དཔལ་གསང་འདུས་པའི་སྒྲུབ་ཐབས་འབར་བའི་འོད་གསལ།
དཔལ་གསང་འདུས་པའི་སྒྲུབ་ཐབས་འབར་བའི་འོད་གསལ་ཞེས་བྱ་བ་བཞུགས།
ཨོཾ་སྭཱ་སྟི། མདོར་བྱས་ཀྱི་རྗེས་སུ་འབྲངས་པ། དཔལ་གསང་བ་འདུས་པའི་སྒྲུབ་ཐབས་འབར་བའི་འོད་གསལ་ཞེས་བྱ་བ་བླ་མ་ལ་ཕྱག་འཚལ་ལོ། །བདེ་ཆེན་རྡོ་རྗེ་འཛིན་ཞབས་ལ། །གུས་པའི་ཡིད་ཀྱི་བཏུད་བྱས་ནས། །དེ་ཉིད་བཞི་བཅུ་རྩ་དགུ་དང༌། །ཡན་ལག་དྲུག་ལྡན་རིམ་པ་བཤད། །དེ་ལ་འདིར་ངག་འདོན་ཙམ་བརྗོད་པར་བྱ་སྟེ །དེ་ཡང་སྐྱབས་འགྲོ་སེམས་བསྐྱེད་ཚད་མེད་བཞི་རྡོ་རྗེ་སེམས་དཔའི་སྒོམ་བཟླས་རྣམས་སྔོན་དུ་བཏང་སྟེ། ནང་མཆོད་བྱིན་གྱིས་བརླབས་ནས་འབྲུ་གསུམ་གྱིས་མྱང་ངོ༌། །ཨོཾ་སྭ་བྷཱ་ཝ་ཤུངྔྷཿསརྦ་དྷརྨཱ་སྭ་བྷཱ་ཝ་ཤུངྔྷོ་྅ཧཾ། སྟོང་པའི་ངང་ལས་སྐད་ཅིག་གིས་བདག་ཉིད་རྡོ་རྗེ་འཆང་ཆེན་པོ་སྐུ་མདོག་དཀར་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པས། རང་དང་འདྲ་བའི་ཡུམ་རྡོ་རྗེ་དབྱིངས་ཀྱི་དབང་ཕྱུག་མ་ལ་འཁྱུད་པ། ཞབས་རྡོ་རྗེའི་སྐྱིལ་ཀྲུང་གིས་པད་ཟླའི་གདན་ལ་བཞུགས་པ། མཚན་དང་དཔེ་བྱད་ཡོངས་སུ་རྫོགས་ཤིང༌། དར་དང་རིན་པོ་ཆེའི་རྒྱན་གྱིས་བརྒྱན་པའོ། །ཐུགས་ཀ་ནས་འོད་ཟེར་
འཕྲོས། སངས་རྒྱས་ཐམས་ཅད་སྤྱན་དྲངས། སྤྱི་གཙུག་ནས་ཞུགས་བྱང་ཆུབ་ཀྱི་སེམས་སུ་ཞུ་བ་རྡོ་རྗེའི་ལམ་ནས་ཡུམ་གྱི་པདྨར་བབས་པ་ཧཱུཾཾ་དུ་གྱུར། ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས། མི་བསྐྱོད་པར་གྱུར་པ་ཐུགས་ཀར་དྲངས། བཛྲ་དྷྲྀཀ་ཐུགས་ཀ་ནས་ཕྱིར་ཕྱུང་ཕྱོགས་བཅུར་སྤྲོས་སངས་རྒྱས་ཀྱི་མཛད་པ་ཐམས་ཅད་མཛད། སླར་འདུས་ཡེ་ཤེས་པ་དང་འདྲེས། རང་ལ་ཐིམ་པས་བདག་ཉིད་ཞེ་སྡང་རྡོ་རྗེ་ནག་པོ་རྩ་བའི་ཞལ་རབ་ཏུ་ཁྲོས་པ། ནག་དཀར་དམར་པའི་ཞལ་གསུམ། ཕྱག་དྲུག་གི་གཡས་རྡོ་རྗེ་འཁོར་ལོ་པདྨ། གཡོན་དྲིལ་བུ་རིན་ཆེན་རལ་གྲི་འཛིན་པ། རྡོ་རྗེའི་སྐྱིལ་མོ་ཀྲུང་གིས་པད་ཉིའི་གདན་ལ་བཞུགས་པར་གྱུར། ཕྱོགས་བཅུའི་ནམ་མཁའ་ལ་པདྨ་དང་ཉི་མའི་དཀྱིལ་འཁོར་གྱི་གདན་རེ་རེ། རང་གི་སྙིང་ག་ནས་ཧཱུཾ་ཡིག་བཅུ་སྤྲོས། གདན་དེ་རྣམས་ཀྱི་སྟེང་དུ་འཁོད། ཧཱུཾ་དེ་རྣམས་ལས་འོད་འཕྲོས། ཕྱོགས་བཅུའི་བགེགས་དང་གནོད་བྱེད་ཐམས་ཅད་ཚར་བཅད།
ཚུར་འདུས་ཏེ་ཐིམ། དེ་རྣམས་ཡོངས་སུ་གྱུར་པ་ལས། ཤར་དུ་གཤིན་རྗེ་མཐར་བྱེད། ལྷོར་ཤེས་རབ་མཐར་བྱེད། ནུབ་ཏུ་རྟ་མགྲིན། བྱང་དུ་བདུད་རྩི་འཁྱིལ་པ། ཤར་ལྷོར་མི་གཡོ་བ། ལྷོ་ནུབ་ཏུ་འདོད་རྒྱལ། ནུབ་བྱང་དུ་དབྱུག་སྔོན་ཅན། བྱང་ཤར་དུ་སྟོབས་པོ་ཆེ། སྟེང་དུ་གཙུག་ཏོར་འཁོར་ལོས་སྒྱུར་བ། འོག་ཏུ་གནོད་མཛེས་རྒྱལ་པོ་རྣམས་འཁོད་པར་གྱུར། འོག་གི་གནོད་མཛེས་ལས་གནོད་མཛེས་གཉིས་པ་འོངས་ཏེ་མདུན་དུ་འདུག་ནས། བདག་གིས་ཅི་བགྱི་ཞེས་བཀའ་ནོད་པ་ལ། ཨོཾ་སུམྦྷ་ནི་སུམྦྷ་ཧཱུཾ། གྲྀཧྣ་གྲྀཧྣ་ཧཱུཾ། གྲྀཧྣ་པཱ་ཡ་གྲྀཧྣ་པཱ་ཡ་ཧཱུཾ། ཨཱ་ན་ཡ་ཧོ་བྷ་ག་ཝན་བིདྱ་རཱ་ཛ་ཧཱུཾ་ཕཊ། ཅེས་བཀའ་བསྒོས་པས། གནོད་མཛེས་དེ་ཉིད་གནོད་མཛེས་བཅུར་གྱུར་ཏེ། གཡས་དང་པོ་ལྕགས་ཀྱུ་ཐོགས་པ་རྣམས་ཀྱིས། ཕྱོགས་བཅུའི་བགེགས་རྣམས། ཕྱོགས་སྐྱོང་བཅུའི་རྣམ་པར་གྱུར་པ་རྣམས་ཞགས་པས་བཅིངས། ལྕགས་ཀྱུས་བཏབ། ལྷག་མ་མཚོན་ཆ་སྣ་ཚོགས་པས་སྡིགས་ཏེ་བཀུག་ནས་ཕྱི་རོལ་ཏུ་ཧཱུཾ་ལས་བྱུང་བའི་འབྲུབ་ཁུང་ཟབ་མོ་རྣམས་སུ་བཅུག་པར་གྱུར། བདུད་རྩི་འཁྱིལ་བ་ལས་བདུད་རྩི་འཁྱིལ་བ་ལྟེ་བ་མན་ཆད་ཕུར་བུའི་དབྱིབས་ཅན་འབར་བའི་འཕྲེང་བ་འཁྲུག་པ་བཅུ་སྤྲོས་ཏེ། བགེགས་རྣམས་ཀྱི་སྤྱི་བོར་ཟུག ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུཥྟཾ་ཕཊ་ཕཊ། ཀཱི་ལ་ཡ་ཀཱི་ལ་ཡ། སརྦ་པཱ་པཾ་ཕཊ་ཕཊ་ཧཱུཾ་ཧཱུཾ་ཧཱུཾ། བཛྲ་ཀི་ལ་བཛྲ་ངྷ་རོ་ཨཱ་ཛྙ་པ་ཡ་ཏི་སརྦ་བིགྷ་ནན། ཀཱ་ཡ་ཝཱཀ་ཙིཏྟ་བཛྲ།
ཀཱི་ལ་ཡ་ཧཱུཾ་ཧཱུཾ་ཧཱུཾ་ཕཊ་ཕཊ། ཅེས་གནོད་མཛེས་ལ་བཀའ་བསྒོས་པས། དེ་ཉིད་རྡོ་རྗེ་ཐོ་བ་ཐོགས་པར་གྱུར་ཏེ། ཕུར་བུའི་སྤྱི་བོ་ནས་བརྡུངས། བགེགས་རྣམས་ཀྱི་སྤྱི་བོ་ནས་རྐང་མཐིལ་གྱི་བར་དུ་ཕུག ལུས་ངག་ཡིད་གསུམ་གྱི་གཡོ་བ་ཆད་དེ་འོད་གསལ་གྱི་ངང་དུ་ཐིམ། གནོད་མཛེས་རྣམས་འོག་གི་གནོད་མཛེས་ལ་ཐིམ། ཁྲོ་བོ་དང་ཕུར་བུ་རྣམས་ལས་རྡོ་རྗེའི་མེ་ལྕེ་ཕྱོགས་བཅུར་སྤྲོད་པས། བགེགས་ཀྱི་ལྷག་མ་ཐམས་ཅད་ཚིག་ཅིང་བྲོས། མེ་ལྕེ་སླར་འདུས་ནས། མེའི་ར་གུར་དུ་གྱུར། ཨོཾ་བཛྲ་ཛྭ་ལ་ཨ་ན་ལཱརྐ་ཧཱུཾ་ཧཱུཾ་ཧཱུཾ། ཊཀྐི་ཧཱུཾ་ཛཿརྡོ་རྗེའི་ར་བར་གྱུར། འོག་ཏུ་ཧཱུཾ་གི་འོད་ཟེར་འཕྲོ་འདུ་ལས། རྡོ་རྗེའི་ས་གཞི་དང༌། སྟེང་དུ་ཧཱུཾ་ལས་རྡོ་རྗེའི་གུར་དུ་གྱུར། རང་གི་སྤྱི་བོར་ཟླ་བ་ལ་ཨོཾ་དཀར་པོ། མགྲིན་པར་པདྨ་ལ་ཨཱཿདམར་པོ། སྙིང་གར་ཉི་མ་ལ་ཧཱུཾ་སྔོན་པོ། ཨོཾ་ཨཱཿཧཱུཾ་ལན་མང་དུ་བཟླ། དེ་དག་ནི་བསྲུང་བའི་འཁོར་ ལོའོ། །དངོས་པོ་མེད་ལ་སྒོམ་པ་མེད། །བསྒོམ་པར་བྱ་བ་སྒོམ་པ་མིན། །དེ་ལྟར་དངོས་པོ་དངོས་མེད་པས། །སྒོམ་པ་དམིགས་སུ་མེད་པའོ། །གང་ཡང་མི་དམིགས་ཏེ་སྟོང་པ་ལ་ཅུང་ཟད་མཉམ་པར་གཞག ཡེ་ཤེས་ཀྱིས་བསྐྱེད་པའོ། །སྟོང་པའི་ངང་ལས་ཆོས་ཀྱི་འབྱུང་གནས་དཀར་པོ་ཟུར་གསུམ་པ་གདེང་ཀ་གྱེན་དུ་ཕྱོགས་པ་ཡངས་ཤིང་རྒྱ་ཆེ་བའི་དབུས་སུ། སྣ་ཚོགས་པདྨའི་ལྟེ་བར། ཡཾ་ལས་རླུང་གི་དཀྱིལ་འཁོར་སྔོན་པོ་ཟླ་གམ་དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ། དེའི་སྟེང་དུ་བཾ་ལས་ཆུའི་དཀྱིལ་འཁོར་
དཀར་པོ་ཟླུམ་པོ། དེའི་སྟོང་དུ་ལཾ་ལས་སའི་དཀྱིལ་འཁོར་སེར་པོ་གྲུ་བཞི། དེ་ལྟར་དཀྱིལ་འཁོར་བཞི་པོ་རེ་རེ་ཞིང༌། སྟེང་འོག་གི་ལོགས་གཉིས་སུ། ཧཱུཾ་གཉིས་ལས་བྱུང་བའི་རྡོ་རྗེ་རང་མདོག་དང་མཚུངས་པ་གཉིས་གཉིས་ཀྱིས་མཚན་པར་གྱུར། དཀྱིལ་འཁོར་བཞི་པོ་གཅིག་ཏུ་འདྲེས་པ་ལས། སྣ་ཚོགས་རྡོ་རྗེའི་རང་བཞིན་གྱི་རྡོ་རྗེའི་ས་གཞིར་གྱུར། དེ་དང་དུས་མཉམ་དུ་རྭ་གུར་མེ་ལྕེའི་འཕྲེང་བ་དང་བཅས་པའི་བསྲུང་པའི་འཁོར་ལོ་སྔོན་བཞིན་དུ་གྲུབ་པར་གྱུར། སྣ་ཚོགས་རྡོ་རྗེའི་སྟེང་དུ་བྷྲུཾ་ལས་ཐར་པ་ཆེན་པོའི་ཁང་བཟང་གཞལ་ཡས་ཁང་རིན་པོ་ཆེ་སྣ་ལྔ་ལས་རྫོགས་པར་གྲུབ་པ། ཐུབ་པའི་དབང་པོའི་འོད་ཟེར་གྱིས་མཐའ་ཡས་པའི་ཕྱོགས་ཀུན་དུ་ཁྱབ་པ། གྲུ་བཞི་སྒོ་བཞི། ཕྱི་ནས་རིམ་པ་བཞིན་དུ། དཀར་སེར་དམར་ལྗང་སྔོ་བའི་རྩིགས་པ་རིམ་པ་ལྔ་དང་ལྡན་པ། དེའི་སྟེང་དུ་རིན་པོ་ཆེའི་ཕ་གུ་དམར་པོས་བསྐོར་བའི་སྟེང་ན་གསེར་གྱི་སྐ་རགས་བཞིའི་ཕྱི་ངོས་སུ་ཆུ་སྲིན་གྱི་ཁ་ནས་འཕྱང་བའི་དྲ་བ་དྲ་ཕྱེད། དེའི་སྟེང་དུ་བྱ་འདབ་ལས་འཕྱང་བའི་ཤར་བུ། སྟེང་དུ་མདའ་ཡབ་མཆོད་རྟེན་གྱི་དབྱིབས་ཅན་གྱིས་ཡོངས་སུ་བསྐོར་བ་ལ། རྒྱལ་མཚན་དང་བ་དན་ལ་སོགས་པ་རྒྱན་ཐམས་ཅད་ཀྱིས་རྣམ་པར་བརྒྱན་པ། རྩིག་པའི་ཕྱི་འགྲམ་འདོད་ཡོན་གྱི་སྣམ་བུ་དམར་པོས་བསྐོར་བ་ལ། བཞུགས་སྟངས་དང་ཁ་དོག་སྣ་ཚོགས་པའི་གཟུགས་མ་རྣམས་ཀྱིས་མཆོད་རྫས་སྣ་ཚོགས་པ་
ཐོགས་ནས་བཅོམ་ལྡན་འདས་ལ་མཆོད་པ། སྒོ་བཞིའི་མདུན་དུ་སྟེགས་བུ་གྲུ་བཞི་པའི་སྟེང་དུ་བུམ་པ་ལ་གནས་པའི་ཀ་བ་བཞི་བཞིས་བཏེགས་པའི་རྟ་བབས་སྣམ་བུ་བཅུ་གཅིག་གི་རྩེ་མོར། པདྨ་ལ་གནས་པའི་འཁོར་ལོ་དང། གཡས་གཡོན་དུ་རི་དྭགས་ཕོ་མོས་བརྒྱན་པ། སྒོ་དང་སྒོ་ཁྱུད་ཀྱི་ཕྱི་མཚམས་དང༌། གྲྭ་བཞིར་ཟླ་ཕྱེད་ལ་གནས་པའི། རིན་པོ་ཆེ་དམར་པོ་ལ་རྡོ་རྗེས་མཚན་པའི་བརྒྱན་པ། རྟ་བབས་ཀྱི་གཡས་གཡོན་དུ་བུམ་པ་བཟང་པོ་དང་དཔག་བསམ་གྱི་ཤིང་དང༌། རྒྱལ་སྲིད་སྣ་བདུན་དང༌། སྤྲིན་གྱི་གསེབ་ནས་བྱུང་བའི་ལྷ་མོ་མེ་ཏོག་གི་འཕྲེང་བ་ཐོགས་པ་རྣམས་ཀྱིས་བརྒྱན་པ། གཞལ་ཡས་ཁང་གི་ནང་དཀྱིལ་འཁོར་གྱི་ཕྱེད་ཀྱི་ཚད་ཀྱི་ཕྱི་ངོས་སུ་འོད་ཟེར་རྣམ་པ་ལྔའི་འཕྲེང་བས་བསྐོར་བའི་ནང་དུ་རྡོ་རྗེ་རྩེ་གསུམ་པས་ཟླུམ་པོར་བསྐོར་བ་ལ་བརྟེན་པའི་ཀ་བ་བརྒྱད་དང་ལྡན་པ་སྟེ། ཤར་དུ་འཁོར་ལོ། ལྷོར་རིན་པོ་ཆེ། ནུབ་དུ་པདྨ། བྱང་དུ་རལ་གྲིས་མཚན་པའི་ཀ་བ་གཉིས་གཉིས་ཀྱིས་བཏེག་པའི་སྟེང་རྡོ་རྗེའི་གདུང་བཞིས་མིག་མངས་རིས་སུ་བྲིས་ཤིང་མཛེས་པར་ཕུབ་པ། དབུས་ཕྱུར་བུར་གྱུར་པའི་རྩེ་མོ་རྡོ་རྗེ་རིན་པོ་ཆེའི་ཏོག་གི་སྤྲས་པ། རིམ་པ་གཉིས་པའི་གྲྭ་བཞིའི་གཡས་གཡོན་དུ་བཀྲ་ཤིས་ཀྱི་བུམ་པ་བརྒྱད་དང་བཅས་པ། མཆོད་པའི་སྤྲིན་ཐམས་ཅད་ཀྱིས་མངོན་པར་བརྒྱན་པའི་ཁང་བཟང་དམ་པ། ནང་གི་སྟེང་འོག་གི་གཞི་རྣམས། ཤར་དཀར། ལྷོ་སེར།
ནུབ་དམར། བྱང་ལྗང༌། དབུས་སྔོ་བའི་ནང་ལེ་ཚེ་དགུར་གྱུར་པ། ལྷའི་གནས་ཐམས་ཅད་དུ་སྣ་ཚོགས་པདྨའི་གདན་རེ་རེ། གཙོ་བོའི་གནས་དང༌། ཁྲོ་བོ་བཅུའི་གནས་སུ་ཉི་མ། གཞན་ཤར་ཕྱོགས་པ་རྣམས་ལ་ཟླ་བ། མཱ་མ་ཀཱི་ལ་རྡོ་རྗེ། གཞན་ལྷོ་ཕྱོགས་པ་རྣམས་ལ་རིན་པོ་ཆེ། ནུབ་ཕྱོགས་པ་རྣམས་ལ་ཆུ་སྐྱེས་དམར་པོ། བྱང་ཕྱོགས་པ་རྣམས་ལ་སྣ་ཚོགས་རྡོ་རྗེའི་གདན་རྣམས་སུ་གྱུར། དེ་ནས་ལྷག་མོས་ཀྱི་དཀྱིལ་འཁོར་བསྐྱེད་པ་ནི། དབུས་ཀྱི་གདན་གྱི་སྟེང་དུ་བདག་ཉིད་རྡོ་རྗེ་འཆང་སྔོན་པོ། སྔོ་དཀར་དམར་པའི་ཞལ་གསུམ་ཕྱག་དྲུག་གི་གཡས་རྡོ་རྗེ་འཁོར་ལོ། པདྨ། གཡོན་དྲིལ་བུ། རིན་ཆེན། རལ་གྲི་འཛིན་པ། རྡོ་རྗེའི་སྐྱིལ་མོ་ཀྲུང་གིས་བཞུགས་པ། དར་དང་རིན་པོ་ཆེས་བརྒྱན་པ། རང་དང་མཚུངས་པའི་ཡུམ་རེག་བྱ་རྡོ་རྗེ་མས་འཁྱུད་པ་ཐུགས་དཀར་མི་བསྐྱོད་པ། ལེ་ཚེ་བརྒྱད་ལ་ཤར་དུ་རྣམ་པར་སྣང་མཛད། ལྷོར་རིན་ཆེན་འབྱུང་ལྡན། ནུབ་ཏུ་འོད་དཔག་མེད། བྱང་དུ་དོན་ཡོད་གྲུབ་པ་རྣམས་མི་བསྐྱོད་པའི་དབུ་རྒྱན་ཅན། ཤར་ལྷོར་སྤྱན་མ། ལྷོ་ནུབ་ཏུ་མཱ་མ་ཀཱི། ནུབ་བྱང་དུ་གོས་དཀར་མོ། བྱང་ཤར་དུ་སྒྲོལ་མ་རྣམས་རིམ་པ་བཞིན་དུ། རྟག་པ། མི་བསྐྱོད་པ། རྡོ་རྗེ་ཆོས། གདོན་མི་ཟ་བ་རྣམས་ཀྱི་ཅོད་པན་ཅན། རིམ་པ་གཉིས་པའི་ཤར་ལྷོར་གཟུགས་རྡོ་རྗེ་མ། ལྷོ་ནུབ་ཏུ་སྒྲ་རྡོ་རྗེ་མ། ནུབ་བྱང་དུ་དྲི་རྡོ་རྗེ་མ། བྱང་ཤར་དུ་རོ་རྡོ་རྗེ་མ་རྣམས་ཀྱང་རིམ་པ་
བཞིན། རྟག་པ་ལ་སོགས་པའི་ཅོད་པན་ཅན་ནོ། ། རིམ་པ་གསུམ་པའི་ལྷ་རྣམས་ལ་ཤར་གྱི་གཡས་སུ་བྱམས་པ། གཡོན་དུ་སའི་སྙིང་པོ་གཉིས། རྣམ་པར་སྣང་མཛད་ཀྱི་ཅོད་པན་ཅན། ལྷོའི་གཡས་སུ་ཕྱག་ན་རྡོ་རྗེ་དང༌། གཡོན་དུ་ནམ་མཁའི་སྙིང་པོ་གཉིས། དཀོན་མཆོག་དཔལ་གྱི་ཅོད་པན་ཅན། ནུབ་ཀྱི་གཡས་སུ་འཇིག་རྟེན་དབང་ཕྱུག་དང༌། གཡོན་དུ་འཇམ་དཔལ་གཉིས། ཚེ་དཔག་མེད་ཀྱི་ཅོད་པན་ཅན། བྱང་གི་གཡས་སུ་སྒྲིབ་པ་རྣམ་སེལ་དང༌། གཡོན་དུ་ཀུན་ཏུ་བཟང་པོ་གཉིས། དོན་ཡོད་གྲུབ་པའི་ཅོད་པན་ཅན། ཤར་སྒོར་གཤིན་རྗེ་གཤེད་རྣམ་སྣང་གི ལྷོ་སྒོར་གཞན་གྱི་མི་ཐུབ་པ་རིན་འབྱུང་གི ནུབ་སྒོར་རྟ་མགྲིན་འོད་དཔག་མེད་ཀྱི། བྱང་སྒོར་བགེགས་མཐར་བྱེད་དོན་གྲུབ་ཀྱི། ཤར་ལྷོར་མི་གཡོ་བ་རྟག་པའི། ལྷོ་ནུབ་ཏུ་འདོད་རྒྱལ་རིན་ཆེན་ཏོག་གི ནུབ་བྱང་དུ་དབྱུག་སྔོན་ཅན་འོད་དཔག་མེད་ཀྱི། བྱང་ཤར་དུ་སྟོབས་པོ་ཆེ་དོན་ཡོད་རྒྱལ་པོའི་སྟེང་དུ་གཙུག་ཏོར་འཁོར་ལོས་སྒྱུར་བ་དང༌། འོག་ཏུ་གནོད་མཛེས་གཉིས། ཞེ་སྡང་རྡོ་རྗེའི་ཅོད་པན་ཅན་རྣམས་འཁོད་པར་གྱུར། རང་གི་སྙིང་ཀ་ནས་འོད་ཟེར་འཕྲོས་སེམས་ཅན་ཐམས་ཅད་བཀུག་ནས། དཀྱྀལ་འཁོར་གྱི་ཕྱོགས་བཞི་ནས། རྡོ་རྗེ་སེམས་དཔའི་འཇུག་པས་ཐོགས་པ་མེད་པར་ཞུགས་པ་ལ། རྗེས་ཆགས་ལས་བྱུང་བའི་བྱང་ཆུབ་སེམས་ཀྱི་འོད་ཟེར་གྱིས་དབང་བསྐུར་བས། སྡིག་སྒྲིབ་ཐམས་ཅད་དག དེ་
བཞིན་གཤེགས་པ་ཐམས་ཅད་ཀྱི་བདེ་བ་དང་ཡིད་བདེ་བ་ཐོབ་ནས། རྡོ་རྗེ་སེམས་དཔར་གྱུར་ཏེ། རང་རང་གི་ཞིང་དུ་གཤེགས་པར་གྱུར་ཏོ། །དེ་ཡན་ཆད་ནི་རྣལ་འབྱོར་གྱི་སྔོན་དུ་འགྲོ་བའི་ཏིང་ངེ་འཛིན་ནོ། །དེ་ནས་ལྷག་མོས་དེ། རང་ལུས་ལ་བསྡུ་བ་ནི། རང་གི་སྙིང་གའི་ས་བོན་ལས་འོད་ཟེར་འཕྲོས་པས། དཀྱིལ་འཁོར་གྱི་ལྷ་ཚོགས་ཐམས་ཅད་རང་ལུས་ལ་ཞུགས། སྤྱི་བོར་རྣམ་སྣང་དང་སྒྲོལ་མ། མགྲིན་པར་འོད་དཔག་མེད་དང་གོས་དཀར་མོ། སྙིང་གར་མི་བསྐྱོད་པ་དང་མཱ་མ་ཀཱི་དང་འཇམ་དཔལ། ལྟེ་བར་རིན་འབྱུང་དང་སྤྱན་མ། འདོམས་པར་དུ་དོན་གྲུབ། མིག་ཏུ་ས་སྙིང་དང་གཟུགས་རྡོ་རྗེ་མ། རྣ་བར་ཕྱག་རྡོར་དང་སྒྲ་རྡོ་རྗེ་མ། སྣར་ནམ་སྙིང་དང་དྲི་རྡོ་རྗེ་མ། ལྕེ་ལ་སྤྱན་རས་གཟིགས་དང་རོ་རྡོ་རྗེ་མ། གསང་སྒོར་སྒྲིབ་སེལ་དང་རེག་རྡོ་རྗེ་མ། ཚིགས་རྣམས་ལ་ཀུན་བཟང༌། སྤྱི་གཙུག་ཏུ་བྱམས་པ། ཕྱག་གཡས་ལ་ཡ་མཱན་ཏ་ཀ གཡོན་ལ་པྲཛྙཱན་ཏ་ཀ ཞལ་ལ་རྟ་མགྲིན། གསང་བར་བདུད་རྩི་འཁྱིལ་བ། དཔུང་བ་གཡས་པར་མིག་གཡོ་བ། གཡོན་པར་འདོད་རྒྱལ། པུས་མོ་གཡས་པར་དབྱུག་སྔོན་ཅན། གཡོན་པར་སྟོབས་པོ་ཆེ། སྤྱི་བོར་གཙུག་ཏོར། རྐང་མཐིལ་གཉིས་སུ་གནོད་མཛེས་རྣམས་འཁོད་པར་གྱུར། ལྷག་མོས་དོན་དམ་དུ་བསྡུ་བ་ནི། རྣམ་སྣང་སྤྱན་མ་གཟུགས་དང་བྱམས་པ་དང༌། །ས་སྙིང་གཤིན་
དགྲ་མི་གཡོ་འོད་གསལ་ཐིམ། ། རིན་འབྱུང་བདག་མ་སྒྲ་དང་ཕྱག་རྡོར་དང༌། །གཞན་གྱིས་མི་ཐུབ་འདོད་རྒྱལ་འོད་གསལ་ཐིམ། །དཔག་མེད་གོས་དཀར་དྲི་དང་ནམ་མཁའི་སྙིང༌། །རྟ་མགྲིན་དབྱུག་སྔོན་འོད་གསལ་ངང་དུ་ཐིམ། །དོན་གྲུབ་སྒྲོལ་མ་རོ་དང་འཇིག་རྟེན་མགོན། །སྒྲིབ་སེལ་ཀུན་བཟང་བདུད་རྩི་འཁྱིལ་བ་དང༌། །སྟོབས་པོ་ཆེ་རྣམས་འོད་གསལ་དབྱིངས་སུ་ཐིམ། །གཙུག་ཏོར་གནོད་མཛེས་རེག་བྱ་འཇམ་དབྱངས་ལ། །འཇམ་དཔལ་མི་བསྐྱོད་པ་ལ་ཐིམ་པ་དང༌། །མི་བསྐྱོད་པ་ནི་གཞི་ལུས་རྡོར་སེམས་ལ། །དེ་ཡང་འོད་གསལ་ངང་དུ་ཞུགས་པར་གྱུར། །དེ་ནས་ཐམས་ཅད་སྟོང་པ་བདེ་བ་ཆེན་པོ་རང་བཞིན་གྱི་རྣམ་པར་དག་པར་མོས། ཨོཾ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནི་བྱང་ཆུབ་རྣམ་པ་ལྔ་ལས་དེ་བཞིན་ཉིད་ལས་བྱང་ཆུབ་པའོ། །སྟོང་པའི་ངང་ལས་དབུས་ཀྱི་གདན་གྱི་སྟེང་གི་ནམ་མཁའ་ལ། ཧཱུཾ་ནག་པོ་ལས་ཉི་མའི་དཀྱིལ་འཁོར། དེའི་སྟེང་དུ་ཨོཾ་དཀར་པོ་ལས་ཟླ་བའི་དཀྱིལ་འཁོར། དེའི་སྟེང་དུ་ཨཱཿདམར་པོ་ལས་འདམ་སྐྱེས་འཆར་ཀའི་མདོག་ཅན་འདབ་མ་བརྒྱད་པ། དེའི་སྟེང་དུ་ཨོཾ་དཀར་པོ། ཨཱཿདམར་པོ། ཧཱུཾ་སྔོན་པོ་རྣམས་སྟེང་ནས་སྟེང་དུ་བརྩེགས་པར་གྱུར། ཧཱུཾ་ཨཱཿལ་ཐིམ། ཨཱཿཨོཾ་ལ་ཐིམ། ཨོཾ་པདྨ་ལ་ཐིམ། པདྨ་དང་ཉི་མ་ཟླ་བ་ལ་ཐིམ། སྣོད་བཅུད་ཐམས་
ཅད་ཀྱང་དེ་ལ་རབ་ཏུ་ཞུགས་ཏེ། སེམས་ཙམ་ཟླ་བར་སྣང་བའོ། །ཨོཾ་དྷརྨཱ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། ཟླ་བ་ལས་བྱང་ཆུབ་པའོ། །ལྷག་མོས་ལུས་ལ་བསྡུ་བ་ནས། དེའི་བར་ནི་རྣལ་འབྱོར་དང་པོའོ། །ཟླ་བའི་སྟེང་དུ་ཨོཾ་ཨཱཿཧཱུཾ་བརྩེགས་པའོ། །ས་བོན་ལས་བྱང་ཆུབ་པའོ། །དེ་ལས་འོད་འཕྲོས་སངས་རྒྱས་སྲས་བཅས་ཐམས་ཅད་རིགས་ལྔའི་རྣམ་པར་སྤྱན་དྲངས་ཏེ་ཐིམ་པ་ལས། རྡོ་རྗེ་དཀར་པོ་རྩེ་ལྔ་པ་ལྟེ་བ་ལ། ཨོཾ་ཨཱཿཧཱུཾ་དཀར་དམར་མཐིང་ཀས་མཚན་པ། བཛྲ་ཨཱཏྨ་ཀོ྅ཧཾ། ཕྱག་མཚན་ལས་བྱང་ཆུབ་པའོ། །དེ་ཡོངས་སུ་གྱུར་པ་ལས། བདག་ཉིད་དང་པོའི་མགོན་པོ་སྐུ་མདོག་དཀར་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པ། རྡོ་རྗེའི་སྐྱིལ་མོ་ཀྲུང་གི་པད་ཟླའི་གདན་ལ་བཞུགས་པ། མཚན་དང་དཔེ་བྱད་ཡོངས་སུ་རྫོགས་ཤིང༌། དར་དང་རིན་པོ་ཆེའི་རྒྱན་གྱིས་བརྒྱན་པའོ། །སྐུ་རྫོགས་པ་ལས་བྱང་ཆུབ་པའོ། །དེའི་ཐུགས་ཀ་ནས་འོད་ཟེར་འཕྲོས། མཁའ་དབྱིངས་གང་བའི་དེ་བཞིན་གཤེགས་པ་ཐམས་ཅད་རྗེས་ཆགས་ཀྱིས་བྱང་ཆུབ་སེམས་སུ་ཞུ་བ་ལས་བྱུང་བའི་རྒྱལ་བ་མི་བསྐྱོད་པ་དཔག་ཏུ་མེད་པ་རྣམས་ཀྱིས། སེམས་ཅན་ཐམས་ཅད་བྱིན་གྱིས་བརླབས་ནས། དེ་བཞིན་གཤེགས་པ་ཐམས་ཅད་ཀྱི་བདེ་བ་དང་ཡིད་བདེ་བ་ཐོབ་པར་གྱུར། དེ་དག་ནི་རྗེས་སུ་རྣལ་འབྱོར་རོ། །ཚུར་འདུས་གཞལ་ཡས་ཁང་གི་ནང་དུ་
གཅིག་ཏུ་འདྲེས་ནས། བདག་ཉིད་དང་གཉིས་སུ་མེད་པར་གྱུར་པ་ལས། རྡོ་རྗེ་སེམས་དཔའ་སྤྲུལ་པའི་སྐུ་སྔོན་པོ་སྔོ་དཀར་དམར་བའི་ཞལ་གསུམ་ནས། རིན་པོ་ཆེས་བརྒྱན་པར་གྱུར། དེ་ནས་ལུས་དཀྱིལ་བསྒོམ་པ་ནི། ལུས་ནི་གཞལ་ཡས་ཁང་དུ་གྱུར། སངས་རྒྱས་ཀུན་གྱིས་ཡང་དག་བརྟེན། ། ཟུར་བཞི་པོ་ནི་མདུན་རྒྱབ་དང༌། །གཡས་དང་གཡོན་གྱི་དབྱེ་བས་སོ། །སྟེང་འོག་སྒོ་ཡི་དབྱེ་བ་ཡིས། །སྒོ་བཞི་ཞེས་ནི་བཤད་པ་ཡིན། ལྟེ་གསང་སྙིང་ག་གདོང་སྟེ་བཞི། །སྣ་ཡི་རྩེ་མོའི་དབྱིབས་ཀྱིས་ནི། །རྟ་བབས་བཞིར་ནི་བརྗོད་པར་བྱ། །དྲ་བ་རྒྱུ་མར་ཡང་དག་བཤད། །རྒྱུས་པར་གྱུར་པ་དྲ་བ་ཕྱེད། །ཆ་ནི་ཟླ་བ་ཕྱེད་པ་དང༌། །བུམ་པ་ལྟོ་བར་ཡང་དག་བཤད། །རྗེ་ངར་བརླ་དཔུང་ལག་ངར་ནི། །ཀ་པ་བརྒྱད་དུ་རྣམ་པར་བཤད། །མིག་གི་རྣམ་ཤེས་མེ་ལོང་སོགས། སྒྲ་ཡི་རྣམ་ཤེས་བ་དན་དང༌། སྣ་ཡི་རྣམ་ཤེས་མེ་ཏོག་འཕྲེང༌། །རིན་ཆེན་ཕ་གུ་ལྕེ་རྣམ་ཤེས། །ལུས་ཀྱི་རྣམ་ཤེས་དར་འཕན་དང༌། །ཡིད་ཀྱི་རྣམ་ཤེས་རི་དྭགས་སོ། །མིག་ནི་འཁོར་ལོའི་མཚན་མ་དང༌། །རྣ་བ་ཀུན་ནས་རྡོ་རྗེ་རྣམས། །སྣ་ནི་བ་དན་དུ་ནི་བཤད། ། ལྕེ་ནི་དྲིལ་བུ་རུ་ནི་གསུངས། །རྔ་ཡབ་ལ་སོགས་རྣམ་དག་པ། །ལུས་ཀྱི་ཚོགས་ཤེས་བྱ་བར་བཤད། །ཡིད་ཀྱི་དབུས་ཀྱི་པདྨར་གསུངས། །རྣམ་རྟོག་རླུང་ནི་ཡང་དག་བསྟན། །ཡེ་ཤེས་ལྔ་ནི་རྣམ་
དག་པ། །རེ་ཁ་ལྔར་ནི་ཡང་དག་བརྗོད། །ཕུང་པོ་ལྔ་ནི་ཡང་དག་ལྔ། །རྣམ་དག་ཁ་དོག་ལྔ་ནི་བྱེད། །དེ་དག་གཞལ་ཡས་ཁང་དུ་བསྒོམ། །སྤྱྀ་བོར་གཟུགས་ཕུང་ཨོཾ་ལས་རྣམ་པར་སྣང་མཛད། མགྲིན་པར་འདུ་ཤེས་ཨཱཿལས་འོད་དཔག་མེད། སྙིང་གར་རྣམ་ཤེས་ཧཱུཾ་ལས་མི་བསྐྱོད་པ། ལྟེ་བར་ཚོར་བ་སྭཱ་ལས་རིན་ཆེན་འབྱུང་ལྡན། འདོམ་པར་དུ་འདུ་བྱེད་ཧཱ་ལས་དོན་ཡོད་གྲུབ་པ། སླར་ཡང་ལྟེ་བར་ས་ཁམས་ལཾ་ལས་སྤྱན་མ། སྙིང་ཁར་ཆུ་ཁམས་མཾ་ལས་མཱ་མ་ཀཱི། མགྲིན་པར་མེ་ཁམས་པཾ་ལ་གོས་དཀར་མོ། སྤྱྀ་བོར་རླུང་ཁམས་ཏཱཾ་ལས་སྒྲོལ་མ་རྣམས། དེ་བཞིན་གཤེགས་པ་རྣམས་ཀྱི་མདུན་དུ་བཞུགས་པར་གྱུར། མིག་གི་དབང་པོ་ ལས་སའི་སྙིང་པོ། རྣ་བའི་དབང་པོ་ཨོཾ་ལས་ཕྱག་ན་རྡོ་རྗེ། སྣའི་དབང་པོ་ཨོཾ་ལས་ནམ་མཁའ་སྙིང་པོ། ལྕེའི་དབང་པོ་ཨོཾ་ལས་འཇིག་རྟེན་དབང་ཕྱུག སྙིང་གར་ཡིད་དབང་ཧཱུཾ་ལས་འཇམ་དཔལ། གསང་སྒོར་ལུས་དབང་ཨོཾ་ལས་སྒྲིབ་སེལ། ལུས་ཀྱི་ཚིགས་མཚམས་རྣམས་སཾ་ལས་ཀུན་ཏུ་བཟང་པོ། སྤྱྀ་གཙུག་ཏུ་རྩ་རྒྱུས་མཻཾ་ལས་བྱམས་པ། སའི་སྙིང་པོ་སོགས་དྲུག་ལ་ཤེས་རབ་མས་འཁྱུད་པ་ནི། མིག་གི་སྒོར་ཡུལ་གཟུགས་ཛཿལས་གཟུགས་རྡོ་རྗེ་མ། རྣ་བའི་སྒོར་ཡུལ་སྒྲ་ཧཱུཾ་ལས་སྒྲ་རྡོ་རྗེ་མ། སྣའི་སྒོར་ཡུལ་དྲི་བཾ་ལས་དྲི་རྡོ་རྗེ་མ། ལྕེ་རྩེར་ཡུལ་རོ་ཧོཿལས་རོ་རྡོ་རྗེ་མ། རྟགས་ཀྱི་སྒོར་ཡུལ་རེག་བྱ་ཁཾ་ལས་རེག་བྱ་རྡོ་རྗེ་མ། ལག་པ་གཡས་པར་ཧཱུཾ་ལས་གཤིན་རྗེ་གཤེད། གཡོན་པར་ཧཱུཾ་ལས།
གཞན་གྱི་མི་ཐུབ་པ། ཁར་ཧཱུཾ་ལས་རྟ་མགྲིན། གསང་བར་ཧཱུཾ་ལས་བདུད་རྩི་འཁྱིལ་བ། དཔུང་པ་གཡས་པར་ཧཱུཾ་ལས་མི་གཡོ་བ། གཡོན་པར་ཧཱུཾ་ལས་འདོད་རྒྱལ། པུས་མོ་གཡས་པར་ཧཱུཾ་ལས་དབྱུག་སྔོན་ཅན། གཡོན་པར་ཧཱུཾ་ལས་སྟོབས་པོ་ཆེ། སྤྱི་གཙུག་ཏུ་ཧཱུཾ་ལས་འཁོར་ལོས་སྒྱུར་བ། རྐང་མཐིལ་དུ་ཧཱུཾ་ལས་གནོད་མཛེས་རྒྱལ་པོ་རྣམས་བཞུགས་པར་གྱུར། དེ་དག་ནི་རྗེས་སུ་རྣལ་འབྱོར་རོ། །དེ་ནས་རྡོ་རྗེ་གསུམ་བྱིན་གྱིས་བརླབ་པ་ནི། རང་གི་སྤྱི་བོར་ཨོཾ་ལས་ཟླ་བའི་སྟེང་དུ་ཨོཾ་དཀར་པོ་འོད་ལྔ་འཕྲོ་བ། དེ་ལས་སྤྱན་མ་ནམ་མཁའ་གང་བ་སྤྲོས། སྐུ་རྡོ་རྗེ་རྣམ་སྣང་གི་ལྷ་ཚོགས་ནམ་མཁའ་གང་བ་སྤྱན་དྲངས། དེའི་གཙོ་བོ་སྤྱན་མ་དང་མཉམ་པར་སྦྱོར་བའི་མདུན་དུ་བདག་ཉིད་འདུག དཔལ་ལྡན་སངས་རྒྱས་སྐུ་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུས་ནི་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུ་ཡིས་མཛད་དུ་གསོལ། །སྐུ་རྡོ་རྗེ་ཡབ་ཡུམ་འཁོར་བཅས་བདག་གི་སྤྱི་གཙུག་ནས་ཐིམ། སངས་རྒྱས་ཀུན་གྱི་སྐུ་གང་ཡིན། །ཕུང་པོ་ལྔ་ཡིས་རབ་ཏུ་རྒྱས། ། སངས་རྒྱས་སྐུ་ཡི་རང་བཞིན་གྱིས། །བདག་ཀྱང་དེ་དང་འདྲ་བར་ཤོག །ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། འདིས་འོག་མ་གཉིས་ལའང་རིགས་འགྲེ་བར་བྱ་སྟེ། ལྕེའི་
དབུས་སུ་ཨཱཿལས་པདྨའི་སྟེང་དུ་ཨཱ་དམར་པོ་འོད་ལྔ་འཕྲོ་བ། དེ་ལས་གོས་དཀར་མོ། གསུང་རྡོ་རྗེ་འོད་དཔག་མེད་ཀྱི་ལྷ་ཚོགས། གོས་དཀར་མོ་དང་སྦྱོར་བའི། ཆོས་ཀྱི་གསུང་ལམ་དཔལ་དང་ལྡན། །རྡོ་རྗེ༴ །དེང་བདག༴ །རྡོ་རྗེ་གསུང་གིས༴ །ཕྱོགས༴ །རྡོ་རྗེ༴ །དེང་བདག༴ །རྡོ་རྗེ་གསུང་གིས༴ །གསུང་རྡོ་རྗེ་ཡབ་ཡུམ། ལྕེའི་དབུས་སུ་ཐིམ། རྡོ་རྗེ་ཆོས་ཀྱི་གསུང་གང་ཡིན། །གསུང་དེ་ངེས་ཚིག་ཕུན་སུམ་ཚོགས། །བདག་གི་ཚིག་ཀྱང་དེ་འདྲ་སྟེ། །ཆོས་འཛིན་པ་དང་འདྲ་བར་ཤོག །ཨོཾ་སརྦ་ཏ་ཐཱ་ག་ཏ་ཝཱཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྙིང་གར་ཧཱུཾ་ལས་ཉི་མའི་སྟེང་དུ་ཧཱུཾ་སྔོན་པོ་འོད་ལྔ་འཕྲོ་བ། ཐུགས་རྡོ་རྗེ་མི་བསྐྱོད་པ་མཱ་མ་ཀཱི་དང༌། དཔལ་ལྡན་རྡོ་རྗེ་ཐུགས་འཆང་བ། །རྡོ་རྗེ༴ །དེང་བདག་༴ །རྡོ་རྗེ་ཐུགས་ཀྱིས༴ ། ཕྱོགས་༴ །རྡོ་རྗེ༴ །དེང་བདག༴ །རྡོ་རྗེ་ཐུགས་ཀྱིས༴ །ཐུགས་རྡོ་རྗེ་ཡབ་ཡུམ། སྙིང་གར་ཐིམ། གསང་བའི་དབང་པོ་བློ་ལྡན་པ། །ཀུན་ཏུ་བཟང་པོ་ཐུགས་གང་ཡིན། །རྡོ་རྗེ་འཛིན་པ་ལྟ་བུར་ནི། །བདག་གི་སེམས་ཀྱང་དེ་འདྲར་ཤོག །ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ལྟར་བདག་ཉིད་རྒྱལ་བ་ཀུན་གྱི་སྐུ་གསུང་ཐུགས་རྡོ་རྗེ་དབྱེར་མི་ཕྱེད་པ་ཁྱབ་བདག་ཆེན་པོའི་ངོ་བོར་གྱུར། ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱཀ་ཙིཏྟ་ཨཱཏྨ་ཀོ྅ཧཾ། རང་གི་ཐུགས་ཀར་སྣ་ཚོགས་པདྨ་དང་ཟླ་བ་ལ། ཡེ་ཤེས་སེམས་དཔའ་སྐུ་མདོག་དམར་པོ་ཞལ་
གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པས། རང་སྣང་བའི་ཡུམ་ལ་འཁྱུད་པ། དེ་གཉིས་ཁ་སྦྱོར་གྱི་སྦྱོར་བས་དམ་ཚིག་སེམས་དཔའི་ལུས་རྒྱས་པར་བྱེད་པར་གྱུར། དེའི་ཐུགས་ཀར་ཟླ་བའི་སྟེང་དུ་རྡོ་རྗེ་སྔོན་པོའི་ལྟེ་བར། ཏིང་ངེ་འཛིན་སེམས་དཔའ་ཧཱུཾ་ནག་པོ། མར་མེ་ཆེན་པོ་ལྟ་བུ། མི་ཤེས་པའི་མུན་པ་འཇོམས་པའི་འོད་སྣང་གི་ཕུང་པོ་རྟག་ཏུ་འཆར་བའོ། །རང་ཉིད་དམ་ཚིག་སེམས་དཔའ་རལ་པའི་ཅོད་པན་ལ། རིགས་བདག་རྡོ་རྗེ་འཆང་ཆེན་པོ་སྐུ་མདོག་དཀར་པོ། རང་འདྲ་བའི་རྡོ་རྗེ་དབྱིངས་ཀྱི་དབང་ཕྱུག་མ་ལ་འཁྱུད་པ། ཡབ་ཡུམ་སྙོམས་པར་འཇུག་པའི་སྦྱོར་བས། བྱང་ཆུབ་ཀྱི་སེམས་ཀྱི་བདུད་རྩིའི་ཆུ་རྒྱུན་ཟླ་བ་ཞུན་མ་ལྟ་བུ་བབས་ཏེ་བདག་ལ་ཐིམ་པས་ཚིམ་ཞིང་བདེ་བ་ཆེན་པོའི་ངོ་བོར་གྱུར། དེ་དག་ནི་རྣལ་འབྱོར་ཆེན་པོའི་ཏིང་ངེ་འཛིན་ནོ། །དེ་ནས་རིག་མ་འདུ་བྱ་བ་ནི། རང་གི་སྙིང་ག་ནས། རང་གི་རིགས་དང་མཐུན་པའི་ཡེ་ཤེས་ཀྱི་རིག་མ་ཕྱུང༌། སྟོང་པའི་ངང་ལས་ཁཾ་དང་རྡོ་རྗེ་ལས་རིག་མ་དེ་ཉིད་རེག་བྱ་རྡོ་རྗེ་མ། ཁ་དོག་དང་མཚོན་ཆ་གཙོ་བོ་དང་མཚུངས་པ་ལས། སྒེག་ཅིང་ལང་ཚོ་ལ་བབ་པ། ནུ་འབུར་ལྷག་པར་རྒྱས་པ་བུད་མེད་སྒྱུ་མའི་ང་རྒྱལ་གྱིས་འགྱིང་བ། རིག་པའི་ཡུམ་གྱི་མཚན་ཉིད་ཡོངས་སུ་རྫོགས་པར་གྱུར། དེའི་སྤྱི་བོར་ཨོཾ་ལས་རྣམ་པར་སྣང་མཛད། མགྲིན་པར་ཨཱཿལས་འོད་དཔག་མེད་ནས། སྤྱི་བོར་ཏཱཾ་ལས་སྒྲོལ་མ་རྣམས་དེ་བཞིན་གཤེགས་པ་རྣམས་ཀྱི་མདུན་དུ་བཞུགས་པར་གྱུར་གྱི་བར་གོང་
བཞིན་ལས། ཕུང་ཁམས་ཀྱི་མིང་དོར། དེ་བཞིན་དུ་མིག་གི་སྒོར་ཛཿལས་གཟུགས་རྡོ་རྗེ་མ་ནས། རེག་བྱ་རྡོ་རྗེ་མའི་བར་ལའང་ཡུལ་ལྔའི་མིང་དོར། དེ་ལྔ་ཆར་རང་རང་གི་ཐབས་ལ་འཁྱུད་པའོ། །ལག་པ་གཡས་པར་ཧཱུཾ་ལས་རོ་ལངས་མ། གཡོན་པར་ཧཱུཾ་ལས་གཞན་གྱི་མི་ཐུབ་མ། ཁར་ཧཱུཾ་ལས་ཁྲོ་གཉེར་ཅན་མ། བྷ་གར་ཧཱུཾ་ལས་རལ་གཅིག་མ། དཔུང་པ་གཡས་པར་ཧཱུཾ་ལས། དེ་བཞིན་གཤེགས་པའི་ཡུམ་རྡོ་རྗེ་མ། གཡོན་པར་ཧཱུཾ་ལས་སྣ་ཚོགས་རིན་ཆེན་མ། པུས་མོ་གཡས་པར་ཧཱུཾ་ལས་སྣ་ཚོགས་པདྨ་མ། གཡོན་པར་ཧཱུཾ་ལས་སྣ་ཚོགས་ལས་མ། སྤྱི་གཙུག་ཏུ་ཧཱུཾ་ལས་ནམ་མཁའི་རྡོ་རྗེ་མ། རྐང་མཐིལ་དུ་ཧཱུཾ་ལས་ས་འཛིན་ལྷ་མོ་རྣམས་སོ། ཁྲོ་མོ་འདི་རྣམས་ཀྱི་སྐུ་མདོག་ཕྱག་མཚན་ནི། རང་རང་གི་ཁྲོ་བོ་དང་འདྲ་བར་ཤེས་པར་བྱའོ། །ཡབ་ཀྱི་གསང་གནས་ཧཱུཾ་ལས་རྡོ་རྗེ་སྔོན་པོ་རྩེ་ལྔ་པ། ནོར་བུ་ལ་ཨོཾ་དཀར་པོས་མཚན་པ་ཡུམ་གྱི་གསང་གནས་ཨཱཿལས་པདྨ་དམར་པོ་འདབ་མ་བརྒྱད་པ། རང་ཉིད་རིན་ཆེན་འབྱུང་ལྡན་གྱི་ངོ་བོར་གྱུར། འཁྱུད་པ་ལ་སོགས་པ་རྗེས་ཆགས་ཀྱི་སྤྱོད་པ་བརྩམ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། རང་ཉིད་རྡོ་རྗེ་འཆང་ཆེན་པོའི་ངོ་བོར་གྱུར། རྡོ་རྗེ་དང་པདྨའི་ནང་འོད་ཟེར་སྣ་ལྔས་གང༌། ཧཱུཾ་ཧཱུཾ་ཧཱུཾ་སྙོམས་པར་ཞུགས། ཕཊ་རང་དོན་ཡོད་གྲུབ་པའི་ངོ་བོར་གྱུར། སྐུའི་ཆ་ཐམས་ཅད་ནས་ཟླ་བ་བྱང་ཆུབ་ཀྱི་སེམས་ཞུ་ཞིང་འཕེལ་པས། ལུས་དཀྱིལ་གྱི་ལྷ་ཐམས་ཅད་བདེ་བས་ཚིམ།
བྱང་ཆུབ་ཀྱི་སེམས་ཤེས་རབ་མའི་ཆུ་སྐྱེས་ཀྱི་དབུས་སུ་སྦྲང་རྩི་ལྟར་བབས་པས། བདེ་གཤེགས་འཁོར་བཅས་ཐམས་ཅད་མཆོད་པར་གྱུར། ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སླར་ཡང་ཡབ་ཡུམ་སྙོམས་པར་ཞུགས། ཐུགས་ཀ་ནས་འོད་ཟེར་འཕྲོས། ཕྱོགས་བཅུའི་སངས་རྒྱས་ཐམས་ཅད་སྤྱན་དྲངས། སྤྱི་གཙུག་ནས་ཞུགས། ལུས་དཀྱིལ་གྱི་ལྷ་རྣམས་དང་ལྷན་ཅིག་ཐིག་ལེར་ཞུ་ཏེ། རྡོ་རྗེའི་ལམ་ནས་པདྨར་བབས་པའི་བྱང་ཆུབ་ཀྱི་སེམས་ཀྱི་ཐིག་ལེ་ཆ་གཉིས་སུ་གྱུར། ཆ་གཅིག་བྷྲུཾ་ལས་བྱུང་བའི་གཞལ་ཡས་ཁང་གདན་དང་བཅས་པར་གྱུར། ཆ་གཅིག་ཆ་སོ་གཉིས་སུ་གྱུར་ནས་སོ་སོའི་གདན་གྱི་སྟེང་དུ་འཁོད། སྐབས་འདིར་ལྷ་རེ་རེ་བཞིན་བསྐྱེད་པ་ལ། སྔགས་དང་ཕྱག་མཚན་སྐུ་གཟུགས་བསྐྱེད། །ཕྱི་རོལ་སྤྲོ་ཞིང་འཕྲིན་ལས་མཛད། །གཅིག་བསྡུས་ཡེ་ཤེས་པ་དང་བསྲེ། །གནས་སུ་བཀོད་དེ་དོན་ཚན་བདུན།། ཞེས་པ་ལྟར་ཡིན་པས། དབུས་ཀྱི་ཐིག་ལེ་ཨོཾ་ཨཱཿཧཱུཾ་ཧཱུཾ་དུ་གྱུར། དེ་ལས་རྡོ་རྗེ་རྩེ་ལྔ་པ། དེ་ལས་ལྷ་བཅུར་བཞེངས་པ་ནི། མི་བསྐྱོད་ནག་པོ་ནག་དཀར་དམར། །དང་པོ་རྡོ་རྗེ་དྲིལ་བུ་འཛིན། །འཁོར་ལོ་པད་མ་གཡས་པས་ཏེ། །དྲིལ་བུ་ནོར་བུ་གཡོན་ནའོ། ། རྡོ་རྗེ་སེམས་དཔའི་ཅོད་པན་ཅན། །རང་གི་ཐུགས་ཀར་དྲངས། བཛྲ་དྷྲྀཀ་ཐུགས་ཀ་ནས་ཕྱིར་ཕྱུང༌། ནམ་མཁའི་ཁམས་ཐམས་ཅད་ཁྱད་པར་སྤྲོས།
ཆོས་ཀྱི་འཁོར་ལོ་བསྐོར་བ་ལ་སོགས་པ། སངས་རྒྱས་ཀྱི་མཛད་པ་ཐམས་ཅད་མཛད། ཁྱད་པར་དུ་སེམས་ཅན་ཐམས་ཅད་ཀྱི་ཞེ་སྡང་སྦྱངས་ཏེ། མི་བསྐྱོད་པའི་གོ་འཕང་ལ་བཀོད། སྤྲུལ་པ་རྣམས་གཅིག་ཏུ་འདུས་པ་ལ། གདོད་ནས་གྲུབ་པའི་མི་བསྐྱོད་པ་ཡེ་ཤེས་སེམས་དཔའི་ཚུལ་དུ་ཐིམ། རང་གི་རིགས་བདག་ཡབ་ཡུམ་སྙོམས་པར་ཞུགས་པའི་བྱང་ཆུབ་སེམས་ཀྱིས་དབང་བསྐུར། རང་གི་སྙིང་ག་ནས་ཞུགས་ཏེ་ཐིམ་པས། བདག་ཉིད་རྡོ་རྗེ་འཆང་ཞི་བ་དེ། སླར་ཞེ་སྡང་རྡོ་རྗེར་གྱུར་པ་ནི། སྐུ་མདོག་སྔོན་པོ་ཨིནྡྲ་ནཱི་ལ་ལྟར་འབར་བའི་འོད་ཟེར་འཕྲོ་བ། རྩ་ཞལ་མཐིང་ཀ་ཁྲོ་བ་དང་འདོད་ཆགས་ཆེན་པོ་འདྲེས་པའི་ཉམས་ཅན། མཆེ་བའི་མྱུ་གུ་རྣོན་པོ་གཙིགས་པ། ཁྲོ་གཉེར་བསྡུས་ཤིང་སྤྱན་གསུམ་དང་ལྡན་པ། གཡས་ཞལ་དཀར་པོ་ཞི་བའི་ཉམས་ཅན། གཡོན་ཞལ་དམར་པོ་ཆགས་པའི་ཉམས་ཅན། ཞལ་གསུམ་ཀར་ཡང་རབ་ཏུ་མཛེས་པའི་སྨིན་ཚུགས་ཀྱིས་བརྒྱན་པ། རིན་པོ་ཆེའི་སོར་གདུབ་ཀྱིས་སྤྲས་པའི་ཕྱག་དྲུག་གི་དང་པོ་གཉིས་རྡོ་རྗེ་ནག་པོ་རྩེ་དགུ་པ་དང༌། དྲིལ་བུ་འཛིན་པས་ཡུམ་རེག་བྱ་རྡོ་རྗེ་མ་རང་དང་མཚུངས་པ་ལ་འཁྱུད་པ། གཡས་གཉིས་པ་ན་འཁོར་ལོ་དཀར་པོ་རྩིབས་བརྒྱད་པ། གསུམ་པ་ན་པདྨ་དམར་པོ་འདབ་མ་བརྒྱད་པ། གཡོན་གཉིས་པ་ན་རིན་པོ་ཆེ་ལྗང་ཁུ་རྩེ་མོ་དགུ་པ། གསུམ་པ་ན་རལ་གྲི་སྔོ་སངས་འོད་
ཟེར་འབར་པ་འཛིན་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། མཚན་སུམ་ཅུ་རྩ་གཉིས་དང༌། དཔེ་བྱད་བརྒྱད་ཅུས་བརྒྱན་པ། དབུ་སྐྲ་རལ་བའི་ཐོར་ཚུགས་སྤྱི་བོར་བཅིངས་པ། ཉི་ཟླའི་འོད་ཟེར་རབ་ཏུ་འབར་ཞིང་སིལ་སིལ་གྱི་སྒྲ་སྒྲོག་པའི་རིན་པོ་ཆེའི་ཐོར་ཚུགས་དབུ་རྒྱན། སྙན་རྒྱན་མགུལ་རྒྱན། དོ་ཤལ། དཔུང་རྒྱན། གདུ་བུ། སོ་མོ་དོ། སྐ་རགས་ཏེ་རིན་པོ་ཆེའི་རྒྱན་བརྒྱད་ཀྱིས་བརྒྱན་པ། སྙན་གོང་དུ་ཨུཏྤལའི་གདེངས་ཀ་དང་དར་དཔྱངས་ཀྱིས་མཛེས་པར་བྱས་པ། དབང་པོའི་གཞུ་ལྟར་བཀྲ་བའི་ལྷའི་དར་སྣ་ཚོགས་ཀྱི་ན་བཟའ་གསོལ་ཞིང་སྲིད་ཞིའི་མཐའ་ལས་འདས་པ། སྐུ་གསུང་ཐུགས་ཀྱི་ཡོན་ཏན་ཐམས་ཅད་དང་ལྡན་པར་གྱུར། ལེ་ཚེ་བརྒྱད་ལ་ཤར་གྱི་ཐིག་ལེ་ཨོཾ་ཨཱཿཨོཾ་ཧཱུཾ་དང་འཁོར་ལོར་གྱུར་པ་ལས། རྣམ་སྣང་དཀར་པོ་དཀར་ནག་དམར། དང་པོ་འཁོར་ལོ་དྲིལ་བུ་འཛིན། རྡོ་རྗེ་པད་དཀར་གཡས་པས་སྟེ་རིན་ཆེན་རལ་གྲི་གཡོན་ནའོ། །མི་བསྐྱོད་རྡོ་རྗེའི་དབུ་རྒྱན་ཅན། ཐུགས་ཀར་དྲངས། ཛི་ན་ཛྀཀ ཐུགས་ཀ་ནས་ཕྱིར་ཕྱུང༌། ནམ་མཁའི་ཁམས༴ ཆོས་ཀྱི་འཁོར་ལོར༴ ཁྱད་པར་དུ་སེམས་ཅན་ཐམས་ཅད་ཀྱི་གཏི་མུག་སྦྱངས་ཏེ། རྣམ་པར་སྣང་མཛད་ཀྱི་གོ་འཕང༌། སྤྲུལ་པ་རྣམས། གདོད་ནས་གྲུབ་པའི། རང་གི་རིགས་བདག་ནས། དབང་བསྐུར། དཀྱིལ་འཁོར་ཆེན་པོའི་
ཤར་གྱི་རེ་མིག་ཏུ་པད་ཟླའི་གདན་ལ་འཁོད་པར་གྱུར། དེ་བཞིན་དུ་འོག་མ་རྣམས་ལ་སྦྱར་ཏེ། ལྷོའི། ཨོཾ་ཨཱཿསྭཱ་ཧཱུཾ་དང་རིན་པོ་ཆེར། རིན་འབྱུང་སེར་པོ་སེར་ནག་དཀར། །དང་པོ་ནོར་བུ་དྲིལ་བུ་འཛིན། །རྡོ་རྗེ་འཁོར་ལོ་གཡས་པས་ཏེ། །པད་སེར་རལ་གྲི་གཡོན་ནའོ། །མི་བསྐྱོད་རྡོ་རྗེའི་དབུ་རྒྱན་ཅན། །རཏྣ་དྷྲྀཀ ང་རྒྱལ་དང་སེར་སྣ་སྦྱངས་ཏེ་རིན་འབྱུང་གི གདོད་ནས་གྲུབ་པའི་རིན་འབྱུང༌། ལྷོའི་རེ་མིག་ཏུ། པདྨ་དང་རིན་པོ་ཆེའི་གདན་ལ་འཁོད། ནུབ་ཀྱི་ཨོཾ་ཨཱཿཨཱཿཧཱུཾ་དང་པད་མར། འོད་དཔག་མེད་དམར་དམར་ནག་དཀར། གཡོན་གྱི་དང་པོ་པད་རྩ་དང༌། དྲིལ་བུ་ལྷན་ཅིག་དཀུར་བརྟེན་འཛིན། གཡས་པས་པདྨ་དམར་པོ་ནི། འདབ་བརྒྱད་ཐུགས་ཀར་ཁ་འབྱེད་པའོ། །རྡོ་རྗེ་འཁོར་ལོ་གཡས་པ་ཏེ། །རིན་ཆེན་རལ་གྲི་གཡོན་ནའོ། །མི་བསྐྱོད་རྡོ་རྗེའི་དབུ་རྒྱན་ཅན།། ཨ་རོ་ལིཀ འདོད་ཆགས་སྦྱངས་ཏེ། གདོད་ནས་གྲུབ་པའི་འོད་དཔག་མེད། ནུབ་ཀྱི་རེ་མིག་ཏུ་པདྨ་བརྩེགས་པའི་གདན་ལ། བྱང་གི་ཨོཾ་ཨཱཿཧཱ་ཧཱུཾ་དང་རལ་གྲིར། དོན་གྲུབ་ལྗང་ཁུ་ལྗང་ནག་དཀར། །དང་པོ་རལ་གྲི་དྲིལ་བུ་འཛིན། །སྣ་ཚོགས་རྡོ་རྗེ་འཁོར་ལོ་གཡས། །པདྨ་ལྗང་ཁུ་ནོར་བུ་གཡོན། །མི་བསྐྱོད་རྡོ་རྗེའི་དབུ་རྒྱན་ཅན། །པྲཛྙཱ་དྷྲྀཀ བརྫུན་དང་ཕྲག་དོག་སྦྱངས་ཏེ་དོན་གྲུབ་ཀྱི། གདོད་ནས་གྲུབ་པའི་དོན་གྲུབ། བྱང་གི་རེ་མིག་ཏུ། སྣ་ཚོགས་རྡོ་རྗེའི་གདན་ལ་ཞེས་པ་ནི་ཁྱད་
པར་རོ། །འདི་མན་ཆད་ལ་ཆོས་ཀྱི་འཁོར་ལོ་ཞེས་པ་ནས་ཐམས་ཅད་མཛད། ཁྱད་པར་དུ་ཞེས་པའི་ཚིག་རྣམས་དོར་བར་བྱའོ། །དེ་ལྟར་དེ་བཞིན་གཤེགས་པ་བཞི་ཡང༌། རྡོ་རྗེའི་སྐྱིལ་ཀྲུང་གིས་བཞུགས་པའོ། །དེ་བཞིན་དུ་སྦྱར་ཏེ། ཤར་ལྷོའི་ཨོཾ་ཨཱཿལཾ་ཧཱུཾ་དང༌། ཨུཏྤལ་དཀར་པོ། སྤྱན་མ་དཀར་མོ་དཀར་ནག་དམར། །དང་པོ་འཁོར་ལོ་དྲིལ་བུ་འཛིན། །རྡོ་རྗེ་ཨུཏྤལ་དཀར་པོ་གཡས། །རིན་ཆེན་རལ་གྲི་གཡོན་ནའོ། ། རྣམ་སྣང་མཛད་ཀྱི་ཅོད་པན་ཅན། །མོ་ཧ་ར་ཏཱི། སེམས་ཅན་གྱི་ཁམས་ན་གདོན་དང་ནད་ཀྱིས་གདུངས་པ་ཐམས་ཅད་ཞི་བར་མཛད། གདོད་ནས་གྲུབ་པའི་སངས་རྒྱས་སྤྱན་མ། ཤར་ལྷོའི་རེ་མིག་ཏུ་ཟླ་བའི་གདན་ལ། ལྷོ་ནུབ་ཀྱི་ཨོཾ་ཨཱཿམཾ་ཧཱུཾ་དང་ཨུཏྤལ་སྔོ་དམར་དུ། མཱ་མ་ཀཱི་སྔོ་སྔོ་དཀར་དམར། དང་པོ་རྡོ་རྗེ་དྲིལ་བུ་འཛིན།། འཁོར་ལོ་ཨུཏྤལ་སྔོ་དམར་གཡས། །དྲིལ་བུ་ནོར་བུ་གཡོན་ནའོ། །མི་བསྐྱོད་རྒྱལ་པོའི་ཅོད་པན་ཅན། །དྭེ་ཥ་ར་ཏཱི། སེམས་ཅན་གྱི་ཁམས་ན་བགེགས་ཀྱིས་གཟིར་བ་རྣམས་ལས་བསྲུངས་ཏེ་རྒྱས་པར་མཛད། གྲུབ་པའི་མཱ་མ་ཀཱི། ལྷོ་ནུབ་ཀྱི་རེ་མིག་ཏུ་རྡོ་རྗེའི་གདན། ནུབ་བྱང་གི ཨོཾ་ཨཱཿཔཾ་ཧཱུཾ་དང༌། ཨུཏྤལ་དམར་པོ། གོས་དཀར་མོ་དམར་དམར་ནག་དཀར། ཨུཏྤལ་རྩ་བ་གཡོན་དང་པོས། ། དྲིལ་བུ་ལྷན་ཅིག་དཀུར་བརྟེན་ཞིང༌། །གཡས་པས་ཨུཏྤལ་དམར་པོ་ནི། །འདབ་བརྒྱད་ཐུགས་ཀར་ཁ་འབྱེད་པ། །རྡོ་རྗེ་འཁོར་ལོ་གཡས་པས་ཏེ། །རིན་ཆེན་
རལ་གྲི་གཡོན་ནའོ། །འོད་དཔག་མེད་པའི་ཅོད་པན་ཅན། །རཱ་ག་ར་ཏཱི། སེམས་ཅན་གྱི་ཁམས་ན་གདོན་གྱིས་ཉེན་པ་ཐམས་ཅད་ལ་བསྲུངས་བ་མཛད། གྲུབ་པའི་གོས་དཀར་མོ། ནུབ་བྱང་གི་རེ་མིག་ཏུ་པདྨ་རྩེགས་པའི་གདན་ལ། བྱང་ཤར་གྱི་ཨོཾ་ཨཱཿཏཱཾ་ཧཱུཾ་དང༌། ཨུཏྤལ་ལྗང་ཁུར། སྒྲོལ་མ་ལྗང་ཁུ་ལྗང་ནག་དཀར། །དང་པོ་སྣ་ཚོགས་རྡོར་དྲིལ་འཛིན། །འཁོར་ལོ་ཨུཏྤལ་རྡོ་རྗེས་མཚན། །རིན་ཆེན་རལ་གྲི་གཡས་གཡོན་ནའོ། །དོན་ཡོད་གྲུབ་པའི་དབུ་རྒྱན་ཅན། །བཛྲ་ར་ཏཱི། སེམས་ཅན་ཐམས་ཅད་དབང་དུ་འདུ་བར་མཛད། གྲུབ་པའི་སྒྲོལ་མ། བྱང་ཤར་གྱི་རེ་མིག་ཏུ། སྣ་ཚོགས་རྡོ་རྗེའི་གདན་ལ་འཁོད། །རིམ་པ་གཉིས་པའི་ཤར་ལྷོའི། ཨོཾ་ཨཱཿཛཿཧཱུཾ། མེ་ལོང་དམར་པོར། དཀར་མོ་གཟུགས་ཀྱི་རྡོ་རྗེ་མ། །རྩ་ཕྱག་མེ་ལོང་དམར་པོ་འཛིན། །ལྷག་མ་སངས་རྒྱས་སྤྱན་མ་བཞིན། །རྣམ་པར་སྣང་མཛད་ཀྱི་དབུ་རྒྱན་ཅན། རཱུ་པ་བཛྲ། གཟུགས་ཀྱི་སྐྱེ་མཆེད་སྦྱངས། ཡེ་ཤེས་དོན་དམ་པའི་གཟུགས་ཀྱི་བདེ་བ་མཆོད། གྲུབ་པའི་གཟུགས་རྡོ་རྗེ་མ། རིམ་པ་གཉིས་པའི་ཤར་ལྷོར་ཟླ་བ་ལ་འཁོད། ལྷོ་ནུབ་ཀྱི་ཨོཾ་ཨཱཿཧཱུཾ་ཧཱུཾ་དང་པི་ཝཾ་དུ། སེར་མོ་སྒྲ་ཡི་རྡོ་རྗེ་མ། །སེར་ནག་དཀར་བའི་ཞལ་གསུམ་སྟེ། །རྩ་ཕྱག་པི་ཝཾ་སྔོན་པོ་སྒྲེང༌། །ལྷག་མ་མཱ་མ་ཀི་དང་མཚུངས། །མི་བསྐྱོད་རྒྱལ་པོས་དབུ་ལ་བརྒྱན། །ཤཔྟ་བཛྲ། སྒྲའི་སྐྱེ་མཆེད་སྦྱངས། ཡེ་ཤེས་དོན་དམ་པའི་སྒྲའི་བདེ་བས་མཆོད། གྲུབ་
པའི་སྒྲ་རྡོ་རྗེ་མ། ལྷོ་ནུབ་ཏུ་རིན་པོ་ཆེའི་གདན་ལ་འཁོད། ནུབ་བྱང་གི་ཨོཾ་ཨཱཿབཾ་ཧཱུཾ་དང༌། དྲི་བཟང་གིས་གང་བའི་དུང་ཕོར་དུ། དམར་མོ་དྲི་ཡི་རྡོ་རྗེ་མ། །རྩ་ཕྱག་དྲི་བཟང་དུང་ཆོས་འཛིན། །ལྷག་མ་གོས་དཀར་མོ་དང་མཚུངས། །འོད་དཔག་མེད་ཀྱི་དབུ་རྒྱན་ཅན། །གན་དྷེ་བཛྲ། དྲིའི་སྐྱེད་མཆེད་སྦྱངས། དྲིའི་བདེ་བས་མཆོད། ནུབ་བྱང་དུ་པདྨ་དམར་པོའི་གདན་ལ་འཁོད། བྱང་ཤར་གྱི་ཨོཾ་ཨཱཿཧོཿཧཱུཾ་དང༌། རོ་མཆོག་གི་སྣོད་དུ། ལྗང་ཁུ་རོ་ཡི་རྡོ་རྗེ་མ། །རྩ་ཕྱག་རོ་མཆོག་གིས་གང་སྣོད། ཁྱད་པར་གཞན་རྣམས་སྒྲོལ་མ་བཞིན།། རྒྱལ་བ་རྔ་སྒྲའི་ཅོད་པན་ཅན། །རཱ་ས་བཛྲ། རོ་ཡི་སྐྱེ་མཆེད་སྦྱངས། རོའི་བདེ་བས་གྲུབ་པའི་རོ་རྡོ་རྗེ། བྱང་ཤར་དུ་སྣ་ཚོགས་རྡོ་རྗེའི་གདན་ལ། དབུས་ཀྱི་གདན་གྱི་སྟེང་གི་ཨོཾ་ཨཱཿཁཾ་ཧཱུཾ་དང་རྡོ་རྗེར། རེག་མ་སྔོན་མོ་སྔོ་དཀར་དམར། །དང་པོ་རྡོ་རྗེ་དྲིལ་བུ་འཛིན། །འཁོར་ལོ་པདྨ་གཡས་པས་ཏེ། །དྲིལ་བུ་ནོར་བུ་གཡོན་ནའོ། །མི་བསྐྱོད་རྒྱལ་པོའི་ཅོད་པན་ཅན། །སྤར་ཤ་བཛྲ། རེག་བྱའི་སྐྱེ་མཆེད་སྦྱངས། རེག་བྱའི་བདེ་བས། གྲུབ་པའི་རེག་བྱ་རྡོ་རྗེ་མ། འཁོར་ལོའི་དབང་ཕྱུག་གི་པད་མར་འཁོད་པའི་རེག་བྱ་རྡོ་རྗེ་མ་ལ་ཐིམ་པར་གྱུར། ལྷ་མོ་དགུ་པོ་ཐམས་ཅད་ནི། སྒེག་ཅིང་ལང་ཚོ་ལ་བབ་པ། །ནུ་འབུར་ལྷག་པར་རྒྱས་པ་བུད་མེད་སྒྱུ་མའི་ང་རྒྱལ་གྱིས་འགྱིང་བ། རིག་པའི་ཡུམ་གྱི་མཚན་ཉིད་ཡོངས་སུ་རྫོགས་པའོ།། རིམ་པ་གསུམ་པའི་ལྷ་རྣམས་ཀྱི་ཤར་གྱི་
གཡས་ཀྱི་ཨོཾ་ཨཱཿམཻཾ་ཧཱུཾ་དང༌། ཀླུ་ཤིང་གི་ཡལ་ག་འཁོར་ལོས་མཚན་པའི་མེ་ཏོག་དང་བཅས་པར། བྱམས་པ་རྣམ་སྣང་དང་མཚུངས་པ་ལས། རྣམ་སྣང་གི་ཅོད་པན་ཅན། ཕྱག་གཡས་ཀྱི་དང་པོ་ན་ཀླུ་ཤིང་གི་ཡལ་ག་འཁོར་ལོས་མཚན་པའི་མེ་ཏོག་དང་བཅས་པའོ། །མཻ་ཏྲི། རྩ་རྒྱུས་དང་ཉོན་མོངས་པ་ཅན་གྱི་ཡིད་སྦྱངས། རྡོ་རྗེའི་རྩ་དང་ཟག་ཟད་ཀྱི་མངོན་ཤེས་ལ་བཀོད། གྲུབ་པའི་བྱམས་པ། ལྷ་སྣམ་གྱི་ཤར་གྱི་གཡས་སུ་པད་ཟླའི་གདན་ལ། ཤར་གྱི་གཡོན་གྱི་ཨོཾ་ཨཱཿ ཧཱུཾ་དང་འཁོར་ལོ། སའི་སྙིང་པོ་རྣམ་སྣང་དང་མཚུངས་པ། ཀྵི་ཏི་གརྦྷ། མིག་དབང་རྣམ་ཤེས་དང་བཅས་པ་སྦྱངས། རྡོ་རྗེའི་མིག་དང་མིག་གི་མངོན་ཤེས་ལ་བཀོད། ལྷ་སྣམ་གྱི་ཤར་གྱི་གཡོན་དུ་ཟླ་བ་ལ། ལྷོའི་གཡས་ཀྱི་ཨོཾ་ཨཱཿཨོཾ་ཧཱུཾ་དང་རིན་པོ་ཆེར། ཕྱག་ན་རྡོ་རྗེ་རིན་ཆེན་འབྱུང་ལྡན། རིན་འབྱུང་གི་དབུ་རྒྱན་ཅན། བཛྲ་པཱ་ཎི། རྣ་བའི་དབང་པོ་རྣམ་ཤེས་དང་བཅས་པ་སྦྱངས། རྡོ་རྗེའི་རྣ་བ་དང་རྣ་བའི་མངོན་ཤེས་ལ། གྲུབ་པའི་ཕྱག་ན་རྡོ་རྗེ། ལྷོའི་གཡས་སུ་རིན་པོ་ཆེའི་གདན་ལ་ལྷོའི་གཡོན་གྱི། ཨོཾ་ཨཱཿཨོཾ་ཧཱུཾ་དང་རིན་པོ་ཆེར། ནམ་མཁའི་སྙིང་པོ་རིན་ཆེན་འབྱུང་ལྡན། རིན་འབྱུང་གི་དབུ་རྒྱན་ཅན། ཁ་གརྦྷ། སྣའི་དབང་པོ་རྣམ་ཤེས་དང་བཅས་པ་སྦྱངས། རྡོ་རྗེའི་སྣ་དང༌། སྣའི་མངོན་ཤེས་ལ་བཀོད། གྲུབ་
པའི་ནམ་མཁའི་སྙིང་པོ། ལྷོའི་གཡོན་དུ་ཟླ་བ་ལ། ནུབ་ཀྱི་གཡས་ཀྱི་ཨོཾ་ཨཱཿཨོཾ་ཧཱུཾ་དང་པདྨར། འཇིག་རྟེན་དབང་ཕྱུག་འོད་དཔག་མེད། །འོད་དཔག་མེད་ཀྱི་དབུ་རྒྱན་ཅན། །ལོ་ཀེ་ཤྭ་ར། ལྕེའི་དབང་པོ་རྣམ་ཤེས་དང་བཅས་པ་སྦྱངས། རྡོ་རྗེའི་ལྕེ་དང་ལྕེའི་མངོན་ཤེས་ལ་བཀོད། གྲུབ་པའི་འཇིག་རྟེན་དབང་ཕྱུག །ནུབ་ཀྱི་གཡས་སུ་པདྨ་དམར་པོའི་ལ། ནུབ་ཀྱི་གཡོན་གྱི་ཨོཾ་ཨཱཿཧཱུཾ་ཧཱུཾ་དང་པདྨར། འཇམ་དཔལ་འོད་དཔག་མེད། འོག་དཔག་མེད་ཀྱི་དབུ་རྒྱན་ཅན། མཉྫུ་ཤྲཱི། ཡིད་དབང་དང་ཡིད་ཀྱི་རྣམ་ཤེས་སྦྱངས། རྡོ་རྗེའི་ཡིད་དང་ཕ་རོལ་སེམས་ཤེས་ལ་བཀོད། གྲུབ་པའི་འཇམ་དཔལ། ནུབ་ཀྱི་གཡོན་དུ་པདྨ་དམར་པོའི་གདན་ལ་བྱང་གི་གཡས་ཀྱི། ཨོཾ་ཨཱཿཨོཾ་ཧཱུཾ་དང་རལ་གྲིར། སྒྲིབ་པ་རྣམ་པར་སེལ་བ། དོན་ཡོད་གྲུབ་པ། དོན་གྲུབ་གྱི་ཅོད་པན་ཅན། སརྦ་ནི་ཝ་ར་ཎ་བི་སྐཾ་བྷི་ནི། ལུས་དབང་རྣམ་ཤེས་དང་བཅས་པ་སྦྱངས། རྡོ་རྗེའི་ལུས་དང་རྫུ་འཕྲུལ་ཀྱི་མངོན་ཤེས་ལ། གྲུབ་པའི་སྒྲིབ་པ་རྣམ་སེལ། བྱང་གི་གཡས་སུ་སྣ་ཚོགས་རྡོ་རྗེ་ལ། བྱང་གི་གཡོན་གྱི། ཨོཾ་ཨཱཿསཾ་ཧཱུཾ་དང་རལ་གྲིར། ཀུན་ཏུ་བཟང་པོ་དོན་ཡོད་གྲུབ་པ། དོན་གྲུབ་ཀྱི་དབུ་རྒྱན་ཅན། ས་མནྟ་བྷ་དྲ། ཚིགས་རྣམས་དང་ ཀུན་གཞི་རྣམ་ཤེས་སྦྱངས། རྡོ་རྗེ་སྟོབས་དང་སྔོན་གྱི 
་གནས་རྗེས་སུ་དྲན་པ་ལ་བཀོད། གྲུབ་པའི་ཀུན་ཏུ་བཟང་
པོ། བྱང་གི་གཡོན་དུ་སྣ་ཚོགས་རྡོ་རྗེའི་གདན་ལ། དེ་ལྟར་ལྷ་མོ་རྣམས་དང་སེམས་དཔའ་བརྒྱད་ནི་སེམས་དཔའི་སྐྱིལ་མོ་ཀྲུང་གིས་བཞུགས་པ། ཞི་བའི་ལྷ་ཚོགས་དེ་ཐམས་ཅད་ཀྱང་འཛུམ་ཞིང་སྒེག་པའི་ཉམས་ཅན། འདོད་པའི་ཡོན་ཏན་ལྔའི་དགའ་བས་རོལ་པ་དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། འོད་ཀྱི་དཀྱིལ་འཁོར་འབར་བའི་དབུས་ན་བཞུགས་པའོ། །ཤར་སྒོའི། ཨོཾ་ཨཱཿཧཱུཾ་ཧཱུཾ་དང་དབྱུག་པར། གཤིན་རྗེ་གཤེད་ནག་ནག་དཀར་དམར། དབྱུག་པ་འཁོར་ལོ་རྡོ་རྗེ་གཡས། །ཐུགས་ཀར་སྡིགས་མཛུབ་དང་བཅས་པའི། །ཞགས་པ་དྲིལ་བུ་དགྲ་སྟ་གཡོན། །རྣམ་སྣང་མཛད་ཀྱི་ཅོད་པན་ཅན། །ཡ་མཱན་ཏ་ཀྲྀཏ། དབང་པོ་ལ་སོགས་པའི་བགེགས་ཐམས་ཅད་བཅོམ། གྲུབ་པའི་གཤིན་རྗེ་གཤེད། ཤར་སྒོར་པད་ཉིའི་གདན། ལྷོ་སྒོའི། ཨོཾ་ཨཱཿཧཱུཾ་ཧཱུཾ་དང༌། རྡོ་རྗེ་མཚན་པའི་དབྱུག་པ་དཀར་པོར། ཤེས་རབ་མཐར་བྱེད་དཀར་པོ་ནི།། དཀར་ནག་དམར་བའི་ཞལ་གསུམ་པ། །རྡོ་རྗེ་དབྱུག་པ་རལ་གྲི་གཡས། །གཡོན་ནི་གཤིན་རྗེ་གཤེད་དང་མཚུངས། །རིན་ཆེན་འབྱུང་བའི་ཅོད་པན་ཅན། །པྲཛྙཱནྟ་ཀྲྀཏ། གཤིན་རྗེ་དང་མ་མོ་ལ་སོགས་པའི་བགེགས། གྲུབ་པའི་ཤེས་རབ་མཐར་བྱེད། ལྷོ་སྒོར་པད་ཉིའི་གདན་ལ། ནུབ་སྒོའི། ཨོཾ་ཨཱཿཧཱུཾ་ཧཱུཾ་དང་པདྨར། རྟ་མགྲིན་དམར་པོ་དམར་ནག་དཀར། །པདྨ་
རལ་གྲི་གཏུན་ཤིང་གཡས། །དྲིལ་བུ་སྙེམས་པས་དཀུར་བརྟེན་དང༌། །དགྲ་སྟ་ཞགས་པ་གཡོན་ནའོ། །སྣང་མཐའ་ཡས་ཀྱི་ཅོད་པན་ཅན། །པདྨཱནྟ་ཀྲྀཏ། ཀླུ་དང་ས་བདག་གི་བགེགས། གྲུབ་པའི་པདྨ་མཐར་བྱེད། ནུབ་སྒོར་པད་ཉིའི་གདན་ལ། བྱང་སྒོའི། ཨོཾ་ཨཱཿཧཱུཾ་ཧཱུཾ་དང་སྣ་ཚོགས་རྡོ་རྗེར། བགེགས་མཐར་བྱེད་པ་སྔོ་སངས་ནི། །སྔོ་དཀར་དམར་བའི་ཞལ་གསུམ་པ། །རྒྱ་གྲམ་འཁོར་ལོ་གཏུན་ཤིང་གཡས། །གཡོན་པ་གཤིན་རྗེ་གཤེད་དང་མཚུངས། རྒྱལ་བ་རྔ་སྒྲའི་ཅོད་པན་ཅན། །བིགྷྣཱནྟ་ཀྲྀཏ། གནོད་སྦྱིན་དང་ལོག་འདྲེན་ལ་སོགས་པའི་བགེགས། གྲུབ་པའི་བགེགས་མཐར་བྱེད། བྱང་སྒོར་པད་ཉི་ལ། ཤར་ལྷོའི་གྲྭའི། ཨོཾ་ཨཱཿཧཱུཾ་ཧཱུཾ་དང་རལ་གྲིར། མི་གཡོ་ནག་པོ་ནག་དཀར་དམར། །རལ་གྲི་རྡོ་རྗེ་འཁོར་ལོ་གཡས། གཡོན་པ་ཐུགས་ཀར་སྡིག་འཛུབ་དང༌། །དགྲ་སྟ་ཞགས་པ་རིམ་པ་བཞིན། །སངས་རྒྱས་སྣང་མཛད་ཅོད་པན་ཅན།། ཨ་ཙ་ལ། ཡམས་ནད་གཏོང་བ་དང་མེ་ལྷའི་གདོན་རྣམས་བཅོམ་གྲུབ་པའི་མི་གཡོ་བ། ཤར་ལྷོའི་གྲྭར་པད་ཉི་ལ། ལྷོ་ནུབ་ཀྱི་གྲྭའི། ཨོཾ་ཨཱཿཧཱུཾ་ཧཱུཾ་དང་རྡོ་རྗེར། འདོད་རྒྱལ་སྔོན་པོ་སྔོ་དཀར་དམར། །རྩ་ཕྱག་ཧཱུཾ་མཛད་ཕྱག་རྒྱ་འཆིང༌། །རྡོ་རྗེ་རལ་གྲི་གཡས་པས་ཏེ། །ཞགས་པ་ལྕགས་ཀྱུ་གཡོན་ནའོ། །དཀོན་མཆོག་དཔལ་གྱི་ཅོད་པན་ཅན། །ཊཀྐི་རཱ་ཛ། སྲིན་པོའི་གདོན་སོགས་ཉེ་
བར་འཚོ་བ་རྣམས་བཅོམ། གྲུབ་པའི་འདོད་རྒྱལ། བདེན་བྲལ་གྱི་གྲྭར་པད་ཉིའི་གདན་ལ། ནུབ་བྱང་གི་གྲྭའི། ཨོཾ་ཨཱཿཧཱུཾ་ཧཱུཾ་དང༌། རྡོ་རྗེས་མཚན་པའི་བེ་ཅོན་སྔོན་པོར། དབྱུག་སྔོན་སྔོན་པོ་སྔོ་དཀར་དམར། །བེ་ཅོན་རལ་གྲི་འཁོར་ལོ་གཡས། །སྡིགས་མཛུབ་བཅས་པའི་ཞགས་པ་ནི། །ཐུགས་ཀར་གཏོད་ཅིང་པདྨ་དང༌། །དགྲ་སྟ་གཡོན་ལ་རིམ་པས་སོ། །རྡོ་རྗེ་ཆོས་ཀྱི་ཅོད་པན་ཅན། །ནཱི་ལ་དཎྜ། ཡམས་ནད་དང་རླུང་ལྷའི་གདོན་རྣམས་བཅོམ། གྲུབ་པའི་དབྱུག་སྔོན་ཅན། ནུབ་བྱང་གི་གྲྭར་པད་ཉི་ལ། བྱང་ཤར་གྱི་གྲྭའི། ཨོཾ་ཨཱཿཧཱུཾ་ཧཱུཾ་དང༌། རྡོ་རྗེས་མཚན་པའི་དབྱུག་པ་ནག་པོར། སྟོབས་ཆེན་ནག་པོ་ནག་དཀར་དམར། །དབྱུག་པ་རྡོ་རྗེ་འཁོར་ལོ་གཡས། ། སྡིགས་མཛུབ་བཅས་པའི་ཞགས་པ་ནི། །ཐུགས་ཀར་གཏོད་ཅིང་རྩེ་གསུམ་དང༌།། དགྲ་སྟ་གཡོན་གསུམ་རིམ་པས་སོ། །དོན་ཡོད་གྲུབ་པའི་ཅོད་པན་ཅན། །མ་ཧཱ་བ་ལ། དབང་ལྡན་མཁའ་འགྲོ་མའི་གདོན་དང་བཅས་པ་བཅོམ། གྲུབ་པའི་སྟོབས་པོ་ཆེ། བྱང་ཤར་གྱི་གྲྭར་པད་ཉིའི་གདན་ལ། སྟེང་གི་ཡ་ཕུབས་ཀྱི་ནང་གི །ཨོཾ་ཨཱཿཧཱུཾ་ཧཱུཾ་དང་རྡོ་རྗེ། གཙུག་ཏོར་འཁོར་ལོས་གྱུར་བ་སྔོ། །ཞལ་གསུམ་སྔོ་དཀར་དམར་བ་སྟེ། །རྩ་ཕྱག་གཙུག་ཏོར་ཕྱག་རྒྱ་བཅིངས། སྤྱི་བོར་འཇོག་ཅིང་ལྷག་མ་ཡི། །གཡས་པས་རྡོ་རྗེ་པདྨ་སྟེ། །གཡོན་པ་སྡིག་མཛུབ་རལ་གྲིའོ། མི་བསྐྱོད་རྒྱལ་བོའི་ཅོད་པན་ཅན། །ཨུཥྞི་ཥ་ཙཀྲ་ཝརྟི། ཚང་པ་ལྷའི་
གདོན་དང་བཅས་པ་བཅོམ་གྲུབ་པའི་གཙུག་ཏོར་འཁོར་ལོས་སྒྱུར་བ། གཞལ་ཡས་ཁང་གི་ཡ་ཕུབས་ཀྱི་ནང་དུ་པད་ཉི་ལ། འོག་གི་ས་གཞིའི་ནང་གི་ཐིག་ལེ། ཨོཾ་ཨཱཿཧཱུཾ་ཧཱུཾ་དང་རྡོ་རྗེར་གྱུར་པ་ལས། གནོད་མཛེས་ནག་པོ་ནག་དཀར་དམར། །རྡོ་རྗེ་འཁོར་ལོ་ནོར་བུ་གཡས། །ཐུགས་ཀར་སྡིགས་མཛུབ་ཞགས་པ་དང༌། །པདྨ་རལ་གྲི་གཡོན་པས་སོ། །མི་བསྐྱོད་མགོན་པོའི་ཅོད་པན་ཅན། རང་གི་ཐུགས་ཀར་དྲངས། སུམ་བྷ་རཱ་ཛ། ཐུགས་ཀ་ནས་ཕྱིར་ཕྱུང་ནམ་མཁའི་ཁམས་ཐམས་ཅད་ཁྱབ་པར་སྤྲོས། ཀཱ་ལ་ཀུ་ཊ་ལ་སོགས་པ་བརྟན་གཡོའི་དུག་ཐམས་ཅད་དང༌། གདོན་གྱི་བདག་པོ་ཐམས་ཅད་བཅོམ། །སྤྲུལ་པ་རྣམས་གཅིག་ཏུ་འདུས་པ་ལ། གདོད་ནས་གྲུབ་པའི་གནོད་མཛེས་རྒྱལ་པོ་ཡེ་ཤེས་སེམས་དཔའི་ཚུལ་དུ་ཐིམ། རང་གི་རིགས་བདག་ཡབ་ཡུམ་སྙོམས་པར་ཞུགས་པའི་བྱང་ཆུབ་སེམས་ཀྱིས་དབང་བསྐུར། གཙོ་བོའི་གནས་ཀྱི་འོག་རྡོ་རྗེའི་ས་བཞིའི་ནང་དུ་པད་ཉི་ལ་འཁོད་པར་གྱུར། ཁྲོ་བོ་བཅུ་པོ་ཐམས་ཅད་ཀྱང་སྦོམ་ཞིང་ཐུང་ལ་མི་སྡུག་པའི་ཉམས་ཅན། དབུ་སྐྲ་དམར་སེར་གྱེན་དུ་བརྫེས་ཤིང༌། སྨིན་མ་དང་སྨ་ར་དམར་སེར་རབ་ཏུ་འབར་བ། ཞལ་རེ་རེ་ཡང་དམར་ལ་ཟླུམ་པའི་སྤྱན་གསུམ་གསུམ་དང་ལྡན་ཞིང༌། སྦྲུལ་ཆེན་པོ་བརྒྱད་ཀྱིས་བརྒྱན་པ་ནི། ཀླུའི་རྒྱལ་པོ་མཐའ་ཡས་སྔོན་པོས་དབུ་སྐྲ་བཅིངས་ཤིང༌། འཇོག་པོ་དམར་པོས་རྣ་རྒྱན་བྱས་པ་རིགས་ལྡན་ཁྲ་བོས་དཔུང་
པ་ལ་བརྒྱན་ཅིང༌། པདྨ་དཀར་པོས་མགུལ་རྒྱན་བྱས་པ། དུང་སྐྱོང་སེར་པོས་ལག་གདུབ་བྱས་ཤིང༌། སྟོབས་རྒྱུ་ལྗང་ཁུས་མཆོད་ཕྱིར་ཐོགས་བྱས་པ། ནོར་རྒྱས་ཀྱི་བུ་བདུད་རྩིའི་ཁ་དོག་ལྟ་བུས་སྐ་རགས་བྱས་ཤིང༌། པདྨ་ཆེན་པོ་དཀར་པོས་རྐང་གདུབ་བྱས་པ། སྟོབས་ཆེན་ཕ་རོལ་གནོན་པ། སྐུ་ལས་སྐྱེས་པའི་ཡེ་ཤེས་ཀྱི་མེ་རབ་ཏུ་འབར་པའི་དབུས་ན། གདུག་པ་ཅན་ཐམས་ཅད་ཚར་གཅོད་པའི་འཕྲིན་ལས་ལ་བརྩོན་པ། གཡོན་བརྐྱང་གི་སྟབས་ཀྱིས་བཞུགས་པའོ། །འདོད་རྒྱལ་གྱི་ཕྱག་རྒྱ་དང་པོ་ཧཱུཾ་མཛད་ཀྱི་ཕྱག་རྒྱ་མཛད་པ་ནི། ཧཱུཾ་མཛད་ཀྱི་ཕྱག་རྒྱ་དང་ཕལ་ཆེར་འདྲ་བ་ལས་དེར་བརྟགས་པ་ཡིན་ཏེ། ཧཱུཾ་མཛད་ཀྱི་ཕྱག་རྒྱ་ལས་མཛུབ་མོ་གཉིས་ཀྱང་སྦྲེལ་བ་སྟེ། འདོད་རྒྱལ་ཉིད་ཀྱི་ཕྱག་རྒྱ་ཡིན་ནོ། །གཙུག་ཏོར་གྱི་ཕྱག་རྒྱ་ནི། ཐལ་མོ་སྦྱར་བ་ཁ་ཕྱེ་བ་ལས་མཐེ་ཆུང་གཉིས་ཁབ་ལྟར་གཤིབས། སྲིན་ལག་གཉིས་མཐེ་བོང་གིས་མནན། གུང་མོ་གཉིས་བརྐྱང་སྟེ་རྩེ་སྤྲད། མཛུབ་མོ་གཉིས་དེ་ལ་བཙུགས་ཏེ། གཡས་གཡོན་དུ་རྭའི་ཚུལ་གྱིས་བྱས་པའོ། །གསང་འདུས་འཕགས་བསྐོར་གྱི་སྐབས་འདིར། ཁྲོ་བོ་བཅུ་ལ་རོལ་པའི་ཁྲོ་བོ་མི་བཞེད་དེ། ཐམས་ཅད་ཆེར་ཁྲོས་པའོ། །ཡུམ་གྱི་པདྨའི་ནང་གི་གཞལ་ཡས་ཁང༌། རང་གི་ཐུགས་ཀར་དྲངས། ཨོཾ་ཨཱཿཧཱུཾ་ཐུགས་ཀ་ནས་ཕྱིར་ཕྱུང༌། ནམ་མཁའི་ཁམས་ཐམས་ཅད་ཁྱབ་པར་སྤྲོས། སྣོད་ཀྱི་འཇིག་རྟེན་གྱི་དྲི་མ་ཐམས་ཅད་སྦྱངས། ཡེ་ཤེས་ཀྱི་སྣང་བའི་གཞལ་མེད་ཁང་ལ་བཀོད།
སྤྲུལ་པ་རྣམས་གཅིག་ཏུ་འདུས་པ་ལ། གདོད་ནས་གྲུབ་པའི་གཞལ་ཡས་ཁང་ཡེ་ཤེས་སེམས་དཔའི་ཚུལ་དུ་ཐིམ། དེ་ཉིད་དཀྱིལ་འཁོར་ཆེན་པོའི་གཞལ་ཡས་ཁང་ལ་ཐིམ་པར་གྱུར། དེ་ལྟར་ན་དཀྱིལ་འཁོར་ཆེན་པོ་དངས་ཤིང་སྒྲིབ་པ་མེད་པ། ཟུང་དུ་འཇུག་པའི་རང་བཞིན་ལ་མཉམ་པར་འཇོག་སྟེ། དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་ནོ། །དེ་ནས་ཕྲ་མོའི་རྣལ་འབྱོར་ནི། སྟེང་གི་སྣ་རྩེ་འམ། རྡོ་རྗེའི་ལྟེ་བར་ཐིག་ལེ་སོགས་ལ་སེམས་འཛིན་པ་སྟེ། གཞན་དུ་ཤེས་པར་བྱའོ། བསྐྱེད་རིམ་གྱི་རྡོ་རྗེའི་བཟླས་པ་ནི། ཐ་མལ་པ་གང་ལའང་མ་ཆགས་ཤིང༌། ལྷའི་རྣལ་འབྱོར་དང་མི་ཕྱེད་པའི་ཡིད་བཟླས་སོ། །ཚིག་ཏུ་བརྗོད་པའི་བཟླས་པ་ནི། དམ་ཚིག་གི་བཟླས་པ་སྤྲཽ་བསྡུའི་དམིགས་པ་གཙོ་བོར་གསལ་གདབ། བཟླས་བྱའི་སྔགས། ཨོཾ་ཨཱཿཧཱུཾ་ནི་དེ་ཁོ་ན་ཉིད་ཀྱི་སྙིང་པོའོ། །ཨོཾ་ཨཱཿབཛྲ་དྷྲྀཀ་ཧཱུཾ་ཧཱུཾ། ཨོཾ་ཨཱཿཛི་ན་ཛྀཀ་ཨོཾ་ཧཱུཾ། ཨོཾ་ཨཱཿརཏྣ་དྷྲྀཀ་སྭཱ་ཧཱུཾ། ཨོཾ་ཨཱཿཨ་རོ་ལྀཀ་ཨཱཿཧཱུཾ། ཨོཾ་ཨཱཿཔྲཛྙཱ་དྷྲྀཀ་ཧཱ་ཧཱུཾ། ཨོཾ་ཨཱཿམོ་ཧ་ར་ཏཱི་ལཾ་ཧཱུཾ། ཨོཾ་ཨཱཿདྭེ་ཥ་ར་ཏཱི་མཾ་ཧཱུཾ། ཨོཾ་ཨཱཿརཱ་ག་ར་ཏཱི་པཾ་ཧཱུཾ། ཨོཾ་ཨཱཿབཛྲ་ར་ཏཱི་ཏཾ་ཧཱུཾ། ཨོཾ་ཨཱཿརཱུ་པ་བཛྲཱ་ཛཿཧཱུཾ། ཨོཾ་ཨཱཿཤཔྟ་བཛྲ་ཧཱུཾ་ཧཱུཾ། ཨོཾ་ཨཱཿ་གནྡྷ་བཛྲ་བཾ་ཧཱུཾ། ཨོཾ་ཨཱཿར་ས་བཛྲཱ་ཧོཿཧཱུཾ། ཨོཾ་ཨཱཿསྤརྴ་བཛྲཱ་ཁཾ་ཧཱུཾ། ཨོཾ་ཨཱཿམཻ་ཏྲི་མེཾ་ཧཱུཾ། ཨོཾ་ཨཱཿཀྵི་ཏི་གརྦྷ་ ཧཱུཾ། ཨོཾ་ཨཱཿབཛྲ་པཱ་ཎི་ཨོཾ་ཧཱུཾ། ཨོཾ་ཨཱཿཁ་གརྦྷ་ཨོཾ་ཧཱུཾ། ཨོཾ་ཨཱཿལོ་ཀེ་ཤྭ་ར་ཧཱུཾ་ཧཱུཾ། ཨོཾ་ཨཱཿམཉྫུ་ཤྲཱི་ཧཱུཾ་ཧཱུཾ། ཨོཾ་ཨཱཿསརྦ་ནི་ཝ་ར་ཎ་བི་སྐཾ་བི་ནི་ཨོཾ་ཧཱུཾ། ཨོཾ་ཨཱཿས་མནྟ་བྷ་དྲ་སཾ་ཧཱུཾ། ཨོཾ་ཨཱཿཡ་མཱནྟ་
ཀྲིཏ་ཧཱུཾ་ཧཱུཾ། ཨོཾ་ཨཱཿཔྲཛྙཱནྟ་ཀྲིཏ་ཧཱུཾ་ཧཱུཾ། ཨོཾ་ཨཱཿཔདྨཱནྟ་ཀྲིཏ་ཧཱུཾ་ཧཱུཾ། ཨོཾ་ཨཱཿབིགྷྣཱནྟ་ཀྲིཏ་ཧཱུཾ་ཧཱུཾ། ཨོཾ་ཨཱཿཨ་ཙ་ལ་ཧཱུཾ་ཧཱུཾ། ཨོཾ་ཨཱཿཊཀྐི་རཱ་ཛཱ་ཧཱུཾ་ཧཱུཾ། ཨོཾ་ཨཱཿནཱི་ལ་དཎྜ་ཧཱུཾ་ཧཱུཾ། ཨོཾ་ཨཱཿམཧཱ་བ་ལ་ཧཱུཾ་ཧཱུཾ། ཨོཾ་ཨཱཿཨུཥྞཱི་ཥ་ཙཀྲ་ཝརྟི་ཧཱུཾ་ཧཱུཾ། ཨོཾ་ཨཱཿསུམྦྷ་རཱ་ཛ་ཧཱུཾ་ཧཱུཾ། ཡུམ་བཞི་དང་ཁྲོ་བོ་དགུའི་འཕྲེང་སྔགས་ནི། རྩ་བའི་རྒྱུད་ཉིད་དུ་གསལ་བར་གསུངས་པའོ།། གཙོ་བོ་དོན་དམ་ལ་བཞུགས་པ་ནི། ཡབ་ཡུམ་སྙོམས་པར་ཞུགས་པའི་བདེ་བ་ཆེན་པོས། སེམས་དཔའ་གསུམ་ཀ་འོད་གསལ་དུ་ཞུགས་པར་གྱུར། དེ་ནས་གླུས་བསྐུལ་བ་ནི། སྤྱན་མས། སེམས་ཅན་ཁམས་ན་གནས་ཀྱི་དབང་ཕྱུག་ཁྱོད་ནི་རྡོ་རྗེའི་ཐུགས། ། དགའ་བ་ཡིད་འོང་དོན་ཆེན་འདོད་པས་བདག་ལ་བསྐྱབ་ཏུ་གསོལ། །མགོན་པོ་གལ་ཏེ་བདག་ནི་དེ་རིང་གསོན་པར་མཆིས་བཞེད་ན། །སེམས་ཅན་ཡབ་ཆེན་གཉེན་མཆོག་བདག་ལ་དགེས་པར་མཛད་དུ་གསོལ། །མཱ་མ་ཀཱིས། རྡོ་རྗེའི་སྐུ་ཁྱོད་བཀའ་ཡི་འཁོར་ལོ་སེམས་ཅན་ཀུན་ལ་ཕན། །སངས་རྒྱས་དོན་དུ་བྱང་ཆུབ་དོན་དམ་རྗེས་སུ་ཕན་སྟོན་པ། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །འདོད་ཆགས་དམ་ཚིག་ཆགས་པས་བདག་ལ་དགེས་པར་མཛད་དུ་གསོལ། །གོས་དཀར་མོས། ཁྱོད་ནི་རྡོ་རྗེའི་གསུང་ཏེ་ཀུན་ལ་ཕན་ཞིང་ཐུགས་བརྩེ་བ། །འཇིག་རྟེན་དག་གི་དགོས་པའི་དོན་མཛད་པ་ལ་རྟག་ཏུ་བརྩོན། །མགོན་པོ་གལ་ཏེ་དེ་རིང་
བདག་ནི་གསོན་པར་མཆིས་བཞེད་ན། །རབ་དགའི་སྤྱོད་པ་ཀུན་ཏུ་བཟང་པོས་བདག་ལ་དགེས་པར་མཛོད། །སྒྲོལ་མས། ཁྱོད་ནི་རྡོ་རྗེ་འདོད་པ་དམ་ཚིག་མཆོག་གི་ཕན་དོན་ཆེ། །ཡང་དག་རྫོགས་སངས་རྒྱས་ཀྱི་གདུང་མཆོག་མཉམ་པ་ཉིད་གཟིགས་པ། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །ཡོན་ཏན་རིན་ཆེན་མང་པོའི་གཏེར་གྱུར་བདག་ལ་དགེས་པར་མཛོད། །ཅེས་བསྐུལ་པས། གཙོ་བོ་སེམས་དཔའ་གསུམ་ཡོངས་སུ་རྫོགས་པ་སྔོན་བཞིན་དུ་གྲུབ་པར་གྱུར། དེ་ནས་བསྟོད་ཅིང་མཆོད་པ་ནི། མི་བསྐྱོད་རྡོ་རྗེ་ཡེ་ཤེས་ཆེ། ། རྡོ་རྗེ་དབྱིངས་ནི་མཁས་པ་ཆེ། །རྡོ་རྗེ་གསུམ་མཆོག་དཀྱིལ་འཁོར་གསུམ། ། གསང་བའི་དབྱིངས་ལ་ཕྱག་འཚལ་ལོ། །རྣམ་པར་སྣང་མཛད་དག་པ་ཆེ། །རྡོ་རྗེ་ཞི་བ་དགའ་ཆེན་པོ། །རང་བཞིན་འོད་གསལ་མཆོག་གི་མཆོག །སྟོན་པ་རྡོ་རྗེ་ཕྱག་འཚལ་ལོ། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་མཁའ་འདྲ་དྲི་མ་མེད། ། རང་བཞིན་དག་པ་གོས་པ་མེད། །རྡོ་རྗེའི་སྐུ་ལ་ཕྱག་འཚལ་ལོ། །རྡོ་རྗེ་དཔག་མེད་རྒྱལ་པོ་ཆེ། །མི་རྟོག་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། རྡོ་རྗེ་གསུང་ལ་ཕྱག་འཚལ་ལོ། །དོན་ཡོད་རྡོ་རྗེ་རྫོགས་སངས་རྒྱས། ། བསམ་པ་ཐམས་ཅད་རྫོགས་མཛད་པ། །དག་པ་ངོ་བོ་ཉིད་ལས་བྱུང༌། །རྡོ་རྗེ་སེམས་དཔའ་ཕྱག་འཚལ་ལོ། །
ཨོཾ་སརྦ་ཏ་ཐཱ་ག་ཏ་ཨརྒྷཾ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཤྲཱི་ཨཱཿཧཱུཾ། ཨརྒྷཾ་གྱི་གནས་སུ་པཱདྱཾ། པུཥྤེ། ངྷཱུ་པེ། ཨཱ་ལོ་ཀེ གནྡྷེ། ནཻ་ཝི་ཏེ། ཤཔྟ། རཱུ་པ། ཤཔྟ། གནྡྷ། ར་ས། སྤརྴ། ངྷརྨ་དྷ་ཏུ་ཞེས་པ་རྣམས་སྦྱར་རོ། །ལྷ་རྣམས་ཀྱི་ལྗགས་ཧཱུཾ་ལས་བྱུང་བའི་རྡོ་རྗེ་རྩེ་ལྔ་པ། དེའི་འོད་ཟེར་གྱི་སྦུ་གུས་དྲངས་ཏེ་བདུད་རྩི་གསོལ་བར་གྱུར། རྡོ་རྗེ་འཆང་ཆེན་ཕྱག་ན་རྡོ་རྗེ་ཨིནྡྲ་བྷུ་ཏི་དང༌། །ཀླུ་ཡི་རྣལ་འབྱོར་མ་དང་བི་སུ་ཀལྤ་ས་ར་ཧ། །ཀླུ་སྒྲུབ་ཡབ་སྲས་བཞི་དང་ཟླ་གྲགས་སློབ་པའི་རྡོ་རྗེ་དང༌། །ནག་པོ་ས་འདྲེས་དེ་བཱ་ཀ་ར་འགོས་ལོ་ཁུག་པ་དང༌། ། མངར་སེང་རྒྱལ་ཡེ་ཤེས་སེང་གེ་ཉི་སེང་ཉི་མ་ལྕམ། །རྔོག་སྟོན་འཕགས་ལྷ་ཐང་སྤེ་བ་དང་གསེར་སྡེངས་གཞོན་ནུ་འོང༌། ཆོས་སྐུ་འོད་ཟེར་འཕགས་འོད་བུ་སྟོན་རིན་ཆེན་རྣམ་རྒྱལ་དང༌། །དཔལ་མཆོག་དོན་གྲུབ་ཙནྡྲ་ཤྲཱི་འཁྲུལ་ཞིག་ཚུལ་རྒྱལ་བ། །མཁྱེན་རབ་མཆོག་གྲུབ་དཀོན་མཆོག་དཔལ་བཟང་བཀྲ་ཤིས་རྒྱལ་མཚན་དང༌། །དཔལ་ལྡན་ཆོས་བཟང་ལ་སོགས་རྩ་བརྒྱུད་བླ་མ་རྣམས་ལ་མཆོད། །ཨོཾ་ཨཱཿཧཱུཾ། ལུགས་འདི་ལ་སྤྱིར་བརྒྱུད་པ་བདུན་ལྡན་གྱི་བཀའ་སྲོལ་ཚང་བས། བརྒྱུད་པ་དེ་དག་གང་ནས་དྲངས་ཀྱང་འདྲའོ། །ཡང་ན། བུ་སྟོན་ཁྱུང་པོ་ལྷས་པ་དང། ཤར་ངོར་པཎ་ཆེན་ཆོས་རྗེ་རབ་གསལ་ཟླ་བ་མགོན་པོ་དང༌། གྲོལ་མཆོག་ཞབས་དང་བྱམས་པའི་མཚན་ཅན་རྣམས་ལ་མཆོད་པར་འབུལ། ཞེས་སོ། །ཡང་ན། བུ་སྟོན་བླ་མ་
དམ་པ་དང༌། ཐེག་ཆེན་པ་དང་བསོད་ནམས་བཟང་པོ་རྡོ་རྗེ་གདན་པ་དང༌། བྱང་དབང་ཤཱཀྱ་ཀུན་དགའ་ཡེ་ཤེས་དབང་པོ་རྣམས་ལ་འབུལ། ཞེས་བྱ་ཞིང༌། ཕྱི་མ་འདི་ལ་འགོས་ལོ་ཙཱ་བ་ནས། དབུས་པ་དགེ་སེར་སོགས་དང༌། ས་སྐྱ་གོང་མ་ལྔ་ཆར་ལ་དེད་ཀྱང་ཆོག་པ་ཡོད་དོ། །དེ་ནས་འཕྲེང་སྔགས་ཀྱི་མཐར། རེ་རེ་བཞིན་འབྲུ་གསུམ་བཏགས་པས་ནང་མཆོད་འབུལ། བདུད་རྩི་མྱང་རྗེས་ཆགས་ཀྱི་མཆོད་པ་སྔོན་བཞིན་ཡིད་ཀྱིས་དྲན་པ་ཙམ་བྱ། དེ་ནས་ཉེར་བསྡུ་ནི། རང་གི་སྙིང་གའི་ས་བོན་གྱི་འོད་ཟེར་གྱིས། འཁོར་གྱི་ལྷ་རྣམས་སྤྱན་དྲངས་ཏེ་རང་གི་ལུས་ལ་ཐིམ། གཞལ་ཡས་ཁང་འོད་དུ་ཞུ་ནས་རང་ལ་ཐིམ། ཡབ་ཡུབ་སྙོམས་པར་ཞུགས་པའི་སྦྱོར་མཚམས་ནས་བྱང་ཆུབ་ཀྱི་སེམས་ཀྱི་འོད་ཟེར་སྤྲོས་ཏེ། སེམས་ཅན་ཐམས་ཅད་ལ་དབང་བསྐུར། སྡིག་སྒྲིབ་སྦྱངས་ཏེ་ཧཱུཾ་ཡིག་གི་རྣམ་པ་ནམ་མཁའ་གང་བར་གྱུར། ཐམས་ཅད་ཀྱང་རྡོ་རྗེ་འཆང་གི་ཕྱག་རྒྱ་ཆེན་པོར་གྱུར་ཏེ། དེ་ཐམས་ཅད་རང་གི་ཐུགས་ཀའི་འོད་ཟེར་གྱིས་དྲངས་ནས། རང་ཉིད་ལ་ཐིམ་པར་གྱུར་ཞེས་བརྗོད་ལ་དབྱིངས་དེར་ཅུང་ཟད་མཉམ་པར་བཞག་གོ །དེ་དག་ནི་ལས་རྒྱལ་མཆོག་གི་ཏིང་ངེ་འཛིན་ནོ། །སླར་ཡང་བདག་ཉིད་རྡོ་རྗེ་འཆང་ཕྱག་གཉིས་པའི་རྣམ་པ་ཅན་དུ་གྱུར། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཆོས་ཐམས་ཅད་རྡོ་རྗེ་གསུམ་མཉམ་པ་ཉིད་ཀྱི་རང་བཞིན་དུ་ལྷག་པར་མོས་པས་ཐུན་མཚམས་
ཀྱི་སྤྱོད་པ་ལ་འཇུག་སྟེ། དགེ་བ་འདི་ཡིས་མྱུར་དུ་བདག །སངས་རྒྱས་ཀུན་གྱི་ཀུན་བདག་ཉིད། །རྡོ་རྗེ་འཆང་བ་ཐོབ་གྱུར་ཅིག །འགྲོ་བས་ཀྱང་ནི་དེ་ཐོབ་ཤོག །བྱང་ཆུབ་ཕྱིར་ནི་སྤྱོད་གང་དང༌། །རྫོགས་སངས་རྒྱས་ཀྱི་གང་ཡིན་པ། །བྱང་ཆུབ་རྡོ་རྗེ་གང་གསུངས་པའི། །སྤྱོད་དེ་གཉིས་ཀའང་བདག་སྤྱོད་ཤོག །ཅེས་སོ། །སྐབས་འདིར་གཏོར་མ་འབུལ་བར་འདོད་ན། མཆོད་གཏོར་འདུས་བྱས་ལ། ཨོཾ་ཨཱཿབིགྷྣཱནྟ་ཀྲྀཏ་ཧཱུཾ། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས། ཡཾ་ལས་རླུང་གི་དཀྱིལ་འཁོར་ལྗང་སྔོན་ཟླ་གམ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ། དེའི་སྟེང་དུ་ཨཱཿལས་བྱུང་བའི་ཐོད་པ་ཕྱི་དཀར་ལ་ནང་དམར་པའི་ནང་དུ་ཨ་ལས་བྱུང་བའི་པདྨ་དམར་པོ་འདབ་མ་བརྒྱད་པ་ཨཱ་རིང་པོས་མཚན་པ། དེའི་དབུས་སུ་ཧཱུཾ་ལས་མིའི་ཤ་དང༌། དྲི་ཆུ་ཧཱུཾ་གིས་མཚན་པ། ཤར་དུ་ཨོཾ་ལས་སོ་ལྡན་གྱི་ཤ་དང་དྲི་ཆུ་ཨོཾ་གྱིས་མཚན་པ། ལྷོར་སྭཱ་ལས་མགྱོགས་འགྲོའི་ཤ་དང་རཀྟ་སྭཱ་ཡིས་མཚན་པ། ནུབ་ཏུ་ཨ་ལས་ཁྱུ་མཆོག་གི་ཤ་དང༌། བྱང་སེམས་ཨས་མཚན་པ། བྱང་དུ་ཧཾ་ལས་ཤྭ་ནའི་ཤ་དང༌། ཤ་ཆེན་གྱི་དྭངས་མ་ཧཱ་ཡིས་མཚན་པ། དེ་ཐམས་ཅད་ཀྱི་ཐུན་མོང་གི་སྟེང་དུ་ཨོཾ་ཡིག་གིས་མཚན་པ། དེའི་སྟེང་གི་བར་སྣང་ལ། ཟླ་བའི་སྟེང་དུ་ཧཱུཾ་ལས་བྱུང་བའི་རྡོ་རྗེ་དཀར་པོ་རྩེ་ལྔ་པ་ཧཱུཾ་གིས་མཚན་པ། ཧཱུཾ་
ལས་འོད་འཕྲོས་རླུང་གཡོས་མེ་སྤར་རྫས་རྣམས་སྐོལ་བའི་ནང་དུ། རྡོ་རྗེ་ཟླ་བ་དང་བཅས་པ་ལྷུང་ནས་དཀྲུགས་པས། ཐམས་ཅད་ཞུ་ནས་རོ་མཉམ་དུ་གྱུར་པ། དྲི་མ་སྦྱངས་ཏེ་དག་པའི་ཤེལ་ལྟར་གྱུར། པདྨ་ཨ་དང་བཅས་པ་ཞུ་བས་ཉི་མ་ལྟར་འབར་བའི་འོད་ཀྱི་ཡེ་ཤེས་ཀྱི་བདུད་རྩིར་རྟོགས་པར་བྱས། ཨོཾ་ལས་འོད་ཟེར་འཕྲོས། ཕྱོགས་བཅུའི་སངས་རྒྱས་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་སྤྱན་དྲངས་ཤིང༌། འཁོར་འདས་ཀྱི་བདུད་རྩི་ཐམས་ཅད་བཀུག་སྟེ་ཐིམ་པས། སྤར་ཞིང་སྤེལ་བ་ལས། བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ་ལན་གསུམ་བརྗོད་པས་བྱིན་གྱིས་བརླབ་བོ། །མཆོད་པའང་དངོས་སུ་བཤམས་ཡོད་ན་བྱིན་གྱིས་རླབས་དགོས་ལ། དངོས་བཤམ་མེད་ན་མི་དགོས་སོ། །ཤཱུ་ནྱ་ཏཱས་སྟོང་པར་སྦྱངས། སྟོང་པའི་ངང་ལས་ཧཱུཾ་ལས་བྱུང་བའི་བསྲུང་འཁོར་གྱི་ནང་དུ་བྷྲུཾ་ལས་བྱུང་བའི་གཞལ་ཡས་ཁང་གདན་དང་བཅས་པ་གྲུབ་པར་གྱུར། རང་གི་སྙིང་ག་ནས་རྡོ་རྗེ་སེམས་དཔའ་ཞཻ་སྡང་རྡོ་རྗེའི་རྣམ་པ་ཅན་ལ་སོགས་པ། དཔལ་གསང་བ་འདུས་པ་ལྷ་སུམ་ཅུ་རྩ་གཉིས་ཀྱི་དཀྱིལ་འཁོར་གྱི་འཁོར་ལོ་སྤྲུལ། མདུན་གྱི་གཞལ་མེད་ཁང་གི་ནང་སོ་སོའི་གདན་གྱི་སྟེང་དུ་བཞུགས་པར་གྱུར། ཡང་རང་གི་སྙིང་གའི་ཏིང་ངེ་འཛིན་སེམས་དཔའ་ལས་འོད་ཟེར་འཕྲོས། ཁམས་གསུམ་དང༌། སྐྱེ་གནས་བཞི་དང་
རིགས་དྲུག་སྲིད་པ་བར་མ་དང་བཅས་པས་བསྡུས་པའི་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། རྡོ་རྗེ་འཆང་ཆེན་པོའི་སྐུར་གྱུར། ཚུར་འདུས་གཅིག་ཏུ་འདྲེས་པ། གཞལ་ཡས་ཁང་གི་ནང་དུ་ཕྱིན་པ་ཙམ་གྱིས་ལྷ་སུམ་ཅུ་རྩ་གཉིས་ཀྱི་ལྷ་ཚོགས་སུ་གྱུར་ནས། ལྷ་ཚོགས་སྔ་མ་དང་གཉིས་སུ་མེད་པར་འདྲེས། རང་གི་ཐུགས་ཀ་ནས་གནོད་མཛེས་རྒྱལ་པོ་སྤྲོས། ཕྱོགས་བཅུ་དུས་གསུམ་གྱི་སངས་རྒྱས་བྱང་སེམས་འཕགས་པའི་ཚོགས་དང་བཅས་པ་ཐམས་ཅད་ཡེ་ཤེས་ཀྱི་འཁོར་ལོ་རྡོ་རྗེ་སེམས་དཔའ་ལྷ་སུམ་ཅུ་རྩ་གཉིས་ཀྱི་དཀྱིལ་འཁོར་གྱི་རྣམ་པར་སྤྱན་དྲངས། ཨོཾ་བཛྲ་ས་མཱ་ཛཿ ཛཿཧཱུཾ་བཾ་ཧོཿལན་མང་དུ་བརྗོད། ལྷ་ཐམས་ཅད་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཨོཾ་སརྦ་ཏ་ཐཱ་ག་ཏ་ཨརྒྷཾ་པཱུ་ཛ་སོགས་ཀྱིས་མཆོད། ལྷ་རྣམས་ཀྱི་ལྗགས་ཧཱུཾ་ལས་བྱུང་བའི་རྡོ་རྗེ་རྩེ་ལྔ་པ་རྩེ་མོར་ཨོཾ་དང་ནོར་བུས་མཚན་པ་དེའི་འོད་ཟེར་གྱི་སྦུ་གུས་དྲངས་ཏེ་གཏོར་མ་གསོལ་བར་གྱུར། གཏོར་མ་དབུལ་བའི་སྔགས་ནི། ཤནྟ་དེ་བ་ན་རེ། ཨོཾ་ཨཱཿབཛྲ་དྷྲྀཀ་པཉྩ་ཨ་མྲྀ་ཏ་ཧཱུཾ་ཞེས་པ་ནས། ཨོཾ་ཨཱཿསུཾ་བྷ་རཱ་ཛ་པཉྩ་ཨ་མྲྀ་ཏ་ཧཱུཾ་ཞེས་པའི་བར་གྱི་འབུལ་བར་འདོད། དེ་ལྟར་བྱས་ཀྱང་རུང་ལ་ལག་ལེན་ནག་པོ་དམ་ཚིག་རྡོ་རྗེའི་གཏོར་ཆོག་བཞིན་མཛད་དེ། ཨོཾ་ཨཱཿཧཱུཾ་ཨོཾ་སྭཱ་ཨཱཿཧཱ་ལཾ་མཾ་པཾ་ཏཾ། ཛཿཧཱུཾ་བཾ་ཧོཿ ཁཾ་མཻཻཾ་ ཨོཾ་ཨོཾ་ཨོཾ་ཧཱུཾ་ཨོཾ་ཨོཾ། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཨོཾ་ཨ་ཀཱ་རོ་
མུ་ཁཾ་སརྦ་དྷརྨཱ་ཎཾ་ཨདྱ་ནུདྤནྣ་ཏྭཏ། ཨོཾ་ཨཱཿཧཱུཾ་ཕཊ་སྭཱཧཱ། ཞེས་པ་ལན་གསུམ་མམ་ལྔས་ཕུལ། རྒྱས་པ་བྱེད་ན་ལྷ་རེ་རེ་བཞིན་སྙིང་པོའི་མཐར་ཨ་ཀཱ་རོ་བཏགས་པས་འབུལ། ཆུ་གཉིས་དང་ཉེར་སྤྱོད་སྔར་བཞིན་ཕུལ། མི་བསྐྱོད་རྡོ་རྗེ་ཡེ་ཤེས་ཆེ། །ཞེས་སོགས་དེ་ཉིད་ལྔ་པས་བསྟོད། འཇིག་རྟེན་པའི་གཏོར་མ་སྒོས་སུ་མི་བྱེད་ན། འདིར་འཕྲིན་ལས་བཅོལ་བ་མན་ཆད་བྱ། འདི་འཇིག་རྟེན་འཇིག་རྟེན་འདས་པ་ཐམས་ཅད་མཉམ་ཉིད་དུ་འབུལ་བའི་ལུགས་ཡིན་པས། འཇིག་རྟེན་པའི་གཏོར་ཆོག་ལོགས་སུ་མེད་ཀྱང་ཆོག་པའི་དབང་དུ་བྱས་ནས། ཤན་ཏ་དེ་བས་མཆོད་བསྟོད་ཀྱི་རྗེས་སུ། ཆོས་བཤད་མཛད་དོ། །འོན་ཀྱང་ལག་ལེན་དམ་ཚིག་རྡོ་རྗེ་དང་མཐུན་པར་འཇིག་རྟེན་པའི་གཏོར་མ་ལོགས་སུ་བྱེད་དེ། དེ་ལྟར་དེ་ཉིད་ལྔ་པའི་བསྟོད་པ་སོང་ནས། འཇིག་རྟེན་པའི་གཏོར་ཆོག་བྱས་ཏེ། འཕྲིན་ལས་གཞོལ་པ་ཕྱོགས་ཅིག་ཏུ་བྱ་ཞིང༌། སྒོས་ཀྱི་བསྲུང་མ་ནག་པོ་ཆེན་པོ་སོགས་ལ་འབུལ་བར་འདོད་ན། འཇིག་རྟེན་འཇིག་རྟེན་འདས་པའི་གཏོར་མའི་བར་འདིར་བྱའོ། །འཇིག་རྟེན་པའི་གཏོར་མ་ནི། རང་གི་སྙིང་ག་ནས་འོད་ཟེར་འཕྲོས། སྲིད་པ་གསུམ་གྱི་འབྱུང་པོའི་ཚོགས་ཐམས་ཅད་ཨོཾ་བཛྲ་ས་མཱ་ཛཿ ཨོཾ་བཛྲ་ཨརྒྷཾ་སྭཱཧཱ། ཆོས་རྣམས་གཟུགས་བརྙན་ལྟ་བུ་སྟེ། ། གསལ་ཞིང་དག་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཡང་དག་འབྱུང༌། །ངོ་བོ་ཉིད་མེད་གནས་མེད་པ། །དེ་ལྟར་ཆོས་རྣམས་ཤེས་གྱིས་ལ། །སེམས་ཅན་དོན་ནི་མཉམ་མེད་
བྱོས། །འོན་ཀྱང་སངས་རྒྱས་སྲས་སུ་སྐྱེ། །ཞེས་མཆོག་སྦྱིན་གྱི་ཕྱག་རྒྱ་དང་བཅས་པས་བརྗོད། ཨོཾ་ཨཱཿཧཱུཾ་ཨི་དཱཾ་སྠཱ་ན་ཨ་དཱི་ནཾ་སརྦ་ཀྵེ་ཏྲ་པཱ་ལ་སརྦ་ཡཀྵ་རཱཀྵ་ས། ཨུནྨཱ་ད། ཨ་པ་སྨཱ་ར། སརྦ་དཱེ་བ། སརྦ་ནཱ་གསརྦ་པཱ་ཐ། སརྦ་ཌཱ་ཀི་ནྱ་སརྦ་སཏྭ། སརྦ་བྷཱུ་ཏ། ཨ་ཏ་ཡ། ཨི་དཾ་བ་ལིཾ་གྲྀཧྞ་གྲྀཧྞ། མ་མ་སརྦ་ས་པ་རི་ཝཱ་རཱ་ན། སརྦ་སཏྭ་ནཱཉྩ། སརྦ་པཱ་པཾ། བྱ་ཏི། བིགྷ་ན། ཤིནྟཾ་ཀུ་རུ། ངྷ་ན་ངྷ་ནྱ། ཨ་ཡུ་ཨ་རོ་ཀྵ། ཨ་ཏི་པུཥྟིཾ་ཀུ་རུ། སརྦ་བྷ་ཡ་རཀྵ་ཀུ་རུ་སྭཱཧཱ། ཐམས་ཅད་གྲུབ་པར་མཛོད་ཅིག །དགེ་བའི་སེམས་སུ་མཛོད་ཅིག །ཅེས་ལན་བདུན་ལ་སོགས་པས་གཏོར་མ་ཕུལ། ཨོཾ་བཛྲ་ཨརྒྷཾ་སྭཱཧཱ། པཱདྱཾ། ཨོཾ་བཛྲ་པུཥྤེཿཧཱུཾ་ནས། ཤཔྟའི་བར་གྱིས་མཆོད། རྡོ་རྗེ་རྣམ་གསུམ་དབྱེར་མེད་དངོས། །གདོད་ནས་རྣམ་པར་དག་པ་ཡི། །ཡེ་ཤེས་ལྔ་ཡི་རང་བཞིན་ཅན། །དེ་དག་རྣམས་ལའང་བསྟོད་པར་བགྱི། །ཨོཾ་ཕྱོགས་བཅུར་རྣམ་པར་གནས་རྣམས་དང༌། །འདིར་ནི་ཀུན་ཏུ་གནས་པ་དང༌། ། ལྷ་དང་ཀླུ་དང་གནོད་སྦྱིན་དང༌། །དྲི་ཟ་ལྷ་མིན་ནམ་མཁའ་ལྡིང༌། །མི་འམ་ཅི་དང་ལྟོ་འཕྱེ་ཆེ། །འབྱུང་པོ་ཡི་དྭགས་ཤ་ཟ་དང། །སྨྱོ་བྱེད་དང་ནི་བརྗེད་བྱེད་དང༌། ། གནོན་པོ་ལ་སོགས་པ་རྣམས་ལ། །གཏོར་མ་འབུལ་གྱིས་བསྣམས་ནས་ཀྱང༌། ། བདེ་དང་ཡིད་བདེ་ཐོབ་གྱུར་ཅིག །གནས་འདིར་ཉེར་འཚེ་མེད་པར་མཛོད། ། སངས་རྒྱས་ཀུན་གྱི་བྱིན་བརླབས་ཀྱིས། །ཨོཾ་ཨཱཿཧཱུཾ་གི་བདུད་རྩི་
ཡི། །བཟའ་བ་ལ་ནི་ལོངས་སྤྱོད་ནས། །བདག་ཅག་འཁོར་དང་བཅས་པ་ལ། །ཞི་དང་བཀྲ་ཤིས་མཛད་དུ་གསོལ། །སྭཱཧཱ། ཞེས་པའི་སྔགས་ལན་གསུམ་གྱིས་གསོལ་བ་བཏབ། ཐུན་མོང་དུ་འཕྲིན་ལས་གཞོལ་བ་ནི། དཀྱིལ་འཁོར་ལྷ་ནི་ཐམས་ཅད་དང༌། །ཞིང་སྐྱོང་ལ་སོགས་འབྱུང་པོའི་ཚོགས། །སྲིད་པ་གསུམ་ན་གང་གནས་པ། །འཇིག་རྟེན་འཇིག་རྟེན་འདས་པ་ཀུན། །མཆོད་སྤྱིན་གཏོར་མ་འདི་བཞེས་ལ། །ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །ཡི་གེ་བརྒྱ་པས་ལྷག་ཆད་ཁ་བསྐང༌། མ་འབྱོར་བ་དང་སོགས། ཨོཾ་ཁྱེད་ཀྱིས་སེམས་ཅན་དོན་ཀུན་མཛད་སོགས། ཨོཾ་ཨཱཿཧཱུཾ་བཛྲ་མུཿ འཇིག་རྟེན་པ་རྣམས་རང་གནས་སུ་གཤེགས། འཁྱུད་རྒྱ་དང་བཅས་ཏེ་ཨོཾ་ཨཱཿཧཱུཾ། ཡེ་ཤེས་པ་རྣམས་རང་ལ་ཐིམ། སྨོན་ལམ་དང་བཀྲ་ཤིས་བྱའོ། །འདིར་གཏོར་ཆོག་ལ། ཕྱིས་ཀྱི་མཁས་པ་ཆེན་པོ་རྣམས་ཀྱིས་འཕྲེང་བ་ལྟར་སྦྱར་བ་ཡང་ཤིན་ཏུ་ལེགས་མོད་ཀྱི། འདིར་འགོས་ལུགས་དང༌། རྔོག་ལུགས་ཀྱི་བླ་མ་སྔ་མ་རྣམས་མཛད་པའི་ལག་ལེན་འདི། དོན་ཚང་ཕྱིན་ཁྱེར་བདེ་བར་སྣང་པས་བཀོད་པ་ཡིན་ནོ། །མར་ལུགས་ཀྱི་གཏོར་ཆོག་ཀྱང་ཕལ་ཆེར་འདི་དང་འདྲའོ། །འདིར་སྨྲས་པ། འདི་ལ་སྒྲུབ་ཐབས་ལེགས་པོ་མང་ཡང༌། །ཕལ་ཆེར་ཚིག་ཚོགས་ཤིན་ཏུ་ཆེ་བས། །སྒོམ་དོན་ཉམས་སུ་ལེན་པ་ལྟ་ཞོག །ཚིག་ཙམ་སྐྱོར་བའང་དཀར་བར་མཐོང་ལ། ཐུན་བཞིའི་རྣལ་འབྱོར་རེ་ཐག་ཆད་པས། །མ་སྨིན་སྐྱེ་བོ་ཚོགས་པའི་དབུས་
སུ། །སྒྲུབ་མཆོད་མིང་བཏགས་ལག་ལེན་འཆོལ་བས། །དཀོར་རྫས་ཙམ་ཞིག་དོན་དུ་གཉེར་བའམ། འགའ་ཞིག་ཚིག་གི་བཤད་པ་ན་ཡམས། །རྟོག་གེས་བསླད་པའི་ཅལ་ཅོལ་མང་པོས། མཁས་གྲགས་ཙམ་ཞིག་དོན་དུ་གཉེར་ཏེ། །བསྒྲུབ་དཀྱིལ་ཟབ་མོ་འབད་པས་བཟུང་བའི།།འབྲས་བུ་དེ་ཙམ་ཅིག་ལ་རེའོ། །ཧ་ཅང་རྒྱས་ལ་སྐྱོན་དེ་མཐོང་ནས། །ཚིག་ཉུང་འཛིན་སླ་ལག་ལེན་བདེ་འདི། །ཉམས་ལེན་འདོད་པ་འགའ་ཞིག་སྲིད་ན། །དེ་ལ་ཕན་ནམ་སྙམ་ནས་བཀོད་དོ། ། ཚིག་ཚོགས་ཆེན་པོ་ངོམས་པར་མི་འདོད། །དགོས་དོན་ཟབ་མོ་གནད་ལ་སྦྱོར་ན། །འདི་ཙམ་གྱིས་ཀྱང་དོན་མཆོག་སྟོན་འགྱུར། །ཞེས་བྱའོ། །འདི་བྲིས་པ་ལས་བྱུང་བ་ཡི། །དགེ་བ་སྲིད་མེད་གང་བསགས་དེས། །སྲིད་པ་གསུམ་གནས་སེམས་ཅན་རྣམས། །རྡོ་རྗེ་འཆང་ཆེན་ཐོབ་པར་ཤོག །ཅེས་པ་གསང་བ་འདུས་པའི་སྒྲུབ་ཐབས་འབར་བའི་འོད་གསལ་ཞེས་བྱ་བ་འདི་ཡང་རྒྱལ་ཁམས་པ་ཏཱ་ར་ནཱ་ཐས་ནགས་རྒྱལ་གྱི་དབེན་གནས་སུ་སྨྲས་པའོ།། །།འདིས་ཀྱང་བསྟན་འགྲོ་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག