སྔོན་དུ་འགྲོ་བའི་གཏམ།
དེ་ཡང་སློབ་དཔོན་བདེ་བྱེད་བདག་པོའི་ལྷ་ལས་ཕུལ་དུ་བྱུང་བའི་བསྟོད་ པ་ལས། བདག་ནི་སངས་རྒྱས་ཕྱོགས་མི་འཛིན། །སེར་སྐྱ་སོགས 
་ལ་མི་སྡང་ཡང༌། །གང་ཞིག་རིགས་པར་ལྡན་པའི་ཚིག །དེ་ཉིད་སྟོན་པར་ཡོངས་སུ་འཛིན། །ཞེས་དང༌། གང་ལ་སྐྱོན་ཀུན་ཡོད་མིན་ལ། །ཡོན་ཏན་ཐམས་ཅད་ཡོད་གྱུར་ན། །ཚངས་དང་ཁྱབ་འཇུག་དབང་ཕྱུག་ཆེ། །དེ་ཡང་བདག་གི་སྟོན་པ་ཡིན། །ཞེས་གསུངས་པ་ལྟར་སྨྲས་པ། བདག་ཀྱང་ཇོ་ནང་ཕྱོགས་མི་འཛིན། །ཞ་ལུ་ཕྱོགས་ལ་མི་སྡང་ཡང༌། །ལུང་རིགས་རྣམས་དང་མི་འགལ་བའི། །གྲུབ་མཐའ་དེ་ཉིད་ཡོངས་སུ་འཛིན། །གང་ལ་སྐྱོན་ཀུན་ཡོད་མིན་ལ། །ཡོན་ཏན་ཐམས་ཅད་ཡོད་གྱུར་ན། །ཇོ་ནང་ཞ་ལུའི་བཤེས་གཉེན་སོགས། །ཐམས་ཅད་བདག་གི་སྟོན་པ་ཡིན། །སློབ་དཔོན་མཐོ་བཙུན་གྲུབ་རྗེའི་ཁྱད་པར་འཕགས་བསྟོད་ལས་ཀྱང༌། གང་ཕྱིར་འཇིག་རྟེན་སྐྱོན་ལ་དགའ། །ཡོན་ཏན་འཛིན་ལ་ཞན་པས་ན། །སྐྱོན་ཡང་ཡོན་ཏན་ལྟར་མཐོང་ནས། །གཞན་ལ་སྐྱབས་སུ་སོང་བར་གྱུར། །ཞེས་དང༌། འཇིག་རྟེན་ལྷ་དང་བྲམ་ཟེ་དང༌། །རིག་བྱེད་ཤཱཀྱ་འདི་དག་ཅེས། །སྡང་བར་སྨྲ་བ་རང་སྐྱོན་ཉིད། །ཅི་ཕྱིར་སེམས་པར་མི་བྱེད་ཀྱེ། །ཞེས་གསུངས་པ་ལྟར་སྨྲས་པ། སྙིགས་དུས་སྐྱེ་བོ་སྐྱོན་ལ་ཆགས། །ཡོན་ཏན་འཛིན་ལ་སྡང་བས་ན། །གྲུབ་མཐའ་ལོག་པའང་ལེགས་མཐོང་ནས། །ལོག་པའི་རྗེས་སུ་ཞུགས་པར་གྱུར། །འཁོར་ལོ་གསུམ་པ་དྲང་དོན་དང༌། །ཇོ་ནང་གྲུབ་མཐའ་གྲངས་ཅན་ཞེས། །སྡང་བར་སྨྲ་བ་རང་སྐྱོན་ཉིད། །ཅི་ཕྱིར་སེམས་པར་མི་བྱེད་ཀྱེ། །
དེ་ཡང་གྲུབ་མཐའི་གཤགས་རལ་བྱེད་པ་དང༌། རང་གི་རྒྱུད་ལ་གོ་བར་བྱེད་པ་དང༌། གཞན་ལ་སྟོན་པ་དང༌། ལུང་རིགས་རྣམ་དག་གིས་དགག་སྒྲུབ་བྱེད་པ་ལ་ཡོན་ཏན་འདི་རྣམས་དང་ལྡན་པ་གཅིག་དགོས་ཏེ། བཀའ་རབ་འབྱམས་གྱི་རྒྱལ་ཁམས་ཡངས་པ་གཟིགས་པ། བསྟན་བཅོས་སྣ་རེའི་ལུང་ཕུག་ཏུ་མ་ཞེན་པ། རྨོངས་པ་ཁ་མཐུན་གྱི་དམག་དཔུང་ལ་མི་འཇིགས་པ། རང་འདོད་ཕུར་ཚུགས་གྱི་མཁར་དཔེ་ལ་མ་འཁྲས་པ། གྲུབ་མཐའ་ལོག་པའི་སྐྱོ་མ་སྔ་བཙན་གྱི་དབང་དུ་མི་འགྲོ་བ། གཞན་གྱི་ཡོན་ཏན་ཕུན་སུམ་ཚོགས་པ་ལ་སེམས་ཁོང་ནས་འཁྲུགས་པའི་ཕྲག་དོག་གི་དྲི་མས་མ་སྦགས་པ། སྣུམ་གྱིས་སྦགས་པའི་གོས་ཚོན་གྱིས་བསྒྱུར་དུ་མི་རུང་བ་བཞིན་དུ། གྲུབ་མཐའ་བདེན་རྫུན་གྱི་རྟོག་དཔྱོད་མི་བྱེད་པར། རང་རང་གི་ཕྱོགས་སུ་ཞེན་པའི་ལྟ་བས་ཆོས་མི་གོ་བས་ལོག་པའི་ཞེན་ལྟ་དེ་དང་བྲལ་བ། ཐེག་པ་ཆེན་པོའི་གང་ཟག་ལ་ཞེ་སྡང་བའི་དབང་གིས་ཆོས་ལ་ཡང་ལོག་པར་སྒྲུབ་པ་མཐོང་བས། གང་ཟག་གི་ཆགས་སྡང་ཆོས་ལ་མི་བསྲེ་བ། ཆོས་ཀྱི་འཁོར་ལོ་རིམ་པ་གསུམ་དུ་བསྐོར་བ་ལས་བརྩམས་ཏེ། དྲང་དོན་དང་ངེས་དོན་དང་བདེན་གཉིས་ཀྱི་རྣམ་དབྱེ་ལ་མཁས་པ། ཚུར་རོལ་རང་གི་འདོད་པ་དང་མཐུན་ཡང་རྒྱལ་བའི་གསུང་རབ་རྣམ་དག་དང་མི་མཐུན་ན་དུག་དང་འདྲེས་པའི་ཁ་ཟས་བཞིན་འདོར་ནུས་པ། ཕ་རོལ་གཞན་གྱི་གང་ཟག་ངན་ཡང་ལེགས་བཤད་རྣམ་དག་མཐོང་ན་ཚེར་མའི་ཤིང་ལས་སྦྲང་རྩི་བཞིན་དུ་ལེན་ནུས་པ། ཚུར་རོལ་རང་གི་འདོད་པ་དང་མི་མཐུན་ཡང་རྒྱལ་བའི་གསུང་རབ་རྣམ་དག་དང་མཐུན་ན། དྲི་མི་ཞིམ་ཡང་རོ་ནུས་ཕུན་སུམ་ཚོགས་པའི་སྨན་བཞིན་དུ་དང་དུ་ལེན་ནུས་པ། ཕ་རོལ་གཞན་གྱི་གང་ཟག་བཟང་ཡང་ཉེས་པར་བཤད་པ་རྣམས་གསེར་གྱི་རི་ལ་དུག་གི་ཆུ་རྒྱུན་བཞིན་དུ་སྤོང་ནུས་པ། ཆོས་རྒྱལ་ཐུབ་པའི་མདོ་རྒྱུད་གསུང་རབ་རྣམ་དག་དང༌། རྒྱལ་ཚབ་བྱམས་པའི་ཆོས་ལྔ་དང༌། རྒྱལ་སྲས་སེམས་འགྲེལ་སྐོར་གསུམ་དང༌། རྒྱལ་བས་ལུང་བསྟན་པའི་རྒྱན་དྲུག་ལ་
སོགས་པ ་འཁྲུལ་བ་མི་མངའ་བའི་སེམས་དཔའ་ཆེན་པོ་རྣམས་ཀྱི་མཛད་པའི། བསྟན་བཅོས་དྲི་མ་མེད་ པ་ལ་སོགས ་ཏེ་དཔང་པོར་གྱུར་པ་ཚད་མར་གྱུར་པ་རྣམས་དོར་ནས། དེ་རྣམས་དང་མི་མཐུན་ཞིང་དཔང་དུ་མ་གྱུར་ཚད་མར་མ་གྱུར་འཁྲུལ་པ་མངའ་བའི་པཎ་ཆུང་གཞན་འགའ་རེའི་བསྟན་བཅོས་ཀྱི་རྗེས་སུ་འབྲང་བ་ནི། ཡན་ལག་བརྒྱད་དང་ལྡན་པའི་ཆུ་བོ་ཡོད་བཞིན་དུ་དེ་དོར་ནས་བ་ཚྭའི་ཆུ་ལ་འཐུང་བ་བཞིན་དུ། བླང་དོར་ཕྱིན་ཅི་ལོག་ཡིན་པས་ལོག་པའི་བླང་དོར་དང་བྲལ་བ། སྔོན་གྱི་བགྲེས་པོ་དམ་པ་རྣམས་ལ་ཡང་མོས་པ་དང་དད་པ་བྱས་པ་ལས་བྱིན་རླབས་འཇུག་པའི་དགོས་པ་ཡོད་པར་མཐོང་ནས། མོས་གུས་རྩེ་གཅིག་ཏུ་བྱེད་པ་ཐབས་ཀྱི་ཆ་བསྒྲུབ་པ་ལ་མཁས་ཤིང༌། ཤེབ་རབ་ཀྱི་ཆ་ཆོས་རབ་ཏུ་རྣམ་པར་འབྱེད་པའི་བློ་གྲོས་ཀྱིས་མོས་པ་ཙམ་གྱི་རྗེས་སུ་མི་འབྲང་བར། སྔོན་གྱི་བགྲེས་པོའི་ཟེར་སྒྲོས་ནོར་བ་དང་ལོག་པའི་གྲུབ་མཐའ་གྲགས་ཆེ་བ་རྣམས་འདོར་ནུས་པའི་དབང་རྣོན་ཆོས་ཀྱི་རྗེས་སུ་འབྲང་བའི་ཤེས་རབ་རྣམ་པར་དག་པ་དང་ལྡན་པ། ཐེག་ཆེན་མཐར་ཐུག་གི་ལྟ་བ་རྣམ་དག་དེ་དང་པོར་གཞན་ལས་ཐོས་པའི་དུས་སུ་ཐོས་བྱུང་ཤེས་རབ་དང༌། ལུང་རྣམ་དག་ལ་བརྟེན་པའི་ཡིད་ཆེས་རྗེས་དཔག་གིས་རྟོག་ཤིང་ངོ་སྤྲོད། བར་དུ་རང་ཉིད་ཀྱིས་བསམ་པའི་དུས་སུ་བསམ་བྱུང་ཤེས་རབ་དང༌། རང་གི་རིགས་པ་དངོས་པོ་སྟོབས་ཤུགས་ཀྱི་རྗེས་དཔག་གིས་རྟོགས་ཤིང་ངོ་འཕྲོད། ཐ་མར་བསྒོམ་པའི་དུས་སུ་སྒོམ་བྱུང་ཤེས་རབ་དང༌། རང་ཉིད་ཀྱི་མངོན་གསུམ་བཞིས་རྟོགས་ཤིང་ཉམས་མྱོང་གིས་ངོ་འཕྲོད་པའི། ཐོག་མཐའ་བར་གསུམ་དུ་དགེ་བའི་ཐོས་བསམ་སྒོམ་གསུམ་གྱིས་གཏན་ལ་ཕབ་པའི་ལྟ་བ་རྣམ་པར་དག་པ་དང་ལྡན་པ། གསེར་རྟོགས་པ་ལ་ཡང་བསྲེགས་བཅད་བརྡར་ནས་གཏན་ལ་འབེབས་པ་བཞིན་དུ། གཞལ་བྱའི་གནས་གསུམ་གཏན་ལ་འབེབས་པ་ཡང༌། གཞལ་བྱ་མངོན་གྱུར་གཏན་ལ་འབེབས་པ་ལ་བསྲེག་པ་དང་འདྲ་པའི་མངོན་སུམ་ཚད་མས་གནོད་པ་མེད། གཞལ་བྱ་ལྐོག་གྱུར་གཏན་ལ་འབེབས་པ་ལ་བཅད་པ་དང་འདྲ་བའི་རྗེས་དཔག་ཚད་མས་གནོད་པ་མེད། གཞལ་བྱ་ཤིན་ཏུ་ལྐོག་གྱུར་གཏན་ལ་འབེབས་པར་བརྡར་བ་དང་འདྲ་བའི་ལུང་རྣམ་དག་དང་ཆོས་ཉིད་ཀྱི་རིགས་པས་གནོད་པ་མེད་པར་གཏན་ལ་འབེབས་པ་ལ་མཁས་པ། མགོན་པོ་བྱམས་པས་ཆོས་སྤོང་པའི་རྒྱུ་བཅུ་གསུངས་པ་སྐྱེ་བ་སྔོན་དང་འདིར་ཡང་སྦྱངས་པ་མ་བྱས་པས་བློ་གྲོས་དམན་པ་དང༌། ཟབ་ཅིང་རྒྱ་ཆེ་བའི་ཆོས་ལ་སྐྲག་ཅིང་མོས་པ་མེད་པ་དང༌། མི་ཤེས་པ་ཤེས་སོ་སྙམ་པའི་མངོན་པའི་ང་རྒྱལ་ལ་བརྟེན་པ་དང༌། སྔོན་ལས་ངན་བསགས་པ་ལས་ཚེ་འདིར་ཆོས་ཀྱིས་ཕོངས་པའི་སྒྲིབ་པ་ཅན་དུ་གྱུར་པ་དང༌། དོན་དམ་མཐར་ཐུག་གི་མཆོག་བར་ནས་ཀུན་རྫོབ་དྲང་དོན་ལ་མཆོག་ཏུ་འཛིན་པ་དང༌། རྙེད་པ་དང་བཀུར་སྟི་ལ་ལྷག་པར་བརྐམ་ཆགས་སུ་གྱུར་པ་དང༌། ཀུན་རྫོབ་ཀུན་རྫོབ་ཏུ་མེད་པར་ལྟ་བ་དང༌། དོན་དམ་དོན་དམ་དུ་མེད་པར་ལྟ་བ་ལ་ སོགས་ཏེ། ལྟ་བ་ངན་པའི་དབང་དུ་གྱུར་པ ་དང༌། ཆོས་ཡང་དག་པ་སུན་འབྱིན་པའི་སྡིག་པའི་གྲོགས་པོ་བསྟེན་པས་དེའི་དབང་དུ་གྱུར་པ་དང༌། ཆོས་ཡང་དག་པ་འཛིན་པའི་དགེ་བའི་བཤེས་གཉེན་རྒྱང་རིང་དུ་བསྲེང་བ་དང༌། ཐེག་ཆེན་ལ་མི་མོས་པར་ཐེག་ཆུང་ལ་མོས་པ་ནི་མོས་པ་དམན་པར་གསུངས་པ་ཡིན་ལ། སྐྱོན་འདི་བཅུ་ནི་རང་ཉིད་ཆོས་ཟབ་མོ་ལས་ཉམས་པའི་རྒྱུར་གསུངས་པས་སྐྱོན་བཅུ་འདི་དང་བྲལ་བ། ལྟ་བ་དང་སྒོམ་པ་དང་སྤྱོད་པ་དང་འབྲས་བུ་བཞི་ལ་ཡང༌། བདེན་གཉིས་ལས་བརྩམས་ནས་ཤན་འབྱེད་པ་ལ་མཁས་པ་སྟེ་ཡོན་ཏན་འདི་རྣམས་དང་ལྡན་པ་གཅིག་འཚལ་ལོ། །
སྨྲས་པ།
གྲུབ་མཐའི་དགག་སྒྲུབ་བྱེད་པའི་ཚེ། །
ཡོན་ཏན་འདི་རྣམས་ཚང་བ་གཅེས། །
རྒྱ་ཆེན་ཆོས་ཀྱི་སྤྱན་ལྡན་གཅེས། །
ཕྲག་དོག་ཕྱོགས་བྲལ་གཟུར་གནས་གཅེས། །
བདེན་གཉིས་རྣམ་དབྱེར་མཁས་པ་གཅེས། །
ལེགས་ཉེས་བླང་དོར་ཤེས་པ་གཅེས། །
འཁྲུལ་མེད་དཔང་པོར་འཛིན་པ་གཅེས། །
དབང་རྣོན་ཆོས་ཀྱི་རྗེས་འབྲང་གཅེས། །
ཐོས་བསམ་སྒོམ་པའི་ཤེས་རབ་གཅེས། །
ལུང་རིགས་མཁས་པར་ཤེས་པ་གཅེས། །
ཆོས་སྤོང་རྒྱུ་དང་བྲལ་བ་གཅེས། །
མདོར་ན་ཐུབ་གསུང་མི་འགལ་གཅེས། །
ཞེས་པ་བསྡུ་བའི་ཚིགས་སུ་བཅད་པའོ། །
འོ་ན་ཡོན་ཏན་འདི་ལྟ་བུ་དང་ལྡན་པ་དཀའ་འོ་སྙམ་ན། ཤིན་ཏུ་བདེན་མོད་ཀྱི་ཡོན་ཏན་འདི་རྣམས་དང་ལྡན་པ་དཀོན་པའི་ཕྱིར། གྲུབ་པའི་མཐའ་མ་ནོར་བར་རྟོགས་པའང་ཤིན་ཏུ་ཉིད་དུ་རབ་ཏུ་དཀོན་ནོ། །ཡོན་ཏན་འདི་རྣམས་དང་མི་ལྡན་པར་གྲུབ་མཐའི་གཤགས་རལ་བྱེད་པ་ནི། མུན་རྡོ་འཕེན་པ་དང་མཚུངས་པར་མཁས་པ་རྣམས་ཀྱི་བཞད་གད་ཀྱི་གནས་ཡིན་ནོ། །གྲུབ་མཐའི་གཤགས་རལ་བྱེད་པ་ལ་ཡོན་ཏན་འདི་རྣམས་རྗེས་མཐུན་པ་ཅིག་ཅེས་ཀྱང་ཚང་བར་དགོས། དེ་ལྟ་མིན་ན་གྲུབ་མཐའ་མངོན་སུམ་རྟོགས་པ་ལྟ་ཅི་སྨོས། ལུང་རིགས་ལ་མི་བརྟེན་ནས་རྗེས་དཔག་གིས་ཀྱང་རྟོགས་པར་མི་འགྱུར་རོ། །
དེ་ཡང་གྲུབ་མཐའ་རྣམ་པར་འབྱེད་པ་ལ་རང་ལུགས་ཀྱི་ཐུབ་པ་ཆེན་པོའི་གྲུབ་མཐའ་རྣམས་སྡེབ་སྦྱོར་དང་སྙན་ངགས་ཀྱིས་བཅིངས། དེ་ལས་ཕྱི་རོལ་ཏུ་གྱུར་པའི་གྲུབ་མཐའ་རྣམས་ཐལ་འགྱུར་གྱིས་དགག་ན་མཁས་པ་རྣམས་དགྱེས་པར་བྱེད་ནུས་མོད་ཀྱི། སྦྱོར་བྱུང་གི་ནན་ཏན་དམན་ཞིང་ལུང་རིགས་ལ་སྦྱངས་པ་མ་བྱས་པ་སྐྱེས་ཐོབ་ཀྱི་ཤེས་རབ་ཆུང་བ་རྣམས་ཀྱི་ཆོས་སྐལ་ཆད་པར་འགྱུར་པས། སྟོད་སྨད་འབྲེལ་ཆགས་པར་བྱ་བའི་ཕྱིར་བསྒྲུབ་བྱ་ཁོང་ན་གནས་པ་རྣམས་དངོས་སུ་ཐོན་པར་བཀོད། རང་བཟོའི་དུག་ཆུས་མ་འདྲེས་པར་བྱ་བའི་ཕྱིར་ལུང་རིགས་རྣམ་དག་གི་སྒྲུབ་བྱེད་སོ་སོར་བཀོད། ཐམས་ཅད་ཀྱིས་རྟོགས་པར་བྱ་བའི་ཕྱིར་ཤིན་ཏུ་གསལ་བའི་སྒོ་ནས་བཤད་པར་བྱའོ། །
དེ་ཡང་འཆད་པར་བྱེད་པའི་རྒྱུ་ནི། དེང་སང་གངས་ཅན་གྱི་ཁྲོད་འདི་ན། ས་སྐྱ་པ་དང་བུ་དོལ་གཉིས་ཀྱི་གྲུབ་མཐའི་ཁ་འཛིན་ཕྱོགས་ཕྱོགས་ཀྱི་བུ་སློབ་རྣམས་ཀྱིས་བྱས་ནས། གཅིག་གིས་གཅིག་གི་ལོག་རྟོག་འགོག་པར་རློམ་ཡང༌། ཐམས་ཅད་མཁྱེན་པའི་གསུང་ལ་དགག་པ་བྱེད་ཅིང་རྒྱལ་པོ་ངན་པའི་ཆོས་ལུགས་དང་འདྲ་བར། མི་རིགས་པས་རིགས་པ་འགོག་ལ་སྒྲོ་འདོགས་སྐུར་འདེབས་ཀྱི་མཐའ་གཉིས་སུ་ལྷུང་སྟེ། མཚམས་མེད་ལྔའི་སྡིག་ལས་ལྕི་བའི་ཆོས་སྤོང་གི་ལས་ཆེན་པོ་གསོག་པར་མཐོང་བ་དང༌། མི་རིགས་པ་མང་དུ་འཕེལ་ན་ཞིང་གི་ཡུར་བ་ལྟར་བསྟན་པ་ལ་གནོད་པ་བློས་མ་བཟོད་པར། དེ་རྣམས་བཟློག་པའི་ཕྱིར་དུ་གྲུབ་མཐའི་རྣམ་དབྱེ་འདི་བྱས་སོ། །