དྲག་པོའི་དངོས་འགལ་གྱི་ཐོག་དབབ་པ།
གཉིས་པ་ལྟ་ངན་གྱི་མགོ་ལ་དངོས་འགལ་གྱི་ཐོག་དབབ་པ་ནི། དོན་དམ་གྱི་སངས་རྒྱས་ཡོད་པའང་མིན་མེད་པའང་མིན། གཉིས་ཀའང་མ་ཡིན། གཉིས་ཀ་མ་ཡིན་པའང་མ་ཡིན་ཞེས་སྨྲ་བ་ཇི་བཞིན་དུ་ཁས་ལེན་པ་ཐམས་ཅད་སོམས་ཤིག འདི་ནི་ཁྱེད་ཀྱི་འགལ་བའི་དུས། །འདི་ནི་ཁྱེད་རྣམས་ཕམ་པའི་དུས། །ཁོ་བོས་ཁྱེད་ལ་དངོས་འགལ་སྒྲིགས་ཀྱིས། ཁྱེད་ཀྱིས་ཡིན་པ་ལ་ཡང་ཡིན་ཞེས་ལན་ཐོབ་མཛོད་ཅིག མ་ཡིན་པ་ལ་ཡང་མ་ཡིན་ཞེས་སྨྲོས་ཤིག ཁྱེད་ཀྱིས་ཡོད་མེད་གཉིས་ཀ་མ་ཡིན་པར་ཁས་བླངས་སམ་བླངས་ལགས། དེ་ཀའི་རྗེས་ལ་ཡོད་མེད་གཉིས་ཀ་མ་ཡིན་པའང་མ་ཡིན་ནོ། །ཞེས་ཁས་བླངས་སམ་བླངས་ལགས། འོ་ན་འདི་གཉིས་དངོས་སུ་འགལ་ལོ། །
དངོས་འགལ་བྱ་བ་མེད་ན་ཁྱེད་བདེན། ཡོད་ན་ནི་འདི་བས་ལྷག་པའི་དངོས་འགལ་གང་ན་ཡོད་སྨྲོས་ཤིག ཡིན་ན་ཡིན་པ་ལས་འོས་ཅི་ཡོད། མ་ཡིན་ན་མ་ཡིན་པ་ལས་འོས་ཅི་ཡོད། མིན་པར་ཁས་བླངས་ནས་དེ་ཀའི་རྗེས་ལ་མིན་པའང་མིན་ཞེས་བློ་ལྡན་སུས་ཁས་ལེན། མ་ཡིན་པ་མ་ཡིན་ན་ཡིན་པར་འགྱུར་མོད། དགག་པ་གཉིས་ཀྱི་རྣལ་མ་གོ་བའང་ད་དུང་མ་དགོངས་སམ་མ་ཤེས་སམ། ཁྱི་སྐད་ལ་རྒྱུག་པ་འདིའང་མ་མཛད་པར་ལུང་རིགས་མཁྱེན་པའི་སྐབས་དོན་ལགས་པས། རྟོག་དཔྱོད་ཐུགས་བསམ་དུམ་རེ་ལ་བཏང་དུ་གསོལ་ཞེས་གནད་ནས་བསྐུལ་ཏེ་ཞུས་པ་དང༌། དངོས་འགལ་གྱི་ཐོག་གཉིས་འཛོམ་ནས་ཅང་མི་གསུང་བར་བཞུགས་པས་དེ་དེ་བཞིན་དུ་འཛིན་ཏོ། །འདི་ཡང་ཁོ་བོའི་བློ་གྲོས་ཀྱིས་གསར་དུ་རྙེད་པའི་རིགས་པ་ཡིན་ནོ། །
སྨྲས་པ།
ཡིན་ན་ཡིན་པར་མི་འགྱུར་ཞིང༌། །
མིན་ན་མིན་པར་མི་འགྱུར་བས། །
འགལ་བ་ལྟག་སྤྲོད་ཁས་ལེན་པ། །
གྲུབ་མཐའ་ལོགས་སུ་རྩོམ་པ་བདེན། །
དེང་སང་དུས་ཀྱི་ཆོས་པ་བདག་ལྟ་བུས། །
ལྟ་སྒོམ་གཉིས་ཀྱི་ཤན་འབྱེད་མ་ཤེས་པས། །
རྒྱལ་བའི་བཀའ་ལ་ཁྱད་གསོད་བྱས་ནས་ཀྱང༌། །
གཡེམ་མའི་མུ་ཅོར་སྨྲས་པ་མཐོལ་ལོ་བཤགས། །
ཞེས་པ་བར་སྐབས་ཀྱི་ཚིགས་བཅད་དོ།། །།
འོ་ན་ལུང་དེ་ལ་འབྲུ་ཅི་ལྟར་སྣོན་ཅེ་ན། དུས་འཁོར་རྒྱུད་འགྲེལ་དུ་ལུང་འདི་ལ། རྗེ་བཙུན་སྤྱན་རས་གཟིགས་ཀྱིས། ཡོད་པ་ཤེས་རབ་གྱི་ཆ་དཀར་ཕྱོགས་མ་ཡིན། མེད་པ་ཐབས་ཀྱི་ཆ་ནག་ཕྱོགས་མ་ཡིན། དཀར་ཕྱོགས་ནག་ཕྱོགས་གཉིས་འགལ་བའི་ཕྱིར་གཉིས་ཀའང་མ་ཡིན། དཀར་ཕྱོགས་ནག་ཕྱོགས་འདི་དག་ལས་མ་གཏོགས་པའི་ལྷན་སྐྱེས་ཀྱི་བདེ་བ་ཟུར་ན་ཡོད་པ་མ་ཡིན་ཞེས་འབྲུ་བསྣན་གདའ། བྱམས་མགོན་གྱི་མདོ་སྡེ་རྒྱན་དུ། ཡོད་མིན་མེད་མིན་དེ་བཞིན་མིན་གཞན་མིན། །ཞེས་པའི་འགྲེལ་པར་ཀུན་མཁྱེན་གཉིས་པ་དབྱིག་གཉེན་གྱིས། དེ་ཁོ་ན་ཉིད་ཀྱི་དོན་དེ་ཀུན་བརྟགས་གཞན་དབང་གི་མཚན་ཉིད་ཀྱིས་ནི་ཡོད་པ་མ་ཡིན། ཡོངས་སུ་གྲུབ་པའི་མཚན་ཉིད་ཀྱིས་ནི་མེད་པ་མ་ཡིན། ཀུན་བརྟགས་གཞན་དབང་ཡོངས་གྲུབ་གཅིག་པ་ཉིད་གཉིས་མེད་པས་དེ་བཞིན་ཉིད་མ་ཡིན་ནོ། །དེ་དག་ཁོ་ན་དང་གཞན་པ་མེད་པས་གཞན་མ་ཡིན་ནོ། །ཞེས་འབྲུ་བསྣན་གདའ། ཡང་བྱམས་མགོན་གྱི་རྒྱུད་བླ་མར། ཡོད་མིན་མེད་མིན་ཡོད་མེད་མ་ཡིན་ཡོད་མེད་ལས་གཞན་དུའང༌། །བརྟགས་པར་མི་ནུས་ངེས་ཚིག་དང་བྲལ་སོ་སོ་རང་གིས་རིག་བྱ་བ། །ཞེས་པའི་རྒྱས་བཤད་དུ། བརྟག་མིན་ཕྱིར་དང་ཞེས་གསུང་པས། ཡོད་པ་མིན་པར་ཡང་བརྟག་པར་མི་ནུས། མེད་པ་མིན་པར་བརྟག་པར་མི་ནུས། ཡོད་མེད་གཉིས་ཀ་མིན་པར་ཡང་བརྟག་པར་མི་ནུས། ཡོད་མེད་གཉིས་ཀ་ལས་གཞན་དུའང་བརྟག་པར་མི་ནུས་ཞེས་པའང་གི་སྒྲས་གོང་མ་རྣམས་ཀྱང་བརྟག་མི་ནུས་པར་བཤད་པར་གདའ།
བྱམས་མགོན་གྱི་དངོས་སློབ། འཕགས་པ་ཐོགས་མེད་ཀྱིས་ཀྱང༌། དེའི་འགྲེལ་བར་མེད་པ་དང་ཡོད་པ་དང་ཡོད་མེད་གཉིས་ཀ་མ་ཡིན་པ་སྟེ། རྣམ་པ་བཞི་ཀ་ལྟར་ཡང་རྟོག་གེའི་ཡུལ་མ་ཡིན་པའི་ཕྱིར་རོ། །ཞེས་གསུངས། འདི་ཡང་ཁོ་བོས་གསར་དུ་རྙེད་པའི་ཁྱད་ཆོས་ཡིན་ནོ། །
ཁོང་དཔོན་སློབ་གཉིས་ཀྱི་བསྟན་བཅོས་ལ་ཁོ་རང་གཉིས་ཀ་རྒྱུས་ཆེ། ཁོང་གཉིས་ཀྱིས་དོན་དམ་གྱི་ཆོས་དཀོན་མཆོག་དེ། རྟོག་གེས་མུ་བཞི་གང་དུའང་བརྟག་པར་མི་ནུས། རྟོག་གེའི་ཡུལ་མིན། རྟོག་གེའི་མི་ཤེས་ཞེས་གསུངས་གདའ། སུས་ཀྱང་མི་ཤེས་སུ་ཡི་ཡང་ཡུལ་མིན་གསུངས་པ་མིན་པར་གདའ། དེའི་རྗེས་སུ་བྱམས་མགོན་གྱིས། སོ་སོ་རང་གིས་རིག་ཅེས་དང་དེའི་རྒྱས་བཤད་དུ། འཕགས་པས་མཁྱེན་ཕྱིར། ཞེས་གསུངས། དེའི་འགྲེལ་པར་ཐོགས་མེད་ཀྱིས་འཕགས་པ་རྣམས་ཀྱིས་སོ་སོ་རང་གིས་རིག་པར་བྱ་བའི་ཕྱིར་རོ། །ཞེས་གསུངས་པས། མི་རྟོག་ཡེ་ཤེས་ཀྱི་ཡུལ་དུ་ཡོད་པར་གྲུབ་པོ། །
སྨྲས་པ།
མཉམ་བཞག་བསྒོམ་པ་གཏན་ལ་འབེབས་པའི་ཚེ། །
ཡོད་མེད་ལ་སོགས་མུ་བཞི་གང་དུ་ཡང༌། །
ཅིར་ཡང་མི་འཛིན་ཅིར་ཡང་མི་རྟོག་ཅིང༌། །
སྣང་བ་དགག་སྒྲུབ་མི་བྱེད་རང་སོར་འཇོག།
ཡིན་ལུགས་ལྟ་བ་གཏན་ལ་འབེབས་པའི་ཚེ། །
དོན་དམ་སེམས་ཀྱི་རང་བཞིན་འོད་གསལ་དེ། །
མཉམ་བཞག་མི་རྟོག་ཡེ་ཤེས་ཡུལ་དུ་ལྟ། །
ཀུན་རྫོབ་སྣང་བ་རྣམ་པ་སྣ་ཚོགས་འདི། །
རྗེས་ཐོབ་རྨི་ལམ་སྒྱུ་མ་ལྟ་བུར་བལྟ། །
མཉམ་རྗེས་གཅིག་ཏུ་འདྲེས་པ་སངས་རྒྱས་ཡིན། །
དེ་དང་རྗེས་མཐུན་དག་པ་ས་གསུམ་ཡིན། །
དེ་དང་ཆ་མཐུན་མ་དག་ས་བདུན་ཡིན། །
མོས་སྤྱོད་ས་ལ་མཉམ་རྗེས་རེས་འཇོག་བྱེད། །
མདོ་རྒྱུད་བསྟན་བཅོས་ཀུན་གྱི་དགོངས་པ་ཡིན། །
གྲུབ་ཐོབ་བླ་མ་རྣམས་ཀྱི་མན་ངག་ཡིན། །
ཆོས་ཀྱི་ལྟ་སྒོམ་རྣམ་དག་དེ་ལྟར་ཡིན། །
མི་ཤེས་ལོག་རྟོག་ཐེ་ཚོམ་བསལ་བའི་ཕྱིར། །
ཆོས་ཀྱི་གསང་བ་ཟབ་མོ་བྲིས་པ་ལ། །
གསང་སྒྲོགས་ཉེས་ལྟུང་བར་ཆད་མི་འབྱུང་བར། །
བླ་མ་དཀོན་མཆོག་མཁའ་འགྲོའི་བྱིན་གྱིས་རློབས། །
དེ་རྣམས་ཡན་ཆད་ཀྱིས་བརྟེན་པ་གཞན་དོན་ཕུན་ཚོགས། ཀུན་རྫོབ་གཟུགས་ཀྱི་སྐུ་ཡོད་པའི་རྒྱུ་མཚན་གྱིས་དེའི་རྟེན་དོན་དམ་ཆོས་སྐུ་ཡོད་པར་བསྒྲུབས། ཆོས་ཀྱི་སྐུ་སྐྱེ་འཇིག་མེད་པར་ལྷུན་གྱིས་གྲུབ་པའི་རྒྱུ་མཚན་རྟག་པ་དང་བརྟན་པར་བཞུགས་པ་ལས། གདུལ་བྱ་རིང་བ་སོ་སོའི་སྐྱེ་བོ་རྣམས་གདུལ་བྱ་ནམ་དུས་ལ་བབ་པ་ན། བཟོ་དང་སྐྱེ་བ་བྱང་ཆུབ་ཆེ། །མྱ་ངན་འདས་པ་རྟག་སྟོན་པ། །སངས་རྒྱས་སྤྲུལ་པའི་སྐུ་འདི་ནི། །རྣམ་པར་གྲོལ་བའི་ཐབས་ཆེན་པོ། །ཞེས་གསུང་པ་ལྟར། གང་ལ་གང་འདུལ་གྱི་སྤྲུལ་པའི་སྐུ་སྣ་ཚོགས་སྟོན་ པ་དང༌། གདུལ་བྱ་ཉེ་བ་བྱང་ཆུབ་སེམས་དཔའ་རྣམས་འདུལ་བ་ལ། ལོངས་སྤྱོད་རྫོགས 
་པའི་སྐུ་ཞིང་ཁམས་མཐའ་ཡས་པའི་འོག་མིན་མཐའ་ཡས་པར། བྱང་ཆུབ་སེམས་དཔའ་མཐའ་ཡས་
པ་ལ་ལོངས་སྤྱོད་རྫོགས ་པའི་སྐུ་མཐའ་ཡས་པས། ཐེག་པ་ཆེན་པོའི་ཆོས་མཐའ་ཡས་པ་བསྟན་ནས། དུས་འཁོར་བ་མ་སྟོང་གི་བར་དུ་སངས་རྒྱས་ཀྱི་འཕྲིན་ལས་རྒྱུན་མི་ཆད་པར་ལྷུན་གྱིས་གྲུབ་པའི་ཕྱིར། དོན་གཉིས་ཕུན་ཚོགས་སྐུ་གཉིས་ཟུང་དུ་འཇུག་པར་གྲུབ་པོ། །
དོན་དམ་ཆོས་སྐུ་རྟག་ཅིང་བརྟན་པའི་སྒྲུབ་བྱེད་དུ། མདོ་རྒྱུད་བསྟན་བཅོས་རྣམས་ནས་སྐྱེ་འཇིག་མེད་པའི་ཆོས་ཉིད་ལྷུན་གྲུབ་ཡིན་པར་གསུངས། ཇོ་ནང་པའང་འདི་བས་ལྷག་པའི་རྟག་བརྟན་མི་བཞེད། ཁོ་བོ་ཅག་ཀྱང་མི་འདོད་དོ། །དཔལ་ཆོས་ཀྱི་གྲགས་པས་ཀྱང༌། གང་གི་རང་བཞིན་འཇིག་མེད་པ། །དེ་ལ་མཁས་རྣམས་རྟག་ཅེས་བརྗོད། །ཅེས་གསུངས། ངེད་ཅག་གིས་ཁོང་རྣམ་པའི་རྗེས་ཟློས་བྱས་པ་ལགས་སོ། །སྐྱོན་གདའ་ན་དེར་གཏོང་བར་ཞུས།
སྨྲས་པ།
ཁ་ཅིག་མཆོག་གསུམ་ཀུན་རྫོབ་བདེན་པ་ཡིན། །
སངས་རྒྱས་རྟག་བརྟན་བྱ་བ་མི་སྲིད་པས། །
དོན་དམ་ཆོས་སྐུའང་སངས་རྒྱས་མ་ཡིན་ཟེར། །
དེ་བཞིན་འགོག་བདེན་ཆོས་ཀྱང་ཆོས་མ་ཡིན། །
དོན་དམ་དགེ་འདུན་དགེ་འདུན་མིན་ནོ་ལོ། །
དོན་དམ་དཀོན་མཆོག་གསུམ་ལ་སྐུར་པ་འདེབས། །
འདི་ཡང་ཀུན་རྫོབ་ཁོ་ནའི་ཕྱོགས་སུ་ལྷུང༌། །
ཕྱོགས་རེའི་མཐའ་ལ་ཞེན་ནས་ཕན་ཚུན་འགོག།
ཁ་ཅིག་མཆོག་གསུམ་དོན་དམ་བདེན་པ་ཡིན། །
སྐྱེ་འཇིག་ཅན་གྱི་སངས་རྒྱས་གོ་མི་ཆོད། །
དེ་ཕྱིར་ཀུན་རྫོབ་གཟུགས་སྐུ་སངས་རྒྱས་མིན། །
དེ་བཞིན་ལམ་གྱི་ཆོས་ཀྱང་ཆོས་མ་ཡིན། །
ཀུན་རྫོབ་དགེ་འདུན་དགེ་འདུན་མིན་ཞེས་སྨྲས། །
ཀུན་རྫོབ་དཀོན་མཆོག་གསུམ་ལ་སྐུར་པ་འདེབས། །
འདི་ཡང་དོན་དམ་ཁོ་ནའི་ཕྱོགས་སུ་ལྷུང༌། །
ཕྱོགས་རེས་མཐའ་ལ་ཞེན་ནས་ཕན་ཚུན་འགོག།
ཐམས་ཅད་དྲིལ་ནས་མཆོག་གསུམ་ཡུལ་ནས་ཕུད། །
མཆོག་གསུམ་སྐུར་འདེབས་སྡིག་པའི་ཁུར་ཆེན་འདི། །
གང་ཟག་གཅིག་གིས་བསྒྱུར་བར་མི་ནུས་ཞེས། །
ཕྱོགས་ཕྱོགས་ཉིད་དུ་བགོ་བཤའ་བྱས་པ་འདྲ། །
སངས་རྒྱས་ལ་ཡང་བདེན་གཉིས་ཟུང་དུ་འཇུག།
དམ་ཆོས་ལ་ཡང་བདེན་གཉིས་ཟུང་དུ་འཇུག།
དགེ་འདུན་ལ་ཡང་བདེན་གཉིས་ཟུང་དུ་འཇུག།
མཐའ་བྲལ་དབུ་མ་ཆེན་པོའི་གྲུབ་མཐའ་ཡིན། །
མདོ་རྒྱུད་བསྟན་བཅོས་མན་ངག་སྙིང་པོ་ཡིན། །
རྒྱལ་བ་སྲས་དང་བཅས་པས་མགྲིན་གཅིག་གསུངས། །
རྣལ་འབྱོར་གྲུབ་པ་ཐོབ་པ་རྣམས་ཀྱིས་རྟོགས། །
ཐོས་བསམ་སྒོམ་པས་གཏན་ལ་ཕབ་པ་ཡིན། །
ཚིག་ཙམ་གྱིས་ནི་དོན་རྣམས་ཅི་ཞིག་འགྲུབ། །
དོན་གྱི་ཆ་ལ་གཟུ་བོའི་བློ་ཡིས་དཔྱོད། །
དེ་སྐད་སྨྲ་བའི་འཇམ་དཔལ་གྲགས་པ་དེས། །
འབྲས་བུ་ཟུང་འཇུག་བཀའ་བསྡུ་ལྔ་པ་བྱས། །
འབྲས་བུ་སྐུ་གཉིས་ཟུང་དུ་འཇུག་པའི་སྐབས་དེ་དང་པོའོ།། །།