རེད་མདའ་བ་གཞོན་ནུ་བློ་གྲོས་ཀྱི་རྣམ་ཐར་བཞུགས།

ན་མོ་གུ་རུ་ཝེ། དམིགས་མེད་བརྩེ་བའི་གཏེར་གྱུར་སྤྱན་རས་གཟིགས། །དྲི་མེད་མཁྱེན་པའི་དབང་པོ་འཇམ་པའི་དབྱངས། །གངས་ཅན་མཁས་པའི་གཙུག་རྒྱན་རེད་མདའ་བ། །གཞོན་ནུ་བློ་གྲོས་ཞབས་ལ་ཕྱག་འཚལ་ལོ། །དམ་པ་ཁྱོད་ཀྱིས་རྨད་བྱུང་མཛད་པའི་ཚུལ། །ཉིད་ཀྱིས་གསུང་ལ་ཇི་ལྟར་འབྱུང་བ་བཞིན། །སྒྲོ་བཀུར་མེད་པར་མདོ་ཙམ་བརྗོད་པར་བྱ། །སྐལ་བཟང་དེ་དག་དྭང་བའི་ཡིད་ཀྱིས་ཉོན། །

དེ་ལ་སྡོམ་ནི། རིགས་ལ་གཟིགས་ནས་སྐྱེ་བ་བཞེས་ཚུལ་དང་། །གཞོན་ནུའི་དུས་ཀྱི་རྣམ་པར་ཐར་པ་དང་། །དགེ་སྦྱོང་སྤྱོད་པའི་དྲི་མེད་བརྟེན་ཚུལ་དང་། །དམ་པས་བསྔགས་པའི་ལྟ་སྤྱོད་བསྟན་ཚུལ་དང་། །སྐྱེས་བུ་དམ་པ་གུས་པས་བསྟེན་ཚུལ་དང་། །ཐུབ་པའི་དགོངས་པ་ཇི་ལྟར་བཙལ་ཚུལ་དང་། །ཡང་དག་ལྟ་བའི་གནད་ཟབ་རྙེད་ཚུལ་དང་། །རང་དགའ་གཞན་འགྲེལ་རྣམ་བཤད་མཛད་ཚུལ་དང་། །འཆད་ཉན་མཛད་འབྲས་སློབ་མ་སྤེལ་ཚུལ་དང་། །ཐུགས་དམ་གྱི་མཐིལ་གང་ལ་མཛད་ཚུལ་དང་། །ལྷག་པའི་ལྷ་ལ་དམ་བཅའ་ཕུལ་ཚུལ་དང་། །དབེན་པའི་གནས་སུ་ཡིད་རབ་བཞོལ་ཚུལ་དང་། །སྐྱེ་ཤི་མི་འཇིགས་གདེང་རྣམས་ཐོབ་ཚུལ་དང་། །ཕུལ་ཕྱིན་མཛད་པ་གཞན་ཡང་མཛད་ཚུལ་དང་། །གདུལ་བྱའི་དོན་དུ་ཞིང་གཞན་གཤེགས་ཚུལ་དང་། །དད་ལྡན་མོས་པའི་རྟེན་རྣམས་བཞག་ཚུལ་རྣམས། །མགོན་པོ་ཁྱེད་ཀྱིས་མཛད་པའི་ཕྱི་སྡོམ་ཡིན། །

དེ་ལ་སྐྱེ་བ་བཞེས་པའི་ཚུལ་ནི། སངས་རྒྱས་ཀྱི་བསྟན་པ་དར་བའི་ས་ཕྱོགས་མགོན་པོ་འཇམ་པའི་དབྱངས་ཀྱི་རྣམ་འཕྲུལ་རྒྱུད་མར་བྱོན་པའི་གདན་ས་དཔལ་ལྡན་ས་སྐྱའི་བྱ་འདབས་ཡུལ་རེད་མདའ་ཞེས་བྱ་བར། བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་དང་གདུང་གཅིག་པ་ཇོ་བོ་རེད་མདའ་བའི་བློན་པོ་ཆེན་པོ་ཞིག་གི་སྲས་སུ་འཁྲུངས་ཏེ། ལྷུམས་སུ་འཇུག་པ་དང་། བལྟམས་པའི་དུས་ཀྱི་མཚན་ལྟས་བཟང་པོ་རྣམས་ལྷ་མོ་སྒྱུ་འཕྲུལ་མ་ལ་བྱུང་བ་དང་ཚུལ་མཚུངས་པར་འབྱུང་འདུག་སྟེ་མང་པས་མ་བྲིས་སོ། །

གཞོན་ནུའི་རྣམ་ཐར་ནི། དགུང་ལོ་བཅུ་པའི་དུས་ཉིད་ན་ཏིང་ངེ་འཛིན་བཟང་པོ་མངའ་བ་ཡིན་ཏེ། ཡུམ་གྱིས་བ་ཚིགས་ལ་འཚོར་གཏང་པས་ཉིན་གཅིག་བ་སླེབ་ཀྱང་ཁོང་མ་བྱོན་པར་བལྟར་ཕྱིན་པ་ཚིགས་ཁ་ན་སྒོམ་ལ་འཇམ་འདུག་སྐད་དེ། སྔོན་གཞོན་ནུ་དོན་གྲུབ་ཞིང་ལས་ལ་གཟིགས་སུ་བྱོན་པས་སྐྱོ་སྟེ་ཤིང་གི་བསིལ་གྲིབ་ལ་མཉམ་པར་བཞག་པས་བསམ་གཏན་བཞི་ཐོབ་པ་དང་ཚུལ་མཚུངས་སོ། །

དེ་ནས་བཙུན་མོ་བཞེས་པར་ཞུས་པས། ཁྱིམ་པ་རྣམས་འདམ་རྫབ་མེ་འོབས་ན་གཡོས་པ་དང་འདྲ་ལ། རབ་ཏུ་བྱུང་བ་ནི་སྐམ་པ་དང་བསིལ་ཁང་ན་གནས་པ་དང་འདྲ་བར་ཁྱིམ་པ་དང་རབ་བྱུང་གི་སྐྱོན་ཡོན་མཁྱེན་ཅིང་། རབ་བྱུང་གི་རྟེན་མ་ཡིན་པ་ལ་ཆོས་རྣམ་དག་བྱེད་པའི་སྐབས་མེད་པར་རིགས་ནས་བཙུན་མོ་མ་བཞེས། དེར་ཡབ་ཡུམ་ནི་གྲོངས། ཡུལ་ཆབ་སྲིད་རྣམས་སྤངས། རབ་ཏུ་བྱུང་སྟེ་ཨ་ནེ་ཅིག་གི་ཞབས་ཏོག་བྱེད་ཀྱིན་ས་སྐྱར་བཞུགས་ནས་ལག་ལེན་སློབ་ཀྱིན་ཡོད་པ། དམ་པ་འདི་ནི་རྒྱལ་བུ་སྙིང་སྟོབས་ཆེན་པོ་དང་འདྲ་བར་བློ་སྟོབས་དཔག་ཏུ་མེད་པ་མངའ་བ་ཡིན་ཏེ། ཉིན་གཅིག་ཨ་ནེར་བྱོན་ཏེ། ང་ཡང་ན་གོང་དུ་ཕྱིན་ལ་དཔོན་ཆེན་གྱི་ལས་ཀ་བླངས་ལ་ཆབ་སྲིད་ཆོས་ཀྱིས་སྐྱོང་བ་གཅིག་བྱེད། ཡང་ན་སྡེ་སྣོད་ལ་ཐུགས་སྦྱོང་བྱས་ནས་སངས་རྒྱས་ཀྱི་བསྟན་པ་དར་ཞིང་རྒྱས་པར་བྱེད་དགོས་པར་འདུག་གསུང་། ཨ་ནེས་ཁྱེད་ཀྱིས་དེ་འདྲ་མི་ཡོང་། ཁྱེད་རང་ཡང་སྐྱིད་ང་ལའང་ཕན། ལག་ལེན་སློབས་ཞུས་པས་མ་གསན་པར་དགུང་ལོ་བཅོ་བརྒྱད་པ་ལ། ཉ་དབོན་གྱི་ཞབས་ལ་བཏུགས་ཏེ་རིགས་པས་བསྟན་བཅོས་རྣམས་བསླབས་ཏེ་དགུང་ལོ་ཉེར་གསུམ་པ་ལ་སེལ་པ་རྟག་པའི་རབ་བྱེད་དང་། ཚད་མའི་ཡུལ་དང་བྱེད་པ་བརྟག་པའི་རབ་བྱེད་སོགས་མཛད་དེ་ཆོས་ཀྱི་གྲགས་པ་གཉིས་པ་ལྟར་འགྱུར་ཏོ། །

དགེ་སྦྱོང་གི་སྤྱོད་པ་དྲི་མེད་བསྟན་པའི་ཚུལ་ནི། ཉིད་ཀྱི་གསུང་དགེ་སྦྱོང་གི་ཚུལ་ལ་གདམས་པ་ལས། གང་ཞིག་ལེགས་གསུང་དམ་ཆོས་འདུལ་བ་ལ། །རབ་ཏུ་བྱུང་ནས་ལེགས་པར་མི་སྡོམ་ཞིང་། །ཐུབ་པའི་བཀའ་ལུང་ཚུལ་མིན་འདུས་བྱེད་པའི། །དགེ་སྦྱོང་དེ་དག་བསྟན་པའི་ཆོམ་རྐུན་ཡིན། །འཁྱོག་པོར་སྨྲ་ལ་གཞན་དག་རླིང་པོར་སེམས། །ངག་མི་བཙུན་པ་དགེ་སྦྱོང་ཚུལ་མིན་པས། །གྱ་གྱུའི་སེམས་དང་དེ་ཡི་ཚུལ་སྤངས་ཏེ། །གསོང་པོར་སྨྲ་ལ་ཁོ་བོ་རྟག་ཏུ་བསྟེན། །འཛེམ་མེད་སྨྲ་བ་གཞན་དག་སྤོབས་པར་སེམས། །ངག་མི་སྡོམ་པ་དགེ་སྦྱོང་ཚུལ་མིན་པས། །མུ་ཅོར་སྨྲ་བ་སྨྱོན་པའི་ཚུལ་སྤངས་ཏེ། །ཞི་བའི་ཚུལ་ལ་ཁོ་བོ་རྟག་ཏུ་བསྟེན། །ཕྱི་ཚུལ་འཆོས་པ་གཞན་དག་བཙུན་པོར་སེམས། །གཡོ་སྒྱུའི་སྤྱོད་པ་དགེ་སྦྱོང་ཚུལ་མིན་པས། །ཕ་རོལ་བྲིད་བྱེད་ཡོན་པོའི་ཚུལ་སྤངས་ཏེ། །དེས་པའི་ཚུལ་ལ་ཁོ་བོ་རྟག་ཏུ་བསྟེན། །རང་དགའི་སྤྱོད་པ་གཞན་དག་དྲང་པོར་སེམས། །དབང་པོ་མི་སྡོམ་དགེ་སྦྱོང་ཚུལ་མིན་པས། །བག་དང་མི་ལྡན་ཧྲལ་པོའི་ཚུལ་སྤངས་ཏེ། །བག་ཡོད་ཚུལ་ལ་ཁོ་བོ་རྟག་དུ་བསྟེན། །བྱ་བྱེད་མང་བ་གཞན་དག་དྲུང་པོར་སེམས། །རྣམ་གཡེང་འདོད་པ་དགེ་སྦྱོང་ཚུལ་མིན་པས། །འདུ་འཛི་བསྲེལ་བ་ཁྱིམ་པའི་ཚུལ་སྤངས་ཏེ། །དོན་ཉུང་ཚུལ་ལ་ཁོ་བོ་རྟག་ཏུ་བསྟེན། །ལོངས་སྤྱོད་འབྱོར་བ་གཞན་དག་དཔལ་དུ་སེམས། །འདོད་ཞེན་ཆེ་བ་དགེ་སྦྱོང་ཚུལ་མིན་པས། །ཟང་ཟིང་དང་བཅས་གྲོང་པའི་ཚུལ་སྤངས་ཏེ། །ཆོག་ཤེས་ཚུལ་ལ་ཁོ་བོ་རྟག་ཏུ་བསྟེན། །གྲོང་ཐབས་འགྲིམ་པ་གཞན་དག་གདུལ་བྱར་སེམས། །རྙེད་བསྐུར་སྒྲུབ་པ་དགེ་སྦྱོང་ཚུལ་མིན་པས། །ཁྱེ་སྤོགས་འདོད་པ་ཚོང་པའི་ཚུལ་སྤངས་ཏེ། །བས་མཐའི་གནས་ལ་ཁོ་བོ་རྟག་ཏུ་བསྟེན། །ཅེས་གསུངས་པ་ལས་ཤེས་སོ། །

དམ་པས་བསྔགས་པའི་ལྟ་སྤྱོད་ལྡན་པའི་ཚུལ་ནི། འཇམ་དབྱངས་ནམ་མཁའ་རིན་ཆེན་ལ་སྤྲིང་པ་ལས། དིང་སང་འདི་ན་མཁས་རློམ་མང་ན་ཡང་། །རིགས་དང་མི་རིགས་འབྱེད་པའི་བློ་ལྡན་ཉུང་། །རི་བོང་ཅལ་གྱི་རྗེས་འབྲང་རི་དྭགས་བཞིན། །ཕལ་ཆེར་སྒྲ་ཡི་རྗེས་འབྲང་ཁོ་ནར་ཟད། །མཁས་བཙུན་བཟང་པོར་གྲགས་པ་མང་ན་ཡང་། །ཐུབ་བསྟན་གཅེས་པར་འཛིན་པའི་དམ་པ་དཀོན། །ཁྱེ་སྤོགས་འདོད་པའི་ཞིང་པ་ཚོང་པ་བཞིན། །ཕལ་ཆེར་ཚེ་འདིའི་ཆེ་ཐབས་སྒྲུབ་པ་མང་། །འདི་ན་ལ་ལ་ཉེས་བཤད་དུག་ཆུས་མྱོང་། །ཁ་ཅིག་ལྟ་ངན་རི་ཡི་སྤོ་ལ་ཞེན། །གཞན་དག་ཚུལ་འཆལ་འདོད་པ་བསོད་ཉམས་ཏེ། །མང་པོ་འབྲས་མེད་སྦུན་པ་འཕྱར་བས་ངལ། །རང་གཞན་ཁ་སྒྱུར་བཞིན་དུ་མི་འཆལ་ཞིང་། །ལྕགས་ཕྱེ་གསེར་གྱིས་གཡོགས་པ་ཅི་ལྟ་བར། །ཁོང་པ་རབ་བདུག་ཕྱི་རོལ་འཕགས་ཚུལ་གྱིས། །ཆོས་ལྟར་བཅོས་པའི་སྟོན་པའང་ཤིན་ཏུ་མང་། །དེ་ཕྱིར་བློ་ངན་རྣམས་ཀྱིས་ཉེས་བཤད་ཀྱིས། །ཐུབ་བསྟན་དྲི་མར་བྱས་པ་མ་བཟོད་པར། །རིགས་དང་མི་རིགས་ཅུང་ཟད་ཕྱེ་ན་ཡང་། །དིང་སང་འདི་ན་བདག་ལ་བཤེ་བ་མང་། །འཇིག་རྟེན་སྐྱེ་བོ་མ་མཉེས་གྱུར་ཀྱང་བླ། །དམ་པས་ཁྲེལ་ན་གསོན་པོ་སྲོག་སོང་ཡིན། །དེ་ཕྱིར་བདག་ལ་བསྟན་པ་དང་འགལ་བའི། །ལྟ་སྤྱོད་ཡོད་ན་དམ་པ་རྣམས་ཀྱིས་སྨོད། །ཁོ་བོ་སངས་རྒྱས་བསྟན་ལ་རབ་བྱུང་ནས། །རིགས་དང་མི་རིགས་འབྱེད་ཤེས་ཚུན་ཆད་དུ། །ལུས་ངག་ཡིད་ཀྱི་སྤྱོད་པ་ཅི་བྱེད་ཀྱང་། །རབ་ཏུ་སྒྲིམས་ནས་ཐུབ་པའི་གསུང་བཞིན་སྒྲུབ། །ཐོག་མེད་གོམས་པའི་ཉོན་མོངས་ཤུགས་དྲག་པས། །གལ་ཏེ་མི་རིགས་ཅུང་ཟད་བྱས་ན་ཡང་། །དེ་ཡི་མོད་ལ་དུག་ཟོས་དྲན་པ་བཞིན། །འགྱོད་སེམས་ལྡན་པས་སླར་ཡང་ཆོས་བཞིན་བྱས། །གནས་ལུགས་འབྱེད་པའི་འོད་ཟེར་སྟོང་ལྡན་པའི། །ཐུབ་བསྟན་ཉི་མའི་དཀྱིལ་འཁོར་མཐོང་བས་ན། །བློ་ངན་མུན་པའི་ཁྲོད་ན་འོད་འབྱིན་པའི། །གཞན་གཞུང་མེ་ཁྱེར་ཚོགས་ལ་བདག་མི་གུས། །གསུང་རབ་རིན་ཆེན་གླིང་ལ་དབང་བསྒྱུར་བའི། །ཀླུ་སྒྲུབ་ཀླུ་དབང་ལེགས་བཤད་གདེངས་ཀའི་ནོར། །དགོས་འདོད་ཀུན་འབྱུང་འདོད་དགུར་འབྱོར་པས་ན། །ཉེས་བཤད་འཆིང་བུའི་ཚོགས་ཀྱིས་བདག་མི་མགུ། །མཐའ་གཉིས་སྤངས་པའི་ཆུ་གཏེར་ལ་གནས་ཏེ། །གདེངས་ཅན་ཀླུ་དབང་ཀླུ་སྒྲུབ་རིང་ལུགས་འཛིན། །ཁོ་བོའི་ལྟ་ཟེར་འབར་བའི་གཟི་བརྗིད་ལ། །ཕས་རྒོལ་འདབ་བཟང་སྟོང་གིས་འགོང་མི་ནུས། །འཇིག་ཚོགས་ལྟ་རི་སྤོ་མཐོན་འཇོམས་བྱེད་པའི། །ལུང་རིགས་རྡོ་རྗེའི་གནམ་ལྕགས་སྟོང་ཡོད་ཀྱང་། །རྨོངས་པའི་གོ་ཆ་སྲ་བརྟན་ཆེར་བགོས་པའི། །སྐྱེ་བོ་འདི་ལ་བདག་གིས་ཅི་བྱར་ཡོད། །དེ་ཕྱིར་ཆོས་དང་ལྡན་པར་སྨྲས་ན་ཡང་། །དིང་སང་འདི་ན་ཕན་པར་མ་མཐོང་ནས། །ཏིང་འཛིན་བདུད་རྩིའི་རོ་དེ་མྱང་འདོད་པས། །ཁོ་བོའི་ཡིད་ནི་དབེན་པའི་གནས་སུ་གཞོལ། །ཅེས་གསུངས་སོ། །

བླ་མ་དམ་པ་བསྟེན་པའི་ཚུལ་ནི། སྐྱེ་དགུའི་གཙུག་རྒྱན་ཆོས་རྗེ་བསོད་རྒྱལ་དང་། །རྒྱལ་བའི་སྲས་པོ་ཐོགས་མེད་བཟང་པོ་དཔལ། །མ་ཏི་པཎ་ཆེན་པཎ་ཆེན་བྱང་རྩེ་དང་། །མཁས་པའི་དབང་པོ་ཉ་དབོན་ཀུན་དགའ་སོགས། །བཀའ་དྲིན་ནོད་པའི་བླ་མ་བཅུ་ཕྲག་གཉིས། །ཡུན་རིང་འབད་དེ་གུས་པའི་གཙུག་གིས་བསྟེན། །ཅེས་གསུངས་སོ། །ཐུབ་པའི་དགོངས་པ་བཙལ་བའི་ཚུལ་ནི། ཕྲིན་ཡིག་ནོར་བུའི་འཕྲེང་བ་ལས། གང་གི་ཤེས་བྱའི་དེ་ཉིད་ཀུན། །མ་ལུས་ཐུགས་སུ་ཆུད་གྱུར་ཅིང་། །གཞན་ལའང་བརྩེ་བས་རྗེས་སྟོན་པ། །སངས་རྒྱས་དེ་ལ་བདག་ཅག་དད། །མི་ཤེས་མུན་པ་སེལ་བའི་སྣང་བྱེད་འཆོས། །ལུང་དང་རྟོགས་པའི་བདག་ཉིད་དམ་ཆོས་དང་། །ཇི་ལྟ་ཇི་སྙེད་གཟིགས་པའི་སྤྱན་མངའ་བ། །འཕགས་མཆོག་དགེ་འདུན་ཚོགས་ལའང་བདག་གུས་སོ། །

སངས་རྒྱས་བསྟན་ལ་ཆེད་ཆེར་མི་འཛིན་ཅིང་། །དམ་ཆོས་རིན་ཆེན་འཚོང་པའི་དོན་མཐུན་པ། །འདོད་པའི་ཁོལ་བོ་སྲེད་པའི་རྗེས་འབྲང་མི། །མཁས་པར་རློམ་གཞན་དེ་དག་མིང་ཙམ་ཡིན། །ཐུབ་བསྟན་འགྲོ་བའི་མིག་བུ་ལྟར་མཐོང་ཞིང་། །གསུང་རབ་དེ་ཉིད་འབྱེད་ལ་རྟག་ཏུ་བརྩོན། །ལུང་རིགས་བདུད་རྩིས་བློ་གྲོས་ལུས་རྒྱས་པའི། །བསྟན་འཛིན་རྣམས་ཀྱི་སྙན་དུ་འདི་སྤྲིང་ངོ་། །ཕན་བདེའི་འབྱུང་གནས་ཐུབ་བསྟན་ཡིད་བཞིན་ནོར། །སྒྲོ་སྐུར་དྲི་མའི་འདམ་རྫབ་ཀྱིས་གོས་པ། །ལུང་རིགས་རྣམ་དག་གངྒཱའི་ཆུ་རྒྱུན་གྱིས། །རྟག་ཏུ་བྱི་དོར་བྱེད་ལ་བརྩོན་འཚལ་ལོ། །ཞེས་སྨྲོས་ནས།། །།

ཐུབ་པས་ཐོག་མར་ཆོས་འཁོར་སྐོར་བའི་ཚུལ་ནི། འཕགས་པའི་ཡུལ་དུ་ཐུབ་པའི་དབང་པོ་ཡིས། །དམན་དང་རྒྱ་ཆེའི་ཆོས་ལ་མོས་རྣམས་ལ། །བརྒྱད་ཁྲི་བཞི་སྟོང་ཆོས་ཀྱི་འཁོར་ལོ་ནི། །འདོད་ཆགས་བྲལ་བའི་གཟུགས་ཀྱིས་ཐོག་མར་སྐོར། །གཅིག་ཏུ་ཟབ་མོའི་ཆོས་ལ་མོས་རྣམས་ལ། །འཁོར་ལོས་སྒྱུར་བའི་གཟུགས་སུ་སྤྲུལ་ནས་ཀྱང་། །ཆགས་ཅན་སྐྱེས་བུ་འདུལ་བའི་དོན་གྱི་ཕྱིར། །རྣམ་མང་ རྒྱུད་སྡེའི་ཆོས་འཁོར་གཞན་དུ་བསྐོར། །ཅེས་གསུངས་སོ། །

བསྡུ་བ་རིམ་པ་གསུམ ་བྱུང་ཚུལ་ནི། ཐུབ་པ་ནོངས་འོག་རྒྱལ་པོའི་ཁབ་ཉིད་དུ། །འོད་སྲུང་ཉེ་བ་འཁོར་དང་ཀུན་དགའ་བོས། །ཐེག་པ་དམན་པའི་སྡེ་སྣོད་རིན་ཆེན་གསུམ། །སྒྲོ་བསྐུར་མེད་པར་བསྡུས་ཞེས་ལུང་ལས་འབྱུང་། །དེ་ནས་བརྒྱ་ཕྲག་གཅིག་དང་བཅུ་འདས་ཚེ། །ཡངས་པ་ཅན་གྱི་གྲོང་ཁྱེར་ཆེན་པོ་རུ། །གྲགས་པ་ལ་སོགས་འཕགས་པ་བདུན་བརྒྱ་ཡིས། །བསྡུ་བ་གཉིས་པ་བྱས་ཞེས་གསལ་བར་ཐོས། །དེ་ནས་རིམ་གྱིས་བདུད་ཀྱི་ལས་གཡོས་ཏེ། །ཐུབ་པའི་བསྟན་ལ་སྡེ་པ་བཅོ་བརྒྱད་གྱེས། །ཀྲི་ཀྲིའི་རྨི་ལམ་ལུང་བསྟན་མདོ་སྡེ་ཡི། །རྗེས་འབྲང་བསྡུ་བ་གསུམ་པ་བྱས་ཞེས་གྲག །ཤིན་ཏུ་རྒྱས་པའི་མདོ་སྡེ་རྣམ་མང་རྣམས། །བྱམས་པ་སྤྱན་རས་གཟིགས་དང་འཇམ་དབྱངས་སོགས། །རྒྱལ་སྲས་རྣམས་ཀྱིས་ལེགས་པར་བསྡུས་སོ་ཞེས། །ཚད་ལྡན་མཁས་པའི་གཞུང་དུ་གསལ་བར་བཀོད། །ཅེས་གསུངས་སོ།། །།

བཀའི་དགོངས་འབྲེལ་བྱུང་ཚུལ་ནི། ཉི་མ་གུང་པ་ཤ་ནའི་གོས་ཅན་སོགས། །ཉན་ཐོས་བསྟན་པ་འཛིན་པར་ཐུབ་པས་གསུངས། །ཐེག་ཆེན་བསྟན་ལ་རྒྱལ་བའི་རྒྱལ་ཚབ་དུ། །ཀླུ་སྒྲུབ་ཀླུའི་དབང་པོ་ལུང་བསྟན་ཏོ། །

བསྡུ་བ་གཉིས་པའི་འོག་ཏུ་གསུང་རབ་ཀྱི། །དགོངས་འགྲེལ་གྲུབ་མཐའ་བཞི་ཡི་དབྱེ་བ་བྱུང་། །མངོན་པ་སྡེ་བདུན་བྱེ་བྲག་བཤད་ཚོགས་སོགས། །བྱེ་བྲག་སྨྲ་བའི་གཞུང་ཆེན་ཐོག་མར་དར། །དེ་ཚེ་རིགས་པའི་རྗེས་འབྲང་བློ་ལྡན་འགས། །བསྟན་བཅོས་དོན་ལ་ཡིད་བརྟན་མ་མཐོང་ནས། །མདོ་སྡེའི་དོན་ལ་རིགས་པས་རྣམ་དཔྱད་དེ། །དོན་རྣམས་འཇོག་ཕྱིར་མདོ་སྡེ་པ་ཞེས་གྲགས། །སྟོན་པ་འདས་ནས་བཞི་བརྒྱའི་ལོ་འདས་ཚེ། །བེ་ཏའི་ཡུལ་དུ་ལི་ཙ་བྱི་གཞོན་ནུ། །ཀླུ་སྒྲུབ་ཞེས་བྱའི་དགེ་སློང་དུ་གྱུར་ནས། །ཐུབ་བསྟན་རྒྱས་པར་མདོ་སྡེའི་ཚོགས་ལས་གསུངས། །ཀླུ་ཡི་ཡུལ་སོགས་འཇིག་རྟེན་གཞན་དག་ནས། །ཟབ་ཅིང་རྒྱ་ཆེ་བའི་མདོ་སྡེ་རྣམ་མང་བླངས། །རྟག་ཆད་མཐར་ལྟའི་མུན་པ་སྟུག་པོ་བཅོམ། །མཐའ་བྲལ་དབུ་མའི་སྒྲོན་མེ་དེ་ཡིས་སྦར། །དེ་འོག་ཐུབ་པའི་ལུང་བསྟན་ཐོགས་མེད་ཀྱིས། །མི་ཕམ་མགོན་ལ་བཀའ་དྲིན་རྗེས་ནོད་ནས། །རྣམ་རིག་སྨྲ་བའི་གྲུབ་མཐའ་གསལ་བྱས་ཞེས། །རྒྱ་བོད་ཤིང་རྟ་ཆེན་པོ་རྣམས་ལ་གྲགས། །འདི་དག་ཐེག་ཆེན་ཤིང་རྟའི་སྲོལ་འབྱེད་དེ། །ཐེག་ཆེན་མདོ་དང་རྒྱུད་སྡེའི་དགོངས་པ་རྣམས། །གཉིས་པོ་འདི་ཡི་ལུགས་དང་མི་མཐུན་པ། །གང་གིས་བཀྲལ་དེ་ལོག་པའི་ལམ་དུ་ཤེས། །དེ་ལྟར་དགོངས་འགྲེལ་ཤིང་རྟའི་སྲོལ་འབྱེད་ང་། །ཐུབ་པའི་བསྟན་ལ་འཕགས་པའི་ཡུལ་དུ་བྱུང་། །ལུགས་དེ་དག་དང་མི་མཐུན་གང་ཡིན་པ། །དེ་ནི་བདེ་གཤེགས་གྲུབ་མཐའི་ཁོངས་སུ་མིན། །དེ་ཕྱིར་བདག་ཉིད་ལེགས་པར་འདོད་རྣམས་ཀྱིས། །ཚུལ་འདི་དག་ལ་ལེགས་པར་འདྲིས་བྱས་ནས། །ཆོས་ལུགས་གཞུང་ལུགས་གྲུབ་པའི་མཐའ་རྣམས་ལ། །རྣལ་འབྱོར་སྤྱོད་ན་མཛེས་ཀྱི་གཞན་དུ་མིན། །གངས་རིའི་ཁྲོད་འདིར་རྨོངས་རྣམས་གཙོར་བྱེད་པའི། །ལོག་པའི་གཞུང་དང་ཆོས་ལུགས་བསམ་མི་ཁྱབ། །མཁས་པ་རྣམས་ལ་ཚད་མར་གྲགས་པ་ཡི། །གཞུང་ལུགས་འགའ་ཡང་ཡིད་བརྟན་མེད་པར་མཐོང་། །ཞེས་དང་། །ཐུབ་པའི་བསྟན་ལ་ཉིད་ཀྱི་དགོངས་པ་བཞིན། །འཁྲུལ་མེད་སྨྲ་བ་འཕགས་པ་ཀླུ་སྒྲུབ་ཡིན། །ཀླུ་སྒྲུབ་དང་ནི་ཐོགས་མེད་གཉིས། །ཁྱོད་ལྟར་འཛིན་པར་ཁྱོད་ཀྱིས་གསུངས། །དེ་དག་གཞུང་གི་རྗེས་འབྲངས་ནས། །བདག་གིས་ཁྱོད་ཀྱི་དགོངས་པ་བཙལ། །ཞེས་གསུངས་སོ། །

ཡང་དག་པའི་ལྟ་བ་རྙེད་པའི་ཚུལ་ནི། རྒྱ་གར་བལ་བོ་བོད་ཀྱི་ཡུལ་རྣམས་སུ། །མདོ་དོན་སྨྲ་བའི་མཁས་པ་མང་བྱོན་ཡང་། །ཕལ་ཆེར་རྟོག་པས་སྦྱར་བའི་དོན་རྣམས་ལ། །མཁས་པར་ཟད་ཀྱི་དེ་ཉིད་དོན་ལ་མིན། །ཐུབ་པའི་བསྟན་ལ་ཉིད་ཀྱི་དགོངས་པ་བཞིན། འཁྲུལ་མེད་སྨྲ་བ་ཀླུ་སྒྲུབ་ཆེན་པོ་ཡིན། །དེ་ཡི་གཞུང་ལུགས་རབ་དཀར་ཀུནྡའི་འཚལ། །ཇི་བཞིན་འབྱེད་པ་དཔལ་ལྡན་ཟླ་བ་ཡིན། །སློབ་དཔོན་དེ་དག་དགོངས་པ་འདི་ཡིན་ཞེས། །མཁས་རློམ་མང་ཡང་སུ་ལ་ཅི་ཆ་ཡོད། །རྣམ་བཀྲ་ཚོན་གྱི་རི་མོ་གསལ་བ་ཡི། །རྣམ་དབྱེ་དམུས་ལོང་དག་ལ་ཡོད་དམ་ཅི། །ལོང་བས་རིན་ཆེན་གཏེར་ཁ་ཕྱེ་པ་ལྟར། །རྣམ་དག་འཕགས་པའི་མིག་དང་མི་ལྡན་ཡང་། །རྒྱལ་དང་རྒྱལ་བའི་སྲས་ཀྱི་བྱིན་བརླབས་ལ། །རྟེན་འབྱུང་ཟབ་མོའི་ལམ་འདི་ཁོ་བོས་རྙེད། །འདས་དང་མ་བྱོན་ད་ལྟར་བཞུགས་པ་ཡི། །རྒྱལ་བ་སྲས་བཅས་དགེས་པའི་ལམ་འདི་ཡིན། །འདི་ལས་གཞན་དུ་ཐར་པའི་ལམ་ཡོད་ཅེས། །སྨྲ་བ་དེ་དག་བདག་གིས་གྱི་ནར་གཏོགས། །ཕྱོགས་བཅུར་བཞུགས་པའི་རྒྱལ་དང་དེ་སྲས་རྣམས། །མངོན་སུམ་བྱོན་ནས་དབྱངས་དང་མགྲིན་གཅིག་གིས། །འདི་ལས་གཞན་དུ་ཐར་པའི་ལམ་སྟོན་ཀྱང་། །བདག་བློ་གཡོ་བ་མེད་དོ་གྲོགས་པོ་དག །དེ་ཕྱིར་བདག་གིས་ཉམ་ངའི་ལམ་སྤངས་ནས། །བདེ་གཤེགས་དགེས་པའི་ལམ་ལ་འཇུག་འདོད་ན། །དཀའ་དང་འབད་པ་བརྒྱ་ཕྲག་དག་གིས་ཀྱང་། །ཀླུ་སྒྲུབ་ལུགས་བཟང་འདི་ལ་འཇུག་པར་རིགས། །འདི་མ་རྟོགས་ན་གཞུང་ལུགས་མང་བསླབས་ཀྱང་། །བདེ་གཤེགས་དགོངས་པ་རྟོགས་པའི་ཐབས་གཞན་མེད། །ཕལ་ཆེར་རྟོག་པའི་དྲྭ་བ་སྤེལ་བའི་ཕྱིར། །བློ་གྲོས་ངལ་བ་ཙམ་ཞིག་ཐོབ་པར་ཟད། །དེ་ཕྱིར་རང་ཉིད་དྲན་པ་གསོ་ཕྱིར་དང་། །སྐལ་མཉམ་གཞན་ལའང་ཕན་པར་བྱ་ཕྱིར་དང་། །ཐུབ་པའི་བསྟན་པ་ཡུན་རིང་གནས་བྱའི་ཕྱིར། །དུས་གསུམ་རྒྱལ་བའི་ཡུམ་འདི་བདག་གིས་བཤད། །ཅེས་དང་། ཁོ་བོ་ལ་དབུ་མའི་རྟོགས་པ་སྐྱེ་ཚུལ་རིམ་པ་འབྱུང་སྟེ། འདི་ལྟར་དང་པོ་དཔྱད་སྟོང་། གཉིས་པ་སྣང་སྟོང་། གསུམ་པ་རྟེན་འབྲེལ་སྒྱུ་མར་གོ་བ། བཞི་པ་རྟེན་འབྲེལ་བཏགས་ཡོད་གཞི་མེད་དུ་གོ་བའོ། །

དང་པོ་ནི། བུམ་པ་ཐོ་བས་བཅོམ་པ་ལྟར་ཀུན་རྫོབ་རྫས་ཡོད་རིགས་པས་བཤིགས་པའི་སྟོང་ཉིད་དེ། འདིས་ཀྱང་རིགས་དཔྱད་ཀྱིས་བདེན་འཛིན་ལྡོག་ཅིང་། སྟོང་ཉིད་ལ་མོས་པའི་རྒྱུ་ཙམ་བྱེད། གཉིས་པ་ནི། སྣང་བ་སྒྱུ་མ་ལྟར་སྣང་དུས་ཉིད་ནས་རང་བཞིན་མེད་པར་རྟོགས་པ་སྟེ། འདིས་ཕྱི་གཟུང་བྱ་ལ་སྒྲོ་བཀུར་གྱི་རྟོག་པ་མཐའ་དག་ལྡོག་ཀྱང་ནང་མྱོང་རིག་ལ་དྲོད་པའི་ཞེན་པ་མི་ལྡོག་པས་སེམས་ཙམ་རྣམ་རྫུན་པའི་ལྟ་བ་ལས་མ་འདས། གསུམ་པ་ནི། ནང་མྱོང་རིག་དང་ཕྱི་གཟུང་བ་གཉིས་ཀ་ཡང་རྒྱུ་རྐྱེན་ལ་རག་ལས་པ་སྒྱུ་མ་ལྟར་ཀུན་རྫོབ་ཏུ་ཡང་སྣང་བ་ཙམ་ལས་རང་བཞིན་ཅུང་ཟད་ཀྱང་མེད་པར་རྟོགས་པ་སྟེ། འདི་ལ་ཡང་མཐར་འཛིན་གྱི་ཞེན་པ་ཅི་ཡང་མེད་ཀྱང་། རྟེན་འབྲེལ་སྒྲ་རྟོག་ལ་མ་ལྟོས་པའི་དོན་ཆོས་སྒྱུ་མ་ཙམ་དུ་འཛིན་པ་ཡོད་པས་རྣལ་འབྱོར་སྤྱོད་པའི་དབུ་མ་པ་ལས་མ་འདས། བཞི་པ་ནི། རྟེན་འབྲེལ་གྱིས་ཆོས་རྣམས་རིགས་པས་ཚུལ་བཞིན་དུ་དཔྱད་པ་ན་རང་གི་ངོ་བོ་ཅུང་ཟད་ཀྱང་མི་རྙེད་ཅིང་། མ་དཔྱད་པ་ན་ཐ་སྙད་ཀྱི་ཡུལ་དུ་འགྱུར་བས་རྟོག་པས་བཏགས་ཤིང་མིང་གི་ཐ་སྙད་བྱས་པ་ཙམ་གྱིས་བཏགས་ཡོད་དུ་རྟོགས་པའོ། །ད་ལྟའི་རྟེན་འབྲེལ་རྟོགས་པའི་བློ་དེ་ཉིད་ཀྱིས་བློ་གཞན་ལ་ལྟོས་མེད་དུ་རྒྱུ་འབྲས་མི་འཁྲུལ་བ་དང་། རྟེན་འབྲེལ་རྟག་ཆད་སྤྲོས་པའི་མཐའ་ཐམས་ཅད་དང་བྲལ་བར་ངེས་པ་འདྲོངས་པ་དུས་གཅིག་ལ་ཡོང་བ་ཡིན། གོ་ཡུལ་གྱི་ལྟ་བ་འདིའི་གོང་ན་བོགས་དབྱུང་རྒྱུ་ཡོད་པར་མི་སེམས། འདི་མ་རྟོགས་བར་ལ་ལྟ་བ་མཐར་ཐུག་པ་ཡང་མ་ཡིན་ཞེས་གསུངས་སོ།། །།

བརྩམ་ཆོས་མཛད་པའི་ཚུལ་ནི། འཛམ་གླིང་མཁས་པའི་རྒྱན་མཆོག་བཀའ་ཆེན་བཞི། །རྩ་འཇུག་བཞི་ གསུམ་ཐེག་ཆེན་རྒྱུད ་བླ་དང་། །ཆོས་མངོན་མཛོད་དང་དཔལ་ལྡན་འདུས་པ་སོགས། །རྣམ་བཤད་བྱས་པའི་གཞུང་ལུགས་བཅུ་ཕྲག་གཅིག །གཞན་ཡང་བོད་ཡུལ་འགྱུར་བའི་བསྟན་བཅོས་དང་། །མདོ་དང་རྒྱུད་སྡེ་ཕལ་ཆེར་ལེགས་པར་བལྟས། །རང་གཞན་གྲུབ་མཐའི་དེ་ཉིད་འབྱེད་པ་ལ། །མཁས་པའི་འདུན་སར་འཇིགས་མེད་སྤོབས་པ་ཐོབ། །ཅེས་གསུངས་སོ།། །།

སློབ་མ་སྤེལ་བའི་ཚུལ་ནི། ཀུན་མཁྱེན་ཤེར་འོད་བློ་བཟང་གྲགས་པ་སོགས། །གཞུང་ལུགས་རབ་འབྱམས་ཤེས་པའི་བཤེས་གཉེན་བདུན།༈་་་་་བདུན་ལ་ལྔ་ནི། ཆོས་རྗེ་དཔལ་འབྱོར་བ། གོ་འཇོ་ཉི་མ། བཀའ་བཅུ་པ་ཀུན་དགའ་དཔལ། དར་མ། བསོད་ཤེ། །བཀའ་བཞི་ལེགས་པར་སྨྲ་བ་བཅུ་ཕྲག་གཉིས། །ཕར་ཚད་ཤེས་པའི་སློབ་མ་བརྒྱ་ཕྲག་རྒལ། །ཅེས་གསུངས་སོ། །

ཐུགས་དམ་མཐིལ་གང་ལ་མཛད་པ་ནི། མང་དུ་ཐོས་ཤིང་ལེགས་པར་བསམ་པའི་དོན། །དབེན་པའི་གནས་སུ་རྩེ་གཅིག་ལེགས་སྒོམ་སྟེ། །རྒྱལ་བའི་དགོངས་པ་ཚུལ་བཞིན་སྐྱོང་འདོད་ཀྱང་། །སྔོན་ཆད་རྣམ་གཡེང་ལེ་ལོའི་དབང་དུ་གྱུར། །མཁའ་མཉམ་འགྲོ་ལ་དམིགས་པའི་སྙིང་རྗེ་དང་། །སྲིད་ཞི་སྟོང་པར་རྟོགས་པའི་ཤེས་རབ་གཉིས། །རེས་འགའ་རེས་འཇོག་རེས་འགའ་ཟུང་འབྲེལ་སྒོམ། །འོན་ཀྱང་ཕལ་ཆེར་སྙོམས་ལས་དབང་དུ་ཐལ། །ཅེས་དང་། ཡང་གསུངས་པ། རྒྱུ་འབྲས་བསླུ་བ་མེད་པའི་ཡིད་ཆེས་དང་། །རྟེན་འབྲེལ་སྟོང་པར་རྟོགས་པའི་ཤེས་རབ་གཉིས། །འབྲལ་མེད་ཟུང་དུ་ཆུད་པར་ནམ་གྱུར་པ། །དེ་ཚེ་མཐའ་བྲལ་དབུ་མའི་ལམ་ལ་ཞུགས། །ཇི་ལྟར་སྣང་ཞིང་གྲགས་པའི་དངོས་འདི་ལ། །རང་གཞན་གྲུབ་མཐས་བཏགས་པའི་ཀུན་བཏགས་དང་། །ལྷན་སྐྱེས་ཡིད་ཀྱི་དངོས་འཛིན་མུན་པ་རྣམས། །རྣམ་དག་ལུང་རིགས་ཟེར་གྱིས་རྣམས་བསལ་ཏེ། །སྣང་དུས་ཉིད་ནས་སྟོང་པར་རྟོགས་པ་དང་། །སྟོང་པ་རྟོགས་ཚེ་སྣང་བ་མི་འགོག་པའི། །ཟུང་འཇུག་ཚུལ་ལ་ངེས་པ་ནམ་སྐྱེས་པ། །དེ་ཚེ་རྒྱལ་བའི་དགོངས་པ་རྟོགས་པ་ཡིན། །ཐོས་བསམ་རིགས་པས་རྣམ་པར་དཔྱོད་པའི་ཚེ། །སྣང་བ་བཀག་ནས་སྟོང་པ་སྒྲུབ་པ་དང་། །སྟོང་པ་རྟོགས་ཚེ་སྣང་བ་ནུབ་པ་དང་། །ཀུན་རྫོབ་བསལ་ནས་དོན་དམ་སྒྲུབ་པ་རྣམས། །རྟག་ཆད་མཐར་ལྟའི་གཡང་ལ་ལྷུང་བའི་ཕྱིར། །སངས་རྒྱས་དགེས་པའི་ལམ་ལས་རིང་དུ་གོལ། །སྒོམ་བྱུང་འཕགས་པའི་ཡེ་ཤེས་ཤར་བ་ན། །ཤེས་དང་ཤེས་བྱའི་མཚན་མ་སྣ་ཚོགས་ལ། །མཁའ་ལ་འཇའ་མཚོན་དེངས་ལྟར་མི་སྣང་ཞིང་། །ཆུ་ལ་ཆུ་དང་མར་ལ་མར་བཞག་བཞིན། །དབྱིངས་དང་རིག་པ་དབྱེར་མེད་འདྲེས་པ་ན། །མཐོང་མེད་ཚུལ་གྱིས་དེ་ཉིད་མཐོང་བ་དང་། །གནས་མེད་ཚུལ་གྱིས་ཆོས་སྐུ་ལ་གནས་དང་། །མྱ་ངན་འདས་དང་འོད་གསལ་ཆོས་ཀྱི་སྐུ། །སངས་རྒྱས་སྲས་པོ་བློ་བཟང་ཀླུ་སྒྲུབ་བཞེད། །འོན་ཀྱང་རབ་འབྲིང་བར་མའི་གདུལ་བྱ་ལ། །སྔོན་བསགས་དགེ་དང་སྨོན་ལམ་གྲུབ་པའི་མཐུས། །རང་རང་བློ་དང་འཚམས་པའི་སྤྲུལ་སྐུ་ཡིས། །འཁོར་བ་སྲིད་དུ་ཕྲིན་ལས་ངང་གིས་འཇུག །ཅེས་དང་། བླ་མ་ཕྱག་ན་རྡོ་རྗེར་འཇམ་དབྱངས་ལ་ཟླ་བ་བདུན་བསྙེན་པ་མཛད་ན་དངོས་སུ་ཆོས་གསུང་བར་འགྱུར་ཞེས་ལུང་བསྟན་པ་ལ་འཁོར་རྣམས་ཀྱིས་མཛད་པར་ཞུས་པས་འཇམ་དབྱངས་ས་བཅུའི་བྱང་སེམས་ཆེན་པོ་ཡིན་པས་དངོས་སུ་མཇལ་ནས་ཕན་ཡོན་དཔག་ཏུ་ཡོད་མོད། འོན་ཀྱང་ཟླ་བ་བདུན་སྔགས་སྒྲོང་བ་བས་བྱང་ཆུབ་ཀྱི་སེམས་སྒོམ་པ་ཁྱད་ཆེ་ཞེས་གསུང་ངོ་། །ཡང་ཁོ་བོས་སྔར་ཞི་གནས་ལ་ཆེད་ཆེར་མ་བྱས། གཙོ་ཆེར་ལྷག་མཐོང་ཁོ་ན་ཉམས་སུ་བླངས། དེ་ཡང་མཉམ་བཞག་ཏུ་བདག་གིས་བདག་མེད་དྲན་པ་ཉེར་གཞག་དང་། ཁམས་ཀྱི་རབ་ཏུ་དབྱེ་བའི་སྒོ་ནས་ཉམས་སུ་བླངས། རྗེས་ཐོབ་ཏུ་ཡུལ་སྣང་སྣ་ཚོགས་ལ་སྤྱི་དང་བྱེ་བྲག་ཅི་རིགས་པར་རང་བཞིན་མེད་པར་དཔྱད་ནས་ཉམས་སུ་བླངས་ཏེ། སྔར་ཆེར་མ་སྒོམ་ཀྱང་ལྟ་བའི་བོགས་འབྱིན་པ་ལ་ཤིན་ཏུ་ཕན་པར་བྱུང་། ལྟ་བའི་གོ་ཡུལ་ཙམ་ཡོད་ཀྱང་ཉམས་སུ་ལེན་མ་ཤེས་ན་བོགས་མི་འབྱིན་ལ། མྱོང་བ་འཐོན་ན་གོ་ཡུལ་ཙམ་གྱིས་ཀྱང་ཉོན་མོངས་པ་དང་རྣམ་རྟོག་གི་དབལ་མི་ཆོག་པར་སྣང་ཞེས་གསུངས་སོ། །

དམ་བཅའ་ཕུལ་བའི་ཚུལ་ནི། མདོར་ན་ལྟ་བའི་ཕུ་ཐག་ཆོད། ཉམས་ལེན་གྱི་གནད་ཤེས། འཁོར་བའི་ཉེས་དམིགས་དང་ཐར་པའི་ས་བོན་ལ་ཚིག་ཙམ་མ་ཡིན་པར་ངེས་པ་འདྲོངས། སྟོན་པ་དང་བསྟན་པའི་ཡོན་ཏན་ལ་ཡིད་ཆེས་པའི་དད་པ་ཐོབ་བཞིན་དུ། སྒྲུབ་པ་སྙིང་པོར་མི་བྱེད་པར་ཚེ་འདིའི་སྣང་ཤས་ལྷུར་ལེན་ན་ཁོ་བོའི་སྙིང་རུལ་བ་ལས་གཞན་དུ་བརྟག་ཏུ་ཅི་ཞིག་ཡོད། དེ་བས་ན་ཚེ་ལྷག་གང་ཡོད་བས་མཐའི་གནས་མི་སྐྱེལ་ཞིང་། ཚེ་དང་སྒྲུབ་པ་མི་སྙོམས་པར། གཞན་དོན་བྱེད་པ་ལྟར་བཅོས་པའི་ཐབས་ཀྱིས་འཁོར་བསྡུས་ནས་སྣང་ཤས་ལྷུར་བྱེད་དམ། སྐྱིད་ཆོས་དང་སྙོམས་ལས་ལྷུར་བྱེད་ན་བསྟན་བསྲུང་རྣམས་ཀྱིས་ཁོ་བོའི་མགོ་བོ་ཨར་རྫ་ཀའི་དོག་པ་བཞིན་དུ་ཁོས་ཤིག གཞན་ཡང་ཡིད་དམ་གྱི་ལྷའི་སྤྱན་སྔར་དམ་བཅའ་འདི་དག་དབུལ་ལོ། །གང་གིས་ཞབས་ཟུང་པད་མོ་གེ་སར་རྡུལ། །ཚངས་དང་ལྷ་དབང་ཁྱབ་འཇུག་ལ་སོགས་པ། །འཇིག་རྟེན་དྲེགས་ལྡན་གཙུག་གིས་གུས་བསྟེན་པའི། །སྤྱན་རས་གཟིགས་མགོན་དེ་འཚལ་ལོ། །མང་དུ་ཐོས་ཀྱང་ཚུལ་གཞན་སེམས་ལ་གཡེལ། །ཁྲིམས་བརྒྱ་ནོད་ཀྱང་ཉེས་ལྟུང་དྲི་མ་ཅན། །དགེ་སྦྱོང་བདག་གི་གཡར་དམ་འདི་རྣམས་ལ། །མཁྱེན་ལྡན་ཐུགས་རྗེ་ལྷ་ཁྱོད་ཡུད་ཙམ་དགོངས། །གང་དུ་གནས་ན་སྣང་ཤས་འཕེལ་གྱུར་ཞིང་། །རང་རྒྱུད་རྙེད་བཀུར་ཞགས་པས་འཆིང་བྱེད་ལ། །གཞན་རྒྱུད་ཕྲག་དོག་འགྲན་སེམས་ཀྱིས་རྡུངས་པའི། །གནས་དེར་སྐད་ཅིག་ཙམ་ཡང་མི་གནས་སོ། །

དེང་ནས་བཟུང་སྟེ་ཇི་སྲིད་འཚོ་བར་དུ། །གངས་དང་རི་སུལ་ནགས་ཀྱི་ཁྲོད་རྣམས་སུ། །བསེ་རུ་ལྟ་བུར་རྟག་ཏུ་གནས་བྱེད་ཅིང་། །གྲོང་དང་འཁོར་མང་དབུས་སུ་གནས་མི་བགྱི། །ཆོས་བརྒྱད་རྐྱེན་གྱིས་ནམ་ཡང་མི་གཡོ་བའོ། །སེམས་ལ་བརྟན་པ་ཇི་སྲིད་མ་ཐོབ་བར། །གཅིག་ཏུ་རང་བརྒྱུད་འདུལ་བ་མ་གཏོགས་པ། །གཞན་དོན་ཐབས་ཀྱིས་རང་དོན་ཉམས་མི་བགྱི། །ཆོས་གོས་གསུམ་དང་ལྷུང་བཟེད་མ་གཏོགས་པ། །རང་ཉིད་འཚོ་བའི་ཡོ་བྱད་མ་གཏོགས་པ། །གསེར་དང་དབྱིག་སོགས་ལྷག་པའི་ཡོ་བྱད་ནི། །རང་གི་དོན་དུ་ཏིལ་ཙམ་མི་འཆང་ངོ་། །གཞན་གྱི་ཉེས་པ་ནམ་ཡང་མི་གླེང་ཤིང་། །དོན་དང་ལྡན་ཞིང་ཆོས་མཐུན་མ་གཏོགས་པ། །དམག་དང་ཆོམ་རྐུན་རྒྱལ་བའི་གཏམ་ལ་སོགས། །འཁྲུལ་པའི་བཀའ་འཆིད་ནམ་ཡང་མི་བགྱིད་དོ། །ཆོས་ཀྱི་དོན་དུ་བཀའ་སྤྱད་སྲན་བཟོད་ཅིང་། །འཇིག་རྟེན་བློས་བཏང་རྣམ་གྲོལ་དོན་དུ་གཉེར། །འདོད་ཆུང་ཆོག་ཤེས་རང་དང་རྗེས་མཐུན་པའི། །རྗེས་འབྲང་འཁོར་ནི་བཞི་བས་ལྷག་མི་བསྟེན། །གལ་ཏེ་བདག་གི་གཡར་དམ་འདི་རྣམས་ལ། །འགལ་བ་བགྱིས་ན་རྒྱལ་བ་སྲས་བཅས་དང་། །ཐུགས་རྗེའི་མངའ་བདག་སྤྱན་རས་གཟིགས་མགོན་གྱིས། །ཁྱི་ཕག་ལུག་བོང་རྣམས་དང་བདག་སྙོམས་ཤིག །བདག་གིས་ཇི་སྐད་སྨྲ་འདི་ཁྱོད་ཀྱིས་ཀྱང་། །ཡིད་ལ་ཆོངས་ལ་ཚུལ་བཞིན་ཉམས་སུ་ལོངས། །ཤི་ཡང་འདི་ལས་གཞན་གྱིས་ཁ་ཆེམས་མེད། །ཕྲད་ཀྱང་སྨྲ་རྒྱུ་གཞན་འགའ་མ་མཆིས་སོ། །ཞེས་གསུངས་སོ།། །།

དབེན་པ་ལ་ཐུགས་གཞོལ་བའི་ཚུལ་ནི། ཁོ་བོ་དབེན་པ་བསྟེན་པའི་རྒྱུ་མཚན་ཡང་འཁོར་དང་གྲོགས་ཀྱིས་ཡིད་སུན་ཕྱུང་བའམ། རྙེད་བཀུར་དང་གྲགས་པ་འདོད་པ་མ་ཡིན་གྱིས། གཞན་དུ་ན་འཁོར་བའི་སྡུག་བསྔལ་མེ་འོབ་ལྟར་ཤིན་ཏུ་བརྣག་དཀའ་བར་མཐོང་བའི་ཕྱིར་དང་། བཅོམ་ལྡན་འདས་ཀྱིས་རྣམ་གྲངས་དུ་མར་བསྔགས་པའི་དབེན་པའི་གནས་པད་མོའི་ཚལ་བས་ཀྱང་། ཤིན་ཏུ་ཡིད་དུ་འོང་བར་མཐོང་བའི་ཕྱིར་རོ། །

དེ་ཡང་འདི་ལྟར། གང་ལ་ཉེས་པ་རྡུལ་ཙམ་མི་མངའ་ཞིང་། །རྨད་བྱུང་ཡོན་ཏན་དཔལ་གྱིས་རབ་བརྗིད་པས། །སྙན་པའི་བ་དན་འཇིག་རྟེན་གསུམ་ན་གཡོ། །ཐུབ་དབང་ལྷ་ཡི་ལྷ་ལ་ཕྱག་འཚལ་ལོ། །ཀ་ཡེ་ཉོན་ཅིག་ཤེས་ལྡན་གྲོགས་པོ་དག །བསྟན་པའི་ཉིན་བྱེད་ནུབ་རིའི་རྩེ་ལ་སོན། །ལུས་སྲོག་གཡོ་བ་འབབ་ཆུའི་རྒྱུན་དང་མཚུངས། །ཐར་འདོད་རྣམས་ཀྱིས་བག་ཡོད་བསྟེན་པར་རིགས། །རིན་ཆེན་བདུན་ལྡན་གླིང་ཆེན་བཞི་ལ་དབང་། །དཔག་མེད་ཚེ་གནས་དགེ་བཅུའི་དཔལ་ལ་སྤྱོད། །ཕུན་ཚོགས་མངོན་མཐོའི་བདེ་ལ་རོལ་བྱེད་པའི། །འཁོར་ལོས་སྒྱུར་རྒྱལ་དེ་ཡང་ཆུ་ཤིང་འདྲ། །ལྷུན་པོའི་སྤོ་ལ་ཡུན་རིང་གནས་བཅས་ཏེ། །ཡོངས་འདུའི་ཚལ་དུ་དགའ་བདེའི་དཔལ་གྱིས་རོལ། །འཆི་མེད་ཉེས་དབང་ཚོགས་ཀྱིས་གུས་བཏུད་པའི། །འཕྲོག་བྱེད་མིག་སྟོང་ལྡན་དེའང་སྲིད་པའི་བྲན། །ལུས་སེམས་ཟུག་རྔུའི་བརྡུང་བ་རིང་དུ་སྤངས། །ཏིང་འཛིན་བདེ་བས་བསྐལ་མང་འདའ་བྱེད་པའི། །འཇིག་རྟེན་མེས་པོ་གསེར་གྱི་རྔ་ལྡན་ཡང་། །འཆི་མེད་གོ་འཕང་ལས་རིང་གྱི་ནར་འཁོར། །གང་གིས་རེག་ན་རབ་བརྟན་ལྷུན་པོ་ཡང་། །སྐད་ཅིག་ཙམ་གྱིས་ཐལ་བར་རློག་བྱེད་པའི། །མེ་ལྕེའི་ཕྲེང་བ་ལུས་རབ་འབར་བ་ལ། །དམྱལ་བའི་ཟུག་ངུ་སུ་ཡིས་བརྣག་པར་ནུས། །བལྟས་པ་ཙམ་གྱིས་རླུང་ཆེན་རྒྱུན་སྐེམས་ཤིང་། །ལྗོན་ཤིང་འབྲས་བུ་མེད་པར་བྱེད་པ་ཡི། །ཏ་ལའི་ཡ་ཐོག་སྐམ་ལྟའི་ཡི་དྭགས་གཟུགས། །གང་ཞིག་མཐོང་ན་འཇིགས་རུང་གི་ཡང་གཡའ། །བླང་དོར་རྨོངས་པའི་གཏི་མུག་དམག་རུམ་འཐིབས། །གཅིག་ལ་གཅིག་ཟ་རྡོ་ཡི་མེ་སྟག་དང་། །བཀོལ་བཙོག་ཆར་རྒྱུན་ལུས་ལ་རྟག་འབབ་པའི། །རྣམ་མང་དུད་འགྲོའི་གདུང་བ་སུ་ཡིས་བཟོད། །སྲིད་པའི་ཕུན་ཚོགས་དེ་ལྟར་གནོག་ཆུང་ཤིང་། །རབ་མང་ཉེས་པའི་ཚོགས་དང་ལྡན་རིགས་ནས། །རང་གཞན་སྲིད་པའི་མཚོ་ལས་བསྒྲལ་བྱའི་ཕྱིར། །མང་ཐོས་བདག་ནི་དབེན་པའི་གནས་སུ་འགྲོ། །ཆར་སྡོད་བྱེ་འུ་འབྲུག་སྒྲ་ཐོས་པ་ལྟར། །དབེན་པའི་གནས་སུ་གཏམ་འདི་ཁོ་བོའི་སྙིང་ལ་བབ། །ཐོས་པའི་དོན་རྣམས་དོན་ཡོད་བྱ་བའི་ཕྱིར། །གཞོན་ནུ་བློ་གྲོས་དབེན་པའི་གནས་སུ་འགྲོ། །ངང་པའི་ཚོགས་ཀྱིས་པད་མའི་མཚོ་མཐོང་ལྟར། །བས་མཐའི་གནས་ལ་མཁོ་བོ་སེམས་རབ་གཡོ། །དལ་འབྱོར་ལུས་ལ་སྙིང་པོ་བླང་བའི་ཕྱིར། །གཞོན་ནུ་བློ་གྲོས་དབེན་པའི་གནས་སུ་འགྲོ། །བུང་བ་གཞོན་ནུས་འདབ་རྒྱའི་ཚལ་མཐོང་ལྟར། །ཁོ་བོའི་ཡིད་ནི་དབེན་པའི་རོ་ལ་ཆགས། །ཏིང་འཛིན་བདུད་རྩི་རོ་མྱང་བྱ་བའི་ཕྱིར། །གཞོན་ནུ་བློ་གྲོས་དབེན་པའི་གནས་སུ་འགྲོ། །དཔྱིད་དུས་བསིལ་བའི་མ་ལ་ཡ་རླུང་ལྟར། །ནགས་ཀྱིས་སྨན་ལྗོངས་ཁོ་བོའི་ཡིད་ལ་འབབ། །ཉོན་མོངས་བདུད་ཀྱི་སྡེ་དེ་གཞོམ་བྱའི་ཕྱིར། །གཞོན་ནུ་བློ་གྲོས་དབེན་པའི་ནགས་སུ་འགྲོ། །ཞེས་གསུངས་སོ། །

མི་འཇིགས་པའི་གདེང་ཐོབ་ཚུལ་ནི། ན་མོ་གུ་རུ། གང་ལ་སྐྱབས་ན་བསླུ་མེད་དཀོན་མཆོག་གསུམ། །འབྲལ་མེད་སྤྱི་གཙུག་རྒྱན་དུ་རྟག་བཞུགས་གསོལ། །སྣང་སྟོང་སྒྱུ་མའི་རྣལ་འབྱོར་རི་ཁྲོད་པ། །སེམས་གནོང་མེད་ཀྱི་གླུ་སྐད་འདི་བཞིན་ལེན། །ཤུལ་ན་འཕྲེངས་པའི་ཟས་ནོར་ལུས་པ་མེད། །གདོང་ན་མཚེར་བའི་ལས་ངན་བསགས་པ་མེད། །ཐེག་ཆེན་བསླབ་པའི་བསམ་སྦྱོར་ཉམས་པ་མེད། །ད་སྒྱུ་མའི་ལུས་སེམས་འབྲལ་ཡང་འགྱོད་པ་མེད། །ཚེ་འདིའི་རྙེད་བཀུར་ཆེ་ཐབས་སྒྲུབ་མ་མྱོང་། །འདོད་ཡོན་སྲེད་པའི་རྗེས་ཕྱིར་འབྲང་མ་མྱོང་། །དོན་མེད་བྱ་བས་ཚེ་འདི་ཡེངས་མ་མྱོང་། །ད་སྒྱུ་མའི་ལུས་སེམས་འབྲལ་ཡང་འགྱོད་པ་མེད། །ཅིར་སྣང་སྒྱུ་མར་རྟོགས་པའི་ཤེས་རབ་ཡོད། །འགྲོ་དྲུག་ཕ་མར་ཤེས་པའི་ལྷག་བསམ་ཡོད། །ཐབས་ཤེས་ཟུང་དུ་འབྲེལ་པའི་ཉམས་ལེན་ཡོད། །ད་སྒྱུ་མའི་ལུས་སེམས་འབྲལ་ཡང་འགྱོད་པ་མེད། །ཐོག་མར་གསུང་རབ་དགོངས་དོན་ཚུལ་ལ་སྦྱངས། །བར་དུ་བློ་གསལ་གདུལ་བྱའི་ཚོགས་ལ་བཤད། །ཐ་མར་འདྲིས་པའི་དོན་ལ་རྩེ་གཅིག་བསྒོམས། །ད་སྒྱུ་མའི་ལུས་སེམས་འབྲལ་ཡང་འགྱོད་པ་མེད། །རྒྱལ་བའི་བསྟན་པ་སྲོག་པས་གཅེས་པར་བཟུང་། །རིགས་དང་མི་རིགས་ཚུལ་བཞིན་རྣམ་པར་ཕྱེས། །འཆད་རྩོད་རྩོམ་པས་དལ་འབྱོར་དོན་ཡོད་བྱས། །ད་སྒྱུ་མའི་ལུས་སེམས་འབྲལ་ཡང་འགྱོད་པ་མེད། །འགྱོད་མེད་གདེང་དྲུག་གི་མགུར་མ་འདི། །གངས་བུ་ལེའི་མགུལ་དུ་བླངས་པ་ཡིན། །མི་ཁོ་བོའི་རྗེས་འཇུག་དད་ལྡན་རྣམས། །མིང་བཞིན་བྱེད་ན་འདི་བཞིན་མཛོད། །ཚོགས་གཉིས་ཟུང་དུ་འཇུག་པས་རྒྱུད་སྦྱངས་ཏེ། །བདེན་ཉིས་ཟུང་དུ་འཇུག་པའི་དོན་རྟོགས་ཤིང་། །རིམ་གཉིས་ཟུང་འཇུག་རྡོ་རྗེའི་ལམ་སྒྲུབ་ནས། །འཇའ་ལུས་རྡོ་རྗེའི་སྐུ་རུ་བདག་གྱུར་ཅིག །ཅེས་གསུངས་སོ། །

ཕུལ་དུ་བྱུང་བའི་མཛད་པ་གཞན་ཡང་མཛད་ཚུལ་ནི། ཁྱོད་ཉིད་གཞན་དོན་གཤེགས་པའི་དུས་མཁྱེན་ཚེ། །གཞན་གྱིས་གསོལ་མང་བཏབ་ཀྱང་འདི་སྐད་དུ། །སངས་རྒྱས་བསྟན་ལ་ཚུལ་བཞིན་བྱ་བྱས་ཟིན། །རིང་མི་གནས་ཀྱང་འདི་མ་གྲུབ་སྙམ་དང་། །གནས་མིན་བྱ་བ་འདི་བྱས་སྙམ་འགྱོད་མེད། །དེ་ཕྱིར་བསྟན་དང་བདག་ལ་གཅེས་འཛིན་རྣམས། །རྒྱལ་བ་སྐྱེད་བྱེད་ཡུམ་ལས་འདི་སྐད་དུ། །ཐབས་ཀྱི་རིང་བསྲེལ་རྣམ་གཉིས་བཞག་པ་ལས། །ཤེས་རབ་ཕ་རོལ་ཕྱིན་འདི་ལེན་ཇི་བཞིན། །ཟུར་གནས་བློ་མིག་དད་ལྡན་རྣམས་ཀྱིས་ཀྱང་། །ཁོ་བོའི་རྣམ་བཤད་བསྟན་དོན་བཞག་འདི་ཡང་། །ལེན་པར་རིགས་མོད་བློ་མིག་ལྡོངས་རྣམས་ཀྱིས། །ཡོད་པའི་ལེགས་བཤད་ཕྲག་དོག་མུན་པས་སྒྲིབ། །མེད་པའི་ཉེས་བཤད་བློ་ངན་མིག་གིས་མཐོང་། །དེ་ཕྱིར་བློ་ངན་ལོག་ལམ་ལ་གོམས་ཤིང་། །བཤེས་གཉེན་ངན་པའི་དུག་ཆུས་བསླད་རྣམས་ཀྱིས། །རློངས་པའི་གོ་ཆ་སྲ་བརྟན་ཆེར་གྱོན་ལ། །ལུང་རིགས་རྣམས་ལྕགས་སྟོང་གིས་མི་ལྡོག་རྣམས། །ཀྱེ་མ་འདི་ལ་བདག་གིས་ཅི་བྱར་ཡོད། །ཅེས་པའི་སྨྲེ་བསྔགས་ཡང་ཡང་ཉིད་གསུང་ཞིང་། །བློ་བཟང་ཀླུ་སྒྲུབ་ལུགས་འདིའང་རྨ་མེད་པ། །སུས་ཀྱང་ཇི་བཞིན་རྟོགས་སྙམ་མི་འཚལ་ལོ། །འདི་ལས་གཞན་དུ་ཐར་ལམ་མེད་པར་ཡང་། །ཉིད་གཞུང་དག་ལས་གསལ་བར་མངོན་པ་ཡིན། །དེ་ཕྱིར་བདག་གིས་འདི་དོན་གསུང་རབ་ལས། །ལེགས་པར་རྩལ་ཞིང་ལེགས་པར་གཅེས་པར་བཟུང་། །ཐར་འདོད་བློ་གྲོས་དམན་པ་དག་ལ་ཡང་། །ཐར་པ་ཕྱོགས་མཐོང་ཙམ་གྱིས་ས་བོན་ནི། །བསྐྲུན་པར་བྱས་འདིའང་བདག་གི་ཁུར་ཁུར་ལེགས། །ཞེས་གསུང་འདུས་པའི་མན་ངག་གསུང་དུས་ཚེ། །ཡང་དག་མཐའ་ལ་ཞུགས་པའི་ཚུལ་ལུགས་ལ། །རྒྱུད་དང་རྒྱ་བོད་ཤིང་རྟ་ཆེ་བཞེད་ཚུལ། །འདི་དོན་འཁྲུལ་མེད་འདི་ལྟར་ཡིན་ཞེས་གསུངས། །མགོན་ཁྱོད་ཐེག་པ་མཆོག་ལ་རབ་བཞུགས་ཚེ། །ཉིན་དང་མཚན་གྱི་ཐུན་སྐབས་མ་ཕྱེ་བར། །འདུས་པ་དགེས་རྡོར་བདེ་མཆོག་ལ་སོགས་ཀྱི། །མཐའ་དྲུག་ཚུལ་བཞིས་རྒྱས་བཏབ་རྡོ་རྗེའི་ཚིག །ཇི་བཞིན་ལེགས་པར་རྟོགས་ནས་རིམ་གཉིས་ཀྱི། །ཏིང་འཛིན་ཟབ་མོའི་བདེ་ལ་རོལ་བས་ན། །རྡོ་རྗེ་འཛིན་པ་ཞེས་པའི་སྒྲ་དེ་ཡང་། །མགོན་པོ་ཁྱོད་ལ་དོན་དང་བཅས་པ་ལགས། །

གཞན་ཡང་། བླ་མ་ཕྱག་ན་རྡོ་རྗེས་དམ་པ་ཉིད་ལ་སངས་རྒྱས་སྣང་བ་མཐའ་ཡས་ཀྱི་སྐུ་འཁྲུ་གང་པ་གཅིག་བཞེངས་ནས་བཟང་སྤྱོད་སྨོན་ལམ་བཏབ་ན་འདིའི་ཕྱི་མ་ལ་བདེ་བ་ཅན་དུ་འཁྲུངས། དེ་ལྟར་མ་བྱས་ན། རྒྱ་གར་ནུབ་ཕྱོགས་ཁ་ཆེའི་ཡུལ་དུ་པཎྜི་ཏ་གཅིག་ཏུ་འཁྲུངས་ཏེ། པཎ་ཆུང་ལྔ་བརྒྱ་ཙམ་དང་བྱས་བསྟན་པ་ལ་བྱ་བ་བྱས། དེ་ནས་བདེ་བ་ཅན་དུ་འཁྲུངས་ཞེས་ལུང་བསྟན་ལ། འཁོར་རྣམས་ཀྱིས་སྐུ་བཞེངས་པར་ཞུས་པས་ཉིད་ཀྱི་གསུང་ནས། དག་པའི་ཞིང་དོན་དུ་གཉེར་བ་བྱང་ཆུབ་སེམས་དཔའ་བློ་དམན་གྱི་ལུགས་ཡིན། ཁོ་བོ་གཞན་དུ་གྱུར་ན་དམྱལ་བར་སྐྱེ་ཡང་སྐྱོ་བ་མེད། ཅེས་གསུངས། །

ཞི་བར་གཤེགས་པའི་ཚུལ་ནི། གདུལ་བྱའི་དོན་དུ་ཞིང་གཞན་གཤེགས་པའི་ཚེ། །ལྟ་བ་རྣམ་དག་ནམ་མཁའ་དག་པ་དང་། །སྔར་མ་ཚོར་བའི་སྤོས་དང་རོལ་མོའི་སྒྲ། །འཇའ་འོད་སྣ་ཚོགས་ས་གཡོའི་ལྟས་བཟང་དང་། །སྐུ་གསུང་ཐུགས་ཀྱི་རྣམ་འཁྲུལ་བསམ་ཡས་ཀྱིས། །བཀོད་པ་སྤྲོས་ཞིང་གཅིག་བསྡུས་བདག་པོར་གྱུར། །གཤེགས་བྱོན་ཀུན་ལ་དབང་འབྱོར་ལྟ་བུར་བསྟན། །དད་ལྡན་མོས་པའི་རྟེན་བཞག་པའི་ཚུལ་ནི། ཉིད་ཀྱིས་གདུང་ལ་འདུས་པའི་ལྷ་སྐུ་དང་། །ཆོས་སྐུ་མངོན་མཛད་རིང་བསྲེལ་བསམ་མི་ཁྱབ། །ཚུལ་ཁྲིམས་རྣམ་དག་བདུང་ལོག་ལ་སོགས་པ། །དད་ལྡན་རྟེན་དུ་བཞག་སྟེ་སྨིན་གྲོལ་མཛད། །དེ་ལྟར་མཛད་པའི་ཚུལ་ལ་དགོས་པ་དག །མཁས་ལ་ཅི་སྐྱེ་བླུན་པོ་གང་རྟོགས་པ། །བཞིན་དུ་ཉི་ཟླ་ས་ལ་ལྟུང་ཀྱང་སྲིད། །བདེ་གཤེགས་བཀའ་ནི་གཞན་དུ་མི་འགྱུར་ཏེ། །ཇི་ལྟར་ཤཱཀྱ་སེང་གེ་སྐྱོབ་པ་ཡིས། །བྱང་ཆུབ་ཚུལ་ལ་ས་ཡི་ལྷ་མོ་ཡིས། །དཔང་པོ་ཇི་བཞིན་མཛད་ཚུལ་འདི་ལ་ཡང་། །གཡོ་མེད་བདེན་སྨྲ་ཁྱོད་ཀྱི་གསུངས་འདི་དང་། །རྒྱལ་བ་སྲས་དང་བཅས་རྣམས་དཔང་པོ་ལགས། །མགོན་པོ་ཁྱོད་ཀྱི་རྨད་བྱུང་མཛད་པ་རྣམས། །བདེན་པ་རབ་སྟོན་ཉིད་ཀྱི་གསུང་རབ་ལ། །མཐའ་གཉིས་སྤངས་ཏེ་ཇི་ལྟར་གནས་པའི་དོན། །ཕྱོགས་མཚོན་ཙམ་ཞིག་རེད་ནས་བཀོད་པ་ལ། །ཉེས་པ་མཆིས་ན་དམ་པས་བཟོད་མཛད་ཅིང་། །དགེ་བས་འགྲོ་ཀུན་བླ་མས་རྗེ་འཛིན་ཤོག །

ཅེས་པ་འདི་ཡང་། བླ་མ་འདི་ཉིད་ལ་དད་པ་ཅུང་ཟད་ཐོབ་པ་རཏྣ་སཾ་བྷ་ཝ་ཞེས་བྱ་བས་དེ་ཉིད་ཀྱི་གསུང་རབ་ཐོར་བུ་བ་རྣམས་ལེགས་པར་བལྟས་པ་དང་རྩོམ་པར་འདོད་པའི་བློ་སྐྱེས་ཏེ་ཅུང་ཟད་བསྟོད་པ་སྟག་ལོའི་གདན་ས་དཔེ་དམར་དུ་སྦྱར་བའོ།། །།དགེའོ།། །།