གཞན་ལུགས་དགག་པ་ལ་གཞི་བདེན་གཉིས་ཀྱི་རྣམ་གཞག་ལ་དཔྱད་པ།

རྟོག་པའི་དྲ་བ་རྣམ་བསལ་ཅིང༌། །ཟབ་ཅིང་རྒྱ་ཆེའི་སྐུ་མངའ་བ། །ཀུན་ཏུ་བཟང་པོའི་འོད་ཟེར་དག །ཀུན་ནས་འཕྲོ་ལ་ཕྱག་འཚལ་ལོ། །ཞེས་པའི་སྐབས་སུ། གཞན་ལུགས་དགག་པ། རང་ལུགས་བཞག་པ་གཉིས། དང་པོ་ལ། གཞི་བདེན་པ་གཉིས་ཀྱི་རྣམ་བཞག །ལམ་ཐབས་ཤེས་གཉིས་ཀྱི་རྣམ་བཞག །འབྲས་བུ་སྐུ་གསུམ་གྱི་རྣམ་བཞག །གཞུང་འདི་གྲུབ་མཐའ་སྨྲ་བ་གང་གི་དབང་དུ་བྱས་པ། བསྟན་བཅོས་ལུས་ཀྱི་རྣམ་བཞག་བཤད་པ་དང་ལྔ། དང་པོ་ལ་ཁ་ཅིག་ན་རེ། རིགས་པས་དཔྱད་བཟོད་དུ་གྲུབ་པའི་ཆོས་དོན་དམ་བདེན་པའི་མཚན་ཉིད་ཟེར་ན། བུམ་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། ཁྱབ་པ་ཁས། མ་གྲུབ་ན། དེར་ཐལ། རིགས་པས་བཙལ་བའི་ཚེ་ན་རྙེད་པའི་ཆོས་ཡིན་པའི་ཕྱིར་ཏེ། བཏགས་དོན་བཙལ་བའི་ཚེ་ན་རྙེད་པའི་ཆོས་ཡིན་པའི་ཕྱིར་ཏེ། མིང་གི་ཐ་སྙད་ཀྱི་དབང་ཙམ་གྱིས་བཞག་པ་མ་ཡིན་པར་རང་ངོས་ནས་གྲུབ་པའི་ཆོས་ཡིན་པའི་ཕྱིར། དེ་ལྟར་བྱས་པ་ལ་ཁོ་ན་རེ། གང་ཟག་ཆོས་ཅན། བཏགས་དོན་བཙལ་བའི་ཚེ་ན་རྙེད་པའི་ཆོས་སུ་ཐལ། མིང་གི་ཐ་སྙད་བཏགས་པའི་བཏགས་དོན་བཙལ་བའི་ཚེ་ན་རྙེད་པའི་ཆོས་ཡིན་པའི་ཕྱིར། འདོད་བྱས་པ་ལ། དེ་ཆོས་ཅན། རང་གི་ཕུང་པོ་ལ་བཏགས་པའི་བཏགས་དོན་བཙལ་བའི་ཚེ་ན་རྙེད་པའི་ཆོས་སུ་ཐལ། འདོད་པ་གང་ཞིག །ཁྱོད་ཀྱི་ཕུང་པོ་ལྔ་ཡོད་པའི་ཕྱིར་ན་མ་ཁྱབ། འདོད་མི་ནུས་ཏེ། གང་ཟག་གི་ཕུང་པོ་ལྔ་ཚོགས་ཙམ་དེ་ཡང་གང་ཟག་མིན། གང་ཟག་གི་ཕུང་པོ་ལྔ་རེ་རེ་བ་ཡང་གང་ཟག་མིན། གང་ཟག་དེ་དེའི་ཕུང་པོ་ལྔ་ལས་དོན་གཞན་དུ་མ་གྲུབ་པའི་ཕྱིར་ཏེ། གང་ཟག་དང་དེའི་ཕུང་པོ་ལྔ་པོ་རང་བཞིན་གྱི་ངོ་བོ་གཅིག་ཡིན་པའི་ཕྱིར་ཏེ། གང་ཟག་དང་གང་ཟག་གི་ཕུང་པོ་གཉིས་རང་བཞིན་གྱིས་གྲུབ་པའི་ངོ་བོ་གཅིག་ཡིན་པའི་ཕྱིར་ཏེ། སེམས་ཙམ་པས་དེ་ལྟར་ཁས་བླངས་པ་ལ། ཐལ་འགྱུར་བས་དེ་གཉིས་གཅིག་ཏུ་ཐལ་བ་སོགས་ཀྱི་སྐྱོན་འཕེན་པའི་ཕྱིར། ཟེར་ན། གང་ཟག་བཏགས་དོན་བཙལ་བའི་ཚེ་ན་མི་རྙེད་པ་དེ། གང་ཟག་གི་བདག་མེད་ཕྲ་མོ་ཡིན་པར་ཐལ། གང་ཟག་བཏགས་དོན་བཙལ་བའི་ཚེ་ན་མི་རྙེད་པའི་ཕྱིར། འདོད་ན། གང་ཟག་རང་གི་ཕུང་པོ་ལ་བཏགས་པའི་བཏགས་དོན་བཙལ་བའི་ཚེ་ན་མི་རྙེད་པ་དེ། གང་ཟག་གི་བདག་མེད་ཕྲ་མོ་ཡིན་པར་ཐལ། འདོད་པའི་ཕྱིར། འདོད་ན། གང་ཟག་གི་ཕུང་པོ་ལྔ་ཚོགས་ཙམ་ཡང་གང་ཟག་མིན། དེ་རེ་རེ་ཡང་གང་ཟག་མིན། དེ་དེ་ལས་དོན་གཞན་དུའང་མ་གྲུབ་པ་དེ་གང་ཟག་གི་བདག་མེད་ཕྲ་མོ་ཡིན་པར་ཐལ། འདོད་པའི་ཕྱིར། འདོད་ན། དེ་ཚོགས་ཙམ་པ་གང་ཟག་ཏུ་འཛིན་པའི་རྟོག་པ་ལ་སོགས་པ་གང་ཟག་གི་བདག་འཛིན་ཕྲ་མོ་ཡིན་པར་ཐལ། འདོད་པའི་ཕྱིར། གཞན་ཡང༌། གང་ཟག་ཐ་སྙད་བཙལ་བའི་ཚེ་ན་རྙེད་པར་ཐལ། གང་ཟག་ཐ་སྙད་པའི་ཚད་མས་བཙལ་བའི་ཚེ་ན་རྙེད་པའི་ཕྱིར། དེའི་ཆོས་ཉིད་དེ་མཐར་ཐུག་དཔྱོད་བྱེད་ཀྱི་ཚད་མས་བཙལ་བའི་ཚེ་ན་རྙེད་པའི་ཕྱིར་ཏེ། དེས་བཙལ་བའི་ཚེ་ན་རྙེད་པའི་ཆོས་ཉིད་ཡོད་པའི་ཕྱིར་ཏེ། བདེན་པར་གྲུབ་པའི་ཆོས་ཉིད་ཡོད་པའི་ཕྱིར། ཁ་ཅིག །གང་ཟག་རང་གི་ཕུང་པོ་ལ་བཏགས་པའི་བཏགས་དོན་བཙལ་བའི་ཚེ་ན་རྙེད་དེ། གང་ཟག་གི་རྒྱུད་ཀྱི་ཡིད་ཀྱི་རྣམ་པར་ཤེས་པ་གང་ཟག་ཡིན་པའི་ཕྱིར། ཟེར་ན། དེ་རང་སྐྱ་ཐུབ་པའི་རྫས་ཡོད་དུ་འཛིན་པའི་རྟོག་པ་དེ། གང་ཟག་གི་བདག་འཛིན་ཡིན་པར་ཐལ། དམ་བཅའ་དེའི་ཕྱིར། འདོད་ན། དེ་ལོག་ཤེས་སུ་ཐལ་ལོ། །འདོད་མི་ནུས་ཏེ། དེ་རང་སྐྱ་ཐུབ་པའི་རྫས་ཡོད་ཡིན་པའི་ཕྱིར། མ་གྲུབ་ན། དེར་ཐལ། གཙོ་སེམས་ཡིན་པའི་ཕྱིར། ཁྱབ་སྟེ། སེམས་བྱུང་ཡིན་ན་བཏགས་ཡོད་ཡིན་དགོས་པའི་ཕྱིར། གཞན་ཡང༌། དེ་ཆོས་ཅན། བདག་ཤེས་རིག་གི་སྐྱེས་བུ་ཡིན་པར་ཐལ། བདག་དང་ཤེས་པ་དང་རིག་པ་ གསུམ་འདུས་པའི་སྐྱེས་བུ་ཡིན་པའི་ཕྱིར། གཞན་ཡང༌། སངས་རྒྱས་འཕགས་པའི་རྒྱུད ་ཀྱི་རྣམ་པར་ཤེས་པ་དེ་ཡང་སངས་རྒྱས་འཕགས་པ་ཡིན་པར་ཐལ། གང་ཟག་ལ་དེའི་ཕྱིར། འདོད་ན། དེ་ཆོས་ཅན། གཞན་དོན་གཟུགས་སྐུ་ཡིན་པར་ཐལ་ལོ། །འདོད་མི་ནུས་ཏེ། རང་དོན་ཆོས་སྐུ་ཡིན་པའི་ཕྱིར་ཏེ། ཡེ་ཤེས་ཆོས་སྐུ་ཡིན་པའི་ཕྱིར་ཏེ། རྣམ་མཁྱེན་ཡིན་པའི་ཕྱིར། གཞན་ཡང༌། དེ་ཆོས་ཅན། ཁྱོད་མངོན་སུམ་དུ་རྟོགས་པའི་བྱང་འཕགས་ཡོད་པར་ཐལ། ཁྱོད་སངས་འཕགས་ཡིན་པའི་ཕྱིར། འདོད་མི་ནུས་ཏེ། ཁྱོད་སངས་རྒྱས་འཕགས་པ་ནང་ཕན་ཚུན་ཁོ་ནའི་མངོན་སུམ་གྱི་སྤྱོད་ཡུལ་ཡིན་པའི་ཕྱིར་ཏེ། ཡེ་ཤེས་ཆོས་སྐུ་ཡིན་པའི་ཕྱིར། ཁྱབ་སྟེ། རྣལ་འབྱོར་རྟོགས་པ་བསམ་མི་ཁྱབ། །ཅེས་གསུངས་པའི་ཕྱིར། ཁ་ཅིག་ན་རེ། མཐར་ཐུག་དཔྱོད་བྱེད་ཀྱི་རིག་ཤེས་ཚད་མ་རང་ཉིད་ལ་ལྟོས་ནས་མཐར་ཐུག་དཔྱོད་བྱེད་ཀྱི་རིག་ཤེས་ཚད་མར་སོང་བ་དེ། དོན་དམ་བདེན་པའི་མཚན་ཉིད། ཐ་སྙད་དཔྱོད་བྱེད་ཀྱི་ཚད་མ་རང་ཉིད་ལ་ལྟོས་ནས་ཐ་སྙད་དཔྱོད་བྱེད་ཀྱི་ཚད་མར་སོང་བ་དེ། ཀུན་རྫོབ་བདེན་པའི་མཚན་ཉིད་ཟེར་ན། དང་པོ་ལ། མཐར་ཐུག་དཔྱོད་བྱེད་ཀྱི་རིག་ཤེས་ཚད་མའི་རྒྱུ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། དེ་ཁྱོད་ལ་ལྟོས་ནས་དེར་སྐྱེས་པའི་ཕྱིར། འདོད་མི་ནུས་ཏེ། ཀུན་རྫོབ་བདེན་པ་ཡིན་པའི་ཕྱིར། གཉིས་པ་ལ། ཐ་སྙད་དཔྱོད་བྱེད་ཀྱི་ཚད་མའི་ཆོས་ཉིད་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། དེ་གཉིས་ཕན་ཚུན་ལྟོས་གྲུབ་ཡིན་པའི་ཕྱིར། མ་གྲུབ་ན། དེ་ཆོས་ཅན། ཁྱོད་དང་ཁྱོད་ཀྱི་ཆོས་ཉིད་ཕན་ཚུན་ལྟོས་གྲུབ་ཡིན་པར་ཐལ། ཁྱོད་གཞི་གྲུབ་ཡིན་པའི་ཕྱིར། ཁ་ཅིག་ན་རེ། རང་མངོན་སུམ་དུ་རྟོགས་པའི་མངོན་སུམ་གྱི་ཚད་མས་གཉིས་སྣང་ནུབ་པའི་ཚུལ་གྱིས་རྟོགས་པར་བྱ་བ། དོན་དམ་བདེན་པའི་མཚན་ཉིད་ཟེར་ན། དེ་ལ་སྐྱོན་འཕེན་པ་ཁ་ཅིག་ན་རེ། ཚད་མ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་དེར་ཐལ། རང་མངོན་སུམ་དུ་རྟོགས་པའི་རང་རིག་མངོན་སུམ་གྱིས་གཉིས་སྣང་ནུབ་པའི་ཚུལ་གྱིས་རྟོགས་པར་བྱ་བ་ཡིན་པའི་ཕྱིར། དེར་ཐལ། རང་ཉམས་སུ་མྱོང་བའི་རང་རིག་མངོན་སུམ་གྱིས་གཉིས་སྣང་ནུབ་པའི་ཚུལ་གྱིས་རྟོགས་པར་བྱ་བ་ཡིན་པའི་ཕྱིར་ན་མ་ཁྱབ། འོ་ན། རྗེས་དཔག་ཆོས་ཅན། དེར་ཐལ། དེའི་ཕྱིར། འདོད་ན། དེ་རྗེས་དཔག་ལ་གཉིས་སྣང་ནུབ་པའི་ཤེས་པར་ཐལ་ལོ། །འདོད་ན། དེ་དེ་ཉམས་སུ་མྱོང་བའི་རང་རིག་ཡིན་པར་ཐལ་ལོ། །འདོད་ན། སེམས་ཅན་གྱི་རྒྱུད་ཀྱི་ཤེས་པར་ཐལ་ལོ། །འདོད་མི་ནུས་ཏེ། སངས་འཕགས་ཀྱི་རྒྱུད་ཀྱི་རང་རིག་ཁྱོད་ཡིན་པའི་ཕྱིར། ཁ་ཅིག་ན་རེ། མཐར་ཐུག་དཔྱོད་བྱེད་ཀྱི་རིག་ཤེས་ཀྱི་ཚད་མའི་རྙེད་དོན། དོན་དམ་བདེན་པའི་མཚན་ཉིད། ཐ་སྙད་དཔྱོད་བྱེད་ཀྱི་ཚད་མའི་རྙེད་དོན། ཀུན་རྫོབ་བདེན་པའི་མཚན་ཉིད་ཟེར་ན། དང་པོ་ལ། གཟུགས་ཕུང་དང་ཕྱི་རོལ་དོན་གྱིས་སྟོང་པའི་ཚོགས་དོན་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། གཟུགས་ཕུང་ཕྱི་རོལ་དོན་གྱིས་སྟོང་པར་རྟོགས་པའི་རྗེས་དཔག་གི་རྙེད་དོན་ཡིན་པའི་ཕྱིར་ཏེ། དེ་འདྲའི་རྗེས་དཔག་གི་གཞལ་བྱ་ཡིན་པའི་ཕྱིར། མ་གྲུབ་ན། དེར་ཐལ། སྒྲ་རྟག་པས་སྟོང་པའི་ཚོགས་དོན་དེ། སྒྲ་རྟག་སྟོང་དུ་རྟོགས་པའི་རྗེས་དཔག་གི་རྙེད་དོན་ཡིན་པའི་ཕྱིར། དེ་འདྲའི་རྗེས་དཔག་དེས་ཚོགས་དོན་དེ་རྟོགས་པའི་ཕྱིར། རྩ་བར་འདོད་མི་ནུས་ཏེ། མཐུན་པའི་དོན་དམ་ཡིན་པའི་ཕྱིར། གཞན་ཡང༌། གཟུགས་ཕུང་ཡིན་ན། ཕྱི་རོལ་དོན་གྱིས་སྟོང་པས་ཁྱབ་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་དེར་ཐལ། གཟུགས་ཕུང་ཕྱི་རོལ་དོན་གྱིས་སྟོང་པར་རྟོགས་པའི་རྗེས་དཔག་གི་རྙེད་དོན་ཡིན་པའི་ཕྱིར་ཏེ། དེའི་གཞལ་བྱ་ཡིན་པའི་ཕྱིར། དེ་དེར་ཐལ། སྒྲ་ཡིན་ན། རྟག་སྟོང་ཡིན་པས་ཁྱབ་པ་དེ་སྒྲ་རྟག་སྟོང་དུ་རྟོགས་པའི་རྗེས་དཔག་གི་གཞལ་བྱ་ཡིན་པའི་ཕྱིར། གཞན་ཡང༌། ཕྱི་རོལ་དོན་གྱིས་སྟོང་པའི་རྟགས་ལས་གཟུགས་ཕུང་ཟླ་སྒྲས་བརྗོད་རུང་དུ་སྒྲུབ་པའི་ཕྱོགས་ཆོས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། གཟུགས་ཕུང་ཕྱི་རོལ་དོན་གྱིས་སྟོང་པར་རྟོགས་པའི་རྗེས་དཔག་གི་རྙེད་དོན་ཡིན་པའི་ཕྱིར་ཏེ། དེ་ལྟ་བུའི་རྗེས་དཔག་དེས་དེ་སྐོར་གྱི་ཕྱོགས་ཆོས་རྟོགས་པའི་ཕྱིར་ཏེ། གཟུགས་ཕུང་ཕྱི་རོལ་དོན་གྱིས་སྟོང་ཞེས་པའི་ངག་དེས། དེ་སྐོར་གྱི་ཕྱོགས་ཆོས་བརྗོད་པ་གང་ཞིག །སྒྲ་བྱས་པར་རྟོགས་པའི་རྗེས་དཔག་དེས་བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་ཕྱོགས་ཆོས་རྟོགས་པའི་ཕྱིར། ཕྱི་མ་གྲུབ་མཐའ་ལ་ཁས། དང་པོ་གྲུབ་སྟེ། སྒྲ་བྱས་ཞེས་པའི་ངག་དེས་བྱས་རྟགས་ཀྱིས་སྒྲ་མི་རྟག་པར་སྒྲུབ་པའི་ཕྱོགས་ཆོས་བརྗོད་པའི་ཕྱིར། རྟགས་གྲུབ་མཐའ་ལ་ཁས། གཞན་ཡང༌། དོན་དམ་པ་ཡང་ཡིན། དོན་དམ་པ་མ་ཡིན་པ་ཡང་ཡིན་པའི་གཞི་མཐུན་པས་སྟོང་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། དོན་དམ་པ་འཇལ་བའི་ཚད་མའི་རྙེད་དོན་ཡིན་པའི་ཕྱིར་ཏེ། དེའི་གཞལ་བྱ་ཡིན་པའི་ཕྱིར་ཏེ། དོན་དམ་བདེན་པའི་མེད་དགག་གི་གཞན་སེལ་ཡིན་པའི་ཕྱིར། ཁྱབ་སྟེ། ཀུན་རྫོབ་བདེན་པའི་མེད་དགག་གི་གཞན་སེལ་ཡིན་ན་ཀུན་རྫོབ་བདེན་པ་འཇལ་བའི་ཚད་མའི་གཞལ་བྱ་ཡིན་དགོས་པའི་ཕྱིར། གཞན་ཡང༌། དོན་དམ་པ་ཡང་ཡིན། དེ་མ་ཡིན་པ་ཡང་ཡིན་པའི་གཞི་མཐུན་པས་སྟོང་པ་དེ་དོན་དམ་པ་འཇལ་བའི་ཚད་མའི་གཞལ་བྱ་ཡིན་པར་ཐལ། དེ་འདྲའི་ཚད་མ་དེ་དེ་འདྲའི་གཞི་མཐུན་འཛིན་པའི་སྒྲོ་འདོགས་ཆོད་པའི་ཚད་མ་ཡིན་པའི་ཕྱིར་ཏེ། དེ་རང་གི་གཞལ་བྱ་ལ་སྒྲོ་འདོགས་པའི་སྒྲོ་འདོགས་ཆོད་པའི་ཚད་མ་ཡིན་པ་གང་ཞིག །དེ་འདྲའི་གཞི་མཐུན་འཛིན་པའི་རྟོག་པ་དེ་དོན་དམ་བདེན་པ་ལ་སྒྲོ་འདོགས་པའི་སྒྲོ་འདོགས་ཡིན་པའི་ཕྱིར། དང་པོ་གྲུབ་སྟེ། ཚད་མ་ཡིན་པའི་ཕྱིར། གཉིས་པ་གྲུབ་སྟེ། ཆོས་ཉིད་ཀྱང་ཡིན། དེ་མ་ཡིན་པ་ཡང་ཡིན་པའི་གཞི་མཐུན་འཛིན་པའི་རྟོག་པ་དེ་ཆོས་ཉིད་ལ་སྒྲོ་འདོགས་པའི་སྒྲོ་འདོགས་ཡིན་པའི་ཕྱིར་ཏེ། ཆོས་ཉིད་ལ་སྒྲོ་འདོགས་པའི་སྒྲོ་འདོགས་ཡོད་པའི་ཕྱིར། བྱས་པ་ལ་ཁོ་ན་རེ། མ་ཁྱབ་སྟེ། ཆོས་ཉིད་ལ་སྒྲོ་འདོགས་པའི་སྒྲོ་འདོགས་ཡིན་ན། ཆོས་ཀྱི་བདག་འཛིན་ཡིན་པས་ཁྱབ་བོ། །ཟེར་ན། འོ་ན། ཆོས་ཉིད་རང་འཛིན་རྟོག་པའི་ཞེན་གཞིར་རང་གི་མཚན་ཉིད་ཀྱིས་གྲུབ་པར་འཛིན་པའི་རྟོག་པ་དེ། ཆོས་ཉིད་ལ་སྒྲོ་འདོགས་པའི་སྒྲོ་འདོགས་ཡིན་པར་ཐལ། དམ་བཅའ་འཐད་པའི་ཕྱིར། འདོད་ན། བུམ་པ་དེར་ཐལ། འདོད་ན། བུམ་པ་ལ་སྒྲོ་འདོགས་པའི་སྒྲོ་འདོགས་ཆོད་པའི་གང་ཟག་ཡིན་ན། བུམ་པ་རང་འཛིན་རྟོག་པའི་ཞེན་གཞིར་རང་གི་མཚན་ཉིད་ཀྱིས་གྲུབ་པར་འཛིན་པའི་སྒྲོ་འདོགས་ཆོད་པའི་གང་ཟག་ཡིན་དགོས་པར་ཐལ། འདོད་པའི་ཕྱིར། འདོད་ན། བུམ་པ་ཚད་མས་གྲུབ་པའི་གང་ཟག་ཡིན་ན། བུམ་པ་བུམ་འཛིན་རྟོག་པའི་ཞེན་གཞིར་རང་གི་མཚན་ཉིད་ཀྱིས་གྲུབ་པས་སྟོང་པ་དེ་ཚད་མས་གྲུབ་པའི་གང་ཟག་ཡིན་དགོས་པར་ཐལ། འདོད་པའི་ཕྱིར། འདོད་ན། བུམ་པ་ཚད་མས་གྲུབ་པའི་གང་ཟག་ཡིན་ན། ཆོས་ཀྱི་བདག་མེད་ཚད་མས་གྲུབ་པའི་གང་ཟག་ཡིན་དགོས་པར་ཐལ་ལོ། །བྱས་པ་ལ་ཁོ་ན་རེ། རྒྱུན་མཐའི་བར་ཆད་མེད་ལམ་དེས་ཆོས་ཉིད་ཀྱང་ཡིན། དེ་མ་ཡིན་པ་ཡང་ཡིན་པའི་གཞི་མཐུན་པས་སྟོང་པ་མངོན་སུམ་དུ་རྟོགས་པར་ཐལ། དེ་འདྲའི་གཞི་མཐུན་འཛིན་པའི་རྟོག་པ་དེ། ཆོས་ཉིད་ལ་སྒྲོ་འདོགས་པའི་སྒྲོ་འདོགས་གང་ཞིག །དེ་ཆོས་ཉིད་ལ་སྒྲོ་འདོགས་ཆོད་པའི་བློ་ཡིན་པའི་ཕྱིར། ཟེར་ན་མ་ཁྱབ། རྩ་བར་འདོད་ན། དེ་འདྲའི་གཞི་མཐུན་པས་སྟོང་པ་དེ་སྟོང་ཉིད་ཡིན་པར་ཐལ། འདོད་པའི་ཕྱིར་ཟེར་ན། འོ་ན། མཐར་ཐུག་དཔྱོད་བྱེད་ཀྱི་རིག་ཤེས་ཚད་མའི་གཞལ་བྱ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། མ་གྲུབ་ན། དེ་འདྲའི་ཚད་མ་ཆོས་ཅན། ཁྱོད་ཀྱི་གཞལ་བྱ་ཁྱོད་ཀྱི་རྙེད་དོན་ཡིན་པར་ཐལ། ཁྱོད་རང་གི་གཞལ་བྱ་འཇལ་བའི་ཚད་མ་ཡིན་པའི་ཕྱིར། ཁ་ཅིག་ན་རེ། རང་ལ་དམིགས་ཏེ་བསྒོམས་པས་ཤེས་སྒྲིབ་དག་པར་འགྱུར་བའི་དམིགས་པ་མཐར་ཐུག་དེ། དོན་དམ་བདེན་པའི་མཚན་ཉིད་ཟེར་ན། དེ་ལ་མངོན་པ་ཀུན་ལས་བཏུས་པ་ལྟར་ན། གང་ཟག་གི་བདག་མེད་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། རྟགས་གྲུབ་སྟེ། དེ་བཞིན་ཉིད་ཡིན་པའི་ཕྱིར། རྟགས་གྲུབ་སྟེ། མངོན་པ་ཀུན་ལས་བཏུས་ལས། ཆོས་དགེ་བ་རྣམས་ཀྱི་དེ་བཞིན་ཉིད་གང་ཞེ་ན། བདག་མེད་པ་རྣམ་པ་གཉིས་དང༌། སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་དང༌། ཡང་དག་པའི་མཐའ་དང༌། དོན་དམ་པ་དང་། ཆོས་ཀྱི་དབྱིངས་དང་། དེ་བཞིན་ཉིད་དོ། །ཞེས་གསུངས་པའི་ཕྱིར། གཞན་ཡང༌། གང་ཟག་གི་བདག་མེད་ཆོས་ཅན། སྟོང་ཉིད་ཡིན་པར་ཐལ། ཟབ་པ་དང་རྒྱ་ཆེ་བ་གཉིས་སུ་ཕྱེ་བའི་ཟབ་མོའི་ཆོས་ཡིན་པའི་ཕྱིར་ཏེ། རྟོག་པའི་དྲ་བ་རྣམ་བསལ་ཅིང༌། །ཞེས་པའི་སྐབས་ནས་དངོས་སུ་བསྟན་པའི་དེ་གཉིས་སུ་ཕྱེ་བའི་ཟབ་མོའི་ཆོས་ཡིན་པའི་ཕྱིར་ཏེ། ཐར་ལམ་གསལ་བྱེད་ལས། གང་ཟག་དང་ཆོས་ལ་བདག་མེད་པའི་སྟོང་པ་ཉིད་ནི་འཕགས་པ་རྣམས་ཀྱི་མཉམ་བཞག་སོ་སོ་རང་གི་མངོན་སུམ་གྱིས་རིག་པར་བྱ་བ་ཡིན་གྱི། ཆོས་སྟོན་པའི་སྒྲ་ཙམ་ལས་ཇི་ལྟ་བ་བཞིན་ཤེས་མི་ནུས་པས་ཟབ་ཅིང༌། ཞེས་གསུངས་པའི་ཕྱིར། དེ་ལྟར་བྱས་པ་ལ། ཁོ་ན་རེ། བུམ་པ་ཆོས་ཅན། མཐར་ཐུག་དཔྱོད་བྱེད་ཀྱི་རིག་ཤེས་ཀྱི་ཚད་མས་དཔྱད་བཟོད་དུ་གྲུབ་པར་ཐལ། དེའི་རྙེད་དོན་ཡིན་པའི་ཕྱིར་ན་མ་ཁྱབ། འདོད་མི་ནུས་ཏེ། ཐ་སྙད་དཔྱོད་བྱེད་ཀྱི་ཚད་མས་དཔྱད་བཟོད་དུ་གྲུབ་པའི་ཕྱིར། ཀུན་རྫོབ་བདེན་པ་ཡིན་པའི་ཕྱིར། གཞན་ཡང་ཁོ་ན་རེ། གང་ཟག་རང་སྐྱ་ཐུབ་པའི་རྫས་ཡོད་ཀྱིས་སྟོང་པ་དེ་གང་ཟག་གི་གནས་ལུགས་མཐར་ཐུག་ཡིན་པར་ཐལ། གང་ཟག་གི་བདག་མེད་གནས་ལུགས་མཐར་ཐུག་ཡིན་པའི་ཕྱིར། འདོད་ན། དེ་དང་གང་ཟག་རང་འཛིན་རྟོག་པའི་ཞེན་གཞིར་རང་གི་མཚན་ཉིད་ཀྱིས་གྲུབ་པས་སྟོང་པ་གཉིས་ཀ་གང་ཟག་གི་གནས་ལུགས་མཐར་ཐུག་ཏུ་ཐལ། འདོད་པའི་ཕྱིར། འདོད་ན། དེ་གཉིས་ལ་ཕྲ་རགས་ཀྱི་ཁྱད་པར་མེད་པར་ཐལ་ལོ། །ཟེར་ན་མ་ཁྱབ་སྟེ། དེ་གཉིས་ལ་ཕྲ་རགས་ཀྱི་ཁྱད་པར་ཡོད་པར་ཐལ། གང་ཟག་རང་སྐྱ་ཐུབ་པའི་རྫས་ཡོད་ཀྱིས་སྟོང་པ་དེ། གང་ཟག་གི་བདག་མེད་ཕྲ་མོ་དང༌། གཅིག་ཤོས་ཆོས་ཀྱི་བདག་མེད་ཕྲ་མོ་ཡིན་པའི་ཕྱིར། གཞན་ཡང་ཁོ་ན་རེ། སྟོང་པ་ཉིད་ཡིན་ན་རང་ལ་དམིགས་ཏེ་བསྒོམས་པས་ཤེས་སྒྲིབ་དག་པར་འགྱུར་བའི་དམིགས་པ་མཐར་ཐུག་ཡིན་དགོས་པར་ཐལ། ཡོངས་གྲུབ་ཡིན་ན་དེ་ཡིན་དགོས་པའི་ཕྱིར་ཏེ། ཐར་ལམ་གསལ་བྱེད་ལས། འགྱུར་བ་མེད་པའི་ཡོངས་གྲུབ་ནི་རང་ལ་དམིགས་ཏེ་བསྒོམ་པས་ཤེས་སྒྲིབ་དག་པར་འགྱུར་བའི་དམིགས་པ་མཐར་ཐུག་ཡིན་པས། ཞེས་གསུངས་པའི་ཕྱིར། ཟེར་ན་མ་ཁྱབ་སྟེ། དེའི་དོན་ནི་ཆོས་ཀྱི་བདག་མེད་ཕྲ་མོ་ཡིན་ན་དེ་ཡིན་དགོས་པ་དེའི་དོན་ཡིན་ནོ། །གཞན་ཡང་ཁོ་ན་རེ། ཉན་ཐོས་ཀྱི་བར་ཆད་མེད་ལམ་དེ་སྟོང་ཉིད་ལ་རྩེ་གཅིག་ཏུ་མཉམ་པར་བཞག་པའི་མཉམ་བཞག་ཡེ་ཤེས་ཡིན་པར་ཐལ། དེ་གང་ཟག་གི་བདག་མེད་ལ་རྩེ་གཅིག་ཏུ་མཉམ་པར་བཞག་པའི་མཉམ་བཞག་ཡེ་ཤེས་གང་ཞིག །གང་ཟག་གི་བདག་མེད་སྟོང་ཉིད་ཡིན་པའི་ཕྱིར། འདོད་བྱས་པ་ལ། སྟོང་ཉིད་ཆོས་ཅན། གང་ཟག་གི་བདག་མེད་ཕྲ་མོ་ཡིན་པར་ཐལ། ཉན་ཐོས་ཀྱི་བར་ཆད་མེད་ལམ་ཁྱོད་ལ་རྩེ་གཅིག་ཏུ་མཉམ་པར་བཞག་པའི་མཉམ་བཞག་ཡེ་ཤེས་ཡིན་པའི་ཕྱིར། འདོད་བྱས་པ་ལ། དེ་མ་ཡིན་པར་ཐལ། ཆོས་ཀྱི་བདག་མེད་ཕྲ་མོ་ཡིན་པའི་ཕྱིར་ཏེ། རྒྱུན་མཐའི་བར་ཆད་མེད་ལམ་ཁྱོད་ལ་རྩེ་གཅིག་ཏུ་མཉམ་པར་བཞག་པའི་མཉམ་བཞག་ཡེ་ཤེས་ཡིན་པའི་ཕྱིར། ཁྱབ་སྟེ། རྒྱུན་མཐའི་བར་ཆད་མེད་ལམ་ཡིན་ན་ཤེས་སྒྲིབ་ཀྱི་དངོས་གཉེན་ཡིན་དགོས་པའི་ཕྱིར་ཟེར་ན། མ་ཁྱབ་སྟེ། འོ་ན། སྟོང་ཉིད་དེ་གང་ཟག་གི་བདག་མེད་ཕྲ་མོ་ཡིན་པར་ཐལ། བདག་མེད་དེ་དེ་ཡིན་པའི་ཕྱིར་ཏེ། བདག་འཛིན་གང་ཟག་གི་བདག་འཛིན་ཡིན་པའི་ཕྱིར་ཏེ། གང་ཟག་གི་བདག་འཛིན་སྤངས་པའི་གང་ཟག་ཡིན་ན་བདག་འཛིན་སྤངས་པའི་གང་ཟག་ཡིན་དགོས་པའི་ཕྱིར་ཏེ། དགྲ་བཅོམ་པ་ཡིན་ན་བདག་འཛིན་སྤངས་པའི་གང་ཟག་ཡིན་དགོས་པའི་ཕྱིར། ཡང་། དབུས་མཐའ་དང་བསྟུན་ན། གང་ཟག་གི་བདག་མེད་ཆོས་ཅན། ཡོངས་གྲུབ་ཡིན་པར་ཐལ། མཚན་ཉིད་གསུམ་གྱི་ནང་ནས་ཡོངས་གྲུབ་ཁོ་ན་ཡིན་པའི་ཕྱིར་ཏེ། ཉོན་སྒྲིབ་ཀྱི་དངོས་གཉེན་དུ་གྱུར་པའི་ཉན་ཐོས་ཀྱི་སྒོམ་ལམ་བར་ཆད་མེད་ལམ་གྱི་དམིགས་པ་མཐར་ཐུག་ཡིན་པའི་ཕྱིར། ཁྱབ་སྟེ། དབུས་མཐའ་ལས། རྣམ་དག་སྤྱོད་ཡུལ་རྣམ་གཉིས་ཏེ། །གཅིག་པུ་ཁོ་ནར་བརྗོད་པ་ཡིན། །ཞེས་གསུངས་པའི་ཕྱིར། རྣམ་པ་གཅིག་ཏུ། གང་ཟག་གི་བདག་མེད་རྟོགས་པའི་ལྟ་བ་དེ་སྟོང་ཉིད་རྟོགས་པའི་ལྟ་བ་ཡིན་པར་ཐལ། གང་ཟག་གི་བདག་མེད་སྟོང་ཉིད་ཡིན་པའི་ཕྱིར། འདོད་ན། དེ་དབུ་མའི་ལྟ་བ་ཡིན་པར་ཐལ་ལོ། །འདོད་ན། མདོ་སྡེ་པ་དེ་དབུ་མའི་ལྟ་བ་ལ་གནས་པའི་གང་ཟག་ཏུ་ཐལ། འདོད་པ་གང་ཞིག །མདོ་སྡེ་པ་དེ་འདྲའི་ལྟ་བ་ལ་གནས་པའི་གང་ཟག་ཡིན་པའི་ཕྱིར་ན་མ་ཁྱབ། འདོད་མི་ནུས་ཏེ། དེ་རྟག་མཐར་ལྷུང་བའི་གང་ཟག་ཡིན་པའི་ཕྱིར་ཏེ། དེ་གཟུགས་རང་འཛིན་རྟོག་པའི་ཞེན་གཞིར་རང་གི་མཚན་ཉིད་ཀྱིས་གྲུབ་པར་འདོད་པའི་གང་ཟག་གང་ཞིག །དེ་ལྟར་གྲུབ་པ་དེ་རྟག་མཐའ་ཡིན་པའི་ཕྱིར་ཏེ། དེ་ལྟར་གྲུབ་པས་སྟོང་པ་དེ་མཐའ་བྲལ་གྱི་དབུ་མ་ཡིན་པའི་ཕྱིར། གཞན་ཡང༌། མདོ་སྡེ་པས་གང་ཟག་གི་གནས་ལུགས་རྟོགས་པར་ཐལ། དེས་གང་ཟག་རང་སྐྱ་ཐུབ་པའི་རྫས་ཡོད་ཀྱིས་སྟོང་པར་རྟོགས་པ་གང་ཞིག །དེ་ལྟར་སྟོང་པ་དེ་གང་ཟག་གི་གནས་ལུགས་མཐར་ཐུག་ཡིན་པའི་ཕྱིར། ཕྱི་མ་ཁས། འདོད་མི་ནུས་ཏེ། དེ་དེ་ལ་ལོག་པར་ཞུགས་པའི་གང་ཟག་ཡིན་པའི་ཕྱིར་ཏེ། དེས་གང་ཟག་རང་འཛིན་རྟོག་པའི་ཞེན་གཞིར་རང་གི་མཚན་ཉིད་ཀྱིས་གྲུབ་པར་འདོད་པ་གང་ཞིག །དེ་ལྟར་གྲུབ་པས་སྟོང་པ་དེ་གང་ཟག་གི་གནས་ལུགས་མཐར་ཐུག་ཡིན་པའི་ཕྱིར། གཞན་ཡང༌། བྱང་སེམས་འཕགས་པའི་རྒྱུད་ཀྱི་གང་ཟག་གི་བདག་མེད་ཀྱི་ཁྱད་པར་དུ་བྱས་པའི་སེམས་ཅན་ལ་དམིགས་པའི་སྙིང་རྗེ་ཆེན་པོ་དེ། དམིགས་མེད་ལ་དམིགས་པའི་སྙིང་རྗེ་ཡིན་པར་ཐལ། གང་ཟག་གི་བདག་མེད་དེ་རྣམ་དག་ལམ་གྱི་དམིགས་པ་མཐར་ཐུག་ཡིན་པའི་ཕྱིར་ན་མ་ཁྱབ། འདོད་མི་ནུས་ཏེ། དེ་སེམས་ཅན་གྱི་རྒྱུད་ཀྱི་ཆོས་ལ་དམིགས་པའི་སྙིང་རྗེ་ཡིན་པའི་ཕྱིར་ཏེ། ཐར་ལམ་གསལ་བྱེད་ལས། གཉིས་པ་ནི། གང་ཟག་གི་བདག་དང་བྲལ་བར་རྟོགས་པའི་ཤེས་རབ་ཀྱིས་ཟིན་པའི་ངང་ནས་སེམས་ཅན་ལ་དམིགས་པའོ། །ཞེས་གསུངས་པའི་ཕྱིར། ཡང་ཉན་ཐོས་དང་རང་སངས་རྒྱས་ལ་སོགས་པའི་ཡང་སྤྱོད་ཡུལ་དུ་མ་གྱུར་པའི་གཉིས་སྟོང་གི་དེ་ཁོ་ན་ཉིད་ནི་ཟབ་མོ་ཡིན་ལ། ཞེས་པའི་དོན་ལ། མཁས་པའི་དབང་པོ་ཁ་ཅིག་ན་རེ། དང་པོ་ཉིད་ནས་ཐེག་དམན་དུ་རིགས་ངེས་པའི་རང་རྒྱལ་སློབ་པ་འཕགས་པས། གཟུགས་དང་གཟུགས་འཛིན་ཚད་མ་རྫས་གཞན་གྱིས་སྟོང་པའི་སྟོང་ཉིད་རིགས་པའི་རྣམ་གྲངས་མཐའ་ཡས་པའི་སྒོ་ནས་མ་རྟོགས་པ་དེ། ལུང་དེའི་དོན་ཡིན་ཅིང༌། གཞན་དུ་ན་དེ་ལྟར་རྟོགས་པ་ཡིན་ཏེ། རང་རྒྱལ་དང་སེམས་ཙམ་པ་གཉིས་ཀྱི་ལྟ་བ་ལ་མཐོ་དམན་གྱི་ཁྱད་པར་མེད་པའི་ཕྱིར་ཏེ། རྣམ་བཤད་སྙིང་པོ་རྒྱན་ལས། འདིར་བསྟན་པའི་རང་རྒྱལ་གྱི་ལྟ་བ་དང༌། སེམས་ཙམ་པའི་ལྟ་བ་ལ་མཐོ་དམན་གྱི་ཁྱད་པར་ཅུང་ཟད་ཀྱང་མེད་པས། དེ་གཉིས་གྲུབ་མཐའ་མཚུངས་པ་འཐད་ཅེས་པ་ནི་གསལ་བར་བྱེད་པའི་བཞད་གད་དོ། །ཞེས་གསུངས་པའི་ཕྱིར་ཟེར་ན་མ་ཁྱབ། ལུང་དེའི་དོན་ནི། རྣལ་འབྱོར་སྤྱོད་པའི་རང་རྒྱུད་པའི་སྐབས་སུ། དེ་གཉིས་ཀྱི་ལྟ་བ་ལ་མཐོ་དམན་གྱི་ཁྱད་པར་མེད་པ་དེ་དེའི་དོན་ཡིན་པའི་ཕྱིར། དེ་ལྟར་མ་ཡིན་ན་རང་རྒྱལ་སློབ་པ་འཕགས་པས། ཆོས་ཀྱི་བདག་མེད་སྒོམ་བྱའི་གཙོ་བོར་བྱས་ནས་བསྒོམ་པར་ཐལ། དམ་བཅའ་འཐད་པའི་ཕྱིར། འདོད་ན། དེས་ཆོས་ཀྱི་བདག་འཛིན་སྤང་བྱའི་གཙོ་བོར་བྱས་ནས་སྤོང་བར་ཐལ་ལོ། །འདོད་ན། རང་རྒྱལ་དགྲ་བཅོམ་པས་ཆོས་ཀྱི་བདག་འཛིན་སྤངས་པར་ཐལ་ལོ། །འདོད་ན། དེས་ཤེས་སྒྲིབ་སྤངས་པར་ཐལ་ལོ། དེ་ལྟར་བྱས་པ་ལ་ཁོ་ན་རེ། དེ་ལྟ་བུའི་རང་རྒྱལ་སློབ་པ་འཕགས་པས་སྟོང་ཉིད་རྟོགས་པར་ཐལ། དེས་གཟུགས་ཕྱི་རོལ་དོན་གྱིས་སྟོང་པར་རྟོགས་པའི་ཕྱིར་ཏེ། དེ་ལྟར་ཁས་ལེན་པའི་ཕྱིར་ཟེར་ན་མ་ཁྱབ། རྟགས་གྲུབ་སྟེ། དེས་གཟུགས་ཕྱི་རོལ་དོན་དུ་ཁས་མི་ལེན་པའི་ཕྱིར། མ་གྲུབ་ན། དེ་རྟག་མཐར་ལྷུང་བའི་གང་ཟག་ཡིན་པར་ཐལ། མ་གྲུབ་པ་དེའི་ཕྱིར། འདོད་མི་ནུས་ཏེ། དབུ་མ་པ་ཡིན་པའི་ཕྱིར་ཏེ། འཕགས་པ་ཡིན་པའི་ཕྱིར། གཞན་ཡང་ཁོ་ན་རེ། ཉན་ཐོས་དང་རང་རྒྱལ་གཉིས་ཀྱི་ལྟ་བ་ལ་མཐོ་དམན་གྱི་ཁྱད་པར་མེད་པར་ཐལ། རང་རྒྱལ་དང་སེམས་ཙམ་པ་གཉིས་ཀྱི་ལྟ་བ་ལ་མཐོ་དམན་གྱི་ཁྱད་པར་ཡོད་པའི་ཕྱིར། འདོད་བྱས་པ་ལ། སྤང་བྱ་གཅིག་ཆར་བའི་རྒྱུན་ཞུགས་ཀྱི་རྟོགས་པ་སྔོན་དུ་སོང་བའི་རང་རྒྱལ་གྱི་མཐོང་ལམ་བར་ཆད་མེད་ལམ་གྱི་སྤང་བྱའི་གཙོ་བོ་མེད་པར་ཐལ། དེ་གཉིས་ཀྱི་སྤང་བྱའི་གཙོ་བོ་ལ་སྤོང་དཀའ་སླའི་ཁྱད་པར་མེད་པའི་ཕྱིར་ཏེ། དེ་གཉིས་ཀྱི་བསྒོམ་བྱའི་གཙོ་བོ་ལ་ཁྱད་པར་མེད་པའི་ཕྱིར་ཏེ། དེ་གཉིས་ཀྱི་ལྟ་བ་ལ་མཐོ་དམན་གྱི་ཁྱད་པར་མེད་པའི་ཕྱིར། རྩ་བར་འདོད་བྱས་པ་ལ། དེ་ཡོད་པར་ཐལ། དེ་འདྲའི་བར་ཆད་མེད་ལམ་ཡོད་པའི་ཕྱིར་ཏེ། དེ་ལྟ་བུའི་མཐོང་ལམ་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། དེ་ལྟ་བུའི་མཐོང་ལམ་པ་ཡོད་པའི་ཕྱིར་ཏེ། ཀུན་བཏུས་ལས། སངས་རྒྱས་འབྱུང་བ་མེད་ན་རང་རྒྱལ་བར་འགྱུར་རོ། །ཞེས་གསུངས་པའི་ཕྱིར། གཞན་ཡང་། དེ་གཉིས་ཀྱི་ཐེག་པ་ལ་མཐོ་དམན་གྱི་ཁྱད་པར་མེད་པར་ཐལ། ལྟ་བ་ལ་དེའི་ཕྱིར་ན་མ་ཁྱབ་སྟེ། དེ་གཉིས་ཀྱི་ཐེག་པ་ལ་མཐོ་དམན་གྱི་ཁྱད་པར་ཡོད་པར་ཐལ། རང་རྒྱལ་གྱི་ཐེག་པ་དེ་ཐེག་པ་ལ་ཆེ་འབྲིང་ཆུང་གསུམ་དུ་ཕྱེ་བའི་འབྲིང་དང༌། ཉན་ཐོས་ཀྱི་ཐེག་པ་དེ་ཐེག་པ་ཆུང་ངུ་ཡིན་པའི་ཕྱིར། མཚན་གཞི་ལ་ཁ་ཅིག་ན་རེ། གཟུང་འཛིན་རྫས་གཞན་གྱིས་སྟོང་པ་དེ་ཆོས་ཀྱི་བདག་མེད་ཕྲ་མོ་ཡིན་ཟེར་ན་དེ་མ་ཡིན་པར་ཐལ། མདོ་སྡེ་པས་དེ་རྟོགས་པའི་ཕྱིར་ཏེ། དེས་ཤེས་བྱ་དང་ཤེས་བྱ་འཛིན་པའི་ཚད་མ་རྫས་གཞན་གྱིས་སྟོང་པར་རྟོགས་པ་གང་ཞིག །དེ་གཉིས་གཟུང་འཛིན་གྱི་ཆོས་ཡིན་པའི་ཕྱིར། བྱས་པ་ལ་ཁོ་ན་རེ། གཟུང་འཛིན་རྫས་གཞན་གྱིས་སྟོང་པའི་སྟོང་ཉིད་ཡིན་ན། ཆོས་ཀྱི་བདག་མེད་ཕྲ་མོ་མ་ཡིན་དགོས་པར་ཐལ། གཟུང་འཛིན་རྫས་གཞན་གྱིས་སྟོང་པ་དེ་ཆོས་ཀྱི་བདག་མེད་ཕྲ་མོ་མ་ཡིན་པའི་ཕྱིར་ན་མ་ཁྱབ། འདོད་ན། གཟུགས་དང་གཟུགས་འཛིན་ཚད་མ་རྫས་གཞན་གྱིས་སྟོང་པའི་སྟོང་ཉིད་ཆོས་ཅན། དེར་ཐལ། དེའི་ཕྱིར། གཞན་ཡང༌། གཟུང་འཛིན་རྫས་གཞན་གྱིས་སྟོང་པ་དེ་ཆོས་ཀྱི་བདག་མེད་ཕྲ་མོ་ཡིན་པར་ཐལ། གཟུང་འཛིན་རྫས་གཞན་དུ་འཛིན་པའི་རྟོག་པ་དེ་ཆོས་ཀྱི་བདག་འཛིན་ཡིན་པའི་ཕྱིར། ཟེར་ན་མ་ཁྱབ། རྟགས་གྲུབ་སྟེ། ཤཱཀྱ་བློས། རྟོག་པ་ནི་སེམས་དང་སེམས་ལས་བྱུང་བ་ཁམས་གསུམ་པ་བདག་དང་བདག་གི་བ་ལ་སོགས་པའི་རྣམ་པར་ཞུགས་པ་དང༌། གཟུང་བ་དང་འཛིན་པའི་རྣམ་པར་ཞུགས་པ་རྣམས་སོ། །ཞེས་གསུངས་པའི་ཕྱིར། ཁ་ཅིག །སྔར་གྱི་ཁྱབ་པ་དེ་ལ། ངོ་བོ་དང་ཁྱད་པར་དུ་ཀུན་བཏགས་པའི་ཀུན་བཏགས་རང་གི་མཚན་ཉིད་ཀྱིས་གྲུབ་པས་སྟོང་པ་དེ། ཆོས་ཀྱི་བདག་མེད་ཕྲ་མོ་ཡིན་པར་ཐལ། དེ་རང་གི་མཚན་ཉིད་ཀྱིས་གྲུབ་པར་འཛིན་པའི་རྟོག་པ་དེ། ཆོས་ཀྱི་བདག་འཛིན་ཡིན་པའི་ཕྱིར། ཟེར་ན། འདོད་བྱས་པ་ལ། དེ་མ་ཡིན་པར་ཐལ། མདོ་སྡེ་པས་དེ་ཚད་མས་ངེས་པའི་ཕྱིར་ཏེ། མདོ་སྡེ་པས་ངོ་བོ་དང་ཁྱད་པར་དུ་ཀུན་བཏགས་པའི་ཀུན་བཏགས་རང་མཚན་མ་ཡིན་པར་ཚད་མས་ངེས་པའི་ཕྱིར་ཏེ། དེས་དེ་སྤྱི་མཚན་དུ་ཚད་མས་ངེས་པའི་ཕྱིར། དེས་དེ་དངོས་མེད་དུ་ཚད་མས་ངེས་པའི་ཕྱིར། ཟེར་ན་མ་ཁྱབ་སྟེ། འོ་ན། མདོ་སྡེ་པས་ནམ་མཁའ་རང་གི་མཚན་ཉིད་ཀྱིས་མ་གྲུབ་པར་ཚད་མས་ངེས་པར་ཐལ། དེས་དེ་རང་མཚན་མ་ཡིན་པར་ཚད་མས་ངེས་པའི་ཕྱིར། དེས་དེ་སྤྱི་མཚན་དུ་ཚད་མས་ངེས་པའི་ཕྱིར་ཏེ། དེས་དེ་དངོས་མེད་དུ་ཚད་མས་ངེས་པའི་ཕྱིར། ཁྱབ་པ་ཁས། འདོད་མི་ནུས་ཏེ། དེས་དེ་རང་གི་མཚན་ཉིད་ཀྱིས་གྲུབ་པར་ཁས་ལེན་པའི་ཕྱིར་ཏེ། དེས་དེ་རང་བཞིན་གྱིས་གྲུབ་པར་ཁས་ལེན་པའི་ཕྱིར། དེས་བྱས་མི་རྟག་གཉིས་ཐ་དད་ཀྱི་ཆ་དེ་རང་བཞིན་གྱིས་གྲུབ་པར་ཁས་ལེན་པའི་ཕྱིར་ཏེ། གང་ཕྱིར་དངོས་ཀུན་རང་བཞིན་གྱིས། །རང་རང་ངོ་བོ་ལ་གནས་ཕྱིར། །ཞེས་གསུངས་པའི་ཕྱིར། རང་ལུགས་ཀྱི་སྒྲིགས་ཁྱབ་ནི། ཕྱི་དོན་མེད་པ་ཆོས་ཀྱི་བདག་མེད་ཕྲ་མོ་ཡིན་པར་ཐལ། དེ་ཡོད་པར་འཛིན་པའི་རྟོག་པ་དེ་ཆོས་ཀྱི་བདག་འཛིན་ཡིན་པའི་ཕྱིར་ཏེ། གཟུགས་དེར་འཛིན་པའི་རྟོག་པ་དེ་ཆོས་ཀྱི་བདག་འཛིན་ཡིན་པའི་ཕྱིར། གཞན་ཡང༌། ཁོ་རང་ལ་ཀུན་བཏགས་རང་གི་མཚན་ཉིད་ཀྱིས་གྲུབ་པས་སྟོང་པ་དེ་ཆོས་ཅན། སྟོང་ཉིད་ཡིན་པར་ཐལ། ངོ་བོར་ཀུན་བཏགས་པའི་ཀུན་བཏགས་རང་གི་མཚན་ཉིད་ཀྱིས་གྲུབ་པས་སྟོང་པ་དེ་སྟོང་ཉིད་ཡིན་པའི་ཕྱིར། དེ་དེར་ཐལ། དེ་རང་འཛིན་རྟོག་པའི་ཞེན་གཞིར་རང་གི་མཚན་ཉིད་ཀྱིས་གྲུབ་པས་སྟོང་པ་དེ་དེ་ཡིན་པའི་ཕྱིར། རྟགས་གྲུབ་སྟེ། གཟུགས་འཛིན་རྫས་གཞན་གྱིས་སྟོང་པ་དེ་གཟུགས་འཛིན་རྫས་གཞན་གྱིས་སྟོང་པའི་སྟོང་ཉིད་ཡིན་པའི་ཕྱིར། བྱས་པ་ལ་ཁོ་ན་རེ། ཀུན་བཏགས་རང་གི་མཚན་ཉིད་ཀྱིས་གྲུབ་པས་སྟོང་པ་དེ་ཀུན་བཏགས་རང་གི་མཚན་ཉིད་ཀྱིས་གྲུབ་པས་སྟོང་པའི་སྟོང་ཉིད་དུ་ཐལ། དེ་ངོ་བོར་ཀུན་བཏགས་པའི་ཀུན་བཏགས་རང་གི་མཚན་ཉིད་ཀྱིས་གྲུབ་པས་སྟོང་པའི་སྟོང་ཉིད་ཡིན་པའི་ཕྱིར། འདོད་ན། སྒྲ་རྟག་པས་སྟོང་པ་དེ་སྒྲ་རྟག་པས་སྟོང་པའི་སྟོང་ཉིད་ཡིན་པར་ཐལ་ལོ། །ཟེར་ན་མ་ཁྱབ། ཁ་ཅིག་ན་རེ། ཁྱོད་དངོས་པོ་ཡིན་ན། ཁྱོད་ཕྱི་རོལ་དོན་གྱིས་སྟོང་པ་ཆོས་ཀྱི་བདག་མེད་ཕྲ་མོ་ཡིན་པས་ཁྱབ་ཟེར་ན། ཚད་མ་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། མདོ་སྡེ་པས་དེ་རྟོགས་པའི་ཕྱིར་ཏེ། མདོ་སྡེ་པས་དེ་ཤེས་པའི་བདག་ཉིད་དུ་རྟོགས་པའི་ཕྱིར་ཏེ། དེས་དེ་ལྟར་དུ་ཁས་ལེན་པའི་ཕྱིར། བྱས་པ་ལ་ཁོ་ན་རེ། མདོ་སྡེ་པས་དེ་རང་འཛིན་ཤེས་པའི་བདག་ཉིད་དུ་ཁས་ལེན་པར་ཐལ། དེས་དེ་ཤེས་པའི་བདག་ཉིད་དུ་ཁས་ལེན་པའི་ཕྱིར། ཟེར་ན་མ་ཁྱབ། འདོད་མི་ནུས་ཏེ། དེས་དེ་རང་འཛིན་ཤེས་པའི་རྒྱུར་ཁས་ལེན་པའི་ཕྱིར། རང་རེས། གཟུགས་ཀྱི་སྐྱེ་མཆེད་ཡིན་ན། ཁྱོད་ཕྱི་རོལ་དོན་གྱིས་སྟོང་པ་དེ་ཆོས་ཀྱི་བདག་མེད་ཕྲ་མོ་ཡིན་པས་ཁྱབ། བྱས་པ་ལ་ཁོ་ན་རེ། ཆོས་དེ་དང་ཕན་ཚུན་ཐ་དད་དུ་གྱུར་པའི་བུམ་པ་ཆོས་ཅན། དེར་ཐལ། དེའི་ཕྱིར། འདོད་ན། དེ་ཕྱི་རོལ་དོན་དུ་འཛིན་པའི་རྟོག་པ་དེ་ཆོས་ཀྱི་བདག་འཛིན་ཡིན་པར་ཐལ་ལོ། །འདོད་ན། དེ་འདྲའི་རྟོག་པ་སྤངས་པའི་མཁྱེན་པ་དེ་རྣམ་མཁྱེན་ཡིན་པར་ཐལ་ལོ། །འདོད་ན། དེ་ཆོས་ཅན། རང་གི་ཉེར་ལེན་དུ་གྱུར་པའི་རྒྱུན་མཐའི་ཡེ་ཤེས་ལས་བྱུང་བར་ཐལ་ལོ། །ཟེར་ན་མ་ཁྱབ། འདོད་ན། དེ་མེད་ན་ཁྱོད་མེད་དགོས་པར་ཐལ་ལོ། །འདོད་ན། རི་བོང་རྭ་དང་ཕན་ཚུན་ཐ་དད་དུ་གྱུར་པའི་བུམ་པ་ཕྱི་རོལ་དོན་དུ་འཛིན་པའི་རྟོག་པ་སྤངས་པའི་མཁྱེན་པ་མེད་པར་ཐལ། དེའི་ཉེར་ལེན་དུ་གྱུར་པའི་རྒྱུན་མཐའི་ཡེ་ཤེས་མེད་པའི་ཕྱིར། རྟགས་གྲུབ་སྟེ། དེ་འདྲའི་མཁྱེན་པ་དེ་རྣམ་མཁྱེན་མ་ཡིན་པའི་ཕྱིར། ཐེག་ཆེན་མཐོང་ལམ་རྣམ་གྲོལ་ལམ་དེ་དེ་འདྲའི་རྟོག་པ་སྤངས་པའི་མཁྱེན་པ་ཡིན་པའི་ཕྱིར། དེ་འདྲའི་རྟོག་པ་དེ་སྤང་བྱ་ཀུན་བཏགས་ཡིན་པའི་ཕྱིར། གཞན་ཡང༌། ཆོས་དེ་དང་ཕན་ཚུན་ཐ་དད་དུ་གྱུར་པའི་བུམ་པ་ཕྱི་རོལ་དོན་དུ་འཛིན་པའི་རྟོག་པ་སྤངས་པའི་མཁྱེན་པ་ཆོས་ཅན། ཁྱོད་ཡོད་ན་ཁྱོད་རྣམ་མཁྱེན་ཡིན་དགོས་པར་ཐལ། ཁྱོད་རྣམ་མཁྱེན་ཡིན་པའི་ཕྱིར་ན་མ་ཁྱབ། འདོད་ན། རི་བོང་གི་རྭ་དང་སྦྱར་ནས་གཤོག །གཞན་ཡང༌། དེ་འདྲའི་རྟོག་པ་སྤོང་ཁ་མའི་མཁྱེན་པ་དེ། རྒྱུན་མཐའི་ཡེ་ཤེས་ཡིན་པར་ཐལ། དེ་སྤངས་པའི་མཁྱེན་པ་དེ་རྣམ་མཁྱེན་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་ཡོད་ན་ཁྱོད་རྒྱུན་མཐའི་ཡེ་ཤེས་ཡིན་དགོས་པར་ཐལ། ཁྱོད་རྒྱུན་མཐའི་ཡེ་ཤེས་ཡིན་པའི་ཕྱིར་ན་མ་ཁྱབ། འདོད་ན། རི་བོང་གི་རྭ་དང་སྦྱར་ནས་གཤོག །འདོད་མི་ནུས་ཏེ། ཐེག་ཆེན་མཐོང་ལམ་བར་ཆད་མེད་ལམ་དེ་དེ་འདྲའི་རྟོག་པ་སྤོང་ཁ་མའི་མཁྱེན་པ་ཡིན་པའི་ཕྱིར་ཏེ། དེ་འདྲའི་མཐོང་ལམ་རྣམ་གྲོལ་ལམ་དེ་དེ་འདྲའི་རྟོག་པ་སྤངས་པའི་མཁྱེན་པ་ཡིན་པའི་ཕྱིར། ཁ་ཅིག་ན་རེ། ཕྱི་སྟོང་པ་ཉིད་དང་ནང་སྟོང་པ་ཉིད་འགལ་ལོ། །ཟེར་ན། དེ་མི་འཐད་པར་ཐལ། གཟུགས་དང་གཟུགས་འཛིན་ཚད་མ་རྫས་གཞན་གྱིས་སྟོང་པའི་སྟོང་ཉིད་དེ་དེ་གཉིས་ཀ་ཡིན་པའི་ཕྱིར་ཏེ། སྟོང་ཉིད་དེའི་སྟོང་གཞི་ཆོས་ཅན་དུ་གྱུར་པའི་ཕྱིའི་ཆོས་དང་ནང་གི་ཆོས་གཉིས་ཀ་ཡོད་པའི་ཕྱིར་ཏེ། དེ་འདྲའི་སྟོང་ཉིད་དེ་གཟུགས་ཀྱི་སྟོང་ཉིད་ཡིན་པར་མ་ཟད། གཟུགས་འཛིན་ཚད་མའི་ཡང་སྟོང་ཉིད་ཡིན་པའི་ཕྱིར་ཏེ། དེའི་ཕྱིར་གཉིས་སྟོང་གང་ཡིན་པ། །དེ་ནི་དེ་ཡིའང་དེ་ཉིད་ཡིན། །ཞེས་གསུངས་པའི་ཕྱིར། ཁ་ཅིག །དབང་རྟེན་ཁོག་པ། ཁོ་རང་ཞེས་པའི་སྒྲ་འཇུག་པའི་འཇུག་གཞིར་རང་གི་མཚན་ཉིད་ཀྱིས་གྲུབ་པས་སྟོང་པ་དེ། ཕྱི་སྟོང་པ་ཉིད་དང༌། ནང་སྟོང་པ་ཉིད་གཉིས་ཀ་ཡིན་ཟེར་ན། དེ་མི་འཐད་པར་ཐལ། དེའི་སྟོང་གཞི་ཆོས་ཅན་དུ་གྱུར་པའི་ཕྱིའི་ཆོས་མེད་པའི་ཕྱིར་ཏེ། དེ་ཡིན་ན་ནང་གི་ཆོས་ཡིན་དགོས་པའི་ཕྱིར་ཏེ། དབང་རྟེན་ཁོག་པ་དེ་ནང་གི་ཆོས་ཡིན་པའི་ཕྱིར། བྱས་པ་ལ་ཁོ་ན་རེ། དེ་ཕྱི་སྟོང་པ་ཉིད་དང་ནང་སྟོང་པ་ཉིད་གཉིས་ཀ་ཡིན་པར་ཐལ། དེ་ཕྱི་ནང་གཉིས་ཀའི་སྟོང་པ་ཉིད་ཡིན་པའི་ཕྱིར། ཟེར་ན་མ་ཁྱབ། རྟགས་གྲུབ་སྟེ། ཕྱི་ནང་གཉིས་ཀའི་སྟོང་པ་ཉིད་ཡོད་པའི་ཕྱིར་ཏེ། སྟོང་ཉིད་བཅུ་དྲུག་ཡོད་པའི་ཕྱིར། ཁ་ཅིག །གཟུགས་འཛིན་རྟོག་པའི་ཞེན་གཞིར་གཟུགས་བདེན་པར་མེད་པ་དེ། ཆོས་ཀྱི་བདག་མེད་ཕྲ་མོ་ཡིན་ཟེར་ན། དེ་མི་འཐད་པར་ཐལ། མདོ་སྡེ་པས་དེ་རྟོགས་པའི་ཕྱིར། དེས་གཟུགས་གཟུགས་འཛིན་རྟོག་པའི་ཞེན་གཞི་ཡིན་པ་དེ་བདེན་མེད་དུ་རྟོགས་པའི་ཕྱིར་ཏེ། དེས་གཟུགས་གཟུགས་ཞེས་པའི་སྒྲའི་བརྗོད་བྱ་ཡིན་པ་དེ་བདེན་མེད་དུ་རྟོགས་པའི་ཕྱིར་ཏེ། དེས་རྗོད་བྱེད་ཀྱི་སྒྲའི་བརྗོད་བྱ་བདེན་མེད་དུ་རྟོགས་པའི་ཕྱིར། གཞན་ཡང༌། ནམ་མཁའ་རང་འཛིན་རྟོག་པའི་ཞེན་གཞིར་བདེན་པར་མེད་པ་དེ་ཡང་ཆོས་ཀྱི་བདག་མེད་ཕྲ་མོ་ཡིན་པར་ཐལ། གཟུགས་ལ་དེའི་ཕྱིར། འདོད་མི་ནུས་ཏེ། མདོ་སྡེ་པས་དེ་རྟོགས་པའི་ཕྱིར། དེས་ནམ་མཁའ་བདེན་མེད་དུ་རྟོགས་པའི་ཕྱིར། ཁྱབ་སྟེ། ནམ་མཁའ་བདེན་མེད་དུ་རྟོགས་པའི་གང་ཟག་ཡིན་ན། ནམ་མཁའ་རང་འཛིན་རྟོག་པའི་ཞེན་གཞིར་བདེན་མེད་དུ་རྟོགས་པའི་གང་ཟག་ཡིན་དགོས་པའི་ཕྱིར་ཏེ། རྟག་པ་བྱས་སྟོང་དུ་རྟོགས་པའི་གང་ཟག་ཡིན་ན། རྟག་པ་སྒྲའི་བྱས་སྟོང་དུ་རྟོགས་པའི་གང་ཟག་ཡིན་དགོས་པའི་ཕྱིར། རང་རེས། གཟུགས་གཟུགས་འཛིན་རྟོག་པའི་ཞེན་གཞིར་རང་གི་མཚན་ཉིད་ཀྱིས་གྲུབ་པ་དེ་ངོ་བོར་ཀུན་བཏགས་པའི་ཀུན་བཏགས་དང༌། དེས་སྟོང་པ་དེ། ངོ་བོར་ཀུན་བཏགས་པའི་ཀུན་བཏགས་རང་གི་མཚན་ཉིད་ཀྱིས་གྲུབ་པས་སྟོང་པའི་སྟོང་ཉིད་ཡིན་ཅིང༌། གཟུགས་གཟུགས་ཀྱི་དངོས་པོ་ཞེས་པའི་སྒྲ་འཇུག་པའི་འཇུག་གཞིར་རང་གི་མཚན་ཉིད་ཀྱིས་གྲུབ་པ་དེ་ཁྱད་པར་ལ་ཀུན་བཏགས་པའི་ཀུན་བཏགས་དང་། དེས་སྟོང་པ་དེ་ཁྱད་པར་ལ་ཀུན་བཏགས་པའི་ཀུན་བཏགས་རང་གི་མཚན་ཉིད་ཀྱིས་གྲུབ་པས་སྟོང་པའི་སྟོང་ཉིད་ཡིན་བྱས་པ་ལ། ཁོ་ན་རེ། གཟུགས་གཟུགས་འཛིན་རྟོག་པའི་ཞེན་གཞིར་རང་གི་མཚན་ཉིད་ཀྱིས་མ་གྲུབ་པར་ཐལ། དམ་བཅའ་དེའི་ཕྱིར། འདོད་བྱས་པ་ལ། དེར་གྲུབ་པར་ཐལ། གཟུགས་དེར་དངོས་པོ་ཡིན་པའི་ཕྱིར། ཁ་ཅིག་གིས་འདིར་མ་ཁྱབ་ཟེར། རྟགས་མ་གྲུབ་བྱས་པ་ལ། དེར་ཐལ། གཟུགས་དེར་རྟག་པ་མ་ཡིན་པའི་ཕྱིར། མ་གྲུབ་བྱས་པ་ལ། གཟུགས་ཆོས་ཅན། རྟག་པ་ཡིན་པར་ཐལ། རང་འཛིན་རྟོག་པའི་ཞེན་གཞིར་རྟག་པ་ཡིན་པའི་ཕྱིར། ཟེར་ན། རི་བོང་གི་རྭ་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། དེར་ཡོད། དེར་དངོས་པོ་མ་ཡིན་པའི་ཕྱིར། དང་པོ་གྲུབ་སྟེ། བདག་མེད་ཡིན་པའི་ཕྱིར། ཁ་ཅིག་མ་ཁྱབ་ཟེར་བ་དེ་ལ། གཟུགས་གཟུགས་འཛིན་རྟོག་པའི་ཞེན་གཞིར་གཟུགས་ཡིན་པར་ཐལ། གཟུགས་དེར་དངོས་པོ་ཡིན་པའི་ཕྱིར། འདོད་ན། དེར་གཟུགས་ཡོད་པར་ཐལ་ལོ། །འདོད་ན། དེར་གཟུགས་ཆོས་ཅན། རང་གི་མཚན་ཉིད་ཀྱིས་གྲུབ་པར་ཐལ། གཟུགས་ཡིན་པའི་ཕྱིར། འདོད་ན། གཟུགས་དེར་རང་གི་མཚན་ཉིད་ཀྱིས་གྲུབ་པར་ཐལ། འདོད་པའི་ཕྱིར། གཞན་ཡང༌། རང་མཚན་རང་མཚན་འཛིན་པའི་རྟོག་པའི་ཞེན་གཞིར་རང་མཚན་ཡིན་པར་ཐལ། གཟུགས་གཟུགས་འཛིན་རྟོག་པའི་ཞེན་གཞིར་གཟུགས་ཡིན་པའི་ཕྱིར། འདོད་མི་ནུས་ཏེ། དེ་དེར་རང་གི་མཚན་ཉིད་ཀྱིས་གྲུབ་པས་སྟོང་པ་ཡིན་པའི་ཕྱིར། གཞན་ཡང༌། གཟུགས་རང་འཛིན་རྟོག་པའི་ཞེན་གཞིར་རང་གི་མཚན་ཉིད་ཀྱིས་གྲུབ་ཟེར་བ་དེ་ལ། གཟུགས་དེར་དོན་དམ་པར་གྲུབ་པར་ཐལ་ལོ། །འདོད་ན། དེ་གཟུགས་ཞེས་པའི་སྒྲ་འཇུག་པའི་འཇུག་གཞིར་དོན་དམ་པར་གྲུབ་པར་ཐལ་ལོ། །འདོད་ན། གཟུགས་དོན་དམ་པར་གཟུགས་ཞེས་པའི་སྒྲའི་བརྗོད་བྱ་ཡིན་པར་ཐལ་ལོ། །འདོད་ན། དེ་དོན་དམ་པར་རྗོད་བྱེད་ཀྱི་སྒྲའི་བརྗོད་བྱ་ཡིན་པར་ཐལ་ལོ། །འདོད་ན། དངོས་པོ་དེ་དེ་ཡིན་པར་ཐལ་ལོ། །