རྫོགས་ཆེན་ཀློང་ཆེན་སྙིང་ཐིག་གི་སྒོ་ནས་སྐལ་ལྡན་ཇི་ལྟར་བཀྲི་བའི་ཚུལ།

༄༅། །རྫོགས་ཆེན་ཀློང་ཆེན་སྙིང་ཐིག་གི་སྒོ་ནས་སྐལ་ལྡན་ཇི་ལྟར་བཀྲི་བའི་ཚུལ་བཞུགས་སོ། །འཁོར་ལོའི་དབང་ཕྱུག་ཀུན་བཟང་ཧེ་རུ་ཀ །གསང་འཛིན་རྡོ་རྗེ་གཏུམ་པོར་ཁྲོས་པའི་གར། །གཞན་ངོར་ཕན་བདེའི་མཆོག་སྩོལ་བཤེས་གཉེན་གྱི། །རྣམ་རོལ་སྒྱུར་པ་ཡོངས་འཛིན་བླ་མར་འདུད། །ཤེས་བྱའི་ཆོས་ཀུན་མཁྱེན་པའི་ཀློང་ཆེན་ལས། །རབ་འབྱམས་འགྲོ་ངོར་རྗེས་བརྩེའི་འོད་སྟོང་ཟེར། །སྤྲོ་མཛད་ཀུན་མཁྱེན་བླ་མ་ཡབ་སྲས་དེ། །སྙིང་དབུས་པདྨའི་ཟེར་འབྲུར་དེང་རོལ་ཅིག །དེ་ལ་འདིར་འཁོར་བ་སྤྱི་དང་བྱེ་བྲག་གི་རང་མཚང་མཐོང་ནས། སྤྱིར་ཐར་བ་དོན་དུ་གཉེར། བྱེ་བྲག་ཏུ་རྣམ་མཁྱེན་དོན་དུ་གཉེར། ཡང་དགོས་སུ་ཚེ་གཅིག་གིས་མགོན་པོ་རྡོ་རྗེ་འཆང་གི་གོ་འཕང་རིན་ཆེན་མངོན་དུ་འཐོབ་པར་འདོད་པའི་གང་ཟག་སྐལ་བ་མཆོག་དང་ལྡན་པ་དེ་དག་གི་འཇུག་ངོགས་མ་ནོར་བ་དེ་ནི་འདིར་བརྗོད་པར་བྱ་བ་ཉིད་ཡིན་ཞིང་། དེ་ལ་ཡང་སྤྱིར་གསང་ཆེན་རྡོ་རྗེའི་ཐེག་པའི་ཆོས་ཀྱི་རྣམ་གྲངས་བསམ་གྱིས་མི་ཁྱབ་པ་ཞིག་མཆིས་པ་དེ་དག་ལས་འཇུག་པའི་སྒོ་གང་ནས་བཀྲི་བར་བྱས་ཀྱང་འགལ་བ་མེད་མོད་དེ། རེ་ཞིག་རྫོགས་པ་ཆེན་པོ་ཀློང་ཆེན་སྙིང་ཐིག་གི་སྒོ་ནས་སྐལ་བ་དང་ལྡན་པའི་གང་ཟག་ཇི་ལྟར་བཀྲི་བའི་ཚུལ་ལས་འཕྲོས་ཏེ་བརྗོད་པར་བྱའོ། །འདིར་ཡང་ཀུན་མཁྱེན་བླ་མའི་ལེགས་བཤད་ཁྲིད་ཡིག་བྱང་ཆུབ་ལམ་བཟང་གི་འགྲོས་ལྟར་དགེ་བ་གསུམ་གྱི་ཆིངས་ཀྱིས་འཆིང་བར་བྱས་ན། ཐོག་མར་དགེ་བ་རྒྱུ་མཚན་ཉིད་ཀྱི་ཐེག་པ་དང་ཐུན་མོང་བའི་ཁྲིད་རིམ་ལ། ཐུན་མོང་གི་སྔོན་འགྲོའི་ཁྲིད་ཀྱི་ལག་ལེན་འདེབ་ལུགས་དང་། སེམས་སྤྱོང་བདུན་གྱི་དོན་ཁྲིད་ཐར་བའི་ཐེམ་སྐས་ཀྱི་ཕྱོགས་གཅིག་དང་། ཁྲིད་ཡིག་དྲན་པ་ཉེར་བཞག་གི་སེམས་བསྐྱེད་ཀྱི་བསླབ་པའི་མཐར་ཐུག་པ་རྣམས་ཏེ། འདི་དག་གིས་སྐྱེས་བུ་གསུམ་གྱི་ལམ་རིམ་ལྷ་མི་ཉན་རང་བྱང་སེམས་ཀྱི་ཐེག་པ་དང་བཅས་པའི་དོན་བསྡུས་པའོ། །དེ་ནས་བར་དུ་དགེ་བ་གསང་སྔགས་རྡོ་རྗེ་ཐེག་པའི་ཐུན་མོང་གི་ལམ་རིམ་ལ། ཁྲིད་ཡིག་ཐར་བའི་ཐེམ་སྐས་ཀྱི་ཕྱོགས་གཅིག་དང་། དྲན་པ་ཉེར་བཞག་གི་རྡོར་སེམས་སྒོམ་བཟླས་མན་ཆད་ཀྱི་ལྷག་མ་རྣམས་དང་། བསྐྱེད་རིམ་ལྷའི་ཁྲིད་ཀྱི་རྣམ་པར་གཞག་པ་འོག་མིན་བསྒྲོད་པའི་ཐེམ་སྐས་འཕོ་བ་མ་བསྒོམ་སངས་རྒྱས། སྙན་བརྒྱུད་ཤོག་ དྲིལ་ཡིད་བཞིན་ནོར་བུ ་དེའི་སྦས་དོན་ཐབས་ལམ་མ་བསྒོམས་སངས་རྒྱས། བསྐྱེད་རྫོགས་ཀྱི་ཆོ་ག་རྣམས་དང་བཅས་པ་སྟེ་འདི་དག་གིས་ནི་ཕྱི་རྒྱུད་སྡེ་གསུམ་རྒྱུད་ལུང་གཉིས་དང་བཅས་པའི་ཉམས་ལེན་བསྡུས་སོ། །དེ་ནས་ཐ་མར་དགེ་བ་འོད་གསལ་རྫོགས་པ་ཆེན་པོ་ཐུན་མོང་མ་ཡིན་པའི་ཁྲིད་རིམ་ལ། གདོད་མའི་མགོན་པོའི་ལམ་གྱི་རིམ་པའི་ཁྲིད་ཡིག་ཡེ་ཤེས་བླ་མ། དེའི་མཐའ་རྟེན་གྱི་མན་ངག གནས་ལུགས་རྡོ་རྗེའི་ཚིག་རྐང་དང་། ཀུན་མཁྱེན་ཞལ་ལུང་ལ་སོགས་པ་རྣམས་ཏེ། དེ་ལྟར་ན་ཐེག་པ་རིམ་པ་དགུའི་ལམ་མཐའ་དག་སྟན་ཐོག་གཅིག་ཏུ་ཇི་ལྟར་ཉམས་སུ་ལེན་པའི་ཁྲིད་རིམ་རྣམས་མ་ཚང་བ་མེད་པར་ལེགས་པར་བསྟན་པ་ཡིན་ནོ། །དེ་དག་དབང་བཞི་དང་སྦྱར་ན། བསྐྱེད་རིམ་གྱི་ཁྲིད་ཡིག་ཆོ་ག་དང་བཅས་པ་རྣམས་ནི་བུམ་དབང་གི་ལམ་དང་། སྙན་བརྒྱུད་ཤོག་ དྲིལ་ཡིན་བཞིན་ནོར་བུ ་ཡན་ལག་དང་བཅས་བ་ནི་གསང་དབང་གི་ལམ་དང་། དེའི་སྦས་དོན་ཐབས་ལམ་མ་སྒོམ་སངས་རྒྱས། རྩ་འགྲེལ་ནི་ཤེར་དབང་གི་ལམ་དང་། ཁྲིད་ཡིག་ཡེ་ཤེས་བླ་མ་ལ་སོགས་པ་ནི་ཚིག་དབང་གི་ལམ་ཁྲིད་དུ་ཤེས་པར་བྱའོ། །འདིར་གཞུང་ཚོགས་རྣམས་ད་ལྟའི་གླེགས་བམ་གྱི་བཞུགས་རིམ་དང་ཅུང་ཟད་བསྣོལ་བ་ནི། གླེགས་བམ་བསྒྲིགས་པའི་དཀར་ཆགས་མཁན་པོ་ཉིད་ཀྱི་བློའི་ཉེས་པ་ཡིན་པར་ཤེས་པར་བྱ་སྟེ། འདི་ལྟར་ཐུན་མོང་དང་ཐུན་མིན་གྱི་སྔོན་འགྲོའི་ཁྲིད་ཡིག་རྣམས་ནི་དབང་བཞི་བའི་ལམ་རྫོགས་ཆེན་རང་གི་སྔོན་འགྲོ་ཡིན་ལ། བསྐྱེད་རྫོགས་ཀྱི་ཁྲིད་དག་ནི་དེ་ལས་གཞན་བུམ་གསང་སོགས་ཀྱི་ལམ་མ་ཧཱ་དང་ཨ་ནུ་དག་གི་ཁྲིད་རིམ་ཡིན་པས་ན་དེ་དག་དང་འདྲའོ་སྙམ་དུ་སེམས་པས་སོ། །དེ་ནི་མི་འཐད་དེ། སྤྱིར་རྫོགས་ཆེན་གྱི་སྔོན་འགྲོ་ཡིན་པར་དེ་རྣམས་ལ་ཁྱད་མེད་ཅིང་བྱེ་བྲག་འཇུག་པའི་རིམ་པ་ཐེག་པའི་གོ་རིམ་དང་མཐུན་པར་སྔར་བཤད་པ་ལྟར་ངེས་པའི་ཕྱིར་རོ། །དེ་ལ་ཁོ་ན་རེ། ཐུན་མོང་གི་སྔོན་འགྲོ་དག་གིས་རྒྱུད་ལེགས་པར་སྦྱང་བ་སྔོན་དུ་འགྲོ་དགོས་པ་ནི་རྫོགས་ཆེན་རང་གི་གཞུང་ལས་གསུངས་ཏེ། འདས་རྗེས་ལས། མི་རྟག་སྙིང་རྗེ་བྱང་སེམས་སྦྱངས། ཞེས་གསུངས་པ་ལྟ་བུ་ཡིན་པའི་ཕྱིར་དེ་དང་མི་འདྲའོ། །ཞེས་ཟེར་ན། དེ་ཡང་དེ་ལྟར་མ་ཡིན་ཏེ། ཐུན་མོང་གི་སྔོན་འགྲོས་རྒྱུད་སྦྱང་དགོས་པ་བཞིན་དུ། ཐུན་མོང་མ་ཡིན་པའི་སྔོན་འགྲོ་དབང་སྔ་མ་གསུམ་གྱི་ལམ་བསྐྱེད་རྫོགས་ཀྱི་རིམ་པ་དག་གིས་ཀྱང་རྒྱུད་སྦྱོང་དགོས་པ་མཚུངས་ཏེ། འདི་ལྟར་རྫོགས་ཆེན་རང་གི་རྒྱུད་ནོར་བུ་ཕྲ་བཀོད་ལས། སྦྱོང་བ་རྒྱུན་གྱི་རྣལ་འབྱོར་དང་། སྒོམ་པ་རྒྱུན་གྱི་རྣལ་འབྱོར་དང་། ལྟ་བ་རྒྱུན་གྱི་རྣལ་འབྱོར་དང་། འབྲས་བུ་རྒྱུན་གྱི་རྣལ་འབྱོར་རོ། །ཞེས་སྤྱིར་རྣལ་འབྱོར་བཞི་རུ་གསུངས་ནས་དེ་དག་ལ་འཇུག་པའི་རིམ་པ་ཡང་། རིན་པོ་ཆེ་སྤུངས་པའི་རྒྱུད་ལས། དེ་རིམ་མམ་བྱེ་བྲག་འདི་ལྟ་བུས། ཁྲིགས་ཆགས་ཉིད་དུ་ཉམས་སུ་བླངས། ཞེས་མཐར་ཆགས་ཁོ་ནས་འཇུག་པར་གསུངས་པའི་ཕྱིར། དེ་ལྟ་ན་སྤྱོད་པ་ལ་རྒྱུན་ཏུ་བྱེད་པའི་རྣལ་འབྱོར་གྱི་སྐབས་སུ་ཡང་བུང་བ་ལྟ་བུའི་སྤྱོད་པ་ནས་རྣལ་འབྱོར་དབང་ཕྱུག་གི་སྤྱོད་པར་སྤྱད་པའི་དུས་གྲངས་བདུན་གསུམ་ཉེར་གཅིག་པོ་མཐའ་དག་ཐེག་པའི་གོ་རིམ་དང་མཐུན་པར་མཐར་ཆགས་ཁོ་ནར་བཤད་ལ། ཁྱད་པར་སྒོམ་པ་ལ་རྒྱུན་དུ་བྱེད་པའི་རྣལ་འབྱོར་གྱི་སྐབས་སུ་ལྷ་དང་མིའི་སེམས་འཛིན་བྱང་ཆུབ་སེམས་དཔའི་བསམ་གཏན། དེ་བཞིན་གཤེགས་པའི་དགོངས་པ་སྟེ་གསུམ་དུ་དབྱེ་ནས་དེ་དག་ལ་རིམ་གྱིས་འཇུག་པར་གསུངས་པའི་དང་པོ་ལྷ་མིའི་སེམས་འཛིན་གྱི་སྐབས་སུ་ཉི་ཟླ་ཁ་སྦྱོར་གྱི་རྒྱུད་ལས། ཡི་གེ་ཨ་ལ་སེམས་གཏད་པས། །དངོས་པོའི་ཞེན་པ་རང་སར་ལྡོག །བསྐྱེད་པའི་ལྷ་ལ་སེམས་གཏད་པས། །ལུས་ཀྱི་དྲི་མ་དག་པར་བྱེད། །ཅེས་སོགས་སེམས་འཛིན་ཉེར་གཅིག་གསུངས་པ་རྣམས་དང་བྱང་ཆུབ་སེམས་དཔའི་བསམ་གཏན་གྱི་སྐབས་སུ་ཟས་གོས་བག་ཆགས་ཀྱི་ཞེན་པ་གཅོད་པའི་གདམས་ངག་གསུམ་གསུངས་པ་མཐའ་དག་དབང་སྔ་མ་གསུམ་དང་ཐུན་མོང་བའི་ལམ་བསྐྱེད་རྫོགས་ཀྱི་སྒོམ་རིམ་ཁོ་ན་ཡིན་པའི་ཕྱིར་རོ། །དེ་ཡང་མ་ཟད་སྒྱུད་འཕྲུལ་རྩ་བའི་རྒྱུ་ལས་ཀྱང་། འདུལ་བ་མདོ་སྡེ་ཆོས་མངོན་དང་། །དམ་ཚིག་སྒྲུབ་དང་གྲུབ་པ་དང་། །སྐུ་དང་གསུང་དང་ཐུགས་ཀྱི་རྒྱུད། །ཕྱོགས་བཅུ་རྣམས་སུ་རབ་གྲགས་པ། །གསང་བའི་སྙིང་བོ་ལས་འཕྲོས་ཏེ། །རང་བཞིན་གསང་བའི་སྙིང་པོ་ནི། །སྡེ་སྣོད་ཀུན་དང་རྒྱུད་ཀུན་གྱི། །འབྱུང་གནས་གཏན་ལ་ངེས་པར་འབེབས། །ཞེས་དང་། ས་རྣམས་ཁྱད་པར་བཀོད་པ་ཡང་། གསང་བའི་སྙིང་པོར་འགྲོ་བའི་ལམ། །ཞེས་ཐེག་བརྒྱད་རྫོགས་པ་ཆེན་པོའི་ལམ་སྟེགས་སྔོན་འགྲོའི་ཆོས་སུ་གསུངས་ཤིང་། དེ་ཡང་རིམ་འཇུག་ཁོ་ནར་གསུངས་ཏེ་འདི་སྐབས་ཀྱི་གསང་བའི་སྙིང་པོ་ནི་རྫོགས་པ་ཆེན་པོ་ཉིད་ཡིན་པའི་ཕྱིར་རོ། དེས་ན་རྫོགས་ཆེན་གྱི་སྔོན་འགྲོར་བསྐྱེད་རྫོགས་ཐུན་མོང་གི་ལམ་འགྲོ་མི་དགོས་པར་འཛིན་པ་ཐམས་ཅད་ལ་བློ་སྐྱོན་འདི་ཉིད་ཁོ་ན་ཞུགས་པས་ནོངས་པ་ཡིན་པའི་ཕྱིར་ཚུལ་འདི་ཡང་མི་ཤེས་སུ་མི་རུང་བའི་གནད་གལ་བོ་ཆེ་གཅིག་གོ རེ་ཞིག་འདིར་དེ་ཙམ་གྱིས་ཆོག་ལ། ད་དུང་ཡང་དགག་སྒྲུབ་བྱེད་འདོད་པ་གཞན་དག་མཆིས་ཚེ་རིམ་བཞིན་སྤྲོས་པས་ཆོག་གོ །ད་ནི་བཀྲི་བའི་ཚུལ་དངོས་བརྗོད་པར་བྱ་སྟེ། དེ་ཡང་ཐུན་མོང་དང་ཐུན་མོང་མ་ཡིན་པའི་སྔོན་འགྲོ་དག་གིས་རྒྱུད་ལས་སུ་རུང་བར་བྱས་ནས། དངོས་གཞིར་འཇུག་པའི་ཐོག་མར་དབང་གི་སྤྱི་དོན་སྙིང་པོའི་དོན་གསལ་གྱིས་ཁོག་ཕུབས་པའི་རྩ་བ་གསུམ་གྱི་དབང་རིམ་རྣམས་ཀྱིས་རྒྱུད་སྨིན་ངེས་སུ་བྱས་ཏེ། དེ་ནས་རྡོར་སེམས་སྒོམ་བཟླས་དང་འབྲེལ་བའི་བུམ་དབང་གི་ལམ་ཡི་དམ་གང་རུང་གི་བསྐྱེད་རིམ་ལ་འཇུག་པར་བྱ་ཞིང་། དེའི་ཁྲིད་རིམ་འོག་མིན་བསྒྲོད་པའི་ཐེམ་སྐས་དང་ཆོ་ག་རང་རང་གི་གབ་བྱང་དང་དཀའ་འགྲེལ་བསྙེན་ཡིག་རྣམས་ལས་ཇི་ལྟར་བཤད་པ་བཞིན་ཉམས་འོག་ཏུ་ཆུད་པར་བྱའོ། རིམ་པ་དང་པོའི་ལམ་འདི་ནི་རྫོགས་རིམ་གྱི་སྨིན་བྱེད་ཡིན་པས་ན་ཐོག་མར་འདི་ཉིད་ལ་བརྟན་པ་མ་ཐོབ་པར་རྩ་རླུང་གི་གདམས་པ་སོགས་ལ་བརྩོན་པ་ནི་དོན་དུ་མི་འགྱུར་ཏེ། དཔེར་ན་ཏིལ་མེད་པའི་ཏིལ་མར་དང་། བུད་ཤིང་མེད་པའི་མེ་མི་འབྱུང་བ་བཞིན་ནོ། །དེས་ན་གསང་སྔགས་ལམ་གྱིས་འདོད་ཡོན་ལམ་དུ་བྱེད་པ་སོགས་མཐའ་དག་ཆོས་ཐམས་ཅད་དག་མཉམ་ཆེན་པོར་རྟོགས་པའི་ལྟ་བ་དང་ལྷའི་རྣལ་འབྱོར་བསྒོམ་པས་རབ་ཏུ་ཕྱེ་བ་ཉིད་ཡིན་ན། དབང་བཞིའི་ལམ་ལ་གོ་རིམ་མ་ལོག་པར་སློབ་དགོས་པ་འདི་ནི་མི་ཤེས་སུ་མི་རུང་བའི་གནད་གལ་བོ་ཆེའོ། །དེ་ལྟར་རིམ་པ་དང་པོའི་ལམ་ལ་བརྟན་པ་ཇི་རིགས་ཐོབ་ནས་དབང་གཉིས་པ་དང་གསུམ་པའི་ལམ་གྱིས་བསྡུས་པ་རྫོགས་པའི་རིམ་པ་ལ་བརྩོན་པར་བྱ་སྟེ། དེ་ཉིད་འདིར་འཆད་པར་བྱེད་པ་ལ། སྙན་བརྒྱུད་ཤོག་དྲིལ་ཡིད་བཞིན་ནོར་བུའི་སྦས་དོན་ཐབས་ལམ་མ་བསྒོམས་སངས་རྒྱས་ལས། བེམ་པོའི་རེག་བྱ་དོར་བས་བློ་ཚིམ་སྟེ། །མ་སྨིན་སེམས་ཅན་མདུན་ནས་རྩ་ལྟུང་རིན། །རྒྱབ་མདུན་ཐུར་མས་ཉོ་ཙམ་སྔགས་ལམ་མིན། །ཟབ་མོའི་ལམ་གནད་ཇི་བཞིན་རྟོགས་འདོད་རྣམས། །ཡིད་བཞིན་རིན་ཆེན་མཛོད་ཀྱི་རིམ་པའི་ཁང་། །ཉི་ཤུ་བ་དང་དེ་ཡི་ཕྱི་མའི་གནས། །རྡོ་རྗེའི་ལམ་གྱི་ལྡེ་མིག་ཆེན་པོར་ཟུངས། །ཞེས་རང་རེ་རྗེས་འཇུག་ཏུ་རློམས་པ་རྣམས་ལ་བརྩེ་བ་ཆེན་པོས་རྗེས་སུ་གདམས་པར་མཛད་པ་འདི་ལྟོས་མེད་དུ་འདོར་བར་མི་འོས་ཤིང་གཅེས་ནོར་དུ་འཛིན་པར་རིགས་པའི་ཕྱིར་རེ་ཞིག་ཚིག་འདི་རྣམས་ཀྱི་དོན་ལ་དཔྱད་པར་བྱ་སྟེ། དེ་ཡང་འདི་ལྟར། ཁ་ཅིག་བེམ་པོའི་རེག་བྱ་དོར་བ་སྟེ། གོས་འཐུག་པོ་སྤངས་ནས་སྲབ་མོ་རས་རྐྱང་ཙམ་གྱིས་སྐྱོབ་པ་དང་རྒྱབ་མདུན་ཐུར་མའི་ལག་ལེན་གྱིས་འདྲེན་པ་ལ་སོགས་པ་བྱང་བར་གྱུར་པ་ན། དེ་ཙམ་གྱིས་བློ་ཚིམ་སྟེ། བདག་ལྟ་བུའི་རྩ་རླུང་བ་གཞན་སུ་ཡང་མེད་སྙམ་པའི་ང་རྒྱལ་གྱིས་གསང་བ་ཟབ་མོའི་ལམ་གྱིས་རྒྱུད་མ་སྨིན་ཞིང་གསང་སྔགས་ཀྱི་དོན་བློར་མི་ཚུད་པ་དག་གི་མདུན་དུ་ཕྱིན་ནས། སྔགས་ཀྱི་རྩ་ལྟུང་ལ་ཅི་ཡང་མི་སེམས་པར། འདི་ནི་རྒྱབ་ཐུར་རོ། །འདི་ནི་མདུན་ཐུར་རོ། །ཞེས་པ་ལྟ་བུའི་སྒོ་ནས། གསང་བ་སྒྲོགས་པའི་རྩ་ལྟུང་བདུན་པ་རིན་གྱིས་ཉོ་བར་བྱེད་པ་དེ་ལྟ་བུ་ནི་གསང་སྔགས་ཀྱི་ལམ་མ་ཡིན་ནོ། །ཞེས་གསུངས་ཤིང་དེ་བཞིན་དུ་ཡང་རིག་འཛིན་འཁྲུལ་འཁོར་སྦས་དོན་གསལ་བ་ལས་ཀྱང་རྣམ་འགྱུར་མང་ཡང་འཆུན་དང་མི་ལྡན་ན། འབོལ་སྟན་སྟེང་དུ་བྱ་མཁན་དྲངས་པ་དངོས། །དག་སྦྱོར་མེད་པའི་དུད་འགྲོའི་ལུས་འགྱུར་ཡང་། །ངན་འགྲོའི་ལམ་ལ་རྟེན་འབྲེལ་བསྒྲིགས་པ་བཞིན། །ཞེས་གསུངས་པས་འཁྲུལ་འཁོར་གྱི་རྣམ་འགྱུར་མང་བོ་དེ་དག་ལ་ཡང་ལུས་འཆུན་དང་མི་ལྡན་ན། འབོལ་སྟན་གྱི་སྟེང་དུ་བྱ་མཁན་སྟེ་ཕལ་སྐད་དུ་ཤིང་མགོ་རས་པར་གྲགས་པའི་རྩེད་མོ་བྱེད་མཁན་དེ་ཉིད་དྲངས་ནས་རྩེད་མོ་བྱས་པ་དང་ཁྱད་མེད་པ་དང་། དེ་བཞིན་དུ་ཉོན་མོངས་པ་ལྔ་ཡེ་ཤེས་ལྔར་དག་པ་ལ་སོགས་པའི་གཞི་འབྲས་སྦྲེལ་པའི་དག་པ་སྦྱོར་དུ་མེད་པར་དུད་འགྲོའི་འགྱུར་བཞི་དང་དམ་ཚིག་གི་འཁྲུལ་འཁོར་ལྔ་ལྟ་བུ་དུད་འགྲོའི་ལུས་ཀྱི་རྣམ་འགྱུར་བྱས་པ་ཡང་ངན་འགྲོའི་ལམ་ལ་རྟེན་འབྲེལ་བསྒྲིགས་པ་ལྟ་བུ་ལས་དགོས་པ་གཞན་མེད་པར་གསུངས་པས་སོ། །འོ་ན་གསང་སྔགས་ཀྱི་ལམ་དངོས་དེ་ཇི་ལྟ་བུ་ཞིག་ཡིན་སྙམ་ན་དེ་ཉིད་སྟོན་པའི་ཕྱིར། དེ་ཕྱིར་རྟེན་འབྱུང་བྱེད་ལས་འབྲས་གསུམ་ཀའི། དོན་ལ་སྟོན་ཅིང་སྟོང་པ་བཞིའི་འོད་གསལ། །ཉམས་སུ་མྱོང་བ་རྡོ་རྗེ་ཐེག་པའི་ལམ། །ཡིན་པར་ངེས་ཤེས་སྐྱེས་པ་ཙམ་བྱུང་ཡང་། །སྔགས་ཀྱི་གཟུགས་བརྙན་ཡོད་སྙམ་དགའ་བ་སྐྱེས། །ཞེས་གསུངས་ཏེ། རྩ་རླུང་བསྒོམས་པའི་དོན་པོ་ནི་གཞུང་དུ་གསལ་བ་ལྟར། རྟེན་ཅིང་འབྲེལ་འབྱུང་དང་། བྱེད་ལས་དང་། འབྲས་བུ་སྟེ། དེ་གསུམ་གྱི་སྒོ་ནས་རླུང་སེམས་དབུ་མར་ཇི་ལྟར་འཇུག་པའི་ཚུལ་རྣམས་ཚིག་ཙམ་ལ་གཙོ་བོར་མི་རྟོན་པར་དོན་ལ་ཡིད་རྟོན་པའི་སྒོ་ནས་ཉམས་སུ་བླངས་པས་དབུ་མར་རླུང་སེམས་ཞུགས་པའི་རྟགས་སུ་སྣ་སྒོའི་རྒྱུ་བ་མཉམ་པ་དང་། དབུ་མར་རླུང་སེམས་གནས་པའི་རྟགས་སུ་སྣ་སྒོའི་རྒྱུ་བ་འགགས་པ་དང་། དབུ་མར་རླུང་སེམས་ཐིམ་པའི་རྟགས་སུ་ནང་དུ་དུ་བ་ལ་སོགས་པའི་སྣང་བ་ཤར་བའི་མཐར་མཁའ་སྣང་འཆར་བ་སྟེ། དེ་ལ་ཡང་སྟོང་བའམ་སྣང་བའི་དུས་སུ་དཀར་ལམ་སྟེ་ནམ་མཁའ་ལ་ཟླ་འོད་ཤར་བ་ལྟ་བུའི་སྣང་བ་དང་། ཤིན་ཏུ་སྟོང་བའམ་མཆེད་པའི་དུས་སུ་དམར་ལམ་སྟེ་ནམ་མཁའ་ལ་ཉི་འོད་ཤར་བ་ལྟ་བུའི་སྣང་བ་དང་། ཐམས་ཅད་སྟོང་བའམ་ཉེར་ཐོབ་ཀྱི་དུས་སུ་ནག་ལམ་སྟེ་ནམ་མཁའ་ལ་མཚན་གྱི་སྨག་གིས་བསླད་པ་ལྟ་བུའི་སྣང་བ་དང་། རབ་ཏུ་སྟོང་བའམ་འོད་གསལ་ཀྱི་དུས་སུ་ནམ་མཁའ་སླང་བྱེད་ཀྱི་རྐྱེན་ཟླ་ཉི་མུན་པ་གསུམ་དང་བྲལ་བའི་ཐོ་རངས་ཀྱི་ཐུན་དང་པོ་ལྟ་བུའི་སྣང་བ་སྟེ། དེ་ལྟར་སྟོང་བ་བཞིའམ་སྣང་བ་བཞིའི་ཡེ་ཤེས་རིམ་གྱིས་ངོས་བཟུང་ནས་མཐར་འོད་གསལ་གྱི་ངང་ལ་ཅི་གནས་སུ་མཉམ་པར་བཞག་པ་ལས་ལམ་གྱི་འོད་གསལ་བུའི་ཚུལ་དུ་ཤར་བ་དེ་ཉིད། གཞིའི་འོད་གསལ་མའི་ཚུལ་དུ་གནས་པ་དེ་ཉིད་དང་ཟུང་དུ་འཇུག་པས་གྲོལ་པར་འགྱུར་བ་འདི་ཉིད་ཡིན་ཏེ། དེ་ལྟར་ན་ཚུལ་བཞིན་དུ་བསྒོམས་པས་བརྟན་པ་ཐོབ་པར་མ་གྱུར་ན་ཡང་དེ་ལྟ་བུའི་སྟོང་བཞི་ཉམས་སུ་མྱོང་བ་ཉིད་རྡོ་རྗེ་ཐེག་པའི་ལམ་ཡིན་པའི་ངེས་ཤེས་སྐྱེས་པ་ཙམ་རེ་བྱུང་བ་ཡིན་ཡང་ད་དུང་གསང་སྔགས་ཀྱི་གཟུགས་བརྙན་ཙམ་མ་ནུབ་པར་འདུག་གོ་སྙམ་པས་ཐུགས་ལ་དགའ་བ་སྐྱེས་པར་གྱུར་ཏེ་ཞེས་གསུངས་པ་སྟེ། དེས་ན་ཐབས་ཀྱིས་རླུང་སེམས་དབུ་མར་བཅུག་སྟོབས་ཀྱི་སྟོང་བ་བཞིའི་མཐའི་འོད་གསལ་ངོས་བཟུང་ནས་སྒོམ་པ་འདི་ཉིད་ལམ་གྱི་སྙིང་བོ་ཡིན་པ་ཤེས་པར་བྱའོ། །དགའ་བ་བཞི་ནི་སྟོང་བཞི་ལས་གཞན་མ་ཡིན་ཏེ། རྒྱུད་ཀྱི་བྱེ་བྲག་ལས་ཐབས་ཀྱི་ཁྱད་པར་ཙམ་ཡིན་པའི་ཕྱིར་རོ། །དེ་ལྟ་བུའི་ཚུལ་གཏན་ལ་འབེབས་ཀྱང་ཀུན་མཁྱེན་བླ་མའི་ལེགས་བཤད་ལས་འབྱུང་བའི་ཕྱིར། ཟབ་མོའི་གནད་ཇི་ལྟ་བ་བཞིན་དུ་རྟོགས་པར་འདོད་པ་རྣམས་ཀྱིས་ནི། ཡིད་བཞིན་རིན་པོ་ཆེའི་མཛོད་ཀྱི་རིམ་ཁང་ཉི་ཤུ་དང་། དེའི་ཕྱི་མའི་གནས་ལེའུ་ཉེར་གཅིག་པ་དང་། དོན་ཁྲིད་རྡོ་རྗེ་སྙིང་བོ། སེམས་ཉིད་ངལ་བསོ་རྩ་འགྲེལ་སོགས་རྩ་རླུང་བསྟན་པའི་གཞུང་ཆེན་རྣམས་ཟབ་མོའི་ལམ་གྱི་སྒོ་འབྱེད་པའི་ལྡེ་མིག་ཉིད་དུ་བཟུང་ནས་བརྗོད་བྱའི་དོན་ཐམས་ཅད་ཐོག་མར་ཁོང་དུ་ཆུད་པར་བྱའོ། །ཞེས་བརྩེ་བར་གདམས་པ་ཡིན་ནོ། །དེ་ལྟར་ན་དོན་འདི་རྣམས་ལ་སོམ་ཉི་མེད་པ་གཞིར་བཞག་ནས་སྐབས་དོན་དངོས་ཀུན་མཁྱེན་བླ་མའི་དགོངས་པ་ལྟར་འཆད་པ་ལ། སེམས་ཉིད་ངལ་བསོའི་ལེའུ་དགུ་བའི་འགྲེལ་བ་ལས། དེ་ཡང་རྫོགས་རིམ་གྱི་ངོ་བོ་ནི་དམིགས་པ་འགའ་ཞིག་གི་སྟེང་དུ་སེམས་རྩེ་གཅིག་ཏུ་བཞག་པས་བདེ་གསལ་མི་རྟོག་པའི་ངང་ལ་གནས་ཏེ་གཉུག་མ་ཕྱག་རྒྱ་ཆེན་པོའི་དོན་རྟོགས་པ་ལ་སྦྱོར་བའོ། །ཞེས་སྤྱིར་རྫོགས་རིམ་གྱི་ངོ་བོ་ནི་དེ་ཏིང་སོགས་དང་མི་ལྟ་བར་འདྲ་བར་བསྒོམས་དགོམ་བྱུང་མི་ཕྲེགས་པས་རབ་ཏུ་ཕྱེ་བ་ཡིན་པར་གསུངས་ནས། དེ་ཉམས་སུ་ལེན་པ་ལ་ལུང་སྔ་མའི་མུར། དེའང་གཤིས་ཀྱི་ཡིན་ཚུལ་ལ་གཞི་གདོད་མའི་ཡིན་ལུགས་རྡོ་རྗེའི་ལུས་ཀྱི་རང་བཞིན། སེམས་ཉིད་དོན་ཀྱི་ངོ་བོ་རྣམས་ཤེས་ནས། སྒོམ་པར་བྱེད་སྟེ། ཞེས་རྫོགས་རིམ་སྒོམ་པའི་སྔོན་དུ་གཞི་གདོད་མའི་གནས་ལུགས། རྡོ་རྗེའི་ལུས་ཀྱི་གྲུབ་ཚུལ་དང་གནས་ཚུལ་གྱི་རང་བཞིན། སེམས་ཉིད་དོན་གྱི་ངོ་བོའི་འདུག་ཚུལ་རྣམས་མི་ཤེས་སུ་མི་རུང་བར་གསུངས་ཏེ། དེ་རྣམས་ངེས་པར་མ་གྱུར་ན་འབེན་མེད་པའི་མདའ་བཞིན་དུ་ལམ་གང་ལ་གནད་དུ་བསྣུན་པ་གང་ཞིག་སྐྱེ་བར་འགྱུར་བ་ཡིན་ལ་སོགས་པ་ཅི་ཡང་མི་ཤེས་པར་འགྱུར་བའི་ཕྱིར་རོ་སྙམ་དུ་དགོངས་སོ། །དེས་ན་དེ་ཉིད་གཏན་ལ་འབེབ་པའི་ཕྱིར་ལེའུ་ལས། བདག་དང་འགྲོ་ཀུན་ཡེ་ནས་སངས་རྒྱས་པས། །ཕུང་བོ་ཁམས་དང་སྐྱེ་མཆེད་ལ་སོགས་ཀུན། །དཀྱིལ་འཁོར་གཅིག་ཏུ་གསལ་བཏབ་རིམ་གཉིས་བསྒོམ། །ཞེས་པའི་སྐབས་ཀྱི་འགྲེལ་བར་རྒྱ་ཆེར་གཏན་ལ་ཕབ་ནས་གསུངས་པ་ལྟར་ཁོང་དུ་ཆུད་པར་བྱའོ། །དེ་ལྟར་ལུས་སེམས་ཀྱི་དངོས་པོའི་གནས་ཚུལ་ལེགས་པར་རྟོགས་ནས་དེ་ཉིད་ལ་གནད་དུ་བསྣུན་པའི་ཐབས་ཀྱི་རིམ་པ་དངོས་སྒོམ་པར་བྱེད་པ་ལའང་ཁྲིད་ཡིག་བྱང་ཆུབ་ལམ་བཟང་ལས། དེ་ནས་ཟབ་ལམ་བྱེ་བྲག་ཏུ་སྒོམ་པ་ལ། བྱིན་རླབས་དངོས་གྲུབ་ཀྱི་གནད། སྔོན་འགྲོ་ལམ་སེལ་གྱི་གནད། དངོས་གཞི་ཁྱད་པར་གྱི་གནད་དང་གསུམ་ལས། ཞེས་གསུངས་པ་ལྟར་གནད་གསུམ་གྱིས་ཁོག་ཕུབས་ནས་ཉམས་སུ་ལེན་པ་འདི་ནི་གཞུང་འདིའི་ལུས་རྣམ་པར་བཞག་པ་ཉིད་དུ་རིགས་པར་བྱའོ། །དེ་ལྟར་ན་གནད་གསུམ་ལས། དང་པོ་བྱིན་རླབས་དངོས་གྲུབ་ཀྱི་གནད་ནི། རྩ་ཐིག་རླུང་གསུམ་གྱིས་བྱིན་གྱིས་རློབས་པ་དང་། ཟབ་ལམ་གྱི་རྟོགས་པ་ཁྱད་པར་ཅན་རྒྱུད་ལ་སྐྱེ་བའི་ཕྱིར། བླ་མའི་རྣལ་འབྱོར་སྒོམ་པ་ནི། དེ་ཡང་འདི་ཉིད་ཀྱི་རང་གཞུང་སྙན་བརྒྱུད་ཤོག་ དྲིལ་ཡིད་བཞིན་ནོར་བུ ་ལས། ཀུན་བཟང་གདོད་མའི་ཀློང་ལ་ཕྱག་འཚལ་ལོཿ ཞེས་པ་ལ་སོགས་པས་སྙིགས་མའི་དུས་སུས་སྐུ་གསུམ་གྱི་བཞུགས་སྟངས་ལ་བརྟེན་ནས་རྫོགས་པ་ཆེན་པོའི་དོན་རྩོལ་མེད་དུ་རྒྱུད་ལ་སྐྱེད་པ་ཐོད་རྒལ་གྱི་གདམས་པ་ལྟ་བུ་ཉམས་སུ་ལེན་པའི་ལོང་མེད་ན། རིག་འཛིན་འཁྲུལ་འཁོར་སྦས་དོན་གསལ་བ་ལས། རྟེན་འབྲེལ་ལུས་ལ་བསྒྲིགས་པས་རྟོགས་པ་སེམས་སུ་འཆར། །སྲོག་རྩོལ་གནད་དུ་ཚུད་པས་གནས་པའི་རྩ་ཁ་ཕྱེ། །རླུང་དང་འཁྲུལ་འཁོར་འབྲེལ་བས་རྩ་མདུད་རང་སར་གྲོལ། །ཐེམ་བུའི་མན་ངག་ཤེས་ན་བཀོད་པ་བྱང་སེམས་རྒྱས། །རྡོ་རྗེའི་རྦ་རླབས་ལ་བརྟེན་འབྲས་བུའི་དེ་ཉིད་མཐོང་། །གནད་ལས་གནད་དུ་གྱུར་པས་ཐབས་ཀྱི་ལམ་མཆོག་ཡིན། །ཞེས་གསུངས་ཏེ་དེ་ལྟར་གནད་ལ་བརྟེན་པའི་ཐབས་ཀྱི་ལམ་མཆོག་འདི་ཉིད་སྒོམ་པར་བྱའོ། །ཞེས་གསུངས་ཏེ་དེ་ཡང་སྣོད་ལྡན་ལ་ཆིག་བརྒྱུད་དུ་སྤེལ་བ་ལས་སྣོད་མིན་ལ་བསྟན་བྱ་མ་ཡིན་པར་བཀའ་རྒྱས་བཏབས་ནས། དེའི་རྗེས་སུ་དང་པོ་མལ་ནས་ཧར་ལངས་ཏེཿ ལྟོ་སྟོང་རླུང་རིག་དྭངས་པའི་ཚེཿ སྔོན་འགྲོ་སྤྱི་དང་ཁྱད་པར་དུ༔ བླ་མའི་རྣལ་འབྱོར་གནད་དུ་བསྣུན༔ མོས་གུས་གདུང་བས་དབང་བཞི་བླངསཿ ཞེས་བླ་མའི་རྣལ་འབྱོར་སྒོམ་པའི་ཚུལ་དངོས་གསུངས་སོ། །འདིར་ཉམས་ལེན་ལ་འཇུག་པའི་སྔོན་དུ་འགྲོ་བའི་ལག་ལེན་གྱི་ཆིང་སེ་བླ་མའི་ཞལ་ལས་ཐོས་པ་དག་བརྗོད་པར་བྱ་སྟེ། དེ་ཡང་ཆོས་རྗེ་བླ་མའི་ཞལ་སྔ་ནས། ཐོག་མ་སྐྱབས་འགྲོ་ནས་བཟུངས་ཏེ་བླ་མའི་རྣལ་འབྱོར་ལ་ཐུག་གི་བར་གྱི་སྔོན་འགྲོ་ཐུན་མོང་དང་ཐུན་མོང་མ་ཡིན་པ་མཐའ་དག་ཁྲིད་གཞུང་ལྟར་ལེགས་པར་ཉམས་སུ་ལེན་གྲུབ་པའི་གང་ཟག་དེས། འབོལ་སྟན་དང་ཀོ་གདན་སོགས་འབེབ་གདན་དུ་འོས་པ་དང་། རླུང་ཆས་ཨང་རག སྒོམ་ཐག རས་གཟན་སོགས་དགོས་ཆས་རྣམས་སྔ་ཚགས་བགྱིས་ཏེ། དེ་ནས་དབེན་པ་སྐྱེ་བོའི་རྒྱུ་འགྲུལ་མེད་པའི་གནས་སུ་ཕྱིན་ཏེ། རབ་ལྷག་སྦུད་དང་ཁ་ཆར་སོགས་སྐྱོབ་པའི་ཁང་ཁྱིམ་བྲག་ཕུག་སོགས་དང་། དེ་མིན་ཀྱང་གཞན་གྱིས་མི་མཐོང་བའི་ར་བ་སོགས་སུ་དཀར་གཏོར་དང་ཕུད་གཙང་བཤམས་ནས་སྡེ་བརྒྱད་གསེར་སྐྱེམས་ལ་སོགས་པ་སྔོན་དུ་འགྲོ་བས་ཡུལ་དེའི་གཞི་བདག་སོགས་དཀར་ཕྱོགས་སྐྱོང་བ་རྣམས་ལ། རྣལ་འབྱོར་བ་བདག་གིས་གནས་འདིར་ཐབས་ལམ་ཟབ་མོ་ཉམས་སུ་ལེན་པ་ལ་ཀོ་ལོང་མི་མཛད་ཅིང་འགལ་རྐྱེན་བར་ཆད་ཐམས་ཅད་ཞི་བ་དང་མཐུན་རྐྱེན་ལེགས་ཚོགས་ཐམས་ཅད་ཡིད་བཞིན་དུ་འགྲུབ་པའི་སྡོང་གྲོགས་མཛོད་ཅིག ཅེས་ཕྲིན་ལས་བཅོལ་ཏེ་ཕུད་གཏོར་གཤེགས། དེ་ནས་ལུས་གཅེར་བུར་ཕྱུངས་ཏེ་རླུང་ནད་སོགས་མི་སྡང་བའི་ཐབས་སུ་ཐོག་མར་ཆུ་དྲོན་གྱིས་ལུས་ཐམས་ཅད་བཀྲུས་ཏེ་དེའི་རྗེས་སུ་ཕྱེ་འཕུར་སྣུམ་བག་ཅན་གྱིས་ལུས་ཐམས་ཅད་ལ་ཁྱབ་པར་བསྐུ་མཉེ་བྱ། དེ་ནས་དགུང་མོ་དབང་གི་དུས་ལ་བབས་པ་ན་རས་གཟན་དང་ཨང་རག་བགོས་ཏེ་རླུང་གདན་སོ་སོར་འཁོད་ལ་འགོ་འཛིན་པ་ཡིན་ཡང་། རང་གཞུང་དུ་ཐོ་རངས་མལ་ནས་ལངས་འཕྲལ་ལ་འགོ་འཛིན་པར་གསུངས་པ་ནི་རྒྱུན་གྱི་རྣལ་འབྱོར་གྱི་དབང་དུ་བྱས་པ་ཡིན་གསུངས། གང་ལྟར་ཀྱང་བསམ་གཏན་གྱི་འདུག་སྟངས་དང་བཅས་ཏེ་གདན་ལ་འཁོད་གྲུབ་པ་ན། སྔོན་འགྲོ་སྤྱི་དང་ཁྱད་པར་དུ་བླ་མའི་རྣལ་འབྱོར་ལ་གནད་དུ་བསྣུན་ནས་བླ་བརྒྱུད་གསོལ་འདེབས་དཀྱུས་མའི་གཤམ་དུ་གཏུམ་མོའི་གསོལ་འདེབས་རྡོ་རྗེའི་ཚིག་རྐང་ཉིད་ཚར་གྲངས་གང་ནུས་སུ་བཏོན་ཏེ་དབང་བཞི་བླངས་མཐར་ཐུགས་ཡིད་གཅིག་དུ་བསྲེས་ནས་དབང་དོན་ལ་མཉམ་པར་བཞག་སྟེ་རྗེས་ཐོབ་སྒྱུ་མའི་ལྷ་སྐུ་རིག་འཛིན་རྡོ་རྗེ་ཆོས་ཡབ་ཡུམ་གྱི་རྣམ་པར་ལྡང་བའི་བར་དུ་དཀྱུས་བཞིན་བཏང་ངོ་། །འདིར་རིག་འཛིན་རྡོ་རྗེ་ཆོས་སྒོམ་པར་གསུངས་པ་ནི་མཚོན་བྱེད་ཙམ་ཉིད་ཡིན་གྱི། གཞན་དུ་ན་རང་གི་ཡི་དམ་གང་ཡིན་པ་དེ་ཉིད་ཀྱི་ལུས་དབུས་སུ་རྩ་ཐིག་རླུང་གསུམ་བསྒོམས་པ་ཉིད་ཀྱིས་འཐུས་པ་ཡིན་ནོ། །དེ་ལྟར་བྱིན་རླབས་དངོས་གྲུབ་ཀྱི་གནད་སྒོམ་པའི་རིམ་པ་དེ་སོང་ནས། གཉིས་པ་སྔོན་འགྲོ་ལམ་སེལ་གྱི་གནད་སྒོམ་པ་ལའང་། རྩ་སྦྱང་བ་སྟོང་རའི་གནད། རླུང་སྦྱང་སྲོག་གི་གནད། ཐིག་ལེ་སྦྱང་བ་རྩོལ་བའི་གནད་དང་གསུམ་དུ་གསུངས་ཤིང་། དེ་དག་ཀྱང་རིམ་བཞིན་རང་གཞུང་ལས། དངོས་གཞི་ལུས་གནད་དྲང་བོར་བསྲངཿ ཞེས་པ་ནས། དབུ་མའི་ཡར་སྣ་ཁ་ཟླུམ་འཁྱིལཿ ཞེས་པའི་བར་གྱིས་དང་པོ་དང་། རོ་རྐྱང་གཉིས་ནས་ལས་ཀྱི་རླུང་༔ ཞེས་པ་ནས་ངལ་གསོ་ཤེས་པ་རྣལ་དུ་ཕབ༔ ཞེས་པའི་བར་གྱིས་གཉིས་པ་དང་། དེ་ནས་སྙིང་གུར་སྨུག་པོའི་དབུས༔ ཞེས་པ་ནས། འོག་རླུང་ཅུང་ཟད་བསྐུལ་བྱས་ཏེ༔ རླུང་ཡིག་རིག་པ་གཅིག་ཏུ་དྲིལ༔ ཞེས་པའི་བར་གྱིས་གསུམ་པ་བསྟན་ནོ། །དེ་ལྟར་སྟོན་འགྲོ་ལམ་སེལ་གྱི་གནད་གསུམ་པ་ཡང་གནད་ཀྱི་གནད་གསུམ་བསྟན་ཏེ། ཡིད་བཞིན་རིན་པོ་ཆེའི་མཛོད་ཀྱི་ལེའུ་ཉི་ཤུ་པའི་འགྲེལ་བ་ལས། བླ་མེད་ཕ་མ་གཉིས་སུ་མེད་པ་གསུམ་ཆར་དྲིལ་ནས་ཉམས་སུ་ལེན་པའི་སྐབས་འདིར་རྩ་རླུང་ཐིག་ལེ་གསུམ་གྱི་ཐབས་ལས་ཡེ་ཤེས་འཆར་བ་ངོས་བཟུང་ནས་བསྒོམ་པའི་ཕྱིར་དེ་གསུམ་ལ་གནད་དུ་བསྣུན་པ་གཅེས་སོ། །ཡིད་བཞིན་འཛོད་ཀྱི་ལུང་སྔ་མའི་མུར། ཞེས་གསུངས་པ་དང་མཐུན་པར་ཁྲིད་ཡིག་བྱང་ཆུབ་ལམ་བཟང་ལས། དེའང་རྩ་གནད་དུ་འགྲོ་བ་ལ་ལུས་གནད། རླུང་གནད་དུ་འགྲོ་བ་ལ་སྲོག ཐིག་ལེ་གནད་དུ་འགྲོ་བ་ལ་རྩོལ་བ་གལ་ཆེའོ། །ཞེས་གསུངས་པ་ལྟར་ཏེ། དེ་ཡང་གནད་དུ་བསྣུན་ཞེས་པའི་དོན་ནི། དཔེར་ན་ལུས་ཀྱི་གནད་སྙིང་ལྟ་བུར། མཚོན་བསྣུན་ན་མི་འཆི་བའི་རང་དབང་མེད་པ་བཞིན་དུ་གདམས་ངག་སྒོམ་པའི་གནད་གང་ཡིན་པ་དེར་དམིགས་པའི་མཚོན་བསྣུན་ན་ཡང་མི་གྲོལ་པའི་རང་དབང་མེད་པ་ཡིན་པས་ན་དེ་སྐད་ཅེས་བྱ་སྟེ། དེས་ན་རྡོ་རྗེ་ཕུང་བོའི་གནས་དྲུག་ན་ཉིན་མཚན་གྱི་རྣལ་འབྱོར་སྒོམ་པའི་གནད་དྲུག་ཡོད་པའི་ཕྱིར། དེ་དག་སོ་སོར་རང་གནད་དང་མཐུན་པར་དམིགས་པའི་མཚོན་སྣུན་པར་བྱེད་པ་ནི་སྤྱིར་ཤེས་པར་བྱ་བ་ཉིད་ཡིན་ནོ། །དེ་ལྟར་ན་རྩ་སྦྱང་བ་སྟོང་རའི་གནད་ལ་རྩ་གནད་དུ་འགྲོ་བ་ལ་ལུས་གནད་གལ་ཆེ་བའི་ཕྱིར་ཐོག་མར་ལུས་གནད་འཆོས་པར་བྱ་དགོས་སྟེ། དེ་ཡང་རང་གཞུང་ལས། དངོས་གཞི་ལུས་གནད་དྲང་བོར་བསྲངཿ ཞེས་པས་བསྟན་པ་ལྟར་ལུས་གནད་བསམ་གཏན་གྱི་ཆོས་བདུན་ནམ། རྣམ་སྣང་ཆོས་བདུན་དུ་གྲགས་པ་ལྟར་བཅའ་བར་བྱ་སྟེ། རྐང་བ་རྡོ་རྗེའི་སྐྱིལ་ཀྲུང་། ལག་པ་གཉིས་མཉམ་བཞག་ཐལ་མོ་བརླ་སྟེང་དུ་བསྡམས་པ། དཔུང་བ་རྒོད་གཤོག་ལྟར་བརྐྱང་བ། སྒལ་ཚིགས་མདའ་ལྟར་བསྲང་བའམ་དོང་རྩེ་ལྟར་བརྩེགས་པ་ཡང་ཟེར། མགྲིན་པ་ཨེན་ཙམ་དགུག་པ། མིག་སྣ་རྩེ་ལ་ཕབ་པ། ལྕེ་ཡ་སྐན་ལ་སྦྱར་བ་སྟེ་བདུན་ནོ། །འདི་ལ་རྣམ་སྣང་ཆོས་བདུན་ཞེས་ཟེར་བ་ཡང་རྫོགས་ཆེན་གྱི་ཆོས་སྐད་དེ། གཞུང་དེར་སྐུ་ལྔ་དང་ཡེ་ཤེས་ལྔ་ཡི་བཞུགས་སྟངས་བཅུ་གསུངས་པའི་ནང་ཚན་ཆོས་དབྱིངས་ཡེ་ཤེས་རྣམ་པར་སྣང་མཛད་ཀྱི་བྱང་ཆུབ་མཆོག་གི་བཞུགས་སྟངས་ཞེས་བཤད་པ་དེ་ཡིན་པའི་ཕྱིར། འདིར་ཆོས་བདུན་ཐུན་མོང་བ་དང་མི་མཚུངས་པའི་ཁྱད་པར་ནི། ལག་པ་མཉམ་བཞག་གི་ཐལ་མོ་བརླ་སྟེང་དུ་སྡོམ་པ་དེ་དང་། དཔུང་བ་ཐད་ཀར་བརྒྱང་པ་མ་ཡིན་པར་གྱེན་དུ་དྲང་བོར་བརྐྱངས་ནས་ལུས་འཆུན་འཛིན་པ་འདི་གཉིས་ཙམ་ཞིག་ཡིན་ཏེ་གཞན་རྣམས་ནི་འདྲའོ། །གང་ལྟར་ཀྱང་སྐབས་འདི་དང་འོག་ཏུ་འཁྲུལ་འཁོར་དངོས་ཀྱི་སྐབས་སོགས་ཀུན་ཏུ་ལུས་ཀྱི་ཆ་ཆ་ནས་ལྷོང་ལྷོང་བོར་ལྟ་བུ་མ་ཡིན་པར་སོར་ཚིགས་ཚུན་ཆད་ལ་བསྒྲིམས་ཏེ་ལུས་འཆུན་དང་ལྡན་པར་བྱེད་པ་ནི་གལ་ཆེ་བ་ཡིན་ཏེ་རིག་འཛིན་འཁྲུལ་འཁོར་གྱི་འགྲེལ་བ་སྦས་དོན་གསལ་བ་ལས། དེ་ཡང་ལུས་བསྲང་བ་དང་། བཅུད་པ་དང་། དགྱེ་དགུ་དང་། ཡན་ལག་བརྐྱངས་བསྐུམ་དང་། བསྡིགས་མཛུབ་ལ་སོགས་པ་གང་གི་ཐད་དུའང་དབྱུགས་པས་སྲང་བུ་གཅུད་པ་ལྟར་སོར་ཚིག་ཡན་ཆད་ལ་འཆུན་འཐོན་པར་ཆ་ཆ་ནས་སྒྲིམས་ཤིང་། ཞེས་གསུངས་པའི་ཕྱིར་རོ། །དེ་ལྟར་ལུས་གནད་བཅོས་གྲུབ་ནས་སྔར་ལྟར་སྔོན་འགྲོ་སྤྱི་དང་བྱེ་བྲག་བླ་མའི་རྣལ་འབྱོར་རྗེས་ཐོབ་སྒྱུ་མའི་སྐུ་རིག་འཛིན་རྡོ་རྗེ་ཆོས་སུ་ལྡང་བའི་བར་སོང་བ་དང་འབྲེལ་བར་སྟོང་ར་དངོས་སྒོམ་པར་བྱེད་པ་ལའང་། ཕྱིའི་ལུས་ཀྱི་སྟོང་ར་དང་། ནང་རྩ་ཡི་སྟོང་ར་གཉིས་ལས། དང་པོ་ནི། རང་ཉིད་རིག་འཛིན་རྡོ་རྗེ་ཆོསཿ ཞེས་པ་ལ་སོགས་པ་ངག་ཏུ་བརྗོད་པ་དང་མཉམ་དུ་རིག་འཛིན་རྡོ་རྗེ་ཆོས་ཀྱི་མངོན་རྟོགས་གསལ་དགོས་པ་སྟེ། དེ་ཡང་སྤྱིར་རྡོ་རྗེ་ཆོས་ནི་རྒྱལ་བ་ཐམས་ཅད་ཀྱི་གསུང་གི་རྡོ་རྗེ་འོད་དཔག་མེད་ཉིད་ཡིན་ལ། དེ་ཉིད་རྒྱུད་སྡེ་འགའ་ཞིག་གི་སྡུད་པོ་མཛད་པའི་སྐབས་སུ་ཕྱག་ན་རྡོ་རྗེའམ་རིག་འཛིན་རྡོ་རྗེ་ཆོས་ཞེས་ཀྱང་གྲགས་ཏེ། དེ་ལྟར་ན་ཨོ་རྒྱན་གྱི་སློབ་དཔོན་སངས་རྒྱས་གཉིས་པ་ཡང་གཞུང་ཁ་ཅིག་ལས་འོད་དཔག་མེད་དང་། ཁ་ཅིག་ལས་ཕྱག་ན་རྡོ་རྗེའི་སྤྲུལ་པར་ཡང་གསུངས་པ་དག་འགལ་བ་མེད་པ་ཉིད་དུ་གནད་འདིས་རྟོགས་པར་བྱའོ། །དེ་ལྟར་ན་འདིར་རྡོ་རྗེ་ཆོས་སྒོམ་པ་དང་། བླ་མ་རིག་འཛིན་འདུས་པའི་ཡེ་ཤེས་སེམས་དཔའ་རྡོ་རྗེ་ཆོས་ཡིན་པའི་རྒྱུ་མཚན་དང་། ལྷའི་ངོ་བོ་ལ་སོགས་པ་ཡང་ཞར་ལ་ཁོང་དུ་ཆུད་པར་བྱའོ། །དེ་ལྟ་བུའི་རྡོ་རྗེ་ཆོས་དེ་ཡང་རིག་འཛིན་གྱི་གབ་བྱང་ལས། ཡབ་སྐུ་མདོག་དམར་པོ་དང་། ཡུམ་སྔོན་པོར་གསུངས་ཀྱང་། འདིར་ཡབ་མདོག་སྔོ་སྐྱ་དང་། ཡུམ་དམར་མོ་བྱས་པ་ཙམ་བདེ་སྟོང་དང་། ཡུལ་ཡུལ་ཅན་གྱི་དག་པ་སྦྱོར་བའི་ཁྱད་པར་དུ་བྱས་པ་ཙམ་ལས་གཞན་མངོན་པར་རྟོགས་པ་ཕལ་ཆེར་འདྲ་ལ། བཞུགས་སྟངས་ནི་ཐབས་ཤེས་ཀྱི་མཚོན་དོན་དུ། ཡབ་གཡས་རྐྱང་གཡོན་བསྐུམས་ཀྱི་དོར་སྟབས་སུ་བཞུགས་ཤིང་། ཡུམ་གྱི་བཞུགས་ཚུལ་མི་གསལ་ཡང་ཞབས་གཉིས་ཀ་ཡབ་ཀྱི་སྐེད་པར་འཁྲིལ་ནས་བཞུགས་པ་ཉིད་དོན་ལ་འབྱོར་རོ། །ཞལ་རས་ཞི་མ་ཁྲོ་སྟེ་ཁྲོ་ཆགས་ཀྱི་རྣམ་པ་ཅན་ནོ། །རྒྱན་ཆ་ལུགས་འདིར་མི་གསལ་ཡང་། ཆོས་རྗེ་རིན་པོ་ཆེའི་ཞལ་སྔ་ནས། གཅེར་བུ་རུས་རྒྱན་ཐོར་ཚུག་ཅན་ཡིན་ཞེས་གསུངས་པ་གབ་བྱང་དང་མཐུན་ནོ། །ཕྱག་མཚན་ནི་ཡབ་རིག་འཛིན་རྡོ་རྗེ་ཆོས་ཕྱག་གཉིས་རྡོར་དྲིལ་བསྣོལ་ཐབས་སུ་འཛིན་པས་ཡུམ་ལ་འཁྲིལ་བ་དང་། ཡུམ་རྡོ་རྗེ་རྣལ་འབྱོར་མ་ཕྱག་གཡས་གྲི་ཁུག་འཛིན་པས་ཡབ་ཀྱི་མགུལ་ནས་འཁྱུད་ཅིང་གཡོན་པས་ཐོད་ཁྲག་འཛིན་པ་ཡབ་ལ་སྟོབས་པའོ། །དེ་ལྟ་བུའི་རྡོ་རྗེ་ཆོས་ཡབ་ཡུམ་དེ་ཡང་ཡབ་ཀྱི་ངོས་ནས་བལྟས་ན་ཡུམ་མི་སྒྲིབ་ཅིང་། ཡུམ་ཀྱི་ངོས་ནས་བལྟས་ན་ཡབ་མི་སྒྲིབ་པ་སྣང་སྟོང་ཆུ་ནང་གི་ཟླ་བའམ། ནམ་མཁའི་འཇའ་ཚོན་བཞིན་དུ་གསལ་བའི་སྐུ་ལུས་ཀྱི་ནང་ཐམས་ཅད་ཁང་བ་སྟོང་བའི་ནང་ལྟར་སྟོང་སང་ངེ་ཡོད་པར་བསྒོམ། དེ་ཡང་དུས་གཅིག་ཏུ་མི་གསལ་ན། དབུའི་ནང་ཙམ་དང་། མགྲིན་པ་ཡན་ཆད་དང་། སྐུ་སྐེད་ཡན་ཆད་དང་། སྐུ་སྨད་ཡན་ཆད་དང་། ཕྱག་ཞབས་ཀྱི་ནང་སོར་མོའི་མཐའ་ཐུག་གི་བར་དུ་སྦུབས་སྟོང་བར་བསྒོམས་ནས་གསལ་སྣང་རིམ་གྱིས་འདོན། དེ་ལྟར་བསྒོམ་པ་ན་སྐུ་ལུས་ཀྱི་ནང་ཐམས་ཅད་སྟོངས་སང་ངེར་ཡོད་པའི་ཉམས་སྐྱེས་པ་ན་འབྱོང་བའི་ཚད་དོ། །གཉིས་པ་ནང་རྩ་ཡི་སྟོང་ར་བསྒོམ་པ་ནི། དེ་ལྟར་ཡབ་ཡུམ་སྣང་སྟོང་གཉིས་སུ་མེད་པར་གསལ་བའི་ཡབ་ཀྱི་སྐུའི་དབུས་སུ་རྩ་དབུ་རྐྱང་རོ་གསུམ་སྒོམ་པ་སྟེ། དེ་ཡང་དབུ་མ་སྦོམ་ཕྲ་སྦ་ལྕག་འབྲིང་བོ་ཙམ་སྒོམ་པའི་དུས་སུ་རོ་རྐྱང་གུང་མོ་ཙམ་སྒོམ། དེ་བཞིན་དུ་དབུ་མ་མདའ་སྨྱུག་ཙམ་སྒོམ་ཚེ་རོ་རྐྱང་གྲོ་སོག་ཙམ་སྒོམ་པ་སོགས་དབུ་མ་ཆེ་ཆུང་ཅི་ཙམ་སྒོམ་པ་དང་འཚམས་པའི་རོ་རྐྱང་བསྒོམ། ཁོ་དོག་ཀྱང་འདིར་དབུ་མ་ཆོས་སྐུ་མཚོན་བྱེད་ཁ་དོག་མཐིང་ག་དང་། དེའི་གཡས་སུ་རོ་མ་སྤྲུལ་སྐུ་མཚོན་བྱེད་ཁ་དོག་དཀར་པོ། གཡོན་དུ་རྐྱང་མ་ལོངས་སྐུ་མཚོན་བྱེད་ཁ་དོག་དམར་པོར་བཤད་ཅིང་། གཞུང་གཞན་ལས་རོ་མ་དམར་པོ་དང་རྐྱང་མ་དཀར་མོར་བཤད་དོ། །འདིར་རིགས་ཀྱི་འདོད་ཚུལ་ཐ་དད་མང་པོ་ཡོད་པ་ལས་གང་ལྟར་བསྒོམས་ཀྱང་འགལ་བ་མེད་དེ། གནས་སྐབས་ཀྱི་དག་པ་སྦྱོར་བའི་གཞིའི་ཁྱད་པར་ཙམ་ཡིན་པའི་ཕྱིར་རོ། །གང་ལྟར་ཀྱང་དབུ་རྐྱང་རོ་གསུམ་པོ་དེ་རྣམས་ཕན་ཚུན་མ་རེག་པ། མར་སྣ་ཡི་གེ་ཆའི་འཕོངས་ལྟ་བུ་ལས་ནང་ཁོང་རྒྱུན་གཅིག་ཏུ་འབྲེལ་བ། ཡར་སྣ་གསུམ་ལས་དབུ་མའི་ཡར་སྣ་ཚངས་བུག་དང་ཁ་ད་ཆད་དུ་ཟླུམ་པོར་འཁྱིལ་བ། རོ་རྐྱང་གཉིས་ལྟག་པ་ནས་མདུན་ངོས་སུ་ཚུར་གུག་སྟེ་སྣ་བུག་གཉིས་སུ་ཟུགས་པ། དེ་ཡང་དབུ་མ་ནི་མཚན་ཉིད་བཞི་ལྡན་ཏེ། དྲང་བ་ཆུ་ཤིང་ངམ་སྨྱུག་མའི་སྡོང་བོ་ལྟ་བུ། གསལ་བ་ཏིལ་གྱི་མར་མེ་ལྟ་བུ། སྲབ་པ་པདྨའི་འདབ་མ་ལྟ་བུ། སྔོ་བ་སྤྲིན་བྲལ་གྱི་ནམ་མཁའའམ་མཐིང་ཞུན་ལྟ་བུ་དང་བཞིར་སྐབས་འདིར་གསུངས་ཤིང་གཞུང་གཞན་ལས་མཚན་ཉིད་འདི་དང་ཅུང་ཟད་མི་མཐུན་པར་གསུངས་པའང་ཡོད་དོ། །རྩ་གསུམ་པོའི་ནང་ཐམས་ཅད་སྦུབས་སྟོང་ཁྲག་དང་ཆུ་སེར་སོགས་གྱིས་མ་གོས་པས་དྭངས་གསལ་དྲི་མ་མེད་པ་འཇའ་ཚོན་ལྟ་བུར་བསྒོམ། དེ་ལ་གསལ་བརྟེན་ཅུང་ཟད་ཐོབ་ནས། སྙིང་ག་ཆོས་ཀྱི་འཁོར་ལོའི་རྩ་འདབ་བརྒྱད། མགྲིན་པ་ལོངས་སྤྱོད་འཁོར་ལོའི་རྩ་འདབ་བཅུ་དྲུག སྤྱི་བོ་བདེ་ཆེན་འཁོར་ལོའི་རྩ་འདབ་སོ་གཉིས། ལྟེ་བ་སྤྲུལ་པའི་འཁོར་ལོའི་རྩ་འདབ་དྲུག་བཅུ་རྩ་བཞི་སྟེ། འཁོར་ལོ་བཞིའི་རྩ་འདབ་ཐམས་ཅད་ཀྱི་ནང་ཡང་སྟོང་སང་ངེ་ཡོད་པར་བསྒོམ། དེ་རྣམས་གསལ་ཐེབ་པ་དང་། དེ་དག་ལས་གྱེས་པའི་རྩ་འདབ་གྲངས་མེད་པ། བ་སྤུའི་བུ་ག་ཐམས་ཅད་དུ་ཟུག་པ་དེ་ཐམས་ཅད་ཀྱི་ནང་སྟོང་སང་ངེ་ཡོད་པར་སྒོམ་པ་སྟེ། དེ་དག་ནི་རྩ་སྦྱོང་བ་སྟོང་རའི་གནད་དོ། །རྩ་དེ་རྣམས་ཀྱི་ནང་དུ་སེམས་ཞུགས་སོང་བ་ལྟ་བུའི་ཉམས་སྐྱེས་ན་འབྱོང་བའི་ཚད། གཉིས་པ་རླུང་སྦྱང་བ་སྲོག་གི་གནད། །ཆོས་ཚན་འདིའི་མཇུག་མི་ཚང་། །