གླེང་གཞི།
ངག་འདོན་བྱིན་རླབས་གློག་ཞགས་ཀྱི་གསོལ་སྨན་རྒྱས་འགྲེལ་ཞིང་མཆོག་མྱུར་བགྲོད་ཅེས་བྱ་བ་བཞུགས་སོ།།
བསོད་ནམས་དཔལ་གྱིས་བསྐྲུན་པའི་རྣ་བ་ལ།།
གང་མཚན་གྲགས་པ་ལན་གཅིག་ལྷུང་བས་ཀྱང་།།
དམན་པའི་ས་ལས་རབ་ཏུ་ལྡོག་པ་དེར།།
སྙིམ་པའི་འདབ་སྟོང་ཟུམ་འདི་སྐལ་བ་བཟང་།།
མ་ཆགས་པདྨ་དམར་པོའི་ཟེའུ་འབྲུ་ལ།།
མི་རྟོག་གསུང་གི་གསང་བ་ཐིག་ལེར་འཁྱིལ།།
རྐྱེན་བྲལ་རང་བྱུང་རིག་པ་ཐོལ་སྐྱེས་སྐུ།།
དུས་ཀྱི་མུན་ཁམས་ལ་ཟ་སྟོན་ཀའི་ཟླ།།
གབ་པ་མངོན་ཕྱུང་གསང་བ་གསང་བའི་མཛོད།།
ཡེ་ཤེས་རྡོ་རྗེའི་ལྗགས་ཀྱིས་ཐང་མར་བརྡལ།།
མགོ་མཁྲེགས་རྟོག་གེའི་སྟོང་འུར་ཟིལ་གྱིས་གནོན།།
དཔལ་གྱི་རི་ལ་བཞུགས་དེ་བདག་གི་མགོན།།
སྲིད་པའི་མངའ་ཐང་ཆེ་རྒུ་གཡས་སུ་དོར།།
ཞི་བའི་རང་འདོད་ཡོད་རྒུ་གཡོན་དུ་འཕང་།།
དོན་མེད་སྨྲ་བའི་ངག་གི་སྒོ་མོ་བསྡམས།།
ཅང་མེད་ནགས་ན་བཞུགས་དེ་བདག་གི་མགོན།།
མཁས་དང་བཙུན་པའི་སྡེ་ཞེས་ཡར་མ་བཞག།
གྲོང་དང་ཁྱིམ་པའི་རིགས་ཞེས་མར་མ་བཅད།།
འདྲ་མཉམ་བརྩེ་བ་ཆེན་པོས་སྐྱ་སེར་ཀུན།།
སྨིན་ཁྲིད་ཆོས་ར་འདི་ནས་མཐོ་དམན་བསྙམས།།
བླ་རབས་བརྒྱུད་པའི་རིང་ལ་མ་ཐོས་ཞིང་།།
མི་རབས་འདས་པའི་དུས་སུ་མ་མཐོང་བ།།
དད་ལྡན་མི་སྐྱ་ཕོ་མོ་ཁྲི་ཕྲག་གིས།།
དཔྱད་འཇོག་སྤེལ་མའི་ཏིང་འཛིན་འདི་ན་སྒོམ།།
ས་དང་ལམ་གྱི་མངོན་རྟོགས་མ་མཆིས་ཤིང་།།
ལས་དང་ཉོན་མོངས་སྒྲིབ་པ་མ་སྤངས་ཀྱང་།།
རྣམ་དག་བདེ་ཆེན་ཞིང་དུ་སྐྱེ་ངེས་པའི།།
སྨིན་ཁྲིད་ཆོས་ཀྱི་དགའ་སྟོན་འདི་ན་འགྱེད།།
མེ་ཡི་འོབས་ཀྱིས་བསྐོར་བའི་སྟོང་གསུམ་ཁྱོན།།
གཅེས་པའི་སྲོག་གིས་བརྒལ་ཏེ་འཚོལ་ན་ཡང་།།
དོན་ལྡན་སྲིད་པའི་མྱ་ངན་གཞིལ་བའི་ཆོས།།
བདེ་ཆེན་ཞིང་ཁྲིད་ཆེན་མོའི་སྐྱུད་བྱང་འབྲི།།
དེའང་ཇི་སྐད་དུ་ བདག་ཅག་གི་སྟོན་པ་དཔལ་མཉམ་མེད 
་ཐུབ་པའི་དབང་པོའི་ཞལ་ནས། མི་ཕམ་པ། གང་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་སངས་རྒྱས་མགོན་པོ་འོད་དཔག་མེད་ཀྱི་མཚན་ཐོས་པ་དེས་ནི་རྙེད་པ་ཇི་སྙེད་ཅིག་ལེགས་པར་རྙེད་པ་ལ་ལྟོས། ཞེས་དང་། སེམས་ཅན་གང་ཞིག་གིས་སངས་རྒྱས་འོད་དཔག་ཏུ་མེད་པ་ལ་སེམས་ཀྱིས་དད་པ་ལན་གཅིག་བྱས་པ་དང་། བདེ་བ་ཅན་གྱི་ཞིང་གི་ཡོན་ཏན་བསྟན་པའི་ཆོས་ཀྱི་རྣམ་གྲངས་འདི་ལ་མི་ཕྱེད་པའི་དད་པ་ལྡན་པ་དེ་དག་ནི་དམན་པའི་ལམ་ལས་ལྡོག་པར་འགྱུར་བ་ཡིན། ཞེས་དང་། མི་ཕམ་པ། ཆོས་འདི་ལ་མོས་པར་གྱིས། ཁོང་དུ་ཆུད་པར་གྱིས། གཞན་ལ་དེ་བཞིན་རྒྱ་ཆེར་ཤོད། གླེགས་བམ་ལ་སྟོན་པའི་འདུ་ཤེས་བཞག་སྟེ་མཆོད་པར་གྱིས། གལ་ཏེ་སྟོང་གསུམ་འཇིག་རྟེན་གྱི་ཁམས་མེ་ཡི་འོབས་ཆེན་པོ་བརྒལ་དཀའ་བར་གྱུར་ཀྱང་འདིའི་དོན་དུ་དེ་ཉིད་བརྒལ་ནས་འགྲོ་བར་འོས་ཏེ། ཅིའི་ཕྱིར་ན་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་མང་པོས་ཆོས་ཀྱི་རྣམ་གྲངས་འདི་ལ་ཉན་ནས་འཁོར་བའི་རྒྱ་མཚོ་ཆེན་པོ་བརྒལ་ཞིང་སྲིད་པའི་མྱ་ངན་ཐམས་ཅད་དང་བྲལ་ཏེ། རང་གཞན་གཉིས་དོན་གྲུབ་པ་བླ་མེད་རྫོགས་པའི་བྱང་ཆུབ་བརྙེས་ནས་ཕྱིར་མི་ལྡོག་པར་གྱུར་ཏོ། །ཞེས་དང་གཞན་ཡང་འདི་ལྟར། དུས་གང་གི་ཚེ་གང་ཟག་གང་ཞིག་གིས་རྡུལ་ཕྲ་རབ་ཀྱི་གྲངས་དང་མཉམ་པའི་འཇིག་རྟེན་གྱི་ཁམས་བཤིག་ནས་རྡུལ་ཕྲ་རབ་ཏུ་བྱས་པའི་གྲངས་ཇི་སྙེད་དང་མཉམ་པ་དེ་སྙེད་ཀྱི་འཇིག་རྟེན་ཁམས་ཐམས་ཅད་ལྷ་དང་མི་ཡི་རིན་པོ་ཆེ་སྣ་ཚོགས་ཀྱིས་བཀང་སྟེ་སྦྱིན་པ་བཏང་བ་ལས། གང་སུ་ཞིག་གིས་སངས་རྒྱས་འོད་དཔག་མེད་ཀྱི་མཚན་དང་བདེ་བ་ཅན་གྱི་ཞིང་གི་ཡོན་ཏན་ཁྱད་དུ་འཕགས་པ་རྣམས་ཐོས་ནས་དེ་ལ་དད་ཅིང་དགའ་བའི་ཐལ་མོ་ལན་གཅིག་དེའི་ཕྱོགས་སུ་སྦྱོར་ན་བསོད་ནམས་ཆེའོ། །ཞེས་དང་། དེ་བཞིན་ཡང་སྔོན་དགེ་སློང་ཆོས་ཀྱི་འབྱུང་གནས་ཀྱིས་ཐུགས་བསྐྱེད་དམ་བཅའ་བཟུང་ཚུལ་ནི་ཇི་སྐད་དུ། ལས་ངན་གྱིས་འཆིང་བའི་སེམས་ཅན་ཡིན་ཡང་ཆོས་སྤོང་དང་མཚམས་
མེད་བྱས་པ་མ་གཏོགས་བདག ་ལ་དད་ཅིང་སྨོན་ལམ་བཏབ་ཚད་ཀུན་ཞིང་དེར་སྐྱེ་བར་ཤོག་ཅིག སྐྱེས་ནས་ཀྱང་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔར་གྱུར་ནས་རྟེན་དེ་བརྗེས་མ་ཐག་འཚང་རྒྱ་བར་ཤོག་ཅིག དེ་ལྟའི་སྨོན་ལམ་མ་གྲུབ་ཀྱི་བར་དུ་བདག་འཚང་མི་རྒྱ་བར་ཤོག་ཅིག ཅེས་སོགས་གསུངས་པ་ལྟར་གང་མཚན་ལན་གཅིག་རྣ་བས་ཐོས་པ་དང་། སེམས་ཀྱིས་དད་པ་བྱས་པ། ལག་པས་ཐལ་མོ་སྦྱར་བ་ཙམ་གྱི་ཕན་ཡོན་ཡང་བསམ་བརྗོད་ལས་འདས་པའི་ངོ་མཚར་རྨད་བྱུང་གི་ཆོས་ཚུལ་འདི་ནི། ༧ཁྱབ་ བདག་བླ་མ་རིན་པོ་ཆེ་པད་འབྱུང་བི་མའི་ཞལ་སྐྱིན། བྱར་མེད་ལྷུག་པའི་སྒོམ་ཆེན། རང་བྱུང་རྟོགས་པ ་ཀློང་རྡོལ། ཡང་གསང་ཐེག་རྩེའི་མཛོད་འཛིན། ཟག་མེད་གསུང་གི་དབང་ཕྱུག གཞི་གསུམ་ཆོས་གའི་བརྒྱུད་འཛིན། ངེས་དོན་བསྟན་པའི་སྒྲོན་མེ། ངག་རིག་སྨྲ་བའི་དབང་པོ། ཕྱག་སོར་ལྷོད་པའི་བྲིས་མཁན། དོན་གྱི་སླད་དུ་མཚན་ནས་སྨྲོས་ན༧སྐྱབས་རྗེ་པདྨ་སྐལ་བཟང་རིན་པོ་ཆེ་མཆོག་གི་ཞལ་སྔ་ནས་གདན་ས་དམ་པའི་མཐིལ་རྫོགས་ཆེན་པདྨ་ཐང་ལུང་རྟོགས་པདྨའི་དགའ་ཚལ་དུ། བོད་རབ་བྱུང་བཅུ་བདུན་པའི་མེ་ཕོ་སྤྲེལ་ལོའི་སྟོན་དུས་སུ་སྣོད་ལྡན་བུ་སློབ་སྟོང་ཕྲག་ལྷག་ལ་བཀའ་མདོ་སྒྱུ་སེམས་གསུམ་གྱི་སྨིན་དབང་ཟབ་དོན་ལྗགས་ཁྲིད་དང་བཅས་པ་ཡོངས་སུ་གྲུབ་པའི་མཇུག་ཐོག་ཏུ། ཐུགས་བརྩེ་བ་ཆེན་པོས་རིས་སུ་མ་ཆད་པའི་སྐྱེ་འགྲོ་ཀུན་དང་། ཁྱད་པར་སྐབས་འདིའི་ཆེད་དུ་བྱ་བའི་གདུལ་བྱ་ཁྱིམ་ན་གནས་པའི་དགེ་བསྙེན་ཕོ་མོ་གཙོ་བྱས་དད་ལྡན་མང་ཚོགས་ལ་བསྩལ་བའི་ཆོས་སྐལ་ནི། བདེ་ཆེན་ཞིང་གི་སྒྲུབ་མཆོད་ཆེན་མོ་དང་འབྲེལ་བའི་སྨིན་ཁྲིད་ཟབ་མོའི་སྒོམ་རིམ། ཚིག་ཉུང་ཞིང་དོན་འདུས་པ། གོ་སླ་ཞིང་ཆོད་ཆེ་བ། བྱིན་རླབས་ཀྱི་ཚན་ཁ་འབར་བ། ཇི་སྐད་དུ། གསེར་ཞུན་ནོར་བུས་སྤྲས་པའི་ཡོན་གྱིས་ཀྱང་། །མི་འགུགས་དབྱིངས་ཀྱི་མཁའ་འགྲོའི་ཐུགས་མཛོད་ཆོས། །ཞེས་པ་ཇི་བཞིན་པའི་ཉམས་ལེན་དམར་ཁྲིད་ཀྱི་གདམས་ཟབ། ལུས་ཀྱི་འདུག་སྟངས། སེམས་ཀྱི་བཞག་ཐབས། དབུགས་ཀྱི་རྒྱུ་ཚུལ། མཚན་བཅས་ཀྱི་དམིགས་རྣམ། མཚན་མེད་ཀྱི་ཏིང་འཛིན། དེ་མིན་ད་དུང་ལུས་ཀྱིས་ཕྱག་འཚལ་སྟངས། ངག་གིས་གསོལ་བ་འདེབས་ཚུལ། ཡིད་ཀྱིས་དད་པ་བྱེད་ལུགས། མཆོག་གསུམ་ལ་སྐྱབས་སུ་འགྲོ་ཚུལ། སེམས་ཅན་ལ་སྙིང་རྗེ་བསྒོམ་སྟངས། མདོར་ན་གང་ལ་གང་འདུལ་བདུད་རྩིའི་གྲུ་ཆར་འདོད་རྒུ་རུ་བསྩལ་བའི་ཚུལ་ནི་འདི་ལྟ་སྟེ། སེང་གེས་གངས་ཟིན་པ་ལྟ་བུའི་བསྒོམ་མེད་ཡེངས་མེད་ཀྱི་བཙན་ས་ལས་ནམ་ཡང་མ་གཡོས་མོད། རྗེས་ཐོབ་སྒྱུ་མའི་ལྷ་སྐུ་རུ་ལྡང་བའི་ཟོལ་གྱིས་ཟག་མེད་ཆོས་ཀྱི་ཁྲི་ལ་གུས་ཕྱག་ལན་གསུམ་ཕུལ་རྗེས། ཞབས་མཐིལ་འཁོར་ལོའི་རི་མོ་གསེར་གྱི་ཁྲི་ལ་སྙོམས་པར་བཀོད་ཅིང་། བརྩེ་ཆེན་ཞལ་གྱི་དཀྱིལ་འཁོར་ནས་འཛུམ་པའི་མདངས་བྱུང་། ཕྱག་སོར་པདྨོའི་འདབ་མ་ཐུགས་ཀར་ཟུམ། མཁའ་ཁྱབ་འགྲོ་ཀུན་སྒྲོལ་བའི་སེམས་མཆོག་བསྐྱེད། དེ་ནས་གཟུངས་སྤོབས་བློ་གྲོས་ཀྱི་སྒོ་མོ་རང་བབས་སུ་ཕྱེས་པ་ན། ཐོས་པ་ཙམ་གྱིས་དབང་མེད་དུ་ལུས་ལ་བ་སྤུ་གཡོ་ཞིང་མིག་ལ་མཆི་མ་འཁྲིགས་པའི་དལ་ཅིང་བརྗིད་པའི་གསུང་གི་རོལ་མོ་ནི། གསལ་དག་སྙན་པའི་ཚིག་འབྲུ་ལ་ཆད་ལྷག་གི་སྐྱོན་ཡེ་མི་མངའ་ཞིང་། རྩོལ་མེད་བྲག་ཐོག་ནས་རྡོལ་བའི་ཆབ་རྒྱུན་བཞིན་བདག་ཅག་གུས་སློབ་ཡོངས་ཀྱིས་འདི་སྐད་དུ་ཐོས་སོ།།