ཉིན་དང་པོའི་བདེ་ཆེན་ཞིང་གི་སྨིན་ཁྲིད།
གྲུབ་དབང་རྫོགས་ཆེན་པའི་ཕྱག་སྲོལ་ནར་མའི་མཆོད་བརྗོད།
དུས་གསུམ་སངས་རྒྱས་ཐམས་ཅད་ཀྱི་ངོ་བོ། རིགས་དང་དཀྱིལ་འཁོར་རྒྱ་མཚོའི་ཁྱབ་བདག བཀའ་དྲིན་མཚུངས་ཟླ་མ་མཆིས་པ་དྲིན་ཆེན་དཔལ་མགོན་རྩ་བའི་བླ་མ་རིན་པོ་ཆེའི་ཞབས་ཀྱི་རྡུལ་དྲི་མ་མེད་པ་ལ་མགོ་བོས་རབ་ཏུ་བཏུད་དེ་གུས་པས་ཕྱག་འཚལ་ཞིང་སྐྱབས་སུ་མཆིའོ། །བདག་གཞན་སེམས་ཅན་ཐམས་ཅད་ཀྱི་རྒྱུད་བྱིན་གྱིས་བརླབ་ཏུ་གསོལ། གང་གི་ཞལ་བཟང་བལྟ་བས་མི་ངོམས་གེ་སར་འཛུམ་པའི་མདངས་བཀྲ་ཞིང་། །མཚན་དཔེའི་གཟི་འོད་ཟེའུ་འབྲུ་གསལ་བས་འགྲོ་ཀུན་མིག་གི་བདུད་རྩིར་གྱུར། །ཐུགས་རྗེ་འདབ་མ་ཀུན་ནས་དཀྱུས་རིང་འཇིག་རྟེན་གསུམ་གྱི་ཁོངས་ཁྱབ་པའི། །ཐུབ་དབང་པདྨ་དཀར་པོའི་ཞབས་པད་དེ་རིང་བདག་བློའི་ཡིད་མཚོར་སྐྱོངས། །བདེ་བ་ཅན་ན་འོད་དཔག་མེད་དེ་རི་བོ་ཏ་ལར་སྤྱན་རས་གཟིགས། །འཛམ་བུའི་གླིང་དུ་པདྨ་རྒྱལ་པོ་འགྲོ་ལ་ཐ་དད་སྣང་གྱུར་ཀྱང་། །སྐུ་གསུམ་མཛད་པའི་ངོ་བོ་གཅིག་བསྡུས་དཔལ་ལྡན་སངས་རྒྱས་པདྨ་སྐྱེས། །གངས་ལྗོངས་འགྲོ་ལ་ལྷག་པར་བརྩེ་བའི་ཐུགས་བརྩེའི་འོད་ཟེར་ཅན་ལ་འདུད། །འཛམ་གླིང་མཛེས་པའི་རྒྱན་དྲུག་མཆོག་གཉིས་དང་། །ཐུགས་རྗེ་ལུང་རྟོགས་མཉམ་པའི་མཐུ་མངའ་ཡང་། །ནགས་ཁྲོད་དམ་པར་སྦས་པའི་བརྟུལ་ཞུགས་ཅན། །འཁོར་འདས་ཆོས་སྐུར་རྟོགས་པའི་ཀློང་ཆེན་པ། །དྲི་མེད་འོད་ཟེར་ཞབས་ལ་གསོལ་བ་འདེབས། །ཤེས་བྱ་ཀུན་མཁྱེན་འགྲོ་ལ་རྗེས་བརྩེའི་གཏེར། །དྲི་མེད་འོད་ཟེར་ཡང་སྤྲུལ་ཐུགས་གཏེར་མཛོད། །འོད་གསལ་ཀློང་ཆེན་ནམ་མཁའི་རྣལ་འབྱོར་པ། །འཇིགས་མེད་གླིང་པའི་ཞབས་ལ་གསོལ་བ་འདེབས། །བརྒྱུད་གསུམ་བྱིན་ཐོབ་དགོངས་པའི་རྩལ་ཆེན་རྫོགས། །སྣང་བཞི་མཐར་ཕྱིན་ཆོས་སྐུའི་རྒྱལ་སྲིད་བརྙེས། །གདོད་མའི་མགོན་པོ་མི་ཡི་རྫུར་ཞུགས་པ། །འཇིགས་མེད་ཡོན་ཏན་མགོན་པོར་གསོལ་བ་འདེབས། །དགོངས་བརྒྱུད་རྟོགས་པ་འཕོ་བར་བྱིན་གྱིས་རློབས། །ཧྲཱིཿ འོག་མིན་ཆོས་ཀྱི་དབྱིངས་ཀྱི་ཕོ་བྲང་ན། །དུས་གསུམ་སངས་རྒྱས་ཀུན་གྱི་ངོ་བོ་ཉིད། །རང་སེམས་ཆོས་སྐུར་མངོན་སུམ་སྟོན་མཛད་པ། །རྩ་བའི་བླ་མ་མཆོག་ལ་གསོལ་བ་འདེབས། །བདག་གཞན་འགྲོ་བའི་བློ་སྣ་ཆོས་ལ་སྒྱུར། །གང་ཞིག་གསེར་མཆོག་རང་བཞིན་རི་རབ་ལ་གནས་མནྡཱ་ར་དང་ལྷར་བཅས་གནོད་སྦྱིན་དང་། །གདེངས་ཀ་ནོར་བུའི་འོད་ཀྱིས་མུན་པ་སེལ་མཛད་ས་འོག་གནས་པའི་ཀླུ་རྣམས་གང་ཡིན་དང་། །གངས་ཅན་རིར་ནི་དཔལ་གྱིས་རོལ་ཞིང་རབ་ཏུ་དགའ་བའི་རིག་པ་འཛིན་པ་གང་ཡིན་པ། །དེ་དག་ཐམས་ཅད་ཐར་བ་དམ་པའི་སྒོར་གྱུར་ཐུབ་པའི་གསུང་ཉན་ཕྱིར་ན་འདིར་གཤེགས་ཤིག །གང་དག་ཕྱོགས་བཅུའི་སྟོང་གི་འཇིག་རྟེན་ན། །བདེ་གཤེགས་སློབ་མར་གྱུར་པ་གང་སུ་དག །དེང་འདིར་དམ་པའི་ཆོས་ཀྱི་ཆར་འབེབས་ཀྱིས། །གསན་པར་འདོད་པ་ཐམས་ཅད་འདིར་གཤེགས་ཤིག །ནམ་མཁའི་མཐས་གཏུགས་འཇིག་རྟེན་ཐམས་ཅད་ན། །ལྷ་ཀླུ་གནོད་སྦྱིན་དྲི་ཟ་ལྷ་མ་ཡིན། །གྲུལ་བུམ་མིའམ་ཅི་དང་ལྟོ་འཕྱེ་སོགས། །རྫུ་འཕྲུལ་ཡིད་ལྡན་ཐམས་ཅད་འདིར་ཤོག་ཅིག །བསྐལ་བ་སྟོང་དུ་ཐོས་པ་རབ་དཀའ་ཞིང་། །གང་ཞིག་ཐོས་ན་གཏན་དུ་བདེ་བྱེད་པ། །བདེ་གཤེགས་གསུང་སྙན་བདུད་རྩིའི་ཆོས་ཀྱི་སྒྲ། །བདག་གིས་སྦྱིན་གྱིས་དད་ཅིང་གུས་པས་ཉོན། །གང་ཞིག་གཏན་གྱི་སྐྱབས་གནས་མཆོག་གྱུར་པ། །དཀོན་མཆོག་གསུམ་གྱི་ཡོན་ཏན་བསམ་མི་ཁྱབ། །དེ་ལ་དེར་ཤེས་རྣམ་སྨིན་ཡང་དེ་བཞིན་ཏེ། །བསྐལ་བ་ཕྱེ་བ་ཁྲག་ཁྲིག་བགྲང་ན་ཡང་། །དཀོན་མཆོག་མཚན་ཐོས་ཙམ་ཡང་རྙེད་དཀའ་ཞིང་། །རྣམ་པར་གྲོལ་བ་རིན་ཆེན་སྣ་ཚོགས་དང་། །ཟབ་མོ་རྒྱལ་བའི་བཀའ་འདི་གུས་པས་ཉོན། །ལྷ་ཡི་སྐད་དང་ཀླུ་དང་གནོན་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་གྱི་སྒྲ་རྣམས་ཅི་ཙམ་པ། །ཐམས་ཅད་སྐད་དུ་ཆོས་འདི་འགྱུར་བར་ཤོག །མཚམས་སྦྱོར་བའི་ཞལ་གདམས། དེའང་ས་ཐག་རིང་ཐུང་ལ་མ་ལྟོས་པའི་ཆོས་འདོད་དོན་གཉེར་ཅན། ཐེངས་འདིའི་ཆོས་ཚོགས་སུ་ཞུགས་པའི་སེར་སྐྱ་མཆོག་དམན་རྒན་དར་ཕོ་མོ་རིས་སུ་མ་ཆད་པའི། ཁྱེད་ཆོས་གྲོགས་ཡོངས་ལ་ཁམས་བདེའི་འཚམ་འདྲི་དང་ལྷན་ཅིག་འུ་ཅག་ཚང་མའི་དམིགས་ཡུལ་གྱི་འདུན་པ་གཅིག་ལ་གཏད་ས་ཆོས་དོན་གྱི་གླེང་མོའི་མགོ་རྩོམ་པར་བྱེད། དེའང་རྫོགས་ཆེན་པདྨ་ཐང་ལུང་རྟོགས་པདྨའི་དགའ་ཚལ་དུ་ད་ལོ་བོད་རབ་བྱུང་བཅུ་བདུན་པའི་མེ་ཕོ་སྤྲེལ་ལོའི་བདེ་ཆེན་ཞིང་ཁྲིད་ཆེན་མོའི་དབུ་ཁ་སང་བརྩམས་ཤིང་། དེ་དང་ལྷན་དུ་བདེ་ཆེན་ཞིང་སྒྲུབ་ཀྱི་ཆོ་གའི་གཞུང་བསྲིངས་ནས་མཁན་སྤྲུལ་མི་མང་མི་ཉུང་བ་དབུར་བཞུགས་པའི་དགེ་འདུན་འདུས་པ་རྒྱ་མཚོས་ཚོགས་སྒྲུབ་དཀྱིལ་འཁོར་གྱི་ཞལ་ཕྱེས་རྗེས་དེ་རིང་བདེ་ཆེན་ཞིང་ཁྲིད་བཤད། །དེའང་ཞིང་མཆོད་དང་གཅིག ཞིང་སྒྲུབ་དང་གཉིས། ཞིང་ཁྲིད་དང་གསུམ་གྱི་དོན་སྟབས་གཅིག་ཏུ་ཚང་བ་ཞིག་བྱེད་ཀྱིན་ཡོད་ན་འདི་དག་ལས་གང་རུང་གིས་ཆོག་པ་མིན་ནམ་སྙམ་ན། དེ་དག་རེ་རེ་ལའང་ཕན་ཡོན་བསམ་གྱིས་མི་ཁྱབ་མོད། འོན་ཀྱང་འཚོགས་ན་འཚོགས་གོ་ཆོད་པ་ཞིག་སྟེ། ལོ་གཅིག་གི་རིང་ལ་ཚོགས་པ་འདིའི་གྲལ་གྱི་ཆེས་མང་པོ་ཞིག་གིས་བྱ་ཁུ་བྱུག་གིས་གནམ་ཆུ་ལ་སྒུག་པ་ཇི་བཞིན། སང་ཕོད་ཞིང་ཁྲིད་ཡོད་སྲིད་པས་དེ་དུས་ཅི་ནས་ཀྱང་ཉན་པར་འགྲོ་དགོས་སྙམ་སྟེ། ཟླ་བ་དང་ཞག་གྲངས་མཛུབ་རྩིས་བརྒྱབ་ནས་བསྡད་པ་ཡིན་ལ། འགའ་རེས་ས་ཐག་རིང་གི་ལམ་ལ་མ་འཛེམ་པར། ས་ནག་པོ་འདོམ་ལ་འཇལ། སྤྲིན་དཀར་པོ་ཐོད་ལ་བཟུང་ནས་ཡོང་བས་ན། དེ་དག་ཡོང་གོ་ཆོད་པ་ཞིག དོན་མེད་དུ་མ་གྱུར་པ་ཞིག་དང་། ད་ལོ་ཡོང་བའི་ཡོང་གོ་འདི་ཆོད་སོང་སྙམ་པ། རང་གཞན་འདི་ཕྱི་གཉིས་ཕན་གྱི་བློ་བདེ་བ། སེམས་ལ་འཛིན་རྒྱུའི་ཚིག་ཅིག་དང་། རུམ་ལ་བསྡུ་རྒྱུའི་བྲོ་རེ་ཡོད་དགོས། རྒས་གཞོན་སུས་སྔ་མི་ཤེས་པར་ཐམས་ཅད་སྔ་གཞུག་ཙམ་ལས་ཕྱི་མའི་ལམ་ལ་གོམ་པ་སྤོ་མཁན་ཤ་སྟག་ཡིན་པས་ན། ཚེ་ཕྱི་མའི་ཡུལ་དུ་འགྲོ་དུས་ཀྱི་རྟ་བྲོ་གྲོགས་གསུམ་ལ་སྔ་མོ་ནས་གྲ་སྒྲིག་ཅིག་ཡོང་བར་རེ་ལྟོས་བྱས་ནས་ཆོས་ཚོགས་འདིར་ལོ་རེ་བཞིན་ཆག་མེད་དུ་འཚོགས་བཞིན་ཡོད། དེ་ལྟ་མོད་ཚེ་ཕྱི་མའི་ལོ་རྒྱུས་བཤད་ན་དེ་ལ་ཉན་འདོད་མེད་ཅིང་། དེ་ནི་སྡུག་རབས་བཤད་པ་ཞིག་ཡིན་བསམ་མཁན་ཡང་ཡོད་སྲིད་ལ། འགའ་རེས་འདི་ལ་སྐྱོ་སྣང་རང་ལུགས་ཞེས་ཀྱང་བརྗོད་མོད། འོན་ཀྱང་སྐྱོ་སྣང་མ་ཡིན་པའི་སྤྲོ་སྣང་ངོ་མ་ཞིག་སྐྱེད་པར་བྱེད་པ་ལ། སྐྱོ་སྣང་གི་རྩ་བ་གཞི་དང་བཅས་པ་ལོག་ཐུབ་དགོས་པས་ན། ཤི་བ་ན་བ་སོགས་མེད་ཁུལ་བྱས་པ་ཙམ་གྱིས་མེད་པར་མི་འགྱུར་ཏེ། ང་ཚོས་རང་ཕྱོགས་ལ་བསམ་ནའང་གཅེས་དམར་མ་ག་ཚོད་ཤོར་ཐལ། བླ་མ་དགེ་བའི་བཤེས་གཉེན་སོགས་བསྟན་འཛིན་གྱི་སྐྱེས་ཆེན་ཚོ་ཡང་གདུལ་བྱ་རྟག་འཛིན་ཅན་གྱི་ངོར་སྐུ་མྱ་ངན་ལས་འདའ་བའི་ཚུལ་བསྟན་པ་ལ་བསམ་བློ་བཏང་ན། སྔ་བསམ་ཕྱི་འདང་གཅིག་ཀྱང་མེད་པར་ཟོག་ཉལ་ཉལ་དང་ཟོག་ལང་ལང་བྱེད་པའི་མི་དེ་འདྲ་བ་ནི། ཟོག་ཤི་ཤི་བྱེད་པར་མ་ཟད་ཡི་ཆད་དང་འགྱོད་པ་རྟས་མི་ཟིན་པ་ཞིག་དང་བཅས་ཏེ་འཆིི་བར་འགྱུར་ངེས། དེ་རིང་ང་ཚོ་གསོན་པོ་ཡིན་ཡང་། གལ་ཏེ་སང་ཉིན་ཤི་གསོན་གཉིས་ཀྱི་མཚམས་ལ་ཐོན་པ་ཡིན་ན། དེ་དུས་ཅི་ཞིག་བྱ་དགོས་པའི་ཚུལ་འདི་ལ་བསམ་བློ་གཏོང་མ་ཤེས་ན། ངུར་མི་ངུར་དང་རྩྭ་བཟའ་མི་བཟའ་ཙམ་གྱི་ཁྱད་པར་ལས་རང་དང་སྒོ་ཁའི་ཕྱུགས་ཟོག་རྣམས་ལ་ཁྱད་ཆེན་པོ་མེད་དོ། །དེའི་ཕྱིར་དགྲ་ཆེན་འཆི་བ་ད་ལྟ་མདུན་ལ་ཐོན་ནའང་དེར་གདོང་ལེན་བྱེད་པའི་དཔའ་གདེང་འདི་ཡོད་སྙམ་པ་ཞིག་མཆིས་ན་ད་གཟོད་སྐྱོ་སྣང་གི་རྩ་བ་ཆོད་པ་ཡིན་ལ། དེ་ནས་བཟུང་སྡུག་གསོག་མ་དགོས་ཤིང་སྡུག་རབས་བཤད་མ་དགོས་པ་ཡིན། དུས་དེར་གཞི་ནས་སེམས་བདེ་བློ་བདེའི་སྤྲོ་སྣང་དང་། འདི་བདེ་ཕྱི་མར་སྐྱིད་པའི་གཏན་བདེའི་འདུན་མ་ཞིག་འགྲུབ་པ་ཡིན་ནོ། །སངས་རྒྱས་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་རིམ་པ་གསུམ་གསུངས་པ་དེར། སྐྱེས་བུ་གསུམ་གྱི་ལམ་གྱི་རིམ་པ་མངོན་མཐོ་ངེས་ལེགས་ནས་བསྟན་ཞིང་། མངོན་མཐོ་ཡིས་ལྷ་མིའི་བདེ་སྐྱིད་ཐོབ་པ་དང་། ངེས་ལེགས་ཀྱིས་འཁོར་བའི་སྡུག་བསྔལ་ལས་གཏན་དུ་ཐར་ཐབས་བསྟན། དེའང་སེམས་ཅན་ལ་དགོས་དོན་གནས་སྐབས་དང་མཐར་ཐུག་གི་བདེ་བ་གཉིས་ཡོད་པས་ན་སངས་རྒྱས་ཀྱིས་དེ་གཉིས་ཐོབ་པའི་ལམ་བསྟན་པའོ། །དེའི་ཕྱིར་སྤྱིར་ཐུན་མོང་གི་ཆོས་རེ་སྒྲུབ་པ་དང་ཁྱད་པར་ཞིང་སྒྲུབ་འཚོགས་པ་འདི་རྒན་པོ་ཚོའི་ཆོས་སྐལ་ཁོ་ན་ཞིག་ཡིན་པར་བསམ་པ་ནི་ནོར་འཁྲུལ་ཡིན། ལོ་ཉུང་འཁོར་བ་ད་ལྟ་འཛིན་པ་གསར་དུ་མི་གྲལ་ལ་འགྲོ་བ་རྣམས་ཀྱིས་ཀྱང་མི་ཡ་རབས་ཚད་ལྡན་ཞིག་བྱེད་འདོད་ན། ཚེ་འདི་ཕྱི་གཉིས་ཀྱི་དོན་བྱ་མི་འཆུག་པའི་མིག་རྒྱང་ཡོད་དགོས། དེའང་སྤྱིར་ཕྱིའི་རྒྱུ་ནོར་བསགས་ནས་བདེ་སྐྱིད་སྒྲུབ་པར་འདོད་མོད། འོན་ཀྱང་ལས་སྔར་བྱས་ཀྱིས་བསགས་པའི་བསོད་ནམས་ཞིག་མེད་ན་འབད་བརྩོན་ཁོ་ནས་མི་འགྲུབ་ཅིང་། དེའི་ཆེད་དུ་རྒྱུ་འབྲས་བསྣོག་པ་ནི་སྡུག་ཐུག་མཐའ་ཐུག་གི་ལས་ཀ་རང་མགོ་རང་གིས་བསྐོར་བ། ཤེས་བཞིན་དུག་འཐུང་བ། གཞན་གྱིས་བལྟས་ན་སྨྱོན་པའམ་ཡང་ན་གླེན་ལྐུག་རེད་འདུག་སྙམ་པའི་བྱ་སྤྱོད་ལས་མ་འདས། སྤྱིར་བདེ་སྐྱིད་དངོས་ནི་ནང་སེམས་ཀྱི་སྟེང་ནས་རྙེད་དགོས་ཀྱི་དེར་མ་རྙེད་ན། ཕྱིའི་རྒྱུ་ནོར་ལོངས་སྤྱོད་ལས་བདེ་སྐྱིད་ཕུན་སུམ་ཚོགས་པ་ཞིག་འབྱུང་ཐབས་མེད་ལ། ནང་གི་བདེ་སྐྱིད་རྙེད་ཐབས་དེ་ནི་དམ་པའི་ཆོས་ལས་གཞན་ཡོད་པ་མ་ཡིན་ནོ། །དེས་ན་འུ་ཅག་གི་སྐབས་དོན་བཤད་བྱའི་སྙིང་པོ་ནི། ཞིང་མཆོད་དང་ཞིང་སྒྲུབ་དང་ཞིང་ཁྲིད་གསུམ་མཉམ་དུ་འཛོམ་པ་ཞིག་ཡིན་ཟེར་དུས། འདི་གསུམ་གྱི་ཁྱད་པར་ནི་གང་། རེ་རེའི་བརྗོད་དོན་ནི་ཅི་ཞེ་ན། དེ་ནི་ངོ་བོ་དང་རྣམ་པ་དང་བྱེད་ལས་ཀྱི་ཆ་ནས་འཆད་དགོས་ཏེ། དེ་གསུམ་གྱི་ངོ་བོ་ནི། ནུབ་བདེ་བ་ཅན་གྱི་ཞིང་ཁམས་སྡུག་བསྔལ་གཏན་ནས་མེད་ཅིང་བདེ་སྐྱིད་ལོངས་སྤྱོད་ཕུན་སུམ་ཚོགས་པའི་གནས་ཁྱད་པར་ཅན་དེར་སྐྱེ་བྱེད་ཡིན་པ་ལ་གསུམ་ཀར་ཁྱད་མེད་ཅིང་འདྲ་མཚུངས་ཡིན་པ་གང་ཞིག རྣམ་པ་ནི། མཆོད་པ་དང་། སྒྲུབ་པ་དང་། འཆད་ཁྲིད་ཡིན་ནོ། །བྱེད་ལས་ནི། ཞིང་མཆོད་ཀྱིས་དངོས་འབྱོར་ཡིད་སྤྲུལ་གྱི་མཆོད་པ་ཕུལ་ནས་བསོད་ནམས་ཀྱི་ཚོགས་རྫོགས་པར་བྱེད་ལ། ཞིང་སྒྲུབ་ཀྱིས་བསྐྱེད་རྫོགས་རིམ་གཉིས་ཀྱི་ལམ་ལ་བརྟེན་ཏེ་བསོད་ནམས་དང་ཡེ་ཤེས་ཀྱི་ཚོགས་གཉིས་སྟབས་གཅིག་ཏུ་རྫོགས་པར་བྱེད་པ་དང་། ཞིང་ཁྲིད་ཀྱིས་ཚོགས་གཉིས་ཁྱད་པར་ཅན་རྫོགས་ཚུལ་གྱི་གནད་བསྟན་པ་སྟེ། དཔེར་ན། ལོང་བའི་ལག་པ་ནས་འཇུས་ཏེ་ཁོ་རང་ཐོན་དགོས་སའི་ཡུལ་ལ་ཁྲིད་པ་དང་འདྲ་བས་ན་ཁྲིད་ཅེས་བྱའོ། །འདིར་གང་དུ་ཁྲིད་པ་ཡིན་ཞེ་ན། ཞིང་ཁྲིད་ཅེས་པས་ནུབ་བདེ་བ་ཅན་གྱི་ལམ་བསྟན་ནས་ཞིང་དེར་ཁྲིད་པ་ཡིན། དེ་ལ་སྒྲ་ཡངས་དོག་གི་གོ་བ་ལེན་ཚུལ་གཉིས་ཡོད་ཆོག་སྟེ། སྒྲ་ཡངས་བའི་དབང་དུ་བྱས་ན། བདེ་བ་ཅན་དུ་ཁྲིད་པ་ཡིན་ཞེས་བརྗོད་ཀྱང་འགལ་བ་དེ་ཙམ་མི་ཆེ་བའི་བཤད་ཚུལ་ཡོད་མོད། སྒྲ་ དོགས་པའི་དབང་དུ་བྱས་ན། བདེ་བ་ཅན་དུ་སྐྱེ་བར་རྡོ་འཕེན་པ 
་ལྟར་གཞན་སྟོབས་ཁོ་ནར་བརྟེན་ཚུལ་ཞིག་མེད། དེའང་དཔེར་ན་ལོང་བར་ལྟ་བྱེད་མིག་མེད་པ་ལས་འགྲོ་བྱེད་རྐང་བ་ལྡན་ནའང་། ཁྲིད་སའི་ཕྱོགས་དེར་གོམ་ཁ་མི་སྤོ་བར་བོང་བུ་འཁྱགས་ཐོག་ཏུ་ཁྲིད་པ་ལྟར་ཕྱི་སྣུར་འབའ་ཞིག་བྱེད་ན། རེ་ཞིག་སྐྱུར་བ་ལས་འགྲོ་ཡུལ་གྱི་གནས་དེར་ཁྲིད་ཐབས་མི་འདུག་ལ། སྤྱིར་རིགས་ཆད་པའང་ཁས་མི་ལེན་པས་སེམས་ཅན་ཐམས་ཅད་ལ་སངས་རྒྱས་ཀྱི་ས་བོན་ནམ་བདེ་གཤེགས་སྙིང་པོས་ཁྱབ་པའི་ཕྱིར་ནམ་ཞིག་འདྲེན་སྟོབས་རེ་དང་འཕྲད་པ་སྲིད་མོད། འོན་ཀྱང་ཁྲིད་སར་མི་འགྲོ་བ་དག་རེ་ཞིག་དམྱལ་བ་ཡི་དྭགས་དུད་འགྲོར་འཁྱམ་པའི་ལམ་འགོག་ཐབས་མི་འབྱུང་ངོ་། །དེའི་ཕྱིར་འུ་བུ་ཅག་གིས་ཞིང་ཁྲིད་བཤད་པའང་ལོང་བའི་ལག་པ་ནས་ཁྲིད་པའི་ཉམས་ཙམ་སྟོན་པ་ཡིན། དེས་ན་གེགས་མེད་བདེ་བླག་ཏུ་ཁྲིད་པ་ལ་ཁྲིད་མཁན་དང་ཁྲིད་བྱ་གཉིས་ཀྱིས་ལས་བྱ་བ་གཅིག་ལ་བློ་རྩེ་མ་གཏད་ན། སྐུད་པ་སྔ་ཕྱི་གཉིས་ཀྱིས་ཐ་གུའི་གོ་མི་ཆོད་པ་དང་། དེ་བཞིན་སྨན་བཅོས་བྱེད་པར་ཡང་ནད་པས་སྨན་པའི་ངག་ལ་མ་ཉན་ན་གཉིས་ཀའི་དམིགས་ཡུལ་ནད་དྲག་ཐབས་མི་ཡོང་བའི་དཔེ་བཞིན་དུ་ལས་བྱ་བ་ཅི་སྒྲུབ་ཀྱང་གོ་ཆོད་ལ་དོན་ཐོན་པ་སྤུས་དག་ཅིང་ཚད་ལྡན་ཞིག་དགོས་ཏེ། ཐ་ན་འུ་ཅག་གིས་འཇིག་རྟེན་ཁྱིམ་པའི་བྱ་གཞག་ཅིག་སྒྲུབ་ནའང་མགོ་རྔ་སྐེད་གསུམ་ཆ་ཚང་བ་ཞིག་མ་བྱུང་བར་མི་ཁའི་ཁྲལ་སོད་ཙམ་གྱིས་མི་འགྲུབ་ལ། དེས་ན་རང་གཞན་ཚེ་འདི་ཕྱིའི་དོན་ཆེ་ཞིང་གལ་ཆེ་བའི་ལས་ཀ་འདིི་དེ་བས་ཀྱང་ཅ་དག་སྤུས་གཙང་ཞིག་སྒྲུབ་དགོས། དེ་རིང་ཆོས་ར་འདིར་ཡོང་དོན་ནི་ཆོས་ཞུ་བ་དང་ཆོས་སྒྲུབ་པའི་ཆེད་ཡིན། ཆོས་སྒྲུབ་མཁན་དེ་རང་ཉིད་ཡིན་ན་རང་ཞེས་པའི་གདགས་གཞི་འདིའི་ལུས་ངག་ཡིད་གསུམ་ཆིག་དྲིལ་གྱིས་ཆོས་སྒྲུབ་པར་བྱེད་དགོས། དེའང་ལུས་ཀྱིས་ནི་ཆོས་ཞུ་བའི་ཀུན་སྤྱོད་དམའ་ས་ནས་གུས་པའི་ཐལ་མོ་སྦྱར་ཏེ་ཉན་དགོས་ཤིང་། ངག་གིས་ནི་ཐོག་མར་ཆོས་རའི་སྒོ་ཐེམ་ཡར་བརྒལ་བ་ནས་བཟུང་མཇུག་མཐར་སྒོའི་ཕྱིར་མ་སོང་བར་དུ་དུས་རྒྱུན་འུ་ཅག་ཆོས་ཚོགས་ཀྱི་སྒྲིག་ལམ་བཞིན་དུ་ངག་བཅད་བྱེད་དགོས་ཏེ། ཁ་མི་གྲག་པར་སྨྲ་བ་བསྡམས་ནས་དེའི་ཡུན་ལ་སྐད་ཆ་ཚིག་གཅིག་ཀྱང་བཤད་མི་རུང་བར་མ་ཟད་ཐ་ན་ལྐོག་གཏམ་ཙམ་ཡང་མི་བྱའོ། །དེའང་གསོན་གྲང་ང་ཁམས་ཀྱི་ས་ཆ་འཇིག་རྟེན་ཚེ་འདིའི་སྣང་བ་སྐྱ་རིབ་བེ་འདི་མིག་ལ་ཤར་བ་ནས་བཟུང་སྟེ་མཚན་གཉིད་ཐུན་ཙམ་རེ་མ་གཏོགས་ད་བར་དུ་སྐད་ཆ་འདྲ་མིན་སྣ་ཚོགས་བཤད་པ་ཡིན་མོད། བཤད་པས་བཤད་གོ་མ་ཆོད་པ་ཙམ་དུ་མ་ཟད་ལུས་དང་ཡིད་ཀྱི་མི་དགེ་བ་ཐམས་ཅད་ཀྱང་ཕར་བཤད་ཚུར་ཉན་གྱི་གཏམ་སྨྲ་བ་མང་པོའི་ངག་འདི་ལ་བརྟེན་ནས་བྱུང་བ་ཡིན་པས། ད་ནི་ཅི་ཡང་མི་སྨྲ་བར་ངག་སྒོ་བསྡམས་ནས་དར་ཅིག་སྡོད་དང་། འདི་ལ་མ་གོམས་པའི་ཕྱིར་ན་དང་པོ་ངག་འཆོར་སྲིད་མོད་སླར་ཡང་དྲན་ཤེས་བག་ཡོད་ཀྱིས་ཟིན་པར་གྱིས་དང་། གང་ལྟར་ཡང་གཡང་ལ་མི་ལྕེབ་པར་ཚོད་འཛིན་བྱེད་པའི་ཁ་ལོ་བ་ཞིག་ཡོད་པ་དང་འདྲའོ། །དེའང་འུ་བུ་ཅག་འདིར་འདུས་མང་ཆེ་ཤོས་ནི་སྔོན་འགྲོ་ཉམས་ལེན་བྱེད་མཁན་ཡིན་ན། ཇི་སྐད་དུ། སྙིང་དབུས་དད་པའི་གེ་སར་བཞད་པ་ནས། །སྐྱབས་གཅིག་དྲིན་ཆེན་བླ་མ་ཡར་ལ་བཞེངས། །ལས་དང་ཉོན་མོངས་དྲག་པོས་གཟིར་བ་ཡི། །སྐལ་བ་ངན་པ་བདག་ལ་སྐྱོབ་པའི་ཕྱིར། །སྤྱི་བོ་བདེ་ཆེན་འཁོར་ལོའི་རྒྱན་དུ་བཞུགས། །དྲན་དང་ཤེས་བཞིན་ཀུན་ཀྱང་བཞེངས་སུ་གསོལ། །ཞེས་པ་ལྟར་སྙིང་དབུས་པདྨ་འདབ་བརྒྱད་ནས་རྩ་བའི་བླ་མ་སྤྱི་བོའི་གཙུག་ཏུ་གདན་དྲངས་པའི་རྗེས་སུ་དྲན་དང་ཤེས་བཞིན་ཀུན་ཀྱང་བཞེངས་སུ་གསོལ་བ་ཡིན་ལ། དེའང་དྲན་དང་ཤེས་བཞིན་ནི་ནང་གི་ཡོངས་འཛིན་ཡིན་པས་དེས་ཟིན་པར་གྱུར་ན་ལོག་པའི་ལམ་དུ་འགྲོ་བར་མི་བྱེད། དེ་ལྟར་ངག་གིས་སྨྲ་བ་བཅད་ཅིང་སེམས་ཀྱིས་ཆོས་ཀྱི་དོན་བསམ་པ་ལས་མི་ཡེངས་བ་སྟེ་ཆོས་ཀྱི་ཚིག་ཉན་ཅིང་དོན་ལ་བསམ་བློ་གཏོང་དགོས། དེ་མིན་ད་ལོར་འུ་བུ་ཅག་གིས་ཆོས་འཆད་པ་དང་ཉན་པ་ཙམ་མ་ཟད་ད་དུང་སྒོམ་རྒྱག་དགོས། ན་ནིང་ནས་བཟུང་སྟེ་སྒོམ་རྒྱག་དགོས་ཚུལ་གྱི་མགོ་རེ་གླེང་མྱོང་ལ། གཞན་ཡང་བླ་མའི་རྣལ་འབྱོར་དང་སྦྲེལ་ནས་སྒོམ་གྱི་སྙིང་དོན་ཅི་འདྲ་ཡིན་པ་ཚིག་བསྡུས་ཀྱིས་བཤད་མྱོང་། དེ་ལ་མི་སྐྱ་ཕོ་མོ་རྣམས་ཀྱིས་སྒོམ་རྒྱག་ཅེས་པ་འདི། ད་སྔོན་མི་ཐོག་མི་རབས་དང་བླ་ཐོག་བླ་རབས་ལ་གོ་མ་མྱོང་ཟེར་མཁན་ཡོད་སྲིད་ཀྱང་སྒོམ་མ་བརྒྱབ་ན་འཚང་མི་རྒྱ། དེ་ལ་མི་སྐྱ་ཕོ་མོར་སངས་རྒྱས་ཀྱི་གོ་འཕང་ཐོབ་མི་ཆོག་པའི་ཁྲིམས་འདྲ་ཡོད་པ་མིན་ན། སེམས་ཅན་ཐམས་ཅད་ཀྱི་དོན་ཟེར་མཁན་ཞིག་ཡིན་ཕྱིན་མི་སྐྱ་ཕོ་མོའང་དེའི་གྲས་སུ་གཏོགས་པས་དེ་དག་ལ་ཁྱད་པར་དུ་སྒོམ་རྒྱག་སྟངས་འདི་སྦྱང་དུ་འཇུག་དགོས། སྤྱིར་སྒོམ་རྒྱག་ཅེས་པ་ཧ་ཅང་ཁག་པོ་གླེང་ཡང་མི་ཕོད་པ་ཞིག་ཀྱང་མ་ཡིན་ཏེ། ཕྱི་རོལ་མུ་སྟེགས་པར་ཡང་སྒོམ་རྒྱག་རྒྱུ་ཡོད་ལ་དེར་མ་ཟད་ཐ་ན་ལུས་པོ་བདེ་ཐང་ཡོང་བར་ཡང་། ཇི་སྐད་དུ། ཟས་དང་གཉིད་དང་ལེགས་བྱ་བ། །ཏིང་འཛིན་ལུས་ཀྱི་རྒྱུ་བཞིའོ། །ཞེས་གསུངས་པ་ལྟར་ཟས་དང་གཉིད་ཆག་ན་རྒྱུ་མ་ཚང་བས་ལུས་ཀྱི་སྟོབས་མར་ཉམས་ཤིང་ནད་སྐྱེད་ལ། ཡུན་རིང་ལོན་མི་དགོས་པར་ཕལ་བ་རྣམས་ལ་ཉིན་ཞག་བདུན་བརྒྱད་ཙམ་གྱིས་སྲོག་གི་ཉེན་ཁའང་འབྱུང་སྲིད་དོ། །དེ་བཞིན་ཏིང་ངེ་འཛིན་བསྒོམ་པས་ལུས་རྒྱས་པར་བྱེད་དེ། དེའི་རྒྱུ་མཚན་ནི་སེམས་རྣམ་རྟོག་གི་འཕྲོ་འདུ་ནི་སྤྲིན་འཁྲིགས་པ་ལྟ་བུ་ཞིག་ཡིན་ལ། དེ་ལྟའི་དགའ་སྡུག་ཆགས་སྡང་གི་ཟུག་ངུ་མེད་པར་གྱུར་ན་དེ་ཚེ་སེམས་ལ་ངལ་གསོ་རེ་ཐོབ་པ་ཡིན་ཞིང་། ལུས་སེམས་གཉིས་ལ་རྟེན་དང་བརྟེན་པའི་འབྲེལ་བ་ཧ་ཅང་ཆེ་སྟེ། དཔེར་ན། སེམས་དགའ་བའི་དུས་སུ་དགོད་ལ། སྡུག་པའི་དུས་སུ་མིག་ནས་མཆི་མ་འབྱུང་བ་ནི་རྟེན་དང་བརྟེན་པའི་འབྲེལ་བ་ཡོད་པས་སོ། །དེའི་ཕྱིར་སེམས་བདེ་ན་ལུས་བདེ་ལ། ལུས་སེམས་གཉིས་ཀ་བདེ་ན་ནད་མེད་ལང་ཚོ་དར་བའི་ལུས་སྟོབས་རང་ཤུགས་ཀྱིས་རྒྱས་ཡོང་། གཞན་ཡང་མཐོ་རིས་ལྷའི་བདེ་སྐྱིད་བསམ་ནས་ཕྱི་མར་ལྷའི་ཡུལ་གཟུགས་གཟུགས་མེད་ཀྱི་ཁམས་གོང་མར་སྐྱེ་འདོད་ན། ཟག་བཅས་དགེ་བའི་ལས་ཀྱི་བསོད་ནམས་གསོག་པ་དང་ལྷན་དུ་བསམ་གཟུགས་ཀྱི་ཏིང་ངེ་འཛིན་བསྒོམ་དགོས་ཀྱི་མ་བསྒོམས་ན་སྐྱེ་བར་མི་ནུས་སོ། །དེས་ན་འཇིག་རྟེན་པའི་གནས་ཁམས་གོང་མར་སྐྱེ་བ་ཙམ་ལའང་སྒོམ་རྒྱག་དགོས་ན། འཇིག་རྟེན་ལས་འདས་པའི་ཞིང་ཁམས་བདེ་བ་ཅན་དུ་སྐྱེ་བར་སྒོམ་རྒྱག་དགོས་པ་སྨྲོས་ཅི་འཚལ། དེའང་བདེ་བ་ཅན་དུ་སྐྱེ་བའི་རྒྱུ་བཞིའི་དང་པོ་ནི་རྟེན་ཞིང་ཁམས་ཡིད་ལ་བྱེད་པ་ཡིན་ཞིང་། དེ་ནི་སྒོམ་རྒྱག་པ་ཡིན་ཏེ་བདེ་བ་ཅན་གྱི་ཞིང་བཀོད་དང་མགོན་པོ་འོད་དཔག་མེད་ཀྱི་སྐུ་ཡིད་ཡུལ་ལ་གསལ་ནུས་པ་ཙམ་དུ་མ་ཟད་མིག་སྔར་ཡང་གསལ་ནུས་པ་ཞིག་དགོས། ད་རེས་འུ་ཅག་ཆོས་ཁྲིད་ལ་ཐེངས་བཞིར་འཚོགས་དགོས་ཤིང་ཆོས་ཐུན་རེ་རེའི་མཇུག་ཏུ་སྒོམ་རྒྱག་དགོས་མོད། སྒོམ་རྒྱག་པར་ངོ་གནོང་མི་དགོས་ཤིང་ད་སྔོན་སྒོམ་མ་བརྒྱབ་པར་ངོ་གནོང་དགོས་སོ། །དེ་ལ་ཁྲིད་བཤད་པ་གལ་ཆེ་སྟེ། མ་བཤད་ན་ཅི་ཞིག་གོ་ནུས། གོ་བ་དེའང་དོན་བསམ་པའི་ཆེད་དུ་ཡིན་མོད་མ་བསམ་པའི་སྒྲ་ཚིག་ནི་རྣ་རྒྱབ་ཀྱི་རླུང་བུ་དང་འདྲ། ཐོས་བསམ་གཉིས་ཀྱི་སྙིང་པོ་ནི་སྒོམ་རྒྱག་ཤེས་རྒྱུ་དེ་ཡིན། མི་བསྒོམ་པ་ནི་དཔེར་ན། ནས་བརྔོས་ཏེ་རྩམ་པ་འཐག་ནའང་དེ་ཉིད་མ་ཟོས་པར་ལྟོ་སྟོང་དུ་ལྟོགས་གྲིར་ཤི་བ་དང་གཅིག་མཚུངས་ཡིན། དེའང་འུ་ཅག་ཆོས་རའི་ནང་གི་རྒད་པོ་འགའ་རེ་ཉེ་སྔོན་ཤི་སོང་ལ། ཁོ་རང་མ་ཤི་བའི་སྔོན་དུ་སྐབས་འདིའི་ཚོགས་གྲལ་དུ་ཐོན། དེར་མ་ཟད་རབ་ཏུ་བྱུང་བའི་ཆ་ལུགས་འཆང་ཞིང་སྡོམ་པ་བླངས། འཆི་ཁ་དག་དག་ལ་ཙོག་པུར་སྡོད་ཅིང་སྒྲ་འཁོར་ལས་འཕོ་ལུང་གི་གསལ་འདེབས་ལ་རྣ་བས་ཉན་བཞིན་ཕཊ་སྒྲ་དུ་མ་དང་བཅས་ཏེ་ཕྱི་དབུགས་ཆད་སོང་། ཁོང་ལ་སྤྱིར་སྔོན་འགྲོའི་ཆོས་རེ་དང་ཞིང་ཁྲིད་རེ་ཟུང་ཙམ་ལས་ཐོབ་མེད་ནའང་། དམ་ཚིག་མ་ཉམས་ཞིང་དད་གུས་མ་ཞན་པས་ན་རང་སེམས་རང་གིས་ཁ་ལོ་བསྒྱུར་ནས་ལམ་གང་མྱུར་གྱི་གདམ་ག་རང་གིས་བྱེད་ནུས་པ་ཞིག་བྱུང་ཡོད། གཞན་ཡང་ཚེ་འདི་ཁོ་ནར་སྐྱིད་དགོས་ན། མི་ནོར་ཕྱུགས་གསུམ་འཛོམ་དགོས། སྡེ་བཞིའི་དཔལ་ཡོན་དར་དགོས། ཅི་བསམ་ལམ་དུ་འགྲོ་དགོས། ཁ་ལས་རླུང་རྟ་དར་དགོས་ནའང་དམ་པའི་ཆོས་ཀྱི་ལམ་དུ་ཞུགས་ནས་བསོད་ནམས་གསོག་ཚུལ་ཤེས་དགོས། ཇི་སྐད་དུ། བསོད་ནམས་དམ་པའི་མི་ཡིས་བསམ་པ་ཐམས་ཅད་འགྲུབ། །ཅེས་གསུངས་པས་ན་རྒྱུ་མེད་ཀྱི་འབྲས་བུ་ཞིག་འབྱུང་མི་སྲིད་ལ། བསོད་ནམས་ཟད་པར་གྱུར་དུས་བསམ་པ་བརྒྱ་ལས་གཅིག་ཀྱང་འགྲུབ་པར་དཀའ། གཞན་ཡང་ཚེ་ཕྱི་མར་འདང་རྒྱག་དགོས་ཏེ། ཚེ་ཅུང་ཟད་རིང་པོ་ཙམ་ལ་སྡོད་ལོངས་ཡོད་དུ་ཆུག་ཀྱང་ལོ་ན་ཉུང་ཞིང་ལུས་ཁམས་བདེ་ཐང་གི་སྐབས་སུ་ཆོས་ཤིག་མ་འགྲུབ་ན། རྒས་པ་ལུས་སེམས་ཐུར་རྒུད་ཀྱི་ཚེ་ན་འཆི་ཁའི་མ་ཎི་མཚན་འདོན་རེ་བྱས་ཀྱང་དོན་འབྲས་དེ་ཙམ་མི་ཡོང་། གཞན་ཡང་ཁྱིམ་ཕ་མ། ཨ་ཡེ་ཨ་མྱེ། གྲོགས་དགའ་མཛའ། ཡུལ་མི་ཁྱིམ་མཚེ་ཡི་དོན་དུའང་རང་ཆོས་ཡོད་ཀྱི་ས་ཆར་བསྡད་ན་ཆོས་མེད་ཤི་བོ་ལག་སྟོང་ཚོའི་དོན་ལ་འདང་རེ་རྒྱག་མི་དགོས་སམ། དེའི་ཕྱིར་ཆོས་སྒྲུབ་ན་སྒྲུབ་ཐག་ཆོད་པ། ཁ་ཆོས་མིན་པའི་དོན་ཆོས་ཤིག་བྱེད་དགོས་ཀྱི་ཕྱིའི་རྣམ་པ་ཙམ་མམ་ཚུལ་འཆོས་ཙམ་གྱིས་མི་ཡོང་སྟེ། ཁ་དཔེར། མི་མགོ་བསྐོར་ན་བསྐོར་ཆུང་། རང་མགོ་བསྐོར་ན་བསྐོར་ཆེན། ཞེས་པ་ལྟར་ཡིན་པས་དོན་གནད་ཐོག་ཏུ་སྨིན་པའི་སེམས་ཀྱི་ཆོས་ཞིག་སྒྲུབ་དགོས། སྤྱིར་ལུས་ཀྱི་ཆོས་དང་ངག་གི་ཆོས་ཀྱང་བཟང་མོད། དེ་བས་སེམས་ཀྱིས་ཆོས་སྒྲུབ་པ་ཆོད་ཆེའོ། །དེའི་ཆོད་སྒོ་ཆེ་ཆུང་ལ་དཔེ་ཞིག་བཀོད་ན། རྒྱལ་བོ་ཆེན་པོ་ཞིག་དང་བྲན་གཡོག་དབང་མེད་ཅིག་གིས་ལས་ཀ་སྒྲུབ་པའི་འགྲུབ་སྟོབས་ཙམ་གྱི་ཁྱད་པར་ཡོད་དོ། །དེའང་སེམས་རྒྱལ་བོ་ལྟ་བུ་དེ་ཆོས་ལམ་དུ་ཕྱོགས་ནས་ཁ་གྱེན་ལ་མ་འཁོར་ན། ལུས་གཡོག་པོ་ལྟ་བུ་དེས་ཅི་ཙམ་འབད་ཀྱང་དོན་ཆེན་པོ་ཞིག་འགྲུབ་མི་ནུས། དེས་ན་ལོ་རེ་བཞིན་འུ་ཅག་གིས་འཆད་ཉན་བྱས་མོད། ད་རེས་སྒོམ་པ་དང་བཅས་པའི་ཞིང་སྒྲུབ་ཉིན་ཞག་བདུན་ནི་མི་ཚེའི་ནང་གི་གོ་ཆོད་པའི་ཉི་མ་བདུན། དོན་འགྲུབ་པའི་ཉི་མ་བདུན། འཆི་ཁར་འདི་ཡོད་བསམ་རྒྱུ་ཞིག་འགྲུབ་དགོས། དེས་ན་ཚང་མས་ངག་བཅད་གཞིར་བཞག་གིས་སྒོ་གསུམ་ཆིག་དྲིལ་དུ་མཛད་དེ་གསན་པར་བྱ་དགོས། རང་རེའི་ཆོས་ར་འདིའི་ནང་དུ་མཆོད་པར་འོས་པའི་སྐྱབས་ཡུལ། གུས་པའི་གནས་དགེ་འདུན་འདུས་པ་རྒྱ་མཚོ་དང་། དེ་བཞིན་ས་འདིའི་གནས་སྡོད་ཀྱི་མི་སྣ་དང་། ཕྱོགས་གཞན་ནས་ཆེད་གཏད་དུ་ཡོང་བའི་གཞིས་མགྲོན་ཆོས་དད་མང་ཚོགས་དང་བཅས་པ་འདི་འདྲའི་གཙུག་ལག་ཁང་ངམ་ཆོས་ར་གཅིག་ཏུ་གདན་མཐོ་དམན་མེད་པར་མཉམ་དུ་འཚོགས་ཡོད་ལ། ད་དུང་དགེ་འདུན་པ་ཕྱི་མཐའ་གཡས་གཡོན་གྱི་ཟུར་གཉིས་སུ་བཞུགས་ཤིང་། མང་ཚོགས་མི་སྐྱ་ཕོ་མོ་ལྷ་ཁང་གི་དཀྱིལ་དབུས་གཙོ་བོའི་འདུག་གནས་སུ་བཀོད་སྒྲིག་མཛད་པ་ནི། མཆོད་ཡུལ་དང་སྦྱིན་བདག་གོ་ལོག་བྱས་ཤིང་། སྐྱབས་ཡུལ་དང་བསྐྱབ་བྱ་མཉམ་བསྲེ་མཛད་དེ། ཐ་ན་ལྷན་པ་སེར་པོ་ཙམ་ཡང་གུས་པས་ཡར་བླངས་ནས་གཙང་སར་འཇོག་དགོས་པ་སོགས་དགག་སྒྲུབ་ཆ་མཐུན་གྱི་སྐྱབས་འགྲོའི་བསླབ་བྱ་ལ་ཤེས་བཞིན་རྩིས་མེད་དུ་བཏང་བ་མ་ཡིན་ལ། འདིར་དགོས་པའི་དབང་གིས་དགེ་འདུན་པ་རང་གིས་ཐུགས་བསམ་བཞེས་ཏེ། ཐེངས་འདིའི་ཆེད་དུ་བྱ་བའི་གདུལ་བྱ་ནི་ཁྱིམ་ན་གནས་པའི་དགེ་བསྙེན་ཕོ་མོ་གཙོར་བྱས་དད་ལྡན་མང་ཚོགས་ཡིན་པས་དེ་དག་ལ་དམིགས་བསལ་གྱི་ཆོས་སྐལ་ཞིག་ཐོབ་དགོས་སྙམ་པའི་དགོངས་གཞི་དང་བསྟུན་ནས་འཆར་འགོད་གནང་བ་ཞིག་རེད། འདིས་ཅི་ཞིག་མཚོན་པ་ཡིན་ཞེ་ན། ཕྱོགས་གཅིག་ནས་བསླབ་གསུམ་འཆང་བའི་བླ་སྤྲུལ་གྲྭ་ཚང་སྡེ་སྣོད་འཛིན་པ་ཡོན་ཏན་གྱིས་བརྒྱན་པ་ཤ་སྟག་ཡིན་ཡང་། སྙེམས་པ་དང་ང་རྒྱལ་མེད་ལ་ཁེངས་སྐྱུང་གི་རྣམ་པ་མངོན་པར་གསལ་བ་དོན་གྱི་ཆེ་བའི་མཚོན་རྟགས་དང་། གཞན་ཡང་རྒན་པར་བསྙེན་བཀུར་བྱེད་ལ་དགའ་བ་ནི། ཐོས་རྒྱ་ཆེ་ཡང་མཁས་པའི་ང་རྒྱལ་མེད་པའི་ཡོན་ཏན་གྱི་རང་རྟགས་ཕྱི་ལ་མངོན་པ་དང་། ཡང་ཕྱོགས་གཅིག་ནས་ཐུགས་རྒྱུད་བརྩེ་བ་དང་སྙིང་རྗེའི་རླན་གྱིས་ཁྱབ་པ་སྟེ། བཀྲེས་པ་ལ་བརྩེ་མ་རུངས་པ་ལ་བརྩེ། །ཀུན་འཁྲུག་ལ་བརྩེ་བག་མེད་རྣམས་ལ་བརྩེ། །ཞེས་པའི་བྱམས་པ་ཆེན་པོའི་ལམ་ལ་སློབ་བཞིན་པ་དང་། དེ་མིན་མི་སྐྱ་ཕོ་མོ་ཙམ་དུ་མ་ཟད་སེམས་ཅན་ཐམས་ཅད་རིང་བའི་མཆེད་ཀྱི་འདུ་ཤེས་མངའ་བ། མདོར་ན་ཆོས་བརྒྱད་གདོན་གྱིས་མ་བརླམས་པར་དམན་ས་གོང་མའི་གདན་ས་ལ་དགྱེས་ཤིང་། སྔར་བྱོན་དམ་པ་གོང་མའི་ཞབས་རྗེས་སུ་སྙེག་བཞིན་ཡོད་པ་མངོན་སུམ་རྟགས་སུ་ཤར་བ་ཚད་མའི་ཡུལ་ཡིན་ནོ། །དེ་བཞིན་དུ་ཁྱིམ་པ་ཕོ་མོའི་ངོས་ནས་བཤད་ནའང་གསོན་པོའི་སྐྱབས་འཇུག་ཞུ་ས། ཤི་བོའི་བསྔོ་རྟེན་འཇོག་ས། ཚེ་འདི་ཕྱི་གཉིས་ཀྱི་རེ་ལྟོས་བྱ་ཡུལ་དཀོན་མཆོག་གསུམ་གྱི་ཡ་གྱལ་ནི། མཆོག་གསུམ་གཅིག་འདུས་ཀྱི་ངོ་བོ་བླ་སྤྲུལ་མཁན་གསུམ་དབུར་བཞུགས་དགེ་འདུན་འདུས་པ་རྒྱ་མཚོ་ཡིན་པ་སྨྲོས་ཅི་དགོས། དེའི་ཕྱིར་ན་སྤྱིར་དགེ་འདུན་པ་ནི། ཆོས་ཕྱོགས་ནས་ཕྱག་གི་ཡུལ་ཡིན་པ། དད་པའི་གནས་ཡིན་པ། བསོད་ནམས་གསོག་པའི་ཞིང་ས་ཡིན་མོད་དགེ་འདུན་པའང་རྣམ་པ་མིའི་ཟོལ་དུ་ཕེབས་ཡོད་པས་ན། ཁྱིམ་ཕ་མའི་རྒྱུད་ལས་མ་སྐྱེས་པ་ཞིག་གང་ན་ཡོད། དེའི་ཕྱིར་སྡེ་དགོན་གཅིག་ལ་གཅིག་འབྲེལ་ཡིན་པས་བུ་གྲྭ་བ། ཨ་ཞང་བླ་མ། ཉེ་རིང་སྤྲུལ་སྐུ་དང་མཁན་པོ་ཡིན་པ། དེ་དང་འདྲ་བར་ཡུལ་སྡེ་གཅིག་པའི་མི་རྣམས་ནི། ཉེ་ཡིས་ཚུར་ལ་བསྡུས། ཕྱུགས་ཀྱིས་བར་འདུན་བྱས། དེ་ལྟར་ཕན་ཚུན་གཅིག་ལ་གཅིག་འབྲེལ་ཡིན་པའོ། །དེ་མིན་ཡང་རིགས་རུས་པ་ཤ་ཁྲག་གཅིག་ཏུ་འབྲེལ་བའི་ཕུ་ནུ་མིང་སྲིང་། གྲྭ་ཚང་གྲུ་བཞི། འདི་དངོས་གནས་བཤད་ན་ཁྱིམ་གཅིག་གི་སྐྱ་སེར་ལྷན་འཛོམ། བཟའ་ཚང་གྲལ་ལ་མགོ་རྔ་མེད་པ། གཞི་བྱེས་འཛོམ་པའི་ལོ་གཅིག་ཐེངས་གཅིག་གི་ཆོས་ར་ཟེར་ན་གྲོས་ར་ཞིག་ལ་མཉམ་དུ་འཚོགས་པ་ཡིན། དེ་ལ་འདིར་དགེ་འདུན་པའི་བཞུགས་གྲལ་ན་སྡེ་སྣོད་གསུམ་ཐུགས་སུ་ཆུད་པའི་མཁས་པ་ཆེན་པོ། མཁས་པ་ཙམ་དུ་མ་ཟད་བཙུན་ཞིང་བཟང་བའི་བདག་ཉིད། དམ་པའི་ཚུལ་དགུའི་ཡོན་ཏན་མངའ་བ་ཅི་འདྲའི་མང་པོ་བཞུགས། ད་དུང་འདིའི་གྲལ་ན་ཡོངས་ལ་མ་གྲགས་པའི་རྒྱུད་སྦས་ཚུལ་དུ་བཞུགས་པ་མ་འོངས་ལོ་ངོ་བཅུ་ཕྲག་གི་མཚམས་སུ་གསེར་ས་འོག་ན་ཡོད་པའི་འོད་ནམ་མཁའ་ལ་ཁྱབ་ཡོང་བ་མང་དུ་བཞུགས་ངེས་མོད། རྒན་པ་གོང་དུ་བཀུར་བའི་ཡ་རབས་དམ་པའི་སྲོལ་ལུགས་མཛད་ནས་ལོ་ན་རྒན་གཞོན་དུ་སྐྱེས་པ་སྔ་ཕྱིའི་དུས་རབས་ཀྱིས་དེད་ནས་བདག་གིས་འདིར་ཁ་མར་འཁོར་ཏེ་གྲོས་མགོ་ཙམ་འདོན་པར་ཁེལ་བྱུང་། དེ་ལ་ཆོས་བཤད་པའམ་ཆོས་ཁྲིད་འཚོགས་ཞེས་གང་བཤད་པར་བྱ་བའི་ཆོས་ནི། སངས་རྒྱས་ཆོས་དང་དགེ་འདུན་གསུམ་ལས་སྤང་རྟོགས་མཐར་ཕྱིན་དོན་གཉིས་ལྷུན་གྲུབ་ཀྱི་སངས་རྒྱས་དང་རིག་གྲོལ་ཡོན་ཏན་བརྒྱད་ལྡན་གྱི་དགེ་འདུན་གཉིས་མ་གཏོགས་པ། ཞི་བ་འདོད་ཆགས་དང་བྲལ་བ་ཞེས་པ་ནི་དམ་པའི་ཆོས་ཡིན། དེའང་ཇི་སྐད་དུ། གང་ཞིག་གང་གིས་ཆགས་བྲལ་བ། །བདེན་གཉིས་མཚན་ཉིད་ཅན་དེ་ཆོས། །ཞེས་པའི་གང་ཞིག་འདོད་ཆགས་དང་བྲལ་བ་འགོག་བདེན་དང་། གང་གིས་འདོད་ཆགས་དང་བྲལ་བ་ལམ་བདེན་ཡིན་ལ། དེའང་བདེན་གཉིས་ཀྱི་མཚན་ཉིད་ཅན་རྟོགས་པའི་ཆོས་དང་། དེའི་རྒྱུ་ཐུན་མོང་ཐུན་མིན་གྱི་སྡེ་སྣོད་ལུང་གི་ཆོས་སོ། །ལས་དང་པོ་པའི་སྐྱབས་ཡུལ་དངོས་ནི་དཀོན་མཆོག་གསུམ་ལས་ཆོས་དཀོན་མཆོག་འདི་ཉིད་ཡིན་པས་ན། ཇི་སྐད་དུ། སྐྱོབས་པ་བླ་མེད་དམ་ཆོས་རིན་པོ་ཆེ། །ཞེས་སྐྱོབས་པ་ཀུན་ལས་ཀྱང་བླ་ན་མེད་པ་ནི་དམ་པའི་ཆོས་འདི་ཡིན་པར་གསུངས། དེའི་ཕྱིར་ན་སྟོན་པ་བཅོམ་ལྡན་འདས་ཀྱི་ཞལ་ནས་ཀྱང་། ངས་ནི་ཁྱོད་ལ་ཐར་བའི་ཐབས་བསྟན་གྱི། །ཐར་བ་རང་ལ་རག་ལས་བརྩོན་པར་གྱིས། །ཞེས་པ་ལྟར་དམ་པའི་ཆོས་བསྟན་ནས་འགྲོ་བའི་སྡུག་བསྔལ་སེལ་ཞིང་གཏན་བདེའི་ཐར་ལམ་ལ་འགོད་པ་མ་གཏོགས། ཐུབ་རྣམས་སྡིག་པ་ཆུ་ཡིས་མི་འཁྲུ་ཞིང་། །འགྲོ་བའི་སྡུག་བསྔལ་ཕྱག་གིས་མི་སེལ་ལ། །ཉིད་ཀྱི་རྟོགས་པ་གཞན་ལ་སྤོ་མིན་པས། །ཆོས་ཉིད་ཞི་བ་བསྟན་ནས་མྱ་ངན་འདའ། །ཞེས་པ་ལྟར་འགྲོ་བ་མང་པོ་མ་གྲོལ་བ་ལས་གྲོལ་བར་མཛད་ཅིང་མ་བསྒྲལ་བ་ལས་སྒྲོལ་བར་འགྱུར་རོ། །དེ་ལྟར་ཆོས་སྟོན་པའི་ཐབས་མ་གཏོགས་སངས་རྒྱས་དང་དགེ་འདུན་གཉིས་བྱོན་ཡང་སྐྱོབ་མི་ནུས་པ་དེ་དཔེ་དོན་སྦྱར་ནས་བཤད་ན། ལྷས་སྦྱིན་དང་དགེ་སློང་ལེགས་སྐར་ལྟ་བུ་སྐྱོབ་ཐབས་མ་བྱུང་བའི་དཔེ་དང་། རང་རེ་འཁོར་བའི་སེམས་ཅན་ལས་ཉོན་བག་ཆགས་ཀྱི་འདམ་རྫབ་ཏུ་འཁོར་བཞིན་ཡོད་པ་འདིས་ཀྱང་དོན་གྱིས་རྟོགས་སོ། །དེས་ན་ཆོས་དཀོན་མཆོག་འདི་ལས་དང་པོ་པའི་སྐྱབས་གནས་མ་ནོར་བ་ཡིན་པ་དང་། ཆོས་དེའང་རང་རྒྱུད་ལ་སྒྲུབ་དགོས་པ་ཞིག་ཡིན་པའི་གནད་རྟོགས་པས་ན། རང་རེ་ལྟ་བུར་མཚོན་ན་ཐེག་པ་ཆེན་པོའི་ཆོས་དར་བའི་ས་ཆར་སྐྱེས་ཤིང་ཐེག་ཆེན་དམ་པའི་ཆོས་སྒོར་ཞུགས། ད་དུང་ཐེག་པ་ཆེན་པོའི་ལུགས་ཀྱི་སྐྱབས་འགྲོའི་སྡོམ་པའང་ཕལ་མོ་ཆེས་རྒྱུད་ལ་བླངས་ནས། དཀོན་མཆོག་གསུམ་གྱི་འབངས་སུ་མཆི་བར་དམ་བཅས་ཤིང་། བྱང་ཆུབ་མཆོག་ཏུ་སེམས་བསྐྱེད་དེ། སྨོན་དང་འཇུག་པའི་བསླབ་བྱ་གང་རུང་ངམ་གཉིས་ཀར་འཇུག་པར་ཁས་བླངས་བར་མ་ཟད། ཉེ་ལམ་སྔགས་ཀྱི་ཆོས་སྒོར་ཞུགས་ཏེ་དབང་མ་ཐོབ་པ་དང་སྔགས་སྡོམ་མ་བླངས་བསམ་རྒྱུ་མེད་པར་གྱུར་ནས། ལ་ལ་ཚེ་ཕྱེད་དང་ལ་ལ་ཚེ་སྨད་ལ་ཐུག་ཀྱང་ཐམས་ཅད་གཅིག་མཚུངས་མིན་ཏེ། འགའ་རེ་ནི་གཞན་དོན་སྨོན་པ་ཚིག་གི་བརྗོད་སྟངས་ཙམ་ལས་དོན་ལ་གཞན་དོན་ཕར་ཞོག་རང་དོན་ཙམ་ཡང་སྒྲུབ་ཚུལ་མི་ཤེས་པ། དཔེར་ན། མེ་ཆེ་ཐོག་ལ་བུད་ཤིང་སྣོན་པ་ཇི་བཞིན་མི་འདོད་པ་མ་བསམ་བཞིན་སྟེང་དུ་ཡོང་ཐབས་རང་གིས་བྱས་ཏེ། སྡུག་བསྔལ་སྔ་མའི་ཁུར་བོ་མ་དོར་བའི་སྔོན་ལ་སྡུག་བསྔལ་ཕྱི་མ་ཚུར་ལེན་པ་དང་འདྲ་བར་ལས་ངན་སྔ་མའི་རྣམ་སྨིན་གྱི་འབྲས་བུ་སྡུག་བསྔལ་མྱོང་བཞིན་དུ། རྒྱུ་མཐུན་གྱི་བྱེད་པས་སྡུག་བསྔལ་ཕྱི་མའི་ས་བོན་གསར་དུ་འདེབས་པ་ཁོ་ན་བྱེད། དེ་ལྟར་རང་གཞན་མ་བགོས་ཐུན་མོང་དུ་གྱུར་པ་སོ་སོའི་སྐྱེ་བོའི་ལས་བྱ་གཞག་འདི་མི་རུང་བས་ན། ད་སྔོན་འུ་བུ་ཅག་སྔ་དྲོ་མ་ཤེས་འཁྲུལ་བའི་དབང་དུ་གྱུར། བྱས་པ་སྔོན་སོང་བྱ་རྒྱལ་རྒོད་པོས་མི་ཆོད་པས་ཚར་སོང་རུང་། ཕྱི་དྲོ་བྱ་བ་རིགས་པས་གཏན་ལ་འབེབས་པ་ཞིག་མ་མཛད་པར་མིག་ཡོད་ཀྱིས་མཐོང་བཞིན་དུ་གད་མཆོང་གཡང་མཆོང་བྱ་བར་མི་རིགས་སོ། །འགའ་རེས་འདི་ལྟར་སྙམ་སྟེ་རང་དང་འདྲ་བ་དག་དང་རང་ལས་བཟང་བ་དེ་ལས་ལྷག་པ་དག་ཀྱང་འཁོར་བའི་བྱ་གཞག་སྡིག་དང་འབག་པ་ལས་ཆོས་རྣམ་དག་འབའ་ཞིག་མི་སྒྲུབ་ན། རང་ནི་དེར་ལྟོས་ན་མི་ཆུང་ཆུང་ཞིག་ཡིན་པས་འཇིག་རྟེན་ཁ་དཔེར། རྭ་ཡོད་བརྒྱ་ཐར་ས་ནས། །ཡུ་ལུ་མ་གཅིག་ཐར་ལོས་འགྲོ། ཞེས་བསམ་པ་ནི་རང་མགོ་རང་གིས་སྐོར་བ་བདུད་དགའ་རབ་དབང་ཕྱུག་གིས་བྱིན་པའི་ཟས་སྨན་ཞིག་གོ །འཇིག་རྟེན་མིའི་བལྟ་ས་རིག་ས་ན་ཡོད་པའི་འབྱོར་ཕྱུག་ཆུང་ངུ་འདི་ཙམ་ལ་ལྟ་ཅི། སྟོང་འཁོར་ལོས་སྒྱུར་བའི་རྒྱལ་པོ་དང་ཚངས་དབང་བརྒྱ་བྱིན་གྱི་ལུས་བླང་ཡང་ཕྱི་མ་དམྱལ་བའི་སྒྱེད་རྡོ་རུ་གྱུར་པ་རང་གཞན་ཀུན་ལ་གཅིག་མཚུངས་ཡིན། དེས་ན་ཁ་ཡོད་ལག་ཏུ་སྨིན་པའི་འདི་ཕྱི་གཉིས་ཀྱི་བདེ་ཐབས་ལ་གང་དགའ་ཅིའི་དྲག་ཅེས་འདིར་ཆོས་བཤད་བྱའི་གྲོས་གཞི་དེ་ནས་བརྩམ་ན། མིག་གིས་བལྟ་ས་མཐོ་དགོས་ཀྱི་དམིགས་འབེན་དེ་དམའ་ག་ལ་རུང་། ཚེ་གཅིག་ལུས་གཅིག་གི་སྟེང་ནས་འཚང་རྒྱ་བ་ཞིག་སྟེ། རང་གཞན་གཉིས་དང་འཕྲལ་ཕུགས་གཉིས་ལ་འབྲས་བུ་ཡོད་པ་ཤིན་ཏུ་ཟབ་པའི་མྱུར་ལམ་ཞིག་ལ་དམིགས་པ་གཏད་དགོས། དེ་ལྟ་མོད་བྱ་བ་ལག་ལེན་ལ་བསྟར་དུས་རང་གི་རྒྱུད་ཚོད་དང་མ་བསྟུན་ན། ཕུ་ཤྭ་ཤོར་དང་མདའ་ཤེའུ་ཤོར་དུ་གྱུར་ཚེ་དོན་མེད་དོ། །དཔེར་ན། ས་ཐག་རིང་ཉི་མ་ལྷ་སའི་ཇོ་བོའི་གསེར་ཁང་གི་མདུན་སྒོ་འབྱེད་པ་གལ་ཆེ་མོད། ཐོག་མར་རང་ཁྱིམ་གྱི་སྒོ་ཐེམ་བརྒལ་ཏེ་ལམ་ལ་ཞུགས་ནས་དང་པོ་གོམ་ཁ་སྤོ་ཕྱོགས་དང་ཁ་འཁོར་ཕྱོགས་མི་ནོར་ཞིང་། དང་པོ་སྒོ་ལམ་མཚམས་སུ་རྡོག་སྣེ་ཐོགས་ཏེ་ས་ལ་མི་འགྱེལ་བར་གོམ་ཁ་ལམ་ལ་འཇོག་ནུས་པ་ནི་དེ་བས་ཀྱང་གལ་ཆེའོ། །དེའང་ད་ལྟའི་གནས་སྟངས་ལ་བསམ་ན་རང་གཞན་གཉིས་དོན་རྒྱ་ཆེ་ཞིང་རྒྱང་རིང་བའི་དམིགས་འདུན་འགྲུབ་པ་ཕར་ཞོག གནང་ཉིན་ལྟ་བུའི་རང་ཉིད་ཀྱི་ཚེ་ཕྱི་མར་འདང་རྒྱག་མི་ཤེས་པར་མ་ཟད། སང་ཉིན་ལྟ་བུའི་མ་འོངས་ཕྱི་མའི་ལོ་ཟླར་ཡང་འདང་མི་ཕོག ཐ་ན་དེ་རིང་ལྟ་བུའི་མདུན་གྱི་རྡོག་ལམ་ཡང་མི་མཐོང་བར་རང་བདེ་དོན་གཉེར་གྱི་བྱ་གཞག་ཆུང་ཆུང་བཤད་རིན་མེད་པའང་སྒྲུབ་ལུགས་སྒྲུབ་སྟངས་མི་ཤེས་པར་མགོ་འཁོར་གྱི་ནད་བྱུང་བ་བཞིན་མི་འགྲུབ་པར་སྡོད་པ་འདི་ལ་བལྟས་ན། སྐས་ཐེམ་འོག་མ་ནས་མ་བརྒྱུད་པར་གོང་མ་ལ་འགོ་ཐབས་མེད་པ་ཤེས་ཡོང་། དེས་ན་སྐྱེས་བུ་གསུམ་གྱི་ལམ་རིམ་ཡར་ལྡན་ལ་བསམ་བློ་མི་གཏོང་ཐབས་མེད་དུ་གྱུར་འདུག དེའང་ན་ནིང་བསྐལ་བ་ལུག་གི་ལོའི་ད་ལྟའི་དུས་སུ་ཞིང་སྒྲུབ་འཚོགས་ཤིང་ཞིང་ཁྲིད་བཤད་དུས་བདག་གིས་བྲིས་པའི་ངག་འདོན་ཤིན་ཏུ་བསྡུས་པ་བྱིན་རླབས་གློག་ཞགས། ཞེས་པ་དེ་ཉིད་བཤད་ཅིང་། དེ་དང་མཉམ་དུ་དོན་མཐུན་ཆོས་ཀྱི་གྲོགས་པོ་ཞེས་བརྗོད་དགོས་པ་སྟེ། བླ་སེར་རྣམས་ལ་བསྟན་པའི་བདག་པོ་དང་བསྟན་པའི་གཞི་མ་ཞེས་ཡར་ལ་མ་བཞག་ཅིང་། མི་ནག་ཁྱིམ་པ་ཕོ་མོ་ལ་ཐ་མལ་བ་ཞེས་མར་ལ་མ་བསྐྱལ་བར་སྐྱ་སེར་འདུ་ཚོགས་ཁྱིམ་བཟའ་ཚང་གང་གི་ནང་གྲོས་བྱེད་པ་བཞིན་དུ། རང་གཞན་འདི་ཕྱིའི་བདེ་ཐབས་ཀྱི་ན་སའི་ཚ་མིག་གླེང་བ་ཡིན། དེ་ལ་བོད་མདོ་དབུས་ཁམས་གསུམ་གྱི་མི་སྣ་དང་དེ་མིན་མི་རིགས་གཞན་ཡིན་རུང་། སྐྱེ་ས་འཁྲུངས་ཡུལ་མི་གཅིག་ཅིང་། ཆ་ལུགས་སྐད་སྣ་མི་འདྲ་ཡང་། འདྲ་ས་གཅིག་པུ་ནི་བདེ་འདོད་སྡུག་བསྔལ་མི་འདོད་པ་དེ་འགྲོ་བ་མིའི་རིགས་ཙམ་དུ་མ་ཟད་སེམས་ཅན་ཀུན་ལ་སེམས་དང་ལྡན་པས་ན་བསམ་བློ་གཅིག་མཚུངས་སུ་གྱུར་ཡོད། དེའང་ཆོས་ར་གང་བའི་མི་ཁྲི་ཚོ་ཙམ་གྱིས་དབུགས་ཆེར་ལེན་ཙམ་མི་ཚོར་བར་འདུན་པ་རྩེ་གཅིག་ཏུ་གཏད་དེ་འདིའི་ཕྱོགས་ལ་ཐོས་བསམ་བྱེད་པ་ཡིན། ན་ནིང་འུ་བུ་ཅག་ཚོགས་པ་འབྲལ་ཁའི་དུས་ཚོད་ལ་སླེབས་དུས་བཤད་པ་སྟེ། ད་རེས་ང་ཚོ་འདི་ལྟར་ཚོགས་པ་ཡིན་མོད། ལོ་རྗེས་མའི་ད་ལྟའི་དུས་སུ་འདི་ལྟར་ཚོགས་པ་དང་ཐམས་ཅད་ཁ་རུག་ཚང་བར་འཛོམ་ཐུབ་པའི་རྟག་འཛིན་ནི་མངོན་ཤེས་མེད་པས་སུས་ཀྱང་མི་རྟོགས། གཅིག་རྟག་ཀྱང་ཅིག་ཤོས་རྟག་པར་དཀའ་བ་ནི་ཤེས་གསལ་ལྟར་རེད། ད་དུང་འབྲལ་ཁ་མར་དེ་རིང་རང་རེ་སོ་སོར་འབྲལ་བ་འདི་བཞིན་མི་རྟག་མཐའ་བཞིས་བསྡུས་པའི་འཁོར་བའི་ཆོས་ཏེ། འདུས་མཐའ་འབྲལ། སྐྱེས་མཐའ་འཆི། མཐོ་མཐར་ལྷུང་། བསགས་མཐར་འཛད་པར་འགྱུར་བ་འཁོར་བ་རང་གི་ཆོས་ཉིད་ཡིན་ན། སང་ཕོད་ཅིག་ལ་འུ་ཅག་འདི་ལྟར་ཚང་ཚང་རུག་རུག་གིས་འཛོམ་པར་དཀའ། དེས་ན་དེ་རིང་ཤི་ཡང་མི་འགྱོད་པའི་གདེང་ཞིག་རང་གིས་རང་ལ་ཡོད་པར་གྱིས་ཞེས་བཤད། ཚེ་འདིར་འགྲོག་པའི་ཁྱིམ་བཟའ་ཚང་དང་། དགའ་ཉེ་མཐུན་གྲོགས་ཡང་ཐ་མར་མི་འདོད་བཞིན་དུ་འབྲལ་ངེས་པར་མ་ཟད། དང་པོ་ང་ཞེས་གདགས་གཞིའི་ཕུང་པོ་དང་། དེ་ནས་ངའི་ཞེས་གཅེས་པར་བསྐྱང་བའི་ལུས་སེམས་གཉིས་ཀའང་སོ་སོར་གྱུར་ཏེ་བེམ་རིག་བྲལ་དུས། ཚེ་གཅིག་ལ་སྡིག་སྡུག་གཉིས་ལ་མ་འཛེམ་པར་འབད་པས་བསགས་པའི་རྒྱུ་ནོར་ལས་སྤུ་ཉག་ཙམ་ཞིག་འཁྱེར་དབང་མེད་པར་མ་ཟད། ལུས་ཕུང་པོ་འབྱུང་བཞིར་ཐིམ་ན། ལོ་ན་ཚོད་གཞོན་ཡང་ཕན་ཐོག་མེད་ལ། ལང་ཚོ་རྒྱས་པའི་སྒང་ཡིན་ཡང་བཤད་ས་མེད་པར་ཤ་རུལ་ཞིང་རུས་པ་ཞིག རུས་ཚིགས་ལྷུ་རུས་བཞིན་དུ་སོ་སོར་འཐོར་ནས་བལྟས་ན་ཡ་ང་ཞིང་དྲན་ན་ཡི་མུག་པ་ཞིག་ཏུ་འགྱུར་བ་དེ་ཉིད་ནམ་ཞིག་ལ་རང་མགོར་ཐོན་ཡོང་བ་སུས་ཤེས། དེ་མིན་ད་དུང་ཤི་ཁའི་གནད་གཅོད་ཀྱི་སྡུག་བསྔལ། བར་དོའི་འཁྲུལ་སྣང་གི་སྡུག་བསྔལ། ཕྱི་མ་ངན་སོང་གི་སྡུག་བསྔལ་སོགས་ལ་བསམ་བློ་རེ་བཏང་ན། ཟས་ཟོས་པ་མིད་པར་མི་འགྲོ་ཞིང་། མཚན་གཉིད་ཐུན་གནད་ལ་མི་ཁུག དེ་མིན་གཞན་དྲན་རྒྱུ་མེད་པའི་འཇིགས་སྐྲག་ཅིག་མདུན་དུ་ཡོད་མོད། ང་ཚོ་ཧ་ཅང་བླུན་ཆེ་བའི་དབང་གིས་དཔེར་ན། སང་ཉིན་གསོད་རྒྱུའི་བཤའ་ཟོག་གིས་དེ་རིང་ཞེ་ལྷོད་པོར་རྩ་ཟོས་ནས་འགྲོ་བ་དང་འདྲའོ། །གལ་ཏེ་རང་ཉིད་སང་ཉིན་དུས་ཚོད་ལྔ་ཡས་མས་སུ་རྐྱེན་འདི་འདྲ་བ་ཞིག་གིས་འཆི་བར་འགྱུར་བ་གསལ་ཐག་ཆོད་པ་ཞིག་ཤེས་ན། དོ་ནུབ་ཀྱི་དགོང་ཟས་བཟའ་བའི་ཡི་ག་ཡོད་པ་ལྟ་ཅི་ཐ་ན་ནུབ་མོ་དེར་མཚན་གཉིད་ཀླད་ལ་ཁུག་པ་ཞིག་ག་ལ་སྲིད། དེ་མིན་གཞན་བར་དོའི་འཕྲང་རིང་བགྲོད་དུས་ཤིན་ཏུ་འཇིགས་པའི་སྒྲ་བཞི་དང་། ཡ་ང་བའི་གཡང་ས་གསུམ། ཕྱི་མར་ལས་ངན་གྱི་འབྲས་བུ་ངན་སོང་གི་སྡུག་བསྔལ་རང་སྟེང་དུ་འབབ་པ་སོགས་ལ་བསམ་ན་སྐྲག་ནས་བརྒྱལ་བར་འགྱུར་བའི་ཚོད་ཡིན་མོད། འོན་ཀྱང་རང་རེ་བླུན་ཆེས་པའི་དབང་གིས་ཕྱི་འདང་མི་ཕོག་པ་ཡིན། ཚུལ་དེར་བལྟས་ན་དགྲ་གཉེན་བར་མའི་འགྲོ་བ་འདི་དག་ཐམས་ཅད་སྙིང་རྗེའི་ཡུལ་ཡིན་པས་ན། སྔོན་དགེ་བའི་བཤེས་གཉེན་གླང་རི་ཐང་པ་སྐུ་ཚེ་གཅིག་ལ་ཞལ་མ་འཛུམ་པར་བཞུགས་པ་ལ་སྐབས་ཞིག་བླ་མ་ཞལ་ནག་པ་ཞེས་མཚན་ཐོགས་པ་ཡིན། དེས་ན་སྐྱེས་པའི་ཐ་མར་འཆི་བ་ཡོད་ལ། སྐྱེ་རྒ་ན་འཆི་བཞི་བོ་གཅིག་འཕྲོ་གཅིག་ལ་རྒྱུན་ཆད་པ་མེད་པར་འབྱུང་བས་ན་བདུད་ཀྱི་ཆུ་བོ་བཞི་ཞེས་བྱའོ། །ཤི་ཕར་རྒྱབ་ཀྱི་སྣང་བ་ཤར་དུས་ལུས་བེམ་པོ་ནི་འབྱུང་བཞིའི་བག་ལ་ཞ་ཞིང་། སེམས་རྣམ་ཤེས་ནི་ལས་ཀྱི་རྗེས་སུ་འབྲང་ནས་ཤི་གསོན་སྣང་བ་སོ་སོར་འགྱུར་བ་དེ་སྔ་ཕྱི་ཙམ་ཡིན། དེའི་ཕྱིར་ན་མི་འཆི་བསམ་ཡང་རང་དབང་མེད་ལ། མི་འབྲལ་བསམ་ཡང་རང་དབང་མེད་པས་ན། དབང་མེད་འཁོར་བའི་སྡུག་བསྔལ་འདི་ལས་གཏན་དུ་ཐར་བ་ཞིག་མ་བྱུང་ན་མི་ཉན་མོད། ད་ལྟའི་ལུས་རྟེན་འདིའི་སྟེང་ནས་གལ་ཆེན་ནང་གི་དོན་ཆེན་ཐར་བའི་ལམ་སྣེ་ཞིག་ཟིན་ཡོང་སྙམ་སྟེ། བྱ་བ་ཆུང་ངུ་ཙག་ཙིག་ལ་གལ་ཆེན་དུ་མི་བལྟ་བར་འདི་ཉིད་གལ་ཆེན་བརྒྱ་ཡི་ནང་གི་དོན་ཆེན་དུ་དགོངས་ཏེ་འབད་པས་བརྩོན་པར་མ་ནུས་ན། དོན་ཆུང་ཚེ་འདིའི་བྱ་གཞག་ཙམ་རེ་བསྒྲུབས་ནས་སྡོད་པ་ནི་སྒོ་ཟོག་དུད་འགྲོ་རྣམས་ལས་མ་འཕགས་པར་བཤད་དོ། །དེའང་འུ་བུ་ཅག་གིས་ན་ནིང་ཆོས་བཤད་པ་དང་ཉན་པ་ཐོས་པ་ཙམ་གྱིས་མི་ཆོག ཚིག་རྣ་བས་ཐོས་པ་དང་དོན་སེམས་ཀྱིས་བསམ་པ་གཉིས་དུས་མཉམ། དོན་བསམ་པའི་སྙིང་པོ་སྒོམ་གྱི་ལག་ལེན་ལ་སྦྱར་ཏེ་བསམ་པ་དང་བསྒོམ་པ་དུས་མཉམ་པ་ཞིག་བྱེད་དགོས། ད་སྔོན་རང་གཞན་གཉིས་ལ་ཉམས་མྱོང་དང་སྦྱར་ན། ཆོས་སང་སྒྲུབ་གནང་སྒྲུབ་ཀྱིས་མི་ཚེ་ཟད་སོང་། ཕུག་རོན་གྱིས་ཉལ་ས་བཅའ་ཚེ་ནམ་ལང་བ་ལྟར། འཇིག་རྟེན་མ་འགྲུབ་ཅིང་སྐྱིད་རྗེས་སུ་འོང་བའི་འདུག་ཆས་ཁོ་ན་སྒྲུབ་སྟེ་བསྡད། ཆོས་ཀྱང་མ་འགྲུབ། སང་དང་གནང་གི་ཕྱི་བཤོལ་ལེ་ལོ་རྐྱང་རྐྱང་གིས་དུས་འདའ་བ་མ་གཏོགས་ཆོས་དང་འཇིག་རྟེན་གཉིས་ཀ་མ་འགྲུབ་པར་ཚེ་ཕྱི་མའི་ལམ་དུ་འགྱོད་བཞིན་སོང་བ་རང་གཞན་གཉིས་ཀའི་ཕྱོགས་ན་ཅི་འདྲའི་མང་པོ་ཞིག་ཡོད། དེའང་བྱ་སྔོན་མ་ཤི་བའི་རོ་ལ་བལྟས་ན། རྗེས་མ་མི་རྟག་པ་དེ་དང་འདྲའོ། །དེས་ན་འུ་ཅག་གིས་དེ་ལྟར་མི་བྱེད་འདི་ལྟར་བྱེད་ཅེས། བདག་གིས་ངག་འདོན་ཐུང་ཐུང་གོ་སླ་ཉན་བདེ་བ་དེ་ཉིད་གཞིར་བཟུང་ནས་ལམ་ལོག་པ་ལས་ལྡོག་བྱེད་སྐྱབས་འགྲོ་དང་། ལམ་དམན་པ་ལས་ལྡོག་བྱེད་སེམས་བསྐྱེད། གཞན་ཡང་ཚོགས་བསགས་སྒྲིབ་སྦྱོང་གི་སྒོ་མཐའ་ཡས་པ་ཞིག་ཡོད་པ་ཡན་ལག་བདུན་དང་། དེའི་གནད་ཐམས་ཅད་བསགས་སྦྱོང་གཉིས་སུ་འདུ་ཚུལ་བཤད་ལ། དེ་བཞིན་རྫོགས་ཆེན་དངོས་གཞིའི་ཉམས་ལེན་ལ་འབྲལ་ཐབས་མེད་ཅིང་རྟོགས་པའི་ཡེ་ཤེས་རང་རྒྱུད་དུ་བཙན་ཐབས་སུ་འདྲེན་བྱེད་ཟབ་ལམ་བླ་མའི་རྣལ་འབྱོར་གྱི་ཁྲིད་ཀྱང་དེའི་ཞར་ལ་བཤད་དོ། །ཁྲིད་བཤད་པ་ལའང་མོས་ཁྲིད་དང་སྨིན་ཁྲིད་གཉིས་ཡོད་ལ། དེ་གཉིས་ལས་སྨིན་ཅིང་གྲོལ་བ་དོན་ལ་ཕན་པའི་སྨིན་ཁྲིད་བཤད། བཤད་ཚུལ་ལའང་ཚོགས་བཤད་དང་སློབ་བཤད་གཉིས་ལས། ཚིག་ལ་གྲིམ་པའི་སྙན་ཆ་དང་མཛེས་ཆོས་གཙོ་བོར་མ་བཟུང་བར་སློབ་མའི་རྒྱུད་ལ་ཕན་པའི་སློབ་ཁྲིད་དེ་རང་རྒྱུད་དཔེ་མཚོན་ལ་བཀོད་ནས་བཤད་དེ། ཁྱིམ་པ་ཕོ་མོར་སྒོམ་རྒྱག་སྟངས་ཀྱང་བསླབ། དེའང་ལུས་ཀྱི་འདུག་སྟངས་རྣམ་སྣང་ཆོས་བདུན། སེམས་ཀྱི་བཞག་ཐབས་ཡིད་དུས་གསུམ་གྱི་རྗེས་སུ་མི་འབྲང་། ལུས་སེམས་གཉིས་ཆར་རང་བབས་སུ་ལྷོད་དེ་བཞག་པའི་སྟེང་དུ་ཞི་གནས་དང་ལྷག་མཐོང་ཟུང་འབྲེལ་གྱི་རྣལ་འབྱོར་བསམ་གཏན་དང་ཤེས་རབ་གཉིས་དང་རྗེས་སུ་འབྲེལ་བ་སྟེ། མཉམ་བཞག་ནམ་མཁའ་ལྟ་བུ་དང་རྗེས་ཐོབ་སྒྱུ་མ་ལྟ་བུའི་ཉམས་ལེན་གྱི་གནད་ཀྱང་ཕྱོགས་ཙམ་བཤད་པའི་ཚུལ་མཛད་ཅིང་། དེ་ནས་ཞིང་ཁྲིད་དངོས་ལ་ཀུན་མཁྱེན་འཇིགས་གླིང་གི་གསུང་བྱིན་རླབས་ཅན་ཏེ། ཆོས་ཉིད་མི་འགྱུར་སྣང་བ་མཐའ་ཡས་སོགས་ཤོ་ལོ་ཀ་གཅིག་གི་སྟེང་ནས་བཤད་རྒྱུ་བྱས་མོད། འོན་ཀྱང་དེར་ཐུག་དུས་འུ་བུ་ཅག་གི་ཆོས་ཁྲིད་ཉི་མ་བཞི་ལྔ་བོ་ལོན་ཟིན་པས་ན། དུས་ཚོད་ཀྱིས་མ་འདང་བའི་དབང་གིས་བདེ་བ་ཅན་དུ་སྐྱེ་བའི་རྒྱུ་བཞི་རགས་བསྡུས་ཀྱི་མགོ་ཙམ་སྨྲོས་ཏེ། བླ་མ་དང་མགོན་པོ་འོད་དཔག་མེད་དབྱེར་མེད་དུ་མོས་པ་ལ་རྒྱུ་བཞི་འདུ་ཚུལ་དང་། དེ་བཞིན་སྔར་བཤད་པའི་སྒྲ་ཕབ་རེ་ལའང་ཉོན་དང་ཕན་ཐོག་ཅུང་ཟད་འབྱུང་སྲིད་དོ། །ཞེས་ཕྱོགས་ཙམ་ཞིག་བསྟན་ནས་འདུས་པ་ཐམས་ཅད་རང་གནས་སུ་གྱེས་སོང་བ་ཡིན། དུས་དེ་ནས་ད་ལྟ་ལ་མ་ཐུག་གི་བར་དུ་ལོ་གཅིག་སྟེ་ཟླ་བ་བཅུ་གཉིས་འཁོར་ནས་སླར་ཡང་རང་རེ་མ་ཤི་བ་ཐམས་ཅད་བསྐལ་བ་བརྒྱའི་ནང་གི་དུས་ཚོད་གཅིག་ཅེས་པ་ལྟར་ལོ་གཅིག་རིང་གི་དུས་གཅིག་འདི་ལ་འཛོམ་པ་ཡིན། དེ་ལྟར་འཛོམ་པ་ལ་ན་ནིང་གི་འཕྲོར་མཐུད་དེ་བདེ་ཆེན་ཞིང་ཁྲིད་ཀྱི་ཉམས་ལེན་ལ་དམིགས་ནས། ཉམས་ལ་རན་པོ་གནད་ལ་ཁེལ་བ། ཕན་ཐོག་རེ་འབྱུང་བའི་ཆེད་དུ་སྔོན་གྱི་དེབ་ཆུང་དེ་ལ་ཡང་བསྐྱར་བལྟས་ནས་འཆད་རྩིས་ཡིན། དེའང་དེབ་ཆུང་ངམ་ཡིག་ལྡེབ་གཅིག་ཙམ་གྱི་ངག་འདོན་ཤིན་ཏུ་བསྡུས་པ་ཞེས་པ་འདི་ནི། འཇིག་རྟེན་བྱ་བའི་ལས་བྲེལ་ཅན་གྱི་ཁྱིམ་པ་དུས་རྒྱུན་ཡིག་ཆ་སྣ་མང་ཀློག་ལོངས་མེད་པའམ་ཡི་གེ་འབྲི་ཀློག་གི་སྦྱང་བ་ཆེན་པོ་མ་བརྒྱུད་པ་ཚོར་ཁ་ཐོག་ནས་བསླབ་ཀྱང་བློར་འཛིན་བདེ་ཞིང་ཤེས་སླ་བར་དམིགས་ནས་བྲིས་པ་ཞིག་ཡིན་ལ། འདི་ཉིད་ཀྱི་བྱེ་བྲག་གི་མིང་དངོས་ནི་བྱིན་རླབས་གློག་ཞགས་ཞེས་རང་གིས་བཏགས་པའོ། །དེའི་དོན་ནི་འདི་ཉིད་ཚིག་ཉུང་ཡང་བརྗོད་དོན་དམ་པའི་སྐྱེས་བུའི་གསུང་གི་གནད་འདུས་པས་ན། དུས་གསུམ་རྒྱལ་བའི་ཞལ་ཚབ། དགོངས་བརྒྱུད་བླ་མའི་བྱིན་རླབས་འདྲེན་པ་ལ་མྱུར་བ། ནམ་མཁའི་གློག་གི་ཞགས་པའི་དཔེའི་གཟུགས་ཅན་དུ་བཀོད་དེ་མྱུར་བའི་ཆ་ནས་འདྲ་བ་རྒྱུ་མཚན་དུ་བྱས་ནས་བཏགས་པའི་མིང་ཞིག་གོ །ད་ནི་ཡིག་དེབ་དེར་ལྟོས་དང་ཐོག་མར་འདི་ལྟར་འཁོད་དེ། ཕྱོགས་བཅུའི་སངས་རྒྱས་བྱང་སེམས་བླ་མ་དགོངས། །ཞེས་པས་ནི་ཚོགས་ཞིང་བསྒོམ་པ་ཤུགས་བསྟན་གྱིས་དགོངས་གསོལ་གྱི་སྙན་གསན་དབབ་ཅིང་། དཀོན་མཆོག་གསུམ་ལ་སྙིང་ནས་སྐྱབས་སུ་མཆི། །ཞེས་པ་འདིས་སྐྱབས་འགྲོ་དང་། སེམས་ཅན་དོན་དུ་བྱང་ཆུབ་སེམས་མཆོག་སྐྱེད། །ཅེས་པས་སེམས་བསྐྱེད་བསྟན། ཕྱག་འཚལ་མཆོད་འབུལ་སྡིག་ལྟུང་ཐམས་ཅད་བཤགས། །དགེ་ལ་ཡི་རངས་ཆོས་འཁོར་བསྐོར་བར་སྐུལ། །མི་འདའ་བཞུགས་གསོལ་དགེ་ཀུན་བྱང་ཆུབ་བསྔོ། །ཞེས་པའི་ཚིག་རྐང་གསུམ་གྱིས་ཡན་ལག་བདུན་པ་དང་བཅས་ཐུན་མོང་ཐུན་མིན་གྱི་སྔོན་འགྲོ་དངོས་ཤུགས་བརྒྱུད་གསུམ་གྱིས་བསྟན་པའོ། །འདི་མན་ཆད་དངོས་གཞི་ལ་བསྐྱེད་རྫོགས་རྫོགས་ཆེན་གསུམ་གྱི་གནད་བསྡུས་ནས་བསྟན་པར་སྣང་སྟེ། དེའང་བསྐྱེད་པ་མ་ཧཱ་ཡོ་ག རྫོགས་པ་ཨ་ནུ་ཡོ་ག རྫོགས་ཆེན་ཨ་ཏི་ཡོ་ག་གསུམ་གྱི་གནད་ཅི་ལྟར་བསྟན་ཡོད་ཅེ་ན། མདུན་མཁར་འདབ་སྟོང་པདྨའི་དབུས་བཞུགས་པའི་། །སྐྱབས་གནས་ཀུན་འདུས་བླ་མ་རྡོ་རྗེ་འཆང་། །ངོ་བོ་སངས་རྒྱས་ཀུན་དང་དབྱེར་མེད་པ། །རྣམ་པ་མཚོ་སྐྱེས་རྡོ་རྗེའི་གནས་གསུམ་ལས། །དཀར་དམར་མཐིང་གའི་འོད་འཕྲོས་སྒོ་གསུམ་ཐིམ། །ཞེས་པའི་ཚིག་རྐང་ལྔ་བོ་འདིས་བསྐྱེད་རིམ་བསྟན་ཞིང་། སླར་ཡང་ཐུགས་ཀའི་འོད་མཐིང་སྙིང་ལ་ཐིམ། །སྒྲིབ་དག་དབང་ཐོབ་སྐུ་བཞིའི་ས་བོན་ཐེབས། །གུ་རུའི་ཐུགས་ཀའི་འོད་དམར་གྱིས་དྲངས་ནས། །བདག་ཉིད་གཞི་ལུས་རྡོ་རྗེ་རྣལ་འབྱོར་མ། །འོད་དམར་གྱུར་ཏེ་བླ་མའི་ཐུགས་ཀར་ཐིམ། །ཞེས་པའི་ཚིག་རྐང་ལྔས་རྫོགས་རིམ་ཐུན་མོང་བ་བསྟན་ལ། ཐུགས་ཡིད་དབྱེར་མེད་ཆོས་སྐུའི་དགོངས་པར་འདྲེས། །སྟོང་གསལ་མཐའ་དབུས་བྲལ་བའི་ཆོས་ཀྱི་དབྱིངས། །འཛིན་མེད་འོད་གསལ་རིག་སྟོང་རྗེན་པའི་གཤིས། །ཡེ་ཤེས་གཅིག་གི་ངོ་བོར་རོ་གཅིག་པུ། །མ་བཅོས་མཉམ་པ་ཆེན་པོའི་ཀློང་དུ་ཨ། །ཞེས་ཐ་མའི་ཚིག་རྐང་ལྔས་རྫོགས་རིམ་ཀུན་གྱི་མཐར་ཐུག་ཐུན་མིན་རྫོགས་པ་ཆེན་པོའི་གནད་བསྟན་ཏོ། །ཞེས་བརྗོད་གཡོ་མེད་མཉམ་པར་བཞག །ཐུན་མཐར་དཔལ་ལྡན་བླ་མ་སོགས་ཡིག་ཆུང་གིས་མི་གཡོ་མཉམ་པ་ཆེན་པོའི་དགོངས་དོན་གཞི་འབྲས་དབྱེར་མེད་ཀྱི་གནད་གསང་མཉམ་པར་གཞག་བྱ་འཇོག་བྱེད་དང་བྲལ་བ་ཆོས་དབྱིངས་ཐིག་ལེ་ཉག་གཅིག་དབྱིངས་དང་ཡེ་ཤེས་དབྱེར་མེད་སྟོང་གསལ་མཐའ་དབུས་དང་བྲལ་བའི་ངང་ལས་མ་བྲལ་བར་བྱ་བས་རྗེས་ཐོབ་སྤྱོད་པའི་བོགས་འདོན་གྱི་གོ་དོན་ཡང་བསྟན་ནོ། །དེ་ཡན་ཆད་གྱི་གོ་དོན་ནི་ལོ་སྔོན་མར་བཤད་ཟིན་ལ། དེའང་དང་སྒྲ་འོག་མ་སྡུད་པའི་ཚིག་གིས་དྲངས་ནས། ད་ལོར་གང་འཆད་པར་བྱ་བ། ཆོས་ཉིད་མི་འགྱུར་སྣང་བ་མཐའ་ཡས་དང་། །ཞེས་པ་སོགས་ཤོ་ལོ་ཀ་གཉིས་ཀྱིས་བདེ་བ་ཅན་དུ་སྐྱེ་བའི་རྒྱུ་བཞིི་སྡོམ་གྱིས་བསྡུས་པས་ན། བདེ་ཆེན་ཞིང་ཁྲིད་ནི་འདི་ཉིད་རྩལ་འདོན་གྱིས་གསལ་ཁ་བཏོད་ནས་འཆད་པར་བྱའོ། །དེའང་དེབ་ཆུང་འདི་ཉིད་དུས་རྒྱུན་ངག་འདོན་གྱི་སྔོན་འགྲོ་དང་བླ་མའི་རྣལ་འབྱོར་ལ་གཙོ་བོར་བྱེད་དུས་སུ། ཆོས་ཉིད་མི་འགྱུར་ལ་སོགས་པ་ནི་མཇུག་གི་སྨོན་ལམ་གྱི་ཚུལ་འདོན་པ་དང་། བྱང་སྨོན་གཙོ་བྱས་འདི་ལྟར་ཉམས་ལེན་སྒོམ་ཁྲིད་ཀྱི་ཚེ་ན་སྔ་མ་རྣམས་ནི་འདི་ཉིད་ཀྱི་སྔོན་འགྲོའམ། ཡང་ན་བདེ་བ་ཅན་དུ་སྐྱེ་བའི་རྒྱུ་བཞིའང་གོང་དུ་སོང་མ་ཐག་པའི་ཐུན་མོང་གི་བསགས་སྦྱང་དང་བསྐྱེད་རྫོགས་རྫོགས་ཆེན་གསུམ་གྱི་དམིགས་རིམ་ལས་མ་འདས་པར་བྱ། གཞན་ཡང་མདོ་ཡི་དགོངས་པ་སྔགས་ཀྱིས་གབ་བཏོན་བྱུང་བ་མདོ་སྔགས་ཟུང་འབྲེལ་གྱི་མན་ངག་སྟེ། གསེར་གྱི་མཆོད་སྡོང་ལ་གཡུ་དང་མུ་མེན་གྱིས་ཕྲ་རྒྱན་བཏབ་པ་ལྟ་བུ་ཞིག་ཡིན་པར་བཤད་ཆོག དེ་ལྟར་འཆད་ཉན་བྱེད་པ་ལ་སྤྱིར་ཐེག་པ་ཆེན་པོའི་ཆོས་ནི་སྦྱོར་བ་སེམས་བསྐྱེད་དམ་པ། དངོས་གཞི་དམིགས་མེད་དམ་པ། རྗེས་བསྔོ་བ་དམ་པ་གསུམ་གྱིས་རྩིས་ཟིན་པ་ཞིག་དགོས་པས་ན། དེ་ལ་ཐོག་མར་མེད་དུ་མི་རུང་བ་ནི་བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་ཡིན་པས་ན། འདི་ལྟར་ནམ་མཁས་གར་ཁྱབ་ལ་སེམས་ཅན་གྱིས་ཁྱབ་ཅིང་། སེམས་ཅན་གྱིས་གར་ཁྱབ་ལ་ལས་དང་ཉོན་མོངས་པས་ཁྱབ། ལས་དང་ཉོན་མོངས་པས་གར་ཁྱབ་ལ་སྡུག་བསྔལ་གྱིས་ཁྱབ། དེ་ལྟར་སྡུག་བསྔལ་རྣམ་གསུམ་གྱིས་མནར་བའི་སེམས་ཅན་འདི་དག་ཐམས་ཅད་ནི་གཞན་མ་ཡིན་ཏེ། རང་ཉིད་ཀྱི་འཁོར་བ་ཐོག་མེད་ནས་ཕ་མར་གྱུར་པ་ཁོ་ན་ཡིན། དེ་དག་གི་གྲས་སུ་ཕ་དང་མ་བྱེད་མ་མྱོང་བ་ནི་མེད་ལ། དེའང་ད་ལྟའི་ཕ་མ་བཞིན་དུ་དྲིན་ཆེན་པོས་བསྐྱངས་བའི་དྲིན་ཆེན་ཤ་སྟག་ཡིན། དེ་ལྟར་ཡིན་པའང་གཞན་གྱི་ངག་ཙམ་ལ་ཉན་ནས་དེ་འདྲ་ཡིན་སྲིད་སྙམ་པ་ཙམ་དུ་མི་འཇོག་པར་ཡིན་མིན་རང་ཉིད་ཀྱི་རིགས་པས་བརྟགས་ཤིང་དཔྱད་དེ་གཏན་ལ་འབེབས་དགོས་ཤིང་། འདི་ལ་བརྟགས་ཤིང་དཔྱད་ནའང་སྤྱིར་རྒྱུ་མེད་ཀྱི་འབྲས་བུ་ཞིག་མི་སྲིད་པས་ན་ད་ལྟའི་རང་གི་ལུས་འདི་ལ་རྫས་རྒྱུན་ཞིག་དང་། སེམས་འདི་ལ་ཤེས་རྒྱུན་ཞིག་ཡོད་ངེས་ལ། དེ་གཉིས་ཀྱི་ཡ་མཐའ་བཙལ་ན་ཐུག་མེད་ཡིན་ཞིང་། དེའང་སྐྱེ་བ་རེ་ལ་ཕ་མ་རེ་ཡོད་པས་ཀྱང་གྲུབ་པར་མ་ཟད། སྟོན་པ་སངས་རྒྱས་ཀྱི་བཀའ་ལུང་བསླུ་བ་མེད་པ་སྟོང་རྟེན་འབྱུང་གི་བདེན་དོན་འཁྲུལ་བ་སྤངས་པས་ཀྱང་ཆེ་ས་ནས་འགྲུབ་པས་ན། ཆུང་ས་ནས་བྱིས་བློའི་རྣམ་དཔྱོད་ཀྱིས་གཞལ་མི་དགོས་པར་ལུང་བཞིན་སྨྲ་ཤེས་པས་ཆོག དེ་ལྟར་ངེས་ནས་ད་ལྟ་རང་རེས་དལ་འབྱོར་ཚང་བའི་ལུས་རྟེན་བླང་ཞིང་། དམ་པའི་ལྷ་ཆོས་བྱེད་པའི་གོ་སྐབས་བཟང་པོ་ཞིག་ཐོབ་ཡོད་བཞིན་དུ། འདི་ཉིད་དོན་མེད་དུ་མི་འདའ་བར་མ་རྒན་སེམས་ཅན་ཐམས་ཅད་སྡུག་བསྔལ་ལས་བསྒྲལ་ཏེ་གཏན་གྱི་བདེ་བ་སངས་རྒྱས་ཀྱི་གོ་འཕང་དམ་པར་འགོད་པ་ལ། དེ་ལྟར་འགོད་ནུས་པའི་སྟོབས་དང་ནུས་པ་ཅན་རྫོགས་པའི་བྱང་ཆུབ་སྒྲུབ་པའི་ཕྱིར་ཆོས་འཆད་ཉན་ལ་འཇུག་ཅིང་། དེ་ཙམ་དུ་མ་ཟད་ཐོས་བསམ་གྱི་སྙིང་པོ་བསྒོམ་པའི་ཉམས་ལེན་ལ་བརྩོན་ནས་ཚུལ་བཞིན་རྒྱུད་ལ་འབྱོར་བ་ཞིག་བྱ་དགོས་སྙམ་པ་ཡིད་ལ་ཟུངས་ཤིག དེའང་ཐེག་ཆེན་གྱི་ཆོས་དར་བའི་ཡུལ་དུ་མདོ་སྔགས་ཀྱི་ཆོས་གང་འཆད་ཀྱང་ཀུན་གྱིས་ཚིག་རྐང་དེ་དག་གིས་གསལ་འདེབས་བྱེད་དོ། །དེ་ལྟར་ཀུན་སློང་བཅོས་དགོས་པར་མ་ཟད། ཇི་སྐད་དུ་ཀུན་མཁྱེན་ཀློང་ཆེན་པས། ཁྱད་པར་ཐེག་ཆེན་དགེ་བ་རླབས་པོ་ཆེ། །སྦྱོར་བ་སེམས་བསྐྱེད་དངོས་གཞི་དམིགས་པ་མེད། །རྗེས་ལ་བསྔོ་བས་ཡོངས་སུ་ཟིན་པ་སྟེ། །ཐར་ལམ་སྒྲུབ་པའི་ཤེས་པ་རྣམ་གསུམ་ཡིན། །ཞེས་གསུངས་པ་ལྟར། ཐར་ལམ་ཡང་དག་པ་ཞིག་མི་སྒྲུབ་ན་དེར་ཟད་ཀྱི་དངོས་གནས་བསྒྲུབ་པར་འདོད་ན་དེ་གསུམ་མེད་ཐབས་མེད་ལ། ཁྱད་པར་བྱང་ཆུབ་མཆོག་ཏུ་སེམས་བསྐྱེད་ཅིང་། བྱང་སེམས་རྒྱུད་ལ་སྐྱེས་པ་དེ་ཉིད་མི་ཉམས་པ་ནི། ཇི་སྐད་དུ། ཡོད་ན་སངས་རྒྱས་སྒྲུབ་ལ་དེས་ཆོག་གི། མེད་ན་སངས་རྒྱས་སྒྲུབ་ལ་ཐབས་ཆག་པ། །སངས་རྒྱས་སྒྲུབ་པའི་ས་བོན་མ་ནོར་བ། །ཞེས་དང་། སྙིང་རྗེའི་སེམས་དང་གཉིས་སུ་མེད་བློ་དང་། །བྱང་ཆུབ་སེམས་ནི་རྒྱལ་སྲས་རྣམས་ཀྱི་རྒྱུ། །ཞེས་གསུངས་པ་ལྟར་རོ། །འོན་ཀྱང་དེའི་དོན་ཡིད་ན་མེད་པར་རྗེས་ཟློས་ངག་འདོན་ཁ་བཤད་ཙམ་དུ་གྱུར་ན་དེ་ནི་དོན་དང་མ་འབྲེལ་ཞིང་། ཁྱད་པར་འདི་ནས་ཁྲིད་བཤད་པ་ནི། ལོང་བའི་ལག་མགོ་ནས་འཇུས་ཏེ་འདོད་པའི་ཡུལ་དང་བདེ་བའི་གནས་ཞིག་ཏུ་སྐྱེལ་བའི་དཔེ་དོན་བཞིན་མ་ནོར་ལམ་གྱི་འཇུག་སྒོ་ནས་ཁྲིད་དེ་ཡང་དག་བསྒྲུབ་བྱའི་འབྲས་བུ་མངོན་དུ་བྱེད་པ་ཡིན་ཞེས་བཤད་ན། དེའང་སྤྱིར་ཁྲིད་མཁན་རང་ལ་ལམ་རྒྱུས་ཡང་དག་པ་ཞིག་ཡོད་དགོས་ཤིང་། དེ་དགོས་པ་ལ་ཐོག་མར་གཏམ་གྱི་མགོ་འཛུགས་ས་སྟེ། སེམས་ཅན་ཐམས་ཅད་ཕ་མར་ཤེས་པ་འདིའི་ཐད་དུ་རང་བློ་རང་ལ་ཡིད་མི་ཆེས་པའི་གནོང་ཞིག་ཡོད་པར་འདུག སྤྱིར་ན་ཆོས་འཆད་མཁན་ནི་མངོན་ཤེས་ཅན་ཞིག་ཡིན་དགོས་ཤིང་། དེའི་རྒྱུ་མཚན་ནི་ཆོས་འཆད་པ་གདུལ་བྱའི་རྒྱུད་ལ་ཕན་པའི་ཕྱིར་ཡིན་ན། གདུལ་བྱ་ལ་འདྲ་དང་མི་འདྲ་སྣ་ཚོགས་ཡོད་པས་ཁམས་དབང་མོས་པ་ཤེས་པའི་ནུས་པ་ཡོད་དགོས། ནུས་པ་དེ་མེད་ན་ནད་པའི་ནད་ངོས་མ་ཟིན་པའི་སྨན་པས་ཡིད་ཚོད་ཀྱིས་སྨན་སྟེར་བ་དང་འདྲ་བར་བྱེད་པ་ལས་ཐབས་མེད་ལ། དེ་འདྲ་བ་ནི་སྨན་དུ་འགྱུར་རམ་དུག་ཏུ་འགྱུར་མི་ཤེས། སྤྱིར་བསམ་པ་བཟང་བ་ཙམ་གྱིས་མི་ཆོག་སྟེ། ག་བུར་ནི་ཚ་བ་སེལ་བའི་སྨན་མཆོག་ཡིན་ཡང་སྦྱིན་ཡུལ་མ་ཤེས་ན་རླུང་ནད་ཅན་ལ་དུག་ཏུ་འགྱུར་ཉེན་ཡང་ཆེའོ། །འོ་ན་ཁྱེད་ཀྱིས་ཆོས་ཅི་ལྟར་འཆད་རྩིས་ཡིན་ཞེས་དྲི་བ་ཞིག་བཀོད་ན། རང་ལྟ་བུས་ནི་སློབ་དཔོན་སངས་རྒྱས་ཀྱི་འཆད་སྟངས་དང་། སློབ་དཔོན་དགྲ་བཅོམ་པས་འཆད་སྟངས། སློབ་དཔོན་པཎྜི་ཊས་ཆོས་འཆད་སྟངས་སོགས་མ་ཤེས་ན། མངོན་ཤེས་མི་འདུག་པས་གཞན་རྒྱུད་མི་རྟོགས་མོད། རང་རྒྱུས་རང་ལ་ཡོད་པས་རང་རྒྱུད་རྟོགས་ཤིང་། རང་བློ་རང་ལ་ལྐོག་ཏུ་མ་གྱུར་པ་སོ་སོའི་སྐྱེ་བོའི་བསམ་སྤྱོད་མདོག་མ་བརྗེས་ཤིང་སྤུ་མ་འགྱུར་བ་དེ་ཉིད་གཞིར་བཞག་ནས། སྤྱིར་སེམས་ཅན་མཐའ་ཡས་ཀྱང་སོ་སོའི་སྐྱེ་བོའི་ཆ་ཙམ་འདྲ་བར་ཡོད་པའི་དཔེ་འཇོག་གིས་རང་རྒྱུད་གཞིར་བཟུང་ནས་འཆད་པ་ཡིན། དེ་ལྟར་བསམ་བློ་ཞིབ་ཏུ་བཏང་ན་ང་དང་ཁྱོད་ཀྱི་ཁྱད་ཕྱེ་སར་ཐུག་དུས། གཞན་བདེ་ས་དང་རང་གཟར་ས་རུ་འཇོག་ཟེར་བ་དེ་ལས་སླ་བ་ཞིག་མིན། མཐའ་ཡས་སེམས་ཅན་ཐམས་ཅད་ཕ་མར་བསམ་མི་ནུས་པར་མ་ཟད་ཚེ་འདིའི་ཕ་མ་དྲིན་ཆེན་ཡིན་རུང་བརྩི་འཇོག་མེད་པའི་མི་ཅི་འདྲའི་མང་པོ་ཞིག་ཡོད། དེའང་ཕ་ལ་ཕར་མི་བརྩི། མ་ལ་མར་མི་བརྩི། སློབ་དཔོན་ལ་སློབ་དཔོན་དུ་མི་འཛིན། ཞེས་པ་དེ་སྙིགས་མའི་རང་རྟགས་ཡིན་ལ། དེ་འདྲའི་མི་སྡུག་པོ་དངོས་ནི་ཆོས་ར་འདིར་སླེབས་མེད་སྙམ་མོད། མཐའ་ཡས་པའི་སེམས་ཅན་བགྲང་གིས་མི་ལང་བའི་ཚུལ་ལ་དཔྱད་པ་ཞིག་བྱས་ན། ང་དང་ཁྱོད་དང་ཁོ་གསུམ་གྱི་རིགས་སུ་འདུ་ཞིང་། དེ་ལ་ངེད་ཚོ་དང་ཁྱེད་ཚོ་དང་ཁོང་ཚོ་ཞེས་པ་བཞིན་དུ། ངས་ང་ལ་ང་རང་བསམ་ཞིང་། ཁྱོད་ཀྱིས་ཁྱོད་ལ་ང་རང་བསམ། ཁོས་ཁོ་ལ་ང་རང་བསམ་པས་ན་དོན་ལ་ཐམས་ཅད་ཀྱིས་ང་རང་བསམ་ནས་རང་གཅེས་པར་འཛིན་པ་ཤ་སྟག་ཡིན་པས་ན། ཇི་སྐད་དུ། དང་པོ་ང་ཞེས་བདག་ལ་ཞེན་གྱུར་ཅིང་། །བདག་གི་འདི་ཞེས་དངོས་ལ་ཆགས་སྐྱེད་པ། །ཞེས་པ་ལྟར་ང་དང་ང་ཡིར་འཛིན་པ་འདི་བྱུང་བས་ན་སྲིད་རྩ་ནི་བདག་འཛིན་ལྷན་སྐྱེས་ཀྱི་མ་རིག་པ་ཡིན། ང་མེད་ལ་ང་དང་བདག་མེད་ལ་བདག་ཏུ་འཛིན་པ་འདི་མ་ལྡོག་པར་འཁོར་བའི་རྩ་བ་མི་ཆོད་ཅིང་། དེ་ལ་འཁོར་བའི་སྡུག་བསྔལ་གྱི་རྩ་བ་ནི་ཆགས་སོགས་ཉོན་མོངས་པར་ཐུག ཉོན་མོངས་པའི་དངོས་གཉེན་ནི་བདག་མེད་རྟོགས་པའི་ཤེས་རབ་ཡིན་ན། དེའང་ཕུང་བོ་ལ་བརྟེན་ནས་བདག་ཏུ་བཏགས་པ་འདི་རང་གི་ངོ་བོས་མ་གྲུབ་པ་གང་ཟག་གི་བདག་མེད་ཡིན་ཡང་འདྲ། ཡན་ལག་ལ་སོགས་པའི་ཚོགས་པར་བརྟེན་ནས་བཏགས་པ་ལུས་སོགས་རང་གི་ངོ་བོས་སྟོང་པ་ཆོས་ཀྱི་བདག་མེད་ཡིན་ཡང་རུང་། སྟོང་གཞི་ཆོས་ཅན་གྱི་ཆ་ནས་དབྱེ་བ་ཙམ་མ་གཏོགས་ངར་འཛིན་ལྷན་སྐྱེས་ཀྱི་ཡུལ་དུ་གྱུར་པའི་བདག་ནི་རང་བཞིན་གྱིས་གྲུབ་པ་མེད་པ་སྟེ། དམིགས་མེད་ཀྱི་བདེན་པ་ཁོང་དུ་མ་ཆུད་པར་བདག་མེད་རྟོགས་ཐབས་མི་འདུག དེས་ན་ཆོས་བདག་མེད་རྟོགས་པའི་ཡེ་ཤེས་ནི་སྤྱི་དང་གང་ཟག་གི་བདག་མེད་རྟོགས་པའི་མཁྱེན་པ་བྱེ་བྲག་ཡིན་པས་ན། བྱང་ཆུབ་སེམས་དཔའི་སེར་སྣ་ལ་སོགས་པས་ཐར་བ་ལ་སྒྲིབ་པའི་ཉོན་སྒྲིབ་དང་། འཁོར་གསུམ་རྣམ་པར་རྟོག་པས་ཐམས་ཅད་མཁྱེན་པ་ལ་སྒྲིབ་པས་ཤེས་སྒྲིབ། དེ་ལྟའི་སྒྲིབ་གཉིས་བག་ཆགས་དང་བཅས་པ་སྤངས་ནས་སྲིད་ཞིའི་མཐའ་གཉིས་ལ་མི་གནས་པའི་ཐར་བ་ཡང་དག་པ་རྫོགས་པའི་སངས་རྒྱས་ཀྱི་གོ་འཕང་སྒྲུབ་དགོས་སོ། །དེ་ལ་ཁ་ཅིག་འདི་སྙམ་དུ་ང་དང་ཁྱོད་ལ་བདག་ཅེས་པ་ཞིག་མེད་ན། སངས་རྒྱས་ཀྱི་གོ་འཕང་སུ་ལ་ཐོབ་དགོས་ཟེར་ན། དོན་དམ་པར་གང་ལ་ཐོབ་པ་སེམས་ཅན་དང་གང་ཞིག་ཐོབ་པ་སངས་རྒྱས་བདེན་གྲུབ་ཅིག་མེད་དེ། དོན་དམ་རྟོགས་པའི་ངོར་མྱ་ངན་ལས་འདས་པ་དང་མ་འདས་པའི་འཁོར་འདས་རོ་མཉམ་ཞིང་ཤེས་དང་ཤེས་བྱ་མཉམ་ཉིད་ཡིན་དེའི་ཕྱིར་ན། གཉིས་ལ་མི་གནས་ཐར་བ་མཆོག །ཅེས་པའི་དོན་སྒྲུབ་པ་ལ་འཇུག་གོ །ཡིན་ནའང་མ་རྟོགས་པའི་སེམས་ཅན་གྱི་ངོར་རྨོངས་པའི་འཁྲུལ་སྣང་ཡོད་པ་བཟློག་ཏུ་མེད་དེ། རང་རྒྱུད་ལྡན་གྱི་གང་ཟག་ཐམས་ཅད་ལ་ཐུན་མོང་མཐུན་སྣང་དུ་གྲུབ་ཡོད། དེའང་ཀུན་ཉོན་འཁོར་བའི་ཕྱོགས་དང་དེ་ལྡོག་པའི་རྣམ་བྱང་གཉིས་ལས་ལོགས་སུ་མྱང་འདས་ཞེས་པ་མ་གྲུབ་ལ། ཐར་བ་ནོར་ཙམ་ཟད་པ་ཡིན། །ཞེས་གསུངས་པ་ལྟར་བློ་ནོར་བའི་འཁྲུལ་བ་ཟད་པ་ལ་ཐར་བ་དང་མྱང་འདས་ཞེས་བཏགས་པའོ། །སླར་ཡང་སྐབས་བབ་ཀྱི་འཆད་བྱ་དངོས་ལ་འཇུག་ན། མཐའ་ཡས་པའི་སེམས་ཅན་ཐམས་ཅད་ཕ་མར་མ་གྱུར་པ་མེད་པས་དེ་དག་གི་དོན་དུ་བྱང་ཆུབ་སྒྲུབ་འདོད་ཀྱི་བློ་ཡོད་དགོས། དེའང་ཇི་ལྟར་ཕ་མར་གྱུར་པ་བཞིན་དགྲ་ཟླ་དང་བཏང་སྙོམས་པར་གྱུར་པའང་གྲངས་ཀྱིས་ག་ལ་ཆོད། ཚུལ་དེ་ནི་མགོ་མཚུངས་ཀྱི་རིགས་པས་ཀྱང་ཤེས་མོད། འོན་ཀྱང་འདིར་བཤད་བྱ་དངོས་ནི་གཞན་དོན་སྙིང་རྗེའི་བསམ་པ་ཀུན་ལ་ཁྱབ་པ་ཞིག་ཡོད་དགོས་པ་དེའོ། །འདི་ལ་བདག་དང་གཞན་དུ་མ་གྲུབ་ན་སུ་ཞིག་གིས་གང་ལ་སྙིང་རྗེ་སྐྱེད་དགོས་པ་ཡིན་ཞེ་ན། དོན་དམ་པར་རང་གཞན་སེམས་ཅན་ཐམས་ཅད་སྐྱེ་མ་མྱོང་ཞིང་འགག་པ་མེད་པ་སྟོང་ཉིད་བསམ་ངོ་དང་བྲལ་བ་ལས་མ་འདས་པ་ཡིན་པས་དེ་དང་རྗེས་མཐུན་དམིགས་མེད་ཀྱི་བློ་ཞིག་རང་རྒྱུད་ལ་མ་སྐྱེས་ན། མཐའ་ཡས་སེམས་ཅན་ཐམས་ཅད་ལ་ཁྱབ་པའི་སྙིང་རྗེ་ཕ་མཐའ་བྲལ་བ་ཞིག་སྐྱེ་བར་མི་ནུས། རང་རེས་དུས་རྒྱུན་སྙིང་རེ་རྗེ་ཞེས་བརྗོད་ཁུལ་བྱེད་མོད། དེ་ལ་བརྟགས་ཤིང་དཔྱད་ན་སྙིང་རྗེ་ཉི་ཚེ་བ་ཆགས་ཞེན་དང་འབྲེལ་བའི་འདོད་ཆགས་ཀྱི་རྣམ་པ་ཅན་སྙིང་རྗེའི་མིང་ཙམ་ཡང་གདགས་རིན་མེད་པ་སྟེ། རང་གི་བུ་ཚ་རྒྱུད་དང་གཉེན་ཉེ་རིང་ལ་གཅེས་སེམས་ཀྱི་ཆགས་ཞེན། དེ་ཙམ་ནི་གཅན་གཟན་གཏུམ་པོ་དག་ལའང་ཐུན་མོང་དུ་ཡོད། འུ་ཅག་གིས་འདིར་ཆོས་ཁྲིད་གཞན་དང་མི་འདྲ་བར་སྨིན་ཁྲིད་བྱེད་པ་ཡིན་པས་ཆོས་འཆད་ཉན་གཟུགས་བརྙན་ཙམ་གྱིས་རང་གཞན་གཉིས་ཀའི་མགོ་མི་སྐོར། གདུགས་དང་རྒྱལ་མཚན་བ་དན་གསུམ་ཡ་ལེ་ཡོལ་ལེ། ཞེས་པ་ལྟར་ད་སྔ་ཡན་ཆད་གྱི་མི་ཚེ་འདས་ཟིན་མོད། ད་ནི་དེ་འདྲས་མི་ཚེ་སྐྱེལ་ལོང་མི་འདུག་སྟེ། ཞིབ་འདང་རེ་རྒྱོབ་དང་ལོ་ན་རྒན་གཞོན་གཉིས་ཀར་རང་རང་གི་མི་ཚེའི་ལོ་ཟླའི་ནང་ཅི་ཙམ་དོན་མེད་དུ་གྱུར་སོང་། དེ་དག་ཕྱིར་ཡོང་ཐབས་མེད་ཀྱང་ད་ལྟ་ཤུལ་དུ་ལྷག་པའི་གསེར་ལས་ཀྱང་རིན་ཐང་ཆེ་བའི་དུས་ཚོད་ནི་དོན་མེད་དུ་ཟད་པར་བྱ་མི་རིགས། དེ་ལ་ཆོས་ཉན་པ་དང་བསམ་པ་གཉིས་དུས་གཅིག བསམ་པ་དང་བསྒོམ་པ་གཉིས་དུས་གཅིག གདན་ས་དེའི་སྟེང་ནས་ཐོབ་བྱ་ལག་ཏུ་འབྱུང་བ་ཞིག་བྱེད་དགོས་ཟེར་གྱི་འདུག་མོད། ཆོས་ད་ལོ་ཉན་ནའང་དེ་ཙམ་ཞིག སང་ལོ་ཞུས་ནའང་དེ་ཙམ་ཞིག་མ་ཡིན་པར་རང་གི་རྒྱུད་ལ་ཡར་སྐྱེད་བྱུང་སྟེ། རབ་རང་གཞན་བདེ་ལ་འགོད་ནུས་པའི་འབྲེལ་ཚད་དོན་ལྡན་ཞིག འབྲིང་རང་མགོ་རང་གིས་ཐོན་པ་ཞིག ཐ་མའང་ཤི་ཁར་བློ་ཕམ་མེད་ཅིང་འགྱོད་པ་མེད་པ་རང་རྒྱུད་ཐར་བའི་ལམ་སྣེ་ཟིན་པ་ཞིག་མ་བྱུང་བར་ཆོས་ཐོས་ནས་ལོ་བརྒྱ་སོང་ཡང་ལས་དང་པོ་པའི་ས་ལས་མི་འཕགས། དེ་ལྟ་ནའང་ཆོས་ཀྱི་སྒྲ་ཐོས་པའི་ཕན་ཡོན་ཙམ་ནི་ཡོད་དེ། སློབ་དཔོན་དབྱིག་གཉེན་གྱིས་མདོ་གསུངས་པའི་ཆོས་སྒྲ་སྡོང་གསེབ་ཀྱི་ཕུག་རོན་ཞིག་གི་རྣ་བར་ཐོས། དེ་ཉིད་ཚེ་འཕོས་ནས་མི་ལུས་བླང་ཞིང་སློབ་དཔོན་རང་གི་སློབ་མ་མངོན་པ་རང་ལས་མཁས་པ་སློབ་དཔོན་བློ་གྲོས་བརྟན་པར་གྱུར་པ་མ་ཡིན་ནམ། དེའི་ཕྱིར་ཆོས་རྔ་སྒྲོག་པའི་སྒྲ་ཐོས་པ་ལའང་ཕན་ཡོན་མེད་པ་མིན་ལ། ད་སྔོན་ཆོས་ཞུས་ཚད་དང་ཐོས་ཚད་དོན་མེད་དུ་སོང་བ་མིན་མོད། དོན་སྒོ་དེ་ལས་ཆེ་བ་མ་ཐོབ་པ་ཡིན་པས་ན། ཆོས་ཐོག་མར་འཆད་ས་དང་ཉན་སའི་ཚིག་མགོ་ནས་བཟུང་དར་ཞུད་འཐེན་པ་ལྟ་བུར་མི་འགྱུར་བར་བསམ་བློ་གཏོང་དགོས། དེའང་ཅི་ཡིན་འདི་ཡིན་མ་ཚོར་བར་ལུང་མདོར་ཐོན་པ་ལ་དར་ཞུད་འཐེན་པ་ཟེར་ཏེ་འཁྱག་ཞུད་རྒྱག་པའི་དོན། ལས་བྱ་བ་གང་ལའང་རྟེན་འབྲེལ་མགོ་ནས་འཆུག་ན་མཇུག་ཏུ་འཆུག་སྟེ། ཚེས་གཅིག་བརྩི་ནོར་བྱུང་སྟེ་ཚེས་གཉིས་སུ་བརྩིས་ན། ཚེས་གཉིས་ཚེས་གསུམ་དང་ཚེས་གསུམ་ཚེས་བཞི་རུ་མི་བརྩི་ཐབས་མེད་ཡིན། དེ་ལྟར་ཆད་ལྷག་ཟླ་ལྷག་གཅིག་ཀྱང་མི་བརྩི་བར་བྱས་ན་ནམ་ཞིག་ཚེས་བཅོ་ལྔ་གནམ་གང་དུ་གྱུར་ཅིང་བཅོ་ལྔའི་ཟླ་བ་འཆར་རྒྱུ་མེད་པ་ཞིག་ཏུ་མགོ་འཁོར་བར་འགྱུར་ལ། དེ་འདྲ་བ་ནི་ལས་བྱ་བ་ཐོག་མར་མ་ལེགས་པར་ནོར་བ་ཡིན་པས་སོ། །དེས་ན་མཐའ་ཡས་པའི་སེམས་ཅན་ལ་དམིགས་པའི་སྙིང་རྗེ་བསྒོམ་པར་ཐོག་མར་བསམ་པ་བཟང་པོ་ནས་འགོ་འཛུགས་དགོས། དེའང་རང་ལ་ཅི་དགོས་གཞན་ལའང་དགོས་ཤིང་། རང་གིས་མི་འདོད་པ་གཞན་གྱིས་ཀྱང་མི་འདོད། བདག་རང་ཉིད་མིན་ཚད་ཐམས་ཅད་གཞན་ཡིན་ཏེ། ཁྱིམ་བཟའ་ཚང་གཉེན་ཉེ་དགའ་མཛའ་རང་ལས་ཀྱང་གཅེས་པར་འདོད་པ་འདི་དག་ཀྱང་གཞན་གྱི་ཁོངས་སུ་གཏོགས་སོ། །རང་མ་སྐྱེས་པའི་སྔ་རོལ་དུ་ཁྱིམ་འདིར་རང་ཉིད་མེད་ལ། ད་ལྟའི་སྐབས་ཀྱི་གཉེན་ཉེ་མཛའ་བཤེས་ཉིན་རེར་ཡང་འབྲལ་བར་མི་ཕོད་པ་འདི་དག་ངོ་མ་ཤེས་པའི་སྔོན་དུ་བརྩེ་དུང་དང་ཆགས་ཞེན་གྱི་འཆིང་བ་དམ་པོ་འདི་མེད། དེའང་འདི་ལྟར་དགྲ་ཡིན་པར་བསམ་དུས་རང་ལ་ལྟོས་ན་དགྲ་ཡིན་ཏེ་མཐོང་ཡང་ཡིད་དུ་མི་འོང་པའི་དགྲ་མི་ནག་དེ་ཡིན་མོད། ཁོ་རང་གི་གཉེན་ལ་ལྟོས་ན་གཉེན་ཡིན་ཏེ་ཡིད་འོང་གི་དངོས་པོ་རིག་ན་དགའ་ཞིང་མཐོང་ན་སྐྱིད་པ་ཞིག་ལོས་ཡིན། དེའི་ཕྱིར་དགྲ་གཉེན་བར་མ་ལ་ངེས་པ་མེད། གལ་ཏེ་རང་སྐྱོན་གྱི་ངོས་སུ་མེ་ལོང་ཞིག་གཏད་ནས་བལྟས་ན། གཞན་སྐྱིད་པར་མི་འདོད་སྡུག་པར་འདོད་པ། བསྟོད་པར་མི་འདོད་སྨད་པར་འདོད་པ། གཞན་སྐྱོན་རྗེས་བརྗོད་བྱེད་པ་རྩེད་མཚར་ཙམ་དུ་བརྩི་བ་འདི་དག་ནི་འདྲེ་སེམས་མ་ཡིན་ནམ། འདི་ལ་ད་དུང་མུ་མཐུད་པར་གྱུར་ན་འདྲེ་རུ་མ་གྱུར་ཀྱང་གདོན་དུ་སྐྱེ་བར་འགྱུར་སྙམ་པ་ཞིག་གོ །དེས་ན་ཐམས་ཅད་ཀྱིས་སྡུག་བསྔལ་མི་མྱོང་བར་བདེ་བ་རེ་ཐོབ་ན་སྙམ་ནས་བསམ་ངན་མེད་པའི་བསམ་བཟང་གི་སྤྱོད་པ་སྣ་རེ་ཡིན་ཡང་སྒྲུབ་ཅི་ཐུབ་དང་། སྤྱོད་ངན་སྣ་རེ་ཡིན་ཡང་སྤང་ཅི་ཐུབ་བྱེད་དགོས་ལ། དེའང་བློ་ཆུང་ལས་དང་པོ་པས་ཐོག་མར་རང་ཉིད་དང་། དེ་ནས་ཁྱིམ་མི། དེ་ནས་གཉེན་ཉེ་དུ་དང་ཡུལ་སྡེ། མཐར་དགྲ་དང་བཅས་པར་ཁྱབ་ནུས་པའི་བསམ་པ་བཟང་པོའི་སྟེང་ནས་སྙིང་རྗེ་གཙོ་བོར་བྱས་པའི་ཚད་མེད་བཞི་མན་ངག་གི་ལུགས་ལྟར་བསྒོམ་དགོས། དེའང་སྙིང་རེ་རྗེ་ཞེས་པ་ཙམ་ལ་གོ་དོན་ཆ་ཚང་མི་འདུག་སྟེ། སྤྱིར་སྙིང་རྗེ་ལ་སེམས་ཅན་ལ་དམིགས་པའི་སྙིང་རྗེ་དང་། ཆོས་ལ་དམིགས་པའི་སྙིང་རྗེ། དམིགས་པ་མེད་པའི་སྙིང་རྗེ་བཅས་ཀྱི་དབྱེ་བ་ཡོད་ལ། སེམས་ཅན་ལ་དམིགས་པའི་སྙིང་རྗེ་ཞེས་པ་ནི། བདེ་སྡུག་བར་མའི་ཡུལ་གྱིས་བསྡུས་པའི་སེམས་ཅན་ནམ་མཁའི་གར་ཁྱབ་ལ་སྙིང་རྗེ་བསྒོམ་པ་ནས་སྦྱོང་དགོས་པ་དེ་དང་། དེ་མིན་ཆོས་ལ་དམིགས་པའི་སྙིང་རྗེ་ནི། ཆོས་འདུས་བྱས་ཕུང་པོ་སྐད་ཅིག་མའི་རྒྱུན་ལ་བཏགས་པའི་ཁྱད་པར་དུ་བྱས་པ་སེམས་ཅན་འཁྲུལ་བའི་རང་བཞིན་ཡིན་པ་ཤེས་ནས་སྙིང་རྗེ་བའོ། །དེའི་སྟེང་དུ་དམིགས་པ་མེད་པའི་རྙིང་རྗེ་ནི། སྙིང་རྗེ་ཡུལ་གྱི་སེམས་ཅན་ཡང་བློས་བཏགས་པ་ཙམ་ལས་རང་བཞིན་གྱིས་གྲུབ་པ་མེད་པར་ཤེས་པའི་གང་ལ་དམིགས་བྱ་དམིགས་བྱེད་དང་བྲལ་བའི་ཆོས་ཉིད་མ་དམིགས་པའི་སྙིང་རྗེ་དེ་ཉིད་བསྒོམ་པའོ། །དེའང་ཐོག་མར་བསམ་པ་བཟང་པོ་ནས་འགོ་རྩོམ་ཞིང་། རྒྱས་པར་བཤད་ན་ཚད་མེད་བཞི་དང་། བསྡུས་ན་བྱམས་དང་སྙིང་རྗེས་དྲངས་པའི་བྱང་ཆུབ་ཀྱི་སེམས་རིན་པོ་ཆེ་རང་གི་རྒྱུད་ལ་སྐྱེད་ཅིང་མི་ཉམས་པར་བྱ། དེ་ལ་སྦྱོར་བ་སེམས་བསྐྱེད་དམ་པ་ཞེས་པ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག་ཅེས་པ་ཡིད་ལ་དྲན་པ་ཙམ་བྱས་རྗེས་དེ་ནས་བསྐྱུར་ཆོག་པ་ཞིག་མ་ཡིན་ཏེ། ཇི་སྐད་དུ། སྙིང་རྗེའི་སེམས་དང་གཉིས་སུ་མེད་བློ་དང་། །བྱང་ཆུབ་སེམས་ནི་རྒྱལ་སྲས་རྣམས་ཀྱི་རྒྱུ། །ཞེས་གསུངས་པ་ལྟར་འདི་ནི་ཐེག་ཆེན་མདོ་སྔགས་གཉིས་ཀའི་ལམ་གྱི་གཞུང་ཤིང་ཡིན་པར་མ་ཟད། གཞན་ཡང་ཇི་སྐད་དུ། གང་ཕྱིར་བརྩེ་ཉིད་རྒྱལ་བའི་ལོ་ཏོག་ཕུན་ཚོགས་འདིའི། །ཞེས་པ་སོགས་ཀྱི་དོན་བཞིན་དུ་སྙིང་རྗེའི་སེམས་ནི་ཐོག་མཐའ་བར་གསུམ་དུ་འབྲལ་ཐབས་མེད་ལ་རྒྱལ་བའི་ཡེ་ཤེས་བརྙེས་ཀྱང་འབྲལ་དུ་མེད་པ། དེའང་སྟོང་ཉིད་སྙིང་རྗེའི་སྙིང་པོ་ཅན་ཏེ། སྙིང་རྗེ་ནི་སྟོང་ཉིད་ཀྱི་རང་གདངས་ཡིན་པས་ན། ལམ་ལ་སློབ་དུས་སུ་ཀུན་རྫོབ་བྱང་སེམས་ཀྱིས་བསོད་ནམས་ཀྱི་ཚོགས་རྫོགས་ཤིང་། དོན་དམ་བྱང་སེམས་ཀྱིས་ཡེ་ཤེས་ཀྱི་ཚོགས་རྫོགས་པ་ཡིན་ན། དངོས་གཞི་དམིགས་པ་མེད་པར་སོ་སོའི་སྐྱེ་བོའི་ས་ནས་བློ་མཐུ་ངོ་མ་ཞིག་མ་བརྙེས་ཀྱང་དེ་དང་རྗེས་སུ་མཐུན་པའི་ལམ། དེའང་རྗེས་མཐུན་བྱེད་པ་འཇུག་པའི་རྒྱུ་ཡིན་པས་ན་སྟོང་ཉིད་རྗེས་མཐུན་པར་བློ་ཁ་ཕྱོགས་ནས། བླ་མའི་རྣལ་འབྱོར་གྱིས་ཐུགས་ཡིད་དབྱེར་མེད་དུ་བསྲེས་ཏེ་གསལ་སྟོང་མཐའ་དབུས་དང་བྲལ་བ་ཆོས་ཉིད་ནམ་མཁའ་ལྟ་བུའི་གོ་དོན་ལ་སེམས་ཕྱོགས་པ་དང་མ་བྲལ་ཞིང་། རྗེས་བསྔོ་བ་དམ་པའི་སྐབས་སུ་དམིགས་བསམ་བརྗོད་པ་དང་བྲལ་བའི་མཉམ་བཞག་གི་ངང་ལས་མ་གཡེལ་བ། རྗེས་ཐོབ་སྒྱུ་མ་ལྟ་བུའི་དགེ་ཚོགས་སྒྱུ་མ་ལྟ་བུའི་སེམས་ཅན་ལ་དམིགས་ནས་སྒྱུ་མ་ལྟ་བུའི་རྒྱལ་བའི་སྐུ་དང་ཡེ་ཤེས་ཐོབ་པར་བྱེད་པ་ནི། བསྔོ་བྱ་སྔོ་བྱེད་བསྔོ་ཡུལ་དང་བཅས་པ་སྒྱུ་མ་ལྟ་བུར་འཁོར་གསུམ་འཛིན་མེད་དུ་བསྔོ་བར་བྱེད་པའོ། །སྒོ་གསུམ་དང་འབྲེལ་བའི་དགེ་རྩའི་གཟུགས་བརྙན་ཆེ་ཆུང་ལ་མ་ལྟོས་པར་གང་བསྒྲུབ་ཀྱང་ཐེག་ཆེན་ཐར་བ་ཆ་མཐུན་ནི་མངོན་པར་རྫོགས་པར་འཚང་རྒྱ་བར་ཡོད་དགོས་པའི་རྒྱུ་མེད་ན་ཐབས་མེད་པ་ཡིན་ལ། དེ་ལྟའི་ཐོག་མཐའ་བར་གསུམ་གྱི་ཆོས་ལ་དམ་པ་གསུམ་ཟེར། ཀུན་མཁྱེན་ཀློང་ཆེན་པས། དེས་ནི་འཁོར་བའི་ཞེན་འཛིན་རང་གྲོལ་ཏེ། །སྒྱུ་མར་གྲོལ་ནས་མི་གནས་མྱ་ངན་འདའ། །སྒྱུ་མ་ལྟ་བུའི་དོན་གཉིས་ལྷུན་འགྲུབ་སྟེ། །དེ་ཕྱིར་སྒྱུ་མ་ལྟ་བུའི་དོན་སྒོམས་ཤིག །ཅེས་གསུངས་སོ། །དེ་འདྲའི་སྦྱོར་དངོས་རྗེས་གསུམ་དམ་པ་གསུམ་ཚང་བའི་ཐེག་པ་ཆེན་པོའི་ཆོས་སྒྲུབ་ལུགས་ཤེས་ན་བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་ལོགས་སུ་བཤད་མི་དགོས། དེ་ནས་མདོ་སྔགས་ཟུང་འབྲེལ་གྱི་ཆོས་འཆད་པ་ལ། སྔགས་ཀྱི་ཐུན་མོང་མ་ཡིན་པའི་དགོས་ཆོས་ནི། ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་ཡིན་པས་དེ་ངེས་པར་ཡོད་དགོས། དེའང་བདེ་བ་ཅན་གྱི་ཞིང་ཁམས་ནི་གསང་བ་སྔགས་ལྟར་ན་རིགས་ལྔ་སྟུག་པོ་བཀོད་པའི་ཞིང་ཁམས་ཏེ། ནུབ་སྣང་བ་མཐའ་ཡས་པདྨའི་རིགས། གསུང་མ་ཆགས་བདེ་བ་ཆེན་པོའི་ཡེ་ཤེས་ཀྱི་རང་གཟུགས་ཡིན་ལ། དེའི་རྣམ་པ་རང་བཞིན་སྤྲུལ་སྐུའི་ཞིང་ཁམས་སུ་ཤར་བ་རྣམ་གྲོལ་དབུགས་ཆེན་འབྱིན་པའི་ཞིང་ལྔའི་ཡ་གྱལ་དང་གཉིས་སུ་མ་མཆིས་པས་ན། དེའང་ཡུལ་ག་ཤེད་དུ་སོང་ན་ཐོན་པའི་འཇིག་རྟེན་ས་སྤྱོད་ཀྱི་གནས་དང་འདྲ་བར་མི་བལྟ་བར། རང་སྣང་དག་པའི་ཚེ་ན་དག་པ་ཡེ་ཤེས་ཀྱི་ཞིང་ཁམས་མངོན་དུ་གྱུར་པ་ཡིན་པའི་དབང་གིས་ད་ལྟ་བསྒྲུབ་ནས་གྲུབ་འབྲས་མངོན་དུ་གྱུར་ན་ཕྱི་མ་བདེ་བ་ཅན་དུ་ཕ་ཁྱིམ་བུ་འགྲོ་ཡིན་པར་བསམ་ལ། དེའང་སྣོད་བཅུད་དག་པ་རབ་འབྱམས་ཡེ་ནས་རྒྱལ་བའི་དཀྱིལ་འཁོར་ཡིན་ཡང་། ཐང་ཁྲོམ་ཟོས་པའི་མིག་ལམ་ལ་མེད་སྣང་གི་གཟུགས་བརྙན་འཆར་བ་བཞིན་དུ། མ་དག་པའི་སྣང་བ་འདི་ནི་འཁྲུལ་བའི་སྣང་ཚུལ་ཙམ་ལས་དོན་གྱི་གནས་ཚུལ་ཡིན་ལུགས་དངོས་སུ་མ་གྲུབ་པར་ཤེས་ནས། ད་ལྟ་ཆོས་ཞུ་བའི་སྐབས་སུའང་གནས་འདི་ཐ་མལ་འཇིག་རྟེན་གྱི་ཡུལ་མ་དག་འཁོར་བའི་སྣོད་དུ་མི་བསམ་པར་གནས་རྣམ་པར་དག་པ་བདེ་བ་ཅན་གྱི་ཞིང་ཁམས་སུ་དམིགས་ཤིང་། དུས་ནི་འདས་བྱས་ཀྱི་མཚན་མ་ཅན་དུས་གསུམ་གྱིས་བསྡུས་པ་མ་ཡིན་པར་མཚན་མེད་འདས་མ་བྱས་གྱི་དུས་དང་། ཆོས་འཆད་པའི་སྟོན་པ་ཐ་མལ་མིའི་གཟུགས་སུ་མི་བལྟ་བར་སྟོན་པ་རྒྱལ་བ་འོད་དཔག་མེད་ཀྱི་ཞལ་སྔ་ནས་དང་། འཁོར་རང་བཞིན་སྙིགས་མའི་སེམས་ཅན་མ་ཡིན་པར་དག་པ་འཕགས་པའི་དགེ་འདུན་ཉན་རང་བྱང་སེམས་ལྷ་མིའི་རྣམ་པ་ཅན་ཤ་སྟག ཆོས་བདག་མེད་རྟོག་བཏགས་དང་བྲལ་བའི་བསམ་གཏན་དང་ཤེས་རབ་ཀྱིས་ཁྱད་པར་དུ་བྱས་པ་དང་། གསང་ཆེན་སྔགས་ཀྱི་ཐེག་པའི་རྒྱུད་དང་རྫོགས་རིམ་དང་རྫོགས་ཆེན་གྱི་ལམ། ཟབ་ཞི་སྤྲོས་པ་དང་བྲལ་བ་འོད་གསལ་འདུས་མ་བྱས་པ་སྒྲ་ཚིག་ཐ་མལ་གྱི་བརྒྱུད་པ་ལས་འདས་པ་གསལ་དང་སྙན་དང་དག་དང་ཟབ་པ་ཚངས་པའི་དབྱངས་ཀྱིས་སྟོན་བཞིན་ཡོད་པར་བསམ་ལ། གཞན་ཡང་སློབ་དཔོན་སངས་རྒྱས་འོད་དཔག་མེད་དུ་གསལ་བའི་ལྗགས་ལས་འོད་ཟེར་དབྱངས་དང་གསལ་བྱེད་ཀྱི་རྣམ་པར་འཕྲོས་ནས་ཆོས་ཉན་པ་པོ་རང་གི་སྙིང་ཁར་ཐིམ་ཚེ་དཔོན་སློབ་དགོངས་པ་གཅིག་ཏུ་གྱུར་ཏེ། མགོན་པོ་འོད་དཔག་མེད་ཀྱི་ཐུགས་མཁྱེན་གཉིས་ཡེ་ཤེས་རང་ལ་ཐོབ་པར་མོས་ནས་ཉན་པའོ། །དེ་བཞིན་ཆོས་འཆད་པའི་སློབ་དཔོན་གྱིས་ཀྱང་ཉན་པ་པོ་སློབ་མའི་རྒྱུད་ལ་ཕན་འདོད་ཀྱི་ཆོས་སྦྱིན་སོགས་ཕར་ཕྱིན་དྲུག་ཚང་བའི་སྒོ་ནས་འཆད་དགོས་ལ། ཉན་མཁན་སློབ་མས་ཀྱང་དེ་བཞིན་ཆོས་ཕྱིར་མཆོད་འབུལ་བྱེད་པ་སྦྱིན་པ་དང་། སྨྲ་བ་སྡོམ་པ་སོགས་ཀུན་སྤྱོད་གཙང་བ་ཚུལ་ཁྲིམས། ཆོས་ཉན་དུས་སྐྱོ་ངལ་མེད་པར་དཀའ་བ་སྤྱད་ནས་ཉན་པ་ཆོས་ཕྱིར་དཀའ་སྤྱད་བཟོད་པའི་བཟོད་པ། ལེ་ལོ་དང་ཕྱི་བཤོལ་མེད་པ་བརྩོན་འགྲུས། ལོག་ལྟ་དང་རྣམ་གཡེང་མེད་པ་བསམ་གཏན། ཚིག་དོན་རྣམ་པར་འབྱེད་པའི་ཤེས་རབ་བཅས་ཕར་ཕྱིན་དྲུག་ཚང་བར་བྱས་ཏེ་ཉན་དགོས་སོ། །དེའང་བདེ་བ་ཅན་དུ་སྐྱེ་བའི་རྒྱུ་བཞི་ཆོས་ཁྲིད་ཐུན་གཅིག་པོ་འདིར་ཡང་ཚང་སྟེ། རྒྱུ་བཞི་བོ་འདིར་ཚོགས་ཀུན་གྱི་བློ་ངོར་ཡོད་དེ། རྟེན་ཞིང་ཁམས་ཡིད་ལ་བྱེད་པ་དང་གཅིག རྒྱུ་ཚོགས་བསགས་སྒྲིབ་སྦྱོང་དང་གཉིས། གྲོགས་བྱང་ཆུབ་མཆོག་ཏུ་སེམས་བསྐྱེད་པ་དང་གསུམ། རྐྱེན་སྨོན་ལམ་དག་པས་མཚམས་སྦྱོར་བ་དང་བཞི་ཡིན་ལ། ཚིག་བསྡུས་ཏེ་རང་གིས་གོ་སླ་ཞིང་ཡིད་ལ་འཛིན་བདེ་བའི་ཆེད་དུ། རྟེན། རྒྱུ། གྲོགས། རྐྱེན་བཞི་ཞེས་བྱ། དེའང་རྟེན་ཞིང་ཁམས་ཡིད་ལ་བྱེད་པ་ནི། གོང་དུ་སྨྲོས་པ་བཞིན་སྣོད་དག་པ་བདེ་བ་ཅན་གྱི་ཞིང་ཁམས་དང་བཅུད་དག་པ་མགོན་པོ་འོད་དཔག་མེད་འཁོར་བཅས་གསལ་འདེབས་པ། དེའང་མ་ཡིན་པ་ལ་ཡིན་པར་བློས་བཏགས་པ་བྱིས་པས་རྩེད་རྡོ་སྒྲིག་པ་ལྟ་བུ་མིན་པར་དོན་ལ་དེ་ལྟར་ཡིན་པ་ལ་ཡིན་པར་ཤེས་པའི་ངེས་ཤེས་བསྐྱེད་པ་ཙམ་མོ། །དོན་ལ་དེ་ལྟར་ཨེ་ཡིན་སྙམ་པ་ནི་ཐེ་ཚོམ་ཡིན་ལ། ཡིད་གཉིས་ཐེ་ཚོམ་ཅན་གྱིས་གལ་ཏེ་རྒྱུ་བཞི་འགྲུབ་ནས་ཞིང་དེར་སྐྱེས་པར་གྱུར་ཀྱང་། ཡུན་རིང་མེ་ཏོག་པདྨའི་ཁ་མི་འབྱེད་པས་བདེ་བར་གཤེགས་པའི་ཞལ་ལོ་གྲངས་མང་པོར་མི་མཇལ། དེ་ནས་རྒྱུ་ནི་འདིར་སྦྱོར་དངོས་རྗེས་ཀྱི་དམ་པ་རྣམ་གསུམ་ཚང་བ་གཞིར་བྱས་བསྐྱེད་དང་རྫོགས་དང་རྫོགས་ཆེན་གྱི་ལམ་དང་འབྲེལ་བའི་ཚོགས་བསགས་སྒྲིབ་སྦྱོང་གཉིས་སྟབས་གཅིག་ཏུ་འགྲུབ་པ་དང་། གྲོགས་བྱང་ཆུབ་མཆོག་ཏུ་སེམས་བསྐྱེད་པ་ཐོག་མཐའ་བར་གསུམ་དུ་ཚང་བའི་སྟེང་། རྐྱེན་སྨོན་ལམ་དག་པ་འདུན་པས་ཁ་བསྒྱུར་བའི་མཇུག་བསྔོ་བའི་ཞལ་འདོན་དང་མཉམ་དུ་ཚང་། དེའང་ཆེས་གལ་ཆེ་བ་ནི་སེམས་འདི་ད་ལྟ་ནས་བདེ་བ་ཅན་གྱི་སེམས་སུ་གྱུར་ན་ལུས་བརྗེས་མ་ཐག་བདེ་བ་ཅན་དུ་པདྨའི་སྙིང་པོར་འོད་ལུས་སུ་སྐྱེ་བར་ཚེགས་མེད་དོ། །རྣམ་རྟོག་སྤྲོས་བའི་དྲྭ་བ་ཕར་བཏང་ནས་གཡོ་མེད་སྟོང་གསལ་གྱི་ཏིང་འཛིན་བརྟན་པ་གཞིར་བྱས་འཛིན་མེད་རང་གསལ་ཤེས་རབ་གྱི་རྩལ་ཆེན་རྫོགས་ན་བདེ་བ་ཅན་གྱི་ཞིང་ཁམས་ཕྱི་ནས་འཚོལ་མི་དགོས་པར་ནང་ནས་རྙེད་ཡོང་། ནང་སེམས་ཉིད་ཆོས་སྐུའི་ངོ་བོ་འོད་དཔག་མེད་དུ་མཐོང་ན་ངེས་དོན་འོད་དཔག་མེད་ཀྱི་རང་ཞལ་དེ་དུས་མཇལ་བ་ཡིན། དེའི་ཕྱིར་འདི་ཉིད་བཀྲལ་ན་བདེ་བ་ཅན་དུ་སྐྱེ་བའི་རྒྱུ་ལ་གྲངས་བཞིས་མི་ཚད་པར་མཐའ་ཡས་རྒྱལ་བའི་མཁྱེན་རབ་དང་ཞིང་ཁམས། སེམས་ཅན་གྱི་གྲངས་དང་བློ་ཡི་རིམ་པ་ལྟར་ནམ་མཁའི་མཐའ་བཞིན་ཚད་མེད་དོ། །འོན་ཀྱང་ཚུར་བསྡུས་ན་རྒྱུ་བཞི་དང་དེ་ལས་ཀྱང་རྟེན་ཞིང་ཁམས་ཡིད་ལ་བྱེད་པ་ཁོ་ནས་ཀྱང་སྐྱེ་བར་ནུས་པའི་གོ་དོན་གྱི་སྒྲོག་དེ་ལྟར་ཁྲོལ་དགོས། དེའང་ངེད་ཅག་ཁྱིམ་པ་ཕོ་མོ་རྣམས་ཀྱིས་ཞི་གནས་ཞེས་པ་དང་ལྷག་མཐོང་དང་ཏིང་འཛིན་དང་ཤེས་རབ་དང་བདག་ལྟ་དང་བདག་མེད་སོགས་ཅི་ཡིན་མི་རྟོགས་པའི་ཆོས་སྐད་མང་པོ་དང་བསྲེས་ནས་བཤད་ན་དོན་མ་ཟད་ཚིག་ཀྱང་ལེགས་པོ་ཞིག་མི་གོ་བས་བདེ་བ་ཅན་དུ་སྐྱེ་བའི་ལས་སྨོན་མེད་པ་མ་ཡིན་ནམ་སྙམ་དུ་མི་བསམ་སྟེ། སངས་རྒྱས་བཅོམ་ལྡན་འདས་ཀྱི་ཞལ་ནས། དོན་དམ་པ་ནི་དད་པའི་རྟོགས་པར་བྱ་བའོ། །ཞེས་གསུངས་པས་ན། ཆོས་སྣང་བའི་སྒོ་དད་པ་ཡིན་པས་དེ་ཉིད་དད་པས་ཕྱེས་ན། ཤེས་བྱ་རྣམ་པར་འབྱེད་པའི་ཤེས་རབ་ལ་དབང་ཐོབ་པ་སྟེ་བདེ་བ་ཅན་གྱི་ཞིང་དུ་སྐྱེས་པ་དང་དུས་མཉམ་དུ་བདེ་བར་གཤེགས་པའི་གསུང་ཐོས་ཤིང་སྔ་ན་མེད་པའི་ཏིང་འཛིན་དང་ཤེས་རབ་བརྒྱ་ཕྲག་གི་སྒོ་མོ་དེ་དུས་འབྱེད་དོ། །དད་པ་མེད་ན་སྦྱང་བར་མཛད་པའི་གཞུང་ལུགས་ཀྱི་ཆོས་སྐད་འགའ་རེའི་སྟེང་ནས་ཡར་བཤད་མར་བཤད་སྣ་ཚོགས་པ་ལོག་པའི་ཤེས་རབ་ཀྱིས་ལོག་ལྟ་སྐྱེ་བྱེད་བཤད་ཤེས་པ་ལ་དོན་མེད་དེ། དགེ་སློང་ལེགས་པའི་སྐར་མས་སྡེ་སྣོད་མང་པོ་བློ་འདོན་ཤར་ཤར་བྱེད་ཅིང་སྒོམ་བརྒྱབ་ནས་སྲིད་རྩེའི་ཏིང་འཛིན་ཐོབ་ཡོད་པར་བཤད་རྒྱུ་མེད་དམ། དེས་ན་རྒྱུ་གཅིག་ཆོག་དད་པ་ལྷད་མེད་ཅིག་ཡོད་ན་དེ་ཁོ་ནས་གོ་ཆོད་དེ། ཨ་རིའི་སྒོར་མོ་ཁྱེར་ནས་འཛམ་བུ་གླིང་གི་ས་ཆ་གང་དུ་སོང་ཡང་གོ་ཆོད་པ་བཞིན་རང་གི་སེམས་ན་དད་པ་ལྷད་མེད་ཅིག་ཡོད་ན་དེས་ཆོག་སྟེ། གནའ་སྔ་མོར་ཡུལ་རྫ་ཆུ་ཁའི་རྒད་པོ་ཞིག་གིས་མགོན་པོ་འོད་དཔག་མེད་ཀྱི་སྐུ་མདོག་སྔོན་པོ་ཡིན་པར་བསམ་ནས་བསྡད། བླ་རྒན་ཞིག་གིས་རྒད་པོ་ལ་སྐུ་མདོག་སྔོན་པོ་མ་ཡིན་པར་དམར་པོ་ཡིན་པར་བཤད་ཀྱང་ཁོས་བདེན་པར་མ་བཟུང་བར་གསོལ་བ་རྩེ་གཅིག་ཏུ་བཏབ་སྟེ་རང་གི་བསྒོམ་ཚུལ་ལྟར་ཡིད་ལ་བྱས། མཐར་ཤི་དུས་མངོན་ཤེས་ཅན་ཞིག་གི་མཐོང་སྣང་དུ་རྒད་པོ་ནི་མགོན་པོ་འོད་དཔག་མེད་སྐུ་མདོག་སྔོན་པོ་ཅན་འཁོར་རྒྱལ་སྲས་བརྒྱད་ཀྱིས་བསྐོར་བ་ཞིག་གིས་ལམ་སྣ་དྲངས་ཏེ་བདེ་བ་ཅན་དུ་སོང་བར་མཐོང་། དེའི་ཕྱིར་དད་པ་ཡོད་ན་གོ་གཅིག་ཆོད་ཀྱི་རྒྱུ་དེ་རང་ལ་ཡོད་པའོ། །དེ་ལ་སྐབས་དོན་བཤད་བྱའི་ཚིག་གི་འབྲུ་མནན་ན་འདི་ལྟར་དཔེ་ཆར་ལྟོས་དང་། ཆོས་ཉིད་མི་འགྱུར་སྣང་བ་མཐའ་ཡས་ནི། །འགག་མེད་སྙིང་རྗེ་ལོངས་སྤྱོད་སྤྱན་རས་གཟིགས། །ཨོ་རྒྱན་པཎ་ཆེན་རྫུས་སྐྱེས་སྤྲུལ་བའི་སྐུ། །ཞེས་པ་ཀུན་མཁྱེན་འཇིགས་མེད་གླིང་པའི་རྡོ་རྗེའི་གསུང་ཡིན་ལ། ཚིག་རྐང་གསུམ་པོ་འདིས་ནི་བདེ་བ་ཅན་དུ་སྐྱེ་བའི་རྒྱུ་བཞིའི་དང་པོ་རྟེན་ཞིང་ཁམས་ཡིད་ལ་བྱེད་པ་བསྟན་ལ། དེའི་མཇུག་ཏུ། གསོལ་བ་འདེབས་སོ་ཞེས་པས་རྒྱུ་གཉིས་པ་ཚོགས་བསགས་སྒྲིབ་སྦྱང་བསྟན། དེའི་འོག་ཏུ། ནད་གདོན་བར་ཆད་སོལ། །འཆི་ཁར་གནད་གཅོད་སྡུག་བསྔལ་མི་འབྱུང་ཞིང་། །ཚེ་འདིའི་སྣང་བ་ནུབ་པར་གྱུར་མ་ཐག །བདེ་བ་ཅན་དང་རི་བོ་པོ་ཏ་ལ། །ཟངས་མདོག་དཔལ་ཀྱི་རི་བོར་སྐྱེ་བར་ཤོག །ཅེས་ཚིག་རྐང་བཞི་ལྷག་གིས་རྐྱེན་སྨོན་ལམ་དག་པའི་མཚམས་སྦྱར་བསྟན་ཞིང་། རྒྱུ་གསུམ་པ་གྲོགས་བྱང་ཆུབ་མཆོག་ཏུ་སེམས་བསྐྱེད་པ་ནི་ཆ་མཉམ་དུ་བསྟན་པའོ།།
རྒྱུ་དང་པོ་རྟེན་ཞིང་ཁམས་ཡིད་ལ་བྱེད་པ།
ཐོག་མར་བསམ་པ་བྱང་ཆུབ་མཆོག་ཏུ་ཐུགས་བསྐྱེད་དེ་དམ་བཅའ་བཟུང་ཞིང་རྫོགས་སྨིན་སྦྱང་བ་མཐར་ཕྱིན་ཚུལ།
དེའང་ཞིང་ཁམས་བཀོད་ཅིང་འཛིན་པ་པོ་མགོན་པོ་འོད་དཔག་མེད་ཀྱིས་སྔོན་སློབ་པ་ལམ་གྱི་ཚེ་ན། ཐོག་མར་བསམ་པ་བྱང་ཆུབ་མཆོག་ཏུ་ཐུགས་བསྐྱེད་དེ་དམ་བཅའ་བཟུང་ཞིང་རྫོགས་སྨིན་སྦྱང་བ་མཐར་ཕྱིན་ཚུལ་དང་གཅིག བར་དུ་མངོན་པར་རྫོགས་པར་སངས་རྒྱས་ནས་ཞིང་ཁམས་ཁྱད་པར་དུ་འཕགས་པ་བཟུང་ཚུལ་དང་གཉིས། ཐ་མར་སྨོན་ལམ་ཡོངས་སུ་རྫོགས་པའི་ཚུལ་དང་གསུམ་བཤད་དགོས། དེ་ལས་དང་པོ་བྱང་ཆུབ་མཆོག་ཏུ་ཐུགས་བསྐྱེད་ཚུལ་ལ་གཉིས་ཏེ། དང་པོ་ཐུགས་བསྐྱེད་ཁྱད་པར་ཅན་གྱིས་དམ་བཅའ་མཛད་པ། གཉིས་པ་སྦྱོར་བ་ཁྱད་པར་ཅན་གྱིས་ཚོགས་བསགས་ཏེ་རྫོགས་སྨིན་སྦྱང་བ་མཐར་ཕྱིན་པ།
དང་པོ་ཐུགས་བསྐྱེད་ཁྱད་པར་ཅན་གྱིས་དམ་བཅའ་མཛད་པ།
དེའང་ཞིང་ཁམས་ཀུན་ལས་ཁྱད་པར་དུ་འཕགས་པ་ནུབ་བདེ་བ་ཅན་གྱི་ཞིང་ཁམས་ཡོངས་སུ་འཛིན་པ་པོ་ནི་སངས་རྒྱས་སྣང་བ་མཐའ་ཡས་མགོན་པོ་འོད་དཔག་མེད་ཡིན། ཁོང་ལ་སྐྱེས་རབས་རྣམ་པར་ཐར་བ་མཐའ་ཡས་པ་ཞིག་ཡོད་ཀྱང་ཡོངས་སུ་གྲགས་པ་ནི་འོད་མདོ་དང་སྙིང་རྗེ་པད་དཀར་གཉིས་གཙོ་བོར་བཟུང་ནས་སྟོན་པའོ།།
༡འོད་དཔག་མེད་ཀྱི་མདོའི་འཆད་ཚུལ།
དང་པོ་འོད་དཔག་མེད་ཀྱི་མདོའི་རྗེས་སུ་འབྲང་ནས་བཤད་པ། སྔོན་བསྐལ་བ་དཔག་མེད་བགྲང་དུ་མེད་པ་འདས་པའི་སྔ་རོལ་དུ། སྟོབས་བཅུ་མངའ་བ་འཇིག་རྟེན་གྱི་སྒྲོན་མ་ཆེན་པོ་འཇིག་རྟེན་དབང་ཕྱུག་རྒྱལ་པོ་ཞེས་བྱ་བ་བྱོན། དེའི་ཚེ་ན་ཁོང་ནི་སློབ་པ་ལམ་ལ་གནས་པ་ས་བརྒྱད་པ་མི་གཡོ་བ་ཐོབ་པའི་བྱང་ཆུབ་སེམས་དཔའ་གཟུངས་དང་སྤོབས་པ་དང་བློ་གྲོས་ལྡན་པའི་མཆོག་ཏུ་གྱུར་པ། ཤེས་རབ་དང་བརྩོན་འགྲུས་དང་ནུས་པ་དང་སྙིང་སྟོབས་རྒྱ་ཆེར་ལྡན་པ། གཞན་དང་མི་མཚུངས་པའི་ཐུགས་བསྐྱེད་མངའ་བ་དགེ་སློང་ཆོས་ཀྱི་འབྱུང་གནས་ཞེས་བྱ་བའི་སྐུའི་སྐྱེ་བ་བཞེས། སངས་རྒྱས་དེའི་ཞབས་འབྲང་བསྙེན་བཀུར་པར་གྱུར་ཚེ་སྙིང་རྗེའི་རྩ་བ་བརྟན་ཞིང་བརྩོན་འགྲུས་ཀྱི་གོ་ཆ་བགོས། སྙིང་སྟོབས་མཆོག་ཏུ་མི་ཕྱེད་ཅིང་སྤོབས་པ་རླབས་ཆེན་དང་ལྡན་པས་སངས་རྒྱས་དེ་ཉིད་ཀྱི་མདུན་ནས་བྱང་ཆུབ་མཆོག་ཏུ་ཐུགས་ཁྱད་པར་ཅན་བསྐྱེད། ས་བརྒྱད་པ་ཐོབ་པའི་བྱང་ཆུབ་སེམས་དཔའ་ཆེན་པོ་ཞིག་གིས་གཟོད་ཐུགས་བསྐྱེད་པ་ཅི་ཞེ་ན། དེ་ནི་ཐུགས་ཁྱད་པར་ཅན་བསྐྱེད་པ་སྟེ། སྨོན་ལམ་དང་འབྲེལ་བའི་ཐུགས་ཁྱད་པར་ཅན་བསྐྱེད་དེ་སངས་རྒྱས་གཞན་ལས་སྨོན་ལམ་རྒྱ་ཆེར་བཏབ། དེའང་འཕགས་པའི་ས་བརྒྱད་པ་མི་གཡོ་བ་ནི་སྨོན་ལམ་གྱི་ཕར་ཕྱིན་རྫོགས་པའི་ས་ཡིན་པ་དང་། ཁྱད་པར་འདི་ཉིད་ཀྱི་ཐུགས་སྟོབས་དང་སྨོན་ལམ་མཚུངས་ཟླ་མེད་པ་ཡིན་པས་ཐོག་མར་ཐུགས་བསྐྱེད་པ་ནས་བཟུང་སངས་རྒྱས་གཅིག་ལ། དེ་བཞིན་གཤེགས་པ་ཁྱེད་སྐུ་ཅི་འདྲ་དང་། །ཞེས་པ་ལྟ་བུའམ་བདག་ཉིད་མངོན་པར་འཚང་རྒྱ་བའི་ཚེ་ན་མཐའ་ཡས་འགྲོ་བའི་དེད་དཔོན་དུ་འགྱུར་བར་ཤོག་ཅིག་ཅེས་པ་ལྟ་བུ་མ་ཡིན་པར་དུས་ཡུན་རིང་བོ་མི་ལོ་བྱེ་བའི་བར་དུ། ལས་དག་དང་མ་དག་པའི་གདུལ་བྱའི་སེམས་ཅན་མང་པོ་དག་པའི་ཞིང་དུ་འདྲེན་པ་དང་། སངས་རྒྱས་མང་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་ཞིང་ཁམས་རྟེན་དང་བཅས་པའི་རྒྱན་བཀོད་དང་། ཆགས་དབྱིབས། ཡེ་ཤེས་དང་ཡོན་ཏན་གྱི་ཆོ་འཕྲུལ་སྣ་ཚོགས་པ་ཇི་ལྟར་ཡེ་ཤེས་རང་སྣང་གི་བཀོད་པ་ལྟར་གཞན་ལ་སྣང་བ། དེ་ཉིད་གཞི་གང་ལས་ཚུལ་ཅི་ལྟར་གདུལ་བྱ་སྣ་ཚོགས་པའི་ངོར་ཐུན་མོང་དུ་གྲུབ་ཚུལ་དང་བཅས་པ་སྐྱོ་ངལ་སྤངས་ཏེ་གསན་ཞིང་། དེར་མ་ཟད་བསྐལ་བ་ཆེན་པོ་ལྔ་ཕྲག་གཅིག་གི་ཡུན་ལ་ཞིང་ཁམས་དེ་དག་གི་ཡོན་ཏན་མ་ལུས་པར་བསམ། ཞིང་ཁམས་གཞན་གྱིས་འགྲན་དུ་མེད་ཅིང་མཚུངས་པ་མེད་པའི་ཁྱད་པར་དུ་འཕགས་པ། དེ་དག་གི་ཡོན་ཏན་དང་བཀོད་པ་གཅིག་ཏུ་བསྡུས་པ་ལྟ་བུའི་ཞིང་། དེ་དག་ལས་བརྒྱ་འགྱུར་དང་སྟོང་འགྱུར་ཁྲི་འགྱུར་དང་འབུམ་འགྱུར་གྱིས་ལྷག་པའི་རང་ཉིད་ཀྱི་ཞིང་ཁམས་དེའི་རྒྱ་ཁྱོན་དང་རང་བཞིན། བདེ་སྐྱིད་ལོངས་སྤྱོད་ཟད་དུ་མེད་པ་ཕུན་སུམ་ཚོགས་པའི་འབྱོར་བ་མཐའ་ཡས་པར་འདུན་པའི་སྟོབས་སྔོན་དུ་བཏང་། དེ་ལྟའི་ཞིང་ཁམས་འགོད་ཅིང་གཟུང་བར་དུས་དེ་ལས་རིང་བར་གསན་བསམ་མཛད་པར་མ་ཟད། སྨོན་ལམ་འགྲུབ་པའི་རྒྱུར་ཟག་མེད་ཀྱི་དགེ་ཚོགས་རྒྱ་ཆེ་བ་བྱང་ཆུབ་སེམས་དཔའ་ས་བརྒྱད་ནོན་པའི་ཚུལ་ཁྲིམས་དང་ཏིང་འཛིན་དང་ཤེས་རབ་ཟད་མི་ཤེས་པ་མངོན་པར་འདུ་བྱས་ཏེ། བདེ་བར་གཤེགས་པ་འཇིག་རྟེན་དབང་ཕྱུག་རྒྱལ་པོའི་མདུན་ནས་ཞིང་ཁམས་དེ་ལྟ་བུ་ཞིག་གཟུང་བར་སྨོན་ལམ་དང་འབྲེལ་བའི་དམ་བཅའ་སླར་ཡང་མཛད་པ་ལ་བྱང་ཆུབ་མཆོག་ཏུ་ཐུགས་བསྐྱེད་པའི་སྒྲས་བརྗོད་དོ། །ཀུན་མཁྱེན་འཇིགས་གླིང་གི་ཞལ་ནས། གང་ཁྱོད་འཇིག་རྟེན་དབང་ཕྱུག་རྒྱལ་པོའི་དྲུང་། །དགེ་སློང་ཆོས་ཀྱི་འབྱུང་གནས་ཞེས་གྲགས་ཚེ། །ཞིང་ཁམས་གཟུང་བར་སྨོན་པའི་དམ་བཅའ་ལ། །བླ་མར་བྱའོ་མྱུར་ཏུ་སྐབས་དབྱེར་གསོལ། །ཞེས་པའི་དོན་ནོ། །དེ་ལྟར་ཐུགས་བསྐྱེད་དམ་བཅའ་བཟུང་བ་ནི་འོད་མདོའི་རྗེས་སུ་འབྲང་བའི་འཆད་ཚུལ་ལྟར་བཤད་པ་ཡིན་ནོ།།
༢སྙིང་རྗེ་པདྨ་དཀར་པོའི་མདོའི་འཆད་ཚུལ།
གཉིས་པ་སྙིང་རྗེ་པདྨ་དཀར་པོའི་མདོའི་འཆད་ཚུལ། བསྐལ་བ་གྲངས་མེད་བརྗོད་ལས་འདས་པའི་སྔ་རོལ་ཏུ་མི་ཡུལ་གླིང་བཞིའི་འཇིག་རྟེན་ལ་དབང་སྒྱུར་བའི་འཁོར་ལོས་སྒྱུར་བའི་རྒྱལ་པོ་རྩིབས་ཀྱིས་མུ་ཁྱུད་ཅེས་བྱ་བ་ཞིག་བྱུང་། རྒྱལ་པོ་དེ་ལ་བློན་པོ་མདུན་ན་འདོན་ཆེན་པོ་བྲམ་ཟེ་རྒྱ་མཚོའི་རྡུལ་ཞེས་བྱ་བ་ཞིག་ཡོད། དེ་ལ་བུ་རྒྱ་མཚོའི་སྙིང་པོ་ཞེས་བྱ་བའི་ཁྱེའུ་ཡ་མཚན་པ་ཞིག་འཁྲུངས། དེ་ཉིད་ཆེར་བསྐྱེད་དེ་ན་ཚོད་དར་ལ་བབ་པའི་ཚེ་ན་རབ་ཏུ་བྱུང་ཞིང་མཐར་མངོན་པར་རྫོགས་པར་སངས་རྒྱས་པའི་མཚན་ལ་སངས་རྒྱས་རིན་ཆེན་སྙིང་པོ་ཞེས་བྱ་བ་འཇིག་རྟེན་གྱི་ཁམས་ལ་ཡོངས་སུ་གྲགས་པའི་སྟོན་པ་ཆེན་པོ་ཞིག་ཏུ་གྱུར། དེའི་མདུན་ནས་འཁོར་ལོས་སྒྱུར་བའི་རྒྱལ་པོ་བྱང་ཆུབ་སེམས་དཔའ་སྙིང་སྟོབས་ཆེན་པོ་མངའ་བ་རྩིབས་ཀྱིས་མུ་ཁྱུད་ཅན་གྱིས་འགྲོ་བའི་དོན་དུ་ཞིང་ཁམས་ཀུན་ལས་ཁྱད་པར་དུ་འཕགས་ཤིང་ཟླ་དང་བྲལ་བ་ཞིག་གཟུང་བར་ཐུགས་བསྐྱེད་དམ་བཅའ་མཛད་ཅིང་སྨོན་ལམ་བཏབ། རྒྱལ་པོ་རྩིབས་ཀྱི་མུ་ཁྱུད་ཀྱིས་ལོ་བདུན་ལ་གཡེང་བ་ཐམས་ཅད་རྣམ་པར་སྤངས་ཤིང་། ལོ་བདུན་པོ་དེའི་རིང་མཉམ་བཞག་གཡོ་མེད་ཀྱི་ཏིང་ངེ་འཛིན་གཅིག་གི་ཁོར་ཡུག་ལ་ནང་དུ་ཡང་དག་འཇོག་པ་ན། དེ་བཞིན་གཤེགས་པ་རིན་ཆེན་སྙིང་པོའི་བྱིན་རླབས་ཀྱི་མཐུས་ཕྱོགས་བཅུའི་ཕྱོགས་རེ་རེའི་མུ་དང་མཐའ་ཟད་པ་མེད་པ་ན། སངས་རྒྱས་ཀྱི་ཞིང་ཇི་སྙེད་འཇིག་རྟེན་ཁམས་ཀྱི་རྡུལ་གྲངས་དང་མཉམ་པ། དེ་དག་རེ་རེའང་རྒྱན་དང་བཀོད་པས་ཁྱད་པར་དུ་འཕགས་ཤིང་བདེ་ཞིང་སྐྱིད་པ་འབྱོར་བའི་ཡོན་ཏན་གཅིག་ལས་གཅིག་ལྷག་པ་མཐོང་། དེ་དག་རྒྱུ་ཅི་དང་རྐྱེན་གང་ལས་བྱུང་བ་དང་དེ་དག་གི་སྔོན་དང་བར་དང་ཕྱི་མའི་མཐའ་ལ་རྣམ་པར་བརྟགས་ཤིང་དཔྱད་པ་མཛད། དེ་དང་ཆབས་ཅིག་ཞིང་ཁམས་སྦྱངས་ཤིང་ཞིང་ཁམས་དེ་དག་གི་རྒྱལ་བ་ཐམས་ཅད་ལས་ཆོས་ཞུས་ཏེ་གསན་བསམ་གཙོ་བོར་མཛད་ཅིང་། མཐའ་ཡས་སེམས་ཅན་རྒྱ་མཚོ་སྒྲོལ་ཕྱིར་དུ་ཞིང་ཁམས་རྒྱ་མཚོ་དེ་དག་གི་སངས་རྒྱས་རྒྱ་མཚོའི་སྤྱོད་པ་རྒྱ་མཚོ་མཐར་ཕྱིན་པའི་ཐུགས་བསྐྱེད་དང་སྨོན་ལམ་རྒྱ་མཚོ་ཡོངས་སུ་རྫོགས་པའི་ཚུལ་ཐམས་ཅད་ལ་མཁས་པར་མཛད། དེ་ནས་དེ་བཞིན་གཤེགས་པ་རིན་ཆེན་སྙིང་པོའི་སྤྱན་སྔར་ཐུགས་བསྐྱེད་རྨད་དུ་བྱུང་བ་བདེ་བར་གཤེགས་པའི་ཞིང་ཁམས། ཇི་སྙེད་སྟོང་ཁམས་འཇིག་རྟེན་གྱི་བྱེ་སྙེད་རྡུལ་གྲངས་ལས་འདས་པའི་ཞིང་གིི་ཡོན་ཏན་དང་འབྱོར་བ་ཕྱོགས་གཅིག་ཏུ་བསྡུས་པའི་ཞིང་ཁམས་གཟུང་བར་ཐུགས་བསྐྱེད་ཅིང་སྨོན་ལམ་དང་དམ་བཅའ་མཛད། དེའི་ཚེ་དེའི་དུས་ན་དེ་བཞིན་གཤེགས་པ་རིན་ཆེན་སྙིང་པོའི་ཕྱག་གཡས་པ་དབུ་ལ་བཞག་ནས། ཁྱོད་ཉིད་མ་འོངས་པ་ན་དེ་བཞིན་གཤེགས་པ་ཚེ་དང་ཡེ་ཤེས་དཔག་ཏུ་མེད་པ་འོད་སྣང་མཐའ་ཡས་རྡུལ་བྲལ་ཤིན་ཏུ་རྣམ་པར་དག་པ་ཞེས་བྱ་བར་འགྱུར་རོ་གསུངས་ནས་བྱིན་གྱིས་བརླབས་ཤིང་དབང་བསྐུར་ཏེ། གསུང་གི་དབུགས་དབྱུང་གནང་ཞིང་མཚན་གྱི་ལུང་བསྟན་མཛད། ཐུགས་བསྐྱེད་རྨད་བྱུང་ཁྱད་འཕགས་ཀྱིས་མཐའ་ཡས་འགྲོ་བ་སྒྲོལ་བའི་མགོན་པོ་མཚན་ཙམ་གྱིས་ཀྱང་ངན་སོང་ལས་སྐྱོབ་པར་གཟེངས་བསྟོད། སྙིང་རྗེའི་པད་དཀར་གྱི་མདོའི་རྗེས་སུ་འབྲང་ན་མགོན་པོ་འོད་དཔག་མེད་ཀྱིས་ཞིང་ཁམས་བཟུང་ནས་ཐུགས་བསྐྱེད་དམ་བཅའ་མཛད་པའི་སྐུ་ཚེའིི་ཐོག་མ་ནི་དེ་ཡིན་པར་གསུངས་སོ།།
༣མདོ་དེ་གཉིས་ཀྱི་དགོངས་པ་འགལ་མེད་དུ་སྒྲུབ་པ།
མདོ་དེ་གཉིས་ཀྱི་དགོངས་པ་འགལ་མེད་དུ་སྒྲུབ་པ། དོན་ལ་ལུགས་དེ་གཉིས་འགལ་འདུ་མ་ཡིན་ཏེ། རང་རེ་སོ་སོའི་སྐྱེ་བོ་བྱིས་པའི་བློ་དང་བསྟུན་ནས་མདོ་སྡེ་གཉིས་ཀྱི་དགོངས་པ་ཡོངས་སུ་གྲགས་པ་ལྟར་བརྗོད་པ་ཙམ་ལས། སངས་རྒྱས་བྱང་སེམས་ཀྱིས་སྐད་ཅིག་རེ་རེར་བསྟན་པའི་ཆོས་ཀྱི་རྣམ་གྲངས་དང་མཛད་པའི་རྣམ་ཐར་ནི་བསམ་གྱིས་མི་ཁྱབ་པ་གོང་དུ་བཤད་པ་ཇི་བཞིན་ཏེ། ཕྱོགས་བཅུའི་ཞིང་ཁམས་ཀྱི་ཞིང་མཐར་ཐུག་པའི་སངས་རྒྱས་གྲངས་མེད་ཀྱི་མདུན་ནས་མཚན་དང་སྐུ་ཡི་བཀོད་པའང་དེ་དང་གྲངས་མཉམ་པ་ཞིག་གིས་ཐུགས་བསྐྱེད་པའི་རྣམ་ཐར་ཡོད་ཆོག་གོ །རྒྱལ་བ་རྣམས་ཀྱིས་ཆོས་ཀྱི་འཁོར་ལོ་གདུལ་བྱའི་བློ་དང་མཚམས་པར་སྐོར་བ་ཡིན་ལ། འདི་ཉིད་ཕྱི་ལྟར་ན་ཕྱོགས་ཙམ་མཚོན་བྱེད་བྱིས་པ་འཇུག་བདེ་བའི་ཕྱིར་བློ་དང་འཚམ་པར་གོ་བརྡ་སྤྲོད་པ་ཡིན། ཐུགས་བསྐྱེད་རྒྱ་ཆེ་བའི་ཆ་ནས་འོད་མདོ་དང་། ཏིང་འཛིན་དང་ཤེས་རབ་ཟབ་པའི་ཚུལ་སྙིང་རྗེ་པད་དཀར་ལྟར་ཡིན་པས་གཉིས་ཀ་དོན་གཅིག་ཏུ་མཐུན། ཐོག་མར་ཐུགས་བསྐྱེད་པ་ནས་མཐར་སྨོན་ལམ་ཡོངས་སུ་རྫོགས་པའི་བར་གྱི་གོ་དོན་དེ་ལྟར་བླང་ཆོག་པར་བདག་གིས་བསམ་མོ། །དེ་ཡན་ཆད་ཀྱིས་མགོན་པོ་འོད་དཔག་མེད་ཀྱིས་དང་པོར་ཐུགས་བསྐྱེད་དམ་བཅའ་མཛད་ཚུལ་སྨོན་ལམ་བཏབ་ཚུལ་བཤད་ཟིན་ཏོ།།
གཉིས་པ་སྦྱོར་བ་ཁྱད་པར་ཅན་གྱིས་རྫོགས་སྨིན་སྦྱང་བ་མཐར་ཕྱིན་པ།
གཉིས་པ་བར་དུ་སྦྱོར་བ་ཁྱད་པར་ཅན་གྱིས་ཚོགས་ཇི་ལྟར་བསགས་ཚུལ། སྤྱིར་བྱང་ཆུབ་སེམས་དཔའ་ས་ཆེན་པོར་གནས་པ་དེས་འདོད་ན་ཞག་བདུན་གྱིས་ཀྱང་འཚང་རྒྱ་བར་ནུས་མོད། སངས་རྒྱས་འོད་དཔག་མེད་ཀྱིས་དང་པོ་ཐུགས་བསྐྱེད་དམ་བཅའ་མཛད་དུས་ནས་བཟུང་འདི་ལྟར། ལས་ཉོན་གྱིས་འཆིང་བའི་སེམས་ཅན་ཡིན་ཡང་ཆོས་སྤོང་དང་མཚམས་མེད་བྱས་པ་མ་གཏོགས་ཁོང་ལ་དད་ཅིང་སྨོན་ལམ་བཏབ་ཚད་ཀུན་ཁོང་གི་ཞིང་དེར་སྐྱེ་བར་ཤོག སྐྱེས་ནས་ཀྱང་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔར་གྱུར་ཏེ་རྟེན་དེ་བརྗེས་མ་ཐག་ཏུ་འཚང་རྒྱ་བར་ཤོག དེ་ལྟའི་སྨོན་ལམ་མ་གྲུབ་ཀྱི་བར་དུ་རང་འཚང་མི་རྒྱ་བར་ཤོག་ཅེས་པ་སོགས་སེམས་དཔའ་ཆེན་པོའི་ཐུགས་བསྐྱེད་མཛད་པར་མ་ཟད་སྨོན་ལམ་ཁྱད་པར་ཅན་དེ་འདྲ་བཏབ་པོ། །དེའང་གང་སྨོན་ལམ་བཏབ་པ་ཙམ་གྱིས་ཆོག་པར་མ་མཛད་པར་དེ་ཉིད་འགྲུབ་པའི་ཕྱིར་དུ། དུས་ཡུན་རིང་པོ་བསྐལ་ཆེན་གྲངས་མེད་མཐའ་ཡས་པར་ལམ་ལ་བསླབ་ཚུལ་དང་། ཁྱད་པར་དུ་སྙིང་སྟོབས་མཆོག་ཏུ་གྱུར་པའི་དབང་གིས་ཞིམ་པ་སྐད་ཅིག་ཙམ་ཡང་མ་སྐྱེས་པར་ཡོངས་འཛིན་དགེ་བའི་བཤེས་གཉེན་གྲངས་མེད་པ་ཅིག་མཉེས་པར་བྱས་ཤིང་། མི་མཉེས་པའི་ལས་ཏིལ་ཙམ་ཡང་མ་བསྒྲུབས་པར་དྲན་དང་ཤེས་བཞིན་བག་ཡོད་ལ་གནས་པའི་སྟེང་། བསླབ་པར་བྱ་བའི་རང་བཞིན་སྒོ་གསུམ་གྱི་ཉེས་སྤྱོད་ཆེས་ཕྲ་ཞིང་ཕྲ་བ་ནས་བསྡམས་ཤིང་ཚུལ་ཁྲིམས་དང་ཏིང་འཛིན་གྱི་སྤྱོད་པ་ཆེས་ཕྲ་ཞིང་ཕྲ་བ་ནས་བསྒྲུབས་ཏེ། ཁྱད་པར་དུ་དེ་ཁོ་ན་ཉིད་རྟོགས་པའི་ཤེས་རབ་ཚད་གཟུང་དུ་མེད་པ་མངའ་བས་ཆོས་ཟབ་མོ་མཐའ་ཡས་པ་སེམས་ཅན་གྱི་དོན་དུ་དངོས་བརྒྱུད་ཤུགས་གསུམ་ནས་ཐབས་ལ་མཁས་པས་འགྲོ་བ་དམུས་ལོང་གི་ཚོགས་ལ་བསྟན་ཞིང་། དགེ་བའི་རྩ་བ་གང་དག་མཆིས་པ་དེ་དག་ཀུན་ཏུ་བཟང་པོའི་སྨོན་ལམ་གྱིས་ཡོངས་སུ་བསྔོས་ཤིང་སྤེལ་བར་མཛད། དེ་བཞིན་གཤེགས་པ་མགོན་པོ་འོད་དཔག་མེད་ཀྱིས་བདེ་བ་ཅན་གྱི་ཞིང་ཁམས་བཟུང་ཞིང་ཚོགས་གཉིས་ཀྱི་དགེ་རྩ་རླབས་པོ་ཆེ་འདི་དང་འདི་ལྟ་བུ་བསྒྲུབས་ཞེས་བཤད་དགོས་ན། དེ་བཞིན་གཤེགས་པ་ཉིད་ཀྱི་དགོངས་པའི་ཚུལ་དང་མཐུན་པ་ཡིན་པར་སྨྲ་བ་ཙམ་ལས་མི་ནུས་ཏེ། ནམ་མཁའི་རྒྱ་ཁྱོན་གྱི་དཔེ་ལ་ནམ་མཁའ་ཇི་བཞིན་ནོ་ཞེས་བརྗོད་དགོས་པ་བཞིན་བྱིས་པའི་བློས་གཞལ་ཐབས་དང་སོ་སྐྱེས་སྒྲ་ཚིག་གི་ཡུལ་ལས་འདས་པའོ། །སྤྱིར་མ་དག་པའི་ཞིང་ནས་སངས་རྒྱས་མངོན་སུམ་དུ་བཞུགས་པའི་དྲུང་དུ་སྐྱེ་བར་ནུས་མོད། སངས་རྒྱས་ཀྱི་ཞལ་མཐོང་བ་ཙམ་གྱིས་སྡུག་བསྔལ་ཞི་བར་འགྱུར་དཀའོ། །བདེ་བ་ཅན་དུ་སོ་སོའི་སྐྱེ་བོ་རྣམས་སྐྱེ་བར་ནུས་པ་ནི་གཞན་རྐྱེན་དེ་བཞིན་གཤེགས་པའི་སྨོན་ལམ་གྱི་མཐུ་ལས་བྱུང་ཞིང་། གལ་ཏེ་སེམས་ཅན་དེ་ཉིད་མ་དག་པའི་ཞིང་དུ་ཡོད་ན་ངན་འགྲོར་ལྟུང་བར་ཆོས་སྤོང་དང་མཚམས་མེད་བྱས་པ་མིན་ཡང་དེར་སྐྱེ་བའི་རྒྱུ་རྐྱེན་ཚང་སླ་མོད། བདེ་བར་གཤེགས་པའི་སྨོན་ལམ་དང་དགེ་རྩ་ནི་རླབས་ཆེ་ཞིང་གཞན་མཚུངས་ཟླ་བྲལ་བ་ཡིན་ནོ། །འོད་མདོ་རུ། རྒྱལ་བ་འོད་དཔག་མེད་རྗེས་སུ་དྲན་པའི་སེམས་ཅན་རྣམས་ཤི་ན་དེར་སྐྱེ་བར་མ་ཟད་ཚེ་འདིར་ཡང་ཞལ་མཐོང་བར་འགྱུར་གསུངས། ཞལ་མཐོང་ཚུལ་ཡང་རྨི་ལམ་ནས་འཇལ་བ་དང་། ཤི་ཁར་སངས་རྒྱས་ཀྱི་སྤྲུལ་བ་མངོན་སུམ་དུ་བྱོན་པར་མཇལ་བ་དེ་འདྲའོ། །དེའི་ཕྱིར་ན༧ རྗེ་འཇམ་མགོན་བླ་མ་ཙོང་ཁ་པས་ཀྱང་། ནམ་ཞིག་ཚེ་ཡི་འདུ་བྱེད་བཏང་བ་ན། །འཁོར་ཚོགས་རྒྱ་མཚོས་བསྐོར་བ་འོད་དཔག་མེད། །མིག་གི་ལམ་དུ་མངོན་སུམ་མཐོང་གྱུར་ཏེ། །དད་དང་སྙིང་རྗེས་བདག་རྒྱུད་གང་བར་ཤོག །ཅེས་རང་གི་མོས་པ་རྣམ་པར་དག་པའི་དད་པ་བརྟན་པོ་དང་། ཞིང་དེར་སྐྱེ་བའི་འདུན་པ་དྲག་པོ། ཞིང་དེར་སྐྱེ་བའི་སྨོན་ལམ་གེགས་མེད་དུ་འགྲུབ་པ་རྒྱལ་བའི་ཐུགས་བསྐྱེད། ཞིང་དག་པའི་སྟོབས་ལ་སེམས་པའི་བསམ་པ་ཤུགས་དྲག་བཅས་ཚང་ན་བདེ་བ་ཅན་དུ་ཚེའི་འདུ་བྱེད་བཏང་བ་དང་སྐྱེ་བ་དུས་མཉམ་ཡིན་པར་བསྟན། སྐྱེས་ནས་ཀྱང་རང་དོན་ཞི་བ་ཕྱོགས་གཅིག་ཏུ་ཞེན་པ་མ་ཡིན་པའི་ཚུལ་ནི། གོང་གི་ཚིག་མཇུག་དེ་མ་ཐག་ཏུ། བར་དོའི་སྣང་བ་ཤར་བར་གྱུར་མ་ཐག །རྒྱལ་སྲས་རྒྱ་མཚོས་མ་ནོར་ལམ་བསྟན་ཏེ། །བདེ་བ་ཅན་དུ་སྐྱེས་ནས་སྤྲུལ་བ་ཡིས། །མ་དག་ཞིང་གི་འགྲོ་བ་འདྲེན་གྱུར་ཅིག །ཅེས་གསུངས་སོ། །མ་དག་ཞིང་གི་འགྲོ་བ་ནི་སྤྱིར་འཕགས་ས་ཐོབ་པས་མ་གཏོགས་འདྲེན་པར་དཀའ་བ་དང་། ཞིང་འདིར་སོ་སྐྱེའང་སྐྱེ་བར་གསུངས་པ་དང་། ཞིང་འདིར་འཕགས་པ་མིན་པ་གཞན་མེད་པའི་གོ་དོན་ཡང་འགལ་བ་མ་ཡིན་ཏེ། མདོ་ལས། བདེ་བ་ཅན་གྱི་བྱང་སེམས་ཐམས་ཅད་ནི་སྨོན་ལམ་གྱི་དབང་གིས་མ་གཏོགས་བླ་མེད་བྱང་ཆུབ་ལ་སྐྱེ་བ་གཅིག་གིས་ཐོགས་པ་ཤ་སྟག་ཡིན་པར་གསུངས། དེའི་གཞུང་སྤྱིའི་ཆོས་སྐད་ལྟར་ན་སྐྱེ་བ་གཅིག་གིས་ཐོགས་པའི་བྱང་སེམས་ནི་ས་བཅུ་བར་ངོས་འཛིན། དེ་བཞིན་དུ་མདོ་ལས། ཉན་ཐོས་ཀྱི་དགེ་འདུན་ནི་ལེགས་པར་ཞུགས་པ་རིག་པར་ཞུགས་པ་དྲང་བར་ཞུགས་པ་མཐུན་པར་ཞུགས་པ། ཞེས་པ་ནི་འཕགས་པ་ཐོགས་མེད་ཀྱིས་སློབ་དང་མི་སློབ་རྒྱུན་ཞུགས་འབྲས་གནས་ཀྱི་དབྱེ་བར་སྦྱར་ཞིང་། ལེགས་པར་ཞུགས་པ་ནི་མྱང་འདས་ཀྱི་ཞུགས་པ། སྤྱིར་ཡང་དག་ངེས་པ་ཞེས་པ་ནི་འཕགས་ས་ལ་སྦྱོར་མོད། འོད་མདོ་རུ་བདེ་བ་ཅན་དུ་སྐྱེས་པ་ནི་ཡང་དག་པ་ཉིད་ལ་ངེས་པ་ཁོ་ན་ཡིན་ཞེས་ཀྱང་གསུངས། དེའང་རྒྱུན་གཅིག་ལ་གསུངས་པའི་ཡོན་ཏན་གཞི་ཐ་དད་པར་བཤད་ཆོག་པའང་མང་པོ་ཡོད་པས་སྐབས་ཀྱིས་གོ་བར་བྱ་བ་ལས་ཕྱོགས་གཅིག་ཏུ་གཡག་སྣ་ཁུ་ཚུར་གྱིས་མི་འོང་ངོ་། །དེ་བཞིན་གཤེགས་པའི་གསུང་གི་གསང་བ་ཟབ་མོ་ལ་མཐའ་གཅིག་ཏུ་འདི་ཙམ་ཡིན་ལ་འདི་ལས་གཞན་མེད་ཅིང་འདི་ལས་མི་འདའ་ཞེས་བརྗོད་པར་མི་ནུས་ཏེ། འཇམ་མགོན་ས་སྐྱ་པཎྜི་ཏས། འདི་མཐའ་འདི་ཙམ་ཁོ་ནར་གནས་སོ་ཞེས། །དེ་མཐའ་དེ་ཙམ་ཁོ་ནར་རྗེས་དཔགས་ན། །འགྲོ་བའི་བླ་མའི་གསུང་ལ་བརྒལ་བ་སྟེ། །དེས་ན་མཐའ་དོན་དགོངས་པ་དཔྱད་པར་བྱ། །ཞེས་གསུངས་སོ། །དེ་ལྟར་མགོན་པོ་འོད་དཔག་མེད་ཀྱིས་དེ་བཞིན་གཤེགས་པའི་སྤྱན་སྔར་ཐུགས་བསྐྱེད་དམ་བཅའ་སྨོན་ལམ་བཏབ་ཚུལ་དང་སྦྱོར་བ་ཁྱད་པར་ཅན་གྱིས་ཚོགས་ཇི་ལྟར་བསགས་ཚུལ་བཤད་པ་ཡོངས་སུ་གྲུབ། སང་ཉིན་འུ་བུ་ཅག་གིས་མགོན་པོ་འོད་དཔག་མེད་མངོན་པར་རྫོགས་པར་སངས་རྒྱས་ནས་ཞིང་ཁམས་ཇི་ལྟར་བཟུང་ཚུལ་ནས་འཆད་པར་བྱའོ།།