མན་ངག་མཛོད་ཀྱི་ལྗགས་འགྲེལ་གདམས་ཟབ་ནོར་བུའི་གཏེར་མཛོད། ༼ཨེ༽

མན་ངག་རིན་པོ་ཆེའི་མཛོད་ཀྱི་ཟབ་གསང་སྙིང་པོའི་དོན་རྡོ་རྗེའི་ལྗགས་ཀྱིས་བཀྲལ་བ་སྐྱུད་བྱང་དུ་བསྡུས་པ་གདམས་ཟབ་ནོར་བུའི་གཏེར་མཛོད་ཅེས་བྱ་བ་བཞུགས་སོ།། ༼ཨེ༽

རྒྱ་གར་སྐད་དུ། ཨུ་པ་དེ་ཤ་རཏྣ་ཀོ་ཥ་ནཱ་མ། བོད་སྐད་དུ། མན་ངག་རིན་པོ་ཆེའི་མཛོད་ཅེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཐུགས་རྗེ་མཆོག་གི་ཡེ་ཤེས་གྲུ་ཆེན་གྱིས། །སྲིད་གསུམ་རྒྱ་མཚོའི་ཕ་རོལ་ཕྱིན་གྱུར་ཅིང༌། །དེད་དཔོན་ཡིད་བཞིན་ས་མཐོར་རབ་གཤེགས་པའི། །རྒྱལ་བ་སྲས་བཅས་རྣམས་ལ་ཕྱག་འཚལ་ལོ། །སྐལ་བཟང་རབ་མཆོག་ཐར་པ་འདོད་རྣམས་ལ། །མདོ་རྒྱུད་མན་ངག་སྙིང་པོའི་བཅུད་བསྡུས་ཏེ། །ཡང་ཟབ་གནད་རྣམས་མ་ལུས་བསྟན་པ་ནི། །དྲུག་ཚན་དྲུག་གིས་བཤད་ཀྱིས་གུས་པས་ཉོན། །དེ་ལ་ཐོག་མར་འཇུག་པའི་ཆོས་དྲུག་ནི། །ལམ་གྱི་གཞི་རྟེན་བསླབ་གསུམ་བསྲུང་བ་དང༌། །སྣ་ཚོགས་ཐོས་བསམ་ཕྱོགས་མེད་བྱ་བ་དང༌། །སྒོ་གསུམ་ཞི་ཞིང་རང་རྒྱུད་གདུལ་བ་དང༌། །སྡིག་ལ་འཛེམ་ཞིང་དགེ་བ་སྤེལ་བ་དང༌། །ངོ་ཚ་ཁྲེལ་ཡོད་དད་པ་བསྐྱེད་པ་དང༌། །དགེ་བའི་བཤེས་དང་དགེ་གྲོགས་བསྟེན་པ་སྟེ། །དང་པོའི་ལས་ཅན་རྣམས་ལ་ཤིན་ཏུ་གཅེས། །དེ་ནས་གཅིག་པུ་དབེན་པར་གནས་འདོད་ན། །སྟ་གོན་བྱ་བའི་ཆོས་དྲུག་གཅེས་པ་སྟེ། །བླ་མ་དང་བྲལ་རང་རྐྱ་ཐུབ་པ་དང༌། །ཐེ་ཚོམ་གེགས་སེལ་དྲི་རྒྱུ་མེད་པ་དང༌། །ལུས་ལ་ནད་གདོན་བར་ཆད་མེད་པ་དང༌། །མི་ཆོས་ཁྱུ་ནས་ལེགས་པར་བུད་པ་དང༌། །དོན་གཉིས་བསྒྲུབ་པའི་གདམས་པ་ཚང་བ་དང༌། །ལྟ་བའི་དགོངས་པ་བློ་ཐག་ཆོད་པའོ། །དེ་ནས་དགོན་པ་བསྟེན་པའི་ཆོས་དྲུག་ནི། །ས་ཕྱོགས་དབེན་ཞིང་མཚན་ཉིད་ཚང་བ་དང༌། །གྲུབ་ཐོབ་གོང་མས་ཞབས་ཀྱིས་བཅགས་པ་དང༌། །ཉམས་གྲིབ་མེད་པས་དམ་ཅན་འདུ་བ་དང༌། །རྣམ་གཡེང་འདུ་འཛིའི་རྐྱེན་རྣམས་མེད་པ་དང༌། །མཐུན་རྐྱེན་ཡོ་བྱད་བསྒྲུབ་པར་སླ་བ་དང༌། །མི་དང་མི་མིན་འཚེ་བ་མེད་པའོ། །དེ་ནས་མཐུན་རྐྱེན་བསྒྲུབ་པའི་རྫས་དྲུག་ནི། །བཟའ་བཏུང་འཚོ་བ་མཐའ་གཉིས་མ་ལྷུང་དང༌། །དགོས་པའི་མཆོད་རྫས་བསྒྲུབ་རྫས་ཚོགས་པ་དང༌། །ཟབ་མོའི་གདམས་ངག་དཔེ་ཆ་ཚང་བ་དང༌། །བར་ཆད་བཟློག་པའི་རྟེན་འབྲེལ་མཐུན་རྫས་དང༌། །གང་དགོས་ཡན་ལག་ཚགས་སུ་ཚུད་པ་དང༌། །ནོར་རྫས་མང་པོའི་སྐྱེད་འབྲེལ་མེད་པའོ། །དེ་ནས་གྲོགས་མཆོག་མཐུན་པའི་ཆོས་དྲུག་ནི། །རིགས་རྒྱུད་བཟང་ཞིང་ངང་རྒྱུད་དུལ་བ་དང༌། །དད་དང་བརྩོན་འགྲུས་ཤེས་རབ་ཆེ་བ་དང༌། །ཉམས་ལེན་མཐུན་ཞིང་འགྲོགས་ན་བདེ་བ་དང༌། །ང་རྒྱལ་ཆུང་ཞིང་དབང་པོ་དུལ་བ་དང༌། །དམ་ཚིག་གཙང་ཞིང་དག་སྣང་ཆེ་བ་དང༌། །བརྩེ་གདུང་ཆེ་ཞིང་ཟབ་མོའི་གསང་ཐུབ་བསྟེན། །ཉམས་ལེན་མཐར་ཐུག་དམ་པའི་ཆོས་དྲུག་ནི། །རྒྱབ་བརྟེན་ལུང་སྦྱོར་གཏན་ཚིགས་གཏན་ལ་ཕབ། །མན་ངག་གནད་བསྣུན་ས་ལམ་རིམ་པ་རྫོགས། །མཐོ་དམན་ཀུན་འདྲེན་མཐའ་འཛིན་བྲལ་བའོ། །སྒྲུབ་པ་བསྲན་ཚུགས་མཐར་ཕྱིན་ཆོས་དྲུག་ནི། །གསོད་ཀྱང་དམ་པའི་ཆོས་ལས་བློ་མི་ལྡོག །ན་ཡང་ལོག་པར་ལྟ་བ་མི་སྐྱེ་ཞིང༌། །དམ་བཅའ་ངོ་སྲུང་བར་ཆོད་ཀྱིས་མི་ཤིགས༌། །མཉམ་གཞག་མྱོང་བ་རྗེས་ཐོབ་བསྲེ་ནུས་ཤིང༌། །མ་གྲུབ་བར་དུ་བརྩོན་པ་འདོར་མི་བྱེད། །སྤང་གཉེན་ཐུག་ཕྲད་རོ་སྙོམས་ནུས་པའོ། །དེ་ནས་བསམ་པར་བྱེད་པའི་ཆོས་དྲུག་ནི། །ལེ་ལན་ཐམས་ཅད་རང་ལས་བྱུང་བ་དང༌། །སྡུག་བསྔལ་ཐམས་ཅད་སྔོན་གྱི་ལས་ལས་བྱུང༌། །སྔོན་ལས་དེ་ཡང་འཕྲལ་གྱི་རྐྱེན་ལས་བྱུང༌། །རྐྱེན་ངན་རང་གི་ཀུན་རྟོག་གཡོ་ལས་བྱུང༌། །དེ་ཡང་འཁྲུལ་བའི་ཡུལ་ཕྱིར་འབྲངས་ལས་བྱུང༌། །དེ་ཡིས་ཐར་ལམ་སྒྲིབ་པ་བསམ་པའོ། །ཉེས་ཀུན་རང་གིས་བྱས་པའི་ཆོས་དྲུག་ནི། །སྐྱེ་ཤིའི་སྡུག་བསྔལ་རང་ལས་བྱུང་བས་ཏེ། །བཙལ་གྱིས་མ་རྙེད་འཚོལ་བའི་སྡུག་བསྔལ་དང༌། །འཚོ་སྐྱོང་སྡུག་བསྔལ་རང་གི་ཆེད་ཀར་བྱས། །དགྲ་གཉེན་གཉིས་ལ་ཆགས་སྡང་འཛིན་པ་ཡིས། །དགྲ་ཕྲད་གཉེན་བྲལ་སྡུག་བསྔལ་རང་གིས་བྱས༌། །ངན་སོང་གསུམ་གྱི་སྡུག་བསྔལ་ཆེན་པོ་ཡང༌། །གཞན་མིན་རང་གི་ལས་ཀྱིས་བྱས་པའོ། །ཉེས་སྣང་ངན་རྟོག་འཁྲུལ་བའི་ཆོས་དྲུག་ནི། །རང་སེམས་མ་ཐུལ་གནོད་བྱེད་ཟད་མེད་དང༌། །གནོད་བྱེད་སྣང་བ་རང་སྣང་མ་དག་དང༌། །གྲག་སྟོང་སྒྲ་ལ་རང་གར་རྗེས་གཅོད་དང༌། །རང་ཡན་སེམས་ལ་དགག་སྒྲུབ་འཛིན་པ་དང༌། །བདེ་སྡུག་ངེས་མེད་ངེས་པར་འཛིན་པ་དང༌། །ཁོང་ཁྲོ་འཁོན་ངན་རང་རྒྱུད་སྲེག་པའོ། །འཁྲུལ་སྣང་བཟློག་པ་དོན་ཆེན་ཆོས་དྲུག་ནི། །གནོད་ལ་བཟོད་བྱ་སྙིང་རྗེ་བསྐྱེད་པ་དང༌། །འདྲེར་རྟོག་མི་གཟུང་ཕ་མ་ལྟར་ཤེས་དང༌། །འཁྲུལ་བར་ཞེན་ལ་བདེན་མེད་རྩལ་སྦྱོང་དང༌། །འཁྲུལ་རྩ་སེམས་ཀྱི་རྩ་བ་བཅད་པ་དང༌། །གང་སྣང་རྐྱེན་རྣམས་ལམ་དུ་བསྒྱུར་བ་དང༌། །ཐ་མལ་མ་ཡེངས་གཉེན་པོ་བསྟེན་པའོ། །འཁོར་བའི་རང་རྒྱུད་ཉེན་པའི་ཆོས་དྲུག་ནི། །ལུས་སེམས་སྡུག་བསྔལ་མ་བྲལ་བདེ་བ་མེད། །ཚེ་འདིའི་སྡུག་བསྔལ་བཙལ་བས་འབྲལ་དུས་མེད། །རང་ལུས་དབང་མ་ཐོབ་པས་བདེ་དོན་མེད། །དར་ལ་སྙུགས་རིང་བདེ་བའི་གོ་སྐབས་མེད། །ལས་མ་ཟད་པར་འཁོར་བའི་སྡུག་བསྔལ་ལོ། །ཅིས་ཀྱང་དགོས་མེད་བསམ་པའི་ཆོས་དྲུག་ནི། །ལམ་སྣ་མ་ཟིན་གང་བྱས་དགོས་པ་མེད། །དགེ་བ་མ་བསྒྲུབས་ཅིས་ཀྱང་དགོས་པ་མེད། །ཆོས་ལ་མ་སྤྱད་ཚེ་རིང་དགོས་པ་མེད། །ཆོས་མིན་གཞན་གྱིས་ཕན་བཏགས་དགོས་པ་མེད༌། །ཚོགས་གཉིས་མ་བསགས་ཡོ་བྱད་དགོས་པ་མེད། །བྱང་ཆུབ་མ་བསྒྲུབས་ཅིས་ཀྱང་དགོས་མེད་བསམ། །ཐར་ལམ་དེད་དཔོན་བླ་མའི་ཆོས་དྲུག་ནི། །མུན་པར་འཁྱམས་ལ་ཡེ་ཤེས་སྒྲོན་མེ་སྦོར། །གཡང་སར་འཁྱམས་རྣམས་ཡང་དག་ལམ་ལ་འཛུད། །ཆུ་བོས་ཁྱེར་བ་བདེ་ཆེན་གཟིངས་ཀྱིས་འཛིན། །བཙོན་རར་ཚུད་རྣམས་རྣམ་གྲོལ་ས་ལ་འདྲེན། །སྡུག་བསྔལ་འདམ་བྱིང་ཐར་པའི་སྐམ་སར་འདོན། །གཟུང་འཛིན་བཅིངས་རྣམས་ཡེ་ཤེས་རལ་གྲིས་གཅོད། །དེ་ཕྱིར་བླ་མ་སངས་རྒྱས་ཉིད་དུ་བསམ། །འདུས་བྱས་མི་རྟག་འཇིག་པའི་ཆོས་དྲུག་ནི། །རྒྱུ་རྐྱེན་འདུས་ཕྱིར་འཇིག་པ་ཉིད་དང་ནི། །སྔར་སྐྱེས་མ་ལུས་ཤི་བས་འཇིག་ངེས་དང༌། །སྣོད་བཅུད་མི་རྟག་འགྱུར་བས་འཇིག་ངེས་དང༌། །ཚེ་ལ་ངེས་མེད་འཆི་བས་འཇིག་པ་དང༌། །ཉིན་མཚན་སྐད་ཅིག་འགྲོ་བས་འཇིག་པ་དང༌། །སྐྱེས་མཐའ་འཆི་བར་ངེས་ཕྱིར་འཇིག་པ་བསམ། །དེ་ནས་ཆོས་ལ་སྦྱར་བའི་ཕན་ཡོན་དྲུག །མོས་དང་རྣ་བར་ཐོས་དང་ཡི་རང་དང༌། །བསྟོད་དང་ཞུགས་དང་ཅུང་ཟད་སྤྱད་རྣམས་ཀྱང༌། །འཁོར་བ་མཐའ་ཅན་ཐར་བའི་ས་བོན་བསྐྲུན། །ཚུལ་བཞིན་སྤྱད་པའི་ཕན་ཡོན་རྣམ་པ་དྲུག །ཀུན་གྱིས་བཀུར་དང་བསྟོད་དང་ལྷས་བསྲུང་དང༌། །ཚེ་འདིར་བདེ་མང་ཤི་འཕོས་མཐོ་རིས་འགྲོ། །མཐར་ཐུག་རྫོགས་པའི་བྱང་ཆུབ་འགྲུབ་པའོ། །ཆོས་དང་མི་ལྡན་ཉེས་པ་རྣམ་དྲུག་ནི། །མ་རིག་གིས་བསྒྲིབས་རྒན་མོ་ལོང་མ་འདྲ། །སྲིད་པར་སླུ་མཁས་སྨད་འཚོང་བུ་མོ་འདྲ། །དོན་མེད་གཡེང་བས་ཚོང་འདུས་ལྟད་མོ་འདྲ། །སྣང་བ་འབྲིད་མཁས་བུ་ཆུང་འཚོ་བ་འདྲ། །རིག་པ་ཅོལ་ཆུང་བྱིས་པའི་རྩེད་མོ་འདྲ། །འཁྲུལ་སྣང་བཅད་དཀའ་ཉ་མོ་རྒྱས་ཟིན་འདྲ། །དོན་ཆུང་ལས་ལ་མི་ཚེ་ཟད་པར་བྱེད། །ཆོས་ལས་ཉམས་པའི་ཉེས་པ་རྣམ་དྲུག་ནི། །རང་བས་དམན་པས་བརྙས་པར་འགྱུར་བ་དང༌། །ལྷ་མིའི་གནས་སུ་གཏམ་ངན་གྲགས་པ་དང༌། །མི་གཙང་སྣོད་བཞིན་དམ་པས་སྤང་བ་དང༌། །བསྲུང་བའི་ལྷས་འདོར་བར་ཆད་མང་བ་དང༌། །བསམ་པ་མི་འགྲུབ་བསོད་ནམས་དཔལ་ཉམས་དང༌། །ཕྱི་མར་ངན་སོང་སྡུག་བསྔལ་མྱོང་བའོ། །ཕྱི་དུས་རེ་བའི་ཉེས་པ་རྣམ་དྲུག་ནི། །དལ་འབྱོར་ཐོབ་དུས་ཆོས་ལམ་མ་བསྒྲུབས་ན། །ཡེང་མའི་ལམ་ལ་མི་ཚེ་ཟད་པ་དང༌། །འཆི་བ་ངེས་མེད་ཐོག་རྫིས་འོང་བ་དང༌། །ཤི་ནས་འཁོར་བ་ངན་སོང་ལྟུང་བ་དང༌། །སྡུག་བསྔལ་དྲག་པོས་ལུས་སེམས་གདུངས་པ་དང༌། །འགྱོད་པ་དྲན་ཡང་ཤིན་ཏུ་མནར་བ་དང༌། །ཐར་བའི་དུས་མེད་ཡུན་རིང་གནས་པའོ། །འཁོར་བའི་གནས་ལ་འཇིགས་པའི་ཆོས་དྲུག་ནི། །མི་རྣམས་སྡུག་བསྔལ་བསམས་ན་ཡིད་རེ་སྐྱོ། །ལྷ་མིན་སྡུག་བསྔལ་བསམས་ན་སྐྱི་རེ་གཡའ། །ལྷ་ཡི་སྡུག་བསྔལ་བསམས་ན་གཡང་རེ་ཟ། །བྱོལ་སོང་སྡུག་བསྔལ་བསམས་ན་ངུ་རེ་བྲོ། །ཡི་དྭགས་སྡུག་བསྔལ་བསམས་ན་སྐྱི་རེ་བུང༌། །དམྱལ་བའི་སྡུག་བསྔལ་བསམས་ན་སྙིང་རེ་འདར། །དེ་བས་འགྲོ་དྲུག་གནས་ནས་འབྲོས་རེ་རན། །རན་པ་བས་ཀྱང་ཕྱིས་པར་གྱུར་པ་ཙམ། །དེ་ལས་ཐར་བར་བྱེད་པའི་ཆོས་དྲུག་ནི། །རྟག་ལྟ་ཡུལ་ཕྱུང་ཕྱི་དུས་ལེ་ལོ་བོར། །སང་ཕོད་བཅས་ཞོག་ཅི་ཡོད་ཆོས་ལ་ཐོང༌། །ཐ་མལ་སྤྱོད་བོར་བསྟན་པའི་སྲོལ་དུ་ཞུགས། །སྟོབས་བཞིའི་གཉེན་པོས་ལས་ངན་སྡིག་པ་སྦྱོངས། །ཆོས་སྤྱོད་རྣམ་བཅུས་ཚོགས་གཉིས་ཅི་ནུས་སོགས། །སྦྱོར་དངོས་རྗེས་གསུམ་ཆོས་ཀྱི་ལམ་དུ་ཆུག །དེ་ཡིས་འཁོར་བའི་གནས་ལས་མྱུར་དུ་ཐར། །ཆོས་ཀྱི་བར་གཅོད་ནོར་པ་རྣམ་དྲུག་ནི། །ཆེ་བཙན་དྲེགས་པས་གཡེངས་པའི་ཆེན་པོ་ནོར། །མི་ཆོས་བྱ་བ་བསྒྲུབ་པའི་བཙུན་པ་ནོར། །ཐ་སྙད་མི་ཚེ་འདའ་བའི་སྟོན་པ་ནོར། །དུག་ལྔས་རང་རྒྱུད་བསྲེག་པའི་སྔགས་པ་ནོར། །བླུན་རྨོངས་ལོག་འཚོ་བསྒྲུབ་པའི་སྒོམ་ཆེན་ནོར། །བློ་ལྟོས་འཁྲུལ་སྣང་འཆའ་བའི་སྐྱེ་བོ་ནོར། །ནོར་པ་སྤངས་ནས་ཆོས་ལ་བརྩོན་པ་གཅེས། །མ་ནོར་ཕན་པར་བྱེད་པའི་ཆོས་དྲུག་ནི། །བརྩེ་བའི་གདམས་ངག་བླ་མའི་གསུང་ལ་ཉོན། །ཡིད་ཆེས་གཏད་ས་རྒྱལ་བའི་བཀའ་ལུང་ལྟོས། །ཉིན་མཚན་ཐུན་མཚམས་དགེ་སྡིག་བསྔོ་བགྲང་གྱིས། །ཕྱི་མ་གར་འགྲོ་རྒྱུ་འབྲས་རྟེན་འབྲེལ་སོམས། །ལུས་དང་ལོངས་སྤྱོད་གཅེས་འཛིན་ཆགས་ཞེན་སྤོངས། །རྒྱུད་ལུང་མན་ངག་སེམས་ཀྱི་སྟེང་དུ་ཕོབ། །དེ་ལྟར་བྱས་ན་མྱུར་དུ་སངས་རྒྱས་འགྲུབ། །ཚུལ་བཞིན་ལེགས་པར་བལྟ་བའི་ཆོས་དྲུག་ནི། །འཇིག་རྟེན་བྱ་བས་ཕན་པ་འདུག་གམ་ལྟོས། །བསགས་པའི་ནོར་རྫས་བཞག་ནས་སོང་བ་ལྟོས། །ཕན་བཏགས་ལན་དུ་གནོད་པ་སྐྱེལ་ལ་ལྟོས། །མང་པོའི་ནང་ནས་གཅིག་པུར་སོང་བ་ལྟོས། །སོ་ནམ་གསོག་བྲུན་རང་ཤི་རང་དབང་ལྟོས། །ཆེ་བཙན་སྙན་གྲགས་བོར་ནས་སོང་བ་ལྟོས། །དེ་ལྟར་བལྟས་ནས་རང་ལ་ནང་དུ་སྦྱོར། །ཡང་དག་དོན་ཆེན་འགྱོད་མེད་རྣམ་དྲུག་ནི། །ཆོས་ཕྱིར་དཀའ་སྤྱད་ཤི་ཡང་འགྱོད་པ་མེད། །དམན་པའི་ས་བཟུང་ཁ་ཉེན་འགྱོད་པ་མེད། །ཕ་ཡུལ་རྒྱབ་སྐྱུར་མདོ་ཆུང་འགྱོད་པ་མེད། །ཆོས་ཕྱིར་ནོར་བཏང་ལྟོགས་ཀྱང་འགྱོད་པ་མེད། །སྡིག་སྤངས་ངན་སོང་སོང་ཡང་འགྱོད་པ་མེད། །སྣོད་ངན་ཆོས་དང་རིང་བ་རྣམ་དྲུག་ནི། །ཕག་བཞིན་ཅི་རྙེད་ཟ་བས་བསྒྲུབ་མི་ནུས། །རང་མཐོང་རྨ་བྱ་འདྲ་བས་འགྲོགས་མི་ཤེས། །ཆིག་ཚུགས་ཕ་བོང་འདྲ་བས་སྐབས་མི་ཕྱེད། །ཀུན་འཛུགས་བཟེ་མ་འདྲ་བས་དམ་མི་ཐུབ། །སྦྲུལ་བཞིན་གདུག་རྩུབ་ཆེ་བས་རྒྱུད་མི་ཐུལ། །སྤྲེལ་བཞིན་སྤྱམ་ལ་འབྱོར་བས་བསྒྲུབ་མི་ཚུགས། །གླང་བཞིན་ཤེས་རབ་བླུན་པས་ཆོས་མི་གོ །དེ་ཕྱིར་འདི་དག་སྤངས་ནས་བསྒྲུབ་པ་གཅེས། །སྣོད་ངན་དབང་དུ་མི་གཏོང་ཆོས་དྲུག་ནི། །ཚེ་འདིར་བློ་འཇུག་བྱུར་ངན་སྒོར་དབྱུང་ཞིང༌། །དགེ་ལ་སྤྲོ་བ་དཔལ་ཡིན་ཕུགས་སུ་ཆུག །ང་རྒྱལ་རང་མཐོང་འདྲེ་ངན་བསྐྲད་བྱ་ཞིང༌། །དམན་པའི་ས་འཛིན་དངོས་གྲུབ་སྔ་ལྟས་བསྟེན། །གཉེན་པོ་མཆོག་འཛིན་བདུད་དཔུང་བོར་བྱ་ཞིང༌། །རྣམ་རྟོག་གྲོགས་འཆར་ལྟས་ངན་གཡང་དུ་ཁུག །དེ་རྣམས་ལྡན་ན་ཆོས་རབ་བཟང་པོའི་སྣོད། །མཐར་ཕྱིན་ཆོས་ཀྱི་བློ་སྣ་རྣམ་དྲུག་ནི། །འཆི་བདག་འཇིགས་བསྐྱེད་གཤེད་མས་བདས་འདྲ་དང༌། །འཁོར་བར་སྐྱོ་བསྐྱེད་ཁྱོ་ངན་ཆུང་མ་འདྲ། །འཁྲུལ་སྣང་ཞེན་ལོག་སྐྱུགས་ནད་ཟས་མཐོང་འདྲ། །མི་ཆོས་ཡིད་བྱུང་མཛའ་བོས་བསླུས་པ་འདྲ། །སོ་ནམ་སྒྱིད་ལུག་སད་ཁུངས་ཞིང་ངན་འདྲ། །ཉེ་འབྲེལ་གདུང་ཆད་དགྲར་ལངས་བུ་ཚ་འདྲ། །དེ་དང་ལྡན་པས་དམ་ཆོས་ཚད་དུ་ཕྱིན། །དེ་དང་མི་ལྡན་འགྲོ་བ་རྣམ་དྲུག་ནི། །ཐོས་པ་བྱས་ཀྱང་ཚིག་གི་རྩོད་པ་མཁན། །བཤད་པ་བྱས་ཀྱང་ཕྲག་དོག་ཁ་སྦྱང་མཁན། །སྒོམ་པ་བྱས་ཀྱང་རྣམ་རྟོག་ཡིད་སྨོན་མཁན། །བསམ་པ་བྱས་ཀྱང་ཟས་ནོར་ཁེ་སྤོགས་མཁན། །གཅིག་པུར་བསྡད་ཀྱང་ཉོན་མོངས་རྣམ་རྟོག་མཁན། །སྲུང་སྡོམ་བྱས་ཀྱང་ཉོན་མོངས་ཁ་གསག་མཁན། །འགྲོ་བ་དྲུག་ལྡན་བརྟགས་ཏེ་རིང་དུ་སྤང༌། །ནང་དུ་རང་ལ་བལྟ་བའི་ཆོས་དྲུག་ནི། །འཁོར་བའི་གནས་དང་འབྲེལ་བ་ཆོད་དམ་བལྟ། །དགྲ་གཉེན་གཉིས་ལ་ཆགས་སྡང་འདུག་གམ་བལྟ། །འགྲོ་དུས་བཟང་པོའི་ནོམ་པ་འདུག་གམ་བལྟ། །བསྒོམ་དུས་གྲུབ་རྟགས་ཚད་དུ་སྐྱོལ་ལམ་བལྟ། །གཞན་དོན་ཤུལ་དུ་དད་པ་ལོག་གམ་བལྟ། །འཆི་དུས་དག་པའི་སྣང་བ་འཆར་རམ་བལྟ། །དེ་ལྟར་བལྟས་ན་འདུན་མ་ལེགས་པའི་རྩེ། །ཆོས་དང་རིང་གྱུར་ཉེས་པ་རྣམ་དྲུག་ནི། །དོན་ཆེན་མི་སྒྲུབ་འཆི་བ་མ་དྲན་ལས། །ཆེ་བཙན་བསྒྲུབ་པ་བསླུ་བར་མ་ཤེས་ལས། །གཉེན་བཤེས་བརྩེ་གདུང་འབྲལ་བར་མ་ཤེས་ལས། །འདོད་ཡོན་སྲེད་པ་ཉེས་མང་མ་ཤེས་ལས། །ནོར་རྫས་གསོག་འཇོག་འཇོག་པར་མ་ཤེས་ལས། །སྒོམ་སྒྲུབ་ལེ་ལོ་མི་རྟག་མ་ཤེས་ལས། །བྱུང་བའི་ཉེས་པ་འདི་ཀུན་སྤང་བར་མཛོད། །རང་རྒྱུད་ཆོས་དང་འདྲེས་པའི་ཆོས་དྲུག་ནི། །ཞེན་པ་རང་ལོག་རོ་གོས་གཡང་སྐྱུར་འདྲ། །སྙིང་རྗེས་རྒྱུད་བརླན་བུ་གཅིག་མ་དང་འདྲ། །ཡོན་ཏན་ཤུགས་སྐྱེས་དབྱར་ཀའི་ས་གཞི་འདྲ། །བརྩོན་པ་རྒྱུན་རིང་རལ་གྲིའི་འཁོར་ལོ་འདྲ། །འཁྲུལ་སྣང་རང་གྲོལ་སྦྲུལ་གྱི་མདུད་པ་འདྲ། །གནས་ལུགས་ངང་ཕྱིན་དེད་དཔོན་ཡུལ་སླེབས་འདྲ། །དེ་འདྲའི་ཚད་ལྡན་སྐྱེས་མཆོག་གོང་མ་ལགས། །ཆོས་དང་མི་མཐུན་འཁྲུལ་བའི་ཆོས་དྲུག་ནི། །འཁོར་བར་ཞེན་པའི་བློ་ནི་འབྲལ་རེ་དཀའ། །ས་ཟིན་མེད་པའི་རིག་པ་བསླུ་རེ་སླ། །ཚོགས་དྲུག་ཡུལ་གྱི་འཁྲུལ་བ་འབྲིད་རེ་མཁས། །དོན་མེད་འཁོར་བའི་བྱ་བ་འཕྲོ་རེ་གཤིན། །ཉིན་མཚན་གཉིས་ཀྱིས་ཚེ་འཛད་འགྲོ་རེ་མགྱོགས། །དོན་ཆུང་མི་ཚེ་སྐྱེལ་བ་གྲངས་རེ་མང༌། །འདི་དག་བསམས་ནས་དམ་པའི་ཆོས་མཛོད་ཀྱེ། །ཡང་དག་དོན་ལ་བསྐུལ་བའི་ཆོས་དྲུག་ནི། །སླུ་ངེས་ཆགས་སྡང་གཉིས་པོས་ནམ་སླུའམ། །འབྲལ་ངེས་ལུས་སེམས་འདི་གཉིས་ནམ་འབྲལ་ལམ། །ཁྱེར་ངེས་འབྱུང་བཞིའི་གཡར་པོ་ནམ་ཁྱེར་རམ། །ནུབ་ངེས་ཚེ་འདིའི་སྣང་བ་ནམ་ནུབ་བམ། །འཇོག་ངེས་སྒྱུ་མའི་ནོར་རྫས་ནམ་འཇོག་གམ། །ཡོང་ངེས་འཆི་བདག་ཐོག་རྫིས་ནམ་ཡོང་ངམ། །སྙམ་དུ་སྙིང་ནས་ཉིན་མཚན་བསམ་པར་བྱ། །རང་རྒྱུད་ཆོས་དང་བསྲེ་བའི་ཆོས་དྲུག་ནི། །འདོད་པ་ཟད་འདོད་ཆོག་ཤེས་སེམས་ལ་བསྟེན། །དགྲ་སྡང་ཟད་འདོད་ཁོང་ཁྲོ་ནང་དུ་ཐུལ། །གཞན་དོན་འགྲུབ་འདོད་སེམས་བསྐྱེད་རྒྱུད་ལ་སྦྱོར། །གཞན་སྣང་འདུལ་འདོད་བྱིན་རླབས་ནང་དུ་སྦོར། །ཞིང་ཁམས་སྦྱོང་འདོད་རང་རིག་འོད་གསལ་སྦྱོངས། །སྡུག་བསྔལ་ཞི་འདོད་བདེ་ཆེན་ནང་དུ་སྦོར། །ནང་གི་རྟེན་འབྲེལ་ཕྱི་རུ་འཆར་བ་ཡིན། །དལ་འབྱོར་ཐོབ་ཀྱང་སྙིང་མེད་ཆོས་དྲུག་ནི། །མ་རིག་གཉེན་པོ་ཐོས་བསམ་འདོར་བ་དང། །བྱིན་རླབས་རྩ་བ་བླ་མ་སྤོང་བ་དང༌། །དངོས་གྲུབ་འབྱུང་གནས་ཡི་དམ་སྤོང་བ་དང༌། །བསྒྲུབ་བྱའི་རྩ་བ་བསམ་གཏན་ཕྱི་བཤོལ་དང༌། །སྡིག་སྒྲིབ་ཆགས་ཤིང་ནད་གདོན་སྤོང་བློ་དང༌། །གཞན་སྣང་དད་བྱེད་སྤྱོད་ལམ་འགལ་བ་རྣམས། །སྙིང་མེད་མི་ལ་ཁབ་ལེན་ལྕགས་བཞིན་འདུ། །གང་ཟག་རྣམས་ཀྱི་སྐྱོན་དྲུག་དོར་བ་ནི། །ཞེ་བཅད་མེད་པའི་བྱ་མང་མགོ་མི་ཐོན། །གཉེན་བཤེས་བརྩེ་གདུང་ཆགས་སྡང་སྒྲོག་མི་ཐར། །ཟས་ལ་རྔམ་པ་ལྟོ་གོས་ཁོལ་པོར་འཆོར། །ཁ་ལྟའི་རྦད་ཁམ་སྙིང་པོའི་དོན་ལ་འདྲེད། །འདུན་པ་སྐྱེ་དུས་མ་འབད་འགྲུབ་དུས་མེད། །ད་ལྟ་མ་འདྲིས་བར་དོར་ལས་སྟོབས་གཅོག །དེ་བས་སྐྱོན་དྲུག་བརྟགས་ཏེ་སྤང་བ་གཅེས། །བལྟ་ཐབས་དྲུག་གིས་རང་རྒྱུད་གདུལ་བ་ནི། །ཡུལ་ལ་བདེན་འཛིན་དུས་བཞིའི་འགྱུར་ལྡོག་ལྟོས། །ཚེ་ལ་རྟག་འཛིན་རྩྭ་ཁའི་ཟིལ་བ་ལྟོས། །རྒྱུ་འབྲས་རྨོངས་ན་ས་བོན་མྱུ་གུ་ལྟོས། །སྣང་སེམས་མ་ཤེས་ཉལ་བའི་རྨི་ལམ་ལྟོས། །རོ་གཅིག་མ་ཤེས་བུ་རམ་གཟུགས་བརྙན་ལྟོས། །གཉིས་མེད་མ་ཤེས་ཆུ་དང་ཆབ་རོམ་ལྟོས། །དེ་ལྟར་བལྟས་པས་སོ་སོའི་གཉེན་པོ་ཆེ། །འདུ་ཤེས་དྲུག་གིས་ལམ་དུ་བསླང་བ་ནི། །བླ་མ་མཆོག་ལ་སྨན་པའི་འདུ་ཤེས་དང༌། །མཆེད་གྲོགས་ནད་གཡོག་ཉམས་ལེན་ནད་གསོ་དང༌། །རང་ལ་ནད་པ་ཆོས་ལ་སྨན་དང་ནི། །འབྲས་བུ་ནད་སོས་ལྟ་བུར་བསམ་བྱ་ཡིས། །ཕྱིན་ཅི་ལོག་ཏུ་སེམས་པ་དོར་བར་བྱ། །ལེགས་པར་སྤྱད་ལས་ངེས་པ་རྣམ་དྲུག་ནི། །བླ་མ་བསྟེན་པས་བྱིན་རླབས་འོང་བར་ངེས། །ཡི་དམ་བསྒོམས་པས་དངོས་གྲུབ་འོང་བར་ངེས། །དམ་ཚིག་བསྲུངས་པས་དམ་ཅན་འདུ་བར་ངེས། །ཉམས་ལེན་བརྩོན་པས་ཉམས་རྟོགས་འཆར་བར་ངེས། །གནས་ལུགས་བསྐྱངས་པས་སྒྲིབ་གཉིས་འབྱང་བར་ངེས། །ཡེང་མེད་རྩལ་སྦྱོངས་ཡོན་ཏན་འཆར་བར་ངེས། །རང་བཞིན་ཤེས་པས་སྐྲག་པ་རྣམ་དྲུག་ནི། །འཇིག་རྟེན་བྱ་བ་གླང་ཆེན་འདམ་ཚུད་དང༌། །གཉེན་འབྲེལ་བརྩེ་གདུང་བཙོན་རའི་སྲུང་མ་དང༌། །ཚེ་འདིའི་ལོངས་སྤྱོད་ཁྱི་རྒན་རུས་འཆའ་དང༌། །མ་རིག་སྡིག་སྤྱོད་གཡང་ཁའི་དམུས་ལོང་དང༌། །དུག་ལྔའི་ཉོན་མོངས་དུག་སྦྲུལ་གཙེས་པ་དང༌། །ཡུལ་དྲུག་ཆགས་པ་སྦྲང་བུ་རྩིས་ཟིན་ལྟར། །སྐྲག་པ་བསྐྱེད་ནས་རིང་དུ་དོར་བ་གཅེས། །འཇིག་རྟེན་མི་ཆོས་ཉེས་པ་རྣམ་དྲུག་ནི། །ཡུལ་མཁར་འཛིན་པ་དམྱལ་བའི་ལྕགས་ཁང་དང༌། །བུ་དང་ཆུང་མ་རལ་གྲི་ལོ་མའི་ཚལ། །རྒྱན་དང་གོས་བཟང་མེ་ལྕེ་འབར་བ་འདྲ། །བཟའ་བཏུང་བསྲེགས་པ་ལྕགས་ཀྱི་ཐོ་ལུམ་དང། །བྲན་གཡོག་ལས་མི་དམྱལ་བའི་སྲུང་མ་དང༌། །ཁྲོ་དང་འཐབ་རྩོད་མདག་མེའི་སེར་བ་ལྟར། །དགེ་ལེགས་འཇོམས་པའི་གནས་སུ་མཁྱེན་པར་མཛོད། །འདོད་ལ་ཉེས་པར་ཤེས་པའི་ཆོས་དྲུག་ནི། །འདོད་པས་ཚེ་འདིར་ལུས་སེམས་གདུང་བ་དང༌། །ཕྱི་མར་ངན་འགྲོ་གཏན་དུ་འཁོར་བར་འཁྱམ། །ཀུན་དང་རྩོད་བཅས་མི་དགེ་ངང་གིས་འཕེལ། །དགེ་བ་འགྲིབ་ཕྱིར་དམ་པ་རྣམས་ཀྱིས་སྨད། །ཆགས་པས་འཆིང་བའི་སྐྱོན་དྲུག་བསྟན་པ་ནི། །ལུས་ནི་མི་གཙང་ཀུན་གྱི་སྣོད་དང་ནི། །རྩ་རྒྱུས་རུས་པ་འབྲེལ་བའི་དྲ་བ་དང༌། །རྣག་དང་ཆུ་སེར་ངན་སྐྱུགས་གཤང་གཅིའི་རྫིང༌། །བུ་ག་དགུ་ཡི་ལམ་དང་བཅས་པ་དང༌། །སྣོད་དྲུག་དོན་ལྔ་སྲིན་བུའི་གྲོང་ཁྱེར་དང༌། །གདོས་བཅས་ནད་ཀུན་འབྱུང་བའི་རང་བཞིན་དུ། །མི་ཤེས་ལུས་ལ་ཆགས་པས་བསླུ་བར་འགྱུར། །དོན་མེད་སྙིང་པོ་མེད་པའི་ཆོས་དྲུག་ནི། །སྣ་ཚོགས་ཡུལ་དུ་སྣང་བའི་ཆོས་རྣམས་ཀུན། །མི་རྟག་མྱུར་དུ་འཇིག་པས་ཆུ་བུར་འདྲ། །གང་ཡང་སྙིང་པོ་མེད་པས་ཆུ་ཤིང་འདྲ། །འཁྲུལ་བས་བྱིས་པ་བསླུས་པས་སྨིག་རྒྱུ་འདྲ། །མེད་བཞིན་སྣ་ཚོགས་སྣང་བས་སྒྱུ་མ་འདྲ། །བག་ཆགས་དབང་གིས་སྣང་བས་རྨི་ལམ་འདྲ། །རིང་དུ་མི་གནས་འགྱུར་བས་གློག་དང་འདྲ། །དེ་ལྟར་ཤེས་རྣམས་སྲིད་པའི་ཕ་རོལ་འགྲོ། །ཆོས་བྱེད་ཐ་མ་འཇུག་པའི་ཚུལ་དྲུག་ནི། །འཁོར་བའི་སྡུག་བསྔལ་མཐོང་བས་ལམ་སྣ་འཚོལ། །ཅི་བྱས་དོན་མེད་གོ་བས་ཁེ་གྲགས་ཆུང༌། །ང་རྒྱལ་འདོད་བློ་ཆུང་བས་དམན་ས་འཛིན། །དད་བརྩོན་གྲོགས་དང་འགྲོགས་པས་ཉམས་ལེན་བརྩོན། །ཐེག་ཆེན་རིགས་སྐྱེས་དམན་པས་བློ་མི་ཁེངས། །ཤེས་བྱའི་གནས་ལ་དད་པས་གང་ལའང་མོས། །དམ་པ་རྣམས་ཀྱི་འཇུག་སྒོ་དང་པོ་ཡིན། །ཆོས་བྱེད་འབྲིང་གི་དགོས་པའི་ཆོས་དྲུག་ནི། །སོ་ནམ་རྨོ་རྐོ་ཞིང་ཆུའི་མུ་མི་བསྲུང༌། །ལང་ཚོ་ཁེ་སྤོགས་ཚོང་གི་ཁུར་མི་ཁུར། །ངོ་བསྲུང་བང་ཆེན་གཉེན་བཤེས་སེམས་མི་འཛིན། །ཞེ་སྡང་ཕྱོགས་རིས་འཐབ་རྩོད་བྱ་བ་དོར། །གསོག་བྲུན་ཕྱི་རྩིས་གནས་ཀྱི་མཁར་ལེན་སྤང༌། །འདུ་འཛིའི་བདུད་ལས་མི་ཆེན་བཤེས་འདྲིས་མེད། །ཆོས་མཛད་རྣམས་ཀྱི་འཇུག་སྡོམ་གཉིས་པའོ། །རྣལ་འབྱོར་རབ་ཀྱི་དུར་ཁྲོད་ཆོས་དྲུག་ནི། །ཐ་མལ་འགོ་བས་མི་དང་མི་འགྲོགས་ཤིང༌། །སྒོ་གསུམ་སྤྱོད་སྦས་ཅི་བྱེད་མིས་མི་མཐོང༌། །ཟས་གོས་མི་གཉེར་རོ་ཟས་རོ་གོས་འཚོ། །ཉམ་ང་མེད་པས་མཁའ་འགྲོའི་སྤྱོད་པ་བྱེད། །གསང་སྤྱོད་ཉམས་སྐྱོང་ཐ་མལ་སྤྱོད་པ་སྤང༌། །ཆོས་ཉིད་ངང་གནས་བདེ་ཆེན་རྟོགས་པ་སྟེ། །ཐར་ལམ་བགྲོད་རྣམས་འཇུག་སྲོལ་གསུམ་པར་བཞེད། །ཡང་རབ་ཕྱོགས་བྲལ་རྣལ་འབྱོར་ཆོས་དྲུག་ནི། །རང་ཡུལ་མི་ཡུལ་གང་ལའང་མ་ཆགས་དང༌། །རྟག་དང་ཆད་པའི་མཐའ་གཉིས་ལས་གྲོལ་དང༌། །ཉེ་རིང་གང་གིས་ངོ་མི་ཤེས་པ་དང༌། །ས་གཅིག་མི་ཞེན་སྤྲིན་ལྟར་འཕྱོ་བ་དང༌། །ཚོགས་དྲུག་ཡུལ་སྣང་གྲོགས་སུ་འཆར་བ་དང༌། །བཟང་ངན་གང་ལའང་ངོས་གཟུང་མེད་པ་སྟེ། །རྣམ་གྲོལ་ལམ་བཟང་འཇུག་སྒོ་བཞི་པ་ཡིན། །བསྒྲུབ་པར་འདོད་པས་དོགས་པ་དྲུག་སྤང་སྟེ། །མ་མགུ་དོགས་དང་མཐུན་འཇུག་ངོ་སྲུང་སྤང༌། །མེད་ཀྱིས་དོགས་ནས་ནོར་དང་རྫས་མི་བསོགས། །སྡུག་གིས་དོགས་ནས་ཕྱི་རྩིས་བྱ་བ་སྤང༌། །དམས་ཀྱིས་དོགས་ནས་མཐོན་པོའི་ས་མི་སྒྲུབ། །ཉེས་ཀྱིས་དོགས་ནས་མི་ཆོས་འདུན་མ་དོར། །མཐོས་ཀྱིས་དོགས་ནས་གཞན་གྱི་སེམས་མི་དཀྲུགས། །ཉམས་ལེན་གནད་ཀྱི་མཚམས་དྲུག་བཅད་པ་ནི། །ཆགས་སྡང་བྲལ་བས་ཕྱི་ཡི་མཚམས་བཅད་དང༌། །སོག་འཇོག་མེད་པས་ནང་གི་མཚམས་བཅད་དང༌། །གཟུང་འཛིན་བྲལ་བས་གསང་བའི་མཚམས་བཅད་དང༌། །བཟང་པོར་རེ་བའི་ཡར་གྱི་མཚམས་བཅད་དང༌། །ངན་པར་དོགས་པའི་མར་གྱི་མཚམས་བཅད་དང༌། །བྱ་བྱེད་དམིགས་འཛིན་བར་གྱི་མཚམས་བཅད་དང༌། །འདི་དྲུག་ལྡན་ན་བར་ཆད་འབྱུང་མི་སྲིད། །སངས་རྒྱས་བསྒྲུབ་པའི་རག་ལས་ཆོས་དྲུག་ནི། །བསྒྲུབ་པའི་རྟེན་མཆོག་དལ་འབྱོར་རག་ལས་དང༌། །མ་བསྒྲུབས་མི་གྲོལ་སྒྲུབ་ལ་རག་ལས་དང༌། །སྒྲུབ་པ་ལེགས་པར་ཤེས་ལ་རག་ལས་དང༌། །ཤེས་པ་དང་པོའི་ཐོས་ལ་རག་ལས་དང༌། །ཐོས་ཏེ་གནད་འགྲོ་བསམ་ལ་རག་ལས་དང༌། །ཐམས་ཅད་དགེ་བའི་བཤེས་ལ་རག་ལས་སོ། །བཟང་པོའི་མཚན་ཉིད་རྣམ་པ་དྲུག་ལྡན་ནི། །བསོད་ནམས་བསགས་པས་རིགས་བཟང་ངང་རྒྱུད་དུལ། །མཁྱེན་རབ་རྒྱས་པས་ཤེས་བྱའི་དོན་ལ་མཁས། །ཤེས་རབ་འཕགས་པས་ཆོས་ཉིད་ཕྱོགས་བྲལ་རྟོགས། །ཉམས་ལེན་བརྩོན་པས་ཉམས་རྟོགས་གྲུབ་རྟགས་ཐོན། །ཐུགས་རྗེ་ཐབས་མཁས་གཞན་དོན་སྐྱོ་ངལ་མེད། །གདམས་པའི་གནད་ལྡན་ལམ་སྣ་ཁྲིད་པར་ནུས། །འགྲོ་མཆོག་སྐྱེ་བོ་དམ་པའི་ཚུལ་འདི་དགེ། །སློབ་མ་དམ་པས་བསྟེན་པའི་ཆོས་དྲུག་ནི། །སྲིད་པརསྐྱོ་ཞིང་འཁྲུལ་སྣང་ཡིད་འབྱུང་དང༌། །ཆོས་མིན་བྱ་བ་དགོས་མེད་བཞག་པ་དང༌། །འདུ་འཛི་རྣམ་གཡེང་དགྲ་ལྟར་སྤང་བ་དང༌། །ཁེ་གྲགས་ལོ་འདོད་རེ་ལྟོས་མེད་པ་དང༌། །ཉེ་འབྲེལ་ངོ་སྲུང་འབྲེལ་ཐག་ཆོད་པ་དང༌། །དགྲ་གཉེན་ཉེ་རིང་ཆགས་སྡང་བོར་བ་དང༌། །འཇིག་རྟེན་བློས་བཏང་དམ་ཆོས་བསྒྲུབ་པའོ། །སྣ་ཐག་གཞན་ལམ་ཤོར་ཆོས་དྲུག་ནི། །བྲན་ཁོལ་མ་སྐྱེས་དབང་མེད་མི་འབབ་དང༌། །ཁྱིམ་ཐབ་མ་བྱས་གཉིས་འདུས་འཆིང་རེས་མེད། །ཆེན་པོར་མ་སྐྱེས་གང་འདོད་ཆོས་ལ་སྤྱོད། །ཤོལ་འདེབས་སྒྲོག་མེད་ནམ་དྲན་གང་དགར་སྤྱོད། །མི་འགྲུབ་དམ་བཅའི་ཁས་བླངས་མེད་པ་དང༌། །ལས་ངན་དམག་དཔུང་སྡུག་བསྔལ་མཚོ་མ་བརྡོལ། །འདི་འདྲའི་རང་དབང་ཡོད་རྣམས་སྤྲོ་བར་རིགས། །བསྒོམ་ཞིང་བསྒྲུབ་པའི་འཚོ་བ་ཆོས་དྲུག་ནི། །མཐའ་གཉིས་མ་ལྷུང་ཡོ་བྱད་རང་འཚོ་དང༌། །ཟས་ཀྱི་ཚོད་རིག་འགྲང་ལྟོགས་ཆ་སྙོམས་དང༌། །འབྱུང་འཁྲུགས་ནད་ཀྱི་ཁམས་མ་འཁྲུགས་པ་དང༌། །ཁ་ཟས་བཟང་པོའི་ལུགས་བརྒྱགས་མ་གྱུར་དང༌། །ཧ་ཅང་ངན་ཆེས་འབྱུང་བ་མ་རྒུད་དང༌། །ཉིན་མཚན་ཚོད་ཟིན་དུས་མིན་ཟ་བ་སྤོང༌། །འདི་ནི་དགེ་སྦྱོར་གནད་དུ་འགྲོ་བའི་གྲོགས། །དད་བརྩོན་སྐུལ་འདེབས་རྐྱེན་གྱི་ཆོས་དྲུག་ནི། །རྐྱེན་ངན་བཏུད་ལས་མི་རྟག་རྒྱུད་ལ་སྐྱེས། །རྒྱུ་འབྲས་ཤེས་ནས་ལས་ངན་དུག་བཞིན་སྤོང༌། །མོས་གུས་ཚུད་པས་བླ་མ་སངས་རྒྱས་མཐོང༌། །ཆོས་ལ་ངེས་པས་དགེ་སྦྱོར་བྲོད་པ་སྐྱེ། །དགེ་འདུན་དད་པས་ཡར་འདྲེན་སྐྱེལ་མ་ཞུ། །སངས་རྒྱས་འདོད་པས་བརྩོན་པས་ཅི་ཐོབ་བྱེད། །སྐལ་བཟང་དམ་པ་རྣམས་ཀྱི་ལུགས་ཡིན་ནོ། །རང་རྒྱུད་འདུལ་སྦྱོང་གདུལ་བའི་ཆོས་དྲུག་ནི། །ལོག་བློ་མི་རྒོད་ཆོས་བློ་མི་འགྱུར་བ། །ཞེ་བཅད་བཟོད་དཀའ་སྡུག་བསྲན་ཐུབ་པ་དང༌། །འཁོར་བའི་ཉེས་མཐོང་སྐྲག་པས་ཡིད་འབྱུང་དང༌། །སྣོད་ངན་སྐྱོན་མེད་རང་རྒྱུད་དག་པ་དང༌། །ཐོས་བསམ་ཆེ་བས་ཆོས་མཆོག་བསྟན་པ་རྟོགས། །དབང་དང་དམ་ཚིག་ཟབ་མོའི་སྣོད་གྱུར་པ། །མཚོ་གླིང་རིན་ཆེན་སྣོད་ལས་དཀོན་པར་སྣང༌། །ཉམས་ལེན་རྐྱེན་ངན་མི་འཕྲོགས་ཆོས་དྲུག་ནི། །ལུས་ཀྱི་སྡུག་བསྔལ་སྣ་ཚོགས་ཐུབ་པ་དང༌། །ངག་གི་མི་དགེ་དོན་མེད་འཆལ་གཏམ་ཐུབ། །སེམས་ཀྱི་བདེ་སྡུག་ལེགས་ཉེས་ཟུག་རྔུ་ཐུབ། །མི་མེད་དབེན་པར་སྐྱོ་ངལ་འཇིགས་སྐྲག་ཐུབ། །འདུ་འཛིའི་གྲོང་དུ་ཡེངས་མེད་གཉེན་པོ་ཐུབ། །སྲུང་སྡོམ་བསླབ་པས་ཡུལ་རྐྱེན་ངན་པ་ཐུབ། །དེ་དག་ལྡན་ན་ཆོས་ལམ་བདེ་བར་འགྲུབ། །ཐར་ལམ་ཡོན་ཏན་འདྲེས་པ་རྣམ་དྲུག་ནི། །ཐུན་མོང་ཆོས་འདྲེས་ཕྱི་མའི་བྱང་ཆུབ་སྒྲུབ། །གསང་སྔགས་ཆོས་འདྲེས་སྐུ་གསུམ་ལམ་དུ་སློང༌། །མཐར་ཐུག་གནད་འདྲེས་མཐར་འཛིན་གོལ་ས་ཆོད། །ཐེག་ཆེན་ཆོས་འདྲེས་ཅི་བྱེད་གཞན་དོན་སྤྱོད། །ཉན་རང་ཆོས་འདྲེས་འཁོར་བའི་བྱ་བ་དོར། །དེ་འདྲའི་གང་ཟག་ཆོས་དང་རང་རྒྱུད་འདྲེས། །མངོན་ཞེན་ཨ་འཐས་འཇིག་པའི་ཆོས་དྲུག་ནི། །ཡུལ་དྲུག་རྫུན་པས་འཁྲུལ་བར་ཐག་ཆོད་དང༌། །བྱ་བྱེད་དོན་མེད་འཁྲུལ་བར་ཐག་ཆོད་དང༌། །མངོན་ཞེན་སླུ་བས་འཁྲུལ་བར་ཐག་ཆོད་དང༌། །སྙན་གྲགས་བསྟོད་བཀུར་འཁྲུལ་བར་ཐག་ཆོད་དང༌། །དགྲ་གཉེན་ངེས་མེད་འཁྲུལ་བར་ཐག་ཆོད་དང༌། །བདེན་མེད་ཤེས་ན་འཁྲུལ་སྣང་འཁྲུལ་འཛིན་ཞིག །དལ་འབྱོར་དོན་དང་བཅས་པའི་ཆོས་དྲུག་ནི། །འབྱོར་ཡང་དོན་མེད་སླུ་བས་སྒྲུབ་ལ་འབད། །ཐོས་ཀྱང་ཚིག་ཕྱིར་འཆོར་བས་སྒྲུབ་ལ་འབད། །ཤེས་ཀྱང་སྙིང་པོ་སྟོར་བས་སྒྲུབ་ལ་འབད། །བསམས་ཀྱང་རྣམ་རྟོག་མཆེད་ཕྱིར་སྒྲུབ་ལ་འབད། །བཤད་ཀྱང་གོ་ཡུལལུས་པས་སྒྲུབ་ལ་འབད། །མ་བསྒྲུབས་མངོན་དུ་མི་སྣང་སྒྲུབ་ལ་འབད། །འཁོར་བ་བློས་བཏང་བློ་སྦྱོང་ཆོས་དྲུག་ནི། །དོན་མེད་སླུ་བས་འཇིག་རྟེན་བྱ་བ་བཏང༌། །སྲེད་པ་འཕེལ་བས་འདོད་ཡོན་ཞེན་པ་བཏང༌། །སྙིང་པོ་མེད་པས་འདུན་གྲོས་ངན་པ་བཏང༌། །ཐམས་ཅད་འདོར་བས་ནོར་རྫས་ཞེན་པ་བཏང༌། །འདུས་བྱས་བྲལ་བས་གཉེན་འདུན་གདུང་སེམས་བཏང༌། །ཕུང་ཁྲོལ་རྩ་བ་ཆགས་སྡང་གཟུང་འཛིན་བཏང༌། །དེ་དག་བཏང་ན་དམ་ཆོས་ངང་གིས་འགྲུབ། །རྒྱུ་འབྲས་ངེས་ཤེས་བསྐྱེད་པའི་ཆོས་དྲུག་ནི། །སྡེ་སྣོད་ཉན་ལ་རྒྱུ་འབྲས་ཡིད་ཆེས་བྱ། །ཆུ་ཐིགས་བུམ་ཁེངས་དཔེ་ཡིས་ཚོགས་གཉིས་བསགས། །མེ་ཕྲས་ནགས་ཚལ་བསྲེགས་དཔེས་སྡིག་པ་སྤང༌། །སྐྱིད་སྡུག་སྔོན་ལས་གྱུར་པས་བསོད་ནམས་བསགས། །དུས་གཅིག་ཚོགས་རྫོགས་མིན་པས་རིམ་གྱིས་སློབ། །བདག་འཛིན་ཡོད་པར་ལས་ཡོད་ཡིད་ཆེས་བྱ། །ཉན་བྱེད་སྣོད་ཀྱི་སྐྱོན་དྲུག་སྤང་བ་ནི། །དུས་ལ་མ་བབས་རྫ་སོ་མ་བཏང་དང༌། །རྣ་བ་མི་གཏོད་ཁ་བུབ་ལྟ་བུ་དང༌། །ཐོས་པ་མི་བརྟན་ཞབས་རྡོལ་ལྟ་བུ་དང༌། །ཉོན་མོངས་དང་འདྲེས་དུག་ཅན་ལྟ་བུ་དང༌། །ལམ་དུ་མི་འགྲོ་དྲི་མས་སྦགས་འདྲ་དང༌། །ཚིག་གིས་ང་རྒྱལ་སྣོད་ངན་གང་འདྲ་བའི། །སྐྱོན་རྣམས་སྤངས་ཏེ་ལེགས་པར་རབ་ཏུ་ཉོན། །ཡང་དག་ཐོས་པ་དམ་པའི་ཆོས་དྲུག་ནི། །ཤེས་རབ་མཆོག་ལྡན་དོན་གཉེར་གཟུ་བོར་གནས། །བཤེས་གཉེན་བསྟེན་དང་ཐོས་པས་མི་ངོམས་ཤེས། །མང་པོ་ལ་བརྟེན་མཁས་རྣམས་མཉེས་བྱས་ཤིང༌། །མང་པོ་ཐོས་པས་སྣ་ཚོགས་ཆོས་སྒོ་ཕྱེད། །མང་དུ་ཐོས་པས་ཡང་ཡང་ངེས་བྱས་ཤིང༌། །མང་པོ་ཐོས་དང་དྲིས་ཤིང་བརྩད་པ་སྟེ། །རྒྱ་མཚོ་འདྲ་བའི་ཆོས་མཛོད་འཛིན་པར་འགྱུར། །དེ་ནས་བསམ་པ་དག་པའི་ཆོས་དྲུག་ནི། །ཚིག་འདིས་དོན་ནི་ཅི་ཞིག་བསྟན་སྙམ་དང༌། །དབྱེ་ན་གང་ཡིན་བསྡུ་ན་ཇི་ལྟ་བུ། །རྣམ་གྲངས་ཅི་ཞིག་གང་གི་ཕྱོགས་སུ་གཏོགས། །དྲིལ་ནས་ཉམས་ལེན་མཐའ་ནི་གང་ཡིན་ཞེས། །ལེགས་པར་བསམས་པས་རིན་ཆེནཆོས་སྒོ་འབྱེད། །དེ་ནས་སྒོམ་པ་དག་པའི་ཆོས་དྲུག་ནི། །གནས་ལུགས་མ་རྨོངས་རྟག་ཆད་མཐའ་ལས་གྲོལ། །ཐེག་ཆེན་ལམ་གྱུར་སྟོང་ཉིད་སྙིང་རྗེར་འབྲེལ། །ཆོས་ཉིད་ངང་གནས་བྱིང་རྒོད་ཡེངས་བ་མེད། །ཞི་ལྷག་ཟུང་འབྲེལ་ཉམས་རྟོགས་གོང་དུ་འཕེལ། །རེ་དོགས་གཟུང་འཛིན་དམིགས་པ་མཚན་མ་མེད། །ཉོན་མོངས་སྒྲིབ་པའི་གཉེན་པོར་གྱུར་པ་སྟེ། །བསམ་གཏན་པ་དེ་སྲིད་པའི་ཕ་རོལ་འགྲོ། །རྐྱེན་གྱིས་རྫི་བ་མེད་པའི་ཆོས་དྲུག་ནི། །བསྟོད་སྨད་སྒྲ་ལ་བྲག་ཅར་ཤེས་པ་དང༌། །གཞན་གྱི་ཆགས་སྡང་འདུན་མ་བྱེད་པ་དང༌། །རང་གི་བྱེད་སྤྱོད་ཆོས་ལས་མི་འགལ་དང༌། །ཡོ་བྱད་སྦྱིན་འབྲས་གསོག་བྲུན་མི་བྱ་དང༌། །ནད་གདོན་དགེ་བསྐུལ་སྤང་ལོ་མི་བྱ་དང༌། །དག་སྣང་མོས་གུས་རྒྱུན་ཆད་མེད་པ་སྟེ། །མི་མཐུན་རྐྱེན་རྣམས་བསྒྱུར་བའི་དཔའ་བོ་ཡིན། །དྲི་མའི་བསམ་ངན་སྤང་བའི་ཆོས་དྲུག་ནི། །སྙན་གྲགས་ཆེ་བ་བསྒྲུབ་པའི་བསམ་ངན་དང༌། །རྙེད་དང་ལོངས་སྤྱོད་བསྒྲུབ་པའི་བསམ་ངན་དང༌། །ཡུལ་སྣང་བདེན་པར་འཛིན་པའི་བསམ་པ་དང༌། །ལུས་ངག་འདོད་པས་བསྐོལ་བའི་བསམ་པ་དང༌། །ཚེ་འདིའི་འཚོ་བ་བསྒྲུབ་པའི་བསམ་པ་དང༌། །རང་ཉིད་གཅིག་པུ་ཐར་འདོད་བསམ་པ་སྟེ། །བདུད་ཀྱི་བྱིན་རླབས་ལས་བྱུང་མཁས་པས་སྤང༌། །དབང་པོ་ཡུལ་ཕྱིར་མ་འབྲངས་ཆོས་དྲུག་ནི། །རང་ཡུལ་ཆགས་སྡང་དུག་གིས་མ་ཐེབས་དང༌། །འདོད་ཡོན་རང་དགའི་གདུང་བས་མ་ཟིན་དང༌། །འཇིག་རྟེན་ཆོས་བརྒྱད་མཚོན་གྱིས་མ་བཏབ་དང༌། །སྤྱོད་ལམ་གཡོ་སྒྱུའི་དྲི་མས་མ་གོས་དང༌། །སྣ་ཚོགས་འདུ་འཛིའི་རླུང་གིས་མ་བསྐྱོད་དང༌། །ཉིན་མཚན་ཆོས་སྤྱོད་བཟང་པོས་འདའ་བ་སྟེ། །དམ་པ་རྣམས་ཀྱི་ཚུལ་ལ་འཇུག་པར་བྱ། །དད་པས་ཁམས་གསོ་ཐུབ་པའི་ཆོས་དྲུག་ནི། །མོས་པའི་དད་པས་གསོལ་འདེབས་བླ་མ་སྒོམ། །གུས་པའི་དད་པས་དཀོན་མཆོག་མཆོད་ལ་བརྩོན། །ཡིད་ཆེས་དད་པས་ཡི་དམ་སྒོམ་སྒྲུབ་བྱེད། །དང་བའི་དད་པས་ཆོས་ཉིད་དོན་ལ་གཞོལ། །མི་ལྡོག་དད་པས་རྐྱེན་ངན་གྲོགས་སུ་བསྒྱུར། །མཐར་འཛིན་དད་པས་རང་རྒྱུད་ཆོས་དང་བསྲེ། །དེ་ཕྱིར་ཐར་ལམ་སྒྲུབ་པ་ཤིན་ཏུ་གཅེས། །སྲུང་སྡོམ་ངོ་ལྐོག་མེད་པའི་ཆོས་དྲུག་ནི། །བསྟན་པའི་རྩ་བ་ཚུལ་ཁྲིམས་ཤེས་པ་དང༌། །ངན་སོང་སྣ་ཁྲིད་སྡིག་པར་ཤེས་པ་དང༌། །སྲུང་སྡོམ་མེད་ན་ཆོས་རྩ་རུལ་བ་དང༌། །ཡོན་ཏན་ཀུན་གྱི་རྟེན་ཏུ་ཤེས་པ་དང༌། །མཐོ་རིས་འཛེག་པའི་སྐས་སུ་ཤེས་པ་དང༌། །ཐར་བ་བགྲོད་པའི་བཞོན་པར་ཤེས་པ་དང༌། །ཁྲིམས་གཙང་བསྲུང་ལ་གཅེས་སྤྲས་ནན་ཏན་བྱ། །གཉེན་པོས་རྐྱེན་ངན་ཐུབ་པའི་ཆོས་དྲུག་ནི། །ཉན་ཐོས་བཞིན་དུ་དགྲ་ལྟས་སྤོང་བདང༌། །ཕ་རོལ་ཕྱིན་ལྟར་ཡོངས་སུ་སྦྱོང་བ་དང༌། །སྔགས་ལྟར་ཐབས་ཀྱིས་ལམ་དུ་བསྒྱུར་བ་དང༌། །ཡང་ཟབ་གནད་ཀྱིས་རང་སར་གྲོལ་བ་དང༌། །མཐའ་བྲལ་ངང་དུ་རང་ཞིར་བཏང་བ་དང༌། །བྱ་བཙལ་མེད་པར་ཡོངས་ལ་ལ་བཟླ་སྟེ། །བློ་རིགས་བསྟུན་ནས་གང་ལྟར་སྒོམ་བྱེད་ཀྱང༌། །འགག་ལ་ཉོན་མོངས་རང་དགྲར་མ་ཤོར་གཅེས། །སྣོད་ལྡན་སློབ་མ་བཟང་པོའི་ཆོས་དྲུག་ནི། །མི་གཞི་ལེགས་ཤིང་ངོ་ཚ་ཁྲེལ་ཡོད་ལྡན། །གསུང་བཞིན་སྒྲུབ་ཅིང་དད་མོས་ཕུན་སུམ་ཚོགས། །ལུས་སྲོག་དོར་ནས་སྒྲུབ་ལ་སྙིང་རུས་ཆེ། །གྲོགས་ལ་བརྩེ་ཞིང་སྙིང་རྗེས་རང་རྒྱུད་བརླན། །སྐྱོ་དུབ་མེད་པས་བཟོད་ལྡན་ཕན་བདེ་བྱེད། །སྒོ་གསུམ་ཞི་ཞིང་དམ་ཚིག་སྡོམ་ལ་གནས། །དེ་ནི་སྐལ་བཟང་ཆོས་ཀྱི་བདུད་རྩིའི་སྣོད། །ཁོམ་ལྡན་རྙེད་དཀའ་བསམ་པའི་ཆོས་དྲུག་ནི། །མི་ལུས་ཐོབ་དཀའ་ད་རེས་འབད་པ་ཐོན། །བླ་མ་རྙེད་དཀའ་ཡོན་ཏན་འབྲས་བུ་ལོང༌། །ཆོས་དང་ཕྲད་དཀའ་བརྩོན་པས་ཉམས་སུ་ལོང༌། །ཟབ་དོན་ཐོས་དཀའ་སྙན་བརྒྱུད་སྙིང་པོ་བསྒྲུབ། །འཁྲུལ་སྣང་བཅད་དཀའ་གཉིས་མེད་དོན་ལ་སྦྱང༌། །མཐུན་རྐྱེན་ཚོགས་དཀའ་འཛོམ་དུས་ཉམས་ལེན་འབུངས། །འདིར་བདེ་ཕྱི་མར་བདེ་བའི་འདུན་གྲོས་ཡིན། ཆོས་ལ་ཞུགས་པའི་གལ་ཆེ་རྣམ་དྲུག་ནི། །ཕྱི་མ་རྒྱུན་རིང་སྦྱིན་པ་གལ་རེ་ཆེ། །བདེ་འགྲོའི་ཐེམ་སྐས་ཚུལ་ཁྲིམས་གལ་རེ་ཆེ། །བཟོད་པའི་གོ་མཚོན་བསྲན་ཚུགས་གལ་རེ་ཆེ། །ཡོན་ཏན་འབྱུང་གནས་བརྩོན་འགྲུས་གལ་རེ་ཆེ། །དམིགས་པས་མི་གཡོ་བསམ་གཏན་གལ་རེ་ཆེ། །དོན་སྒྲུབ་ལྷུན་གྲུབ་ཤེས་རབ་གལ་རེ་ཆེ། །གལ་ཆེན་བསྒྲུབས་ལ་ཐར་ལམ་མྱུར་དུ་བགྲོད། །དེ་དང་མི་ལྡན་སྐྱོན་དྲུག་བསྟན་པ་ནི། །སྦྱིན་པ་མ་བཏང་ཡི་དྭགས་མདུན་ན་སྒུགས། །ཚུལ་ཁྲིམས་མ་བསྲུངས་དུད་འགྲོ་མདུན་ན་སྒུགས། །བཟོད་པ་མ་བསྒོམས་དམྱལ་བ་མདུན་ན་སྒུགས། །བརྩོན་འགྲུས་མི་རྩོམ་མི་ཁོམ་གཡང་ས་སྒུགས། །བསམ་གཏན་མི་སྒོམ་བདུད་བཞིའི་དཔུང་ཚོགས་སྒུགས། །ཤེས་རབ་མ་བསྒོམས་གཏན་དུ་སྲིད་པ་སྒུགས། །དགྲ་རྣམས་མདུན་སྒུགས་དེ་ཡི་དབང་དུ་འགྱུར། །ཟབ་མོ་རྒྱུད་སྦྱོར་མི་དགོས་རྣམ་དྲུག་ནི། །གང་འདུག་དགེ་བ་འཕེལ་ན་དགོན་པ་བསྟེན་མི་དགོས། །རྣམ་རྟོག་རང་སར་གྲོལ་ན་འཁོར་བ་སྤང་མི་དགོས། །རང་གི་བག་མེད་བསྲུངས་ན་གཞན་སེམས་བསྲུང་མི་དགོས། །མ་བཅོས་སེམས་ཉིད་རྟོགས་ན་དཔེ་ཆ་ཀློག་མི་དགོས། །ཅི་སྣང་སྒྱུ་མར་རྟོགས་ན་ཞེན་པ་བཟློག་མི་དགོས། །གནས་ལུགས་རང་ངོ་ཤེས་ན་སངས་རྒྱས་བཙལ་མི་དགོས། །འདི་དག་དང་ལྡན་སྐྱེས་ཆེན་འགྲོ་མཆོག་ལགས། །ཆོས་སྒྲུབ་གྲོགས་སུ་མཆོག་དྲུག་བསྟན་པ་ནི། །མཆོད་གནས་མཆོག་ཏུ་བླ་མ་དཀོན་མཆོག་བཀུར། །གཏོང་བའི་མཆོག་ཏུ་ཚེ་འདིའི་བྱ་བ་གཏོང༌། །ནོར་གྱི་མཆོག་ཏུ་ཐོས་བསམ་དད་པ་བསྟེན། །བཤེས་ཀྱི་མཆོག་ཏུ་སེམས་ཉིད་རང་ངོ་ཤེས། །སེམས་བསྐྱེད་མཆོག་ཏུ་རང་འདོད་འཁྲི་བ་སྤོང༌། །གྲུབ་རྟགས་མཆོག་ཏུ་བླ་མ་སངས་རྒྱས་མཐོང༌། །དེ་དག་འབྱོར་ན་དོན་གཉིས་ལྷུན་གྲུབ་འགྱུར། །བྱ་བ་མ་ཡིན་རྣམ་དྲུག་སྤང་བ་ནི། །རྒྱུད་ཚོད་མི་ཤེས་གང་ཟག་གཤེ་སྐུར་སྤང༌། །ལོག་འཚོའི་རྙེད་པས་དད་ལྡན་སུན་མ་འདོན། །བག་མེད་ཐོ་ཅོའི་སྨྱོན་སྤྱོད་ཤུགས་མ་དྲགས། །གཞན་ལ་ཁྱད་གསོད་མཐོ་དགོས་བརྙས་མ་བྱེད། །ལྟོ་རྒྱབ་ཆེད་དུ་དམ་པའི་ཆོས་མ་འདོར། །རྒྱུ་འབྲས་ཟབ་མོའི་རྟེན་འབྲེལ་ཁྱད་མ་བསད། །འདི་དག་སྤངས་ན་སྐྱེས་བུ་དམ་པར་འགྱུར། །ཆོས་བྱེད་རྣམས་ཀྱི་བྱ་བ་རྣམ་དྲུག་ནི། །བླ་མ་ཡི་དམ་མཁའ་འགྲོ་གཙུག་གིས་འཁུར། །སྒོ་གསུམ་དགེ་བ་བྱང་ཆུབ་ལམ་དུ་བསྒྱུར། །ངར་འཛིན་བདེན་ཞེན་རྟག་འཛིན་ལིངས་ཀྱིས་བསྐྱུར། །ཚེ་འདིའི་བློ་སྣ་སྐྱེས་ཚད་འབུར་འཇོམས་གྱིས། །ཉོན་མོངས་དུག་ལྔ་གཉེན་པོས་ཡུལ་ནས་ཕྱུང༌། །ཐོས་བསམ་སྒོམ་པའི་ནོར་རྫས་རྒྱུད་ལ་བསྟེན། །དེ་ཡིས་རང་གཞན་འབྱོར་པ་ཉེ་བར་སྐྱེ། །ཉམས་སུ་ལེན་དུས་དགོས་པའི་ཆོས་དྲུག་ནི། །མྱུར་དུ་འཆི་ངེས་ཆོས་མིན་འདོར་དགོས་ཤིང༌། །བཏང་སྙོམས་འབྱུང་ཉེ་སྙོམ་ལས་མེད་པ་དགོས། །བརྩོན་འགྲུས་འཆོར་རྐྱེན་གཉེན་པོ་བསྟེན་དགོས་ཤིང༌། །དད་གུས་ལོག་སླ་གོ་འདྲིས་མ་ཁྱེར་དགོས། །འཁྲུལ་སྣང་བཅད་དཀའ་བདེན་མེད་ཤེས་དགོས་ཤིང༌། །ལོག་སྤྱོད་འགོ་སླ་མི་དང་མི་འགྲོགས་དགོས། །ནང་པའི་ཁོངས་ཆུད་སྐྱབས་འགྲོ་རྣམ་དྲུག་ནི། །སངས་རྒྱས་སྐུ་གསུམ་བསྒྲུབ་བྱར་སྐྱབས་འགྲོ་ཞིང༌། །ཐེག་གསུམ་ཆོས་ལ་ལམ་དུ་སྐྱབས་སུ་འགྲོ། །ཉན་རང་བྱང་སེམས་གྲོགས་སུ་སྐྱབས་འགྲོ་ཞིང༌། །མཁས་གྲུབ་བླ་མ་བསྟེན་པར་སྐྱབས་སུ་འགྲོ། །ཡི་དམ་ལྷ་ཚོགས་དངོས་གྲུབ་སྐྱབས་འགྲོ་ཞིང༌། །ཡེ་ཤེས་མཁའ་འགྲོ་བྱིན་རླབས་སྐྱབས་འགྲོ་བ། །འདི་དག་དང་པོར་སྔོན་འགྲོའི་ཆོས་ལ་གཅེས། །དད་ཅན་རྣམས་ཀྱི་ངོ་ཤེས་རྣམ་དྲུག་ནི། །འགྲོ་ངོ་ཤེས་པས་རང་དོན་ཆོས་སུ་ཆུག །འབོར་ངོ་ཤེས་པས་འཁྲུལ་སྣང་ཞེན་ཆགས་སྐྱུངས། །ཉན་ངོ་ཤེས་པས་བླ་མའི་གདམས་ངག་ཉོན། །སྤོང་ངོ་ཤེས་པས་སྒོ་གསུམ་སྡིག་པ་སྤོངས། །སྤྱོད་ངོ་ཤེས་པས་ཟབ་དོན་ཆོས་ལ་སྤྱོད། །ལྟ་ངོ་ཤེས་པས་སེམས་ཉིད་དོན་ལ་ལྟོས། །དེ་ལྟར་བྱས་ན་ཡང་དག་དོན་ལ་ཉེ། །སྐལ་བཟང་རྣམས་ཀྱི་གོམས་པའི་གནད་དྲུག་ནི། །གནས་ལུགས་བྱར་མེད་ཡིན་གྱིས་སྤྲོས་མེད་གནད། །སྒོམ་པ་འོད་གསལ་ཡིན་གྱིས་ཡེངས་མེད་གནད། །སྤྱོད་པ་སྒྱུ་མ་ཡིན་གྱིས་བདེན་མེད་གནད། །འབྲས་བུ་ལྷུན་གྲུབ་ཡིན་གྱིས་རང་ཆས་གནད། །རྐྱེན་ངན་རང་གྲོལ་ཡིན་གྱིས་འཛིན་མེད་གནད། །བདེ་སྡུག་རང་སེམས་ཡིན་གྱིས་རྩལ་སྦྱོང་གནད། །དེ་དང་ལྡན་ན་མ་བྱས་དོན་ཀུན་འགྲུབ། །རིགས་པ་དྲུག་གིས་རང་ལ་གྲོས་འདེབས་ནི། །ཚེ་ལ་ངེས་མེད་བརྩོན་འགྲུས་བརྩམ་པར་རིགས། །འཁོར་བའི་སྡུག་བསྔལ་སྐྱོ་བ་སྐྱེ་བར་རིགས། །འགྲོ་དྲུག་ཚད་མེད་སྙིང་རྗེས་སྐྱོང་བར་རིགས། །བླ་མའི་མོས་གུས་རྒྱུན་ཆད་མེད་པར་རིགས། །ཟབ་མོའི་གདམས་ངག་ཉམས་སུ་བླངས་པར་རིགས། །རང་ངོ་ཤེས་དུས་དབེན་པ་བསྟེན་པར་རིགས། །རིགས་པའི་རྗེས་འགྲོ་སྐྱེས་བུའི་མཆོག་རབ་ཡིན། །ཐེག་པའི་དོན་འདུས་ཤེས་པའི་ཆོས་དྲུག་ནི། །ཉོན་མོངས་རང་ག་ཐ་མལ་སྐྱོན་ཤེས་དགོས། །ཉོན་མོངས་སྤོང་བ་ཉན་རང་ལམ་ཤེས་དགོས། །ཉོན་མོངས་སྦྱོང་བ་རྒྱལ་སྲས་ལམ་ཤེས་དགོས། །ཉོན་མོངས་བསྒྱུར་བ་གསང་སྔགས་ལམ་ཤེས་དགོས། །རང་བཞིན་ཡོངས་ཤེས་རང་བྱུང་ཡེ་ཤེས་དགོས། །བླང་དོར་གྲོལ་བྱ་བཙལ་མེད་ཤེས་པ་དགོས། །དེ་དག་ལྡན་ན་ཉོན་མོངས་གོས་པ་མེད། །ཆོས་བྱེད་རྣམས་ཀྱི་བློ་སྣ་རྣམ་དྲུག་ནི། །འཁོར་བའི་མཚང་རྟོགས་ངན་པའི་སྐྱོན་འཚོལ་འདྲ། །དེ་ལས་འབྲོས་བློ་དམག་མི་རུ་ལོག་འདྲ། །ཕྱིར་མི་བཟློག་བློ་ཝ་མོ་གལ་ཐར་འདྲ། །འཁོར་བ་སྤང་བློ་རྗེ་ངན་འཁོར་གཡོག་འདྲ། །འཁྱམས་ཀྱིས་དོགས་བློ་ལམ་ངན་ས་འཚོལ་འདྲ། །འཁོར་བ་གྲོལ་བློ་ཆབ་རོམ་ཆུར་ཞུ་འདྲ། །རྒྱུད་ལ་ཆོས་སྦྱོར་བློ་སྣ་རྣམ་དྲུག་ནི། །འཛིན་བློ་སྦྲང་མ་སྦྲང་རྩིར་འབྱར་བ་འདྲ། །བསམ་བློ་ས་རྡོའི་ནང་ནས་གསེར་འཚོལ་འདྲ། །རྟོགས་བློ་གསེར་སྦྲམ་ལག་ཏུ་ཐོབ་པ་འདྲ། །འདྲིས་པར་བསྒོམ་བློ་ཕྱི་དོར་བྱེད་འདྲ་དང༌། །ཡོན་ཏན་འཕེལ་བློ་དེ་ལ་རྒྱན་དུ་བྱེད། །མངོན་དུ་གྱུར་བློ་འདོད་དགུ་འབྱུང་འདྲའོ། །ཐེག་ཆེན་ཆོས་ལ་འབྲེལ་བ་དྲུག་ལྡན་ནི། །དངོས་འཛིན་འཇིག་ལ་ལྟ་བ་ཉམས་མྱོང་འབྲེལ། །སྙོམ་ལས་སེལ་ལ་དད་པ་བརྩོན་འགྲུས་འབྲེལ། །ཐེག་དམན་སྐྱོབ་ལ་ཐབས་དང་ཤེས་རབ་འབྲེལ། །ཁོང་ཁྲོ་འབྱིན་ལ་རང་སྐྱོན་གཞན་བདེན་འབྲེལ། །འཕགས་ལམ་བགྲོད་ལ་མོས་གུས་སྙིང་རུས་འབྲེལ། །གོལ་ས་གཅོད་ལ་ཐོས་བསམ་ཉམས་ལེན་འབྲེལ། །ལེགས་པར་དགོས་ཏེ་ཤིན་ཏུ་དཀོན་པར་སྣང༌། །གོང་ན་མེད་པའི་གདམས་པ་རྣམ་དྲུག་ནི། །གནས་ལུགས་གོ་ན་ཐོས་པ་གོང་ན་མེད། །རྩ་བ་ཆོད་ན་བསམ་པ་གོང་ན་མེད། །ཡེ་ཤེས་སྐྱེས་ན་ཐབས་ལམ་གོང་ན་མེད། །ཆོས་ལ་བཀོལ་བཏུབ་བྱིན་རླབས་གོང་ན་མེད། །སྐྱེ་ཤི་མེད་རྟོགས་དངོས་གྲུབ་གོང་ན་མེད། །ཐོབ་རྒྱུ་མེད་རྟོགས་གདེང་ཚད་གོང་ན་མེད། །དེ་དག་སྦྱོར་ན་སངས་རྒྱས་རང་ལས་འབྱུང༌། །མཐར་ཕྱིན་བསྒྲུབ་ལ་མ་ཤོར་རྣམ་དྲུག་ནི། །ཟླར་དགའ་གྲོགས་ཀྱི་དབང་དུ་མ་ཤོར་དང༌། །ངོར་བསྟོད་ཟས་ཀྱི་དབང་དུ་མ་ཤོར་དང༌། །འབྲེལ་འདྲིས་རྣམ་གཡེང་དབང་དུ་མ་ཤོར་དང༌། །བརྩེ་གདུང་གཉེན་གྱི་དབང་དུ་མ་ཤོར་དང༌། །བཟོ་རིགས་བཤེས་གཉེན་དབང་དུ་མ་ཤོར་དང༌། །གསོག་བྲུན་ནོར་རྫས་དབང་དུ་མ་ཤོར་དང༌། །དེ་ལྟར་དྲུག་ལྡན་ཆོས་ལམ་མཐར་ཕྱིན་འགྱུར། །མི་གཞིའི་སྐྱོན་དྲུག་བརྟགས་ཏེ་འདོར་བ་ནི། །རང་འཁྲུག་གཞན་སྨོད་དུག་ལྔ་རགས་པ་དང༌། །ཅོལ་ཆུང་འདོ་མེད་བློ་སྣ་རགས་པ་དང༌། །དོན་མེད་བྱ་བྱེད་འབྲེལ་འདྲིས་དགའ་བ་དང༌། །གྱོང་པོ་ཆིག་ཚུགས་བསྐུལ་ཏུ་མི་བཏུབ་དང༌། །མཐོ་འགྲོགས་གསར་ངས་ཕྱི་ཤོལ་ཆེ་བ་དང༌། །ངན་གཡོ་གྱ་གྱུས་ཞེ་བཞག་ཆེ་བ་རྣམས། །དམ་ཆོས་བསྒྲུབ་ལ་སྐྱོན་ཡོན་བརྟགས་ཏེ་སྤང༌། །ཀུན་སྤྱོད་སྐལ་བ་ངན་པའི་སྐྱོན་དྲུག་ནི། །བྱས་པ་མི་གཟོ་དྲིན་ལན་ཉེས་ཀྱིས་འཇལ། །རང་ལ་མི་འཇལ་གཞན་ལ་ཕོད་ཁམ་ཆེ། །འགྱུར་ལྡོག་མང་ཞིང་མི་རྟག་ཁམས་འདུས་ཆེ། །གདོང་ལྕང་ངོར་དགའ་ཁ་ཞེ་གཉིས་པ་ཅན། །དོན་ལྡན་མི་ཤེས་བློ་མང་གཏམ་ལ་དགའ། །བྱས་པ་མེད་པར་རེ་བ་ཆེ་བ་རྣམས། །སྐལ་ངན་དམ་ཆོས་ཕྱོགས་མིན་རིང་དུ་སྤང༌། །མཐར་ཕྱིན་སྐྱོན་ལས་གྲོལ་བའི་ཆོས་དྲུག་ནི། །བློ་བརྟན་རང་རྒྱུད་དགེ་ཞིང་བྱ་བ་ཉུང༌། །སྙིང་རུས་ཞེ་བཅད་ཆེ་ཞིང་བཟོད་དང་ལྡན། །གཞན་གྱིས་མི་བརྫི་རྐྱེན་གྱིས་འཕྲོག་པ་མེད། །ཕྱི་ཐག་རྒྱུན་རིང་དད་གུས་ངོ་ལྐོག་མེད། །བློ་བཟང་གྲོས་འདུན་ཆེ་ཞིང་ཐབས་ལ་མཁས། །གཞན་སྐྱོན་མི་བརྗོད་རང་སྐྱོན་མཚང་ནས་འདོན། །དེ་འདྲའི་སྐྱེས་མཆོག་བྱང་ཆུབ་གཏན་གྱི་གྲོགས། །ཆོས་བྱེད་རྣམས་ཀྱི་ཕྲག་དོག་སྐྱོན་དྲུག་ནི། །གཞན་ལས་རྙེད་མང་ལོངས་སྤྱོད་འབྱོར་འདོད་དང༌། །འཁོར་མང་བུ་སློབ་རྒྱས་པར་འདོད་པ་དང༌། །བསོད་ནམས་ཅི་ཆེ་འདུ་བ་མང་འདོད་དང༌། །སྙན་གྲགས་བ་དན་རྒྱལ་ཁམས་ཁྱབ་འདོད་དང༌། །ཀུན་ལས་རབ་འཕགས་ཆེ་ཁྱད་འདོད་པ་དང༌། །རང་ལས་གཞན་མིན་གཅིག་ཀྱང་མིའདོད་པ། །འདི་དག་འདོད་ལྷའི་མེ་ཏོག་མདའ་ཡིས་བཅོམ། །དེ་ལས་རྟགས་དྲུག་འཆར་བའི་མྱུ་གུ་ནི། །བསོད་ནམས་འདུ་འཛི་ཅན་ལ་ཡིད་སྨོན་འདིང༌། །ཆོས་མཛད་གོང་མ་རྣམས་ལ་ངན་སྐྱོན་བརྗོད། །གཞན་གྱི་ཕུན་ཚོགས་མཐོང་ལ་ཁོང་ཁྲོ་འཁྲུག །བྱམས་སེམས་གཞན་དོན་ཅན་ལ་ཟུར་ཟ་གཏོང༌། །སྒོམ་སྒྲུབ་དངོས་གྲུབ་ཅན་ལ་གཤེ་སྐུར་འདེབས། །མ་རིག་ལོག་པར་ལྟ་བའི་ཁ་འཛིན་བྱེད། །དེ་འདྲའི་སྐལ་ངན་བསྟེན་པའི་སྐྱོན་དྲུག་ནི། །མཐོང་བ་ཙམ་གྱིས་ངེས་འབྱུང་དད་པ་འགྲིབ། །ཐོས་པ་ཙམ་གྱིས་ཐར་པའི་ལམ་དང་རིང༌། །དྲན་པ་ཙམ་གྱིས་འཁོར་བའི་ས་བོན་འདེབས། །རེག་པ་ཙམ་གྱིས་བྱིན་རླབས་དངོས་གྲུབ་ཡལ། །གཏམ་འདྲེས་ཙམ་གྱིས་དག་སྣང་མོས་གུས་འགྲིབ། །ཆོས་ཀྱིས་འབྲེལ་ཚད་བདུད་ཀྱིས་བྱིན་བརླབས་པ། །ཤི་བའི་འོག་ཏུ་མནར་མེད་གནས་སུ་འགྲོ། །དེ་བས་དེ་འདྲའི་སྐལ་ངན་སྤང་བར་གྱིས། །ངན་པའི་རྟགས་དྲུག་རང་བཞིན་བསྟན་པ་ནི། །ཆོས་ལ་ལྟ་ཅི་ཐ་མལ་བས་ཀྱང་དམན། །བསྟན་ཞུགས་ལྟ་ཅི་མ་རབས་བས་ཀྱང་དམན། །ཐེག་ཆེན་ལྟ་ཅི་མུ་སྟེགས་བྱེད་ལས་དམན། །གསང་སྔགས་ལྟ་ཅི་ལོག་སྲེད་ཅན་ལས་དམན། །ཉམས་ལེན་ལྟ་ཅི་སྡིག་ཅན་རྣམས་ལས་དམན། །ལྟ་སྒོམ་ལྟ་ཅི་ཆོས་དང་གནམ་ས་བཞིན། །བསྟན་པའི་ཆོམ་རྐུན་ཆོས་ལྟར་བཅོས་པ་སྟེ། །དད་ལྡན་ལོག་ལམ་ངན་འགྲོར་ཁྲིད་པས་སྤང༌། །ཡ་བྲལ་དྲུག་གིས་མི་འགྲུབ་བསྟན་པ་ནི། །སེམས་བསྐྱེད་ཡོད་ཀྱང་སྨོན་ལམ་མ་བཏབ་ན། །གཟུགས་སྐུའི་སྒྲིབ་སྦྱོང་ས་བོན་ཐེབས་མི་འགྱུར། །སྙིང་རྗེ་ཡོད་ཀྱང་རང་འདོད་མ་ཟད་ན། །ཐེག་ཆེན་གཞན་དོན་སྤྱོད་པའི་གྲལ་མི་ཚུད། །མཐུན་འཇུག་བྱས་ཀྱང་དུས་ལ་མ་བབས་ན། །གཞན་དོན་མི་འགྲུབ་སླར་ལ་འཕྱར་ཀའི་རྒྱུ། །རི་ཁྲོད་བསྟེན་ཀྱང་བློ་སྣ་མ་ལོག་ན། །ཆགས་སྡང་མཐུན་འཇུག་འཁྲི་བ་ཆོད་པར་དཀའ། །དད་གུས་མེད་པའི་གསོལ་བ་སྟོང་བཏབ་ཀྱང༌། །བྱིན་རླབས་རང་བཞིན་ཆར་ཐིགས་གཅིག་མི་འབབ། །མཁྱེན་པ་ཆེ་ཡང་སྤྲོས་ལས་མ་གྲོལ་ན། །འཁོར་འདས་མི་ཕྱེད་གྲུབ་མཐའི་གཟེབ་ཏུ་བཅིངས། །དེ་ཕྱིར་མན་ངག་ཟུང་དུ་འབྲེལ་བ་གཅེས། །ཆོས་བྱེད་རྣམས་ཀྱི་དགོས་པ་རྣམ་དྲུག་ནི། །འཁོར་བས་སྐྲག་པས་གཤེད་མས་དེད་འདྲ་དང༌། །དགེ་སྦྱོར་བརྩོན་པས་སོ་ནམ་བྱེད་འདྲ་དང༌། །གཉེན་པོར་འགྲོ་བ་ནད་པ་སྨན་བཞིན་དང༌། །གཞན་ཕན་ལྷུར་ལེན་བུ་ཆུང་སྐྱོང་འདྲ་དང༌། །རང་རྒྱུད་འདུལ་མཁས་ཀོ་བ་ཉེད་འདྲ་དང༌། །ངར་འཛིན་དགྲ་གསོད་མི་ཤ་འདོན་འདྲ་སྟེ། །འདི་རྣམས་དགོས་པ་རྟག་ཏུ་རྒྱུད་ལ་བསྟེན། །མཐར་ཐུག་དྲུག་གིས་རང་རྒྱུད་གདུལ་བ་ནི། །བཙོན་བུའི་མཐར་ཐུག་ཡུལ་ལ་ཆགས་ཞེན་སྤངས། །སོ་ནམ་མཐར་ཐུག་དགེ་ལ་བརྩོན་པ་བསྟེན། །གཏན་ཡུལ་མཐར་ཐུག་གནས་ལུགས་ས་འཛིན་མཛོད། །བསྲུང་བའི་མཐར་ཐུག་ངར་འཛིན་གཅེས་འཛིན་བོར། །དགྲ་ཡི་མཐར་ཐུག་དུག་ལྔ་རང་རྒྱུད་ཐུལ། །ཉམས་ལེན་མཐར་ཐུག་དྲན་པ་ཡེངས་མེད་སྐྱོངས། །འདི་དང་ལྡན་ན་དགོས་འདོད་ཡིད་བཞིན་འགྲུབ། །ཆོས་བྱེད་རྣམས་ཀྱི་འཆོར་བའི་ཉེན་དྲུག་ནི། །དད་པ་ཡོད་ཀྱང་ཁེ་གྲགས་མ་སྤངས་ན། །མཐར་ཐུག་མི་ཆོས་འཆོར་བའི་ཉེན་ཡོད་གཟབ། །དགོན་པ་བསྟེན་ཡང་ཞེ་བཅད་མི་ལྡན་ན། །མཐར་ཐུག་ཡེངས་བར་འཆོར་བའི་ཉེན་ཡོད་གཟབ། །གྲུབ་རྟགས་ཐོན་ཡང་རློམ་སེམས་མ་སྤངས་ན། །མཐར་ཐུག་བདུད་ཀྱིས་འཁྱེར་བའི་ཉེན་ཡོད་གཟབ། །དམ་ཅན་འདུ་ཡང་སྙིང་རྗེ་མི་ལྡན་ན། །མཐར་ཐུག་ལས་མཐའ་ལོག་པའི་ཉེན་ཡོད་གཟབ། །དགོངས་པ་མཐོ་ཡང་ཞེན་པ་མ་ལོག་ན། །མཐར་ཐུག་དྲེད་པོར་འཆོར་བའི་ཉེན་ཡོད་གཟབ། །འགྲོ་དོན་བརྩོན་ཡང་རང་འདོད་འཁྲིས་ཞུགས་ན། །མཐར་ཐུག་ཟོག་པོར་སོང་བའི་ཉེན་ཡོད་གཟབ། །སྒྲིབ་པ་དྲུག་པོ་སྤོང་བའི་དགོས་པ་ནི། །དམ་ཆོས་མི་འཛིན་སྤངས་པའི་སྒྲིབ་པ་ཡིན། །བདུད་ལས་གང་ཡིན་མི་ཤེས་སྒྲིབ་པ་ཡིན། །བླ་མའི་མོས་གུས་མེད་པ་སྒྲིབ་པ་ཡིན། །མཆེད་གྲོགས་དག་སྣང་མེད་པ་སྒྲིབ་པ་ཡིན། །ཐེག་མཆོག་ཞུགས་ལ་སྨོད་པ་སྒྲིབ་པ་ཡིན། །སྒོ་གསུམ་ཉེས་སྤྱོད་གཡོ་སྒྱུ་སྒྲིབ་པ་ཡིན། །དེ་དག་སྤངས་ནས་ཐར་ལམ་བསྒྲུབ་པ་གཅེས། །སྒྲིབ་བྲལ་རིན་ཐང་མཐའ་ཡས་ཆོས་དྲུག་ནི། །ལན་ལ་མི་རེ་སྦྱིན་པ་ཕྱོགས་མེད་གཏོང༌། །སྲིད་པ་མི་གཉེར་ཚུལ་ཁྲིམས་རྣམ་དག་བསྲུང༌། །སེམས་ཅན་མི་གཏོང་བྱམས་དང་སྙིང་རྗེ་སྐྱེ། །དམ་ཆོས་ཤེས་པས་ནམ་ཡང་ངོམས་པ་མེད། །རྙེད་བཀུར་མི་གཉེར་འགྲོ་ལ་ཆོས་རབ་སྟོན། །ཕྱོགས་རིས་མི་བྱེད་ཀུན་ལ་སེམས་བཟང་སྙོམས། །རབ་དགེ་འདི་འདྲའི་སྤྱོད་པ་དམ་པ་ལགས། །ཐེག་ཆེན་བསྟན་པའི་ཡོན་ཏན་རྣམ་དྲུག་ནི། །བཤེས་གཉེན་བསྟེན་ལ་གཡེལ་བ་མེད་པ་དང༌། །སེམས་ཅན་དོན་བྱེད་སྐྱོ་དུབ་མེད་པ་དང༌། །གནས་ལུགས་རྟོགས་ཀྱང་ང་རྒྱལ་མེད་པ་དང༌། །དོན་དུ་མི་འགྱུར་རྙེད་པ་སྤོང་བ་དང༌། །ཟབ་མོའི་དོན་ལ་སྐྲག་པ་མེད་པ་དང༌། །དགེ་ཚོགས་སྒྲུབ་ལ་ཆོག་ཤེས་མེད་པའོ། །ཉོན་མོངས་དགྲ་ཆེན་གཞོམ་པའི་ཆོས་དྲུག་ནི། །ཉིན་འགའི་དགེ་སྦྱོར་ཉོན་མོངས་མི་ཕྱེད་པས། །སྒྲུབ་པ་རྒྱུན་བསྲིང་ངང་ཐུང་མེད་པ་གཅེས། །ཐོག་མེད་ཉོན་མོངས་ཤིན་ཏུ་གདུལ་དཀའ་བས། །གཉེན་པོ་རབ་ཟབ་ཐབས་བཅས་བསྟེན་པ་གཅེས། །བདག་འཛིན་གཞིག་དཀའ་གཟུང་འཛིན་རླབས་ཆེ་བས། །ཚོགས་གཉིས་དཔུང་བསྐྱེད་དགེ་ལ་འབད་པ་གཅེས། །འཁོར་བའི་གཅོང་ནད་ཡུན་རིང་སྦྱང་དཀའ་བས། །འཚོ་བྱེད་བླ་མ་རྟག་ཏུ་བསྟེན་པ་གཅེས། །དུག་ལྔའི་མེ་དཔུང་རབ་ཏུ་གཞིལ་དཀའ་བས། །བྱང་ཆུབ་སེམས་བསྐྱེད་རྒྱ་མཚོ་བསྟེན་པ་གཅེས། །ལས་ངན་བསགས་པའི་བགྲོད་ལམ་མཐུར་བྱེད་པས། །ཐར་བའི་སྐས་ལ་ཡར་ལ་འཛེག་པ་གཅེས། །སྡེ་སྣོད་བསླབ་གསུམ་ཁྱད་པར་ཆོས་དྲུག་ནི། །ཉན་ཐོས་སྡེ་སྣོད་སྟོན་ལས་སྒྲའི་རྗེས་འབྲང༌། །རང་རྒྱལ་རང་རྟོགས་རྟེན་འབྲེལ་ནང་ནས་འཆར། །བྱང་སེམས་རང་གཞན་ཡེ་ཤེས་མཐའ་ཡས་ལྡན། །ཉན་ཐོས་བསླབ་པ་ཕྱོགས་གཅིག་རང་རྒྱུད་ཙམ། །རང་རྒྱལ་བར་མ་རང་དོན་ལྷུར་ལེན་ཞིང༌། །བྱང་སེམས་སྙིང་རྗེ་ངེས་པར་འབྱུང་བ་ཡིན། །འཇིག་རྟེན་སྐྱོན་དུ་ལྟ་བའི་ཆོས་དྲུག་ནི། །སྙན་གྲགས་འབྲུག་སྒྲ་འདྲ་བས་དགའ་བ་སྤང༌། །ལོངས་སྤྱོད་སྤྲིན་དང་འདྲ་བས་ཞེན་པ་སྤང༌། །ཉེ་འཁོར་རྒན་འཁོགས་བུ་འདྲ་རེ་བ་སྤང༌། །ཡུལ་ཁྱིམ་མགྲོན་ཁང་འདྲ་བས་རི་ཁྲོད་འགྲིམ། །བདེ་སྐྱིད་རྨི་ལམ་འདྲ་བས་བདེན་མ་འཛིན། །ཐམས་ཅད་བོར་ནས་འགྲོ་བས་ཆགས་ཞེན་སྐྱུངས། །དེ་ལྟར་བྱས་ན་ཇེ་བདེར་འགྱུར་བ་ཡིན། །ཆོས་བྱེད་རྣམས་ཀྱི་བྱར་དགོས་རྣམ་དྲུག་ནི། །གང་དུ་སྐྱེས་ཀྱང་གཞན་དོན་འགྲུབ་དགོས་པས། །སེམས་བསྐྱེད་སྨོན་ལམ་རྒྱ་ཆེན་སྦྱང་བར་བྱ། །སྐྱིད་ན་ཆོས་ཀྱི་བྱིན་རླབས་ཤེས་དགོས་པས། །ཕན་ཡོན་བསམས་ལ་ནན་ཏན་བརྩོན་པར་བྱ། །སྡུག་ན་སྔོན་གྱི་ལས་སུ་ཤེས་དགོས་པས། །རྒྱུ་འབྲས་བསམས་ལ་བློ་སྦྱོང་སྙིང་པོར་བྱ། །ན་ན་དགེ་སྦྱོར་རྩལ་སྦྱོང་ཤེས་དགོས་པས། །མ་ན་བ་ལ་རིག་པ་གཅུན་པར་བྱ། །རྒས་ན་བློ་སེམས་བདེ་བ་ཅིག་དགོས་པས། །གཞོན་དུས་བསགས་སྦྱོང་ལས་ལ་འབད་པར་བྱ། །ཤི་ན་བྱ་བ་རྫོགས་པ་ཅིག་དགོས་པས། །མ་ཤི་བར་ལ་འབྲེལ་ཐག་གཅད་པར་བྱ། །འདི་དག་སྙིང་ནས་བསླབ་པའི་ཆོས་སུ་སྣང༌། །གདམས་ངག་དྲུག་གིས་གནད་དུ་བརྡེག་པ་ནི། །བཟའ་མི་ཚོང་དུས་འགྲོན་པོ་ཚོགས་པ་འདྲ། །ནམ་འབྲལ་མི་ཤེས་མཐར་ཐུག་དོན་ལ་སྦྱངས། །གཉེན་འདུན་ལྕང་ཁའི་བྱིའུ་ཆུང་འདུས་པ་འདྲ། །ནམ་གྱེས་མི་ཤེས་གདུང་སེམས་འཁྲི་བ་ཆོད། །ཚེ་སྲོག་མི་རྟག་རྩྭ་ཁའི་ཟིལ་པ་འདྲ། །སྒོམ་སྒྲུབ་ཆོས་ལ་རྩོལ་བ་དྲག་ཏུ་སྐྱེད། །སྨྲ་མང་འཁྲུལ་བའི་དགྲར་ལྡང་ནེ་ཙོ་འདྲ། །ངག་འཁྱལ་བྲེ་མོའི་གཏམ་འདྲ་སྨྲ་བཅད་གྱིས། །ཆོས་སྒྲུབ་མཚོ་གླིང་ནོར་བུ་ལེན་འདྲ་བས། །སྙན་བརྒྱུད་གདམས་ངག་ལྷུག་པར་སྤེལ་མི་བྱ། །འགྲོགས་ཡུན་རིང་ན་སངས་རྒྱས་སྐྱོན་མཐོང་བས། །མི་གཞན་རྣམས་དང་གནས་མལ་གཅིག་མི་བྱ། །འདི་དག་སྙིང་གཏམ་མཆོག་ཡིན་གུས་པས་ཉོན། །ཆོས་བྱེད་རྣམས་ཀྱི་དུས་ཚོད་རྣམ་དྲུག་ནི། །མཚན་ལྡན་བླ་མ་རྣམས་དང་ཕྲད་པའི་ཚེ། །སྤྲོས་པ་གཅོད་པའི་དུས་ཡིན་ཐེ་ཚོམ་དྲིས། །རྐྱེན་ངན་ཡུལ་དང་རིག་པ་ཕྲད་པའི་ཚེ། །ཉམས་ལེན་བསྲེ་བའི་དུས་ཡིན་རྩལ་སྦྱོང་གྱིས། །ཟབ་མོའི་སྙན་བརྒྱུད་མན་ངག་རྙེད་པའི་ཚེ། །འཁྲུལ་བ་འཇིག་པའི་དུས་ཡིན་ཐོག་ཏུ་ཁོལ། །བརྩོན་འགྲུས་དྲག་པོས་སྒྲུབ་ལ་འབད་པའི་ཚེ། །བར་ཆད་འོང་བའི་དུས་ཡིན་བདུད་ལ་བརྟག །སྒྲུབ་པའི་མཐར་ཕྱིན་དངོས་གྲུབ་འོང་བའི་ཚེ། །བདུད་ཀྱི་བར་ཆད་འོང་བས་ཤིན་ཏུ་གཟབ། །གནས་ལུགས་དོན་ལ་ལྟ་བའི་རྩལ་སྦྱོང་ཚེ། །གོལ་སྒྲིབ་འོང་བའི་དུས་ཡིན་བླ་མ་བསྟེན། །འདི་དག་ཟབ་མོའི་གནད་ཡིན་ཡིད་ལ་ཟུངས། །ཚུལ་བཞིན་བསྒྲུབ་པའི་བྱ་དགོས་རྣམ་དྲུག་ནི། །ངན་སྤྱོད་འགོ་ཅན་མི་དང་འགྲོགས་མི་བྱ། །བཟང་སྤྱོད་བསླབ་དཀའ་བཤེས་གཉེན་བསྟེན་པར་བྱ། །སྣང་བ་འབྲིད་མཁས་ཡུལ་ལ་མ་ཡེངས་བྱ། །རིག་པ་ཅོལ་ཆུང་འཁྲུལ་ཕྱིར་མ་སོང་བྱ། །ཆགས་སྡང་གདོས་དྲགས་ཕྱོགས་རིས་མ་སོང་བྱ། །འཁྲུལ་སྣང་འདྲིས་སླ་ཞེན་ཆགས་རྩད་གཅོད་བྱ། །ཐ་མ་འགྱོད་པ་མེད་པའི་ཆོས་དྲུག་ནི། །ངོ་ཚ་ཁྲེལ་འཛེམ་ལྡན་པས་ཤི་ཡང་འགྱོད་པ་མེད། །མི་དགེ་སྡིག་པ་མ་བྱས་ཤི་ཡང་འགྱོད་པ་མེད། །ཆོས་ཕྱོགས་ཟས་ནོར་བཏང་བས་ཤི་ཡང་འགྱོད་པ་མེད། །བསླབ་གསུམ་གཙང་མ་བསྲུངས་པས་ཤི་ཡང་འགྱོད་པ་མེད། །དགེ་ལ་རྟག་ཏུ་བརྩོན་པས་ཤི་ཡང་འགྱོད་པ་མེད། །རང་སེམས་གནོང་འགྱོད་མེད་པས་ཤི་ཡང་འགྱོད་པ་མེད། །འདི་དག་རྣམས་དང་ལྡན་པར་བྱ་བ་གཅེས། །འབྲིང་གི་བྲོད་པ་དྲུག་དང་ལྡན་པ་ནི། །དཀོན་མཆོག་བསྟེན་པས་འཁོར་བ་སྐྱོབ་རེ་བྲོད། །ཚོགས་གཉིས་བསགས་པས་འདི་བས་བདེ་སྟེ་བྲོད། །དམ་ཚིག་བསྲུངས་པས་མཁའ་འགྲོས་བསུ་སྟེ་བྲོད། །ཡི་དམ་བར་དོར་ལམ་སྣ་འདྲེན་ཏེ་བྲོད། །བླ་མ་མཆོག་དང་འདུ་འབྲལ་མེད་དེ་བྲོད། །སེམས་ཉིད་གོམས་པས་འོད་གསལ་འཆར་ཏེ་བྲོད། །འདའ་དཀའ་འཆི་བྲོད་གདམས་པ་ཟབ་མོ་ཡིན། །རྣལ་འབྱོར་རབ་ཀྱི་འཆི་རྒྱུ་མེད་དྲུག་ནི། །རང་རིག་དགོངས་པ་ཡེ་ནས་འཆི་རྒྱུ་མེད། །རང་བྱུང་ཡེ་ཤེས་ཡེ་ནས་འཆི་རྒྱུ་མེད། །འོད་གསལ་ཆོས་ཉིད་ཡེ་ནས་འཆི་རྒྱུ་མེད། །ངར་འཛིན་རིག་བྲལ་ཡེ་ནས་འཆི་རྒྱུ་མེད། །རྒྱུ་འབྲས་ལ་དོར་ཡེ་གྲོལ་འཆི་རྒྱུ་མེད། །རེ་དོགས་གཉིས་མེད་ནམ་མཁའ་འཆི་རྒྱུ་མེད། །དེ་ལྟར་རྟོགས་ན་འཆི་བདག་བདུད་དང་བྲལ། །མ་རྟོགས་དངོས་པོར་གཟུང་བའི་སྐྱོན་དྲུག་ནི། །རང་ལ་ཡོད་པ་བཞག་ནས་གཞན་དུ་བཙལ། །སྒོམ་ཆེན་གནས་ལུགས་མ་ཤེས་མཚན་མས་བཅིངས། །ཡུལ་སྣང་བརྫུན་པར་མ་ཤེས་བདེན་པར་འཛིན། །དབྱིངས་གཅིག་གནས་ལུགས་མ་རྟོགས་སོ་སོར་འཛིན། །རང་རིག་ངོ་བོ་མ་ཤེས་མཐོ་དམན་བགྲོད། །འཁྲུལ་བའི་མངོན་ཞེན་མ་ཆོད་བདུད་ཀྱིས་བསླུས། །མ་རྟོགས་ལོག་པའི་སྐྱོན་རྣམས་བརྟགས་ཏེ་སྤང༌། །ཕྱིར་མི་ལྡོག་པའི་གདམས་ངག་རྣམ་དྲུག་ནི། །བླ་མ་བསྟེན་པས་མི་ཆོས་ཕྱིར་མི་ལྡོག །ཡུལ་གྱི་ཉེས་བསམས་མི་ཆོས་ཕྱིར་མི་ལྡོག །བདེ་སྡུག་བསམས་པས་མི་ཆོས་ཕྱིར་མི་ལྡོག །འཇིག་རྟེན་ཉེས་བསམས་མི་ཆོས་ཕྱིར་མི་ལྡོག །འཁྲུལ་བར་བལྟས་པས་མི་ཆོས་ཕྱིར་མི་ལྡོག །སྡུག་བསྔལ་འདམ་བསམས་མི་ཆོས་ཕྱིར་མི་ལྡོག །དེ་ལྟར་བསམས་ན་འཇིག་རྟེན་ཆོས་ལས་གྲོལ། །གཉེན་པོའི་མེལ་ཚེ་དྲུག་གིས་བསྐོར་བ་ནི། །ཉིན་མཚན་ཚེ་རྐུ་གཉེན་པོའི་མེལ་ཚེ་གྱིས། །དུག་ལྔས་རྒྱུད་སྲེག་གཉེན་པོའི་མེལ་ཚེ་གྱིས། །འདོད་པས་མི་ངོམས་གཉེན་པོའི་མེལ་ཚེ་གྱིས། །དྲག་པོའི་ལས་ལ་གཉེན་པོའི་མེལ་ཚེ་གྱིས། །དོན་མེད་ལས་ལ་གཉེན་པོའི་མེལ་ཚེ་གྱིས། །སྒོ་གསུམ་ཅི་སྤྱོད་གཉེན་པོའི་མེལ་ཚེ་གྱིས། །ཉོན་མོངས་དགྲ་རྐུན་གླགས་སྐབས་རྙེད་མི་འགྱུར། །ཉམས་ལེན་མི་འགྲུབ་འཆོར་ས་རྣམ་དྲུག་ནི། །འཁོས་ཆུང་གང་ཟག་མི་ཚེ་དོན་མེད་འཆོར། །གྲགས་འདོད་ཅན་དེ་མི་ཚེ་ལོ་འདོད་འཆོར། །ཟས་སྲེད་ཅན་དེ་ཟས་ཕྱིར་མུག་ལྟོར་འཆོར། །མི་རྒོད་ནོར་ཅན་ཁེ་སྤོགས་ཚོང་ལ་འཆོར། །དད་མེད་ཐོས་བསམ་ཆོས་དྲེད་རྒྱུས་ཅན་འཆོར། །ཐོས་ཆུང་བླུན་སྒོམ་ལོག་པའི་ལམ་དུ་འཆོར། །འཆོར་བ་དྲུག་པོར་མ་སོང་ཤིན་ཏུ་གཅེས། །སྐྱོན་རྣམས་བྱུང་ན་བསལ་ཐབས་ཆོས་དྲུག་ནི། །མོས་གུས་ཤོར་ན་ཡོན་ཏན་དཀའ་བས་སོམས། །གཡེང་བས་ཁྱེར་ན་རྣམ་རྟོག་གྲོགས་སུ་སློང༌། །བསྒོམས་ཀྱང་སྐྱེད་མེད་སྣ་ཚོགས་ཐབས་ཀྱིས་ཆུན། །འབྱུང་འཁྲུགས་ན་ཚ་རྒྱུ་རྐྱེན་འབྲས་བུར་རྟོགས། །འདུ་བ་ཡལ་ན་ཚོགས་དང་གཏོར་མ་རེམ། །སེམས་བསྐྱེད་ཤོར་ན་གཉེན་པོའི་བསྐྱར་ལ་བླང༌། །དེ་ཡིས་གེགས་རྣམས་གང་བྱུང་སེལ་བ་ཡིན། །རྒྱུད་ལ་སྦྱོར་བ་ཕྱི་ནང་གནད་དྲུག་ནི། །ནང་དུ་བདག་འཛིན་འཁྲི་བ་གཅད་པ་གནད། །ཕྱི་རུ་ཡུལ་སྣང་ཆོས་སྐུར་འཁྱེར་བ་གནད། །བར་དུ་འཛིན་རྟོག་གྲོགས་སུ་བླང་བ་གནད། །ཡར་ལ་ལྟ་དགོངས་ཟད་པར་བྱེད་པ་གནད། །མར་ལ་ཆོས་སྤྱོད་གཞུང་བཞིན་བསྲང་བ་གནད། །བར་དུ་ཡེངས་མེད་ཤེས་བཞིན་བསྲུང་བ་གནད། །དེ་དག་འཛོམ་ན་ཐར་ལམ་མྱུར་དུ་བགྲོད། །སངས་རྒྱས་འདོད་ལ་གཅེས་པ་རྣམ་དྲུག་ནི། །སྒྱུ་མར་རྟོགས་ཀྱང་རྒྱུ་འབྲས་འཛེམ་པ་གཅེས། །ངེས་ཤེས་ཐོབ་ཀྱང་ཁྱད་གསོད་མེད་པ་གཅེས། །གྲོགས་སུ་འཆར་ཡང་དབེན་པར་གནས་པ་གཅེས། །སྒོམ་མེད་གོ་ཡང་རྣམ་རྟོག་འདུལ་བ་གཅེས། །མཉམ་རྗེས་མེད་ཀྱང་ཐ་མལ་མ་ཤོར་གཅེས། །གནས་ལུགས་རྟོགས་ཀྱང་ལུང་རིགས་ཞུན་ཐར་གཅེས། །མཐོན་པོར་ཕྱིན་ཡང་འདི་དྲུག་མ་བྲལ་གཅེས། །མཐར་འཛིན་འཆིང་བར་བསྟན་པའི་ཆོས་དྲུག་ནི། །ཆགས་ན་ཡི་དམ་ཡིན་ཡང་འཆིང་བའི་རྒྱུ། །བཟུང་ན་མཐོན་པོའི་གྲུབ་མཐའ་འང་འཆིང་བའི་རྒྱུ། །འཛིན་ན་སྙིང་རྗེ་ཡིན་ཡང་འཆིང་བའི་རྒྱུ། །རློམ་ན་དགོངས་པ་ཟབ་ཀྱང་འཆིང་བའི་རྒྱུ། །ཞེན་ན་ཉམས་རྟོགས་ཡིན་ཡང་འཆིང་བའི་རྒྱུ། །མྱོང་འཛིན་གཉིས་མེད་ཡིན་ཡང་འཆིང་བའི་རྒྱུ། །ཐ་མལ་ངར་འཛིན་ནོར་རྫས་སྨོས་ཅི་དགོས། །དེས་ན་གང་ལའང་ཞེན་ཆགས་མེད་པ་གཅེས། །འཆིང་བའི་སྒྲོག་དྲུག་བཅད་པའི་མན་ངག་ནི། །ནོར་རྫས་མངོན་ཞེན་སྤེལ་སྲུང་སྒྲོག་གིས་འཆིང༌། །རིགས་རྒྱུད་མངོན་ཞེན་ཁེ་གྲགས་སྒྲོག་གིས་འཆིང༌། །རྣམ་གཡེང་ཆགས་ཞེན་འདུ་འཛིའི་སྒྲོག་གིས་འཆིང༌། །ཐ་སྙད་ཚིག་ཞེན་ང་རྒྱལ་སྒྲོག་གིས་འཆིང༌། །ཉམས་རྟོགས་མངོན་ཞེན་རློམ་སེམས་སྒྲོག་གིས་འཆིང༌། །ཆོས་སྤྱོད་མངོན་ཞེན་གཉེན་པོའི་སྒྲོག་གིས་འཆིང༌། །སྒྲོག་དང་བྲལ་བའི་ཆོས་པ་དཀའ་བར་སྣང༌། །ཆོས་བྱེད་རྣམས་ཀྱི་འོང་བའི་ཆོས་དྲུག་ནི། །ཆགས་སྡང་སྐྱེ་བའི་ཡུལ་ནས་ཕྱིར་བྲོས་དང༌། །ཆོས་སྤྱོད་དགེ་སྦྱོར་ངང་གིས་འཕེལ་བར་འོང༌། །ཀོ་ལོང་སྡོམ་པའི་ཟུར་མགོ་མ་རྣོ་དང༌། །འགྲོགས་པ་རྒྱུན་རིང་འཐབ་རྩོད་ཉུང་བར་འོང༌། །བླ་མ་དམ་པའི་གསུང་བཞིན་གུས་བསྒྲུབ་དང༌། །ཐུགས་ལ་འདོགས་ཤིང་བྱིན་རླབས་དངོས་གྲུབ་འོང༌། །རང་གི་སྣ་ཐག་གཞན་ལ་མ་གཏད་དང༌། །ཤིན་ཏུ་སྐྱིད་ཅིང་སྒྲུབ་པ་མཐར་ཕྱིན་འོང༌། །སྤྱོད་རྩིང་བོར་ལ་ཞི་དུལ་ལྡན་གྱིས་དང༌། །ཀུན་དང་མཐུན་ཞིང་ཡིད་དུ་འཐད་པར་འོང༌། །ཕྱོགས་འཛིན་བོར་ལ་བཟང་པོའི་སེམས་གཟུང་དང༌། །ཚད་མར་འཛིན་ཅིང་ཀུན་གྱིས་བསྟོད་པར་འོང༌། །ངན་པའི་རེ་བ་རྣམ་དྲུག་སྤོང་བ་ནི། །བྱས་པ་མེད་པར་ཕན་འདོགས་འོང་དུ་རེ། །དཀའ་བ་མ་སྤྱད་སྐྱིད་པ་འོང་དུ་རེ། །སྒྲུབ་པ་མེད་པར་དངོས་གྲུབ་ཐོབ་ཏུ་རེ། །མི་ཆོས་མ་བོར་ལྷ་ཆོས་འོང་དུ་རེ། །ཉམས་སུ་མ་བླངས་བཤད་རིངས་གཞན་ཕན་རེ། །ཅུང་ཟད་བསྒྲུབས་ལ་བསྙེན་བཀུར་འོང་དུ་རེ། །ཐར་པའི་ལམ་དང་རྒྱ་མཚོའི་ཤར་ནུབ་བཞིན། །རང་བཞིན་ངན་པའི་ཀུན་སྤྱོད་རྣམ་དྲུག་ནི། །བཟའ་བཏུང་བགོ་ན་རང་བཞིན་ཆེ་བར་འདོད། །ཉོ་ཚོང་བྱེད་ན་རྒྱལ་ཁ་རང་ལ་འདོད། །གོས་གོན་ཚེ་ན་རང་དྲོ་འཇམ་པ་འདོད། །རང་འཆང་བཟང་ལ་གཞན་གཏོང་ངན་པར་འདོད། །ཞག་གཅིག་གནས་ལའང་རང་སྐྱིད་ས་ཕྱོགས་འདོད། །ཆོས་དང་བླ་མས་ཉེ་འབྲེལ་གཅེས་པར་འདོད། །དེ་འདྲའི་མི་ལ་ཐར་པའི་མྱུ་གུ་སྐམ། །མ་ནོར་ལམ་དུ་འཇུག་པའི་ཆོས་དྲུག་ནི། །དགོན་པའི་ས་བཟུང་ང་དང་བདག་མ་འཛིན། །འཚོ་བའི་རྐྱེན་བཟུང་ང་དང་བདག་མ་འཛིན། །མཁས་བཙུན་ཚུལ་བཟུང་མཐོན་པོའི་ཆ་མ་འཛིན། །མ་དད་སྤྱོད་སྤངས་གཞན་གྱི་ངོ་མ་བསྲུང༌། །སྙིང་རྗེས་ཕན་ཐོགས་ཁྱིམ་ཐབ་ནོར་མ་བསྲེལ། །ཕྱོགས་མེད་སྦྱིན་ཐོང་ཡུས་དང་ལན་མ་རེ། །ཉམས་ལེན་རང་རྐྱ་ཐུབ་པའི་ཆོས་དྲུག་ནི། །ངོ་ལྐོག་མེད་པའི་ཚུལ་ཁྲིམས་རྐྱེན་ངན་ཐུབ། །གདམས་ངག་ཁོང་ཁྲོལ་གང་ཡང་ཉམས་ལེན་ཤེས། །བར་ཆད་བགེགས་སེལ་ནད་གདོན་འདོན་ལ་མཁས། །ཐོས་བསམ་མཐའ་ཆོད་གཞན་ལ་དྲི་རྒྱུ་མེད། །གོལ་སྒྲིབ་མཐའ་ཆོད་ཐེག་པ་མཐོ་དམན་ཤེས། །བདུད་ཀྱིས་མི་ཚུགས་གོ་ཆ་ལྡན་པའོ། །ངོ་ཚ་རྣམ་དྲུག་སྤང་བར་གདམས་པ་ནི། །ནོར་རྫས་ཡོ་བྱད་སོག་ན་ངོ་ཚའི་གནས། །གོས་བཟང་ཕྱི་འཆོར་ཆེ་ན་ངོ་ཚའི་གནས། །རྒྱན་དང་སྒེག་ཆོས་བྱེད་པ་ངོ་ཚའི་གནས། །ཟང་ཟིང་གཡེང་བ་བསྒྲུབས་ན་ངོ་ཚའི་གནས། །ཆོས་མིན་བྱ་བ་མང་པོ་ངོ་ཚའི་གནས། །ཆེ་ཁྱད་ང་རྒྱལ་དྲེགས་པ་ངོ་ཚའི་གནས། །སྙིང་ནས་ཆོས་མཛད་རྣམས་ཀྱིས་སྤང་བར་འཚལ། །གོང་མའི་རྣམ་ཐར་བསྟེན་པའི་ཆོས་དྲུག་ནི། །ཡེང་མེད་མི་རྟག་འཆི་བས་སྐུལ་མ་བཏབ། །འཁོར་བ་སྡུག་བསྔལ་ཤེས་པས་རྒྱབ་ཏུ་བོར། །རྒྱལ་སྲིད་ལོངས་སྤྱོད་མཆིལ་མ་བཞིན་དུ་བོར། །དད་བརྩོན་རྣམ་དག་བསྟན་པའི་ཆོས་སྒོར་ཞུགས། །དགེ་བའི་བཤེས་བཙལ་ཐོས་བསམ་སྤྲོས་པ་བཅད། །དཀའ་ཐུབ་ཆེར་སྤྱད་ལུས་སྲོག་འབེན་དུ་བཙུགས། །དེ་ལྟར་མཛད་པས་གྲུབ་པ་བརྙེས་པ་དང༌། །དེ་ལ་ཚད་བཙུགས་སྒྲུབ་ལ་འབད་པར་བྱ། །དེ་ལས་གཞན་དོན་ཆོས་དྲུག་འབྱུང་བ་ནི། །ཐུགས་རྗེ་འབྱོངས་པས་ཉེ་རིང་མེད་པར་བརྩེ། །རྟོགས་པ་ཚད་ཕྱིན་བདག་འཛིན་འཁྲུལ་བ་ཞིག །རྒྱུད་ཚོད་ཤེས་པས་རྟེན་འབྲེལ་ཐབས་ལ་མཁས། །ཆོས་ཉིད་གྲོལ་བས་ཅི་སྣང་གྲོགས་སུ་འཆར། །བྱིན་རླབས་ཞུགས་པས་གཞན་སྣང་བསྒྱུར་ནུས་ཤིང༌། །གདུལ་བྱ་དུས་བབ་དད་ལྡན་འགྲོ་བ་འདུ། །ཕྱི་ནང་རྟེན་འབྲེལ་གཅིག་ཏུ་འགྲིགས་པ་ཡིན། །དགེ་སྦྱོར་རྒྱུད་ལ་མ་ཁེལ་སྐྱོན་དྲུག་ནི། །ཉམས་ལེན་མེད་ན་ཤེས་ཀྱང་འཁོར་བར་འཁྱམ། །འབེན་དྲུང་བཞག་ནས་གཞན་དུ་རྒྱང་མདའ་འཕེན། །ཇག་པ་ཤར་རི་ནུབ་རིར་རམ་མདར་རྒྱུག །རྐུན་མ་ནགས་བྲོས་རྐང་རྗེས་བྱེ་རིར་བཅད། །ཆུས་ཁྱེར་རམ་མདའ་སྐམ་ལ་རྒྱུག་པ་སྟེ། །གྱེར་བའི་སྨྲང་ཡོད་མདོས་གཏོང་ས་མི་ཤེས། །དེ་འདྲའི་གང་ཟག་བདེ་ཆེན་ས་དང་རིང༌། །དཀའ་བའི་སྐྱོན་དྲུག་འབྱུང་བར་བསྟན་པ་ནི། །འཁོར་བར་འདུན་ལ་ཡང་དག་དད་པ་དཀའ། །ཁྲེལ་འཛེམ་མེད་པའི་བསླབ་གསུམ་བསྲུང་བ་དཀའ། །མཚན་ལྡན་མ་མཇལ་ཐར་ལམ་ཚུད་པ་དཀའ། །ཐབས་ལམ་མ་ཆུན་ཡེ་ཤེས་འཆར་བར་དཀའ། །མཐར་འཛིན་མ་གྲོལ་ལྟ་བ་རྟོགས་པར་དཀའ། །མངོན་ཤེས་མེད་པའི་གཞན་དོན་འབྱུང་བར་དཀའ། །དཀའ་བ་ལགས་པས་ཀུན་གྱིས་འགྲུབ་པ་དཀོན། །ཉམས་ལེན་ཡེངས་ཐུབ་གོམས་པ་རྣམ་དྲུག་ནི། །དལ་འབྱོར་དྲན་པས་དོན་མེད་བྱ་བ་སྤང༌། །མི་རྟོག་ཡེངས་མེད་ལེ་ལོའི་དགྲ་དང་བྲལ། །དངོས་གྲུབ་རྙེད་པས་བརྩོན་པ་རྒྱུན་མི་འཆད། །ཉམས་རྟོགས་འཕེལ་བས་སྒོམ་སྒྲུབ་བྲོད་པ་སྐྱེ། །རིག་པ་དབང་ཐོབ་ཡེངས་རྐྱེན་ཆོས་ཉིད་འཆར། །མདོ་རྒྱུད་ཆོས་དང་རང་རྒྱུད་འདྲེས་པའོ། །མཐར་ཕྱིན་བར་དུ་བསྟེན་པའི་ཆོས་དྲུག་ནི། །ཉེ་འབྲེལ་བོར་ལ་ཆོས་ལྡན་གྲོགས་བཟང་བསྟེན། །སྡིག་གྲོགས་བོར་ལ་མཁས་བཙུན་བླ་མ་བསྟེན། །འདུན་གྲོས་བོར་ལ་གཏན་གྱི་སྐྱིད་འདུན་ཆོས། །ཐོས་བསམ་བསྟེན་ལ་རྒྱུད་ལ་ཅི་འདྲིས་གྱིས། །གྲོང་ཡུལ་སྤངས་ལ་རི་ངོགས་དབེན་པ་བསྟེན། །གདམས་པ་ཚོལ་ལ་བརྩོན་པས་སྒྲུབ་པ་གྱིས། །དེ་ལྟར་བྱས་ན་དངོས་གྲུབ་མྱུར་དུ་ཐོབ། །ཕན་གནོད་འདྲེས་མར་སོང་བ་རྣམ་དྲུག་ནི། །ཡོན་ཏན་མི་སྐྱེ་བླ་མ་བསྟེན་པ་དང༌། །སྲོལ་དུ་མི་ཚུད་སློབ་མ་བསྟེན་པ་དང༌། །ཆོས་བརྒྱད་མ་བྲལ་སྒྲུབ་པ་བྱེད་པ་དང༌། །ལོག་འཚོའི་རྙེད་འཚོལ་གཞན་དོན་བྱེད་པ་དང༌། །བསྲུང་སེམས་མེད་པའི་སྡོམ་ཁྲིམས་ནོད་པ་དང༌། །དགེ་སྡིག་འཆོལ་བའི་གསང་སྔགས་སྤྱོད་པ་རྣམས། །ཕན་གནོད་འདྲེས་པས་ཆོས་ཀྱི་གཟུགས་བརྙན་ཡིན། །ལོག་གནོན་གཟེར་བུ་ལྟ་བུའི་ཆོས་དྲུག་ནི། །གནོད་བྱེད་དགྲ་སྡང་བཏུལ་ཞིང་སླར་མང་བས། །ལོག་གནོན་བདག་འཛིན་གདུག་པ་འདུལ་བ་གནད། །འདོད་ཡོན་སྤྱད་ཅིང་ཞེན་པ་སླར་འཕེལ་བས། །ལོག་གནོན་བཙན་ཐབས་ཞེན་པ་གཅོད་པ་གནད། །དལ་ཚོགས་ལོང་གཏམ་སྨྲས་ཤིང་སླར་མང་བས། །ལོག་གནོན་མི་སྨྲ་གཅིག་པུར་འདུག་པ་གནད། །གཞན་སེམས་གཟུང་འཛིན་བྱར་དགོས་སླར་མང་བས། །ལོག་གནོན་གར་བབས་ངང་ལ་སྐྱུར་བ་གནད། །རང་སེམས་སྒྲིམས་ཤིང་འཇུར་བུ་སླར་མང་བས། །ལོག་གནོན་རང་བབས་ངང་དེར་གློད་པ་གནད། །བྱ་བྱེད་སྤྲོས་པ་བྱས་ཤིང་སླར་མང་བས། །ལོག་གནོན་ཅོག་གཞག་རང་བབས་གཏོང་བ་གནད། །འདི་རྣམས་ལྡན་ན་རེ་དོགས་གཉིས་འཛིན་འཇིག །རང་རྒྱུད་ཆོས་ལ་འབྱོར་བའི་རྟགས་དྲུག་ནི། །འདོད་ཡོན་བདུད་ཤེས་འཁོར་བར་ཞེན་ལོག་རྟགས། །ཅི་བྱས་ལམ་འགྱུར་བྱིན་རླབས་ཞུགས་པའི་རྟགས། །རིག་པ་དབང་བསྒྱུར་དངོས་གྲུབ་མཆོག་ཐོབ་རྟགས། །གཞན་གྱིས་མི་འགྱུར་ལྟ་དགོངས་སྐྱེས་པའི་རྟགས། །བླ་མ་མཇལ་སྤྲོ་མོས་གུས་ཞུགས་པའི་རྟགས། །ཚེ་འདི་བློས་ཐོངས་ཆོས་ཀྱིས་ཕན་ཐོགས་རྟགས། །རྟགས་ཆེན་དྲུག་ལྡན་སྐྱེས་བུ་དམ་པ་ཡིན། །མི་འཇིགས་རྣམ་དྲུག་དགོས་པར་བསྟན་པ་ནི། །ཟབ་དོན་ཉམས་བླངས་ངན་རྟོག་དགྲས་མི་འཇིགས། །སེམས་ཉིད་དོན་བལྟས་ཆོས་བརྒྱད་དགྲས་མི་འཇིགས། །ཆོས་སྐུ་རྩལ་འབྱོངས་གཟུང་འཛིན་དགྲས་མི་འཇིགས། །གཞི་མེད་ལམ་བླངས་སྒྲིབ་གཉིས་དགྲས་མི་འཇིགས། །བདེ་ཆེན་ཉམས་བླངས་སྡུག་བསྔལ་དགྲས་མི་འཇིགས། །ཕྱོགས་བྲལ་ཉམས་བླངས་རེ་དོགས་དགྲས་མི་འཇིགས། །དེ་དག་གང་ལྡན་བྱས་པ་དོན་ཆེན་འགྲུབ། །ཆོས་ལ་ཞུགས་པའི་སྤང་བླང་ཆོས་དྲུག་ནི། །ཤེས་བཞིན་མ་བསྟེན་སྤྱོད་ལམ་ཆོས་མི་འབྱོར། །མཐུན་འཇུག་མ་སྤངས་དགེ་སྦྱོར་སྲང་མི་ཚུད། །གནད་ཀྱིས་མ་གཅུན་ཉམས་མྱོང་དྲོད་མི་སྐྱེ། །དུས་ལ་མ་བབས་གཞན་དོན་ཕན་མི་ཐོགས། །ནུས་མཐུ་མ་གྲུབ་བར་ཆད་རྐྱེན་མི་སོལ། །ཟུང་འཇུག་མ་བསླངས་ཚེ་གཅིག་སངས་རྒྱས་མེད། །དེ་བས་དགེ་སྦྱོར་གནད་དུ་འགྲོ་བ་གཅེས། །ངན་པའི་འདུ་ཤེས་རྣམ་དྲུག་སྤང་བ་ནི། །བླ་མ་མིར་མཐོང་བྱིན་རླབས་སྟོར་བས་ངན། །གྲོགས་ལ་དགྲར་ཤེས་དམ་ཚིག་རལ་བས་ངན། །རང་ཉིད་ཆེ་ཕྱིར་ཆོས་ལམ་རིང་བས་ངན། །གདམས་ངག་ཟོང་ཚོང་ལོག་འཚོ་འདྲེས་པས་ངན། །ཡི་དམ་རྐྱེན་བཟློག་ལམ་སྣ་སྟོར་བས་ངན། །ཆོས་སྤྱོད་ནོར་འཚོལ་ཐར་ལམ་སྟོར་བས་ངན། །ངན་པ་དྲུག་བྲལ་སྒྲུབ་པ་ཤིན་ཏུ་གཅེས། །ཐར་ལམ་རང་བཞིན་མ་དྲན་ཆོས་དྲུག་ནི། །ཡུལ་ལ་ཡེངས་པས་མོས་གུས་མ་དྲན་དང༌། །མུ་ལྟོ་ཟས་འཚོལ་དཀོན་མཆོག་མ་དྲན་དང༌། །གཤིས་ངན་སྦུབས་ཐུང་དམ་ཚིག་མ་དྲན་དང༌། །མིག་འགྲིབས་སྙིང་མེད་སྡུག་བསྔལ་མ་དྲན་དང༌། །རྫས་སྲེད་རྙེད་འཚོལ་དགེ་བ་མ་དྲན་དང༌། །ཞེ་སྡང་དུག་སེམས་སེམས་བསྐྱེད་མ་དྲན་དང༌། །དོན་མེད་འཕྱལ་བས་ངན་སོང་མ་དྲན་དང༌། །འདི་དྲུག་ལྡན་པས་ཡུན་རིང་འཁྱམས་པ་ཡིན། །གདམས་ངག་རྣམ་དྲུག་སྐུལ་མ་གདབ་པ་ནི། །དམ་པ་རྣམས་ཀྱི་རྣལ་འབྱོར་ཕ་ནོར་ཡིན། །སྒྲུབ་པ་སྙོམ་ལས་ཕྱི་བཤོལ་མི་བཞག་འཚལ། །རྣམ་རྟོག་འཆར་སྒོམ་ཤེས་རབ་བུད་ཤིང་ཡིན། །དམིགས་གཏད་སེམས་འཛིན་མཆོག་ཏུ་མི་འཛིན་འཚལ། །སྡུག་བསྔལ་རྐྱེན་ངན་དགེ་བའི་སྐུལ་མ་ཡིན། །མྱ་ངན་སྨྲེ་སྔགས་སྤོང་བློ་མི་བགྱིད་འཚལ། །དུག་ལྔར་སྣང་བ་ཡེ་ཤེས་གསང་ལམ་ཡིན། །དགྲ་སྡང་ཚོགས་ལྟས་ལོག་པར་མི་གཟུང་འཚལ། །བར་ཆད་སྣ་ཚོགས་དངོས་གྲུབ་སྔ་ལྟས་ཡིན། །འཁུ་འཕྲིག་ངན་རྟོག་ཞེ་སྡང་མི་བགྱིད་འཚལ། །འཁོར་བར་སྣང་བ་རྒྱལ་བའི་ཞིང་ཁམས་ཡིན། །འཁྲུལ་སྣང་གཉིས་འཛིན་བདེན་ཞེན་མི་འཆའ་འཚལ། །བསླད་པ་དྲུག་གིས་ཆོས་ཉིད་གོལ་བ་ནི། །གནས་ལུགས་རྒྱ་ཡན་ཕྱོགས་མེད་ཡིན་པ་ལ། །ཞེ་འདོད་བློ་ཡི་རྟོག་པ་བྱུང་བས་བསླད། །ཆོས་ཉིད་སྨྲ་བསམ་བརྗོད་ལས་འདས་པ་ལ། །ཡོད་མེད་མཐར་འཛིན་སྒྲོ་སྐུར་བཏབ་པས་བསླད། །སེམས་ཉིད་གཉིས་མེད་སྐྱེ་འགག་མེད་པ་ལ། །སྐྱེ་ཤིར་འཛིན་པའི་འདུ་ཤེས་བསྐྱེད་པས་བསླད། །ཡུལ་སྣང་སེམས་ཉིད་སྟོང་པའི་མེ་ལོང་ལ། །ཆགས་སྡང་གཉིས་འཛིན་བདེན་ཞེན་ཞུགས་པས་བསླད། །དོན་དམ་སྤྲོས་པའི་མཚན་མས་དབེན་པ་ལ། །བདེན་འཛིན་དོན་གྱི་ཐེ་ཚོམ་བྱས་པས་བསླད། །གནས་ལུགས་ཀུན་གཞི་ཕྱོགས་མེད་རྟེན་འབྲེལ་ལ། །གཟུང་འཛིན་འཁྲུལ་བའི་བག་ཆགས་འགོས་པས་བསླད། །ལོག་པའི་འཚོ་བ་རྣམ་དྲུག་སྤང་བ་ནི། །ཚུལ་འཆོས་བསླུ་བྲིད་རྙེད་པ་ལོག་འཚོ་ཡིན། །ཁ་གསག་མགོ་སྐོར་རྙེད་པ་ལོག་འཚོ་ཡིན། །ཞེན་འདོད་གཞོགས་སློང་བྱེད་པ་ལོག་འཚོ་ཡིན། །ཆོས་དཔག་ངན་ཁྲམ་བྱེད་པ་ལོག་འཚོ་ཡིན། །ཐོས་བསམ་རྙེད་པ་འཚོལ་བ་ལོག་འཚོ་ཡིན། །ནོར་རྫས་ཐ་མལ་སྤྱོད་པ་ལོག་འཚོ་ཡིན། །ཚུལ་བཞིན་བསྒྲུབ་པས་དེ་དག་སྤངས་ན་ལེགས། །ཆོས་སྤྱིའི་གདམས་ངག་རྣམ་དྲུག་བསྟན་པ་ནི། །མས་འཛེག་ཀུན་སྤྱོད་གཙང་བ་གདམས་ངག་ཡིན། །སེམས་བསྐྱེད་ཚད་མེད་བཞིས་སྦྱངས་གདམས་ངག་ཡིན། །གང་ཡང་ཟུང་འཇུག་ཉམས་ལེན་གདམས་ངག་ཡིན། །ས་ལམ་ཟབ་མོའི་གནད་བཙལ་གདམས་ངག་ཡིན། །ལྟ་བ་སེམས་ཉིད་མཐའ་གྲོལ་གདམས་ངག་ཡིན། །ཕྱོགས་མེད་ཐོས་བསམ་བྱེད་པ་གདམས་ངག་ཡིན། །རེ་ཐག་ཆོད་པའི་གདམས་ངག་རྣམ་དྲུག་ནི། །ཁྲེལ་མེད་མི་ལ་སྲུང་སྡོམ་རེ་ཐག་ཆོད། །སྙིང་རུས་མེད་ལ་སྒྲུབ་པ་རེ་ཐག་ཆོད། །དད་གུས་མེད་ལ་བྱིན་རླབས་རེ་ཐག་ཆོད། །ཤེས་རབ་མེད་ལ་རྟོགས་པ་རེ་ཐག་ཆོད། །སྙོམ་ལས་ཅན་ལ་གྲུབ་རྟགས་རེ་ཐག་ཆོད། །བསམ་ངན་མི་ལ་ཕན་སེམས་རེ་ཐག་ཆོད། །བསླབ་པའི་གོ་རིམ་རྣམ་དྲུག་བསྟན་པ་ནི། །འཇུག་སྒོ་དང་པོ་འབྲི་ཀློག་སྒྲ་ཚད་བསླབ། །གཉིས་པར་ཁྲིམས་བསྲུང་སྡེ་སྣོད་ཐོས་བསམ་བྱ། །གསུམ་པར་ལམ་འཇུག་བླ་མ་དམ་པ་བསྟེན། །བཞི་པར་མཉེས་བྱ་སྙན་བརྒྱུད་དམ་པ་ཉོན། །ལྔ་པར་བསྒྲུབ་བྱ་མཐར་ཕྱིན་བརྩོན་འགྲུས་བརྩམ། །དྲུག་པར་གཞན་དོན་སྐྱོ་ངལ་མེད་པར་བྱ། །དེ་རྣམས་རྗེས་འཇུག་སྐྱེས་བུ་དམ་པའི་སྲོལ། །སྐལ་བཟང་སློབ་མ་སྐྱོང་བའི་ཆོས་དྲུག་ནི། །དད་ཅན་གང་མོས་རྗེས་སུ་འཛིན་ཤེས་དང༌། །བརྩོན་འགྲུས་བྱ་བྱེད་མི་གཞུག་ལམ་དགོད་ཤེས། །ཐོས་བསམ་ཚིག་འབྱམས་མི་གཞུག་སྒྲུབ་ལ་འཛུད། །རྙེད་འཚོལ་ཡོན་ཏན་མི་སློབ་དགེ་སྦྱོར་འཛུད། །གསོག་བྲུན་ནོར་སོག་མི་སློབ་ཆོག་ཤེས་བསླབ། །ཚེ་འདིའི་གྲོས་འདུན་མི་སྦྱོར་ཆོས་མགོ་འདོན། །དེ་དག་ཐབས་མཁས་བཤེས་གཉེན་བཟང་པོའི་ལུགས། །དྲན་པའི་བྱ་ར་བཏང་བའི་ཆོས་དྲུག་ནི། །ཚེ་འདིར་ཤོར་རམ་དྲན་པའི་བྱ་ར་བཏང༌། །ལེ་ལོས་གཡེངས་སམ་དྲན་པའི་བྱ་ར་བཏང༌། །གོལ་སྒྲིབ་བྱུང་ངམ་དྲན་པའི་བྱ་ར་བཏང༌། །འཁྲུལ་རྟོག་ཤོར་རམ་དྲན་པའི་བྱ་ར་བཏང༌། །འཆལ་གཏམ་ཤོར་རམ་དྲན་པའི་བྱ་ར་བཏང༌། །ཐ་མལ་ལུས་སམ་དྲན་པའི་བྱ་ར་བཏང༌། །ཆོས་མཛད་རྣམས་ཀྱི་བྱ་བ་རྣམ་དྲུག་ནི། །ཚེ་ལ་ལོང་མེད་མྱུར་དུ་འགྲོ་རྩིས་བྱ། །ལས་འབྲས་ཆེ་ཕྲ་དགེ་སྡིག་བླང་དོར་བྱ། །གཞན་དོན་འགྲུབ་དཀའ་རང་དོན་མ་ཤོར་བྱ། །ཤེས་བྱ་ཐུག་མེད་ཚིག་འབྱམས་མ་ཤོར་བྱ། །མི་ཤེས་བླུན་སྒོམ་རྨོངས་པར་མ་ཤོར་བྱ། །མཁས་བཙུན་བཟང་འདོད་ང་རྒྱལ་མ་སོང་བྱ། །སྒྲུབ་འདོད་ལེགས་པར་བསམ་པའི་ཆོས་དྲུག་ནི། །ཚེ་འདི་མ་བྲལ་ཕ་ཡུལ་བློས་མི་ཐོངས། །འདོད་ཞེན་མ་ལོག་དབེན་པར་སྡོད་མི་ཚུགས། །གྲུབ་མཐའ་མ་གྲོལ་རང་རྒྱུད་ཆོས་ཀྱིས་འཆིང༌། །བསམ་གཏན་མ་སྐྱེས་སྟན་ལ་འདུག་མི་ཚུགས། །གཉེན་པོ་བྲལ་བས་རྣམ་གཡེང་རྐྱེན་མི་ཐུབ། །བརྟུལ་ཞུགས་མཆོག་འཛིན་གཉེན་པོ་དུག་ཏུ་འགྲོ། །དེ་བས་འདི་དག་ལེགས་པར་བསམ་པ་གཅེས། །ཕྱི་ནང་རྟགས་དྲུག་ལེགས་པར་བསྟན་པ་ནི། །དཔྱོད་ལྡན་མི་དཔེས་གང་བརྩམས་མཐར་ཕྱིན་དང༌། །རྟོགས་ལྡན་མི་དཔེས་གཏམ་ལ་བསྐྱར་ཐུབ་དང༌། །གོ་རིག་ལྡན་པས་གང་ཡང་ཤེས་པ་དང༌། །ངེས་ཤེས་སྐྱེས་ཏེ་དཀའ་སྤྱད་ནུས་པ་དང༌། །ཆོས་དང་འདྲེས་ཏེ་རང་རྒྱུད་དུལ་བ་དང༌། །ཤེས་རབ་ཅན་དེ་ཐོས་པས་མི་ངོམས་དང༌། །ནང་གི་རྟགས་ཀྱིས་ཕྱི་རོལ་ཤར་བ་ཡིན། །གཟུང་འཛིན་མདུད་པ་དགྲོལ་བའི་ཆོས་དྲུག་ནི། །ཆགས་སྡང་སྐྱེས་དུས་སེམས་ལ་བལྟས་ཏེ་དགྲོལ། །དུག་ལྔ་སྐྱེས་དུས་རང་ངོ་བལྟས་ཏེ་དགྲོལ། །ཟུག་རྔུ་བྱུང་དུས་བདེ་ཆེན་བསྒོམས་ཏེ་དགྲོལ། །རྣམ་རྟོག་འཐོར་དུས་རང་བཞིན་བཅད་དེ་དགྲོལ། །ངལ་དུབ་སྐྱེས་དུས་ལྷོད་དེ་གློད་དེ་དགྲོལ། །འཐིབས་ཤིང་ལྟེང་ཚེ་གསལ་དག་ངར་བཅས་དགྲོལ། །བསྒྲུབ་པའི་ཆོས་ལ་བཅས་པ་རྣམ་དྲུག་ནི། །གདམས་ངག་ཟབ་མོ་ངོ་སྤྲོད་བཅས་པ་དགོས། །ངོ་སྤྲོད་གོང་མའི་ཕྱག་བཞེས་བཅས་པ་དགོས། །ཕྱག་བཞེས་དེ་ཡང་ཉམས་མྱོང་བཅས་པ་དགོས། །ཉམས་མྱོང་དྲོད་ཚད་རྟགས་དང་བཅས་པ་དགོས། །དྲོད་རྟགས་ཐོབ་བྱའི་འབྲས་བུར་བཅས་པ་དགོས། །འབྲས་བུ་གཞན་དོན་མཛད་པར་བཅས་པ་དགོས། །ཡ་བྲལ་ལམ་དེ་གོལ་བའི་གནས་སུ་འཁྱོག །གཅེས་པའི་གདམས་ངག་རྣམ་དྲུག་བསྟན་པ་ནི། །དགེ་སྦྱོར་གང་བྱེད་ཐུན་ལས་མི་འདའ་གཅེས། །བཀའ་ལུང་ཆོས་དང་རང་རྒྱུད་འདྲེས་པ་གཅེས། །བསམ་གཏན་རྐྱེན་ཐུབ་རང་རྒྱུད་མི་འཁྲུགས་གཅེས། །ལྟ་བ་མཐའ་གྲོལ་ཕྱོགས་འཛིན་མེད་པ་གཅེས། །ཆོས་ཉིད་ངང་དང་འདུ་འབྲལ་མེད་པ་གཅེས། །ཅིར་སྣང་ཐབས་ལ་ཡེ་ཤེས་སྐྱེ་བ་གཅེས། །ཡང་དག་ཆོས་ལ་གྱིས་པ་རྣམ་དྲུག་ནི། །འཁོར་བའི་ཉེས་ལྟོས་ཞེན་པ་ལོག་པ་གྱིས། །བདེན་མེད་རྩལ་སྦྱངས་སྒྱུ་མར་ཤེས་པ་གྱིས། །བྱང་ཆུབ་སེམས་བསྐྱེད་གཞན་དོན་ལྟོས་མེད་གྱིས། །དགོངས་པ་བློ་འདས་འཁོར་འདས་ཕྱེད་པ་གྱིས། །རྣམ་རྟོག་གང་ཤར་རང་གྲོལ་ཡེ་ཤེས་གྱིས། །བྱིན་རླབས་རང་འབར་གཞན་སྣང་བསྒྱུར་བ་གྱིས། །སྒོམ་པའི་གོལ་ས་བཅད་པའི་ཆོས་དྲུག་ནི། །འཕྲོ་རྒོད་མ་སོང་སྤྲོས་མེད་དོན་ལ་གནས། །ལྟེང་པོར་མ་སོང་རིག་པའི་གསལ་ངར་གདགས། །ཕྱལ་བར་མ་སོང་དྲན་པའི་རྩི་ཡིས་གཟུང༌། །ཧད་པོར་མ་སོང་བདེ་གསལ་ཉམས་དང་ལྡན། །རེ་དོགས་མ་སོང་ལྷུན་གྲུབ་འོད་གསལ་ངང༌། །སྒོར་ཚེ་མ་སོང་རྒྱ་བསྐྱེད་དཔངས་གཏོད་སྒོམ། །དེ་ལྟར་བྱས་ན་མ་ནོར་ལམ་གྱི་མཆོག །ལམ་ཞུགས་རྣམས་ཀྱི་མ་སོང་རྣམ་དྲུག་ནི། །འགྱུར་མེད་དད་པ་གཟུང་འཛིན་མ་སོང་དང༌། །འཁོར་བའི་སྐྱོ་ཤས་སྡུག་བསྔལ་མ་སོང་དང༌། །ཐོས་བསམ་མཁྱེན་རྒྱ་ཐ་སྙད་མ་སོང་དང༌། །སྙིང་རུས་སྒྲུབ་པ་སྐྱིད་འདོད་མ་སོང་དང༌། །གཞན་དོན་སེམས་བསྐྱེད་མཚན་མར་མ་སོང་དང༌། །མཐོན་པོའི་ལྟ་བ་རློམ་སེམས་མ་སོང་དང༌། །ཤིན་ཏུ་གཅེས་ཏེ་རབ་ཏུ་ཉུང་བར་གདའ། །ཡང་ཟབ་གནད་དུ་འགྲོ་བའི་ཆོས་དྲུག་ནི། །ང་སོད་རྟག་ཏུ་རང་ཕམ་འབའ་ཞིག་ལོང༌། །ཁོ་ཕྱུང་ཁོང་པར་བདེན་པའི་ཡུས་མ་བཞག །གོ་ཆོད་དོན་མེད་གཡེང་བའི་སྨྲ་བ་བོར། །ཀུན་མཐོང་སྤྲོས་བྲལ་སེམས་ཉིད་ངང་ལ་ལྟོས། །འབྲེལ་ཆོད་ཡུལ་དྲུག་གཟུང་འཛིན་རྗེས་མ་སྙེགས། །སྟུག་སྤོངས་ཆོས་ཉིད་དོན་གྱིས་གཏན་ཡུལ་ཟུངས༌། །དེ་ལྟར་བྱས་ན་རང་དོན་མྱུར་དུ་འགྲུབ། །ཡིན་པ་དྲུག་གིས་ལེགས་པར་བསྟན་པ་ནི། །གྲོས་ཕུགས་བླ་མ་ལ་གཏོད་འཁྲུལ་བ་མི་འབྱུང་ཡིན། །དགེ་སྦྱོར་ཕྱི་དུས་མ་བཞག་ཤི་ཡང་མི་འགྱོད་ཡིན། །དགྲ་གཉེན་ཕྱོགས་རིས་མ་འཛིན་ཀུན་སྣང་མཐུན་པ་ཡིན། །བཟང་བྱས་དྲིན་ལན་ལོན་དང་གར་ཡང་དྲིན་པ་ཡིན། །ཕྲག་དོག་གནོད་འཛུགས་སྤོངས་དང་རང་རྒྱུད་དུལ་བ་ཡིན། །དམ་པའི་རྣམ་ཐར་སྐྱོངས་དང་ཅི་བསམ་འགྲུབ་པ་ཡིན། །ཡང་ཟབ་ཤེས་རྒྱུད་གྲོལ་བའི་ཆོས་དྲུག་ནི། །ལྟ་བ་སེམས་ཉིད་ཡིན་གྱིས་རང་ངོ་ཤེས་པར་གྱིས། །སྒོམ་པ་འོད་གསལ་ཡིན་གྱིས་ངང་དྭངས་ཕྱིན་པར་གྱིས། །སྤྱོད་པ་སྒྱུ་མ་ཡིན་གྱིས་ཅིར་སྣང་ལམ་དུ་སློང༌། །ཉམས་མྱོང་ཆོས་ཉིད་འཆར་གྱིས་ཞེན་འཛིན་རྩད་ནས་ཆོད། །འབྲས་བུ་རང་ཆས་ཡིན་གྱིས་རེ་དོགས་འཛིན་པ་ཤོལ། །འཕྲིན་ལས་གཞན་དོན་ཡིན་གྱིས་ཐུགས་རྗེས་འགྲོ་བ་དྲོངས། །ཆོས་མཛད་རྣམས་ཀྱི་རང་བཞིན་རྣམ་དྲུག་ནི། །གཞན་དོན་སེམས་བསྐྱེད་ཡོད་ན་འགྲོ་བ་བྱམས། །སྡང་བ་འབྱུང་སྲིད་བཟོད་པའི་གྲོགས་ཤེས་དགོས། །བྱམས་པའི་གཏོང་ཕོད་ཡོད་ན་འཁོར་ཚོགས་འདུ། །མ་འདུས་དགེ་སྦྱོར་འཕེལ་བའི་གྲོགས་ཤེས་དགོས། །རྟོགས་པ་ཡོད་ན་དམ་ཅན་སྤྲིན་བཞིན་འདུ། །མ་འདུས་དམ་ཚིག་ཉམས་པའི་རྟགས་ཤེས་དགོས། །ཞེན་པ་སྙིང་ནས་ལོག་ན་ནོར་རྫས་འདུ། །མ་འདུས་སྲིད་ན་སྔོན་གྱི་ལས་ཤེས་དགོས། །དངོས་གྲུབ་ཐོབ་ཁར་བར་ཆད་སྣ་ཚོགས་འབྱུང༌། །མ་བྱུང་གོང་མའི་བྱིན་རླབས་ཡིན་ཤེས་དགོས། །སྒྲུབ་པ་བརྩོན་འགྲུས་ཅན་ལ་བདུད་རྣམས་འཇུག །མ་ཞུགས་དགེ་སྦྱོར་གནད་དུ་ཚུད་ཤེས་དགོས། །དེ་ལྟར་མ་ཤེས་ལོག་པར་ལྟས་ཉེན་ཆེ། །མཐར་ཐུག་དོན་གྱི་གདམས་པ་རྣམ་དྲུག་ནི། །ལྟ་བ་རྟོགས་པར་འདོད་ན་རྟོགས་མཁན་ཚོལ། །དེ་ཉིད་མ་རྙེད་མཐའ་བཞིའི་རྒྱ་ལས་གྲོལ། །ཏིང་འཛིན་བསྒོམ་པར་འདོད་ན་བསྒོམ་མཁན་ཚོལ། །དེ་ཉིད་མ་རྙེད་འགྱུ་བ་དངོས་མེད་བསམ། །སྤྱོད་པ་སྤྱད་པར་འདོད་ན་སྤྱོད་མཁན་ཚོལ། །དེ་ཉིད་མ་རྙེད་དབྱེར་མེད་རང་སར་གྲོལ། །འབྲས་བུ་བསྒྲུབ་པར་འདོད་ན་བསྒྲུབ་མཁན་ཚོལ། །དེ་ཉིད་མ་རྙེད་སྐུ་གསུམ་རང་ལ་རྫོགས། །འཕྲིན་ལས་བསྒྲུབ་པར་འདོད་ན་བསྒྲུབ་མཁན་ཚོལ། །དེ་ཉིད་མ་རྙེད་མ་བཙལ་ལྷུན་གྱིས་གྲུབ། །ས་ལམ་བགྲོད་པར་འདོད་ན་བགྲོད་མཁན་ཚོལ། །དེ་ཉིད་མ་རྙེད་གནས་ལུགས་རང་སར་སྐྱོལ། །དེ་ཉིད་མཐར་ཐུག་སྙིང་པོའི་གདམས་པ་སྟེ། །ཐམས་ཅད་རིག་པའི་ཆོ་འཕྲུལ་ཤེས་པར་མཛོད། །རང་སེམས་མཆོག་ཏུ་འདུལ་བའི་ཆོས་དྲུག་ནི། །རང་གི་ང་རྒྱལ་རློམ་སེམས་རི་བོ་བསྒྱེལ། །གཞན་ལ་ཕྲག་དོག་ཡི་དམ་ལྷ་རུ་ཁུར། །གཞན་དོན་ཆགས་ཞེན་ཤེས་རབ་མཚོན་གྱིས་ཆོད། །རྒྱུ་འབྲས་ཁྱད་གསོད་དགེ་སྡིག་ཤན་ཐང་ཕྱེད། །སྐུར་འདེབས་སྒྲོ་སྐུར་བག་ཡོད་ཞི་དུལ་བསྟེན། །གཞན་སྐྱོན་སེམས་འཁྲུག་སྣང་བ་མ་དག་སོམས། །དེ་ལྟར་བྱས་ན་རང་རྒྱུད་ཆོས་དང་འདྲེས། །ངོ་སྤྲོད་དྲུག་གིས་ཤན་ཐང་དབྱེ་བ་ནི། །རིག་པ་གསལ་དག་གྲུབ་མཐའ་ཀུན་ལས་གྲོལ། །ལྟ་བའི་ངོ་སྤྲོད་ཡིན་ནོ་ཕུ་ཐག་ཆོད། །རང་དྭངས་བདེ་ཆེན་དམིགས་གཏད་གཉིས་འཛིན་གྲོལ། །སྒོམ་པའི་ངོ་སྤྲོད་ཡིན་ནོ་ངང་ལ་སྐྱོངས། །ཐབས་ཤེས་ཟུང་འབྲེལ་བྱང་ཆུབ་ལམ་དུ་སློང༌། །སྤྱོད་པའི་ངོ་སྤྲོད་ཡིན་ནོ་སྒྱུ་མར་སྦྱོངས། །སྣང་སྲིད་ཞིང་ཁམས་ཐ་མལ་ཞེན་རྟོག་ལོག །དམ་ཚིག་ངོ་སྤྲོད་ཡིན་ནོ་རྣམ་དག་གྱིས། །ཅིར་སྣང་རང་བྱུང་ཡེ་ཤེས་བདེ་བའི་ངང༌། །དབང་བཞིའི་ངོ་སྤྲོད་ཡིན་ནོ་ས་ལམ་བགྲོད། །དེ་ལྟར་གང་བྱས་གསང་སྔགས་རྣལ་འབྱོར་ཆེ། །ཆོས་བཞིན་སྤྱོད་ལ་རབ་དྲུག་ཚང་བ་ནི། །ཆགས་ཞེན་མེད་པས་སྦྱིན་པའི་རབ་ཏུ་གདའ། །རང་རྒྱུད་དྲི་མེད་ཚུལ་ཁྲིམས་རབ་ཏུ་གདའ། །ཁོང་ཁྲོས་མི་འཁྲུགས་བཟོད་པའི་རབ་ཏུ་གདའ། །ངེས་འབྱུང་སྐྱོ་ཤས་བརྩོན་འགྲུས་རབ་ཏུ་གདའ། །དགོངས་པའི་ངང་གནས་བསམ་གཏན་རབ་ཏུ་གདའ། །སེམས་ཉིད་དོན་རྟོགས་ཤེས་རབ་རབ་ཏུ་གདའ། །ཐེག་ཆེན་སྤྱི་ཡི་གདམས་ངག་རྣམ་དྲུག་ནི། །རྟག་ཏུ་འཆི་བསམ་བརྩོན་འགྲུས་ལྕག་གིས་བྲབ། །ཅི་བྱེད་གོམས་གཙོ་ཆོས་ཀྱི་ཕྱོགས་སུ་བསླབ། །བསགས་པ་བགྲང་ཞིང་དགེ་སྡིག་གསོ་སྦྱོང་བྱ། །དམ་པ་གསུམ་མཆོད་ཚོགས་གཉིས་བསག་ལ་འབད། །དགེ་སྦྱོར་སྲང་གཞུག་སྣང་བ་ཆོས་ལ་བསྒྱུར། །ཅི་བྱེད་གཞན་དོན་བདག་མེད་དོན་དང་སྤྲད། །དེ་ལྟར་སུ་བྱེད་ཐེག་མཆོག་སྙིང་པོར་ཞུགས། །ཡ་བྲལ་ཉེས་པ་རྣམ་དྲུག་སྤང་བ་ནི། །བསྟེན་པ་མཚན་ལྡན་བླ་མ་མ་བྲལ་དགོས། །དེ་དང་བྲལ་ན་ཐར་པའི་ལམ་མི་ཚུད། །རང་རྒྱུད་བརྟན་པའི་དད་པ་མ་བྲལ་དགོས། །དེ་དང་བྲལ་ན་ཆོས་ཉིད་ཡུལ་མི་ཕྱིན། །ཉམས་ལེན་ཟབ་མོའི་གདམས་ངག་མ་བྲལ་དགོས། །དེ་དང་བྲལ་ན་བྱང་ཆུབ་མྱུ་གུ་མེད། །སྤྲོས་སྤྱོད་ཐོས་བསམ་ཤེས་རབ་མ་བྲལ་དགོས། །དེ་དང་བྲལ་ན་ཐེ་ཚོམ་སྒྲོག་མི་ཁྲོལ། །འདུག་ས་རི་ངོགས་དབེན་པ་མ་བྲལ་དགོས། །དེ་དང་བྲལ་ན་རྣམ་གཡེང་འདུ་འཛིས་འཁྱེར། །བརྩོན་འགྲུས་སྙིང་རུས་དམ་བཅའ་མ་བྲལ་དགོས། །དེ་དང་བྲལ་ན་ཡོན་ཏན་ཐོབ་དུས་མེད། །དེ་ཡི་ཕྱིར་ན་ཡ་བྲལ་མ་སོང་གཅེས། །འབྲལ་མེད་བསྟེན་ལ་བདུད་དྲུག་སྤང་བ་ནི། །བླ་མ་བསྟེན་ལ་གོ་དྲེད་བདུད་མ་ཞུགས། །དཀོན་མཆོག་བསྟེན་ལ་མ་གུས་བདུད་མ་ཞུགས། །དགོན་པ་བསྟེན་ལ་བཏང་སྙོམས་བདུད་མ་ཞུགས། །ཐོས་བསམ་བསྟེན་ལ་སྣ་དྲེད་བདུད་མ་ཞུགས། །བསམ་གཏན་བསྟེན་ལ་འཕེལ་མེད་བདུད་མ་ཞུགས། །གཞན་དོན་བསྟེན་ལ་རྣམ་གཡེང་བདུད་མ་ཞུགས། །དགོས་པར་སྣང་སྟེ་ཉིན་མོའི་སྐར་ཚོགས་བཞིན། །བསླབ་པའི་མཐའ་དྲུག་འགྲོགས་པར་བསྟན་པ་ནི། །ཕུ་ཐག་འཁྲུས་པའི་ལྟ་བ་མཆོག་དང་འགྲོགས། །དེ་མེད་ཆོས་ཉིད་ནམ་འཕང་ཆོད་མི་ནུས། །གཞི་རྟེན་བསླབ་གསུམ་དམ་ཚིག་གཙང་དང་འགྲོགས། །དེ་མེད་འདོད་པའི་དངོས་གྲུབ་ཐོབ་མི་ནུས། །དུས་ཚོད་ཤེས་པའི་སྤྱོད་པ་མཆོག་དང་འགྲོགས། །དེ་མེད་འཁོར་བའི་ཕ་རོལ་སྒྲོལ་མི་ནུས། །ཉམས་ལེན་རང་བྱུང་ཡེ་ཤེས་གདེང་དང་འགྲོགས། །དེ་མེད་གཟུང་འཛིན་ཉོན་མོངས་གདོས་མི་ཆོད། །ཉམས་མྱོང་གོང་འཕེལ་བོགས་འབྱིན་རྩལ་སྦྱོང་འགྲོགས། །དེ་མེད་ཉོན་མོངས་གཡུལ་ངོ་བཟློག་མི་འགྱུར། །ཟབ་མོའི་མན་ངག་ཕྱོགས་མེད་ཀུན་དང་འགྲོགས། །དེ་མེད་གང་དགོས་འདོད་པའི་དོན་མི་འགྲུབ། །དེ་ཕྱིར་ཡང་དག་སྙིང་པོའི་དོན་འདིར་བསླབ། །གཙོ་བོ་རྣམ་དྲུག་གདམས་ངག་བསྟན་པ་ནི། །འདུག་སའི་གཙོ་བོར་རི་ངོགས་དབེན་པ་བསྟེན། །དེ་ལས་གཞན་དུ་ཡུལ་འཁོར་སྡུག་བསྔལ་རྒྱུ། །ལམ་གྱི་གཙོ་བོར་བླ་མ་སངས་རྒྱས་ཁུར། །དེ་ལས་གཞན་དུ་ལམ་རྟགས་རྟེན་འབྲེལ་འཆུགས། །དམ་ཚིག་གཙོ་བོར་གང་ཡང་ཟུང་འཇུག་གཅེས། །དེ་ལས་གཞན་དུ་ཡ་བྲལ་དོན་མི་འགྲུབ། །ཉམས་རྟོགས་གཙོ་བོར་རྣམ་རྟོག་ཡེ་ཤེས་བསྒྱུར། །དེ་ལས་གཞན་དུ་སྤང་བྱའི་དཔུང་མི་ཆོམ། །འདུ་ཤེས་གཙོ་བོར་འཁོར་བའི་ཞེན་པ་བཟློག །དེ་ལས་གཞན་དུ་ཚེ་འདིའི་དབང་དུ་འཆོར། །ལྟ་བའི་གཙོ་བོར་རྟོགས་མཁན་རང་ངོ་གྲོལ། །དེ་ལས་གཞན་དུ་རྟག་ཆད་མཐའ་མི་གྲོལ། །འདི་དག་གཅེས་པའི་མཛོད་ཡིན་གུས་པར་ཟུངས། །ཤུགས་ཀྱིས་འགྲུབ་པའི་ཆོས་དྲུག་བསྟན་པ་ནི། །བྱ་བ་བཏང་ན་དགེ་སྦྱོར་ཤུགས་ཀྱིས་འགྲུབ། །བསླབ་གསུམ་གཙང་ན་དམ་ཅན་ཤུགས་ཀྱིས་འདུ། །སྙིང་རྗེ་འབྱོངས་ན་འགྲོ་དོན་ཤུགས་ཀྱིས་འབྱུང༌། །བསྙེན་སྒྲུབ་ཐེམ་ན་འཕྲིན་ལས་ཤུགས་ཀྱིས་འབྱུང༌། །ལྷུག་པར་གློད་ན་ཆོས་ཉིད་ཤུགས་ཀྱིས་མཐོང༌། །མཆོག་ཉིད་བསྒྲུབས་ན་ཐུན་མོང་ཤུགས་ཀྱིས་འགྲུབ། །མང་བ་དྲུག་ཏུ་མ་སོང་ཆོས་དྲུག་ནི། །ཞེན་པ་མ་ལོག་འདི་བར་འཁྱོག་པ་མང༌། །ཤེས་བྱ་མི་སྒྲུབ་ཐ་མལ་ཤི་བ་མང༌། །གཉེན་པོ་མ་བསྟེན་བསླབ་གསུམ་རལ་བ་མང༌། །ཐོས་བསམ་མ་བྱས་སྒོམ་པ་གོལ་བ་མང༌། །རྒྱུ་འབྲས་ཁྱད་གསོད་ངན་སོང་ལྟུང་བ་མང༌། །འདུ་འཛི་བདུད་ཀྱིས་སྒྲུབ་པ་བསླུས་པ་མང༌། །མང་པོའི་གསེབ་དེར་བདག་ཉིད་མ་སོང་འཚལ། །ཡིན་པ་དྲུག་གིས་བདུད་ལས་རྒྱལ་བ་ནི། །སྐུལ་འདེབས་ཡེངས་མེད་ཡིན་ནོ་ལེ་ལོའི་བདུད་མ་བསྐུར། །བློ་སྦྱོང་གཞན་གཅེས་ཡིན་ནོ་རང་འདོད་བདུད་མ་བསྐུར། །གནས་ལུགས་ཐག་ཆོད་ཡིན་ནོ་ཐེ་ཚོམ་བདུད་མ་བསྐུར། །ཉམས་ལེན་མཐའ་བྲལ་ཡིན་ནོ་ཕྱོགས་རིས་བདུད་མ་བསྐུར། །སྒྲུབ་པ་གནད་སྣུན་ཡིན་ནོ་ཁ་འབྱམས་བདུད་མ་བསྐུར། །དགོངས་པ་མཐའ་གྲོལ་ཡིན་ནོ་གྲུབ་མཐའི་བདུད་མ་བསྐུར། །ཚད་དྲུག་ལེགས་པར་གཏན་ལ་དབབ་པ་ནི། །རྒྱུ་འབྲས་ཕྲ་སྤྱད་དད་པ་ཆེ་བའི་ཚད། །གཏམ་ལ་འཇིགས་པ་ཁྲེལ་འཛེམ་ཆེ་བའི་ཚད། །ཡོན་ཏན་འགོ་བ་གྲོགས་པོ་བཟང་བའི་ཚད། །སེམས་ཉིད་ཡུལ་བྲལ་སྒོམ་པ་བཟང་བའི་ཚད། །སྐྱོན་ཡོན་མི་འཕྲོགས་ཉམས་ལེན་རྫོགས་པའི་ཚད། །སྐུ་གསུམ་ལམ་སློང་ཟད་སར་སྐྱོལ་བའི་ཚད། །ཚད་རྣམས་ལྡན་པའི་སྐྱེས་བུ་མཆོག་རབ་ཡིན། །ཉེས་པ་དྲུག་ལྡན་མི་བྱ་བསྟན་པ་ནི། །སྡོམ་གསུམ་བླངས་ནས་ཉེས་ལྟུང་འཁུར་མི་བྱ། །སྙིང་པོའི་དོན་བོར་ཚིག་ཕྱིར་འབྲང་མི་བྱ། །བྱང་ཆུབ་མི་སྒྲུབ་ཆོས་བརྒྱད་ལྷུར་མི་བྱ། །མི་ལུས་ཐོབ་ནས་སྟོང་པར་ལོག་མི་བྱ། །ཟབ་དོན་རྙེད་ནས་དམན་པར་འཇུག་མི་བྱ། །སྡེ་སྣོད་འཆད་མཁས་ཉམས་ལེན་མེད་མི་བྱ། །སྒྲུབ་ལ་ཉེས་པ་བསམ་པའི་ཆོས་དྲུག་ནི། །བར་ཆོད་མང་ན་མཐུན་འཇུག་རྩིག་པ་བསྒྱེལ། །འདུན་པ་མ་ལོག་ལོང་མེད་རྒྱུད་ལ་བསྟེན། །སྙིང་རྗེ་མ་སྐྱེས་རང་ལ་དཔེ་ལོང་ལྟོས། །བྱིན་རླབས་ཡལ་ན་མོས་གུས་བརྩོན་འགྲུས་བསྐྱེད། །གནོད་བྱེད་མང་ན་ཞུན་འཐར་མང་དུ་སྦྱོངས། །གཞན་དོན་འདོད་ན་སེམས་བསྐྱེད་སྨོན་ལམ་ཐོབ། །དེ་ལྟར་བྱས་ན་ཉེས་པའི་སྐྱོན་ལས་གྲོལ། །སྒྲུབ་པའི་དམ་ཆོས་ཚད་མ་དྲུག་ལྡན་ནི། །མདོ་རྒྱུད་ལུང་ཟིན་བཀའ་ཡི་ཚད་མ་དང༌། །བརྒྱུད་པ་མ་ཆད་གདམས་ངག་ཚད་མ་དང༌། །ཉམས་སེལ་མ་ཞུགས་བྱིན་རླབས་ཚད་མ་དང༌། །འདྲ་མིན་མ་བསླད་ཡང་དག་ཚད་མ་དང༌། །རང་རྒྱུད་ཁེལ་བ་ཉམས་མྱོང་ཚད་མ་དང༌། །མངོན་སུམ་རྗེས་དཔག་གཏན་ཚིགས་ཚད་མ་དང༌། །རྣམ་པ་དྲུག་ལྡན་ཤིན་ཏུ་གཅེས་པ་ཡིན། །རང་སྐྱོན་མཚང་ནས་འབྲུ་བའི་ཆོས་དྲུག་ནི། །ངན་གཡོའི་ཁྲིམས་ཀྱིས་རང་མགོ་མ་བསྐོར་ཅིག །མི་དགེའི་སྡིག་པས་རང་ཕུང་མ་བསྒྲུབས་ཤིག །ཞེན་འཛིན་ཕུང་འདྲེས་རང་བདུད་མ་འབེབས་ཤིག །ཁོང་ཁྲོའི་སེམས་ཀྱིས་རང་སེམས་མ་དཀྲུགས་ཤིག །རྣམ་གཡེང་འདུ་འཛིས་རང་དོན་མ་སླུ་ཞིག །འཁོར་བའི་གཡང་སར་རང་ཉིད་མ་འདོར་ཅིག །གྲོས་དེ་ཉན་ན་འདུན་མ་ལེགས་པར་འོང༌། །མཐོ་དམན་དྲིལ་ནས་བསྟན་པའི་ཆོས་དྲུག་ནི། །ཡར་ལ་བླ་མ་ཡི་དམ་མཁའ་འགྲོ་མཆོད། །མར་ལ་སྣོད་བཅུད་ལོངས་སྤྱོད་འབྲེལ་ཐག་ཆོད། །བར་དུ་སྣང་སྟོང་ཟུང་འཇུག་དོན་ལ་སྦྱོངས། །ཕར་ལ་དགེ་བ་སེམས་ཅན་དོན་ལ་བསྔོས། །ཚུར་ལ་དཀོན་མཆོག་ཡོན་ཏན་རྒྱུད་ལ་སྦྱོར། །བར་དུ་བདག་གཞན་དགེ་སྦྱོར་དམིགས་མེད་སྐྱོལ། །དེ་ཡིས་ལམ་ཟབ་སྙིང་པོའི་དམ་ཆོས་འགྲུབ། །ཆོས་དང་འཛོལ་བ་ཡ་ཆ་རྣམ་དྲུག་ནི། །མི་ལུས་ཐོབ་ནས་སྡིག་སྤྱོད་ཡ་རེ་ཆ། །ཆོས་དང་ཕྲད་ནས་མི་བསྒྲུབ་ཡ་རེ་ཆ། །ཚུལ་ཁྲིམས་ཐོབ་ནས་རལ་པ་ཡ་རེ་ཆ། །དམ་ཚིག་ཉམས་པའི་སྒྲུབ་པ་ཡ་རེ་ཆ། །ཆོས་ཀྱིས་རྙེད་འཚོལ་ལོག་འཚོ་ཡ་རེ་ཆ། །རང་དོན་ཕྱལ་བའི་གཞན་དོན་ཡ་རེ་ཆ། །བསམས་ཤིང་ཡི་མུག་གང་ཟག་མང་བར་གདའ། །ཆོས་ལ་འདྲེད་པའི་རྒྱུ་དྲུག་བསྟན་པ་ནི། །གྲོགས་ངན་བསྟེན་ན་དགེ་སྦྱོར་འདྲེད་པའི་རྒྱུ། །བླ་མའི་སྐྱོན་རྟོག་མོས་གུས་འདྲེད་པའི་རྒྱུ། །རྩོལ་བས་མི་སྒོམ་ཉམས་མྱོང་འདྲེད་པའི་རྒྱུ། །ཡེང་བའི་ལམ་སྡོད་དམ་ཆོས་འདྲེད་པའི་རྒྱུ། །གཞན་གྱི་སྐྱོན་རྟོགས་དག་སྣང་འདྲེད་པའི་རྒྱུ། །ལང་ཅན་རིག་པ་འཁྲུལ་བར་འདྲེད་པའི་རྒྱུ། །རྒྱུ་དྲུག་སྤངས་ལ་དམ་ཆོས་བསྒྲུབ་པར་བྱ། །དགྲ་དྲུག་སྤང་བར་གདམས་པའི་ཆོས་དྲུག་ནི། །དལ་འབྱོར་མི་ལུས་ལྟོ་རྒྱབ་དགྲར་མ་བསྐུར། །གཞན་དོན་སེམས་བསྐྱེད་ཐེག་དམན་དགྲར་མ་བསྐུར། །སེམས་ཉིད་ནོར་བུ་འཁྲུལ་བའི་དགྲར་མ་བསྐུར། །ཚོགས་གཉིས་ཡིད་བཞིན་ཚེ་འདིའི་དགྲར་མ་བསྐུར། །སྙིང་པོའི་སྒྲུབ་པ་ལེ་ལོའི་དགྲར་མ་བསྐུར། །མོས་གུས་གདུང་སེམས་ལོག་ལྟའི་དགྲར་མ་བསྐུར། །འདོད་ཡོན་རང་གར་སྤྱོད་པའི་ཉེས་དྲུག་ནི། །གཟུགས་ཀྱིས་མིག་བསླུས་ཕྱེ་ལེབ་མར་མེ་བཞིན། །སྒྲ་ཡིས་རྣ་བ་གླིང་བུ་རི་དྭགས་བཞིན། །དྲི་ཡིས་སྣ་བསླུས་བུང་བ་ཙནྡན་བཞིན། །རོ་ཡིས་ལྕེ་བསླུས་ཉ་མོ་ལྕགས་ཀྱུ་བཞིན། །རེག་གིས་ལུས་བསླུས་གླང་ཆེན་འདམ་ཚུད་བཞིན། །ཆོས་ཀྱིས་ཡིད་བསླུས་རྔ་མོ་བུ་ཤི་བཞིན། །ཚོགས་དྲུག་ཡུལ་ལ་རང་གར་མ་སོང་འཚལ། །འགལ་བ་ལམ་དུ་སློང་བའི་ཆོས་དྲུག་ནི། །ཚེ་འདིའི་བློ་སྐྱེས་ཞེན་པ་ནང་ནས་ལོག །ནད་གདོན་ཅི་བྱུང་སྡིག་སྒྲིབ་ཕྱགས་མར་ལྟོས། །རྐྱེན་ངན་བར་ཆད་དགེ་བའི་སྐུལ་མར་ལྟོས། །དགྲ་སྡང་གནོད་འཚེ་བཟོད་པའི་སྐུལ་མར་ལྟོས། །རྣམ་རྟོག་གང་ཤར་ཡེ་ཤེས་གསལ་འདེབས་ལྟོས། །སྣོད་བཅུད་སྣང་བ་རྒྱལ་བའི་ཞིང་དུ་ལྟོས། །རྐྱེན་རྣམས་བྱང་ཆུབ་ལམ་དུ་འགྲོ་བ་ཡིན། །དེ་ལྟར་མ་ཤེས་མ་གོ་རྣམ་དྲུག་ནི། །སྐྱོན་ཡོན་གཉིས་ལ་བླང་དོར་བྱེད་པ་དང༌། །འགྲོ་དྲུག་ཞིང་ལ་མཐོ་དམན་བྱེད་པ་དང༌། །རིག་པའི་དངོས་ལ་སྐྱེ་འགག་འཛིན་པ་དང༌། །ཟང་ཀའི་ཤེས་པ་སྤང་གཉེན་བྱེད་པ་དང༌། །རིག་པའི་དོན་ལ་སྦྱང་བགྲོད་འདོད་པ་དང༌། །འབྲས་བུ་ལོགས་ནས་བསྒྲུབ་བྱར་འདོད་པ་དང༌། །མཐོན་པོའི་དོན་གྱི་རང་བཞིན་མ་གོ་བས། །བློ་དམན་བྱིས་པ་གྲོང་པའི་ཆོས་ལ་སྦྱོར། །ཆོས་སྒྲུབ་རྣམས་ལ་ངོ་ཚ་རྣམ་དྲུག་ནི། །བསྟན་པའི་སྒོར་ཞུགས་སྡིག་སྤྱོད་ངོ་རེ་ཚ། །ཐ་སྙད་ཚིག་ཞེན་མི་བསྒྲུབ་ངོ་རེ་ཚ། །སེམས་བསྐྱེད་ཁས་བླངས་བདག་འཛིན་ངོ་རེ་ཚ། །ཆོས་དང་འཇིག་རྟེན་བསྲེ་བ་ངོ་རེ་ཚ། །ཆགས་སྡང་འཐབ་རྩོད་བྱེད་པ་ངོ་རེ་ཚ། །ཆོས་དང་གང་ཟག་གཤེ་བ་ངོ་རེ་ཚ། །ངོ་ཚ་ཚུལ་བཞིན་སྤོང་བ་ཤིན་ཏུ་དཀོན། །ཡང་དག་དོན་གྱི་གདམས་པ་རྣམ་དྲུག་ནི། །འདུ་འཛི་བདུད་ལས་ཡིན་གྱིས་འཁྲི་བ་ཆོད། །བསོད་ནམས་བར་ཆོད་ཡིན་གྱིས་དགའ་བྲོད་བོར། །ཆེ་གྲགས་བདུད་ལས་ཡིན་གྱིས་དམན་ས་ཟུངས། །ཕྱོགས་འཛིན་རྟག་ཆད་ཡིན་གྱིས་དབྱིངས་གཅིག་དྲིལ། །གནད་མེད་སྡུག་སྒུར་ཡིན་གྱིས་གདམས་པ་ཚོལ། །ཉམས་མེད་ཁ་ལྟ་ཡིན་གྱིས་རྒྱུད་དང་སྦྱོར། །དེ་ལྟར་བྱས་ན་ལེགས་པའི་ཡོན་ཏན་འགྲུབ། །རན་པའི་ཚོད་ཟིན་དྲུག་གིས་གདམས་པ་ནི། །སྐྱེ་ཤི་བར་དོ་འདིར་འཁྱམས་གྲངས་མང་བས། །ད་རེས་འགྱུར་མེད་བཙན་ས་བཟུང་རེ་རན། །སྡུག་བསྔལ་འཁྲུལ་འཁོར་འདིར་ཚུད་གྲངས་མང་བས། །ད་རེས་བདེ་ཆེན་ས་ལ་འགྲོ་རེ་རན། །སྐྱེ་ཤིའི་ཕུང་པོ་འདོར་ལེན་གྲངས་མང་བས། །ད་རེས་འགྱུར་མེད་ཆོས་སྐུ་ཐོབ་རེ་རན། །མ་རིག་མུན་ཁྲོད་འཐོམས་པ་གྲངས་མང་བས། །ད་རེས་ཡེ་ཤེས་སྒྲོན་མ་སྤོར་རེ་རན། །བདུད་བཞིའི་དམག་དཔུང་འདིས་བཅོམ་གྲངས་མང་བས། །ད་རེས་འཁོར་བའི་གཡུལ་ངོ་བཟློག་རེ་རན། །འདོད་པའི་ཁོལ་པོ་འདི་བྱས་གྲངས་མང་བས། །ད་རེས་གཏན་གྱི་སོ་ནམ་ཟིན་རེ་རན། །རན་པ་བས་ཀྱང་ཐལ་བར་གྱུར་འདི་སོམས། །འགྲོ་བ་དྲུག་གི་དོན་ལ་བརྟག་པ་ནི། །སྡུག་བསྔལ་རང་བཞིན་བདེ་བར་མ་ཤེས་ན། །བདེ་བ་འདོད་པ་སྡུག་བསྔལ་ནད་དུ་ཆེ། །ཆགས་སྡང་རང་རིག་མཉམ་ཉིད་མ་ཤེས་ན། །འདོར་ལེན་བྱེད་པ་སྤང་བླང་ནད་དུ་ཆེ། །རྐྱེན་ངན་རང་བཞིན་གྲོགས་སུ་མ་ཤེས་ན། །ཐབས་ཤེས་གཞན་བརྟེན་འཆིང་བའི་གཟེབ་ཏུ་ཆེ། །ལྟས་ངན་རང་བཞིན་གཡང་དུ་མ་ལོན་ན། །དངོས་གྲུབ་ཉིད་ཀྱང་བདུད་དང་གོལ་བར་འགྲོ། །རང་གི་སེམས་རྒྱུད་ཆོས་ཀྱིས་མ་བཏུལ་ན། །ཚིག་ཚོགས་ཆེ་ཡང་ནེ་ཙོའི་འདོན་པར་འགྲོ། །དགེ་བ་གང་བྱེད་སེམས་བསྐྱེད་མི་ལྡན་ན། །ཉན་རང་ཉིད་དམ་བསོད་ནམས་ཆ་མཐུན་འགྲོ། །དེ་བས་ཡང་དག་གནད་དུ་འགྲོ་བ་གཅེས། །ཆོས་བྱེད་རྣམས་ཀྱི་འོང་བའི་ཆོས་དྲུག་ནི། །དབེན་པ་བསྟེན་ན་དགེ་སྦྱོར་འཕེལ་བར་འོང༌། །གཞན་ལ་བསྟོད་ན་ཤུགས་ཀྱིས་དད་པར་འོང༌། །རང་རྒྱུད་བཏུལ་ན་དགེ་བ་འཕེལ་བར་འོང༌། །ནོར་བདུན་བསགས་ན་དབུལ་འཕོངས་སེལ་བར་འོང༌། །ཡོན་ཏན་སྤེལ་ན་རྒྱལ་བའི་གདུང་འཛིན་འོང༌། །འགྲོ་དྲུག་བསྐྱངས་ན་རྒྱལ་སྲས་སྤྱོད་པར་འོང༌། །འོང་བ་བཞིན་དུ་མཛད་པའི་སྐྱེ་བོ་ཉུང༌། །གལ་ཆེ་དྲུག་གི་སྤྲོ་བ་བསྐྱེད་པ་ནི། །མོས་གུས་དད་པ་གཏིང་ནས་སྐྱེ་དཀའ་བས། །བཅོས་ཤིང་བློས་བསྒྱུར་འབད་པ་གལ་རེ་ཆེ། །རྣམ་རྟོག་སྣ་ཚོགས་གྲོགས་སུ་འཆར་དཀའ་བས། །ཅི་སྐྱེས་དྲན་པ་གྲོལ་བ་གལ་རེ་ཆེ། །སྣོད་བཅུད་སྣང་བ་ཞིང་ཁམས་འཆར་དཀའ་བས། །སྒྱུ་མ་རྨི་ལམ་ཤེས་པ་གལ་རེ་ཆེ། །དགོངས་པ་རྟོགས་གྲོལ་དུས་མཉམ་འབྱུང་དཀའ་བས། །ནན་ཏན་སྒོམ་པ་སྐྱེད་པ་གལ་རེ་ཆེ། །དངོས་སུ་གཞན་ལ་ཕན་པ་འབྱུང་དཀའ་བས། །སྨོན་པ་སེམས་བསྐྱེད་བསླབ་པ་གལ་རེ་ཆེ། །ཆགས་ཞེན་འཛིན་པ་མེད་འདི་རབ་དཀའ་བས། །བགས་ཀྱིས་འདོད་ཆུང་ཆོག་ཤེས་གལ་རེ་ཆེ། །དེ་དག་བསླབས་པས་མྱུར་དུ་མཆོག་ལ་རེག །ཆོས་བྱེད་རུ་བརྒྱངས་བཅད་པ་རྣམ་དྲུག་ནི། །ཡར་གྱི་རུ་བརྒྱངས་ལྟ་བའི་གྲོས་ཐག་བཅད། །མར་གྱི་རུ་བརྒྱངས་སྤྱོད་པའི་དུས་ཚོད་ཤེས། །ཕར་གྱི་རུ་བརྒྱངས་ཡུལ་སྣང་སྒྱུ་མར་ཤེས། །ཚུལ་གྱི་རུ་བརྒྱངས་གཟུང་འཛིན་ཞེན་པ་དོར། །ཕྱི་རུ་རུ་བརྒྱངས་ཐོས་བསམ་ཕྱོགས་མེད་བྱ། །ནང་གི་རུ་བརྒྱངས་རང་རྒྱུད་དུག་ལྔ་འདུལ། །དེ་ལྟར་མཛད་ན་འཁོར་བའི་དམག་དཔུང་ལོག །ཉོན་མོངས་རེ་བ་ངན་པའི་ཆོས་དྲུག་ནི། །རང་རྒྱུད་མ་བཏུལ་གཞན་རྒྱུད་ཐུལ་དུ་རེ། །གོ་ཡུལ་རྟོགས་པས་གནས་ལུགས་ཤེས་སུ་རེ། །དམིགས་བཅས་བསྒོམས་པས་ཉོན་མོངས་འདག་ཏུ་རེ། །ཕྱོགས་འཛིན་ཆོས་ཀྱིས་ཐར་ལམ་བགྲོད་དུ་རེ། །དགེ་བ་མ་བསྒྲུབ་མཐོ་རིས་ཐོབ་ཏུ་རེ། །སྡིག་པ་མ་སྤངས་ངན་འགྲོར་མི་ལྟུང་རེ། །རེ་བའི་མི་ལ་དགོས་པ་བསླུས་པར་མཆི། །མ་ཚོར་དྲན་པ་སྟོར་བའི་ཆོས་དྲུག་ནི། །མི་ཚེ་ཉོན་མོངས་དུག་ལྔས་འདའ་བྱས་ནས། །ངན་སོང་འགྲོ་བ་མ་ཚོར་དྲན་པ་སྟོར། །ཁྱིམ་ཐབ་བུ་ཚས་འབྲེལ་བའི་སྒྲོག་ཞུགས་ནས། །སྡུག་བསྔལ་མཚོར་བྱིང་མ་ཚོར་དྲན་པ་སྟོར། །དགྲ་གཉེན་རིས་བཅད་ཆགས་སྡང་འདའ་བྱས་ནས། །མར་འགྲོའི་ལས་སོང་མ་ཚོར་དྲན་པ་སྟོར། །སྒོ་གསུམ་བྱ་བྱེད་གང་ཡང་མ་སྤངས་པར། །སེམས་ཉིད་གནས་སུ་རེ་བས་དྲན་པ་སྟོར། །ཚེ་འདིའི་འཇིག་རྟེན་བྱ་བ་མ་སྤངས་པར། །ཐར་ལམ་སྙོགས་སུ་རེ་བས་དྲན་པ་སྟོར། །སྟོང་ལྟའི་ཚིག་ལ་ཞེན་ནས་རྩོལ་བ་སྟོར། །ཉམས་རྟོགས་དྲོད་རྟགས་རེ་བས་དྲན་པ་སྟོར། །མ་ཚོར་དྲན་པ་སྟོར་བའི་མི་རེ་མང༌། བདག་གཞན་ཐུན་མོང་དགོས་པའི་ཆོས་དྲུག་ནི། །འཁོར་བའི་སྡུག་བསྔལ་བསམ་སྟེ་ཆོས་ལ་བསྐུལ། །དད་གུས་རྒྱུན་དུ་བསྒོམས་ཏེ་རང་རྒྱུད་འདུལ། །གསོ་སྦྱོང་འབད་པས་རང་གཞན་སྒྲིབ་པ་སྦྱོང༌། །སེམས་བསྐྱེད་བཟང་པོས་རང་གཞན་དོན་གཉིས་འགྲུབ། །སྨིན་གྲོལ་ལྡན་པས་རང་གཞན་དགེ་ལ་སྦྱོར། །ཉམས་ལེན་བརྩོན་པས་རང་གཞན་འཁྲུལ་བ་གཞོམ། །གཅེས་པའི་གནད་དྲུག་ལེགས་པར་བསྟན་པ་ནི། །འདི་ཕྱིའི་འདུན་འགྲོས་ངན་པར་མ་སོང་གཅེས། །ཐ་མལ་རྣམས་དང་སྤྱོད་ལམ་མ་འདྲེས་གཅེས། །སྔོན་ལས་རགས་པས་རྒྱུ་འབྲས་ཞིབ་མོ་གཅེས། །ཤེས་རབ་སྙིང་རྗེ་ཟུང་དུ་འབྲེལ་བ་གཅེས། །ཐབས་ཀྱི་འདོད་ཡོན་ལམ་དུ་སློང་བ་གཅེས། །དབྱེར་མེད་རྟོགས་པས་བཙན་ས་འཛིན་པ་གཅེས། །འདི་དང་སུ་ལྡན་རྣལ་འབྱོར་ཡང་རབ་ཡིན། །ཡེངས་མེད་ལམ་དུ་བསླང་བའི་ཆོས་དྲུག་ནི། །དང་པོའི་ལས་ཅན་འདུ་བྱེད་མ་ཡེངས་བྱ། །མཉམ་རྗེས་སློབ་རྣམས་ཆོས་ཉིད་མ་ཡེངས་བྱ། །གོམས་པས་དྲན་སྣང་ཡེ་ཤེས་མ་ཡེངས་བྱ། །ཀློང་གྱུར་དུས་སུ་ཡེངས་མེད་ཡེངས་མཁན་མེད། །བརྟན་པ་མཐར་ཕྱིན་ཡེངས་ཡུལ་ཆོས་ཉིད་ངེས། །ཆོས་ཟད་དུས་ན་མཚོན་བརྗོད་ཡུལ་ལས་འདས། །དེ་འདྲའི་ཚད་དུ་སྐྱོལ་བར་མཛད་པར་ཞུ། །ནོར་ར་རེ་གཉིས་བརྟག་པའི་ཆོས་དྲུག་ནི། །མོས་ཤིང་སྐྱོ་བས་ཤེས་པ་མ་བདེ་དང༌། །རྐྱེན་ངན་དབང་གིས་མི་དགའ་ནོར་ར་རེ། །ཚད་མེད་མོས་གུས་གཏིང་ནས་སྐྱེས་པ་དང༌། །བཅོས་མའི་དད་པ་ཁ་ནས་སྐྱེས་པ་ནི། །ཡུད་ཙམ་བལྟས་ན་ཕན་ཚུན་ནོར་ར་རེ། །གཉེན་བཤེས་སྣང་སེམས་འཁྲི་ཐག་ཆོད་པ་དང༌། །བརྩེ་མེད་སེམས་ཐག་རིང་བ་ནོར་ར་རེ། །ཡི་དམ་དངོས་གྲུབ་མཆོག་རབ་སྟེར་བ་དང༌། །བདུད་ཀྱི་བར་ཆད་ཆོ་འཕྲུལ་ནོར་ར་རེ། །ཐུགས་རྗེས་མ་ལུས་འགྲོ་བ་འདྲེན་པ་དང༌། །ཆོས་བརྒྱད་གཞན་དོན་གཟུགས་བརྙན་ནོར་ར་རེ། །འོད་གསལ་ཆོས་ཉིད་ངང་ལ་འབྱམས་པ་དང༌། །སྟོང་པ་ཧད་པོར་ཤོར་བ་ནོར་ར་རེ། །དེ་དག་རང་བཞིན་བརྟག་པའི་ཆོས་དྲུག་ནི། །སྐྱོ་བས་མ་བདེ་ཡུལ་མཆོག་ཕྲད་ན་སངས། །རྐྱེན་ངན་གང་ལ་དགའ་བ་མེད་པའོ། །གཏིང་ནས་མོས་གུས་ལུས་སེམས་འགྱུར་བ་སྟེ། །ཁ་ནས་དད་པ་དབང་པོ་མདངས་མི་འགྱུར། །འཁྲི་བ་ཆོད་པས་ཅིས་ཀྱང་དགོས་མེད་ཤེས། །སེམས་ཐག་རིང་བ་གནས་སྐབས་བྱེ་བྲག་འོང༌། །དངོས་གྲུབ་མཆོག་སྟེར་ཉམས་དགའ་བྱིན་འཐིབས་ལ། །བདུད་ཀྱི་བར་ཆད་སྐྱི་ཟིང་ཤེས་པ་འཚུབ། །འགྲོ་བ་འདྲེན་པ་རང་འདོད་འཁྲིས་མེད་ལ། །ཆོས་བརྒྱད་གཞན་ཕན་རང་འདོད་རྙེད་བཀུར་འདོད། །ཆོས་ཉིད་ངང་འབྱམས་དབང་པོ་དྭངས་ཤིང་གསལ། །སྟོང་པ་ཧད་པོ་མུན་འཐོམས་ལྟ་བུ་སྟེ། །དེ་ཕྱིར་མ་ནོར་བྱེ་བྲག་ཤེས་པ་གཅེས། །གཅིག་ཆོག་དྲུག་གི་གདམས་ངག་བསྟན་པ་ནི། །སྐྱེ་བ་གཅིག་ཆོག་ད་རེས་འབྲེལ་ཐག་ཆོད། །ཚོགས་གསོག་གཅིག་ཆོག་བླ་མ་སངས་རྒྱས་ཁུར། །བྱ་བ་གཅིག་ཆོག་བླ་མ་སངས་རྒྱས་བསྒྲུབ། །བསླབ་པ་གཅིག་ཆོག་ཆོས་མིན་བྱ་བ་བོར། །ངོ་སྤྲོད་གཅིག་ཆོག་འགྱུ་བ་ཆོས་ཉིད་སྤྲོད། །ཉམས་ལེན་གཅིག་ཆོག་དེ་ཉིད་ངང་ལ་སྐྱོངས། །དེ་ལ་མཉམ་ན་མྱུར་དུ་བདེ་ཆེན་འགྲུབ། །ཟབ་མོ་གནད་ཀྱི་གདམས་པ་རྣམ་དྲུག་ནི། །ཆོས་ཀྱིས་ཕན་འདོད་སེམས་ལ་གང་ཕན་བསྟེན། །རང་རྒྱུད་འདུལ་འདོད་རང་གྲོས་རང་ལ་ཐོབ། །ཆོས་སྐུ་ཐོབ་འདོད་ཐོལ་བྱུང་འགྱུ་ངོས་གཟུང༌། །ཉམས་སྐྱོང་སེམས་ཉིད་ཡེངས་བོར་ནང་དུ་ལྟོས། །འགྱུ་དྲན་གཅོད་འདོད་རླུང་སེམས་གཅུད་ལ་བོར། །མཐར་ཐུག་སྐྱེལ་འདོད་མ་བཅོས་རྣལ་དུ་ཞོག །འདི་ནི་ཡང་ཟབ་སྙིང་པོའི་གདམས་པ་ཡིན། །ཕྱི་ནང་རྟེན་འབྲེལ་རྟགས་དྲུག་མན་ངག་ནི། །དད་པ་སྐྱེས་རྟགས་འཇིག་རྟེན་བྱ་བ་གཏོང༌། །བྱིན་རླབས་ཞུགས་རྟགས་དམན་པའི་འདུ་ཤེས་བསྐྱེད། །གཞན་ཕན་སེམས་རྟགས་ཅི་བྱས་གཞན་ལ་ཕན། །མངོན་ཞེན་ལོག་རྟགས་ཆོས་བརྒྱད་མགོ་སྙོམས་པའོ། །དོན་དམ་འབྱོར་རྟགས་གཉིས་འཛིན་ངང་གིས་ཆུང༌། །རང་གྲོས་ཐེབས་རྟགས་དགེ་ལ་རྟག་པར་བརྩོན། །རྟགས་རྣམས་ལྡན་དེ་སྲིད་པའི་ཕ་རོལ་འགྲོ། །རྫོགས་པ་ཆེན་པོ་རྡོ་རྗེའི་ཚིག་དྲུག་ནི། །གཞི་ཡི་རྫོགས་ཆེན་སེམས་ཉིད་གཏན་ལ་དབབ། །ལམ་གྱི་རྫོགས་ཆེན་མཐའ་གྲོལ་གནད་དུ་བསྣུན། །འབྲས་བུའི་རྫོགས་ཆེན་རེ་དོགས་ཟད་སར་སྐྱོལ། །ཡུལ་གྱི་རྫོགས་ཆེན་སྣང་བ་འཛིན་མེད་གྲོལ། །སེམས་ཀྱི་རྫོགས་ཆེན་རྣམ་རྟོག་གྲོགས་སུ་འཆར། །དོན་གྱི་རྫོགས་ཆེན་འགྱུ་བ་རང་ཡལ་དྭངས། །དེ་ལྟར་སུས་ཤེས་རྣལ་འབྱོར་རྒྱལ་པོ་ཆེ། །གདེང་དུ་ཚུད་པའི་རྟགས་དྲུག་འཆར་བ་ནི། །བར་དོ་རང་ཞི་སྐྱེལ་མ་བཟང་པོ་འདྲ། །སྒྲིབ་པ་རང་དག་ནོར་བུ་རང་དྭངས་འདྲ། །ཉམས་མྱོང་རང་འབར་ཆང་གི་གླུམ་ལངས་འདྲ། །བདེ་ཆེན་རང་འབར་གར་ཆང་འཐུངས་པ་འདྲ། །སེམས་ཉིད་རང་ཟིན་སྦྲང་མ་རྩི་འབྱར་འདྲ། །བྱིན་རླབས་ཤུགས་འབྱུང་ལོ་ཐོག་ལེགས་པ་འདྲ། །དེ་ལྟར་འཆར་དུས་རྣལ་འབྱོར་ཆེན་པོ་ཡིན། །ཆོས་བྱེད་རྣམས་ཀྱི་མ་ཉེ་རྣམ་དྲུག་ནི། །མཆོད་གནས་ཉེ་འབྲེལ་བྱེད་པས་ཚོགས་གཉིས་ཕྱོགས་མ་ཉེ། །སྒྲུབ་པ་དལ་ཁོམ་བྱེད་པས་དངོས་གྲུབ་ཕྱོགས་མ་ཉེ། །དགེ་སྦྱོར་རྐྱེན་ཟློག་བྱེད་པས་སངས་རྒྱས་ཕྱོགས་མ་ཉེ། །བཟླས་བརྗོད་ལོང་གཏམ་བྱེད་པས་ནུས་མཐུ་ཕྱོགས་མ་ཉེ། །ཡོན་ཏན་ང་རྒྱལ་བྱེད་པས་གནས་ལུགས་ཕྱོགས་མ་ཉེ། །ལག་ལེན་མི་ཆོས་བྱེད་པས་ལྷ་ཆོས་ཕྱོགས་མ་ཉེ། །དེ་ལྟར་མ་སོང་ཤིན་ཏུ་གཅེས་པ་ལགས། །ཁེ་ཉེན་ཆེ་བའི་གདམས་པ་རྣམ་དྲུག་ནི། །དམུ་རྒོད་དག་དང་འབྲེལ་འདྲེས་བྱེད་པ་དང༌། །རང་རྒྱུད་ངན་དང་ཆོས་ཀྱིས་འབྲེལ་པ་དང༌། །གཉེན་པོ་མེད་པས་བསླབ་ཁྲིམས་ལེན་པ་དང༌། །ཐོས་བསམ་མེད་པས་སྒོམ་པ་བྱེད་པ་དང༌། །དམ་ཚིག་འཕྱལ་བའི་གསང་སྔགས་བསྒྲུབ་པ་དང༌། །དེད་དཔོན་རྒྱ་མཚོར་ནོར་བུ་ལེན་པ་རྣམས། །ཁེ་ཉེན་ཆེ་བས་ལེགས་པར་བརྟག་པ་གཅེས། །ཉམས་སུ་ལེན་པའི་གདམས་ངག་རྣམ་དྲུག་ནི། །སྣང་བ་ཅི་ཤར་རང་ངོ་རང་སངས་བཏང༌། །རིག་པ་ཅི་རིག་རང་བྱུང་རང་དག་བཞག །འགྱུ་བ་ཅི་འགྱུ་བྱ་ལམ་རྗེས་མེད་ཁྱེར། །དབྱེར་མེད་མཐའ་གྲོལ་རྒྱ་ཡན་ཡེ་གྲོལ་ཐོང༌། །གྲོལ་མཁན་བལྟས་པས་འཁོར་འདས་ཕུགས་སྟོང་ལྟོས། །གཉིས་འཛིན་ཞིག་པས་གནས་ལུགས་གཞི་ལ་བསྐྱལ། །དེ་ལྟར་ཤེས་ན་ཐེག་མཆོག་དོན་ལ་མཁས། །མིན་པ་དྲུག་གི་ལ་ཤན་དབྱེ་བ་ནི། །བསོད་ནམས་གྲགས་འདོད་བླ་མ་བཟང་པོ་མིན། །ནོར་རྫས་ཆེར་འཛིན་ཆོས་སྒྲུབ་བཟང་པོ་མིན། །མི་ཆོས་གཙོར་འཛིན་རབ་བྱུང་བཟང་པོ་མིན། །བདག་ལྟ་ཕྱོགས་འཛིན་རྣལ་འབྱོར་བཟང་པོ་མིན། །བསྐལ་པར་རིམ་བགྲོད་གསང་སྔགས་བཟང་པོ་མིན། །ཕྱོགས་ལྷུང་རྒྱ་ཆད་རྫོགས་ཆེན་བཟང་པོ་མིན། །ཀུན་མཉམ་ཡངས་པ་ཆེན་པོར་མཁྱེན་འཚལ་ལོ། །ཆོས་ཉིད་དོན་ལ་གཞག་པའི་ཆོས་དྲུག་ནི། །གཟུང་བའི་ཡུལ་ལ་སྒོ་ལྔས་རྟེན་མ་བྱེད། །འཛིན་པའི་སེམས་ལ་སྤྲོ་བསྡུས་བཟོ་མ་བྱེད། །བདེ་གསལ་ཞེན་མེད་རྣམ་རྟོག་འཕྲོ་མ་གཞུག །རང་བྱུང་ལྷུག་པ་སྤྲོས་པའི་གོས་མ་གོན། །ཆོས་ཉིད་རྒྱ་ཡན་སེམས་འཛིན་སྒྲོག་མ་གཞུག །ཡངས་གྲོལ་བློ་ཡངས་འདུ་ཤེས་གཟེབ་མ་བཅིངས། །དེ་ལྟར་སུས་ཤེས་ཡང་དག་དོན་ལ་ཉེ། །ཐེག་ཆེན་ཆོས་དོན་མ་གོ་ཆོས་དྲུག་ནི། །འགྲོ་ཀུན་རྒྱལ་བའི་སྲས་པོ་དམ་པ་ལ། །དམན་པ་ཁྱད་གསོད་ཐེག་ཆེན་དོན་མ་གོ །སློང་བ་ཐམས་ཅད་དགེ་བསྐུལ་དྲིན་ཅན་ལ། །སེར་སྣའི་འཇུར་གེགས་ཐེག་ཆེན་དོན་མ་གོ །གནོད་བྱེད་དགྲ་འདྲེ་བཟོད་པའི་ཡུལ་མཆོག་ལ། །ཞེ་སྡང་ཁོང་ཁྲོ་ཐེག་ཆེན་དོན་མ་གོ །ཉེས་སྐྱོན་ངན་སྨྲས་སྐྱོན་སེལ་གདམས་ངག་ལ། །ངར་འཛིན་ཀོ་ལོང་ཐེག་ཆེན་དོན་མ་གོ །རྙེད་བཀུར་སྙན་གྲགས་ཕུང་འདྲེའི་ནང་དབྱེན་ལ། །ཆོས་བརྒྱད་རློམ་སེམས་ཐེག་ཆེན་དོན་མ་གོ །བྱིན་རླབས་ནུས་མཐུ་བདུད་ཀྱི་སྣ་འདྲེན་ལ། །ང་རྒྱལ་རློམ་སེམས་ཐེག་ཆེན་དོན་མ་གོ །དེ་དག་མང་བས་འཁོར་བར་འཁྱམས་པ་ཡིན། །སྤངས་ནས་བསྡད་པར་བྱ་བའི་ཆོས་དྲུག་ནི། །འདུ་འཛི་གཡེང་བའི་ཡུལ་སྤངས་དབེན་པར་སྡོད། །སྡེ་ཚན་ཕྱོགས་རིས་སྤངས་ལ་འདྲིས་མེད་སྡོད། །འཇིག་རྟེན་སོ་ནམ་འབྲེལ་སྤངས་བདེ་བར་སྡོད། །མང་པོའི་ཚོགས་སྤངས་གཅིག་ཏུ་དབེན་པར་སྡོད། །དོན་དང་བྱ་བ་མང་སྤངས་དབེན་པར་སྡོད། །མི་དགེ་ལུང་མ་བསྟན་སྤངས་དགེ་བར་སྡོད། །དེ་ལྟར་བསྡད་དུས་བྱ་བ་རྣམ་དྲུག་ནི། །རིག་པ་གཅེར་བུ་རང་ངོ་ཟིན་པར་བྱ། །སེམས་ཀྱི་གནས་ལུགས་གཏན་ལ་དབབ་པར་བྱ། །ཤེས་པ་སྙམ་བྱེད་འདུན་མ་བྲལ་བར་བྱ། །དངོས་འཛིན་གཟའ་གཏད་ཆེད་དུ་གཟུང་མི་བྱ། །བརྩོན་འགྲུས་འདོད་བློ་རང་སར་ཆོད་པར་བྱ། །བྱེད་མཁན་ངོ་བོ་ཟད་སར་སྐྱོལ་བར་བྱ། །རིག་པ་བསམ་གཏན་གནས་པའི་ཆོས་དྲུག་ནི། །སྣང་ཚུལ་མ་འགགས་བཀྲ་ཡལ་སིང་ངེ་བ། །ཤེས་པ་མ་རྨུགས་ཡེ་རེ་སིང་ངེ་བ། །འཕྲོ་རྒོད་མ་སྙོགས་རང་དྭངས་སིང་ངེ་བ། །འཕྲོ་རྒོད་མ་ཤོར་མཉམ་པར་ལྷན་ནེ་བ། །རྨུགས་འཐིབས་མེད་པར་རང་སང་ལྷག་གེ་བ། །མཐའ་བཞིར་མ་བསྐྱོད་རང་བབས་ཕྱལ་ལེ་བ། །མཚན་ཉིད་དྲུག་ལྡན་གོལ་ས་མེད་པ་ཡིན། །ལྟ་སྒོམ་ཉམས་སུ་བླང་བའི་ཆོས་དྲུག་ནི། །ཅིར་སྣང་ལྟ་བར་ཤེས་པས་གྲུབ་མཐའི་འཛིན་པ་གྲོལ། །ཅིར་སེམས་སྒོམ་པར་ཤེས་པས་ཐུན་མཚམས་རིས་ལས་གྲོལ། །ཅི་བྱས་འཛིན་མེད་སྤྱོད་པས་ཆེད་འཛིན་ཞེན་པ་གྲོལ། །ཅིར་སྣང་དགོངས་པར་ཤར་བས་ཉམས་སུ་མྱོང་བ་གྲོལ། །ཅིར་བགྲོད་ཆོས་ཉིད་ཆོད་པས་ས་ལམ་ཚད་མར་གྲོལ། །ཅི་བསྒྲུབ་སྐུ་ལྔར་གྲུབ་པས་འབྲས་བུའི་ཞེན་པ་གྲོལ། །དེ་འདྲའི་རྣལ་འབྱོར་ནམ་མཁའ་ལྟ་བུ་ཡིན། །སྐྱོན་དྲུག་བརྟགས་ཏེ་སྤང་བར་བྱ་བ་ནི། །དད་བརྩོན་ལྡན་ཡང་བླ་མ་འབྲལ་སྔས་ན། །ལམ་མཐར་མ་ཕྱིན་བྱེའུ་ཕྲུག་མ་བྲལ་འདྲ། །རྒྱུ་འབྲས་གོ་ཡང་འདོད་བློ་མ་ཞིག་ན། །རྐྱེན་དབང་འཆོར་བ་གཡོ་སྒྱུ་ཁྲམ་པ་འདྲ། །ཤེས་རབ་ཆེ་ཡང་ཉམས་སུ་མ་ལོན་ན། །དགོས་དུས་མི་བསྟོངས་གཡུལ་ངོར་མཚོན་སྟོར་འདྲ། །རང་ངོ་འཕྲོད་ཀྱང་གོམས་འདྲིས་མ་བྱས་ན། །རྣམ་རྟོག་དགྲས་ཁྱེར་གཡུལ་ངོའི་བུ་ཆུང་འདྲ། །སྒོམ་ཡུན་རིང་ཡང་ཞེན་བློ་མ་ཞིག་ན། །ངལ་བ་དོན་མེད་རབས་ཆད་ཁེ་གྲགས་འདྲ། །ཡིན་མིན་ཤེས་ཀྱང་ཕྱོགས་རིས་མ་ཕྱེད་ན། །ཉོན་མོངས་རོ་ལྡང་མདེའུ་ཤའུ་འདྲ། །དེ་བས་སྐྱོན་དབང་མ་སོང་ཤིན་ཏུ་གཅེས། །གནས་ལུགས་རྟོགས་ན་མི་དགོས་རྣམ་དྲུག་ནི། །རང་ལུས་རི་བོར་དྲི་མེད་སེམས་གནས་ན། །རི་ངོགས་དབེན་པའི་དགོན་པ་བསྟེན་མི་དགོས། །གང་བྱུང་ཆོས་ཉིད་ངང་ལས་མི་འདའ་ན། །དུས་ཚོད་ངེས་གཟུང་སྡུག་རྒུར་མཚམས་མི་དགོས། །སྣང་གྲགས་ཡེ་ཤེས་རོལ་པར་འཆར་བ་ན། །ཐུན་མཚམས་བར་བཅད་ཆེད་དུ་བསྒོམ་མི་དགོས། །སྤང་ཐོབ་མཚན་མ་གཞི་ལ་རང་དག་ན། །མཚན་བཅས་བསགས་སྣང་འདུན་མ་བཏང་མི་དགོས། །ཅིར་སྣང་སྐུ་གསུམ་ཞིང་དུ་འཆར་བ་ན། །སྒོམ་སྒྲུབ་ཡུལ་ལ་གཉེན་པོ་བསྟེན་མི་དགོས། །དགོངས་པ་ཕྱོགས་མེད་རྒྱ་ཡན་འཆར་བ་ན། །རེ་དང་དོགས་པའི་འདུ་ཤེས་བསྐྱེད་མི་དགོས། །དེ་དང་སུ་ལྡན་ཡེ་ཤེས་དོན་དང་མཇལ། །འགྲོ་བ་དྲུག་གི་མན་ངག་བསྟན་པ་ནི། །མི་དགེ་ཐུབ་པའི་མི་དེ་རང་བཞིན་དཔའ་བོར་འགྲོ། །དུག་ལྔ་ཁོང་གསོད་མི་དེ་སྐྱེས་བུ་མཐུ་ཅན་འགྲོ། །དམིགས་འཛིན་མེད་པའི་མི་དེ་དགེ་སྦྱོར་ཅན་དུ་འགྲོ། །ཤེས་བཞིན་བག་ཡོད་འཆང་དེ་མཁས་ཤིང་མཛངས་པར་འགྲོ། །གནོད་འཛུགས་སྤོང་བའི་མི་དེ་གོ་མཚོན་ཅན་དུ་འགྲོ། །དམ་ཅན་བསྐོར་བའི་མི་དེ་འཁོར་འབངས་ཅན་དུ་འགྲོ། །དེ་ལྟར་ཅི་འགྲོ་བྱ་བ་གདམས་པའི་མཆོག །བསླུ་བས་སྤང་བར་བྱ་བའི་ཆོས་དྲུག་ནི། །རང་རིག་མ་བསླངས་གཞན་རིག་རྫུན་པོས་བསླུ། །འོད་གསལ་མ་ཡིན་ཞི་གནས་ལྟེང་པོས་བསླུ། །ཆིག་ཆོད་མ་ཡིན་བཏང་སྙོམས་འབྱམས་པས་བསླུ། །རང་དག་མ་ཡིན་རྣམ་རྟོག་ཉིང་འཁྲུལ་བསླུ། །ཟུང་འཇུག་མ་ཡིན་བྱར་མེད་ཁ་འབྱམས་བསླུ། །རང་གནས་མ་ཡིན་རྩེ་གཅིག་སེམས་འཛིན་བསླུ། །འདྲ་གཉིས་བསླུ་བས་དོན་མེད་མ་བཏང་ཅིག །འགྲོ་བ་དྲུག་གི་རང་བཞིན་བསྟན་པ་ནི། །དམིགས་མེད་རང་བཞིན་མ་རྟོགས་དགེ་བཅུ་འཆིང་བར་འགྲོ། །རང་ལ་ཞེན་ལོག་མ་སྐྱེས་སྤྲོས་མེད་བླང་དོར་འགྲོ། །ཆོས་འདས་དབྱིངས་སུ་མ་བྱས་བསྒོམས་ཀྱང་བློ་བྱས་འགྲོ། །ཐུག་ཕྲད་རང་ངོ་མ་རྟོགས་བསྒོམས་ཀྱང་བཅོས་མར་འགྲོ། །ངང་དྭངས་གནས་ལུགས་མ་ཤེས་བསྒོམས་ཀྱང་རྟོག་པར་འགྲོ། །ཡེ་གྲོལ་འཛིན་མེད་མ་ཤེས་བསྒོམས་ཀྱང་མཚན་མར་འགྲོ། །འགྲོ་བའི་གནས་ལས་ལོག་པ་ཤིན་ཏུ་གཅེས། །གསོད་པ་དྲུག་གི་གདམས་ངག་བསྟན་པ་ནི། །འདྲེ་གདོན་ཞི་བར་འདོད་ན་ལུས་སྲོག་གཅེས་འཛིན་སོད། །མཐུན་འཇུག་བྱ་བར་འདོད་ན་ང་རྒྱལ་ཁེངས་སེམས་སོད། །སྡུག་བསྔལ་ཞི་བར་འདོད་ན་གཉིས་འཛིན་མཚན་མ་སོད། །གནས་ལུགས་དགོངས་པ་འདོད་ན་གཉེན་པོ་མཆོག་འཛིན་སོད། །གཉིས་མེད་ཡེ་ཤེས་འདོད་ན་སྒོམ་བློའི་གཉེན་པོ་སོད། །ཚེ་གཅིག་བྱང་ཆུབ་འདོད་ན་ཕྱི་ཤོལ་ལེ་ལོ་སོད། །དེ་དག་ལྡན་ན་གང་ཡིན་བདུད་བཞིའི་དགྲ་ལས་རྒྱལ། །མེད་པ་དྲུག་གི་རང་བཞིན་བསྟན་པ་ནི། །སེམས་ཅན་ཅི་མགུ་བྱས་ན་རྒྱལ་མཆོད་ལོགས་ན་མེད། །གཞན་དོན་དང་ལེན་བྱས་ན་ཐར་ལམ་ལོགས་ན་མེད། །དབྱེ་བསལ་གཉིས་མེད་རྟོགས་ན་མཉམ་ཉིད་ལོགས་ན་མེད། །ཡུལ་སེམས་གཉིས་མེད་རྟོགས་ན་ཆོས་ཉིད་ལོགས་ན་མེད། །འཁོར་བ་བདེན་མེད་ཤེས་ན་མྱང་འདས་ལོགས་ན་མེད། །བསྒྲུབ་མཁན་ངོ་བོ་སྟོར་ན་གོལ་སྒྲིབ་བསལ་དུ་མེད། །དེ་ལྟར་རྟོགས་རྣམས་ཆོས་སྐུ་རང་ཆས་འགྲུབ། །དཀའ་བ་དྲུག་གི་རང་བཞིན་བསྟན་པ་ནི། །ཆོས་ལ་ཞུགས་དཀའ་དེ་བས་མི་ལྡོག་དཀའ། །སྡེ་སྣོད་ཤེས་དཀའ་དེ་བས་རྒྱུད་སྦྱོར་དཀའ། །དམ་ཚིག་ཐོབ་དཀའ་དེ་བས་ལེགས་བསྲུང་དཀའ། །ཟབ་དོན་ཕྲད་དཀའ་དེ་བས་ཉམས་ལེན་དཀའ། །དགོངས་པ་སྐྱེ་དཀའ་དེ་བས་སྐྱོང་བ་དཀའ། །གཞན་དོན་བྱེད་དཀའ་དེ་བས་སྐྱོ་བཟོད་དཀའ། །སངས་རྒྱས་འདོད་ན་དཀའ་ཡང་བསྒྲུབ་འཚལ་ལོ། །ངོ་མཚར་ཆེ་བའི་གདམས་ངག་རྣམ་དྲུག་ནི། །དད་བརྩོན་ཡོད་ན་ཆོས་ཀྱི་སྦྱིན་པ་ལ། །དགོས་སུ་སྤྱོད་རྒྱུ་ཡོད་པ་ངོ་མཚར་ཆེ། །མོས་གུས་ཡོད་ན་བླ་མ་སངས་རྒྱས་ལ། །གདམས་ངག་མཉན་དུ་ཡོད་པ་ངོ་མཚར་ཆེ། །ཟབ་མོའི་ཐབས་ཀྱིས་ཟིན་ན་འདོད་ཡོན་ལྔ། །མ་སྤངས་སྤྱོད་པས་གྲོལ་བ་ངོ་མཚར་ཆེ། །བརྩོན་པས་ཉམས་སུ་བླངས་ན་སེམས་ཅན་གྱིས། །ཚེ་གཅིག་སངས་རྒྱས་འགྲུབ་པ་ངོ་མཚར་ཆེ། །རྟོགས་པའི་ངང་ལ་མ་ཡེངས་བསྒོམས་བྱས་ན། །གཏིང་གསལ་ཆོས་ཉིད་མངོན་གྱུར་ངོ་མཚར་ཆེ། །དཀྱིལ་འཁོར་གསུམ་ལ་རྟག་ཏུ་འདྲིས་བྱས་ན། །སྐུ་གསུམ་ཡེ་ཤེས་འཆར་བ་ངོ་མཚར་ཆེ། །ཆོས་བྱེད་རྣམས་ཀྱི་སྐྱོན་དྲུག་བསྟན་པ་ནི། །བྱེ་བྲག་མི་ཤེས་ལྟ་བའི་མིག་དང་བྲལ། །གཏན་དུ་དགོས་པ་དགེ་སྦྱོར་གྲོགས་དང་བྲལ། །ཐར་པར་ཁྲིད་བྱེད་བཤེས་གཉེན་ལོང་ཁྲིད་མེད། །ཐོགས་པར་བྱེད་པ་ཐོས་བསམ་འཁར་བ་ཆག །མི་འདོད་ཉོན་མོངས་གཟུང་འཛིན་གདོན་གྱིས་བརླབས། །ཐར་མེད་སྲིད་ལས་ངན་སོང་གཡང་འཕྱོང་བ། །ཉེས་པ་དྲུག་ལྡན་འགྲོ་བ་འདི་དག་ཀུན། །སྙིང་རྗེས་བཟོད་དཀའ་མཆི་མ་འཁྲུག་ནའང། །ལས་ངན་མ་ཟད་དྲང་བའི་ཐབས་དང་བྲལ། །ལོག་པར་མ་སོང་དྲུག་གི་གདམས་པ་ནི། །དཀོན་མཆོག་གསུམ་ལ་ཞབས་ཏོག་མ་གྲུབ་ཀྱང༌། །སྡིག་པ་མ་སོག་ངན་འགྲོའི་འཇིགས་པ་སོམས། །བླ་མ་མཆོག་ལ་མོས་གུས་མ་གྲུབ་ཀྱང༌། །སྒྲོ་སྐུར་མ་འདེབས་ལོག་ལྟའི་ཉེས་དམིགས་སོམས། །མཆེད་གྲོགས་རྣམས་ལ་བརྩེ་གདུང་མ་འགྲུབ་ཀྱང༌། །ཕྲག་དོག་མ་བྱེད་དམ་ཉམས་ཉེས་དམིགས་སོམས། །རང་གི་ཕ་ཆོས་གཞུང་བཞིན་མ་གྲུབ་ཀྱང༌། །ཆོས་མཛད་མ་སྨད་ལས་ངན་ཉེས་དམིགས་སོམས། །འཁྲུལ་སྣང་དངོས་ལ་བདེན་འཛིན་མ་ཞིག་ཀྱང༌། །རྟག་པར་མ་འཛིན་ཕྱི་ནང་འགྱུར་བ་སོམས། །དངོས་སུ་གཞན་ལ་ཕན་འདོགས་མ་འགྲུབ་ཀྱང༌། །གནོད་པ་མ་སྐྱེལ་ལས་འབྲས་རྟེན་འབྲེལ་སོམས། །ཉན་ན་རིགས་པ་དྲུག་གི་གདམས་ངག་ནི། །ཅུང་ཟད་བྱ་བ་ཆག་པའི་སྡུག་བསྔལ་ལྟོས། །དགེ་སྦྱོར་ཆག་ལ་སྡུག་བསྔལ་བྱ་བར་རིགས། །དངོས་པོའི་བདེ་འགྱུར་ཆག་པའི་སྡུག་བསྔལ་ལྟོས། །ཉམས་མྱོང་འཕེལ་ཆག་སྡུག་བསྔལ་བྱ་བར་རིགས། །ཞག་གཅིག་ཟས་སྐོམ་ཆག་པའི་སྡུག་བསྔལ་ལྟོས། །ཐུན་བཞིའི་དགེ་སྦྱོར་ཆག་ལ་སྡུག་བསྔལ་རིགས། །ཚེ་འདིའི་དགྲ་མགོ་མ་ཐུལ་སྡུག་བསྔལ་ལྟོས། །ཉོན་མོངས་དགྲ་མགོ་ཤོར་ལ་སྡུག་བསྔལ་རིགས། །འཁྲུལ་བའི་བཟའ་ཚོ་ཤི་བའི་སྡུག་བསྔལ་ལྟོས། །གཏན་གྲོགས་ཆོས་དང་བྲལ་ལ་སྡུག་བསྔལ་རིགས། །བྱ་བྱེད་ཅུང་ཟད་ཆག་པའི་སྡུག་བསྔལ་ལྟོས། །དལ་འབྱོར་ཆོས་སྤྱོད་ཆག་ལ་སྡུག་བསྔལ་རིགས། །རིགས་པའི་དོན་ལ་བསམས་ན་ཤིན་ཏུ་དགེ །ཚུལ་བཞིན་བསྒྲུབ་པའི་བོར་བ་རྣམ་དྲུག་ནི། །འཁོར་བའི་འདམ་རྫབ་འཇིག་རྟེན་བྱ་བ་བོར། །བྱུར་གྱི་གདོས་ཐག་ཁྱིམ་ཐབ་བུ་ཚ་བོར། །བྱིས་པའི་རྩེད་མོ་འཁྲུལ་སྣང་བདེན་ཞེན་བོར། །མགོ་བསྐོར་སླུ་བྲིད་འདོད་ཡོན་ལོངས་སྤྱོད་བོར། །བདུད་ཀྱི་ཞགས་པ་གཞན་གྱི་བཀུར་གནས་བོར། །ཕ་མེས་ཕུང་སྲི་མ་རིག་གཟུང་འཛིན་བོར། །དེ་ལྟར་བྱས་ན་འཁོར་བའི་གནས་ལས་ཐར། །གདམས་པའི་གནས་དྲུག་ཆིངས་སུ་བསྟན་པ་ནི། །ཐུག་ཕྲད་ཀུན་གྲོལ་མ་ཤེས་སྣང་བའི་རྟོག་མི་ཆོམས། །ཅེར་མཐོང་ཅེར་གྲོལ་མ་ཤེས་གཉིས་འཛིན་རྩད་མི་ཆོད། །ཉམས་མྱོང་གཏིང་གསལ་མ་ཤེས་མི་རྟོག་ལྟེང་པོར་འཆོར། །གཉིས་སྣང་འཁྲུལ་བར་མ་གོ་ཞེན་ཆགས་འཁྲིས་མི་ཆོད། །ཚེ་ལ་ལོང་མེད་མ་ཤེས་དགེ་སྦྱོར་ཐང་ལྷོད་འཆོར། །རིག་པའི་རྩལ་ཁ་མ་འབྱོངས་འགྲོ་དྲུག་གཡང་མི་ཆོད། །དེ་དག་གནད་ལ་ལེགས་པར་བསླབ་པ་གཅེས། །མཐར་ཐུག་དྲུག་གིས་གནད་འགག་བསྡམ་པ་ནི། །སྡུག་པའི་མཐར་ཐུག་ཡིན་གྱིས་གཞན་གྱི་མགོ་དཔོན་བོར། །སྐྱིད་པའི་མཐར་ཐུག་ཡིན་གྱིས་བྱ་བ་ཐེངས་པར་གྱིས། །ཕུང་བའི་མཐར་ཐུག་ཡིན་གྱིས་མི་དགེའི་སྤྱོད་པ་སྤངས། །འཚེངས་པའི་མཐར་ཐུག་ཡིན་གྱིས་དགེ་ལ་སྤྱོད་པ་བསྒྲུབས། །བཟང་པོའི་མཐར་ཐུག་ཡིན་གྱིས་འཇིག་རྟེན་རྒྱབ་ཏུ་བོར། །ངན་པའི་མཐར་ཐུག་ཡིན་གྱིས་ཆོས་ལས་ལྡོག་པ་ཞོག །དེ་ལྟར་བྱས་ན་ཡང་རབ་དམ་པའི་རྩེ། །སྤང་བ་དྲུག་གིས་རང་རྒྱུད་གདུལ་བ་ནི། །མི་གཙང་གཅིན་རྟུག་ཡིན་གྱིས་ཟས་ཀྱི་སྲེད་པ་ཆོད། །སྙན་གྲགས་བྲག་ཆ་ཡིན་གྱིས་འཇིག་རྟེན་གྲགས་པ་སྤངས། །འཁྲུལ་སྣང་དགྲ་རུ་ལྡང་གིས་ཆགས་སྡང་འདུན་མ་སྤངས། །དུག་ལྔའི་མཚོན་ཆ་འཛུགས་ཀྱིས་གཟུང་འཛིན་ང་བདག་སྤངས། །ཆེ་བཙན་ལྷ་ཆོས་འཆོར་གྱིས་མི་ཆེན་ལབ་མོ་སྤངས། །སྡིག་འཕེལ་དགེ་སྦྱོར་ཆག་གིས་ནོར་རྫས་གསོག་བྲུན་སྤངས། །དེ་ལྟར་བྱས་ན་སྒྲུབ་པ་འཕེལ་བར་མཆི། །ཆོས་ཉིད་དོན་དང་མཇལ་བའི་ཆོས་དྲུག་ནི། །ཅེར་མཐོང་ངོ་ཤེས་ཉམས་མྱོང་གཏིང་ནས་སད། །ཉམས་ཞེན་རང་ལོག་སྣང་བ་རྗེས་མེད་སངས། །འཇིག་རྟེན་རྟོག་བྲལ་ཡེ་ཤེས་ཟང་ཐལ་ཤར། །འདི་དྲུག་སུ་ལྡན་ཆོས་ཉིད་ཉམས་སུ་མྱོང། །འདུ་ཤེས་དྲུག་གི་གདམས་པ་བསྟན་པ་ནི། །དུས་གསུམ་ཐུན་ཕྱེ་མི་རྟག་འདུ་ཤེས་སྒོམས། །གཉེན་དང་མཛའ་བཤེས་འགྲོན་པོའི་འདུ་ཤེས་སྒོམས། །གར་འདུག་གནས་ལ་འགྲོན་ཁང་འདུ་ཤེས་སྒོམས། །ཟས་ནོར་ལོངས་སྤྱོད་རྩེད་མོའི་འདུ་ཤེས་སྒོམས། །བྱ་བ་གང་བྱེད་རྨི་ལམ་འདུ་ཤེས་སྒོམས། །ཉེ་རིང་གར་འགྲོ་འཆི་བའི་འདུ་ཤེས་སྒོམས། །དེ་དག་ལྡན་ན་འཁོར་བའི་གནས་ལས་ཐར། །གཅེས་པ་དྲུག་གི་གདམས་ངག་བསྟན་པ་ནི། །སེམས་ཉིད་དོན་མཐོང་རྟོགས་པའི་རང་ཉམས་གཅེས། །གདམས་ངག་མཚང་ཤེས་གོ་བའི་ཤེས་རབ་གཅེས། །དཀའ་བའི་གནད་ཁྲོལ་གྲུབ་མཐའི་དོན་མཐོང་གཅེས། །གོ་ཆ་ཐུབ་པའི་ཚུལ་ཁྲིམས་རྣམ་དག་གཅེས། །འཁྲུལ་བ་ཆོད་པའི་ཤེས་རབ་དྲི་མེད་གཅེས། །ཆེད་འཛིན་གྲོལ་བའི་སྤྱོད་པ་གཏད་མེད་གཅེས། །ལམ་དུ་སློང་བ་སྤྱི་ཡི་ཆོས་དྲུག་ནི། །མར་གྱི་ཟག་ཆུ་བསྡམས་པའི་རྒྱུ་འབྲས་ཕྲ་མོ་སྤྱད། །ཡར་གྱི་ཕུ་ཐག་བསྲིངས་པ་མཐོན་པོའི་རྩེ་མོ་སྙེགས། །བར་གྱི་འཕྲེད་ཁ་བཅད་པ་ཆོས་སྤྱོད་སྲང་དུ་གཞུག །སྦྱོར་བ་ཐེག་དམན་ལས་ལྡོག་བྱང་ཆུབ་སེམས་བསྐྱེད་བྱ། །དངོས་གཞི་བདེན་ཞེན་དགག་པ་རང་བཞིན་མེད་ཤེས་དང༌། །རྗེས་ལ་ལམ་དུ་བསྒྱུར་བ་འཁོར་གསུམ་དག་པར་བསྔོ། །དེ་དྲུག་ལྡན་ན་དགེ་སྦྱོར་ལམ་དུ་འགྲོ། །འཁྲོལ་ཆགས་ཡངས་པ་ཆེན་པོའི་ཆོས་དྲུག་ནི། །བློ་རྒྱ་ཆུང་བས་མི་འོང་སྡེ་སྣོད་འཁྲོལ་ཤེས་དགོས། །ཤེས་ནས་འབྱམས་པས་མི་འོང་གདམས་ངག་འཁྲོལ་ཤེས་དགོས། །ཟབ་མོས་སྐྲག་པས་མི་འོང་རྒྱུད་སྡེའི་འཁྲོལ་ཤེས་དགོས། །ཚིག་ཕྱིར་འབྲངས་པས་མི་འོང་བསྒྲུབ་པའི་འཁྲོལ་ཤེས་དགོས། །ཕྱོགས་ཆའི་གྲུབ་མཐས་མི་འོང་གང་ལ་འཁྲོལ་ཤེས་དགོས། །ཐེ་ཚོམ་སོམ་ཉིས་མི་འོང་ངེས་ཤེས་འཁྲོལ་ཤེས་དགོས། །དེ་ལྟར་སུས་ཤེས་ཆོས་ཀུན་གཅིག་ཏུ་འདུས། །ཡང་དག་དོན་ལ་སྦྱར་བའི་ཆོས་དྲུག་ནི། །ཅི་བསླབ་གཞན་གྱི་དོན་དུ་སྦྱར་བ་དང༌། །སྙིང་རྗེས་སྡུག་བསྔལ་རང་ཉམས་སྦྱར་བ་དང༌། །ལོངས་སྤྱོད་ཅི་བྱུང་ཚོགས་སུ་གཏང་བ་དང༌། །སྡོམ་གསུམ་དམ་ཚིག་གཙང་མ་བསྲུང་བ་དང༌། །སྤྱོད་ལམ་ཆོས་ཉིད་དག་དང་མ་བྲལ་དང༌། །མོས་གུས་གདུང་བས་གསོལ་བ་གདབ་པ་རྣམས། །དམ་པའི་རྣམ་ཐར་ཡིན་ནོ་རྗེས་སུ་བསྒྲུབ། །ན་བ་ལམ་དུ་བསླང་བའི་ཆོས་དྲུག་ནི། །ན་བས་འཁོར་བའི་ལས་ངན་ཟད་པར་བྱེད། །ན་བས་ཉོན་མོངས་དྲི་མ་འཁྲུ་བར་བྱེད། །ན་བས་མོས་གུས་གདུང་བའི་གསོལ་འདེབས་བྱེད། །ན་བས་བརྩོན་འགྲུས་དགེ་སྦྱོར་སྐུལ་མ་བྱེད། །ན་བས་ཐར་བའི་ལམ་དང་སྤྲོད་པར་བྱེད། །ན་བས་རྩལ་སྦྱོང་བོགས་འདོན་གསལ་འདེབས་བྱེད། །དེ་ཕྱིར་ན་བ་མཁས་པས་ལམ་དུ་བསླང༌། །ཤེས་པ་དྲུག་གི་གདམས་ངག་བསྟན་པ་ནི། །གནོད་བྱེད་དགྲ་འདྲེ་ཕན་འདོགས་ལྷར་ཤེས་དང༌། །ཉེ་འབྲེལ་བརྩེ་གདུང་མར་འདྲེན་གནོད་སྐྱེལ་དང༌། །རང་རྒྱུད་ཉོན་མོངས་དགྲ་སྡང་ཚེར་མ་དང༌། །ངར་འཛིན་སྲུང་སྐྱོབ་གནོད་བྱེད་འགོང་པོ་དང༌། །མི་མཐུན་རྐྱེན་ངན་ཐར་ལམ་བོགས་འབྱིན་དང༌། །སྙན་གྲགས་བསྟོད་པ་སྐྱོན་གྱི་ངན་ཚང་དུ། །ཤེས་པར་བྱ་བ་ཤིན་ཏུ་རྣམ་དྲུག་གཅེས། །ངེས་དོན་སྙིང་པོའི་གདམས་ངག་རྣམ་དྲུག་ནི། །སྐྱེ་མེད་ངང་ལས་འཁྲུལ་གཞི་ངོས་གཟུང་ཞིང༌། །འགག་མེད་འཆར་དུས་འཁྲུལ་བ་རྩད་ནས་ཆོད། །གཉིས་མེད་རྟོགས་པས་འཁོར་བ་རུ་བཟློག་ཅིང༌། །བློ་དངོས་རང་གྲོལ་མཐའ་བཞིའི་གེགས་རྣམས་བསལ། །ལྟ་བས་ཕུ་བཅད་འཁོར་འདས་ཁོག་དགྲོལ་ཞིང༌། །སྤྱོད་པས་མདའ་ཁྲོལ་སྤྱོད་ལམ་ལམ་དུ་སློང༌། །འདི་དག་ཟབ་དོན་སྙིང་པོ་མཐར་ཐུག་ཡིན། །བྱ་བ་དྲུག་གིས་གནད་དུ་བརྡེག་པ་ནི། །མི་གཞི་འགྱུར་མེད་ཆོས་ལས་མི་བཟློག་བྱ། །སེམས་ལ་གཡོ་མེད་གཞན་གྱིས་མ་ཁྲེལ་བྱ། །དད་གུས་འགྲིབ་མེད་རེས་འགར་མ་སོང་བྱ། །བསླབ་གསུམ་གཅེས་སྤྲས་ཉེས་ལྟུང་མ་གོས་བྱ། །རྟག་ཏུ་འཆི་བསམ་སྙོམ་ལས་མ་ལུས་བྱ། །ཐུག་ཕྲད་ཉོན་མོངས་གཉེན་པོས་རང་གྲོལ་བྱ། །དེ་དྲུག་ལྡན་ན་དགོས་པ་ཐམས་ཅད་འགྲུབ། །ཡེ་ཤེས་སྦར་བའི་གདམས་པ་རྣམ་དྲུག་ནི། །འཛིན་མེད་ངང་དུ་སྣང་བ་ས་ལེ་བ། །གཉིས་མེད་ངང་དུ་མཉམ་པར་ལྷན་ནེ་བ། །གསལ་དག་ངང་དུ་རང་དྭངས་སང་ངེ་བ། །འོད་གསལ་ངང་དུ་རང་གསལ་སལ་ལེ་བ། །ཆོས་ཉིད་ངང་དུ་དགའ་འཛུམ་ཤིག་གེ་བ། །བློ་འདས་དབྱིངས་སུ་ཡངས་པ་ཕྱལ་ལེ་བ། །མ་བཅོས་རང་བཞིན་རྫོགས་པ་ཆེན་པོར་འགྲུབ། །རང་བཞིན་གནད་དང་བསྲེ་བའི་ཆོས་དྲུག་ནི། །རང་རིག་བློ་འདས་གཉུག་མའི་ཡེ་ཤེས་ལ། །རང་བབས་སྒོམ་པ་འོད་གསལ་ཆེན་པོ་ནི། །གྲིམས་པར་བསྒྲིམས་ལ་ལྷོད་པར་གློད་པ་སྟེ། །ཕྱལ་བར་མ་ཤོར་མ་ཡེངས་དྲན་པས་ཟིན། །འཕྲོ་གནས་རིས་མེད་མཉམ་པའི་ངང་གཅིག་ལ། །ཕྱོགས་བྲལ་ནམ་མཁའ་འདྲ་བའི་རང་བཞིན་ནི། །ཆོས་སྐུ་ཕྱག་རྒྱ་ཆེན་པོར་ལྷུན་གྱིས་གྲུབ། །མི་གནས་འཕོ་འགྱུར་མེད་པའི་ཆོས་དྲུག་ནི། །རིག་པ་སྟོང་གསལ་སྤྲོས་དང་བྲལ་བ་ལ། །གཟུང་འཛིན་རེ་དོགས་དྲི་མས་མ་བསླད་པར། །རང་བབས་སོ་མ་གཅེར་བུ་རང་གའི་ངང༌། །མི་བསམ་མི་སྤྱོད་མི་སྒོམ་མི་རྟོག་པར། །སལ་ལེ་སེང་ངེ་ཡེ་རེ་ཝལ་ལེ་བ། །ཤར་གྲོལ་རིས་མེད་ཐ་མལ་ཤེས་པ་ནི། །མ་ལུས་སྡུག་བསྔལ་སྤྲོས་ཀུན་ཞི་བྱེད་ཡིན། །ཆོས་ཉིད་མཉམ་པ་ཆེན་པོའི་ཆོས་དྲུག་ནི། །མཐའ་གྲོལ་རིག་པ་ནམ་མཁའ་ལྟ་བུ་ལ། །འཁོར་འདས་རིས་མེད་སྤང་བླང་ཐ་སྙད་བྲལ། །བྱར་མེད་ཆོས་སྐུ་གཞི་གྲོལ་ལྟ་བའི་ངང༌། །གང་ལའང་མི་སེམས་དམིགས་འཛིན་བྲལ་བ་ནི། །གནས་ལུགས་རང་བཞིན་ཤེས་རབ་ཕ་རོལ་ཕྱིན། །བློ་ཡི་སྙེམས་བྲལ་ཞེན་པའི་འཁྲིས་ཆོད་པ། །རྒྱལ་བ་ཀུན་གྱི་སྤྱོད་ཡུལ་ལྷུན་གྱིས་གྲུབ། །རིག་པ་ཆོས་ཉིད་གནས་པའི་ཚད་དྲུག་ནི། །དད་པའི་ངང་ལ་ཁམས་སོས་ཡལ་ལེ་བ། །གནས་ལུགས་ངང་ལ་ལྷུན་ཆགས་མེར་རེ་བ། །བསམ་གཏན་ངང་ལ་བརྗིད་ཆགས་ལྷན་ནེ་བ། །ཉམས་མྱོང་ངང་ལ་བཀྲག་ཕྱིན་སལ་ལེ་བ། །ཆོས་ཉིད་ངང་ལ་དྭངས་ཆགས་སང་ངེ་བ། །རང་རིག་ངང་ལ་ངར་ཆགས་ཧུར་རེ་བ། །དེ་ལྟར་བསྒོམས་པས་ཡེ་ཤེས་རིག་པའི་ཀློང༌། །སྐལ་བཟང་སྣོད་དང་ལྡན་པའི་ཆོས་དྲུག་ནི། །མོས་གུས་ཚུད་པས་ཅི་བྱས་དད་མི་ལྡོག །ཆོས་ལ་དད་པས་དགེ་སྡིག་རྒྱུ་འབྲས་འཛེམ། །དམ་ཚིག་གཙང་བས་མཆེད་ལ་བརྩེ་གདུང་ཆེ། །ཆོས་དང་འདྲེས་པས་དགེ་སྦྱོར་གཅེས་སྤྲས་བྱེད། །གཉེན་པོ་ཆེ་བས་རྐྱེན་ངན་རང་སར་གྲོལ། །བྲོད་པ་རྙེད་པས་སྒོམ་སྒྲུབ་བརྩོན་པ་ནི། །དམ་ཆོས་རིན་ཆེན་སྣོད་མཆོག་ལགས་པར་གསུངས། །སྣོད་ངན་དོན་ཆུང་ཆོས་དྲུག་བསྟན་པ་ནི། །ཡུན་རིང་བསྒོམས་ཀྱང་རང་རྒྱུད་མ་གྲོལ་ན། །དགོན་པར་གནས་ཀྱང་དོན་ཆུང་རི་དྭགས་འདྲ། །སྡེ་སྣོད་ཤེས་ཀྱང་གཉེན་པོར་མ་སོང་ན། །ཐོས་བསམ་ཆེ་ཡང་དོན་ཆུང་ནེ་ཙོ་འདྲ། །བླ་མ་བསྟེན་ཡང་གདམས་པ་མ་ལོན་ན། །མདོ་སྟོར་རྒྱ་མཚོའི་འགྲམ་དུ་སྐོམ་རིད་ལུས། །གདམས་ངག་ཡོད་ཀྱང་རྒྱུད་ལ་མ་འབྱོར་ན། །བཅངས་པ་དོན་ཆུང་སྨན་དཔྱད་ཡི་གེ་འདྲ། །དྲོད་རྟགས་ཐོབ་ཀྱང་སེམས་ཉིད་མ་རྟོགས་ན། །སྒོམ་པ་དོན་ཆུང་མུ་སྟེགས་ལམ་ཞུགས་འདྲ། །དཀའ་སྤྱད་ཆེ་ཡང་ཡོན་ཏན་མ་སྐྱེས་ན། །འབད་པ་དོན་ཆུང་སྤང་ཕུགས་ཕྱི་བ་འདྲ། །དེ་བས་གནད་དུ་འགྲོ་བ་ཤིན་ཏུ་གཅེས། །བླ་མ་མཆོག་གི་རྟགས་དྲུག་བསྟན་པ་ནི། །བསྟེན་ཚེ་བག་དྲོ་ཆོས་ལ་བློ་འགྲོ་ན། །བསྒྲུབས་པའི་བྱིན་རླབས་སྤྲིན་ཕུང་ཡོད་པའི་རྟགས། །སློབ་མ་སྒྲུབ་བཅུག་ཡོན་ཏན་སྣ་མང་ན། །ཟབ་མོའི་སྙན་བརྒྱུད་གདམས་པ་ཆེ་བའི་རྟགས། །འཁོར་དང་ཡོ་བྱད་གཞན་ཤོར་ཕྲག་དོག་མེད། །འཇིག་རྟེན་མངོན་ཞེན་འདོད་བློ་ཟད་པའི་རྟགས། །བློ་རིག་གང་ཡང་ལམ་དུ་འཇུག་ཤེས་ན། །འགྲོ་དོན་ཐབས་མཁས་ཐུགས་རྗེ་ཡོད་པའི་རྟགས། །སྡུག་བསྔལ་བ་ལ་ཕན་འདོགས་རྒྱ་ཆེ་ན། །ཚད་མེད་སེམས་བསྐྱེད་སྙིང་རྗེ་འབྱོངས་པའི་རྟགས། །ཁོང་ཡངས་བློ་བདེ་བྱ་བ་བྲལ་བ་ན། །གནས་ལུགས་རྟོགས་པའི་གདེང་དང་ལྡན་པའི་རྟགས། །དེ་འདྲའི་མཚན་ལྡན་བླ་མ་བཙལ་ལ་བསྟེན། །ཆོས་སྒྲུབ་རྣམས་ཀྱི་རྟགས་དྲུག་སྤང་བ་ནི། །མི་ཆོས་ཁ་འཛིན་ཆེ་ན་ཆགས་སྡང་ཡོད་པའི་རྟགས། །ཅི་བྱས་སྡང་བར་མཐོང་ན་ལོག་ལྟ་སྐྱེས་པའི་རྟགས། །འཁྲུལ་སྣང་གཅེས་འཛིན་མང་ན་དགེ་སྦྱོར་འགྲིབ་པའི་རྟགས། །ཕ་ཡུལ་ཡོ་བྱད་སོག་ན་ཆོས་ལས་ལོག་པའི་རྟགས། །ཚེ་འདི་དོན་དུ་གཉེར་ན་བར་ཆད་བདུད་ཀྱི་རྟགས། །ཆོས་ལ་ངེས་ཤེས་མེད་ན་ཐར་ལམ་སྟོར་བའི་རྟགས། །ནོར་བ་དྲུག་གི་རང་བཞིན་སྤང་བ་ནི། །འདི་ཕྱིའི་སྐྱབས་གནས་བླ་མ་མི་མཆོད་པར། །མགུ་བྱེད་ཉེ་འབྲེལ་སྐྱོང་བ་ཤིན་ཏུ་ནོར། །དངོས་གྲུབ་རྩ་བ་བཟླས་བརྗོད་མི་བྱེད་པར། །ཟད་མེད་ལོང་གཏམ་གཏོང་བ་ཤིན་ཏུ་ནོར། །དད་སོགས་འཕགས་པའི་ནོར་བདུན་མི་གསོག་པར། །སྡུག་བསྔལ་རྩ་བ་ནོར་སོག་ཤིན་ཏུ་ནོར། །སེམས་ཉིད་དོན་གྱི་གནས་ལུགས་མི་སྒོམ་པར། །རྣམ་གཡེང་འདུ་འཛིའི་བྱ་བ་བསྒྲུབ་པ་ནོར། །ཉེས་པའི་འབྱུང་གནས་ངར་འཛིན་མི་འདུལ་བར། །ཁེ་གྲགས་ལོ་འདོད་མངོན་རློམ་བྱེད་པ་ནོར། །མ་རིག་མུན་སེལ་ཐོས་བསམ་མི་བྱེད་པར། །སྙམ་བྱེད་མུན་པའི་བླུན་སྒོམ་བྱེད་པ་ནོར། །ནོར་བ་སྤངས་ན་ཐར་ལམ་ཉེ་བར་འགྱུར། །གདམས་ངག་དྲུག་གིས་གནད་དུ་བསྣུན་པ་ནི། །རྐང་མེད་ཡུར་བར་མི་འབབ་མཁས་པའི་བླ་མ་བསྟེན། །འཁྲུལ་བར་འགྲོ་བའི་རྟེན་ཡིན་ལོག་དམན་བྱ་བ་དོར། །གཞན་གྱི་ངན་སྤྱོད་འགོ་བས་མི་དང་འགྲོགས་མི་བྱ། །བསམ་གཏན་གཡེང་བའི་ཚེར་མ་ཐ་སྙད་ཚིག་མ་རྩོད། །བྲེལ་དོ་ཟིན་པའི་དུས་མེད་བྱ་བྱེད་འཕྲོ་ལ་བོར། །དངོས་གྲུབ་རིང་བར་འགྱུར་བས་ཡི་དམ་གཞན་མ་སྤེལ། །བཟའ་བཏུང་སྲེད་པ་འཕེལ་བས་གང་བྱུང་འཚོ་བ་བསྟེན། །དེ་ལྟར་བྱས་ན་ཀུན་སྤྱོད་དགེ་བ་འཕེལ། །སློབ་དཔོན་ངན་པའི་སྐྱོན་དྲུག་འགོ་བ་ནི། །བཤེས་གཉེན་ངན་པ་བསྟེན་པའི་སློབ་མ་དག །གྲུབ་མཐའ་ངན་པས་རྟག་ཆད་མཐར་འཛིན་འགོ །སྤྱོད་པ་ངན་པས་མི་དགེ་ལོག་པར་འཁྲིད། །གྲུབ་རྟགས་ངན་པས་ཁོང་ཁྲོ་གདུག་རྩུབ་འཕེལ། །སྒོམ་པ་ངན་པས་འཁྲུལ་སྣང་བག་ཆགས་སྦྱོར། །ཉམས་ལེན་ངན་པས་འཇིག་རྟེན་ཆོས་ལ་འཆེལ། །འབྲས་བུ་ངན་པས་འཁོར་བ་ངན་སོང་ལྟུང༌། །དེ་ཕྱིར་དད་ལྡན་ཐར་ལམ་གཉེར་རྣམས་ཀྱིས། །བར་ཆད་བདུད་དུ་སློབ་དཔོན་ངན་པ་ཆེ། །དེ་བས་བརྟགས་ཏེ་རབ་ཏུ་སྤང་བར་བྱ། །གྲོགས་ངན་སྤྱོད་པ་འགོ་བའི་ཆོས་དྲུག་ནི། །བསམ་མེད་བྱིས་དང་འགྲོགས་ན་དོན་ཆུང་སྤྱོད་པ་འགོ །ན་ཕྲད་གཞོན་དང་འགྲོགས་ན་རྩེ་རྒོད་སྤྱོད་པ་འགོ །ཁྱིམ་པ་རྣམས་དང་འགྲོགས་ན་སོ་ནམ་ཁེ་གྲགས་འགོ །ཚོང་པ་དག་དང་འགྲོགས་ན་ཁེ་སྤོགས་གསོག་བྲུན་འགོ །ཞེ་སྡང་ཅན་དང་འགྲོགས་ན་གདུག་རྩུབ་སྤྱོད་པ་འགོ །གཉེན་བཤེས་སྐྱོང་དང་འགྲོགས་ན་ལྟོ་གོས་བཟའ་འཚོལ་འགོ །དེ་བས་གྲོགས་ངན་སྤངས་ལ་གྲོགས་བཟང་ཆོས་ལྡན་བསྟེན། །བྱུར་ངན་ཁྱིམ་ཐབ་བསྟེན་པའི་ཉེས་དྲུག་ནི། །མི་རྟག་རྒྱུད་ལ་སྐྱེས་ཀྱང་སྒྲུབ་པ་ལེ་ལོས་འཁྱེར། །དད་པ་ཤེས་རབ་འཛོམ་ཡང་བྱ་བའི་སྐབས་མི་རྙེད། །ཚེ་འདི་དགོས་མེད་ཤེས་ཀྱང་འཇིག་རྟེན་བློས་མི་ཐོངས། །ཟབ་མོའི་གདམས་པ་ཡོད་ཀྱང་ཉམས་ལེན་ཡིད་སྨོན་ལུས། །ཐོས་བསམ་ཤེས་རྒྱ་ཆེ་ཡང་རང་གཞན་ཕན་མི་ཐོགས། །གནས་ལུགས་ལྟ་བ་གོ་ཡང་ཐ་མལ་ངང་དུ་འཆི། །དེ་འདྲའི་དབང་དུ་མ་སོང་ཤིན་ཏུ་གཟབ་པར་བྱ། །བསླུ་བྲིད་བདུད་ཀྱི་ཆོས་དྲུག་བསྟན་པ་ནི། །ནོར་སྲེད་ཅན་རྣམས་རྫས་ཀྱིས་བསླུས་པའི་བདུད། །མཁྱེན་རྒྱ་ཅན་རྣམས་ཡོན་ཏན་བསླུས་པའི་བདུད། །མཐོན་པོའི་རིགས་རྣམས་སྐྱེས་པས་བསླུས་པའི་བདུད། །འདུ་བ་ཅན་རྣམས་བསོད་ནམས་བསླུས་པའི་བདུད། །ལས་ངན་ཅན་རྣམས་རྐྱེན་ངན་བསླུས་པའི་བདུད། །གྲགས་འདོད་ཅན་རྣམས་གཏམ་གྱིས་བསླུས་པའི་བདུད། །ཤིན་ཏུ་མང་བས་དེ་དབང་མ་སོང་བྱ། །བསླབ་ཉེས་དྲེད་པོར་སོང་བའི་སྐྱོན་དྲུག་ནི། །ཐ་མལ་བསམ་བློ་བྱ་བྱེད་ལོང་གཏམ་མང༌། །འཁྲུལ་བའི་ཉེས་སྤྱོད་གཅིག་ཕྱིར་གཅིག་མཐུད་འབྱུང༌། །ལྟ་བར་བདག་འཛིན་ཆགས་སྡང་སྣ་ཚོགས་སྤྱོད། །སྒོམ་པར་ངན་སེམས་ལོག་ལྟ་རྒྱུན་མི་འཆད། །སྤྱོད་པར་མི་དགེ་ཆོས་མིན་སྣ་ཚོགས་སྤྱོད། །ཆོས་ལ་བློ་འདྲེད་ཚེ་འདིའི་དབང་སོང་བ། །དེ་དག་ཐར་པའི་ལམ་སྟོར་དྲེད་པོ་སྟེ། །བསླབ་ཉེས་ངན་ལང་ཆེ་བས་རིང་དུ་སྤང༌། །དགེ་སྡིག་འདྲེས་མ་སྤང་བའི་ཆོས་དྲུག་ནི། །བཅུད་མེད་ཆགས་སྡང་འཕེལ་བའི་སློབ་དཔོན་མ་བསྟེན་ཞིག །སྣོད་མེད་ཉེས་སྐྱོན་རྟོགས་པའི་སློབ་མ་མ་བསྟེན་ཞིག །མི་དགེ་སྡིག་པ་བསགས་པའི་དགེ་བ་མ་བྱེད་ཅིག །བཀུར་སྟི་ཁ་ལན་རེ་བའི་སྦྱིན་པ་མ་བཏང་ཅིག །ཟས་ནོར་ཉེ་འབྲེལ་གསོ་བའི་མཆོད་པ་མ་བྱེད་ཅིག །གཡོ་སྒྱུས་རྙེད་པ་འཚོལ་བའི་ཆོས་བཤད་མ་བཏང་ཅིག །འདི་ལ་ཉན་ན་ཆོས་དང་མཐུན་པར་འོང༌། །ལོ་འདོད་དོན་དང་འགལ་བའི་ཆོས་དྲུག་ནི། །ཐ་མལ་བློ་མ་ལོག་པའི་ཆོས་པ་ཡིན་ལོ་དང༌། །དད་གུས་བསྙེན་བཀུར་མེད་པའི་བླ་མ་བསྟེན་ལོ་དང༌། །ཆོས་དང་རང་རྒྱུད་མ་འདྲེས་སྟོན་ཆེན་ཡིན་ལོ་དང༌། །འདུ་འཛི་སྙོམ་ལས་མ་སྤངས་དགོན་པ་བསྟེན་ལོ་དང༌། །ཡོན་ཏན་གོང་དུ་མི་འཕེལ་བསམ་གཏན་སྒོམ་ལོ་དང༌། །སྒྲུབ་པ་གནད་དུ་མ་བསྣུན་གཞན་དོན་བྱེད་ལོ་དང༌། །འདི་དྲུག་འདྲ་མིན་འཆོལ་བས་མཁས་པས་རིང་དུ་སྤང༌། །ཟོལ་མ་དྲུག་གིས་བསླུ་བའི་ཆོས་དྲུག་ནི། །ལྟ་བ་ཟོལ་མ་གདེང་དུ་མ་ཚུད་པའི། །གཡོམ་རྒྱུག་སྤྲོས་བྲལ་འདིས་ཀྱང་རང་སེམས་སླུ། །སྒོམ་པ་ཟོལ་མ་གནད་དུ་མ་ཐེབས་པའི། །བླུན་སྒོམ་ཡིད་དཔྱོད་འདིས་ཀྱང་རང་སེམས་སླུ། །སྤྱོད་པ་ཟོལ་མ་བག་དང་མི་ལྡན་པའི། །སྨྱོ་སྤྱོད་རྩིང་པོ་འདིས་ཀྱང་རང་སེམས་སླུ། །དམ་ཚིག་ཟོལ་མ་ཉེས་ལྟུང་མི་འཛེམ་པའི། །སྲུང་སྡོམ་ངོ་ལྐོག་འདིས་ཀྱང་རང་སེམས་སླུ། །ཐོས་བསམ་ཟོལ་མ་སངས་རྒྱས་མི་འདོད་པའི། །ང་མཁས་གྲགས་འདོད་འདིས་ཀྱང་རང་སེམས་སླུ། །འབྲས་བུ་ཟོལ་མ་སེམས་ཉིད་མ་རྟོགས་པའི། །ཕྱི་དུས་ཡིད་སྨོན་འདིས་ཀྱང་རང་སེམས་སླུ། །སླུ་བྲིད་དབང་དུ་མ་སོང་ཤིན་ཏུ་གཅེས། །མི་རིགས་བྱ་བ་སྤང་བའི་ཆོས་དྲུག་ནི། །ཕ་མེས་བླ་འཚོང་ཆོས་དཔག་ཁྲམ་མ་བྱེད། །སྤུན་གྲོགས་དམེ་ཤོར་མཆེད་གྲོགས་རྩོད་མ་བྱེད། །སྤྱི་ཡུལ་ཁྲིམས་འཇིགས་ཆོས་མིན་ལས་མ་བྱེད། །ངན་སྐྱུགས་དུག་འཐོར་གཞན་གྱི་རྔན་མ་འདྲེན། །ཚོད་མེད་ཞལ་བཙེ་གང་ཟག་ཆོས་མ་གཤེ །མ་བཅོལ་གཉེར་བ་མི་ཆོས་འདུན་མ་ཞོག །བཅོལ་ཞིང་དབང་བ་ཆོས་ཀྱིས་སངས་རྒྱས་བསྒྲུབ། །ཚུལ་བཞིན་ཆོས་ལ་བསྒྲུབ་པར་ཞུགས་རྣམས་ཀྱིས། །གྲོང་ཡུལ་ཕྱིན་པའི་ཉེས་པ་རྣམ་དྲུག་ནི། །ཉམས་གྲིབ་ཕོག་པས་ཉམས་དང་བྱིན་རླབས་ཡལ། །ཉོན་མོངས་ལྡང་བས་བསླབ་གསུམ་སྲུང་སྡོམ་ཤོར། །དམ་བཅའ་འཆག་པས་རྐྱེན་དང་བར་ཆད་མང༌། །འཁྲུལ་སྣང་འགོས་པས་ལྟ་སྒོམ་རྩལ་གསུམ་ཤོར། །ཐ་མལ་འགོས་པས་རང་རྒྱུད་ཆོས་ལས་འདྲེད། །ལས་ངན་དབང་གིས་ཐ་མལ་ཁྱིམ་ཐབ་འགྲོ། །དེ་ཕྱིར་གྲོང་ཡུལ་མི་འགྲིམ་དབེན་པ་བསྟེན། །རྒྱ་ལམ་འགྲོ་ཡང་བཙོན་རའི་འདུ་ཤེས་ཀྱིས། །དབང་པོ་ཡུལ་ལ་མ་ཡེངས་ཤིན་ཏུ་གཟབ། །བསྒྲུབ་པའི་གནས་དྲུག་ཆིངས་སུ་བཅིང་བ་ནི། །ལྟ་བའི་གནས་ལུགས་སངས་རྒྱས་དགོངས་པར་སྐྱོལ། །ཉམས་ལེན་མན་ངག་ཐབས་ཀྱིས་གནད་དུ་གཟིར། །རིག་པའི་ཡེ་ཤེས་གཏན་ཚིགས་འགག་ཏུ་གཏེམས། །སྐྱེ་ཚུལ་གནད་རྣམས་ཡུལ་སྣང་ཐུག་ཕྲད་གྲོལ། །ཐམས་ཅད་སེམས་ཉིད་འགྱུར་མེད་ངང་དུ་བསྡམ། །ཆོས་སྤྱི་རྫོགས་པ་ཆེན་པོར་བཅིང་བ་སྟེ། །འདི་དག་གནད་བསྣུན་ཚེ་འདིས་བྱང་ཆུབ་འགྲུབ། །གཞི་དྲུག་འདིངས་པའི་གདམས་ངག་བསྟན་པ་ནི། །ཤེས་རབ་གཞི་འདིངས་ཐོས་བསམ་སྦྱོར་བ་དང༌། །ཐེག་ཆེན་གཞི་འདིངས་སེམས་བསྐྱེད་བསླབ་པ་དང༌། །བྱིན་རླབས་གཞི་འདིངས་བརྒྱུད་པ་བཟང་བ་དང༌། །རྟོགས་པའི་གཞི་འདིངས་སེམས་ཉིད་རྟོགས་པ་དང༌། །ཡོན་ཏན་གཞི་འདིངས་དད་བརྩོན་འབྲེལ་བ་དང༌། །བདེ་སྐྱིད་གཞི་འདིངས་འཁོར་བ་སྤང་བ་སྟེ། །དམ་པ་རྣམས་ཀྱི་མཛད་པའི་རྗེས་སུ་སློབ། །ཟང་ཟིང་ནོར་རྫས་བསགས་པའི་སྐྱོན་དྲུག་ནི། །དུག་ལྔའི་རྟེན་ཡིན་ཆགས་སྡང་ཟག་པ་འཕེལ། །སེར་སྣའི་འཆིང་བྱེད་ཡི་དྭགས་ལས་ངན་སོག །འཇིག་རྟེན་ཆོས་སོང་བྱང་ཆུབ་ལམ་དང་བྲལ། །སྐྱེད་འཕེལ་བསྐྱང་སྲུང་མི་ཚེ་སྡུག་བསྔལ་ཟད། །ཉམས་ལེན་ཆོས་འཛོལ་ལྷ་མིའི་ངན་སྨྲས་འདུ། །བར་ཆད་བདུད་ཡིན་ཐ་མལ་སྲོག་ལ་རྒོལ། །དེ་བས་ནོར་རྫས་གསོག་བྲུན་སྐྱེད་འཕེལ་ཀུན། །དམ་ཆོས་སྒྲུབ་པས་རིང་དུ་སྤང་བར་བྱ། །བཟའ་ཚང་ལེགས་པར་བཙལ་བའི་ཆོས་དྲུག་ནི། །ཕ་ཡི་དམ་པར་ཆོས་དབྱིངས་འགྱུར་མེད་ཚོལ། །མ་ཡི་དམ་པར་རང་བྱུང་ཡེ་ཤེས་ཚོལ། །བུ་ཡི་དམ་པར་རང་བྱུང་ཁྱེའུ་ཆུང་ཚོལ། །གྲོགས་ཀྱི་དམ་པར་གཉིས་མེད་ཟུང་འཇུག་ཚོལ། །ནོར་གྱི་དམ་པར་སེམས་ཉིད་ནོར་བུ་ཚོལ། །གནས་ཀྱི་དམ་པར་སྐུ་གསུམ་ཞིང་ཁམས་ཚོལ། །དེ་དག་འཛོམ་ན་རིག་པའི་གཏན་ཡུལ་ཟིན། །ཉམས་ལེན་སྲོལ་དུ་འཇུག་པའི་ཆོས་དྲུག་ནི། །འཁོར་བའི་སྐྱེལ་མར་སྐྱབས་འགྲོ་ཉམས་སུ་བླང༌། །སོ་ནམ་ལས་སུ་ཆོས་སྤྱོད་ཉམས་སུ་བླང༌། །མྱུར་མགྱོགས་རྟ་ཕོར་ཐབས་ལམ་ཉམས་སུ་བླང༌། །ནོར་གྱི་དབྱིག་ཏུ་ཚོགས་གཉིས་ཉམས་སུ་བླང༌། །ཁེ་སྤོགས་འཕེལ་དུ་ཡོན་ཏན་ཉམས་སུ་བླང༌། །ཟས་སྐོམ་བཅུད་དུ་གདམས་ངག་ཉམས་སུ་བླང༌། །དེ་ལྟར་སུས་བྱས་གོང་མའི་བརྒྱུད་པ་ཟིན། །རིག་པ་ལམ་གཞུག་གདམས་ངག་རྣམ་དྲུག་ནི། །སྐབས་སུ་རང་སྣང་མཐུན་པའི་རྐྱེན་གྲོགས་ལྟོས། །རང་སྣང་ཤེས་པས་ཉམས་མྱོང་གྲོགས་སུ་འཆར། །སྐབས་སུ་མི་མཐུན་གནོད་པའི་རྐྱེན་སྣང་ལྟོས། །འཁྲུལ་བ་ཞེན་ལོག་གནད་དུ་ཆེ་བ་ཡིན། །སྐབས་སུ་གྲོགས་དང་གཞན་གྱི་བླ་མ་ལྟོས། །བཟང་ངན་ཤེས་ན་ཉམས་ལེན་སྐུལ་མ་ཡིན། །སྐབས་སུ་མཁའ་ལ་འབྱུང་བཞིའི་ཆོ་འཕྲུལ་ལྟོས། །སེམས་ཉིད་ངང་དུ་འབད་རྩོལ་ཞིག་པ་ཤེས། །སྐབས་སུ་རང་གི་ཡུལ་མཁར་ལོངས་སྤྱོད་ལྟོས། །སྒྱུ་མར་ཤེས་པས་འཁྲུལ་སྣང་ཞེན་པ་ལོག །སྐབས་སུ་གཞན་གྱི་མི་ནོར་ལོངས་སྤྱོད་ལྟོས། །སྙིང་རྗེར་ཤེས་པས་འཁོར་བའི་འདོད་པ་སྤོང༌། །མདོར་ན་སྣ་ཚོགས་སྣང་བའི་ཆོས་རྣམས་ལ། །རང་བཞིན་བརྟགས་པས་བདེན་ཞེན་འཁྲུལ་བ་འཇིག །བལྟས་པས་ལེགས་པར་མཐོང་བའི་ཆོས་དྲུག་ནི། །ཕྱི་རོལ་སྣང་བ་དུས་བཞིའི་འགྱུར་ལྡོག་ལྟོས། །མི་རྟག་སྐྱོ་ཤས་བློ་སྣ་ཐུང་བ་འཆར། །ཕན་བཏགས་ལན་དུ་གནོད་པ་བྱེད་པ་ལྟོས། །སྙིང་ནས་ཞེན་ལོག་ཐུན་མོང་མ་ཡིན་འཆར། །དོན་མེད་གཞན་གྱིས་ཆགས་སྡང་བྱེད་པ་ལྟོས། །ངེས་འབྱུང་དྲག་པོས་གང་ལའང་དགོས་མེད་འཆར། །བསྐྱངས་པའི་བུ་ཚས་ཕ་མར་མི་བསྟོངས་ལྟོས། །གཞན་ལ་བློ་ལྟོས་རེ་བ་ཆུང་བ་འཆར། །འབྱོར་ལྡན་ཤི་ནས་སྒྲེན་མོར་སོང་བ་ལྟོས། །ཡོ་བྱད་གཉེན་འདུན་ཞེན་པ་ལོག་པ་འཆར། །ཐར་ལམ་དེད་དཔོན་བླ་མའི་སྐུ་དྲིན་ལྟོས། །སྙིང་ནས་མོས་གུས་མཆི་མ་གཡོ་བ་འཆར། །དེ་ལྟར་བདེ་སྡུག་འཁྲུལ་བའི་རྐྱེན་རྣམས་ལ། །ལེགས་པར་བསམས་ཏེ་ངེས་འབྱུང་སྐྱོ་ཤས་བསྐྱེད། །སྐབས་སུ་ལེགས་པར་ལྟ་བའི་ཆོས་དྲུག་ནི། །སྐབས་སུ་རང་གཞན་ལུས་ཀྱི་བྱེད་སྤྱོད་ལྟོས། །གར་མཁན་རྩེད་མོ་འདྲར་མཐོང་བདེན་མེད་འཆར། །སྐབས་སུ་ངག་གི་སྨྲ་བརྗོད་སྒྲ་ལ་ལྟོས། །གྲགས་སྟོང་བྲག་ཅ་འདྲར་མཐོང་བརྗོད་མེད་འཆར། །སྐབས་སུ་ཡིད་ཀྱི་བདེ་སྡུག་ཅི་ཤར་ལྟོས། །རིག་པའི་རོལ་པར་མཐོང་བས་གནས་ལུགས་འཆར། །སྐབས་སུ་འགྱུ་དྲན་རྟོག་པའི་རང་ངོ་ལྟོས། །རང་ཡལ་ཤེས་པ་ཆོས་སྐུ་ཅེར་མཐོང་འཆར། །སྐབས་སུ་སེམས་ཉིད་མ་གཡོས་ངང་ལ་ལྟོས། །འཕྲོ་འདུ་མེད་མཐོང་ཟད་པའི་དགོངས་པ་འཆར། །སྐབས་སུ་ཅོག་གཞག་བྱ་བཙལ་བྲལ་ལ་ལྟོས། །བྱར་མེད་མཐོང་བས་བློ་བདེ་ཁོང་ནས་འཆར། །དེ་ལྟར་སུས་ཤེས་ཟབ་མོའི་དོན་ལ་མཁས། །རང་བཞིན་ལེགས་པར་བསམ་པའི་ཆོས་དྲུག་ནི། །སྐྱེ་རྒ་ན་འཆིའི་དམག་ལ་བག་ཟོན་བསྐྱེད། །སྔར་བསགས་ལས་ཀྱི་བུ་ལོན་ད་རེས་སྦྱངས། །གཟུང་འཛིན་འཇིགས་པའི་འཕྲང་ལས་ད་རེས་བྲོས། །རྣམ་སྨིན་སྡིག་པའི་ཁུར་པོ་རྒྱབ་ཏུ་བོར། །འཛད་ངེས་ཚེ་ཡི་ཐར་ལམ་བྱང་ཆུབ་སྒྲུབས། །འཆི་བའི་ལ་ཆེན་རྒལ་ལ་བསམ་བློ་ཐོང༌། །དེ་ལྟར་བྱས་ན་ཐར་བའི་སྐམ་སར་སྙེགས། །གཅུད་ལ་བོར་བའི་དམ་ཆོས་རྣམ་དྲུག་ནི། །སྐྱུག་ལོག་བསམ་པས་འཁོར་བ་གཅུད་ལ་བོར། །བརྩོན་འགྲུས་བསྟེན་ནས་ཉམས་ལེན་གཅུད་ལ་བོར། །མོས་གུས་གསོལ་བས་བླ་མ་གཅུད་ལ་བོར། །དམ་ཚིག་བསྙེན་སྒྲུབ་ཡི་དམ་གཅུད་ལ་བོར། །གཏོར་ཚོགས་བརྩོན་པས་མཁའ་འགྲོ་གཅུད་ལ་བོར། །ཡང་ཟབ་གདམས་པས་ལྟ་སྒོམ་གཅུད་ལ་བོར། །དེ་ལྟར་སུས་བྱས་དངོས་གྲུབ་མྱུར་དུ་ཐོབ། །མཉམ་པ་དྲུག་དགོས་ལེགས་པར་བསྟན་པ་ནི། །འགྲོ་དྲུག་ཕ་མར་ཤེས་པས་དགྲ་དང་བུ་མཉམ་དགོས། །ནོར་རྫས་འཁྲུལ་སྣང་ཤེས་པས་གསེར་དང་བོང་མཉམ་དགོས། །གཤིས་ལ་ལས་འབྲས་མེད་པས་དགེ་སྡིག་མཉམ་ཤེས་དགོས། །ཚོགས་དྲུག་ཆོས་ཉིད་ཤེས་པས་མཉམ་རྗེས་མེད་ཤེས་དགོས། །ཉོན་མོངས་ཡེ་ཤེས་གསལ་བས་སྤང་བླང་མེད་ཤེས་དགོས། །གནས་ལུགས་གདོད་ནས་དག་པས་འཁོར་འདས་མཉམ་ཤེས་དགོས། །དེ་ལྟར་མཉམ་ཤེས་ཆེན་པོའི་རྣལ་འབྱོར་ཡིན། །མི་འཇུག་དྲུག་གི་གདམས་ངག་བསྟན་པ་ནི། །ཅིར་སྣང་བདེན་མེད་རྟོགས་པས་འཁྲུལ་སྣང་ཡིད་མི་འཇུག །ཅི་བྱས་དོན་མེད་རྟོགས་པས་འཇིག་རྟེན་ཡིད་མི་འཇུག །རང་དོན་གོལ་སར་རྟོགས་པས་ཐེག་དམན་ཡིད་མི་འཇུག །གཞི་ལ་སྐྱེ་མེད་རྟོགས་པས་སྐྱེ་འགག་ཡིད་མི་འཇུག །སེམས་ཉིད་དམིགས་མེད་རྟོགས་པས་མཚན་འཛིན་ཡིད་མི་འཇུག །ཆོས་ཉིད་བྱ་བྲལ་རྟོགས་པས་རྩོལ་སྒྲུབ་ཡིད་མི་འཇུག །གནས་ལུགས་རྟོགས་པའི་རྟགས་སུ་ཤུགས་ལ་འཆར། །མ་སོང་དྲུག་གི་གདམས་ངག་བསྟན་པ་ནི། །ལམ་ཁྱེར་གཡོམ་རྒྱུག་མ་སོང་ཕྲ་རགས་རྣམ་རྟོག་འཇོམས། །ས་ལམ་གཡོམ་རྒྱུག་མ་སོང་སྒྲིབ་གཉིས་སྤང་བྱ་ཞིང༌། །རྒྱུ་འབྲས་གཡོམ་རྒྱུག་མ་སོང་དགེ་སྡིག་བླང་དོར་བྱེད། །སྒོམ་པ་གཡོམ་རྒྱུག་མ་སོང་རང་གསལ་འཛིན་པ་མེད། །སྤྱོད་པ་གཡོམ་རྒྱུག་མ་སོང་བྱ་བྱེད་ཆོས་ལ་སྤྱོད། །མཛད་སྤྱོད་གཡོམ་རྒྱུག་མ་སོང་དམ་པའི་རྣམ་ཐར་སྐྱོང༌། །དེ་དང་གང་ལྡན་དམ་ཆོས་སྙིང་པོར་འགྲུབ། །སྐྱོན་དྲུག་སྤོང་བར་གདམས་པའི་ཆོས་དྲུག་ནི། །ལྟ་བ་རྟོགས་ཆོག་དེ་ནས་བྱ་རྒྱུ་མེད། །ཉམས་ལེན་ཁ་འབྱམས་སྐྱོན་དེ་ངོས་ཟིན་དགོས། །བསམ་གཏན་རང་གསལ་ངང་དུ་གནས་པ་བཙལ། །སྒོམ་པ་སྙེམས་བྱེད་དོན་དེ་ངོས་ཟིན་དགོས། །དངས་གསལ་མ་ཕྱེད་བྱིང་འཐིབས་འཁྱིམ་པ་ཙམ། །སེམས་འཛིན་གོལ་བའི་སྐྱོན་དེ་ངོས་ཟིན་དགོས། །གཅིག་ལ་ཨ་འཐས་དྲོད་རྟགས་སྐྱེས་ན་ཡང༌། །ཀོར་ཙེར་བཅིངས་པའི་སྐྱོན་དེ་ངོས་ཟིན་དགོས། །གཅིག་ལ་བལྟས་པས་གཉིས་སུ་བྱུང་ཚོར་འཕྲོ། །རྣམ་རྟོག་རྐུན་བུའི་སྐྱོན་དེ་ངོས་ཟིན་དགོས། །མཉམ་གཞག་དུས་ན་དུག་ལྔ་མགོ་ནོན་ཡང༌། །རྗེས་ལ་རགས་སྐྱེ་རྩ་བ་མ་ཆོད་སྐྱོན། །ད་རུང་སེམས་ཉིད་མ་རྟོགས་ངོས་ཟིན་དགོས། །ངོས་ཟིན་བྱས་ཏེ་གཉེན་པོས་གྲོལ་བ་གཅེས། །ལ་བཟླ་དྲུག་གིས་འཁོར་བ་བསྒྲལ་བ་ནི། །གནས་ལུགས་རང་བཞིན་བློ་ཡི་ཡུལ་ལས་འདས། །གཞི་ཡི་དུས་སུ་སེམས་ཀྱི་ཆོས་ལ་རྟོག །མྱོང་འཛིན་ཞེན་རྟོག་འཁོར་བའི་ཆོས་ཡིན་པས། །ལམ་གྱི་དུས་སུ་ཉམས་མྱོང་ཆོས་མི་སྒོམ། །རྣམ་དག་སྤྱོད་ཡུལ་འཁོར་འདས་གཉིས་མེད་པས། །འབྲས་བུའི་དུས་ན་སེམས་ཅན་དོན་མི་བྱེད། །རང་རིག་བློ་ཡིས་མ་བསླད་གནས་ལུགས་གཞི། །ཤེས་བྱའི་ཡུལ་དང་བྲལ་བས་སྤྲོས་དང་བྲལ། །སྤྱིར་ཡང་མི་ཤེས་མི་འཛིན་ཡང་དག་ལམ། །དྲན་བསམ་འཚོལ་འཕྲོའི་དམིགས་གཏད་ཀུན་དང་བྲལ། །མཚན་མར་མི་དམིགས་མཐར་ཐུག་འབྲས་བུའི་མཆོག །སྒྲིབ་མེད་ཟང་ཀ་རང་གསལ་ཕྱོགས་ལྷུང་བྲལ། །དེ་ལྟར་སུས་ཤེས་ཡངས་པའི་རྣལ་འབྱོར་ཆེ། །རྟོགས་པ་དྲུག་གི་རང་བཞིན་བསྟན་པ་ནི། །གཞན་གྱིས་སྒྲས་རྟོགས་བླ་མའི་མན་ངག་དང༌། །སྣང་བའི་ཡུལ་རྟོགས་བདེན་མེད་སྒྱུ་མ་དང༌། །འཛིན་པའི་སེམས་རྟོགས་རྩ་བྲལ་ནམ་མཁའ་དང༌། །རིག་པའི་ངོ་རྟོགས་སྒྲིབ་མེད་གཅེར་བུ་དང༌། །མཐོང་བའི་དོན་རྟོགས་བློ་ཡི་མཐའ་འདས་དང༌། །སྒོམ་པའི་གདེང་རྟོགས་གཞི་མའི་ཟད་ས་སྟེ། །གང་གིས་དེ་རྟོགས་དགོངས་པ་ནམ་མཁའི་ངང༌། །བྱ་བྱེད་མེད་པར་ཡེ་བབས་ལྷུན་གྱིས་གྲུབ། །བདུད་ཀྱི་བར་དུ་གཅོད་པའི་ཆོས་དྲུག་ནི། །བླ་མ་བོར་ནས་སྡིག་གྲོགས་བསྟེན་པ་དང༌། །བྱང་ཆུབ་བོར་ནས་འཁོར་བའི་ལམ་ཞུགས་དང༌། །རང་དོན་བོར་ནས་གཞན་དོན་ལྟར་སྣང་བྱེད། །དགོས་མེད་བོར་ནས་འཇིག་རྟེན་ཆོས་བརྒྱད་གཉེར། །དབེན་པ་བོར་ནས་འདུ་འཛི་རྣམ་གཡེང་ཞུགས། །གཉིས་མེད་བོར་ནས་མཚན་མ་ཚིག་ཕྱིར་འབྲང༌། །དེ་འདྲའི་མི་ལ་བདུད་ཀྱིས་བྱིན་བརླབས་པས། །འདི་ཕྱིར་སྡུག་བསྔལ་གཏན་གྱི་འདུན་མ་འཕྱུགས། །ཡེང་མེད་བྱ་ར་བཏང་བའི་ཆོས་དྲུག་ནི། །སྤྱོད་པའི་རང་བཞིན་གླང་ཆེན་ཡན་འདྲ་འདི། །ཉམ་ངའི་འདམ་དུ་ཚུད་དམ་བྱ་ར་བཏང༌། །ལྟ་བའི་རང་བཞིན་སྣང་སྟོང་དབྱེར་མེད་འདི། །བདག་འཛིན་འདྲེ་ཡིས་ཁྱེར་རམ་བྱ་ར་བཏང༌། །རིག་པའི་ངང་དྭངས་འོད་གསལ་ཁྱེའུ་ཆུང་འདི། །འཁྲུལ་བའི་རྗེས་ཕྱིར་འབྲངས་སམ་བྱ་ར་བཏང༌། །བྱིན་རླབས་རྩ་བ་མོས་གུས་ལོ་ཐོག་འདི། །ལོག་ལྟའི་སད་ཀྱིས་ཁྱེར་རམ་བྱ་ར་བཏང༌། །བྱང་ཆུབ་ཐར་ལམ་བགྲོད་པའི་སྒྲོན་མེ་འདི། །འདོད་པའི་རླུང་གིས་གཡོས་སམ་བྱ་ར་བཏང༌། །འཆི་མེད་བདུད་རྩི་བླ་མའི་གདམས་ངག་འདི། །ཐེ་ཚོམ་དུག་དང་འདྲེས་སམ་བྱ་ར་བཏང༌། །དེ་ཕྱིར་ཡེངས་མེད་བྱ་ར་གཅེས་པ་ཡིན། །ཡང་དག་དོན་ལ་མི་རྟོགས་ཆོས་དྲུག་ནི། །སྐྱེ་བློས་སྐྱེ་མེད་མི་རྟོགས་བློ་འདས་ཕྱིར། །དངོས་བློས་སྟོང་ཉིད་མི་རྟོགས་ཡུལ་འདས་ཕྱིར། །བྱ་བློས་བྱར་མེད་མི་རྟོགས་བྱ་བྲལ་ཕྱིར། །སྙམ་བློས་གཉིས་མེད་མི་རྟོགས་བསམ་བྲལ་ཕྱིར། །ཞེན་བློས་མཐའ་བྲལ་མི་རྟོགས་ཕྱོགས་བྲལ་ཕྱིར། །སྤྱོད་བློས་སྤྲོས་མེད་མི་རྟོགས་སྤྲོས་འདས་ཕྱིར། །དངོས་པོ་མཚན་མར་མ་འཛིན་གནས་ལུགས་དོན། །མ་བསམས་ཟང་ཀ་ཐ་མལ་དམིགས་རྟོག་བྲལ། །གནས་ལུགས་རང་ངོ་བརྟག་པའི་ཆོས་དྲུག་ནི། །རང་རིག་ཟང་ཀ་བཅོས་བསླད་མེད་པ་ནི། །ཐ་མལ་མ་ཡིན་ལུང་མ་བསྟན་ལས་ལོག །ཀུན་རྟོག་མ་ཡིན་གཟུང་འཛིན་གཉིས་དང་བྲལ། །གཉེན་པོ་སེམས་མིན་སྤང་གཉེན་ཀུན་ལས་འདས། །གཞན་གྱིས་མི་མཐོང་སོ་སོར་རང་རིག་སྟེ། །རང་ཞེས་མི་དམིགས་དམིགས་མྱོང་ཀུན་ལས་འདས། །རྟག་ཏུ་ཡོད་ཀྱང་གསང་འདི་ཤེས་དཀའ་བས། །རྟོགས་དང་མི་རྟོགས་ཀུན་འདས་ཀུན་ཁྱབ་ཡིན། །གང་གིས་འདི་ཤེས་གནས་ལུགས་དོན་ལ་མཁས། །རང་བཞིན་མངོན་དུ་ཕྱུང་བའི་ཆོས་དྲུག་ནི། །རྟོགས་པའི་དུས་ན་རང་གསལ་སང་ངེ་བ། །མི་རྟོག་དུས་ན་མ་འགགས་ཝལ་ལེ་བ། །ཅིར་སྣང་དུས་ན་རང་གསལ་ལྷག་གེ་བ། །གཟུང་འཛིན་དུས་ན་ཀུན་གསལ་སལ་ལེ་བ། །མཉམ་གཞག་དུས་ན་མཐའ་གྲོལ་སང་ངེ་བ། །འཕྲོ་གནས་མཉམ་དུས་བར་མེད་ཧ་རེ་བ། །འདི་འདྲའི་གནད་ཤེས་རྣལ་འབྱོར་རྩེ་མོར་ཕྱིན། །ཁྱད་དུ་བསད་ནས་བསྒྲུབ་པ་རྣམ་དྲུག་ནི། །ངལ་དུབ་བཀྲེས་སྐོམ་སྡུག་བསྔལ་ཁྱད་བསད་དགོས། །མི་ཡུལ་འབྲེལ་འདྲིས་སོ་ནམ་ཁྱད་བསད་དགོས། །དགྲ་གཉེན་ཆགས་སྡང་ཁེ་གྲགས་ཁྱད་བསད་དགོས། །སྒོ་ལྔའི་ཡུལ་ལ་ཆགས་ཞེན་ཁྱད་བསད་དགོས། །བསྟོད་སྨད་ཚིག་ལ་དགག་སྒྲུབ་ཁྱད་བསད་དགོས། །དྲན་རྟོག་རང་ཡལ་སྤང་གཉེན་ཁྱད་བསད་དགོས། །དེ་ལྟར་ལྡན་ན་ཐར་ལམ་བྱང་ཆུབ་འགྲུབ། །ཕ་རོལ་ཕྱིན་དྲུག་མ་བྲལ་བསྒྲུབ་པ་ནི། །སྦྱིན་པ་སེར་སྣའི་དགྲ་ལ་མ་བསྐུར་ཅིག །ཚུལ་ཁྲིམས་འཆལ་བའི་ཇག་པས་མ་འཇོམས་ཤིག །བཟོད་པ་ཁོང་ཁྲོའི་མཚོན་གྱིས་མ་དབུག་ཅིག །བརྩོན་འགྲུས་ལེ་ལོའི་སྒྲོག་ཏུ་མ་འཆིངས་ཤིག །བསམ་གཏན་གཡེང་བའི་དུག་དང་མ་བསྲེ་ཞིག །ཤེས་རབ་རྨོངས་པའི་མུན་པས་མ་བསྒྲིབས་ཤིག །དེ་ལྟར་མི་མཐུན་དྲུག་པོ་སྤངས་ལ་སྒྲུབས། །འབྲེལ་མེད་དྲུག་གི་རང་བཞིན་བཤད་པ་ནི། །སྡུག་བསྔལ་རྒྱན་མཐོང་མི་ལ་ཐར་པའི་ལས་འབྲེལ་མེད། །སྤྱོད་པ་ངོ་སྲུང་མི་ལ་འཁྲུལ་ཞིག་ལས་འབྲེལ་མེད། །ཐོས་བསམ་ཁེ་གྲགས་མི་ལ་ཉམས་ལེན་ལས་འབྲེལ་མེད། །མི་དགེ་སྡིག་སྤྱོད་མི་ལ་མཐོ་རིས་ལས་འབྲེལ་མེད། །སྙོམ་ལས་ལེ་ལོའི་མི་ལ་ཉམས་མྱོང་ལས་འབྲེལ་མེད། །བདག་ལྟ་ཆགས་སྡང་མི་ལ་བསྒྲུབ་པའི་ལས་འབྲེལ་མེད། །དེ་འདྲའི་འབྲེལ་མེད་དབང་དུ་རང་ཉིད་མ་སོང་གཅེས། །བསྒོམ་དུས་སེམས་ལ་བལྟ་ཐབས་རྣམ་དྲུག་ནི། །རེས་འགའ་སེམས་དེ་གནས་ཤིང་བརྟན་ལ་བལྟ། །སྐྱེ་འགག་གནས་གསུམ་བྲལ་བར་སུས་ཤེས་པ། །སེམས་ཉིད་རང་དབང་ཐོབ་པར་གོམས་པའི་གནད། །རེས་འགའ་དེ་དུས་ཉམས་མྱོང་རང་ངོ་བལྟ། །མི་གནས་ཆགས་ཡུལ་མེད་པར་སུས་ཤེས་པ། །དགའ་བྲོད་རང་སྣང་སྐྱེ་མེད་རྟོགས་པའི་གནད། །རེས་འགའ་ཡོན་ཏན་གོང་འཕེལ་རྣམས་ལ་བལྟ། །མ་འགག་ཆོ་འཕྲུལ་རང་གྲོལ་སུས་ཤེས་པ། །སྐྱེ་མེད་ཡོན་ཏན་འབྱུང་བ་སྤྱོད་པའི་གནད། །རེས་འགའ་མཉམ་གཞག་ཆོས་ཉིད་དོན་ལ་བལྟ། །རང་བྱུང་བདེ་ཆེན་ཡེ་དག་སུས་ཤེས་པ། །ཆོས་ཀུན་མཉམ་ཉིད་ལམ་དུ་སློང་བའི་གནད། །རེས་འགའ་ཕྱི་ནང་རིག་པ་རང་བབས་བལྟ། །འཁོར་བ་གཟུང་འཛིན་བྲལ་བ་སུས་ཤེས་པ། །དོན་དམ་ཉག་གཅིག་རྩད་ནས་ཆོད་པའི་གནད། །རེས་འགའ་མ་བསྒོམ་རིག་པ་རང་བབས་བལྟ། །ལྟ་སྒོམ་བྱར་མེད་ཟང་ཀ་སུས་ཤེས་པ། །ཆོས་སྐུ་རང་ངོ་ཅེར་མཐོང་སྤྲོད་པའི་གནད། །གནད་དྲུག་ལྡན་པའི་སྐལ་བཟང་རྣལ་འབྱོར་པ། །ཆོས་ཟད་ངང་དུ་བློ་ཟད་ཉམས་རེ་དགའ། །ངན་པའི་རང་བཞིན་རྣམ་དྲུག་སྤང་བ་ནི། །སེར་སྣ་སྡུག་འཁུམས་མི་ཡི་ཕྱི་མའི་རྒྱགས་མི་སོག །དད་མེད་བླ་མ་མི་བསྟེན་གདམས་པའི་ནོར་མི་སོག །གང་ཤེས་ཉམས་ལེན་མི་བརྩོན་བྱང་ཆུབ་ལམ་མི་རྙེད། །མཛའ་བཤེས་ཉེ་འབྲེལ་ཆགས་པས་བར་དོར་ཟླ་མི་རྙེད། །བདག་ལྟ་ངར་འཛིན་ཆོས་ཀྱིས་བདུད་བཞིའི་དཔུང་མི་བཟློག །འདོད་པའི་ཁོལ་པོ་བྱེད་པས་གཏན་ཡུལ་ཚུགས་མི་ཟིན། །ངན་པའི་ལས་དྲུག་བསགས་པའི་ཉེས་པ་རང་ལ་འཁོར། །དེ་བས་བཟང་པོའི་ལས་ལ་བསླབ་པ་གཅེས། །དགོས་པ་དྲུག་གི་རང་བཞིན་བཤད་པ་ནི། །དང་པོར་ཡིད་ཕམ་ངེས་འབྱུང་སྐྱེ་དགོས་ཏེ། །ཡུལ་ལ་མི་འཇུག་ཆོས་ལ་དམིགས་པ་དགོས། །དེ་ནས་ཤེས་པ་ངལ་གསོ་ཤེས་དགོས་ཏེ། །རྒྱལ་བའི་སྐུ་གསུང་ཐུགས་སུ་གློད་ཤེས་དགོས། །དེ་ནས་སེམས་ལ་དབུགས་ཆེན་འབྱིན་དགོས་ཏེ། །རྟོགས་པའི་གདེང་གིས་ཉམ་ང་མེད་པ་དགོས། །དེ་ནས་བློ་མཆོག་བདེ་ཆེན་ཐོབ་དགོས་ཏེ། །ཀ་དག་ས་ལ་མངོན་དུ་གྱུར་པ་དགོས། །དེ་ནས་བདེ་བ་གཞན་ལ་སྤེལ་དགོས་ཏེ། །འཕྲིན་ལས་རྣམ་བཞིས་འགྲོ་བ་འདྲེན་པ་དགོས། །དེ་ནས་མི་ལྡོག་ས་ལ་གནས་དགོས་ཏེ། །ལྷུན་གྲུབ་ཕྱག་རྒྱ་མངོན་དུ་གྱུར་པ་དགོས། །དགོས་པ་དྲུག་གིས་མཐར་ཕྱིན་བྱ་བ་གཅེས། །མ་སྐྱོལ་ལམ་དུ་བསླང་བའི་ཆོས་དྲུག་ནི། །མ་བསྒོམས་སྣ་ཚོགས་འགྱུ་དྲན་རང་ངོ་ལྟོས། །གང་བྱུང་རང་སར་རང་ངོ་ཤེས་པ་དེས། །ཅིར་སྣང་སྐྱེ་མེད་ཞིང་དུ་གྲོལ་བར་ངེས། །སྒོམ་ལ་འཇུག་པའི་སྦྱོར་བའི་ཤེས་པ་ལྟོས། །བདེ་སྡུག་རྒྱུ་མཐུན་མཉམ་པར་ཤེས་པ་དེས། །བླང་དོར་མཉམ་ཉིད་དབྱེར་མེད་གྲོལ་བར་ངེས། །དངོས་གཞི་ཟག་མེད་མ་སྐྱེས་བར་ལ་ལྟོས། །སེམས་ཉིད་ཀུན་སྣང་རང་བཞིན་ཤེས་པ་དེས། །རིམ་གྱིས་སེམས་འཇུག་སྐྱེ་མེད་ཚུད་པར་ངེས། །མཉམ་གཞག་ལས་ལངས་རྗེས་ཤེས་ངོ་ལ་ལྟོས། །སེམས་ཉིད་དོན་དང་གཉིས་མེད་འདྲེས་ཤེས་དེས། །མཉམ་རྗེས་དབྱེར་མེད་ངང་དུ་ཚུད་པར་ངེས། །དེ་རྗེས་གང་འགྱུས་རྣམ་རྟོག་རང་ངོ་ལྟོས། །ཉོན་མོངས་གང་སྐྱེས་རང་ཞིར་ཤེས་པ་དེས། །སྣང་ཤེས་ཐོག་མའི་གཞི་ལ་སྦྱོར་བར་ངེས། །སྦྱོར་དངོས་རྗེས་གསུམ་གཅིག་ཏུ་དྲིལ་ལ་ལྟོས། །གསུམ་ག་རྗེས་མེད་བྱ་ལམ་ཤེས་པ་དེས། །དུས་གསུམ་རང་བཞིན་གནད་ཅིག་རྟོགས་པར་ངེས། །དེ་ལྟར་ཤེས་ན་རྗེས་ཤེས་ཆོས་ཉིད་འཆར། །ཡོན་ཏན་དྲུག་ཚང་རང་བཞིན་བཤད་པ་ནི། །འཁོར་བའི་སྡུག་བསྔལ་བྲེད་ནས་སྐྱབས་འཚོལ་དང༌། །དད་པས་རྒྱུད་འདུལ་རྒྱལ་བའི་རྗེས་སུ་སློབ། །བསོད་ནམས་ཆེ་མཐོང་གཏོང་ཕོད་ཚོགས་གཉིས་འབད། །བརྩོན་པའི་ལྕག་འདེབས་ཉིན་མཚན་དགེ་ལ་འབད། །ངོ་ཚ་ཁྲེལ་ཡོད་ཆོས་ཕྱོགས་སྲོག་གཏོང་ཕོད། །ཤེས་རབ་དོན་དཔྱོད་སྣང་ཤེས་ཆོས་ཉིད་འཁྱེར། །དེ་དག་ཚང་རྣམས་འཁོར་བའི་ཕ་རོལ་འགྲོ། །ཅིས་ཀྱང་དགོས་པའི་བསྒྲུབ་བྱ་རྣམ་དྲུག་ནི། །ཚེ་འདིའི་བྱ་བ་མི་གཙང་འདམ་རྫབ་བོར། །མཐའ་གྲོལ་ཡེ་ཤེས་ཁྲི་གདུགས་ཅི་འཆར་གྱིས། །མ་རིག་མུན་པའི་སྨག་རུམ་ཅི་སངས་གྱིས། །ཉམས་རྟོགས་སྒྲོ་བཏགས་མྱུ་གུ་ཅི་སྐྱེས་གྱིས། །གཟུང་འཛིན་འཁྲུལ་སྣང་རྨི་ལམ་ཅི་སངས་གྱིས། །འབྲས་བུ་སྐུ་གསུམ་ནོར་བུ་ཅི་ལོན་གྱིས། །དམ་པའི་གདམས་ངག་ཡིན་ནོ་སེམས་ལ་ཞོག །རང་བཞིན་མཆོག་ལ་བསླབ་པའི་ཆོས་དྲུག་ནི། །འཁྲུལ་བའི་ལུས་ཀྱི་བྱ་བྱེད་སྤངས་པ་དང༌། །དོན་མེད་ངག་གི་སྨྲ་བརྗོད་སྤངས་པ་དང༌། །རྣམ་རྟོག་ཡིད་ཀྱི་འཕྲོ་འདུ་སྤངས་པ་དང༌། །འདོད་ཡོན་རང་གའི་ཞེན་འཛིན་སྤངས་པ་དང༌། །རྣམ་གཡེང་འདུ་འཛིའི་འབྲེལ་འདྲིས་སྤངས་པ་དང༌། །གཞན་སེམས་འཛིན་པའི་ངོ་སྲུང་སྤངས་པ་སྟེ། །འདི་དང་སུ་ལྡན་དམ་ཆོས་ཚུལ་བཞིན་འོང༌། །འདོད་པའི་གཟེབ་ཏུ་བཅིང་བའི་ཆོས་དྲུག་ནི། །སྤྲོས་པའི་བློ་དང་བྲལ་བར་འདོད་པ་དང༌། །བདེ་སྟོང་དབྱེར་མེད་ཟུང་འཇུག་འདོད་པ་དང༌། །དམིགས་མེད་མཁའ་ལྟར་རྣམ་དག་འདོད་པ་དང༌། །སྟོང་པ་ཡེ་ཤེས་སྙིང་པོ་ཅན་འདོད་དང༌། །རིག་པ་འོད་ཀྱི་ཁང་བུ་ཅན་འདོད་དང༌། །གདོད་ནས་ཡེ་གྲོལ་རང་བྱུང་ཡེ་ཤེས་འདོད། །ཕྱོགས་རེའི་དོན་མཐོང་གླང་ཆེན་མྱོས་པ་བཞིན། །བདག་ལྟའི་དངོས་པོ་མཚན་མ་ཞེན་པ་ཡིན། །དེ་བས་ཕྱོགས་འཛིན་བདག་ལྟའི་གཟེབ་བོར་ལ། །ཡིན་མིན་མེད་པའི་རང་རིག་ཕྱོགས་བྲལ་ནི། །མཐའ་གྲོལ་ཡངས་པ་ཆེན་པོར་ཐག་ཆོད་ཅིག །ཉམས་སུ་ལེན་པའི་རང་འགག་རྣམ་དྲུག་ནི། །ཕྱི་རོལ་གཟུང་བའི་ཤེས་པ་རང་འགགས་དང༌། །ནང་གི་འཛིན་རྟོག་ཤེས་པ་རང་འགགས་དང༌། །གསང་བ་སྣང་ངོ་དམིགས་པ་རང་འགགས་དང༌། །ཁོ་ན་ཉིད་དྲན་ཆད་ཆོད་རང་འགགས་དང༌། །མཐར་ཐུག་ཉམས་སྣང་རང་ངོ་རང་འགགས་དང༌། །མཉམ་རྗེས་རེས་འཇོག་རིག་པ་རང་འགགས་ཏེ། །འདི་དྲུག་མཐར་ཕྱིན་དགོངས་པ་ཟད་སར་སྐྱོལ། །མ་འདས་་དྲུག་གིས་ཉམས་སུ་བླང་བ་ནི། །རང་ལུས་རྒྱལ་བའི་དཀྱིལ་འཁོར་མ་འདས་དང༌། །ངག་བརྗོད་གསུང་གི་འགྲོ་དོན་མ་འདས་དང༌། །ཡིད་ནི་ཆོས་སྐུའི་དགོངས་པ་མ་འདས་དང༌། །བཟའ་བཏུང་བདུད་རྩིའི་མཆོད་ལས་མ་འདས་དང༌། །འགྲོ་འདུག་སྒྱུ་མའི་འཕྲིན་ལས་མ་འདས་དང༌། །ཉམས་ལེན་ཆོས་ཉིད་དོན་ལས་མ་འདས་དང༌། །རྣམ་པ་དྲུག་ལ་གང་གིས་བསླབས་གྱུར་པ། །གསང་མཆོག་རྒྱལ་པོའི་མཛོད་ལ་སྤྱོད་པ་ཡིན། །འཁོར་བའི་རང་བཞིན་དཔེ་དྲུག་བསྟན་པ་ནི། །གང་ཡང་བདེན་མེད་སྒྱུ་མའི་སྐྱེས་བུ་འདྲ། །དེ་བཞིན་འཁྲུལ་སྣང་སྣ་ཚོགས་རྨི་ལམ་འདྲ། །སྣང་དུས་རང་བཞིན་མེད་པ་ཆུ་ཟླ་འདྲ། །བཟང་ངན་བདེ་སྡུག་འགྱུར་བས་སྤྲིན་དང་འདྲ། །ཚོར་དང་མ་ཚོར་མི་རྟག་ཟིལ་པ་འདྲ། །རང་བྱུང་རང་ཞིག་ཆུ་ཡི་ཆུ་བུར་འདྲ། །དེ་ལྟར་རྒྱུད་ལ་སྦྱར་ཏེ་བསྒོམ་པ་གཅེས། །མྱང་འདས་རང་བཞིན་དཔེ་དྲུག་བསྟན་པ་ནི། །སྣ་ཚོགས་སེམས་ཉིད་འདུས་པ་ཉི་ཟེར་སྙིང་པོ་འདྲ། །སེམས་ཉིད་སྐྱོན་གྱིས་མ་གོས་འདམ་གྱི་པདྨ་འདྲ། །ཡོན་ཏན་ལྷུན་གྱིས་གྲུབ་པ་ཡིད་བཞིན་ནོར་བུ་འདྲ། །རང་གསལ་རྟོག་པས་མ་བསྒྲིབས་ཉི་ཟླ་སྤྲིན་བྲལ་འདྲ། །ཀུན་ཁྱབ་ཕྱོགས་ལྷུང་མེད་པ་སྟོང་གསལ་ནམ་མཁའ་འདྲ། །ཀུན་རྫོབ་འཕེལ་འགྲིབ་མེད་པས་རྒྱ་མཚོ་ཆེན་པོ་འདྲ། །དེ་ལྟར་སུས་ཤེས་འཁོར་འདས་གཉིས་མེད་གྲོལ། །གཅེས་པ་དྲུག་གིས་རང་ལ་བསྐུལ་བ་ནི། །རང་མདུན་རང་གིས་བཅད་དེ་ཆོས་ལ་འཇུག་པ་གཅེས། །རང་བསྐུལ་རང་ལ་བཏབ་སྟེ་དགེ་སྦྱོར་བསྐུལ་བ་གཅེས། །རང་གྲོས་རང་ལ་བཏབ་སྟེ་གཉེན་པོ་བསྟེན་པ་གཅེས། །རང་ལས་རང་གིས་བྱས་ཏེ་དཀའ་བ་སྤྱད་པ་གཅེས། །རང་མགོ་རང་གིས་བཏོན་ཏེ་སྒྲུབ་པ་མཐར་ཕྱིན་གཅེས། །རང་གཉེན་རང་གིས་བསྐྱངས་ཏེ་འགྲོ་དྲུག་བསྒྲལ་བ་གཅེས། །སྤྱི་ཡི་གདམས་ངག་ཡིན་པས་སེམས་ལ་ཞོག །རྒྱུད་དང་དགེ་སྦྱོར་བསྲེ་བའི་ཆོས་དྲུག་ནི། །དགེ་སྡིག་ཅི་བྱས་ཡང་ཡང་བརྟག་པར་བྱ། །ཐ་མལ་རང་གའི་རྣམ་རྟོག་གདུལ་བར་བྱ། །རྟག་ཏུ་གུས་པས་གསོལ་བ་ཡེངས་མེད་གདབ། །བཀའ་དང་བསྟན་བཅོས་གཞུང་བཞིན་ནན་ཏན་བྱ། །རྟོགས་པའི་གདེང་གིས་རང་སྣང་བསླང་བར་བྱ། །ཅི་བྱེད་ཕྱོགས་བྲལ་དགོངས་པས་ཟིན་པར་བྱ། །དེ་ལྟར་བྱས་ན་ཐར་ལམ་བྱང་ཆུབ་འགྲུབ། །ཆོས་བྱེད་རྣམས་ཀྱི་མ་སོང་རྣམ་དྲུག་ནི། །དད་པའི་ཞིང་ས་མེད་ན་བདེ་བའི་འབྲས་མི་འབྱུང༌། །མཁས་བཙུན་བླ་མ་མེད་ན་རིག་པའི་མུན་མི་སེལ། །སྐྱིད་བདེའི་དམ་ཆོས་མ་སྤྱད་སྡུག་བསྔལ་མཚོ་མོ་རྡོལ། །དགེ་བཅུས་ལམ་སྣ་མ་དྲངས་ཆོས་ཀྱི་རྩ་བ་ཤོར། །ད་ལྟའི་ཡུལ་ནས་མ་ཕྱིན་སྙོམ་ལས་སྒྲོག་གིས་བཅིངས། །ཤེས་རབ་མིག་དང་མ་ལྡན་འཁོར་བའི་གཡང་སར་ལྷུང༌། །དེ་ལྟར་མ་སོང་འབད་པས་བསྒྲུབ་པ་གཅེས། །མ་བྱས་རེ་བ་དྲུག་གི་རང་བཞིན་ནི། །སྡིག་སྤྱད་ངན་སོང་སྡུག་བསྔལ་མི་མྱོང་རེ། །དགེ་བ་མ་བྱས་བདེ་འགྲོ་ཐོབ་ཏུ་རེ། །ཉོན་མོངས་མ་སྤངས་འཁྲུལ་བ་འདག་ཏུ་རེ། །ཚོགས་གཉིས་མ་འབད་སངས་རྒྱས་ཐོབ་ཏུ་རེ། །ཅི་བྱེད་ཚེ་འདི་བྱས་པས་ཕྱི་མ་བདེ་རུ་རེ། །ཐར་ལམ་ཆོས་ལ་མ་སྤྱད་འཁོར་བར་མི་འཁྱམ་རེ། །རེ་བ་འདོད་ཀྱང་ཐོག་ཏུ་མི་འབབ་མཆི། །བདེ་འགྲོ་མཐོ་རིས་ཐོབ་པའི་ཆོས་དྲུག་ནི། །སྔོན་བསགས་ལེགས་པར་སྤྱད་པའི་ལས་འཕྲོ་ཡོད། །ད་ལྟ་སྒོ་གསུམ་གཡོ་མེད་དྲང་པོར་གནས། །སེམས་ཅན་རིགས་ལ་རྣམ་པར་འཚེ་བ་མེད། །ལས་འབྲས་དད་པས་དགེ་སྡིག་ཤན་ཐང་ཕྱེད། །ཡང་དག་ངེས་དོན་ལྟ་བ་བཟང་ལ་མོས། །དད་གུས་ལྡན་པས་ཆོས་ལ་བརྩོན་པ་སྟེ། །མཐོ་རིས་དགའ་བདེ་ལག་པའི་མཐིལ་ན་ཡོད། །ངན་སོང་འགྲོ་བ་དག་གི་ཆོས་དྲུག་ནི། །རང་གར་ཁྲོ་ཞིང་ངང་རྒྱུད་རྩུབ་པ་དང༌། །དགེ་ལ་སྨོད་ཅིང་སྡིག་པའི་ལས་ལ་བསྟོད། །ཐབས་ཀྱིས་གཞན་བསླུ་གཡོ་དང་སྒྱུར་ལྡན་ཞིང༌། །གཞན་དག་ཕུན་ཚོགས་མཐོང་ལ་ཕྲག་དོག་བྱེད། །ནོར་རྫས་ཞེན་ཆགས་སེར་སྣ་གཏོང་སེམས་མེད། །གཞན་ལ་ཁྱད་གསོད་ང་རྒྱལ་རློམ་སེམས་ཆེ། །འདི་དག་སུ་ལྡན་ངན་སོང་མདུན་ནས་བསུ། །སྡུག་བསྔལ་ཚད་མེད་ཐར་བའི་དུས་མེད་མྱོང༌། །ཐར་ལམ་བསྒྲུབ་པའི་དམ་ཆོས་རྣམ་དྲུག་ནི། །མོས་གུས་དྲག་པོས་བླ་མ་མཁས་བསྟེན་ལ། །ཐོས་བསམ་རྒྱ་སྐྱེད་རྩ་བ་ཆོད་པ་ཡིན། །བྱིན་རླབས་མགོན་སྐྱབས་མེད་ན་བར་མ་དོར། །བར་ཆོད་བདུད་ཀྱིས་བསླུ་བས་དཀོན་མཆོག་ཁུར། །དགྲ་གཉེན་ཡིད་འབྱུང་མ་སྐྱེ་ཉོན་མོངས་ཀྱི། །འདམ་ལས་མི་ཐོན་ཆགས་སྡང་བདུད་ལས་ཁྲོལ། །ཤེས་བཞིན་བྱ་རས་མ་ཟིན་ངན་སོང་གི །གཡང་སར་སྐྱུར་པས་བག་ཡོད་རྒྱུན་དུ་བསྟེན། །ཆོས་སྤྱོད་དཔུང་དང་མི་ལྡན་འཁོར་བ་ཡི། །གཡུལ་ངོ་མི་བཟློག་གསོ་སྦྱོང་ལས་ལ་འབད། །དམིགས་མེད་རྩིས་མ་ཟིན་ན་འདུས་བྱས་ཀྱི། །དགེ་བས་བྱང་ཆུབ་མི་འགྲུབ་ཤེས་རབ་སྦྲེལ། །དེ་ལྟར་བརྩོན་ན་བྱང་ཆུབ་མྱུར་དུ་འགྲུབ། །ཚོགས་བསག་དགེ་ལ་འབད་པའི་ཆོས་དྲུག་ནི། །ཡར་ལ་གོང་མའི་བཀུར་སྟི་ཚོགས་ཆེ་བས། །བླ་མ་ཡི་དམ་མཁའ་འགྲོ་མཆོད་པ་གཅེས། །མར་ལ་འོག་མའི་ཕན་འདོགས་ཚོགས་ཆེ་བས། །ཚད་མེད་སྙིང་རྗེས་སྡུག་ཕོངས་བསྐྱང་བ་གཅེས། །ནང་དུ་ཕྱོགས་མེད་དམ་ཆོས་ཚོགས་ཆེ་བས། །ཐོས་པ་བསམ་པ་སྒོམ་པ་བརྩོན་པར་གྱིས། །ཕར་ལ་གཞན་ལ་ཕན་འདོགས་ཚོགས་ཆེ་བས། །སེམས་བསྐྱེད་ཆོས་བཤད་མགོན་སྐྱབས་དཔུང་གཉེན་མཛོད། །ཚུར་ལ་མཚན་མའི་དམིགས་མེད་ཚོགས་ཆེ་བས། །ངར་འཛིན་རློམ་སེམས་མཚན་མར་འཛིན་པ་སྤངས། །བར་དུ་གནས་ལུགས་བསྒྲུབ་པ་ཚོགས་ཆེ་བས། །མཐར་ཐུག་དོན་གྱི་དཀོན་མཆོག་གསུམ་པོ་བསྒྲུབ། །དེ་ལྟར་སྤྱད་ན་མྱུར་དུ་སངས་རྒྱས་འགྲུབ། །རང་ཕུང་རང་གིས་བསྒྲུབ་པའི་ཆོས་དྲུག་ནི། །བྱམས་པས་སྨྲ་བའི་གདམས་ངག་མི་ཉན་ཏེ། །རུས་སྦལ་ཁ་ནས་ཤིང་ཤོར་འདྲ་བས་ཕུང༌། །ལས་ངན་བྱས་ནས་སྐྱིད་པར་འདོད་པ་དེ། །ཁོང་དུ་དུག་ཟོས་བདེ་བར་འདོད་འདྲས་ཕུང༌། །བླ་མ་བོར་ནས་སྡིག་གྲོགས་བསྟེན་པ་དེ། །སྐྱེལ་མ་བཞག་ནས་དགྲ་གསེབ་ཕྱིན་འདྲས་ཕུང༌། །ལྷ་ཆོས་བབས་ནས་མི་ཆོས་སྤྱོད་པ་དེ། །རྒྱལ་སྲིད་བབས་ནས་ཕྱུགས་རྟ་འཚོ་འདྲས་ཕུང༌། །དེ་ལྟར་མ་སོང་ཤིན་ཏུ་གཅེས་པ་ཡིན། །མ་སོང་དྲུག་གིས་རང་གྲོས་བཏབ་པ་ནི། །གྲོང་པར་མ་སོང་རི་ཁྲོད་དབེན་པ་བསྟེན། །གདོས་ཆོས་མ་སོང་སྒོ་གསུམ་ཞི་དུལ་ལྡན། །བློ་རྒོད་མ་སོང་བློ་སྣ་ཆོས་ལ་ཁུག །ཁྲེལ་མེད་མ་སོང་ཁས་བླངས་དམ་བཅའ་བསྒྲུབ། །དམ་མེད་མ་སོང་བླ་མ་མཆེད་གྲོགས་བཀུར། །སྡུག་འཁུམས་མ་སོང་ཡངས་པ་ཁྲོལ་ལེ་བ། །བློ་བདེའི་མལ་དུ་ཉལ་བ་ཤིན་ཏུ་གཅེས། །ཕོངས་པ་དྲུག་གིས་ལེགས་པར་བསམ་པ་ནི། །ཕ་རྒན་དྲིན་ཅན་བླ་མ་བཀའ་དྲིན་ཅན། །བརྗེད་དུ་ཕོངས་པས་བསྙེན་བཀུར་གསོལ་བ་ཐོབ། །མ་རྒན་དྲིན་ཅན་འགྲོ་དྲུག་སེམས་ཅན་རྣམས། །སྡུག་དུ་ཕོངས་པས་བདེ་ཆེན་ལམ་སྣ་དྲོངས། །རང་ཉིད་དལ་འབྱོར་རྙེད་དཀའི་སྒོ་གསུམ་འདི། །དལ་དུ་ཕོངས་པས་གཞན་དོན་དགེ་ལ་བཀོལ། །གྲོགས་མཆོག་རྣམས་དང་དངོས་གྲུབ་ཡི་དམ་ལྷ། །འབྲལ་དུ་ཕོངས་པས་རྟག་ཏུ་གུས་པས་འགྲོགས། །བུ་མཆོག་རང་བྱུང་ཁྱེའུ་ཆུང་མཛེས་པ་འདི། །འཁྲུལ་དུ་ཕོངས་པས་ཆོས་ཉིད་བཙན་ས་ཟུང༌། །ཕ་ནོར་སེམས་ཉིད་ནོར་བུ་རིན་ཆེན་འདི། །ཤོར་དུ་ཕོངས་པས་མ་ཡེངས་གཅེས་སྤྲས་ཀྱིས། །གཏན་སྲིད་འཛིན་ན་གདམས་པ་དེ་དྲུག་གཅེས། །ཆོས་མཐར་མ་ཕྱིན་ཉེས་པ་རྣམ་དྲུག་ནི། །སྲིད་པར་སྐྱེ་བའི་སྡུག་བསྔལ་མི་འདོད་ཀྱང༌། །ཆུ་འབུར་སས་མི་ནོན་པ་ལྟ་བུ་འབྱུང༌། །རྒས་ཤིང་འཁོགས་པའི་སྡུག་བསྔལ་མི་འདོད་ཀྱང༌། །མེ་ཏོག་སད་ཀྱིས་རྙིང་བ་བཞིན་དུ་འོང༌། །ན་བའི་སྡུག་བསྔལ་དྲག་པོ་མི་འདོད་ཀྱང༌། །གསེར་མིག་ཉ་མོ་བྱེ་ཚན་བསྒྲེས་བཞིན་འོང༌། །རང་གཞན་འབྲལ་བའི་སྡུག་བསྔལ་མི་འདོད་ཀྱང༌། །རྔ་མོ་རང་གི་བུ་སྟོར་བཞིན་དུ་འོང༌། །དགྲ་འདྲེས་གནོད་པའི་སྡུག་བསྔལ་མི་འདོད་ཀྱང༌། །བྱེའུ་ཆུང་ཁྲ་ཡིས་འདེད་པ་ལྟ་བུ་འོང༌། །འཆི་བའི་སྡུག་བསྔལ་དྲག་པོ་མི་འདོད་ཀྱང༌། །མར་མེ་རླུང་གིས་བཏབ་བཞིན་འོང་བ་སྟེ། །འདི་དག་བསམས་ནས་ཆོས་ལ་བརྩོན་པར་མཛོད། །འདོད་ཀྱང་མི་འོང་གདམས་པ་རྣམ་དྲུག་ནི། །བཟའ་ཚང་ཉེ་འབྲེལ་འདི་དང་དུས་རྟག་ཏུ༌། །མི་འབྲལ་འགྲོགས་པར་འདོད་ཀྱང་འབྲལ་བར་ངེས། །བཟང་པོའི་གནས་མལ་འདི་རུ་དུས་རྟག་ཏུ། །མི་འབྲལ་འདུག་པར་འདོད་ཀྱང་འགྲོ་བར་ངེས། །བདེ་སྐྱིད་ལོངས་སྤྱོད་འདི་དང་དུས་རྟག་ཏུ། །མི་འབྲལ་སྤྱོད་པར་འདོད་ཀྱང་འབོར་བར་ངེས། །དལ་འབྱོར་མི་ལུས་མཆོག་འདི་དུས་རྟག་ཏུ། །མི་འབྲལ་རྟག་པར་འདོད་ཀྱང་འཆི་བར་ངེས། །བཟང་པོའི་བླ་མ་འདི་དང་དུས་རྟག་ཏུ། །མི་འབྲལ་ཆོས་ཉན་འདོད་ཀྱང་འབྲལ་བར་ངེས། །དམ་པའི་གྲོགས་བཟང་རྣམས་དང་དུས་རྟག་ཏུ། །མི་འབྲལ་འགྲོགས་པར་འདོད་ཀྱང་འབྲལ་ངེས་པས། །དེ་རིང་ཉིད་ནས་བརྩོན་པའི་གོ་བགོས་ཏེ། །འབྲལ་མེད་བདེ་ཆེན་གླིང་དུ་བགྲོད་རེ་རན། །སྐྱོ་ཤས་གཏིང་ནས་སྐྱེ་བའི་གྲོགས་རྣམས་ལ། །ཆོས་མེད་སྤྲང་པོ་བདག་གིས་དེ་སྐད་བསྐུལ། །མི་འདོད་ངང་གིས་འོང་བའི་ཆོས་དྲུག་ནི། །འཁོར་བའི་ཆོས་ལ་དགོས་མེད་རྒྱབ་ཏུ་བོར། །མྱང་འདས་བདེ་བ་མི་འདོད་ངང་གིས་འོང༌། །དཀར་པོའི་ཆོས་ལ་དད་བརྩོན་ཕྱོགས་མེད་ཀྱིས། །བདེ་སྐྱིད་དམ་ཆོས་མི་འདོད་ངང་གིས་འོང༌། །ཅི་སྤྱོད་བླ་མ་དམ་པའི་གསུང་བཞིན་སྒྲུབས། །ཟབ་མོའི་གདམས་པ་མི་འདོད་ངང་གིས་འོང༌། །ཚད་མེད་བཞི་ལ་རང་གི་སེམས་སྦྱོངས་དང༌། །གཞན་དོན་འགྲོ་དོན་མི་འདོད་ངང་གིས་འོང༌། །འདོད་བློ་བོར་ལ་ཅི་ཡོད་ཚོགས་སུ་ཐོངས། །ལོངས་སྤྱོད་འབྱོར་པ་མི་འདོད་ངང་གིས་འོང༌། །སངས་རྒྱས་དགོངས་པ་འདུ་འབྲལ་མེད་པ་སྒོམས། །འཁྲུལ་སྣང་བདག་འཛིན་ངང་གིས་སྟོངས་པར་འོང༌། །གཞུང་བཞིན་བསྒྲུབས་ན་དེ་ལྟར་འོང་བར་ངེས། །དགོས་པའི་ཆོས་དྲུག་ལེགས་པར་བསམ་པ་ནི། །འཁོར་བའི་འཁྲུལ་སྣང་འདི་ལ་སྐྱུག་ལོག་པ། །རོ་མྱགས་འདམ་མཐོང་ལྟ་བུའི་ཞེན་ལོག་དགོས། །མི་དགེ་ལས་ངན་རྣམས་ལ་འཛེམ་པ་ནི། །བག་མ་ཡོང་མ་ཐག་འདྲ་བག་ཡོད་དགོས། །ཆོས་མིན་ལས་ལ་འགྱོད་པའི་བློ་སྐྱེས་པས། །སྐྱེས་བུས་དུག་འཐུངས་སྡུག་བསྔལ་དྲན་འདྲ་དགོས། །ཉོན་མོངས་སྤང་བྱ་ཟིལ་གྱིས་གནོན་ནུས་པ། །རི་དྭགས་རྒྱལ་པོ་འདྲ་བའི་གཉེན་པོ་དགོས། །རྣམ་རྟོག་ཅི་སྐྱེས་རང་སར་གྲོལ་ནུས་པ། །ལན་ཚྭ་ཆུ་ཐིགས་འདྲ་བའི་ཐུག་ཕྲད་དགོས། །ཆོས་དང་ཆོས་མིན་ལེགས་པར་འབྱེད་ཤེས་པ། །ངང་པའི་མཆུ་དང་འདྲ་བའི་ཤེས་རབ་དགོས། །དེ་དྲུག་ལྡན་ན་དམ་ཆོས་ཀུན་དང་མཐུན། །རྣལ་འབྱོར་རབ་ལ་དགོས་པའི་ཆོས་དྲུག་ནི། །ལྟ་བ་རྒྱལ་པོ་འདྲ་བས་ས་ཟིན་དགོས། །སྤྱོད་པ་བློན་པོ་འདྲ་བས་དུས་ཤེས་དགོས། །སྲུང་སྡོམ་སྒོ་སྲུངས་འདྲ་བས་རྐྱེན་ཐུབ་དགོས། །ཤེས་རབ་བྲན་དང་འདྲ་བས་ཀུན་ཁྱབ་དགོས། །རྣམ་རྟོག་སྤྲིན་དང་འདྲ་བས་རང་ཡལ་དགོས། །ཡོན་ཏན་མཛོད་ཁང་འདྲ་བས་གང་ཡང་དགོས། །དེ་དང་ལྡན་ན་དོན་གཉིས་ལྷུན་གྱིས་གྲུབ། །བཟང་པོར་བསྒྲུབ་པའི་དམ་ཆོས་རྣམ་དྲུག་ནི། །རྗེ་དཔོན་རྒྱལ་པོར་འདོད་ན་རང་ཉིད་ཆོས་ལ་བསྐུལ། །དཔའ་བོའི་རྒྱལ་པོར་འདོད་ན་ཉོན་མོངས་དགྲ་དཔུང་ཆོམས། །གཙོ་བོའི་རྒྱལ་པོར་འདོད་ན་བཀའ་ལུང་འདུན་གྲོས་ཆོས། །མཐུ་སྟོབས་རྒྱལ་པོར་འདོད་ན་བདག་ལྟའི་འགོང་པོ་ཐུལ། །ཕྱུག་པོའི་རྒྱལ་པོར་འདོད་ན་ཚོགས་གཉིས་ལོངས་སྤྱོད་སྒྲུབས། །སྨན་པའི་རྒྱལ་པོར་འདོད་ན་རང་སྐྱོན་གཅོང་ནད་ཐོན། །དེ་ལྟར་ཤེས་ན་ལྷ་མིའི་གཙོ་བོར་འགྱུར། །དགྲ་ལ་བག་ཟོན་བྱ་བའི་ཆོས་དྲུག་ནི། །ཆོས་ལ་ངེས་འབྱུང་དད་པ་སྐྱེས་པའི་ཚེ། །གཉེན་འདུན་གྲོས་འདེབས་བརྩེ་གདུང་དགྲ་རུ་ལྡང༌། །འཁོར་བའི་བྱ་བ་ཐམས་ཅད་སྤང་བའི་ཚེ། །ཆགས་ཞེན་འཁྲི་བ་རང་གི་དགྲ་རུ་ལྡང༌། །ཆོས་སྤྱོད་ཟས་ནོར་སྦྱིན་གཏོང་བྱས་པའི་ཚེ། །གཞན་གྱི་ཁར་འདྲེན་རློམ་སེམས་དགྲ་རུ་ལྡང༌། །ཟབ་མོའི་གདམས་ངག་ཉམས་སུ་ལེན་པའི་ཚེ། །ཡིད་གཉིས་སོམ་ཉི་ཐེ་ཚོམ་དགྲ་རུ་ལྡང༌། །གོང་འཕེལ་ཉམས་ཀྱི་དྲོད་རྟགས་ཤར་བའི་ཚེ། །དགའ་བྲོད་ཞེན་འཛིན་དམིགས་བཅས་དགྲ་རུ་ལྡང༌། །སྣ་ཚོགས་ཡོན་ཏན་འཆར་སྒོ་ཕྱེད་པའི་ཚེ། །ང་རྒྱལ་རློམ་སེམས་རང་མཐོང་དགྲ་རུ་ལྡང༌། །ལྡང་བའི་དགྲ་ལ་བག་ཟོན་བྱ་བ་གཅེས། །བྱམས་སེམས་བཟོད་པ་བསྒོམ་པའི་གོ་ཆ་མཆོག །ཆོས་བྱེད་མི་ལ་མིང་དྲུག་གདགས་པ་ནི། །རང་མགོ་ཆོས་སུ་ཐོན་ན་དྲག་པོ་ཡིན། །སྒོ་གསུམ་དགེ་ལ་འཛུད་ན་དད་ལྡན་ཡིན། །གཡོ་སྒྱུ་ཟོལ་ཁྲམ་མེད་ན་བཟང་པོ་ཡིན། །ལོག་པའི་ལམ་ལོག་ཤེས་ན་བློ་ལྡན་ཡིན། །མི་ཚེ་ཆོས་ཀྱིས་སྐྱེལ་ན་མདོ་ཅན་ཡིན། །གཞན་ཕན་སྙིང་རྗེ་ཆེ་ན་ཐེག་ཆེན་ཡིན། །དམ་པ་རྣམས་ཀྱི་སྤྱོད་ལམ་བསླབ་པར་བྱ། །སྡུག་བསྔལ་རྒྱ་ལས་ཐར་པའི་ཆོས་དྲུག་ནི། །རྙེད་དཀའི་མི་ལུས་ཐོབ་ནས་ཆོས་དང་འཕྲད། །མཚན་ལྡན་བླ་མ་མཇལ་ནས་མོས་གུས་ཐོབ། །འཁོར་བའི་བྱ་བ་སྤངས་པས་འདུ་འཛི་མེད། །ཟབ་མོའི་གདམས་པ་འཆང་བས་གོལ་སྒྲིབ་མེད། །སྤྱོད་ལམ་དགེ་བས་འདའ་བས་སྙོམ་ལས་མེད། །བདེ་ཆེན་ལྷུན་གྱིས་གྲུབ་པས་དམིགས་འཛིན་བྲལ། །དེ་དྲུག་ལྡན་ན་ཟུག་རྔུ་ལྡང་མི་ནུས། །ཤེས་པ་དྲུག་གི་གདམས་པ་བསྟན་པ་ནི། །དབེན་པར་སྐྱོ་བས་གཅིག་པུར་མི་ཚུགས་ན། །སེམས་འཛིན་ལ་སོགས་ཉམས་ལེན་མེད་པར་ཤེས། །མང་པོའི་མི་དང་འགྲོགས་པར་མི་ཤེས་ན། །ཐབས་ལ་མི་མཁས་རང་རྒྱུད་ངན་པར་ཤེས། །བླ་མ་བསྟེན་ཡང་ཆོས་མིན་མི་སྤོང་ན། །དེ་ཡི་བྱིན་རླབས་ཡོན་ཏན་མ་འགོས་ཤེས། །ཁེངས་ཤིང་མ་དུལ་ང་རྒྱལ་ཆེ་བ་ན། །ཉམས་མྱོང་རྩི་མེད་གནས་ལུགས་མ་རྟོགས་ཤེས། །གདམས་ངག་ཆུང་ལ་ལེ་ལོ་ཆེ་བ་ན། །ཐར་ལམ་མི་སྙོགས་འཁོར་བར་འཁྱམས་པར་ཤེས། །རང་དོན་གཙོར་འཛིན་སྙིང་རྗེ་མེད་པ་ན། །ཐེག་ཆེན་ལམ་དང་སེམས་བསྐྱེད་མེད་པར་ཤེས། །རྟགས་ལ་བརྟེན་ནས་ནང་གི་ཚུལ་རིག་པས། །ཆོས་མིན་ལོག་པར་ཞུགས་པ་སྤང་འཚལ་ལོ། །ཆུད་གཟན་དྲུག་གི་རྣམ་གྲངས་བསྟན་པ་ནི། །ངན་སོང་མི་འཇིགས་སྡིག་པའི་ལས་ངན་སོག །རྙེད་དཀའི་དལ་འབྱོར་མི་ལུས་ཆུད་རེ་གཟན། །ཆོས་སྒོར་ཞུགས་ནས་ཕྱོགས་རིས་ཆགས་སྡང་བྱེད། །ཡང་དག་དོན་གྱི་དད་པ་ཆུད་རེ་གཟན། །ཐོས་བསམ་ཚིག་གི་ང་རྒྱལ་རྡོ་འཇོང་འཆང༌། །གནས་ལུགས་རྟོགས་པའི་ཤེས་རབ་ཆུད་རེ་གཟན། །ཟབ་མོའི་གསང་སྔགས་ཉམས་ལེན་དོན་བཞག་ནས། །གནད་མེད་བརྩོན་འགྲུས་དཀའ་ཐུབ་ཆུད་རེ་གཟན། །ཟུང་འཇུག་གཉིས་མེད་ཡེ་ཤེས་མཆོག་བོར་ནས། །སྣང་སྟོང་མཐར་འཛིན་སྒོམ་པ་ཆུད་རེ་གཟན། །རི་ངོགས་དབེན་གནས་ཆོས་འགྲུབ་གནས་བཞག་ནས། །སྡེ་དགོན་གྲོང་འགྲིམ་དངོས་གྲུབ་ཆུད་རེ་གཟན། །དེ་བས་དེ་དག་ལམ་དུ་མ་སོང་གཅེས། །གོང་མའི་རྗེས་སུ་སྙེགས་པའི་ཆོས་དྲུག་ནི། །སྡིག་སྒྲིབ་བག་ཆགས་རྩད་ནས་གཅོད་འདོད་ན། །སེམས་ཉིད་རང་བཞིན་གཞི་རྩ་བྲལ་བ་ལྟོས། །དགོས་འདོད་ནོར་བུ་ཡིད་བཞིན་བཙལ་འདོད་ན། །ཟབ་མོའི་ལམ་ལ་རྩོལ་བ་རྒྱུན་དུ་བསྲིངས། །གནས་ལུགས་དོན་གྱི་ཆོས་ཉིད་རྟོགས་འདོད་ན། །བཙལ་བས་མི་རྙེད་རང་བཞིན་ཞོག་ལ་ལྟོས། །གདམས་ངག་ཉམས་ལེན་རྒྱུད་ལ་སྦྱོར་འདོད་ན། །རང་རྒྱུད་ཐུལ་ལ་དེ་ནས་ཉམས་སུ་ལོང༌། །སྙིང་ནས་དམ་ཆོས་ཚུལ་བཞིན་སྒྲུབ་འདོད་ན། །ཚེ་འདི་བློས་ཐོངས་ཞེན་ཐག་འཁྲི་བ་ཆོད། །གོང་མའི་རྗེས་སུ་མྱུར་དུ་སྙེགས་འདོད་ན། །མཛད་སྤྱོད་ལྟོས་ལ་སྒྲུབ་པ་སྙིང་པོར་གྱིས། །འདི་དག་གནད་ཀྱི་མན་ངག་སྙིང་པོ་ཡིན། །སྤྱི་ཡི་ཚུལ་དང་མི་མཐུན་ཆོས་དྲུག་ནི། །རང་གི་ངན་སྤྱོད་སྣ་དགུ་ཚང་བྱས་ནས། །གཞན་དག་མགུ་རེ་ཆོས་པའི་ལུགས་མ་ཡིན། །རང་གི་གཡོ་སྒྱུ་ཁྲམ་གསུམ་ཚང་བྱས་ནས། །དཀོན་མཆོག་མཉེས་རེ་ཆོས་པའི་ལུགས་མ་ཡིན། །དབེན་པའི་གནས་སུ་བརྩོན་པས་མི་བསྒྲུབ་པར། །ཆོས་ལ་རེ་འཁང་ཆོས་པའི་ལུགས་མ་ཡིན། །ཚིག་ཏུ་སྙིང་རྗེ་ལག་ལེན་རང་འདོད་སྒྲུབ། །གཞན་དོན་འགྲུབ་རེ་ཆོས་པའི་ལུགས་མ་ཡིན། །སེམས་ལ་བདག་འཛིན་ཁ་ལ་སྟོང་པ་ཉིད། །ཐར་ལམ་སྙོགས་རེ་ཆོས་པའི་ལུགས་མ་ཡིན། །སེམས་ལ་རང་ལྟ་ཁ་ལ་མཐའ་བྲལ་ཟེར། །གནས་ལུགས་རྟོགས་རེ་ཆོས་པའི་ལུགས་མ་ཡིན། །དེ་བས་བསྟན་པ་སྤྱི་ཡི་སྲོལ་ཉམས་སྤང༌། །ཤིན་ཏུ་དགེ་ཞིང་ལེགས་པའི་ཆོས་དྲུག་ནི། །བསྟན་པ་གནས་ཤིང་དལ་འབྱོར་ཐོབ་དུས་འདིར། །འཁོར་བའི་དོང་ལས་མྱུར་དུ་འབྲོས་རེ་རན། །ཐོས་བསམ་སྙིང་པོའི་ཉམས་སུ་ལེན་དུས་འདིར། །རང་རྒྱུད་ཁེངས་པའི་ཆོས་དང་བསྲེ་རེ་རན། །སྣ་ཚོགས་སྡུག་བསྔལ་འགལ་རྐྱེན་མང་དུས་འདིར། །སྒྲུབ་པའི་ཆོས་ལ་སྙིང་རུས་བསྐྱེད་རེ་རན། །ཚོགས་དྲུག་སྒོ་ལ་ཡུལ་དྲུག་ཤར་དུས་འདིར། །གཟུང་འཛིན་གཉིས་སྣང་རང་སར་གྲོལ་རེ་རན། །ལྟ་སྒོམ་སྤྱོད་པའི་དོན་ལ་བསྒོམ་དུས་འདིར། །རིག་པའི་རྩལ་སྦྱོང་ཕྱོགས་མེད་བྱེད་རེ་རན། །གཏན་གྱི་འདུན་མ་ད་རེས་བསྒྲུབ་དུས་འདིར། །བརྩེ་བའི་གདམས་ངག་འབད་པས་སྒྲུབ་རེ་རན། །དེ་ལྟར་གཉེན་པོས་རང་ཚོད་མ་ཟིན་ན། །འཆི་དུས་ལུས་ལ་འཆི་བདག་བཞད་གད་བྱེད། །མི་འགྲུབ་འགལ་བ་གླབ་ཅོལ་ཆོས་དྲུག་ནི། །རང་གིས་རང་ལ་རང་དབང་མ་ཐོབ་པར། །གཞན་དབང་བྱེད་འདོད་འགལ་བ་གླབ་ཅོལ་ཞིག །རང་ཕན་མ་བསྒྲུབས་ཕན་འདོགས་མི་ནུས་བཞིན། །གཞན་ཕན་སྒྲུབ་འདོད་འགལ་བ་གླབ་ཅོལ་ཞིག །རང་ཉིད་སློབ་མའི་མཚན་ཉིད་མི་ལྡན་པར། །སློབ་དཔོན་བྱེད་འདོད་འགལ་བ་གླབ་ཅོལ་ཞིག །རང་ཉིད་ཀོ་སྐམ་བཞིན་དུ་མ་དུལ་བར། །གཞན་རྒྱུད་འདུལ་བ་འགལ་བ་གླབ་ཅོལ་ཞིག །རང་ལ་འདིར་རྒྱག་རྟོགས་པའི་གདེང་མེད་པར། །གཞན་ལ་སྒོམ་འབོགས་འགལ་བ་གླབ་ཅོལ་ཞིག །རང་ཉིད་ཐ་མལ་ཀུན་སྤྱོད་མ་ལོག་པར། །གཞན་དག་ཆོས་འགོད་འགལ་བ་གླབ་ཅོལ་ཞིག །དེ་འདྲའི་རང་བཞིན་སྐྱོན་གྱིས་མ་གོས་གཅེས། །དམ་ཆོས་ལེགས་པར་བསྐུལ་བའི་ཆོས་དྲུག་ནི། །དོན་མེད་འཇིག་རྟེན་བྱ་བ་སྤོང་འདོད་ན། །དད་པ་སྐྱེ་དུས་བྱ་བྱེད་འཕྲོ་ལ་ཞོག །བྱས་ཀྱང་ཆུ་གཉེར་འདྲ་སྟེ་ཟིན་དུས་མེད། །དབེན་པའི་གནས་སུ་ཕྱིན་ནས་སྒྲུབ་འདོད་ན། །དྲན་དུས་དྲན་པ་ཤོལ་མེད་དེ་ཀར་སོང༌། །དེ་དུས་མ་ཕྱིན་འགལ་རྐྱེན་ཤོལ་འདེབས་མང༌། །བླ་མ་བསྟེན་དུས་ཅི་གསུང་བཀའ་ཉན་དགོས། །ངས་བྱས་ཡུས་ཀྱིས་ཐུགས་ཟིན་དུས་མི་འོང༌། །སེམས་ཉིད་བལྟ་དུས་མ་བཅོས་རང་བཞག་དགོས། །མ་བཞག་བཅོས་མས་རང་ངོ་མཐོང་དུས་མེད། །ཡོན་ཏན་འཚོལ་དུས་བརྩོན་འགྲུས་གཉུག་བསྲིང་དགོས། །ངང་ཐུང་རེས་འཇོག་ཡོན་ཏན་རྫོགས་དུས་མེད། །ཟད་སར་སྐྱེལ་དུས་གནས་ལུགས་ས་ཟིན་དགོས། །གཞན་དུ་བཙལ་བས་རྙེད་པའི་དུས་མི་འོང༌། །གནས་ལུགས་སྒྲུབ་པའི་གཉེན་པོ་རྣམ་དྲུག་ནི། །ཆེ་བཟང་མཐོ་ས་མི་གཟུང་དམན་པའི་འདུག་སར་བསྡད། །མང་པོའི་མགོ་དཔོན་མི་བྱ་ བཟང་པོའི་འོག་ཏུ ་ཞུགས། །བཟང་འདོད་སྙན་གྲགས་མི་སྒྲུབ་ངར་འཛིན་རི་བོ་སྒྱེལ། །རང་འདོད་རྒྱལ་ཁ་མི་སྒུག་ཆོག་ཤེས་ཕམ་ཁ་བླང༌། །མི་ངོའི་དཀར་ནག་མི་ལྟ་རང་རྒྱུད་དགེ་སྡིག་ལྟ། །ཚོགས་དྲུག་ཡུལ་ལ་མི་ཡེངས་སེམས་ཀྱི་རང་ངོ་ལྟོས། །དེ་ལྟར་རྣམ་པ་དྲུག་ལྡན་སྒྲུབ་པ་གནད་དུ་ཕྱིན། །ངེས་པ་རྣམ་དྲུག་མན་ངག་བསྟནཔ་ནི། །མོས་གུས་གདུང་སེམས་བཅས་ཏེ་གསོལ་བ་འདེབས་ནུས་ན། །སེམས་ཉིད་རང་ངོ་རྟོགས་ཤིང་བྱིན་རླབས་འཇུག་པར་ངེས། །རང་བབས་བྱར་མེད་ངང་ལ་ལྷུག་པར་གློད་ཤེས་ན། །རང་རིག་གཉིས་མེད་ཡེ་ཤེས་ཇི་བཞིན་གསལ་བར་ངེས། །གཉིས་འཛིན་མཚན་མའི་རྣམ་རྟོག་རང་ངོ་བལྟ་ཤེས་ན། །རང་ཐོག་བཅོས་བསླད་མེད་པར་རང་ས་གྲོལ་བར་ངེས། །འཁྲུལ་སྣང་གཟུང་འཛིན་རྣམ་རྟོག་རང་སར་འཇོག་ཤེས་ན། །རང་དྭངས་མི་རྟོག་ཡེ་ཤེས་རང་བཞིན་འཆར་བར་ངེས། །ཐབས་ཀྱིས་རིག་པ་གཅུན་ན་གནས་ལུགས་གདོད་མའི་གཞི། །མི་གཡོ་སྤྲོས་དང་བྲལ་བའི་ལྷུན་གྲུབ་འཆར་བར་ངེས། །སྙོམ་ལས་ལེ་ལོ་མེད་པར་བརྩོན་འགྲུས་རྒྱུན་བསྲིངས་ན། །ས་ལམ་ཡོན་ཏན་དྲོད་རྟགས་ནང་ནས་འཆར་བར་ངེས། །ཡིན་པ་དྲུག་གི་རྣམ་གྲངས་བསྟན་པ་ནི། །གཞན་དག་གཡོ་སྒྱུས་བསླུས་ན་རང་ཉིད་བསླུས་པ་ཡིན། །གཞན་ལ་རྒྱལ་ཁ་བྱིན་ན་རང་ལ་བྱིན་པ་ཡིན། །གཞན་ལ་གདུག་རྩུབ་གནོད་པ་རང་ལ་བསྐྱལ་བ་ཡིན། །གཞན་ལ་ཇི་ལྟར་ཕན་བཏགས་རང་ལ་བཏགས་པ་ཡིན། །གཞན་ལ་ཕྲག་དོག་གཤེ་སྐུར་རང་ལ་བཏབ་པ་ཡིན། །གཞན་དོན་ཚོགས་གཉིས་ཅི་བསགས་རང་ལ་བསགས་པ་ཡིན། །དེ་འདྲ་གོ་བ་དཀོན་ཏེ་རྒྱུད་ལ་འགེལ་བ་དཀོན། །དེ་བས་དེ་ཉིད་དོན་ལ་རང་གི་སེམས་སྦྱང་བྱ། །འཛིན་པ་མེད་པའི་རྣམ་གྲངས་དྲུག་པོ་ནི། །དད་གུས་མེད་པའི་མི་ལ་ཐུགས་རྗེས་འཛིན་པ་མེད། །ཤེས་རབ་མེད་པའི་མི་ལ་ཐོས་བསམ་འཛིན་པ་མེད། །དམ་ཚིག་མེད་པའི་མི་ལ་དངོས་གྲུབ་འཛིན་པ་མེད། །བསླབས་ཀྱང་མི་ཉན་མི་ལ་ཁ་ཏས་འཛིན་པ་མེད། །རང་རྒྱུད་ངན་པའི་མི་ལ་ཆོས་ཀྱིས་འཛིན་པ་མེད། །དྲིན་གཟོ་མེད་པའི་མི་ལ་ཕན་ཐོགས་འཛིན་པ་མེད། །ཆོས་ཀྱིས་རྡུགས་པར་བསྟན་པ་རྣམ་དྲུག་ནི། །ནང་ནས་ཉོན་མོངས་དགྲ་རུ་མ་མཐོང་ན། །ཕྱི་ནས་བླ་མའི་གདམས་པ་རྡུགས་པར་གདའ། །ཚེ་འདིའི་བྱ་བ་རྒྱབ་ཏུ་མ་བོར་ན། །ཉམས་ལེན་འགྲུབ་པའི་དུས་ཤིག་རྡུགས་པར་གདའ། །རྒས་ཀའི་ཕྱི་ཚིས་སྡུག་དོགས་མ་སྤངས་ན། །སྙིང་ནས་བརྩོན་པའི་དམ་ཆོས་རྡུགས་པར་གདའ། །ནང་ནས་རང་ལ་ངེས་ཤེས་མ་སྐྱེས་ན། །ཆོས་དང་བླ་མའི་མོས་གུས་རྡུགས་པར་གདའ། །འཁོར་བའི་སྡིག་སྤྱོད་མི་དགེ་མ་སྤངས་ན། །འཕགས་པའི་ཐུགས་རྗེས་འདྲེན་པ་རྡུགས་པར་གདའ། །གཅིག་ཏུ་ཨ་འཐས་བདེན་ཞེན་མི་འདོར་ན། །ཕྱོགས་རིས་མེད་པའི་གདམས་པ་རྡུགས་པར་གདའ། །ཡི་ཆད་དགོད་རེ་བྲོ་བའི་ཆོས་དྲུག་ནི། །འདུག་དང་མི་འདུག་རང་དབང་ཆ་མེད་པའི། །གནས་ཀྱི་སོ་ཚིས་ཡི་ཆད་དགོད་རེ་བྲོ། །སྤྱོད་དང་མི་སྤྱོད་རང་དབང་ཆ་མེད་པའི། །ནོར་གྱི་གསོག་བྲུན་ཡི་ཆད་དགོད་རེ་བྲོ། །གོན་དང་མི་གོན་རང་དབང་ཆ་མེད་པའི། །གོས་ཀྱི་རྩོལ་སྒྲུབ་ཡི་ཆད་དགོད་རེ་བྲོ། །ཟ་དང་མི་ཟ་རང་དབང་ཆ་མེད་པའི། །ཟས་ཀྱི་བྱ་བྱེད་ཡི་ཆད་དགོད་རེ་བྲོ། །འགྲོགས་དང་མི་འགྲོགས་རང་དབང་མེད་པ་ཡི། །གྲོགས་ཀྱི་ཉེས་ཁ་ཡི་ཆད་དགོད་རེ་བྲོ། །བསྟོངས་དང་མི་བསྟོངས་རང་དབང་མེད་པ་ཡི། །བུ་ཚའི་གཅེས་སྤྲས་ཡི་ཆད་དགོད་རེ་བྲོ། །འཇིག་རྟེན་འཁྲུལ་བའི་སྤྱོད་པ་མཐོང་ཙ་ན། །ཡི་ཆད་དགོད་རེ་བྲོ་བ་ཤིན་ཏུ་མང༌། །དགོས་པ་དྲུག་གི་རྣམ་གྲངས་བསྟན་པ་ནི། །འཇིག་རྟེན་བྱ་བ་ཅིས་ཀྱང་འབོར་དགོས་ཤིང༌། །མ་རིག་མུན་པ་ཅིས་ཀྱང་སངས་པ་དགོས། །གཟུང་འཛིན་མཁར་པོ་ཅིས་ཀྱང་འགྱེལ་དགོས་ཤིང༌། །ཉམས་རྟོགས་ཡོན་ཏན་ཅིས་ཀྱང་གོང་འཕེལ་དགོས། །ཟུང་འཇུག་ཡེ་ཤེས་ཅིས་ཀྱང་འཆར་དགོས་ཤིང༌། །སྐུ་གསུམ་ནོར་བུ་ཅིས་ཀྱང་ལོན་པ་དགོས། །ཡ་ཆའི་རྣམ་གྲངས་དྲུག་པོ་བསྟན་པ་ནི། །རབ་ཏུ་བྱུང་ནས་ལོ་མང་ལོན་ན་ཡང༌། །སྲུང་སྡོམ་གནང་བཀག་མི་ཤེས་ཡ་རེ་ཆ། །ཆོས་སྒོར་ཞུགས་ནས་ལོ་མང་ལོན་ན་ཡང༌། །དགེ་སྡིག་ད་གཟོད་བསླབ་དགོས་ཡ་རེ་ཆ། །ཐེག་ཆེན་ཞུགས་ནས་ལོ་མང་ལོན་ན་ཡང༌། །སེམས་བསྐྱེད་བསླབ་ཕྱོགས་མི་ཉེ་ཡ་རེ་ཆ། །ཐོས་བསམ་བྱས་ནས་ལོ་མང་ལོན་ན་ཡང༌། །ཉམས་ལེན་བློ་ཁ་མ་ཕྱོགས་ཡ་རེ་ཆ། །སྒོམ་པ་བྱས་ནས་ལོ་མང་ལོན་ན་ཡང༌། །དྲོད་རྟགས་ཡོན་ཏན་མ་སྐྱེས་ཡ་རེ་ཆ། །ལྟ་བ་རྟོགས་ནས་ལོ་མང་ལོན་ན་ཡང༌། །དངོས་ཞེན་འཁྲུལ་བ་མ་ཞིག་ཡ་རེ་ཆ། །འདི་དག་མཁར་ལན་ཐོག་མར་བྱས་རྗེས་སུ། །རྩིག་རྨིང་གདོད་ནས་བླང་བ་ཤིན་ཏུ་མཚར། །བརྟགས་ཤིང་དགོད་བྲོ་བསམས་ཤིང་ཡི་མུག་པས། །དམ་པ་བསྟེན་ལ་ཐོས་བསམ་སྒོམ་པ་སྒྲུབས། །ཆོས་ཉིད་རང་ཆས་གནད་དྲུག་བསྟན་པ་ནི། །མ་བརྟག་མ་དཔྱད་རང་ངོ་རང་གིས་མཐོང༌། །མ་བསམས་མ་ཕྱིས་འཁོར་བ་ཀ་ནས་དག །མ་བཅད་མ་བཀྲོལ་མཚན་མ་རང་སར་གྲོལ། །མ་བཙལ་མ་བསྒྲུབས་སྐུ་ལྔ་ལྷུན་གྱིས་གྲུབ། །མ་སྤངས་མ་བླངས་སྐྱོན་ཡོན་མཐའ་ལས་འདས། །མ་བྱས་མ་འབད་འཕྲིན་ལས་ལྷུན་གྱིས་གྲུབ། །དེ་ལྟར་སུས་ཤེས་སྙིང་པོའི་གནད་ལ་མཁས། །བཤེས་གཉེན་མཁས་པའི་གདམས་ངག་རྣམ་དྲུག་ནི། །དད་མེད་དད་པ་བསྐྱེད་ལ་མཁས་པ་དང༌། །བླང་དོར་གནས་ལ་སློབ་པར་མཁས་པ་དང༌། །སྒྲུབ་པས་གནད་དུ་གཏོང་ལ་མཁས་པ་དང༌། །བར་ཆད་བགེགས་ལས་སྐྱོབ་པར་མཁས་པ་དང༌། །ཟུང་འབྲེལ་སྙན་བརྒྱུད་སྟོན་ལ་མཁས་པ་དང༌། །རྐྱེན་ངན་ལམ་དུ་བསྒྱུར་ལ་མཁས་པའོ། །རིགས་པ་དྲུག་གི་རང་བཞིན་བསྟེན་པ་ནི། །ཐ་མལ་ནད་ལ་སྨན་པ་བསྟེན་ཚོད་དུ། །འཁོར་བའི་ནད་འབྱིན་བླ་མ་བསྟེན་པར་རིགས། །འཇིགས་པའི་འཕྲང་ལ་སྐྱེལ་མ་བསྟེན་ཚོད་དུ། །བར་དོའི་སྐྱབས་ལ་བླ་མ་བསྟེན་པར་རིགས། །གྲོས་འདུན་ཆེད་དུ་རྒན་རབས་བསྟེན་ཚོད་དུ། །གཏན་གྱི་གྲོས་འདུན་བླ་མ་བསྟེན་པར་རིགས། །ཁ་ཉེན་དབང་གིས་རྗེ་དཔོན་བསྟེན་ཚོད་དུ། །རྐྱེན་ངན་ཞི་ཕྱིར་བླ་མ་བསྟེན་པར་རིགས། །གྲུ་པས་ཐབས་མཁས་མཉན་པ་བསྟེན་ཚོད་དུ། །སྡུག་བསྔལ་མཚོ་སྒྲོལ་བླ་མ་བསྟེན་པར་རིགས། །ཚོང་པས་རྒྱ་མཚོའི་དེད་དཔོན་བསྟེན་ཚོད་དུ། །བྱང་ཆུབ་འགྲུབ་ཕྱིར་བླ་མ་བསྟེན་པར་རིགས། །ལྟོས་པ་དྲུག་གི་རྣམ་གྲངས་བསྟན་པ་ནི། །ད་ལྟའི་ནད་ཀྱི་སྡུག་བསྔལ་ཟུག་རྔུ་ལྟོས། །ངན་སོང་གསུམ་གྱི་སྡུག་བསྔལ་བཟོད་དམ་སོམས། །བཙོན་རར་བཟུང་རྣམས་འབྲོས་པའི་འབད་རྩོལ་ལྟོས། །འཁོར་བའི་བཙོན་རར་རང་བརླག་བྱེད་དམ་སོམས། །ཚེ་འདིའི་ལྟོ་གོས་རྩོལ་བ་བྱེད་ལ་ལྟོས། །གཏན་གྱི་སོ་ནམ་ད་རེས་འཆོར་བ་སོམས། །ཡུད་ཙམ་འགྲོགས་པའི་གྲོགས་ངན་སྐྱོན་ལ་ལྟོས། །བཟོད་དཀའི་སེམས་ཅན་འགྲོགས་དཀའ་བཟོད་དམ་སོམས། །ཐ་མལ་གཡང་སར་བག་ཟོན་བྱེད་ལ་ལྟོས། །ངན་སོང་གཡང་སར་འགྲོ་བའི་སྡུག་བསྔལ་སོམས། །ཚེ་འདིའི་བཟའ་ཚོ་ཤི་བའི་མྱ་ངན་ལྟོས། །གཏན་གྲོགས་ཆོས་དང་བྲལ་བའི་རང་བཞིན་སོམས། །དེ་ལྟར་བསམས་ན་སྲིད་པའི་ཕ་རོལ་འགྲོ། །ཉམས་སུ་ལེན་པའི་མན་ངག་རྣམ་དྲུག་ནི། །བར་སྣང་ངོས་ལ་ཉི་མ་ཤར་བ་ལྟར། །རང་བྱུང་ཡེ་ཤེས་གསལ་སྟོང་གནད་ལ་དབབ། །རི་རབ་རྩེ་ནས་རི་ཕྲན་ཀུན་མཐོང་ལྟར། །སེམས་ཉིད་དོན་མཐོང་དགོངས་པའི་རྩེ་མོར་དཔྱད། །གསེར་གླིང་ཕྱིན་དུས་བོང་བ་མི་རྙེད་ལྟར། །ཡེང་རྐྱེན་ཡུལ་རྣམས་ཆོས་ཉིད་རང་ངོ་སྤྲད། །སེར་བུ་རྡུལ་བྲལ་མཁའ་ལ་འགྱུ་བ་ལྟར། །རྣམ་རྟོག་མཚན་མ་རང་སར་དྭངས་སུ་གཞུག །མཚོན་ཚོགས་འཕངས་པ་མེ་ཏོག་ཆར་གྱུར་ལྟར། །ཅི་སྣང་ཐམས་ཅད་ཆོས་སྐུའི་ལམ་དུ་བླང༌། །སེང་གེ་རྩལ་གསུམ་རང་ལ་རྫོགས་པ་ལྟར། །རེ་དོགས་མཚན་མ་མཉམ་ཉིད་ཟིལ་གྱིས་མནན། །དེ་ལྟར་སུས་ཤེས་ཡང་ཟབ་གནད་ལ་མཁས། །ཐེག་པའི་ལམ་ཁྱེར་དྲིལ་བའི་ཆོས་དྲུག་ནི། །སྣོད་བཅུད་འཁྲུལ་སྣང་ངོ་སྤྲད་དག་སྣང་ལམ་དུ་ཁྱེར། །འཁོར་བ་སྡུག་བསྔལ་ངོ་སྤྲད་སྙིང་རྗེ་ལམ་དུ་ཁྱེར། །འགྲོ་དྲུག་ཕ་མར་ངོ་སྤྲད་བྱམས་པ་ལམ་དུ་ཁྱེར། །རྒྱུ་འབྲས་རྟེན་འབྲེལ་ངོ་སྤྲད་སྡོམ་གསུམ་ལམ་དུ་ཁྱེར། །དབང་བཞི་སྒོ་གསུམ་ངོ་སྤྲད་བསྐྱེད་རྫོགས་ལམ་དུ་ཁྱེར། །སྣང་གྲགས་སེམས་ཉིད་ངོ་སྤྲད་ཆོས་ཉིད་ལམ་དུ་ཁྱེར། །དེ་དང་ལྡན་ན་གོལ་ས་སྒྲིབ་པ་མེད། །ལེ་ལོར་མི་འཇོག་གནད་ཀྱི་ཆོས་དྲུག་ནི། །དབེན་གནས་བས་མཐའ་བཙལ་འདོད་ཕྱི་ཐལ་འགྲོ། །སེམས་ལ་གཟུང་འཛིན་དབེན་པར་བྱ་བ་གནད། །གདམས་ངག་ཚིག་ལས་བཙལ་འདོད་ཕྱི་ཐལ་འགྲོ། །ཐབས་ལམ་ཉམས་ལེན་ཟབ་མོ་བཙལ་བ་གནད། །འཚོ་བ་གསོག་བྲུན་ལྟོས་པ་ཕྱི་ཐལ་འགྲོ། །གང་བྱུང་ཆོག་ཤེས་བྱ་འཚོལ་བསླབ་པ་གནད། །སྒོམ་སྒྲུབ་བྲེལ་ཤོམ་རྗེས་བྱེད་ཕྱི་ཐལ་འགྲོ། །བྱ་བྱེད་རྩལ་འཕྲོ་བོར་ནས་བྱེད་པ་གནད། །ཉམས་རྟོགས་བསགས་སྦྱོང་བསྐྱལ་ཏེ་ཕྱི་ཐལ་འགྲོ། །ཟབ་མོ་གནད་བསྣུན་བཙན་ཐབས་བསྐྱེད་པ་གནད། །ས་ལམ་རིམ་གྱིས་འཚོལ་བ་ཕྱི་ཐལ་འགྲོ། །སེམས་ཉིད་སྐུ་གསུམ་བརྟན་ཞིང་གོམས་པ་གནད། །ཉམས་སུ་བླངས་ན་སངས་རྒྱས་བྱང་ཆུབ་འགྲུབ། །གནས་དྲུག་དོན་ལ་བསླབ་པའི་ཆོས་དྲུག་ནི། །ཉམས་པ་མེད་པའི་བྱང་ཆུབ་སེམས་ལ་གནས། །ཚོགས་གཉིས་མི་ངོམས་ཕ་རོལ་ཕྱིན་ལ་གནས། །ཤེས་རབ་སྦྱང་ཕྱིར་ཆོས་ཀྱི་གཏམ་ལ་གནས། །བསམ་གཏན་བསྒྲུབ་ཕྱིར་དགོན་པ་དབེན་ལ་གནས། །འདུ་བྱེད་སྐྱུང་ཕྱིར་སྦྱངས་པའི་དོན་ལ་གནས། །ས་མཆོག་བསྒྲུབ་ཕྱིར་བླ་མ་བཀུར་ལ་གནས། །དེ་ལྟར་སུ་གནས་ཐེག་མཆོག་ལམ་ཆེན་ཞུགས། །ཉལ་ན་ལམ་དྲུག་ལེགས་པར་བསྟན་པ་ནི། །ལུས་སེམས་གཡོ་བ་སྤང་ཕྱིར་དགོན་པའི་ལམ། །བདག་གཞན་གདུང་བ་མེད་ཕྱིར་ཚང་བའི་ལམ། །རང་བཞིན་འགྱོད་པ་མེད་ཕྱིར་ལེགས་པའི་ལམ། །ཡོན་ཏན་བསྒྲུབ་ཕྱིར་ཡང་དག་འཇོག་པའི་ལམ། །བརྩམས་པ་མཐར་ཕྱིན་བྱ་ཕྱིར་གྲུབ་པའི་ལམ། །སྔོན་ནས་ལེགས་པར་སྦྱང་ཕྱིར་ལྷུན་གྲུབ་ལམ། །མལ་དྲུག་སུ་ཉལ་བདེ་ཞིང་སྐྱིད་པ་ཡིན། །ཐེག་ཆེན་རྣམས་ཀྱི་འགྲོ་བའི་ས་དྲུག་ནི། །སངས་རྒྱས་ཆོས་འདོད་ཆོས་ཉིད་ངང་དུ་འགྲོ། །སེམས་ཅན་དོན་འདོད་གང་འཚམས་ཆོས་སྟོན་འགྲོ། །རང་སེམས་རྟོགས་འདོད་དུག་གསུམ་མེད་པར་འགྲོ། །ཤེས་རབ་ཐོབ་འདོད་ཆོས་ཀྱི་རྒྱུན་དུ་འགྲོ། །གདུལ་བྱའི་དབང་གིས་སྐྱེ་བ་ཀུན་ཏུ་འགྲོ། །ཐར་ལམ་འདོད་པས་བླ་མ་བསྟེན་དུ་འགྲོ། །དེ་ལྟར་སུ་འགྲོ་སངས་རྒྱས་ཆོས་བསླབ་ཡིན། །ཡིད་གནས་དགོས་པའི་རྣམ་གྲངས་རྣམ་དྲུག་ནི། །དགེ་བའི་རྩ་བ་རྩོམ་ལ་ཡིད་གནས་དགོས། །ཆོས་ལ་ནན་ཏན་ལྷུར་བླང་ཡིད་གནས་དགོས། །བླ་མེད་བྱང་ཆུབ་ཡིད་ཞུགས་ཡིད་གནས་དགོས། །གཞན་དོན་བྱང་ཆུབ་སེམས་ལ་ཡིད་གནས་དགོས། །ཉིན་མཚན་ཆོས་ཉིད་དོན་ལ་ཡིད་གནས་དགོས། །ངེས་འབྱུང་སྐྱོ་ཤས་བསྐྱེད་ལ་ཡིད་གནས་དགོས། །དེ་ལྟར་གང་བྱེད་རྒྱལ་སྲས་ལམ་ བཟང་ཞུགས། །ངག་དྲུག་རྣམ་གྲངས་རབ་ཏུ ་བསྟན་པ་ནི། །སེམས་ཅན་སྤྱོད་པ་མི་ཟད་སྟོན་པའི་ངག །ཆོས་ཚུལ་རྒྱ་མཚོ་རབ་ཏུ་སྟོན་པའི་ངག །སངས་རྒྱས་ཡོན་ཏན་བསྔགས་པ་བརྗོད་པའི་ངག །ཐེག་ཆེན་མི་ཟད་རབ་ཏུ་སྟོན་པའི་ངག །ཕྱོགས་བཅུའི་ནམ་མཁའ་ཆོས་སྒྲས་འགེངས་པའི་ངག །འཁོར་བ་འཇིག་ཅིང་མྱ་ངན་འདའ་སྟོན་ངག །དེ་དག་སུ་ལྡན་རྒྱལ་བའི་སྲས་པོ་ཆེ། །ལུས་དྲུག་རྣམ་འཕྲུལ་རབ་ཏུ་བསྟན་པ་ནི། །མི་རྣམས་སྨིན་ཕྱིར་མི་ཡི་ལུས་དང་ནི། །ངན་སོང་གདུལ་ཕྱིར་མི་མ་ཡིན་པའི་ལུས། །ལྷ་དང་ལྷ་མིན་སྨིན་མཛད་ལུས་དང་ནི། །ཆུང་ངུ་འདུལ་ཕྱིར་ཉན་ཐོས་རང་རྒྱལ་ལུས། །ཐེག་ཆེན་འགོད་ཕྱིར་སེམས་དཔའི་ལུས་དང་ནི། །དབང་རྫོགས་བྱ་ཕྱིར་ལོངས་སྤྱོད་རྫོགས་པའི་ལུས། །མངའ་དབང་འབྱོར་བ་རྣམས་ལ་ལྷུན་གྱིས་གྲུབ། །རྒྱལ་སྲས་རྣམས་ཀྱི་མགོ་དྲུག་བསྟན་པ་ནི། །ལྷ་དང་བཅས་པའི་འཇིག་རྟེན་འདུ་བའི་ཕྱིར། །ཡོན་ཏན་མཆོག་ལྡན་བླ་མ་འདུད་པའི་མགོ །དཀོན་མཆོག་གསུམ་གྱི་གདུང་རྒྱུད་མི་བཅད་ཕྱིར། །བདེ་གཤེགས་རྣམས་ཀྱི་ཚུལ་བླངས་བསྡུས་པའི་མགོ །སྟོང་གསུམ་ཀུན་གྱི་བདག་པོར་འགྱུར་བྱའི་ཕྱིར། །རྣམ་དག་ཟབ་མོ་མོས་པ་བླངས་པའི་མགོ །འགྲོ་ཀུན་བྱང་ཆུབ་ལམ་ལ་དགོད་བྱའི་ཕྱིར། །སེམས་ཅན་ཐམས་ཅད་ཡོངས་སུ་སྨིན་བྱེད་མགོ །གོང་ན་མེད་པའི་ཆོས་རབ་གྲུབ་བྱའི་ཕྱིར། །ཤེས་རབ་ཕ་རོལ་ཕྱིན་ལ་གནས་པའི་མགོ །ཁམས་གསུམ་ཀུན་གྱིས་མཆོད་པར་བྱ་བའི་ཕྱིར། །དགེ་བའི་རྩ་བ་ཡོངས་སུ་བསྔོ་བའི་མགོ །དེ་ལྟར་ལྡན་རྣམས་ས་མཆོག་དཀྱིལ་འཁོར་འགྲུབ། །རྒྱལ་སྲས་རྣམས་ཀྱི་རྣ་བ་དྲུག་ལྡན་ནི། །སྙན་མིན་སྙན་ཐོས་དགག་སྒྲུབ་མེད་པ་དང༌། །ཉན་ནས་གཏམ་ཐོས་མི་འདོད་སྨོད་མི་བྱེད། །སེམས་དཔའ་འབྱུང་བའི་གཏམ་ཐོས་སྤྲོ་བ་སྐྱེད། །མི་ཁོམ་སྐྱེས་ཐོས་སྙིང་རྗེའི་གོ་ཆ་གྱོན། །སངས་རྒྱས་བསྔགས་ཐོས་འདོད་ཕྱིར་བརྩོན་འགྲུས་རྩོམ། །ཕྱོགས་བཅུའི་འཇིག་རྟེན་སྒྲ་ཀུན་བྲག་ཅར་ཤེས། །དེ་ལྟར་ཉན་པའི་རྣ་བ་དྲུག་ལྡན་བྱ། །རྒྱལ་སྲས་རྣམས་ཀྱི་ལྟ་བའི་མིག་དྲུག་ནི། །འཇིག་རྟེན་གཟུགས་རྣམས་བལྟ་ཕྱིར་ཤ་ཡི་མིག །སེམས་ཅན་རིགས་རྣམས་བལྟ་ཕྱིར་ལྷ་ཡི་མིག །སེམས་ཅན་དབང་པོ་བལྟ་ཕྱིར་ཤེས་རབ་མིག །ཆོས་རྣམས་ཇི་བཞིན་བལྟ་ཕྱིར་ཆོས་ཀྱི་མིག །སྒྲིབ་པ་མེད་པར་བྱ་ཕྱིར་ཆགས་མེད་མིག །ཆོས་དབྱིངས་བལྟ་ཕྱིར་ཐམས་ཅད་མཁྱེན་པའི་མིག །དེ་དང་ལྡན་པས་སེམས་ཅན་དོན་ཡོངས་འགྲུབ། །རྒྱལ་སྲས་རྣམས་ཀྱི་ལག་པ་རྣམ་དྲུག་ནི། །རྒྱལ་མོས་ཡིད་ཆེས་བྱ་ཕྱིར་དད་པའི་ལག །སློང་བ་ཡིད་བཞིན་ཚིམ་བྱེད་གཏོང་བའི་ལག །ཐེ་ཚོམ་བཅད་ཕྱིར་ཐོས་པ་དམ་པའི་ལག །སེམས་ཅན་འདོན་ཕྱིར་བདེ་བར་འཇོག་པའི་ལག །འགྲོ་ལ་ཆོས་སྟོན་སེར་སྣ་མེད་པའི་ལག །ཚོགས་སྡུད་རྒྱལ་མཆོད་རིམ་གྲོ་བྱེད་པའི་ལག །དེ་དང་ལྡན་པས་ཆོས་ཀྱི་སྣང་བ་སྟོན། །རྒྱལ་སྲས་རྣམས་ཀྱི་རྐང་པ་དྲུག་ལྡན་ནི། །སྨོན་ལམ་རྫོགས་ཕྱིར་ཚུལ་ཁྲིམས་རྐང་པ་དང༌། །བྱང་ཆུབ་ཆོས་སྡུད་བརྩོན་འགྲུས་རྐང་པ་དང༌། །བརྩམས་པ་མཐར་འབྱིན་དམ་བཅའི་རྐང་པ་དང༌། །བླ་མའི་བཀའ་སྒྲུབ་མཐུན་པའི་རྐང་པ་དང༌། །ཐོས་པས་མི་ངོམས་ཤེས་རབ་རྐང་པ་དང། །ལེགས་པར་སྤྱོད་བྱེད་ནན་ཏན་རྐང་པ་དང༌། །དྲུག་ལྡན་སྐྱེས་བུ་རྒྱལ་བའི་ས་རབ་བགྲོད། །བདུད་ཀྱིས་མི་ཚུགས་གོ་ཆ་རྣམ་དྲུག་ནི། །འགྲོ་བ་སྐྱོབ་པ་བྱམས་པའི་གོ་ཆ་དང༌། །བརྩམས་པ་མཐར་ཕྱིན་སྨོན་ལམ་གོ་ཆ་དང༌། །འགྲོ་བ་བསྒྲལ་བ་སྙིང་རྗེའིི་གོ་ཆ་དང༌། །མ་རིག་སེལ་བ་ཤེས་རབ་གོ་ཆ་དང༌། །ཐེག་ཆེན་སེམས་ལྡན་བཟོད་པའི་གོ་ཆ་དང༌། །དགེ་བ་མངོན་སྒྲུབ་ཐབས་མཁས་གོ་ཆ་དང༌། །རྒྱལ་སྲས་རྣམས་ཀྱི་ས་མཁན་སྤྱོད་པའི་གྲོགས། །མཚོན་དྲུག་འཆང་བའི་རྣམ་གྲངས་བསྟན་པ་ནི། །གཉིས་འཛིན་གཅོད་པ་མཉམ་ཉིད་མཚོན་དང་ནི། །ཉོན་མོངས་གཅོད་པ་ཤེས་རབ་ཡེ་ཤེས་མཚོན། །ལོག་འཚོ་གཅོད་པ་ཡང་དག་འཚོ་མཚོན་དང༌། །འཆལ་བ་རྒྱུན་གཅོད་ཚུལ་ཁྲིམས་རྣམ་དག་མཚོན། །སེར་སྣའི་གཟེབ་གཅོད་གཏོང་བའི་མཚོན་དང་ནི། །སེམས་ཅན་སྨིན་བྱེད་ཡོངས་སུ་མི་སྐྱོའི་མཚོན། །དེ་དག་དང་ལྡན་སྲིད་པའི་འཁྲི་ཤིང་གཅོད། །ཕུལ་དུ་བྱུང་བའི་གདམས་ངག་རྣམ་དྲུག་ནི། །འགྲོ་ཀུན་ཡེ་ནས་སངས་རྒྱས་ཤེས་མོད་ཀྱང༌། །སེམས་ཅན་བསྒྲལ་ཕྱིར་ཚོགས་གཉིས་རྒྱ་ཆེར་བསྒྲུབ། །སངས་རྒྱས་ཞིང་རྣམས་མཁའ་འདྲར་ཤེས་ན་ཡང༌། །ཞིང་ཁམས་སྦྱངས་ལ་བརྩོན་འགྲུས་དཔེ་མེད་རྩོམ། །སེམས་ཅན་སྨིན་ལ་རབ་ཏུ་མི་སྐྱོ་ཞིང༌། །བདག་མེད་དོན་གྱི་མཚན་ཉིད་མ་སྤངས་ཤིག །མངོན་པར་ཤེས་པས་རྣམ་པར་འཕྲུལ་བྱ་ཞིང༌། །ཆོས་དབྱིངས་ངང་ལས་གཡོ་བ་མེད་པར་བྱ། །བྱང་ཆུབ་མཆོག་ཏུ་སེམས་བསྐྱེད་མི་གཏོང་ཞིང༌། །ཐམས་ཅད་མཁྱེན་པའི་ཡེ་ཤེས་འབྱུང་བར་གྱིས། །ཆོས་ཀྱི་འཁོར་ལོས་ཐམས་ཅད་ཚིམ་བྱེད་ཅིང༌། །ཆོས་ཉིད་ངང་ལས་ཡོངས་སུ་འདའ་མི་བྱ། །དེ་དང་ལྡན་རྣམས་བདེ་གཤེགས་གོ་འཕང་ཐོབ། །བདུད་ཀྱི་ལས་དྲུག་ཤེས་ནས་སྤང་བ་ནི། །གཞན་དོན་སེམས་ཞུམ་བསམ་པ་འཁྲུགས་པ་དང༌། །དོན་རྒྱ་ཆུང་ངུས་མགུ་ཞིང་གཅིག་ལས་མི་བཟོད་དང༌། །ཆོས་ལ་ཐེ་ཚོམ་ཟ་ཞིང་དམ་པའི་ཆོས་སྤོང་དང༌། །སེམས་ཅན་སྨིན་པར་མི་བྱེད་གཅིག་པུ་ཐར་འདོད་དང༌། །རང་ཉིད་འཁོར་བས་སྐྲག་ནས་སྤྱོད་པ་རླབས་ཆེན་འདོར། །སྨོན་ལམ་ལྷག་པར་མི་དམིགས་ཉོན་མོངས་ཞི་བར་འདོད། །འདི་དག་བདུད་ཀྱི་ལས་ཏེ་རིང་དུ་སྤང༌། །གོང་མས་བྱིན་གྱིས་བརླབས་པའི་རྟགས་དྲུག་ནི། །བླ་མེད་རྫོགས་པའི་བྱང་ཆུབ་སེམས་མཆོག་སྐྱེ། །བདུད་ཀྱི་ལས་རྣམས་ཤེས་ནས་རྣམ་པར་བཟློག །ཐེག་ཆེན་ཆོས་ཐོས་དེ་ལ་ནན་ཏན་བྱེད། །འཁོར་བར་གཞན་དོན་སྒྲུབ་ལ་སྐྱོ་བ་མེད། །ཉན་རང་ཆོས་སྟོན་དེ་ལ་མཆོག་འཛིན་མེད། །དགོངས་པ་རྟོགས་ཀྱང་སྤྱོད་པ་སྒྲུབ་ལ་བརྩོན། །རྒྱལ་སྲས་ཆོས་མཆོག་ཞུགས་རྣམས་མཛད་སྤྱོད་ཡིན། །ཆོས་སྟོན་འདོད་པ་དག་གི་བདུད་དྲུག་ནི། །མགོན་པོར་མེད་ལ་དམ་ཆོས་མི་སྟེར་བདུད། །སྣོད་ལྡན་སློབ་མ་ཁྱད་དུ་གསོད་པ་བདུད། །ཟང་ཟིང་ཆེད་དུ་དམ་ཆོས་སྟོན་པ་བདུད། །སྣོད་མིན་རྣམས་ལ་ཟབ་མོ་སྟོན་པ་བདུད། །ཐེག་མཆོག་མོས་པ་ཐེག་དམན་སྟོན་པ་བདུད། །གང་མོས་མི་སྟོན་ཕྱོགས་འབྱམས་སྟོན་པ་བདུད། །འདི་དག་རྣམས་ཀྱིས་མ་བསླུས་ཤིན་ཏུ་གཅེས། །སློབ་མས་ལོག་པའི་བདུད་དྲུག་སྤང་བ་ནི། །བཤེས་གཉེན་བོར་ནས་སྡིག་པའི་གྲོགས་པོ་བསྟེན། །ལམ་སྟོན་མགོན་བྲལ་བདུད་ཀྱིས་ཟིན་པ་ཡིན། །ཐེག་ཆེན་བོར་ནས་ཐེག་དམན་ཉན་པ་ནི། །གོལ་ས་ལམ་ལོག་བདུད་ཀྱིས་ཟིན་པ་ཡིན། །ཐར་ལམ་བོར་ནས་འཇིག་རྟེན་ཤེས་བྱ་འཚོལ། །བྱ་བྱེད་སྤྱོད་ལོག་བདུད་ཀྱིས་ཟིན་པ་ཡིན། །སྐྱེ་བར་མི་དགའ་མྱ་ངན་འདའ་དོན་གཉེར། །སེམས་བསྐྱེད་གོ་ཆའི་བདུད་ཀྱིས་ཟིན་པ་ཡིན། །རང་གིས་མ་ཐོས་དམ་པའི་ཆོས་ལ་སྨོད། །བླང་དོར་འཁྲུལ་བའི་བདུད་ཀྱིས་ཟིན་པ་ཡིན། །དགེ་སྡིག་སྤང་བླང་ཆོས་མིན་མི་ཤེས་པ། །མ་རིག་མུན་འཐིབས་བདུད་ཀྱིས་ཟིན་པ་ཡིན། །སྣོད་ལྡན་རྣམས་ཀྱིས་དེ་དྲུག་སྤང་བ་གཅེས། །བདུད་ཀྱི་ལས་ཀྱིས་མི་ཚུགས་ཆོས་དྲུག་ནི། །ང་རྒྱལ་སྤངས་ནས་བཤེས་གཉེན་བསྙེན་བཀུར་བྱེད། །ཁོང་ཁྲོ་སྤངས་ནས་གཞན་གྱི་བསྔགས་པ་བརྗོད། །སྙོམ་ལས་སྤངས་ནས་ཟབ་མོའི་དོན་ལ་བརྩོན། །ཕྱོགས་འཛིན་སྤངས་ནས་སངས་རྒྱས་ཆོས་ཀུན་འཚོལ། །ཕྱོགས་རིས་སྤངས་ནས་ཟུང་འཇུག་ལམ་དུ་ཞུགས། །བྱ་བྱེད་སྤངས་ནས་སྒྲུབ་པ་སྙིང་པོར་བྱེད། །དེ་དང་སུ་ལྡན་བདུད་དཔུང་འཇོམས་པར་ནུས། །ཐེག་ཆེན་བསླབ་པ་འཆོར་བའི་ཆོས་དྲུག་ནི། །དཀོན་མཆོག་སྤོང་ཞིང་མཆོད་འོས་བསླུ་བ་དང༌། །ལྷག་པའི་བསམ་སྤངས་གཡོ་སྒྱུས་སྤྱོད་པ་དང༌། །རྒྱལ་སྲས་རྣམས་ལ་ཚིག་ངན་སྨྲ་བ་དང༌། །གཞན་དགེ་བྱེད་ལ་འགྱོད་པ་བྱེད་པ་དང༌། །ཐེག་མཆོག་ཞུགས་ལ་ཁོང་ཁྲོ་ཕྲག་དོག་བྱེད། །ཐབས་ཤེས་ཡ་བྲལ་ལམ་ལ་ཞུགས་པ་སྟེ། །འདི་དྲུག་སྤངས་ལ་རྟག་ཏུ་ནན་ཏན་བྱ། །གཞན་དོན་སྤྱོད་ཚེ་ཕྲག་དོག་གཤེ་སྐུར་འབྱུང༌། །དེ་ལ་སྐྱོ་བ་ལོག་པའི་ཆོས་དྲུག་ནི། །རང་གིས་གཞན་ལ་སྨད་པའི་རྣམ་སྨིན་དང༌། །ཉོན་མོངས་ལས་ངན་འཛད་པའི་ཐབས་ཆེན་དང༌། །ཉེས་ཀུན་མཚང་ནས་འབྱིན་པའི་ཁ་ཏ་དང༌། །མཐོ་དམན་མི་བྱེད་ཁྱི་སྒྲ་ཟུག་འདྲ་དང༌། །བཟོད་པའི་ཡུལ་འགྱུར་དགེ་འཕེལ་ལས་ཡོད་དང༌། །ངོས་གཟུང་རྗེས་མེད་སྟོང་པའི་ཆོ་འཕྲུལ་བསྟེན། །འདི་དག་བསམས་ལ་ཁོང་ཁྲོའི་ཟུག་རྔུ་དང༌། །མི་དགའ་སྐྱོ་བ་སྤངས་ལ་གཞན་དོན་བྱ། །འཁོར་གྱི་ལོག་སྒྲུབ་བཟོད་པའི་ཆོས་དྲུག་ནི། །སླར་ཡང་ལྷག་པའི་སྙིང་རྗེས་གཟུང་བ་དང༌། །འཁོར་གཞན་རྣམས་ལ་རེ་བ་བསྐྱུངས་པ་དང༌། །སྔ་ཕྱིར་བྱུང་བའི་རྣམ་གྲངས་བསམ་པ་དང༌། །རང་གི་ལས་དང་རྐྱེན་ལ་བསམ་པ་དང༌། །སུ་དང་འགྲོགས་ཀྱང་ཚུལ་དེ་དཔག་པ་དང༌། །ཐམས་ཅད་རྨི་ལམ་སྒྱུ་མར་བསམ་པ་སྟེ། །འཁོར་ངན་སྐྱོ་ལ་གཉེན་པོ་དེ་དྲུག་བསྟེན། །རྟག་ཏུ་གདབ་པའི་སྨོན་ལམ་རྣམ་དྲུག་ནི། །གང་དུ་སྐྱེས་པའི་སྐྱེ་བ་ཐམས་ཅད་དུ། །མཐོ་རིས་ཡོན་ཏན་བདུན་ལྡན་ཐོབ་པར་ཤོག །སྐྱེས་མ་ཐག་ཏུ་ཆོས་དང་ཕྲད་གྱུར་ཅིང༌། །ཚུལ་བཞིན་བསྒྲུབ་པའི་རང་དབང་ཡོད་པར་ཤོག །དེར་ཡང་བླ་མ་དམ་པ་མཉེས་བྱེད་ཅིང༌། །ཉིན་དང་མཚན་དུ་ཆོས་ལ་སྤྱོད་པར་ཤོག །ཆོས་རྟོགས་ནས་ནི་སྙིང་པོའི་དོན་བསྒྲུབས་ཏེ། །ཚེ་དེས་སྲིད་པའི་རྒྱ་མཚོ་རྒལ་བར་ཤོག །སྲིད་པར་དམ་པའི་ཆོས་རབ་སྟོན་བྱེད་ཅིང༌། །གཞན་ཕན་སྒྲུབ་ལ་སྐྱོ་ངལ་མེད་པར་ཤོག །རླབས་ཆེན་གཞན་དོན་ཕྱོགས་རིས་མེད་པ་ཡིས། །ཐམས་ཅད་ཕྱམ་གཅིག་སངས་རྒྱས་འགྲུབ་པར་ཤོག །སྨོན་ལམ་རྒྱལ་པོ་འདི་དག་རྟག་ཏུ་གདབ། །བསོད་ནམས་ཕན་ཡོན་ཚད་མེད་ནམ་མཁའ་བཞིན། །ཆོས་མཛོད་འཛིན་པའི་གདམས་པ་རྣམ་དྲུག་ནི། །གཡོ་སྒྱུ་མེད་པས་དམ་ཆོས་ཚོལ་བ་དང༌། །ཆོས་ལ་ནན་ཏན་གུས་པས་བསྒྲུབ་པ་དང༌། །གཞན་ལ་བསྟོད་ཅིང་ཡོན་ཏན་བསྔགས་པ་བརྗོད། །ཆོས་སྨྲ་རྣམས་ལ་སྟོན་པའི་འདུ་ཤེས་བསྐྱེད། །བཀུར་སྟི་རིམ་གྲོ་སྲི་ཞུས་རྟག་བསྟེན་ཅིང༌། །སྐྱོ་ངལ་མེད་པས་ཆོས་མཛོད་འཛིན་པ་སྟེ། །རྒྱལ་སྲས་རྣམས་ཀྱི་སྤྱོད་པ་རྨད་བྱུང་ཡིན། །ཚད་མེད་དྲུག་གིས་འགྲོ་བ་དྲང་བ་ནི། །སྡུག་བསྔལ་བྲལ་འདོད་སྙིང་རྗེ་ལག་ཏུ་བླང༌། །བདེ་ལ་འགོད་འདོད་བྱམས་པ་ལག་ཏུ་བླང༌། །བདེ་ཐོབ་མི་འབྲལ་དགའ་བ་ལག་ཏུ་བླང༌། །ཉེ་རིང་མེད་པའི་བཏང་སྙོམས་ལག་ཏུ་བླང༌། །འཇུག་པའི་ཆོས་ལ་དམིགས་པ་ལག་ཏུ་བླང༌། །འཁོར་གསུམ་མི་རྟོག་དམིགས་མེད་ལག་ཏུ་བླང༌། །སེམས་བསྐྱེད་སྤེལ་བའི་དོན་ལ་བསླབ་པ་གཅེས། །སངས་རྒྱས་ཆོས་དྲུག་ལེགས་པར་བསྒྲུབ་པ་ནི། །སེམས་ཅན་ཀུན་ལ་བརྩེ་བའི་མིག་གིས་བལྟ། །བྱ་དང་མི་བྱའི་འདུ་བྱེད་ཇི་བཞིན་ཤེས། །བྱང་ཆུབ་ཆེན་པོའི་ཡེ་ཤེས་ཇི་ལྟར་རྟོགས། །སེམས་ཅན་དོན་དུ་འཁོར་བ་མི་སྤོང་ཞིང༌། །རང་བཞིན་མི་རྟོག་འཁོར་བས་གོས་པ་མེད། །སངས་རྒྱས་འདོད་ན་བརྩོན་པས་བསྒྲུབ་པ་སྟེ། །རྒྱལ་སྲས་རྣམས་ཀྱི་ཕུན་ཚོགས་སྤྱོད་པ་ཡིན། །བར་ཆད་དྲུག་གི་རང་བཞིན་སྤང་བ་ནི། །ཐོས་ཉུང་གྲོང་ལ་སོགས་པར་འཇུག་པ་སྤང༌། །སྲུང་སྡོམ་མི་ལྡན་གཞན་གྱི་བཀུར་སྟི་སྤང༌། །དབང་པོ་མ་བསྡམས་བུད་མེད་ལྟ་བ་སྤང༌། །མཉམ་པར་མ་བཞག་དབང་པོའི་འཇུག་པ་སྤང༌། །ལུས་སེམས་རྩུབ་པས་མི་མཐུན་གནས་པ་སྤོང༌། །འཚོ་བ་མ་དག་ཚུལ་འཆོས་བཅོས་མ་སྤང༌། །དེ་དག་མ་སྤངས་བདུད་ཀྱིས་བསླུས་པར་འགྱུར། །ངན་པའི་གྲོགས་དྲུག་སྤང་བར་གདམས་པ་ནི། །འཇིག་རྟེན་རྒྱང་ཕན་མུ་སྟེགས་ཅན་མི་འགྲོགས། །སོ་སོ་སྐྱེ་བོ་འདི་དོན་གཉེར་མི་འགྲོགས། །བརྩེ་མེད་རང་དོན་ཉན་ཐོས་རྣམས་མི་འགྲོགས། །གཞན་ཕན་བློ་བྲལ་རང་རྒྱལ་འདོད་མི་འགྲོགས། །ཟང་ཟིང་རྙེད་སྡུད་གཡེང་བར་གྱུར་མི་འགྲོགས། །རྙེད་བཀུར་གྲགས་འདོད་འཁོར་མང་བསྟེན་མི་འགྲོགས། །ངན་པ་འགྲོགས་ན་དེ་བས་ཆེས་ངན་འགྱུར། །གཅེས་པའི་ཡོན་ཏན་རྣམ་དྲུག་བསྟན་པ་ནི། །བདག་མེད་རྟོགས་ལ་སེམས་ཅན་སྙིང་རྗེ་གཅེས། །སྟོང་ཉིད་མོས་ལ་ལས་འབྲས་ཡིད་ཆེས་གཅེས། །ཞི་བར་གནས་ལ་སྲིད་པར་མི་གནས་གཅེས། །སྦྱིན་པ་གཏོང་ལ་རྣམ་སྨིན་མི་རེ་གཅེས། །ཚུལ་ཁྲིམས་སྲུང་ལ་རློམ་སེམས་སྤང་བ་གཅེས། །དགོན་པར་གནས་ལ་ཡོ་བྱད་སྐྱུང་བ་གཅེས། །འདི་དྲུག་ལྡན་ན་དམ་ཆོས་ཚུལ་བཞིན་འགྲུབ། །དམ་ཆོས་བསྟེན་པའི་དགོས་པ་རྣམ་དྲུག་ནི། །རང་གཞན་ཀུན་གྱི་ཤེས་རབ་སྦྱང་བ་དང༌། །འཁོར་དུ་འདུས་པའི་ཐེ་ཚོམ་བཅད་པ་དང༌། །བསྟན་པ་སྐྱོང་ཞིང་དམ་ཆོས་འཛིན་པ་དང༌། །བླང་དོར་དམིགས་ཤེས་ལོག་པའི་ལམ་ལྡོག་དང༌། །མཐོ་དམན་ཁྱད་ཤེས་ཟབ་མོའི་ལམ་འཇུག་དང༌། །གྲུབ་པའི་མཐའ་ཤེས་གོལ་སྒྲིབ་ཆོད་པ་སྟེ། །ཆོས་སྨྲ་རྣམས་ཀྱིས་བརྩོན་པའི་དགོས་པ་ཡིན། །སངས་རྒྱས་རྣམས་དང་ཕྲད་པའི་ཆོས་དྲུག་ནི། །བསླབ་གསུམ་ཚུལ་ཁྲིམས་རྣམ་དག་བསྲུང་བ་དེ། །རྩེ་གཅིག་ཏིང་འཛིན་རྒྱལ་བའི་སྐུར་བསྒོམ་དང༌། །མོས་གུས་མཆོད་བསྟོད་བཟླས་པ་རྟག་བརྩོན་དང༌། །བྱ་བྱེད་གཡེང་བོར་སེམས་ཉིད་བལྟ་བ་དང༌། །ཉོན་མོངས་མེད་ཀྱང་སྲིད་ན་སྐྱེ་བ་ལེན། །གཡེལ་མེད་བརྩོན་པར་དགེ་བའི་ཕྱོགས་ལ་འབད། །ལྷག་བསམ་རྣམ་དག་བཟང་པོའི་སྨོན་ལམ་འདེབས། །འདི་དྲུག་བརྩོན་ན་རྒྱལ་བས་རྗེས་སུ་འཛིན། །སྲོག་ལ་བབས་ཀྱང་མི་གཏོང་རྣམ་དྲུག་ནི། །གཞན་དོན་རྫོགས་པའི་བྱང་ཆུབ་སེམས་མི་གཏོང༌། །ཐུབ་པའི་བསྟན་པ་དམ་པའི་ཆོས་མི་གཏོང༌། །འཁོར་བར་འཁྱམས་པའི་སེམས་ཅན་བློས་མི་གཏོང༌། །སྒྲིབ་སྦྱོང་སྙིང་པོ་དགེ་བའི་རྩ་མི་གཏོང༌། །ལམ་འདྲེན་བླ་མ་ཡི་དམ་ལྷ་མི་གཏོང༌། །འཕགས་ལམ་ས་སྦྱོང་མཐོན་པོའི་ལམ་མི་གཏོང༌། །གཉེན་པོ་སྟོབས་སུ་གྱུར་པའི་ཆོས་དྲུག་ནི། །ཇི་ལྟར་ཕོངས་ཀྱང་དགེ་སྦྱོར་མི་འདོར་དང༌། །ཇི་ལྟར་བཟང་ཡང་ངན་པ་མི་བརྙས་དང༌། །སྐུལ་མཁན་མེད་ཀྱང་གཞན་གྱི་ཐར་ལམ་འདྲེན། །ཕན་པ་བཏགས་ཀྱང་ལན་ལ་རེ་བ་མེད། །གནོད་པ་བསྐྱལ་ཡང་གནོད་ལན་ཁོང་ཁྲོ་མེད། །དྲན་དང་ཤེས་བཞིན་གཉེན་པོ་སྤྱོད་པའོ། །བྱང་ཆུབ་ཆོས་འགྲུབ་ཐབས་མཁས་རྣམ་དྲུག་ནི། །སེམས་ཅན་ཀུན་ལ་བྱམས་དང་སྙིང་རྗེ་ལྟ། །འདུ་བྱེད་ཐམས་ཅད་ཇི་ལྟར་ཤེས་པ་དང༌། །ཉོན་མོངས་མེད་ཀྱང་སྲིད་ན་སྐྱེ་བ་ལེན། །དེ་ཡང་འགྲོ་ལ་ཕན་པ་མི་འདོར་དང། །སངས་རྒྱས་ཡེ་ཤེས་འདོད་ལ་རབ་ཏུ་བརྩོན། །ཐམས་ཅད་དམིགས་མེད་མཁའ་ལྟར་ཤེས་པ་དང༌། །བྱང་ཆུབ་བསྔོ་བ་ཐབས་མཁས་སྤྱོད་པ་ཡིན། །ཐབས་ཆེན་དྲུག་གི་རིམ་པ་བསྟན་པ་ནི། །དགེ་བ་ཆུང་ངུ་ཆེན་པོར་བསྒྱུར་བའི་ཐབས། །ཅུང་ཟད་བསྔོ་དང་རྗེས་སུ་ཡི་རང་བྱེད། །ཚེགས་ཆུང་བསོད་ནམས་ཆེན་པོ་བསྒྲུབ་པའི་ཐབས། །འཕགས་པའི་གཉེན་གནས་གཞན་དག་ལམ་དུ་འཇུག །གཞན་གྱི་ཞེ་འགྲས་ཁོང་ཁྲོ་སེལ་བའི་ཐབས། །སེམས་ཅན་མཐུན་འཇུག་ལས་བཞིས་ཕན་འདོགས་བྱེད། །ཐ་མལ་འགྲོ་བ་བསྟན་ལ་དྲང་བའི་ཐབས། །མཐུན་པའི་གཏམ་སྨྲ་ཟས་གོས་ལོངས་སྤྱོད་སྦྱིན། །ལམ་ཞུགས་སྐྱེ་བོ་སྨིན་པར་བྱེད་པའི་ཐབས། །གང་མོས་བློ་ཁྲིད་ཐེག་ཆེན་བསྔགས་པ་བརྗོད། །སྨིན་པ་དེ་དག་གྲོལ་བར་བྱེད་པའི་ཐབས། །ཟབ་ཅིང་རྒྱ་ཆེན་གནད་འགྲོའི་ཆོས་རབ་བསྟན། །དེ་དག་དང་ལྡན་གཞན་དོན་དཀའ་བ་མེད། །མི་མཐུན་ལམ་དུ་འཇུག་པའི་ཐབས་དྲུག་ནི། །མཐུན་པར་འཇུག་ཐབས་རང་སྤྱོད་ཞི་དུལ་གྱིས། །གཞན་བསྟོད་ཡི་རང་མཐུན་པས་དེ་ནས་འཇུག །བསྒྲག་ཅིང་འགེང་ཐབས་ཚུལ་བཞིན་ཁྱེད་བསྒྲུབས་ན། །མཐུན་རྐྱེན་སྒྲུབ་ཅེས་དམ་པའི་ཆོས་ལ་འཇུག །མི་མཐུན་འཁྲུག་ཐབས་རེ་ཞིག་ཁྲོ་ཚུལ་དང༌། །ཅུང་ཟད་གནོད་བྱ་དམ་པའི་ཆོས་ལ་གཞུག །སྡིག་པའི་ངན་ཐབས་ཕན་སེམས་སྡིགས་མོ་ཡིས། །ཚོམ་རྔམས་བྱ་ཞིང་ཚུལ་བཞིན་ལམ་དུ་གཞུག །ལེན་འདོད་ཐབས་ནི་དྲིན་འོག་བཙུད་ལ་གཞུག །རྣམ་དག་ཐབས་ནི་རྣམ་འཕྲུལ་འགྲོ་དོན་ཏེ། །རྒྱལ་སྲས་རྣམས་ཀྱིས་ཐབས་མཁས་གཞན་ཕན་བྱ། །རྒྱ་ཆེན་དོན་ལ་བསླབ་པའི་ཆོས་དྲུག་ནི། །འཁོར་བ་ཇི་སྲིད་འགྲོ་ལ་ཕན་འདོད་དང༌། །ཞེ་སྡང་འཚེ་མེད་ཀུན་ལ་བྱམས་སེམས་དང༌། །རྨོངས་མེད་ཐབས་ཀྱིས་འགྲོ་བ་བསྒྲལ་འདོད་དང༌། །ཕྲག་དོག་མེད་བློས་མཉམ་ཉིད་བདེ་འགོད་དང༌། །ང་རྒྱལ་རློམ་མེད་གཞན་དོན་འབའ་ཞིག་དང༌། །སེར་སྣའི་འཁྲེས་མེད་དགེ་ཚོགས་བཏང་བློ་དང༌། །ལྡན་པས་ཕན་བདེ་བྱེད་པ་བསླབ་པ་གཅེས། །བདག་འཛིན་རྩད་ནས་གཅོད་པའི་ཆོས་དྲུག་ནི། །རྒྱལ་རྣམས་བདག་གི་མགོན་སྐྱབས་བྱེད་པ་བཞིན། །བདག་གིས་དེ་དག་གྲོགས་སུ་ཅི་འགྲོ་བྱ། །རྒྱལ་སྲས་ཚོགས་རྣམས་མགོན་སྐྱབས་བྱེད་པ་བཞིན། །བདག་གིས་དེ་དག་གྲོགས་སུ་གཞན་ཕན་སྒྲུབ། །དམ་ཅན་རྣམས་ཀྱིས་བདག་གི་གྲོགས་བྱེད་བཞིན། །བདག་གིས་དེ་དག་དམ་ཚིག་སྟོང་གྲོགས་བྱ། །སངས་རྒྱས་ཆོས་རྣམས་མགོན་སྐྱབས་གྱུར་པ་བཞིན། །བདག་གིས་ཆོས་ཀྱི་གྲོགས་གྱུར་ལེགས་བསྒྲུབ་བྱ། །བརྩེ་བའི་རང་བཞིན་བདག་གི་གྲོགས་གྱུར་བཞིན། །བདག་གིས་དེ་དག་གྲོགས་གྱུར་དགེ་ལ་འབད། །དམ་པའི་བླ་མ་བདག་གི་མགོན་གྱུར་བཞིན། །བདག་གིས་སེམས་ཅན་མགོན་གྱུར་ཕན་བྱེད་བྱ། །སྙམ་དུ་བསམ་ཞིང་གུས་པས་བསྒྲུབ་པར་བྱ། །རྣམ་དག་དྲུག་གི་རང་བཞིན་བསྟན་པ་ནི། །ཐོས་བསམ་རྣམ་དག་ཕྱོགས་མེད་དགོངས་པ་རྟོགས། །ལྟ་བ་རྣམ་དག་ཟུང་འཇུག་དོན་ལ་མཁས། །སྒོམ་པ་རྣམ་དག་གཉིས་འཛིན་རང་སར་སངས། །སྤྱོད་པ་རྣམ་དག་རང་རྒྱུད་དྲི་མ་མེད། །ཉམས་རྟོགས་རྣམ་དག་འགག་མེད་རྩལ་དུ་འབྱོངས། །དངོས་གྲུབ་རྣམ་དག་ཆོས་ཉིད་ཀློང་དུ་གྱུར། །དེ་ལྟར་ལྡན་ན་ཐེག་ཆེན་དོན་ལ་མཁས། །བདག་ལས་གཞན་གཅེས་བསྒྲུབ་པའི་ཆོས་དྲུག་ནི། །བདག་གཞན་བླང་དོར་མཐོང་ཚོར་འདི་ལྟར་བྱ། །བདག་གི་སྡུག་བསྔལ་ཁྱད་དུ་བསད་བྱས་ལ། །གཞན་གྱི་སྡུག་བསྔལ་ཞི་ལ་བརྩོན་པ་བསྐྱེད། །བདག་གི་བདེ་བ་ཁྱད་དུ་བསད་བྱས་ལ། །གཞན་གྱི་བདེ་བ་བསྒྲུབ་ལ་བརྩོན་པ་བསྐྱེད། །བདག་གི་དུག་ལྔ་རྣམ་རྟོག་ཁྱད་བསད་ལ། །གཞན་གྱི་ཉོན་མོངས་འཇོམས་ཕྱིར་བརྩོན་པ་བསྐྱེད། །བདག་གི་ཡེ་ཤེས་སྐྱེ་བ་ཁྱད་བསད་ལ། །གཞན་གྱི་ཡེ་ཤེས་བསྐྱེད་ལ་བརྩོན་པ་བསྐྱེད། །བདག་གི་སྒྲིབ་གཉིས་སྦྱོང་བ་ཁྱད་བསད་ལ། །གཞན་གྱི་སྒྲིབ་གཉིས་སྦྱོང་ཕྱིར་བརྩོན་པ་བསྐྱེད། །བདག་གི་ཚོགས་གཉིས་བསག་པ་ཁྱད་བསད་ལ། །གཞན་གྱི་ཚོགས་གཉིས་བསག་ཕྱིར་བརྩོན་པ་བསྐྱེད། །དེ་ལྟར་སུ་བྱེད་མྱུར་དུ་རང་དོན་འགྲུབ། །དགོངས་པ་དཔག་པར་དཀའ་བའི་ཆོས་དྲུག་ནི། །རྒྱལ་སྲས་ཀུན་གྱི་སྤྱོད་པ་མ་ལུས་པ། །གཅིག་ཏུ་བསྡོམས་པ་བདག་གིས་སྤྱད་སྙམ་དང༌། །བདག་གིས་བྱང་ཆུབ་ཐོབ་ཚེ་བདེ་གཤེགས་རྣམས། །ཀུན་མཉམ་འཕྲིན་ལས་བདག་གིས་བསྒྲུབ་སྙམ་དང༌། །སེམས་ཅན་རེ་རེའི་ཕྱིར་ཡང་བདག་གིས་ནི། །བསྐལ་པ་གྲངས་མེད་སྡུག་བསྔལ་བཟོད་སྙམ་དང༌། །རྒྱལ་སྲས་རྣམས་ཀྱིས་སྤྱད་པར་མ་ནུས་པའི། །སེམས་ཅན་དོན་རབ་དཀའ་བ་སྤྱད་སྙམ་དང༌། །དཔག་ཏུ་མེད་པའི་ཞིང་ཁམས་རེ་རེར་ཡང༌། །སངས་རྒྱས་མཛད་པ་བསམ་ཡས་བསྒྲུབ་སྙམ་དང༌། །དེ་དག་བདག་གིས་རྫོགས་པར་མ་བྱས་ན། །རྒྱལ་བ་སྲས་བཅས་བསླུས་པར་འགྱུར་སྙམ་པའི། །གོ་ཆ་ཆེན་པོ་དྲུག་ནི་རྟག་ཏུ་བགོ །བདུད་ཀྱིས་མི་ཐུབ་གོ་ཆ་རྣམ་དྲུག་ནི། །ཉ་པ་ཤན་པ་ཞིང་པ་དམག་མི་དང༌། །ཚོང་པ་བྲན་ཁོལ་འཚོ་བ་ཙམ་གྱི་ཕྱིར། །ཚ་གྲང་བཀྲེས་སྐོམ་གཅེས་པའི་སྲོག་དོར་ནས། །སྙོམ་ལས་མེད་པར་རྟག་ཏུ་སྒྲུབ་བྱེད་ན། །དཔེ་དྲུག་མཐོང་ནས་ཚད་མེད་འགྲོ་བའི་ཕྱིར། །རྙེད་དཀའི་བྱང་ཆུབ་སྒྲུབ་ལ་ནན་ཏན་བསྐྱེད། །བདུད་དྲུག་སྤང་བར་གདམས་པའི་ཆོས་དྲུག་ནི། །ཐར་ལམ་སེམས་བསྐྱེད་གཞན་དོན་སྒོམ་སྒྲུབ་བོར། །རང་དོན་སྙན་གྲགས་བསྒྲུབས་ན་ཁེ་གྲགས་བདུད། །རང་རྒྱུད་ཐ་མལ་གནས་ལས་མ་འཕགས་པར། །འཕགས་པའི་སྤངས་རྟོགས་ཚིག་རྩོད་དྲེད་པོའི་བདུད། །རྩེ་གཅིག་བསམ་གཏན་ཕྱི་དུས་རབ་བཞག་ནས། །འབྲས་བུ་ཡིད་སྨོན་རེ་བ་ལེ་ལོའི་བདུད། །རི་ངོགས་དབེན་པ་བསྟེན་པ་རབ་སྤངས་ནས། །ཁེ་སྤོགས་སོ་ནམ་འབུན་སྐྱེད་འདོད་པའི་བདུད། །ལུང་རིགས་མན་ངག་ཐོས་བསམ་རབ་སྤངས་ནས། །བླུན་སྒོམ་ཡིད་དཔྱོད་སྤོམ་ཡོར་རྨོངས་པའི་བདུད། །རང་སྐྱོན་ཁོང་དུ་སྦས་ནས་གཞན་གྱི་སྐྱོན། །མེད་ཀྱང་སྒྲོ་འདོགས་གཤེ་བ་ཕྲག་དོག་བདུད། །རང་རྒྱུད་བདུད་ཀྱིས་མ་ཟིན་ཤིན་ཏུ་གཅེས། །མི་བསྐྱོད་སྐྱོན་ལས་ཐར་བའི་ཆོས་དྲུག་ནི། །ཉན་རང་སེམས་ཀྱིས་མི་བསྐྱོད་རི་རྒྱལ་འདྲ། །ཉོན་མོངས་རྣམ་རྟོག་མི་བསྐྱོད་ནམ་མཁའ་འདྲ། །རྙེད་བཀུར་འཆིང་བས་མི་བསྐྱོད་འཕགས་པ་འདྲ། །ན་ཚ་སྡུག་བསྔལ་མི་བསྐྱོད་ས་གཞི་འདྲ། །བཀྲེས་སྐོམ་ཚ་གྲང་མི་བསྐྱོད་རྒྱ་མཚོ་འདྲ། །གདོན་བགེགས་འཚེ་བས་མི་བསྐྱོད་མེ་དཔུང་འདྲ། །དེ་དང་སུ་ལྡན་ཐེག་མཆོག་དོན་ལ་གནས། །ཤིན་ཏུ་གཅེས་པའི་ཆོས་དྲུག་བསྟན་པ་ནི། །རང་བདེ་གཞན་བདེ་བྱེད་པ་ཤིན་ཏུ་གཅེས། །གོང་མས་དམན་པའི་དོན་བྱེད་ཤིན་ཏུ་གཅེས། །བདེ་ལེགས་སེམས་ཅན་དྲིན་ཤེས་ཤིན་ཏུ་གཅེས། །གནོད་ལན་ཕན་བདེ་བྱེད་པ་ཤིན་ཏུ་གཅེས། །རྒྱལ་བ་མཆོད་པས་སེམས་ཅན་དོན་བྱེད་གཅེས། །རང་བདེ་བོར་ནས་གཞན་སྡུག་བསལ་བ་གཅེས། །འདི་དག་ཐེག་ཆེན་གཞུང་སྲོལ་ཆེན་པོ་ཡིན། །བཀའ་དྲིན་ཆེ་བའི་གདམས་པ་རྣམ་དྲུག་ནི། །འཚེ་བས་ཉེན་ནས་ཆོས་དང་ཕྲད་པ་སྟེ། །ཐར་ལམ་རྙེད་པས་གནོད་བྱེད་བཀའ་དྲིན་ཆེ། །སྡུག་བསྔལ་ཡིད་དབྱུང་ཆོས་དང་ཕྲད་པ་དེ། །གཏན་བདེ་རྙེད་པས་སྡུག་བསྔལ་བཀའ་དྲིན་ཆེ། །མི་མིན་གནོད་པས་ཆོས་དང་འཕྲད་པ་དེ། །འཇིགས་མེད་རྙེད་པས་འདྲེ་གདོན་བཀའ་དྲིན་ཆེ། །མི་སོགས་སྡང་བས་ཆོས་དང་འཕྲད་པ་དེ། །ཕན་བདེ་རྙེད་པས་སྡང་བྱེད་བཀའ་དྲིན་ཆེ། །རྐྱེན་ངན་དྲག་པོས་ཆོས་དང་འཕྲད་པ་དེ། །འགྱུར་མེད་ལམ་རྙེད་རྐྱེན་ངན་བཀའ་དྲིན་ཆེ། །གཞན་གྱིས་བསྐུལ་བས་ཆོས་དང་འཕྲད་པ་དེ། །སྙིང་པོའི་དོན་རྙེད་སྐུལ་མཁན་བཀའ་དྲིན་ཆེ། །མཉམ་དུ་དྲིནགཟོ་དགེ་བ་དེ་ལ་བསྔོ། །འཚེ་བ་ལམ་སློང་གཏན་ཚིགས་རྣམ་དྲུག་ནི། །གནོད་པའི་སྐྱབས་གནས་བླ་མ་ཕྲད་ཕྱིར་དང༌། །སྡུག་བསྔལ་སྐྲག་ནས་ཆོས་ལ་འཇུག་ཕྱིར་དང༌། །ཚད་མེད་གཅིག་སྐྱེས་སེམས་བསྐྱེད་འཕེལ་ཕྱིར་དང། །སེམས་ཅན་དོན་སྦྱངས་བསག་སྦྱོང་བརྩོན་ཕྱིར་དང༌། །རང་ངོ་བལྟས་པས་རྟོགས་པ་བསྐྱེད་ཕྱིར་དང༌། །ས་ལམ་ཡོན་ཏན་གོང་དུ་འཕེལ་ཕྱིར་དང༌། །དགེ་ལ་བསྐུལ་ཕྱིར་གནོད་འཚེ་དང་དུ་བླང༌། །གཞན་དོན་བསྒྲུབས་པའི་ཕན་ཡོན་རྣམ་དྲུག་ནི། །འཇིགས་ཀུན་བསྐྱབ་པའི་སྐྱེལ་མ་བྱེད་པ་དང༌། །གདོན་བགེགས་རྣམས་ཀྱི་སྲུང་བ་བྱེད་པ་དང༌། །འདུ་བའི་ནད་སེལ་སྨན་པ་བྱེད་པ་དང༌། །བར་ཆད་བདུད་སེལ་དཔའ་བོ་བྱེད་པ་དང༌། །ལས་དང་ཉོན་མོངས་རྩད་ནས་གཅོད་པ་དང༌། །ཚོགས་གཉིས་རྫོགས་ནས་བྱང་ཆུབ་ཐོབ་པ་སྟེ། །དཔག་མེད་ཕན་ཡོན་ནམ་མཁའི་དབྱིངས་བཞིན་ནོ། །རབ་ཏུ་བསྔགས་པའི་ཕན་ཡོན་རྣམ་དྲུག་ནི། །སྡིག་ཆེན་མ་ལུས་འཇོམས་པར་བྱེད་པ་དང༌། །སངས་རྒྱས་ཅན་གྱིས་བསྔགས་པར་འགྱུར་བ་དང༌། །འཁོར་བ་སྤང་ཞིང་ཕན་བདེ་འགྲུབ་པ་དང། །རྒྱལ་སྲས་ས་ཐོབ་མཆོད་སྡོང་འགྱུར་བ་དང༌། །ཚད་མེད་འགྲོ་བའི་དེད་དཔོན་འགྱུར་བ་དང༌། །གནས་སྐབས་མཐར་ཐུག་དོན་གཉིས་ཕུན་སུམ་ཚོགས། །གནས་ལུགས་གཏན་ལ་དབབ་པའི་ཆོས་དྲུག་ནི། །གནས་ལུགས་འགྱུར་མེད་ནམ་མཁའ་ལྟ་བུ་དང༌། །མི་གཡོ་འགག་མེད་རྒྱ་མཚོ་ལྟ་བུ་དང༌། །རྟོག་མེད་འདོད་འབྱུང་ནོར་བུ་ལྟ་བུ་དང༌། །རྐྱེན་གྱིས་ཐ་དད་ག་བུར་ལྟ་བུ་དང༌། །གསལ་སྟོང་རྙོག་མེད་མེ་ལོང་ལྟ་བུ་དང༌། །ཀུན་ཁྱབ་ཕྱོགས་མེད་ཏིལ་མར་ལྟ་བུ་དང༌། །རྣམ་པ་དྲུག་ཏུ་གཏན་ལ་དབབ་པ་གཅེས། །དང་པོ་ནམ་མཁའ་ལྟ་བུའི་ཆོས་དྲུག་ནི། །ཕྱོགས་ལྷུང་མེད་པས་ནམ་མཁའ་ལྟ་བུ་དང༌། །རྒྱ་ཆད་མེད་པས་ནམ་མཁའ་ལྟ་བུ་དང༌། །ཡངས་དོག་མེད་པས་ནམ་མཁའ་ལྟ་བུ་དང༌། །མཐོ་དམན་མེད་པས་ནམ་མཁའ་ལྟ་བུ་དང༌། །ཁ་དོག་དབྱིབས་མེད་ནམ་མཁའ་ལྟ་བུ་དང༌། །འཁོར་འདས་ཀུན་འབྱུང་ནམ་མཁའ་ལྟ་བུའོ། །གཉིས་པ་རྒྱ་མཚོ་འདྲ་བའི་ཆོས་དྲུག་ནི། །གནས་ལུགས་ཡངས་ཤིང་རྒྱ་ཆེ་རྒྱ་མཚོ་འདྲ། །དངོས་མེད་ཟང་ཐལ་གཏིང་ཟབ་རྒྱ་མཚོ་འདྲ། །བློ་ཡིས་དཔག་དཀའ་ཚད་མེད་རྒྱ་མཚོ་འདྲ། །མཐའ་གཉིས་མི་གཡོ་དྭངས་པ་རྒྱ་མཚོ་འདྲ། །ཀློང་ཡངས་མ་འགག་རང་གསལ་རྒྱ་མཚོ་འདྲ། །རྟོག་པའི་རྦ་རླབས་རང་གྲོལ་རྒྱ་མཚོ་འདྲ། །གསུམ་པ་ནོར་བུ་འདྲ་བའི་ཆོས་དྲུག་ནི། །རྟོག་མེད་དགོས་འདོད་འབྱུང་བས་ནོར་བུ་འདྲ། །བྱུང་ཡང་ཕྱོགས་ལྷུང་མེད་པས་ནོར་བུ་འདྲ། །གནས་ལུགས་རང་བཞིན་དག་པས་ནོར་བུ་འདྲ། །རྩལ་ལས་རྒྱན་དུ་ཤར་བས་ནོར་བུ་འདྲ། །དངས་གསལ་སྤྲོས་པ་མེདཔས་ནོར་བུ་འདྲ། །ཐམས་ཅད་དབྱིངས་གཅིག་རང་བཞིན་ནོར་བུ་འདྲ། །བཞི་པ་ག་བུར་འདྲ་བའི་ཆོས་དྲུག་ནི། །མ་རྟོགས་འཁོར་བ་འབྱུང་བས་ག་བུར་འདྲ། །རིགས་དྲུག་སྡུག་བསྔལ་མྱོང་བས་ག་བུར་འདྲ། །རྟོགས་ནས་སངས་རྒྱས་འབྱུང་བས་ག་བུར་འདྲ། །སྐུ་གསུམ་ཞི་བདེ་འགྲུབ་པས་ག་བུར་འདྲ། །གཞི་ལ་གཉིས་ཀ་མེད་པས་ག་བུར་འདྲ། །རྐྱེན་གྱིས་ཐ་དད་སྣང་བས་ག་བུར་འདྲ། །ལྔ་པ་མེ་ལོང་ལྟ་བུའི་ཆོས་དྲུག་ནི། །གནས་ལུགས་གཞི་ནས་གསལ་བས་མེ་ལོང་འདྲ། །སྒྲིབ་གཡོགས་གཡའ་དང་བྲལ་བས་མེ་ལོང་འདྲ། །རོལ་པ་འགག་མེད་འཆར་བས་མེ་ལོང་འདྲ། །མཚན་ཉིད་གཉིས་སུ་མེད་པས་མེ་ལོང་འདྲ། །རྟོག་མེད་ངང་དྭངས་གནས་པས་མེ་ལོང་འདྲ། །རང་གསལ་ཡེ་ནས་དག་པས་མེ་ལོང་འདྲ། །དྲུག་པ་ཏིལ་མར་འདྲ་བའི་ཆོས་དྲུག་ནི། །སེམས་ཅན་སངས་རྒྱས་ཁྱབ་པས་ཏིལ་མར་འདྲ། །རྒྱུ་འབྲས་སྐྱེ་ཤི་སྣང་བས་ཏིལ་མར་འདྲ། །སེམས་ཉིད་ཡུལ་ལ་སྣང་བས་ཏིལ་མར་འདྲ། །ཡུལ་རྟོག་སེམས་ཉིད་གྲོལ་བས་ཏིལ་མར་འདྲ། །བསྒོམས་ན་ཆོས་སྐུར་འཆར་བས་ཏིལ་མར་འདྲ། །འབྲས་བུ་རྒྱུར་མི་ལྡོག་པས་ཏིལ་མར་འདྲ། །དེ་ལྟར་རྟོགས་ན་གནས་ལུགས་དོན་ལ་མཁས། །གཉིས་སྣང་ཞེན་པ་གཅོད་པའི་ཆོས་དྲུག་ནི། །རྨི་ལམ་དཔེས་མཚོན་སྣང་བ་སེམས་སུ་སྤྲད། །རྨི་ལམ་སད་པས་སྟོང་ལྟར་སྣང་བ་ཡང༌། །རང་བཞིན་གྱིས་སྟོང་མ་རིག་སངས་ཚེ་དག །ཕྱི་རོལ་ཡུལ་གྱི་བདེན་འཛིན་འཇིག་པ་ཡིན། །སྒྱུ་མའི་དཔེས་མཚོན་སྣང་སེམས་ནུས་མཐུར་སྤྲད། །གང་སྣང་གིས་སྟོང་བག་ཆགས་འཁྲུལ་བར་ཤེས། །གཟུགས་བརྙན་དཔེས་མཚོན་སེམས་ཉིད་རང་བཞིན་སྤྲད། །སྣང་བས་སྟོང་སྟེ་གཟུང་འཛིན་བྲལ་བར་ཤེས། །ན་བུན་དཔེས་མཚོན་སེམས་ཀྱི་རོལ་པར་སྤྲད། །ཡུལ་སྣང་རང་ཡལ་སྟོང་པར་རྟོགས་པ་ཡིན། །འཇའ་ཚོན་དཔེས་མཚོན་སེམས་ཀྱི་རྒྱན་དུ་སྤྲད། །མཁའ་ལ་ཐིམ་ལྟར་རང་སྣང་ཡེ་ཤེས་གྲོལ། །མན་ཤེལ་དཔེས་མཚོན་སེམས་ཀྱི་རང་གདངས་སྤྲད། །རང་ངོ་རང་གདངས་གཉིས་མེད་ཡེ་ཤེས་གྲོལ། །ངོ་སྤྲོད་དྲུག་གི་བསྡུ་བའི་ཆོས་དྲུག་ནི། །དོན་གྱི་ཀུན་གཞི་གཉིས་མེད་རིས་བྲལ་དང༌། །དེ་ལ་འཁྲུལ་སྣང་འཁོར་བའི་རང་བཞིན་དང༌། །འཁྲུལ་སྣང་འཁྲུལ་འཛིན་རང་སེམས་ཆོ་འཕྲུལ་དང༌། །དེ་ལས་བཟློག་པ་གཞི་མེད་རྩལ་སྦྱོང་དང༌། །སྣང་སེམས་རང་ལོག་ཡེ་ཤེས་གྲོལ་བ་དང༌། །ཡེ་ཤེས་རང་དྭངས་གདོད་མར་བཙན་ས་ཟིན། །འདི་དྲུག་ཆོས་ཀྱི་སྤྱི་ཆིངས་གལ་པོ་ཆེ། །རྟོགས་པ་ཙམ་གྱིས་རང་བཞིན་འཚེངས་པ་ཡིན། །ཟབ་དོན་མཐར་ཐུག་སྐུ་གསུམ་ངོ་སྤྲོད་ནི། །རྣམ་པ་དྲུག་ལས་དང་པོ་ལྷུན་གྲུབ་ནི། །ཤེལ་གོང་མེ་ལོང་ཉི་ཟེར་རྣམ་པ་དང༌། །ངང་དྭངས་རང་བཞིན་བདག་ཉིད་གསུམ་ཉིད་དོ། །ཆོས་སྐུ་རང་བཞིན་རྣམ་པར་དག་པའི་ངང༌། །ཤེལ་གོང་དྲི་མེད་གདོད་ནས་དག་པ་འདྲ། །ལོངས་སྐུ་འདུག་ཚུལ་འོད་གསལ་རང་བཞིན་ཏེ། །མེ་ལོང་དག་པའི་ནང་ན་གཟུགས་བརྙན་འདྲ། །སྤྲུལ་སྐུ་སྣང་ཚུལ་ཕྱི་ནང་མེད་བདག་ཉིད། །ཉི་ཟླའི་ཟེར་བཞིན་ཕྱོགས་བཅུར་འཕྲོ་བ་ཡིན། །འདི་དག་རང་ལ་ཡེ་ནས་ལྷུན་གྲུབ་པས། །གཞན་ནས་མ་ཚོལ་རང་ཆས་ཤེས་པར་གྱིས། །གཉིས་པ་ནོར་བུ་འགག་མེད་ངོ་སྤྲད་པ། །རང་བཞིན་གྱིས་དག་ངོ་བོ་ཆོས་ཀྱི་སྐུ། །འོད་གསལ་མ་འགག་རང་བཞིན་ལོངས་སྤྱོད་རྫོགས། །ཡེ་ཤེས་མ་འགག་ཐུགས་རྗེ་སྤྲུལ་པའི་སྐུ། །རང་ཆས་ཉིད་དེ་གྱད་ཀྱི་ནོར་བུ་བཞིན། །གསུམ་པ་ཉི་མ་རང་ཤར་ངོ་སྤྲད་པ། །ཉི་མའི་སྙིང་པོ་ཟང་ཐལ་མི་རྟོག་ལྟར། །རིག་པའི་ཡེ་ཤེས་མི་རྟོག་ཆོས་ཀྱི་སྐུ། །སྤྲིན་གྱིས་མ་བསྒྲིབས་རང་གསལ་དག་པ་བཞིན། །སྒོ་ལྔ་ཧར་སངས་གསལ་བ་ལོངས་སྤྱོད་རྫོགས། །ཟེར་རྣམས་ཀུན་ཏུ་འཆར་ཞིང་སྣང་བ་ལྟར། །ཡུལ་དྲུག་འཆར་བ་མ་འགགས་སྤྲུལ་པའི་སྐུ། །ནམ་ལངས་ཉི་ཤར་འདྲ་བའི་རང་རིག་ལ། །སྐུ་གསུམ་རང་ཆས་རང་ངོ་ཤེས་པར་གྱིས། །བཞི་པ་དབྱིངས་ཤར་ཉི་མས་ངོ་སྤྲད་པ། །མཁའ་ལྟར་རྣམ་དག་ཆོས་ཉིད་ཆོས་སྐུ་ལ། །ཉི་ལྟར་རང་བྱུང་འོད་གསལ་ལོངས་སྤྱོད་རྫོགས། །རང་བཞིན་གཉིས་མེད་རིག་སྟོང་སྤྲུལ་པའི་སྐུ། །རང་ལ་ཡོད་པ་རང་ངོ་ཤེས་པར་གྱིས། །ལྔ་པ་དཔེ་དོན་རྟགས་གསུམ་ངོ་སྤྲད་པ། །དཔེ་ནི་མཁའ་ལྟར་རྣམ་དག་ཆོས་ཀྱི་སྐུ། །རྒྱ་ཆད་ཕྱོགས་ལྷུང་ཀུན་ལས་འདས་པ་ཡིན། །དོན་ནི་འོད་གསལ་རང་དག་ལོངས་སྤྱོད་རྫོགས། །ཡེ་ནས་ལྷུན་གྲུབ་འདུས་མ་བྱས་པ་ཡིན། །རྟགས་ནི་རང་འོད་ངོས་སྣང་སྤྲུལ་པའི་སྐུ། །སྒྲོན་མ་རང་གསལ་ཡིད་ཆེས་བསྐྱེད་པ་ཡིན། །དྲུག་པ་དབྱིངས་རིག་མཐར་ཐུག་སྤྲད་པ་ནི། །མཁའ་ལྟར་ཆོས་དབྱིངས་ཀ་དག་ཆོས་ཀྱི་སྐུ། །དབྱིངས་ལྟར་འདུག་ཚུལ་འོད་གསལ་ལོངས་སྤྱོད་རྫོགས། །ཕྱོགས་དང་བྲལ་ལྟར་རིག་སྟོང་སྤྲུལ་པའི་སྐུ། །རང་རིག་ངང་འདིར་ཡེ་ནས་གྲུབ་ཟིན་པས། །གཞན་དུ་མ་ཚོལ་རྙེད་པའི་དུས་མེད་དོ། །དེ་ལྟར་མ་ཤེས་རྡོ་བ་གསེར་སྒྲུབ་དང༌། །དམུས་ལོང་གསེར་ཚོལ་ཉི་མ་སྤྲིན་བསྒྲིབས་དང༌། །རྐང་མེད་རྐས་འཛེག་ལོང་བས་ལྷ་ཁང་ཕྱིན། །མུན་ནག་ཟླ་ཤར་ལྟ་བུར་འགྲོ་བ་སྟེ། །གསལ་གསལ་འདྲ་ཡང་མ་རིག་བག་ཞར་ཡོད། །དེ་བས་མ་ནོར་ལེགས་པར་ཐག་བཅད་ནས། །སེམས་ཉིད་དོན་ལ་བརྟན་པ་ཐོབ་པ་གཅེས། །མཉམ་རྗེས་འབྲལ་མེད་དགོངས་པ་རྣམ་དྲུག་ནི། །དཔེ་རྣམས་དྲུག་གིས་ཤེས་པར་བྱ་བ་ལས། །དང་པོ་བར་སྣང་སེར་བུའི་དཔེས་མཚོན་ནས། །གསལ་དག་ཡེ་ཤེས་ནམ་མཁའ་ལྟ་བུའི་ངང༌། །འགྱུ་བ་དག་གྲོལ་རང་དྭངས་ཉམས་སུ་བླང༌། །ཟང་ཐལ་འཛིན་མེད་ཉམས་སུ་མྱོང་བ་ཡིན། །དེ་ལྟར་མ་ཤེས་རྩེ་གཅིག་ཏིང་འཛིན་ནི། །མར་མེ་རླུང་གིས་བསྐྱོད་བཞིན་རྐྱེན་མི་ཐུབ། །གཉིས་པ་ནམ་ལངས་ཉི་ཤར་དཔེས་མཚོན་ནས། །ངང་དྭངས་གསལ་འགྲིབ་མཐའ་བྲལ་ཉམས་སུ་བླང༌། །རང་དག་གསལ་དྭངས་ཡེ་ཤེས་མྱོང་བ་ཡིན། །དེ་ལྟར་མ་ཤེས་རིམས་ནད་ཐེབས་པ་ལྟར། །བྱིང་རྨུགས་འཕྲོ་རྒོད་གནས་ལུགས་དོན་ལ་སྒྲིབ། །གསུམ་པ་རླུང་མེད་མར་མེའི་དཔེས་མཚོན་ནས། །སྣང་སེམས་གཡོ་འགུལ་མེད་པར་ཉམས་སུ་བླང༌། །མ་བཅོས་མཉམ་པ་ཆེན་པོ་མྱོང་བ་ཡིན། །དེ་ལྟར་མ་ཤེས་བུ་ཆུང་ངན་པ་ལྟར། །ཐུན་མཚམས་བསྒོམས་པས་དགོས་དུས་མི་བསྟོངས་ཉིད། །བཞི་པ་ནམ་མཁའ་ཀློང་ཡངས་དཔེས་མཚོན་ནས། །གསལ་ཁྱབ་མཐའ་སྟོང་ཕྱམ་གདལ་ཉམས་སུ་བླང༌། །རེ་དོགས་འཛིན་གྲོལ་དགོངས་པ་ཉམས་སུ་མྱོང༌། །དེ་ལྟར་མ་ཤེས་བྱ་བྲན་གཤོག་ཆག་གིས། །མཁའ་ལ་འཕུར་བཞིན་བརྩོན་འགྲུས་གཡང་སར་ལྷུང༌། །ལྔ་པ་རྒྱ་མཚོ་རྦ་རླབས་དཔེས་མཚོན་ནས། །རང་བྱུང་ཀློང་ཐིམ་ངང་དུ་ཉམས་སུ་བླང༌། །སྐྱེ་འགག་གནས་གསུམ་ཆོས་ཉིད་ཀློང་འདྲེས་མྱོང༌། །དེ་ལྟར་མ་ཤེས་གཞི་ལ་གཉིས་བཟུང་ན། །དགག་སྒྲུབ་གཟུང་འཛིན་ཡུལ་དང་འབྲལ་མི་ནུས། །དྲུག་པ་ཆུ་ཕྲན་རྒྱ་མཚོ་དཔེས་མཚོན་ནས། །རྟོག་ཚོགས་སེམས་ཉིད་ངང་འདུས་ཉམས་སུ་བླང༌། །དུ་མ་རོ་གཅིག་ཐིག་ལེ་ཉག་གཅིག་མྱོང༌། །དེ་ལྟར་མ་ཤེས་ཡུངས་ཀར་བང་འཐོར་ལྟར། །རྟོག་པའི་རྣམ་གྲངས་སྙིང་པོས་འདུལ་མི་ནུས། །དེ་འདྲའི་མན་ངག་གནད་དུ་བསྣུན་ཤེས་ན། །ཆུ་བོ་རྒྱུན་གྱི་རྣལ་འབྱོར་ཆེན་པོ་ཡིན། །དེ་ལྟར་མ་ཤེས་ཆུ་ཕྲན་སྐམས་པ་ལྟར། །ལྟ་སྒོམ་སྤྱོད་པས་རྐྱེན་མི་ཐུབ་པ་ཡིན། །ལྟ་བའི་རང་ས་གཟུང་བའི་གནད་དྲུག་ལས། །དང་པོ་གཟུང་འཛིན་མེད་པའི་ལྟ་བ་ལ། །རང་རིག་གཉིས་མེད་རང་ས་གཟུང་བ་ནི། །ཡུལ་དྲུག་སྟོང་པས་གཟུང་བའི་མཐའ་ལས་གྲོལ། །རང་གསལ་ཡེ་ཤེས་འཛིན་པའི་མཐའ་ལས་གྲོལ། །གཟུང་འཛིན་གཉིས་མེད་གཉིས་ཀའི་མཐའ་ལས་གྲོལ། །མཐའ་གྲོལ་མིང་ཙམ་གཉིས་མེད་མཐའ་ལས་གྲོལ། །དེ་ལྟར་རྟོགས་པས་གང་ལའང་ཞེན་འཛིན་མེད། །གཉིས་པ་ཡོད་མེད་རྟག་ཆད་ལས་གྲོལ་བའི། །ལྟ་བས་རང་ས་གཟུང་བའི་མན་ངག་ནི། །རང་བྱུང་ཡེ་ཤེས་ཡིན་པས་མེད་པའི་མཐའ་ལས་གྲོལ། །རྟོག་པའི་དྲི་མ་མེད་པས་ཡོད་པའི་མཐའ་ལས་གྲོལ། །ཡུལ་མེད་མིང་དང་བྲལ་བས་གཉིས་ཀའི་མཐའ་ལས་གྲོལ། །རོལ་པ་གཉིས་ཀར་སྣང་བས་གཉིས་མེད་མཐའ་ལས་གྲོལ། །ཡེ་གྲོལ་ཡོངས་གྲོལ་ཆེན་པོར་ཤེས་པར་གྱིས། །གསུམ་པ་སྐྱེ་འགག་གྲོལ་བར་ས་བཟུང་ནི། །མཁའ་ལྟར་སྐྱེ་གཞི་མ་གྲུབ་སྐྱེ་བའི་མཐའ་ལས་གྲོལ། །རོལ་པ་མ་འགགས་འགག་པའི་མཐའ་ལས་གྲོལ། །སྐྱེ་དུས་སྐྱེ་མེད་གཉིས་ཀའི་མཐའ་ལས་གྲོལ། །ལྟ་བྱེད་མ་གྲུབ་གཉིས་མེད་མཐའ་ལས་གྲོལ། །རང་བཞིན་དབྱིངས་གཅིག་དག་པར་རྟོགས་པར་གྱིས། །བཞི་པ་སྣང་སྟོང་ལས་གྲོལ་ས་བཟུང་ནི། །རང་བཞིན་གསལ་བས་སྟོང་པའི་མཐའ་ལས་གྲོལ། །རྣམ་པར་མི་རྟོག་སྣང་བའི་མཐའ་ལས་གྲོལ། །དབྱེ་བསལ་མེད་པས་གཉིས་ཀའི་མཐའ་ལས་གྲོལ། །གཟའ་གཏད་མེད་པས་གཉིས་མེད་མཐའ་ལས་གྲོལ། །རང་གྲོལ་མཉམ་པ་ཆེན་པོར་ཤེས་པར་གྱིས། །ལྔ་པ་རྟག་ཆད་ལས་གྲོལ་ས་བཟུང་ནི། །ཅི་ཤར་ངོ་བོ་སྟོང་པས་རྟག་པའི་མཐའ་ལས་གྲོལ། །སྟོང་པ་སྣ་ཚོགས་འཆར་བས་ཆད་པའི་མཐའ་ལས་གྲོལ། །སྣང་སྟོང་འདུ་འབྲལ་མེད་པས་གཉིས་ཀའི་མཐའ་ལས་གྲོལ། །ལྟ་མཁན་རང་ངོ་དག་པས་གཉིས་མེད་མཐའ་ལས་གྲོལ། །ཐམས་ཅད་ཡེ་ནས་མ་སྐྱེས་གདོད་ནས་དག་པར་གཟུང༌། །དྲུག་པ་བཟང་ངན་གྲོལ་བར་ས་བཟུང་ནི། །མཐོན་པོར་མ་ཆད་བཟང་པོའི་མཆོག་འཛིན་སངས། །དམའ་མོར་མ་ཆད་ངན་པའི་སྤང་བློ་སངས། །གཉིས་སུ་མ་ཆད་གཉིས་འཛིན་རང་སར་སྟོང༌། །གཉིས་མེད་མ་ཆད་མུ་མཐའ་ཀུན་ལས་གྲོལ། །དེ་ལྟར་ལྟ་བའི་རྫོང་ཆེན་མ་ཤེས་ན། །རང་ཚུགས་མི་ཐུབ་གོལ་སྒྲིབ་ལྡང་བ་དང༌། །འོག་མའི་དོན་ལས་བོགས་མི་ཐོན་པར་འགྱུར། །དེས་ན་ས་བཟུང་གནད་ཀྱི་མན་ངག་གཅེས། །རྣམ་རྟོག་གྲོགས་སུ་སློང་བའི་ཆོས་དྲུག་ནི། །རྣམ་ཤེས་རང་ཡལ་སེར་བུ་ལྟ་བུར་ཁྱེར། །རང་བྱུང་ཡེ་ཤེས་ནང་ནས་འཆར་བ་ཡིན། །འགྱུ་བ་རང་དག་བར་སྣང་གློག་ལྟར་སྦྱངས། །ཅི་འགྱུས་རང་གསལ་ཡེ་ཤེས་འཆར་བ་ཡིན། །དྲན་པ་རང་སངས་ཆུ་རྙོག་ལྟ་བུར་ཁྱེར། །ཅི་དྲན་རང་བྱུང་རྒྱལ་བའི་དགོངས་པར་འཆར། །ཅི་རྟོག་ཆོས་ཉིད་ལིངས་པ་གྲོགས་སུ་ཁྱེར། །བླང་དོར་མེད་པའི་དགོངས་པ་ཁོང་ནས་འཆར། །འཛིན་པ་རང་ཟད་ཡུལ་མེད་གྲོགས་སུ་ཁྱེར། །གཞི་མེད་མཐོང་ཡལ་ཡེ་ཤེས་རང་ལ་འཆར། །རང་གདངས་གསལ་དག་ཀློང་གསལ་གྲོགས་སུ་ཁྱེར། །ཝལ་པོ་རྗེས་མེད་ཡེ་ཤེས་ཁོང་ནས་འཆར། །དེ་ལྟར་ཉམས་སུ་ལེན་པའི་རྣལ་འབྱོར་ལ། །རྣམ་རྟོག་ཉིད་ལས་ཡེ་ཤེས་འཆར་བ་ཡིན། །ཤིང་སྐམ་དག་ལས་མེ་ཆེན་འབར་བ་ལྟར། །ཐམས་ཅད་གྲོགས་སུ་འཆར་བ་ཤིན་ཏུ་གཅེས། །ཆོས་ཉིད་ངང་ལ་གནས་པའི་གནད་དྲུག་ནི། །རྩ་རླུང་ཁམས་རྣམས་རང་གནད་དགོད་པའི་གནད། །ལུས་ནི་བསམ་གཏན་ཆོས་དྲུག་བཅའ་བ་དང༌། །ཐ་མལ་རང་གའི་འཁྲུལ་སྣང་དགྲོལ་བའི་གནད། །སྣོད་བཅུད་རྒྱལ་བའི་དཀྱིལ་འཁོར་ཤེས་པ་དང༌། །བདེ་བ་ཆེན་པོ་རང་ལུགས་འབར་བའི་གནད། །འོག་སྒོ་བསྡམས་ཏེ་སྟེང་རླུང་བསྡུ་བ་དང༌། །རྟོག་མེད་ཆོས་ཉིད་ངང་ལ་གནས་པའི་གནད། །ལྕེ་རྩེ་གྱེན་བཟློག་རྐན་གཉིས་མ་རེག་བྱ། །རང་གསལ་ཡེ་ཤེས་མཁའ་ལ་དག་པའི་གནད། །མིག་གཉིས་མཐོ་གང་ནམ་མཁར་གཏད་པ་དང༌། །གཉུག་མའི་ཡེ་ཤེས་ལྷུན་གྱིས་གྲུབ་པའི་གནད། །སེམས་ཉིད་མ་བཅོས་གློད་ནས་དྭངས་སངས་བཞག །དེ་ལྟར་ཐབས་ལྡན་ཆོས་ཉིད་ངང་ལ་གནས། །བརྩོན་པས་གནད་དུ་བསྣུན་ཞིག་སྐལ་ལྡན་ཀུན། །ཆོས་ཉིད་ངང་ལ་བཞག་ཐབས་རྣམ་དྲུག་ནི། །མན་ངག་དྲུག་གིས་ཤེས་པར་བྱ་བ་ལ། །དང་པོ་དུས་གསུམ་དབྱེར་མེད་མན་ངག་གིས། །གཉིས་འཛིན་བློ་ཡི་རྟོག་མཐའ་བསལ་བ་ནི། །འདས་རྗེས་མི་དཔྱད་མ་འོངས་སྔུན་མི་བསུ། །ད་ལྟར་འཛིན་མེད་ངང་དུ་ལྷན་གྱིས་བཞག །ཐི་བྱ་ཚང་དུ་འཇུག་པའི་མན་ངག་གིས། །རེ་དོགས་གཉིས་ཀྱི་རྟོག་མཐའ་བསལ་བ་ནི། །ད་ལྟར་སེམས་ལ་འབྱུང་འཇུག་གཉིས་མེད་པས། །མ་ཡེངས་མཉམ་ཉིད་ངང་ལ་གློད་ལ་ཞོག །སྐྱེས་བུ་བྱ་བ་བཏང་བའི་མན་ངག་གིས། །གཟའ་གཏད་འཛིན་པའི་རྟག་མཐའ་བསལ་བ་ནི། །སེམས་ཉིད་གནས་ལུགས་མ་བཅོས་མཉམ་པའི་ངང༌། །འཛིན་བྲལ་ཆེན་པོར་བོར་ལ་ཕྱམ་གཅིག་བཞག །ཁྱུང་ཆེན་ནམ་མཁར་ལྡིང་བའི་མན་ངག་གིས། །ཐེ་ཚོམ་གཉིས་འཛིན་རྟོག་མཐའ་བསལ་བ་ནི། །ཤེས་པ་མཐར་བཅད་རང་བྱུང་རྣལ་མའི་ངང༌། །ཡངས་པ་ཆེན་པོར་བོར་ལ་ཕྱམ་གཅིག་བཞག །ནམ་ལངས་ཉི་ཤར་དག་པའི་མན་ངག་གིས། །ཡུལ་སྣང་སྣ་ཚོགས་རྟོག་མཐའ་བསལ་བ་ནི། །དབང་པོ་མི་བསྡུ་འགྱུ་བ་མི་དགག་པར། །ཚོགས་དྲུག་ལྷུག་པར་བཏང་སྟེ་གློད་ལ་བཞག །མཚན་མ་རང་སར་དྭངས་པའི་མན་ངག་གིས། །སྣ་ཚོགས་རྣམ་རྟོག་རྟོག་མཐའ་བསལ་བ་ནི། །ཅི་སྣང་ཡུལ་ལ་བླང་དོར་གཉིས་མེད་པར། །མ་བཅོས་སོ་མའི་ངང་ལ་ཇི་བཞིན་བཞག །དེ་ལྟར་བཞག་རྣམས་གཉིས་མེད་ངང་གནས་པས། །མཐའ་གྲོལ་ཀློང་ཡངས་དགོངས་པ་འཆར་བར་ངེས། །སྒོམ་པའི་སྤྱི་སྐྱོན་རྣམ་དྲུག་བསྟན་པ་ནི། །གསལ་དྭངས་མ་ཕྱེད་མི་རྟོག་ལྟེང་པོར་སོང། །ཆེད་དུ་གསལ་བསྒོམས་ཡེ་ཤེས་ཕྱོགས་ཆད་སོང། །འཕྲོ་བ་ནང་བསྡུས་སེམས་འཛིན་ཀོལ་ཙེར་སོང༌། །གཏིང་གསལ་མ་རྟོགས་ཁ་འབྱམས་ཕྱལ་བར་སོང༌། །གཏིང་ཐག་མ་ཆོད་ཐེ་ཚོམ་རྐྱེན་དབང་སོང༌། །སྒོ་གསུམ་བཅོས་མས་རྣམ་རྟོག་ཉིང་འཁྲུལ་སོང༌། །དེ་ལྟར་སྐྱོན་དྲུག་གང་བྱུང་སྒྲིབ་པ་སྟེ། །ཡང་དག་དོན་འདོད་རྣམས་ཀྱིས་བསལ་ནས་བསྒོམ། །གོལ་ས་དྲུག་གི་རྣམ་གྲངས་བསྟན་པ་ནི། །སྐྱེ་མཆེད་མུ་བཞིའི་སྒོམ་པ་ཡིད་བྱེད་དང༌། །ཀུན་རྫོབ་རྒྱུ་འབྲས་མེད་འཛིན་ཆད་ལྟ་དང༌། །གཟུང་འཛིན་མི་འགྱུར་རྟག་པ་ཆེན་པོར་འཛིན། །ཡུལ་སྣང་དགྲ་དང་ཚེར་མར་བལྟས་ནས་སོང༌། །ཐམས་ཅད་སེམས་བསྡུས་རང་རིག་རང་གསལ་བསྒོམ། །རྟོག་ཚོགས་ལྷར་འགྱུར་དོན་ལས་འགྱངས་པ་སྟེ། །དེ་དྲུག་མ་སོང་ཆོས་ཉིད་ཕྱོགས་བྲལ་ཀློང༌། །མཉམ་པ་ཆེན་པོའི་ངང་ལས་མ་འདས་གཅེས། །སྐྱོན་དྲུག་བྱུང་ན་བཅོས་པའི་ཐབས་དྲུག་ནི། །མཁའ་ལ་སྤྲིན་དེངས་ལྟ་བུར་བཅོས་པ་ནི། །སེམས་ཀྱི་ཆོ་འཕྲུལ་སྣ་ཚོགས་ཅི་ཤར་ཡང༌། །ཆོས་ཉིད་མཁའ་ལ་རང་བཞིན་དྭངས་པས་བཅོས། །ཁང་སྟོང་རྐུན་མས་ཕྱིན་ལྟར་བཅོས་པ་ནི། །རྣམ་རྟོག་ངོ་བོ་རང་བཞིན་མེད་པ་དེ། །ཅི་སྐྱེས་དུས་ནས་མ་སྐྱེས་ངོས་གཟུང་མེད། །གློད་པ་ཙམ་ལས་བསལ་དུ་མེད་པར་བཅོས། །དགུན་གྱི་ནགས་མེ་མཆེད་ལྟར་བཅོས་པ་ནི། །ཡུལ་རྟོག་ཅི་བྱུང་དེ་ཉིད་ངོ་བརྟགས་པས། །ཆོས་ཉིད་གྲོགས་སུ་སྤར་བས་བཅོས་པར་བྱ། །དུག་ལ་སྔགས་ཀྱིས་བཏབ་ལྟར་བཅོས་པ་ནི། །རྣམ་རྟོག་སྐྱེ་མེད་ངང་དུ་བསད་པས་བཅོས། །འབངས་ཀྱིས་རྒྱལ་པོ་མཐོང་ལྟར་བཅོས་པ་ནི། །དུག་ལྔ་སྐྱེ་དུས་ངོས་གཟུང་རང་གློད་པས། །ཆོས་ཉིད་དོན་དང་རང་ངོ་ཕྲད་པར་བཅོས། །གཟིངས་ཀྱི་བྱ་རོག་ལྟ་བུར་བཅོས་པ་ནི། །འཕྲོ་རྒོད་ཅི་བྱུང་ཆོས་ཉིད་ལྡོག་པ་ལས། །གཞན་དུ་འགྲོ་ས་མེད་པའི་ངང་དུ་བཅོས། །དེ་ལྟར་གནད་དྲུག་འགྱུས་དྲན་ཅི་སྐྱེས་ཀུན། །རང་ཐོག་རང་དག་རང་སངས་དགྲོལ་བ་གཅེས། །ཡང་དག་རྟོགས་པའི་གདེང་གི་རྟགས་དྲུག་ནི། །སྐྱོན་ཡོན་གང་ལའང་དཔའ་བཀོང་ཞུམ་པ་མེད། །གདོས་བཅས་ལུས་ལ་རང་སེམས་ཆོས་སྐུར་ཞུགས། །འཁོར་བར་མ་ཆགས་གཞན་དོན་སྐྱོ་དུབ་མེད། །གོལ་སྒྲིབ་ཕྱོགས་བྲལ་ཐིག་ལེ་ཉག་གཅིག་རྫོགས། །བདུད་རྣམས་ཆོས་ཉིད་བར་ཆད་ཉམ་ང་མེད། །བདེ་སྡུག་མཁའ་ཀློང་སྤང་བླང་རེ་དོགས་མེད། །དེ་ལྟར་རྟོགས་རྣམས་གནས་ལུགས་མཐར་ཕྱིན་འགྱུར། །ཡང་དག་བརྟན་པ་ཐོབ་པའི་ཚད་དྲུག་ནི། །སྣང་སྲིད་ཆོས་རྣམས་སྒྱུ་མའི་རང་སྣང་ཞིང༌། །རང་བཞིན་མེད་པའི་རྟགས་ལ་རྒྱུན་དུ་འཆར། །ཉོན་མོངས་ངོ་བོ་ཡེ་ནས་ཀ་དག་པས། །དུག་ལྔ་མི་འཁྲུགས་རང་གསལ་ཡེ་ཤེས་འཆར། །སྐྱོན་ཡོན་ཡེ་ཤེས་ཆེན་པོར་ཡེ་ཤར་བས། །བླང་དོར་གཉིས་ཀྱི་འདུན་པ་རང་སངས་འཆར། །སྙིང་པོའི་དོན་ལ་གཞན་སྣང་མེད་རྟོགས་པས། །དྲན་རྟོག་ཆོས་ཉིད་ངང་དུ་གསལ་བ་དང༌། །སེམས་ཉིད་ནོར་བུ་རང་ལ་རྙེད་གྱུར་པས། །འཆི་འཕོའི་འཇིགས་བྲལ་ཉམ་ང་མེད་པ་འཆར། །རང་སེམས་ཆོས་ཉིད་སངས་རྒྱས་དོན་མཐོང་བས། །བརྩོན་འགྲུས་རེ་དོགས་འཆིང་བ་གྲོལ་བ་འཆར། །དེ་འདྲའི་རྣལ་འབྱོར་མངོན་པར་སངས་རྒྱས་ཡིན། །དགོངས་པ་ཀློང་དུ་གྱུར་པའི་གདེང་དྲུག་ནི། །ཆོས་རྣམས་མཐའ་བྲལ་དབུ་མར་རྟོགས་པ་དང༌། །ཟུང་འཇུག་འོད་གསལ་ཆེན་པོར་རྟོགས་པ་དང༌། །མཉམ་ཉིད་བདེ་བ་ཆེན་པོར་རྟོགས་པ་དང༌། །གཉིས་མེད་ཐིག་ལེ་ཉག་གཅིག་རྟོགས་པ་དང༌། །ལྷུན་གྲུབ་ཕྱོགས་བྲལ་ཆེན་པོར་རྟོགས་པ་དང༌། །ཀ་དག་རྣལ་མར་རྟོགས་པ་མཐར་ཕྱིན་ཡང༌། །དེ་དག་རྟོགས་པར་འདོད་པ་པོ་མེད་ཅིང༌། །རྟོགས་པ་ཉིད་ལ་རློམ་པའི་སེམས་མེད་པས། །སྒྱུ་མའི་རྣལ་འབྱོར་དཔེ་དང་བྲལ་བ་ཡིན། །དེ་ལྟར་རྟོགས་པའི་གྲོལ་ཚུལ་རྣམ་དྲུག་ནི། །ཕྱི་རོལ་ཡུལ་རྣམས་སྣང་བའི་དུས་ཉིད་ནས། །སྣང་ཐོག་གྲོལ་བ་ཆབ་རོམ་ཆུར་ཞུ་འདྲ། །ནང་དུ་རིག་པའི་ཆོས་རྣམས་རིག་དུས་ནས། །རིག་ཐོག་གྲོལ་བ་ཆུ་བུར་ཆུར་ཐིམ་འདྲ། །བར་དུ་འགྱུ་བའི་ཡིད་གཉིས་འགྱུ་དུས་ནས༌། །འགྱུ་ཐོག་གྲོལ་བ་བར་སྣང་གློག་འགྱུ་འདྲ། །སྒྲ་བཏགས་མིང་རྣམས་གྲག་པའི་དུས་ཉིད་ནས། །མིང་ཐོག་གྲོལ་བ་བྲག་ཅའི་སྒྲ་དབྱངས་འདྲ། །གཟུང་བའི་གྲུབ་མཐའ་འདོད་པའི་དུས་ཉིད་ནས། །འདོད་ཐོག་གྲོལ་བ་མཁའ་ལ་འཇའ་ཡལ་འདྲ། །བསྒྲུབ་པའི་འབྲས་བུ་གྲུབ་ཐོག་ཉིད་གྲོལ་བ། །ནོར་བུའི་རྒྱལ་ལ་དགོས་འདོད་འབྱུང་བཞིན་ཏེ། །རང་བཞིན་རང་གྲོལ་གཉེན་པོ་རང་སར་དེངས། །མིང་མེད་ཡུལ་བྲལ་དགོངས་པར་ལྷུན་གྱིས་གྲུབ། །དེ་ལྟར་རབ་རྣམས་སྐྱེ་ཤི་བར་དོར་གྲོལ། །འབྲིང་རྣམས་ཆོས་ཉིད་བར་དོར་གྲོལ་བ་ནི། །དྲུག་ཚན་གཉིས་ཀྱིས་ཤེས་པར་བྱ་བ་ལས། །ལུས་རྒྱའི་དོར་ལུགས་རྣམ་པ་དྲུག་པོ་ནི། །ཕྱི་ནང་སེམས་སུ་འདུས་པའི་དུས་ཀྱི་ཚེ། །གཟུང་བའི་ཡུལ་དང་བྲལ་བའི་དུས་ཡིན་ལ། །སེམས་ཉིད་ཡེ་ཤེས་དབང་དུ་འདུས་པའི་ཚེ། །འཛིན་པའི་སེམས་དང་རང་བཞིན་བྲལ་བ་ཡིན། །རིག་པའི་ཡེ་ཤེས་བག་ཆགས་སྦུབས་འདུས་ཚེ། །ས་རླུང་ཆུ་ལ་ཐིམ་པས་ལུས་མི་ཐེགས། །འཕོ་བར་བྱ་ཞིང་བཤང་གཅི་དྲི་ངན་འབྱུང༌། །ཆུ་རླུང་མེ་རུ་ཐིམ་པས་ལུས་ཀྱི་ཡན་ལག་འཕྲ། །བྱད་ལ་རྡུལ་ཆགས་ཁ་ཆུ་སྣ་ཆུ་འཛག །མེ་རླུང་རླུང་ཐིམ་ཁ་སྣའི་ཆུ་སྐམ་ཞིང༌། །ལུས་ཀྱི་དྲོད་ཤོར་ཁ་སྣའི་གཟི་མདངས་སྡུད། །འདི་ཡི་དུས་སུ་རྐང་མཐིལ་དྲོད་འདུས་ན། །དམྱལ་བར་སྐྱེ་ཞིང་གསང་བར་ཡི་དྭགས་དང༌། །ལྟེ་བ་བྱོལ་སོང་སྙིང་ག་མི་དང་ནི། །མགྲིན་པ་ལྷ་མིན་མིག་འདུས་ལྷར་སྐྱེ་ལ། །སྤྱི་བོར་དྲོད་ཡལ་བླ་མེད་འབྲས་བུ་འཐོབ། །རླུང་གི་རླུང་རྣམས་རྣམ་ཤེས་ཐིམ་པའི་དུས། །ཕྱི་དབུགས་བརྩེགས་འབྱུང་ནང་དུ་སྡུད་མི་ཤེས། །མིག་གི་རང་འོད་སྒྲོན་མ་ཡལ་འགྱུར་ཞིང༌། །ཕྱི་ཡི་དབུགས་འཆད་རྣམ་ཤེས་འོད་གསལ་ཐིམ། །ནང་དབུགས་འཆད་ཅིང་ལུས་སེམས་འབྲལ་བ་སྟེ། །ལུས་དེ་དེར་བཞག་ཡེ་ཤེས་དབྱིངས་ལ་འཆར། །འདི་དག་ཐོག་མར་འབྱུང་བའི་ཐིམ་ཚུལ་ཡིན། །དྲུག་ཚན་གཉིས་པ་དབང་པོའི་གྲོལ་ཚུལ་ལ། །རྣམ་པ་དྲུག་ལས་དང་པོ་བསྟན་པ་ནི། །དབང་པོ་རབ་ཀྱི་རྣོན་པོ་དེ་ཉིད་ལ། །བར་དོ་མི་འཆར་ལུས་རྒྱ་བྲལ་མ་ཐག །ཆོས་ཉིད་ལྷག་མཐོང་ཆེན་པོར་རང་གསལ་ནས། །སྤྲོས་པའི་མཐའ་དང་བྲལ་བར་གནས་པ་ཡིན། །གཉིས་པ་དབང་པོ་རབ་ཀྱི་རྟུལ་པོ་ནི། །སྐད་ཅིག་གསུམ་པར་གྲོལ་བ་ཐོབ་པ་སྟེ། །ལུས་སེམས་བྲལ་བའི་སྐད་ཅིག་དང་པོ་ལ། །རང་གསལ་ཆོས་སྐུ་རྟོག་བྲལ་ཆེན་པོ་འཆར། །སྐད་ཅྀག་གཉིས་པར་ལོངས་སྐུ་ཟེར་དུ་འཆར། །སྐད་ཅིག་གསུམ་པར་འོད་གསལ་རྣམ་གྲོལ་ནས། །མཁའ་ལྟར་མཉམ་ཉིད་ཆོས་སྐུའི་ངང་དུ་གནས། །གསུམ་པ་འབྲིང་གི་རྣོན་པོ་ཞག་གཅིག་གམ། །གསུམ་དུ་རྟོག་བྲལ་བརྒྱལ་ཐབས་གནས་པ་སྟེ། །དེ་ཉིད་སངས་ནས་ཡེ་ཤེས་འོད་དུ་འཆར། །སྐུ་ཡི་རང་འོད་གསུང་གི་རང་སྒྲ་དང༌། །ཐུགས་ཀྱི་ཟེར་གདངས་ཞག་ལྔར་འཆར་དུས་སུ། །སྐུ་གསུང་ཐུགས་སུ་རང་ངོ་ཤེས་པས་གྲོལ། །བཞི་པ་དབང་པོ་འབྲིང་གི་རྟུལ་པོ་ནི། །ཞག་གསུམ་པར་རམ་ལྔ་རུ་བརྒྱལ་ཐབས་གནས། །དེ་སངས་ཡེ་ཤེས་ལྔ་འཕྲོ་འོད་གསལ་ཏེ། །དངངས་སྐྲག་མ་སྐྱེས་འཇིགས་མེད་རང་སྣང་གྲོལ། །ལྔ་པ་དབང་པོ་ཐ་མའི་རྣོན་པོ་ནི། །ཞག་གསུམ་བར་དུ་རིག་པ་བརྒྱལ་ཐབས་གནས། །དེ་སངས་ཡེ་ཤེས་ལྔ་ཡི་འོད་གསལ་ཏེ། །ཞག་ལྔ་ལོན་ནས་ཡེ་ཤེས་སྣང་བ་ནུབ། །འོད་ལས་ཡུལ་དང་སྒྲ་ལས་ཟེར་དང་ནི། །ཟེར་ལས་རྟོག་པར་ཤར་དང་དེ་ཡི་ཚེ། །སྔོན་གྱི་ཡུལ་དང་ནོར་དང་མི་རྣམས་ཀྱི། །དྲན་པ་སད་དུས་སྔ་མའི་ཆོས་དྲན་ནས། །གཉེན་པོ་སད་དེ་འཛིན་མེད་རང་གསལ་གྱི། །ཡེ་ཤེས་རང་ཤར་བར་དོའི་སྣང་བ་གྲོལ། །ཆོས་དབྱིངས་ངང་དུ་མངོན་པར་བྱང་ཆུབ་ཡིན། །དྲུག་པ་དབང་པོ་ཐ་མའི་རྟུལ་པོ་ནི། །ཞག་གཅིག་རིག་པ་བརྒྱལ་ཐབས་གནས་པ་ལས། །དེ་སངས་ཡེ་ཤེས་སྣང་བ་ཞག་གཅིག་འཆར། །དེ་ནུབ་སྔ་མའི་གཟུགས་སུ་ཡོད་སྙམ་ཞིང༌། །དབང་པོ་ཀུན་ཚང་གར་ཡང་ཐོགས་མེད་རྒྱུ། །རྣམ་ཤེས་རྟེན་བྲལ་ཡུལ་དང་འདུག་ས་ཚོལ། །ལས་ཀྱིས་མངལ་སྒོ་ཐ་དད་འཇུག་པ་ལས། །དེ་ཉིད་མི་ལུས་ཡོན་ཏན་བདུན་ཐོབ་ནས། །ཟབ་མོའི་ཆོས་ཕྲད་སྐྱེ་བ་དེས་གྲོལ་འགྱུར། །དེ་ཡང་ཤིན་ཏུ་སྡིག་པ་ཅན་རྣམས་ལ། །བར་དོ་མི་སྣང་ལུས་སེམས་བྲལ་མ་ཐག །རང་སྣང་འཁྲུལ་ནས་དམྱལ་བར་སྣང་བ་ཡིན། །སྡིག་པ་འབྲིང་སྤྱད་བར་དོ་ཡུན་ཐུང་གནས། །དེ་ནས་ངན་སོང་གཞན་གཉིས་མྱོང་བ་ཡིན། །དགེ་སྡིག་ཆ་སྙོམས་བར་དོ་ཡུན་རིང་སྟེ། །ཞག་གྲངས་བཞི་བཅུ་རྩ་དགུ་གནས་པ་ལས། །དེ་ནས་ལས་ཀྱི་ལུས་ལེན་འགྱུར་བ་ཡིན། །དེ་ཡང་ཆོས་ཉིད་བར་དོ་ནུབ་པ་ལས། །རྟུལ་པོ་གཉིས་ལ་སྲིད་པའི་བར་དོ་འཆར། །དེ་བས་ད་ལྟ་མི་དགེ་རྣམ་སྤངས་ཏེ། །དགེ་སྒྲུབ་སེམས་ཉིད་གཏན་སྲིད་ཟིན་པ་གཅེས། །ཕན་པའི་གདམས་ངག་ཡིན་ནོ་སེམས་ལ་ཞོག །མཐར་ཐུག་འབྲས་བུ་མངོན་དུ་གྱུར་པའི་ཚེ། །མངོན་པར་བྱང་ཆུབ་ཆོས་དྲུག་བསྟན་པ་ནི། །གཟུང་འཛིན་འཁྲུལ་བའི་བག་ཆགས་ཀུན་བྲལ་ནས། །འཁྲུལ་སྣང་འཁྲུལ་འཛིན་དབྱིངས་སུ་ནུབ་པ་ཡིན། །སྤྲིན་དེངས་ཉི་མཁའ་བཞིན་དུ་དག་པའི་ཚེ། །དང་པོ་ཆོས་སྐུ་དག་པ་གཉིས་ལྡན་ནི། །གསལ་བའི་ཡེ་ཤེས་ཆོས་ཉིད་དབྱིངས་སུ་ཤར། །སྤྲོས་བྲལ་འོད་གསལ་ཁྱབ་གདལ་ཆེན་པོ་ཉིད། །ལྷུན་གྲུབ་ཀ་དག་ཕྱོགས་ལ་གྲོལ་བ་ཡིན། །གཉིས་པ་ལོངས་སྤྱོད་རྫོགས་སྐུ་དག་པ་ནི། །དེ་ཉིད་ངང་ལས་ས་བཅུའི་སེམས་དཔའ་ལ། །འཇའ་ཚོན་ལྟ་བུ་རིགས་ལྔ་གངས་ཆེན་མཚོ། །མཚན་རྫོགས་དཔེ་བྱད་འབར་བ་སྣང་བ་ཡིན། །གསུམ་པ་སྤྲུལ་སྐུའི་དེ་ཉིད་ཟླ་གཟུགས་བཞིན། །གདུལ་བྱའི་ཆུ་སྣོད་གང་ཡོད་དེར་སྣང་སྟེ། །བཟོ་དང་སྐྱེ་བ་མཆོག་གི་སྤྲུལ་པ་སོགས། །གང་ལ་གང་འདུལ་དེ་ལ་དེར་སྣང་བས། །འགྲོ་དྲུག་གནས་ན་སྲིད་པ་ཇི་སྲིད་བར། །སེམས་ཅན་དོན་མཛད་འཕྲིན་ལས་བསམ་མི་ཁྱབ། །སྐུ་ལ་བརྟེན་པའི་ཡེ་ཤེས་དྲུག་ལྡན་ནི། །ཆོས་དབྱིངས་ཡེ་ཤེས་ཆོས་ཉིད་འཕོ་འགྱུར་མེད། །མེ་ལོང་ཡེ་ཤེས་རང་གསལ་ཀུན་སྣང་གཞི། །མཉམ་ཉིད་ཡེ་ཤེས་རོ་གཅིག་འབྱེད་པ་མེད། །ཀུན་རྟོག་ཡེ་ཤེས་ཇི་སྙེད་ཇི་བཞིན་གཟིགས། །བྱ་གྲུབ་ཡེ་ཤེས་མཛད་པ་བསམ་མི་ཁྱབ། །ལྷུན་གྲུབ་ཡེ་ཤེས་འདུས་མ་བྱས་ཉིད་ནི། །དཔེ་བྲལ་རྒྱལ་བའི་ཡེ་ཤེས་ཀུན་གྱི་བདག །ནོར་བུ་བཞིན་དུ་མི་རྟོག་དོན་ཀུན་འབྱུང༌། །བཞི་པ་ཐུགས་རྗེ་འགྲོ་ལ་འབྱུང་ཚུལ་ནི། །སེམས་བསྐྱེད་སྨོན་ལམ་ཚོགས་གཉིས་བསགས་པ་དང༌། །ལྷུན་གྲུབ་ངང་ལས་ཡེ་ཤེས་སྟོབས་ཀྱིས་འབྱུང༌། །ལྔ་པ་ཐུགས་རྗེ་ཇི་ལྟར་སྐྱེ་ཚུལ་ནི། །རང་བཞིན་ཤུགས་ཀྱིས་ཐུགས་རྗེ་སྐྱེ་བ་དང༌། །ཡུལ་དང་ཕྲད་པའི་ཐུགས་རྗེ་སྐྱེ་བ་དང༌། །བསྐུལ་ཞིང་གསོལ་བ་གདབ་ལས་སྐྱེ་བའོ། །དྲུག་པ་དེ་ལས་འགྲོ་དོན་མཛད་ཚུལ་ནི། །རྟེན་ཅན་རྟེན་མེད་ངོ་བོ་ཉིད་གསུམ་སྟེ། །ཕྱོགས་ཆར་ཆད་རྣམས་འདི་བཞི་ངེས་བྱ་བ། །ཆོས་སྐུས་གོ་འབྱེད་རྟེན་མེད་དོན་མཛད་ཅིང༌། །སྨོན་ལམ་སེམས་བསྐྱེད་ནུས་པས་སྒྲིབ་སྦྱངས་ཏེ། །འགྲོ་ལ་གཟུགས་སྐུ་སྣང་བར་མཛད་པའོ། །ལོངས་སྐུ་ཡེ་ཤེས་ཐུགས་རྗེ་རང་སྣང་བས། །རྟེན་ཅན་དོན་མཛད་ས་བཅུའི་སྒྲིབ་པ་སྦྱོང༌། །ངོ་བོ་ཉིད་ཀྱིས་དོན་མཛད་དབྱིངས་ཀྱི་སྐུ། །ཡོད་མེད་སྒྲོ་སྐུར་ཞི་བའི་ངང་ཉིད་ལས། །གདུལ་བྱ་རྣམས་ལ་གང་འདོད་དེར་སྣང་བས། །སྣ་ཚོགས་སྤྲུལ་པས་དོན་ཀུན་མཛད་པ་ཡིན། །གྲུབ་པའི་མཐའ་ལས་རྟེན་ཅན་དོན་མཛད་པ། །མཐར་ཐུག་རྫོགས་པའི་སངས་རྒྱས་ས་དེ་ན། །སྐུ་དང་ཡེ་ཤེས་གྲུབ་པས་དོན་མཛད་འདོད། །རྟེན་མེད་དེ་ལྟར་གྲུབ་པས་འགག་མེད་དེ། །འོན་ཀྱང་དྲང་སྲོང་མཆོད་སྡོང་བསྒྲུབས་པ་བཞིན། །སྨོན་ལམ་དབང་གིས་དེ་ལྟར་སྣང་བར་འདོད། །ངོ་བོ་ཉིད་ཀྱིས་དོན་གཉིས་མཛད་པ་ཡང༌། །དེ་དག་གཉིས་ལྟར་ཡོད་མེད་སྒྲོ་སྐུར་གྲོལ། །དབྱེར་མེད་ངོ་བོ་ཉིད་ཀྱི་སྐུ་དེ་ལས། །ཇི་ལྟར་འཚམས་པར་བཞག་ནས་དོན་བྱེད་འདོད། །འདི་དག་གསུམ་ཡང་དོན་ལ་གཅིག་དགོས་པས། །སྔ་མ་ལྟ་བུར་ཁོང་དུ་ཆུད་པར་བྱ། །དེ་ཡིས་ཕྱོགས་འཛིན་ཡོད་མེད་གཟེབ་ལས་གྲོལ། །དེ་ལྟར་བླ་མེད་བྱང་ཆུབ་བརྙེས་པ་ནི། །སོ་སོ་སྐྱེ་བོ་མོས་པ་ཕུན་ཚོགས་ལ། །ཐུན་མོང་ཁྱད་པར་མཆོག་གི་ལམ་གསུམ་ལ། །བརྟེན་ནས་འབད་པས་རིམ་གྱིས་གོང་བགྲོད་དེ། །ཡོན་ཏན་ཡིད་བཞིན་ལྷུན་གྱིས་གྲུབ་པས་ན། །ཐར་ལམ་བསྒྲུབ་ལ་རང་བཞིན་འབད་པ་གཅེས། །དེང་སང་དུས་ངན་བསམས་ཤིང་སྐྱོ་བ་འཕེལ། །ཚེ་ལ་ལོང་མེད་ཡེངས་མའི་ལམ་ལ་འཛད། །ཤེས་བྱ་ཐུག་མེད་སྤྲོས་ལ་ཟད་པ་མེད། །དེ་བས་ཉིན་མཚན་སྙིང་པོའི་ཆོས་སྒྲུབས་ཤིག །ཚེ་འདིའི་བྱ་བ་ཤི་ཤིར་ཟིན་དུས་མེད། །གཅིག་གིས་གཅིག་ཁྲིད་ཆུ་ཡི་གཉེར་མ་འདྲ། །འཆི་དུས་བསྟོངས་སམ་ལེགས་པར་སེར་ཐོབ་ལ། །དེ་རིང་ཉིད་ནས་ཐར་པའི་བྱང་ཆུབ་སྒྲུབས། །གར་འགྲོ་ཅིར་འགྱུར་བདག་ལ་ཆ་ཡོད་པ། །སུས་བསྟོངས་འདིར་བདེ་མི་འཇིགས་གདེང་ཅི་ཡོད། །དེ་བས་ད་ལྟ་རང་དབང་ཡོད་དུས་སུ། །གཏན་ཡུལ་ཐར་པའི་གནས་སུ་སྙེགས་རེ་རན། །ལུས་དང་ལོངས་སྤྱོད་མཛའ་བཤེས་གཉེན་འདུན་དང༌། །ཚེ་འདིའི་སྣང་བ་མ་ལུས་ཀུན་བོར་ནས། །གཅིག་པུ་སུས་ཀྱང་མི་བསྟོངས་འགྲོ་བ་སོམས། །དེ་དུས་སྐྱབས་དང་དཔུང་གཉེན་ཚོལ་རེ་རན། །ད་ལྟའི་འདི་བཞིན་གཏན་དུ་མི་འོང་བས། །གནམ་ས་འདྲེ་ལྡོག་འཆི་བདག་འབྱུང་བའི་ཚེ། །བདག་གིས་ཅི་བྱ་དེ་དུས་སུ་ལ་རེ། །དེ་བས་ད་ལྟ་དམ་པའི་ཆོས་སྒྲུབས་ཤིག །མཛངས་དང་གྲོས་འདུན་མཁས་དང་མི་མཁས་དང་། །འཆི་དུས་རག་སྟེ་དགེ་བའི་དཔུང་ཚོགས་བསྐྱེད། །སྙིང་པོའི་སེམས་ཉིད་གཉུག་མའི་དོན་ལ་སྒོམས། །མཐོ་རིས་བདེ་འགྲོའི་དགའ་བདེ་ལྷུན་གྱིས་གྲུབ། །ཐར་བའི་གནས་ བཟང་རིན་ཆེན་ཕོ་བྲང་དུ། །རྒྱལ་བས་སྔུན་བསུ་རང་རིག་ཡེ་ཤེས་མཆོག །བྱང་ཆུབ་འབྱོར་པ་ཤིན་ཏུ ་མཐའ་ཡས་ཤིང༌། །རྟག་ཏུ་མི་འགྱུར་བདེ་ཆེན་དོན་ལ་སྤྱོད། །ཆོས་མེད་སྤྲང་པོ་བདག་གིས་དེ་སྐད་བསྐུལ། །ཕན་པའི་སྙིང་གཏམ་ལགས་ཀྱིས་སེམས་ལ་ཞོག །དེ་ལྟར་ཆོས་ཚུལ་ཡོན་ཏན་རིན་ཆེན་མཛོད། །དྲུག་ཚན་རེས་ཀྱང་སྙིང་པོའི་དོན་འགྲུབ་པ། །ཡིད་བཞིན་རིན་ཆེན་གདམས་པའི་སྙིང་པོ་འདི། །དད་ལྡན་ཐར་བ་བསྒྲུབ་རྣམས་དོན་དུ་སྤྲོས། །དགེ་བ་དེ་ཡིས་བདག་དང་འགྲོ་བ་ཀུན། །མ་ལུས་བདེ་གཤེགས་སྙིང་པོའི་སར་གཞོལ་ནས། །སྤངས་དང་རྟོགས་པའི་ཡོན་ཏན་ཕུན་ཚོགས་ཏེ། །དོན་གཉིས་ལྷུན་གྲུབ་ཆོས་ཀྱི་རྒྱལ་པོར་ཤོག །བདག་ཀྱང་དེང་ནས་ཚེ་རབས་ཐམས་ཅད་དུ། །སྲིད་ན་མི་སྐྱོ་སེམས་ཅན་དོན་བསྒྲུབ་ཅིང༌། །དམ་པ་རྣམས་ལས་ཆོས་ཀྱི་མཛོད་ཐོས་ཏེ། །ཚུལ་བཞིན་བསྒྲུབ་པས་རྒྱལ་བ་མཉེས་པར་ཤོག །བྱང་ཆུབ་ཐོབ་ཀྱང་སེམས་ཅན་མི་འདོར་ཞིང༌། །འཁོར་བར་གནས་ཀྱང་ཉེས་པས་ཀྱང་མི་གོས། །མཐོང་ཐོས་དྲན་རེག་ཐར་པའི་ལམ་འདྲེན་པས། །རྒྱལ་བ་སྲས་བཅས་རབ་ཏུ་མཉེས་པར་ཤོག །སྐལ་ལྡན་རྣམས་ལ་ཟབ་མོའི་ཆོས་སྟོན་ཅིང༌། །སྐལ་མེད་རྣམས་ལ་ཆོས་ཀྱི་ས་བོན་འདེབས། །སྒྲུབ་པ་ལྷུར་ལེན་ཉམས་ལེན་མཐར་ཕྱིན་པས། །དཔལ་མགོན་བླ་མ་དམ་པ་མཉེས་པར་ཤོག །མན་ངག་རིན་པོ་ཆེའི་མཛོད་ཅེས་བྱ་བ། བདེ་བར་གཤེགས་པའི་གསུང་རབ་ལ་མང་དུ་ཐོས་པའི་ནོར་གྱིས་འབྱོར་ཞིང༌། ཟབ་པ་དང་རྒྱ་ཆེ་བའི་དོན་ལ། ཐོས་པ་དང༌། བསམ་པ་དང༌། སྒོམ་པའི་ཤེས་རབ་ཀྱིས་ལེགས་པར་སྦྱངས་པ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་སྦྱར་བ་རྫོགས་སོ།། །།

༄༅།། མན་ངག་རིན་པོ་ཆེའི་མཛོད་ཀྱི་ཟབ་གསང་སྙིང་

པོའི་དོན་རྡོ་རྗེའི་ལྗགས་ཀྱིས་བཀྲལ་བ་སྐྱུད་བྱང་དུ་

བསྡུས་པ་གདམས་ཟབ་ནོར་བུའི་གཏེར་

མཛོད་ཅེས་བྱ་བ་བཞུགས་སོ།།

མན་ངག་རིན་པོ་ཆེའི་མཛོད་ཀྱི་སྐྱུད་བྱང་གདམས་ཟབ་ནོར་བུའི་གཏེར་མཛོད།

བླ་མ་ཀུན་ ཏུ་བཟང ་པོ་ལ་ཕྱག་འཚལ་ལོ།།

རབ་འབྱམས་ཞིང་དུ་གསང་གསུམ་རོལ་མོ་གྲངས་མེད་བཀོད་པའི་ཕྲ་མོའི་ཆ།།

མཐའ་ཡས་སྐྱེ་དགུའི་དཔྱིད་དུ་སྣང་བའི་སྙན་དབྱངས་ཟབ་མོ་རེ་རེས་ཀྱང་།།

དཔག་མེད་ཆོས་ཚུལ་སྒོ་བརྒྱ་འབྱེད་ཅིང་མ་རིག་གཉིད་ལས་སློང་མཛད་པའི།།

མགོན་པོ་མཆོག་ཁྱོད་རིག་སྟོང་དབྱིངས་ལ་གཏན་དུ་རོལ་བའི་བསྟོད་ཕྱག་བགྱིད།།

འོད་གསལ་དྲི་མེད་ཆོས་ཀྱི་ཐུགས།།

ཟབ་རྒྱས་བཅུད་དུ་དྲིལ་བ་ཡི།།

མན་ངག་རྒྱ་མཚོར་སྣང་བ་དེ།།

ཐབས་ཤེས་ཡི་གེའི་གཟུགས་སུ་བསྡེབ།།

དེ་ཡང་དུས་ཕུན་སུམ་ཚོགས་པ་དུས་བཞི་མཉམ་པ་ཉིད་ཀ་དག་ཐོག་མའི་དུས་རྟག་པ་རྒྱུན་གྱི་འཁོར་ལོ་ལས་མ་གཡོས་བཞིན་དུ་ཐུན་མོང་གི་ངོར་འདི་སྐད་བདག་གིས་ཐོས་པའི་དུས་ལྕགས་ཕོ་སྟག་གི་ལོའི་ཁྲུམས་སྟོད་ཟླ་བའི་ཚེས་བཅུ་གཅིག་ཉིན། གནས་ཕུན་སུམ་ཚོགས་པ་ཟངས་མདོག་དཔལ་གྱི་རི་བོ་པདྨ་འོད་ཀྱི་ཕོ་བྲང་གངས་རྒྱན་གསེར་གྱི་པདྨའི་གན་དྷོ་ལ་ཆེན་པོར། འཁོར་ཕུན་སུམ་ཚོགས་པ་རིག་འཛིན་ཕོ་མོ་དཔའ་བོ་མཁའ་འགྲོའི་ཚོགས་ཐམས་ཅད་མ་འོངས་བསྟན་པའི་སྲོག་རྒྱུན་མཐུད་པར་ཐུགས་བསྐྱེད་སྨོན་ལམ་གཅིག་ཏུ་མཐུན་པའི་མཁན་སྤྲུལ་དགེ་འདུན་འདུས་པའི་རྣམ་པར་བྱོན་པ་རྣམས་ལ། སྟོན་པ་ཕུན་སུམ་ཚོགས་པ་དུས་གསུམ་རྒྱལ་བའི་སྤྱི་གཟུགས། རིགས་དང་དཀྱིལ་འཁོར་རྒྱ་མཚོའི་ཁྱབ་བདག ཨོ་རྒྱན་རྡོ་རྗེ་འཆང་གི་ཐུགས་ཀྱི་གསང་བ་ཆེན་པོ། ལྔ་བརྒྱ་བའི་འགྲོ་ལ་ལྷག་པར་བརྩེ་བའི་ཀུན་སྣང་སྙིང་རྗེ་ཆེན་པོའི་རོལ་རྩལ་ལས་དགེ་སྦྱོང་ངུར་སྨྲིག་གི་རྣམ་པར་འཆང་བ། མཆོག་གསུམ་གྱི་ངོ་བོ། རྩ་གསུམ་གྱི་བདག་ཉིད། སྐུ་གསུམ་གྱི་རང་གཟུགས། ཁམས་གསུམ་ཆོས་ཀྱི་རྒྱལ་པོ། ཆོས་རྗེ་ཡིད་བཞིན་གྱི་ནོར་བུ། འགྲོ་ཁམས་རྒྱ་མཚོའི་མུན་སེལ་གྱི་སྒྲོན་མེ། མ་འདྲིས་པའི་སེམས་ཅན་ཡོངས་ཀྱི་རྩ་ལག་དམ་པ། ཐེག་མཆོག་འབྲུག་སྒྲ་ཟབ་མོས་སྐྱེ་དགུ་མ་རིག་པའི་གཉིད་ལས་སློང་བའི་སྟོན་པ་ཆེན་པོ། ཁྱབ་བདག་རྩ་བའི་བླ་མ་བཀའ་དྲིན་སུམ་ལྡན་གྱི་བདག་ཉིད་གང་གིས། ཆོས་ཕུན་སུམ་ཚོགས་པ་མདོ་རྒྱུད་ཐེག་རིམ་དགུ་ཡི་མན་ངག་གི་ཉིང་ཁུ་རྣམས་དྲུག་ཚན་གྱིས་བཅད་ནས་ཐང་མར་བརྡལ་བ་རྣམ་པར་བཤད་པ་སྐྱུད་བྱང་དུ་བསྡུ་བ་ལ། དེ་ཡང་ཁྱབ་བདག་གང་གིས་ཐུགས་ཟབ་མོའི་ཏིང་འཛིན་ལས་མ་གཡོས་བཞིན་དཀར་ལ་སྨུག་པའི་ཞལ་གྱི་དཀྱིལ་འཁོར་འཁོར་ཚོགས་ཡོངས་ལ་མངོན་པར་ཕྱོགས་ཏེ། བརྩེ་བའི་སྤྱན་རས་ཀྱིས་གཟིགས་བཞིན་ཅུང་ཟད་འཛུམ་པའི་ཉམས་དང་བཅས་བཀའ་བསྩལ་བ་ནི་འདི་ལྟར།

ཉིན་དང་པོའི་ཆོས་ཁྲིད།

དུས་གསུམ་སངས་རྒྱས་ཐམས་ཅད་ཀྱི་ངོ་བོ། རིགས་དང་དཀྱིལ་འཁོར་རྒྱ་མཚོའི་མངའ་བདག བཀའ་དྲིན་མཚུངས་ཟླ་མ་མཆིས་པ། དཔལ་མགོན་བླ་མ་དམ་པའི་ཞབས་ཀྱི་རྡུལ་དྲི་མ་མེད་པ་ལ་མགོ་བོས་རབ་ཏུ་བཏུད་དེ་ཕྱག་འཚལ་ཞིང་སྐྱབས་སུ་མཆིའོ། །བདག་གཞན་སེམས་ཅན་ཐམས་ཅད་ཀྱི་རྒྱུད་བྱིན་གྱིས་བརླབ་པར་མཛད་དུ་གསོལ། །ཐབས་མཁས་ཐུགས་རྗེས་ཤཱཀྱའི་རིགས་སུ་འཁྲུངས། །གཞན་གྱིས་མི་ཐུབ་བདུད་ཀྱི་དཔུང་འཇོམས་པ། །གསེར་གྱི་ལྷུན་པོ་ལྟ་བུ་བརྗིད་པའི་སྐུ། །ཤཱཀྱའི་རྒྱལ་པོ་ཁྱེད་ལ་མགོས་ཕྱག་འཚལ། །དྲི་མེད་མཚོ་གླིང་པདྨའི་སྡོང་པོའི་རྩེར། །རྒྱལ་བའི་རྣམ་འཕྲུལ་རང་བྱུང་ལྷུན་གྱིས་གྲུབ། །མཚན་རྫོགས་དཔེ་བྱད་ཡོན་ཏན་ཚོགས་འབར་བ། །པདྨ་འབྱུང་གནས་བདག་བློའི་པད་མཚོར་རོལ། །འཛམ་གླིང་མཛེས་པའི་རྒྱན་དྲུག་མཆོག་གཉིས་དང་། །ཐུགས་རྗེ་ལུང་རྟོགས་མཉམ་པའི་མཐུ་མངའ་ཡང་། །ནགས་ཁྲོད་དམ་པར་སྦས་པའི་བརྟུལ་ཞུགས་ཀྱིས། །འཁོར་འདས་ཆོས་སྐུར་རྟོགས་པའི་ཀློང་ཆེན་པ། །དྲི་མེད་འོད་ཟེར་ཞབས་ལ་གསོལ་བ་འདེབས། །བརྒྱུད་གསུམ་བྱིན་ཐོབ་དགོངས་པའི་རྩལ་ཆེན་རྫོགས། །སྣང་བཞི་མཐར་ཕྱིན་ཆོས་སྐུའི་རྒྱལ་སྲིད་བརྙེས། །གདོད་མའི་མགོན་པོ་མི་ཡི་རྫུར་ཞུགས་པ། །འཇིགས་མེད་ཡོན་ཏན་མགོན་པོར་གསོལ་བ་འདེབས། །དགོངས་རྒྱུད་རྟོགས་པ་འཕོ་བར་བྱིན་གྱིས་རློབས། །ཧྲཱིཿ འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། །དུས་གསུམ་སངས་རྒྱས་ཀུན་གྱི་ངོ་བོ་ཉིད། །རང་སེམས་ཆོས་སྐུར་མངོན་སུམ་སྟོན་མཛད་པ། །རྩ་བའི་བླ་མ་མཆོག་ལ་གསོལ་བ་འདེབས། །བདག་གཞན་འགྲོ་བའི་བློ་སྣ་ཆོས་ལ་སྒྱུར། །གང་དག་ཕྱོགས་བཅུ་སྟོང་གི་འཇིག་རྟེན་ན། །བདེ་གཤེགས་སློབ་མར་གྱུར་པ་གང་སུ་དག །དེང་འདིར་དམ་པའི་ཆོས་ཀྱི་ཆར་འབེབས་ཀྱིས། །གསན་པར་འདོད་པ་ཐམས་ཅད་འདིར་གཤེགས་ཤིག །ནམ་མཁའི་མཐས་གཏུགས་འཇིག་རྟེན་ཐམས་ཅད་ན། །ལྷ་ཀླུ་གནོད་སྦྱིན་དྲི་ཟ་ལྷ་མ་ཡིན། །གྲུལ་བུམ་མིའམ་ཅི་དང་ལྟོ་འཕྱེ་སོགས། །རྫུ་འཕྲུལ་ཡིད་ལྡན་ཐམས་ཅད་འདིར་ཤོག་ཅིག །ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་གྱི་སྒྲ་རྣམས་ཇི་ཙམ་པར། །ཐམས་ཅད་སྐད་དུ་ཆོས་འདི་འགྱུར་བར་ཤོག །ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་རྣམ་མཁྱེན་བླ་ན་མེད་པ་ཡང་དག་པ་རྫོགས་པའི་སངས་རྒྱས། སྐུ་བཞི་ཡེ་ཤེས་ལྔ་ཡི་བདག་ཉིད་ཁྱབ་བདག་དཔལ་གདོད་མའི་མགོན་པོའི་གོ་འཕང་རིན་པོ་ཆེར་དགོད་པར་བྱ། དེའི་ཆེད་དུ་དམ་པའི་ཆོས་ཟབ་མོ་གང་ཞིག་ཐོས་པ་དཀའ་ཞིང་ཐོས་ན་དོན་ཆེན་པོ་དང་ལྡན་པ་དེ་ཉིད་ཉན་པ་ཙམ་གྱིས་མ་ཚད། དེའི་དོན་བསམ་པས་ཞུན་མཐར་བཅད། སྒོམ་པས་ཉམས་སུ་བླང་བར་བྱའོ་སྙམ་པའི་བསམ་པ་སྙིང་རྗེ་ཆེན་པོས་སེམས་ཅན་ཐམས་ཅད་བློས་མ་དོར་བ་ཞིག་དང་། ཤེས་རབ་ཆེན་པོས་སེམས་ཅན་ཐམས་ཅད་གཏན་བདེ་བླ་ན་མེད་པ་ལ་འགོད་པར་འདོད་པའི་ཀུན་སློང་དང་མ་བྲལ་བའི་ཐོག་ནས། ཐབས་རྒྱ་ཆེ་བ་སྣོད་བཅུད་ཐ་མལ་དུ་མི་བལྟ་བར་གནས་དུས་སྟོན་འཁོར་ཆོས་རྣམས་ཕུན་སུམ་ཚོགས་པ་ལྔ་ཡི་རང་བཞིན་ཡེ་ནས་ཡིན་པ་ལ་ཡིན་པར་ཤེས་པའི་ངེས་ཤེས་དང་བཅས་པའི་གསང་བ་སྔགས་ཀྱི་ཀུན་སློང་སྟེ་དེ་ལྟ་བུའི་ཀུན་སློང་ཕུན་སུམ་ཚོགས་པ་དང་ལྡན་པས། ཀུན་སྤྱོད་ཀྱང་མདོ་རྒྱུད་བསྟན་བཅོས་རྣམས་ལས་ཇི་ལྟར་འབྱུང་བ་དང་ཚུལ་མཐུན་པར་རྣམ་པར་དག་པས་གསན་པར་བྱེད་དགོས་ལ། གང་ཞིག་གསན་པར་བྱ་བའི་ཆོས་ཀྱི་རིམ་པ་ནི། ཇི་སྐད་དུ་རྫ་དཔལ་སྤྲུལ་རིན་པོ་ཆེས། ལྔ་རིག་སྨྲ་བའི་ཉིན་བྱེད་ས་པཎ་རྗེ། །མདོ་སྔགས་ལེགས་བཤད་འབྱུང་གནས་ཙོང་ཁ་པ། །ཡོངས་རྫོགས་བསྟན་པའི་མངའ་བདག་ཀློང་ཆེན་ཞབས། །གངས་ལྗོངས་འཇམ་པའི་དབྱངས་དངོས་རྣམ་གསུམ་ཡིན། །ཞེས་གསུངས་པའི་ཡ་གྱལ་ཡོངས་རྫོགས་བསྟན་པའི་མངའ་བདག་རྒྱལ་བའི་དབང་པོ་ཀློང་ཆེན་རབ་འབྱམས་སམ་བདག་ཉིད་ཆེན་པོ་དྲི་མེད་འོད་ཟེར་ཞེས་བྱ་བ་མ་འོངས་པར་སངས་རྒྱས་རི་རབ་མར་མེའི་རྒྱལ་མཚན་དུ་མངོན་པར་འཚང་རྒྱ་བར་འགྱུར་བ་གང་ཉིད་ཀྱི་རྡོ་རྗེའི་གསུང་། ཀློང་ཆེན་མཛོད་བདུན་ཞེས་པའི་མཚན་སྙན་གྱི་ཅོད་པན་ཉི་ཟླས་ཁྱབ་པའི་ས་གཞི་རིལ་བོའི་ཁྱོན་ཙམ་དུ་མ་ཚད། སྲིད་པ་གསུམ་དུ་མངོན་པར་མཐོ་བ་རྒྱལ་བའི་གསུང་དང་གཉིས་སུ་མ་མཆིས་ཤིང་། རྡོ་རྗེ་འཆང་གི་བཀའ་དྲི་མ་མེད་པའི་རྒྱུད་དོན་གསལ་བར་བྱེད་པ་ལ་གཞན་གྱི་དྲིང་དུ་མ་བཞག་པར། རྒྱ་ཆེ་བ་པཎྜི་ཏའི་ལུགས་ལྟར་བྱས་ཏེ་བཤད་པའི་ཐར་ལམ་སྟོན་པའི་མིག་གཅིག་པུ་དེ་ཉིད་ལས། མན་ངག་རིན་པོ་ཆེའི་མཛོད་འདི་ཉིད་འཆད་ཉན་གྱིས་གཏན་ལ་འབེབས་པའི་སྐབས་སུ་བབས་པ་ཡིན་པས། དེ་ལ་ཡང་ཐོག་མར་དགེ་བ་ཀླད་ཀྱི་དོན། བར་དུ་དགེ་བ་གཞུང་གི་དོན། ཐ་མར་དགེ་བ་མཇུག་གི་དོན་དང་གསུམ་ལས། དང་པོ་ཐོག་མར་དགེ་བ་ཀླད་ཀྱི་དོན་དེ་ལ་ཡང་། བསྟན་བཅོས་མཛད་པ་པོ་སུ་ཡིན་ངེས་པའི་ཆེད་དུ་རྣམ་ཐར་བརྗོད་པ་དང་། གང་བརྩམ་བྱའི་བསྟན་བཅོས་རྩོམ་པ་ལ་འཇུག་པའི་རྒྱུའམ་བསྟན་བཅོས་རྩོམ་པ་ལ་འཇུག་པའི་ཡན་ལག་བཤད་པ་དང་གཉིས་སུ་ཡོད་པ་ལས། དང་པོ་ཀུན་མཁྱེན་ཀློང་ཆེན་པའི་རྣམ་ཐར་སྔར་ཚིག་དོན་རིན་པོ་ཆེ་བཤད་པའི་སྐབས་སུ་ཞུས་པ་ལས་མ་འཐུས་པའི་གཞན་མེད་ཀྱང་། འདིར་དམ་པའི་ཡོན་ཏན་གྱི་ཆེ་བ་བརྗོད་པའི་ཚིག་རེ་རེ་གླེང་ཡང་བསོད་ནམས་དཔག་མེད་ཐོབ་པ་དང་། གཞུང་འཆད་པའི་འགྲོས་ཀྱི་ས་ཁོངས་འཛིན་བྱེད་ཙམ་དུ་མདོར་བསྡུས་ཤིག་ཞུ་བ་ལ། ཀུན་མཁྱེན་ཆེན་པོ་ནི་བོད་དབུས་གཙང་རུ་བཞིའི་ནང་གི་གཡོ་རུ་གྲ་ཕུ་སྟོད་གྲོང་ཞེས་པའི་སར། ངན་ལམ་རྒྱལ་བ་མཆོག་དབྱངས་ཀྱི་རིགས་རུས་ཟམ་མ་ཆད་པར་བརྒྱུད་པའི་མི་རབས་ཉི་ཤུ་རྩ་ལྔ་པ་ཡིན་ལ། རབ་གནས་ཕུར་བུ་ས་ཕོ་སྤྲེལ་གྱི་ལོའི་ཟླ་བ་གསུམ་པའི་ཚེས་བརྒྱད་ལ་འཁྲུངས་ཤིང་། ཆུ་མོ་ཡོས་ཀྱི་ལོའི་རྒྱལ་ཟླ་བའི་ཚེས་བཅོ་བརྒྱད་ལ་མངོན་པར་རྫོགས་པ་སངས་རྒྱས་པས། དགུང་ལོ་ལྔ་བཅུ་ང་དྲུག་གི་བར་དུ་ཞིང་འདིར་གཟུགས་སྐུའི་བཀོད་པ་དེས་འགྲོ་དོན་མཛད་དེ་གདུལ་བྱ་ཆོས་ཀྱིས་བསྐྱངས། གསང་ཆེན་གསང་བ་སྙིང་ཐིག་གི་བསྟན་པའི་ཤིང་རྟ་ཆེན་པོ་ལ། འཕགས་པའི་ཡུལ་ན་དགའ་རབ་རྡོ་རྗེ་དང་། བོད་ཀྱི་ཡུལ་ན་མཉམ་མེད་རྒྱལ་བ་ཀློང་ཆེན་པ་ཞེས་མཚན་ཉི་ཟླ་ལྟར་མིའི་འཇིག་རྟེན་འདིར་གྲགས་པ་ཙམ་གྱིས་མ་ཚད། ཞིང་ཁམས་མཐའ་ཡས་པ་ཀུན་ཏུ་གསང་བ་གསུམ་གྱི་སྒྱུ་འཕྲུལ་གྱིས་ཡོངས་སུ་ཁྱབ་ནས་ཡོད་པ་ཡིན། ཀློང་ཆེན་པ་ཐོག་མར་སྐུ་བལྟམས་ཚེ་ནམ་གྲུ་རེ་མ་ཏི་དངོས་སུ་བྱོན་ནས་བསྲུངས་པ་མཛད་པ་མཐོང་ཆོས་སུ་གྱུར་ཅིང་། སྐྱེ་བས་ཐོབ་པའི་མཁྱེན་རབ་ཕུལ་དུ་བྱུང་བ་མངའ་བས་དགུང་ལོ་ལྔར་སོན་ཚེ་ཡི་གེ་འབྲི་ཀློག་ཐམས་ཅད་མཁྱེན་པ་དང་། དགུང་ལོ་བདུན་གྱི་ཐོག་ནས་སྨན་རྩིས་ལ་སོགས་པའི་རིག་གནས་ལ་བསླབས་པར་མཛད། བཅུ་གཉིས་སུ་རབ་ཏུ་བྱུང་ནས་གྲྭ་སྐོར་དུ་བྱོན་པ་དང་གཞུང་བཤད་མཛད། དེ་ནས་རིམ་གྱིས་མདོ་སྔགས་རིག་གནས་དང་བཅས་པའི་གསན་སྦྱོང་ཐམས་ཅད་གཟིགས་པ་ཙམ་གྱིས་མཁྱེན་ནས་ཕྱོགས་མེད་ཀྱི་ཐོས་པ་བཙལ་བར་མཛད། དེ་དང་མཉམ་དུ་སྒྲུབ་པ་ཉམས་ལེན་གྱི་ཕྱོགས་ལ་དཀའ་སྤྱད་དང་སྙིང་རུས་ཚད་མེད་མཛད་པས། རིག་འཛིན་ཆེན་པོ་ཀུ་མཱ་ར་ཛའི་ཐུགས་བརྒྱུད་དགོངས་པའི་རྟོགས་པ་འཕོས། པད་འབྱུང་དང་བི་མས་ཞལ་གཟིགས། རྫས་གཏེར་དང་དགོངས་གཏེར་གྱི་རྒྱ་ཁྲོལ་ནས་ཟད་མི་ཤེས་པའི་ཆོས་མཛོད་ལ་མངའ་དབང་འབྱོར་བའི་བསྟན་པའི་མངའ་བདག་ཆེན་མོར་བཞུགས་ཤིང་། ཆོས་སྐུའི་རིང་བསྲེལ་གྱི་ཕུང་པོ་ཕྱི་རབས་སྐལ་ལྡན་གྱི་དོན་དུ་བཞག་པ་འདི་བཞིན་དུ་མཇལ་དུ་ཡོད་པ་ཡིན། ལེགས་ཉེས་ཀྱི་གནས་སྟོན་ཅིང་ཐུགས་བརྒྱུད་དགོངས་པའི་བྱིན་རླབས་འཕོ་བ་ལ་མན་ངག་བརྒྱུད་པ་དང་བཅས་པ་བཞག་ཡོད་པ་འདི་དག་མཇལ་ན་ཀློང་ཆེན་པ་ཞལ་དངོས་སུ་མཇལ་བ་དང་ཁྱད་མེད་པ་མ་ཟད། ཞལ་མཇལ་བ་རྐྱང་པ་ཙམ་ལས་ཀྱང་ལྷག་པ་ཡིན་ཏེ། དེ་དུས་ཁམས་ཀྱི་གྲྭ་ས་པ་ལ་ལས་མཇལ་བས་མི་ཚད་ཆོས་གྲོགས་ཀྱང་བྱེད་མྱོང་ཡང་། དམ་པ་ཡིན་པའི་ངོས་མ་ཟིན་ནས་ཞབས་ཏོག་བསྙེན་བཀུར་གྱི་བསོད་ནམས་བསག་མ་ཤེས་པའི་ལོ་རྒྱུས་ཉིད་ཀྱི་གསུང་ལས་མང་རབ་བྱུང་བ་ཡིན། རྒྱལ་བ་ཀློང་ཆེན་པའི་མདོ་ཕྱོགས་ཀྱི་འགྲེལ་ཊཱིཀ་མང་པོ་ཞིག་གི་དཔེ་རྒྱུན་འུ་ཚོ་བརྒྱུད་འཛིན་ཚོའི་ལག་ཏུ་མ་འབྱོར་ནས་དཔེ་རྒྱུན་ཆད་སོང་བ་དུ་མ་ཡོད་རབས་བཤད་པ་དང་། ད་ལྟ་མཇལ་དུ་ཡོད་པ་ལས་གཙོ་ཆེ་བ་གསང་སྔགས་རྫོགས་ཆེན་གྱི་སྐོར་ནས། རྒྱ་ཆེ་བ་པཎྜི་ཏའི་ལུགས་ལྟར་མཛད་པའི་ཀློང་ཆེན་མཛོད་བདུན་ལ་སོགས་པ་དང་། ཟབ་པ་ཀུ་སཱ་ལིའི་ལུགས་སུ་བཀྲལ་བའི་སྙིང་ཏིག་མ་བུ་གཉིས་སོགས་དང་། ཟབ་རྒྱས་གཉིས་ཀའི་གནད་ཚང་ལ་མ་ནོར་བ་བསྟན་པ་ངེས་དོན་ཤིང་རྟ་རྣམ་གསུམ་ལ་སོགས་པའི་ཆོས་མཛོད་ཆེན་པོ་བཞུགས་བཞིན་པ་འདི་དག་ཡིན། བརྒྱུད་འཛིན་བྱིན་རླབས་འཕོ་ཡུལ་གྱི་ཐུགས་ཀྱི་སྲས་སམ་རྒྱལ་བའི་དབང་པོ་དེ་ཉིད་ཀྱི་སྐུའི་སྐྱེ་བ་གཞན་གྱིས་གདུལ་བྱའི་དོན་མཛད་པ་ནི། ཀུན་མཁྱེན་ཕྱི་མ་ཀུན་མཁྱེན་འཇིགས་མེད་གླིང་པའམ་མཁྱེན་བརྩེའི་འོད་ཟེར་ཏེ། འདི་ཡབ་སྲས་ཀྱིས་རྫོགས་ཆེན་གྱི་བསྟན་པ་གཞིར་བཞེངས་སུ་བསླངས་ནས་ངེས་དོན་སྙིང་པོའི་ལམ་གྱི་སྲོལ་ཆེན་ཕྱེས་པའོ། །དེ་ལྟ་བུའི་བསྟན་བཅོས་རྩོམ་པ་པོའི་ཆེ་བ་སྔོན་དུ་སོང་བའི་ཐོག་ནས་བསྟན་བཅོས་རྩོམ་པ་ལ་འཇུག་པའི་ཡན་ལག་ལ། མཚན་སྨོས་པ། མཆོད་པར་བརྗོད་པ། རྩོམ་པར་དམ་བཅའ་བ་དང་གསུམ་ལས། དང་པོ་མཚན་ནི།

དང་པོ་མཚན་གྱི་དོན་བཤད་པ།

རྒྱ་གར་སྐད་དུ། །ཨུ་པ་དེ་ཤ་རཏྣ་ཀོ་ཥ་ནཱ་མ། འདི་ནི་བོད་གཞུང་ཁུངས་མ་ཡིན་པ་ལ་འདིའི་མཚན་རྒྱ་གར་སྐད་དུ་སྨོས་པ་ཅི་ཞེ་ན། རྒྱ་གར་འཕགས་པའི་ཡུལ། དབུས་འགྱུར་མ་ག་དྷཱ་རྡོ་རྗེའི་གདན་བསྐལ་བ་བཟང་པོ་འདིའི་སངས་རྒྱས་སྟོང་རྩ་བྱོན་པའི་གནས་ཁྱད་པར་ཅན་འདིར། བདག་ཅག་གི་སྟོན་པ་མཉམ་མེད་ཟས་གཙང་སྲས་པོ་སངས་རྒྱས་པས་མ་ཚད། རང་ཅག་མི་རྣམས་ཀྱི་སྣང་ངོར་ཆོས་ཀྱི་འཁོར་ལོ་རིམ་པ་གསུམ་རྒྱ་གར་སཾ་སྐྲྀ་ཏའི་སྐད་ཀྱིས་གསུངས་པ་ཡིན་པ་དང་། དེར་མ་ཟད་རང་རེ་བོད་ལ་དར་བའི་ཆོས་མདོ་རྒྱུད་མན་ངག་དང་བཅས་པ་མང་རབ་འདི་དག སྔར་བྱོན་ལོ་པཎ་བཀའ་དྲིན་ཅན་རྣམས་ཀྱིས་རྒྱ་གར་གྱི་སྐད་ཀྱི་སྟེང་ནས་ཚུར་བསྒྱུར་པ་མང་བ་ཡིན་པས། རྒྱུད་ལ་བྱིན་རླབས་འཇུག སྐད་ལ་བག་ཆགས་བཞག འཆད་ཉན་ལ་བར་ཆད་མེད་པ་དང་། ལོ་པཎ་རྣམ་པའི་བཀའ་དྲིན་མི་བརྗེད་པའི་ཆེད་ལ་སོགས་པའི་རྒྱུ་མཚན་མང་པོ་ལ་བརྟེན་ནས་འདིའི་མཚན་ཡང་རྒྱ་གར་སྐད་དུ་སྨྲས་པའོ། །འོ་ན་སངས་རྒྱས་བཅོམ་ལྡན་འདས་ཀྱིས། ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང༌། །འགྲོ་བ་ཀུན་གྱི་སྒྲ་རྣམས་ཇི་ཙམ་པར། །ཐམས་ཅད་སྐད་དུ་བདག་གིས་ཆོས་སྟོན་ཏོ། །ཞེས་གསུངས་པས་མིའི་སྐད་ཀྱི་བྱེ་བྲག་སཾ་སྐྲྀ་ཏའི་སྐད་འབའ་ཞིག་གིས་གསུངས་པ་ནི་མ་ཡིན་ནོ་སྙམ་ན། འགྲོ་བ་གཞན་དག་དྲི་ཟ་གྲུལ་བུམ་གྱི་སྐད་འུ་བུ་ཅག་གིས་གོ་བ་མ་ཡིན་པས་དེའི་ཁུར་ལེན་དགོས་པ་མིན་ཞིང་། སྐབས་ཐོབ་མི་རྣམས་ཀྱི་ངོར་མིའི་སྐད་དུ་གསུངས་པ་ལ་གོ་དགོས་སོ། །དེ་ཡང་ཨུ་པ་དེ་ཤ་རཏྣ་ཀོ་ཥ་ནཱ་མ་ཞེས་པ་འདི་བོད་སྐད་དུ་བསྒྱུར་ན། མན་ངག་རིན་པོ་ཆེའི་མཛོད་ཅེས་བྱ་བའོ། །སྐད་གཉིས་ཤན་སྦྱར་ན། ཨུ་པ་དེ་ཤ་མན་ངག རཏྣ་རིན་པོ་ཆེའི། ཀོ་ཥ་མཛོད། ནཱ་མ་ཅེས་བྱ་བ། མཚན་དོན་འགྲེལ་བ་ལ་མན་ངག་ཅེས་པ་ནི། ཚིག་དོན་རྒྱ་ཆེ་བ་མཐའ་དག་གནད་གཅིག་ཏུ་དྲིལ་ནས་ཉམས་སུ་ལེན་བདེ་བའམ་འཁྱེར་བདེ་སྤྱོད་བདེར་བྱས་པ་ནི་མན་ངག་སྟེ། ཚིག་ཉུང་དོན་ཟབ་མན་ངག་གོ །ཞེས་གསུངས་པའི་ཕྱིར། འདིར་མདོ་དང་རྒྱུད་སྡེའི་གནད་ཐམས་ཅད་ཚུར་བསྡུས་ནས་གང་ཟག་གཅིག་འཚང་རྒྱ་བའི་ལམ་གྱི་གནད་དུ་འཛིན་བདེ་བའི་ཁྱད་ཆོས་དང་ལྡན་པའི་མན་ངག་གོ །རིན་པོ་ཆེའི་མཛོད་ཅེས་པའི་རིན་པོ་ཆེ་ནི་འཇིག་རྟེན་འདི་ན་གང་དཀོན་པའི་དངོས་པོ་མི་ཐམས་ཅད་ཀྱིས་རིན་ཐང་ཆེན་པོར་བརྩི་བའི་དངོས་པོ་དེ་གང་ཡིན་ན། དེ་ལ་རིན་པོ་ཆེའི་མིང་ཙམ་ཐོགས་པ་མང་ན་ཡང་རིན་པོ་ཆེའི་དོན་བྱེད་ནུས་པའི་ཡིད་བཞིན་དུ་བསམ་པ་འགྲུབ་པར་བྱེད་པའི་ཁྱད་དུ་འཕགས་པ་ནི། ཡིད་བཞིན་ནོར་བུ་སྨོན་ལམ་གང་བཏབ་འགྲུབ་པ་དེ་ཡིན་ལ། འོན་ཀྱང་ཡིད་བཞིན་གྱི་ནོར་བུས་ཚེ་འདིའི་འཇིག་རྟེན་ལ། འདིར་སྣང་གི་ཟང་ཟིང་ཙམ་སྒྲུབ་པ་ལས་རང་གཞན་གཏན་བདེའི་དོན་ཆེན་མི་འགྲུབ་པ་ཡིན་པས་ན། དེ་བས་ཀྱང་ལྷག་པའི་མངོན་མཐོ་ངེས་ལེགས་ཀྱི་འབྲས་བུ་ཐམས་ཅད་སྐྱེད་པར་བྱེད་པས་ན་རིན་པོ་ཆེའི་མཛོད་ཅེས་འདྲ་བ་རྒྱུ་མཚན་དུ་བྱས་ནས་མཚན་བཏགས་པའོ། །མན་ངག་གི་གཞུང་འདི་ཉིད་སྐལ་བཟང་ཐར་འདོད་ཀྱི་གང་ཟག་གིས་ཉམས་སུ་བླངས་ན། ཚེ་རབས་གཏན་གྱི་རྒུད་པ་སེལ་ཞིང་། འགྲོ་བ་དབུལ་ཕོངས་ཀྱི་ཚོགས་ལ་ཟད་པ་མེད་པའི་ཆོས་ཆར་ཕབ་ནས། བསམ་རྒུ་ངང་གིས་འགྲུབ་པར་བྱེད་པས་དོན་དང་འབྲེལ་བའི་མཚན་ཡང་ཡིན། མན་ངག་ནི་བརྗོད་བྱ་དོན་གྱི་སྒོ་ནས་བཏགས་པ་དང་། རིན་པོ་ཆེའི་མཛོད་ནི་འདྲ་བ་དཔེ་ཡི་སྒོ་ནས་བཏགས་པའོ། །གཞུང་འདིའི་ནང་དུ་མདོ་རྒྱུད་ཀྱི་མན་ངག་ཐམས་ཅད་ཀྱི་གནད་མ་ཚང་བ་གཅིག་ཀྱང་མེད་པས་མན་ངག་རིན་པོ་ཆེའི་མཛོད་དོ། །མཚན་བཏགས་པའི་དགོས་པ་ནི་འཕགས་པ་ལངྐར་གཤེགས་པའི་མདོ་ལས། །མིང་དུ་གདགས་པར་མ་མཛད་ན། །འཇིག་རྟེན་ཐམས་ཅད་རྨོངས་པར་འགྱུར། །དེ་བས་རྨོངས་པ་བསལ་བའི་ཕྱིར། །མགོན་པོས་མིང་དུ་གདགས་པར་མཛད། །ཅེས་གསུངས་པ་ལྟར། མཚན་ཐོས་པ་དང་མཐོང་བ་ཙམ་གྱིས་ཀྱང་དབང་རབ་ཡིན་ན་གཞུང་དབུ་ཞབས་ཀྱི་དོན་ཁོང་དུ་ཆུད་པ་དང་། དབང་འབྲིང་ཡིན་ན་ཕྱོགས་གང་གཏོགས་ཤེས་པའི་དགོས་པ་དང་། དབང་ཐ་ཡིན་ཡང་གླེགས་བམ་འཚོལ་སླ་བ་དང་། མཚན་ཙམ་མཐོང་ཐོས་ཀྱིས་རྒྱུད་ལ་བྱིན་རླབས་དང་བག་ཆགས་ཁྱད་པར་ཅན་འཇོག་ཐུབ་པའི་དགོས་པ་ཡོད་དོ། །རྩིས་འགོ་ཡན་ལག་ལྔས་ཐོག་ནས་བཤད་ན། འདི་མཛད་པ་པོ་སུས་མཛད་ན་གོང་ནས་ཞུས་པ་ལྟར་ཀུན་མཁྱེན་རྒྱལ་བ་ཀློང་ཆེན་པས་མཛད། ལུང་གང་ལས་བཏུས་ན་སྤྱིར་མདོ་རྒྱུད་མན་ངག་ཐམས་ཅད་དང་སྒོས་རྫོགས་ཆེན་བཅུ་བདུན་རྒྱུད་ལས་བཏུས། ཕྱོགས་གང་དུ་གཏོགས་ན་ཐེག་ཆེན་མདོ་སྔགས་གཉིས་དང་། ཁྱད་པར་དུ་གསང་སྔགས་རྫོགས་པ་ཆེན་པོ་ལ་གཏོགས། དབུ་ནས་ཞབས་སུ་བསྡུས་པའི་དོན་གང་ཡིན་ན་གང་ཟག་གཅིག་ཚེ་གཅིག་ལུས་གཅིག་ལ་འཚང་རྒྱ་བའི་གནད་ཀྱི་མན་ངག་ཐམས་ཅད་དྲུག་ཚན་གྱི་སྒོ་ནས་གསུངས་པ་ཞིག་ཡིན། དགོས་ཆེད་སུ་ཞིག་གི་ཆེད་དུ་མཛད་པ་ཡིན་ན་སྤྱིར་ཐར་ལམ་རྣམ་དག་དོན་གཉེར་གྱི་ཐེག་པ་ཆེན་པོའི་རིགས་ཅན་དང་། ཁྱད་པར་སྔགས་ལ་ཞུགས་ནས་སྨིན་གྲོལ་ཁྱད་པར་ཅན་གྱི་ལམ་ལ་བརྟེན་ཏེ་རིག་འཛིན་བཞིའི་གསང་ལམ་ནས་སྐུ་བཞིའི་གོ་འཕང་སྒྲུབ་པར་འདོད་པ་དང་། ཡང་སྒོས་སུ་རྫོགས་ཆེན་སྒོམ་པའི་རྣལ་འབྱོར་པ་ལས་དང་པོ་པ་ཞིག་ལམ་དུ་ཞུགས་ནས་ཉམས་མྱོང་གི་དྲོད་ཚད་ངེས་ཅན་ཐོབ་པ་ལ་སོགས་པ་རྫོགས་པ་ཆེན་པོའི་གདུལ་བྱའི་ཆེད་དུ་བསྟན་པ་ཡིན་ལ། འདིའི་དགོས་འབྲེལ་ཡན་ལག་བཞི་ཡང་དེ་མཚུངས་ཀྱིས་གོ་ཐུབ་ལ། དེས་མཚན་སྨོས་པ། སྐད་གཉིས་ཤན་སྦྱར་བ། མཚན་དོན་བཀྲལ་བ་ལ་སོགས་པ་སོང་ནས། གཉིས་པ་མཆོད་པར་བརྗོད་པ་ལ་གཉིས་ལས། དང་པོ་ཕྱག་འཚལ་བ་ནི།

དང་པོ་ཕྱག་འཚལ་བ་བསྟན་པ།

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།།

ཞེས་པ་སྟེ་ཐོག་མར་ཕྱག་འཚལ་བ་བྱུང་བ་ནི་རྒྱ་ཆོས་བོད་དུ་འགྱུར་བའི་སྐབས་སུ་བཀོད་པའི་འགྱུར་ཕྱག་ཏུ་གྲགས་པ་ཞིག་ཡོད་ལ། དེ་ནི་ལོ་པཎ་རྣམ་པས་མཛད་པ་ཡིན་ཞིང་དེ་ལ་རྒྱལ་པོ་བཀས་བཅད་ཀྱི་ཕྱག་དང་སྡེ་སྣོད་ངོས་འཛིན་གྱི་ཕྱག་ཀྱང་ཟེར། འདིར་བརྗོད་བྱ་མདོ་དང་རྒྱུད་སྡེའི་གནད་བསྡུས་ཏེ་མན་ངག་ཏུ་སྟོན་པའི་གཞུང་ཡིན་པས་སངས་རྒྱས་དང་བྱང་ཆུབ་སེམས་དཔའ་ལ་ཕྱག་འཚལ་ཞིང་། འདིའི་དོན་ཐུན་མོང་ལྟར་ན་མ་རིག་པའི་གཉིད་ལས་སངས་ཤིང་ཤེས་བྱ་ལ་མཁྱེན་པའི་བློ་གྲོས་རྒྱས་པའི་སྤངས་རྟོགས་མཐར་ཕྱིན་རྫོགས་པའི་སངས་རྒྱས་སྐྱོན་ཀུན་ཟད་ཡོན་ཏན་ཀུན་ལྡན་གྱི་བདག་ཉིད་དོ། །ཐུན་མིན་ལྟར་དུ་བྱས་ན་སྐུ་བཞི་ཡེ་ཤེས་ལྔ་ཡི་བདག་ཉིད་སྐུ་དང་ཡེ་ཤེས་རྒྱ་མཚོའི་ཁྱབ་བདག་ཏུ་བཞུགས་པའི་རྒྱལ་བ་རྫོགས་པའི་སངས་རྒྱས་དང་། དེའི་སྲས་བྱང་ཆུབ་སེམས་དཔའ་ཕྱིན་དྲུག་བསྡུ་དངོས་བཞི་ལ་སོགས་པའི་ཐབས་ཤེས་ཟུང་འབྲེལ་གྱི་ལམ་མཐའ་དག་ལ་བྱང་ཞིང་ཆུབ་པ་དང་། འགྲོ་མང་གི་མཐའ་དང་བསྐལ་བའི་ཡུན་ལ་སོགས་པ་བྱ་དཀའི་སྤྱོད་པ་མཐའ་ཡས་པའི་རྫོགས་སྨིན་སྦྱངས་པ་རྒྱ་མཚོ་ལྟ་བུ་ལ་སྐྱོ་སེམས་མེད་པའི་སེམས་དཔའ། ཕྱོགས་དང་དུས་ཀྱིས་བསྡུས་པའི་རྒྱལ་བ་སྲས་བཅས་ཐམས་ཅད་ལ་སྒོ་གསུམ་གུས་པས་ཕྱག་འཚལ་བའོ།།

གཉིས་པ་མཆོད་པར་བརྗོད་པ་དངོས་བཤད་པ།

ཐུགས་རྗེ་མཆོག་གི་ཡེ་ཤེས་གྲུ་ཆེན་གྱིས།།

སྲིད་གསུམ་རྒྱ་མཚོའི་ཕ་རོལ་ཕྱིན་གྱུར་ཅིང་།།

དེད་དཔོན་ཡིད་བཞིན་ས་མཐོར་རབ་གཤེགས་པའི།།

རྒྱལ་བ་སྲས་བཅས་རྣམས་ལ་ཕྱག་འཚལ་ལོ།།

ཞེས་པའི་ཤོ་ལོ་ཀ་འདིས་མཆོད་པར་བརྗོད་པ་བསྟན་ལ་འདིའི་དགོས་པ་ནི། ཇི་སྐད་དུ། བསྟན་བཅོས་བྱེད་པོས་སྟོན་པ་ལ། །མཆོད་པར་བརྗོད་པ་འབྲས་མེད་མིན། །སྟོན་པ་དང་ནི་བསྟན་བཅོས་ལ། །དད་འདུན་བསྐྱེད་པར་བྱ་ཕྱིར་རོ། །ཞེས་གསུངས་པ་ལྟར་རོ། །མཆོད་པར་བརྗོད་པ་ནི་གང་མཆོད་པར་བརྗོད་ཡུལ་གྱི་མཚན་སྨྲོས་པའི་སྒོ་ནས་ཡོན་ཏན་བརྗོད་པ་སྟེ། དེ་ལ་ཡང་། འགྲོ་བའི་བླ་མས་དེང་འདིར་ཤིས་པ་སྩོལ། །ཞེས་པ་ལྟ་བུ་ཤིས་པ་སྐུལ་བའི་ཚིག་གི་མཐའ་ཅན་གྱི་མཆོད་པར་བརྗོད་པ་དང་། གང་ཞབས་སོར་མོས་རེག་པའི་རྡུལ་དམར་བརྩི། །ཟུར་ཕུད་ནོར་བུའི་གཙུག་ན་རྟག་ཏུ་མཆོད། །ཅེས་བཀུར་སྟི་ཕུ་དུད་ཀྱི་མཐའ་ཅན་གྱི་མཆོད་བརྗོད་ལ་སོགས་པ་ཡོད་པ་ལས་འདི་ནི་ཕྱག་འཚལ་བའི་མཐའ་ཅན་གྱི་མཆོད་བརྗོད་དང་། གོང་གི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ་ཞེས་པ་ནི་ཕྱག་འཚལ་བ་དངོས་སོ། །ཐུགས་རྗེ་མཆོག་གི་ཡེ་ཤེས་གྲུ་ཆེན་གྱིས། །ཞེས་བརྗོད་ན་ཐུགས་རྗེ་ལ་མཆོག་དམན་ཡོད་དམ་ཞེ་ན། ཡོད་དེ་ཐེག་དམན་ཉན་རང་གི་རྒྱུད་དུ་ཡང་ཐུགས་རྗེའམ་སྙིང་རྗེ་ཡོད་ཀྱང་ཡུངས་འབྲུ་སྲིན་གྱིས་ཟོས་པའི་ནམ་མཁའ་དང་ཕྱིའི་ནམ་མཁའ་ཆེན་པོའི་ཁྱད་པར་ལྟར་དུ་ཆེ་ཆུང་གི་ཁྱད་ཆེ་བས། ཐུགས་རྗེ་ཙམ་གྱི་སྒྲ་འཇུག་པ་ལ་ཁྱད་མེད་ཀྱང་ཐུགས་རྗེ་ལ་མཆོག་དམན་ཡོད་པས་ཉན་རང་གི་རྒྱུད་ལ་ཡོད་པའི་ཐུགས་རྗེ་དེ་མཆོག་མིན་པར་མ་ཟད། རྒྱལ་སྲས་བྱང་ཆུབ་སེམས་དཔའ་རྣམས་ལའང་ས་དང་ལམ་གྱི་ཡོན་ཏན་རྒྱ་ཆེན་པོ་ཡོད་ཀྱང་། སངས་རྒྱས་ཀྱི་སའི་ཟག་མེད་ཀྱི་ཆོས་སྡེ་ཚན་ཉེར་གཅིག་ཏུ་བགྲངས་བའི་སྟོབས་དང་མི་འཇིགས་པ་ལ་སོགས་པ་མེད་པ་དེའི་ཕྱིར་ན་སངས་རྒྱས་ཀྱི་རྣམ་མཁྱེན་གྱི་ཡེ་ཤེས་དེ་མཆོག་ཡིན། དེའི་ཡེ་ཤེས་ཀྱི་གྲུ་ཆེན་གྱིས། སྲིད་གསུམ་རྒྱ་མཚོའི་ཕ་རོལ་ཕྱིན་གྱུར་ཅིང་། །ཞེས་གསུངས་པ་ནི་གྲུ་དང་། རྒྱ་མཚོ་དང་། དེད་དཔོན་དང་། ཡིད་བཞིན་གྱི་སྐམ་ས་རྣམས་གཟུགས་ཅན་གྱི་རྒྱན་དུ་བཀོད་ནས་གསུངས་པ་སྟེ། སྲིད་པ་ཁམས་གསུམ་འཁོར་བའི་སྡུག་བསྔལ་གྱི་རྒྱ་མཚོ་ཆེན་པོ་བརྒལ་དཀའ་བ་དེའི་ཕ་རོལ་ཐར་བའི་སྐམ་སར་ཕྱིན་པར་གྱུར་ཀྱང་ཞེས། སྲིད་གསུམ་རྒྱ་མཚོའི་ཕ་མཐར་ཕྱིན་ཟིན་པ་རྒྱལ་བ་རྣམས་དངོས་སུ་བསྟན་པའི་ཞར་ལ། ཕྱིན་པར་འགྱུར་བ་རྒྱལ་སྲས་རྣམས་ཤུགས་ཀྱིས་བསྟན་པའོ། །དེད་དཔོན་ཡིད་བཞིན་ས་མཐོར་རབ་གཤེགས་པའི། །ཞེས་པ་ནི་མཐའ་ཡས་སེམས་ཅན་ཐམས་ཅད་གནས་སྐབས་མངོན་མཐོ་དང་མཐར་ཐུག་ངེས་ལེགས་ཀྱི་ལམ་ལ་བགྲོད་པ་ནི་རྒྱལ་བ་སྲས་བཅས་ལ་བརྟེན་ནས་དེ་དག་གིས་འདྲེན་པར་བྱེད་པས་ན་དེད་དཔོན་ཏེ། དེ་ལྟ་བུའི་འགྲོ་བ་དམུས་ལོང་གི་ས་མཁན། ལམ་སྟོན་གྱི་སྒྲོན་མེ། འཁོར་བའི་རྒྱ་མཚོ་ལས་སྒྲོལ་བའི་དེད་དཔོན་གྱིས་ཡིད་བཞིན་དུ་སྨོན་པའི་གནས། རྒྱ་མཚོ་དང་བྲལ་བའི་སྐམ་སའི་ས་མཐོའི་ལམ་སྟེགས་མཆོག་འབྲས་བུ་མཐར་ཐུག་བརྙེས་ཟིན་པའམ་བརྙེས་བཞིན་པའི་རྒྱལ་བ་དང་། དེའི་སྲས་ལ་སྐུ་སྲས་སྒྲ་གཅན་འཛིན། གསུང་སྲས་ཉན་རང་དགྲ་བཅོམ། ཐུགས་ཀྱི་སྲས་བྱང་ཆུབ་སེམས་དཔའ་རྣམས་ལས་སྐབས་འདིར། བྱང་ཆུབ་སེམས་ནི་རྒྱལ་སྲས་རྣམས་ཀྱི་རྒྱུ། །ཞེས་གསུངས་པའི་གནད་དེའི་དབང་གིས་ཐུགས་སྲས་བྱང་ཆུབ་སེམས་དཔའ་ཁོ་ན་ལ་གོ་དགོས་པ་ཡིན་པས། དེ་ལྟ་བུའི་རྒྱལ་བ་སྲས་དང་བཅས་པ་རྣམས་ལ་ཕྱག་འཚལ་བའོ།།

གསུམ་པ་རྩོམ་པར་དམ་བཅའ་བ།

གསུམ་པ་རྩོམ་པར་དམ་བཅའ་བ་ནི།

སྐལ་བཟང་རབ་མཆོག་ཐར་པ་འདོད་རྣམས་ལ།།

མདོ་རྒྱུད་མན་ངག་སྙིང་པོའི་བཅུད་བསྡུས་ཏེ།།

ཡང་ཟབ་གནད་རྣམས་མ་ལུས་བསྟན་པ་ནི།།

དྲུག་ཚན་དྲུག་གིས་བཤད་ཀྱིས་གུས་པས་ཉོན།།

ཞེས་གསུངས་པ་སྟེ། དེ་ལ་ཐོག་མར་སྣོད་ངོས་བཟུང་ནས་བསྟན་པ་སྟེ། སྤྱིར་སངས་རྒྱས་བསྟན་པའི་ཆོས་སྒོ་ལ་ཞུགས་ནས་དམ་པའི་ཆོས་དང་འཕྲད་པ་དེ་སྐལ་བ་བཟང་པོ་ཡིན་ཡང་། འདིར་སྐལ་བཟང་རབ་མཆོག་ཅེས་གསུངས་པས་སྐལ་བ་བཟང་པོ་དེ་ལ་ཡང་དམན་འབྲིང་རབ་གསུམ་གྱི་དབྱེ་བ་དང་། རབ་དེ་ལ་ཡང་ཐ་འབྲིང་རབ་གསུམ་ཕྱེས་པའི་རབ་ཀྱི་མཆོག་གམ་རྩེ་མོ་གྱུར་པ། ཐར་བའི་མཆོག་རྫོགས་པའི་སངས་རྒྱས་ཀྱི་གོ་འཕང་ཐོབ་པར་འདོད་པའི་གང་ཟག་སྐལ་ལྡན་དེ་རྣམས་ལ། མདོ་རྒྱུ་མཚན་ཉིད་ཐེག་པའི་ཐེག་དམན་ཉན་རང་ནས་ཐེག་ཆེན་དབུ་སེམས་ཀྱི་བར་དང་། རྒྱུད་གསང་སྔགས་ཕྱི་ནང་དང་ཡང་གསང་རྫོགས་པ་ཆེན་པོ་ཐེག་དགུའི་རྩེ་མོར་གྱུར་པ་མན་ཆད་ཀྱི་གཞུང་ལུགས་ཐམས་ཅད་གདམས་པར་ཤར་བའི་མན་ངག་གི་སྙིང་བཅུད་བསྡུས་ཏེ། དེ་ལྟ་བུའི་མ་ཀི་ཉན་ཐོས་ཀྱི་ཐེག་པ་ནས་ཡ་ཀི་རྫོགས་པ་ཆེན་པོ་མན་ཆད་ཀྱི་གདམས་པའི་སྙིང་པོ་ཟབ་པའི་ནང་གི་ཡང་ཟབ་ཀྱི་གནད་རྣམས་ཐམས་ཅད་མ་ལུས་པ། ལས་དང་པོ་བའི་གང་ཟག་དང་། ཉམས་ལེན་གྱི་དྲོད་ཚད་གང་འཚམས་རྙེད་པ་ནས་མཐར་ཐུག་སངས་རྒྱས་ཀྱི་ས་ཐོབ་ལ་ཉེ་བ་མན་ཆོད་ཀྱི་གང་ཟག་མཆོག་དམན་ཐམས་ཅད་སྨིན་ཅིང་གྲོལ་བའི་ཆེད་དུ་བསྟན་པ་ནི། བརྗོད་བྱ་མདོ་རྒྱུད་ཀྱི་གནད་ཐམས་ཅད་པོ་མན་ངག་དྲུག་ཚན་དུ་བསྡུས་པ་དེ། རྗོད་བྱེད་དྲུག་ཚན་གྱི་ཚོམས་ཀྱིས་བཅད་ནས་བཤད་པར་བྱ་ཞེས་རྩོམ་པར་དམ་བཅས་པའོ། །རྩོམ་པར་དམ་བཅའ་བ་འདི་ནི་དམ་པས་ཁས་བླངས་ཤིང་ཞལ་གྱིས་འཆེས་ཟིན་དུས་དེ་ལས་ལྡོག་པ་མིན་པ་དང་། ཕལ་བ་ཡིན་ཡང་རྩོམ་པར་དམ་བཅས་ན་རྩོམ་ལྡོག་གི་ཉེས་པ་མི་འབྱུང་བའི་རྒྱུ་རུ་འགྱུར་བ་ལ་སོགས་པའི་དགོས་པ་ཡོད་དོ། །དེ་ནས་གུས་པས་ཉོན་ཞེས་སྐལ་བཟང་གི་སློབ་མ་ལ་དོན་ཆེན་ཡལ་བ་མ་དོར་བར་ཉོན་དང་རང་གཞན་ཀུན་ལ་ཕན་པའི་དོན་འབྲས་འབྱུང་བར་ཤུགས་ཀྱིས་བསྟན་པའི་སྒོ་ནས་སྐལ་ལྡན་ཆོས་ལ་བསྐུལ་བའོ།།

གཉིས་པ་བརྩམ་བྱ་བསྟན་བཅོས་ཀྱི་ལུས་དངོས་བཤད་པ།

༡ ཐོག་མར་འཇུག་པའི་ཆོས་དྲུག་བསྟན་པ།

ཐོག་མར་ཆོས་ལ་འཇུག་ཅིང་སྒྲུབ་པའི་མཐུན་རྐྱེན་གྱི་ཆོས་དྲུག་ཚན་དྲུག་དང་། ངེས་འབྱུང་སྐྱོ་ཤས་སྐུལ་བའི་ཆོས་དྲུག་ཚན་དྲུག་གི་སྤྱིའི་འཇུག་ཚུལ་བསྟན་པ་ལས། དང་པོ་ནི།

དེ་ལ་ཐོག་མར་འཇུག་པའི་ཆོས་དྲུག་ནི།།

ལམ་གྱི་གཞི་རྟེན་བསླབ་གསུམ་བསྲུང་བ་དང༌།།

སྣ་ཚོགས་ཐོས་བསམ་ཕྱོགས་མེད་བྱ་བ་དང༌།།

སྒོ་གསུམ་ཞི་ཞིང་རང་རྒྱུད་གདུལ་བ་དང༌།།

སྡིག་ལ་འཛེམ་ཞིང་དགེ་བ་སྤེལ་བ་དང༌།།

ངོ་ཚ་ཁྲེལ་ཡོད་དད་པ་བསྐྱེད་པ་དང༌།།

དགེ་བའི་བཤེས་དང་དགེ་གྲོགས་བསྟེན་པ་སྟེ།།

དང་པོའི་ལས་ཅན་རྣམས་ལ་ཤིན་ཏུ་གཅེས།།

ཞེས་གསུངས་ཏེ། ཐོག་མར་ལམ་ལ་འཇུག་པའི་གནས་སྐབས་ན་དགོས་པའི་ཆོས་དྲུག་པོ་དེ་གང་ཡིན་ན། ལམ་ཞུགས་ལས་དང་པོ་པ་ཞིག་ལ་ཚད་གཞི་རུ་འཕངས་ནས་གསུངས་པས། ལམ་གནད་ཐེག་པ་ཆེ་ཆུང་གི་མདོ་ནས་སྔགས་རྒྱུད་སྡེ་དྲུག་དང་བཅས་པའི་གནད་དེ་དག གང་ཟག་གཅིག་ལ་ཡར་ལྡན་དུ་རྫོགས་པའི་དགོས་གནད་དང་བསྟུན་ནས་གསུངས་པ་སྟེ། དེ་ཡང་དཔེར་ན་མི་ཞིག་སྐྱེད་སྲིང་བྱ་བའི་ཚུལ་ལ་དཔེར་བྱས་ནས་བཤད་ན། དང་པོ་བྱིས་པ་གོམ་ཁ་མི་ཐུབ་པ་ཞིག་ལ་རྒྱུག་ཚུལ་དང་མཆོང་ཚུལ་བསླབས་ཀྱང་དོན་གྱིས་སྟོང་པ་ཡིན་ལ། དེ་ལས་ཁོ་རང་ལ་ལག་མགོ་གཏད་ནས་གོམ་པ་སྤོ་ཚུལ་བསླབས་ན། དེ་ནི་དེ་ལ་རན་པའི་ཕན་ཐོགས་ཡོད་ཤག་ཤག་གི་ཐབས་ཡིན་པ་བཞིན་དུ། ལས་དང་པོ་པ་ལ་རྒྱ་ཆེ་ས་རྒྱང་རིང་ས། ས་དང་ལམ་གྱི་མངོན་རྟོགས་མཐོན་པོ་ནས་བཤད་ན་ཐོས་པའི་ཤེས་རབ་བསྐྱེད་ཅིང་མ་རིག་པའི་མུན་པ་སེལ་བར་གྲགས་ཀྱང་། བཤད་པ་ཚིག་གི་རོ་ཁོ་ན་ལ་གཡེངས་ནས་དོན་ལ་མ་ཁེལ་ན་ཕན་ཐོགས་མེད་པ་ཡིན་ཏེ་། མི་གཡོ་དོན་ལ་མཁས་ན་མཁས་པ་ཡིན། །ཞེས་གསུངས་པའི་ཕྱིར། ཉམས་ལེན་མན་ངག་གི་གནད་ལ་བསྣུན་ནས་དངོས་ཡོད་གནས་ཚུལ་དང་མཐུན་པར་རང་གི་རྒྱུད་ཐོག་ལ་འབྱོར་དགོས་པ་ལས། མཐོ་བཤད་བྱས་པ་ཙམ་གྱིས་མ་མཐོང་རྒྱང་གི་གཏམ་སྙན་དུ་གྱུར་ནས་ཕན་འབྲས་ཀྱིས་དབེན་པ་ཡིན། འདིར་ལས་དང་པོ་པ་ནས་བཟུང་མཐར་ཐུག་སངས་རྒྱས་ཀྱི་ས་བརྙེས་པའི་བར་གྱི་གཞི་ལྟ་བ། ལམ་སྒོམ་པ། འབྲས་བུ་ཐོབ་བྱ་དང་བཅས་པ་གསུངས་ཡོད་པས། རང་རེ་ཅག་ལས་དང་པོ་པ་སྨོས་ཅི་དགོས་ལམ་རྟགས་ཀྱི་ཡོན་ཏན་སྣ་རེ་སྣ་གཉིས་བརྙེས་པ་དག་གིས་ཀྱང་། འདིའི་འགོ་ནས་མར་རང་རྒྱུད་དང་སྦྱར་བཞིན་སོང་ན་རང་རྒྱུགས་རང་ལ་འཕྲོད་པ་དང་རང་རྒྱུས་རང་གིས་ལོན་པ་ཞིག་ཡོང་བ་ཡིན་པས་ཐོག་མར་འཇུག་པའི་ཆོས་དྲུག་བསྟན་པ་ལ། བསླབ་པ་ཚུལ་ཁྲིམས་དང་། ཏིང་འཛིན་དང་། ཤེས་རབ་གསུམ་པོ་དེ་ལ་ལྷག་པའི་བསླབ་པ་རྣམ་པ་གསུམ་ཞེས་གསུངས་ལ། ལྷག་པའི་བསླབ་པ་ཞེས་པའི་དོན་ནི་ཁྱི་དང་བ་ལང་གི་བརྟུལ་ཞུགས་འཛིན་པ་དང་། ཉི་མ་དང་ཟླ་བ་ལྷར་མཆོད་པ་ལ་སོགས་པ་ཕྱི་རོལ་བ་ལ་ཡོད་ཀྱང་ལམ་དེས་ནི་ཐར་པ་དང་ཐམས་ཅད་མཁྱེན་པ་མི་འཐོབ་པ་དང་། ནང་པ་སངས་རྒྱས་པའི་ལམ་ལྷག་པའི་བསླབ་པས་ནི་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་པར་བྱེད་པས། ཁྱད་དུ་འཕགས་པའི་བསླབ་པ་ཡིན་པས་ལྷག་པའི་བསླབ་པ་ཞེས་བྱ་ལ། བརྗོད་བྱ་བསླབ་པ་གསུམ་གྱི་རྗོད་བྱེད་འདུལ་བ་མདོ་སྡེ་མངོན་པ་གསུམ་ཡིན་པས། དེའི་བསྟན་དོན་སོ་བྱང་སྔགས་གསུམ་གྱི་སྡོམ་པ་དང་། བསླབ་བྱ་དང་། དམ་ཚིག་ལ་གནས་པ་དེ་ཐར་བ་མཆོག་གི་ལམ་ལ་ཞུགས་པའི་གཞི་རྟེན་ཡིན་པས། བསླབ་གསུམ་མིག་གི་འབྲས་བུ་བཞིན་དུ་བསྲུང་བ་ནི་མན་ངག་གི་གཞུང་འདིའི་དྲུག་ཚན་ཐམས་ཅད་ཀྱི་ཐོག་མའི་མགོར་བཞག་ནས་གསུངས་ཡོད། འདིར་བཞུགས་ཀྱི་ཇོ་སེར་རབ་ཏུ་བྱུང་བ་དག་སྨོས་ཅི་དགོས། སྔགས་ཕོ་མོ་དགེ་བསྙེན་དང་བཅས་པས་ཀྱང་སོ་ཐར་རིགས་བདུན་གང་རུང་གི་བསླབ་གཞི་མནོས་ནས་སྡོམ་པ་རེ་བླངས་ཡོད་པ་ཡིན། འོན་ཀྱང་དེ་ཐེག་པ་ཆེ་ཆུང་གི་སོ་ཐར་གྱི་སྡོམ་པའི་གྲས་སུ་འགྲོ་བར་བྱེད་པ་ལ། ངེས་འབྱུང་གི་ཀུན་སློང་བརྟན་པོ་ཞིག་མེད་པའི་ཐབས་མེད་ཡིན་ཏེ། ངེས་འབྱུང་གི་བསམ་པས་རྩིས་མ་ཟིན་པའི་སོར་སྡོམ་ཞུས་པ་ནི། སྒྲ་ཙམ་འཇུག་པའི་སྡོམ་པའི་གཟུགས་བརྙན་ཙམ་ལས་སྡོམ་པ་རྣམ་དག་གི་གྲས་སུ་འགྲོ་བ་མིན་པའི་ཕྱིར། དེ་ཡང་ངེས་འབྱུང་ཞེས་པ་དེ་འཁོར་བ་སྡུག་བསྔལ་ཆེའོ་སྙམ་པ་ཙམ་ལ་ཟེར་བ་མིན་པར། ཁམས་གསུམ་རིགས་དྲུག་གི་འཁོར་བའི་ཆོས་ཐམས་ཅད་ལ་ཞེན་པ་གཏིང་ནས་ལོག་པ། སྐྱུག་ནད་ཅན་ལ་བཙོ་ཟན་བྱིན་ན་ཟ་མི་འདོད་པ་ལྟ་བུའི་ཞེན་ལོག་རྒྱུད་ལ་སྐྱེས་ནས་ཐར་ལམ་དོན་དུ་གཉེར་པ་ཞིག་ལ་ཟེར་བས། ངེས་འབྱུང་སྐྱེས་བཞིན་དུ་ཆོས་བརྒྱད་དོན་གཉེར་བྱེད་པ་ཞིག་ནི་མི་སྲིད་པ་ཡིན། དེས་ན་ངེས་འབྱུང་ཞིག་ལ་དོན་གཉིས་ཚང་དགོས་ཏེ། དང་པོ་འཁོར་བ་མཐའ་དག་སྡུག་བསྔལ་དུ་ཤེས་ནས་དེ་ལ་སྐྱོ་ཤས་ཡོད་པ་དང་། གཉིས་པ་དེ་ལས་ཐར་བའི་ཐར་བ་བྱང་ཆུབ་གསུམ་གང་རུང་ཐོབ་པར་འདོད་པའི་བློ་བཅོས་མ་མིན་པ་ཡོད་པའོ། །དེ་འདྲའི་དོན་གཉིས་ཚང་བའི་ངེས་འབྱུང་མ་ཡོད་ན། སྡོམ་པ་ཞུ་མདོག་བྱས་པ་དེ་ཡང་གཟུགས་བརྙན་ཙམ་དུ་སོང་ཡོད་མེད་རང་གིས་མ་གཏོགས་མི་ཤེས་པའི་ཚད་ལ་ཐོན་ནས་ཡོད་པ་ཡིན། མན་ངག་ཉམས་ལེན་གྱི་གནད་ལ་ཕབ་ཡོང་ཚེ་རེ་རེ་བཞིན་དུ་བརྟག་དཔྱད་བྱས་ནས་རང་གི་རྒྱུད་དང་སྦྲེལ་ནས་ལམ་ལ་སློབ་དགོས། དེའི་དུས་སུ་མ་ཡིན་ཡིན་མདོག་བྱས་ན་རང་གིས་རང་ལ་མགོ་གཡོགས་པ་ཡིན། མི་མགོ་སྐོར་ན་སྐོར་ཆུང་། །རང་མགོ་སྐོར་ན་སྐོར་ཆེན། །ཟེར་བ་ལྟར་ཡིན་པས། ཚེ་ཕྱི་མ་ལ་བསམ་བློ་བཏང་ནས་ཕྱི་མའི་འགྲོ་ཆས་ལ་ཆོས་མིན་གཞན་གྱིས་ཕན་མི་འདུག དེའི་དུས་སུ་ཕས་མི་སྐྱོབ་ལ་མས་ཀྱང་མི་སྐྱོབ་ཅིང་། ཕུ་ནུ་གཉེན་འདུན་གྲོང་རོགས་ཁྱིམ་མཚེས་སུས་ཀྱང་མི་སྐྱོབ་པས། ད་ནས་རང་བསམ་རང་གིས་མ་བཏང་ན་མི་རིགས་སོ་སྙམ་པ་ཞིག་དགོས་པ་ཡིན། དེ་ཡང་རྒྱལ་པོ་ལ་གདམས་པའི་མདོ་ལས། ཆོས་མ་གཏོགས་པའི་སྐྱབས་གཞན་མེད། མགོན་གཞན་མེད། དཔུང་གཉེན་གཞན་མེད་དོ། །རྒྱལ་པོ་ཆེན་པོ་དེའི་ཚེ་དེའི་དུས་ན། ཆོས་ནི་གླིང་དང་། གནས་དང་། མགོན་དང་། སྟོན་པར་འགྱུར་རོ། །རྒྱལ་པོ་ཆེན་པོ། དེ་ལྟ་བུའི་དུས་ན། རང་ཉིད་མལ་ན་ཉལ་བཞིན་དུ། ཕྱི་མའི་སྣང་བ་ཉམས་སུ་མྱོང་སྟེ་ངན་སོང་དུ་འགྲོ་ན། དེ་གནས་ལ་འཇིགས་པའི་སྣང་བ་འབྱུང་སྟེ། དེའི་ཚེ་ཆོས་མ་ཡིན་པ་ཅི་ཞིག་ཀྱང་སྐྱབས་སུ་གྱུར་པ་མེད་དོ། །ཞེས་གསུངས་པའི་ཕྱིར། འུ་ཚོས་མ་ནམ་མཁའ་དང་མཉམ་པའི་སེམས་ཅན་ཞེས་རྒྱུན་པར་རྗོད་ཀྱིན་ཡོད་ཀྱང་། དང་པོ་རང་གིས་རང་གཅེས་མི་ཤེས་མཁན་ཞིག་གིས་གཞན་ལ་གཅེས་པ་བྱེད་པ་ཡིན་ཟེར་ན་དོན་ལ་མེད་པའི་ཁ་ཟེར་ཙམ་ཞིག་ལས་མ་འདས་པས། དང་པོར་རང་གིས་རང་ལ་གཅེས་ཤེས་པ་དེ་གལ་ཆེ་བ་ཡིན། དེ་ཡང་རང་དོན་གྱི་ལས་ཀ་ཚེ་འདིའི་བྱ་བཞག་ཆུང་ཆུང་ཙམ་ཞིག་ཡིན་རུང་། ཞིབ་ཚགས་ཀྱི་ཐོག་ནས་བློ་འཁེལ་བ་ཞིག་དང་སྤུས་དག་པོ་ཞིག་མ་ཐོན་ཡང་ཨེ་ཐོན་ལྟ་ཁུལ་བྱེད་པ་ཡིན་ན། ཚེ་འདི་ཕྱིའི་གཉིས་ཀའི་དོན་ཆེན་ནི་དེ་བས་གནད་ཆེན་ཡིན་པ་སྨོས་མ་དགོས་པས། མན་ངག་ཉམས་ལེན་གྱི་སྐབས་སུ་རང་རྒྱུད་ཀྱི་བསླབ་པ་ལ་བརྟགས་ཤིང་དཔྱད་པ་ནི་ཤིན་ཏུ་གལ་ཆེ་བ་ཡིན། དེ་བཞིན་དུ་བྱང་སེམས་ཀྱི་བསླབ་པའི་ཐད་ནས་ཀྱང་། བྱང་སྡོམ་བླངས་པ་ཙམ་གྱིས་ཐོབ་ཡོད་པའི་ངེས་པ་མེད་དེ། སེམས་བསྐྱེད་སྔོན་དུ་སོང་མེད་ན་རགས་པ་བརྡ་ལས་བྱུང་བའི་ཀུན་རྫོབ་སེམས་བསྐྱེད་ཙམ་ཡང་ཐོབ་མེད་པས་ཕྲ་བ་ཆོས་ཉིད་ཀྱིས་ཐོབ་པའི་དོན་དམ་སེམས་བསྐྱེད་ནི་ཐག་རིང་རྒྱང་གི་སྐད་ཆ་དངོས་ཡིན། སེམས་ཤིག་བསྐྱེད་ཡོད་ཀྱང་། སེམས་ཅན་གཅིག་པུ་ཞིག་བློས་བཏང་ན་ནམ་མཁའ་དང་མཉམ་པའི་སེམས་ཅན་ཐམས་ཅད་ལས་གཅིག་མ་ཚང་བ་ཡིན་པས། ཐམས་ཅད་ཀྱི་སྒྲ་འཇུག་ཡུལ་མ་ཚང་ནས་སེམས་བསྐྱེད་མེད་པར་ཆགས་པ་ཡིན་པས། སེམས་མཆོག་བསྐྱེད་པ་མི་གཙོ་སྐྱེས་པ་གཙོ། །ཞེས་པ་ལྟར་དུ་བྱང་ཆུབ་ཀྱི་སེམས་སྐྱེས་པ་དེ་གཙོ་ཆེ་བ་ཡིན། དཔེ་དེ་བཞིན་དུ་གསང་སྔགས་ཀྱི་དབང་ནམ་ཞུས་ཀྱི་སྐབས་སུ་སྔགས་སྡོམ་ལེན་བཞིན་ཡོད་ཀྱང་། དབང་གི་སྲོག་ནི་དམ་ཚིག་གིས་འཛིན་དགོས་ན། དམ་ཚིག་ས་མ་ཡ་འབུམ་སྡེའི་གྲངས་ཀ་བརྩི་བ་ཙམ་ཡང་མི་ཤེས་ན་སྲུང་མི་ཤེས་པ་ནི་སྨོས་མ་དགོས་པ་དང་། རིམ་གཉིས་ཀྱི་ལམ་ལ་མ་བསླབས་ན་སྔགས་ལ་ཞུགས་པ་ཙམ་ཡང་མིན་ལ། ཇོ་བོ་རྗེ་དཔལ་ལྡན་ཨ་ཏི་ཤ་ལྟ་བུའི་དམ་པའི་སྐྱེས་བུ་དེ་ཚོས་ཀྱང་། ང་རང་སོ་སོ་ཐར་པའི་སྒོར་ཞུགས་ནས་ཉེས་བྱས་ཕྲ་མོས་ཀྱང་མ་གོས། བྱང་སེམས་ཀྱི་བསླབ་བྱ་ལ་ཉེས་པ་རེ་རེ་གཉིས་གཉིས་བྱུང་། གསང་སྔགས་རྡོ་རྗེ་ཐེག་པའི་སྒོར་ཞུགས་ནས་ཉེས་པ་ཅོ་ལེ་ཉོ་ལེ་བྱུང་ཡང་ཉེས་ལྟུང་དང་འགྲོགས་ནས་ཞག་གཅིག་ཀྱང་སྡོད་མ་མྱོང་གསུངས། ལམ་དུ་བྱོན་པའི་བར་ལ་ཡང་ཀུན་རྟོག་ངན་པ་རེ་ཙམ་བྱུང་ཙ་ན་ཤིང་གི་མཎྜལ་ཞིག་ཡོད་པ་བླངས་ནས་འཕྲལ་དང་འཕྲལ་དུ་བཤགས་སྡོམ་མཛད་པ་ལྟ་བུ་ཡིན་པས། ཉམས་ལེན་གྱི་ཐོག་ནས་མན་ངག་ལག་ལེན་ལ་བསྟར་དུས། རང་རྒྱུད་ལ་བརྟགས་ཤིང་དཔྱད་པ་གཙོ་ཆེ་བའི་དབང་གིས་ཞིབ་ཆ་དགོས་མ་གཏོགས། མ་ཡིན་ཡིན་མདོག་བསྟན་པ་ཙམ་གྱིས་ས་ཆོད་པ་མིན་ཕྱིར། ལམ་གྱི་གཞི་རྟེན་བསླབ་གསུམ་མིག་འབྲས་ལྟར་བསྲུངས་ནས། སྣ་ཚོགས་ཤེས་བྱའི་གནས་སྤྱི་དང་། ཁྱད་པར་དུ་ཐར་བ་དམ་པའི་ལམ་སྟོན་པའི་བསླབ་གསུམ་ཉམས་ལེན་གྱི་གནད་དང་ལྡན་པའི་སྡེ་སྣོད་རྣམ་པ་གསུམ་གྱིས་གཙོར་བྱས་པའི་རིག་པའི་གནས་མཐའ་དག དང་པོར་དགེ་བའི་བཤེས་གཉེན་ལས་ཐོས། བར་དུ་ཐོས་པའི་དོན་བསམ། ཐ་མར་བསམ་དོན་སྒོམ་པའི་སྒོ་ནས་ཐོས་བསམ་སྒོམ་པའི་ཤེས་རབ་གསུམ་རྒྱུད་ལ་བསྐྱེད་པའི་ཆེད་དུ་ཐོས་བསམ་ཕྱོགས་དང་རིས་སུ་མི་གཅད་པ་གལ་ཆེ་བས། ལྟ་བ་ངན་པའི་ཀུན་རྟོག་སེལ་བའི་ཆེད་དུ་མུ་སྟེགས་པའི་གཞུང་ཡན་ཆད་ཀྱང་ཤེས་པར་བྱ་དགོས་པས། ཀུན་མཁྱེན་ཀློང་ཆེན་པ་དང་། རྗེ་བདག་ཉིད་ཆེན་པོ་ལ་སོགས་པའི་མཁས་གྲུབ་དག་གི་རྗེས་སུ་སློབ་ནས། གསར་རྙིང་གི་མཁས་གྲུབ་མང་པོར་བསྟེན་ཏེ་ཐོས་བསམ་འཚོལ་ཞིང་། གཞུང་ལུགས་ཐམས་ཅད་ལས་གང་གསུངས་པ་དེ་དག་གང་ཟག་གཅིག་འཚང་རྒྱ་བའི་ལམ་དུ་དགོངས་པ་འགལ་མེད་དུ་སྒྲུབ་ལུགས་ཇི་ལྟར་ཡིན་པའི་ཚུལ་ལ་རྣམ་པར་དཔྱད་ནས། དཔྱད་རྩོམ་རེ་དང་མཐའ་དཔྱོད་རེ་བྲིས་ཏེ་དེར་ཕྱོགས་ལ་ལག་རྗེས་རེ་བཞག་ན་བསྟན་པའི་མིག་རྒྱན་དང་བསོད་ནམས་ཀྱི་གཞི་མ་ཡིན། འོན་ཀྱང་དུས་ངན་སྙིགས་མ་ཚེ་ཐུང་གཡེང་བ་ཆེ་བའི་སྐབས་ཀྱི་སྐྱེས་བུ་བློ་རྒྱ་ཆུང་བས། ཕྱོགས་མེད་ཀྱི་ཐོས་བསམ་རིས་མེད་ཀྱི་མཐའ་རྒྱ་མང་པོ་ཞིག་ཆོད་མ་བཞག་ཀྱང་། ཐམས་ཅད་ལ་དག་སྣང་ཕྱོགས་མེད་དུ་སྦྱངས་ནས་རང་ལ་གང་དགོས་པ་དེ་དཔྱིས་ཕྱིན་པར་བྱས་ནས་ཉམས་ལེན་ལ་བརྩོན་དགོས་པ་ཡིན། དེ་ལྟར་སྣ་ཚོགས་པའི་ཆོས་ཚུལ་ལ་ཕྱོགས་མེད་ཀྱི་ཐོས་བསམ་བྱས་པའི་གཞུག་ནས། རང་ཉིད་གང་ལ་ལས་འབྲེལ་ཡོད་པའི་ཆོས་སྒོ་དེ་ཉམས་ལེན་གྱི་གཙོ་བོར་བཟུང་བ་ལས་རིས་མེད་ཡིན་མདོག་གིས། ཡས་མས་ཀྱི་ཆོས་སྐད་དང་ལྟ་གྲུབ་ཚང་མ་འདྲ་འདྲེས་རྩམ་ཕྱུར་བསྲེས་པ་ལྟ་བུས་ཅི་ཡང་མི་ཡོང་བས། སྐབས་ཐོབ་ཀྱི་གོ་བ་མ་འདྲེས་ཤིང་དོན་ལ་རྒྱལ་བའི་དགོངས་པ་འགལ་མེད་དུ་ལེན་ཤེས་པའི་མ་འདྲེས་འབྲེལ་བའི་ཚུལ་གྱིས། བསྟན་པའི་རྣམ་གཞག་ལ་བྱི་དོར་བྱས་ནས་འཆད་རྩོད་རྩོམ་གསུམ་ཐུབ་ན་མཆོག་ཏུ་གྱུར་པ་ཡིན། དེ་ལྟ་བུའི་རྒྱ་ཆེ་བ་པཎྜི་ཏའི་ལུགས་ཀྱི་མཐའ་རྒྱ་ཆེ་བ་ཞིག གཅིག་ན་ལོ་ཚོད་ནམ་ཟླ། གཉིས་ན་ཐོས་བསམ་སྦྱོང་པ་གང་ཐད་ཀྱིས་ཐུབ་མ་སོང་སྙམ་མི་དགོས་ཏེ། དག་སྣང་མོས་གུས་ཀྱི་སྒོ་ནས་སྙིང་ལ་རུས་པ་བཅངས་ནས་བརྩོན་འགྲུས་གྱིས་དང་ཟབ་པ་ཀུ་སཱ་ལིའི་ཕྱོགས་ཀྱི་ཁྲིད་ཡོད་པས། དེའི་ཁྲིད་ཡིག་ཆེན་མོ་རྣམས་བློ་མཆོག་འབྲིང་དམན་གསུམ་གྱི་བགོ་སྐལ་དུ་ཡོད་པས། དེ་བཞིན་དུ་རང་རྒྱུད་ལ་ཉམས་ལེན་བྱས་ནས་དལ་འབྱོར་སྟོང་ལོག་ཏུ་མི་འགྲོ་བ་དང་དབུལ་པོ་ལག་སྟོང་རེད་མི་ཤོར་བར་རང་གིས་རང་ལ་གཟབ་ཆོག་པའི་ཕྱིར། དེའི་སྟེང་དུ་ལུས་ངག་ཡིད་གསུམ་ནི་དགེ་སྡིག་སྣ་ཚོགས་འབྱུང་བའི་སྒོ་ལྟ་བུ་ཡིན་ཕྱིར་སྒོ་གསུམ་ཞེས་བྱ་ལ། དེ་ལས་ཀྱང་གཙོ་བོ་སེམས་མ་དུལ་བའི་རང་རྒྱུད་གྱོང་པོ་ཀོ་གྱོང་དམར་རུ་མཉེ་མ་མྱོང་བ་ལྟ་བུ། དམ་པའི་ལྷ་ཆོས་བྱེད་ལུགས་མ་དགོས་འཇིག་རྟེན་གྱི་མིའི་ཚུལ་ལུགས་ཙམ་ཡང་བསླབས་མ་མྱོང་། གོ་མ་མྱོང་། སྦྱངས་མ་མྱོང་བ་ནི། མ་ཞི་བ། མ་དུལ་བ། གྱོང་པོ། རྩུབ་མོ་ཞེས་དོན་གཅིག་གིས་བསྙད་པ་ཡིན། ནང་སེམས་རྒྱུད་མ་དུལ་དུས་དེས་བཀོད་འདོམ་བྱས་པའི་འོག་གི་ལུས་ངག་གཉིས་པོ་ཡང་། དུལ་མོ་དང་འཇམ་པོ་ཞིག་ཡོང་དོན་མེད་པས་སྒོ་གསུམ་མ་ཞི་ཞིང་མ་དུལ་བ་དེ། ཆོས་ཐོས་པ་ཙམ་གྱིས་ཆོག་པར་མི་བྱ་བར་ཐོས་དོན་ཉམས་སུ་བླངས་པའི་སྟོབས་ཀྱིས། ཆོས་དང་རང་རྒྱུད་འདྲེས། ནད་དང་སྨན་གཉིས་འཕྲོད་ཡོད་པའི་རྟགས་ལ་སུ་དང་ཐུག་གང་དང་འགྲོགས་ན་རྒྱུད་འཇམ་དུང་ངེ་ཡོད་པ་ཕྱེ་ཐུག་ལ་ཟོ་མར་བཏབ་པ་ལྟ་བུ་དང་། མི་དགེ་སྡིག་པའི་ལས་ཕྲ་ཞིང་ཕྲ་བ་ནས་འཛེམ་དགོས་ཏེ། སྡིག་པ་བྱེད་པ་དག་གིས་འཕྲལ་དུ་གཞན་ལ་གནོད་སྐྱེལ་ཐུབ་པ་ལྟ་བུར་ཡོད་ཀྱང་། མཐར་ཐུག་གནོད་ལེན་རང་ལ་འཁོར་ནས་ནམ་ཕུགས་ཀྱི་རྣམ་སྨིན་ཡིད་དུ་མི་འོང་བ་ཉམས་སུ་མྱོང་དགོས་པའི་ཕྱིར། དེས་ན་སྡིག་པ་ཆེ་འབྲིང་ཆུང་གསུམ་ལ་འཛེམས་ནས་དུག་བཞིན་དུ་སྤངས་ཏེ། དགེ་བ་མ་སྐྱེས་པ་བསྐྱེད་ཅིང་སྐྱེས་པ་དེ་ཡང་རྗེས་སུ་ཡི་རང་གིས་སྤེལ་བ་དང་བསྔོ་བའི་སྒོ་ནས་སྤེལ་བར་བྱེད་པ་དང་། རང་ངོ་ལ་ལྟོས་པའི་ངོ་ཚ་ཤེས་པ་དང་། གཞན་ངོ་ལ་ལྟོས་པའི་ཁྲེལ་ཡོད་པ་ཞེས་པའམ། ཡང་ན་ཆོས་རྒྱུ་མཚན་དུ་བྱས་ཏེ་ངོ་ཚ་ཡོད་པ་དང་། འཇིག་རྟེན་རྒྱུ་མཚན་དུ་བྱས་ཏེ་ཁྲེལ་ཡོད་པའི་སྟེང་ནས། ཇི་སྐད་དུ། དད་པ་ནོར་དང་གཏེར་དང་རྐང་བའི་མཆོག །ལག་པ་བཞིན་དུ་དགེ་སྡུད་རྩ་བ་ཡིན། །ཞེས་གསུངས་པ་ལྟར་བླ་མ་དཀོན་མཆོག་ལ་བྱིན་རླབས་དང་ཐུགས་རྗེ་ཡོད་ཀྱང་། དེ་རང་རྒྱུད་དུ་འདྲེན་པར་དད་པ་དགོས་པ་ནི། དངོས་པོ་ལེན་དགོས་ན་གཙོ་བོ་ལག་པ་ལ་ལྟོས་པ་ལས། ཅ་ལག་ཚུར་རང་ཤུགས་ཀྱིས་མི་ཡོང་བ་ལྟར་ཡིན་པའི་ཕྱིར་དང་། དད་པ་མེད་ན་ཆོས་ཀྱི་རྩ་བ་རུལ། །ཞེས་གསུངས་པས་དམ་པའི་ཆོས་དང་བླ་མ་ལ་དད་པ་དང་མོས་གུས་བསྐྱེད་པ་དང་། དེའི་ཐོག་ཏུ་ལས་དང་པོ་པ་ཞིག་ལ་མེད་མི་རུང་བ་ནི་དགེ་བའི་བཤེས་གཉེན་ལ་བསྟེན་པ་ཡིན་ཏེ། དཔེར་ན་བྱིས་པ་ཆུང་ཆུང་ཡིག་ངོ་འཛིན་ཏེ་ཀློག་སློབ་པ་ནས་རིག་གནས་ལ་སྦྱོང་བརྩོན་བྱེད་པའི་བར་དུ་སློབ་མཁན་གྱི་དགེ་རྒན་རང་ཉིད་ལས་མཁས་ཤིག་མ་རྙེད་ཚེ་ཤེས་ཡོང་ཐབས་དང་ཤེས་ཡོང་རྒྱུ་ཞིག་མེད་པ་ལྟ་བུ་ཡིན་པའི་ཕྱིར། དེས་ན་ཆོས་ལམ་ལ་ཞུགས་པའི་དུས་སུ་ཡང་ལམ་སྟོན་གྱི་དགེ་བའི་བཤེས་གཉེན། རང་ཉིད་ལམ་དེར་ཞུགས་ནས་ལམ་གྱི་རྒྱུས་ལོན་ཡོད་པ་ཞིག་ལ་བསྟེན་པ་ནི་བྱ་བ་ཐམས་ཅད་ཀྱི་ནང་ནས་གལ་ཆེན་ཡིན་པས། ལམ་སྟོན་གྱི་བཤེས་གཉེན་མ་ནོར་བ་ཞིག་ཐོག་མ་ནས་བརྟགས་ཏེ་བསྟེན་པ་བྱེད་དགོས། དེ་བཞིན་དུ་སོ་སོ་སྐྱེ་བོའི་བློ་ནི་ཆུ་སྣ་ལྟ་བུ་གར་ཁྲིད་ཡིན་པས་གྲོགས་བཟང་ངན་གྱི་རྗེས་སུ་འགྲོ་བ་ཡིན་ཕྱིར། གང་དང་འགྲོགས་ན་དུག་གསུམ་འཕེལ་འགྱུར་བ། །གྲོགས་ངན་སྤོང་བ་རྒྱལ་སྲས་ལག་ལེན་ཡིན་ཞེས་གསུངས་པ་ལྟར་གྲོགས་ངན་སྤངས་ནས་གྲོགས་བཟང་བསྟེན་པ་སྟེ་དྲུག་པོ་དེ་ནི་དང་པོའི་ལས་ཅན་ལམ་ལ་འཇུག་པའི་གང་ཟག་རྣམས་ལ་མེད་ན་ཐབས་ཆག་གི་ཆོས་དྲུག་གོ།

༢ དབེན་པར་སྟ་གོན་བྱ་བའི་ཆོས་དྲུག་བསྟན་པ།

དེ་ནས་གཅིག་པུ་དབེན་པར་གནས་འདོད་ན།།

སྟ་གོན་བྱ་བའི་ཆོས་དྲུག་གཅེས་པ་སྟེ།།

བླ་མ་དང་བྲལ་རང་རྐྱ་ཐུབ་པ་དང༌།།

ཐེ་ཚོམ་གེགས་སེལ་དྲི་རྒྱུ་མེད་པ་དང༌།།

ལུས་ལ་ནད་གདོན་བར་ཆད་མེད་པ་དང༌།།

མི་ཆོས་ཁྱུ་ནས་ལེགས་པར་བུད་པ་དང༌།།

དོན་གཉིས་བསྒྲུབ་པའི་གདམས་པ་ཚང་བ་དང༌།།

ལྟ་བའི་དགོངས་པ་བློ་ཐག་ཆོད་པའོ།།

ཞེས་གསུངས་སྟེ། ཐོས་བསམ་བྱས་ཤིང་ཡོན་ཏན་འབྱོར་བའི་མཚམས་དེ་ནས་སམ། ཡང་ན་རང་ཉིད་གང་ལ་མོས་པའི་ཆོས་ལ་ནན་ཏན་གྱིས་སྦྱངས་ནས། ཐུན་མིན་གྱི་དགེ་བའི་བཤེས་གཉེན་དང་དགེ་གྲོགས་བསྟེན་ཏེ་ལྟ་བའི་ངོ་སྤྲད་ཟིན་པ་དེ་ནས་སྒོམ་པས་ཉམས་སུ་ལེན་དགོས་པ་ཡིན་ལ། ལས་དང་པོ་བའི་སྒོམ་པ་གསར་བུ་པས་རྐྱེན་ཐུབ་པ་མིན་པས་བསམ་གཏན་གྱི་ཚེར་མ་མེད་པའི་དབེན་པའི་རི་ཁྲོད་ལྟ་བུར་གནས་པར་འདོད་ན། དེར་ཚགས་སུ་ཚུད་པར་བྱ་བའི་སྟ་གོན་ནམ་གྲ་སྒྲིག་གི་ཆོས་དྲུག་པོ་འདི་གཅེས་ཤིང་གནད་ཆེ་སྟེ། དེ་ཡང་བླ་མའི་མདུན་ནས་ཉམས་སུ་ལེན་བྱའི་ཆོས་ཀྱི་གནད་མཐའ་དག་ཞུན་ཐར་བཅད་དེ་ཐེ་ཚོམ་བསལ་ནས། བླ་མ་དང་ཞལ་གྱེས་ཞུས་ཏེ་རང་གཅིག་པུས་སྒྲུབ་པ་བྱེད་པའི་སྐབས་སུ་རང་རྐྱ་ཐུབ་པ་སྟེ་རང་ཁེ་རུས་རང་ཚུགས་ཐུབ་པ་དང་། སྤྱིར་ཐེ་ཚོམ་གཏན་ནས་མི་དགོས་པར་ཤེས་བྱའི་མཐའ་རྒྱ་ཆོད་པ་ནི། སོ་སོར་རང་རིག་པའི་ཡེ་ཤེས་བརྙེས་ན་མ་གཏོགས་དཀའ་བ་ཡིན་ཡང་། སྐབས་ཐོབ་རང་གི་རྒྱུད་ཚོད་དང་བསྟུན་པའི་ཐེ་ཚོམ་མེད་ཅིང་ཉམས་ལེན་གྱི་གེགས་དང་ཕྲད་ཚེ་གེགས་སེལ་ཇི་ལྟར་དགོས་དྲི་རྒྱུ་མེད་པ་དང་། ལུས་ལ་ནད་དང་དེའི་འབྱུང་རྐྱེན་གྱི་གདོན་བགེགས་ཡོད་ཚེ། ཉམས་ལེན་བྱེད་པ་ལ་བར་ཆད་དུ་འགྲོ་བས་དེ་དག་མེད་པའམ་ཡོད་ན་བཅོས་ཐབས་བྱ་བ་དང་། མི་ཆོས་འཇིག་རྟེན་ཆོས་བརྒྱད་རྙེད་པ་བདེ་བ་སྙན་གྲགས་གཞན་གྱིས་རང་ལ་བསྟོད་པ་རྣམས་འདོད་པ་དང་། དེའི་མི་མཐུན་ཕྱོགས་རྣམས་མི་འདོད་པ་ནི་དམ་པའི་ཆོས་མི་འགྲུབ་པའི་སྔ་ལྟས་དང་རྩ་བ་ཡིན་པས། ཇོ་བོ་བཀའ་གདམས་པའི་གཏད་པ་བཞི་དང་བུད་བསྙེགས་ཐོབ་གསུམ་སྟེ། བློ་ཕུགས་ཆོས་ལ་གཏད། ཆོས་ཕུགས་སྤྲང་ལ་གཏད། སྤྲང་ཕུགས་ཤི་ལ་གཏད། ཤི་ཕུགས་གྲོག་སྟོང་ལ་གཏད། ཅེས་པ་དང་ལ་ལར་བྲག་ཁུང་ལ་གཏད་ཅེས་ཀྱང་གསུངས་ཡོད་འདུག ཡང་མི་གྲལ་ནས་བུད། ཁྱི་གྲལ་བསྙེགས། ལྷ་གྲལ་ཐོབ། ཅེས་གསུངས་པ་ལྟར་དུ་ཆོས་ལས་བསམ་རྒྱུ་མེད་པར་བྱས་ནས། འཇིག་རྟེན་མི་ལུགས་ལ་བརྟེན་ནས་ཆོས་འགལ་གྱི་བྱ་བ་བྱེད་པ་ལ་ཁ་ཙམ་མི་འཁོར་བ་ནི་མི་ཆོས་ཀྱི་ཁྱུ་ནས་ལེགས་པར་བུད་པ་སྟེ། དེ་ཡང་སྐྱིད་སྡུག་གཉིས་ཀ་རོ་སྙོམས་ནས་ཁྱི་ཕག་ལྟ་བུའི་དམན་ས་བཟུང་ནས་ཁྱི་གྲལ་དུ་བསྙེགས་དུས། དམ་ཆོས་ཀྱི་ཉི་མ་སྙིང་ཁོང་ནས་ཤར་ཏེ། ནང་སེམས་ཀྱི་ཡོན་ཏན་དེས་དམ་པའི་ལྷ་གྲལ་ཐོབ་སྟེ་རིག་འཛིན་བརྒྱུད་པའི་ཞབས་རྗེས་བསྙེགས་ཐུབ་པ་ཡིན་ནོ། །མི་ཆོས་ཁྱུ་ནས་བུད་མ་ཐུབ་ཚེ་ཆོས་འཇིག་རྟེན་གཉིས་ཀ་མཉམ་དུ་སྒྲུབ་ཐབས་མེད་པ་ཡིན་པས་ཟས་གཙང་སྲས་པོའི་རྒྱལ་སྲིད་སྤངས་པ་དང་། ཁྱད་པར་སྲིད་སྐྱོང་ཟེར་བ་ནི་དེ་བས་ཀྱང་དཀའ་བ་ཡིན་པས་ཐབས་ལ་མཁས་པའི་མཛད་པ། མི་ལས་འདས་པའི་སྤྱོད་ཡུལ་ཅན་ཡིན་ན་མ་གཏོགས་ལ། སྤྱིར་བཏང་གི་དབང་དུ་བྱས་ན་རབ་བྱུང་མ་དགོས་ཁྱིམ་པ་ཆོས་པས་ཀྱང་ཁ་ཕྱོགས་སུ་མི་རུང་བ་ཡིན་ཕྱིར། མི་གྲལ་ནས་གཏན་འབུད་ཐུབ་པའི་སེམས་ཐག་ཆོད་མེད་དུས་ཉིན་ཞིག་ཕྱིར་བལྟས་ཤོར་ངེས་ཏེ། རྟོག་ངན་དུག་རོ་ཁོང་དུ་ཡོད་ན། །འཆི་ཁ་ཚུན་ཆོད་མི་མངོན་མི་སྲིད། །གསུངས་པ་ལྟར་དུ་རི་ཁྲོད་འགྲིམས་སྔ་བྱས་ནས་ཐ་མར་གྲོང་མཐར་ལྷུང་བའི་རྟོགས་ལྡན་ཨ་ཀྲད་ཁྱིའུ་རྡུང་1བྱེད་པའང་ཡོད་པ་ཡིན་པས་ཆོས་སྒྲུབ་དུས་མི་གྲལ་ནས་འབུད་ན་བུད་ངེས་ཅན་གྱི་སེམས་ཐག་གཅད་དགོས་སོ། །ཐེག་ཆེན་མདོ་སྔགས་ཀྱི་ཆོས་ལམ་ལ་ཞུགས་ནས་རང་གཞན་དོན་གཉིས་སྒྲུབ་པ་ལ། དོན་གཉིས་འགྲུབ་བྱེད་ཀྱི་ཉམས་སུ་ལེན་པའི་གདམས་ངག་དང་ལྟ་སྒོམ་ཆ་ཚང་ལ། ཐེ་ཚོམ་དང་བྲལ་བའི་ངེས་ཤེས་ཡོད་དགོས་མ་གཏོགས། རི་ཁྲོད་དབེན་པའི་རི་ལ་རང་གར་བྱ་དང་རི་དྭགས་རྣམས་དང་ཁྱད་མེད་པར་བསྡད་པས་ཅི་ཡང་མི་འོང་བ་དང་། ལྟ་བའི་དགོངས་པ་ལ་བློ་ཐག་ཆོད་པའི་གདེང་དང་ལྡན་པ་དང་དྲུག་པོ་ནི་སྒྲུབ་པ་ཉམས་ལེན་བྱེད་མཁན་ཞིག་གི་སྟ་གོན་ནམ་གྲ་སྒྲིག་གི་ཆོས་རེད་ཅེས་གསུངས་པའོ། །འདིའི་མན་དུ་ཚིག་རེ་རེ་བཞིན་དུ་མང་པོ་ཞིག་བཤད་པ་དགོས་པ་ཆུང་བར་སེམས་ཏེ། མན་ངག་ཉམས་ལེན་གྱི་གནད་ནི་བརྒྱུད་པའི་བྱིན་རླབས་ལ་བློ་གཏད་བྱ་བ་གཙོ་བོ་ཡིན་པ་དང་། འདིར་བཞུགས་མང་ཆེ་ཤོས་ནི་སྡེ་སྣོད་འཛིན་པ་ཤ་སྟག་རེད། ཚིག་འགྲེལ་ཙམ་ལ་ལྟོས་པ་མ་ཡིན་ཞིང་། ལས་དང་པོ་པ་ཐོས་བསམ་ལ་བློ་ཁ་ཕྱོགས་མ་ཐག་པ་ལ་ནི་རྒྱས་བཤད་བྱས་ཀྱང་ཕན་ཐོགས་ཇི་ཙམ་ཆེ་མ་འཚལ་བས། ངས་དང་པོ་ཚུར་ཞུ་དུས་ཀྱང་མཐའ་དཔྱད་རྒྱས་སྤྲོས་ཀྱིས་མཚན་ཉིད་ཐེག་པའི་བཤད་པ་གསུངས་པ་བཞིན་དུ་གསུང་སྲོལ་མེད་པས་ད་རེས་ཀྱང་མདོར་བསྡུས་པར་བཤད་འཆར་ཡིན།

༣ དགོན་པ་བསྟེན་པའི་ཆོས་དྲུག་བསྟན་པ།

དེ་ནས་དགོན་པ་བསྟེན་པའི་ཆོས་དྲུག་ནི།།

ས་ཕྱོགས་དབེན་ཞིང་མཚན་ཉིད་ཚང་བ་དང༌།།

གྲུབ་ཐོབ་གོང་མས་ཞབས་ཀྱིས་བཅགས་པ་དང༌།།

ཉམས་གྲིབ་མེད་པས་དམ་ཅན་འདུ་བ་དང༌།།

རྣམ་གཡེང་འདུ་འཛིའི་རྐྱེན་རྣམས་མེད་པ་དང༌།།

མཐུན་རྐྱེན་ཡོ་བྱད་བསྒྲུབ་པར་སླ་བ་དང༌།།

མི་དང་མི་མིན་འཚེ་བ་མེད་པའོ།།

ཞེས་གསུངས་ཏེ། དེ་ནས་དགོན་པ་སྟེ་དབེན་པའི་གནས་གྲོང་ལས་རྒྱང་གྲགས་ཀྱིས་ཆོད་པའི་ས་ལ་དགོན་པ་ཞེས་བརྗོད་པ་ལས། དགོན་པ་གྲོང་པ་རུ་འགྱུར་ནས་ཁྱིམ་ཆུང་སྤངས་པའི་ཁྱིམ་ཆེན་ལྟ་བུ་ལ་དགོན་པའི་སྒྲ་འཇུག་པ་མིན་པས་དགོན་པའམ་དབེན་པ་བསྟེན་པ་ལ་ཆོས་དྲུག་གང་དག་ཚོགས་དགོས་ན། ས་ཕྱོགས་དབེན་པ་སྐྱེ་བོའི་རྒྱུ་འགྲུལ་དང་འདུ་འཛི་བྲེལ་ཟིང་མེད་པ་དང་། སའི་དཔྱད་ཀྱི་མཚན་ཉིད་ལ་ཡང་དབྱར་དགུན་སྟོན་དཔྱིད་ཀྱི་དུས་བཞིའི་སྒྲུབ་གནས་ཀྱི་ཁྱད་པར། དཔེར་ན་དབྱར་རྫ་སྤང་གངས་ཁྲོད་མཐོ་བའི་གནས་དང་། དཔྱིད་རྩི་ལྗང་སྤང་ཐང་ནེའུ་གསེང་གི་ཚལ་དང་། སྟོན་རྩི་བཅུད་འབྲས་བུའི་སྟོབས་འཕེལ་ས་དང་། དགུན་རོང་ཀླུང་དྲོད་ཁུང་བདེ་དྲོད་འབར་ས་རུ་བསྒྲུབ་དགོས་པ་དེ་ལྟར་གསུངས་པ་དང་། ཡང་ཞི་རྒྱས་དབང་དྲག་གི་ལས་བཞི་སྒྲུབ་པའི་སའི་ཁྱད་པར་དང་། སྤྱིར་བཏང་གི་ཤར་ཕྱེས་ལྷོ་སྤུང་ནུབ་འདན་བྱང་དར་དཀར་གྱི་ཡོལ་བ་བྲེས་འདྲ་གསུངས་པ་དང་། ཕྱོགས་བཞིའི་སྲུང་བཞི་ཚང་བ་དང་། མཚམས་བཞིའི་དཔལ་བཞི་ཚང་བ་སོགས་མང་ཞིང་། དེ་ལྟ་བུའི་སྒྲུབ་གནས་ཀྱི་མཚན་ཉིད་ཚང་ཞིང་བསམ་གཏན་ངང་གིས་འཕེལ་བ་དང་། དམ་པ་གོང་མ་གྲུབ་བརྙེས་རིག་འཛིན་རྣམས་ཀྱིས་ཞབས་ཀྱིས་བཅགས་པའི་གནས་སྟེ། ད་ལྟ་རང་རེ་ཡོད་སའི་གནས་འདི་ལྟ་བུ་ལ་མཚོན་ན། སློབ་དཔོན་ཆེན་པོའི་ཞབས་ཀྱིས་བཅགས་བྱིན་གྱིས་རླབས་ནས་བདུད་རྩི་སྨན་གྱི་སྒྲུབ་པ་མཛད་པའི་གནས། ཁྱད་པར་དུ་རྫོགས་པ་ཆེན་པོ་ཀློང་ཆེན་སྙིང་ཐིག་གི་ཆོས་བརྒྱུད་འདིའི་གྲུབ་བརྙེས་ཀྱི་རིག་འཛིན་མང་པོ་བྱོན་ནས་སྒྲུབ་པ་ཉམས་ལེན་མཛད་པའི་ས་ཆ་ཁྱད་པར་ཅན། གནས་ཀྱིས་གང་ཟག་བྱིན་གྱིས་རློབ་ནུས་པ་འདི་ལྟ་བུ་དང་། ཉམས་གྲིབ་མེད་པས་དམ་ཅན་འདུ་བ་ཞེས་པ་འདི་ནི་ཤིན་ཏུ་གཙིགས་ཆེན་གལ་ཆེན་དུ་འཛིན་དགོས་པ་ཞིག་ཡིན་ཏེ། དམ་ཚིག་ཉམས་པའི་གྲིབ་ཀྱིས་མི་གོས་པ་དང་མི་གནོད་པ་ཞིག་མེད་པས། བླ་མར་བརྙས་ཤིང་སྤུན་ལ་ཁྲོས་པའི་དམ་ཉམས་དང་ཁ་ལག་འབྲེལ་བ་ཙམ་གྱིས་ཀྱང་ཚེ་འདི་ཕྱི་གཉིས་ཀའི་མི་འདོད་སྣ་དགུ་འབྱུང་བས། དབང་ཞུས་ཤིང་བླ་མར་བསྟེན་ཚར་དུས་དེའི་སྐུ་དགྲ་དང་འགྲོགས་ན་ཉམས་གྲིབ་ཀྱིས་རང་མ་དགོས་ཡུལ་ལུང་པ་དག་ལ་གནོད་ཅིང་། དཀར་ཕྱོགས་སྐྱོང་བའི་ལྷ་དང་སྲུང་མ་གཡེལ་འགྲོ་བ་ཡིན། དེས་ན་ཉམས་གྲིབ་མེད་པས་དམ་ཅན་འདུ་བའི་གནས་དང་། རྣམ་གཡེང་འདུ་འཛིའི་རྐྱེན་བསྟོད་སྨད་ཀྱི་གཏམ་ཉོག་བཤད་མཁན་ལ་སོགས་པ་མེད་པ་དང་། མཐུན་རྐྱེན་གྱི་ཡོ་བྱད་ཚོམ་བུའི་ཚོགས་སྒྲུབ་དང་འབྲེལ་ན་དགྲ་བཟློག་རྫས། ནད་བཟློག་སྨན་ལ་སོགས་པ་གསུངས་པ་དང་། གཅིག་པུར་སྒྲུབ་ལ་བརྩོན་པའི་གང་ཟག་ཡིན་ན་འཚོ་མཁོ་ལྷག་པའི་ཡོ་བྱད་དང་། ཁྱད་པར་དུ་ཟས་གོས་སོགས་མཐུན་རྐྱེན་བསྒྲུབ་པར་སླ་བ་དང་། དངོས་ཡོད་མི་ཡི་འཚེ་བ་དང་དངོས་མེད་མི་མིན་གྱི་འཚེ་བ་མེད་པའོ།།

༤ མཐུན་རྐྱེན་བསྒྲུབ་པའི་རྫས་དྲུག་བསྟན་པ།

དེ་ནས་མཐུན་རྐྱེན་བསྒྲུབ་པའི་རྫས་དྲུག་ནི།།

བཟའ་བཏུང་འཚོ་བ་མཐའ་གཉིས་མ་ལྷུང་དང༌།།

དགོས་པའི་མཆོད་རྫས་བསྒྲུབ་རྫས་ཚོགས་པ་དང༌།།

ཟབ་མོའི་གདམས་ངག་དཔེ་ཆ་ཚང་བ་དང༌།།

བར་ཆད་བཟློག་པའི་རྟེན་འབྲེལ་མཐུན་རྫས་དང༌།།

གང་དགོས་ཡན་ལག་ཚགས་སུ་ཚུད་པ་དང༌།།

ནོར་རྫས་མང་པོའི་སྐྱེད་འབྲེལ་མེད་པའོ།།

ཞེས་གསུངས་ཏེ། འདོད་ཁམས་པ་དེ་རགས་པའི་ཟས་ལ་བརྟེན་ཡོད་པས་མཐའ་གཉིས་སུ་མ་ལྷུང་བའི་ཟས་གོས་འཛོམ་པར་བྱེད་པ་དང་། མཆོད་རྫས་དང་སྒྲུབ་པའི་རྫས་ཚོགས་པ་བྱེད་པ་དང་། ལྟ་མི་ཐུབ་པའི་ཡིག་སྣ་མང་ཆེ་ན་ཡང་དཔེ་མང་ཁུར་དུ་ལུས་པའི་རྒྱུ་ཡིན་པས་མང་པོ་ནི་དགོས་པ་མེད་པས། ཟབ་མོའི་གདམས་ངག་གི་ཡིག་ཆ་དང་མན་ངག་གི་བེའུ་བུམ་རེ་ཚང་བར་བྱེད་པ་དང་། དེ་ལས་གཞན་པའི་རྒྱུན་མཁོའི་རྫས་སྣ་རེ་ཙམ་ཚགས་ཚུད་བྱེད་པ་ལས། རྒྱུ་ནོར་རྫས་མང་པོའི་སྐྱེད་འབྲེལ་མེད་པ་ཞིག་དགོས་ཏེ། རྒྱུ་ནོར་ཉར་ཚགས་ཀྱིས་དུས་གྲོན་པ་དང་། ལུས་བྲེལ་བ་ཆེ་ཞིང་སེམས་ཞེན་ཆགས་ཀྱིས་བཅིང་བར་འགྱུར་བའི་ཕྱིར་དང་། གལ་སྲིད་ཞེན་ཆགས་ཆེར་མེད་ཀྱང་དེའི་གཏོང་ལེན་དང་གསོག་སྲུང་གི་སེམས་ཚེགས་ཀྱིས་ཆོས་ལས་གཡེལ་བར་བྱེད་པའི་དགྲ་ཆེན་ཡིན་པའི་ཕྱིར་རོ། །མདོར་ན་དབེན་གནས་སུ་བསྡད་ཀྱང་རུང་མ་བསྡད་ཀྱང་རུང་ཆོས་པ་ཞིག་དང་སེར་མོ་ཞིག་ལ་ཆ་མཚོན་ན་ཡོ་བྱད་སྙུང་བ་སྟབས་བདེ་བྱེད་པ་ནི་དུས་ཚོད་ནམ་དང་ནམ་གནས་གང་དང་གང་དུ་ཡང་གནད་ཆེ་སྟེ། འདོད་ཆུང་ཆོག་ཤེས་བྱེད་པ་ནི་འཕགས་པའི་ནོར་མཆོག་ཡིན་པའི་ཕྱིར་རོ།།

༥ གྲོགས་མཆོག་མཐུན་པའི་ཆོས་དྲུག་བསྟན་པ།

དེ་ནས་གྲོགས་མཆོག་མཐུན་པའི་ཆོས་དྲུག་ནི།།

རིགས་རྒྱུད་བཟང་ཞིང་ངང་རྒྱུད་དུལ་བ་དང༌།།

དད་དང་བརྩོན་འགྲུས་ཤེས་རབ་ཆེ་བ་དང༌།།

ཉམས་ལེན་མཐུན་ཞིང་འགྲོགས་ན་བདེ་བ་དང༌།།

ང་རྒྱལ་ཆུང་ཞིང་དབང་པོ་དུལ་བ་དང༌།།

དམ་ཚིག་གཙང་ཞིང་དག་སྣང་ཆེ་བ་དང༌།།

བརྩེ་གདུང་ཆེ་ཞིང་ཟབ་མོའི་གསང་ཐུབ་བསྟེན།།

ཞེས་གསུངས་སྟེ། སྤྱིར་ན་ཤཱཀྱའི་བསྟན་པ་ལ་རིགས་རུས་མི་གཙོ་ཡང་འཇིག་རྟེན་པའི་ལུགས་ཀྱི་རིགས་ཀྱིས་དམན་པ་ཤན་པ་ལ་སོགས་པ་དང་། ཆོས་ཀྱི་ཐད་ནས་རིགས་རྒྱུད་ཀྱིས་དམན་པ་གྲུབ་མཐའ་དམན་པ་འཛིན་པ་ལ་སོགས་པ་མ་ཡིན་པའི་རིགས་རྒྱུད་བཟང་ཞིང་ངང་རྒྱུད་དུལ་བ་དང་། དད་པ་དང་བརྩོན་འགྲུས་ལྡན་ཅིང་ཤེས་རབ་ཆེ་བ་དང་། བླ་མ་གཅིག་གི་སློབ་མ་མཆེད་གྲོགས་ནང་མཐུན་ཡིན་པའམ་མིན་ཡང་ཆོས་རྒྱུད་གཅིག་པ་ལྟ་བུའི་ཉམས་ལེན་མཐུན་ཞིང་། འགྲོགས་པར་བདེ་བ་སྐ་རགས་ལྟ་བུ་དང་། །འཇུག་པར་བདེ་བ་ལན་ཚྭ་ལྟ་བུ་དང་། །བཟོད་བསྲན་ཆེ་བ་ཀ་བ་ལྟ་བུ་ཡིས། བླ་མའི་འཁོར་དང་རྡོ་རྗེའི་སྤུན་ལ་བསྙེན། །ཞེས་གསུངས་པ་ལྟ་བུའི་འགྲོགས་བདེ་འདྲིས་གཤིན་འདྲིས་ཤིང་འདྲིས་ལ་ཇེ་བཟང་དུ་འགྲོ་བ་དང་། ང་རྒྱལ་ཆུང་ཞིང་དམན་ས་འཛིན་པ་དབང་པོ་ཞི་ཞིང་དུལ་བ་དང་། གསང་སྔགས་ཀྱི་དམ་ཚིག་གཙང་ཞིང་དད་པ་དང་དག་སྣང་ཆེ་བ་དག་དང་མཉམ་དུ་འགྲོག་པ་ལས་གྲོགས་ངན་པ་དང་འགྲོག་མི་རུང་ཏེ། གྲོགས་ཀྱི་ཤུགས་རྐྱེན་རང་ཉིད་ལ་འགོ་བ་ཡིན་པའི་ཕྱིར། དེ་ཡང་དཔེར་ན་གྲོགས་ཞེ་སྡང་ཅན་དང་འགྲོགས་ན་ཞེ་སྡང་སྐྱེ་བར་མ་ཟད། དེ་དང་མཉམ་དུ་རྟག་པར་རྒྱབ་རབས་གཡུག་རབས་བསད་རབས་གཏུབ་རབས་དང་དགྲས་གནོད་པ་བྱས་རབས། ངས་དགྲ་ལན་འདི་ལྟ་བུ་སྤྲད་རབས་དང་སྤྲད་དགོས་རབས་ཏག་ཏག་བཤད་ན་སྐབས་ཤིག་ལ་ཤམ་ཐབས་ཀྱི་གསེབ་ཏུ་གྲི་ཐུང་ཡང་འདོག་དགོས་པར་འགྱུར་བ་དང་། གྲོགས་འདོད་ཆགས་དང་རྔམ་སེམས་ཅན། རྒྱུན་དུ་ཡས་ཀྱིས་རྒྱུ་བསགས་རབས། མས་ཀྱིས་ཚོང་བྱས་རབས། ངས་རྒྱུ་ལོན་རབས་དང་ཁོས་འཇིག་རྟེན་མཐུན་སྡེབ་བྱས་རབས་ཏག་ཏག་བཤད་མཁན་དང་མཉམ་པོར་བཤིབས་ནས། དེ་འདྲ་ཁོ་ན་བཤད་དེ་དུས་འདས་ན་རང་སེམས་ལ་འདྲེ་འཛུལ་ནས་ཚུལ་མིན་ཡིད་བྱེད་ཀྱི་རྣམ་རྟོག་གིས་རྒྱུད་ཆུད་ཟ་རུ་འཇུག་པ་དང་། གྲོགས་གཏི་མུག་ཅན་ཉལ་དགའ་གཉིད་དགའ་ཆེ་བའི་ཟ་འདོད་འགུལ་འཚེར་དང་ཐུག་ན་དེའི་སྐྱོན་གྱིས་གོས་ནས་རྣམ་གཡེང་ལེ་ལོ། གཏི་མུག་གཉིད་ཉལ། དོན་མེད་འཁྱམ་ཉུལ་ཁོ་ནས་དལ་བའི་རྟེན་བཟང་འདི་ཆུད་ཟོས་སུ་བྱེད་པ་ཡིན་པས་གྲོགས་འདི་གལ་ཆེ་བ་སྟེ། མཁས་པ་ཤེས་རབ་ཅན་རང་ཚུགས་ཐུབ་པ་ཞིག་མིན་ཚེ། གྲོགས་ཀྱིས་ཆུ་སྣ་ཁྲིད་པ་ལྟར་ཁྲིད་པ་ནི། དཔེར་ན་ཆུ་བོ་སའི་བབ་གང་དུ་དམའ་བའི་རྗེས་སུ་འབྲང་བ་ལས་རང་ཚུགས་ཐུབ་བྱེད་ཀྱི་ནུས་པ་མེད་པ་ལྟ་བུ་ཡིན་པའི་ཕྱིར། དེས་ན་རྡོ་རྗེའི་སྤུན་དང་ཆོས་ཀྱི་མཆེད་པོའི་བར་དུ་དག་སྣང་དང་བརྩེ་གདུང་ཆེ་ཞིང་། གབ་གསང་སྦས་པའི་གསང་བ་ཐུབ་ཅིང་བློ་གཏད་ཕེར་བའི་གྲོགས་མཆོག་མཐུན་པའི་ཆོས་དྲུག་དང་ལྡན་པ་དང་འགྲོགས་དགོས་སོ།།

༦ ཉམས་ལེན་མཐར་ཐུག་དམ་པའི་ཆོས་དྲུག་བསྟན་པ།

ཉམས་ལེན་མཐར་ཐུག་དམ་པའི་ཆོས་དྲུག་ནི།།

རྒྱབ་བརྟེན་ལུང་སྦྱོར་གཏན་ཚིགས་གཏན་ལ་ཕབ།།

མན་ངག་གནད་བསྣུན་ས་ལམ་རིམ་པ་རྫོགས།།

མཐོ་དམན་ཀུན་འདྲེན་མཐའ་འཛིན་བྲལ་བའོ།།

ཞེས་གསུངས་ཏེ། དབེན་པའི་གནས་སུ་དམ་པའི་གྲོགས་དང་འགྲོགས་ནས་མན་ངག་གི་གདམས་པ་ལ་ཉམས་སུ་ལེན་པའི་མཐར་ཐུག་གི་དམ་པའི་ཆོས་དྲུག་ནི། གང་ཉམས་སུ་ལེན་བྱའི་ལྟ་བ་དེ་ཡང་དག་པར་ཡིན་པའི་སྒྲུབ་བྱེད་དུ། རྒྱབ་རྟེན་གྱི་ལུང་དང་རིགས་པའི་སྦྱོར་བས་གཏན་ལ་དབབ་དགོས་ཏེ། སྒོམ་སེམས་གནས་ཙམ་རེ་དང་གསལ་སྟོང་ཕྱོགས་རེ་བ་ཙམ་རེ་ཕྱི་རོལ་པ་ལ་ཡང་ཡོད་དེ། སྒོམ་བསམ་གཏན་ལ་གནས་པ་ཕུར་བུ་པ་ལ་སོགས་པ་རིགས་བདུན་ཙམ་ཡོད་པའི་ཕྱིར། དེས་ན་ལུང་དང་རིགས་པ་མན་ངག་གསུམ་པོ་ལྟོ་སྦྱར་ནས་ལུང་གིས་རྒྱབ་སྐྱོར་གཏན་ཚིགས་ཀྱིས་གཏན་ལ་དབབ་དགོས། འོན་ཀྱང་ཉམས་ལེན་གནད་ལ་འདྲིལ་བྱེད་ཀྱི་མན་ངག་ཡོད་དགོས་མ་གཏོགས་ཁ་ཡིས་སྐྱིད་པོ་བཤད་ཤེས་ཀྱང་གནད་གཅིག་ཏུ་དྲིལ་མ་ཤེས་ན་གོ་ཆོད་པ་མིན། དེས་ན་མན་ངག་གིས་གནད་དུ་བསྣུན་ནས་གོལ་ཤོར་ནོར་གསུམ་གྱི་འཕྲང་ལས་ཐར་བར་བྱས་ནས་ཉམས་སུ་ལེན་དགོས་པ་ཡིན་ཏེ། སྔོན་ཇོ་བོ་རྗེ་ལྷ་གཅིག་བོད་དུ་ཕེབས་པའི་ཚེ། ཇོ་བོས་ལོ་ཙཱ་བ་ལ། ཆོས་འདི་དང་འདི་ལྟ་བུ་མཁྱེན་ནམ་ཞེས་རིམ་པར་དྲིས་པས་མི་མཁྱེན་པ་མེད་པ་ལྟར་འདུག་པས། ཇོ་བོ་མགུ་སྟེ་ངོ་མཚར་ཆེ། ཁྱེད་ལྟ་བུའི་མཁས་པ་བོད་ན་བཞུགས་བཞིན་དུ་ཁོ་བོ་བོད་དུ་འོང་མི་དགོས་པར་འདུག་གསུངས། སླར་ཡང་དེ་ཐམས་ཅད་སྟན་ཐོག་གཅིག་ཏུ་ཉམས་སུ་ལེན་ན་ཅི་ལྟར་བྱེད་གསུངས་པས། རང་རང་གི་གཞུང་ནས་ཇི་ལྟར་བཤད་པ་ལྟར་ཉམས་སུ་ལེན་པ་ཡིན་ཞུས་པས། ཇོ་བོ་མ་དགྱེས་ཏེ། ལོ་ཙཱ་བ་རུལ། ང་བོད་དུ་འོང་དགོས་པར་འདུག་གསུངས། འོ་ན་ཇི་ལྟར་བྱེད་ཞུས་པས། མདོ་སྔགས་ཀྱི་ཆོས་ཐམས་ཅད་མན་ངག་གི་གནད་གཅིག་ཏུ་བསྡུས་ནས་གང་ཟག་གཅིག་འཚང་རྒྱ་བའི་ལམ་གནད་དུ་གཞུང་ལུགས་ཐམས་ཅད་གདམས་པར་ཤར་བའི་འབབ་ས་གཅིག་ཏུ་བབ་པར་བྱས་ནས་ཉམས་སུ་ལེན་དགོས་པ་ཡིན་གསུངས། དེ་ལྟར་ཐོས་བསམ་ལུང་རིགས་ཀྱིས་མཐའ་རྒྱ་བཅད་ནས་ཐེག་པ་མཐོ་དམན་ཀུན་གྱི་གནད་མན་ངག་གཅིག་ཏུ་འབྲེལ་ནས་ཕྱོགས་རིས་མཐར་འཛིན་དང་བྲལ་བ་བྱེད་དགོས་ཞེས་ཉམས་ལེན་མཐར་ཐུག་གི་སྐྱེལ་སོའི་དམ་པའི་ཆོས་དྲུག་བསྟན་པའོ།།

༧ སྒྲུབ་པ་བསྲན་ཚུགས་མཐར་ཕྱིན་གྱི་ཆོས་དྲུག་བསྟན་པ།

སྒྲུབ་པ་བསྲན་ཚུགས་མཐར་ཕྱིན་ཆོས་དྲུག་ནི།།

གསོད་ཀྱང་དམ་པའི་ཆོས་ལས་བློ་མི་ལྡོག།

ན་ཡང་ལོག་པར་ལྟ་བ་མི་སྐྱེ་ཞིང༌།།

དམ་བཅའ་ངོ་སྲུང་བར་ཆོད་ཀྱིས་མི་ཤིགས༌།།

མཉམ་གཞག་མྱོང་བ་རྗེས་ཐོབ་བསྲེ་ནུས་ཤིང༌།།

མ་གྲུབ་བར་དུ་བརྩོན་པ་འདོར་མི་བྱེད།།

སྤང་གཉེན་ཐུག་ཕྲད་རོ་སྙོམས་ནུས་པའོ།།

ཞེས་གསུངས་ཏེ། སྒྲུབ་གནས་སུ་སོང་ནས་སྒྲུབ་པ་མཐར་མ་ཕྱིན་ན་ཆོས་འགོ་མ་ཐོན་པ་ཡིན་པས། སྒྲུབ་པ་མཐར་ཕྱིན་པར་བྱེད་པ་ལ་བསྲན་ཚུགས་དགོས་པས་ན་རུང་ཚ་རུང་ཤི་རུང་གསོན་རུང་འཕོངས་རུལ་གདན་རྡོལ་གང་ལྟར་གྱུར་ཀྱང་སྒྲུབ་པ་ཉམས་ལེན་འདི་ལས་ཕྱི་བཤོལ་མི་བྱེད་སྙམ་པའི་དམ་བཅའི་ཆོད་སེམས་དམ་པོ་གསོད་པའི་གཤེད་མ་དེ་སྔོན་དུ་ཐོན་ཡང་དམ་ཆོས་ཉམས་ལེན་དེ་ལས་བློ་མི་ལྡོག་ཕྱིར་བཤོལ་མི་བྱེད། ནད་ན་ཚས་ཇི་ལྟར་མནར་ཡང་། འདི་འདྲ་མི་རིགས་སྙམ་པའི་ལོག་ལྟ་དང་ཡི་ཆད་ཀྱི་འཁང་ར་མི་སྐྱེ་ཞིང་། དམ་བཅས་པ་དེ་ངོ་ཆེན་གྱི་ངོ་སྲུང་བའི་ཆེད་དུ་དམ་བཅའ་ཤོར་བ་ལ་སོགས་པ་བར་ཆད་ཀྱིས་བཤིག་མི་ནུས་པ་དང་། མཉམ་བཞག་གི་སྐབས་ཀྱི་ཉམས་ལེན་དེ་རྗེས་ཐོབ་ཀྱི་སྐབས་སུ་འཁྲུལ་བ་མི་འབྱུང་བའི་ཆེད་དུ་ཡིན་པ་དང་། སྒོམ་པས་རྐྱེན་མ་ཐུབ་ཚེ་རྐྱེན་ངན་ཐོག་ཏུ་བབས་ན་ཐ་མལ་པ་དང་ཁྱད་མེད་དུ་འགྱུར་འགྲོ་བས་མཉམ་བཞག་གི་མྱོང་བ་རྗེས་ཐོབ་དང་བསྲེ་ནུས་པར་བྱེད་པ་དང་། ཉམས་ལེན་ལ་འབྲས་བུ་ཐོབ་པའི་བར་རམ་ཡང་ན་སྒྲུབ་པ་དུས་བཀག་གི་ཐོག་ཏུ་མ་ཐོན་གྱི་བར་དེར་མཚམས་ལས་ཧར་ལང་བྱེད་པ་སོགས་བརྩོན་པ་ལ་ཐང་ལྷོད་ཤོར་མི་རུང་བ་ཡིན་པས་བརྩོན་པ་མ་དོར་བ་དང་། མཉམ་བཞག་རྗེས་ཐོབ་གང་གི་སྐབས་སུ་ཡིན་ཡང་ཉོན་མོངས་རྣམ་རྟོག་གང་སྐྱེས་ཀྱང་། ལས་དང་པོ་པས་སྤང་གཉེན་ཐུག་ཕྲད་ཀྱིས་མི་མཐུན་ཕྱོགས་ཀྱི་དབང་དུ་མ་ཤོར་ཞིང་། ལམ་ལ་བརྟན་པ་ཅུང་ཟད་ཅིག་ཐོབ་ཡོད་པས་བཟང་ངན་སྐྱིད་སྡུག་རོ་སྙོམས་ཀྱི་སྤྱོད་པས་གཉིས་འཛིན་སྤང་བླང་དང་བྲལ་བའི་ལྟ་སྤྱོད་ཀྱིས་བོགས་འབྱིན་པར་བྱེད་པ་སྟེ་སྒྲུབ་ལ་བསྲན་ཚུགས་མཐར་ཕྱིན་གྱི་ཆོས་དྲུག་བསྟན་པའོ།།

༨ བསམ་པར་བྱ་བའི་ཆོས་དྲུག་བསྟན་པ།

དེ་ནས་བསམ་པར་བྱ་བའི་ཆོས་དྲུག་ནི།།

ལེ་ལན་ཐམས་ཅད་རང་ལས་བྱུང་བ་དང༌།།

སྡུག་བསྔལ་ཐམས་ཅད་སྔོན་གྱི་ལས་ལས་བྱུང༌།།

སྔོན་ལས་དེ་ཡང་འཕྲལ་གྱི་རྐྱེན་ལས་བྱུང༌།།

རྐྱེན་ངན་རང་གི་ཀུན་རྟོག་གཡོ་ལས་བྱུང༌།།

དེ་ཡང་འཁྲུལ་བའི་ཡུལ་ཕྱིར་འབྲངས་ལས་བྱུང༌།།

དེ་ཡིས་ཐར་ལམ་སྒྲིབ་པ་བསམ་པའོ།།

ཞེས་གསུངས་ཏེ། ཀུན་རྫོབ་བྱང་ཆུབ་ཀྱི་སེམས་ཀྱིས་རྐྱེན་ངན་ལམ་དུ་སྒྱུར་བ་ནི་ཇོ་བོ་རྗེས་འདི་ལྟར་གསུངས་ཏེ། སྣོད་བཅུད་སྡིག་པས་ཁོལ་བའི་ཚེ། །རྐྱེན་ངན་བྱང་ཆུབ་ལམ་དུ་བསྒྱུར། །ལེ་ལན་ཐམས་ཅད་གཅིག་ལ་བདའ། །ཀུན་ལ་བཀའ་དྲིན་ཆེ་བར་བསྒོམ། །ཞེས་གསུངས་པ་དང་འདྲ་བར། མི་འདོད་རྐྱེན་དང་ཉེར་འཚེ་གང་བྱུང་ཡང་དེ་ལ་ཁྲོ་ཆགས་སོགས་ཀྱི་འཛིན་པ་མི་ཞུགས་པར། ལེ་ལན་ཚང་མ་གཞན་ལས་མ་བྱུང་བར་རང་ལས་བྱུང་བ་སྟེ། རང་གི་འཁྲུལ་སྣང་ལས་རང་གི་སྡུག་བསྔལ་འདི་བྱུང་བའི་ཕྱིར་དང་། སྔོན་གྱི་ལས་དེ་ཡང་ཐོག་མ་ཉིད་ནས་འགྱུར་དུ་མེད་པའི་གཏན་འཁེལ་བ་རྟག་བརྟན་ཐེར་ཟུག་གི་བྱེད་པོས་བཟོས་པ་ཕྱི་རོལ་བའི་འདོད་པ་དང་འདྲ་བ་ཞིག་མིན་པས། རྒྱུ་རྐྱེན་མེད་པ་མ་ཡིན་པར་འཕྲལ་རྐྱེན་ལ་བརྟེན་ནས་བྱུང༌ཞིང་། འོ་ན་འཕྲལ་གྱི་རྐྱེན་ངན་དེ་གང་ནས་བྱུང་ཞེ་ན། རང་ཉིད་ཀྱི་ཀུན་རྟོག་ཡུལ་ཕྱིར་གཡོས་ནས་གཟུང་འཛིན་འཁྲུལ་བ་ཅན་དུ་སོང་བ་ལས་བྱུང༌བས། གཙོ་བོ་འདོད་ལྔའི་ཡུལ་ཕྱིར་དབང་ལྔ་འབྲངས་ནས་འཁྲུལ་བའི་དབང་གིས་ཐར་ལམ་སྒྲིབ་པའོ་ཞེས་པ་སྟེ། དེ་ཡང་གཞན་ཞིག་གིས་འཁོར་བའི་གནས་སུ་འཕངས་པ་ལྟ་བུ་མ་ཡིན་པར་རང་ཉིད་ཀྱི་ཀུན་རྟོག་གཡོས་ནས་ཡུལ་རྗེས་སུ་འབྲངས། དེས་ལས་བསགས། དེའི་དབང་གིས་རྣམ་སྨིན་སྡུག་བསྔལ་མྱོང་བ་སྟེ། འདི་དག་ཐམས་ཅད་རང་རྩ་ནས་འཁྲུལ་ཏེ་མ་འཇོན་མ་ཐོན་པ་ཡིན་ནོ།།

༩ ཉེས་ཀུན་རང་གིས་བྱས་པའི་ཆོས་དྲུག་བསྟན་པ།

ཉེས་ཀུན་རང་གིས་བྱས་པའི་ཆོས་དྲུག་ནི།།

སྐྱེ་ཤིའི་སྡུག་བསྔལ་རང་ལས་བྱུང་བས་ཏེ།།

བཙལ་གྱིས་མ་རྙེད་འཚོལ་བའི་སྡུག་བསྔལ་དང༌།།

འཚོ་སྐྱོང་སྡུག་བསྔལ་རང་གི་ཆེད་ཀར་བྱས།།

དགྲ་གཉེན་གཉིས་ལ་ཆགས་སྡང་འཛིན་པ་ཡིས།།

དགྲ་ཕྲད་གཉེན་བྲལ་སྡུག་བསྔལ་རང་གིས་བྱས༌།།

ངན་སོང་གསུམ་གྱི་སྡུག་བསྔལ་ཆེན་པོ་ཡང༌།།

གཞན་མིན་རང་གི་ལས་ཀྱིས་བྱས་པའོ།།

ཞེས་གསུངས་པ་སྟེ། སྔོན་ལས་དང་འཕྲལ་རྐྱེན་གྱི་དབང་གིས་སྡུག་བསྔལ་བ་འདི་དག་གི་ལེ་ལན་རང་ལ་ཐུག་ཚུལ་དེ་སྤྱིའི་སྒོ་ནས་བཤད་ན་དེ་ལྟར་ཡིན་ལ། བྱེ་བྲག་མིའི་སྡུག་བསྔལ་ལ་བསམ་ན་ཡང་། རང་ངོ་རང་གིས་མ་ཤེས་པར་ལས་ངན་བསགས་པའི་སྟོབས་ཀྱིས་སྐྱེ་ཤི་ཁ་བརྒྱུད་དེ་འཁོར་བར་འཁྱམས་པའི་སྡུག་བསྔལ་རང་ལས་བྱུང་བ་དང་། ནོར་རྫས་ལོངས་སྤྱོད་མེད་པ་བཙལ་བར་བྱས་ཀྱང་མ་རྙེད་འཚོལ་བའི་སྡུག་བསྔལ་དང་། ཡོད་པ་འཚོ་སྐྱོང་མ་ཐུབ་པའི་སྡུག་བསྔལ་ཡང་རང་གིས་ཆེད་ཀར་རམ་ཆེད་དུ་བྱས་པ་དང་། དགྲ་གཉེན་གཉིས་ལ་ཆགས་སྡང་གི་འཛིན་པ་བྱས་པའི་དབང་གིས། དགྲ་སྡང་འཕྲད་ཀྱིས་དོགས་པའི་སྡུག་བསྔལ་དང་། གཉེན་སྐྱོང་འབྲལ་གྱིས་དོགས་པའི་སྡུག་བསྔལ་དག་བྱུང་བས་དེ་ལྟ་བུའི་སྡུག་བསྔལ་ཡང་རང་གིས་བྱས་པ་དང་། དེ་བཞིན་དུ་ངན་སོང་གསུམ་གྱི་སྡུག་བསྔལ་ཆེན་པོ་ཡང་། རང་གི་སྡིག་པ་མི་དགེ་བའི་སེམས་ཀྱིས་ལས་བསགས་པ་ལ་བརྟེན་ནས་བྱུང་བ་ནི། སེམས་ཅན་དམྱལ་བའི་མཚོན་ཆ་རྣམས། །སུ་ཞིག་གིས་ནི་ཆེད་དུ་བྱས། །ལྕགས་སྲེག་ས་གཞི་སུ་ཡིས་བྱས། །མོ་ཚོགས་དེ་དག་ཅི་ལས་བྱུང་། །དེ་འདྲ་དེ་དག་ཐམས་ཅད་ཀྱང་། །སྡིག་སེམས་ཡིན་པར་ཐུབ་པས་གསུངས། །ཞེས་གསུངས་པ་ལྟར་ཡིན་པས་གཞན་མིན་རང་གི་ལས་ཀྱིས་བྱས་པའོ། །སྐྱེས་ནས་འཆི་བའི་བར་དུ་རྒ་ན་གཉིས་ཀ་ཡོད་པ་ཡིན་པས་སྐྱེ་ཤིའི་ཁོངས་སུ་རྒ་ན་འདུས་ལ་དེ་ཐམས་ཅད་ཀྱི་རྩ་བ་ཡང་རང་ཉིད་ཀྱི་རྣམ་རྟོག་འཁྲུལ་བའི་གཞན་དབང་དུ་སོང་ནས་མེད་པ་ལ་ཡོད་པར་བཟུང་བའི་བདག་ཏུ་འཛིན་པ་ལས་བྱུང་བ་ཡིན་པར་བསྟན་པའོ།།

༡༠ ཉེས་སྣང་ངན་རྟོག་འཁྲུལ་བའི་ཆོས་དྲུག་བསྟན་པ།

ཉེས་སྣང་ངན་རྟོག་འཁྲུལ་བའི་ཆོས་དྲུག་ནི།།

རང་སེམས་མ་ཐུལ་གནོད་བྱེད་ཟད་མེད་དང༌།།

གནོད་བྱེད་སྣང་བ་རང་སྣང་མ་དག་དང༌།།

གྲག་སྟོང་སྒྲ་ལ་རང་གར་རྗེས་གཅོད་དང༌།།

རང་ཡན་སེམས་ལ་དགག་སྒྲུབ་འཛིན་པ་དང༌།།

བདེ་སྡུག་ངེས་མེད་ངེས་པར་འཛིན་པ་དང༌།།

ཁོང་ཁྲོ་འཁོན་ངན་རང་རྒྱུད་སྲེག་པའོ།།

ཞེས་གསུངས་པ་སྟེ། རང་སེམས་བདག་འཛིན་གྱི་འགོང་པོ་དེ་མ་ཐུལ་ན་ཕྱི་རོལ་གྱི་གནོད་བྱེད་ཟད་དུ་མེད་པར་འབྱུང་བ་ཡིན་ཏེ། རྒྱལ་སྲས་ཞི་བ་ལྷས། ས་སྟེང་འདི་དག་ཀོས་གཡོགས་སུ། །དེ་སྙེད་ཀོ་བས་ག་ལ་ལང་། །ལྷམ་མཐིལ་ཙམ་གྱི་ཀོ་བས་ནི། །ས་སྟེང་ཐམས་ཅད་གཡོགས་དང་འདྲ། །ཞེས་པ་སྟེ། གང་ཟག་གང་གིས་ངའི་རྐང་བ་ཚེར་མས་འབིགས་ཡོང་འདུག་ཟེར་ནས་ས་སྟེང་ཚང་མ་ཀོ་བས་གཡོག་དགོས་ན་ཀོ་བས་འདང་ཐབས་མེད་ལ་གཡོག་ཐུབ་ཐབས་ཀྱང་མེད་པ་ཡིན། འོན་ཀྱང་རང་གི་ལྷམ་གྱི་མཐིལ་དེ་ཀོ་བས་གཡོགས་པར་བྱས་ན་ས་སྟེང་ཐམས་ཅད་གཡོགས་པའི་གོ་ཆོད་པ་ཡིན་པ་བཞིན་དུ། བཟེ་རེ་ཅན་གྱི་མཐོང་སྣང་དུ་ཕྱི་རོལ་གྱི་སྣང་བ་ཐམས་ཅད་དགྲ་རུ་འཆར་ཞིང་། གང་སྣང་ཐམས་ཅད་གནོད་བྱེད་ཀྱི་སྣང་བ་ཤ་སྟག་ཏུ་འགྱུར་བ་དང་། བྲག་སྲིན་མོའི་གླུ་ལས། འདྲེ་ང་བས་མི་ཚད་གཞན་ཡང་ཡོད། །ཅེས་པ་དང་། འདྲེ་མང་པོ་བྱ་བ་འདུ་ཤེས་ཡིན། །འདྲེ་ངར་མ་བྱ་བ་ངར་འཛིན་ཡིན། །འདྲེ་རྒོད་པོ་བྱ་བ་རྣམ་རྟོག་ཡིན། །ཞེས་པ་ལྟར་དུ་གནོད་བྱེད་ཐམས་ཅད་རང་གི་སེམས་ཀྱི་སྣང་བ་ཡིན་པས། རྩ་བ་རང་སེམས་བདག་འཛིན་གྱི་འཁྲུལ་བ་འདི་བདག་མེད་རྟོགས་པའི་ཤེས་རབ་ཀྱིས་བཤིག་ཐུབ་ན་འཕྲུལ་འཁོར་གྱི་གསང་གནད་ཀྱི་གཟེར་གཏོར་བ་དང་འདྲ་བར་ཕྱི་རོལ་གནོད་བྱེད་ཀྱི་སྣང་བ་གང་ཤར་གང་སྣང་ཐམས་ཅད་རང་ཤུགས་ཀྱིས་འགག་པ་ཡིན་པ་སྟེ། དེ་འདྲའི་གནོད་བྱེད་ཀྱི་སྣང་བ་དེ་དག་ཀྱང་རང་སྣང་མ་དག་པའི་དབང་གིས་ཤར་བ་འབའ་ཞིག་པ་ལས། དག་པའི་དབང་དུ་བྱས་ན་མ་དག་པའི་སྣང་བ་ཞིག་ཡོད་པ་མིན་ཏེ། མདོ་ཕྱོགས་ལྟར་ན། ས་བརྒྱད་པ་ལ་དྲི་མ་དེ་དག་རྩ་བཅས་ཉེ་བར་ཞི་འགྱུར་ཞིང་། །ཞེས་གསུངས་པ་བཞིན་དུ། ས་བརྒྱད་པའི་བྱང་སེམས་ལ་མ་དག་པའི་སྣང་བ་མི་མངའ་བ་དང་། སྔགས་ནང་རྒྱུད་སྤྱིའི་སྐབས་སུ་ཡང་། ལམ་བསྐྱེད་རྫོགས་ལ་བརྟེན་ནས་སྣང་སྲིད་དག་པ་རབ་འབྱམས་དག་མཉམ་བདེན་པ་དབྱེར་མེད་ལ་དགྲ་དང་བགེགས་ཀྱི་མིང་མེད་ཅིང་། རྫོགས་ཆེན་མན་ངག་སྡེའི་སྐབས་སུ་ཡང་ཐོད་རྒལ་སྣང་བཞིའི་རིག་པ་ཚད་ལ་ཕེབས་ནས་མ་དག་པའི་སྣང་བ་མི་མངའ་བ་ཡིན་པས་དག་པའི་སྣང་བ་འབའ་ཞིག་ཡིན་པས། མ་དག་འཁྲུལ་བའི་སྣང་བ་སྡུག་བསྔལ་བདེན་པས་བསྡུས་པའི་བཟང་ངན་དགྲ་གཉེན་དགའ་སྡུག་གི་དབྱེ་བ་འདི་ཀུན་རྫོབ་སྣང་ཚུལ་ཙམ་ལ་ཡོད་པ་ལས་དོན་དམ་མ་འཁྲུལ་བའི་སྣང་ངོར་འཁྲུལ་བའི་མིང་ཙམ་ཡང་ཡོད་པ་མིན་ནོ། །ངག་གྲག་པ་ཙམ་གྱི་རང་དུས་ནས་སྟོང་བའི་བྲག་ཆ་ལྟ་བུ་དེ་ལ་དགའ་སྡུག་གི་སྣང་བ་སྐྱེས་ནས་བསྟོད་སྨད་སྙན་དང་མི་སྙན་གྱི་རྗེས་སུ་འབྲངས་ཏེ་ཆགས་སྡང་སྐྱེས་པ་དང་། དེ་བཞིན་སེམས་རང་ཡན་བདག་མེད་རྟ་རྒོད་རི་ཡན་བྱས་པ་ལྟ་བུའི་འཁྲུལ་རྟོག་ཐ་མལ་གྱི་ཤེས་པ་དེས་དགག་སྒྲུབ་བདེ་སྡུག་སྣ་ཚོགས་ངེས་མེད་དུ་འཛིན་པ་དང་། ཁོང་ཁྲོ་འཁོན་འཛིན་ངན་སེམས་ཀྱིས་རང་རྒྱུད་སྲེག་པ་དང་། ཤུགས་ལ་ཆགས་པས་ཡུལ་གྱི་གཞན་དབང་དུ་སོང་བའི་ལས་བསགས་པ་དང་། གཉིས་མཉམ་གཏི་མུག་གི་དབང་གིས། འཁྲུལ་བའི་རྨོངས་མུན་དུ་ཐོག་མེད་ནས་ད་ལྟའི་བར་འཁྱམས་པའི་ངན་རྟོག་འཁྲུལ་བས་ཕུང་ཚུལ་གྱི་ཆོས་བསྟན་པའོ།།

༡༡ འཁྲུལ་སྣང་བཟློག་པ་དོན་ཆེན་ཆོས་དྲུག་བསྟན་པ།

འཁྲུལ་སྣང་བཟློག་པ་དོན་ཆེན་ཆོས་དྲུག་ནི།།

གནོད་ལ་བཟོད་བྱ་སྙིང་རྗེ་བསྐྱེད་པ་དང༌།།

འདྲེར་རྟོག་མི་གཟུང་ཕ་མ་ལྷར་ཤེས་དང༌།།

འཁྲུལ་བར་ཞེན་ལ་བདེན་མེད་རྩལ་སྦྱོང་དང༌།།

འཁྲུལ་རྩ་སེམས་ཀྱི་རྩ་བ་བཅད་པ་དང༌།།

གང་སྣང་རྐྱེན་རྣམས་ལམ་དུ་བསྒྱུར་བ་དང༌།།

ཐ་མལ་མ་ཡེངས་གཉེན་པོ་བསྟེན་པའོ།།

ཞེས་གསུངས་པ་སྟེ། མེད་ལ་ཡོད་པར་བཟུང་བའི་འཁྲུལ་སྣང་དེ་ཇི་ལྟར་ལྡོག་དགོས་ན། གནོད་པ་བྱེད་མཁན་ལ་བཟོད་པ་བསྒོམས་ན་ངན་རྐྱེན་བཟང་རྐྱེན་ལ་འགྱུར་བ་ཡིན་ཏེ། དགྲས་ལོག་སྒྲུབ་བྱས་ཀྱང་ཐུགས་དམ་གྱི་བོགས་འདོན། །གཏམ་མ་ཉེས་ཁ་ཡོག་དགེ་སྐུལ་གྱི་ལྕག་འདེབས། །འདི་ཆགས་ཞེན་འཇིག་པའི་བླ་མ་རུ་འདུག་པས། །ཁོའི་དྲིན་ལན་འཁོར་ཐབས་མེད་པ་རུ་གཟིགས་མཛོད། །ཅེས་དང་། བཟོད་པ་དཀའ་ཐུབ་དམ་པ་བཟོད་པ་སྟེ། །ཞེས་གསུངས་པ་ལྟར་གནོད་བྱེད་ལ་ངན་ལན་མེད་ཅིང་བཟོད་པ་སྒོམ་པའི་སྟེང་དུ་དེ་ལ་སྙིང་རྗེ་བསྐྱེད་པ་དང་། མཁའ་རྒྱུའི་ཡི་དྭགས་ཀྱི་རིགས་ཅན་གནོད་སྦྱིན་འབྱུང་པོ་མི་མ་ཡིན་འདྲེ་གདོན་ལ་སོགས་པ་དེ་དག་ནི། ལས་ངན་གྱིས་རྒྱུ་བྱས་ཏེ་ལུས་ངན་འཁྲུལ་བའི་རང་གཟུགས་ལ་གོམས་ནས་མ་རུང་གནོད་སེམས་ཀྱི་ཉེར་ལེན་གྱིས་སེམས་ཅན་ལ་འཚེ་བ་བྱེད་པ་རུ་གྱུར་སོང་བ་ཡིན་ཡང་། དེ་དག་ལ་གནོད་བྱེད་འདྲེ་ཡི་རྟོག་པར་མི་བཟུང་བར་ཐམས་ཅད་ཀྱང་ཕ་མ་མ་བྱས་པ་གཅིག་ཀྱང་མེད་པ་ཡིན་སྙམ་པ་དེ་ལྟར་ཤེས་པའི་སྒོ་ནས་སྙིང་རྗེ་སྐྱེད་པ་དང་། འགྲོ་ཀུན་བདེ་གཤེགས་སྙིང་པོའི་ས་བོན་ཅན་མ་འོངས་པར་སངས་རྒྱས་པའི་ངོ་བོ་སྣང་སྲིད་དག་པ་རབ་འབྱམས་ལྷ་ཡི་འཁོར་ལོར་སྣང་བར་འགྱུར་བར་ཤེས་པར་བྱེད་དགོས་ཏེ། གནས་ལུགས་དོན་དམ་པའི་ཆོས་ཐམས་ཅད་ཀྱི་ཆོས་ཉིད་འཕོ་འགྱུར་བྲི་གང་དང་བྲལ་བའི་ཆ་ནས་བསམས་ན་གདོད་མའི་མགོན་པོ་དང་སྣང་སྲིད་ལྷ་འདྲེ་གཉིས་ཀ་ལ་ཁྱད་མེད་པའི་ཡུམ་དོན་གྱི་དགོངས་པ་མཐར་ཐུག་ཡིན་པའི་ཕྱིར། འཁྲུལ་བར་ཞེན་ཅིང་ཆགས་པ་དེ་དག་ནི་བདེན་མེད་སྒྱུ་མའི་རང་གཟུགས་སུ་བལྟས་ཏེ། མདང་དགོང་རྨི་ལམ་ནང་གི་བུ་ཤི་བ་དང་ནོར་བུ་རྙེད་པ་གཉིས་དེ་རིང་མེད་པ་དང་། ད་ལྟའི་འཁྲུལ་སྣང་ལ་སྤྱོད་པ་གཉིས་ཁྱད་པར་མེད་པའི་དོན་ལ་རྩལ་སྦྱོང་བར་བྱེད་པ་དང་། དེ་ལ་སྤྱིར་ན་འཁྲུལ་བ་འདི་ལ་སྣང་བ་དང་ཞེན་པ་གཉིས་སུ་ཕྱེ་སྟེ། དེ་ཡང་དང་པོར་དབང་ཤེས་རྟོག་མེད་ཀྱི་ཡུལ་ལ་རི་དང་ཁང་ཁྱིམ་ལ་སོགས་ཤར་བ་དེ་འཁྲུལ་བའི་སྣང་བ་ཡིན་། དེ་ནས་དེ་ལ་ཞེན་པ་ཤར་ནས་དེར་འཛིན་བྱེ་བྲག་ལ་འཛིན་པའི་ཞེན་པ་དེ་འབྱུང་བ་ཡིན། དེ་ལྟ་བུའི་འཁྲུལ་བ་དེ་གཞི་མེད་རྩ་བྲལ་དུ་ཤེས་པར་བྱས་ནས་བདེན་མེད་ཀྱི་རྩལ་སྦྱོང་དགོས་སོ། །འཁྲུལ་བའི་རྩ་བ་དེ་དེད་ནས་སོང་ན་སེམས་ལ་ཐུག་པ་ཡིན། སེམས་ཀྱི་རྩ་བ་རྩད་བཅད་ན་ཕྱི་སྣང་བའི་ཡུལ། ནང་རང་ལུས་ཀྱི་ཕུང་ཁམས་སྐྱེ་མཆེད་ཐམས་ཅད་ལ་བཙལ་ན་ཡང་རྙེད་དུ་མེད་པ། ཡོད་ཅེ་ན་སྟོན་དུ་མེད་པ། མེད་ཅེ་ན་ཡོད་ཡོད་འདྲ་བའི་སེམས་ཀྱི་གསང་འོད་གསལ་སྤྲོས་པ་དང་བྲལ་བའི་ངང་དུ་འབབ་པའི་མན་ངག་གི་གསང་གིས་སེམས་ཀྱི་རྩ་བ་བཅད་དགོས་སོ། །འཁྲུལ་བ་མ་འགགས་དངོས་པོར་སྣང་བའི་ཚེ་འདི་ལ། བདེ་སྡུག་གང་སྣང་གི་རྐྱེན་ཐམས་ཅད་བདེན་མེད་དུ་ཤེས་པའི་སྒོ་ནས། སྡུག་བསྔལ་བྱུང་ན་བདེ་སྡུག་གཏོང་ལེན་བྱེད་པ་སྟེ། སེམས་ཅན་ཐམས་ཅད་ཀྱི་སྡུག་བསྔལ་མྱོང་བའི་གོ་ཆོད་པ་ལ་འདེང་རྒྱག་པ་དང་། བདེ་བ་བྱུང་ན་ཡང་དེ་ལྟར་དུ་སེམས་ཅན་ལ་བདེ་བ་འདི་ལྟ་བུ་ཐོབ་པར་ཤོག་ཅིག བདེ་བ་འདི་ལྟ་བུའམ་འདི་ལས་ལྷག་པ་དང་འབྲལ་བར་མ་གྱུར་ཅིག་བསམས་ནས་ལམ་དུ་བསྒྱུར་ཏེ། ཐ་མལ་གྱི་ཡེངས་བ་འཁྲུལ་བའི་དབང་དུ་མི་ཤོར་བར་གཉེན་པོ་བདེན་མེད་དུ་ཤེས་པ་དེ་ཉིད་བསྟེན་ནས་འཁྲུལ་སྣང་ལྡོག་ཐབས་བྱེད་དགོས་སོ།།

༡༢ འཁོར་བའི་རང་རྒྱུད་ཉེན་པའི་ཆོས་དྲུག་བསྟན་པ།

འཁོར་བའི་རང་རྒྱུད་ཉེན་པའི་ཆོས་དྲུག་ནི།།

ལུས་སེམས་སྡུག་བསྔལ་མ་བྲལ་བདེ་བ་མེད།།

ཚེ་འདིའི་སྡུག་བསྔལ་བཙལ་བས་འབྲལ་དུས་མེད།།

རང་ལུས་དབང་མ་ཐོབ་པས་བདེ་དོན་མེད།།

དར་ལ་སྙུགས་རིང་བདེ་བའི་གོ་སྐབས་མེད།།

ལས་མ་ཟད་པར་འཁོར་བའི་སྡུག་བསྔལ་ལོ།།

ཞེས་གསུངས་པ་སྟེ། ལུས་སེམས་ཀྱི་སྡུག་བསྔལ་དང་མ་བྲལ་བའི་ཟག་བཅས་ཉེར་བར་ལེན་པའི་ཕུང་པོ་འདི་ཡོད་པའི་རིང་ལ་བདེ་བ་ཞིག་གཏན་ནས་མེད་པས། ལྟར་སྣང་བདེ་བ་ལྟར་དུ་སྣང་ཡང་སྡུག་བསྔལ་གསུམ་ལས་མ་འདས་པར་ཉེན་ཞིང་གདུང་བ་དང་། དེ་བཞིན་དུ་ཚེ་འདིའི་སྡུག་བསྔལ་གྱི་རྒྱུ་རང་གིས་བཙལ་ཏེ་བསྒྲུབས་པས་འབྲས་བུ་སྡུག་བསྔལ་མེད་པར་འདོད་ཀྱང་རྒྱུ་མི་དགེ་བའི་ལས་སྔོན་དུ་སོང་ཟིན་ཕྱིར་འབྲལ་བའི་དུས་མེད་པ་དང་། རང་ལུས་ལ་རང་དབང་ཐོབ་པ་མདོ་ལམ་གྱི་ས་དང་པོ་ཆོས་ཉིད་ཀྱི་བདེན་པ་མཐོང་བའི་མཐོང་ལམ་ཡོན་ཏན་བརྒྱ་ཕྲག་བཅུ་གཉིས་ལ་དབང་ཐོབ་པའི་སྐབས་དང་། སྔགས་ལམ་གྱིས་ཀྱང་རྣམ་པར་སྨིན་པའི་རིག་འཛིན་བརྙེས་པ་དང་རིམ་གཉིས་ཀྱི་ལམ་ནས་སྒྱུ་ལུས་འབྱུང་བ་འདྲ་ཡིན་ན་མ་གཏོགས་ལ། གཞན་ཉེར་ལེན་འབྱུང་རྡོས་ཀྱི་ཕུང་པོའི་རྒྱ་ཡིས་འཐུམས་ནས་ཡོད་པས་བདེ་བའི་དོན་མེད་པ་དང་། མི་བདེ་བ་དེ་ཡང་དར་བའམ་སྡུག་བསྔལ་གྱི་སྟོབས་བདོ་ཞིང་སྨིན་པའི་སྒང་དང་སྙུགས་རིང་བ་སྟེ་རྒྱུན་རིང་པོར་བདེ་བའི་གོ་སྐབས་མེད་པའི་གཞན་དབང་ཅན་ཏེ། ལས་མ་ཟད་ཀྱི་བར་དུ་འཁོར་ཞིང་སྡུག་བསྔལ་བ་ཡིན་ཞེས་འཁོར་བའི་གནས་ཀྱི་རང་རྒྱུད་ཉེན་པའི་ཆོས་དྲུག་འདིས་འཁོར་བའི་སྡུག་བསྔལ་བསྟན་པའོ།།

༡༣ ཅིས་ཀྱང་དགོས་མེད་བསམ་པའི་ཆོས་དྲུག་བསྟན་པ།

ཅིས་ཀྱང་དགོས་མེད་བསམ་པའི་ཆོས་དྲུག་ནི།།

ལམ་སྣ་མ་ཟིན་གང་བྱས་དགོས་པ་མེད།།

དགེ་བ་མ་བསྒྲུབས་ཅིས་ཀྱང་དགོས་པ་མེད།།

ཆོས་ལ་མ་སྤྱད་ཚེ་རིང་དགོས་པ་མེད།།

ཆོས་མིན་གཞན་གྱིས་ཕན་བཏགས་དགོས་པ་མེད༌།།

ཚོགས་གཉིས་མ་བསགས་ཡོ་བྱད་དགོས་པ་མེད།།

བྱང་ཆུབ་མ་བསྒྲུབས་ཅིས་ཀྱང་དགོས་མེད་བསམ།།

ཞེས་གསུངས་པ་སྟེ། ཐར་བའི་ལམ་སྣ་ཞིག་མ་ཟིན་ཚེ་ལས་དཀར་ནག་གི་གཟུགས་བརྙན་གྱི་རི་མོ་གང་ལ་འཇུག་ཀྱང་དགོས་པ་མེད་ཅེས་པ་སྟེ། ཚོགས་བསགས་རྟེན་བཞེངས་དང་ཐོས་བསམ་གྱི་གཟུགས་བརྙན་གང་བྱས་ཀྱང་ཐར་བའི་ལམ་སྣ་ཞིག་ཟིན་མ་ཐུབ་དུས་བེད་ཆེ་ཞིག་མེད་པ་ཡིན་པས་དགོས་པ་མེད་ཅེས་གསུངས་ཤིང་། ཐེག་པ་ཆུང་ངུའི་ལུགས་ཀྱི་ཐར་བའི་ལམ་སྣ་ཞིག་ཟིན་དགོས་ན་གོང་ནས་བཤད་པ་ལྟར་ངེས་འབྱུང་རྣམ་དག་གི་ཀུན་སློང་སྔོན་སོང་ཞིག་ཡོད་དགོས་པ་ཡིན། དེ་ཡང་འཁོར་བ་མཐའ་དག་སྡུག་བསྔལ་གྱི་རང་བཞིན་ཅན་དུ་ཤེས་ནས་དེ་ལས་ཐར་བའི་ཐར་བ་ཐོབ་འདོད་ཀྱི་བློ་མ་བཅོས་པ་ཞིག་ཡོད་དགོས་པ་ལས། སྐབས་སྐབས་སུ་བླ་མ་རེའི་ཆོས་རེ་བཤད་ལུགས་དང་། སྔོན་འགྲོའི་ཁྲིད་ཡིག་རེའི་ནང་དོན་ལ་བལྟས་པ་དང་། བཟའ་ཤི་ཚང་བརྡིབས་ཀྱི་མི་འདོད་པ་རེ་རང་ལ་ཡོང་བའམ་མི་ལ་ཡོང་བ་རིག་པས། ངེས་འབྱུང་སད་སུད་འཁོར་བའི་གནས་འདིར་སྡུག་བསྔལ་གྱི་སྣེ་ལ་སྡུག་བསྔལ་རེད་སྙམ་པའི་ཚོར་སྣང་ཙམ་རེ་ཡོད་སྲིད་པ་ཡིན་ཡང་། དེ་ནི་བསམ་བློའི་འགྱུར་བག་ཙམ་ཡིན་པས་ངེས་འབྱུང་མིན་ལ། ངེས་འབྱུང་ནི་འཁོར་བར་ཞེན་པ་ལོག་ནས་ཐར་ལམ་ལ་ཕྱིར་མི་ལྡོག་པར་འཇུག་པའི་བློ་སྣ་འཇིག་རྟེན་ཚེ་འདིའི་བྱ་གཞག་ཐམས་ཅད་བློས་ཐོངས་པ་ཞིག་ལ་ངོས་འཛིན་དགོས། ཐེག་དམན་ཉན་རང་གི་ལམ་གྱི་ངེས་འབྱུང་ཡང་དག་པ་ཞིག་སྐྱེས་ནས་ལམ་དེའི་ཐར་ལམ་ཟིན་ཡོད་པའི་རྟགས་སུ། འཇིག་རྟེན་ཆོས་བརྒྱད་སྤངས་ཐུབ་ཡོད་དགོས་པས་དེ་མ་སྤངས་ན་ངེས་འབྱུང་གི་བློ་ཡོད་པ་མིན། གང་ལ་ཆོས་བརྒྱད་ཀྱི་ཞེན་པ་ཡོད་ན་དེ་ལ་འཁོར་བར་ངེས་འབྱུང་མེད་པས་ཁྱབ་པ་ཡིན། འཁོར་བར་ངེས་འབྱུང་མེད་ཚེ་ཐེག་དམན་ཉན་རང་གི་ཐར་བའི་ལམ་སྣེ་ཞིག་ཀྱང་ཟིན་མེད་ལ། ཐེག་ཆེན་ལ་མཚོན་ན་ངེས་འབྱུང་དེའི་ཐོག་ཏུ་བྱང་ཆུབ་ཀྱི་སེམས་སྨོན་འཇུག་གི་བདག་ཉིད་ཅན་རྒྱུད་ལ་བསྐྱེད་དགོས་པས། དེའི་ཆེད་དུ་བྱང་ཆུབ་མཆོག་ཏུ་སེམས་བསྐྱེད་ནས་སེམས་བསྐྱེད་སྔོན་སོང་གི་བྱང་སྡོམ་ལེན་དགོས། བྱང་ཆུབ་མཆོག་ཏུ་སེམས་བསྐྱེད་དུས་རང་དོན་ཡིད་བྱེད་ཀྱི་བློ་ཡོད་མི་རུང་བ་དེས་ན། སྤང་བྱ་ནི་ཆོས་བརྒྱད་ཀྱི་ཞེན་པ་དང་། རང་འདོད་ཡིད་བྱེད་ཡིན། བླང་བྱ་ནི་རང་དོན་མ་ཡིན་པའི་གཞན་དོན་འབའ་ཞིག་ཡིན་དགོས། དེས་ན་གང་ན་རང་དོན་ཡིད་བྱེད་ཡོད་པ་དེར་ངེས་འབྱུང་དང་བྱང་སེམས་མེད་པས་ཁྱབ་ཅིང་། དེས་ན་ཐར་བའི་ལམ་སྣ་ཟིན་ཞེས་པ་དེ་ལས་སླ་མོ་ཞིག་མིན་ལ། རྩ་བ་ནས་མི་ཟིན་པའམ་རྩ་བ་ནས་མི་ཐོབ་པ་ཞིག་ཀྱང་ག་ལ་ཡིན། ཚོགས་བསགས་སྒྲིབ་པ་སྦྱངས་པའི་ལག་རྗེས་ཀྱི་ཡོན་ཏན་གྱི་ཁྱད་པར་ཅན་རྒྱུད་ལ་བསྐྱེད་དུ་ཡོད་པ་ཡིན། འོན་ཀྱང་ཚོགས་བསགས་སྒྲིབ་སྦྱོང་གི་སྒོ་ལ་མཚོན་ན་རང་རེའི་ཆོས་རྒྱུད་འདིའི་དབང་དུ་བྱས་ན་སྔོན་འགྲོའི་འབུམ་ལྔ་བསག་དགོས་ཤིང་། སྔོན་འགྲོ་སྔོན་དུ་མ་སོང་ན་དངོས་གཞིའི་ཆོས་ལ་རྨང་མེད་པ་ལྟ་བུ་ཡིན་པས་སྔོན་འགྲོ་བསགས་སྦྱང་གིས་རྒྱུད་མ་སྦྱངས་པ་ཞིག་ལ་དངོས་གཞི་དོན་དམ་ལྷན་ཅིག་སྐྱེས་པའི་ཡེ་ཤེས་སྐྱེ་བ་མིན། འོན་ཀྱང་སྔོན་འགྲོ་ཁྲལ་གསོབ་མ་ཁ་གྲངས་བརྩི་བ་ཙམ་ལན་གྲངས་དུ་མ་བསགས་ཀྱང་ཕན་པ་ཆེར་མེད་ལ། སེམས་བསྐྱེད་ཡང་དག་པ་ཞིག་མ་སྐྱེས་པར་རང་འདོད་ཡིད་བྱེད་དང་མ་བྲལ་བར་ཡོད་ན་སེམས་བསྐྱེད་འབུམ་ལྔ་དུ་མ་བསགས་ཀྱང་གཟུགས་བརྙན་ཙམ། དེ་ཡང་གཞན་ཕན་མ་ཡིན་རང་དོན་ཡིན་པས་སྣང་བ་ཡོད་སར་མུན་པ་དང་མུན་པ་ཡོད་སར་སྣང་བ་ཡོད་པ་མ་ཡིན་པ་བཞིན་དུ་འཇིག་རྟེན་པའི་ཆོས་བརྒྱད་དང་རང་འདོད་ཡིད་བྱེད་ཡོད་དུས་ཐར་བའི་ལམ་སྣ་ཟིན་པ་མེད་ཅིང་། དེས་ན་དེ་འདྲ་བས་ཆོས་སྒྲུབ་མདོག་བྱས་ཀྱང་དགུན་གྱི་དར་ཐོག་ཏུ་མཁར་བརྩིགས་པ་བཞིན་དུ་ཡུན་མི་བརྟན་པར་ཆོས་གཞུག་ཤོར་བ་ཡིན། ཐ་ན་ལམ་ཞུགས་ཙམ་ཡང་རེད་མེད། ལོ་བཅུ་མ་དགོས་ཉི་ཤུ་ལ་ཆོས་ཞུས་པ་དང་དབང་ལུང་ཁྲིད་གསུམ་ཅི་འདྲའི་མང་རབ་ཐོབ་ཡོད་ཅེས་བཤད་ཀྱང་ཐར་ལམ་ཐོབ་པའི་ཆོས། ལམ་གྱི་སྣེ་མོ་ཙམ་ལ་རང་གི་ཀུན་སློང་གི་ཐོག་ནས་ཟིན་མེད་པས། སྔར་ཡང་བཤད་པར་ལྟར་དུ་རང་གི་རྒྱུད་རང་གིས་བརྟགས་ཤིང་དཔྱད་ན། ངེས་འབྱུང་ཙམ་ཞིག་མ་སྐྱེས་ཚེ་སོ་ཐར་གྱི་སྡོམ་པ་ཡང་ཐོབ་མེད་པས་ཐེག་དམན་གྱི་ཆོས་ལམ་ཙམ་དུ་ཡང་ཞུགས་ཐུབ་མེད་ལ། རང་འདོད་ཡིད་བྱེད་འདུལ་མ་ཐུབ་པར་ཆོས་བརྒྱད་ཚེ་འདིའི་བྱ་བ་དགྲ་གཉེན་ཆགས་སྡང་། ཕྱོགས་རིས་བསྟོད་སྨད་རྣམས་ཀྱི་ཁ་ཙམ་དམའ་མེད་ན་བྱང་སྡོམ་རྒྱུད་ལ་སྐྱེས་མེད། དེས་ན་ནང་བ་ཡིན་མིན་གྱི་ཕྱེ་གཞི་ནི་སྐྱབས་འགྲོ་ཙམ་ལས་ལྷག་མེད་ལ། དེ་ཡང་ཞིབ་ཏུ་དཔྱད་ན་སྐྱབས་འགྲོའི་ཐད་ཀྱི་དཀོན་མཆོག་གསུམ་ཙམ་ཡང་ངོས་ལེགས་པོ་ཞིག་ཟིན་མེད་ན་དཀོན་མཆོག་གསུམ་ལ་སྐྱབས་སུ་མཆི་བ་ཡིན་ཞེས་ཀྱང་། མཆོག་གསུམ་གང་ཡིན་དང་སྐྱབས་སུ་འགྲོ་ཚུལ་ཙམ་ཡང་མི་ཤེས། དེའི་སྟེང་དུ་སོ་བྱང་སྔགས་མ་དགོས་སྐྱབས་འགྲོའི་བསླབ་བྱ་ཙམ་ཡང་བསྲུངས་མེད་བསྲུང་བྱ་ཙམ་ཡང་མི་ཤེས་དུས། ནང་པའི་ཁྱིམ་པ་ཞིག་ཀྱང་ཡིན་མིན་ཐེ་ཚོམ་ཅན་དུ་ལོག་འགྲོ་བ་ཡིན། དེས་ན་དམ་ཆོས་རྣམ་དག་སྒྲུབ་པ་འདི་ལ་མིན་ཡང་ཡིན་མདོག་སྟོན་སར་མི་འགྲོ་ཞིང་མིང་ཆེན་པོ་ཐོབ་མཐོན་པོ་ཅི་འདྲ་བ་ཡོད་ཀྱང་ཕན་ཐོགས་མེད་པས། མདོར་བསྡུས་ན་ཐར་བའི་ལམ་སྣེ་དངོས་ཤིག་མ་ཟིན་དུས་གང་བྱས་ཀྱང་དགོས་པ་མེད་དོ། །ཐེག་པ་ཆེན་པོའི་ལམ་དུ་ཞུགས་ནས་བྱང་ཆུབ་ཀྱི་སེམས་རྒྱུད་ལ་སྐྱེས་དུས་རྣམ་པ་གང་ལྟར་ཡང་ཆོག་པས། ངེས་འབྱུང་དང་བྱང་ཆུབ་སེམས་ཀྱིས་བློ་སྦྱངས་ནས་ལམ་སྣ་ཞིག་ཨེ་ཟིན་བལྟ་བ་ནི་གནད་ཆེ་། དེས་ན། ལམ་སྣ་མ་ཟིན་གང་བྱས་དགོས་པ་མེད། །ཅེས་དགོས་མེད་དྲུག་གི་དང་པོར་བསྟན་པའོ། །དགེ་བ་མ་བྱས་ཚེ་གཞན་ཅི་དང་གང་བསྒྲུབས་ཀྱང་ཚེ་འདི་ཕྱི་རང་གཞན་གཉིས་ལ་ཕན་པའི་བྱ་བ་ཡིན་པའི་ངེས་པ་མེད་པས་དགོས་པ་མེད་དོ། །དམ་པའི་ཆོས་ལམ་དུ་མ་ཞུགས་དུས་ཚེ་རིང་པོ་ཞིག་འཚོ་བ་ཡང་སྡིག་པ་མང་པོ་སོག་བྱེད་ཡིན་པ་དང་། སྡིག་པ་དེས་ཚེ་རབས་མང་པོའི་བར་དུ་སྡུག་བསྔལ་རྣམ་པར་སྨིན་བྱེད་ཀྱི་རྒྱུ་བྱེད་པས་ཆོས་མེད་མི་ཚེ་རིང་ན་སྡུག་རྐྱེན་ཡིན་པ་དང་། ཆོས་མིན་གཞན་གྱིས་ཕན་བཏགས་པ་འུ་ཚོ་འཇིག་རྟེན་པས་རྒྱུ་ཟས་ལོངས་སྤྱོད་ཀྱིས་ཕན་རེ་བཏགས་པ་དང་གཉེན་ཉེ་བ། ཤ་ཕུ་ནུ། དགོན་སྡེ་གྲྭ་ཚང་། གཅིག་རྒྱབ་གཅིག་གིས་འཚོ་ཁུལ་བྱེད་པ་དེ་ཕན་འདོགས་བཞིན་ཡོད་པའི་འདེང་ཡིན་ཡང་། དོན་དངོས་སུ་ཕན་བཏགས་ནས་ཐོགས་པ་ཞིག་བྱེད་བསམ་ན་ཆོས་ཀྱིས་ཕན་འདོགས་དགོས་ཏེ། འཇིག་རྟེན་གྱི་ཕྱོགས་ནས་རྒྱུ་ཟས་ནོར་སྦྱིན་པ་དང་མགོ་འདྲེན་སྐྱོབ་མ་བྱེད་པ་ལ་སོགས་པ་ཕན་ཉི་ཚེ་བ་རེ་བཏགས་པར་བྱས་ཀྱང་སྐབས་འགར་འབྲས་བུ་སྡུག་བསྔལ་དུ་མ་བསྐྱེད་ནས་ཕན་མ་བཏགས་ན་དགའ་འདུག་པ་ལྟ་བུའང་ཡོད་པས་མ་ཚད། ཆོས་ཀྱིས་ཕན་བཏགས་ན་ཚེ་འདི་ཕྱི་ཐམས་ཅད་ལ་ཕན་ཐོགས་པས་ཡུན་རིང་གཏན་གྱི་ཕན་ཐོགས་པའི་ཕྱིར་དང་། ཁྱད་པར་དུ་རབ་ཏུ་བྱུང་བ་ཞིག་གིས་སེམས་ཅན་ལ་ཕན་གདགས་པ་དེ་ཆོས་ཀྱིས་འདོགས་དགོས་ཏེ། རྫོགས་པའི་སངས་རྒྱས་བཅོམ་ལྡན་འདས་ཤཱཀྱའི་རྒྱལ་སྲིད་ཀྱི་བདག་པོ་ཡིན་ཡང་། རྒྱལ་སྲིད་མཆིལ་མའི་ཐལ་བ་བཞིན་བོར་ནས་སེམས་ཅན་ལ་ཕན་བཏགས་པ་ལ་ཆོས་འཁོར་རིམ་པ་གསུམ་དུ་བསྐོར་ནས་ཆོས་ཀྱིས་ཕན་བཏགས་པའི་ཕྱིར། འོན་ཀྱང་ཆོས་ཀྱིས་ཕན་འདོགས་པ་ལ་རྒྱ་ཆེན་རྒྱང་རིང་གི་གཞུང་བཤད་མང་པོ་ཞིག་མ་ཤེས་ན་ཕན་ཐོགས་པ་མིན་པས་ང་འདྲ་བས་ཆོས་ཀྱི་ཕན་འདོགས་ཤེས་པ་མིན་ཞེས་བསམ་མི་དགོས་ཏེ། ཐ་ན་དུད་འགྲོ་ཞིག་གི་རྣ་ལམ་དུ་སངས་རྒྱས་ཀྱི་མཚན་རེ་བརྗོད་པར་བྱས་ཀྱང་ཆོས་ཀྱིས་ཕན་བཏགས་པ་ཡིན་ལ་ཆོས་ཀྱི་སྦྱིན་པའང་བྱས་པ་ཡིན། དེས་ན་གྲྭ་པ་རྣམས་ཀྱིས་ཁྱིམ་ཚང་གི་ཁ་ཨེ་སོས་ཀྱི་ཆེད་དུ་རྒྱ་དབུས་གཉིས་ཀ་འགྲིམས་ནས་ནོར་རྫས་གསོག་བྲུན་བྱེད་པ་བས་ཕ་མ་ཉེ་འབྲེལ་ལ་དགེ་སྡིག་གི་བླང་དོར་རེ་དང་སྐྱབས་འགྲོའི་བསླབ་བྱ་རེ་བསླབས་པར་བྱས་ན་ཕན་པ་དེའི་ཆེ་བ་ཡིན། ཆོས་ཚིག་གཅིག་ཙམ་གྱི་དོན་དེ་དག་གིས་ཤེས་སོང་ན་ཚེ་རབས་མང་པོའི་བར་དུ་སྡུག་བསྔལ་མྱོང་མི་དགོས་པའི་ཕན་པ་ཡོད་པས་མ་ཚད་དེ་ལ་བརྟེན་ནས་ཐར་བའི་ལམ་སྣ་རེ་ཟིན་སོང་ན་སེམས་ཅན་ཕན་བདེ་ལ་བཀོད་པའི་དོན་བྱས་པ་ཡིན། མདོར་ན་འབྲེལ་ཚད་དོན་ལྡན་རེ་ཆོས་ཀྱི་སྟེང་ནས་ཨེ་ཡོང་བལྟ་དགོས་པ་ལས་ཟས་ནོར་སོགས་ཀྱིས་ཕན་འདོགས་པ་ལ་དགོས་པ་མེད་དོ་ཅེས་པ་སྟེ། སྤྱིར་ན་སྦྱིན་སོགས་བསྡུ་བའི་དངོས་པོ་བྱང་ཆུབ་སེམས་དཔའི་སྤྱོད་པ་ཡིན་པས། ཅི་ཡོད་བདོག་པའི་དངོས་པོ་རླུང་ཁྱེར་གྱི་རྫས་བཞིན་མཆོད་སྦྱིན་དུ་གཏོང་བ་དམ་པའི་སྤྱོད་པ་ཡིན་པ་ལས། དེ་ལས་གཞན་པར་ལོག་འཚོའི་ཟས་ནོར་གཅིག་ལས་བླངས་པ་གཅིག་ལ་བྱིན་ནས་ཚོགས་མ་བསགས་པའི་རྒྱུ་རྫས་དེ་ཞིང་མ་དག་པའི་ཁ་ལ་བརྒྱབ་ཀྱང་ཡ་མཚན་ཆེ་བ་མ་ཡིན་ནོ་ཞེས་པའི་དོན་ཏོ། །ཚོགས་གཉིས་བསག་མ་ནུས་ན་ཡོ་བྱད་ཀྱི་དགོས་པ་མེད་པས་ཚོགས་གཉིས་ཅི་ནུས་ཀྱིས་བསག་དགོས། དེ་ལ་དམིགས་བཅས་བསོད་ནམས་ཀྱི་ཚོགས་ལ་མཚོན་ན་ཡོ་བྱད་ཀྱིས་གསོག་ཆོག་ཀྱང་། དམིགས་མེད་ཡེ་ཤེས་ཀྱི་ཚོགས་ནོར་ལ་བརྟེན་ནས་བསག་ཆོག་གམ་ཞེ་ན། དེ་ཡང་ཐབས་ལ་མཁས་ན་བྱར་མེད་པ་ཞིག་མིན་ཏེ། དགེ་བ་གང་ཡིན་ཡང་ལྟ་བ་ཁྱད་པར་ཅན་གྱི་རྩིས་ཟིན་པ་དང་། མིན་ཡང་དགོས་གནད་ཁྱད་པར་ཅན་ལ་བརྟེན་ནས། བསྟན་པའི་སྲོག་གསོ་ཞིང་མཐུད་པའི་ཆ་རྐྱེན་ཁྱད་པར་ཅན་དུ་སྒྱུར་ཐུབ་ན་ཡེ་ཤེས་ཀྱི་ཚོགས་ཀྱང་རྫོགས་པར་གསུངས་པའི་ཕྱིར། དེས་ན་ནོར་ཡོད་པ་དེ་ཚོགས་གཉིས་ཀྱི་ཞིང་སར་བཏང་ནས་ནོར་ལས་ནོར་གྱི་སྙིང་པོ་ལེན་ཤེས་དགོས། དེ་མ་ཐུབ་དུས་ཆགས་ཞེན་གྱི་གཞི་མ་རུ་འགྱུར་བ་ཡིན། མདོར་བསྡུས་ན་ཐར་བ་རྫོགས་པའི་བྱང་ཆུབ་ཀྱི་ལམ་དང་མ་འབྲེལ་བའི་བྱ་བ་ལྟར་སྣང་ཆོས་བརྒྱད་ཀྱི་ཕྱོགས་ལ་འགྲོ་བའི་འཆད་རྩོད་རྩོམ་གསུམ་རྟེན་བཞེངས་མཆོད་སྦྱིན་སོགས་གང་བྱས་ཀྱང་དགོས་པ་མེད་པར་བསམ་དགོས་ན་འཇིག་རྟེན་གྱི་བྱ་བ་གཞན་ནི་ལྟ་ཅི་སྨོས་ཞེས་དགོས་མེད་དྲུག་གི་དོན་བསྡུས་པའོ། །སྙིང་ནས་དམ་ཆོས་སྒྲུབ་ནས་དལ་འབྱོར་དོན་ཡོད་བྱེད་བསམ་མཁན་ཞིག་ལ་འདིའི་མན་ངག་དྲུག་ཚན་འདི་བས་མི་དགོས་པར་འདུག འདི་ཉམས་སུ་བླངས་ནས་འདི་བཞིན་དུ་འགྲུབ་པར་བྱུང་ན་འདིའི་ནང་དུ་ཐམས་ཅད་འདུས་པ་ཡིན། གཞན་དུ་ཡས་ཉན་ཙམ་མས་གོ་ཙམ་ཕྱོགས་མགོ་ཕྱོགས་མགོའི་འཆད་ཉན་ཐོས་བསམ་གྱི་གཟུགས་བརྙན་བཟོ་ལྟ་ཙམ་རེ་ལས་རྒྱུད་ལ་གཅིག་ཀྱང་མ་འབྱོར་ན་ཕན་པ་ཆེར་མེད་པ་ཡིན། རྒྱལ་བས་ཆོས་འཁོར་རིམ་གསུམ་བཀའ་རྒྱ་ཆེ་ལུང་གྲངས་མང་ཡང་། དོན་མན་ངག་གི་གནད་ཚིག་ཉུང་དོན་འདུས་སུ་དྲིལ་ནས་ཉམས་སུ་ལེན་དགོས་ན་ལེན་ཐབས་མི་ཤེས་པས། རྒྱལ་བའི་བཀའ་ལས་ཀྱང་བླ་མའི་མན་ངག་གཙོ་ཆེ་བ་ཡིན། ཁྱད་པར་དུ་ཀུན་མཁྱེན་ཆེན་པོ་རྒྱལ་བ་ཀློང་ཆེན་པས་ཕྱི་རབས་ཀྱི་གདུལ་བྱའི་དོན་དུ་དགོངས་ནས་མན་ངག་རིན་པོ་ཆེའི་མཛོད་འདི་མདོ་དང་རྒྱུད་སྡེའི་དགོངས་དོན་གྱི་མན་ངག་རྣམས་ཚུར་བསྡུས་ནས་དབང་པོ་རྣོ་རྟུལ་སུ་ཡིན་ཡང་ཉམས་སུ་ལེན་བདེ་བའི་ཆེད་དུ་དྲུག་ཚན་དྲུག་ཚན་གྱི་ཚོམས་ཀྱིས་བཅད་ནས་གསུངས། ད་དུང་གདུལ་བྱ་ལས་དང་པོ་པ་དང་། ཅུང་ཟད་ལམ་ལ་ངེས་ཤེས་ཐོབ་པ་དག་ལ་ཕན་པ་ཆེ་བའི་ཆེད་དུ་མ་ཀིའི་ཐེག་དམན་ནས་ཡ་ཀིའི་རྫོགས་ཆེན་མན་ཆོད་ཀྱི་བརྗོད་བྱ་བསྟན་བྱའི་ཆོས་ཀྱི་སྙིང་པོ་དེ་གདམས་ངག་གི་གནད་དུ་དྲིལ་ནས་གསུངས་པ་ཡིན་ལ། ད་རེས་འདི་ནས་ཁྲིད་རྒྱུན་རེ་ཐོབ་པ་ནི་གལ་ཆེ། རྫོགས་ཆེན་རང་ལུགས་ཀྱི་རྩ་བའི་ཁྲིད་རྒྱུན་མ་འཕྱུག་པ་ཡིན། དེའི་ཞོར་དུ་བརྒྱུད་པའི་བྱིན་རླབས་དང་ཆོས་ཀྱི་ཆེ་བའི་དབང་གིས་མན་ངག་རང་རྒྱུད་ལ་འབྱོར་ནས་ཐར་བའི་ལམ་སྣ་མ་ནོར་བ་རེ་ཟིན་པ་དང་། གང་ཟག་རེ་རེའི་ངོས་ཀྱི་ཕན་ཐོགས་རེ་བྱུང་ན་སྐྱེ་དགུའི་བདེ་སྐྱིད་ཀྱི་གཞི་རྩ་རྒྱལ་བའི་ལུང་རྟོགས་ཀྱི་བསྟན་པ་ཡིན་པས་བསྟན་པའི་གསོས་སྨན་དངོས་སུ་ཨེ་འགྱུར་སྙམ་པའི་ཀུན་སློང་གི་སྟེང་ནས་བཤད་པ་ཡིན་པས། རྣམ་པ་ཚང་མས་འདིའི་བརྗོད་བྱ་ཉམས་ལེན་གྱི་གནད་དུ་འཛིན་པ་ནི་མ་འཆུག་ཅེས་ཞུ་བ་ཡིན། བྱང་ཆུབ་མ་བསྒྲུབས་ཅིས་ཀྱང་དགོས་མེད་བསམ། །ཞེས་པའི་མཚམས་འདིར་དེ་རིང་བཞག་ནས་སང་ཉིན་ཐར་ལམ་དེད་དཔོན་བླ་མའི་ཆོས་དྲུག་ནི། །ཞེས་པ་ནས་དབུ་འཛིན་ནས་བཤད་པ་བྱེད། སྤྱིར་མན་ངག་མཛོད་འདི་མདོ་རྒྱུད་ཐེག་པ་ཐམས་ཅད་ཀྱི་གནད་བསྡུས་ནས་མན་ངག་ཏུ་དྲིལ་བ་ཞིག་ཡིན་པས་ཆོས་ཟབ་མོ་ཡིན་ཡང་། ད་རེས་གཙོ་བོ་བློ་སྦྱོང་ལྟར་དུ་དགྲོལ་བའི་ཉམས་ཡིན་པས་དགེ་བསྙེན་ཕོ་མོ་ཡང་ཉན་མཁན་གྱི་གྲས་སུ་ཞུགས་བཅུག་པ་ཡིན། ཐམས་ཅད་ཀྱིས་ཡིག་བརྒྱ་དང་ས་ཏྭ་ཐོན། ཚིག་རེ་ཡིན་ཡང་ཞེ་ཐོག་ལ་ཨེ་ལོན་ལྟོས་དང་འདི་ཚེ་འདི་ཕྱི་གཉིས་ཀའི་བྲོ་རྟེན་ཡིན། འདི་ཐོབ་པ་ཡང་སྐལ་བ་བཟང་པོ་རེད། ཐོབ་ཡུལ་གྱི་བླ་མ་བཟང་པོ་ཞིག་མིན་ཡང་ཐོབ་བྱའི་ཆོས་རྩ་ཆེན་ཡིན། ལ་ལས་རྒད་པོ་རྒད་མོ་རྣམས་མཛོད་བདུན་གྱི་ཆོས་ཁྲིད་ནང་དུ་འཛུད་ཀྱིན་ཡོད་འདུག་གནའ་སྔོན་མ་དེ་འདྲ་མི་དར་ཟེར་ལས་ཆེ་ཡང་། གནའ་ལུགས་ཚང་མ་ལྷ་ཡི་སྲོལ་དང་། ད་ལུགས་ཚང་མ་འདྲེ་ཡི་སྲོལ་རེད། ཅེས་བརྗོད་ཀྱང་དངོས་ཡོད་དུས་ཀྱི་འཁོར་ལོའི་རླབས་རྒྱུན་དེ་བཙན་གྱིས་ལྡོག་ཏུ་མེད་པས། ལམ་གཅིག་འཕྲེད་བཟུང་བྱས་ནས་རྡོག་སྣ་ཁོ་ན་ལ་ལྟ་བཞིན་བསྡད་ན་མི་རབས་རྗེས་མ་དག་འཐབ་མགོ་ནས་མར་གཡུགས་ནས། མགོ་བཅག་པར་རྨུས་པའི་ཉམས་མྱོང་ཡོད་པས། ཁ་རྩང་ངས་བོད་མཐོ་སྒང་གི་མི་རིགས་དེ་ཆོས་དང་རིག་གཞུང་གི་ཆེད་དུ་འཚོ་དགོས་ཞེས་བཤད་པ་ལྟར་དུ། བོད་ཆོས་ལྡན་གྱི་ཞིང་ཁམས་དད་པ་ཆོས་ལ་འཇོག་མཁན་ཡིན་པར་བཤད་ཀྱང་། དད་ཡུལ་གྱི་ཆོས་གང་ཡིན་མ་ཤེས་ཚེ་དད་པ་རྨོངས་དད་ལ་འགྱུར་འགྲོ། མི་ཞིག་གིས་དཀོན་མཆོག་ལ་ཐུགས་རྗེ་ཡོད་ལས་རྒྱུ་འབྲས་བསླུ་མེད་རེད་ཅེས་བཤད་སྐབས་བདེན་སྙམ་ནས་དད་པ་བྱེད་ཀྱང་། ཡང་གཅིག་གིས་དེ་རྫུན་པ་རེད་མགོ་གཡོག་བྱེད་རེད་ཅེས་བརྗོད་ན་དེ་ཡང་བདེན་སྣང་ཤར་བ་ཡིན། དེ་བས་ཨེ་བདེན་མི་བདེན་རང་གིས་བལྟས་ནས་ཆོས་བསྒྲུབས་ན་བསྒྲུབས་གོ་ཆོད་པ། སྒྲུབ་ལུགས་རང་གིས་ཤེས་པ་དང་ཆོས་ཀྱི་ནང་དོན་རང་གིས་ཧ་གོ་བར་བྱེད་དགོས། མིའི་ཁ་ལ་ཉན་མི་དགོས་གནའ་སྔོན་ཆོད་ནང་པའི་ཆོས་རྨོངས་དད་མགོ་གཡོག་བྱེད་རེད་ཅེས་བརྗོད་མྱོང་བའི་མི་ཡོད་པས་མི་ཚད། དེང་སང་ཡང་དེ་ལྟར་སྨྲ་མཁན་རང་རིགས་གཞན་རིགས་གཉིས་ཀའི་ནང་དུ་ཡོད་འདུག དེ་དག་གིས་བརྟག་དཔྱད་ཞིབ་འཇུག་བྱས་ནས་ཡང་དག་ཡིན་མིན་གྱི་དབྱེ་བ་འབྱེད་པའི་གཞི་ཆོས་ཀྱི་ནང་དོན་ཆ་ཚང་གོ་མེད་པ་རེད། དེ་མ་གོ་དུས་རང་གིས་མ་རིག་ཚེ་ལ་ཕར་རྒྱབ་ན་མི་གཅིག་ཀྱང་མེད་ཅེས་བརྗོད་ཀྱང་དོན་ལ་གནས་པའི་གཏམ་མིན་པ་ལྟ་བུ་ཡིན། དེས་ན་ཕྱི་བ་ནང་པའི་ལྟ་གྲུབ་དང་རིགས་གཞུང་གང་ཡིན་ཡང་། གཙོ་བོ་རང་ཉིད་ཀྱི་འགྲོ་ལམ་འདུག་ལམ། ཚེ་འདི་ཕྱིའི་ཚོད་ཐིག་པའི་བདེ་བའི་གཞི་ཞིག་བསྒྲུབ་དགོས་དུས་ཆོས་དང་བླ་མ་མ་ནོར་བ་ཞིག་ལ་བརྟེན་ནས་དོན་རང་གི་ཉམས་ལེན་གྱི་གནད་དུ་བསྣུན་ནས་མི་ཚེའི་དུས་ཚོད་འཕྲོ་བརླག་ཏུ་མི་ཤོར་བ་ནི་རྩ་བའི་གནད་འགག་མདོ་རྩ་སྙིང་པོ་དེ་ཡིན་པས། ཚིག་རེ་ཡིན་ཡང་མན་ངག་གི་དོན་འདི་ཚོ་གོ་བར་བྱས་ནས་རྒྱུད་དུ་སྦྱར་ཨེ་ཐུབ་བལྟ་བ་ནི་གནད་ཆེན་ཡིན་ནོ།།

ཉིན་གཉིས་པའི་ཆོས་ཁྲིད།

ནམ་མཁའི་མཐའ་དང་མཉམ་པའི་མུ་མེད་མཐའ་ཡས་པའི་སེམས་ཅན། ཕ་མ་མ་གྱུར་པ་གཅིག་ཀྱང་མེད་པའི་འགྲོ་བ་རིགས་དྲུག་གི་གནས་ནས་སྡུག་བསྔལ་སྣ་ཚོགས་མྱོང་བའི་སེམས་ཅན་ཉམ་ཐག་དབང་མེད་འཁོར་བའི་གནས་སུ་འཁྱམ་བཞིན་པ་ཐམས་ཅད་སྙིང་རེ་རྗེ། དེ་ལས་ཀྱང་ངན་སོང་གི་གནས་གསུམ་དུ་ཡོད་པའི་སེམས་ཅན་གྱི་ལུས་སེམས་གཉིས་ཀའི་སྡུག་བསྔལ་སྐད་ཅིག་གཅིག་ཙམ་ལའང་བཟོད་ཐབས་བྲལ་བ་ཞིག་ཡིན་པ་དང་། དེ་ལས་མཐོ་རིས་རྣམ་གསུམ་སྡུག་བསྔལ་ཆུང་ཤོས་ལྟ་བུ་ཞིག་ཡིན་ཡང་། རང་རེ་མིའི་སྡུག་བསྔལ་ལྟ་བུ་ལ་བསམ་ན་སྐྱེ་རྒ་ན་འཆི་བདུད་ཀྱི་ཆུ་བོ་བཞི་གཅིག་བས་གཅིག་གིས་ཐུ་བ་དང་། ཁྱད་པར་དུ་འཆི་བའི་སྡུག་བསྔལ་ཞེས་པའི་དགྲ་ཆེན་དེས་ནམ་ཞིག་ལ་ཇི་ལྟར་ཁྲིད་འགྲོ་བསམས་ནས་ཤི་སྡུག་གསོག་པ་དེ་ཁོ་ནའི་ཚུལ་ལ་བསམས་ན་ཡང་སྙིང་མི་རྗེ་རང་དབང་མེད་པ་ཞིག་ཡིན། མི་སྡིག་ཅན་འཆི་བ་མཐོང་ཙ་ན། །ལས་རྒྱུ་འབྲས་སྟོན་པའི་སློབ་དཔོན་ཡིན། །ཞེས་པ་ལྟར་དུ་སྐྱེས་པའི་མི་གཏན་བྲལ་རེད། བསགས་པའི་རྒྱུ་ནོར་ཤུལ་དུ་བསྐྱུར་ནས་ལས་ཀྱི་རྗེས་སུ་འབྲང་ནས་སྡུག་བསྔལ་མྱོང་བ་དང་། དེ་བཞིན་དུ་ནད་པ་ཚབས་ཆེན་དང་། རྒས་པ་ཉམ་ཐག་དག་ཀྱང་དེ་དང་དེའི་རང་བཞིན་ཡིན་ལ། ལོ་ཉུང་ནད་མེད་དག་ཉིན་ཁ་ཤས་ཀྱི་རིང་ལ་ལོ་ཉུང་ལུས་ཕྲ་ལྟ་བུར་སྣང་ཡང་ཕན་ཅི་ཡོད་དེ། བདུད་ཀྱི་ཆུ་བོ་ཆེན་པོ་བཞིའི་དབའ་ལ་བྱིངས་ནས། བཤའ་ཟོག་ར་བའི་ནང་དུ་བརྒྱབ་པ་ལྟ་བུ་དང་ཁྱད་མེད་པར། འཆི་བདག་གཤིན་རྗེའི་སྐྱེས་བུ་ལ་དུས་འདིའི་ཉིན་པར་དབུགས་ཀྱི་རྒྱུ་མཚམས་གཅད་པར་བྱ་དགོས་སྙམ་པའི་ཞེ་ཚོད་དང་ཁོག་འདེང་ཁྲིགས་སེ་ཡོད་པ་ཡིན་པའི་ཕྱིར། གང་ཟག་འདི་དུས་འདིའི་ཉིན་དུ་རྐྱེན་འདི་ལྟ་བུས་འཆི་བ་ཡིན་ཞེས་གཤིན་རྗེའི་ཁྲམ་ཤིང་གི་ངོས་སུ་ཤི་རྟགས་བརྒྱབ་མེད་པ་གཅིག་ཀྱང་ཡོད་པ་མ་ཡིན། མདོར་ན་ཉམ་གཅིག་བས་གཅིག་ཐག སྙིང་གཅིག་བས་གཅིག་རྗེ་བའི་སེམས་ཅན་འདི་དག་ཐམས་ཅད་འདི་འདྲའི་སྡུག་བསྔལ་དྲག་པོ་འདི་དག་ལས་ཐར་བར་བྱས་ནས་གཏན་བདེ་བྱང་ཆུབ་དམ་པ་སྡུག་བསྔལ་གྱི་མིང་ཙམ་ཡང་མེད་པའི་ཐར་བ་བྱང་ཆུབ་ཆེན་པོ་ལ་འགོད་ནུས་པའི་ལམ་ཞིག་རྙེད་པའི་གོ་སྐབས་བཟང་པོ་འདི་ད་རེས་ཤོར་མི་རུང་ལ་ཤོར་བར་མི་བྱ་སྙམ་པའི་ཀུན་སློང་དང་བཅས་པས། སྐབས་སུ་བབ་པ་གང་ཞིག་གསན་པར་བྱ་བའི་ཆོས་ཀྱི་རིམ་པ་ནི། ངེས་པ་དོན་གྱི་མཐར་ཐུག་ན་འཕགས་པ་འཇམ་དཔལ་དབྱངས་དང་། གསང་བའི་བདག་པོ་དང་། ཀུན་ ཏུ་བཟང ་པོ་ལ་སོགས་པ་ས་བཅུའི་དབང་ཕྱུག་ཆེན་པོ་རྣམས་དང་ཞལ་མི་གཉིས་ན་ཡང་། གདུལ་བྱ་ཐུན་མོང་གི་ངོར་མིའི་ཟོལ་དུ་བྱོན་ནས། གསན་བསམ་སྒོམ་པ་རྒྱ་མཚོའི་ཕ་མཐར་སོན་ཅིང་། མཁས་ཤིང་གྲུབ་པའི་རྣམ་ཐར་རྩོད་མེད་ཡོངས་ལ་གྲགས་པའི་རྫོགས་ཆེན་བསྟན་པའི་ཤིང་རྟ་བ་ཆེན་པོ། ཀློང་ཆེན་རབ་འབྱམས་བཟང་པོ་མ་འོངས་པ་ན་བདེ་གཤེགས་རི་རབ་མར་མེ་རྒྱལ་མཚན་དུ་གྲགས་པ་དེ་ཉིད་དུ་འཚང་རྒྱ་བར་འགྱུར་བ་གང་ཉིད་ཀྱི་གསུང་ཆོས་སྐུའི་རིང་བསྲེལ་གྱི་ཕུང་པོ་བཀའ་གཙིགས་བཀའ་ཆེམས་གྱི་ཚུལ་དུ་བཞག་པ་མང་ན་ཡང་། དེ་ལས་ཁྱད་པར་དུ་གྱུར་བ་རྒྱ་ཆེ་བ་པཎྜི་ཏའི་ལུགས་ཀྱི་བསྟན་བཅོས་མཛོད་ཆེན་རྣམ་པ་བདུན་ཡོད་པ་ལས། མ༵ན་ང༵ག་ཀུན་གྱི་སྙིང་པོ་བསྡུ་བསྡུ་བ། །དྲུག་ཚན་རེས་ཀྱང་དམ་ཆོས་མཛོད་རྫོགས་པའི། །ལམ་བཟང་འདི་འདྲ་རྒྱལ་བ་དངོས་མཇལ་ཀྱང་། །ཅིག་ཆར་ཐོས་པ་དཀའ་བ་མ་ཡིན་ནམ། །ཞེས་གསུངས་པ་ལྟར་དུ་ལམ་དང་འབྲས་བུའི་ཆོས་ཐམས་ཅད་ཀྱི་ཉམས་ལེན་གྱི་གནད་གཅིག་ཏུ་དྲིལ་ནས། གང་ཟག་མཆོག་དམན་སུ་ལ་ཡང་ཕན་པའི་གདམས་པ། རྗོད་བྱེད་དྲུག་ཚན་གྱི་དབང་དུ་བྱས་ནས་བཤད་པ། མན་ངག་རིན་པོ་ཆེའི་མཛོད་འདི་ཉིད་འཆད་ཉན་བགྱི་བའི་སྐབས་ལས། ཐོག་མར་དགེ་བ་ཀླད་ཀྱི་དོན། བར་དུ་དགེ་བ་གཞུང་གི་དོན། ཐ་མར་དགེ་བ་མཇུག་གི་དོན་དང་གསུམ་ཡོད་པ་ལས། ཐོག་མར་དགེ་བ་ཀླད་ཀྱི་དོན་སོང་ནས། བར་དུ་དགེ་བ་གཞུང་གི་དོན་དེ་ལ་ཡང་། ཐུན་མོང་དང་ཐུན་མིན་གྱི་མདོ་དང་རྒྱུད་སྡེའི་ཉིང་བཅུད་ཐམས་ཅད་ཉམས་ལེན་གྱི་གནད་དུ་བསྡུས་ཏེ་བསྟན་པའི། ཁ་སང་དང་པོར་སྒྲུབ་པའི་མཐུན་རྐྱེན་གྱི་ཆོས་དྲུག་ཚན་དང་། ངེས་འབྱུང་སྐྱོ་ཤས་བསྐུལ་བ་དང་། འཁྲུལ་སྣང་ལྡོག་པའི་ཐར་བའི་ལམ་དུ་ཞུགས་པའི་སྔོན་འགྲོའི་སྐོར་གྱི་དྲུག་ཚན་རྣམས་སོང་ནས། དེ་རིང་ཐར་བ་དངོས་ལ་ཞུགས་པའི་ལམ་ཁྲིད་དེད་དཔོན་གྱི་སྐོར་སོགས་ནས་བཤད་པ་ལ།

༡༤ ཐར་ལམ་དེད་དཔོན་བླ་མའི་ཆོས་དྲུག་བསྟན་པ།

ཐར་ལམ་དེད་དཔོན་བླ་མའི་ཆོས་དྲུག་ནི།།

མུན་པར་འཁྱམས་ལ་ཡེ་ཤེས་སྒྲོན་མེ་སྦོར།།

གཡང་སར་འཁྱམས་རྣམས་ཡང་དག་ལམ་ལ་འཛུད།།

ཆུ་བོས་ཁྱེར་བ་བདེ་ཆེན་གཟིངས་ཀྱིས་འཛིན།།

བཙོན་རར་ཚུད་རྣམས་རྣམ་གྲོལ་ས་ལ་འདྲེན།།

སྡུག་བསྔལ་འདམ་བྱིང་ཐར་པའི་སྐམ་སར་འདོན།།

གཟུང་འཛིན་བཅིངས་རྣམས་ཡེ་ཤེས་རལ་གྲིས་གཅོད།།

དེ་ཕྱིར་བླ་མ་སངས་རྒྱས་ཉིད་དུ་བསམ།།

ཞེས་གསུངས་པ་སྟེ། གདུལ་བྱ་གཞན་ལ་ཆོས་བསྟན་ནས་ཐར་བའི་ལམ་དུ་ཁྲིད་པའི་ལམ་མཁན་དང་། སྡུག་བསྔལ་གྱི་རྒྱ་མཚོ་ཆེན་པོའི་དབའ་ཀློང་ལས་བསྒྲལ་ནས་ཐར་བའི་སྐམ་སར་འཁྲིད་པའི་དེད་དཔོན་མཁས་པ་ལྟ་བུའི་བླ་མའི་ཁྱད་ཆོས་དྲུག་ནི། མ་རིག་རྨོངས་པའི་སྨག་རུམ་དུ་ལམ་ལོག་ལམ་སྟོར་དུ་གྱུར་ནས། ཁམས་གསུམ་རིགས་དྲུག་ཏུ་འཁྱམས་པའི་སེམས་ཅན་དེ་དག་གི་སེམས་ཁོང་ལ། ཡེ་ཤེས་ཀྱི་སྒྲོན་མེ་སྦར་ནས་ཤེས་རབ་ཀྱི་སྣང་བ་སྦྱིན་མཁན་དེ་བླ་མ་ཡིན་དགོས་ལ། དེ་དང་ཆ་འདྲ་བ་བླ་མའི་མིང་འཛིན་མཁན་མིན་པའི་བན་དེ་བཙུན་མ་སུ་ཡིན་ཡང་། རང་རང་གི་ངོས་ནས་ཐུབ་ཚོད་ནུས་ཚོད་དང་བསྟུན་ནས་ཁྱིམ་པ་ཕོ་མོ་རྣམས་དང་། རབ་ཏུ་བྱུང་བ་ཡིན་ཡང་ལས་དང་པོ་བའི་རིགས་ཅན་ལ། རྒྱུ་འབྲས་བླང་དོར་གྱི་གནས་བསྟན་ན་སེམས་ཅན་དེ་དག་གི་རྨོངས་པའི་མུན་པ་སེལ་བ་ལ་ཕན་ཐོགས་ཡོད་ཅིང་། དེ་ཡང་དང་པོའི་སྐབས་སུ་ཡེ་ཤེས་ཀྱི་སྣང་བ་བཤད་མཁན་རང་ལ་མེད་པའི་ཡོན་ཏན་ཁྱད་པར་ཅན་ཞིག་མི་ལ་སྤྲད་རྒྱུ་ལོན་དགོས་པ་མིན་པར། བསམ་པ་བཟང་པོའི་ཀུན་སློང་གིས་རང་གི་ཆེ་ཤེས་ཆུང་ཤེས་རྣམས་ལེགས་པར་བསྟན་དགོས་པ་ཡིན། དེ་བཞིན་དུ་ཡུལ་སྡེ་གཅིག་གི་མི་ངོ་ཤེས་མཐུན་པ་ཡོན་བདག་ལ་སོགས་པ་སུ་ཡིན་ཡང་། རྒྱུ་ཟས་ནོར་ཅིག་གི་བགོ་བཤའ་སྦྱིན་རེས་བྱེད་པ་ལས། ཆོས་ཚིག་རེ་ཙམ་ཤེས་པ་དེ་གཞན་ལ་གོ་བར་བྱས་ན་དེ་དག་ལ་ཕན་པ་ཆེན་པོ་འབྱུང་བ་ཡིན་ཏེ། དེ་ནི་འཁོར་བའི་གཅོང་ནད་ཀྱི་སྨན་དང་ཐར་བ་དམ་པའི་རྒྱུ་རུ་འགྱུར་ངེས་ཅན་ཡིན་པའི་ཕྱིར། གསང་སྔགས་ཀྱི་དབང་བསྐུར་བ་དང་། རྒྱུད་ལུང་གི་ཆོས་བཤད་པ་དང་། མན་ངག་གི་ལུང་སྦྱིན་པ་ལ། གཅིག་ན་རང་ཉིད་ལ་དེའི་ཡོན་ཚད་ཡོད་པ་དང་། གཉིས་ན་བླ་མས་དེའི་བཀའ་ཁྲོལ་བ་ཞིག་ཡིན་དགོས་ཀྱང་། དེའི་འདྲའི་གསང་བ་མིན་པའི་སྐྱེས་བུ་གསུམ་གྱི་ལམ་གྱི་རིམ་པ་རྒྱ་མཚོ་ལྟ་བུ་བཞུགས་པ་དེ་དག ཐ་ན་ཁ་བརྡ་ཡན་ཆོད་ཀྱི་སྒོ་ནས་བསམ་པ་དག་པས་བཤད་ནས་ལེགས་ཉེས་བླང་དོར་གྱི་གནས་བསྟན་པར་བྱས་ན། འགལ་ཉེས་མེད་པས་མི་ཚད་བདེ་བར་གཤེགས་པའི་ཆོས་འཛིན་སྤེལ་བྱས་པའི་ཕན་ཡོན་རྒྱ་ཆེན་ཐོབ་ཏུ་ཡོད་པ་ཡིན་ནོ། །གཡང་སར་འཁྱམས་པ་རྣམས་ཇི་ལྟར་ཡང་དག་གི་ལམ་དུ་འཛུད་དགོས་ཞེ་ན། ངན་སོང་དང་འཁོར་བའི་གནས་སྡུག་བསྔལ་རྣམ་པ་གསུམ་གྱིས་ཉིན་མཚན་བར་མེད་དུ་མནར་བའི་གཡང་ས་ཆེན་པོར་ལྟུང་བར་བྱེད་པའི་རྒྱུ་ལ་བར་མེད་དུ་བརྩོན་ནས་འཁྱམས་པའི་རིགས་དྲུག་འཁོར་བའི་སེམས་ཅན་སྡུག་བསྔལ་ལ་སྡུག་བསྔལ་ཡིན་པར་མ་ཤེས་པས་ལམ་ལོག་ལམ་གོལ་དུ་སོང་བ་འདི་དག ཡང་དག་པ་ཐར་བའི་ལམ་ལ་འཛུད་མཁན་དེ་བླ་མ་དགེ་བའི་བཤེས་གཉེན་ཡིན་ལ། རང་ཉིད་ཀྱིས་ཀྱང་དེ་དང་ཆ་འདྲ་བ་བྱེད་དགོས་པ་ཡིན་དེ་ཡང་རང་ཐར་བའི་སྐམ་སར་མ་ཕྱིན་པ་ཞིག་གིས་མི་གཞན་གྱི་འདྲེན་སྟོན་ཡོང་ཞེས་པ་དེ་ཅུང་དཀའ་ཡང་། གང་ཟག་གི་བློ་དང་བསྟུན་ནས་དགེ་བཅུ་བསྒྲུབ་དགོས་ཚུལ་དང་། བསྒྲུབས་ན་ཕན་ཡོན་ཡོད་ཚུལ་དང་། མི་དགེ་བཅུ་སྤང་དགོས་ལ་མ་སྤངས་ན་ཚེ་འདི་ཕྱི་གཉིས་ཀ་ལ་གནོད་པ་ཡོད་ཚུལ་བཤད་དེ། སེམས་ཅན་རེ་རེའི་བློ་སྣ་དགེ་བ་ལ་འགྱུར་ཐབས་ཐོན་ནས་ལམ་ལོག་གཡང་ས་ཆེན་པོ་ནས་སྐྱོབ་ཐུབ་ན་ཅི་མ་རུང་། གྲྭ་བ་སེར་མོ་བ་ཞིག་ལ་མཚོན་ན་སོ་བྱང་སྔགས་གསུམ་གྱི་སྡོམ་ཁྲིམས་བླངས། གསང་སྔགས་ཀྱི་དཀྱིལ་འཁོར་ལ་ཞུགས་ནས་དབང་ཞུས་ཁྲིད་ཉན་པ་དང་ཐོས་བསམ་འཆད་ཉན་བྱས་ཀྱང་། རྐྱེན་སྣ་ཚོགས་པའི་དབང་ཤུགས་ལ་སོང་ནས་ཆོས་མིན་གྱི་བྱ་བ་སྡོམ་ཁྲིམས་དང་འགལ་བ་དང་། ཐ་ན་ལས་མཐའ་ལོག་པ་ལ་སོགས་པ་བྱུང་བ་ནི་གཡང་སར་འཁྱམས་པ་ཡིན་ལ་དེ་དག་དེ་ལས་ལྡོག་ནས་ཡང་དག་གི་ལམ་ལ་འཛུད་པ་དང་། ཁྱིམ་པ་ཕོ་མོ་དག་ལ་ཡང་སྲོག་མ་གཅོད། རྐུ་མ་བྱེད། འཛིང་རྩོད་མ་སློང་། བསམ་ངན་མི་ལ་མ་འཚགས་མ་གཏོགས་སྦྱོར་ངན་རང་ལ་འདུ་ཡོང་། ཉ་སྟོང་ཚེས་བརྒྱད་ཀྱི་དུས་ཁྲིམས་བསྲུངས་ནས་ཚོགས་བསགས་དང་མཆོད་འབུལ་ནུས་ཚོད་རེ་གྱིས་དང་བསོད་ནམས་བསགས་པའི་སྒོ་ཁྱད་པར་ཅན་དུ་འགྱུར་བ་ཡིན་ཞེས་པ་ཙམ་རེ་བཤད་ཀྱང་། རྙེད་བདེ་གྲགས་བསྟོད་ཀྱི་ཀུན་སློང་མེད་ན་སེམས་ཅན་གྱི་འགྲོ་དོན་དུ་འགྲོ་བ་ཡིན་ལ་གཡང་སར་འཁྱམས་པ་ཡང་དག་གི་ལམ་དུ་བཙུད་པ་ཡང་ཡིན། ཁམས་གསུམ་འཁོར་བའི་ཆུ་བོ་ཆེན་པོས་དབང་མེད་དུ་ཁྱེར་བའི་སེམས་ཅན་རྣམས་བདེ་ཆེན་ཐར་བའི་སྐམ་ས་རུ་ཆོས་དགེ་སྡིག་བླང་དོར་གྱི་འཇུག་པ་བསྟན་པའི་གཟིངས་ཀྱིས་འཛིན་པར་བྱེད་པ་དང་། དེ་བཞིན་དུ་འཁོར་བའི་བཙོན་རར་ཚུད་པའི་སེམས་ཅན་ཉམ་ཐག་དེ་དག་ཐམས་ཅད་སྡུག་བསྔལ་དེ་ལས་རྣམ་པར་གྲོལ་བ་སྟེ་གཏན་དུ་གྲོལ་བའི་ཐར་ལམ་ལ་འདྲེན་པར་མཛད་པ་དང་། སྡུག་བསྔལ་གྱི་འདམ་དུ་ཟུག་ནས་མི་ཐར་བར་ཡོད་པའི་སེམས་ཅན་ཐམས་ཅད་ལ་དགེ་བའི་སྟོབས་བྱིན་ནས་ཐར་བའི་སྐམ་སར་འདོན་པར་བྱེད་པ་སྟེ། འདི་དག་རྣམས་རྨོངས་པའི་ཆ་ནས་མུན་པར་འཁྱམས་པ་དང་། ཉེན་ཁ་ཆེ་བའི་ཆ་ནས་གཡང་སར་འཁྱམས་པ་དང་། སྡུག་བསྔལ་བར་མེད་ཀྱི་རྒྱུ་ཕྱོགས་ལ་དབང་མེད་དུ་དེད་པའི་ཆ་ནས་ཆུ་བོར་བྱིངས་པ་དང་། རང་དབང་མེད་པར་སྡུག་བསྔལ་ལ་སྤྱོད་པའི་ཆ་ནས་བཙོན་རར་ཚུད་པ། ཡུལ་ལྔའི་འདོད་ཡོན་གྱི་བསླུ་བྲིད་ཀྱིས་དབང་མེད་དུ་བཟུང་བའི་ཆ་ནས་འདམ་དུ་ཆུད་པ་ཞེས་འཁོར་བའི་སྡུག་བསྔལ་གྱི་ཆ་སོ་སོ་ནས་དཔེར་བླངས་པའོ། །དེ་རྣམས་ཀྱི་རྩ་བ་གཟུང་འཛིན་གྱིས་བཅིངས་པའི་འཁོར་བའི་སེམས་ཅན་འདི་དག་ཐམས་ཅད། ཐོག་མཐའ་མེད་པའི་འཁོར་བའི་གནས་འདིར། ང་མེད་ལ་ང་དང་བདག་མེད་ལ་བདག་ཏུ་བཟུང་བ་འདིས་དབང་གིས་འཁྱམས་པ་ཡིན་པས། དེ་བདག་མེད་རྟོགས་པའི་ཡེ་ཤེས་ཀྱི་རལ་གྲིས་གཅོད་པར་བྱེད་པའི་ཐབས་སྟོན་མཁན་བླ་མ་ཡིན་པ་དེ་ཡི་ཕྱིར་ན། བླ་མ་ནི་སངས་རྒྱས་ལས་ཀྱང་བཀའ་དྲིན་ཆེ་བ་ཡིན་པས་ཐར་བའི་ལམ་སྟོན་གྱི་བླ་མ་ལ། སངས་རྒྱས་དངོས་དང་ཁྱད་མེད་ཀྱི་འདུན་པའི་ཐོག་ནས་དད་འདུན་མོས་གུས་གྱིས་ཞེས་གསུངས་པའོ། །སྙིགས་དུས་སུ་སངས་རྒྱས་བླ་མའི་གཟུགས་སུ་བྱོན་ནས་བླང་དོར་གྱི་གནས་སྟོན་བཞིན་ཡོད་པས། བླ་མའི་མཚན་ཉིད་ཡོངས་རྫོགས་ཚང་མིན་ལ་མ་ལྟོས་པར། བསམ་པ་རྣམ་པར་དག་པས་ཀུན་ནས་བསླངས་བར་བྱས་ཏེ་ནུས་ཚོད་ལྕོགས་ཚོད་ཀྱིས་གོང་དུ་བཤད་པ་དག་བསྒྲུབས་པར་བྱས་ན་བསྟན་པ་ལ་བྱ་བ་བྱས་པ་དང་། སེམས་ཅན་ལ་ཕན་བདེ་བསྒྲུབས་པ་དང་། རྒྱལ་བའི་ཕྲིན་ལས་འཇུག་པར་བྱས་པའོ།།

༡༥ འདུས་བྱས་མི་རྟག་འཇིག་པའི་ཆོས་དྲུག་བསྟན་པ།

འདུས་བྱས་མི་རྟག་འཇིག་པའི་ཆོས་དྲུག་ནི།།

རྒྱུ་རྐྱེན་འདུས་ཕྱིར་འཇིག་པ་ཉིད་དང་ནི།།

སྔར་སྐྱེས་མ་ལུས་ཤི་བས་འཇིག་ངེས་དང༌།།

སྣོད་བཅུད་མི་རྟག་འགྱུར་བས་འཇིག་ངེས་དང༌།།

ཚེ་ལ་ངེས་མེད་འཆི་བས་འཇིག་པ་དང༌།།

ཉིན་མཚན་སྐད་ཅིག་འགྲོ་བས་འཇིག་པ་དང༌།།

སྐྱེས་མཐའ་འཆི་བར་ངེས་ཕྱིར་འཇིག་པ་བསམ།།

ཞེས་གསུངས་པ་སྟེ། འདུས་བྱས་ཀྱི་ཆོས་ཐམས་ཅད་མི་རྟག་པ་ཡིན་པའི་ཚུལ་རྣམ་པ་དྲུག་གིས་གསུངས་པ་ལས། དང་པོ་འདུས་བྱས་ཀྱི་ཆོས་ཐམས་ཅད་རྒྱུ་དང་རྐྱེན་དུ་མ་ཞིག་ཚོགས་ནས་འདུས་པ་ལས་སྐྱེས་པ་ཡིན་པ་དང་། འདུས་པ་ཐམས་ཅད་ནི་འབྲལ་བས་ཁྱབ་པའི་ཆོས་ཅན་ཡིན་པར་བསམ་པ་དང་། སྔར་སྐྱེས་ཀྱི་སེམས་ཅན་མ་ལུས་པ་ཐམས་ཅད་ཀྱང་ཤི་ནས་འཇིག་པའི་ཆོས་ཅན་ཡིན་པས། ད་ལྟ་ས་འདིའི་ཐོག་ནས་རྒྱུ་བའི་ཐོབ་དང་མངའ་ཐང་ཅན། དབང་དང་འབྱོར་བ་ཅན་ལ་སོགས་པ་གཅིག་ཀྱང་མ་ལུས་པ་ཐམས་ཅད་འཇིག་རྟེན་ཕྱི་མའི་ལམ་ཆེན་ལ་བགྲོད་ནས་མི་རྟག་པའི་རང་གཤིས་བསྟན་ཏེ་འཇིག་པར་ངེས་པ་བསམ་པ་དང་། ཕྱི་སྣོད་ཀྱི་འཇིག་རྟེན་དང་ནང་བཅུད་ཀྱི་སེམས་ཅན་ཐམས་ཅད། ཕྲ་བ་ཆོས་ཉིད་ཀྱིས་མི་རྟག་པར་སྐད་ཅིག་སྐད་ཅིག་ལ་འགྱུར་བ་ཡིན་པས་ན་འཇིག་ངེས་ཡིན་པར་བསམ་པ་དང་། ཐུང་ས་མིག་གིས་རིག་ས་ཡི་སྐྱེས་བུའི་ཚེ་ལ་ངེས་པ་མེད་པར་འཆི་བས་འཇིག་པ་ཡིན་ཏེ། ཁ་རྩང་ཡོད་པ་དེ་རིང་ཤི་བ་དང་། ན་ནིང་ཡོད་པ་ད་ལོ་མེད་པ་སོགས་མཐོང་ཐོས་སུ་གྱུར་པ་ཤིན་ཏུ་མང་བའི་ཕྱིར་དང་། ཉིན་མཚན་ཆུ་ཚོད་ཉི་ཤུ་རྩ་བཞིའི་བགྲོད་ཚུལ་ལ་བསམ་བློ་བཏང་ན། ཆུ་ཚོད་གཅིག་ཟད་ན་ཉེར་གསུམ་ལས་མེད་པ་དང་། དེ་ལས་བཅུ་ཟད་ན་ཤུལ་དུ་བཅུ་གསུམ་ལས་མ་ལུས་པ་ཡིན་པ་བཞིན་དུ། རང་གི་ཚེ་ཚད་མ་ཤེས་ཤིང་ནམ་འཆི་མ་ཤེས་པ་ཙམ་ལས། གལ་སྲིད་དེ་ཤེས་ཏེ་ཉི་མ་སྟོང་ཕྲག་གཅིག་ལ་འདུག་རྒྱུ་ཡོད་པ་ལྟ་བུ་ལ་ཆ་མཚོན་ན། དེ་རིང་གཅིག་ཟད་ན་ཆིག་སྟོང་གི་ནང་ནས་དགུ་བརྒྱ་དང་གོ་དགུ་ལས་ལྷག་མེད་པ་དང་། དེ་བཞིན་དུ་ཞིབ་རྩིས་བརྒྱབ་ན་ཉལ་ནས་གཉིད་པའི་ཉི་མ་ལྔ་བརྒྱ་ཙམ་ཞིག་ཟད་པ་དང་། ད་ཤུལ་དུ་བཞི་བརྒྱ་དགུ་བཅུ་ལྷག་ཙམ་མ་གཏོགས་མེད་ཅིང་། དེ་ལས་ཀྱང་ཟས་ཟ་ཚེ་དང་། སྒོ་ཕྱི་ནང་དུ་རྒྱུ་བ་དང་། ཟས་སྦྱོར་གཡོ་སྐོལ་དང་། མཚང་ངན་བྲེལ་ཟིང་གི་ནང་དུ་གྲོན་པ་རྣམས་ཕར་ཕུད་ཚེ། ཉིན་མ་སྟོང་ཕྲག་ཅེས་དུས་མང་བ་ལྟར་སྣང་བ་ཡིན་ཡང་། དེ་ལྟར་ཟད་ས་ལ་ཐུག་དུས་ཤིན་ཏུ་མྱུར་བར་འཛད་པ་ཡིན་པས། སྐད་ཅིག་མ་སེ་གོལ་གྱི་ཡུན་དང་། སྐྱེས་བུའི་ཚེ་སྲོག་གི་ཡུན་གཉིས་ཀ་མཐར་ཟད་པའི་ཆ་ནས་ཁྱད་པར་མེད་པར་བསམ་པ་དང་། སྐྱེས་པའི་ཐ་མ་འཆི་བ་ངེས་པ་ཡིན་ཏེ། སྐྱེས་པའི་སྐད་ཅིག་དང་པོ་ནས་འཆི་བདག་གི་ཕྱོགས་སུ་གོམ་པ་འདོར་བཞིན་ཡོད་པ་ཡིན་པའི་ཕྱིར་རོ་ཞེས་བསམ་པ་སྟེ། དེ་ལྟ་བུའི་མི་རྟག་པའི་ཆོས་དྲུག་པོ་དེ་ལ་ལེགས་པར་སེམས་དགོས་སོ་ཞེས་གདམས་པའོ།།

༡༦ ཆོས་ལ་སྦྱར་བའི་ཕན་ཡོན་རྣམ་དྲུག་བསྟན་པ།

དེ་ནས་ཆོས་ལ་སྦྱར་བའི་ཕན་ཡོན་དྲུག།

མོས་དང་རྣ་བར་ཐོས་དང་ཡི་རང་དང༌།།

བསྟོད་དང་ཞུགས་དང་ཅུང་ཟད་སྤྱད་རྣམས་ཀྱང༌།།

འཁོར་བ་མཐའ་ཅན་ཐར་བའི་ས་བོན་བསྐྲུན།།

ཞེས་གསུངས་པ་སྟེ། དམ་པའི་ཆོས་ལམ་ལ་དངོས་སུ་ཞུགས་ནས་བསྒྲུབས་པར་བྱས་ན་སྨོས་ཅི་དགོས་དེ་ལ་མོས་པ་ཙམ་སྐྱེ་བ་དང་། ཆོས་ཀྱི་སྒྲ་རྣ་ལམ་དུ་ཐོས་པ་ཙམ་དང་། ཆོས་འཆད་ཉན་ལ་སོགས་པ་ལ་དགའ་ནས་རྗེས་སུ་ཡི་རང་བྱས་པ་ཙམ་དང་། དེ་ལ་བསྟོད་པ་བྱས་པ་ཙམ་དང་། ཆོས་འཆད་ཉན་བྱས་པ་ལ་སོགས་པའི་གྲལ་དུ་ཞུགས་པ་ཙམ་དང་། ཞུགས་ནས་ཅུང་ཟད་ཙམ་སྤྱད་པ་རྣམས་ཀྱང་། སངས་རྒྱས་ཀྱི་བསྟན་པ་དེ་འབྲེལ་ཚད་དོན་ལྡན་ཡིན་པ་དང་། ལྔ་བརྒྱ་ཐ་མའི་གནས་སྐབས་ན་གཟུགས་བརྙན་ཙམ་ཞིག་གི་ཆོས་བཟུང་ན་ཡང་འཁོར་བ་མཐའ་ཅན་དུ་འགྱུར་བ་གསུངས་ཕྱིར། དེ་ལ་བསྟོད་བཀུར་བསྔགས་པ་ལ་སོགས་པ་བྱས་ན་འཁོར་བ་མཐའ་ཅན་དུ་གྱུར་ནས་ཐར་བའི་ས་བོན་བསྐྲུན་པ་ནི་སྨོས་མ་དགོས་སོ།།

༡༧ ཆོས་ལ་ཚུལ་བཞིན་སྤྱད་པའི་ཕན་ཡོན་རྣམ་དྲུག་བསྟན་པ།

དེའི་སྟེང་དུ་སྟོན་པའི་དམ་ཆོས་ཚུལ་བཞིན་བསྒྲུབས་ནས་སྤྱད་པའི་ཕན་ཡོན་བསམ་གྱིས་མི་ཁྱབ་པ་ལས་རྣམ་པ་དྲུག་ཏུ་བསྡུས་ནས་བསྟན་པ་ནི།

ཚུལ་བཞིན་སྤྱད་པའི་ཕན་ཡོན་རྣམ་པ་དྲུག།

ཀུན་གྱིས་བཀུར་དང་བསྟོད་དང་ལྷས་བསྲུང་དང༌།།

ཚེ་འདིར་བདེ་མང་ཤི་འཕོས་མཐོ་རིས་འགྲོ།།

མཐར་ཐུག་རྫོགས་པའི་བྱང་ཆུབ་འགྲུབ་པའོ།།

ཞེས་གསུངས་པ་སྟེ། དམ་ཆོས་འཛིན་ཅིང་སྨྲ་བའི་སྐྱེས་བུ་དེ་ཐར་བའི་ལམ་སྟོན་པའི་བཤེས་གཉེན་ཡིན་པས་དེ་ལ་སྐྱེ་བོ་ཀུན་དགའ་ནས་གུས་ཤིང་བཀུར་བསྟི་བྱེད་པ་དང་། ཐམས་ཅད་ཀྱིས་དེ་ལ་སྙན་པར་སྨྲ་བས་བསྟོད་ཅིང་བསྔགས་པ་བྱེད་པ་དང་། དེ་བཞིན་དུ་དཀར་ཕྱོགས་སྐྱོང་བའི་ལྷ་རྣམས་ཀྱིས་སྲུང་ཞིང་མགོན་སྐྱབས་བྱེད་པ་དང་། ཆོས་འཛིན་པའི་སྐྱེས་བུ་དེ་ཚེ་འདིར་བདེ་བ་མང་ཞིང་ཤི་འཕོས་ནས་ཀྱང་དམ་པའི་ཆོས་ཚུལ་བཞིན་དུ་སྒྲུབ་པའི་དབང་གིས་གནས་སྐབས་མཐོ་རིས་ལྷ་མིའི་གནས་སུ་འགྲོ་བ་དང་། སྐྱེ་བ་དེའི་ཐོག་ནས་འཁོར་བར་ཕྱིར་མི་འཁོར་བ་འཇིག་རྟེན་གྱི་ཞིང་ཁམས་བདེ་བ་ཅན་དུ་སྐྱེ་བ་ལ་སོགས་པར་ཕྱིན་ནས་མཐར་ཐུག་རྫོགས་པའི་བྱང་ཆུབ་འགྲུབ་པ་ཡིན་ནོ།།

༡༨ ཆོས་དང་མི་ལྡན་པའི་ཉེས་པ་རྣམ་དྲུག་བསྟན་པ།

ཆོས་དང་མི་ལྡན་ཉེས་པ་རྣམ་དྲུག་ནི།།

མ་རིག་གིས་བསྒྲིབས་རྒན་མོ་ལོང་མ་འདྲ།།

སྲིད་པར་སླུ་མཁས་སྨད་འཚོང་བུ་མོ་འདྲ།།

དོན་མེད་གཡེང་བས་ཚོང་འདུས་ལྟད་མོ་འདྲ།།

སྣང་བ་འབྲིད་མཁས་བུ་ཆུང་འཚོ་བ་འདྲ།།

རིག་པ་ཅོལ་ཆུང་བྱིས་པའི་རྩེད་མོ་འདྲ།།

འཁྲུལ་སྣང་བཅད་དཀའ་ཉ་མོ་རྒྱས་ཟིན་འདྲ།།

དོན་ཆུང་ལས་ལ་མི་ཚེ་ཟད་པར་བྱེད།།

ཅེས་གསུངས་པ་སྟེ། དམ་པའི་ཆོས་ལ་བློ་ཁ་མ་ཕྱོགས་པར་དོན་ཆུང་ལ་མགོ་འཁོར་བའི་ཉེས་པ་རྣམ་དྲུག་འདྲ་བ་དྲུག་གི་དཔེ་ཡིས་བསྟན་པ་ནི། བློ་མིག་མ་རིག་པས་བསྒྲིབས་པའི་དབང་གིས། འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་འདིར་ཐོག་མེད་ནས་འཁྱམས་ཤིང་མཐའ་མེད་དུ་འཁོར་ཀྱང་། དེ་ལས་ཐར་བའི་ལམ་འཚོལ་མི་ཤེས་པ་དག་ནི། ཚེ་འདིའི་སྙན་གྲགས་རྒྱས་ཐབས་དང་། ཚེ་རིང་ནད་མེད་ཀྱི་ལང་ཚོ་རྒྱས་ཐབས་དང་། བཙན་ཕྱུག་འཕན་དར་འཛོམས་ཐབས་ལ་སོགས་པ་ལ་མཁས་ཤིང་བྱང་ཆུབ་པ་དང་། སྲིད་འབྱོར་རིག་གསུམ་དར་བའི་རྒྱལ་ཁབ་ཀྱི་མགོ་དཔོན་ཡིན་ཡང་། འཇིག་རྟེན་ཕ་རོལ་གྱི་མུན་པའི་ལམ་དུ་ཡ་ང་བར་འཁྱམ་དགོས་པས། བླུན་ཞིང་གཏི་མུག་པའི་རྒན་མོ་ལོང་མ་ལམ་མ་ཤེས་པར་གཡང་སར་འཆལ་བ་དང་ཁྱད་མེད་པ་དང་། སྲིད་པར་འདོད་ཡོན་གྱི་དངོས་པོས་བསླུ་མཁས་པ་ནི་སྨད་འཚོང་གི་བུ་མོ་དང་འདྲ་བ་དང་། དོན་མེད་ཀྱི་གཡེང་བས་འདའ་བ་ནི་ཚོང་འདུས་ཀྱི་ལྟད་མོ་ལ་ཧང་བ་དང་འདྲ་བ་དང་། ཕྱིའི་སྣང་བ་སྣ་ཚོགས་པ་འདི་སླུ་ཞིང་འབྲིད་མཁས་པས་བུ་ཆུང་གཡེང་བར་བྱེད་པའི་འཚོ་བ་དང་འདྲ་བ་དང་། ནང་རིག་པ་སེམས་ཀྱི་བདག་ཉིད་འདི་ཅོལ་ཆུང་ཞིང་སླུ་སྐྱེན་པ་ནི་བྱིས་པའི་རྩེད་མོས་བྱིས་པ་སླུ་སླ་བ་དང་འདྲ་བ་དང་། དེ་དག་གིས་སོ་སོ་སྐྱེ་བོ་དག་ཚེ་འདིའི་བྱ་གཞག་ལ་རྣམ་རིག་ཇི་ལྟར་བཀྲ་ཡང་འདོད་ཡོན་རྣམ་ལྔའི་སྣང་བས་བསླུས་ནས་མགོ་འཁོར་བཞིན་པ་བྱིས་པ་སེམས་མི་ཤེས་པ་ལྟ་བུ་ཞིག་ལས་མ་འདས་པར་བསྟན་པ་དང་། དེ་ལྟ་བུའི་འཁྲུལ་སྣང་དེ་ཐོག་མེད་ནས་གོམས་པའི་བག་ཆགས་ཀྱི་དབང་གིས། གོ་བའི་ཐོག་ནས་དོན་ལ་མེད་པའི་འཁྲུལ་སྣང་སྒྱུ་མ་ལྟ་བུ་ཞིག་ཡིན་བསམས་ཀྱང་། དངོས་ཞེན་བདག་འཛིན་གྱི་རྩ་བ་འདི་སྟོང་ཉིད་ཀྱི་ལྟ་བ་དངོས་སུ་མ་རྟོགས་བར་དུ་མི་ཆོད་པས་ཉ་མོ་ཉ་རྒྱའི་ཁུག་ཏུ་འཛུལ་རྗེས་ཕྱིར་ཐར་དཀའ་བ་བཞིན་དུ་བཅད་དཀའ་བ་སྟེ། དེ་དག་ནི་ཆོས་དང་མི་ལྡན་པའི་དབང་གིས་འདིར་སྣང་སྲིད་པའི་བདེ་འབྱོར་གྱི་སླུ་བྲིད་ཐེབས་ཏེ། དོན་ཆུང་སྒྲུབ་ས་ནས་དོན་ཆེན་ཤོར་ནས་མི་ཚེ་རིན་ཐང་ཅན་དེ་དོན་མེད་ཆུད་ཟོས་ཀྱིས་ཟད་པར་བྱེད་པའོ།།

༡༩ ཆོས་ལས་ཉམས་པའི་ཉེས་པ་རྣམ་དྲུག་བསྟན་པ།

ཆོས་ལས་ཉམས་པའི་ཉེས་པ་རྣམ་དྲུག་ནི།།

རང་བས་དམན་པས་བརྙས་པར་འགྱུར་བ་དང༌།།

ལྷ་མིའི་གནས་སུ་གཏམ་ངན་གྲགས་པ་དང༌།།

མི་གཙང་སྣོད་བཞིན་དམ་པས་སྤང་བ་དང༌།།

བསྲུང་བའི་ལྷས་འདོར་བར་ཆད་མང་བ་དང༌།།

བསམ་པ་མི་འགྲུབ་བསོད་ནམས་དཔལ་ཉམས་དང༌།།

ཕྱི་མར་ངན་སོང་སྡུག་བསྔལ་མྱོང་བའོ།།

ཞེས་གསུངས་པ་སྟེ། ཐོག་མར་ཆོས་ལ་ཞུགས་ཀྱང་མཐར་སྡོམ་དང་དམ་ཚིག་ཉམས་པ་ལ་སོགས་པ་བྱུང་བའི་ཉེས་པ་རྣམ་པ་དྲུག་བསྟན་པ་ནི། རང་བས་ལྷག་པའི་དམ་པ་རྒྱལ་བ་སྲས་བཅས་དང་། ལྷ་དང་སྲུང་མས་དབྱིངས་ནས་ཐུགས་ཀྱིས་ཁྲེལ་བས་མི་ཚད། རང་བས་དམན་པར་གྱུར་བ་དེ་དག་གིས་ཀྱང་བརྙས་བཅོས་དང་འཕྱ་སྨོད་བྱེད་པ་ཡིན་པ་དང་། ལྷ་དང་མིའི་གནས་སུ་གཏམ་ངན་གྱིས་ཁྱབ་ནས་གྲགས་པ་ངན་པས་ས་སྟེང་གང་བ་དང་། དེའི་སྐབས་སུ་མི་གཙང་བའི་སྣོད་བཙོག་པ་ཞིག་སུ་ལའང་མི་མཁོ་བ་ལྟར་དམ་པས་སྤངས་ནས་སྔར་དང་འདྲ་བར་མི་བསྐྱོང་བ་དང་། ཆོས་མཐུན་བུ་བཞིན་དུ་སྐྱོང་ཞིང་དམ་མེད་བསྟན་དགྲ་ཚར་བཅད་པ་ནི་རྡོ་རྗེ་ཆོས་སྐྱོང་སྲུང་མ་ཐམས་ཅད་ཀྱིས་ཁས་བླངས་གཡར་དམ་གྱི་ཐ་ཚིག་གཉེན་པོ་བླངས་པའི་སྙིང་པོ་ཡིན་པས། ཆོས་དང་བསླབ་པ་དང་འགལ་ཚེ་ལྷ་དང་སྲུང་མ་མཆོད་ཀྱང་འགོ་ཞིང་སྡོང་གྲོགས་མི་མཛད་ཅིང་། དཀོན་མཆོག་དཔང་པོར་བཞག་ཕྱོགས་བཅུའི་རྒྱལ་བ་སྲས་བཅས་ལ་དགོངས་གསོལ་ཞུས་ནས་སྡོམ་དམ་ཚིག་ཁས་བླངས་བའི་ཐ་ཚིག་ལ་མ་བསྡད་པར་སྐྱབས་འོག་ནས་བུད་སོང་བ་ཡིན་པས་ལྷ་དང་སྲུང་མ་གཤེད་དུ་བབས་ནས་བར་ཆད་མང་བ་སྨོས་མ་དགོས་པ་དང་། མི་འདོད་པ་དུ་མ་ཆར་བཞིན་བབས་ནས་བསམ་རྒྱུ་བརྒྱ་བསམས་ཀྱང་འགྲུབ་པ་གཅིག་ཀྱང་མེད་པར་བསོད་ནམས་ཀྱི་དཔལ་ཉམས་ནས་མངའ་ཐང་འབྱོར་བ་དམན་པར་འགྱུར་བ་དང་། ཆོས་དང་བསླབ་པ་ལས་ཉམས་པའི་ཉེས་དམིགས་ཀྱིས་ཕྱི་མ་ངན་སོང་གི་སྡུག་བསྔལ་ཡང་མྱོང་བ་ཡིན་ནོ།།

༢༠ ཕྱི་དུས་རེ་བའི་ཉེས་པ་རྣམ་དྲུག་བསྟན་པ།

ཕྱི་དུས་རེ་བའི་ཉེས་པ་རྣམ་དྲུག་ནི།།

དལ་འབྱོར་ཐོབ་དུས་ཆོས་ལམ་མ་བསྒྲུབས་ན།།

ཡེང་མའི་ལམ་ལ་མི་ཚེ་ཟད་པ་དང༌།།

འཆི་བ་ངེས་མེད་ཐོག་རྫིས་འོང་བ་དང༌།།

ཤི་ནས་འཁོར་བ་ངན་སོང་ལྟུང་བ་དང༌།།

སྡུག་བསྔལ་དྲག་པོས་ལུས་སེམས་གདུངས་པ་དང༌།།

འགྱོད་པ་དྲན་ཡང་ཤིན་ཏུ་མནར་བ་དང༌།།

ཐར་བའི་དུས་མེད་ཡུན་རིང་གནས་པའོ།།

ཞེས་གསུངས་པ་སྟེ། ཆོས་སྒྲུབ་པར་ཕྱི་བཤོལ་བྱས་ནས་ད་ལྟ་ནི་ཆོས་སྒྲུབ་པའི་དུས་ལ་བབས་མེད་ལ་ལོ་ཚོད་ག་གེ་མོ་ཞིག་ལོན་དུས་ཡིན་བསམ་པ་དང་། བྱ་བ་འདི་དང་འདི་དག་སྔོན་དུ་འགྲུབ་པར་བྱས་ནས་དེ་ནས་གཟོད་ཆོས་བསྒྲུབ་དགོས་སྙམ་པར་བྱེད་ཀྱང་། འཁོར་བའི་བྱ་བཞག་ལ་འགྲུབ་ཟིན་པའི་དུས་ཤིག་ག་ལ་ཡོད་དེ། དང་པོ་ཟིན་དུས་གཉིས་པ་དྲན་པར་འགྱུར་ཞིང་། དེ་དག་ཀྱང་གནད་གཅིག་ལས་གཅིག་ཆེ་བར་སེམས་ཁུར་བྱེད་པའི་ཕྱིར། འོན་ཀྱང་དོན་དུ་གནད་ཆེན་དོན་འབྲས་དང་ལྡན་པ་གཅིག་ཀྱང་ཡོད་པ་མིན། དེས་ན་རང་ཐག་རང་གིས་བཅད་ཅིང་དོར་བ་བྱས་ན་འཁོར་བའི་བྱ་གཞག་གི་མཇུག་རྫོགས་པ་ལས། ཚར་སྒུག་དགོས་ཚེ་ལོ་སྟོང་དུ་གནས་ཀྱང་ཚར་བའི་དཔེ་མེད་པས། དལ་འབྱོར་གྱི་ལུས་རྟེན་ཐོབ་དཀའ་དོན་ཆེ་འདི་ལྟ་བུ་ཞིག་རྙེད་ནས་ཡོད་དུས་ཆོས་མི་སྒྲུབ་པར་དེ་རིང་གི་ཕག་ཏུ་སང་ཉིན་། སང་ཉིན་གྱི་ཕག་ཏུ་གནངས་ཉིན་བཞག་པའི་ཉེས་དམིགས་དྲུག་དེ་གང་ཡིན་ན། ཡེངས་མ་ལམ་ལ་མི་ཚེ་སྟོང་ཟད་དུ་སོང་ནས་འཆི་རན་པ་ལ་བསླེབས་པ་དང་། འཆི་བ་ལ་འདི་ཙམ་ཡོད་སྙམ་པའི་ཞེ་ཚོད་ཡོད་ན་དེ་དང་བསྟུན་ཆོག་ཀྱང་དེ་ལྟར་མ་ཡིན་པ་འཆི་བ་ངེས་མེད་དགྲ་ཐོག་རྒྱག་དང་འདྲ་བར་གློ་བུར་དུ་ཐོག་རྫིས་བྱེད་པ་ཡིན་པ་དང་། ཤི་ནས་སྡུག་བསྔལ་མི་མྱོང་བའི་གནས་ཤིག་ཏུ་ཕྱིན་ཆོག་ན་བླ་ཡང་། ཤི་རྗེས་འཁྱམ་ས་འཁོར་བ་ངན་སོང་མ་གཏོགས་མེད་པ་སྟེ། ངན་སོང་གི་སེམས་ཅན་དང་མཐོ་རིས་ཀྱི་སེམས་ཅན་གཉིས་ཀ་ས་ཆེན་པོའི་རྡུལ་དང་སེན་མོའི་སྟེང་གི་རྡུལ་ལྟ་བུའི་མང་ཉུང་ཡོད་པར་གསུངས་བ་དང་། སྣང་བ་ནས་མུན་པར་འགྲོ་བ་དང་། སྣང་བ་ནས་སྣང་བར་འགྲོ་བ་དང་། མུན་པ་ནས་སྣང་བར་འགྲོ་བ་དང་། མུན་པ་ནས་མུན་པར་འགྲོ་བའི་སེམས་ཅན་གྱི་རིགས་དེ་མུ་བཞི་རུ་ཕྱེས་ནས་གཏན་ལ་ཕབ་ཚེ། སྣང་བ་ནས་མུན་པར་འགྲོ་བ་དང་། མུན་པ་ནས་མུན་པར་འགྲོ་བས་མང་བར་གསུངས་པས་སོ། །དེ་འདྲའི་རྒྱ་ཆེ་ཞིང་གྲངས་མང་བའི་ངན་སོང་གི་གནས་སུ་ལྟུང་ཚེ། དེའི་གནས་རིས་མཐོ་དམན་གང་དང་གང་དུ་ཕྱིན་ཀྱང་སྡུག་བསྔལ་དོས་དྲག་པོ་དེས་ལུས་སེམས་གཉིས་ཀ་དུས་རྟག་ཏུ་གདུང་བར་བྱེད་པ་དང་། དེའི་སྐབས་སུ་འགྱོད་པ་སྐྱེས་ཀྱང་ཐབས་མེད་པ་རུ་ཏྲའི་སྨེ་བཤགས་ལས། ཡི་ཆད་འགྱོད་ཀྱང་ལས་ལ་བཅོས་སུ་མེད། །ཅེས་པ་ལྟར་ཡིན་པ་དང་། དེར་རྣམ་སྨིན་མྱོང་སྟོབས་ཀྱིས་ཟད་དགོས་ཚེ་བསྐལ་ཆེན་ལ་སོགས་པའི་ཡུན་ལ་ཐར་བའི་དུས་མེད་པར་ཡུན་རིང་གནས་དགོས་པའོ།།

༢༡ འཁོར་བའི་གནས་ལ་འཇིགས་པའི་ཆོས་དྲུག་བསྟན་པ།

འཁོར་བའི་གནས་ལ་འཇིགས་པའི་ཆོས་དྲུག་ནི།།

མི་རྣམས་སྡུག་བསྔལ་བསམས་ན་ཡིད་རེ་སྐྱོ།།

ལྷ་མིན་སྡུག་བསྔལ་བསམས་ན་སྐྱི་རེ་གཡའ།།

ལྷ་ཡི་སྡུག་བསྔལ་བསམས་ན་གཡང་རེ་ཟ།།

བྱོལ་སོང་སྡུག་བསྔལ་བསམས་ན་ངུ་རེ་བྲོ།།

ཡི་དྭགས་སྡུག་བསྔལ་བསམས་ན་སྐྱི་རེ་བུང༌།།

དམྱལ་བའི་སྡུག་བསྔལ་བསམས་ན་སྙིང་རེ་འདར།།

དེ་བས་འགྲོ་དྲུག་གནས་ནས་འབྲོས་རེ་རན།།

རན་པ་བས་ཀྱང་ཕྱིས་པར་གྱུར་པ་ཙམ།།

ཞེས་གསུངས་པ་སྟེ། འཁོར་བའི་གནས་འདི་ལ་སེམས་ཤིང་དཔྱད་ན་ཤིན་ ཏུ་འཇིགས་ཤིང་སྐྲག་པའི་ཆོས་དྲུག་ནི། དེ་ཡང་འཁོར་གནས་འགྲོ་བ་རིགས་དྲུག་གི་ནང་ནས་མི་ནི་བཟང ་ཤོས་ལྟ་བུ་ཡིན་པ་སྟེ། མཐོ་རིས་འཇིག་རྟེན་དམ་ཆོས་སྒྲུབ་ཆོག་པའི་ལུས་རྟེན་ཡིན་པའི་ཕྱིར། འོན་ཀྱང་དེའི་སྡུག་བསྔལ་བཞི་དང་བརྒྱད་ལ་སོགས་པ་ལ་བསམས་པར་བྱས་ན་ཡིད་སྐྱོ་བ་ཞིག་སྟེ། དེ་ཡང་གཞོན་མཛེས་ལང་ཚོ་ཅན་གྱི་ལུས་དེ་དབང་མེད་དུ་བཅོམ་ནས་རྒས་ཤིང་རྒུད་པས་མནར་ནས་འཁོགས་པ་དང་། ནད་མེད་སྟོབས་ལྡན་གྱི་ལུས་དེ་འབྱུང་བཞི་མ་སྙོམས་པའི་འདུ་བས་ཉམ་ཉེས་པར་བྱས་ཏེ། ནམ་ཡོང་ཆ་མེད་ཀྱི་འཆི་བདག་འཇིགས་སྐྲག་ཅན་དེའི་མདུན་དུ། ཤིན་ཏུ་ཉམ་ཆུང་བར་འཆི་བ་སྒུར་རེ་སྒུག་པ་ཤན་པའི་མདུན་གྱི་ར་ལུག་དང་ཁྱད་མེད་པར་བསྡད་ཡོད་པ་ཡིན་པ་དང་། དེ་བཞིན་དུ་སྙིང་ནས་གཅེས་པའི་མི་དམར་ཐང་ཅན་འདང་ཆེན་རྩིས་ཆེན་དེ་དག་དབང་མེད་གཤིན་རྗེའི་ལག་ཏུ་གཅིག་ཁྲིད་གཉིས་ཁྲིད་ཀྱིས་ཤོར་དང་འཆོར་ལ་ཕྱོགས་ནས་ཡོད་པ་དང་། དྲིན་ཅན་ཕ་མས་གཙོ་བྱས་པའི་འཇིག་རྟེན་ཕྱི་མའི་ལམ་དུ་སོང་བ་དེ་དག་ད་ཚོད་ངན་སོང་གི་སྡུག་བསྔལ་ཇི་ལྟ་བུ་ཞིག་མྱོང་གིན་ཡོད་ན་ལ་སོགས་པ་བསམ་ན་སྐྱོ་ཤས་ཤིག་མི་སྐྱེ་བའི་རང་དབང་མེད་པ་དང་། དེ་བཞིན་དུ་ལྷ་མིན་གྱི་སྡུག་བསྔལ་འཐབ་རྩོད་བསད་རྨས་དེ་དག་ལ་བསམས་དུས་སྐྱི་གཡའ་ནས་ཤ་བརྩེད་པ་ཞིག་ཡིན་པ་དང་། ལྷའི་སྡུག་བསྔལ་ལ་བསམས་ན་ཡང་ལྷ་ཡུལ་གྱི་བདེ་བ་མྱོང་མྱོང་ནས་ཤི་རན་དུས་ངན་སོང་དུ་ལྟུང་བ་ཤེས་པས་དེ་ལ་གཡང་རེ་ཟ་ཞེས་པ་སྟེ། གཡང་ས་ཟབ་མོ་ནས་མར་བལྟས་ན་སྐྲག་སྔངས་ཡོང་བ་ལྟ་བུའི་ཉམ་ང་བ་ཞིག་ཡིན་པ་དང་། བྱོལ་སོང་གི་སྡུག་བསྔལ་ཐམས་ཅད་ལ་བསམས་ན་ལྟ་ཅི་སྨོས། ཐད་ན་ཡོད་པའི་དུད་འགྲོ་རང་རེས་མཐོང་བ་འདི་དག་བཀོལ་སྤྱོད་ཀྱི་སྡུག་བསྔལ་མྱོང་བཞིན་ཡོད་པ་འདི་དག་ལ་བལྟས་ན་ངུ་བྲོ་བ་ལས་གཞན་མེད་དེ། དེ་ཐམས་ཅད་ཀྱང་ཡང་ན་སྐྱེ་བ་འདིའམ་སྐྱེ་བ་གཞན་དུ་ཕ་མ་རུ་བྱས་པ་ཤ་སྟག་ཡིན་ཏེ། ཕ་མ་སྒོ་ཕྱུགས་དང་སྒོ་བཤས་ལ་ཚུར་ལ་སྐྱེ་བ་ནི། ཕ་ཤ་ཟ་ཞིང་མ་ལ་རྡེག །གསོད་པའི་དགྲ་བོ་པང་ན་བཟུང་། །ཆུང་མས་ཁྱོ་ཡི་རུས་པ་འཆའ། །འཁོར་བའི་ཆོས་ལ་གད་མོ་བྲོ། །ཞེས་པ་ལ་སོགས་པ་མང་དུ་གསུངས་པའི་ཕྱིར། ཡི་དྭགས་ཀྱི་བཀྲེས་སྐོམ་གྱི་ཐོག་ནས་བཤད་ནའང་དཔེ་དེ་བཞིན་དུ་སྐྱི་བུང་སྟེ་སྐྲག་ནས་བ་སྤུ་གཟེངས་བར་བྱེད་པའི་སྡུག་བསྔལ་གྱིས་ཉམ་ཐག་པ་ཞིག་ཡིན་པ་དང་། དེ་བཞིན་དུ་དམྱལ་བའི་ཚ་གྲང་གསོད་གཅོད་ཀྱི་སྡུག་བསྔལ་གོ་ན་སྙིང་འདར་བ་ཞིག་ཡིན་པས། ཁོག་ཏུ་སེམས་ཡོད་པ་ཞིག་ཡིན་ཚེ་འབྲོས་རན་པས་མ་ཚད་ཕྱིས་པར་གྱུར་པས་ལ་འུར་བརྩོན་པར་རིགས་སོ།།

༢༢ དེ་ལས་ཐར་བར་བྱེད་པའི་ཆོས་དྲུག་བསྟན་པ།

དེ་ལས་ཐར་བར་བྱེད་པའི་ཆོས་དྲུག་ནི།།

རྟག་ལྟ་ཡུལ་ཕྱུང་ཕྱི་དུས་ལེ་ལོ་བོར།།

སང་ཕོད་བཅས་ཞོག་ཅི་ཡོད་ཆོས་ལ་ཐོང༌།།

ཐ་མལ་སྤྱོད་བོར་བསྟན་པའི་སྲོལ་དུ་ཞུགས།།

སྟོབས་བཞིའི་གཉེན་པོས་ལས་ངན་སྡིག་པ་སྦྱོངས།།

ཆོས་སྤྱོད་རྣམ་བཅུས་ཚོགས་གཉིས་ཅི་ནུས་སོགས།།

སྦྱོར་དངོས་རྗེས་གསུམ་ཆོས་ཀྱི་ལམ་དུ་ཆུག།

དེ་ཡིས་འཁོར་བའི་གནས་ལས་མྱུར་དུ་ཐར།།

ཞེས་གསུངས་པ་སྟེ། དེ་ལས་ཐར་བར་བྱེད་པའི་ཐབས་ཀྱི་ཆོས་དྲུག་བསྟན་པ་ནི། སྤྱིར་ན་རྟག་པར་ལྟ་བ་དེ་མུ་སྟེགས་རྟག་ལྟ་བའི་གྲུབ་མཐའ་ལས་བཤད་པ་ལྟ་བུ་ཡིན་ཡང་། འདིར་སྐབས་ཐོབ་ཀྱི་གོ་བ་འདུས་བྱས་མི་རྟག་པ་ཡིན་པ་ཁ་ནས་བཤད་ཀྱང་དོན་དུ་མགྱོགས་པོར་མི་འཆི་སྙམ་པའི་རྟག་ལྟ་དེ་ལ་གོ་དགོས་ཏེ། དེའི་ཁུངས་ནས་མི་འདོད་པ་ཕལ་ཆེ་བ་འབྱུང་བ་ཡིན་པའི་ཕྱིར། དེས་ན་དེ་འདྲའི་རྟག་ལྟ་དེ་ཡུལ་ཕུད་ནས་ཕྱི་བཤོལ་གྱི་ལེ་ལོ་བོར་ཞིག སང་ཕོད་གནངས་ཕོད་ཀྱི་ཕྱི་ཚིས་གྲབས་གཤོམ་དེ་བཞག་ནས། ཕྱིས་རྒས་དུས་བཟའ་རྒྱུ་དང་བུ་ཚའི་མཁོ་ཆས་ཡིན་མི་བསམ་པར་བདོག་པའི་དངོས་པོ་ཅི་ཡོད་ཆོས་ཕྱོགས་སུ་ཐོང་། ཐ་མལ་པའི་སྤྱོད་པ་མི་དགེའི་བསམ་སྦྱོར་བོར་ནས་སངས་རྒྱས་བསྟན་པའི་སྲོལ་ལམ་ལ་ཞུགས་ཤིག ཚེ་རབས་ཐོག་མེད་ནས་བསགས་པའི་སྔར་བྱས་ཀྱི་སྡིག་སྒྲིབ་ཐམས་ཅད་གཉེན་པོ་སྟོབས་བཞིའི་སྒོ་ནས་བཤགས་ཏེ་སྦྱོངས་ཤིག ཡི་གེ་འབྲི་མཆོད་སྦྱིན་པ་དང་། །ཉན་དང་ཀློག་དང་འཛིན་པ་དང་། །འཆད་དང་ཁ་ཏོན་བྱེད་པ་དང་། །དོན་སེམས་པ་དང་སྒོམ་པ་སྟེ། །སྤྱོད་པ་འདི་བཅུའི་བདག་ཉིད་ནི། །བསོད་ནམས་ཕུང་པོ་དཔག་ཏུ་མེད། །ཅེས་པ་ལྟར་དུ་ཆོས་སྤྱོད་ཀྱི་བྱ་བ་རྣམ་པ་བཅུ་ཡིས་འདས་པར་བྱས་ནས་བསོད་ནམས་དང་ཡེ་ཤེས་ཀྱི་ཚོགས་གཉིས་ཅི་ནུས་སུ་སོག་ཅིག ཀུན་མཁྱེན་ཆོས་རྗེས། ཁྱད་པར་ཐེག་ཆེན་དགེ་བ་རླབས་པོ་ཆེ། །སྦྱོར་བ་སེམས་བསྐྱེད་དངོས་གཞི་དམིགས་པ་མེད། །རྗེས་ལ་བསྔོ་བས་ཡོངས་སུ་ཟིན་པ་དེ། ཐར་ལམ་སྒྲུབ་པའི་གཅེས་པ་རྣམ་གསུམ་ཡིན། །ཞེས་གསུངས་པ་ལྟར་སྦྱོར་བ་སེམས་བསྐྱེད་དམ་པ་དགེ་རྩ་ཐབས་ཀྱིས་ཟིན་བྱེད་བྱང་ཆུབ་ཏུ་སེམས་བསྐྱེད་པ་དང་མི་འབྲལ་ཞིང་། དངོས་གཞི་དམིགས་མེད་དམ་པ་དབུ་ཕྱག་རྫོགས་གསུམ་གྱི་ལྟ་བའི་གནད་དང་མ་བྲལ་བ་ཞིག་དགོས་ལ། འོན་ཀྱང་དེ་ཙམ་མ་ནུས་ཀྱང་ཁ་གཡེང་མིག་གཡེང་མེད་པའི་སྒོ་གསུམ་ཆུན་གཅིག་ཏུ་དྲིལ་ནས། བསམ་པས་དགེ་སྦྱོར་གང་བསྒྲུབ་ཀྱང་དེ་ལ་རྩེ་གཅིག་ཏུ་གཏད་ནས་གང་བསྒྲུབ་བྱའི་ཆོས་ལ་སོགས་པ་དེ་དང་དེ་དག་སྣང་ལ་རང་བཞིན་གྱིས་མི་དམིགས་པར་རྒྱས་འདེབས་བྱས་ན། དངོས་གཞི་དམིགས་མེད་ཀྱི་དོད་ཐུབ་པའི་དགེ་རྩ་རྐྱེན་གྱིས་མི་འཇིག་པར་བྱེད་པ་ཡིན་ལ། རྗེས་བསྔོ་བ་དམ་པ་གང་བསྔོ་བྱ་སྔོ་བྱེད་བསྔོ་ཡུལ་དང་བཅས་པ་འཁོར་གསུམ་དག་པའི་འདུན་པས་བསྔོས་པར་བྱས་ན་དགེ་རྩ་ཆུད་མི་ཟ་བ་སྟེ་དེ་ལྟ་བུའི་དམ་པ་གསུམ་གྱི་རྩིས་ཟིན་ན་དགེ་རྩ་ཆེ་ཆུང་གང་ཡིན་ཡང་ཐར་བ་ཆ་མཐུན་གྱི་དགེ་རྩ་རུ་འགྱུར་བ་ཡིན་ལ། གལ་སྲིད་དམ་པ་གསུམ་གྱི་རྩིས་མ་ཟིན་དུས་དགེ་བ་ཆེན་པོ་བྱས་པ་ཡང་བསོད་ནམས་ཆ་མཐུན་ཙམ་ལས་མི་འགྱུར་བ་ཡིན་པས་སྦྱོར་དངོས་རྗེས་ཀྱི་དམ་པ་གསུམ་དང་འབྲེལ་བའི་ཆོས་ལ་རང་ཞུགས་པས་མ་ཚད། གཞན་ལ་ཡང་དེ་ལྟར་གདམས་པར་བྱས་ན་འཁོར་བའི་གནས་ནས་མྱུར་དུ་ཐར་བར་འགྱུར་བ་ལས། སྐྱོ་བ་དང་སྐྱི་གཡའ། གཡང་ཟ་དང་སྙིང་འདར་ཇི་ལྟར་བྱུང་ཡང་ཕན་པ་མེད་དོ།།

༢༣ ཆོས་ཀྱི་བར་གཅོད་ནོར་པ་རྣམ་དྲུག་བསྟན་པ།

ཆོས་ཀྱི་བར་གཅོད་ནོར་པ་རྣམ་དྲུག་ནི།།

ཆེ་བཙན་དྲེགས་པས་གཡེངས་པའི་ཆེན་པོ་ནོར།།

མི་ཆོས་བྱ་བ་བསྒྲུབ་པའི་བཙུན་པ་ནོར།།

ཐ་སྙད་མི་ཚེ་འདའ་བའི་སྟོན་པ་ནོར།།

དུག་ལྔས་རང་རྒྱུད་བསྲེག་པའི་སྔགས་པ་ནོར།།

བླུན་རྨོངས་ལོག་འཚོ་བསྒྲུབ་པའི་སྒོམ་ཆེན་ནོར།།

བློ་ལྟོས་འཁྲུལ་སྣང་འཆའ་བའི་སྐྱེ་བོ་ནོར།།

ནོར་པ་སྤངས་ནས་ཆོས་ལ་བརྩོན་པ་གཅེས།།

ཞེས་གསུངས་པ་འདི་ཆོས་ཀྱི་བར་ཆད་ཀྱི་སྐོར་ནས་གསུངས་པ་སྟེ་ལས་དང་པོ་པའམ་ལམ་ཞུགས་ཀྱི་ཆོས་པ་ཞིག་གི་ཆོས་ཀྱི་བར་ཆད་ནི་འདི་དག་རེད་ཅེས་པ་སྟེ། དེ་ཡང་སངས་རྒྱས་བྱང་སེམས་ཀྱི་སྤྲུལ་བ་ཞིག་ལ་མཚོན་ན་གང་ལ་གང་འདུལ་ཐབས་མཁས་ཀྱི་མཛད་པ་སྟོན་པ་ཡིན་ལ་དེ་དག་ནི་འདིར་བསྡུས་ནས་འཆད་དུ་ཡོད་པ་མིན་པ་དང་། ཐ་མལ་པ་ཆོས་ལམ་ལ་མ་ཞུགས་པ་དང་ཆོས་ལམ་ལ་བློ་ཁ་མ་ཕྱོགས་པའི་བདུད་རིགས་ལོག་ལྟ་ཅན་དག་ཀྱང་འདིར་འདུ་བ་མིན་པས་དེ་ལས་གཞན་པ་ཆོས་སྒོར་ཞུགས་ནས་ཆོས་སྒྲུབ་བཞིན་ཡོད་ཀྱང་རྐྱེན་ངན་པ་དང་ཐུག་ན་ཆོས་འགོ་ཨེ་ཐོན་བསམ་པའི་རེ་དོགས་དགོས་པ་རྣམས་ཀྱིས་འདི་དྲུག་པོ་ལ་གཟབ་དགོས་པ་ཡིན་ཅིང་། དེ་ཡང་གཙོ་བོ་ཀུན་སློང་ལ་རག་ལས་པ་ཡིན་ཏེ། སེམས་དགེ་བ་ལ་ཉེས་པ་མེད། །ཅེས་པ་དང་། བསམ་པ་དག་ན་ལུས་ངག་གི་མི་དགེ་བ་བདུན་གནང་བའི་སྐབས་ཀྱང་ཡོད་པས། གཙོ་བོ་གཞན་དོན་གྱི་ཆེད་མ་ཡིན་པའི་རང་དོན་དུ་སྟོབས་དང་འབྱོར་བ། མཚན་དང་སྙན་གྲགས་མངའ་ཐང་དང་གཟི་བརྗིད་བསྐྱེད་ན་དེ་ལ་བརྟེན་ནས་ཆོས་ཀྱི་རྩ་བ་ངེས་འབྱུང་དང་བྱང་སེམས། བྱམས་དང་སྙིང་རྗེ་རྣམས་བོར་ན་ཆོས་རྣམ་དག་འགྲུབ་པ་མིན་པས་ཆེན་པོའི་ཚོད་ཀྱི་མཐོ་འདོད་གྲགས་འདོད་བྱས་ན་ནོར་བ་ཡིན། དེ་ཡང་ཇི་ལྟར་ནོར་ན་ཆོས་མ་འགྲུབ་གོང་གི་འཇིག་རྟེན་འགྲུབ་ན་ཆོས་པའི་ཆོས་ལམ་ནོར་སོང་བ་ཡིན་པས། དམན་ས་གོང་མའི་གདན་ས་ཡིན་ཞེས་གསུངས་པས་དམན་ས་འཛིན་དགོས། འོན་ཀྱང་དེང་གི་དུས་འདི་ལྟ་བུ་ཞིག་ལ་མཚོན་ན་དུས་ངན་ཡིན་པས་དམན་ས་འཛིན་མཁན་ལ་དམན་པ་དངོས་ཡིན་པའི་འདུ་ཤེས་དང་། ཆེ་བ་འདོན་མཁན་ལ་དབང་རྒྱུ་ཐོབ་གསུམ་གྱིས་ཡར་འདེགས་བྱེད་པ་དང་མི་ཚང་མ་མཐོ་དགའ་ཆེ་བ་གཉིས་མཐུ་བསྡོངས་དཔུང་བསྡོངས་བྱས་ནས་སྐབས་དང་སྐབས་སུ་ཆོས་མཐུན་བཀུར་བསྟིའི་བཞུགས་གྲལ་མགོ་མཇུག་ ཏུ་ལྡོག་པའི་དུས་ཡོད་ཀྱང་། རང་ངོས་ནས་རྒྱལ་བ་དགྱེས་པའི་ལམ་བཟང ་ལ་ཞུགས་པ་ཡིན་ན། གཞན་དག་སུ་མ་འགུ་ཡང་ཞེ་བློ་བདེ་ནས་འདུག་ཆོག་པ་ཡིན་པས། ཆོས་པ་དག་གིས་ཆེ་བཙན་དྲེགས་པས་གཡེངས་པའི་དབང་འབྱོར་གྱི་དབང་དུ་མི་ཤོར་བ་ནི་གལ་ཆེའོ། །དགེ་ཚུལ་སློང་གི་སྡོམ་པ་བླངས་ནས་མ་ཉམས་པར་གནས་པའི་བཙུན་པ་དང་བཙུན་མ་རྣམས་ཀྱིས་མི་ཆོས་ཏེ་ཁྱིམ་པའི་བྱ་བ་དགྲ་གྱོད་འཁོན་གསུམ་ཚོང་སོ་ནམ་དང་། འུ་ཚོ་འབྲོག་ཕྱོགས་ཀྱི་ཡུལ་ལ་མཚོན་ན་ཕྱུགས་འཚོ་བ། བཞོན་བཞོ་བ། རུ་སྐྱེལ་བ། ཁལ་འགེལ་བ་དང་། ཟུར་གྱི་ལས་ཀ་དབྱར་རྩྭ་བརྐོ་བ། གྲོ་མ་བརྐོ་བ། རྩྭ་འཐུ་བ། ས་ལས་ལ་སོགས་པ་མི་སྐྱ་ཕོ་མོ་ཁྱིམ་པ་མི་ནག་པ་དག་གི་བྱ་བ་རབ་ཏུ་བྱུང་བས་བྱེད་ན། སྤྱིར་ན་བཅོམ་ལྡན་འདས་ཀྱི་བཀའ་དང་འགལ་བ་དང་། དེའི་སྟེང་དུ་ལུས་སེམས་གཉིས་ཀ་ཆོས་མིན་གྱི་ཕྱོགས་ལ་འཁོར་ནས་འཁོར་བའི་ཁ་འཛིན་བྱས་ནས་ཆོས་སྤྱོད་དང་དགེ་བ་སྒྲུབ་པ་ལས་གཡོལ་དུ་འགྲོ་བས་ནོར་བའོ། །དོན་ལ་མི་རྟོན་ཞིང་ཚིག་རྐྱང་པ་ལ་རྟོན་པའི་ཐ་སྙད་ཀྱི་བཤད་རྒྱང་ཁོ་ན་འཐེན་ནས་ཉམས་ལེན་གྱི་གནད་མི་ཤེས་པར་མི་ཚེ་གྲོན་པ་ནི་ཆོས་གཞན་ལ་སྟོན་པའི་སྟོན་པ་དག་གི་ནོར་བ་སྟེ། ཁྱད་པར་དུ་ཐོས་པས་རང་རྒྱུད་མ་གྲོལ་པ་ལ་ལ། དཔེར་ན་ཆུ་ཟོམ་ཕྱེད་ཁུར་ན་ཆུ་དེ་བས་ཆོབ་སྒྲ་དེས་ཆེ་ཞིང་འཁུར་མི་བདེ་བ་བཞིན་དུ། འགྲོག་པ་མི་བདེ་ཞིང་། ཡས་མས་ཐམས་ཅད་མི་འཐད་པའི་འགལ་འདུ་ཤ་སྟག་ཏུ་མཐོང་ནས། དམ་ཆོས་འཆད་ཉན་བྱས་པ་དེ་ནང་རང་རྒྱུད་ཉོན་མོངས་ཀྱི་གཉེན་པོར་མི་འགྲོ་བར། ཕྱིའི་ཁ་ཤགས་བཀྱེ་བྱེད་དུ་ལོག་སྟེ། ནམ་ཞིག་དད་པ་དག་སྣང་ཡང་ཇེ་ཆུང་དུ་སོང་ནས་རྐྱེན་ངན་ཐོག་ཏུ་བབས་དུས་ཐ་མལ་པར་འགྱུར་བ་དེ་དག་ནི་ནོར་བའོ། །སྔགས་པས་གསང་སྔགས་ཀྱི་དམ་ཚིག་བསྲུངས་ནས་བསྟན་པའི་སྤྱི་དགྲ་དང་བླ་མའི་སྒོས་དགྲ། ཞིང་བཅུ་ཚང་བའི་དགྲ་བོ་སྒྲོལ་བ་ནི་སྔགས་པའི་ལས་ཡིན་ཡང་། དེ་ལྟར་མ་ཡིན་པ་རང་འདོད་ཕུགས་སུ་བཅུག་རང་ཉིད་དང་ཡོན་བདག་ལ་གནོད་པའི་དངོས་དངོས་མེད་སུ་ཡིན་ཡང་། ཕ་རོལ་པོའི་སེམས་ཅན་དེ་ལ་དགྲ་རུ་བཟུང་ནས་མནན་བསྲེགས་འཕངས་གསུམ་བྱས་ན་བསྟན་པའིི་ཞབས་འདྲེན་ཆོས་ལམ་ལས་འགལ་བའི་ནོར་བ་ཡིན། སྔགས་པས་བསྟན་དགྲ་སྒྲོལ་བ་དེ་མཐུས་གསོད་ཐུབ་པ། ནུས་པས་འདྲེན་ཐུབ་པ་ཞིག་དགོས་ཏེ། རྡོ་རྗེ་ཕུར་པ་རྩ་བའི་རྒྱུད་ཀྱི་དུམ་བུ་ལས། སྙིང་རྗེས་བསྒྲལ་བའི་དམ་ཚིག་ནི། །གསད་ཅིང་མནན་པ་མ་ཡིན་ཏེ། །ཞེས་གསུངས་ལ་མུ་སྟེགས་པའི་ངན་སྔགས་རེག་ཕུང་ནག་པོ་ལྟ་བུས་ཕ་རོལ་པོ་གསད་ཐུབ་ཀྱང་། སྐྱེ་བོ་མི་ནག་པས་གྲི་ཁ་མདུང་ཁ་བཀྱེས་ནས་རྒྱལ་ཕམ་འབྱེད་པ་དང་ཁྱད་མེད་པས་དེ་འདྲ་བ་ནི་བསྟན་པ་འདི་ལས་ཕྱི་རོལ་དུ་གྱུར་པས་ཆོས་པའི་ལས་མིན་ལ། རང་གར་ངན་སེམས་འཆང་ནས་ཇ་ཕུད་མཆོད་མཁན་དེའི་ཕྱོགས་ཙམ་ལའང་ཆོས་སྐྱོང་སྲུང་མ་ཉེ་བ་མིན་པར་མ་ཟད། རྣལ་འབྱོར་པ་དམ་ཚིག་དང་མ་ལྡན་ན་དགྲ་བོ་ཕར་བསད་ཀྱང་རང་ལ་ཚུར་རྡེག་པ་ཡིན་པས་གཟབ་པར་བྱའོ། །དང་པོའི་ལས་ཅན་ཐོས་པ་འཚོལ་མ་མྱོང་བས་ཐོས་བསམ་གྱི་ཤེས་རབ་མེད་པས་ཉམས་ལེན་གྱི་གནད་རྣམས་མི་ཤེས་བཞིན་དུ། མཐོ་སའི་ཕྱག་རྫོགས་ཀྱི་ཉམས་ལེན་དང་། དམའ་སའི་སྔོན་འགྲོ་བློ་སྦྱོང་གི་སྐོར་ནས་ཚེ་མི་རྟག་པ་ལ་སོགས་པ་སྒོམ་མདོག་གིས་རི་མགོ་རྫ་མགོ་ཞིག་ལ་ཁེར་འདུག་བྱས་ཀྱང་། ཅི་སྒོམ་འདི་སྒོམ་གྱི་གནད་ལེགས་པར་མ་ཤེས་པས་གྲུབ་དོན་གྱི་འབྲས་བུ་ཉམས་རྟོགས་ཀྱི་ཡོན་ཏན་བསྐྱེད་དུ་མེད་ཚེ། ལོག་འཚོའི་འཚོ་བ་རྒྱུ་ནོར་གསོག་བྲུན་དང་གཡོ་སྒྱུ་མགོ་སྐོར་ལ་སོགས་པ་ལ་ཐུགས་དམ་དུ་བཟུང་བའི་ཐུན་གྱི་ཉམས་ལེན་དེ་ལས་བསམ་རྒྱུ་མེད་པར་གྱུར་པའི་བླུན་རྨོངས་ལོག་འཚོ་སྒྲུབ་པའི་སྒོམ་ཆེན་རྣམས་ནོར་བ་ཡིན་ནོ། །བློས་ལྟོས་ས་འཁྲུལ་སྣང་ལ་འཆའ་བའི་སྐྱེ་བོ་ཐ་མལ་པ་སོ་སོ་སྐྱེ་བོ་དག མེད་སྣང་འཁྲུལ་བའི་རང་གཟུགས་འདི་དག་མེད་ལ་ཡོད་པར་བཟུང་བ་དང་། མི་གཙང་བ་ལ་གཙང་བར་བཟུང་བ་དང་། མི་བདེ་བ་ལ་བདེ་བར་བཟུང་བ་སོགས་ཀྱིས་ནོར་ཏེ་འཁྱམས་པ་ཡིན་པས་འདི་ལྟ་བུའི་ནོར་བ་འདི་དག་སྤངས་ནས་དམ་པའི་ལྷ་ཆོས་ལ་ཚུལ་བཞིན་དུ་བརྩོན་པར་བྱའོ།།

༢༤ མ་ནོར་ཕན་པར་བྱེད་པའི་ཆོས་དྲུག་བསྟན་པ།

མ་ནོར་ཕན་པར་བྱེད་པའི་ཆོས་དྲུག་ནི།།

བརྩེ་བའི་གདམས་ངག་བླ་མའི་གསུང་ལ་ཉོན།།

ཡིད་ཆེས་གཏད་ས་རྒྱལ་བའི་བཀའ་ལུང་ལྟོས།།

ཉིན་མཚན་ཐུན་མཚམས་དགེ་སྡིག་བསྔོ་བགྲང་གྱིས།།

ཕྱི་མ་གར་འགྲོ་རྒྱུ་འབྲས་རྟེན་འབྲེལ་སོམས།།

ལུས་དང་ལོངས་སྤྱོད་གཅེས་འཛིན་ཆགས་ཞེན་སྤོངས།།

རྒྱུད་ལུང་མན་ངག་སེམས་ཀྱི་སྟེང་དུ་ཕོབ།།

དེ་ལྟར་བྱས་ན་མྱུར་དུ་སངས་རྒྱས་འགྲུབ།།

ཅེས་གསུངས་པ་སྟེ། མ་ནོར་ཕན་པར་བྱེད་པའི་ཆོས་དྲུག་ནི། དེ་ཡང་དང་པོར་བླ་མ་བརྟགས་ཤིང་སྟེན་པར་བྱེད་པའི་དུས་སུ་ཐུགས་རྒྱུད་བརྩེ་བ་དང་སྙིང་རྗེས་གང་བ་ཞིག་ཡིན་མིན་བརྟག་དགོས་ཏེ། སྤྱིར་ན་བླ་མ་མ་དགོས་གང་ཟག་ཕལ་བའི་ཚོད་གང་ཟག་གིས་ཟིན་པ་མིན་ཡང་། བླ་མ་བརྟག་ཐབས་ཀྱི་གཙོ་བོ་དེ་ཐུགས་རྒྱུད་སྙིང་རྗེས་གང་བ་ཡིན་མིན་དང་། མ་མཐའ་ཡང་བྱང་ཆུབ་ཀྱི་སེམས་སྨོན་འཇུག་གི་བདག་ཉིད་ཅན་ཐུགས་རྒྱུད་དུ་འཁྲུངས་པ་ཞིག་ཡིན་དགོས་པ་ལ་སོགས་པ། མདོ་དང་རྒྱུད་སྡེའི་རང་ལམ་གྱི་བླ་མའི་མཚན་ཉིད་གསུངས་པ་དག་ལ་གཞིར་བཅས་པའི་བརྟག་པ་སྔོན་དུ་སོང་བའི་མཚན་ལྡན་གྱི་བླ་མ་དེའི་གསུང་ལ་ཉོན་ཅིག དེའི་སྟེང་དུ་ཡིད་ཆེས་ས་རྒྱལ་བའི་བཀའ་དང་དེའི་དགོངས་འགྲེལ་ཐམས་ཅད་ཡིན་པ་ལས། དེ་མིན་འཇིག་རྟེན་གྱི་ཆེན་པོ་གཉན་པོ་དང་། ཕ་མ་མཛའ་བཤེས་སུས་སྨྲས་ཀྱང་བློ་གཏད་དང་ཡིད་ཆེས་བྱེད་ཡུལ་མིན་ཏེ། རང་མགོ་རང་གིས་མ་ཐོན་པ་ཤ་སྟག་གིས་གཞན་གྱི་ལམ་སྟོན་དང་རྒྱབ་རྟེན་ཐུབ་པ་མིན་པས་སོ། །ཉིན་གཅིག་གི་མཐའ་ལ་མཚོན་ན་དགོང་མོ་མར་ཉལ་དུས་ངས་དེ་རིང་ཉིན་གཅིག་ལ་ཆོས་མཐུན་གྱི་བྱ་བ། གཞན་ཕན་གྱི་བསམ་སྦྱོར་སོགས་དགེ་བ་གང་དང་གང་བྱས་འདུག་བསྔོ་བགྲང་ངམ་རྩིས་བཤེར་བྱས་ན། ཆགས་སྡང་དོན་མེད་ཀྱི་བྱ་བ་ཁོ་ན་རུ་སོང་བའམ། ཐུན་རེ་སྡོམ་ནས་ཁ་ཏོན་དགེ་སྦྱོར་རེ་བྱས་ཀྱང་དེ་ཡང་རྣམ་དག་ཅིག་མ་བྱུང་བར་འདུག་ན་ད་ཕྱིན་ཆད་འདི་འདྲ་མི་བྱེད་སྙམ་པའི་དམ་བཅའ་བྱེད་ཅིང་། ནངས་མོ་ཡར་ལང་བའི་དུས་སུ་ཡང་དེ་རིང་མི་ཚེའི་དུས་ཚོད་འཕྲོ་བརླག་ཏུ་མི་གཏོང་བར་དགེ་སྦྱོར་ལ་རེམ་དགོས་བསམ་པའི་དམ་བཅའ་དང་། དྲན་པའི་བྱ་ར་ལྟ་མཁན་འཚོ་མཁན་ཞིག་ཡོད་ཚེ་ཉིན་རེ་རེ་བཞིན་ཇེ་བཟང་དུ་འགྲོ་བ་ཡིན་ལ། དེ་ལས་གཞན་དུ་འཁྲུལ་རྟོག་ཡན་པ་རྒྱ་འབྱམས་སུ་སོང་ན་དགེ་སྡིག་གང་བྱེད་བཞིན་ཡོད་རང་གིས་ཀྱང་མི་ཤེས་པ་དེ་འདྲར་འགྱུར་བ་ཡིན་ནོ། །ཕྱི་མ་གར་སྐྱེ་ད་ལྟའི་ལས་ལ་ལྟོས། །ཞེས་གསུངས་པས་རྒྱུ་འབྲས་རྟེན་འབྲེལ་བསླུ་བ་མེད་པ། ལས་བྱས་པ་ས་ལ་མི་སྨིན་རྡོ་ལ་མི་སྨིན་རང་ཉིད་ཀྱི་ཟིན་པའི་ཕུང་པོ་འབའ་ཞིག་ལ་སྨིན་པ་ཡིན་ཏེ། མདོ་ལས་དགེ་སློང་དག་བྱས་ཤིང་བསགས་པའི་ལས་ནི་སའི་ཁམས་ལ་སྨིན་པར་འགྱུར་བ་མ་ཡིན། ཆུ་དང་མེ་དང་རླུང་ལ་མ་ཡིན་གྱི། ཟིན་པའི་ཕུང་པོ་དང་ཁམས་དང་སྐྱེ་མཆེད་འདི་ཉིད་ལ་སྨིན་པར་འགྱུར་རོ། །ཞེས་གསུངས་པས་རྒྱུ་འབྲས་རྟེན་འབྲེལ་གྱི་ཐོག་ནས་ལས་འབྲས་ལ་སེམས་པར་བྱེད་པ་ནི་མ་ནོར་བའི་ལམ་དང་། ལུས་དང་ལོངས་སྤྱོད་འདི་དག་ཆགས་ཞེན་གྱི་གཞི་མ་ཡིན་པས་འདི་ལ་གཅེས་འཛིན་ཆགས་ཞེན་སྤོངས་ཤིག དེ་ཡང་རྒྱབ་ཀྱི་ཁུར་ཕོག་པ་ལྟ་བུ་དེ་མ་ཐག་ཏུ་ལོངས་སྤྱོད་མ་དགོས་ལུས་ཀྱི་ཆགས་ཞེན་ཙམ་ཡང་མི་བྱེད་ཅེ་ན་སོ་སོ་སྐྱེ་བོས་ཐུབ་པ་ཞིག་མིན་ཡང་རིམ་གྱིས་སྦྱོང་དུ་ཡོད་པ་ཡིན་པས། བསམ་བློ་ཞིབ་ཏུ་བཏང་ན་ལུས་འདི་གཡར་བའི་དངོས་པོ་ལྟ་བུ་ཞིག་ཡིན་པ་དང་། ལོངས་སྤྱོད་ཀྱང་དེ་བཞིན་དུ་མི་རྟག་པ་མདང་གི་རྨི་ལམ་དང་འདྲ་བར་གོ་བར་བྱས་ནས། ལུས་རྟེན་འདི་ཐར་བའི་གྲུ་གཟིངས་ས་བེད་སྤྱོད་པ་དང་། ལོངས་སྤྱོད་ཀྱི་ཕྱོགས་ནས་ཀྱང་རབ་བྱུང་ཞིག་ཡིན་ཚེ་ལོངས་སྤྱོད་ཆེན་པོ་སྒྲུབ་མི་རུང་བས་མ་ཟད། ལར་སུ་ཡིན་ཡང་སྒྱུ་མའི་ནོར་ལས་ནོར་གྱི་སྙིང་པོ་ལེན་པ་རུ་ནོར་གྱི་མཆོད་སྦྱིན་བྱས་ནས་བསོད་ནམས་ཀྱི་ཟོང་ཞིག་སྐྲུན་པར་བྱེད་པ་ལས་ཞེན་ཆགས་མི་བྱེད་པ་ནི་མ་ནོར་བའི་ལམ་མོ། །རྒྱུད་ལུང་མན་ངག་གི་ཐོས་བསམ་བྱས་ཚད་པོ་ཁ་ཕྱིར་སྐོར་ནས་གཞན་སྐྱོན་འཚོལ་བའི་ཐུར་མ་མི་བྱེད་པར། ནང་དུ་ཚུར་སྐོར་ནས་རང་སྐྱོན་ལྟ་བའི་མེ་ལོང་རང་རྒྱུད་འདུལ་བའི་གཉེན་པོ་རུ་བཟུང་ནས་སེམས་ཀྱི་སྟེང་དུ་ཕབ་སྟེ་གཞུང་ལུགས་གདམས་པར་ཤར་བའི་ཉམས་ལེན་གྱིས་དང་ནོར་ཡོད་པ་མིན་ནོ་ཞེས་པ་སྟེ། ཆོས་དང་རང་རྒྱུད་བསྲེ་མ་ཐུབ་ནས་ཆོས་དང་རང་རྒྱུད་སོ་སོ་རུ་ལུས་ན། ནད་དང་སྨན་གཉིས་མ་འཕྲོད་པ་ལྟར་དུ་ཆོས་དེ་དུག་གསུམ་འདུལ་བའི་གཉེན་པོ་རུ་འགྲོ་བའི་དུས་ཤིག་ཡོད་པ་མིན་པས། བཅོམ་ལྡན་འདས་ཀྱིས་རང་གི་སེམས་འདུལ་བ་འདིའི་ནང་དུ་སངས་རྒྱས་ཀྱི་བསྟན་པ་མཐའ་དག་འདུས་ཡོད་ཅེས་ཚིག་གཅིག་ལ་བསྡུས་པ་ཡིན་ནོ། །དེ་ལྟར་མ་ནོར་བ་དྲུག་པོ་དེ་བསྒྲུབས་པར་བྱས་ན་མྱུར་དུ་སངས་རྒྱས་ཀྱི་གོ་འཕང་དཀའ་བ་མེད་པ་འགྲུབ་པར་འགྱུར་བ་དངོས་སུ་བསྟན་ནས། ཤུགས་ལ་དེ་ལྟར་མ་བྱས་ན་སངས་རྒྱས་མི་འགྲུབ་པ་ཡང་བསྟན་པའོ།།

༢༥ ཚུལ་བཞིན་ལེགས་པར་བལྟ་བའི་ཆོས་དྲུག་བསྟན་པ།

ཚུལ་བཞིན་ལེགས་པར་བལྟ་བའི་ཆོས་དྲུག་ནི།།

འཇིག་རྟེན་བྱ་བས་ཕན་པ་འདུག་གམ་ལྟོས།།

བསགས་པའི་ནོར་རྫས་བཞག་ནས་སོང་བ་ལྟོས།།

ཕན་བཏགས་ལན་དུ་གནོད་པ་སྐྱེལ་ལ་ལྟོས།།

མང་པོའི་ནང་ནས་གཅིག་པུར་སོང་བ་ལྟོས།།

སོ་ནམ་གསོག་བྲུན་རང་ཤི་རང་དབང་ལྟོས།།

ཆེ་བཙན་སྙན་གྲགས་བོར་ནས་སོང་བ་ལྟོས།།

དེ་ལྟར་བལྟས་ནས་རང་ལ་ནང་དུ་སྦྱོར།།

ཞེས་གསུངས་པ་སྟེ། བལྟས་ན་ཤེས་སུ་ཡོད་པའི་ཆོས་རྣམ་པ་དྲུག་ཏེ། སྔར་འདས་པའི་དུས་སུ་འཇིག་རྟེན་གྱི་བྱ་བ་སྒྲུབ་མཁན་ནི། ས་ཆེན་པོ་འདི་ཆགས་ནས་ད་ལྟའི་བར་དུ་མིང་དང་གྲགས་པ་མེད་པ་ཁྲི་ཁྲི་འབུམ་འབུམ་བྱེ་བ་དུང་ཕྱུར་གྲངས་མེད་དང་། མིང་དང་གྲགས་པ་ཡོད་པས་ཀྱང་འབད་འབད་ལས་ཀྱི་ཐ་མར། འདི་ཐོན་དེ་ཐོན་དང་འདི་འགྲུབ་དེ་འགྲུབ་ཅི་ཡང་མེད་པར་ཕྱི་མའི་ལམ་ཆེན་དུ་མིང་སྐམ་ཞིག་ཤུལ་དུ་བཞག་ནས་སོང་བ་ཤ་སྟག་ཡིན་པ་དང་། ད་ལྟའི་འཇིག་རྟེན་གྱི་ཁམས་ན་ཡོད་པའི་མཐོ་དམན་དྲག་ཞན་མེད་པས་ཉིན་མི་དལ་མཚན་མི་ཁོམ་ནས་བྱ་བས་བྲེལ་བཞིན་ཡོད་ཀྱང་། འཇིག་རྟེན་གྱི་བྱ་བ་འདིས་ཟིན་སོང་ཞེས་པ་ཞིག་མེད་པར་འགྲོ་དགོས་ཚེ། འཇིག་རྟེན་གྱི་བྱ་བས་ཕན་པ་འདུག་གམ་ལྟོས་ཤིག་དང་དོན་མེད་མི་ཚེ་ཟད་པའི་ངང་ཚུལ་དེ་མཐོང་བར་འགྱུར་རོ། །བསགས་པའི་ནོར་རྫས་ཚེ་གང་པོར་སྡིག་སྡུག་བསྔལ་གཉིས་དང་བརྗེས་ནས་བསྒྲུབས་པའི་ནོར་རྫས། ཕྱུག་པོ་ལ་ལས་ཟ་མ་བྲ་གོན་མ་བྲ་བར་གསོག་ཁུལ་བྱས། གསོན་ཚེ་མཆོད་སྦྱིན་གྱི་བསོད་ནམས་བྱེད་མ་ཐུབ་པས་འཆི་བ་ཐོག་ཏུ་བབས་ཚེ་གློ་བུར་དུ་བསྐྱུར་ནས་འགྲོ་དགོས་པ་ཡིན་ལ། དེ་དུས་རང་གིས་བསགས་པ་གཞན་གྱིས་སྤྱོད་པ་དེ་བར་དོའི་རྣམ་ཤེས་ཀྱིས་རིག་ནས་ཞེན་ཆགས་དང་སྡང་བ་སྐྱེ་བཞིན་ངན་སོང་གི་གནས་སུ་ལྷུང་བ་ཡིན་པའི་ཚུལ་ལ་ལྟོས་ཤིག་དང་ཁབ་དང་སྐུད་པ་ཙམ་ཡང་ཁྱེར་དབང་མེད་པའི་ཚུལ་དེ་མཐོང་བར་འགྱུར་རོ། །གྲོགས་དང་འཁོར་འབངས་ལ་བསམ་བློ་བཏང་ན་ཡིད་རྟོན་མི་ཕེར་ཞིང་ཕར་ལ་ཕན་བཏགས་ཀྱང་ཚུར་གནོད་སྐྱེལ་བ། འབྲེལ་བ་མེད་ན་འགལ་བ་ཡོང་བ་མིན་པའི་དཔེ་བཞིན་དུ། འཇིག་རྟེན་གྱི་དགྲ་བོ་མང་ཆེ་བ་དག་དང་པོ་གཉེན་ཤ་སྟག་ཡིན་པའི་ཚུལ་ལ་ལེགས་པར་ལྟོས་ཤིག་དང་གནོད་བྱེད་རང་གིས་སྒྲུབ་པའི་ངང་ཚུལ་དེ་མཐོང་བར་འགྱུར་རོ། །གཉེན་ཕྱོགས་རེ་བ་རྒྱུ་ནོར་གྱིས་བསྐྱངས་ནས་ཕན་འདོགས་ཁུལ་བྱས་པ་ལ་སྙིང་པོ་ཡོད་པ་མིན་ཏེ། མང་པོའི་ནང་ནས་གཅིག་པུ་མར་ནང་ནས་སྤུ་འཐེན་པ་བཞིན་དུ་ཕྱི་མའི་ལམ་ཆེན་དུ་འགྲོ་དགོས་པ་དང་སོང་བ་ལ་ལྟོས་ཤིག་དང་། དེ་དུས་ཕ་མ་གཉེན་འདུན་སུས་ཀྱང་སྐྱོབ་པ་མིན་པའི་ཚུལ་མཐོང་བར་འགྱུར་རོ། །གསོན་ཚེ་རྒྱུ་ནོར་གསོག་འཇོག་བྱེད་ཁུལ་གྱིས་གཅིག་གཉིས་ལ་ཨེ་འགྱུར་དང་བརྒྱ་ཁ་སྟོང་ཁ་ལ་ཨེ་འབུད་ལྟ་བར་བྱེད་པ་ཡིན་ཡང་། རང་ཉིད་ཤི་དུས་ལོངས་སྤྱོད་རྗེས་སུ་འབྲང་བ་དང་། དེ་དུས་རང་དབང་ཇི་ཙམ་ཡོད་ལྟོས་དང་ཤེས་པ་ཡིན་ནོ། །ཚེ་འདིའི་ཆེ་བཙན་སྙན་གྲགས་ཅི་འདྲ་ཆེ་ཡང་མཐའ་ཨེ་རྟག་མཐོན་པོ་ཐོབ་ལས་ལྷུང་བ་དང་། དཔའ་བོ་དགྲ་ལག་ནས་ཤི་བ་དང་། ཚེ་སྟོད་དུ་སྙན་གྲགས་དང་ལོངས་སྤྱོད་མངའ་ཐང་རྒྱས་པའི་དུས་སུ། ཐང་དཀར་རྒོད་ཀྱི་བུ་རེད་འདུག་ནམ་འཕང་ཆོད་འདུག་གཤོག་རྩ་དཀར་འདུག་ཅེས་བསྔགས་པ་རྗོད་པར་བྱེད་ཀྱང་། ཚེ་སྨད་དབང་པོ་ཐུར་དུ་རྒུད་དུས་ངང་པ་སེར་པོའི་བུ་ཡིན་འདུག་འདམ་རྩྭ་ཟ་འདུག་འདམ་དྲི་བྲོ་འདུག་ཅེས་སྨོད་པ་བྱེད་པའང་ཅི་འདྲ་མི་མང་ལ། གཞན་ཡང་རྒྱལ་ཁབ་ཀྱི་དཔོན་པོ་འཛམ་གླིང་དུ་མིང་གྲགས་ཡོད་པ་དག་ཀྱང་། ཤི་བའི་ཉིན་མོ་གྲོགས་མེད་ཁེར་རྐྱང་དུ་སོང་བས། དེའི་དུས་སུ་མཚན་གྱིས་མི་ཕན་གྲགས་པས་མི་སྐྱོབ་པ་དེ་ལ་ལྟོས་ཤིག་དང་ཅིས་ཀྱང་དགོས་པ་མེད་པའི་དོན་རྟོགས་པར་འགྱུར་རོ། །དེ་ལྟར་ཕྱིའི་འཇིག་རྟེན་དངོས་ཡོད་ཀྱི་སྣང་ཚུལ་དངོས་ལ་བལྟས་ནས་ནང་རང་གི་རྒྱུད་ལ་ཚུར་སྦྱོར་དང་། ཕྱིའི་དཔེ་དང་ནང་གི་དོན་གཉིས་སྦྱར་ན་དཔེ་དོན་འཕྲོད་ནས་ཉམས་ལེན་གནད་དུ་འགྲོ་བ་ཡིན་ནོ། །དེ་ལྟ་བུའི་ཐབས་བསྟན་པ་དེ་ལ་མན་ངག་ཅེས་བྱའོ། །ལྟ་ཤེས་ན་གང་སྣང་ཐམས་ཅད་བརྡ་ཆོས་སུ་འཆར་བ་ཡིན་པས་ཡི་གེ་ལ་བརྟེན་པའི་གནའ་བོའི་གཏམ་རྒྱུད་དཔེ་ཆོས་རྙིང་པ་ཁོ་ན་ལ་ལྟོས་དགོས་པ་མིན་ནོ།།

༢༦ ཡང་དག་དོན་ཆེན་འགྱོད་མེད་རྣམ་དྲུག་བསྟན་པ།

ཡང་དག་དོན་ཆེན་འགྱོད་མེད་རྣམ་དྲུག་ནི།།

ཆོས་ཕྱིར་དཀའ་སྤྱད་ཤི་ཡང་འགྱོད་པ་མེད།།

དམན་པའི་ས་བཟུང་ཁ་ཉེན་འགྱོད་པ་མེད།།

ཕ་ཡུལ་རྒྱབ་སྐྱུར་མདོ་ཆུང་འགྱོད་པ་མེད།།

ཆོས་ཕྱིར་ནོར་བཏང་ལྟོགས་ཀྱང་འགྱོད་པ་མེད།།

སྡིག་སྤངས་ངན་སོང་སོང་ཡང་འགྱོད་པ་མེད།།

ཅེས་གསུངས་པ་སྟེ། ཡང་དག་པའི་དོན་ཆེན་པོ་དེ་དག་བསྒྲུབས་ནས་ཕྱིན་ཆད་འགྱོད་པ་མེད་པར་སེམས་བདེ་བར་གནས་ཆོག་པ་དྲུག་ནི། རང་གཞན་ཕན་བདེ་ལ་སྦྱོར་བའི་ཆེད་དུ་དམ་པའི་ཆོས་སྒྲུབ་པར་བྱེད་དགོས་ཤིང་། དེ་ལྟར་ཆོས་བསྒྲུབས་པའི་བརྒྱུད་རིམ་གྱི་ཁྲོད་ནས་དཀའ་བ་སྤྱད་དེ་ཤི་ཡང་འགྱོད་དགོས་པ་མིན་ཏེ། ཐོག་མེད་ནས་ད་ལྟའི་བར་དུ་ཅི་འདྲའི་མ་སྐྱེས་ཅི་འདྲའི་མ་ཤི་ཡང་དོན་ཡོད་པ་རང་གཞན་གཉིས་དོན་སྒྲུབ་པའི་ཆེད་དུ་ཤི་མཁན་ཉུང་བ་དང་། བླུན་པོས་བལྟས་ནས་ན་ཤི་ཚུལ་ངན་སྙམ་ཡང་དོན་གྱི་སྟེང་ནས་ཤི་བ་དོན་ཡོད་ཡིན་པའི་ཕྱིར་རོ། །འོན་ཀྱང་དེའི་དོན་དུ་ཤི་དགོས་པའི་ངེས་པ་ཡང་མེད་དོ། །དམན་པའི་ས་བཟུང་ནས་དམ་པའི་རྒྱལ་ས་བཟུང་ན་ལ་ལས་ཐབས་མེད་འཁོས་རྡུགས་ཤེས་བརྗོད་ཀྱང་རང་ལ་འགྱོད་པ་ཡོད་པ་མིན། ཕ་ཡུལ་རྒྱབ་ཏུ་བསྐྱུར་མི་ཡུལ་དང་དུ་བླངས་ཚེ། ཕ་གཞིས་མ་མཁར་མ་ཟིན་པའི་མདོ་མེད་རྐང་འདྲེན་ཡིན་ཞེས་སྨྲས་ཀྱང་འགྱོད་པ་མེད་པ་དང་། སྤྱིར་དམ་པའི་ཆོས་ཀྱི་ཕྱིར་དང་ཁྱད་པར་དུ་བསྟན་པ་ཉམས་དམའ་ཞིང་ཉག་ཕྲ་བའི་གནས་སྐབས་སུ་བསྟན་སྲོག་གི་ཟུངས་སུ་རང་ཉིད་ཀྱི་ཡོད་དགུའི་ནོར་རྫས་དག་བཏང་ན་ནོར་མེད་སྤྲང་པོར་སོང་ནས་ལྟོགས་ཀྱང་འགྱོད་པ་ཡོད་པ་མིན་ལ། དེ་ཡང་ནོར་གྱིས་ཆོས་བསྒྲུབས་ནས་སྤྲང་པོར་གྱུར་པ་ཞིག་སྲིད་པ་མིན་ཡང་གལ་སྲིད་སྲིད་ཀྱང་འགྱོད་མེད་བློ་བདེ་ཡིན་པ་དང་། སྡིག་པ་སྤངས་ནས་དགེ་བ་བསྒྲུབས་ན་ངན་སོང་དུ་སོང་ཡང་འགྱོད་པ་མེད་པ་སྟེ། ཆོས་བསྒྲུབས་ནས་རྒྱུ་མེད་དུ་གྱུར་ནས་ལྟོགས་བཞིན་ཡོད་པ་ཞིག་དང་། སྡིག་པ་སྤངས་ནས་ངན་སོང་དུ་ལྷུང་བ་ཞིག་མི་སྲིད་པས་འགྱོད་པ་མེད་དོ་ཞེས་པའི་དོན་ཏོ། །མདོར་ན་དེ་ལྟ་བུའི་འགྱོད་མེད་ཀྱི་བྱ་བ་རྣམ་དྲུག་ལ་བློ་ཐག་བཅད་ནས་འབད་དགོས་སོ་ཞེས་པའོ།།

༢༧ སྣོད་ངན་ཆོས་དང་རིང་བ་རྣམ་དྲུག་བསྟན་པ།

སྣོད་ངན་ཆོས་དང་རིང་བ་རྣམ་དྲུག་ནི།།

ཕག་བཞིན་ཅི་རྙེད་ཟ་བས་བསྒྲུབ་མི་ནུས།།

རང་མཐོང་རྨ་བྱ་འདྲ་བས་འགྲོགས་མི་ཤེས།།

ཆིག་ཚུགས་ཕ་བོང་འདྲ་བས་སྐབས་མི་ཕྱེད།།

ཀུན་འཛུགས་བཟེ་མ་འདྲ་བས་དམ་མི་ཐུབ།།

སྦྲུལ་བཞིན་གདུག་རྩུབ་ཆེ་བས་རྒྱུད་མི་ཐུལ།།

སྤྲེལ་བཞིན་སྤྱམ་ལ་འབྱོར་བས་བསྒྲུབ་མི་ཚུགས།།

གླང་བཞིན་ཤེས་རབ་བླུན་པས་ཆོས་མི་གོ།

དེ་ཕྱིར་འདི་དག་སྤངས་ནས་བསྒྲུབ་པ་གཅེས།།

ཞེས་གསུངས་པ་སྟེ། སྣོད་ངན་པ་རང་རྒྱུད་ཆོས་དང་ཐག་རིང་བ་རྣམ་དྲུག་ནི། ཕག་ལྟ་བུ་ཟ་རྒྱུ་ཁོ་ན་མ་གཏོགས་བསམ་རྒྱུ་མེད་པའི་ཟས་སྲེད་ཅན་དེས་ཟས་འཚོལ་དང་། ཟ་དགའ་འཐུང་སྐྱིད་འབའ་ཞིག་གིས་མི་ཚེ་ཟད་ནས་དམ་ཆོས་བསྒྲུབ་མི་ནུས་པ་དང་། ལ་ལ་རང་མཐོང་ཆེན་པོ་ཅན་ངའི་ཡན་ན་སུ་གཅིག་མེད་སྙམ་མཁན་དེའི་རྒྱུད་དེ་ང་རྒྱལ་གྱིས་སྦོས་ནས་ཡོད་པས་དེ་འདྲ་དེས་མཐོན་པོ་ལ་སྐུར་འདེབས། མཉམ་པ་ལ་འགྲན་སེམས། དམན་པ་ལ་བརྙས་བཅོས་བྱེད་ཅིང་། སུ་གཅིག་དང་འགྲིག་པ་མིན་པས་འགྲོགས་མི་ཤེས་པ་དང་། ཆིག་ཚུགས་ཏེ་ཆིག་ནི་གཅིག་གི་དོན་ཡིན་ཏེ་ཆིག་ཁྲི་ཆིག་སྟོང་ཞེས་པ་ལྟ་བུ་ཡིན། ཆིག་ཚུགས་ཕ་བོང་དང་འདྲ་བ་རང་གི་ཚུགས་འཛིན་ཅིང་བསླབ་བྱ་སློབ་གསོ་སོགས་ཇི་ལྟར་བཤད་ཀྱང་ཁོ་རང་ལས་ཁས་མི་ལེན་ཅིང་། བྱེད་སྟངས་ཀྱི་ཕྱོགས་ནས་རང་གིིས་བྱས་པ་དེ་ཡང་དག་པ་ཡིན་སྣང་ཤར་མཁན་གྱི་དཀྱུ་རུ་མ་དཀྱུ་བོ་དཀྱུ་ལུགས་ངན་པ་ཅན་ལས། བརྟན་པོ་ཚུགས་ཐུབ་མིན་པའི་འཆུས་པོ་གཡག་རྭ་འདྲ་བའི་མི། དགེ་བའི་བཤེས་གཉེན་གྲོགས་ཚངས་སྤྱོད་སུ་ཡི་ཁ་ལ་ཡང་མི་ཉན་པས། གདམས་པ་དང་མན་ངག་བསྟན་བསམས་ཀྱང་བསྟན་པའི་གོ་སྐབས་མི་འབྱེད་པ་དང་། གཟེ་མ་ར་མགོ་ཞེས་པ་ལྡུམ་བུ་ཕྱོགས་ཐམས་ཅད་ལ་ཚེར་མ་རྣོན་པོའི་སོ་ཡོད་པས། གང་དུ་ཐུག་ཀྱང་ཚེར་མས་ཕུག་ཡོང་ནས་མི་ལ་ན་ཟུག་སྟེར་བ་བྱེད་པ་བཞིན་དུ་རྒྱུད་བཟེ་རེ་ཆེ་བའི་དབང་གིས་བླ་མ་མཆེད་གྲོགས་ཀྱི་དམ་ཚིག་སྲུང་ཐུབ་པ་མིན་པ་དང་། སྦྲུལ་ལྟར་དུ་ཐུག་ས་རེག་ས་མེད་པའི་རྒྱུད་མི་མ་ཐུལ་པ་དང་། སྤྲེའུ་ལྟ་བུ་སྤྱམ་ལ་འབྱོར་བ་ནི་འདུག་མི་ཚུགས་པ་སྤྲ་ལག་ཚ་བ་ལ་ཟེར་ཞིང་དེ་འདྲ་བས་སྒྲུབ་ཚུགས་མི་ཟིན་པ་ཡིན་པ་དང་། བ་གླང་འདྲ་བའི་ཤེས་རབ་མེད་པའི་བླུན་པོ་དག་གིས་ནི་ཆོས་ཉན་ན་མི་གོ་ཞིང་། བསམས་ན་མི་ཤེས་པས་དེ་ལ་ཨུ་ཚུགས་ཀྱིས་བསླབས་ཀྱང་ཕན་ཆེར་ཐོགས་པ་མིན་པས། འདི་འདྲ་བ་འདུལ་ཐབས་དེ་རྗེ་རིན་པོ་ཆེས་ཞིང་ས་ཁྱད་པར་ཅན་ལ་ཚོགས་གསོག་ཏུ་འཇུག་དགོས་གསུངས་པ་དང་། བཅོམ་ལྡན་འདས་ཀྱིས་ཀྱང་ལམ་ཆུང་བ་ལ་དགེ་འདུན་པའི་མཆིལ་ལྷམ་བྱི་དོར་དང་། གཙུག་ལག་ཁང་ཕྱགས་དར་བྱེད་བཅུག་པ་ལྟ་བུ་ཡིན། དེ་འདྲའི་རིགས་ཅན་འདི་དང་པོར་སྒྲིབ་པ་དག་ནས་ཆོས་ཀྱི་སྣོད་དུ་འགྱུར་དགོས་པ་ཡིན། དེ་ལྟ་བུའི་སྣོད་མིན་ཆོས་དང་རིང་བ་དྲུག་སྤངས་ནས་སྒྲུབ་པ་བྱེད་པ་གཅེས་པ་སྟེ། མདོར་ན། གྲོགས་ངན་སྤངས་བ་རྒྱལ་སྲས་ལག་ལེན་ཡིན། །ཞེས་པ་ལྟ་བུའོ།།

༢༨ སྣོད་ངན་དབང་དུ་མི་གཏོང་ཆོས་དྲུག་བསྟན་པ།

སྣོད་ངན་དབང་དུ་མི་གཏོང་ཆོས་དྲུག་ནི།།

ཚེ་འདིར་བློ་འཇུག་བྱུར་ངན་སྒོར་དབྱུང་ཞིང༌།།

དགེ་ལ་སྤྲོ་བ་དཔལ་ཡིན་ཕུགས་སུ་ཆུག།

ང་རྒྱལ་རང་མཐོང་འདྲེ་ངན་བསྐྲད་བྱ་ཞིང༌།།

དམན་པའི་ས་འཛིན་དངོས་གྲུབ་སྔ་ལྟས་བསྟེན།།

གཉེན་པོ་མཆོག་འཛིན་བདུད་དཔུང་བོར་བྱ་ཞིང༌།།

རྣམ་རྟོག་གྲོགས་འཆར་ལྟས་ངན་གཡང་དུ་ཁུག།

དེ་རྣམས་ལྡན་ན་ཆོས་རབ་བཟང་པོའི་སྣོད།།

ཅེས་གསུངས་པ་སྟེ། ཚེ་འདིའི་དོན་ཁོ་ནར་བསམ་ནས་དམིགས་ཡུལ་འདུན་པ་དེ་ལ་གཏད་པ་ནི་བྱུར་ངན་པ་ཆག་སྒོའི་སྣ་འདྲེན་ཆོས་མི་འགྲུབ་པའི་སྔོན་རྟགས་ཡིན་པས། བློ་དེ་སྒོར་དབྱུང་ཞིང་། དགེ་བ་རྣམ་དག་ལ་བརྩོན་གང་དགེ་ལ་སྤྲོ་བའི་མཚན་ཉིད་ཅན་གྱི་བརྩོན་འགྲུས་བྱེད་པ་ནི། ལེགས་པའི་ཆོས་ཐམས་ཅད་འབྱུང་བའི་དཔལ་ཡིན་པས་གཡང་རྟེན་མཛོད་ཀྱི་དཀྱིལ་དུ་བཞག་པ་བཞིན་དུ་ཡར་ཕུགས་སུ་ཉར་ཚགས་དགོས་པ་དང་། ཡོན་ཏན་མེད་ཀྱང་ཡོད་པར་རློམ་པའི་ང་རྒྱལ། གང་མེད་ཀྱང་དོ་ཡོད་པའི་ཉམས་སྟོན་པར་བྱེད་པའི་རང་མཐོང་དེ་གནོད་པ་སྐྱེལ་བའི་འདྲེ་ངན་ཞིག་འཁྲི་ནས་ཡོད་པ་དང་འདྲ་བ་ཡིན་པས། བགེགས་སྐྲད་པ་བཞིན་དུ་རྒྱ་མཚོ་ཆེན་པོའི་ཕ་རོལ་དུ་བསྐྲད་ནས་དམན་ས་འཛིན་པ་ནི་དངོས་གྲུབ་ཐོབ་པའི་སྔ་ལྟས་སུ་དམན་ས་བསྟེན་དགོས་པ་ཡིན། དམན་ས་ཞེས་པ་འདི་འདུག་ས་མཐོ་དམན་དང་གོས་བཟང་ངན་གྱི་ཕྱི་ཚུལ་ཙམ་མིན་པར་སེམས་ཀྱི་ཐོག་ནས་ང་རྒྱལ་དང་རང་མཐོང་མེད་པར་བྱེད་པ་ལ་གོ་བས་ཕྱིའི་ཚུལ་འཆོས་ནས་དམན་ས་བཟུང་མདོག་ཏུ་ཡོད་ཀྱང་། དོན་དུ་ཆེ་འདོད་སེམས་ཀྱི་གཅོང་ནད་ནང་དུ་ཡོད་ཚེ། དེ་ཡང་དམན་སའི་གྲལ་དུ་མི་འགྲོ་བ་ཡིན། གཉེན་པོ་མཆོག་འཛིན་སྤང་གཉེན་གཡུལ་སྤྲད་པ་ལྟ་བུ་སྟེ། མཚམས་རེ་སྨན་མ་ཞུ་བ་དུག་ལ་ལོག་པ་ལྟ་བུ་ཡོང་བ་ཡིན་པས་གཉེན་པོ་མཆོག་འཛིན་གྱི་བདུད་དཔུང་དེ་བོར་བར་བྱ་ཞིང་། རྣམ་རྟོག་གྲོགས་སུ་ཤར་ཏེ་གནས་ལུགས་ཀྱི་ལྟ་བའི་གདེང་རྙེད་ནས། གང་ཤར་རང་གྲོལ་དུ་གཏོང་བ་དང་། རྣམ་རྟོག་བཟང་ངན་གང་ཤར་ཡང་ཐམས་ཅད་ཉམས་ལེན་བོགས་འདོན་གྱི་རྩལ་སྦྱོང་། མདོར་ན་རིག་ཚད་གོ་ཚད་དྲན་ཚད་ཐམས་ཅད་སྤྱོད་ཡུལ་ལམ་ཁྱེར་བཞིན་དུ་བྱེད་པའམ་ལས་དང་པོ་པ་ཡིན་ན། གོང་དུ་བཤད་པ་བཞིན་དུ་མི་དགེའི་རྣམ་རྟོག་ཇེ་ཉུང་དུ་བཏང་བ་དང་། དགེ་བའི་རྣམ་རྟོག་ཇེ་མང་དུ་བཏང་ན་རིམ་གྱིས་ཚུལ་མིན་ཡིད་བྱེད་ཀྱི་རྣམ་རྟོག་ཇེ་ཉུང་དུ་སོང་ནས་གང་ཤར་དགེ་བར་འགྱུར་བའི་ལྟས་ངན་གཡང་དུ་ཁུག་པ་ཡིན་ནོ། །དེ་ལྟར་སྣོད་ངན་གྱི་དབང་དུ་མི་གཏོང་བའི་ཆོས་དྲུག་དང་ལྡན་པ་ནི་ཆོས་རབ་བཟང་པོའི་སྣོད་ཅེས་བྱའོ།།

༢༩ མཐར་ཕྱིན་ཆོས་ཀྱི་བློ་སྣ་རྣམ་དྲུག་བསྟན་པ།

མཐར་ཕྱིན་ཆོས་ཀྱི་བློ་སྣ་རྣམ་དྲུག་ནི།།

འཆི་བདག་འཇིགས་བསྐྱེད་གཤེད་མས་བདས་འདྲ་དང༌།།

འཁོར་བར་སྐྱོ་བསྐྱེད་ཁྱོ་ངན་ཆུང་མ་འདྲ།།

འཁྲུལ་སྣང་ཞེན་ལོག་སྐྱུགས་ནད་ཟས་མཐོང་འདྲ།།

མི་ཆོས་ཡིད་བྱུང་མཛའ་བོས་བསླུས་པ་འདྲ།།

སོ་ནམ་སྒྱིད་ལུག་སད་ཁུངས་ཞིང་ངན་འདྲ།།

ཉེ་འབྲེལ་གདུང་ཆད་དགྲར་ལངས་བུ་ཚ་འདྲ།།

དེ་དང་ལྡན་པས་དམ་ཆོས་ཚད་དུ་ཕྱིན།།

ཅེས་གསུངས་པ་སྟེ། རྗེ་མི་ལ་རས་པས། ང་འཆི་བས་འཇིགས་ནས་རི་ལ་ཕྱིན། །ནམ་འཆི་ཆ་མེད་བསྒོམས་བསྒོམས་པས། །འཆི་མེད་གཉུག་མའི་བཙན་ས་ཟིན། །ད་འཆི་བའི་འཇིགས་པ་བོར་ཏེ་ཐལ། །ཞེས་པ་ལྟར་དུ་འཆི་བདག་གི་བསུ་མ་ལ་འཇིགས་སྐྲག་ཡོད་པ་ནི་གསོད་མཁན་གྱི་གཤེད་མས་རྗེས་ནས་བདས་པ་དང་འདྲ་བར་ཚེ་ལ་ལོང་མེད་ཀྱི་བསམ་པ་རྒྱུད་ལ་ཡོད་དགོས་པ་དང་། འཁོར་བ་ལ་སྐྱོ་བ་བསྐྱེད་པ་ནི་ཁྱོ་བོ་ངན་པ། ཐབས་མེད་འཁོས་ཞན་སྡུག་ངན་གྱོང་གི་བཟེ་རེ་ཆེན་པོ་ཅན། བྱ་ངན་སྤྱོད་ངན་ངན་པ་སྣ་དགུ་མི་ཤེས་པ་མེད་པའི་བཟའ་བ་ངན་པའི་ཆུང་མ་སུ་ཡིན་ཡང་སེམས་སུན་ཡི་ཆད་ཀྱིས་སྐྱོ་བ་སྐྱེ་བ་ལྟར་དུ། འཁོར་བའི་གནས་ལ་སྐྱོ་བ་སྐྱེད་པར་བྱེད་པ་དང་། འཁྲུལ་སྣང་ལ་ཞེན་ཁ་ལོག་པ་ནི་སྐྱུགས་ནད་ཅན་གྱི་སྔུན་དུ་སྣུམ་ཟས་བཞག་པ་ལྟར་དུ་འཁོར་བའི་འཁྲུལ་སྣང་ལ་ཞེན་ལོག་བསྐྱེད་པ་དང་། འཇིག་རྟེན་མཐུན་འཇུག་གི་བྱ་བ་ལ་བློ་གཏད་ས་དང་སྙིང་པོ་མེད་པ་ཤེས་ནས་ཡིད་བྱུང་བ་ནི་མཛའ་བོ་བཟང་པོས་བསླུས་པ་དང་འདྲ་བར་ལྟ་བ་དང་། སོ་ནམ་ཚོང་ཁེ་ལ་སོགས་པའི་རྒྱུ་ནོར་གསོག་བྲུན་འདི། ལོ་ཏོག་འདེབས་པའི་ས་ཞིང་ཞིག་ལ་དཔེར་བྱས་ན། ཚེ་གཅིག་ལ་སད་ཁོ་ནས་ཁྱེར་ཞིང་ལོ་ལེགས་ཐེངས་གཅིག་ཀྱང་མི་རག་པའི་ཞིང་ངན་ཞིག་ལ་ལོ་ཏོག་བཏབ་པ་བཞིན་དུ། སྙིང་པོ་མེད་པར་སྒྱིད་ལུགས་ནས་རྨུས་པ་ལྟ་བུར་གོ་བར་བྱེད་པ་དང་། ཉེ་འབྲེལ་བར་གྱི་བརྩེ་གདུང་ཆད་པ་ནི། བུ་ཚ་དགྲ་རུ་ལངས་ཚེ་སུ་ཞིག་ལ་བློ་གཏད་བྱ་ཡུལ་མེད་པར་རིག་པ་བཞིན་དུ། ཉེ་འབྲེལ་གྱི་གདུང་སེམས་ཆད་པར་བྱེད་པ་སྟེ་དྲུག་པོ་དང་ལྡན་ན་ཆོས་མཐར་ཕྱིན་པར་བྱེད་པས། ངེས་པར་འབྱུང་བའི་བློ་སྣ་རྣམ་དྲུག་དཔེ་དྲུག་གིས་བསྟན་པ་དེ་ཉིད་དོན་དུ་བཟུང་ནས་རྒྱུད་ལ་སྦྱར་བར་བྱའོ།།

༣༠ དེ་དང་མི་ལྡན་འགྲོ་བ་རྣམ་དྲུག་བསྟནཔ།

དེ་དང་མི་ལྡན་འགྲོ་བ་རྣམ་དྲུག་ནི།།

ཐོས་པ་བྱས་ཀྱང་ཚིག་གི་རྩོད་པ་མཁན།།

བཤད་པ་བྱས་ཀྱང་ཕྲག་དོག་ཁ་སྦྱང་མཁན།།

སྒོམ་པ་བྱས་ཀྱང་རྣམ་རྟོག་ཡིད་སྨོན་མཁན།།

བསམ་པ་བྱས་ཀྱང་ཟས་ནོར་ཁེ་སྤོགས་མཁན།།

གཅིག་པུར་བསྡད་ཀྱང་ཉོན་མོངས་རྣམ་རྟོག་མཁན།།

སྲུང་སྡོམ་བྱས་ཀྱང་ཉོན་མོངས་ཁ་གསག་མཁན།།

འགྲོ་བ་དྲུག་ལྡན་བརྟགས་ཏེ་རིང་དུ་སྤང༌།།

ཞེས་གསུངས་པ་སྟེ། དེ་དག་དང་མི་ལྡན་པའི་དབང་གིས་འགྲོ་བ་རྣམ་པ་དྲུག་ནི། མཁས་པའི་བགྱི་བ་རྣམ་གསུམ་གྱི་འཆད་རྩོད་རྩོམ་གསུམ་ནི། བསྟན་པ་འཛིན་སྲུང་སྤེལ་གསུམ་ལ་མེད་པའི་ཐབས་མེད་ཀྱང་། བཀའ་མདོ་རྒྱུད་དང་ལུང་མན་ངག་གི་གནས་ལ་ཐོས་པ་སློབ་གཉེར་ཇི་ལྟར་བྱས་ཀྱང་། སློབ་དཔོན་ཆེན་པོས། ཐ་སྙད་ཚིག་ལ་མཁས་ན་མཁས་པ་མིན། །ཅེས་པ་ལྟར་དུ། ཐོས་དོན་རྒྱུད་ལ་མ་འབྱོར་བའི་མི་མཁས་ཚིག་གི་རྩོད་པ་མཁན་དུ་གྱུར་པའི་ང་རྒྱལ་གྱིས་འགྲོ་བ་དང་། བཀའ་མདོ་རྒྱུད་ཀྱི་དོན་ལ་བཤད་ཁྲིད་བྱས་ཀྱང་གཞན་ལ་ཕྲག་དོག་གི་དབང་གིས་སྐྱོན་འཚོལ་བྱེད་པའི་ཁ་སྦྱང་མཁན་ལས་རང་རྒྱུད་ཉོན་མོངས་འདུལ་བྱེད་དུ་བཀོལ་མི་ཤེས་པའི་ཕྲག་དོག་གིས་འགྲོ་བ་དང་། སྒོམ་པ་བྱས་ཀྱང་རྣམ་རྟོག་གི་འཕྲོ་འདུ་ཞིག་ལས་མི་འཕར་བའི་ཡིད་སྨོན་ལ་རག་ལས་པའི་གཏི་མུག་གིས་འགྲོ་བ་དང་། ཐོས་པའི་དོན་ལ་བསམས་པ་བྱས་ཀྱང་རྙེད་བདེ་གྲགས་བསྟོད་དང་ཟས་ནོར་ཁེ་སྤོགས་ཁོ་ན་བརྩོན་མཁན་གྱི་འདོད་ཆགས་ཀྱིས་འགྲོ་བ་དང་། གཅིག་པུ་རི་ཁྲོད་ལྟ་བུར་འདུག་ཁུལ་བྱས་ཀྱང་། གདམས་ངག་གི་བློ་ཆོད་མེད་པས་ཉོན་མོངས་རྣམ་རྟོག་གི་དབང་དུ་སོང་ནས། ལུས་དབེན་པའི་གནས་སུ་བསྡད་ནས་ཕྱིའི་དབེན་པ་ན་ཡོད་ཀྱང་ནང་དང་གསང་བའི་དབེན་པ་མ་ཚང་བས། དབེན་གསུམ་དམ་པའི་རྒྱལ་ས་མ་ཟིན་པར་ཉོན་མོངས་རྣམ་རྟོག་མཁན་དུ་གྱུར་པའི་ཐེ་ཚོམ་གྱིས་འགྲོ་བ་དང་། ཕྱི་ཚུལ་ནས་སྲུང་སྡོམ་རེ་སྲུང་ཁུལ་བྱས་ཀྱང་ངེས་འབྱུང་དང་བྱང་སེམས་ཀྱིས་མ་ཟིན་པས་ཉོན་མོངས་ཁོང་ཁྲོ་ཞེ་སྡང་གི་ཁ་སོར་གང་དམའ་མེད་ཀྱང་ཁ་གསག་ཚིག་འཇམ་སྨྲ་བའི་ཞེ་སྡང་གིས་འགྲོ་བ་སྟེ། དེ་ལྟ་བུའི་འགྲོ་བ་དྲུག་དང་ལྡན་པའི་ཆོས་མིན་ཆོས་སུ་བཅོས་པ་དེ་དག་ལ་ལེགས་པར་བརྟགས་ཏེ་རིང་དུ་སྤང་བར་བྱའོ།།

༣༡ ནང་དུ་རང་ལ་བལྟ་བའི་ཆོས་དྲུག་བསྟན་པ།

ནང་དུ་རང་ལ་བལྟ་བའི་ཆོས་དྲུག་ནི།།

འཁོར་བའི་གནས་དང་འབྲེལ་བ་ཆོད་དམ་བལྟ།།

དགྲ་གཉེན་གཉིས་ལ་ཆགས་སྡང་འདུག་གམ་བལྟ།།

འགྲོ་དུས་བཟང་པོའི་ནོམ་པ་འདུག་གམ་བལྟ།།

སྒོམ་དུས་གྲུབ་རྟགས་ཚད་དུ་སྐྱོལ་ལམ་བལྟ།།

གཞན་དོན་ཤུལ་དུ་དད་པ་ལོག་གམ་བལྟ།།

འཆི་དུས་དག་པའི་སྣང་བ་འཆར་རམ་བལྟ།།

དེ་ལྟར་བལྟས་ན་འདུན་མ་ལེགས་པའི་རྩེ།།

ཞེས་གསུངས་པ་སྟེ། རང་གིས་རང་ཉིད་ལ་ཇི་ལྟར་ཡིན་པ་ལྟ་བྱེད་ཀྱི་ཆོས་དྲུག་ནི། འཁོར་བ་ནི་འཁྲུལ་བ་ཡིན་ལ་འཁྲུལ་བ་འཁྲུལ་བ་ཡིན་པར་ཤེས་ན་དེ་ལ་ཞེན་ཆགས་ཆོད་པ་ཡིན། ཞེན་པ་ཆོད་པ་ནི་ངེས་འབྱུང་ཡིན་པ་དང་། འཁོར་བར་འཁོར་བྱེད་ནི་ང་མེད་ལ་ང་བདག་མེད་ལ་བདག་ཏུ་བཟུང་བ་ཡིན་ཏེ། དང་པོར་ང་ཞེས་བདག་ལ་ཞེན་གྱུར་ཅིང་། །བདག་གི་འདི་ཞེས་དངོས་ལ་ཆགས་བསྐྱེད་པ། །ཟོ་ཆུན་འཕྱན་ལྟར་རང་དབང་མེད་པ་ཡི། །འགྲོ་ལ་སྙིང་རྗེར་གྱུར་གང་དེ་ལ་འདུད། །ཅེས་གསུངས་པའི་ཕྱིར། དེས་ན་རྩ་བ་བདག་འཛིན་ལ་ཐུག་ཡོད་པས་བདག་འཛིན་གྱི་རྩ་བ་ཆོད་དུས་འཁོར་བ་དང་འབྲེལ་བ་ཆོད་སོང་བ་ཡིན། བདག་འཛིན་གྱི་རྩ་བ་གཅོད་བྱེད་བདག་མེད་རྟོགས་པའི་ཤེས་རབ་སྟེ། མདོར་ན་ངེས་འབྱུང་དང་སྟོང་ཉིད་རྟོགས་པའི་ལྟ་བས་འཁོར་བའི་གནས་དང་འབྲེལ་བ་ཆོད་ཡོད་མེད་བལྟ་བར་བྱ་བ་དང་། དགྲ་དང་གཉེན་གཉིས་ཀ་ལ་ཆགས་སྡང་ཡོད་མེད་སྔར་ཆོས་མ་ཞུས་གོང་དང་ད་ཆོས་ཞུས་རྗེས་གཉིས་ཀ་ལ་ཁྱད་ཡོད་མེད་བལྟ་བར་བྱ་ལ། གལ་ཏེ་འདྲ་འདྲ་ཡིན་ཚེ་ཆོས་བསྒྲུབས་ནས་རང་རྒྱུད་སོར་གང་གིས་འཕགས་མེད་པའི་རྟགས་ཡིན། གལ་ཏེ་དགྲ་གཉེན་གཉིས་ཀ་འདྲ་མཉམ་ཙམ་བྱུང་ནས་སྔར་འདྲའི་ཆགས་སྡང་མེད་ན་ཐར་བ་བྱང་ཆུབ་ལ་རེ་བ་ཅུང་ཟད་ཡོད་པའི་རྟགས་སོ། །འཇིག་རྟེན་ཕྱི་མའི་ཡུལ་དུ་འགྲོ་དུས་བཟང་པོའི་ནོམ་པ་སྟེ་དགེ་བའི་ལམ་རྒྱགས་འདུག་གམ་བལྟ་བ་དང་། སྒོམ་ཉམས་ལེན་བྱེད་པའི་དུས་སུ་གྲུབ་པའི་རྟགས་དངོས་ཉམས་རྨི་ལམ་ལ་རྫོགས་ཏེ་ཚད་དུ་སྐྱོལ་ལམ་བལྟ་བར་བྱ་བ་དང་། གཞན་དོན་སྒྲུབ་པར་སྒྲུབ་ཏུ་སོང་བའི་རྗེས་ཤུལ་དུ་དེ་དག་གི་དད་པ་ལོག་གམ་བལྟ་བར་བྱ་བ་དང་། འཆི་དུས་དག་པའི་སྣང་བ་འཆར་རམ་བལྟ་བར་བྱ་བ་སྟེ་དེ་ལྟར་བལྟས་ན་འདུན་མ་ལེགས་པའི་རྩེ་རུ་ཐོན་པ་ཡིན་ནོ།།

༣༢ ཆོས་དང་རིང་གྱུར་ཉེས་པ་རྣམ་དྲུག་བསྟན་པ།

ཆོས་དང་རིང་གྱུར་ཉེས་པ་རྣམ་དྲུག་ནི།།

དོན་ཆེན་མི་སྒྲུབ་འཆི་བ་མ་དྲན་ལས།།

ཆེ་བཙན་བསྒྲུབ་པ་བསླུ་བར་མ་ཤེས་ལས།།

གཉེན་བཤེས་བརྩེ་གདུང་འབྲལ་བར་མ་ཤེས་ལས།།

འདོད་ཡོན་སྲེད་པ་ཉེས་མང་མ་ཤེས་ལས།།

ནོར་རྫས་གསོག་འཇོག་འཇོག་པར་མ་ཤེས་ལས།།

སྒོམ་སྒྲུབ་ལེ་ལོ་མི་རྟག་མ་ཤེས་ལས།།

བྱུང་བའི་ཉེས་པ་འདི་ཀུན་སྤང་བར་མཛོད།།

ཅེས་གསུངས་པ་སྟེ། དོན་ཆེན་པོ་ཕྱི་མའི་དོན་མི་སྒྲུབ་པར་དོན་མེད་རྣམ་གཡེང་གི་ངང་དུ་སྐྱེལ་བ་ནི། འཆི་བ་མ་དྲན་པ་ལས་བྱུང་བ་དང་། རང་ལ་ཡོན་ཏན་མེད་བཞིན་དུ་ཆེ་བཙན་མི་ཆེན་གྱི་ལད་མོ་བསྒྲུབས་པར་བྱས་པ་ནི། གཞན་བསླུ་བ་ལས་རང་བསླུས་པ་མ་ཤེས་པ་ལས་བྱུང་བ་དང་། གཉེན་བཤེས་རྣམས་ཆགས་ཤིང་ཞེན་པའི་བརྩེ་གདུང་ནི། འབྲལ་བར་མ་ཤེས་པ་ལས་བྱུང་བ་དང་། ཕྱི་འདོད་ཡོན་གྱི་ཡུལ་དྲུག་ལ་ནང་དབང་དྲུག་གི་ཞེན་པ་སྐྱེས་པ་ནི། དེའི་ཉེས་ཚོགས་མ་ཤེས་པ་ལས་བྱུང་བ་ཡིན་པ་དང་། ནོར་རྫས་གསོག་འཇོག་བྱེད་པ་ནི། ཤི་བའི་དུས་སུ་ཤུལ་དུ་བཞག་ནས་འགྲོ་རྒྱུ་ཡིན་པར་མ་ཤེས་པའི་ཉེས་པ་ལས་བྱུང་བ་ཡིན་པ་དང་། སྒོམ་སྒྲུབ་ལ་ལེ་ལོ་བྱེད་པ་ནི། མི་རྟག་པ་ཡིན་པར་མ་ཤེས་པའི་དབང་དུ་ཤོར་བ་སྟེ་ཉེས་པ་འདི་དག་ཡོད་ན་ཆོས་དང་རང་རྒྱུད་ཐག་ཇེ་རིང་དུ་འགྲོ་བ་ཡིན་པས་སྤང་བར་བྱ་དགོས་སོ།།

༣༣ རང་རྒྱུད་ཆོས་དང་འདྲེས་པའི་ཆོས་དྲུག་བསྟན་པ།

རང་རྒྱུད་ཆོས་དང་འདྲེས་པའི་ཆོས་དྲུག་ནི།།

ཞེན་པ་རང་ལོག་རོ་གོས་གཡང་སྐྱུར་འདྲ།།

སྙིང་རྗེས་རྒྱུད་བརླན་བུ་གཅིག་མ་དང་འདྲ།།

ཡོན་ཏན་ཤུགས་སྐྱེས་དབྱར་ཀའི་ས་གཞི་འདྲ།།

བརྩོན་པ་རྒྱུན་རིང་རལ་གྲིའི་འཁོར་ལོ་འདྲ།།

འཁྲུལ་སྣང་རང་གྲོལ་སྦྲུལ་གྱི་མདུད་པ་འདྲ།།

གནས་ལུགས་ངང་ཕྱིན་དེད་དཔོན་ཡུལ་སླེབས་འདྲ།།

དེ་འདྲའི་ཚད་ལྡན་སྐྱེས་མཆོག་གོང་མ་ལགས།།

ཞེས་གསུངས་པ་སྟེ། རང་རྒྱུད་ཆོས་དང་འདྲེས་པའི་ཆོས་དྲུག་དཔེ་དྲུག་ལ་སྦྱར་ནས་གསུངས་པ་ནི། འཁོར་བའི་ཆོས་ལ་ཞེན་པ་རང་ལོག་ཏུ་སོང་བ་དཔེར་ན་རོ་གོས་གཡང་ལ་བསྐྱུར་བ་ལ་བཙོག་བལྟས་ནས་དོར་བ་ལས་ཁྱེར་དགོས་བསམ་པ་མེད་པ་དང་འདྲ་བ་བྱུང་ན་རང་རྒྱུད་ཆོས་དང་འདྲེས་པའི་རྟགས་ཡིན་པ་དང་། ཐེག་པ་ཆེན་པོའི་ལམ་དུ་ཞུགས་ནས་སློབ་པའི་ཆོས་པ་ཞིག་ཡིན་དུས་མེད་ཐབས་མེད་པ་ནི་སྙིང་རྗེ་ཡིན་ཏེ། བཅོམ་ལྡན་འདས་ཀྱིས་ཆོས་ཡང་དག་བར་སྡུད་པའི་མདོ་ལས། སངས་རྒྱས་ཐོབ་པར་འདོད་པས་ཆོས་མང་པོ་ལ་བསླབ་པར་མི་བགྱི་ཡི། ཆོས་གཅིག་ལ་བསླབ་པར་བགྱིའོ། །དེ་གང་ཞེ་ན་སྙིང་རྗེ་ཆེན་པོའོ། །གང་ལ་སྙིང་རྗེ་ཆེན་པོ་ཡོད་པ་དེ་ལ་སངས་རྒྱས་ཀྱི་ཆོས་ཐམས་ཅད་ལག་མཐིལ་དུ་ཡོད་པ་ལྟར་འགྱུར་རོ། །ཞེས་གསུངས་པས་སྙིང་རྗེ་ནི་ཡོན་ཏན་ཐམས་ཅད་ཀྱི་གཞི་མ་ས་བོན་ལྟ་བུ་ཡིན་ལ། སྙིང་རྗེ་མེད་ན་བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་སྐྱེ་མི་བཏུབ་ཅིང་། བྱང་ཆུབ་ཀྱི་སེམས་མ་སྐྱེས་ཤིང་རྫོགས་སྨིན་སྦྱངས་པ་རྒྱ་མཚོ་ལྟ་བུ་ལ་བསླབ་པར་མ་བྱས་ན་སངས་རྒྱས་ཐོབ་པ་མིན་པ་དེས་ན། སྙིང་རྗེས་རྒྱུད་བརླན་པ་བུ་གཅིག་པུར་མ་ཡིས་ལྷག་པར་གཅེས་པ་དང་འདྲ་བར་སེམས་ཅན་ཐམས་ཅད་ལ་གཅེས་པ་ཞིག་བྱུང་ན་རང་རྒྱུད་ཆོས་དང་འདྲེས་པའི་རྟགས་ཡིན་ལ། དེ་ལ་སྙིང་རྗེ་འབྱོངས་པའི་ཚད་ནི་སེམས་ཅན་མིག་གི་མཐོང་དུས་འཆི་མ་འབྱུང་བ་ཞིག་དགོས་པར་གསུངས་སོ། །ཡོན་ཏན་ཐམས་ཅད་རང་ཤུགས་ཀྱིས་རྒྱུད་ལ་སྐྱེས་པ་དེ་ནམ་ཟླ་དབྱར་ཁའི་དུས་སུ་ས་གཞི་ལ་རྩི་ཤིང་དང་མེ་ཏོག་སྣ་ཚོགས་རང་ཤུགས་ཀྱིས་སྐྱེས་པ་དང་འདྲ་བ་དང་། བརྩོན་འགྲུས་ལ་རྒྱུན་ཆད་མེད་པ་རལ་གྲིའི་འཁོར་ལོ་བར་མེད་དུ་བསྐོར་བ་དང་འདྲ་བ་དང་། འཁྲུལ་སྣང་རང་སར་གྲོལ་བ་སྦྲུལ་གྱི་མདུད་པ་དང་འདྲ་བར་ཤར་གྲོལ་དུས་མཉམ་དུ་དགོས་པ་དང་། གནས་ལུགས་དོན་གྱི་གནད་རྟོགས་ནས་གཞི་བདེའི་ངང་དུ་བློ་བདེར་སོང་བ་ནི། དེད་དཔོན་རྒྱ་མཚོར་སོང་བ་ནོར་བུ་རྙེད་ནས་ཕྱིར་ལོག་པ་དང་འདྲ་བར་བྱ་བ་བྱས་ཟིན་ཁུར་བོར་ཚར་བ་ཞིག་དགོས་པ་སྟེ། དེ་ལྟ་བུའི་རང་རྒྱུད་ཆོས་དང་འདྲེས་པ་དེ་ཚད་ལྡན་གྱི་སྐྱེས་མཆོག་གོང་མར་གྱུར་པ་ལགས་སོ།།

༣༤ ཆོས་དང་མི་མཐུན་འཁྲུལ་བའི་ཆོས་དྲུག་བསྟན་པ།

ཆོས་དང་མི་མཐུན་འཁྲུལ་བའི་ཆོས་དྲུག་ནི།།

འཁོར་བར་ཞེན་པའི་བློ་ནི་འབྲལ་རེ་དཀའ།།

ས་ཟིན་མེད་པའི་རིག་པ་བསླུ་རེ་སླ།།

ཚོགས་དྲུག་ཡུལ་གྱི་འཁྲུལ་བ་འབྲིད་རེ་མཁས།།

དོན་མེད་འཁོར་བའི་བྱ་བ་འཕྲོ་རེ་གཤིན།།

ཉིན་མཚན་གཉིས་ཀྱིས་ཚེ་འཛད་འགྲོ་རེ་མགྱོགས།།

དོན་ཆུང་མི་ཚེ་སྐྱེལ་བ་གྲངས་རེ་མང༌།།

འདི་དག་བསམས་ནས་དམ་པའི་ཆོས་མཛོད་ཀྱེ།།

ཞེས་གསུངས་པ་སྟེ། ཆོས་དང་མི་མཐུན་པར་འཁྲུལ་བའི་ཆོས་རྣམ་པ་དྲུག་ནི། འཁོར་བའི་སྡུག་བསྔལ་མངོན་གྱུར་བས་ལྷག་པར་གཙེས་པ་མེད་པའི་དུས་སུ། འདོད་ཡོན་ལ་ཞེན་ཏེ་ལུས་ལོངས་སྤྱོད་ལ་ཆགས་ནས་འཁོར་བ་ལ་ཞེན་པ་ཆོད་དཀའ་བའི་དུས་དེ་ནི་ཆོས་དང་མི་མཐུན་པར་འཁྲུལ་བཞིན་ཡོད་པའི་རྟགས་ཡིན་པ་དང་། དེ་བཞིན་དུ་དོན་གྱི་ས་ཟིན་པའི་ཉམས་མྱོང་གི་གདེང་མ་ཁེལ་ན་རིག་པ་བསླུ་སྐྱེན་པ་དང་། ཚོགས་དྲུག་ཡུལ་གྱི་འཁྲུལ་བ། གཟུགས་མཛེས་པ། སྒྲ་སྙན་པ། རོ་ཞིམ་པ་ལ་སོགས་པ་ནི་འབྲིད་ལ་མཁས་པ་རྔོན་པའི་གླིང་བུའི་སྒྲ་སྙན་གྱིས་རི་དྭགས་བསླུས་པ་ལྟ་བུ་ཡིན་པ་དང་། དོན་མེད་འཁོར་བའི་བྱ་བཞག་གཅིག་གི་འཕྲོས་སུ་གཅིག་དང་གཅིག་གི་རྗེས་སུ་གཅིག་མི་ཆད་པ་རྒྱུན་མཐུད་པས་འཕྲོ་རེ་གཤིན་པ་དང་། མི་ཚེའི་དུས་ཚོད་དེ་རིང་པོ་ཞིག་ལ་བརྩི་ཁུལ་བྱེད་ཀྱང་། ལོ་ཟླ་བས་ཟད། ཟླ་བ་ཉིན་ཞག་གིས་ཟད་ནས་ཉིན་མཚན་སྦྲེལ་བསྣོལ་གྱི་ཐོག་ནས་མཚན་མོར་མར་ཉལ་བ་དང་ཉིན་མོར་ཡར་ལང་བ་ཁ་ཤས་བརྒྱུད་ཚེ། དུས་ཚོད་ནམ་ཟླ་འདས་ནས་ཚེའི་དུས་ཚོད་ཆུ་རྒྱུན་རྒྱུག་པ་བཞིན་དུ་འགྲོ་མགྱོགས་པ་དང་། རྗེ་མི་ལས་ཁྱི་ར་མགོན་པོ་རྡོ་རྗེ་ལ། སྤྱིར་དལ་འབྱོར་མི་ལུས་དཀོན་གསུངས་ཏེ། མི་ཁྱོད་འདྲ་མཐོང་ན་དཀོན་རྒྱུ་མེད། །ཅེས་གསུངས་པ་ལྟར་དོན་ཆེན་སྒྲུབ་མཁན་དཀོན་པ་ལས། དོན་ཆུང་ཚེ་འདིའི་བྱ་བཞག་གིས་མི་ཚེ་གཅོད་མཁན་ནི་མང་བ་ཡིན་པ་སྟེ། འདི་དག་ནི་ཆོས་དང་མི་མཐུན་པར་འཁྲུལ་བཞིན་ཡོད་པ་ཡིན་པས་འཁྲུལ་བ་འདི་དག་ལ་བསམས་ནས་མ་འཁྲུལ་བའི་ཆོས་རྣམ་དག་ཅིག་མཛོད་ཅིག་ཀྱེ་ཞེས་སྐལ་བ་དང་ལྡན་པ་རྣམས་ལ་འབོད་པས་སྐུལ་བའི་ཚིག་ཡིན་ནོ།།

༣༥ ཡང་དག་དོན་ལ་བསྐུལ་བའི་ཆོས་དྲུག་བསྟན་པ།

ཡང་དག་དོན་ལ་བསྐུལ་བའི་ཆོས་དྲུག་ནི།།

སླུ་ངེས་ཆགས་སྡང་གཉིས་པོས་ནམ་སླུའམ།།

འབྲལ་ངེས་ལུས་སེམས་འདི་གཉིས་ནམ་འབྲལ་ལམ།།

ཁྱེར་ངེས་འབྱུང་བཞིའི་གཡར་པོ་ནམ་ཁྱེར་རམ།།

ནུབ་ངེས་ཚེ་འདིའི་སྣང་བ་ནམ་ནུབ་བམ།།

འཇོག་ངེས་སྒྱུ་མའི་ནོར་རྫས་ནམ་འཇོག་གམ།།

ཡོང་ངེས་འཆི་བདག་ཐོག་རྫིས་ནམ་ཡོང་ངམ།།

སྙམ་དུ་སྙིང་ནས་ཉིན་མཚན་བསམ་པར་བྱ།།

ཞེས་གསུངས་པ་སྟེ། ཡང་དག་པའི་དོན་ལ་བསྐུལ་བའི་ཆོས་དྲུག་བསྟན་པ་ནི། ཡང་དག་པའི་དོན་ལས་ངེས་པར་སླུ་བར་བྱེད་པའི་གཉེན་ཕྱོགས་ལ་ཆགས་པ་དང་། དགྲ་ཕྱོགས་ལ་སྡང་བའམ། ཡང་ན་ཡུལ་ཡིད་འོང་ལ་ཆགས་པ་དང་། ཡིད་དུ་མི་འོང་ལ་སྡང་བ་དང་། དེ་གཉིས་པོ་མཉམ་པའི་རྨོངས་པའི་ཆ་དང་བསྡོངས་ནས་ནམ་ཞིག་ལ་བསླུའམ་ཞེས་བསམ་པར་བྱ་དགོས་པ་དང་། འབྲལ་ངེས་པ་ཡིན་པའི་ལུས་སེམས་གཉིས་པོ་འདི་ནམ་ཞིག་འབྲལ་ལམ་སྙམ་དུ་བསམ་པར་བྱ་བ་དང་། འབྱུང་བཞི་འདུས་པའི་ཕུང་པོ་འདིི་གཡར་བོའི་རྒྱུ་རྫས་ཉིན་ཞིག་ལ་ཕྱིར་ཁྱེར་བ་དང་འདྲ་བར། ང་དང་ངའི་ལུས་ཕུང་འདི་སྙམ་ནས་གཅེས་སྤྲས་བྱེད་ཡུལ་འདི་ནམ་ཞིག་ལ་ཕྱིར་ཁྱེར་འགྲོའམ་སྙམ་དུ་བསམ་པར་བྱ་བ་དང་། རྟག་འཛིན་གྱིས་ཡུན་རིང་ཞིག་ལ་མི་ནུབ་པར་སེམས་ཀྱང་ངེས་པར་ནུབ་པར་འགྱུར་བའི་ཚེ་འདིའི་སྣང་བ་ནམ་ཞིག་ལ་ནུབ་པ་ཡིན་ནམ་སྙམ་དུ་བསམ་པར་བྱ་བ་དང་། འཇོག་ངེས་པ་ཁྱེར་དབང་མེད་པའི་རྒྱུ་རྫས་འདི་དག་ནམ་ཞིག་ལ་བདག་པོ་སྤྲད་དབང་མེད་པར་འཇོག་རན་ནམ་སྙམ་པ་དང་། ཡོང་ཤག་ཤག་གི་འཆི་བདག་དེ་ཐོག་རྫིས་སམ་གློ་རྒྱག་ཏུ་ནམ་ཡོང་ངམ་སྙམ་དུ་སྙིང་ཐག་པར་ཉིན་མཚན་ཀུན་ཏུ་མ་བརྗེད་པར་བསམ་པར་བྱ་དགོས་སོ། །དེས་ན་ཡང་དག་གི་དོན་ལ་མགྱོགས་པར་ཞུགས་དགོས་པ་ལས་ཆགས་སྡང་གི་དབང་དུ་ཤོར་འགྲོ་བ་དང་། ལུས་སེམས་འབྲལ་ནས་འབྱུང་བཞིའི་གཡར་པོ་ཕྱིར་བླངས་ནས་ཚེ་འདིའི་སྣང་བ་ནུབ་ཅིང་ཕྱི་མའི་ནོར་རྫས་བཞག་དགོས་པའི་འཆི་བདག་གི་བསུ་མ་ནམ་ཡོང་ཆ་མེད་སྙམ་ནས་དྲན་པས་རྒྱུན་བསྐྱངས་ན་ཆོས་ཡང་དག་གི་དོན་ལ་སྐུལ་མ་ཡོང་བ་ཡིན་ནོ།།

༣༦ རང་རྒྱུད་ཆོས་དང་བསྲེ་བའི་ཆོས་དྲུག་བསྟན་པ།

རང་རྒྱུད་ཆོས་དང་བསྲེ་བའི་ཆོས་དྲུག་ནི།།

འདོད་པ་ཟད་འདོད་ཆོག་ཤེས་སེམས་ལ་བསྟེན།།

དགྲ་སྡང་ཟད་འདོད་ཁོང་ཁྲོ་ནང་དུ་ཐུལ།།

གཞན་དོན་འགྲུབ་འདོད་སེམས་བསྐྱེད་རྒྱུད་ལ་སྦྱོར།།

གཞན་སྣང་འདུལ་འདོད་བྱིན་རླབས་ནང་དུ་སྦོར།།

ཞིང་ཁམས་སྦྱོང་འདོད་རང་རིག་འོད་གསལ་སྦྱོངས།།

སྡུག་བསྔལ་ཞི་འདོད་བདེ་ཆེན་ནང་དུ་སྦོར།།

ནང་གི་རྟེན་འབྲེལ་ཕྱི་རུ་འཆར་བ་ཡིན།།

ཞེས་གསུངས་པ་སྟེ། རང་རྒྱུད་ཆོས་དང་བསྲེ་བའི་ཆོས་དྲུག་སྟེ། འདོད་པའི་བློ་སྣ་མང་པོ་ཞིག་གིས་དོན་མ་འགྲུབ་ནས་འཁོར་བའི་སྐྱེ་བོ་དག་སྡུག་བསྔལ་བཞིན་ཡོད་པ་ཡིན་པས། སྔོན་གྱི་སློབ་དཔོན་མཁས་གྲུབ་དག་གི་གསུང་ལས། འདོད་པ་ཆུང་ན་འཕགས་པའི་རིགས་ཡིན་ཞིང་། །འདོད་པ་ཟད་ན་འཕགས་པ་དངོས་ཡིན་པས། །རྟག་ཏུ་འདོད་པ་ཆུང་ལ་བསླབ་པར་བྱ། །གསུངས་པ་ལྟར་དུ་ཆོག་ཤེས་འཕགས་པའི་ནོར་སྒྲུབ་པར་བྱེད་པ་ལ་སྡུག་བསྔལ་འབྱུང་རྐྱེན་གྱི་གཞི་རྩ། འདོད་པ་ཟད་དགོས་པ་ཡིན་པས་ཆོག་ཤེས་པར་བྱ་བ་དང་། དགྲ་སྡང་བ་འདི་མེད་ན་ཅི་མ་རུང་སྙམ་ན་རང་ཉིད་ཀྱི་ཁོང་ཁྲོ་ཐུལ་དང་ཕྱིའི་དགྲ་བོ་མེད་པར་འགྱུར་བ་ཡིན་ཏེ། རང་གི་ཞེ་སྡང་དགྲ་བོ་མ་ཐུལ་ན། །ཕྱི་རོལ་དགྲ་བོ་བཏུལ་ཞིང་འཕེལ་བར་འགྱུར། །ཞེས་གསུངས་པའི་ཕྱིར། གཞན་དོན་ཞིག་ཨེ་འགྲུབ་སྙམ་ན་དང་པོར་སྙིང་རྗེ་དང་གཞན་ཕན་གྱིས་ཀུན་ནས་སློང་བའི་བྱང་ཆུབ་ཀྱི་སེམས། དོན་གཉིས་སམ་ཟུར་གཉིས་དང་ལྡན་པ་དེ་བསྐྱེད་ནས་རང་རྒྱུད་ལ་འདྲེས་པར་བྱེད་དགོས་ཏེ། གཞན་དུ་བྱང་ཆུབ་ཀྱི་སེམས་རྒྱུད་ལ་མེད་བཞིན་དུ་དབང་བསྐུར་ཆོས་བཤད་སོགས་གཞན་དོན་བྱེད་ཁུལ་བྱེད་པ་ནི། ལྟར་སྣང་ཙམ་ཡིན་པས་ཕན་པ་ཆེན་པོ་ཞིག་འབྱུང་དཀའ་བ་ཡིན་པའི་ཕྱིར་དང་། སེམས་བསྐྱེད་ཀྱིས་མ་ཟིན་ན་ཐེག་ཆེན་གྱི་ཆོས་སུ་འགྱུར་བ་མིན་པས། བྱང་ཆུབ་ཀྱི་སེམས་བསྐྱེད་ཅིང་སྐྱེ་བར་བྱེད་པ་གལ་ཆེའོ། །གཞན་སྣང་དགེ་ལ་བསྒྱུར་ནས་རང་སྣང་དབང་དུ་བསྡུ་འདོད་པ་ཡིན་ན། དད་དང་ངེས་འབྱུང་གིས་རྒྱུད་བསྐུལ་ནས་བྱང་ཆུབ་ཀྱི་སེམས་རིན་པོ་ཆེ་རང་རྒྱུད་ལ་འཁྲུངས་པར་བྱས་ན། དེ་ལ་རྒྱལ་བ་སྲས་དང་བཅས་པས་དགོངས་ནས་རྒྱལ་བའི་སྲས་སུ་འགྱུར་བ་ཡིན་པས་དེའི་རྒྱུད་ལ་བྱིན་རླབས་ཀྱང་ཡོད་པ་ཡིན་ལ། དེ་ལྟ་བུ་དེས་རང་གི་རྒྱུད་ལ་ཡོད་པའི་བྱིན་རླབས་ཀྱི་ནུས་པས་གཞན་སྣང་རང་ཤུགས་ཀྱིས་འདུལ་ཐུབ་པ་ཡིན་ཏེ། ཐུགས་རྒྱུད་བྱང་ཆུབ་སེམས་ཀྱིས་གང་ཡོད་པའི་དམ་པའི་སྐྱེས་བུ་དེ་ཉིད་མི་སྲིན་གཏུམ་པོ་ཅི་འདྲ་ཞིག་གིས་མཇལ་ན་ཡང་དེའི་རྒྱུད་ཀྱི་གདུག་རྩུབ་ཞི་བ་ནི། སྔོན་བཅོམ་ལྡན་འདས་སློབ་པ་ལམ་གྱི་གནས་སྐབས་ན་རྒྱལ་སྲས་ནོར་བཟང་ལ་སོགས་པའི་སྐུའི་སྐྱེ་བ་བཞེས་དུས་སྙིང་རྗེའི་སེམས་ཀྱི་སྟོབས་ཀྱིས་གཅན་གཟན་གཏུམ་པོའི་རིགས་རྣམས་ཀྱི་གདུག་རྩུབ་ཀྱང་ཞི་བ་ལ་སོགས་པ་གསུངས་པ་ལྟར་ཡིན་པས། ནང་གི་རང་སྣང་ཐུལ་མེད་ཚེ་ཕྱིའི་གཞན་སྣང་འདུལ་མི་ནུས་པ་ཡིན་ནོ། །ཞིང་ཁམས་སྦྱང་བར་འདོད་ན་རང་རིག་འོད་གསལ་གྱི་རྩལ་སྦྱང་བར་གྱིས་དང་གང་སྣང་དག་པའི་ཞིང་ཁམས་སུ་ཤར་བ་ཡིན་ནོ། །སྡུག་བསྔལ་ཞི་བར་འདོད་ན་མྱུར་ལམ་ཁྱད་པར་ཅན་ལ་བརྟེན་ནས་བདེ་བའི་ཡེ་ཤེས་ནང་ནས་སྦོར་དང་གང་སྣང་ཐམས་ཅད་བདེ་བར་ཤར་བ་ཡིན་པ་སྟེ། དེ་ཡང་ནང་རྡོ་རྗེའི་ལུས་ཀྱི་རྩ་རླུང་ཐིག་ལེ་གནད་དུ་བསྣུན་ནས་གཅུན་ན། ནང་དག་པའི་རྟེན་འབྱུང་དེ་ཕྱིར་ཤར་ནས་རྣལ་འབྱོར་བའི་ངོར་གང་སྣང་ཐམས་ཅད་མཐུན་རྐྱེན་གྱི་གྲོགས་སུ་འཆར་བ་ཡིན་ནོ།།

༣༧ དལ་འབྱོར་ཐོབ་ཀྱང་སྙིང་མེད་ཆོས་དྲུག་བསྟན་པ།

དལ་འབྱོར་ཐོབ་ཀྱང་སྙིང་མེད་ཆོས་དྲུག་ནི།།

མ་རིག་གཉེན་པོ་ཐོས་བསམ་འདོར་བ་དང།།

བྱིན་རླབས་རྩ་བ་བླ་མ་སྤོང་བ་དང༌།།

དངོས་གྲུབ་འབྱུང་གནས་ཡི་དམ་སྤོང་བ་དང༌།།

བསྒྲུབ་བྱའི་རྩ་བ་བསམ་གཏན་ཕྱི་བཤོལ་དང༌།།

སྡིག་སྒྲིབ་ཆགས་ཤིང་ནད་གདོན་སྤོང་བློ་དང༌།།

གཞན་སྣང་དད་བྱེད་སྤྱོད་ལམ་འགལ་བ་རྣམས།།

སྙིང་མེད་མི་ལ་ཁབ་ལེན་ལྕགས་བཞིན་འདུ།།

ཞེས་གསུངས་པ་སྟེ། དལ་འབྱོར་ཚང་བའི་མི་ཞིག་ཡིན་ཡང་སྙིང་མེད་ཀྱི་མི་ལ་ཁབ་ལེན་གྱི་ལྕགས་བཞིན་དུ་འདུ་བའི་ཆོས་དྲུག་ཡོད་པ་ནི། ཁམས་གསུམ་འཁོར་བ་སྡུག་བསྔལ་གསུམ་གྱི་འབྱུང་ཁུངས་ཀྱི་མ་རིག་པའི་མུན་པ་སེལ་བའི་གཉེན་པོ་བྱེད་ཅིང་། ཡང་དག་པའི་ལྟ་བའི་དམིགས་རྣམ་སྟེར་བའི་ཤེས་རབ་ཀྱི་རྒྱུ་མ་ནོར་བ། ཐོས་བསམ་འདོར་བ་བྱེད་པ་ནི་སྙིང་མེད་ཁོག་རུལ་མ་རིག་པའི་གཞན་དབང་ཅན་ཡིན་པ་དང་། བཅོམ་ལྡན་འདས་ཀྱིས། འཕགས་པ་ཡོངས་སུ་མྱ་ངན་ལས་འདས་པ་དང་རྔ་བོ་ཆེན་པོ་མདོ་ལས། མྱ་ངན་མ་བྱེད་ཀུན་དགའ་བོ། །སྨྲེ་སྔགས་མ་འདོན་ཀུན་དགའ་བོ། །ང་ནི་ཕྱི་མའི་དུས་ཀྱི་ཚེ། །དགེ་བའི་བཤེས་གཉེན་ཉིད་སྤྲུལ་ནས། །ཁྱོད་ལ་སོགས་པའི་དོན་བྱེད་འགྱུར། །ཞེས་ཞལ་ཆེམས་བཞག་པ་ལྟར་དུ་སངས་རྒྱས་མིའི་གཟུགས་སུ་བྱོན་པའི་བླ་མ་དགེ་བའི་བཤེས་གཉེན་རྣམས་ནི་བྱིན་རླབས་ཐམས་ཅད་འབྱུང་བའི་རྩ་བ་ཡིན་ཏེ། སངས་རྒྱས་ཀྱི་བྱིན་རླབས་ཀྱང་བླ་མ་བར་དུ་བརྒྱུད་ནས་ཐོབ་དགོས་པ། དཔེར་ན་ཉི་མ་ལ་ཚ་ཞིང་སྲེག་པའི་ནུས་པ་ཡོད་ཀྱང་མེ་ཤེལ་བར་དུ་མ་བརྒྱུད་ན་ས་གཞིའི་རྩ་སྐམ་པོ་དེ་འཚིག་པར་བྱེད་མི་ནུས་པ་ལྟར་དུ་ཡིན་པས། བྱིན་རླབས་ཀྱི་རྩ་བ་བླ་མ་སྤོང་བ་ནི་སྙིང་མེད་དེ་ལ་ཁབ་ལེན་ལ་ལྕགས་བཞིན་འདུ་བ་དང་། དཀྱིལ་འཁོར་གང་ལ་མེ་ཏོག་ཕོག་པའི་རང་གི་ལྷག་པའི་ལྷ་བླ་མ་དང་གཉིས་སུ་མེད་པ་དངོས་གྲུབ་དམ་པ་འབྱུང་བའི་གནས་ཀྱི་ཡི་དམ་སྤོང་བར་བྱེད་པ་དང་། ཐོས་བསམ་བྱས་པའི་སྙིང་པོའམ་བསྒྲུབ་བྱའི་རྩ་བ་དེ་བསམ་གཏན་བསྒོམས་ནས་རང་རྒྱུད་གྲོལ་བར་བྱེད་དགོས་པ་ཡིན་ཡང་། བསམ་གཏན་སྒོམ་པ་བཤོལ་ནས་གཞན་ལ་འཇུག་པ་སྙིང་པོ་བོར་ནས་ཤུན་པ་འཚོལ་བ་དང་འདྲ་བར་བྱེད་པ་དང་། སྡིག་སྒྲིབ་ཟོ་བ་ལ་ཟོ་དྲེག་ཆགས་པ་བཞིན་དུ་ཆགས་ཤིང་གནས་པ་རྣམས་དག་པར་མི་བྱེད་པར་ནད་གདོན་སྤོང་བློ་བྱེད་པ་དང་། གཞན་གདུལ་བྱའི་སྣང་བ་དྭངས་ཤིང་དག་སྣང་འདྲེན་དགོས་ན་རང་ཉིད་ཀྱི་རྒྱུད་དང་འབྲེལ་བའི་སྤྱོད་ལམ་གཙང་དགོས་ལ་དེ་ལྟར་མི་བྱེད་པར་འགལ་བ་འབའ་ཞིག་སྒྲུབ་པ་སྟེ། དེ་རྣམས་སྙིང་མེད་ཀྱི་མི་ལ་ཁབ་ལེན་ལ་ལྕགས་བཞིན་འདུ་བ་ཡིན་ནོ།།

༣༨ གང་ཟག་རྣམས་ཀྱི་སྐྱོན་དྲུག་དོར་བ་བསྟན་པ།

གང་ཟག་རྣམས་ཀྱི་སྐྱོན་དྲུག་དོར་བ་ནི།།

ཞེ་བཅད་མེད་པའི་བྱ་མང་མགོ་མི་ཐོན།།

གཉེན་བཤེས་བརྩེ་གདུང་ཆགས་སྡང་སྒྲོག་མི་ཐར།།

ཟས་ལ་རྔམ་པ་ལྟོ་གོས་ཁོལ་པོར་འཆོར།།

ཁ་ལྟའི་རྦད་ཁམ་སྙིང་པོའི་དོན་ལ་འདྲེད།།

འདུན་པ་སྐྱེ་དུས་མ་འབད་འགྲུབ་དུས་མེད།།

ད་ལྟ་མ་འདྲིས་བར་དོར་ལས་སྟོབས་གཅོག།

དེ་བས་སྐྱོན་དྲུག་བརྟགས་ཏེ་སྤང་བ་གཅེས།།

ཞེས་གསུངས་པ་སྟེ། གང་ཟག་རྣམས་ཀྱི་སྐྱོན་དྲུག་དོར་བར་བསྟན་པ་ནི། སྤྱིར་བྱ་བ་གང་དང་གང་སྒྲུབ་པ་དང་ཁྱད་པར་དུ་ཆོས་ཕྱོགས་ཀྱི་བྱ་བ་གང་སྒྲུབ་ཀྱང་། མགོ་མཇུག་ཚང་བ་ཞིག་བྱེད་དགོས་ན་བྱ་བའི་མགོ་འཛིན་དུས་ནས་འདི་མ་འགྲུབ་ན་མི་བཞག་སྙམ་པའི་ཞེ་བཅད་དང་དམ་བཅའ་བརྟན་པོ་ཞིག་ཡོད་དགོས་པ་ཡིན། དེ་འདྲ་མིན་པར་ཡས་ཀྱི་མགོ་བརྩམ་ཁུལ་དང་མས་ཀྱི་མཇུག་ལ་འཛིན་ཁུལ་གྱིས་གཞན་དག་གི་ལད་མོར་བྱས་ཀྱང་ཐ་མ་གཅིག་ཀྱང་མ་འགྲུབ་པའི་བྱ་མང་མགོ་མི་ཐོན་པ་དང་། གཉེན་བཤེས་ལ་བརྩེ་དུངས་དང་ཆགས་ཞེན་ཆེ་དྲགས་པའི་དབང་གིས། དེའི་ཆགས་ཞེན་གྱི་སྒྲོག་རང་གིས་རང་ལ་བརྒྱབ་ནས་མི་ཐར་བར་སྡུག་བསྔལ་མཉམ་དུ་མྱང་བ་ནི། དཔེར་ན་རྟ་ཞིག་ལ་སྒྲོག་སུམ་སྐོར་ཞིག་བརྒྱབ་ནས་བཞག་ན་འགྲོ་བསམ་ཡང་རང་དབང་མེད་པ་ལྟ་བུ་ཡིན་པ་དང་། གཉེན་བཤེས་ལ་ཕན་འདོགས་བསམ་ན་ཆོས་བསྒྲུབ་ཏུ་ཆུག་དང་དེས་རང་གཞན་གཉིས་ཀ་ལ་ཕན་ཐོགས་ཡོད་པ་ཡིན། ཟས་ཀྱི་སྲེད་པ་ཧ་ཅང་ཆེ་བའི་མི་དེ་ཟས་གོས་འབའ་ཞིག་བསྒྲུབས་ནས་དེའི་ཁོལ་བོའམ་གཡོག་པོར་འགྱུར་བ་ཡིན་པ་དང་། ཉམས་རྟོགས་མཐོན་པོའི་སྐད་ཆ་བཤད་ཀྱང་དོན་དུ་མེད་པའི་ཁ་ལྟ་སྟོང་སྐད་དེ་ནི་སྙིང་པོའི་དོན་ལ་འདྲེད་པ་སྟེ་སྙིང་པོའི་དོན་ལ་མི་ཁེལ་བ་དར་ཐོག་ནས་ཞུད་པ་བཞིན་དུ་སྙིང་པོའི་དོན་ལས་རིང་འགྲོ་བ་ཡིན་པ་དང་། ལྕགས་དམར་ལིང་ཡིན་ཚེ་རྡུང་དགོས་པ་ལས་གྲང་ནས་མདོག་འགྱུར་ཚེ་རྡུང་ཐབས་མེད་པ་དང་འདྲ་བར། རང་ཉིད་ལ་འདུན་པའམ་ཆོས་ལ་མོས་པ་སྐྱེ་བའི་དུས་སུ་བརྩོན་འགྲུས་བསྐྱེད་ནས་འབད་དགོས་པ་ལས་ཕྱིས་སུ་གཉེན་པོའི་སྟོབས་ཞན་པར་སོང་ནས་འགྲུབ་པ་མིན་པ་དང་། ད་ལྟ་གསོན་པོའི་སྐབས་སུ་ཉམས་ལེན་གྱི་གོམས་འདྲིས་བློ་གདེང་ཁེལ་བ་ཞིག་མེད་ན། བར་དོའི་འཁྲུལ་སྣང་ཤར་དུས་མ་དག་ལས་སྣང་གི་སྟོབས་གཅོག་དགོས་བསམ་ཡང་ཐུབ་པ་མིན་པ་སྟེ། དེ་ལྟ་བུའི་བསམ་ཉེས་ལས་ཉེས་ཀྱིས་གང་ཟག་དེ་ལ་སྐྱོན་དྲུག་འབབ་པ་ཡིན་པས་དེ་སྤོང་ཐབས་བྱེད་དགོས་སོ།།

༣༩ བལྟ་ཐབས་དྲུག་གིས་རང་རྒྱུད་གདུལ་བ་བསྟན་པ།

བལྟ་ཐབས་དྲུག་གིས་རང་རྒྱུད་གདུལ་བ་ནི།།

ཡུལ་ལ་བདེན་འཛིན་དུས་བཞིའི་འགྱུར་ལྡོག་ལྟོས།།

ཚེ་ལ་རྟག་འཛིན་རྩྭ་ཁའི་ཟིལ་བ་ལྟོས།།

རྒྱུ་འབྲས་རྨོངས་ན་ས་བོན་མྱུ་གུ་ལྟོས།།

སྣང་སེམས་མ་ཤེས་ཉལ་བའི་རྨི་ལམ་ལྟོས།།

རོ་གཅིག་མ་ཤེས་བུ་རམ་གཟུགས་བརྙན་ལྟོས།།

གཉིས་མེད་མ་ཤེས་ཆུ་དང་ཆབ་རོམ་ལྟོས།།

དེ་ལྟར་བལྟས་པས་སོ་སོའི་གཉེན་པོ་ཆེ།།

ཞེས་གསུངས་པ་སྟེ། བལྟ་ཐབས་དྲུག་གིས་བལྟས་ནས་རང་རྒྱུད་གདུལ་བ་ནི། ཡུལ་ལ་རྟག་འཛིན་དང་བདེན་འཛིན་བྱེད་རིགས་དང་མི་རིགས་རགས་པ་དུས་བཞིའི་འགྱུར་བ་ལ་བལྟས་ན་ཤེས་ཏེ། དེ་ཡང་དབྱར་གྱི་རྗེས་སུ་སྟོན་དང་། སྟོན་གྱི་རྗེས་སུ་དགུན་དང་། དགུན་གྱི་རྗེས་སུ་དཔྱིད་འཁོར་ནས་འགྱུར་བ་དང་འདྲ་བར་ཕྲ་བའི་ཐོག་ནས་ཀྱང་ཡུལ་སྣང་ཐམས་ཅད་སྐད་ཅིག་སྐད་ཅིག་གིས་འགྱུར་བ་ཤེས་པ་དང་། ཚེ་འདི་ལ་རྟག་པར་འཛིན་པ་རིགས་དང་མི་རིགས་རྩྭ་རྩེའི་ཟིལ་བ་ལ་ལྟོས་དང་ཤེས་ཏེ། རྩྭ་མགོའི་ཟིལ་བ་དེ་ཉི་མ་ཤར་ནས་ཆེར་མི་འགོར་བ་སྐམ་འགྲོ་བ་དང་འདྲ་བར་མི་ཚེ་ཡང་ཡུད་ཙམ་གྱིས་འཛད་པ་ཡིན་པར་ངེས་པའི་ཕྱིར་དང་། རྒྱུ་འབྲས་ཀྱི་འགྲོ་སྟངས་མ་ཤེས་ན་ས་བོན་དང་མྱུ་གུའི་འགྲོ་སྟངས་ལ་ལྟོས་དང་ཤེས་ཏེ། རྒྱུ་མེད་ཀྱི་འབྲས་བུ་མི་སྲིད་པ་ཡིན་པའི་ཕྱིར་དང་། རིགས་པས་དཔྱད་ནས་སོང་ན་ཕན་ཚུན་གཅིག་ལ་གཅིག་བརྟེན། རྟེན་ཅིང་འབྲེལ་བར་འབྱུང་བ་ལས་འོང་བ་ཡིན་ཅིང་། དེ་འདྲའི་རྟེན་འབྲེལ་གྱི་གཤིས་སྟོང་ཉིད་དང་། དེའི་གནད་ཀྱིས་ཅིར་ཡང་སྒྱུར་དུ་རུང་བ་ལ་སོགས་པ་ཤེས་པ་ཡིན། སྣང་སེམས་ཀྱི་གནས་ལུགས་དེ་མ་ཤེས་ན་མདང་མ་ཉལ་གྱི་རྨི་ལམ་ལ་ལྟོས་དང་ཤེས་ཏེ། དེའི་སྣང་བ་ཤེས་པ་ལས་ཤར་བ་ཡིན་པའི་ཕྱིར། རོ་གཅིག་མ་ཤེས་ན་བུ་རམ་གྱི་གཟུགས་བརྙན་ལ་ལྟོས་དང་ཤེས་ཏེ། བུ་རམ་ཡོད་ཚད་མངར་བའི་རོ་ཅན་ཡིན་པ་བཞིན་དུ་ཆོས་ཅན་ཐམས་ཅད་ཆོས་ཉིད་ཀྱི་ཀློང་དུ་རོ་གཅིག་ཡིན་པར་ངེས་པའི་ཕྱིར། གཉིས་མེད་ཀྱི་དོན་མ་རྟོགས་ནས་གཉིས་འཛིན་དུ་འཁྲུལ་ན། ཆུ་དང་ཆབ་རོམ་ཀྱི་དཔེ་ལ་ལྟོས་དང་འཁྲུལ་བ་ཆབ་རོམ་ལྟ་བུ་དང་མ་འཁྲུལ་བ་ཆུ་ལྟ་བུ་དོན་ལ་གཅིག་ལས་མ་འདས་པ་ཤེས་ཡོང་པ་ཡིན་པའི་ཕྱིར་། དེས་ན་དེ་ལྟར་བལྟས་ནས་སྐབས་སོ་སོའི་གཉེན་པོ་བསྟེན་པ་གནད་ཆེའོ།།

༤༠ འདུ་ཤེས་དྲུག་གིས་ལམ་དུ་བསླང་བ་བསྟན་པ།

འདུ་ཤེས་དྲུག་གིས་ལམ་དུ་བསླང་བ་ནི།།

བླ་མ་མཆོག་ལ་སྨན་པའི་འདུ་ཤེས་དང༌།།

མཆེད་གྲོགས་ནད་གཡོག་ཉམས་ལེན་ནད་གསོ་དང༌།།

རང་ལ་ནད་པ་ཆོས་ལ་སྨན་དང་ནི།།

འབྲས་བུ་ནད་སོས་ལྟ་བུར་བསམ་བྱ་ཡིས།།

ཕྱིན་ཅི་ལོག་ཏུ་སེམས་པ་དོར་བར་བྱ།།

ཞེས་གསུངས་པ་སྟེ། བླ་མ་མཆོག་ལ་ཉོན་མོངས་པའི་ནད་དང་དེས་བསྐྱེད་པའི་སྡུག་བསྔལ་གྱི་ཟུག་རྔུ་བཅོས་པ་ལ་མཁས་པའི་སྨན་པའི་འདུ་ཤེས་དང༌། ཆོས་མཉམ་དུ་ཞུས་པའི་དོན་མཐུན་གྱི་མཆེད་གྲོགས་ཐམས་ཅད་ལ་ནད་གཡོག་གི་འདུ་ཤེས་དང་། ཆོས་ཉམས་ལེན་བྱེད་པ་ལ་ནད་བཅོས་གསོ་དཔྱད་ཀྱི་འདུ་ཤེས་དང༌། རང་ལ་ནད་པ་ཆོས་ལ་སྨན་དང་ནི་འབྲས་བུ་ནད་སོས་ལྟ་བུར་བསམ་པར་བྱ་བ་ཡིས་ཕྱིན་ཅི་ལོག་ཏུ་སེམས་པ་དོར་བར་བྱ་བ་ནི་སྡོང་པོས་བརྒྱན་པའི་མདོའི་ལུང་དོན་དུས་རྒྱུན་འདྲེན་བཞིན་ཡོད་པ་དེ་དང་འདྲ་ལ། དེ་ལས་གཞན་དུ་བླ་མ་ལ་གླ་བ་ཆོས་ལ་གླ་རྩིའི་འདུ་ཤེས་བཞག་ན་མི་རུང་ངོ་།།

༤༡ ལེགས་པར་སྤྱད་ལས་ངེས་པ་རྣམ་དྲུག་བསྟན་པ།

ལེགས་པར་སྤྱད་ལས་ངེས་པ་རྣམ་དྲུག་ནི།།

བླ་མ་བསྟེན་པས་བྱིན་རླབས་འོང་བར་ངེས།།

ཡི་དམ་བསྒོམས་པས་དངོས་གྲུབ་འོང་བར་ངེས།།

དམ་ཚིག་བསྲུངས་པས་དམ་ཅན་འདུ་བར་ངེས།།

ཉམས་ལེན་བརྩོན་པས་ཉམས་རྟོགས་འཆར་བར་ངེས།།

གནས་ལུགས་བསྐྱངས་པས་སྒྲིབ་གཉིས་འབྱང་བར་ངེས།།

ཡེང་མེད་རྩལ་བསྐྱངས་ཡོན་ཏན་འཆར་བར་ངེས།།

ཞེས་གསུངས་པ་སྟེ། འདི་ལྟར་དུ་ལེགས་པར་སྤྱད་ན་འབྲས་བུ་སྨིན་ངེས་པ་རྣམ་པ་དྲུག་ནི། བླ་མ་མཚན་ཉིད་དང་ལྡན་པ་ཚུལ་བཞིན་དུ་བསྟེན་པས་བྱིན་རླབས་འོང་བར་ཐེ་ཚོམ་བྱ་མི་དགོས་པ་དང་། དེ་བཞིན་དུ་ཡི་དམ་བསྒོམས་པས་དངོས་གྲུབ་འོང་བར་ངེས་པ་དང་། དམ་ཚིག་བསྲུངས་པས་དམ་ཅན་འདུ་བར་ངེས་པ་དང་། དེ་ཡང་དམ་ཅན་ཆོས་སྐྱོང་སྲུང་མ་རྣམས་ནི་དམ་ལྡན་བུ་བཞིན་སྐྱོང་བའི་གཡར་དམ་བླངས་མཁན་ཤ་སྟག་ཡིན་པས་དུས་དང་ཐུན་གྱི་གཏོར་བསྔོ་གསོལ་མཆོད་རེ་བྱས་ན་སྲུང་མ་འཁོར་བ་ཡིན་པས་དེ་བསྒྲུབ་བྱའི་སྙིང་པོ་རུ་བཟུང་ནས་དེ་ལ་དུས་ཚོད་ཟད་པར་བྱེད་དགོས་པ་མིན་ནོ། །ཉམས་ལེན་གྱི་གནད་བླ་མའི་མན་ངག་བཞིན་དུ་བརྩོན་པ་བསྲིངས་ན་ཉམས་རྟོགས་ཀྱི་ཡོན་ཏན་ཁྱད་པར་ཅན་རྒྱུད་ལ་སྐྱེས་ནས་འཆར་བར་ངེས་པ་ཡིན་པ་དང་། གནས་ལུགས་མ་བཅོས་པའི་དོན་དབུ་ཕྱག་རྫོགས་གསུམ་གྱི་ལྟ་བ་སྒོམ་པའི་ཉམས་ལེན་གྱི་རྒྱུན་བསྐྱངས་བར་བྱས་པས་སྒྲིབ་གཉིས་བྱང་བར་ངེས་པ་ཡིན་པ་དང་། ཐ་མལ་འཁྲུལ་འབྱམས་ངན་རྟོག་སྣ་ཚོགས་ཀྱི་དབང་དུ་མ་ཤོར་ནས་ཡེངས་མེད་སྒོམ་པའི་རྩལ་ཡུན་ནས་ཡུན་དུ་སྦྱངས་ནས་བསྐྱངས་ན་ཡོན་ཏན་འཆར་ཐུབ་མིན་ལ་ཐེ་ཚོམ་མི་དགོས་པར་འཆར་བར་ངེས་སོ། །དེས་ལེགས་པར་སྤྱད་པའི་ཆོས་དྲུག་བསྟན་པའོ། །འདི་ཡན་གྱི་དོན་བསྡུ་ན་དམ་ཆོས་རྣལ་མ་ཞིག་བསྒྲུབས་ནས་མི་ཚེ་དོན་ལྡན་ཞིག་བྱེད་དགོས་ན་དམ་ཆོས་ཇི་ལྟར་སྒྲུབ་པའི་སྒྲུབ་ཚུལ་དེ་ཤེས་དགོས་པས། དེ་ཇི་ལྟར་ཡིན་ན་ལམ་གྱི་རྩ་བ་ངེས་འབྱུང་དང་བྱང་སེམས་ཡིན་པས་འཁོར་བ་ཞེན་ལོག་གི་ངེས་འབྱུང་ཡང་དག་པ་ཞིག་རྒྱུད་ལ་བསྐྱེད་དགོས་ཏེ། ཆོས་འགྲུབ་མིན་དང་། ཆོས་ཚུགས་ཟིན་མིན་དང་། ཆོས་མཐར་ཕྱིན་མིན་རྩ་བ་དེ་ལ་ཐུག་ཡོད་པའི་ཕྱིར། དེའི་སྟེང་དུ་སྙིང་རྗེ་ཡོད་དགོས་ཏེ་ཐེག་ཆེན་ཆོས་ཀྱི་རྩ་བ་སྙིང་རྗེ་ཡིན། སྙིང་རྗེ་ཡོད་ན་དེས་དྲངས་པའི་བྱང་ཆུབ་ཀྱི་སེམས་རྒྱུད་ལ་སྐྱེ་སླ་བ་དེས་ན་བྱང་ཆུབ་ཀྱི་སེམས་བསྐྱེད་དགོས། གཞན་དོན་འགྲུབ་མིན་ནི་གཞན་ཕན་གྱི་བསམ་པ་ལ་རག་ལས་བྱང་ཆུབ་ཀྱི་སེམས་རང་རྒྱུད་ལ་སྐྱེས་མེད་ན་དེས་གཞན་རྒྱུད་འདུལ་ཞེས་པ་ནི་ལྟར་སྣང་ཙམ་ཡིན། དེས་ན་མི་ཚེ་རྟག་པ་མེད་པ་དང་། གཉེན་བཤེས་འདུ་འབྲལ་ཆེ་བ་དང་། དེས་མ་ཚད་ལུས་བེམ་གོག་གཡར་བོའི་རྒྱུ་རྫས་དང་འདྲ་བ་ཡིན་པས་མི་རྟག་པ་ཡིན་པའི་ཚུལ་རྣམས་སྒོམ་པས་རྒྱུད་ལ་སྦྱར་ནས། ད་རེས་ཀྱི་དལ་རྟེན་འདི་སྟོང་ལོག་མི་རེད་པ་ཞིག་བྱེད་དགོས་པ་དང་། དེ་ལྟར་བྱས་ན་རྗེས་སུ་འགྱོད་མེད་ཡིན་པས་མ་ཚད་ཚེ་འདི་བདེ་ཕྱི་སྐྱིད་རང་གཞན་གཉིས་ཀ་བདེ་ཞིང་སྐྱིད་པ་ཡིན། འདེང་ཞིབ་ཏུ་བརྒྱབ་ནས་ཁ་རང་ལ་འཁོར་ནས་བསམ་ན་ཆུང་ནས་དམ་པའི་ཆོས་སྒོ་ལ་ཞུགས། བསྟན་པའི་ལྷག་ཞབས་སུ་ཚུད། སྡོམ་པ་གསུམ་གྱི་དམ་བཅའ་བླངས་ནས་ཤི་གསོན་མང་པོ་ཞིག་ལ་ཐར་ལམ་སྟོན་བཞིན་ཡོད་མདོག་གི་ཕྱི་ཚུལ་ཙམ་ཞིག་འཆང་བ་དང་། ཁ་ཐོག་ནས་ཐེག་པ་ཆེ་ཆུང་སྐྱེས་བུ་གསུམ་གྱི་ལམ་སྔགས་རྒྱུད་སྡེ་བཞི་དྲུག་བཅས་པའི་ས་ལམ་གྱི་རྣམ་གཞག་སངས་རྒྱས་ཀྱི་མངོན་རྟོགས་སྔགས་རྫོགས་ཀྱི་ལྟ་བ་གང་བཤད་ཀྱང་། དོན་ནང་ཉམས་ངེས་འབྱུང་གི་བསམ་པ་ཡང་དག་པ་ཞིག་སྐྱེ་ཡོད་མིན་གྱི་ཞུ་དག་ཕེར་དཀའ་བ་ཡིན། ངེས་འབྱུང་ཞེས་པ་ནི་ཁ་རྩང་བཤད་པ་བཞིན་དུ་འཁོར་བར་ཞེན་ལོག་དང་དེ་ལས་ཐར་འདོད་ཀྱི་བློ་གཉིས་ཀ་རེད། དེས་ན་ཞེན་ལོག་ཡོད་ན་ཆགས་ཞེན་ཡོད་མི་རིགས་ལ། ཆགས་ཞེན་ཡོད་ན་ཞེན་ལོག་མེད་པའི་རྟགས་ཡིན། འཁོར་བར་ངེས་འབྱུང་གཤའ་མ་ཞིག་མེད་ན་ཐེག་ཆེན་མ་དགོས་ཐེག་དམན་གྱི་ཐར་ལམ་ཟིན་མི་འདུག རང་ཐར་བའི་ལམ་སྣ་མ་ཟིན་པ་ཞིག་གིས་གཞན་ཤི་གསོན་གྱི་མགོ་སྔས་ཤིག་ནས་མིག་གིས་དཀར་ལོག་དམར་ལོག་གང་བསྒྱུར་རུང་སྙིང་པོ་མེད་པ་ཡིན། འཕྲལ་དུ་གཞན་མགོ་བསྐོར་ཀྱང་དོན་དུ་རང་མགོ་བསྐོར་བ་ཡིན་པའི་དཔེ་དོན་གཉིས་ཀ་གནའ་བོའི་གཏམ་རྒྱུད་ཅིག་ལ་སྦྱོར་མི་དགོས་པ་རང་ལ་ཚང་ནས་ཡོད། ངེས་འབྱུང་བྱང་སེམས་ཡང་དག་པའི་ལྟ་བ་གསུམ་ལ་ལམ་གྱི་གཙོ་བོ་རྣམ་གསུམ་ཞེས་གསུངས་ཡོད། ངེས་འབྱུང་ཙམ་ཞིག་གི་ཆ་རྐྱེན་མ་ཚང་དུས་ཐར་བའི་ལམ་སྣ་ཟིན་མེད་པ་དང་། བྱང་སེམས་ཀྱི་རྩ་བ་སྙིང་རྗེ་དགོས་ལ་སྙིང་རྗེ་འདྲ་རེ་ཡོད་བསམ་ཁུལ་བྱེད་པ་ནི་ཕྱོགས་རེ་བ་ཆུང་ངུ་ཞིག་སྟེ། ཕ་མ་སྤུན་སྲིང་ལ་གཅེས་ཞེན་ཡོད་པའི་སྙིང་རྗེ་དང་བྱམས་པ་ཕྲ་མོ་ཕྱོགས་རེ་བ་གཅན་གཟན་གཏུམ་པོ་དག་ལ་ཡང་ཡོད་པས། དེས་སྙིང་རྗེ་ཡོད་པའི་གོ་མི་ཆོད། ལར་དེ་སྙིང་རྗེ་ཡིན་དང་ཆགས་ཞེན་ཡིན་མ་འཚལ་བ་ཞིག་ཡིན། དེས་ན་དཔེ་ཆ་བས་གཞུང་བཀའ་པོད་ལྔ་ལ་ཐོས་བསམ་འཆད་ཉན་ལོ་མང་དུ་བྱས་པ་ཡིན་ཚུལ་དང་། སྤོང་བ་པས་ལོ་མཚམས་ཟླ་མཚམས་དང་། ལོ་གསུམ་ཟླ་གསུམ་མང་པོ་ཞིག་གི་མཇུག་ཕུད་པ་ཡིན་ཚུལ་དང་། དགེ་བསྙེན་ཕོ་མོས་ཀྱང་ཡིག་བརྒྱ་ཡིག་དྲུག་བྱེ་བ་དུང་ཕྱུར་མང་པོའི་ཁ་ཕུད་པ་དང་སྒྲུབ་ཚུལ་སོགས་བཤད་མ་བཤད་ཅི་ཡང་མེད། རྩ་བའི་སྙིང་དོན་དངོས་ནི་ངེས་འབྱུང་བྱང་སེམས་རྒྱུད་ལ་སྐྱེ་འདུག་གམ་བལྟ་དགོས། དེའི་ནང་ནས་ཀྱང་དང་པོར་སེམས་བསྐྱེད་དང་སྟོང་ཉིད་ཀྱི་ལྟ་བའི་ཕྱོགས་ནས་མི་བཤད་པར་འཁོར་བ་ལ་ཞེན་པ་ལོག་ཡོད་མེད་དང་། རང་རྒྱུད་སྔར་བས་ཅུང་འགྱུར་ནས་ཞེན་ཆགས་མི་ཆེ་བ་དང་རྟག་འཛིན་ཆུང་བ་ཕྲག་དོག་གི་མགོ་སྔར་བས་དམའ་ཡོད་དམ་ཞེ་སྡང་སྔོན་མ་ལྟར་དུ་མི་ཆེ་བ་དེ་འདྲ་ཞིག་ཏུ་འགྱུར་ཡོད་མིན་དཔྱད་ཚེ། འགྱུར་བ་སོང་ཡོད་ན་ཆོས་དང་རང་རྒྱུད་ཁ་ཐག་ཅུང་ཟད་ཉེ་ཡོད་པའི་རྟགས་ཡིན། དེ་ལས་གཞན་དུ་རང་རྒྱུད་སྔར་དང་འདྲ་འདྲ་ཉོན་མོངས་དུག་ལྔ་དུག་གསུམ་གྱི་གྲ་ཞིག་ཉམས་མེད་ཚེ། ཆོས་ལ་བག་ཆགས་བཞག་ནས་བསམ་པ་ལོག་པ་འཚག་མེད་ཟེར་ཡང་། ཐར་བའི་རིང་རྒྱུ་ཙམ་ཞིག་ཏུ་འགྲོ་ངེས་པ་ཙམ་ཞིག་ལས། ཐར་བའི་ཉེ་རྒྱུ་རུ་གྱུར་ནས་རྟེན་འདིའི་ཐོག་ནས་ད་དུང་ཐར་བའི་ལམ་སྣེ་ཟིན་མེད་པས། ཆོས་སྒྲུབ་དུས་མི་སྔོན་ནས་ཡིན་མདོག་བསྟན་པ་ཞིག་གིས་གོ་ཆོད་པ་མིན། ནང་རང་ཉམས་སུ་མི་རྟག་འཆི་བའི་ལམ་ཆེན་དུ་སྐྱོད་དུས་ཡོད་དགོས་པ་ཡིན། རང་རྒྱུད་ལ་ཞུ་དག་བྱས་ནས་མན་ངག་གི་གཞུང་འདི་དག་དང་ཐོད་གཏུགས་ན་རང་རྒྱུས་རང་གིས་ལོན་པ་ཡིན། གཞུང་འདི་ནི་མདོ་རྒྱུད་ཀྱི་མན་ངག་གང་གཅེས་གཅེས་རྣམས་ཀྱི་བཅུད་བསྡུས་པའི་མན་ངག་གི་གཞུང་ཡིན་པས། ཚིག་ཐོག་རྐྱང་པ་ནས་འདིའི་དོན་སུས་ཀྱང་འགྲོལ་ཐུབ་པ་ཞིག་རེད། ཁྱད་པར་དུ་དཔེ་ཆ་བ་རྣམས་ལ་འདི་འགྲེལ་མི་དགོས་པ་ཞིག་ཡིན་ཡང་མན་ངག་ཉམས་ལེན་གྱི་ཟུངས་སུ་སྨིན་པའི་ཐབས་དང་། ཁ་དོན་སྦྲེལ་ནས་རང་རྒྱུད་དུ་སྦྱར་ན་དོན་ཆེ་སྙམ། འཁོར་བ་ཞེན་ལོག་གི་ངེས་འབྱུང་བཅོས་མིན་ཞིག་སྐྱེས་པའི་སྟེང་ནས་དོན་གཉིས་སམ་ཟུར་གཉིས་དང་ལྡན་པའི་བྱང་ཆུབ་མཆོག་ཏུ་སེམས་བསྐྱེད་ཅིང་། དེའི་སེམས་བསྐྱེད་ཀྱི་སྡོམ་པ་དེ་བླངས་ལ་མ་ཉམས་པའི་ཐོག་ནས་བསླབ་བྱ་ཆེ་ལོང་ཐམས་ཅད་བསྲུངས་པ་དང་། ཉམས་ན་བཤགས་པ་ཚུལ་བཞིན་བྱེད་རྒྱུའི་གོམས་གཤིས་དེ་ཆགས་སོང་ན་བྱང་ཆུབ་སེམས་དཔའ་ཞེས་བརྗོད་ཆོག གཞན་འདྲེན་སྟོན་གྱི་བསམ་བློ་བཏང་ན་དེ་དུས་ཕལ་ཆེ་རན་པ་མ་གཏོགས། རང་ཐར་བའི་སྐམ་སར་མ་ཕྱིན་པ་ཞིག་གམ་ཕྱིན་མ་དགོས་ཐར་བའི་ལམ་སྣེ་མ་ཟིན་པ་ཞིག་གིས་གཞན་མགོ་འདོན་པ་ཡིན་ཚུལ་བཤད་ཀྱང་ཁ་སྟོང་པའི་སྐད་ཆ་ཡིན། དེས་ན་འདི་དག་ཐུགས་ཉམས་སུ་བཞེས་ཏེ་རང་རྒྱུད་ཆོས་ཀྱིས་འདུལ་བའི་གནད་དེ་དག་གཙིགས་སུ་འཛིན་རྒྱུ་གལ་ཆེའོ། །དེ་རིང་ལེགས་པར་སྤྱད་ལས་ངེས་པ་རྣམ་དྲུག་གི་ཐ་མའི་ཚིག ཡེང་མེད་རྩལ་བསྐྱངས་ཡོན་ཏན་འཆར་བར་ངེས། །ཞེས་པ་འདིིར་འཇོག་རྒྱུ་བྱེད། སང་ཉིན་རང་བཞིན་ཤེས་པས་སྐྲག་པ་རྣམ་དྲུག་ནི། །ཞེས་པ་ལས་མགོ་འཛིན་ཏེ་བཤད། འདིའི་ཉིན་སྲིབ་ཀྱི་དངོས་གཞིའི་ཉམས་ལེན་པ་རྣམས་ཀྱིས་དངོས་གཞིའི་ཉམས་ལེན་གཙོ་བོར་བྱས་ནས་འདི་ལ་ཞོར་གཟིགས་རེ་མཛད་ནས་རྒྱུད་ལ་སྦྱོར། ཐོས་བསམ་པ་དག་དང་གཞན་མཛད་ཕྲིན་ཅན་ཚོས་ཚར་རེ་གཉིས་གཟིགས་ཐུབ་ན་བཟང་། དོན་ཐུགས་རྒྱུད་ལ་འབྱོར་བའི་སྐུལ་མ་ཡོང་ངེས། དེ་མིན་གྱི་ཇོ་སེར་ཆོས་ཞུ་བ་འདི་ཉིད་གཙོ་བོའི་དོན་གཉེར་དུ་འཛིན་མཁན་རྣམས་ཀྱིས་མ་མཐའ་ཡང་སྐྱོར་སྦྱང་ཚར་བཅུ་རེ་ཙམ་བྱེད་ནས་བལྟ་དགོས། རྒན་ཞུགས་དག་དང་ཆོས་ཞུ་གསར་བུ་བ་ཀློག་ལ་བྱང་ཆུབ་མེད་པ་དག་གིས་གཞན་ལ་འདོན་བཅུག་ནས་ཚར་གྲངས་ཉན་པ་དང་། རང་གིས་ཀྱང་ཡིག་ངོ་ཆོད་པ་དག་གིས་ཞིབ་ཏུ་ལྟོས་ལ་དོན་ལ་བསམ་བློ་ཐོང་། མདོར་ན་ཐམས་ཅད་ཀྱིས་དོན་གྱི་རྩད་བདར་ཆོད་པ་ནི་གལ་ཆེའོ། །དགེ་བསྙེན་ཕོ་མོ་དག་གིས་ཀྱང་འདོན་ཤེས་མཁན་རྣམས་ཀྱིས་ཐོན། མི་གོ་ས་གྲྭ་བ་སེར་མོ་པ་སུ་ཐུག་ལ་དྲིས། འདི་ཁྲོམ་དབང་ཞུས་པ་དང་འདྲ་བར་ཆུ་ཐིགས་གཅིག་མིད་ཟིན་པ་ལས་ཅུང་མེད་པ་ལྟ་བུ་མ་ཡིན། འདི་ཐོས་ན་ཐོས་པའི་ཕན་ཡོན་མེད་པ་མིན་ཡང་། གཙོ་བོ་དོན་གོ་ནས་རང་ཉམས་སུ་བསྟར་དགོས། གལ་སྲིད་འདིའི་དོན་གོ་ན་རིན་ཆེན་གོང་ཆེན་བྱིན་ཡང་ཉོ་རྒྱུ་མི་ལོན་པའི་ཕན་པ་ཆེ་ཞིང་རིན་ཐང་ལྡན་པ། སྐོར་བ་སྐོར་བྱེད། མཆོད་མེ་འབུལ་བྱེད། བསྡད་ན་འདུག་རྟེན། སོང་ན་འགྲོ་རྟེན། སྐྱིད་ཀྱི་གོང་གནོན། སྡུག་གི་སྐྱོ་གྲོགས། སེམས་ལ་བཞག་རྒྱུའི་ཚིག རུམ་དུ་བཅུག་རྒྱུའི་བྲོ། ནང་དོན་ཅན་འདི་ལ་ཡོད་པ་ཡིན། དེ་ཡང་གོ་སླ་ཉན་བདེ་ཚིག་མང་པོ་ཡས་དང་མས་ཀྱི་ཐོ་གཏུག་མི་དགོས་པར། ཐད་ཀར་ཚིག་གཅིག་བཤད་པ་དེ་བསྒྲུབས་ན་ཆོས་དྲུག་ཚན་རེ་རེའི་ནང་དུ་དམ་པའི་ཆོས་ཀྱི་མཛོད་ཡོངས་རྫོགས་རྫོགས་ནས་ཚང་ཡོད་པས་ཆེ་ཐོབ་ཆེ་ཡིས་འཚེངས་ཆུང་ཐོབ་ཆུང་གིས་འཚེངས་པའི་མན་ངག་གི་ཆོས་ཡིན་པས། གཏམ་ངན་རྣ་སྡུག་ཅན་གྱི་བུ་ཚ་ངན་པ་དང་གཤིབ་པ་བས་འདིའི་ཚིག་ལྷུ་རེ་རེ་སྔས་སུ་སྦྱར་ནས་དེ་ལ་ལྟོས་དང་། ནང་གི་གྲོལ་བྱེད་ཡིན། སེམས་ཁམས་ཀྱི་སྨན་ཡིན། དགེ་བསྙེན་ཕོ་མོ་དག་མང་ཤོས་ལོ་ན་ཡར་སོན་ལ་ཐོན་པ་དང་། མང་ཆེ་བ་ནད་པ་རྒས་པ་ཡིན་པས། གནའ་བོའི་ལུགས་སྲོལ་དེ་ད་ལྟའི་མིའི་བསམ་ཚུལ་ལ་འཕྲོད་པ་མིན་པས་ཁྱིམ་བཟའ་བའི་མགོ་འཛིན་མི་འཁྱོངས། མི་རྒན་རྟ་རྒན་ཁྱི་རྒན་དག་གི་འདང་རྩིས་ཇེ་ཞན་དུ་འགྲོ་བ་ནི་འཇིག་རྟེན་འཁོར་བའི་ཆོས་ཉིད་ཡིན་པས། ཁྱོད་གཅིག་པུས་མི་ཚད་པར་ཐམས་ཅད་དེའི་རང་བཞིན་ཡིན། འཆི་བདག་གིས་རྒས་པའི་བར་དུ་སྒུག་པ་ནི། རབ་ཏུ་གྱུར་པ་ཚེ་རིང་ལོ་བརྒྱའི་སྨོན་ཡུལ་ཡིན་ཡང་། རྒས་མེད་ལང་ཚོ་ལྡན་པའི་ལོ་བརྒྱ་འདྲ་ཐོབ་ན་མ་གཏོགས་རྒ་རྒས་ཕལ་ཆེ་ནི་ཤི་རྒྱུ་ལ་སྨོན་དགོས་པ་བྱུང་བ་ཡིན། དེས་ན་སེམས་རྟེན་ཆོས་ཀྱིས་གྱིས། ཆོས་ཀྱི་ནང་ནས་ཀྱང་སེམས་ཀྱི་ཆོས་སྒྲུབ་ཤེས་པར་གྱིས་དང་། ལུས་ངག་གཉིས་ཀྱིས་སྐོར་བ་བསྐོར་བ་དང་། ཕྱག་འཚལ་བ་དང་། འདོན་པ་བཏོན་པ་དང་། སྙུང་གནས་བསྡད་པ་རྣམས་ཀྱི་ཆོས་གོ་ཆོད་ཆེ་བ་ཞིག་ཏུ་འགྱུར་བ་ཡིན། དཔལ་སྤྲུལ་ཚང་གིས་རྒ་རྒས་ཟེར་བ་ནི་ལུས་བདེ་སེམས་བདེ་འཆི་ཆོས་མ་ཎི་རྡོག་རེ་ལ་འབད་འདུག་མཁན་ཞིག་དགོས་གསུངས་ཡོད། དུས་རྒྱུན་དུ་དམ་པ་གསུམ་དང་འབྲེལ་བའི་མ་ཎི་གསོག་བཞིན་བསྡད་ཀྱང་དེ་ཁོ་ནས་ཆོག་པ་ཡིན། མདོར་ན་དམ་པའི་ལྷ་ཆོས་དེ་སྨན་འཆི་གསོས་ཀྱི་བདུད་རྩི་དང་འདྲ་བར་སྡུག་བསྔལ་གྱི་ནད་ལས་ཐར་བྱེད། དཀོན་མཆོག་གི་སྐྱབས་གནས་དེ་ནམ་མཁའི་ཉི་མ་དང་འདྲ་བར་ཕྱོགས་ལྷུང་མེད་པ། ལས་རྒྱུ་འབྲས་དེ་རྡོ་བརྐོས་ཀྱི་རིི་མོ་དང་འདྲ་བར་ནོག་རྒྱུ་མེད་པ་དེ་འདྲ་བར་ཡིན་པས་ཆོས་བདག་མེད་ལ་སྙིང་རུས་སུ་ཆེ་ཡིན་པས་སྙིང་རུས་ཆེ་ན་དམ་ཆོས་འགྲུབ་པ་ཡིན། ལམ་གང་ནས་འཇུག་དགོས་མ་ཤེས་ན་ཁག་མེད་ཀྱང་འདི་ལྟ་བུའི་གདམས་ངག་མན་ངག་གི་ཚུལ་ཅན་གོ་སླ་ཉན་བདེ་བྱིན་རླབས་ཀྱི་བརྒྱུད་པ་མ་ཆད་པར་ཐོབ་དུས་གནད་མདོ་རྩ་རྡོག་རྡོག་གི་སྙིང་པོ་ལེན་པ་གལ་ཆེའོ།།

ཉིན་གསུམ་པའི་ཆོས་ཁྲིད།

རང་རེ་ནང་པ་སངས་རྒྱས་པའི་ཆོས་སྒོ་ལ་ཞུགས་ནས་ཐེག་ཆེན་མདོ་དང་སྔགས་ཀྱི་ཆོས་ཞུ་མཁན་གྱི་གང་ཟག་ཅིག་ལ། ཐོག་མར་མེད་དུ་མི་རུང་བ་སྦྱོར་བ་སེམས་བསྐྱེད་དམ་པ། བར་དུ་མེད་མི་རུང་བ་དངོས་གཞི་དམིགས་མེད་དམ་པ། རྗེས་སུ་མེད་ཐབས་མེད་པའི་བསྔོ་བ་དམ་པ་སྟེ། དམ་པ་གསུམ་དང་འབྲལ་མི་རུང་བ་ནི་མན་ངག་གི་གཞུང་འདི་ལས་གོང་ནས་གསུངས་པ་ལྟར་ཡིན་ལ། དེ་ཡང་རེས་འཇོག་ཅན་གཅིག་ཡོད་དུས་གཅིག་མེད་པ་དང་། མཚམས་རེར་ཡོད་ལ་མཚམས་རེར་མེད་པ་མིན་པར། དགེ་སྦྱོར་གང་བྱས་ཀྱི་ཐོག་མཐའ་བར་གསུམ་དུ་ཡོད་དགོས་པ་ཡིན། དེ་ཡང་སྙིང་རྗེ་ཆེན་པོའི་སྙིང་པོ་ཅན་གྱི་སྟོང་ཉིད་དོན་དམ་པའི་ཡེ་ཤེས་འོད་གསལ་འདུས་མ་བྱས་པ་སྤྲོས་པའི་མཐའ་ཐམས་ཅད་དང་བྲལ་བའི་དོན་ལ་བློ་སྦྱོང་བ་ཞིག་ལ་ཚང་བ་ཡིན། འོན་ཀྱང་དོན་དངོས་པོའི་ཐོག་ནས་གཞལ་ན་རང་གཞན་སུའི་ངོས་ནས་ཡིན་ཡང་དམ་པ་གསུམ་དང་འབྲེལ་བ་ནི་སྨོན་པའི་རྗེས་འགྲོ་ཙམ་ཞིག་ལས་མེད་པའི་ཚད་ལ་ཐོན་ཡོད་ཅིང་། དེ་རྒྱུ་རྐྱེན་གང་གིས་ལན་ཞེ་ན། ནང་སེམས་འདི་དམ་པའི་ཆོས་དང་ཁ་ཐག་རིང་ནས་བདག་འཛིན་གྱི་འགོང་པོ་འདི་ཡུལ་ཕུད་མ་ནུས་པ་དང་། ཆོས་དང་སེམས་རྒྱུད་འདྲེས་པའི་གོ་སྐབས་ཡོད་མ་མྱོང་བ་དང་། གཞན་ཕན་བྱང་ཆུབ་སེམས་ཀྱི་སྟོབས་ཞན་པའི་དབང་གིས་སྐྱོན་འདི་བྱུང་བ་ཡིན། དེ་ལྟ་བུའི་སྐྱོན་བྱུང་ཚུལ་ལ་བསམ་བློ་བཏང་ན་རང་རྒྱུས་རང་ལ་མི་ཆེ་བ་ཅི་ཞིག་ཡོད་དེ། བདག་འཛིན་རྨོངས་པའི་གདོན་དེས་ཟིན་ནས་སྐྱོན་དུག་རོ་ཁོག་ལ་ཡིབ་ཡོད་པའི་ནད་དེ་ཐེར་འདོན་མ་ཐུབ་པ་དང་། དེ་ལ་ཕན་པའི་ཆོས་ཀྱི་སྨན་དང་གཏར་སྲེག་གི་དཔྱད་ཀ་རྣམས་ལས་གཅིག་ཀྱང་བྱེད་མ་ནུས་པས་བྱུང་བ་ཡིན། དེས་ན་ཆོས་སྒྲུབ་པ་ནི་སྐྱོན་སེལ་ཡོན་ཏན་ཡར་ལྡན་དུ་འགྱུར་བྱེད་ཀྱི་ཐབས་ཤིག་ཡིན་པས། དེས་རང་གཞན་འདི་དང་ཕྱི་མའི་བདེ་སྐྱིད་སྐྲུན་ཐབས་ཤིག་བྱེད་དགོས་པ་ཡིན། དེས་ན་དགོན་པ་ཞིག་གམ། ཆོས་སྡེ་ཞིག་གམ། སྡེ་ཕྱོགས་ཤིག་གམ། ཁྱིམ་ཚང་ཞིག་གི་ཇོ་སེར་དང་། ཁྱིམ་པ་ཕོ་མོ་སྤྱི་དང་སྒེར་ལ་མ་ལྟོས་པ་སུ་ཡིན་རུང་། ནང་གི་དྲོད་བཅུད་དེ་སེམས་ཀྱི་ནང་ནས་ཚུར་ཡོང་བའི་ཕྱོགས་ལ་ཡིད་ཆེས་བྱས་ནས། དམ་པའི་ཆོས་ལ་རྒྱབ་རྟེན་བཅོལ་ན། དུས་དང་རྣམ་པ་ཀུན་ཏུ་བག་དྲོ་ཤ་རེ། ཡིད་དྭངས་སང་ངེའི་དགའ་སྐྱིད་སྤྲོ་སེམས་དེ། ནུབ་པ་དང་ཟད་དུ་མེད་པ་ནི་རིན་པོ་གཏེར་ཁ་ཟད་མེད་ཅིག་རང་ཁྱིམ་ན་ཡོད་པ་དང་འདྲ་བའམ། ནང་གི་ནུས་པས་བག་དྲོ་བའི་དྲོད་བཅུད་ཀྱི་འོད་སྣང་ཞིག་རང་ཤུགས་ལ་ཡོད་པ་ཉི་མའི་དཀྱིལ་འཁོར་ལ་དྲོད་རང་ཆས་སུ་ཡོད་པ་དང་འདྲ་བར་བློ་གཏད་ས་གཅིག་ཆོག་ནང་གི་ཉི་མ་སྙིང་ནས་ཤར་བ་ཡིན་པ་དང་། དེ་འདྲའི་ཆོས་སེམས་དེ་རྒྱུད་ན་ཡོད་པའི་དྲོད་བཅུད་མེད་ཚེ་དགོན་གྲོང་སེར་སྐྱ་ཕོ་མོ། སྤྱི་པ་སྒེར་པ་སུ་ཡིན་ཡང་བླ་སྲོག་མེད་པའི་མི་དང་འདྲ་བར། བག་མི་ཕེབས་ཤིང་སེམས་སྐྱོ་བ་དང་འཚུབ་སླ་བ་གྲོགས་མེད་ཁེར་རྐྱང་གི་སྣང་བ་ཅན། ཕོ་ངན་སེམས་དང་གཤིས་ངན་གནམ། ཞེས་པ་ལྟར་དུ་སེམས་གངས་དཀར་ནས་སྡུག་གི་སྨུག་ལང་ཚེ་གཅིག་ལ་དྭངས་རྒྱུ་མེད་པ། ཟུར་དེ་ནས་ཚག་སྒྲ་ཆེན་པོ་ཞིག་གྲགས་ཀྱང་ང་ལ་གནོད་པ་བྱེད་མཁན་ཞིག་རེད་བསམས་ནས་འབྱུང་བ་དགྲ་རུ་ལངས། སྣོད་བཅུད་འཚེ་བ་ཅན་དུ་སྣང་ནས། ཕྲག་དོག་དང་འགྲན་སེམས། བརྣབ་སེམས་དང་གནོད་སེམས་ལ་སོགས་པའི་གནོད་འཚེ་གདུག་རྩུབ་ཀྱི་བསམ་སྦྱོར་ཐམས་ཅད་ཡར་བསླངས་ནས། ལུས་མཐོ་རིས་མིའི་འཇིག་རྟེན་ན་ཡོད་ཀྱང་སྣང་བ་ལྷ་མ་ཡིན་དང་ངན་སོང་གི་རྒྱུ་མཐུན་དང་མ་བྲལ་བ་ནི། འཇིག་རྟེན་ཁྱིམ་ནག་གི་མིའི་ནང་ན་ཡོད་པས་མ་ཚད་པར། དགོན་པའི་བླ་གྲྭའི་ནང་ན་ཡང་ཤིན་ཏུ་གཡེངས་པ་ལ་ལས་ཕྱི་ཚུལ་ལ་སྟོན་པའི་ན་བཟའ་གོས་ངུར་སྨྲིག་གི་རྒྱལ་མཚན་གྱི་རྟགས་རེ་འཆང་ཡོད་ཀྱང་། གཏམ་གྱི་བཤད་སྟངས་ལ་ཆ་བཞག་ན་དམ་པའི་ཆོས་ཀྱི་ཕྱོགས་ཀྱི་དྲི་ཙམ་མི་བྲོ་བའི་ཐོག་ཏུ་འཇིག་རྟེན་ཁྱིམ་པའི་སྐད་ཆ། དེ་ཡང་རྒྱུ་འབྲས་ཡང་དག་གི་ལྟ་ལ་དད་པ་ཅན་གྱི་གཏམ་མ་ཡིན་པར། ཚོང་བརྒྱབ་རབས་ཁེ་ཁུག་རབས་རྒྱག་རེས་འཛིང་རྩོད་བྱས་རབས་ཁོ་སྡུག་རབས་ང་བཟང་རབས་སོགས་དང་། དེའི་ཞོར་དུ་དཀོན་མཆོག་ལྷ་ཁང་གསུང་རབ་སོགས་དཔང་དུ་བཙུགས་ནས་མནའ་ཆེན་པོ་ཁ་ནང་དུ་མི་ཤོང་བ་སྐྱེལ་བར་བྱེད་ཅིང་། ད་དུང་རང་སྐྱོན་མི་མཐོང་བ་མ་ཚད་ཡར་འདིའི་ཁ་ཆེ་ཚུལ། མར་འདིའི་སྣ་རིང་ལུགས་སོགས་ཀྱིས་ཉིན་མཚན་གཉིས་ཀ་བག་མེད་སྤྱོད་འཆལ་ཁོ་ནས་འདའ་བས་མི་ཚེ་བཅད་ནས། ཁྱིམ་པ་སུན་འབྱིན་པས་མ་ཟད། ཆོས་གོས་འོག་གི་དུག་མདའ་ལ་ལས་རུམ་གྲི་ཡང་སྤྲད་ནས་གཟུར་འགྲོས་བྱེད་པ་དང་། ཡང་སྐྱེས་ཕོ་མོ་ཁྱིམ་ན་གནས་པའི་གང་ཟག་ཅིག་ལ་ཆ་མཚོན་ན་ནང་གི་དྲོད་བཅུད་སེམས་ཀྱི་རྒྱབ་རྟེན་མེད་པའི་རྐྱེན་གྱིས། ཡ་རབས་མ་རབས་ཀྱི་ལས་ཚུལ་གང་ཡིན་མ་ཤེས་པར། རང་ཉིད་ཡག་བྱེད་རྒྱན་བྱེད་དང་སྐྱིད་མཐའ་རིང་གི་མདུན་ལམ་གཉེར་བ་ལ་རྨོངས་པའི་དབང་གིས། མི་ཚེ་དོན་ལྡན་བྱེད་པའི་ཤེས་རིག་ཡོན་ཏན་སྦྱོང་བ་བསྐྱུར་ནས་མ་རབས་ཀྱི་ངན་སྤྱོད་ལ་འཇུག་པ་དང་། དེ་ཡང་ངན་ཆུ་སྣ་ཐུར་དུ་རྒྱུག་པ་ལྟ་བུ་བྱུང་བ་ནི། ཐོག་མེད་ནས་ད་ལྟའི་བར་དུ་ལས་ཉོན་གྱི་གོམས་ཤུགས་ཆེ་ཞིང་གོམས་ཡུན་རིང་བ་དང་། དེའི་བག་ཆགས་མཐུག་པའི་དབང་གིས་ལོབས་ཀྱང་སླ་བ་ཡིན་པ་དང་། བཟང་ཡ་རབས་དམ་པའི་ལུགས་སྲོལ་ཞིག་བསླབ་དགོས་ཚེ། བཟང་གོམས་ཀྱི་བག་ཆགས་རྒྱུད་ལ་མེད་པའི་སྟབས་ཀྱིས་དཀའ་སྣང་དུབ་སྣང་ཡོད་པ་ཡིན། སྤྱིར་ཁྱིམ་པ་ཕོ་མོ་རྣམས་ཀྱིས། ཁྱིམ་ཕྱུགས་ལས། ཚོང་ཁེ་བསྐྱེད། རྒྱུ་ནོར་རྫས། ཟས་གོས་གསོག་བྲུན། ཁྱིམ་བཟའ་བའི་ཁ་གསོ་རྒྱབ་འགེབས་སོགས་ཐོན་དགོས་ཏེ། དེ་མ་ཐོན་ཚེ་གཞིས་འཁོར་བ་མ་ཟིན་པ་རེད། དེ་འདྲ་དེ་ནི་བྱ་བྲལ་མ་རེད་མདོ་ཤོར་རེད། འོན་ཀྱང་ཆོས་འཇིག་རྟེན་གཉིས་ཀའི་བྱ་བ་གང་བསྒྲུབ་དགོས་ཀྱང་ཤེས་རིག་ཡོན་ཏན་ལ་སྦྱོང་བ་མ་བྱས། ལས་རྒྱུ་འབྲས་ཀྱི་འགྲོ་སྟངས་མ་ཤེས། དམ་པའི་ཆོས་ཀྱི་གནད་མ་རིག་སྟེ། རང་གིས་རང་ཡང་དག་པའི་ལམ་ལ་མ་བཞག་ཚེ། མིའི་ལུས་རྟེན་བླངས་ཀྱང་མིའི་ལས་ཚུལ་དང་མིའི་འགྲོ་སྟངས་མ་ཤེས་ཚེ། མི་གཞན་གྱིས་དེ་མི་གྲལ་དུ་མི་འཇོག་པར་འགྱུར་བ་ཡིན། དེ་ཡང་དཔེར་ན་མི་ཞིག་དང་ཟོག་ཅིག་གི་འཚོ་བ་སྤྱོད་སྟངས་ཀྱི་ཐབས་ཤེས་མི་འདྲ་བ་ཡིན་ཏེ། རྟ་ཟོག་སེམས་ཅན་གྱིས་སྔ་བསམ་ཕྱི་འདེང་གི་ཐབས་བཀོད་མི་ཤེས་པས་སྔུན་ན་ཡོད་པའི་རྩྭ་ཟ་ཆུ་འཐུང་ཙམ་ལས་འཁྱག་ལྟོགས་གང་བྱུང་ཡང་སྒུར་རེ་འདུག་པ་ལས་མེད་ཀྱང་། མི་ཞིག་ཡིན་ན་ཅི་འདྲའི་ཐབས་རྡུགས་ཀྱང་འཁྱགས་ནས་འཁེང་བ་ལ་ཕྱོགས་དུས་ཁོ་རང་གད་ཕུག་གམ་ཤིང་དྲུང་ལྟ་བུ་ཞིག་ཏུ་ཕྱིན། མེ་ཤིང་འཐུས་ནས་མེ་སྒོང་བཏང་སྟེ་ཁ་ལག་བསྲོ་ཨེ་ཤེས་ལྟ་བ་ཡིན། དེ་དང་འདྲ་བར་མི་དང་མིའི་བར་དུ་བཟང་ངན་བྱུང་བ་ནི་རྩ་བའི་བདེ་སྐྱིད་ཀྱི་ས་བོན་དེ་སྐྲུན་ཐབས་མ་ཤེས་ཤིང་དེ་ལ་བློ་ཁ་མ་ཕྱོགས་ནས་མ་སྦྱངས་པས་ཡིན། སྤྱིར་སྐྱིད་སྡུག་སྔོན་ལས་ལ་རག་ལས་པ་ཡིན་ཡང་། ལས་དཀར་ནག་གསོག་མཁན་གྱི་བྱེད་པ་པོ་རང་ཉིད་ལ་ཐུག་ཡོད་པས། མཛོ་མོ་བཤས་པས་མི་དགའ་བཞོས་པས་དགའ་ཞེས་པ་ལྟར་དུ། སྔར་བསགས་ཀྱི་འབྲས་བུ་ཅུང་ཟད་ཅིག་ཡོད་པ་དེ་ཟད་དུ་བཅུག་པས་མི་དགའ་བར་བསོད་ནམས་ཀྱི་ཞིང་དུ་བཏབ་ནས། དེའི་འབྲས་བུ་ལོ་ཏོག་རྒྱུན་མི་ཆད་པ་ཞིག་ཡུན་དུ་ལོངས་སྤྱོད་རྒྱུ་ཡོད་པ་དེས་དགའ་བ་ཡིན། དེ་ཡང་བྱ་བའི་སྒྲུབ་ཐབས་ཤེས་མིན་ལ་རག་ལས་ཡོད་པས། ལ་ལས་ལོག་པའི་བློ་རིག ངན་གཡོ་སྒྱུ། རྐུ་འཕྲོག་བཅོམ་གསུམ། རྔོན་རི་དྭགས། ཤོ་བག་རྒྱལ་སྐུག་སོགས་ཀྱིས་མགོ་གཡོག་མི་ལ་བྱེད་ས་ནས་ཐ་མ་རང་མགོ་ལ་ཆུ་དྲངས་ནས་ཆེ་ན་ཚེ་སྲོག་ཤོར། འབྲིང་ན་ཁྱིམ་གཞིས་བརླགས་ནས་དོམ་བུ་ལོན་གྱི་འོག་ནས་འབུད་རྒྱུ་མེད་པར་གྱུར་པ་དང་། ཆུང་ན་ཡང་རྡུང་ངན་རེག་ནས་ཁ་སྐྲང་མིག་སྐྲང་དུ་ཡོད་པ་དེ་འདྲར་འགྱུར་བ་ཡིན། ཕ་དོམ་མང་ཚང་གི་བུ་ཚ་སྡུག །དབང་མགོ་མང་ཚང་གི་ཁྱིམ་ཚང་སྡུག །ཅེས་པ་ལྟར་དུ་རྒན་རབས་ལ་བཀུར་བསྟི་གཅེས་སྐྱོང་མི་ཤེས་ཤིང་བུ་ཚ་ལ་བཟང་པོའི་ཡོན་ཏན་སློབ་མི་ཤེས་པའི་ཁྱིམ་ཚང་ལ་ཡག་པོ་ཡོང་རྒྱུ་མེད་པར་མཐར་སྡུག་པོར་འགྱུར་བ་ཡིན། དེ་ཡང་རང་བྱས་ལས་ཀྱིས་ཉོས་པ་ཡིན་ཏེ། སྐྱིད་པོ་མིན་པ་མ་བསམས་ཡང་། སྡུག་པོ་མིན་པ་མ་ཐོབ་པ་ནི་རང་ཉིད་བྱ་བའི་ཐབས་ལ་མ་མཁས་པའི་མ་གོས་ལན་ཆགས་ཀྱིས་དེ་འདྲར་སོང་བ་ཡིན། སྤྱིར་སོ་སོ་སྐྱེ་བོ་ཞིག་ཡིན་དུས་རང་གཞན་སུ་ཡིན་ཡང་ནོར་བ་འབྱུང་རྒྱུ་ཡོད་ལ། འོན་ཀྱང་ནོར་བ་བཅོས་མ་ཤེས་ནས་ནོར་བ་རྒྱུན་འབྱམས་སུ་སོང་ན་སྡུག་བསྔལ་མཐའ་མེད་ཀྱི་ལོག་ལམ་དུ་འཁྲིད་པ་ཡིན་པས། ནོར་བ་གཏན་ནས་མི་ཤོར་བ་དང་ནོར་བ་ཤོར་ན་བཅོས་ཤེས་པ་གཉིས་ཀ་མཆོག་ཡིན་པར་གསུངས་ཡོད། དེས་ན་དགོན་དང་གྲོང་། སྤྱི་དང་སྒེར། སེར་མོ་དང་སྐྱ་བོ། ཕོ་མོ་དང་རྒན་གཞོན་ལ་མ་ལྟོས་པར་ནང་གི་དྲོད་བཅུད་ཀྱི་འོད་སྣང་ནུབ་པ་མེད་པ་ཞིག རང་གི་ཁོག་ནས་འབྱུང་བར་བྱེད་པ་ལ་དམ་པའི་ལྷ་ཆོས་འདི་ལས་མ་གཏོགས་གཞན་ཞིག་ནས་རྙེད་དགོས་ན་ཁམས་གསུམ་སྲིད་པ་གསུམ་པོ་བསྐོར་ཀྱང་རྙེད་དུ་མེད་པ་ཡིན། དེས་ན་བོད་མགོ་ནག་ཆོས་ལྡན་གྱི་ས་ཆ་ལ་སྐྱེས་པའི་མི་ཞིག་ཡིན་ནས་བཟུང་ཆོས་རྣ་བས་མ་གོ་བ་ཞིག་ཨེ་ཡིན་ཡང་། ཆོས་ཟུར་དུ་བཞག་ནས་ཆོས་རྒྱུས་མ་ལོན་པ་དང་ཨེ་ལོན་སྙམ་པའི་བསམ་པ་ཙམ། རྨོངས་པའི་གཞན་དབང་གྱུར་ནས་སྐྱེ་མ་མྱོང་ནས་མ་ཤེས་པ་རེད། ཆོས་སྒྲུབ་ཅེས་པའི་ཁ་ཡིས་འདོན་པ་བཏོན་པ་དང་། ལུས་ཀྱིས་ཕྱག་སྐོར་བྱེད་པ། མཆོད་མེ་ཀོང་བུ་རྒྱུན་མི་གཅད་པ་རྣམས་ཀྱང་ཆོས་སྒྲུབ་པའི་གྲས་སུ་འགྲོ་བ་ཡིན་ཡང་། གཙོ་བོའི་ནང་གི་གཙོ་བོ་སེམས་ཀྱིས་ཆོས་བསྒྲུབས་ཏེ་སེམས་ཆོས་ལ་བསྒྱུར་བ་ནི་ཆོས་སྒྲུབ་ཚུལ་རབ་ཡིན། སེམས་ཀྱི་ཀུན་སློང་ཡག་པ་ཞིག་དང་། ཆོས་གང་བསྒྲུབས་ཐམས་ཅད་དངོས་གཞི་དམིགས་མེད་ཀྱི་ལྟ་བས་རྩིས་ཟིན་སོང་ན། མཆོད་མེ་དང་སྐོར་བ་ལ་སོགས་པ་བརྒྱ་སྟོང་ཁྲི་འབུམ་དུང་ཕྱུར་མང་པོ་རུ་འཕེལ་ཆེ་བ་ཡིན། དེ་ཡང་སྤྱིར་ལས་གང་ཡིན་ཡང་སེམས་འདི་གཙོ་བ་ཡིན་ཏེ། སེམས་ཀྱིས་ཕུང་པོ་འདི་ལ་ང་ཞེས་བཏགས་པ་སྟེ་མཚན་རྨི་ལམ་ཐུན་གཅིག་གི་འོག་ནས་ཀྱང་། ང་ཆུས་ཁྱེར་བའམ་ང་གཡང་ས་བྲག་མགོ་ནས་ལྷུང་ཡོང་སྙམ་ནས་དེ་ལ་གཟབ་ནས་སྡུག་བསྔལ་བཞིན་ཡོད་པ་ཡིན་ལ། སེམས་ནི་རྒྱལ་པོ་འདྲ་བར་ལུས་ངག་གཉིས་ཀ་ལ་བཀོད་འདོམ་བྱེད་མཁན་ཡིན་པ་དང་། ལུས་ངག་གཉིས་ཀ་སེམས་ཀྱི་བཀའ་ལ་ཉན་པའི་གཡོག་པོ་ལྟ་བུ་ཡིན་པས་སེམས་ཀྱིས་བཀོད་སྒྲིག་གང་བྱས་ཀྱང་དེའི་རྗེས་སུ་འབྲང་བ་ཡིན། དེ་ཡང་སེམས་དགའ་ན་ལུས་ཀྱིས་དགའ་བའི་འཛུམ་མདངས་ཕྱུང་ནས་དགའ་སྐྱིད་ཀྱི་གྲོ་གར་འཁྲབ་པ་དང་། སེམས་སྡུག་ན་ལུས་ཀྱང་དེ་དང་མཉམ་དུ་ཉམ་སྨད་ཅིང་ངུ་འབོད་ལ་སོགས་པ་བྱེད་པ་དང་། དེ་བས་ཐུ་ན་རང་སྲོག་རང་གིས་གཅོད་པར་བྱེད་པའང་གང་མང་མང་ཡོད་པ་ཡིན། དེ་བཞིན་དུ་སེམས་ཉོན་མོངས་དུག་ལྔའི་དབང་དུ་ཤོར་ན་སྡོམ་དམ་ཚིག་དང་འགལ་བར་བྱེད་པ་དང་། ཕ་མ་སློབ་དཔོན་ལ་མི་འཚམས་པའི་ལས་བྱེད་པ་དང་། གྲོགས་པོ་བློས་ཐུབ་སླུ་བ་དང་། རྒྱུ་འབྲས་ཁྱད་གསོད་བྱེད་པ་སོགས། མདོར་ན་བཅས་དང་རང་བཞིན་གྱི་ཁ་ན་མ་ཐོ་བ་སྡུག་སྡིག་པ་གཉིས་ཀ་ཁོ་ན་ལ་འབད་ནས། རྡོ་ལྕི་མོ་སྐེ་ལ་བཏགས་ནས་མཚོ་ཞབས་མེད་དུ་མཆོངས་པ་ལྟ་བུའི་ཤེས་བཞིན་དུག་འཐུང་བྱེད་པ་ཡིན། སེམས་ཀྱི་བསམ་བློ་གཏོང་ཚུལ་ལེགས་སོང་ན་མི་དགེ་སྡིག་ལ་འཛེམ། དཀར་པོ་དགེ་བའི་ལས་ལ་ཕྱོགས་ནས་ཚེ་འདི་ལ་སྐྱིད་ཅིང་ཕྱི་མ་ལ་བདེ་བ་སྟེ། ཤི་དུས་དག་ཞིང་དུ་དམིགས་པ་གཏད་ན་བདེ་བ་ཅན་དུ་ཕ་ཁྱིམ་བུ་འགྲོ་བྱེད་ཆོག་པ་སོགས་ཀྱང་། སེམས་ཀྱི་བྱེད་ལས་ཀྱི་སྟེང་ནས་ཡོང་བ་ཡིན། དེས་ན་སྐྱིད་སྡུག་ཐམས་ཅད་སེམས་ལ་རག་ལས་པ་ཡིན་པས། སེམས་བསམ་པའི་བློ་ཁ་དམ་པའི་ཆོས་ཕྱོགས་ལ་བསྐོར་ནས། བློ་གཏད་ས་བླ་མ་དཀོན་མཆོག ལས་སྐྱིད་སྡུག་སྔོན་བསགས་ཀྱི་བསྐོས་ཐང་ཡིན་པའི་རྒྱུ་འབྲས་ཡིད་ཆེས་ཀྱི་དད་པ་ཡོད་པའི་ཐོག་ནས། སྔར་བྱས་ཚེ་རབས་གྲངས་མེད་ཀྱི་སྡིག་ལྟུང་སྦྱོང་ཐབས་དང་། རླབས་ཆེན་ཚོགས་གཉིས་རྗོགས་པའི་ཐབས་དང་མན་ངག་ཁྱད་པར་ཅན་ཤེས་པར་བྱས་ནས། ནང་སེམས་ཀྱི་གནད་འདི་ཤེས་ན་འདིའི་སྟེང་ནས་འཁོར་འདས་གཉིས་ཀའི་གདམ་ཁ། སྐྱིད་སྡུག་གཉིས་ཀའི་འགྲོ་ལམ་གྱི་བཞི་མདོ་ནས། ཕྱོགས་གང་དུ་བསྐོར་དགོས་ཤེས་པས་མི་ཚད། གོང་ནས་ཟད་མེད་ཡིད་བཞིན་རིན་ཆེན་གྱི་གཏེར་ལ་དཔེ་བཞག་ནས་བཤད་པའི་བསྡད་ན་སེམས་རྟེན། སོང་ན་འགྲོ་རྟེན། ཚེ་འདི་ཕྱི་གཉིས་ཀའི་ལམ་གོ་ཆོད་པར་བྱེད་པའི་རྒྱུ་གཅིག་ཆོག ཅི་བསམ་འགྲུབ་པའི་ནོར་བུ། གཏན་དུ་བདེ་བའི་བང་མཛོད་ཟད་མེད་ལ་ལོངས་སྤྱོད་ཆོག་པའི་སྒོ་ཞིག་འདི་ན་ཡོད་འདུག་སྙམ་པའི་འཕྲིག་ཚུད་དགོས་པ་ཡིན། དེའི་འཕྲིག་དེ་ཆོས་ས་ཆོས་ཡུལ་དུ་སྐྱེས་པའི་མི་ཞིག་ལ་མཚོན་ན་སྔ་མ་དགོས་འཕྱིས་ཡོད་པ་ཡིན། འོན་ཀྱང་ལྷུང་ལུགས་ངན་པ་ཁ་སྦུབ་ ཏུ་ལྷུང་ཡང་། ལྷུང་ས་བཟང ་པོ་བྱེ་མའི་ནང་། ཞེས་པ་ལྟར་ད་ལྟ་འཕྲིག་ཚུད་པ་དེ་ཡང་། ལས་མེད་ནང་གི་ལས་ཅན་ཡིན་པས། ཤི་ཐང་དགུ་ཆད་ན་ཐེངས་དགུ། ཐག་པ་ཆད་ན་མདུད་དགུ། ཞེས་པ་ལྟར་དུ་གཟབ་པར་བྱས་ན། ད་དུང་གསོན་འདི་ངོགས་རང་དབང་ཆེ་བའི་ས་ཆ་ན་ཡོད་པ་རེད་བསམ་ནས་རང་གིས་རང་ལ་སྙིང་ཕུར་ཞིག་བཏབ་སྟེ། རང་ཉིད་ཚེ་གཅིག་ཡུན་དུ་བདེ་བའི་གོ་འཕང་ཐོབ་པས་མི་ཚད། གཞན་འབྲེལ་ཚད་ཐམས་ཅད་ཀྱིས་ཀྱང་བདེ་བ་ཟད་མི་ཤེས་པ་རྙེད་དུ་ཡོད་པའི་མི་ཟད་རིན་པོ་ཆེའི་གཏེར་སྒོ་འདི་ཕྱེ་དགོས་འདུག་བསམས་ནས། དམ་པའི་ཆོས་ལམ་ལ་ཞུགས་པ་དེ་ཉིད་གལ་ཆེ་བ་ཡིན། དེའི་ལྡེའུ་མིག་མ་ནོར་བ་གཅིག་པུ་ནི་རྒྱལ་བའི་བཀའ། མཁས་པའི་གསུང་རབ། དམ་པའི་མན་ངག མདོ་སྔགས་ཀྱི་ཆོས་འདི་དག་ཡིན་པས། དེ་ལ་འཇུག་དུས་ཐོག་མར་ཐོས་པ་དོན་དུ་གཉེར་དགོས་པ་ཡིན། ཐོས་པ་ཙམ་གྱིས་མི་ཆོག་པར་ཐོས་དོན་བསམ་དགོས་པ་དང་། བསམ་པ་གཅིག་པུས་མི་ཆོག་པར་བསམ་དོན་བསྒོམས་ནས་རང་རྒྱུད་ལ་སྦྱོར་དགོས་པ་ཡིན། ད་དེ་ལྟ་བུའི་དམ་པའི་ཆོས་འཁོར་བའི་འཇིགས་པ་ལས་སྐྱོབ་ཅིང་། དུག་ལྔའི་ནད་སེལ་བའི་ཐབས་དང་གདམས་པ་རྒྱ་མཚོ་ལྟ་བུ་ཞིག་ཡོད་པ་ལས། འདིར་སྐབས་སུ་བབ་པ་གང་ཞིག་གསན་པར་བྱ་བ་ནི། ཀུན་མཁྱེན་བླ་མ་རྫོགས་པའི་སངས་རྒྱས་དེའི། །ལེགས་བཤད་བདུད་རྩི་ཤིན་ཏུ་དག་པ་འདི། །ལུང་གི་ཆོས་མཆོག་ཞལ་ནས་གསུངས་བའི་བཀའ། །མི་ཤེས་པ་དེ་བ་གླང་ཡ་སོ་ཅན། །ཞེས་གསུངས་པ་ལྟར་དུ་ཀུན་མཁྱེན་བླ་མ་རྫོགས་པའི་སངས་རྒྱས་ཀྱི་ཐུགས་ཀྱི་གསང་མཛོད་ལས་ཕྱུང་། ཞལ་གྱི་བུམ་བཟང་ལས་ཐོན་པའི་ལེགས་བཤད་ཡང་དག་པ། ནད་འཆི་གསོས་ཀྱི་བདུད་རྩི་ལྟ་བུའི་ལུང་གི་ཆོས་མཆོག་ཏུ་གྱུར་པ་འདི། འཆོས་སྐྱོབ་ཀྱི་ཡོན་ཏན་གཉིས་དང་ལྡན་པས་བསྟན་བཅོས་ཀྱང་ཡིན་པས་མ་ཚད། རྫོགས་པའི་སངས་རྒྱས་ཀྱི་ཞལ་ནས་གསུངས་པའི་བཀའ་དང་ཡང་རྣམ་དབྱེར་མ་མཆིས་པ་ཞིག་ཡིན་ན། གལ་སྲིད་དེ་མ་ཉན་ཚེ་ཡ་སོ་ཡོད་པ་ཙམ་ལས་བ་ལང་ཞིག་དང་འདྲ་བས་ངུར་སྒྲ་སྒྲོག་བཞིན་འགྲོ་རིགས་སོ། །ཞེས་པ་དང་། སྐལ་པ་བཟང་དག་རབ་དགའ་སྐྱེད་བྱོས་ལ། །སངས་རྒྱས་མཐོང་བའི་ངེས་ཤེས་གྱིས་ཤིག་དང་། །ཀུན་མཁྱེན་བླ་མའི་ལེགས་བཤད་འདི་མཐོང་ལས། །སངས་རྒྱས་མཇལ་ཡང་ཅུང་ཟད་ཡོད་རེ་ཀན། །ཞེས་དཔལ་སྤྲུལ་ཚང་གིས་འུ་ཅག་ལ་སྐལ་བ་བཟང་པོ་ཅན་རྣམས་ཞེས་བོས་ནས། སངས་རྒྱས་མཇལ་ཐལ་བསམ་པའི་འདུན་པ་ཡིས་དགའ་དགའ་གྱིས་དང་ཆོག་སྟེ། སངས་རྒྱས་དངོས་སུ་མཇལ་ཡང་གསུང་ཡོང་རྒྱུ་ཀུན་མཁྱེན་བླ་མའི་ལེགས་བཤད་འདིའི་ཕན་དུ་ཅང་ཡོད་རེ་ཀན་ཞེས་འགག་ལ་ཐུག་པའི་གསུང་གནང་བ་ཡིན་ན། དཔལ་སྤྲུལ་ཚང་གི་རྡོ་རྗེའི་གསུང་ལ་བློ་འགེལ་མི་རུང་བ་ནི་མི་སྲིད་པས། ཀླད་པ་སྲ་མོ་རྡོ་འདྲ་འདྲ་དང་། དྲན་པ་ལྐུགས་ཐོ་བྱོལ་སོང་འདྲ་བ་ཞིག་མིན་ན་བ་སྤུའི་འཁྲི་ཤིང་མི་ལྡང་བའི་ཐབས་ཤིག་མེད་པ་ཡིན། དེ་ལྟ་བུའི་ཀུན་མཁྱེན་རྒྱལ་བའི་དབང་པོ་ཀློང་ཆེན་པའི་གསུང་མཛོད་ཆེན་རིན་པོ་ཆེ་རྣམ་པ་བདུན་གྱི་ནང་ནས་མན་ངག་རིན་པོ་ཆེའི་མཛོད་འདི་ཉིད་འཆད་པའི་སྐབས་ལས། བསྟན་བཅོས་སྤྱིའི་འཆད་ཐབས་ལྟར་དུ་ཐོག་མཐའ་བར་གསུམ་དགེ་བའི་ཆིངས་ཆེན་པོ་གསུམ་གྱིས་བཅིངས་ནས་འཆད་པའི་ནང་ནས་ཐོག་མར་དགེ་བ་ཀླད་ཀྱི་དོན་སོང་ནས། བར་དུ་དགེ་བ་གཞུང་གི་དོན་ལས་ཀྱང་། འགའ་ཞིག་སོང་ནས་དེ་རིང་གི་སྐབས་སུ་བབ་པ་ནི།

༤༢ རང་བཞིན་ཤེས་པས་སྐྲག་པ་རྣམ་དྲུག་བསྟན་པ།

རང་བཞིན་ཤེས་པས་སྐྲག་པ་རྣམ་དྲུག་ནི།།

འཇིག་རྟེན་བྱ་བ་གླང་ཆེན་འདམ་ཚུད་དང༌།།

གཉེན་འབྲེལ་བརྩེ་གདུང་བཙོན་རའི་སྲུང་མ་དང༌།།

ཚེ་འདིའི་ལོངས་སྤྱོད་ཁྱི་རྒན་རུས་འཆའ་དང༌།།

མ་རིག་སྡིག་སྤྱོད་གཡང་ཁའི་དམུས་ལོང་དང༌།།

དུག་ལྔའི་ཉོན་མོངས་དུག་སྦྲུལ་གཙེས་པ་དང༌།།

ཡུལ་དྲུག་ཆགས་པ་སྦྲང་བུ་རྩིས་ཟིན་ལྟར།།

སྐྲག་པ་བསྐྱེད་ནས་རིང་དུ་དོར་བ་གཅེས།།

ཞེས་གསུངས་པ་སྟེ། འཇིག་རྟེན་གྱི་བྱ་བ་འདི་དག་ཐམས་ཅད་ཅི་ཙམ་བསྒྲུབས་པར་བྱས་པ་དེ་བཞིན་དུ་འཁོར་བའི་གཏིང་ཇེ་ཟབ་ཏུ་འགྲོ་བ་ཁོ་ན་ཡིན་པའི་རང་བཞིན་ཤེས་པས་སྐྲག་པ་རྣམ་པ་དྲུག་ནི། དཔེར་ན་གླང་པོ་ཆེ་འདམ་རྫབ་ཆེན་པོའི་ཁྲོད་དུ་ཟུག་ཡོད་ན་གླང་ཆེན་གྱི་ལུས་ཆེ་ཞིང་གདོས་པས། ཇི་ཙམ་འཕགས་པ་དེ་ཙམ་དུ་ཕྱིར་འདམ་གྱི་གཏིང་དུ་ཇེ་ཟབ་ལ་ཚུད་པ་དང་འདྲ་བ་འདི་ལ་སྐྲག་པ་བསྐྱེད་ནས་འདོར་དགོས་པ་དང་། གཉེན་ཉེ་འབྲེལ་གྱི་བརྩེ་གདུང་ནི་འཁོར་བའི་བཙོན་ར་ལས་ཐར་དུ་མི་འཇུག་བའི་སྲུང་མ་དང༌འདྲ་བ་ཡིན་པ་དང་། ཚེ་འདིའི་ལོངས་སྤྱོད་འདི་དོན་ཆུང་ལ་དཀའ་ཚེགས་ཆེན་པོའི་འབད་པ་དོན་མེད་ཆུད་ཟོས་སུ་འགྲོ་བ་ནི། དཔེར་ན་ཁྱི་རྒན་གྱིས་འཆའ་བཞིན་དུ་ཡོད་པའི་རུས་པ་དེ་ལས་འཚོ་བྱེད་ལྟོ་ལ་ཕན་པ་ཡོད་པ་ཞིག་བཟའ་རྒྱུ་ལོན་གྱིན་མེད་ཀྱང་། ཞེན་ཆགས་ཀྱིས་དེ་ལ་འཐམས་ནས་བསྐྱུར་མི་བྲ་བ་དང༌འདྲ་བ་དང་། མ་རིག་པའི་དབང་གིས་སྡིག་ལ་སྤྱོད་པ་ནི་བྲག་གཡང་མཐོན་པོའི་མགོ་ནས་དམུས་ལོང་འགྲོ་བ་དང་འདྲ་བར། ཉེན་ཆེན་པོ་ངན་སོང་གི་གནས་སུ་ལྟུང་ལ་ཁད་པར་ཡོད་པ་དང༌། དུག་ལྔའི་ཉོན་མོངས་པ་ནི་དཔེ་དུག་སྦྲུལ་གདུག་པ་ཅན་གྱིས་གཙེས་ཤིང་གནོད་པ་བྱས་པ་དང༌འདྲ་ཞིང་། འདོད་པའི་ཡོན་ཏན་ཡུལ་དྲུག་ལ་ཆགས་པ་ནི་སྦྲང་བུ་རྩི་ལ་ཆགས་པའི་རྐྱེན་གྱིས་དེ་ལ་འབྱར་ནས་ཤི་བ་དང་འདྲ་བར་སྡུག་བསྔལ་སྣ་ཚོགས་མྱོང་བ་ཡིན་པས། འདི་དག་ལ་སྐྲག་པ་བསྐྱེད་ནས་རེ་རེ་བཞིན་རིང་དུ་འདོར་བ་གཅེས་སོ།།

༤༣ འཇིག་རྟེན་མི་ཆོས་ཉེས་པ་རྣམ་དྲུག་བསྟན་པ།

འཇིག་རྟེན་མི་ཆོས་ཉེས་པ་རྣམ་དྲུག་ནི།།

ཡུལ་མཁར་འཛིན་པ་དམྱལ་བའི་ལྕགས་ཁང་དང༌།།

བུ་དང་ཆུང་མ་རལ་གྲི་ལོ་མའི་ཚལ།།

རྒྱན་དང་གོས་བཟང་མེ་ལྕེ་འབར་བ་འདྲ།།

བཟའ་བཏུང་བསྲེགས་པ་ལྕགས་ཀྱི་ཐོ་ལུམ་དང།།

བྲན་གཡོག་ལས་མི་དམྱལ་བའི་སྲུང་མ་དང༌།།

ཁྲོ་དང་འཐབ་རྩོད་མདག་མེའི་སེར་བ་ལྟར།།

དགེ་ལེགས་འཇོམས་པའི་གནས་སུ་མཁྱེན་པར་མཛོད།།

ཅེས་གསུངས་པ་སྟེ། འཇིག་རྟེན་མི་ཆོས་ཀྱི་ཉེས་པ་རྣམ་པ་དྲུག་ནི། འདིའི་རིགས་ཚང་མ་ལ་ཐ་མའི་གསལ་བྱེད་ཀྱི་གོ་དོན་ཡར་སྦྱར་ནས་བཤད་དགོས་པས། ཡུལ་མཁར་མང་པོ་འཛིན་པར་བྱེད་ནས་ཆགས་ཤིང་ཞེན་པ་ནི། དམྱལ་བའི་ལྕགས་བསྲེགས་དམར་འབར་བའི་ཁང་པར་ཆུད་པ་བཞིན་དུ་མི་འདོད་སྡུག་བསྔལ་འབྱུང་བའི་གནས་ཡིན་པར་ཤེས་པ་དང༌། བུ་དང་ཆུང་མ་ལ་ཆགས་ཞེན་གཅེས་འཛིན་བྱས་ན་སྡུག་བསྔལ་སྣ་ཚོགས་མྱོང་བ་ཡིན་པས་རལ་གྲི་ལོ་མའི་ཚལ་དང་ཁྱད་མེད་པར་མ་ཟད་མ་འོངས་པར་རལ་གྲི་ལོ་མའི་ནགས་ཚལ་སྐྱེད་བྱེད་ཀྱང་དེ་ཡིན་པར་ཤེས་པ་དང་། རྒྱན་དང་གོས་བཟང་ལ་བརྟེན་ནས་ཆགས་སྡང་སྣ་ཚོགས་སྐྱེ་བ་ཡིན་པས་མེ་ལྕེ་འབར་བས་ལུས་ལ་རེག་པ་དང་འདྲ་བ་ཡིན་པར་ཤེས་པ་དང་། བཟའ་བཏུང་ལ་བརྟེན་ནས་ཆགས་སྡང་གི་ལས་སྣ་ཚོགས་ཤིག་བསགས་པ་ཡིན་པའི་དབང་གིས་ལྕགས་བསྲེགས་ཀྱི་ཐོ་ལུམ་ཟོས་པ་དང་འདྲ་བར་ཤེས་པ་དང་། བྲན་གཡོག་ལས་མི་འཁོར་དང་ཡང་འཁོར་དེ་དག་ནི། སྡུག་བསྔལ་གྱི་ནང་ནས་ཐར་དུ་མེད་པར་འཆིང་བའི་བྱེད་པོ་ཡིན་པས་དམྱལ་བའི་སྲུང་མ་དང༌འདྲ་བར་ཤེས་པ་དང་། ཁང་ཁྱིམ་ནོར་རྫས་བྲན་ཁོལ་དག་ལ་བརྟེན་ནས་ཁྲོ་དང་འཐབ་རྩོད་སྣ་ཚོགས་འབྱུང་བ་ནི་མདག་མེའི་སེར་བ་ལྟར་ཡིན་པ་དེས་ན་འཁོར་བ་འདི་ནི་མེའི་འོབས། དུག་སྦྲུལ་གྱི་ཚང་། ཟ་བར་བྱེད་པ་སྲིན་མོའི་གླིང་དང་གཅིག་ཡིན་པས། འདི་དག་ནི་ད་ལྟ་ནས་ངན་སོང་དང་འདྲ་བའི་སྡུག་བསྔལ་མྱོང་བར་བྱེད་པས་མི་ཚད། ཕྱི་མར་ངན་སོང་གི་གནས་ལ་དངོས་སུའང་འཕེན་པར་བྱེད་པས་དགེ་ལེགས་འཇོམས་པའི་གནས་སུ་མཁྱེན་པར་མཛོད་ཅིག་ཅེས་པའོ།།

༤༤ འདོད་ལ་ཉེས་པར་ཤེས་པའི་ཆོས་དྲུག་བསྟན་པ།

འདོད་ལ་ཉེས་པར་ཤེས་པའི་ཆོས་དྲུག་ནི།།

འདོད་པས་ཚེ་འདིར་ལུས་སེམས་གདུང་བ་དང༌།།

ཕྱི་མར་ངན་འགྲོ་གཏན་དུ་འཁོར་བར་འཁྱམ།།

ཀུན་དང་རྩོད་བཅས་མི་དགེ་ངང་གིས་འཕེལ།།

དགེ་བ་འགྲིབ་ཕྱིར་དམ་པ་རྣམས་ཀྱིས་སྨད།།

ཅེས་གསུངས་པ་སྟེ། འདོད་ལ་ཉེས་པར་ཤེས་པའི་ཆོས་དྲུག་བསྟན་པ་ནི། འདོད་པའི་དབང་གིས་ཟས་ནོར་ལ་སོགས་པ་ཅི་ཙམ་ཡོད་ཀྱང་ཡིད་མི་ཚིམ་པས་མ་ཚད། དེ་དག་དོན་གཉེར་གྱི་ཆེད་དུ་ལུས་སེམས་གཉིས་ཀྱི་སྡུག་བསྔལ་མྱོང་བ་ཡིན་ཏེ། རྒྱུ་ནོར་རྫས་བསགས་པ་དེ་ཡང་ན་ལུས་ཀྱི་དཀའ་ཚེགས་སྤྱད་ནས་དངུལ་ཆུའི་ཐིགས་པ་རེ་དང་བརྗེས་ཏེ་བསགས་པ་ཞིག་གམ། ཡང་ན་སེམས་ཀྱི་རྩོལ་བ་ཆེན་པོའི་ཐབས་བཀོད་སྣ་ཚོགས་འཐེན་ནས་ལུས་ཀྱི་དཀའ་ཚེགས་སྤྱད་པ་བས་ཀྱང་ཐུ་བ་ཞིག་བྱས་ནས་རྙེད་པའམ། ཡང་ན་ཨར་ཇག་རྐུན་མ་ལ་སོགས་ཁྲིམས་མཐུན་མ་ཡིན་པའི་རྒྱུ་རྫས་སྲོག་དང་བརྗེས་ནས་བསགས་པ་ཞིག་ཡིན་པས། ཚེ་འདིར་ལུས་སེམས་གཉིས་ཀ་གདུང་བར་བྱེད་པ་དང༌། ཕྱི་མར་ཐོག་མཐའ་བར་གསུམ་དུ་རྒྱུ་རྫས་འདི་ལ་བརྟེན་ནས་མི་དགེ་བ་བསགས་ཏེ་དེ་ལ་ཞེན་ཆགས་བྱས་པས་གཏན་དུ་འཁོར་བར་འཁྱམས་པའི་རྒྱུ་ཡིན་པ་དང་། ཁྱིམ་བཟའ་ཚང་ཤ་ཕུ་ནུ་བླ་སློབ་བྲན་ཁོལ་དང་བཅས་པ་ཐམས་ཅད་མི་མཐུན་པའི་གཞི་རྩ་ཡང་ནོར་རྫས་འདིའི་ཁོང་ནས་བྱུང་བ་ཡིན་པས་ཀུན་དང་རྩོད་པ་བཅས་ཤིང་མི་དགེ་བ་ངང་གིས་འཕེལ་བ་དང་། མ་ཟད་དགེ་བ་འགྲིབ་བྱེད་ཀྱང་ཡིན་པའི་ཕྱིར་ན་དམ་པ་རྣམས་ཀྱིས་སྨད་པའི་གནས་ཀྱང་ཡིན་པས་འདོད་པའི་ཉེས་དམིགས་དེ་དག་ཤེས་དགོས་སོ་ཞེས་པའོ།།

༤༥ ཆགས་པས་འཆིང་བའི་སྐྱོན་དྲུག་བསྟན་པ།

ཆགས་པས་འཆིང་བའི་སྐྱོན་དྲུག་བསྟན་པ་ནི།།

ལུས་ནི་མི་གཙང་ཀུན་གྱི་སྣོད་དང་ནི།།

རྩ་རྒྱུས་རུས་པ་འབྲེལ་བའི་དྲ་བ་དང༌།།

རྣག་དང་ཆུ་སེར་ངན་སྐྱུགས་གཤང་གཅིའི་རྫིང༌།།

བུ་ག་དགུ་ཡི་ལམ་དང་བཅས་པ་དང༌།།

སྣོད་དྲུག་དོན་ལྔ་སྲིན་བུའི་གྲོང་ཁྱེར་དང༌།།

གདོས་བཅས་ནད་ཀུན་འབྱུང་བའི་རང་བཞིན་དུ།།

མི་ཤེས་ལུས་ལ་ཆགས་པས་བསླུ་བར་འགྱུར།།

ཞེས་གསུངས་པ་སྟེ། གང་ཆགས་པའི་ཡུལ་དུ་གྱུར་པའི་ལུས་འདི་ནི་ཞིབ་ཏུ་བརྟགས་ཤིང་དཔྱད་ན་མི་གཙང་བའི་རྫས་སོ་དྲུག་གི་བདག་ཉིད་ཅན་ཤ་དང་ཁྲག་དང་ཀླད་པ་དང་སྣབས་ལུད་ལ་སོགས་པའི་སྣོད་ཡིན་པ་དང་ནི། རྩ་དང་རྒྱུས་པ་རུས་པ་དག་འབྲེལ་བའི་དྲ་བ་ཞིག་ལ་ལུས་ཞེས་བཏགས་པའི་ཕྱིར་དང༌། རྣག་དང་ཆུ་སེར་ངན་སྐྱུགས་གཤང་གཅིའི་རྫིང༌བུ་བུ་ག་དགུ་ཡི་ལམ་དང་བཅས་པ་དང༌། ཕོ་བ་རྒྱུ་མ་ལོང་ག་ལ་སོགས་པ་སྣོད་དྲུག་དང་། གློ་སྙིང་མཆིན་མཚེར་སོགས་ཀྱི་དོན་ལྔ་པོ་གང་ལ་སེམས་ཀྱང་སྲིན་བུ་མང་པོ་ཆགས་སའི་གྲོང་ཁྱེར་ཡིན་པ་སྟེ། དཔེར་ན་མི་གཅིག་གི་ལུས་ཀྱི་ཁྲག་གི་ནང་དུ་ཡོད་པའི་སྲིན་བུ་ཕྲ་མོ་རྩིས་གྲངས་མི་ཐེབས་པ་ཡོད་པ་ལྟ་བུ་ཡིན་པ་དང་། ལུས་གདོས་བཅས་འདིའི་འབྱུང་བ་འཁྲུགས་པའི་ནད་ཐམས་ཅད་ལུས་རང་ཉིད་ལས་བྱུང་བ་སྟེ། དེ་ལྟ་བུའི་སྡུག་བསྔལ་གྱི་གཞི་མ་མི་གཙང་བའི་ཕུང་པོ་ཡིན་པར་རྨོངས་པའི་དབང་གིས་མ་ཤེས་ནས་འདི་ལ་ཆགས་ཞེན་བྱས་པས་བསླུ་བར་འགྱུར་བ་ཡིན་ནོ་ཞེས་པའོ།།

༤༦ དོན་མེད་སྙིང་པོ་མེད་པའི་ཆོས་དྲུག་བསྟན་པ།

དོན་མེད་སྙིང་པོ་མེད་པའི་ཆོས་དྲུག་ནི།།

སྣ་ཚོགས་ཡུལ་དུ་སྣང་བའི་ཆོས་རྣམས་ཀུན།།

མི་རྟག་མྱུར་དུ་འཇིག་པས་ཆུ་བུར་འདྲ།།

གང་ཡང་སྙིང་པོ་མེད་པས་ཆུ་ཤིང་འདྲ།།

འཁྲུལ་བས་བྱིས་པ་བསླུས་པས་སྨིག་རྒྱུ་འདྲ།།

མེད་བཞིན་སྣ་ཚོགས་སྣང་བས་སྒྱུ་མ་འདྲ།།

བག་ཆགས་དབང་གིས་སྣང་བས་རྨི་ལམ་འདྲ།།

རིང་དུ་མི་གནས་འགྱུར་བས་གློག་དང་འདྲ།།

དེ་ལྟར་ཤེས་རྣམས་སྲིད་པའི་ཕ་རོལ་འགྲོ།།

ཞེས་གསུངས་པ་སྟེ། དོན་མེད་སྙིང་པོ་མེད་པའི་ཆོས་དྲུག་བསྟན་པ་ནི། སྣ་ཚོགས་ཡུལ་དུ་སྣང་བའི་ཆོས་རྣམས་ཐམས་ཅད་མི་རྟག་པར་མྱུར་དུ་འཇིག་པས་ཆུ་བུར་འདྲ་བས་དོན་མེད་སྙིང་པོ་མེད་པ་དང་། གང་ཡང་སྙིང་པོ་མེད་པའི་ཆ་ནས་ཆུ་ཤིང་དང་འདྲ་བ་དང་། འཁྲུལ་བས་བསླུས་པའི་ཆ་ནས་བྱིས་པ་སླུ་བའི་སྨིག་རྒྱུ་དང་འདྲ་བ་དང་། མེད་བཞིན་སྣ་ཚོགས་སྣང་བས་སྒྱུ་མ་དང་འདྲ་བ་དང་། བག་ཆགས་དབང་གིས་སྣང་བས་རྨི་ལམ་དང་འདྲ་བ་དང་། ཡུན་རིང་དུ་མི་གནས་པར་འགྱུར་བས་འཁྱུག་ཙམ་གྱི་གློག་དང་འདྲ་བ་དེ་ལྟ་བུའི་ཚུལ་ཤེས་པ་རྣམས་སྲིད་པའི་རྒྱ་མཚོའི་ཕ་རོལ་འགྲོ་བ་ཡིན་ནོ། །འདིའི་དོན་དངོས་སུ་ཚུལ་བཞིན་དུ་རྟོགས་པ་ནི་སྟོང་ཉིད་མངོན་སུམ་དུ་རྟོགས་པའི་མཉམ་བཞག་གི་རྗེས་ཐོབ་ཏུ་འབྱུང་བ་ཡིན་ཡང་ད་ལྟ་རྗེས་མཐུན་པའི་སྒྱུ་མའི་དཔེ་བརྒྱད་ཀྱི་ཚུལ་གྱིས་ཆོས་རྣམས་རང་བཞིན་སྟོང་ཞིང་བདག་མེད་པ་ཡིན་པའི་གོ་བ་ཆགས་པར་བྱས་ནས་རིམ་གྱིས་སྲིད་པའི་ཕ་རོལ་ཏུ་འགྲོ་དགོས་སོ།།

༤༧ ཆོས་བྱེད་ཐ་མ་འཇུག་པའི་ཚུལ་དྲུག་བསྟན་པ།

ཆོས་བྱེད་ཐ་མ་འཇུག་པའི་ཚུལ་དྲུག་ནི།།

འཁོར་བའི་སྡུག་བསྔལ་མཐོང་བས་ལམ་སྣ་འཚོལ།།

ཅི་བྱས་དོན་མེད་གོ་བས་ཁེ་གྲགས་ཆུང༌།།

ང་རྒྱལ་འདོད་བློ་ཆུང་བས་དམན་ས་འཛིན།།

དད་བརྩོན་གྲོགས་དང་འགྲོགས་པས་ཉམས་ལེན་བརྩོན།།

ཐེག་ཆེན་རིགས་སྐྱེས་དམན་པས་བློ་མི་ཁེངས།།

ཤེས་བྱའི་གནས་ལ་དད་པས་གང་ལའང་མོས།།

དམ་པ་རྣམས་ཀྱི་འཇུག་སྒོ་དང་པོ་ཡིན།།

ཞེས་གསུངས་པ་སྟེ། ཆོས་བྱེད་རབ་འབྲིང་ཐ་གསུམ་རིམ་བགྲོད་གྱིས། །ཞེས་གསུངས་པ་ལྟར་དུ། ཆོས་བྱེད་པའི་གང་ཟག་དེ་རབ་འབྲིང་ཐ་གསུམ་དུ་ཕྱེས་པའི་ཐ་མ་ཞིག་ཡིན་ཡང་ཆོས་དྲུག་པོ་འདི་དང་ལྡན་དགོས་ལ། དེ་ཡང་འཁོར་བའི་སྡུག་བསྔལ་ལ་སྡུག་བསྔལ་ཆེ་བ་ཡིན་པར་ཤེས་ནས་དེ་ལས་ངེས་པར་ཐར་དགོས་སྙམ་པའི་ངེས་འབྱུང་གི་ཀུན་སློང་ཡོད་དགོས་པ་ཡིན་ཏེ། ཕྱོགས་ག་ཤེད་ཅིག་ཏུ་དོན་ག་གེ་མོ་ཞིག་བསྒྲུབ་པར་སོང་ན་ལམ་འདི་བརྒྱུད་ནས་སོང་ན་ཕྱོགས་དེར་ཐོན་པ་ཡིན་པའི་ལམ་སྣེ་དེ་ཐོག་མར་རྙེད་དགོས་པ་བཞིན་དུ། ལོག་ལམ་ངན་འགྲོར་འགྲོ་བའི་ལམ་དང་། བདེ་འགྲོ་མཐོ་རིས་ལ་འགྲོ་བའི་ལམ་སོགས་མུན་པའི་ལམ་ཕྱིན་ཅི་ལོག་པ་གར་ཡང་ཕྱིན་མི་ཐུབ་པའི་ལམ་ཕུག་རྡུགས་ཀྱང་ཡོད་པ་དེས་ན། ཆོས་པ་ལས་དང་པོ་བ་ཞིག་གིས་དང་པོར་ཡང་དག་པའི་ལམ་སྣེ་དེ་རྙེད་དགོས་པས། ལམ་སྣེ་ཁྲིད་མཁན་གྱི་བླ་མས་ཇི་ལྟར་བསྟན་པ་བཞིན་དུ་རང་ཉིད་ཀྱང་དེར་འཇུག་དགོས་པ་ལས་གཞན་དུ་བླ་མས་ལམ་བསྟན་པའི་ནང་དུ་རང་ཉིད་མ་སོང་ན། བོང་བུ་འཁྱག་ཐོག་ཏུ་དེད་པ་བཞིན་དུ་བླ་མས་རྗེས་ནས་ཡར་འཕུལ་རྒྱག་བྱེད་དུ་མེད་པ་ནི་བླ་མས་མི་ཚད་རྫོགས་པའི་སངས་རྒྱས་དངོས་སུ་བྱོན་ཡང་ཐབས་མེད་པ་སྟེ། སེམས་ཅན་གཅིག་གི་དོན་དུ་སངས་རྒྱས་སྟོང་བྱོན་ཡང་མཐུ་རྡུགས་ས་ཡོད་པས་ཉམས་ལེན་གནད་ཐོག་ཏུ་འཁེལ་དགོས་ན་ཀུན་སློང་རྣམ་དག་ངེས་འབྱུང་བྱང་སེམས་བཅོས་མིན་བསྐྱེད་པ་ལ་བརྩོན་ནས་དང་པོར་ལམ་སྣ་འཚོལ་དགོས་པ་དང་། འཇིག་རྟེན་གྱི་བྱ་བ་ཆོས་བརྒྱད་དོན་གཉེར་ལ་སོགས་པ་གང་ཡིན་ཡང་ཚེ་འདི་སྣང་གི་བྱ་བ་ལ་སྙིང་པོ་མེད་པར་གོ་ནས་ཁེ་གྲགས་ཆུང༌བར་བྱས་ན་ཆོས་ལམ་ལ་བར་ཆད་མི་འབྱུང་བ་དང་། ང་རྒྱལ་མི་ཆེ། དགོས་རྒྱུ་མི་མང་བར་འདོད་ཆུང་ཆོག་ཤེས་ཀྱི་སྒོ་ནས་དམན་ས་འཛིན་དགོས་པ་དང་། གྲོགས་དད་པ་དང་བརྩོན་འགྲུས་ཅན་དང་འགྲོགས་པའི་སྒོ་ནས་ཉམས་ལེན་ལ་བརྩོན་པ་དང་། ཐེག་ཆེན་གྱི་རིགས་སུ་སྐྱེས་ནས་ཐེག་ཆེན་གྱི་ཆོས་ཉམས་ལེན་བྱེད་པའི་ཐེག་ཆེན་པ་ཞིག་ཡིན་བཞིན་དུ་དམན་པའི་ལམ་ཞིག་གིས་བློ་མི་ཁེངས་པའམ་སེམས་འཚེང་བར་མི་བྱེད་པ་དང་། ཤེས་བྱ་རིག་པའི་གནས་སྤྱི་དང་བྱེ་བྲག་ཐམས་ཅད་ལ་སྦྱོང་བར་བྱེད་ཅིང་། དེ་ལས་ཀྱང་ཁྱད་པར་དུ་མདོ་སྔགས་རིག་པའི་གནས་གང་ཡིན་ཐམས་ཅད་ལའང་མོས་པ་ཡོད་པ་ཡང་དག་པའི་ལམ་ལ་དད་པས་འཇུག་པ་རྣམས་ནི་དམ་པའི་རིགས་ཅན་རྣམས་ཀྱི་འཇུག་སྒོ་དང་པོ་ཡིན་ནོ་ཞེས་པ་སྟེ། འདི་དག་ནི་ཆོས་བྱེད་ཐ་མ་ཞིག་ལ་དགོས་ཀྱི་རབ་ལ་མི་དགོས་ཞེས་པའི་དོན་མིན་པར། དང་པོའི་ལམ་ལས་དང་པོ་པ་ནས་རིམ་བརྒྱུད་ཀྱི་ལམ་གྱི་འཇུག་སྒོ་མས་ནས་ཡར་འཛེགས་ཀྱི་ཚུལ་དུ་གསུངས་པའོ། །གོང་གི་དོན་ཚན་དྲུག་པོ་འདི་མ་ཚང་དུས་ཆོས་པ་མིན་ཅིང་ལམ་སྣ་མ་ཟིན་པ་ཡིན་པས། སྐྱེ་རྟགས་རང་གིས་རང་ལ་བཤད་ན་ཐར་བའི་ལམ་སྣེ་ཟིན་མི་འདུག་ཅེས་ལུང་བསྟན་ཆོག་པ་ཡིན་ནོ།།

༤༨ ཆོས་བྱེད་འབྲིང་གི་དགོས་པའི་ཆོས་དྲུག་བསྟན་པ།

ཆོས་བྱེད་འབྲིང་གི་དགོས་པའི་ཆོས་དྲུག་ནི།།

སོ་ནམ་རྨོ་རྐོ་ཞིང་ཆུའི་མུ་མི་བསྲུང༌།།

ལང་ཚོ་ཁེ་སྤོགས་ཚོང་གི་ཁུར་མི་ཁུར།།

ངོ་བསྲུང་བང་ཆེན་གཉེན་བཤེས་སེམས་མི་འཛིན།།

ཞེ་སྡང་ཕྱོགས་རིས་འཐབ་རྩོད་བྱ་བ་དོར།།

གསོག་བྲུན་ཕྱི་རྩིས་གནས་ཀྱི་མཁར་ལེན་སྤང༌།།

འདུ་འཛིའི་བདུད་ལས་མི་ཆེན་བཤེས་འདྲིས་མེད།།

ཆོས་མཛད་རྣམས་ཀྱི་འཇུག་སྡོམ་གཉིས་པའོ།།

ཞེས་གསུངས་པ་སྟེ། ཆོས་བྱེད་འབྲིང་གི་དགོས་པའི་ཆོས་རྣམ་པ་དྲུག་ནི། དཔེ་ཞིང་པའི་ས་ཆའི་མི་ཞིག་ལ་མཚོན་ན་སོ་ནམ་རྨོ་རྐོ་ཡི་ལས་ལ་ཞུགས་ནས་ཞིང་དང་ཆུའི་ལས་ཀའི་སྣེ་ལ་བསྡད་ནས་མུ་སྲུང་བཞིན་མི་འདུག་པ་དང་། དེ་བཞིན་དུ་འབྲོག་པ་ཡིན་ཡང་ཕྱུགས་འཚོ་སྐྱོང་དང་རུ་སྐྱ་ཁལ་འགེལ་ལ་སོགས་པ་ཁྱིམ་གྱི་ཁ་འཛིན་མི་བྱེད་པ་དང་། ལང་ཚོ་དང་ལུས་སྟོབས་རྒྱས་པའི་སྟོབས་ཤུགས་ཡོད་དགུ་ཚོང་ཁེ་སྤོགས་དང་ལོ་འདོད་སྙན་གྲགས་ཤིག་གི་དོན་དུ་བསྐྱལ་བའི་ཁུར་མི་འཁུར་བ་དང་། ངོ་བསྲུང་གི་དོན་དུ་འདི་ཡི་ངོ་བཅག་ན་མི་རུང་། ཁོའི་ངོ་ལ་མ་བལྟས་ན་མི་ཉན་སྙམ་པ་དེ་ལྟར་མ་བྱེད། བང་ཆེན་བྱས་ནས་ཆ་ཁུར་ནས་སྡེ་གཉིས་ཐོད་པ་གཏུགས། སྡེ་གསུམ་ཀླད་ཡུ་བསྐོར་ཏེ། གྱོད་བཤད་གཉེན་སྒྲིག་ལ་སོགས་པ། འདྲེས་ར་མགོ་སྲེག་ས་མིན་པར་ཐོན་ནས་ཁུར་ཐང་མང་པོ་བླངས་ནས་གཉེན་བཤེས་དག་གི་འདོད་བློ་སྐོང་བཞིན་འཚོ་ན་ཆོས་བྱེད་པའི་དུས་ཚོད་ཡོད་པ་མིན་པས་དེ་ལྟར་མི་བྱེད་པ་དང་། ཞེ་སྡང་གི་ཀུན་སློང་སྔོན་དུ་སོང་ནས་རང་ཕྱོགས་རྒྱལ་རྒྱུའི་ཕྱོགས་རིས་འཐབ་རྩོད་ཀྱི་བྱ་བ་ལུས་ངག་ཡིད་གསུམ་གྱི་ཐོག་ནས་དོར་བར་བྱེད་པ་དང་། ཕུག་རོན་གྱིས་རིལ་མ་གསོག་པ་བཞིན་དུ་རྒྱུ་ནོར་གསོག་བྲུན་བྱེད་ཅིང་། ཡུན་རིང་ཕྱི་མའི་རྟག་འཛིན་གྱི་འཚོ་རྩིས་འདུག་སའི་གནས་ཀྱི་གཞི་རྒྱ་ཆེར་བསྐྱེད་བྱེད་པ་ལ་སོགས་པ་སྤོང་བར་བྱེད་པ་དང་། སྤྱིར་ན་བདུད་ཀྱི་ལས་དེ་ལ། ཕྱིའི་དགྲ་གཉེན་ཆགས་སྡང་གི་བདུད། འབྱུང་པོ་ལོག་འདྲེན་གྱི་བདུད། དཔོན་གྲོགས་བདུད་གཅོད་ཀྱི་བདུད། ཟས་ནོར་འཛིན་ཆགས་ཀྱི་བདུད་ལ་སོགས་པ་དང་། ནང་གི་ང་བདག་རྩ་བའི་བདུད། ཉོན་མོངས་དུག་རྒྱས་ཀྱི་བདུད། རྣམ་རྟོག་འཕེལ་འགྲིབ་ཀྱི་བདུད། ཐེ་ཚོམ་ཡིད་གཉིས་ཀྱི་བདུད་ལ་སོགས་པ་མང་ལ། དེ་དག་ལས་འདིར་དཔོན་གྲོགས་བདུད་གཅོད་ཀྱི་བདུད་གཙོ་བོར་གསུངས་པ་སྟེ། དེ་ཡང་མི་ཆེན་དང་། བླ་ཆེན་དང་། ཚོང་དཔོན་ཆེན་པོ་ལ་སོགས་མི་སྣ་སྐད་གྲགས་ཅན་ངོ་ཤེས་ན་དགའ་སྣང་ཤར་ནས་མཐོ་འདེམས་ཀྱི་བཤེས་གྲོགས་འཚོལ་བ་ནི་ཆོས་པ་ཞིག་གིས་མི་རུང་བ་རེད། གང་ཟག་ལ་ལ་ཕྱུག་པོ་མཐོན་པོར་འབྲེལ་འདྲིས་ཐོབ་དུས་དགའ་ཁུལ་བྱེད་ཀྱང་ལོངས་སྤྱོད་དང་མངའ་ཐང་ནི་རང་རང་སོ་སོ་ལ་དབང་བས། རང་ཉིད་ལ་ཕན་པ་ཡོད་པའི་བྱ་བ་རང་གིས་མ་བསྒྲུབས་ན་དེ་དག་གིས་དངོས་གྲུབ་སྦྱིན་དཀའ་བ་ཡིན། དེ་དག་ནི་ཆོས་མཛད་པ་འབྲིང་ཞིག་གི་ཚད་ལ་བླངས་ཏེ་སྡོམ་བྱས་པ་སྟེ། སེམས་ཀྱི་ཐོག་ཏུ་སྔོན་མའི་ཆོས་དྲུག་དེ་ཡོད་པ་གཞིར་བཞག་ནས་ལུས་ཀྱི་ཐོག་གི་ཆོས་དྲུག་པོ་འདི་དག་དང་ལྡན་དགོས་སོ་ཞེས་པའོ།།

༤༩ རྣལ་འབྱོར་རབ་ཀྱི་དུར་ཁྲོད་ཆོས་དྲུག་བསྟན་པ།

རྣལ་འབྱོར་རབ་ཀྱི་དུར་ཁྲོད་ཆོས་དྲུག་ནི།།

ཐ་མལ་འགོ་བས་མི་དང་མི་འགྲོགས་ཤིང༌།།

སྒོ་གསུམ་སྤྱོད་སྦས་ཅི་བྱེད་མིས་མི་མཐོང༌།།

ཟས་གོས་མི་གཉེར་རོ་ཟས་རོ་གོས་འཚོ།།

ཉམ་ང་མེད་པས་མཁའ་འགྲོའི་སྤྱོད་པ་བྱེད།།

གསང་སྤྱོད་ཉམས་སྐྱོང་ཐ་མལ་སྤྱོད་པ་སྤང༌།།

ཆོས་ཉིད་ངང་གནས་བདེ་ཆེན་རྟོགས་པ་སྟེ།།

ཐར་ལམ་བགྲོད་རྣམས་འཇུག་སྲོལ་གསུམ་པར་བཞེད།།

ཅེས་པ་ནི་རྣལ་འབྱོར་པ་རབ་བརྟུལ་ཞུགས་ཀྱི་སྤྱོད་པ་སྐྱོང་མཁན་ཞིག་གི་ཚད་ནས་གསུངས་པ་སྟེ། ཐ་མལ་གྱི་སྤྱོད་པ་འགོ་མི་ཡོང་བའི་ཆེད་དུ་མི་དང་མི་འགྲོགས་པར་གཅིག་པུར་འདུག་དགོས་ཤིང༌། སྒོ་གསུམ་བརྟུལ་ཞུགས་ཀྱི་སྤྱོད་པ་རྣམས་དད་མེད་ལོག་ལྟ་ཅན་ལ་སྦས་ནས་ཅི་བྱེད་མིས་མི་མཐོང༌བར་བྱེད་པ་དང་། ཟས་གོས་ཆེད་དུ་མི་གཉེར་བ་ནི་རྒྱ་གར་བའི་ལུགས་ལྟར་དུ་བྱས་ན། དུར་ཁྲོད་དུ་རོ་ཟས་འབྲས་ཆན་ཁལ་རེ་དང་། རོ་གོས་རས་ཡུག་རེས་དྲིལ་ནས་རོ་བསྐྱལ་བར་བཤད་པ་ལྟར་དུ་དེས་འཚོ་བར་བྱེད་པའམ། ཡང་ན་བཅུད་ལེན་གྱིས་འཚོ་བ་ལ་སོགས་པ་བྱེད་པ་དང་། དུར་ཁྲོད་གཉན་ས་དང་། རི་ཁྲོད་དབེན་པའི་གནས། ས་སྤྱོད་ཀྱི་ཞིང་ཁམས་ལ་སོགས་པའི་ངེས་མེད་གནས་སུ་བརྟུལ་ཞུགས་ཀྱི་སྤྱོད་པ་བསྐྱངས་ནས་རྒྱུ་བ་ན་ཉམ་ང་མེད་པས་མཁའ་འགྲོ་མ་ལ་ཆོས་བསྟན་པ་སོགས་བྱེད་པ། དཔེར་ན་གུ་རུ་རིན་པོ་ཆེ་རྒྱ་གར་གྱི་དུད་ཁྲོད་རྣམས་ཀྱི་མཆོད་རྟེན་ལ་རྒྱབ་བརྟེན་ནས་ལོ་དུ་མར་བཞུགས་པའི་ཚུལ་རྣམ་ཐར་ལས་བྱུང་བ་ལྟར་དང་། རྫོགས་ཆེན་གྱི་སྐབས་ནས་གསུངས་པའི་སྤྱོད་པ་བདུན་ནམ་ཉེར་གཅིག་ལ་སོགས་པ་དེ་དག་དང་བསྟུན་ན། འདི་བརྟུལ་ཞུགས་ལམ་སློང་གི་སྤྱོད་པ་ཞེས་པ་དེ་ཡིན། སྦྱོར་སྒྲོལ་ཏན་གན་གྱི་གསང་སྤྱོད་ཀྱི་ཉམས་བསྐྱངས་ནས་ཐ་མལ་འཁྲུལ་བའི་སྤྱོད་པ་སྤོང༌བར་བྱེད་པ་དང་། ཆོས་ཉིད་དམིགས་བསམ་བྲལ་བའི་ངང་དུ་གནས་ནས་བདེ་ཆེན་ཡེ་ཤེས་ཀྱི་རྟོགས་པ་རྒྱུད་ལ་བརྙེས་པ་སྟེ། དེ་དག་ནི་གྲུབ་པ་ཐོབ་པའི་རྣལ་འབྱོར་གྱི་སྤྱོད་པས་ཐར་ལམ་ལ་ཞུགས་པ་དང་ཐར་ལམ་བགྲོད་པའི་འཇུག་སྲོལ་གསུམ་པ་རབ་ཀྱི་སྤྱོད་པ་ཡིན་པར་བཞེད་དོ།།

༥༠ ཡང་རབ་ཕྱོགས་བྲལ་རྣལ་འབྱོར་ཆོས་དྲུག་བསྟན་པ།

ཡང་རབ་ཕྱོགས་བྲལ་རྣལ་འབྱོར་ཆོས་དྲུག་ནི།།

རང་ཡུལ་མི་ཡུལ་གང་ལའང་མ་ཆགས་དང༌།།

རྟག་དང་ཆད་པའི་མཐའ་གཉིས་ལས་གྲོལ་དང༌།།

ཉེ་རིང་གང་གིས་ངོ་མི་ཤེས་པ་དང༌།།

ས་གཅིག་མི་ཞེན་སྤྲིན་ལྟར་འཕྱོ་བ་དང༌།།

ཚོགས་དྲུག་ཡུལ་སྣང་གྲོགས་སུ་འཆར་བ་དང༌།།

བཟང་ངན་གང་ལའང་ངོས་གཟུང་མེད་པ་སྟེ།།

རྣམ་གྲོལ་ལམ་བཟང་འཇུག་སྒོ་བཞི་པ་ཡིན།།

ཞེས་གསུངས་པ་སྟེ། ཡང་རབ་ཕྱོགས་བྲལ་གྱི་རྣལ་འབྱོར་དེ་ནི་རབ་ཀྱིས་མི་ཚད་ཡང་རབ་ཏུ་གྱུར་པ་ཞིག་ཡིན་པས་རང་ཡུལ་མི་ཡུལ་གང་ལའང་མ་ཆགས་པ་དང༌། གཉིས་ལ་མི་གནས་པའི་ཡེ་ཤེས་ཀྱི་དོན་རྟོགས་ནས་རྟག་དང་ཆད་པའི་མཐའ་གཉིས་ལས་གྲོལ་བ་དང༌། ཉེ་དང་རིང་བའི་ས་ན་ཡོད་པའི་མི་ཐམས་ཅད་ཀྱི་ངོ་མི་འཛིན་པས་ན་གང་གིས་ཀྱང་ངོ་མི་ཤེས་པ་དང༌། ས་གཅིག་ལ་མི་ཞེན་པས་གནས་མི་འཆའ་ཞིང་རྟེན་གཞི་མི་བཙུགས་པ་སྤྲིན་ནམ་མཁའ་ནས་གཡོ་བའི་རང་བཞིན་ཅན་གནས་གཅིག་ཏུ་འདུག་པའི་ངེས་པ་མེད་པ་ལྟར་འཕྱོ་བ་དང༌། ཚོགས་དྲུག་གི་ཡུལ་སྣང་གང་ཤར་ཡང་ཤར་གྲོལ་བདེ་བ་ཆེན་པོའི་ལམ་ཁྱེར་གཟུང་འཛིན་གྱི་སྣང་བ་ཐམས་ཅད་ཡེ་ཤེས་སུ་ཤར་ནས་རྨ་བྱས་དུག་ཟོས་ན་སྒྲོ་མདོངས་མཛེས་པའི་གྲོགས་སུ་འགྱུར་བ་ལྟར་གྲོགས་སུ་འཆར་བ་དང༌། བཟང་ངན་བླང་དོར་གྱི་ཆོས་ལས་འདས་པ་གང་ལའང་ངོས་གཟུང་མེད་པ་སྟེ་དེ་དག་ནི་རྣམ་གྲོལ་ལམ་བཟང་ལ་འཇུག་པའི་སྒོ་བཞི་པ་ཡིན་ནོ།།

༥༡ སྒྲུབ་པར་འདོད་པས་དོགས་པ་དྲུག་སྤང་བར་བསྟན་པ།

བསྒྲུབ་པར་འདོད་པས་དོགས་པ་དྲུག་སྤང་སྟེ།།

མ་མགུ་དོགས་དང་མཐུན་འཇུག་ངོ་སྲུང་སྤང༌།།

མེད་ཀྱིས་དོགས་ནས་ནོར་དང་རྫས་མི་བསོགས།།

སྡུག་གིས་དོགས་ནས་ཕྱི་རྩིས་བྱ་བ་སྤང༌།།

དམས་ཀྱིས་དོགས་ནས་མཐོན་པོའི་ས་མི་སྒྲུབ།།

ཉེས་ཀྱིས་དོགས་ནས་མི་ཆོས་འདུན་མ་དོར།།

མཐོས་ཀྱིས་དོགས་ནས་གཞན་གྱི་སེམས་མི་དཀྲུགས།།

ཞེས་གསུངས་པ་སྟེ། ཆོས་རྣམ་དག་བསྒྲུབ་པར་འདོད་པས་སེམས་ཐག་བཅད་ནས་ཆོས་མིན་གཞན་ལ་བློ་གཏོད་དུ་ཡོད་པ་མིན་པས་བློ་ཐག་རང་གིས་བཅད་སྣ་ཐག་མགོ་ལ་བརྫེས་ནས་རང་ཐག་རང་གིས་བཅད་དགོས་པ་ལས། གཡག་སྣ་ལོའི་སྣ་ཐག་མི་ལག་ལ་ཤོར་ཚེ་གཞན་དབང་དུ་གྱུར་ནས་དེས་གང་དུ་ཁྲིད་ཀྱང་རྗེས་སུ་འབྲང་པ་ལས་ཐབས་མེད་པ་ཡིན་པ་དེས་ན་རང་དབང་རང་གིས་མ་བཟུང་ནས། མ་མགུ་དོགས་ཀྱིས་མཐུན་འཇུག་ངོ་སྲུང་བྱས་ན་ཁྱིམ་མི་གཉེན་ཉེ་ཡིན་ཡང་མགུ་ཐབས་མི་ཐོན་ཞིང་འབྲལ་ངེས་ཅན་ཡིན་པས། ཉིན་ཁ་ཤས་ལ་སྡུག་མཉམ་ཁུར་བྱེད་པ་ལས་རང་གཞན་གཏན་བདེའི་ལམ་ཞིག་རྙེད་ན་རང་གཞན་ཐམས་ཅད་ལ་ཕན་པ་ཆེ་བས་མཐུན་འཇུག་དང་ངོ་སྲུང་སྤོང་བར་བྱེད་པ་དང་། རྒྱུ་ནོར་མེད་ན་མི་རིགས་སྙམ་གྱིས་དོགས་ནས་ནོར་དང་རྫས་མི་གསོག་པ་དང་། སྡུག་པོ་ཐ་མོ་ཡོང་གིས་དོགས་ནས་ཡུན་རིང་གི་འདེང་རྒྱག་དང་དེའི་ཚོད་རྩིས་བྱ་བ་སྤང༌བ་དང་། དམའ་ས་ཐ་ས་ཞིག་ཏུ་ལྷུང་གིས་དོགས་ནས་མཐོན་པོའི་ས་སྒྲུབ་པར་མི་བྱེད་པ་དང་། འདུན་མ་ཉེས་ཐལ་ཞེས་པ་ཞིག་འཇིག་རྟེན་གྱི་ངོས་ནས་རེད་འགྲོ་བསམས་ནས་མིའི་ཆོས་ལུགས་ཀྱི་གྲོས་འདུན་བྱེད་པ་དོར་དགོས་པ་དང་། རང་བས་གཞན་མཐོས་ཀྱིས་དོགས་ནས་དེ་མར་འབེབས་ཐབས་བྱས་ནས་གཞན་གྱི་སེམས་དཀྲུགས་པ་མི་བྱེད་པ་སྟེ་ཆོས་དྲུག་པོ་དེ་དག་ཚང་དགོས་སོ།།

༥༢ ཉམས་ལེན་གནད་ཀྱི་མཚམས་དྲུག་བཅད་པ་བསྟན་པ།

ཉམས་ལེན་གནད་ཀྱི་མཚམས་དྲུག་བཅད་པ་ནི།།

ཆགས་སྡང་བྲལ་བས་ཕྱི་ཡི་མཚམས་བཅད་དང༌།།

སོག་འཇོག་མེད་པས་ནང་གི་མཚམས་བཅད་དང༌།།

གཟུང་འཛིན་བྲལ་བས་གསང་བའི་མཚམས་བཅད་དང༌།།

བཟང་པོར་རེ་བའི་ཡར་གྱི་མཚམས་བཅད་དང༌།།

ངན་པར་དོགས་པའི་མར་གྱི་མཚམས་བཅད་དང༌།།

བྱ་བྱེད་དམིགས་འཛིན་བར་གྱི་མཚམས་བཅད་དང༌།།

འདི་དྲུག་ལྡན་ན་བར་ཆད་འབྱུང་མི་སྲིད།།

ཅེས་གསུངས་པ་སྟེ། ཆགས་པའི་སེམས་དང་སྡང་བའི་སེམས་དང་བྲལ་བས་ཕྱི་ཡི་མཚམས་བཅད་དགོས་པ་ལས་མཚམས་ཐོ་ཞིག་གིས་མི་དང་འབྲེལ་བ་བཅད་དང་མ་བཅད་ཡོད་པ་མིན་ཏེ། ལུས་མཚམས་ཀྱི་ནང་དུ་ཡོད་ཀྱང་། སེམས་མཚམས་ཀྱི་ཕྱི་རུ་བུད་ནས་ཆགས་སྡང་གཉིས་ཀྱི་འཁོར་ལོ་བསྐོར་ནས་སྟོང་གསུམ་རི་རབ་གླིང་བཞི་རུ་འགྲིམས་ན། ཁང་སྟོང་ནང་དུ་བེམ་གོག་བཞག་ཀྱང་ཕན་པ་ཆེ་བ་མིན་པའི་ཕྱིར། ནོར་རྫས་གསོག་འཇོག་མེད་པས་ནང་གི་མཚམས་བཅད་དགོས་པ་ལས་ཆོས་པ་ཞིག་གིས་ཟས་ནོར་གསོག་བྲུན་དགོས་པ་མིན་ཏེ། ཆོས་པ་རི་ལ་བསྡད་ན་ཟན་གོང་གྱེན་དུ་འགྲིལ་ཡོང་། ཞེས་པའི་དཔེ་ལྟར་མཐུན་རྐྱེན་ལྷས་སྒྲུབ་པ་ཡིན་པས། ཆོས་པ་མུ་གེས་ཤི་བའི་དཔེ་མེད་པའི་ཕྱིར། གཟུང་འཛིན་གྱི་སེམས་འཁྲུལ་རྟོག་ཐ་མལ་པ་དང་བྲལ་བའི་བཙན་ས་ཟིན་པར་བྱས་ནས་གསང་བའི་མཚམས་བཅད་དགོས་པ་དང༌། དེའི་སྟེང་དུ་ཡར་བཟང་པོ་ཞིག་ཨེ་རེད་སྙམ་ནས་རེ་བའི་ཡར་གྱི་མཚམས་གཅོད་པར་བྱེད་དགོས་པ་དང༌། མར་ངན་པ་ཞིག་གི་སར་ཨེ་ལྷུང་སྙམ་པའི་མར་གྱི་དོགས་པའི་མཚམས་གཅོད་པར་བྱེད་དགོས་པ་དང༌། ཉམས་ལེན་དམིགས་གཏད་ཅན་ཕར་བསྐྱུར་ནས། འདི་བྱ་འདི་བྱེད་ཀྱི་དམིགས་པ་དང་འཛིན་པ་མ་ཞུགས་པའི་བར་གྱི་མཚམས་གཅོད་པར་བྱེད་པ་སྟེ། འདི་དྲུག་དང་ལྡན་ན་ཆོས་པ་སད་ཀྱིས་མི་ཁྱེར་ཞིང་ཆོས་ལམ་ལ་བར་ཆད་མི་འབྱུང་བ་ཡིན་པ་ལས་མཚམས་དྲུག་པོ་འདི་མ་ཆོད་ན་ལུས་བཙོན་ལ་བཟུང་བ་ཙམ་ཞིག་གིས་མཚམས་ཀྱི་གོ་ཆོད་པ་མིན་པས་སྒོ་འདག་སྦྱར་བྱས་ཀྱང་ཕན་མ་ཐོགས་པ་རེད་ཅེས་པའི་དོན་ཏོ།།

༥༣ སངས་རྒྱས་སྒྲུབ་པའི་རག་ལས་ཆོས་དྲུག་བསྟན་པ།

སངས་རྒྱས་བསྒྲུབ་པའི་རག་ལས་ཆོས་དྲུག་ནི།།

བསྒྲུབ་པའི་རྟེན་མཆོག་དལ་འབྱོར་རག་ལས་དང༌།།

མ་བསྒྲུབས་མི་གྲོལ་སྒྲུབ་ལ་རག་ལས་དང༌།།

སྒྲུབ་པ་ལེགས་པར་ཤེས་ལ་རག་ལས་དང༌།།

ཤེས་པ་དང་པོའི་ཐོས་ལ་རག་ལས་དང༌།།

ཐོས་ཏེ་གནད་འགྲོ་བསམ་ལ་རག་ལས་དང༌།།

ཐམས་ཅད་དགེ་བའི་བཤེས་ལ་རག་ལས་སོ།།

ཞེས་གསུངས་པ་སྟེ། དང་པོར་སྒྲུབ་པར་བྱེད་པའི་ལུས་རྟེན་མཆོག་དལ་འབྱོར་ཚང་བའི་མི་ལུས་ཡིན་ལ། དེ་ལ་ལྷ་བས་ལྷག་པའི་ལུས་རྟེན་ཞེས་གྲགས་ལ། དེ་ཡང་ཚེ་རིང་ནད་མེད་གཟུགས་བཟང་གི་ཆ་ནས་ལྷ་ལ་མི་འགྲན་ཡང་། ཆོས་ཉམས་ལེན་བྱེད་པའི་ཆ་ནས་ལྷས་ཀྱང་འགྲན་དུ་མེད་པའི་ལུས་ཡིན་པས་ལྷ་བས་ལྷག་པའི་ལུས་ཡིན་ལ། ཆོས་འགྲུབ་མིན་དལ་འབྱོར་གྱི་རྟེན་མཆོག་འདི་ཡོད་མིན་ལ་རག་ལས་པ་ཡིན་པས་སྟོང་ལོག་མ་བྱེད་ཅེས་པའང་ཤུགས་ཀྱིས་གོའོ། །ད་རེས་ཀྱི་ལུས་རྟེན་འདིའི་ཐོག་ནས་སྒྲུབ་ལ་བརྩོན་ནས་བསྒྲུབས་འབྲས་མངོན་དུ་བྱེད་ཐུབ་མིན་ནི་སྒྲུབ་པ་ལ་རག་ལས་པས་དལ་འབྱོར་གྱི་རྟེན་ཐོབ་ནས་ཡོད་སྙམ་སྟེ་རང་གར་བསྡད་ནས་མ་བསྒྲུབས་ན། དལ་བ་ཚང་ཡང་འབྱོར་བ་མ་ཚང་བ་དང་། དེ་འདྲའི་དལ་འབྱོར་གྱི་ལུས་རྟེན་དེ་ཡང་རྒྱུན་དུ་ཐོབ་པ་མིན་པས་སྒྲུབ་པ་ལ་བརྩོན་དགོས་པ་དང་། སྒྲུབ་པ་དེ་ཡང་དང་པོར་ལེགས་པར་ཤེས་དགོས་པས་དེ་ཤེས་པ་ལ་རག་ལས་པ་དང༌། ཤེས་པ་དེ་ཡང་ཐོག་མར་ཐོས་དགོས་པས་དང་པོའི་ཐོས་པ་ལ་རག་ལས་པ་དང༌། རང་གར་གོ་བ་ཙམ་གྱིས་ཅི་ཡང་མི་འོང་བས་ཐོས་ཏེ་གནད་དུ་འགྲོ་བ་ནི་བསམ་པ་ལ་རག་ལས་པ་དང༌། ཐོས་པ་དེའང་འཆད་མཁན་ལ་རག་ལས་པས་སངས་རྒྱས་བསྒྲུབ་དགོས་ན་ཐམས་ཅད་དགེ་བའི་བཤེས་ལ་རག་ལས་སོ་ཞེས་མདོར་བསྡུས་པའོ།།

༥༤ བཟང་པོའི་མཚན་ཉིད་རྣམ་པ་དྲུག་ལྡན་བསྟན་པ།

བཟང་པོའི་མཚན་ཉིད་རྣམ་པ་དྲུག་ལྡན་ནི།།

བསོད་ནམས་བསགས་པས་རིགས་བཟང་ངང་རྒྱུད་དུལ།།

མཁྱེན་རབ་རྒྱས་པས་ཤེས་བྱའི་དོན་ལ་མཁས།།

ཤེས་རབ་འཕགས་པས་ཆོས་ཉིད་ཕྱོགས་བྲལ་རྟོགས།།

ཉམས་ལེན་བརྩོན་པས་ཉམས་རྟོགས་གྲུབ་རྟགས་ཐོན།།

ཐུགས་རྗེ་ཐབས་མཁས་གཞན་དོན་སྐྱོ་ངལ་མེད།།

གདམས་པའི་གནད་ལྡན་ལམ་སྣ་ཁྲིད་པར་ནུས།།

འགྲོ་མཆོག་སྐྱེ་བོ་དམ་པའི་ཚུལ་འདི་དགེ།

ཞེས་གསུངས་པ་སྟེ། བཟང་པོ་དམ་པའི་སྐྱེས་བུ་ཞིག་གི་མཚན་ཉིད་རྣམ་པ་དྲུག་དང་ལྡན་པ་ནི། སྐྱེ་བ་སྔོན་མར་བསོད་ནམས་བསགས་པའི་སྟོབས་ཀྱིས་ད་ལྟ་རིགས་བཟང་པོའི་རྒྱུད་དུ་འཁྲུངས་ཤིང་། ངང་རྒྱུད་ཞི་ཞིང་དུལ་བ་ཐམས་ཅད་དགའ་བའི་ཡུལ་ཡིན་པ་དང་། མཁྱེན་རབ་ཀྱི་རྩལ་རྒྱས་པས་ཤེས་བྱའི་དོན་ལ་མ་རྨོངས་པར་མཁས་པ་དང་། ཤེས་རབ་གཞན་ལས་ཁྱད་པར་དུ་འཕགས་པས་ཆོས་ཉིད་གནས་ལུགས་རྣལ་མའི་དོན་ཕྱོགས་བྲལ་ཡོངས་སུ་རྫོགས་པ་རྟོགས་པ་དང་། ཉམས་ལེན་ལ་བརྩོན་པར་བྱས་ནས་ཉམས་དང་རྟོགས་པ་ཡོད་པའི་རྟགས་སུ་གྲུབ་པའི་རྟགས་སྒོ་གསུམ་ལ་ཐོན་པ་དང་། སྤྱིར་ན་གྲུབ་རྟགས་དེ་ལ་ཐུན་མོང་འཇིག་རྟེན་པའི་གྲུབ་པ་དང་། ཐུན་མིན་མཆོག་གི་གྲུབ་པ་རིག་འཛིན་རྣམ་བཞིའི་ས་ལ་གཤེགས་པ་ལ་སོགས་པ་ཁྱད་པར་མང་དུ་ཡོད་པས། ནམ་མཁའ་ལ་བྱ་ལྟར་ལྡིང་བ་དང་ས་འོག་ཏུ་བྱི་ལྟར་འཛུལ་བ་དང་ཆུ་ལ་ཉ་ལྟར་འཕྱོ་བ་སོགས་སྤྱིར་གྲུབ་རྟགས་ཡིན་པའང་ཡོད་ཀྱང་། གཙོ་བོ་དགོས་དོན་དངོས་རང་རྒྱུད་ཉོན་མོངས་པའི་འཆིང་བ་བཅད་ཐུབ་ཡོད་ན་གྲུབ་རྟགས་མཚན་ཉིད་པ་ཡིན་ལ། གལ་ཏེ་ཉོན་མོངས་ཇེ་ཆེར་སོང་ཡོད་ན་རྡོ་ལ་རི་མོ་བྲིས་ཀྱང་ལོག་པའི་རིག་སྔགས་ཀྱི་མཐུ་ཡིན་ངེས་ལ། ལྕགས་དམར་ལིང་མུ་སྟེགས་པས་ཀྱང་ལྕེས་ལྡག་ཐུབ་ཅིང་། ནམ་མཁར་བྱའང་འཕུར་བཞིན་ཡོད་པ་དང་། ས་འོག་ཏུ་འབུ་ཡང་འཛུལ་བཞིན་ཡོད་པས་ལྷག་པའི་ཡ་མཚན་མེད་དོ། །ཐུགས་སྙིང་རྗེ་ཆེན་པོ་དང་ལྡན་པས་སེམས་ཅན་གྱི་དོན་སྒྲུབ་པ་ལ་ང་དཀའ་འདུག་སྡུག་འདུག་བསྐྱུར་ལ་ཐོང་སྙམ་པ་ལྟ་བུ་མིན་པར། མེ་ཚོགས་སྤུ་གྲིའི་སོ་ཡང་བརྒལ་ནས་ནི། ཕྱི་མཐར་ཐུག་གི་བར་དུ་དམ་ཆོས་བཙལ། །ཞེས་གཞན་དོན་དུ་ཆོས་འཚོལ་བ་ལྟ་བུ་དང་། རྒྱལ་ཚབ་བྱམས་པས་མདོ་སྡེ་རྒྱན་ལས། མགོ་ལ་སེམས་ཅན་ཁུར་ཆེན་ཁྱེར་བ་ཡི། །སེམས་དཔའ་མཆོག་རྣམས་དལ་གྱིས་འགྲོ་མི་མཛེས། །བདག་གཞན་སྣ་ཚོགས་འཆིང་བས་རབ་བཅིངས་པས། །བརྩོན་པ་བརྒྱ་འགྱུར་དུ་ནི་བྱ་བའི་རིགས། །ཞེས་པ་ལྟར་དུ་ཅི་བྱེད་གཞན་དོན་དུ་འགྱུར་བ་དང་གཞན་དོན་མཛད་པ་ལ་སྐྱོ་ངལ་མེད་པ་དེ་དག་ནི་བཟང་པོའི་མཚན་ཉིད་ཡིན་པ་དང་། ཡང་དམ་པའི་མཚན་ཉིད་ཅན་གྱི་སྐྱེས་བུ་དེ་ལ་གདམས་པའི་གནད་ཕྱིན་ཅི་མ་ལོག་པ་ལྡན་པས་འབྲེལ་ཚད་དོན་ལྡན་དུ་གྱུར་ནས་སེམས་ཅན་མང་རབ་ཀྱི་ལམ་སྣ་འཁྲིད་པར་ནུས་པ་སྟེ། དེ་འདྲའི་མཚན་ཉིད་དྲུག་ལྡན་གྱི་སྐྱེ་བོ་དེ་འགྲོ་བ་རྣམས་ལས་མཆོག་ཏུ་གྱུར་པ་རྣམ་པ་མི་ཡིན་ཡང་དོན་ལ་མི་ལས་འདས་པའི་དམ་པའི་ངང་ཚུལ་ཅན་ཡིན་ནོ་ཞེས་པའོ།།

༥༥ སློབ་མ་དམ་པས་བསྟེན་པའི་ཆོས་དྲུག་བསྟན་པ།

སློབ་མ་དམ་པས་བསྟེན་པའི་ཆོས་དྲུག་ནི།།

སྲིད་པར་སྐྱོ་ཞིང་འཁྲུལ་སྣང་ཡིད་འབྱུང་དང༌།།

ཆོས་མིན་བྱ་བ་དགོས་མེད་བཞག་པ་དང༌།།

འདུ་འཛི་རྣམ་གཡེང་དགྲ་ལྟར་སྤང་བ་དང༌།།

ཁེ་གྲགས་ལོ་འདོད་རེ་ལྟོས་མེད་པ་དང༌།།

ཉེ་འབྲེལ་ངོ་སྲུང་འབྲེལ་ཐག་ཆོད་པ་དང༌།།

དགྲ་གཉེན་ཉེ་རིང་ཆགས་སྡང་བོར་བ་དང༌།།

འཇིག་རྟེན་བློས་བཏང་དམ་ཆོས་བསྒྲུབ་པའོ།།

ཞེས་གསུངས་པ་སྟེ། སྲིད་པ་ཁམས་གསུམ་འཁོར་བ་གང་དུ་སྐྱེས་ཀྱང་བློ་གཏོད་མི་ཕེར་བ་སྡུག་བསྔལ་གྱི་རང་བཞིན་ཅན་ཡིན་པར་ཤེས་ནས་སྐྱོ་ཞིང་། འཁྲུལ་སྣང་འཁོར་བའི་བྱ་བཞག་འདི་འཁྲུལ་རྟོག་གིས་ཕར་བཏགས་པ་ཙམ་མ་གཏོགས་ཐ་སྙད་ཚད་མས་གྲུབ་པ་ཞིག་མེད་པར་ཤེས་ནས་འཁོར་བའི་འཁྲུལ་སྣང་འདིས་ཡིད་འབྱུང་བ་དང༌། དམ་པའི་ཆོས་མིན་པའི་བྱ་བ་གཞན་པ་གང་ཡིན་ཡང་དགོས་མེད་དུ་འཇོག་པར་བྱེད་པ་དང༌། འདུ་འཛི་རྣམ་གཡེང་ལ་སོགས་པའི་བདུད་ལས་ཐམས་ཅད་དགྲ་ལྟར་སྤང་བ་དང༌། འཇིག་རྟེན་གྱི་ཁེ་དང་གྲགས་པ་བུ་བཟང་རྟ་མགྱོགས་དང་། མིང་གྲགས་ལ་སོགས་པའི་ལོ་འདོད་ལ་རེ་ལྟོས་མེད་པ་དང༌། ཉེ་འབྲེལ་གྱི་ངོ་སྲུང་བ་སོགས་ཀྱི་འབྲེལ་ཐག་ཆོད་པ་དང༌། དགྲ་གཉེན་ལ་ཉེ་རིང་དང་ཆགས་སྡང་བོར་བ་དང༌། མདོར་ན་འཇིག་རྟེན་གྱི་ཕྱོགས་བྱ་བཞག་སོ་ཚིས་ངོ་སྲུང་ལ་སོགས་པ་ཐམས་ཅད་བློས་བཏང་བ་སོགས་དྲུག་པོ་ནི་སློབ་མ་དམ་པ་ཞིག་ལ་མེད་ཐབས་མེད་པའི་ཆོས་དྲུག་ཡིན་ཞེས་པའོ།།

༥༦ སྣ་ཐག་གཞན་ལ་མ་ཤོར་ཆོས་དྲུག་བསྟན་པ།

སྣ་ཐག་གཞན་ལ་མ་ཤོར་ཆོས་དྲུག་ནི།།

བྲན་ཁོལ་མ་སྐྱེས་དབང་མེད་མི་འབབ་དང༌།།

ཁྱིམ་ཐབ་མ་བྱས་གཉིས་འདུས་འཆིང་རེས་མེད།།

ཆེན་པོར་མ་སྐྱེས་གང་འདོད་ཆོས་ལ་སྤྱོད།།

ཤོལ་འདེབས་སྒྲོག་མེད་ནམ་དྲན་གང་དགར་སྤྱོད།།

མི་འགྲུབ་དམ་བཅའི་ཁས་བླངས་མེད་པ་དང༌།།

ལས་ངན་དམག་དཔུང་སྡུག་བསྔལ་མཚོ་མ་བརྡོལ།།

འདི་འདྲའི་རང་དབང་ཡོད་རྣམས་སྤྲོ་བར་རིགས།།

ཞེས་གསུངས་པ་སྟེ། གཞན་གྱི་བྲན་གཡོག་དང་ཁོལ་པོ་ཁོལ་མོར་མ་སྐྱེས་པས་དབང་མེད་རང་ཐོག་ཏུ་མི་འབབ་པ་དང༌། རབ་ཏུ་བྱུང་བ་ཞིག་ལ་མཚོན་ན་ཁྱིམ་ཐབ་མ་བྱས་པས་ཅིག་ཤོས་ཀྱིས་ཆོས་སྒྲུབ་ན་ཅིག་ཤོས་དེས་བར་དུ་གཅོད་པའི་གཉིས་འདུས་ཀྱི་འཆིང་རེས་སམ་འཆིང་ཐག་མེད་པ་དང་། ཆེན་པོའི་རིགས་སུ་སྐྱེས་ན་དེའི་རིགས་རྒྱུད་འཛིན་དགོས་པ་ལ་སོགས་པའི་འཆིང་བ་ཡོད་ལ་དེ་འདྲར་མ་སྐྱེས་པས་རང་གང་འདོད་ཀྱིས་ཆོས་ལ་སྤྱོད་དུ་ཡོད་པ་སྟེ། ཧ་ཅང་ཕྱུག་པའི་ཁྱིམ་དང་ནི། །དབུལ་པོའི་ཁྱིམ་དུ་མི་སྐྱེ་བར། །བར་མའི་ཁྱིམ་དུ་སྐྱེ་འགྱུར་ཞིང༌། །རྟག་ཏུ་རབ་བྱུང་མང་བར་ཤོག །ཅེས་སྨོན་གྱི་ཡུལ་ཡིན་པ་དང་། བཤོལ་འདེབས་ཀྱིས་མ་བྱེད་ཟེར་མཁན་མེད་པ་རྟ་ལ་སྒྲོག་མེད་པ་དང་འདྲ་བས་ཆོས་ནམ་དྲན་དང་ཆོས་རྗེས་སུ་གང་དགར་སྤྱོད་ཆོག་པ་དང་། མི་འགྲུབ་དམ་བཅའི་ཁས་བླངས་རང་གི་ནུས་པའི་ཚོད་ལ་བསམ་བློ་མ་བཏང་ནས། ས་ག་ཤེད་གཅིག་ལ་འདུག་ཆད་དང་། འགན་འཁྲི་ཆེ་གེ་མོ་ཞིག་ལོ་གྲངས་དུ་མའི་བཅད་བཀག་གི་བར་དུ་འཁུར་དགོས་པ་བྱས་ཡོད་ན་ཆོས་སྒྲུབ་པ་ལ་རང་དབང་མེད་པའི་འགལ་རྐྱེན་ཡིན་པས་དེ་ལྟར་མེད་པ་དང༌། ལས་ངན་གྱི་དཔུང་ཚོགས་དམག་ལྟ་བུ་མང་པོ་བྱུང་བ་ལ་བརྟེན་ནས་ལུས་སེམས་ཀྱི་སྡུག་བསྔལ་སྣ་ཚོགས་པ་རྒྱ་མཚོ་ཆེན་པོ་བཞིན་དུ་ཟད་པར་མེད་པར་བརྡོལ་ན་ཆོས་སྒྲུབ་པའི་འགལ་རྐྱེན་ཡིན་པས་དེ་འདྲ་མེད་པ་སྟེ། དེ་དག་དང་བྲལ་བའི་རང་དབང་ཡོད་པ་རྣམས་ཀྱིས་སྤྲོ་བར་བསྐྱེད་རིགས་སོ་ཞེས་པའོ།།

༥༧ བསྒོམ་ཞིང་བསྒྲུབ་པའི་འཚོ་བ་ཆོས་དྲུག་བསྟན་པ།

བསྒོམ་ཞིང་བསྒྲུབ་པའི་འཚོ་བ་ཆོས་དྲུག་ནི།།

མཐའ་གཉིས་མ་ལྷུང་ཡོ་བྱད་རང་འཚོ་དང༌།།

ཟས་ཀྱི་ཚོད་རིག་འགྲང་ལྟོགས་ཆ་སྙོམས་དང༌།།

འབྱུང་འཁྲུགས་ནད་ཀྱི་ཁམས་མ་འཁྲུགས་པ་དང༌།།

ཁ་ཟས་བཟང་པོའི་ལུས་བརྒྱགས་མ་གྱུར་དང༌།།

ཧ་ཅང་ངན་ཆེས་འབྱུང་བ་མ་རྒུད་དང༌།།

ཉིན་མཚན་ཚོད་ཟིན་དུས་མིན་ཟ་བ་སྤོང༌།།

འདི་ནི་དགེ་སྦྱོར་གནད་དུ་འགྲོ་བའི་གྲོགས།།

ཞེས་གསུངས་པ་སྟེ། དམ་པའི་ཆོས་ཉམས་སུ་བླངས་ནས་སྒོམ་སྒྲུབ་བྱེད་པ་ཞིག་གི་འཚོ་བ་ལ་ཆ་མཚོན་ན་མཐའ་གཉིས་སུ་མ་ལྷུང་བ་ཞིག་དགོས་པས། ཡོད་ཆེ་ནས་གསོག་འཇོག་ལ་སོང་བའི་མང་པོ་མ་ཡིན་པ་དང་། ཉུང་ཆེས་ནས་སྒྲུབ་རྒྱགས་མ་འདང་ནས་ཟད་འགྲོ་བ་མ་ཡིན་པ་སྟེ། རང་རེའི་ས་ཆ་འདིར་རྒྱ་གར་གྱི་དགེ་སློང་ལྟ་བུའི་འཚོ་བ་ཉིན་རེའི་བསོད་སྙོམས་ལ་བརྟེན་པའི་ལུགས་ཡོད་པ་མིན་པས་མཐའ་གཉིས་ལ་མ་ལྷུང་བའི་འཚོ་བ་སྒྲུབ་རྒྱགས་རང་ལ་ཡོད་དགོས་པ་དང༌། ཟས་ཀྱི་ཚོད་དེའང་འགྲངས་མི་ཆེ་ཞིང་ལྟོགས་མི་ཆེ་བ་སྟེ། དེ་ཡང་ལུས་ཀྱི་ཆ་བཞིའི་ཆ་གཅིག་སྟོང་པ། ཆ་གཉིས་ཟས། ཆ་གཅིག་སྐོམ་དུ་བཤད་དེ། ཡན་ལག་བརྒྱད་པ་ལས། ལྟོ་བའི་ཆ་གཉིས་ཟས་ཀྱིས་ཏེ། །ཆ་གཅིག་སྐོམ་གྱིས་ཡིན་པར་བཞེད། །རླུང་ལ་སོགས་པའི་གནས་དག་ཏུ། །ཆ་བཞི་པ་ནི་ཡང་དག་བཞག །ཅེས་པ་ལྟར་རམ། ཡང་ན་ཟས་ཀྱི་གཞི་ལས་འབྱུང་བ་ལྟར། ཆ་གསུམ་གྱི་ཆ་གཉིས་ཟས་དང་སྐོམ། ཆ་གཅིག་སྟོང་པར་བཞག་གོ །དེ་ཡང་ལྟོགས་ན་སྲིན་བུའི་ཚོགས་ལ་གནོད་པ་དང་། ནད་འགའ་ཞིག་ལྡང་བ་དང་། བྱ་བ་ལ་འཇུག་པར་མི་ནུས་ལ། འགྲངས་དྲགས་ན་དྲི་ང་བ་དང་། ནད་མང་དུ་འབྱུང་བ་དང་། ཏིང་ངེ་འཛིན་ལས་སུ་མི་རུང་བ་ལ་སོགས་པའི་ཉེས་པ་འབྱུང་བར་བཤད་དེ། སྤྱོད་འཇུག་ལས། རན་པ་ཙམ་དུ་བཟའ་བར་བྱ། །ཞེས་པ་དང་། འགྲང་ལྟོགས་སྙོམས་པའི་སྒྱུ་ལུས་བདེ། །ཞེས་གསུངས་པ་ལྟར་བྱས་ན་འཕྲོད་བསྟེན་གྱི་ཕྱོགས་ནས་ཀྱང་འཚམས་པ་ཡིན་པ་དང༌། འབྱུང་བཞི་ནང་འཁྲུགས་ཀྱི་འདུ་བ་ཆ་མི་སྙོམས་པའི་ནད་མེད་པའི་ཐབས་བྱེད་པ་དང་། དེ་དག་ཀྱང་འདུལ་བ་ལས་དུས་རུང་དང་། ཐུན་ཚོད་ལ་སོགས་པའི་སྨན་བཅང་ཚུལ་གསུངས་པ་དང་ཕྱོགས་མཐུན་པར་གནས་དུས་དང་བསྟུན་དགོས་ལ། ཡང་ཁ་ཟས་བཟང་པོ་བཅུད་ཆེན་འབའ་ཞིག་ཟོས་ན་ལུས་ཀྱི་ཤ་རྒྱགས་པར་གྱུར་ནས་དོགས་མི་བདེ་བ་དང་དེས་རྐྱེན་གྱིས་ནད་མང་པོ་བསྐྱེད་པ་དང་། མ་ཚད་གཉིད་ལ་དགའ་བ་དང་། ཟས་ཀྱིས་མི་ངོམས་པ་ལ་སོགས་པའི་སྐྱོན་མང་པོ་འབྱུང་བས་དེ་འདྲར་མ་གྱུར་པ་དང༌། ཡང་ལུས་ཕུང་གི་བཅུད་ཀྱིས་མ་འདངས་ནས་ལུས་ཟུངས་ཧ་ཅང་ངན་ཆེས་ནས་འབྱུང་བ་མར་རྒུད་པ་དང༌། ཉིན་མཚན་གྱི་ཚོད་ཟིན་པ་ནུབ་མོ་མར་ཉལ་ཤེས་པ་དང་། ནངས་མོ་ཡར་ལང་ཤེས་པ་ཉལ་ཚོད་ལང་ཚོད་ཀྱི་ཚད་ལ་འཆར་གཞི་ཡོད་ཅིང་བཟའ་བ་ཡང་དུས་ཐོག་ནས་ཟ་བ་ལས་དུས་མིན་གྱི་ཟ་བ་སྤོང༌བ་སྟེ། འདི་དག་ནི་རྒྱུན་གྱི་འཚོ་བའི་ཐོག་ནས་དགེ་སྦྱོར་གནད་དུ་འགྲོ་བའི་གྲོགས་ཡིན་ནོ་ཞེས་པའོ།།

༥༨ དད་བརྩོན་སྐུལ་འདེབས་རྐྱེན་གྱི་ཆོས་དྲུག་བསྟན་པ།

དད་བརྩོན་སྐུལ་འདེབས་རྐྱེན་གྱི་ཆོས་དྲུག་ནི།།

རྐྱེན་ངན་བསྟུད་ལས་མི་རྟག་རྒྱུད་ལ་སྐྱེས།།

རྒྱུ་འབྲས་ཤེས་ནས་ལས་ངན་དུག་བཞིན་སྤོང༌།།

མོས་གུས་ཚུད་པས་བླ་མ་སངས་རྒྱས་མཐོང༌།།

ཆོས་ལ་ངེས་པས་དགེ་སྦྱོར་བྲོད་པ་སྐྱེ།།

དགེ་འདུན་དད་པས་ཡར་འདྲེན་སྐྱེལ་མ་ཞུ།།

སངས་རྒྱས་འདོད་པས་བརྩོན་པས་ཅི་ཐོབ་བྱེད།།

སྐལ་བཟང་དམ་པ་རྣམས་ཀྱི་ལུགས་ཡིན་ནོ།།

ཞེས་གསུངས་པ་སྟེ། དྲིན་ཕ་མ་བརྒྱ་ཡི་ཁ་ཏ་བས། །སྡང་དགྲ་བོ་གཅིག་གི་གློ་རྒྱག་དགའ། །ཞེས་པ་ལྟར་དུ་རྐྱེན་ངན་མང་པོ་བསྟུད་མར་ཐོག་ལ་བབས་པ་དཔེར་ན་རྗེ་མི་ལ་རས་པ་ལ་ཨ་ཁུ་ཨ་ནེས་མནར་གཅོད་ཀྱི་དྲིན་གྱིས་ཆོས་ལམ་ལ་ཞུགས་པ་བཞིན་དུ། མི་རྟག་སྟོན་པའི་སློབ་དཔོན་གྱི་སྐུལ་མ་ལས་མི་རྟག་རྒྱུད་ལ་སྐྱེས་པ་ཡིན་པ་དང་། ལས་རྒྱུ་འབྲས་ཀྱི་རྣམ་གཞག་ཤེས་པས་ལས་ངན་སྡིག་པའི་བྱ་སྤྱོད་དུག་བཞིན་དུ་རང་ཤུགས་ཀྱིས་སྤོང༌བ་ཡིན་ཡང་། རང་རེ་བོད་ལ་མཚོན་ན་ཁྱིམ་ལ་གནས་པ་མང་ཆེ་བས་དཀོན་མཆོག་གསུམ་ལ་དད་པ་བྱེད་ཅིང་། ཚེ་འདི་ཕྱི་གཉིས་ཀ་ལ་བདེ་ན་སྐྱིད་ན་སྙམ་པས་མ་ཚད་ཚེ་ཕྱི་མར་ལས་འབྲས་མྱོང་བ་པོ་ཡོད་པར་འཛིན་པ་དང་། རང་མི་གཅེས་པ་དང་བདེ་འབྲས་མི་འདོད་པ་ཞིག་མིན་ཡང་། ལས་འབྲས་ཀྱི་རྣམ་གཞག་དེ་ཡང་དག་པ་ཞིག་མ་ཤེས་ནས་རྒྱུ་འབྲས་འཆོལ་ཉོག་ཏུ་སྤྱད་པ་ཡིན་པས་ལས་འབྲས་ཀྱི་རྣམ་གཞག་ལེགས་པར་ཤེས་པ་ནི་གལ་ཆེའོ། །མོས་གུས་ཡོད་ན་བླ་མ་སངས་རྒྱས་སུ་མཐོང་བ་དང་བླ་མ་སངས་རྒྱས་སུ་མཐོང༌བས་བྱིན་རླབས་རང་རྒྱུད་ལ་ཞུགས་པ་ཡིན་པ་དང་། ཆོས་ཀྱི་ནང་དོན་ཤེས་ནས་ངེས་པས་དེའི་དོན་ཉམས་སུ་བླངས་ཏེ། དེ་མ་གཏོགས་པའི་ཐབས་གཞན་མི་འདུག་སྙམ་པའི་བྲོད་པའམ་སྤོབས་པ་དང་སྤྲོ་བ་སྐྱེ་དུས། བརྩོན་གང་དགེ་ལ་སྤྲོ་བ་ཡིན་པས་ཆོས་ཀྱི་རྣམ་གྲངས་དུ་མ་ལ་འཇུག་པའི་ནང་གི་སེམས་སྟོབས་སྐྱེ་བ་ཡིན་པ་དང་། དགེ་འདུན་ལ་དད་པ་ཞེ་སྙིང་ནས་ཡོད་པས་ཡར་འདྲེན་ཐར་ལམ་གྱི་སྐྱེལ་མ་ཞུ་བ་དང་། མཐར་ཐུག་སངས་རྒྱས་ཀྱི་གོ་འཕང་ཐོབ་འདོད་པ་ཡིན་ན། བརྩོན་པ་དྲག་པོས་སངས་རྒྱས་བྱང་སེམས་ཀྱི་རྣམ་ཐར་ལ་སློབ་ཅིང་དགེ་བའི་ཆོས་ཅི་ཐོབ་གང་ཐོབ་ཀྱིས་སྒྲུབ་པར་བྱེད་དགོས་ལ། སངས་རྒྱས་ཐོབ་འདོད་དེ་ཡང་འཁོར་བའི་སྡུག་བསྔལ་ལ་བསམས་ནས་རང་ཉིད་ཀྱི་གཏན་བདེ་རྫོགས་པའི་སངས་རྒྱས་ཀྱི་གོ་འཕང་ཞིག་ཐོབ་དགོས་འདུག་སྙམ་ན། བསམ་རྒྱུ་སྡུག་པོ་མིན་པར་བསམ་པ་ཙམ་དང་སྨོན་ལམ་བཏབ་པ་ཙམ་གྱིས་བསོད་ནམས་རླབས་ཆེན་བསགས་པ་ཡིན་ཡང་། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་བསྒྲུབ་དགོས་འདུག སྟོབས་བཅུའི་སྟོབས་དང་དབང་བཅུའི་དབང་ལ་སོགས་པ་སྤངས་རྟོགས་ཀྱི་ཡོན་ཏན་མཐར་མ་ཕྱིན་ཚེ་སེམས་ཅན་ལ་ཕན་འདོགས་ཐུབ་པ་མི་འདུག་སྙམ་པ་ནི། ཐེག་ཆེན་བྱང་ཆུབ་མཆོག་ཏུ་སེམས་བསྐྱེད་པ་ཡིན་ཅིང་། དེ་དུས་ཐེག་ཆེན་ཚོགས་ལམ་གྱི་སྣེ་ཟིན་པ་ཡིན་པས་ལམ་མ་ནོར་བ་དེའི་རྔ་མ་ལ་བཟུང་རྔོག་མ་ལ་འཐམས་ནས། ལོང་བས་བ་རྔ་བཟུང་བཟུང་བྱས་ཏེ་མ་བཏང་ན་དགེ་བ་མ་སྐྱེས་པ་སྐྱེ། སྐྱེས་པ་འཕེལ་ཞིང་། བྱང་ཆུབ་སེམས་དཔའི་སྨོན་འཇུག་གི་བསླབ་བྱ་ཕ་རོལ་ཏུ་ཕྱིན་པ་དྲུག་དང་བསྡུ་དངོས་བཞི་ལ་རིམ་གྱིས་བསླབས་ནས་རིམ་གྱིས་ས་ལམ་གྱི་མངོན་རྟོགས་སྐྱེ་བ་ཡིན། གང་ལྟར་ཐར་བའི་ལམ་སྣ་ཟིན་ཚེ་གོམ་གང་སོང་ཡང་ཐར་བའི་ལམ་དེ་ལས་འཕྱུག་འགྲོ་ས་མེད་པས་རྫོགས་པའི་སངས་རྒྱས་ལ་ཐག་ཇེ་ཉེར་འགྲོ་བ་ཡིན་པས་མ་ཚད། མྱུར་ལམ་ཁྱད་པར་ཅན་དང་འཕྲད་ན་རྐང་འགྲོས་དང་ཉི་ཟླའི་འགྲོས་ཁྱད་བཞིན་ཡོད་པས་སངས་རྒྱས་ཀྱི་གོ་འཕང་ལ་ལྷག་ ཏུ་ཉེ་བ་སྟེ། དེ་ལྟ་བུའི་སྐུལ་འདེབས་རྐྱེན་གྱི་ཆོས་དྲུག་དང་ལྡན་པར་བྱེད་པ་ནི་སྐལ་བཟང ་དམ་པ་རྣམས་ཀྱི་ལུགས་ཡིན་ནོ།།

༥༩ རང་རྒྱུད་འདུལ་སྦྱོང་གདུལ་བའི་ཆོས་དྲུག་བསྟན་པ།

རང་རྒྱུད་འདུལ་སྦྱོང་གདུལ་བའི་ཆོས་དྲུག་ནི།།

ལོག་བློ་མི་རྒོད་ཆོས་བློ་མི་འགྱུར་བ།།

ཞེ་བཅད་བཟོད་དཀའ་སྡུག་བསྲན་ཐུབ་པ་དང༌།།

འཁོར་བའི་ཉེས་མཐོང་སྐྲག་པས་ཡིད་འབྱུང་དང༌།།

སྣོད་ངན་སྐྱོན་མེད་རང་རྒྱུད་དག་པ་དང༌།།

ཐོས་བསམ་ཆེ་བས་ཆོས་མཆོག་བསྟན་པ་རྟོགས།།

དབང་དང་དམ་ཚིག་ཟབ་མོའི་སྣོད་གྱུར་པ།།

མཚོ་གླིང་རིན་ཆེན་སྣོད་ལས་དཀོན་པར་སྣང༌།།

ཞེས་གསུངས་པ་སྟེ། རང་བློ་ངན་གོམས་སུ་སོང་བ་བཅོས་ནས་ཡང་དག་པའི་ལམ་དུ་བཞག་པའི་འདུལ་སྦྱོང་བྱེད་ཐབས་ཀྱི་ཆོས་དྲུག་ནི། ལོག་པའི་བློ་སྣ་གསོད་གཅོད་རྐུ་འཕྲོག་དང་། ངན་གཡོ་འཕྲུལ་སྟབས་སོགས་མི་དགེ་བའི་ལས་ཀྱི་ཕྱོགས་ལ་འཇུག་པའི་བློ་སྣ་མི་རྒོད་ཅིང་ཆོས་དང་འདྲེས་པའི་བློ་ནམ་ཡང་མི་འགྱུར་བར་བྱེད་པ་དང་། ཆོས་ཕྱོགས་ལ་ཞེ་བཅད་དང་བཟོད་དཀའ་བའི་གནས་ལ་སྡུག་བསྲན་ཐུབ་པ་ཞིག་དགོས་ཏེ། འཇིག་རྟེན་བྱ་བའི་ཁ་མགོ་རྣ་ཞིག་གི་དོན་དུ་སྲོག་ཀྱང་གཏོང་ཐུབ་པ་ཡིན་ན་རང་གཞན་གཏན་གྱི་བདེ་བའི་འདུན་མ་དམ་པའི་ཆོས་ཀྱི་ཕྱོགས་ལ་ཅིའི་ཕྱིར་ན་སྡུག་བསྲན་མི་བྱེད། དེས་ན་བཟོད་དཀའ་སྡུག་བསྲན་བྱེད་ས་ནི་ལྟོ་གོས་གཏམ་གསུམ་ཡིན་ལ། དེ་ལས་ཀྱང་གཏམ་གྱི་ཐད་ནས་སྡུག་བསྲན་མ་ཐུབ་སྟེ་ལོག་ལམ་དུ་ཞུགས་པ་ཤིན་ཏུ་ནས་ཀྱང་མང་བ་ཡིན་པས་གཟབ་དགོས་སའི་གནས་གལ་ཆེན་ཡིན། ཆོས་བཤད་པ་དེ་བོས་ཁ་སྐོར་བ་བཞིན་དུ་ཁ་ཕྱིར་བསྐོར་ནས་བཤད་རྒྱུ་ཞིག་མ་ཡིན་པས། རང་འདེང་རང་ལ་བརྒྱབ་ནས་བཤད་ན། ང་ནི་ཆུང་ནས་དམ་པ་ཡིན་པའི་མཚན་བཏགས་ནས་ཞུགས་ས་བཟང་པོ་ཆོས་ལམ་ལ་ཞུགས་དུས། དམ་པའི་སྐྱེ་སྤྲུལ་ཡིན་པའི་བྱང་ཆུབ་སེམས་དཔའི་རིགས་ཀྱི་རྟགས་དང་མཚན་མ་ཡོད་པ་མིན་ཡང་། བླ་མ་བཀའ་དྲིན་ཅན་ཚོའི་བཀའ་དྲིན་གྱིས་ཆུང་དུས་ནས་ཚོགས་གཏོར་བཅས་པ་བཞིན་དུ་ཡར་འཛུགས་འཛུགས་བྱས་ནས་བཞག་པས་མ་ཚད། དེ་ལ་དབང་ལུང་གདམས་ཁྲིད་མང་པོའི་རྒྱུན་གནང་ནས་མར་གྱིས་ཁོག་སྣུམ་བརྒྱབ། མ་འོངས་བསྟན་རྒྱུན་སྤེལ་དགོས་པའི་བཀའ་གནང་ནས་དཀར་རྒྱན་གྱིས་སྒྲོས་བཏོད་པ་བྱས། འོན་ཀྱང་མི་ཚེའི་ལོ་རྒྱུས་ཀྱི་འཕེལ་འགྲིབ་ཀྱི་ནང་དུ་སྐྱིད་སྡུག་དར་རྒུད་མང་པོ་ཞིག་བརྒྱུད་པའི་ལོ་ཉུང་གི་དུས་ལྟ་བུ་ལ་མཚོན་ན། ལ་རྒྱ་རུས་པའི་བསམ་བློའི་ཐོག་ནས་ཚུགས་རེ་བཟུང་བའི་བསམ་བློ་ཤུགས་ཆེ་བ་མ་གཏོགས། ཐོག་མ་ཉིད་ནས་བསྟན་པ་རང་རྒྱུད་ལ་ཆ་ཚང་བཞུགས་པའིཚུར་ཉན་རྒྱལ་བསྟན་སྲོག་གིས་བསྲུངས་ནས་མ་སེམས་ཅན་གྱི་དོན་དུ་སངས་རྒྱས་བསྒྲུབ་དགོས་བསམ་པའི་སེམས་བསྐྱེད་ཀྱིས་ཟིན་ཡོད་པ་ནི་དཀའ་བའི་ཚད་ལ་སླེབས་ཡོད་དེ། རང་བློ་རང་ལ་ལྐོག་ཏུ་མ་གྱུར་པ་ཡིན་པས་རང་མཚང་རང་གིས་མི་ཤེས་པ་ཅི་ཡོད། དེང་སང་ལོ་ན་ཡར་སོན་ལ་ཐོན་ཏེ་འདས་པའི་ལོ་རྒྱུས་རྣམས་ཉམས་མྱོང་ལ་སོང་ནས་ཆོས་འཇིག་རྟེན་གཉིས་ཀའི་ཐད་ནས་མྱོང་བ་མང་པོ་ཞིག་རང་ཐོག་ལ་ཡོང་བ་དེས་རྨུས་ནས། དབེན་པའི་ཁྲོད་འདིར་བྲོས་པས་མ་ཟད་ཆོས་མིན་གཞན་པའི་བློ་གཏད་མེད་པ་མྱོང་བས་གྲུབ་པ་ཡིན། དེ་ཡང་ཆོས་མི་ལ་བཤད་པའི་བླ་མའི་མཚན་ཉིད་མ་དགོས་ཆོས་ཚུར་ཉན་པའི་སློབ་མ་བཟང་པོ་ཞིག་གི་ཆ་ཚད་མི་ལྡན་པས་ཁུ་སིམ་པོར་སྡོད་དགོས་པ་ཞིག་ཡིན་ཡང་། དུས་ཀྱི་འཕེལ་འགྲིབ་ཀྱིས་བསྟན་པའི་ཕྲ་ཉག་འདི་འདྲ་བ་ལ་ཐུག་དུས་ཆོས་བརྒྱུད་རེ་སྤེལ་ཏེ་བསྟན་པའི་སྲོག་མཐུད་པའི་དབུགས་ལམ་རེ་ཉན་སོང་ནའང་སྐལ་བ་བཟང་པོ་རེད་བསམས་པའི་ཐོག་གིས་བཤད་རྒྱུན་སྤེལ་བ་ལ་འཇུག་བཞིན་པ་འདི་འདྲ་ཡིན། གྱོང་གཏོང་དགོས་པའི་ལྟོ་གོས་གཏམ་གསུམ་གྱི་ཕྱོགས་ནས་ང་འདྲ་ཞིག་ལ་ཆ་མཚོན་ན་སྲོག་གཅོད་ཀྱི་ཤན་པ་མདུན་དུ་ཐོན་ཡོང་རུང་ཁེ་ཁ་ཁོ་ལ་སྤྲོད་པར་མ་ཟད་བསྔོ་བ་སྨོན་ལམ་བཟང་པོ་ཞིག་གིས་མཚམས་སྦྱོར་བྱས་ནས་དེ་ལ་སྡིག་པ་མ་འབྱུང་བར་ཤོག་ཅེས་ཟེར་ཐུབ་ངེས་ཡིན་སྙམ་བཞིན་ཡོད། འོན་ཀྱང་བསམ་པའི་ཐོག་ནས་དེ་འདྲ་ཞིག་ཡོད་ཀྱང་སྦྱོར་བའི་ཐོག་ནས་སོ་སོ་སྐྱེ་བོ་ཡིན་པས་ཅི་འོང་མི་ཤེས་ལ། ད་གང་ལྟར་ཡང་ཆོས་པ་ཞིག་ཡིན་དུས་བཀའ་གདམས་གོང་མའི་རྣམ་ཐར་ལྟར་གྱོང་ལྟོ་གོས་གཏམ་གསུམ་ལ་བསྐུར་བ་ནི་རང་རྒྱུད་འདུལ་སྦྱོང་གི་ཆོས་ཀྱི་གཙོ་བོ་ཡིན། དེ་ནས་འཁོར་བའི་ཉེས་པའམ་སྡུག་བསྔལ་གྱིས་སྐྲག་ནས་འཁོར་བ་ལས་ཡིད་འབྱུང་བ་དང༌། རང་རྒྱུད་ལ་སྣོད་ངན་གྱི་སྐྱོན་མེད་པའི་གཙང་ཞིང་དག་པ་ཞིག་དགོས་ཏེ། སྣོད་ངན་ལ་བཅུད་ཚོགས་པ་མིན་ཅིང་། སྣོད་བཟང་ན་བཅུད་ཀྱང་འབོ་ཟགས་ཉམས་རུལ་དང་སླད་སྐྱོན་ལ་སོགས་པ་མེད་པར་འཛིན་ཐུབ་པའི་ཕྱིར། དེའི་འཕྲོར་ཐོས་བསམ་སྐྱེས་སྦྱོང་གི་ཤེས་རབ་མི་དམན་པས་ཆོས་མཆོག་ཟབ་མོ་བསྟན་པ་རྟོགས་ཐུབ་པ་དང་། སྣོད་དག་པས་དབང་དང་དམ་ཚིག་ཟབ་མོའི་སྣོད་དུ་གྱུར་པ་སྟེ། དེ་ལྟ་བུའི་རང་རྒྱུད་བྱི་དོར་ལེགས་པའི་གང་ཟག་དེ་ཆོས་ཟབ་མོ་འཛིན་པའི་ནུས་པའམ་མཚན་ཉིད་དང་ལྡན་པ་རྒྱ་མཚོའི་གླིང་གི་རིན་པོ་ཆེའི་སྣོད་བཟང་པོ་ལས་ཀྱང་རྙེད་པ་དཀོན་པར་སྣང་ངོ་།།

༦༠ ཉམས་ལེན་རྐྱེན་ངན་མི་འཕྲོགས་ཆོས་དྲུག་བསྟན་པ།

ཉམས་ལེན་རྐྱེན་ངན་མི་འཕྲོགས་ཆོས་དྲུག་ནི།།

ལུས་ཀྱི་སྡུག་བསྔལ་སྣ་ཚོགས་ཐུབ་པ་དང༌།།

ངག་གི་མི་དགེ་དོན་མེད་འཆལ་གཏམ་ཐུབ།།

སེམས་ཀྱི་བདེ་སྡུག་ལེགས་ཉེས་ཟུག་རྔུ་ཐུབ།།

མི་མེད་དབེན་པར་སྐྱོ་ངལ་འཇིགས་སྐྲག་ཐུབ།།

འདུ་འཛིའི་གྲོང་དུ་ཡེངས་མེད་གཉེན་པོ་ཐུབ།།

སྲུང་སྡོམ་བསླབ་པས་ཡུལ་རྐྱེན་ངན་པ་ཐུབ།།

དེ་དག་ལྡན་ན་ཆོས་ལམ་བདེ་བར་འགྲུབ།།

ཞེས་གསུངས་པ་སྟེ། ཉམས་ལེན་རྐྱེན་ངན་གྱི་དབང་དུ་མི་འགྲོ་བར་བྱེད་པའི་རྐྱེན་ཐུབ་ཀྱི་ཆོས་དྲུག་ནི། དེ་ལ་སྤྱིར། དཀའ་མོའི་ལས་མ་བྱས་ན། དཀོན་པོའི་རྒྱུ་དང་མི་ཐུག ཅེས་པ་དང་། གཟར་མོའི་བྲག་ལ་མ་འགོས་ན། བདེ་མོའི་ཐང་ལ་མི་ཐོན། ཞེས་པའི་དཔེ་ལྟར་ཡིན་པས་ཆོས་ཕྱིར་དཀའ་སྤྱད་ལ་བཟོད་དགོས་པ་དང་། བྱེ་བྲག་འཇིག་རྟེན་ཁྱིམ་པ་དག་གིས་དབྱར་དགུན་སྟོན་དཔྱིད་དུས་དང་རྣམ་པ་ཀུན་ཏུ་མནོག་ཆུང་ཚེ་འདིའི་བྱ་བའི་དོན་དུ། དཀའ་ཚེགས་སྡུག་བསྔལ་དྲག་པོའང་བཟོད་ཅིང་བསྲན་ཐུབ་པ་ཡིན་ན། ཆོས་ཕྱོགས་ཀྱི་བྱ་བ་ལ་དེ་བས་ཀྱང་བཟོད་འོས་པ་དང་། ཁྱད་པར་སྔོན་གྱི་སངས་རྒྱས་དང་བྱང་ཆུབ་སེམས་དཔའ་དག་གིས་དམ་ཆོས་བྱང་ཆུབ་སྒྲུབ་པ་ལ་ཆོས་ཚིག་བཞི་རེའི་དོན་དུ་ཅི་འདྲའི་དཀའ་སྤྱད་མཛད་འདུག་སྙམ་ནས་དཀའ་སྡུག་བཟོད་ཐུབ་པར་བྱེད་པ་དང༌། ངག་གིས་ཀྱང་མི་དགེ་དོན་མེད་ཀྱི་འཆལ་གཏམ་སྤང་ཐུབ་དགོས་ཏེ། དོན་མེད་འཆལ་གཏམ་གྱིས། ཆུང་ན་རྣམ་གཡེང་འཕེལ་ཞིང་དུས་ཚོད་གྲོན་པར་བྱེད་པ་དང་། ཆེ་ན་འཁོན་དང་ཚིག་རྩུབ་ལ་སོགས་པ་མི་དགེ་སྣ་ཚོགས་འདྲེན་པ་ཡིན་པས་རབ་ན་ངག་བཅད་སོགས་བྱེད་པ་དང་། སེམས་དགའ་བའི་དུས་སུ་ཁེངས་ནས་དགའ་མི་ཆེ་བ་དང་། སྡུག་ནས་ཡིད་མི་བདེ་བའི་ཟས་རྙེད་དུས་ཁོང་དུ་མི་ཆུད་པར། དམ་པའི་ཆོས་ཀྱིས་སྐྱིད་ན་གོང་གནོན་སྡུག་ན་སྐྱོ་གྲོགས་བྱེད་ཐུབ་པ་ཞིག་དགོས་པ་དང་། མི་མེད་དབེན་པའི་རི་ཁྲོད་ན་སྡོད་ཚེ་འདུག་ཚུགས་ཤིང་འདྲེ་སྲིན་ལ་སོགས་པ་ལ་འཇིགས་སྐྲག་མེད་པ་དང་། འདུ་འཛི་ཅན་གྱི་གྲོང་ནང་དུ་ཐོན་ཚེ་ཡེངས་མེད་ཀྱི་གཉེན་པོ་དྲན་པ་དང་ཤེས་བཞིན་མ་བྲལ་བ་དང་། བརྟུལ་ཞུགས་བརྟན་པར་མ་གྱུར་གང་དང་གང་། །ཡུལ་དང་གྲོགས་ལ་བརྟེན་ནས་མཐོ་དམན་བྱེད། །གསུངས་པས་བསླབ་པ་མིག་གི་འབྲས་བུ་བཞིན་དུ་སྲུང་བ་ལ་འདུན་པ་དྲག་པོས་བསླབས་པས། ཡུལ་རྐྱེན་ངན་པའི་དབང་དུ་མི་འགྲོ་བར་ཐུབ་པ་སྟེ་ཆོས་དྲུག་པོ་དེ་དག་དང་ལྡན་ན་ཆོས་ལམ་བདེ་བར་འགྲུབ་པ་ཡིན་ནོ།།

༦༡ ཐར་ལམ་ཡོན་ཏན་འདྲེས་པ་རྣམ་དྲུག་བསྟན་པ།

ཐར་ལམ་ཡོན་ཏན་འདྲེས་པ་རྣམ་དྲུག་ནི།།

ཐུན་མོང་ཆོས་འདྲེས་ཕྱི་མའི་བྱང་ཆུབ་སྒྲུབ།།

གསང་སྔགས་ཆོས་འདྲེས་སྐུ་གསུམ་ལམ་དུ་སློང༌།།

མཐར་ཐུག་གནད་འདྲེས་མཐར་འཛིན་གོལ་ས་ཆོད།།

ཐེག་ཆེན་ཆོས་འདྲེས་ཅི་བྱེད་གཞན་དོན་སྤྱོད།།

ཉན་རང་ཆོས་འདྲེས་འཁོར་བའི་བྱ་བ་དོར།།

དེ་འདྲའི་གང་ཟག་ཆོས་དང་རང་རྒྱུད་འདྲེས།།

ཞེས་གསུངས་པ་སྟེ། ཐུན་མོང་ཐེག་པ་ལས་བསྟན་པའི་ཆོས་རྣམས་རང་རྒྱུད་ལ་འདྲེས་ན་ཐར་བའི་ལམ་སྣ་ཟིན་ནས་ཕྱི་མའི་བྱང་ཆུབ་འགྲུབ་པ་ཡིན་པ་དང་། དེ་བཞིན་དུ་གསང་སྔགས་ཀྱི་ཆོས་དང་རང་རྒྱུད་འདྲེས་ན་གསང་སྔགས་སོ་སོའི་རང་བཞེད་ལྟར་དུ་སྐུ་གསུམ་ལམ་དུ་སློང༌ནུས་པ་དང་། མཐར་ཐུག་གི་གནད་དང་འདྲེས་ན་ཡོད་མེད་ཡིན་མིན་རྟག་ཆད་སྐྱེ་འགག་ལ་སོགས་པའི་མཐར་འཛིན་གྱི་གོལ་ས་ཆོད་པ་དང་། ཐེག་ཆེན་གྱི་ཆོས་སྨོན་འཇུག་བྱང་ཆུབ་མཆོག་ཏུ་སེམས་བསྐྱེད་ནས་རང་རྒྱུད་དང་འདྲེས་ན། བྱ་བ་འདི་ལྟ་བུ་ཞིག་བྱེད་སྙམ་པའི་དམིགས་གཏད་ཅན་གྱི་བྱ་བཞག་གང་བྱེད་ཀྱང་། ཐེག་ཆེན་བྱང་ཆུབ་སེམས་ཀྱིས་ཟིན་ནས་དངོས་ཤུགས་བརྒྱུད་གསུམ་དུ་གཞན་དོན་ལ་འགྱུར་བ་ཡིན་པ་དང་། ཉན་རང་གི་ཆོས་དང་འདྲེས་ནས་འཁོར་བ་ལ་ངེས་འབྱུང་སྐྱེས་པའི་སྟོབས་ཀྱིས་འཁོར་བའི་བྱ་བ་དོར་བ་སྟེ། དེ་འདྲའི་གང་ཟག་གི་རྒྱུད་ཆོས་དང་འདྲེས་པའོ།།

༦༢ མངོན་ཞེན་ཨ་འཐས་འཇིག་པའི་ཆོས་དྲུག་བསྟན་པ།

མངོན་ཞེན་ཨ་འཐས་འཇིག་པའི་ཆོས་དྲུག་ནི།།

ཡུལ་དྲུག་རྫུན་པས་འཁྲུལ་བར་ཐག་ཆོད་དང༌།།

བྱ་བྱེད་དོན་མེད་འཁྲུལ་བར་ཐག་ཆོད་དང༌།།

མངོན་ཞེན་སླུ་བས་འཁྲུལ་བར་ཐག་ཆོད་དང༌།།

སྙན་གྲགས་བསྟོད་བཀུར་འཁྲུལ་བར་ཐག་ཆོད་དང༌།།

དགྲ་གཉེན་ངེས་མེད་འཁྲུལ་བར་ཐག་ཆོད་དང༌།།

བདེན་མེད་ཤེས་ན་འཁྲུལ་སྣང་འཁྲུལ་འཛིན་ཞིག།

ཅེས་གསུངས་པ་སྟེ། གཟུགས་སོགས་ཡུལ་དྲུག་རྫུན་པ་སྒྱུ་མའི་དཔེ་བརྒྱད་ལྟར་དུ་མེད་བཞིན་སྣང་བ་ཡིན་པར་ཤེས་ནས་དེ་ལྟར་སྣང་བ་ནི་འཁྲུལ་བ་ཡིན་པར་ཐག་ཆོད་པ་དང༌། ཚེ་འདིའི་བྱ་བྱེད་ཐམས་ཅད་དོན་མེད་འཁྲུལ་བ་ཡིན་པར་ཐག་ཆོད་པ་དང༌། མངོན་པར་ཞེན་ཅིང་ཆགས་པ་ཐམས་ཅད་སླུ་བྱེད་ཡིན་པར་ཤེས་ནས་འཁྲུལ་བར་ཐག་ཆོད་པ་དང༌། སྙན་གྲགས་བསྟོད་བཀུར་སོགས་ལ་སྙིང་པོ་མེད་པར་ཤེས་ནས་འཁྲུལ་བ་ཡིན་པར་ཐག་ཆོད་པ་དང༌། དགྲ་གཉེན་ལ་ངེས་པ་མེད་པ་ཚེ་སྟོད་ཀྱི་དགྲ་ཚེ་སྨད་ཀྱི་གཉེན་དུ་འགྱུར་བ་ལ་སོགས་པ་འཁྲུལ་བས་ཀུན་ཏུ་བརྟགས་པ་ཡིན་པས་འཁྲུལ་བ་ཡིན་པར་ཐག་ཆོད་པ་དང་། དེ་ལྟ་བུའི་འཁྲུལ་སྣང་ཐམས་ཅད་དོན་ལ་མེད་པ་མེད་བཞིན་ཡོད་པར་སྣང་བ་བསླུ་བའི་ཆོས་ཅན་ཡིན་པར་ཤེས་ན། འཁྲུལ་འཁོར་གྱི་ཨ་མའི་གནད་གསང་གི་སྒོ་བརྒྱབ་ན་འཕྲུལ་འཁོར་གྱི་ལྷུ་ལག་ཐམས་ཅད་འགུལ་མི་བཏུབ་པ་བཞིན་དུ་བདེན་འཛིནགྱི་འཁྲུལ་བ་ཞིག་ནས་བདེན་མེད་ཀྱི་དོན་རྟོགས་པ་ཡིན་ནོ་ཞེས་པའོ།།

༦༣ དལ་འབྱོར་དོན་དང་བཅས་པའི་ཆོས་དྲུག་བསྟན་པ།

དལ་འབྱོར་དོན་དང་བཅས་པའི་ཆོས་དྲུག་ནི།།

འབྱོར་ཡང་དོན་མེད་སླུ་བས་སྒྲུབ་ལ་འབད།།

ཐོས་ཀྱང་ཚིག་ཕྱིར་འཆོར་བས་སྒྲུབ་ལ་འབད།།

ཤེས་ཀྱང་སྙིང་པོ་སྟོར་བས་སྒྲུབ་ལ་འབད།།

བསམས་ཀྱང་རྣམ་རྟོག་མཆེད་ཕྱིར་སྒྲུབ་ལ་འབད།།

བཤད་ཀྱང་གོ་ཡུལ་ལུས་པས་སྒྲུབ་ལ་འབད།།

མ་བསྒྲུབས་མངོན་དུ་མི་སྣང་སྒྲུབ་ལ་འབད།།

ཅེས་གསུངས་པ་སྟེ། ཤིན་ཏུ་རྙེད་དཀའ་ཞིང་རྙེད་ན་དོན་ཆེ་བའི་དལ་འབྱོར་གྱི་ལུས་རྟེན་ད་ལྟ་ཐོབ་ཡོད་ཀྱང་དེ་དོན་དང་ལྡན་པ་ཞིག་མ་བྱས་ཚེ་དོན་མེད་ཀྱི་བྱ་བས་བསླུ་བར་འགྱུར་བས་དོན་ཡོད་པའི་བྱ་བ་དམ་པའི་ཆོས་ནན་ཏན་དུ་སྒྲུབ་པ་ལ་འབད་པར་བྱེད་དགོས་པ་དང་། ཐོས་བསམ་གྱི་གཟུགས་བརྙན་ཙམ་ཞིག་བྱས་ཀྱང་ཐོས་པ་ཁ་ཕྱིར་བལྟས་སུ་སོང་ནས་ཚིག་རྐྱང་པའི་རྗེས་སུ་ཤོར་ན་ཅི་ཡང་མི་འོང་བས་སྒྲུབ་པ་ལ་འབད་དགོས་པ་དང་། ཐོས་དོན་ཤེས་པ་ཙམ་ཁོ་ན་ཡོད་ཀྱང་སྙིང་པོ་དོན་གྱི་ཉམས་ལེན་སྟོར་བས་སྒྲུབ་ལ་འབད་དགོས་པ་དང་། ཐོས་པས་དོན་ཤེས་ནས་དེ་ལ་བསམ་གཞིག་བྱས་པ་ཙམ་ཡོད་ཀྱང་རྣམ་རྟོག་མང་པོ་སྤྲོ་ཞིང་མཆེད་པའི་རྒྱུ་ཡིན་པས་སྒྲུབ་པ་ལ་འབད་དགོས་པ་དང་། དེ་ལྟར་དུ་ཐོས་བསམ་བྱས་པ་དེ་གཞན་ལ་བཤད་ཀྱང་ཐོས་པ་གོ་ཡུལ་དུ་ལུས་པས། རྒན་པོས་གནའ་སྒྲུང་བཤད་པ་དང་འདྲ་བར་དེ་ལྟར་ཟེར་དར་བསམ་པ་ཞིག་ཏུ་འགྲོ་བས་སྒྲུབ་ལ་འབད་པ་གནད་ཆེ་བ་བསྟན་པ་སྟེ། མདོར་ན་མ་བསྒྲུབས་ན་མངོན་དུ་མི་འགྱུར་པས་སྒྲུབ་ལ་འབད་དགོས་སོ་ཅེས་པའོ།།

༦༤ འཁོར་བ་བློས་བཏང་བློ་སྦྱོང་ཆོས་དྲུག་བསྟན་པ།

འཁོར་བ་བློས་བཏང་བློ་སྦྱོང་ཆོས་དྲུག་ནི།།

དོན་མེད་སླུ་བས་འཇིག་རྟེན་བྱ་བ་བཏང༌།།

སྲེད་པ་འཕེལ་བས་འདོད་ཡོན་ཞེན་པ་བཏང༌།།

སྙིང་པོ་མེད་པས་འདུན་གྲོས་ངན་པ་བཏང༌།།

ཐམས་ཅད་འདོར་བས་ནོར་རྫས་ཞེན་པ་བཏང༌།།

འདུས་བྱས་བྲལ་བས་གཉེན་འདུན་གདུང་སེམས་བཏང༌།།

ཕུང་ཁྲོལ་རྩ་བ་ཆགས་སྡང་གཟུང་འཛིན་བཏང༌།།

དེ་དག་བཏང་ན་དམ་ཆོས་ངང་གིས་འགྲུབ།།

ཅེས་གསུངས་པ་སྟེ། འཇིག་རྟེན་གྱི་བྱ་བཞག་ཐམས་ཅད་དོན་མེད་འཁྲུལ་བའི་རང་བཞིན་གྱི་སླུ་བྱེད་ཤ་སྟག་ཡིན་པས་གཏང་བར་བྱ་བ་དང་། འདོད་ཡོན་ནི་ལན་ཚྭའི་ཆུ་ལྟར་ཇི་ལྟར་སྤྱད་བཞིན་ངོམས་པ་མེད་པར་སྲེད་པ་སླར་ཡང་འཕེལ་བ་ཡིན་ཕྱིར་ཞེན་པ་གཏང་དགོས་པ་དང་། འདུན་གྲོས་ངན་པ་འཇིག་རྟེན་གྱི་བྱ་བ་སྣ་ཚོགས་པའི་གྲོས་མགོ་བཤམས་པ་དང་བློ་འདོན་བྱེད་པ་རྣམས་ལའང་སྙིང་པོ་མེད་པས་གཏང་བར་བྱ་བ་དང་། ནོར་རྫས་ཐམས་ཅད་མཐར་འདོར་ནས་བསྐྱུར་བ་ཡིན་པས་དེ་ལ་ཞེན་པ་གཏང་བར་བྱ་བ་དང་། གཉེན་འདུན་ཐམས་ཅད་ཀྱང་འདུས་བྱས་འབྲལ་བའི་ཆོས་ཅན་ཡིན་པས་གདུང་སེམས་གཏང་བར་བྱ་བ་དང་། ཕུང་ཁྲོལ་ཆག་སྒོ་ཐམས་ཅད་ཀྱི་རྩ་བ་ཆགས་སྡང་དང་གཟུང་འཛིན་ཡིན་པས་དེ་གཏང་བར་བྱ་བ་སྟེ། དེ་དག་བཏང་ན་དམ་ཆོས་ངང་གིས་འགྲུབ་པ་ཡིན་ནོ།།

༦༥ རྒྱུ་འབྲས་ངེས་ཤེས་བསྐྱེད་པའི་ཆོས་དྲུག་བསྟན་པ།

རྒྱུ་འབྲས་ངེས་ཤེས་བསྐྱེད་པའི་ཆོས་དྲུག་ནི།།

སྡེ་སྣོད་ཉན་ལ་རྒྱུ་འབྲས་ཡིད་ཆེས་བྱ།།

ཆུ་ཐིགས་བུམ་ཁེངས་དཔེ་ཡིས་ཚོགས་གཉིས་བསགས།།

མེ་ཕྲས་ནགས་ཚལ་བསྲེགས་དཔེས་སྡིག་པ་སྤང༌།།

སྐྱིད་སྡུག་སྔོན་ལས་གྱུར་པས་བསོད་ནམས་བསགས།།

དུས་གཅིག་ཚོགས་རྫོགས་མིན་པས་རིམ་གྱིས་སློབ།།

བདག་འཛིན་ཡོད་པར་ལས་ཡོད་ཡིད་ཆེས་བྱ།།

ཞེས་གསུངས་པ་སྟེ། ལས་རྒྱུ་འབྲས་ལ་ངེས་ཤེས་ཤིག་མ་བསྐྱེད་ན་དམ་པའི་ཆོས་འགྲུབ་པ་མིན་པས། རྒྱུ་འབྲས་ལ་ཡིད་ཆེས་སྐྱེད་པའི་ཆོས་བཅོམ་ལྡན་འདས་ཀྱིས་གསུངས་པའི་བཀའ་སྡེ་སྣོད་གསུམ་པོ་ཉན་ན། རྒྱུ་འབྲས་བསླུ་མེད་ཀྱི་གནད་ཤེས་པས་རྒྱུ་འབྲས་ལ་ཡིད་ཆེས་རང་ཤུགས་ཀྱིས་ཡོང་བ་ཡིན་པ་དང་། ཚོགས་གཉིས་ཆུང་རིམ་ནས་བསགས་ནས་སོགས་པའི་ཚུལ་ནི། ཆུ་ཐིགས་བསགས་ནས་བུམ་པ་ཁེངས་པའི་དཔེ་ཡིས་ཤེས་པར་བྱས་ཏེ། རིམ་གྱིས་ཚོགས་གཉིས་རྒྱ་ཆེན་གསོག་པར་བྱེད་པ་དང་། སྡིག་པ་ཆུང་ངུ་ཡིན་ཡང་འཛེམ་དགོས་པ་ལས་སྡིག་པ་ཆུང་འདུག་སྙམ་ནས་བརྙས་བཅོས་བྱེད་རྒྱུ་མེད་པ་ནི། མེ་སྟག་ཕྲ་མོས་ཀྱང་ནགས་ཚལ་ཆེན་པོ་བསྲེགས་པའི་དཔེ་ཡིས་ཤེས་པར་བྱས་ཏེ་སྤོང་བར་བྱེད་པ་དང་། ད་ལྟའི་ལུས་ཐོག་གི་སྐྱིད་སྡུག་ཐམས་ཅད་སྔོན་བསགས་ཀྱི་ལས་ཀྱི་འབྲས་བུ་ཡིན་པས་བསོད་ནམས་བསག་དགོས་པ་དང་། དུས་གཅིག་ལ་ཚོགས་མཉམ་དུ་རྫོགས་པ་དཀའ་ཡང་རིམ་གྱིས་བསླབས་ནས་ཚོགས་རྗོགས་པར་བྱེད་པ་སྟེ། མདོར་ན་བདག་ཏུ་འཛིན་པ་འདི་ཡོད་པའི་ཚེ་ལ་ལས་ཡོད་ལ། ལས་ལ་འབྲས་བུ་ཡོད་པས་ལས་འབྲས་ཀྱི་ཆ་ཕྲ་མོ་ནས་ཀྱང་སྤང་བླང་བྱེད་པར་གཟབ་དགོས་སོ་ཞེས་པའོ།།

༦༦ ཉན་བྱེད་སྣོད་ཀྱི་སྐྱོན་དྲུག་སྤང་བ་བསྟན་པ།

ཉན་བྱེད་སྣོད་ཀྱི་སྐྱོན་དྲུག་སྤང་བ་ནི།།

དུས་ལ་མ་བབས་རྫ་སོ་མ་བཏང་དང༌།།

རྣ་བ་མི་གཏོད་ཁ་བུབ་ལྟ་བུ་དང༌།།

ཐོས་པ་མི་བརྟན་ཞབས་རྡོལ་ལྟ་བུ་དང༌།།

ཉོན་མོངས་དང་འདྲེས་དུག་ཅན་ལྟ་བུ་དང༌།།

ལམ་དུ་མི་འགྲོ་དྲི་མས་སྦགས་འདྲ་དང༌།།

ཚིག་གིས་ང་རྒྱལ་སྣོད་ངན་གང་འདྲ་བའི།།

སྐྱོན་རྣམས་སྤངས་ཏེ་ལེགས་པར་རབ་ཏུ་ཉོན།།

ཞེས་གསུངས་པ་སྟེ། ལས་དང་པོ་བ་དེ་རྫ་མ་ཞིག་ལ་དཔེ་བླངས་ནས་དེ་སོ་མ་བཏང་བ་སྟེ་མེ་ལ་མ་བསྲེགས་པར་ནང་དུ་ཆུ་བླུགས་ན་འཇིག་པ་བཞིན་དུ། ལས་དང་པོ་བ་ལ་བློ་སྦྱོང་དང་སྔོན་འགྲོའི་ཆོས་སྔོན་ན་མ་བཤད་ནས་ཟབ་དང་རྒྱ་ཆེའི་གཞུང་དངོས་གཞི་དོན་བསྟན་པར་བྱས་ཀྱང་། དོན་ཕྱིན་ཅི་མ་ལོག་པར་མི་གོ་བས་མ་ཚད་ལས་འབྲས་ཀྱི་རྣམ་གཞག་ལ་སོགས་པ་བློ་ལྡོག་གི་ཆོས་ཙམ་གོ་མ་མྱོང་བ་ཞིག་ལ་ཆོས་སྐད་མཐོན་པོ་ཅི་འདྲ་བཤད་ཀྱང་། དེའི་རྒྱུད་ལ་ཕན་མི་ཐོགས་པའི་ཁར་རྒྱུད་ཆུད་ཟོས་སུ་འགྲོ་བའང་ཡོད་པ་དང་། ཆོས་ལ་རྣ་བ་མི་གཏོད་ན་སྣོད་ཁ་སྦུབས་ཀྱི་སྟེང་དུ་ཆུ་བླུགས་ཀྱང་ནང་དུ་ཆགས་རྒྱུ་མེད་པ་དང་འདྲ་བ་དང་། ཐོས་ཀྱང་ཞེ་ལ་བརྟན་པོར་མ་བཟུང་ན་སྣོད་ཞབས་རྡོལ་གྱི་ནང་དུ་བཅུད་བླུགས་པ་དང་འདྲ་བར་མི་ཚོགས་པ་དང༌། ཉོན་མོངས་པ་དང་འདྲེས་བཞིན་ཆོས་ཉན་ན་དུག་ཅན་གྱི་སྣོད་དུ་ཁ་ཟས་བཟང་པོ་བཞག་པ་བཞིན་དུ་ཕན་མི་ཐོགས་པ་དང༌། ཆོས་ལམ་དུ་མི་འགྲོ་བ་འཇིག་རྟེན་དང་འདྲེས་ན། དྲི་མས་སྦགས་པའི་ཁ་ཟས་ལྟར་དུ་མ་རུང་བར་འགྱུར་བ་དང༌། ཚིག་ཁ་ཤས་འགྲེལ་ཤེས་པས་ང་རྒྱལ་ནས་ང་ནི་གཞན་ལས་ལྷག་པ་ཡིན་བསམས་ནས་བསྡད་ན། སྣོད་ངན་མི་གཙང་བས་གང་བ་དང་འདྲ་བ་ཡིན་པས་སྐྱོན་དེ་རྣམས་སྤངས་ཏེ་ལེགས་པར་རབ་ཏུ་ཉོན་དགོས་ཏེ། བཅོམ་ལྡན་འདས་ཀྱིས། ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་ཅེས་གསུངས་པའི་ཕྱིར་རོ།།

༦༧ ཡང་དག་ཐོས་པ་དམ་པའི་ཆོས་དྲུག་བསྟན་པ།

ཡང་དག་ཐོས་པ་དམ་པའི་ཆོས་དྲུག་ནི།།

ཤེས་རབ་མཆོག་ལྡན་དོན་གཉེར་གཟུ་བོར་གནས།།

བཤེས་གཉེན་བསྟེན་དང་ཐོས་པས་མི་ངོམས་ཤེས།།

མང་པོ་ལ་བརྟེན་མཁས་རྣམས་མཉེས་བྱས་ཤིང༌།།

མང་པོ་ཐོས་པས་སྣ་ཚོགས་ཆོས་སྒོ་ཕྱེད།།

མང་དུ་ཐོས་པས་ཡང་ཡང་ངེས་བྱས་ཤིང༌།།

མང་པོ་ཐོས་དང་དྲིས་ཤིང་བརྩད་པ་སྟེ།།

རྒྱ་མཚོ་འདྲ་བའི་ཆོས་མཛོད་འཛིན་པར་འགྱུར།།

ཞེས་གསུངས་པ་སྟེ། ཐོས་པ་བྱེད་མཁན་དེ་ཤེས་རབ་མཆོག་དང་ལྡན་པ་ཞིག་ཡིན་པས་མ་ཚད། དོན་གཉེར་མེད་པ་ཁྱི་ལ་སྐར་མ་བསྟན་པ་དང་འདྲ་བ་མིན་པར་དོན་གཉེར་དང་ལྡན་ཞིང་། ཐོག་མ་ཉིད་ནས་ཕྱོགས་རིས་ཤིག་ལ་བློ་རྩེ་བཏད་ནས་ཐོས་པ་ཕྱོགས་རིས་དང་ཁ་འཛིན་ལ་འཆེལ་བ་དེ་ལྟ་བུ་ཞིག་མ་ཡིན་པར་བློ་གཟུ་བོར་གནས་པ་དང་། དགེ་བའི་བཤེས་གཉེན་བསྟེན་ཅིང་དེའི་མདུན་ནས་ཆོས་ཉན་པའི་སྐབས་སུ་ཕྱོགས་རེ་བ་ཙམ་གྱིས་སེམས་ཁ་མི་གང་བར་ཐོས་པས་མི་ངོམས་པར་ཤེས་པ་དང་། བཤེས་གཉེན་དམ་པ་མང་པོ་ལ་བརྟེན་ནས་མཁས་པའི་བཤེས་གཉེན་རྣམས་ཀྱི་ཐུགས་མཉེས་ཐབས་བྱས་ཤིང༌ཆོས་མང་པོ་ཐོས་པས། ཐོས་པ་རྒྱ་ཆེན་དུ་སོང་ནས་ཆོས་སྒོ་སྣ་ཚོགས་པ་མང་པོའི་སྒོ་རང་ངོས་ནས་འབྱེད་ཐུབ་པ་དང་། མང་དུ་ཐོས་པས་རང་བློ་ལ་ཡང་ཡང་ངེས་པར་བྱས་ཤིང༌། མང་པོ་ཐོས་པ་དང་དྲིས་ཤིང་བརྩད་ཅིང་སྒྲོ་འདོགས་བཅད་པ་སྟེ། དེ་ལྟར་བྱས་པས་རྒྱ་མཚོ་འདྲ་བའི་ཟབ་དང་རྒྱ་ཆེའི་ཆོས་མཛོད་འཛིན་པར་འགྱུར་བ་ཡིན་ནོ།།

༦༨ བསམ་པ་དག་པའི་ཆོས་དྲུག་བསྟན་པ།

དེ་ནས་བསམ་པ་དག་པའི་ཆོས་དྲུག་ནི།།

ཚིག་འདིས་དོན་ནི་ཅི་ཞིག་བསྟན་སྙམ་དང༌།།

དབྱེ་ན་གང་ཡིན་བསྡུ་ན་ཇི་ལྟ་བུ།།

རྣམ་གྲངས་ཅི་ཞིག་གང་གི་ཕྱོགས་སུ་གཏོགས།།

དྲིལ་ནས་ཉམས་ལེན་མཐའ་ནི་གང་ཡིན་ཞེས།།

ལེགས་པར་བསམས་པས་རིན་ཆེན་ཆོས་སྒོ་འབྱེད།།

ཅེས་གསུངས་པ་སྟེ། ཐོས་པ་བྱས་པའི་ཚིག་འདིས་བསྟན་བྱའི་སྙིང་པོ་དངོས་དེ་གང་ཡིན་སྙམ་པ་དང༌། དེ་ལ་ཕར་དབྱེ་ན་དོན་གང་དང་གང་ཕྱེར་ཡོད་ཅིང་། ཚུར་བསྡུ་ན་དོན་ཇི་ལྟ་བུ་ཞིག་ཏུ་འདུ་བ་དང་། ཚིག་འདིས་ཆོས་ཀྱི་རྣམ་གྲངས་ཅི་ཞིག་བསྟན་པ་དང་། དེ་ཡང་བཀའ་དང་བསྟན་བཅོས། མདོ་དང་རྒྱུད་སྡེ་ཐེག་པའི་རིམ་པ་གང་གི་ཕྱོགས་སུ་གཏོགས་པ་ཡིན་པ་དང་། དེའི་ནང་དོན་གྱི་གནད་དྲིལ་ནས་ཉམས་སུ་བླངས་ན་ཉམས་ལེན་གྱི་སྙིང་པོ་གང་བསྟན་པ་ཡིན་ཞེས་བསམ་པའི་སྐབས་སུ་དེ་དག་ལེགས་པར་བསམས་པས་རིན་པོ་ཆེ་དང་འདྲ་བའི་རྒྱལ་བའི་ཆོས་མཛོད་ཀྱི་སྒོ་འཕར་ལེགས་པར་འབྱེད་པ་ཡིན་ཞེས་ཐོས་བསམ་བྱེད་ཚུལ་བསྟན་པའོ།།

༦༩ སྒོམ་པ་དག་པའི་ཆོས་དྲུག་བསྟན་པ།

དེ་ནས་སྒོམ་པ་དག་པའི་ཆོས་དྲུག་ནི།།

གནས་ལུགས་མ་རྨོངས་རྟག་ཆད་མཐའ་ལས་གྲོལ།།

ཐེག་ཆེན་ལམ་གྱུར་སྟོང་ཉིད་སྙིང་རྗེར་འབྲེལ།།

ཆོས་ཉིད་ངང་གནས་བྱིང་རྒོད་ཡེངས་བ་མེད།།

ཞི་ལྷག་ཟུང་འབྲེལ་ཉམས་རྟོགས་གོང་དུ་འཕེལ།།

རེ་དོགས་གཟུང་འཛིན་དམིགས་པ་མཚན་མ་མེད།།

ཉོན་མོངས་སྒྲིབ་པའི་གཉེན་པོར་གྱུར་པ་སྟེ།།

བསམ་གཏན་པ་དེ་སྲིད་པའི་ཕ་རོལ་འགྲོ།།

ཞེས་གསུངས་པ་སྟེ། དེ་ནས་སྒོམ་པ་དག་པའི་ཆོས་དྲུག་ནི། གནས་ལུགས་དོན་གྱི་ལྟ་བ་ལ་མ་རྨོངས་པས་རྟག་ཆད་མཐའ་འཛིན་གྱི་ལྟ་བ་ལས་གྲོལ་བ་དང་། སྒོམ་པ་ཐེག་ཆེན་གྱི་ལམ་དུ་གྱུར་པས་སྟོང་ཉིད་དང་སྙིང་རྗེ་གཉིས་ཟུང་དུ་འབྲེལ་བ་སྟེ། དེ་ཡང་སྙིང་རྗེ་ཆེན་པོ་རྒྱུད་ལ་སྐྱེས་པ་དང་སྟོང་ཉིད་དངོས་སུ་རྟོགས་པ་ནི་ལམ་ཞུགས་ལས་དང་པོ་བ་ལ་དཀའ་བ་ཡིན་ཡང་། སྟོང་ཉིད་རྗེས་མཐུན་པ་དང་བྱང་ཆུབ་སེམས་ཀྱི་རྩ་བ་སྙིང་རྗེའི་གཞི་མ་ཚུགས་ན་ཐེག་ཆེན་གྱི་སྒོམ་དུ་མི་འགྱུར་བ་ཡིན་པས། སྟོང་ཉིད་སྙིང་རྗེ་ཟུང་དུ་འཇུག་པ་ཞིག་རྒྱུད་དུ་ཡོད་ན་ཐེག་ཆེན་གྱི་ལམ་ནས་གང་བྱས་དགེ་བར་འགྱུར་བ་ཡིན་ནོ། །ཆོས་ཉིད་བསམ་གྱིས་མི་ཁྱབ་པའི་ངང་དུ་གནས་པས་སྒོམ་སྐྱོན་བྱིང་རྒོད་དང་ཡེངས་བ་མེད་པ་དང་། རང་ལམ་སྐབས་ཐོབ་ཀྱི་ཞི་གནས་དང་ལྷག་མཐོང་ཟུང་དུ་འབྲེལ་བས་ཉམས་རྟོགས་ཀྱི་ཡོན་ཏན་གོང་དུ་འཕེལ་བ་དང་། རེ་དོགས་དང་གཟུང་འཛིན་བྲལ་བས་མཚན་མ་ཅན་གྱི་དམིགས་གཏད་མེད་པ་དང་། ཉོན་མོངས་དང་བྲལ་བས་སྒྲིབ་པའི་གཉེན་པོར་གྱུར་པ་སྟེ། དེ་འདྲའི་ཆོས་དྲུག་དང་ལྡན་པའི་བསམ་གཏན་པ་དེ་སྲིད་པའི་ཕ་རོལ་ཏུ་འགྲོ་བ་ཡིན་ནོ།།

༧༠ རྐྱེན་གྱིས་རྫི་བ་མེད་པའི་ཆོས་དྲུག་བསྟན་པ།

རྐྱེན་གྱིས་རྫི་བ་མེད་པའི་ཆོས་དྲུག་ནི།།

བསྟོད་སྨད་སྒྲ་ལ་བྲག་ཅར་ཤེས་པ་དང༌།།

གཞན་གྱི་ཆགས་སྡང་འདུན་མ་བྱེད་པ་དང༌།།

རང་གི་བྱེད་སྤྱོད་ཆོས་ལས་མི་འགལ་དང༌།།

ཡོ་བྱད་སྦྱིན་འབྲས་གསོག་བྲུན་མི་བྱ་དང༌།།

ནད་གདོན་དགེ་སྐུལ་སྤང་ལོ་མི་བྱ་དང༌།།

དག་སྣང་མོས་གུས་རྒྱུན་ཆད་མེད་པ་སྟེ།།

མི་མཐུན་རྐྱེན་རྣམས་བསྒྱུར་བའི་དཔའ་བོ་ཡིན།།

ཅེས་གསུངས་པ་སྟེ། བསྟོད་སྨད་ཀྱི་ཚིག་གི་སྒྲ་ལ་དགའ་སྡུག་མེད་པ་བྲག་ཅ་དང་འདྲ་བའི་སྣང་བ་འཛིན་པ་དང་། གཞན་གྱི་ཆགས་སྡང་ལ་བློ་བཞག་ནས་དེ་ལ་འདུན་པ་གཏད་ནས་བསམ་བློ་མི་གཏོང་བ་དང༌། རང་གི་བྱེད་སྤྱོད་ཐམས་ཅད་དམ་པའི་ཆོས་སྡེ་སྣོད་གསུམ་གྱི་དགོངས་དོན་ལས་མི་འགལ་བར་བྱེད་པ་དང༌། ད་ལྟ་ཡོ་བྱད་ཀྱིས་འབྱོར་བ་ནི་སྔར་སྦྱིན་པ་གཏོང་བའི་འབྲས་བུ་ཡིན་པས་ཕྱིས་ཀྱང་གསོག་བྲུན་མི་བྱ་བར་གཏོང་བར་བྱེད་པ་དང༌། ནད་གདོན་བྱུང་བ་ལ་བརྟེན་ནས་ངེས་འབྱུང་རྒྱུད་ལ་སྐྱེས་ཏེ་དགེ་བའི་སྐུལ་མར་སོང་བ་མང་བས། ནད་གདོན་ལ་ཚིག་པ་ཟོས་ནས་སྤང་ལོ་མི་བྱ་བ་དང༌། གཞན་གྱི་ངང་ཚུལ་ཇི་ལྟར་མཐོང་གང་ལྟར་སྣང་ཡང་། རང་ཉིད་མ་དག་པའི་མིག་སྔར་མ་དག་པ་མཐོང་བ་ལས་དོན་དངོས་སུ་དེ་ལྟར་མིན་སྙམ་ནས་དག་སྣང་སྦྱོང་ཞིང་། བླ་མ་དང་ཆོས་ལ་མོས་གུས་རྒྱུན་ཆད་མེད་པར་བྱེད་པ་དེ་དག་ནི་མི་མཐུན་རྐྱེན་ངན་གྱིས་གླགས་མི་ཁེལ་ཞིང་། རྐྱེན་ངན་རྣམས་ལམ་དང་གྲོགས་སུ་སྒྱུར་ནུས་པའི་དཔའ་བོ་ཡིན་ནོ།།

༧༡ དྲི་མ་བསམ་ངན་སྤང་བའི་ཆོས་དྲུག་བསྟན་པ།

དྲི་མའི་བསམ་ངན་སྤང་བའི་ཆོས་དྲུག་ནི།།

སྙན་གྲགས་ཆེ་བ་བསྒྲུབ་པའི་བསམ་ངན་དང༌།།

རྙེད་དང་ལོངས་སྤྱོད་བསྒྲུབ་པའི་བསམ་ངན་དང༌།།

ཡུལ་སྣང་བདེན་པར་འཛིན་པའི་བསམ་པ་དང༌།།

ལུས་ངག་འདོད་པས་བསྐོལ་བའི་བསམ་པ་དང༌།།

ཚེ་འདིའི་འཚོ་བ་བསྒྲུབ་པའི་བསམ་པ་དང༌།།

རང་ཉིད་གཅིག་པུ་ཐར་འདོད་བསམ་པ་སྟེ།།

བདུད་ཀྱི་བྱིན་རླབས་ལས་བྱུང་མཁས་པས་སྤང༌།།

ཞེས་གསུངས་པ་སྟེ། སྙན་པ་གྲགས་པ་ཞིག་རང་ཉིད་ལ་ཨེ་ཐོབ་བསམས་ནས་དེ་འབའ་ཞིག་གི་ཆེད་དུ་བྱ་བ་འདྲ་མིན་སྣ་ཚོགས་བསྒྲུབ་པ་དེ་བསམ་པ་ངན་པ་ཡིན་པ་སྟེ། འདི་ལ་བསམ་པའི་ཀུན་སློང་གིས་དམ་པའི་སྐྱེས་བུ་འགའ་རེས་བསྟན་པའི་རྒྱལ་མཚན་སྒྲེང་བའི་ཆེད་དུ། བསྟན་འཛིན་གྱི་སྐྱེས་བུའི་དབུ་འཕང་དེ་ཕྱོགས་གང་དང་གང་ནས་མཐོ་བའི་ཆེད་ལ་སོགས་པ་ཐབས་ལ་མཁས་པའི་མཛད་པ་ཡང་ཡོད་ལ། ཡང་ལ་ལས་དེ་དང་འདྲ་བའི་ཚུལ་རང་འདོད་དང་འདྲ་མ་འདྲེས་སུ་བྱས་ནས་ཐ་མར་བསྟན་དོན་དུ་མ་སོང་བར་བསྟན་བླ་འཚོང་བའི་བྱ་སྤྱོད་དུ་སོང་བའང་ཡོད་པ་ཡིན། གང་ལྟར་རང་འདོད་མེད་པའི་གཞན་ཕན་གྱི་བསམ་པས་ཀུན་ནས་བསླངས་ན་བསམ་ངན་གྱི་གྲས་སུ་མི་འགྲོ་བ་ཡིན་ངེས། རྙེད་པ་དང་བཀུར་བསྟི་དང་ལོངས་སྤྱོད་དག་བསྒྲུབ་དགོས་སྙམ་པའི་བསམ་ངན་འདི་ཆོས་པའི་མིང་འཛིན་པའི་རང་འདོད་ཅན་ལ་འབྱུང་ཉེ་བ་ཡིན་ལ། འོན་ཀྱང་རང་གཞན་སུ་ཡིན་ཡང་འདོད་ཡོན་གྱི་ལོངས་སྤྱོད་ལ་ཞེན་པ་དང་བྲལ་བ་ནི་དཀོན་ལ། སྤྱིར་མི་ཞིག་ཡིན་ནས་ཟས་གོས་ཤིག་མེད་ན་འདུག་ཐབས་མེད་པས་བླ་གྲྭ་སུ་ཡིན་ཡང་མིའི་འཚོ་བ་ཟ་གོན་ལ་བརྟེན་ཡོད་པས་ཟས་གོས་དང་ཉེར་སྤྱོད་ཙམ་ནི་དགོས་པས་མ་ཚད་ཡོད་ཆོག་པའང་ཡིན་པ་དང་། ཕ་མས་ཀྱང་ད་སྔོན་ཡན་དུ་གསོས་པ་ཡིན་པས་དེ་ལ་ཟོས་དོམ་ཞིག་སྤྲད་ཀྱང་མི་འོས་པ་མིན་ལ། དེ་དག་གིས་ཀྱང་སྡེ་སྣོད་འཛིན་པ་ཞིག་གསོ་སྐྱོང་བྱས་པས་རང་ལ་ཡང་བསོད་ནམས་ཆེན་པོ་ཐོབ་པ་ཡིན། དེ་ལས་གཞན་དུ་ལོངས་སྤྱོད་ལ་འདོད་ཆེན་ཞེན་ཆེའི་དབང་གིས་གསོག་འཇོག་ཆེ་ན། དེ་བསམ་པ་ངན་པ་ཡིན་པས་མི་ཚད། དེའི་རྗེས་སུ་སྤྱོད་པ་ངན་པ་དང་། དེ་ལས་གྲགས་པ་ངན་པ་སོགས་ངན་པ་ཐམས་ཅད་མཉམ་དུ་བྱུང་ནས་རང་གནོད་གཞན་གནོད་ཐམས་ཅད་དམྱལ་བ་ལ་འཁྲིད་པར་བྱེད་ཡོང་པ་དང་། དེའི་དུས་སུ་ཕོ་མ་བྱས་བྱ་མ་ལེགས་པ་ཡིན་པས། དེ་དག་གི་ཕྱོགས་ལ་འདེང་རྒྱག་རྒྱུ་ནི་གལ་ཆེ་བ་ཡིན། ཡུལ་སྣང་བདེན་པར་འཛིན་པའི་བསམ་པ་འཁྲུལ་བའི་དབང་དུ་སོང་བའི་ཕྱིན་ཅི་ལོག་གི་བསམ་པ་དང་། འདོད་པའི་ཁ་མ་གང་བའི་དབང་གིས་ལུས་ངག་གཉིས་ཀ་སྐད་ཅིག་ཙམ་ཡང་མི་དལ་བར་གཡོག་ཏུ་བཀོལ་བའི་བསམ་པ་དང༌། ཕྱི་མིའི་དོན་ཆེན་ལ་བསམ་བློ་མི་འཁོར་བར་ཞག་གཅིག་འདུག་པའི་ཚེ་མེད་ཀྱང་ལོ་བརྒྱ་འདུག་པའི་བསམ་པ་བཟུང་ནས་ཚེ་འདིའི་འཚོ་བ་སྒྲུབ་པའི་བསམ་པ་དང༌། ཕྱི་མའི་དོན་བསྒྲུབ་པའི་བསམ་པ་ཙམ་འཁོར་ཡང་རང་ཉིད་གཅིག་པུ་འཁོར་བའི་སྡུག་བསྔལ་ལས་ཐར་བ་འདོད་པའི་བསམ་པ་སྟེ། དེ་དག་ནི་བདུད་ཀྱིས་བྱིན་རླབས་ལས་བྱུང་བ་སྟེ་བདུད་དགའ་རབ་དབང་ཕྱུག་སྡེ་དང་བཅས་པས། མྱོས་བྱེད་དང་རྨོངས་བྱེད་ལ་སོགས་པའི་མདའ་མང་པོ་འཕངས་པས། ལ་ལའི་སྙིང་ལ་ཕོག་ནས་བསམ་པ་ངན་པ་དེ་འདྲ་འཆར་བ་ཡིན་པས་མཁས་པ་རྣམ་དཔྱོད་ཅན་གྱིས་སྤང་དགོས་པ་ཡིན་ནོ།།

༧༢ དབང་པོ་ཡུལ་ཕྱིར་མ་འབྲངས་ཆོས་དྲུག་བསྟན་པ།

དབང་པོ་ཡུལ་ཕྱིར་མ་འབྲངས་ཆོས་དྲུག་ནི།།

རང་ཡུལ་ཆགས་སྡང་དུག་གིས་མ་ཐེབས་དང༌།།

འདོད་ཡོན་རང་དགའི་གདུང་བས་མ་ཟིན་དང༌།།

འཇིག་རྟེན་ཆོས་བརྒྱད་མཚོན་གྱིས་མ་བཏབ་དང༌།།

སྤྱོད་ལམ་གཡོ་སྒྱུའི་དྲི་མས་མ་གོས་དང༌།།

སྣ་ཚོགས་འདུ་འཛིའི་རླུང་གིས་མ་བསྐྱོད་དང༌།།

ཉིན་མཚན་ཆོས་སྤྱོད་བཟང་པོས་འདའ་བ་སྟེ།།

དམ་པ་རྣམས་ཀྱི་ཚུལ་ལ་འཇུག་པར་བྱ།།

ཞེས་གསུངས་པ་སྟེ། ཕ་ཡུལ་སྤོང་བ་རྒྱལ་སྲས་ལག་ལེན་ཡིན། །ཞེས་པ་ལྟར་རང་ཡུལ་ལ་བསྡད་ན་ཆགས་སྡང་གི་རྐྱེན་མང་པོ་ཡོད་པས་དེའི་དུག་གིས་མ་ཐེབས་པ་དང༌། སྤྱིར་འདོད་པའི་ཡོན་ཏན་དང་ཁྱད་པར་རང་ཉིད་གང་ལ་དགའ་ཞིང་འདུན་པ་དེའི་གདུང་བས་མ་ཟིན་པ་ཞིག་དང་། རྙེད་བདེ་གྲགས་བསྟོད་ལ་སོགས་པ་འཇིག་རྟེན་ཆོས་བརྒྱད་ཀྱི་མཚོན་གྱིས་མ་བཏབ་པ་དང༌། སྤྱོད་ལམ་གང་ཡིན་ཡང་དྲང་ཞིང་གཡོ་སྒྱུའི་དྲི་མས་མ་གོས་པ་དང༌། འདུ་འཛི་འདྲ་མིན་སྣ་ཚོགས་པ་རླུང་གིས་བསྐྱོད་པ་བཞིན་དུ་ཁོམ་པ་གཏན་ནས་མེད་དེ་གཡེངས་པ་དེ་འདྲ་མ་ཡིན་པ་དང༌། ཉིན་མཚན་གྱི་དུས་ལ་ཐོ་རངས་འདི་སྒོམ། སྔ་དྲོ་འདི་འདོན། ཕྱི་དྲོའི་ཐུན་ལ་འདི་བྱེད་དགོས། སྲོད་ཐུན་ལ་ཅི་སྒོམ་ལ་སོགས་པ་སྤྱོད་ཡུལ་ཐམས་ཅད་པོ་འཆར་གཞི་ཡོད་པ་མ་གཏོགས། ཟོག་ཉལ་ཉལ་དང་ཟོག་ལང་ལང་ནི་ཁྱིམ་ན་གནས་པའི་ཆོས་པ་ཞིག་ཡིན་ཡང་མི་རུང་ན། སེར་མོ་བ་ཞིག་ཡིན་ཚེ་དེ་བས་ཀྱང་ཆོས་སྤྱོད་བཟང་པོས་དུས་འདའ་བར་བྱ་དགོས་ལ། འོ་ན་ཆོས་སྤྱོད་ཡིན་ལ་བཟང་པོ་མ་ཡིན་པ་ཡོད་དམ་ཞེ་ན། ཡོད་དེ་ཁ་བཏོན་འདོན་ཞོར་དང་ཁ་བརྡ་བཤད་ཞོར། བསྙེན་པ་བགྲང་ཞོར་དུ་དམིགས་གཏད་ཀྱི་གསལ་སྣང་དང་བསྐྱེད་རྫོགས་ཅི་ཡང་མེད་པ་ནི། ལྟུང་བཤགས་ཚ་གསུར་བཏང་ཡང་དམིགས་གཏད་ནི་མི་འདུག །ཅེས་པ་ལྟ་བུར་སོང་ན་ཆོས་སྤྱོད་བཟང་པོ་དང་ཚད་ལྡན་མ་ཡིན་པས་དེ་འདྲ་མིན་པའི་ཆོས་སྤྱོད་བཟང་པོས་འདའ་བ་སྟེ། དེ་ལྟ་བུའི་དམ་པ་རྣམས་ཀྱི་ཚུལ་ལ་འཇུག་པར་བྱ་དགོས་སོ།།

༧༣ དད་པས་ཁམས་གསོ་ཐུབ་པའི་ཆོས་དྲུག་བསྟན་པ།

དད་པས་ཁམས་གསོ་ཐུབ་པའི་ཆོས་དྲུག་ནི།།

མོས་པའི་དད་པས་གསོལ་འདེབས་བླ་མ་སྒོམ།།

གུས་པའི་དད་པས་དཀོན་མཆོག་མཆོད་ལ་བརྩོན།།

ཡིད་ཆེས་དད་པས་ཡི་དམ་སྒོམ་སྒྲུབ་བྱེད།།

དང་བའི་དད་པས་ཆོས་ཉིད་དོན་ལ་གཞོལ།།

མི་ལྡོག་དད་པས་རྐྱེན་ངན་གྲོགས་སུ་བསྒྱུར།།

མཐར་འཛིན་དད་པས་རང་རྒྱུད་ཆོས་དང་བསྲེ།།

དེ་ཕྱིར་ཐར་ལམ་སྒྲུབ་པ་ཤིན་ཏུ་གཅེས།།

ཞེས་གསུངས་པ་སྟེ། སྤྱིར་ན་དང་འདོད་ཡིད་ཆེས་ཀྱི་དད་པ་གསུམ་དང་། དེའི་སྟེང་དུ་ཕྱིར་མི་ལྡོག་པའི་དད་པ་བསྣན་པའི་བཞི་རུ་གསུངས་ཀྱང་། འདིར་དྲུག་ཏུ་དབྱེ་བར་བྱས་ནས་དད་པས་ཁམས་དང་སྣང་བ་གསོས་ཏེ་དྭངས་པ་འདྲེན་ཐུབ་པའི་ཆོས་དྲུག་བསྟན་པ་སྟེ། མོས་པའི་དད་པས་བླ་མ་ལ་གསོལ་བ་འདེབས་པ་དང་སྒོམ་པ་སྟེ་འབྲུག་པ་ཀུན་ལེགས་ཀྱིས་དགོང་མོ་ནམ་དཀྱིལ་ཞིག་ལ་བླ་མ་ལ་མོས་གུས་འཁྲུངས་ནས་བླ་མ་མཁྱེན་ཞེས་སྐད་ཆེན་པོས་བོས་པའི་ཕྱི་ཉིན་འུར་སློང་བྱུང་ཞེས་ཆད་ལས་འགེལ་བ་ལ་ཕྱོགས་དུས། འབྲུག་ར་ལུང་ཆོས་ཀྱི་དགོན་ནང་ནས། །ནམ་ཕྱེད་བླ་མ་དྲན་པ་མཐོལ་ལོ་བཤགས། །ཞེས་གསུངས་པ་ཡིན། དེ་བཞིན་དུ་མོས་པའི་དད་པས་བླ་མ་ལ་གསོལ་བ་བཏབ་ནས་སྒོམ་པར་བྱེད་པ་དང་། གུས་པའི་དད་པས་དཀོན་མཆོག་ལ་ཕྱག་དང་ཞེ་སས་མཆོད་པ་ལ་བརྩོན་པ་དང་། ཡིད་ཆེས་ཀྱི་དད་པས་ལྷག་པའི་ལྷ་ཡི་དམ་ལ་ཐུགས་དམ་བཅོལ་ནས་སྒོམ་སྒྲུབ་བྱེད་པ་དང་། དང་བའི་དད་པས་དྭངས་གསལ་འཕོ་འགྱུར་དང་བྲལ་བའི་ཆོས་ཉིད་ཀྱི་དོན་ལ་གཞོལ་བར་བྱེད་པ་དང་། མི་ལྡོག་པའི་དད་པ་བརྟན་པོ་སུན་སྣང་མེད་པས་ལམ་སྒྲུབ་ཚེ་རྐྱེན་ངན་ཡིན་ཡང་གྲོགས་སུ་བསྒྱུར་ཐུབ་པ་དང་། མཐར་འཛིན་དད་པ་ཞེས་པ་ནི་རྟག་ཆད་ཀྱི་མཐར་ལྟུང་བ་ལ་གོ་བ་མིན་པར་རྒྱུན་རིང་གཉུག་སྲིང་དུས་ཀྱི་མཐའ་ལ་ཐུག་ཀྱང་དད་པ་ནམ་ཡང་མི་ལྡོག་པའི་མཐར་འཛིན་པའི་དད་པས་རང་རྒྱུད་ཆོས་དང་རིམ་གྱིས་བསྲེ་བ་ཡིན་པ་སྟེ་དེའི་ཕྱིར་དད་པ་དང་མ་བྲལ་བར་ཐར་ལམ་སྒྲུབ་པ་ཤིན་ཏུ་གཅེས་སོ།།

༧༤ སྲུང་སྡོམ་ངོ་ལྐོག་མེད་པའི་ཆོས་དྲུག་བསྟན་པ།

སྲུང་སྡོམ་ངོ་ལྐོག་མེད་པའི་ཆོས་དྲུག་ནི།།

བསྟན་པའི་རྩ་བ་ཚུལ་ཁྲིམས་ཤེས་པ་དང༌།།

ངན་སོང་སྣ་ཁྲིད་སྡིག་པར་ཤེས་པ་དང༌།།

སྲུང་སྡོམ་མེད་ན་ཆོས་རྩ་རུལ་བ་དང༌།།

ཡོན་ཏན་ཀུན་གྱི་རྟེན་ཏུ་ཤེས་པ་དང༌།།

མཐོ་རིས་འཛེག་པའི་སྐས་སུ་ཤེས་པ་དང༌།།

ཐར་བ་བགྲོད་པའི་བཞོན་པར་ཤེས་པ་སྟེ།།

ཁྲིམས་གཙང་བསྲུང་ལ་གཅེས་སྤྲས་ནན་ཏན་བྱ།།

ཞེས་གསུངས་པ་སྟེ། སྲུང་སྡོམ་ངོ་ལྐོག་མེད་པའི་ཆོས་དྲུག་ནི་སངས་རྒྱས་ཀྱི་བསྟན་པའི་རྩ་བ་ཚུལ་ཁྲིམས་ཡིན་པར་ཤེས་པ་དང༌། ངན་སོང་གི་གནས་སུ་སྣ་འཁྲིད་བྱེད་ནི་སྡིག་པ་མི་དགེ་བ་ཡིན་པར་ཤེས་པ་དང༌། ཚུལ་ཁྲིམས་མ་བསྲུངས་ནས་སྡོམ་པ་མེད་ན་ཆོས་ཀྱི་རྩ་བ་རུལ་བ་ཡིན་པར་ཤེས་པ་དང༌། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལགས་པར་གསུངས། །ཞེས་གསུངས་པ་བཞིན་དུ་དེ་ཡོན་ཏན་ཀུན་གྱི་རྟེན་ཏུ་ཤེས་པ་དང༌། དེ་བཞིན་དུ་ཚུལ་ཁྲིམས་ནི་མཐོ་རིས་སུ་བགྲོད་པའི་ཐེམ་སྐས་སུ་ཤེས་པ་སྟེ། སྐས་མེད་ན་ཁང་པའི་རྩེག་གོང་མར་འགྲོ་མི་ཐུབ་པ་དང་རྐང་པ་མེད་ན་གོམ་པ་འདོར་མི་ཐུབ་པ་བཞིན་དུ་ཚུལ་ཁྲིམས་ཀྱི་རྐང་པ་མེད་ན་ཐར་ལམ་ལ་སྙེག་ཐུབ་པ་མིན་པ་དང་། རྟ་མེད་ན་ཐག་རིང་གི་སར་རྐང་ཐང་གོམ་བགྲོད་ཀྱིས་མི་ཆོད་པ་བཞིན་དུ་ཐར་བར་བགྲོད་པའི་བཞོན་པར་ཤེས་པར་བྱས་སྟེ། ཁྲིམས་གཙང་གང་སྲུང་བར་ཁས་བླངས་པ་དེ་ཉིད་ལ་སྐྱོན་གྱིས་མ་གོས་པར་སྲུང་བ་ལ་གཅེས་སྤྲས་ནན་ཏན་བྱེད་དགོས་སོ།།

༧༥ གཉེན་པོས་རྐྱེན་ངན་ཐུབ་པའི་ཆོས་དྲུག་བསྟན་པ།

གཉེན་པོས་རྐྱེན་ངན་ཐུབ་པའི་ཆོས་དྲུག་ནི།།

ཉན་ཐོས་བཞིན་དུ་དགྲ་ལྟས་སྤོང་བ་དང༌།།

ཕ་རོལ་ཕྱིན་ལྟར་ཡོངས་སུ་སྦྱོང་བ་དང༌།།

སྔགས་ལྟར་ཐབས་ཀྱིས་ལམ་དུ་བསྒྱུར་བ་དང༌།།

ཡང་ཟབ་གནད་ཀྱིས་རང་སར་གྲོལ་བ་དང༌།།

མཐའ་བྲལ་ངང་དུ་རང་ཞིར་བཏང་བ་དང༌།།

བྱ་བཙལ་མེད་པར་ཡོངས་ལ་ལ་བཟླ་སྟེ།།

བློ་རིགས་བསྟུན་ནས་གང་ལྟར་སྒོམ་བྱེད་ཀྱང༌།།

འགག་ལ་ཉོན་མོངས་རང་དགྲར་མ་ཤོར་གཅེས།།

ཞེས་གསུངས་པ་སྟེ། གཉེན་པོ་ལ་བརྟེན་ནས་རྐྱེན་ངན་ཉོན་མོངས་ཀྱི་ཚོགས་གཞོམ་ཐུབ་པའི་ཆོས་དྲུག་པོ་ནི། ཉན་ཐོས་བཞིན་དུ་སྤང་བྱ་ཉོན་མོངས་པ་ལ་དགྲར་བལྟས་ནས་གཉེན་པོའི་མཚོན་ཐོགས་ཏེ་སྤང་གཉེན་གཡུལ་སྤྲད་ནས་འཇོམས་པ་དང་། ཕ་རོལ་ཕྱིན་པའི་ཐེག་པ་ལྟར་སྟོང་ཉིད་དང་སྙིང་རྗེའི་རྩིས་ཟིན་པར་བྱས་ནས་སྨན་གྱིས་སྦྱངས་པའི་དུག་བཞིན་དུ་ཉོན་མོངས་རང་མཚན་པས་རང་རྒྱུད་ལ་མི་གོས་པར་བྱེད་པ་དང་། སྔགས་ཕྱི་རྒྱུད་སྡེ་གསུམ་ལྟར་དུ་ཐབས་ཁྱད་པར་ཅན་གྱིས་ལྕགས་གསེར་དུ་བསྒྱུར་བ་བཞིན་དུ་ཉོན་མོངས་ཡེ་ཤེས་ཀྱི་ངོ་བོར་བསྒྱུར་ནས་ཉོན་མོངས་པས་མི་གནོད་པར་བྱེད་པ་དང་། ཡང་ནང་རྒྱུད་སྡེ་གསུམ་གྱི་སྤྱིའི་དགོངས་དོན་ལྟར་དུ་ཉོན་མོངས་པ་སྤྲིན་བཞིན་དུ་རང་སར་གྲོལ་བར་བྱེད་པ་དང༌། མཐའ་བྲལ་གཉིས་མེད་ཆེན་པོ་སྟེ་ཆོས་དབྱིངས་ཀུན་ ཏུ་བཟང ་མོའི་མཁའ་ཀློང་དུ་རང་ཞིར་བཏང་བ་ཨ་ནུའི་ལུགས་ལྟར་བྱེད་པ་དང༌། བྱ་བཙལ་མེད་པར་ཅོག་གཞག་བཞིའི་ངང་དུ་ཡོངས་ལ་ལ་བཟླ་བ་ཨ་ཏིའི་ལུགས་ཏེ། མདོར་ན་གང་ཟག་རང་རང་གི་བློ་རིགས་དང་བསྟུན་ནས་གང་ལྟར་སྒོམ་པར་བྱེད་ཀྱང༌། འགག་རྩ་ལ་ཉོན་མོངས་པ་རང་གི་དགྲ་རུ་མ་ཤོར་བར་གཅེས་སོ།།

༧༦ སྣོད་ལྡན་སློབ་མ་བཟང་པོའི་ཆོས་དྲུག་བསྟན་པ།

སྣོད་ལྡན་སློབ་མ་བཟང་པོའི་ཆོས་དྲུག་ནི།།

མི་གཞི་ལེགས་ཤིང་ངོ་ཚ་ཁྲེལ་ཡོད་ལྡན།།

གསུང་བཞིན་སྒྲུབ་ཅིང་དད་མོས་ཕུན་སུམ་ཚོགས།།

ལུས་སྲོག་དོར་ནས་སྒྲུབ་ལ་སྙིང་རུས་ཆེ།།

གྲོགས་ལ་བརྩེ་ཞིང་སྙིང་རྗེས་རང་རྒྱུད་བརླན།།

སྐྱོ་དུབ་མེད་པས་བཟོད་ལྡན་ཕན་བདེ་བྱེད།།

སྒོ་གསུམ་ཞི་ཞིང་དམ་ཚིག་སྡོམ་ལ་གནས།།

དེ་ནི་སྐལ་བཟང་ཆོས་ཀྱི་བདུད་རྩིའི་སྣོད།།

ཅེས་གསུངས་པ་སྟེ། སྣོད་ལྡན་སློབ་མ་བཟང་པོའི་ཆོས་དྲུག་བསྟན་པ་ནི། སློབ་མ་ལ་ཡོན་ཏན་མེད་ན་སློབ་ཆོག་པ་ཡིན་ཡང་མི་གཞི་ངན་ན་བཅོས་དཀའ་བ་ཡིན་ཞེས། སྔོན་གྱི་དགེ་བའི་བཤེས་གཉེན་དག་གིས་གསུངས་པ་ལྟར་དུ་མི་གཞི་ལེགས་དགོས་པས། མི་གཞི་ལེགས་ཤིང་། རང་ངོ་ལ་ལྟོས་ནས་ངོ་ཚ་ཤེས་པ་དང་གཞན་ངོས་ལ་ལྟོས་ནས་ཁྲེལ་ཡོད་པ་དང་ལྡན་པ་དང་། བླ་མའི་བཀའ་གསུང་བཞིན་དུ་སྒྲུབ་ཅིང་ཆོས་དང་བླ་མར་དད་པ་དང་གུས་པ་ཕུན་སུམ་ཚོགས་པ་ཡོད་པ་དང་། ལུས་སྲོག་འདོར་དགོས་ཀྱང་མི་འཛེམ་པར་སྒྲུབ་པར་བྱེད་པ་ལ་སྙིང་རུས་ཆེ་བ་དང་། མཆེད་གྲོགས་ལ་བརྩེ་གདུང་ཆེ་ཞིང་སྙིང་རྗེའི་ཆབ་ཀྱིས་རང་རྒྱུད་བརླན་པ་དང་། བཟོ་སྟེགས་བཞིན་དུ་ཚ་གྲང་གང་ཡང་བཟོད། །ཅེས་གསུངས་པ་བཞིན་དུ་ཆོས་ཕྱིར་དཀའ་བ་སྤྱད་པའི་བཟོད་པ་དང་ལྡན་ཞིང་སེམས་ཅན་ཕན་པ་དང་བདེ་བའི་ཐབས་ལ་བརྩོན་པ་བསྐྱེད་པ་དང་། སྒོ་གསུམ་མ་དུལ་པ་མིན་པའི་ཞི་ཞིང་དམ་ཚིག་དང་སྡོམ་པ་ཇི་ལྟར་ཁས་བླངས་པ་ལ་གནས་པ་སྟེ་དེ་འདྲའི་ཆོས་དྲུག་ཚང་བའི་སྐྱེས་བུ་དེ་ནི་སྐལ་བཟང་ཆོས་ཀྱི་བདུད་རྩིའི་སྣོད་ཡིན་ནོ།།

༧༧ ཁོམ་ལྡན་རྙེད་དཀའ་བསམ་པའི་ཆོས་དྲུག་བསྟན་པ།

ཁོམ་ལྡན་རྙེད་དཀའ་བསམ་པའི་ཆོས་དྲུག་ནི།།

མི་ལུས་ཐོབ་དཀའ་ད་རེས་འབད་པ་ཐོན།།

བླ་མ་རྙེད་དཀའ་ཡོན་ཏན་འབྲས་བུ་ལོངས།།

ཆོས་དང་ཕྲད་དཀའ་བརྩོན་པས་ཉམས་སུ་ལོངས།།

ཟབ་དོན་ཐོས་དཀའ་སྙན་བརྒྱུད་སྙིང་པོ་བསྒྲུབ།།

འཁྲུལ་སྣང་བཅད་དཀའ་གཉིས་མེད་དོན་ལ་སྦྱང༌།།

མཐུན་རྐྱེན་ཚོགས་དཀའ་འཛོམ་དུས་ཉམས་ལེན་འབུངས།།

འདིར་བདེ་ཕྱི་མར་བདེ་བའི་འདུན་གྲོས་ཡིན།

ཅེས་གསུངས་པ་སྟེ། རྒྱལ་སྲས་ཞི་བ་ལྷས། དལ་འབྱོར་འདི་ནི་རྙེད་པར་ཤིན་ཏུ་དཀའ། །སྐྱེས་བུའི་དོན་སྒྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་མ་བསྒྲུབས་ན། །ཕྱིས་འདི་ཡང་དག་འབྱོར་པར་ག་ལ་འགྱུར། །ཞེས་པ་ལྟར་དུ་དལ་འབྱོར་གྱི་མི་ལུས་རིན་པོ་ཆེ་ཐོབ་པར་དཀའ་ཞིང་རྙེད་ན་དོན་ཆེ་བ་ད་རེས་ཐོབ་པའི་དུས་འདི་ལ་འབད་པར་མ་བྱས་ན་ཕྱི་ནས་ལུས་རྟེན་འདི་འདྲ་རྙེད་དཀའ་བ་ཡིན་ཏེ། རྒྱུ་ཚུལ་ཁྲིམས་རྣམ་པར་དག་པ་དང་ཚོགས་བསགས་སྒྲིབ་སྦྱོང་དགོས་པས་མ་ཚད། རྐྱེན་སྨོན་ལམ་དག་པས་མཚམས་སྦྱོར་བྱེད་དགོས་པའི་ཕྱིར། དེས་ན་ད་རེས་ཐར་བའི་ལམ་སྣ་ཞིག་མ་ཟིན་ཚེ། འདི་ལྟ་བུའི་རྒྱུ་རྐྱེན་ཚོགས་པ་ནི་དཀའ་བ་ཡིན་པར་ཤེས་པར་བྱས་ནས། དལ་འབྱོར་གྱི་སྙིང་པོ་སྒྲུབ་པ་ཉམས་ལེན་ལ་བརྟེན་ནས་ལེན་པའི་ཕྱོགས་ལ་འབད་པར་བྱེད་པ་དང་། བླ་མ་མཚན་ཉིད་དང་ལྡན་པ་སྙིགས་མའི་དུས་ན་ཉིན་མོའི་སྐར་མ་ལྟར་དུ་དཀོན་ལ། གལ་ཏེ་དགེ་བའི་བཤེས་གཉེན་མཚན་ཉིད་དང་ལྡན་པ་ཞིག་ཡོད་ཀྱང་དེ་སྦས་པའི་ཚུལ་གྱིས་བཞུགས་པ་ཞིག་ཡིན་པ་ལས། ང་ཡིན་ཟེར་མཁན་ལ་མཚན་ཉིད་ཀྱང་ཨེ་ཚང་མི་ཤེས་པས། རང་ཉིད་ལ་ལས་འབྲེལ་ཡོད་པའི་བླ་མ་རྙེད་དུས་ཡོན་ཏན་གྱི་འབྲས་བུ་ལོན་པར་བྱེད་པ་དང་། དེ་བཞིན་དུ་ཆོས་དང་ཡང་ཕྲད་པར་དཀའ་བས་བརྩོན་པས་ཉམས་སུ་ལོངས༌ཤིག ཁྱད་པར་དུ་ཟབ་མོའི་དོན་ཐད་ཀར་བཤད་པའི་གདམས་ངག་ཐོབ་དཀའ་བས་སྙན་བརྒྱུད་ཟབ་མོའི་ཆོས་རྣམས་ཀྱི་སྙིང་པོ་སྒྲུབ་པས་ཉམས་སུ་ལེན་དགོས་པ་དང་། འཁྲུལ་སྣང་གཅོད་དཀའ་བ་ཁ་ཡིས་མེད་པར་སྨྲས་ཀྱང་དོན་ལ་མེད་མ་ཐུབ་པར་ལག་པ་ཁབ་དང་ཕྲད་ན་ཚ་སྣང་ཡོད་པ་འདི། ཁ་བཤད་ཙམ་གྱིས་ཆོད་པ་ཞིག་མིན་པས་གཉིས་མེད་ཀྱི་སྒོམ་པའི་དོན་ལ་སྦྱང༌དགོས་པ་དང་། དེ་ལྟ་བུའི་མཐུན་རྐྱེན་ཚོགས་དཀའ་བ་བླ་མས་ཆོས་གསུངས་ཀྱང་རང་ངོས་ཀྱི་རྒྱུ་རྐྱེན་མ་ཚོགས་པས་ཉན་དུ་མ་བྱུང་བ་དང་། བླ་མ་ལ་དད་པ་སྐྱེ་དུས་བླ་མས་ཆོས་མི་གསུངས་པ་ལྟ་བུའམ། གསུངས་ནའང་དབང་པོ་རྒུད་པའི་མཐར་ལྷུང་ནས་སྒོམ་སྒྲུབ་ཀྱི་གེགས་སུ་འགྲོ་བ་སོགས་མཐུན་རྐྱེན་མི་ཚོགས་པ་མང་ལ། དེ་ལྟར་མ་ཡིན་པར་མཐུན་རྐྱེན་འཛོམས་པའི་དུས་འདིར་ཉམས་ལེན་ལ་འབུངས་རན་པ་ཡིན་པ་སྟེ། འདི་དག་ནི་འདི་དང་ཕྱིར་མར་བདེ་བའི་འདུན་གྲོས་བྱས་པ་ཡིན་པས་འདིས་བློ་སྒོ་ཕྱེས་ནས་དམ་པའི་ཆོས་ལམ་ལ་ཞུགས་པའི་ལམ་སྣེ་ཟིན་ཤག་ཤག་དང་རང་བློ་རང་ལ་ཁེལ་བ་ཞིག་བྱེད་དགོས་པ་ཡིན་ནོ། །ཁ་རང་ལ་བསྐོར་ནས་བཤད་ན་ད་རེས་ཆོས་ལྡན་གྱི་མི་ལུས་ཐོབ་ཡོད་པས་དལ་འབྱོར་དོན་ལྡན་བྱེད་དགོས་ཟེར་ཁུལ་བྱེད་ཀྱང་། དོན་ནང་ཉམས་ལ་བསམས་ན་གཞོན་ཚེ་སྟོད་ཀྱི་ཉི་མ་ཟད་ནས་ཚེ་སྨད་ལ་ཐུག་བཞིན་ཡོད་ན་ཡང་། ད་དུང་བློ་སྣ་མ་ཁུག་པས་ཁ་བཤད་ཤེས་རུང་དོན་ཐོག་ལ་མ་ཁེལ་ནས་ལྷག་ཡོད་པ་ནི་དལ་འབྱོར་གྱི་ཆོས་སོ་བཞི་བོ་ཙམ་ཡང་མ་ཚང་བས་ཡིན། དེ་ཡང་དད་པ་ལྟ་བུ་ལ་མཚོན་ན། དེ་ཡང་ཡོད་ལ་མེད་དུ་གྱུར་ཡོད་ཚེ་དལ་འབྱོར་གྱི་ཆོས་ལས་གཅིག་མ་ཚང་བ་ཡིན། དེའི་རྐྱེན་གྱིས་སྡོམ་དམ་ཚིག་ལ་སྐྱོན་ཞུགས་ན་གཉིས་མ་ཚང་བ་ཡིན། དེ་བཞིན་དུ་ཞིབ་ཏུ་དཔྱད་ན་དལ་འབྱོར་ཚང་ཞེས་པ་ནི་དཀའ་བའི་ཚད་དུ་ཐོན་པ་དང་། ད་ལྟ་ཚང་ཡང་ད་ལྟ་མི་ཚང་བ་ཡང་སྲིད་པས། རང་རྒྱུད་ལ་བྱི་དོར་སྣོད་གཙང་འཁྲུད་བྱས་པ་ལྟ་བུའི་ནང་དུ་བཅུད་ཆོས་ཀྱི་བདུད་རྩི་སེལ་དྲི་མ་མེད་པའི་གཙང་མ་ཞིག་ཐོབ་དགོས་པ་ཡིན། དེ་ཡང་ཁུངས་དག་ཅིང་ཡིད་རྟོན་དུ་རུང་བ་བྱིན་རླབས་ཀྱི་བརྒྱུད་པ་ཡོད་པ་ཞིག་དགོས་པས། ཚིག་གི་བརྒྱུད་པ་ཙམ་ཞིག་ཐོབ་པས་མི་ཆོག་པར་ཟབ་མོའི་གདམས་ངག་ཉམས་ལེན་གྱི་དོན་བརྒྱུད་དང་ལྡན་པ་ཞིག་ཡོད་དགོས་པ་ཡིན། དེ་ཇི་ལྟ་བུ་ཞིག་ལ་ལྡན་པ་ཡིན་ཞེ་ན། རྟོགས་པའི་ཡེ་ཤེས་ནང་དུ་བརྙེས་ནས་ཐུགས་རྗེ་ནུས་པའི་བྱིན་རླབས་ཐོབ་ནས་ཕ་རོལ་པོའི་སྣང་བ་བསྒྱུར་ཐུབ་པས་རྒྱུད་མ་རུང་པ་འདུལ་ནུས་པ་ཞིག་ལ་ཡོད་པ་ཡིན་པས། ཐར་བའི་ལམ་སྣ་མ་ནོར་བ་ཞིག་ཟིན་དགོས་ཚེ་བླ་མ་ལམ་སྟོན་གྱི་འདྲེན་པ་དེ་གནད་ཆེ་བ་ཡིན། དེ་ཡང་བླ་མ་ལ་ལར་ནང་རྟོགས་པའི་ཡོན་ཏན་མངའ་ན་ཡང་གདུལ་བྱ་འདུལ་བའི་དུས་བབ་ཀྱི་དབང་གིས་ཆོས་མ་བསྟན་པ་དང་། ལ་ལས་བཤད་པའི་ཁ་མགོ་ལག་མགོ་ཤོམ་བཞིན་ཡོད་ཀྱང་ཚིག་ཕྱོགས་ལ་འཆེལ་ནས་ཉམས་ལེན་གྱི་གནད་མ་ཐོན་པས་སློབ་མའི་རྒྱུད་འདུལ་མི་ཐུབ་པ་དང་། ལ་ལ་ཕྱི་ནང་གཉིས་ཀ་མེད་པ་ང་འདྲ་བ་དང་། མདོར་ན། འདྲ་འོ་འདྲ་འོ་ནོར་ར་རེ། །ཞེས་རྫོགས་ཆེན་གྱི་སྐབས་སུ་འདྲ་ནོར་གྱི་འཕྲང་བཅོ་བརྒྱད་གསུངས་པ་ལྟར་དུ་བླ་མ་ཡང་དག་ཅིག་རྙེད་པ་ནི་གོང་ནས་གསུངས་པ་བཞིན་ཏུ་ཤིན་ཏུ་དཀའ་བ་ཡིན། དེ་མ་རྙེད་ཚེ་ཐར་བའི་ལམ་སྣ་ཟིན་ཐབས་ཡོད་པ་མིན། སྐྱེ་བ་ཚེ་འདིའི་ཐོག་ཏུ་འདི་སྣང་གི་རྟོག་པ་མ་འགགས་ནས་སྣང་བ་རྣམ་རིག་གསལ་བའི་དུས་འདིར་ཐར་ལམ་མ་ཟིན་ཚེ་ཤི་བའི་རྗེས་ནས། ཆེ་གེ་མོ་ཞིག་གིས་བདེ་འགྲོ་ཐོབ་སོང་ཚུལ་དང་ཐར་ལམ་ཟིན་སོང་བ་ཟངས་མདོག་དཔལ་རིའི་སྒོ་རྩ་ནས་འགྲོ་བཞིན་ཡོད་འདུག་ཅེས་པ་ཙམ་གྱིས། ཁོང་རང་གིས་རང་སྣང་དག་པའི་ངོར་ཤར་བ་འདྲ་ཡིན་ན་མ་གཏོགས་སེམས་ཅན་ལས་ཀྱི་རྗེས་སུ་མི་འབྲང་བར་ཉེ་ལམ་བརྒྱུད་ས་ཡོད་པ་མིན། འོན་ཀྱང་དགེ་བའི་ར་མདའ་གཟུངས་སྔགས་ཁྱད་པར་ཅན་བཟླ་བ་དང་། གསང་སྔགས་ཟབ་མོའི་དཀྱིལ་འཁོར་ལ་བརྟེན་ནས་གཏན་དུ་གནས་ནས་འདྲེན་ཐབས་མེད་པ་ཞིག་ཀྱང་མིན་ནོ། །དེས་ན་གཙོ་བོའི་ནང་གི་གཙོ་བོ་ནི། རང་ཉིད་ཚོགས་ལམ་ཆུང་ངུ་ནས་ཞུགས་ན་ཐར་བ་སྒྲུབ་པའི་ཐབས་མདོ་སྔགས་དགོངས་པ་གཅིག་ ཏུ་བབས་པ་ཡིན་པས། དེ་ལ་བརྩོན་པར་བྱེད་པ་གལ་ཆེ་བ་ལས་སྔས་མགོའི་བླ་མ་བཟང ་ཡང་འོ་བརྒྱལ་གཏན་ནས་མི་དགོས་པར་འདྲེན་ཐུབ་པའི་ཐུགས་རྗེ་ཡ་བྲལ་བ་ཞིག་ཡོད་པ་མིན་ཏེ། བཅོམ་ལྡན་འདས་ཀྱི་མདུན་ནས་གཅུང་ལྷས་བྱིན་གསོན་པོར་དམྱལ་བར་སོང་བ་ལ། བཅོམ་ལྡན་འདས་ཀྱིས་ཐུགས་མ་བརྩེ་བ་དང་བཅོམ་ལྡན་འདས་ལ་ཐུགས་རྗེ་མེད་པ་ག་ལ་ཡིན་ཡང་ཐབས་མེད་པས་ཡིན། དེས་ན་ཐམས་ཅད་ཀྱིས་ཆོས་ཚིག་རེ་ཐོས་པ་ཡན་ཆད་རང་རྒྱུད་ཀྱི་ཉམས་ལེན་གྱི་གནད་ལ་འཁེལ་བར་བྱེད་པ་ནི་གནད་ཆེ་བ་ཡིན། སྤྱིར་འདིའི་མན་ངག་དྲུག་ཚན་དུ་ཡོད་པ་འདི་དག་མང་ཆེ་ཤོས་ཚིག་རྐང་པ་བརྒྱད་རེས་བསྟན་པ་དང་། ཁ་ཤས་དེ་བས་མང་དང་དེ་བས་ཉུང་ཡང་ཡོད་ལ། གང་ལྟར་ཐོག་མའི་ཚིག་རྐང་དང་པོ་འདིས་མན་ངག་དྲུག་གི་གནད་བསྡུས་ནས་མཚམས་སྦྱོར་མདོར་བསྟན་གྱི་ཚུལ་དང་། བར་གྱི་ཚིག་རྐང་གཞན་རྣམས་ཀྱིས་མན་ངག་རེ་རེ་བཞིན་དུ་རྒྱས་པར་དབྱེ་བ་དང་། ཐ་མ་ན་ཡོད་པའི་ཚིག་རྐང་གཅིག་འདིས་དགོས་པ་དང་བཅས་པའི་མན་ངག་དྲུག་ཚན་དེའི་དོན་བསྡུས་པ་ཞིག་གོ།

ཉིན་བཞི་བའི་ཆོས་ཁྲིད།

དེ་ཡང་རྫ་དཔལ་སྤྲུལ་འཇིགས་མེད་ཆོས་ཀྱི་དབང་པོས། ཐུབ་པའི་མཚན་དཔེ་མིག་གི་བདུད་རྩི་སྟེ། །སྐལ་བཟང་ཡིད་ལ་དད་གསུམ་བསྐྱེད་པ་ལགས། །ལེགས་བཤད་ཡིག་གཟུགས་བཟོ་ཡི་སྤྲུལ་སྐུ་སྟེ། །དད་པའི་གསོས་སུ་འདི་ལས་ལྷག་པ་མེད། །སྟོན་པའི་ཚངས་དབྱངས་རྣ་བའི་བདུད་རྩི་སྟེ། །སྐལ་བཟང་ཡིད་ལ་ཤེས་རབ་བསྐྱེད་པ་ལགས། །ལེགས་བཤད་ཚིག་ཕྲེང་རྣ་བའི་བདུད་རྩི་སྟེ། །ཤེས་རབ་གསོས་སུ་འདི་དང་མཉམ་པ་མེད། །རྒྱལ་བའི་བྱིན་རླབས་སྙིང་གི་བདུད་རྩི་སྟེ། །སྐལ་བཟང་ཡིད་ལ་བདེན་པ་སྟོན་པ་ལགས། །ལེགས་བཤད་དོན་བཟང་སྙིང་གི་བདུད་རྩི་སྟེ། །ཡིད་ལ་ཡེ་ཤེས་གསོས་སུ་འདི་ཉིད་ཆེ། །ཞེས་གསུངས་ཏེ། དེ་ཡང་རྒྱལ་བའི་སྐུ་གསུང་ཐུགས་ཀྱི་གསང་གསུམ་མི་ཟད་རྒྱན་གྱི་འཁོར་ལོའི་མཚུངས་ཆོས་དང་སྦྱར་ནས། ཀུན་མཁྱེན་བླ་མའི་གསུང་ཆོས་སྐུའི་རིང་བསྲེལ་གྱི་ཕུང་པོ་འདི་གདུལ་བྱའི་དོན་དུ་གཟུགས་སྐུའི་གསང་བ་གསུམ་གྱི་རྣམ་རོལ་ ཏུ་ཤར་བ་ཡིན་པར་བསྟན་པ་སྟེ། ཐུབ་པའི་མཚན་དཔེ་མིག་གི་བདུད་རྩི་སྟེ། །སྐལ་བཟང ་ཡིད་ལ་དད་གསུམ་བསྐྱེད་པ་ལགས། །ཞེས་པ་ནི་ཐུབ་པ་རྫོགས་པའི་སངས་རྒྱས་བཅོམ་ལྡན་འདས་ཀྱི་མཚན་དང་དཔེ་བྱད་ཀྱིས་བརྒྱན་པའི་སྐུ་མཆོག་མཐོང་ན་མི་མཐུན་པ་མེད་པ་ཤཱཀྱ་སེངྒེ་མཆོག་གི་སྤྲུལ་བའི་སྐུ་དེ་ཉིད། ཚེ་རབས་བསྐལ་བ་དུ་མར་ཚོགས་གཉིས་བསགས་པའི་སྐལ་བ་བཟང་པོ་ཅན་དག་གིས་ཞལ་དངོས་སུ་མཇལ་ཏེ། མིག་གི་བདུད་རྩི་རུ་ཐོབ་པས་མ་ཚད་དད་གསུམ་བསྐྱེད་ཅིང་ཐར་བ་བྱང་ཆུབ་ཀྱི་ལམ་དུ་བཀོད་པའི་དགའ་སྟོན་ཐོབ་ཡོད་པ་དང་། ལེགས་བཤད་ཡིག་གཟུགས་བཟོ་ཡི་སྤྲུལ་སྐུ་སྟེ། །དད་པའི་གསོས་སུ་འདི་ལས་ལྷག་པ་མེད། །ཅེས་པ་ནི་སངས་རྒྱས་བཅོམ་ལྡན་འདས་ཉིད་ཀྱིས། ལྔ་བརྒྱའི་ཐ་མར་གྱུར་པ་ན། །ང་ཉིད་ཡི་གེའི་གཟུགས་སུ་སྣང་། །ཞེས་པ་ལྟར་བཟོ་དང་སྐྱེ་བ་མཆོག་གི་སྤྲུལ་བའི་སྐུ་ལ་སོགས་པའི་ནང་ནས། ལེགས་བཤད་ཡིག་གཟུགས་འདི་བཟོའི་སྤྲུལ་སྐུ་ཡིན་པས། སངས་རྒྱས་ཀྱི་གསུང་གི་གསང་བ་ཡི་གེའི་གཟུགས་སུ་སྣང་བའི་ཀློང་ཆེན་མཛོད་བདུན་འདི་སངས་རྒྱས་ཀྱི་སྐུ་དངོས་མཇལ་བ་དང་ཁྱད་པར་མེད་པས་དད་པའི་གསོས་བླ་ན་མེད་པའོ་ཞེས་པ་སྟེ། དེས་རྒྱལ་བའི་སྐུ་མི་ཟད་པ་རྒྱན་གྱི་འཁོར་ལོའི་བྱིན་རླབས་འདི་ལ་ཚང་བ་བསྟན་པ་ཡིན། སྟོན་པའི་ཚངས་དབྱངས་རྣ་བའི་བདུད་རྩི་སྟེ། །སྐལ་བཟང་ཡིད་ལ་ཤེས་རབ་བསྐྱེད་པ་ལགས། །ཞེས་པ་ནི་རྗོད་བྱེད་སྟོན་པ་རྫོགས་པའི་སངས་རྒྱས་ཀྱི་གསུང་ཚངས་པའི་དབྱངས་འགྲོ་བ་རང་རང་གི་སྐད་དང་མཐུན་པའི་སྙན་ཞིང་རྣ་བར་འཇེབས་པ། བརྗོད་བྱ་དོན་གྱི་ཆོས་འཁོར་ཟབ་ཅིང་རྒྱ་ཆེ་བས་སྐལ་བཟང་གི་སྐྱེ་བོའི་ནང་གི་ངེས་པ་འདྲེན་ཅིང་ཤེས་རབ་སྐྱེད་པར་བྱེད་པ་དང་། ལེགས་བཤད་ཚིག་ཕྲེང་རྣ་བའི་བདུད་རྩི་སྟེ། །ཤེས་རབ་གསོས་སུ་འདི་དང་མཉམ་པ་མེད། །ཅེས་རྗོད་བྱེད་ཀུན་མཁྱེན་ཆེན་པོའི་ལེགས་བཤད་རྒྱལ་བའི་གསུང་དང་གཉིས་སུ་མེད་པ་འདི་ཉིད་སྐལ་བཟང་སློབ་མའི་ཡང་དག་པའི་ཤེས་རབ་འཕེལ་བའི་གསོས་སྨན་བླ་ན་མེད་པ་ཡིན་པར་བསྟན་པ་སྟེ། དེས་རྒྱལ་བའི་གསུང་གི་ཆེ་བ་རྫོགས་ཚུལ་དང་གསུང་མི་ཟད་རྒྱན་འཁོར་གྱི་རྣམ་གཞག་བསྟན་པའོ། །རྒྱལ་བའི་བྱིན་རླབས་སྙིང་གི་བདུད་རྩི་སྟེ། །སྐལ་བཟང་ཡིད་ལ་བདེན་པ་སྟོན་པ་ལགས། །ཞེས་པ་ནི་རྒྱལ་བའི་ཐུགས་ཀྱི་བྱིན་རླབས་སྐལ་ལྡན་སྙིང་གི་བདུད་རྩི་དོན་དམ་སྐྱེ་བ་མེད་པའི་བདེན་པ་སྐལ་བཟང་སློབ་མས་མངོན་དུ་བྱེད་པའི་མཚན་ཉིད་ཅན་གྱི། ལེགས་བཤད་དོན་བཟང་སྙིང་གི་བདུད་རྩི་སྟེ། །ཡིད་ལ་ཡེ་ཤེས་གསོས་སུ་འདི་ཉིད་ཆེ། །ཞེས་པ་ནི་ཀུན་མཁྱེན་བླ་མའི་ལེགས་བཤད། དོན་བཟང་པོ། ཚིག་འབྲུ་བཟང་པོ། རྗོད་བྱེད་རྒྱ་ཆེ་ཞིང་བརྗོད་བྱ་གཏིང་ཟབ་པ་འདི་དག་ནི། སྐལ་བ་མཆོག་རབ་ལྡན་པའི་སྐལ་བཟང་དབང་རབ་ཀྱི་སྐྱེ་བོའི་ཡིད་ལ་ཆོས་ཉིད་བརྗོད་དུ་མེད་པའི་གནས་ལུགས་མ་བཅོས་པའི་ཡེ་ཤེས་ཀྱི་རང་ཞལ་མཇལ་བའི་གསོས་སུ་ཆེ་བ་ཡིན་ཞེས་གསུངས་པ་སྟེ། རྒྱལ་བའི་ཐུགས་ཀྱི་གསང་བ་ཟབ་མོའི་མཛོད་ཡོངས་སུ་རྫོགས་པའི་ཀློང་ཆེན་མཛོད་བདུན་འདི་ལ་རྒྱལ་བའི་གསང་གསུམ་གྱི་མཛད་པ་ཚང་བས། རྒྱལ་བ་དངོས་བྱོན་དང་ཁྱད་པར་མེད་པའི་རྒྱལ་བ་ཐམས་ཅད་ཀྱི་ཆོས་སྐུའི་མཆོད་སྡོང་ཆེན་པོ་ཡིན་ཕྱིར་བསོད་ནམས་བསག་པའི་ཞིང་ལ་འདི་ལས་ལྷག་པ་མེད་པར་བསྟན་པ་སྟེ། མདོར་ན་གཞུང་འདིས་ཚིག་གཅིག་ཙམ་ཉན་པ་དང་། འཛིན་པ་དང་། འཆང་བ་དང་། བཀླགས་པར་བྱས་ན། ཇི་སྙེད་རྒྱལ་བའི་ཆོས་ཚུལ་རབ་འབྱམས་ཞིང་ཁམས་རྒྱ་མཚོར་བཞུགས་པ་ཐམས་ཅད་ཉན་འཆད་འཛིན་འཆང་བྱས་པ་དང་མཉམ་པ་ཡིན་པར་གསུངས་ནས། བསྔགས་པ་བརྗོད་པར་མཛད་པའི་མཛོད་ཆེན་རིན་པོ་ཆེ་རྣམ་པ་བདུན། རྒྱལ་སྲིད་རིན་པོའི་ཆེའི་གྲངས་དང་ལྡན་པར་བཞུགས་པ་ལས་སྐབས་འདིར་གང་གསན་པར་བྱ་བ་མན་ངག་རིན་པོ་ཆེའི་མཛོད་འདི་ཉིད་འཆད་པའི་སྐབས་ལས། འདི་ལ་ཐོག་མཐའ་བར་གསུམ་དུ་དགེ་བའི་ཆིངས་རྣམ་པ་གསུམ་གྱིས་བཅིངས་ནས་བཤད་པའི་སྐབས་ལས། ཐོག་མར་དགེ་བ་ཀླད་ཀྱི་དོན་དང་། བར་དུ་དགེ་བ་གཞུང་དོན་ལས་ཀྱང་འགའ་ཞིག་སོང་ནས་དེ་རིང་།

༧༨ ཆོས་ལ་ཞུགས་པའི་གལ་ཆེ་རྣམ་དྲུག་བསྟན་པ།

ཆོས་ལ་ཞུགས་པའི་གལ་ཆེ་རྣམ་དྲུག་ནི།།

ཕྱི་མ་རྒྱུན་རིང་སྦྱིན་པ་གལ་རེ་ཆེ།།

བདེ་འགྲོའི་ཐེམ་སྐས་ཚུལ་ཁྲིམས་གལ་རེ་ཆེ།།

བཟོད་པའི་གོ་མཚོན་བསྲན་ཚུགས་གལ་རེ་ཆེ།།

ཡོན་ཏན་འབྱུང་གནས་བརྩོན་འགྲུས་གལ་རེ་ཆེ།།

དམིགས་པས་མི་གཡོ་བསམ་གཏན་གལ་རེ་ཆེ།།

དོན་སྒྲུབ་ལྷུན་གྲུབ་ཤེས་རབ་གལ་རེ་ཆེ།།

གལ་ཆེན་བསྒྲུབས་ལ་ཐར་ལམ་མྱུར་དུ་བགྲོད།།

ཅེས་གསུངས་པ་སྟེ། ཆོས་ལ་ཞུགས་པའི་གལ་ཆེ་ཕ་རོལ་ཏུ་ཕྱིན་པ་དྲུག་ནི། ཀུན་སློང་དག་པས་སྦྱིན་པ་ཡང་དག་པར་བཏང་ན་སྦྱིན་པའི་འབྲས་བུ་སྐྱེ་བ་གཞན་དུ་ནོར་དང་ལོངས་སྤྱོད་འབྱོར་བའི་ཁྱད་པར་ཡོད་པས། ཕྱི་མར་ནོར་འཚོལ་བས་དུས་གྲོན་ཏེ་ཆོས་སྒྲུབ་ལོང་མེད་པ་སེལ་ཞིང་། གལ་སྲིད་སྦྱིན་པ་མ་བཏང་ན་འབྲས་བུ་ལོངས་སྤྱོད་མི་འབྱུང་བས་སྦྱིན་པ་གལ་རེ་ཆེ་བ་ཡིན་ཏེ། འཇུག་པ་ལས། སྐྱེ་བོ་འདི་ཀུན་བདེ་བ་མངོན་འདོད་ཅིང་། །མི་རྣམས་བདེ་བའང་ལོངས་སྤྱོད་མེད་མིན་ལ། །ལོངས་སྤྱོད་ཀྱང་ནི་སྦྱིན་ལས་འབྱུང་མཁྱེན་ནས། །ཐུབ་པས་དང་པོར་སྦྱིན་པའི་གཏམ་མཛད་དོ། །ཞེས་གསུངས་པའི་ཕྱིར། ཡང་དེ་ལས། སྦྱིན་པས་ལོངས་སྤྱོད་དག་ནི་འགྲོ་ངན་ནའང་། །སྐྱེ་བོ་ཚུལ་ཁྲིམས་རྐང་པ་ཉམས་ལས་འབྱུང་། །སྐྱེད་བཅས་དངོས་འདུ་ཡོངས་སུ་ཟད་པས་ན། །ཕྱིན་ཆད་དེ་ལ་ལོངས་སྤྱོད་འབྱུང་མི་འགྱུར། །ཞེས་པ་ལྟར་དུ་སྦྱིན་པ་གཅིག་པུས་མི་ཆོག་པ་ཡིན་ཏེ། ལོངས་སྤྱོད་ཅན་ནི་ལྷ་མ་ཡིན་དང་། ཀླུ་དང་། ཉི་ཚེ་བ་ཡི་དྭགས་རྫུ་འཕྲུལ་ཆེན་པོ་སོགས་ཀྱང་ཡོད་པས་ལོངས་སྤྱོད་རྐྱང་པས་ཕན་ཐོགས་པ་མེད་པ་ཡིན་པའི་ཕྱིར། དེས་ན་བདེ་འགྲོ་ལྷ་མིའི་ལུས་གཟུགས་མཛེས་པ་ནད་མེད་པ་དབང་པོ་ཚང་བ་ཞིག་ཐོབ་དགོས་ན་བདེ་འགྲོའི་ཐེམ་སྐས་ཚུལ་ཁྲིམས་གལ་རེ་ཆེ་བ་ཡིན་ཏེ། དེ་ལས། ཡོན་ཏན་ཚུལ་ཁྲིམས་ཞིང་དུ་རྣམ་འཕེལ་ན། །འབྲས་བུ་ཉེར་སྤྱོད་ཆད་པ་མེད་པར་འགྱུར། །ཞེས་དང་། མངོན་མཐོའི་རྒྱུ་ནི་ཚུལ་ཁྲིམས་ལས་གཞན་མེད། །ཅེས་གསུངས་པའི་ཕྱིར། ཚེ་འདི་དང་ཕྱི་མར་རང་དང་གཞན་གྱི་དོན་བསྒྲུབས་ནས་འགྲུབ་པ་ལ་ཞེ་སྡང་གི་མཚོན་གྱིས་ཕུག་མི་ནུས་པའི་བཟོད་པའི་གོ་མཚོན། ཆོས་ཀྱི་ཕྱིར་དུ་སྡུག་དཀའ་ལས་ཅི་འདྲ་བྱུང་ཡང་བསྲན་ཚུགས་པ་དེ་གལ་རེ་ཆེ་ཏེ། དཔལ་ལྡན་ཟླ་བས། མི་སྡུག་གཟུགས་སུ་བྱེད་ཅིང་དམ་པ་མིན་པར་བཀྲི། །ཚུལ་དང་ཚུལ་མིན་ཤེས་པའི་རྣམ་དཔྱོད་འཕྲོག་བྱེད་ཅིང་། །མི་བཟོད་པ་ཡིས་མྱུར་དུ་ངན་འགྲོར་སྐྱུར་བར་བྱེད། །བཟོད་པས་བཤད་ཟིན་དང་འགལ་ཡོན་ཏན་རྣམས་བྱེད་དོ། །བཟོད་པས་མཛེས་ཤིང་སྐྱེ་བོ་དམ་པ་ལ། །ཕངས་དང་ལུགས་དང་ལུགས་མིན་ཤེས་པ་ལ། །མཁས་པར་འགྱུར་ཞིང་དེ་ཡི་འོག་ཏུ་ནི། །ལྷ་མིའི་སྐྱེ་དང་སྡིག་པ་ཟད་པར་འགྱུར། །ཞེས་གསུངས་པའི་ཕྱིར། ཡང་དེ་ལས། ཡོན་ཏན་མ་ལུས་བརྩོན་འགྲུས་རྗེས་འགྲོ་ཞིང་། །བསོད་ནམས་བློ་གྲོས་ཚོགས་ནི་གཉིས་ཀྱི་རྒྱུ། །ཞེས་པ་ལྟར་དུ། ཡོན་ཏན་འབྱུང་དང་མི་འབྱུང་བརྩོན་པ་ཡོད་མེད་ལ་རག་ལས་པས་ཡོན་ཏན་འབྱུང་གནས་བརྩོན་འགྲུས་རྩོམ་པ་གལ་རེ་ཆེ་བ་དང་། ཐོས་བསམ་བྱས་པའི་སྙིང་དོན་སྒོམ་པས་ཉམས་སུ་ལེན་པའི་སྒོ་ནས་འབྲས་བུ་ཐོབ་དགོས་པས་དམིགས་པ་སྣ་ཚོགས་པའི་མཚན་མས་མི་གཡོ་བའི་བསམ་གཏན་གལ་རེ་ཆེ་ཏེ། བསམ་གཏན་ལྷག་ཅིང་བློ་ བཟང་བདེན་རང་བཞིན། །ཞིབ་མོ་རྟོགས་ལའང་ཤིན་ཏུ ་མཁས་པ་འཐོབ། །ཅེས་གསུངས་པའི་ཕྱིར། རང་གཞན་དོན་གཉིས་མཉམ་དུ་སྒྲུབ་པ་ལ་གནད་ཁྱད་པར་ཅན་ཤེས་པའི་སྟོབས་ཀྱིས་ལྷུན་གྱིས་འགྲུབ་པར་བྱེད་པ་ནི་ཤེས་རབ་ཡིན་ཏེ། ཤེས་རབ་ཡེ་ཤེས་ཀྱི་ཚོགས་བསགས་ན་མིག་དང་ལྡན་པ་གང་འདོད་པའི་སར་ཕྱིན་ཆོག་པ་ལྟ་བུ་ཞིག་ཡིན་པར་དེ་ལས། ཇི་ལྟར་ལོང་བའི་ཚོགས་ཀུན་བདེ་བླག་ཏུ། །མིག་ལྡན་སྐྱེས་བུ་གཅིག་གིས་འདོད་པ་ཡི། །ཡུལ་དུ་འཁྲིད་པ་དེ་བཞིན་འདིར་ཡང་བློས། །མིག་ཉམས་ཡོན་ཏན་བླངས་ཏེ་རྒྱལ་ཉིད་འགྲོ། །ཞེས་གསུངས་པའི་ཕྱིར། དེ་འདྲའི་གལ་ཆེན་ཕར་ཕྱིན་དྲུག་པོ་བསྒྲུབས་ན་ཐར་ལམ་མྱུར་དུ་འགྲུབ་པའི་བགྲོད་ཤུགས་དང་ལྡན་པ་ཡིན་ནོ།།

༧༩ དེ་དང་མི་ལྡན་སྐྱོན་དྲུག་བསྟན་པ།

དེ་དང་མི་ལྡན་སྐྱོན་དྲུག་བསྟན་པ་ནི།།

སྦྱིན་པ་མ་བཏང་ཡི་དྭགས་མདུན་ན་བསྒུགས།།

ཚུལ་ཁྲིམས་མ་བསྲུངས་དུད་འགྲོ་མདུན་ན་བསྒུགས།།

བཟོད་པ་མ་བསྒོམས་དམྱལ་བ་མདུན་ན་བསྒུགས།།

བརྩོན་འགྲུས་མི་རྩོམ་མི་ཁོམ་གཡང་ས་བསྒུགས།།

བསམ་གཏན་མི་བསྒོམ་བདུད་བཞིའི་དཔུང་ཚོགས་བསྒུགས།།

ཤེས་རབ་མ་བསྒོམས་གཏན་དུ་སྲིད་པ་བསྒུགས།།

དགྲ་རྣམས་མདུན་སྒུགས་དེ་ཡི་དབང་དུ་འགྱུར།།

ཞེས་གསུངས་པ་སྟེ། ཕྱིན་དྲུག་དེ་དག་དང་མི་ལྡན་པའི་སྐྱོན་དྲུག་བསྟན་པ་ནི། གོང་དུ་བཤད་པའི་ཕར་ཕྱིན་དྲུག་ཚུལ་བཞིན་སྒྲུབ་པ་ལས་ལྡོག་ནས་སྦྱིན་པ་མ་བཏང་བར་སེར་སྣ་བྱས་ན་ཡི་དྭགས་སུ་སྐྱེ་བས་མདུན་ན་སྒུག་པ་དང་། ཚུལ་ཁྲིམས་མ་བསྲུངས་ན་དུད་འགྲོ་ལ་སྐྱེ་བ་ཡིན་པས་མདུན་ནས་བསྒུགས་པ་དང་འདྲ་བ་ཡིན་པས་དེ་ལས་ལྡོག་ཏུ་མེད་པ་སྟེ། ལ་ལའི་ཚུལ་ཁྲིམས་བདེ་བ་སྟེ། །ལ་ལའི་ཚུལ་ཁྲིམས་སྡུག་བསྔལ་ཡིན། །ཚུལ་ཁྲིམས་ལྡན་པ་བདེ་བ་སྟེ། །ཚུལ་ཁྲིམས་འཆལ་བ་ངན་འགྲོར་ལྟུང་། །ཞེས་འབྱུང་བས་སོ། །དེ་ཡང་རབ་ཏུ་བྱུང་བ་རྐྱང་པ་ལ་གསུངས་པ་མིན་ཏེ། དཀོན་མཆོག་གསུམ་ལ་སྐྱབས་སུ་སོང་བའི་ནང་པ་སངས་རྒྱས་པའི་སློབ་མ་ཐམས་ཅད་ཀྱིས་སྐྱབས་སྡོམ་ཞུས་ཡོད་པ་དང་། དགེ་བསྙེན་དག་གིས་སྣ་གཅིག་དང་སྣ་འགའ་ལ་སོགས་པའི་སྡོམ་པ་བླངས་ཡོད་པ་ཡིན་ན། མི་དགེ་བཅུ་སྤོང་གི་ཚུལ་ཁྲིམས་ཐམས་ཅད་ཀྱིས་སྲུང་བར་བྱེད་དགོས་པ་ཡིན་པས། དེའི་སྡོམ་ཁྲིམས་དང་འགལ་ན་དུད་འགྲོ་ལ་སོགས་པར་སྐྱེ་བ་ཡིན། དེའི་ལས་ཟད་ནས་མི་ལུས་ཐོབ་ཀྱང་ཁ་ཆེ་སྣ་ཉག་སོགས་གདོང་མི་མཛེས་པ་དང་། དབང་པོ་མ་ཚང་བ་ལ་སོགས་པའི་ལུས་ལེན་པ་ཡིན་ན་རབ་ཏུ་བྱུང་བས་སྡོམ་པ་མ་བསྲུངས་ན་དེ་བས་ཀྱང་རྣམ་སྨིན་ལྕི་བ་ཡིན། དེ་བཞིན་དུ་བཟོད་པ་མ་བསྒོམས་པར་ཁྲོ་བས་དམྱལ་བར་སྐྱེ་བས་མདུན་ན་བསྒུགས་པ་ཡིན་ཏེ། སྐྱེས་རབས་ལས། ཁྲོ་བའི་མེ་ཡིས་བཞིན་མདོག་ཉམས་གྱུར་ན། །རྒྱན་གྱིས་བརྒྱན་ཡང་བཟང་པོར་ཡོང་མི་སྣང་། །མལ་སྟན་བཟང་པོ་དག་ལ་ཉལ་གྱུར་ཀྱང་། །ཁྲོ་བའི་ཟུག་རྔུས་སེམས་ནི་སྡུག་བསྔལ་འགྱུར། །བདག་ལ་ཕན་པའི་དོན་འགྲུབ་བརྗེད་འགྱུར་ཏེ། །ཁྲོ་བས་གདུངས་ནས་ལམ་ངན་འགྲོ་བར་བྱེད། །གྲགས་དང་དོན་གྲུབ་པ་ལས་ཉམས་པར་འགྱུར། །ཞེས་དང་། སྤྱོད་འཇུག་ལས། བསྐལ་པ་སྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། །ལེགས་སྤྱད་གང་ཡིན་དེ་ཀུན་ཀྱང་། །ཁོང་ཁྲོ་གཅིག་གིས་འཇོམས་པར་བྱེད། །ཅེས་གསུངས་པའི་ཕྱིར། སྐྱོད་པར་བྱེད་པའི་ལས་ཅན་རླུང་མེད་ན་གཡོ་བ་དང་མྱུར་བའི་ལས་མི་འགྲུབ་པ་བཞིན་དུ། བྱང་ཆུབ་ཀྱི་རང་བཞིན་ནི་དགེ་བའི་ས་ཆེན་པོ་བསོད་ནམས་དང་ཡེ་ཤེས་ཀྱི་ཚོགས་ལ་རག་ལས་ཤིང་། དེ་བརྩོན་འགྲུས་མེད་ན་མི་འབྱུང་བས་མི་ཁོམ་པའི་གཡང་སར་སྐྱེ་བས་མདུན་ན་བསྒུགས་ནས་ཡོད་པ་ཡིན་ཏེ། ཡུམ་ལས། ལེ་ལོས་ནི་བདག་གི་དོན་ཡང་བྱ་བར་མི་ནུས་ན་གཞན་གྱི་དོན་ལྟ་ཅི་སྨོས། ལེ་ལོའི་རྣམ་པར་སྨིན་པས་ནི། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་སྐྱེ་བར་འགྱུར་རོ། །ཞེས་གསུངས་པའི་ཕྱིར། བསམ་གཏན་མི་སྒོམ་པའི་གང་ཟག་རྣམ་གཡེང་ཅན་ལ་བདུད་འཇུག་སླ་བ་ཡིན་པས་བདུད་བཞིའི་དཔུང་ཚོགས་ཀྱིས་བསྒུགས་ནས་ཡོད་པ་དང་། ཤེས་རབ་མེད་ན་ལུང་དང་རྟོགས་པའི་ཆོས་ཇི་སྙེད་པ་དང་། ཇི་ལྟ་བ་ཤེས་པ་ལྟ་ཞོག དགེ་སྦྱོར་གཞན་སྦྱིན་པ་དང་ཚུལ་ཁྲིམས་ལ་སོགས་པ་ཕ་རོལ་ཏུ་ཕྱིན་པའི་ལམ་ལ་འབད་ཀྱང་དེ་དག་ཐར་པའི་རྒྱུར་མི་འགྲོ་ནས་སྲིད་པ་ཁམས་གསུམ་འཁོར་བའི་གནས་སུ་གཏན་དུ་འཁྱམས་པས་བསྒུགས་པ་ཡིན་ཏེ། ཤེས་རབ་མེད་ན་འབྲས་བུ་དོན་གཉེར་ལ། །སྦྱིན་པ་བདག་ཉིད་རྣམ་པར་དག་མི་འགྱུར། །ཞེས་དང་། ཤེས་རབ་སྣང་བས་མུན་པ་མ་བསལ་ན། །ཚུལ་ཁྲིམས་དག་དང་ལྡན་པར་དེ་མི་འགྱུར། །ཕལ་ཆེར་ཤེས་རབ་མེད་པས་ཚུལ་ཁྲིམས་དག །ཉེས་པའི་སྐྱོན་གྱིས་ཉོན་མོངས་རྙོག་བཅས་འགྱུར། །ཞེས་གསུངས་པའི་ཕྱིར། དེས་ན་དགྲ་དེ་དག་གིས་མདུན་ནས་བསྒུགས་ནས་དེ་ཡི་དབང་དུ་གྱུར་ཚེ་ངན་འགྲོ་སྔུག་བསྔལ་གྱི་གཡང་ནས་ཐར་བ་མིན་ནོ།།

༨༠ ཟབ་མོ་རྒྱུད་སྦྱོར་མི་དགོས་རྣམ་དྲུག་བསྟན་པ།

ཟབ་མོ་རྒྱུད་སྦྱོར་མི་དགོས་རྣམ་དྲུག་ནི།།

གང་འདུག་དགེ་བ་འཕེལ་ན་དགོན་པ་བསྟེན་མི་དགོས།།

རྣམ་རྟོག་རང་སར་གྲོལ་ན་འཁོར་བ་སྤང་མི་དགོས།།

རང་གི་བག་མེད་བསྲུངས་ན་གཞན་སེམས་བསྲུང་མི་དགོས།།

མ་བཅོས་སེམས་ཉིད་རྟོགས་ན་དཔེ་ཆ་ཀློག་མི་དགོས།།

ཅི་སྣང་སྒྱུ་མར་རྟོགས་ན་ཞེན་པ་བཟློག་མི་དགོས།།

གནས་ལུགས་རང་ངོ་ཤེས་ན་སངས་རྒྱས་བཙལ་མི་དགོས།།

འདི་དག་དང་ལྡན་སྐྱེས་ཆེན་འགྲོ་མཆོག་ལགས།།

ཞེས་གསུངས་པ་སྟེ། ཟབ་མོ་རྒྱུད་སྦྱོར་མི་དགོས་རྣམ་དྲུག་ནི། གནས་གང་དུ་འདུག་ཀྱང་རུང་། གྲོགས་སུ་དང་འགྲོགས་ཀྱང་རུང་། དགེ་སྦྱོར་འཕེལ་ན་དགོན་པའམ་དབེན་པར་བསྟེན་མི་དགོས་ཏེ་དབེན་པར་འདུག་པ་ནི་སྡིག་མེད་དགེ་བ་འཕེལ་བའི་དོན་ཡིན་པའི་ཕྱིར། འདི་ནི་རང་དོན་གྲུབ་ཟིན་པའི་གང་ཟག་རྐྱེན་གྱིས་མི་ཚུགས་པ་དག་གི་དབང་དུ་བྱས་པའོ། །རྣམ་རྟོག་ཐ་མལ་རང་སར་གྲོལ་ནས་སྒོམ་པ་ཀློང་དུ་གྱུར་ན་རྣམ་རྟོག་འཁྲུལ་བའི་དབང་གིས་གནས་དོན་ལུས་སུ་སྣང་བའི་འཁོར་བ་ཆེད་དུ་སྤང་མི་དགོས་ཏེ། དེ་ལོགས་སུ་གྲུབ་པ་མེད་པའི་ཕྱིར། རང་རྒྱུད་ལ་བག་མེད་པའི་བསམ་སྤྱོད་སྐྱེ་མ་བཅུག་པར་བསྲུངས་ནས་བག་ཡོད་པར་གྱུར་པ་དེ་ལས་གཞན་དུ་གྱུར་པའི་སེམས་ཟུར་ནས་བསྲུང་མི་དགོས་ཏེ། བཅོམ་ལྡན་འདས་ཀྱིས་དགེ་སློང་གསར་བུ་དག་ལ་བག་ཡོད་པར་གྱིས་ཤིག་བག་ཡོད་པ་འདི་ནི་ཚིག་ཉུང་ཡང་དོན་རྒྱ་ཆེན་པོ་ཡོད་པ་ཡིན་ཞེས་གསུངས་པའི་ཕྱིར། མ་བཅོས་སེམས་ཉིད་གནས་ལུགས་ཆོས་སྐུའི་རང་ཞལ་མཐོང་ནས་རྟོགས་ན། དཔེ་ཆ་ཀློག་མི་དགོས་ཏེ་ཐོས་བསམ་གྱི་མཐར་སོན་པ་ཡིན་པའི་ཕྱིར། ཅི་སྣང་རང་བཞིན་གྱིས་མ་གྲུབ་པ་སྒྱུ་མ་ལྟ་བུར་རྟོགས་ན་ཞེན་པ་ཟུར་ནས་བཟློག་མི་དགོས་པ་དང་། གནས་ལུགས་དོན་གྱི་རང་ངོ་ཤེས་ན་སངས་རྒྱས་ཞེས་པ་ཞིག་ཟུར་ནས་བཙལ་མི་དགོས་པ་སྟེ། འདི་དག་དང་ལྡན་པ་ནི་སྐྱེས་ཆེན་འགྲོ་བའི་མཆོག་གམ་འགྲོ་བའི་མགོན་དང་སྐྱབས་དང་དཔུང་གཉེན་དུ་གྱུར་པ་ཞིག་ཡིན་ནོ།།

༨༡ ཆོས་སྒྲུབ་གྲོགས་སུ་མཆོག་དྲུག་བསྟན་པ།

ཆོས་སྒྲུབ་གྲོགས་སུ་མཆོག་དྲུག་བསྟན་པ་ནི།།

མཆོད་གནས་མཆོག་ཏུ་བླ་མ་དཀོན་མཆོག་བཀུར།།

གཏོང་བའི་མཆོག་ཏུ་ཚེ་འདིའི་བྱ་བ་གཏོང༌།།

ནོར་གྱི་མཆོག་ཏུ་ཐོས་བསམ་དད་པ་བསྟེན།།

བཤེས་ཀྱི་མཆོག་ཏུ་སེམས་ཉིད་རང་ངོ་ཤེས།།

སེམས་བསྐྱེད་མཆོག་ཏུ་རང་འདོད་འཁྲི་བ་སྤོང༌།།

གྲུབ་རྟགས་མཆོག་ཏུ་བླ་མ་སངས་རྒྱས་མཐོང༌།།

དེ་དག་འབྱོར་ན་དོན་གཉིས་ལྷུན་གྲུབ་འགྱུར།།

ཞེས་གསུངས་པ་སྟེ། ཆོས་སྒྲུབ་གྲོགས་སུ་མཆོག་དྲུག་བསྟན་པ་ནི། མཆོད་པའི་གནས་ཐམས་ཅད་ཀྱི་མཆོག་སངས་རྒྱས་ཆོས་དང་དགེ་འདུན་ཏེ་དཀོན་མཆོག་གསུམ་དང་། དེ་གསུམ་གཅིག་ཏུ་འདུས་པའི་བདག་ཉིད་བླ་མ་ཡིན་པས་དེ་ལ་བཀུར་ནས་མཆོད་པ་བྱེད་པ་དང་། གཏོང་བའི་མཆོག་ཏུ་ཚེ་འདིའི་བྱ་བ་གཏང༌དགོས་ཏེ་དེ་ཡང་ཚེ་འདི་བློས་མ་ཐོང་ཚེ་ཆོས་རྣལ་མ་ཞིག་འགྲུབ་པ་མིན་པའི་ཕྱིར། ནོར་ཐམས་ཅད་ཀྱི་ནང་ནས་ཚེ་རབས་སྐྱེ་བའི་ཕྲེང་བ་ལ་ཕན་པ་ཡོད་པའི་མཆོག་ཏུ་གྱུར་པ་ནི་ཐོས་བསམ་དང་དད་པ་ཡིན་པས་བསྟེན་དགོས་པ་དང་། བཤེས་གཉེན་གྱི་མཆོག་ཏུ་གྱུར་པ་ནི་སེམས་ཉིད་རང་ངོ་ཤེས་པ་ཡིན་པས་དེ་དང་འབྲལ་བ་མེད་པར་བྱེད་པ་དང་། སྨོན་འཇུག་གི་སྡོམ་པ་ལེན་དུས་དགོངས་སུ་གསོལ་བ་གསུམ་གྱིས་སད་པར་བྱས་ཏེ། སྐྱབས་སུ་འགྲོ་བ་གསུམ་གྱིས་གཞིར་བཟུང་ནས་དངོས་གཞི་དམ་བཅའ་སེམས་བསྐྱེད་པའི་རྗེས་སུ། དེ་རིང་ང་བྱང་ཆུབ་སེམས་དཔའ་དཔར་བྱས་པ་ཡིན་པས་ལྷ་དང་ལྷ་མིན་ལ་སོགས་ཐམས་ཅད་དགའ་བར་གྱིས་ཤིག་ཅེས་བརྗོད་ནས་སེམས་སྐྱེད་བཞིན་ཡོད་ཀྱང་། བྱང་ཆུབ་སེམས་དཔའ་རུ་གྱུར་ཡོད་མིན་ནི་རང་འདོད་ཡོད་མེད་ཀྱི་རྗེས་སུ་བྱེད་པས། སེམས་བསྐྱེད་ནས་རང་འདོད་ཀྱི་འཁྲི་བ་སྟེ་དེའི་ཆ་ཤས་ཙམ་མ་དགོས་རང་འདོད་རགས་པ་མངོན་གྱུར་པ་ཙམ་ཡང་སྤོང་མ་ནུས་པ་དང་། རང་གཞན་གཉིས་ཀའི་བདེ་སྡུག་བརྗེ་མ་ཐུབ་དུས་རང་འདོད་ཀྱི་འཁྲི་བ་ཡོད་པས་སེམས་བསྐྱེད་རྒྱུད་ལ་སྐྱེས་མེད་པ་ཡིན། དེས་ན་རང་འདོད་ཀྱི་འཁྲི་བ་སྤངས་པའི་སེམས་མཆོག་བསྐྱེད་དགོས་སོ། །བཀའ་མདོ་རྒྱུད་དགོངས་གནད་ཟབ་མོ་ཁྲོལ་ནས་བླ་མ་སངས་རྒྱས་སུ་མཐོང༌བའི་གྲུབ་པའི་རྟགས་མཆོག་ཐོབ་སྟེ་བཤད་སྒྲུབ་ཀྱི་ལག་རྗེས་ཞོག་ན་སྐྱེ་དགུའི་བདེ་སྐྱིད་ཀྱི་གཞི་མ་བཙུགས་པ་ཡིན་པས། ལྕགས་ལ་མདུད་པ་མདུད་པ་དང་། རྡོ་ལ་ཞབས་རྗེས་བཞག་པའི་གྲུབ་རྟགས་མེད་ཀྱང་བླའོ། །དེ་ལྟ་བུའི་མཆོག་དྲུག་གི་འབྱོར་བས་ཕྱུག་ན་དོན་གཉིས་ལྷུན་གྱིས་འགྲུབ་པར་འགྱུར་རོ།།

༨༢ བྱ་བ་མ་ཡིན་རྣམ་དྲུག་སྤང་བ་བསྟན་པ།

བྱ་བ་མ་ཡིན་རྣམ་དྲུག་སྤང་བ་ནི།།

རྒྱུད་ཚོད་མི་ཤེས་གང་ཟག་གཤེ་བཀུར་སྤང༌།།

ལོག་འཚོའི་རྙེད་པས་དད་ལྡན་སུན་མ་འདོན།།

བག་མེད་ཐོ་ཅོའི་སྨྱོན་སྤྱོད་ཤུགས་མ་དྲགས།།

གཞན་ལ་ཁྱད་གསོད་མཐོ་དོགས་བརྙས་མ་བྱེད།།

ལྟོ་རྒྱབ་ཆེད་དུ་དམ་པའི་ཆོས་མ་འདོར།།

རྒྱུ་འབྲས་ཟབ་མོའི་རྟེན་འབྲེལ་ཁྱད་མ་བསད།།

འདི་དག་སྤངས་ན་སྐྱེས་བུ་དམ་པར་འགྱུར།།

ཞེས་གསུངས་པ་སྟེ། བྱ་བ་མ་ཡིན་རྣམ་དྲུག་སྤང་བ་ནི། བཅོམ་ལྡན་འདས་ཀྱིས་དཀོན་མཆོག་བརྩེགས་པ་ལས། འོད་སྲུངས་ང་དང་ང་འདྲ་བས་ཆོས་དང་གང་ཟག་གི་ཚོད་གཟུང་བར་རུང་གིས། གཞན་དག་ནི་མ་ཡིན་ཏེ་ལོག་པར་ལྟུང་བའི་ཕྱིར་རོ། །ཞེས་གསུངས་པ་ལྟར་དུ་ཕྱི་ཚུལ་ལ་བལྟས་ནས་བཟང་ངན་གྱི་ཁྱད་པར་དང་། སངས་རྒྱས་བྱང་སེམས་ཀྱི་སྤྲུལ་བ་གང་ན་ཡོད་ཤེས་པ་མིན་པས། དཔལ་སྤྲུལ་ཚང་གིས་དང་བ་དང་དད་ལོག་གཉིས་ཀ་བྱེད་མི་ཉན་པ་ནི། རྒྱུས་མེད་ཀྱི་བླ་མ་ཡིན་པར་གསུངས་པ་ལྟར་དུ། དད་པ་མ་ཞོག་ཀྱང་དད་ལོག་དགོས་དོན་མེད་པས་གང་ཟག་ལ་གཤེ་སྐུར་ཏེ་ངན་ཟེར་དང་སྐུར་འདེབས་སྤོང་བར་བྱེད་པ་དང་། དེང་སང་བསྟན་པ་ཆགས་འཇིག་གི་རྟེན་གཞིའི་གཙུག་ལག་ཁང་བཞེངས་པ་དང་། དགེ་འདུན་པའི་འཚོ་ཆས་ཡོ་བྱད་རེ་མེད་ཀྱི་ཐབས་མེད་དུ་ཁེལ་བ་ཡིན་ཡང་། རྙེད་པ་དང་བཀུར་སྟིའི་ཕྱིར་དུ་ཚིག་འཇམ་སྔོན་ཏུ་སྨྲ་བ་ཁ་གསག ཐོབ་པར་འདོད་པས་གཞན་གྱི་རྫས་ལ་བསྔགས་པ་གཞོགས་སློང་། རང་ལ་བབ་ཐོབ་ཀྱི་ཡོན་ཏན་བརྗོད་པ་ཐོབ་འཇལ། སྔར་ཐོབ་པ་ལ་བསྔགས་པ་དང་ཐོབ་པའི་ཕྱིར་དུ་ཅུང་ཟད་སྦྱིན་པ་རྙེད་པས་རྙེད་པ་འཚོལ་བ། རྙེད་བཀུར་གྱི་ཕྱིར་དུ་དབང་པོ་བསྡམས་ནས་དུལ་བར་འཆོས་པ་ཚུལ་འཆོས་སོགས་ལ་བརྟེན་ཏེ། དཀོན་མཆོག་གི་ཕག་ནས་ལོག་འཚོའི་འཚོ་བས་རང་ཉིད་དང་། ཁོར་ཡུག་གི་གཟི་མདངས་བསྐྱེད་ནས་ཆོས་པའི་གཟུགས་ཀྱིས་ཆོས་མིན་བྱེད་པ། གནད་ཤེས་པ་ཞིག་གིས་བལྟས་ན་བླུན་པོ་ཤེས་མེད་བ་ལང་གསེར་གྱི་རྒྱན་ཆ་ཅན་ཞིག་ལ་མཐོང་བའི་མཚང་རྗེན་གཅེར་སྟོན་ཏེ་དད་ལྡན་སུན་འབྱིན་ནས་སེམས་ཕམ་ཞིང་ཡི་ཆད་པར་བྱེད་ཅིང་། དད་མེད་ལོག་ལྟ་ཅན་དག་གིས་ངན་སྨོད་བྱེད་པའི་ཡུལ་བསྟན་པའི་ཞབས་འདྲེན་དང་བསྟན་བླ་འཚོང་བའི་བདག་ཉིད་ཅན། མགོ་རྣ་ལ་རྒྱ་བཟུང་ནས་གཅིག་ཚང་ལ་གཅིག་ཡོད་དུས་ངེད་ཚང་ལ་དེ་བས་བཟང་ཞིག་དགོས་འདུག་བསམ་ཁུལ་གྱིས་སྐུ་ཚེ་ས་རྡོ་དང་རྩོལ་སྒྲུབ་ལ་སྐྱེལ་བའི་རྣམ་ཐར་གྱི་ནང་དུ། ཡ་མཚན་མེད་པར་མ་ཟད་རང་གཞན་གྱི་རྒྱུད་ཆུད་ཟ་བར་བྱེད་པ་ཡིན་པས། སྒེར་གྱི་དོན་དུ་སྨོས་ཅི་དགོས་སྤྱི་དོན་ཡིན་ཡང་། རྒྱུ་ནོར་རྙེད་པའི་ཆེད་དུ་ཁྱིམ་པ་སུན་འབྱིན་གྱི་བྱ་བས་གཞན་གྱི་དད་པ་ལྡོག་བཅུག་ན་རང་གིས་མ་ཟད་ན་བཟའ་དམར་པོ་མནབས་ཚད་ཀྱི་དབུ་འཕང་དམའ་རུ་འཇུག་པས་ཤིན་ཏུ་ཐ་ཆད་པ་ཡིན། སྤྱིར་ན་སོ་སོ་སྐྱེ་བོའི་གནས་སྐབས་ན་ཟས་ནོར་གྱི་དགོས་མཁོ་རེ་སྒྲུབ་པའི་འདོད་པ་ཙམ་མེད་པ་ཞིག་ཡོད་པ་མིན་པ་དང་། རབ་ཏུ་བྱུང་བ་ཡིན་ཡང་འཚོ་མཁོ་ལྷག་པའི་ཡོ་བྱད་ཉར་ཆོག་པ་དང་། ལུས་འཚོ་བའི་ཆེད་དུ་ལུས་རྒུད་པའི་རྒྱུ་རུ་མི་འགྱུར་བའི་འཚོ་བ་བསོད་སྙོམས་ཀྱི་མཐའ་སྤོང་དགོས་པའི་བཅས་པ་ཡོད་པ་དང་། འདུལ་བ་ཡུལ་དུས་དང་བསྟུན་ནས་མཐའ་འཁོབ་ཀྱི་ཡུལ་དུ་ཀོ་ལྤགས་གནང་བ་ལ་སོགས་པ་ཡོད་པར་མ་ཟད། ཆགས་པ་མེད་ན་འབུམ་རི་བའི་གོས་དང་གནས་ཁང་བརྩེགས་པ་ལྔ་བརྒྱ་བ་ལ་སོགས་པ་ཡང་གནང་བའི་སྐབས་ཡོད་པ་ཡིན་ཡང་། གཙོ་ཆེ་བ་དད་པས་ཕུལ་ཞིང་དང་བས་བཞེས་པའི་དད་རྫས་དཀོན་མཆོག་གི་མཆོད་པའི་ཞིང་སར་འགྲོ་བར་བྱེད་ཅིང་། བསྟན་པ་ཉམ་དམན་པར་གྱུར་པའི་སྐབས་འདིར། བསྟན་པའི་མེ་རོ་སློང་ཞིང་དེའི་རྒྱུན་འཛུགས་པའི་མཐུན་རྐྱེན་དངོས་ཀྱི་ཐོག་ཏུ་སྨིན་པ་ནི་གལ་ཆེ་བ་ཡིན་པས། ལྷ་ཁང་དང་ལྷ་རྟེན་དགེ་འདུན་སྤྱིའི་ཚོགས་ས་འདུ་ས་དང་ཆོས་སྡེ་སྤྱིའི་དཀོར་ནོར་བགྱིས་ན་དགེ་འདུན་འདུ་བའི་སྒོ་ཡིན་པ་དང་། བླ་མ་སྤྲུལ་སྐུ་མཁན་པོ་སུ་ཡིན་ཡང་གང་ཟག་སྒེར་གྲྭ་བ་གྲྭ་རྐྱང་གི་འཚོ་བ་སྐྱེལ་ནས་གྲྭ་ཤག་ཆུང་ཆུང་རེ་བཟུང་བ་ལས་བླ་བྲང་ཆེན་པོའི་ཚུགས་ཀ་མ་གཏོད། དུས་ཚོད་ཀྱི་འགྱུར་བ་འགྲོ་བཞིན་ཡོད་པས་གནའ་བོའི་ཞ་དཔེ་ལྷམ་འགེབས་ཁོ་ན་དགོས་པ་མིན། རིག་གནས་གསར་བརྗེའི་དུས་ཚོད་ལ་སོགས་པའི་དུས་འགྱུར་ཚུན་ཆོད་དུ། བསྟན་པ་འདི་ལ་ཉམ་ཉེས་དང་བརྡབ་གསིག་ཆེན་པོ་སོང་བའི་ཡང་དར་གྱི་འགོ་གསར་བ་འཛུགས་པའི་སྐབས་འདིར། བསྟན་པ་དྭངས་གཙང་གི་རྒྱུན་ཞིག་གཞག་དགོས། སྔོན་མས་ཇི་ལྟར་བྱས་པའི་རྗེས་སུ་རྗེས་མ་དག་འཇུག་པ་ཡིན་པས་འདི་མི་རབས་རྗེས་མའི་མིག་ལྟོས་ལ་བཟང་བ་ཡིན། འདུལ་བ་དང་མཐུན་པའི་སྦྱངས་ཡོན་ལ་གནས་པ། སྔར་བཀའ་གདམས་ཀྱི་དགེ་བའི་བཤེས་གཉེན་རྣམ་པ་ལྟ་བུ་མིན་ཡང་ང་ཚོའི་ཆོས་བརྒྱུད་འདི་དང་། ས་ཆ་འདིའི་སྔོན་རབས་པ་ལ་ཕྱིར་བལྟས་ཤིག་བྱས་ན་རྫོགས་ཆེན་ཚང་གི་མཁན་རབས་བཞི་བཅུ་ལྷག་བྱོན་པ་ཚང་མ་བྱ་བྲལ་སྦས་པའི་རྣལ་འབྱོར་འདོད་ཆུང་ཆོག་ཤེས་ཅན་ཤ་སྟག་ལས་མེད། ཚུལ་ཁྲིམས་འཆལ་བའི་གང་ཟག་གཅིག་གསེར་ཁྲིའི་སྟེང་དུ་འདུག་མ་དགོས་ལུང་བའི་ནང་དུའང་འདུག་མི་ཆོག་པའི་ཕྱག་སྲོལ་ཡོད་པས། བཟང་པོའི་ཕྱག་བཞེས་དེ་དག་མི་ཉམས་པའི་རྒྱུན་འཛིན་པ་གལ་ཆེ་བ་ཡིན། དེས་ན་བོད་པའི་ས་ཆ་ནས་བསོད་སྙོམས་ལ་ཕེབས་པའི་ཉིན་རེའི་གུང་ཚིགས་ཚེ་གཅིག་ལ་ཡོན་བདག་གིས་འབུལ་བ་མ་དར་ན་ཡང་། རས་གཟན་རས་ཤམ་རེ་དང་དབྱར་འགག་དགུན་འགག་རེ་སོགས་མི་འཁྱག་མི་ལྟོགས་པའི་གནས་མལ་འཚོ་ཆས་དང་། དགོས་མཁོའི་གློག་ཆས་རེ་མེད་པའི་ཐབས་མེད་དུས་རབས་དང་བསྟུན་པའི་དགོས་མཁོ་རེད། དེའི་སྟེང་དུ་ཉེར་སྤྱོད་ཕྲན་ཚེགས་དང་འགྲོ་གྲོན་གཏོང་བྱེད་དུ་སྒོར་བརྒྱ་སྟོང་ཙམ་ལས་འདོད་པ་ཆེ་ཆེ་ན་བན་རྒན་འགྲོ་བའི་ནངས་མོར་ཤུལ་མི་གཙང་བྱེད་ཡིན་པས། གྲྭ་པ་བླ་མ་སྒེར་ལ་གསོག་ཉར་བྱེད་རྒྱུར་ཉུང་ན་མཛེས་པ་ཡིན། འོ་ན་ཁྱོད་རང་གི་ཐད་ནས་ཅི་འདྲ་ཞིག་ཡིན་ཞེ་ན། ང་ནི་ཆུང་ནས་ད་ལྟའི་བར་དུ་བྱ་བཏང་ཆོས་བྱེད་པ་དཀྱུས་མ་ཞིག་བྱེད་རྒྱུ་ལ་སྨོན་མཁན་ཞིག་ཡིན་ཡང་། དོན་དུ་ངས་སྔོན་མར་གསེར་རྟའི་མཁན་ཆེན་ཆོས་ཁྱབ་ཚང་ལ་ང་ནི་ཆོས་བརྒྱད་ཀྱི་དོན་གཉེར་མཁན་རྟ་ཐོག་གི་བླ་མས་བསྟན་པ་མི་ཤེས་པ་ཞིག་ཡིན་ཞེས་ཞུས་པ་ལྟར་དུ་ཡིན། འོན་ཀྱང་དུས་དང་བསྟུན་པའི་ལས་སྐལ་བསྟན་རྒྱུན་སྲོག་གིས་བསྲུངས་ནས་ལྷག་བསམ་གང་འཚམས་ཀྱི་བྱ་བ་རང་ཚོད་དང་མཐུན་པ་རེ་འགྲུབ་ནས། དེ་རིང་ཁ་རྩང་གནས་དབེན་པའི་རི་ཁྲོད་འདིར་གྲོགས་བྱ་དང་རི་དྭགས་བྱས་ནས་འཇིག་རྟེན་ཆོས་བརྒྱད་ཀྱི་བྱ་བ་ལ་ཕྱི་ཕྱག་འཚལ་བའི་འདུན་པ་དང་སྨོན་པ་བསྐྱེད་པ་ཞིག་ཡིན། རྫོགས་ཆེན་པདྨ་ཐང་འདིར་རྟེན་གཞིའི་བཞེངས་པ་རྒྱ་ཆེ་བ་རེད། དེ་དང་བསྟུན་པའི་རྟེན་རྫས་ཁྱད་པར་ཅན་ཀློང་ཆེན་སྙིང་ཐིག་གི་བསྟན་པའི་མངའ་བདག་ཀུན་མཁྱེན་འཇིགས་གླིང་གི་སྐུ་ཆས་ཀྱིས་གཙོ་བོར་བྱས་པའི། འཛམ་གླིང་གཡས་སྐོར་གཡོན་སྐོར་དུ་མར་བྱས་ཀྱང་རྙེད་དུ་མེད་པའི་རྟེན་བྱིན་ལྡན་བཞུགས་པ་འདི་དག་ཐམས་ཅད་དུས་ཕྱི་རབས་ཀྱི་སེམས་ཅན་གྱི་བསོད་ནམས་བསག་ཡུལ་དང་སྨོན་ལམ་རྒྱག་པའི་བགོ་སྐལ་དུ་བཞག་སྟེ། ང་རང་ཉིད་པདྨ་ཐང་གཞུང་གི་གཙུག་ལག་ཁང་གི་ཁོར་ཡུག་དང་བཅས་པའི་ཟུར་ཞིག་ལ་ཚེ་གཅིག་གི་ཡུན་ལ་བསམ་པའི་འཇག་མའི་སྤྱིལ་བུ་ཤིང་ཁང་ཆུང་ཆུང་སྤྱོད་ལམ་བཞི་ཤོང་ཞིག་བྱ་དགོས་ཞེས་པ་ལ། འདི་དག་གིས་ལུས་ཁམས་བདེ་སྲུང་གི་ཆེད་དུ་མ་མཐའ་ཡང་ས་རླན་འགོག་པ་དང་རླུང་ཚོགས་པ་དྲོ་བ་ཞིག་དགོས་པས་མ་ཟད་རྩྭ་འགེབ་བརྒྱབ་ན་རླུང་གིས་སྤུར་འགྲོ་བ་ལ་སོགས་པར་བཤད་ནས། ཐོག་ཏུ་རྩྭ་འགེབ་ཀྱི་ཚུལ་དུ་ས་འགེབ་ཤིང་འགེབ་ཨ་རྩེག་ཡང་རྩེག་བྱས་ནས་ལྷ་ཁང་གི་རྒྱབ་ན་ལས་ཡོད་པ་འདི་རེད། ངས་བསམ་པ་བས་བཅུ་ལོག་ཉི་ཤུ་ལོག་གིས་ཇེ་བཟང་དུ་སོང་འདུག ད་གང་ལྟར་ངས་འཇག་མའི་སྤྱིལ་བུའི་བཟོ་དབྱིབས་ཀྱི་རི་མོ་བྲིས་པ་དེ་རྩེ་འབུག་འབུག་ཅན་ཞིག་ཡིན། དེ་ལ་ཕྱིས་སུ་ཕྱོགས་བཞི་ནས་ཀྱང་རྩེ་མོ་རེ་རེ་བབ་ནས་ཡོད་པ་ལ་ངས་མིང་དུ་འདབ་དྲུག་པདྨའི་སྤྱིལ་ཆུང་ཞེས་བཏགས་ཡོད། མཚམས་རེ་སེམས་ཁམས་དྲོས་དུས་སྙན་ངག་གི་ཚིག་རྒྱན་སྦྱར་ནས་འདབ་དྲུག་པདྨའི་སྤྱིལ་ཆུང་ཟུར་བརྒྱད་འོད་གསལ་གྱི་ལྡིང་ཁང་ནས་ཞེས་རྩོམ་ཡིག་འགའ་རེའི་མཇུག་ཏུ་ཡང་འབྲི་བཞིན་ཡོད། དེ་དག་ཅི་ཞིག་གི་དོན་དུ་བཤད་པ་ཡིན་ན་བླ་སྤྲུལ་རྣམ་པས་དགེ་འདུན་འདུས་པ་མང་ཚོགས་ཀྱི་མདུན་སྣེ་འཁྲིད་དགོས་པས་གཙོ་བོའི་སྣེ་ཁྲིད་པ་དེ་ཅི་འདྲ་ཡིན་པ་དེའི་ཤུལ་དུ་གཞན་དག་འགྲོ་བ་ཞིག་ཡིན་པས་བླ་མ་གྲྭ་པས་འདོད་ཆུང་ཆོག་ཤེས་བྱེད་པ་ལས། རྙེད་པ་བཀུར་བསྟིའི་དོན་དུ་སྐུ་ཚེ་སྐྱེལ་མི་ཉན་མ་གཏོགས་སྒྲུབ་པ་ཉམས་ལེན་སོགས་མཛད་པ་རིན་ཐང་ཅན་ལ་གནོད་ཡོང་། དེ་ལས་ཀྱང་རྙེད་བཀུར་གྱི་དོན་དུ་ལོག་འཚོ་ཡི་སྒོ་ནས་གཞན་གྱི་དད་པ་ལྡོག་རྐྱེན་ལ་འགྱུར་ཡོང་དེ་ལྟར་སོང་ན་ཅི་ལ་རུང་། ང་སྔོན་མ་གཞུང་དོན་ལ་འགྲོ་སྐབས་ལྷའི་བཀའ་ཆད་དམ་འདྲེ་ཡི་བར་ཆད་གང་ཡིན་མ་ཤེས་པར་ཤི་ལ་ཐུག་པའི་རྨས་སྐྱོན་ཆེན་པོ་ཕོག་ནས་དེང་སང་དབང་པོ་སྐྱོན་ཅན་གྱི་མི་ཞིག་ལ་ལོག་ནས་ཡོད་པ་འདི་རེད། དེ་དུས་རླངས་འཁོར་དེ་བས་ཅུང་བཟང་ཞིག་ཡོད་ན་དེ་འདྲ་ཡོང་བ་མིན། དེའི་དུས་སུ་སྤྱིར་ཡུལ་ལུང་རྟེན་ཡུལ་གྱི་རྒྱལ་ཁབ་དང་བཅས་པ་འབྱོར་འཁོས་ཞན་པས་ཡིན། ལོ་ཉུང་དག་ཁྱེད་ཚོ་རབ་ཡིན་ན་བསྡད་ནས་བསྟན་པ་འཛིན་ཏེ། རང་དོན་དུ་ཐོས་བསམ་སྒོམ་གསུམ། གཞན་དོན་དུ་འཆད་རྩོད་རྩོམ་གསུམ། གཉིས་དོན་དུ་མཁས་བཙུན་བཟང་གསུམ་གྱི་ཡོན་ཏན་ལྡན་པའི་དམ་པའི་ཚུལ་དགུའི་བདག་ཉིད་ཅན། གང་ན་བྱེ་བྲག་གསེར་གྱི་འཁོར་ལོ་ཡིས། །ཕྲིན་ལས་རྩིབས་སྟོང་གཡོ་བའི་འདུན་སྟེགས་དང་། །བཀའ་བབ་ཐེག་པའི་རྒྱལ་སྲིད་བདུན་ལྡན་གྱིས། །མི་གཏང་གང་ཁྱེད་ཡང་དག་འཁོར་ལོས་སྒྱུར། །ཞེས་པ་ལྟ་བུར་བྱས་ནས་འདུག་དགོས་པ་ཡིན། འོན་ཀྱང་སྐབས་ཤིག་ལ་བྱ་བ་སྣ་ཚོགས་ཀྱི་དགོས་དབང་གིས་ད་དུང་དུས་ལ་མ་བབས་པའམ་ནུས་པས་མ་འདང་བའི་སྐབས་སུ་བསྟན་དོན་ལ་ཡར་མར་འགྲོ་དགོས་ཚེ། ངའི་སྟངས་ཀ་བྱས་ནས་དོན་ཆུང་ཞིག་གི་ཆེད་དུ་རང་སྲོག་ཕར་འཕེན་མ་བྱེད། སྐུ་སྲོག་བདེ་འཇགས་ཀྱི་དོན་དུ་རླངས་འཁོར་སྲ་བ་རེ་དང་ཁ་ལོ་པ་བཟང་པོ་རེ་ཡོད་པར་གྱིས། དེ་ཡང་ཞེན་ཆགས་མེད་ན་འབུམ་རི་བའི་ཉེར་སྤྱད་འཚག་ཆོག་པ་རེད། ལྕགས་སྣ་ཁ་ཤས་ལ་ཞེན་ཆགས་ཅི་ཞིག་ཡོད། དེང་སང་རྐུན་མ་གཉིས་གསུམ་རེ་འཛིན་མཁན་དང་། ཆ་རྒྱག་གི་གོ་གཅོད་པའི་ལས་ཁུངས་ཀྱི་མི་སྣ་ཚོ་ཡང་རླངས་འཁོར་ལེགས་པོ་རེའི་ནང་ནས་འགྲོ་བཞིན་ཡོད་ན། སྡེ་སྣོད་འཛིན་པའི་བླ་སྤྲུལ་ལུང་དང་རྟོགས་པའི་ཡོན་ཏན་གྱིས་བརྒྱན་པ་ཤ་སྟག་གསེར་གྱི་རླངས་འཁོར་གྱིས་མི་ཚད་རྡོ་རྗེ་ཕ་ལམ་གྱི་འགྱོགས་བྱམས་ནང་དུ་བཞུགས་ན་ཡང་འོས་པ་ཞིག་ཡིན། ཨ་ལ་དེ་ཚོ་རྩེ་མཚར་ཡིན། སྡེ་སྣོད་འཛིན་པ་སངས་རྒྱས་ཀྱི་རྗེས་འཇུག་བསྟན་འཛིན་གྱི་སྐྱེས་བུ་ཟེར་དུས། ནང་གི་སེམས་རྒྱུད་གཙང་མ། ཕྱིའི་ཀུན་སྤྱོད་གཙང་མ། གསང་བའི་ལྟ་གྲུབ་གཙང་མ། ཉམས་ལེན་གྱི་གནད་གཙང་མ། ཐ་ན་སྲུང་མ་བསྟེན་ཕྱོགས་ཚུན་ཆད་གཙང་ཕྱེད་དེ་ཡོད་པ་རང་གི་ཆོས་རྒྱུད་ལ་སེལ་མ་ཞུགས་པ་ཕྱི་རབས་བསྟན་པའི་མིག་རྒྱན་མཛད་པ་གལ་ཆེ་བ་ནི་རང་གར་ཞོར་དུ་ཞུས་པ་ཡིན་ནོ། །དེ་ནས་བག་མེད་ཐོ་ཅོའི་སྨྱོན་སྤྱོད་དོན་མེད་ལུང་པ་འུར་གྱིས་བཀང་ནས། བརྟུལ་ཞུགས་ཀྱི་སྤྱོད་པ་མིན་ནའང་ཡིན་མདོག་སྟོན་ཁུལ་བྱེད་པའི་ཤུགས་མ་དྲགས་ཤིག གཞན་ལ་ཁྱད་དུ་བསད་ནས་མཐོ་དོགས་ཀྱིས་བརྙས་བཅོས་མ་བྱེད་ཅིག ལྟོ་རྒྱབ་གཉིས་ཀྱི་ཟ་རྒྱུ་གོན་རྒྱུ་ཞིག་གི་ཆེད་དུ་དམ་པའི་ཆོས་མི་འདོར་བ་སྟེ། འདི་ནི་ལྟོ་ཕོགས་རེ་ལ་བལྟས་ནས་ཆོས་སྤོང་གི་ལས་གསོག་མཁན་ཡོད་པ་དེ་འདྲ་ལ་གོ་ཆོག་པ་དང་། སྒོར་རྡོག་ཨེ་ལོན་གྱི་དོན་དུ་ཟབ་ཆོས་སྣོད་མིན་ལ་མ་འཚོང་ཞེས་པ་ལ་གོ་ན་ཡང་ཆོག་པ་ཡིན། ལྟོ་རྒྱབ་མིན་ཡང་སྙན་གྲགས་དང་མཐོ་འདོད་ཀྱི་ཆེད་དུ་བཙོངས་ན་ཡང་གཅིག་པ་རེད་། ཀུན་སློང་གི་ཁྱད་ཀྱིས་དགེ་སྡིག་གི་ཁྱད་པར་དང་། དགོས་པ་ཆེ་ཆུང་གིས་དགག་པ་ཡིན་མིན་སྤྱིར་ན་ཕྱེ་དགོས་པ་ཡིན། ཡང་སྒོས་སུ་མི་ཕལ་བའི་སྤྱོད་ཡུལ་ལས་འདས་པའི་སངས་རྒྱས་མི་གཟུགས་ལ་བྱོན་པའི་དམ་པའི་བཤེས་གཉེན་དེ་དག་གི་མཛད་པ་སོ་སྐྱེས་ཕལ་བའི་སྤྱོད་ཡུལ་ལས་འདས་པ་རེད། དེ་རྣམ་པའི་སྟངས་ཀ་ཕལ་བས་ག་ལ་ཤེས། སྟངས་མི་ཐོན་པར་སྟག་མཆོངས་ཤུལ་དུ་ཝ་ལུ་མ་མཆོངས་ནས་གད་ལ་ལྷུང་བ་ཡང་ཡོད་པ་རེད། དེ་ཅི་བཤད་པ་ཡིན་ཞེ་ན། སྔགས་ཀྱི་ཟབ་ཆོས་བཀའ་རྒྱ་ཅན་བསམ་གྱིས་མི་ཁྱབ་པའི་དགོངས་སྤྱོད་གབ་སྦས་ཀྱི་གསང་བ་དེ་དག་ཕལ་བའི་བློར་མི་ཤོང་བས་ན་གསང་བ་ཞེས་པ་ཡིན་ཡང་། མ་སྤེལ་ན་ཉམས་དོགས་པའི་སྐད་ཀྱིས་སྤེལ་ཆེ་ནས་ཞིབ་འཇུག་པའི་རྒྱ་སྲང་གི་ཅོག་ཙེའི་ཐོག་ཡན་དུ་ཐོན་ཏེ། དེ་དག་གིས་བསྟན་པ་ལ་ནག་ཐིག་བརྒྱབ་པའི་དཔྱད་རྩོམ་འདྲ་མིན་འབྲི་བཞིན་ཡོད་པ་དང་། ང་ཚོས་རྫོགས་ཆེན་གྱི་ཁྲིད་རེ་འཆད་དུས་སེམས་ཁྲིད་ཞུ་མྱོང་མཁན་ཡིན་ཡང་འབུམ་ལྔ་བསགས་ནས་ཉམས་ལེན་ལོ་གསུམ་ལ་མ་བྱས་ཚེ། ཁྲིད་འཆད་པའི་གྲས་སུ་མི་ཚུད་པས་ཐོན་མ་ཡོང་ཟེར་ནས་ཁ་རིན་རྩིས་པ་ལྟ་བུ་ཡོད་ཀྱང་། མི་རིགས་གཞན་གྱི་ཡིག་རིགས་དག་ལ་མ་དག་པ་རེའི་ཐོག་ནས་འུ་ཚོའི་སྔས་འགོའི་གླེགས་བམ་ཞལ་ཕྱེ་མི་ཕོད་འདུག་པ་དག་གི་ཚིག་རེ་ཟུང་དྲངས་ནས་ཁ་དཀྱུ་རྔོག་རྡེབ་ཚུར་བྱེད་ཡོང་དུས་མཚམས་རེ་ཚིག་ངན་ཡང་སྦྱིན་དགོས་ཐུག་འདུག ངས་དུས་རྒྱུན་ཟེར་བཞིན་པའི་སྐད་གཉིས་དང་སྐད་གསུམ་སྨྲ་བ་ཡིན་ན་ཚུར་སྒྱུར་ཤོག་སྔར་གྱི་ལོ་པཎ་བཀའ་དྲིན་ཅན་དག་གིས་འགྱུར་སྔ་ཕྱི་ཚང་མ་ཚུར་བསྒྱུར་བྱས་པ་ལས་ཕར་བཙོངས་མེད། བོད་དུ་མ་འགྱུར་བའི་བཀའ་དང་བསྟན་བཅོས་ཅི་འདྲའི་ཡོད་འདུག དེ་མིན་ཡང་འཕྲུལ་འཁོར་གྱི་ཤེས་རིག་དང་གློག་འཕྲུལ་གྱི་ལག་ལེན་སྐོར་འདི་དག་སྒྱུར་ཤོག་དང་ས་ཆ་རེ་ལ་སྨན་ཁང་དང་སློབ་གྲྭ་རེ་བན་རྒན་རེའི་ཨེ་ཚུགས་ལྟ་ཁུལ་བྱེད་པ་ལས་དགའ་བ་ཡིན། རང་རིགས་ལ་མཁོ་ཞིང་རན་པ་ཡང་དེ་ཡིན་ཏེ། དེང་སང་བོད་འདི་དཔལ་འབྱོར་རྗེས་ལུས་ཀྱི་གནས་སུ་ལྷུང་རྐྱེན་དེ་བཟོ་འཕྲུལ་རིག་གནས་ཚོང་དོན་གྱི་སྐོར་མ་ཤེས་པས་ཡིན་པ་རེད། གཞན་ཡང་གནམ་རིག་དང་ས་ཁམས་རིག་པ། ཚན་རིག་གི་སྐོར་འདི་དག་ཤེས་ནས་ནང་རིག་པའི་རིག་གཞུང་དང་བསྡུར་ནས་ར་སྦྲག་ན་དེ་དང་འབྲེལ་བའི་ཐོག་གི་བདེན་དོན་དམ་པའི་ཆོས་དང་འབྲེལ་བ་རེ་བཤད་ན་སངས་རྒྱས་ཀྱི་བསྟན་པ་ལ་མ་དད་པ་མང་པོ་དད་པའི་གནས་ལ་བཀོད་པའི་ཕན་པ་ཆེན་པོ་ཡོད་འདུག་སྙམ། དེ་ནས་རྒྱུ་འབྲས་ཟབ་མོའི་རྟེན་འབྲེལ་ཁྱད་དུ་བསད་པ་དགེ་སྡིག་གི་འབྲས་བུ་བདེ་སྡུག་མེད་ཅེས་ཁྱད་དུ་མི་གསོད་པ་སྟེ། དེ་འདྲའི་ཆོས་དྲུག་དང་ལྡན་ན་སྐྱེས་བུ་དམ་པར་འགྱུར་བ་ཡིན་ནོ།།

༨༣ ཆོས་བྱེད་རྣམས་ཀྱི་བྱ་བ་རྣམ་དྲུག་བསྟན་པ།

ཆོས་བྱེད་རྣམས་ཀྱི་བྱ་བ་རྣམ་དྲུག་ནི།།

བླ་མ་ཡི་དམ་མཁའ་འགྲོ་གཙུག་གིས་འཁུར།།

སྒོ་གསུམ་དགེ་བ་བྱང་ཆུབ་ལམ་དུ་བསྒྱུར།།

ངར་འཛིན་བདེན་ཞེན་རྟག་འཛིན་ལིངས་ཀྱིས་བསྐྱུར།།

ཚེ་འདིའི་བློ་སྣ་སྐྱེས་ཚད་འབུར་འཇོམས་གྱིས།།

ཉོན་མོངས་དུག་ལྔ་གཉེན་པོས་ཡུལ་ནས་ཕྱུང༌།།

ཐོས་བསམ་སྒོམ་པའི་ནོར་རྫས་རྒྱུད་ལ་བསྟེན།།

དེ་ཡིས་རང་གཞན་འབྱོར་པ་ཉེ་བར་སྐྱེ།།

ཞེས་གསུངས་པ་སྟེ། ཆོས་བྱེད་རྣམས་ཀྱི་བྱ་བ་རྣམ་དྲུག་ནི། བྱིན་རླབས་ཀྱི་རྩ་བ་བླ་མ། དངོས་གྲུབ་ཀྱི་རྩ་བ་ཡི་དམ། ཕྲིན་ལས་ཀྱི་རྩ་བ་མཁའ་འགྲོ་གསུམ་པོ་གཙུག་གིས་བཀུར་བ་སྟེ། དེ་ཡང་རྒྱ་གར་པས་ཆུའི་བུམ་པ་དང་ཅ་ལག་ཁུར་བ་ལྟར་དུ་དུས་རྒྱུན་དུ་མགོ་ཐོག་ཏུ་འཁུར་དགོས་ཞེས་པའི་དོན་མིན་པར། ཡན་ལག་གི་དྭངས་མ་མགོ་སྤྱི་བོའི་གཙུག་ཏུ་བཞག་པ་སྟེ་གོང་ནའམ་བླ་ན་བཀུར་བའི་དོན་ཡིན། སྒོ་གསུམ་གྱིས་དགེ་བ་བསགས་ཚད་དེ་ཡོངས་སུ་བསྔོ་བས་བྱང་ཆུབ་ཆེན་པོའི་ལམ་དུ་བསྒྱུར་བ་དང་། ངར་འཛིན་དང་བདེན་ཞེན་གྱི་བློ་རྟག་འཛིན་ཐམས་ཅད་ལིངས་ཀྱིས་བསྐྱུར་ནས། ཚེ་འདིའི་བདེ་སྐྱིད་སྙན་གྲགས་ལ་སོགས་པའི་བློ་སྣ་སྐྱེས་ཚད་འབུར་འཇོམས་བྱས་ཏེ་མགོ་འབུར་དུ་མི་འཇུག་པར་བཅོམ་པ་དང་། ཉོན་མོངས་དུག་ལྔ་ལ་རང་རང་གི་གཉེན་པོ་བསྟེན་ནས་ཕྱོགས་དེར་འདུག་དུ་མ་འཇུག་པར་ཡུལ་ནས་འབྱིན་པར་བྱེད་པ་དང་། ཐོས་བསམ་སྒོམ་པ་དེ་བྱང་ཆུབ་སྒྲུབ་པ་ལ་མེད་དུ་མི་རུང་བའི་ནོར་རྫས་ཡིན་པས་རྒྱུད་ལ་བསྟེན་པ་སྟེ། དེ་ལྟར་བྱས་ན་རང་གཞན་འདི་དང་ཕྱི་མའི་གནས་སྐབས་ལ་འབྱོར་ཞིང་བདེ་བ་ཕུན་སུམ་ཚོགས་པ་ཉེ་བར་སྐྱེ་བ་ཡིན་ནོ།།

༨༤ ཉམས་སུ་ལེན་དུས་དགོས་པའི་ཆོས་དྲུག་བསྟན་པ།

ཉམས་སུ་ལེན་དུས་དགོས་པའི་ཆོས་དྲུག་ནི།།

མྱུར་དུ་འཆི་ངེས་ཆོས་མིན་འདོར་དགོས་ཤིང༌།།

བཏང་སྙོམས་འབྱུང་ཉེ་སྙོམ་ལས་མེད་པ་དགོས།།

བརྩོན་འགྲུས་འཆོར་རྐྱེན་གཉེན་པོ་བསྟེན་དགོས་ཤིང༌།།

དད་གུས་ལོག་སླ་གོ་འདྲིས་མ་ཁྱེར་དགོས།།

འཁྲུལ་སྣང་བཅད་དཀའ་བདེན་མེད་ཤེས་དགོས་ཤིང༌།།

ལོག་སྤྱོད་འགོ་སླ་མི་དང་མི་འགྲོགས་དགོས།།

ཞེས་གསུངས་པ་སྟེ། ཉམས་སུ་ལེན་པའི་དུས་སུ་དགོས་པའི་ཆོས་དྲུག་ནི། སྐྱེས་བུའི་ཚེ་ལ་རྟག་པ་ཡོད་པ་མ་ཡིན་པར་མྱུར་དུ་འཆི་ངེས་པས་ཆོས་མིན་གྱི་བྱ་བ་འདོར་དགོས་མ་གཏོགས་ཕྱི་མའི་སྐབས་སུ་རྣམ་སྨིན་ཡིད་དུ་མི་འོང་བ་མྱོང་ངེས་པ་དང་། དགེ་སྡིག་གཉིས་སུ་མི་གཏོགས་པའི་བཏང་སྙོམས་ཡལ་ལེ་ཡོལ་ལེའི་ངང་ནས་མི་ཚེ་ཤོར་བ་ཡིན་པས་སྙོམ་ལས་མེད་པར་བྱེད་དགོས་པ་དང་། བརྩོན་འགྲུས་ལ་ཐང་ལྷོད་ཤོར་ན་དམ་ཆོས་མི་འགྲུབ་པར་དལ་རྟེན་ཆུད་ཟོས་སུ་འགྱུར་ངེས་པས་གཉེན་པོ་བསྟེན་ནས་བརྩོན་འགྲུས་ཆུ་བོའི་རྒྱུན་དང་འདྲ་བར་རྒྱུན་ཆད་མེད་པར་གལ་ཆེ་སྟེ། འཇིག་རྟེན་ཁམས་ཀྱི་མི་རྣམས་ལ་རང་རང་འོས་ཐོབ་ཀྱི་བྱ་བ། ལ་ལས་ཁྱིམ་བཟའ་ཚང་གི་ཁ་གསོ་རྒྱབ་འགེབས་བྱེད་བཞིན་ཡོད་པ་དང་། འགའ་རེས་སྡེ་བའི་སྤྱི་ཆོས་སྒྲུབ་བཞིན་ཡོད་པ་ཡིན། གྲྭ་པ་སེར་མོ་པ་ཞིག་ལ་མཚོན་ན་ཆོས་བསྒྲུབ་དགོས་ཏེ། དམ་པའི་ཆོས་འཛིན་པ་ནི་དེ་ཡི་ལས་འགན་ཡིན་པའི་ཕྱིར། ཆོས་བསྒྲུབས་ནས་ཅི་བྱེད་དགོས་ཟེར་ན། ཆོས་བསྒྲུབས་ནས་རང་གཞན་ཐར་བ་དང་ཐམས་ཅད་མཁྱེན་པར་འགོད་དགོས་པས་འགན་ཆེ་བ་ཡིན། སྡེ་སེམས་ཅན་གྱིས་བློ་གཏད་བཅོལ་ཡོད་པ་ཡིན། མདོ་སྡེ་རྒྱན་ལས། སེམས་ཅན་ཁུར་ཆེན་མགོ་ལ་ཁྱེར་བ་ཡིས། །སེམས་དཔའ་མཆོག་རྣམས་དལ་གྱིས་འགྲོ་མི་མཛེས། །བདག་གཞན་འཆིང་བ་སྣ་ཚོགས་རབ་བཅིངས་པས། །བརྩོན་འགྲུས་བརྒྱ་འགྱུར་དུ་ནི་བྱ་བའི་རིགས། །ཞེས་གསུངས་པས། སྐད་ཅིག་ཙམ་ལ་ཡང་དུས་ཚོད་སྟོང་ཟད་དུ་མི་གཏང་བར་ཉམས་ལེན་ལ་བརྩོན་དགོས་སོ། །དད་གུས་རེས་ཡོད་ལ་རེས་མེད་པ་དེ་ཀུན་རྟོག་སྣ་རེ་སྐྱེ་ཚུལ་གྱིས་ཀྱང་འགྱུར་ནས་ལོག་སླ་བ་ཡིན་པས་ཆོས་དང་བླ་མ་གང་ཡིན་ཡང་གོ་མྱོང་འདྲིས་མྱོང་གི་སླད་ཀྱིས་མ་ཁྱེར་བ་ཞིག་དགོས་པ་དང་། འཁྲུལ་སྣང་ཐོག་མེད་ནས་གོམས་པ་དེ་གཅད་པར་དཀའ་བ་ཡིན་པས་ན་བདེན་མེད་སྒྱུ་མའི་རང་བཞིན་ལ་བློ་སྦྱངས་ནས་ཤེས་པར་བྱ་དགོས་ཤིང༌། ལོག་པའི་སྤྱོད་པ་སྐྱོན་ངན་གྱི་རིགས་དེ་འགོས་ནད་བཞིན་དུ་འགོ་སླ་བས་ཆོས་མཐུན་གྱི་གྲོགས་ཚངས་པ་མཚུངས་པར་སྤྱོད་པ་དག་ལས་གཞན་པའི་མི་དང་མི་འགྲོགས་པར་གཅིག་པུར་སྡོད་དགོས་སོ།།

༨༥ ནང་པའི་ཁོངས་ཆུད་སྐྱབས་འགྲོ་རྣམ་དྲུག་བསྟན་པ།

ནང་པའི་ཁོངས་ཆུད་སྐྱབས་འགྲོ་རྣམ་དྲུག་ནི།།

སངས་རྒྱས་སྐུ་གསུམ་བསྒྲུབ་བྱར་སྐྱབས་འགྲོ་ཞིང༌།།

ཐེག་གསུམ་ཆོས་ལ་ལམ་དུ་སྐྱབས་སུ་འགྲོ།།

ཉན་རང་བྱང་སེམས་གྲོགས་སུ་སྐྱབས་འགྲོ་ཞིང༌།།

མཁས་གྲུབ་བླ་མ་བསྟེན་པར་སྐྱབས་སུ་འགྲོ།།

ཡི་དམ་ལྷ་ཚོགས་དངོས་གྲུབ་སྐྱབས་འགྲོ་ཞིང༌།།

ཡེ་ཤེས་མཁའ་འགྲོ་བྱིན་རླབས་སྐྱབས་འགྲོ་བ།།

འདི་དག་དང་པོར་སྔོན་འགྲོའི་ཆོས་ལ་གཅེས།།

ཞེས་གསུངས་པ་སྟེ། ནང་པའི་ཁོངས་ཆུད་སྐྱབས་འགྲོ་རྣམ་དྲུག་ནི། སྟོན་པ་སངས་རྒྱས་སྐུ་གསུམ་གྱི་བདག་ཉིད་ལ་བསྒྲུབ་པར་བྱ་བའམ་འཐོབ་པར་བྱ་བར་སྐྱབས་སུ་འགྲོ་ཞིང༌། ཐེག་པ་གསུམ་གྱི་ཆོས་ལ་ལམ་དུ་སྐྱབས་སུ་འགྲོ་བ་དང་། ཉན་རང་བྱང་སེམས་ལ་ལམ་གྱི་གྲོགས་སུ་སྐྱབས་སུ་འགྲོ་བ་དང་། མཁས་ཤིང་གྲུབ་བརྙེས་བྱིན་རླབས་ཀྱི་བརྒྱུད་པ་མ་ཆད་པའི་བླ་མ་དེ་དཀོན་མཆོག་ཀུན་འདུས་ཀྱི་ངོ་བོའམ་དཀོན་མཆོག་བཞི་བའི་ཚུལ་དུ་བསྟེན་ནས་སྐྱབས་སུ་འགྲོ་བ་དང་། ཡི་དམ་ལྷ་ཚོགས་རྣམས་དངོས་གྲུབ་འབྱུང་བའི་གནས་སུ་བཟུང་ནས་སྐྱབས་སུ་འགྲོ་བ་དང་། ཡེ་ཤེས་མཁའ་འགྲོ་བྱིན་རླབས་དང་ཕྲིན་ལས་ཀྱི་རྟེན་དུ་སྐྱབས་སུ་འགྲོ་བ་སྟེ། འདི་དག་དང་པོར་ཆོས་སྒོར་ཞུགས་དུས་མེད་ན་ཐབས་མེད་ཡིན་ཏེ། སྐྱབས་གསུམ་མེད་ན་ནང་པའི་གྲལ་དུ་མི་ཚུད་པ་དང་། ནང་པའི་གྲལ་དུ་མ་ཚུད་ན་ངེས་འབྱུང་མེད་ལ། ངེས་འབྱུང་མེད་ན་སོ་ཐར་གྱི་སྡོམ་པ་མི་ཐོབ་པ་དང་། དེ་མེད་ན་བྱང་ཆུབ་ཀྱི་སེམས་སྐྱེ་བ་མིན་ལ། བྱུང་ཆུབ་ཀྱི་སེམས་མེད་ན་བྱང་ཆུབ་སེམས་སྡོམ་མི་ཐོབ་པ་དང་། རྩ་གསུམ་ལ་མ་བརྟེན་ན་སྔགས་ཀྱི་བྱིན་རླབས་དང་དངོས་གྲུབ་ཐོབ་པ་མིན་པ་དེས་ན་དང་པོ་སྔོན་འགྲོའི་ཆོས་ལ་འདི་དག་གཅེས་སོ།།

༨༦ དད་ཅན་རྣམས་ཀྱི་ངོ་ཤེས་རྣམ་དྲུག་བསྟན་པ།

དད་ཅན་རྣམས་ཀྱི་ངོ་ཤེས་རྣམ་དྲུག་ནི།།

འགྲོ་ངོ་ཤེས་པས་རང་དོན་ཆོས་སུ་ཆུག།

འབོར་ངོ་ཤེས་པས་འཁྲུལ་སྣང་ཞེན་ཆགས་སྐྱུངས།།

ཉན་ངོ་ཤེས་པས་བླ་མའི་གདམས་ངག་ཉོན།།

སྤོང་ངོ་ཤེས་པས་སྒོ་གསུམ་སྡིག་པ་སྤོངས།།

སྤྱོད་ངོ་ཤེས་པས་ཟབ་དོན་ཆོས་ལ་སྤྱོད།།

ལྟ་ངོ་ཤེས་པས་སེམས་ཉིད་དོན་ལ་ལྟོས།།

དེ་ལྟར་བྱས་ན་ཡང་དག་དོན་ལ་ཉེ།།

ཞེས་གསུངས་པ་སྟེ། དད་ཅན་རྣམས་ཀྱི་ངོ་ཤེས་རྣམ་དྲུག་ནི། གནད་ཐོག་ཏུ་འགྲོ་ངེས་པ་ཅན་གྱི་རང་དོན་ཡིན་ཤག་ཤག་ནི། དམ་པའི་ཆོས་ཡིན་པས་བློ་སྣ་ཆོས་ཀྱི་ཕྱོགས་སུ་འགྲོ་རུ་འཇུག་པ་དང་། འབོར་དགོས་ངེས་པ་དེ་འཁྲུལ་སྣང་ཡིན་པས་དེའི་ཞེན་ཆགས་སྐྱུང་བའམ་བསྐྱུར་དགོས་ལ། ཉན་ན་དོན་ཡོད་པ་ནི་བླ་མའི་གདམས་ངག་ཡིན་པས་དེ་ཐོས་པར་བྱེད་ཅིང་། སྤངས་ན་དོན་ཡོད་པ་སྒོ་གསུམ་གྱི་སྡིག་པ་ཡིན་པས་དེ་སྤངས་པར་བྱས་ནས། སྤྱོད་ན་དོན་ཡོད་པ་ནི་ཟབ་དོན་ཡིན་པས་ཆོས་ལ་སྤྱོད་དགོས་པ་དང་། ལྟ་ངོ་ཤེས་པས་སེམས་ཉིད་དོན་ལ་ལྟ་བར་བྱེད་པ་སྟེ། དེ་ལྟར་བྱས་ན་ཡང་དག་གི་དོན་ལ་ཉེ་ནས་ཐར་ལམ་རྙེད་པ་ཡིན་ནོ།།

༨༧ སྐལ་བཟང་རྣམས་ཀྱི་གོམས་པའི་ཆོས་དྲུག་བསྟན་པ།

སྐལ་བཟང་རྣམས་ཀྱི་གོམས་པའི་གནད་དྲུག་ནི།།

གནས་ལུགས་བྱར་མེད་ཡིན་གྱིས་སྤྲོས་མེད་གནད།།

སྒོམ་པ་འོད་གསལ་ཡིན་གྱིས་ཡེངས་མེད་གནད།།

སྤྱོད་པ་སྒྱུ་མ་ཡིན་གྱིས་བདེན་མེད་གནད།།

འབྲས་བུ་ལྷུན་གྲུབ་ཡིན་གྱིས་རང་ཆས་གནད།།

རྐྱེན་ངན་རང་གྲོལ་ཡིན་གྱིས་འཛིན་མེད་གནད།།

བདེ་སྡུག་རང་སེམས་ཡིན་གྱིས་རྩལ་སྦྱོང་གནད།།

དེ་དང་ལྡན་ན་མ་བྱས་དོན་ཀུན་འགྲུབ།།

ཅེས་གསུངས་པ་སྟེ། སྐལ་བཟང་རྣམས་ཀྱི་གོམས་པའི་གནད་དྲུག་ནི། གནས་ལུགས་ཁོ་རང་བྱར་མེད་ཡིན་པས་དེ་ལ་བྱ་བ་མེད་པར་བྱེད་པའི་གནད་དེ་གནད་དང་པོ་ཡིན་པ་དང་། སྒོམ་པ་འོད་གསལ་ཡིན་པས་དེ་ལ་བཏང་བཞག་དང་བྲལ་བའི་ཡེངས་བ་མེད་པ་དེ་གནད་གཉིས་པ་ཡིན། སྤྱོད་པ་གང་ཤར་རང་སར་གྲོལ་བ་སྒྱུ་མ་ལྟ་བུ་ཡིན་པས་བདེན་མེད་ཀྱི་རྩལ་སྦྱོང་བའི་གནད་གསུམ་པ་དང་། འབྲས་བུ་གཞན་བྱུང་མ་ཡིན་པ་ལྷུན་གྲུབ་གཞན་ནས་འཚོལ་མི་དགོས་པའི་རང་ཆས་ཀྱི་གནད་དེ་བཞི་བ་དང་། རྐྱེན་ངན་གང་བྱུང་རང་གྲོལ་ཡིན་པས་དེ་ལ་འཛིན་མེད་ཀྱི་གནད་དང་ལྡན་པ་ལྔ་བ་དང་། བདེ་སྡུག་ཐམས་ཅད་རང་སེམས་ཀྱི་འཆར་སྣང་ཡིན་པས་རྩལ་སྦྱོང་གི་གནད་དེ་དྲུག་པོ་འདི་དག་དང་ལྡན་ན་གཞན་ཅི་ཡང་མེད་ཀྱང་ཆོག་པས་མ་བྱས་དོན་ཀུན་འགྲུབ་པ་ཡིན་ནོ། །འདི་དག་ནི་ལམ་གོང་མའི་སྐབས་ཀྱི་ཉམས་མྱོང་ཅི་རིགས་པ་ཡོད་པའི་རྟོགས་པ་མཆོག་ལྡན་གྱི་རིགས་མིན་ན་ལས་དང་པོ་པ་ལ་མཚོན་ན་སྨོན་པའི་ཡུལ་ཡིན་ནོ།།

༨༨ རིགས་པ་དྲུག་གི་རང་ལ་གྲོས་འདེབས་བསྟན་པ།

རིགས་པ་དྲུག་གིས་རང་ལ་གྲོས་འདེབས་ནི།།

ཚེ་ལ་ངེས་མེད་བརྩོན་འགྲུས་བརྩམ་པར་རིགས།།

འཁོར་བའི་སྡུག་བསྔལ་སྐྱོ་བ་སྐྱེ་བར་རིགས།།

འགྲོ་དྲུག་ཚད་མེད་སྙིང་རྗེས་སྐྱོང་བར་རིགས།།

བླ་མའི་མོས་གུས་རྒྱུན་ཆད་མེད་པར་རིགས།།

ཟབ་མོའི་གདམས་ངག་ཉམས་སུ་བླངས་པར་རིགས།།

རང་ངོ་ཤེས་དུས་དབེན་པ་བསྟེན་པར་རིགས།།

རིགས་པའི་རྗེས་འགྲོ་སྐྱེས་བུའི་མཆོག་རབ་ཡིན།།

ཞེས་གསུངས་པ་སྟེ། རིགས་ཤིང་འོས་པའི་ཆོས་དྲུག་གིས་གྲོས་རང་ལ་འདེབས་པ་ནི། ཚེ་ལ་ངེས་པ་མེད་པས་མགྱོགས་པོར་འཆི་བའམ། ནད་དང་ན་ཚ་བྱུང་བའམ། རང་དབང་མེད་པར་གྱུར་པ་སོགས། ཕྱི་དང་ནང་གི་རྐྱེན་གྱིས་མི་ཁོམ་པ་སོགས་ཆོས་སྒྲུབ་པའི་འགལ་རྐྱེན་མང་བས་ཕྱིར་བཤོལ་མི་བྱ་བར་བརྩོན་འགྲུས་བརྩམ་པར་རིགས་པ་དང་། རང་གཞན་གཉིས་ཀས་འཁོར་བའི་སྡུག་བསྔལ་འདི་ལྟར་མྱོང་བཞིན་ཡོད་པས་སྐྱོ་བ་ངེས་པར་དུ་སྐྱེ་བ་རིགས་པ་དང་། སྙིང་རྗེ་མེད་ན་ཐེག་ཆེན་གྱི་ཆོས་སྒྲུབ་ཐབས་མེད་པ་དང་། འགྲོ་དྲུག་སེམས་ཅན་ཐམས་ཅད་ཕ་མ་ཡིན་པས་དེ་དག་ཚད་མེད་སྙིང་རྗེས་སྐྱོང་བར་འོས་ཤིང་རིགས་པ་ཡིན་པ་དང་། ལམ་གྱི་ཡོན་ཏན་ཐམས་ཅད་ཀྱི་རྩ་བ་ཡིན་པས་བླ་མ་ལ་མོས་གུས་རྒྱུན་ཆད་མེད་པ་བྱེད་པ་རིགས་པ་དང་། ཟབ་མོའི་གདམས་ངག་ཐོབ་པར་དཀའ་བ་ཡིན་པས་ད་ལྟ་ཐོབ་པའི་ཚེ་ཉམས་སུ་བླང་བར་འོས་ཤིང་རིགས་པ་དང་། རང་ངོ་ཤེས་ནས་རང་རིག་དོན་གྱི་འོད་གསལ་གྱི་ངོ་འཕྲོད་དུས་བསྒོམ་དགོས་པས་སྒོམ་ཡུལ་དབེན་པ་བསྟེན་པར་རིགས་ཤིང་འོས་པ་ཡིན་པ་སྟེ། དེ་ལྟ་བུའི་རིགས་ཤིང་འཐད་པ་བྱེད་འོས་པའི་དོན་དྲུག་བྱེད་པ་ནི་སྐྱེས་བུའི་མཆོག་ཡིན་པས་མ་ཚད་དེ་ལས་ཀྱང་རབ་ཡིན་ནོ།།

༨༩ ཐེག་པའི་དོན་འདུས་ཤེས་པའི་ཆོས་དྲུག་བསྟན་པ།

ཐེག་པའི་དོན་འདུས་ཤེས་པའི་ཆོས་དྲུག་ནི།།

ཉོན་མོངས་རང་ག་ཐ་མལ་སྐྱོན་ཤེས་དགོས།།

ཉོན་མོངས་སྤོང་བ་ཉན་རང་ལམ་ཤེས་དགོས།།

ཉོན་མོངས་སྦྱོང་བ་རྒྱལ་སྲས་ལམ་ཤེས་དགོས།།

ཉོན་མོངས་བསྒྱུར་བ་གསང་སྔགས་ལམ་ཤེས་དགོས།།

རང་བཞིན་ཡོངས་ཤེས་རང་བྱུང་ཡེ་ཤེས་དགོས།།

བླང་དོར་གྲོལ་བྱ་བཙལ་མེད་ཤེས་པ་དགོས།།

དེ་དག་ལྡན་ན་ཉོན་མོངས་གོས་པ་མེད།།

ཅེས་གསུངས་པ་སྟེ། འདི་དྲུག་ཤེས་ན་ཐེག་པའི་དོན་འདུས་པའི་ཆོས་དྲུག་ནི། ཉོན་མོངས་རང་ག་བ་ཐ་མལ་ནི་སྐྱོན་དང་ལྡན་པ་ཡིན་པས་གནོད་པར་བྱེད་པའི་བདག་ཉིད་ཅན་དུ་ཤེས་པར་བྱ་དགོས་པ་དང་། དེ་བཞིན་དུ་ཉོན་མོངས་པར་གཉེན་པོ་བསྟེན་ནས་སྤོང་བར་བྱེད་པ་ཉན་རང་གི་ལམ་དང་། ཉོན་མོངས་པ་ཐབས་དང་ཤེས་རབ་ཀྱིས་སྦྱོང་བ་རྒྱལ་སྲས་བྱང་སེམས་ཀྱི་ལམ་དང་། ཉོན་མོངས་པ་ཡེ་ཤེས་སུ་བསྒྱུར་བ་གསང་སྔགས་སྤྱིའི་ལམ་དང་། ཉོན་མོངས་པའི་རང་བཞིན་ཡོངས་སུ་ཤེས་ཏེ་རང་བྱུང་གི་ཡེ་ཤེས་ཀྱི་ངང་དུ་གྲོལ་བ་ཐུན་མིན་ཨ་ཏིའི་ལུགས་དང་། ཉོན་མོངས་པ་བླང་དོར་དང་གྲོལ་བྱ་བཙལ་དུ་མེད་པའི་ཆོས་ཉིད་གཅིག་གི་ངང་དུ་ལ་བཟླ་བ་དེ་ཤིན་ཏུ་ཐེག་རྩེ་མན་ངག་སྡེའི་ལུགས་སྟེ་དེ་དག་ཤེས་པར་བྱ་དགོས་ཏེ། ཤེས་ནས་ལྡན་ན་ཉོན་མོངས་པས་གོས་པ་མེད་པའི་ཕྱིར་རོ།།

༩༠ ཆོས་བྱེད་རྣམས་ཀྱི་བློ་སྣ་རྣམ་དྲུག་བསྟན་པ།

ཆོས་བྱེད་རྣམས་ཀྱི་བློ་སྣ་རྣམ་དྲུག་ནི།།

འཁོར་བའི་མཚང་རྟོགས་ངན་པའི་སྐྱོན་འཚོལ་འདྲ།།

དེ་ལས་འབྲོས་བློ་དམག་མི་རུ་ལོག་འདྲ།།

ཕྱིར་མི་བཟློག་བློ་ཝ་མོ་གལ་ཐར་འདྲ།།

འཁོར་བ་སྤང་བློ་རྗེ་ངན་འཁོར་གཡོག་འདྲ།།

འཁྱམས་ཀྱིས་དོགས་བློ་ལམ་ངན་ས་འཚོལ་འདྲ།།

འཁོར་བ་གྲོལ་བློ་ཆབ་རོམ་ཆུར་ཞུ་འདྲ།།

ཞེས་གསུངས་པ་སྟེ། ཆོས་བྱེད་རྣམས་ཀྱི་བློ་སྣ་རྣམ་དྲུག་ནི། ངན་པའི་སྐྱོན་འཚོལ་ཚེ་བརྗོད་ཀྱིས་མི་ལང་བ་ཞིག་ཡོད་པ་དང་འདྲ་བར། འཁོར་བའི་མཚང་ལ་བརྟགས་ནས་བསམ་གྱིས་མི་ཁྱབ་པའི་ཉེས་དམིགས་རྣམས་རྟོགས་པར་བྱེད་པ་དང་། སྐྱོན་ཅན་གྱི་འཁོར་བ་དེའི་ནང་ནས་ཁ་ཕྱིར་བལྟས་མི་བྱེད་པར་འབྲོས་དགོས་སྙམ་པའི་བློ་དེ་དམག་མི་རུ་ལོག་པ་སྟེ་དམག་དཔུང་དམག་གི་རུ་ས་ནས་ཕམ་སྟེ་ཕྱིར་བྲོས་ན་ཅི་ཐར་གང་ཐར་བྱེད་པ་ལས་འདེང་གཞན་པ་མེད་པ་དང་འདྲ་བར་བྱེད་པ་དང་། འཁོར་བ་ལ་ཕྱིར་བལྟས་མི་ཤོར་བ་ཝ་མོ་གལ་ལམ་རྙི་ལས་ཐར་དུས་ཕྱིས་སུ་རྙི་ལ་མི་འཛུལ་བ་དང་འདྲ་བར་བྱེད་པ་དང་། རྗེ་ངན་པའི་དམངས་སུ་འདུག་པ་དང་གཅིག རྫ་རི་གཟར་གྱི་རྦབ་འོག་ཏུ་འདུག་པ་དང་གཉིས། ཁྱིམ་བཟའ་བ་ངན་པའི་དབང་འོག་ཏུ་འདུག་པ་དང་གསུམ་ནི། མི་སྐྱིད་སྡུག་གི་གཞི་མ་རྣམ་གསུམ་ཡིན་པས་འཁོར་བ་སྤང་བ་ལ་བྲེལ་ལང་བ་རྗེ་ངན་གྱི་འཁོར་གཡོག་དང་འདྲ་བར་ལྟ་བ་དང་། ལམ་ནོར་ནས་ཕྱིར་འཁོར་བའི་གནས་སུ་འཁྱམ་གྱིས་དོགས་པའི་བློ་ནི་ལམ་ངན་འགྲོ་མི་བདེ་ས་ནས། གང་ནས་སོང་ན་ཁད་བདེ་བར་ལྟ་ཞིང་འཚོལ་བ་དང་འདྲ་བར་བྱེད་པ་དང་། འཁོར་བ་གྲོལ་བློ་སྟེ་རྣམ་པར་གྲོལ་བ་ནི་ཆབ་རོམ་ཆུར་ཞུ་འདྲ་བའི་བློ་དང་འདྲ་བའམ། ཡང་ན་ཆབ་རོམ་ཆུ་ལ་བཞུ་བའི་དོན་གཉེར་ལྟར་དུ་རྣམ་རྟོག་ཡེ་ཤེས་སུ་གྲོལ་བས་འཁོར་བ་སྤངས་ནས་ཐར་བ་ཐོབ་པ་ལ་དོན་གཉེར་གྱི་བློ་ཡོད་པ་སྟེ། དེ་དག་ནི་ཆོས་བྱེད་རྣམས་ཀྱི་བློ་སྣ་རྣམ་དྲུག་ཡིན་ནོ།།

༩༡ རྒྱུད་ལ་ཆོས་སྦྱོར་བློ་སྣ་རྣམ་དྲུག་བསྟན་པ།

རྒྱུད་ལ་ཆོས་སྦྱོར་བློ་སྣ་རྣམ་དྲུག་ནི།།

འཛིན་བློ་སྦྲང་མ་སྦྲང་རྩིར་འབྱར་བ་འདྲ།།

བསམ་བློ་ས་རྡོའི་ནང་ནས་གསེར་འཚོལ་འདྲ།།

རྟོགས་བློ་གསེར་སྦྲམ་ལག་ཏུ་ཐོབ་པ་འདྲ།།

འདྲིས་པར་བསྒོམ་བློ་ཕྱི་དོར་བྱེད་འདྲ་དང༌།།

ཡོན་ཏན་འཕེལ་བློ་དེ་ལ་རྒྱན་དུ་བྱེད།།

མངོན་དུ་གྱུར་བློ་འདོད་དགུ་འབྱུང་འདྲའོ།།

ཞེས་གསུངས་པ་སྟེ། རང་རྒྱུད་ལ་ཆོས་སྦྱོར་བའི་བློ་སྣ་རྣམ་པ་དྲུག་ནི། རང་རྒྱུད་ལ་ཆོས་སྦྱར་ནས་འཛིན་པའི་བློ་ནི་སྦྲང་མ་སྦྲང་རྩིར་འབྱར་བ་དང་འདྲ་བར་འགོག་ཏུ་མེད་པ་དང་། ནན་ཏན་ཆོས་ལ་བསམ་པའི་བློ་ནི་ས་རྡོའི་ནང་ནས་གསེར་འཚོལ་བ་དང་འདྲ་བར་དོན་གཉེར་བརྩོན་པ་ཞིབ་ཚགས་ཅན་དང་། རྟོགས་པའི་བློ་དེ་གསེར་གྱི་མཆོག་ས་ལེ་སྦྲམ་ལག་ཏུ་ཐོབ་ནས་འཚེངས་པ་དང་འདྲ་བ་དང་། ཆོས་རང་རྒྱུད་ལ་འདྲིས་པ་ནི་གསེར་སྦྲམ་རྙེད་ནས་དེ་ལ་བྱི་དོར་བྱེད་པ་དང་འདྲ་བ་དང་། ཡོན་ཏན་འཕེལ་བློ་ནི་གསེར་དེ་ལ་རྒྱན་བྱས་ན་མཛེས་པ་དང་འདྲ་བར་ཡོན་ཏན་ཡར་འཕེལ་བ་དང་། འབྲས་བུ་མངོན་དུ་གྱུར་ནས་ཡོན་ཏན་སྣ་ཚོགས་པའི་མཛོད་དང་གཏེར་ལ་མངའ་དབང་འབྱོར་བའི་བློ་ནི་འདོད་དགུ་ཅི་བསམ་འགྲུབ་པ་དང་འདྲ་བ་རྣམས་དགོས་སོ།།

༩༢ ཐེག་ཆེན་ཆོས་ལ་འབྲེལ་བ་དྲུག་ལྡན་བསྟན་པ།

ཐེག་ཆེན་ཆོས་ལ་འབྲེལ་བ་དྲུག་ལྡན་ནི།།

དངོས་འཛིན་འཇིག་ལ་ལྟ་བ་ཉམས་མྱོང་འབྲེལ།།

སྙོམ་ལས་སེལ་ལ་དད་པ་བརྩོན་འགྲུས་འབྲེལ།།

ཐེག་དམན་སྐྱོབ་ལ་ཐབས་དང་ཤེས་རབ་འབྲེལ།།

ཁོང་ཁྲོ་འབྱིན་ལ་རང་སྐྱོན་གཞན་བདེན་འབྲེལ།།

འཕགས་ལམ་བགྲོད་ལ་མོས་གུས་སྙིང་རུས་འབྲེལ།།

གོལ་ས་གཅོད་ལ་ཐོས་བསམ་ཉམས་ལེན་འབྲེལ།།

ལེགས་པར་དགོས་ཏེ་ཤིན་ཏུ་དཀོན་པར་སྣང༌།།

ཞེས་གསུངས་པ་སྟེ། ཐེག་ཆེན་ཆོས་ལ་འབྲེལ་བ་དྲུག་ལྡན་ནི། དངོས་འཛིན་གྱི་ཞེན་པ་འཇིག་པར་བྱེད་པ་ལ་ལྟ་བ་ཁ་ལྟ་བཤད་ཤེས་པ་ཙམ་གྱིས་ཕན་མི་ཐོགས་པས་ལྟ་བ་ལག་ལེན་གྱི་ཐོག་ནས་བསྒོམས་པའི་ཉམས་མྱོང་དང་འབྲེལ་དགོས། སྒྲུབ་པ་སྙོམ་ལས་དང་ལེ་ལོའི་དབང་དུ་མི་ཤོར་བའི་ཆེད་དུ་དད་པ་དང་བརྩོན་འགྲུས་གཉིས་འབྲེལ་དགོས། ཐེག་དམན་རང་དོན་ཞི་བ་ཕྱོགས་གཅིག་པའི་མཐའ་ལ་ལྷུང་ན་ཐེག་ཆེན་བྱང་ཆུབ་སེམས་དཔའི་གཡང་ས་ཡིན་པས་དེ་ལས་སྐྱོབ་པར་བྱེད་པ་ལ་ཐབས་སྙིང་རྗེ་ཆེན་པོ་དང་ཤེས་རབ་སྟོང་པ་ཉིད་འབྲེལ་དགོས། ཁོང་ཁྲོ་དྲུངས་ནས་འབྱིན་པ་ལ་རང་ཉིད་ཀྱི་སྐྱོན་གྱི་ཕྱོགས་དང་གཞན་བདེན་པའི་ཕྱོགས་འབྲེལ་ཐུབ་ན་ཁོང་ཁྲོ་ཡོང་དོན་མེད་པས་དེ་ལྟར་བྱེད་དགོས། འཕགས་པའི་ལམ་བགྲོད་པ་ལ་མོས་གུས་ཡོད་དགོས་ཏེ། མོས་གུས་མེད་ན་བྱིན་རླབས་མི་འཇུག་པ་དང་། བྱིན་རླབས་མ་ཞུགས་ན་ས་ལམ་མི་འཕར་བ་ཡིན་པའི་ཕྱིར། མོས་གུས་དེ་ཡང་ཐང་ལྷོད་མེད་པ་དགོས་པས་སྙིང་རུས་འབྲེལ་དགོས། ལམ་མཐོན་པོའི་ཉམས་ལེན་བྱེད་དུས་གོལ་ས་དང་ནོར་ས་མང་བས་དེ་དུས་གོལ་ས་གཅོད་ནས་མ་ནོར་མ་འཁྲུལ་བའི་ལམ་ལ་ཞུགས་པ་ལ་བླ་མའི་ཞལ་གྱི་བདུད་རྩི་དང་མདོ་རྒྱུད་མན་ངག་གི་གཞུང་ལ་ཐོས་བསམ་ཉམས་ལེན་བྱེད་པ་དང་འབྲེལ་དགོས་སོ། །འོན་ཀྱང་ལེགས་པར་བྱེད་པ་ནི་ཤིན་ཏུ་དཀོན་པར་སྣང༌ངོ་།།

༩༣ གོང་ན་མེད་པའི་གདམས་པ་རྣམ་དྲུག་བསྟན་པ།

གོང་ན་མེད་པའི་གདམས་པ་རྣམ་དྲུག་ནི།།

གནས་ལུགས་གོ་ན་ཐོས་པ་གོང་ན་མེད།།

རྩ་བ་ཆོད་ན་བསམ་པ་གོང་ན་མེད།།

ཡེ་ཤེས་སྐྱེས་ན་ཐབས་ལམ་གོང་ན་མེད།།

ཆོས་ལ་བཀོལ་བཏུབ་བྱིན་རླབས་གོང་ན་མེད།།

སྐྱེ་ཤི་མེད་རྟོགས་དངོས་གྲུབ་གོང་ན་མེད།།

ཐོབ་རྒྱུ་མེད་རྟོགས་གདེང་ཚད་གོང་ན་མེད།།

དེ་དག་སྦྱོར་ན་སངས་རྒྱས་རང་ལས་འབྱུང༌།།

ཞེས་གསུངས་པ་སྟེ། གོང་ན་མེད་པའི་གདམས་པ་རྣམ་དྲུག་ནི། གནས་ལུགས་གཤིས་ཀྱི་བཞུགས་ཚུལ་གྱི་དོན་གོ་ན་དེའི་ཡན་དུ་ཐོས་པ་ཞེས་པ་ཞིག་མི་དགོས། གནས་ལུགས་མ་བཅོས་པའི་དོན་ལ་རྩ་བརྡར་ཆོད་ན་དེའི་ཡན་ན་བསམ་པ་ཞེས་པ་ཞིག་མེད། ཡེ་ཤེས་འོད་གསལ་བའི་རང་བཞིན་ནང་ནས་ཚུར་སྐྱེས་ན་དེའི་ཡན་དུ་ཐབས་ལམ་ཞེས་པ་ཞིག་མི་དགོས། དེ་ལྟ་བུའི་སྒོ་གསུམ་ཆོས་ཕྱོགས་སུ་བཀོལ་བཏུབ་པ་ཡིན་ན་དེའི་ཡན་གྱི་བླ་མའི་བྱིན་རླབས་ཞེས་པ་ཞིག་ལོགས་ན་མེད། སྐྱེ་ཤིའི་འཇིག་པ་དང་བྲལ་བའམ་ཡང་ན་སྐྱེ་འཆི་དོན་ལ་མེད་པའི་གཉིས་མེད་བློ་འདས་ཀྱི་དོན་རྟོགས་ན་དེའི་ཡན་གྱི་དངོས་གྲུབ་ཅེས་པ་ཞིག་མི་དགོས། འཐོབ་བྱའི་ཞེ་འདོད་མཐའ་དག་དབྱིངས་སུ་ཡལ། །ཞེས་པ་ལྟར་དུ་ཡར་སངས་རྒྱས་ལ་འཐོབ་བྱའི་རེ་བ་མེད་པ་ཞིག་རེད་ཚེ། དེའི་ཕན་གྱི་གདེང་ཚད་ཅེས་པ་ཞིག་མེད་པ་སྟེ། དེ་དག་རྣམས་རང་རྒྱུད་ལ་སྦྱོར་ཐུབ་ན་སངས་རྒྱས་ལོགས་ནས་བཙལ་མི་དགོས་པར་རང་ལས་འབྱུང༌བ་ཡིན་ནོ།།

༩༤ མཐར་ཕྱིན་བསྒྲུབ་ལ་མ་ཤོར་རྣམ་དྲུག་བསྟན་པ།

མཐར་ཕྱིན་བསྒྲུབ་ལ་མ་ཤོར་རྣམ་དྲུག་ནི།།

ཟླར་དགའ་གྲོགས་ཀྱི་དབང་དུ་མ་ཤོར་དང༌།།

ངོར་བསྟོད་ཟས་ཀྱི་དབང་དུ་མ་ཤོར་དང༌།།

འབྲེལ་འདྲིས་རྣམ་གཡེང་དབང་དུ་མ་ཤོར་དང༌།།

བརྩེ་གདུང་གཉེན་གྱི་དབང་དུ་མ་ཤོར་དང༌།།

བཟོ་རིགས་བཤེས་གཉེན་དབང་དུ་མ་ཤོར་དང༌།།

གསོག་བྲུན་ནོར་རྫས་དབང་དུ་མ་ཤོར་ཏེ།།

དེ་ལྟར་དྲུག་ལྡན་ཆོས་ལམ་མཐར་ཕྱིན་འགྱུར།།

ཞེས་གསུངས་པ་སྟེ། སྒྲུབ་པའི་འབྲས་བུ་མཐར་ཕྱིན་པ་ལ་མ་ཤོར་རྣམ་པ་དྲུག་དགོས་པས། དེ་ཡང་ཟླ་བོ་རོགས་པ་དགའ་གྲོགས་ཀྱི་དབང་དུ་མ་ཤོར་བ་དང༌། ཁ་ཡག་ངོ་བསྟོད་དང་རྒྱུ་སྦྱིན་ཟས་སྦྱིན་གྱི་དབང་དུ་མ་ཤོར་བ་དང༌། ཡས་མས་ཚང་མ་དང་འབྲེལ་འདྲིས་བྱེད་ཁུལ་གྱིས་རྣམ་གཡེང་གི་དབང་དུ་མ་ཤོར་བ་དང༌། བརྩེ་གདུང་གཉེན་དང་ཉེ་བའི་དབང་དུ་མ་ཤོར་བ་དང༌། བཟོ་རིགས་ཡིག་རིགས་སློབ་མཁན་གྱི་བཤེས་གཉེན་ཕལ་བའི་དབང་དུའང་མ་ཤོར་བ་དང༌། གསོག་བྲུན་ནོར་རྫས་ཀྱི་དབང་དུ་མ་ཤོར་བ་སྟེ། དེ་ལྟར་མ་ཤོར་དྲུག་པོ་དེ་ལག་བསྟར་ལེགས་པོ་བྱུང་ན་ཆོས་ལམ་མཐར་ཕྱིན་པར་འགྱུར་བ་ཡིན་ནོ།།

༩༥ མི་གཞིའི་སྐྱོན་དྲུག་བརྟགས་ཏེ་འདོར་བ་བསྟན་པ།

མི་གཞིའི་སྐྱོན་དྲུག་བརྟགས་ཏེ་འདོར་བ་ནི།།

རང་འཁྲུག་གཞན་སྨོད་དུག་ལྔ་རགས་པ་དང༌།།

ཅོལ་ཆུང་འདོ་མེད་བློ་སྣ་རགས་པ་དང༌།།

དོན་མེད་བྱ་བྱེད་འབྲེལ་འདྲིས་དགའ་བ་དང༌།།

གྱོང་པོ་ཆིག་ཚུགས་བསྐུལ་ཏུ་མི་བཏུབ་དང༌།།

མཐོ་འགྲོགས་གསར་ངས་ཕྱི་ཤོལ་ཆེ་བ་དང༌།།

ངན་གཡོ་གྱ་གྱུས་ཞེ་བཞག་ཆེ་བ་རྣམས།།

དམ་ཆོས་བསྒྲུབ་ལ་སྐྱོན་ཡོན་བརྟགས་ཏེ་སྤང༌།།

ཞེས་གསུངས་པ་སྟེ། མི་གཞིའི་སྐྱོན་དྲུག་བརྟགས་ཏེ་འདོར་བ་ནི། རང་གི་རྒྱུད་འཁྲུགས་ནས་གཞན་ཐམས་ཅད་ལ་སྨོད་པའི་དུག་ལྔ་རགས་པའི་སྐྱོན་དང༌། ཅོལ་ཆུང་བློ་སྣ་གར་ཁྲིད་དང་དགའ་སྡུག་སླ་བའི་འདོ་མེད་ཀྱི་བློ་སྣ་རགས་པའི་སྐྱོན་དང༌། དོན་མེད་ཀྱི་འབྲེལ་འདྲིས་འགྲུབ་ཏུ་མེད་པའི་བྱ་བྱེད་མང་པོ་ལ་དགའ་བའི་སྐྱོན་དང༌། སྤྱིར་ན་སུ་ལ་ཡང་འཐད་ཅིང་བློ་གདང་བཅོས་དཀའ་བ་ཞིག་དགོས་ཀྱང་། ཧ་ཅང་ཐལ་ཆེ་བ་སྒྱུར་ཏུ་མེད་པའི་གྱོང་པོ་འཆུས་རུ་མ་ལོག་པའི་ལམ་ལས་ཚུར་ལྡོག་པའི་ཕན་སེམས་བྱས་ཀྱང་མི་ཉན་པའི་ཆིག་ཚུགས་བསྐུལ་ཏུ་མི་བཏུབ་པའི་སྐྱོན་དང༌། མཐོ་འགྲོགས་སམ་མཐོ་དགའ་དང་གསར་ངས་ཆེ་ཞིང་སྒྲུབ་པ་ཉམས་ལེན་ལ་ཕྱི་ཤོལ་ཆེ་བའི་སྐྱོན་དང༌། ངན་གཡོ་སྒྱུའི་གྱ་གྱུ་ཆེ་བ་སྟེ། ངས་རྩོམ་ཡིག་ཅིག་གི་ནང་དུ། ཤར་ནུབ་མཐའ་ཡི་རྒྱ་མཚོའི་འགྲམ་ངོགས་ཚུན། །རྫུན་པའི་གཏམ་གྱི་མྱོང་ཚོར་མཐོང་མཐོང་ནས། །རིགས་མཐུན་གྲོགས་དང་འཕྲད་ན་སྤྲོ་བ་འཕེལ། །ཞེས་བྲིས་ཡོད་ཀྱང་། དེང་སང་ནི་རིགས་མཐུན་གྱི་གྲོགས་ལ་ཐུག་ན་ཡང་། འདིས་ཁ་ནས་འདི་ལྟར་སྨྲས་ཀྱང་དོན་ལ་ཅི་ཞིག་དམིགས་ཡོད་ན། ངོས་ནས་དེ་ལྟར་བཤད་ཀྱང་ལྐོག་ནས་ཅི་བྱེད་སུས་ཤེས་བསམ་པའི་ཚོར་བ་སྟེར་བའི་རྒྱུ་རྫུན་མ། ཟས་རྫུན་མ། མི་རྫུན་མས་ས་སྟེང་གང་དུས་ཡིན་པ་རེད། དེ་ཡང་དམ་པའི་སྐྱེས་བུའི་ཐབས་མཁས་ཀྱི་མཛད་པ་དང་མ་རབས་སྐྱེས་བུའི་ངན་སྤྱོད་གཉིས་ནོར་མི་དགོས་ཀྱང་ལྟ་མ་ཤེས་ན། འདྲའོ་འདྲའོ་ནོར་ར་རེ། །ཞེས་པའང་ཡོད་སྲིད་པས། དེ་ལྟ་བུའི་སྐྱོན་དྲུག་བརྟགས་ནས་སྤངས་ཏེ་དེ་ལས་ལྡོག་པའི་ཡོན་ཏན་དྲུག་དང་ལྡན་པར་དགོས་སོ།།

༩༦ ཀུན་སྤྱོད་སྐལ་བ་ངན་པའི་སྐྱོན་དྲུག་བསྟན་པ།

ཀུན་སྤྱོད་སྐལ་བ་ངན་པའི་སྐྱོན་དྲུག་ནི།།

བྱས་པ་མི་གཟོ་དྲིན་ལན་ཉེས་ཀྱིས་འཇལ།།

རང་ལ་མི་འཇལ་གཞན་ལ་ཕོད་ཁམ་ཆེ།།

འགྱུར་ལྡོག་མང་ཞིང་མི་རྟག་ཁམས་འདུས་ཆེ།།

གདོང་ལྕང་ངོར་དགའ་ཁ་ཞེ་གཉིས་པ་ཅན།།

དོན་ལྡན་མི་ཤེས་བློ་མང་གཏམ་ལ་དགའ།།

བྱས་པ་མེད་པར་རེ་བ་ཆེ་བ་རྣམས།།

སྐལ་ངན་དམ་ཆོས་ཕྱོགས་མིན་རིང་དུ་སྤང༌།།

ཞེས་གསུངས་པ་སྟེ། ཀུན་སྤྱོད་སྐལ་བ་ངན་པའི་སྐྱོན་དྲུག་ནི། དྲིན་ཆེན་ལ་དྲིན་ལན་མི་འཇལ་བའི་མི་ཡིས་བཟང་ལན་གྱི་བྱས་པ་མི་གཟོ་ཞིང་དྲིན་ལན་ཉེས་ཀྱིས་འཇལ་བ་རེད། འུ་ཚོ་ཆོས་པ་ཞིག་ལ་མཚོན་ན། གོང་གི་བླ་མའི་བཀའ་དྲིན་ལ་བསམས་ནས་འཇལ་དགོས་པས། རབ་སྒྲུབ་པའི་མཆོད་པ་བྱས་ཏེ་དགོངས་པ་རྫོགས་པར་བྱེད་པ་དང་། འོག་གི་ཕ་མ་སེམས་ཅན་ཞིག་ལ་དྲིན་ལན་གསོབ་ནའང་ཆོས་ཀྱིས་ཕན་འདོགས་པ་ལས་དགའ་མེད་པ་ཡིན། དེ་ལྟར་མིན་པའི་དྲིན་ལན་ངན་འཇལ་བྱེད་པའི་སྐལ་ངན་ཅན་དང་། རང་ལ་ཚད་མི་འཇལ་བར་གཞན་ལ་ཕོད་ཁམ་ཆེ་བ་དང་། དགའ་སྡུག་གི་འགྱུར་ལྡོག་མང་ཞིང་མི་རྟག་ཅིང་གནོད་ཁ་སླ་བ་ཅུང་ཟད་ཙམ་གྱིས་ནག་ལོག་གིས་འགྲོ་བའི་ཁམས་འདུས་ཆེ་བ་དང་། གདོང་ལྕང་ངོ་དགའ་མཁས་ཀྱང་ལྐོག་ལ་མེད་པ་ཁ་དང་ཞེ་གཉིས་མི་མཚུངས་པའི་ངོ་གཉིས་མ་དང་། དོན་ཆེན་པོའི་གནད་མི་ཤེས་པར་ཡས་དྲན་མས་དྲན་གྱི་བློ་མང་ཞིང་། ཁ་མང་གཏམ་ལ་དགའ་བ་བཤད་ཚོད་ཡོད་ཀྱང་ཉན་ཚོད་མེད་པ་དང་། ཕར་ཕན་པར་བྱས་པ་མེད་པར་ཚུར་རེ་བ་ཆེན་པོ་བྱེད་ཅིང་མ་མགུ་ཚེ་འཁང་ར་བྱེད་པ་རྣམས་ནི་ཆོས་འཇིག་རྟེན་གང་དུ་བསྐོར་ཀྱང་གཤིས་ཀ་ངན་པ་སྐལ་ངན་གྱི་རིགས་ཡིན་པས་དམ་ཆོས་བསྟན་ཀྱང་སྒྲུབ་པ་མིན་པས། སེམས་ཅན་ཡིན་པས་ཡུན་གྱིས་བློས་གཏོང་མི་རུང་ཡང་། དུས་ལ་མ་བབས་ན་དེ་འདྲ་བའི་གྲོགས་དང་སློབ་མ་གནས་སྐབས་སུ་སྐྱུར་དགོས་མ་གཏོགས་ཆོས་རང་གིས་མི་འགྲུབ་ཅིང་གཞན་ལ་འགྲུབ་ཁ་མི་འཇུག་པར་ཡོང་བས་རིང་དུ་སྤང༌བར་བྱའོ།།

༩༧ མཐར་ཕྱིན་སྐྱོན་ལས་གྲོལ་བའི་ཆོས་དྲུག་བསྟན་པ།

མཐར་ཕྱིན་སྐྱོན་ལས་གྲོལ་བའི་ཆོས་དྲུག་ནི།།

བློ་བརྟན་རང་རྒྱུད་དགེ་ཞིང་བྱ་བ་ཉུང༌།།

སྙིང་རུས་ཞེ་བཅད་ཆེ་ཞིང་བཟོད་དང་ལྡན།།

གཞན་གྱིས་མི་བརྫི་རྐྱེན་གྱིས་འཕྲོག་པ་མེད།།

ཕྱི་ཐག་རྒྱུན་རིང་དད་གུས་ངོ་ལྐོག་མེད།།

བློ་བཟང་གྲོས་འདུན་ཆེ་ཞིང་ཐབས་ལ་མཁས།།

གཞན་སྐྱོན་མི་བརྗོད་རང་སྐྱོན་མཚང་ནས་འདོན།།

དེ་འདྲའི་སྐྱེས་མཆོག་བྱང་ཆུབ་གཏན་གྱི་གྲོགས།།

ཞེས་གསུངས་པ་སྟེ། མཐར་ཕྱིན་སྐྱོན་ལས་གྲོལ་བའི་ཆོས་དྲུག་ནི། བློ་སྣ་བརྟན་ཅིང་རང་རྒྱུད་དགེ་ལ་བཟང་ཞིང་དོན་མེད་བྲེལ་ཟིང་གི་བྱ་བ་ཉུང༌བ་དང་། སྙིང་རུས་ཆེན་པོས་ཁས་བླངས་ཉམས་སུ་མི་སྟེར་བའི་ཞེ་བཅད་ཆེ་ཞིང་བཟོད་དང་ལྡན་པ་དང་། རྐྱེན་ཕྲན་བུ་རེས་གྱང་སྟེང་གི་རྩྭ་རླུང་ཡར་གཡུགས་ན་ཡར་འགུལ་བ་མར་གཡུགས་ན་མར་འགུལ་བ་དེ་འདྲ་མ་ཡིན་པས་གཞན་གྱིས་མི་བརྫི་ཞིང་རྐྱེན་གྱིས་འཕྲོག་པ་མེད་པ་དང་། འགྲོགས་ན་འགྲོགས་ཡུན་རིང་བའི་ཕྱི་ཐག་རྒྱུན་རིང་ཞིང་ཆོས་དང་བླ་མ་ལ་དད་གུས་བྱས་ན་ངོ་ལྐོག་མེད་པ་དང་། བློ་ཤེས་རྒྱ་ཆེ་ཞིང་གྲོས་གཞི་འདོན་ན་བློ་བཟང་པོ་འདོན་དུ་ཡོད་པའི་ཐབས་ལ་མཁས་པ་ཅན། གཞན་སྐྱོན་འབའ་ཞིག་ཚེ་གང་པོར་བརྗོད་པ་ཅན་མིན་པར་རང་སྐྱོན་མི་གསང་བར་མཚང་ནས་འདོན་ཕོད་པ་དེ་འདྲའི་སྐྱེས་བུ་མཆོག་ནི་གྲོགས་ཚངས་པ་མཚུངས་པར་སྤྱོད་པའི་གྲལ་དུ་ཡོད་ན་བྱང་ཆུབ་ཀྱི་གཏན་གྲོགས་དང་། ཆོས་ཞུ་བའི་སློབ་མའི་གྲལ་དུ་ཡོད་ན་སློབ་མ་བཟང་པོ་ཡིན་ནོ།།

༩༨ ཆོས་བྱེད་རྣམས་ཀྱི་ཕྲག་དོག་སྐྱོན་དྲུག་བསྟན་པ།

ཆོས་བྱེད་རྣམས་ཀྱི་ཕྲག་དོག་སྐྱོན་དྲུག་ནི།།

གཞན་ལས་རྙེད་མང་ལོངས་སྤྱོད་འབྱོར་འདོད་དང༌།།

འཁོར་མང་བུ་སློབ་རྒྱས་པར་འདོད་པ་དང༌།།

བསོད་ནམས་ཅི་ཆེ་འདུ་བ་མང་འདོད་དང༌།།

སྙན་གྲགས་བ་དན་རྒྱལ་ཁམས་ཁྱབ་འདོད་དང༌།།

ཀུན་ལས་རབ་འཕགས་ཆེ་ཁྱད་འདོད་པ་དང༌།།

རང་ལས་གཞན་མིན་གཅིག་ཀྱང་མི་འདོད་པ།།

འདི་དག་འདོད་ལྷའི་མེ་ཏོག་མདའ་ཡིས་བཅོམ།།

ཞེས་གསུངས་པ་སྟེ། ཆོས་བྱེད་རྣམས་ཀྱི་ཕྲག་དོག་སྐྱོན་དྲུག་ནི། གཞན་དག་གི་རྙེད་པ་ལས་ངའི་རྙེད་པ་མང་ནས་ལོངས་སྤྱོད་མང་པོ་འབྱོར་ན་འདོད་པ་དང༌། དེ་བཞིན་དུ་ཁོ་ཡི་འཁོར་ལས་ངའི་འཁོར་གྱིས་མང་ནས་བུ་སློབ་རྒྱས་པར་འདོད་པ་དང༌། བསོད་ནམས་སྙན་གྲགས་ཁ་རྗེ་ཅན་གྱི་ཡོན་བདག་དང་སློབ་མ་ཚང་མ་ང་ལ་འདུས་ན་ཅི་མ་རུང་སྙམ་པ་དང༌། ངའི་སྙན་དང་གྲགས་པའི་བ་དན་གྱིས་རྒྱལ་ཁམས་ཁྱབ་པར་འདོད་པ་དང༌། སུ་དང་མི་འདྲ་བར་ང་ཀུན་ལས་རབ་ཏུ་འཕགས་པར་འདོད་པ་དང༌། རང་ཁོ་ནའི་བདེ་ཐབས་སྐྱིད་ཐབས་ལས་གཞན་གྱི་ཆེད་དུ་རྡུལ་ཙམ་ཡང་སེམས་པ་མིན་པས་མཚན་རྨི་ལམ་ཚུན་དུ་ཡང་རང་ཉིད་ཆེ་ཐབས་ལས་བསམ་རྒྱུ་མེད་ཅིང་། གཞན་གྱི་ཕན་བདེ་གཅིག་ཙམ་ཡང་མི་འདོད་པ། འདི་དག་ནི་འདོད་ལྷའི་བདུད་དགའ་རབ་དབང་ཕྱུག་གི་མདའ་སྙིང་ལ་ཕོག་པའི་རྟགས་ཡིན་ཏེ། འདོད་ལྷ་ལ་དུག་ལྔའི་མདའ་ལྔ་ཡོད་ལ་དེ་ལའང་ནང་གསེས་ལྔ་ལྔ་ཉེར་ལྔའི་འདྲ་མིན་ཡོད་ཅིང་། མདའ་དེ་དག་འཕངས་ཚེ་འདོད་ཆགས་ཅན་ལ་ཕོག་ན་འདོད་ཆགས་འཕེལ་བ་དང་། ཞེ་སྡང་ཅན་ལ་ཕོག་ན་ཞེ་སྡང་འཕེལ་བ་དང་། ཕྲག་དོག་ཅན་ལ་ཕོག་ན་ཕྲག་དོག་སྐྱེ་ཞིང་འཕེལ་བའི་ཕྱིར་རོ།།

༩༩ དེ་ལས་རྟགས་དྲུག་འཆར་བའི་མྱུ་གུ་བསྟན་པ།

དེ་ལས་རྟགས་དྲུག་འཆར་བའི་མྱུ་གུ་ནི།།

བསོད་ནམས་འདུ་འཛི་ཅན་ལ་ཡིད་སྨོན་འདིང༌།།

ཆོས་མཛད་གོང་མ་རྣམས་ལ་ངན་སྐྱོན་བརྗོད།།

གཞན་གྱི་ཕུན་ཚོགས་མཐོང་ལ་ཁོང་ཁྲོ་འཁྲུག།

བྱམས་སེམས་གཞན་དོན་ཅན་ལ་ཟུར་ཟ་གཏོང༌།།

སྒོམ་སྒྲུབ་དངོས་གྲུབ་ཅན་ལ་གཤེ་སྐུར་འདེབས།།

མ་རིག་ལོག་པར་ལྟ་བའི་ཁ་འཛིན་བྱེད།།

ཅེས་གསུངས་པ་སྟེ། འདོད་ལྷའི་མདའ་ལྔ་དང་ཁྱད་པར་དུ་ཕྲག་དོག་གི་མདས་སྙིང་རྨས་ནས་ཡོད་ཚེ་དེའི་ན་ཚའི་ཟུག་རྔུ་མི་བཟོད་པའི་རྟགས་ཅི་ཞིག་འབྱུང་བ་ཡིན་ཞེ་ན། བསོད་ནམས་སྔར་བསགས་ཀྱི་འབྲས་བུ་ལོངས་སྤྱོད་ཀྱི་འབྱོར་བ་ཡོད་པ་དང་། འདུ་འཛི་རྣམ་གཡེང་གི་རྩེད་འཇོ་ལ་སོགས་པས་དུས་གྲོན་པ་ཅན་ལ་ཡིད་སྨོན་བྱེད་ཅིང་དེ་ལ་འདང་བའམ་སེམས་ཤོར་བ་དང་། ཆོས་མཛད་གོང་མ་དམ་པའི་སྐྱེས་བུ་རྣམས་ལ་ངན་སྐྱོན་ཞིག་འདོགས་རྒྱུ་ཨེ་ལོན་མི་ལོན་ལྟ་བ་དང་། གཞན་གྱི་ཕུན་ཚོགས་མི་ཞིག་ལམ་འགྲོ་ཅུང་ཟད་བྱུང་བ་ཙམ་ལ་ཡང་ཁོང་ཁྲོ་འཁྲུག་པ་དང་། སྐྱེས་བུ་དམ་པ་བྱམས་སྙིང་རྗེ་ཅན་གྱིས་གཞན་དོན་སྒྲུབ་པ་ཅན་ལ་ཟུར་ཟ་དང་སྙིང་ཁྲེལ་གཏོང༌བ་དང་། སྒོམ་སྒྲུབ་ཉམས་ལེན་ཅན་ལ་གཤེ་ཞིང་སྐུར་བ་འདེབས་པ་དང་། མ་རིག་ལོག་པར་ལྟ་བས་བློ་སྒྲིབ་པའི་ཐ་ཆད་རྣམས་ཀྱི་ཁ་འཛིན་དང་རོགས་བྱེད་པ་ཅན་ཡིན་ནོ། །འདི་ཡས་མས་ཀྱི་མན་ངག་དྲུག་ཚན་རྣམས་སྦྲེལ་ནས་གསུངས་པ་ཡིན།

༡༠༠ དེ་འདྲའི་སྐལ་ངན་བསྟེན་པའི་སྐྱོན་དྲུག་བསྟན་པ།

དེ་འདྲའི་སྐལ་ངན་བསྟེན་པའི་སྐྱོན་དྲུག་ནི།།

མཐོང་བ་ཙམ་གྱིས་ངེས་འབྱུང་དད་པ་འགྲིབ།།

ཐོས་པ་ཙམ་གྱིས་ཐར་པའི་ལམ་དང་རིང༌།།

དྲན་པ་ཙམ་གྱིས་འཁོར་བའི་ས་བོན་འདེབས།།

རེག་པ་ཙམ་གྱིས་བྱིན་རླབས་དངོས་གྲུབ་ཡལ།།

གཏམ་འདྲེས་ཙམ་གྱིས་དག་སྣང་མོས་གུས་འགྲིབ།།

ཆོས་ཀྱིས་འབྲེལ་ཚད་བདུད་ཀྱིས་བྱིན་བརླབས་པ།།

ཤི་བའི་འོག་ཏུ་མནར་མེད་གནས་སུ་འགྲོ།།

དེ་བས་དེ་འདྲའི་སྐལ་ངན་སྤང་བར་གྱིས།།

ཞེས་གསུངས་པ་སྟེ། དེ་འདྲའི་སྐལ་ངན་བསྟེན་པའི་སྐྱོན་དྲུག་ནི། གང་ཟག་ལ་ལ་རྒྱུད་ལ་ཡུན་རིང་བཅར་མི་དགོས་པར་མཐོང་བ་ཙམ་གྱིས་ངེས་འབྱུང་དང་དད་པ་མར་འགྲིབ་པར་བྱེད་པ་དང་། ཐོས་པ་ཙམ་གྱིས་རྒྱུད་ལ་ཉོན་མོངས་སྐྱེས་ནས་ཐར་པའི་ལམ་དང་ཐག་རིང༌བར་བྱེད་པ་དང་། དྲན་པ་ཙམ་གྱིས་ཉོན་མོངས་ཀྱི་དབང་དུ་ཤོར་ནས་འཁོར་བའི་ས་བོན་འདེབས་པ་དང་། དེས་རེག་པ་ཙམ་གྱིས་བྱིན་རླབས་དང་དངོས་གྲུབ་སྔར་ཡོད་མར་ཉམས་པ་དང་ཕྱིས་ཡར་མི་འཕེལ་བའི་རྐྱེན་བྱེད་པ་དང་། གཏམ་འདྲེས་པ་ཙམ་གྱིས་དག་སྣང་དང་མོས་གུས་མར་འགྲིབ་པར་བྱེད་པ་དང་། བཤད་བྱ་ཆོས་ཡིན་ཡང་བཤད་མཁན་གྱི་རྒྱུད་ང་རྒྱལ་ཕྲག་དོག་གི་དབང་གིས་ཆོས་ཀྱི་ཕག་ནས་ལོག་ལྟ་སྐུར་འདེབས་ཕྱོགས་རིས་ཤ་སྟག་བཤད་པའི་བདུད་ཀྱི་བྱིན་རླབས་དེ། རང་ལ་ཞུགས་ནས་རང་རྒྱུད་མ་རུང་བར་འགྱུར་བར་བྱེད་པ་སྟེ། གང་ཟག་ལ་ལའི་ངོ་ཁར་བཟང་པོ་ལེགས་པོ་གཅིག་ཀྱང་མེད་པ་ནི། རྒྱུད་ཕྲག་དོག་དང་ལོག་ལྟས་བསླད་སོང་བའི་དབང་གིས་ཡིན་པས་དེ་འདྲ་བ་ལ་ཁ་བརྡ་ཡུན་རིང་བྱས་ན་ནམ་ཞིག་རང་ཡང་དེའི་ཁ་ལ་བརྒྱུགས་ནས་དག་སྣང་དང་མོས་གུས་ཅུང་ཟད་རེ་ཡོད་པ་མར་འགྲིབ་པར་འགྱུར་བ་དང་། བཟང་པོ་དག་དང་གཏམ་འདྲེས་ན་དག་སྣང་དང་མོས་གུས་ཡར་འཕེལ་བར་བྱེད་པ་སོགས། མདོར་ན་གྲོགས་བཟང་པོ་དང་འགྲོགས་ན་བཟང་འགོ་བ་དང་། ངན་པ་དང་འདྲིས་ན་ངན་འགོ་བ་ཡིན་པས་དེ་འདྲའི་ངན་པ་དག་དང་འགྲོགས་ན་སྐྱོན་གྱི་ཆ་འགོས་སླ་ཞིང་ཡོན་ཏན་གྱི་ཆ་ལོབས་དཀའ་བ་ཡིན་པས། ཤི་བའི་འོག་ཏུ་མནར་མེད་པའི་གནས་སུ་འགྲོ་བས་དེ་འདྲའི་སྐལ་ངན་སྤོང་བར་གྱིས་ཤིག་ཅེས་པའོ།།

༡༠༡ ངན་པའི་རྟགས་དྲུག་རང་བཞིན་བསྟན་པ།

ངན་པའི་རྟགས་དྲུག་རང་བཞིན་བསྟན་པ་ནི།།

ཆོས་ལ་ལྟ་ཅི་ཐ་མལ་བས་ཀྱང་དམན།།

བསྟན་ཞུགས་ལྟ་ཅི་མ་རབས་བས་ཀྱང་དམན།།

ཐེག་ཆེན་ལྟ་ཅི་མུ་སྟེགས་བྱེད་ལས་དམན།།

གསང་སྔགས་ལྟ་ཅི་ལོག་སྲེད་ཅན་ལས་དམན།།

ཉམས་ལེན་ལྟ་ཅི་སྡིག་ཅན་རྣམས་ལས་དམན།།

ལྟ་སྒོམ་ལྟ་ཅི་ཆོས་དང་གནམ་ས་བཞིན།།

བསྟན་པའི་ཆོམ་རྐུན་ཆོས་ལྟར་བཅོས་པ་སྟེ།།

དད་ལྡན་ལོག་ལམ་ངན་འགྲོར་ཁྲིད་པས་སྤང༌།།

ཞེས་གསུངས་པ་སྟེ། ངན་པའི་རྟགས་དྲུག་གི་རང་བཞིན་བསྟན་པ་ནི། ཆོས་ཀྱི་ཕྱོགས་ནས་ལྟ་ཅི་སྤྱིར་བཏང་གི་མིའི་སྤུས་ཚད་ཀྱི་ཐད་ནས་ཐ་མལ་པ་ཞིག་ལས་ཀྱང་དམན་པའི་སྒོ་གསུམ་མི་དགེ་བའི་ཕྱོགས་ལ་འགྲོ་བ་དང་། བསྟན་པ་ལ་ཞུགས་མཁན་ཞིག་གི་བསམ་སྤྱོད་ལྟ་ཅི་འཇིག་རྟེན་མ་རབས་ལས་ཀྱང་བྱ་སྤྱོད་དམན་པ་དང་། ཐེག་ཆེན་ལྟ་ཅི་མུ་སྟེགས་བྱེད་ལས་དམན་ཏེ། མུ་སྟེགས་བྱེད་ལ་ལས་གཞན་ལ་ཕན་པ་ཙམ་བྱེད་པ་ཡིན་ལ་དེ་ཙམ་ཡང་སྒྲུབ་མི་ཐུབ་པས་མུ་སྟེགས་བྱེད་ལས་ཀྱང་དམན་པ་ཡིན་པ་དང་། གསང་སྔགས་པ་ལྟ་ཅི་ལོག་སྲེད་ཅན་ལས་ཀྱང་དམན་པ་སྤྱོད་པ་འཆོལ་མ་སྤྱད་པས་མ་ཚད། དེ་ཡང་དག་པ་ཡིན་མདོག་བཤད་པ་དང་། ཉམས་ལེན་ལྟ་ཅི་སྡིག་ཅན་ཕལ་བ་རྣམས་ལས་ཀྱང་སྡིག་ལྟ་ཆེ་བ་དང་། ལྟ་སྒོམ་ཡང་དག་པའི་ཕྱོགས་ཙམ་ལའང་མི་ཉེ་བས་ཆོས་དང་གནམ་ས་བཞིན་དུ་ཐག་རིང་བ་དེ་དག་ནི་བསྟན་པའི་ཆོམ་རྐུན་ཕྱི་ཚུལ་གྱིས་ཆོས་པ་ལྟར་དུ་བཅོས་པ་སྟེ། མདོར་ན་དེ་འདྲ་བ་དག་གིས་བླ་མ་ཡིན་པར་བཤད་ན་བླ་རྫུན། སྤྲུལ་སྐུ་ཡིན་པར་སྨྲས་ན་སྤྲུལ་རྫུན། གྲྭ་པ་ཡིན་པར་བརྗོད་ན་གྲྭ་རྫུན་ཡིན་པས། དད་ལྡན་ལོག་ལམ་ངན་འགྲོར་ཁྲིད་པའི་ངན་འགྲོའི་ས་མཁན་ལས་གཞན་དུ་མེད་པས་དེ་ནི་རིང་དུ་སྤང་བར་བྱ་བ་ཡིན་ནོ།།

༡༠༢ ཡ་བྲལ་དྲུག་གིས་མི་འགྲུབ་བསྟན་པ།

ཡ་བྲལ་དྲུག་གིས་མི་འགྲུབ་བསྟན་པ་ནི།།

སེམས་བསྐྱེད་ཡོད་ཀྱང་སྨོན་ལམ་མ་བཏབ་ན།།

གཟུགས་སྐུའི་སྒྲིབ་སྦྱོང་ས་བོན་ཐེབས་མི་འགྱུར།།

སྙིང་རྗེ་ཡོད་ཀྱང་རང་འདོད་མ་ཟད་ན།།

ཐེག་ཆེན་གཞན་དོན་སྤྱོད་པའི་གྲལ་མི་ཚུད།།

མཐུན་འཇུག་བྱས་ཀྱང་དུས་ལ་མ་བབས་ན།།

གཞན་དོན་མི་འགྲུབ་སླར་ལ་འཕྱར་ཀའི་རྒྱུ།།

རི་ཁྲོད་བསྟེན་ཀྱང་བློ་སྣ་མ་ལོག་ན།།

ཆགས་སྡང་མཐུན་འཇུག་འཁྲི་བ་ཆོད་པར་དཀའ།།

དད་གུས་མེད་པའི་གསོལ་བ་སྟོང་བཏབ་ཀྱང༌།།

བྱིན་རླབས་རང་བཞིན་ཆར་ཐིགས་གཅིག་མི་འབབ།།

མཁྱེན་པ་ཆེ་ཡང་སྤྲོས་ལས་མ་གྲོལ་ན།།

འཁོར་འདས་མི་ཕྱེད་གྲུབ་མཐའི་གཟེབ་ཏུ་བཅིངས།།

དེ་ཕྱིར་མན་ངག་ཟུང་དུ་འབྲེལ་བ་གཅེས།།

ཞེས་གསུངས་པ་སྟེ། ཡ་བྲལ་དྲུག་གིས་མི་འགྲུབ་པར་བསྟན་པ་ནི། བསམ་པ་བྱང་ཆུབ་མཆོག་ཏུ་སེམས་བསྐྱེད་པ་ཞིག་ཡོད་ཀྱང་། བདག་ནམ་ཞིག་མངོན་པར་རྫོགས་པར་སངས་རྒྱས་པའི་སྐབས་སུ། གདུལ་བྱའི་ཁམས་ལ་གཟུགས་སྐུ་རྣམ་གཉིས་ཀྱིས་འགྲོ་དོན་བྱེད་ཅིང་ཕན་པ་དང་བདེ་བ་སྒྲུབ་པར་བྱེད་པ། དཔེར་ན་ལྟོགས་པ་རྣམས་ལ་ཟས་དང་། སྐོམ་པ་རྣམས་ལ་ཆུ་ལ་སོགས་པ་གང་འདོད་འབྱུང་བར་ཤོག་ཅེས་པའི་སྨོན་ལམ་རྣམ་པར་དག་པས་མཚམས་མ་སྦྱར་ན། གཟུགས་སྐུ་འཐོབ་པར་བྱེད་པའི་སྒྲིབ་པ་སྦྱོང་མི་ནུས་ཤིང་གཟུགས་སྐུ་ཐོབ་པའི་ས་བོན་ཐེབས་པ་མི་འགྱུར་བ་དང་། སྙིང་རྗེ་ཙམ་ཞིག་ཡོད་ཀྱང་རང་འདོད་ཀྱི་འཁྲི་བ་གཏིང་ནས་ཟད་མེད་ན། ཉན་རང་ལ་སྙིང་རྗེ་ཡོད་ཀྱང་རང་འདོད་མ་སྤངས་བས་ཐེག་ཆེན་གཞན་དོན་སྤྱོད་པའི་གྲས་སུ་མ་ཚུད་པ་ལྟ་བུ་ཡིན་པ་སྟེ། དེ་ཡང་སྙིང་རྗེ་ཡོད་པ་ཙམ་གྱིས་མི་ཆོག་པར་རང་འདོད་བྲལ་བའི་སྙིང་རྗེ་ཡོད་དགོས་ལ། འོན་ཀྱང་ད་ལྟ་སོ་སྐྱེའི་སྐབས་སུ་རང་འདོད་ཀྱི་ས་བོན་ཙམ་ཡང་མེད་པ་ཞིག་དཀའ་ན་ཡང་། སྦྱོར་དངོས་རྗེས་གསུམ་གང་གི་སྐབས་སུ་ཡང་གཞན་དོན་གྱི་སེམས་སླད་མེད་པ་ཞིག་ཡོད་དགོས་པ་ཡིན་པ་ལས། དེ་མེད་ན་ཐེག་ཆེན་གཞན་དོན་སྤྱོད་པའི་གྲལ་དུ་མི་ཚུད་པ་ཡིན། གཞན་དོན་སྒྲུབ་མདོག་གི་མཐུན་འཇུག་བྱས་ཀྱང་དུས་ལ་བབས་མེད་ནས་གཞན་དོན་བྱེད་པའི་ནུས་པ་རང་ལ་མེད་ན། གཞན་དོན་མི་འགྲུབ་པའི་སྟེང་དུ་སླར་ལ་འཕྱར་ཀའི་རྒྱུ་སྟེ་འཕྱ་སྨོད་བྱེད་པའི་གཞི་རུ་འགྱུར་ངེས་པ་དང་། རི་ཁྲོད་དབེན་པའི་གནས་ཤིག་བསྟེན་ཀྱང་འཁོར་བར་མངོན་ཞེན་གྱི་བློ་སྣ་ནང་ནས་ལོག་མ་ཐུབ་ན་རྐྱེན་ཕྱི་ན་མེད་ཀྱང་ནང་བག་ཆགས་ཀྱིས་བསླད་པའི་ཆགས་སྡང་གི་མགོ་མ་ནོན་པས། མཐུན་འཇུག་གི་འཁྲི་བ་ཆོད་པར་དཀའ་བ་ཡིན་པ་དང་། དད་གུས་དང་ལྡན་པས་གསོལ་བ་བཏབ་ན་བྱིན་རླབས་འབྱུང་བ་ཡིན་ཏེ། རྒན་མོས་ཁྱི་སོ་ལ་དད་པ་བཞག་ནས་གསོལ་འདེབས་སྨོན་ལམ་བྱས་ནས་བྱིན་རླབས་ཐོབ་པ་ལྟ་བུ་ཡིན་པ་དང་། དད་གུས་མེད་པར་ཁ་སྟོང་པ་རྐྱང་བ་ཞིག་གིས་གསོལ་བ་སྟོང་བཏབ་ཀྱང་སྤྲིན་མེད་ས་ནས་ཆར་སྒུག་པ་དང་འདྲ་བ་ཡིན་པས་བྱིན་རླབས་ཀྱི་རང་བཞིན་ཆར་ཐིགས་གཅིག་ཀྱང་འབབ་རྒྱུ་མེད་པའོ། །མ་ཀི་ཉན་ཐོས་ཐེག་པ་ནས་ཡ་ཀི་རྫོགས་པ་ཆེན་པོའི་བར་གྱི་ལྟ་སྒོམ་ཁ་ནས་བཤད་ཤེས་པའི་མཁྱེན་པ་ཆེ་ཡང་། སྤྲོས་མེད་ཀྱི་དོན་ཚུལ་བཞིན་རྟོགས་ཏེ་སྤྲོས་ལས་མ་གྲོལ་ན། འཁོར་འདས་འཁྲུལ་གྲོལ་གྱི་དབྱེ་བ་མ་ཕྱེད་ནས་གནས་ལུགས་སྤྲོས་བྲལ་གྱི་དོན་མ་རྟོགས་པ་ནི། བཤད་ཡམ་ཚིག་གི་སྤྲོས་པ་ཅན་གྱི་གྲུབ་མཐའི་གཟེབ་ཀྱི་དྲ་བར་བཅིངས་ནས་གནས་པ་དང་། དེའི་ཕྱིར་ན་སེམས་བསྐྱེད་སྨོན་ལམ་དང་འབྲེལ་བ་དང་། གཞན་དོན་སྙིང་རྗེ་དང་འབྲེལ་བ་དང་། གཞན་དོན་དེ་དུས་བབ་དང་འབྲེལ་བ་དང་། བློ་སྣ་ལོག་ནས་རི་ཁྲོད་བསྟེན་པ་དང་། གསོལ་འདེབས་དད་གུས་དང་འབྲེལ་བ་དང་། མཁས་པ་སྤྲོས་པའི་གཟེབ་ལས་གྲོལ་ཐུབ་དགོས་པ་སྟེ། དེ་དག་ནི་ཟུང་དུ་མ་འབྲེལ་ཐབས་མེད་ཀྱི་མན་ངག་དྲུག་ཡིན་ནོ།།

༡༠༣ ཆོས་བྱེད་རྣམས་ཀྱི་དགོས་པ་རྣམ་དྲུག་བསྟན་པ།

ཆོས་བྱེད་རྣམས་ཀྱི་དགོས་པ་རྣམ་དྲུག་ནི།།

འཁོར་བས་སྐྲག་པས་གཤེད་མས་དེད་འདྲ་དང༌།།

དགེ་སྦྱོར་བརྩོན་པས་སོ་ནམ་བྱེད་འདྲ་དང༌།།

གཉེན་པོར་འགྲོ་བ་ནད་པ་སྨན་བཞིན་དང༌།།

གཞན་ཕན་ལྷུར་ལེན་བུ་ཆུང་སྐྱོང་འདྲ་དང༌།།

རང་རྒྱུད་འདུལ་མཁས་ཀོ་བ་ཉེད་འདྲ་དང༌།།

ངར་འཛིན་དགྲ་གསོད་མི་ཤ་འདོན་འདྲ་སྟེ།།

འདི་རྣམས་དགོས་པ་རྟག་ཏུ་རྒྱུད་ལ་བསྟེན།།

ཞེས་གསུངས་པ་སྟེ། ཆོས་བྱེད་རྣམས་ཀྱི་དགོས་པ་རྣམ་དྲུག་ནི། འཁོར་བས་སྐྲག་པ་ནི་སྲོག་གཅོད་ཀྱི་གཤེད་མ་ཞིག་གིས་རྗེས་ནས་བདས་ན་དེ་རིང་མིན་སང་ཉིན་འབྲོས་དགོས་བསམ་དུ་མེད་པར། གོམ་པ་གང་དང་དབུགས་གཅིག་གི་ཡུན་ལ་སྔ་ཕྱི་ཡོད་པ་དང་འདྲ་བར། འཆི་བདག་དང་ལག་སྔ་ཕྱི་ཚད་ནས་འདུག་ཁོམ་འདུག་བཟོད་གཉིས་ཀ་ཡོད་པ་མིན་པ་དེ་ལྟ་བུ་དང་། དགེ་སྦྱོར་བརྩོན་པས་སོ་ནམ་བྱེད་མཁན་གྱིས་དབྱར་དགུན་སྟོན་དཔྱིད་དུས་ཚོད་དང་འབྲེལ་བའི་ལས་ཀ་གང་གི་ཐོག་ལ་བབ་ཡོད་པ་དེ་བྱེད་དགོས་པ་ལས། ཕྱི་བཤོལ་བྱེད་དུ་མེད་པ་དང་འདྲ་བ་དང༌། གཉེན་པོར་འགྲོ་བ་ནད་པ་ལ་ཕན་ཐོགས་ཤག་ཤག་གི་སྨན་དེ་གང་ཡིན་ན་དེ་ཉིད་དོན་གཉེར་བྱེད་པ་ལས། ཕན་ཐོགས་མེད་ཀྱང་བླ་ཡི་ཁྱོད་ཀྱི་སྨན་འཐུངས་ཤིག་ཅེས་རྗོད་དུ་མེད་པ་བཞིན་དང༌། གཞན་ཕན་ལྷུར་ལེན་བུ་ཆུང་མ་ཡིས་སྐྱོང་དུས་གང་གིས་དགའ་དང་ཅི་ཞིག་ཉམས་སུ་རན་འདུག་བལྟས་ནས་བུ་ཆུང་གི་སྲོག་འཚོ་བ་ལ་རང་གི་སྲོག་གིས་ཕན་ནའང་སྦྱིན་པ་དང་འདྲ་བ་སྟེ། ད་ལྟ་སྲོག་ཙམ་ཞིག་སྟེར་མ་ཐུབ་ཀྱང་སེམས་ཅན་ལ་ཕན་པའི་ལས་གང་ནུས་ཅི་ནུས་སུ་བསྒྲུབ་དགོས་པ་ཡིན། དེ་བྱང་ཆུབ་ཀྱི་སེམས་ཤིག་བསྐྱེད་པའི་དོན་གོ་ཡིན། རང་རྒྱུད་འདུལ་མཁས་ཀོ་བ་མཉེད་མཁན་མཁས་པ་ཞིག་གིས་མཐའ་དཀྱིལ་གང་ནས་གྱོང་ཡོད་པ་དེ་ནས་མཉེ་བ་དང་འདྲ་བར། རང་རྒྱུད་གང་ནས་རེད་མེད་ན་དེ་ནས་བཅོས་པ་དང༌། དགྲ་བོ་དངོས་དེ་ངར་འཛིན་གྱི་དགྲ་ཡིན་པས་དེ་ལ་ཕ་གསོད་ཀྱི་ལག་དམར་དང་ཕ་ཤོར་གྱི་དྭ་ཕྲུག་ཐུག་པ་བཞིན་དུ་དགྲ་ཤ་ལེན་དགོས་པ་སྟེ། འདི་རྣམས་དགོས་པས་རྟག་ཏུ་རྒྱུད་ལ་བསྟེན་པར་བྱའོ།།

༡༠༤ མཐར་ཐུག་དྲུག་གིས་རང་རྒྱུད་གདུལ་བ་བསྟན་པ།

མཐར་ཐུག་དྲུག་གིས་རང་རྒྱུད་གདུལ་བ་ནི།།

བཙོན་བུའི་མཐར་ཐུག་ཡུལ་ལ་ཆགས་ཞེན་སྤངས།།

སོ་ནམ་མཐར་ཐུག་དགེ་ལ་བརྩོན་པ་བསྟེན།།

གཏན་ཡུལ་མཐར་ཐུག་གནས་ལུགས་ས་འཛིན་མཛོད།།

བསྲུང་བའི་མཐར་ཐུག་ངར་འཛིན་གཅེས་འཛིན་བོར།།

དགྲ་ཡི་མཐར་ཐུག་དུག་ལྔ་རང་རྒྱུད་ཐུལ།།

ཉམས་ལེན་མཐར་ཐུག་དྲན་པ་ཡེངས་མེད་སྐྱོངས།།

འདི་དང་ལྡན་ན་དགོས་འདོད་ཡིད་བཞིན་འགྲུབ།།

ཅེས་གསུངས་པ་སྟེ། མཐར་ཐུག་དྲུག་གིས་རང་རྒྱུད་གདུལ་བ་ནི། ཁམས་གསུམ་འཁོར་བའི་སེམས་ཅན་འདི་བཙོན་ཁང་ནང་དུ་ཚུད་པ་ལྟ་བུ་ཡིན་ལ། འདིའི་བཙོན་ཁང་ནང་གི་བཙོན་པ་དེ་མི་ཐར་བའི་རྐྱེན་མཐར་ཐུག་ནི་ཆགས་ཞེན་ཡིན་པས་དེ་སྤོང་བར་བྱེད་པ་དང་། སོ་ནམ་གྱི་བྱ་བ་བསྒྲུབས་ནས་དོན་དུ་གཉེར་བྱ་མཐར་ཐུག་རབ་དེ་གང་ཡིན་ན། དགེ་བའི་ལོ་ཏོག་སྡུད་པར་བརྩོན་ནས་རྒྱུད་ལ་བསྟེན་པར་བྱེད་པ་དེ་ཡིན་པ་དང་། གཏན་གྱི་ཡུལ་ཕ་ཁྱིམ་མཐར་ཐུག་ནི། གནས་ལུགས་ཀྱི་ལྟ་བ་རྟོགས་ནས་སྒོམ་པས་དེ་ལ་གོམས་པའི་ས་འཛིན་པར་བྱེད་པ་ཡིན་པ་དང་། དགྲས་གནོད་པ་བསྲུང་བའམ་ཡང་ན་བདེ་འཚམས་ཀྱི་ཆེད་དུ་བསྲུང་བ་མཐར་ཐུག་དངོས་དེ་གང་ཡིན་ན། བདག་མེད་ལ་བདག་ཏུ་འཛིན་པའི་ངར་འཛིན་དང་། རང་ལ་གཅེས་པར་ཞེན་པའི་གཅེས་འཛིན་བོར་བ་དེ་ཡིན་པ་དང་། དགྲ་ཡི་མཐར་ཐུག་པ་སྟེ་དེ་བས་ཐུ་མེད་པ་ནི་ཉོན་མོངས་དུག་ལྔ་རང་རྒྱུད་ལ་ཁ་ཡན་དུ་འཕྱོ་བ་དེ་ཡིན་པས་དེ་ཐུལ་བར་བྱེད་པ་དང་། ཉམས་ལེན་གྱི་མཐར་ཐུག་སྐྱོང་བ་ནི་ཡེངས་མེད་ཀྱི་དྲན་པ་ཡིན་པས་དེའི་ངང་དེར་སྐྱོང་བ་སྟེ། མཐར་ཐུག་དྲུག་གིས་རང་རྒྱུད་འདུལ་བའི་ཆོས་འདི་དྲུག་དང་ལྡན་ན་ཡིད་ལ་ཅི་བསམ་གྱི་དགོས་འདོད་ཡིད་བཞིན་དུ་འགྲུབ་པ་ཡིན་ནོ།།

༡༠༥ ཆོས་བྱེད་རྣམས་ཀྱི་འཆོར་བའི་ཉེན་དྲུག་བསྟན་པ།

ཆོས་བྱེད་རྣམས་ཀྱི་འཆོར་བའི་ཉེན་དྲུག་ནི།།

དད་པ་ཡོད་ཀྱང་ཁེ་གྲགས་མ་སྤངས་ན།།

མཐར་ཐུག་མི་ཆོས་འཆོར་བའི་ཉེན་ཡོད་གཟབ།།

དགོན་པ་བསྟེན་ཡང་ཞེ་བཅད་མི་ལྡན་ན།།

མཐར་ཐུག་ཡེངས་བར་འཆོར་བའི་ཉེན་ཡོད་གཟབ།།

གྲུབ་རྟགས་ཐོན་ཡང་རློམ་སེམས་མ་སྤངས་ན།།

མཐར་ཐུག་བདུད་ཀྱིས་འཁྱེར་བའི་ཉེན་ཡོད་གཟབ།།

དམ་ཅན་འདུ་ཡང་སྙིང་རྗེ་མི་ལྡན་ན།།

མཐར་ཐུག་ལས་མཐའ་ལོག་པའི་ཉེན་ཡོད་གཟབ།།

དགོངས་པ་མཐོ་ཡང་ཞེན་པ་མ་ལོག་ན།།

མཐར་ཐུག་དྲེད་པོར་འཆོར་བའི་ཉེན་ཡོད་གཟབ།།

འགྲོ་དོན་བརྩོན་ཡང་རང་འདོད་འཁྲིས་ཞུགས་ན།།

མཐར་ཐུག་ཟོག་པོར་སོང་བའི་ཉེན་ཡོད་གཟབ།།

ཅེས་གསུངས་པ་སྟེ། ཆོས་བྱེད་རྣམས་ཀྱི་འཆོར་བའི་ཉེན་དྲུག་ནི། དད་པ་ཡོད་ཀྱང་སྙན་གྲགས་ལ་སོགས་པའི་ཆོས་བརྒྱད་སྤང་མ་ཐུབ་ན་མཐར་ཐུག་མི་ཆོས་ཁ་འཛིན་གྱི་ཕྱོགས་ལ་འཆོར་བའི་ཉེན་ཡོད་པས་གཟབ་དགོས་པ་དང་། དགོན་པའམ་དབེན་པ་བསྟེན་ཁུལ་བྱས་ཀྱང་ཞེ་བཅད་དམ་བཅའ་བརྟན་པོ་དང་མ་ལྡན་ཚེ། མཐར་ཐུག་ཡེངས་བར་འཆོར་ནས་ལུས་རི་ཁྲོད་ན་ཡོད་ཀྱང་སེམས་གཡེང་བའི་རང་བཞིན་ཅན་དུ་གྱུར་པའམ་ཡང་ན་དང་པོར་རི་ཁྲོད་དུ་འགོས་ཁུལ་བྱས་ཀྱང་། རྗེས་སུ་མཐར་མ་ཕྱིན་ནས་ཇེ་དམའ་ཇེ་དམའ་རུ་ཡོང་བའི་ཉེན་ཡོད་པས་གཟབ་པར་བྱ་བ་དང་། གྲུབ་རྟགས་ཆུང་ཆུང་རེ་ཐོན་པའམ་ཡང་ན་ཤེས་ཉམས་དང་རྩ་རླུང་གི་འདུ་བ་དམིགས་བསལ་བ་རེའི་རླུང་ཉམས་ཡོང་ན་དེ་ལ་རློམ་སེམས་སྤོང་དགོས་མ་གཏོགས། མཐར་ཐུག་བར་ཆད་བདུད་ཀྱི་རྟགས་སུ་འགྱུར་ནས་ཉམས་ལེན་གྱིས་ས་མི་ཟིན་པའི་ཉེན་ཡོད་པས་གཟབ་དགོས་པ་དང་། དམ་ཅན་སྲུང་མ་རང་འཁོར་ཡིན་ཡང་སྙིང་རྗེའི་སྒོ་ནས་བསྟན་དགྲ་འདུལ་བ་ལས། རང་འདོད་ཡིད་བྱེད་ཀྱིས་སྙིང་རྗེ་མེད་པའི་ཕྲིན་ལས་བཅོལ་ན། ཆོས་སྐྱོང་བའི་སྲུང་མ་རྣམས་ནི་ཆོས་སྐྱོང་མཁན་ཡིན་པས་ལས་དེ་འདྲ་མི་འགྲུབ་པས་མ་ཚད། མཐར་ཐུག་བྱམས་སྙིང་རྗེ་བྱང་ཆུབ་སེམས་ཀྱི་རྩ་བ་ཆད་ནས་ལས་མཐའ་ལོག་པའི་ཉེན་ཡོད་པས་གཟབ་དགོས་པ་དང་། ལྟ་བ་དང་དགོངས་པ་མཐོ་ཟེར་ཡང་འཁོར་བར་ཞེན་པ་མ་ལོག་ན་མཐར་ཐུག་ཆོས་དྲེད་ཆོས་ཀྱིས་འདུལ་མི་ནུས་པའི་ལོག་ལམ་ལ་འགྲོ་བའི་ཉེན་ཡོད་པས་གཟབ་པར་བྱ་བ་དང་། ལྟར་སྣང་དུ་གཞན་འགྲོ་བའི་དོན་དུ་བརྩོན་ཁུལ་བྱས་ཀྱང་རང་འདོད་ཀྱི་འཁྲིས་ཞུགས་ནས་དེའི་འཁྲི་བ་མ་ཆོད་ན། རྟོག་ངན་དུག་རོ་ཁོང་དུ་ཡོད་ན། །འཆི་ཁ་ཚུན་ཆད་མི་མངོན་མི་སྲིད། །ཅེས་གསུངས་པ་བཞིན་དུ་མཐར་ཐུག་ཟོག་པོ་རྫུན་རྐྱལ་གྱི་གྲལ་དུ་སོང་ནས་བསྟན་དགྲ་རེད་པའི་ཉེན་ཡོད་པས་གཟབ་དགོས་སོ།།

༡༠༦ སྒྲིབ་པ་དྲུག་པོ་སྤོང་བའི་དགོས་པ་བསྟན་པ།

སྒྲིབ་པ་དྲུག་པོ་སྤོང་བའི་དགོས་པ་ནི།།

དམ་ཆོས་མི་འཛིན་སྤངས་པའི་སྒྲིབ་པ་ཡིན།།

བདུད་ལས་གང་ཡིན་མི་ཤེས་སྒྲིབ་པ་ཡིན།།

བླ་མའི་མོས་གུས་མེད་པ་སྒྲིབ་པ་ཡིན།།

མཆེད་གྲོགས་དག་སྣང་མེད་པ་སྒྲིབ་པ་ཡིན།།

ཐེག་མཆོག་ཞུགས་ལ་སྨོད་པ་སྒྲིབ་པ་ཡིན།།

སྒོ་གསུམ་ཉེས་སྤྱོད་གཡོ་སྒྱུ་སྒྲིབ་པ་ཡིན།།

དེ་དག་སྤངས་ནས་ཐར་ལམ་བསྒྲུབ་པ་གཅེས།།

ཞེས་གསུངས་པ་སྟེ། སྒྲིབ་པ་དྲུག་པོ་སྤོང་བའི་དགོས་པ་ནི། དམ་པའི་ཆོས་བསྐལ་བ་སྟོང་དུ་བཙལ་ཀྱང་རྙེད་པར་དཀའ་བ་འདི་ལྟ་བུ་ཐོབ་བཞིན་དུ་དེ་མི་འཛིན་པར་སྤངས་པ་ནི་རྨོངས་པས་བསྒྲིབས་ནས་མ་ཤེས་པའི་སྒྲིབ་པ་དང་། སྤང་བླང་ངོས་མི་འབྱེད་པ་ནི་བདུད་ཀྱི་ལས་གང་ཡིན་མི་ཤེས་པའི་སྒྲིབ་པ་འཐུག་པོ་ཡིན་པ་དང་། རང་ལ་དངོས་གྲུབ་འབྱུང་བའི་སྒོ་བླ་མ་ལ་སངས་རྒྱས་དངོས་མཐོང་གི་དད་པ་དང་མོས་གུས་ཀྱིས་ཕྱེ་མ་ཤེས་ནས་བྱིན་རླབས་ཀྱི་ཕ་ཕོག་འབྱུང་དུ་མེད་པ་ནི་སྒྲིབ་པ་འཐུག་པའི་དབང་གིས་ཡིན་པ་དང་། སྐལ་ལྡན་རྡོ་རྗེའི་མཆེད་ལྕམ་ལ་ལྷ་དང་ལྷ་མོར་ལྟ་བ་ལ་སོགས་པར་མི་ཤེས་པ་ཡང་སྒྲིབ་པའི་གནས་སུ་གྱུར་པ་ཡིན་པ་དང་། ཐེག་པ་མཆོག་གི་བསྟན་པ་ལ་ཞུགས་པ་དེ་སྔར་བསགས་བསོད་ནམས་ཀྱི་ས་བོན་སྔོན་ལ་སོང་བའམ་སྔོན་སྨོན་ལས་འཕྲོ་བཙན་པོ་སྟོབས་སུ་བདོ་བ་ཡིན་པས་ན་དེ་ལ་སྨོད་པར་བྱེད་པ་སོགས་ཀྱང་སྒྲིབ་པ་ཡིན་པ་དང་། སྒོ་ལུས་ངག་ཡིད་གསུམ་གྱི་ཉེས་པར་སྤྱོད་པ་དང་གཡོ་སྒྱུ་བྱེད་པ་དེ་དག་ནི་རང་གི་ཐར་ལམ་འགོག་པའི་སྒྲིབ་པ་འཐུག་པོ་ཡིན་པ་སྟེ། དེ་འདྲའི་སྒྲིབ་པ་འཐུག་པོ་དེ་དག་སྤངས་ནས་ཐར་ལམ་བསྒྲུབ་པ་ཤིན་ཏུ་གཅེས་སོ།།

༡༠༧ སྒྲིབ་བྲལ་རིན་ཐང་མཐའ་ཡས་ཆོས་དྲུག་བསྟན་པ།

སྒྲིབ་བྲལ་རིན་ཐང་མཐའ་ཡས་ཆོས་དྲུག་ནི།།

ལན་ལ་མི་རེ་སྦྱིན་པ་ཕྱོགས་མེད་གཏོང༌།།

སྲིད་པ་མི་གཉེར་ཚུལ་ཁྲིམས་རྣམ་དག་བསྲུང༌།།

སེམས་ཅན་མི་གཏོང་བྱམས་དང་སྙིང་རྗེ་སྐྱེ།།

དམ་ཆོས་ཤེས་པས་ནམ་ཡང་ངོམས་པ་མེད།།

རྙེད་བཀུར་མི་གཉེར་འགྲོ་ལ་ཆོས་རབ་སྟོན།།

ཕྱོགས་རིས་མི་བྱེད་ཀུན་ལ་སེམས་བཟང་སྙོམས།།

རབ་དགེ་འདི་འདྲའི་སྤྱོད་པ་དམ་པ་ལགས།།

ཞེས་གསུངས་པ་སྟེ། སྒྲིབ་བྲལ་རིན་ཐང་མཐའ་ཡས་ཆོས་དྲུག་ནི། ལན་དང་རྣམ་སྨིན་ལ་མི་རེ་བར་སྦྱིན་པ་ཕྱོགས་མེད་དུ་གཏོང༌བ་སྟེ། དེ་ཡང་ཁྱིམ་པ་ཡིན་ན་གཙོ་བོ་ཟང་ཟིང་གི་སྦྱིན་པ་གཏོང་བ་དང་། རབ་ཏུ་བྱུང་བ་ཡིན་ན་ཆོས་ཀྱི་སྦྱིན་པ་གཙོ་བོར་གཏོང་དགོས། མི་འཇིགས་པ་སྐྱབས་ཀྱི་སྦྱིན་པ་ནི་ཁྱིམ་པ་རབ་བྱུང་གཉིས་ཀས་གཏོང་དགོས། སྲིད་པ་མི་གཉེར་བར་སྲིད་ལས་ངེས་པར་འབྱུང་བའི་ཚུལ་ཁྲིམས་རྣམ་དག་བསྲུང༌དགོས་པས་མཐོ་རིས་དོན་གཉེར་བྱེད་པ་ནི་སྲིད་པ་དོན་གཉེར་ཡིན་པས། དེ་ལྟར་མིན་པའི་ཚུལ་ཁྲིམས་རྣམ་པར་དག་པ་བསྲུངས་ནས། སེམས་ཅན་གྱི་རིགས་སུ་གཏོགས་སོ་ཅོག་བློས་མི་གཏོང་བར་བྱམས་དང་སྙིང་རྗེ་བསྐྱེད་པ་དང་། རྒྱ་མཚོ་ཆུ་ཡིས་མི་ངོམས་པ་ལྟར་དུ་ཡོན་ཏན་གྱིས་མི་ངོམས་ཤིང་ཆོས་ཤེས་པ་ལ་ནམ་ཡང་བརྩོན་པ་མི་འདོར་ཞིང་ཆོག་མི་ཤེས་པ་དང་། དམ་པའི་ཆོས་སྟོན་པའི་གནས་སྐབས་སུ་རྙེད་དང་བཀུར་སྟི་ཞིག་ཨེ་ཡོང་བསམས་པའི་ཀུན་སློང་མེད་པར་འགྲོ་བ་ལ་ཆོས་རབ་ཏུ་སྟོན་པར་བྱེད་པ་སྟེ། དེ་ཡང་སེམས་ཅན་ལ་ཕན་འདོགས་འདོད་ཀྱི་བློ་དང་། རྙེད་བཀུར་ལ་མི་ལྟ་བར་འགྲོ་ལ་ཕན་འདོགས་པ་གཉིས་དོན་དུ་གཅིག་པ་དང་། འགྲོ་ལ་ཆོས་སྟོན་པ་དང་བསྟན་པ་འཛིན་སྐྱོང་གཉིས་ཀ་ཡང་དོན་དུ་གཅིག་ཡིན། སེམས་ཅན་གྱི་བདེ་སྐྱིད་ཐམས་ཅད་རྒྱལ་བའི་བསྟན་པ་ལས་འབྱུང་བ་ཡིན་ལ་དེ་ཉིད་འཛིན་པའི་སླད་དུ་འགྲོ་ལ་ཆོས་སྟོན་ན་སྤྱོད་པ་དམ་པ་ཡིན་ནོ། །རྫོགས་ཆེན་ལ་སོགས་པ་ཟབ་ཆོས་ཐུན་མིན་སྟོན་པའི་དུས་བབས་དང་བཀའ་ཁྲོལ་ཡོད་མེད་ནི་མ་གཏོགས་ལ་དེ་ལས་གཞན་ཐེག་པ་ཐུན་མོང་གི་ཆོས་དང་། ལས་རྒྱུ་འབྲས་ཀྱི་ཆོས་སྟོན་པ་ལ་ལྷག་བསམ་ཡོད་ཕྱིན་སྟོན་དགོས་པ་ཡིན། སེམས་ཅན་ལ་ཕན་པའི་བྱ་བ་ཞིག་སྒྲུབ་ན་དེ་ལ་ཁྱད་ཕྱེས་ནས་ཕྱོགས་དང་རིས་སུ་བཅད་པ་མི་བྱེད་པར་ཀུན་ལ་སེམས་ བཟང་པོས་སྙོམས་པར་བྱེད་པ་སྟེ། རབ་ཏུ ་དགེ་ཞིང་ལེགས་པ་འདི་འདྲའི་སྤྱོད་པ་དེ་དག་དམ་པ་ཡིན་ནོ།།

༡༠༨ ཐེག་ཆེན་བསྟན་པའི་ཡོན་ཏན་རྣམ་དྲུག་བསྟན་པ།

ཐེག་ཆེན་བསྟན་པའི་ཡོན་ཏན་རྣམ་དྲུག་ནི།།

བཤེས་གཉེན་བསྟེན་ལ་གཡེལ་བ་མེད་པ་དང༌།།

སེམས་ཅན་དོན་བྱེད་སྐྱོ་དུབ་མེད་པ་དང༌།།

གནས་ལུགས་རྟོགས་ཀྱང་ང་རྒྱལ་མེད་པ་དང༌།།

དོན་དུ་མི་འགྱུར་རྙེད་པ་སྤོང་བ་དང༌།།

ཟབ་མོའི་དོན་ལ་སྐྲག་པ་མེད་པ་དང༌།།

དགེ་ཚོགས་སྒྲུབ་ལ་ཆོག་ཤེས་མེད་པའོ།།

ཞེས་གསུངས་པ་སྟེ། ཐེག་ཆེན་བསྟན་པའི་ཡོན་ཏན་རྣམ་དྲུག་ནི། དགེ་བའི་བཤེས་གཉེན་མེད་ན་ཐར་བའི་ལམ་རྙེད་པ་མིན་པས་དེ་ཉིད་བསྟེན་པ་ལ་དུས་དང་གནས་སྐབས་ལས་གཡེལ་བ་མེད་པ་དང༌། སེམས་ཅན་གཅིག་གི་དོན་ལ་བསྐལ་བ་བརྒྱར་དམྱལ་བར་གནས་དགོས་ཀྱང་ཡི་ཆད་དང་སྐྱོ་དུབ་མེད་པ་སྟེ། དེ་ཡང་ལས་དང་པོ་པས་དེ་འདྲ་དེ་སྨོན་པའི་ཡུལ་དུ་བྱས་ནས་གང་ཐུབ་ཅི་ནུས་ཀྱིས་སེམས་ཅན་གྱི་དོན་བྱེད་དགོས་པ་ཡིན། ང་རྒྱལ་ཡོད་ན་གནས་ལུགས་རྟོགས་མེད་པའི་རྟགས་ཡིན། ཕྲན་བུའི་གོམས་པ་སྟོབས་སུ་གྱུར་ཡོད་ན་ཡང་ང་རྒྱལ་མེད་པ་དང༌། གཞན་དོན་དུ་གྱུར་ན་ལུས་ངག་གི་བདུན་ཡང་གནང་བ་ཡིན་པས་གཞན་དོན་མ་གཏོགས་རང་འདོད་མེད་ན་བྱང་ཆུབ་སེམས་དཔའི་མཛད་སྤྱོད་ཡིན། གཞན་དོན་དུ་མ་གྱུར་ན་རྙེད་པ་སྤོང་བར་བྱེད་པ་དང་། གསང་བ་ཟབ་མོའི་དོན་གོ་བ་ལ་སྐྲག་པ་མེད་པའི་བཟོད་པ་ཡོད་པ་དང༌། རྣམ་དཀར་དགེ་བའི་ཚོགས་སྒྲུབ་པ་ལ་དེས་ཆོག་གི་དེ་ཙམ་ལས་མི་འགྲུབ་པས་མི་དགོས་སྙམ་པའི་ངོམས་པའམ་ཆོག་ཤེས་མེད་པའོ།།

༡༠༩ ཉོན་མོངས་དགྲ་ཆེན་གཞོམ་པའི་ཆོས་དྲུག་བསྟན་པ།

ཉོན་མོངས་དགྲ་ཆེན་གཞོམ་པའི་ཆོས་དྲུག་ནི།།

ཉིན་འགའི་དགེ་སྦྱོར་ཉོན་མོངས་མི་ཕྱེད་པས།།

སྒྲུབ་པ་རྒྱུན་བསྲིང་ངང་ཐུང་མེད་པ་གཅེས།།

ཐོག་མེད་ཉོན་མོངས་ཤིན་ཏུ་གདུལ་དཀའ་བས།།

གཉེན་པོ་རབ་ཟབ་ཐབས་བཅས་བསྟེན་པ་གཅེས།།

བདག་འཛིན་གཞིག་དཀའ་གཟུང་འཛིན་རླབས་ཆེ་བས།།

ཚོགས་གཉིས་དཔུང་བསྐྱེད་དགེ་ལ་འབད་པ་གཅེས།།

འཁོར་བའི་གཅོང་ནད་ཡུན་རིང་སྦྱང་དཀའ་བས།།

འཚོ་བྱེད་བླ་མ་རྟག་ཏུ་བསྟེན་པ་གཅེས།།

དུག་ལྔའི་མེ་དཔུང་རབ་ཏུ་གཞིལ་དཀའ་བས།།

བྱང་ཆུབ་སེམས་བསྐྱེད་རྒྱ་མཚོ་བསྟེན་པ་གཅེས།།

ལས་ངན་བསགས་པའི་བགྲོད་ལམ་མཐུར་བྱེད་པས།།

ཐར་བའི་སྐས་ལ་ཡར་ལ་འཛེག་པ་གཅེས།།

ཞེས་གསུངས་པ་སྟེ། ཉོན་མོངས་དགྲ་ཆེན་གཞོམ་པའི་ཆོས་དྲུག་ནི། རྟ་སར་རྒྱུག་སྐབས་དང་པོ་མི་ཐུབ་འདུག་ཁུལ་བྱེད་ཀྱང་། ཡུན་མི་རིང་བར་ཐང་ཆད་འགྲོ་བ་ལྟ་བུའི་ཉིན་འགའི་དགེ་སྦྱོར་གྱིས་ཉོན་མོངས་དང་རང་རྒྱུད་སོ་སོར་མི་ཕྱེད་པས་སྒྲུབ་པ་ཉམས་ལེན་བྱེད་ཚེ་རྒྱུན་བསྲིང་ངང་ཐུང་མེད་པ་གཅེས་པ་ཡིན་པ་དང་། ཐོག་མེད་ནས་གོམས་པའི་ཉོན་མོངས་པ་བག་ཆགས་ཤུགས་དྲགས་པོ་གོམས་ཕྱིར་ཤིན་ཏུ་གདུལ་དཀའ་བས། གཉེན་པོ་རབ་ཟབ་དཔེར་ན་ཞེ་སྡང་གི་གཉེན་པོ་ལ་བཟོད་པ་སྒོམ་ཅིང་ཐབས་ཟབ་མོར་བསྟེན་ན་མྱུར་ཁྱད་དང་ནུས་པ་ལྷག་ཏུ་ཐོན་པ་ཡིན་པས། གཉེན་པོ་དང་བསྟེན་ཐབས་གཉིས་ཀ་ལ་གཟབ་པར་གཅེས་པ་དང་། རྡོ་རྗེ་དོ་ཧ་ལས་ཀྱང་། དོན་དམ་ལྷན་ཅིག་སྐྱེས་པའི་ཡེ་ཤེས་ནི། །ཚོགས་བསགས་སྒྲིབ་པ་དག་པའི་ལག་རྗེས་དང་། །རྟོགས་ལྡན་བླ་མའི་བྱིན་རླབས་ཁོ་ན་ལས། །ཐབས་གཞན་བསྟེན་པ་རྨོངས་པར་ཤེས་པར་བྱ། ཞེས་གསུངས་པ་ལྟར། བདག་ཏུ་འཛིན་པ་ནི་གཞིག་དཀའ་ཞིང་གཟུང་འཛིན་རླབས་ཆེ་བས། བསོད་ནམས་དང་ཡེ་ཤེས་ཀྱི་ཚོགས་གཉིས་དཔུང་བསྐྱེད་པ་གལ་ཆེ་བས་དེ་ལ་འབད་པར་བྱེད་པར་གཅེས་པ་དང་། འཁོར་བའི་གཅོང་ནད་ནི་ན་ཡུན་རིང་ཞིང་། ན་ལུགས་ངན་པ་དང་། བག་ཆགས་གཏིང་ཟབ་པའི་སྟོབས་ཀྱིས་སྦྱང་དཀའ་བ་ཞིག་ཡིན་ཕྱིར། འཚོ་བྱེད་སྨན་པ་ལྟ་བུའི་བླ་མ་མཁས་པ་ལ་རང་མགོ་ཐོན་ནས་ཁེར་རྐྱ་འཕེར་བ་མ་གྱུར་བར་དུ་རྟག་ཏུ་བསྟེན་པར་ཤིན་ཏུ་གཅེས་པ་དང་། རང་འདོད་མ་འདྲེས་པའི་བྱང་ཆུབ་ཀྱི་སེམས་སྐྱེས་ན་དུག་ལྔའི་མེ་དཔུང་ཡིན་ཡང་གཞིལ་ཐུབ་པ་དང་། ངེས་པའི་སྡིག་པ་ཟིལ་གྱིས་གནོན་པ་དང་། མ་ངེས་པའི་སྡིག་པ་དྲུངས་ནས་འབྱིན་པ་དང་། གཞན་དོན་གྱི་ཞོར་དུ་རང་དོན་ཡང་འགྲུབ་པ་ཡིན་པས། བྱང་ཆུབ་སེམས་བསྐྱེད་རྒྱ་མཚོར་བསྟེན་པ་གཅེས་པ་དང་། ལས་ངན་བསགས་པ་ནི་ངན་གོམས་ཀྱི་བག་ཆགས་ཤུགས་དྲགས་པས་ཆུ་རྒྱུན་དང་མཚུངས་པར་ཐུར་དུ་རྒྱུག་སླ་བ་དང་། སློབ་མི་དགོས་པར་ཤེས་བདེ་བ་ཡིན་པ་དང་། ཡར་ཐར་ལམ་སྙེགས་ནས་བསོད་ནམས་བསག་པ་དེ་མ་གོམས་ན་དཀའ་བ་ཡིན་ཡང་ཐུར་ལ་མི་འབབ་པར་ཡར་ལ་འཛེག་པ་ནི་གཅེས་སོ།།

༡༡༠ སྡེ་སྣོད་བསླབ་གསུམ་ཁྱད་པར་ཆོས་དྲུག་བསྟན་པ།

སྡེ་སྣོད་བསླབ་གསུམ་ཁྱད་པར་ཆོས་དྲུག་ནི།།

ཉན་ཐོས་སྡེ་སྣོད་སྟོན་ལས་སྒྲའི་རྗེས་འབྲང༌།།

རང་རྒྱལ་རང་རྟོགས་རྟེན་འབྲེལ་ནང་ནས་འཆར།།

བྱང་སེམས་རང་གཞན་ཡེ་ཤེས་མཐའ་ཡས་ལྡན།།

ཉན་ཐོས་བསླབ་པ་ཕྱོགས་གཅིག་རང་རྒྱུད་ཙམ།།

རང་རྒྱལ་བར་མ་རང་དོན་ལྷུར་ལེན་ཞིང༌།།

བྱང་སེམས་སྙིང་རྗེ་ངེས་པར་འབྱུང་བ་ཡིན།།

ཅེས་གསུངས་པ་སྟེ། སྡེ་སྣོད་བསླབ་གསུམ་ཁྱད་པར་ཆོས་དྲུག་ནི། ཉན་ཐོས་ནི་སྡེ་སྣོད་སྟོན་པ་ལས་ཐོས་ནས་སྒྲའི་རྗེས་སུ་འབྲང༌ཞིང་། ཐོས་ནས་གཞན་ལ་སྒྲོག་པ་ཉན་ཐོས་ཞེས་བྱ་བ་དང་། རང་རྒྱལ་གྱིས་གཞན་གྱི་སྒྲའི་རྗེས་སུ་མི་ལྟོས་པར་སྔོན་གྱི་སྨོན་ལམ་གྱི་དབང་ལས་རང་གི་རྟོགས་པ་ནང་ནས་འཆར་ཏེ་རྟེན་འབྲེལ་ཡན་ལག་བཅུ་གཉིས་ལུགས་འབྱུང་ལྡོག་ཏུ་བསྒོམས་པས་སྲིད་རྩ་དྲུངས་ནས་འབྱིན་པའི་ཡོན་ཏན་ནང་ནས་ཚུར་འཆར་བ་དང་། བྱང་སེམས་ནི་རང་གཞན་ཐམས་ཅད་ཀྱི་དོན་བྱས་པའི་རྟོགས་པའི་ཡེ་ཤེས་ཚད་མེད་མཐའ་ཡས་དང་ལྡན་པ་དང་། ཉན་ཐོས་བསླབ་པ་ཕྱོགས་གཅིག་ཞི་བ་དོན་གཉེར་གྱི་ཐོག་ནས་རང་རྒྱུད་འདུལ་བ་ཙམ་ཞིག་ཡིན་པ་དང་། རང་རྒྱལ་བར་མའམ་སྐྱེས་བུ་འབྲིང་རང་དོན་ལྷུར་ལེན་ཞིང༌། བྱང་སེམས་གང་སྙིང་རྗེས་ཀུན་ནས་བསླངས་པ་ཞིག་མིན་ན་ཐེག་ཆེན་བྱང་ཆུབ་སེམས་དཔའི་ལམ་མིན་པ་དང་། གང་བྱང་ཆུབ་སེམས་དཔའི་ལམ་དང་ཐེག་པ་ཆེན་པོའི་ལམ་ཡིན་ན་སྙིང་རྗེས་ཀུན་ནས་བསླངས་པའི་ལམ་ཡིན་པས་ཁྱབ་ཕྱིར། སྐྱེས་བུ་ཆུང་འབྲིང་ཆེ་གསུམ་གྱི་ལམ་དེ་སྡེ་སྣོད་གསུམ་དང་བསླབ་གསུམ་ཉམས་སུ་ལེན་པ་ཡིན་ཡང་། བསླབ་གསུམ་ཉམས་ལེན་གྱི་རྟོགས་རིགས་ཀྱི་ཐད་ནས་ཁྱད་པར་ཡོད་པ་ཡིན་ནོ།།

༡༡༡ འཇིག་རྟེན་སྐྱོན་དུ་ལྟ་བའི་ཆོས་དྲུག་བསྟན་པ།

འཇིག་རྟེན་སྐྱོན་དུ་ལྟ་བའི་ཆོས་དྲུག་ནི།།

སྙན་གྲགས་འབྲུག་སྒྲ་འདྲ་བས་དགའ་བ་སྤང༌།།

ལོངས་སྤྱོད་སྤྲིན་དང་འདྲ་བས་ཞེན་པ་སྤང༌།།

ཉེ་འཁོར་རྒན་འཁོགས་བུ་འདྲ་རེ་བ་སྤང༌།།

ཡུལ་ཁྱིམ་མགྲོན་ཁང་འདྲ་བས་རི་ཁྲོད་འགྲིམ།།

བདེ་སྐྱིད་རྨི་ལམ་འདྲ་བས་བདེན་མ་འཛིན།།

ཐམས་ཅད་བོར་ནས་འགྲོ་བས་ཆགས་ཞེན་སྐྱུངས།།

དེ་ལྟར་བྱས་ན་ཇེ་བདེར་འགྱུར་བ་ཡིན།།

ཅེས་གསུངས་པ་སྟེ། འཇིག་རྟེན་སྐྱོན་དུ་ལྟ་བའི་ཆོས་དྲུག་ནི། སྙན་གྲགས་ནི་འབྲུག་གི་སྒྲ་ཡུན་ཐུང་ཞིང་མེད་པར་འགྱུར་བ་དང་འདྲ་བས། སྙན་གྲགས་དོན་གཉེར་གྱིས་མི་ཚེ་འཛད་པ་ནི་དོན་མེད་ཡིན་པས་དེ་ལ་དགའ་བ་སྤང༌བར་བྱ་བ་དང་། རྒྱུ་ནོར་ལོངས་སྤྱོད་ནི་རྟག་བརྟན་མེད་པར་ད་ལྟ་ཡོད་ཀྱང་ད་ལྟ་མེད་པ། དཔེར་ན་སྤྲིན་ད་ལྟ་ཡོད་ཕྱོགས་ལ་ད་ལྟ་མེད་པ་དང་འདྲ་བས་ཞེན་ཆགས་མི་བྱེད་པ་དང་། ཉེ་འཁོར་ན་ཡོད་པའི་གཉེན་བཤེས་ལ་སོགས་པ་འདི་དག་ཐམས་ཅད་ནི་མི་རྒན་འཁོགས་ཀྱིས་བུ་ཆུང་འདིས་ང་ཨེ་སྐྱབས་སྙམ་ཡང་བུ་ནར་སོན་དུས་རྒན་འཁོགས་ཤི་ནས་མེད་པར་འགྱུར་བ་ལྟ་བུ་ཡིན་པས་རེ་བ་སྤང༌བར་བྱ་བ་དང་། ཡུལ་ཁྱིམ་ནི་མགྲོན་པོའི་མགྲོན་ཁང་ཞག་གཅིག་ནས་བསྐྱུར་བྱ་ཡིན་པ་དང་འདྲ་བས་དེ་ལ་རང་ཡུལ་དང་རང་ཁྱིམ་ལ་སོགས་པའི་བདེན་ཞེན་མ་ཆེ་བར་རི་ཁྲོད་འགྲིམས་ནས་ཕ་ཡུལ་རྒྱབ་ཏུ་བསྐྱུར་ན་ཆོས་བསྒྲུབས་པའི་ཡོན་ཏན་མང་པོ་ཐོབ་ཏུ་ཡོད་པ་ཡིན་པ་དང་། མདང་དགོང་བདེ་སྐྱིད་ཀྱི་འཚོ་བར་རོལ་བའི་རྨི་ལམ་རྨིས་ཀྱང་དེ་རིང་མེད་པ་དང་འདྲ་བས་བདེ་སྐྱིད་ལ་བདེན་པར་མི་འཛིན་པ་དང་། ནོར་ལོངས་སྤྱོད་འཁོར་འབངས་ཉེ་དུ་ཐམས་ཅད་བསྐྱུར་ནས་ཕྱི་མའི་ལམ་ཆེན་ཕྱིར་ལོག་ཏུ་མེད་པའི་ཆ་མེད་ཀྱི་ཡུལ་དུ་འགྲོ་བས་ཆགས་ཞེན་བསྐྱུང་བར་བྱ་སྟེ། དེ་ལྟར་ཆགས་ཞེན་ཐམས་ཅད་སྐྱུང་བར་བྱེད་ན་སྡུག་བསྔལ་ཇེ་ཆུང་ལ་སོང་ནས་ཇེ་བདེ་ཇེ་བདེ་རུ་འགྱུར་བ་ཡིན་ནོ།།

༡༡༢ ཆོས་བྱེད་རྣམས་ཀྱི་བྱར་དགོས་རྣམ་དྲུག་བསྟན་པ།

ཆོས་བྱེད་རྣམས་ཀྱི་བྱར་དགོས་རྣམ་དྲུག་ནི།།

གང་དུ་སྐྱེས་ཀྱང་གཞན་དོན་འགྲུབ་དགོས་པས།།

སེམས་བསྐྱེད་སྨོན་ལམ་རྒྱ་ཆེན་སྦྱང་བར་བྱ།།

སྐྱིད་ན་ཆོས་ཀྱི་བྱིན་རླབས་ཤེས་དགོས་པས།།

ཕན་ཡོན་བསམས་ལ་ནན་ཏན་བརྩོན་པར་བྱ།།

སྡུག་ན་སྔོན་གྱི་ལས་སུ་ཤེས་དགོས་པས།།

རྒྱུ་འབྲས་བསམས་ལ་བློ་སྦྱོང་སྙིང་པོར་བྱ།།

ན་ན་དགེ་སྦྱོར་རྩལ་སྦྱོང་ཤེས་དགོས་པས།།

མ་ན་བ་ལ་རིག་པ་གཅུན་པར་བྱ།།

རྒས་ན་བློ་སེམས་བདེ་བ་ཅིག་དགོས་པས།།

གཞོན་དུས་བསགས་སྦྱོང་ལས་ལ་འབད་པར་བྱ།།

ཤི་ན་བྱ་བ་རྫོགས་པ་ཅིག་དགོས་པས།།

མ་ཤི་བར་ལ་འབྲེལ་ཐག་གཅད་པར་བྱ།།

འདི་དག་སྙིང་ནས་བསླབ་པའི་ཆོས་སུ་སྣང༌།།

ཞེས་གསུངས་པ་སྟེ། ཆོས་བྱེད་རྣམས་ཀྱི་བྱར་དགོས་རྣམ་དྲུག་ནི། ཐེག་པ་ཆེན་པོའི་ཆོས་སྒོ་ལ་ཞུགས་ནས་བྱང་ཆུབ་མཆོག་ཏུ་སེམས་བསྐྱེད་ཡོད་པ་ཞིག་ཡིན་ཚེ། གང་དུ་སྐྱེས་ཀྱང་གཞན་དོན་འགྲུབ་དགོས་ལ། དེ་འགྲུབ་པར་བྱེད་པ་ལ་སེམས་བསྐྱེད་སྨོན་ལམ་གཉིས་ཀ་མེད་དུ་མི་རུང་བ་ཡིན་པས་སྨོན་ལམ་དག་པས་མཚམས་སྦྱར་དགོས་ཤིང་། དེ་ཡང་སེམས་ཅན་གྱི་དོན་དང་བསྟན་པའི་དོན་གཉིས་གཅིག་ཡིན་ཕྱིར་དམ་པའི་ཆོས་འཛིན་པའི་སྨོན་ལམ་བཏབ་ན་སྨོན་ལམ་ཐམས་ཅད་ཀྱི་གནད་དེ་ལ་འདུས་པ་ཡིན་ནོ། །ཚ་བའི་དུས་སུ་བསིལ་རླུང་གི་རེག་བྱ་འཇམ་པོ་ཞིག་ཡོང་བ་དང་། གྲང་བའི་དུས་ན་ཉི་འོད་དྲོ་བ་ཞིག་ལ་ལྡེ་རྒྱུ་བྱུང་ནའང་བླ་མ་དཀོན་མཆོག་གི་བྱིན་རླབས་ཡིན་པར་ཤེས་པར་བྱ་དགོས་པས། ཆོས་ཀྱི་ཕན་ཡོན་བསམས་ལ་དེ་བས་ལྷག་ཏུ་ནན་ཏན་གྱིས་བརྩོན་པར་བྱ་བ་དང་། སྡུག་ན་རང་གི་སྔར་བསགས་ཀྱི་འབྲས་བུ་རང་ཐོག་ཏུ་སྨིན་པ་ཤེས་དགོས་པས། རྒྱུ་འབྲས་བསླུ་མེད་ཀྱི་ཚུལ་ལ་བསམ་བློ་བཏང་ནས་བློ་སྦྱོང་བྱེད་པ་ལ་སྙིང་པོར་བྱ་དགོས། དེ་ཡང་རང་ཉིད་ལ་བདེ་སྡུག་གང་བྱུང་ན་དེ་བེད་སྤྱད་ཤེས་དགོས། བེད་སྤྱོད་ཇི་ལྟར་བྱེད་དགོས་ན་བདེ་བ་བྱུང་ན་དེ་ལྟ་བུའི་བདེ་བ་དེ་གཞན་སེམས་ཅན་ཡོངས་ལ་ཐོབ་པར་གྱུར་ཅིག་བསམ་པ་དང་། སྡུག་བསྔལ་བྱུང་ན་སྡུག་བསྔལ་འདི་ལྟ་བུ་སེམས་ཅན་གཅིག་ལ་ཡང་མི་འབྱུང་བར་ཤོག་ཅིག་བསམ་པ་དང་། བདེ་སྡུག་གཏོང་ལེན་རང་འདོད་དང་མ་འདྲེས་པ་ཞིག་དགོས་སོ། །ན་ན་དགེ་སྦྱོར་གྱི་རྩལ་སྦྱོང་ཤེས་པ་ཞིག་དགོས་པས། དེ་ཤེས་པ་ལ་ད་ལྟ་མ་ན་བའི་སྐབས་ལ་རིག་པ་གཅུན་པར་བྱ་ཞིང་ཉམས་ལེན་གྱི་གནད་ལ་སྦྱོང་ནས་ན་བས་མི་ཚད་ཤི་བ་ཐོག་ལ་བབས་ཀྱང་དགེ་སྦྱོར་བསྒྲུབས་པ་ལས་ལ་སྦྱར་ཤེས་པ་ཞིག་བྱེད་དགོས་པ་དང་། རྒས་པའི་དུས་ན་ད་ཤི་རན་པས་ཅི་བྱེད་སྙམ་ནས་འཚུབ་མི་ལང་བར་བློ་སེམས་བདེ་བ་ཞིག་དགོས་པས། རྒས་དུས་བློ་སེམས་བདེ་བར་བྱེད་པ་རུ་གཞོན་དུས་བསོད་ནམས་གསོག་པ་དང་སྡིག་པ་སྦྱོང་བ་ལ་སོགས་པའི་ལས་ལ་འབད་པར་བྱ་དགོས། ཤི་ན་བྱ་བ་རྫོགས་པ། འདི་འགྲུབ་མ་སོང་སྙམ་པའི་བློ་ལྷག་མེད་པ་ཞིག་དགོས་པས་བྱ་བའི་མཐའ་ཞེས་པ་རྫོགས་སུ་མེད་པ་ཡིན་ཡང་མ་ཤི་བའི་སྐབས་སུ་འཇིག་རྟེན་ཚེ་འདིའི་ཞེན་ཆགས་ཀྱི་འབྲེལ་ཐག་གཅོད་པར་བྱེད་པ་སྟེ། འདི་དག་ནི་ཁ་བཤད་ཙམ་གྱིས་མི་ཡོང་བར་དོན་གྱི་སྟེང་ནས་ཟིན་ཤག་ཤག་གི་སྙིང་ནས་བསླབས་ཏེ་བསྒྲུབ་དགོས་པའི་ཆོས་སུ་སྣང༌ངོ་། །དེ་རིང་འདི་དག་སྙིང་ནས་བསླབ་པའི་ཆོས་སུ་སྣང༌། །ཞེས་པ་འདིར་བཞག་ནས་སང་ཉིན་གདམས་ངག་དྲུག་གིས་གནད་དུ་བརྡེག་པ་ནི། །ཞེས་པ་ནས་བཤད་རྒྱུ་བྱེད། གོང་ནས་ཞུས་པ་ལྟར་དུ་རྒྱལ་བ་ཀློང་ཆེན་པའི་གསུང་ཆོས་སྐུའི་རིང་བསྲེལ་མཛོད་ཆེན་བདུན་འདི་རྒྱལ་བའི་སྐུ་གསུང་ཐུགས་དང་གཉིས་སུ་མ་མཆིས་ཤིང་། རྒྱལ་བ་དངོས་བྱོན་དང་འདྲ་བའི་མཐོང་གྲོལ་ཐོས་གྲོལ་གཉིས་ཀ་ཡིན་པས། སངས་རྒྱས་དངོས་ཀྱི་གཟུགས་སྐུ་མཇལ་བ་དང་། གསུང་ཐོས་པ་དང་། ཐུགས་ཀྱི་བྱིན་རླབས་འཕོ་ལ་ཕྱོགས་ནས་ཡོད་པ་ལྟ་བུ་ཞིག་ཡིན་པས། འདིའི་ཚིག་གཅིག་ཐོས་པ་ཡང་བྱིན་རླབས་ཆེ་ཞིང་། བསོད་ནམས་མི་ཟད་པའི་སྐལ་བ་དང་ལྡན་པ་ཡིན་ཡང་གཙོ་ཆེར་ཐོས་པ་ཙམ་གྱིས་ཆོག་པར་མི་འཛིན་པར། ཐོས་བསམ་སྒོམ་གསུམ་གྱི་རིམ་པ་དང་བསྟུན་ནས་གནད་རང་རྒྱུད་ལ་སྦྱར་ན། དལ་རྟེན་དོན་ཡོད་དུ་བྱེད་པ་ལ་འདི་ལས་ལྷག་པ་ཞིག་མེད་པ་ཡིན། ཁྱད་པར་དུ་མན་ངག་མཛོད་འདི་ནི། ཚིག་ཉུང་དོན་བསྡུས་མན་ངག་གོ །ཞེས་གསུངས་པ་བཞིན་དུ་གཏིང་ཟབ་པའི་བརྗོད་བྱའི་དོན་དེ་ཉིད་རྒྱ་ཆེ་བའི་རྗོད་བྱེད་ཀྱི་ཚིག་གིས་བསྙད་ནས་ཚིག་ཉུང་དོན་བསྡུས་ཀྱི་ཡང་བཅུད་དུ་དྲིལ་ནས་བསྟན་པའི་མན་ངག་ཡིན། འོ་ན་འདིས་བརྗོད་བྱའི་དོན་གང་དང་གང་བསྡུས་ཡོད་ཅེ་ན། རྒྱལ་བས་གསུངས་པའི་ཆོས་སྒོ་བརྒྱད་ཁྲི་བཞི་སྟོང་ངམ། མཐའ་ཡས་རབ་འབྱམས་དཔག་མེད་ཀྱི་ཞིང་ན་བཞུགས་པའི་རྒྱལ་བའི་བཀའི་སྙིང་དོན་ཚང་མ་འདིར་བསྡུས་ནས་ཡོད། འདི་ལྟ་བུའི་ཚིག་ཉུང་ཞིང་གོ་སླ་ལ་ཉན་བདེ་བས་མ་ཚད། ཟབ་དང་རྒྱ་ཆེའི་དོན་ཀུན་འདུས་པའི་གཞུང་བཟང་འདི་ནི་འཇིག་རྟེན་གྱི་མིག་གཅིག སྲིད་པའི་སྒྲོན་མེ། རྙེད་དུ་མེད་པའི་རིན་བྲལ་གྱི་ནོར་བུ་ཡིན་པས། འདི་ཉན་ལོ་དང་ཐོས་ལོ་ཙམ་རེས་ཆོག་པར་འཛིན་ན་ཆུད་ཟོས་སུ་བཏང་བ་ཡིན་པས། གཞུང་བཟང་འདི་འདྲ་མཇལ་དུ་ཡོད་པ་དང་། ལམ་ བཟང་འདི་རྙེད་དུ་ཡོད་པ་དང་། འདི་ལྟ་བུའི་བརྒྱུད་པའི་བྱིན་རླབས་བར་མ་ཆད་པ་འཐོབ་ཏུ ་ཡོད་པའི་སྐབས་འདིར། ཚིག་དང་དོན་གྱི་རོ་བཅུད་ཕུན་ཚོགས་དེ་མྱོང་བའི་ཆེད་དུ། དངོས་ཤུགས་བརྒྱུད་གསུམ་གྱི་བསྟན་དོན་ལ་ཐོས་བསམ་སྒོམ་པའི་ཤེས་རབ་ཀྱིས་ཞུན་ཐར་བཅད་ནས་གཏན་ལ་ཕབ་ན། འདིའི་དྲུག་ཚན་རེས་ཀྱང་རྒྱལ་བའི་ཆོས་མཛོད་རྫོགས་པར་བསྟན་པ་ཡིན་པས། ཆོས་ཚུལ་རབ་འབྱམས་ལ་ལྟ་བའི་བློ་མིག་འབྱེད་པའི་དགོས་གནད་ཅིའི་ཕྱིར་མི་ལྡན། ལྟ་བའི་སྐབས་སུ་ཡང་ལོ་བརྒྱ་ཕྲག་ཁ་ཤས་ཀྱི་སྔོན་གྱི་བླ་མ་ཞིག་གིས་དེ་འདྲ་གསུངས་འདུག་བསམས་ནས་རྒྱང་གི་ལྟད་མོ་ལ་གཞག་བྱ་ཞིག་མ་ཡིན་ཏེ། འདི་དུས་ཕྱི་རབས་ཀྱི་འགྲོ་བ་རང་རེ་རྣམས་ལ་ཐུགས་བརྩེ་བས་བགོ་སྐལ་དུ་བཞག་པ་ཞིག་ཡིན་པའི་ཕྱིར། འདིའི་དོན་ལ་དཔྱད་ནས་གཏན་ལ་འབེབས་པའི་སྐབས་སུ་ཡང་། སྤྱིའི་བརྗོད་བྱ་ལ་བརྟགས་ཤིང་དཔྱད། བྱེ་བྲག་མན་ངག་རེ་རེའི་བསྟན་དོན་གྱི་གནད་ཕུད། དེང་སང་གི་དུས་དང་སྦྱར། བསྟན་པ་སྤྱིའི་འཕེལ་འགྲིབ་དང་སྦྲེལ། སྐྱེ་འགྲོའི་དར་རྒུད་ལེགས་ཉེས་ཀྱི་འདུན་མ་སྤྱི་ལ་སྦྱར་བས་མི་ཚད། རང་ཉིད་ཀྱི་ཚེ་སྟོད་ཚེ་སྨད་ཀྱི་འགྱུར་བ། ཁོར་ཡུག་གི་སྣང་ཚུལ། ཕྱིན་ཆད་ཀྱི་འདུན་མ། འདི་དང་ཕྱི་མའི་རེ་ལྟོས་དང་རྒྱབ་རྟེན། གང་ས་ཅི་ཐད་ལ་སྦྱར་ནས་ཆོས་ཞུས་པའི་སྙིང་པོ། མན་ངག་ཐོབ་པའི་དགོས་པ་དེ་སྔར་མེད་ཀྱི་དྲོད་ཚད་འདི་བླངས་ཡོད་བསམས་པའི་སེམས་རྟེན་ཞིག་ཐོབ་དགོས་པ་ཡིན། ཁྱད་པར་དུ་དགེ་བསྙེན་ཕོ་མོ་དག་གིས་འདི་ཐོབ་ཐུབ་པ་ནི་བསམ་ཡུལ་ལས་འདས་པ་ཞིག་ཡིན་ཡང་། ཐམས་ཅད་ལ་འདིའི་བསོད་ནམས་ཅི་ཡོད་དེ་ཉན་མཁན་ནི་རྡོག་མ་ཁ་ཤས་ཤིག་ལས་མེད་པ་རེད། ཁྱེད་རྣམས་ཀྱིས་གསོལ་བ་དང་སྨོན་ལམ་ཐོབ། ཚིག་རེ་ཡིན་ཡང་ཨེ་གོ་ལྟ་བ་ལ་ཉེར་ལེན་གྱིས་དང་། དབང་ལུང་བསྙེན་སྒྲུབ་མེད་ཅིང་། བསྐྱེད་རྫོགས་མ་དགོས་ཚིག་རྗེས་དོན་དྲན་ཙམ་ཡང་མི་ཤེས་པ། དེར་མ་ཟད་ཆོ་གའི་ཡན་ལག་གི་མགོ་མཇུག་མི་ཚང་ཞིང་། དག་དྲན་ཙམ་ཡང་མི་ཤེས་པ་ཁ་ཤས་ཀྱིས་གནས་སྟོང་མང་རབ་ཅིག་སྐུར་བ་ལས་འདིས་དགའ་བ་ཡིན། མདོར་ན། གདམས་ངག་ཟགས་སུ་མ་འཇུག་སྙིང་གཏམ་ཡིན། །གསུངས་པ་བཞིན་དུ་འདི་ཉམས་ལེན་གྱི་གནད་དུ་སྨིན་ཐབས་རེ་ཚང་མས་མ་འཕྱུག ངས་རྩ་བའི་བླ་མ་བཀའ་དྲིན་ཅན་འཇིགས་མེད་རྟ་མགྲིན་ཡོན་ཏན་མགོན་པོའི་མདུན་ནས་ཐོབ་པས་མ་ཟད། རྫོགས་ཆེན་མཁན་པོ་ལྷ་རྒྱལ་ལམ་ས་འདིའི་བརྗོད་ཚུལ་ལྟར་ན་ཨ་བུ་ལྷ་སྒང་ཚང་གི་དོན་བརྒྱུད་ཀྱི་བྱིན་རླབས་ཀྱང་ཆུ་བོ་གཅིག་འདྲེས་སུ་ཚང་ཡོད། སང་ཉིན་ནས་བསྐལ་མང་གོང་ནས་གཡོ་སྒྱུ་སྤངས་པའི་ཐུགས། །ཞེས་པའི་སྨོན་ལམ་དེའི་ཕྱག་དཔེ་སྣོམས་ཤོག མཛོད་བདུན་གྱི་ཆོས་ཁྲིད་ལ་དེ་འདོན་དགོས། དེའི་སྨོན་ལམ་དེ་དང་སྦྲགས་ནས་ཨ་བུ་ལྷ་སྒང་ཚང་གི་ཐུགས་རྩེ་ང་ལ་གཏད་པ་ཡིན་པས་བྱིན་རླབས་ཀྱི་ཚན་ཁ་ལྷག་པར་དུ་ཆེ་བ་ཡིན། དགེ་བསྙེན་རྣམས་ཀྱིས་ད་རེས་སྐབས་འདིར་ཕྱག་དང་སྐོར་བ་ལ་གནད་ཆེན་མ་འཛིན་པར་མན་ངག་འདི་ལ་བལྟས་ནས་བསམ་པ་བཟང་པོ་ནས་མགོ་འཛིན་ཏེ་སྙིང་རྗེའི་སེམས་རེ་རྒྱུད་ལ་ཨེ་སྐྱེ་ལྟོས། དེ་སྐྱེས་ན་རིམ་གྱིས་སྨོན་དང་འཇུག་པའི་བདག་ཉིད་ཅན་གྱི་བྱང་ཆུབ་ཀྱི་སེམས་ལ་སློབ་དང་ཚོགས་གསོག་སྒྲིབ་སྦྱོང་ཐམས་ཅད་ཀྱི་གོ་དེས་ཆོད་པ་ཡིན། དེ་ལྟར་བཤད་ཀྱང་ཅི་ཡིན་འདི་གོ་མེད་ན་རྡོར་སེམས་སྒོམ་ཟླས་དང་སྦྲགས་པའི་གཉེན་པོ་སྟོབས་བཞི་ཚང་བའི་བཤགས་པ་རེ་བྱེད་ཚུལ་ཨེ་ཤེས་ལྟོས། ངས་ཀུན་བཟང་བླ་མའི་ཞལ་ལུང་བཤད་ཡོད་པ་དེའི་ཟེར་སྡེར་དེ་ཚོ་ཡང་ཉན་རེ་གྱིས་དང་ཕན་ཐོགས་ངེས། མདོར་ན་པདྨའི་ཐང་འདི་བསམ་གཏན་སྒོམ་པའི་གནས་རེད། དང་པོ་ཡར་ཡོང་སའི་སྒོ་ཆེན་ཕྱི་མའི་ཀླད་དུ་ཡུན་རིང་ངལ་ཞིང་དུབ་པའི་སེམས་ཁྱོད་ཀྱིས་ངལ་སོས་ཞེས་བཀོད་ཡོད་པས་བློ་བག་ལ་ཕབས་ནས་ཕྱི་མའི་བྲོ་རྟེན་རེ་ཨེ་ལོན་ལྟ་ས་ཡིན། མང་ཆེ་བ་རྒན་འཁོགས་རེད་སྐྱིད་ལ་སྡུག་གི་འཇིག་རྟེན་མི་ཡུལ་གྱི་བྲོ་བ་མྱངས་ཚར་བ་དང་། ན་ཚོད་རྒས་པ་རྣམས་མ་དགོས་ད་ལྟའི་ལོ་ཉུང་ཚང་མ་ཡང་འདི་དང་འདིའི་རང་བཞིན་གྱི་རྒ་ན་འཆི་བའི་སྡུག་བསྔལ་མྱང་དགོས་པ་ཡིན། དེས་ན་བློ་བདེ་སེམས་བདེའི་ངང་ནས་སྦྱོར་དངོས་རྗེས་གསུམ་ཚང་བའི་མ་ཎི་སྤུས་དག་རེ་རེ་གཉིས་རེ་ཨེ་འགྲུབ་ལྟོས་དང་ཕྱི་མའི་འཇིགས་སྐྲག་དེས་སེལ་བ་ཡིན་ནོ།།

ཉིན་ལྔ་བའི་ཆོས་ཁྲིད།

མ་གྱུར་ནམ་མཁའི་མཐའ་དང་མཉམ་པའི་སེམས་ཅན་ཁམས་གསུམ་འཁོར་བ་རིགས་དྲུག་ཏུ་དབང་མེད་དུ་རྒྱུ་ཞིང་འཁྱམས་པ། སྡུག་བསྔལ་རྣམ་པ་གསུམ་གྱིས་སྐད་ཅིག་ཐང་ཅིག་ཙམ་ཡང་མ་བཏང་བའི་མཐའ་ཡས་འགྲོ་ཁམས་རྒྱ་མཚོ་ལྟ་བུ་འདི་དག་གི་དོན་དུ། འཐོབ་བྱ་བླ་ན་མེད་པ་གཏན་གྱི་བདེ་བ་མཐའ་གཉིས་ལ་མི་གནས་པ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ། སྐྱོན་ཀུན་ཟད་ཡོན་ཏན་ཀུན་ལྡན་གྱི་བདག་ཉིད། མཁྱེན་བརྩེ་ནུས་པ་ཕྲིན་ལས་དང་ལྡན་པ་དེ་ཉིད་ཐོབ་པར་བྱས་ཏེ། མ་རྒན་མཐའ་ཡས་ཀྱི་སེམས་ཅན་འདི་དག་ཐམས་ཅད་སྡུག་བསྔལ་གྱི་རྒྱ་མཚོ་ལས་བསྒྲལ་བར་བྱ། དེའི་ཆེད་དུ་བླ་ན་མེད་པའི་ལམ་གྱི་འཇུག་ངོགས་དམ་པའི་ཆོས་ཟབ་མོ་ཉན་ནས་དེའི་དོན་ཚུལ་བཞིན་དུ་ཉམས་སུ་བླང་བར་བྱའོ་སྙམ་པའི་བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་སྟེ། དེ་ཡང་འགྲོ་ཀུན་ཕ་མར་ཤེས་པའི་སྙིང་རྗེ་དང་། དེ་དག་རྫོགས་བྱང་ལ་འགོད་པའི་ཤེས་རབ་ཀྱི་ཟུར་གཉིས་ཚང་བ་དང་། དེའི་སྟེང་དུ་ཐབས་རྒྱ་ཆེ་བ་གསང་སྔགས་དག་སྣང་གི་ལམ། གནས་དུས་སྟོན་པ་འཁོར་དང་བཅས་པ་ཐམས་ཅད་ཡེ་ནས་དག་པའི་རང་བཞིན་དུ་གསལ་བཏབ་ནས། སྒོ་གསུམ་གུས་ཤིང་འདུད་པས་དང་བའི་སེམས་དང་ལྡན་པའི་ཀུན་སྤྱོད་ཀྱི་རིམ་པ་མདོ་རྒྱུད་བསྟན་བཅོས་དག་ལས་ཇི་ལྟར་འབྱུང་བ་བཞིན་དང་མ་བྲལ་བར་གསན་པར་བྱ་དགོས་ལ། དེ་ཡང་དམ་པའི་ཆོས་འདི་སྨན་དང་། ཆོས་བཤད་པའི་བླ་མ་སྨན་པ། རང་ཉིད་ནད་པ། རྒྱུད་ཉོན་མོངས་དུག་ལྔས་གཟིར་བ་འདི་ནད་གཞི་ཆེན་པོའི་གདོན་གྱིས་བཟུང་བ་ལྟ་བུ་ཞིག་ཡིན་པས། དེ་ལ་ནད་ཉེ་བར་འཚོ་བ་ཆོས་སེམས་རྒྱུད་དུ་འབྱོར་ནས་སེམས་ཁམས་ལ་ཕན་ཞིག་ཐོགས་པ་ནི། བླ་སློབ་སྨན་པ་དང་ནད་པ་ཐུན་མོང་གི་བྱེད་ལས་སུ་ཁེལ་ཞིང་། དམ་པའི་ཆོས་ནི་ཐར་བའི་སྲོག་གི་ཟུངས་གསོ་བའི་ལྷའི་བདུད་རྩི་ལྟ་བུ་ཞིག་ཡིན་ལ། དེ་བླུག་སའི་སྣོད་དེ་ཡང་གཙང་ཞིང་ལེགས་པ་བཅུད་མི་འཛག་ཅིང་མི་རྫོབ་པ་ཞིག་དགོས་པས། ཐོག་མར་རང་རྒྱུད་རང་གིས་རང་ལ་བརྟགས་ནས་བྱི་དོར་བྱེད་པ་ནི་གལ་ཆེ་ལ། འཇིག་རྟེན་གྱི་མི་རྣམས་སྐྱེས་ནས་ད་ལྟའི་བར་དུ་འཁྲུལ་བའི་གཞན་དབང་དུ་ཤོར་ནས་བདེ་བ་ཕྱི་ནས་རྙེད་རྒྱུ་ཡོད་པར་རློམ་སྟེ། ཕྱིའི་དངོས་པོའི་འབྱོར་བའི་མཐུན་རྐྱེན་གྱི་ཕྱོགས་ལ་ཆུང་ནས་ཆེ་དང་། གཞོན་ནས་རྒས་ཀྱི་བར་དུ་འབད་པ་དོན་མེད་ངལ་བ་འབྲས་བུས་སྟོང་བ་ཐོབ་རྒྱུ་ཅུང་ཟད་ཙམ་ཡང་མེད་པའི་ངང་ནས། མི་ཚེའི་ཡག་ས་བཟང་ས་ཕལ་མོ་ཆེ་དོན་མེད་དུ་གྲོན་ཞིང་། དེ་ཡང་རང་གར་དོན་མེད་དུ་སོང་ན་བླ་ཡང་དོན་ལོག་ཏུ་སོང་ནས་མི་དགེ་སྡིག་པའི་རྣམ་སྨིན་རི་རབ་དང་འདྲ་བ་ཞིག་རང་གི་གཉའ་བར་བཀལ་ནས་སྐྱབས་མེད་མགོན་མེད་ཀྱི་གནས་ལ་ལྷུང་བ་ནི། སོ་སོ་སྐྱེ་བོ་རྨོངས་པའི་གཞན་དབང་དུ་གྱུར་པས་ཡིན་ལ། ད་རེས་མི་ལུས་རིན་པོ་ཆེ་ཡིད་བཞིན་གྱི་ནོར་བུ་ལས་ལྷག་ཅིང་། ཡང་ཡང་རྙེད་དཀའ་ཉིན་དཀར་གྱི་སྐར་མ་དང་འདྲ་བ་ཐོབ་ནས། ཡར་འགྲོ་མར་འགྲོ་གཉིས་ཀའི་ས་མཚམས། ལམ་གྱི་བཞི་མདོ་རུ་ཐོན་ཡོད་པ་ཡིན་ལ། ད་སྔོན་ལམ་ལོག་ཁུར་བའི་ཕམ་ཁ་ཉོས་པའི་ཉམས་མྱོང་དེ་ལ་བརྟེན་ནས། ད་ནི་འཇིག་རྟེན་འཁོར་བའི་བྱ་བཞག་ཆོས་བརྒྱད་ཟིན་མེད་ཀྱི་བྲེལ་དོ་འདིས་མགོ་མ་གཡོགས་བསམ་པ་ཞིག་དང་། འདི་ལ་མགོ་མ་འཁོར་བསམས་པ་ཞིག་ཅི་ཡོད། ད་ནི་འཁྲུལ་སྣང་བཙོན་ཁང་ལྟ་བུ་འདིའི་ནང་ནས་དུས་གཏན་དུ་ཐར་བའི་ཐར་བ་དམ་པ། སྐྱེ་རྒ་ན་དང་འཆི་བའམ་བཤད་ཚོད་བགྲང་ཚོད་མེད་པའི་སྡུག་བསྔལ་འདི་དག་མེད་པའི་སྐྱིད་ས་བདེ་སའི་འགྲོ་ས་སྐྱབས་གནས་ཤིག་ཡོད་དུས་དེ་ལ་མི་འཇུག་པ་ནི་མྱོས་པ་ཡིན་པ་རེད། ཆོས་ཉན་ཞིང་ཉན། མན་ངག་ཐོབ་ཅིང་ཐོབ། དོན་གོ་ཞིང་གོ་ལ་བདེ་བ་ཞེས་པ་དེ་ཕྱི་ནས་བཙལ་རྒྱུ་མེད་པར་ནང་ནས་རྙེད་དགོས་པ་ཡིན་ནས་འདུག རིན་ཐང་ཅན་ནི་ཕྱིའི་རྒྱུ་ནོར་མིན་པར་ནང་རང་ཉིད་ཀྱི་མི་ཚེའི་དུས་ཚོད་ཡིན་པར་འདུག དེ་བས་ཀྱང་ནང་གི་བདེ་སྐྱིད་སེམས་ཉིད་ཆོས་སྐུའི་རང་ཞལ་མངོན་དུ་བྱེད་པ་དེ་ཡིན་པར་འདུག་པས། ད་སྔོན་དོན་མེད་ཆུད་ཟོས་སུ་ཤོར་བའི་ལོ་གཅིག་མ་དགོས། ཟླ་བ་གཅིག་གམ། དེ་མ་དགོས་ཞག་གཅིག་གམ། ཆུ་ཚོད་གཅིག་ཙམ་ཡང་ཚུར་ཚེའི་སྣོན་མར་ཉོ་དགོས་བསམ་ན། འཛམ་གླིང་གི་རྒྱུ་ནོར་ཐམས་ཅད་རང་ལ་དབང་ནས་རིན་དུ་བྱིན་ཡང་། ཉོ་རུ་མི་བཏུབ་པས། མི་ཚེའི་རིན་ཐང་དེ་ལྟར་ཡིན་པ་དེ་སྔར་ནས་ཧ་གོ་བ་དང་། འདས་པའི་མི་ཚེའི་དུས་ཚོད་ཡུན་རིང་དེའི་ཚེ་དམ་པའི་ལྷ་ཆོས་རང་གཞན་གཉིས་ཀ་ལ་ཕན་ཐོགས་བྱེད་དེ་འགྲུབ་ཡོད་ན་ཅི་འདྲའི་དོན་ཆེན་ཞིག་འགྲུབ་ཡོད་པར་འདུག་ཨང་། དེ་ལྟར་བསམ་བློ་བཏང་ན་ཨ་ཙ་མ་ཅི་འདྲའི་འཁྲུལ་ན་འཁྲུལ་ལུགས་སྡུག་པོ། གཉིད་མ་བདེ་བའི་རྨི་ལམ་ལྟ་བུའི་འཁྲུལ་རྒྱུ་ཡོད་ཅིང་སད་རྒྱུ་མེད་པ་ཞིག་ཨང་བསམས་ནས་རང་གིས་རང་ལ་ཞེ་ཁྲེལ་འདེབས་དགོས་སའི་ས་ལ་ཐོན་པ་དེ་ཤེས་དགོས་པ་ཡིན། དེའི་སྟེང་དུ་འདེང་བསམ་བློ་ཡང་གཏོང་ཞིག་བྱས་ན། རིག་འཛིན་གང་ཤར་རང་གྲོལ་གྱིས། ད་རེས་ལན་གཅིག་རྙེད་པའི་རྟེན་འདི་ལ། །སྙིང་ནས་དམ་ཆོས་སྒྲུབ་ལ་མ་བརྩོན་ན། །རིན་ཆེན་གླིང་ནས་སྟོང་ལོག་བྱས་པ་ལྟར། །མི་ཚེ་སྟོང་ཟད་ཡིན་ནོ་མཆེད་གྲོགས་ལགས། །ཞེས་གསུངས་པར་ལྟར་ད་ལྟ་འདེང་ཞིག་མ་ཕོག་པར་འདི་བཞིན་མུ་མཐུད་ན། ལུས་ངག་ཡིད་གསུམ་གྱིས་བྱས་ཚད་དྲན་ཚད་ཐམས་ཅད་མི་དགེ་སྡིག་པའི་ལས་ཤ་སྟག་ཡིན་པས། འདི་ལ་མཐའ་འབྲས་ལེགས་པོ་ཞིག་མེད་པ་ནི་ཤེས་གསལ་ཡིན། ཕ་དམ་པས། ཕོ་ངན་མདོ་དོན་ཆེ་ཆུང་ད་རེས་ཤེས། །ཚེ་ལ་སྟོང་ལོག་མ་བྱེད་དིང་རི་བ། །ཞེས་དིང་རི་བརྒྱད་ཅུའི་གདམས་ངག་ལས་དེ་འདྲ་གསུངས་ཡོད། ལས་སྔོན་ནས་དྲན་ན་མཁས་པ་ཡིན། རྗེས་ནས་དྲན་ན་འགྱོད་པ་ཡིན། འགྱོད་པ་ནི་ལས་ཀྱི་ཐ་མ་ཡིན། བུ་ཨེ་བཟང་མི་བཟང་འདེང་ཨེ་ཕོག་མི་ཕོག་བྱ་བ་ཨེ་ཐིག་མི་ཐིག་ནི་ད་རེས་ཡིན། ད་རེས་མེད་དུས་མེད་པ་ཡིན། ལོ་གྲངས་ནམ་ཟླའི་རྩིས་གྲངས་མཛུབ་མགོ་ལ་བཤར་ན་ད་སྔ་འདྲ་ཞིག་ད་འདུག་ཚེ་གང་ན་ཡོད་དེ་མེད་ལ། གལ་སྲིད་ཡོད་ཀྱང་རྒས་ཚེ་སྨད་རང་ལུས་དབང་དུ་མི་འདུས་པའི་དུས་ལ་ཐོན་ཡོད་པས་བྱ་བ་ཆེར་ཞིག་འགྲུབ་པ་མིན་པ་དང་། ལར་མི་ཚེ་ལ་རྟག་བརྟན་མེད་པས་ཚེ་ལྷག་ཅི་ཡོད་མི་ཤེས་པས། གད་མགོ་མཐའ་མགོ་ཞིག་ནས་ལྷུང་ལ་ཁད་པར་བྱས་ནས་རྐྱེན་ངན་པ་ཞིག་དང་ཐུག་རན་ནས་ཡོད་པ་ལའང་ཐང་མེད་པར་བསམས་ནས། ལོང་མེད་རྒྱུད་ལ་བརྟེན་པ་སྡར་མའི་པང་དུ་སྦྲུལ་ཐོན་པ་དང་། སྒེག་མོའི་མགོ་ལ་མེ་ཤོར་བ་ལྟ་བུ་ཞིག་དགོས་པ་ཡིན། གལ་ཏེ་ཚེ་ལོང་མེད་རྒྱུད་ལ་མ་སྐྱེས་ཤིང་དལ་འབྱོར་རང་ལ་ཡོད་པའི་རིན་ཐང་དེ་མ་ཤེས་པར། ཁ་གནམ་དུ་གདང་བཞིན་ཅི་ཡིན་གང་ཡིན་ངོ་མི་འབྱེད་ངོས་མི་ཟིན་ནས་བལྟས་འདུག་ཚེ། འཆི་བདག་གི་ཞགས་པ་སྐེ་ལ་བསྐོན་ནས་བཤའ་ལུག་བཟུང་བ་ལྟར་བྱས་ཚེ་གཞི་ནས་འགྱོད་ཀྱང་འཕྱིས་པ་ཡིན། དེས་ན་ཆོས་ཚིག་རེ་གོ་བའི་གནད་དེ་རང་ཉམས་ལ་ལོན་པར་བྱས་ནས་དོན་ཡོད་པར་གྱིས་མ་གཏོགས་ཉིན་རེ་ཟད་ཀྱང་ཕྱིར་འོང་མེད་པ་ཡིན། དེ་ལྟ་བུའི་ཟད་པ་ནི་མི་ཚེའི་ནང་གི་ཚེ་ཡིན་པས། འཆི་བདག་ཚུར་ཇེ་བཅར་ཡིན། དེ་དུས་རང་མགོ་རང་གིས་མ་ཐོན་ཚེ་གཞན་ཞིག་གིས་འདྲེན་འགྲོ་ཟེར་ཡང་། སངས་རྒྱས་ལས་ལྷག་གི་ཐུགས་རྗེ་ཅན་ཞིག་མེད་ཀྱང་། སེམས་ཅན་ལ་ལས་མེད་དུས་འུ་ཚོ་དྲངས་མ་ནུས། འདྲེན་ཐབས་མེད་ནས་ལྷག་ཡོད་པ་འདི་བཞིན་ཡིན། དེ་དང་འདྲ་བའི་འགྲོ་བ་རིགས་དྲུག་གི་སེམས་ཅན་ཆོས་སྒྲ་རྣ་བས་མ་གོ་བ་ཐར་ལམ་མཐོང་བའི་མིག་ཐོབ་མེད་པ་ཡང་ཅི་འདྲ་མེད། རང་གི་ཁྱིམ་བཟའ་ཚང་། གྲོང་རོགས་ཁྱིམ་མཚེས་ལ་ཁ་བསྐོར་ནས་བསམ་བློ་བཏང་ན། དོན་ཆུང་ལ་ཡེངས་ནས་དོན་ཆེན་ཤོར་བ་གྲངས་ཀྱིས་མི་ཆོད། འཇིག་རྟེན་ཕྱི་མའི་ལམ་ཆེན་ལ་སོང་བའི་རང་གི་མི་ཐོག་སྔོན་མ་དེ་ཚོ་ཡང་། ཤི་སྣང་ཡིད་ལ་མེད་ས་ནས་ཆོས་རྣམ་དག་དགེ་བ་སྣ་གཅིག་སྒྲུབ་མ་ཐུབ་པར་གཤིན་རྗེའི་འཕྲང་ལམ་ལ་བཤར་ནས་ཤི་གསོན་གྱི་ལ་མོ་བརྒལ་བ་ཤ་སྟག་ཡིན། ད་ནི་སེམས་ཅན་ཐམས་ཅད་ལ་སྙིང་མི་རྗེ་ས་ཞིག་མེད་པས་མ་ཚད། དགྲ་གཉེན་གྱི་དབྱེ་བ་ཕྱེ་ཡོང་ས་ཞིག་ཀྱང་མེད་པས། ཚང་མ་ཉམ་ཐག་སྙིང་རྗེའི་ཡུལ་ཁོ་ན་རེད་བསམས་ནས། ལེ་ལོ་དང་ཕྱི་བཤོལ་མེད་པར་ཐོས་བསམ་ལ་རྩེ་གཅིག་གིས་གཞོལ་ནས་གོ་བ་གཏིང་ནས་ལོན་པ་ཞིག་དགོས་པ་ལས། མི་ལས་མེད་ཀྱིས་ཁལ་བཀལ་བ་དང་འདྲ་བར་བྱས་ལོ་ལས་ལོའི་ཁྲལ་འགྲོ་ཁྲལ་འདུག་དང་། འགྲོ་ཞོར་འདུག་ཞོར་ལས་ཞོར་བཅའ་ཞོར་ཞིག་གིས། བྱས་པའི་མཐའ་ལ་གྲུབ་པའི་འབྲས་ཡོད་པ་ཞིག་མི་ཡོང་བའི་ཚུལ་ལ་སོགས་པ་ལ་ལེགས་པར་བསམས་ནས། སྐབས་སུ་བབ་པ་གང་གསན་པར་བྱ་བའི་དམ་པའི་ལྷ་ཆོས་དེ་ནི། རྒྱལ་བའི་བསྟན་པ་ཇི་སྙེད་ཡོངས་རྫོགས་པའི། །གཞུང་བཟང་ཀུན་མཁྱེན་བླ་མས་འཀྲལ་འདི་འདྲ། །འཕགས་བོད་མཁས་པའི་སྐྱེ་བོ་སུ་ཡིས་ཀྱང་། །སྔོན་ཆད་འཛམ་གླིང་ལྗོངས་འདིར་བཞག་པ་མེད། །ཅེས་གསུངས་པ་ལྟར་དུ། ཇི་སྙེད་རྒྱལ་བའི་གསུང་གི་ཟབ་དོན་གྱི་སྙིང་པོ་དྲིལ་བ་མཛོད་ཆེན་བདུན་གྱི་ཆོས་སྐུའི་མཆོད་སྡོང་ཆེན་པོ་ལས། མན་ངག་རིན་པོ་ཆེའི་མཛོད་འདི་ཉིད་འཆད་པའི་སྐབས་ནས་འགའ་ཞིག་སོང་ནས་དེ་རིང་ནི།

༡༡༣ གདམས་ངག་དྲུག་གིས་གནད་དུ་བརྡེག་པ་བསྟན་པ།

གདམས་ངག་དྲུག་གིས་གནད་དུ་བརྡེག་པ་ནི།།

བཟའ་མི་ཚོང་དུས་འགྲོན་པོ་ཚོགས་པ་འདྲ།།

ནམ་འབྲལ་མི་ཤེས་མཐར་ཐུག་དོན་ལ་སྦྱངས།།

གཉེན་འདུན་ལྕང་ཁའི་བྱིའུ་ཆུང་འདུས་པ་འདྲ།།

ནམ་གྱེས་མི་ཤེས་གདུང་སེམས་འཁྲི་བ་ཆོད།།

ཚེ་སྲོག་མི་རྟག་རྩྭ་ཁའི་ཟིལ་པ་འདྲ།།

སྒོམ་སྒྲུབ་ཆོས་ལ་རྩོལ་བ་དྲག་ཏུ་སྐྱེད།།

སྨྲ་མང་འཁྲུལ་བའི་དགྲར་ལྡང་ནེ་ཙོ་འདྲ།།

ངག་འཁྱལ་བྲེ་མོའི་གཏམ་འདྲ་སྨྲ་བཅད་གྱིས།།

ཆོས་སྒྲུབ་མཚོ་གླིང་ནོར་བུ་ལེན་འདྲ་བས།།

སྙན་བརྒྱུད་གདམས་ངག་ལྷུག་པར་སྤེལ་མི་བྱ།།

འགྲོགས་ཡུན་རིང་ན་སངས་རྒྱས་སྐྱོན་མཐོང་བས།།

མི་གཞན་རྣམས་དང་གནས་མལ་གཅིག་མི་བྱ།།

འདི་དག་སྙིང་གཏམ་མཆོག་ཡིན་གུས་པས་ཉོན།།

ཞེས་གསུངས་པ་སྟེ། གདམས་ངག་དྲུག་གིས་ཉམས་ལེན་གྱི་གནད་དུ་བརྡེག་ནས་འཁྲུལ་བའི་སྲོག་གཅོད་པའི་མན་ངག་ནི། ད་ལྟ་ཕ་མ་དང་མིང་སྲིང་ཕུ་ནུ་རུ་བྱས་ནས་བཟའ་ཚང་གཅིག་གི་མི་རུ་མཉམ་དུ་ལས་ཀྱིས་བསྐོས་ནས་གཤིབ་བཞིན་ཡོད་པ་འདི་དག་ཚོང་འདུས་ཀྱི་འགྲོན་པོ་དང་འདྲ་བར་སོ་སོར་ནམ་འབྲལ་མི་ཤེས་པས། ནམ་ཡང་འབྲལ་དུ་མེད་པའི་མཐར་ཐུག་གི་དོན་ལ་སྦྱང་དགོས་པ་སྟེ། དེ་ཡང་ཆོས་པ་རྣམས་ཀྱིས་ཁྱིམ་ཕ་མ་མིང་སྲིང་ལ་སོགས་པ་ལ་དགྲ་དང་འདྲ་བའི་འཛིན་སྟངས་ཀྱིས་འདོར་དགོས་ཞེས་པའི་དོན་མིན་ཏེ། ཕ་མ་ནི་དྲིན་ཆེ་བ་བརྩི་བཀུར་གྱི་ཡུལ་ཡིན་པས་དྲིན་ལེན་འཇལ་དགོས་པའི་ཕྱིར། འོན་ཀྱང་ཕ་མའི་དྲིན་ལེན་ཕ་མ་གཉིས་ཕྲག་ལ་ཁུར་ནས་ས་ཆེན་པོ་ལ་བསྐོར་བ་བྱས་ཀྱང་གསོབ་མིན་པར་བཤད་ཅིང་། འོ་ན་དེ་ཇི་ལྟར་གསོབ་ཅེ་ན། ཆོས་གཅིག་པོས་དྲིན་ལན་གསོབ་པ་ཡིན་པས་ཆོས་ཀྱིས་དྲིན་ལན་འཇལ་དགོས་པ་ཡིན། འོན་ཀྱང་ཁྱིམ་མིའི་ཉེ་འབྲེལ་དང་འབྲལ་མི་ཕོད་པའི་ཞེན་ཆགས་ཡོད་མི་རུང་སྟེ། ཆོས་ཀྱི་བར་ཆད་དུ་འགྲོ་བའི་ཕྱིར། ཕ་མ་རྒྱུ་མཚན་མི་ཤེས་མཁན་ཆོས་ལ་བར་ཆད་བྱེད་མཁན་ཡང་ཡོད་སྲིད་པ་རེད། དེས་བར་ཆད་བྱེད་པའི་དུས་སུ་ཕ་མ་ཡིན་ཡང་མི་ཉན་པར་རང་གཞན་གཉིས་ཀའི་དོན་དུ་མཐར་ཐུག་གི་དོན་ལ་སྦྱོང་དགོས་པ་དེས་ན་ཐེག་པ་ཆེན་པོའི་ལམ་ལ་བསླབས་ནས་སྦྱོང་དགོས་སོ། །བཟའ་ཚང་མི་རྟག་ཚོང་འདུས་ཀྱི་འགྲོན་པོ་དང་འདྲ་བ་ནི་ཇི་ལྟར་ཡིན་ན། གཏམ་པདྨའི་ཚལ་གྱི་ཟློས་གར་ལས། གསེར་གྱི་སྦྲང་ཆུང་པདྨའི་འདབ་ཡངས་དང་། གཡུའི་སྦྲང་ཆུང་པདྨའི་ངག་སྙན་གཉིས་སྐྱེད་ཚལ་མེ་ཏོག་གི་གླིང་ནས་རྩེད་འཇོ་རོལ་བཞིན་པའི་སྐབས་སུ། གློ་བུར་དུ་ནམ་མཁར་སྤྲིན་ནག་འཁྲིགས་ཤིང་སེར་དྲག་ཐར་ཐོར་བབས་ནས། གཡུའི་སྦྲང་ཆུང་ངག་སྙན་པདྨའི་འདབ་མའི་སྦུབས་སུ་འཐུམ་ནས་ཤི་གསོན་གཉིས་ཀྱི་ས་མཚམས་སུ་ཐོན་ཏེ། ཕྱིན་ཆད་ཐུག་ཏུ་མེད་པའི་ཡུལ་དུ་འགྲོ་རན་དུས། གསེར་གྱི་སྦྲང་ཆུང་འདབ་ཡངས་ཀྱིས། གློ་བུར་འཆི་བདག་བདུད་པོ། །སྔོན་མ་ཁོང་ལ་སླེབས་སོང་། །ངེད་ལ་ནམ་ཙམ་སླེབ་ཡོང་། །མཁྱེན་ནོ་བླ་མ་མཁྱེན་ནོ། །ཞེས་དང་། ལས་ཀྱིས་འབྲེལ་བའི་བརྩེ་གདུང་གི་ཟླ་གྲོགས། །བར་དོའི་ཡུལ་ན་ད་ལྟ་ཙམ་ལུས་ཡོད། །ཤི་ན་རེ་ས་ལྷ་ཆོས་ལས་མི་འདུག །ཕན་པའི་ལྷ་ཆོས་རང་བྱས་ཤིག་མེད་ན། །འགྱོད་ཀྱང་ནོར་གྱིས་ཉོ་རྒྱུ་ནི་མི་འདུག །ཅེས་པ་མཐར་ཐུག་རེ་ས་དམ་པའི་ལྷ་ཆོས་ལས་མེད་པར་བསྟན་པ་ཡིན། མཐར་ཐུག་གི་དོན་ཆོས་ཉིད་ཟབ་མོའི་གནད་ལ་སྦྱངས་ནས་ཕྱིན་ཆད་འཁོར་བ་འཁྱམས་མི་དགོས་པ་མ་ཟད་གཞན་སེམས་ཅན་འདྲེན་ཐུབ་པའི་གནད་ཤེས་པར་བྱ་དགོས་པ་དང་། གཉེན་ཉེ་བ་དང་འདུན་གྲོས་བྱེད་ས་ཐམས་ཅད་ནི་ལྕང་སྡོང་ཞིག་གི་ཁ་ལ་བྱིའུ་ཆུང་འདུས་པ་དང་འདྲ་བར། སྐབས་ཤིག་འཛོམས་ཀྱང་ཡུན་རིང་མི་བརྟན་པར་རང་རང་སོ་སོའི་གནས་སུ་འཕུར་བ་ལྟར་ནམ་གྱེས་སམ་ནམ་ཁ་འབྲལ་བར་མི་ཤེས་པས། གཉེན་བཤེས་ལ་གདུང་བའི་སེམས་ཀྱི་འཁྲི་བ་དང་འབྲེལ་ཐག་ཆོད་ཅིག སྐྱེས་བུའི་ཚེ་སྲོག་མི་རྟག་པ་ནི་དཔེ་རྩྭ་ཁའི་ཟིལ་པ་དང་འདྲ་ཞིང་། དེ་ཡང་ཚེ་མི་རྟག་པ་ནི་ཁ་བཤད་ཙམ་མིན་པར་ནམ་འཆི་ཆ་མེད་ཀྱི་ངེས་ཤེས་ནང་ནས་འདྲོངས་ཏེ་འཇིག་རྟེན་འདི་སྣང་གི་བྱ་བ་བྱེད་ཟེར་ན་ཞེ་མེར་བ་ཞིག་དགོས་པས། ཕྱི་བཤོལ་རྟག་འཛིན་ཆེ་བ་ནི་ལོང་མེད་རྒྱུད་ལ་མ་སྐྱེས་པས་ལན་པ་ཡིན། དེས་ན་ཚེ་མི་རྟག་པ་ལ་སྦྱོང་སྟེ་བསྒོམས་ན། སྒོམ་སྒྲུབ་གང་བྱེད་དགོས་ཀྱང་འགྲུབ་པ་ཡིན་པས་ཆོས་ལ་རྩོལ་བ་དྲག་ཏུ་སྐྱེད་པ་སྟེ། འདིར་ཐོས་བསམ་མི་གསུང་པར་སྒོམ་སྒྲུབ་གསུངས་པ་ནི་ཐ་མའི་གནད་ལ་སྒོམ་སྒྲུབ་གཙོ་ཆེ་བ་དང་ཐོས་བསམ་ཡང་སྒོམ་སྒྲུབ་ཀྱི་ཆེད་དུ་ཡིན་པར་བསྟན་པ་དང་། སྒོམ་སྒྲུབ་ལ་བརྟེན་ནས་འབྲས་བུ་ཉམས་ལེན་གྱི་རྩལ་ཤུགས་རྒྱས་ཞིང་བརྟན་པ་ཐོབ་པ་ནི་ཤུགས་ཀྱིས་བསྟན་པ་ཡིན་ནོ། །སྨྲ་བ་མང་པོའི་གཏམ་བཤད་མང་དྲགས་ན་འཁྲུལ་བའི་དགྲ་བོ་བསྐྱེད་པ་ཡིན་པས། ངག་འཁྱལ་བྲེ་མོའི་གཏམ་ཆགས་སྡང་སློང་བར་བྱེད་པའི་གཏམ་མ་སྨྲ་བར་ངག་བསྡམས་ནས་སྨྲ་བཅད་གྱིས་ཤིག ཆོས་ཟབ་མོ་སྒྲུབ་པ་ནི་རྒྱ་མཚོའི་གླིང་ནས་ནོར་བུ་ལེན་པ་དང་འདྲ་བས་ན་རྫོགས་ཆེན་གྱི་གདམས་ངག་ཆིག་བརྒྱུད་སྙན་ནས་སྙན་དུ་བརྒྱུད་པའི་གདམས་ངག ལྐུགས་པ་དང་འདྲ་བའི་སྣོད་ངན་ལ་ལྷུག་པར་སྤེལ་བར་མི་བྱ། འགྲོགས་པའི་ཡུན་རིང་ན་སངས་རྒྱས་ལ་སྐྱོན་མེད་ཀྱང་། རྨོངས་པ་མ་རིག་པས་བསྒྲིབས་པའི་དབང་གིས་སངས་རྒྱས་ལ་ཡང་སྐྱོན་ཡོད་པར་མཐོང་བ་དཔེ་ལེགས་སྐར་དང་ལྷས་སྦྱིན་ལྟ་བུ་ཡིན་ན། གང་ཟག་ཕལ་བ་སྐྱོན་ཅན་དང་མཉམ་དུ་བསྡད་དུས་གཅིག་གིས་གཅིག་ལ་སྐྱོན་མཐོང་བ་ཡིན་པས། མི་གཞན་རྣམས་དང་གནས་མལ་གཅིག་མི་བྱ་ཞིང་འགྲོགས་ཡུན་མི་རིང་བར་བྱེད་པ་སྟེ། འདི་དག་སྙིང་གཏམ་མཆོག་ཡིན་གུས་པས་ཉོན་ལ་དང་དུ་ལོངས་ཤིག་ཅེས་སོ།།

༡༡༤ ཆོས་བྱེད་རྣམས་ཀྱི་དུས་ཚོད་རྣམ་དྲུག་བསྟན་པ།

ཆོས་བྱེད་རྣམས་ཀྱི་དུས་ཚོད་རྣམ་དྲུག་ནི།།

མཚན་ལྡན་བླ་མ་རྣམས་དང་ཕྲད་པའི་ཚེ།།

སྤྲོས་པ་གཅོད་པའི་དུས་ཡིན་ཐེ་ཚོམ་དྲིས།།

རྐྱེན་ངན་ཡུལ་དང་རིག་པ་ཕྲད་པའི་ཚེ།།

ཉམས་ལེན་བསྲེ་བའི་དུས་ཡིན་རྩལ་སྦྱོང་གྱིས།།

ཟབ་མོའི་སྙན་བརྒྱུད་མན་ངག་རྙེད་པའི་ཚེ།།

འཁྲུལ་བ་འཇིག་པའི་དུས་ཡིན་ཐོག་ཏུ་ཁོལ།།

བརྩོན་འགྲུས་དྲག་པོས་སྒྲུབ་ལ་འབད་པའི་ཚེ།།

བར་ཆད་འོང་བའི་དུས་ཡིན་བདུད་ལ་བརྟག།

སྒྲུབ་པའི་མཐར་ཕྱིན་དངོས་གྲུབ་འོང་བའི་ཚེ།།

བདུད་ཀྱི་བར་ཆད་འོང་བས་ཤིན་ཏུ་གཟབ།།

གནས་ལུགས་དོན་ལ་ལྟ་བའི་རྩལ་སྦྱོང་ཚེ།།

གོལ་སྒྲིབ་འོང་བའི་དུས་ཡིན་བླ་མ་བསྟེན།།

འདི་དག་ཟབ་མོའི་གནད་ཡིན་ཡིད་ལ་ཟུངས།།

ཞེས་གསུངས་པ་སྟེ། ཆོས་བྱེད་པ་རྣམས་ཀྱི་དུས་ཚོད་ཤོར་མི་རུང་བ་རྣམ་པ་དྲུག་ནི། མཚན་ཉིད་དང་ལྡན་པའི་དགེ་བའི་བཤེས་གཉེན་བླ་མ་དམ་པ་རྣམས་དང་ཕྲད་པར་དཀའ་བས། ད་རེས་ལན་གཅིག་ཕྲད་པའི་སྐབས་སུ་སྤྲོས་པའམ་མི་ཤེས་པའི་ཐེ་ཚོམ་གྱི་སྒྲོ་འདོགས་གཅོད་པའི་དུས་ཡིན། དེས་ན་ཐེ་ཚོམ་གྱི་དྲི་བ་ཡོད་ན་དྲིས་ལ་བརྡར་ཤ་ཆོད་ཅིག རྐྱེན་ངན་ཐོག་བབས་ཀྱིས་ཡུལ་དང་རིག་པ་ཕྲད་པའི་དུས་སུ། རྐྱེན་ངན་ལམ་དུ་བསླངས་ནས་རིག་པ་བོགས་འདོན་པའི་ཉམས་ལེན་གྱི་གནད་ལ་བསྲེ་བའི་དུས་ཡིན་པས། རིག་པའི་རྩལ་སྦྱོང་སྣང་རིག་ངོས་བཟུང་དང་བྲལ་བ་ཡུལ་སྣང་ཐུག་ཕྲད་ཀྱི་ཉམས་ལེན་ལ་བརྩོན་པར་གྱིས་ཤིག གལ་ཏེ་ལས་དང་པོ་བའི་གང་ཟག་ཡིན་ན་སྣང་བ་བསླུ་སྐྱེན་རིག་པ་ཅོལ་ཆུང་བས་རྐྱེན་ཁར་འཆོལ་བ་ལ་གཟབ་དགོས་པ་དང་། བླ་མ་དམ་པ་ལས་ཞལ་ནས་སྙན་དུ་བརྒྱུད་པའི་མན་ངག་ཟབ་མོ་དང་ཕྲད་ནས་རྙེད་པའི་ཚེ། འཁྲུལ་བ་འཇིག་པར་བྱེད་པའི་དུས་ཡིན་པས་ཉམས་ལེན་གནད་ཐོག་ཏུ་ཁོལ་ཅིག བརྩོན་འགྲུས་དྲག་པོས་སྒྲུབ་ལ་འབད་པའི་དུས་སུ་བར་ཆད་འོང་བ་ཡིན་ཏེ། བརྩོན་འགྲུས་མ་ཐུབ་ནས་རང་རྒྱུད་ཐ་མལ་དུ་གནས་དུས་བདུད་ཀྱི་དབང་དུ་གྱུར་ཚར་བ་ཡིན་པས། དེ་ལ་བདུད་ཀྱི་བར་ཆད་བྱེད་དགོས་པ་མིན་པའི་ཕྱིར། དེས་ན་སྒྲུབ་པ་ལ་འབད་པའི་ཚེ། བར་ཆད་ཡོང་བའི་དུས་ཡིན་པས། འཕེལ་འགྲིབ་ཉམས་ཀྱི་རྟགས་དང་། མི་འགྱུར་གསང་བའི་རྟགས་དང་། བར་ཆད་བདུད་ཀྱི་རྟགས་རྣམས་གང་ཡིན་ལེགས་པར་བརྟགས་ནས་འབྱེད་དགོས། སྒྲུབ་པ་བྱས་ནས་གྲུབ་པའི་འབྲས་བུ་མཐར་ཕྱིན་ནས་དངོས་གྲུབ་བྱུང་བའི་ཚེ། ཆོས་ཟབ་ཙ་ན་ནག་པོའི་བདུད་ཀྱང་ཟབ་ཅེས་པ་ལྟར་དུ། བདུད་དགའ་རབ་དབང་ཕྱུག་གིས་རྒྱལ་བའི་གདུང་འཛིན་པ་ཞིག་ཡོང་བར་འདུག་བསམས་ཕྲག་དོག་གིས་བར་ཆད་རྩོམ་པ་བྱེད་པས། དེ་དུས་བླ་མའི་མན་ངག་དྲན་པར་བྱས་ནས་ཤིན་ཏུ་གཟབ་པར་བྱ་བ་དང་། ཆོས་ཉིད་བསམ་གྱིས་མི་ཁྱབ་པའི་གནས་ལུགས་ཟབ་མོའི་དོན་ལ་ལྟ་བའི་རྩལ་སྦྱོང་བའི་ཚེ། གོལ་ཤོར་ནོར་གསུམ་གྱི་འཕྲང་ལས་བརྒལ་དགོས་པས་གོལ་སྒྲིབ་འོང་བའི་དུས་ཡིན། དེ་དུས་བླ་མ་བསྟེན་ནས་གེགས་སེལ་གྱི་གདམས་ངག་ཞུ་དགོས་པ་སྟེ། འདི་དག་ཟབ་མོའི་གནད་ཀྱི་ཞལ་གདམས་ཡིན་པས་ཡིད་ལ་ངེས་པར་ཟུངས་ཤིག་ཅེས་པའོ།།

༡༡༥ ཚུལ་བཞིན་བསྒྲུབ་པའི་བྱ་དགོས་རྣམ་དྲུག་བསྟན་པ།

ཚུལ་བཞིན་བསྒྲུབ་པའི་བྱ་དགོས་རྣམ་དྲུག་ནི།།

ངན་སྤྱོད་འགོ་ཅན་མི་དང་འགྲོགས་མི་བྱ།།

བཟང་སྤྱོད་བསླབ་དཀའ་བཤེས་གཉེན་བསྟེན་པར་བྱ།།

སྣང་བ་འབྲིད་མཁས་ཡུལ་ལ་མ་ཡེངས་བྱ།།

རིག་པ་ཅོལ་ཆུང་འཁྲུལ་ཕྱིར་མ་སོང་བྱ།།

ཆགས་སྡང་དོས་དྲག་ཕྱོགས་རིས་མ་སོང་བྱ།།

འཁྲུལ་སྣང་འདྲིས་སླ་ཞེན་ཆགས་རྩད་གཅོད་བྱ།།

ཞེས་གསུངས་པ་སྟེ། ཚུལ་བཞིན་དུ་བསྒྲུབ་དགོས་པའི་བྱ་བ་རྣམ་པ་དྲུག་ནི། སོ་སོ་སྐྱེ་བོ་ཐ་མལ་པ་དེ་འཁོར་བའི་གནས་སུ་འཁྱམས་ཡུན་རིང་ཞིང་འཁྲུལ་སྣང་གི་བག་ཆགས་འཐུག་དྲགས་པའི་དབང་གིས་ངན་སྤྱོད་དང་ཕྲད་ཚེ་ཆུ་ཐུར་བབས་པ་བཞིན་དུ་འཇུག་ཅིང་། རིམས་ནད་བཞིན་དུ་འགོ་སླ་བ་ཡིན་པས། དང་པོ་ཉིད་ནས་དེ་འདྲའི་མི་དང་མི་འགྲོག་པར་ཐག་རིང་བར་བྱ་བ་དང་། བཟང་སྤྱོད་ནི་བསླབ་ཀྱང་ཤེས་དཀའ་བས་ངན་པའི་མི་དང་མི་འགྲོག་པས་མ་ཚད་བཤེས་གཉེན་དམ་པ་ལ་བསྟེན་པར་བྱ་བ་དང་། ཕྱིའི་འདོད་ཡོན་གྱི་སྣང་བ་འདི་བསླུ་བྲིད་བྱེད་པར་མཁས་པས་ཡུལ་ལ་མ་ཡེངས་བར་བྱ་དགོས་པ་ལས། མིག་གཟུགས་ལ་ཆགས་ན་ཕྱེ་ལེབ་མར་མེའི་འོད་ལ་ཆགས་པ་ལྟ་བུ་རུ་འགྱུར་བ་ལ་སོགས་པ་ཡིན་པས་སོ། །ཐ་མལ་པའི་རིག་པ་འདི་ཅོལ་ཆུང་བ་ཡིན་པས། བསླབ་པ་ཆུང་རིམ་ནས་བསྲུངས་ཏེ་འཁྲུལ་བའི་ཡུལ་ཕྱིར་མ་སོང་བར་བྱ། ཆགས་སྡང་ཤུགས་ཆེ་ནས་དོས་དྲག་པོར་སོང་ན་དེའི་དབང་གིས་ཕྱོགས་རིས་ཅན་དུ་འགྲོ་བས་དེ་ལྟར་མ་སོང་བར་བྱ་བ་ལས། ཆོས་ལ་ཕྱོགས་རིས་བྱས་ན་ཆོས་སྤོང་གི་ལས་བསགས་པ་ལ་སོགས་པའི་ཉེས་པ་ཡོང་བ་ཡིན་ཕྱིར། འཁྲུལ་སྣང་ཚུལ་མིན་ཡིད་བྱེད་ཀྱི་ཀུན་རྟོག་དེ་འདྲིས་སླ་བས་དེ་ལ་ཞེན་ཅིང་ཆགས་པ་རྩད་ནས་གཅད་པར་བྱ་དགོས་མ་གཏོགས་ངན་རྟོག་དེས་སྣ་ཁྲིད་ནས་ནོར་བ་ངན་པ་ཡོང་བ་ཡིན་ནོ།།

༡༡༦ ཐ་མ་འགྱོད་པ་མེད་པའི་ཆོས་དྲུག་བསྟན་པ།

ཐ་མ་འགྱོད་པ་མེད་པའི་ཆོས་དྲུག་ནི།།

ངོ་ཚ་ཁྲེལ་འཛེམ་ལྡན་པས་ཤི་ཡང་འགྱོད་པ་མེད།།

མི་དགེ་སྡིག་པ་མ་བྱས་ཤི་ཡང་འགྱོད་པ་མེད།།

ཆོས་ཕྱོགས་ཟས་ནོར་བཏང་བས་ཤི་ཡང་འགྱོད་པ་མེད།།

བསླབ་གསུམ་གཙང་མ་བསྲུངས་པས་ཤི་ཡང་འགྱོད་པ་མེད།།

དགེ་ལ་རྟག་ཏུ་བརྩོན་པས་ཤི་ཡང་འགྱོད་པ་མེད།།

རང་སེམས་གནོང་འགྱོད་མེད་པས་ཤི་ཡང་འགྱོད་པ་མེད།།

འདི་དག་རྣམས་དང་ལྡན་པར་བྱ་བ་གཅེས།།

ཞེས་གསུངས་པ་སྟེ། ཐ་མ་འགྱོད་པ་མེད་པའི་ཆོས་དྲུག་ནི། རང་ངོས་ནས་ངོ་ཚ་བ་དང་གཞན་ངོས་ནས་ཁྲེལ་ཡོད་པ་དང་ལྡན་པས་ནི་དལ་འབྱོར་དོན་ཡོད་པར་བྱས་པས་དེ་འདྲ་དེ་ནི་ཤི་ཡང་འགྱོད་པ་མེད་པ་ཡིན་པ་དང་། །མི་དགེ་སྡིག་པ་མ་བྱས་པ་ཡང་ཤི་ཡང་འགྱོད་པ་མེད་པ་སྟེ། དེ་ཡང་སྡིག་པ་གཏན་ནས་བྱེད་མ་མྱོང་བ་ནི་དཀའ་ཡང་། སྡིག་པ་བྱས་པ་བཤགས་ཤེས་པའི་མི་ཡང་སྡིག་པ་མ་བྱས་པ་དང་ཕྱོགས་མཚུངས་པ་ཡིན་ནོ། །ཆོས་ཀྱི་ཕྱོགས་ལ་ཟས་ནོར་བཏང་བ་དག་གིས་ཕྱི་མར་ཁྱེར་རྒྱུའི་རྒྱགས་ཆས་ཀྱི་ཉེར་བསྡོགས་གྲུབ་ཟིན་པས་ཤི་ཡང་འགྱོད་པ་མེད་པ་ཡིན་པ་དང་། ལར་རྒྱུ་ནོར་ཆོས་ཕྱོགས་སུ་བཏང་ནས་སྤྲང་པོར་གྱུར་པ་ཞིག་མི་སྲིད་པས་མ་ཚད་དེའི་རྐྱེན་གྱིས་ཕྱུག་ཆེས་ནས་རྒྱུ་བདག་པོ་མ་ཐུབ་པའི་ལོ་རྒྱུས་ཡོད་པ་ཡིན། གལ་ཏེ་ཆོས་ཕྱོགས་ལ་བཏང་ནས་རྒྱུ་མེད་དུ་ཆགས་ཀྱང་དེ་བས་ལྷག་པ་ཡིན་ཏེ། ནོར་ལས་ནོར་གྱི་སྙིང་པོ་བླངས་ཟིན་པ་ཡིན་པའི་ཕྱིར། དེས་ན་གྲྭ་བ་བན་རྒན་ཞིག་ཡིན་ཚེ་ལྷག་ཏུ་རྒྱུ་ནོར་ཆོས་ཕྱོགས་སུ་གཏོང་དགོས་པ་ཡིན། ཤི་དུས་ཤུལ་ན་ཁྲི་མང་པོའི་རྩ་བ་ཡོད་ན་བཙོག་པ་ཡིན། དེས་ན་ཟས་ནོར་ཆོས་ཕྱོགས་ལ་གཏོང་པ་ལས་དོན་མེད་དུ་འཕྲོ་བརླག་བྱེད་མི་རུང་། སོ་བྱང་སྔགས་ཀྱི་བསླབ་གསུམ་གཙང་མ་བསྲུངས་པས་གནས་སྐབས་སུ་མཐོ་རིས་ཀྱི་ཡོན་ཏན་བདུན་གྱིས་ཕྱུག་ཅིང་། མཐར་ཐུག་ཐར་བ་དང་ཐམས་ཅན་མཁྱེན་པའི་གོ་འཕང་ཐོབ་པ་ཡིན་པས་ཤི་ཡང་འགྱོད་པ་ཅིའི་ཕྱིར་ཡོད་དེ་མེད་དོ། །དུས་རྟག་ཏུ་དགེ་སྦྱོར་ལ་བརྩོན་པས་ཤི་ཡང་འགྱོད་པ་མེད་དེ་འདི་དང་ཤི་མ་བར་དོ་གསུམ་གང་རུང་ལ་ཐར་བའི་རིགས་ཅན་ཡིན་པས་སོ། །རྒྱལ་བ་སྲས་དང་བཅས་པ་ཡེ་ཤེས་ཀྱི་སྤྱན་དང་ལྡན་པ་དེ་དག་གི་མདུན་ནས་གནོང་འགྱོད་མེད་པ་དང་། ཐུགས་མཁྱེན་པའི་བདག་པོ་བླ་མ་དམ་པ་ད་ལྟ་ཞལ་མཇལ་ཡང་ཁྱོད་ཀྱིས་དེ་དུས་དྲན་ལུགས་ལས་ལུགས་མ་ལེགས་པར་གསུང་རྒྱུ་མེད་པར་རང་བློ་རང་ལ་ཁེལ་བ་ཞིག་བྱུང་ན་རང་སེམས་གནོང་འགྱོད་མེད་པ་ཡིན་པས་ཤི་ཡང་འགྱོད་པ་མེད་པ་སྟེ། དེ་ཡང་རབ་ལྷ་དང་བླ་མའི་མདུན་ན་མི་གནོང་མི་འགྱོད། འབྲིང་རང་སེམས་གཙང་མའི་ངོས་ནས་མི་གནོང་མི་འགྱོད། ཐ་མ་གྲོགས་ཀྱི་སྔོན་ནས་མི་གནོང་མི་འགྱོད་པ་ཞིག་དགོས་པ་ཡིན། འགྱོད་མེད་ཀྱི་བྱ་བ་འདི་དག་འགྲུབ་པ་དང་ལྡན་པར་བྱ་བ་ནི་ཤིན་ཏུ་གཅེས་སོ།།

༡༡༧ འབྲིང་གི་བྲོད་པ་དྲུག་དང་ལྡན་པ་བསྟན་པ།

འབྲིང་གི་བྲོད་པ་དྲུག་དང་ལྡན་པ་ནི།།

དཀོན་མཆོག་བསྟེན་པས་འཁོར་བ་སྐྱོབ་རེ་བྲོད།།

ཚོགས་གཉིས་བསགས་པས་འདི་བས་བདེ་སྟེ་བྲོད།།

དམ་ཚིག་བསྲུངས་པས་མཁའ་འགྲོས་བསུ་སྟེ་བྲོད།།

ཡི་དམ་བར་དོར་ལམ་སྣ་འདྲེན་ཏེ་བྲོད།།

བླ་མ་མཆོག་དང་འདུ་འབྲལ་མེད་དེ་བྲོད།།

སེམས་ཉིད་གོམས་པས་འོད་གསལ་འཆར་ཏེ་བྲོད།།

འདའ་དཀའ་འཆི་བྲོད་གདམས་པ་ཟབ་མོ་ཡིན།།

ཞེས་གསུངས་པ་སྟེ། བྲོད་ཅེས་པ་ནི་དངངས་སྐྲག་མེད་པའི་དཔའ་གདེང་དང་སྤོབས་པ་ཡོད་པ་ལ་གོ་ཞིང་། བླ་མ་དཀོན་མཆོག་གསུམ་པོ་བསྟེན་པས་ན་འཁོར་བ་ལས་སྐྱོབ་ཏུ་རེ་བ་ལྟར་དུ་བྲོད་པ་སྟེ་གདེང་ཡོད་པ་ཡིན། བསོད་ནམས་ཡེ་ཤེས་ཀྱི་ཚོགས་གཉིས་བསགས་པས་རྒྱུ་སྔོན་སོང་གི་འབྲས་བུ་ཚེ་འདི་བས་ཕྱི་མར་བདེ་སྟེ། བདེ་ལེགས་ཀྱི་གནས་སུ་འགྲོ་བའི་བྲོད་པ་ཡོད་པ་དང་། སྔགས་ཀྱི་དམ་ཚིག་བསྲུངས་པས། པདྨའི་ཕོ་ཉ་མཁའ་འགྲོ་གར་མཁན་མས༔ མངོན་སུམ་ལག་པའི་ཁུ་ཚུར་ནས་བཟུང་ནས༔ མཁར་ཆེན་བཟའ་དང་གུ་ཎ་ནཱ་ཐ་ལྟར༔ བདག་ཀྱང་པདྨ་འོད་དུ་འཁྲིད་པར་ཤོག༔ ཅེས་སྨོན་ལམ་བཏབ་པ་བཞིན་དུ་ཤི་མ་ཤི་གཉིས་ཀྱི་ས་མཚམས་ནས་མཁའ་འགྲོས་བསུས་ཏེ་ཞིང་ཁམས་སུ་བགྲོད་པའི་བྲོད་པ་སྟེ་དཔའ་གདེང་ཡོད་པ་དང་། ཡི་དམ་གྱི་བསྐྱེད་རིམ་གསལ་སྣང་བརྟན་པས་བར་དོར་ཡི་དམ་དེ་ཉིད་ཀྱི་སྐུའི་རྣམ་པས་ལམ་སྣ་འདྲེན་ཏེ་སྐྲག་མི་དགོས་པའི་བྲོད་ཚད་ཡོད་པ་དང་། རང་སེམས་བླ་མར་ཤེས་པས་བླ་མའི་ཐུགས་དུས་གསུམ་སངས་རྒྱས་ཐམས་ཅད་ཀྱི་དགོངས་པ་དང་དབྱེར་མེད་པ་དེ་ཉིད་དང་རང་སེམས་བསྲེས་ནས་ཐུགས་ཡིད་དབྱེར་མེད་ཀྱི་བླ་མའི་རྣལ་འབྱོར་ལ་གོམས་ན། བླ་མའི་སྐུ་གང་ན་བཞུགས་དང་མི་བཞུགས་ཀྱི་ཁྱད་པར་མེད་པས་སྐད་ཅིག་ཀྱང་འབྲལ་བར་མེད་པ་དེས་ན་བྲོད་པ་སྟེ་གློ་བ་སྐྱིད་སེམས་འཚེངས་ཞེས་པ་ཞིག་ལ་གོ་ནའང་ཆོག་གོ །སེམས་ཉིད་འོད་གསལ་གྱི་གནད་ལ་གོམས་པས་འོད་གསལ་རང་ངོ་ལ་འཆར་ཏེ་བྲོད་པ་སྐྱེ་བ་ཡིན་པ་དང་། འདའ་དཀའ་འཕོ་བའི་གདམས་པ་ཡོད་ན་འཆི་བྲོད་ཀྱི་གདམས་པ་ཟབ་མོ་ཡིན་ལ། དེ་བཞིན་དུ་མདོ་ཕྱོགས་ཀྱི་རྗེས་དྲན་དྲུག་དང་སྔགས་ཀྱི་བར་དོའི་གདམས་པ་ཐམས་ཅད་ཀྱང་དཔེ་དེ་བཞིན་ཡིན་ནོ།།

༡༡༨ རྣལ་འབྱོར་རབ་ཀྱི་འཆི་རྒྱུ་མེད་དྲུག་བསྟན་པ།

རྣལ་འབྱོར་རབ་ཀྱི་འཆི་རྒྱུ་མེད་དྲུག་ནི།།

རང་རིག་དགོངས་པ་ཡེ་ནས་འཆི་རྒྱུ་མེད།།

རང་བྱུང་ཡེ་ཤེས་ཡེ་ནས་འཆི་རྒྱུ་མེད།།

འོད་གསལ་ཆོས་ཉིད་ཡེ་ནས་འཆི་རྒྱུ་མེད།།

ངར་འཛིན་རིག་བྲལ་ཡེ་ནས་འཆི་རྒྱུ་མེད།།

རྒྱུ་འབྲས་ལ་དོར་ཡེ་གྲོལ་འཆི་རྒྱུ་མེད།།

རེ་དོགས་གཉིས་མེད་ནམ་མཁའ་འཆི་རྒྱུ་མེད།།

དེ་ལྟར་རྟོགས་ན་འཆི་བདག་བདུད་དང་བྲལ།།

ཞེས་གསུངས་པ་སྟེ། རྣལ་འབྱོར་རབ་ཀྱི་དགོངས་རྒྱུད་ལ་མངའ་བའི་འཆི་རྒྱུ་མེད་པ་རྣམ་པ་དྲུག་ནི། རང་རིག་གི་དགོངས་པ་དུས་གསུམ་སྐྱེ་འགག་དང་བྲལ་བ་ཡེ་ནས་རང་རྒྱུད་ལ་ཡོད་པ་དེ་ཉིད་རྟོགས་པ་ནི་ཡེ་ནས་འཆི་རྒྱུ་མེད་པ་དང་། རང་བྱུང་གི་ཡེ་ཤེས་རྒྱུ་རྐྱེན་དང་བྲལ་བ་ཡེ་ནས་སྐྱེ་འགག་གནས་གསུམ་དང་བྲལ་བས་འཆི་རྒྱུ་མེད་པ་དང་། འོད་གསལ་གྱི་ཡེ་ཤེས་ཆོས་ཉིད་མཚན་མ་དང་བྲལ་བ་ནམ་མཁའ་ལྟ་བུ་ལ་ཡེ་ནས་འཆི་རྒྱུ་མེད་པ་དང་། རིག་བྱ་རིག་བྱེད་དང་བྲལ་བའི་རིག་པ་ལ་ཡེ་ནས་འཆི་རྒྱུ་མེད་པ་དང་། རྒྱུ་འབྲས་ལ་དོར་ཅིང་སྤང་བླང་མཚན་མ་དང་བྲལ་བའི་དོན་རྟོགས་ན་ཡེ་གྲོལ་ཡིན་ལ། ཡེ་གྲོལ་ལ་གསར་དུ་གྲོལ་འཁྲུལ་མེད་པས་འཆི་རྒྱུ་མེད་པ་དང་། རེ་དོགས་གཉིས་སུ་མེད་པ་འདུས་མ་བྱས་སྐུ་ནམ་མཁའ་ལྟ་བུ་ལ་འཆི་རྒྱུ་མེད་པའམ། རེ་དོགས་བྲལ་བའི་བྱ་བྲལ་ནམ་མཁའི་རྣལ་འབྱོར་གྱི་དགོངས་པ་ཟང་ཐལ་ཆེན་པོ་ལ་ཡེ་ནས་འཕོ་འགྱུར་མེད་པས་ན་དེ་ལ་འཆི་རྒྱུ་མེད་པ་སྟེ། དེ་ལྟར་རྟོགས་ན་འཆི་བདག་གི་བདུད་དང་བྲལ་བ་ཡིན་ནོ།།

༡༡༩ མ་རྟོགས་དངོས་པོར་བཟུང་བའི་སྐྱོན་དྲུག་བསྟན་པ།

མ་རྟོགས་དངོས་པོར་གཟུང་བའི་སྐྱོན་དྲུག་ནི།།

རང་ལ་ཡོད་པ་བཞག་ནས་གཞན་དུ་བཙལ།།

སྒོམ་ཆེན་གནས་ལུགས་མ་ཤེས་མཚན་མས་བཅིངས།།

ཡུལ་སྣང་བརྫུན་པར་མ་ཤེས་བདེན་པར་འཛིན།།

དབྱིངས་གཅིག་གནས་ལུགས་མ་རྟོགས་སོ་སོར་འཛིན།།

རང་རིག་ངོ་བོ་མ་ཤེས་མཐོ་དམན་བགྲོད།།

འཁྲུལ་བའི་མངོན་ཞེན་མ་ཆོད་བདུད་ཀྱིས་བསླུས།།

མ་རྟོགས་ལོག་པའི་སྐྱོན་རྣམས་བརྟགས་ཏེ་སྤང༌།།

ཞེས་གསུངས་པ་སྟེ། མ་རྟོགས་པར་དངོས་པོ་དང་མཚན་མར་གཟུང་བའི་སྐྱོན་དྲུག་ནི། སངས་རྒྱས་རང་ལ་ཡོད་པ་དེ་རང་ངོ་ཨེ་ཤེས་མ་བལྟས་པར་བཞག་ནས་གཞན་དུ་བཙལ་བ་སྟེ་ས་ལམ་གཞན་ནས་འཚོལ་བའི་ངལ་བ་བྱས་པ་དང་། མིང་སྒོམ་ཆེན་ཡིན་ཡང་དོན་གནས་ལུགས་དོན་གྱི་བཞུགས་ཚུལ་དེ་མ་ཤེས་ནས་མཚན་མའི་རྣམ་རྟོག་གིས་བཅིངས་ནས་གྲོལ་བའི་དུས་མེད་པའི་སར་ལྷུང་བ་དང་། ཕྱིའི་ཡུལ་སྣང་ཐམས་ཅད་མེད་སྣང་སྒྱུ་མའི་རང་གཟུགས་རྫུན་པར་བསླུ་བའི་ཆོས་ཅན་ཡིན་པར་མ་ཤེས་པས་བདེན་པར་འཛིན་པའི་གཟུང་འཛིན་གྱི་སྒྲོག་ལས་མ་གྲོལ་བ་དང་། དབྱིངས་དེ་བཞིན་ཉིད་ལ་གཅིག་མ་གཏོགས་མེད་པ་གཉིས་མེད་ཐིག་ལེ་ཆེན་པོར་རོ་གཅིག་པ་ཡིན་ཡང་གནས་ལུགས་མ་རྟོགས་པས་དེ་སོ་སོར་འཛིན་ནས་འཁྲུལ་བ་ཡིན་པ་དང་། རང་རིག་གི་ངོ་བོ་མ་ཤེས་ནས་མཐོ་དམན་གྱི་གནས་སུ་བགྲོད་པར་བྱེད་པའི་ལམ་ཞིག་གཞན་ནས་འཚོལ་བ་དང་། ཕྱི་འཁྲུལ་སྣང་སྙེམས་བྱེད་ཀྱི་བདུད་དེ་བདུད་ཀྱི་རྩ་བ་ཡིན་ལ་དེ་མ་ཆོད་ན་བདུད་ཀྱིས་བསླུས་ནས་མ་རྟོགས་འཁོར་བར་འཁྱམས་པ་ཡིན་པས། གནས་ལུགས་ཀྱི་དོན་མ་རྟོགས་པའི་ལོག་པའི་སྐྱོན་རྣམས་བརྟགས་ཏེ་སྤང༌བར་བྱ་དགོས་སོ། །འདི་རྣལ་འབྱོར་བ་རབ་གོམས་པ་ཀློང་དུ་གྱུར་བ་ཞིག་མིན་ན་ལས་དང་པོ་པ་ཞིག་ལ་ད་རུང་གནས་ལུགས་ཀྱི་དོན་མ་དགོས་ངེས་འབྱུང་རྣམ་དག་ཅིག་ཀྱང་སྐྱེ་མེད་པ་ཡིན་པས་རིམ་གྱིས་བསླབ་དགོས་པའི་གནས་ཡིན་ཡང་། དེའི་ཕྱོགས་གོ་བའི་དགོས་པ་དང་ལྡན་པས་དབང་པོ་རབ་འབྲིང་ཐ་གསུམ་དང་སྦྱར་ནས་གསུངས་སོ།།

༡༢༠ ཕྱིར་མི་ལྡོག་པའི་གདམས་ངག་རྣམ་དྲུག་བསྟན་པ།

ཕྱིར་མི་ལྡོག་པའི་གདམས་ངག་རྣམ་དྲུག་ནི།།

བླ་མ་བསྟེན་པས་མི་ཆོས་ཕྱིར་མི་ལྡོག།

ཡུལ་གྱི་ཉེས་བསམས་མི་ཆོས་ཕྱིར་མི་ལྡོག།

བདེ་སྡུག་བསམས་པས་མི་ཆོས་ཕྱིར་མི་ལྡོག།

འཇིག་རྟེན་ཉེས་བསམས་མི་ཆོས་ཕྱིར་མི་ལྡོག།

འཁྲུལ་བར་བལྟས་པས་མི་ཆོས་ཕྱིར་མི་ལྡོག།

སྡུག་བསྔལ་འདམ་བསམས་མི་ཆོས་ཕྱིར་མི་ལྡོག།

དེ་ལྟར་བསམས་ན་འཇིག་རྟེན་ཆོས་ལས་གྲོལ།།

ཞེས་གསུངས་པ་སྟེ། ལེགས་པའི་ལམ་ལས་ཕྱིར་མི་ལྡོག་པར་བྱེད་པའི་གདམས་ངག་རྣམ་པ་དྲུག་ནི། བླ་མ་མཚན་ཉིད་དང་ལྡན་པ་བསྟེན་པའི་སློབ་མ་དེ་མི་ཆོས་འཁོར་བའི་ཕྱོགས་ལ་ཕྱིར་མི་ལྡོག་པ་དང་། ཡུལ་གྱི་ཉེས་དམིགས་བསམས་ནས་དེ་ཤེས་པ་དག་མི་ཆོས་ཆོས་བརྒྱད་ཀྱི་ཕྱོགས་ལ་ཕྱིར་མི་ལྡོག་པ་དང་། བདེ་སྡུག་གང་ཡང་རྟག་བརྟན་མེད་ཚུལ་བསམས་པས་ན་མི་ཆོས་འཇིག་རྟེན་གྱི་ལོ་འདོད་ལ་ཕྱིར་མི་ལྡོག་པ་དང་། འཇིག་རྟེན་འཁོར་བའི་ཉེས་པ་སྡུག་བསྔལ་འཛིན་འཁྲིའི་གནས་ལྟ་བུ་ཡིན་པར་བསམས་པས་ན་མི་ཆོས་འཇིག་རྟེན་མངོན་ཞེན་ལ་ཕྱིར་མི་ལྡོག་པ་དང་། འཁྲུལ་བ་འཁྲུལ་བར་ཡིན་པར་ཤེས་ནས་འཁྲུལ་བ་འཁྲུལ་བར་བལྟས་ནས་འཁྲུལ་སྣང་བདེན་མེད་དུ་ཤེས་པས་ན་མི་ཆོས་འཇིག་རྟེན་གྱི་བྱ་བ་ལ་ཕྱིར་མི་ལྡོག་པ་དང་། སྡུག་བསྔལ་ནི་འདམ་རྫབ་བཞིན་དུ་བྱིངས་ཤིང་ནུབ་པར་བྱེད་པ། འདམ་གྱིས་རྫས་འཛིན་ཞེས་པ་ལྟ་བུ་ཡིན་པར་བསམས་ནས་ཤེས་པས་ན་མི་ཆོས་འཇིག་རྟེན་ཕྱོགས་ལ་ཕྱིར་མི་ལྡོག་པ་སྟེ། དེ་ལྟར་བསམས་ན་འཇིག་རྟེན་གྱི་ཆོས་ལས་གྲོལ་ནས་འདས་པའི་སར་ཕྱིན་པ་དོན་གྱིས་སྟོན་པའོ།།

༡༢༡ གཉེན་པོའི་མེལ་ཚེ་དྲུག་གིས་བསྐོར་བ་བསྟན་པ།

གཉེན་པོའི་མེལ་ཚེ་དྲུག་གིས་བསྐོར་བ་ནི།།

ཉིན་མཚན་ཚེ་རྐུ་གཉེན་པོའི་མེལ་ཚེ་གྱིས།།

དུག་ལྔས་རྒྱུད་སྲེག་གཉེན་པོའི་མེལ་ཚེ་གྱིས།།

འདོད་པས་མི་ངོམས་གཉེན་པོའི་མེལ་ཚེ་གྱིས།།

དྲག་པོའི་ལས་ལ་གཉེན་པོའི་མེལ་ཚེ་གྱིས།།

དོན་མེད་ལས་ལ་གཉེན་པོའི་མེལ་ཚེ་གྱིས།།

སྒོ་གསུམ་ཅི་སྤྱོད་གཉེན་པོའི་མེལ་ཚེ་གྱིས།།

ཉོན་མོངས་དགྲ་རྐུན་གླགས་སྐབས་རྙེད་མི་འགྱུར།།

ཞེས་གསུངས་པ་སྟེ། གཉེན་པོའི་མེལ་ཚེ་དྲུག་གིས་བསྐོར་དགོས་པ་ནི། ཉིན་ངོ་དཀར་རེ་དང་། མཚན་ངོ་ནག་རེ་རེས་མོས་སུ་བྱུང་ནས་མཚན་རེད་ཅེས་མར་རེ་ཉལ། ཉིན་རེད་ཟེར་དུས་ཡར་རེ་ལང་བའི་ཉིན་མཚན་བར་མ་ཆད་པའི་མཚམས་ནས་མི་ཚེའི་དུས་ཚོད་བརྐུས་པས་གཉེན་པོའི་མེལ་ཚེ་སྟེ་བསྲུང་བར་བྱ་དགོས་ལ། དེ་ཡང་གཏན་དུ་རྐུ་མི་ཤོར་བར་བྱར་མེད་ཀྱང་མི་ཚེ་དོན་ལྡན་བྱེད་པའི་སྒོ་ནས་བསྲུང་དགོས། དེ་ཡང་ལང་ན་ལང་བ་དོན་ལྡན་ཐུན་བཞིའི་རྣལ་འབྱོར་ལ་བསླབ། ཉལ་ན་ཉལ་བ་དོན་ལྡན་རྨི་ལམ་འོད་གསལ་ལ་སྦྱངས། དགེ་སྡིག་དཀར་ནག་གི་རྩིས་གྲངས་བཏབ་ནས་དགེ་བ་གོང་འཕེལ་དུ་གཏང་དགོས་པ་དང་། ཉོན་མོངས་དུག་ལྔས་རྒྱུད་སྲེག་པར་བྱེད་པས་དེ་དང་དེའི་གཉེན་པོའི་མེལ་ཚེ་བྱེད་པ་དང་། འདོད་པ་རྣམས་ནི་ཕུང་ཀྲོལ་སྐྱེད་མཁན་ཡིན་པས་མ་ཚད། དེ་ལ་ཇི་ལྟར་སྤྱོད་ཀྱང་ལན་ཚྭའི་ཆུ་བཞིན་ངོམས་པ་མེད་པ་ཞིག་ཀྱང་ཡིན་པས་གཉེན་པོའི་མེལ་ཚེ་བྱེད་དགོས་པ་ལས། འདོད་པའི་དབང་དུ་ཤོར་ན་སྡུག་བསྔལ་དྲག་པོ་མྱོང་བ་ཡིན་པ་དང་། ཧ་ཅང་ཐལ་དྲགས་པའི་ལས་ཞེས་པའམ་ཡང་ན་ཁྲོས་འཁྲུག་ཅན་གྱི་དྲག་པོའི་ལས་ལ་གཉེན་པོའི་མེལ་ཚེ་བྱེད་དགོས་པ་དང་། ཚེ་འདིའི་མནོག་ཆུང་གི་བྱ་བ་དོན་མེད་ཀྱི་ལས་ལ་དེ་དང་དེའི་གཉེན་པོའི་མེལ་ཚེ་བྱེད་པ་དང་། སྒོ་གསུམ་གྱི་བསམ་སྤྱོད་གང་དང་ཅི་སྤྱོད་ཀྱང་དེ་དང་དེའི་གཉེན་པོའི་མེལ་ཚེ་བྱེད་པ་སྟེ། དེ་དག་དང་མ་བྲལ་ན་ཉོན་མོངས་པའི་དགྲ་རྐུན་གྱིས་གླགས་འཚོལ་བའམ་གནོད་སྐྱེལ་བའི་གོ་སྐབས་རྙེད་པ་མི་འགྱུར་རོ།།

༡༢༢ ཉམས་ལེན་མི་འགྲུབ་འཆོར་ས་རྣམ་དྲུག་བསྟན་པ།

ཉམས་ལེན་མི་འགྲུབ་འཆོར་ས་རྣམ་དྲུག་ནི།།

འཁོས་ཆུང་གང་ཟག་མི་ཚེ་དོན་མེད་འཆོར།།

གྲགས་འདོད་ཅན་དེ་མི་ཚེ་ལོ་འདོད་འཆོར།།

ཟས་སྲེད་ཅན་དེ་ཟས་ཕྱིར་མུག་ལྟོར་འཆོར།།

མི་རྒོད་ནོར་ཅན་ཁེ་སྤོགས་ཚོང་ལ་འཆོར།།

དད་མེད་ཐོས་བསམ་ཆོས་དྲེད་རྒྱུས་ཅན་འཆོར།།

ཐོས་ཆུང་བླུན་སྒོམ་ལོག་པའི་ལམ་དུ་འཆོར།།

འཆོར་བ་དྲུག་པོར་མ་སོང་ཤིན་ཏུ་གཅེས།།

ཞེས་གསུངས་པ་སྟེ། ཉམས་ལེན་མི་འགྲུབ་འཆོར་ས་རྣམ་དྲུག་ནི། འཁོས་ཆུང་གི་གང་ཟག་ནུས་མེད་དེ་ཡིས། ངས་ཅི་ནུས་ངས་ཅི་འགྲུབ་སྙམ་ནས་སེམས་ཞུམ་ཚེ་ཆོས་འཇིག་རྟེན་ཅི་ཡང་མི་འགྲུབ་པ་ཡིན་པས་དེ་འདྲ་བས་ནི་མི་ཚེ་དོན་མེད་དུ་འཆོར་བའམ་ཤོར་བ་ཡིན་པ་དང་། གྲགས་འདོད་ཅན་རྟག་པར་ཆེ་གྲགས་མཐོ་གྲགས་ཀྱི་མིང་ཅན་ཞིག་ཨེ་རེད་བསམ་མཁན་དེ་ནི། ལོ་འདོད་དེ་རྙེད་འདོད་གྲགས་འདོད་ཤ་སྟག་གིས་མི་ཚེ་རྫོགས་ནས་ཟད་པ་ཡིན་པ་དང་། ཟས་ཀྱི་སྲེད་པ་ཧ་ཅང་ཐལ་ཆེ་བ་ཅན་དེ་དག་ཟས་ཀྱི་ཕྱིར་དུ་མུག་ལྟོར་འཆོར་བ་སྟེ། ཧེབ་མུ་གེ་ཁོ་ནའི་ངང་དུ་འདས་ནས་ཉམས་ལེན་མི་འགྲུབ་པར་དུས་ཚོད་ཤོར་བ་ཡིན་པ་དང་། སེམས་མ་དུལ་བའི་མི་རྒོད་ནོར་དང་ལྡན་པ་དེ་ནི་སེམས་ཁ་འཚེང་དུ་མེད་པར། བརྒྱ་ཡོད་ན་ཉིས་བརྒྱ་དང་ཁྲི་ཡོད་ན་འབུམ་ཁ་ཨེ་གང་བསམ་ནས་ཚོང་ཁེ་སྤོགས་འབའ་ཞིག་གི་ཕྱོགས་ལ་བསམ་བློ་གཏོང་ནས་དེ་ཕྱོགས་སུ་འཆོར་བ་ཡིན་པ་སྟེ། ཁྱད་པར་དུ་གྲྭ་བས་ཚོང་བྱེད་མི་ཉན་མ་གཏོགས་བན་ཁོལ་དུ་ལོག་པ་ཡིན། བན་ཁོལ་ཞེས་པ་ནི་བན་མ་རྒན་སྐྱ་སེར་གཉིས་གོ་ཆོད་པ་ཅན་དུ་འགྱུར་བ་དེ་ལ་ཟེར་བ་ཡིན། དེ་ཡང་དཔལ་སྤྲུལ་ཚང་གིས། ཟ་ཆོག་ཚོགས་གྲལ་འགྲིམ་པ་གཞོན་ནུའི་དུས། །སྐྱ་སེར་གཉིས་གོ་ཆོད་པ་བར་དུ་སྟེ། །ཕྱི་ནས་རྒྱ་དབུས་འགྲིམ་པའི་ཚོང་དཔོན་དུ། །ཆས་པ་ཕྱོགས་འདིའི་ལམ་སྲོལ་གཉིས་པ་ལགས། །ཞེས་པ་དེ་ལུང་བསྟན་ཡིན་འདུག་སྙམ་པའི་ཚོད་ལ་ཐོན་ངེས་སོ། །དད་པ་མེད་པའི་མི་དེས་ཐོས་བསམ་བྱེད་ཁུལ་བྱས་ཀྱང་ཆོས་དྲེད་ཆོས་རྒྱུས་ཅན་ངན་པ་རྒྱུས་ཅན་དུ་འཆོར་འགྲོ་བ། དཔེར་ན་སྨན་མ་ཞུ་བ་དུག་ཏུ་ལོག་པ་ལ་སྨན་གྱིས་ཕན་མི་ཐོགས་པ་བཞིན་དུ་ཆོས་དྲེད་དུ་འགྱུར་དུས་ཆོས་ཀྱིས་ཀྱང་ཕན་མི་ཐོགས་པ་ཡིན་པ་དང་། ཐོས་པ་ཆུང་ཆུང་བླུན་པོའི་སྒོམ་བྱེད་མཁན་གྱིས་ཅི་ཡང་མི་འོང་བས་ཐོས་པ་ཆེ་དགོས་ཏེ། དབུ་མ་ཆེན་པོ་ལ་ནི་དཔྱད་པ་དགོས་ཏེ། དཔྱད་གསུམ་དག་པས་སྟོང་ཉིད་གཏན་ལ་འབེབས་དགོས་པའི་ཕྱིར། རྫོགས་པ་ཆེན་པོ་ལའང་ཐོས་བསམ་གྱི་ཤེས་རབ་དགོས་ཏེ། ཀུན་མཁྱེན་འཇིགས་གླིང་གིས་ཁྱད་པར་དུ་དེང་སང་མོས་པས་སྤྱོད་པའི་ས་ཡིན་པས་ཐོས་པ་ཆེ་དགོས་ཞེས་གསུངས་པ་དང་། འཇམ་མགོན་བླ་མས། བླུན་སྒོམ་སེམས་ལས་འདས་པའི་རྫོགས་པ་ཆེ། །ཞེས་གསུངས་པས་ཐོས་པ་མེད་ན་ལྟ་སྒོམ་གཉིས་ཀ་གང་བྱས་ཀྱང་ལོག་པའི་ལམ་དུ་འཆོར་བའི་ཉེན་ཡོད་པས། སྙིང་ནས་ཆོས་ལམ་གཉེར་མཁན་གྱིས་འཆོར་བ་དྲུག་པོ་རུ་མ་སོང་བ་ཞིག་ཤིན་ཏུ་གཅེས་སོ།།

༡༢༣ སྐྱོན་རྣམས་བྱུང་ན་བསལ་ཐབས་ཆོས་དྲུག་བསྟན་པ།

སྐྱོན་རྣམས་བྱུང་ན་བསལ་ཐབས་ཆོས་དྲུག་ནི།།

མོས་གུས་ཤོར་ན་ཡོན་ཏན་དཀའ་བས་སོམས།།

གཡེང་བས་ཁྱེར་ན་རྣམ་རྟོག་གྲོགས་སུ་སློང༌།།

བསྒོམས་ཀྱང་སྐྱེད་མེད་སྣ་ཚོགས་ཐབས་ཀྱིས་ཆུན།།

འབྱུང་འཁྲུགས་ན་ཚ་རྒྱུ་རྐྱེན་འབྲས་བུར་རྟོགས།།

འདུ་བ་ཡལ་ན་ཚོགས་དང་གཏོར་མ་རེམ།།

སེམས་བསྐྱེད་ཤོར་ན་གཉེན་པོའི་བསྐྱར་ལ་བླང༌།།

དེ་ཡིས་གེགས་རྣམས་གང་བྱུང་སེལ་བ་ཡིན།།

ཞེས་གསུངས་པ་སྟེ། གལ་ཏེ་སྐྱོན་རྣམས་བྱུང་ན་དེའི་གེགས་སྐྱོན་བསལ་ཞིང་མ་གོས་ཐབས་ཀྱི་ཆོས་དྲུག་ནི། མོས་གུས་ཇེ་ཆུང་དང་ཇེ་ཞན་དུ་འགྲིབ་ནས་མེད་སོང་ན་མོས་གུས་བྱེད་ས་བླ་མ་ཡིན་པས་བླ་མའི་ཡོན་ཏན་གྱི་ཕྱོགས་ལ་དཀའ་བས་དང་དུ་བླངས་ནས་སེམས་པར་བྱེད་པ་དང་། གཡེང་བས་ཁྱེར་ཤོར་འདུག་བསམས་ན། ཉམས་ལེན་པས་རྣམ་རྟོག་གྲོགས་སུ་སློང༌དགོས་པས། རྣམ་རྟོག་གྲོགས་སུ་བསླངས་ནས་བུད་ཤིང་ཅི་ཙམ་སྣོན་བཞིན་མེ་དེ་ལྟར་འབར་བ་ལྟར་དུ། རྣམ་རྟོག་ཆོས་ཉིད་དུ་གྲོལ་བར་བྱེད་པའམ། གཞན་ཡང་རྣམ་རྟོག་ངན་པ་དེ་ངེས་འབྱུང་དང་སྙིང་རྗེ་བྱང་ཆུབ་སེམས་ཀྱི་ཕྱོགས་སུ་སྒྱུར་བར་བྱེད་དགོས་པ་དང་། བསྒོམས་པར་བྱས་ཀྱང་ཡར་སྐྱེད་མེད་ན་དམ་ཚིག་ཉམས་ཆག་སོང་བའམ། ཟླས་ཉམས་དང་ཞོར་ཉམས་ཀྱིས་གོས་པའམ། ཚོགས་བསགས་ཀྱིས་མ་ཆོག་པ་ཡིན་ངེས་པས། ཚོགས་དང་བསྐོང་བ་དང་མཆོད་འབུལ་བྱེད་པ་དང་། ཡང་ན་མི་རྟོག་པ་སོགས་སྒོམ་བཞིན་ཡོད་ན་བདུད་ཀྱི་བཤེས་གཉེན་གྱིས་ཟིན་པ་ལ་སོགས་པས་བསྐྱེད་མེད་པར་འགྱུར་བས། དེ་དག་གང་ལ་གང་གི་གཉེན་པོ་བསྟེན་དགོས་པས། སྣ་ཚོགས་ཐབས་ཀྱིས་གནད་དུ་བསྣུན་ནས་རང་དབང་དུ་འཆུན་པར་བྱེད་པ་དང་། འབྱུང་ཁམས་འཁྲུགས་པའི་ན་ཚ་བྱུང་ན། དེ་ལ་ང་ལ་འདི་ལྟར་འོང་མི་རིགས་སྙམ་པའི་ཡི་ཆད་མི་བྱེད་པར། སྔར་བསགས་ཀྱི་རྒྱུ་ལ་སོགས་པ་རྒྱུ་རྐྱེན་འབྲས་བུ་རྣམས་རྟོགས་པར་བྱས་ནས། ན་ཚ་ལམ་སློང་ལ་སོགས་པས་ཉམས་ལེན་གྱི་གྲོགས་སུ་འགྲོ་བར་བྱེད་པ་དང་། ཀུན་མཁྱེན་འཇིགས་གླིང་གིས། འདུ་བ་རྣམ་གསུམ་དབྱར་གྱི་མཚོ་ལྟར་བསྐྱིལ། །འབར་བ་རྣམ་གསུམ་དུས་མཐའི་མེ་ལྟར་སྦོར། །ཞེས་པ་ལྟར་དུ། མི་ནོར་ཟས་གསུམ་དང་འཁོར་སློབ་ཀྱི་འདུ་བ་ཡལ་ནས་དམ་ཆོས་སྤེལ་བ་ལ་འགོག་རྐྱེན་བྱུང་ན། སྤྱིར་བསྡུ་བ་རྣམ་བཞིའི་འགྲོ་དོན་དང་། ཁྱད་པར་དུ་ཚོགས་དང་གཏོར་མ་ལ་རེམ་དགོས། བསྡུ་བ་རྣམ་བཞི་ནི་ལོག་འཚོའི་ཆེད་དུ་སྦྱིན་དང་སྙན་སྨྲ་གྱིས་གསུངས་པ་མིན་པར། ལན་དང་རྣམ་སྨིན་ལ་མི་རེ་བའི་སྦྱིན་པ་དང་། བྱམས་པའི་ངག་གི་ལས་སྙན་པར་སྨྲ་བ། གཞན་ལ་ཆོས་གང་བསྟན་ན་དེ་ཉིད་རང་གིས་དོན་མཐུན་དོན་སྤྱོད་ཀྱིས་སྒྲུབ་པ་ནི་གནད་ཆེ་ཤོས་ཡིན་ལ་དེ་ལྟར་མ་བྱས་ཚེ། བྱི་ལའི་གྲྭ་བར་བྱི་བ་བཞག་པ་བཞིན་དུ་ཇེ་ཉུང་ཇེ་ཉུང་དུ་འགྲོ་བས་མ་ཚད། ད་ལྟ་ཡོད་པ་རྣམས་ཀྱང་བཅར་མི་ཕོད་པར་འགྱུར་བ་ཡིན་པ་དང་། སེམས་བསྐྱེད་ལས་སྨོན་སེམས་ཤོར་ན་ཚད་མེད་རྣམ་བཞི་སྒོམ་པ་དང་། འཇུག་སེམས་ཤོར་ན་དམ་བཅའ་གསར་བ་ལེན་ཅིང་། གཉིས་ཀ་ཤོར་ན་བཤགས་པ་གནད་སྨིན་བྱེད་པ་གལ་ཆེ་བས་གཉེན་པོ་བསྐྱར་ལ་བླང༌བར་བྱ་བ་སྟེ། དེ་དག་གིས་གེགས་རྣམས་གང་བྱུང་སེལ་བ་ཡིན་པས། གེགས་སེལ་དེ་ལྟར་བྱེད་དགོས་སོ།།

༡༢༤ རྒྱུད་ལ་སྦྱོར་བ་ཕྱི་ནང་གནད་དྲུག་བསྟན་པ།

རྒྱུད་ལ་སྦྱོར་བ་ཕྱི་ནང་གནད་དྲུག་ནི།།

ནང་དུ་བདག་འཛིན་འཁྲི་བ་གཅད་པ་གནད།།

ཕྱི་རུ་ཡུལ་སྣང་ཆོས་སྐུར་འཁྱེར་བ་གནད།།

བར་དུ་འཛིན་རྟོག་གྲོགས་སུ་བླང་བ་གནད།།

ཡར་ལ་ལྟ་དགོངས་ཟད་པར་བྱེད་པ་གནད།།

མར་ལ་ཆོས་སྤྱོད་གཞུང་བཞིན་བསྲང་བ་གནད།།

བར་དུ་ཡེངས་མེད་ཤེས་བཞིན་བསྲུང་བ་གནད།།

དེ་དག་འཛོམ་ན་ཐར་ལམ་མྱུར་དུ་བགྲོད།།

ཅེས་གསུངས་པ་སྟེ། རྒྱུད་ལ་སྦྱོར་བར་འོས་པའི་ཕྱི་ནང་གི་གནད་དྲུག་ནི། འཕྲུལ་འཁོར་གྱི་འཁོར་མཚམས་འཇོག་དགོས་ན་གསང་ཐག་གི་འཛེར་མགོ་མནན་ཤེས་དགོས་པ་བཞིན་དུ། འཁོར་བའི་འཁྲུལ་སྣང་གི་རྒྱུན་ཆད་དགོས་ན། ནང་དུ་བདག་ཏུ་འཛིན་པའི་འཁྲི་བ་གཅད་པ་གནད་ཡིན་པ་དང་། ཕྱི་རུ་གང་ཡུལ་དུ་སྣང་བའི་ཆོས་ཐམས་ཅད་ཆོས་སྐུའི་ཡོ་ལང་ཡེ་ཤེས་གཅིག་ལས་མ་འདས་པར་འཁྱེར་ཤེས་པ་གནད་ཡིན་པ་དང་། བར་དུ་འཛིན་པའི་རྣམ་རྟོག་ཐམས་ཅད་གྲོགས་སུ་བླངས་ནས་རྟོག་ཚོགས་རང་གྲོལ་དུ་དག་པར་བྱེད་པ་གནད་ཡིན་པ་དང་། ལྟ་བ་མཐོ་དགོས་པས་ཡར་ལ་ལྟ་དགོངས་ཆོས་ཉིད་ཀྱི་ཀློང་དུ་ཟད་པར་བྱེད་པ་གནད་ཡིན་པ་དང་། སྤྱོད་པ་སྡར་དགོས་པས་མར་ལ་རྒྱུ་འབྲས་ཁྱད་གསོད་མི་བྱེད་པ་ཆོས་སྤྱོད་གཞུང་བཞིན་བསྲང་བ་གནད་ཡིན་པ་དང་། བར་དུ་དུས་རྟག་ཏུ་སྲུང་སེམས་མི་བརྗེད་པའི་དྲན་པ་དང་། རང་རྒྱུད་ལ་ཉེས་པ་བྱུང་མ་བྱུང་རྟོག་པའི་ཤེས་བཞིན་དང་། འཇུག་ལྡོག་གི་གནས་ལ་གཟོབ་པ་ལྷུར་ལེན་པའི་བག་ཡོད་པ་རྣམས་བསྲུང་བ་ནི་གནད་ཀྱི་དམ་པ་ཡིན་པ་སྟེ། དེ་དག་འཛོམ་ན་ཐར་ལམ་ལ་དཀའ་ཚེགས་མེད་པར་མྱུར་དུ་བགྲོད་ཐུབ་པ་ཡིན་ནོ།།

༡༢༥ སངས་རྒྱས་འདོད་ལ་གཅེས་པ་རྣམ་དྲུག་བསྟན་པ།

སངས་རྒྱས་འདོད་ལ་གཅེས་པ་རྣམ་དྲུག་ནི།།

སྒྱུ་མར་རྟོགས་ཀྱང་རྒྱུ་འབྲས་འཛེམ་པ་གཅེས།།

ངེས་ཤེས་ཐོབ་ཀྱང་ཁྱད་གསོད་མེད་པ་གཅེས།།

གྲོགས་སུ་འཆར་ཡང་དབེན་པར་གནས་པ་གཅེས།།

སྒོམ་མེད་གོ་ཡང་རྣམ་རྟོག་འདུལ་བ་གཅེས།།

མཉམ་རྗེས་མེད་ཀྱང་ཐ་མལ་མ་ཤོར་གཅེས།།

གནས་ལུགས་རྟོགས་ཀྱང་ལུང་རིགས་ཞུན་ཐར་གཅེས།།

མཐོན་པོར་ཕྱིན་ཡང་འདི་དྲུག་མ་བྲལ་གཅེས།།

ཞེས་གསུངས་པ་སྟེ། སངས་རྒྱས་སྒྲུབ་པར་འདོད་པའི་གང་ཟག་ཅིག་ལ་འཛོམ་དགོས་པའི་གཅེས་པ་རྣམ་པ་དྲུག་ནི། ཆོས་ཐམས་ཅད་སྒྱུ་མ་དང་རྨི་ལམ་ལྟར་བུར་རྟོགས་ཀྱང་གཟུང་འཛིན་གྱི་རྟོག་པ་རྩ་བ་ནས་ཟད་མེད་ན་རྒྱུ་འབྲས་ཕྲ་ཞིང་ཕྲ་བ་ནས་འཛེམ་པ་གཅེས་པ་དང་། རང་ལ་ཉམས་རྟོགས་ཀྱི་ངེས་ཤེས་ཅུང་ཟད་ཙམ་ཐོབ་ཡོད་ཀྱང་གཞན་ལ་ཁྱད་གསོད་མེད་པ་གཅེས་པ་དང་། རྐྱེན་ངན་གྲོགས་སུ་འཆར་ཞིང་རྣམ་རྟོག་ཡེ་ཤེས་སུ་གྲོལ་ཏེ་ཚོགས་སུ་གནས་པ་དང་། དབེན་པར་གནས་པ་ཁྱད་མེད་པར་གྱུར་ཀྱང་གཞན་གྱི་དད་པ་མི་ལྡོག་པའི་ཆེད་དུ་དབེན་པར་གནས་པ་ཤིན་ཏུ་གཅེས་པ་དང་། སྒོམ་མེད་ཡེངས་མེད་ཀྱི་གནད་གོ་ཡང་གོ་བ་རྒྱུད་ལ་སྦྱར་ནས་རྣམ་རྟོག་འདུལ་བ་གཅེས་པ་སྟེ། རྟོག་འདུལ་དམ་ཚིག་དེ་སྙེད་སྤྲོ། །ཞེས་པ་ལྟར་རྣམ་རྟོག་འདུལ་བའམ་ཟད་ནས་ཆོས་ཉིད་དུ་གྲོལ་བའམ། ལས་དང་པོ་པས་ངན་རྟོག་གི་གཉེན་པོར་བཟང་རྟོག་བསྟེན་པ་ལྟ་བུ་དང་། མཉམ་རྗེས་ཁྱད་པར་གཏན་ནས་མེད་པར་མཉམ་བཞག་གཅིག་གི་ངང་ལས་མི་འདའ་བ་ནི་སངས་རྒྱས་ཀྱི་ས་ཡིན་ལ། དེ་དང་རྗེས་མཐུན་གྱི་མཉམ་རྗེས་དབྱེར་མེད་དུ་གྱུར་ཀྱང་ཐ་མལ་གྱི་ཚུལ་ཅན་དུ་མ་ཤོར་བ་གཅེས་པ་དང་། གནས་ལུགས་ཀྱི་དོན་རྟོགས་ཀྱང་ལུང་དང་རིགས་པས་བརྡར་ཤ་བཅད་ནས་ཞུན་ཐར་བཅད་དེ། གོལ་ཤོར་ནོར་བའི་འཕྲང་བསལ་བ་ཤིན་ཏུ་གཅེས་པ་སྟེ། ཉམས་རྟོགས་ཅུང་ཟད་མཐོན་པོར་ཕྱིན་ཡང་འདི་དྲུག་དང་ནམ་ཡང་མི་འབྲལ་བ་ཤིན་ཏུ་གཅེས་སོ།།

༡༢༦ མཐར་འཛིན་འཆིང་བར་བསྟན་པའི་ཆོས་དྲུག་བསྟན་པ།

མཐར་འཛིན་འཆིང་བར་བསྟན་པའི་ཆོས་དྲུག་ནི།།

ཆགས་ན་ཡི་དམ་ཡིན་ཡང་འཆིང་བའི་རྒྱུ།།

བཟུང་ན་མཐོན་པོའི་གྲུབ་མཐའ་འང་འཆིང་བའི་རྒྱུ།།

འཛིན་ན་སྙིང་རྗེ་ཡིན་ཡང་འཆིང་བའི་རྒྱུ།།

རློམ་ན་དགོངས་པ་ཟབ་ཀྱང་འཆིང་བའི་རྒྱུ།།

ཞེན་ན་ཉམས་རྟོགས་ཡིན་ཡང་འཆིང་བའི་རྒྱུ།།

མྱོང་འཛིན་གཉིས་མེད་ཡིན་ཡང་འཆིང་བའི་རྒྱུ།།

ཐ་མལ་ངར་འཛིན་ནོར་རྫས་སྨོས་ཅི་དགོས།།

དེས་ན་གང་ལའང་ཞེན་ཆགས་མེད་པ་གཅེས།།

ཞེས་གསུངས་པ་སྟེ། གཟུང་འཛིན་མངོན་རློམ་གྱིས་མཐའ་རུ་འཛིན་ནས་འཆིང་བར་བྱེད་པའི་རྒྱུ་ཡིན་པར་བསྟན་པའི་ཆོས་དྲུག་ནི། ཆགས་པ་དང་ཞེན་པ་སྐྱེས་ན་ཡི་དམ་ལྷའི་ཞལ་མཇལ་པ་ཡིན་ཡང་འཆིང་བར་བྱེད་པའི་རྒྱུ་ཡིན་པ་ནི། གསེར་སྒྲོག་ཐག་སྒྲོག་འཆིང་བ་ལ་མཉམ་པ་དང་། མཚན་ཉིད་ཐེག་པའི་སྐབས་སུ་ཡང་། རྒྱལ་ལ་སོགས་ལ་ཆགས་པ་ཕྲ། །ཞེས་པ་དེ་ཡིན། འཛིན་པའི་འཆིང་ཞེན་དང་བཅས་ན་མཐོན་པོ་ཐེག་རྩེའི་གྲུབ་མཐའ་ཡིན་ནའང་འཆིང་བའི་རྒྱུ། འཛིན་པ་རང་རྒྱུད་དུ་ཤོར་ན་སྙིང་རྗེ་ཡིན་ཡང་འཆིང་བའི་རྒྱུ་ཡིན་། རློམ་པ་ང་རྒྱལ་ཆེ་དྲགས་ན་ལྟ་བ་དང་དགོངས་པ་ཟབ་ཀྱང་རློམ་པའི་དབང་གིས་འཆིང་བའི་རྒྱུ་ཡིན་པ་དང་། ཞེན་ན་ཞེན་ཡུལ་ལ་དཀར་ནག་མེད་པ་ཐི་གུ་དཀར་ནག་གཉིས་ཀ་འཆིང་བྱེད་ཀྱི་རྒྱུ་ཡིན་པ་བཞིན་དུ་ཉམས་རྟོགས་ཡིན་ཡང་འཆིང་བའི་རྒྱུ་ཡིན་པ་དང་། མྱོང་བ་ཅན་གྱི་འཛིན་པ་དེ་གཉིས་མེད་ཡིན་སྙམ་ཡང་མྱོང་བྱ་མྱོང་བྱེད་གཉིས་སུ་འཛིན་པས་གཉིས་མེད་མིན་ལ། གཉིས་འཛིན་ནི་འཁོར་བའི་འཆིང་བ་དངོས་ཡིན་པས་འཆིང་བའི་རྒྱུ་ཡིན་པ་སྟེ། དེ་དག་ཀྱང་འཆིང་བའི་རྒྱུ་ཡིན་ན་དེ་ལས་གཞན་པ་ཐ་མལ་གྱི་ནོར་རྫས་སོགས་ལ་ཆགས་པ་ནི་འཆིང་བྱེད་ཡིན་པ་སྨོས་ཀྱང་ཅི་དགོས་དེས་ན་གང་ལའང་ཞེན་ཆགས་མེད་པ་གཅེས་སོ།།

༡༢༧ འཆིང་བའི་སྒྲོག་དྲུག་བཅད་པའི་མན་ངག་བསྟན་པ།

འཆིང་བའི་སྒྲོག་དྲུག་བཅད་པའི་མན་ངག་ནི།།

ནོར་རྫས་མངོན་ཞེན་སྤེལ་སྲུང་སྒྲོག་གིས་འཆིང༌།།

རིགས་རྒྱུད་མངོན་ཞེན་ཁེ་གྲགས་སྒྲོག་གིས་འཆིང༌།།

རྣམ་གཡེང་ཆགས་ཞེན་འདུ་འཛིའི་སྒྲོག་གིས་འཆིང༌།།

ཐ་སྙད་ཚིག་ཞེན་ང་རྒྱལ་སྒྲོག་གིས་འཆིང༌།།

ཉམས་རྟོགས་མངོན་ཞེན་རློམ་སེམས་སྒྲོག་གིས་འཆིང༌།།

ཆོས་སྤྱོད་མངོན་ཞེན་གཉེན་པོའི་སྒྲོག་གིས་འཆིང༌།།

སྒྲོག་དང་བྲལ་བའི་ཆོས་པ་དཀའ་བར་སྣང༌།།

ཞེས་གསུངས་པ་སྟེ། འཆིང་བར་བྱེད་པའི་སྒྲོག་དྲུག་དེ་བཅད་པའི་མན་ངག་ནི། ནོར་རྫས་མངོན་ཞེན་ནི། ཀླུ་སྒྲུབ་ཀྱི་ཞལ་ནས། བསག་དང་བསྲུང་དང་ཚོལ་བའི་སྡུག་བསྔལ་གྱིས། ནོར་ནི་ཕུང་ཀྲོལ་མཐའ་ཡས་ཤེས་པར་བྱ། །ཞེས་པ་ལྟར་དུ་ནོར་དང་པོར་བསགས། བར་དུ་བསྲུང། ཐ་མར་བརླག་ཤོར་བ་ལ་སོགས་པ་སྡུག་བསྔལ་མང་བར་གསུངས་པ་བཞིན་དུ་སྤེལ་སྲུང་སྒྲོག་གིས་འཆིང༌བ་དང་། ངའི་མི་ཐོག་སྔོན་མ། ངའི་རིགས་རུས་བཟང་པོ་ཡིན་བསམས་ནས་དེས་འཆིང་བ་ནི་མངོན་ཞེན་ཁེ་གྲགས་ཏེ་རྒྱལ་ཁ་སྙན་གྲགས་ཀྱི་སྒྲོག་གིས་འཆིང༌བ་དང་། རྣམ་གཡེང་ཆགས་ཞེན་དང་གླུ་གར་རོལ་མོ། ཁྲོམ་དང་ལྟད་མོ་ལ་སོགས་པའི་འདུ་འཛིའི་སྒྲོག་གིས་འཆིང༌བ་དང་། ཐ་སྙད་ཀྱི་ཚིག་ལ་ཞེན་ནས་བདག་བསྟོད་གཞན་སྨོད་ཀྱི་རྩོད་པའི་འཁོར་ལོ་སྐོར་མཁན་དེ་ནི་ང་རྒྱལ་སྒྲོག་གིས་འཆིང༌བ་ཡིན་པས་ཐ་སྙད་ཀྱི་ཚིག་རྐྱང་པ་གཙོ་མི་ཆེ་བར་དོན་གྱི་ལམ་གནད་རྟོགས་པ་དེ་གནད་ཆེ་དང་། ཉམས་རྟོགས་ལ་མངོན་ཞེན་སྐྱེས་ན་རློམ་སེམས་ཀྱི་སྒྲོག་གིས་འཆིང༌བ་ཡིན་པས། ཉམས་ན་བུན་འདྲ་དེ་ཡལ་ནས་འགྲོ། །གོ་བ་ལྷན་པོ་འདྲ་དེ་གོག་ནས་འགྲོ། །ཞེས་པ་ལྟར་ཡིན་པས་ཉམས་སད་སུད་ལ་བལྟ་རྒྱུ་མེད་པས་རློམ་སེམས་ཀྱིས་མ་བཅིངས་པར་སྒོམ་པར་བྱེད་དགོས་པ་དང་། ཆོས་སྤྱོད་ལ་མངོན་ཞེན་སྐྱེ་བ་ནི་གཉེན་པོའི་སྒྲོག་གིས་འཆིང༌བ་ཡིན་པས་དེ་ལ་མངོན་ཞེན་མེད་པས་གཅད་པར་བྱ་བ་སྟེ། དེ་དག་ནི་སྒྲོག་ལས་གྲོལ་བར་བྱེད་པའམ་འཆིང་བྱེད་གཅོད་པའི་མན་ངག་ཡིན་ཡང་དོན་དངོས་སུ་སྒྲོག་དང་བྲལ་བའི་ཆོས་པ་དཀའ་བར་སྣང༌ངོ་།།

༡༢༨ ཆོས་བྱེད་རྣམས་ཀྱི་འོང་བའི་ཆོས་དྲུག་བསྟན་པ།

ཆོས་བྱེད་རྣམས་ཀྱི་འོང་བའི་ཆོས་དྲུག་ནི།།

ཆགས་སྡང་སྐྱེ་བའི་ཡུལ་ནས་ཕྱིར་བྲོས་དང༌།།

ཆོས་སྤྱོད་དགེ་སྦྱོར་ངང་གིས་འཕེལ་བར་འོང༌།།

ཀོ་ལོང་སྡོམ་པའི་ཟུར་མགོ་མ་རྣོ་དང༌།།

འགྲོགས་པ་རྒྱུན་རིང་འཐབ་རྩོད་ཉུང་བར་འོང༌།།

བླ་མ་དམ་པའི་གསུང་བཞིན་གུས་བསྒྲུབ་དང༌།།

ཐུགས་ལ་འདོགས་ཤིང་བྱིན་རླབས་དངོས་གྲུབ་འོང༌།།

རང་གི་སྣ་ཐག་གཞན་ལ་མ་གཏད་དང༌།།

ཤིན་ཏུ་སྐྱིད་ཅིང་སྒྲུབ་པ་མཐར་ཕྱིན་འོང༌།།

སྤྱོད་རྩིང་བོར་ལ་ཞི་དུལ་ལྡན་གྱིས་དང༌།།

ཀུན་དང་མཐུན་ཞིང་ཡིད་དུ་འཐད་པར་འོང༌།།

ཕྱོགས་འཛིན་བོར་ལ་བཟང་པོའི་སེམས་གཟུང་དང༌།།

ཚད་མར་འཛིན་ཅིང་ཀུན་གྱིས་བསྟོད་པར་འོང༌།།

ཞེས་གསུངས་པ་སྟེ། ཆོས་བྱེད་རྣམས་ཀྱི་འོང་བའི་ཆོས་དྲུག་ནི། ཡུལ་ངན་སྤོང་བ་རྒྱལ་སྲས་ལག་ལེན་ཡིན། །ཞེས་གསུངས་པ་བཞིན་དུ་ཆགས་སྡང་སྐྱེ་བའི་ཡུལ་ནས་ཕྱིར་བྲོས་ན་ཆོས་སྤྱོད་དང་དགེ་སྦྱོར་ངང་གིས་འཕེལ་བར་འོང༌བ་ཡིན་པ་དང་། ཀོ་ལོང་སྟེ་གདུག་རྩུབ་ཀྱི་གཤིས་ཀ་བསྡོམས་ནས་དེའི་དབང་དུ་མི་འགྲོ་བའི་ངང་ཚུལ་ལ་གནས་ཤིང་ཚིག་གི་ཟུར་མགོའམ་ཚིག་གི་སྣེ་མོ་མ་རྣོ་ན་བླ་སློབ་མཆེད་གྲོགས་སུ་དང་སུ་ཡིན་ཡང་འགྲོགས་པ་རྒྱུན་རིང་བ་ཡིན་སྟེ། དེ་ཡང་། འགྲོགས་པར་བདེ་བ་སྐ་རགས་ལྟ་བུ་དང་། འཇུག་པར་བདེ་བ་ལན་ཚྭ་ལྟ་བུ་དང་། །བཟོད་བསྲན་ཆེ་བ་ཀ་བ་ལྟ་བུ་ཡིས། བླ་མའི་འཁོར་དང་རྡོ་རྗེའི་སྤུན་ལ་བསྙེན། །ཞེས་པ་ལྟར་དུ་བྱས་ན་འཐབ་རྩོད་ཉུང་བར་འོང༌། དང་པོ་ཁ་མཚར་རྩེ་ཁུལ་བྱེད། བར་ཞིག་ལ་རྩེད་རྔ་ཤོར་ནས་སྤྲང་ལག་ཐུག་རྒྱུ་ཡོང་བ་དེ་འདྲ། མཐོ་གྲྭ་སའི་གྲྭ་བ་མན་ཆད་ནས་དམའ་གྲོང་ནང་གི་མི་ནག་པ་ཡན་ཆད་ལ་ཡོང་བ་ཡིན་པས། དེ་དག་ལ་གདུག་རྩུབ་མ་ཆེ། ར་རུ་མདའ་མདུང་མ་བཤད་ཅེས་པའོ། །བླ་མ་དམ་པས་ཅི་གསུང་གི་བཀའ་བཞིན་དུ་གུས་པས་བསྒྲུབས་ན། བླ་མ་དེས་ཐུགས་ལ་འདོགས་ཤིང་དེ་ལས་བྱིན་རླབས་དངོས་གྲུབ་འོང༌བ་ཡིན་ཏེ། བྱིན་རླབས་དང་དངོས་གྲུབ་ཐམས་ཅད་བླ་མ་མཉེས་པ་ལས་འོང་བ་ཡིན་པའི་ཕྱིར། རང་གི་སྣ་ཐག་དབང་ཆ་དེ་གཞན་ལ་མ་གཏད་མ་གཏོགས་སྣ་ཐག་མི་ལག་ལ་སྤྲད་ན་གང་དུ་ཁྲིད་ན་དེར་འགྲོ་དགོས་པ་ཡིན་པས། གལ་སྲིད་རྗེས་དེད་ས་དེ་ངན་པ་ཞིག་ཡིན་ཚེ་ལམ་ལོག་ཏུ་ཁྲིད་ནས་མི་ཚེའི་མཐའ་ལ་ཐུག་དུས་འགྱོད་པ་ཆེན་པོ་འོང་བ་ཡིན་པ་དང་། རང་དབང་ཐམས་ཅད་བདེ་བ་དང་གཞན་དབང་ཐམས་ཅད་སྡུག་བསྔལ་ཡིན་པས་རང་དབང་ཡོད་ཚེ་ཆོས་པ་རང་དབང་རང་གིས་སྤྱོད་ཤེས་པ་ཞིག་ཡིན་ན་ཤིན་ཏུ་སྐྱིད་ཅིང་སྒྲུབ་པ་མཐར་ཕྱིན་འོང༌བ་ཡིན་པ་སྟེ། དེ་ཡང་རང་མགོ་མི་ཐོན་པ་ཞིག་ལ་གཞན་དམ་པའི་སྐྱེས་བུ་ལ་མ་བསྟེན། དེའི་རྒྱུད་དུ་མ་གཅར་ཞེས་པའི་དོན་མིན་པར། དམ་པའི་རྒྱུད་ལ་བཅར་ནས་གྲོགས་ངན་པའི་དབང་དུ་མ་ཤོར། ཞེས་པའོ། །སྤྱོད་པ་རྩིང་པོ་བོར་ལ་ཞི་དུལ་དང་ལྡན་པར་གྱིས་དང༌། དེ་ལྟར་བྱས་ན་སྐྱེ་བོ་ཀུན་དང་མཐུན་ཞིང་ཡིད་དུ་འཐད་པར་འོང་བ་ཡིན་པ་དང༌། ཕྱོགས་རིས་ཀྱི་འཛིན་ཞེན་བོར་ལ་ཐམས་ཅད་ལ་བཟང་པོའི་སེམས་ལྷད་མེད་ཅིག་ཟུངས་དང༌། ཐམས་ཅད་ཀྱིས་ཚད་མར་འཛིན་ཅིང་སྐྱེས་བུ་དམ་པ་ཡིན་པའི་ཚད་དུ་འཇོག་པས་ཀུན་གྱིས་བསྟོད་ཅིང་བསྔགས་པར་འོང༌ངོ་།།

༡༢༩ ངན་པའི་རེ་བ་རྣམ་དྲུག་སྤོང་བར་བསྟན་པ།

ངན་པའི་རེ་བ་རྣམ་དྲུག་སྤོང་བ་ནི།།

བྱས་པ་མེད་པར་ཕན་འདོགས་འོང་དུ་རེ།།

དཀའ་བ་མ་སྤྱད་སྐྱིད་པ་འོང་དུ་རེ།།

སྒྲུབ་པ་མེད་པར་དངོས་གྲུབ་ཐོབ་ཏུ་རེ།།

མི་ཆོས་མ་བོར་ལྷ་ཆོས་འོང་དུ་རེ།།

ཉམས་སུ་མ་བླངས་བཤད་རིངས་གཞན་ཕན་རེ།།

ཅུང་ཟད་བསྒྲུབས་ལ་བསྙེན་བཀུར་འོང་དུ་རེ།།

ཐར་པའི་ལམ་དང་རྒྱ་མཚོའི་ཤར་ནུབ་བཞིན།།

ཞེས་གསུངས་པ་སྟེ། ངན་པའི་རེ་བ་རྣམ་དྲུག་སྤོང་བ་ནི། ཕར་ཕན་འདོགས་མ་མྱོང་བ་ཞིག་གིས་ང་འདིས་ཆེན་པོ་ཞིག་བྱེད་ཨེ་ཡོང་བསམ་རྒྱུ་མེད་པས། བྱས་པ་མེད་པར་ཕན་འདོགས་འོང་དུ་རེ་བ་མི་ཆེ་བ་དང་། དཀའ་བ་མ་སྤྱད་སྐྱིད་པ་འོང་དུ་རེ་བ་ཟ་འདོད་འགུལ་འཚེར་གྱི་མི་དང་། སྒྲུབ་པ་གཏན་ནས་མི་དགོས་པར་དངོས་གྲུབ་ཆེན་པོ་ཞིག་ཐོབ་ཏུ་རེ་བ་དེ་ཡོང་བ་དཀའ་བ་ཡིན་པས་དེ་འདྲའི་ངན་པའི་རེ་བ་སྤོང་དགོས་པ་ཡིན། མི་ཆོས་མ་བོར་ནས་སྐྱུར་ཐུབ་མེད་པ་ཞིག་གིས་ད་དུང་ལྷ་ཆོས་འོང་དུ་རེ་ན་འགྲུབ་པ་མིན་པ་ནི། ཆོས་འཇིག་རྟེན་གཉིས་ཀ་མེ་ཆུ་དགྲ་གཤེད་ཡིན་པས། མི་ཆོས་འགྲུབ་བཞིན་ཡོད་དུས་ལྷ་ཆོས་དེ་ལ་མེད་པའི་རྟགས་དང་། ལྷ་ཆོས་འགྲུབ་བཞིན་ཡོད་དུས་མི་ཆོས་ལ་ཕྱིར་བལྟས་མི་བྱེད་པ་ནི་བདག་ཅག་གི་སྟོན་པ་མན་ཆོད་ཡིན། བདག་ཅག་གི་སྟོན་པ་ཐབས་མ་མཁས་པ་ག་ལ་ཡིན། ཐབས་ལ་མཁས་པ་ཐུགས་རྗེ་ཆེན་པོ་དང་ལྡན་པ་ཡིན་པ་རེད། འོན་ཀྱང་འཇིག་རྟེན་དང་ཆོས་གཉིས་མཉམ་པོར་སྒྲུབ་མ་ཐུབ་པར་བསྟན་པ་ཡིན། ཐབས་མཁས་ཀྱི་མཛད་པ་མིའི་སྤྱོད་ཡུལ་ལས་འདས་པ་འགའ་རེ་མེད་ཟེར་ཅི་ཤེས་ཀྱང་། སྤྱིར་བཤད་ན་དེ་ལྟར་ཡིན། ཉམས་སུ་མ་བླངས་ནས་བཤད་པའི་དུས་ལ་མ་བབས་གོང་ཞིག་ནས་བཤད་ལ་རིངས་བ། མགོ་མ་ཚོས་གོང་ནས་ལྕེ་ལ་བསྙབས་ནས་གཞན་ཕན་ལ་རེ་བ་། ཉམས་ཆུང་དབུལ་པོའི་ལག་གི་རིན་ཆེན་དང་། ཐོས་ཆུང་བླུན་པོའི་ཁ་ཡི་གདམས་ངག་བསྟན་སྔ་སོང་བ་དང་། ཅུང་ཟད་བསྒྲུབས་པ་ཉམས་ལེན་བྱས་པ་ལ་བསྙེན་བཀུར་ཆེན་པོ་འོང་དུ་རེ་བ་དེ་དག་ཐར་པའི་ལམ་དང་རྒྱ་མཚོའི་ཤར་ནུབ་བཞིན་ཡིན་པ། མཁའ་དང་ས་གཞིའི་བར་ཐག་རྒྱང་རིང་ཞིང་། །ཤར་ནུབ་རྒྱ་མཚོའི་འགྲམ་ཐག་དེ་བས་རིང་། །ཞེས་པ་བཞིན་ནོ།།

༡༣༠ རང་བཞིན་ངན་པའི་ཀུན་སྤྱོད་རྣམ་དྲུག་བསྟན་པ།

རང་བཞིན་ངན་པའི་ཀུན་སྤྱོད་རྣམ་དྲུག་ནི།།

བཟའ་བཏུང་བགོ་ན་རང་བཞིན་ཆེ་བར་འདོད།།

ཉོ་ཚོང་བྱེད་ན་རྒྱལ་ཁ་རང་ལ་འདོད།།

གོས་གོན་ཚེ་ན་རང་དྲོ་འཇམ་པ་འདོད།།

རང་འཆང་བཟང་ལ་གཞན་གཏོང་ངན་པར་འདོད།།

ཞག་གཅིག་གནས་ལའང་རང་སྐྱིད་ས་ཕྱོགས་འདོད།།

ཆོས་དང་བླ་མས་ཉེ་འབྲེལ་གཅེས་པར་འདོད།།

དེ་འདྲའི་མི་ལ་ཐར་པའི་མྱུ་གུ་སྐམ།།

ཞེས་གསུངས་པ་སྟེ། རང་བཞིན་ངན་པའི་ཀུན་སྤྱོད་རྣམ་པ་དྲུག་ཡོད་པ་དེ་སྤོང་དགོས་ཏེ། དེ་ཡང་བཟའ་བཏུང་བགོ་ན་སྐལ་བ་ཆེ་བ་དེ་ངེས་པར་དུ་ང་ལ་དགོས་ཞེས་རང་བཞིན་ཆེ་བར་འདོད་པ་དང་། ཉོ་ཚོང་བྱེད་ན་ངེས་པར་དུ་ང་ཁེ་དགོས་ཁྱོད་ཕམ་དགོས་ཞེས་རྒྱལ་ཁ་རང་ལ་འདོད་པ་དང་། དེ་འདྲའི་རང་འདོད་ཅན་གྱི་མི་རང་འབའ་ཞིག་ལེགས་དགོས་གཞན་དག་ཅི་རེད་ཀྱང་རེད་བསམ་ནས་གཞན་ལ་བསམ་བློ་མི་གཏོང་མཁན། གོས་གོན་ཚེ་བཟང་ངན་གཉིས་ཡོད་ན་དེ་ལས་དྲོ་བ་དང་འཇམ་པ་ཁོ་ལ་དགོས་ཞེས་པ་དང་། ཁོ་རང་གི་འཆང་རྒྱུ་ནི་བཟང་པོ་དགོས་ལ་གཞན་ལ་ཕར་གཏོང་རྒྱུ་ནི་ངན་པར་གཏོང་དགོས་པར་འདོད་པ་དང་། ཞག་གཅིག་ཞག་སའི་གནས་ཁང་གཅིག་ལ་མཉམ་པོར་བསྡད་ན་ཁོ་ཡག་ས་དང་སྐྱིད་ས་ལ་འདུག་དགོས་ཟེར་བའི་རང་འདོད་ཅན་དང་། དེ་འདྲ་དེ་ལ་འདོམས་ཁར་བཅུག་ན་ཆོས་དང་བླ་མ་བས་རང་གི་ཉེ་འབྲེལ་གཅེས་པར་འདོད་པ་ཡིན་པ་དེ་འདྲ་དེས་རང་དང་ཉེ་བས་ཅི་བྱས་ཀྱང་ལེགས་པར་བརྩི་ཞིང་། གཞན་གྱིས་བཟང་པོར་སྒྲུབ་པ་ལ་ཡང་སྐྱོན་ཞིག་དེའི་ཟུར་དུ་འདོགས་རྒྱུ་ཨེ་རྙེད་ལྟ་བར་བྱེད་པའི་མི་རྒྱུད་ངན་དེ་འདྲ་ལ་ཐར་བའི་མྱུ་གུ་སྐམ་པ་ཡིན་པས་མྱུ་གུ་སྐམ་པོ་ལ་འབྲས་བུ་གསར་བ་སྨིན་དུ་མེད་དོ།།

༡༣༡ མ་ནོར་ལམ་དུ་འཇུག་པའི་ཆོས་དྲུག་བསྟན་པ།

མ་ནོར་ལམ་དུ་འཇུག་པའི་ཆོས་དྲུག་ནི།།

དགོན་པའི་ས་བཟུང་ང་དང་བདག་མ་འཛིན།།

འཚོ་བའི་རྐྱེན་བཟུང་ང་དང་བདག་མ་འཛིན།།

མཁས་བཙུན་ཚུལ་བཟུང་མཐོན་པོའི་ཆ་མ་འཛིན།།

མ་དད་སྤྱོད་སྤངས་གཞན་གྱི་ངོ་མ་བསྲུང༌།།

སྙིང་རྗེས་ཕན་ཐོགས་ཁྱིམ་ཐབ་ནོར་མ་བསྲེལ།།

ཕྱོགས་མེད་སྦྱིན་ཐོང་ཡུས་དང་ལན་མ་རེ།།

ཞེས་གསུངས་པ་སྟེ། ཐར་ལམ་ཡང་དག་ཅིག་རྙེད་དགོས་ན་མ་ནོར་བའི་ལམ་དུ་འཇུག་པའི་ཆོས་དྲུག་འདི་འཛོམས་དགོས་ལ། དེ་ཡང་འཛིན་དགོས་པ་དགོན་པའམ་དབེན་པའི་ས་གཟུང་བ་ལས་འཛིན་མི་རུང་བའི་ང་དང་བདག་ལ་མི་འཛིན་པ་སྟེ། དེ་ཡང་རང་རྒྱུད་ཀྱི་ཕུང་པོ་ལ་དམིགས་པའི་ང་དང་བདག་ལ་མི་འཛིན་པ་དང་། ཕྱི་རོལ་གྱི་དངོས་པོ་སོགས་ལ་དམིགས་ནས་ཀྱང་ངའི་རྒྱུ་ངའི་དགོན་པ་ངའི་ཁྱིམ་ལ་སོགས་པའི་ང་ཡིར་འཛིན་པའང་མི་རུང་བ་ཡིན། འཚོ་བའི་རྐྱེན་དུ་གྱུར་པའི་ཡོ་བྱད་ཙམ་གཟུང་འོས་པ་ཡིན་ཡང་ང་དང་བདག་ལ་ཤིན་ཏུ་ཞེན་ཅིང་ཆགས་པའི་འཐས་པར་མི་འཛིན་པ་དང་། མཁས་བཙུན་གྱི་ཚུལ་ལམ་ཚུགས་གཟུང་ཞིང་རང་རྒྱུད་ཀྱི་བསླབ་པ་ལ་གུས་པའི་ཕྱིར་དུ་བསླབ་པ་གཞོན་པའམ་ཁྱིམ་པ་སོགས་ཀྱི་ཕྱག་ལེན་པ་སོགས་ཀྱི་ཚུལ་འཛིན་པ་དང་། གཞན་རྒྱུད་ཀྱི་བསླབ་པ་ལ་གུས་པའི་ཆ་ནས་མཐོན་པོའི་མི་ཆེན་གྱི་ཚུགས་མི་འཛིན་པ་དང་། གཞན་ཡང་མཁས་བཙུན་ཡིན་ན་མཐོན་པོའི་ས་གཟུང་མི་དགོས་པར་ཟིན་པ་ཡིན། དེ་མིན་དུས་གཟུང་ཡང་ཕན་ཐོགས་ཡོད་པ་མིན་ཏེ། ཉིན་ཁ་ཤས་ཀྱིས་ཐུར་དུ་འདྲིལ་པ་ནི་ཆོས་ཉིད་ཡིན། དེས་ན་དམན་པའི་ས་བཟུང་ནས་མཁས་བཙུན་གྱི་ཚུགས་དེ་མ་ཤོར་ཞེས་པ་ཡིན། མ་དད་པའི་སྤྱོད་པ་སྤངས་ཀྱང་གཞན་གྱི་ངོ་སྲུང༌དང་ངོ་དགའ་མི་བྱེད་པ་དང་། ཐེག་པ་ཆེན་པོའི་ལམ་གྱི་སྲོག་ཡིན་པས་སྙིང་རྗེས་གཞན་ལ་ཕན་བཏགས་པ་ལས་ཁྱིམ་ཐབ་དང་ནོར་བསྲེལ་མི་རུང་ཏེ། སྡུག་བསྔལ་དང་ཉོན་མོངས་ཀྱི་གཞི་མ་ཡིན་པའི་ཕྱིར། ཕྱོགས་དང་རིས་མེད་པར་སྦྱིན་པ་བཏང་ནས་བྱས་ཡུས་དང་ལན་ལ་མི་རེ་བ་སྟེ། དེ་ཡང་རབ་བྱུང་གིས་ཆོས་དང་། ཁྱིམ་པས་ཟང་ཟིང་གི་སྦྱིན་པ་དང་། གཉིས་ཀས་མི་འཇིགས་པ་སྐྱབས་ཀྱི་སྦྱིན་པ་བྱའོ།།

༡༣༢ ཉམས་ལེན་རང་རྐྱ་ཐུབ་པའི་ཆོས་དྲུག་བསྟན་པ།

ཉམས་ལེན་རང་རྐྱ་ཐུབ་པའི་ཆོས་དྲུག་ནི།།

ངོ་ལྐོག་མེད་པའི་ཚུལ་ཁྲིམས་རྐྱེན་ངན་ཐུབ།།

གདམས་ངག་ཁོང་ཁྲོལ་གང་ཡང་ཉམས་ལེན་ཤེས།།

བར་ཆད་བགེགས་སེལ་ནད་གདོན་འདོན་ལ་མཁས།།

ཐོས་བསམ་མཐའ་ཆོད་གཞན་ལ་དྲི་རྒྱུ་མེད།།

གོལ་སྒྲིབ་མཐའ་ཆོད་ཐེག་པ་མཐོ་དམན་ཤེས།།

བདུད་ཀྱིས་མི་ཚུགས་གོ་ཆ་ལྡན་པའོ།།

ཞེས་གསུངས་པ་སྟེ། ཉམས་ལེན་རང་རྐྱ་ཐུབ་པར་བྱེད་པའི་ཆོས་དྲུག་དེ་གང་ཞེ་ན། ངོ་ལྐོག་མེད་པའི་ཚུལ་ཁྲིམས་ཀྱིས་རྐྱེན་ངན་པ་ཐུབ་པ་ལས་ངོས་ནས་བསྲུངས་ཤིང་ལྐོག་ནས་མི་བསྲུང་བ་དེས་རྐྱེན་ངན་ཐུབ་པ་མིན་པས། རྐྱེན་ངན་ཐུབ་པའི་ཚུལ་ཁྲིམས་རང་སེམས་གཙང་མ་དཔང་པོར་འཇོག་ཆོག་པ་ཞིག་བསྲུང་དགོས་པ་དང་། གདམས་ངག་གི་ཁོང་ཁྲོལ་བའམ་ཁོག་ཁྲོལ་ན་གང་ཡང་ཉམས་ལེན་ཤེས་པས། མི་མཐུན་པ་འབའ་ཞིག་གི་འགལ་བ་མི་འདུ་བ་ཡིན་པ་དང་། བར་ཆད་ཀྱི་བགེགས་རང་སྟོབས་ཀྱིས་སེལ་ནུས་ཤིང་། ནད་གདོན་འདོན་པའི་ཐབས་ལ་མཁས་པ་དང་། ཐོས་བསམ་གྱི་མཐའ་རྒྱ་ཆོད་ནས་གཞན་ལ་དྲི་རྒྱུ་མེད་པ་སྟེ་དྲི་རྒྱུ་ཚང་མ་བླ་མའི་མདུན་ནས་ཐེ་ཚོམ་ཆོད་ཚར་རྗེས་རི་ཁྲོད་ལ་འགྲོ་དགོས་པ་ལས། རི་ཁྲོད་དབེན་པར་ཐོན་དུས་ཡང་གཅིག་དྲི་བར་རྟ་ཟིན་སྒ་ཟིན་བྱས་ནས་རྒྱུག་རྒྱུ་ཡོད་པ་མིན། གོལ་སྒྲིབ་ཀྱི་མཐའ་མ་ཆོད་ན་འོག་མར་གོལ་བའི་ཉེན་ཡོད་པ་དེས་ན་ཐོས་བསམ་གྱི་མཐའ་རྒྱ་ཆོད་ནས་ཐེག་པ་མཐོ་དམན་གྱི་ཉམས་ལེན་གྱི་གནད་ཤེས་པ་དང་། བདུད་ཀྱི་བར་ཆད་ཀྱི་མཚོན་གྱིས་མི་ཚུགས་པར་བྱེད་པའི་གོ་ཆ་དང་ལྡན་པའོ།།

༡༣༣ ངོ་ཚ་རྣམ་དྲུག་སྤང་བར་གདམས་པ།

ངོ་ཚ་རྣམ་དྲུག་སྤང་བར་གདམས་པ་ནི།།

ནོར་རྫས་ཡོ་བྱད་སོག་ན་ངོ་ཚའི་གནས།།

གོས་བཟང་ཕྱི་འཆོར་ཆེ་ན་ངོ་ཚའི་གནས།།

རྒྱན་དང་སྒེག་ཆོས་བྱེད་པ་ངོ་ཚའི་གནས།།

ཟང་ཟིང་གཡེང་བ་བསྒྲུབས་ན་ངོ་ཚའི་གནས།།

ཆོས་མིན་བྱ་བ་མང་པོ་ངོ་ཚའི་གནས།།

ཆེ་ཁྱད་ང་རྒྱལ་དྲེགས་པ་ངོ་ཚའི་གནས།།

སྙིང་ནས་ཆོས་མཛད་རྣམས་ཀྱིས་སྤང་བར་འཚལ།།

ཞེས་གསུངས་པ་སྟེ། ངོ་ཚ་རྣམ་དྲུག་སྤང་བ་བྱ་བར་གདམས་པ་ནི། རབ་བྱུང་བ་ཞིག་ལ་མཚོན་ན་ནོར་རྫས་ཡོ་བྱད་སོག་ན་ངོ་ཚའི་གནས་ཇི་ལྟར་ཡིན་ན། བན་རྒན་ཤི་བའི་ཤུལ་དུ་རྒྱུ་ནོར་མང་ཆེན་ཡོད་པ། དཔེར་ན་གནའ་དགོན་པ་ཞིག་གི་བན་རྒན་ཞིག་ཤི་དུས་མཛུབ་མོ་གྱང་ལོགས་སུ་བཙུགས་ནས་ཤི་བ་རེད། དེར་སློག་དུས་དངུལ་སྒོར་ཞོ་བདུན་མ་མང་རབ་ཅིག་སྦས་ཡོད་ཅིང་། དེ་འདྲ་དེ་ངོ་ཚའི་གནས་ཡིན། ཁྱིམ་པ་ཡིན་ཡང་ཟ་མི་བྲ། གོན་མི་བྲ། བྱིས་པའི་སློབ་སྦྱོང་གི་དོན་དུ་གཏོང་མི་བྲ། ཤི་གསོན་གཉིས་ཀའི་དོན་དུ་མངག་མ་བྲ་བ་དེ། ནམ་ཞིག་འབྲེལ་མེད་ཁ་ཤས་ཀྱིས་བགོ་བཤའ་བྱེད་དུས་ངོ་ཚ་སྡུག་གྱོང་ཐམས་ཅད་ཀྱི་གཞི་ཡིན། དེ་དུས་ངོ་ཚ་མཁན་མེད་ཀྱང་མ་ཤི་གོང་ནས་ཀྱང་དེའི་རྒྱུ་མཚན་ཚང་མས་ཤེས་པ་ཡིན། ཁྱིམ་པ་ཞིག་ཡིན་ན་ལོངས་སྤྱོད་ཚུལ་དང་མཐུན་པ་ཞིག་གིས་གསོག་དགོས་ལ། གསོག་ནས་ཅི་བྱེད་དགོས་ན་གཏོང་དགོས། རབ་ཡིན་ན་ཆོས་ཕྱོགས་སུ་མངག་དགོས། འབྲིང་ཡིན་ན་སྙན་གྲགས་དང་མགོ་རྣ་ལ་རྒྱའི་དོན་དུ་མངག་དགོས། ཤོ་སྐུགས་དང་ཆང་རག་གི་དོན་དུ་ཤོར་བ་ནི་ཐ་ཆད་པ་ཡིན། གོས་བཟང་པོ་རིན་ཐང་ཅན་མི་ལ་མ་བལྟས་པའི་གོས་གྱོན་ནས་ཕྱི་འཕྱོར་ཆེ་ན་ངོ་ཚའི་གནས་ཡིན་པས། གྲྭ་བ་སེར་མོ་པ་ཞིག་ཡིན་ན་བཅོམ་ལྡན་འདས་ཀྱིས་གནང་བའི་ཆོས་གོས་རྣམ་གསུམ་དང་། ས་མཐའ་འཁོབ་ལ་ཡུལ་དུས་ཀྱི་དབང་གིས་ཀོ་ལྤགས་གནང་བ་བཞིན་དུ་ཤུགས་ལ་གནང་བའི་འུ་ཅག་གི་གྲྭ་ཆས་སྤྱིར་གཏང་བ་ཕུ་དུང་ཡོད་པ་འདི་ཚོ་ལ་སོགས་པ་དང་། ཞེན་པ་མེད་ན་འབུམ་རི་བ་ལ་སོགས་པ་གོན་ཆོག་པ་རེད་ཀྱང་ཕྱི་འཕྱོར་ཆེ་ཆེས་ན་མཛེས་བྱེད་མ་དགོས་རྫོབ་བྱེད་ཡིན་པ་རེད། རྒྱ་གསེར་གྱི་སྟོད་འབོག་ལ་སོགས་པ་མིག་ལ་མི་འཛའ་བ་གོན་ན་གོན་མཁན་ཁོ་རང་ངོ་ཚ་བས་མི་ཚད་ལྟ་མཁན་ཡང་ངོ་ཚ་བ་དེ་འདྲ་ཡོང་བ་རེད། བླ་སེར་ཞིག་གིས་སྐེ་རྒྱན་མཛུབ་དཀྲིས་གསེར་ཐག་ལ་སོགས་པ་བཏགས་ནས་རྒྱན་དང་སྒེག་ཆོས་བྱེད་པ་ངོ་ཚའི་གནས་ཡིན། དེ་ཡག་བྱེད་མ་དགོས་བཙོག་བྱེད་ཡིན། མཛེས་བྱེད་ཀྱི་རྒྱན་ངོ་མ་དེ་གང་ཡིན་ན་མཁས་པའི་ཡོན་ཏན་བཙུན་པའི་ཚུགས་ཡོད་དགོས་དེ་རྒྱན་རེད། ཁྱིམ་པ་ཡིན་ཡང་ཤེས་རིག་ཡོན་ཏན་གྱི་རྒྱན་དང་ལྡན་པ་བྱེད་པ་དང་། དེའི་ཐོག་ཏུ་རྒྱན་གོས་བབས་ཆགས་གཙང་མ་རེ་བྱས་ན་མཛེས་པོ་ཡོང་བ་ཡིན། ལར་སྐྱ་སེར་སུ་ཡིན་ཡང་གཙང་སྦྲ་ཡོད་དགོས། དྲི་ངན་ཕ་ལེ་མེད་ན་མཛེས་ཤིང་། དེ་ལ་ངོ་ཚ་མི་དགོས། ཟང་ཟིང་གཡེང་བ་རྒྱུ་ནོར་གསོག་འཇོག་འབའ་ཞིག་རང་འདོད་ཁོ་ནས་བསྒྲུབས་ན་ངོ་ཚའི་གནས་ཡིན། ཆོས་པའི་མིང་བཟུང་ནས་ཆོས་མིན་གྱི་བྱ་བ་མང་པོ་བསྒྲུབས་པར་བྱས་ན་ངོ་ཚའི་གནས་ཡིན། རང་གི་ཆེ་ཁྱད་འདོན་པ་དང་ང་རྒྱལ་དྲེགས་པ་ཡིས་གཞན་ལ་བརྙས་སྨོད་བྱེད་པ་འདི་དག་ཐམས་ཅད་བསྒྲུབས་ན་ངོ་ཚའི་གནས་ཡིན་པ་སྟེ། དེ་དག་ནི་ཞེ་སྙིང་ནས་དམ་པའི་ཆོས་མཛད་མཁན་སུ་དང་སུ་འདྲ་ཡིན་ན་དེ་རྣམས་ཀྱིས་སྤང་བར་འཚལ་ལོ།།

༡༣༤ གོང་མའི་རྣམ་ཐར་བསྟེན་པའི་ཆོས་དྲུག་བསྟན་པ།

གོང་མའི་རྣམ་ཐར་བསྟེན་པའི་ཆོས་དྲུག་ནི།།

ཡེང་མེད་མི་རྟག་འཆི་བས་སྐུལ་མ་བཏབ།།

འཁོར་བ་སྡུག་བསྔལ་ཤེས་པས་རྒྱབ་ཏུ་བོར།།

རྒྱལ་སྲིད་ལོངས་སྤྱོད་མཆིལ་མ་བཞིན་དུ་བོར།།

དད་བརྩོན་རྣམ་དག་བསྟན་པའི་ཆོས་སྒོར་ཞུགས།།

དགེ་བའི་བཤེས་བཙལ་ཐོས་བསམ་སྤྲོས་པ་བཅད།།

དཀའ་ཐུབ་ཆེར་སྤྱད་ལུས་སྲོག་འབེན་དུ་བཙུགས།།

དེ་ལྟར་མཛད་པས་གྲུབ་པ་བརྙེས་པ་དང༌།།

དེ་ལ་ཚད་བཙུགས་སྒྲུབ་ལ་འབད་པར་བྱ།།

ཞེས་གསུངས་པ་སྟེ། གོང་མ་དམ་པའི་རྣམ་ཐར་བསྟེན་པའི་ཆོས་དྲུག་ནི། ཚེ་གཅིག་ལ་ཡེངས་བ་མེད་པར་མི་རྟག་འཆི་བས་སྐུལ་མ་རང་ལ་བཏབ་ནས་འཆི་རྐྱེན་ངེས་མེད་ཡིན་པར་བསམ་བློ་བཏང་ནས་བློ་སྣ་ཐུང་དགོས་པ་དང་། འཁོར་བ་འདི་སྡུག་བསྔལ་གྱི་རང་བཞིན་ཅན་ཡིན་པ་ཤེས་པར་བྱས་ནས་ཆོས་བརྒྱད་ཀྱི་ཞེན་པ་རྒྱབ་ཏུ་བོར་བར་བྱེད་དགོས་པ་དང་། རྒྱལ་སྲིད་ཀྱི་འབྱོར་བ་དང་ལོངས་སྤྱོད་རྒྱས་ཀྱང་མཆིལ་མ་ས་རུ་འཕངས་ནས་ཡར་མི་ལེན་པ་བཞིན་དུ་བོར་དགོས་པ་དང་། དད་པ་དང་བརྩོན་འགྲུས་རྣམ་པར་དག་པས་སངས་རྒྱས་ཀྱི་བསྟན་པའི་ཆོས་སྒོར་ཡང་དག་པར་ཞུགས་དགོས་པ་དང་། དགེ་བའི་བཤེས་གཉེན་མཚན་ཉིད་དང་ལྡན་པ་ཞིག་བཙལ་ཏེ། དེའི་མདུན་ནས་ཐོས་བསམ་གྱི་སྤྲོས་པའམ་ཐེ་ཚོམ་གཅིག་ཀྱང་མ་ལུས་པར་གཅོད་པར་བྱེད་པ་དང་། དམ་པའི་ཆོས་ཐོས་པ་དེ་ཡང་བསམ། བསམ་པ་དེ་ཡང་སྒོམ་ཞིང་བསྒྲུབས་ནས་དཀའ་སྤྱད་སྙིང་རུས་ཆེ་ཐང་དུ་སྤྱད་ནས་ལུས་སྲོག་འབེན་དུ་བཙུགས་ནས་ཆོས་སྒྲུབ་པར་བྱེད་པ་སྟེ། དེ་ལྟར་མཛད་པས་སྒྲུབ་པའི་འབྲས་བུ་གྲུབ་པ་བརྙེས་པ་ཡིན་ཕྱིར་གོང་མའི་རྣམ་ཐར་དེ་དག་ལ་ཚད་བཙུགས་ནས་སྒྲུབ་པ་ལ་འབད་པར་བྱའོ།།

༡༣༥ དེ་ལས་གཞན་དོན་ཆོས་དྲུག་འབྱུང་བར་བསྟན་པ།

དེ་ལས་གཞན་དོན་ཆོས་དྲུག་འབྱུང་བ་ནི།།

ཐུགས་རྗེ་འབྱོངས་པས་ཉེ་རིང་མེད་པར་བརྩེ།།

རྟོགས་པ་ཚད་ཕྱིན་བདག་འཛིན་འཁྲུལ་བ་ཞིག།

རྒྱུད་ཚོད་ཤེས་པས་རྟེན་འབྲེལ་ཐབས་ལ་མཁས།།

ཆོས་ཉིད་གྲོལ་བས་ཅི་སྣང་གྲོགས་སུ་འཆར།།

བྱིན་རླབས་ཞུགས་པས་གཞན་སྣང་བསྒྱུར་ནུས་ཤིང༌།།

གདུལ་བྱ་དུས་བབ་དད་ལྡན་འགྲོ་བ་འདུ།།

ཕྱི་ནང་རྟེན་འབྲེལ་གཅིག་ཏུ་འགྲིགས་པ་ཡིན།།

ཞེས་གསུངས་པ་སྟེ། གོང་དུ་གསུངས་པ་དེ་ལྟར་སྒྲུབ་པ་ལ་འབད་པས་གཞན་དོན་འབྱུང་བའི་ཆོས་དྲུག་ནི། ཐུགས་སྙིང་རྗེ་ཆེན་པོ་རྒྱུད་ལ་འབྱོངས་པས་ཉེ་རིང་མེད་པར་སེམས་ཅན་ཐམས་ཅད་ལ་བརྩེ་བ་སྐྱེ་བ་དང་། ཉམས་དང་རྟོགས་པའི་ཡོན་ཏན་ཚད་དུ་ཕྱིན་ནས་བདག་འཛིན་འཁྲུལ་བ་ཞིག་པ་དང་། གཞན་གདུལ་བྱའི་རྒྱུད་ཚོད་ཤེས་པས་ན་དུས་ལ་བབས་དང་མ་བབས་ལ་སོགས་པའི་རྟེན་འབྲེལ་གྱི་ཐབས་ལ་མཁས་པ་དང་། ཆོས་ཅན་ཐམས་ཅད་ཆོས་ཉིད་ཀྱི་ཀློང་དུ་གྲོལ་བས་ན་ཅི་སྣང་ཐམས་ཅད་ལམ་གྱི་གྲོགས་སུ་འཆར་བ་ཡིན་པ་དང་། གོང་མའི་བྱིན་རླབས་རང་གི་རྒྱུད་ལ་ཞུགས་པས་ཆོས་བཤད་ན་ཕན་ཐོགས་པ་སོགས་གཞན་སྣང་བསྒྱུར་ནུས་པ་སྟེ། དེ་ཡང་ནུས་པ་ཁྱད་པར་ཅན་ངེས་མེད་ཀྱི་ཐོག་ནས་ཐོན་ཐུབ་པ་བྱིན་རླབས་དང་། དེས་བྱིན་གྱིས་བརླབས་པའམ་དེར་སྒྱུར་ཐུབ་པ་ལ་བྱིན་རླབས་ཐོབ་ཅེས་ཟེར། བྱིན་རླབས་ཡིན་ཚད་བཟང་པོ་ཏག་ཏག་ཡིན་པར་གོ་མི་དགོས་ཏེ། བདུད་ཀྱིས་བྱིན་གྱིས་རླབས་པ་ཡང་ཡོད་པའི་ཕྱིར། དེས་ན་ངན་པའི་བྱིན་རླབས་གྲོགས་ངན་དང་འགྲོགས་ནས་དེའི་ཤུགས་ལ་འགྲོ་བ་ལ་སོགས་པ་དང་། བཟང་པོའི་བྱིན་རླབས་རྟེན་ཁྱད་པར་ཅན་མཇལ་ན་ཉམས་རྟོགས་ཁྱད་པར་ཅན་སྐྱེ་བ་དང་། སྔར་མེད་ཀྱི་དད་པ་འཁྲུངས་པ་དང་། གནས་ཁྱད་པར་ཅན་གྱི་དབང་གིས་ཏིང་ངེ་འཛིན་དང་དད་པ་དང་ངེས་འབྱུང་རང་ཤུགས་ཀྱིས་སྐྱེ་བ་དང་། བླ་མས་ཆོས་གསུངས་དུས་ངེས་ཤེས་གཏིང་ནས་འདྲོངས་ནས་རྒྱུད་ལ་ཕན་ཐོགས་པ་ལ་སོགས་པ་ཡོད་དོ། །གདུལ་བྱ་དུས་ལ་བབས་ན་དད་ལྡན་འགྲོ་བ་ངང་གིས་འདུས་ནས་ཕྱི་དང་ནང་གི་རྟེན་འབྲེལ་དུས་གཅིག་ལ་མཉམ་དུ་འགྲིགས་པ་ཡིན་ནོ།།

༡༣༦ དགེ་སྦྱོར་རྒྱུད་ལ་མ་ཁེལ་སྐྱོན་དྲུག་བསྟན་པ།

དགེ་སྦྱོར་རྒྱུད་ལ་མ་ཁེལ་སྐྱོན་དྲུག་ནི།།

ཉམས་ལེན་མེད་ན་ཤེས་ཀྱང་འཁོར་བར་འཁྱམ།།

འབེན་དྲུང་བཞག་ནས་གཞན་དུ་རྒྱང་མདའ་འཕེན།།

ཇག་པ་ཤར་རི་ནུབ་རིར་ར་མདར་རྒྱུག།

རྐུན་མ་ནགས་བྲོས་རྐང་རྗེས་བྱེ་རིར་བཅད།།

ཆུས་ཁྱེར་ར་མདའ་སྐམ་ལ་རྒྱུག་པ་སྟེ།།

གྱེར་བའི་སྨྲང་ཡོད་མདོས་གཏོང་ས་མི་ཤེས།།

དེ་འདྲའི་གང་ཟག་བདེ་ཆེན་ས་དང་རིང༌།།

ཞེས་གསུངས་པ་སྟེ། དགེ་སྦྱོར་གང་བྱས་རྒྱུད་ལ་མ་ཁེལ་ན་སྐྱོན་དྲུག་འབྱུང་བ་ནི། ཉམས་ལེན་གྱི་གནད་མེད་ན་འཁོར་བ་རང་བཞིན་མེད་ཅེས་ཟེར་ཤེས་ཀྱང་རང་བཞིན་མེད་པའི་དོན་རྒྱུད་ཐོག་ལ་མ་ཁེལ་བས་འཁོར་བར་འཁྱམས་པ་ཡིན་པ་ནི། དཔེར་ན་འབེན་དྲུང་དུ་བཞག་ནས་གཞན་དུ་རྒྱང་མདའ་འཕངས་པར་བྱས་ཀྱང་འབེན་གྱི་སྟེང་དུ་ཁེལ་རྒྱུ་མེད་པ་ལྟ་བུ་དང་། ཇག་པ་ཤར་རིའི་ཕྱོགས་ལ་བཞག་ནས་ནུབ་རིར་ར་མདར་རྒྱུག་ན་ཐུག་རྒྱུ་མེད་པ་ལྟ་བུ་དང་། རྐུན་མ་ནགས་སུ་བྲོས་ཚེ་རྐང་རྗེས་བྱེ་རི་ལ་བཅད་པ་ལྟ་བུ་དང་། མི་ཆུས་ཁྱེར་དུས་ཆུ་ནང་དུ་སོང་ནས་སྲོག་སྐྱོབ་ཐབས་མི་བྱེད་པར་ར་མདའ་སྐམ་ལ་རྒྱུག་པ་ལྟ་བུ་དང་། གླུད་འཕེན་བྱེད་ཀྱི་འདོན་ཆོག་གྱེར་བའི་དབྱངས་རྟའི་སྨྲང་ཡོད་ཀྱང་མདོས་ཀྱི་ཡས་ལམ་མམ་གཏོང་ས་མི་ཤེས་པ་ལྟ་བུ་སྟེ། དེ་དག་ནི་དགག་བྱ་རང་རྒྱུད་ལ་ཡོད་པའི་བདེན་འཛིན་དང་དེས་སྐྱེད་པའི་ཉོན་མོངས་སྤོང་བ་ལ་མི་བརྩོན་པར་ཚིག་གི་བཤད་རྒྱང་འཐེན་པའི་འཛོལ་བ་ཅན། ཕྱོགས་དང་ལམ་དམིགས་པ་དང་འདུན་པ་ནོར་སོང་བའི་གང་ཟག་ཡིན་པས་བདེ་ཆེན་གྱི་ས་དང་ཐག་རིང༌བ་ཡིན་ནོ།།

༡༣༧ དཀའ་བའི་སྐྱོན་དྲུག་འབྱུང་བར་བསྟན་པ།

དཀའ་བའི་སྐྱོན་དྲུག་འབྱུང་བར་བསྟན་པ་ནི།།

འཁོར་བར་འདུན་ལ་ཡང་དག་དད་པ་དཀའ།།

ཁྲེལ་འཛེམ་མེད་པའི་བསླབ་གསུམ་བསྲུང་བ་དཀའ།།

མཚན་ལྡན་མ་མཇལ་ཐར་ལམ་ཚུད་པ་དཀའ།།

ཐབས་ལམ་མ་ཆུན་ཡེ་ཤེས་འཆར་བར་དཀའ།།

མཐར་འཛིན་མ་གྲོལ་ལྟ་བ་རྟོགས་པར་དཀའ།།

མངོན་ཤེས་མེད་པའི་གཞན་དོན་འབྱུང་བར་དཀའ།།

དཀའ་བ་ལགས་པས་ཀུན་གྱིས་འགྲུབ་པ་དཀོན།།

ཞེས་གསུངས་པ་སྟེ། ལམ་སྒྲུབ་སྐབས་ཀྱི་དཀའ་བའི་སྐྱོན་དྲུག་འབྱུང་བར་བསྟན་པ་ནི། འཁོར་བ་ལ་འདུན་ནས་འཁོར་བ་འདི་བདེ་ཞིང་སྐྱིད་པར་འདུག་སྙམ་པའི་ངེས་འབྱུང་མ་སྐྱེས་པའི་གང་ཟག་དེ་ལ་ཡང་དག་པའི་དད་པ་ཡོང་བ་དཀའ་བ་ཡིན་ཏེ། ཚེ་འདིའི་ཆེད་ཙམ་ལས་ཕྱི་མའི་འདེང་མེད་ན་དེ་ལ་ངེས་འབྱུང་མེད་པ་ཡིན། དེ་འདྲ་དེས་རྒྱུ་འབྲས་ཀྱི་འགྲོ་སྟངས་མི་ཤེས་པས་དད་པ་ཡང་དག་པ་བློ་གཏད་ལིང་སྐྱུར་ཡོད་པ་མིན། དེས་ན་དེ་ལ་བྱིན་རླབས་ཀྱང་ཐོབ་དཀའ་བ་ཡིན་ནོ། །ཁྲེལ་ལ་འཛེམ་བག་མེད་པའི་གང་ཟག་དེས་བསླབ་གསུམ་ཚུལ་བཞིན་དུ་བསྲུང་བ་དཀའ་བ་ཡིན་པ་དང་། མཚན་ལྡན་གྱི་བླ་མ་དམ་པ་མཇལ་ནས་གདམས་ངག་གི་བཅུད་མྱོང་མཁན་ཞིག་ཡིན་ཚེ་ཕྱོགས་གང་ནས་ཀྱང་མི་འདྲ་བའི་ཁྱད་པར་ཡོད་ཅིང་། དེ་ལས་གཞན་དུ་རང་གར་ཁུངས་མེད་ལུང་མེད་དག་གིས་ཕྱི་ཚུལ་ཅི་འདྲའི་འཆོས་བཞིན་བསྡད་ཀྱང་ཐར་ལམ་ཡང་དག་པ་ལ་ཚུད་པ་དཀའ་བ་ཡིན་པ་དང་། གསང་སྔགས་ཀྱི་ཐབས་གྲོལ་གྱི་ལམ་གཉིས་ལས་ཐབས་ལམ་གནད་དུ་མ་ཆུན་ན་བདེ་སྟོང་གི་ཡེ་ཤེས་འཆར་བར་དཀའ་བ་དང་། རྟག་ཆད་ལ་སོགས་པའི་མཐར་འཛིན་གྱི་སྤྲོས་པ་ལས་མ་གྲོལ་བ་ཡིས་སྟོང་ཉིད་ཀྱི་ལྟ་བ་རྟོགས་པར་དཀའ་བ་དང་། རང་ལ་མངོན་ཤེས་མེད་པའི་འོལ་ཚོད་ཀྱིས་གཞན་དོན་རྣམ་དག་འབྱུང་བར་དཀའ་བ་ཡིན་པས། གཞན་དོན་བྱེད་པའི་དུས་སུ་གཞན་གྱི་རྒྱུད་བརྟག་པ་ལ་སོགས་པའི་མངོན་ཤེས་ངེས་པར་དུ་ཡོད་དགོས་པ་ལས། ཁ་བའི་འོག་གི་དངོས་པོ་བཙལ་བ་བཞིན་དུ་གསལ་བོར་མི་ཤེས་པས་གཞན་རྒྱུད་ཐུལ་དཀའ་བ་ཡིན། དཀའ་བ་ལགས་པས་ཀུན་གྱིས་ཚེགས་མེད་བདེ་བླག་ཏུ་འགྲུབ་པ་དཀོན་ནོ།།

༡༣༨ ཉམས་ལེན་ཡེངས་ཐུབ་གོམས་པ་རྣམ་དྲུག་བསྟན་པ།

ཉམས་ལེན་ཡེངས་ཐུབ་གོམས་པ་རྣམ་དྲུག་ནི།།

དལ་འབྱོར་དྲན་པས་དོན་མེད་བྱ་བ་སྤང༌།།

མི་རྟོག་ཡེངས་མེད་ལེ་ལོའི་དགྲ་དང་བྲལ།།

དངོས་གྲུབ་རྙེད་པས་བརྩོན་པ་རྒྱུན་མི་འཆད།།

ཉམས་རྟོགས་འཕེལ་བས་སྒོམ་སྒྲུབ་བྲོད་པ་སྐྱེ།།

རིག་པ་དབང་ཐོབ་ཡེངས་རྐྱེན་ཆོས་ཉིད་འཆར།།

མདོ་རྒྱུད་ཆོས་དང་རང་རྒྱུད་འདྲེས་པའོ།།

ཞེས་གསུངས་པ་སྟེ། ཉམས་ལེན་ཡེངས་བ་ཐུབ་ནས་མི་ཡེངས་བར་གོམས་པ་རྣམ་དྲུག་ནི། དལ་འབྱོར་རྙེད་དཀའ་ཡིན་པ་དྲན་པས་ན་དོན་མེད་ཀྱི་བྱ་བ་སྤོང་ནུས་པ་དང་། རྣམ་པར་མི་རྟོག་པར་ཡེངས་མེད་ཀྱི་ཏིང་འཛིན་ལ་གནས་ཐུབ་ན་ལེ་ལོའི་དགྲ་དང་བྲལ་བ་དང་། དངོས་གྲུབ་རྙེད་པ་ཞིག་ཡིན་ཚེ་ཆོས་ལ་བརྩོན་པ་རྒྱུན་མི་འཆད་པར་རང་ཤུགས་ཀྱིས་འཇུག་པ་ཡིན་པ་དང་། ཉམས་རྟོགས་གོང་ནས་གོང་དུ་འཕེལ་བས་སྒོམ་སྒྲུབ་ལ་འབྲས་བུ་ཡོད་པར་ཧ་གོ་ནས་བྲོད་པའམ་དགའ་བ་རང་བཞིན་གྱིས་སྐྱེ་བ་དང་། རིག་པ་ལ་དབང་ཐོབ་ཚེ་ཕྱིའི་ཡེངས་རྐྱེན་དེ་ཡང་ཆོས་ཉིད་དུ་འཆར་བ་དང་། དེ་ལྟར་འགྱུར་ཚེ་མདོ་དང་རྒྱུད་སྡེའི་ཆོས་ཚུལ་རབ་འབྱམས་རང་གི་རྒྱུད་དང་འདྲེས་པར་འགྱུར་རོ།།

༡༣༩ མཐར་ཕྱིན་བར་དུ་བསྟན་པའི་ཆོས་དྲུག་བསྟན་པ།

མཐར་ཕྱིན་བར་དུ་བསྟེན་པའི་ཆོས་དྲུག་ནི།།

ཉེ་འབྲེལ་བོར་ལ་ཆོས་ལྡན་གྲོགས་བཟང་བསྟེན།།

སྡིག་གྲོགས་བོར་ལ་མཁས་བཙུན་བླ་མ་བསྟེན།།

འདུན་གྲོས་བོར་ལ་གཏན་གྱི་སྐྱིད་འདུན་ཆོས།།

ཐོས་བསམ་བསྟེན་ལ་རྒྱུད་ལ་ཅི་འདྲིས་གྱིས།།

གྲོང་ཡུལ་སྤངས་ལ་རི་ངོགས་དབེན་པ་བསྟེན།།

གདམས་པ་ཚོལ་ལ་བརྩོན་པས་སྒྲུབ་པ་གྱིས།།

དེ་ལྟར་བྱས་ན་དངོས་གྲུབ་མྱུར་དུ་ཐོབ།།

ཅེས་གསུངས་པ་སྟེ། སྒྲུབ་པ་མཐར་མ་ཕྱིན་གྱི་བར་དུ་བསྟེན་དགོས་པའི་ཆོས་དྲུག་ནི། ཉེ་འབྲེལ་བདུད་ཀྱི་གཡབ་མོ་ཡིན་པས་བོར་ལ་ཆོས་ལྡན་ནམ་ཆོས་མཐུན་གྱི་གྲོགས་བཟང་པོ་བསྟེན་པ་དང་། སྡིག་གྲོགས་ནི་ངན་འགྲོའི་ལམ་མཁན་ཡིན་པས་བོར་ནས་མཁས་བཙུན་བཟང་གསུམ་དང་ལྡན་པའི་བླ་མ་ལ་བསྟེན་པ་དང་། དེ་ཡང་སྡིག་གྲོགས་ཞེས་པ་ནག་པོ་རྭ་ཅན་ཞིག་ལོགས་ན་མེད་པར་དུས་རྒྱུན་ཟུར་དུ་ཡོད་པའི་ཐོས་བསམ་སྒོམ་པ་རྣམས་མར་འགྲིབ་པར་བྱེད་ཅིང་། ཉོན་མོངས་ཆགས་སྡང་རྨོངས་གསུམ་ཡར་འཕེལ་བར་བྱེད་པ་དེ་དག་ཡིན་ནོ། །འཇིག་རྟེན་གྱི་བྱ་བ་མང་པོ་ཞིག་ཐོན་དགོས་བསམས་ནས་འདུན་གྲོས་མང་པོ་བྱེད་པ་སྟེ། དཔེར་ན་མང་པོའི་གྲོས་འགོ་བསྡུ་བ་དང་། ཡ་ཀའི་གཉེན་སྒྲིག་ས། མར་ཀའི་གྱོད་བཤད་ས། ཐ་ན་རྩྭ་ས་མཚེར་ས་རྩོད་ས་ཚུན་ཆོད་ལ་ཐོན་ཡོད་པ་དེ་འདྲ་དེ་བོར་ནས་གཏན་གྱི་བདེ་སྐྱིད་ཀྱི་འདུན་མ་བཅའ་དགོས་པ་དང་། ཐོས་བསམ་བསྟེན་པར་བྱས་ནས་དེ་དག་རང་རྒྱུད་ལ་ཅི་འདྲིས་བྱེད་པ་དང་། ཆོས་སྒྲུབ་པའི་གང་ཟག་གིས་གྲོང་ཡུལ་འདུ་འཛིའི་གནས་སྤངས་ལ་རི་ངོགས་དབེན་པའི་རི་ཁྲོད་ལ་བསྟེན་པ་དང་། གདམས་པ་གང་གིས་ཟབ་པ་རྣམས་བཙལ་ནས་དེ་ལ་བརྩོན་པས་སྒྲུབ་པ་དགོས་པ་སྟེ། དེ་ལྟར་བྱས་ན་མཆོག་ཐུན་གྱི་དངོས་གྲུབ་རང་རང་གི་བློ་ཚོད་དང་མཐུན་པར་མྱུར་དུ་ཐོབ་པ་ཡིན་ནོ།།

༡༤༠ ཕན་གནོད་འདྲེས་མར་སོང་བ་རྣམ་དྲུག་བསྟན་པ།

ཕན་གནོད་འདྲེས་མར་སོང་བ་རྣམ་དྲུག་ནི།།

ཡོན་ཏན་མི་སྐྱེ་བླ་མ་བསྟེན་པ་དང༌།།

སྲོལ་དུ་མི་ཚུད་སློབ་མ་བསྟེན་པ་དང༌།།

ཆོས་བརྒྱད་མ་བྲལ་སྒྲུབ་པ་བྱེད་པ་དང༌།།

ལོག་འཚོའི་རྙེད་འཚོལ་གཞན་དོན་བྱེད་པ་དང༌།།

བསྲུང་སེམས་མེད་པའི་སྡོམ་ཁྲིམས་ནོད་པ་དང༌།།

དགེ་སྡིག་འཆོལ་བའི་གསང་སྔགས་སྤྱོད་པ་རྣམས།།

ཕན་གནོད་འདྲེས་པས་ཆོས་ཀྱི་གཟུགས་བརྙན་ཡིན།།

ཞེས་གསུངས་པ་སྟེ། བཟང་ངན་གཉིས་ཀ་འདྲ་འདྲེས་སོང་ནས་ཕན་གནོད་འདྲེས་མར་ཡོད་པའི་ཆོས་རྣམ་པ་དྲུག་ནི། ཡོན་ཏན་མི་སྐྱེ་བའི་བླ་མ་བསྟེན་ན་ཡོན་ཏན་མི་སྐྱེ་བས་ཕན་པ་ཆེར་མེད་ལ། བླ་མ་བསྟེན་པའི་དགེ་བ་དང་བསོད་ནམས་ཙམ་ཡོད་པ་དང༌། སྲོལ་དུ་མི་ཚུད་པའམ་ལམ་དུ་མི་ཞོག་པའི་སློབ་མ་བསྟེན་ན་ཕན་ཐོགས་པ་མིན་ཡང་། བླ་མའི་ངོས་ནས་ཕན་སེམས་བཟང་པོ་འཆང་ཡོད་པ་དང༌། ཆོས་བརྒྱད་དང་མ་བྲལ་བའི་སྒྲུབ་པ་བྱས་ན་ཆོས་བརྒྱད་མ་བྲལ་བའི་ཕྱོགས་དེ་གནོད་པ་ཅན་ཡིན་ཡང་སྒྲུབ་པ་བྱེད་པ་དེ་ལ་ཕན་པ་ཅུང་ཙམ་ཡོད་པ་དང༌། ལོག་འཚོའི་རྙེད་འཚོལ་གྱིས་གཞན་དོན་བྱེད་པ་གཅིག་ལས་བླངས་པ་གཅིག་ལ་སྦྱིན་པ་བྱས་ན་གཞན་དོན་དང༌ལོག་འཚོའི་ཕན་གནོད་འདྲེས་པ་དང་། བསླབ་པ་སྲུང་ཐུབ་པའི་ཆོད་སེམས་མེད་པ་དེ་འདྲ་དེས་སྡོམ་ཁྲིམས་མནོས་ནས་སྐབས་གཅིག་བསྲུངས་པའི་ཕན་ཡོན་དང་འགལ་བའི་ཉེས་པ་གཉིས་ཀ་ལྡན་པ་དང༌། དགེ་སྡིག་འཆོལ་བའི་གསང་སྔགས་སྤྱོད་པ་སྟེ་གསང་སྔགས་སྤྱོད་པའི་ཕན་ཡོན་དང་དགེ་སྡིག་འཆོལ་བའི་ཉེས་པ་གཉིས་ཀ་དང་ལྡན་པ་རྣམས་ཕན་གནོད་འདྲེས་པས་བསྒྲུབ་རྒྱུ་ཆོས་ཀྱི་གཟུགས་བརྙན་དང་སྒྲུབ་མཁན་ཆོས་པའི་གཟུགས་བརྙན་ཡིན་ནོ།།

༡༤༡ ལོག་གནོན་གཟེར་བུ་ལྟ་བུའི་ཆོས་དྲུག་བསྟན་པ།

ལོག་གནོན་གཟེར་བུ་ལྟ་བུའི་ཆོས་དྲུག་ནི།།

གནོད་བྱེད་དགྲ་སྡང་བཏུལ་ཞིང་སླར་མང་བས།།

ལོག་གནོན་བདག་འཛིན་གདུག་པ་འདུལ་བ་གནད།།

འདོད་ཡོན་སྤྱད་ཅིང་ཞེན་པ་སླར་འཕེལ་བས།།

ལོག་གནོན་བཙན་ཐབས་ཞེན་པ་གཅོད་པ་གནད།།

དལ་ཚོགས་ལོང་གཏམ་སྨྲས་ཤིང་སླར་མང་བས།།

ལོག་གནོན་མི་སྨྲ་གཅིག་པུར་འདུག་པ་གནད།།

གཞན་སེམས་གཟུང་འཛིན་བྱར་དགོས་སླར་མང་བས།།

ལོག་གནོན་གར་བབས་ངང་ལ་སྐྱུར་བ་གནད།།

རང་སེམས་སྒྲིམས་ཤིང་འཇུར་བུ་སླར་མང་བས།།

ལོག་གནོན་རང་བབས་ངང་དེར་གློད་པ་གནད།།

བྱ་བྱེད་སྤྲོས་པ་བྱས་ཤིང་སླར་མང་བས།།

ལོག་གནོན་ཅོག་གཞག་རང་བབས་གཏོང་བ་གནད།།

འདི་རྣམས་ལྡན་ན་རེ་དོགས་གཉིས་འཛིན་འཇིག།

ཅེས་གསུངས་པ་སྟེ། ཕྱིན་ཅི་ལོག་གི་མགོ་གནོན་པར་བྱེད་ཅིང་དེ་ལས་མི་འདའ་བར་བྱེད་པའི་གཟེར་བུ་ལྟ་བུའི་ཆོས་དྲུག་ནི། ཕྱིའི་གནོད་པར་བྱེད་པའི་དགྲ་སྡང་དེ་བཏུལ་ཞིང་བཏུལ་སླར་མང་བ་ནི་རང་རྒྱུད་བདག་འཛིན་གྱི་དགྲ་བོ་མ་ཐུལ་བས་ཡིན་ཕྱིར། དེའི་ལོག་གནོན་བདག་འཛིན་གདུག་པ་ཅན་ནང་རང་གི་རྒྱུད་ནས་འདུལ་བ་གནད་ཡིན་པ་དང་། འདོད་པའི་ཡོན་ཏན་སྤྱད་ཟིན་ཅིང་ཞེན་པ་ཟད་པ་ནི་མེད་པར་སླར་འཕེལ་བས། དེའི་ལོག་གནོན་རང་རྒྱུད་ཀྱི་ཞེན་པ་བཙན་ཐབས་ཀྱིས་གཅོད་པ་གནད་ཡིན་པ་དང་། མི་དལ་མོ་མང་པོ་ཚོགས་ནས་ལོང་གཏམ་སྣ་ཚོགས་མང་པོ་ཡས་བཤད་མས་བཤད་མང་པོ་བྱས་ཤིང་བྱས་ལ་སླར་ཇེ་མང་དུ་སོང་ནས་ཁ་འཛིང་སོགས་ཀྱང་ཡོང་བ་ཡིན་པས། ལོག་པའི་ལམ་དེ་གནོན་པ་ལ་མི་སྨྲ་གཅིག་པུར་འདུག་པ་གནད་ཡིན་པ་དང་། གཞན་སེམས་གཟུང་འཛིན་བྱས་ནས་ཡས་ཀྱི་ངོ་བླངས་མས་དང་འབྲེལ་བཀོད་པའི་མཇུག་རྫོགས་སུ་མེད་པར་སླར་ཡང་འཕེལ་བས། དེའི་ལོག་གནོན་ལ་ལྟོས་མེད་གར་བབས་ངང་ལ་སྐྱུར་བ་ནི་གནད་ཟབ་པའི་མཆོག་ཡིན་པ་དང་། སྒོམ་བྱེད་སྐབས་རང་སེམས་བསྒྲིམས་ཤིང་བསྒྲིམས་ལ་སྐུད་པ་གྲིམ་དྲགས་ན་འཇུར་བུ་སླར་མང་བ་ལྟར་ཡིན་པས། དེའི་ལོག་གནོན་མ་བཅོས་རང་བབས་ངང་དེར་གློད་པ་གནད་ཡིན་པ་དང་། བྱ་བྱེད་སྤྲོས་པ་བྱས་ཤིང་བྱས་ལ་སླར་མང་བ་དགོས་རྒྱུ་ཇེ་མང་དུ་འགྲོ་བས། ལོག་གནོན་ཅོག་གེར་མ་བཅོས་པར་གཞག་ཅིང་རང་བབས་སུ་གཏོང་བའི་གནད་དེ། འདི་རྣམས་ལྡན་ན་རེ་དོགས་གཉིས་འཛིན་རང་ཤུགས་ཀྱིས་འཇིག་ནས་འཆིང་བ་ལས་གྲོལ་བ་ཡིན་ནོ།།

༡༤༢ རང་རྒྱུད་ཆོས་ལ་འབྱོར་བའི་རྟགས་དྲུག་བསྟན་པ།

རང་རྒྱུད་ཆོས་ལ་འབྱོར་བའི་རྟགས་དྲུག་ནི།།

འདོད་ཡོན་བདུད་ཤེས་འཁོར་བར་ཞེན་ལོག་རྟགས།།

ཅི་བྱས་ལམ་འགྱུར་བྱིན་རླབས་ཞུགས་པའི་རྟགས།།

རིག་པ་དབང་བསྒྱུར་དངོས་གྲུབ་མཆོག་ཐོབ་རྟགས།།

གཞན་གྱིས་མི་འགྱུར་ལྟ་དགོངས་སྐྱེས་པའི་རྟགས།།

བླ་མ་མཇལ་སྤྲོ་མོས་གུས་ཞུགས་པའི་རྟགས།།

ཚེ་འདི་བློས་ཐོངས་ཆོས་ཀྱིས་ཕན་ཐོགས་རྟགས།།

རྟགས་ཆེན་དྲུག་ལྡན་སྐྱེས་བུ་དམ་པ་ཡིན།།

ཞེས་གསུངས་པ་སྟེ། རང་རྒྱུད་ཆོས་ལ་འབྱོར་བའི་རྟགས་དྲུག་ནི། འདོད་པའི་ཡོན་ཏན་ཐར་བའི་ལམ་ལ་བར་དུ་གཅོད་པའི་བདུད་ཡིན་པར་ཤེས་ཡོད་ན། འཁོར་བར་ཞེན་པ་ལོག་ནས་ངེས་པར་འབྱུང་བའི་བློ་ཆེ་ཆུང་ལ་མ་ལྟོས་པར་སྐྱེས་ཡོད་པའི་རྟགས་ཡིན་པ་དང་། བྱ་བ་ཅི་བྱས་ཀྱང་ལམ་ཡང་དག་ལས་མི་འདའ་བར་གྱུར་ན་བྱིན་རླབས་ཞུགས་པའི་རྟགས་ཡིན་པས་མ་ཚད། ན་ན་ན་སྟེ་ན་བས་དགའ། །སྔར་བསགས་ཀྱི་ལས་ངན་ཟད་པ་ཡིན། །ཞེས་དང་། ཤི་ན་ཤི་ན་ཤི་སྟེ་དགའ། །རྣལ་འབྱོར་འཚང་ཆུང་རྒྱ་བ་ཡིན། །ཞེས་པ་ལྟར་དུ་རྐྱེན་ངན་གྲོགས་སུ་བསྒྱུར་ནས་ལམ་དུ་སློང་ཤེས་ནའང་བྱིན་རླབས་ཞུགས་པའི་རྟགས་ཡིན། སྣང་སེམས་ལ་རང་དབང་འབྱོར་ནས་རིག་པ་ལ་དབང་བསྒྱུར་ཐུབ་ན་དངོས་གྲུབ་མཆོག་ཐོབ་ཡོད་པའི་རྟགས་དང་། གཞན་རྐྱེན་འཇམ་རྩུབ་བཟང་ངན་གང་གིས་ཀྱང་མི་འགྱུར་བ་ནི་ལྟ་དགོངས་སྐྱེས་ཤིང་བརྟན་པའི་རྟགས་ཡིན་པ་དང་། བླ་མ་ཡང་དང་ཡང་དུ་མཇལ་བར་སྤྲོ་ཞིང་འདུན་པ་ནི་མོས་གུས་ཞུགས་པའི་རྟགས་ཡིན་པ་ལས་བླ་མའི་མདུན་ནས་ཆོས་ཞུས་ཏེ་བརྒྱུད་པ་ལོན་ཚར་དུས་ཕྱིར་བལྟས་མེད་པ་ནི་མོས་གུས་མེད་པའི་རྟགས་ཡིན་ལ། གཞན་ཡང་བླ་མའི་ཐུགས་དང་འབྲལ་བ་མེད་པ། བླ་མ་དུས་གསུམ་སངས་རྒྱས་ལ། །ཡིད་དུང་ངེ་བ་ལ་འབྲལ་བ་མེད། །ཅེས་པ་ལྟར་ཡིན་ན་ཁྱད་པར་དུ་མོས་གུས་ཡོད་པའི་རྟགས་ཡིན་ནོ། །ཚེ་འདི་བློས་ཐོངས་ཡོད་ན་ཆོས་ཀྱིས་ཕན་ཐོགས་ཡོད་པའི་རྟགས་ཡིན་ཏེ་ཚེ་བློས་བཏང་གི་ནང་དུ་ཡོན་ཏན་ཁ་ཚང་འདུས་ཡོད་པས་སོ། །རྟགས་ཆེན་པོ་འདི་དྲུག་དང་སུ་ལྡན་པ་དེ་སྐྱེས་བུ་དམ་པ་ཡིན་ནོ།།

༡༤༣ མི་འཇིགས་རྣམ་དྲུག་དགོས་པར་བསྟན་པ་ནི།

མི་འཇིགས་རྣམ་དྲུག་དགོས་པར་བསྟན་པ་ནི།།

ཟབ་དོན་ཉམས་བླངས་ངན་རྟོག་དགྲས་མི་འཇིགས།།

སེམས་ཉིད་དོན་བལྟས་ཆོས་བརྒྱད་དགྲས་མི་འཇིགས།།

ཆོས་སྐུ་རྩལ་འབྱོངས་གཟུང་འཛིན་དགྲས་མི་འཇིགས།།

གཞི་མེད་ལམ་བླངས་སྒྲིབ་གཉིས་དགྲས་མི་འཇིགས།།

བདེ་ཆེན་ཉམས་བླངས་སྡུག་བསྔལ་དགྲས་མི་འཇིགས།།

ཕྱོགས་བྲལ་ཉམས་བླངས་རེ་དོགས་དགྲས་མི་འཇིགས།།

དེ་དག་གང་ལྡན་བྱས་པ་དོན་ཆེན་འགྲུབ།།

ཅེས་གསུངས་པ་སྟེ། མི་འཇིགས་པ་རྣམ་དྲུག་དགོས་པར་བསྟན་པ་ནི། ཟབ་མོའི་དོན་གོ་ནས་ཉམས་སུ་བླངས་ན་ངན་རྟོག་གི་དགྲ་ཅི་ལྟར་བྱུང་ཡང་དེ་ལ་མི་འཇིགས་པར་ཐོབ་པ་དང་། སེམས་ཉིད་ཀྱི་དོན་ལ་བལྟས་ནས་ངོ་ཤེས་ན་འཇིག་རྟེན་ཆོས་བརྒྱད་ཀྱི་དགྲས་མི་འཇིགས་པས། ཆོས་བརྒྱད་མགོ་རུ་ཤོར་ཡོད་ན་སེམས་ཉིད་ཀྱི་དོན་རྟོགས་མེད་པའི་རྟགས་ཡིན། རང་སེམས་ཆོས་སྐུ་རུ་ངོ་ཤེས་པའི་རྩལ་འབྱོངས་ཡོད་ན་གཟུང་དང་འཛིན་པའི་དགྲ་བོས་མི་འཇིགས་པས་གཟུང་འཛིན་གྱི་དགྲ་ལ་འཇིགས་དུས་རྩལ་འབྱོངས་མེད་པའི་རྟགས་ཡིན། གཞི་མེད་རྩ་བྲལ་སྤྲོས་པ་དང་བྲལ་བའི་སྟོང་ཉིད་ཀྱི་དོན་རྟོགས་ནས་དེའི་རང་ལམ་བླངས་བས་སྒྲིབ་གཉིས་ཀྱི་དགྲས་མི་འཇིགས་པ་དང་། བདེ་ཆེན་ཉམས་སུ་བླངས་ནས་མི་བདེའི་སྡུག་བསྔལ་རང་སར་དག་པས་སྡུག་བསྔལ་གྱི་དགྲས་མི་འཇིགས་པ་དང་། ཕྱོགས་མེད་ཕྱོགས་དང་བྲལ་བའི་ཉམས་བླངས་གནད་དུ་སོང་ན། རེ་དང་དོགས་པའི་དགྲས་མི་འཇིགས་པ་བྱ་རྒོད་པོ་མཁའ་དབྱིངས་ནས་འཕུར་ན་གཡང་ས་བྲག་ཀླུང་ལ་མི་འཇིགས་པ་ལྟ་བུ་ཡིན་པ་དང་། དེ་དག་ཐམས་ཅད་དང་ལྡན་ན་སྨོས་མ་དགོས་ལ་ནང་གསེས་ཀྱི་རེ་རེ་ཙམ་ལྡན་ཡང་བྱས་པ་དོན་ཆེན་འགྲུབ་པ་ཡིན་ནོ།།

༡༤༤ ཆོས་ལ་ཞུགས་པའི་སྤང་བླང་ཆོས་དྲུག་བསྟན་པ།

ཆོས་ལ་ཞུགས་པའི་སྤང་བླང་ཆོས་དྲུག་ནི།།

ཤེས་བཞིན་མ་བསྟེན་སྤྱོད་ལམ་ཆོས་མི་འབྱོར།།

མཐུན་འཇུག་མ་སྤངས་དགེ་སྦྱོར་སྲང་མི་ཚུད།།

གནད་ཀྱིས་མ་གཅུན་ཉམས་མྱོང་དྲོད་མི་སྐྱེ།།

དུས་ལ་མ་བབས་གཞན་དོན་ཕན་མི་ཐོགས།།

ནུས་མཐུ་མ་གྲུབ་བར་ཆད་རྐྱེན་མི་སོལ།།

ཟུང་འཇུག་མ་བསླངས་ཚེ་གཅིག་སངས་རྒྱས་མེད།།

དེ་བས་དགེ་སྦྱོར་གནད་དུ་འགྲོ་བ་གཅེས།།

ཞེས་གསུངས་པ་སྟེ། ཆོས་ལ་ཞུགས་པའི་སྤང་བླང་གི་ཆོས་དྲུག་ནི། རང་རྒྱུད་ལ་ཉེས་པ་བྱུང་དང་མ་བྱུང་རྟོག་པ་ནི་ཤེས་བཞིན་ཡིན་ལ། དེ་མ་བསྟེན་ན་སྤྱོད་ལམ་རྣམ་པར་དག་པའི་ཆོས་ལ་མི་འབྱོར་བ་དང་། རང་དོན་གྱི་འཇིག་རྟེན་མཐུན་འཇུག་མ་སྤངས་ན། ཡང་དག་པའི་དགེ་སྦྱོར་སྲང་ལ་མ་ཚུད་པ་ནི། རང་གིས་རང་ལ་བརྟགས་ཤིང་དཔྱད་ན་ཕྱི་ཚུལ་ལྟར་སྣང་གི་དགེ་སྦྱོར་རེ་བྱས་ཀྱང་། སེམས་ཀྱི་སྟེང་གི་དགེ་བ་ཡང་དག་འགྲུབ་པ་དཀའ་བར་གནས་ནས། བསོད་ནམས་ཆ་མཐུན་གྱི་དགེ་བ་ཙམ་རེ་ལས་དགེ་སྦྱོར་སྲང་ལ་ཡང་དག་པར་མ་ཚུད་པར་ལུས་ཡོད་པ་དང་། གནད་ཀྱིས་བཅུན་ནས་ཉམས་ལེན་ལ་རྡོ་རུས་མ་གཏུག་ན་ཉམས་མྱོང་གི་དྲོད་མི་སྐྱེ་བ་དང་། གཞན་དོན་དུས་བབས་ཀྱི་དུས་སུ་རང་དོན་མཆོག་ཐུན་གྱི་དངོས་གྲུབ་ཐོབ་ཡོད་དགོས་པ་ལས། དུས་ལ་མ་བབས་ན་གཞན་དོན་བྱེད་ལོ་བྱས་ཀྱང་གཞན་ལ་ཕན་མི་ཐོགས་པའམ། གདམས་ངག་སྒྲོན་མེ་ལག་བརྒྱུད་མི་ལ་སྤྲད་ཚེ་རང་ལ་མེད་པར་འགྱུར་བ་ཡིན་པས་རང་ལ་དྲོད་མ་ཐོབ་པར་གཞན་ལ་གདམས་ངག་ཁྱད་པར་ཅན་འབོགས་པ་དང་། རང་ལ་བྱིན་བརྒྱུད་མེད་པར་གཞན་ལ་དབང་བསྐུར་བ་སོགས་མི་བྱ་བ་ལ་གོ་དགོས་པ་ལས། གཞན་ཕན་གྱི་བསམ་པ་དག་པས་རང་ནུས་གང་ཡོད་ཀྱིས་སེམས་ཅན་ལ་ཕན་འདོགས་པར་མ་བྱེད། བཏགས་ཀྱང་མི་ཐོགས་ཞེས་པའི་དོན་ནི་མིན་ཏེ། དཔེར་ན་དེ་རིང་འདི་ནས་སྲོག་ཆགས་ཕྲ་མོ་ཞིག་ཉི་མས་ཚིག་བཞིན་ཡོད་ན་དེ་སྔོ་མའི་ནང་དུ་འཕེན་པ་དང་། མི་ཤེས་པ་དག་ལ་ཨོཾ་མ་ཎི་པདྨེ་ཧཱུྃཿ ཞེས་པ་ཞིག་བསླབས་ན་ཡང་དེ་དག་ལ་ཕན་པ་ཡོད་པ་ཡིན་པས་རང་ནུས་དང་བསྟུན་ནས་བརྩོན་དགོས་སོ། །ནུས་མཐུ་ཆ་ཚང་ཞིག་མ་འགྲུབ་ན་བར་ཆད་ཀྱི་རྐྱེན་རང་གར་མི་སོལ་བ་དང་། ཟུང་འཇུག་གི་གནད་དེ་མ་བསླངས་ན་ཚེ་ལུས་གཅིག་གི་སངས་རྒྱས་ཀྱི་གོ་འཕང་ཐོབ་ཏུ་མེད་པ་དེས་ན་དགེ་སྦྱོར་སྒྲུབ་ན་གནད་དུ་འགྲོ་བ་དང་དོན་དུ་སྨིན་པ་གཅེས་སོ།།

༡༤༥ ངན་པའི་འདུ་ཤེས་རྣམ་དྲུག་སྤང་བ་བསྟན་པ།

ངན་པའི་འདུ་ཤེས་རྣམ་དྲུག་སྤང་བ་ནི།།

བླ་མ་མིར་མཐོང་བྱིན་རླབས་སྟོར་བས་ངན།།

གྲོགས་ལ་དགྲར་ཤེས་དམ་ཚིག་རལ་བས་ངན།།

རང་ཉིད་ཆེ་ཕྱིར་ཆོས་ལམ་རིང་བས་ངན།།

གདམས་ངག་ཟོང་ཚོང་ལོག་འཚོ་འདྲེས་པས་ངན།།

ཡི་དམ་རྐྱེན་བཟློག་ལམ་སྣ་སྟོར་བས་ངན།།

ཆོས་སྤྱོད་ནོར་འཚོལ་ཐར་ལམ་སྟོར་བས་ངན།།

ངན་པ་དྲུག་བྲལ་སྒྲུབ་པ་ཤིན་ཏུ་གཅེས།།

ཞེས་གསུངས་པ་སྟེ། ངན་པའི་འདུ་ཤེས་རྣམ་དྲུག་སྤང་བ་ནི། བླ་མ་སངས་རྒྱས་སུ་མ་མཐོང་ནས་མི་རུ་མཐོང་ན་བྱིན་རླབས་སྟོར་བའམ་བོར་བས་ངན་པ་ཡིན་པ་དང་། གྲོགས་ཚངས་པ་མཚུངས་པར་སྤྱོད་པ་དང་སྐལ་ལྡན་རྡོ་རྗེའི་མཆེད་ལྕམ་རྣམས་ལ་དགྲར་འཛིན་པའི་འདུ་ཤེས་འཆང་ན་དམ་ཚིག་རལ་བས་ངན་པ་དང་། རང་ཉིད་ཆེ་ཆེ་འགྱིང་འགྱིང་གིས་ཆེ་འདོད་ངོམ་པའི་ཕྱིར་ན་ཆོས་ལམ་ལས་རིང་དུ་གྱུར་བ་ཡིན་པས་ངན་པ་དང་། གདམས་ངག་གང་ཟབ་ཟབ་ཟས་ངོ་ནོར་ངོ་མི་ངོ་ལ་བལྟས་ནས་ཤོར་བ་དང་། ཁྱད་པར་དུ་གདམས་ཟབ་དང་སྒོར་མོ་བརྗེས་ན་ལོག་འཚོའི་ཆེད་དུ་གདམས་ངག་བཙོངས་བ་ཡིན་པས་ངན་པ་དང་། གསང་སྔགས་ཀྱི་དཀྱིལ་འཁོར་གྲོང་བའི་ར་ཚང་གི་ནང་དུ་བཞེངས། ཞེས་པ་ལྟར་དུ་ཡི་དམ་གྱི་ལྷ་རྐྱེན་བཟློག་གི་ཆེད་དུ་སྒྲུབ་ན་ལམ་སྣ་སྟོར་བས་ངན་པ་དང་། ཡི་གེ་འབྲི་མཆོད་སོགས་ཆོས་སྤྱོད་བཅུའམ་རྒྱུན་གྱི་དགེ་སྦྱོར་གྱི་ཆོས་སྤྱོད་ཐམས་ཅད་ནོར་འཚོལ་བའི་ཆེད་དུ་བྱས་ན་ཐར་ལམ་སྟོར་བས་ངན་པ་ཡིན། དེས་ན་ཁ་འདོན་ཚིག་བཞི་ཙམ་ཞིག་ལས་མ་བཏོན་ཀྱང་ངེས་འབྱུང་བྱང་སེམས་ཡང་དག་པའི་ལྟ་བས་ཟིན་པ་ཞིག་ཡིན་དགོས། གཞན་དུ་ན་ཐར་ལམ་ལ་སྙེག་པའི་དགེ་སྦྱོར་དུ་འགྲོ་བ་མིན་པས་དེ་ལྟ་བུའི་ངན་པ་དྲུག་དང་བྲལ་བའི་སྒོ་ནས་སྙིང་པོའི་སྒྲུབ་པ་ལྷུར་ལེན་པ་ཤིན་ཏུ་གཅེས་སོ།།

༡༤༦ ཐར་ལམ་རང་བཞིན་མ་དྲན་ཆོས་དྲུག་བསྟན་པ།

ཐར་ལམ་རང་བཞིན་མ་དྲན་ཆོས་དྲུག་ནི།།

ཡུལ་ལ་ཡེངས་པས་མོས་གུས་མ་དྲན་དང༌།།

མུ་ལྟོ་ཟས་འཚོལ་དཀོན་མཆོག་མ་དྲན་དང༌།།

གཤིས་ངན་སྦུབས་ཐུང་དམ་ཚིག་མ་དྲན་དང༌།།

མིག་འགྲིབས་སྙིང་མེད་སྡུག་བསྔལ་མ་དྲན་དང༌།།

རྫས་སྲེད་རྙེད་འཚོལ་དགེ་བ་མ་དྲན་དང༌།།

ཞེ་སྡང་དུག་སེམས་སེམས་བསྐྱེད་མ་དྲན་དང༌།།

དོན་མེད་འཕྱལ་བས་ངན་སོང་མ་དྲན་དང༌།།

འདི་དྲུག་ལྡན་པས་ཡུན་རིང་འཁྱམས་པ་ཡིན།།

ཞེས་གསུངས་པ་སྟེ། ཐར་ལམ་རང་བཞིན་མ་དྲན་ཆོས་དྲུག་ནི། འདོད་ཡོན་གྱི་ཡུལ་ལ་ཡེངས་པས་ཆོས་དང་བླ་མ་ལ་མོས་གུས་མ་དྲན་པ་དང༌། མུ་ལྟོའམ་སྐྱིད་མེད་སྡུག་ཟད་ཀྱི་མི་བཟའ་བཏུང་འཚོལ་སྒྲུབ་ཏག་ཏག་གི་དོན་དུ་མི་ཚེ་ཟད་ནས་དཀོན་མཆོག་མ་དྲན་པ་དང༌། མི་གཤིས་ངན་ཞིང་སྦུབས་ཐུང་ངམ་ཁོག་ཆུང་འཚབ་སླའི་དབང་གིས་དམ་ཚིག་མ་དྲན་དང༌། ཡང་དག་པའི་ལྟ་བ་ཡི་མིག་འགྲིབས་ནས་ལེགས་ཉེས་འབྱེད་པའི་སྙིང་མེད་དེ་འཁོར་བའི་སྡུག་བསྔལ་མ་དྲན་ནས་བདེ་བར་འཛིན་པ་དང༌། ནོར་རྫས་ལ་སྲེད་པ་ཆེ་བའི་དབང་གིས་རྙེད་འཚོལ་ཏག་ཏག་གི་ངང་དུ་མི་ཚེ་ཟད་ནས་དགེ་བ་མ་དྲན་པ་དང༌། ཞེ་སྡང་དུག་ལྟ་བུའི་སེམས་དེ་རྒྱུད་ལ་ཡོད་པའི་དབང་གིས་སྙིང་རྗེ་མ་སྐྱེས། སྙིང་རྗེ་མེད་པས་སེམས་བསྐྱེད་མ་དྲན་པ་དང༌། དོན་མེད་ཡེངས་མ་ལམ་དུ་འཕྱལ་བས་ངན་སོང་དྲན་མ་ཐུབ་ནས་ཆོས་རྣམ་དག་མ་འགྲུབ་པ་དང༌། འདི་ལྟ་བུའི་ངན་པ་དྲུག་དང་ལྡན་པས་འཁོར་བའི་གནས་སུ་ད་སྔོན་ལ་འཁྱམས་ཤིང་ད་རུང་ཡང་ཡུན་རིང་འཁྱམས་པ་ཡིན་ནོ།།

༡༤༧ གདམས་ངག་རྣམ་དྲུག་སྐུལ་མ་གདབ་པ་བསྟན་པ།

གདམས་ངག་རྣམ་དྲུག་སྐུལ་མ་གདབ་པ་ནི།།

དམ་པ་རྣམས་ཀྱི་རྣལ་འབྱོར་ཕ་ནོར་ཡིན།།

སྒྲུབ་པ་སྙོམ་ལས་ཕྱི་བཤོལ་མི་བཞག་འཚལ།།

རྣམ་རྟོག་འཆར་སྒོམ་ཤེས་རབ་བུད་ཤིང་ཡིན།།

དམིགས་གཏད་སེམས་འཛིན་མཆོག་ཏུ་མི་འཛིན་འཚལ།།

སྡུག་བསྔལ་རྐྱེན་ངན་དགེ་བའི་སྐུལ་མ་ཡིན།།

མྱ་ངན་སྨྲེ་སྔགས་སྤོང་བློ་མི་བགྱིད་འཚལ།།

དུག་ལྔར་སྣང་བ་ཡེ་ཤེས་གསང་ལམ་ཡིན།།

དགྲ་སྡང་ཚོགས་ལྟས་ལོག་པར་མི་གཟུང་འཚལ།།

བར་ཆད་སྣ་ཚོགས་དངོས་གྲུབ་སྔ་ལྟས་ཡིན།།

འཁུ་འཕྲིག་ངན་རྟོག་ཞེ་སྡང་མི་བགྱིད་འཚལ།།

འཁོར་བར་སྣང་བ་རྒྱལ་བའི་ཞིང་ཁམས་ཡིན།།

འཁྲུལ་སྣང་གཉིས་འཛིན་བདེན་ཞེན་མི་འཆའ་འཚལ།།

ཞེས་གསུངས་པ་སྟེ། གདམས་ངག་རྣམ་པ་དྲུག་གིས་སྙིང་ནས་ཆོས་བྱེད་རྣམས་ལ་སྐུལ་མ་ཡང་ཡང་གདབ་པ་ནི། དམ་པ་རྣམས་ཀྱི་ཚུལ་ཇི་བཞིན་སྒྲུབ་པའི་རྒྱུན་གྱི་རྣལ་འབྱོར་དུ་བྱ་བ་ནི་ཕ་ནོར་རིན་ཐང་ཅན་ཡིན་པས། སྒྲུབ་པ་ལ་སྙོམ་ལས་དང་ཕྱི་བཤོལ་མི་བཞག་པར་གནད་ཆེ་བ་དང་། རྣམ་རྟོག་འཆར་བ་སྒོམ་དུ་ཤེས་ན་ཤེས་རབ་ཀྱི་བུད་ཤིང་ཡིན་པས་བུད་ཤིང་མང་ན་མེ་ཆེ་བའི་གྲོགས་ཡིན་པས། དམིགས་གཏད་སེམས་འཛིན་གྱི་སྒོ་ནས་སྡུག་སྒུར་བྱས་ནས་མི་རྟོག་ལྟེང་པོ་ལ་མཆོག་ཏུ་མི་འཛིན་པ་གལ་ཆེ་བ་དང་། རིག་འཛིན་འཇིགས་མེད་གླིང་པའི་ཞལ་ནས། དགྲས་ལོག་སྒྲུབ་བྱས་ཀྱང་ཐུགས་དམ་གྱི་བོགས་འདོན། །གཏམ་མ་ཉེས་ཁ་ཡོག་དགེ་སྐུལ་གྱི་ལྕག་འདེབས། །འདི་ཆགས་ཞེན་འཇིག་པའི་བླ་མ་རུ་འདུག་པས། །ཁོའི་དྲིན་ལན་འཁོར་ཐབས་མེད་པ་རུ་གཟིགས་མཛོད། །ཅེས་གསུངས་པ་ལྟར་སྡུག་བསྔལ་དང་རྐྱེན་ངན་དགེ་བའི་སྐུལ་མ་རུ་སློང་ཤེས་དགོས་པས། དེ་ལ་མྱ་ངན་དང་སྨྲེ་སྔགས་ཀྱི་ཐོག་ནས་སྤོང་བློ་མི་བགྱིད་པ་འཚལ། དུག་ལྔར་སྣང་བ་དེ་རྟོགས་པ་མཆོག་ལྡན་གྱི་ངོ་ཁ་ལ་ཡེ་ཤེས་ཀྱི་གསང་ལམ་ཡིན་པས། དུག་ལྔ་དགྲ་སྡང་གི་ཚོགས་ལ་བལྟས་ནས་དེའི་འཇོམས་བྱེད་བཙལ་ཏེ་ལོག་པར་མི་གཟུང་བ་འཚལ། བར་ཆད་ཀྱི་རྐྱེན་སྣ་ཚོགས་འོང་བ་ནི་དངོས་གྲུབ་ཀྱི་སྔ་ལྟས་ཡིན་ཏེ་ཐ་མལ་པ་ལ་ནི་བར་ཆད་མི་དགོས་པ་ཡིན། བར་ཆད་དང་སློང་ཚད་ཡོང་ས་རྣམས་ཚད་ངེས་ཅན་ཞིག་གི་ཐོག་ཏུ་ཐོན་ཡོད་པ་ཡིན། དེས་ན་བར་ཆད་དེ་ལ་འཁུ་འཕྲིག་ཐེ་ཚོམ་གྱི་ངན་རྟོག་དང་ཞེ་སྡང་མི་བགྱིད་པར་འཚལ་བ་དང་། འཁོར་བར་སྣང་བ་འདི་མ་དག་པའི་སྣང་བ་རེད་མ་གཏོགས་དོན་དངོས་དག་པའི་སྣང་རྩལ་ལ་རྒྱལ་བའི་ཞིང་ཁམས་ཡིན་པས། འདི་ལ་འཁྲུལ་སྣང་གཉིས་འཛིན་གྱི་བདེན་ཞེན་མི་འཆའ་བའམ་མི་བྱེད་པ་འཚལ་ལོ།།

༡༤༨ བསླད་པ་དྲུག་གིས་ཆོས་ཉིད་གོལ་བ་བསྟན་པ།

བསླད་པ་དྲུག་གིས་ཆོས་ཉིད་གོལ་བ་ནི།།

གནས་ལུགས་རྒྱ་ཡན་ཕྱོགས་མེད་ཡིན་པ་ལ།།

ཞེ་འདོད་བློ་ཡི་རྟོག་པ་བྱུང་བས་བསླད།།

ཆོས་ཉིད་སྨྲ་བསམ་བརྗོད་ལས་འདས་པ་ལ།།

ཡོད་མེད་མཐར་འཛིན་སྒྲོ་སྐུར་བཏབ་པས་བསླད།།

སེམས་ཉིད་གཉིས་མེད་སྐྱེ་འགག་མེད་པ་ལ།།

སྐྱེ་ཤིར་འཛིན་པའི་འདུ་ཤེས་བསྐྱེད་པས་བསླད།།

ཡུལ་སྣང་སེམས་ཉིད་སྟོང་པའི་མེ་ལོང་ལ།།

ཆགས་སྡང་གཉིས་འཛིན་བདེན་ཞེན་ཞུགས་པས་བསླད།།

དོན་དམ་སྤྲོས་པའི་མཚན་མས་དབེན་པ་ལ།།

བདེན་འཛིན་དོན་གྱི་ཐེ་ཚོམ་བྱས་པས་བསླད།།

གནས་ལུགས་ཀུན་གཞི་ཕྱོགས་མེད་རྟེན་འབྲེལ་ལ།།

གཟུང་འཛིན་འཁྲུལ་བའི་བག་ཆགས་འགོས་པས་བསླད།།

ཅེས་གསུངས་པ་སྟེ། བསླད་པའི་སྐྱོན་རྣམ་པ་དྲུག་གིས་ཆོས་ཉིད་ཀྱི་དོན་ཡང་དག་པར་མ་རྟོགས་ནས་གོལ་སོང་བ་ནི། དོན་དམ་པ་གནས་ལུགས་གཤིས་ཀྱི་བཞུགས་ཚུལ་དངོས་དེ་རྒྱ་ཡན་ནམ་རྒྱ་གར་ཡང་མ་ཆད་པ་དང་། ཕྱོགས་མེད་དམ་ཕྱོགས་གང་དུ་མ་ལྷུང་བ་ཡིན་པ་ལ། ཀུན་རྫོབ་ཞེ་འདོད་བློ་ཡི་རྟོག་པས་ཕྱོགས་ཞེན་རིས་སུ་བཅད་པ་བྱུང་བས་བསླད་པ་དང་། ཆོས་ཐམས་ཅད་ཀྱི་ཆོས་ཉིད་སྨྲ་བསམ་བརྗོད་མེད་སྤྲོས་པའི་མཐའ་ལས་འདས་པ་ཡིན་པ་ལ། ལ་ལས་ཡོད་པ་དང་། ལ་ལས་མེད་པའི་མཐའ་རུ་འཛིན་ནས་ཡར་སྒྲོ་བཏགས་མར་སྐུར་བ་བཏབ་པས་བསླད་པ་དང་། སེམས་ཉིད་འོད་གསལ་བའི་རང་བཞིན་དེ་གཉིས་མེད་ཀྱི་བདག་ཉིད་ཅན་སྐྱེ་འགག་མེད་པ་ཡིན་པ་ལ། སྐྱེ་ཤིར་འཛིན་པའི་གཉིས་འཛིན་གྱི་འདུ་ཤེས་བསྐྱེད་པས་བསླད་སོང་བ་དང་། ཡུལ་དུ་སྣང་བའི་སྣང་ཡུལ་དེ་སེམས་ཉིད་སྟོང་པའི་མེ་ལོང་ལ་ཤར་བ་ཙམ་ཡིན་པ་ལ། ཆགས་སྡང་གཉིས་སུ་འཛིན་པའི་བདེན་ཞེན་ཞུགས་པས་བསླད་སོང་བ་དང་། དོན་དམ་པ་ལ་སྤྲོས་པའི་མཚན་མས་དབེན་ཞིང་ཀ་ནས་དག་པ་ཡིན་པ་ལ། བདེན་འཛིན་གྱིས་དོན་གྱི་རང་བཞིན་སྒྲུབ་པའི་ཐེ་ཚོམ་བྱས་པས་བསླད་པ་དང་། གནས་ལུགས་ཡེ་དོན་གྱི་ཀུན་གཞི་ཕྱོགས་མེད་རྟེན་ཅིང་འབྲེལ་འབྱུང་གཞི་ཅིར་ཡང་མ་ཡིན་པ་ལས་ཅིར་ཡང་སྣང་བ་ལ། གཟུང་བ་ཡུལ་དང་འཛིན་པ་སེམས་སུ་འཁྲུལ་བའི་བག་ཆགས་འགོས་ནས་བག་ཆགས་སྣ་ཚོགས་པའི་ཀུན་གཞི་རུ་བཟུང་བས་བསླད་པ་ཡིན་ནོ། །དེ་རིང་། གཟུང་འཛིན་འཁྲུལ་བའི་བག་ཆགས་འགོས་པས་བསླད། །ཅེས་པ་འདིར་བཞག་ནས་སང་ཉིན། ལོག་པའི་འཚོ་བ་རྣམ་དྲུག་སྤང་བ་ནི། །ཞེས་པ་ནས་བཤད་རྒྱུ་བྱེད། ད་ཀུན་མཁྱེན་བླ་མའི་གསུང་གི་གསང་བ་ཆོས་སྐུའི་བསྟན་པ་སྒྲ་ཚིག་གི་འཕྲུལ་གྱིས་བསྟན་པའི་ཟབ་དོན་འདི་ཚོ། དགོངས་པ་གདིང་ནས་ཁྲོལ་བ་ནི་དཀའ་མོའི་ནང་གི་དཀོན་པོ་ཡིན་པ་རེད། མཐིལ་ཕྱིན་པའི་གོ་དོན་འགྲོལ་དགོས་ན་སོ་སོར་རང་རིག་པའི་ཡེ་ཤེས་ལ་མངའ་བརྙེས་པའམ། ཆོས་རབ་རྣམ་འབྱེད་ཀྱི་རྩལ་ཁ་ཆེ་ཚོད་ཆུང་མིན་རྒྱས་མེད་ཚེ་བཤད་འདེང་བྱེད་རྒྱུ་ཅན་ཞིག་མ་རེད། འོན་ཀྱང་བསྟན་པ་ཉག་ཕྲ་བའི་དུས་འདིར་རང་ལུགས་རྩ་བའི་བརྒྱུད་པ་མཐུད་པའི་སྐབས་སུ་དད་མོས་ལྷག་བསམ་གྱི་འདུན་པ་གཙོ་བོར་བཟུང་ནས། བཤད་པའི་རྒྱུན་མི་ནུབ་པར་འཛིན་བྱེད་དུ་ཐ་མལ་གྱི་ཚིག་གི་ཐོག་ནས་རང་ཉིད་ཀྱི་གོ་ཡུལ་མཚོན་བྱེད་ཙམ་ཞིག་ཁྱེད་རྣམ་པ་ལ་ནང་ལུགས་སུ་ཞུ་བཞིན་ཡོད་པ་ཡིན། དཔལ་སྤྲུལ་ཚང་གིས། ངེས་ཚིག་ཚིག་དོན་ཁྲོལ་རུང་མ་ཁྲོལ་རུང་། །བརྗོད་བྱའི་དོན་ཟབ་ཤེས་རུང་མ་ཤེས་རུང་། །དགོངས་པའི་ཞེ་ཕུགས་རྙེད་རུང་མ་རྙེད་རུང་། །རེ་དོགས་ཆོད་ལ་མ་ཡེངས་ངང་ནས་གཟིགས། །ཞེས་ངེས་ཚིག་ཁྲོལ་ན་མ་ཁྲོལ་ན། དོན་ཟབ་གོ་བཞིན་ཡོད་ཀྱང་མེད་ཀྱང་། དགོངས་པའི་ཞེ་ཕུགས་རྙེད་ཀྱིན་ཡོད་ན་ཐང་མེད་ན་ཐང་ཡང་། མདོར་ན་གང་ལྟར་ཡིན་ཡང་དལ་མོ་གཙོར་གཟུང་གིས་ལྟོས་གསུངས་པ་དང་། ཡང་ལྟོས་ཡང་ལྟོས་ཉམས་དང་བསྲེས་ལ་ལྟོས། །གཞུང་དང་སེམས་བསྲེས་སེམས་ལ་གཞུང་རྒྱས་ཐོབ། །དབྱེར་མེད་ངང་ནས་ཉམས་དགའ་གདངས་སུ་གྱེར། །མོས་གུས་རྩལ་འབར་རྟོགས་པའི་ཡེ་ཤེས་སྐྱེ། །ཞེས་འདི་རང་གར་ཤར་འདོན་ཞིག་བྱས་ནས་གོ་འདུག མི་གོ་རྒྱུ་ཅི་མི་འདུག་ཟེར་ནས་སྐྱུར་ཆོག་པ་ཞིག་མིན། འདི་མན་ངག་གི་ཡིག་ཆ་ཡིན་པས་འདིའི་ཚིག་རེ་ཕར་བཀྲལ་ན་གླེགས་བམ་དུ་མ་བྱེད་ཆོག་སྟེ། འདིའི་ནང་དུ་བཀའ་མདོ་རྒྱུད་གླང་པོ་ཆེའི་རྒྱབ་ཁལ་མང་པོ་དང་། མི་མིན་མཁའ་འགྲོས་བདག་བྱས་པའི་སྔགས་རྒྱུད་ཀྱི་རྒྱུད་སྡེ་བསམ་གྱིས་མི་ཁྱབ་པ་དག་གིས་ནང་དོན་ཡོད་དོ་ཅོག་ཚུར་བསྡུས་ནས་ཡོད་པ་ཡིན་པས། ཕར་བཀྲལ་ན་ཡང་དེ་ལྟར་དུ་བཀྲལ་དུ་ཡོད་པའི་བརྗོད་བྱ་རྒྱ་ཆེན་གཏིང་ཟབ་ཅན་ཡིན་པའི་ཕྱིར། འོན་ཀྱང་དོན་ཟབ་དཔོག་དང་མི་དཔོག་གང་ཡིན་ཡང་། མན་ངག་གི་དགོངས་དོན་རང་ཉིད་ཀྱི་ཉམས་དང་བསྲེས་ནས་ཡང་ཡང་བལྟ་བ་དང་། གཞུང་ལ་སེམས་ཕར་བསྲེས་པས་མི་ཚད་གཞུང་གིས་སེམས་ལ་ཚུར་རྒྱས་བཏབ་པ་སྟེ། མདོར་ན་མན་ངག་གི་གཞུང་དང་སེམས་འདྲེས་པའི་ཉམས་ལེན་གྱིས་གསུངས་པ་ཡིན། མཚམས་མཚམས་སུ་འདིའི་ཚིག་ཁ་ཤས་ངག་ཏུ་བཀུག་ནས་ཉམས་དབྱངས་ཀྱི་ཚུལ་དུ་འཐེན་པ་དང་། རང་ཉིད་ཀྱི་སེམས་ལ་ཕན་པའི་གདམས་ངག་འགའ་རེ་བསལ་ནས་སྔས་མགོ་རུ་སྦྱོར་དང་མི་བརྗེད་པའི་དྲན་རྟེན་དང་སེམས་རྟེན་དུ་ཡོང་བ་ཡིན། སྡུག་ཐུག་གི་ཉི་མ་བློ་ཕ་ལ་འདྲི་ས་མེད་གྲོས་མ་ལ་ཤོམ་ས་མེད་དུས་ཤིག་ལ་མན་ངག་འདི་ཚོ་ལ་བློ་དྲིས་ན་ཚིག་རེའི་ནང་དུ་གསེར་སྲང་འབུམ་ཕྲག་རི་བ་ཡོད་པ་ཡིན། དགེ་བསྙེན་ཕོ་མོ་དག་གིས་སྐོར་ལམ་ནང་ནས། ཡས་ཀྱི་ཕ་ཆུས། མས་ཀྱི་མ་ཆུས། དགོན་པའི་བསྟན་ཆུས། གནམ་གྱི་ཡག་བཙོག ཉི་མའི་དྲོ་གྲང་། པུས་འགོ་ན་རབས་མཁལ་སྐེད་གཟེར་རབས་སོགས་དོན་མེད་པའི་ངག་འཁྱལ་བཤད་མ་འདུག དེ་བས་འདིའི་ཆོས་ཀྱི་ཚིག་དོན་རེ་ཞེ་ལ་བཀོལ་ནས་ཕར་བཤད་ཚུལ་གླེང་རེ་གྱིས་དང་གོམས་ཆ་སྐྱེས་ནས་བཟང་ཡ་རབས་ཀྱི་ཕྱོགས་ལ་ལོབས་རྒྱུ་ཡོད་པ་ཡིན། ཡིག་ངོ་ཅུང་ཟད་རེ་ཨེ་ཤེས་ལྟོས་དང་དོན་ཞེ་ལ་བཟུང་རྟེན་ཡོང་བ་ཡིན། ཕྱི་མ་དུད་འགྲོའི་ལུས་རྟེན་བླང་མི་དགོས་པའི་ཕན་ཐུགས་ཀྱང་ཡོད་པ་ཡིན། ཡི་གེ་སྦྱོང་བ་ལ་རྒས་མ་རྒས་དང་ཕོ་མོའི་ཁྱད་པར་ཅི་ཡོད། ཡི་གེ་ཐམས་ཅད་ཀྱིས་སྦྱངས་ན་ཕན་ཡོན་ཆེ་བ་ཡིན། བརྗོད་བྱ་དམ་པའི་ཆོས་ཀྱི་ནང་དོན་ཅན་ཡི་གེ་ན་ཞིག་ཚུན་ཆོད་སངས་རྒྱས་ཀྱི་སྤྲུལ་བ་ཡིན། བཟོ་དང་སྐྱེ་བ་སྤྲུལ་བའི་སྐུ་ལས་སྤྲུལ་བའི་གཟུགས་སྐུ་ཡིན་པས་མ་ཚད་རྒྱལ་བའི་གསང་གསུམ་གྱི་འཕྲིན་ལས་ཀྱང་འདི་ལ་ཚང་བ་ཡིན། སྒྲ་མེད་བརྗོད་པ་དང་བྲལ་བའི་ཆོས་ཞུ་ཤེས་པ་ཞིག་ལ་སྐུ་རྟེན་བས་གསུང་རྟེན་ལྷག་པ་ཡིན། གསུང་རྟེན་ཡི་གེའི་གཟུགས་སུ་བྱོན་པ་དེས་ལེགས་ཉེས་བླང་དོར་གྱི་གནས་བསྟན་པས་མི་ཚད། བཤེས་གཉེན་དམ་པ་དེའི་བར་དུ་བརྒྱུད་ན་ཐུགས་ཀྱི་གསང་བ་ཟབ་མོ་བཅར་ཕོག་ཏུ་ངོ་འཕྲོད་ཐུབ་པ་ཡིན། དེས་ན་ཆོས་ཐོས་པ་ལ་དཀོན་པའི་འདུ་ཤེས་བསྐྱེད་པ་གནད་ཆེ་བ་དང་། དེ་བྱ་བ་ཐམས་ཅད་ལས་གནད་ཆེན་ཡིན་པར་ཤེས་པ་ནི་དེ་བས་ཀྱང་གལ་ཆེ་བ་ཡིན། ཆོས་དུང་བུས་པའི་ཕྱོགས་ལ་གོམ་པ་སྤོས་པ་ཙམ་མ་དགོས་དང་པའི་ཡིད་ཀྱིས་དེའི་ཕྱོགས་སུ་མོས་པའི་འདུན་པ་ཙམ་བསྐྱེད་ཀྱང་ཕན་ཡོན་དང་བསོད་ནམས་རྒྱལ་བའི་ལྗགས་ཀྱིས་ཀྱང་བརྗོད་མི་ལང་བ་ཡོད་པ་ཡིན། རྒྱལ་བའི་དབང་པོ་ཀློང་ཆེན་ཞབས་ཀྱིས་ཀྱང་། །ཆོས་རྔ་སྒྲོགས་པའི་སྒྲ་ཐོས་སེམས་ཅན་ཡང་། །ངན་སོང་རྣམ་གྲོལ་ཉན་རྣམས་སྨོས་ཅི་དགོས། །ཞེས་གསུངས་སོ། །འུ་ཚོ་དེ་ཉིན་སོས་ཀ་སྔོ་རྩི་ཤིང་དང་པོར་རྒྱས་དུས་ནས་ད་ནམ་ཟླ་སྟོན་མཇུག་གི་ཤིང་ལོ་རླུང་གིས་ཁུར་བའི་དུས། སྤང་ལྗོངས་ཀྱི་མདོག་གཉིས་བརྗེས་བའི་ཡུན་དུ་ངས་ཆོས་ཤིག་བཤད་ཁུལ་བྱས་པ་དེ་ཁྱེད་རྣམ་པས་གསན་པ་རེད། འགའ་རེ་དབྱར་ཟླ་གསུམ་དང་སྟོན་ཟླའི་བར་དུ་ས་རློན་གྱི་ཐོག་ཏུ་རས་གུར་རེ་ཕུབ་ནས་གནམ་དྲོ་གྲང་ཉི་མ་ཆར་ཞོད་གང་བྱུང་ཡང་བསྲན་ནས་ཆོས་ཕྱིར་དཀའ་སྤྱད་མཛད་དེ་བཞུགས་ཡོད་པ་རེད། འགའ་རེ་ས་ཐག་རིང་པོའི་ཆོས་ཞུ་བ་ཡིན་པས་སྐུ་ངལ་ཅི་འདྲ་ཞིག་མེད། དགོན་པ་འགའ་རེའི་གྲྭ་བས་ཆད་ལས་ཉིན་རེ་བཞིན་དུ་འཇལ་ཞོར་དུ་ཆོས་ཞུས་ནས་བཞུགས་པ་ཡང་ཡོད་འདུག འགའ་རེ་བྲོ་རྟེན་ཆད་ཀྱང་ཆོས་མ་བསྐྱུར་ནས་བློ་ཐབས་གང་དྲག་གིས་ཆོས་གསན་ནས་བཞུགས་ཡོད་པ་དང་། འདིའི་ཉིན་སྲིབ་ཀྱི་ཇོ་སེར་རྣམ་པས་ཀྱང་མཆོད་འབུལ་དང་དགེ་འདུན་གྱི་བསྙེན་བཀུར་ཆེད་དུ་དུས་རྒྱུན་དུ་འོ་བརྒྱལ་མང་པོ་མཛད་བཞིན་ཡོད། འོན་ཀྱང་རང་རེ་ཚང་མ་སྔར་བསགས་བསོད་ནམས་དང་ལས་སྨོན་མཐུན་པས་མཉམ་དུ་འཛོམས་པ་ཡིན་ཕྱིར། སྐབས་འདིའི་མཆེད་ལྕམ་དམ་ཚིག་གཅིག་གིས་སྦྲེལ་བའི་ཕྱི་མའི་མཐའ་ལ་བདེ་ནས་བདེ་བའི་ལམ་ལ་ཆོས་ཟབ་མོ་འདི་ཚོས་སྟོབས་ཀྱིས་དམ་ཚིག་མ་ཉམས་ན་ཚོམ་བུ་གཅིག་ཏུ་ལོས་འགྲོ་བསམ་གྱིན་ཡོད། དེ་ཆོས་ཟབ་མོ་ཐོད་པ་བོར་ཆོག་གི་གདམས་པ་ཡོད་པའི་ལེགས་རྐྱེན་གྱིས་ཡིན་པས་ཚང་མས་ཐུགས་སྤྲོ་སྤྲོ་གྱིས། ཨེ་སྐྱིད་མི་སྐྱིད་སེམས་ཡིན་སྐྱིད་པོ་རང་གིས་མ་བྱས་ན་གཞན་གྱིས་སྐྱིད་ཐབས་སྤྲོད་རྒྱུ་ཡོད་པ་མིན། སྐྱིད་རང་རྩིབ་ན་ཡོད་དུས་མ་ཤེས་ན་རྗེས་ནས་དེ་དུས་སྐྱིད་པ་ལ་ཨང་བསམས་ན་འདས་དོན་རྗེས་དྲན་ཡིན་པས་ཉམས་ལ་རན་པ་མིན་ནོ།།

ཉིན་དྲུག་པའི་ཆོས་ཁྲིད།

དེ་ཡང་ཇི་སྐད་དུ་ཆེད་དུ་བརྗོད་པའི་ཚོམས་ལས། སང་དང་འཇིག་རྟེན་ཕྱི་མ་གཉིས། །སྔོན་དུ་གང་འོང་གཏོལ་མེད་པས། །སང་གི་དོན་ལ་མི་འབད་པར། །ཕྱི་མའི་དོན་ལ་འབད་པར་རིགས། །ཞེས་གསུངས་པ་ལྟར་དུ་རང་རེའི་ད་ལྟའི་མི་ཚེ་འདི་ལ་རྟག་བརྟན་མེད་པའི་ཚུལ་ནི། རླུང་ནང་གི་མར་མེ་ཞིག་དང་འདྲ་བར་གནོད་པའི་རྐྱེན་མང་ཞིང་འཚོ་བའི་རྐྱེན་ཉུང་བ། འཚོ་རྐྱེན་ཡིན་བསམས་པ་དེ་ཡང་འཆི་རྐྱེན་དུ་སོང་བ་གྲངས་ལས་འདས་པ་ཡོད་ཕྱིར། རང་གི་མགོ་ཐོག་ལ་སང་ཉིན་དང་འཇིག་རྟེན་ཕྱི་མ་གཉིས་སྔོན་མ་གང་ཡོང་ཆ་མི་འཚལ་བ་ཡིན་པས། ཕྱི་མའི་ཚེ་རབས་མང་པོའི་གཏན་གྱི་བདེ་སྡུག་གི་དོན་ལ་མི་འབད་པར། སང་ཉིན་གྱི་བྱ་བ་ངན་ངོན་ཚར་རྒྱུ་འགྲུབ་རྒྱུ་མེད་པའི་དོན་ཆུང་རྡུལ་ལྟ་བུ་དེ་ལ་བསམ་བློ་འཁོར་བ་བྱེད་པ་ནི་དགོས་པ་མེད་པ་དེས་ན། ཁོག་པའི་ནང་དུ་སེམས་ཡོད་ཅིང་ཕྱི་མར་ངན་སོང་ལ་སྐྱེ་བར་སྐྲག་སྔངས་ཡོད་པ་ཞིག་ཡིན་ན་ཚེ་ཕྱི་མའི་དོན་ཆེན་ལ་འབད་པ་ནི་རན་ཅིང་རིགས་པ་ཡིན་ཞེས་གསུངས་པ་ཡིན། འཇིག་རྟེན་གྱི་མི་རྣམས་རྟག་འཛིན་ཆེ་བའི་དབང་གིས་ང་སང་ཉིན་མི་འཆི་བསམ་པ་བྱེད་ཀྱང་། མ་བསམས་མ་དྲན་ས་ནས་གློ་བུར་དུ་ཤི་བ་ནི་གྲངས་ཀྱིས་མི་ཆོད་པ་ཡོད་པས། མང་ཆེ་བ་ཤི་སྣང་ཞེ་ལ་མེད་ས་ནས་ཤི་བ་ཏག་ཏག་ཡིན། ཤི་གསོན་གཉིས་ཀའི་མཚམས་སུ་བར་ཐག་རིང་པོ་ཞིག་ཡོད་པ་མིན་ཏེ། དབུགས་རླངས་པ་འདྲ་དེ་ཕར་སོང་ནས་ཚུར་མ་འདུས་ཤིང་། དེ་དང་མཉམ་དུ་དྲོད་མེ་སྟག་འདྲ་དེ་ཡལ་ཚེ་ཤི་བ་ཞེས་པའི་སྒྲ་བོ་ཆེ་དེ་བསླེབས་པ་ཡིན། ཤི་བའི་དུས་སུ་སྡུག་སྡིག་པ་གཉིས་ཀ་བསགས་པའི་སྒོ་ནས་གཅེས་པར་བཟུང་བའི་ལུས་ཕུང་དེ་རྡོ་རིལ་སུམ་ཚུགས་ཤིག་གི་སྟེང་དུ་རྩྭ་འགའ་ཞིག་གི་ཁུག་ཏུ་བཏུམས་ནས་ཁང་ཁུག་གི་ཡོལ་བ་ཞིག་གི་ཕག་ཏུ་བཞག་སྐབས། གསོན་ཚེ་གཅེས་དགུ་དམར་དགུ་ཇི་ལྟར་ཡིན་ཡང་དེ་ལ་བཙོག་བལྟས་ནས་བཅར་མི་ནུས་པས་གླ་ཟུར་ནས་བྱིན་ཏེ་མ་བཙལ་དུས་གཅར་མཁན་མི་ལོན་པ་ཡིན། ཤི་ནས་རོ་གོག་མེད་པར་བྱས་པའི་རྗེས་སུ་མུ་སྟེགས་རྒྱང་འཕེན་པས་བཤད་པ་བཞིན་དུ་ཅི་ཡང་མེད་ན་བླ་ཡང་། རྣམ་ཤེས་བྱ་སྒྲོ་རླུང་ཁྱེར་དེ་བར་དོའི་འཕྲང་ལ་བཤར་བའི་དུས་སུ། འཇིགས་པའི་སྒྲ་བཞི་སྟེ། རི་ཆེན་པོ་ཉིལ་བའི་སྣང་བ། རྒྱ་མཚོ་ཆེན་པོ་འཕྱུར་བའི་སྒྲ་སྐད། བསྐལ་བའི་མེ་ཆེན་འབར་བའི་འུར་སྒྲ། དུས་མཐའི་འཐོར་རླུང་འཚུབས་པའི་སྔངས་སྐྲག་དང་། དུག་གསུམ་གྱི་རང་སྣང་ཡ་ང་བའི་གཡང་ས་གསུམ་སྟེ། ས་གཞི་ཐམས་ཅད་སྐྱ་ཆད་དེ་བ། དམར་ལམ་མེ་བ། ནག་ངོམ་མེ་བའི་སྣང་བ་ས་རུབ་པའི་གསལ་མ་སྨག་གི་ནང་ནས་སོང་བསྡད་པ་ལྟ་བུ་ཞིག་ལས་མེད་པ་དང་། ཡང་མཚམས་མཚམས་སུ་གཅན་གཟན་གཏུམ་པོའི་ངར་སྐད་སྒྲོགས་ནས་བདས་ཚེ་འཇིགས་སྐྲག་གིས་བརྒྱལ་ལ་ཁད་པ་ལ་སོགས་པའི་སྣང་བ་འབའ་ཞིག་པའི་དབང་དུ་ཤོར་བ་དང་། དེའི་དུས་སུ་ད་ནི་ང་ཤི་ནས་བར་དོར་འཁྱམ་བཞིན་འདུག སྔར་གསོན་པའི་དུས་ལ་ཡོད་སྐབས་དམ་པའི་ཆོས་ཞུས་ནས་བར་དོ་ཆོད་པའི་གདམས་པ་རེ་ཐོབ་ཡོད་ན་ཅི་མ་རུང་སྙམ་པའི་ཡི་ཆད་དང་འགྱོད་པ་སྐྱེ་བ་དང་། ཤུལ་མི་ལ་ཞེ་ཆགས་བྱེད་ཀྱང་། ཤི་གསོན་སྣང་བ་ཁ་ཁར་ཤར་བའི་དུས་ཡིན་པས་གཅིག་གིས་གཅིག་ལ་ཕན་ཐོགས་པ་མིན། དེའི་དགེ་བའི་ར་མདའ་དམ་པའི་ཆོས་མ་གཏོགས་གང་གིས་མི་སྐྱོབ་ཀྱང་། ཆོས་རྣམ་དག་རྗེས་ནས་མངག་ཅེས་པ་དེ་ཡང་དཀོན་པོ་ཡིན། དེས་ན་དམ་པའི་ཆོས་གསོན་འདི་གོང་ནས་རང་གིས་མ་འགྲུབ་ཚེ། ཤི་ཟིན་དུས་རྗེས་ནས་མངག་པ་དེ་སྒང་ལ་ཁ་མཐོན་པོ་ནས་རྩམ་པ་ཟོས་པ་དང་འདྲ་བར་བསེར་མ་རླུང་དང་ཕྱེད་མར་འགྲོ་བར་ཡིན་པས་ཉམས་ལ་རན་པ་ཞིག་ཡོང་དཀའ་བ་ཡིན། གཅིག་ན་ཆོས་སྒྲུབ་སྟངས་ཀྱི་ཐད་ནས་གནད་ལ་སྨིན་པ་ཞིག་སྒྲུབ་མི་ཤེས། གཉིས་ན་སེར་སྣ་འཇུར་གེགས་ཀྱི་དབང་གིས་ཞེ་དགུའི་ཞག་གྲངས་སོང་ཞིང་སོང་ལ་ཤི་བོའི་རྩིས་འདང་ཇེ་ཆུང་དང་རྒྱུ་ནོར་གྱི་དམར་ཐང་ཇེ་ཆེ་ལ་འགྲོ་བ་ཡིན། གསུམ་ན་མཆོད་གནས་ཡང་དག་ལོན་དང་མི་ལོན་དང་བསྔོ་བའི་འདུན་པས་ཤི་བོ་ལ་ཐོབ་དང་མི་ཐོབ་ལ་སོགས་པ་རྐྱེན་བར་ཆད་མང་བ་ཡིན། སྡིག་པ་ཤིན་ཏུ་ཆེ་བའི་རིགས་ལ་བར་དོ་མེད་པར་མར་གྱི་ཟང་ཐལ་དུ་དབུགས་ཆད་ནས་འབྱུང་བའི་ཐིམ་རིམ་གྱི་དེ་མ་ཐག་ཏུ་དམྱལ་བའི་སྣང་བ་ཤར་བ་ཡིན། དེས་ན་ད་ལྟའི་སྐབས་འདིར་སྐྱེ་རྒ་ན་དང་འཆི་བའི་ཐད་ནས་རང་དབང་མེད་པས། ཚེ་ཚད་སྐར་མདའ་རྒྱུག་པ་ལྟ་བུ་འདི་ཅུང་ཟད་དལ་དུ་འཇུག་དགོས་བསམ་ཡང་ཁོམ་པ་དང་དབང་ཆ་ཡོད་པ་མིན་ཡང་། རང་ལུས་འདོམ་གང་གྲུ་བཞིའི་ལུས་ངག་ཡིད་གསུམ་འདིས། དཀར་པོ་དགེ་བའི་ལས་ཤིག་སྒྲུབ་དང་ནག་པོ་སྡིག་པའི་ལས་ཤིག་གསོག་གི་རང་དབང་རང་ལ་ཡོད་པ་ཡིན། དེ་ཡང་ཇི་ལྟར་བསྒྲུབ་དགོས་མི་ཤེས་པའི་ལྟ་ལོག་བདུད་རིགས་ཀྱི་གྲུབ་མཐའ་ངན་པ་ལ་ཞུགས་ནས་གྲུབ་མཐས་བློ་བསླད་པ་མི་ཡིན་ཡང་དུད་འགྲོ་གླེན་ལྐུགས་ཀྱི་རིགས་དང་འདྲ་བ་ཡིན་ན་ཁག་མེད་ཀྱང་། རང་རེ་ནི་ཆོས་དང་ལྡན་པའི་ས་ཆ་ལ་སྐྱེས་ནས་བསྟན་པ་ཡང་དར་གྱི་རྗེས་ཟིན་པའི་སྐབས་དང་ཁེལ་ནས། རང་རང་གི་སྔར་བསགས་བསོད་ནམས་ཀྱི་བགོ་སྐལ་དང་མཐུན་པའི་བླ་སེར་འདུས་པ་རྣམས་མཇལ་བས་མ་ཚད། དེ་དག་གིས་ཀྱང་སངས་རྒྱས་ཀྱི་མཛད་པ་སེམས་ཅན་གྱི་དོན་སྒྲུབ་པ་ནི་རང་རང་གི་འོས་འགན་ཕྲག་ཏུ་བབས་པ་ཞིག་ཏུ་བརྩིས་ནས། དམ་པའི་ཆོས་ཁ་ལ་བཞག་ཅིང་ཁོག་ལ་འཛུད་ལེ་མིན་པར་བྱས་ནས་ཆོས་བསྟན་པའི་ད་རེས་ཀྱི་དུས་ཐོག་འདི་ནས་མ་གཟབ་དུས། འཕྱིས་པ་ཤོར་བ་གཉིས་ཀ་རེད་བསམ་དགོས་ཏེ། རྒ་རྒས་ནད་པ་དག་མ་གཏོགས་ཤི་མི་དགོས་པ་ཞིག་མིན་པ་དེས་ན་ང་ལོ་ཉུང་ཡིན་པས་མི་ཤི་ཟེར་ནས་འདུག་ས་ཡོད་པ་མིན་ཅིང་། ངས་ད་དུང་སྐྱིད་ལོང་དགའ་ལོང་བྱུང་མེད་པ་དང་། འཇིག་རྟེན་ཁམས་ཀྱི་སྐྱིད་སྡུག་གི་བྲོ་བ་མྱོང་ལོང་མ་བྱུང་ཟེར་ས་དེ་ལས་ཀྱང་ག་ལ་ཡོད། གཤིན་རྗེའི་ཁྲམ་ཁ་དེ་སུ་ལ་གཏད་ཡོད་ན་དེ་མ་ཐག་ཏུ་རང་དབང་སྐད་ཅིག་ཙམ་མེད་པར་འགྲོ་དགོས་པ་ཡིན། འགྲོ་བའི་དུས་སུའང་ངས་དམར་ཐང་ཅན་གྱི་མི་ལ་ཁ་ཆེམས་ཤིག་འཇོག་དགོས་པ་དང་། སུ་གང་ཞིག་ལ་ཤི་ངོ་ཞིག་གཏུག་དགོས་ཟེར་ས་ཙམ་ཡང་མེད་པ་ཡིན། ལར་ཤི་རྒྱུ་རྐྱང་པ་མིན་ཡང་། གསོན་འདི་ག་ལ་མི་འདོད་པའི་རྐྱེན་ངན་ཅི་འདྲའི་མང་པོ་མེད་ན། དེ་ཐམས་ཅད་ལ་ཕན་བྱེད་དང་སྐྱོབ་བྱེད། གནོད་པ་དེ་དག་ལས་ཟློག་བྱེད་དང་བྱ་བ་འགྲུབ་བྱེད་ཀྱི་གཞི་དམ་པའི་ཆོས་སྒྲུབ་པ་འདི་ཁོ་ན་ཡིན། ཚེ་ཕྱི་མ་མིན་ཡང་སྡུག་བསྔལ་འབའ་ཞིག་ཡིན་པ་རེད། ངན་འགྲོའི་སེམས་ཅན་དམྱལ་བ་པ་དག་གིས་ཨ་ན་ཨ་རའི་སྒྲ་སྒྲོག་ཅིང་ངུ་འབོད་བྱེད་ཚུལ་དཔེར་ན། མནར་མེད་ཀྱི་དམྱལ་བ་ལྟ་བུ་ལ་མཚོན་ན་དམྱལ་བའི་སེམས་ཅན་དང་མེ་གཉིས་དབྱེར་མེད་དུ་གྱུར་ནས་ཨ་ཚ་ཨ་ནའི་ངུ་སྐད་ཐོས་ཚེ་གཟོད་སེམས་ཅན་ཡོད་པར་ཤེས་པ་ལྟ་བུ་ཡིན། དམྱལ་བའི་སེམས་ཅན་མིན་ཡང་རང་རེ་འགྲོ་བ་མིའི་སྒྲ་སྐད་ལ་ཉན་ནས་ཞིབ་འཇུག་བྱས་ན་སྡུག་པའི་ངུ་སྐད་ཤ་སྟག་ཡིན་པ་སྟེ། ནད་པ་ཚབས་ཆེན་གཟེར་གྱིས་མནར་ནས་ཤི་ལ་ཕྱོགས་པ་དང་། ཕ་མ་ཤི་བའི་དྭ་བུས་ངུ་འབོད་བྱེད་བཞིན་ཡོད་པ་དང་། བུ་རྒྱུད་མ་དབང་བའི་ཕ་མས་སྡུག་སྨྲེ་འདོན་བཞིན་ཡོད་པ་དང་། གཞན་ཡང་དུས་རྒྱུན་གྱི་སྐད་ཆ་ལ་བསམ་བློ་བཏང་ན། ན་རབས། ཚ་རབས། ཤོར་རབས། བོར་རབས། ཁོལ་རབས། ཁོས་དེ་བྱས་པས་ང་ལ་འདི་ལྟར་བྱུང་བ་དང་། སེམས་དཀའ་བ་དང་ལུས་ཆད་པ། ནོར་གོད་པ་དང་ཚོང་ཉེས་པ། དགྲ་སྡང་བ་དང་འཕྲད་རབས། གཉེན་བྱམས་པ་དང་བྲལ་རབས། འདོད་པ་དོན་ཐོག་ཏུ་མ་ཁེལ་རབས། མི་འདོད་པ་མ་བསམས་ཀྱང་དབང་མེད་དུ་ཐོག་ཏུ་བྱུང་ཚུལ་ལ་སོགས་པ་མདོར་ན་བཤད་ཚོད་ཐམས་ཅད་སྡུག་བསྔལ་གྱི་སྨྲེ་ངག་དང་ངུ་འབོད་ཤ་སྟག་ཡིན། དེ་དག་ནི་སྡུག་ས་ཏག་ཏག་ནས་བགྲང་པ་ཙམ་ལས་མཚམས་རེ་སྐྱིད་ནས་གླུ་ལེན་བཞིན་ཡོད་པས་དེ་ཚོའི་སྒྲ་སྐད་སྡུག་སྐད་མ་ཡིན་ནོ་ཞེ་ན། དེ་ཡང་སྡུག་སྐད་ཀྱི་ངུ་འབོད་ཡིན་ཏེ། གླུའི་ནང་དོན་ལ་གཞིག་ཚེ། དེའི་ནང་དུ་དྲིན་ཆེན་གྱི་ཕ་མ་མ་དབང་རབས་དང་། ཚེ་ཕྱི་མའི་ཡུལ་ནས་དཀོན་མཆོག་གིས་སྐྱོབ་རོགས་དང་། ང་མཐུན་པའི་མི་དང་བྲལ་ཚུལ་དང་། བསམ་དོན་ཐོག་ཏུ་མི་འབབ་རབས་ལ་སོགས་པ་ཤ་སྟག་ཡིན་པའི་ཕྱིར། མཚམས་རེ་བཀྲ་ཤིས་ཀྱི་ཁ་གཡང་ཚེ་རིང་བསམ་དོན་འགྲུབ་པའི་སྨོན་ལམ་གྱི་ནང་དོན་ཅན་རེ་ཡོད་ཀྱང་། ཚེ་མ་རིང་ནས་མི་སྔོན་མ་མང་པོ་ཤི་བའི་སྡུག་དང་། ང་རང་ཉིད་ཚེ་ཐུང་ནས་ནམ་ཞིག་ལ་ཤི་འགྲོ་བསམས་པའི་འཇིགས་སྐྲག་སྡུག་བསྔལ་ཡོད་ནས་དེ་ལྟར་དུ་སྨོན་པ་ཡིན། དེས་ན་དེ་ཡང་དོན་དུ་སྡུག་སྐད་ཁོ་ན། མི་དང་མི་ཐུག་དུས་ཁྱོད་བདེ་མོ་ཨེ་ཡིན་ཞེས་འདྲི་སྲོལ་ཡོད་པ་ནི། བཟང་ཆེས་པས་མ་ཡིན་ཏེ། མི་བདེ་བ་དེ་ཟུར་དུ་ཡོང་མ་རགས་པ་ཡོད་པའི་རྐྱེན་གྱིས་དེའི་ཚིག་དེ་བྱུང་བ་ཡིན། ན་བ་དང་ཤི་བའི་སྒྲ་མི་གྲགས་པའི་འཇིག་རྟེན་ཞིག་ཡིན་ན། ཁྱོད་ཨེ་བདེ་ཞེས་པའི་ཐ་སྙད་དེ་ཡོང་དོན་མེད་པ་ཡིན། ཁྱོད་བདེ་མོ་ཨེ་ཡིན་ཞེས་པ་དེ་ཡག་བཅོས་བྱས་ནས་བརྗོད་པ་ཙམ་ལས་དོན་དུ་ཁྱོད་འཆི་བ་ལ་ཕྱོགས་བཞིན་མེད་དམ་ཞེས་པའི་དོན་ཡིན། དེས་ན་ཤི་ཕར་རྒྱབ་ཀྱི་དུས་སུ་མིན་ཡང་། དམ་པའི་ཆོས་འདི་གསོན་འདི་ངོགས་ཀྱི་སྡུག་བསྔལ་ཆུང་ཞིང་ན་ཚ་ཤི་ཆད་མི་འབྱུང་བྱེད་དང་། བྱུང་ནའང་སེམས་སྡུག་གི་ཁུར་བོ་མི་ལྗིད་པར་བྱེད་པ་དང་། རྐྱེན་བར་ཆད་སྔོན་ལས་ལྡོག་མེད་ཀྱི་དབང་གིས་བྱུང་ཡང་། རབ་ན་བྱང་ཆུབ་ཀྱི་ལམ་དུ་སྒྱུར། འབྲིང་ན་བདེ་སྡུག་གཏོང་ལེན་བྱས་ནས་དེའི་སྡུག་བསྔལ་དེས་གོ་ཆེན་བཅད། ཐ་མ་ཡིན་ཡང་སྔོན་བསགས་ཀྱི་ལས་ཀྱི་རྣམ་སྨིན་བྱང་བའི་སྨོན་ལམ་རེ་འདེབས་ཤེས་ན་སྡུག་བསྔལ་དེ་དག་གི་གདོང་ལེན་གྱི་ནུས་པ་ཆེན་པོར་ཐོབ་པ་ཡིན། ཁྱིམ་པ་མི་ནག་པ་ཞིག་ལ་མཚོན་ན། རབ་བྱུང་བ་དག་དང་འདྲ་བར་ཆོས་ལས་འཇིག་རྟེན་གྱི་འཚོ་ཚིས་ལ་འདེང་རྒྱག་མི་དགོས་པ་ཞིག་ག་ལ་ཡིན་ཡང་། འཇིག་རྟེན་ཡག་པ་ཞིག་འགྲུབ་དགོས་ཚེ་ཡང་དམ་པའི་ཆོས་འདོར་མི་རུང་བ་ཡིན་ཏེ། ཆོས་ཀྱིས་རྒྱུད་དུལ་བའི་གང་ཟག་དེ་མི་བཟང་པོ་ཡ་རབས་ཡིན་ཅིང་། མི་བཟང་པོ་ཡ་རབས་དེ་ནི་ཐམས་ཅད་ལ་ཕན་ཐོགས་ཆེ་ཞིང་ཀུན་གྱིས་གུས་བཀུར་བྱེད་ས་ཞིག་ཡིན་པས། དེ་ལྟ་བུ་དེས་གཞན་དོན་སྒྲུབ་ཞོར་ལ་རང་དོན་ཤུགས་ཀྱིས་འབྱུང་བ་ཡིན། ཤེས་རབ་བརྒྱ་པར། མི་ཡི་ཆོས་ལུགས་ལེགས་སྤྱད་ན། །ལྷ་ཡུལ་བགྲོད་པ་ཐག་མི་རིང་། །ལྷ་དང་མི་ཡི་ཐེམ་སྐས་ལ། །འཛེགས་ན་ཐར་པ་གམ་ན་འདུག །ཅེས་པ་ལྟར་དུ། དང་པོར་མི་ཡ་རབས་འཇིག་རྟེན་ཡང་དག་གི་ལྟ་ལ་དད་ཅིང་། ལས་རྒྱུ་འབྲས་ལ་བརྩི་སྲུང་ཡོད་མཁན་ཞིག་བྱས་ན། དེ་ནི་ལྷ་ཡུལ་ལ་སོགས་པའི་མཐོ་རིས་རིམ་བརྒྱུད་ཀྱིས་མི་འགོར་བར་ཐར་བ་ཐོབ་ནས་འཁོར་བའི་སྡུག་བསྔལ་ལས་ཐར་བ་ཡིན་ཞེས་གསུངས་པ་ཡིན། ཁྱད་པར་དུ་ལོ་ཉུང་དག་གིས་ཐོས་བསམ་བྱས་ཏེ། ཆོས་སྤྱོད་ཀྱི་མཐོང་རྒྱ་ཆེར་བསྐྱེད་བྱས་ནས། རང་ཉིད་མི་བཟང་པོ་འཇིག་རྟེན་གྱི་ཁ་གསོ་རྒྱབ་འགེབ་ཤེས་མཁན་ཙམ་ཞིག་གིས་མི་ཚད་པར། རང་གཞན་གཉིས་ཀའི་བདེ་སྐྱིད་བསྐྲུན་པ་ལ་རྒྱ་ཆེ་ས་ནས་འདེང་རྒྱག་བྱེད་མཁན་ཞིག་ཏུ་གྱུར་ནས། རིམ་པས་ཚེ་འདི་ཕྱི་གཉིས་ཀའི་བདེ་བའི་འབྱུང་གནས་དམ་པའི་ལྷ་ཆོས་དེ་རང་ཉིད་ཀྱི་འཚོ་བ་དང་རྒྱུན་གྱི་བྱ་སྤྱོད་ལ་སྦྱོར་ཤེས་ནས། གཅིག་གིས་མི་ཚད་ཚང་མའི་རྒྱུད་ལ་ཆོས་ཀྱི་བདུད་རྩིའི་རོ་བཅུད་ལེན་ཤེས་པར་ཆགས་ཚེ། མྱི་ཐམས་ཅད་ལྷ་མྱི་དང་། ཡུལ་ལུང་པ་ལྷ་ལུང་དུ་སོང་ནས། ཆོས་ལྡན་དག་པའི་ཞིང་ཁམས་མིང་དང་དོན་མཚུངས་པ་ཞིག་ཏུ་འགྱུར་བ་ཡིན། ད་ལྟའི་འདིར་བཞུགས་མང་ཤོས་དགེ་འདུན་པ་ཡིན་པ་དང་། ལྷ་ཁང་ཕྱི་མའི་ནང་དུ་ཡོད་པའི་དགེ་བསྙེན་ཕོ་མོ་དག་ཀྱང་ལོ་ན་ཡར་སོན་གྱི་རྡོག་མ་ཁ་ཤས་ཡིན་པས། སྡེ་པ་མང་ཚོགས་ལ་བཤད་རྒྱུའི་སྐད་ཆ་རྗེས་སུ་སྐབས་ཐོབ་དང་བསྟུན་ནས་བཤད་ཆོག མདོར་ན་ཆོས་ལམ་ལ་དང་པོར་ཞུགས་པ་རྣམས་དང་། ཞུགས་ནས་ཡུན་རིང་རེད་ཡོད་ཀྱང་དམིགས་བསལ་གྱི་ལམ་སྟོན་བྱེད་མཁན་དང་མ་འཕྲད་པ་དག་གིས་དང་པོར་བསམ་པ་བཟང་པོ་ནས་མགོ་བཙུགས་ཏེ་སྦྱོང་དགོས་པ་ཡིན། ཕྱི་རོལ་བདེ་སྡུག་གི་མཐོང་སྣང་འདི་ཐམས་ཅད་པོ་ཕལ་ཆེ་བ་ནི་ནང་རང་གི་སེམས་ཀྱིས་བྱས་པ་ཁོ་ན་ཡིན་པས་དེ་དེ་ལྟར་ཡིན་པར་ཤེས་དགོས། དེ་ཡང་སེམས་སྐྱིད་པའི་ཉིན་མོར་ཁོར་ཡུག་ཐམས་ཅད་ཞིང་ཁམས་ལྟར་དུ་གང་སྣང་ཡོངས་རྫོགས་སྐྱིད་པའི་སྣང་བ་སྤྲོ་སེམས་འཁོར་བྱེད་ཤ་སྟག་ཡིན་ལ། སེམས་མི་སྐྱིད་པའི་ཉིན་ཞིག་ལ་ཁེལ་ཚེ། ཅི་འདྲའི་མེ་ཏོག་ལྡུམ་ར་སོགས་སྤྲོ་སྐྱིད་ཀྱི་གླིང་ཁ་ཞིག་ལ་སོང་ན་ཡང་། སྐྱོ་སྣང་ཅན་གྱི་ཁོར་ཡུག་ཅིག་མ་གཏོགས་མཐོང་དུ་མེད་པ་ཡིན། དེ་ནི་ཕྱིའི་འབྱུང་བ་འགྱུར་སོང་བ་མིན་ཡང་རང་གི་སེམས་ཀྱི་འགྱུར་བས་དེ་ལྟར་བདེ་སྡུག་གི་སྣང་བ་ཤར་དུ་བཅུག་པ་ཡིན། དེ་བཞིན་དུ་སྡིག་སེམས་ཀྱིས་དམྱལ་བའི་མཐོང་སྣང་བྱུང་བ་དང་། དགེ་སེམས་ཀྱིས་མཐོ་རིས་ལྷ་དང་མིའི་སྣང་ཤེས་འབྱུང་བ་ཡིན། ཆོས་སེམས་ཀྱིས་སྒྲུབ་ཅེས་པ་ནི་སེམས་ལ་བསྒྱུར་བཀོད་ཐོངས་ཞེས་པའི་དོན་ཡིན། རང་རེས་མན་ངག་མཛོད་ཀྱི་ནང་ནས་འགའ་རེ་ཆོས་སྐད་མཐོན་པོ་ཡིན་པས་ལས་དང་པོ་བས་སྨོན་པའི་ཡུལ་རེད་ཅེས་རྒྱང་ལ་བཞག་པ་ནི། སེམས་ཀྱི་བསྒྱུར་བཀོད་ཚད་ལ་ལོངས་པའི་མིའི་སྤྱོད་ཡུལ། མཐོང་སྣང་འུ་ཚོ་ཐ་མལ་པ་དང་མི་འདྲ་བའི་སྣང་ཤེས་ཀྱི་སྐད་ཆ་བཤད་པ་རེད་ཅེས་པའི་དོན་ཡིན། སེམས་ལ་བསྒྱུར་བཀོད་ཇི་ལྟར་གཏོང་དགོས་ཤེ་ན། སེམས་ཞེས་པ་ནི་འཁྲུལ་སོང་བའི་མི་འཆར་དགུ་ཅན་འདི་ལ་ཟེར་བ་ཡིན། སེམས་དེ་མ་འཁྲུལ་བའི་ངང་དུ་འཇོག་ཤེས་ན་དེའི་དྭངས་ནི་ཡེ་ཤེས་ཡིན་པས། ཆོས་སྒྲུབ་ཅེས་པ་ནི་འཁྲུལ་བ་ལམ་དུ་བྱས་ནས་མ་འཁྲུལ་བའི་དྭངས་དེ་རྙེད་ཐབས་བྱེད་པ་ཞིག་ལ་གོ་ཆོག་པ་ཡིན། འཁྲུལ་མ་འཁྲུལ་གཉིས་ཡོད་པའི་དབང་གིས་ལམ་སྦྱོང་པའི་གནས་སྐབས་སུའང་། བདེན་གཉིས། ཚོགས་གཉིས། མཁྱེན་གཉིས་སོགས་གཉིས་ཅན་གྱི་ཆོས་སྐད་མང་རབ་འབྱུང་བ་ཡིན། འོན་ཀྱང་མཐར་ཐུག་གཉིས་མེད་གཅིག་ཏུ་བཟླུམས་ནས་ཡེ་ཤེས་ཐིག་ལེ་ཉག་གཅིག་གི་ནང་དུ་འཁྱིལ་དུས་ཆོས་སྐུའི་དབྱིངས་སུ་སངས་རྒྱས་ཞེས་པ། དུས་རྒྱུན་དུ་སེམས་ཅན་ཐམས་ཅད་ཀྱི་དོན་དུ་སྐུ་བཞི་ཡེ་ཤེས་ལྔའི་བདག་ཉིད་ཀྱི་གོ་འཕང་བསྒྲུབ་དགོས་ཞེས་པ་དེར་སོན་པ་ཡིན། སངས་རྒྱས་ཀྱི་ས་བོན་རང་ལ་ཡོད་པས་སེམས་ཅན་སུས་བསྒྲུབས་ཀྱང་འགྲུབ་ཏུ་ཡོད་པ་ཡིན། དེས་ན་དགེ་བསྙེན་ཕོ་མོ་ནས་བཟུང་སྟེ་སྔོན་འགྲོའི་འབུམ་ལྔ་གསོག་བཞིན་ཡོད་ལ། དེའི་སྐབས་ཀྱི་བླ་མའི་རྣལ་འབྱོར་སྒོམ་སྐབས་བླ་མ་དང་ཐུགས་ཡིད་དབྱེར་མེད་བསྲེ་དགོས་ཞེས་པའི་བླ་མ་དེ་གང་ལ་གོ་དགོས་ཟེར་ན། མཚོན་བྱ་དོན་གྱི་བླ་མ་ལ་གོ་དགོས། དེའི་འདྲའི་བླ་མའི་ཐུགས་དེ་ཁྱབ་བརྡལ་ཆེན་པོ་ཡིན་པས་སངས་རྒྱས་ཐམས་ཅད་ཀྱི་ཐུགས་དང་གཉིས་སུ་མེད་པ་ཡིན། དེ་དང་རང་གི་སེམས་གཉིས་དབྱེར་མེད་རོ་གཅིག་ཏུ་བསྲེ་དགོས། གོ་བདེ་བར་བཤད་ན་ད་ལྟའི་སྐབས་སུ་རང་རེས་སངས་རྒྱས་ཀྱི་ཐུགས་སྦྱོང་བཞིན་ཡོད་ལ། དེ་ལ་གོམས་པ་མཐར་ཕྱིན་པའི་དུས་སུ་རང་ཉིད་སངས་རྒྱས་སུ་འགྱུར་བ་ཡིན་ལ། མཉམ་བཞག་གི་དམིགས་འདུན་དེའི་ཐོག་ནས་བསམ་པ་བཟང་པོའི་ཀུན་སློང་གི་གཞི་བཅས་ནས་སེམས་ཅན་ཐམས་ཅད་ལ་དམིགས་པའི་ཡོངས་ཁྱབ་ཀྱི་སྙིང་རྗེ་ཕྱོགས་རིས་མེད་པ་ཞིག་ཨེ་ཡོང་བལྟ་ཞིང་། བླ་མའི་ཐུགས་དང་སངས་རྒྱས་ཀྱི་ཐུགས་ནི་བསམ་བརྗོད་དང་བྲལ་བའི་སྟོང་པ་ཉིད་ཡིན་ཅིང་། དེ་ལ་བྱམས་དང་སྙིང་རྗེའི་སྙིང་པོ་མེ་དང་ཚ་བ་བཞིན་དུ་འབྲལ་བར་མེད་པར་ཡོད་པས་དུས་རྒྱུན་གྱི་སྙིང་རྗེ་ཕྲ་མོ་ཕྱོགས་རིས་ཅན་ལས་ལྷག་པར་སྐྱེ་བ་དང་། དགའ་བ་དང་བཏང་སྙོམས་གཉིས་ཀྱང་རང་ཤུགས་ཀྱིས་འབྱུང་བ་ཡིན། དེ་ལྟ་བུའི་ཚད་མེད་བཞི་བསྒོམས་པའི་སྒོ་ནས་སྨོན་དང་འཇུག་པའི་བདག་ཉིད་ཀྱི་བྱང་ཆུབ་ཀྱི་སེམས་བསྐྱེད་པ་ཡིན་ལ། བྱང་ཆུབ་ཀྱི་སེམས་རྒྱུད་ལ་སྐྱེས་ནས་སེམས་བསྐྱེད་ཀྱི་སྡོམ་པ་ཐོབ་ལ་མ་ཉམས་པར་གྱུར་ཚེ། ཐར་བའི་ས་བོན་རྒྱུད་ལ་བཞག་ནས་སྨིན་པ་ལ་ཚེགས་མེད་པའི་དུས་སུ་བསླེབས་པ་ཡིན། ཁྱད་པར་དུ་འཇུག་སེམས་ཐོབ་ལ་མ་ཉམས་པ་ཡོད་ན། ཐ་ན་དབུགས་ཀྱི་རྒྱུ་འགྲུལ་ཡན་ཆད་གཞན་དོན་དུ་འགྱུར་ནས་ཅི་བྱེད་བྱང་ཆུབ་ཀྱི་ལམ་ཡིན། མདོར་ན་ངེས་འབྱུང་བྱང་སེམས་ཡང་དག་པའི་ལྟ་བ་རྣམས་རྒྱུད་ལ་སྐྱེས་ནས་ལྟ་སྒོམ་སྤྱོད་འབྲས་ཀྱི་ཉམས་ལེན་མཐར་ཕྱིན་པ་ནི་གནད་ཆེའོ། །ཡང་བསྐྱར་གོ་སླ་ཉན་བདེའི་སྒོ་ནས་བཤད་ན། ལུས་འདི་ཡོད་ཚེ་སེམས་འདི་ཡོད་ལ། སེམས་འདི་ཡོད་ནས་བཟུང་སྟེ། སེམས་ཀྱི་རྣམ་རྟོག་དེ་ཡང་ན་ཉོན་མོངས་དུག་ལྔའམ་ཡང་ན་ལུང་མ་བསྟན་དུ་གནས་པ་ཞིག་གམ་ཡང་ན་ཟག་བཅས་ཀྱི་དགེ་སེམས་ཤིག་ལས་མ་འདས་པ་ཡིན། འོན་ཀྱང་སེམས་ཁོ་རང་གི་ངོ་བོ་སེམས་ཉིད་བདེ་གཤེགས་སྙིང་པོས་སེམས་ཅན་ཐམས་ཅད་ལ་མ་ཁྱབ་པར་མེད་པར་ཡོད་པས། དེ་ལ་ཐེག་པ་རིམ་པ་དགུ་ཡིས་མིང་རེ་རེར་བཏགས་ནས་གྲོལ་འཁྲུལ་གཉིས་ཀྱི་ལམ་གྱི་དབྱེ་བ་འབྱེད་པའི་གཞི་རུ་བྱུང་བ་ཡིན་ཏེ། འཁོར་འདས་གཉིས་མིན་པའི་ཆོས་ཤིག་མི་སྲིད་ལ། དེ་གཉིས་གང་ནས་བྱུང་ཞེས་ཕུགས་དེད་ན་སྟོང་བ་ཉིད་ནས་བྱུང་བར་འདོད་དགོས། དེ་ཡང་འཁོར་བ་ལ་མཚོན་ན་རང་བཞིན་སྟོང་པ་ཉིད། རྣམ་པ་འཁྲུལ་བ། མཚན་ཉིད་སྡུག་བསྔལ་དུ་ཤར་བ་ཞིག་དང་། མྱ་ངན་ལས་འདས་པའང་དེ་བཞིན་དུ་རང་བཞིན་སྟོང་པ་ཉིད། རྣམ་པ་འཁྲུལ་བ་ཟད་ནས་ཡལ་སོང་བ། མཚན་ཉིད་སྡུག་བསྔལ་ཐམས་ཅད་ལས་གྲོལ་བ་ཞིག་ཡིན་པས། རྒྱུ་བདེ་གཤེགས་སྙིང་པོ་ཡོད་ཅིང་། རྟེན་མི་ལུས་རིན་ཆེན་ད་རེས་ཐོབ་ཡོད་པ་མ་ཟད། རྐྱེན་དགེ་བའི་བཤེས་གཉེན་རང་སྐལ་དུ་ཐོབ་པ་དེ་ལ་བརྟེན་ནས། ཐབས་དེས་གདམས་ངག་གིས་འབྲས་བུ་རྫོགས་པའི་སངས་རྒྱས་ཐོབ་ནས་སེམས་ཅན་གཞན་གྱི་འགྲོ་དོན་བྱེད་ཐུབ་པ་ཞིག་བྱེད་པ་ནི། ཆོས་སྒྲུབ་པའི་ཐོག་མཐའ་བར་གསུམ་པོ་ཚིག་ཉུང་ངུར་བསྡུས་ནས་བཤད་པ་ཡིན། མདོ་རྩ་རྡོག་རྡོག་བླངས་ན་འཁོར་བ་མྱང་འདས་སུ་གྲོལ། ཉོན་མོངས་ཡེ་ཤེས་སུ་འཆར་བ་ནི་གོང་དུ། ཐེག་པའི་དོན་འདུས་ཤེས་པའི་ཆོས་དྲུག་ནི། །ཉོན་མོངས་རང་ག་ཐ་མལ་སྐྱོན་ཤེས་དགོས། །ཉོན་མོངས་སྤོང་བ་ཉན་རང་ལམ་ཤེས་དགོས། །ཉོན་མོངས་སྦྱོང་བ་རྒྱལ་སྲས་ལམ་ཤེས་དགོས། །ཉོན་མོངས་བསྒྱུར་བ་གསང་སྔགས་ལམ་ཤེས་དགོས། །རང་བཞིན་ཡོངས་ཤེས་རང་བྱུང་ཡེ་ཤེས་དགོས། །བླང་དོར་གྲོལ་བྱ་བཙལ་མེད་ཤེས་པ་དགོས། །དེ་དག་ལྡན་ན་ཉོན་མོངས་གོས་པ་མེད། །ཅེས་གསུངས་པ་ལྟར་དང་། མངའ་རིས་པཎ་ཆེན་གྱིས། སྤོང་བསྒྱུར་ལམ་དུ་བྱེད་པ་སོ་སོ་ཡང་། །ཉོན་མོངས་རང་མཚན་སྤོང་བ་མཁས་རྣམས་མཐུན། །ཞེས་གསུངས་པ་ལྟར་ཡིན། མདོར་ན་དེ་ལྟ་བུའི་ལམ་གྱི་ཁོག་གཞི་བྱས་ནས་རང་ཉིད་གང་ལ་མོས་པའི་ལས་འབྲེལ་དང་ལྡན་པ་ལ་ཞུགས་ཤིང་ཆོས་སྒྲུབ་ཚེ། སྒྲུབ་སྟངས་ཤེས་པ་དང་། སྒྲུབ་འབྲས་ལོན་པར་བྱེད་དགོས་པའི་ཚུལ་རྣམས་ངེས་པར་བྱས་ནས། སྐབས་སུ་བབས་པ་གང་ཞིག་འཆད་ཉན་བྱ་བའི་དམ་པའི་ཆོས། གངས་རིའི་ལྗོངས་འདིའི་རྫོགས་ཆེན་སྟོན་པའི་ཤིང་རྟ་བ་ཆེན་པོ་རྒྱལ་བ་ཀློང་ཆེན་པའི་གསུང་རབ། ཆོས་སྐུའི་བསྟན་པའི་ཉིང་བཅུད། གསང་བདག་དགའ་རབ་དཔའ་བོའི་ཞལ་ལུང་དྲི་མ་མེད་པ། རྒྱ་ཆེ་བ་པཎྜི་ཏའི་ལུགས་ཀྱི་ཟབ་དང་རྒྱ་ཆེའི་བསྟན་བཅོས་མཛོད་ཆེན་རིན་པོ་ཆེ་རྣམ་པ་བདུན་བཞུགས་པ་ལས། མན་ངག་རིན་པོ་ཆེ་བཤད་པའི་སྐབས་ནས་བཤད་བྱའི་ཡན་ལག་བཤད་པ་ཐོག་མར་དགེ་བ་ཀླད་ཀྱི་དོན་སོང་ནས། བཤད་བྱ་དངོས་བཤད་པ་བར་དུ་དགེ་བ་གཞུང་གོ་དོན་ལས་མང་དག་ཅིག་སོང་ནས་དེ་རིང་།

༡༤༩ ལོག་པའི་འཚོ་བ་རྣམ་དྲུག་སྤང་བ་ནི།

ལོག་པའི་འཚོ་བ་རྣམ་དྲུག་སྤང་བ་ནི།།

ཚུལ་འཆོས་བསླུ་བྲིད་རྙེད་པ་ལོག་འཚོ་ཡིན།།

ཁ་གསག་མགོ་སྐོར་རྙེད་པ་ལོག་འཚོ་ཡིན།།

ཞེན་འདོད་གཞོགས་སློང་བྱེད་པ་ལོག་འཚོ་ཡིན།།

ཆོས་དཔག་ངན་ཁྲམ་བྱེད་པ་ལོག་འཚོ་ཡིན།།

ཐོས་བསམ་རྙེད་པ་འཚོལ་བ་ལོག་འཚོ་ཡིན།།

ནོར་རྫས་ཐ་མལ་སྤྱོད་པ་ལོག་འཚོ་ཡིན།།

ཚུལ་བཞིན་བསྒྲུབ་པས་དེ་དག་སྤངས་ན་ལེགས།།

ཞེས་གསུངས་པ་སྟེ། ཡང་དག་པ་མ་ཡིན་པའི་ལོག་པའི་འཚོ་བ་རྣམ་པ་དྲུག་སྤང་བ་ནི། ངན་པའི་ཚུལ་དེ་བཟང་པོར་འཆོས་པའི་ཚུལ་འཆོས་ཀྱིས་གཞན་དག་བསླུ་བྲིད་བྱས་ནས་འདི་ནི་སྐྱེས་བུ་དམ་པའོ་སྙམ་དུ་བཅུག་སྟེ། དེ་ལ་བརྟེན་པའི་ཟང་ཟིང་གི་རྙེད་པ་སྒྲུབ་པ་ནི་ཡང་དག་པ་ལས་ལོག་པའི་འཚོ་བ་ཡིན་པ་དང་། གཞན་བསླུ་ཐབས་ཀྱི་ཁ་ཡག་ངག་འཇམ་འབའ་ཞིག་པའི་ཁ་གསག་མགོ་སྐོར་གྱི་སྒོ་ནས་རྒྱུ་རྙེད་ཐབས་བྱེད་པ་ལོག་འཚོ་དང་དེས་རྙེད་པའི་རྒྱུ་ནོར་ཡང་ལོག་འཚོའི་འཚོ་བ་ཡིན་པ་དང་། ནོར་རྫས་སོགས་ལ་ཞེན་ཆགས་དང་འདོད་ཞེན་ཡོད་པའི་ཀུན་སློང་ལ་བརྟེན་ནས། ཟོལ་གྱིས་སློང་བ་དཔེར་ན་མི་ཆེ་གེ་མོ་ཞིག་གིས་དངོས་པོ་ག་གེ་མོ་ཞིག་གང་ཟག་སུ་ཞིག་ལ་བྱིན་རབས་དང་དེ་ལེགས་ཚུལ། འདི་འདྲ་བ་ཞིག་ང་ལ་གལ་སྲིད་ཐོབ་ན། ངས་རྟེན་རྩ་ག་ལ་བར་འཇོག་པ་ཡིན་ནོ་སོགས་པའི་ཐབས་ཀྱིས་གཞན་ནོར་ཐོབ་ཐབས་བྱེད་པའི་གཞོགས་སློང་བྱེད་པའང་ལོག་འཚོ་ཡིན་པ་དང་། ཆོས་ལ་དཔག་པའི་སྒོ་ནས་ངན་ཁྲམ་སྣ་ཚོགས་བྱེད་པ་མི་ཆོས་བླ་མའི་རྫུན་ལ་འགྲོ་བའི་གཡོ་ཟོལ་གྱི་བསམ་པས། དྲག་གྲས་དང་མཐོ་གྲས་ཀྱི་ཚུལ་སྟོན་པའི་སྒོ་ནས་རྒྱུ་ནོར་མི་ལག་ནས་བླངས་ན་ལོག་འཚོ་ཡིན་པ་དང་། རྙེད་པའི་དོན་དུ་ཐོས་བསམ་བྱེད་པ་དང་། རང་ཐོས་བསམ་པ་ཡིན་པར་བསྒྲགས་ནས་རྙེད་པ་འཚོལ་བ་ལོག་འཚོ་ཡིན་པ་དང་། དད་པས་ཕུལ་བའི་ནོར་རྫས་དེ་དག་དགེ་སྦྱོར་མེད་ཅིང་ཞིང་ཁྱད་ཅན་དུ་མ་སོང་ནས་ཐ་མལ་རང་གར་སྤྱོད་པ་བྱས་ན་ལོག་འཚོ་ཡིན་པ་སྟེ་དེ་དག་ནི། ཚུལ་བཞིན་བསྒྲུབ་པ་སྟེ་ཆོས་བཞིན་དུ་བྱེད་པ་ཞིག་གིས་སྤངས་ན་ལེགས་སོ། །འདི་ལྟ་བུའི་གདམས་ངག་གསུངས་ཡོང་དུས་ཚང་མ་ང་ལ་ཟེར་བཞིན་འདུག་སྙམ་པ་བྱུང་ན་མཚང་ལ་ཕོག་ནས་ཉེས་སྐྱོན་ཤེས་པ་གདམས་ངག་ཉན་པའི་གོ་ཆོད་པ་ཡིན་ནོ།།

༡༥༠ ཆོས་སྤྱིའི་གདམས་ངག་རྣམ་དྲུག་བསྟན་པ།

ཆོས་སྤྱིའི་གདམས་ངག་རྣམ་དྲུག་བསྟན་པ་ནི།།

མས་འཛེག་ཀུན་སྤྱོད་གཙང་བ་གདམས་ངག་ཡིན།།

སེམས་བསྐྱེད་ཚད་མེད་བཞིས་སྦྱངས་གདམས་ངག་ཡིན།།

གང་ཡང་ཟུང་འཇུག་ཉམས་ལེན་གདམས་ངག་ཡིན།།

ས་ལམ་ཟབ་མོའི་གནད་བཙལ་གདམས་ངག་ཡིན།།

ལྟ་བ་སེམས་ཉིད་མཐའ་གྲོལ་གདམས་ངག་ཡིན།།

ཕྱོགས་མེད་ཐོས་བསམ་བྱེད་པ་གདམས་ངག་ཡིན།།

ཅེས་གསུངས་པ་སྟེ། ཆོས་སྤྱིའི་གདམས་ངག་རྣམ་དྲུག་བསྟན་པ་ནི། སྤྱོད་པ་མས་ནས་ཡར་འཛེག་སྟེ། ཐོག་མར་སོ་ཐར་གྱི་ཀུན་སྤྱོད་གཙང་བ་གདམས་ངག་ཡིན། བར་དུ་བྱང་ཆུབ་མཆོག་ཏུ་སེམས་བསྐྱེད་ནས་ཚད་མེད་བཞིས་སྦྱང་པ་གདམས་ངག་ཡིན། སོ་བྱང་སྔགས་གསུམ་གང་གི་སྐབས་སུ་ཡང་ཟུང་འཇུག་ཡ་མ་བྲལ་བའི་ཉམས་ལེན་སྡོམ་གསུམ་གཅིག་འགྲོ་གཅིག་འདུག་མ་ཡིན་པར་བྱེད་པ་གདམས་ངག་ཡིན། མཐར་ཐུག་ས་ལམ་མྱུར་མོའི་སྒོ་ནས་བཅད་པ་ལ་ཟབ་མོའི་གནད་རང་གང་ལ་ལས་འབྲེལ་ཡོད་པ་དེ་བཙལ་བ་གདམས་ངག་ཡིན། སེམས་ཀྱི་ཆོས་ཉིད་ཡོད་མེད་ཡིན་མིན་ལ་སོགས་པའི་སྤྲོས་པའི་མཐའ་ཐམས་ཅད་དང་བྲལ་བའི་རང་བཞིན་གྱི་ལྟ་བས་ཐག་བཅད་པ་གདམས་ངག་ཡིན། ཐོས་བསམ་མ་བྱས་ན་འཁོར་བ་ངན་སོང་གི་སྡུག་བསྔལ་མི་ཤེས་པ་དང་། དེ་ལས་སྐྱོབ་པའི་དཀོན་མཆོག་ཀྱང་མི་ཤེས་ཤིང་། ཐར་བ་དང་དེ་ཉིད་སྒྲུབ་པའི་ཐབས་དང་དད་པ་འཇོག་ཚུལ་ཙམ་ཡང་མི་ཤེས་པས་རྨོངས་པའི་དད་པ་ཙམ་ལས་མེད་ཕྱིར་ཐོས་བསམ་མ་བྱས་པ་ནི་མིག་མེད་ཀྱི་ལོང་བ་ཞིག་དང་ཁྱད་མེད་པ་ཡིན། དེ་འདྲ་དེ་ལ་ལྟ་བ་འདི་ཡིན་གྱི་ངོས་བཟུང་མེད་ན་སྒོམ་པ་དང་སྤྱོད་པ་ལྟ་ཅི། དེས་ན་གྲྭ་གཞོན་རྣམ་པས་ཐོས་བསམ་བྱེད་པ་ནི་ཤིན་ཏུ་ནས་ཀྱང་གལ་ཆེ་སྟེ། ཐོས་པ་མེད་པའི་སྒོམ་པ་དེ། །ལག་རྡུམ་བྲག་ལ་འཛེགས་པ་འདྲ། །ཞེས་གསུངས་པ་དེས་ན་ཐོས་བསམ་ཡ་མ་བྲལ་ཞིང་གོ་རིམ་མ་ནོར་བ་ཕྱོགས་མེད་དུ་བྱེད་པ་གདམས་ངག་ཡིན། གལ་སྲིད་ཐོས་བསམ་ལ་དགྲ་རུ་ལྟ་མཁན་ཞིག་ཡིན་ཚེ། དགྲ་རུ་ལྟ་མཁན་ཁོ་རང་ཆོས་མི་ཤེས་མཁན་ཞིག་ཡིན་པའི་རྟགས་བསྟན་པ་ཡིན་ནོ།།

༡༥༡ རེ་ཐག་ཆོད་པའི་གདམས་ངག་རྣམ་དྲུག་བསྟན་པ།

རེ་ཐག་ཆོད་པའི་གདམས་ངག་རྣམ་དྲུག་ནི།།

ཁྲེལ་མེད་མི་ལ་སྲུང་སྡོམ་རེ་ཐག་ཆོད།།

སྙིང་རུས་མེད་ལ་སྒྲུབ་པ་རེ་ཐག་ཆོད།།

དད་གུས་མེད་ལ་བྱིན་རླབས་རེ་ཐག་ཆོད།།

ཤེས་རབ་མེད་ལ་རྟོགས་པ་རེ་ཐག་ཆོད།།

སྙོམ་ལས་ཅན་ལ་གྲུབ་རྟགས་རེ་ཐག་ཆོད།།

བསམ་ངན་མི་ལ་ཕན་སེམས་རེ་ཐག་ཆོད།།

ཅེས་གསུངས་པ་སྟེ། རེ་ཐག་གདིང་ནས་ཆོད་པའི་གདམས་ངག་རྣམ་དྲུག་ནི། ངོ་ཚ་ཁྲེལ་མེད་ཀྱི་མི་དེ་ལ་སྲུང་སྡོམ་རྣམ་པར་དག་དགོས་སྙམ་པ་ཙམ་ཡང་མེད་པས་རེ་ཐག་གདིང་ནས་ཆོད། སྙིང་རུས་དང་བརྩོན་འགྲུས་གཏན་ནས་མེད་པའི་མི་ཅོལ་ཆུང་དེ་འདྲ་དེས་ལོ་གསུམ་མམ་ཚེ་མཚམས་སོགས་བསྡད་ནས་སྒྲུབ་པ་བྱེད་པ་ཡིན་མདོག་པར་བཤད་ཀྱང་མི་བརྟན་པས་སྒྲུབ་པ་རེ་ཐག་ཆོད། ཆོས་དང་བླ་མ་ལ་དད་པ་དང་གུས་པ་མེད་པའི་མི་ལ་བྱིན་རླབས་ཁྱད་པར་ཅན་ཞིག་ཐོབ་པའི་དུས་མེད་པས་རེ་ཐག་ཆོད། ཤེས་རབ་མེད་པའི་མི་ལ་དགོངས་བརྒྱུད་རྟོགས་པ་ཁྱད་པར་བ་འཕོ་བ་མིན་པས་རེ་ཐག་ཆོད། སྙོམ་ལས་ཅན་སྒྲུབ་ལ་བརྩོན་འགྲུས་མེད་པ་ཞིག་ལ་གྲུབ་པའི་རྟགས་ཡོང་དུ་མེད་པས་རེ་ཐག་ཆོད། མི་བསམ་པ་ནག་པོ་བསམ་ངན་ཅན་ལ་ཕན་སེམས་མིི་འབྱུང་བས་རེ་ཐག་ཆོད་ཅེས་སོ།།

༡༥༢ བསླབ་པའི་གོ་རིམ་རྣམ་དྲུག་བསྟན་པ།

བསླབ་པའི་གོ་རིམ་རྣམ་དྲུག་བསྟན་པ་ནི།།

འཇུག་སྒོ་དང་པོ་འབྲི་ཀློག་སྒྲ་ཚད་བསླབ།།

གཉིས་པར་ཁྲིམས་བསྲུང་སྡེ་སྣོད་ཐོས་བསམ་བྱ།།

གསུམ་པར་ལམ་འཇུག་བླ་མ་དམ་པ་བསྟེན།།

བཞི་པར་མཉེས་བྱ་སྙན་བརྒྱུད་གདམས་པ་ཉོན།།

ལྔ་པར་བསྒྲུབ་བྱ་མཐར་ཕྱིན་བརྩོན་འགྲུས་བརྩམ།།

དྲུག་པར་གཞན་དོན་སྐྱོ་ངལ་མེད་པར་བྱ།།

དེ་རྣམས་རྗེས་འཇུག་སྐྱེས་བུ་དམ་པའི་སྲོལ།།

ཞེས་གསུངས་པ་སྟེ། བསླབ་པའི་གོ་རིམ་རྣམ་པ་དྲུག་མ་འཛོལ་བར་བསྟན་པ་ནི། བསླབ་པ་ལ་འཇུག་པའི་སྒོ་དང་པོ་ཡི་གེ་འབྲི་ཀློག་དང་དེའི་སྟེང་དུ་སྒྲ་ཚད་རིག་གནས་བསླབ་དགོས་པ་ཡིན། དེ་ཡང་ཁྱིམ་ཚང་སུ་དང་སུ་ཡིན་ཡང་རང་གི་ཤ་ནས་ཆད་པའི་བུ་རྒྱུད་ལ་བརྩེ་ཞིང་གཅེས་པ་ཡིན་ཡང་། ལ་ལས་གཅེས་ལུགས་མ་ཤེས་ནས་བུ་རྒྱུད་ཀྱི་ཚེ་འདིའི་བདེ་སྐྱིད་དང་། ཚེ་རབས་གཏན་གྱི་འདུན་མ་ལ་གནོད་པ་བཏང་བ་ཡང་མི་ཉུང་བ་བྱུང་བ་དེས་ན་ཁྱིམ་ལས་ཙག་ཙིག་རེ་ཡི་དོན་དང་། བུ་རྒྱུད་དང་ཁ་བྲལ་མི་ཕོད་བསམ་ཁུལ་གྱིས་ཕ་མའི་རྩིབ་ནས་ལོ་གྲངས་ནམ་ཟླ་གྲོན་དུ་བཅུག་པ་ནི་དེ་ཡི་མདུན་ལམ་ལ་གནོད་པའི་ལས་ཚབས་ཆེན་བྱས་པ་ཡིན། གཞན་སྔོན་ཐོན་གྱི་མི་རྣམས་ཀྱིས་བྱིས་པ་མ་ཁོག་ན་ཡོད་དུས་ཀྱང་རོལ་མོ་སྒྲ་སྙན་ལ་སོགས་པས་དེའི་སེམས་ཁམས་ལ་སློབ་གསོ་གཏོང་བར་བྱེད་དུ་རུང་བ་ཡིན་ཞེས་དེ་ལྟར་བྱེད་པ་ཡིན། དེ་ལྟར་མ་འཛོམས་རུང་བྱིས་པའི་ཁ་གྲག་ཤེས་དུས་ནས་ཨ་མ་དང་ཡིག་ངོ་མཉམ་པོར་བསླབ་པའམ། དེ་ལྟར་མིན་ཡང་ལོ་བདུན་བརྒྱད་ལ་སོན་དུས་བྱིས་པ་ཕོ་མོ་སུ་ཡིན་ཡང་ཕོ་མོ་ལ་མ་ལྟོས་པར་ཡོན་ཏན་རིག་གནས་སློབ་པ་ནི་ཤིན་ཏུ་གལ་ཆེན་ཡིན། ས་ཆ་འདི་ལ་མཚོན་ན་བུ་གྲྭ་པ་བྱེད་པ་ཤིན་ཏུ་ཉུང་བའི་ཚད་ལ་ཐོན་ནས་སྡེ་བ་དུད་གྲངས་སྟོང་ཕྲག་གཉིས་ཙམ་ཡོད་པ་ལས་གྲྭ་པ་སྟོང་ཕྲག་གཅིག་གི་ཁ་མ་ལོངས་བའི་གནས་སུ་གྱུར་འདུག ཁྱིམ་ཚང་རེ་ལ་གྲྭ་པ་རེ་རེ་མེད་ཀྱང་ཆ་མཉམ་གཉིས་རེའི་བར་ལ་གྲྭ་པ་རེ་ཡོད་ན་ཆོས་འཇིག་རྟེན་གཉིས་ཀའི་ལེགས་ཉེས་བླང་དོར་ཤེས་ལུགས་མི་འདྲ་བ་ཡིན། སྡེ་བ་ཡར་རྒྱས་ཀྱང་དེ་ལས་འབྱུང་བ་ཡིན། ཚོགས་པ་འཚོག་སྐབས་ལྷ་ཁང་ནང་མའི་ནང་གི་དགེ་འདུན་པ་གཙོ་བོ་ཡིན་ཡང་། ཁྱིམ་ལ་ཐོན་དུས་ལྷ་ཁང་ཕྱི་མའི་ནང་ལ་ཡོད་པའི་ཕ་མ་རྒན་གསུམ་དབང་ཆ་ཆེ་བས་དེ་ལྟར་བཤད་པ་ཡིན། དེ་ནས་ཇོ་སེར་སུ་ཡིན་ཡང་གཉིས་པར་རབ་ཏུ་བྱུང་ནས་ཁྲིམས་བསྲུངས་སྟེ། སྡེ་སྣོད་རིན་པོ་ཆེ་རྣམ་པ་གསུམ་ལ་ཐོས་བསམ་བྱ་དགོས་པ་དང་། གསུམ་པར་ཐར་བའི་ལམ་ཆོས་ལམ་དངོས་ལ་ཞུགས་ནས་ལམ་སྣེ་ཟིན་ཤག་ཤག་བྱེད་པའི་ཆེད་དུ་བླ་མ་དམ་པ་ལ་ངེས་པར་བསྟེན་པ་བྱེད་པ་དང་། བླ་མ་བསྟེན་པར་ཙམ་གྱིས་མི་ཕན་པས་བཞི་པར་བླ་མ་དམ་པ་དེའི་ཐུགས་མཉེས་པར་བྱས་ཏེ་སྙན་ནས་བརྒྱུད་པའི་སྙན་བརྒྱུད་ཀྱི་གདམས་པ་ཟབ་མོ་ཉན་དགོས་པ་དང་། གདམས་པ་ཉན་པ་ཙམ་གྱིས་མི་ཆོག་པར་ལྔ་པར་གདམས་པ་དེ་བསྒྲུབ་པར་བྱ་ཞིང་། སྒྲུབ་ལོ་ཙམ་དུ་མི་བཞག་པར་སྒྲུབ་པ་མཐར་ཕྱིན་གྱི་བརྩོན་འགྲུས་རྩོམ་པར་བྱ་བ་དང་། དེ་དག་མཐར་ཕྱིན་རྗེས་ཀྱི་དམིགས་ཡུལ་དངོས་ནི་དྲུག་པར་གཞན་དོན་ལ་དངོས་བརྒྱུད་ཅི་རིགས་པ་ནས་སྐྱོ་ངལ་མེད་པར་བྱ་དགོས་ཏེ། ཐེག་པ་ཆེན་པོའི་ལམ་དུ་ཞུགས་པའི་སྙིང་དོན་དངོས་ནི་གཞན་དོན་གྱི་ཆེད་ཡིན་པ་དེས་ན་གཞན་དོན་གྱི་བསམ་པས་དབེན་ཚེ་རང་ཉིད་ཐེག་ཆེན་གྲལ་དུ་ཆུད་མེད་པ་ཡིན། དེ་མེད་ན་ངེས་འབྱུང་ཡོད་མིན་དཔྱོད། དེ་མེད་ན་ཐེག་དམན་གྱི་གྲལ་དུ་ཆུད་མེད་པ་ཡིན། དེ་དག་ཐམས་ཅད་མེད་ཚེ་རྒྱུ་འབྲས་ཡིད་ཆེས་ཀྱི་དད་པ་ཡོད་མིན་དཔྱོད། དེ་མེད་ཚེ་འཇིག་རྟེན་ཡང་དག་གི་གྲལ་དུའང་ཆུད་མེད་པའི་ས་ཚོད་ལ་ཐོན་ཡོད་པར་ཤེས་དགོས། ཆོས་དྲུག་པོ་དེ་རྣམས་ཀྱི་རྗེས་སུ་འཇུག་པ་ནི་སྐྱེས་བུ་དམ་པའི་སྲོལ་ཡིན་ནོ།།

༡༥༣ སྐལ་བཟང་སློབ་མ་སྐྱོང་བའི་ཆོས་དྲུག་བསྟན་པ།

སྐལ་བཟང་སློབ་མ་སྐྱོང་བའི་ཆོས་དྲུག་ནི།།

དད་ཅན་གང་མོས་རྗེས་སུ་འཛིན་ཤེས་དང༌།།

བརྩོན་འགྲུས་བྱ་བྱེད་མི་གཞུག་ལམ་དགོད་ཤེས།།

ཐོས་བསམ་ཚིག་འབྱམས་མི་གཞུག་སྒྲུབ་ལ་འཛུད།།

རྙེད་འཚོལ་ཡོན་ཏན་མི་སློབ་དགེ་སྦྱོར་འཛུད།།

གསོག་བྲུན་ནོར་སོག་མི་སློབ་ཆོག་ཤེས་བསླབ།།

ཚེ་འདིའི་གྲོས་འདུན་མི་སྦྱོར་ཆོས་མགོ་འདོན།།

དེ་དག་ཐབས་མཁས་བཤེས་གཉེན་བཟང་པོའི་ལུགས།།

ཞེས་གསུངས་པ་སྟེ། སྐལ་བ་བཟང་པོའི་སློབ་མ་སྐྱོང་བའི་ཆོས་དྲུག་དེ་གང་ཡིན་ན། དད་ཅན་གང་ལ་མོས་པ་དེ་དང་དེ་ཡི་སྒོ་ནས་རྗེས་སུ་འཛིན་ཤེས་པ་དང༌། བརྩོན་འགྲུས་ཅན་ལ་ཕལ་བའི་བྱ་བྱེད་མང་པོ་ལས་སུ་མི་གཞུག་པར་ལམ་སྲོལ་ལ་དགོད་ཤེས་པའམ་འཛུད་ཤེས་དགོས་པ་དང་། ཐོས་བསམ་བྱེད་ཚེ་ཚིག་ཏག་ཏག་ལ་འབྱམས་སུ་མི་གཞུག་པར་སྒྲུབ་པ་ཉམས་ལེན་གྱི་གནད་ཀྱི་སྙིང་པོ་ལ་འཛུད་པ་དང་། རྙེད་པ་འཚོལ་བྱེད་ཀྱི་ཡོན་ཏན་ཙ་གེ་ཙིག་གེ་ཞིག་སློབ་ཀྱིན་མི་འདུག་པར་དགེ་སྦྱོར་དངོས། དོན་གྱི་སྙིང་པོ་ཡོད་པའི་ལམ་ལ་འཛུད་པ་དང་། འཇིག་རྟེན་གྱི་རྒྱུ་ནོར་གསོག་བྲུན་ལ་སློབ་ཀྱིན་མི་འདུག་པར་འདོད་ཆུང་ཆོག་ཤེས་ཀྱི་འཕགས་ནོར་དམ་པ་ལ་བསླབ་དགོས་པ་དང་། འཇིག་རྟེན་ཚེ་འདིའི་བྱ་གཞག་གི་གྲོས་འདུན་མི་སྦྱོར་བར་ཆོས་ཕྱོགས་ཀྱི་མགོ་འདོན་བྱེད་པ་སྟེ། དེ་དག་ནི་ཐབས་ལ་མཁས་པའི་བཤེས་གཉེན་བཟང་པོའི་སློབ་མ་སྐྱོང་ལུགས་བཟང་པོ་ཡིན་ནོ། །དེ་ལྟར་བསླབ་ན་ལས་ཀྱི་དབང་གིས་འདུལ་ཐབས་མེད་པའང་ཡོད་ངེས་དེ་ནི་མ་གཏོགས་ཏེ། སངས་རྒྱས་ཀྱིས་འདུལ་མ་ཐུབ་པའི་དམུ་རྒོད་ཡོད་པ་རེད། དེ་མིན་གྱི་མང་ཤོས་ལ་ཕན་ཐོགས་པ་ཡིན་པས་སྐལ་བཟང་སློབ་མ་སྐྱོང་བའི་ཆོས་དྲུག་ཅེས་གསུངས་པའོ།།

༡༥༤ དྲན་པའི་བྱ་ར་བཏང་བའི་ཆོས་དྲུག་བསྟན་པ།

དྲན་པའི་བྱ་ར་བཏང་བའི་ཆོས་དྲུག་ནི།།

ཚེ་འདིར་ཤོར་རམ་དྲན་པའི་བྱ་ར་བཏང༌།།

ལེ་ལོས་གཡེངས་སམ་དྲན་པའི་བྱ་ར་བཏང༌།།

གོལ་སྒྲིབ་བྱུང་ངམ་དྲན་པའི་བྱ་ར་བཏང༌།།

འཁྲུལ་རྟོག་ཤོར་རམ་དྲན་པའི་བྱ་ར་བཏང༌།།

འཆལ་གཏམ་ཤོར་རམ་དྲན་པའི་བྱ་ར་བཏང༌།།

ཐ་མལ་ལུས་སམ་དྲན་པའི་བྱ་ར་བཏང༌།།

ཞེས་གསུངས་པ་སྟེ། དྲན་པའི་བྱ་རའམ་སོ་བཏང་བའི་ཆོས་དྲུག་ནི། ཚེ་འདིའི་ཕྱོགས་ཤོར་རམ་མ་ཤོར་དྲན་པའི་བྱ་ར་བཏང༌ནས་བལྟ་དགོས་པ་དང་། ལེ་ལོ་ངན་པའི་དབང་དུ་སོང་ནས་གཡེངས་སམ་མ་གཡེངས་དྲན་པའི་སྒོ་ནས། དུས་རྟག་ཏུ་སྲུང་སེམས་མི་བརྗེད་པའི་བྱ་ར་གཏོང༌བ་དང་། གོལ་སྒྲིབ་བམ་སྒོམ་ཉེས་པ་བྱུང་ངམ་མ་བྱུང་དྲན་པའི་བྱ་ར་གཏོང༌བ་དང་། འཁྲུལ་རྟོག་གི་དབང་དུ་ཤོར་རམ་མ་ཤོར་དྲན་པའི་བྱ་ར་གཏོང༌བ་དང་། བཟླས་བརྗོད་ལ་སོགས་པ་བྱེད་པའི་གནས་སྐབས་ན་འཆལ་གཏམ་གྱི་དབང་དུ་ཤོར་རམ་མ་ཤོར་གྱི་དྲན་པའི་བྱ་ར་གཏོང༌དགོས་པ་དང་། སྒོ་གསུམ་སྐུ་གསུང་ཐུགས་གསུམ་གྱི་ཉམས་ལེན་ལ་གནས་པའམ་ཐ་མལ་དུ་ལུས་སམ་མ་ལུས་ཀྱི་དྲན་པའི་བྱ་ར་གཏོང༌བའམ། སྒོ་གསུམ་ཆོས་དགེ་བ་ལ་མི་གནས་སམ་ཐ་མལ་འཁྲུལ་བ་ལ་སྤྱོད་དམ་མ་སྤྱོད་ཀྱི་དྲན་པའི་བྱ་ར་བཏང་བ་སྟེ་གང་ལྟར་གོ་ཡང་ཆོག་གོ།

༡༥༥ ཆོས་མཛད་རྣམས་ཀྱི་བྱ་བ་རྣམ་དྲུག་བསྟན་པ།

ཆོས་མཛད་རྣམས་ཀྱི་བྱ་བ་རྣམ་དྲུག་ནི།།

ཚེ་ལ་ལོང་མེད་མྱུར་དུ་འགྲོ་རྩིས་བྱ།།

ལས་འབྲས་ཆེ་ཕྲ་དགེ་སྡིག་བླང་དོར་བྱ།།

གཞན་དོན་འགྲུབ་དཀའ་རང་དོན་མ་ཤོར་བྱ།།

ཤེས་བྱ་ཐུག་མེད་ཚིག་འབྱམས་མ་ཤོར་བྱ།།

མི་ཤེས་བླུན་སྒོམ་རྨོངས་པར་མ་ཤོར་བྱ།།

མཁས་བཙུན་བཟང་འདོད་ང་རྒྱལ་མ་སོང་བྱ།།

ཞེས་གསུངས་པ་སྟེ། ཆོས་མཛད་མཁན་གྱི་ཆོས་པ་རྣམས་ཀྱིས་བྱ་དགོས་པའི་བྱ་བ་རྣམ་དྲུག་ནི། ཚེ་མི་རྟག་རྒྱུད་ལ་འབྱོངས་པ་ཞིག་གིས་འགྲོ་རྩིས་མ་གཏོགས་འདུག་རྩིས་མི་བྱེད་ལ། འདུག་རྩིས་ཏག་ཏག་བྱེད་པ་ནི་ཚེ་མི་རྟག་པ་ལ་ངེས་ཤེས་འདྲོངས་མེད་རྟགས་ཡིན་པས། ཚེ་ལ་ལོང་མེད་ཤེས་པ་དག་གིས་མྱུར་དུ་འགྲོ་རྩིས་བྱ་དགོས་པ་དང་། ལས་འབྲས་ཆེ་བའི་རིགས་ལྟ་ཅི་ཆ་ཕྲ་བ་དག་ཀྱང་འཛེམས་དགོས། ཁྱད་པར་དུ་གྲྭ་ཇོ་སེར་ལ་མཚོན་ན་དཀོན་མཆོག་གི་དཀོར་ལ་བྱུང་རྒྱལ་དུ་སྤྱོད་པའི་ཕྱོགས་ལ་གཟབ་པར་གནད་ཆེ་ཞིང་། དཀོར་ནག་བྱུང་རྒྱལ་དུ་སྤྱོད་ན་ཉེས་དམིགས་ལྕི་བས། དུག་རང་གིས་ཟོས་པས་མི་ཚད་ཁོར་ཡུག་གི་མི་དང་བཅས་པ་ལ་བྱིན་ན་མ་རུང་བའི་བསམ་ནག་གདུག་རྩུབ་བྱས་པ་ལྟ་བུར་འགྱུར་བས། དགེ་སྡིག་བླང་དོར་བྱ་བ་གལ་ཆེ་བ་དང་། གཞན་སྨིན་པ་ལ་ཐོག་མར་རང་སྨིན་དགོས་པས། རང་མ་སྨིན་པས་གཞན་དོན་ངོ་མ་འགྲུབ་དཀའ་བས་དང་པོར་རང་དོན་མ་ཤོར་བ་གཞན་དོན་མ་འགྲུབ་ཀྱང་གཞན་གནོད་མི་བྱེད་སྙམ་པའི་དམ་བཅའ་བ་བྱ་དགོས། འདིའི་དོན་གཞན་དོན་འགྲུབ་དཀའ་བས་སྐྱུར་ཤོག་རང་དོན་མ་ཤོར་དང་ཆོག་ནས་ཡོད་ཅེས་པའི་དོན་མིན་པར་གཞན་དོན་འགྲུབ་དཀའ་བར་བསམས་ནས་རང་དོན་དེ་མ་ཤོར་ཞེས་པའི་དོན་ནོ། །ཤེས་བྱ་ནམ་མཁའི་གཟའ་སྐར་འདྲ། བསླབ་དགོས་གནས་ལ་ཟད་པ་མེད། ཅེས་པ་ལྟར་དུ་ཤེས་བྱ་ཐུག་མེད་ཡིན་ཡང་དེ་དག་ཚིག་འབྱམས་སུ་མ་ཤོར་བ་གང་ཤེས་པ་དེ་ཉིད་ཕན་པའི་གདམས་ངག་ཏུ་འཛིན་དགོས་པ་དང་། མི་ཤེས་བླུན་སྒོམ་རྨོངས་པའི་དབང་དུ་མ་ཤོར་བར་བྱ་དགོས། ཇོ་བོ་རྗེའི་ཞལ་ནས། ཚེ་འདི་ཡུན་ཐུང་ཤེས་བྱའི་རྣམ་པ་མང་། །ཚེ་ཡི་ཚད་ནི་སུས་ཀྱང་མི་ཤེས་ལ། །ངང་པས་ཆུ་ལས་འོ་མ་ལེན་པ་ལྟར། །རང་གི་འདོད་པ་དང་དུ་བླང་པར་རིགས། །ཞེས་གསུངས་པ་ལྟར་དུ་དགོས་མཁོ་ཅན་དེ་ཤེས་ནས་ལྟ་སྒོམ་ལ་རྨོངས་པའི་བླུན་སྒོམ་མིན་པར་བྱེད་དགོས་པ་དང་། མཁས་བཙུན་བཟང་འདོད་དེ་ཆེ་འདོད་གྲགས་འདོད་ཀྱི་ང་རྒྱལ་གྱི་དབང་དུའང་མ་སོང་བར་བྱའོ།།

༡༥༦ སྒྲུབ་འདོད་ལེགས་པར་བསམ་པའི་ཆོས་དྲུག་བསྟན་པ།

སྒྲུབ་འདོད་ལེགས་པར་བསམ་པའི་ཆོས་དྲུག་ནི།།

ཚེ་འདི་མ་བྲལ་ཕ་ཡུལ་བློས་མི་ཐོངས།།

འདོད་ཞེན་མ་ལོག་དབེན་པར་སྡོད་མི་ཚུགས།།

གྲུབ་མཐའ་མ་གྲོལ་རང་རྒྱུད་ཆོས་ཀྱིས་འཆིང༌།།

བསམ་གཏན་མ་སྐྱེས་སྟན་ལ་འདུག་མི་ཚུགས།།

གཉེན་པོ་བྲལ་བས་རྣམ་གཡེང་རྐྱེན་མི་ཐུབ།།

བརྟུལ་ཞུགས་མཆོག་འཛིན་གཉེན་པོ་དུག་ཏུ་འགྲོ།།

དེ་བས་འདི་དག་ལེགས་པར་བསམ་པ་གཅེས།།

ཞེས་གསུངས་པ་སྟེ། སྒྲུབ་འདོད་ལེགས་པར་བསམ་པའི་ཆོས་དྲུག་ནི། ཚེ་འདིའི་ཞེན་པ་དང་མ་བྲལ་བས་ཕ་ཡུལ་བློས་མི་ཐོངས་བ་དང་། འདོད་ཡོན་ལ་ཞེན་པ་གཏིང་ནས་མ་ལོག་ན་དབེན་པའི་གནས་སུ་སྡོད་མི་ཚུགས་པར་སྒོམ་ཆེན་གྱི་སྟན་ཞབས་ནས་བྱི་ལོང་གིས་ས་འབུར་བཅས་ནས་འདུག་ཏུ་མི་འཇུག་པ་ལྟ་བུ་ཡིན་པས་འདོད་ཞེན་ལོག་དགོས། འདོད་ཞེན་ལོག་སོང་ན་རི་ཁྲོད་དུ་སྡོད་ཚུགས་པས་མ་ཟད། བསྡད་ནའང་སྐྱིད་ཅིང་ཉམས་རྟོགས་ཀྱི་ཡོན་ཏན་འཕེལ་བ་ཡིན་པ་དང་། གྲུབ་མཐའ་གང་བཟུང་བའམ་ཆོས་ལམ་གང་དུ་ཞུགས་ན་དེའི་མཐར་ཐུག་གི་གནད་གྲོལ་བ་ཐོབ་པའི་ཚུལ་དེ་མ་གྲོལ་བའམ་མ་ཤེས་པས། གཞུང་ལུགས་ཐམས་ཅད་གདམས་པར་ཤར་བའི་ཉམས་ལེན་གྱི་གནད་དུ་དྲིལ་མ་ཤེས་ན་རང་རྒྱུད་ཆོས་ཀྱིས་འཆིང༌བ་དང་། བསམ་གཏན་མ་སྐྱེས་ནས་སྒོམ་གྱི་ངང་དུ་འདུག་ས་ཞིག་མེད་ཚེ། སྟན་ལ་བཙན་གྱིས་བསྡད་ཀྱང་འདུག་མི་ཚུགས་པ་དང་། གཉེན་པོ་བྲལ་སོང་བས་རྣམ་གཡེང་གི་རྐྱེན་མི་ཐུབ་པ་དང་། བརྟུལ་ཞུགས་མཆོག་འཛིན་ཏེ་རང་གིས་གང་སྒྲུབ་པ་དེ་ལ་མཆོག་འཛིན་བྱས་ན་གཉེན་པོ་དུག་ཏུ་འགྲོ་བ་ཡིན་པ་དེ་བས་ན་འདི་དག་ལེགས་པར་བསམ་པ་གཅེས་སོ།།

༡༥༧ ཕྱི་ནང་རྟགས་དྲུག་ལེགས་པར་བསྟན་པ།

ཕྱི་ནང་རྟགས་དྲུག་ལེགས་པར་བསྟན་པ་ནི།།

དཔྱོད་ལྡན་མི་དཔེས་གང་བརྩམས་མཐར་ཕྱིན་དང༌།།

རྟོགས་ལྡན་མི་དཔེས་གཏམ་ལ་བསྐྱར་ཐུབ་དང༌།།

གོ་རིག་ལྡན་པས་གང་ཡང་ཤེས་པ་དང༌།།

ངེས་ཤེས་སྐྱེས་ཏེ་དཀའ་སྤྱད་ནུས་པ་དང༌།།

ཆོས་དང་འདྲེས་ཏེ་རང་རྒྱུད་དུལ་བ་དང༌།།

ཤེས་རབ་ཅན་དེ་ཐོས་པས་མི་ངོམས་དང༌།།

ནང་གི་རྟགས་ཀྱིས་ཕྱི་རོལ་ཤར་བ་ཡིན།།

ཅེས་གསུངས་པ་སྟེ། ཕྱི་ནང་རྟགས་དྲུག་ལེགས་པར་བསྟན་པ་ནི། བརྟགས་ཤིང་དཔྱད་པ་སྔོན་དུ་སོང་བའི་ནང་རྟགས་ཅན་གྱི་མི། གཞན་གྱི་མིག་དཔེར་འོས་པ་དེས་གང་བརྩམས་པ་དེ་ཉིད། དཔྱད་པ་སྔོན་དུ་སོང་བས་མཐར་ཕྱིན་པ་ཡིན་པ་དང་། ལེགས་པར་རྟོགས་པའི་གང་ཟག དཔེར་འོས་པ་དེས་བཤད་པའི་གཏམ་ལ་བསྐྱར་ཐུབ་པ་སྟེ་གཏམ་ལ་ཕྱིར་བལྟས་ཕེར་བ་དང༌། ནང་རྟགས་གོ་རིག་དང་ལྡན་པས་ཕྱི་རྟགས་གང་ཡང་ཤེས་པ་དང༌། ནང་རྟགས་ཆོས་ལ་ངེས་ཤེས་སྐྱེས་ཏེ། ཕྱི་རྟགས་ཆོས་ཕྱོགས་ལ་དཀའ་སྤྱད་ནུས་པ་དང༌། ནང་རྟགས་ཆོས་དང་འདྲེས་ཏེ། ཕྱི་རྟགས་རང་རྒྱུད་དུལ་བ་བྱ་སྤྱོད་ཀྱི་ཐོག་ནས་མཐོང་བ་དང༌། ནང་རྟགས་ཤེས་རབ་ཅན་དེ་ཕྱི་རྟགས་ཐོས་པས་མི་ངོམས་པ། དཔེར་ན་རྒྱ་མཚོ་ཆུ་ཡིས་མི་ངོམས་པ་དང༌། མཁས་པ་ཡོན་ཏན་གྱིས་མི་ངོམས་པ་དེ་ལྟ་བུ་ཡིན་པ་དང་། དེ་དག་ནི་ནང་གི་རྟགས་ཀྱིས་ཕྱི་རོལ་ཤར་བ་ཡིན་ནོ།།

༡༥༨ གཟུང་འཛིན་མདུད་པ་དགྲོལ་བའི་ཆོས་དྲུག་བསྟན་པ།

གཟུང་འཛིན་མདུད་པ་དགྲོལ་བའི་ཆོས་དྲུག་ནི།།

ཆགས་སྡང་སྐྱེས་དུས་སེམས་ལ་བལྟས་ཏེ་དགྲོལ།།

དུག་ལྔ་སྐྱེས་དུས་རང་ངོ་བལྟས་ཏེ་དགྲོལ།།

ཟུག་རྔུ་བྱུང་དུས་བདེ་ཆེན་བསྒོམས་ཏེ་དགྲོལ།།

རྣམ་རྟོག་འཐོར་དུས་རང་བཞིན་བཅད་དེ་དགྲོལ།།

ངལ་དུབ་སྐྱེས་དུས་ལྷོད་དེ་གློད་དེ་དགྲོལ།།

འཐིབས་ཤིང་ལྟེང་ཚེ་གསལ་དག་ངར་བཅས་དགྲོལ།།

ཞེས་གསུངས་པ་སྟེ། གཟུང་འཛིན་མདུད་པ་དགྲོལ་བའི་ཆོས་དྲུག་ནི། ཆགས་སྡང་སྐྱེས་པའི་དུས་སུ་སྐྱེ་མཁན་གྱི་སེམས་ལ་བལྟས་ཏེ་ཆགས་སྡང་གི་མདུད་པ་དགྲོལ་ཤེས་དགོས་པ་དང་། དུག་ལྔའི་ཉོན་མོངས་སྐྱེས་དུས་དུག་ལྔ་སྐྱེ་མཁན་ཁོ་རང་གི་ངོ་ལ་བལྟས་ཏེ། ཞེ་སྡང་མེ་ལོང་ཡེ་ཤེས་སོགས་སུ་དགྲོལ་བར་བྱ་དགོས་པ་དང་། ཟུག་རྔུ་མི་བདེ་བ་བྱུང་དུས་བདེ་ཆེན་གྱི་ཡེ་ཤེས་བསྒོམས་ཏེ་དེ་ཉིད་དུ་དགྲོལ་བར་བྱ་དགོས་པ་དང་། རྣམ་རྟོག་འཐོར་དུས་འཐོར་བ་སྡུད་དེ་གཟུང་འཛིན་དེ་ཉིད་དབྱིངས་སུ་བཅད་དེ་དགྲོལ་དགོས་པ་སྟེ། དེ་ཡང་རྣམ་རྟོག་འཐོར་བ་སྡུད་པ་ཕཊ་དང་ཧཱུྃ་གི་ཡི་གེས་དགྲོལ་བ་གསུངས་པའང་ཡོད་དོ། །ངལ་ཞིང་དུབ་པ་སྐྱེས་ནས་ཡི་ཆད་དང་ཐང་ལྷོད་བྱུང་ན་དེའི་ངང་དུ་ལྷོད་ཀྱིས་གློད་དེ་དགྲོལ་དགོས་པ་དང་། རྣམ་རྟོག་དེ་ཉིད་འཐིབས་ཤིང་ཅི་དྲན་འདི་དྲན་མེད་པའི་ཞི་གནས་ལྟེང་པོར་སོང་བའི་ཚེ་ན་གསལ་དག་ངར་ཆ་བཅས་པའི་རིག་པའི་དྭངས་ཆ་འདོན་ནས་དགྲོལ་དགོས་པ་སྟེ་དེ་དག་ནི་དངོས་གཞིའི་ཉམས་ལེན་པ་རྣམས་ཀྱིས་གོ་དགོས་པའི་མན་ངག་གོ།

༡༥༩ བསྒྲུབ་པའི་ཆོས་ལ་བཅས་པ་རྣམ་དྲུག་བསྟན་པ།

བསྒྲུབ་པའི་ཆོས་ལ་བཅས་པ་རྣམ་དྲུག་ནི།།

གདམས་ངག་ཟབ་མོ་ངོ་སྤྲོད་བཅས་པ་དགོས།།

ངོ་སྤྲོད་གོང་མའི་ཕྱག་བཞེས་བཅས་པ་དགོས།།

ཕྱག་བཞེས་དེ་ཡང་ཉམས་མྱོང་བཅས་པ་དགོས།།

ཉམས་མྱོང་དྲོད་ཚད་རྟགས་དང་བཅས་པ་དགོས།།

དྲོད་རྟགས་ཐོབ་བྱའི་འབྲས་བུར་བཅས་པ་དགོས།།

འབྲས་བུ་གཞན་དོན་མཛད་པར་བཅས་པ་དགོས།།

ཡ་བྲལ་ལམ་དེ་གོལ་བའི་གནས་སུ་འཁྱོག།

ཅེས་གསུངས་པ་སྟེ། བསྒྲུབ་པའི་ཆོས་ལ་བཅས་པ་རྣམ་པ་དྲུག་གང་ཡིན་ན། དེ་ལ་ཐོག་མར་གདམས་ངག་ཟབ་མོ་ངོ་སྤྲོད་དང་བཅས་པ་དགོས་ལ། དེ་ཡང་གདམས་ངག་དང་ངོ་སྤྲོད་གཅིག་མ་ཡིན་ནམ་དེའི་ཕན་དུ་ཅི་དགོས་ཤེ་ན། གདམས་ངག་ཅེས་པ་ནི་དོན་སྤྱིའི་གོ་བ། དཔེར་ན་ཟླ་བ་ནམ་མཁའ་ན་ཡོད་པ་དང་། དེའི་དབྱིབས་ཟླུམ་པོ། ཁ་དོག་དཀར་པོ། རེག་བྱ་བསིལ་བ་ཡིན་པ་ལ་སོགས་པ་བཤད་པ་དེ་གདམས་ངག་ཡིན་པ་དང་། ངོ་སྤྲོད་ནི་ནམ་མཁའི་ཟླ་བ་དེ་ལ་འདིའོ་ཞེས་མཛུབ་བཙུགས་བྱས་ནས་བསྟན་པ་དེ་ལ་ངོ་སྤྲོད་ཅེས་བྱ་བ་ཡིན། གདམས་ངག་ཡོད་ངོ་སྤྲོད་མེད་ཚེ་ལོ་གྲངས་མང་པོ་བསྒོམས་ཀྱང་བསྐྱེད་མེད་པ་དེ་འབྱུང་བ་ཡིན། ངོ་སྤྲོད་དེ་ཡང་རང་གར་ངོ་སྤྲད་པ་ཡིན་བྱས་པ་ཙམ་གྱིས་མི་ཆོག་པར་བརྒྱུད་པ་གོང་མའི་ཕྱག་བཞེས་དང་བཅས་པའི་སྒོ་ནས་ངོ་སྤྲོད་དགོས། ཕྱག་བཞེས་དེ་ཡང་དེ་འདྲ་ཟེར་དར་བ་དང་ཡིན་དར་ཞེས་པ་ཞིག་གིས་མི་ཆོག་པར་ཉམས་མྱོང་དང་བཅས་པ་ཞིག་དགོས། ཉམས་མྱོང་དེ་ཡང་ང་ལ་ཅིག་ཡོད་དོ་སྙམ་པའི་མངོན་རློམ་ཙམ་གྱིས་མི་ཆོག་པར་དྲོད་ཚད་ཀྱི་རྟགས་མན་ངག་གི་གཞུང་དང་མཐུན་པ་དང་བཅས་པ་ཞིག་དགོས། དྲོད་རྟགས་ཡོད་པ་ཙམ་ཁོ་ནས་མི་ཆོག་པས་འབྲས་བུ་ཐོབ་ལ་ཕྱོགས་པ་ཙམ་མིན་པར་འཐོབ་བྱའི་འབྲས་བུ་མངོན་དུ་གྱུར་པ་དང་བཅས་པ་ཞིག་དགོས། འབྲས་བུ་དེ་ཡང་ནང་ཞིག་ནས་གྲོལ་ཏེ་ཡོད་ཅེས་པ་ཙམ་གྱིས་མི་ཡོང་བར་གཞན་དོན་ཕྲིན་ལས་ཀྱི་ཐོག་ནས་མཛད་པ་དང་བཅས་པ་ཞིག་དགོས། དེ་དག་མ་ཚང་བའི་ཡ་བྲལ་བའི་ལམ་དེ་གོལ་བའི་གནས་སུ་འཁྱོགས་པའི་ནོར་བ་ཡིན་ནོ།།

༡༦༠ གཅེས་པའི་གདམས་ངག་རྣམ་དྲུག་བསྟན་པ།

གཅེས་པའི་གདམས་ངག་རྣམ་དྲུག་བསྟན་པ་ནི།།

དགེ་སྦྱོར་གང་བྱེད་ཐུན་ལས་མི་འདའ་གཅེས།།

བཀའ་ལུང་ཆོས་དང་རང་རྒྱུད་འདྲེས་པ་གཅེས།།

བསམ་གཏན་རྐྱེན་ཐུབ་རང་རྒྱུད་མི་འཁྲུགས་གཅེས།།

ལྟ་བ་མཐའ་གྲོལ་ཕྱོགས་འཛིན་མེད་པ་གཅེས།།

ཆོས་ཉིད་ངང་དང་འདུ་འབྲལ་མེད་པ་གཅེས།།

ཅིར་སྣང་ཐབས་ལ་ཡེ་ཤེས་སྐྱེ་བ་གཅེས།།

ཞེས་གསུངས་པ་སྟེ། གཅེས་པའི་གདམས་ངག་རྣམ་པ་དྲུག་དེ་བསྟན་པ་ནི། དགེ་སྦྱོར་གང་བྱེད་ཀྱང་ངེས་པར་དུ་ཐུན་ལས་མི་འདའ་བར་གཅེས་ཏེ་ནམ་ཁོམ་དུ་བསྒྲུབས་པ་བྱས་ན་ཁོམ་པ་ཇེ་ཉུང་དུ་འགྲོ་བ་དང་། ཐུན་དུ་བཅད་ན་དགེ་སྦྱོར་གནད་དུ་འགྲོ་བ་ཡིན། རྒྱལ་བའི་བཀའ་བླ་མའི་ལུང་གདམས་ངག་ཟབ་ཆོས་ཐམས་ཅད་རང་རྒྱུད་དང་འདྲེས་པ་གཅེས་པས་ཐོས་དོན་བསམས་ནས་རྒྱུད་ལ་འབྱོར་དགོས་པ་དང་། བསམ་གཏན་གྱིས་རྐྱེན་ཐུབ་པ་སྒོམ་པ་རྐྱེན་དབང་དུ་མ་ཤོར་བས་རྐྱེན་གྱིས་རང་རྒྱུད་མི་འཁྲུགས་པ་ཞིག་གཅེས་པ་དང་། ལྟ་བ་སྤྲོས་པའི་མཐའ་ལས་གྲོལ་ཞིང་ཕྱོགས་འཛིན་མེད་པ་གཅེས་པ་དང་། སྒོམ་པ་ཆོས་ཉིད་རང་བབས་ཀྱི་ངང་དེ་ཉིད་དང་འདུ་འབྲལ་མེད་པ་གཅེས་པ་དང་། སྤྱོད་འབྲས་ཅིར་སྣང་ཐབས་ལ་ཡེ་ཤེས་སྐྱེ་བའམ་ཐབས་ཤེས་ཟུང་དུ་འབྲེལ་བ་ཞིག་གཅེས་སོ།།

༡༦༡ ཡང་དག་ཆོས་ལ་གྱིས་པ་རྣམ་དྲུག་བསྟན་པ།

ཡང་དག་ཆོས་ལ་གྱིས་པ་རྣམ་དྲུག་ནི།།

འཁོར་བའི་ཉེས་ལྟོས་ཞེན་པ་ལོག་པ་གྱིས།།

བདེན་མེད་རྩལ་སྦྱངས་སྒྱུ་མར་ཤེས་པ་གྱིས།།

བྱང་ཆུབ་སེམས་བསྐྱེད་གཞན་དོན་ལྟོས་མེད་གྱིས།།

དགོངས་པ་བློ་འདས་འཁོར་འདས་ཕྱེད་པ་གྱིས།།

རྣམ་རྟོག་གང་ཤར་རང་གྲོལ་ཡེ་ཤེས་གྱིས།།

བྱིན་རླབས་རང་འབར་གཞན་སྣང་བསྒྱུར་བ་གྱིས།།

ཞེས་གསུངས་པ་སྟེ། ཡང་དག་ཆོས་ལ་གྱིས་ཤིག་ཅེས་པ་རྣམ་པ་དྲུག་ནི། འཁོར་བའི་ཉེས་དམིིགས་བལྟས་ནས་དེ་ལ་ཞེན་པ་ལོག་པ་ཞིག་གྱིས། བདེན་མེད་ལ་རྩལ་སྦྱངས་ནས་ཆོས་ཀུན་སྒྱུ་མ་ལྟ་བུ་ཡིན་པར་ཤེས་པ་གྱིས། བྱང་ཆུབ་ཀྱི་སེམས་བསྐྱེད་ནས་གཞན་གྱི་དོན་ལན་དང་རྣམ་སྨིན་སོགས་ལ་ལྟོས་པ་མེད་པར་གྱིས། དགོངས་པ་བློ་ལས་འདས་པ་ཆོས་ཉིད་ཀྱི་དོན་རྟོགས་ནས་འཁོར་འདས་སྤང་བླང་གི་དྭངས་ཕྱེད་པར་གྱིས། རྣམ་རྟོག་གང་ཤར་ཡང་ཐད་ཀར་གྲོལ་བའི་རང་གྲོལ་ཡེ་ཤེས་སུ་འགྲོ་བར་གྱིས། བྱིན་རླབས་གཞན་ནས་འཚོལ་མི་དགོས་པར་རང་འབར་དུ་གྱུར་པའི་གཞན་སྣང་རང་ཤུགས་ཀྱིས་བསྒྱུར་བ་གྱིས་ཤིག་ཅེས་སོ།།

༡༦༢ སྒོམ་པའི་གོལ་ས་བཅད་པའི་ཆོས་དྲུག་བསྟན་པ།

སྒོམ་པའི་གོལ་ས་བཅད་པའི་ཆོས་དྲུག་ནི།།

འཕྲོ་རྒོད་མ་སོང་སྤྲོས་མེད་དོན་ལ་གནས།།

ལྟེང་པོར་མ་སོང་རིག་པའི་གསལ་ངར་གདགས།།

ཕྱལ་བར་མ་སོང་དྲན་པའི་རྩི་ཡིས་གཟུང༌།།

ཧད་པོར་མ་སོང་བདེ་གསལ་ཉམས་དང་ལྡན།།

རེ་དོགས་མ་སོང་ལྷུན་གྲུབ་འོད་གསལ་ངང༌།།

སྒོར་ཚེ་མ་སོང་རྒྱ་བསྐྱེད་དཔངས་གཏོད་སྒོམ།།

དེ་ལྟར་བྱས་ན་མ་ནོར་ལམ་གྱི་མཆོག།

ཅེས་གསུངས་པ་སྟེ། སྒོམ་པའི་གོལ་ས་བཅད་པ་འདྲ་ནོར་གྱི་འཕྲང་བསལ་བའི་ཆོས་དྲུག་ནི། སྒོམ་པའི་སྐབས་སུ་འཕྲོ་རྒོད་ཀྱི་རྣམ་རྟོག་གི་དབང་དུ་མ་སོང་བར་སྤྲོས་མེད་ཀྱི་དོན་ལ་གནས་པར་གྱིས། ཞི་གནས་ལྟེང་པོ་ཅི་ཡིན་འདི་ཡིན་མེད་པ་རུ་མ་སོང་བར་རིག་པའི་གསལ་ངར་གདགས་དགོས་པ་དང་། །ཕྱལ་བ་རླུང་གིས་སྤུར་བ་ལྟ་བུར་མ་སོང་བར་དྲན་པའི་རྩི་ཡིས་གཟུང༌བ་དང་། ཧད་པོར་ཁ་ཧོང་བ་ལྟ་བུར་མ་སོང་བར་བདེ་གསལ་གྱི་ཉམས་དང་ལྡན་པ་དང་། སྒོམ་པ་རེ་དོགས་ཅན་གྱི་དབང་དུ་མ་སོང་བར་ལྷུན་གྲུབ་འོད་གསལ་གྱི་ངང༌སྒོམ་དུ་མེད་པའི་ངང་དུ་འཇོག་པ་དང་། སྒོར་ཚེ་ཐུམ་དུ་འཐུམ་སོང་བ་ལྟ་བུར་མ་སོང་བར་རྒྱ་བསྐྱེད་དཔངས་གཏོད་ཀྱིས་སྒོམ་པ་སྟེ། དངོས་གཞིའི་སྒོམ་པ་བ་དག་གིས་དེ་ལྟར་བྱས་ན་མ་ནོར་ལམ་གྱི་མཆོག་ཡིན་ནོ།།

༡༦༣ ལམ་ཞུགས་རྣམས་ཀྱི་མ་སོང་རྣམ་དྲུག་བསྟན་པ།

ལམ་ཞུགས་རྣམས་ཀྱི་མ་སོང་རྣམ་དྲུག་ནི།།

འགྱུར་མེད་དད་པ་གཟུང་འཛིན་མ་སོང་དང༌།།

འཁོར་བའི་སྐྱོ་ཤས་སྡུག་བསྔལ་མ་སོང་དང༌།།

ཐོས་བསམ་མཁྱེན་རྒྱ་ཐ་སྙད་མ་སོང་དང༌།།

སྙིང་རུས་སྒྲུབ་པ་སྐྱིད་འདོད་མ་སོང་དང༌།།

གཞན་དོན་སེམས་བསྐྱེད་མཚན་མར་མ་སོང་དང༌།།

མཐོན་པོའི་ལྟ་བ་རློམ་སེམས་མ་སོང་དང༌།།

ཤིན་ཏུ་གཅེས་ཏེ་རབ་ཏུ་ཉུང་བར་གདའ།།

ཞེས་གསུངས་པ་སྟེ། ལམ་དུ་ཞུགས་པ་རྣམས་ཀྱིས་བྱ་འོས་པའི་མ་སོང་རྣམ་པ་དྲུག་གི་གདམས་པ་ནི། འགྱུར་བ་མེད་པའི་དད་པ་དེ་གཟུང་འཛིན་མཚན་མའི་རྣམ་རྟོག་གི་དབང་དུ་མ་སོང་བར་དད་པ་སྒོམ་གྱི་ངོ་བོར་ལྟ་བ་དང༌། འཁོར་བའི་སྐྱོ་ཤས་དེ་སྡུག་བསྔལ་གྱི་སྣོན་མ་རུ་མ་སོང་བ་དང༌། ཐོས་བསམ་མཁྱེན་རྒྱ་ཐ་སྙད་རྐྱང་པའི་ཚིག་ཏག་ཏག་གི་འཐེན་རྒྱང་གི་ཐོག་ནས་མི་ཚེ་འགྲོ་བ་དེ་ལྟར་མ་སོང་བ་དང༌། དབེན་པའི་གནས་སུ་སྙིང་རུས་སྒྲུབ་པ་བྱས་ནས་བསྡད་ན་སྒྲུབ་པ་བྱེད་པའི་མིང་ཡོད་ཀྱང་། སྐྱིད་འདོད་ལུང་མ་བསྟན་དུ་མ་སོང་བ་དང༌། གཞན་དོན་དུ་སེམས་བསྐྱེད་ནས་དམིགས་པ་མེད་པའི་སྟོང་ཉིད་དང་སྙིང་རྗེ་ཟུང་འཇུག་ཅན་ཞིག་ཡིན་དགོས་པས་མཚན་མར་འཛིན་པའི་ཕྱོགས་སུ་མ་སོང་བ་དང༌། མཐོན་པོའི་ལྟ་བ་དེ་རློམ་སེམས་ཀྱི་དབང་དུ་མ་སོང་བ་སྟེ་དེ་དག་ཤིན་ཏུ་གཅེས་ལ། འོན་ཀྱང་རབ་ཏུ་ཉུང་བར་གདའ་འོ།།

༡༦༤ ཡང་ཟབ་གནད་དུ་འགྲོ་བའི་ཆོས་དྲུག་བསྟན་པ།

ཡང་ཟབ་གནད་དུ་འགྲོ་བའི་ཆོས་དྲུག་ནི།།

ང་སོད་རྟག་ཏུ་རང་ཕམ་འབའ་ཞིག་ལོང༌།།

ཁོ་ཕྱུང་ཁོང་པར་བདེན་པའི་ཡུས་མ་བཞག།

གོ་ཆོད་དོན་མེད་གཡེང་བའི་སྨྲ་བ་བོར།།

ཀུན་མཐོང་སྤྲོས་བྲལ་སེམས་ཉིད་ངང་ལ་ལྟོས།།

འབྲེལ་ཆོད་ཡུལ་དྲུག་གཟུང་འཛིན་རྗེས་མ་སྙེགས།།

སྟུག་སྤོངས་ཆོས་ཉིད་དོན་གྱིས་གཏན་ཡུལ་ཟུངས།།

དེ་ལྟར་བྱས་ན་རང་དོན་མྱུར་དུ་འགྲུབ།།

ཅེས་གསུངས་པ་སྟེ། ཡང་ཟབ་གནད་དུ་འགྲོ་བའི་ཆོས་དྲུག་ནི། དཔེར་ན་མི་གཉིས་ཡོད་པ་ལས་གཅིག་ཤོས་གསོད་དགོས་སོ་ཟེར་ན། ང་སོད་ཅེས་དུས་རྟག་ཏུ་རང་ཕམ་འབའ་ཞིག་ལེན་པ། གླང་རི་ཐང་པའི་བློ་སྦྱོང་ཚིག་རྐང་བརྒྱད་མ་ལས། ཁེ་དང་རྒྱལ་ཁ་གཞན་ལ་སྦྱིན། །གྱོང་དང་བུབ་ཁ་རང་གིས་བླང་། །ཞེས་པ་ལྟར་ཡིན་དགོས་པ་དང་། བཙོན་རའི་ནང་དུ་གཉིས་ཀ་བཟུང་ནས་གཅིག་ཤོས་ཕྱིར་ཕྱུང་ཆོག་ཚེ། ཁོ་ཕྱུང་ལ་ང་མངག་མི་དགོས་ཟེར་བ། དེ་ཡང་ཁ་ཙམ་མིན་པར་སྙིང་ཁོང་ནས་སྨྲས་པས་བདེན་པའི་ཡུས་མ་བཞག་པ་དང་། གཞན་དོན་འགྲུབ་པའི་གོ་ཆོད་ཅིང་དོན་མེད་པའི་གཡེང་བའི་སྨྲ་བ་བོར་དགོས་པ་དང་། གནད་གཅིག་ཤེས་ན་དོན་བརྒྱའི་འགག་ཁྲོལ་བའི་ཀུན་མཐོང་སྤྲོས་བྲལ་སེམས་ཉིད་ཀྱི་ངང་ལ་ལྟོས་ཤིག ཡུལ་དྲུག་གི་གཟུང་འཛིན་གྱི་ཞེན་པའི་འབྲེལ་བ་ཆོད་པར་བྱས་ནས་རྗེས་སུ་མ་སྙེགས། སྟུག་པོའམ་འཐུག་པོའི་སྒྲིབ་ཚོགས་སྤངས་ནས་ཆོས་ཉིད་དོན་གྱི་གཏན་ཡུལ་ཟུངས། དེ་ལྟར་བྱས་ན་རང་དོན་མྱུར་དུ་འགྲུབ་ནས་དེ་ལས་གཞན་དོན་འབྱུང་བ་ཤུགས་ཀྱིས་གོ་བའོ།།

༡༦༥ ཡིན་པ་དྲུག་གིས་ལེགས་པར་བསྟན་པ།

ཡིན་པ་དྲུག་གིས་ལེགས་པར་བསྟན་པ་ནི།།

གྲོས་ཕུགས་བླ་མ་ལ་གཏོད་འཁྲུལ་བ་མི་འབྱུང་ཡིན།།

དགེ་སྦྱོར་ཕྱི་དུས་མ་བཞག་ཤི་ཡང་མི་འགྱོད་ཡིན།།

དགྲ་གཉེན་ཕྱོགས་རིས་མ་འཛིན་ཀུན་སྣང་མཐུན་པ་ཡིན།།

བཟང་བྱས་དྲིན་ལན་ལོན་དང་གར་ཡང་དྲིན་པ་ཡིན།།

ཕྲག་དོག་གནོད་འཛུགས་སྤོངས་དང་རང་རྒྱུད་དུལ་བ་ཡིན།།

དམ་པའི་རྣམ་ཐར་སྐྱོངས་དང་ཅི་བསམ་འགྲུབ་པ་ཡིན།།

ཅེས་གསུངས་པ་སྟེ། ཡིན་པ་དྲུག་གིས་ལེགས་པར་བསྟན་པ་ནི། གྲོས་ཕུགས་དེ་རང་གི་རྩ་བའི་བླ་མ་ལ་གཏོད་དང་འཁྲུལ་བ་མི་འབྱུང་བ་ཡིན་ཏེ། བླ་མ་ནི་བརྟགས་ཤིང་དཔྱད་པ་སྔོན་དུ་སོང་བས་བློ་ཁེལ་ཡིད་ཆེས་བྱེད་ཡུལ་ཡིན་པའི་ཕྱིར། བླ་མས་གསུངས་པ་དང་མ་མཐུན་ཚེ་གནས་སྐབས་འགྲུབ་འགྲུབ་འདྲ་ཡང་མཐའ་ལེགས་པ་མིན་ནོ། །དགེ་སྦྱོར་ཕྱི་དུས་སུ་མ་བཞག་པར་སྔར་ནས་སྒྲུབ་པར་གྱིས་དང་ནམ་ཤི་ཡང་མི་འགྱོད་པ་ཡིན། དགྲ་གཉེན་ཕྱོགས་རིས་སུ་མ་འཛིན་དང་ཀུན་དང་སྣང་བ་མཐུན་པ་ཡིན། ཚུར་ལ་བཟང་པོར་བྱས་ཚད་ལ་ཆོས་དང་འཇིག་རྟེན་གྱི་དྲིན་ལན་ལོན་པའམ་དྲིན་ལན་ལྡོན་པར་གྱིས་དང་། གར་ཡང་སྟེ་ཐམས་ཅད་པོ་དྲིན་ལན་མཇལ་མཁན་ཏག་ཏག་ཏུ་འགྲོ་བ་ཡིན། ཕྲག་དོག་གི་གནོད་འཛུགས་སྤངས་ནས་ཚང་མ་ལ་གནོད་མ་བྱེད་དང་རང་རྒྱུད་དུལ་བ་ཡིན། བླ་མ་དམ་པའི་རྣམ་ཐར་སྐྱོངས་དང་ཅི་བསམ་འགྲུབ་པ་ཡིན་ནོ།།

༡༦༦ ཡང་ཟབ་ཤེས་རྒྱུད་གྲོལ་བའི་ཆོས་དྲུག་བསྟན་པ།

ཡང་ཟབ་ཤེས་རྒྱུད་གྲོལ་བའི་ཆོས་དྲུག་ནི།།

ལྟ་བ་སེམས་ཉིད་ཡིན་གྱིས་རང་ངོ་ཤེས་པར་གྱིས།།

སྒོམ་པ་འོད་གསལ་ཡིན་གྱིས་ངང་དྭངས་ཕྱིན་པར་གྱིས།།

སྤྱོད་པ་སྒྱུ་མ་ཡིན་གྱིས་ཅིར་སྣང་ལམ་དུ་སློང༌།།

ཉམས་མྱོང་ཆོས་ཉིད་འཆར་གྱིས་ཞེན་འཛིན་རྩད་ནས་ཆོད།།

འབྲས་བུ་རང་ཆས་ཡིན་གྱིས་རེ་དོགས་འཛིན་པ་ཤོལ།།

འཕྲིན་ལས་གཞན་དོན་ཡིན་གྱིས་ཐུགས་རྗེས་འགྲོ་བ་དྲོངས།།

ཞེས་གསུངས་པ་སྟེ། ཡང་ཟབ་ཀྱི་གནད་ཤེས་ནས་རྒྱུད་འགྲོལ་བའི་གདམས་ངག་གི་ཆོས་དྲུག་ནི། ལྟ་བ་སེམས་ཉིད་ཀྱི་དོན་མཐོང་བ་དེ་ཡིན་གྱིས་སེམས་ཉིད་རང་ངོ་ཤེས་པར་གྱིས། སྒོམ་པ་འོད་གསལ་ཡིན་གྱིས་རྣམ་རྟོག་གི་རྙོག་མ་མེད་པའི་ངང་དྭངས་ཕྱིན་པར་གྱིས། སྤྱོད་པ་གང་ཤར་སྒྱུ་མ་ཡིན་གྱིས་ཅིར་སྣང་ལམ་དུ་སློང༌། ཉམས་མྱོང་ཆོས་ཉིད་དུ་འཆར་གྱིས་དེ་ལ་ཞེན་འཛིན་རྩད་ནས་ཆོད། འབྲས་བུ་ཟུར་ནས་བཙལ་མི་དགོས་པར་རང་ཆས་ཡིན་གྱིས་རེ་དོགས་འཛིན་པ་བཤོལ་ནས་སྐྱུར། འཕྲིན་ལས་མཐར་ཐུག་གི་དམིགས་ཡུལ་གཞན་དོན་ཡིན་གྱིས་ཐུགས་རྗེས་འགྲོ་བ་དྲོངས་ཤིག་ཅེས་སོ།།

༡༦༧ ཆོས་མཛད་རྣམས་ཀྱིས་རང་བཞིན་རྣམ་དྲུག་བསྟན་པ།

ཆོས་མཛད་རྣམས་ཀྱི་རང་བཞིན་རྣམ་དྲུག་ནི།།

གཞན་དོན་སེམས་བསྐྱེད་ཡོད་ན་འགྲོ་བ་བྱམས།།

སྡང་བ་འབྱུང་སྲིད་བཟོད་པའི་གྲོགས་ཤེས་དགོས།།

བྱམས་པའི་གཏོང་ཕོད་ཡོད་ན་འཁོར་ཚོགས་འདུ།།

མ་འདུས་དགེ་སྦྱོར་འཕེལ་བའི་གྲོགས་ཤེས་དགོས།།

རྟོགས་པ་ཡོད་ན་དམ་ཅན་སྤྲིན་བཞིན་འདུ།།

མ་འདུས་དམ་ཚིག་ཉམས་པའི་རྟགས་ཤེས་དགོས།།

ཞེན་པ་སྙིང་ནས་ལོག་ན་ནོར་རྫས་འདུ།།

མ་འདུས་སྲིད་ན་སྔོན་གྱི་ལས་ཤེས་དགོས།།

དངོས་གྲུབ་ཐོབ་ཁར་བར་ཆད་སྣ་ཚོགས་འབྱུང༌།།

མ་བྱུང་གོང་མའི་བྱིན་རླབས་ཡིན་ཤེས་དགོས།།

སྒྲུབ་པ་བརྩོན་འགྲུས་ཅན་ལ་བདུད་རྣམས་འཇུག།

མ་ཞུགས་དགེ་སྦྱོར་གནད་དུ་ཚུད་ཤེས་དགོས།།

དེ་ལྟར་མ་ཤེས་ལོག་པར་ལྟས་ཉེན་ཆེ།།

ཞེས་གསུངས་པ་སྟེ། ཆོས་མཛད་རྣམས་ཀྱི་རང་བཞིན་རྣམ་པ་དྲུག་ནི། གཞན་དོན་སེམས་བསྐྱེད་ཡོད་ན་འགྲོ་བ་སེམས་ཅན་གྱིས་བྱམས་པ་ཐོབ་པ་དང་། སྡང་བར་བྱེད་མཁན་ཡང་འབྱུང་སྲིད་པས་དེས་དུས་སུ་བཟོད་པའི་གྲོགས་ཤེས་དགོས་པ་དང་། བྱམས་པའི་དབང་གིས་གཏོང་ཕོད་ཡོད་ན་འཁོར་ཚོགས་རང་བཞིན་གྱིས་འདུ་བ་དང་། གལ་ཏེ་མ་འདུས་ན་དགེ་སྦྱོར་འཕེལ་བའི་གྲོགས་ཡིན་པས་དེ་ལྟར་ཤེས་དགོས་པ་དང་། ཉམས་དང་རྟོགས་པ་རྒྱུད་དུ་ཡོད་ན་དམ་ཅན་ཆོས་སྐྱོང་སྲུང་མ་སྤྲིན་བཞིན་འདུ་བ་དང་། གལ་ཏེ་མ་འདུས་ཚེ་དམ་ཚིག་ཉམས་པའི་རྟགས་ཡིན་པས་ཤེས་དགོས་སོ། །ཞེན་པ་སྙིང་ནས་ལོག་ཡོད་ན་ནོར་རྫས་འདུ་བ་སྟེ་ནོར་རྫས་ལ་ཞེན་པ་ཆེ་ནས་ཨེ་ལོན་གྱིས་བདས་ཚེ་མི་ལོན་པ་དང་། ཞེན་པ་མེད་ནས་མི་དགོས་བསམས་ཀྱང་མི་ཁོག་པར་འདུ་བ་ནི་ཆོས་ཉིད་ཡིན་པ་དང་། གལ་སྲིད་ཞེན་པ་ལོག་ཀྱང་མ་འདུས་སྲིད་ན་སྔོན་གྱི་སེར་སྣ་ལ་སོགས་པའི་ལས་ཡིན་པར་ཤེས་དགོས་པ་དང་། དངོས་གྲུབ་ཐོབ་ཁར་སྤྱིར་བར་ཆད་སྣ་ཚོགས་འབྱུང༌བ་ཡོད་ཀྱང་། གལ་ཏེ་མ་བྱུང་ཚེ་གོང་མའི་བྱིན་རླབས་ཡིན་པས་ཤེས་དགོས་པ་དང་། སྒྲུབ་པ་བརྩོན་འགྲུས་ཅན་ལ་བདུད་རྣམས་འཇུག་སླ་བ་ཡིན་ལ་གལ་ཏེ་མ་ཞུགས་ཚེ་དགེ་སྦྱོར་གནད་དུ་ཚུད་པར་ཡིན་པར་ཤེས་དགོས་པ་དང་། དེ་ལྟར་མ་ཤེས་ཚེ་ལོག་པར་ལྟས་ཉེན་ཆེ་བས་དེ་དག་ཤེས་པར་བྱའོ།།

༡༦༨ མཐར་ཐུག་དོན་གྱི་གདམས་པ་རྣམ་དྲུག་བསྟན་པ།

མཐར་ཐུག་དོན་གྱི་གདམས་པ་རྣམ་དྲུག་ནི།།

ལྟ་བ་རྟོགས་པར་འདོད་ན་རྟོགས་མཁན་ཚོལ།།

དེ་ཉིད་མ་རྙེད་མཐའ་བཞིའི་རྒྱ་ལས་གྲོལ།།

ཏིང་འཛིན་བསྒོམ་པར་འདོད་ན་བསྒོམ་མཁན་ཚོལ།།

དེ་ཉིད་མ་རྙེད་འགྱུ་བ་དངོས་མེད་བསམ།།

སྤྱོད་པ་སྤྱད་པར་འདོད་ན་སྤྱོད་མཁན་ཚོལ།།

དེ་ཉིད་མ་རྙེད་དབྱེར་མེད་རང་སར་གྲོལ།།

འབྲས་བུ་བསྒྲུབ་པར་འདོད་ན་བསྒྲུབ་མཁན་ཚོལ།།

དེ་ཉིད་མ་རྙེད་སྐུ་གསུམ་རང་ལ་རྫོགས།།

འཕྲིན་ལས་བསྒྲུབ་པར་འདོད་ན་བསྒྲུབ་མཁན་ཚོལ།།

དེ་ཉིད་མ་རྙེད་མ་བཙལ་ལྷུན་གྱིས་གྲུབ།།

ས་ལམ་བགྲོད་པར་འདོད་ན་བགྲོད་མཁན་ཚོལ།།

དེ་ཉིད་མ་རྙེད་གནས་ལུགས་རང་སར་སྐྱོལ།།

དེ་ཉིད་མཐར་ཐུག་སྙིང་པོའི་གདམས་པ་སྟེ།།

ཐམས་ཅད་རིག་པའི་ཆོ་འཕྲུལ་ཤེས་པར་མཛོད།།

ཅེས་གསུངས་པ་སྟེ། མཐར་ཐུག་དོན་གྱི་གདམས་པ་རྣམ་པ་དྲུག་ནི། ལྟ་བ་རྟོགས་པར་འདོད་ན་རྟོགས་མཁན་གྱི་སེམས་དེ་ཉིད་ཚོལ། འཚོལ་མཁན་དེ་ཉིད་མ་རྙེད་ན་ཡོད་མེད་དང་གཉིས་མིན་གྱི་མཐའ་བཞིའི་རྒྱ་ལས་གྲོལ་བའི་ལྟ་བ་ཡིན། ཏིང་འཛིན་བསྒོམ་པར་འདོད་ན་སྒོམ་མཁན་ཁོ་རང་དང་པོ་ཚོལ། སྒོམ་མཁན་དེ་ཉིད་བཙལ་ནས་མ་རྙེད་ན་འགྱུ་བ་དངོས་མེད་བར་སྣང་དག་པ་ལྟ་བུར་བསམ་དགོས། སྤྱོད་པ་སྤྱད་པར་འདོད་ན་སྤྱོད་མཁན་དེ་ཉིད་ཚོལ། སྤྱོད་མཁན་དེ་ཉིད་བཙལ་ནས་མ་བརྙེད་ན་སྤྱད་བྱ་སྤྱོད་བྱེད་གཉིས་དབྱེར་མེད་རང་སར་གྲོལ་བ་ཡིན། འབྲས་བུ་བསྒྲུབ་པར་འདོད་ན་ཡང་སྒྲུབ་མཁན་དང་པོར་ཚོལ། སྒྲུབ་མཁན་བཙལ་ནས་དེ་ཉིད་མ་བརྙེད་ན་སྐུ་གསུམ་རང་ལ་ཡེ་རྫོགས་སུ་ཡོད་པའི་རྟགས་ཡིན། འཕྲིན་ལས་བསྒྲུབ་པར་འདོད་ན་སྒྲུབ་མཁན་ཚོལ། འཕྲིན་ལས་སྒྲུབ་མཁན་དེ་ཉིད་བཙལ་ནས་མ་རྙེད་ན་མ་བཙལ་ལྷུན་གྱིས་གྲུབ་པ་ཡིན། ས་ལམ་བགྲོད་པར་འདོད་ན་བགྲོད་མཁན་ཚོལ། བགྲོད་མཁན་དེ་ཉིད་བཙལ་ནས་མ་རྙེད་ན་གནས་ལུགས་མ་བཅོས་པའི་གནད་ཐོག་ལ་རང་སར་སྐྱོལ། གནས་ལུགས་རང་ཐོག་ལ་སྐྱེལ་བ་དེ་ཉིད་མཐར་ཐུག་སྙིང་པོའི་གདམས་པ་སྟེ། མདོར་ན་ལྟ་སྒོམ་སྤྱོད་འབྲས་ཐམས་ཅད་རིག་པའི་ཆོ་འཕྲུལ་ཙམ་དུ་ཤེས་པར་མཛོད་ཅེས་པའོ།།

༡༦༩ རང་སེམས་མཆོག་ཏུ་འདུལ་བའི་ཆོས་དྲུག་བསྟན་པ།

རང་སེམས་མཆོག་ཏུ་འདུལ་བའི་ཆོས་དྲུག་ནི།།

རང་གི་ང་རྒྱལ་རློམ་སེམས་རི་བོ་བསྒྱེལ།།

གཞན་ལ་ཕྲག་དོག་ཡི་དམ་ལྷ་རུ་ཁུར།།

གཞན་དོན་ཆགས་ཞེན་ཤེས་རབ་མཚོན་གྱིས་ཆོད།།

རྒྱུ་འབྲས་ཁྱད་གསོད་དགེ་སྡིག་ཤན་ཐང་ཕྱེད།།

སྐུར་འདེབས་སྒྲོ་སྐུར་བག་ཡོད་ཞི་དུལ་བསྟེན།།

གཞན་སྐྱོན་སེམས་འཁྲུག་སྣང་བ་མ་དག་སོམས།།

དེ་ལྟར་བྱས་ན་རང་རྒྱུད་ཆོས་དང་འདྲེས།།

ཞེས་གསུངས་པ་སྟེ། རང་སེམས་མཆོག་ཏུ་འདུལ་བའི་ཆོས་དྲུག་ནི། ང་ནི་མཆོག་ཡིན་ངའི་ཡན་དུ་མེད་སྙམ་པའི་ང་རྒྱལ་རློམ་སེམས་ཀྱི་རི་བོ་བསྒྱེལ་བར་གྱིས་ཤིག གཞན་ལ་ཕྲག་དོག་མི་བྱེད་པར་ཕྲག་དོག་བྱེད་ཡུལ་དེ་ཉིད་ཡི་དམ་ལྷ་དང་མཚུངས་པར་གཙུག་ཏུ་ཁུར་ནས་བཀུར་བསྟི་གྱིས། གཞན་དོན་བྱེད་པའི་སྐབས་སུ་དེ་ལ་ཆགས་ཞེན་བྱུང་ན་དེ་ནི་རློམ་པ་ཡིན་པས་ཤེས་རབ་ཀྱི་མཚོན་གྱིས་ཆོད་ཅིག རྒྱུ་འབྲས་ཁྱད་གསོད་ཀྱི་བསམ་སྤྱོད་བྱུང་ན་དགེ་སྡིག་ཤན་ཐང་ཕྱེད་པའི་ཐོག་ནས་བླང་དོར་ཡང་དག་པར་གྱིས། སྐུར་འདེབས་ཀྱི་རིགས་མ་བྱས་པའི་སྤྱོད་པ་བྱས་སོ་ཞེས་ཡར་སྒྲོ་འདོགས་པ་དང་། ཡོན་ཏན་ཡོད་པ་དག་མེད་དོ་ཞེས་མར་སྐུར་བ་བཏབ་པ་བྱུང་ན་བག་ཡོད་པ་དང་ཞི་དུལ་བསྟེན་པ་ལས་བྱིས་པའི་སྤྱོད་ཚུལ་ལ་སེམས་མ་འཁྲུག གཞན་སྐྱོན་མཐོང་བའི་རྐྱེན་གྱིས་སེམས་འཁྲུགས་ན་གཞན་ཁོ་ན་ལ་མི་བལྟ་བར་ལྟ་མཁན་རང་གི་སྣང་བ་མ་དག་པ་ཡིན་པའི་ཕྱོགས་ལ་ཚུར་སོམས། ཁྱད་པར་དུ་བླ་མ་དང་མཆེད་གྲོགས་ལ་དེ་ལྟར་བསམ་དགོས། དེ་ལྟར་བྱས་ན་རང་རྒྱུད་ཆོས་དང་འདྲེས་པ་ཡིན་ནོ།།

༡༧༠ ངོ་སྤྲོད་དྲུག་གིས་ཤན་ཐང་དབྱེ་བ་བསྟན་པ།

ངོ་སྤྲོད་དྲུག་གིས་ཤན་ཐང་དབྱེ་བ་ནི།།

རིག་པ་གསལ་དག་གྲུབ་མཐའ་ཀུན་ལས་གྲོལ།།

ལྟ་བའི་ངོ་སྤྲོད་ཡིན་ནོ་ཕུ་ཐག་ཆོད།།

རང་དྭངས་བདེ་ཆེན་དམིགས་གཏད་གཉིས་འཛིན་གྲོལ།།

སྒོམ་པའི་ངོ་སྤྲོད་ཡིན་ནོ་ངང་ལ་སྐྱོངས།།

ཐབས་ཤེས་ཟུང་འབྲེལ་བྱང་ཆུབ་ལམ་དུ་སློང༌།།

སྤྱོད་པའི་ངོ་སྤྲོད་ཡིན་ནོ་སྒྱུ་མར་སྦྱོངས།།

སྣང་སྲིད་ཞིང་ཁམས་ཐ་མལ་ཞེན་རྟོག་ལོག།

དམ་ཚིག་ངོ་སྤྲོད་ཡིན་ནོ་རྣམ་དག་གྱིས།།

ཅིར་སྣང་རང་བྱུང་ཡེ་ཤེས་བདེ་བའི་ངང༌།།

དབང་བཞིའི་ངོ་སྤྲོད་ཡིན་ནོ་ས་ལམ་བགྲོད།།

དེ་ལྟར་གང་བྱས་གསང་སྔགས་རྣལ་འབྱོར་ཆེ།།

ཞེས་གསུངས་པ་སྟེ། ངོ་སྤྲོད་དྲུག་གིས་ཤན་ཐང་དབྱེ་བ་ནི། རིག་པའི་ངོ་བོ་གསལ་ཞིང་དག་པ་བློས་བྱས་ཀྱི་གྲུབ་མཐའ་ཀུན་ལས་གྲོལ་ཞིང་བློ་ལས་འདས་པ་ཡིན་པ་དེ། ལྟ་བའི་ངོ་སྤྲོད་ཡིན་ནོ་དེའི་སྟེང་དུ་ཕུ་ཐག་ཆོད། ངང་གིས་གསལ་བའི་རང་དྭངས་བདེ་བ་ཆེན་པོ་དམིགས་གཏད་གཉིས་འཛིན་གྱི་སྒྲོག་ལས་གྲོལ་བ་དེ། སྒོམ་པའི་ངོ་སྤྲོད་ཡིན་ནོ་དེ་ཤེས་པར་བྱས་ནས་དེའི་ངང་ལ་སྐྱོངས། ཐབས་སྙིང་རྗེ་ཆེན་པོ་དང་ཤེས་རབ་སྟོང་པ་ཉིད་ཟུང་འབྲེལ་ཡ་མ་བྲལ་བས་ཅི་བྱས་བྱང་ཆུབ་ལམ་དུ་སློང༌ཐུབ་པ་དེ། སྤྱོད་པའི་ངོ་སྤྲོད་ཡིན་ནོ་སྤྱོད་པ་སྒྱུ་མར་སྦྱོངས། དོན་དུ་སྣང་སྲིད་ཞིང་ཁམས་ཡིན་པས་མ་དག་ཐ་མལ་གྱི་ཞེན་རྟོག་ལོག་པ་སྣང་གྲག་མཐོང་ཐོས་ཅི་ཤར་ཐམས་ཅད་རིག་སྟོང་གྲག་སྟོང་དྲན་སྟོང་གི་ངོ་བོར་ངོ་འཕྲོད་ནས་རྡོ་རྗེ་གསུམ་གྱི་རང་བཞིན་ལས་མི་འདའ་བ་ནི། སྤྱིར་སྔགས་ཀྱི་སྐབས་ཀྱི་དམ་ཚིག་གི་རྣམ་གཞག་དང་། ཁྱད་པར་དུ་རྫོགས་ཆེན་མན་ངག་སྡེའི་སྐབས་ཀྱི་མེད་དང་ཕྱལ་བ་ལྷུན་གྲུབ་གཅིག་པུ་ལ་ཁྲེགས་ཆོད་ཐོད་རྒལ་གྱི་དམ་ཚིག་བསྡུ་བའི་ངོ་སྤྲོད་ཡིན་ནོ་རྣམ་པར་དག་པ་གྱིས། ཅིར་སྣང་གང་ཤར་ཐམས་ཅད་རང་བྱུང་ཡེ་ཤེས་ལས་མ་ཤར་བ་མེད་པའི་བདེ་བའི་ངང༌ལས་མ་འདས་པ་ཡིན་པ་དེ་ནི། བུམ་གསང་ཤེར་དང་ཚིག་དབང་རིན་པོ་ཆེ་སྟེ་དབང་བཞིའི་ངོ་སྤྲོད་ཡིན་ནོ་དེ་འདྲའི་གཞི་དབང་དང་ལམ་དབང་དེ་ལ་བརྟེན་ནས་ས་ལམ་བགྲོད་དེ་མཐར་ཐུག་འབྲས་བུའི་དབང་ཐོབ་པར་གྱིས། དེ་ལྟར་རྡོ་རྗེ་གསུམ་ལས་མི་འདའ་ཞིང་ཅིར་སྣང་རང་བྱུང་ཡེ་ཤེས་ཀྱི་ངང་སྐྱོང་བའི་རྣལ་འབྱོར་བ་དེས་གང་བྱས་ཀྱང་གསང་སྔགས་ཀྱི་རྣལ་འབྱོར་ཆེན་པོ་ཡིན་ནོ།།

༡༧༡ ཆོས་བཞིན་སྤྱོད་ལ་རབ་དྲུག་ཚང་བ་བསྟན་པ།

ཆོས་བཞིན་སྤྱོད་ལ་རབ་དྲུག་ཚང་བ་ནི།།

ཆགས་ཞེན་མེད་པས་སྦྱིན་པའི་རབ་ཏུ་གདའ།།

རང་རྒྱུད་དྲི་མེད་ཚུལ་ཁྲིམས་རབ་ཏུ་གདའ།།

ཁོང་ཁྲོས་མི་འཁྲུགས་བཟོད་པའི་རབ་ཏུ་གདའ།།

ངེས་འབྱུང་སྐྱོ་ཤས་བརྩོན་འགྲུས་རབ་ཏུ་གདའ།།

དགོངས་པའི་ངང་གནས་བསམ་གཏན་རབ་ཏུ་གདའ།།

སེམས་ཉིད་དོན་རྟོགས་ཤེས་རབ་རབ་ཏུ་གདའ།།

ཞེས་གསུངས་པ་སྟེ། ཆོས་བཞིན་སྤྱོད་པའི་གང་ཟག་ཅིག་ལ་རབ་དྲུག་ཚང་དགོས་ན་དེ་དྲུག་ནི། སྦྱིན་པ་ཐམས་ཅད་ཀྱི་མཆོག་དེ་ཆགས་ཞེན་མེད་པ་ཡིན། དེ་ཡང་གང་སྦྱིན་རྒྱུའི་དངོས་པོ་ལྟ་བུ་ལ་མཚོན་ན་སེར་སྣས་ཆགས་ཞེན་མེད་པ་དང་། སྦྱིན་པའི་དགེ་བ་དེ་ལ་ཡང་མ་ཆགས་པར་དམིགས་མེད་ཀྱིས་ཟིན་པ་དང་། ལན་དང་རྣམ་སྨིན་ལའང་རེ་བའི་ཆགས་ཞེན་མེད་པ་དེ་འདྲ་བ་དེ་སྦྱིན་པའི་རབ་ཏུ་གདའ། རང་རྒྱུད་ཉེས་སྤྱོད་ཀྱི་དྲི་མས་མ་གོས་པས་བསམ་སྤྱོད་གཙང་བ་དང་། ཚུལ་བརྟུལ་མཆོག་འཛིན་གྱི་དྲི་མས་མ་གོས་ཤིང་། བསྲུང་བྱ་སྲུང་བྱེད་དང་བྲལ་བའི་འདའ་ཉམས་མེད་པའི་ཚུལ་ཁྲིམས་ཆེན་པོ་དེ་ཚུལ་ཁྲིམས་ཀྱི་རབ་ཏུ་གདའ། ཁོང་ཁྲོས་དུས་དང་རྣམ་པ་ཀུན་ཏུ་རྒྱུད་མི་འཁྲུག་པ་ཞིག་རེད་ཡོད་ན་དེ་བཟོད་པའི་རབ་ཏུ་གདའ། ངེས་འབྱུང་སྐྱོ་ཤས་ཤིག་གཏིང་ནས་སྐྱེས་ཡོད་ན་ཆོས་ཕྱོགས་ལ་མི་བརྩོན་པར་མི་སྲིད་པས་བརྩོན་འགྲུས་རབ་ཏུ་གདའ། ངེས་འབྱུང་སྐྱོ་ཤས་ཡག་པ་ཞིག་མེད་པས་མཚམས་རེ་བརྩོན་ཡང་མཚམས་རེ་ལྷོད་པ་ཅན་དུ་གྱུར་ནས། དུས་ཚོད་མང་ཤོས་དང་བཟང་ཤོས་དེ་ཚེ་འདིའི་བྱ་བཞག་ལ་སོང་ཞིང་། ལྷག་མའི་དུས་དེ་ཆོས་སྒྲུབ་པའི་དུས་སུ་བྱེད་པ་ནི་རྩ་བ་ངེས་འབྱུང་མེད་པའི་རྟགས་དང་། ངེས་འབྱུང་མེད་པ་ནི་རྒྱུ་འབྲས་ལ་ཡིད་ཆེས་ཡང་དག་མེད་པའི་རྟགས་ཡིན་པས། ད་གང་ནས་བཤད་ཀྱང་རྫུན་ཨབ་ར་གཉིས་ཀའི་རྔ་མ་ཐུང་བ་ཡིན་ཕྱིར་ཆོས་པ་ཡིན་མདོག་བརྒྱ་བསྟན་ཡང་བྱ་བ་སྤྱོད་པའི་ཐོག་ནས་ལྟ་རྐུབ་སྤྱོད་པས་ཕུད་པ་ཡིན། བསམ་བློ་དང་པོ་ཚེ་འདིའི་བྱ་བཞག་ལ་འཁོར་ནས་ལས་ཀ་དང་པོ་དེ་ལ་བརྩོན་བཞིན་བསྡད་ཚེ་འཇོན་གྱིན་མེད་པའི་རྟགས་ཡིན་ནོ། །ཆོས་སྐུའི་དགོངས་པ་གཡོ་མེད་མི་འགྱུར་པའི་ངང་ལ་གནས་ཐུབ་ན་བསམ་གཏན་རབ་ཏུ་གདའ། རང་བཞིན་ཡེ་བབས་ཀྱི་བསམ་གཏན་ཞེས་པ་དེ་ཡིན། སེམས་ཉིད་སྤྲོས་བྲལ་སྟོང་ཉིད་ཀྱི་དོན་རྟོགས་ན་ཤེས་རབ་ཐམས་ཅད་མཆོག་གམ་རབ་ཏུ་གདའ་འོ།།

༡༧༢ ཐེག་ཆེན་སྤྱི་ཡི་གདམས་ངག་རྣམ་དྲུག་བསྟན་པ།

ཐེག་ཆེན་སྤྱི་ཡི་གདམས་ངག་རྣམ་དྲུག་ནི།།

རྟག་ཏུ་འཆི་བསམ་བརྩོན་འགྲུས་ལྕག་གིས་བྲབ།།

ཅི་བྱེད་གོམས་གཙོ་ཆོས་ཀྱི་ཕྱོགས་སུ་བསླབ།།

བསགས་པ་བགྲང་ཞིང་དགེ་སྡིག་གསོ་སྦྱོང་བྱ།།

དམ་པ་གསུམ་མཆོད་ཚོགས་གཉིས་བསག་ལ་འབད།།

དགེ་སྦྱོར་སྲང་གཞུག་སྣང་བ་ཆོས་ལ་བསྒྱུར།།

ཅི་བྱེད་གཞན་དོན་བདག་མེད་དོན་དང་སྤྲད།།

དེ་ལྟར་སུ་བྱེད་ཐེག་མཆོག་སྙིང་པོར་ཞུགས།།

ཞེས་གསུངས་པ་སྟེ། ཐེག་ཆེན་སྤྱི་ཡི་གདམས་ངག་མེད་དུ་མི་རུང་བ་རྣམ་པ་དྲུག་ནི། རྟག་ཏུ་འཆི་བ་མི་རྟག་པ་ལ་བསམས་ནས་བརྩོན་འགྲུས་རྟ་མཆོག་ལྕག་གིས་བསྐུལ་བ་ལྟ་བུའི་ལོང་མེད་རྒྱུད་ལ་སོམས། ལས་བྱ་བ་ཅི་བྱེད་ཀྱང་དེའི་ཐབས་ལ་མཁས་ཤིང་འགྲུབ་དགོས་ཚེ་གོམས་པ་གཙོ་ཆེ་བས་གོམས་པ་ཆོས་ཀྱི་ཕྱོགས་སུ་བསླབ་དགོས་ཏེ། གོམས་ན་སླ་བར་མི་འགྱུར་བའི་དངོས་པོ་ཡོད་པ་མིན་པས། དང་པོར་དཀའ་བར་སྣང་བ་ཡང་གོམས་ན་ཇེ་སླར་འགྲོ་བ་ཡིན་པའི་ཕྱིར། དཔེར་ན་དུད་འགྲོ་ཡིན་ཡང་བསླབས་ན་ལོབས་རྒྱུ་ཡོད་པ་རེད། རྒྱུག་མཆོང་གི་ལུས་རྩལ་པའི་མི་ཞིག་ལ་མཚོན་ན། ལུས་ཀྱི་མཉེན་ལྕུག་ཕུལ་དུ་ཕྱིན་པ་བསླབས་ནས་ལོབས་པ་མངོན་སུམ་དང་། ངག་གི་ཕྱོགས་ནས་བསམས་ན། གླུ་གར་པ་ཞིག་ལ་མཚོན་ན་དེའི་ཕྱོགས་ལ་འབད་པ་བྱས་པས་གྲུབ་འབྲས་ལེགས་པོ་ཐོབ་པ་དང་། སེམས་ཀྱི་ཕྱོགས་ནས་ཀྱང་། རྫོགས་པ་ཆེན་པོའི་ལྟ་བ་ལེགས་པར་སྒོམ་ཐུབ་ན་འཇའ་ལུས་སུ་འགྲུབ་པ་ཡིན། འོན་ཀྱང་ངེས་འབྱུང་ཡང་དག་ཅིག་རྒྱུད་ལ་མ་སྐྱེས་ནས་བརྩོན་པ་བསྐྱེད་མ་ནུས་ནས་གོམས་པ་ཞན་པའི་དབང་གིས་འབྲས་བུ་དེའི་ཚོད་ལས་འཐོབ་མི་ཐུབ་པ་རེད། དེས་ན་སྙིགས་མའི་སེམས་ཅན་ཆོས་ཕྱོགས་ལ་གོམས་པ་སྐྱེད་པའི་བློ་སྟོབས་ཞན་པའི་དབང་གིས། གོམ་པ་ཆོས་ཕྱོགས་སུ་འདོར་མ་ཐུབ་ནས་ཆོས་མ་འགྲུབ་པ་ཡིན་པས་ཆོས་ཕྱོགས་ལ་གོམས་པ་མཆོག་ཏུ་བརྟན་པ་གནད་ཆེའོ། །རང་གིས་ད་སྔ་ཡན་དུ་ལས་ཚད་བཅས་ཚད་ལ་བསམ་བློ་བཏང་ནས། མི་ཚེའི་སྟོད་དུ་དང་པོ་བླང་དོར་མ་ཤེས་པའི་དུས་སུ་ཅི་བྱས་པ་དང་། ཅི་འདྲ་ཞིག་ཡིན་འདུག་བསམས་ནས་འདེང་ཞིག་བརྒྱབ་ན། དང་པོའི་དུས་སུ་བྱིས་པ་བསམ་མེད་ཀྱི་སྐབས་རེད། དེའི་རྗེས་སུ་ལེགས་ཉེས་བླང་དོར་གྱི་གནས་སྟོན་མཁན་རེ་ཐུག་ཡོད་ཀྱང་། འགའ་རེ་ནི་བསམ་པ་དཀར་བ་ཙམ་ལས་ཁོ་རང་གིས་ཅིའང་མ་ཤེས་པར་སྣང་བ་དང་། ལ་ལ་ནི་དེ་དུས་འདྲིས་ཆེ་ནས་མིག་གིས་རྫི་མ་རིག་པ་ལས་དེས་ཅི་ཟེར་ལ་ཉན་ན་འཁྲུལ་མེད་ཚད་མར་འཛིན་འོས་སུ་འདུག་ཀྱང་། རྐྱེན་སྣ་ཚོགས་པའི་དབང་ལ་བརྟེན་ནས་དེ་ལྟར་མ་འགྲུབ་པ་སོགས་མདོར་ན་མི་ཚེའི་ཉི་མ་ཕལ་ཆེར་ཤོར་ཚར་བ་དེ་ལ་ཕྱིར་བལྟས་དང་ཕྱོགས་བསྡོམས་ཤིག་བརྒྱབ་ནས་བསྔོ་བགྲང་ཞིག་བྱས་ན། དང་པོར་ཐེག་ཆེན་ཐར་བ་ཆ་མཐུན་གྱི་དགེ་རྩ་ཅི་ཙམ་འགྲུབ་པའི་ཚུལ་ལ་བརྟགས་ཤིང་དཔྱད་ན། གལ་ཏེ་ངེས་འབྱུང་གི་བསམ་པས་གཞི་བྱས་ནས་སྙིང་རྗེ་ཆེན་པོས་ཀུན་ནས་སློང་སྟེ་གཞན་ཕན་བྱང་ཆུབ་ཀྱི་སེམས་བསྐྱེད་ཚེ། སེམས་ཅན་གཅིག་ཙམ་ཡང་བློས་གཏོང་མི་རུང་བ་ཡིན། རང་འདོད་ཡིད་བྱེད་མེད་པའི་གཞན་ཕན་རྣམ་དག་ཅིག་འགྲུབ་ཨེ་ཡོད་གསེར་རྐོ་དག་གིས་གསེར་ཚགས་བརྒྱབ་པ་འདྲ་ཞིག་བྱས་ནས་བལྟས་ན། ཚུལ་མིན་ཡིད་བྱེད་ཀྱི་ངན་རྟོག་ཉོནམོངས་པ་དང་དེ་དང་འབྲེལ་བའི་སྤྱོད་ངན་ཏག་ཏག་ལས་ཤུལ་དེ་ན་ཐེག་ཆེན་ཐར་བ་ཆ་མཐུན་གྱི་དགེ་བ་ཕྲ་བ་ཙམ་ཡང་དཀའ་བའི་གནས་སུ་ཡོད་པ་དང་། རབ་ཏུ་བྱུང་བའི་རྟགས་ཆ་ལུགས་བཅངས་ཡོད་ཀྱང་། སྲུང་སྡོམ་ཆུ་ཆུང་ས་ནས་ལྷམ་ཕུད་ནས་བརླ་རྫེ་དགུང་རྫེ་བྱེད་ཀྱང་། ཆེ་ས་ལ་ཐུག་དུས་ལྷམ་དང་བཅས་པར་འཇུག་པ་འབྲུག་པ་ཀུན་ལེགས་ཀྱིས་གསུངས་པ་ལྟ་བུ་བྱེད་པ་དང་། སྦྱིན་དང་བསམ་གཏན་གྱི་ཕྱོགས་ནས་ཀྱང་གཟུགས་བརྙན་ཙམ་རེ་བྱེད་ཁུལ་ཡོད་ཀྱང་། བརྩོན་འགྲུས་ཀྱི་ཕྱོགས་ནས་མ་འཇོན་པ་དང་། ཁྱད་པར་དུ་གྲོགས་ཤེས་རབ་དང་འབྲེལ་མ་ཤེས་ནས་ཐེག་པ་ཆེན་པོའི་ཆོས་ཀྱི་གྲལ་དུ་ཆུད་པའི་ཆ་རྐྱེན་མེད་པའི་ཚད་ལ་ཐོན་ཡོད་པ་རེད། དེ་ལྟར་དཔྱད་ཚེ་སྐས་ཐེམ་གོང་མའི་སྟེང་ནས་མར་ཤུད་པ་རེད། བར་མ་ལ་རྡོག་ཅིག་ཨེ་བརྟན་བལྟས་ན། སྐྱེས་བུ་འབྲིང་ཉན་རང་གི་ལམ་རེད། དེ་ཡང་རང་ལམ་གྱི་སྡེ་སྣོད་གསུམ་ལ་སྦྱངས་པ་བྱས་ནས་བསླབ་པ་གསུམ་ལ་ཉམས་ལེན་བྱེད་དགོས། དེ་བྱས་ན་འབྲས་བུ་ཅི་ཞིག་ཐོབ་ཏུ་ཡོད་ན། ཉན་རང་དགྲ་བཅོམ་པའི་གོ་འཕང་འཐོབ་ཏུ་ཡོད་པ་ཡིན། དེ་ཡང་འཕགས་ས་ཐོབ་ནས་འཁོར་བ་ལ་རྒྱབ་ཀྱིས་ཕྱོགས་པ་རེད། གཞན་དོན་རྒྱ་ཆེན་འགྲུབ་པའི་རླབས་ཆེན་གྱི་སྤྱོད་པ་དང་སྨོན་ལམ་མེད་ཀྱང་། རང་ཉིད་ཞི་བདེའི་བཙན་ས་ཟིན་ནས་ཡོད་པ་ཡིན། ལམ་དེ་ལ་ཞུགས་ཀྱང་མཐར་ཐུག་ཐེག་ཆེན་ལ་ཞུགས་ནས་འཚང་རྒྱ་ཐབས་ཡོད་པ་ཡིན། འོན་ཀྱང་ལམ་དེ་ལ་ཚུད་ཡོད་མེད་གོམ་པ་དང་པོ་སྤོ་བའི་དུས་སུ་ངེས་འབྱུང་ཡོད་མེད་ལ་ཐུག་ཡོད། འཁོར་བའི་ཕུན་ཚོགས་ལ་སྐྱུགས་ནད་ཅན་ལ་བཙོས་ཟན་བྱིན་པ་ལྟ་བུའི་ཞེན་ལོག་དང་། དེ་ལས་ཐར་འདོད་ཉེས་ཆེན་བཙོན་ན་ཡོད་པ་ལྟ་བུ་ངེས་པར་དགོས་པ་ཡིན། དེ་ཨེ་ཡོད་བལྟས་ན་ལས་རྒྱུ་ཚང་མ་ལ་ཆོས་བརྒྱད་དང་འདྲེས་པའི་བྱ་བ་ལས་མེད་པ་དེས། བསམ་རྒྱུ་འཁོར་བའི་འདི་སྣང་འདི་སྐྱུར་མ་ཐུབ་པའི་རྟགས། བལ་བོའི་སེའུ་མ་ཟོས་ཀྱང་། ཁ་དོག་ཉིད་ལས་བྲོ་བ་ཤེས་བཞིན་ཡོད་པ་རེད། དེ་ལྟར་དུ་ཞིབ་པའི་ཚགས་ལ་བརྒྱབ་ནས་གསེར་བཙགས་བཙགས་བྱས་ན། ཐེག་ཆེན་མ་དགོས་ཐེག་དམན་ཐར་བ་ཆ་མཐུན་གྱི་དགེ་བ་འགྲུབ་མེད་པ་རེད། དེ་མེད་བཞིན་དུ་ཡོད་མདོག་བྱེད་སར་འགྲོ་བ་མིན། ལ་ཕར་རྒྱབ་ཏུ་ཐོན་དུས་རྩིས་ཁྲ་ཞིབ་པ་རེད། དེ་ལྟར་ཞིབ་མོའི་བློ་ཡིས་བརྟགས་ཤིང་དཔྱད་ཚེ་ཡང་སྐས་བར་མའི་སྟེང་ནས་མར་ཤུད་པ་རེད། ཐེམ་སྐས་འོག་མའི་ཐོག་ལ་འདུག་ལོས་འགྲོ་སྟེ། ཤཱཀྱའི་བསྟན་པ་ལ་རབ་ཏུ་བྱུང་། ཆུང་ནས་ད་ལ་མ་ཐུག་གི་བར་དུ་གཞན་ལ་དགེ་སྡིག་རྒྱུ་འབྲས་ཕར་བཤད་པས་མ་ཚད། རང་གིས་ཀྱང་སྤང་བླང་འདོར་ལེན་བྱེད་པ་ཡིན་མདོག་པོའི་གྲལ་དུ་ཞུགས་ནས་ཡོད་པ་ལ་བསམ་པ་ཞིག་རེད་ཀྱང་། སྐྱེས་བུའི་ཆུང་ངུའི་ལམ་ཕྱི་མ་ལྷ་མིའི་བདེ་འབྲས་འཚོལ་བ་ཞིག་ཡིན་ཚེ། རྒྱུ་འབྲས་ཡིད་ཆེས་ཀྱི་འཇིག་རྟེན་ཡང་དག་གི་ལྟ་བ་ཞིག་ཡོད་དགོས་པས། མི་དགེ་བཅུ་སྤངས་ཀྱི་ཚུལ་ཁྲིམས་བསྲུངས། སོ་ཐར་རིགས་བདུན་ལས་དགེ་བསྙེན་གྱི་སྡོམ་པའི་དགག་སྒྲུབ་ཆ་མཐུན་དང་བཅས་པའི་བསླབ་བྱ་ནན་ཏན་གྱིས་སྲུང་བ་ཞིག་ཡིན་དགོས། ད་ངོ་མས་ངོ་མ་བཤད། བྱང་མས་ལ་མོ་བརྒྱབ་ཡོང་ན། གོང་ནས་བཤད་པ་ལྟར་དུ་རྒྱུ་འབྲས་ཡིད་ཆེས་ལ་བློ་གཏད་དང་ཡིད་ཆེས་བརྟན་པོ་ཞིག་མེད་པའི་རྟགས་ཀྱང་མངོན་བཞིན་ཡོད་ལ། བསམ་པའི་ཀུན་སློང་དེ་ལས་མེད་བཞིན་དུ་ཐེག་པ་རིམ་དགུའི་མདོ་སྔགས་ཀྱི་ལམ་གྱི་རིམ་པ་ཐམས་ཅད་ཁ་ཐོག་ནས་བཤད་བཞིན་ཡོད་ཀྱང་། དོན་བྱ་བ་ལག་ལེན་གྱི་ཐོག་ནས་ཚོགས་ལམ་ཆུང་འབྲིང་ཕར་ཞོག ཕྱི་མ་ལྷ་མིའི་གོ་འཕང་མངོན་མཐོ་དོན་གཉེར་བྱེད་པའི་ཆ་རྐྱེན་ཙམ་ཡང་ལྡན་མེད་ཚེ། དེའི་ཡན་གྱི་སྐད་ཆ་གླེང་རིན་མེད་པའི་ཚད་ལ་ཐོན་ནས་ཡོད་པས་གསང་སྔགས་ཀྱི་སྐོར་ཕར་ཚད་ཞོག དེ་ལྟར་རང་གིས་རང་ལ་ད་སྔའི་བསགས་པ་རྣམས་བགྲང་ཞིང་བྱ་བའི་ཕྱོགས་བསྡོམས་ཤིག་བྱས་ཚེ། དགེ་སྡིག་ངོ་མི་ཤེས་པའི་བྱིས་པའི་དུས་དང་། ཆུང་ནས་ཆེ་ལ་ཕྱོགས་པའི་དུས་དང་། ཆེ་ནས་རྒས་ཀྱི་བར་དང་། དེ་བཞིན་དུ་ཉི་མ་རེ་རེ་བཞིན་དང་ཞག་མ་རེ་རེར་དགེ་སྡིག་བསགས་གྲངས་ལ་འདེང་བརྒྱབ་ན། ཕྱི་མར་ཁ་ཐུར་ལ་སྐོར་བ་ལས་གཞན་དུ་འགྲོ་ས་འདུག་གམ། ཆོས་དང་བླ་མ་མ་འདྲ་བ་དང་འཕྲད་པའི་སྟོབས་ཀྱིས་སྐྱེ་བ་རེ་རེ་གཉིས་རེར་ངན་སོང་དུ་མ་ལྷུང་ན་ཡང་། ཐར་བའི་ལམ་སྣེ་ཞིག་མ་ཟིན་ཚེ་གཞན་དོན་ཕར་ཞོག་རང་དོན་ཙམ་ཡང་འགྲུབ་མེད་པ་ཡིན། མདོར་ན་རྒྱུག་རྒྱུག་འདུར་འདུར་ལས་ལས་བཅས་བཅས་ཀྱིས་མི་ཚེ་འདས་ཀྱང་། ཆོས་འཇིག་རྟེན་གཉིས་ཀ་མ་འགྲུབ་ནས་ལུས་འདུག་པའི་ཚུལ་ནི། གདམས་ངག་ཁྱད་པར་འདི་དག་དང་ར་སྦྲག་ན་ཤེས་པ་ཡིན་ཏེ། དེ་ཡང་དོན་ངོ་མས་བཤད་ན་སྐྱབས་གནས་དཀོན་མཆོག་གསུམ་པོ་དེ་ངོས་ཟིན་གྱིན་འདུག་གམ། དེ་ཡང་ཡང་དག་པ་ཞིག་མ་ཤེས་ཚེ་དད་པ་ཇི་ལྟར་གཞག་དགོས། སྐྱབས་ཡུལ་མ་ཤེས་པའི་སྐྱབས་འགྲོའི་སྡོམ་པ་ཞིག་དེ་བས་ཀྱང་ག་ལ་ཡོད། ད་བཤད་ཀྱིན་བཤད་ཀྱིན་ཇེ་སྡུག་ཏུ་སོང་ནས་ནང་པའི་གྲལ་དུ་ཚུད་ཡོད་མེད་ཀྱི་ཚད་ལ་བརྒྱབ་ཡོད་པ་རེད། འདི་རིགས་འདི་ཚུར་མ་བསློགས་ནས་བསྐྱུར་བཞག་ན། ཚེ་འདི་ལ་མི་བླུན་པོ་ཁ་ཤས་ཉིན་འགའ་རེའི་རིང་དུ་མགོ་སྐོར་ཐུབ་ན་ཐང་ཡང་། མཐར་ཐུག་རང་གཞན་གཉིས་ཀ་ལ་གནོད་ཀྱི་སྟེང་དུ་གནོད་དུ་འགྱུར་བ་ཡིན་པས། དམ་པའི་ཆོས་མཆོག་ཀུན་མཁྱེན་བླ་མའི་མན་ངག་དྲུག་ཚན་འདི་ཚོའི་ནང་གི་དྲུག་ཚན་གཅིག་ཙམ་ཞིག་ཉམས་ལེན་བྱེད་ཐུབ་ཀྱང་། དེ་ལས་མི་དགོས་པ་ལྟ་བུ་ཞིག་ཡིན་པས་ད་ནས་བཟུང་སྟེ་དམ་པའི་ཆོས་རྣམ་དག་མིང་དོན་མཚུངས་པ་ཞིག་ཨེ་འགྲུབ་བལྟ་དགོས། ང་རང་ལ་ཁ་བསྐོར་ན་སོ་སྐྱེ་ཐ་མལ་པ་འཆིང་བ་ཀུན་ལྡན་ཡིན་པས་དེ་ལྟར་ཡིན་ཡང་། རྣམ་པ་ཚོས་མཐུན་རྐྱེན་བསྐྲུན་པ་ལ་བརྟེན་ནས་མན་ངག་འདི་ཚོ་མཉམ་དུ་སྐྱོར་སྦྱོང་རེ་བྱེད་པའི་སྐལ་བ་ཐོབ་ཅིང་། གདན་ས་འདི་ལྟ་བུ་ལ་བསྡད་ནས་ཆོས་པའི་མིང་རེ་བཟུང་སྟེ། ཆོས་པ་རབ་འཇའ་ལུས་འགྲུབ་པ་མ་རེད་ཀྱང་། འབྲིང་རང་གཞན་གཉིས་ཀ་མགོ་མི་གཡོགས་པའི་འབྲེལ་ཚད་དོན་ལྡན་ཞིག་གམ། ཐ་མ་ཡིན་ཡང་ཤི་ཁ་འགྱོད་མི་དགོས་པར་ཐར་ལམ་སྙེག་མཁན་ཞིག་ངེས་པར་ཡོང་བའི་རེ་བ་དང་སྨོན་ལམ་བཏབ་ནས་བློ་རྩེ་གཅིག་གཏོད་ཀྱིས་བསྒྲུབས་ན་གང་འཚམས་ཤིག་འགྲུབ་པར་གདོན་མི་ཟ་ལ། དེ་ལྟར་མིན་པར་བློ་རྩེ་གཉིས་ཀྱིས་དོན་མི་འགྲུབ་པ་དང་། ཁབ་རྩེ་གཉིས་ཀྱིས་ཚེམ་བུ་མི་ཡོང་བ་ལྟར་དུ། ཆོས་ཆོས་ཀྱི་རྗེས་མ་ཟིན། འཇིག་རྟེན་འཇིག་རྟེན་གྱི་བྱ་བ་མ་འགྲུབ་ནས། བྲང་ལ་སྦར་ཤད་བྱེད་པ་ལས་འོས་མེད་པའི་གནས་སུ་གྱར་བ་ནི་མཐོ་དམན་དྲག་ཞན་ཐམས་ཅད་ལ་འབྱུང་དུ་ཡོད་པས། དཀོན་མཆོག་དམ་པ་གསུམ་སྤྱི་བོའི་གཙུག་ཏུ་མཆོད་ནས་བསོད་ནམས་དང་ཡེ་ཤེས་ཀྱི་ཚོགས་གཉིས་བསག་པ་ལ་འབད་ཅིང་། དགེ་སྦྱོར་སྲང་དུ་གཞུག་པའམ་ཚད་དང་ལྡན་པར་བྱས་ཏེ་སྣང་བ་ཆོས་ལ་བསྒྱུར་ནས། གང་སྣང་དགེ་སྦྱོར་གྱི་སྐུལ་མ་དང་བརྡ་ཆོས་སུ་གོ་བར་བྱེད་པས་མ་ཚད། ཅི་བྱེད་གཞན་དོན་ལ་སྤྱད་པས་ནམ་ཞིག་གང་བྱས་གཞན་དོན་དུ་གྱུར་པ་བྱེད་ཅིང་བདག་མེད་སྟོང་ཉིད་ཀྱི་ལྟ་བ་རྟོགས་ནས་བདག་འཛིན་ཞིག་ཅིང་བདག་མེད་ཀྱི་དོན་དང་འཕྲད་པ་སྟེ། དེ་ལྟར་སུས་བྱེད་པ་དེ་ཐེག་མཆོག་སྙིང་པོ་ལ་ཞུགས་པ་ཡིན་ནོ།།

༡༧༣ ཡ་བྲལ་ཉེས་པ་རྣམ་དྲུག་སྤང་བ་བསྟན་པ།

ཡ་བྲལ་ཉེས་པ་རྣམ་དྲུག་སྤང་བ་ནི།།

བསྟེན་པ་མཚན་ལྡན་བླ་མ་མ་བྲལ་དགོས།།

དེ་དང་བྲལ་ན་ཐར་པའི་ལམ་མི་ཚུད།།

རང་རྒྱུད་བརྟན་པའི་དད་པ་མ་བྲལ་དགོས།།

དེ་དང་བྲལ་ན་ཆོས་ཉིད་ཡུལ་མི་ཕྱིན།།

ཉམས་ལེན་ཟབ་མོའི་གདམས་ངག་མ་བྲལ་དགོས།།

དེ་དང་བྲལ་ན་བྱང་ཆུབ་མྱུ་གུ་མེད།།

སྤྲོས་སྤྱོད་ཐོས་བསམ་ཤེས་རབ་མ་བྲལ་དགོས།།

དེ་དང་བྲལ་ན་ཐེ་ཚོམ་སྒྲོག་མི་ཁྲོལ།།

འདུག་ས་རི་ངོགས་དབེན་པ་མ་བྲལ་དགོས།།

དེ་དང་བྲལ་ན་རྣམ་གཡེང་འདུ་འཛིས་འཁྱེར།།

བརྩོན་འགྲུས་སྙིང་རུས་དམ་བཅའ་མ་བྲལ་དགོས།།

དེ་དང་བྲལ་ན་ཡོན་ཏན་ཐོབ་དུས་མེད།།

དེ་ཡི་ཕྱིར་ན་ཡ་བྲལ་མ་སོང་གཅེས།།

ཞེས་གསུངས་པ་སྟེ། ཡ་བྲལ་ཉེས་པ་རྣམ་དྲུག་སྤང་བ་ནི། བསྟེན་པར་བྱ་བ་མཚན་ལྡན་གྱི་བླ་མ་དམ་པ། མ་མཐའ་ཡང་བསླབ་ལྡན་བྱང་ཆུབ་ཀྱི་སེམས་རྒྱུད་ན་ཡོད་ཅིང་གཞན་ཐར་བའི་ལམ་ལ་འཛུད་མཁས་པ་དེ་ལྟ་བུའི་བླ་མ་དང་མ་བྲལ་བར་དགོས་པ་ལས། དེ་དང་བྲལ་ན་ཐར་པའི་ལམ་ལ་ཡང་དག་པར་ཚུད་ནས་ལམ་གོ་མི་ཆོད་པ་ཡིན། གཞན་ངོས་ནས་བླ་མ་དམ་པ་དང་མ་བྲལ་བས་མ་ཚད་རང་ངོས་ནས་ཀྱང་། རང་རྒྱུད་བརྟན་ཅིང་མི་འགྱུར་བའི་དད་པ་དང་མ་བྲལ་བར་དགོས་པ་ལས་དད་པ་དང་བྲལ་སོང་ན་ཆོས་ཉིད་ཟབ་མོའི་གནད་མི་རྟོགས་པས་ཆོས་ཉིད་ཟབ་མོའི་རང་ཡུལ་གྱི་ཕ་གཞིས་ཀྱི་བཙན་ས་མི་རྙེད་པ་ཡིན། མདོར་ན་དད་པ་མེད་ཚེ་བྱིན་རླབས་མི་འཇུག་པ་དང་། དད་པ་དེའི་ཐོག་ཏུ་ཉམས་ལེན་ཟབ་མོའི་གནད་ཀྱི་གདམས་ངག་དང་མ་བྲལ་བ་ཞིག་དགོས་པ་ལས། གདམས་ངག་དེ་དང་བྲལ་ནས་མེད་ན་བྱང་ཆུབ་མྱུ་གུ་མེད་པ་སྟེ། དད་དང་བརྩོན་འགྲུས་ཡོད་ཀྱང་ཟབ་མོའི་གདམས་ངག་ཡོད་དགོས་མ་གཏོགས་དེ་མེད་ན་བྱང་ཆུབ་ཀྱི་མྱུ་གུ་མེད་ལ། དེ་མེད་དུས་ཐར་བའི་ལོ་འབྲས་ག་ལ་ཡོད་དེ་མེད་དོ། །སྤྲོས་མེད་ཉམས་ལེན་གྱི་གནད་ལ་འབད་པ་ཞིག་ཡིན་ཡང་དང་པོར་སྤྲོས་སྤྱོད་ཐོས་བསམ་གྱི་ཤེས་རབ་དང་མ་བྲལ་བ་ཞིག་དགོས་མ་གཏོགས། ཐོས་བསམ་ཤེས་རབ་དེ་དང་བྲལ་སོང་ན་ཉམས་ལེན་གྱི་སྐབས་སུ་ཐེ་ཚོམ་གྱི་སྒྲོག་མི་ཁྲོལ་བ་དང་། ཆོས་རྣམ་དག་སྒྲུབ་པ་ཞིག་ཡིན་ན་འདུག་ས་དེ་རི་ངོགས་ཀྱི་དབེན་པ་དང་མ་བྲལ་བ་ཞིག་དང་། ཁྱད་པར་དུ་ལས་དང་པོ་བས་མ་བྲལ་བ་ཞིག་དགོས་པ་ལས། གལ་ཏེ་དབེན་པ་དེ་དང་བྲལ་སོང་བ་ཡིན་ན་རྣམ་གཡེང་དང་འདུ་འཛིའི་དབང་དུ་ཤོར་བ་ཡིན། ཆོས་གྲྭ་ཞིག་ནས་ཐོས་བསམ་བྱེད་པའམ་དབེན་པའི་རི་ཁྲོད་ཅིག་ནས་ཉམས་ལེན་བྱས་ན་གྲོགས་བརྩོན་འགྲུས་མེད་ཀྱི་ཐབས་མེད་ཡིན། ཕྱིན་དྲུག་གི་སྤྱོད་པ་ཐམས་ཅད་བརྩོན་འགྲུས་དང་འབྲལ་མི་རུང་བས་བརྩོན་འགྲུས་དང་སྙིང་རུས་བྱེད་དགོས། དེའི་ཐོག་ཏུ་དམ་བཅའ་ཡོད་ན་དེ་ལས་མི་འདའ་བའི་ཕན་པ་ཆེ་བས་དམ་བཅའ་དང་མ་བྲལ་བར་དགོས་པ་ལས་དམ་བཅའ་དེ་དང་བྲལ་ན་ཡོན་ཏན་ཐོབ་དུས་མེད་པ་དེ་ཡི་ཕྱིར་ན་ཡ་བྲལ་དྲུག་གི་དབང་དུ་མ་སོང་བར་གཅེས་སོ།།

༡༧༤ འབྲལ་མེད་བསྟེན་ལ་བདུད་དྲུག་སྤང་བ་བསྟན་པ།

འབྲལ་མེད་བསྟེན་ལ་བདུད་དྲུག་སྤང་བ་ནི།།

བླ་མ་བསྟེན་ལ་གོ་དྲེད་བདུད་མ་ཞུགས།།

དཀོན་མཆོག་བསྟེན་ལ་མ་གུས་བདུད་མ་ཞུགས།།

དགོན་པ་བསྟེན་ལ་བཏང་སྙོམས་བདུད་མ་ཞུགས།།

ཐོས་བསམ་བསྟེན་ལ་སྣ་དྲེད་བདུད་མ་ཞུགས།།

བསམ་གཏན་བསྟེན་ལ་འཕེལ་མེད་བདུད་མ་ཞུགས།།

གཞན་དོན་བསྟེན་ལ་རྣམ་གཡེང་བདུད་མ་ཞུགས།།

དགོས་པར་སྣང་སྟེ་ཉིན་མོའི་སྐར་ཚོགས་བཞིན།།

ཞེས་གསུངས་པ་སྟེ། འབྲལ་མེད་དྲུག་དེ་བསྟེན་ནས་བདུད་དྲུག་སྤང་དགོས་པ་བསྟན་པ་ནི། བླ་མ་བསྟེན་པ་ལ་གོ་དྲེད་ཀྱི་བདུད་དེ། བླ་མ་བསྟེན་ཡུན་རིང་ཆོས་གསུང་ཡུན་རིང་དུས་དེ་ལྟར་ཟེར་བ་ཡིན་དེ་འདྲ་ཟེར་དར་བསམས་པ་ལྟ་བུ་རེད་དུས། རིན་ཆེན་གསེར་གྱི་གླིང་དུ་ཐོན་དུས་གསེར་ལ་རིན་ཐང་མི་བརྩི་བར་འགྲོ་བ་ལྟར་དུ། ཆོས་མང་པོ་གོ་ན་ཆོས་ཇེ་ངན་དུ་སོང་བ་མིན་ཡང་འདེང་ཇེ་ཆུང་དུ་འགྲོ་བ་ནི་རང་རྒྱུད་ཇེ་ཞན་དུ་སོང་ནས་གོ་དྲེད་དུ་སོང་ནས་ཉམས་སུ་མ་བླངས་པའི་སྟོབས་ཀྱིས་ཐ་མར་ཆོས་དྲེད་ཆོས་ཀྱིས་འདུལ་དུ་མེད་པ་འགྱུར་བ་ཡིན་པས་དེ་ལྟ་བུའི་གོ་དྲེད་ཀྱི་བདུད་མ་ཞུགས་པ་དང་། དཀོན་མཆོག་བསྟེན་ནས་དེ་ལ་མ་གུས་པའི་བདུད་མ་ཞུགས་པར་དགོས་པ་སྟེ། གནའ་ཞིག་ལ་པར་དཔོན་ཞིག་གིས། ང་ནི་པར་ཤིང་དག་འདྲིས་ནས་ཡོད་པས་ཉེས་པ་མེད་ཅེས་པར་ཤིང་རྣམས་འགོམ་ཡུག་བྱས་པ་རེད། དེ་ནི་གསུང་རབ་ཀྱི་པར་ཤིང་ཁོ་དང་འདྲིས་ནས་ཡུན་རིང་བའི་དབང་གིས་མ་གུས་པའི་བདུད་ཞུགས་པ་ཡིན། དགོན་པ་བསྟེན་པའམ་དབེན་པ་བསྟེན་པ་ལ་བཏང་སྙོམས་ཀྱི་བདུད་ཐ་མལ་སྙོམ་ལས་སུ་འདུག་པ་དེ་མ་ཞུགས་པ་དང་། དང་པོར་དགོས་སྣང་ཤར་ནས་ཐོས་བསམ་གྱི་གྲལ་དུ་འདུག་ཁུལ་བྱས་ཀྱང་། གཞུང་བཤད་མཁན་ལའང་སྤྱིར་ན་རྣམ་གྲངས་དུ་མ་ཡོད་པ་རེད། ལ་ལས་ནི་སློབ་མའི་རྒྱུད་ཚོད་ལ་དཔག་ནས་ཉམས་ལ་རན་པ་ཞིག་བཤད་པ་དང་། ལ་ལས་མཁས་ཉམས་བཏོད་ནས་སླ་མོ་དཀའ་མོ་རུ་བསྒྱུར་ནས་བཤད་པ་དང་། ཡང་ལ་ལས་ཡས་བཤད་མས་བཤད་མདོ་མདུད་པ་འདི་ཡིན་དེ་ཡིན་མེད་པར་ཁྲིད་པ་ཡང་ཡོད་པ་རེད། ལས་དང་པོ་བ་ཞིག་དེ་འདྲ་ཞིག་ལ་ཐུག་སོང་ཚེ་རྨུས་ནས་ཕྱིས་སུ་ཕྱོགས་དེར་འགྲོ་ཁ་མི་ཉན་པ་ཐོས་པ་ཟེར་དུས་སྣ་བརྫེ་འགྲོ་བའི་སྣ་དྲེད་ཀྱི་བདུད་མ་ཞུགས་པ་དང་། བསམ་གཏན་བསྟེན་ནས་ལོ་གཅིག་བསྒོམས་ཀྱང་དེ་དང་དེ། གཉིས་ལ་བསྒོམས་ཀྱང་དེ་དང་དེ། ཞག་ཉི་མའི་ཟླ་གྲངས་བརྩི་རྒྱུ་ཡོད་ཀྱང་། ཉམས་རྟོགས་པའི་ཐད་ནས་སྙིང་རྗེ་ཇེ་ཆེ་མ་དགོས་ངེས་འབྱུང་ཙམ་ཡང་སྐྱེ་མེད་པའི་འཕེལ་མེད་ཀྱི་བདུད་མ་ཞུགས་པ་དང་། གཞན་དོན་ཆོས་བཤད་པ་དང་དབང་རྒྱུན་ལུང་རྒྱུན་རེ་སྤེལ་ཁུལ་བྱས་ཀྱང་། གཞན་གྱི་བཀུར་བསྟི་ལ་སོགས་པ་ལ་བསྟེན་ནས་གཡེང་བ་ཤོར་ན་རྐྱེན་དབང་ལ་ཤོར་བ་ཡིན་པས་དེ་འདྲའི་རྣམ་གཡེང་གི་བདུད་མ་ཞུགས་པ་སྟེ་དེ་དག་དགོས་པར་སྣང་སྟེ་འོན་ཀྱང་ཚང་བ་ནི་ཉིན་མོའི་སྐར་ཚོགས་བཞིན་དཀོན་པའོ།།

༡༧༥ བསླབ་པའི་མཐའ་དྲུག་འགྲོགས་པར་བསྟན་པ།

བསླབ་པའི་མཐའ་དྲུག་འགྲོགས་པར་བསྟན་པ་ནི།།

ཕུ་ཐག་འཁྲུས་པའི་ལྟ་བ་མཆོག་དང་འགྲོགས།།

དེ་མེད་ཆོས་ཉིད་ནམ་འཕང་ཆོད་མི་ནུས།།

གཞི་རྟེན་བསླབ་གསུམ་དམ་ཚིག་གཙང་དང་འགྲོགས།།

དེ་མེད་འདོད་པའི་དངོས་གྲུབ་ཐོབ་མི་ནུས།།

དུས་ཚོད་ཤེས་པའི་སྤྱོད་པ་མཆོག་དང་འགྲོགས།།

དེ་མེད་འཁོར་བའི་ཕ་རོལ་སྒྲོལ་མི་ནུས།།

ཉམས་ལེན་རང་བྱུང་ཡེ་ཤེས་གདེང་དང་འགྲོགས།།

དེ་མེད་གཟུང་འཛིན་ཉོན་མོངས་གདོས་མི་ཆོད།།

ཉམས་མྱོང་གོང་འཕེལ་བོགས་འབྱིན་རྩལ་སྦྱོང་འགྲོགས།།

དེ་མེད་ཉོན་མོངས་གཡུལ་ངོ་བཟློག་མི་འགྱུར།།

ཟབ་མོའི་མན་ངག་ཕྱོགས་མེད་ཀུན་དང་འགྲོགས།།

དེ་མེད་གང་དགོས་འདོད་པའི་དོན་མི་འགྲུབ།།

དེ་ཕྱིར་ཡང་དག་སྙིང་པོའི་དོན་འདིར་བསླབ།།

ཅེས་གསུངས་པ་སྟེ། བསླབ་པའི་མཐའ་དྲུག་འགྲོགས་པར་བསྟན་པ་ནི། ཕུ་ཐག་འཁྲུས་པའམ་ཆོད་པའི་ཐེ་ཚོམ་མེད་པའི་ལྟ་བ་མཆོག་དང་འགྲོགས་དགོས་ལ། གལ་སྲིད་དེ་མེད་ཚེ་ཆོས་ཉིད་ནམ་འཕང་ཆོད་མི་ནུས་པས་ལྟ་བའི་གཤོག་རྩལ་ནང་ནས་རྫོགས་ན་ཆོས་ཉིད་ཀྱི་ནམ་འཕང་གཞི་ནས་གཅོད་ནུས་པ་ཡིན། ཡོན་ཏན་ཀུན་གྱི་གཞི་རྟེན་ཚུལ་ཁྲིམས་དང་ཏིང་འཛིན་ཤེས་རབ་ཀྱི་བསླབ་པ་གསུམ་པོ་དག་དང་། གསང་སྔགས་ཀྱི་དམ་ཚིག་གཙང་མ་དང་འགྲོགས་པར་གལ་ཆེ་བ་སྟེ། དེ་མེད་ན་འདོད་པའི་དངོས་གྲུབ་ཐོབ་པ་མི་ནུས་པ་དང་། སྤྱོད་པ་དུས་ཚོད་དང་བསྟུན་དགོས་པས་དུས་ཚོད་ཤེས་པའི་སྤྱོད་པ་མཆོག་དང་འགྲོགས་དགོས་པ་སྟེ། སྤྱོད་པ་དེ་ལ་ཡང་། དགེ་སྦྱོང་ཁྲིམས་ལྡན་གྱི་སྤྱོད་པ། རྒྱལ་པོ་ས་འཛིན་གྱི་སྤྱོད་པ། འཁོར་འདས་རུ་ཤན་གྱི་སྤྱོད་པ། བརྟུལ་ཞུགས་ལམ་སློང་གི་སྤྱོད་པ། སྣང་བ་དབང་སྒྱུར་གྱི་སྤྱོད་པ་ལ་སོགས་པ་མདོ་སྔགས་གང་གི་སྐབས་སུ་ཡང་སྤྱོད་པ་མང་པོ་གསུངས་ཡོད་པ་དེ་དག་དུས་ལ་བབས་པ་དེ་བྱེད་པ་ལས། འཕུར་བ་ཡིན་ཞེས་བྲག་འགོ་ནས་མར་གཤོག་ལྷབ་བྱས་ཀྱང་འཕུར་བ་མིན་པ་ལྕེབས་པའི་གྲལ་དུ་མ་གཏོགས་འགྲོ་ས་མེད་པས་དུས་ཚོད་དང་བསྟུན་པར་གྱིས། སྤྱོད་པ་མཆོག་དེ་མེད་ན་འཁོར་བའི་རྒྱ་མཚོའི་ཕ་རོལ་དུ་བསམས་པ་བཞིན་དུ་སྒྲོལ་མི་ནུས་པ་དང་། ཉམས་ལེན་ནི་གསར་དུ་ག་ཤེད་ནས་བཙལ་མི་དགོས་པར། རང་ལ་ཡེ་ནས་ཡོད་པའི་རང་བྱུང་ཡེ་ཤེས་རང་ངོ་ཤེས་པའི་གདེང་དེ་དང་འགྲོགས་ཤེས་པར་དགོས་པ་ལས། དེ་ལྟར་མིན་ཚེ་གཟུང་འཛིན་དང་ཉོན་མོངས་ཀྱི་གདོས་སམ་འཆིང་ཐག་མི་ཆོད་པ་དང་། ཉམས་མྱོང་གོང་འཕེལ་གྱི་ཆེད་དུ་བོགས་འབྱིན་ནམ་སྐྱེད་རྒྱག་སྤྱད་ཀྱི་རྩལ་སྦྱོང་དང་འགྲོགས་དགོས་པ་ལས། བོགས་འབྱིན་དེ་མེད་ན་རྐྱེན་དང་ཐུག་དུས་ཉོན་མོངས་ཀྱི་གཡུལ་ངོ་བཟློག་པར་མི་འགྱུར་པ་དང་། ཟབ་མོའི་མན་ངག་ཕྱོགས་མེད་ཀུན་དང་འགྲོགས། ཞེས་པ་ནི་ཆོས་བརྒྱུད་འདྲ་དང་མི་འདྲའི་གདམས་ངག་འདྲ་དང་མི་འདྲའི་འདྲ་མ་འདྲེས་སུ་གྱིས་ཤིག་ཅེས་པའི་དོན་མིན་པར། ཆོས་གང་ཞུས་ཀྱི་གཙོ་བོ་རང་གི་གང་ཉམས་སུ་ལེན་པའི་ཆོས་དང་གདམས་ངག་དེའི་ནང་དུ། གདམས་ངག་ཐམས་ཅད་ཚང་བ། ཉམས་མྱོང་དང་ལག་ལེན། གེགས་སེལ་དང་བོགས་འབྱིན། ལྟ་སྒོམ་དང་སྤྱོད་འབྲས་ཀྱི་གནད་ཐམས་ཅད་ཚང་ཐུབ་པ་དང་ཚང་ཡོད་པའི་གཅིག་འདུས་པ་ཞིག་དགོས་ཞེས་པའི་དོན་ཡིན་པས། དེ་ལྟར་དགོས་པ་ལས། མན་ངག་ཆ་ཚང་བའི་གནད་དེ་མེད་ན་གནད་གཅིག་གི་ཕྱོགས་ནས་ཤེས་ཀྱང་། གཞན་གཅིག་ལ་ཐུག་དུས་དེར་ཐོགས་ནས་གང་དགོས་ཀྱི་འདོད་པའི་དོན་མི་འགྲུབ་པ་ཡིན་པ་དེའི་ཕྱིར་ཡང་དག་སྙིང་པོའི་དོན་འདིར་བསླབ་དགོས་སོ།།

༡༧༦ གཙོ་བོ་རྣམ་དྲུག་གདམས་ངག་བསྟན་པ།

གཙོ་བོ་རྣམ་དྲུག་གདམས་ངག་བསྟན་པ་ནི།།

འདུག་སའི་གཙོ་བོར་རི་ངོགས་དབེན་པ་བསྟེན།།

དེ་ལས་གཞན་དུ་ཡུལ་འཁོར་སྡུག་བསྔལ་རྒྱུ།།

ལམ་གྱི་གཙོ་བོར་བླ་མ་སངས་རྒྱས་ཁུར།།

དེ་ལས་གཞན་དུ་ལམ་རྟགས་རྟེན་འབྲེལ་འཆུགས།།

དམ་ཚིག་གཙོ་བོར་གང་ཡང་ཟུང་འཇུག་གཅེས།།

དེ་ལས་གཞན་དུ་ཡ་བྲལ་དོན་མི་འགྲུབ།།

ཉམས་རྟོགས་གཙོ་བོར་རྣམ་རྟོག་ཡེ་ཤེས་བསྒྱུར།།

དེ་ལས་གཞན་དུ་སྤང་བྱའི་དཔུང་མི་ཆོམ།།

འདུ་ཤེས་གཙོ་བོར་འཁོར་བའི་ཞེན་པ་བཟློག།

དེ་ལས་གཞན་དུ་ཚེ་འདིའི་དབང་དུ་འཆོར།།

ལྟ་བའི་གཙོ་བོར་རྟོགས་མཁན་རང་ངོ་གྲོལ།།

དེ་ལས་གཞན་དུ་རྟག་ཆད་མཐའ་མི་གྲོལ།།

འདི་དག་གཅེས་པའི་མཛོད་ཡིན་གུས་པར་ཟུངས།།

ཞེས་གསུངས་པ་སྟེ། གཙོ་བོ་རྣམ་དྲུག་གདམས་ངག་བསྟན་པ་ནི། ཐར་ལམ་བྱང་ཆུབ་སྒྲུབ་པ་མ་གཏོགས་བསམ་རྒྱུ་མེད་པ་ཞིག་གིས་འདུག་སའི་གཙོ་བོ་དེ་རི་ངོགས་དབེན་པ་ལ་བསྟེན་དགོས། དབེན་པ་དེ་ལས་གཞན་དུ་ཡུལ་འཁོར་གྲོང་དང་གྲོང་ཁྱེར་ལ་སོགས་པ་གང་དུ་བསྡད་ཀྱང་སྡུག་བསྔལ་གྱི་རྒྱུ་རྐྱེན་ཡིན། ལམ་གྱི་གཙོ་བོར་བླ་མ་ལ་སངས་རྒྱས་དངོས་མཐོང་གི་དད་པས་སྤྱི་བོའི་གཙུག་ཏུ་ཁུར་ནས་གུས་ཤིང་འདུད་པའི་ཚུལ་གྱིས་བསྟེན་དགོས། དེ་ལས་གཞན་དུ་གྱུར་པའི་ལམ་ཞིག་བཙལ་དུ་ཕྱིན་ན་ལམ་རྟགས་ཀྱི་རྟེན་འབྲེལ་མགོ་ནས་འཆུགས་སོང་བ་ཡིན། དམ་ཚིག་གི་གཙོ་བོར་གཉིས་འཛིན་ཕྱོགས་རེར་ཞེན་པའི་འཆིང་བ་སྤངས་ནས་གང་ཡང་ཟུང་དུ་འཇུག་པའི་མཉམ་པའི་རང་བཞིན་ཆེ་ཆུང་མཐོ་དམན་ཡངས་དོག་དང་བྲལ་བར་ཤེས་པ་དེ་ཉིད་གཅེས་པ་ཡིན། དེ་ལས་གཞན་དུ་གཉིས་འཛིན་ཐམས་ཅད་ཡ་བྲལ་ཡིན་པས་འདོད་དོན་མི་འགྲུབ། ཉམས་རྟོགས་ཀྱི་གཙོ་བོར་རྣམ་རྟོག་ཡེ་ཤེས་སུ་འཆར་དགོས་པས་དེར་བསྒྱུར་ནས་འགྱུར་ཐུབ་དགོས། དེ་ལས་གཞན་དུ་སྤང་གཉེན་དགྲ་ཕྱོགས་ཀྱི་འཐབ་འཛིང་བྱེད་དགོས་ན་ཕ་རོལ་ཉོན་མོངས་ཀྱི་དཔུང་ཚོགས་མི་ཆོམ་པ་ཡིན། འདུ་ཤེས་ཐམས་ཅད་ཀྱི་གཙོ་བོར་འཁོར་བའི་ཞེན་པ་ཟློག་བྱེད་དེ་ལ་འབད་དགོས། བཅོམ་ལྡན་འདས་ཀྱིས། དཔེར་ན་རྗེས་རྣམས་ཀྱི་ནང་ནས་གླང་པོ་ཆེའི་རྗེས་མཆོག་ཡིན་ནོ། །དེ་བཞིན་དུ་ནང་པ་སངས་རྒྱས་པའི་སྒོམ་པའི་འདུ་ཤེས་ཐམས་ཅད་ཀྱི་ནང་ནས་མི་རྟག་པ་སྒོམ་པའི་འདུ་ཤེས་ཁོ་ན་མཆོག་ཡིན་ནོ། །ཞེས་གསུངས་པས། དེ་ལས་གཞན་དུ་ཆོས་བརྒྱད་ཚེ་འདིའི་དབང་དུ་འཆོར་བ་ཡིན། དེ་ལ་ཆོས་བརྒྱད་རགས་པ་དེ་ཆོས་པ་ཞིག་གིས་དང་པོ་ཉིད་ནས་སྤོང་ཐུབ་དགོས། ཕྲ་བ་སྤོང་མི་དགོས་སམ་ཞེ་ན་མིན་ཡང་། ཕྲ་བ་བག་ཆགས་ཀྱི་ཆ་དང་བཅས་པ་དེ་ལམ་ངེས་ཅན་ཞིག་ལ་མ་ཐོན་ཚེ་དཀའ་བ་ཡིན། ལྟ་བའི་གཙོ་བོར་རྟོགས་མཁན་རང་ངོ་ནས་གྲོལ་དགོས། དེ་ལས་གཞན་དུ་ལྟ་བྱ་ཕྱི་རོལ་དུ་བཟུང་ན་རྟག་ཆད་ཀྱི་མཐའ་ལས་མི་གྲོལ་བ་ཡིན་པས། ཀུན་མཁྱེན་ཉིད་ཀྱིས། ལྟ་བ་མ་བལྟ་ལྟ་མཁན་མཁན་པོ་ཚོལ། །ལྟ་མཁན་ཁོ་རང་བཙལ་བས་མ་རྙེད་ན། །དེ་ཚེ་ལྟ་བ་ཟད་སར་སྐྱོལ་བ་ཡིན། །ལྟ་བའི་ཕུགས་ཀྱང་དེ་ཀ་རང་ལ་ཐུག །ཅེས་དང་གུ་རུ་རིན་པོ་ཆེ་ཉིད་ཀྱིས་ཀྱང་དེ་ལྟར་གསུངས་ཡོད། འདི་དག་གཅེས་པའི་མཛོད་ཡིན་པས་གུས་པར་གཟུང་དགོས་སོ།།

༡༧༧ ཤུགས་ཀྱིས་འགྲུབ་པའི་ཆོས་དྲུག་བསྟན་པ།

ཤུགས་ཀྱིས་འགྲུབ་པའི་ཆོས་དྲུག་བསྟན་པ་ནི།།

བྱ་བ་བཏང་ན་དགེ་སྦྱོར་ཤུགས་ཀྱིས་འགྲུབ།།

བསླབ་གསུམ་གཙང་ན་དམ་ཅན་ཤུགས་ཀྱིས་འདུ།།

སྙིང་རྗེ་འབྱོངས་ན་འགྲོ་དོན་ཤུགས་ཀྱིས་འབྱུང༌།།

བསྙེན་སྒྲུབ་ཐེམ་ན་འཕྲིན་ལས་ཤུགས་ཀྱིས་འབྱུང༌།།

ལྷུག་པར་གློད་ན་ཆོས་ཉིད་ཤུགས་ཀྱིས་མཐོང༌།།

མཆོག་ཉིད་བསྒྲུབས་ན་ཐུན་མོང་ཤུགས་ཀྱིས་འགྲུབ།།

ཅེས་གསུངས་པ་སྟེ། རང་ཤུགས་ཀྱིས་འགྲུབ་པའི་ཆོས་དྲུག་བསྟན་པ་ནི། འཇིག་རྟེན་གྱི་བྱ་བ་བློས་བཏང་ཡོད་ན། དེའི་ཤུལ་དུ་དགེ་སྦྱོར་སྒྲུབ་པ་མ་གཏོགས་ལུས་མེད་པས་དགེ་སྦྱོར་རང་ཤུགས་ཀྱིས་འགྲུབ་པ་དང་། བསླབ་པ་གསུམ་གྱི་ཉམས་ལེན་རང་བློ་ཁེལ་བ་ཞིག་གཙང་ན། དམ་ཅན་སྲུང་མ་རང་ཤུགས་ཀྱིས་འདུ་བ་ཡིན། ཆོས་སྐྱོང་དམ་ཅན་སྲུང་མ་རྣམས་ནི་རྔ་དྲག་བརྡུང་བྱས་པས་འཁོར་བ་མིན་ལ། གྲངས་མང་པོ་གསོག་ཀྱང་འདུ་བ་མ་ཡིན། ཆོས་སྐྱོང་གཙོ་བོ་མི་འཁོར་བའི་སྟེང་དུ་འཁོར་འཇིག་རྟེན་པའི་དྲེགས་པ་རང་རྒྱུད་པ་དང་ཕྲད་ནས། སྒྲུབ་པ་པོའི་རྒྱུད་ཁྲོ་ལིང་ངེ་གདུག་རྩུབ་ཆེ་ཤར་རེར་འགྲོ་བ་ཡང་ཡིན་པས་བསླབ་གསུམ་གཙང་ཞིང་དམ་ཚིག་སྲོག་དང་བསྡོས་ནས་བླ་མའི་བཀའ་བཞིན་བསྒྲུབས་ཏེ། གཞན་དོན་ལྷུར་ལེན་བྱེད་པ་ཞིག་དགོས་པ་ཡིན། དེའི་དུས་སུ་དམ་ཅན་སྲུང་མ་ཐམས་ཅད་རང་འཁོར་དུ་ཡོང་བ་ཡིན། དེ་དུས་སོད་ཤོག་ཁྱེར་ཤོག་ཟེར་དགོས་པ་ཡང་མིན། དེ་ལས་གཞན་དུ་དེ་ལྟར་བོས་ན་དྲག་པོའི་སྐུལ་མ་རང་གིས་རང་ལ་བཏོན་པ་ལྟ་བུ་ཡང་འགྱུར་བ་ཡིན་པས་གཟབ་དགོས་སོ། །སྙིང་རྗེ་འབྱོངས་བའི་ཚད་ནི་སྡུག་བསྔལ་བའི་སེམས་ཅན་མཐོང་ཚེ་སྙིང་རྗེའི་ཤུགས་ཀྱིས་མིག་ནས་མཆི་མ་ཡོང་བ་ཞིག་དགོས་པ་ཡིན། དེའི་དུས་སུ་སྙིང་རྗེ་འབྱོངས་པ་རྟགས་ཡིན་གསུངས་ཡོད། འོན་ཀྱང་ང་ལ་དེ་འདྲ་མི་འདུག་པས་འགྲོ་དོན་མི་འབྱུང་ངོ་བསམ་མི་དགོས། ཆེ་ན་ཆེ་བའི་ཚོད་དང་། ཆུང་ན་ཆུང་བའི་ཚོད། དཔེར་ན་རང་གི་ཕ་མ་ཉེ་འབྲེལ་ལ་སྡུག་པོ་བྱུང་ན་སྙིང་རྗེ་སྐྱེ་ངེས། དེ་གཅན་གཟན་གཏུམ་པོ་དག་ལ་ཡང་ཡོད་པ་ཡིན། ནམ་ཞིག་དེ་ནར་སོན་ནས་ཉམ་ཐག་སུ་ཞིག་མཐོང་ཡང་ཐམས་ཅད་ལ་སྙིང་རྗེ་སྐྱེས་ན་འགྲོ་དོན་ཤུགས་ཀྱིས་འབྱུང༌བ་ཡིན། དེས་ན་རང་གིས་ཀྱང་སྙིང་རྗེ་སྒོམ། གཞན་ལ་ལ་ཡང་སྙིང་རྗེའི་ཕན་ཡོན་བཤད་ནས་སྙིང་རྗེ་སྒོམ་དུ་འཇུག་པ་དང་། སྙིང་རྗེ་རང་གིས་བསྒོམས་ནས་ཤན་པའི་ལག་ནས་སེམས་ཅན་གཅིག་གི་སྲོག་བླུ་བ་དང་། ནད་པ་བདག་མེད་ལ་སྨན་བཅོས་ཀྱི་རོགས་ཙམ་བྱས་ནའང་འགྲོ་དོན་དང་གཞན་ཕན་ཡིན། ཆུང་ས་ནས་སྦྱོང་སྟེ་ཆེ་སར་ཐོན་དགོས་པ་ལས་ཐོག་མ་ཉིད་ནས་ཕུན་སུམ་ཚོགས་པ་ཞིག་སུ་ལའང་ཡོད་པ་མིན། བསྙེན་སྒྲུབ་བསྐྱེད་རྗོགས་ཀྱི་གྲངས་ཐེངས་ན་འཕྲིན་ལས་རྣམ་བཞི་གང་དགོས་ཀྱང་རང་བཞིན་ཤུགས་ཀྱིས་འབྱུང༌བ་དང་། རྫོགས་ཆེན་སྒོམ་པའི་གནས་སྐབས་ན་རང་བབས་ཤུགས་འབྱུང་དུ་ལྷུག་པར་གློད་ན་ཆོས་ཉིད་རང་ཤུགས་ཀྱིས་མཐོང༌བ་དང་། མཆོག་གི་དངོས་གྲུབ་དེ་ཉིད་བསྒྲུབས་ནས་གྲུབ་ན་ཐུན་མོང་གི་དངོས་གྲུབ་རང་ཤུགས་ཀྱིས་འགྲུབ་པ་རྒྱལ་པོ་དབང་དུ་འདུ་ན་འཁོར་འབངས་རང་ཤུགས་ཀྱིས་འདུ་བ་ལྟ་བུའོ།།

༡༧༨ མང་བ་དྲུག་ཏུ་མ་སོང་ཆོས་དྲུག་བསྟན་པ།

མང་བ་དྲུག་ཏུ་མ་སོང་ཆོས་དྲུག་ནི།།

ཞེན་པ་མ་ལོག་འདི་བར་འཁྱོག་པ་མང༌།།

ཤེས་བྱ་མི་སྒྲུབ་ཐ་མལ་ཤི་བ་མང༌།།

གཉེན་པོ་མ་བསྟེན་བསླབ་གསུམ་རལ་བ་མང༌།།

ཐོས་བསམ་མ་བྱས་སྒོམ་པ་གོལ་བ་མང༌།།

རྒྱུ་འབྲས་ཁྱད་གསོད་ངན་སོང་ལྟུང་བ་མང༌།།

འདུ་འཛི་བདུད་ཀྱིས་སྒྲུབ་པ་བསླུས་པ་མང༌།།

མང་པོའི་གསེབ་དེར་བདག་ཉིད་མ་སོང་འཚལ།།

ཞེས་གསུངས་པ་སྟེ། མང་བ་དྲུག་ཏུ་མ་སོང་ཆོས་དྲུག་ནི། ཆོས་བརྒྱད་ལ་ཞེན་པ་གདིང་ནས་མ་ལོག་ན་ཚེ་འདི་བར་འཁྱོགས་ནས་དོན་མེད་ཚེ་འདིའི་དབང་ཤུགས་ལ་འགྲོ་བ་མང༌བ་དང་། ཤེས་བྱ་ཡོན་ཏན་མི་སྒྲུབ་ནས་ཐོས་པ་མ་བསྟེན་ན་ཅི་ཡང་མི་ཤེས་ནས་ཐ་མལ་དུ་ཁྱི་ཤི་བ་ལྟར་འགྲོ་བ་མང༌བ་དང་། གཉེན་པོ་མ་བསྟེན་ནས་དུག་རང་གར་ཤོར་ན་བསླབ་གསུམ་སྒྲུབ་པའི་མགོ་མ་ཐོན་ནས་རལ་བ་མང༌བ་དང་། ཐོས་པ་མ་རིག་མུན་སེལ་སྒྲོན་མེ་ཡིན། །ཞེས་སོགས་གསུངས་པས་ཐོས་བསམ་མ་བྱས་ན་གནད་མི་ཤེས་ཤིང་། གནད་མ་ཤེས་ཚེ་སྒོམ་པ་གོལ་ནས་ཕྱིན་ཅི་ལོག་ཏུ་སོང་བ་མང༌བ་དང་། རྒྱུ་འབྲས་ཁྱད་གསོད་བྱས་ནས་མ་བསྲུངས་ཚེ་ངན་སོང་དུ་ལྟུང་བ་མང༌བ་དང་། བདུད་ཀྱི་ལས་མང་རབ་ཡོད་པ་ལས་འདུ་འཛིའི་བདུད་ཀྱིས་སྒྲུབ་པ་བསླུས་པ་མང༌བ་སྟེ། དེ་ལྟར་མང་པོའི་གསེབ་དེར་བདག་ཉིད་མ་སོང་བར་འཚལ་ལོ།།

༡༧༩ ཡིན་པ་དྲུག་གིས་བདུད་ལས་རྒྱལ་བ་བསྟན་པ།

ཡིན་པ་དྲུག་གིས་བདུད་ལས་རྒྱལ་བ་ནི།།

སྐུལ་འདེབས་ཡེངས་མེད་ཡིན་ནོ་ལེ་ལོའི་བདུད་མ་བསྐུར།།

བློ་སྦྱོང་གཞན་གཅེས་ཡིན་ནོ་རང་འདོད་བདུད་མ་བསྐུར།།

གནས་ལུགས་ཐག་ཆོད་ཡིན་ནོ་ཐེ་ཚོམ་བདུད་མ་བསྐུར།།

ཉམས་ལེན་མཐའ་བྲལ་ཡིན་ནོ་ཕྱོགས་རིས་བདུད་མ་བསྐུར།།

སྒྲུབ་པ་གནད་སྣུན་ཡིན་ནོ་ཁ་འབྱམས་བདུད་མ་བསྐུར།།

དགོངས་པ་མཐའ་གྲོལ་ཡིན་ནོ་གྲུབ་མཐའི་བདུད་མ་བསྐུར།།

ཞེས་གསུངས་པ་སྟེ། ཡིན་པ་དྲུག་གིས་བདུད་ལས་རྣམ་པར་རྒྱལ་བའི་ཐབས་ནི། སྐུལ་འདེབས་ཀྱི་ནང་ནས་མཆོག་ནི་ཡེངས་མེད་ཡིན་ནོ་གཡེང་བ་ལེ་ལོའི་བདུད་ལ་མ་བསྐུར་བར་རང་རང་ལ་སྐུལ་འདེབས་གྱིས། བློ་སྦྱོང་གི་མཆོག་གཞན་གཅེས་ཡིན་ནོ་དེ་རང་འདོད་ཀྱི་བདུད་ལ་མ་བསྐུར། གནས་ལུགས་ཀྱི་མཆོག་རང་ངོ་ཤེས་ནས་ཐག་ཆོད་པ་ཡིན་ནོ་དེ་ཐེ་ཚོམ་གྱི་བདུད་ལ་མ་བསྐུར། ཉམས་ལེན་གྱི་གདིང་མཐའ་བྲལ་ཡིན་ནོ་དེ་ཕྱོགས་རིས་ཀྱི་བདུད་ལ་མ་བསྐུར། སྒྲུབ་པ་གནད་ལ་བསྣུན་དགོས་པ་ཡིན་ནོ་དེ་གནད་ལ་མ་ཁེལ་བའི་ཁ་བཤད་ཁ་འབྱམས་ཀྱི་བདུད་ལ་མ་བསྐུར། ཆོས་སྐུའི་དགོངས་པ་མཐའ་གྲོལ་ཡིན་ནོ་སྤྲོས་པ་ཅན་གྱི་གྲུབ་མཐའི་བདུད་ལ་མ་བསྐུར། །དེ་རིང་དགོངས་པ་མཐའ་གྲོལ་ཡིན་ནོ་གྲུབ་མཐའི་བདུད་མ་བསྐུར། ཞེས་པ་འདིར་འཇོག་རྒྱུ་བྱེད། འདིའི་མཚམས་འདིར་བསྟན་པ་བུ་གཅིག་གི་རྒྱུད་ཀྱི་ལུང་འདོན་དགོས་ས་ཡོད། སྔོན་ཆོད་ཤྲཱི་སེང་ནས་སྙིང་ཐིག་ཡ་བཞིའི་དབང་ལུང་གཉིས་ཀ་བླ་མ་རྟོགས་ལྡན་ཚང་གིས་འདོན་དགོས་གསུངས་ནས་བཏོན་པ་ཡིན། རྙིང་པ་དག་གིས་ཐོབ་ཡོད་ས་ཡོད། བསྟན་པ་བུ་གཅིག་གི་རྒྱུད་འདི་དངོས་གཞིའི་ཉམས་ལེན་པ་དག་གིས་ཆགས་མེད་དུ་ཞལ་འདོན་མཛོད། ད་རུང་ལུས་ལ་འཆང་རྒྱུ་ཡང་གནད་ཆེ་བ་དང་། དེ་བཞིན་དུ་བཏགས་གྲོལ་གྱི་དབང་ཐོབ་རྒྱུ་ཡང་གལ་ཆེའོ།།

Notes

[←1]

ལྷམ་ཀྲད་ལ་ཚུགས་འདོན་པའི་དོན།