དཔེ་སྐྲུན་གྱི་སྔོན་དུ་འགྲོ་བའི་གཏམ།
འགྲོ་བ་མིའི་རིགས་གོམ་གང་མདུན་ཕྱོགས་སུ་སྤོས་པར་འདོད་པའི་དུས་རབས་ཏེ། ཡར་ཐོན་ནམ་ཡང་ན་རྗེས་ལུས། དར་རྒྱས་སམ་ཡང་ན་ཉམས་རྒུད། ཤེས་རབ་བམ་ཡང་ན་བླུན་རྟགས། གང་ལྟར་ཤོག་སྒོར་ལས་ཡོད་ཚད་ལ་རིན་ཐང་ཆུང་བའི་གནས་དུས་འདིར་གནའ་དཔེ་ཞིག་གི་ལྡེབ་གྲངས་ཚང་མིན་ལ་རེ་དོགས་དང་དགའ་སྡུག་གི་སེམས་ཚོར་མྱོང་བཞིན་པ་རང་ཉིད་ལས་ཐམས་ཅད་ལ་ལྐོག་ཏུ་གྱུར་པ་སྨོས་ཅི་དགོས། འོན་ཀྱང་དད་པ་དང་དུང་ཞེན་འདྲེས་པའི་ཀུན་སློང་གསོན་པོའི་མེ་རྩ་ཞིག་དེ་རིང་ཙམ་མིན་པར་ཆུང་དུས་ཐོས་བསམ་ལ་འཇུག་པ་ནས་སྙིང་ཁོང་དུ་གནས་ཀྱང་ཉམས་ཞན་པའི་རེ་བའི་ངོ་བོར་ཡུན་རིང་ལུས་པ་སྟེ། མཚན་དོན་དང་ལྡན་པ་སུ་ཞིག་གིས་ནམ་ཞིག་ན་དམ་པའི་གསུང་རབ་འདི་དག་འཚོལ་སྒྲིག་དར་སྤེལ་གྱི་མཛད་རྒྱུན་བསྐྱོངས་པར་ངེས་སྙམས་པའི་ཡིད་ཆེས་དང་རེ་བས་ལོ་ཟླའི་འཁོར་ལོ་དུ་མ་ཞིག་ཤུགས་ཀྱིས་འདས། ད་ལམ་མཐུན་པའི་རྐྱེན་ཅུང་ཟད་ཚོགས་པ་དང་བསྟུན་སྤྲོ་བ་ཆེན་པོས་རང་ཉིད་ཀྱི་ཁུར་དུ་ངང་གིས་བླང་སྟེ་གྲུབ་དབང་རྫོགས་ཆེན་པའི་མཁས་གྲུབ་རྣམས་ཀྱི་གསུང་འབུམ་གཙོ་བོར་གྱུར་པའི་དཔེ་ཚོགས་འདི་བཞིན་འཚོལ་སྡུད་དང་། དཔེ་བསྡུར། དག་ཞུས་ཀྱིས་འགྲེམ་སྤེལ་བྱུང་ན་ཁ་བའི་ལྗོངས་ཀྱི་ཆོས་དང་རིག་གཞུང་ཉམས་པ་སླར་གསོ་མི་ཉམས་དར་སྤེལ་གྱི་བྱ་བའི་ཆ་ཤས་ཤིག་ལ་ཕྱར་བ་གྲུ་འདེགས་དང་། གང་ལ་མེ་ཏོག་ཕོག་པའི་ལྷ་སྐལ་བརྒྱུད་ལྡན་བླ་མ་རྣམས་ཀྱི་གསུང་གི་ཕྲིན་ལས་ལ་སྲི་ཞུའི་མཆོད་པ་ཅུང་ཟད་འགྱུར་བའི་ལྷག་བློ་དང་བཅས་བགྱི་བ་འདི་བརྩོན་པས་སྒྲུབ་ན། རྣམ་པར་དཀར་བའི་དགེ་རྩ་གང་མཆིས་མཁའ་མཐས་ཁྱབ་པའི་འགྲོ་བ་ཀུན་ལ་རྡུལ་བྲལ་ཡེ་ཤེས་ཀྱི་མིག་དམ་པ་ཐོབ་པའི་རྒྱུར་ཡོངས་སུ་བསྔོ་བ་དང་། འགལ་འཛོལ་གྱིས་དམ་པའི་གསུང་ལ་བསླད་པ་སྲིད་ཚེ་འཕྲལ་དང་ཡུན་དུ་སྒྲིབ་པར་མི་འགྱུར་ཞིང་མཁྱེན་སྤྱན་ཡངས་ པ་རྣམས་ཀྱིས་ནོར་བཅོས་དགོངས 
་འཆར་ལྷུག་སྩོལ་ཡོད་པའི་རེ་སྨོན་དང་། ཐོག་མཐའི་བྱ་བར་དངོས་སུ་ཞུགས་པ་དང་བསམ་སྦྱོར་གང་ཐད་ནས་རྒྱབ་སྐྱོར་རོགས་དན་མཛད་པོ་ཡོངས་ལ་བཀའ་དྲིན་རྗེས་དྲན་ཞུ་བ་དང་བཅས།
བསྟན་འཛིན་ལུང་རྟོགས་ཉི་མས་ཙི་ནའི་ཡུལ་གྱི་གྲོང་ཁྱེར་ཨུདྤལ་ཅན་དུ། སྤྱི་ལོ་༢༠༡༡ལོའི་ཟླ་བ་༣པའི་ཚེས་༨ཉིན་བྲིས།
དཔེ་སྒྲིག་ལས་ཁང་།
སྔ་འགྱུར་རྫོགས་ཆེན་དཔེ་ཚོགས་བསྡུ་སྒྲིག་ཁང་།
སྤྱི་ཁྱབ་བསྡུ་སྒྲིག་གཙོ་འགན་པ།
རྫོགས་ཆེན་རིན་པོ་ཆེ་བསྟན་འཛིན་ལུང་རྟོགས་ཉི་མ།
དཔེ་སྡུར་ཞུ་དག་པ།
ཤྲཱི་སེང་ཆོས་གྲྭའི་མཁན་ཆེན་ཨོ་རྒྱན་རིག་འཛིན། མཁན་པོ་ཚེ་ནོར། མཁན་པོ་ཐུབ་བསྟན་ཚེ་འཕེལ། མཁན་པོ་ཐུབ་བསྟན་དབང་རྒྱལ། མངོན་པའི་འཛིན་གྲྭའི་སྐྱོར་དཔོན་བསོད་ཕུན། སྡེ་སྣོད་འཛིན་པ་བསྟན་འཛིན་ཉི་མ་དང་། འཆི་མེད་བཟོད་པ། བསྟན་འཛིན་ཚེ་རིང་། པདྨ་འགྲོ་འདུལ། བཀྲ་བ་བཅས་དང་།
དཔེ་སྒྲིག་པ།
དབྱིན་ཇི་བ་པདྨ་མཐུ་སྟོབས།
རྩིས་འཕྲུལ་པ།
དོན་ཡོད་རྣམ་རྒྱལ། རྒྱལ་མཚན་གྲགས་པ། བྱང་ཆུབ་ཆོས་མཚོ། གསང་སྔགས་དབང་མོ།
མདུན་ཤོག་མཛེས་རིས་པ།
ཡུས་ཁུ་ཡུས།
ལས་སྒྲུབ་པ།
ཕུར་བཟང་། སྐལ་བཟང་དབྱངས་ཅན།