དཔལ་གསང་བ་འདུས་པའི་དཀྱིལ་འཁོར་དུ་དབང་བསྐུར་བའི་ཆོ་གའི་རིམ་པ་དོན་གསལ།

དཔལ་གསང་བ་འདུས་པའི་དཀྱིལ་འཁོར་དུ་དབང་བསྐུར་བའི་ཆོ་གའི་རིམ་པ་དོན་གསལ་ཞེས་བྱ་བ་བཞུགས་སོ། །

རྡོ་རྗེ་འཆང་དབང་དཔལ་ལྡན་བླ་མ་དང་། ཁྱབ་བདག་རྡོ་རྗེ་སེམས་པ་ལ་བཏུད་ནས། །དཔལ་ལྡན་འདུས་པའི་དཀྱིལ་འཁོར་དུ་འཇུག་པའ། །ཆོ་གའི་རིམ་པ་རབ་གསལ་འབྲི་བར་བྱ། །འདིར་རྡོ་རྗེ་ཐེག་པའི་ལམ་ལ་མོས་ཤིང་། དངོས་གྲུབ་རྣམ་པ་གཉིས་དོན་དུ་གཉེར་བས། དང་པོར་མཚན་ཉིད་དང་ལྡན་པའི་བླ་མ་ལ། དབང་བསྐུར་བ་ནོད་པར་བྱས་ཏེ། དབང་བསྐུར་ནི་རྡོ་རྗེ་ཐེག་པའི་ལམ་ཐམས་ཅད་ཀྱི་སྔོན་དུ་འགྲོ་བ་ཡིན་པའི་ཕྱིར་རོ། །དེ་སྐད་དུ་ཡང་། ཕྱག་རྒྱ་ཆེན་པོ་ཐིག་ལེའི་རྒྱུད་ལས། དབང་མེད་ན་ནི་དངོས་གྲུབ་མེད། །བྱེ་མ་བཙིར་ཡང་མར་མེད་ལྟར། །གང་ཞིག་རྒྱུད་ལུང་ང་རྒྱལ་གྱིས། །དབང་བསྐུར་མེད་ལ་འཆད་བྱེད་པ། །སློབ་དཔོན་སློབ་མ་ཤི་མ་ཐག །དངོས་གྲུབ་ཐོབ་ཀྱང་དམྱལ་བར་འགྲོ། །དེ་བས་འབད་པ་ཐམས་ཅད་ཀྱིས། །བླ་མ་ལ་ནི་དབང་ནོད་ཞུ། །ཞེས་གསུངས་སོ། །དབང་བསྐུར་བ་ཡང་། དཀྱིལ་འཁོར་སྔོན་དུ་འགྲོ་བ་ཅན་ཡིན་ལ། དཀྱིལ་འཁོར་དེ་ཡང་། གང་ཟག་གི་དབང་པོའི་རིམ་པས་རྣམ་པ་གསུམ་སྟེ། འདི་ལྟར་དབང་པོ་རབ་ལ་རང་བཞིན་གྱིས་གྲུབ་པའི་ལུས་ཀྱི་དཀྱིལ་འཁོར་དང་། འབྲིང་ལ་ཐིག་ལ་ཚོན་བཀྱེ་བ་རྡུལ་ཚོན་གྱི་དཀྱིལ་འཁོར་དང་། དབང་པོ་ཐ་མ་ལྷ་སྐུ་ཕྱག་རྒྱ་ཆེན་པོ་ཞལ་ཕྱག་གི་རྣམ་པ་ཅན་མེད་པར་ཡིད་མི་ཆེས་པ་རྣམས་ལ་རི་མོར་གནས་པའི་ལས་རས་རིས་ཀྱི་དཀྱིལ་འཁོར་ལ་བརྟེ ན་ནས་དབང་བསྐུར་བ་དང་གསུམ་ཡིན་ཏེ། སློབ་དཔོན་རྡོ་རྗེ་ དྲིལ་བུ ་པས། དབང་བསྐུར་དཀྱིལ་འཁོར་སྔོན་འགྲོ་བར། །རྡོ་རྗེ་འཆང་གིས་བཤད་པ་སྟེ། །འོན་ཀྱང་དཀྱིལ་འཁོར་དེའི་རང་བཞིན། །ཅི་ཡིན་དེ་ནི་འདི་ལྟར་བཤད། །རི་མོར་གནས་པའི་ལས་དང་ནི། །ཐིག་ལ་ཚོན་བཀྱེའི་རིམ་པ་བསྟན། །འགྲོ་བ་དེ་ཉིད་རང་བཞིན་གྱིས། །གྲུབ་པའི་དཀྱིལ་འཁོར་གཉིས་མེད་པའོ། །ཞེས་གསུངས་པ་ལྟར་རོ། །དེ་ལ་འདིར། རས་རིས་ཀྱི་དཀྱིལ་འཁོར་དེ་ལ་བརྟེན་ནས། དཔལ་གསང་བ་འདུས་པའི་དཀྱིལ་འཁོར་དུ་དབང་བསྐུར་བའི་རིམ་པ་བཤད་པར་བྱའོ། །

སྔོན་འགྲོའི་ཆོ་ག་ནི།

དེ་ཡང་ཆོ་ག་སྦྱོར་བ་དང་། དངོས་དང་། རྗེས་གསུམ་གྱི། དང་པོ་ལ་ཡང་། གསོལ་དང་བསྙེན་པའི་ལས་དང་ནི། །ས་གཞི་ཡོངས་སུ་གཟུང་བ་དང་། །ལྷག་པར་གནས་པའི་ཆོ་ག་སྟེ། །སྦྱོར་བའི་ཡན་ལག་རྣམ་པ་བཞི། །དེ་ལ་ཐོག་མར། སློབ་མ་དད་པ་དང་ལྡན་པས། བླ་མ་ལ་ཡན་ལག་ལྔས་ཕྱག་འཚལ་ཏེ། མནྜལ་སྔོན་དུ་འགྲོ་བའི་མེ་ཏོག་དང་བཅས་པའི་ཐལ་མོ་སྦྱར་ལ། ཀུན་མཁྱེན་ཡེ་ཤེས་ཕུང་པོ་ཅན། །ཞེས་སོགས་ཀྱི་ལན་གསུམ་དུ་གསོལ་བ་བཏབ་པ་དང་། བླ་མས། ཁྱོད་ཀྱི་བསམ་པ་དག་པས། ཡོ་བྱད་ཕུན་སུམ་ཚོགས་པར་གྱིས་ཤིག་དང་། ཁོ་བོས་ཀྱང་ཇི་ལྟར་ནུས་པས་རྗེས་སུ་གཟུང་བར་བྱའོ། །ཞེས་ཀྱང་བརྗོད་པར་བྱའོ། །

དེ་ནས་དཀྱིལ་འཁོར་གྱི་བྱ་བ་ལ་འཇུག་པར་བྱ་ཞིང་། བར་དུ་གཅོད་པ་རྣམས་ལས་རྒྱལ་བ་དང་། སློབ་མའི་རྒྱུད་བྱིན་གྱིས་བརླབས་པ་ལ་ནུས་པ་དང་ལྡན་པར་བྱ་བའི་ཕྱིར། བསྙེན་པའི་ལས་བརྩམ་པར་བྱའོ། །དེའང་བུམ་པ་ལ་བརྟེན་པའི་ཆོ་ག་ནི། འཆད་པར་འགྱུར་བའི་བུམ་པ་སྟ་གོན་དུ་གནས་པ་དང་འདྲ་ཞིང་། མ་བརྟེན་པའི་ཕྱོགས་ནི། སྒྲུབ་ཐབས་ནས་འབྱུང་བ་དང་མཐུན་ལ། ཇི་སྲིད་དུ་མཚན་མ་མཐོང་གི་བར་དུ་ཟླ་བའམ། ཡང་ན་གཙོ་བོ་ལ་འབུམ་ཕྲག་གཅིག་དང་འཁོར་རྣམས་ལ་ཁྲི་ཕྲག་རེ་རེ་བཟླའོ། །བསྙེན་པའོ། །དེ་ནས། འཚེ་བ་མེད་ཅིང་ཡོ་བྱད་ཕུན་སུམ་ཚོགས་ལ། རྣལ་འབྱོར་དང་མཐུན་པའི་ས་ཡི་ཆ། སྔར་ཡོངས་སུ་མ་སྦྱངས་པར་སའི་ཆོ་ག་བྱས་ཏེ། ཆུ་གཉིས་སྔོན་དུ་འགྲོ་བའི་མཆོད་པ་རྣམ་པ་ལྔ་དང་གཏོར་མ་གཅིག་བཤམས་ལ། དཀྱིལ་འཁོར་གྱི་ས་གཞིར་བ་བྱུང་དང་། དྲི་བཟང་གིས་བྱུགས་པའི་དབུས་སུ། ༀ་པྲྀ་ཐི་དཱེ་ཝི་ཞེས་པས་མེ་ཏོག་གི་ཚོམ་བུ་བཀོད་ལ། པདྨ་དང་ཟླ་བའི་སྟེང་དུ། བྂ་ལས་སའི་ལྷ་མོ་སེར་མོ། ཕྱག་གཉིས་ཀྱིས་རིན་པོ་ཆེའི་བུམ་པ་བདུད་རྩིས་གང་བ་འཛིན་ཞིང་། བདག་ལ་ཕྱོགས་པར་བསྐྱེད་པའི་དཔྲལ་བར་ༀ། མགྲིན་པར་ཨཱཿ སྙིང་ཁང་ཧཱུྃ་བཀོད་ནས། རང་གི་ལག་པ་གཡོན་པའི་སྲིན་ལག་ལ་ཧྂ་དམིགས་ཏེ། ས་ལ་བཏུགས་པ་ལས་འོད་འཕྲོས་པས། སའི་ལྷ་མོ་འཁོར་དང་བཅས་པ་གདན་དྲངས་ལ། ཚོམ་བུ་ལ་བསྟིམས་ཏེ། དབང་བསྐུར་ནས། རིན་ཆེན་འབྱུང་ལྡན་གྱིས་དབུ་བརྒྱན་པ་ལ། བྱིན་གྱིས་བརླབས་པའི་ཕྱིའི་མཆོད་རྫས་རྣམས་ཀྱིས་མཆོད་པར་བསམ་ཞིང་ༀ་པྲྀ་ཐི་ཝི་དཱེ་ཝི་གྲིཧྣེ་དཾ། ཞེས་སྔོན་དུ་འགྲོ་བའི་ཨརྒྷཾ་པྲ་ཏིཙྪ་ཡེ་སྭཱ་ཧཱ་ལ་སོགས་པ་སོ་སོའི་སྔགས་ཀྱིས་ཕུལ་ནས། ནང་བདུད་རྩིས་ཀྱང་མཆོད་ལ་ༀ་ཨཱཿ ཧཱུྃ་གིས་བདུད་རྩིར་བྱིན་གྱིས་བརླབ་པའི་གཏོར་མ། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐ་ཁཾ་ཨུད་ག་ཏེ་སྥ་ར་ན་ཨི་མཾ་ག་ག་ན་ཁཾ་གྲྀཧྞེ་དཾ་བ་ལིཾ་དི་སྭཱ་ཧཱ། ཞེས་ལན་གསུམ་གྱིས་ཕུལ་ལ། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱིས། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱས་ནས་དཀྱིལ་འཁོར་བྲི། །ཞེས་ལན་གསུམ་བརྗོད་ནས། བདག་གིས་སེམས་ཅན་ཐམས་ཅད་ཀྱི་དོན་དུ། ས་ཕྱོགས་འདིར་དཔལ་གསང་བ་འདུས་པའི་དཀྱིལ་འཁོར་བཞེངས་ནས། བདག་ཉིད་འཇུག་ཅིང་དབང་བསྐུར་བར་འཚལ་བས། སའི་ཕྱོགས་འདི་བདག་ལ་གནང་ཞིང་། ལས་ཀྱི་དངོས་གྲུབ་དག་ཀྱང་བདག་ལ་བསྩལ་དུ་གསོལ། ཞེས་གསོལ་བ་བཏབ་པས། རིགས་ཀྱི་བུ་ཁྱོད་ཅི་དགའ་བར་སྤྱོད་ཅིག་ཅེས་པས་གནང་བ་བྱིན་ཞིང་དཔང་པོར་མཛད་པར་བསམས་ནས། ༀ་བཛྲ་མུཾཿཞེས་པས་དེ་ཉིད་དུ་ཐིམ་པར་བསམ་མོ། །

དེ་ནས་དཀྱིལ་འཁོར་གྱི་དབུས་སུ་ལངས་ལ། རྡོ་རྗེ་ དྲིལ་བུ ་འཛིན་པས་མིག་གཡས་གཡོན་གཉིས་སུ། མ་དང་། ཊ་ལས་ཉི་ཟླ་ཧཱུྃ་གིས་མཚན་པར་དམིགས་ལ། གཡས་ནས་གཡོན་དུ་བལྟ་བས་བགེགས་རྣམས་ཚར་བཅད་པ་དང་། གཡོན་ནས་གཡས་སུ་བལྟ་བས་རྗེས་སུ་བཟུང་བར་བསམ་ལ། རྡོ་རྗེ་སློབ་དཔོན་དག་གིས། སའི་ཕྱོགས་འདིར་སེམས་ཅན་གྱི་དོག་རྩོམ་གྱི། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། འབྱུང་པོ་དང་། ཤ་ཟ་དང་། མ་མོ་དང་། སྲིན་པོ་ལ་སོགས་པ་གང་དག འདི་ན་གནས་པའི་སའི་བདག་པོ་མྱུར་དུ་སོང་ཞིག འདི་ལྟར་མི་བསྐྱོད་པ་ཞལ་གསུམ་ཕྱག་དྲུག་པ་ཧེ་རུ་ཀའི་བཀའ་མནོས་ནས་མྱུར་དུ་སོང་ཞིག གང་དག་མི་འགྲོ་བ་དེ་ལ། ང་ཡི་ཡེ་ཤེས་ཀྱི་རྡོ་རྗེ་འདིས་སྤྱི་བོ་རྣམ་པ་བརྒྱར་གས་པར་བྱའོ་ཞེས་ལན་གསུམ་བརྗོད་པས། དཀྱིལ་འཁོར་ལྟ་བར་མི་དབང་བའི་ནག་པོའི་ཕྱོགས་རྣམས་བསྐྲད་ཅིང་། དཀར་པོའི་ཕྱོགས་སྣོད་དུ་གྱུར་པ་རྣམས། ཞི་བའི་ཡིད་ཀྱིས་བདག་གི་གྲོགས་བྱེད་པར་བསམ་མོ། །ས་བླང་བའོ། །

དེ་ནས་ལྟོ་འཕྱེའི་ལྟོ་བའི་ཕྱོགས་ནས། པུས་མོ་ནུབ་ཙམ་དུ་བསྐོས་ཏེ། གྱོ་མོ་དང་། སོལ་བ་དང་། རུས་བུ་ལ་སོགས་པའི་ཟུག་རྔུ་རྣམས་ཕྱུང་ནས་དྲི་བཟང་དང་། རིན་པོ་ཆེ་ལ་སོགས་པའི་ས་བརྙན་བཟང་པོས་བཀང་སྟེ། འཐས་པར་བརྡུངས་ལ། ཤར་དང་བྱང་དུ་ུགཞོལ་ཞིང་། མེ་ལོང་གི་ངོས་ལྟར་འཇམ་པའི་ས་ཡི་སྟེགས་བུ་གྲུ་བཞི་པ་བྱས་པའི་སྟེང་དང་འཁོར་ཡུག་ཀུན་ཏུ་ལག་པ་གཉིས་བཞག་ཅིང་ༀ་བྷུ་ཁཾ་ཞེས་བརྗོད་པས། ཕྱོགས་ཐམས་ཅད་ནམ་མཁའི་རང་བཞིན་དུ་གྱུར་པར་བསམ་མོ། །ས་སྦྱང་བའོ། །དེ་ནས་དཀྱིལ་འཁོར་གྱི་དབུས་སུ་ཁ་ཤར་དུ་བལྟས་ཏེ། བདག་ཉིད་ཞེ་སྡང་རྡོ་རྗེའི་ང་རྒྱལ་དང་ལྡན་པས་འདུག་ལ། སེང་ལྡེང་གི་ཕུར་བུ་སོར་བརྒྱད་པའི་ཚད་ཅན་ལ་ཙནྡན་དམར་པོ་བྱུག་ཅིང་། སྲད་བུ་དམར་པོ་དང་། མེ་ཏོག་གི་ཕྲེང་བས་བརྒྱན་ཏེ། སྟོད་ཁྲོ་བོ། སྨད་ཕུར་བུའི་རྣམ་པ་ཅན་གྱི་ཁྲོ་བོ་བཅུར་བསྐྱེད་ལ། ཡེ་ཤེས་པ་དང་རོ་གཅིག་པར་བྱས་ནས། དབང་བསྐུར། རིགས་ཀྱི་བདག་པོས་རྒྱས་གདབ་སྟེ། མཆོད་པ་རྣམས་ཀྱིས་མཆོད་ནས། རང་གི་སྙིང་ཁའི་འོད་ཀྱིས་བགེགས་ཀྱི་གཙོ་བོ་ཕྱོགས་སྐྱོང་བཅུ་འཁོར་དང་བཅས་པ་རྣམས་བཀུག་ནས། སྤྱི་བོར་ཕུར་བུས་གདབ་པའི་ཕྱིར། རང་གི་སྙིང་ཁ་ནས་སྤྲོས་པའི་ཁྲོ་བོ་རྣམས་ཀྱིས། གཡོན་པས་ཕུར་བུ་རྣམས་བཟུང་། གཡས་པས་རྡོ་རྗེ་ཐོ་བ་བཟུང་ནས། བགེགས་རྣམས་ཀྱི་སྤྱི་བོར་ཕུར་བུས་བཏབ། རྡོ་རྗེ་ཐོ་བས་བརྡུངས་པར་བསམ་ཞིང། ཁྲོ་བོ་སོ་སོའི་སྔགས་དང་སྦྱར་བའི་ༀ་གྷ་གྷ་ཞེས་སོགས་དང་། བཛྲ་མུད་ག་ར་ཞེས་སོགས་བརྗོད་པས། བགེགས་རྣམས་ཀྱི་ལུས་བསྲེགས་ནས་སྡིག་པ་སྦྱང་བར་བསམ་ཞིང་། དངོས་སུ་དཀྱིལ་འཁོར་གྱི་ཁོར་ཡུག་གི་ཕྱོགས་བཅུར་ཕུར་བུ་རྣམས་གདབ། དེའང་སྟེང་གི་ཤར་དང་། འོག་གི་ནུབ་ཏུ་གདབ་བོ། །དེ་ནས་སའི་ཕྱོགས་དེར་སྒྲུབ་ཐབས་བཞིན། སྲུང་བའི་འཁོར་ལོ་རྒྱས་པར་བསྒོམས་ནས་སུཾ་བྷའི་སྔགས་ཡང་ཡང་བཟླས་ཏེ་བསྟན་པར་བྱ་བ་ནི། ས་བསྲུང བའོ། །

དེ་ནས་རྡོ་རྗེའི་འགྲོས་ཀྱི་བྱང་ཤར་དུ་སོང་ལ། སྔར་བཞིན་དུ་བགེགས་ལ་བཀའ་སྒོས་ནས། གཡོན་སྐོར་གྱིས་བསྐོར་ཞིང་། ཤར་དུ་གཡས་རྐྱང་། ལྷོར་གཡོན་རྐྱང་། ནུབ་ཏུ་ས་ག བྱང་དུ་ཟླུམ་པོ་ལ་སོགས་པའི་རྐང་སྟབས་ཀྱི་བཀོད་པ་རྣམས་ཀྱི་ས་གཟུང་བའམ། ཡང་ན་དེ་ལྟར་མ་བྱས་ཀྱང་འགལ་བ་མེད་པས། སའི་ཕྱོགས་འདིར་ད ཀྱིལ་འཁོར་བཞེངས་ལ། སེམས་ཅན་གྱི་དོན་བྱའོ་སྙམ་དུ་ཡིད་ཀྱིས་བཟུང་བ་ནི། ས་བཟུང་བ་སྟེ་སའི་ཆོ་ག་མདོར་བསྡུས་པའོ། །ལྷ་ཁང་དང་། ཕྱུགས་ལྷས་དང་། བྲག་སྟེང་དང་། ཡང་ཐོག་ལ་སོགས་པ་རྣམས་སུ་ནི། ཇི་སྐད་བཤད་པའི་སའི་ཆོ་ག་འདི་དག་མི་དགོས་སོ། །

དེ་ནས་སྟ་གོན་ལ་འཇུག་པར་བྱ་སྟེ། དེའང་། ས་ཡི་ལྷ་མོ་ལྷག་གནས་དང་། །ལྷ་དང་དེ་བཞིན་བུམ་པ་དང་། །སློབ་མ་ལྷག་པར་གནས་པ་སྟེ། །སྟ་གོན་ཆོ་ག་རྣམ་པ་བཞི། །དེ་ལ་ཐོག་མར། དཀྱིལ་འཁོར་གྱི་ཁང་པ་རྒྱན་གྱིས་ཉེ་བར་བརྒྱན་ལ། སྟེགས་བུའི་དབུས་སུ། པད་རག་གི་ཚད་ཀྱི་མཎྜལ་གྲུ་བཞི་པ་བ་བྱུང་ལྔ་དྲི་བཟང་དང་བཅས་པ་བྱུགས་པའི་འཁོར་ཡུག་ཏུ། མཆོད་པ་རྣམས་ཀྱིས་བསྐོར་ཞིང་གཏོར་མ་རྣམས་དང་། འོག་ཏུ་ཉེ་བར་མཁོ་བའི་ཡོ་བྱད་རྣམས་ཀྱང་སྟ་གོན་བྱའོ། །དེ་ནས་ཕྱིམ་རེད་ཀྱི་ཚེ། རྡོ་རྗེ་སློབ་དཔོན་སྒྲུབ་པའི་གྲོགས་དང་བཅས་པ། སོ་སོའི་སྟན་ལ་འཁོད་དེ། དེར་འདུས་པའི་བགེགས་དང་འབྱུང་པོ་རྣམས་ལ། སྔོན་འགྲོའི་གཏོར་མ་མཁའ་འགྲོ་སྤྱི་གཏོར་གྱིས་བསྔོས་ནས། སྣོད་མ་ཡིན་རྣམས་བསྐྲད་ཅིང་། སྣོད་ལྡན་རྣམས་ལ་གྲོགས་བཅོལ་ལ་གནས་དང་ཡོ་བྱད་རྣམས་ཐོགས་པ་མེད་ལ། དྭངས་ཤིང་རྒྱ་ཆེ་བར་བྱིན་གྱིས་བརླབས་ཏེ། རོལ་མོའི་སྒྲ་རྒྱ་ཆེར་བྱའོ། །དེ་ནས་ལས་ཀྱི་སློབ་མས་རྣལ་འབྱོར་ལ་གནས་པར་གསོལ་བ་བཏབ་ནས། ཡི་གེ་བརྒྱ་པས་རྒྱུད་སྦྱངས་ཏེ། བདག་བསྐྱེད་བསྒོམ་ལ། མཆོད་པ་དང་བཟླས་པའི་བར་རྫོགས་པར་བྱའོ། །དེ་ནས་རང་གིས་བསྒོམས་པའི་དཀྱིལ་འཁོར་བསྡུས་ཏེ། གཙོ་བོ་འབའ་ཞིག་གི་ང་རྒྱལ་དང་ལྡན་པས། མཆོད་རྫས་རྣམས་བགེག་མཐར་བྱེད་ཀྱི་སྔགས་ཀྱིས་བསང་ཞིང་། སྭཱ་བྷ་ཝས་སྦྱངས་ནས་ཡི་གེ་གསུམ་ལས་ལྷ་རྫས་ཀྱི་མཆོད་པ་ཕུན་སུམ་ཚོགས་པར་བསྐྱེད་ལ། སོ་སོའི་སྔགས་ཀྱིས་བྱིན་གྱིས་བརླབ་བོ། །དེ་ནས་ས་བླང་བའི་སྐབས་ལྟར། སའི་ལྷ་མོ་ལྷག་པར་གནས་པར་བྱའོ། །དེ་ནས་ལྷ་སྟ་གོན་དུ་གནས་པའི་ཕྱིར། མེ་ཏོག་དམན་པ་རྣམས་བསྡུས་ལ། བ་བྱུང་ལྔས་གཡས་བསྐོར་དུ་ཁྱེ་མ་མེད་པར་བྱུག་ཅིང་། ལག་པ་རྡོ་རྗེ་བསྡམས་པ་ནང་དུ་བྱས་ལ། ས་དེ་མནན་ཏེ། ༀ་བཛྲི་བྷཱ་ཝ་ཧཱུྃ། ཞེས་ལན་གསུམ་བརྗོད་པས་རྡོ་རྗེའི་ས་གཞིར་བསྒོམས་ནས། ༀ་བཛྲ་ངྷི་ཌཱ་ཏིཥྠ་ཞེས་ལན་གསུམ་བརྗོད་པས་བྱིན་གྱིས་བརླབ་བོ། །དེར་ས་བོན་ལས་བསྐྱེད་པའམ་སྐད་ཅིག་གིས་སྲུང་བའི་འཁོར་ལོ་སྔོན་དུ་འགྲོ་བའི་གཞལ་ཡས་ཁང་རྫོགས་པར་བསྐྱེད་ལ། ལྷའི་གནས་རྣམས་སུ་རང་རང་གི་སྔགས་ལན་གསུམ་གསུམ་བརྗོད་དེ་དྲིའི་ཐིག་ལེ། གཙོ་བོ་དང་། དེ་བཞིན་གཤེགས་པ་བཞི་ལ་གྲུ་བཞི། གཞན་རྣམས་ལ་ཟླུམ་པོ་རེ་བྱས་པའི་སྟེང་དུ། མེ་ཏོག་གི་ཚོམ་བུ་རེ་བཀོད་ནས། རང་ཉིད་ཞེ་སྡང་རྡོ་རྗེ་ཡབ་ཡུམ་གྱི་མཁའ་གསང་བྱིན་གྱིས་བརླབས།སྙོམས་པར་ཞུགས་པའི་བདེ་བའི་སྒྲས། དེ་བཞིན་གཤེགས་པ་ཐམས་ཅད་སྤྱན་དྲངས། ཞལ་དུ་ཞུགས་ནས་སྐུའི་དབྱིབས་བརྒྱུད་དེ། ཡུམ་གྱི་ཁར་བབས་པ་ལྷ་སུམ་ཅུ་རྩ་གཉིས་སུ་གྱུར་པ་རྣམས་བཛྲ་ངྷྲྀཀ་ལ་སོགས་པའི་འབྱིན་སྔགས་ཀྱིས་ཕྱུངས་ནས། ཚོམ་བུ་སོ་སོ་ལ་བཀོད་པ་རྣམས་ཡོངས་སུ་རྫོགས་པར་གསལ་བཏབ་ནས་རང་ལྷ་རྣམ་སྣང་དུ་གནས་ནས་ལྷ་སྤྲོ་བའི་ལུགས་ལ་ལྷ་ཐམས་ཅད་སྤྲོས་ཟིན་ནས་གཙོ་བོ་ཡབ་ཡུམ་གྱི་ལུས་དཀྱིལ་འགོད། གཞན་རྣམས་ཀྱི་སྐུ་གསུང་ཐུགས་བྱིན་གྱིས་བརླབས་ལ་ཐམས་ཅད་ཀྱང་སེམས་དཔའ་སུམ་བརྩེག་ཏུ་གསལ་བར་དམིགས་ནས་ཡེ་ཤེས་པ་དང་རོ་གཅིག་པར་བྱས་ལ་དཀྱིལ་འཁོར་སྒྲུབ་པའི་སྐབས་ལྟར་སྤྱན་དྲངས་པའི་ཚིགས་བཅད་དང་མཆོད་པ་སོགས་ཇི་ལྟ་བ་བཞིན་བྱའོ། །དབང་བསྐུར་ནས། སོ་སོའི་རིགས་ཀྱི་བདག་པོས་རྒྱས་གདབ་བོ། །དེ་ནས། ཕྱི་ནང་གསང་བ་ཡིད་ལས་བྱུང་བའི་མཆོད་པས་མཆོད་ཅིང་། བསྟོད་པ་རྣམས་ཀྱིས་བསྟོད་ལ། སྙན་གསན་དབབ་པའི་ཕྱིར། པུས་མོ་གཡས་པའི་ལྷ་ང་ས་ལ་བཙུགས་ནས། བདུག་སྤོས་དང་བཅས་པའི་རྡོ་རྗེ་ དྲིལ་བུ ་འཛིན་པས། བཅོམ་ལྡན་རྡོ་རྗེ་འཛིན་པ་མཆོག །རིགས་སྔགས་རྒྱལ་ལ་ཕྱག་འཚལ་ལོ། །ཐུགས་རྗེའི་བདག་ཉིད་ཅན་རྣམས་ཀྱིས། །དཀྱིལ་འཁོར་བདག་ནི་འབྲི་བར་འཚལ། །སློབ་མ་རྣམས་ལ་བརྩེ་བ་དང་། ཁྱེད་རྣམས་ལ་ཡང་མཆོད་པའི་ཕྱིར། །བཅོམ་ལྡན་བདག་ནི་གུས་པ་ལ། །དེས་ན་གནང་བ་མཛད་པར་རིགས། །སངས་རྒྱས་འགྲོ་དོན་མཛད་བརྩོན་དང་། །བྱང་ཆུབ་སེམས་དཔའ་འབྲས་གནས་དང་། །གང་གཞན་གསང་སྔགས་ལྷ་རྣམས་དང་། །འཇིག་རྟེན་སྐྱོང་བའི་ལྷ་རྣམས་དང་། །གང་ཡང་འབྱུང་པོ་མཐུ་ཆེན་དང་། །གང་དུ་རྡོ་རྗེའི་སྤྱན་མངའ་བའི། །སེམས་ཅན་བསྟན་ལ་དགའ་བ་རྣམས། །བདག་མིང་འདི་ཞེས་བགྱི་བ་ཡི། །ཏིང་ངེ་འཛིན་གྱི་དཀྱིལ་འཁོར་ནི། །ཡོ་བྱད་ཇི་ལྟར་འབྱོར་པ་ཡིས། །འགྲོ་བ་དག་ཕྱིར་བདག་འབྲི་ན། །དེང་བདག་སློབ་མར་བཅས་པ་ལ། །ཐུགས་བརྩེ་བར་ནི་དགོངས་ནས་སུ། །ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱིས་བརླབ་པར་མཛད་དུ་གསོལ། །ཞེས་ལན་གསུམ་དུ་གསོལ་བ་བཏབ་པས། དཀྱིལ་འཁོར་གྱི་ལྷ་རྣམས་ཀྱི་མགྲིན་གཅིག་ཏུ། རྡོ་རྗེ་འཛིན་པ་ཁྱོད་ཀྱིས། དཀྱིལ་འཁོར་གྱི་ལས་ཅི་བདེ་བར་གྱིས་ཤིག ཅེས་གནང་བ་བྱིན་པར་བསམ་མོ། །དེ་ནས་ལྷ་དང་འབྱུང་པོ་གཏོར་མས་མཉེས་པར་བྱས་ལ། བུམ་པ་སྟ་གོན་དུ་གནས་པའི་ཆོ་ག་བྱ་སྟེ། རིན་པོ་ཆེ་ལ་སོགས་པའི་རྒྱུ་ལས་བྱུང་བའི་བུམ་པ། ལྟོ་བའི་རྒྱར་མཐོ་ལྔ་ལ། མགྲིན་པའི་དཔངས་སུ་སོར་བརྒྱད་པ། ཁ་ཁྱེར་དང་མཆུ་སོར་གཉིས་འཕྱང་བ། རྩ་བ་ཟླུམ་ཞིང་ཁ་དོག་ནག་པོ་དང་བྲལ་བའི་བུམ་པ་ལྷའི་གྲངས་དང་མཉམ་པའམ་མ་འབྱོར་ན་ལས་ཐམས་ཅད་པའི་བུམ་པ་དང་གཉིས་ལ། འགུལ་ཆིངས་གཙང་མ་པྲོག་ལྔའམ། བདུན་དང་ལྡན་པས་དཀྲི་ཞིང་། མེ་ཏོག་དང་འབྲས་བུས་སྤུད་པའི་རྩེ་མོ་མ་ཉམས་པའི་ཤིང་གི་ཡལ་གས་ཁ་བརྒྱན་ལ། གསེར། དངུལ། མུ་ཏིག བྱི་རུ། མུ་མེན་ཏེ་རིན་པོ་ཆེ་ལྔ། ནས། འབྲས། གྲོ། སྲན་མ། ཏིལ་ཏེ་འབྲུ་ལྔ། སིང་ཧ། སླེ་ཏྲེས། བྷྱ་གྲྀ། ཆུ་སྲིན་སྡེར་མོ། ཧ་ཡ། ཤུ་ུདག ཧ་བ་ངྷེ་ཝ། དབང་པོ་ལག་པ། ཀཎྜ་ཀ་རི་སྟེ་སྨན་ལྔ། ག་བུར། གུར་གུམ། ཙནྡན་དཀར་དམར། ཛ་ཏི་སྟེ་དྲི་ལྔ། འོ་མ། ཞོ། མར། ལན་ཚྭ། བུ་རམ་སྟེ་སྙིང་པོ་ལྔ། ཤ་ལྔ་བདུད་རྩི་ལྔ་སྟེ་གསང་བའི་རྫས་རྣམས་དང་བཅས་པ། ལུ་མ་དང་འབབ་ཆུ་དང་། ཁྲོན་པ་ལས་བྱུང་བའི་ཆུས་གང་བར་བྱས་ལ། ལྷ་སོ་སོའི་མཚན་མ་རྣམས་གདགས་ཤིང། རྣམ་རྒྱལ་གྱི་བུམ་པ་ལ་དུང་ཆོས་དྲི་ཆུས་ཡོངས་སུ་གང་བའི་སྟེང་དུ། རྡོ་རྗེ་ལ་གཟུངས་ཐག་བཏགས་པ་བཞག་གོ། །

དེ་ནས་བུམ་པ་རྣམས་བསང་ཞིང་སྦྱངས་ནས། པཾ་ལས་པདྨ་ཨ་ལས་ཟླ་བའི་སྟེང་དུ། ཧཱུྃ་ལས་རིན་པོ་ཆེ་སྣ་ཚོགས་ལས་གྲུབ་པའི་བུམ་པ་རྣམས་སུ་བསྐྱེད་ནས། ལྷ་གྲངས་དང་མཉམ་པའི་བུམ་པ་ལ་ནི། རེ་རེའི་ནང་དུ་ལྷ་རེ་རེ་བསྐྱེད་ལ་རྣམ་རྒྱལ་གྱི་བུམ་པ་འབའ་ཞིག་ལས་མེད་ན། དེའི་ནང་དུ་དཀྱིལ་འཁོར་གྱི་ལྷ་རྫོགས་པར་བསྐྱེད་དོ། །དེའང་གཞལ་ཡས་ཁང་གི་དོད་དུ་བུམ་པ་ཉིད་ཡིན། ལྷ་རྣམས་ནི་ལྷག་པར་མོས་པ་ཙམ་མམ། ཡང་ན་དཀྱིལ་ཆོག་ཉི་ཤུ་པ་ལས་སོ་སོའི་ས་བོན་ལས་བསྐྱེད་དོ། །

ལས་ཐམས་ཅད་པའི་བུམ་པར་ནི་བགེགས་མཐར་བྱེད་བསྐྱེད་དེ། སྐུ་གསུང་ཐུགས་བྱིན་གྱིས་བརླབས་ནས། ཡེ་ཤེས་པ་བཅུག་ལ་དབང་བསྐུར་ནས། རིགས་ཀྱི་བདག་པོས་རྒྱས་བཏབ་པ་ལ། ཕྱི་ནང་གསང་བ་ཡིད་ལས་བྱུང་བས་མཆོད་དེ། གཏོར་མས་ཀྱང་མཉེས་པར་བྱས་ནས། དུང་ཆོས་ཀྱི་ནང་དུ་ལྷ་རྣམས་ཀྱིས་གཟུགས་བརྙན་གསལ་བར་དམིགས་ནས་རང་གི་སྙིང་ཁ་ནས་སྔགས་འཕྲོས་པས། གཟུངས་ཐག་ལ་བརྟེན་ནས་སོང་བས། ལྷ་རྣམས་ཀྱི་ཐུགས་ཀར་ཕོག་སྟེ་རྒྱུད་བསྐུལ་ནས། སྐུ་ཐམས་ཅད་ལས་བདུད་རྩིའི་རྒྱུན་ཟགས་པས་བུམ་པ་གང་བར་བསམ་ཞིང་། དཀྱིལ་འཁོར་གྱི་ལྷ་སོ་སོའི་སྔགས་སྒྲུབ་ཐབས་ནས་འབྱུང་བ་བཞིན་བཟླ། ལས་ཐམས་ཅད་པ་ལ། ༀ་ཨ་བིགྷནྣ་ཏ་ཀྲིད་ཧཱུྃ་ཕཊ་ཅེས་པ་བཟླའོ། །

སླར་ཡང་མཆོད་པ་དང་བསྟོད་པ་བྱས་ལ། དུང་ཆོས་ཀྱི་ཆུ་བུམ་པ་རྣམས་ཀྱི་ནང་དུ་བླུགས་པས། ལྷ་ཐམས་ཅད་འོད་དུ་ཞུ་བ་ལས་བྱུང་བའི་ཡེ་ཤེས་ཀྱི་ཆུར་བསམས་པས། གཙོ་བོའི་བུམ་པ་རྣམས་ཀྱི་ཆུ་ཅུང་ཟད་རེ་རྣམ་རྒྱལ་བུམ་པར་བསྡུའོ། །འདིར་གཏོར་མ་རྣམས་འབུལ།དེ་ནས་དཔའ་བོ་དང་རྣམ་འབྱོར་མ་རྣམས་ཚོགས་ཀྱི་འཁོར་ལོས་མཉེས་པར་བྱས་ནས་བསྔོ་བའི་བར་ཉམས་སུ་བླངས་ནས་མཆོད་པ་བྱིན་གྱིས་བརླབས་ཏེ། དཀྱིལ་འཁོར་ལ་མཆོད་ཅིང་བསྟོད་དེ། བཟོད་པར་གསོལ་ནས་ཕྱག་རྒྱ་དང་སྔགས་ཀྱི་མཁར་བཞུགས་སུ་གསོལ་ཏེ་ཚོམ་བུ་བསྡུས་ཏེ། སླར་ཡང་མཆོད་བསྟོད་གསོལ་བ་གདབ་པ་བྱས་ནས། བདག་བསྲུང་བ་བྱས་ནས། འོད་གསལ་གྱི་ངང་ལ་ཉལ་བར་བྱས་ལ། ལྷག་མ་ལ་དགའ་བའི་འབྱུང་པོ་རྣམས། ལྷག་མའི་གཏོར་མས་ཚིམ་པར་བྱའོ། །

དེ་ནས་སློབ་མ་ལྷག་པར་གནས་པའི་ཆོ་ག་ནི། ངེས་འབྱུང་བསམ་པ་བསྐྱེད་པ་དང་། །གསོལ་དང་ནང་གི་དབང་བསྐུར་དང་། །སྤྲོ་བ་བསྐྱེད་དང་སྡོམ་པ་སྦྱིན། །བསྲུང་དང་མཆོད་དང་སོ་ཤིང་དོར། །སྐྱོར་ཆུ་བླུད་དང་བསྲུང་སྐུད་བཅིང་། །སྡིག་པ་སྦྱངས་དང་ཀུ་ཤ་སྦྱིན། །ཆོས་བཤད་རྨི་ལམ་ཡོངས་བརྟག་པ། །བཅུ་བཞི་སློབ་མ་སྟ་གོན་ནོ། །དེ་ལ་ཐོག་མར། གོང་དུ་རྗེས་སུ་བཟུང་བའི་སློབ་མ་རྣམས་ཁྲུས་བྱས་ཞིང་། གོས་གཙང་མ་བགོས་ལ། ཕྱག་འཚལ་བ་སྔོན་དུ་འགྲོ་བས། གྲལ་ལ་འཁོད་པ་རྣམས་ལ། མྱང་འདས་ཀྱི་བསམ་པ་བརྟན་པོ་བསྐྱེད་པའི་ཕྱིར། སྔགས་ཀྱི་དངོས་གྲུབ་དོན་གཉེར་གང་། །དཀྱིལ་འཁོར་འདིར་ནི་གཞུག་བྱ་སྟེ། །བསོད་ནམས་འདོད་པ་བདི་ལས་གཞན། །གཞན་དག་འཇིག་རྟེན་ཕ་རོལ་གཉེར། །དད་པ་ཆེན་པོ་ལྡན་བྱས་ཏེ། །འཇིག་རྟེན་ཕ་རོལ་དོན་གཉེར་ན། །བློ་ལྡན་དཀྱིལ་འཁོར་གཞུག་བྱ་སྟེ། །འདི་ཡི་འབྲས་བུ་འདོད་མི་བྱ། །གལ་ཏེ་འདི་ལ་དམིགས་གྱུར་ན། །འཇིག་རྟེན་ཕ་རོལ་འབྱུང་མ་ཡིན། །འཇིག་རྟེན་ཕ་རོལ་དོན་གཉེར་བའི། །མི་ལ་འདི་འབྲས་མ་ལུས་འགྲུབ། ། ཞེས་ལན་ཅིག་བརྗོད་ནས་ཚེ་འདིའི་ནད་གདོན་ཞི་བ་དང་། ཕྱི་མ་ལྷ་མིའི་བདེ་བ་དོན་དུ་གཉེར་ན། དཀྱིལ་འཁོར་དུ་འཇུག་མི་དགོས་ཤིང་། དཀྱིལ་འཁོར་འདིར་འཇུག་པས་ནི། ཕྱག་རྒྱ་ཆེན་པོ་མཆོག་གི་དངོས་གྲུབ་ཚེ་འདི་ཉིད་ལ་ཐོབ་པ་དོན་དུ་གཉེར་དགོས་པས། སེམས་ཅན་ཐམས་ཅད་ཀྱི་དོན་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་བྱ། དེའི་ཕྱིར་དུ། དཀྱིལ་འཁོར་ཆེན་པོར་འཇུག་སྙམ་པ་གྱིས་ཞེས་བརྗོད། དེ་ལྟར་མྱང་འདས་ཀྱི་བསམ་པ་བརྟན་པོས་ཀུན་ནས་བསླང་ནས། བླ་མ་ལ་སངས་རྒྱས་ཀྱི་འདུ་ཤེས་བསྐྱེད་དེ། དེ་ལས་དབང་བླང་བའི་ཕྱིར། མཎྜལ་ཕུལ་ནས། མེ་ཏོག་དང་བཅས་པའི་ཐལ་མོ་སྦྱར་ལ། དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་སྟེ། །སྐྱབས་གསུམ་དག་ཀྱང་བདག་པ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་འཚལ། །ཞེས་ལན་གསུམ་གསོལ་བ་འདེབས་སུ་གཞུག་གོ། །

དེ་ལྟར་གསོལ་བ་འདེབས་པའི་སློབ་མ་ལ། དབང་བསྐུར་བའི་སྣོད་དུ་རུང་བར་བྱ་བའི་ཕྱིར། རང་ཞེ་སྡང་རྡོ་རྗེ་ཡབ་ཡུམ་དུ་གསལ་བར་དམིགས་ལ། སྙོམས་པར་ཞུགས་པ་ལས་ཕྱུང་བའི་སྒྲས། སློབ་མ་རྣམས་བཀུག་ནས། ཞལ་ཏུ་ཞུགས་ཏེ། རྡོ་རྗེའི་ལམ་ནས་ཡུམ་གྱི་བྷ་གར་བབས་པ་རྣམས། མི་བསྐྱོད་རྡོ་རྗེ་ཡབ་ཡུམ་དུ་བསྐྱེད་ཅེས་འབྱུང་ངོ། །ཧེ་རུ་ཀ་ཕྱག་གཉིས་པར་བསྐྱེད་ལ། སླར་ཡང་རང་གི་སྙིང་ཁའི་ས་བོན་གྱི་འོད་ཟེར་གྱིས། རིགས་ལྔ་ཡབ་ཡུམ་བཀུག་ཏེ་རང་གི་ཞལ་དུ་ཞུགས་ཤིང་། ཐུགས་ཀར་བྱང་ཆུབ་ཀྱི་སེམས་སུ་ཞུ་བར་གྱུར་པ་རྡོ་རྗེའི་ལམ་ནས་བརྒྱུད་དེ། ཧེ་རུ་ཀ་རྣམས་ཀྱི་སྤྱི་བོར་ཐིམ་པས། རོ་གཅིག་ཏུ་གྱུར་ཏེ་དེ་ཉིད་ཀྱིས་དབང་བསྐུར་ནས་རིགས་ཀྱི་བདག་པོས་རྒྱས་བཏབ་ནས།ཧཱུྃ་གི་སྦྱོར་མཚམས་ནས་སྤྲོས་ལ། ཤར་སྒོར་རིམ་པ་བཞིན་དགོད་དོ། །

དེ་ལྟར་སྣོད་དུ་རུང་བར་བྱས་པའི་སློབ་མ་སྔགས་ཀྱི་ལམ་ལ་སྤྲོ་བར་བྱ་བའི་ཕྱིར། བུ་ཚུར་ཐེག་པ་ཆེན་པོ་ཡི། ཁྱོད་ནི་ཚུལ་ཆེན་སྣོད་ཡིན་ཏེ། །གསང་སྔགས་སྤྱོད་ཚུལ་ཆོ་ག་ནི། ཁྱོད་ལ་ཡང་དག་བཤད་པར་བྱ། །དུས་གསུམ་དུ་ནི་ལེགས་བྱུང་བའི། །སྐུ་གསུང་ཐུགས་ཀྱི་རྡོ་རྗེ་ཅན། །སངས་རྒྱས་ཡེ་ཤེས་མཉམ་མེད་པ། །རྡོ་རྗེ་སྔགས་ཀྱི་སྟོབས་ཀྱིས་ཐོབ། །སྔགས་ཀྱི་སྦྱོར་བ་མཉམ་མེད་དེ། །དྲག་པོ་ཆེན་པོ་བདུད་ཀྱི་སྡེ། །སྟོབས་ཆེན་དག་ཀྱང་དེ་ཡིས་བཅོམ། །ཤྭཀྱང་སེང་གེ་མཆོག་ལ་སོགས། །འཇིག་རྟེན་མཐུན་པར་གཤེགས་ནས་ཀྱང་། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡི་བློ་གྲོས་འདི་གྱིས་ཤིག །ཅེས་ལན་ཅིག་བརྗོད་ནས། དེའི་དོན་བུ་ཚུར་ཞེས་པ་བོད་པ་ཡིན་ལ། ཁྱོད་ནི་ཤེས་རབ་དང་སྙིང་རྗེ་དང་ལྡན་པས། ཚུལ་ཆེན་པོ་རྡོ་རྗེ་ཐེག་པའི་སྣོད་ཡིན་ཏེ། དེའི་ཕྱིར། ཁྱེད་ལ་གསང་སྔགས་སྤྱོད་ཚུལ་ཆོ་ག་རྣམས་བཤད་པར་བྱའི། ཁྱེད་ཀྱིས་ཀྱང་ལམ་འདི་ལ་བློ་གྲོས་མི་འགྱུར་བར་གྱིས་ཤིག དུས་གསུམ་གྱི་སངས་རྒྱས་ཐམས་ཅད་རྡོ་རྗེ་ཐེག་པའི་ལམ་ནས་སངས་རྒྱས་པ་ཡིན་ནོ། །ཞེས་བཤད།

དེ་ལྟར་ཡིད་སྤྲོ་བར་གྱུར་པའི་སློབ་མ་རྣམས། ལམ་གྱི་གཞི་བྱང་ཆུབ་སེམས་དང་། སྡོམ་པ་སྦྱིན་པའི་ཕྱིར། རྒྱུན་བཤགས་སྔོན་དུ་འགྲོ་བ་ཅན་གྱི་བྱང་ཆུབ་ཀྱི་སེམས་སྦྱིན་པར་བྱ་སྟེ། དོན་དྲན་བཞིན་པས། དཀོན་མཆོག་གསུམ་པ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་ལན་གསུམ་བརྗོད་དོ། །

དེ་ནས། སྤྱི་དང་ཁྱད་པར་གྱི་སྡོམ་པ་རྣམས་བྱང་ཆུབ་ཀྱི་བར་དུ་བསྐྱང་བའི་བསམ་པས། འདི་སྐད་ཅེས་བརྗོད་དུ་གཞུག་གོ །སངས་རྒྱས་བྱང ཆུབ་སེམས་དཔའ་ཀུན། །བདག་ལ་དགོངས་པར་མཛད་དུ་གསོལ། །བདག་མིང་འདི་ཞེས་བགྱི་བ་ནི། །དུས་འདི་ནས་ནི་བཟུང་ནས་ནི། །བྱང་ཆུབ་སྙིང་པོར་མཆིས་ཀྱི་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་བསྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པོར་བདག་གིས་བཟུང་། །སངས་རྒྱས་ཆོས་དང་དགེ་འདུན་སྟེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དེང་ནས་བདག་གིས་གཟུང་། །རྡོ་རྗེའི་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་ནང་གསང་བ་ཐེག་པ་གསུམ། །དམ་ཆོས་སོ་སོར་གཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ནི་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང་། །མ་བསྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་སྒྲོལ། །དབུགས་མ་ཕྱིན་པ་དབུགས་དབྱུང་ཞིང་། །སེམས་ཅད་མྱ་ངན་འདས་ལ་འགོད། །ཅེས་ལན་གསུམ་གྱིས་དམ་ཚིག་དང་སྡོམ་པ་སྦྱིན་ནོ། །

དེ་ནས་ཕྱི་ནང་གི་བར་ཆད་བསྲུང་བའི་ཕྱིར། ལས་ཐམས་ཅད་པའི་བུམ་པའི་ཆུ་སྔགས་དང་བཅས་པས་གཏོར་ཞིང་བསངས་ནས། ལག་པ་གཡས་པས་རྡོ་རྗེ་དང་བཅས་པའི་རྡོ་རྗེ་ཁུ་ཚུར་གྱི་སྲིན་ལག་གིས། དྲིའི་ཆུ་བླངས་པས་དཔྲལ་བར་ཐིག་ལེ་བྱ་ཞིང་། ༀ་ཞེས་བརྗོད་པས་འཁོར་ལོ་དཀར་པོ་ༀ་གྱིས་མཚན་པར་བསམ། མགྲིན་པར་རེག་ཅིང་ཨ་ཞེས་བརྗོད་པས་པདྨ་དམར་པོ་ཨས་མཚན་པ་བསམ། སྙིང་གར་རེག་ཅིང་ཧཱུྃ་ཞེས་བརྗོད་པས་རྡོ་རྗེ་སྔོན་པོ་ཧཱུྃ་གིས་མཚན་པར་བསམ་ལ། དེ་ནས་སྙིང་ཁ་ནས་མས་རིམ་དུ་ཧཱུྃ་ཨཱཿༀ་ཞེས་བརྗོད་དོ། །རྡོ་རྗེ་དང་བཅས་པའི་སྲིན་ལག་གིས་རེག་ཅིང་གསལ་བཏབ། ཡང་ཡས་མར་རེག་ཅིང། ༀ་ཨཱཿཧཱུྃ་ཞེས་པས་གསལ་གདབ་བོ། །

དེ་ལྟར་སྐུ་གསུང་ཐུགས་རྡོ་རྗེས་བསྲུང་བའི་སློབ་མ་རྣམས་མཆོད་པའི་གནས་སུ་གྱུར་པས། མེ་ཏོག་དང་། བདུག་སྤོས། མར་མེ། དྲི། ཞལ་ཟས། རོལ་མོ་རྣམས་ཀྱིས་མཆོད་པར་བྱའོ། །དེ་ནས། བླ་མའི་མདུན་དུ་བཎྜལ་ཟླུམ་པོ་ཁྲུ་གང་གི་ཚད་དང་ལྡན་པ་ལ། བགེག་མཐར་བྱེད་ཀྱི་སྔགས་བཟླ་ཞིང་། བ་ལས་བྱུང་བའི་དྲི་བཟང་པོ་དང་བཅས་པས་བྱུགས་པའི་དབུས་སུ་མེ་ཏོག་གི་ཚོམ་བུ་གཅིག་བཀོད་ལ་སློབ་མས་མེ་ཏོག་ཕུལ་ནས། བླ་མའི་མདུན་དུ་ཁ་བྱང་ཤར་དུ་ཕྱོགས་ཏེ་འདུག་པ་ལ། དངོས་གྲུབ་ཀྱི་ལྟས་བརྟག་པའི་ཕྱིར། འོ་མ་ཅན་གྱི་ཤིང་གི་ཡལ་ག་ཕྲ་མོ་སོར་བཅུ་གཉིས་ཀྱི་ཚད་དང་ལྡན་པའི་རྩེ་མོ་མེ་ཏོག་གིས་བརྒྱན་པ་ༀ་བཛྲ་ཧ་ས་ཧཿཞེས་རྗོད་ནས་བྱིན་པ་ལ་སློབ་མས་ཐལ་མོ་སྦྱར་ནས་བླངས་ཏེ། སོ་དྲུད་ལ་སྡིག་པ་ཐམས་ཅད་སྐྱུགས་པར་བསམ་ཞིང་། མཎྜལ་གྱི་དབུས་སུ་དོར་རོ། །དེ་ནས། བླ་མས་ཕྱོགས་ཀྱི་ཆས་དངོས་གྲུབ་ཀྱི་དབྱེ་བ་བསྟན་ཏེ། སྟེང་དུ་ཕྱོགས་ན་རིག་འཛིན། རང་ལ་ཕྱོགས་ན་མཆོག ཐུར་དུ་བལྟས་ན་ས་འོག ཤར་ལ་སོགས་པའི་ཕྱོགས་བཞིར་བལྟས་ན་ལས་བཞི་གྲུབ་ལ། མཚམས་སུ་བལྟས་ན་དངོས་གྲུབ་ཕྲ་མོ་གྲུབ་བོ་ཞེས་ལུང་བསྟན་ཏོ། །

དེ་ནས་རྨི་ལམ་གསལ་པོ་མཐོང་བའི་ཕྱིར། བཾ་ལས་བྱུང་བའི་དུང་ཆོས་ཀྱི་ཆུ་ལ། ༀ་ཨཱཿཧཱུྃ་བཟླས་ཏེ། ༀ་ཧྲཱི་བི་ཤུདྡྷ་སརྦ་དྷརྨ་པཱ་པཱཾ་ནིཿཙཱ་སྱ་སཾ་ཤོ་དྷ་ཡ་སརྦ་བི་ཀལྤཱ་ཨ་པ་ན་ཡ་ཧཱུྃ། ཞེས་བཟླས་ཏེ་ལག་པ་གཡས་པར་བྱིན་ནས་ལན་གསུམ་འཐུང་དུ་གཞུག་གོ །དེ་ནས་བར་ཆད་མི་འབྱུང་བའི་དོན་དུ། བུ་མོ་གཙང་མས་བཀལ་བའི་སྐུད་པ་དམར་པོ། སློབ་མའི་ལུས་ཀྱི་ཚད་དང་མཉམ་པ་གསུམ་སྒྲིལ་ལ་རྡོ་རྗེའི་མདུད་པ་བཅིང་ལ། ཧཱུྃ་ལས་བྱུང་བའི་རྡོ་རྗེའི་སྲད་བུར་དམིགས་ལ། རང་གི་སྙིང་ཁའི་ས་བོན་གྱི་འོད་ཀྱིས་དཀྱིལ་འཁོར་གྱི་ལྷའི་ཐུགས་ཁ་ནས། ཡེ་ཤེས་ཀྱི་སྐུད་པ་སྤྱད་དྲངས་ནས་བསྟིམ་སྟེ། གཙོ་བོའི་སྔགས་ཀྱིས་བྱིན་གྱིས་བརླབས་ལ་ༀ་བུདྡྷ་མཱཻ་ཏྲི་རཀྵ་རཀྵ་སརྦཱ་ཱན་སྭཱཧཱ། ཞེས་ཟློས་ཞིང་སྐྱེས་པའི་དཔུང་པ་གཡོན་དང་། བུད་མེད་ཀྱི་གཡས་ལ་བཅིངས་ནས། དེ་ལ་ལག་པ་གཉིས་འཇུས་ཏེ། ཡི་གེ་བརྒྱ་པ་བརྗོད་པས་བརྟན་པར་བྱའོ། །དེ་ནས་སྡིག་པ་སྦྱང་བའི་ཕྱིར། དུང་ཆོས་ཀྱི་ཆུ། སྲིན་ལག་གིས་བླངས་ལ། གནས་གསུམ་དུ་རེག་ཅིང་། ༀ་ཨཱཿཧཱུྃ་ཞེས་བརྗོད་པས། སྒོ་གསུམ་གྱི་དྲི་མ་སྦྱང་བར་བསམ་ལ། སྔར་གྱི་སྔགས་ཀྱི་མངོན་པར་བསྔགས་པའི་སྐྱོར་ཆུ་གཉིས་པའང་འཐུང་དུ་གཞུག་གོ །དེ་ནས་རྨི་ལམ་འཁྲུགས་པའི་དོན་དུ། རྩ་བ་དང་རྩེ་མོ་མ་ཉམས་པའི་ཀུ་ཤའི་ཆུན་པོ་ཆེ་ཆུང་གཉིས་ལ། ༀ་བཛྲ་ཏཱིཀྵྞ་བཾ་ཞེས་པས། ཆུང་བ་གཡས་དང་ཆེ་བ་གཡོན་དུ་སྦྱིན་ནོ། །

དེ་ནས་ཡིད་སྤྲོ་བ་བརྟས་ཅིང་ལྡོག་པ་བྱ་བའི་ཕྱིར། ཆོས་ཟབ་མོ་བཤད་པ་ནི། འཇིག་རྟེན་དུ་ནི་ཀུན་མཁྱེན་དག །ཨུ་དུམ་ཝཱ་རའི་མེ་ཏོག་ལྟར། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གི་མཉམ་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །འཇིག་རྟེན་ཀུན་རྫོབ་བདེན་པ་དང་། །དམ་པའི་དོན་གྱི་བདེན་པའོ། །ཟབ་ཅིང་རྒྱ་ཆེ་ཞེས་བཤད་པ། །རྣམ་པར་རྟོག་མེད་ཟབ་པ་སྟེ། །རྒྱ་ཆེ་སངས་རྒྱས་རྣམས་ཀྱི་སྐུ། །འདི་ནི་བདེན་པ་གཉིས་སུ་བཤད། །ཀུན་རྫོབ་དང་ནི་དམ་པའི་དོན། །ཕྱེས་ཏེ་སོ་སོར་ཤེས་ནས་སུ། །དེ་ནས་གཅིག་ཏུ་འདས་བྱས་པའི། །ཟད་མེད་གོ་འཕང་བསྒོམ་པར་བྱ། །བསྐལ་པ་བྱེ་བ་དུ་མ་རུ། །སྔོན་དུ་སྡིག་པ་བྱས་པ་གང་། །དཀྱིལ་འཁོར་འདི་འདྲ་མཐོང་མ་ཐག །དེ་དག་ཟད་པར་འགྱུར་ཡིན་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོན་ཅི་དགོས། །སྐྱོབ་པའི་གསང་སྔགས་བཟླས་ནས་ནི། །གོ་འཕང་བླ་ན་མེད་པར་འགྱུར། །གང་གི་སྤྱོད་པ་མཆོག་འདི་ལ། །བློ་གྲོས་ཤིན་ཏུ་དྲི་མེད་ན། །སྡུག་བསྔལ་ཐམས་ཅད་འབྱུང་བ་ཡི། །ངན་འགྲོ་དེ་ཡིས་གཅོད་པར་འགྱུར། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་བླ་མེད་དེ་རིང་སྙེད། །གང་ཕྱིར་རྒྱལ་བ་སྲས་བཅས་པའི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པར། །བདག་ཉིད་ཆེན་པོ་ཁྱེད་གནས་ཏེ། །གང་གི་ཁྱེད་རྣམས་ཐེག་ཆེན་དུ། །སང་ནི་རབ་ཏུ་སྐྱེ་འགྱུར་བ། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། ཁྱེད་རྣམས་འདིར་ནི་དོང་བས་ན། །རང་བྱུང་སྐལ་བ་ཆེན་པོ་པ། །འཇིག་རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་ཉིད་དུ་འགྱུར། །ཅེས་བརྗོད་ནས། འཇིག་རྟེན་ན་གང་དཀོན་ན། སངས་རྒྱས་དཀོན་ཏེ། དཔེར་ན་ཨུ་དུམ་ཝ་རའི་མེ་ཏོག་བཞིན། དེ་བས་ཀྱང་གསང་སྔགས་དཀོན་ཏེ། རྩ་རྒྱུད་ཀྱི་ལེའུ་བཅུ་བདུན་པ་ལས། ཐུབ་པ་ཆེན་པོ་མར་མེ་མཛད་ནས། འོད་སྲུང་གི་བར་གྱི་འདས་པའི་སངས་རྒྱས་རྣམས་ཀྱིས་ཀྱང་མ་གསུངས། བྱམས་པ་ནས་མོས་པའི་བར་གྱི་མ་འོངས་པའི་སངས་རྒྱས་རྣམས་ཀྱིས་ཀྱང་མི་གསུང་། ཤཱཀྱ་ཐུབ་པ་ཁོ་ནས་སྨོན་ལམ་གྱི་སྟོབས་ཀྱིས་གསུངས་པ་ཡིན་པས་ཤིན་ཏུ་དཀོན་ནོ། །

དཀོན་ཡང་ཕན་ཡོན་མེད་ན་ཅི་བྱ་སྙམ་ན། ཕན་ཡོན་ཤིན་ཏུ་ཆེ་སྟེ། དཔེར་ན་བསྐལ་པ་སྟོང་དུ་བསགས་པའི་མུན་པ་མར་མེས་སྐད་ཅིག་ལ་འཇོམས་པ་ལྟར། ཚེ་རབས་དཔག་ཏུ་མེད་པ་ནས་བསགས་པའི་སྡིག་པ་རྣམས། སང་ནུབ་དཀྱིལ་འཁོར་ཆེན་པོ་མཐོང་བ་ཙམ་གྱིས་ཀྱང་འཇོམས་ན། གསང་སྔགས་ཀྱི་ལམ་ལ་ཞུགས་ཏེ་ཚུལ་བཞིན་བསྒྲུབས་ན་ལྟ་སྨོས་ཀྱང་ཅི་དགོས། དེ་བས་ན། དེ་ལྟ་བུའི་རྙེད་པར་དཀའ་ཞིང་ཕན་ཡོན་ཆེ་བའི་གསང་སྔགས་ཁྱོད་ཀྱིས་ཐོབ་ཀྱིས་དགའ་བ་སྒོམས་ཤིག་ཅེས་པའི་དོན་ཡིན་ནོ་ཞེས་བཤད། དེ་ནས། བུ་ཀྱེ། ནངས་པར་དཀྱིལ་འཁོར་དག་མཐོང་བར་འགྱུར་རོ་ཉོལ་ཅིག་དང་། རྨི་ལམ་མཐོང་བ་གང་ཡིན་པ། །དེ་ཀུན་དང་པོར་ང་ལ་སྨྲོས། །ཞེས་བརྗོད་ནས། ཀུ་ཤ་ཆེ་བ་སྟན་དང་། ཆུང་བ་རྔས་སུ་བཅུག་ལ། རྟོག་པ་གཞན་གྱིས་མ་ཡེངས་པར། བདག་གི་ནངས་པར་དཀྱིལ་འཁོར་ཇི་ལྟ་བུ་ཞིག་མཐོང་བར་འགྱུར་སྙམ་པའི་ཡིད་དང་ལྡན་པས། གཞོགས་གཡས་པ་ས་འོག་ཏུ་ཅུག་པའི་སེང་གེའི་ཉལ་སྟབས་ཀྱིས་ཉོལ་ཅིག ཅེས་སྒོས་ཏེ་བཏང་ངོ། །

དེ་ནས་ཚོམ་བུའི་དཀྱིལ་འཁོར་དེ་ལ་མཆོད་ཅིང་བསྟོད་དེ་བཟོད་པར་གསོལ་ནས། ༀ་བཛྲོད་ཏིཥྠ་ཞེས་པའི་སྔགས་དང་། ཕྱག་རྒྱ་དང་ལྡན་པས་སྟེང་གི་ནམ་མཁར་བཏེགས་ནས་སླར་ཡང་མཆོད་ཅིང་བསྟོད་པ་དེ་ཉིད་དུ་བཞུགས་པར་གསོལ་ལོ། །དེ་ནས་ཚོམ་བུ་རྣམས་བསྡུས་ནས། དྲི་བཟང་པོ་དང་བཅས་པའི་བ་བྱུང་གིས་བྱུགས་ལ། གཏོར་མའི་མགྲོན་གཤེགས་སུ་གསོལ་ཞིང་། གཏོར་མ་ཉིད་ཀྱང རོལ་མོའི་སྒྲ་དང་བཅས་པས་དོར་ལ། བདག་ཉིད་ཀྱི་གནས་གསུམ་དུ་ཡི་གེ་གསུམ་བཀོད་ནས་སུཾ་བྷའི་སྔགས་ཀྱིས་བསྲུངས་ལ་འོད་གསལ་གྱི་ངང་ལ་ཉལ་བར་བྱའོ། །ནངས་པར་སློབ་མས་རྨི་ལམ་བཤད་པའི་ཚེ། དགེ་བའི་མཚན་མ་མཐོང་ན་སྤྲོ་བ་བསྐྱེད་དོ། །མི་དགེ་བའི་མཚན་མ་མཐོང་ན། བགེག་དང་བཅས་ན་བགེག་གཏོར་བྱིན་ལ། གནོད་མཛེས་ཀྱི་སྔགས་ཀྱིས་བསྲུང་ཞིང་། བགེགས་དང་བཅས་པ་མ་ཡིན་ན། ཞི་བའི་སྦྱིན་སྲེག་དང་། སངས་རྒྱས་སྤྱན་གྱི་སྔགས་དང་། རྣལ་འབྱོར་ལ་སོགས་པས་ཞི་བར་བྱའོ། །སྟ་གོན་གྱི་ཆོ་གའོ། །

གཉིས་པ་དངོས་གཞིའི་ཆོ་ག་ནི།

གཉིས་པ་དངོས་གཞིའི་ཆོ་ག་ནི། དཀྱིལ་འཁོར་གྱི་ནི་བྱ་བ་དང་། །བདག་ཉིད་འཇུག་ཅིང་དབང་བླང་དང་། །སློབ་མ་འཇུག་ཅིང་དབང་བསྐུར་བ། །བྱ་བ་རྣམ་པ་གསུམ། །དེ་ལ་རྡུལ་ཚོན་གྱི་དཀྱིལ་འཁོར་འབྲི་བའི་ཚུལ་ནི། ཆོས་ཀྱི་རྒྱལ་པོ་འཕགས་པ་རིན་པོ་ཆེས་མཛད་པའི་དཀྱིལ་འཁོར་གྱི་ཆོ་གར་ཤེས་པར་བྱའོ། །འདིར་རས་རིས་ལ་བསྟེན་པའི་ཚུལ་ནི། ཕྱིམ་རེད་ཀྱི་ཚེ། ཚོམ་བུའི་གཞི་དེ་ཉིད་ལ། བ་བྱུང་དང་དྲི་བཟང་བདུད་རྩི་དང་བཅས་པས་ལེགས་པར་བྱུགས་པའི་སྟེང་དུ་གཞི་བཟང་པོ་གཏིང་བ་ལ། དཀྱིལ་འཁོར་འཇིག་རྟེན་ལས་འདས་པའི་ཤར་ཕྱོགས་སུ་ཞལ་བསྟན་ནས་བཀྲམ་ལ་འཁོར་ཡུག་ཀུན་ཏུ་ཆུ་གཉིས་སྔོན་དུ་འགྲོ་བའི་མཆོད་པ་ལྷ་གྲངས་ལས་མི་ཉུང་བ་བཤམས་ཤིང་། ལྷ་དང་། འབྱུང་པོའི་གཏོར་མ་རྣམས་ཀྱང་བཤམས། ཉེ་བར་མཁོ་བའི་ཡོ་བྱད་རྣམས་ཀྱང་འཚོག་ཆས་བྱའོ། །དེ་ནས་དཀྱིལ་འཁོར་བསྒྲུབ་པའི་ཕྱིར། ཕྱིམ་རེད་ཀྱི་དུས་སུ། སྒྲུབ་པའི་གྲོགས་དང་བཅས་པ། སོ་སོའི་སྟན་ལ་འཁོར་ནས། སྔོན་འགྲོའི་གཏོར་མ་བཏང་སྟེ། མཆོད་པ་བྱིན་གྱིས་བརླབས་ནས། བདག་བསྐྱེད་རྫོགས་པར་བསྒོམ་པའི་བར། སྟ་གོན་གྱི་སྐབས་ལྟར་བྱས་ནས། རང་གི་ཐུགས་ཀ་ནས་འོད་ཟེར་འཕྲོས་པས་དཀྱིལ་འཁོར་པ་ཐམས་ཅད་ལ་ཕོག་འོད་དུ་ཞུ་རྡོ་རྗེའི་ལམ་ནས་དྲངས་ཏིང་ངེ་འཛིན་སེམས་དཔའ་ལ་ཐིམ་པར་བསྒོམ་པའི་དཀྱིལ་འཁོར་བསྡུས་ལ། གཙོ་བོ་ཡབ་ཡུམ་གྱི་ང་རྒྱལ་དང་ལྡན་པས་ཁྲུས་བྱ་ཞིང་། ཧེ་རུ་ཀའི་ཆས་རིན་པོ་ཆེའི་རྒྱན་དང་གོས་སྔོན་པོ་སོགས་ཀྱིས་བརྒྱན་ལ་དཀྱིལ་འཁོར་གྱི་ཤར་ཕྱོགས་སུ་སྟན་ནང་ཚང་ཅན་ལ་འཁོད་དེ་ལས་བུམ་གྱི་ཆུས་གཏོར་ཞིང་། སུཾ་བྷའི་སྔགས་ཀྱིས་རས་རིས་ཀྱི་བགེགས་སྦྱང་བར་བྱའོ། །དེ་ནས་རས་རིས་སྭཱ་བྷཱ་ཝས་སྦྱངས་ནས། སྟོང་པའི་ངང་ལས། གཞན་ཡས་ཁང་གདན་དང་བཅས་པ་སྒྲུབ་ཐབས་བཞིན་ཡོངས་སུ་རྫོགས་པར་བསྐྱེད་དོ། །ལྷ་རྣམས་ཀྱང་ལྷག་མོས་ཙམ་གྱིས་བསྐྱེད་ལ། བདག་ཉིད་གཙོ་བོ་ཡབ་ཡུམ་གྱི་མཁའ་གསང་དང་གནས་ལྔར་བྱིན་གྱིས་བརླབས་ནས་སྙོམས་པར་ཞུགས་པའི་བདེ་བའི་སྒྲས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཞལ་དུ་ཞུགས་ཐུགས་ཁར་རྗེས་ཆགས་ཀྱི་མེས་ཞུ་བ་ཡུམ་གྱི་བྷ་གར་བབས་པའི་ཐིག་ལེ་ཆ་གཉིས་སུ་གྱུར་པའི་ཆ་གཅིག་གཞལ་ཡས་ཁང་གདན་དང་བཅས་པར་བསྐྱེད། ཆ་གཅིག་ཆ་སོ་གཉིས་སུ་གྱུར་པ་ཆོ་ག་གསུམ་གྱི་ལྷ་སོ་གཉིས་སུ་སྒྲུབ་ཐབས་བཞིན་བསྐྱེད་ནས། སོ་སོའི་འབྱིན་སྔགས་ཀྱིས་རིམ་པ་བཞིན་ཕྱུང་སྟེ། འཇིག་རྟེན་གྱི་ཁམས་ཀུན་ཏུ་སྤྲོས་ནས། སྤྱི་དང་ཁྱད་པར་གྱི་མཛད་པ་མཛད་ནས། ཚུར་འདུས་པ་དཀྱིལ་འཁོར་གྱི་ལྷ་སོ་སོ་ལ་ཐིམ་པར་བསམ། གཞལ་ཡས་ཁང་ཡང་ཕྱུང་སྟེ། སྤྲོས་པས་ཞིང་ཡོངས་སུ་དག་པར་བྱས་ནས། རྟེན་གྱི་དཀྱིལ་འཁོར་ལ་ཐིམ་པར་བསམ།

དེ་ནས་གཙོ་བོ་ཡབ་ཡུམ་གྱི་སྐུའི་དཀྱིལ་འཁོར་ས་བོན་གསལ་གདབ་ཅིང་། དཀྱིལ་འཁོར་པ་རྣམས་ཀྱི་ཡང་སྐུ་གསུང་ཐུགས་བྱིན་གྱིས་བརླབས་ནས། ཐམས་ཅད་ཀྱང་སེམས་དཔའ་གསུམ་བརྩེགས་སུ་བལྟས་ཏེ། རང་རང་གི་སྙིང་ཁར་ཟླ་བའི་དཀྱིལ་འཁོར་གྱི་སྟེང་དུ་རང་དང་འདྲ་བའི་ཡེ་ཤེས་སེམས་དཔའ་དང་། དེའི་སྙིང་ཁར་རང་རང་གི་ས་བོན་ཏིང་ངེ་འཛིན་སེམས་དཔའ་བསམ་མོ། །དེ་ནས་བགེགས་མཐར་བྱེད་ཀྱི་སྔགས་དང་ཏིང་ངེ་འཛིན་གྱིས་བགེགས་བསྐྲད་ནས། སྟ་གོན་གྱི་ལྷ་ལ་མཆོད་ཅིང་བསྟོད་དེ། རྡུལ་ཚོན་གྱི་དཀྱིལ་འཁོར་དང་གཉིས་སུ་མེད་པར་བྱའོ། །སླར་ཡང་ལྷ་རྣམས་ཀྱི་ཏིང་ངེ་འཛིན་སེམས་དཔའི་འོད་ཀྱིས། རང་བཞིན་གྱི་གནས་ནས་ཡེ་ཤེས་ཀྱི་དཀྱིལ་འཁོར་སྤྱན་དྲང་བར་བསམ་ཞིང་། རྡོ་རྗེ་ དྲིལ་བུ ་འཛིན་པས། མ་ལུས་འགྲོ་བའི་རང་བཞིན་མངོན་དུ་མཛད། །མི་བཟད་བདུད་ཀྱི་དཔུང་གིས་ཕྱག་བྱས་ཤིང་། །རང་བྱུང་མཐའ་ཡས་འགྲོ་བའི་རང་བཞིན་ཏེ། །སེམས་ཅན་སྙིང་པོ་གཅིག་གྱུར་འདིར་གཤེགས་ཤིག །ཅེས་ལན་གསུམ་བརྗོད་པའི་མཐར་ༀ་བཛྲ་ས་མཱ་ཡ་ཛཿཛཿཛཿཞེས་བརྗོད་ནས། རྡོ་རྗེ་བསྡུ་བའི་ཕྱག་རྒྱ་སེ་གོལ་གཏོག་ཅིང་། མདུན་གྱི་ནམ་མཁར་སྤྱན་དྲངས་པ་ལ། མཆོད་ཅིང་བསྟོད་ནས་སྒོ་བ་བཞིའི་སྔགས་དང་ཏིང་ངེ་འཛིན་དང་། ཕྱག་རྒྱ་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱ་བས་གཉིས་སུ་མེད་པར་བྱས་ལ་སླར་ཡང་དབང་བསྐུར་གྱི་ལྷ་སྤྱན་དྲངས་པ་ལ་མཆོད་ཅིང་བསྟོད་ནས་ༀ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ་ཞེས་པས་གསོལ་བ་བཏབ་པས། ༀ་སརྦ་ཏ་ཐཱ་ག་ཏ་ཨ་བྷི་ཥེཀྟ་ས་མ་ཡ་ཤྲི་ཡེ་ཧཱུྃ་ཞེས། དེ་བཞིན་གཤེགས་པ་རྣམས་ཀྱིས་བུམ་པའི་ཆུས་དབང་བསྐུར་བར་བསམ་ཞིང་། རིགས་བདག་གི་རྒྱས་གདབ་བོ། །དེ་ནས་ༀ་ཨཱཿབཛྲ་དྷྲི་དྷ་ཧཱུྃ་བཛྲ་ས་ཏྭ་ས་མ་ཡ་མ་ནུ་པ་ལ་ཡ་ཞེས་སོགས་ལྷ་སོ་སོའི་མཚན་སྔགས་སྔོན་དུ་འགྲོ་བའི་ཡི་གེ་བརྒྱ་པ་བརྗོད་པས་བྱིན་གྱིས་བརླབས་པར་བྱའོ། །

དེ་ནས་མཆོད་པ་ནི། རང་གཙོ་བོ་ལ་མར་མེ་གཅིག་ལས་གཉིས་ཆད་ཀྱི་ཚུལ་དུ་མི་བསྐྱོད་པར་བསྒོམ་ཧེ་རུ་ཀ་ཕྱག་གཉིས་པའི་རྣམ་པར་ཆད་ནས་ཤར་གྱི་ལྷ་སྣམ་གྱི་སྟེང་དུ་འདུག་སྟེ། མཆོད་པ་ཕུལ་བ་ལ་སོགས་པ་བྱེད་པར་བསམས་ནས། ཕྱི་དང་ནང་དང་ཡིད་ལས་བྱུང་བ་དང་། བསྟོད་པའི་མཆོད་པ་རྣམས་རྒྱ་ཆེར་བྱ་ཞིང་འདིར་འབུལ་བ་ས་སྐྱ་པའི་བླ་མ་གོང་མ་རྣམས་ཀྱི་ལག་ལེན་ཡིན་གསུངས།ལྷ་དང་ཆོས་སྐྱོང་མཁའ་འགྲོ་མ་རྣམས་གཏོར་མས་མཉེས་པར་བྱས་ནས། དཀྱིལ་འཁོར་ལ་ལྟ་བར་མི་དབང་བའི་འབྱུང་པོ་རྣམས་ལ་དཀྱིལ་འཁོར་གྱི་ཁང་པའི་ཕྱི་རོལ་ཏུ་གཏོར་མ་སྦྱིན་པར་བྱ་སྟེ། ཡེ་ཤེས་སེམས་དཔའ་སྤྱན་དྲངས་པའི་ཕྱི་བཞིན་འོངས་པའི་ཕྱོགས་སྐྱོང་དང་འབྱུང་པོ་རྣམས་སྐད་ཅིག་གིས་འོད་གསལ་དུ་བཅུག དེ་ལས་ལངས་ཏེགཏོར་ཆོག་ནས་འབྱུང་བ་ལྟར་བྱེད། འདུས་པའི་ལྷ་ཐབས་དང་ཤེས་རབ་ཀྱི་བདག་ཉིད་དུ་བསྐྱེད་ལ། དྲི་དང་མེ་ཏོག་ལ་སོགས་པས་བརྒྱན་པའི་གཏོར་མ། ནང་མཆོད་ལྟར་བྱིན་གྱིས་བརླབས་ལ། ༀ་ད་ཤ་དི་ཀ་བྱ་བ་སྠི་ཏེ་བྷྱ། ཨི་ཧ་ཨཱ་སྠི་ཏེ་བྷྱཿ ཙ་དེ་བ་ནཱ་ག་ཡཀྵ་ག་ན་དྷརྨ་ཨ་སུ་ར་ག་རུ་ཌ། ཀིནྣ་ར་མ་ཧོ་ར་ག་བྷུ་ད་པྲེ་ཏ་པི་ཤཱ་ཙི་ཀུམྦྷཎྜ་ཨུད་མ་དེ་ཨ་པ་སྨཱ་ར་ཨེ་ཏཱ་ར་གེ་ཨཱ་དི་བྷྱོ་བ་དཱ་པ་ཡཱ་མི་གྲི་ཧཱ་ཏཱ། པུ་ཁ་སཱཽ་མ་ན་སྱ་ལཱ་བྷི་ནོ་བྷ་ཝན་ཏུ་སྠ་ནཾ་ཙ་ནིར་ཨུ་པ་དྷ་བཾ་ཀུརྦནྟུ་སརྦ་བྷུ་ཏ་ཨི་ཥྛཱ་ནི་ན་ༀ་ཨཱཿཧཱུྃ་ཨི་དཾ་ཨ་མྲྀ་ཏ་པིཔྣཾ་བྷུ་ཀ་ཏྲ་མ་མ་ས་པ་རི་ཝཱ་ར་སྱ་ཤཱནྟིཾ་ཀུརྦནྟུ་སྭ་སྟི་སྭཱཧཱ། ཞེས་ལན་གསུམ་གྱི་རྗེས་ལ་ དྲིལ་བུ ་བཀྲོལ་ཞིང་། ༀ་ཕྱོགས་བཅུར་རྣམ་པར་གནས་རྣམས་དང་། །འདིར་ནི་ཀུན་ཏུ་གནས་པ་དང་། །ལྷ་དང་ཀླུ་དང་གནོད་སྦྱི་དང་། །དྲི་ཟ་ལྷ་མིན་ནམ་མཁའ་ལྡིང་། །མིའམ་ཅི་དང་ལྟོ་ཕྱེ་ཆེ། །འབྱུང་པོ་ཡི་དྭགས་ཤ་ཟ་དང་། །སྨྱོ་བྱེད་དང་ནི་བརྗེད་བྱེད་དང་། །གནོན་པོ་ལ་སོགས་པ་རྣམས་ལ། །གཏོར་མ་འབུལ་གྱིས་བསྣམས་ནས་ཀྱང་། །བདེ་དང་ཡིད་བདེ་ཐོབ་གྱུར་ཅིག ། གནས་འདིར་ཉེར་འཚེ་མེད་པར་མཛོད། །སངས་རྒྱས་ཀུན་གྱི་བྱིན་རླབས་ཀྱིས། །ༀ་ཨཱཿཧཱུྃ་གི་བདུད་རྩི་ཡི། །བཟའ་བ་ལ་ནི་ལོངས་སྤྱད་ནས། །བདག་ཅག་འཁོར་དང་བཅས་པ་ལ། །ཞི་དང་བཀྲ་ཤིས་མཛད་དུ་གསོལ། །ཞེས་བསྔོས་པས། ལྗགས་རྡོ་རྗེའི་སྦུ་གུ་ཅན་གྱིས་གསོལ་བས་མཉེས་ཤིང་ཚིམ་པར་བསམས་ལ། མཆོད་པས་མཆོད་དེ་ཕྲིན་ལས་བཅོལ་ནས རྡོ་རྗེ་འཆང་གིས་སངས་རྒྱས་ཀྱི་བསྟན་པ་འཛིན་པའི་གང་ཟག་རྣམས་སྐྱོང་བར་བཀའ་བསྒོས་པ་བཞིན་ཞལ་གྱིས་བཞེས་པའི་སྲུང་མ་དམ་ཚིག་ཅན་ཁྱེད་རྣམས་ཀྱིས་བདག་གིས་སེམས་ཅན་ཐམས་ཅད་ཀྱི་དོན་དུ་བཅོམ་ལྡན་འདས་དཔལ་གསང་བ་འདུས་པའི་དཀྱིལ་འཁོར་བཞེངས་ནས་སྒྲུབ་ཅིང་མཆོད་པ་དང་འཇུག་ཅིང་དབང་བླང་བ་ལ་དཀར་ཕྱོགས་ལ་མངོན་པར་དགའ་བ་རྣམས་ཀྱིས་བསྲུངས་ཞིང་བསྐྱབ་པ་དང་། བྱང་ཆུབ་མ་ཐོབ་ཀྱི་བར་དུ་སྡོང་གྲོགས་མཛོད་ཅིག དཀྱིལ་འཁོར་ཆེན་པོར་ལྟ་བར་མི་དབང་བའི་འབྱུང་པོའི་གནོད་པ་དང་། གདུག་པའི་བསམ་པ་འཆང་བ་རྣམས་འདིར་མ་འདུག་པར་སོང་ཞིག་གཤེགས་སུ་གསོལ་ཏེ་འབུད་དཀྲོལ་དང་བཅས་པས་གཏོར་མ་དོར་བར་བྱའོ། །དེ་ནས་དཀྱིལ་འཁོར་གྱི་ཁང་པར་ཞུགས་ཏེ།  དྲིལ་བུ ་སིལ་ཞིང་ཡི་གེ་བརྒྱ་པ་བརྗོད་ལ། དཀྱིལ་འཁོར་ལ་གཡས་ཕྱོགས་སུ་ལན་གསུམ་དུ་བསྐོར་བར་བྱའོ། །དཀྱིལ་འཁོར་གྱི་བྱ་བའོ། །

དེ་ནས་བདག་ཉིད་འཇུག་པའི་ཕྱིར། དངོས་སམ་ཡིད་ཀྱིས་ནུབ་ཕྱོགས་སུ་སོང་ལ། རྡོ་རྗེ་ཧཱུྃ་མཛད་ཀྱི་ཕྱག་རྒྱ་བཅས་ནས། ཤར་སྒོ་ཕྱེ་བར་བསམས་ལ་ༀ་བཛྲ་ཨུད་གྷ་ཊ་ཡཱ་ས་མཱ་ཡ་པྲ་བེ་ཤཱ་ཡ་ཧཱུྃ། ཞེས་བརྗོད་པས་ཤར་སྒོ་དབྱེའོ། །དེ་བཞིན་དུ་བྱང་ནས་ལྷོ་དང་། ཤར་ནས་ནུབ་དང་། ལྷོ་ནས་བྱང་གི་སྒོ་ཕྱེ་ལ། རང་ཉིད་ཤར་ཕྱོགས་སུ་གནས་ནས། དཀྱིལ་འཁོར་གྱི་གཙོ་བོ་བླ་མ་དང་ཐ་མི་དད་པར་བསམ་ལ། བླ་མའི་བྱ་བ་དང་། སློབ་མའི་བྱ་བ་རྣམས་དངོས་སུ་རང་གིས་བྱ་ཞིང་། གཙོ་བོ་ལས་ཆད་པའི་ཧེ་རུ་ཀ་ཕྱག་གཉིས་པས་དབང་རྫས་སྟེར་བ་སོགས་ལས་ཀྱི་རྡོ་རྗེའི་བྱ་བ་རྣམས་བྱེད་པར་བསམས་ནས། ཕྱི་དང་ནང་གི་དཀྱིལ་འཁོར་དུ་འཇུག་པ་སྔོན་དུ་འགྲོ་བ་ཅན་གྱི། དབང་བཞི་ཡོངས་སུ་རྫོགས་པར་བླང་ངོ་། །

དེ་ནས་རང་ཐལ་མོ་སྦྱར་ཏེ། སློབ་མ་ལ་གཞུག་པའི་ཕྱིར། བདེན་པའི་སྟོབས་བརྗོད་པར་བྱ་སྟེ། ཤེས་རབ་ཐབས་ཀྱི་དཀྱིལ་འཁོར་གྱི། །བདེན་པའི་བྱིན་རླབས་གང་ཡིན་པ། །བདེན་པ་དེ་ཡི་མགོན་བདག་ལ། ཁྱེད་ཀྱི་འདོད་པ་རབ་རྫོགས་མཛད། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་ཏུ་འབྱུང་། །དེ་བཞིན་ཉིད་ལས་ངེས་པར་སྐྱེས། །བདེན་པ་དེ་ཡིས་དཀྱིལ་འཁོར་ནི། །གཟུགས་བརྙན་གསལ་བར་སློབ་མ་རྣམས། །ཀུན་གྱིས་དྲི་མེད་མཐོང་བར་ཤོག ། ཅེས་ལན་གསུམ་བརྗོད་དོ། །སློབ་དཔོན་བདག་ཉིད་འཇུག་ཅིང་དབང་བླང་བའོ། །

དེ་ནས་དཔའ་བོ་དང་རྣལ་འབྱོར་མ་རྣམས་ཙ་རུའི་བཟའ་བས་ཚིམ་པར་བྱས་ནས། སློབ་མ་གཞུག་ཅིང་དབང་བསྐུར་བ་ནི། བླ་མ་ལྷ་ལ་གསོལ་བཏབ་དང་། །གདོང་གཡོགས་བཅིང་དང་འཕྲེང་བ་སྦྱིན། །གསང་དང་བྱིན་རླབས་འདོད་པ་དྲི། །བྱང་ཆུབ་སེམས་གཉིས་བསྐྱེད་པ་དང་། །གསང་བར་གདམས་ནས་ནང་དུ་གཞུག །ཕྱི་ཡི་འཇུག་པ་རྣམ་པ་བཅུ། །དེ་ལ་ཐོག་མར་ཁ་དང་གདོང་དག་པར་བཀྲུས་པའི་སློབ་མ་དཀྱིལ་འཁོར་གྱི་ཁང་པའི་ཕྱི་རོལ་ལམ་ཡོལ་བའི་ཕྱི་རོལ་དུ་རིམ་བཞིན་འཁོད་དེ། ཕྱག་དང་མཎྜལ་སྔོན་དུ་སོང་བས་ཐལ་མོ་སྦྱར་ནས། བླ་མ་ལ་གསོལ་བ་གདབ་པར་བྱ་སྟེ། མ་མཱ་ཀི་དང་རབ་སྦྱོར་བའི། །དགའ་ཆེན་ཁྱེད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་འཚལ། །ཅེས་ལན་གསུམ་བརྗོད་དོ། །བླ་མས་ཀྱང་། སློབ་མ་གཞུག་པའི་དོན་དུ། རྡོ་རྗེ་ དྲིལ་བུ ་འཛིན་པས། འོད་གསལ་བ་ལས་ཡང་དག་བྱུང་། །རྡོ་རྗེ་སེམས་དཔའ་བདེ་ཆེན་པོ། །གཟུགས་བརྙན་གྱི་ནི་དཔེ་ཡང་དེ། །དཀྱིལ་འཁོར་པས་ནི་དེ་དང་མཚུངས། །བདེན་པ་འདི་ཡིས་སློབ་མ་རྣམས། །ཐུགས་ཀྱི་དཀྱིལ་འཁོར་དག་ཏུ་གཞུག འཁོར་ལོ་རྫུ་འཕྲུལ་མ་ལུས་པ། །མཐོང་ནས་སྡིག་པ་མ་ལུས་སྤོང་། །དེ་བཞིན་གཤེགས་པ་ཀུན་གྱི་གནས། །རྡོ་རྗེ་ཡེ་ཤེས་སྒྲུབ་བྱེད་པ། །སྙིང་པོའི་དཀྱིལ་འཁོར་འདི་རུ་ནི། །བདག་གི་སློབ་མ་གཞུག་པར་བགྱི། །ཆོས་ཀྱི་དབྱིངས་ཀྱི་བྱིན་རླབས་དང་། །དམ་ཚིག་དྲན་པས་ཞུགས་པ་ལ། །དེ་བཞིན་གཤེགས་པ་ཐམས་ཅད་ཀྱིས། །ཕུན་སུམ་ཚོགས་པ་ཐམས་ཅད་སྩོལ། །ཅེས་ལན་གསུམ་གྱིས་དཀྱིལ་འཁོར་གྱི་ལྷ་ལ་གསོལ་ལ་གདབ་བོ། །

དེ་ནས་སྔོན་ཆད་མ་རིག་པ་དང་སྲེད་པའི་དབང་དུ་གྱུར་པས། དཀྱིལ་འཁོར་ཆེན་པོ་མ་མཐོང་བ་མཚོན་པའི་ཕྱིར། དར་དམར་པོ་ལ་ༀ་ཙཀྵུར་བྷནྡྷ་ཝ་ར་མཱ་ན་ཡ་ཧཱུྃ། པྲ་ཝེ་ཤ་བྷ་ག་ཝན་མཧཱ་སུ་ཁ་མོཀྵ་པུ་རྂ་སརྦ་སིདྡྷི་སུ་ཁ་པྲ་དྷྂ་པ་ར་མ་སུ་ཁ་ཏ་མ་སི་དྷ་ཛཿཧཱུྃ་བཾ་ཧོཿཔྲ་སི་དྷྱ་སྭ། ཞེས་པ་མངོན་པར་བསྔགས་པས་གདོང་བཅིང་། སློབ་མ་རྣམས་རྣམ་པར་སྣང་མཛད་དུ་བསྐྱེད་པ་ཨ་ཁཾ་ཝཱེ་ར་ཧཱུྃ་ཞེས་བརྗོད་ཅིང་མེ་ཏོག་གི་ཕྲེང་བ་རེ་ཡང་གཏད། བིགྷནྣ་ཏ་ཀྲི་ཀྱི་སྔགས་བརྗོད་ཅིང་ལས་ཐམས་ཅད་པའི་བུམ་པའི་ཆུས་བསངས་ལ། ལྕེའི་སྟེང་དུ་བདུད་རྩི་སྦྱིན་ཞིང་། ཡི་གེ་གསུམ་བརྗོད་པས་བྱིན་གྱིས་བརླབས་བོ། །དེ་ནས་སློབ་མ་སྣོད་དུ་རུང་མི་རུང་བརྟག་པའི་ཕྱིར། བུ་ཁྱོད་སུ་ཡིན་ཅི་ལ་དགའ། །ཞེས་དྲིས་ཤིང་། དེས་ཀྱང་། སྐལ་བཟང་བདག་བདེ་བ་ཆེན་པོ་ལའོ། །ཞེས་ལན་བཏབ། དེས་བུ་ལ་ཅི་ཞིག་བྱ། །ཞེས་དྲིས་པའི་ལན་དུ། སངས་རྒྱས་མཆོག་གི་དམ་ཚིག་གོ །ཞེས་ལན་འདེབས་སུ་གཞུག་གོ །དེ་ལྟར་སྣོད་དུ་རུང་བར་གྱུར་པའི་སློབ་མའི་སེམས་ཀུན་རྫོབ་དང་དོན་དམ་པའི་བདག་ཉིད་ཅན་གྱི་བྱང་ཆུབ་ཀྱི་སེམས་སུ་བྱིན་གྱིས་བརླབ་པའི་ཕྱིར། སློབ་མའི་སྙིང་གི་ནང་དུ། ཨ་ལས་བྱུང་བའི་ཟླ་བའི་དཀྱིལ་འཁོར་ཀུན་རྫོབ་བྱང་ཆུབ་ཀྱི་སེམས་སུ་དམིགས་པའི་སྟེང་དུ་རྡོ་རྗེ་དཀར་པོ་རྩེ་མོ་ལྔ་པ་འོད་འཕྲོ་བ་དོན་དམ་བྱང་ཆུབ་ཀྱི་སེམས་ཀྱི་ངོ་བོར་བསྒོམ་དུ་བཅུག་ལ། སྙིང་ཁར་སློབ་དཔོན་གྱི་རྡོ་རྗེ་བཞག་ནས། ༀ་སརྦ་ཡོ་ག་ཙིཏྟ་ཨུད་པ་དཱ་ཡ་མི་སུ་ར་ཏེ་ས་མ་ཡ་སྟྭྂ་ཧོ། སིདྡྷི་བཛྲ་ཡ་ཐ་སུ་ཁཾ་ཞེས་པས་སེམས་བསྐྱེད་ལ། སྤྱི་བོར་རྡོ་རྗེ་བཞག་ནས། དེང་ཁྱོད་དེ་བཞིན་གཤེགས་པ་ཐམས་ཅད་དང་། དཔའ་བོ་དང་རྣལ་འབྱོར་མ་ཐམས་ཅད་ཀྱི་རིགས་སུ་ཞུགས་ཀྱི། དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་ཆེན་དམ་པ་འདི། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་མ་མཐོང་བ་རྣམས་ལ་སྨྲ་བ་མི་བྱ་ཞིང་། དད་པ་དང་མི་ལྡན་པ་རྣམས་པ་ཡང་མ་ཡིན་ནོ། །ཞེས་གསང་བར་གདམས་ནས། སྒོ་བ་བཞི་ལ་རང་འདྲ་བའི་སྤྲུལ་པ་འཕྲོས་པས། སློབ་མ་རྣམས་དཀྱིལ་འཁོར་གྱི་ནང་དུ་བཅུག་པར་བསམ་ཞིང་སྒོ་བ་བཞིའི་སྔགས་སམ། ཨ་ཁཾ་བཱི་ར་ཧཱུྃ་ཞེས་བརྗོད་ནས། སློབ་མ་རྣམས་རྡོ་རྗེ་ལ་འཛིན་དུ་བཅུག་སྟེ། དཀྱིལ་འཁོར་གྱི་ཤར་སྒོ་ནས་ཞུགས་ཏེ། དཀྱིལ་འཁོར་གྱི་གཙོ་བོའི་མདུན་དུ་བཞག་པར་མོས་ཞིག་ཅེས་བསྒོ། ཡོལ་བའི་ཕྱི་རོལ་གྱི་ཆོ་གའོ། །

དེ་ནས་ནང་དུ་འཇུག་པའི་ཆོ་ག་ལ། ཕྱག་འཚལ་བ་དང་སྡོམ་པ་སྦྱིན། །དམ་ལ་བཞག་དང་ཡེ་ཤེས་དབབ། །མེ་ཏོག་དོར་དང་དཀྱིལ་འཁོར་བསྟན། །ནང་དུ་འཇུག་པ་རྣམ་པ་དྲུག །དེ་ལ་ཐོག་མར་དཀྱིལ་འཁོར་གྱི་ཁང་པར་ཞུགས་པའི་སློབ་མས། དཀྱིལ་འཁོར་གྱི་གཙོ་བོ་ལ་རིམ་གྱིས་ཕྱག་བྱས་ཏེ། ཤར་ཕྱོགས་ནས་མི་བསྐྱོད་པའི་ང་རྒྱལ་དང་ལྡན་པས། པུས་མོ་གཉིས་ས་ལ་བཙུགས་ནས་ཐལ་མོ་སྤྱི་བོར་སྦྱར་ཏེ་ༀ་སརྦ་ཏ་ཐཱ་ག་ཏ་པཱུ་ཛ་ཨུ་པ་སྠཱ་ན་ཡ་ཨཏྨཱ་ནཾ་ནིཪྻ་ཏ་ཡཱ་མི་སརྦ་ཏ་ཐཱ་ག་ཏ་བཛྲ་ཨདྷི་ཏིཥྠ་སྭཱ་མཱཾ་ཞེས་བརྗོད་ནས། སྤྱི་བོ་ས་ལ་གཏུགས་པའི་ཕྱག་བྱས་པར་བསམས། དེ་ནས་ལྷོ་ཕྱོགས་ནས་རིན་འབྱུང་གི་ང་རྒྱལ་དང་ལྡན་པས་ཐལ་མོ་སྙིང་ཁར་སྦྱར་ནས། ༀ་སརྦ་ཏ་ཐཱ་ག་ཏ་པཱུ་ཛ་ཨ་བྷི་ཥེ་ཀ་ཡཱ་ཨཏྨཱ་ནཾ་ནིཪྻཱ་ཏ་ཡ་མི་སརྦ་ཏ་ཐཱ་ག་ཏ་བཛྲ་རཏྣ་ཨ་བྷི་ཥིཉྩ་མཱཾ་ཞེས་བརྗོད་ནས། དཔྲལ་བ་ས་ལ་གཏུགས་པའི་ཕྱག་བྱས་པར་བསམ། ནུབ་ཕྱོགས་ནས་འོད་དཔག་ཏུ་མེད་པའི་ང་རྒྱལ་གྱིས་ཐལ་མོ་དཔྲལ་བར་སྦྱར་ནས། ༀ་སརྦ་ཏ་ཐཱ་ག་ཏ་པཱུ་ཛ་པྲ་བར་ཏ་ནཱ་ཡ་ཨཏྨཱ་ནཾ་ནིཪྻ་ཏ་ཡ་མི་སརྦ་ཏ་ཐཱ་ག་ཏ་བཛྲ་དྷརྨཱ་པྲ་ཝ་ར་ཏ་ཡ་མཱཾ། ཞེས་བརྗོད་ནས་ཁ་ས་ལ་གཏུགས་པའི་ཕྱག་བྱས་པར་བསམ། དེ་ནས་བྱང་ཕྱོགས་ནས་དོན་ཡོད་གྲུབ་པའི་ང་རྒྱལ་གྱིས། རྡོ་རྗེ་ཐལ་མོ་སྙིང་ཁར་སྦྱར་ནས་ༀ་སརྦ་ཏ་ཐཱ་ག་ཏ་པཱུ་ཛ་ཀརྨཱ་ཎི་ཨཏྨཱ་ནཾ་ནིཪྻ་ཏ་ཡ་མི་སརྦ་ཏ་ཐཱ་ག་ཏ་བཛྲ་ཀརྨཱ་ཀུ་རུ་མཱཾ། ཞེས་བརྗོད་ནས་མགོ་བོ་ས་ལ་གཏུགས་པའི་ཕྱག་བྱས་པར་བསམ་མོ། །

དེ་ནས་སྟ་གོན་གྱི་སྐབས་ལྟར་རྒྱུན་བཤགས་སྔོན་དུ་འགྲོ་བའི་བྱང་ཆུབ་ཀྱི་སེམས་དང་། དམ་ཚིག་དང་སྡོམ་པ་རྒྱས་པར་བྱིན་པའམ། ཡང་ན། དཀོན་མཆོག་གསུམ་ལ་བདག་སྐྱབས་མཆི། །ཞེས་སོགས་ལན་གསུམ་བརྗོད་པ་ཙམ་གྱིས་བྱང་ཆུབ་ཀྱི་སེམས་སྦྱིན་ནོ། །དེ་ནས་ཡེ་ཤེས་དབབ་པ་གསང་དུ་གཞུག་པའི་ཕྱིར། དམ་ལ་བཞག་པར་བྱས་ཏེ། སློབ་མ་རྣམས་རྡོ་རྗེ་བསྡམས་པ་ལས། གུང་མོ་གཉིས་མཉམ་པ་བརྐྱངས་པས་མེ་ཏོག་གི་ཕྲེང་བ་བཟུང་བ། རྡོ་རྗེ་སེམས་མའི་ཕྱག་རྒྱ་བཅིངས་ནས། ས་མ་ཡ་སྟྭྂ་ཞེས་བརྗོད་དུ་བཅུག་ལ། སློབ་དཔོན་གྱིས་ཀྱང་ཕྱག་རྒྱ་དེ་ཉིད་སློབ་མའི་སྤྱི་བོར་བཞག་ཅིང་། ༀ་ས་ཏྭ་བཛྲི་ནི་ཨ་དྷི་ཏིཥྠ་སྭ་མཾ་ཧཱུྃ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱི། ཡེ་ཤེས་གང་གི་ཁྱོད་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་ཐོབ་པར་འགྱུར་ན། དངོས་གྲུབ་གཞན་ལྟ་སྨོན་ཀྱང་ཅི་དགོས། དེ་ལྟ་བུའི་རྡོ་རྗེ་ཡེ་ཤེས་ངས་ཁྱོད་ལ་བསྐྱེད་པར་བྱའོ། ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་ཀྱིས་མདུན་དུ་སྨྲ་བར་མ་བྱེད་ཅིག ཁྱོད་དམ་ཚིག་ཉམས་པར་གྱུར་ཏ་རེ། ཞེས་བརྗོད་པས་ཕན་ཡོན་གྱི་སྒོ་ནས་དམ་ལ་བཞག་པའོ། །

དེ་ནས་ཕྱག་རྒྱ་དེ་ཉིད་སྙིང་ཁར་གཏུགས་ལ། རྡོ་རྗེ་སེམས་དཔའ་དེང་ཁྱོད་ཀྱིས། །སྙིང་ལ་ཡང་དག་ཞུགས་པར་གྱུར། །ༀ་བཛྲ་ས་ཏྭ་ཧཱུྃ། གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཞེས་བརྗོད་ནས། ཡང་ཕྱག་དེ་ཉིད་སྤྱི་བོར་གཏུགས་ལ། འདི་ནི་ཁྱེད་དམ་ཚིག་གི་རྡོ་རྗེ་སྟེ། གལ་ཏེ་ཚུལ་འདི་སུ་ཡང་རུང་བ་ལ་སྨྲས་ན། འདིས་ཁྱོད་ཀྱི་མགོ་བོ་འགས་པར་འགྱུར་རོ། །ཞེས་བརྗོད་པ་ནི་ཉེས་དམིགས་ཀྱི་སྒོ་ནས་དམ་ལ་བཞག་པའོ། །

དེ་ནས་ཐོད་པར་གནས་པའི་བདུད་རྩིའི་ཆུ་ལ་ༀ་ཨཱཿཧཱུྃ་གིས་མངོན་པར་བསྔགས་པ་འཐུང་དུ་བཅུག་ལ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་འགྲུབ་པ་ཡི། །རྡོ་རྗེ་བདུད་རྩིའི་ཆུ་ཐུངས་ཤིག །ༀ་བཛྲ་ཨུ་ད་ཀཋཿ ཞེས་བརྗོད་པ་ནི་ཕན་ཡོན་དང་ཉེས་དམིགས་གཉིས་ཀའི་སྒོ་ནས་དམ་ལ་བཞག་པའོ། །དེ་ནས་སློབ་མའི་ལག་པ་གཡས་པ་ནས་བཟུང་བའམ། སྤྱི་བོར་རྡོ་རྗེ་བཞག་ལ། དེང་ཕྱིན་ཆད་ཁྱོད་ཀྱིས་ཕྱག་ན་རྡོ་རྗེ་ང་ཡིན་གྱི། ངས་འདི་བྱོས་ཤིག་ཅེས་བརྗོད་པ་གང་ཡིན་པ་དེ་བྱ་དགོས་སོ། །ཁྱོད་ཀྱི་ང་ལ་བརྙས་པར་མ་བྱེད་ཅིག གལ་ཏེ་བྱས་ན། མི་བདེ་བ་མ་སྤངས་པར་ཤི་བའི་དུས་བྱས་ནས་དམྱལ་བར་ལྷུང་བར་གྱུར་ཏ་རེ། ཞེས་བརྗོད་པ་ནི། སློབ་དཔོན་གྱི་བཀའ་གཉན་པའི་སྒོ་ནས་དམ་ལ་བཞག་པའོ། །

དེ་ནས་ཡེ་ཤེས་དབབ་པའི་ཕྱིར། སློབ་མས་མེ་ཏོག་དང་བཅས་པའི་ཐལ་མོ་སྦྱར་ནས། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ། རྡོ་རྗེ་སེམས་དཔའ་བདག་ལ་དབབ་པར་མཛོད་ཅིག ཅེས་ལན་གསུམ་བརྗོད་དུ་གཞུག་གོ །དེ་ནས་སློབ་མ་རྣམས་ཙོག་པུར་གནས་ཏེ། རྡོ་རྗེ་སེམས་མའི་ཕྱག་རྒྱ་སྙིང་ཁར་འཆང་དུ་བཅུག་ལ། མངོན་བྱང་ལྔས་སློབ་མ་འོད་དཔག་ཏུ་མེད་པར་བསྐྱེད་ནས། ཡན་ལག་ཐམས་ཅད་ལ་ཡི་གེ་ཨ་དམར་པོ་བཀོད་དེ། ལུས་ཀྱི་ནང་སྟོང་པར་བསྒོམ་པའི་སྙིང་ཁར། ལྃ་ལས་སའི་དཀྱིལ་འཁོར་སེར་པོ་གྲུ་བཞི་པ་རྡོ་རྗེ་རྩེ་གསུམ་པས་མཚན་པ། ལྟེ་བར་བྃ་ལས་ཆུའི་དཀྱིལ་འཁོར་ཟླུམ་པོ་བུམ་པས་མཚན་པ། མདོམ་དུ་རྂ་ལས་མེའི་དཀྱིལ་འཁོར་གྲུ་གསུམ་འབར་བས་མཚན་པ། རྐང་པའི་འོག་ཏུ་ཡྂ་ལས་རླུང་གི་དཀྱིལ་འཁོར་ལྗང་ཁུ་གཞུའི་དབྱིབས་ལྟ་བུ་བ་དན་གྱིས་མཚན་པ། རྐང་པའི་མཐིལ་དུ་ཛྷཻཿདམར་པོ་མེའི་རང་བཞིན། སྙིང་གི་ནང་དུ་ཧཱུྃ་སྔོན་མོ། མགྲིན་པར་ཨ་དམར་པོ། སྤྱི་བོར་ཧྂ་དཀར་པོ་རྣམས་དམིགས་ནས། འོག་གི་རླུང་གཡོས་པས། ཛྷཻཿགཉིས་པོ་མེ་འབར་བའི་རྐང་པའི་ནང་ནས་སོང་སྟེ། མདོམ་གི་མེའི་དཀྱིལ་འཁོར་དང་འདྲེས་ནས་ཆེར་འབར་བས། ལུས་ཐམས་ཅད་གང་ནས་སྡིག་པ་དང་རྣམ་རྟོག་ཐམས་ཅད་བསྲེག ལྟོ་བའི་ཆུ་ཁོལ་ཞིང་སྙིང་ཁའི་ས་བསྲེགས་ཏེ་ཧཱུྃ་ལ་སོགས་པའི་ཡི་གེ་གསུམ་ལས་འོད་འཕྲོས་པས། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་རྒྱུད་བསྐུལ་ནས། སློབ་མའི་ལུས་ལ་ཆར་ཆེན་པོ་ལྟར་བབས་ཏེ་རོ་གཅིག་ཏུ་གྱུར་པས། ལུས་ངག་ཡིད་གསུམ། སངས་རྒྱས་ཀྱི་སྐུ་གསུང་ཐུགས་རྡོ་རྗེའི་རང་བཞིན་དུ་གྱུར་པར་བསམས་ལ། སློབ་དཔོན་གྱིས་རྡོ་རྗེ་སེམས་མའི་ཕྱག་རྒྱ་སློབ་མའི་སྙིང་ཁར་བཞག་ལ། འདི་ཁྱོད་དམ་ཚིག་རྡོ་རྗེ་སྟེ། །རྡོ་རྗེ་སེམས་དཔའ་ཞེས་བྱ་གང་། །རྡོ་རྗེ་ཡེ་ཤེས་བླ་ན་མེད། །དེང་ནི་ཁྱོད་ལ་འབེབས་པར་མཛད། །ༀ་བཛྲ་ཨ་ཝེ་ཤ་ཡ་ཨཿཨཿཨཿཨཿ ཞེས་བརྗོད་ནས། གུ་གུལ་གྱིས་བདུག་ཅིང་རོལ་མོའི་སྒྲ་དང་བཅས་པས་དབབ་བོ། །གལ་ཏེ་མ་ཕེབས་ཀྱང་བརྟན་པར་བྱ་བའི་ཕྱིར། ཧཱུྃ་ཨ་ཧའི་ཡི་གེ་གསུམ་རིམ་པ་བཞིན་དུ། མི་བསྐྱོད་པ་འོད་དཔག་མེད། རྣམ་སྣང་ཡབ་ཡུམ་དུ་དམིགས་ཏེ་སྙོམས་པར་ཞུགས་པའི་བདེ་བའི་སྒྲས་རིགས་གསུམ་གྱི་དེ་བཞིན་གཤེགས་པ་རྣམས་བཀུག་སྟེ་ཞལ་དུ་ཞུགས་ནས་སྐུའི་དབྱིབས་བརྒྱུད་དེ་སྦྱོར་མཚམས་ནས། བྱང་སེམས་སྔོ་དམར་དཀར་པོའི་རྣམ་པར་བབས་ནས། ལུས་ཐམས་ཅད་ཁེངས་ནས། བདེ་བ་ཆེན་པོའི་རང་བཞིན་དུ་གྱུར་པར་བསམ་ནས། རོལ་མོའི་སྒྲ་དང་བཅས་པས། ཨ་ཝེ་ཤ་ཡ་སྟཾ་བྷ་ཡ་ཏ་ར་ར་ར། ཙཱ་ལ་ཡ་ཙཱ་ལ་ཡ་ཧཱུྃ་ཨཿཧཿཛྷཻཿཞེས་དྲག་ཏུ་བརྗོད་ཅིང་དབབ་བོ། །ཕེབས་ན་འདར་བ་དང་འཕར་བ་ལ་སོགས་པའི་སྐུའི་རྟགས། སྨྲ་བ་དང་རྒོད་པ་སོགས་གསུང་གི་རྟགས། བདེ་བ་དང་མི་རྟོག་པ་སོགས་ཐུགས་ཀྱི་རྟགས་འབྱུང་ངོ། །

དེ་ནས་སྤྱི་བོར་རྡོ་རྗེ་བཞག་སྟེ། ཏིཥྠ་བཛྲ་ཞེས་བརྗོད་པས་བརྟན་པར་བྱའོ། །དེ་ནས་མེ་ཏོག་དོར་བར་བྱ་བའི་ཕྱིར། སློབ་མས། བླ་མ་ལ་ཕྱག་དང་མེ་ཏོག་ཕུལ་བ་སྔོན་དུ་འགྲོ་བས། རྡོ་རྗེ་སེམས་མའི་ཕྱག་རྒྱས་མེ་ཏོག་གི་ཕྲེང་བ་བཟུང་ནས། དཀྱིལ་འཁོར་གྱི་ཤར་ཕྱོགས་སུ་ལངས་ནས་འཁོད་པ་ལ། ལྟས་བརྟག་པའི་ཕྱིར་ནམ་མཁའི་ཁ་དོག་དྲིས་ཏེ། དཀར་པོར་སྣང་བས་ཞི་བ། སེར་པོ་རྒྱས་པ། དམར་པོ་དབང་། ནག་པོ་མངོན་སྤྱོད། ལྗང་ཁུ་དང་ཁྲ་བོས་ཕྲིན་ལས་སྣ་ཚོགས་འགྲུབ་པར་ལུང་བསྟན་ལ། སློབ་དཔོན་གྱིས་རྡོ་རྗེ་ དྲིལ་བུ ་འཛིན་པས་འདི་སྐད་ཅེས། ཡང་དག་དཀྱིལ་འཁོར་འདི་རུ་ནི། །བདག་གི་སློབ་མ་གཞུག་པར་བགྱི། །བསོད་ནམས་ཇི་བཞིན་ལྷ་རྣམས་ཀྱི། །རིགས་ཀྱི་རིམ་པ་དེ་བཞིན་ཤོག ། ཇི་ལྟར་འདི་ནི་འགྲུབ་འགྱུར་བའི། །གང་གི་རིགས་ཀྱི་སྣོད་གྱུར་དང་། །ཇི་ལྟའི་བསོད་ནམས་མཐུ་ཡོད་པ། །དཀྱིལ་འཁོར་འདིར་ནི་དེ་བཞིན་ཤོག །ཅེས་བདེན་པའི་སྟོབས་བརྗོད་པས། དཀྱིལ་འཁོར་ཆེན་པོ་འདིའི་ལྷ་སུམ་ཅུ་སོ་གཉིས་པོ་ཐམས་ཅད་གཙོ་བོ་གཅིག་གི་ཡེ་ཤེས་ཀྱི་རྣམ་འཕྲུལ་ཡིན་པས་བཟང་ངན་མེད་ཀྱི། རང་གི་རིགས་ཀྱི་ལྷ་གང་ཡིན་པ་དེ་ལ་འབབ་པར་གྱུར་ཅིག་སྙམ་པ་གྱིས། མེ་ཏོག་དོར་ཞིག་ཅེས་སྒོས་ལ། ཏིཥྠ་བཛྲ་ཌྷི་ཌོ་མེ་བྷ་ཝ་ཤཱ་ཤྭ་ཏོ་མེ་བྷ་ཝ་ཧྲི་ད་ཡ་མེ་ཨ་དྷི་ཏིཥྠ་སརྦ་སིདྡྷི་མེ་པྲ་ཡཙྪ་ཧཱུྃ་ཧཿཧཿཧཿ ཧཿཧོ་ༀ་ཨཿཁཾ་ཝཱི་ར་ཧཱུྃ། པྲ་ཏིཙྪ་ཀུ་སུ་མ་ཨན་ཛ་ལི་ནཱ་ཐ་ཧོཿཞེས་པའམ། ༀ་པྲ་ཏིཙྪ་བཛྲ་ཧོཿཞེས་བརྗོད་དེ། དཀྱིལ་འཁོར་གྱི་དབུས་སུ་དོར་ནས། གང་ལ་ཕོག་པ་དེའི་རིགས་སུ་ཤེས་པར་བྱ་ཞིང་། དེའི་གནས་ཀྱིས་དངོས་གྲུབ་ཀྱི་མཚན་མ་ཤེས་པར་བྱ་སྟེ། གཙུག་ཏོར་ལ་ཕོག་པས་མཆོག་གི་དངོས་གྲུབ་དང་། ཞལ་ལ་སྔགས་ཀྱི་དངོས་གྲུབ་དང་། སྐུ་ལ་ཕོག་པས་གྲུབ་པ་བརྒྱད་དང་། སྐུ་དང་ཉེ་བས་དངོས་གྲུབ་མྱུར་ཞིང་། རིང་བས་རིང་ལ། གཉིས་ཀྱི་བར་དུ་ལྷུང་ན་གང་ཉེ་བའི་ཕྱོགས་སུ་བསྡུ་ཞིང་། གལ་ཏེ་དེ་དག་ལ་མ་ཕོག་ན་ལན་གསུམ་བསྐྱར་རོ། །

གསུམ་པ་ལ་ཡང་མ་ཕོག་ན། སྐལ་བ་མེད་པའི་ཕྱིར། ཕྱིར་གཏང་ངོ་། ། སྐལ་བ་དང་ལྡན་པ་རྣམས་ཀྱིས་མེ་ཏོག་དེ་ཉིད་ཀྱིས་དབང་བསྐུར་བར་བསམ་ཞིང་། ལྷ་དེའི་སྔགས་སྔོན་དུ་འགྲོ་བའི་པྲ་ཏི་གྷིཧྞ་དྂ། ཨི་མཾ་ས་ཏྭ་མཧཱ་བ་ལ་ཞེས་བརྗོད་ནས་མགོ་ལ་བཅིང་ངོ་། །མེ་ཏོག་དོར་བའོ། །དེ་ནས་དཀྱིལ་འཁོར་བསྟན་པའི་ཕྱིར། སློབ་མའི་མིག་འབྲས་གཉིས་ༀ་དུ་བསྒོམ་དུ་བཅུག་ལ། རྡོ་རྗེ་སེམས་དཔའ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་འགྱུར་བ། །རྡོ་རྗེའི་མིག་ནི་བླ་ན་མེད། །ཧེ་བཛྲ་པ་ཤྱ་ཞེས་བརྗོད་ནས་གདོང་གཡོགས་བཀྲོལ་ལ། དཀྱིལ་འཁོར་འདི་ལ་ལྟོས་ཤིག་དང་། །ད་ནི་དད་པ་རབ་དུ་བསྐྱེད། ཁྱོད་ནི་སངས་རྒྱས་རིགས་སུ་སྐྱེས། །སྔགས་དང་ཕྱག་རྒྱས་བྱིན་གྱིས་བརླབས། །ཞེས་བརྗོད་ནས་རྟེན་དང་བརྟེན་པར་བཅས་པའི་དཀྱིལ་འཁོར་རྒྱས་པར་བསྟན་པར་བྱའོ། །དེ་ནས་དབང་བསྐུར་བ་ནི། དང་པོ་བུམ་པའི་དབང་ཡིན་ཏེ། །གཉིས་པ་གསང་བའི་དབང་ཡིན་ནོ། །གསུམ་པ་ཤེས་རབ་ཡེ་ཤེས་ཏེ། །བཞི་པ་དེ་ཡང་དེ་བཞིན་ནོ། །དང་པོ་བུམ་པའི་དབང་ལ་ཡང་། །ཆུ་དང་ཅོད་པན་རྡོ་རྗེ་དང་། །དྲིལ་བུ་མེ་དང་མེ་ལོང་དང་། །བརྟུལ་ཞུགས་རྡོ་རྗེ་སློབ་དཔོན་དང་། །རྗེས་གནང་དང་ནི་ལུང་བསྟན་དང་། །དེ་བཞིན་དུ་ནི་དབུགས་དབྱུང་བ། །བཅུ་གསུམ་བུམ་པའི་དབང་ཡིན་ནོ། །

དེ་ལ་ཐོག་མར་དཀྱིལ་འཁོར་དུ་བཅུག་པའི་སློབ་མ་རྣམས་ཀྱིས། བླ་མ་ལ་ཕྱག་དང་མཎྜལ་སྔོན་དུ་འགྲོ་བས། མེ་ཏོག་དང་བཅས་པའི་ཐལ་མོ་སྦྱར་ནས། བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་བསྩལ་བ་ལྟར། །བདག་ཀྱང་བསྐྱབ་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཅེས་གསོལ་བ་འདེབས་སུ་བཅུག་ནས། མདུན་དུ་གནས་པ་ལ། དཀྱིལ་འཁོར་གྱི་ཁྲོ་བོ་ལས་ཁྲོ་བོའི་སྤྲུལ་པ་དུ་མ་སྤྲོས་པས། སློབ་མའི་བགེག་དང་བྱུར་རྣམས་བསལ་བར་བསམ་ཞིང་། བགེག་མཐར་བྱེད་ཀྱི་སྔགས་དང་། ལས་ཐམས་ཅད་པའི་བུམ་པའི་ཆུས་བསང་ལ། བྱུར་དང་སྐལ་བ་ངན་པ་རྣམས་ཏིལ་ལམ་ཡུངས་དཀར་ལ་བསྟིམ་ལ། གཡས་ཕྱོགས་ནས་བསྐོར་ཞིང་། ༀ་སརྦ་པཱ་པྂ་ད་ཧ་ན་བཛྲཱ་ཡ་བཛྲ་སྭ་སྱ་སརྦ་པ་པཾ་ད་ཧ་ན་ཡེ་སྭཱཧཱ། ཞེས་བརྗོད་ལ་མེར་དོར་ནས། བགེག་མཐར་བྱེད་ཀྱིས་མངོན་པར་བསྔགས་པའི་ཆུ། རྡོ་རྗེ་ཁུ་ཚུར་གྱིས་བླངས་པས། གཡོན་ནས་བསྐོར་ཞིང་། དྲི་མ་རྣམས་བཀྲུས་པར་བསམས་ལ། ཧཱུྃ་ཊ་ཊི་ཊ་ཕཊ་ཅེས་བརྗོད་ནས་དོར་ལ། སྟ་གོན་གྱི་སྐབས་ལྟར་སྐྱོར་ཆུ་བླུད་དོ། །དེ་ནས་སློབ་དཔོན་རང་ཞེ་སྡང་རྡོ་རྗེ་ཡབ་ཡུམ་དུ་དམིགས་ཏེ། བུམ་ཆུས་བསངས་པའི་སློབ་མ་ཞལ་དུ་ཞུགས། འདོད་ཆགས་ཆེན་པོའི་མེས་བཞུ་བ། རྡོ་རྗེའི་ལམ་ནས་ཡུམ་གྱི་བྷ་གར་བབས་པའི་ཐིག་ལེ་ཧཱུྃ་ལས་རྡོ་རྗེ་ཧཱུྃ་གིས་མཚན་པ་མི་བསྐྱོད་པར་ཡབ་ཡུམ་དུ་གྱུར་པ་ལ། བླ་མའི་སྙིང་ཁའི་ས་བོན་གྱིས། ཕྱོགས་བཅུའི་རིགས་ལྔ་ཡབ་ཡུམ་འཁོར་དང་བཅས་པ་སྤྱན་དྲངས་ལ་མཆོད་དེ། རྡོ་རྗེ་ཅན་གྱི་སངས་རྒྱས་ལ། །འགྲོ་བ་བསྐྱབ་པའི་ཆེད་དུ་དབང་། །ཡོན་ཏན་འབྱུང་གནས་ཇི་ལྟར་བསྩལ། །དེ་ལྟར་འདི་ལ་སྩལ་དུ་གསོལ། །ཞེས་གསོལ་བ་བཏབ་པས། འདིར་དབང་རྫས་དང་བདག་བསྐྱེད་ལ་སློབ་མ་གཉིས་གཉིས་པའི། རིགས་ལྔ་ཡབ་ཡུམ་སྙོམས་པར་ཞུགས་པ། འདོད་ཆགས་ཆེན་པོའི་མེས་ཞུ་བ། རང་གི་སྤྱི་བོ་ནས་ཞུགས་ཏེ། རྡོ་རྗེའི་ལམ་ནས་ཐོན་པའི་བདུད་རྩིའི་དབང་བསྐུར་བར་བསམ་པ་ནི། ནང་ཏིང་ངེ་འཛིན་གྱི་དབང་ངོ་། །

དེ་ནས་སྦྱོར་མཚམས་ནས་ཕྱུང་ནས། ལུས་དཀྱིལ་གསལ་བཏབ་སྟེ། ཡེ་ཤེས་པ་བསྟིམ་པ་ལ། ཕྱིའི་དབང་བསྐུར་བར་བྱ་སྟེ། དེ་ཡང་རྣམ་རྒྱལ་བུམ་པས་བསང་སྦྱངས། སྟོང་པའི་ངང་ལས། ཧཱུྃ་དང་རྡོ་རྗེ་མི་བསྐྱོད་པར་ཡབ་ཡུམ་དུ་བསྐྱེད་པ་གྱུར་པ་ལ། སྐུ་གསུང་ཐུགས་བྱིན་གྱིས་བརླབས། ཡེ་ཤེས་པ་བཅུག དབང་བསྐུར། མི་བསྐྱོད་པས་རྒྱས་བཏབ་པ་སྟེ་མཆོད་ལ། དེ་ཞུ་བུམ་པའི་ཆུར་བལྟས་ལ། དཔོན་སློབ་གཉིས་ཀས་དཀྱིལ་འཁོར་གྱི་ལྷ་ནམ་མཁའི་ཁམས་གང་བར་བཞུགས་པའི་དེ་བཞིན་གཤེགས་པ་རྣམས་ཀྱིས་དབང་བསྐུར་བའི་དགོངས་པ་མཛད། རིག་མ་རྣམས་ཀྱིས་རིན་པོ་ཆེའི་བུམ་པ་ཡེ་ཤེས་ཀྱི་བདུད་རྩིས་གང་བས་སློབ་མའི་སྤྱི་བོ་ནས་དབང་བསྐུར། བྱང་ཆུབ་སེམས་དཔའ་རྣམས་ཀྱིས་བཀྲ་ཤིས་ཀྱི་ཚིགས་སུ་བཅད་པ་བརྗོད། ཁྲོ་བོ་རྣམས་ཀྱིས་བགེགས་བསྐྲད། མཆོད་པའི་ལྷ་མོ་རྣམས་ཀྱིས་མཆོད་པའི་ༀ་བཛྲ་ཨ་དཪྴ་ཛྙཱ་ན་ཨ་བྷི་ཥིཉྩ་ཧཱུྃ་བརྟན་པའི་ཕྱིར།ཆར་འབེབས་པར་བསམས་ནས། དངོས་སུ་སློབ་དཔོན་ལས་ཀྱི་རྡོ་རྗེ་དང་བཅས་པས་བུམ་པ་བཟུང་ཞིང་། ཏིལ་གྱི་གང་བུ་ལྟར་གང་བའི། །རྒྱལ་བ་བུམ་པ་འཛིན་པ་ཡིས། །དེ་རིང་ཁྱོད་ལ་དབང་བསྐུར་ཏེ། །དེ་ལྟར་ཤེས་ནས་ཡིད་བདེར་གྱིས། །ཞེས་བརྗོད་ལ། བུམ་པའི་ཁ་རྒྱན་གྱིས་རྣམ་རྒྱལ་བུམ་པའི་ཆུ་བླངས་ནས་སྤྱི་བོར་བླུག་ཅིང་། དབང་བསྐུར་རྡོ་རྗེ་ཆེན་པོ་འདི། ཁམས་གསུམ་པ་ཡི་ཕྱག་བྱས་པས། །སངས་རྒྱས་ཀུན་གྱི་གསང་གསུམ་པའི། །གནས་ལས་བྱུང་བ་སྦྱིན་པར་བྱ། །ༀ་མཧཱ་སུ་ཁ་བཛྲ་ས་ཏྭ་ཨ་བྷི་ཥེ་ཀ་ཏ་ཨ་བྷི་ཥིཉྩ་མི་སརྦ་ཏ་ཐཱ་ག་ཏ་ཨ་དྷི་པ་ཏི་ཏྭེ་ནོ་པ་དྷིཉྫོ་བྷ་བ། བཀྲ་ཤིས་གང་ཞིག་སེམས་ཅད་ཀུན་གྱི་སྙིང་ལ་གནས། །ཀུན་གྱི་བདག་ཉིད་རིགས་ཀུན་གྱི་ནི་བདག་པོ་མཆོག །མ་ལུས་སེམས་ཅན་སྐྱེད་བྱེད་བདེ་བ་ཆེན་པོ་སྟེ། །བཀྲ་ཤིས་དེས་ནི་དེ་རིང་ཁྱེད་ལ་དབང་རབ་བསྐུར། །བཀྲ་ཤིས་གང་ཞིག་མ་ལུས་རྡོ་རྗེའི་རིགས་དང་ལྡན། །སྡང་བས་ཟིལ་མནན་སྐྱེ་བོ་རྣམ་པར་སྦྱོང་བྱེད་པ། །མི་བསྐྱོད་མགོན་པོ་ཞེས་བྱ་མཚན་གསོལ་དེ་ཡིས་ནི། །བཀྲ་ཤིས་དེས་ནི་དེ་རིང་ཁྱེད་ལ་དབང་རབ་བསྐུར། །བཀྲ་ཤིས་གང་ཞིག་མ་ལུས་འཁོར་ལོའི་རིགས་དང་ལྡན། །རྣམ་པར་སྣང་མཛད་འཁོར་བའི་སྡུག་བསྔལ་རྟག་འཕྲོག་ཅིང་། །རྨོངས་པ་ཟིལ་མནན་སྐྱེ་བོ་ཡོངས་སུ་སྦྱོང་མཛད་པ། །བཀྲ་ཤིས་དེས་ནི་དེ་རིང་ཁྱོད་ལ་དབང་རབ་བསྐུར། །བཀྲ་ཤིས་གང་ཞིག་མ་ལུས་རིན་ཆེན་རིགས་དང་ལྡན། །ཕོངས་པའི་སྡུག་བསྔལ་ཡོངས་སུ་སྒྲོལ་བར་རབ་བརྩོན་ཞིང་། ཁེངས་པ་ཟིལ་མནན་འགྲོ་བ་ཡོངས་སུ་སྦྱོང་མཛད་པ། །བཀྲ་ཤིས་དེས་ནི་དེ་རིང་ཁྱེད་ལ་དབང་རབ་བསྐུར། །བཀྲ་ཤིས་གང་ཞིག་མ་ལུས་པདྨའི་རིགས་དང་ལྡན། །འཇིག་རྟེན་དབང་ཕྱུག་སྲིད་པའི་དྲ་བ་འཇོམ་པ་པོ། །ཆགས་པས་ཟིལ་མནན་འགྲོ་བ་ཡོངས་སུ་སྦྱོང་མཛད་པ། །བཀྲ་ཤིས་དེས་ནི་དེ་རིང་ཁྱོད་ལ་དབང་རབ་བསྐུར། །བཀྲ་ཤིས་གང་ཞིག་མ་ལུས་ལས་ཀྱི་རིགས་དང་ལྡན། །བརྩེ་བའི་བདག་ཉིད་ལོག་པར་ལྟ་བ་ངེས་པར་སྤོང་། །དེ་སྦྱོར་ཐབས་སྟོན་དེ་ནི་ཡོངས་སུ་སེལ་མཛད་པ། །བཀྲ་ཤིས་དེས་ནི་དེ་རིང་ཁྱོད་ལ་དབང་རབ་བསྐུར། །སངས་རྒྱས་རྡོ་རྗེའི་དབང་བསྐུར་བས། །དེ་རིང་ཁྱོད་ལ་དབང་བསྐུར་རོ། །ༀ་ཨཱཿཧཱུཾ་བཛྲ་ཨ་བྷི་ཥིཉྩ་ཧཱུྃ་སུ་ར་ཏ་སྟྭཾ་ཨ་ཧཾ་ཞེས་བརྗོད་ཅིང་། བུམ་པའི་ཆུས་དབང་བསྐུར་བས། ལུས་ཐམས་ཅད་ཡེ་ཤེས་ཀྱི་བདུད་རྩིས་གང་། སྡིག་སྒྲིབ་ཐམས་ཅད་དག མི་བསྐྱོད་པས་དབུ་བརྒྱན་པར་བསམ་ནས། མཆོད་པ་རྣམས་ཀྱིས་མཆོད་དེ། ཁྱོད་ཀྱི་དབང་ལྔ་ལས་ཆུའི་དབང་ཐོབ། ཉོན་མོངས་པ་ལྔ་ལས་ཞེ་སྡང་གི་དྲི་མ་སྦྱངས། ཕུང་པོ་ལྔ་ལས་རྣམ་པར་ཤེས་པའི་ཕུང་པོ་གནས་གྱུར། ཡེ་ཤེས་ལྔ་ལས་ཆོས་ཀྱི་དབྱིངས་ཀྱི་ཡེ་ཤེས་མངོན་སུམ་དུ་གྱུར། དེ་བཞིན་གཤེགས་པ་ལྔ་ལས་མི་བསྐྱོད་པའི་ས་བོན་དང་བག་ཆགས་རྒྱུད་ལ་བཞག མི་བསྐྱོད་པ་དང་དེ་དང་འབྲེལ་བའི་ལས་བསྒྲུབ་པ་ལ་དབང་ངོ་ཞེས་དོན་ལྔས་རྟོགས་པ་བསྐྱེད་པར་བྱའོ། །དེ་ནས་ཅོད་པན་གྱི་དབང་བསྐུར་བའི་ཕྱིར། སློབ་མ་ཡིད་ཀྱིས་སམ་དངོས་སུ་དཀྱིལ་འཁོར་ལ་བསྐོར་བ་བྱེད་དུ་བཅུག་ནས། བདེ་བ་ཆེན་པོ་འདོད་ཆགས་ཆེ། །རྡོ་རྗེ་ཆེན་པོ་ནོར་ཆེ་བ། །ཤེས་རབ་ཆེན་པོ་ཡེ་ཤེས་ཆེ། །རྡོ་རྗེ་སེམས་དཔའ་དེང་བདག་བསྒྲུབ། །སངས་རྒྱས་ཀུན་གྱི་རྡོ་རྗེ་ཆེ། །དངོས་གྲུབ་ཀུན་གྱི་བདེ་སྟེར་བ། །ཀུན་གྱི་དབང་བསྐུར་ཀུན་དོན་དུ། །རྡོ་རྗེའི་དབང་བསྐུར་བླ་ན་མེད། །ཨེ་མ་ཧོ། དང་པོའི་སངས་རྒྱས་དོན་དམ་སྐུ་ཅན་རྒྱལ། །ཐར་པ་ཆོས་ནོར་འདོད་པ་སྟེར་མཛད་རྒྱལ། །ཡེ་ཤེས་ལྔ་དང་དགའ་ལྡན་རང་བཞིན་རྒྱལ། །མགོན་པོ་བདེ་ཆེན་ཕྱག་ན་རྡོ་རྗེ་རྒྱལ། །ཞེས་པའི་གླུ་འདི་བླངས་ནས། སྟན་ལ་འདུག་ཏུ་བཅུག་ལ། གོང་དུ་བསྟན་པ་དང་མཚུངས་པའི་ཏིང་ངེ་འཛིན་གྱི་དབང་དང་ལྡན་པས། རིན་འབྱུང་མན་ལ་བདག་དང་དབང་རྫས་གཉིས་ཀའི་སྐུ་གསུང་ཐུགས་སམ་གནས་ལྔ་བྱིན་རླབས་ཙམ་བྱ།སྭཱ་དང་རིན་པོ་ཆེ་ལས་སློབ་མ་རིན་འབྱུང་དུ་བསྐྱེད་ཅིང་། དབང་རྫས་དབུ་རྒྱན་ཡང་སྟོང་པའི་ངང་ལས་རིན་འབྱུང་དུ་བསྐྱེད། ཞུ་བ་ལས་བྱུང་བའི་རིན་པོ་ཆེའི་དབུ་རྒྱན་དུ་བལྟས་ལ། སངས་རྒྱས་ཀུན་གྱི་རྒྱལ་སྲིད་ཆེ། །དབུ་རྒྱན་རིན་ཆེན་དམ་པ་སྟེ། །རིན་ཆེན་ཀུན་གྱི་མཆོག་འགྲོ་བས། །རྫོགས་སངས་རྒྱས་སུ་དབང་བསྐུར་རོ། །ༀ་སརྦ་ཏ་ཐཱ་ག་ཏ་རཏྣ་མུ་ཀུ་ཊ་པཱུ་ཛ་ཡ་ཨ་བྷི་ཤཱ་ཡཱ་མི་ཨཱཿཧཱུྃ། ཞེས་པས། དབུ་རྒྱན་མགོ་བོ་ལ་བསྐོན་ལ། རྡོ་རྗེ་ཐལ་སྦྱར་མཐེ་བོང་དག །དཔའ་བོ་སྐྱིལ་ཀྲུང་ཉིད་དུ་བསྐུམ། །བར་མ་མཆོག་གི་ཡན་ལག་བརྐྱང་། །རྩེ་མོ་རྩེ་མོ་མཉམ་པར་སྦྱར། །རྡོ་རྗེ་དབྱིངས་ཀྱི་ཕྱག་རྒྱར་བཤད། །ཕྱག་རྒྱ་འདིས་སློབ་མའི་སྤྱི་བོར་བཅིངས་ལ། ༀ་བཛྲ་དྷཱ་ཏུ་ཨི་ཤྭ་ར་ཨ་བྷི་ཥིཉྩ་ཨ། ཞེས་བརྗོད་ལ། སྤྱི་བོར་ཧཱུྃ་ལས་མི་བསྐྱོད་པ། རྡོ་རྗེ་སེམས་མའི་ཕྱག་རྒྱ་དེ་ཉིད་དཔྲལ་བར་བཞག་ལ། ༀ་སཏྭ་བཛྲི་ཨ་བྷི་ཥིཉྩ་ཧཱུྃྂ་ཞེས་བརྗོད་པས། ༀ་ལས་རྣམ་སྣང་། ཕྱག་རྒྱ་དེ་ཉིད་ལས་གུང་མོའི་ཚིགས་དབུས་མ་བཅག་པ། རིན་པོ་ཆེའི་རྣམ་པར་བྱས་པ་རིན་ཆེན་རྡོ་རྗེ་མའི་ཕྱག་རྒྱ་རྣ་བ་གཡས་པའི་སྟེང་དུ་བཞག་ལ། ༀ་རཏྣ་བཛྲཱི་ཨ་བྷི་ཥིཉྩ་ཏྲྃ་ཞེས་བརྗོད་དེ། སྭཱ་ལས་རིན་འབྱུང་། དེ་ཉིད་ལས་གུང་མོ་པདྨའི་རྣམ་པར་བྱས་པ་ཆོས་ཀྱི་རྡོ་རྗེ་མའི་ཕྱག་རྒྱ་ལྟག་པར་བཅིངས་ལ། ༀ་དྷརྨ་བཛྲཱི་ཨ་བྷི་ཥིཉྩ་ཧྲིཿཞེས་བརྗོད་དེ། ཨ་ལས་འོད་དཔག་ཏུ་མེད་པ། དེ་ཉིད་ལས་དབུས་མའི་ཚིགས་དང་པོ་བཅག་པ། ལས་ཀྱི་རྡོ་རྗེ་མའི་ཕྱག་རྒྱ་རྣ་བ་གཡོན་དུ་བཅིངས་ལ། ༀ་ཀརྨ་བཛྲཱི་ཨ་བྷི་ཉིཉྩ་ཨཿཞེས་བརྗོད་དེ། ཧ་ལས་དོན་ཡོད་གྲུབ་པ་བསམ་མོ། །དེ་ནས་དཔྲལ་བར་མཉམ་པའི་ཐལ་མོ་སྦྱར་བ་ཕྱེ་ནས། ཐལ་མོ་གཉིས་གཡས་དང་གཡོན་དུ་བརྐྱང་པའི་ཚུལ་དུ་བྱ་ཞིང་ༀ་བཛྲ་ཏུ་ཥྱ་ཧོཿཞེས་བརྗོད་ནས་དར་དཔྱངས་ཀྱི་དབང་བྱིན་ལ། སྔར་གྱི་རང་རང་གི་བཀྲ་ཤིས་ཀྱི་ཚིགས་བཅད་དང་། སངས་རྒྱས་རྡོ་རྗེའི་དབང་བསྐུར་ཞེས་སོགས་ཀྱིས་ཆུའི་དབང་བསྐུར་ཞིང་། དྲི་མ་དག རིན་འབྱུང་གིས་དབུ་བརྒྱན་པ་ལ། མཆོད་པ་རྣམས་ཀྱིས་མཆོད་དེ། རིན་འབྱུང་གི་རང་བཞིན་ཅོད་པན་གྱི་དབང་ཐོབ། ཉོན་མོངས་པ་ང་རྒྱལ་དང་སེར་སྣའི་དྲི་མ་སྦྱངས། ཚོར་བའི་ཕུང་པོ་གནས་གྱུར། མཉམ་པ་ཉིད་ཀྱི་ཡེ་ཤེས་མངོན་དུ་བྱས། རིན་འབྱུང་གི་ས་བོན་དང་བག་ཆགས་རྒྱུད་ལ་བཞག རིན་འབྱུང་དང་དེ་ལ་བརྟེན་པའི་དངོས་གྲུབ་སྒྲུབ་པ་ལ་དབང་བར་བྱའོ་ཞེས་རྟོགས་པ་བསྐྱེད་དོ། །

དེ་ནས་ཏིང་ངེ་འཛིན་གྱི་དབང་དང་ལྡན་པ་ལས་ཨ་དང་པདྨ་ལས་སློབ་མ་འོད་དཔག་ཏུ་མེད་པར་བསྐྱེད་ཅིང་རྡོ་རྗེ་སྟོང་པའི་ངང་ལས་འོད་དཔག་ཏུ་མེད་པར་བསྐྱེད་ལ། མཆོད་ཅིང་ཞུ་བ་ལས་བྱུང་བའི་རྡོ་རྗེར་བལྟས་ལ། སངས་རྒྱས་ཀུན་གྱི་རྡོ་རྗེའི་དབང་། །མི་ཕྱེད་རྡོ་རྗེ་འོད་གསལ་བ། །དམ་ཆོས་འབྱུང་བའི་སྣོད་གྱུར་པ། །རྡོ་རྗེ་ཆོས་ཀྱི་དབང་བསྐུར་རོ། །ༀ་བཛྲ་ཨ་དྷི་པ་དྷི་ཏྭྂ། ཨ་བྷི་ཥིཉྩ་མི་ཏིཥྠ་བཛྲ་ས་མ་ཡ་སྟྭཾ། འདི་དེ་སངས་རྒྱས་ཐམས་ཅད་ཉིད། །རྡོ་རྗེ་སེམས་དཔའི་ཕྱག་ན་གནས། ཁྱོད་ཀྱིས་ཀྱང་ནི་རྟག་ཏུ་བཅང་། །ཕྱག་ན་རྡོ་རྗེའི་བརྟུལ་ཞུགས་བརྟན། །ༀ་སརྦ་ཏ་ཐཱ་ག་ཏ་སིདྡྷི་བཛྲཱ་ས་མ་ཡ་ཏིཥྠ་ཨེ་ཥ་སྟྭཾ་དྷ་ར་ཡ་མི་བཛྲ་སཏྭ་ཧཱིཿ ཧི་ཧི་ཧི་ཧི་ཧཱུྃ་ཞེས་བརྗོད་དེ། སློབ་མའི་སྙིང་ཁ་དང་། ལྐོག་མ་དང་། གཙུག་ཏོར་དུ་རེག་ལ་ལག་པ་གཡས་སུ་གཏད། དེས་ཀྱང་ལྷའི་ང་རྒྱལ་བརྟན་པས་སྙེམས་པའི་ཚུལ་གྱིས་བཟུང་། དེ་ཉིད་བརྟན་པར་བྱ་བའི་ཕྱིར་དུ། སྔར་གྱི་བཀྲ་ཤིས་སོགས་བརྗོད་པ་སྔོན་དུ་འགྲོ་བའི་ཆུའི་དབང་བསྐུར། འོད་དཔག་ཏུ་མེད་པས་དབུ་བརྒྱན། མཆོད་པ་རྣམས་ཀྱིས་མཆོད་ནས། འོད་དཔག་ཏུ་མེད་པའི་རང་བཞིན་རྡོ་རྗེའི་དབང་ཐོབ། འདོད་ཆགས་ཀྱི་དྲི་མ་དག འདུ་ཤེས་ཀྱི་ཕུང་པོ་གནས་གྱུར། སོ་སོར་རྟོག་པའི་ཡེ་ཤེས་མངོན་དུ་བྱས། འོད་དཔག་ཏུ་མེད་པའི་ས་བོན་དང་། བག་ཆགས་རྒྱུད་ལ་བཞག འོད་དཔག་ཏུ་མེད་པ་དང་དེ་ལ་བརྟེན་པའི་དངོས་གྲུབ་སྒྲུབ་པ་ལ་དབང་བར་བྱས་སོ། །ཞེས་རྟོགས་པ་བསྐྱེད། དེ་ནས་ཏིང་ངེ་འཛིན་གྱི་དབང་དང་ལྡན་པས། ཧ་དང་རལ་གྲི་དེ་ལས། སློབ་མ་དོན་ཡོད་གྲུབ་པར་བསྐྱེད་ཅིང་། སྟོང་པའི་ངང་ལས་ དྲིལ་བུ ་དོན་གྲུབ་ཏུ་བསྐྱེད་ཅིང་མཆོད་དེ་ཞུ་བ་ལས་བྱུང་བའི་དྲིལ་བུར་བལྟས་ཏེ། སློབ་དཔོན་གྱིས་བཀྲོལ་ནས། ཟླ་བའི་འོད་ཅན་ཡེ་ཤེས་སྐུ་མངའ་རྒྱལ་བའི་ཅོད་པན་འཛིན་པ་པད་ཟླའི་གདན་ལ་བཞུགས། །གདུག་པ་རྣམས་ནི་འདུལ་བའི་དོན་དུ་སྲིད་གསུམ་འདུལ་མཛད་བསྡིགས་པའི་དེ་ཉིད་རྡོ་རྗེ་ཅན། །སངས་རྒྱས་རྣམས་ནི་བསྐུལ་ཕྱིར་དེ་ཁོ་ན་ཉིད་སོ་སོར་སྒྲོགས་པའི་ཆོས་ཉིད་ དྲིལ་བུ ་འཁྲོལ། །དངོས་པོ་ཀུན་གྱི་ངོ་བོ་མ་ལུས་སྟོང་པའི་བཅོམ་ལྡན་གང་ཡིན་དེ་ནི་རྒྱལ་གྱུར་ཅིག །མེ་ལོང་གི་ནི་གཟུགས་བརྙན་དང་། །རྨི་ལམ་སྒྱུ་མ་ཆུ་བུར་དང་། །མིག་འཁྲུལ་འདྲ་བ་སུས་མཐོང་བ། །དེ་ནི་མངའ་བདག་ཏུ་བཤད་དོ། །ཞེས་བརྗོད་ནས། ལག་པ་གཡོན་དུ་གཏད་པས། དེས་ཀྱང་དཀྲོལ་ཏེ་དཀུ་གཡོན་པར་བཀན་ཏེ་བཟུང་ལ་གཡས་པས་རྡོ་རྗེ་སྙིམས་པའི་ཚུལ་གྱིས་གཟུང་སྟེ། ༀ་བཛྲ་སཏྭ་ས་མ་ཡ་ཞེས་སོགས་ཡི་གེ་བརྒྱ་པ་བརྗོད་ལ་ༀ་བཛྲ་གྷཎྜེ་ཨཿཨཿབདག་གིས་བཅོམ་ལྡན་བཟུང་ལགས་ཀྱིས། །བཅོམ་ལྡན་བདག་ལ་ཉེ་བར་མཛོད། །ཅེས་བརྗོད། དེ་ནས་སློབ་དཔོན་གྱིས། ༀ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་མི་ཏིཥྠ་བཛྲ་ཧཱི་ས་མ་ཡ་སྟཱཾ་ཞེས་བརྗོད་ནས། བཀྲ་ཤིས་སོགས་བརྗོད་པས་ཆུའི་དབང་བསྐུར། དོན་གྲུབ་ཀྱིས་དབུ་བརྒྱན། མཆོད་པ་རྣམས་ཀྱིས་མཆོད་དེ། དོན་གྲུབ་ཀྱི་རང་བཞིན་དྲིལ་བུའི་དབང་ཐོབ། ཕྲག་དོག་གི་དྲི་མ་དག འདུ་བྱེད་ཀྱི་ཕུང་པོ་གནས་གྱུར། བྱ་བ་གྲུབ་པའི་ཡེ་ཤེས་མངོན་དུ་བྱས། དོན་གྲུབ་ཀྱི་ས་བོན་དང་བག་ཆགས་རྒྱུད་ལ་བཞག དོན་གྲུབ་དང་དེ་ལ་བརྟེན་པའི་དངོས་གྲུབ་སྒྲུབ་པ་ལ་དབང་ངོ་ཞེས་རྟོགས་པ་བསྐྱེད་དོ། །དེ་ནས་མིང་གི་དབང་བསྐུར་བ་ནི། ཏིང་ངེ་འཛིན་གྱི་དབང་དང་ལྡན་པས། ༀ་དང་འཁོར་ལོ་ལས་སློབ་མ་རྣམ་སྣང་དུ་བསྐྱེད་ཅིང་། སྤྱི་བོ་ཡན་ལས་བཞི་རྫོགས་སུ་བསྐྱེད་པའི་རྣམ་སྣང་ཡབ་ཡུམ་སྙོམས་པར་ཞུགས་པ་སློབ་མའི་ལུས་ལ་ཐིམ་པར་བསམས་ནས། རྡོ་རྗེ་ དྲིལ་བུ ་རྩེ་སྤྲད་དེ་སྤྱི་བོར་གཏུགས་པ་ༀ་བཛྲ་སཏྭ་ཏྭཾ་ཨ་བྷི་ཥེཉྩ་མི་བཛྲ་ནཱ་མ་ཨ་བྷི་ཥེ་ཀ་ཏེ་ཧེཿ ཤྲཱི་ཆེ་གེ་མོ། བཛྲ་ཏ་ཐཱ་ག་ཏ་ས་མ་ཡ་སིདྡྷི་ས་མ་ཡ་སྟྭྂ། བྷཱུར་བྷཱུ་ཝཿསྭཿཨཿཞེས་བརྗོད་ལ། ཆེ་གེ་མོ་ཞེས་པའི་གནས་སུ་རིགས་དང་མཐུན་པའི་མིང་བཏགས་ཏེ། མི་བསྐྱོད་པའི་རིགས་ཡིན་ན་བཞད་པ་དང་། སྒེག་པ་དང་། གཉིས་མེད་དང་། མི་ཕྱེད་པ་དང་། དགའ་རབ་དང་། རོལ་པའི་རྡོ་རྗེ་ཞེས་དང་། རྣམ་སྣང་གི་རིགས་ལ། གཏི་མུག་དང་། ༀ་མཛད་དང་། རྟག་པ་དང་། སྒྱུ་འཕྲུལ་རྡོ་རྗེ་ཞེས་དང་། རིན་འབྱུང་ལ། ཡིད་བཞིན་ནོར་བུ་དང་། མཁའ་དང་གཟི་བརྗིད་རྡོ་རྗེ་ཞེས་དང་། འོད་དཔག་མེད་ལ། འདོད་ཆགས་དང་། སྤྱན་རས་གཟིགས་དང་། ཆོས་དང་། པདྨའི་རྡོ་རྗེ་ཞེས་དང་། དོན་གྲུབ་ལ་རྟ་མཆོག་དང་། དམ་ཚིག་དང་། ལས་ཀྱི་རྡོ་རྗེ་ཞེས་སོགས་མགོར་དཔལ་དང་། མཇུག་ཏུ་རྡོ་རྗེ་བཏགས་པའོ། །ལྷ་མོ་ལ་མི་བསྐྱོད་པའི་རིགས་ལ་རྡོ་རྗེ་བདག་མེད་མ་དང་། ལག་མ་དང་། ཕྲེང་བ་མ་དང་། འབྱུང་གནས་མ་དང་། རྣམ་སྣང་གི་རིགས་ལ། རྡོ་རྗེ་མཁའ་འགྲོ་མ་དང་། སྒེག་མོ་ལ་སོགས་པ་དང་། རིན་འབྱུང་གི་རིགས་ལ། རྡོ་རྗེ་དོ་ཤལ་མ་དང་། དབུགས་དབྱུང་མ་དང་། འབར་མ་དང་། ཕྲེང་བ་མ་དང་། པདྨའི་རིགས་ལ། རྡོ་རྗེ་ཆགས་པ་མ་དང་། དབྱངས་མ་དང་། བློ་གྲོས་མ་དང་། གོས་དཀར་མོ་ལ་སོགས་པ་དང་། དོན་གྲུབ་ཀྱི་རིགས་ལ་རྡོ་རྗེ་སྙེ་མ་དང་། སྒྱུ་འཕྲུལ་མ་དང་། རྒོད་མ་དང་། སྒྲོལ་མ་ལ་སོགས་པ་མགོར་རྗོ་རྗེ་སྦྱར་བའི་མིང་བཏགས་ཏེ། བཀྲ་ཤིས་བརྗོད་པ་སྔོན་དུ་འགྲོ་བས་ཆུའི་དབང་བསྐུར་ནས། རྣམ་སྣང་གི་རྒྱས་བཏབ་སྟེ་མཆོད་པ་རྣམས་ཀྱིས་མཆོད་ནས། རྣམ་སྣང་གི་རང་བཞིན་མིང་གི་དབང་ཐོབ། གཏི་མུག་གི་དྲི་མ་དག གཟུགས་ཀྱི་ཕུང་པོ་གནས་གྱུར། མེ་ལོང་ལྟ་བུའི་ཡེ་ཤེས་མངོན་སུམ་དུ་བྱས། རྣམ་སྣང་གི་ས་བོན་དང་བག་ཆགས་རྒྱུད་ལ་བཞག རྣམ་སྣང་དང་དེ་ལ་བསྟེན་པའི་དངོས་གྲུབ་སྒྲུབ་པ་ལ་དབང་བར་བྱས་སོ་ཞེས་རྟོགས་པ་བསྐྱེད་དོ། །

དེ་ནས། ཐུན་མོང་གི་རྟོགས་པ་བསྐྱེད་པ་ནི། སངས་རྒྱས་ལྔ་ནི་རྣམ་དག་འདི། །དབང་བསྐུར་ལྔ་ནི་ཐོབ་པའི་རྒྱུ། །མ་རིག་པ་ནི་བསལ་ནས་ནི། །ཡེ་ཤེས་ལྔ་ནི་ཐོབ་པར་འགྱུར། །ཞེས་བརྗོད་ནས། དེའི་དོན་། དབང་འདི་རྣམས། སྦྱང་གཞི་ཕུང་པོ་ལྔ་དང་ཉོན་མོངས་པ་ལྔ་སྦྱོང་ཞིང་། ཐོབ་བྱ་རིགས་ལྔ་དང་ཡེ་ཤེས་ལྔ་མངོན་དུ་བྱེད་པ་རིགས་པའི་རྒྱལ་པོ་དེ་བཞིན་གཤེགས་པ་ལྔའི་དབང་ཡིན་པའི་ཕྱིར། རིག་པའི་དབང་ཞེས་བྱ་སྟེ། རང་གི་རྒྱུད་དེ་བཞིན་གཤེགས་པ་ལྔར་བྱིན་གྱིས་བརླབ་པའི་ཕྱིར། སྣང་བ་ཐམས་ཅད་རིགས་ལྔར་བལྟ་བར་བྱ་སྟེ། དངོས་པོ་གང་དང་གང་སྣང་བ། །གཙོ་དེ་རང་གི་ལྷག་པའི་ལྷ། །ཆོས་རྣམས་རང་བཞིན་རྣམ་དག་ལ། །སངས་རྒྱས་ཡེ་ཤེས་བལྟ་བར་གྱིས། །ཞེས་བརྗོད་དོ། །དེ་ནས། ཆོས་ཉིད་དེ་བཞིན་ཉིད་མངོན་དུ་བྱ་བའི་ཕྱིར། ཤེས་རབ་ཀྱི་ཕ་རོལ་ཏུ་ཕྱིན་པ་མེ་ལོང་གི་དབང་དང་། རྡོ་རྗེའི་བརྟུལ་ཞུགས་སྟབས་གཅིག་ཏུ་སྦྱིན་པར་བྱ་སྟེ། ཏིང་ངེ་འཛིན་གྱི་དབང་དང་ལྡན་པས་ཧཱུྃ་ལས་རྡོ་རྗེ་དཀར་པོ་ཧཱུྃ་གིས་མཚན་པ། དེ་ལས་སློབ་མ་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གསུམ་ཕྱག་དྲུག་པར་བསྐྱེད་ཅིང་། ཨ་ལས་དབང་རྫས་མེ་ལོང་རེག་རྡོ་རྗེ་མར་དཀར་པོ་རྡོ་རྗེ་སེམས་དཔའ་བཞིན་བསྐྱེད་ནས། དེ་ཞུ་བ་ལས་བྱུང་བའི་མེ་ལོང་སློབ་མ་ལ་བསྟན་ལ་བརྗོད་དང་གཟུང་འཛིན་རྣམ་སྤངས་ཤིང་། །དག་ཅིང་གསལ་ལ་དྲི་མ་མེད། །མེ་ལོང་ནང་གི་གཟུངས་བརྙན་བཞིན། །རང་ལྷའི་གཟུགས་འདི་ཤེས་པར་གྱིས། །ༀ་པྲ་ཏི་བྷིམྦྷ་ཨ་དཪྴ་བྷ་ཝ་ཨ་བྷི་ཥིཉྩ་ཨཿ ཞེས་བརྗོད་ནས། ཆོས་ཐམས་ཅད་སྣང་ལ་རང་བཞིན་མེད་པ་མེ་ལོང་གི་གཟུགས་བརྙན་དང་འདྲ་བར་ཤེས་པར་གྱིས་ཤིག་ཅེས་རྟོགས་པ་བསྐྱེད་དོ། །

དེ་ནས་རྡོ་རྗེ་ཧཱུྃ་ལ་རྡོ་རྗེ་སེམས་སྐུ་མདོག་དཀར་པོ་ཞལ་གསུམ་ཕྱག་དྲུག་པར་བསྐྱེད ། དེ་ཞུ་བ་ལས་བྱུང་བའི་རྡོ་རྗེ་སློབ་མའི་ལག་པ་གཡས་པར་གཏད་ནས། འདི་དེ་སངས་རྒྱས་ཐམས་ཅད་དེ། །རྡོ་རྗེ་སེམས་དཔའི་ཕྱག་ན་བསྣམས། ཁྱེད་ཀྱིས་ཀྱང་ནི་རྟག་ཏུ་བཅང་། །རྡོ་རྗེ་སེམས་དཔའི་བརྟུལ་ཞུགས་བརྟན། །ༀ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྠ་ཨེ་ཥ་ཏྭཾ་དྷཱ་ར་ཡ་མི་བཛྲ་སཏྭ་ཧྭིཿ ཧི་ཧི་ཧི་ཧི་ཧཱུྃ། ཞེས་བརྗོད་དོ། །དེས་ཀྱང་བླངས་ནས་ཧཱུྃ་ཞེས་བརྗོད་ཅིང་། ལན་གསུམ་གསོར་ནས། སྙིང་ཁར་གཟུང་ལ། སྙིང་ཁའི་ནང་དུ་རང་དང་འདྲ་བའི་རྡོ་རྗེ་སེམས་དཔའ། ཐུགས་ཁར་རྡོ་རྗེ་དཀར་པོ་རྩེ་ལྔ་པས་མཚན་པ། དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེར་བསྒོམ་དུ་བཅུག་ནས། བཀྲ་ཤིས་བརྗོད་པ་སྔོན་དུ་འགྲོ་བའི་ཆུའི་དབང་བསྐུར་ཏེ། རྡོ་རྗེ་སེམས་དཔའི་རྒྱས་བཏབ་ལ། མཆོད་པ་རྣམས་ཀྱིས་མཆོད་ནས། ཤེས་རབ་ཀྱི་ཕ་རོལ་ཏུ་ཕྱིན་མ་མེ་ལོང་གི་དབང་ཐོབ་ཡུལ་ཡུལ་ཅན་ལ་མཚན་མར་འཛིན་པའི་དྲི་མ་སྦྱངས། ཆོས་ཅན་དང་ཆོས་ཉིད་གནས་གྱུར། ཐོག་མ་མེད་པའི་བྱང་ཆུབ་ཀྱི་སེམས་མངོན་དུ་བྱས། དྲུག་པ་རྡོ་རྗེ་སེམས་དཔའི་ས་བོན་རྒྱུད་པ་བཞག རྡོར་སེམས་དང་དེའི་རིགས་ཀྱི་དངོས་གྲུབ་བསྒྲུབ་པ་ལ་དབང་བར་བྱས་སོ་ཞེས་རྟོགས་པ་བསྐྱེད་དོ། །དེ་རྣམས་ནི་ཐུན་མོང་བ་སློབ་མའི་དབང་བསྐུར་བའོ། །དེ་ནས་ཐུན་མོང་མ་ཡིན་པ་རྡོ་རྗེ་སློབ་དཔོན་གྱི་དབང་གི་དོན་དུ། ཕྱག་དང་མཎྜལ་སྔོན་དུ་འགྲོ་བས། མེ་ཏོག་དང་བཅས་པའི་ཐལ་མོ་སྦྱར་ནས། ཕྱིར་མི་ལྡོག་པའི་དབང་བསྐུར་ཆེ། །རྡོ་རྗེ་སེམས་དཔའ་བདག་ལ་སྩོལ། །དཀྱིལ་འཁོར་ལྷ་ཡི་དེ་ཉིད་དང་། །སློབ་དཔོན་གྱིས་ནི་ལས་རྣམས་དང་། །སངས་རྒྱས་ཀུན་གྱི་དམ་ཚིག་དང་། །སྡོམ་དང་གསང་བ་བླ་མེད་སྩོལ། །སེམས་ཅན་ཀུན་གྱི་དོན་གྱི་ཕྱིར། །རྟག་ཏུ་སློབ་དཔོན་བདག་གྱུར་གསུངས། །ཞེས་ལན་གསུམ་གསོལ་བ་གདབ་བོ། །དེ་ནས། སློབ་དཔོན་དུ་འོས་པའི་སློབ་མ་གཅིག དབང་སྟེགས་སེང་གེའི་ཁྲིའི་སྟེང་དུ་བཞག་ལ། ཏིང་ངེ་འཛིན་གྱི་དབང་དང་ལྡན་པས་རྡོ་རྗེ་སེམས་དཔའ་སྐུ་མདོག་སྔོན་པོ་ཞལ་གསུམ་ཕྱག་དྲུག་པ་བསྐྱེད་པ་ལ། དམ་ཚིག་གསུམ་སྦྱིན་པར་བྱ་སྟེ། ཧཱུྃ་ལས་བྱུང་བའི་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་དམ་ཚིག་ཏུ་བྱིན་གྱིས་བརླབས་པ་བཟུང་ནས། སྔར་གྱི་རྡོ་རྗེ་བརྟུལ་ཞུགས་ཀྱི་ཚིགས་བཅད་དང་སྔགས་བརྗོད་དེ་བྱིན་ལ་རྡོ་རྗེའི་དེ་ཁོ་ན་ཉིད་བརྗོད་དེ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་གྱི་བདག །རྡོ་རྗེ་སྙེ་མའི་བདག་པོ་བདག །བཅོམ་ལྡན་འདས་དཔལ་མཆོག་དང་པོའི་སྐྱེས་བུའོ། །ཞེས་བརྗོད་ལ། རྡོ་རྗེ་འདི་ནི། ཐོག་མ་དང་ཐ་མ་མེད་པའི་བྱང་ཆུབ་ཀྱི་སེམས་ཀུན་ཏུ་བཟང་པོ་དེ་བཞིན་གཤེགས་པ་རིགས་ལྔ་པོ་ཐམས་ཅད་ཀྱི་བདག་པོ་རྡོ་རྗེ་སེམས་དཔའི་རང་བཞིན་ཡིན་པས། འདིས་བྱིན་གྱིས་བརླབས་པའི་ཕྱིར། རང་གི་སེམས་ཀྱང་སངས་རྒྱས་ཐམས་ཅད་ཀྱི་ཐུགས་རྡོ་རྗེའི་ངོ་བོར་ཤེས་པར་བྱའོ། །ཞེས་བརྗོད། སློབ་མས། མཧཱ་བཛྲ་ཧཱུྃ་ཞེས་ལན་གསུམ་བརྗོད་ཅིང་སྙིང་ཁར་བཟུང་ངོ་། །

དེ་ནས་ཨ་ལས་བྱུང་བའི་དྲིལ་བུ། སངས་རྒྱས་ཐམས་ཅད་ཀྱི་གསུང་གི་ངོ་བོར་བྱིན་གྱིས་བརླབས་པ་བཟུང་ནས། འདི་དེ་སངས་རྒྱས་ཐམས་ཅད་ཀྱིས། །ཤེས་རབ་དབྱངས་ཀྱི་རྗེས་འགྲོར་བཤད། ཁྱོད་ཀྱི་ཀྱང་ནི་རྟག་ཏུ་བཟུང་། །བྱང་ཆུབ་མཆོག་ཏུ་རྒྱལ་བ་བཞེད། །ཨ་ཞེས་བརྗོད་ནས་བྱིན་ལ། དྲིལ་བུའི་དེ་ཁོ་ན་ཉིད། སྲིད་པ་ངོ་བོ་ཉིད་ཀྱིས་བདག །ངོ་བོ་ཉིད་ཀྱི་སྲིད་བྲལ་བྱས། །རང་བཞིན་དབང་པོའི་སེམས་ལྡན་པ། །སྲིད་པ་དམ་པར་བྱེད་པར་འགྱུར། །ཞེས་བརྗོད་ནས།  དྲིལ་བུ ་འདི་ནི་སྲིད་པའི་ངོ་བོ་ཉིད་ཀྱིས་རྣམ་པར་དག་པ་ཆོས་ཀྱི་དབྱིངས་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཡིན་པས། འདིས་བྱིན་གྱིས་བརླབས་པའི་ཕྱིར། རང་གི་ངག་ཀྱང་སངས་རྒྱས་ཐམས་ཅད་ཀྱི་གསུང་རྡོ་རྗེའི་རང་བཞིན་དུ་ཤེས་པར་བྱའོ། །ཞེས་བརྗོད། སློབ་མས། བཛྲ་གྷནྜེ་ཨ་ཞེས་བརྗོད་ནས་བཀྲོལ་ལ་དཀུ་གཡོན་པར་སྙེམས་པའི་ཚུལ་གྱིས་གཟུང་ངོ་། །དེའི་རྗེས་སུ། ཡིད་ཀྱི་ལུང་ནི་བརྟན་བྱའི་ཕྱིར། །ཕྱག་རྒྱ་དམ་ཚིག་ཅེས་སུ་བཤད། །ལུས་ཀུན་བརྟན་པར་བྱེད་པས་ན། །དེ་ཕྱིར་ཕྱག་རྒྱ་ཞེས་སུ་བསྒྲགས། །ཞེས་བརྗོད་ལ། སློབ་མ་རྡོ་རྗེ་སེམས་དཔའ་སྐུ་མདོག་སྔོན་པོ་ཞལ་གསུམ་ཕྱག་དྲུག་པ། རྡོ་རྗེ་དབྱིངས་ཀྱི་དབང་ཕྱུག་མས་འཁྱུད་པར་བསམས་ལ། རྡོ་རྗེ་དྲིལ་བུས་འཁྱུད་པའི་སྟངས་ཀ་བྱེད་དུ་བཅུག་སྟེ། རྡོ་རྗེ་ཆེ་དང་ དྲིལ་བུ ་ཆེ། །ཟུངས་ཤིག་རྡོ་རྗེར་བྱིན་གྱིས་བརླབས། །དེ་རིང་རྡོ་རྗེ་སློབ་དཔོན་གྱུར། །སློབ་མའི་ཚོགས་རྣམས་བསྡུ་བར་གྱིས། །ཞེས་བརྗོད་ལ་རྡོ་རྗེ་འཆང་ཆེན་པོ་ཕྱག་རྒྱ་ལོ་བཅུ་དྲུག་མའི་རྣམ་པས་འཁྱུད་པ་འདི་ནི། དེ་བཞིན་གཤེགས་པ་ཐམས་ཅད་ཀྱི་སྐུའི་དམ་ཚིག་ཡིན་པས། འདིས་བྱིན་གྱིས་བརླབས་པའི་ཕྱིར། རང་གི་ལུས་ཀྱང་དེ་བཞིན་གཤེགས་པ་ཐམས་ཅད་ཀྱི་སྐུ་རྡོ་རྗེའི་ངོ་བོར་ཤེས་པར་བྱའོ་ཞེས་བརྗོད། སློབ་དཔོན་གྱི་སྙིང་ཁའི་འོད་ཟེར་གྱིས་བཀུག་པའི་ལྷ་ཚོགས་ནམ་མཁའ་གང་བས། སྔར་བཞིན་དབང་བསྐུར་བར་བསམ་ཞིང་། བཀྲ་ཤིས་ཚིགས་བཅད་ཡོངས་སུ་རྫོགས་པའམ་ཡང་ན་དང་པོ་སྔོན་དུ་འགྲོ་བའི་དབང་བསྐུར་རྡོ་རྗེ་ཆེན་པོ་སོགས་བརྗོད་ཅིང་ཆུ་དབང་བསྐུར། མི་བསྐྱོད་པའི་རྒྱས་བཏབ། མཆོད་པ་རྣམས་ཀྱིས་མཆོད་དེ། སུ་པྲ་ཏིཥྛ་བཛྲ་ཡེ་སྭཱཧཱ་བརྗོད་ནས། སློབ་མའི་སྤྱི་བོར་མེ་ཏོག་གི་ཕྲེང་བ་བཞག་གོ །བརྟན་པར་བྱ་བའི་ཕྱིར། སློབ་དཔོན་གྱིས་ཡི་གེ་བརྒྱ་པ་བརྗོད་པའི་རྗེས་ལ། སློབ་མས་ཀྱང་བཟླ་བར་བྱའོ། །

དེ་ལྟར་རྡོ་རྗེ་སློབ་དཔོན་གྱི་དབང་ཐོབ་པས། དེ་ཁོ་ན་ཉིད་བསྟན་པའི་སྣོད་དུ་གྱུར་པས། དེ་ཁོ་ན་ཉིད་བསྟན་པར་བྱ་སྟེ། ཐོག་མར་དཀྱིལ་འཁོར་གྱི་དེ་ཁོ་ན་ཉིད་ནི། རྟེན་འབྲེལ་བཅུ་གཉིས་རྣམ་པར་དག་པས་དཀྱིལ་འཁོར་གྱི་ཚད་ཁྲུ་བཅུ་གཉིས་པའོ། །བདེན་པ་བཞི་རྣམ་པར་དག་པས་ངོས་བཞི། ཚད་མེད་བཞི་རྣམ་པར་དག་པས་གྲྭ་བཞི། འབྱུང་བ་བཞི་དག་པས་སྒོ་བཞི། རྫུ་འཕྲུལ་གྱི་རྐང་པ་བཞི་དག་པས་སྒོ་ཁྱུད་བཞི། དབང་པོ་ལྔ་དག་པས་རྩིག་པ་ལྔ། བསམ་གཏན་བཞི་དག་པས་རྟ་བབས་བཞི། གཟུངས་དང་ཏིང་ངེ་འཛིན་རྣམ་པར་དག་པས་འདོད་ཡོན་གྱི་སྣམ་བུ། ཕར་ཕྱིན་བཅུ་དག་པས་ཕ་གུ། སྒོམ་སྤང་སྤངས་པ་དག་པས་དྲ་བ་དང་དྲ་བ་ཕྱེད་པ། དབང་བཅུ་དག་པས་བྷ་ཀུ་ལི། དགེ་བ་བཅུ་དག་པས་མདའ་ཡབ། རྣམ་པར་ཐར་པ་བརྒྱད་དག་པས་དཀྱིལ་འཁོར་ནང་མའི་མཐའ་རེ་མིག་བརྒྱད་ཀྱིས་བསྐོར་བ། འཕགས་པའི་ལམ་ཡན་ལག་བརྒྱད་དག་པས་ཀ་བ་བརྒྱད་དང་ལྡན་པ། ཆོས་ཀྱི་དེ་ཁོ་ན་ཉིད་སྟོན་པའི་བརྡར་རྡོ་རྗེའི་ཕྲེང་བས་བསྐོར་བའོ། །

ལྷའི་དེ་ཁོ་ན་ཉིད་ནི། རྣམ་པར་ཤེས་པའི་ཕུང་པོ་རྣམ་པར་དག་པ་དང་། ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ་དབུས་ཀྱི་མི་བསྐྱོད་པ། གཟུགས་ཀྱི་ཕུང་པོ་རྣམ་པར་དག་པ་དང་། མེ་ལོང་ལྟ་བུའི་ཡེ་ཤེས་ཀྱི་ངོ་བོ་ཤར་གྱི་རྣམ་པར་སྣང་མཛད། ཚོར་བའི་ཕུང་པོ་རྣམ་པར་དག་པ་དང་། མཉམ་ཉིད་ཡེ་ཤེས་ཀྱི་ངོ་བོ་ལྷོའི་རིན་ཆེན་འབྱུང་ལྡན། འདུ་ཤེས་ཀྱི་ཕུང་པོ་རྣམ་པར་དག་པ་དང་། སོ་སོར་རྟོག་པའི་ཡེ་ཤེས་ཀྱི་ངོ་བོ་ནུབ་ཀྱི་འོད་དཔག་ཏུ་མེད་པ། འདུ་བྱེད་ཀྱི་ཕུང་པོ་རྣམ་པར་དག་པ་དང་། བྱ་བ་གྲུབ་པའི་ཡེ་ཤེས་ཀྱི་ངོ་བོ་བྱང་གི་དོན་ཡོད་གྲུབ་པ། སའི་ཁམས་རྣམ་པར་དག་པ་དང་། བྱམས་པ་ཚད་མེད་པའི་ངོ་བོ་རེ་མིག་ནང་མའི་ཤར་ལྷོའི་སྤྱན་མ། ཆུའི་ཁམས་རྣམ་པར་དག་པ་དང་། སྙིང་རྗེ་ཚད་མེད་པའི་ངོ་བོ་ལྷོ་ནུབ་ཀྱི་མཱ་མ་ཀི མེའི་ཁམས་རྣམ་པར་དག་པ་དང་དགའ་བ་ཚད་མེད་པའི་ངོ་བོ་ནུབ་བྱང་གི་གོས་དཀར་མོ། རླུང་གི་ཁམས་རྣམ་པར་དག་པ་དང་བཏང་སྙོམས་ཚད་མེད་པའི་ངོ་བོ་བྱང་ཤར་གྱི་སྒྲོལ་མ། གཟུགས་རྣམ་པར་དག་པ་རེ་མིག་གཉིས་པར་ཤར་ལྷོའི་གཟུགས་རྡོ་རྗེ་མ། སྒྲ་རྣམ་པར་དག་པ་ལྷོ་ནུབ་ཀྱི་སྒྲ་རྡོ་རྗེ་མ། དྲི་རྣམ་པར་དག་པ་ནུབ་བྱང་གི་དྲི་རྡོ་རྗེ་མ། རོ་རྣམ་པར་དག་པ་བྱང་ཤར་གྱི་རོ་རྡོ་རྗེ་མ། རེག་རྣམ་པར་དག་པ་དབུས་ཀྱི་རེག་རྡོ་རྗེ་མ། རྩ་རྒྱུས་རྣམ་པར་དག་པ་དང་ཟག་པ་མེད་པའི་མངོན་ཤེས་ཀྱི་ངོ་བོ་ཤར་གྱི་སྣམ་བུའི་གཡས་ཕྱོགས་ཀྱི་བྱམས་པ། མིག་རྣམ་པར་དག་པ་དང་། མིག་གི་མངོན་ཤེས་ཀྱི་ངོ་བོ་གཡོན་ཕྱོགས་ཀྱི་སའི་སྙིང་པོ། རྣ་བ་རྣམ་པར་དག་པ་དང་། རྣ་བའི་མངོན་ཤེས་ཀྱི་ངོ་བོ་ལྷོའི་སྣམ་བུའི་གཡས་ཕྱོགས་ཀྱི་ཕྱག་ན་རྡོ་རྗེ། སྣ་རྣམ་པར་དག་པ་དང་། སྣའི་མངོན་ཤེས་ཀྱི་ངོ་བོ་གཡོན་ཕྱོགས་ཀྱི་ནམ་མཁའི་སྙིང་པོ། ལྕེ་རྣམ་པར་དག་པ་དང་། ལྕེའི་མངོན་ཤེས་ཀྱི་ངོ་བོ་ནུབ་ཀྱི་སྣམ་བུའི་གཡས་ཕྱོགས་ཀྱི་འཇིག་རྟེན་དབང་ཕྱུག ཡིད་རྣམ་པ་དག་པ་དང་། གཞན་སེམས་ཤེས་པའི་མངོན་ཤེས་ཀྱི་ངོ་བོ་གཡོན་གྱི་འཇམ་དཔལ། ལུས་རྣམ་པར་དག་པ་དང་། རྫུ་འཕྲུལ་གྱི་མངོན་ཤེས་ཀྱི་ངོ་བོ་བྱང་གི་སྣམ་བུའི་གཡས་ཕྱོགས་ཀྱི་སྒྲིབ་སེལ། ཚིགས་རྣམ་པར་དག་པ་དང་། སྔོན་གནས་རྗེས་དྲན་གྱི་མངོན་ཤེས་ཀྱི་ངོ་བོ་གཡོན་ཕྱོགས་ཀྱི་ཀུན་ཏུ་བཟང་པོ། ལག་པ་གཡས་པ་རྣམ་པར་དག་པ་དང་། སྦྱིན་པའི་ངོ་བོ་ཤར་སྒོའི་གཤིན་རྗེ་གཤེད། ལག་པ་གཡོན་པ་རྣམ་པར་དག་པ་དང་། སྙན་སྨྲའི་ངོ་བོ་ལྷོའི་སྒོའི་གཞན་གྱིས་མི་ཐུབ་པ། ཁ་རྣམ་པར་དག་པ་དང་། དོན་སྤྱོད་ཀྱི་ངོ་བོ་ནུབ་སྒོའི་རྟ་མགྲིན། རྡོ་རྗེ་རྣམ་པར་དག་པ་དང་། དོན་མཐུན་གྱི་ངོ་བོ་བྱང་སྒོའི་བདུད་རྩི་འཁྱིལ་བ། དཔུང་པ་གཡས་རྣམ་པར་དག་པ་ཤར་ལྷོའི་མི་གཡོ་བ། དཔུང་པ་གཡོན་རྣམ་པར་དག་པ་ལྷོ་ནུབ་ཀྱི་འདོད་པའི་རྒྱལ་པོ། པུས མོ་གཡས་རྣམ་པར་དག་པ་ནུབ་བྱང་གི་དབྱུག་སྔོན་ཅན། པུས་མོ་གཡོན་རྣམ་པར་དག་པ་བྱང་ཤར་གྱི་སྟོབས་པོ་ཆེ། སྤྱི་གཙུག་རྣམ་པར་དག་པ་སྟེང་གི་འཁོར་ལོས་བསྒྱུར་བ། རྐང་མཐིལ་རྣམ་པར་དག་པ་འོག་གི་གནོད་མཛེས་སོ། །དེ་ལྟར་ཕྱིའི་དཀྱིལ་འཁོར་གྱི་དེ་ཁོ་ན་ཉིད་བཤད་ནས། ནང་ལུང་ཀྱི་དཀྱིལ་འཁོར་གྱི་དེ་ཁོ་ན་ཉིད་ནི། རྡོ་རྗེ་སློབ་དཔོན་གྱིས་ལུས་ལ་རྟེན་དང་བརྟེན་པར་བཅས་པའི་དཀྱིལ་འཁོར་རྫོགས་པར་གནས་པར་བཤད་དེ། ལུས་ནི་གཞལ་ཡས་ཁང་དུ་གྱུར། །སངས་རྒྱས་ཀུན་གྱི་ཡང་དག་བརྟེན། །ཟུར་བཞི་པ་ནི་མདུན་རྒྱབ་དང་། །གཡས་དང་གཡོན་གྱི་དབྱེ་བས་སོ། །སྟེང་འོག་སྒོ་ཡི་དབྱེ་བ་ཡིས། །སྒོ་བཞི་ཞེས་ནི་བཤད་པ་ཡིན། །སྣ་ཡི་རྩེ་མོའི་དབྱིབས་ཀྱིས་ནི། །རྟ་བབ་བཞིར་ནི་བརྗོད་པར་བྱ། །དྲ་བ་རྒྱུ་མར་ཡང་དག་བཤད། །རྒྱུས་པར་གྱུར་པ་དྲ་བ་ཕྱེད། །མ་ནི་ཟླ་བ་ཕྱེད་པ་དང་། །བུམ་པ་ལྟོ་བར་ཡང་དག་བཤད། །རྗེ་ངར་བརླ་སྦོམ་ལག་ངར་ནི། །ཀ་བ་བརྒྱད་དུ་ཡང་དག་བཤད། །མིག་གི་རྣམ་ཤེས་མེ་ལོང་སོགས། །སྒྲ་ཡི་རྣམ་ཤེས་བ་དན་དང་། །རྣ་ཡི་རྣམ་ཤེས་མེ་ཏོག་ཕྲེང་། །རིན་ཆེན་ཕ་གུ་སྤྱན་རྣམས་སོ། །ལུས་ཀྱི་རྣམ་ཤེས་དར་འཕན་དང་། །ཡིད་ཀྱི་རྣམ་ཤེས་རི་དྭགས་སོ། །མིག་ནི་འཁོར་ལོའི་མཚན་མ་དང་། །རྣ་བ་ཀུན་ནས་རྡོ་རྗེ་རྣམས། །སྣ་ནི་བ་དན་དུ་ནི་བཤད། །ལྕེ་ནི་ དྲིལ་བུ ་རུ་ནི་གསུངས། །རྔ་ཡབ་ལ་སོགས་རྣམ་དག་པ། །ལུས་ཀྱི་ཚོགས་ཞེས་བྱ་བར་བཤད། །ཡིད་ནི་དབུས་ཀྱི་པད་མར་གསུངས། །རྣམ་རྟོག་རླུང་ནི་ཡང་དག་བརྟེན། །ཡེ་ཤེས་ལྔ་ནི་རྣམ་དག་པ། །རེ་ཁཱ་ལྔར་ནི་ཡང་དག་བརྗོད། །ཕུང་པོ་ལྔ་ནི་ཡང་དག་ལྔ། །རྣམ་དག་ཁ་དོག་ལྔ་ནི་བྱེད། །ཅེས་བྱ་བ་དང་། རྡོ་རྗེ་སློབ་དཔོན་ལུས་འདི་ལ། །རྒྱལ་བའི་སྐུ་ནི་རིམ་བཞིན་གནས། །དང་པོ་གཟུགས་ཀྱི་ཕུང་པོ་ནི། །སྐུ་ཡི་རྡོ་རྗེའི་ཡང་དག་བཞུགས། །དེ་བཞིན་ནམ་མཁའི་རྡོ་རྗེ་ནི། །ཚོར་བ་ཡི་ནི་ཕུང་པོར་བཞུགས། །བཅོམ་ལྡན་གསུང་གི་རྡོ་རྗེ་ནི། །འདུ་ཤེས་ཀྱི་ནི་ཕུང་པོར་བཞུགས། །ལས་རྣམས་ཀུན་གྱི་རྡོ་རྗེ་ནི། །འདུ་བྱེད་ཀྱི་ནི་ཕུང་པོར་བཞུགས། །བཅོམ་ལྡན་ཐུགས་ཀྱི་རྡོ་རྗེ་ནི། །རྣམ་ཤེས་ཕུང་པོར་ཡང་དག་བཞུགས། །ཡང་། འདི་ཡི་ཤ་སོགས་ས་ཁམས་ལ། །བཅོམ་ལྡན་འདས་ཡུམ་སྤྱན་བཞུགས་སོ། །

ཁྲག་སོགས་ཆུ་ཡི་ཁམས་ལ་ནི། །བཅོམ་ལྡན་འདས་ཡུམ་མཱ་མ་བཞུགས། །དྲོ་བ་ལ་སོགས་མེ་ཁམས་ལ། །བཅོམ་ལྡན་འདས་ཡུམ་གོས་དཀར་བཞུགས། །བསྐྱོད་པ་ལ་སོགས་རླུང་ཁམས་ལ། །བཅོམ་ལྡན་འདས་ཡུམ་སྒྲོལ་མ་བཞུགས། །དེ་ཡི་མིག་དབང་གཉིས་ལ་ནི། །དེ་བཞིན་གཤེགས་པ་ས་སྙིང་ངོ་། །དེ་ཡི་རྣ་བའི་དབང་གཉིས་ལ། །བདེ་གཤེགས་ཕྱག་ན་རྡོ་རྗེའོ། །དེ་ཡི་སྣ་བུག་གཉིས་ན་ནི། །དེ་བཞིན་གཤེགས་པ་ནམ་མཁའི་མཛོད། །དེ་ཡི་ལྕེ་དབང་ལ་བཞུགས་པ། །དེ་བཞིན་གཤེགས་པ་འཇིག་རྟེན་དབང་། །དེ་ཡི་ཡིད་ཀྱི་དབང་པོ་ལ། །དེ་བཞིན་གཤེགས་པ་འཇམ་དབྱངས་བཞུགས། ཁམས་བཞིའི་རང་བཞིན་གོང་བུ་ནི། །ལུས་ཞེས་བྱ་བར་བརྟགས་པ་ལ། །སྒྲིབ་པ་ཐམས་ཅད་རྣམ་སེལ་བ། །དེ་བཞིན་གཤེགས་པ་དེ་བཞུགས་སོ། །ལུས་ཀྱི་ཚིགས་ནི་ཐམས་ཅད་ལ། །དེ་བཞིན་གཤེགས་པ་ཀུན་ཏུ་བཟང་། །ལུས་ཀྱི་རྩ་རྒྱུས་ཐམས་ཅད་ལ། །དེ་བཞིན་གཤེགས་ལ་བྱམས་པའོ། །ལག་པ་གཡས་པའི་རྩ་བར་ནི། །དེ་བཞིན་གཤེགས་པ་གཤིན་རྗེ་གཤེད། །ལག་པ་གཡོན་པའི་རྩ་བར་ནི། །བདེ་གཤེགས་གཞན་གྱིས་མི་ཐུབ་པ། ཁ་ཡི་པད་མོར་བཞུགས་པ་ནི། །དེ་བཞིན་གཤེགས་པ་རྟ་མགྲིན་ནོ། །གསང་བའི་གནས་སུ་བཞུགས་པ་ནི། །དེ་བཞིན་གཤེགས་པ་བདུད་རྩི་འཁྱིལ། །དཔུང་པ་གཡས་པར་བཞུགས་པ་ནི། །དེ་བཞིན་གཤེགས་པ་མི་གཡོ་མགོན། །དཔུང་པ་གཡོན་པར་བཞུགས་པ་ནི། །དེ་བཞིན་གཤེགས་པ་འདོད་པའི་རྒྱལ། །པུས་མོ་གཡས་པར་བཞུགས་པ་ནི། །དེ་བཞིན་གཤེགས་པ་དབྱུག་པ་སྔོ། །པུས་མོ་གཡོན་པར་བཞུགས་པ་ནི། །དེ་བཞིན་གཤེགས་པ་སྟོབས་པོ་ཆེ། །གང་གི་སྤྱི་གཙུག་སྟེང་བཞུགས་པ། །དེ་བཞིན་གཤེགས་པ་འཁོར་ལོས་བསྒྱུར། །རྐང་པའི་འོག་ཏུ་བཞུགས་པ་ནི། །དེ་བཞིན་གཤེགས་པ་གནོད་མཛེས་ཏེ། །ལུས་ནི་འདི་ཉིད་ཀུན་ལ་འདོར། །དེ་བཞིན་གཤེགས་པ་ཐམས་ཅད་བཞུགས། །ཞེས་བརྗོད་ནས། གཞལ་ཡས་ཁང་གི་དེ་ཁོ་ན་ཉིད་ཀྱི་ལམ་གྱི་ཆོས་དང་། ལྷའི་དེ་ཁོ་ན་ཉིད་ཀྱིས་འབྲས་བུའི་ཆོས་མཚོན་ཅིང་། ཐམས་ཅད་ཀྱང་རྡོ་རྗེ་སློབ་དཔོན་གྱི་ལུས་ལ་ཚང་ལ། ཇི་ལྟར་སློབ་དཔོན་གྱི་ལུས་ལ་ཚང་བ་དེ་བཞིན་དུ། དབང་བསྐུར་ཐོབ་པའི་སློབ་མ་ཁྱེད་རྣམས་ལ་ཡང་ཚང་ངོ་ཞེས་བཤད་པར་བྱའོ། །

དེ་ནས་རྗེས་གནང་སྦྱིན་པར་བྱ་སྟེ། སྔགས་དང་སློབ་དཔོན་བྱ་བ་དང་། ལྷ་རྣམས་མཆོད་དང་སེམས་ཅན་དོན། །ཆོས་འཆད་པ་སྟེ་རྗེས་གནང་ལྔ། །དེ་ལ་སྔགས་ཀྱི་རྗེས་གནང་ནི། རྗེས་བཟློས་བྱེད་དུ་བཅུག་ལ། བླ་མའི་ཐུགས་ཀའི་སྔགས་ཕྲེང་ལས་ཆད་པའི། སྔགས་ཕྲེང་གཉིས་པ་བླ་མའི་ཞལ་ནས་འཐོན། སློབ་མའི་ཁར་ཞུགས་ཏེ། ཏིང་ངེ་འཛིན་སེམས་དཔའི་མཐའ་བསྐོར་དུ་འཁོད་པར་བསམས་ལ།གཙོ་བོའི་སྙིང་པོ་ལན་གསུམ་བཟླས་པའི་རྗེས་སུ། །འདི་ནི་སངས་རྒྱས་ཐམས་ཅད་ཀྱི། །སྙིང་པོ་ཡི་ནི་ཡེ་ཤེས་མཆོག །སངས་རྒྱས་ཐམས་ཅད་བསྡུས་པ་ནི། ཁྱོད་ཀྱིས་ཀྱང་ནི་རྟག་པར་བཅང་། །ཞེས་བརྗོད་ལ་ལྷའི་རྣལ་འབྱོར་ཡང་སྦྱིན་ནོ། །གཙོ་བོ་འཕོས་བའི་རིམ་པའོ། །དེ་ནས་སློབ་མས་མེ་ཏོག་གི་ཕྲེང་བ་ཕུལ་ལ། བཅོམ་ལྡན་བདག་གི་བཟུང་ལགས་ཀྱི། །བཅོམ་ལྡན་བདག་ལ་མཉེས་པར་མཛོད། །ཞེས་གསོལ་བ་གདབ། བླ་མས་མེ་ཏོག་ཕྲེང་བ་དེ་ཉིད་སློབ་མའི་སྤྱི་བོར་བཞག་ནས། བཅོམ་ལྡན་འདི་ལ་བསྩལ་ལགས་ཀྱི། ། འདི་ལ་ཉེ་བར་མཛད་དུ་གསོལ། །ཞེས་བརྗོད་དོ། །དེ་ནས་སློབ་དཔོན་གྱི་བྱ་བའི་རྗེས་སུ་གནང་བ་ནི། ཕྲེང་བ་ལ་སོགས་དབང་རྣམས་ཀྱི། །དབང་བསྐུར་ང་ཡིས་བྱིན་པ་ཡིས། །སྡིག་པ་ཐམས་ཅད་རྣམ་སྤངས་ཏེ། །སངས་རྒྱས་ཀུན་གྱི་མདུན་དུ་གནས། །ད་ནི་དཀྱིལ་འཁོར་སློབ་དཔོན་ཏེ། །སྔགས་དང་རྒྱུད་རྣམས་འཛིན་པར་འགྱུར། །སངས་རྒྱས་བྱང་ཆུབ་སེམས་དཔའ་དང་། །ལྷ་རྣམས་ཀྱིས་ཀྱང་མཐུན་པར་བསྔགས། ཁྱེད་ནི་བདུད་ལས་རྣམ་རྒྱལ་ཏེ། །སངས་རྒྱས་ཐམས་ཅད་ཐོབ་པར་འགྱུར། །འཇིག་པ་མེད་པ་སེང་གེའི་སྤྱོད་པ་ལེགས་སྤྱད་པས། ཁྱེད་ཀྱི་སེམས་ཅན་དོན་རྣམས་བྱོས། །ཆོས་རྣམས་ཀུན་ལ་སེར་སྣ་དང་། །སེམས་ཅད་དོན་ལ་མི་ཕན་གང་། །ཉམས་ང་ཤིན་ཏུ་ཆེ་ན་ཡང་། །བུ་ཁྱོད་ཀྱིས་ནི་དེ་མི་བྱ། །འདི་ལ་ཐེ་ཚོམ་མི་བྱ་སྟེ། །གསང་སྔགས་སྤྱོད་པའི་ཚུལ་གྱིས་མཆོག །མཉམ་མེད་ཁྱོད་ཀྱིས་བསྒྲགས་པར་བྱ། ། དཀྱིལ་འཁོར་ལེགས་པར་བྲི་བྱ་སྟེ། །སློབ་མ་ཡོངས་སུ་བསྡུ་བར་གྱིས། །དོགས་པ་མེད་པའི་སེམས་ཀྱིས་སུ། །སློབ་མ་རྣམས་ལ་དབང་ཡང་བསྐུར། །བརྟུལ་ཞུགས་བརྟན་པས་འཇིག་རྟེན་དང་། །འཇིག་རྟེན་འདས་པའི་དངོས་གྲུབ་བསྒྲུབ། །གནས་ལུགས་ཀྱི་དེ་ཉིད་རིགས་པའི་སེམས་ཀྱིས་ནི། །དངོས་གྲུབ་དེ་རྣམས་ཐམས་ཅད་འབྱུང་། །ཆོས་ཀྱི་དབྱིངས་ཀྱི་བྱིན་རླབས་དང་། །དམ་ཚིག་རྣམས་ཀྱང་བསྐྱང་བ་དང་། ཁྱེད་རྟག་བླ་མ་ལ་གུས་པས། །དེ་ལྟར་བྱས་ན་སངས་རྒྱས་ལ། །ཕན་འདོགས་དྲིན་དུ་བཟོ་ཞེས་བརྗོད། །དེས་ན་བྱས་པ་བཟོ་བ་ཡི། །སངས་རྒྱས་རྣམས་ཀྱང་ཁྱོད་ལ་བསྲུང་། །ཞེས་བརྗོད་དོ། །

དེ་ནས་ལྷ་མཆོད་པའི་རྗེས་སུ་གནང་བ་ནི། སློབ་མའི་ཁུ་ཚུར་གཉིས་དཀུར་བཞག་སྟེ། སྒེག་པ་ལྟར་བྱེད་དུ་བཅུག་སྟེ། དེང་ནས་བརྩམས་ཏེ་རྫོགས་སངས་རྒྱས། །སྲས་དང་བཅས་པས་རྣམ་རོལ་ཅིང་། །རྡོ་རྗེ་སྙེ་མའི་རྣལ་འབྱོར་གྱིས། །དགའ་སྟོན་བདེ་བས་མཆོད་པ་གྱིས། །ཨ་ཞེས་བརྗོད། མེ་ཏོག་གི་ཕྲེང་བ་དཀྱིལ་འཁོར་ལ་འབུལ་བའི་ཚུལ་བྱེད་དུ་བཅུག་ལ། སྒེག་དང་བཅས་པས་ཕྲེང་བ་འཕང་། །སངས་རྒྱས་ཐམས་ཅད་མཆོད་པར་བྱ། །དེས་ནི་བཅོམ་ལྡན་འབྲལ་མི་འགྱུར། །ཕྲེང་བ་དེ་ཡི་རྒྱན་ཡིན་ནོ། །ༀ་ཞེས་བརྗོད། གླུ་ལེན་དུ་བཅུག་ལ། ལུས་ཅན་ཀུན་ལ་དམ་ཆོས་ཀྱི། །གླུ་ནི་ཁྱོད་ཀྱིས་བླང་བར་བྱ། །དེ་ཡི་བདེ་གཤེགས་དངོས་གྲུབ་ནི། །མྱུར་དུ་བདེ་བ་མྱོང་འགྱུར་གྱི། །གཱི་ཞེས་བརྗོད། ཐལ་མོས་གར་བྱེད་དུ་བཅུག་ལ། དེ་ཉིད་ཐལ་མོའི་གར་གྱིས་ནི། །སངས་རྒྱས་ཐམས་ཅད་མཆོད་པར་བྱ། །སངས་རྒྱས་འདུལ་བའི་ཕྲིན་ལས་ཀྱིས། །གར་མཁན་ཚུལ་དུ་རྒྱུ་བར་གྱིས། །ཧོ་ཞེས་བརྗོད། སྤོས་འབུལ་དུ་བཅུག་ལ། རྫོགས་སངས་རྒྱས་ལ་སྤོས་ཕུལ་བས། །བརྟུལ་ཞུགས་བཟང་པོས་ལེགས་ཚིམ་གྱིས། །ལུས་ཅན་བདེ་གཤེགས་ཆ་ལུགས་སུ། །ཡེ་ཤེས་ཀྱིས་ནི་ཚིམ་པར་གྱིས། །ཧཱུྃ་ཞེས་བརྗོད། མེ་ཏོག་འཐོར་དུ་བཅུག་ལ། སངས་རྒྱས་རྣམས་ལ་མེ་ཏོག་དོར། །བྱང་ཆུབ་ཡན་ལག་ཚོགས་གྱུར་པས། །མཚན་དང་དཔེ་བྱད་ལྡན་པ་ཡི། །བདེ་གཤེགས་སྐུ་ནི་ཐོབ་པར་གྱིས། །བྷྲཱུྂ་ཞེས་བརྗོད། མར་མེ་འཛིན་དུ་བཅུག་ལ། ཆོས་ཀྱི་སྒྲོན་མེ་ལེགས་སྦར་བས། །རྡོ་རྗེ་ཆོས་དང་འདྲ་བ་རུ། །སེམས་ཅན་མ་རིག་ལོངས་པ་ལ། །ཆོས་ཀྱི་སྒྲོན་མེ་གསལ་བར་གྱིས། །པྲ་ཞེས་བརྗོད། དྲི་འཐོར་དུ་བཅུག་ལ། རྒྱལ་བ་རྣམས་ལ་དྲི་ཕུལ་བས། །ཚུལ་ཁྲིམས་ཏིང་འཛིན་ཤེས་རབ་དང་། །རྣམ་གྲོལ་ཡེ་ཤེས་མཐོང་བ་ཡི། །བྱང་ཆུབ་ལུས་ཅན་རྣམས་ལ་བསྒོས། །གྷ་ཞེས་བརྗོད། དེ་ནས་སེམས་ཅད་གྱི་དོན་བྱ་བའི་རྗེས་གནང་ལ། ཐོག་མར་མ་རིག་པའི་ལིང་ཏོག་བསལ་བས་སེམས་ཅད་གྱི་དོན་བྱ་བར་བསྟན་པའི་ཕྱིར། ཐུར་མའི་རྗེས་གནང་ནི། གསེར་རམ་དངུལ་ལས་བྱས་པའི་ཐུར་མའམ། མེད་ན་རྡོ་རྗེས་སློབ་མའི་མིག་དབྱེ་བའི་ཚུལ་དུ་བྱས་ནས། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་རབ་རིབ་བསལ་བ་ལྟར། །བུ་ཁྱོད་ཀྱིས་ནི་མི་ཤེས་པའི། །ལིང་ཏོག་རྒྱལ་བ་རྣམས་ཀྱིས་བསལ། །ༀ་བཛྲ་ནེ་ཏྲ་ཨ་པ་ཧ་ར་པ་ཊ་ལ་ཧྲིཿཔྲཾ་ཞེས་བརྗོད། དེ་ལྟར་མ་རིག་པའི་ལིང་ཏོག་བསལ་བས། ཆོས་ཐམས་ཅད་གཟུགས་བརྙན་དང་འདྲ་བར་ཤེས་པར་གྱིས་ཤིག་ཅེས་བསྟན་པའི་ཕྱིར། མེ་ལོང་གི་རྗེས་གནང་ནི། ཨས་བསྔགས་པའི་མེ་ལོང་བསྟན་ཏེ། ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་ཏུ་འབྱུང་། །ངོ་བོ་ཉིད་མེད་གནས་མེད་པར། །དེ་ལྟར་ཆོས་རྣམས་ཤེས་གྱིས་ལ། །སེམས་ཅད་དོན་ནི་མཉམ་མེད་བྱོས། །འོན་ཀྱང་སྐྱོབ་པའི་སྲས་སུ་སྐྱེ། །ཞེས་བརྗོད་དོ། །

དེ་ནས་སྒྲ་ཐམས་ཅད་གྲག་ལ་རང་བཞིན་མེད་པར་བསྟན་པའི་ཕྱིར། དྲིལ་བུའི་རྗེས་གནང་ནི། ཨ་ལས་བསྐྱེད་པའི་ དྲིལ་བུ ་བྱིན་ལ། ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ནི་མཚན་ཉིད་མེད། །ནམ་མཁའ་དག་དང་མཉམ་སྦྱོར་བས། །ཀུན་མཆོག་མཉམ་པ་ཉིད་དུ་གསལ། །ཞེས་བརྗོད་ཅིང་། དཀྲོལ་དུ་གཞུག་གོ །

དེ་ལྟར་ཆོས་རྣམས་རང་བཞིན་མེད་པར་ཤེས་པས་དེ་མ་རྟོགས་པའི་སེམས་ཅད་ལ་སྙིང་རྗེ་ཆེན་པོ་སྐྱེས་ཏེ། ཉན་རང་གི་སེམས་བསྐྱེད་ཁྱད་དུ་གསད་ན། དེ་བཞིན་གཤེགས་པ་ཐམས་ཅད་མཉེས་ཤིང་རྗེས་སུ་ཆགས་པར་འགྱུར་རོ། །ཞེས་བསྟན་པའི་ཕྱིར། མདའ་གཞུའི་རྗེས་གནང་ནི། ཧོ་ཞེས་བྱ་བས་མདའ་གཞུ་བྱིན་ལ། ཕྱོགས་བཞི་སྟེང་འོག་ཏུ་འཕེན་པའི་ཚུལ་བྱེད་དུ་གཞུག་ཅིང་། དེ་བཞིན་གཤེགས་པ་ཐམས་ཅད་ཀྱི་རྗེས་སུ་ཆགས་པར་བྱོན་ཅིག་ཅེས་བརྗོད་དོ། །

དེ་ལྟར་ཆོས་ཐམས་ཅད་རང་བཞིན་མེད་པར་རྟོགས་པ་དེ་ཡང་། སྔར་ཡེ་ཤེས་འབེབས་པའི་དུས་ཀྱི་ཉམས་མྱོང་དེ་ཡིན་ལ། དེ་ཡང་རྡོ་རྗེ་སེམས་དཔའ་སྣང་ལ་རང་བཞིན་མེད་པ་མེ་ལོང་གི་གཟུགས་བརྙན་ལྟ་བུར་ཤེས་པར་གྱིས་ཤིག ཅེས་བསྟན་པའི་ཕྱིར། མེ་ལོང་གི་རྗེས་སྣང་གཉིས་པ་ནི་ཡང་མེ་ལོང་བསྟན་ལ། རྡོ་རྗེ་སེམས་དཔའ་མེ་ལོང་ལྟར། །གསལ་ཞིང་དག་ལ་རྙོག་པ་མེད། །བུ་ཁྱོད་ཀྱི་ནི་སྙིང་ལ་ཞུགས། །རྡོ་རྗེ་སེམས་དཔའི་རང་བཞིན་གཙོ། །གང་ཡང་སངས་རྒྱས་ཐམས་ཅད་ཀྱི་བདག་པོ་བྱང་ཆུབ་ཀྱི་སེམས་ནི་འདི་ཡིན་པར་ཤེས་པར་གྱིས་ཤིག་ཅེས་བརྗོད་དོ། །

དེ་ལྟར་རང་བཞིན་མེད་པའི་མྱོང་བ་སྐྱེས་པས། ཕྱོགས་ལས་རྣམ་རྒྱལ་གྱི་སྤྱོད་པས་སེམས་ཅད་གྱི་དོན་བྱ་བར་བསྟན་པའི་ཕྱིར། རལ་གྲིའི་རྗེས་གནང་ནི། ཁཾ་གི་བསྔགས་པའི་རལ་གྲི་བྱིན་ལ། འདེབས་པའི་ཚུལ་བྱེད་དུ་གཞུག་ཅིང་། འདི་དེ་ཀུན་བཟང་བརྟུལ་ཞུགས་ཏེ། །བསམ་པ་སྣ་ཚོགས་རྣམ་དག་བྱེད། ཁྱོད་ཀྱིས་ཀྱང་ནི་རྟག་ཏུ་བཅང་། །སེམས་ཅད་ཀུན་གྱི་དོན་ནི་བྱོས། །ༀ་སརྦ་ཏ་ཐཱ་ག་ཏ་ཁཌྒ་དྷ་ར་ཏྭྂ། ཞེས་བརྗོད་ནས། སློབ་མས་ཀྱང་དྷ་ར་ཡ་མི་ཧཱུྃ་ཞེས་བརྗོད་དོ། །དེ་ལྟར་སེམས་ཅན་གྱི་དོན་བྱེད་པ་ལ། ཆོས་ཀྱི་འཁོར་ལོ་བསྐོར་དགོས་པས། ཆོས་བཤད་པའི་རྗེས་གནང་བྱ་བ་ནི། སློབ་མ་རྣམས་དབང་སྟེགས་ཀྱི་སྟེང་དུ་བཞག་ལ། ༀ་བཛྲ་ཧེ་ཏུ་ཞེས་པ། འཁོར་ལོ་བྲིས་པ་རྐང་པའི་བར་དུ་གཞུག ༀ་བཛྲ་བྷ་ཥ་རཾ་ཞེས་པས་ལག་པ་གཡས་པར་དུང་བྱིན། ༀ་བཛྲ་གྷཎྜི་ཨ་ཞེས་པས། གཡོན་པར་ དྲིལ་བུ ་བྱིན། ཨ་ཞེས་པས། ལག་ངར་གཉིས་ཀྱི་སྟེང་དུ་གསང་བ་འདུས་པའི་པོ་ཏི་བཞག དེང་ནས་བརྩམས་ཏེ་སེམས་བསྐྱེད་པ། །ཙམ་གྱི་ཆོས་ཀྱི་འཁོར་ལོ་བསྐོར། ཁྱོད་ཀྱི་ཐེ་ཚོམ་དོགས་མེད་པར། །ཡིད་གཉིས་མེད་པའི་སེམས་ཀྱིས་སུ། །ཆོས་ཀྱི་དུང་ནི་བླ་མེད་པས། །དྲི་མེད་ཀུན་ཏུ་གང་བར་གྱིས། །སྔགས་སྤྱོད་སོགས་སུ་མོས་པ་ཙམ་གྱིས་ཁྱབ་ཚུལ་གྱི་ཆོ་ག་ཡིས། །སྐྱེ་བོ་རྣམས་ལ་རྟག་ཏུ་ཤོད། །དེ་ལྟར་བྱས་ན་སངས་རྒྱས་ལ། །ཕན་འདོགས་དྲིན་དུ་བཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཡང་། ཁྱོད་ལ་རྟག་ཏུ་བསྲུང་བར་མཛད། །ཅེས་བརྗོད་ལ། དེ་ནས་སློབ་མ་རྣམ་སྣང་དུ་བསྐྱེད་ཅིང་། རྣམ་སྣང་ཞུ་བ་ལས་བྱུང་བའི་འཁོར་ལོ་བྱིན་ལ། སེམས་ཅད་ཀུན་ལ་ཕན་པའི་ཕྱིར། །འཇིག་རྟེན་ཀུན་ལ་ཐམས་ཅད་དུ། །ཇི་ལྟར་སྣ་ཚོགས་འདུལ་འགྱུར་བའི། །ཆོས་ཀྱི་འཁོར་ལོ་རབ་ཏུ་བསྐོར། །ཛ་ཡ་ཛ་ཡ་སརྦ་ཏ་ཐཱ་ག་ཏ་ཨ་དྷི་པ་ཏི་པྲ་བ་དྷ་ཡ་དྷརྨ་ཙཀྲ་ཞེས་བརྗོད། སློབ་མ་རིན་འབྱུང་དུ་བསྐྱེད་ལ། རིན་འབྱུང་ཞུ་བ་ལས་བྱུང་བའི་རིན་པོ་ཆེ་བྱིན་ལ། རྐང་པ་དང་པོ་གསུམ་སྔར་དང་འདྲ་ཞིང་། སངས་རྒྱས་རིན་ཆེན་རབ་ཏུ་སྟོན། །ༀ་བཛྲ་རཏྣ་སརྦ་དྷརྨ་བི་ཤུདྡྷ་ཛྙ་ན་ཨ་བྷི་ཥེ་ཀ་སྭ་བྷ་ༀ་ༀ་ༀ་ཞེས་བརྗོད། སློབ་མ་འོད་དཔག་ཏུ་མེད་པར་བསྐྱེད་ལ། འོད་དཔག་ཏུ་མེད་པ་ཞུ་བ་ལས་བྱུང་བའི་པདྨ་བྱིན་ཏེ། འདོད་ཆགས་དག་པ་རབ་ཏུ་སྟོན། །ༀ་བཛྲ་དྷརྨ་སརྦ་དྷརྨ་བི་ཤུདྡྷ་ཛྙཱ་ན་རཱ་ག་པདྨ་ད་ལ་སྭ་བྷ་ཝ་ཧྲཱི་ཨཿཞེས་བརྗོད་དོ། །སློབ་མ་དོན་གྲུབ་དུ་བསྐྱེད་ཅིང་། དོན་གྲུབ་ཞུ་བ་ལས་བྱུང་བའི་རྡོ་རྗེ་བྱིན་ལ། རྡོ་རྗེའི་མཆོད་པ་རབ་ཏུ་བསྐོར། ༀ་བཛྲ་ཀརྨ་སརྦ་དྷརྨ་བི་ཤུདྡྷ་ཛྙཱ་ན་སརྦ་པཱུ་ཛ་སྭ་བྷཱ་ཝ་ཨ་ཞེས་བརྗོད་ནས། ཁྱོད་ཀྱིས་རིགས་བཞི་འདུལ་བའི་སེམས་ཅན་རྣམས་ལ། རིགས་དེ་དང་དེའི་ཆོས་ཀྱི་འཁོར་ལོ་བསྐོར་ལ། ཆོས་ཀྱི་དུང་བུས། སྒྲ་སྒྲོགས། བཤད་པ་གྱིས་ཤིག ཅེས་བརྗོད་དེ། དུང་འབུད་པ་དང་།  དྲིལ་བུ ་དཀྲོལ་དུ་གཞུག་གོ །དེ་དག་ནི་རྗེས་གནང་ངོ་། །

དེ་ནས་མ་འོངས་པའི་དུས་སུ་སངས་རྒྱས་སུ་འགྱུར་བ་ལུང་བསྟན་པའི་ཕྱིར། དེ་ལྟར་སངས་རྒྱས་རིགས་སུ་འཇུག ཁྱོད་ཀྱི་བདག་ལ་ལུང་བསྟན་གསོལ། །ཞེས་ལན་གསུམ་གསོལ་བ་འདེབས་སུ་བཅུག་ལ། སློབ་དཔོན་གྱིས་ཤཱཀྱ་ཐུབ་པའི་ང་རྒྱལ་དང་ལྡན་པས་ཆོས་གོས་གྱོན་ཏེ། ཆོས་གོས་ཀྱི་གྲྭ་གཉིས་སེང་གེའི་རྣ་ལྟར་བྱས་པ་ལག་པ་གཡོན་གྱིས་བཟུང་སྟེ། གཡས་པས་ དྲིལ་བུ ་བཟུང་ལ། སྐྱབས་སྦྱིན་དུ་བྱས་ཏེ། ༀ། ང་ཡིས་འདི་ལྟར་ལུང་བསྟན་ཏེ། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་མཆོག་ནི་བསྒྲུབ་པའི་ཕྱིར། ། སྲིད་པའི་ངན་འགྲོ་ཉིད་ལས་བཏོན། །ཀྱེ་དཔལ་ཆེ་གེ་མོ་རྡོ་རྗེ་ཞེས་བྱ་བའི་དེ་བཞིན་གཤེགས་པ་སིདྡྷི་ས་མ་ཡ་སྟྭཾ། བྷུ་ར་བྷུ་ཝ་སྭཿ ཞེས་ལུང་བསྟན་ཅིང་། གང་ལ་སྔགས་འདི་དང་ཕྱག་རྒྱ་འདིས་ལུང་བསྟན་པ་དེ་ལ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། དཀྱིལ་འཁོར་པ་ཐམས་ཅད་ཀྱིས་ལུང་སྟོན་པར་མཛད་དེ། སྔགས་འདི་དང་ཕྱག་རྒྱ་འདིའི་མཐུ་ཡིན་ནོ། །ཞེས་བརྗོད་དོ། །དེ་ནས་དབུགས་དབྱུང་བའི་ཕྱིར། བླ་མའི་ཞལ་སྔ་ནས་ནི་སྐྱེས། །མགོན་པོ་ཡང་དག་བདག་དབུགས་ཕྱུང་། །ཞེས་གསོལ་བ་འདེབས་སུ་བཅུག་ནས། མི་འཇིགས་པའི་ཕྱག་རྒྱ་སྤྱི་བོར་བཞག་ལ། ཁྱོད་ཀྱི་ལམ་ལ་བསླབ་པ་ནི་འདི་དག་ཡིན་ནོ་ཞེས་བསྟན་པའི་ཕྱིར། ཐོག་མར་ལམ་གྱི་དབུགས་དབྱུང་བ་ནི། ཁྱོད་ཀྱིས་སྲོག་ཆགས་གསད་པར་བྱ། །རྫུན་གྱི་ཚིག་ཀྱང་སྨྲ་བར་བྱ། །མ་བྱིན་པར་ཡང་ཁྱོད་ཀྱིས་བླང་། །གཞན་གྱི་ཆུང་མ་བསྟེན་པར་བྱ། །རྡོ་རྗེ་དྲིལ་བུའི་ཕྱག་རྒྱ་ནི། །ནམ་ཡང་དོར་བར་མི་བྱའོ། །སློབ་དཔོན་བརྙས་པར་མི་བྱ་སྟེ། །འདི་ནི་སངས་རྒྱས་ཀུན་དང་མཉམ། །བླ་མ་སངས་རྒྱས་ཀུན་མཉམ་པས། །སློབ་དཔོན་ལ་ནི་གང་བརྙས་པ། །དེས་ནི་སངས་རྒྱས་ཀུན་བརྙས་པས། །རྟག་ཏུ་སྡུག་བསྔལ་ཐོབ་པར་འགྱུར། །དེ་ཕྱིར་སངས་རྒྱས་འབྲས་འདོད་ཅིང་། །གུས་དང་ལྡན་པའི་སེམས་ཅན་གྱིས། །བསམ་ཡས་འབྲས་བུ་སྩོལ་བ་པོ། །འདི་ལ་འབད་པ་ཀུན་གྱིས་མཆོད། །བྱང་ཆུབ་གོ་འཕང་སླའམ་ཅི། །སྲིད་པ་སེལ་བར་སུ་ཡིས་ནུས། །གང་ལ་སྐྱེས་ཤིང་ཤི་བ་མེད། །གང་ཞིག་ལས་གཉིས་ལ་ནུས་ལྡན། །རྡོ་རྗེ་སློབ་དཔོན་མེད་པར་ནི། །ཉོན་མོངས་ཐམས་ཅད་སྤོང་བ་དང་། །མྱ་ངན་འདས་ཞི་གོ་འཕང་དང་། །ཕྱིར་མི་ལྡོག་པ་ཐོབ་མི་འགྱུར། །རང་གི་དམ་ཚིག་རྟག་ཏུ་བསྲུང་། །རྟག་ཏུ་དེ་བཞིན་གཤེགས་པ་མཆོད། །རྟག་ཏུ་བླ་མ་ལ་དབུལ་བྱ། །འདི་ནི་སངས་རྒྱས་ཀུན་དང་མཉམ། །ཐབས་དང་ཤེས་རབ་ལྡན་སེམས་ཀྱིས། །མི་བྱ་བ་ནི་ཅི་ཡང་མེད། །རྟག་ཏུ་རྣམ་རྟོག་མེད་གྱུར་ན། ཁྱོད་ཀྱི་འདོད་པ་ལྔ་རྣམས་སྤྱོད། །སངས་རྒྱས་ཀུན་གྱིས་མཐུན་གསུངས་ཤིང་། །བཀའ་ལུང་དམ་པ་རྟག་པ་སྟེ་གསུངས་ཡ། །དམ་ཚིག་དང་ནི་སྡོམ་པ་འདི། ཁྱོད་ཀྱིས་རྟག་ཏུ་བསྲུང་བར་བྱ། །ཞེས་བརྗོད་ནས། དཀྱིལ་འཁོར་ཆེན་པོ་འདིར་ཞུགས་ཤིང་མཐོང་བ་ཙམ་གྱིས། གནས་སྐབས་སྡིག་པ་ཀུན་ལས་གྲོལ་ཞིང་། མཐར་ཐུག་སྲིད་པའི་སྡུག་བསྔལ་ལས་གྲོལ་ཏེ། སངས་རྒྱས་ཉིད་ཐོབ་པར་ཐེ་ཚོམ་མེད་དོ་ཞེས་བསྟན་པའི་ཕྱིར། འབྲས་བུའི་དབུགས་དབྱུང་བ་དང་། གཟེངས་བསྟོད་པ་སྟབས་གཅིག་ཏུ་བསྟན་པ་ནི། མཆོག་ཏུ་གསང་བའི་དཀྱིལ་འཁོར་འདིར། །ཞུགས་པ་དང་ནི་མཐོང་བ་ཡིས། །སྡིག་པ་ཀུན་ལས་རྣམ་གྲོལ་ཏེ། །དེ་རིང་ཁྱེད་རྣམས་བདེ་བར་གནས། །བདེ་ཆེན་ཐེག་པ་འདི་ལ་ནི། །ཕྱིས་ནས་འཆི་བ་ཡོད་མ་ཡིན། །སྲིད་པ་ཤིན་ཏུ་དག་པས་ན། །སྲིད་པའི་སྡུག་བསྔལ་རྣམ་ལས་གྲོལ། །བྱང་ཆུབ་སེམས་ནི་ནམ་མི་སྤང་། །དེ་ཉིད་འདའ་བར་མི་བྱ་བས། རྡོ་རྗེ་ཞེས་བྱའི་ཕྱག་རྒྱ་ནི། །གང་ཞིག་བསྐྱེད་པ་ཉིད་ཙམ་གྱིས། །སངས་རྒྱས་ཉིད་དུ་ཐེ་ཚོམ་མེད། །དམ་པའི་ཆོས་ལ་སྨད་མི་བྱ། །ནམ་ཡང་སྤོང་བར་མི་བྱ་སྟེ། །མི་ཤེས་པའམ་གཏི་མུག་གིས། །རྣམ་པར་བསྟན་པར་བྱ་མ་ཡིན། །རྡོ་རྗེ་དང་ནི་ དྲིལ་བུ ་དང་། ། ཕྱག་རྒྱ་ནམ་ཡང་སྨད་མི་བྱ། །འདི་ནི་སངས་རྒྱས་ཀུན་དང་མཉམ། །རང་གི་བདག་ཉིད་ཡོངས་སྤངས་ཏེ། །དཀའ་ཐུབ་ཀྱིས་ཀྱང་གདུང་མི་བྱ། །ཇི་ལྟར་བདེ་བས་དེ་བཟུང་ནས། །འདི་ནི་མ་འོངས་རྫོགས་སངས་རྒྱས། །དེ་རིང་བདུད་རྣམས་ཕམ་བྱས་ནས། །གྲོང་ཁྱེར་དམ་པར་རབ་ཏུ་ཞུགས། །དེང་དུས་ཁྱེད་ཀྱིས་སངས་རྒྱས་ཉིད། །འཐོབ་འགྱུར་འདི་ལ་ཐེ་ཚོམ་མེད། །ཞེས་བརྗོད་ནས། ཁྱེད་ཀྱི་ཕྱི་རྡུལ་ཚོན་གྱི་དཀྱིལ་འཁོར་དུ་བུམ་པའི་དབང་ཐོབ། ལུས་ཀྱི་དྲི་མ་དག་པར་བྱས། ལམ་བསྐྱེད་པའི་རིམ་པ་བསྒོམ་པ་ལ་དབང་། འབྲས་བུ་སྤྲུལ་པའི་སྐུ་མངོན་དུ་བྱེད་པའི་སྐལ་བ་དང་ལྡན་པར་བྱས་སོ། །ཞེས་བརྡ་སྤྲད་དང་། བུམ་པའི་དབང་ངོ་། །དེ་ནས་གསང་དབང་གི་དོན་དུ། སློབ་མ་རྣམ་སྣང་གི་ང་རྒྱལ་འཛིན་པས། བླ་མ་ལོངས་སྤྱོད་རྫོགས་པའི་སྐུར་དམིགས་ལ། ཕྱག་དང་མཎྜལ་སྔོན་དུ་འགྲོ་བས། མེ་ཏོག་དང་བཅས་པའི་ཐལ་མོ་སྦྱར་ནས། རྡོ་རྗེ་རྒྱལ་པོ་ཐེག་པ་ཆེ། །ནམ་མཁའི་སྤྱོད་པ་རྣམ་སྦྱོང་བ། །ཀུན་ཏུ་བཟང་པོ་མཆོད་པའི་མཆོག །རྒྱལ་མཆོག་མཆོད་པ་བཤད་དུ་གསོལ། །འདོད་ཆགས་ཞེ་སྡང་གཏི་མུག་ཆེ། ། རྡོ་རྗེ་ཐེག་པ་རབ་སྟོན་པ། །ནམ་མཁའི་དབྱིངས་དང་མཚུངས་པའི་མཆོག །རྒྱལ་བཞི་མཆོད་པ་བཤད་དུ་གསོལ། །ཐར་པའི་ལམ་ནི་རབ་སྟོན་པ། །ཐེག་པ་གསུམ་གྱི་ལམ་ལ་གནས། །སངས་རྒྱས་སྐལ་མཆོག་དག་པའི་བདག །མི་མཆོག་མཆོད་ལ་བཤད་དུ་གསོལ། །བྱང་ཆུབ་སེམས་ནི་རྒྱས་པའི་སྤྱན། །ཆོས་ཀྱི་འཁོར་ལོ་རབ་བསྐོར་བ། །སྐུ་གསུང་ཐུགས་ནི་ཤིན་ཏུ་དག །ཕྱག་འཚལ་རྡོ་རྗེ་ཐེག་པ་ལ། །ཞེས་ལན་གསུམ་གྱིས་གསོལ་བ་བཏབ་ནས། སློབ་མའི་གདོང་གཡོགས་ཏེ། ཡི་གེ་གསུམ་བརྗོད་ཅིང་བདུད་རྩི་བསང་གཏོར་བྱའོ། །དེ་ནས་སློབ་དཔོན་བདག་ཉིད་ཞེ་སྡང་རྡོ་རྗེར་དམིགས་ནས་སློབ་མས་ཕུལ་བའམ་མེད་ན། བསྒོམས་པའི་ལྷ་མོ་རེག་རྡོ་རྗེར་བསྐྱེད་ལ། མཁའ་གསང་བྱིན་གྱིས་བརླབས་ནས་སྙོམས་པར་ཞུགས་པ་ལས་བྱུང་བའི་བདེ་བའི་སྒྲས། ཕྱོགས་བཅུའི་དེ་བཞིན་གཤེགས་པ་ཐམས་ཅད་སྤྱན་དྲངས། ཞལ་དུ་ཞུགས། རྗེས་སུ་ཆགས་པའི་མེས་བཞུ་བའི་བྱང་ཆུབ་ཀྱི་སེམས་རྡོ་རྗེའི་རྩེ་མོར་ཕབ་སྟེ། བདེ་བ་ཆེན་པོས་ལུས་ཀྱི་ལྷ་རྣམས་མཉེས་པར་བསམས་ལ། ༀ་སརྦ་ཏ་ཐཱ་ག་ཏ་ཨ་ནུ་ར་ག་ན་བཛྲ་སྭ་བྷ་ཝ་ཨཱཏྨ་ཀོ྅་ཧཾ། ཞེས་བརྗོད་ནས། ཕཊ་ཀྱི་སྒྲས་ཡུམ་གྱི་ཁར་མངོན་པར་ཕབ་པ། རྒན་པོ་དང་མིང་མེད་ཀྱིས་བླང་ནས། སློབ་མའི་ཁར་སྦྱིན་ཞིང་། འདས་པའི་རྡོ་རྗེ་འཆང་སོགས་ཀྱིས། །ཇི་ལྟར་སངས་རྒྱས་སྲས་དབང་བསྐུར། །བྱང་ཆུབ་སེམས་ནི་བཟང་པོ་ཡིས། །དེ་ལྟར་བུ་ཁྱོད་དབང་བསྐུར་རོ། །ༀ་ཨཱཿབཛྲ་དྷཱྀཀ་ཧཱུྃ་ཧཱུྃ། ཞེས་བརྗོད། སློབ་མས་མ་ཧཱ་སུ་ཁ་ཧོ། ཞེས་བརྗོད་དེ་མྱངས་པས། ལུས་ཐམས་ཅད་ཟག་མེད་ཀྱི་བདེ་བས་གང་། ལུས་དཀྱིལ་གྱི་ལྷ་རྣམས་མཉེས། རང་བཞིན་བརྒྱད་ཅུའི་རྣམ་རྟོག་འགགས། གསུང་རྡོ་རྗེ་འོད་དཔག་ཏུ་མེད་པའི་ངོ་བོར་བསྒོམ་མོ། །དེ་ནས། གདོང་གཡོགས་ཕྱེ་སྟེ། ཁྱོད་ཀྱི་བྷ་གའི་དཀྱིལ་འཁོར་དུ་གསང་བའི་དབང་ཐོབ། ངག་གི་དྲི་མ་དག ལམ་རང་བྱིན་བརླབས་བསྒོམ་པ་ལ་དབང་། འབྲས་བུ་ལོངས་སྐུ་མངོན་དུ་བྱེད་པའི་སྐལ་བ་དང་ལྡན་པ་ཞེས་བརྡ་སྤྲད། གསང་བའི་དབང་ངོ་། །དེ་ནས་ཤེས་རབ་ཡེ་ཤེས་ཀྱི་དབང་གི་དོན་དུ། ཕྱག་དང་མཎྜལ་སྔོན་དུ་འགྲོ་བས། སློབ་མ་འོད་དཔག་ཏུ་མེད་པའི་ང་རྒྱལ་འཛིན་པས། བླ་མ་ཆོས་ཀྱི་སྐུར་དམིགས་ལ་མེ་ཏོག་དང་བཅས་པས་ཐལ་མོ་སྦྱར་ཏེ། མཆོག་སྦྱིན་རྡོ་རྗེ་མཆོག་ཁྱོད་འདུད། །ཡང་དག་མཐར་གྱུར་ཁྱོད་ལ་འདུད། །སྟོང་ཉིད་ལས་བྱུང་ཁྱོད་ལ་འདུད། །སངས་རྒྱས་བྱང་ཆུབ་ཕྱག་འཚལ་འདུད། །ཐམས་ཅད་སྟོང་པའི་བདག་ཉིད་ཅན། །མངོན་པར་བྱང་ཆུབ་བལྟ་བར་འཚལ། །ལས་དང་སྐྱེ་ལས་རྣམ་གྲོལ་ཞིང་། །སྣང་བ་གསུམ་པོ་སྤངས་པ་ཡི། །མངོན་པར་བྱང་ཆུབ་མཐོང་བར་ནི། །མགོན་པོ་ཆེན་པོ་བདག་འཚལ་ལོ། །སངས་རྒྱས་ཀུན་གྱི་ཡེ་ཤེས་ཆེ། །དེ་བཞིན་གཤེགས་པ་ཀུན་གྱི་གནས། །རྡོ་རྗེ་ཡེ་ཤེས་བླ་ན་མེད། །མགོན་པོ་ཆེན་པོ་བདག་འཚལ་ལོ། །ཐོག་མཐའ་མེད་ཅིང་ཞི་བ་དང་། །ཉོན་མོངས་ཐམས་ཅད་རྣམ་སྦྱོང་ཞིང་། །ལུས་དང་ངག་དང་སེམས་སྦྱོང་བ། །རྡོ་རྗེ་ཆེན་པོ་བདག་འཚལ་ལོ། །ཞེས་ལན་གསུམ་གྱིས་གསོལ་བ་བཏབ་ནས། སྔ་མ་བཞིན་དུ་སློབ་མའི་གདོང་གཡོགས་ཏེ་བསང་གཏོར་བྱས་ལ། སྐད་ཅིག་གིས་མི་བསྐྱོད་པར་བསྒོམ་དུ་བཅུག མཚན་ཉིད་དང་ལྡན་པའི་རིག་མ་རེག་རྡོ་རྗེར་མ་སྐུ་མདོག་སྔོན་མོ་ཞལ་གསུམ་ཕྱག་དྲུག་མར་བསྐྱེད་ནས། དེའི་ལག་ནས་བཟུང་སྟེ། ཁྱོད་ཀྱི་དགའ་མ་འདི་ཟུངས་ཤིག །བརྟེན་བྱ་སངས་རྒྱས་རྣམས་ཀྱི་དགོངས། །འཁོར་ལོ་རིམ་པའི་སྦྱོར་བ་ཡིས། །བདེ་བ་དམ་པ་སྤྱད་པར་གྱིས། །སྲིད་པ་གསུམ་ན་རིག་འདི་ལས། །གཞན་པའི་ཐབས་ཀྱི་སངས་རྒྱས་མིན། །དེས་ན་འདི་དང་ནམ་དུ་ཡང་། ཁྱོད་ཀྱི་འབྲལ་བར་མ་བྱེད་ཅིག །འདི་དེ་སངས་རྒྱས་ཐམས་ཅད་ཀྱིས། །རིག་མའི་བརྟུལ་ཞུགས་བླ་ན་མེད། །རྨོངས་པ་གང་ཞིག་འདི་སྤོང་བ། །དེ་ལ་མཆོག་གི་དངོས་གྲུབ་མེད། །ཅེས་བརྗོད་ནས། སློབ་མའི་ལག་ཏུ་སྦྱིན་ནོ། །རིག་མ་དེས་ཀྱང་འདི་སྐད་ཅེས། བཤང་གཅི་ལ་སོགས་ཟ་བ་དང་། ཁྲག་དང་ཁུ་བ་དེ་བཞིན་ཤ། རྟག་པར་བུད་མེད་མཆོག་གུས་པས། །བྷ་གའི་པདྨོར་འོ་བྱེད་པ། །ཇི་ལྟར་སྤྲོ་བར་བྱེད་དམ་ཅི། །ཇི་ལྟར་དགའ་བ་སྨྲོས་ཤིག་བུ། །ཞེས་དྲིས་པའི་ལན་དུ། བཤང་གཅི་བདུད་རྩི་བཟའ་བྱ་བ། །བུད་མེད་རྟག་གུས་ཅིས་མི་བགྱིད། །བྷ་གའི་པདྨོར་འོ་བྱེད་པ། །ལྷ་མོ་བདག་ནི་ཅིས་མི་སྤྲོ། །ཞེས་ལན་བཏབ་པས། དེ་མཉེས་ཏེ་གསང་བའི་པདྨ་བསྟན་ཏེ། འདི་སྐད་དུ། ཨེ་མ་ང་ཡི་པདྨ་འདི། །བདེ་བ་ཐམས་ཅད་ཀྱི་ནི་གནས། །གང་ཞིག་ཆོ་ག་བཞིན་བསྟེན་པ། །དེ་ཡི་མདུན་ན་ང་གནས་ཏེ། །སངས་རྒྱས་བསྙེན་པ་ལ་སོགས་པ། །པདྨར་བྱ་བ་ཇི་བཞིན་གྱིས། །བདེ་ཆེན་རྒྱལ་པོ་རང་ཉིད་ནི། །འདི་ཉིད་དུ་ནི་རྟག་ཏུ་ཞུགས། །བྷ་ཛ་མོ་ཀྵ་ཧོཿཞེས་བརྗོད་ནས། སློབ་མའི་པང་དུ་བྱོན་པ་དང་། འདུ་ཤེས་གསུམ་དང་ལྡན་པས་སྙོམས་པར་ཞུགས་པས། བྱང་ཆུབ་ཀྱི་སེམས་སྤྱི་བོ་ནས། མགྲིན་པར་བྱོན་པ་ན། སེམས་སྣང་བ་དགའ་བའི་ཡེ་ཤེས། སྙིང་ཁར་བྱོན་པ་ན། སྣང་བ་མཆེད་པ་མཆོག་དགའི་ཡེ་ཤེས། ལྟེ་བར་བྱོན་པ་ན། སྣང་བ་ཉེར་ཐོབ་དགའ་བྲལ་གྱི་ཡེ་ཤེས། རྡོ་རྗེ་ནོར་བུའི་རྩེ་མོར་བྱོན་པ་ན། ཐམས་ཅད་སྟོང་པ་འོད་གསལ་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱོང་བར་བྱས་ནས་རེ་ཞིག་མཉམ་པར་བཞག་གོ །གལ་ཏེ་ཐིག་ལེ་མི་ཐུབ་པར་འཛག་ན། དོན་གྲུབ་ཀྱི་ང་རྒྱལ་གྱིས། ཕྱོགས་བཅུའི་དེ་བཞིན་གཤེགས་པ་ཐམས་ཅད་ལ་བྱང་ཆུབ་ཀྱི་སེམས་ཀྱིས་མཆོད་པར་བསམས་ནས། ༀ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷ་ཝ་ཨཱཏྨ་ཀོ྅་ཧཾ་ཞེས་བརྗོད་དོ། །དེ་ནས་རིག་མ་དེས། སྤྱི་བོར་ལག་པ་བཞག་ནས། འདོད་ཆགས་བྲལ་བ་ལྟ་བུ་ཡི། ཁམས་གསུམ་ན་ནི་སྡིག་མེད་དེ། །དེ་བས་འདོད་ལ་ཆགས་པ་དང་། ཁྱོད་ཀྱིས་ནམ་ཡང་མི་བྱའོ། །དེ་རིང་ཕན་ཆད་བུ་ཁྱོད་ཀྱིས། །ཇི་སྲིད་བྱང་ཆུབ་སྙིང་པོའི་བར། །རྨི་ལམ་ཇི་བཞིན་སེམས་ཅན་གྱི། །དོན་ནི་བླ་ན་མེད་པར་བྱོས། །བསྐྱེད་པའི་རིམ་པ་བསྒོམ་པ་ཡི། །འདི་ནི་མན་ངག་ལས་ནི་ཤེས། །རིགས་མ་འདི་ནི་དོར་བྱས་ནས། །ཐབས་གཞན་གྱིས་ནི་འཚང་མི་རྒྱ། །བརྟུལ་ཞུགས་རྣམས་ཀྱིས་མཆོག་གིས་མཆོག །རིག་མའི་བརྟུལ་ཞུགས་བུ་ཡིས་སྤྱོད། །དེ་ལྟར་འདི་ནི་རྣལ་འབྱོར་མཆོག །རྡོ་རྗེ་རྣལ་འབྱོར་རྣལ་འབྱོར་མཆོག །རིམ་པ་ཇི་བཞིན་ཡོངས་ཤེས་བྱ། །རྡོ་རྗེ་སེམས་དཔའི་གོ་འཕང་བསྟེན། །ཞེས་གསུངས་པ་དང་། དེའི་ལན་དུ། སློབ་མས་ཀྱང་། བདག་ལ་དངོས་གྲུབ་མཆོག་བསྩལ་ལགས། །ཏིང་འཛིན་ཀུན་གྱི་འབྲས་བུའང་བསྩལ། །སེམས་ཅན་ཀུན་ལ་ཅི་འདོད་པར། །དངོས་གྲུབ་བླ་ན་མེད་པ་བསྩལ། །ཞེས་ཚིག་གི་གཏང་རག་ཏུ་དབུལ་ལོ། །དེ་ནས་ཁྱོད་ཀྱིས་བྱང་ཆུབ་སེམས་ཀྱི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་དག ལམ་འོད་གསལ་བསྒོམ་པ་ལ་དབང་། འབྲས་བུ་ཆོས་སྐུ་མངོན་དུ་གྱུར་པའི་སྐལ་བ་དང་ལྡན་པར་བྱས་སོ་ཞེས་བརྡ་སྤྲད་དོ། །

ཤེས་རབ་ཡེ་ཤེས་ཀྱི་དབང་ངོ་། །དེ་ནས་དབང་བཞི་པའི་དོན་དུ། ཕྱག་དང་མཎྜལ་སྔོན་དུ་འགྲོ་བས། སློབ་མ་མི་བསྐྱོད་པའི་ང་རྒྱལ་འཛིན་པས། བླ་མ་སྐུ་གསུམ་དབྱེར་མེད་པའི་རང་བཞིན་དུ་དམིགས་ལ། མེ་ཏོག་དང་བཅས་པའི་ཐལ་མོ་སྦྱར་ནས། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱོང་བ། །དེ་རིང་བཤད་པའི་རིན་ཆེན་གྱིས། །གཙོ་བོ་བདག་ལ་བཀའ་དྲིན་སྐྱོབས། ཁྱོད་ཞབས་པད་མོ་སྤང་ནས་ནི། །གཙོ་བོ་གཞན་ལ་སྐྱབས་མ་མཆིས། །འགྲོ་བའི་དཔའ་བོ་ཐུབ་ཆེན་གྱིས། །བདག་ལ་ངེས་པར་དབང་བསྐུར་ཅིག །ཅེས་ལན་གསུམ་གྱིས་གསོལ་བ་བཏབ་ནས། སྔ་མ་བཞིན་དུ་སློབ་མའི་གདོང་གཡོགས། བསམ་གཏན་གྱི་འདུག་སྟངས་ཀྱི་གནས་སུ་བཅུག་ལ། དེ་ནས། དབང་བཞི་པ་ཚིག་གི་སྒོ་ནས་ངོ་སྤྲད་པར་བྱ་སྟེ། དེ་ལ་འདིར་དབང་བཞི་པ་ནི། ཐམས་ཅད་སྟོང་པ་འོད་གསལ་ཡིན་ལ། དེ་མངོན་དུ་བྱེད་པ་ཡང་། སྒྱུ་ལུས་བསྒོམ་པ་སྔོན་དུ་འགྲོ་བ་ཅན་ཡིན་ཏེ། ཇི་སྐད་དུ། བདག་བྱིན་རླབས་པའི་རིམ་གྱིས་ནི། །འོད་གསལ་བ་ནི་ཐོབ་པར་འགྱུར། །དེ་བས་རྡོ་རྗེ་སློབ་དཔོན་གྱིས། །དང་པོར་བདག་ལ་བྱིན་བརླབས་བསྟན། །ཞེས་གསུངས་ཤིང་། བདག་བྱིན་རླབས་དེའང་། རླུང་སེམས་ཙམ་ལས་གྲུབ་པའི་སྒྱུ་མ་ལྟ་བུའི་སྐུ། མཚན་དཔེ་སོགས་རྣམ་པ་ཐམས་ཅད་ཀྱི་མཆོག་དང་ལྡན་པ། མེ་ལོང་གི་གཟུགས་བརྙན་ལྟ་བུ་ཞིག་སྟེ། དེ་སྐད་དུ་ཡང་། དངོས་དང་དངོས་མེད་ལས་གྲོལ་བ། །རྡོ་རྗེ་སེམས་དཔའ་ལེགས་བྲིས་པ། །མེ་ལོང་དྲི་མ་མེད་པ་ལ། །གཟུགས་བརྙན་གསལ་བར་སྣང་དང་མཚུངས། །རྣམ་པ་ཀུན་གྱི་མཆོག་ལྡན་ཞིང་། །སྐུ་ནི་ལྟ་བས་མི་ངོམས་པ། །སློབ་མ་བཟང་པོ་དེ་ལ་བསྟན། །བདག་བྱིན་བརླབས་ཞེས་དེ་བཤད་དོ། །ཞེས་གསུངས་པས་སོ། །དེ་བས་ན་དང་པོར་སློབ་མ། སེམས་སྣང་བ་གསུམ་གྱི་ཉེར་ལེན་དང་། རླུང་ལྔའི་ལྷན་ཅིག་བྱེད་རྐྱེན་ལས་གྲུབ་པའི་སྒྱུ་མ་ལྟ་བུའི་སྐུ། རྡོ་རྗེ་འཆང་ཆེན་པོ་སྣང་ལ་རང་བཞིན་མེད་པ་མེ་ལོང་གི་གཟུགས་བརྙན་ལྟ་བུར་བསྒོམ་དུ་བཅུག་ནས། སླར་ཡང་དེ་ཉིད་མེ་ལོང་ལ་ཧས་བཏབ་པའམ། ནམ་མཁའ་པ་འཇའ་ཡལ་བ་ལྟར་ཐམས་ཅད་སྟོང་པ་འོད་གསལ་གྱི་ངང་དུ་ཐིམ་པས། རྟགས་རྣམས་རིམ་གྱིས་འབྱུང་སྟེ། དང་པོར་ས་ཆུ་ལ་ཐིམ་པས་སྨིག་སྒྱུ་ལྟ་བུ། དེའི་འོག་ཏུ་ཆུ་མེ་ལ་ཐིམ་པས་དུ་བ་ལྟ་བུ། དེའི་འོག་ཏུ་མེ་རླུང་ལ་ཐིམ་པས་མེ་ཁྱེར་ལྟ་བུ། དེའི་འོག་ཏུ་རླུང་རྣམ་ཤེས་ལ་ཐིམ་པས་མར་མེ་འབར་བ་ལྟ་བུ། དེའི་འོག་ཏུ་རྣམ་ཤེས་འོད་གསལ་ལ་ཐིམ་པ་ན། རང་བཞིན་བརྒྱད་ཅུའི་རྣམ་རྟོག་རིམ་གྱིས་འགགས་པས། སེམས་སྣང་བ་གསུམ་གྱི་ཡེ་ཤེས་རིམ་གྱི་མངོན་དུ་འགྱུར་ཏེ། ཐོག་མར་འདོད་ཆགས་ལས་གྱུར་པའི་རང་བཞིན་སུམ་ཅུ་རྩ་གསུམ་འགགས་པས། བྱང་ཆུབ་ཀྱི་སེམས་ཀུན་ཏུ་བཟང་པོ་དང་པོ་སྣང་བའི་ཡེ་ཤེས་མངོན་དུ་གྱུར་པ་དང་ཟླ་བའི་འོད་ཟེར་ཤར་བ་ལྟ་བུ། དེ་ནས་ཞེ་སྡང་ལས་གྱུར་པའི་རང་བཞིན་བཞི་བཅུ་འགགས་པས། བྱང་ཆུབ་ཀྱི་སེམས་ཀུན་ཏུ་བཟང་པོ་གཉིས་པ་སྣང་བ་མཆེད་པའི་ཡེ་ཤེས་མངོན་དུ་གྱུར་པ་ན། ཉི་མའི་འོད་ཟེར་ཤར་བ་ལྟ་བུ། དེ་ནས་གཏི་མུག་ལས་གྱུར་པའི་རང་བཞིན་བདུན་འགགས་པས། བྱང་ཆུབ་ཀྱི་སེམས་ཀུན་ཏུ་བཟང་པོ་གསུམ་པ་སྣང་བ་ཉེར་ཐོབ་ཀྱི་ཡེ་ཤེས་མངོན་དུ་གྱུར་པ་ན། མཚམས་ཀྱི་མུན་པ་ལྟ་བུས་དྲན་རིག་གི་རྟོག་པ་མ་ལུས་པ་འགགས་པ་ཅི་ཡང་མི་གསལ་བའི་ངོ་བོ་ཅན་འབྱུང་། དེའི་འོག་ཏུ་སྣང་བ་ཉེར་ཐོབ་འོད་གསལ་ལ་ཐིམ་པ་ན། དཔེར་ན། ཐོ་རངས་ཀྱི་སྤྲིན་མེད་པའི་ནམ་མཁའ་སྣང་མུན་གྱི་སྒྲིབ་བྱེད་ཐམས་ཅད་བྲལ་བས། ནམ་མཁའི་རང་མདོག་ཇི་ལྟ་བ་མཐོང་བ་བཞིན་དུ་ཡུལ་ཡུལ་ཅན་སོགས་སྤྲོས་པའི་མཚན་མ་ཐམས་ཅད་ཉེ་བར་ཞི་བས། ཆོས་ཐམས་ཅད་ཀྱི་གནས་ལུགས་དོན་དམ་པའི་བདེན་པ། ཆུ་ལ་ཆུ་བཞག་པ་དང་། མར་ལ་མར་བཞག་གི་ཚུལ་དུ་སོ་སོ་རང་རིག་པའི་ཡེ་ཤེས་ཀྱི་མངོན་དུ་གྱུར་པ་ནི། ཐམས་ཅད་སྟོང་པ་འོད་གསལ་ཞེས་ཀྱང་བྱ། ཤེས་རབ་ཀྱི་ཕ་རོལ་ཏུ་ཕྱིན་པ་དང་། དེ་བཞིན་ཉིད་དང་། ཡང་དག་པའི་མཐའ་དང་། དོན་དམ་པའི་བདེན་པ་ཞེས་ཀྱང་བྱ་སྟེ་དེ་ཉིད་དབང་བཞི་པའི་ངོ་བོ་ཡིན་ནོ་ཞེས་བརྡ་སྤྲད་ནས། དངོས་པོ་ཐམས་ཅད་དང་བྲལ་བ་ཞེས་སོགས་བརྗོད་ནས་ཅུང་ཞིག་མཉམ་པར་འཇོག་ཏུ་གཞུག་གོ །

འོད་གསལ་དེ་འབའ་ཞིག་ལ་གནས་ན། ཞི་བ་མྱང་འདས་ཀྱི་མཐར་ལྟུང་བར་འགྱུར་བས་ཆུ་ལས་ཉ་ལྡང་བའམ། གཉིད་ལོག་པ་མྱུར་བར་སད་པ་ལྟར་སྔོན་གྱི་འཕེན་པའི་དབང་གིས། འོད་གསལ་དེ་ཉིད་ལས་ལངས་ཏེ་སྦྲུལ་ཤུན་པ་བརྗེས་པ་ལྟར་མ་དག་པའི་ལུས་སྤངས་ནས་ལུགས་བཟློག་གི་སྣང་བ་གསུམ་རླུང་དང་བཅས་པ་ལས་དག་པའི་སྒྱུ་ལུས་གྲིབ་མ་ལྟར་བཅད་དུ་མེད་ཅིང་གཞིག་ཏུ་མེད་པ། མཚན་དཔེས་བརྒྱན་པའི་ཡིད་ཀྱི་རང་བཞིན་གྱི་ལུས་མངོན་སུམ་དུ་བྱས་པ་ནི། ཟུང་འཇུག་རྡོ་རྗེ་འཆང་ཆེན་པོ་རྒྱུད་ཐམས་ཅད་ཀྱི་གླེང་གཞི་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་སྙིང་པོ་ཡིན་ནོ་ཞེས་བརྡ་སྤྲད་དོ། །

དེ་ནས་སློབ་མས་ཀྱང་དེ་ཁོ་ན་ཉིད་ལ་ཡིད་ཆེས་ཤིང་སྤྲོ་བ་བསྐྱེད་པའི་ཚུལ་གྱིས། ཨེ་མ་ཧོ་སངས་རྒྱས་ཨེ་མ་ཧོ་ཆོས། །ཆོས་བཤད་པ་ནི་ངོ་མཚར་ཆེ། །ཡང་དག་དོན་ནི་དག་པའི་དོན། །བྱང་ཆུབ་སེམས་ལ་ཕྱག་འཚལ་ལོ། ། ཞེས་བརྗོད་དོ། །དེ་ནས་གདོང་གཡོགས་བསམ་ནས། ཁྱོད་ཀྱི་དོན་དམ་པའི་དཀྱིལ་འཁོར་དུ་ཚིག་དབང་རིན་ཆེན་བཞི་པ་ཐོབ། སྒོ་གསུམ་བག་ཆགས་དང་བཅས་པའི་དྲི་མ་དག ལམ་ཟུང་འཇུག་བསྒོམ་པ་ལ་དབང་། འབྲས་བུ་སྐུ་གསུམ་དབྱེར་མེད་རྡོ་རྗེ་འཆང་ཆེན་པོ་མངོན་དུ་བྱེད་པའི་སྐལ་བ་དང་ལྡན་པར་བྱས་སོ་ཞེས་བརྡ་སྤྲད། དབང་བཞི་པའོ། །

གསུམ་པ་མཇུག་གི་ཆོ་ག་ནི།

དེ་ནས་གསུམ་པ་མཇུག་གི་བྱ་བ་ལ་གཉིས་ཏེ། སློབ་མའི་བྱ་བ་དང་། བླ་མའི་བྱ་བའོ། །དང་པོ་ལ་ཡང་དམ་ཚིག་བསྡུས་ཏེ་ཁས་བླང་བ་དང་། ཡོན་དབུལ་བ་གཉིས་ཀྱི་དང་པོ་ནི། གཙོ་བོས་ཇི་ལྟར་བཀའ་བསྩལ་པ། །དེ་དག་ཐམས་ཅད་བདག་གིས་བགྱི། །ཞེས་ལན་གསུམ་བརྗོད་དོ། །གཉིས་པ་ནི། དངོས་སུ་ཅི་འབྱོར་བའི་ཡོན་ཕུལ་ནས། ཡིད་ཀྱིས་ལུས་ལོངས་སྤྱོད་དགེ་བའི་རྩ་བ་ཐམས་ཅད་འབུལ་བར་བསམས་ནས། དེང་ནས་བརྩམས་ཏེ་བདག་བྲན་དུ། ཁྱེད་ལ་བདག་ནི་འབུལ་ལགས་ཀྱིས། ཁྱེད་ཀྱི་སློབ་མར་གཟུང་བ་དང་། །ཆ་ཤས་ཀྱིས་ཀྱང་སྤྱད་དུ་གསོལ། །ཞེས་ལན་གསུམ་དུ་བརྗོད་དོ། །གཉིས་པ་བླ་མའི་བྱ་བ་ལ་གསུམ་གྱིས། དཀྱིལ་འཁོར་མཆོད་ཅིང་དངོས་གྲུབ་བླང་བ་ནི། བླ་མས་དཀྱིལ་འཁོར་གྱི་འཁོར་ལོ་ལ། ཕྱི་ནང་གསང་བ་ཡིད་ལས་བྱུང་བའི་མཆོད་པ་རྣམས་ཀྱིས་མཆོད་པས། མཆོད་དང་ཐུན་མོང་གི་དངོས་གྲུབ་ཇི་ལྟར་འདོད་པ་རྣམས་ལ་གསོལ་བ་གདབ་བོ། །གཉིས་པ་བཟོད་པར་གསོལ་ཞིང་ལྷག་ཆད་ཁ་བསྐང་བ་ནི། མ་འབྱོར་བ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་བ། །དེ་ཀུན་མགོན་པོས་བཟོད་པར་གསོལ། །ཞེས་བརྗོད་ནས། ལྷག་ཆད་སྐང་བའི་ཕྱིར་དུ་ཞི་བའི་སྦྱིན་སྲེག་བྱ་བའམ། མ་གྲུབ་ན་ཡིག་གེ་བརྒྱ་པ་མང་དུ་བཟླས་སོ། །གསུམ་པ་སྨོན་ལམ་གདབ་ཅིང་གཤེགས་སུ་གསོལ་བ་ནི། དེ་ནས་ལས་བསགས་པ་འབྲས་བུ་དང་ལྡན་པར་བྱ་བའི་ཕྱིར། སེམས་ཅན་ཐམས་ཅད་བདེ་གྱུར་ཅིང་། །སེམས་ཅན་ཐམས་ཅད་སྐྱོན་མེད་པར། །གང་གི་ལམ་གྱིས་གྲོལ་གྱུར་པ། །དེས་ནི་སངས་རྒྱས་མྱུར་ཐོབ་ཤོག །ཅེས་སོགས་སྨོན་ལམ་རྒྱ་ཆེར་བཏབ་ནས། དཀྱིལ་འཁོར་ལ་མ་བསྟིམ་པའི་ལྷ་ཚོགས་རྣམས་ལ། ༀ་ཁྱེད་ཀྱིས་སེམས་ཅད་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །བཛྲ་མུཿཞེས་པས་གཤེགས་སུ་གསོལ། རས་བྲིས་ཀྱི་དཀྱིལ་འཁོར་ལ་བསྟིམ་པ་རྣམས་ནི་རབ་ཏུ་གནས་པ་མཆོག་ཏུ་གྱུར་པའི་ཕྱིར་བརྟན་པར་བཞུགས་སུ་གསོལ་ལོ། །

དེ་ནས་རང་ཉིད་ཆོ་ག་གསུམ་གྱི་བསྲུང་ལ། ལས་ཀྱི་རྗེས་བསྡུས་ནས། རྒྱུན་གྱི་རྣལ་འབྱོར་ལ་གནས་པར་བྱའོ། །འདི་སྦྱར་དགེ་བས་མཐའ་ཡས་འགྲོ་བ་ཀུན། །སྨིན་བྱེད་དབང་བཞིའི་རིམ་པས་རྒྱུད་སྦྱངས་ནས། །གྲོལ་བྱེད་རིམ་གཉིས་ཟབ་མོའི་ལམ་བསྒོམས་ཏེ། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །དཔལ་གསང་བ་འདུས་པའི་དཀྱིལ་འཁོར་དུ་དབང་བསྐུར་བའི་ཆོ་གའི་རིམ་པ་དོན་གསལ་བ་འདི་ནི། ཆོས་ཀྱི་རྒྱལ་པོ་འཕགས་པ་རིན་པོ་ཆེའི་དཀྱིལ་འཁོར་ཀྱི་ཆོ་ག་བཞིར་བྱས་ནས། ཚིག་དོན་གྱི་ཆ་མ་བདེ་བ་རྣམས་ཅུང་ཟད་བཅོས་ཞིང་། བུ་སྟོན་རིན་པོ་ཆེའི་དཀྱིལ་ཆོག་གི་ལེགས་ཆ་རྣམས་ཀྱང་བླངས་ནས། ལས་དང་པོ་པ་རྣམས་ཀྱིས་འཇུག་བདེ་བར་བྱ་བའི་ཕྱིར། དགེ་སློང་གཞོན་ནུ་བློ་གྲོས་ཀྱིས་ལྷ་ཡུལ་གུང་ཐང་གི་དབེན་གནས་རི་འདབས་སུ་སྦྱར་བའི་ཡི་གེའི་མཚམས་སྦྱོར་ནེ་པོ་བས་བགྱིས་པ་དགེའོ། །འདིས་བསྟན་པ་དང་སེམས་ཅན་མང་པོ་ལ་ཕན་ཐོགས་པར་གྱུར་ཅིག། །།