ཕྱག་རྒྱ་ཆེན་པོ་གའུ་མའི་བཀའ་དུག་ལྔ་ལམ་ཁྱེར་གྱི་བཀའ།
ཕྱག་རྒྱ་ཆེན་པོ་གའུ་མའི་བཀའ་དུག་ལྔ་ལམ་ཁྱེར་གྱི་བཀའ་ཡོད།། །།
བླ་མ་རྣམས་ལ་ཕྱག་འཚལ་ལོ། །མཎྜལ་འདབ་བཞི་ཕྱོགས་མཚོན་ལ་ལྟེ་བ་སེར་པོ། །མཐའ་མ་ཅི་འབྱོར་བའི་མཆོད་གཏོར་གྱིས་བསྐོར་ལ། །དབུས་སུ་རིན་པོ་ཆེའི་ཁྲི་སེང་གེ་བརྒྱད་ཀྱིས་བཏེགས་པ། །པདྨ་དང་ཉི་མའི་དཀྱིལ་འཁོར་གྱི་སྟེང་དུ། །ངོ་བོ་བླ་མ་ལ་རྣམ་པ་བདེ་མཆོག་སྐུ་མདོག་གསེར་གཙོ་མའི་མདོ་ལྟ་བུ། །རྡོ་རྗེ་དང་དྲིལ་བུ་འཛིན་པ། །མི་མགོ་དང་རུས་པའི་རྒྱན་ཅན། །ཡུམ་དང་གཉིས་སུ་
མེད་པ། །མཁའ་འགྲོ་མ་བཞི་དང་བཅས་པའོ། །ཤར་དུ་དགྱེས་པ་རྡོ་རྗེའི་ལྷ་ཚོགས། །ལྷོར་གསང་འདུས། །ནུབ་ཏུ་མ་ཧཱ་མ་ཡ། བྱང་དུ་འཇིགས་བྱེད་བསྒོམས་ལ། །བདག་འཇུག་བླང་། །སྔོན་འགྲོ་རྒྱས་བསྡུས་ཅི་རིགས་སུ་སྔོན་དུ་སོང་བས། །སློབ་མ་ལ་ཡང་གོང་ལྟར་བསྒོམས་དུ་བཅུག་ལ། །དབང་བསྐུར་དངོས་ནི་སློབ་མ་རང་རང་གི་མདུན་དུ། །ཐོད་པ་ཕྱི་དཀར་ལ་ནང་དམར་བ་
ཡངས་ཤིང་རྒྱ་ཆེ་བའི་ནང་དུ། །རང་གི་ལུས་ཤ་ལྔ་བདུད་རྩི་ལྔར་བསམ་ལ་དབུལ། །ཡང་སྟོང་གསུམ་འདི་རིན་པོ་ཆེ་གསེར་གྱིས་ཕྱུར་གྱིས་བཀང་ནས་ཡོན་དུ་ཕུལ་བར་བསམ་ལ། །གསོལ་བ་གདབ་པ་ནི། །བླ་མ་རིན་པོ་ཆེ་བདག་ལ་བུམ་པའི་དབང་བསྐུར་དུ་གསོལ། །སྐུའི་བྱིན་རླབས་མ་ལུས་པ་གཞུག་ཏུ་གསོལ། །ཞེས་གསོལ་བ་བཏབ་པས། དབུས་ཀྱི་བདེ་མཆོག་བླ་མའི་ངོ་བོ་ཅན་གྱི་སྤྱི་བོའི་ཨོཾ་དཀར་པོ་ལས་འོད་འཕྲོས། སངས་རྒྱས་དང་བྱང་ཆུབ་སེམས་དཔའི་ཐུགས་གཉིས་སུ་མེད་པའི་ཡེ་ཤེས་ཀྱི་བདུད་རྩི་ཆུ་རྒྱུན་ནམ། །འོད་དཀར་པོའི་རྣམ་པར་བྱོན་ཏེ། བླ་མའི་ཨོཾ་ལ་ཐིམ། ཨོཾ་ལས་ཡེ་ཤེས་ཀྱི་བདུད་རྩིའི་ཆུ་རྒྱུན་བྱུང་བས། རང་གི་སྨིན་ཕྲག་གི་ཨོཾ་ལ་ཐིམ་པས། ལུས་ཀྱི་ནད་གདོན་སྡིག་སྒྲིབ་མ་ལུས་པར་སངས་
དག་པར་བསམ། །བླ་མས་ཀྱང་དེ་བཞིན་དུ་བསམ་ཞིང་། རྩ་བ་དང་བརྒྱུད་པའི་བླ་མ་རྣམས་ཀྱི་མཚན་བརྗོད་ཅིང་། བྱིན་གྱིས་རློབས་ཤིག །ད་ལྟ་ཉིད་དུ། མྱུར་བ་ཉིད་དུ། འདུག་ས་འདི་ཉིད་དུ་བྱིན་གྱིས་རློབས་ཤིག་ཅེས་བརྗོད་ཅིང་། རོལ་མོའི་སྒྲ། གུ་གུལ་གྱི་དུད་པ་དང་བཅས་པས། ཡེ་ཤེས་དབབ་སྟེ། སྐུའི་བྱིན་རླབས་ལུས་ལ་ཞུགས་ཅིང་བུམ་པའི་དབང་བསྐུར་རོ། །ཡང་མཆོད་པ་སྔར་བཞིན་ཕུལ་ལ། གསང་བ་དང་། ཤེས་རབ་ཡེ་ཤེས་ཀྱིས་དབང་བསྐུར་དུ་གསོལ་ཞེས་གསོལ་བ་བཏབ་པས། བླ་མའི་མགྲིན་པའི་ཨཱཿདམར་པོ་དང་། ཐུགས་ཁའི་ཧཱུྃ་ལ་མཐིང་ཀ་ལས། འོད་ཟེར་གྱི་སྤྲོ་བསྡུ་སྔ་མ་དང་ལྡན་པས། གཉིས་པ་དང་གསུམ་པའོ། །སླར་ཡང་མཆོད་པ་སྔར་བཞིན་ཕུལ་ནས། བཞི་པ་བསྐུར་དུ་གསོལ་ཞེས་གསོལ་བཏབ་
པས། །བླ་མའི་གནས་གསུམ་གྱི་ཡི་གེ་གསུམ་ལས་འོད་ཟེར་འཕྲོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྒྱུད་བསྐུར་་དེ་དག་གི་ཐུགས་གཉིས་སུ་མེད་པའི་ཡེ་ཤེས་ཀྱི་བདུད་རྩི་འོད་ཟེར་གྱི་རྣམ་པར་བྱོན་ནས། བླ་མའི་གནས་གསུམ་གྱི་ཡི་གེ་གསུམ་ལ་ཐིམ། དེ་ལས་འོད་ཟེར་དཀར་དམར་མཐིང་གསུམ་འཇའ་ཚོན་གྱི་རྣམ་པར་བྱོན་ནས། རང་གི་གནས་གསུམ་དུ་ཐིམ་པས། ལུས་ཀྱི་སྤྱི་བོའི་གཙུག་ནས་རྐང་པའི་མཐིལ་ཡན་ཆད་འོད་ཀྱིས་གང་། ལུས་ངག་ཡིད་གསུམ་གྱི་ནད་གདོན་སྡིག་སྒྲིབ་མ་ལུས་པར་སངས་དག་ནས། ལུས་ལྷའི་སྐུ་སྣང་ལ་རང་བཞིན་མེད་པའི་ངང་ལ་སེམས་མ་བཅོས་པར་བཞག་པ་ནི། བཞི་པའོ། །ཡེ་ཤེས་རྒྱ་མཚོའི་རྒྱུད་ལས། བླ་མའི་སྐུ་ཡི་དཀྱིལ་འཁོར་ལས། དབང་བཞི་ཡོངས་སུ་རྫོགས་པར་བླང་། ས་ལམ་རིམ་པ་མ་ལུས་བསྒྲོད། ཅེས་ལེན་
གསུམ་བརྗོད། དེའི་ཕྱིར་དབང་བཞིའོ། །ཡང་ཤར་གྱི་དགྱེས་རྡོར་འོད་ཀྱི་རྣམ་པ་དེ། དབུས་ཀྱི་བདེ་མཆོག་ལ་ཐིམ། དེ་བཞིན་དུ་རིམ་གྱིས་ཐིམ་ནས། བདེ་མཆོག་འོད་དུ་ལྟེམ་ལྟེམ་འདུག་པ་དེ་རང་གི་སྤྱི་གཙུག་ཏུ་ཐིམ་པས། །སྨིན་མཚམས་སུ་སླེབས་པས་བུམ་དབང་། མགྲིན་པར་སླེབས་པས་གཉིས་པ། སྙིང་གས་གསུམ་པ། ལྟེ་བར་བྱུང་འོད་དུ་ཡལ་སོང་། །ལུས་སྟོང་སང་སོང་སྟེ། དེ་མི་དམིགས་པའི་ངང་ལ་སེམས་མ་བཅོས་པ་བཞག་པ་ནི་ནང་གི་དབང་བཞི་པའོ། །རྫོགས་སོ། །ཡང་གཉིས་པ་ནི། བླ་མའི་གནས་གསུམ་གྱི་ཡིག་འབྲུ་མཐིང་ཀ་ཡོད་པ་ལས། བདེ་མཆོག་སྐུ་ཆུང་ལ་ཡན་ལག་དོད་པ་མཐིང་ཀ་དཔག་ཏུ་མེད་པ་ཆད་ནས། གནས་གསུམ་དུ་ཐིམ་པས་དབང་གསུམ། ལྟེ་བ་ནས་མཐིང་ཀ་དཔག་ཏུ་མེད་
པ་ཆད་ནས་ལྟེ་བར་ཐིམ་པས། མཐར་སྟོང་སངས་ཀྱི་འོད་དུ་ཡལ་བའི་ངང་ལ་བཞག་པ་ནི་བཞི་པའོ། །འདི་ཟབ་ལམ་ཡིན་གསུང་ངོ་། །དགེའོ། །ན་མོ་གུ་རུ། །བླ་མ་དམ་པའི་ཞབས་བཏུད་ནས། །དུག་ལྔ་ལམ་ཁྱེར་དབང་བསྐུར་བྲི། །དེ་ལ་སྦྱོར་བ། །དངོས་གཞི། རྗེས་གསུམ་ལས། སྦྱོར་བ་ནི། གནས་ཁང་བརྐྱང་ནུལ་དང་རྟེན་ལ་སོགས་པ་བཀྲམ། མཎྜལ་འདབ་བཞི་ཕྱོགས་མཚོན་ལ། །ལྟེ་བ་དཀར་པོ། །མཐའ་མ་ཅི་འབྱོར་པའི་མཆོད་གཏོར་གྱིས་བསྐོར་ལ། དབུས་སུ་སེང་གེ་རིན་པོ་ཆེའི་ཁྲི་པདྨ་དང་། ཉི་ཟླའི་སྟེང་དུ་ངོ་བོ་བླ་མ་ལ་རྣམ་པ་ཧེ་རུ་ཀ་སྐུ་མདོག་དཀར་པོ་རྡོ་རྗེ་དང་དྲིལ་བུ་འཛིན་པས། ཡུམ་ཕག་མོ་ལ་འཁྱུད་པ། མི་མགོ་དང་རུས་པའི་རྒྱན་ཅན་གར་དགུའི་ཉམས་དང་ལྡན་པ། ཕྱོགས་བཞིར་བདེ་ཆེན་གྱི་ལྷ་མོ་གྲི་ཐོད་ཅན་བཞི་བསྐྱེད། ཤར་དུ་དགྱེས་
མཛད། །ལྷོར་གསང་འདུས། ནུབ་ཏུ་མ་ཧཱ་མ་ཡ། བྱང་དུ་འཇིགས་བྱེད་ལྷ་ཚོགས་བསྐྱེད། སློབ་དཔོན་གྱིས་བདག་བསྐྱེད་བསྒོམ། བཟླས་པ་བྱ། མདུན་བསྐྱེད་བསྒོམས། མཆོད་གཏོར་དབུལ། བདག་འཇུག་བླང་ངོ། །སློབ་མས་ཁྲུས་བྱས། མཎྜལ་དབུལ། སྔོན་འགྲོ་རྒྱས་བསྡུས་སྐབས་དང་སྦྱར་བ་བྱས་ལ། །སློབ་མའི་སྤྱི་བོར་གོང་ལྟར་བསྒོམ་དུ་བཅུག །དངོས་གཞི་དབང་བསྐུར་བ་ནི། །གསེར་གྱི་མཎྜལ་དང་། རང་གི་མདུན་དུ་ཐོད་པ་ཕྱི་དཀར་ལ་ནང་དམར་བ་ཡངས་ཤིང་རྒྱ་ཆེ་བའི་ནང་དུ། རང་གི་རྣམ་སྨིན་གྱི་ལུས་འདི་ཤ་ལྔ་བདུད་རྩི་ལྔར་བྱིན་གྱིས་བརླབས་ལ་དབུལ་ལོ། །སྟོང་གསུམ་རིན་ཆེན་གསེར་གྱི་ཕྱུར་ཏེ་བཀང་ལ་ཡོན་དུ་དབུལ་བར་བསམ་མོ། །དེ་ནས་གསོལ་བ་གདབ་པ་ནི། བླ་མ་རིན་པོ་ཆེ། བདག་ལ་བུམ་པའི་
དབང་བསྐུར་དུ་གསོལ། སྐུ་ཡི་བྱིན་རླབས་མ་ལུས་པ་གཞུག་ཏུ་གསོལ། །ཅེས་གསོལ་བ་བཏབ་པས། དབུས་ཀྱི་བདེ་མཆོག་བླ་མའི་ངོ་བོ་ཅན་གྱིས་སྤྱི་བོའི་ཨོཾ་དཀར་པོ་ལས་འོད་འཕྲོས། སངས་རྒྱས་དང་བྱང་ཆུབ་སེམས་དཔའི་ཡེ་ཤེས་ཀྱི་བདུད་རྩི་འོད་དཀར་པོའི་རྣམ་པར་བྱོན་ཏེ་བླ་མའི་ཨོཾ་ལ་ཐིམ། ཨོཾ་ལས་ཡེ་ཤེས་ཀྱི་བདུད་རྩིའི་ཆུ་རྒྱུན་བྱུང་བས། །རང་གི་སྨིན་ཕྲག་གི་ཨོཾ་ལ་ཐིམ་པས་ལུས་ཀྱི་ནད་གདོན་སྡིག་སྒྲིབ་སངས་དག་པར་བསམ། བླ་མས་ཀྱང་དེ་བཞིན་བསམས་ཤིང་། བརྒྱུད་པའི་བླ་མ་རྣམས་ཀྱི་མཚན་ནས་བརྗོད་ཅིང་ད་ལྟ་ཉིད་དུ། མྱུར་བ་ཉིད་དུ་བྱིན་གྱི་རློབས་ཤིག །ཅེས་རོལ་མོའི་སྒྲ་དང་། གུ་གུལ་དུད་པས་ཡེ་ཤེས་དབབ་བོ། །སྐུའི་བྱིན་རླབས་ཞུགས། བུམ་དབང་ཐོབ། ཡང་སྔ་མ་ལྟར་མཆོད། གསང་དབང་དང་། །ཐུགས་གཉིས་སུ་མེད་པའི་
ཤེས་རབ་ཡེ་ཤེས་བསྐུར་དུ་གསོལ། །ཞེས་གསོལ་བཏབ་པས། བླ་མའི་མགྲིན་པའི་ཨཱ་དང་། །ཐུགས་ཀའི་ཧཱུྃ་མཐིང་གའི་འོད་ཟེར་གྱི་སྤྲོ་བསྡུ་སྔ་མ་ལྟ་བུ་དང་ལྡན་པས། །གཉིས་པ་དང་། གསུམ་པ་བླང་ངོ། །ཡང་མཆོད་དེ། །བཞི་པའི་གསོལ་བ་བཏབ་པས། བླ་མའི་གནས་གསུམ་གྱི་ཡི་གེ་ལས་འོད་ཟེར་སྤྲོ་བསྡུ་བྱས། རང་གི་གནས་གསུམ་དུ་ཐིམ། །ལུས་ཐམས་ཅད་འོད་ཀྱིས་གང་། ལུས་ངག་ཡིད་གསུམ་གྱི་ནད་གདོན་སྡིག་སྒྲིབ་མ་ལུས་པ་དག །ལུས་ལྷའི་སྐུ་སྣང་ལ་རང་བཞིན་མེད་པའི་ངང་ལ་སེམས་མ་བཅོས་པར་བཞག་པ་ནི་བཞི་པའོ། །ཡེ་ཤེས་རྒྱ་མཚོའི་རྒྱུད་ལས། བླ་མའི་སྐུའི་དཀྱིལ་འཁོར་ལས། །དབང་བཞི་ཡོངས་སུ་རྫོགས་པར་བླང་། ས་ལམ་རིམ་པ་མ་ལུས་བགྲོད། །ཅེས་ལན་གསུམ་བརྗོད། དེ་ནི་
ཕྱིའི་དབང་བཞིའོ། །ཡང་ཤར་གྱི་དགྱེས་མཛད་འོད་ཀྱི་རྣམ་པ་དེ། །དབུས་ཀྱི་བདེ་མཆོག་ལ་ཐིམ། དེ་བཞིན་དུ་རིམ་གྱིས་ཐིམ། །བདེ་མཆོག་འོད་དུ་ལྟེམ་ལྟེམ་འདུག་པ་དེ་སྤྱི་གཙུག་ཏུ་ཐིམ་སྨིན་མཚམས་སུ་སླེབ་བུམ་དབང་ཐོབ། མགྲིན་པར་སླེབས་པས་གཉིས་པ། སྙིང་གར་སླེབ་པས་གསུམ་པ། ལྟེ་བར་སླེབས་པས་འདུས་འདུ་ཡལ། །སྟོང་སངས་པ་ཆོས་ཉིད་སྤྲིན་མེད་པའི་ནམ་མཁའ་ལྟ་བུ་མི་དམིགས་པའི་ངང་ལས་སེམས་མ་བཅོས་པར་བཞག་པ་ནི་བཞི་པ་སྟེ། ནང་གི་དབང་བཞིའོ། །ཟབ་ལམ་ནི། བླ་མའི་གནས་གསུམ་ནས་འོད་ཟེར་འཕྲོས། སྤྲོ་བསྡུ་བྱས། སྤྱིར་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྐུའི་ཡོན་ཏན་བསྡུས། ཁྱད་པར་བདེ་མཆོག་སྐུ་ཆུང་ལ་ཡན་ལག་དོད་པ་དཔག་ཏུ་མེད་པ་
བླ་མའི་སྨིན་མཚམས་ནས་བྱུང་། རང་གི་སྨིན་ཕྲག་ཏུ་ཐིམ། སྐུའི་བྱིན་རླབས་ཞུགས། །ལུས་ཀྱི་དག །བུམ་དབང་ཐོབ། དེ་བཞིན་དུ་དམར་དཀར་སེར་ལྗང་གནས་གསུམ་དུ་ཐིམ། གཉིས་པ་གསུམ་པ་བཞི་པ་ཐོབ། སྐུ་གསུང་ཐུགས་ཡོན་ཏན་ཕྲིན་ལས་ཀྱི་བྱིན་རློབས་ཞུགས། སྒོ་གསུམ་ཐ་དད་ཀྱི་སྡིག་སྒྲིབ་མཐའ་དག །བཅུ་བཞི་བདེ་བ་ཆེན་པོ་ངོ་བོ་ཉིད་སྐུ་ཐོབ་པའི་མན་ངག་རྣམས་ཐད་སོར་ངོ་སྤྲད་དོ། །ཟབ་ལམ་མོ། རྗེས་ཀྱི་ཆོས་རྣམས་སྤྱི་འགྲོ་ལྟར་ཤེས་པར་བྱའོ། །མངྒ་ལཾ། །བྷ་ཝནྟུ། ཕྱག་རྒྱ་ཆེན་པོ་རྟོགས་མི་རྟོག་བྱ་བ་བཞུགས་སོ། །ན་མོ་གུ་རུ། ཐབས་ཁས་མཁས་ཐུགས་རྗེའི་བདག་ཉིད་ཅན། །འགྲོ་བའི་དཔལ་མགོན་རིན་པོ་ཆེ། །རྣམ་རྟོག་ཆོས་
སྐུར་ངོ་སྤྲོད་པའི། །འགྲོ་མགོན་བླ་མའི་ཞབས་ལ་འདུད། །དེ་ལ་ཡང་དག་པར་རྫོགས་པའི་སངས་རྒྱས་ཀྱི་སེམས་ཅན་གྱི་རྒྱུད་ལ། །ཉོན་མོངས་པ་བརྒྱད་ཁྲི་བཞི་སྟོང་གི་གཉེན་པོར། ཆོས་ཀྱི་སྒོ་མོ་དེ་སྙེད་གསུང་ལགས། ཉོན་མོངས་པ་དེ་རྣམས་དུག་ལྔར་འདུས་ཤིང་། །དེ་སྤང་བ་ལ་ཐེག་པ་ཐུན་མོང་པས། འདོད་ཆགས་ལ་མི་གཙང་པའི་རྫས་སུམ་ཅུ་རྩ་གཉིས་ཀྱིས་གང་བ་ལ་སོགས་བསྒོམ་སྟེ། །ཀྲྀ་ཡ་དཔུང་བཟང་གི་རྒྱུད་ལས། འདོད་ཆགས་ཤས་ཆེ་མི་གཙང་ཤ་ཚིལ་དང་། །པགས་པ་ཀེང་རུས་བལྟ་བས་རྣམ་པར་བཟློག །བྱམས་དང་སྙིང་རྗེའི་ཆུ་གདབ་ཞེ་སྡང་ལ། །གཏི་མུག་ལ་ནི་རྟེན་འབྲེལ་ལམ་གྱིས་སོ། །ཅེས་སོ། །ཐེག་ཆེན་གསང་སྔགས་པ་རང་གི་དགེ་སྦྱོར་གྱི་དབང་དུ་སྡུད་ཅིང་ཉམས་སུ་ལེན། དེ་ལ་འདོད་ཆགས། ཞེ་སྡང་། གཏི་མུག །ང་རྒྱལ།
ཕྲག་དོག་དང་བསྲེ་བའོ། །གཞི་ལ་སྟོབས་བསྐྱེད། ལམ་ལ་རྒྱན་འདགས། འབྲས་བུ་ལ་མངོན་དུ་འགྱུར་བའོ། །དང་པོ་ནི། བྱང་ཆུབ་ཏུ་སེམས་བསྐྱེད་ནས། འོད་གསལ་ཕྱག་རྒྱ་ཆེན་པོ་རྟོགས་པར་གསོལ་བ་གདབ་པའི་བར་དུ་བྱ། དེ་ནས་རང་བབས་གསུམ་གྱི་སྟེང་དུ་ཞོགས་ཚད་བཞག་པའི་ངང་ལས། ཆེད་དུ་འདོད་ཆགས་སྐྱེ་བའི་ཡུལ་ཉེ་བར་སྔོན་དུ་བྱས་ཤིང་། །བག་ལ་མ་ཞ་བར། རྩལ་ཇི་ལྟར་ཡོད་པ་བློ་ལ་རྫོགས་ཤིང་ལས་མ་བསགས་པའོ། །འདོད་ཆགས་ཀྱི་རྣམ་རྟོག་དེའི་དབང་དུ་ཤོར་ན། འདོད་ཆགས་ཀྱིས་ཀུན་ནས་བླངས་པའི་ལས་སོགས། །མོ་གདོན་ལྡང་གྲང་ནད་འཇུག །ཡི་དྭགས་སུ་སྐྱེའོ། །སམ་བུ་ཊ་ལས། རྣམ་རྟོག་གཏི་མུག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་ཅིང་། །ཅེས་སོ། །དེའི་དབང་དུ་མ་ཤོར་བར། །
རང་གི་དགེ་སྦྱོར་གྱིས་ཚུར་དབང་དུ་འདུས་པས། འདོད་ཆགས་ལས་གྱུར་པ་ཉི་ཁྲི་ཆིག་སྟོང་དག །འདོད་ཆགས་ཅན་གྱི་མི་དང་མི་མ་ཡིན་པ་དབང་དུ་འདུ། །མོ་གདོན་ལས་གྲོལ། གྲང་ནད་མི་འཇུག །ཡི་དྭགས་སུ་མི་སྐྱེའོ། །སམ་བུ་ཊ་ལས། མི་རྟོག་ཏིང་འཛིན་ལ་གནས་ན། །མཁའ་བཞིན་བྱེད་པ་མེད་པར་མངོན། །ཅེས་སོ། །དེ་བཞིན་དུ་ཞེ་སྡང་གི་དབང་དུ་ཤོར་ན། །དེས་ཀུན་ནས་སླངས་པའི་ལས་སོགས། །ཕོ་གདོན་ལྡང་། །ཚད་ནས་འཇུག །དམྱལ་བར་འགྲོའོ། །གཏི་མུག་གི་དབང་དུ་སོང་ན། །དེས་ཀུན་ནས་བསླང་པའི་ལས་སོགས། ས་གདོན་ལྡང་། །བད་ཀན་འཇུག །དུད་འགྲོར་སྐྱེའོ། །དེའི་དབང་དུ་མ་ཤོར་བར་དགེ་སྦྱོར་གྱི་དབང་དུ་འདུས་པས། །ཞེ་སྡང་ལས་གྱུར་པ་ཉི་ཁྲི་ཆིག་སྟོང་དག །ཞེ་སྡང་ཅན་གྱི་མི་དང་མི་མ་ཡིན་པ་དབང་དུ་འདུ་བ་ལ་སོགས་ཤེས་པར་བྱའོ། །
གཉིས་པ་ནི། །དེའི་དུས་སུ་སེམས་ཅན་ཐམས་ཅད་ཀྱི་འདོད་ཆགས་བདག་ལ་སྨིན་ནས། སེམས་ཅན་ཐམས་ཅད་འདོད་ཆགས་མེད་པའི་དགེ་བའི་རྩ་བ་དང་ལྡན་པར་གྱུར་ཅིག །ཞེས་ལན་གསུམ་བརྗོད་ཅིང་། །ཡིད་ལ་ཡང་བསམ་མོ། །གསུམ་པ་ནི། ནང་སེམས་ཅན་དང་། ཕྱི་རྫས་དང་། ལོངས་སྤྱོད་ལ་ཆགས་པའི་རྣམ་རྟོག་སྐྱེས་པའི་དུས་སུ། །དེའི་དབང་དུ་མ་ཤོར་བར། སྟན་དེའི་ཐོག །འཁྲུལ་འཁོར་དེའི་ཁོངས་སུ། །དེའི་དགེ་སྦྱོར་གྱི་དབང་དུ་བསྡུས་ཤིང་ལམ་དུ་བསློང་དགོས་པས། སེམས་ཅན་དང་རྫས་ལ་འདོད་འདུན་སེར་སྣའི་རྣམ་རྟོག །རྩལ་རྫོགས་ལ་ལས་མ་བསགས་པ་དེའི་ངོ་བོ་ལ་གཅེར་བལྟས་པས། དེས་ཟུངས་མ་ཐུབ་པར། དེ་རང་སྟོང་དུ་བརྗེན་ལྷང་གིས་འཆར་ཞིང་། གདངས་བདེ་བ་རུ་ལྷང་ངེ་བ་དེའི་རྒྱུན་མ་
ཤོར་བ། །རྟོག་པ་གཞན་གྱིས་བར་མ་ཆོད་པར་བདེ་སྟོང་འཛིན་མེད་དུ་ལམ་དུ་བཏང་ངོ་། །གཉིས་པ་ནི། གཞི་དང་ལམ་སྔར་གྱི་དེས་ཀུན་ལ་མཚོན་ལ། འབྲས་བུ་ནི། ཀུན་ནས་མནར་སེམས་ཀྱིས་བསྡུས་པའི་ཞེ་སྡང་གི་རྣམ་རྟོག་དེའི་ངོ་བོ་ལ་གཅེར་བལྟས་པས། དེས་ཟུངས་མ་ཐུབ་པར། རང་སྟོང་དུ་རྗེན་ལྷང་འཆར་ཞིང་། །གདངས་གསལ་བ་རུ་ལམ་མེ་བ། དེའི་རྒྱུན་མ་ཤོར་བར། རྟོག་པ་གཞན་གྱི་བར་མ་ཆོད་པར། གསལ་སྟོང་འཛིན་མེད་དུ་ལམ་དུ་བཏང་ངོ། །གསུམ་པ་ནི། ཤེས་བྱའི་གནས་ལ་བླང་དོར་གྱི་ཆ་མི་ཕྱེད་པའམ། གཉིད་རྨུགས་བྱིངས་པ། གཏི་མུག་གི་རྣམ་རྟོག་སྐྱེས་པའི་དུས་སུ། དེའི་ངོ་བོ་ལ་གཅེར་བལྟས་པས། །དེས་ཟུངས་མ་ཐུབ་པར། རང་སྟོང་དུ་རྗེན་ལྷང་གིས་འཆར་ཞིང་། །གདངས་མི་རྟོག་པ་སིང་ངེ་བའི་ངང་མ་ཤོར་བར། རྟོག་པ་
གཉིས་པ་ནི། གཞི་དང་ལམ་ལྔར་གྱི་དེས་ཀུན་ལ་མཚོན་ལ། འབྲས་བུ་ནི། ཀུན་ནས་མནར་སེམས་ཀྱིས་བསྡུས་པའི་ཞེ་སྡང་གི་རྣམ་རྟོག་དེའི་ངོ་བོ་ལ་གཅེར་བལྟས་པས། དེས་ཟུངས་མ་ཐུབ་པས། རང་སྟོང་དུ་རྗེན་ལྷང་འཆར་ཞིང་། མདངས་གསལ་བ་རུ་ལམ་མེ་བ། དེའི་རྒྱུན་མ་ཤོར་བར། རྟོག་པ་གཞན་གྱིས་བར་མ་ཆོད་པར། གསལ་སྟོང་འཛིན་མེད་དུ་ལམ་དུ་བཏང་ངོ་། །གསུམ་པ་ནི། ཤེས་བྱའི་གནས་ལ་བླང་དོར་གྱི་ཆ་མི་ཕྱེད་པའམ། གཉིད་རྨུགས་བྱིང་བ་གཏི་མུག་གི་རྣམ་རྟོག་སྐྱེས་པའི་དུས་སུ། དེའི་ངོ་བོ་ལ་གཅེར་བལྟས་པས། དེས་ཟུངས་མ་ཐུབ་པར། རང་སྟོང་དུ་རྗེན་ལྷང་གིས་འཆར་ཞིང་། གདངས་མི་རྟོག་པ་སིང་ངེ་བའི་ངང་མ་ཤོར་བར། རྟོག་པ་གཞན་གྱིས་མ་ཆོད་པར་མི་རྟོག་སྐྱེ་མེད་དུ་ལམ་དུ་བཏང་ངོ་། །
གཞན་གྱིས་བར་མ་ཆོད་པར་བདེ་སྟོང་འཛིན་མེད་དུ་ལམ་དུ་བཏང་ངོ་། རིགས་རུས་ཞོ་ཤ་ལ་སོགས་པ་ང་རྒྱལ་གྱི་རྣམ་རྟོག་དང་། །གཞན་གྱི་འབྱོར་པ་བློ་ཡུལ་དུ་མི་ཤོང་བའི་ཕྲག་དོག་ལ་སྔར་ལྟར་ཤེས་པར་བྱའོ། །ཡང་ན་འདོར་མི་ཕྲ་བའི་འདོད་ཆགས་ཀྱི་རྣམ་རྟོག་སྐྱེས་པའི་དུས་སུ། རྗེས་སུ་ཡང་མི་འབྲང་། །སྤོང་ཡང་མི་སྤོང་། སྟོང་པ་ཡིན་སྙམ་པའི་བློས་བྱས་ཀྱི་ངོ་ཤེས་ཀྱང་མི་བསྐྱེད། རང་བབས་གསུམ་གྱི་སྟེང་དུ། རང་ཐོག་ཏུ་གློད་ནས། འཛིན་མེད་དུ་བཅས་བཅོས་མེད་པར་བཞག་པས། །འདོད་ཆགས་སུ་ལམ་མེ་བ་དེ་རང་ལ་ཉམས་ལེན་གྱི་ངོ་ཏིར་བྱས་པས། །དེ་ལ་གཞན་པའི་རྟོག་པས་དབེན་པ་གསལ་ལེར་བསྒོམ་པ་ཡིན། །དེར་འདོད་ཆགས་མ་སྤངས་གནས་སུ་དག་ནས། སྤང་བྱ་སྤང་མ་དགོས། གཉེན་པོ་བཙལ་ཡང་མ་དགོས་པར་
གང་ཤར་དེ་དང་། །སྤང་བླང་དང་བྲལ་ནས། བདེ་སྟོང་འཛིན་མེད་དམ་ཆོས་སྐུར་འཆར་རོ། །དེ་ལྟར་ཞེ་སྡང་ལ་སོགས་པ་ལའང་ཤེས་པར་བྱའོ། །ཡང་ན་དུག་ལྔ་སྐྱེས་པའི་དུས་སུ། གཉེན་པོས་སྤང་བ་ཡང་མེད། །རང་རྒྱུད་པའི་འཛིན་པས་ཡང་མ་དགོས་པ་དེ་ལ་བཟོ་མི་བྱེད། རྗེས་སུ་མི་འབྲང་བར། རང་བབས་གསུམ་གྱི་སྟེང་ནས། རང་ལུགས་སུ་གློད་ནས་འཛིན་མེད་དུ་བཞག་པས། མ་སྤངས་གནས་སུ་དག་ནས་གསལ་སྟོང་འཛིན་མེད་སྐུ་གསུམ་དུ་འཆར་རོ། །དེས་ཉོན་མོངས་པ་ལྔ་དག་ནས། རིགས་ལྔ་ཡེ་ཤེས་ལྔར་འཆར་བར་འགྱུར་རོ། །བརྟག་གཉིས་ལས། དུག་གི་དུམ་བུ་གང་ཉིད་ཀྱིས། །སྐྱེ་བོ་ཐམས་ཅད་འཆི་བར་འགྱུར། །དུག་གི་དེ་ཉིད་ཤེས་པ་ཡིས། །དུག་གིས་དུག་ནི་འབིགས་པར་བྱེད། །དེ་ལྟར་རླུང་གིས་ཟིན་པ་ལ། །མོན་སྲན་
རྡིའུའི་བཟའ་བ་སྦྱིན། །བཟློག་པའི་སྨན་ནི་བཏང་བ་ལས། །རླུང་གིས་རླུང་ལ་བསྣུན་པར་བྱེད། །རྣམ་རྟོག་ལས་ནི་རྣམ་རྟོག་དང་། །སྲིད་པ་ཉིད་ཀྱིས་སྲིད་པ་དག །ཇི་ལྟར་རྣ་བར་ཆུ་ཞུགས་པ། །ཆུ་གཞན་གྱིས་ནི་དགུག་པར་བྱ། །དེ་བཞིན་དངོས་པོའི་རྣམ་རྟོག་ཀྱང་། །རྣམ་པར་ངེས་པར་སྦྱང་བར་བྱ། །ཇི་ལྟར་ཚད་པས་ཚིག་པ་ལ། །མེ་ཡི་ཡང་ནི་གདུང་བར་བྱ། །དེ་བཞིན་འདོད་ཆགས་མེས་ཚིག་པ། །འདོད་ཆགས་མེ་ཡིས་གདུང་བར་བྱ། །སྐྱེ་བོ་མི་ཟད་པའི་ལས། །གང་དང་གང་གིས་འཆིང་གྱུར་པ། །ཐབས་དང་བཅས་ན་དེ་ཉིད་ཀྱིས། །སྲིད་པའི་འཆིང་བ་ལས་གྲོལ་འགྱུར། །ཅེས་དང་། །སམ་བུ་ཊ་ལས། ཆགས་པས་ཆགས་པ་དག་འགྱུར་ཏེ། །ཞེ་སྡང་གིས་ནི་ཞེ་སྡང་སྦྱང་། །གཏི་མུག་གིས་ནི་གཏི་མུག་དང་། །
ང་རྒྱལ་གྱིས་ནི་ང་རྒྱལ་སྦྱངས། །ཕྲག་དོག་གིས་ནི་ཕྲག་དོག་སྦྱང་། །ཅེས་སོ། །དེ་ལ་བསྒོམ་གྱི་གནད་ནི། །གོ་ཡུལ་དུ་ཤོར་ན་ནང་དུ་མྱོང་བ་མི་ཡོང་། །བཤད་པ་ཚིག་ཡིན། །བྲིས་པ་ཡི་གེ་ཡིན། །གོ་བ་གློ་ཡུལ་ཡིན། བསྒོམ་བློ་བསྐྱེད་མེད་པའང་སྐྱོང་མ་ཤེས་པ་ཡིན། །དེ་སྐྱོང་བ་ལ་དྲན་འཛིན་ལས་ཟབ་པ་མེད། །དེའང་ཐོལ་སྐྱེས་ཀྱི་ཤེས་པ་ངོས་བཟུང་ལ། །རང་ཐོག་ཏུ་གློད་ནས་འཛིན་མེད་དུ་བཞག་པས། དེ་མ་སྤངས་གནས་སུ་དག་ནས་སྐྱེས་གྲོལ་དུས་ཅིག་ལ་རྣམ་རྟོག་ཆོས་སྐུར་འཆར་རོ། །སྤྱོད་འཇུག་ལས། ཀུན་ནས་དྲན་པའི་ཐག་པ་ཡིས། །སེམས་ཀྱི་གླང་པོ་མ་བརྟག་ན། །འཇིགས་པ་ཐམས་ཅད་མེད་འགྱུར་ཞིང་། །བདེ་བ་ཐམས་ཅད་ལག་ཏུ་འོང་། །ཅེས་སོ། །ཡང་དུག་ལྔའི་རྣམ་རྟོག་ཏོལ་སྐྱེས་པའི་དུས་སུ། །དེ་ངོས་བཟུང་ལ། དེ་གཉན་པོས་སྤངས་པའང་མེད། །
རང་རྒྱུད་པའི་འཛིན་པས་ཀྱང་མ་གོས་པ་འདི་ལ་གང་སྐྱེས་ཐོག་དུ་བཅས་བཅོས་མེད་པར་བཞག་པས། དེ་མ་སྤངས་གནས་སུ་དག་ནས། རང་གྲོལ་དུས་གཅིག་ལ་ཉོན་མོངས་ཡེ་ཤེས་སུ་འཆར་རོ། །ས་ར་ཧས། གང་མ་སྤངས་ཤིང་གོས་མེད་ཡེ་ཤེས་ལྡན། །ཅེས་དང་། ནཻ་གུ་མས། ཆོས་སྐུའི་ནམ་མཁར་རྣམ་རྟོག་སྤྲིན་ཚོགས་ལས། །དུག་ལྔའི་གློག་འགྱུ་ཡེ་ཤེས་ཆེན་པོར་ལྟོས། །ཅེས་སོ། །དེ་ལ་ཉོན་མོངས་པ་དང་། རྣམ་རྟོག་མིང་གི་རྣམ་གྲང་ཡིན་ཏེ། ཡུམ་ལས། བྱང་ཆུབ་སེམས་དཔའ་རྣམས་ཀྱི་ཉོན་མོངས་པ་ནི་རྣམ་པར་རྟོག་པའོ། །སྤང་བྱ་ནི་རྣམ་པར་རྟོག་པའོ། །ཅེས་སོ། །དེའང་ཉོན་མོངས་པ་དང་ཡེ་ཤེས་སམ། །རྣམ་རྟོག་དང་ཆོས་སྐུའི་བར་ན། ངོ་ཤེས་མ་ཤེས་སམ། །རྟོགས་མ་རྟོགས། གོ་མ་གོ། །དེ་ཡང་ལུང་རིག་གི་སྒྲོ་འདོགས་དཔྱད་པ་དང་། རྣམ་
རྟོག་ཆོས་སྐུའི་ལམ་ཁྱེར་འདི་གཉིས་རྟོགས་པར་གཅིག་ལ། དང་པོ་ནི་གོ་ཡུལ་དུ་ཤོར་བ་ཡིན། །གཉིས་པ་ནི་མ་བཅོས་པར་བཞག་པའི་དུས་སུ། །འཇོག་བྱེད་ཀྱི་རྟོགས་པ་དེ་རང་། རྟོག་མེད་རང་རིག་རང་གསལ་དུ་འཆར་བར། རང་རིག་པའི་རྟོགས་པ་ཡིན་ཏེ། བརྟག་གཉིས་ལས། རང་གི་རིག་པའི་ཡེ་ཤེས་དེ། །ངག་གི་ལམ་འདས་སྤྱོད་ཡུལ་ཏེ། །འདི་ནི་བྱིན་རླབས་རིམ་པའི་ཕྱིར། །ཀུན་མཁྱེན་ཡེ་ཤེས་དེ་ལྟ་བུ། །ཅེས་དང་། རང་རིག་བདག་ཉིད་དག་པ་ཉིད། །དག་པ་གཞན་གྱིས་རྣམ་གྲོལ་མིན། །ཡུལ་གྱི་དངོས་པོ་དག་པའི་ཕྱིར། །རང་གི་རིག་པའི་བདེ་མཆོག་གོ། །ཅེས་སོ། །དེ་ལ་རྟོགས་པའི་རང་བཞིན་གདོད་མ་ནས་གསལ་བྱར་བཞག་པའམ། བཅིངས་གྲོལ་མེད་པར་དག་པའམ། ཆོས་སྐུའི་ངོ་བོར་བཞུགས་པ་ཡིན་ལ། དེ་རང་རིག་པའི་ཡེ་ཤེས་ཀྱི་ཞལ་མངོན་སུམ་བལྟ་ཞིང་
མངོན་དུ་བྱེད་དེ། །དེའང་སྣང་བ་གང་ཤར་གི་ཐོག་དུ། ཚོགས་དྲུག་ཞེན་འཛིན་མེད་པར་བཞག་པས། །ཐ་མལ་གྱི་ཤེས་པ་སུ་ཀྱང་བཟོ་མ་བྱས་པར་བརྗེན་ནེ་བ་འདི་ཁོ་རང་གིས་ཁོ་རང་ངོ་ཤེས་པ་ལས། ཡང་དག་པའམ། ཆོས་སྐུའམ། གནས་ལུགས་ཀྱི་རང་ཞལ་མཐོང་བ་སྟེ། རང་གྲོལ་ཕྱག་རྒྱ་ཆེན་པོ་ཞེས་བྱའོ། །མངོན་རྟོགས་རྒྱན་ལས། འདི་ལ་གསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །དེ་ཕྱིར་ཕྱག་རྒྱ་བཞི་ཡི་ནི། །གསལ་སྟོང་དམ་ཚིག་གིས། བདེ་སྟོང་ལས་ཀྱི། སྣང་སྟོང་ཆོས་ཀྱི་ཟུང་འཇུག་ཕྱག་རྒྱ་ཆེན་པོའོ། བྱེ་བྲག་ཏུ་ཕྱག་རྒྱ་ཆེན་པོའི་སྒྲ་དོན་ནི། སམ་ཀྲྀ་ཏའི་སྐད་དུ། མ་ཧཱ་མུ་དྲ་སྟེ། དེ་ལ་མུ་དྲ་ཅེས་པ་
མི་འདའ་བའམ། མི་ཕྱེད་པའམ། མི་སྟོང་པའམ། འདུ་འབྲལ་མེད་པ་ལ་འཇུག་སྟེ། དེས་ན་སྣང་སྲིད་འཁོར་འདས་ཀྱི་ཆོས་ཐམས་ཅད་རང་ས་རང་ས་ནས་སོ་མ་ཉམས། མདོག་མ་བསྒྱུར། དུས་གསུམ་དུས་མེད་དུ། རང་བྱུང་ལྷན་ཅིག་སྐྱེས་པའི་ཡེ་ཤེས་ལས་མི་འདའ་བས་ཕྱག་རྒྱ་མ་ཧཱ་ཞེས་པ། དེའི་གོང་ན་གཞན་མེད་པས་ཆེན་པོའོ། །དེའང་ཤེས་པ་སྐད་ཅིག་མའི་ཐོག་ཏུ་སྦྱར་ནས། རྣམ་པར་རྟོག་པ་གཅིག་ཐོལ་སྐྱེས་པའི་དུས་སུ། རྣམ་པར་རྟོག་པ་དེ་ལ་དགག་སྒྲུབ་གཅིག་ཀྱང་མ་བྱས་པར། རྣམ་རྟོག་ཏ་ལེ་བ་དེ་རང་། ལྷན་ཅིག་སྐྱེས་པའི་ཡེ་ཤེས་ཀྱི་དངོས་གཞི་ཡིན། དེ་རྟོགས་རུང་མ་རྟོགས་རུང་། དེ་ལས་མི་གཡོ་མི་འདའ་བས་ཕྱག་རྒྱ། རྣམ་རྟོག་དེ་ལས་ལོགས་ན་ལྷན་ཅིག་སྐྱེས་པའི་ཡེ་ཤེས་ཞེས་བྱ་བ་བཙལ་
དུ་མེད་པས་ཆེན་པོའོ། །ཕྱག་རྒྱ་ཆེན་པོ་ཐིག་ལེའི་རྒྱུད་ལས། ཕྱག་ནི་སྟོང་པའི་ཡེ་ཤེས་ཏེ། །རྒྱ་ནི་འཁོར་བའི་ཆོས་ལས་གྲོལ། །ཆེན་པོ་ཟུང་དུ་འཇུག་པ་སྟེ། །ཕྱག་རྒྱ་ཆེན་པོ་ཞེས་བརྗོད་དོ། །ཅེས་སོ། །མདོར་ན་ཕྱག་རྒྱ་ཆེན་པོའི་རང་ངོ་དེ། །བྱིན་རླབས་ཀྱི་འཕོ་བས་དོན་ གྱི་ཆིག་བརྒྱུད་ཐོབ་སྟེ། ཐ་མལ་ཤེས་པ 
་བསྒོམ་དུ་ངོ་འཕྲོད་ཅིང་། །རིག་ཐོག་ཏུ་རྡོ་རུས་ཐུག་སྟེ། །རང་སར་རང་གིས་ཆོག་ཅིང་། །རྐྱེན་ཐུབ་པ་ཅིག་གལ་ཆེའོ། །སྣ་ཚོགས་རྟོག་པའི་འདུད་འཕྲོ་ཀུན། །ཆོས་སྐུ་མི་རྟོག་རྩལ་སྦྱོང་ལ། དྲན་འཛིན་གནད་མཆོག་ཟབ་ལམ་ཡིན། །རང་གྲོལ་བདེ་ཆེན་ལྷུན་གྲུབ་ཤོག །ཡེ་ཤེས་མཁའ་འགྲོ་ནཻ་གུ་མའི་རྟོགས་མི་རྟོག་ཞེས་བྱ་བ། བླ་མའི་གསུང་ལྟར་སྔགས་འཆང་དྷྭ་ཛ་ལཀྵས་ཡི་གེར་བཀོད་པའོ། །རྫོགས་སོ། །མཁས་བཙུན་
གཞོན་ནུ་གྲུབ་ཀྱིས། རྣམ་རྟོག་དང་ཆོས་སྐུའི་བར་ན། ངོ་ཤེས་མ་ཤེས་སམ། རྟོག་མ་རྟོག་སམ། རིག་མ་རིག་གམ། ཁ་ཕྱིར་བལྟ་ནང་བལྟའི་ཁྱད་པར་ཙམ་ལས་མེད་དོ། །ཅེས་གསུངས་སོ། །མཻ་ཏྲི་པས། ཉམས་སུ་མྱོང་བ་ཐ་མལ་ཉིད། །ནམ་མཁའ་ལྟ་བུའི་ངོ་བོར་གསལ། །རེ་དོགས་བླང་དོར་གཉིས་འཛིན་མེད། །འདི་རྟོགས་ཀུན་ཏུ་བཟང་པོའོ། །བསམ་མི་ཁྱབ་ཀྱི་རྒྱུད་ལས། །རྟོགས་དང་གོམས་དང་མཐར་ཕྱིན་པ། །འདི་ལ་ཡོད་པ་མ་ཡིན་ཏེ། །རྟོགས་པའི་སྐད་ཅིག་དེ་ཉིད་ལ། །བཅུ་བཞིའི་ས་ལ་ངེས་པར་གནས། །ཅེས་གསུང་སོ། །བདེ་བའི་བློ་གྲོས་ཀྱིས་ཞུས་པའི་མདོ་ལས། དེ་ཕྱིར་སེམས་རྟོགས་འདི་ཉིད་ཀྱིས། །བསླུ་མེད་སངས་རྒྱས་ཉིད་ཡིན་ནོ། །ཅེས་སོ། །བྲམ་ཟེ་ཆེན་པོས། མ་བཟུང་མ་བཏང་རང་ག་ཉིད་དུ་ཞོག །དྲན་རྟོག་
བྱུང་ན་དེ་ཀ་རང་ལ་ལྟོས། །ཆུ་དང་རླབས་གཉིས་ཐ་དད་མ་རྟོགས་ཤིག །ཅེས་སོ། །བློ་གྲོས་མི་ཟད་པས་བསྟན་པ་ལས། །ཉོན་མོངས་པ་འདི་དག་རྟོགས་པའི་ཕྱིར་བྱང་ཆུབ་སྟེ། །ཉོན་མོངས་པའི་ངོ་བོ་གང་ཡིན་པ་དག་བྱང་ཆུབ་ཀྱི་ངོ་བོ་ཡང་དེ་ཡིན་ནོ། །ཅེས་དང་བློ་གྲོས་རྒྱ་མཚོས་ཞུས་པ་ལས། ཆོས་ཐམས་ཅད་མཉམ་པ་ཉིད་དུ་རྟོགས་པས་བྱང་ཆུབ་སྟེ། དེ་བས་ན་བྱང་ཆུབ་སེམས་དཔའ་བྱང་ཆུབ་རིང་བའི་འདུ་ཤེས་མི་བྱའོ། །ཅེས་གསུངས་སོ། །ཨྀིྠ།། །།