འཁོར་ལོ་སྡོམ་པ་ཁྲོ་བོ་རྣམ་པར་རོལ་པ་ཞེས་བྱ་བ་རྡོ་རྗེ་ཧེ་རུ་ཀའི་སྒྲུབ་ཐབས།
འཁོར་ལོ་སྡོམ་པ་ཁྲོ་བོ་རྣམ་པར་རོལ་པ་ཞེས་བྱ་བ་རྡོ་རྗེ་ཧེ་རུ་ཀའི་སྒྲུབ་ཐབས་བཞུགས།
ཨོཾ་ན་མོ་སམྦྷ་རཱ་ཡ། འཁོར་ལོ་བདེ་མཆོག་ཁྲོ་བོ་རྣམ་པར་རོལ་པ་ཞེས་བྱ་བ་རྡོ་རྗེ་ཧཱུཾ་མཛད་ཧེ་རུ་ཀའི་སྒྲུབ་ཐབས། བླ་མ་དང་དཔལ་ཧེ་རུ་ཀ་ལ་ཕྱག་འཚལ་ཞིང་སྐྱབས་སུ་མཆིའོ། །རྡོ་རྗེ་ཅན་འདི་དུས་ལས་རབ་གྲོལ་མཆོག་ཏུ་དུལ་བའི་རང་བཞིན་ཏེ། །འགྲོ་རྣམས་མུན་པ་མཐར་བྱེད་རབ་ཏུ་ཆེ་བའི་ནང་གི་འོད་ཟེར་ནི། །རྟག་ཏུ་འཆར་བ་རང་གི་རིག་མ་དང་འདུས་བདུད་བཞི་འཇོམས་དཔའ་བོ། །འཇིག་རྟེན་གསུམ་རྒྱལ་བདེ་བའི་རོལ་པ་འགྲོ་བའི་སྙིང་ལ་འཇུག་པར་མཛོད། །སྡོམ་པའི་རྒྱུད་རྒྱལ་དངོས་གྲུབ་ཀྱི། །ཆུ་གཏེར་འདི་ནི་ཆུ་གཏེར་བཞིན། །མཆོག་ཏུ་རྒྱ་ཆེ་གཏིང་ཡང་ཟབ། །ཇི་ལྟར་རྒྱ་མཚོའི་འགྲམ་དག་ཀྱང༌། །རྐྱལ་བས་ཚུགས་མིན་དེ་བཞིན་རིན་ཆེན་འབྱུང་གནས་འདིའི། །སྦྱོར་བ་རེ་རེའང་ཚུ་རོལ་མཐོང་བའི་བློས་མི་སྤྱོད། །འོན་ཀྱང་དཀར་པོའི་བློ་ཡིས་རྣམ་འབྱེད་རྡོ་རྗེ་ཅན། །དེང་བདག་སྙིང་ལ་ཞུགས་སྙམ་འདི་ལ་བློ་མིག་ཐོབ། །དེ་ལྟར་ན་གཟུ་བོར་གནས་པས་མཉན་པའི་རིགས་སོ། །འདིར་དཔལ་ལྡན་འཁོར་ལོ་སྡོམ་པ་ཤྲཱི་ཧེ་རུ་ཀ་རྡོ་
རྗེ་ཁྲོ་བོ་ཧཱུཾ་མཛད་ཀྱི་རྣལ་འབྱོར་ལ་སོགས་པ་ཁྲོ་བོ་བཅུའི་བཀའི་འཁོར་ལོས་སྡང་བ་དང་མ་རུངས་པའི་སེམས་ཅན་ཕྱི་དང་ནང་གི་བདག་ཉིད་ཐོགས་པ་མེད་པར་འཇོམས་པའི་སྦྱོར་བ་དང་སྔགས་དང་རྒྱུད་འདི་ཉིད་ཀྱིས་ལས་གྲུབ་པར་བྱ་བ། དང་པོའི་ལས་ཅན་ལ་སོགས་པ་གང་ཟག་བཞིས་སོ་སོར་བྱ་བ་ནི། ཇི་སྙེད་ཅིག་བཤད་པ་ལས། ཉེ་བར་མཁོ་བ་ཅུང་ཟད་ཅིག་བརྗོད་ན། ཏིང་ངེ་འཛིན་གྱིས་བསྲུང་ཞིང་ཕྱིར་ཟློག་གི་སྦྱོར་བ་དང༌། ཁྲོ་བོ་རྣམས་ཀྱི་བསྙེན་པ་དང༌། ཕྱིར་ཟློག་གི་འཁྲུལ་འཁོར་དང༌། ཞལ་བཞི་པའི་འཁྲུལ་འཁོར་ལས་ཚོགས་དང༌། དེ་རྣམས་ཉིད་ཀྱིས་ངེས་པ་ནང་དུ་བསྟན་པའོ། །བསྲུང་བ་བསྙེན་པ་ཟློག་འཁོར་དང༌། །ལས་ཚོགས་དང་ནི་རྫོགས་རིམ་མོ། །དང་པོ་སྒོམ་པའི་རྣལ་འབྱོར་གྱིས་བསྲུང་ཟློག་ཀྱང༌། རྒྱས་པ་དང༌། བར་མ་དང༌། བསྡུས་པའི་དབྱེ་བས་རྣམ་པ་མང་པོར་འགྱུར་བ་ལས། རེ་ཤིག་འཁོར་ལོ་སྡོམ་པ་ལ་དགའ་བའི་སྔགས་པ་ལས་དང་པོ་པ་རྣམས་ལ་ཉེ་བར་མཁོ་བར་སྣང་བས། མན་ངག་ལས་ཀྱང་འབྱུང་བ། རྒྱུད་དོན་ལས་
ཀྱང་མི་འདའ་བ་ཁོ་ནར་བསྲུང་འཁོར་རྒྱས་པ་ཉིད་ཚིག་ཟོར་ཡང་པའི་སྒོ་ནས་ཐོག་མར་བརྗོད་ལ། རྒྱས་བསྡུས་ཀྱི་འདོར་ལེན་ཅི་རིགས་པ་དག་ནི་ཕྱིས་བཤད་པར་བྱའོ། །དེ་ཡང༌། ཨོཾསྭ་བྷཱ་ཝ་ཤུདྡྷཿསརྦ་དྷརྨ་སྭ་བྷཱ་ཝ་ཤུདྡྷོ྅་ཧཾ། ཨོཾ་ཤཱུནྱ་ཏ་ཛྙཱ་ན་བཛྲ་སྭ་བྷཱ་བ་ཨཏྨ་ཀོ྅་ཧཾ། སྟོང་པའི་ངང་ལས་པད་ཉི་ལ་ཧཱུཾ་ལས་སྣ་ཚོགས་རྡོ་རྗེའི་རྭ་རྣམས་ཤར་དཀར། ལྷོ་སེར། ནུབ་དམར། བྱང་ལྗང༌། ལྟེ་བ་མཐིང་ཁ་ཧཱུཾ་གིས་མཚན་པ། དེའི་སྟེང་དུ་བྷྲུཾ་ལས་བཀའི་འཁོར་ལོ་སེར་པོ་རྩིབས་བཅུ་པ་གཡས་བསྐོར་དུ་མགྱོགས་པར་འཁོར་བ། རྡོ་རྗེ་འབར་བའི་སྤྲིན་ཕྱོགས་བཅུར་འཕྲོ་བ། དེའི་ལྟེ་བར་པཾ་ལས་སྣ་ཚོགས་ཆུ་སྐྱེས་དང༌། རཾ་ལས་ཉིན་མོར་བྱེད་པའི་གདན་ལ། ཐོག་ཐ་མེད་པའི་སེམས་ཀྱིས་རང་སྣང་ཧཱུཾ་དཀར་པོ་ལས། བདག་ཉིད་རྡོ་རྗེ་སེམས་དཔའ་མི་བསྐྱོད་པའི་དབུ་རྒྱན་ཅན། དཔའ་བོ་བདེ་བའི་གོ་འཕངས་ལ་བཞུགས་པ། ཞལ་གསུམ་པ། རྩ་ཞལ་དང་སྐུ་ལུས་དག་པའི་ཤེལ་དང་སྟོན་ཟླ་ལྟར་དཀར་ཞིང་ཞི་བ། གཡས་སེར་གཡོན་ལྗང་བའི་ཞལ་གཉིས་རྣམ་པར་འགྱུར་བ། རྩ་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་རང་སྣང་གི་ཡུམ་ལ་འཁྱུད་པ། ལྷག་མ་གཡས་གཉིས་ལྕགས་ཀྱུ་དང་ཞགས་པ། གཡོན་གཉིས་ཀ་པཱ་ལ་དང་ཁ་ཊྭཾ་ག་བསྣམས་པ། ཐོད་པའི་ཅོད་པན་དང་རྒྱན་ཐམས་ཅད་པ། མཚན་དཔེས་སྤྲས་པའི་སྐུ། གཡས་རྐྱང་གི་སྟབས་
ཅན། འདོད་ཆགས་རྡོ་རྗེའི་འོད་འཕྲེངས་འཁྲུགས་པའི་དཀྱིལ་འཁོར་ན་རོལ་པ། ཧཱུཾ་ལས་བྱུང་བའི་ཐབས་ཀྱིས་རྡོ་རྗེ། རྡོ་རྗེ་རྩེ་གཅིག་པ་དང་ཨཱཿལས་ཤེས་རབ་ཀྱི་པདྨ། པདྨ་དམར་པོ་འདབ་མ་གསུམ་པ། སྙིང་པོའི་བུ་གར་བྱཱཾ་དང་དྱཾ་གྱིས་མཚན་པ། ཨོཾ་ཨཱཿཧཱུཾ་རྡོ་རྗེ་པད་མར་བསྐྱོད་པའི་དགའ་བའི་སྒྲ་དང༌། ཐུགས་ཀའི་འོད་ཀྱིས་སངས་རྒྱས་ཐམས་ཅད་མི་བསྐྱོད་པ་ཁྲོ་བོ་བཅུ་དང་བཅས་པའི་རྣམ་པར་བཀུག་སྟེ། ཞལ་དུ་ཞུགས་ལྷ་མོའི་པདྨར་བབས་པ། ཧཱུཾ་བཅུ་གཅིག་ལས་ཞེ་སྡང་རྡོ་རྗེ་ཧེ་རུ་ཀ་ཁྲོ་བོ་བཅུ་དང་བཅས་པར་གྱུར། མི་བསྐྱོད་པ་ཐུགས་ཀར་དྲངས་ཧཱུཾ་ཞེས་ཕྱིར་ཕྱུང༌། སྣང་བའི་སེམས་ཅན་ཐམས་ཅད་ཚར་བཅད། རྡོ་རྗེ་ཁྲོ་བོའི་ས་ལ་བཀོད། རང་ལ་ཐིམ་པས་བདག་ཉིད་རྡོ་རྗེ་འཇིགས་བྱེད་ཧཱུཾ་མཛད་ཧེ་རུ་ཀར་གྱུར་པ་ནི། སྐུ་མདོག་མཐིང་ནག་ཁྲོ་བོ་འབར་བའི་འཕྲེང་བ་འཁྲུག་པ། མཆེ་བ་གཙིགས་ཤིང་འཇིགས་པར་མཛད་པ། གདོན་བགེགས་ཐམས་ཅད་ཟ་བར་བྱེད་པའི་ཞལ་གསུམ་དབུས་མཐིང་ཁ། གཡས་སེར། གཡོན་ལྗང་བ། གསུམ་ཀའང་ལྷག་པར་ཁྲོས་པའི་གད་རྒྱངས་ཅན། མེ་ལྟར་འབར་ཞིང་འཁྲུགས་པའི་སྤྱན་གསུམ་གསུམ་སྡང་མིག་ཏུ་གཟིགས་པ། ཞལ་གདངས་པ། ལྗགས་འདྲིལ་བ། གློག་འཕྲེང་ལྟ་བུའི་སྨིན་རྫི་གཡོ་བའི་ཁྲོ་གཉེར་བསྡུས་པ། ཐོད་པའི་དུམ་བུས་
འོག་པག་དང༌། ཕྱག་རྒྱ་དྲུག་དང༌། ཀླུ་བརྒྱད་ཀྱིས་བརྒྱན་པ། ཐོད་སྐམ་ལྔའི་དབུ་རྒྱན་དང༌། མི་མགོའི་མེ་ཏོག་གི་དོ་ཤལ་ཅན། སྟག་ལྤགས་ཀྱིས་སྨད་དཀྲིས་པ། རྩ་བའི་ཕྱག་གཉིས་ཁམས་གསུམ་རྣམ་རྒྱལ་གྱི་ཕྱག་རྒྱས་རྡོ་རྗེ་དང་རྡོ་རྗེ་དྲིལ་བུ་ཐུགས་ཀར་འཛིན་པས་རང་སྣང་གི་རིག་མ་ལ་འཁྱུད་པ། པད་ཉི་ལ་གཡས་བརྐྱང་བས་འཇིགས་བྱེད་དང་དུས་མཚན་མ་མནན་པའོ། ཁྲོ་བོ་བཅུ་རྣམས་ཐུགས་ཀར་དྲངས། ཧཱུཾ་ཐུགས་ཀ་ནས་ཕྱིར་སྤྲོས། ཕྱོགས་མཚམས་ཀྱི་རྩིབས་བརྒྱད་ཀྱི་སྟེང་དང༌། སྟེང་འོག་གི་རྩིབས་བརྒྱད་ཀྱི་ནང་ལ་ཅུང་ཟད་མ་རེག་པ་རྣམས་སུ་པད་ཉི་དང་ཕྱོགས་སྐྱོང་བ་བཅུའི་གདན་ལ་འཁོད་པ་ནི། ཤར་དུ་རྡོ་རྗེ་གཏུམ་པོ་སྔོན་པོ་སྔོ་སེར་ལྗང་བའི་ཞལ་གསུམ་པ། བྱང་དུ་རྡོ་རྗེ་ཉི་མ་མེ་སེར་པོ་སེར་ནག་ལྗང་བའི་ཞལ་གསུམ་པ། ནུབ་ཏུ་རྡོ་རྗེ་གཙུག་ཏོར་དམར་པོ་དམར་ནག་ལྗང་བའི་ཞལ་གསུམ་པ། ལྷོར་རྡོ་རྗེ་འཁྱིལ་པ་ལྗང་ཁུ་ལྗང་དཀར་སེར་བའི་ཞལ་གསུམ། མེར་རྡོ་རྗེ་གནོད་སྦྱིན་དུད་ཀ་དུད་སེར་ལྗང་བའི་ཞལ་གསུམ། བདེན་བྲལ་དུ་རྡོ་རྗེ་དུས་དམར་པོ་དམར་སེར་ལྗང་བའི་ཞལ་གསུམ། རླུང་དུ་རྡོ་རྗེ་སྟོབས་པོ་ཆེ་ནག་པོ་ནག་སེར་ལྗང་བའི་ཞལ་གསུམ། དབང་ལྡན་དུ་རྡོ་རྗེ་འཇིགས་རུང་སྔོན་པོ་སྔོ་སེར་ལྗང་བའི་ཞལ་གསུམ་པ་མི་གཡོ་བ། དེ་རྣམས་ཕྱག་དང་པོ་གཉིས་ཅང་ཏེའུ་དང་རྡོ་རྗེ་དྲིལ་བུ་བསྣམས་པ། སྟེང་དུ་གཙུག་ཏོར་
འཁོར་ལོས་བསྒྱུར་བ་དཀར་པོ་དཀར་ནག་ལྗང་བའི་ཞལ། ཕྱག་དང་པོ་གཉིས་འཁོར་ལོ་དང་དྲིལ་བུ། འོག་ཏུ་རྡོ་རྗེ་ས་འོག་མིག་སྨན་ལྟར་གནག་པ། ནག་སེར་ལྗང་བའི་ཞལ། ཕྱག་དང་པོ་གཉིས་རྩེ་གསུམ་དང་དྲིལ་བུ་འཛིན་པ། དེ་ཐམས་ཅད་རྒྱན་དང་ཆ་ལུགས་གཙོ་བོ་ལྟ་བུ། གཙོ་འཁོར་ཐམས་ཅད་ཀྱང་ཕྱག་དྲུག་གི་ལྷག་མ་གཡས་གཉིས་ན་ལྕགས་ཀྱུ་དང་ཞགས་པ། གཡོན་གཉིས་ན་ཐོད་པ་དང་ཁ་ཊྭཱཾ་ག་འཛིན་པ། རྩ་བའི་ཕྱག་གིས་རང་སྣང་གི་ཤེས་རབ་ལ་འཁྱུད་པ། མེ་དཔུང་འབར་བའི་དབུས་ན་བཞུགས་པའོ། །ཁྲོ་བོ་བཅུ་ནི་སྡུག་བསྔལ་དང་ཀུན་འབྱུང་དང༌། འགོག་པ་དང༌། ལམ་དང༌། ཟད་པ་དང༌། མི་སྐྱེ་བ་དང༌། ཀུན་རྫོབ་དང༌། ཕ་རོལ་སེམས་དང༌། ཆོས་དང༌། རྗེས་སུ་ཤེས་པ་སྟེ། རིམ་པ་ཇི་ལྟ་བ་བཞིན་དུའོ། །དེ་ཐམས་ཅད་ཀྱི་སྙིང་གར་ཨོཾ་ཨོཾ་ཧ། ཞེས་པ་ནས། ཙཎྜ་ཀིའི་ངོ་བོ། ཞེས་པའི་བར་རམ། ཡང་ན་སྒྲུབ་ཐབས་ལྟར་ཞལ་ཕྱག་རྫོགས་པའི་གོ་ཆ་བཀོད། དཔྲལ་པར་ཨོཾ་དཀར་པོ་སོགས་རྡོ་རྗེ་གསུམ་གྱི་བྱིན་གྱིས་བརླབས། རང་གི་སྙིང་གའི་ཧཱུཾ་གི་འོད་ཟེར་མུ་མཐའ་མེད་པས་ཁྲོ་བོའི་དཀྱིལ་འཁོར་སྤྱན་དྲངས་ཕཻཾ་ཛཿཧཱུཾ་བཾ་ཧོཿ ཡེ་ཤེས་ཀྱི་འཁོར་ལོ་སད། དབང་གི་ལྷ་དེ་བཞིན་གཤེགས་པ་ལ་སོགས་པ་ཐམས་ཅད་སྤྱན་དྲངས། ཆུ་གཉིས་དང་ཉེར་སྤྱོད་ལྔ་འབུལ། དེ་བཞིན་གཤེགས་
པ་རྣམས་ཀྱིས་བདག་ལ་དབང་བསྐུར་དུ་གསོལ་ཞེས་གསོལ་བ་བཏབ་པས། དཔལ་བདེ་མཆོག་གི་སྒྲུབ་ཐབས་བཞིན་ཆུས་དབང་བསྐུར་བས། ཧཱུཾ་མཛད་ལ་རྡོ་རྗེ་སེམས་དཔའ། རྡོ་རྗེ་གཏུམ་པོ་ལ་རྣམ་སྣང༌། ཉི་མ་ལ་རིན་འབྱུང༌། གཙུག་ཏོར་ལ་འོད་དཔག་མེད། འཁྱིལ་པ་ལ་དོན་གྲུབ། གཞན་ཐམས་ཅད་ལ་མི་བསྐྱོད་པའམ། ཡང་ན། གཙོ་བོ་ལ་རྡོ་རྗེ་སེམས་དཔའི་དབུ་བརྒྱན། གཞན་རྣམས་ལ་མི་བསྐྱོད་པས་དབུ་བརྒྱན། ཨོཾ་ཀྲོདྷ་རཱ་ཛ་ས་པ་རི་ཝ་ར་ཨརྒྷཾ་པྲ་ཏཱིཙྪ་སྭཱཧཱ། པྲ་དྱ་པུཥྤེ། ནས། ཤཔྟའི་བར་གྱིས་མཆོད། ཞལ་བཞི་པའི་སྔགས་བརྗོད་ནས། ཕྱོགས་བཅུའི་བགེགས་ཐམས་ཅད་མེད་པར་གྱིས་ཤིག ཅེས་ཁྲོ་བོ་རྣམས་ལ་བཀའ་བགོས་པས། ཁྲོ་བོ་རེ་རེ་ལས་ཕུར་བུའི་ཁྲོ་བོ་ཞལ་དྲུག་ཕྱག་བཅུ་གཉིས་པ་རྩ་ཞལ་སྔོ། གཡས་སེར་པོ་དུད་ཁ་གཡོན་དམར་པོ་ལྗང་ཁུ། ཕྱག་དང་པོ་གཉིས་རྡོ་རྗེ་དྲིལ་བུ་འཛིན་པས། རང་སྣང་གི་རིག་མར་སྦྱོར་བ་དེ་འོག་གཉིས་ལྷ་ཆེན་པོའི་པགས་པའི་སྟོད་གཡོགས། ལྷག་མ་གཡས་བཞིས་ཁ་ཊྭཱཾཾ་ག ལྕགས་ཀྱུ། ཚངས་མགོ གྲི་གུག གཡོན་བཞིས་ཐོད་པ། ཞགས་པ། ཅང་ཏེའུ། གྲི་གུག མི་མགོའི་ཅོད་པན་དང་དོ་ཤལ། ཕྱག་རྒྱ་དྲུག་དང༌། ཀླུ་མཐའ་ཡས་དང་རྣམ་རྒྱལ་གྱིས་བརྒྱན་པ། རབ་ཏུ་ཁྲོས་པ། ཁྲོ་བོའི་མཚན་ཉིད་རྫོགས་པ། ཞབས་གཅིག་པུ་མདུང་རྩེ་ལྟ་བུའི་ཕུར་བུར་གྱུར་པ། གང་གིས་ཀྱང་བཟོད་གླགས་
མེད་པའི་མེ་དཔུང་འུར་འུར་འབར་བ་ཅན་ཏེ། སྟེང་ཞལ་ནི་སྟེང་གི་ཁྲོ་བོ་སྟག་དང༌། འོག་ནི་བྱི་བའི་གདོང༌། ཤར་ནས་ཕྱོགས་གཡོན་བསྐོར་དང༌། མེ་ནས་མཚམས་གཡས་བསྐོར་གྱིས་རྟ་གདོང་དཀར་པོ། གླང་པོ། བྱི་བ། སེང་གེ ཁྱི་དང༌། འུག་པ། ཕག་དང༌། ཁྲའི་གདོང་ཅན་ནོ། །ཡང་ཧཱུཾ་བཞི་པ་ལན་གཉིས་བརྗོད་ཅིང༌། སྡིགས་མཛུབ་སེ་གོལ་ཕྱོགས་བཅུར་གདབ་ཅིང༌། ཤར་དང་སྟེང་དུ་ཁྭ་གདོང་མ་སྔོ་བ། བྱང་དུ་འུག་གདོང་མ་ལྗང་བ། ནུབ་དང་འོག་ཏུ་ཁྱི་གདོང་མ་དམར་བ། ལྷོར་ཕག་གདོང་མ་སེར་བ། ཤར་ལྷོར་གཤིན་རྗེ་བརྟན་མ་སྔོ་སེར་ཕྱེད་པ། ལྷོ་ནུབ་ཏུ་གཤིན་རྗེ་ཕོ་ཉ་མོ་སེར་དམར་ཕྱེད་པ། ནུབ་བྱང་དུ་གཤིན་རྗེ་མཆེ་བ་མ་དམར་ལྗང་ཕྱེད་པ། བྱང་ཤར་དུ་གཤིན་རྗེ་འཇོམས་མ་ལྗང་སྔོན་ཕྱེད་པ། ཡང་ན་ཐམས་ཅད་དམར་མོར་མན་ངག་ལས་འབྱུང་བའང་རུང་ངོ༌། །ཐམས་ཅད་ཀྱང་ལང་ཚོ་གཞོན་ནུ་དྲེགས་ཤིང་ཁྲོས་པ། ཕྱག་གཡས་རྡོ་རྗེ་ཐོ་བ། གཡོན་སྔར་སྤྲོས་པའི་ཕུར་བུའི་ཁྲོ་བོ་རེ་རེ་བཟུང་བ་ལས། ཕོ་ཉ་དཔག་ཏུ་མེད་པ་སྤྲོས་ཏེ། བགེགས་ཀུན་ཚར་བཅད། ཨོཾ་བཛྲ་ཨངྐུ་ཤ་ཡ་ཨ་ཀརྵ་ཡ་ཧཱུཾ། ཨོཾ་བཛྲ་པཱ་ཤ་བནྡྷ་ཧཱུཾ། ཨོཾ་བཛྲ་ཀ་ལི་ཏ་སྫ་བ་ཧཱུཾ། ཨོཾ་བཛྲ་མུཥྟི་གྷྀཧྞ་ཧཱུཾ། ལྕགས་ཀྱུ་དང་ཞགས་པ་ལ་སོགས་པ་མཚོན་ཆ་སྣ་ཚོགས་འཛིན་པའི་ཕོ་ཉ་རྣམས་ཀྱིས་ཕྱོགས་བཅུའི་བགེགས་མ་ལུས་པ་འདུས་པ་
ཕྱོགས་སྐྱོང་བཅུར་གྱུར་པ་རྣམས་རྡོ་རྗེ་ལྕགས་ཀྱུས་སྙིང་གར་བཏབ། རྡོ་རྗེ་ཞགས་པས་བཅིངས། མཚོན་ཆ་ཐམས་ཅད་ཀྱིས་བསྡིགས། ཁུ་ཚུར་གྱིས་བཟུངས་ནས། འཁོར་ལོའི་རྩེ་མོ་དང་ཉེ་བའི་ཕྱི་རོལ་དུ་ཧཱུཾ་ལས་བྱུང་བའི་ཁྲོན་པ་གྲུ་གསུམ་པ་ཟབ་མོ། ཕྱོགས་མཚམས་བརྒྱད་དང༌། ཤར་གྱི་ཤར་དང༌། ནུབ་ཀྱི་ནུབ་ན་གནས་པ་སྟེ་བཅུ་པོ་རྣམས་སུ་བཅུག མ་མོ་བརྒྱད་པོ་རྣམས་ཀྱིས་ལུགས་འབྱུང་དང་ལུགས་ཟློག་གི་རིམ་པས། དེ་རྣམས་ཀྱི་སྤྱི་བོར་ཕུར་བུས་བཏབ། ཨོཾ་གྷ་གྷ་གྷཱ་ཏཱ་ཡ་གྷཱ་ཏཱ་ཡ་སརྦ་དུཥྟན་ཕཊ། ཀི་ལཱ་ཡ་ཀི་ལཱ་ཡ་སརྦ་པཱ་བཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཀི་ལཱ་ཡ་བཛྲ་དྷ་ར་ཡ་ཛྙཱ་པ་ཡ་ཏི་སརྦ་བིགྷྣ་ཀཱ་ཡ་ཝཱཀྩིཏྟ་བཛྲ་ཀཱི་ལ་ཡ་ཧཱུཾ་ཕཊ། ལན་གསུམ་བརྗོད། ཕུར་བུ་རྣམས་ལུགས་འབྱུང་དང་ལུགས་ཟློག་གི་རིམ་པས་ཐོ་བས་བརྡུང༌། ཨོཾ་བཛྲ་མུངྒ་ར་བཛྲ་ཀི་ལཱ་ཡ་ཨ་ཀོ་ཊྭཱ་ཡ་ཤ་ཧཱུཾ་ཕཊ། ལན་གསུམ་གྱིས་བགེགས་རྣམས་ཀྱི་སྤྱི་བོ་མགྲིན་པ་སྙིང་ག་ལྟེ་བ་གསང་བ་རྐང་པ་རྣམས་སུ་ཕུག་སྟེ་རྡོ་རྗེའི་ས་གཞི་ལ་སྦྲགས་པས་བགེགས་རྣམས་ལུས་གཡོ་བ་མེད། དག་རླུང་རྒྱུ་བ་མེད་པ་སེམས་རྟོག་པ་ཐམས་ཅད་ཆད་ནས། བདེ་བ་ཆེན་པོ་དེ་བཞིན་ཉིན་དང་རོ་གཅིག་ཏུ་གྱུར། ཡང་ཞལ་བཞི་པའི་སྔགས་བརྗོད་པས། སྔགས་རྣམས་འོད་ཟེར་འཕྲོ་བ། གསེར་གྱི་ས་གཞི་ནས་ཚངས་པའི་འཇིག་རྟེན་ལ་ཐུག་པའི་ལུས་ཆེ་ཞིང་འབར་བའི་འོད་ཟེར་
ལས། སྐད་ཅིག་གིས་གྲུབ་པ་ནི། རྡོ་རྗེའི་ར་བ་གྲུ་བཞི་པ་སྟེང་དུ་རྡོ་རྗེའི་གུར། དེ་གཉིས་ཀྱི་མཚམས་སུ་བླ་བྲེ། ཕྱི་རོལ་དུ་རྡོ་རྗེ་རྩེ་ལྔའི་མདེའུ་ཅན་གྱི་མདའ་དྲ་སྲིད་རྩེའི་བར་དུ་ཁྱབ་པ། དེ་ཐམས་ཅད་ཀྱི་ཕྱི་ནང་ཀུན་རྡོ་རྗེ་མེ་རི་སྒྲ་དྲག་པོ་དང་བཅས་པ་བསྐལ་པ་འཇིག་པའི་དུས་ཀྱི་མེ་དཔུང་ལྟ་བུ་གནོད་བྱེད་ཐམས་ཅད་ཀྱིས་བལྟར་ཡང་མི་བཟོད་པར་གྱུར། དེ་དང་དུས་མཉམ་དུ་སྣ་ཚོགས་རྡོ་རྗེའི་ལྟེ་བའི་ཧཱུཾ་ལས་འོད་ཟེར་འཕྲོས་པས། རླུང་གི་དཀྱིལ་འཁོར་ལ་ཐུག་པར་སྣ་ཚོགས་རྡོ་རྗེའི་ས་གཞི། ཨོཾ་མེ་དྷི་ནི་བཛྲི་བྷ་བ་བཛྲ་བནྡྷ་ཧཱུཾ། ཨོཾ་བཛྲ་པྲ་ཀ་ར་ཧཱུཾ་བཾ་ཧཱུཾ། ཨོཾ་བཛྲ་པཉྩ་ར་ཧཱུཾ་པཾ་ཧཱུཾ། ཨོཾ་བཛྲ་པཱི་ཏཱ་ན་ཧཱུཾ་ཁཾ་ཧཱུཾ། ཨོཾ་བཛྲ་ས་ར་ཛཱ་ལ་ཏྲཾ་སཾ་ཏྲཾ། ཨོཾ་བཛྲ་ཛྭ་ལ་ཨ་ན་ལཱརྐ་ཧཱུཾ་ཧཱུཾ་ཧཱུཾ། སླར་ཡང་ཕོ་ཉ་མོ་རྣམས་ཀྱིས་མ་རུངས་པ་ཐམས་ཅད་ཚར་བཅད་དེ། རྡོ་རྗེའི་རྭ་བ་ལ་ཐིམ་པས་ཆུ་ཆུ་ལ་བརྡབས་པའི་ཟེགས་མ་ཕྱིར་འཕྲོས་པ་ལྟར། རྡོ་རྗེ་དང་པདྨ་དང༌། འཁོར་ལོའི་རྭ་བ་རྣམས་སུ་གྱུར། ཨོཾ་བཛྲ་པྲ་ཀ་ར་ཧཱུཾ་ཧཱུཾ་ཕཊ། ཨོཾ་པདྨ་པྲ་ཀ་ར་ཧཱུཾ་ཧཱུཾ་ཕཊ། ཨོཾ་ཙཀྲ་པྲ་ཀ་ར་ཧཱུཾ་ཧཱུཾ་ཕཊ། དེ་ནས་འོག་ནས་འབྱུང་བའི་ཁྲོ་བོ་བཞི་སྤྲོས་ཤིང༌། ཁྲོ་བོ་རྣམས་ཀྱི་བཟླས་པ་བྱ་བའམ། ཡང་ན་མན་ངག་གི་ཚུལ་ལས་མངོན་བརྗོད་དྲུག་ཅུ་པའི་སྐབས་ལས་འབྱུང་བ་ལྟར་འདིར་བླངས་ཏེ། འདི་ལྟར། རང་ཉིད་ཞེ་སྡང་རྡོ་རྗེའི་ཏིང་ངེ་འཛིན་གྱིས་ཧཱུཾ་ཞེས་
བརྗོད་པས་སྐད་ཅིག་གིས་རབ་ཁྲོས་ཧཱུཾ་མཛད་ཞལ་གསུམ་པ་ལས་བརྒྱད་པར་གྱུར་ཏེ། དྲག་ཤུལ་ཅན་གྱི་གཟུགས་རྩ་ཞལ་དང་སྐུ་མདོག་དུས་སྤྲིན་ལྟར་གནག་པ། གཡས་གསུམ་དཀར་སྔོ་སེར་བ། གཡོན་གསུམ་སྔོ་དཀར་སེར་བ་སྟེང་ཞལ་དམར་པོ། ཕྱག་བཅུ་དྲུག་གི་དང་པོ་གཉིས་རྡོ་རྗེ་དྲིལ་བུས་ཐུགས་ཀར་འཁྱུད་པ། གཉིས་པ་གཉིས་ཁམས་གསུམ་རྣམ་རྒྱལ་གྱི་ཕྱག་རྒྱ་དཔྲལ་པར་འཇོག་པ། ལྷག་མ་གཡས་པས་ཐོད་པ། རལ་གྲི། འཁོར་ལོ། ཐོ་བ། ཅང་ཏེའུ་རྣམས་དང༌། གཡོན་རྣམས་ཀྱིས་ཁ་ཊྭཱཾ་གལྕགས་ཀྱུ། སྡིགས་མཛུབ་དང་བཅས་པའི་ཞགས་པ། རིན་པོ་ཆེ། མདུང་རྩེ་གསུམ་པ་དང་བཅས་པའི་ཚངས་པའི་མགོ་བོ་རྣམས་འཛིན་པ། ཐ་མ་གཉིས་ཀྱིས་མིའི་པགས་པ་སྟེང་དུ་འཛིན་པ། རྒྱན་དང་ཆ་བྱད་ཡོངས་སུ་རྫོགས་པ་ཐུགས་ཀའི་ཧཱུཾ་ལས་ཁྲོ་བོ་བཞི་དུས་གཅིག་ཏུ་སྤྲོས་པ་ནི། འདོད་རྒྱལ་སྔོན་པོ་སྔོ་སེར་ལྗང་བ། གཡས་གཉིས་པས་ཐོ་བ། དབྱུག་སྔོན་ལྗང་ཁུ་ལྗང་སེར་གཡས་གཉིས་པས་བེ་ཅོན། སྟོབས་ཆེན་དམར་པོ་དམར་སེར་ལྗང༌། གཡས་གཉིས་པས་ཏྲི་ཤུ་ལ། མི་གཡོ་མགོན་པོ་དུད་ཁ་དུད་སེར་ལྗང་བ། གཡས་གཉིས་པས་རལ་གྲི། ཐམས་ཅད་ཀྱི་དང་པོ་གཉིས་འཇིག་རྟེན་གསུམ་རྒྱལ་གྱི་ཕྱག་རྒྱ་དཔྲལ་པར་འཇོག་པ་གཡོན་གཉིས་པས་དྲིལ་བུ་དང་བཅས་པའི་ཐོད་པ། ཐ་མ་གཉིས་
རྡོ་རྗེ་གྱེན་དུ་གསོར་ཞིང་ཁ་ཊཾ་ག་བསྣམས་པ། བར་པ་གཉིས་ཀྱིས་རང་སྣང་གི་རིག་མ་ལ་འཁྱུད་པ། བདུད་བཞི་ཞབས་ཀྱིས་གནོན་པ་རྣམས་སྤྲོས། སྡང་བ་ཐམས་ཅད་ཚར་བཅད། བར་ཆད་བསྲུང་བའི་ལས་མཛད། ཡང་ཞལ་བཞི་པ་བརྗོད། སྒོ་མཚམས་མ་བརྒྱད་སྤྲོས། སྔར་བཞིན་ལས་མཛད། ཨོཾ་ཁ་བཛྲ་དྷྲྀ་ཀ་བཛྲ་ཧཱུཾ་ཀ་ར་བཛྲ་ཧཱུཾ་ཕཊ། ཨོཾ་བཛྲ་ཙཎྜ་བཛྲ་ཧཱུཾ་ཕཊ། ཨོཾ་བཛྲ་ཛཱ་ལཱ་ན་ལཱརྐ་བཛྲ་ཧཱུཾ་ཕཊ། ཨོཾ་བཛྲོ་ཥྞེ་ཥ་བཛྲ་ཧཱུཾ་ཕཊ། ཨོཾ་བཛྲ་ཀུཎྜ་ལི་བཛྲ་ཧཱུཾ་ཕཊ། ཨོཾ་བཛྲ་ཡཀྴ་བཛྲ་ཧཱུཾ་ཕཊ། ཨོཾ་བཛྲ་ཀཱ་ལི་བཛྲ་ཧཱུཾ་ཕཊ། ཨོཾ་བཛྲ་མཧཱ་བཱ་ལ་བཛྲ་ཧཱུཾ་ཕཊ། ཨོཾབཛྲ་བྷི་ཥ་ཎ་བཛྲ་ཧཱུཾ་ཕཊ། ཞེས་ཁྲོ་བོ་བཅུ་གཅིག་དང༌། གཙོ་བོ་ཉིད་ཀྱི་གསང་སྔགས། ཨོཾ་སུམྦྷ་ནི་སུམྦྷ་ཧཱུཾ་ཧཱུཾ་ཕཊ། ཨོཾ་གྲྀཧྞ་གྲྀཧྞ་ཧཱུཾ་ཧཱུཾ་ཕཊ། ཨོཾ་གྲྀཧྞ་པཱ་ཡ་གྲྀཧྞ་པཱ་ཡ་ཧཱུཾ་ཧཱུཾ་ཕཊ། ཨཽཾ་ཨཱ་ན་ཡ་ཧོ་བྷ་ག་ཝཱན་བཛྲི་ཧཱུཾ་ཧཱུཾ་ཕཊ། ཞེས་སྐད་གསང་མཐོན་པོས་བཟླ་བར་བྱའོ། །གལ་ཏེ་ཕྱིར་ཟློག་བྱ་བར་འདོད་ན་ཧཱུཾ་ཞེས་བརྗོད་པས་ཁྲོ་བོ་ཐམས་ཅད་ཆེར་འཁྲུགས་ཏེ་ཞལ་ཕྱིར་གཟིགས། འཁོར་ལོ་གཡོན་དུ་དྲག་ཏུ་འཁོར། ཁྲོ་བོ་ཐམས་ཅད་ལས་ཕོ་ཉ་དཔག་ཏུ་མེད་པ་དང༌། ཁྱད་པར་རང་གི་སྙིང་གའི་ཧཱུཾ་གི་འོད་ཀྱིས་གཙུག་ཏོར་འཁོར་ལོས་སྒྱུར་བ་བསྐུལ། གཉིས་ཀ་ལས་ཁྲོ་མོ་བཅུའམ། ཁྲོ་བོ་བཞིའི་སྤྲིན་དཔག་ཏུ་མེད་པ་སྤྲོས། གདུག་པ་ཐམས་ཅད་དང༌། སྒྲུབ་བྱ་བཀུགམེ་རླུང་གི་སྟེང་དུ་བཅིང་པ་ལྔས་བཅིངས་མགོ་མཇུག་ལྗོག་དེར་བཞག་པ། འཁོར་ལོའི་
རྩིབས་ཀྱིས་ཕྱེ་མར་གཏུབས། མེས་བསྲེགས་པའི་ཐལ་བ་རླུང་གིས་གཏོར་བར་བསམ། གང་ཡང་སྐྱེས་བུ་གཞན་གྱི་ཕྱིར་ནི། སྒྲུབ་བྱའི་སྙིང་གའི་ཧཱུཾ་གི་ནཱ་ད་དམ། འཁོར་ལོའི་ལྟེ་བར་ཆུད་པར་བསྒོམ་མོ། །སྔགས་འདི་ནི་རང་དང་གཙུག་ཏོར་འཁོར་ལོས་བསྒྱུར་བ་གཉིས་པའི་རྒྱུ་མཚན་རྣམས་གནད་འདི་གཅིག་པུས་རྟོགས་ནུས་པས་འདབ་བཞིའི་རིམ་པས་རྩ་ལག་བཞི། བདེ་བ་ཆེན་པོའི་གནས་ན་གནས། །ཞེས་པའི་ཚིག་རྐང་གཉིས་པོ་འདི་ཁོ་ནས་ཀྱང༌། དུས་འཁོར་སོགས་ཀྱི་རྒྱུད་སྡེ་མང་པོ་ལ་ངེས་པ་སྟེར་བ་འདི་ནི་ངོ་མཚར་ཆེའོ། །མན་ངག་གི་གཞུང་བྱ་བ། རྒྱུད་དོན་གྱི་མདུད་པ་འཁྲོལ་ནུས་པ་འདི་ལྟ་བུ་དགོས་ཀྱི། མན་ངག་དང་རྒྱུད་བཤད་རྒྱབ་འགལ་དུ་འགྲོ་བ་དང༌། གྲུབ་ཐོབ་ཀྱི་གསུང་ཡིན་ཟེར་ནས་སངས་རྒྱས་ཀྱི་གསུང་དང་འགལ་བ་མང་པོ་དག་སྣང་སྟེ། རྩོད་དུས་ཀྱི་ཐ་མ་འདིར། སྐལ་མེད་རྣམས་ཀྱི་སྙིང་ལ་ནི་ཤིན་ཏུ་འཕྲོད་ཀྱང༌། ཟབ་དོན་གྱི་སྐལ་བ་ཅན་བློ་གྲོས་མཆོག་རྣམས་ཀྱིས་ནི། མཛོད་ཕུགས་མི་གཙང་བས་བཀང་བ་དང་འདྲ་བར་མཐོང་ངོ༌། །གསུམ་པ་ནི་ཨེ་ཝཾ་ས་བོན་བླངས་ནས་ནི། །པདྨའི་མེ་ཏོག་ཁ་བྱེ་བར། །བུང་བའི་གཟུགས་ཀྱིས་རབ་དགའ་བའི། །དཔའ་བོ་སྦྲང་རྩི་མནོམ་པར་བྱེད། །ཅེས་པ་སྟེ། འདི་ལ་ཤུང་ཀེ་ལོ་ཙཱ་བ་གྲགས་རྒྱལ་གྱིས། ཨེ་ཝཾ་ཡི་གེའི་ས་བོན་ལེན། །ཆུ་སྐྱེས་ཀྱི་ནི་མེ་ཏོག་ལ། །སྦྲང་རྩིར་བྱེད་པའི་གཟུགས་ཀྱིས་ནི། །རབ་དགའི་དབང་པོ་སྦྲང་རྩི་མནོམ། །ཞེས་འདོན་པ་གོ་བདེ་ཞིང་བརྗོད་སླ་བ་ཙམ་སྣང་ངོ༌། །འདིའི་དོན་འགྲེལ་པར། ཨེ་ཝཾ་ཕ་
མའི་ས་བོན་བླངས་པ་དང༌། པདྨ་མངལ་གནས་དང༌། བུང་བ་དྲི་ཟ་དང༌། རབ་དགའ་དཀར་དམར་གྱི་དབུས་སུ་སེམས་རྒྱལ་བ་ལ་འཆད་ཀྱང་དེ་གཞུང་གི་དོན་དུ་མི་སྣང་ངོ༌། །ཨེ་ཝཾ་ནི་གོང་དུ་བཤད་པ་ལྟར་གྱི། སྒྲ་གཅན་དང་དུས་མེ་ཡིན་ཞིང༌། དེར་ཡང་སྐབས་འདིར་བདེ་བའི་ཕྱོགས་ནས་བསྟན་པས། ཉི་མ་གཅིག་གིས་བསང་བར་མཛོད་ཅིག་ཞེས་སོགས་དམོད་ཚིག་བརྗོད་ལ། རང་གི་ལག་མཐིལ་སྣ་ཚོགས་རྡོ་རྗེར་བསམ་ལ་ཐལ་མོ་བརྡབས་པས། དགྲ་བགེགས་སྐད་ཅིག་གིས་ཐལ་བར་བརླག་པར་བསམ། ཁྲོ་བོ་འབར་བའི་ཚོགས་རྣམས་ཀྱིས། །ཞེས་པ་ལ་སོགས་པ་དང༌། བགེགས་དང་ལོག་པར་འདྲེན་པ་རྣམས། །འདུལ་དཀའ་འདུལ་བྱེད་སོགས་བརྗོད་གལ་ཏེ་ཐུན་མཚམས་སུ་འདི་ཉིད་ཆེད་ཀྱི་བྱས་པ་ཡིན་ན། མཆོད་བསྟོད་གཏོར་མ་དབུལ་བ་སོགས་བྱའོ། །སྔོན་གྱི་བོད་མཁས་པ་རྣམས་ཕྱིར་བཟློག་ལ། སྟེང་དང་དབུས་ཀྱི་ཁྲོ་བོ་བརྗེ་བར་བཞེད་དེ། གཞན་དང་མཐུན་པས་ལེགས་མོད། འོན་ཀྱང་འདི་སྐོར་གྱི་རྒྱུད་དང་རྒྱ་གཞུང་ཁུངས་མ་རྣམས་ལས་མ་བཤད་ཅིང༌། གསང་འདུས་དང༌། རྡོ་རྗེ་གུར་སོགས་དང་འདི་ཅུང་མི་འདྲའོ། །དེ་ལྟར་བརྗེས་ན་གཙོ་བོ་འཕོ་བའི་གནད། བསྲུང་བྱ་སྦ་བའི་གནད། ལྷའི་རྣམ་པའི་གནད། འཁོར་ལོ་འཁོར་བའི་གནད། སྔགས་ཟླ་བའི་གནད་ཅེས་བོད་སྔ་མ་རྣམས་ཀྱི་བརྡ་ཆད་དུ་གནད་ལྔ་ཞེས་གསུངས་པ་དེ་ཡང་ཚང་བར་མངོན། སྤྱིར་དེ་རྣམས་ཀྱི་མན་ངག་རྒྱ་གར་གྱི་སློབ་དཔོན་ཚད་ལྡན་གྱིས་བཤད་པས། ཐ་སྙད་ནི་རྒྱ་གཞུང་ལས་འབྱུང་ངོ་ཞེས་ངལ་
བས་སྒྲུབ་མི་དགོས་ཤིང་འགྲུབ་དཀའོ། །རྡོ་རྗེ་གུར་དུ་ནི་ཁྲོ་བོ་བཅུའི་ལས་ཚོགས་ཀྱི་གཙུག་ཏོར་གྱི་སྐབས་འཁོར་ལོའི་ལྟེ་བར་ཁྲོ་བོ་སྒོམ་ནས་ཕྱིར་བཟློག་བྱ་བར་གསུངས། ལེའུ་བཅུ་གཉིས་པར་དཀྱིལ་འཁོར་གྱི་ཐུན་མོང་མ་ཡིན་པའི་བསྲུང་འཁོར་གསུངས་པ་རྣམས་མན་ངག་གི་སྡེབས་པ་ལས། གཙོ་བོ་འཕོ་བའི་ཚུལ་འབྱུང་ལ། འདིར་ནི་དེ་ལྟར་མེད་པས། གཙོ་བོ་སྤོ་བ་ཡང་མི་དགོས་སོ་ཞེས་རིག་པར་བྱའོ། །གཞན་ཡང་རྡོ་རྗེ་རྭ་གུར་སྔོན་དུ་བསྒོམ་ནས། འཁོར་ལོ་ཕུར་གདབ་སོགས་ཕྱིས་བྱེད་པ་ཡང་ལུགས་གཞན་ཏེ། དང་པོ་ནག་པོ་ལུགས་དང་མཐུན་ལ། འདི་ནི་ལཱུ་ཡི་པ་དང་མཐུན་ཞིང་འདི་གཉིས་ཀའང་ཤིན་ཏུ་རྒྱས་པའོ། །གཉིས། ཡང་ཕུར་བུའི་ཁྲོ་བོ་དང་ཧཱུཾ་མཛད་ཕྱི་མ་ཁྲོ་བོ་བཞི་དང་བཅས་པ་བོར་བ་སྔ་མ་ལྟ་བུ་དང༌། གསུམ། ལྭ་བའི་ཞལ་སྔ་ནས་ཀྱི་འགྲེལ་པར་བསྟན་པ་ལྟར། ཧཱུཾ་བཞི་པས་ཁྲོ་མོ་བཅུ་སྤྲོས། ཕུར་གདབ་བྱས། རྭ་གུར་སོགས་སྔགས་ཚན་དྲུག་གིས་བཀོད། དེའི་དབུས་སུ་འཁོར་ལོ་རྡོ་རྗེ་སེམས་དཔའ་དང་བཅས་པ་བསྐྱེད། རྡོར་སེམས་ཡོངས་སུ་གྱུར་པ་ལས། ཁྲོ་བོ་བཅུ་གཅིག་སྐད་ཅིག་གིས་བསྐྱེད་པ་ནི། ནག་པོ་པའི་ཞབས་དང་འབྲེལ་ལ། བཞི། རྭ་གུར་སོགས་བསྐྱེད་ལ། འཁོར་ལོ་ཁྲོ་བོ་བཅུ་གཅིག་དང་བཅས་པ་བསྒོམས། ཧཱུཾ་བཞི་པས་ཁྲོ་མོ་སྤྲོས་ནས། ཕུར་གདབ་སོགས་བྱེད་པ་ནི་ཉ་ལྟོ་བའི་ཞབས་དང་མཐུན་ནོ། །ལྔ། མངོན་བརྗོད་དུ་བསྟན་པ་ཡང་འདི་དང་མཐུན་ཏེ། འོན་ཀྱང་ཕུར་གདབ་ནི་ཧཱུཾ་བཞི་
པས་བཀའ་བསྒོས་ནས། ཁྲོ་བོ་བཅུས་བྱེད་པ་ཡིན་ཏེ། འདི་གསུམ་ལ་རྡོ་རྗེ་སེམས་དཔའི་ཐུགས་ཀའི་ཧཱུཾ་ལས་ཁྲོ་བོ་བརྒྱད་སྤྲོས། གཙོ་བོ་ཧཱུཾ་མཛད་དུ་བསྒྱུར། དེ་དང་དུས་མཉམ་དུ་སྟེང་འོག་བསྐྱེད་པ་སྟེ། མངོན་བརྗོད་དངོས་བསྟན་དུ་ཁྲོ་བོ་བརྒྱད་སྤྲོ་ཞེས་པ་ལས། ཇི་ལྟར་སྤྲོ་མི་གསལ་ལོ། །དྲུག །ཡང་རྡོ་རྗེ་སེམས་དཔའ་ཧཱུཾ་མཛད་དུ་བསྒྱུར་ནས་ཁྲོ་བཅུ་སྙིང་ག་ནས་སྤྲོ་བ་དང༌། བདུན། མཁའ་ནང་ནས་ས་བོན་ལས་བསྐྱེད་དེ་སྤྲོ་བ་དང༌། བརྒྱད། མཁའ་ནང་དུ་མི་བསྐྱོད་པ་ཁྲོ་བཅུ་དང་བཅས་པ་བསྐྱེད། མི་བསྐྱོད་པ་སྤྲོས་ཏེ་རང་ལ་བཅུག་པས། ཧཱུཾ་མཛད་དུ་བསྒྱུར། ཧཱུཾ་མཛད་ཀྱི་རང་སྣང་གི་རིག་མའི་མཁའ་ལས་ཁྲོ་བོ་བཅུ་སྤྲོ་བ་རྣམས་ཀྱང་ལུགས་གཞན་དང་གཞན་ནོ། །དགུ། འདིར་བསྲུང་བའི་དོན་ཙམ་དུ་འཁོར་ལོ་རྩིབས་བརྒྱད་མི་བསྒོམ་པ་གཙོ་བོ་དང༌། སྟེང་འོག་གི་ཁྲོ་བོ་ཞལ་ཕྱག་གཞན་དུ་བཤད་པ་ཡང་ཡོད་དེ། བཅུ། དེའི་ཕྱིར་རྣམ་པ་དུ་མ་ཡོད་དོ། །འདི་རྣམས་དང༌། འདི་དང་མཐུན་པ་རྣམས་ཀྱང་རྒྱས་པའོ་རྫོགས་ཕྲེང་དང༌། མན་ངག་སྙེ་མའི། སྙེ་མ་ཉེར་བདུན་པར་བཤད་པའི་ཁྲོ་བོའི་ཞལ་ཕྱག་རྣམས་ནི། མངོན་བརྗོད་ཀྱི་ལུགས་ཡིན་པར་སྣང་ན་ཡང༌། ད་ལྟ་བོད་དུ་འགྱུར་བའི་མངོན་བརྗོད་རྣམས་དང་མི་མཐུན་པ་ནི་དཔེ་གཞན་ཞིག་ཡོད་པར་མངོན། མན་ངག་སྙེ་མའི་རྡོར་སེམས་སྒྲུབ་ཐབས་ཀྱི་བསྲུང་འཁོར་ཡང་རྒྱས་པ་ཡིན་ནོ། །བཅུ་གཅིག ལཱུ་བཅུ་གཉིས་ནག་གི་བཅུ་གསུམ། སྒྲུབ་ཐབས་ཀྱི་སྲུང་
འཁོར་དང༌། ཕག་མོ་མངོན་འབྱུང་དང༌། བཅུ་བཞི། སྙེ་མ་ཉེར་བདུན་པའི་སྲུང་འཁོར་དང༌། བཅོ་ལྔ། དེ་རྣམས་དང་མཐུན་པ། འདི་ལྟར་ཁྲོ་བོ་བཅུ་ཁོ་ན་བསྒོམ་པ་དང༌། བཅུ་དྲུགཕུར་གདབ་དང་རྭ་གུར་ཙམ་བྱེད་པ་སྟེ། རྭ་གུར་སྔོན་མ་དང༌། ཕུར་གདབ་ཕྱིས་བྱེད་པ་དང༌། བཅུ་བདུན། ཕུར་གདབ་ཀྱི་རྗེས་སུ་རྭ་གུར་བྱེད་པ་རྣམས་ནི་འབྲིང་པོའོ། །བཅོ་བརྒྱད། སྔགས་དྲུག་གིས་བྱིན་གྱིས་རླབས་པའི་རྭ་གུར་ཙམ་བྱེད་པ་དང༌། བཅུ་དགུ། ཧཱུཾ་བཞི་པས་སྐད་ཅིག་གིས་རྭ་གུར་གྲུབ་པ་དང༌། ཉི་ཤུ། དེ་དང་མཐུན་པ་རྣམས་ནི་བསྡུས་པ་ཡིན་ནོ། །དེ་ལ་བསྲུང་བའི་འཁོར་ལོ་འདི་ནི། དཀྱིལ་འཁོར་བསྒོམ་པའི་སྐབས་ལས་གཞན་དུ་བྱ་དགོས་པའི་གསལ་ཁ་མི་སྣང་ལ། ཕྱིར་བཟློག་ནི་གཙོ་བོར་གཞན་གྱི་བྱད་མ་བཟློག་པའི་དྲག་ཤུལ་གྱི་སྦྱོར་བ་ཡིན་པས། རྒྱུན་གྱི་རྣལ་འབྱོར་ལ་འགྲུབ་ན་ཆེས་ལེགས་མོད། མ་འགྲུབ་ཀྱང་རུང་ངོ༌། །པཎྜི་ཏ་ཆེན་པོ་འཇིགས་མེད་འབྱུང་གནས་ཀྱི་ཞལ་སྔ་ནས། རྡོ་རྗེ་ཕྲེང་བར་དཀྱིལ་འཁོར་ལ་ཆུ་རྡོལ་ལ་སོགས་པའི་གནོད་པ་བསྲུང་བ་ལ་ཡང་འདི་གསུངས་སོ། །དེ་ལྟར་ཤེས་པ་ན་ལྷག་པའི་སྐྱོན་མེད་ཅིང༌། ཤིན་ཏུ་རྒྱས་པ་ཡང་བྱར་ཡོད་ལ། སྐབས་མེད་པའི་ཚེ། ཤིན་ཏུ་བསྡུས་པ་བྱས་ཀྱང་དགོས་པའི་ཆོ་ག་མ་ཆད་པ་ཞིག་འོང་བ་ཡིན་ནོ། །ལཱུ་ནག་གི་ལུགས་གཉིས་དང༌། དྲིལ་བུ་ལྷར་ལྔར་གསུངས་པའི་དོན་གཙུག་ནོར་དུ་བཤད་པ་སྟེ། རྩ་གཅིག །དེ་གསུམ་པོ་གྲགས་ཆེ་བས་མ་བྲིས་སོ། །གཉིས་པ་
ཁྲོ་བོ་བསྙེན་པ་ནི། ཐུན་མོང་བའི་སྲུང་འཁོར་ཡན་ཆད་བསྒོམས་ཏེ། ཆོས་འབྱུང་གི་ནང་དུ། འབྱུང་བཞི་རི་རབ་གཞལ་ཡས་ཁང་མངོན་བྱང་ལྔ་ལས་རྡོ་རྗེ་སེམས་དཔའ་དང༌། དེ་ཞུ་བ་གླུས་བསྐུལ་ཏེ་ཁྲོ་བོ་ཧཱུཾ་མཛད་ཞལ་གསུམ་པར་བསྐྱེད། གོ་ཆ་བགོ སྐུ་གསུང་ཐུགས་བྱིན་གྱིས་བརླབས། ཡེ་ཤེས་དགུག་གཞུག་བྱ། སེམས་དཔའ་གསུམ་བརྩེགས་བསྒོམ། དབང་བསྐུར་ཏེ་མི་བསྐྱོད་པའི་ཅོད་པན་བྱ། དེ་རྣམས་སྦྱོར་བའོ། །ཡུམ་གྱི་གནས་ལྔ་བྱིན་གྱིས་རླབས། ཁྲོ་བོ་བཅུ་མཁའ་སྤྲོ་སྔར་སྲུང་འཁོར་དུ་བསྟན་པ་བཞིན་བྱས་ཏེ། ཡེ་ཤེས་དགུག་གཞུག་དང་དབང་བསྐུར་བྱ། མཆོད་བསྟོད་བྱ་སྟེ། དཀྱིལ་འཁོར་རྒྱལ་མཆོག་གོ །དེ་ནས་བཟླས་པ་བྱ་སྟེ་རྗེས་ཀྱི་བྱ་བ་རྣམས་བྱའོ། །འདི་ནི་ནག་པོའི་ཞབས་ཀྱི་མན་ངག་སྦྱར་བ་ཡིན་ལ། གཅིག །ལྷ་ཐམས་ཅད་མངོན་བྱང་ལྔ་ལས་བསྐྱེད་ལ། གོ་ཆ། ཡེ་ཤེས་དབང་བསྐུར་རྒྱས་བཏབ་བྱ་བ་ལོ་ཨི་པའི་མན་ངག་དང་སྦྱར་བ་སྟེ། འདི་གཉིས་ནཱ་རོ་ཏ་པའི་མན་ངག་ལས་འབྱུང༌། གཉིས། མངོན་བརྗོད་ཀྱི་རྒྱུད་ཀྱི་དངོས་བསྟན་ནི་བསྲུང་འཁོར་དངོས་བསྟན་དེ་ཉིད་བསྒོམ་ནས་བཟླས་པ་བྱས་ལ། རྗེས་ཀྱི་ཆོ་ག་བྱ་བ་སྟེ། ཁྲོ་བོ་ཙམ་གྱི་བསྙེན་པ་ནི་དེ་ཁོ་ནས་རུང་ལ། གསུམ། སྔ་མ་ནི་བདེ་མཆོག་ཁྲོ་བོའི་དཀྱིལ་འཁོར་གྱི་སྒྲུབ་ཐབས་ཡིན་པས། ཐུན་མོང་གི་ཆོ་ག་ལཱུ་ནག་གམ། དེ་དང་མཐུན་པ་རྣམས་དང་ཐུན་མོང་སྟེ་དེའི་ཕྱིར་དེ་གཉིས་སུ་རིག་པར་བྱའོ། །ཡང་གཞན་རྣམས་
དང་པོ་དང་འདྲ་བ་ལས། རྡོར་སེམས་ཧཱུཾ་མཛད་དུ་བསྒྱུར་ལུགས་མངོན་བརྗོད་ཀྱི་དངོས་བསྟན་ལྟར་བྱེད་པའི་ལུགས་ཀྱང་ཡོད་དོ། །བཞི། ཡང་འཁོར་ལོའི་ལྟེ་བར་ཧཱུཾ་མཛད་གཅིག་པུ་བསྙེན་བསྒྲུབ་ཡན་ལག་བཞིས་བསྐྱེད་པ་དང༌། ཁྲོ་བོ་གཞན་བཅུ་པོ་ལ་ཡང་ཡན་ལག་བཞིས་བསྐྱེད་ཀྱི་སྒྲུབས་ཐབས་བོད་འགའ་ཞིག་གིས་མཛད་ལ། ལྔ། འདི་གཞན་གྱིས་རྒྱས་བཀབ་པ་སྟེ་རུང་མོད། འོན་ཀྱང་འདིར་ཁྲོ་བོ་ལྷག་མ་རྣམས་ཀྱི་ལས་ཚོགས་ཐུན་མོང་མ་ཡིན་པ་སྒྲུབ་ཚུལ་མང་པོ་མི་སྣང་བས་རེ་ཞིག་ཉེ་བར་མཁོ་བ་ཆེན་པོ་མི་སྣང་ངོ༌། །དེ་བཞིན་དུ་ཧཱུཾ་ལས་ཕུར་བུའི་ཁྲོ་བོ་སྒོམ་སྟེ། འདིའི་སྒྲུབ་ཐབས་ཀྱང་ཆོ་ག་མངོན་བྱང་ལྔས་བསྐྱེད་དང༌། གཅིག་ཞུ་བ་གླུས་བསྐུལ་གྱི་ཚུལ་གྱིས་སྔར་ཁྲོ་བོའི་བསྙེན་པ་ལྟར་བསྐྱེད་པ་ཡིན་ནོ། །འདི་ལ་ལྷ་སྣམ་གྱི་དབུས་སུ་པདྨ་འདབ་བརྒྱད། དབུས་སུ་གཙོ་བོ། ལྷོ་ནུབ་ཏུ་ལས་བྱེད་ཀྱི་ཕུར་བུ་སྒོམ་པ་ཡིན་ལ། ཁྭ་གདོང་ལ་སོགས་པ་སྒོ་བཞིར་སྒོམ་ལ། གླང་གདོང་སོགས་མེ་ལ་སོགས་པ་གསུམ་དུ་འགོད། གཙོ་བོ་ཞལ་ནུབ་བསྟན་ནོ། །ཞེས་ཁ་ཅིག་འདོད་ཅིང༌། འགའ་ཞིག་གླང་གདོང་སོགས་གཙོ་བོའི་གནས་གསུམ་དུ་འགོད་མོད། ལུགས་དང་པོ་ལྟར་འཐད་ལ། འོན་ཀྱང་ལྷོ་ནུབ་ཀྱི་ཕུར་བུ་མི་དགོས་སོ་སྙམ་མོ། །སྔགས་ནི། ཨོཾ་གྷ་གྷ། སོགས་དང༌། ཨོཾ་ཀི་ལཱི་ཀི་ལཱ་ཡ་ཧཱུཾ་ཞེས་སོགས། ཧཱུཾ་མཛད་ཞལ་བརྒྱད་པའི་ནི། གཙོ་རྐྱང་ཁོ་ན་སྟེ། ཆོས་འབྱུང་དུ། པདྨ་ལ་ས་བོན་ལས་བསྐྱེད་
དེ། འགྲེལ་པ་ལྟར་མཐར། ཡན་ལག་བཞི་བསྐྱེད་བྱ། བཟླས་པའི་སྐབས་སུ་ཁྲོ་བོ་བཞི་སྤྲོ་བ་ཡིན་ནོ། །དེ་ཡང་ཁྲོ་བོ་ཧཱུཾ་མཛད་ཀྱི་འཁོར་ལོ་ལ་སོགས་པ་ལས་ཚོགས་སྒྲུབ་པ་ལ་བདེ་མཆོག་ཉིད་ཀྱི་དཀྱིལ་འཁོར་གྱི་བསྙེན་པ་ཡོངས་སུ་རྫོགས་པ་གྲུབ་པས་ནི། ཧཱུཾ་མཛད་ཀྱི་སྒོས་བསྙེན་མི་དགོས་སོ། །བསྙེན་པའི་གྲངས་ནི་འབུམ་ཕྲག་བཞིར་སྔོན་གྱི་བོད་རྣམས་གསུངས་ལ། དཔལ་ཧེ་རུ་ཀའི་བསྙེན་པ་གྲུབ་པས་ཧཱུཾ་མཛད་ཀྱི་བཟླས་པ་ཁྲི་བྱས་ནས་ལས་སྒྲུབ་བོ་ཞེས་དམ་པ་སྔ་མ་རྣམས་འདོམས་པར་མཛད་དོ། །འདིར་དཔྱད་པར་བྱ་བ་ནི་འདི་ཡོད་དེ། གང་ལ་ལ་ཧཱུཾ་མཛད་ཁོ་ན་རྣལ་འབྱོར་ཏིང་ངེ་འཛིན་གསུམ་དང༌། ཡན་ལག་བཞི་སོགས་ཀྱིས་མི་སྒྲུབ་ན་དེས་སྔགས་ཀྱི་གྲངས་ཙམ་རྫོགས་པས་བསྙེན་པར་འགྱུར་རམ། དཔལ་སངས་རྒྱས་ཐོད་པ་ལ་སོགས་པ་གཞན་ཞིག་གིས་བསྙེན་པ་ནི་བྱས་ལ། རྒྱུད་འདིར་མ་ཡིན་པས་ཧཱུཾ་མཛད་ཀྱི་བཟླས་པ་ཁྲི་ཡིས་ལས་སྒྲུབ་བམ། འོན་ཏེ་མ་ཡིན་ཞེ་ན། བསྐྱེད་པའི་རིམ་པ་ཡོངས་སུ་མ་རྫོགས་པའི་ལྷའི་རྣལ་འབྱོར་གྱིས་ནི། རྫ་རྔ་བཅིངས་པ་ལ་སོགས་པ་སྔགས་དེ་ཁོ་ནའི་ལས་འགྲུབ་པ་ནི་ཡོད་ལ། གཞན་ནི་མ་ཡིན་ཞིང༌། དཀྱིལ་འཁོར་གྱི་ལས་མཐའ་དག་ལ་ཡང་མི་དབང་ལ་སེམས་ཀྱི་དྲི་མ་སྦྱངས་པའང་སྟོབས་ཆུང་བས། དེ་ནི་འབྲས་བུ་ཆེ་བ་མ་ཡིན་ལ། གང་བསྐྱེད་རིམ་ཡོངས་སུ་རྫོགས་པའི་སྒོ་ནས་བསྙེན་པ་གྲུབ་པས་ནི། དེ་དག་རྒྱ་ཆེན་པོ་འགྲུབ་པས་ན། དཔལ་ཧེ་རུ་ཀའི་བསྐྱེད་རིམ་ཡོངས་སུ་རྫོགས་པ་དང་
འབྲེལ་པའི་བསྙེན་པ་ནི་གལ་ཆེ་ལ། དེ་ལྟར་མ་ཡིན་ན་རྒྱུད་འདིར་དབང་བསྐུར་བ། རྣལ་འབྱོར་ཆེན་པོའི་རྒྱུད་གཞན་གྱི་བསྙེན་པ་ལེགས་པར་གྲུབ་པས་ཀྱང་རུང་སྟེ། དེ་ལ་འདིར་ཁྲོ་བོ་རྡོ་རྗེ་སེམས་དཔའི་སྒྲུབ་ཐབས་རྒྱས་པ་སྔར་བསྟན་པ་ནི། བསྐྱེད་རིམ་ཡོངས་སུ་རྫོགས་པའོ། །འོ་ན། འདིར་ཐིག་ལེའམ་ཕྲ་མོ་སྒོམ་པ་ནི་ཇི་ལྟ་བུ་ཞེ་ན། སྔར་བསྟན་པའི་རྗེས་སུ་དཀྱིལ་འཁོར་གྱི་ལྷ་མ་ལུས་པ་སྤྲོ་བསྡུའི་སྦྱོར་བས། རྨི་ལམ་ལྟ་བུར་བསམ་པའི་ལས་རྒྱལ་པོ་མཆོག་སྒོམ་མོ། །དེ་ནས་ལྟེ་སྙིང་མགྲིན་སྤྱིའི་མདུད་པའི་བུ་གར་ཨ་ཧཱུཾ་ཨོཾ་ཧཾ། གསང་བའི་འཁོར་ལོའི་རླུང་གིས་མེ་བསྐུལ་བས་གཏུམ་མོའི་རང་བཞིན་ཨཾ་འབར་བའི་མེས་ཧཾ་ཞུ། དེས་ཡི་གེ་གསུམ་གང༌། ཨཾ་དང་དབྱེར་མེད་ལྷན་སྐྱེས་ཀྱི་ཐིག་ལེར་གྱུར་པ་ལས། འོད་ཟེར་གྱི་རེ་ཁ་ཕྲ་མོ་མེ་ལྕེ་གཅིག་ཏུ་འབར་བ་ལྟ་བུ་དེའི་མཐུས་བདུད་རྩི་འཛག་པའི་ཐིག་ལེས་རེ་ཁ་བསིལ་བར་གྱུར་པ། སེམས་བརྟན་པའི་མཚན་མ་ཐོབ་ཀྱི་བར་དུ་སྒོམ་མོ། །མཚན་མ་རྣམས་ཀྱི་ཉེ་བར་དམིགས་པས་བརྟན་པར་ཤེས་ན། རེ་ཁའི་འོད་ཀྱིས་ཐམས་ཅད་གསལ་བར་བྱས་པ་སྒོམ་སྟེ། ཐིག་ལེའི་རྣལ་འབྱོར་རོ། །ཡང་ན་སྙིང་གའི་སྔགས་ཀྱི། འོད་ཀྱིས་འགྲོ་བ་ཐམས་ཅད་སངས་རྒྱས་སུ་བྱས་ནས། ནང་དུ་འདུས་པ་ཐིག་ལེའི་རྣམ་པའི་ཧཱུཾ་དུ་གྱུར་པ་ལས་ཡིད་བཞག་གོ །དབུགས་འབྱིན་པ་ན་སྤྲོ། རྔུབ་པ་ན་བསྡུད་པ་ཡང་ཡང་སྒོམ་མོ། །འདིས་བྱིང་རྒོད་ཀྱང་
སེལ་ལོ། །བསྡུ་བའི་མཐར་ཐིག་ལེ་གཅིག་པུ་དང༌། སྤྲོ་བསྡུ་ཇི་ཙམ་དུ་བྱས་པ་དེ་ཙམ་གྱི་དཀྱིལ་འཁོར་ཡང་བསམ་མོ། །དེ་ལས་གཞན་ཡང་ཏིང་ངེ་འཛིན་སེམས་དཔའི་འོད་དྷུ་ཏཱི་ནས་སོང་བས་སྤྱི་བོའི་ཧཾ་ཞུ་བའི་འབར་འཛག་ལ་གཙོ་བོར་སྙིང་གར་ཡིད་འཇོག་པ་དེ། ཐིག་ལེའི་རྣལ་འབྱོར་རོ། །ཕྲ་མོའི་རྣལ་འབྱོར་ནི་སེམས་བརྟན་པར་བྱེད་པའི་ཐབས་དམ་པའོ་ཞེས་པས་ཨཾ་ལ་སོགས་པ་ཡི་གེ་ཐམས་ཅད་ཞུ་བའི་ཐིག་ལེ་ཡུངས་འབྲུ་ཙམ་པར་དཀྱིལ་འཁོར་རྫོགས་པ་རྡོ་རྗེ་ནོར་བུའམ། དེ་ལས་འཕྲོས་པའི་པདྨའི་སྣ་རྩེར་བསམ་ལ་བརྟན་ན་དཀྱིལ་འཁོར་སྤྲོའོ། །ཡང་སྙིང་གའི་སྔགས་ཀྱི་འོད་ཀྱིས་བཀུག་པའི་དེ་བཞིན་གཤེགས་པ་ཞལ་དུ་ཞུགས་ཞུ་བའི་ཐིག་ལེ་པདྨའི་སྣ་རྩེར་བསྒོམ་པ་ཡང་སྟེ་ཕྲ་མོའི་རྣལ་འབྱོར་རོ། །དེ་ནས་ནི། རྫ་རྔ་བཅིང་པའི་ངེས་དོན་གྱི་རྡོ་རྗེའི་བཟླས་པ་དང་མཐུན་པ་བསྐྱེད་རིམ་རྡོ་རྗེའི་བཟླས་པའོ། །རྣམ་པ་འདི་གསུམ་ནི་ཡན་ལག་གཞན་གྱི་མཐུ་ལས་རྫོགས་པའི་རིམ་པར་ཡང་འགྱུར་ཏེ། གང་དུ་ཕྲ་ཐིག་དང་རྡོ་རྗེའི་བཟླས་པ་མི་གསལ་བའི་རྒྱུད་ཐམས་ཅད་དུ་ཡང་འདི་སྦྱར་རོ། །ཞེས་པ་ནི་མཁས་པ་རྣམས་ཀྱི་ལུགས་ཏེ། རྡོ་རྗེ་སློབ་དཔོན་ཡེ་ཤེས་ཞབས་ལ་སོགས་པའི་མན་ངག་གོ །དེ་ལ་འདིར། བཟླས་པའི་དམིགས་པ་ཐམས་ཅད་ཀྱང་བླང་དུ་རུང་མོད། འོན་ཀྱང་གཙོ་བོ་ནི་མདོ་ལིའི་བཟླས་པ་ཡིན་ཏེ། དེ་སྐད་དུ། འཁོར་ལོའི་སྦྱོར་བདག་ཉིད་ཀྱིས་ཟླ། །དངོས་གྲུབ་ཀུན་གྱི་འབྲས་བསྐྱེད་པའོ། །ཞེས་པའི་
འཁོར་ལོའི་སྦྱོར་བ་ནི་མདོ་ལིའི་བཟླས་པར་སྔོན་གྱི་བླ་མ་མཁས་པ་རྣམས་འཆད་པ་ལྟར་དོན་ལའང་གནས་པའོ། །གསུམ་པ་བྲིས་པའི་ཕྱིར་ཟློག་གི་སྦྱོར་བ་ནི། འདི་ལྟར་ཡིན་ཏེ། འཁོར་ལོ་རྩིབས་བརྒྱད་པ་ལ་གནས་པའི་པདྨ་འདབ་མ་བརྒྱད་པའི་ལྟེ་བའི་སྟེང་དུ་སྣ་ཚོགས་རྡོ་རྗེ་སྟེ། འཁོར་ལོ་ནི་པད་འདབ་ཀྱི་ཕྱི་རོལ་དུ་རྩེ་མོ་འབུར་ཙམ་ཐོན་པའི་རེ་ཁ་བྲིའོ། །རྡོ་རྗེའི་ལྟེ་བར་ཧཱུཾ་གི་ནང་དུ་བཾ། བཾ་གྱི་ནང་དུ་ཨོཾ་ཨཱཿཧཱུཾ། ཆེ་གེ་མོ། རཀྴཾ་ཀུ་རུ་ཨོཾ་ཨཱཿཧཱུཾ། ཤར་རྭ་དབུས་མ་ལ། རྀ་ཌཱཾ་དེ་རྀཾ། བྱང་རཱྀཾ་ལཾ་དེ་རཱྀཾ། ནུབ་ཏུ་ལྀཾཁཾ་དེ་ལྀཾ། ལྷོར་ལཱྀཾ་རཾ་དེ་ལྀཾ། འདབ་མ་བརྒྱད་ལ་ཤར་ནས་ལྷོར་ཧཱུཾ་ཁཾ་པྲཾ་དེ་ཧཱུཾ་ཧཱུཾ་མཾ་ཙཾ་དེ་ཧཱུཾ་ཧཱུཾ་ཀཾ་པྲཾ་དེ་ཧཱུཾ་ཧཱུཾ་བིཾ་མཾ་དེ་ཧཱུཾ། མེ་ནས་དབང་ལྡན་དུ། ཧཱུཾ་སུཾ་བིཾ། དེ་ཧཱུཾ་ཧཱུཾ་ཨཾ་ཁཾ་དེ་ཧཱུཾ་ཧཱུཾ་བཾ་ལཾ་དེ་ཧཱུཾ་ཧཱུཾ་བཾ་དྲུཾ་དེ་ཧཱུཾ། དེའི་ཕྱི་རོལ་ཁོར་ཡུག་གཉིས་ཀྱི་བར་དུ། སྔར་གྱི་རིམ་པས། ཀཾ་ཁཾ་གཾ་གྷཾ་དང༌། ངཾ་ཙཾ་ཚཾ་ཛཾ་ངོ༌། དེའི་ཕྱི་རོལ་སྣ་ཚོགས་རྡོ་རྗེ་རྭ་དབུས་མ་རྣམས་ལ་ཤར་ནས་གཡས་བསྐོར་གྱིས། ཧཱུཾ་བཞི་པའི་རྐང་པ་རེ་རེ་བཀོད་པ་ཧཱུཾ་དང་ཕཊ་ཀྱི་བར་དུ་མིང་བཅུགདེའི་ཕྱི་རོལ་ཁོར་ཡུག་གཉིས་ཀྱི་བར་དུ་ཤར་ནས་གཡོན་སྐོར་གྱིས་ཨཱ་ལི་བཅུ་གཉིས་ཀླད་ཀོར་ཅན་བྱ། དེའི་ཕྱི་རོལ་པད་འདབ་བཅུ་དྲུག་ལ་ཤར་ནས་གཡོན་སྐོར་གྱི་དབྱངས་བཅུ་དྲུག་ཟླ་ཕྱེད་ཐིག་ལེ་ཅན། ཕྱི་རོལ་ཁོར་ཡུག་གཉིས་ཀྱི་བར་དུ་གཡོན་བསྐོར་གྱིས་ཧེ་རུ་ཀའི་ཡིག་བརྒྱ་བྲི། དེའི་ཕྱིར་
འཁོར་ལོའི་རྩིབས་བཅུ་དྲུག་ལ་ཤར་ནས་གཡོན་བསྐོར་གྱིས། ཨཾ་ཨཻཾ། བཾ་མཾ། མཾ་པཱཾ། བཾ་སུཾ། སུཾ་ཤྱཱཾ། བཾ་སུཾ། མཾ་ཧཾ། བིཾ་ཁཾ། མཾ་ཙཾ། རཾ་ཁཾ། ཧཾ་ཤོཾ་ཨཾ་ཙཾ། ཧེཾ་སུཾ། པཾ་མཾ། བེཾ་ཙཾ། བཾ་མཾ། ས་བོན་གཉིས་ཚན་གཉིས་ཚན་པ་ཨོཾ་དང་ཧྲིཿསྤེལ་བ་སྟེ། ཨོཾ་ཧྲཱིཿཨཾ་ཨཻཾ་དེཾ་ཧྲཱིཿཨོཾ་ལ་སོགས་པའོ། །དེའི་ཕྱི་རོལ་ཁོར་ཡུག་གཉིས་ཀྱི་དབུས་སུ་གཡོན་སྐོར་ཕྱི། ཛྷིཾ་ཉཾ་ཊཾ། ཋཾ་ཊཾ་དྷཾ་ཎཾ། ཏཾ་ཐཾ་དཾ་དྷཾ་ནཾ་པཾ་ཕཾ་བཾ་བྷཾ། དེའི་ཕྱི་རུ་གཞལ་ཡས་ཁང་གྲུ་བཞི་སྒོ་བཞི་རྩིག་པ་རྐྱང་པ་བྱ། སྒོ་མཚམས་སུ་ཧཱུཾ་ཕཊ་ཡཾ་ཀཾ་ཡཾ་དེ་ཧཱུཾ་ཕཊ། དེ་བཞིན་དུ་ཧཱུཾ་ཕཊ་སྤེལ་བའི་རཾ་ཨུཾ་རཾ། ལཾ་ཤྭཾ་ལཾ། ཝཾ་སུཾ་ཝཾ། ཤཾ་ཡཾ་ཤཾ ཥཾ་ཡཾ་ཥཾ། སཾ་ཡཾ་སཾ། ཧཾ་ཡཾ་ཧཾ་རྣམས་བཀོད། དེ་རྣམས་མིང་ལ་སྐོར་བར་བྱ། སྒོའི་སྟེང་དུ་རྡོ་རྗེ་རྩེ་ལྔ་ཕྱེད་ཟུར་གྱི་སྟེང་དུ་ཟླ་ཉི་ཕྱེད་པའི་སྟེང་དུ་རྡོ་རྗེ་ཕྱེད་པ། རྡོ་རྗེ་བརྒྱད་པོའི་རྭ་དབུས་མ་ལ་སྔར་གྱི་རིམ་པས་རྐང་པ་བརྒྱད་པ་བྲི། དེའི་ཕྱིའི་ཁོར་ཡུག་གཉིས་ཀྱི་བར་དུ། ཤར་ནས་གཡོན་བསྐོར་གྱི་ཕྱིར་བཟློག་གི་སྔགས་རིངས་བྲི། དེའི་ཕྱི་རོལ་ཀྵས་སྐོར། དེའི་ཕྱིར་ཋས་སྐོར། དེའི་ཕྱི་རོལ་ཨཱ་ལིས་སྐོར། དེའི་ཕྱི་རོལ་ཀཱ་ལིས་སྐོར། འདི་ལ་ཁ་ཅིག་ཕྱིར་ཟློག་ཡི་གེ་རེ་རེ་ཀྵའི་ནང་དུ་བཅུག་པ་དེ་ཡང་ཋའི་ནང་དུ་ཆུད་པར་བྱ་ཞེས་གསུང་ངོ༌། །དེའི་ཕྱི་རོལ་བདེ་མཆོག་གི་རྩ་སྔགས་ཀྱིས་སྐོར། དེའི་ཕྱི་རོལ་རིགས་ལྔའི་ཕྱག་མཚན་གང་རུང་གིས་སྐོར་ནས་འོད་ཟེར་
ཕྲེང་བ་བྲི། འདི་ལ་སམྦྷུ་ཊི་ལྟར་ན་གོང་གི་ཧཱུཾ་བཞི་པ་ལ་རྐང་པ་བཞི་པ་ལ་ཨཽཾ་མེད་ལ། ཧཱུཾ་ཧཱུཾ་སྭཱཧཱ་ཞེས་པ་ཡོད་དོ། །དེ་ཡང་རིགས་ངན་ནམ་བྲམ་ཟེ་མོའམ། རྒྱལ་པོའི་བུ་མོའི་མེ་ཏོགགླང་པོའི་ཁྲམ་པའི་ཆང༌། སྙོམས་འཇུག་ལས་སྐྱེས་པའི་ཁུ་བ། གི་ཝཾ། ཞུན་ཆེན་གྱི་སྣག་ཚ་རྣམས་རྡོ་རྗེ་དང་པདྨའི་ཆུས་བསྡུར་ཏེ། གླང་པོ་ཆེའི་ཆང་མ་རྙེད་ན་སིང་པོའོ། །མི་ལྤགས་སམ་གྲོ་གའམ་རས་ལ་བྲི་སྟེ། བདེ་མཆོག་ཞི་ཁྲོ་གང་རུང་གི་བདག་མདུན་ལྷའི་རྣལ་འབྱོར། གཏོར་མ་འབུལ་བ་རྣམས་བྱས་ལ། འབྱུང་པོའི་གཏོར་མ་བཏང༌། ཁ་ཤར་དུ་བལྟས་ལ་བྲི་གཞི་ལ་གི་ཝཾ་གུར་གུམ་ཙནྡན་ལ་སོགས་པས་བྱུག་གོ །གལ་ཏེ་བསད་ཟློག་ལྟ་བུ་དྲག་ཤུལ་ལ་ནི། དུག་དང་ཁྲག་དང་ཀེ་ཚེ་དང༌། ནིམ་པ་དང༌། ལན་ཚ་དང༌། དགྲ་བོའི་རྗེས་ཀྱི་རྡུལ་དང༌། དེའི་རྡོ་རྗེའི་ཆུ་བསྲིས་པས་བྱུག་གོ །ལས་གཞན་རྣམས་ལ་སྤྱི་དང་མཐུན་པའི་ཆོ་ག་སྦྱོར་རོ། །དེ་ནས་ལས་དང་མཐུན་པའི་སྨྱུག་གུའམ། པིར་གྱིས་ལེགས་པར་བྲིས་ནས། ཁ་ནུབ་ཏུ་བསྟན་ནས་རབ་གནས་བྱའོ། །རབ་གནས་ནི་བགེག་བསྐྲད། ཁྲུས་བྱ། ཁྲོ་བོ་བཅུ་གཅིག་བསྐྱེད་པའམ། ཇི་ལྟར་བྲིས་པ་བསྐྱེད། ས་བོན་རྣམས་ལྷ་དེ་དག་དང༌། ཕྱིར་ཟློག་གི་འབྲུ་རེ་རེ་ཞིང་འཁོར་ལོས་སྒྱུར་བ། གཞན་རྣམས་ཀྱང་ཧེ་རུ་ཀའི་ངོ་བོར་མོས་པ་ལས། འཁོར་ལོ་ཇི་ལྟ་བུའི་ཡེ་
ཤེས་དགུག་གཞུག དབང་བསྐུར། སྤྱན་དབྱེ་བརྟན་བཞུགས། མཆོད་བསྟོད་བྱས་ལ། ཁྲོ་བོ་བཅུ་གཅིག་བསྐྱེད་ན། སྤྱན་དབྱེ་བྱས་མ་ཐག དེ་ཞུ་བ་འཁོར་ལོ་སྔ་མ་ལྷར་ལྟའོ། །དེ་ལ་གཏོར་མ་ཕུལ་ལ་ཚོགས་མཆོད་བྱ། དེ་ནས་སྒྲུབ་པ་ན་གཞལ་ཡས་ཁང་གི་དབུས་སུ་འཁོར་ལོ་རྩིབས་བཅུ་པའི་ལྟེ་བ་ལ་ཧཱུཾ་མཛད་སྒོམ། དེ་ཡོངས་སུ་གྱུར་པ་ལས་ཁང་བརྩེགས་དང་འཁོར་ལོ་རྣམ་སྣང་གི་ངོ་བོ། བྲིས་པའི་ཡི་གེ་སྔར་བཞིན་བསྐྱེད། ཡེ་ཤེས་པ་བཅུག མིང་ཡིག་རྣམས་དེ་ཡོངས་སུ་གྱུར་པའི་སྒྲུབ་བྱར་ལྟས་ལ། ཡིད་ཀྱིས་འཁོར་ལོ་སྒྲུབ་བྱར་བཅས་པ། ཁ་ནས་བཅུག་སྟེ་ཞུ་བའི་ཁུ་བ་རྣམས་རྡོ་རྗེའི་ལམ་ནས་བྱུང༌། ལྷ་མོའི་པད་མར་སྔར་བཞིན་བསྐྱེད་པ་ལ། ནང་དབང་བསྐུར། དེ་ནས་སྒྲུབ་བྱ་ལ་ནི། ཁྲོ་བོ་རྣམས་དང༌། ཁྱད་པར་བགེགས་མཐར་བྱེད་ཀྱི་ཚོགས་སྤྲོས་པ་རྣམས་ཀྱིས་བསྲུང་བའི་ཕྱིར། ཕྱི་ནས་སྐོར་བར་བསམ། བདུད་རྩི་ལྔ་དང་བྱང་སེམས་ཀྱི་ལུས་གང་བདེ་བས་ཁྱབ། སྔགས་ཀྱི་འོད་ལས་བྱུང་བའི། ལྷ་དཀར་པོ་བུམ་པ་བདུད་རྩིའི་དཀར་པོས་གང་བ་ཐོགས་པ་རྣམས་ཀྱིས་དབང་བསྐུར་ཞིང༌། མཉམ་པར་སྦྱར་བས་ཞུ་བའི་ཁུ་བས་ཀྱང་དབང་བསྐུར་བཞིན་པར་བསམ་སྟེ་དཔའ་བོའི་རྩ་སྔགས་དང༌། ཨོཾ་ཧྲཱིཿཧ་ཧ་ཆེ་གེ་མོ་ལ་ཤིནྟཾ་རཀྵཾ་ཀུ་རུ་ཀུ་རུ་ཧཱུཾ་སརྦ་པཱ་པཾ་ཕཊ། ཞེས་པ་དང༌། ཨུཥྟི་ཥ་བརྒྱ་རྩ་
ཟླ་ཞིང༌། དེ་ནས་སྔགས་འདོན་བཞིན་པས་གྲུ་བཞིར་ལྟབ་དེར། སྐུད་པ་དཀར་པོས་འཁོར་ལོས་མི་མངོན་པར་དུམ་དཀྲི། དེ་ཉིད་མགྲིན་པའམ་དཔུང་པར་གདགས་པས་ཀྱང༌། རྡོ་རྗེ་ལྷ་མོས་བྱིན་གྱིས་རློབས་ཅིང་བགེགས་མེད་པར་བྱེད་པ་དང༌། གཡུལ་དུ་ཡང་རྒྱལ་བར་འགྱུར་ཞེས་གསུངས་ལ། འོན་ཀྱང་གདོན་དྲག་པོ་དང་བྱད་མ་བཟློག་པ་ལ་སྒྲུབ་པ་བྱེད་པ་གལ་ཆེ་སྟེ། ཁམ་ཕོར་དཀར་པོའམ། དགེ་བའི་ཐོད་པར་ཕྱི་ནང་གི་བདུད་རྩི་ལྔ། མར་དང་སྦྲང་རྩི་འོ་མ་རྣམས་ཤས་ཆེ་བས་བགང༌། དེར་འཁྲུལ་འཁོར་གཞུག བཀྲ་ཤིས་ཀྱི་སྐུད་པའི་སྣ་རིང་པོར་བཞག་ལ། དེ་སྲིན་ལག་གིས་བཟུང་དགོས་པས། སྣོད་ཁ་སྦྱོར་གྱི་བར་ནས་བཏོན་དགོས་ཞེས་བླ་མ་རྣམས་གསུངས། བདག་བསྐྱེད་ཁྲོ་བོ་བཅུ་གཅིག་མདུན་བསྐྱེད་ཁྲོ་བོ་བཅུ་བསྒོམ་པ་ནས་བཟླས་པའི་བར་སྔར་ལྟར་བྱས་ལ་འཁྲུལ་འཁོར་ཡང་བདག་བསྐྱེད་ཀྱི་འཁོར་ལོའི་ལྟེ་བར་སྒོམ་པར་འདོད། དེ་ནས་གཟུངས་ཐག་ནས་བཟུངས་ལ་སྔར་གྱི་དམིགས་པས་བཟླས་པ་བྱ། རྩེ་གཅིག་ཏུ་དེ་ལྟར་ཐུན་བཞིའམ། དྲུག་ལ་སོགས་པས་ཇི་སྲིད་མཚན་མ་བརྟན་པོ་མ་བྱུང་བར་དུ་བྱ་བ་ཡིན་ལ། ཐུན་འཇོག་འཁོར་ལོ་མཆོད་བསྟོད་གཏོར་མ་ཕུལ། གསོལ་བ་གདབ་པ་སོགས་བྱའོ། །ངེས་པའི་རྟགས་མཐོང་ན། འཁོར་ལོ་ཕྱུང་ལ་མཆོད་བསྟོད། དངོས་གྲུབ་བླང༌། ཡི་གེ་བརྒྱ་པ་མང་དུ་བཟླས།
གཤེགས་སུ་གསོལ་ཏེ་དྲི་བཟང་གི་ཆུས་བཀྲུ་བར་བྱ་ལ། ཡང་ན་གཤེགས་སུ་མ་གསོལ་བར། འོ་སྦྲང་དང་མར་དང་བདུད་རྩི་ལྔ་བསྲེས་པའི་ཆུས་བཀྲུས་ནས་གང་ལ་གཏོར་བ་ནད་དང་ལྡན་པའང་ནད་མེད་བྱེད། ཅེས་འབྱུང༌། དེ་ལྟར་ན། ལས་ཚོགས་ཀྱི་མཆོག་ཞི་བའི་དབང་དུ་བྱས་པའི་ཕྱིར་ཟློག་འདི་ཉེ་བར་མཁོ་བས་བྲིས་སོ། །ལས་གཞན་དག་ལ་ཡང་སྤེལ་ཚིག་གི་ཁྱད་པར་དང༌། ལས་བཞིའི་བྱེད་པ་སོ་སོ་སྤྱིའི་རིམ་པས་རྡོ་རྗེ་མཁའ་འགྲོ་སོགས་ལས་འབྱུང་བ་ལྟར་བྱ། ཁྱད་པར་དྲག་པོ་ལ་ཧཱུཾ་མཛད་ཀྱི་རྣལ་འབྱོར་གྱིས་ཁ་སྦྱོར་འབྱེད་པའི་སྦྱོར་བ་དང༌། ལས་སྔགས་ཨོཾ་ཕཊ་ཆེ་གེ་བྷཀྵ་ཡ་ཕཊ་ཀྵ་ཧཱུཾ་ཕཊ། ཞེས་པ་དང་ཧཱུཾ་ཕཊ། རཾ་རཾ་རཾ་ཆེ་གེ་མཚམས་མེད་པ་ལྔ་བྱེད་པ་རཾ་རཾ་རཾ་ཧཱུཾ་ཕཊ། ཞེས་པའི་བཟླས་པ་བཞི་ཁྲི་སོགས་སྔོན་དུ་སོང་བ་དགོས་སོ། །འོན་ཀྱང༌། དེ་ལྟར་གསུངས་པའི་ཆོ་ག་ཡིས། །ཡང་དག་གསུང་པས་གང་གསུངས་པའི། །གསོད་པ་དེ་ཡང་རྨོངས་རྣམས་ཀྱི། །ཕྱིན་ཅི་ལོག་ཏུ་བརྟགས་བྱས་ཤིང༌། །ཕྱིན་ཅི་ལོག་ཏུ་བཟུང་བ་འདི། །སྲེད་དང་ཞེ་སྡང་མུན་སྒྲིབས་པས། །སྐྱེ་བོ་རྣམས་ནི་བསད་བྱས་ན། ཁ་ནི་ཐུར་བསྟན་མནར་མེད་འགྲོ། །ཞེས་དེའི་སྦྱོར་བ་མངོན་ཤེས་མེད་པས་མི་སྒྲུབ་པར་གསུངས་སོ། །བཞི་པ་ལ། ཐུན་མོང་མ་ཡིན་པ་འཁྲུལ་འཁོར་གྱི་ལས་ཚོགས་དང་ཐུན་མོང་བ་
བསམ་གཏན་གྱི་ལས། དང་པོ་ལ་འཁྲུལ་འཁོར་བཞི། དེ་རེ་རེ་ལ་ཡང་ལས་གསུམ་གསུམ་སྟེ། ལས་ཆེན་བཅུ་གཉིས་སྒྲུབ་ཚུལ་འཁོར་ལོ་སོ་སོའི་མིང་བོད་ཁ་ཅིག་གིས། རྡོ་རྗེ་རོལ་པ་རྟའི་འགྲོས། །ཡི་དྭགས་སྲིན་པོ་གདོང་གི་འགྲོས། །གཤིན་རྗེ་རོ་ལངས་གཟུགས་དང༌། མ་མོ་རིགས་ལྡན་གྱི་འགྲོས་ཞེས་གསུངས་པ་དང༌། ཡང་གཞན་དག་རིགས་ལྡན་དང་རྟ་འགྲོས་གཉིས་ལས་གཤིན་རྗེ། ཡི་དྭགས་རོ་ལངས་སྲིན་པོ་གདོང་རྣམས་གཞན་དུ་མི་བཞེད་ཅིང༌། རིགས་ལྡན་རྟ་འགྲོས་གཉིས་ལ་གཉིས་གཉིས་སུ་མཛད། རིགས་ལྡན་གྱི་འགྲོས་ཆེ་བས་རྨོངས་རིངས་ཡན་ལག་ཉམས་པ་གསུམ་དེར། དུར་ཁྲོད་ཀྱི་རས་ལ་ཁྲག་དང་དུག་དང་སྐེ་ཚེས་བྲིས་ལ། དེ་ཡང་དཔའ་བོའི་ཐོད་རློན་ནམ་བྲམ་ཟེའི་ཐོད་པ་སྐམ་པོར། སྣག་ཚ་དང༌། དེ་རྣམས་བསྲེས་ལ་བྱ་རོག་གི་སྒྲོ་རྩའམ། རྐང་གིས་བྲི། དབུས་ཀྱི་ལེ་ཚེ་སྟོང་པ་ལ་སྒྲུབ་བྱའི་མིང་སྤེལ་ཚིག་དང་བཅས་པ་འདྲི་སྟེ། དེ་ཡང་རྡོ་རྗེ་འཛིན་པས་བདེ་མཆོག་གི་རྣལ་འབྱོར་རྫོགས་པར་བསྒོམ་ལ། ཧཱུཾ་མཛད་ཀྱི་ང་རྒྱལ་གྱིས་འབྱུང་པོ་ཐམས་ཅད་པའི་གཏོར་མ་སྔོན་དུ་འགྲོ་བས་བྲིའོ། །ཚེས་བཅུའམ་བཅུ་བཞི་ལ་ཤ་ཆེན་དང་ཁྱི་དང་ཕག་དང་ཁྱིམ་བྱའི་ཤའི་གཏོར་མ་དང་སྦྱིན་བསྲེག་བྱ། གོས་སྔོན་པོ་གྱོན། ཁ་ལྷོར་ལྟས་ཏེ། ཐོད་པ་ཁ་སྦྱར་དུག་ཁྲག་སྐེ་ཚེའི་མར་ཁུ། ནིམ་པ་རྣམས་ཀྱིས་བཀང་བར་བཅུག འཁྲུལ་
འཁོར་གྱི་དབུས་སུ་སྒྲུབ་བྱ་བསམ་ལ་སྤེལ་ཚིག་དང་བཅས་པ་སྔགས་ཟློས་ཤིང༌། ལག་པས་རྡོ་རྗེ་བཟུངས་ནས་བརྡེགས་པས་འཇིགས་པར་བྱེད་པར་བསམ། རིགས་ལྡན་འགྲོས་ཤེས་བྱ་བ་ནི། ཀླུ་རིགས་ལྡན་གྱི་འགྲོས་ཏེ་ཀླུ་རྣམས་གྱ་གྱུར་འགྲོ་བ་ལྟ་བུ་ཞེས་བྷ་བ་བྷ་དྲས་བཤད་ཅིང་དེ་ཡང༌། སྦྲུལ་འཁྱིལ་བ་ལྟ་བུ་སྟེ། ཆེ་བ་འདི་ནི་ལྷོ་ནུབ་ཀྱི་ཟུར་ཕྱི་མ་ནས་གཡས་སུ་སྐོར་བ་ཐ་མ་དབུས་ཀྱི་ལྷོའི་རེ་མིག་ཏུ་འབྱུང༌། ཆུང་བ་ལ་ཟུར་བཞིའི་རེ་མིག་དགུ་དགུ་ལ་སྔགས་ཚར་རེ་རེ་རང་རང་ཕྱོགས་ཀྱི་ཟུར་རྩེ་ནས་གཡས་སྐོར་ཐ་མ་རང་རང་གི་དཀྱིལ་དུ་འབྱུང་བ་འདི་ནི་བླ་མ་བོད་པ་རྣམས་བཞེད་དོ། །འཇིགས་མེད་འབྱུང་གནས་ཀྱི་ཞལ་སྔ་ནས་ནི་རིགས་ལྡན་ཆེ་བ་མདུན་ནས་མགོ་རྩོམ་པར་བཞེད་དེ་ཐ་མ་དབུས་ཀྱི་བྱང་དུ་འོང་བ་ཡིན་ནོ། །འཁྲུལ་འཁོར་བཞི་པོས་བཅུ་གཉིས་སུ་འགྲོ་བའང༌། རྫས་དང་སྤེལ་ཚིག་སྲོག་གཟུགས་སོགས་ཀྱིས་ཕྱེ་བ་ཡིན་ལ། དེ་ལ་བཞི་ཀའང༌། གཞལ་ཡས་ཁང་རྩིག་རྐྱང་སྒོ་བཞི་པའི་ནང་དུ་བྲི་ཞིང༌། སྣ་ཚོགས་རྡོ་རྗེ་མི་བྱེད་པའང་ཡོད་མོད། སྔགས་བཏུ་བའི་གཞི་ལ་དེ་ལྟར་ཡིན་མོད་ཀྱང༌། འདི་ལ་གཞལ་ཡས་ཁང་ཡོད་མེད་གདམ་ང་ཡིན་ཞིང༌། སྣ་ཚོགས་རྡོ་རྗེ་ངེས་པར་དགོས་པས་ལྟེ་བ་གྲུ་བཞི་པ་ལ་རེ་མིག་ཞེ་དགུ་བྱ། སྣ་ཚོགས་རྡོ་རྗེ་སྣ་ཚོགས་པདྨ་ལ་གནས་པ། ཕྱི་རོལ་ཁོར་ཡུག་གསུམ་
གྱིས་སྐོར་ཕཊ་ཡི་སྔོན་དུ་མིང་སྤེལ་འདྲི་བར་འཕགས་ཡུལ་གྱི་སློབ་དཔོན་མན་ངག་རིགས་པ་དག་བཞེད་དེ། དེ་ལྟར་ན་སྤྲོས་པས་ཆོག་གོ །ལས་གསུམ་པོ་དེ་རྣམས་ཀྱི་འཁོར་ལོ་གང་དུ་སྦ་བ་ནི་དུར་ཁྲོད་དམ་རོ་བསྲེགས་པའི་སར་རོ། །རིགས་ལྔར་ཆུང་བ་ནི་དབང་དགུག་རྨུགས་པའི་ལས་བྱེད་དེ། དབང་དགུག་གྲོ་ག་ལ་གུར་གུལ་དང༌། གི་ཝཾ་དང༌། སྡོང་རོས་ཀྱིས་བྲི། རྨུགས་པ་དུར་ཁྲོད་ཀྱི་རས་ལ་དུག་དང་སྐེ་ཚེའི་ཁུ་བས་སོ། །འདི་ལ་ཧཱུཾ་གཉིས་ཀྱི་བར་དུ་གཟིར་བའི་ལེ་ཚེ་སྟོང་པ་ལ་སྒྲུབ་བྱའི་མིང་དང་སྤེལ་ཚིག་གོ །དབང་དགུག་ལ་བྲམ་ཟེའི་ཐོད་པར་གཞུག སྦ་མི་དགོས་རྨུགས་པ་ལ་གཡུལ་དུ་བསད་པའི་ཐོད་པ་དུར་ཁྲོད་དུ་སྦ། རྟ་འགྲོས་ཆེ་བ་ནི། ཟུར་གྱི་རེ་མིག་དགུ་དགུ་ལ་མགོ་རང་རང་གི་བདེན་བྲལ་ནས་བརྩམས་མཇུག་རླུང་དུ་འོང་བ་ནི། དབུས་ཀྱི་རེ་མིག་སོགས་ལ་འགྱོག་པོར་འཕྱོང་བ་དེར། སྲིན་དབང་མེ་དང་ཆུ་གནོད་སྦྱིན། གཤིན་རྗེ་དང་ནི་རླུང་དུའོ། །རེ་མིག་སྟོང་པ་བཅུ་བདུན་དུ་མིང་སྤེལ་བྱ། འདི་ལ་སྔ་མ་རྣམས་ཕཊ་མི་དགོད་ལ། ཧཱུཾ་གཉིས་ཏེ་རེ་མིག་གཅིག་ཏུ་བྲི། ཕཊ་ཀྱང་འགོད་ཅེས་ལུགས་གཞན་ནོ། །འདིས་བསད་སྐྲད་དབྱེ་གསུམ་རོ་རས་ལ་དུག་ཁྲག་སྐེ་ཚེ་རྣམས་ཀྱིས་བྲི། བྲིས་གཞི་སྲོག་གཟུགས་ནི་བསད་པ་ལ་ཡི་དྭགས་གཤིན་རྗེ་དང་རོ་ལངས་གང་རུང་སྣོད་ཐོད་པ་མཚན་ངན། སྐྲད་པ་རྔ་མོའམ་
མ་ཧེ། དབྱེ་བ་ལ་རྟ་དང་མ་ཧེ། སྣོད་ཀྱང་དེ་དག་གི་ཐོད་པ་དང༌། དེ་ནས་དུར་ཁྲོད་དམ་དགྲའི་སྒོར་གནོན། རྟ་འགྲོས་ཆུང་བ་ནི། རེ་མིག་དགུ་དགུ་རང་རང་གི་ཟུར་ནས་མགོ་རྩོམ། རེ་མིག་རེ་རེ་བོར་བའི་སྤེལ་མ། འདི་ལ་མིང་སྤེལ་གྱི་གནས་སུམ་ཅུ་སོ་གསུམ་མོ། །འདིའི་ལས་ནི། ཕུར་གདབ། མ་ནིང༌། གཟུགས་བརྗེ་བ་གསུམ་སྟེ། རོ་རས་ལ་ཁྲག་སོགས་ཀྱིས་བྲི། ལམ་གྱི་བཞི་མདོར་སྦའོ། །ཐོག་མར་སྔགས་བཏུས་ཏེ། དེ་ནས་བྲིས་གཞི་ལ་སྤོ། དེ་ནས་ལྷར་བསྐྱེད་པ་སོགས་ཀྱི་རབ་གནས་བྱ། དེ་ནས་དཀྲིས་ཏེ་སྣོད་དུ་སྒྲུབ་པ་དང་སྦ་བ་སོགས་བྱ་སྟེ། ཐུན་མོང་བ་རྣམས་གཤིན་རྗེ་གཤེད་ལྟར་བྱའོ། །གཞལ་ཡས་ཁང་བྱེད་པ་སོགས་འདི་རྣམས་རྡོ་རྗེ་མཁའ་འགྲོ་ལྟར་ཡིན་ཞིང༌། སཾ་བྷུ་ཊི་དང་གཞན་དུ་རྫ་རྔའི་དབྱིབས་ཀྱི་འཁོར་ལོ་བྱ་བར་གསུངས། དེ་ཡང་ཁ་སྦྱོར་གྱི་ལུགས་ལ་ནི། འདིར་བསྟན་འཁོར་ལོ་དང་པོ་གཅིག་པུ་ལ། སོ་སོ་རྫས་དང་སྤེལ་ཚིག་སོགས་ཀྱིས་དབྱེ་བ་སྟེ། སྙེ་མ་ཉེར་བདུན་པར། འདིར་ནི་འཁོར་ལོ་འདི་ལྟར་དགོད་པ་ཁོ་ནས། གནོན་པ་དང་བཅིང་པ་ཞེས་སོགས་བཤད་དོ། །རྒྱུད་དུ་འཁོར་ལོ་གཅིག་ལས་མ་བཤད་པས་འདི་ལེགས་པ་ཡིན་ཏེ། དེ་ཡང་འཁོར་ལོའི་གཙོ་བོ་ཡང་རྣམ་དག་ལ་སོགས་པའི་ངེས་པ་ལས་ན། རིགས་ལྡན་གྱི་འགྲོས་ཆེ་བར་གྲགས་པ་གཙོ་བོར་སྣང་ལ། འཁོར་
ལོ་གཅིག་ཉིད་ཀྱིས་ལས་ཀུན་སྒྲུབ་པ་ནི། དེ་ཉིད་ལས། འཁོར་ལོ་རྫ་རྔའི་དབྱིབས་སུ་གྱུར་པ། རྡོ་རྗེ་དང་པདྨས་མཚན་པ། སྐུ་རྡོ་རྗེ་ལ་སོགས་པ་བསྡུས་ནས་ཕྱི་རོལ་དུ་རི་མོ་གསུམ་གྱིས་བསྐོར་ཏེ་ལས་ཀྱི་རྡོ་རྗེ་རབ་ཏུ་སྒོམས་པས་དགྲ་ཐམས་ཅད་ངེས་པར་གནོན་ཞིང༌། ལས་ཐམས་ཅད་བྱེད་དོ་ཞེས་གསུངས་སོ། །འདིར་ནི་ས་བཅད་ཙམ་སྨོས་ཀྱི་རྒྱས་པར་རྡོ་རྗེ་མཁའ་འགྲོའི་རབ་བྱེད་དགུ་པ་ལས་ཤེས་སོ། །རྒྱུད་དེར་སྔགས་བཏུ་བ་ན། རྀ་རཱྀ་ལྀ་ལཱྀ་བོར་པའི་དབྱངས་བཅུ་གཉིས་ལ། འཕེལ་བ། གཏི་མུག །བཟང་པོ། ཁྱུ་མཆོག རུས་སྦལ། ཆུ་སྲིན། ཡུགས་ས་མོ། རྨེ་བ། འབུགས་པ། འཕྱོ་བ། རྨི་ལམ། ས་ཡི་དབང་ཕྱུག་ཞེས་མིང་ནི་བརྡ་སྦྱར་བར་གོ་བར་བྱའོ། །གཉིས་པ་བསམ་གཏན་གྱི་ལས་ནི་རྡོ་རྗེ་མཁའ་འགྲོ་དང༌། མཁའ་འགྲོ་རྒྱ་མཚོར། ཨཱ་ལི་ཀཱ་ལིའི་དོན་གྱི་ལས་ཚོགས་ཇི་སྙེད་པ་དེ་དག་སྟེ། རྩ་རྒྱུད་དུ་སྔགས་བཏུ་བའི་གཞི་ཨཱ་ལི་ཀཱ་ལིའི་དཀྱིལ་འཁོར་བཤད་པའི་དོན་འཆད་པ་སྟེ། ཕལ་ཆེར་སྔགས་ཀྱི་བྱེད་ལས་བཤད་པ་ཡིན་ཞིང༌། དཀྱིལ་འཁོར་མི་འདྲ་ཡང་ཡི་གེ་འདྲ་བའི་ཕྱིར་སྔགས་བཏུ་རྣམས་ཀྱི་ཐུན་མོང་ཡིན་པར་རིག་གོ ། འདི་དག་བཤད་རྒྱུད་དེ་གཉིས་འགྲེལ་པ་དང་བཅས་པར་བལྟའོ། །འདིར་ཧ་ཅང་མང་བར་འགྱུར་བས་བཞག་གོ །ལྔ་པ་ལ་རྫ་རྔའི་བཅིངས་པའི་ངེས་དོན། བསྲུང་བཟློག་གི་སྦྱོར་བའི་ངེས་དོན། སྐབས་
འདིར་འབྲེལ་བའི་རྫོགས་རིམ་སིལ་བུ་སྣ་ཚོགས་པའོ། །དང་པོ་གཉིས་ནི་སྐབས་ཀྱི་དོན་དུ་སྣང་བས་འདིར་འཆད་ལ། ཕྱི་མ་ནི་ཨཱ་ལི་ཀཱ་ལིའི་ལས་ཚོགས་ཀྱི་བར་བར་ན་ཡི་གེའི་ནང་གི་བཤད་པ་རྫོགས་རིམ་མང་དུ་ཡོད་པ་དེ་དག་ཡིན་པས་བཤད་རྒྱུད་དེ་དག་ཏུ་རྟོགས་པར་བྱའོ། །དང་པོ་ལ། སྔགས་ཀྱི་ངེས་དོན་དང༌། ལས་ཀྱི་ངེས་དོན་ཏེ། སྔགས་བཏུས་ཟིན་པའི་ནང་བཤད་གཉིས་དང༌། རྫ་རྔའི་དཀྱིལ་འཁོར་གྱི་ངེས་དོན་ནམ། སྔགས་བཏུ་བར་བྱ་བ་དང༌། འཐུ་བཞིན་པའི་ནང་བཤད་དེ་གསུམ་ལས། དང་པོ་ནི་ཧཱུཾ་བཞི་པའི་ཧཱུཾ་གི་མཚོན་དོན་མི་འགྱུར་བའི་བདེ་བ་ཡིན་ཏེ། བདེ་སྟོང་ནམ་མཁའི་མཐས་ཀླས་པའི་བརྟན་གཡོ་ཀུན་ལ་མཉམ་པ་ཉིད་ཀྱིས་ཁྱབ་པ་ནི། གནས་ཏེ་འདོད་སྲེད་མེད་པའི་ཤེས་རབ་ཀྱི་ཆ་ནཱ་དས་མཚོན་ལ། ཆ་གཟུགས་ཀུན་ཞེས་པ་ལ་ཆ་ཐིག་ལེ་སྟེ། ཐིག་ལེ་དང་བཅས་པའི་ཧཱུཾ་ཡིག་གིས་ནི་ཐིག་ལེ་འཕོ་མེད་ཀྱི་ངོ་བོ་རང་རིག་བདེ་བ་དང༌། ཕྱི་ནང་གི་ཧཱུཾ་དེ་གཉིས་ལྷ་ཐམས་ཅད་ཀྱི་ཐུགས་ཀྱི་སྙིང་པོ་ཀུན་ཏུ་འབྱུང་བའམ། གྱུར་པའི་ས་བོན་ཏེ་གྲུབ་པའི་སློབ་དཔོན་ཀརྨ་ལིའི་ཞལ་སྔ་ནས། ཀུན་ཏུ་གྱུར་པའི་ས་བོན་ནི། །ཡི་གེ་ཧཱུཾ་གི་ཆ་གཟུགས་ཅན། །མི་འགྱུར་བ་ནི་བདེ་བ་སྟེ། །ནམ་མཁའ་དང་མཉམ་གནས་མེད་པའོ། །ཞེས་གསུངས་སོ། །གཉིས་པ་ནི་གོ་ཆ་བཅིངས་པ་སྟེ། དེ་ཡང་ཕྱོགས་བཅིང་པ་ལ་སོགས་
པའི་བསྲུང་བའོ། །འདི་ལ་ཤེས་རབ་དང་ཐབས་ཀྱི་ཆ་གཉིས་ལས། དང་པོ་ནི། ཐམས་ཅད་སྟོང་པ་འོད་གསལ་བ་ཡང་ཡིན་ལ། བརྟེན་ཏེ་རྡུལ་ཕྲ་རབ་མེད་པའི་ལྷ་སྐུའི་དཀྱིལ་འཁོར་ཡང་ཡིན་པ། དེས་གཉིས་སྣང་དང་གཉིས་འཛིན་ཐམས་ཅད་ཉེ་བར་ཞི་བའི་ཚུལ་གྱིས་བསྲུང་བའོ། །དེ་ཡང་དེ་ཉིད་ཀྱིས། དེ་ནས་གོ་ཆ་བཅིང་བྱས་ནས། །ཐམས་ཅད་སྟོང་པ་རྟེན་མེད་པ། །ཞེས་སོ། །གཉིས་པ་ཐབས་ཀྱི་ཆ་ནི་རྒྱུད་གཞན་གདན་བཞི་ལ་སོགས་པ་དང༌། མངོན་སྤྱོད་བཞི་པ་ལས། བྱམས་པའི་གོ་ཆ་བགོས་པ་སྟེ། །སྙིང་རྗེ་ཡི་ནི་གོ་ཆ་བགོས། །ཤེས་རབ་མཚོན་ཆ་བསྒོམ་ལྡན་པས། །ཉོན་མོངས་བདུད་ལས་ངེས་རྒྱལ་འགྱུར། །འདིར་ཤེས་རབ་ནི་སྟོང་ཉིད་རྟོགས་པ་ཡིན་ལ། མཚོན་ཆ་ནི་རྡོ་རྗེའི་ར་བའོ། །གསུམ་པ་ནི། རྩ་རྒྱུད་སུམ་ཅུ་པ་ལས། དེ་ནས་གཞན་ཡང་བཤད་བྱ་བ། །ཤིན་ཏུ་རྙེད་དཀའ་དགོད་པ་སྟེ། །གང་གིས་ཤེས་པ་ཙམ་གྱིས་ནི། །མྱུར་དུ་དངོས་གྲུབ་སྒྲུབ་བྱེད་པ། །ས་ཡི་ཆ་མཉམ་ཡིད་འོང་བར། །ཙནྡན་གྱིས་ནི་ཉེ་བར་བཀུ། །དྲི་བཟང་དྲི་ལྡན་ས་ལ་ནི། །མེ་ཏོག་སིལ་མ་བཅལ་བཀྲམ་ཞིང༌། །སྤོས་ཀྱི་དྲི་ཡིས་ཉམས་དགའ་བར། །བདག་གི་བྱ་བ་བྱས་ནས་ནི། །ཕྱོགས་བཅིང་པ་ཡང་བྱས་ནས་སུ། །དེ་ནས་རྫ་རྔ་བཅིང་བྱས་ཏེ། །རི་མོ་དགུ་ཡིས་ལེགས་པར་བསྐོར། །ཡི་གེ་ཕྱི་མོ་མཉམ་བྲིས་ལ། །ཤིན་ཏུ་མཉམ་གཞག་
དགོད་པར་བྱ། །དེར་གནས་པ་ལས་དཔའ་བོ་ནི། །འདོད་པའི་དོན་ཀུན་སྒྲུབ་བྱེད་པ། །རིམ་བཞིན་འབྱུང་དང་རིམ་མིན་པས། །དབྱངས་དང་ཡི་གེ་སྒྲུབ་པ་པོས། །གྲངས་དེ་དག་གི་ནང་ཆུད་པ། །དགེ་བ་ཐུབ་པར་བྱས་ནས་ནི། །ཞེས་གསུངས་པ་འདི་ངེས་དོན་ཏེ། འདི་ལ་གཉིས། ས་གཞི་ཡི་ངེས་དོན་དང༌། རེ་མིག་གི་ངེས་དོན་ནོ། །དང་པོ་ནི། དངོས་གྲུབ་སྒྲུབ་བྱེད་ཞེས་པ་ལ། ལས་དང་དངོས་གྲུབ་སྔར་བསྟན་པ་ལྟར། འཁྲུལ་འཁོར་དང་བསམ་གཏན་གྱིས་སྒྲུབ་ཅེས་གསུངས། འདིར་ནི་མན་ངག་གི་རིམ་པ་ཕྱིར་ཟློག་བརྒྱད་ཀྱིས་མཆོག་གི་དངོས་གྲུབ་བསྒྲུབ་ཅེས་བྱའོ། །ས་ཡི་ཆུ་མཉམ་པ་དཀྱིལ་འཁོར་གྲུ་བཞི་འབར་འབུར་མེད་པའི་ངེས་དོན། ཆོས་ཐམས་ཅད་བདེན་གཉིས་ཡུལ་སེམས་རང་གཞན་དོན་གཉིས། སྤང་བླང། ཕན་གནོད། འཁོར་འདས་རྣམས་རང་བཞིན་མཉམ་ཉིད་ཡིན་པ་མ་རྟོགས་པར་བྱིས་པས་སྡུག་བསྔལ་བ་ཐོབ་ལ། རྣལ་འབྱོར་པས་མན་ངག་ལས་འབྱུང་བ་ལྟར་མཉམ་པ་ཉིད་བསྒོམ་པས། རང་བཞིན་དེ་མངོན་དུ་འགྱུར་བས། དེའི་ཚེ་ཟུང་འཇུག་ཅེས་བྱའོ། །ཙནྡན་ནི་ཚུལ་ཁྲིམས་ཏེ། དེ་ཡང་སེམས་གཉིས་སྣང་འཛག་བཅས་ཀྱི་ཚེ་རང་བཞིན་སྟོང་པར་རྟོགས་པའི་འཛག་མེད་ཀྱི་ཚུལ་ཁྲིམས་ཏེ། བསིལ་བར་བྱེད་པས་ཙནྡན་དང་མཚུངས་པ་ཡིན་ལ། དེ་ཡང༌། ཚུལ་ཁྲིམས་ཙནྡན་གྱིས་ལུས་བྱུགས། །བསམ་
གཏན་གྱིས་ནི་གོས་དག་གྱོན། །བྱང་ཆུབ་ཡན་ལག་མེ་ཏོག་བཀྲམ། །ཞེས་འབྱུང་ངོ༌། །དྲི་ཞིམ་པོའི་དྲིས་བྱུགས་པའི་ས་ནི་ཞུ་བདེའི་བྱང་ཆུབ་ཀྱི་སེམས་འཕོ་མེད་དུ་བཅིངས་པའི་བདེ་བ་སྟོང་པར་སྦྱོར་བས་རླན་པའི་སེམས་ཏེ་རྒྱུད་གཞན་ལས། བདེ་བ་ཆེན་པོའི་ནམ་མཁར་གནས། བྱང་ཆུབ་སེམས་ནི་སད་པ་དང༌། དེ་ཉིད་ཀྱིས་ཀྱང་བྱུག་པ་ནི། ཞེས་ཏེ། ནམ་མཁའ་ནི་རང་བཞིན་གྱིས་སྟོང་པ་དང༌། སད་པ་ནི་གྱེན་དུ་བཅིངས་པའི་མིང་ངོ༌། །མེ་ཏོག་བདུན་ནི། པདྨ། ཨུཏྤལ། ཛཱ་ཏི། ཀརྞི་ཀ མ་ལི་ཀ ཡུ་ཐི་ཀ ཀཱ་ར་བཱི་ར་ཏེ། དེ་ཡང་བྱང་ཆུབ་ཡན་ལག་བདུན་མཚོན་པ་ཡིན་ཏེ། འཕགས་ལམ་ཡན་ལག་འབྲས་བུ་དང་མཚུངས་པ། དེ་དངོས་སུ་འབྱིན་པས་ན་མེ་ཏོག་ལྟ་བུ་ཞེས་པ་ཐུན་མོང་ངོ༌། །ཐུན་མོང་མ་ཡིན་པ་ཁ་སྦྱོར་ཡན་ལག་བདུན་ལྡན་གྱིས་མཐོང་བའི་ལམ་ལྷན་ཅིག་སྐྱེས་པའི་ཡེ་ཤེས་ནི། བྱང་ཆུབ་ཡན་ལག་བདུན་ཏེ། མེ་ཏོག་བསིལ་མའོ། །གཞན་ཡང༌། ཡང་དག་དགའ་བའི་མེ་ཏོག་གིས། །རྡོ་རྗེ་ཉི་མ་པདྨར་ཕྱུང༌། །མེ་ཏོག་བདག་ཉིད་ལ་མཆོད་པ། །རྡོ་རྗེ་གསུམ་གྱི་བདག་ཉིད་མཆོག།ཅེས་གསུངས་ཏེ། ཞུ་བདེའི་ལྷན་སྐྱེས་ཀྱི་དགའ་བ་རྡོ་རྗེ་ནོར་བུར་མངོན་དུ་གྱུར་པ་ནི། གསལ་ཞིང་མཛེས་པས་ཡང་དག་དགའ་བའི་མེ་ཏོག་ཅེས་བྱ་ལ། ཉི་མ་ནི་ཤེས་རབ་མའི་མེ་ཏོག་སྟེ། ཁྲག་གི་དྭངས་མ་པདྨའི་ལྟེ་བར་ཕྱུང་བ། བདག་ཉིད་ཀྱིས་དྷུ་ཏཱིས་
བཏུང་བར་བྱ་སྟེ། འདི་ལས་གང་ཞིག་ཐོབ་ན། ཁུ་ཁྲག་རླུང་གསུམ་དག་པས་དྭངས་མའི་འཇའ་ལུས་སེམས་དང་དབྱེར་མེད་པ་མངོན་དུ་འགྱུར་ཏེ། དེ་ལྟར་ན་སེམས་དེ་བཞིན་ཉིད་ལ་འཇུག་པ་འདོད་ཆགས་ཆེན་པོས་སྒྲུབ་པ་མཐར་ཕྱིན་པས་རིག་པའི་སྐྱེས་བུ་མངོན་དུ་བྱེད་ཚུལ་དང༌། ཕྱག་རྒྱའི་ལམ་ལ་དང་པོར་སློབ་པས་ཀྱང༌། འདིའི་ལམ་དང་མཐུན་པ་ཞིག་དགོས་ཤིང༌། ནུས་མཐུ་དེ་ལྟ་བུ་ཚང་པའི་བུད་མེད་ཀྱི་རང་བྱུང་ནི་འདིར་མེ་ཏོག་གོ །དེ་ལྟར་མེ་ཏོག་གི་ངེས་དོན་གསུམ་ག་ལའང་ཇི་བཞིན་མ་ཡིན་པའི་སྒྲ་སྟེ། རིམ་པས་སྤྱི་དོན་དང༌། མཐར་ཐུག་དང༌། སྦས་དོན་རྣམས་གཙོ་ཆེའོ། །སྤོས་ཀྱི་དྲི་ནི། དེ་སྐད་དུ། རྣམ་རྟོག་ཚོགས་ཀྱི་ཡུལ་མིན་ཞིང༌། ལྟེ་བར་གཏུམ་མོའི་མེ་ཡིས་ནི། །ངེས་པར་བསྲེགས་པ་དེ་ཡིས་སྤོས། །ཞེས་གསུངས་པས། རྣམ་རྟོག་གི་རྩོལ་བ་ལ་མ་ལྟོས་པའི་གཏུམ་མོ་ཡེ་ཤེས་ཀྱི་མེས་ཕུང་པོ་སོགས་བསྲེགས་པའི་བདེ་བ་སྟེ། འདི་ཡང་མཐོང་བའི་ལམ་ཡན་ཆད་དུ་མངོན་དུ་འགྱུར་ལ་དྲོད་ཐོབ་པ་ན་ཡང་རྗེས་མཐུན་པ་ནི་མངོན་དུ་བྱེད་ནུས་སོ། །གཞན་ཡང་སྤྱི་དོན་གྱི་ངེས་དོན་འདི་དག་སྟེ། མངོན་བརྗོད་བཞི་པར། མཉམ་པའི་སེམས་ནི་དྲི་ཡིན་ཏེ། །གྲུ་བཞི་པ་ནི་བྱུག་པ་ཡིན། །ལུས་དང་ཏེའུ་དང་ཙནྡན་ནི། །མཉམ་པར་གནས་པ་ཉིད་ཡིན་ནོ། །མེ་
ཏོག་བཟོད་པ་རྣལ་འབྱོར་པ། །འབད་པས་གཏོར་བ་ཡིན་པར་བཤད། །རང་བཞིན་དག་པ་མར་མེ་སྟེ། །མཉམ་ཉིད་བསྒོམ་པ་གདུག་པ་ཉིད། །ཅེས་གསུངས་ཏེ། མཉམ་པའི་སེམས་ཀྱི་དྲི། དངོས་པོ་ཐམས་ཅད་ལ་བྱུག་པ་ཞེས་སྦྱར་ཏེ། བྱམས་པ་དང་སྡང་བ་རང་བཞིན་མེད་པས་མཉམ་པར་བསྒོམ་པ་དང༌། བཟོད་པ་ཡང་བདེ་སྡུག་དང་ཡངས་དོག་སོགས་རང་བཞིན་མེད་པས་བཟོད་པ་སྟེ། གང་རང་བཞིན་མེད་པར་ཤེས་པས་སྣང་བ་ཐམས་ཅད་མཉམ་པར་བཟོད་དོ། །ཆོས་ཐམས་ཅད་རང་བཞིན་གྱི་རྣམ་པར་དག་པ་སྣང་བ་དང་སྟོང་པ་རེས་འཇོག་མ་ཡིན་པར་རྟོགས་པ་ནི་མར་མེ་དང༌། དེའི་ཕྱིར་འཁོར་བ་རང་བཞིན་མཉམ་པར་བསྒོམ་པ་བདུག་སྤོས་ཞེས་བརྡར་བརྟགས་པ་སྟེ། འདི་དག་ནི་མན་ངག་དམ་པ་རིགས་པས་རྩ་བཤད་སྦྱར་བའོ། །བདག་གི་བྱ་བ་ཧཱུཾ་ཡིག་དང་ཕྱོགས་བཅིང་བ་གོ་ཆ་སྟེ། གོང་དུ་བཤད་པ་དེའོ། །གཞན་ཡང་འདི་ཡོད་དེ། མར་མེ་དང༌། བཤོས་ཀྱི་ངེས་དོན་ཐབས་ཀྱི་རྒྱུད་ལས་འདི་ལྟར་འབྱུང་བ་ཡང་འདིའི་དོན་ཡིན་ཏེ། ཡི་གེ་ཧཱུཾ་ལས་ཡང་དག་བྱུང༌། །སྔགས་ཀྱི་འོད་ཟེར་ཤིན་ཏུ་གསལ། །མར་མེ་འབར་བའི་ཡང་དག་འོད། །སྔགས་ཀྱི་འོད་ཟེར་ནི་རླུང་བཅུ་པོ་རྣམས་ཏེ། འོད་ཟེར་གྱི་རྣམ་པར་སྣང་བ་དང༌། སྔགས་ཀྱི་དེ་ཉིད་དུ། རང་བཞིན་གྱིས་གནས་པའི་ཕྱིར། དེ་ནི་འགྱུར་མེད་ཧཱུཾ་སྟེ་སྙིང་གའི་ཐིག་ལེ་དང༌། མི་ཤིགས་
པའི་ སེམས་ལས་འབྱུང་ལ། ཁམས་ཀྱི་སྒྲོད་པ་དེར་ཟད་པ་ན། ཡང་དག་པའི་འོད་གསལ་འཆར ་བ་ནི་བདག་གི་བྱ་བ་སྟེ། སྙིང་གའི་ཐིག་ལེའམ། རྣམ་པར་ཤེས་པ་ནི་བདག་ཅེས་བྱའོ། །འདིར་ནི་གང་དང་གང་ལོངས་སྤྱོད། །དབང་པོ་ཐམས་ཅད་ཡང་དག་བརྟེན། །དེ་དག་ཐམས་ཅད་ཐུགས་རྡོ་རྗེ། །བཟའ་བའི་མཆོད་པས་མཆོད་པར་བྱ། །ཡུལ་དང་དབང་པོ་ཐམས་ཅད་རང་བཞིན་མེད་པ། རྣམ་པ་ཐམས་ཅད་པའི་སྟོང་པའི་དཀྱིལ་འཁོར་ཡུལ་དུས་ཆད་པ་མེད་པར་ལོངས་སྤྱོད་པའི་དབང་པོ་ཐམས་ཅད་པ་སྟེ། དབང་པོ་ཐམས་ཅད་རང་གར་གནས་ཀྱང་གཡོ་བ་མེད་པའི་མན་ངག་གི་ཡེ་ཤེས་དམ་པ་ཞེས་བྱའོ། །འགའ་ཞིག་ལྟར་ལས་དང་པོ་པ་ཁོ་ནས་ཚོགས་དྲུག་ལྷུག་པར་འཇོག་པ་ལྟར་ནི་མ་ཡིན་ཏེ་ཁྱད་པར་ཆེན་པོ་ཤེས་དགོས་སོ། །འདི་གཉིས་ནི་རྩ་རྒྱུད་ཀྱིས་གཞུང་འདིའི་དོན་འཆད་པ་སྟེ། སྐབས་འདིར་མར་མེ་སོགས་ཀྱི་ནི་མ་ཡིན་ནོ། །གཉིས་པ་ལ་གཉིས་ལས། མིང་གི་དོན་མུ་ར་ཛེ་ཡི་གེ་གསུམ་གྱི་སྐུ་གསུམ་མཚོན་ཞིང༌། ཆོས་ལོངས་སྤྲུལ་གསུམ་རིམ་པས་ཐུགས་གསུང་སྐུ་ཡིན་ལ། དེ་ལྟར་མུ་ར་ཛེའི་སྔགས་ནི་ཐུགས་གསུང་སྐུའི་སྔགས་ཏེ་འབྲུ་གསུམ་མོ། །དེ་ཡང་གཉུག་མའི་སྔགས་ཏེ་ལྡང་འཇུག་གནས་གསུམ་དེ་གསུམ་གྱི་གདངས་སུ་རང་བཅས་སུ་ཡོད་པ་དེ་ལ་གནད་དུ་བསྣུན་ན། སྐུ་གསུམ་མངོན་དུ་བྱེད་པའི་ནུས་པ་ཅན་ཡིན་ལ། འདི་དངོས་ནི་ངག་གི་ཆོས་ཡིན་ཀྱང༌།
ལུས་ངག་སེམས་གསུམ་དབྱེར་མེད་པའི་ངེས་པས། ངག་ཉིད་ལའང་སྒོ་གསུམ་གྱིས་རབ་ཏུ་ཕྱེ་བ་དང༌། རྡོ་རྗེ་གསུམ་གྱི་རང་བཞིན་ཉེ་བར་ལེན་པས་གནས་པ་ཡིན་ཏེ། དེ་ཡང་ལྭ་བའི་ཞབས་ཀྱིས། རྫ་རྔ་ཞེས་བྱ་བ་ལ་ཡི་གེ་གསུམ་ནི་སྐུ་གསུང་ཐུགས་ཀྱི་དབྱེ་བས་སྐུ་གསུམ་མོ་ཞེས་སོ། །གཉིས་པ་རེ་མིག་གི་ངེས་དོན་ནི། དེ་ལ་རི་མོ་བརྒྱད་དང་དབུས་ཀྱི་རི་མོ་སྟེ་དགུའོ། །དབུས་ཀྱི་རི་མོ་ནི་རི་མོ་བརྒྱད་ཀྱི་གཞི་ཡིན་པ་བཞིན། སྣང་བ་ཐམས་ཅད་ཀྱི་རྩ་བ་ཡང་རླུང་གི་དྭངས་མ་མི་ཤིགས་པ་ཉིད་ཡིན་ལ། དེ་ཡང་དབུས་ཀྱི་རི་མོས་མཚོན་ནོ། །དེ་ཡང་རྫ་རྔའི་རྣམ་པ་དབུས་སུ་བཀོད་པས་རླུང་སྔགས་དབྱེར་མེད་པར་སྟོན་པ་ཡིན་ཏེ། ལྭ་བ་པས། རླུང་གི་ཤིན་ཏུ་སྐོར་བ་ཡི། །རི་མོ་བརྒྱད་པ་ཡང་དག་བརྟེན། རི་མོ་དགུ་པ་དབུས་སུའོ། །ཞེས་སོ། །ཡི་གེ་ཕྱི་མོ་མཉམ་པའི་དོན། །སློབ་དཔོན་དེ་ཉིད་ཀྱིས། །སྟོང་པའི་རྣམ་པ་དྲི་མེད་དགོད། །ཨཱ་ལི་ཀཱ་ལི་མཉམ་རྒྱས་བྱ། །དབྱངས་གསལ་ཞེ་བརྒྱད་སྟེ་བཅུ་དྲུག་ཚན་གསུམ་ནི་མཉམ་པའི་དོན་ཡིན་ལ། འོག་ཏུ་དགའ་བ་བཞིའི་རང་བཞིན་ཞེས་འབྱུང་བ་དང༌། སྟོང་པའི་རྣམ་པ་ཞེས་པ་ནི་སྟོང་པ་བཅུ་དྲུག་གི་གཟུགས་སམ་མཚོན་བྱེད་དྲི་མ་མེད་པ་ནི། རང་བཞིན་ངོ་བོ་ཉིད་ཀྱིས་དག་པའི་རང་བཞིན་རྣམ་དག་གི་དོན་ནོ། །དེས་ན་སྟོང་ཉིད་བཅུ་དྲུག་དང༌། དགའ་བ་བཅུ་དྲུག་སྦྱར་བའི་བདེ་སྟོང་གི་ཡེ་ཤེས་
འདི་རྣམས་རེ་རེ་ལ་སྙིང་རྗེ་གསུམ་གསུམ་དུ་དབྱེ་བས་བཅུ་དྲུག་ཚན་གསུམ་སྟེ་དམིགས་པ་མེད་པ་བཅུ་དྲུག་དབྱངས་དང༌། ལྷག་མ་གསལ་བྱེད་དེ། བདེ་ཆེན་ཐུགས་རྗེའི་བདག་ཉིད་ཅན་ཞེས་པའི་ངེས་པའོ། །དེ་ནས་དབུས་ཀྱི་ཡི་གེ་འཆད་པ་ན། རྔའི་དོན་སླར་ཡང་བཤད་དེ། དགའ་བ་བཞི་ཡི་རང་བཞིན་ཅན། །ཆོས་ཀྱི་རྔ་ཆེན་མི་ཤིགས་པ། །སངས་རྒྱས་ཀྱི་ཆོས་ཀྱི་རྔ་དང༌། ལུས་ཀྱི་དབུས་སྙིང་གའི་མི་ཤིགས་པའི་རྔའོ། །དགའ་བཞིའི་རང་བཞིན་ཅན་ནི་དགའ་བ་བཞི་འབྱུང་བ་ཅན་ནོ། །རེ་མིག་སྟོང་པའི་རྣམ་པ་ཅན་ལ། ཡི་གེ་རེ་རེ་མཉམ་པར་བཀང་བ་ནི། གསུང་རབ་ཡན་ལག་བཅུ་གཉིས་པའི། ཆོས་ཀྱི་ཡི་གེ་ཡོངས་རྫོགས་པ། ཆོས་ཀྱི་རྔ་དབྱངས་གསལ་གྱི་བདག་ཉིད་གསུང་རབ་ཡན་ལག་བཅུ་གཉིས་ཀྱི་ཆོས་རྫོགས་པར་སྟོན་པ་མཚོན་ལ། ངག་གི་བྱ་བ་ཐམས་ཅད་ཀྱི་རྩ་བ་ནི་མི་ཤིགས་པའི་རླུང་ཡིན་ཞིང༌། དེ་ནི་ཡི་གེ་ཞེ་བརྒྱད་པོའི་རྟེན་ཀྵས་མཚོན་ནོ། །གོང་དུ་རྔའི་མིང་དང༌། འདིར་དོན་བཤད་དོ། །གྲངས་དེ་དག་གི་ནང་ཆུད་དང༌། །ཞེས་པའི་དོན། གྲངས་དེ་དག་གི་ནང་སོན་པར། །ཆོས་བདག་མེད་ལ་ཡང་དག་བརྟེན། །དབྱངས་གསལ་ལས་སྔགས་མཐུ་བ་ནི། །གསུང་རབ་ཡན་ལག་བཅུ་གཉིས་ཀྱི། །དབྱངས་གསལ་གྱི་སྙིང་པོ་བདག་མེད་པའི་ཡེ་ཤེས་མཐུ་བའོ། །ཞལ་བཞི་པར་ནི་རྣམ་གྲགས་པ། བདུད་བཞི་
རྣམ་པར་འཇོམས་པ་པོ། དེ་ལྟར་བཏུས་ཟིན་པའི་སྔགས་ཀྱིས་བདུད་བཞི་འཇོམས་པའི་དོན་དགའ་བཞིའི་བདེ་སྟོང་གི་ཡེ་ཤེས་ཀྱིས་བདུད་བཞི་འཇོམས་པའོ། །རླུང་ལ་ཞོན་ནས་སྤྲོ་བྱེད་ཅིང༌། ཁམས་གསུམ་པོ་ནི་ཡང་དག་བསྡུད། རླུང་གི་དེ་ཉིད་ཡང་དག་རིག།སུམྦྷའི་སྔགས་ཟླ་བའི་ཚེ་སྤྲོ་བསྡུ་བྱེད་པ་ནི། ཁམས་གསུམ་པའི་རྩ་བ་རླུང་གི་དེ་ཉིད་རིག་ནས། རླུང་ལ་རྡོར་བཟླས་བྱེད་པ་སྟེ། ཡི་གེ་དང་རླུང་དབྱེར་མེད་པ་སྔར་བསྟན་པ་ལྟར་རོ། །དེ་དག་ནི། འདོད་པའི་དོན་ཀུན་སྒྲུབ་བྱེད་པ། །ཞེས་པའི་དོན་ཏེ། རིམ་བཞིན་འབྱུང་དང་རིམ་མིན་པའི། །ཨཱ་ལི་ཀཱ་ལི་ལས་བྱུང་བ། །བརྗོད་དང་རྗོད་བྱའི་ཡི་གེ་སྟེ། །སྒྲ་སྙན་ལྟ་བུའི་རྣམ་པར་རྟོགས། །འདི་ལ་གཉིས། བརྗོད་བྱ་ལ་སྦྱར་ན་ཨཱ་ལི་ཀཱ་ལི་རིམ་དང་རིམ་མིན་གྱིས་མཐུ་བའི་དོན་དགའ་བཞི་ལུགས་འབྱུང་ལུགས་ལྡོག་གོ །ཨཱ་ལི་ཀཱ་ལིས་ནི་ཁམས་དཀར་དམར་གཉིས་མཚོན་ལ། དེས་ན་བདེ་བ་ནི་དཀར་དམར་འདུས་པ་ལས་བྱུང་བའོ། །རྗོད་བྱེད་ལ་སྦྱར་བ་ནི། འདིར་བཀོད་པ་ནི་ཡི་གེ་མིན་གྱི་ཡི་གེའི་བརྡའི་གཟུགས་ཡིན་པ་ལྟར་དེས་ནི་ངག་ཐམས་ཅད་བྲག་ཆ་ལྟ་བུའོ། །ཞེས་བསྟན་ཞིང་ནང་གི་སྦྱོར་བས་རླུང་ཐམས་ཅད་མི་ཤིགས་པ་དང༌། སྟོང་པ་ལ་ཐིམ་པས་སྒྲ་ནམ་མཁའ་དང་མཉམ་པ་གང་ཡིན་པ་སྟེ། དེ་ལྟར་ན། མི་ཤིགས་པའི་རྡོར་ཟླས་ཀྱིས་དྲངས་པའི་དགའ་བ་བཞིའི་ལྷན་སྐྱེས་ཀྱི་བདེ་ཆེན་དང༌།
བདག་མེད་ཀྱི་དོན་སྦྱར་ཞིང་བསྒོམ་པ་འདི་ནི་རྫ་རྔའི་རེ་མིག་ལ་དབྱངས་གསལ་བཀོད་ནས་སྔགས་ཐུ་བའི་ངེས་དོན་ནོ། །གཉིས་པ་བསྲུང་ཟློག་གི་སྦྱོར་བའི་ངེས་དོན་ལ། བསྲུང་བ་དང་ཕྱིར་ཟློག་གཉིས་ཀྱི་དང་པོ་ལ། རྩ་རྒྱུད་ལེའུ་གཉིས་པ་ལས། རྭ་བ་རྣམས་ནི་ཕྱོགས་སུ་དགོད། །འོག་ཏུ་ཡང་ནི་མཚོན་ཆ་དགོད། །འཁོར་ལོའི་བདག་ཉིད་མཚོན་ཆ་མཉམ། །སྟེང་དུ་མདའི་དྲྭ་བ་བྱ། །དེ་ལྟར་བདག་ཉིད་མཁའ་སྤྱོད་དུ། །གུར་བྱས་འདི་ནི་གོ་ཆར་འགྱུར། །ཞེས་པ་ལ་རྒྱུད་གཞན་ནས་གསལ་བར་གསུངས་པའི་ངེས་པ་ནི་སྦྱིན་པའི་རྭ་བ་བྱིན་པར་བྱ། སྟེང་དུ་ཚུལ་ཁྲིམས་དྲྭ་བའོ། །བཟོད་པའི་ཕུར་བུ་འོག་ཏུ་གདབ་ཅེས་པས། གཟུང་འཛིན་ལས་གྲོལ་བའི་གཉིས་མེད་ཡེ་ཤེས་དང་ལྡན་པ། ཆོས་ཀྱི་དང༌། ངོ་བོ་ཐམས་ཅད་རྩ་བཞིན་གཏོར་བ། ཟང་ཟིང་དང༌། འགྲོ་བ་ལ་གནོད་པ་མེད་པ་མི་འཇིགས་པའི་སྦྱིན་པའི་རྭ་བ་དང༌། གཞན་ལ་གནོན་པ་འགོག་པའི་ཚུལ་ཁྲིམས་གསུམ་ནི། གུར་དང་མདའ་དྲ། བཟོད་པ་གསུམ་ནི་ཕུར་བུའི་ས་གཞི་སྟེ་སྣ་ཚོགས་རྡོ་རྗེའི་ས་གཞིའོ། །འདི་ནི་སྤྱི་དོན་ཡང་ཡིན་ལ་ངེས་དོན་ཡང་ཡིན་ནོ། །གཉིས་པ་ནི། རྩ་རྒྱུད་ལས། བདེ་བའི་དཀྱིལ་འཁོར་བསྲུང་དོན་དུ། གདུག་པ་ཐམས་ཅད་ཁྱད་པར་གྱི། །འདི་ནི་རྙེད་པ་ཙམ་གྱིས་ཀྱང༌། །རྟག་མི་དགོས་པར་འཚོ་
བར་འགྱུར། །འཁོར་ལོའི་སྦྱོར་བདག་ཉིད་ཀྱིས་ཟླ། །དངོས་གྲུབ་ཀུན་གྱི་འབྲས་བསྐྱེད་པའོ། །གདུག་པ་ནི་ཀུན་རྟོག་གོ །རིག་རྒྱལ་འཁོར་ལོ་བསྒྱུར་བ་སྟེ། རྣམ་པར་མི་རྟོག་པས་མཚན་འཛིན་འཁོར་ལོས་གཅོད་པ་ལྟར་གཅོད་པས་རྟག་པ་སྟེ། ཐེ་ཚོམ་མེད་པར་འཆི་བ་དེར་འོད་གསལ་དུ་འགྱུར་ལ། དངོས་གྲུབ་ཀུན་ཀྱང་འདིས་ཐོབ་བོ། །མངོན་བརྗོད་ལས། ཕྱིར་ཟློག་ཆེན་མོ་བསྲུང་བ་དང༌། རྡོ་རྗེ་ཁ་བཞིས་རྣམ་པར་མཚན། །སྐུ་གསུང་ཐུགས་ཀྱི་དབྱེ་བ་ཡི། །རིམ་པ་གསུམ་པ་རྡོ་རྗེས་མཚན། །ཐམས་ཅད་མཆོག་གི་བསྲུང་བ་ཆེ། །དངོས་གྲུབ་ཐམས་ཅད་རབ་ཏུ་གསོལ། །བདུད་དང་བདུད་མིན་པ་ཡང་མིན། །རང་གི་སེམས་ནི་བཅིང་བར་བྱ། །རང་གི་སེམས་ནི་བཅིངས་པ་ལ། །བདུད་ཀྱི་འཇུག་པ་ག་ལ་ཡོད། །ཅེས་པ་ལ། ཕྱིར་ཟློག་གི་འཁོར་ལོའི་རྡོ་རྗེ་རྩེ་བཞི་པ་ནི་དབང་ཕྱུག་བརྒྱད་རྡོ་རྗེ་བཞིས་ཕྱེ་བ་དང༌། ཁོར་ཡུག་གསུམ་ནི་སྐུ་གསུམ་དང་རྡོ་རྗེ་གསུམ་མོ། །འདིར་ཐམས་ཅད་མཆོག་གི་བསྲུང་བ་ནི། དངོས་པོ་ཐམས་ཅད་སྟོང་པར་རྟོགས་པའི་ཡེ་ཤེས་ཀྱིས་གཉིས་འཛིན་གྱི་བདུད་ཐམས་ཅད་བཅིང་བ་ལ་ཕྱི་རོལ་བདུད་ཀྱི་འཇུག་པ་མེད་དེ། རང་བཞིན་དེ་ལ་བདུད་དང༌། བདུད་མིན་ཏེ་བར་དུ་གཅོད་པ་དང་མི་གཅོད་པ་ངོ་བོས་གྲུབ་པ་མེད་ཅིང༌། མཉམ་པ་ཉིད་ཀྱིས་ཕྱིར་རོ། །དེ་ལྟར་འདིར་ཕྱིའི་བར་ཆད་སྔགས་དང་རྣལ་འབྱོར་གྱིས་ཕྱིར་ཟློག་པ་དང༌།
འཁྲུལ་འཁོར་གྱིས་ཕྱིར་ཟློག་པ་དང༌། ནང་གི་བར་ཆད་རླུང་གིས་དང༌། མཉམ་པ་ཉིད་ཀྱིས་དང༌། ཡེ་ཤེས་འཁོར་ལོས་ཟློག་པ་དང༌། གཉིས་ཀའི་ལ་སྙིང་རྗེ་ཆེན་པོའི་ཕྱིར་ཟློག་པ་དང༌། རིག་པའི་སྐད་ཅིག་གིས་ཕྱིར་ཟློག་པ་དང༌། འབྲས་བུ་ལ་བར་ཆོད་སྲིད་ཞི་མཉམ་ཉིད་ཀྱིས་ཟློག་པའོ། །དེ་ལྟར་འདི་ནི་ཞལ་གྱི་གདམས་པ་སྟེ། མན་ངག་དང་ལྡན་པ་དག་འདོམས་པར་མཛད་པ་གང་ཡིན་པ་དེ་བཤད་ཟིན་ཏོ། །འདི་དག་གི་འཐད་པ་རྒྱས་པར་རྒྱུད་འགྲེལ་རྣམས་དང༌། བླ་མའི་ཞབས་ལ་བརྟེན་ཞིང་རྟོགས་པར་བྱ་ལ་འདིར་ནི་རེ་ཤིག་ཆོག་གོ །མཆོག་ཏུ་འཇིགས་བྱེད་ཧེ་རུ་ཀ་དཔལ་རྡོ་རྗེ་ཁྲོ་བོའི་སྤྲིན་སྤྲོ་བ། །དེ་ཡི་རྣལ་འབྱོར་གསལ་བར་བྱས་པའི་ཕུན་ཚོགས་ལས་འདིས་འགྲོ་རྣམས་ཀྱི། །བདུད་ཀྱི་དྲ་བ་བཅད་ནས་རྡོ་རྗེའི་དཀྱིལ་འཁོར་འདིར་ནི་འདུ་བར་ཤོག།སྡོམ་པའི་རྒྱུད་རྒྱལ་ཤིན་ཏུ་རྒྱ་ཆེའི་བསྲུང་བའི་སྦྱོར་བ་རྣམ་མང་པོ། །མཐའ་དག་ཉུང་ངུའི་ཚིག་གིས་གསལ་བར་བྱའོ་གཟུར་གནས་པའི། །མཁས་པའི་སྐྱེ་བོ་རྣལ་འབྱོར་འདིར་གནས་རྣམས་ཀྱིས་རོལ་རྩེད་མཛོད། །བླ་མར་བསྙེན་བཀུར་བྱས་གང་མན་ངག་རྣམས་ཀྱི་རིན་ཆེན་མཚོ། །ཕལ་ཆེར་རྒྱུད་སྡེ་རྒྱ་ཆེན་མ་མཐོང་མཐོང་ན་ཡང༌། །རྒྱ་ཆེ་བསྡུ་བར་མི་ནུས་གཞན་དག་མ་འཁྲུལ་མེད། །འགའ་ཞིག་མན་ངག་བྲལ་ཏེ་ཕལ་ཆེར་འདི་ན་ཉམས། །མ་ནོར་མན་ངག་ལྡན་པས་བཤད་དེ་འདིས་ཀྱང་བློ། །ཟབ་དང་རྒྱ་ཆེ་དཔོག་པ་མིན་ནམ་རྡོ་རྗེ་
ཁྲོ་བོ་ཡི། །སྒྲུབ་ཐབས་ཡན་ལག་བཏུས་འདིས་རྒྱུད་དོན་དཔག་མེད་གསལ་བར་གྱུར། །བསམ་གཏན་རྫུན་སྨྲ་རྣམས་ལ་འདི་ནི་ཤིན་ཏུ་རྩུབ་པའི་སྒྲ། །གང་ཡང་རྒྱུད་རིག་མཆོག་ཏུ་དགའ་བསྐྱེད་རྣ་བའི་བདུད་རྩི་ཡིན། །སྦྱོར་བ་འདི་ཡི་ཡི་གེ་ནི། །གསལ་པོ་སྔོན་ཆད་མ་མཐོང་ནས། །རྒྱུད་གཞུང་འགྲེལ་བཅས་གཞན་ཡང་ནི། །ཕྱོགས་འདིའི་རྡོ་རྗེ་ཅན་མང་པོ། །ཀུན་གྱི་རིམ་པའང་མཐོང་བ་དང༌། །མན་ངག་ལྡན་ཕྱིར་ཕན་བློས་བཤད། །གྲུབ་པ་རིག་པ་འཛིན་པ་དང༌། །འཕགས་པ་རྣམས་ཀྱིས་འདི་ཉིད་མཁྱེན། །མང་ཐོས་མཁས་སྨྲ་མཁས་པའི་ཚུལ་འཛིན་པ། །རང་ཕྱོགས་རྟག་པར་རྟག་ཏུ་འཛིན་འདོད་པས། །གྱ་གྱུའི་བློ་གྲོས་བློ་ལྡན་འདི་དག་རྣམས། །འདི་ལ་ཅི་འདོད་ཅི་དགའ་སྤྱོད་ཅིང་རུང༌། ཞེས་པ་ནི་བདེ་མཆོག་ཁྲོ་བོ་རྣམ་པར་རོལ་པའི་སྒྲུབ་ཐབས་ཡན་ལག་རྒྱས་པ་དང་བཅས་པ་ཚིག་ཉུང་འདི་ནི། དཔལ་འཁོར་ལོ་སྡོམ་པའི་རྣལ་འབྱོར་པ་ཀུན་དགའ་སྙིང་པོ་ཏཱ་ར་ནཱ་ཐས་རང་ལོ་ཉེར་གཉིས་པ་སྨིན་དྲུག་གི་ཉ་བ་ལ་གྲུབ་པའི་གནས་བསམ་གཏན་སྡིངས་སུ་སྦྱར་བའོ།། །།དགེ་ལེགས་འཕེལ། ཤུ་བྷ་མཱ་སྟུ་སརྦ་ཛཱ་ག་ཏཾ། །མངྒ་ལཾ། །གཉིས་ཞུས།