དཔལ་རྒྱུད་སྡེ་ལྔའི་དཀྱིལ་འཁོར་སྒྲུབ་པའི་ཐབས་བསྐྱེད་རིམ་མཐའ་དག་གསལ་བར་བྱེད་པ།
དཔལ་རྒྱུད་སྡེ་ལྔའི་དཀྱིལ་འཁོར་སྒྲུབ་པའི་ཐབས་བསྐྱེད་རིམ་མཐའ་དག་གསལ་བར་བྱེད་པ་བཞུགས།
ཨོཾ་ན་མོ་གུ་རུ་གུཧྱ་ས་མ་ཛཿ ཙཀྲ་སཾ་བྷ་ར། མཧཱ་མ་ཡ། བཛྲ་བྷཻ་ར་བ། མཧཱའ་ཀཱ་ལ་མཎྜལ་ལེ་བྷྱཿ སློབ་དཔོན་སྟོན་པ་རྡོ་རྗེ་སེམས་དཔའ་ཉིད། །འདུལ་དཀའ་འདུལ་ཕྱིར་ཁྲོ་བོའི་སྐུར་བསྟན་པ། །རྣམ་ལྔའི་དཀྱིལ་འཁོར་མཆོག་ལ་མགོས་བཏུད་ནས། །བླ་མེད་སྒྲུབ་ཐབས་གང་ཡིན་གསལ་བར་བྲི། །ལམ་འདིར་མཁས་གྲུབ་དམ་པ་མཆོག་བརྙེས་པའི། །སྐྱེས་བུ་དུ་མས་ཡང་ཡང་བཤད་གྱུར་མོད། །མཚར་སྡུག་ལང་ཚོས་སྒེག་པའི་གཟུགས་བཟང་མར། །རིན་ཆེན་རྒྱན་གྱིས་བརྒྱན་ན་ལྷག་པར་མཛེས། །དེ་ལ་དགྱེས་པ་རྡོ་རྗེ་དྲག་པོ་གདན་ཅན་གྱི་བསྐྱེད་པའི་རིམ་པ་ལ་གཞི་བྱས་ནས་རྒྱུད་སྡེ་ལྔའི་དཀྱིལ་འཁོར་གྱི་སྒྲུབ་ཐབས་ཉམས་སུ་ལེན་པའི་ཚུལ་ནི་འདི་ཡིན་ཏེ། སྐྱབས་འགྲོ་སེམས་བསྐྱེད་རྡོ་རྗེ་སེམས་དཔའི་སྒོམ་བཟླས་སྤྱི་དང་མཐུན་པར་བྱས་ལ། ཨོཾ་ཤཱུ་ནྱ་ཏ་ཛྙཱ་བཛྲ་སྭཱ་བྷ་ཝ་ཨཱཏྨ་ཀོ྅ཧཾ། སྟོང་པའི་ངང་ལས་ཧཱུྃ་ལས་རྡོ་རྗེ་ཧཱུྃ་གིས་མཚན་པ། དེ་ལས་འོད་ཟེར་སྣ་ལྔ་འཕྲོས་འགྲོ་བའི་སྡིག་
སྒྲིབ་སྦྱངས། ཚུར་འདུས་རང་གི་སྙིང་གར་ཐིམ་ནས་ཞུ་བའི་ཐིག་ལེ་ལས། བདག་ཉྀད་དགྱེས་པ་རྡོ་རྗེ་ཕྱག་གཉིས་པ་ཤེས་རབ་མ་དང་བཅས་པ་ཚངས་པ་དང་དབང་ཕྱུག་གི་གདན་ལ་གནས་པའི་སྙིང་གར་ཉི་མ་ལ་ཧཱུྃ་དེ་ལས་ཁྲོ་བོ་བཅུ་སྤྲོས་ཕྱོགས་བཅུར་འཁོད་པ་ནི། ཤར་དུ་གཤིན་རྗེ་གཤེད་ནག་པོ་ཐོ་བ་འཛིན་པ། ལྷོར་ཤེས་རབ་མཐར་བྱེད་དཀར་པོ་བེ་ཅོན་འཛིན་པ། ནུབ་ཏུ་པདྨའི་མཐར་བྱེད་དམར་པོ་པདྨ་འཛིན་པ། བྱང་དུ་བགེགས་མཐར་བྱེད་ནག་པོ་རྡོ་རྗེ་གདེངས་པ་འཛིན་པ། ཤར་ལྷོར་གཏུམ་པོ་ནག་པོ་རལ་གྲི་འཛིན་པ། ལྷོ་ནུབ་ཏུ་འདོད་རྒྱལ་སྔོ་དམར་ལྕགས་ཀྱུ་འཛིན་པ། ནུབ་བྱང་དུ་བེ་ཅོན་སྔོན་པོ་དབྱུག་པ་འཛིན་པ། བྱང་ཤར་དུ་སྟོབས་པོ་ཆེ་ནག་པོ་ཏྲི་ཤུ་ལ་འཛིན་པ། སྟེང་དུ་གཙུག་ཏོར་འཁོར་ལོས་བསྒྱུར་བ་སེར་པོ་འཁོར་ལོ་འཛིན་པ། འོག་ཏུ་གནོད་མཛེས་ནག་པོ་གཏུན་ཤིང་འཛིན་པ། མི་གཡོ་འདོད་རྒྱལ་གནོད་མཛེས་རྣམས་རོལ་
པའི་ཁྲོ་བོ། གཞན་རྣམས་ཤིན་ཏུ་ཁྲོས་པ། ཐམས་ཅད་ཀྱང་སྟག་ལྤགས་ཀྱི་ཤམ་ཐབས་དང༌། རིན་པོ་ཆེའི་རྒྱན་དང་ལྡན་པ། ཁྲོ་བོའི་མཚན་ཉིད་ཐམས་ཅད་རྫོགས་པ་མེ་དཔུང་དང་བཅས་པའོ། །ཁྲོ་བོ་བཅུ་ལས་ཁྲོ་བོ་བཅུ་ལྕགས་ཀྱུ་དང་ཞགས་པ་ཕྱོགས་བཅུར་སྤྲོས། ཕྱོགས་བཅུའི་བགེགས་རྣམས་ཀྱི་ཡན་ལག་ལྔ་ཞགས་པས་བཅིངས། ལྕགས་ཀྱུས་སྙིང་གར་བཏབ་སྟེ་བཀུག་པར་གྱུར། ཨོཾ་ཡ་མཱནྟ་ཀྲྀཏ་ཧཱུཾ། ཨོཾ་པྲཛྙཱནྟ་ཀྲྀཏ་ཧ྄ཱུཾ། ཨོཾ་པདྨནྟ་ཀྲྀཏ་ཧཱུཾ། ཨོཾ་བིགྷྣན་ཀྲྀཏ་ཧཱུཾ། ཨོཾ་ཨཱརྱཱ་ཙ་ལ་ཧཱུཾ། ཨོཾ་ཊཀྐི་རཱ་ཛ་ཧཱུཾ། ཨོཾ་ནི་ལ་དཎྜ་ཧཱུཾ། ཨོཾ་མཧཱ་བ་ལ་ཧཱུཾ། ཨོཾ་ཙཀྲ་ཝཱརྟི་ཧཱུཾ། ཨོཾ་སུམྦྷ་རཱ་ཛ་ཧཱུཾ། ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུཾ། གྲྀྀཧྞ་པཱ་ཡ་གྲྀྀཧྞ་པཱ་ཡ་ཧཱུཾ། ཨཱ་ན་ཡ་ཧོ་བྷ་གི་ཝཱན་བིདྱཱ་རཱ་ཛ་ཧཱུཾ་ཕཊ་སྭཱཧཱ། ཡང་ཧཱུཾ་ལས་ཕུར་བུ་དང་ཐོ་བ་བཅུ་སྤྲོས། ཡང་སྤྲུལ་ཁྲོ་བོ་རྣམས་ཀྱི་ལག་པ་གཡས་གཡོན་དུ་གཏད། བགེགས་རྣམས་ཀྱི་སྤྱི་བོར་ཕུར་བུས་བཏབ་ཅིང་ཐོ་བས་བརྡུངས་ནས། ལུས་གཡོ་འགུལ་མེད། ངག་རླུང་རྒྱུ་བ་མེད། སེམས་འོད་གསལ་དུ་ཐིམ་ཞིང་ལྷག་མ་རྣམས་རྡོ་རྗེའི་མེ་འོད་དང་དང་སྔགས་ཀྱི་སྒྲས་ཁོར་ཡུག་ཆེན་པོའི་ཕྱི་རོལ་ཏུ་བསྐྲད་པར་གྱུར། ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུཥྟཱ་ན་ཕཊ། ཀཱི་ལཱ་ཡ་ཀཱི་ལཱ་ཡ་སརྦ་པཱ་པཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཀཱི་ལ་བཛྲ་དྷ་རོ་ཨ་ཛྙཱ་པ་ཡ་ཏི་སརྦ་བིགྷྣཱན་ཀཱ་ཡ་ཝཱཀ་ཙིཏྟ་བཛྲ་ཀཱི་ཡ་ཧཱུཾ་ཕཊ། ཨོཾ་བཛྲ་
མུཏྒ་ར་བཛྲ་ཀཱི་ལ་ཨཱ་ཀོ་ཊ་ཡ་ཧཱུཾ་ཧཱུཾ་ཕཊ། རང་ཉིད་མི་བསྐྱོད་པ་སྔོན་པོ་རྡོ་རྗེ་དང་དྲིལ་བུ་འཛིན་པས་མཱ་མ་ཀཱི་ལ་འཁྱུད་པ། རླུང་ཁ་སྦྱོར་བྱ། རྩ་གསུམ་གསལ་བཏབ་ནས། ཨ་ཝ་དྷཱུ་ཏི་རབ་ཏུ་རྒྱས་པའི་ནང་གི་སྙིང་གར་ཧཱུཾ་མཐིང་ནག །ཨོཾ་བཛྲ་རཀྵ་རཀྵ་ཧཱུཾ་ཧཱུཾ་ཧཱུཾ་ཕཊ་སྭཱཧཱ། སྙིང་གའི་ཧཱུཾ་ལས་རཾ་ཆད་དེ་འོག་ཏུ་ཉི་མར་གྱུར། ཡང་ཧཱུཾ་གཅིག་ཆད་དེ། དེའི་སྟེང་དུ་སྣ་ཚོགས་རྡོ་རྗེར་གྱུར་པ་ནི། ཤར་གྱི་རཱ་གསུམ་དཀར་པོ། ལྷོའི་རྭ་གསུམ་སེར་པོ། ནུབ་ཀྱི་རྭ་གསུམ་དམར་མོ། བྱང་གི་རྭ་གསུམ་ལྗང་ཁུ། ལྟེ་བ་མཐིང་ནག་ལ་ཧཱུཾ་གིས་མཚན་པ། སྣ་ཚོགས་རྡོ་རྗེ་དེ་ཉིད་རྒྱ་ཆེ་ཞིང་རྔམས་འཐུག་པར་གྱུར་པས་རྡོ་རྗེའི་ས་གཞི། ཁོར་ཡུག་ཏུ་འཕྲོས་པ་དཔངས་མཐོ་ནས་རྭ་བ། རྩེ་མོ་རྣམས་སྟེང་དུ་འདུས་པས་གུར་དང་བླ་བྲེ། ཨོཾ་བཛྲ་རཀྵ་རཀྵ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཕྱོགས་བཞིར་དམིགས་ནས་ཧཱུཾ་བཞི་པ་ལན་གཅིག་བརྗོད། སྙིང་གའི་ཧཱུཾ་གི་འོད་ཟེར་གྱི་སྣ་ལ་རྡོ་རྗེ་གཅིག་པ་ནས་རྩེ་དགུ་པའི་བར་གྱི་རྡོ་རྗེ་རྣམས་འཕྲོས་ཏེ་གོ་མཚམས་མེད་པ་གཏམས། ཡང་རཀྵའི་སྔགས་བརྗོད་པས། འོག་གི་ཉི་མ་ལས་ཡེ་ཤེས་ལྔའི་རང་བཞིན་གྱི་མེ་འབར་བས་ཕྱི་ངོས་ཀྱི་རྡོ་རྗེ་རྣམས་ཁྲོ་ཆུ་ལྟར་ཞུ་ནས། མེ་ལོང་གི་ངོས་བཞིན་དུ་གྱུར་པས་བསྐལ་བའི་རླུང་གིས་ཀྱང་མི་ཐར་ཞིང་བར་དུ་གཅོད་པ་གང་གིས་ཀྱང་མི་ཚུགས་པའི་བསྲུང་འཁོར་
ཡེ་ཤེས་ཀྱི་མེ་འབར་བས་དཔག་ཚད་བྱེ་བ་ཙམ་དུ་ཁྱབ་པར་གྱུར། བཛྲ་རྭཀྵའི་སྔགས་ལན་གསུམ་བརྗོད། གནས་བསྲུངས་པའོ། །བསྲུང་བའི་འཁོར་ལོའི་ནང་དུ་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་སྤྲིན་ཕུང་འཁྲིགས་པ་བཞིན་བཞུགས་པར་གྱུར། བླ་མ་ཡི་དམ་མཁའ་འགྲོའི་ཚོགས། །སངས་རྒྱས་བྱང་ཆུབ་སེམས་དཔའ་དང༌། ཁྲོ་བོ་ཆོས་སྐྱོང་བཅས་པ་ལ། །རྟག་ཏུ་གུས་པས་སྐྱབས་སུ་མཆི། །ལན་གསུམ་རྣལ་འབྱོར་བསྲུང་བའོ། །ལུས་བསྲུང་བ་ནི། བླ་མ་ཡི་དམ་འཁོར་བཅས་ཀྱིས། རིགས་ཀྱི་བུ་ཁྱོད་ཀྱིས་སེམས་ཅན་གྱི་དོན་དུ་རྒྱུད་སྡེ་ལྔའི་ལྷ་ཚོགས་སྒྲུབ་པ་ནི་ཤིན་ཏུ་ལེགས་སོ། །རིགས་ཀྱི་བུ་ཁྱོད་ཀྱི་བར་ཆད་ང་ཡི་བསྲུང་ཞིང་བྱིན་གྱིས་བརླབས་པར་བྱའོ། །ཞེས་གསུངས་ནས་བུམ་པའི་ཆུས་དབང་བསྐུར་བས་སྡིག་སྒྲིབ་མི་མཐུན་པའི་ཕྱོགས་ཐམས་ཅད་པ་བཀྲུས་པར་གྱུར། དངོས་སུ་ཁྲུས་སྤྲོ་ན་བྱ། ངག་བསྲུང་བ་ནི། མདུན་གྱི་ནམ་མཁའ་ལ་བཅོམ་ལྡན་འདས་དགྱེས་མཛད་རྡོ་རྗེ་ལ་སོགས་པ་བྱོན་ནས་རང་དང་དབྱེར་མེད་དུ་གྱུར། ཡང་སྔགས་རྣམས་བཟླ་ཞིང་ཁ་བཀྲུས་ལ་བདུད་རྩི་མྱང༌། ཡིད་བསྲུང་བ་ནི། ནམ་མཁའ་དང་མཉམ་པའི་སེམས་ཅན་ཐམས་ཅད་བདག་གི་ཕ་མ་ཡིན། ཕ་མ་འདི་རྣམས་སྡུག་བསྔལ་བ་སྙིང་རེ་རྗེ། ད་ནི་བདག་གིས་བདེ་བ་དང་བདེ་བའི་རྒྱུ་དང་ལྡན་པར་བྱ། སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་བྱ།
རྒྱུད་སྡེ་ལྔའི་དཀྱིལ་འཁོར་གྱི་ལྷ་ཚོགས་རྣམས་ཀྱིས་གོ་འཕང་ལ་བཞག་པར་བྱ། དེའི་ཕྱིར་དུ་བདག་གིས་རྒྱུད་སྡེ་ལྔའི་དཀྱིལ་འཁོར་བསྒྲུབ་པར་བགྱིའོ། །བདག་བསྲུང་བའོ། །དེ་ཡན་ཆད་ནི་དཀྱིལ་འཁོར་རེ་རེ་ཉམས་སུ་ལེན་པ་དག་གིས། དགྱེས་པ་རྡོ་རྗེ་དང་རྒྱུད་སྡེ་ལྔ་ཞེས་བྱ་བའི་གནས་སུ་རང་རང་གི་མཚན་བཅུག་པས་འགྲུབ་ཅིང་གཞན་རྣམས་ལ་ཕྱག་གཉིས་པ་རང་གི་མངོན་རྟོགས་ནས་འབྱུང་བ་ལྟར་བསྒོམས་ཞིང༌། གསང་འདུས་ལ་ཡང་རྡོ་རྗེ་འཆང་སྐུ་མདོག་སྔོན་པོ་ཡུམ་ཅན་བསྒོམ་པ་ཡིན་ནོ། །དེ་ནས་རང་སྐད་ཅིག་གིས་དགྱེས་མཛད་རྡོ་རྗེ་ཕྱག་གཉིས་པ་ཤེས་རབ་མ་དང་བཅས་པས་གསལ་བའི་སྙིང་གར་རཾ་ལས་ཉི་མའི་སྟེང་དུ་ཧཱུཾ། དེ་ལས་འོད་ཟེར་སྣ་ལྔ་འཕྲོས་པས། རང་གི་ལུས་ཀྱི་ནང་ཐམས་ཅད་སྦྱངས། ཡེ་ཤེས་ལྔའི་རང་བཞིན་དུ་གྱུར། ཡང་འཕྲོས་པས་ཤ་ཁྲག་ལ་སོགས་པ་བར་གྱི་དངོས་པོ་རྣམས་ཀྱང་སྦྱངས་ཏེ་ཡེ་ཤེས་ལྔའི་ངོ་བོར་གྱུར། ཡང་འཕྲོས་པ་བ་སྤུའི་བུ་ག་ནས་ཕྱིར་སོང་སྟེ་རང་བཞིན་གྱི་གནས་ནས་དཀྱིལ་འཁོར་ལྔའི་ལྷ་ཚོགས་བླ་མས་དབུ་བརྒྱན་པ་སངས་རྒྱས་བྱང་ཆུབ་སེམས་དཔའི་ཚོགས་དང་བཅས་པ་མདུན་གྱི་ནམ་མཁར་སྤྱན་དྲངས། བླ་མ་རྣམས་དང་ཡི་དམ་ལྷ། །སངས་རྒྱས་བྱང་ཆུབ་སེམས་དཔའ་དང༌། །དཔའ་བོ་མཁའ་འགྲོ་ཆོས་སྐྱོང་སོགས། །བདག་གི་གནས་འདིར་གཤེགས་སུ་གསོལ། །ཨོཾ་བྷ་ག་ཝན་མཧཱ་ཀཱ་རུ་ཎི་ཧེ་བཛྲ་གུ་ཧེ་ས་མཱ་ཛཿ ཙཀྲ་སམྦྷར་མཧཱ།
མཱཧ་མ་ཡཱ་བཛྲ་བྷཻ་ར་བ་མཎྜལ་ལ་ས་པ་རི་བཱ་ར་བཛྲ་ས་མཱ་ཛཿ རང་གི་ལུས་ཞིང་གི་རྡུལ་སྙེད་དུ་སྤྲུལ། སངས་རྒྱས་ཐམས་ཅད་འདུས་པའི་སྐུ་སོགས་ཤློ་ཀ་གཅིག །བཅོམ་ལྡན་དགྱེས་མཛད་དཀྱིལ་འཁོར་དང༌། །གསང་འདུས་མཧཱ་མ་ཡ་དང༌། །བདེ་མཆོག་འཁོར་ལོ་འཇིགས་མཛད་དེ། །ཡི་དམ་ལྷ་ལ་ཕྱག་འཚལ་ལོ། །སངས་རྒྱས་ཆོས་དང་དགེ་འདུན་དང༌། །དཔའ་བོ་དཔའ་མོ་མཁའ་འགྲོ་དང༌། །ཆོས་སྐྱོང་ཚོགས་དང་བཅས་པ་ལ། །བདག་སོགས་གུས་པས་ཕྱག་འཚལ་ལོ། །ཨོཾ་ནི་རི་ཏི་ཧཱུཾ་ཁཾ། ནེ་ཝི་ཏེ་ཧཱུཾ་ཁཾ། སརྦ་སཾ་ཤྭ་དྷ་ནི་ཨཱ་ཧཱུཾ༌། ཛཿཧཱུཾ྄་བཾ་ཧོཿ ཁཾ་རཾ་མཧཱ་ཨརྒྷཾ་པྲ་ཏིཙྪ་ཡེ་སྭཱཧཱ། ཡང་ན། ཨརྒྷཾ་ནས། པཏྱཾ་སྟེ་ཆུ་གཉིས་ཕུལ་ཀྱང་རུང༌། ཨོཾ་བཛྲ་པུཥྤེ་ཨཱཿཧཱུཾ་ནས། ཤཔྟའི་བར་གྱིས་འབུལ། ནམ་མཁར་རྗེ་བཙུན་བལྟས་ནས་ནི། །རྡོ་རྗེ་སྐྱེ་བ་སྙིང་རྗེ་ཅན། །རྒྱན་རྣམས་ཐམས་ཅད་འཛིན་པ་ཡི། །ལྷ་མོ་བརྒྱད་པོ་རྣམས་ཀྱིས་མཆོད། །དཀར་མོ་རི་དྭགས་མཚན་མ་འཛིན། །ཆོམ་རྐུན་བདུད་ལས་རྒྱལ་བའི་སྣོད། །རོ་ལངས་མ་ནི་ཆུ་ལག་མ། །གྷསྨ་རི་ནི་སྨན་འཛིན་ཅིང༌། །པུཀྐ་སཱི་ནི་རྡོ་རྗེའི་ལག །དེ་བཞིན་རི་ཁྲོད་མི་རོ་འཛིན། །གདོལ་པ་མོ་ནི་ཅང་ཏེའུ་བརྡུང༌། །འདི་རྣམས་ཀྱིས་ནི་གཙོ་བོ་མཆོད། །འདོད་ཆགས་ཆེན་པོ་རྗེས་ཆགས་པས། །གཡུང་མོས་སྐུ་ལ་འཁྱུད་པ་ཉིད། །མཆོད་བྱ་ཡུལ། མཆོད་བྱེད་བདག །མཆོད་པའི་
རྫས་ཐམས་ཅད་རང་བཞིན་མེད་པར་རང་གིས་སེམས་ཉིད་དོ། །དེ་ནས་རྒྱུན་བཤགས་ནི། ཐོག་མེད་དུས་ཀྱི་སྡིག་པ་དང༌། །སེམས་ཅན་རྣམས་ཀྱི་སྡིག་པའི་ཚོགས། །མི་དགེ་ལས་རྣམས་ཅི་བགྱིས་པ། །དེ་ཀུན་ཁྱེད་ལ་བཤགས་པར་བགྱི། །སོ་སོར་ཐར་པའི་མི་མཐུན་དང༌། །བྱང་ཆུབ་མཆོག་ཏུ་སེམས་བསྐྱེད་ནས། །དེ་དང་འགལ་བའི་ཉེས་པ་ཀུན། །དེ་དག་ཁྱེད་ལ་སོ་སོར་བཤགས། །གསང་སྔགས་ཐེག་པར་དབང་བསྐུར་ནས། །དམ་ཚིག་ཉམས་ཆགས་བྱུང་བ་ཀུན། །དེ་དག་ཁྱེད་ཀྱི་སྤྱན་སྔར་བཤགས། །མི་དགེ་སླན་ཆད་སྡོམ་པར་བགྱི། །སོ་སོའི་སྐྱེ་བོའི་དགེ་བ་དང༌། །ཉན་ཐོས་དགྲ་བཅོམ་དགེ་བ་དང༌། །རང་སངས་རྒྱས་ཀྱི་དགེ་བ་ལ། །བདག་ནི་རྗེས་སུ་ཡི་རང་ངོ༌། །དང་པོ་བྱང་ཆུབ་སེམས་བསྐྱེད་ནས། །འགྲོ་དོན་འཕྲིན་ལས་རབ་རྒྱས་པའི། །སངས་རྒྱས་བྱང་ཆུབ་སེམས་དཔའ་ཡི། །དགེ་བ་ཀུན་ལ་ཡི་རང་ངོ༌། །བླ་མ་ཡི་དམ་ལྷ་རྣམས་ཀྱི། །གསང་སྔགས་ལམ་མཆོག་མཐའ་རུ་ཕྱིན། །འབྲས་བུ་སྐུ་བཞི་འགྲུབ་པ་ཡི། །དགེ་བ་ཀུན་ལ་ཡི་རང་ངོ༌། །བདག་གཞན་སེམས་ཅན་ཐམས་ཅད་ཀྱི། །དུས་གསུམ་བསགས་པའི་དགེ་བ་རྣམས། །སེམས་ཅན་སངས་རྒྱས་ཐོབ་དོན་དུ། །བྱང་ཆུབ་ཆེན་པོར་རབ་ཏུ་བསྔོ། །བླ་མ་ཡི་དམ་སངས་རྒྱས་ལ། །བདག་གིས་ལུས་ངག་ཡིད་གསུམ་ནི། །ལྟོས་མེད་
སེམས་ཅན་དོན་དུ་འབུལ། ཁྱེད་ཀྱི་སྐུ་གསུམ་འགྲུབ་པར་ཤོག །བླ་མ་ཡི་དམ་སངས་རྒྱས་དང༌། །འདུ་འབྲལ་མེད་པར་འགྲུབ་གྱུར་ནས། ཁྱེད་ཀྱི་བྱིན་རླབས་མཐུ་ཡིས་ནི། །གང་ལྟར་སོང་ཡང་ཐུགས་རྗེས་ཟུངས། །བླ་མ་རྒྱུད་སྡེའི་ལྷ་རྣམས་ཀྱིས། །སེམས་ཅན་རྒྱུད་ལ་གང་འཚམས་པའི། །གང་འདུལ་དེ་ལ་དེར་སྟོན་པའི། །ཆོས་ཀྱི་འཁོར་ལོ་བསྐོར་དུ་གསོལ། །བླ་མ་ཡི་དམ་སངས་རྒྱས་ཀྱིས། །ནམ་མཁའ་མཉམ་པའི་སེམས་ཅན་རྣམས། །སངས་རྒྱས་ས་ལ་མ་འཁོད་བར། །དེ་སྲིད་དུ་ནི་བཞུགས་སུ་གསོལ། །བླ་མ་དམ་པ་རྣམས་དང་ནི། །ཡི་དམ་མཁའ་འགྲོར་བཅས་པ་དང༌། །སངས་རྒྱས་ཆོས་དང་དགེ་འདུན་ལ། །བདག་ནི་སྐྱབས་སུ་ཉེ་བར་མཆི། །བླ་མ་རྒྱུད་སྡེའི་ལྷ་རྣམས་ཀྱིས། །དང་པོ་བྱང་ཆུབ་ཐུགས་བསྐྱེད་ལྟར། །བདག་ཀྱང་སེམས་ཅན་བསྒྲལ་བའི་བློས། ཁྱེད་ཀྱི་རྗེས་སུ་སེམས་བསྐྱེད་དོ། །ཡང་ན་མཚོ་སྐྱེས་ལྟར་ཡན་ལག་ལྔའམ། གུར་ནས་འབྱུང་བའི་ཡན་ལག་བདུན་པ་བྱའོ། །དེ་ནས། སྲས་བཅས་སངས་རྒྱས་ཐམས་ཅད་ལ་སོགས་པའི་རིགས་ལྔའི་སྡོམ་པ་བཟུང་བར་བྱའོ། །སེམས་ཅན་ཐམས་ཅད་བདེ་བ་དང༌། སོགས་ཚད་མེད་བཞི་བསྒོམ། །ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭཱ་བྷ་ཝ་ཤུདྡྷོ྅ཧཾ། ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྟོང་པའི་ངང་ལས་རཾ་ལས་ཉི་མ་ལ་ཧཱུཾ་ལས་སྣ་ཚོགས་རྡོ་རྗེ། དེ་ལས་རྡོ་རྗེའི་ས་གཞིར་རྭ་བ་དྲྭ་བགུར་
བླ་བྲེ་མེ་རི་དང་བཅས་པའི་དབུས་སུ། ཨེ་ལས་ཆོས་འབྱུང་གྲུ་གསུམ་ཕྱི་དཀར་ལ་ནང་དམར་བ་གདེངས་ཀ་ཆེ་བ་གྱེན་དུ་ཕྱོགས་ཤིང༌། རྩ་བ་ཕྲ་བ་ཐུར་དུ་ཟུག་པའི་ནང་དུ། ཡཾ་ལས་རླུང་གི་དཀྱིལ་འཁོར་སྔོན་པོ་ཟླ་གཾ་ཡཾ་དང་བ་དན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་རཾ་དང་འབར་བས་མཚན་པ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ། བཾ་དང་བུམ་པས་མཚན་པ། དེའི་སྟེང་དུ་ལཾ་ལས་སའི་དཀྱིལ་འཁོར་སེར་པོ་གྲུ་བཞི་ལཾ་དང་རྡོ་རྗེས་མཚན་པ། དེའི་སྟེང་དུ་བྷྲུཾ་ལས་འཁོར་ལོ་སེར་པོ་རྩིབས་བཅུ་དྲུག་པ་ལྟེ་བ་ལ་བྷྲཱུཾ་གྱིས་མཚན་པ། དེ་རྣམས་གཅིག་ཏུ་འདྲེས་པ་ལས་པད་ཉི་སྣ་ཚོགས་རྡོ་རྗེ་དང་བཅས་པའི་སྟེང་དུ། རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གྲུ་བཞི་སྒོ་བཞི་པ། ཕྱི་ནས་རིམ་པ་བཞིན་དུ་དཀར་སེར་དམར་ལྗང་སྔོ་བའི་རྩིག་པ་རིམ་པ་ལྔ་དང་ལྡན་པ། དེའི་སྟེང་དུ་རིན་པོ་ཆེའི་ཕ་གུ་ལས་དྲྭ་བ་དང་དྲྭ་བ་ཕྱེད་པ་ལ་སོགས་པ་དུ་མ་དཔྱངས་པ། དེའི་སྟེང་དུ་བྱ་འདབས་ལས་ཐུར་དུ་འཕྱང་བའི་ཤར་བུའི་ཕྲེང་བ་དང༌། སྟེང་དུ་མདའ་ཡབ་མཆོད་རྟེན་གྱི་དབྱིབས་ཅན་གྱིས་བསྐོར་བའི་བར་བར་ན་གདུགས་དང་རྒྱལ་མཚན་དང་བ་དན་ལ་སོགས་པས་བརྒྱན་པ། ནང་ཀ་བ་བརྒྱད་དང་ལྡན་པ། སྟེང་རྡོ་རྗེའི་གདུང་བཞི་མིག་མངས་རིས་སུ་བྲིས་ཤིང་མཛེས་པར་ཕུབ་པ། དབུས་ཕྱུར་བུར་གྱུར་
པའི་རྩེ་མོ་རྡོ་རྗེ་རིན་པོ་ཆེའི་ཏོག་གིས་སྤྲས་པ། རྩིག་པའི་ཕྱི་རོལ་འགྲམ་སྟེགས་མཆོད་པའི་སྣམ་བུ་དམར་པོ་ལ་བུད་མེད་སྒྱུ་མའི་མཛེས་སྡུག་གིས་སྒེག་པའི་གཟུངས་མ་རྣམས་ཀྱིས་མཆོད་རྫས་དུ་མ་ཐོགས་ནས་དཀྱིལ་འཁོར་གྱི་ལྷ་ཚོགས་རྣམས་ལ་མཆོད་པ། ཟུར་བཞིར་ཟླ་ཕྱེད་ནོར་བུ་དང༌། སྒོ་ཁྱུད་ཀྱི་མཚམས་སུ་ཟླ་ཕྱེད་རྡོ་རྗེས་བརྒྱན་པ། སྒོ་བཞིའི་མདུན་དུ་རྒྱན་དང་བཅས་པའི་ཀ་བས་བཏེགས་པའི་རྟ་བབས་མཆོད་རྟེན་གྱིས་རྣམ་པ་ཅན་ངང་པ་དང་རྨ་བྱ་དང་ཉ་སྤུས་བརྒྱན་པ་དང༌། ཆུ་སྲིན་དང་གདུགས་དང་རྒྱལ་མཚན་དང༌། སྤྲེའུ་བཟུང་བའི་བ་དན་ལ་སོགས་པས་བརྒྱན་པ། རྟ་བབས་ཀྱིས་རྩེ་མོར་པདྨ་ལ་གནས་པའི་ཆོས་འཁོར། སྟེང་དུ་གདུགས་དཀར་པོ། གཡས་གཡོན་དུ་རི་དྭགས་ཕོ་མོ་དང་བཅས་པ། གཞན་ཡང་རྒྱན་སྣ་ཚོགས་ཀྱིས་སྤྲས་པའི་གཞལ་ཡས་ཁང་གླང་རྒྱབ་ཀྱི་ནང་དེ་བཞིན་གཤེགས་པ་ལྔས་མཛེས་པ། སྒོ་བཞིའི་ཕྱི་རོལ་ཏུ་རིན་པོ་ཆེའི་ཐེམ་སྐས་དང༌། དེའི་ཕྱི་རོལ་ཏུ་བབས་བཞོན་གྱི་རྟ་བབས་དང་བཅས་པའོ། །དེའི་ཕྱི་རོལ་དུར་ཁྲོད་ཆེན་པོ་བརྒྱད་ནི། ཤར་དུ་གཏུམ་དྲག་གི་དུར་ཁྲོད། ལྷོར་འཇིགས་བྱེད་ཐོད་པ་ཅན། ནུབ་ཏུ་འུར་འུར་འབར་བ། བྱང་དུ་ཚང་ཚང་འཁྲིགས་པ། ཤར་ལྷོར་དབང་ཕྱུག་ནགས་ཚལ། ལྷོ་ནུབ་ཏུ་མུན་པ་མི་ཟད་པ། ནུབ་བྱང་དུ་ཅ་ཅོ་སྒྲོག་པ། བྱང་ཤར་དུ་ཧ་ཧ་རྒོད་པའོ། །ཤིང་ཆེན་པོ་བརྒྱད་ནི།
ཧ་ར་ཙུ་ཏ་ཨ་ཤོ་ཀ །ཨ་ཤྭད་ཐ་དང་ཀ་རཉྫ། ཛ་ལ་ཏི་དང་པར་ཏི་པ། བྷེ་ཏ་དང་ནི་བྷ་ཊའོ། །རྩ་བར་ཕྱོགས་སྐྱོང་བརྒྱད་གནས་པ། །ཤར་དུ་བརྒྱ་བྱིན་ལྷོར་གཤིན་རྗེ། །ཆུ་ལྷ་ནུབ་དང་གནོད་སྦྱིན་བྱང༌། །བྱང་ཤར་འབྱུང་པོ་ཤར་ལྷོ་མེ། །ལྷོ་ནུབ་སྲིན་པོ་ནུབ་བྱང་རླུང༌། །བརྒྱ་བྱིན་དཀར་པོ་གླང་པོའི་བདག །རྡོ་རྗེ་དྲིལ་བུ་གཡས་དང་གཡོན། །གཤིན་རྗེ་མཐིང་ནག་མ་ཧེ་བཞོན། །དབྱུག་པ་ཐོད་པ་དེ་བཞིན་ནོ། །ཆུ་ལྷ་དཀར་པོས་ཆུ་སྲིན་མནན། །སྦྲུལ་ཞག་གཡས་དང་གཡོན་པདྨ། །གནོད་སྦྱིན་སེར་པོ་རྟ་ལ་བཞོན། །དཔལ་འབྲས་ནེའུ་ལེ་གཡས་དང་གཡོན། །འབྱུང་པོའི་བདག་པོ་དཀར་པོ་ནི། ཁྱུ་མཆོག་དཀར་པོ་མདུང་ཐུང་འཛིན། །མེ་ལྷ་དམར་པོ་ར་ལ་བཞོན། །སྤྱི་བླུགས་དབྱུག་གུ་རྩེ་གསུམ་བསྣམས། སྲིན་པོ་ཁམ་ནག་མེ་རི་ཁྲིད། །གྲི་དང་ཐོད་པ་གཡས་དང་གཡོན། །རླུང་ལྷ་དུད་ཁ་ཤ་བ་བཞོན། །གཡས་ནས་བ་དན་ཞགས་པ་གཡོན། །ཐམས་ཅད་རིན་ཆེན་བརྒྱད་ལྡན་ཏེ། །སྲིན་པོ་རུས་པས་བརྒྱན་པའོ། །ཆུང་མ་བུ་འཁོར་ཕྱོགས་མདོག་བཅས། །མདོག་རྣམས་ཞི་བྱེད་ཕྱོགས་ལོགས་སྐྱོང༌། །སྟེང་གི་ནམ་མཁར་ལྷ་ཆེན་བརྒྱད། །ཤར་དུ་བརྒྱ་བྱིན་སྔོན་དངའདྲ། །ལྷོ་རུ་ཚངས་པ་གསེར་གྱི་མདོག། སྤྱི་བླུགས་དབྱུག་གུ་རྩེ་གསུམ་འཛིན། །ནུབ་ཏུ་ཁྱབ་འཇུག་དམར་པོ་སྟེ། །འཁོར་ལོ་གཡས་དང་གཡོན་ན་དུང༌། །བྱང་དུ་ལྷ་ཆེན་ཐལ་བའི་མདོག །རྩེ་གསུམ་ཐོད་པ་
གཡས་དང་གཡོན། །དབང་ལྡན་གཞོན་ནུ་དྲུག་གི་བུ། །དཀར་པོ་མདའ་དང་གཞུ་འཛིན་པ༌། །ཤར་ལྷོ་ཚོགས་བདག་དཀར་པོ་ནི། །གཡས་གཡོན་ལ་ཕུག་ལ་དུ་འཛིན། །བདེན་བྲལ་བྷྲིཾ་གི་རི་ཏི་སྨུག །མདུང་དང་བ་དན་གཡས་དང་གཡོན།། རླུང་དུ་ལེགས་ལྡན་ནག་པོ་ནི། །རལ་གྲི་གཡས་དང་ཕུབ་ནི་གཡོན། །ཐམས་ཅད་ལྷ་རྒྱན་དག་དང་ལྡན། །ལྷ་དང་གཟའ་སྐར་འཁོར་གྱིས་བསྐོར། །བསྡུ་ན་བརྒྱ་བྱིན་དཀར་པོ་མན་ཆད་ནས་འདིའི་བར་བོར་ཀྱང་རུང་ངོ༌། །ཆུ་ལ་ཀླུ་ཆེན་བརྒྱད་གནས་པ། །འཇོག་པོ་དུང་སྐྱོང་རིགས་ལྡན་དང༌། །མཐའ་ཡས་པད་ཆེན་དགའ་བོ་དང༌། །ནོར་རྒྱས་བུ་དང་པདྨ་རྣམས། །ཕྱོགས་སྐྱོང་མདོག་ཅན་སྦྲུལ་ཞགས་དང༌། །པདྨ་འཛིན་ཅིང་གདེངས་ཀ་ལྡན། །ཤིང་གི་ཡལ་ག་ལ་གནས་པའི་ཞིང་སྐྱོང་རྣམས་ཕྱོགས་སྐྱོང་སོ་སོའི་མདོག་དང་མཚུངས་ཤིང་སོ་སོའི་བཞོན་པའི་གདོང་པ་ཅན་གྲི་གུག་དང་ཐོད་པ་གཏོར་མས་གང་བ་འཛིན་པའོ། །སྤྲིན་ཆེན་པོ་བརྒྱད་ནི། སྒྲོག་བྱེད་སེར་པོ་ལྡོག་བྱེད་སྔོན་པོ། འཇིགས་བྱེད་དཀར་པོ། འཁོར་བྱེད་སེར་པོ། འཐུག་པོ་དཀར་པོ། འགེངས་བྱེད་དམར་པོ། ཆར་འབེབས་ནག་པོ། གཏུམ་པོ་ལྗང་གུའོ། །གཞན་ཡང་རི་བརྒྱད་མཆོད་རྟེན་བརྒྱད། ཆུ་བརྒྱད། དྲག་ཏུ་འབར་བའི་མེ་བརྒྱད་དང་བཅས་པ། བྱ་དང་གཅན་གཟན་སྣ་ཚོགས་འཐབ་པ་དང་འཁྲུགས་པ་དང་ང་རོ་འདོན་པ། གྲུབ་ཆེན་
རྫུ་འཕྲུལ་དང་ལྡན་པའི་སློབ་དཔོན་རྣམས་དང༌། འཇིགས་པ་དང་འཛེམ་པ་མེད་པའི་དཔའ་བོ་དང་རྣལ་འབྱོར་མ་ཅང་ཏེའུ་དང་ཁ་ཊྭཱཾ་ཐོགས་ཏེ་ཧ་ཧ་ཞེས་གར་བསྒྱུར་བ། རོལ་མོ་སྣ་ཚོགས་པའི་སྒྲ་དང༌། འདོད་ཆགས་ཀྱི་རྣམ་པར་རོལ་བ། མཚན་དང་ལྡན་པའི་བུ་མོ་རྣམས་གཅེར་བུ་སྐྲ་གྲོལ་བ། རྣམ་པར་གྲོལ་བ། རྣམ་པར་བརྒྱན་པ། གར་གྱི་རོལ་བ་སྣ་ཚོགས་པས་ཐོད་རྔའི་སྒྲ་དང༌། གླུ་དབྱངས་བྲོ་ཆ་དང་བཅས་པས་ལྷང་ལྷང་སོགས་སྒྲོག་པ་དང༌། ལ་ལར་འབྱུང་པོ། སྒྲོན་མེ་འབར་བའི་འཇུག་ངོགས་ནས། ལྕེ་སྤྱང་ཁུས་འདེབས་པ་དང༌། ཕག་དང་སེང་གེ་དང༌། སྟག་དང་ཁྱི་དང༌། ཝ་སྣ་ཚོགས་པས་གང་ཞིང༌། ཁྭ་དང༌། འུག་པ་དང༌། བྱ་རོག་དང༌། འོལ་བ་དང་མཆུ་རིང་ལ་སོགས་པས་ལང་ལོང་དུ་རྒྱུག་པ། སེང་གེའི་གདོང་ཅན་དང༌། སྟག་གི་གདོང་ཅན་དང༌། སྦྲུལ་བ་གླང་གི་མགོ་ཅན་དང༌། མགོ་གཉིས་པ་ལ་སོགས་པ་སྐྱི་གཡའ་བ། རོ་ཕྱེད་ཚིག་པ་དང༌། དུམ་བུ་དང༌། འཐོར་བ་དང༌། འགགས་ཏེ་ཤིང་ལ་དཔྱངས་པ་དང༌། ལྷུ་དུམ་དང་མགོ་བོ་དང༌། ཀེང་རུས་ཀྱིས་ཁྱབ་པས་ཡིད་འབྱུང་བར་བྱེད་པ། རོ་ལངས་དང་མགོ་མེད་རྣམས་གར་བྱེད་པ། གནོད་སྦྱིན་དང་སྲིན་པོ་དང་ཤ་ཟ་དང་འབྱུང་པོ་དང༌། མཁའ་འགྲོ་དང་མཁའ་འགྲོ་མ་རྣམས་གཡོ་བ་དང༌། འགྲེང་བ་དང༌། སྡོད་པ་དང༌། ཉལ་བ་དང༌། ཟ་བ་དང༌།
རྒྱུག་པ་ལ་སོགས་པ་སྣ་ཚོགས་པས་ངོ་མཚར་བསྐྱེད་པ། གྲུབ་པའི་རྫས་དང་མཆོད་རྫས་ཐམས་ཅད་ཀྱི་གང་བའི་དངོས་གྲུབ་འབྱུང་བའི་དུར་ཁྲོད། དེ་རྣམས་ཀྱིས་ཡོངས་སུ་བསྐོར་བའི་གཞལ་ཡས་ཁང་གི་ལྷ་སྣམ་ཤར་དཀར། ལྷོ་སེར། ནུབ་དམར། བྱང་ལྗང༌། དབུས་སྔོ་བའི་ལྟེ་བར་སྣ་ཚོགས་པདྨ་འདབ་མ་བརྒྱད་པ། ཕྱོགས་བཞི་དམར་བ། མེ་དང་རླུང་སེར་བ། བདེན་བྲལ་ལྗང་བ། དབང་ལྡན་སྔོ་བ། མཐའ་མ་རྡོ་རྗེ་ནག་པོའི་མུ་ཁྱུད་ཀྱིས་བསྐོར་བ། ལྟེ་བར་ཉི་མའི་གདན་ལ་བདུད་བཞིའི་ངོ་བོ། ཚངས་པ་སེར་པོ། དབང་པོ་དཀར་པོ། ཉེ་དབང་ལྗང་ཁུ། དྲག་པོ་ནག་པོ་རྣམས་གན་རྐྱལ་དུ་བཀྲམ་པ། འདབ་མ་བརྒྱད་ལ། ཤར་དུ་ཚངས་པ། ལྷོ་རུ་བརྒྱ་བྱིན། ནུབ་ཏུ་ཉེ་དབང༌། བྱང་དུ་དྲག་པོ། བྱང་ཤར་དུ་གཤིན་རྗེ་སྔོན་པོ། ཤར་ལྷོར་གནོད་སྦྱིན་སེར་པོ། ལྷོ་ནུབ་ཏུ་སྲིན་པོ་སྨུག་ནགནུབ་བྱང་དུ་ལྷ་མིན་ཐགས་བཟང་རིས་ལྗང་ཁུ་རྣམས་གན་རྐྱལ་དུ་གནས་པའི། སྙིང་གར་ཟླ་བའི་དཀྱིལ་འཁོར་རེ་རེ། སྒོ་བཞིར་ཉི་མའི་དཀྱིལ་འཁོར་ལ་ཡི་དྭགས་ཀྱི་གདན་རེ་རེའོ། །འདི་མན་ངག་སྟེ། གཞུང་ནས་གཙོ་བོ་ལ་འདུད་བཞིའི་སྟེང་དུ་ཉི་མའི་གདན་གསུངས་པ་ལྟར་བྱས་ཀྱང་རུང་ངོ༌། །དབུས་སུ་རང་སེམས་ཧཱུཾ་དང་ཨོཾ་ནག་པོ། དེའི་འོག་ཏུ་མཚན་བཟང་པོ་སུམ་ཅུ་རྩ་གཉིས་ཀྱི་ངོ་བོ་ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ།
ཨཾ་ཨཿ ཕྲག་གཉིས་ཞུ་བ་ལས་བྱུང་བའི་ཟླ་བའི་དཀྱིལ་འཁོར་མེ་ལོང་ལྟ་བུའི་ཡེ་ཤེས། དེའི་སྟེང་དུ་དཔེ་བྱད་བཟང་པོ་བརྒྱད་ཅུའི་ངོ་བོ། ཀ་ཁ་ག་གྷ་ང༌། ཙ་ཚ་ཛ་ཛྙ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། ཌ་དྷ་ད་དྷ་ལ་ཡ། ཕྲག་གཉིས་ཞུ་བ་ལས་བྱུང་བའི་ཉི་མའི་དཀྱིལ་འཁོར་མཉམ་པ་ཉིད་ཀྱི་ཡེ་ཤེས། དེ་གཉིས་ཀྱི་བར་དུ་ཡི་གེ་གཉིས་ཞུགས་ཏེ། ཧཱུཾ་ལས་རྡོ་རྗེ་ཧཱུཾ་གིས་མཚན་པ་དང་ཨཾ་ལས་གྲི་གུག་ཨཾ་གིས་མཚན་པར་གྱུར་པ་ནི་སོ་སོར་ཀུན་ཏུ་རྟོག་པའི་ཡེ་ཤེས་དེ་ལས་འོད་འཕྲོས་སེམས་ཅན་གྱི་དོན་བྱས། ཚུར་འདུས་ཐམས་ཅད་གཅིག་ཏུ་འདྲེས་པ་བྱ་བ་ནན་ཏན་གྱི་ཡེ་ཤེས། དེ་ལས་སྐུ་ཡོངས་སུ་རྫོགས་ཆོས་ཀྱི་དབྱིངས་ཀྱིས་ཡེ་ཤེས་ཀྱི་ངོ་བོ། བཅོམ་ལྡན་འདས་དགྱེས་པ་རྡོ་རྗེ་རྒྱུ་རྡོ་རྗེ་འཛིན་པ་སྐུ་མདོག་མཐིང་ནག །ཞལ་བརྒྱད་པ། སྤྱན་ཉི་ཤུ་རྩ་བཞི་ཕྱེ་བ། ཕྱག་བཅུ་དྲུག་པ། ཞབས་བཞི་པ། ཞལ་ནས་ཧཱུཾ་སྤྲོ་བ། ལྷ་དང་ལྷ་མིན་ཐམས་ཅད་བསྡིགས་པར་མཛད་པ། འཇིགས་པའང་འཇིགས་པ། དྲག་པོ་ཆེན་པོ་རྩ་བའི་ཞལ་ནག་པོ། གཡས་དཀར་བ་གཡོན་དམར་བ་སྟེང་ཞལ་དུ་བའི་མདོག་ཅན། ལྷག་མ་ཞལ་བཞིན་ནག་པ། དབུ་སྐྲ་སེར་པོ་འབར་ཞིངའཁྱིལ་བ། སྤྱི་བོར་སྣ་ཚོགས་རྡོ་རྗེས་མཚན་པ། ཐོད་སྐམ་ལྔ་ལྔའི་དབུ་བརྒྱན་ཅན་སྨིན་མ་ཡོན་པོ་དང་བཅས་ཤིང༌།
ཁྲོ་གཉེར་ལྡན་པ། མཆེ་བ་གཙིགས་པ། བནྡྷུ་ལྟར་དམར་པའི་སྤྱན་གསུམ་གསུམ་དང་ལྡན་པ། ཕྱག་བཅུ་དྲུག་གི་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་ཅིང༌། གཡས་ཀྱི་གཉིས་པ་ན་རལ་གྲི། གསུམ་པ་ན་མདའ། བཞི་པ་ན་འཁོར་ལོ། ལྔ་པ་ན་བཤོར། དྲུག་པ་ན་དབྱུག་པ། བདུན་པ་ན་རྩེ་གསུམ། བརྒྱད་པ་ན་ལྕགས་ཀྱུ། གཡོན་གྱི་གཉིས་པ་ན་པདྨ། གསུམ་པ་ན་གཞུ། བཞི་པ་ན་ཁ་ཊྭཱཾ་ག །ལྔ་པ་ན་ཐོད་པ། དྲུག་པ་ནི་རིན་པོ་ཆེ། བདུན་པ་ན་སྡིགས་འཛུབ། བརྒྱད་པ་ན་ཞགས་པ་བསྣམས་པ། སྐུ་ལ་རུས་པའི་ཕྱག་རྒྱ་དྲུག་དང་ལྡན་པ། ཁྲག་འཛག་མི་མགོ་ལྔ་བཅུའི་དོ་ཤལ་ཅན། གཅེར་བུ་ཞབས་མདུན་མ་གཉིས་གཡས་བརྐྱང་གི་སྟབས་དང༌། རྒྱབ་མ་གཉིས་སྐྱིལ་ཀྲུང་ཕྱེད་པའི་སྟབས་ཀྱིས་ཚངས་པ་དང༌། དབང་པོ་དང༌། དྲག་པོ་དང༌། ཉེ་དབང་རྣམས་མཉམ་པར་མནན། སྒེག་པ་དཔའ་བ་མི་སྡུག་པ། །རྒོད་དང་དྲག་ཤུལ་འཇིགས་སུ་རུང༌། །སྙིང་རྗེ་རྔམ་དང་ཞི་བ་སྟེ། །གར་དགུ་རོ་དང་ལྡན་པ་ཉིད། །དེ་ལ་འཁྱུད་པའི་བདག་མེད་མ་ནག་པོ་དྲག་མོ་ཆེན་པོ་ལྷ་མོའི་ཆ་བྱད་རྫོགས་པ། ཕྱག་བཞིའི་དངཔོ་གཉིས་གྲི་གུག་དང་ཐོད་པ་འཛིན་པ། འོག་མ་གཉིས་ཀྱིས་མདའ་དང་གཞུ་བསྣམས་པ། གཅེར་བུ་ཕྱག་རྒྱ་ལྔ་དང་མགོ་བོ་སྐམ་པོ་ལྔའི་ཕྲེང་བ་ཅན། གཡོན་
བརྐྱང་གི་སྟབས་ཀྱིས་རྗེས་སུ་ཆགས་པ། ལྷག་མ་བཅོམ་ལྡན་འདས་དང་མཚུངས་པ། གཉིས་ཀའང་མེ་དཔུང་འབར་བའི་དབུས་ན་བཞུགས་ཤིང་ནམ་མཁའི་མཐའ་ཀླས་པར་འོད་ཀྱིས་ཁྱབ་པར་མཛད་པའོ། །ཡང་ན་ཞབས་མདུན་མ་གར་སྟབས། རྒྱབ་མ་གཡས་བརྐྱང་པའོ། །ཡབ་ཀྱི་གསང་གནས་མི་དམིགས་པའི་ངང་ལས་ཧཱུཾ་ལས་རྡོ་རྗེ་སྔོན་པོ་རྩེ་ལྔ་པ་ལྟེ་བ་ལ་ཧཱུཾ་གིས་མཚན་པ། ཨོཾ་བཛྲ་མཧཱ་དྭེ་ཥ་ཙ་ཏུར་ཨཱ་ནནྟ་དཱ་ཡ་ཀ་ཁ་ཁ་མུ་ཁ་ཨེ་ཀ་ར་སོ་ན་ཐ་ཧཱུཾ་ཧཱུཾ་ཧཱུཾ་ཀཱརྻཾ་ཀུ་རུ་ཥྭ་མེ། ཡུམ་གྱི་མཁའ་ཨ་ལས་པདྨ་དམར་པོ་འདབ་མ་བརྒྱད་པ་ལྟེ་བ་ཨཾ་གིས་མཚན་པ། ཨོཾ་པདྨ་སུ་ཁ་དྷ་ར་མཧཱ་རཱ་ག་སུ་ཁ་ད་ད་ཙ་ཏུར་ཨ་ནནྟ་བྷཱ་ག་བི་ཤྭ་ཧཱུཾ་ཧཱུཾ་ཧཱུཾ་ཀཱརྻཾ་ཀུ་རུ་ཥྭ་མེ། ཡབ་ཡུམ་སྙོམས་པར་ཞུགས་པའི་དགའ་བའི་སྒྲས་ཕྱོགས་བཅུའི་སངས་རྒྱས་སྲས་དང་བཅས་པ་སྤྱན་དྲངས་ཡབ་ཀྱི་ཞལ་ནས་ཞུགས་ནས་ཐུགས་ཀར་རྗེས་སུ་ཆགས་པའི་མེས་ཞུ། རྡོ་རྗེའི་ལམ་ནས་ཡུམ་གྱི་པདྨར་བབས་པས་ཐིག་ལེ་ཆ་བཅུ་གཉིས་སུ་གྱུར། མཁའ་ནང་ནས་ཕྱིར་སྤྲོས་ཏེ། སོ་སོའི་གདན་ལ་འཁོད་པ་ཉི་ཟླ་ཁ་སྦྱོར་བཅུ་གཉིས་སུ་གྱུར། དེ་རྣམས་ཀྱི་བར་དུ་གཾ་ཙཾ་བཾ་གྷཾ་པཾ་ཤཾ་ལཾ་ཊཾ་ཛཿཧཱུཾ་བཾ་ཧོཿ རྣམས་སུ་གྱུར། དེ་རྣམས་ཡོངས་སུ་གྱུར་པ་ལས་གྲི་གུག་དང་ཅང་ཏེའུ་རལ་གྲི་དང་ཐོད་པ་རིན་པོ་ཆེ་དང་རྡོ་རྗེ་རླུང་རས་དང་ཐོད་པ་ལྕགས་ཀྱུ་དང༌།
ཞགས་པ་ལྕགས་སྒྲོག་དང་དྲིལ་བུ་རྣམས་ས་བོན་དེ་རྣམས་ཀྱིས་མཚན་པ། ཟླ་ཉི་སོ་སོ་དང་གཅིག་ཏུ་འདྲེས་པ་ཡོངས་སུ་གྱུར་པ་ལས། ཤར་དུ་གཽ་རཱི་ནག་མོ་གཡས་གཉིས་གྲི་གུག་དང་མདའ། གཡོན་གཉིས་ཐོད་པ་དང་གཞུ་འཛིན་པ། ལྷོར་ཙཽ་རཱི་དམར་མོ་གཡས་གཉིས་ཌཱ་མ་ རུ་དང་འཁོར་ལོ། གཡོན 
་གཉིས་ཐོད་པ་དང་ལྕགས་ཀྱུ་འཛིན་པ། ནུབ་ཏུ་བཻ་ཏ་ལི་སེར་མོ་གཡས་གཉིས་རལ་གྲི་དང་ཆང་བུ། གཡོན་གཉིས་དུང་ཆོས་དང་ཐོད་པ་འཛིན་པ། བྱང་དུ་གྷསྨ་རི་ལྗང་གུ་གཡས་གཉིས་ཐོད་ཞགས་དང་སྐྱབས་སྦྱིན། གཡོན་གཉིས་དགྲ་སྟྭ་དང་མེ་ཐབ་འཛིན་པ། བྱང་ཤར་དུ་པུཀྐ་སཱི་སྔོན་པོ་གཡས་གཉིས་རྡོ་རྗེ་དང་མཆོག་སྦྱན། །གཡོན་གཉིས་དཔག་བསམ་ཤིང་གི་ལྕུག་མ་དང་ཐོད་པ་འཛིན་པ། ཤར་ལྷོར་ཤཱ་བཱ་རི་དཀར་མོ་གཡས་གཉིས་རྡོ་རྗེ་དང་ཁ་ཊྭཱཾ་ག །གཡོན་གཉིས་ཐོད་པ་དང་ཞགས་པ་འཛིན་པ། ལྷོ་ནུབ་ཏུ་ཙནྡྲ་ལཱི་སྔོན་པོ་གཡས་གཉིས་རླུང་རས་དང་ཐོད་པ། གཡོན་གཉིས་བ་དན་དང་པདྨ་འཛིན་པ། ནུབ་བྱང་དུ་ཌོཾ་བི་ནི་སྣ་ཚོགས་མདོག་གཡས་གཉིས་ཐོད་པ་དང་བཤོར། གཡོན་གཉིས་མདུང་རྩེ་གསུམ་དང་སའི་དཀྱིལ་འཁོར་འཛིན་པ། ཤར་སྒོར་རྟ་གདོང་མ་ནག་མོ་ཞལ་བཞི་ནག་སེར་དམར་བའི་སྟེང་ན་རྟ་གདོང་ལྗང་ཁུ་རྩ་ཕྱག་གཉིས་ཀྱིས་གླིང་བུ། ཐ་མ་གཉིས་ཀྱིས་རྡོ་རྗེ་དང་ལྕགས་ཀྱུ་འཛིན་པ། ལྷོར་སྒོར་ཕག་གདོང་མ་སེར་མོ་ཞལ་བཞི་
སེར་སྔོ་དཀར་བའི་སྟེང་ན་ཕག་གདོང་དམར་མོ་རྩ་ཕྱག་གཉིས་ཀྱིས་པི་ཝང་ཐ་མ་གཉིས་ཀྱིས་རིན་པོ་ཆེ་དང་ཞགས་པ་འཛིན་པ་ནུབ་སྒོར་ཁྱི་གདོང་མ་དམར་མོ་ཞལ་བཞི་དམར་སྔོ་དཀར་བའི་སྟེང་ན་ཁྱི་གདོང་སེར་མོ་རྩ་ཕྱག་གཉིས་ཀྱིས་རྔ་བོ་ཆེ། ཐ་མ་གཉིས་ཀྱིས་པདྨ་དང་ལྕགས་སྒྲོག་འཛིན་པ། བྱང་སྒོར་སེང་གདོང་མ་ལྗང་གུ་ཞལ་བཞི་ལྗང་ནག་དམར་བའི་སྟེང་ན་སེང་གདོང་དཀར་མོ་རྩ་ཕྱག་གཉིས་ཀྱིས་རྫ་རྔ། ཐ་མ་གཉིས་ཀྱི་རལ་གྲི་དང་དྲིལ་བུ་འཛིན་པ། ལྷ་མོ་ཐམས་ཅད་ཀྱང་སྤྱན་གསུམ་གསུམ་དང་ལྡན་ཞིང༌། དབུ་སྐྲ་དམར་སེར་གྱེན་དུ་བརྫེས་པ། ཐོད་སྐམ་ལྔ་ལྔས་དབུ་བརྒྱན་ཅིང༌། སྐམ་པོ་ལྔ་བཅུའི་ཕྲེང་བ་དང༌། རུས་པའི་ཕྱག་རྒྱ་ལྔས་བརྒྱན་པ། གཡོན་བརྐྱང་བའི་སྟབས་ཀྱིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པ། སྒོ་མ་རྣམས་ནི་སྟག་གི་ལྤགས་པའི་ཤམ་ཐབས་ཅན། རྩ་ཞལ་ཡང་སྟེང་ཞལ་དང་མཚུངས་པའོ། །དེ་ནས། གཙོ་བོའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། གཙུག་ཏོར་དང་ལྟཻ་བར་ཧོཿ དམར་པོ་རེས་མཚན་པར་གྱུར། ཡབ་ཡུམ་སྙོམས་པར་ཞུགས་རྗེས་སུ་ཆགས་པའི་མེས་འོད་དུ་ཞུ་ནས་བདུད་བཞིའི་སྟེང་དུ། དེ་བ་ཆེན་པོའི་ངོ་བོ་རྡོ་རྗེ་སེམས་དཔའི་རང་བཞིན་ཐིག་ལེ་གཉིས་སུ་གྱུར། དེ་ནས་ཚད་མེད་པ་བཞིའི་ངོ་བོར་གྱུར་པའི་ལྷ་མོ་བཞིའི་སྙན་
པའི་དབྱངས་ཀྱིས་འགྲོ་བའི་དོན་ལ་བསྐུལ་བ་ནི། པུཀྐ་སིས། རྗེ་བཙུན་སྙིང་རྗེའི་ཡིད་བཞིན་བཞེངས་ཤིག །པུཀྐ་སཱི་ནི་བདག་ལ་སྐྱོབས། །སྟོང་པའི་རང་བཞིན་ཉིད་སྤོངས་ལ། །བདག་ལ་བདེ་ཆེན་སྦྱོར་བཞེད་མཛོད། །ཤ་བ་རཱིས། ཁྱོད་མེད་ན་ནི་བདག་འགུམ་པས། །དགྱེས་མཛད་རྡོ་རྗེ་ཁྱོད་བཞེངས་ཤིག །སྟོང་པའི་རང་བཞིན་ཉིད་སྤོངས་ལ། །རི་ཁྲོད་མ་འབྲས་འགྲུབ་པར་མཛོད། །ཙནྜཱ་ལིས། དགའ་བརྩེ་འཇིག་རྟེན་དོན་གཉེར་བ། །སྟོང་པ་ཉིད་ལ་བཞུགས་སམ་ཅི། ཁྱོད་མེད་ཕྱོགས་ནི་མི་འཚལ་བས། །གདོལ་བ་མོ་བདག་ཞུ་བ་བགྱིད། །ཌོཾ་བི་ནིས། བདག་གིས་ཉིད་ཀྱི་ཐུགས་འཆལ་གྱི། །མིག་འཕྲུལ་མངའ་བ་ཁྱོད་བཞེངས་ཤིག །གཡུང་མོ་བདག་ཉིད་དྲན་ཉམས་པས། །སྙིང་རྗེ་རྒྱུན་ཆད་མ་མཛད་ཅིག །ཅེས་བསྐུལ་བས། ཐིག་ལེ་གཉིས་པོ་གཅིག་ཏུ་འདྲེས་ཏེ་ཉི་ཟླ་ཁ་སྦྱོར་གྱི་དབུས་སུ་ཧཱུཾ་དང་ཨཾ་ལས་རྡོ་རྗེ་དང་གྲི་གུག་ཧཱུཾ་དང་ཨཾ་གིས་མཚན་པ། དེ་ཡོངས་སུ་གྱུར་པ་ལས་འབྲས་བུ་རྡོ་རྗེ་འཛིན་པ་དགྱེས་མཛད་རྡོ་རྗེ་སྐུ་མདོག་མཐིང་ནག་སོགས་རྒྱུ་རྡོ་རྗེ་འཛིན་པ་ཡུམ་བཅས་ལྟར་གསལ་བཏབ། མཚོན་ཆ་ཅན་གྱི་དཀྱིལ་འཁོར་ཁོ་ན་བསྒོམ་པར་འདོད་ན་འོག་ནས་འབྱུང་བའི་ཡེ་ཤེས་པ་སྤྱན་འདྲེན་ཡན་ཆད་བྱའོ། །རྒྱུད་སྡེ་ལྔ་བསྒོམ་པར་འདོད་ན། དེ་ལྟར་བདག་ཉིད་དགྱེས་མཛད་དུ་གྱུར་པའི་སྐུ་ལ་རྩ་གསུམ་འཁོར་ལོ་བཞི་ཡོངས་སུ་རྫོགས་པ། སྙིང་ག་ཆོས་ཀྱི་འཁོར་
ལོ་སྔོན་པོ་རྩིབས་བརྒྱད་པའི་སྟེང་དུ་གཞལ་ཡས་ཁང་པདྨ་འདབ་བརྒྱད་དང་བཅས་པའི་ལྟེ་བ་ལ་ཉི་མའི་སྟེང་དུ་བདུད་བཞིའི་གདན། འདབ་མ་རྣམས་ལ་ཤར་དུ་ཚངས་པ་སེར་པོ། ལྷོར་དབང་པོ་དཀར་པོ། ནུབ་ཏུ་ཉེ་དབང་ལྗང་ཁུ། བྱང་དུ་དྲག་པོ་ནག་པོ། བྱང་ཤར་དུ་གཤིན་རྗེ་སྔོན་པོ། ཤར་ལྷོར་ནོར་བདག་སེར་པོ། ལྷོ་ནུབ་ཏུ་སྲིན་པོ་དམར་པོ། ནུབ་བྱང་དུ་ཐགས་བཟང་རིས་ལྗང་ཁུ། དབུས་ཀྱི་གདན་གྱི་སྟེང་དུ་བདག་ཉིད་བཅོམ་ལྡན་འདས་དགྱེས་མཛད་རྡོ་རྗེ་སྐུ་མདོག་ནག་པོ། དྲག་པོ་ཆེན་པོ་རྩ་བའི་ཞལ་ནག་པོ་གཡས་དཀར་གཡོན་དམར་སྟེང་ཞལ་དུ་བའི་མདོག་ཅན། ལྷག་མ་བཞི་ནག་པོ། དབུ་སྐྲ་སེར་པོ་འབར་ཞིང་འཁྱིལ་བ། སྤྱི་བོར་སྣ་ཚོགས་རྡོ་རྗེས་མཚན་པ། ཐོད་སྐམ་ལྔ་ལྔའི་དབུ་རྒྱན་ཅན་སྨིན་མ་ཡོན་པོ་དང་བཅས་ཤིང༌། ཁྲོ་གཉེར་ལྡན་པ། མཆེ་བ་གཙིགས་པ། བནྡྷུ་ལྟར་དམར་བའི་སྤྱན་གསུམ་གསུམ་དང་ལྡན་པ། ཕྱག་བཅུ་དྲུག་གིས་ཐོད་པ་བཅུ་དྲུག་བཟུང་བའི་གཡས་པ་བརྒྱད་ན། གླང་པོ་ཆེ་རྟ། བོང་བུ་གླང༌། རྔ་མོ། ཁྱི། མི། མ་ཧེ་རྣམས་སོ། །གཡོན་པ་བརྒྱད་ན། སའི་ལྷ་མོ། ཆུ་ལྷ། མེ་ལྷ། རླུང་ལྷ། ཟླ་བ། ཉི་མ། གཤིན་རྗེ། གནོད་སྦྱིན་རྣམས་སོ། །སྐུ་ལ་རུས་པའི་ཕྱག་རྒྱ་དྲུག་དང་ལྡན་པ། ཁྲག་འཛག་མི་མགོ་ལྔ་བཅུའི་དོ་ཤལ་ཅན། གཅེར་བུ་ཞབས་མདུན་མ་གཉིས་གཡས་བརྐྱང་གི་སྟབས་དང༌། རྒྱབ་མ་གཉིས་སྐྱིལ་ཀྲུང་ཕྱེད་པའི་
སྟབས་ཀྱི་ཚངས་པ་དང༌། དབང་པོ་དང༌། དྲག་པོ་དང༌། ཉེ་དབང་རྣམས་མཉམ་པར་མནན་པ། གར་དགུའི་ཉམས་ཀྱིས་རོལ་པ། དེ་ལ་འཁྱུད་པའི་བདག་མེད་མ་ནག་མོ། དྲག་མོ་ཆེན་པོ་ལྷ་མོའི་ཆ་བྱད་རྫོགས་པ། ཕྱག་གཉིས་གྲི་གུག་དང་ཐོད་པ་འཛིན་པ། གཅེར་བུ་ཕྱག་རྒྱ་ལྔ་དང༌། མགོ་བོ་སྐམ་པོའི་ཕྲེང་བ་ཅན། གཡོན་བརྐྱང་གི་སྟབས་ཀྱིས་རྗེས་སུ་ཆགས་པ། ལྷག་མ་བཅོམ་ལྡན་འདས་དང་མཚུངས་ཤིང༌། གཉིས་ཀའང་མེ་དཔུང་འབར་བའི་དབུས་ན་བཞུགས་པའོ། །ཤར་དུ་གཽ་རཱི་ནག་མོ་གཡས་གྲི་གུག་དང་གཡོན་ཉ་རོ་ཧི་ཏ་འཛིན་པ། ལྷོར་ཆོམ་རྐུན་མ་དམར་མོ་གཡས་ཌཱ་མ་
རུ་གཡོན ་ཕག་པ་འཛིན་པ། ནུབ་ཏུ་རོ་ལངས་མ་སེར་མོ་གཡས་རུས་སྦལ་གཡོན་ཐོད་པ་འཛིན་པ། བྱང་དུ་ཟ་ནུས་མ་ལྗང་གུ་གཡས་སྦྲུལ་གཡོན་ཐོད་པ་འཛིན་པ། བྱང་ཤར་དུ་སྦོས་མོ་སྔོན་མོ་གཡས་སེང་གེ་གཡོན་དགྲ་སྟ་འཛིན་པ། ཤར་ལྷོར་རི་ཁྲོད་མ་དཀར་མོ་གཡས་དགེ་སློང་གཡོན་གསིལ་བྱེད་འཛིན་པ། ལྷོ་ནུབ་ཏུ་གདོལ་བ་མོ་སྔོན་པོ་གཡས་འཁོར་ལོ་གཡོན་ཐོད་པ་འཛིན་པ། ནུབ་བྱང་དུ་གཡུང་མོ་བྱ་ཀོ་ལིའི་མགྲིན་པ་ལྟར་ཁ་དོག་སྣ་ཚོགས་པ་གཡས་རྡོ་རྗེ་གཡོན་སྡིགས་མཛུབ་མཛད་པ། ཐམས་ཅད་ཀྱང་དབུ་སྐྲ་སེར་པོ་གྱེན་དུ་བརྫེས་པ། སྤྱན་དམར་པོ་གསུམ་གསུམ་དང་ལྡན་པ། གཅེར་བུ་ཕྱག་རྒྱ་ལྔ་ལྡན། གཡོན་བརྐྱང་བའི་
སྐྱིལ་ཀྲུང་ཕྱེད་པའི་གར་གྱིས་མེ་དཔུང་འབར་བའི་དབུས་ན་བཞུགས་པའོ། །སྤྱི་བོ་བདེ་བ་ཆེན་པོའི་འཁོར་ལོ་དཀར་པོ་འདབ་མ་སོ་གཉིས་པའི་སྟེང་དུ་གཞལ་ཡས་ཁང་དབུས་ལིང་ཚེ་དགུ་པ་སྣམ་བུ་རིམ་པ་གཉིས་དང་བཅས་པ། དབུས་དང་ཁྲོ་བཅུའི་གནས་སུ་ཉི་གདན། ཤར་ཕྱོགས་པ་རྣམས་ལ་ཟླ་བ། མཱ་མ་ཀི་ལ་རྡོ་རྗེ། གཞན་ལྷོ་ཕྱོགས་པ་རྣམས་ལ་རིན་པོ་ཆེ། ནུབ་ཕྱོགས་པ་རྣམས་ལ་པདྨ་དམར་པོ། བྱང་ཕྱོགས་པ་རྣམས་ལ་སྣ་ཚོགས་རྡོ་རྗེའི་གདན། དེ་རྣམས་ཀྱི་སྟེང་དུ་དགྱེས་མཛད་ཀྱི་སྐུའི་སྣང་བ་ལས་གྲུབ་པའི་ལྷ་སུམ་ཅུ་རྩ་གཉིས་ནི། དབུས་སུ་མི་བསྐྱོད་པ་སྔོན་པོ་སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་པ་རྣམས་ཀྱིས་རྡོ་རྗེ་འཁོར་ལོ་པདྨ། གཡོན་པ་རྣམས་ཀྱིས་དྲིལ་བུ་རིན་ཆེན་རལ་གྲི་འཛིན་པ། རྡོ་རྗེའི་སྐྱིལ་མོ་ཀྲུང་གིས་བཞུགས་པ། དར་དང་རིན་པོ་ཆེས་བརྒྱན་པ། ཕྱག་དང་པོ་གཉིས་འཁྱུད་རྒྱས་ཡུམ་རེག་བྱ་རྡོ་རྗེ་མ་རང་དང་འདྲ་བ། པདྨའི་སྐྱིལ་ཀྲུང་གིས་བཞུགས་པ། དར་དང་རིན་པོ་ཆེས་བརྒྱན་པ། ཕྱག་དང་པོ་གཉིས་འཁྱུད་རྒྱས་ཡུམ་རེག་བྱ་རྡོ་རྗེ་མ་རང་དང་འདྲ་བ། པདྨའི་སྐྱིལ་ཀྲུང་གིས་བཞུགས་པ་དང་མཉམ་པར་སྦྱོར་བ། རེ་མིག་རྣམས་སུ་ཤར་དུ་རྣམ་སྣང་དཀར་པོ་དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་པ་རྣམས་ཀྱིས་འཁོར་ལོ་རྡོ་རྗེ་པད་དཀར། གཡོན་པ་རྣམས་ཀྱིས་དྲིལ་བུ་ནོར་བུ་རལ་གྲི་འཛིན་པ། ལྷོར་རིན་འབྱུང་སེར་པོ་སེར་ནག་དཀར་བའི་ཞལ་
གསུམ་ཕྱག་དྲུག་གི་གཡས་པ་རྣམས་ཀྱི་ནོར་བུ་རྡོ་རྗེ་འཁོར་ལོ། གཡོན་པ་རྣམས་ཀྱིས་དྲིལ་བུ་པད་སེར་རལ་གྲི་འཛིན་པ། ནུབ་ཏུ་འོད་དཔག་མེད་དམར་པོ་དམར་ནག་དཀར་བའི་ཞལ་གསུམ་ཕྱག་དྲུག་གི་གཡོན་གྱི་དང་པོ་དྲིལ་བུ་དཀུར་བསྟེན་པས་པདྨ་དམར་པོའི་སྡོང་བུ་འཛིན་པ་གཡས་ཀྱི་དང་པོས་ཁ་འབྱེད་པ། ལྷག་མ་གཡས་གཉིས་ཀྱི་རྡོ་རྗེ་དང་འཁོར་ལོ་གཡོན་གཉིས་ཀྱིས་རིན་པོ་ཆེ་དང་རལ་གྲི་འཛིན་པ། བྱང་དུ་དོན་གྲུབ་ལྗང་ཁུ་ལྗང་ནག་དཀར་བའི་ཞལ་གསུམ་ཕྱག་དྲུག་གི་གཡས་པ་རྣམས་ཀྱིས་རལ་གྲི་སྣ་ཚོགས་རྡོ་རྗེ་འཁོར་ལོ། གཡོན་པ་རྣམས་ཀྱིས་དྲིལ་བུ་པད་ལྗང་ནོར་བུ་འཛིན་པ། ཤར་ལྷོར་སྤྱན་མ་དཀར་མོ་དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་པ་རྣམས་ཀྱིས་འཁོར་ལོ་རྡོ་རྗེ་ཨུཏྤལ་དཀར་པོ། གཡོན་པ་རྣམས་ཀྱིས་དྲིལ་བུ་རིན་ཆེན་རལ་གྲི་འཛིན་པ། ལྷོ་ནུབ་ཏུ་མཱ་མ་ཀི་སྔོན་མོ་སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་པ་རྣམས་ཀྱིས་རྡོ་རྗེ་འཁོར་ལོ་ཨཏྤལ་སྔོ་དམར་གཡོན་པ་རྣམས་ཀྱིས་དྲིལ་བུ་རིན་ཆེན་རལ་གྲི་འཛིན་པ། ནུབ་བྱང་དུ་གོས་དཀར་མོ་དམར་མོ་དམར་ནག་དཀར་བའི་ཞལ་གསུམ་ཕྱག་དྲུག་གི་གཡོན་གྱི་དང་པོས་དྲིལ་བུ་དཀུར་བསྟེན་པས་ཨུཏྤལ་དམར་པོའི་སྡོང་བུ་འཛིན་པ་གཡས་ཀྱི་དང་པོས་ཁ་འབྱེད་པ། ལྷག་མ་གཡས་གཉིས་ཀྱིས་རྡོ་རྗེ་དང་འཁོར་ལོ། གཡོན་གཉིས་ཀྱིས་རིན་པོ་ཆེ་དང་
རལ་གྲི་འཛིན་པ། བྱང་ཤར་དུ་སྒྲོལ་མ་ལྗང་ཁུ་ལྗང་ནག་དཀར་བའི་ཞལ་གསུམ། ཕྱག་དྲུག་གི་གཡས་པ་རྣམས་ཀྱིས་སྣ་ཚོགས་རྡོ་རྗེ་འཁོར་ལོ་ཨུཏྤལ་སྔོན་པོ་རྡོ་རྗེས་མཚན་པ། གཡོན་པ་རྣམས་ཀྱིས་དྲིལ་བུ་རིན་ཆེན་རལ་གྲི་འཛིན་པ། རིམ་པ་གཉིས་པའི་ཤར་ལྷོར་གཟུགས་རྡོ་རྗེ་མ་དཀར་མོ་སངས་རྒྱས་སྤྱན་མ་དང་འདྲ་བ་ལས། ཕྱག་དང་པོ་གཉིས་ཀྱིས་མེ་ལོང་དམར་པོ་འཛིན་པ། ལྷོ་ནུབ་ཏུ་སྒྲ་རྡོ་རྗེ་མ་སྔོན་མོ་མཱ་མ་ཀཱི་དང་འདྲ་བ་ལས། ཕྱག་དང་པོ་གཉིས་ཀྱིས་པི་ཝང་སྔོན་པོ་འཛིན་པ། ནུབ་བྱང་དུ་དྲི་རྡོ་རྗེ་མ་དམར་མོ་འོད་དཔག་མེད་དང་འདྲ་བ་ལས། ཕྱག་དང་པོ་གཉིས་ཀྱིས་དྲིའི་དུང་ཆོས་འཛིན་པ། བྱང་ཤར་དུ་རྡོ་རྗེ་མ་ལྗང་གུ་སྒྲོལ་མ་དང་འདྲ་བ་ལས། ཕྱག་དང་པོ་གཉིས་ཀྱིས་རོ་དྲུག་གིས་གང་བའི་སྣོད་འཛིན་པ། རིམ་པ་གསུམ་པའི་ལྷ་སྣམ་ལ། ཤར་སྒོའི་གཡས་སུ་བྱམས་པ་རྣམ་སྣང་དང་འདྲ་བ་ལས། གཡས་ཀྱི་དང་པོས་ཀླུ་ཤིང་གི་ཡལ་ག་མེ་ཏོག་དང་བཅས་པ་འཁོར་ལོས་མཚན་པ་འཛིན་པ། ཤར་སྒོའི་གཡོན་དུ་སའི་སྙིང་པོ་རྣམ་སྣང་དང་འདྲ་བ། ལྷོ་སྒོའི་གཡས་སུ་ཕྱག་ན་རྡོ་རྗེ་དང༌། གཡོན་དུ་ནམ་མཁའི་སྙིང་པོ་གཉིས་ཀའང་རིན་ཆེན་འབྱུང་ལྡན་ལྟ་བུ། ནུབ་སྒོའི་གཡས་སུ་འཇིག་རྟེན་དབང་ཕྱུག་དང༌། གཡོན་དུ་འཇམ་དཔལ་འོད་དཔག་མེད་དང་འདྲ་བ། བྱང་སྒོའི་གཡས་སུ་སྒྲིབ་
པ་རྣམ་སེལ་དང༌། གཡོན་དུ་ཀུན་ཏུ་བཟང་པོ་དོན་གྲུབ་ལྟ་བུ། ལྷ་ཡབ་རྣམས་ཐམས་ཅད་རལ་བའི་ཐོར་ཚུགས་དང་མཚན་དང་དཔེ་བྱད་རྫོགས་པ། ཡུམ་རྣམས་དབུ་སྐྲ་ཕྱེད་བཅིངས་སུ་བྱས་པ། སྒེག་ཅིང་འཛུམ་བག་དང་ལྡན་པ། ཟུར་གྱིས་ལྟ་བ་ལ་སོགས་པའི་རྣམ་འགྱུར་གྱིས་མཛེས་པ། འདོད་པའི་ཡོན་ཏན་ལྔའི་དགའ་བས་རོལ་བ། དེ་བཞིན་གཤེགས་པ་རྣམས་རྡོ་རྗེའི་སྐྱིལ་ཀྲུང་དང༌། གཞན་རྣམས་སེམས་དཔའི་སྐྱིལ་ཀྲུང་གིས་བཞུགས་པ། ཐམས་ཅད་དར་གྱི་ན་བཟའ་དང་རིན་པོ་ཆེས་བརྒྱན་པའོ། །ཤར་སྒཽར་གཤིན་རྗེ་མཐར་བྱེད་ནག་པོ་ནག་དཀར་དམར་བའི་ཞལ་གསུམ། ཕྱག་དྲུག་གིས་གཡས་པ་རྣམས་ཀྱིས་ཐོ་བ་འཁོར་ལོ་རྡོ་རྗེ། གཡོན་ཐུགས་ཀར་ཞགས་པ་དང་བཅས་པའི་སྡིགས་མཛུབ་དྲིལ་བུ་དགྲ་སྟ་འཛིན་པ། ལྷོ་སྒོར་ཤེས་རབ་འཐར་བྱེད་དཀར་པོ་དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་པ་རྣམས་ཀྱིས་རྡོ་རྗེ་དབྱུག་པ་རལ་གྲི། གཡོན་ཐུགས་ཀར་ཞགས་པ་དང་བཅས་པའི་སྡིགས་མཛུབ་དྲིལ་བུ་དགྲ་སྟ་འཛིན་པ། ནུབ་སྒོར་རྟ་མགྲིན་དམར་པོ་དམར་ནག་དཀར་བའི་ཞལ་གསུམ། ཕྱག་དྲུག་གི་གཡས་པ་རྣམས་ཀྱིས་པདྨ་རལ་གྲི་གཏུན་ཤིང༌། གཡོན་སྙེམས་པ་དང་བཅས་པའི་དྲིལ་བུ་དགྲ་སྟ་ཞགས་པ་འཛིན་པ། བྱང་སྒོར་བགེགས་མཐར་བྱེད་ལྗང་གུ་ལྗང་ནག་དཀར་བའི་ཞལ་གསུམ། ཕྱག་དྲུག་གི་གཡས་པ་རྣམས་ཀྱི་སྣ་ཚོགས་རྡོ་རྗེ་འཁོར་ལོ་གཏུན་ཤིང༌། གཡོན་ཐུགས་ཀར་ཞགས་པ་དང་བཅས་པའི་སྡིགས་མཛུབ་དྲིལ་བུ་དགྲ་སྟ་འཛིན་པ། ཤར་ལྷོའི་གྲྭར་མི་གཡོ་བ་ནག་པོ་མི་བསྐྱོད་པའི་དབུ་རྒྱན་ཅན་ནག་དཀར་དམར་བའི་ཞལ་གསུམ་
ཕྱག་དྲུག་གི་གཡས་པ་རྣམས་ཀྱིས་རལ་གྲི་རྡོ་རྗེ་འཁོར་ལོ། །གཡོན་སྡིགས་མཛུབ་དགྲ་སྟ་ཞགས་པ། ལྷོ་ནུབ་ཀྱི་གྲར་འདོད་རྒྱལ་སྔོན་པོ་རིན་འབྱུང་གི་དབུ་རྒྱན་ཅན། སྔོ་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཧཱུཾ་མཛད་ཀྱི་ཕྱག་རྒྱ་ཅན། ལྷག་མ་གཡས་རྡོ་རྗེ་དང་རལ་གྲི། གཡོན་ཞགས་པ་དང་ལྕགས་ཀྱུ། ནུབ་བྱང་གི་གྲར་དབྱུག་སྔོན་ཅན་སྔོན་པོ་འོད་དཔག་མེད་ཀྱི་དབུ་རྒྱན་ཅན། སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་པ་རྣམས་ཀྱིས་རྡོ་རྗེའི་མཚན་པའི་དབྱུག་པ་སྔོན་པོ་རལ་གྲི་འཁོར་ལོ། གཡོན་ཐུགས་ཀར་ཞགས་པ་དང་བཅས་པའི་སྡིགས་མཛུབ་པདྨ་དགྲ་སྟ། བྱང་ཤར་གྱི་གྲྭར་སྟོབས་པོ་ཆེ་སྔོན་པོ་དོན་འགྲུབ་ཀྱི་དབུ་རྒྱན་ཅན། ནག་དཀར་དམར་བའི་ཞལ་གསུམ་ཕྱག་དྲུག་གི་གཡས་པ་རྣམས་ཀྱིས་རྡོ་རྗེས་མཚན་པའི་དབྱུག་པ་ནག་པོ་རལ་གྲི་འཁོར་ལོ། གཡོན་ཐུགས་དཀར་སྡིགས་མཛུབ་དང་བཅས་པའི་ཞགས་པ་རྩེ་གསུམ་དགྲ་སྟྭ། སྟེང་གི་ཡ་ཕུགས་ཀྱི་ནང་དུ་གཙུག་ཏོར་འཁོར་ལོས་བསྒྱུར་བ་སྔོན་པོ་མི་བསྐྱོད་པའི་དབུ་རྒྱན་ཅན། སྔོ་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་གཙུག་ཏོར་གྱི་ཕྱག་རྒྱ། ལྷག་མ་གཡས་རྡོ་རྗེ་དང་པདྨ། གཡོན་སྡིགས་མཛུབ་དང་རལ་གྲི། འོག་ཏུ་ས་གཞིའི་ནང་དུ་གནོད་མཛེས་ནག་པོ་མི་བསྐྱོད་པའི་དབུ་རྒྱན་ཅན། ནག་དཀར་དམར་བའི་ཞལ་གསུམ་ཕྱག་དྲུག་གི་གཡས་པ་
རྣམས་ཀྱིས་རྡོ་རྗེ་འཁོར་ལོ་རིན་ཆེན། གཡོན་ཐུགས་ཀར་ཞགས་པ་དང་བཅས་པའི་སྡིགས་མཛུབ་པདྨ་རལ་གྲི། ཁྲོ་བོ་ཐམས་ཅད་ཀྱང་སྟོབས་ཆེན་ཕ་རོལ་གནོན་པ། སྤྱན་གསུམ་གསུམ་དང་ལྡན་ཞིང་མཆེ་བ་གཙིགས་པ། སྟག་གི་པགས་པའི་ཤམ་ཐབས་ཅན་ཀླུ་ཆེན་པོ་བརྒྱད་ཀྱིས་བརྒྱན་པ། གཡོན་བརྐྱང་གི་སྟབས་ཀྱིས་པད་ཉི་ལ་བཞུགས་པ། དུས་མཐའི་མེ་ལྟ་བུའི་མེ་སྟག་འབར་བ་དང་བཅས་པས་གདུག་པ་ཅན་ཚར་གཅོད་པའོ། །མགྲིན་པ་ལོངས་སྤྱོད་ཀྱི་འཁོར་ལོ་དམར་པོ་འདབ་མ་བཅུ་དྲུག་པའི་སྟེང་དུ་པདྨ་དམར་པོ་འདབ་མ་བཞི་པ་ལ། དགྱེས་མཛད་རྡོ་རྗེའི་གསུང་གི་སྣང་བ་ལས་བྱུང་བའི་སྒྱུ་འཕྲུལ་ཆེན་མོ་ལྷར་ལྔར་གྱུར་པ་ནི། དབུས་ཀྱི་གདན་གྱི་སྟེང་དུ་དཔལ་ཧེ་རུ་ཀ་སྔོན་པོ་སྔོ་སེར་དམར་ལྗང་པའི་ཞལ། ཕྱག་དང་པོ་གཉིས་ཐོད་པ་དང་ཁ་ཊྭཱཾ་ག་བསྣམས་པས། རང་དང་འདྲ་བའི་ཡུམ་སངས་རྒྱས་མཁའ་འགྲོ་མ་དམར་མོ་དམར་སེར་དཀར་ལྗང་བའི་ཞལ་ཅན་ལ་འཁྱུད་པ། འོག་མ་གཉིས་ཀྱིས་མདའ་གཞུ། ཁྲོ་ཆགས་སྒེག་ལ་འཇིགས་པའང་འཇིགས་པར་མཛད་ལ། སྤྱན་གསུམ་གསུམ་དམར་ཞིང་གཡོ་བ། སྐྲ་སེར་གྱེན་བརྫེས་ཐོད་སྐམ་ལྔ་ལྔའི་དབུ་རྒྱན་དང༌། རློན་པ་ལྔ་བཅུའི་དོ་ཤལ། ཕྱག་རྒྱ་ལྔ་དང་གར་དགུས་རོལ་བ། ཐལ་ཆེན་གྱིས་བྱུགས་ཤིང་མི་ལྤགས་ཀྱིས་སྟོད་གཡོགས་ཅན་གཡོན་བརྐྱང་བའི་གར་སྟབས་ཀྱིས་ཉི་མའི་སྟེང་དུ་མི་རོའི་སྙིང་གར་མནན་པ་མེ་དཔུང་གི་དབུས་
ན་བཞུགས་པའོ། །ཤར་དུ་རྡོ་རྗེ་མཁའ་འགྲོ་མ་སྔོན་མོ། སྔོ་སེར་དཀར་ལྗང་བའི་ཞལ། ཕྱག་བཞིས་རྡོ་རྗེ་དྲིལ་བུ་ཁ་ཊྭཱཾ་ག་ཐོད་པ་བསྣམས་པ། ལྷོར་རིན་ཆེན་མཁའ་འགྲོ་མ་སེར་མོ་སེར་སྔོ་དཀར་ལྗང་བའི་ཞལ། ཕྱག་བཞིས་རིན་ཆེན་ཅེ་སྤྱང་བ་དན་མདུང་རྩེ་གསུམ་པ་བསྣམས་པ། ནུབ་ཏུ་པདྨ་མཁའ་འགྲོ་མ་དཀར་དམར་དཀར་སེར་ལྗང་སྔོ་བའི་ཞལ། ཕྱག་བཞིས་པདྨ་ཐོད་པ་གཞུ་དང་མདའ་བསྣམས་པ། བྱང་དུ་སྣ་ཚོགས་མཁའ་འགྲོ་མ་ལྗང་གུ། ལྗང་སེར་དཀར་སྔོ་བའི་ཞལ། ཕྱག་བཞིས་རལ་གྲི་ཞགས་པ་ཀ་པཱ་ལ་ཌཱ་མ་རུ་བསྣམས་པ། ལྷ་མོ་ལྔ་ནི་ཐལ་བ་དང་བྲལ་བ་ཐོད་སྐམ་གྱི་ཕྲེང་བ་ཅན་ནོ། །ཡང་ན། འདི་ལ་གཞལ་ཡས་ཁང་གི་ལྟེ་བར་པདྨ་དམར་པོ་བསྒོམ་ཀྱང་རུང༌། ལྟེ་བ་སྤྲུལ་པའི་འཁོར་ལོ་སེར་པོ་རྩ་འདབ་དྲུག་ཅུ་རྩ་བཞིའི་སྟེང་དུ་རིན་པོ་ཆེའི་སྣ་ཚོགས་ལས་གྲུབ་པའི་གཞལ་ཡས་ཁང་མཚན་ཉིད་ཐམས་ཅད་ཡོངས་སུ་རྫོགས་པ། ནང་གི་ལྷ་སྣམ་ཤར་དཀར། བྱང་ལྗང༌། ནུབ་དམར༌། ལྷོ་སེར། དབུས་སྔོ་བའི་སྟེང་དུ་འཁོར་ལོ་དཀར་པོ་འཁོར་ལོའི་མུ་ཁྱུད་ཅན། དེའི་ལྟེ་བར་གསུང་གི་འཁོར་ལོ་དམར་པོ་པདྨའི་མུ་ཁྱུད་ཅན། དེའི་ལྟེ་བར་ཐུགས་ཀྱི་འཁོར་ལོ་སྔོན་པོ་རྡོ་རྗེའི་མུ་ཁྱུད་ཅན། གསུམ་གའང་རྩིབས་བརྒྱད་དང་ལྡན་པ། དབུས་སུ་བདེ་ཆེན་འཁོར་ལོ་པདྨ་འདབ་བརྒྱད་མུ་ཁྱུད་ལ་གྲི་གུག་གི་ཕྲེང་བ་ཅན། སྒོ་
མཚམས་བརྒྱད་དུ་རོའི་གདན་སྣ་ཚོགས་པདྨའི་ལྟེ་བར་ཉི་མ་ལ་འཇིགས་བྱེད་དང་དུས་མཚན་མའི་གདན། དེ་རྣམས་ཀྱི་སྟེང་དུ་དགྱེས་མཛད་རྡོ་རྗེའི་ཡོན་ཏན་གྱི་སྣང་བ་ལས་གྲུབ་པའི་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ནི། དབུས་ཀྱི་གདན་གྱི་སྟེང་དུ་འཁོར་ལོ་བདེ་མཆོག་སྐུ་མདོག་མཐིང་ནག་ཞལ་བཞི་ཕྱག་བཅུ་གཉིས་པ། རྩ་བའི་ཞལ་མཐིང་ག་གཡོན་ལྗང༌། རྒྱབ་དམར། གཡས་སེར་བ། ཞལ་རེ་རེ་ལ་དམར་ཞིང་གཡོ་བའི་སྤྱན་གསུམ་གསུམ་དང་ལྡན་ཞིང༌། མཆེ་བ་གཙིགས་པ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། དེའི་འོག་མ་གཉིས་ཀྱིས་གླང་པོ་ཆེའི་ལྤགས་རློན་སྟོད་གཡོགས་སུ་གྱོན་པ། ལྷག་མ་གཡས་རྣམས་ཀྱིས་ཌཱ་མ་རུ་དགྲ་སྟ་རྩེ་གསུམ་གྲི་གུག །གཡོན་པ་རྣམས་ཀྱིས་ཁ་ཊྭཱཾ་ག་ཐོད་པ་ཞགས་པ་ཚངས་པའི་མགོ་བོ་བསྣམས་པ། ཞབས་གཡས་བརྐྱངས་པས་དུས་མཚན་མ་དམར་མོ་དང༌། གཡོན་བསྐུམས་པས་འཇིགས་བྱེད་ནག་པོ་མནན་པ། རལ་པའི་ཐོར་ཚུགས་ལ་སྣ་ཚོགས་རྡོ་རྗེ་དང༌། ཟླ་བ་ཕྱེད་པ་དང༌། ཐོད་སྐམ་ལྔ་ལྔས་དབུ་བརྒྱན་ཅིང༌། མི་མགོ་རློན་པ་ལྔ་བཅུའི་དོ་ཤལ་ཅན། སྟག་ལྤགས་ཀྱི་ཤམ་ཐབས་གྲོལ་ཤིང་ཕྱག་རྒྱ་དྲུག་གིས་བརྒྱན་པ། གར་གྱིས་ཉམས་དགུ་དང་ལྡན་པ། ཡུམ་རྡོ་རྗེ་ཕག་མོ་དམར་མོ་ཕྱག་གཡས་རྡོ་རྗེ་གྲི་གུག་དང་བཅས་པའི་སྡིགས་མཛུབ་གཡོན་ཁྲག་ཆེན་
གྱིས་གང་བའི་ཐོད་པ་ཡབ་ལ་སྟོབ་པའི་ཚུལ་གྱིས་འཁྱུད་པ། སྤྱན་གསུམ་དྲག་མོ་བསྐལ་པའི་མེ་ལྟར་གཟི་བརྗིད་འབར་བ། གཅེར་བུ་སྐྲ་གྲོལ་ཞིང་ཕྱག་རྒྱ་ལྔ་དང་མགོ་ཕྲེང་གིས་བརྒྱན་པ། བྱིན་པ་གཉིས་ཀྱིས་ཡབ་ལ་འཁྱུད་པ། ཁྲག་ལ་དགྱེས་ཤིང་ཟླ་མཚན་དང་བཅས་པ་མེ་དཔུང་འབར་བའི་དབུས་ན་བཞུགས་པ། འདབ་མ་རྣམས་ལ་ཤར་དུ་མཁའ་འགྲོ་མ་ནག་མོ། བྱང་དུ་ལཱ་མ་ལྗང་ཁུ། ནུབ་ཏུ་དུམ་སྐྱེས་མ་དམར་པོ། ལྷོར་གཟུགས་ཅན་མ་སེར་མོ། དམ་ཚིག་གི་འཁོར་ལོའི་ཤར་སྒོར་ཁྭ་གདོང་མ་སྔོན་མོ། བྱང་སྒོར་འུག་གདོང་མ་ལྗང་ཁུ། ནུབ་སྒོར་ཁྱི་གདོང་མ་དམར་མོ། ལྷོ་སྒོར་ཕག་གདོང་མ་སེར་མོ། ཤར་ལྷོར་གཤིན་རྗེ་བརྟན་མ་གཡས་སྔོ་གཡོན་སེར་བ། ལྷོ་ནུབ་ཏུ་གཤིན་རྗེ་ཕོ་ཉ་མོ་གཡས་སེར་གཡོན་དམར་བ། ནུབ་བྱང་དུ་གཤིན་རྗེ་མཆེ་བ་མ་གཡས་དམར་གཡོན་ལྗང་བ། བྱང་ཤར་དུ་གཤིན་རྗེ་འཇོམས་མ་གཡས་ལྗང་གཡོན་སྔོ་བ། ཐམས་ཅད་ཀྱང་ཕྱག་བཞིའི་དངཔོ་གཉིས་ཀྱིས་གྲི་གུག་དང་ཐོད་པ། འོག་པ་གཉིས་ཀྱིས་ཌཱ་མ་རུ་དང་ཁ་ཊྭཱཾ་ག་བསྣམས་པ། གཡས་བརྐྱང་གི་སྟབས་ཀྱིས་བཞུགས་པ་སྟེ། སྒོ་མཚམས་མ་བརྒྱད་ནི་རོའི་གདན་དང་བཅས་པ། བདེ་ཆེན་འཁོར་ལོའི་མཚམས་ཀྱི་འདབ་མ་ལ་བུམ་པ་བདུད་རྩི་ལྔས་གང་བའི་སྟེང་དུ་ཐོད་པ་བདུད་རྩི་ལྔས་གང་བའོ། །ཐུགས་ཀྱི་འཁོར་ལོའི་ཤར་
ཕྱོགས་པུ་ལླི་ར་མ་ལ་ཡར་ཁཎྜ་ཀ་པཱ་ལ་དང་རབ་ཏུ་གཏུམ་མོ། བྱང་ཕྱོགས་ཛ་ལནྡྷ་རར་མ་ཧཱ་ཀཾ་ཀ་ལ་དང་གཏུམ་པའི་མིག་ཅན་མ། ནུབ་ཕྱོགས་ཨོ་ཊི་ཡ་ནཱར་ཀཾ་ཀ་ལ་འོད་ལྡན་མ། ལྷོ་ཕྱོགས་ཨུརྦུ་ཏྭར་མཆེ་བ་རྣམ་པར་གཙིགས་པ་དང་སྣ་ཆེན་མ། ཤར་ལྷོར་གོ་ད་བཱ་རིར་སུ་ར་བཻ་རི་དང་བརྟན་པའི་བློ་ཅན་མ། ལྷོ་ནུབ་ཏུ་རསྨི་ཤྭ་རར་འོད་དཔག་མེད་དང་མིའུ་ཐུང་མ། ནུབ་བྱང་དེ་བཱི་ཀོ་ཊར་རྡོ་རྗེའི་འོད་དང་ལངྐའི་དབང་ཕྱུག་མ། བྱང་ཤར་མ་ལ་བར་རྡོ་རྗེའི་སྐུ་དང་ཤིང་གྲིབ་མ་སྟེ་ཐུགས་ཀྱི་གསང་བ་བསམ་གྱིས་མི་ཁྱབ་པའི་ངོ་བོ་ཁ་དོག་ནག་པོའོ། །གསུང་གི་འཁོར་ལོའི་ཤར་ཕྱོགས་ཀཱ་མ་རཱུ་པར་ཨཾ་ཀུ་རི་དང་ཨེ་ར་བ་ཏི། བྱང་ཕྱོགས་ཨོ་ཏྲེར་རྡོ་རྗེ་རལ་པ་ཅན་དང་འཇིགས་བྱེད་ཆེན་མོ། ནུབ་ཕྱོགས་ཏྲི་ཤ་ཀུ་ནེར་དཔའ་བོ་ཆེན་པོ་དང་རླུང་གི་ཤུགས་ཅན་མ། ལྷོ་ཕྱོགས་ཀོ་ས་ལར་རྡོ་རྗེ་ཧཱུཾ་མཛད་དང་ཆང་འཐུང་མ། ཤར་ལྷོར་ཀ་ལིང་ཀར་རབ་ཏུ་བཟང་པོ་དང༌། ཤྱེ་མ་དེ་བཱི། ལྷོ་ནུབ་ལམ་པ་ཀར་རྡོ་རྗེ་བཟང་པོ་དང་ཤིན་ཏུ་བཟང་མོ། ནུབ་བྱང་ཀཉྩིར་འཇིགས་བྱེད་ཆེན་པོ་དང་རྟ་རྣ་མ། བྱང་ཤར་ཧི་མ་ལར་མིག་མི་བཟང་དང་ཁཱ་གཱ་ན་སྟེ་གསུང་གི་གསང་བ་བསམ་གྱིས་མི་ཁྱབ་པའི་ངོ་བོ་ཁ་དོག་དམར་པོའོ། །སྐུའི་འཁོར་ལོའི་ཤར་ཕྱོགས་པྲེ་ཏ་པུ་རིར་སྟོབས་པོ་ཆེ་དང་འཁོར་ལོའི་ཤུགས་ཅན་མ། བྱང་ཕྱོགས་གྲྀ་ཧ་དེ་
བར་རིན་ཆེན་རྡོ་རྗེ་དང་ཁཎྜ་རོ་ཧི། ནུབ་ཕྱོགས་སོ་རཥྟར་རྟ་མགྲིན་དང་ཤོཎྜི་ནི། ལྷོ་ཕྱོགས་སུ་ཝརྞ་དཱི་པར་ནམ་མཁའི་སྙིང་པོ་དང་འཁོར་ལོའི་གོ་ཆ་མ། ཤར་ལྷོར་ན་ག་རར་དཔལ་ཧེ་རུ་ཀ་དང་ཤིན་ཏུ་དཔའ་མོ། ལྷོ་ནུབ་སིནྡྷུར་པདྨ་གར་གྱི་དབང་ཕྱུག་དང་སྟོབས་ཆེན་མ། ནུབ་བྱང་མ་རུར་རྣམ་པར་སྣང་མཛད་དང་འཁོར་ལོའི་བསྒྱུར་མ། བྱང་ཤར་ཀུ་ལ་ཏར་རྡོ་རྗེ་སེམས་དཔའ་དང་བརྩོན་འགྲུས་ཆེན་མོ་སྟེ་སྐུའི་གསང་བ་བསམ་གྱི་མི་ཁྱབ་པའི་ངོ་བོ་ཁ་དོག་དཀར་པོའོ། །དཔའ་བོ་ཉི་ཤུ་རྩ་བཞི་པོ་རྣམས་ཞལ་གཅིག་ཕྱག་དང་པོ་གཉིས་རྡོ་རྗེ་དང་དྲིལ་བུ་འཛིན་པས་རང་རང་གི་ཡུམ་ལ་འཁྱུད་པ། འོག་པ་གཉིས་ཀྱིས་ཌཱ་མ་རུ་དང་ཁ་ཊྭཱཾ་ག་འཛིན་པ། རྒྱན་དང་ཆ་ལུགས་བཅོམ་ལྡན་འདས་དང་མཚུངས་པ། རྣལ་འབྱོར་མ་ཉི་ཤུ་རྩ་བཞི་ནི་རྡོ་རྗེ་ཕག་མོའི་རིགས་ལས་བྱུང་སྟེ་ཕག་མོ་དང་རྣམ་པ་མཚུངས་ཏེ། འོན་ཀྱང་ཕྱག་གཡས་པ་ན་གྲི་གུག་དང་གཡོན་ཐོད་པ་བསྣམས་པའོ། །གསང་གནས་བདེ་སྐྱོང་གི་འཁོར་ལོ་ལྗང་ཁུ་རྩ་འདབ་སུམ་ཅུ་རྩ་གཉིས་ཀྱི་སྟེང་དུ་གཞལ་ཡས་ཁང་དབུས་ཀྱི་ལྟེ་བ་ལ་སྣ་ཚོགས་རྡོ་རྗེ། སྟེང་ཐོག་རེ་མིག་དགུར་ཕུབ་པ། དབུས་ཀྱི་གདན་གྱི་སྟེང་དུ་དགྱེས་མཛད་རྡོ་རྗེའི་འཕྲིན་ལས་ཀྱི་སྣང་བ་ལས་གྲུབ་པའི་བཅོམ་ལྡན་འདས་དཔལ་རྡོ་རྗེ་འཇིགས་བྱེད་ཆེན་པོ་སྐུ་མདོག་མཐིང་ནག་ཞལ་དགུ་ཕྱག་སུམ་ཅུ་སོ་བཞི། ཞབས་བཅུ་དྲུག་
པ། རྩ་ཞལ་ནག་པོ་མ་གེའི་གདོང་ཅན་ཤིན་ཏུ་ཁྲོས་པ། ཕེཾ་ཀ་རའི་སྒྲ་ཆེན་པོ་འབྲུག་ལྟར་སྒྲོག་པ། དེའི་སྟེང་ན་སྲིན་པོའི་ཞལ་དམར་པོ་བཞད་ཅིང་མཆེ་བ་གཙིགས་པ་ཞལ་གྱི་གྲྭ་ནས་ཁྲག་འཛག་པ། དེའི་སྟེང་ན་འཇམ་དཔལ་གྱི་ཞལ་སེར་པོ་འཛུམ་ཞིང་ཅུང་ཟད་ཁྲོས་པ། གཞོན་ནུའི་རྒྱན་ཅན། རྭའི་གཡས་ཕྱོགས་ཀྱི་ཞལ་དང་པོ་སྔོན་པོ། གཉིས་པ་དམར་པོ། གསུམ་པ་སེར་པོ་སྟེ་མངའ་བདག་གི་ཞལ་གསུམ་ཤིན་ཏུ་ཁྲོས་པ། རྭའི་གཡོན་ཕྱོགས་ཀྱི་ཞལ་དང་པོ་དཀར་པོ་གཉིས་པ་དུད་ཁ། གསུམ་པོ་ནག་པོ་སྟེ་ཞལ་གསུམ་ཀའང་མཆེ་བ་གཙིགས་པའོ། ཁྲོ་ཞལ་རྣམས་སྨིན་མ་དང་སྨ་ར་དབུ་སྐྲ་དམར་སེར་གྱེན་དུ་བརྫེས་པ། གཡས་པའི་ཕྱག་བཅུ་དྲུག་གིས་རིམ་པ་བཞིན་དུ། དང་པོ་ན་གྲི་གུག །གཉིས་པ་ན་འཕང་མདུང༌། གསུམ་པ་ན་གཏུན་ཤིང༌། དེས་འགྲེལ། ཆུ་གྲི། རྡོ་རྗེ་རྩེ་གཅིག་པ། དགྲ་སྟ། མདུང༌། མདའ། ལྕགས་ཀྱུ། དབྱུག་པ། ཁ་ཊྭཱཾ་ག །འཁོར་ལོ། རྡོ་རྗེ་རྩེ་ལྔ་པ། རྡོ་རྗེ་ཐོ་བ། རལ་གྲི། རྔེའུ་ཆུང༌། བསྣམས་པ། གཡོན་གྱི་ཕྱག་བཅུ་དྲུག་གིས་རིམ་པ་བཞིན་དུ། དང་པོ་ན་ཐོད་ཁྲག །གཉིས་པ་ན་ཚངས་པའི་མགོ་བོ། གསུམ་པ་ན་ཕུབ། དེས་འགྲེས། རྐང་པ། རྡོ་རྗེའི་ཞགས་པ། །གཞུ་རྒྱུ་མ། རྡོ་རྗེ་དྲིལ་བུ། ལག་པ༌། རོ་རས། སྐྱེས་བུ་གསལ་ཤིང་ལ་བཙུགས་པ། མེ་ཐབ། ཐོད་
ཚལ། སྡིགས་མཛུབ། འཕན་རྩེ་གསུམ་པ། རླུང་རས་བསྣམས་པ། ཕྱག་ཐ་མ་གཉིས་ཀྱིས་གླང་པོའི་ཆེའི་ལྤགས་པ་རློན་པ་ཁྲག་དང་བཅས་པ་བརྒྱངས་ནས་ན་བཟའ་འཛིན་པ། ཕྱག་དང་པོ་གཉིས་ཕྱག་མཚན་ཐུགས་དཀར་སྟེང་འོག་ཏུ་འཛིན་ཅིང༌། འཇིག་རྟེན་དང་འཇིག་རྟེན་ལས་འདས་པའི་ལྷ་ལ་སྡིགས་མཛུབ་མཛད་པའོ། །ཞབས་བཅུ་དྲུག་གི་གཡས་བརྒྱད་བསྐུམས་པ་རིམ་པ་བཞིན་དུ་མི་དང་མ་ཧེ་དང་གླང་དང་བོང་བུ་དང་རྔ་མོང་དང༌། ཁྱི་དང་ལུག་དང་ཝ་རྣམས་མནན་པ། གཡོན་བརྒྱད་བརྐྱངས་པས་རིམ་པ་བཞིན་དུ་བྱ་རྒོད་དང་འུག་པ་དང་ཁྲ་དང་བྱ་རོག་དང་ནེ་ཙོ་དང་ཁྱུང་དང་རི་སྐེག་དང་བཞད་རྣམས་མནན་པ། དེ་རྣམས་ཀྱིས་འོག་ཏུ་ཚངས་པ་སེར་པོ། དབང་པོ་དཀར་པོ། ཉེ་དབང་སྔོན་པོ། དྲག་པོ་ནག་པོ་རྣམས་བསྒྱེལ་ཞིང་ཁ་བུབ་ཏུ་མནན་པ། དབུ་རེ་རེ་ལ་ཐོད་པ་སྐམ་པོ་ལྔ་ལྔས་དབུ་བརྒྱན་ཅིང༌། རློན་པ་ཁྲག་འཛག་པ་ལྔ་བཅུའི་དོ་ཤལ་དང༌། རུས་པའི་རྒྱན་དྲུག་དང༌། སྦྲུལ་གྱིས་བརྒྱན་པ། ཐལ་ཆེན་གྱི་ཚོམ་བུ། རཀྟའི་ཐིག་ལེ། ཞག་གི་ཟོ་རིས་རྣམས་ཀྱིས་མཚན་པ། སྒེག་པ་དཔའ་བ་མི་སྡུག་པ། རྒོད་དང་དྲག་ཤུལ་འཇིགས་སུ་རུང༌། །སྙིང་རྗེ་རྔམ་དང་ཞི་བ་སྟེ། །གར་དགུའི་རོ་དང་ལྡན་པ་ཉིད། །དེའི་པང་ན་ཡུམ་རྡོ་རྗེ་ཕག་མོ་སྐུ་མདོག་དམར་མོ་ཕྱག་གཡས་རྡོ་རྗེ་དང་བཅས་པས་སྡིགས་མཛུབ་བསྒྲེང་བ། གཡོན་ཁྲག་ཆེན་གྱིས་གང་བའི་ཐོད་པ་ཡབ་ལ་སྟོབ་པའི་
ཚུལ་གྱིས་འཁྱུད་པ། སྤྱན་གསུམ་དྲག་མོ་བསྐལ་བའྀ་མེ་ལྟར་གཟི་བརྗིད་འབར་བ། གཅེར་བུ་སྐྲ་སེར་འཁྱིལ་བ། ཕྱག་རྒྱ་ལྔ་དང་རློན་བྲལ་གྱྀ་མགོ་འཕྲེང་གིས་ཅོད་པན་དང་དོ་ཤལ་དུ་བརྒྱན་པ། གཡས་བརྐྱང་བའི་སྟབས་ཀྱིས་ཡབ་ལ་འཁྲིལ་བ། ཁྲོ་མོའི་ཆ་ལུགས་རྫོགས་པ་འོད་ཀྱིས་ནམ་མཁའི་མཐར་ཁྱབ་པའི་ཡེ་ཤེས་ཀྱི་མེ་འབར་བའི་དབུས་ན་ཡབ་ཡུམ་སྙོམས་པར་ཞུགས་པའི་ཚུལ་གྱིས་གནས་པའོ། །ཤར་དུ་གཏི་མུག་གཤིན་རྗེ་གཤེད་དཀར་པོ་དཀར་ནག་དམར་པའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་རང་འོད་ཀྱི་ཡུམ་ལ་འཁྱུད་པ། ལྷག་མ་གཡས་གཉིས་འཁོར་ལོ་དང་རལ་གྲི། གཡོན་གཉིས་རིན་པོ་ཆེ་དང་པདྨ་འཛིན་པ། ལྷོར་སེར་སྣ་གཤིན་རྗེ་གཤེད་སེར་པོ་སེར་ནག་དཀར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱི་གྲི་གུག་དང་ཐོད་པ་འཛིན་པས་རང་འོད་ཀྱི་ཡུམ་ལ་འཁྱུད་པ། ལྷག་མ་གཡས་གཉིས་རིན་པོ་ཆེ་དང་རལ་གྲི། གཡོན་གཉིས་འཁོར་ལོ་དང་པདྨ་འཛིན་པ། ནུབ་ཏུ་འདོད་ཆགས་གཤིན་རྗེ་གཤེད་དམར་པོ་དམར་ནག་དཀར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་རང་འོད་ཀྱི་ཡུམ་ལ་འཁྱུད་པ། ལྷག་མ་གཡས་གཉིས་པདྨ་དང་རལ་གྲི། གཡོན་གཉིས་རིན་པོ་ཆེ་དང་འཁོར་ལོ་འཛིན་པ། བྱང་དུ་ཕྲག་དོག་གཤིན་རྗེ་གཤེདལྗང་གུ་ལྗང་ནག་དཀར་བའི་ཞལ་གསུམ་ཕྱག་དྲུག་གི་དང་པོ་
གཉིས་ཀྱིས་གྲི་གུག་དང་ཐོད་པ་འཛིན་པས་རང་འོད་ཀྱི་ཡུམ་ལ་འཁྱུད་པ། ལྷག་མ་གཡས་གཉིས་རལ་གྲི་དང་འཁོར་ལོ། གཡོན་གཉིས་རིན་པོ་ཆེ་དང་པདྨ་འཛིན་པ། ཤར་ལྷོར་ཙར་ཙི་ཀཱ་དཀར་མོ་གཏི་མུག་གཤིན་རྗེ་གཤེད་ལྟ་བུ། ལྷོ་ནུབ་ཏུ་ཕག་མོ་སེར་མོ་དབུའི་སྟེང་དུ་ཕག་ཞལ་གྱེན་དུ་ལྟ་བ་དང་བཅས་པ་སེར་སྣ་གཤིན་རྗེ་གཤེད་ལྟ་བུ། ནུབ་བྱང་དུ་དབྱངས་ཅན་མ་དམར་མོ་འདོད་ཆགས་གཤིན་རྗེ་གཤེད་ལྟ་བུ། བྱང་ཤར་དུ་གཽ་རི་ལྗང་ཁུ་ཕྲག་དོག་གཤིན་རྗེ་གཤེད་ལྟ་བུ། དེ་ལྟར་ལྷ་མོ་བཞི་པོ་རང་སྣང་གི་ཐབས་ལ་འཁྱུད་པའོ། །ཤར་སྒོར་ཐོབ་པ་གཤིན་རྗེ་གཤེད་ནག་པོ་ནག་དཀར་དམར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་རང་འོད་ཀྱི་ཡུམ་ལ་འཁྱུད་པ། ལྷག་མ་གཡས་གཉིས་ཐོ་བ་དང་རལ་གྲི། གཡོན་གཉིས་འཁོར་ལོ་དང་པདྨ་འཛིན་པ། ལྷོ་སྒོར་དབྱུག་པ་གཤིན་རྗེ་གཤེད་དཀར་པོ་དཀར་ནག་དམར་བའི་ཞལ་གསུམ། ཕྱག་དྲུག་གི་དང་པོ་གཉིས་ཀྱི་གྲི་གུག་དང་ཐོད་པ་འཛིན་པས་རང་འོད་ཀྱི་ཡུམ་ལ་འཁྱུད་པ། ལྷག་མ་གཡས་གཉིས་དབྱུག་པ་དང་རལ་གྲི། གཡོན་གཉིས་པདྨ་དང་འཁོར་ལོ་འཛིན་པ། ནུབ་སྒོར་པདྨ་གཤིན་རྗེ་གཤེད་དམར་མོ་དམར་ནག་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་རང་འོད་ཀྱི་ཡུམ་ལ་འཁྱུད་པ། ལྷག་མ་གཡས་གཉིས་པདྨ་དང་རལ་གྲི། གཡོན་
གཉིས་འཁོར་ལོ་དང་རིན་པོ་ཆེ་འཛིན་པ། བྱང་སྒོར་རལ་གྲི་གཤིན་རྗེ་གཤེད་ལྗང་གུ་ལྗང་ནག་དཀར་བའི་ཞལ་གསུམ། ཕྱག་དྲུག་གི་དང་པོ་གཉིས་གྲི་གུག་དང་ཐོད་པ་འཛིན་པས་རང་འོད་ཀྱི་ཡུམ་ལ་འཁྱུད་པ། ལྷག་མ་གཡས་གཉིས་རལ་གྲི་དང་འཁོར་ལོ་གཡོན་གཉིས་རིན་པོ་ཆེ་དང་པདྨ་འཛིན་པ། ཐམས་ཅད་ཀྱང་ཞལ་རེ་རེ་ལ་སྤྱན་གསུམ་གསུམ་དང་ལྡན་པ། མཆེ་བ་གཙིགས་པ་སྨིན་མ་དང་སྨ་ར་དང་དབུ་སྐྲ་དམར་སེར་གྱེན་དུ་བརྫེས་པ། སྦྲུལ་གྱི་རྒྱན་དང་སྟག་གི་ལྤགས་པའི་ཤམ་ཐབས་ཅན། ཡབ་རྣམས་ཐམས་ཅད་ཐོད་སྐམ་ལྔས་དབུ་བརྒྱན་ཅིང༌། རློན་པ་ལྔ་བཅུའི་ཕྲེང་བ་དང་རུས་པའི་ཕྱག་རྒྱ་དྲུག་གིས་བརྒྱན་པ། ཡུམ་རྣམས་ཐོད་སྐམ་ལྔས་བུ་བརྒྱན་ཅིང༌། སྐམ་པོ་ལྔ་བཅུའི་ཕྲེང་བ་དང་རུས་པའི་ཕྱག་རྒྱ་ལྔས་བརྒྱན་པ། ཡེ་ཤེས་ཀྱི་མེ་འབར་བའི་དབུས་ན་གཡོན་བརྐྱང་གི་སྟབས་ཀྱིས་བཞུགས་པ། ཕྱིའི་གྲྭ་བཞིར་ཀ་པཱ་ལ་བདུད་རྩིས་གང་བ་བཞི་དང་བཅས་པའོ། །རང་དགྱེས་མཛད་རྡོ་རྗེ་མཚོན་ཆ་ཅན་གྱི་ཐུགས་ཀར་པད་ཉི་ལ་ཧཱུཾ། ལྷ་མོ་བཅུ་གསུམ་གྱི་ཐུགས་ཀར་པད་ཟླ་ལ། ཨཾ་གཾ་ཙཾ་བཾ་གྷཾ་པཾ་ཤཾ་ལཾ་ཌཾ་ཛཿཧཱུཾ་བཾ་ཧོཿ རྣམས་འཁོད་པར་གྱུར། སྙིང་གའི་ས་བོན་གྱི་འོད་ཟེར་གྱིས་དགྱེས་མཛད་མཚོན་ཆ་ཅན་ལྷ་བཅུ་གསུམ་རྒྱུད་སྡེ་ལྔའི་དཀྱིལ་འཁོར་གྱི་ལྷ་ཚོགས་དང་བཅས་པ་ཨོཾ་བཛྲ་ས་མ་ཛཿ ཤར་ཕྱོགས་ཀྱི་དུར་ཁྲོད་ཆེན་པོའི་ཐད་ཀྱི་སྟེང་གི་ནམ་མཁར་བཞུགས། ཚོགས་ཞིང་གི་སྐབས་ལྟར་ཆུ་གཉིས་སྔོན་དུ་འགྲོ་བའི་
ཉེར་སྤྱོད་ཀྱིས་ཡང་དག་པར་མཆོད། སྤྲོས་ན་འོག་ནས་འབྱུང་བ་ལྟར་ནང་མཆོད་བྱིན་གྱིས་བརླབས་ལ་འབུལ། བསྡུ་ན་དགྱེས་མཛད་སྙིང་པོ་ལན་གཉིས་དང༌། གཙོ་བོ་གཞན་བཞིའི་སྙིང་པོ་ལན་རེ་བརྗོད་ལ། མཐར་འབྲུ་གསུམ་བཏགས་པས་ནང་མཆོད་འབུལ། ཨོཾ་སརྦ་ཏ་ཐཱ་ག་ཏ་ཨ་ནུ་ར་ག་ཎ་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཞེས་གསང་བའི་མཆོད་པ་འབུལ། དེ་ཐམས་ཅད་ཀྱང་སྒྱུ་མ་ལྟར་རང་བཞིན་མེད་པར་ཤེས་པར་བྱས་ནས་ཅུང་ཟད་མཉམ་པར་བཞག །ཨོཾ་བཛྲ་གཽ་རཱི་ཨ་ཀརྵ་ཡ་ཛཿ ཨོཾ་བཛྲ་ཙཽ་རཱི་པྲ་བེ་ཤ་ཡ་ཧཱུཾ། ཨོཾ་བཛྲ་བེ་ཏཱ་ལི་བནྡྷ་བཾ། ཨོཾ་བཛྲ་གྷསྨི་རཱི་ཝ་ཤཾ་ཀུ་རུ་ཧོཿ ཛཿཧཱུཾ་བཾ་ཧོཿ ལན་ལྔ། ཡེ་ཤེས་སེམས་དཔའ་དང་དམ་ཚིག་སེམས་དཔའ་རོ་གཅིག་ཏུ་གྱུར། ཕྱིའི་དགྱེས་མཛད་རྡོ་རྗེའི་ལྷ་རྣམས་ཀྱི་མིག་ཏུ་མཾ་དཀར་པོ། རྣ་བར་དཾ་སྔོན་པོ། སྣ་ལ་པཾ་སེར་པོ། ལྕེ་ལ་རཾ་དམར་པོ། དཔྲལ་བར་ཨིཾ་ལྗང་གུ། ལྟེ་བར་ནཾ་ནག་པོ། མིག་ཏུ་གཏི་མུག་རྡོ་རྗེ་མ་དཀར་མོ། རྣ་བར་ཞེ་སྡང་རྡོ་རྗེ་མ་སྔོན་མོ། སྣ་ལ་སེར་སྣ་རྡོ་རྗེ་མ་སེར་མོ། ཁ་ལ་འདོད་ཆགས་རྡོ་རྗེ་མ་དམར་མོ། དཔྲལ་བར་ཕྲག་དོག་རྡོ་རྗེ་མ་ལྗང་ཁུ། ལྟེ་བར་བདག་མེད་རྣལ་འབྱོར་མ་ནག་མོ། དེ་རྣམས་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། རྡོ་རྗེ་མ་དྲུག་གི་གོ་འཕང་ལ་བཀོད། སླར་འདུས་ཏེ་སྐྱེ་མཆེད་ཀྱི་ལྷ་རྣམས་ལ་ཐིམ་པ་ལས་འདས་པའི་དཀྱིལ་འཁོར་དང༌། འཇིགས་མཛད་ཀྱི་ལྷ་རྣམས་ཀྱི་མིག་ཏུ་ཀྵིཾ་
དཀར་པོ་སའི་སྙིང་པོ། རྣ་བར་ཛཾ་ནག་པོ་ཕྱག་ན་རྡོ་རྗེ། སྣ་ལ་ཁཾ་སེར་པོ་ནམ་མཁའི་སྙིང་པོ། ལྕེ་ལ་གཾ་དམར་པོ་འཇིག་རྟེན་དབང་ཕྱུག །དཔྲལ་བར་སྐཾ་ལྗང་གུ་སྒྲིབ་པ་རྣམ་སེལ། ལྟེ་བར་སཾ་སྔོན་པོ་ཀུན་ཏུ་བཟང་པོའི་ངོ་བོ། སྒྲུབ་ཆེན་མོའི་ལྷ་ཚོགས་རྣམས་ལ་དཔྲལ་བར་རྩེ་སེར་པོ། མིག་ཏུ་ཨོཾ་དཀར་པོ། རྣ་བར་ཨཱཿ དམར་པོ། ཁ་ལ་ཁེ་དཀར་པོ། མགྲིན་པར་ཨཱ་དམར་པོ། སྙིང་གར་ར་དམར་པོ། བདེ་མཆོག་གི་ལྷ་ཡབ་རྣམས་ཀྱི་སྙིང་ཁར་ཨོཾ་ཨོཾ་ཧ་དཀར་པོ་རྡོ་རྗེ་སེམས་དཔའ། མགོ་བོར་ཨོཾ་ན་མ་ཧི་སེར་པོ་རྣམ་པར་སྣང་མཛད། སྤྱི་གཙུག་ཏུ་ཨོཾ་སྭཱ་ཧཱ་ཧཱུཾ་དམར་པོ་པདྨ་གར་གྱི་དབང་ཕྱུག །ཕྲག་པ་གཉིས་སུ་ཨོཾ་བཽ་ཥ་ཊ་ཧེ་ནག་པོ་དཔལ་ཧེ་རུ་ཀ །མིག་གཉིས་སུ་ཨོཾ་ཧཱུཾ་ཧཱུཾ་ཧོ་དམར་སེར་རྡོ་རྗེ་ཉི་མ། ཚིགས་ཆེན་བརྒྱད་ལ་ཨོཾ་ཕཊ་ཧིཾ་ལྗང་ཁུ་རྟ་མཆོག་གི་ངོ་བོ། ཡུམ་རྣམས་ལ་ལྟེ་བར་ཨོཾ་བཾ་དམར་པོ་རྡོ་རྗེ་ཕག་མོ། སྙིང་གར་ཧཾ་ཡོཾ་སྔོན་མོ་གཤིན་རྗེ་མ། ཁར་ཨོཾ་ཧྲཱི་མོ་དཀར་མོ་རྨོངས་བྱེད་མ། དཔྲལ་བར་ཨོཾ་ཧྲིཾ་ཧྲིཾ་སེར་མོ་བསྐྱེད་བྱེད་མ། སྤྱི་གཙུག་ཏུ་ཨོཾ་ཧཱུཾ་ཧཱུཾ་ལྗང་ཁུ་སྐྲག་བྱེད་མ། ཚིགས་ཆེན་བརྒྱད་ལ་ཨོཾ་ཕཊ་ཕཊ་དུད་ཁ་ཙཎྜི་ཀའི་ངོ་བོ། དེ་ལྟར་གོ་ཆ་སོ་སོར་དགོད་པ་ནི་བླ་མ་རྣམས་ཀྱི་ཕྱག་བཞེས་ཡིན་ལ། གྲུབ་ཆེན་ཁྱུང་པོ་ཉིད་ཀྱི་དགོངས་པ་ནི། དགྱེས་མཛད་ལྷ་དགུའི་མིག་ཏུ་མཾ་དཀར་ནས། ལྟེ་བར་ནཾ་ནག་པོའི་བར་གོང་བཞིན་ནོ། །ཕྱི་དཀྱིལ་མ་གཏོགས་
ཀྱི་ལུས་དཀྱིལ་ལྔ་ཅར་སྐད་ཅིག་བསྐྱེད་པ་ཡིན་པའི་ཕྱིར། སྐྱེ་མཆེད་བྱིན་གྱིས་རླབས་པ་དང་གནས་གསུམ་བྱིན་གྱིས་རླབས་པ་མི་བཞེད་དོ། །དེ་ཕྱིར་ས་བོན་ལས་ལུས་དཀྱིལ་དཀྱིལ་འཁོར་ལྔའི་ལྷ་ཚོགས་བསྐྱེད་པ་ཡང་མི་མཛེས་སོ། །ལྷ་ཐམས་ཅད་ཀྱི་དཔྲལ་བར་ཨོཾ་དཀར་པོ་དེ་ལས་འོད་ཟེར་འཕྲོས། སེམས་ཅན་རྣམས་ཀྱི་ལུས་ཀྱི་སྡིག་སྒྲིབ་སྦྱངས། སངས་རྒྱས་ཐམས་ཅད་ཀྱི་སྐུའི་བྱིན་རླབས་བསྐུལ་ཞིང་བསྡུས་ཏེ། ཨོཾ་ལ་ཐིམ་པ་ལས་སྐུ་རྡོ་རྗེ་མ་དཀར་མོ། མགྲིན་པར་ཨཱཿདམར་པོ་དེ་ལས་འོད་ཟེར་འཕྲོས། སེམས་ཅན་རྣམས་ཀྱི་ངག་གི་སྡིག་སྒྲིབ་སྦྱངས། སངས་རྒྱས་ཐམས་ཅད་ཀྱི་གསུང་གི་བྱིན་རླབས་བསྐུལ་ཞིང་བསྡུས་ཏེ། ཨཱཿལ་ཐིམ་པ་ལས་གསུང་རྡོ་རྗེ་མ་དམར་མོ། ཐུགས་དཀར་ཧཱུཾ་སྔོན་པོ་དེ་ལས་འོད་ཟེར་འཕྲོས། སེམས་ཅན་རྣམས་ཀྱི་ཡིད་ཀྱི་སྡིག་སྒྲིབ་སྦྱངས། སངས་རྒྱས་ཐམས་ཅད་ཀྱི་ཐུགས་ཀྱི་བྱིན་རླབས་བསྐུལ་ཞིང་བསྡུས་ཏེ། ཧཱུཾ་ལ་ཐིམ་པ་ལས་ཐུགས་རྡོ་རྗེ་མ་སྔོན་མོ། གཏི་མུག་རྡོ་རྗེ་མ་ལ་སོགས་པ་ལྷ་མོ་དྲུག་དང༌། སྐུ་རྡོ་རྗེ་མ་ལ་སོགས་པ་ལྷ་མོ་དྲུག་ནི་ཞལ་གཅིག་ཕྱག་གཉིས་སྤྱན་གསུམ་མ། གྲི་གུག་དང་ཐོད་པ་ཁ་ཊྭཱཾ་ག་བསྣམས་པ། རུས་པ་དང་མི་མགོའི་འཕྲེང་བས་བརྒྱན་པའོ། །རང་གི་ཐུགས་ཀ་ནས་འོད་ཟེར་སྣ་ལྔ་འཕྲོས་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། དེ་བཞིན་གཤེགས་པ་ཐམས་ཅད་བསྐུལ། དབང་གི་ལྷ་རྒྱལ་བ་ཡབ་ཡུམ། བྱང་ཆུབ་སེམས་དཔའ་ཡབ་ཡུམ། ཁྲོ་བོ་
རིག་མ་དངབཅས་པ་ཨོཾ་བཛྲ་ས་མཱ་ཛཿ གོང་བཞིན་མཆོད་པ་གསུམ་གྱིས་མཆོད། ཞེ་སྡང་རྡོ་རྗེ་ཕྱག་འཚལ་བསྟོད། །གཏི་མུག་རྡོ་རྗེ་ཕྱག་འཚལ་བསྟོད། །སེར་སྣ་རྡོ་རྗེ་བདག་ལ་སྩོལ། །འདོད་ཆགས་རྡོ་རྗེ་བདག་ལ་སྐྱོབས། །ཕྲག་དོག་རྡོ་རྗེ་ང་རྒྱལ་ཏེ། །སྒྱུ་འཕྲུལ་རྡོ་རྗེ་མགོན་པོ་ཁྱོད། །ལས་རྣམས་ཐམས་ཅད་གྲུབ་བྱེད་པ། །ཐམས་ཅད་རྡོ་རྗེ་བདག་མགུར་གྱུར། །བཅོམ་ལྡན་དེ་བཞིན་གཤེགས་པ་ཀུན། །བཅོམ་ལྡན་བདག་ཉིད་ཆེན་པོ་རྣམས། །ཐུགས་རྗེའི་བདག་ཉིད་ཅན་རྣམས་ཀྱིས། ཁྱེད་ཀྱིས་བདག་ལ་དབང་བསྐུར་སྩོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ་ཞེས་གསོལ་བ་བཏབ་པས། སངས་རྒྱས་རྣམས་ཀྱི་ཐུགས་ཀ་ནས་བྱུང་བའི་སྤྱན་མ་དང༌། མཱ་མ་ཀི་དང༌། གོས་དཀར་མོ་དང༌། སྒྲོལ་མ་རྣམས་ཀྱི་བྱང་ཆུབ་ཀྱི་སེམས་ཀྱིས་གང་བའི་བུམ་པས་དབང་བསྐུར། ཁྲོ་བོ་རྣམས་ཀྱིས་བསྲུང་བའི་ལས་མཛད། བྱང་ཆུབ་སེམས་དཔའ་རྣམས་ཀྱིས་རྡོ་རྗེའི་གླུ་བླང༌། རྡོ་རྗེ་མ་རྣམས་ཀྱིས་མཆོད་དེ། དབང་བསྐུར་རྡོ་རྗེ་ཆེན་པོ་ནི། ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུཾ། ཞེས་གསུང་ཞིང་དཀྱིལ་འཁོར་གྱི་ལྷ་ཐམས་ཅད་ལ་དབང་བསྐུར། ཆུའི་ལྷག་མ་སྤྱི་བོར་འཁྱིལ་བ་ལས་གཙོ་བོ་ཡབ་ཡུམ་དང༌། གཽ་རཱི་དང༌། པུཀྐ་སཱི་ལ་མི་བསྐྱོད་པ། ཙཽ་རི་དང༌། ཤ་ཝ་རཱི་
དང་སྒོ་མ་བཞི་རྣམས་ལ་རྣམ་པར་སྣང་མཛད། བཻ་ཏཱ་ལི་དང་ཙནྡྲ་ལཱི་ལ་རིན་ཆེན་འབྱུང་ལྡན། གྷསྨ་རཱི་དང་ཌོཾ་བི་ནི་ལ་འོད་དཔག་མེད་རྣམས་ཀྱིས་དབུ་བརྒྱན། སྒོ་མ་བཞི་ལ་དོན་གྲུབ་ཀྱིས་དབུ་རྒྱན་པ་ཡང་བླ་མ་གོང་མ་རྣམས་ཀྱིས་བཞེད་པ་ལྟར་ཡང་རུང་ངོ༌། །དེ་ལྟར་ཕྱག་ལེན་ལ་ལུས་ཀྱི་ལྷ་རྣམས་ལ་ཡང་རིག་བདག་བཞེད་པ་ལྟར་ན་འདུས་པའི་ལྷ་ཚོགས་ཐམས་ཅད་ལ་རྣམ་སྣང༌། སྒྱུ་འཕྲུལ་ཆེན་པོའི་ལྷ་ཚོགས་ཐམས་ཅད་ལ་འོད་དཔག་མེད། དགྱེས་མཛད་ཀྱི་ལྷ་ཚོགས་ཐམས་ཅད་ལ་མི་བསྐྱོད་པ། འཁོར་ལོ་སྡོམ་པའི་ལྷ་ཚོགས་ཐམས་ཅད་ལ་རིན་པོ་ཆེ་རྒྱལ་པོ། འཇིགས་བྱེད་ཀྱི་ལྷ་ཚོགས་ཐམས་ཅད་ལ་དོན་གྲུབ་ཀྱིས་དབུ་བརྒྱན། ཅེས་བཞེད་པ་ནི། སྐུ་གསང་བ་འདུས་པ་ཞེས་གསུངས་པ་སོགས་ལ་བརྟེན་པ་ཡང་སྣང་མོད་ཀྱི་གྲུབ་ཆེན་ཁྱུང་པོས་མི་བཞེད་ཅིང་དོན་ལ་ཡང་མི་དགོས་མོད། འཇག་བསམ་ཀུན་གྱི་ཕྱག་ལེན་ལ་མགྲིན་གཅིག་ཏུ་མཛད་པའི་ཕྱིར་བཀོད་པའོ། །དེ་ནས་བདུད་རྩི་བྱིན་གྱིས་བརླབས་པ་ནི། ཨོཾ་ཨཱཿབིགྷྣཱན་ཏ་ཀྲྀ་ཏ་ཧཱུཾ་གིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་ཟླ་གམ་ཡཾ་དང་བ་དན་གྱིས་མཚན་པའི་སྟེང་དུ། རཾ་ལས་མེའི་དཀྱིལ་འཁོར་གྲུ་གསུམ་རཾ་གྱིས་མཚན་པ། དེའི་སྟེང་དུ་ཀཾ་གསུམ་ལས་མི་མགོའི་སྒྱེད་བུ་གསུམ་གྱི་སྟེང་དུ། ཨ་ལས་ཐོད་པ་དཀར་པོ་སྟོང་གསུམ་གྱི་ཁྱོན་ཙམ་གྱི་ནང་དུ། པདྨ་འདབ་བརྒྱད་ཀྱི་ལྟེ་བར་ཧཱུཾ་ལས་སྣབས་དང་མཆིལ་མ། །ཤར་དུ་བྷྲུཾ་ལས་དྲི་ཆེན།
ལྷོར་ཨཾ་ལས་རཀྟ། ནུབ་ཏུ་ཛྲཱིཾ་ལས་བྱང་ཆུབ་ཀྱི་སེམས། བྱང་དུ་ཁཾ་ལས་དྲི་ཆུ། དབུས་སུ་ན་ལས་མའི་ཤ །བྱང་ཤར་དུ་གཾ་ལས་བ་གླང་གི་ཤ །ཤ་ལྷོར་ནཱཾ་ལས་གླང་པོ་ཆེའི་ཤ། ལྷོ་ནུབ་ཏུ་ཧཾ་ལས་རྟའི་ཤ །ནུབ་བྱང་དུ་ཥཾ་ལས་ཅེ་སྤྱང་གི་ཤ་རྣམས་ཀྱིས་གང་བ། སྟེང་དུ་ཨོཾ་ཨཱཿཧཱུཾ་ཐུགས་ཀའི་ཧཱུཾ་ལས་འོད་འཕྲོས། སྣ་བུག་ནས་ཐོན། རླུང་གི་བ་དན་ལ་ཕོག །ཡཾ་ལས་རླུང་གཡོས། རཾ་ལས་མེ་སྦར། ཐོད་པའི་རྫས་རྣམས་བསྐོལ། ཞུ་ཞིང་གྱེན་དུ་ལུད་པའི་མི་གཙང་བ་རྣམས་ཕྱིར་ཕྱུང༌། སྟེང་གི་ཨཱཿཟླ་བའི་དཀྱིལ་འཁོར་ཧཱུཾ་རྡོ་རྗེ་གྱུར་པ་ཨོཾ་དང་བཅས་ཏེ་ཐོད་པར་ལྷུང་བས་རྫས་རྣམས་ལན་བདུན་དུ་དཀྲུགས་ཤིང་སྦྱངས། ཡང་རྡོ་རྗེ་འགྲེང་བུར་གནས་པའི་ལྟེ་བར་ཨཱཿལས་བྱུང་བའི་ཟླ་བ་ལས་ཧཱུཾ་དང་རྩེ་མོར་ལ་ཨོཾ་གྱིས་མཚན་པ། དེ་ལས་འོད་འཕྲོས། སངས་རྒྱས་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་དཔག་ཏུ་མེད་པ་སྤྱན་དྲངས། དམ་ཚིག་གི་བདུད་རྩི་དང་འདྲེས། ཨོཾ་ཨཱཿཧཱུཾ་ལན་གསུམ་དང༌། ཧ་ཧོ་ཧྲཱིཿ ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར། འབྲིང་དུ་བྱེད་ན་ལག་པ་ཐལ་མོ་ཁ་སྦྱར་བའི་ནང་དུ། ཨོཾ་ཨཱཿཧཱུཾ་ཞེས་བསམ། ཨོཾ་ཞེས་བརྗོད་ལག་པ་གཡོན་པ་བསྟེན་པས་ཨོཾ་ལས་འོད་འཕྲོས་བདུད་རྩི་སྣོད་བཅུད་དང་བཅས་པ་ལ་ཕོག་སྟོང་པར་བསམ། གཡས་པ་བསྟན་པས་ཨཱཿཞེས་པས་ཨཱཿའི་འོད་ཟེར་གྱིས་རིན་པོ་ཆེའི་ཐོད་པའི་སྣོད་ཡངས་ཤིང་རྒྱ་ཆེ་བ་སྟོང་གསུམ་
ཙམ་དུ་བསམ་པའི་ནང་དུ་ཤ་ལྔ་བདུད་རྩི་ལྔས་ཕྱུར་གྱིས་གང་བར་བསམ། ལག་པ་གཉིས་ཀ་བསྟན་པས་ཧཱུཾ་གིས་འོད་ཟེར་གྱིས་ཕྱོགས་བཅུའི་སངས་རྒྱས་རྣམས་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་སྤྱན་དྲངས་དམ་ཚིག་གི་བདུད་རྩི་དང་འདྲེས་པའི་ཁ་དོག་དྲི་རོ་ནུས་པ་ཕུན་སུམ་ཚོགས་པར་བསམ་ལ། ཨོཾ་ཨཱཿཧཱུཾ་ལན་གསུམ་བརྗོད་པས་བྱིན་གྱིས་རླབས། ཤིན་ཏུ་བསྡུ་བར་བྱེད་ན། ཐོད་པ་བཅུད་དང་བཅས་པ་ལ་དམིགས་ནས། ཨོཾ་ཨཱཿཧཱུཾ་ལན་གསུམ་བརྗོད་པ་ལ་ཕྱི་ནང་གསང་བའི་མཆོད་པ་དཔག་ཏུ་མེད་པར་གྱུར་བར་བསམ་མོ། །ལྷ་ཐམས་ཅད་ཀྱི་ལྗགས་ཧཱུཾ་ལས་བྱུང་བའི་རྡོ་རྗེའི་སྦུ་གུས་བདུད་རྩི་དྲངས་ཤིང་གསོལ་བས་ཚིམ་ཞིང་མཉེས་པར་གྱུར། ཨོཾ་སརྦ་ཏ་ཐཱ་ག་ཏ་ཨ་མྲྀ་ཏ་བཛྲ་སྭ་བྷ་ཝ་ཨཱཏྨ་ཀོ྅ཧཾ། དེ་ནས་ཡང་སྔར་བཞིན། ཨརྒྷ྄ཾ་ལ་སོགས་པས་མཆོད། ཨོཾ་སརྦ་ཏ་ཐཱ་ག་ཏ་པུ་ཛ་བཛྲ་སྭ་བྷ་ཝ་ཨཱཏྨ་ཀོ྅ཧཾ། ལྷ་མོའི་འཁོར་གྱིས་བཅོམ་ལྡན་བསྐོར། །རྒྱུ་དང་མི་རྒྱུ་ཁྱོད་ཀྱི་ཐུགས། །སེམས་ཅན་ཀུན་གྱི་དོན་མཛད་རྣམས། །བཅོམ་ལྡན་མཆོག་ཏུ་དགྱེས་རྡོ་རྗེ། །ཞལ་མཛེས་ཐུགས་ཀྱི་དགོངས་པ་འགྲུབ། །ཐུགས་དགྱེས་མཛོད་ཅིག་དགྱེས་རྡོ་རྗེ། །ཨོཾ་སརྦ་ཏ་ཐཱ་ག་ཏ་སྟུ་ཏི་ར་བཛྲ་སྭ་བྷ་ཝ་ཨཏྨ་ཀོ྅ཧཾ། ཧཱུཾ་མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་དབྱིངས་ལ་ཕྱག་འཚལ་ལོ། །ཐམས་ཅད་དངོས་པོ་རང་བཞིན་མཆོག །གདོད་ནས་
ཐམས་ཅད་རང་བཞིན་གནས། ཐབས་དང་ཤེས་རབ་གཉིས་མེད་པའི། །ཀྱཻ་རྡོ་རྗེར་བདག་ཕྱག་འཚལ། །མཆེ་བ་གཙིགས་ཤིང་འཇིགས་པ་ཆེ། །སྔགས་ཀྱི་མེ་ཏོག་འཕྲེང་བས་བརྒྱན། །ཤ་ཆེན་རབ་ཏུ་གསོལ་མཛད་པ། །ཧེ་རུ་ཀ་དཔལ་བདག་ཕྱག་འཚལ། །བཅོམ་ལྡན་མགོན་པོ་དཔའ་བོའི་དབང་ཕྱུག་ནི། །བསྐལ་བའི་མེ་དཔུང་ལྟ་བུར་རབ་ཏུ་འབར། །རལ་པའི་ཅོད་པན་དབུའི་རྒྱན་དུ་བཅིངས། །མཆེ་བ་རབ་གཙིགས་དྲག་ཤུལ་འཇིགས་པའི་ཞལ། །སྐུ་ལ་གཟི་བརྗིད་ཕྱག་སྟོང་ལྡན་པ་པོ། །དགྲ་སྟ་ཞགས་པ་ཁ་ཊྭཱཾ་མདུང་བསྣམས་ཤིང༌། །རབ་འཇིགས་སྟག་གི་ལྤགས་པ་སྐུ་ལ་གསོལ། །སྐུ་ཆེན་དུ་ཁ་བགེགས་མཐར་མཛད་ལ་འདུད། །དུས་གསུམ་རྒྱལ་བ་ཐམས་ཅད་ཀྱི། །བཀའ་ཡི་འཁོར་ལོ་རབ་ཏུ་བསྐོར། །བདུད་དང་མུ་སྟེགས་ལྷ་མིན་བཅོམ། །གཤིན་རྗེ་འཇོམས་ལ་ཕྱག་འཚལ་ལོ། །དེ་ནས་རྫོགས་པའི་རིམ་པ་ནི། གསང་བ་འདུས་པའི་ལྷ་ཚོགས་ཐམས་ཅད་སྙོམས་པར་ཞུགས་ཏེ་གཅིག་ཏུ་འདུས་པ་བྱང་ཆུབ་ཀྱི་སེམས་ཀྱི་ཐིག་ལེ་དཀར་པོ་དྭངས་ཤིང་འོད་ཟེར་འཕྲོ་བ་ལྟར་མི་བཟོད་པ་ཞིག་ཏུ་གྱུར་ནས་བདེ་ཆེན་འཁོར་ལོའི་ལྟེ་བ་ལ་གནས་པར་བསམ། དེའི་འོད་ཟེར་གྱིས་སྤྱི་བོའི་འཁོར་ལོ་དང་ལུས་ཀྱི་ནང་དང་སྣང་བ་ཐམས་བ་ཅད་ཁྱབ་པས་ཐམས་ཅད་ཀྱང་འོད་དཀར་པོའི་རང་བཞིན་དུ་གྱུར། སླར་འདུས་ཏེ་ཐིག་ལེ་ལ་ཐིམ། དེ་ལྟར་སེམས་དང་ཐིག་ལེ་དབྱེར་མེད་པ་དེ་ལ་མ་བཅོས་པའི་ཚུལ་གྱི་མཉམ་པར་བཞག །དེ་བཞིན་དུ་མགྲིན་པའི་ལྷ་ཚོགས་རྣམས་ཞུ་བས་ཐིག་ལེ་དམར་པོ་དང༌། སྙིང་ཁའི་ལྷ་རྣམས་ཞུ་བས་
ཐིག་ལེ་སྔོན་པོ། ལྟེ་བའི་ལྷ་རྣམས་ཞུ་བས་ཐིག་ལེ་སེར་པོ་དང༌། གསང་གནས་ཀྱི་ལྷ་ཚོགས་རྣམས་ཞུ་བས་ཐིག་ལེ་ལྗང་ཁུར་གྱུར། ལྷག་མའི་དམིགས་པ་སྤྱི་བོའི་ཐིག་ལེ་བཞིན་བསྐྱང༌། མཐར་ལྔ་ཆར་ལས་འོད་ཟེར་འཕྲོས། འགྲོ་བ་ཐམས་ཅད་ཀྱི་སྡིག་སྒྲིབ་སྦྱངས་ཞིང་ཡོངས་སུ་དག་པར་བྱས། ཐམས་ཅད་ཀྱང་རྟེན་དང་བརྟེན་པའི་དཀྱིལ་འཁོར་དུ་གྱུར། དེ་རྣམས་ཀྱང་འོད་ཟེར་གྱིས་རྣམ་པར་ཞུ། རྟེན་དང་བརྟེན་པའི་དཀྱིལ་འཁོར་ལ་ཐིམ། དཀྱིལ་འཁོར་ལྷ་དང་བཅས་པ་ཡང་འོད་ཟེར་རྣམ་པ་ལྔར་ཞུ་སྟེ་བདག་ཉིད་ལ་ཐིམ། བདག་ཉིད་ཐིག་ལེ་བཞི་དང་བཅས་པ་ཡང་སྙིང་ཁའི་ཐིག་ལེ་ལ་ཐིམ། དེ་ཉིད་ཀྱང་འཇའ་ཚོན་ཡལ་བ་ལྟར་བསམ་ལ་ཅུང་ཟད་མཉམ་པར་བཞག །སླར་ཡང་དེ་ཉིད་ཀྱི་ངང་ལས་རྟེན་དང་བརྟེན་པའི་དཀྱིལ་འཁོར་རྒྱུད་སྡེ་ལྔའི་ལུས་དཀྱིལ་དང་བཅས་པ་སྐད་ཅིག་ཙམ་གྱིས་གྲུབ་པར་གྱུར། དེ་ལྟར་བསྒོམས་པས་ལོ་ཟླ་ཙམ་གྱིས་ལམ་ལྔའི་རིམ་པ་ལྔ་ཕྱག་རྒྱ་བཞིའི་རྟགས་རྣམས་རྫོགས་པར་འགྱུར་ཞེས་གྲུབ་ཆེན་ཁྱུང་པོས་གསུངས་སོ། །བཟླས་པའི་དམིགས་པ་གསལ་བཏབ་ལ་སྔགས་འདི་རྣམས་བཟླ་བར་བྱ་སྟེ། ཨོཾ་ཨཥྟཱ་ན་ནཱ་ཡ། པིཾ་གོརྡྷ་ཀེ་ཤ་ཝརྟྨ་ནེ། ཙ་ཏུརྦིཾ་ཤ་ཏི་ནེ་ཏྲཱ་ཡ། ཥོ་ཊ་ཤ་བྷུ་ཛཱ་ཡ། ཀྲྀཥྞ་ཛི་མཱུ་ཏ་ཝ་པུ་ཥེ། ཀ་པཱ་ལ་མཱ་ལ་ཨ་ནེ་ཀནྡྷཱ་རི་ཎེ། ཨརཧྨ་ཏ་ཀྲུ་ར་ཙིཏྟ་ཡ། ཨརྡྷེནྡུ་དཾ་ཥྟི་ཎེ། ཨོཾ་མཱ་ར་ཡ། མཱ་ར་ཡ། ཀ་རཱ་ཡ་ཀ་རཱ་ཡ། གརྫཱ་ཡ་གརྫཱ་ཡ། ཏརྫཱ་ཡ་ཏརྫཱ་ཡ། ཤོ་ཥཱ་ཡ་ཤོ་ཥཱ་ཡ། སབྟ་སཱ་ག་རཱ་ན་
བན་དྷ་བན་དྷ། ནཱ་ག་ཨཥྟ་ཀཱན། གྲྀྀཧྞ་གྲྀྀཧྞ། ཤ་ཏྲུཾ། ཧ་ཧཱ། ཧི་ཧཱི། ཧུ་ཧཱུ། ཧེ་ཧཻ། ཧོ་ཧཽ། ཧ་ཧཾ། ཕཊ་སྭཱཧཱ། རྩ་བའི་སྔགས་སོ། །ཨོཾ་དེ་ཝ་པི་ཙུ་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱཧཱ། ཨོཾ་བཛྲ་ཀརྟ་རི་ཧེ་བཛྲ་ཡ་ཧཱུཾ་ཧཱུཾ་ཧཱུཾ་ཕཊ་སྭཱཧཱ། ཨོཾ་ཨཾ་སྭཱཧཱ། ཨོཾ་མཾ་སྭཱཧཱ། ཨོཾ་ཨཾ་སྭཱཧཱ། ཨོཾ་ཨཾ་སྭཱཧཱ། ཨོཾ་ཨཱུཾ་སྭཱཧཱ། ཨོཾ་དཾ་སྭཱཧཱ། ཨོཾ་པཾ་སྭཱཧཱ། ཨོཾ་ལཾ་སྭཱཧཱ། ཨོཾ་བཛྲ་ཧྱ་གྲི་བ་ཧཱུཾ་ཕཊ་སྭཱཧཱ། ཨོཾ་བཛྲ་སུ་ཀ་ར་གྲྀ་བ་ཧཱུཾ་ཕཊ་སྭཱཧཱ། ཨོཾ་བཛྲ་ཀུ་ཀུ་ར་གྲྀ་བ་ཧཱུཾ་ཕཊ་སྭཱཧཱ། ཨོཾ་བཛྲ་སིང་ཧ་གྲི་བ་ཧཱུཾ་ཕཊ་སྭཱཧཱ། དེ་ནི་མཚོན་ཆ་ཅན་གྱིའོ། །ཨོཾ་ཨཱཿབཛྲ་དྷྲིཀ་ཧཱུཾ་ཧཱུཾ་ཕཊ་སྭཱཧཱ། ཨོཾ་ཨཱཿསྤརྴ་བཛྲ་ཧཱུཾ། ཨོཾ་ཨཱཿཛི་ན་ཛིཀ་ཧཱུཾ། ཨོཾ་ཨཱཿརཏྣ་དྷྲིཀ་ཧཱུཾ། ཨོཾ་ཨཱཿཨཱ་རོ་ལཱིཀ་ཧཱུཾ། ཨོཾ་ཨཱཿཔྲཛྙཱ་དྷྲིཀ་ཧཱུཾ། ཨོཾ་ཨཱཿམོ་ཧཱ་ར་ཏི་ཧཱུཾ། ཨོཾ་ཨཱཿདྭེ་ཥ་ར་ཏི་ཧཱུཾ། ཨོཾ་ཨཱཿརཱ་ག་ར་ཏི་ཧཱུཾ། ཨོཾ་ཨཱཿབཛྲ་རཱ་ཏི་ཧཱུཾ། ཨོཾ་ཨཱཿརུ་པ་བཛྲ་ཧཱུཾ། ཨོཾ་ཨཱཿཤབྟ་བཛྲ་ཧཱུཾ། ཨོཾ་ཨཱཿགནྡྷ་བཛྲ་ཧཱུཾ། ཨོཾ་ཨཱཿར་ས་བཛྲ་ཧཱུཾ། ཨོཾ་ཨཱཿམེཾ་ཧཱུཾ། ཨོཾ་ཨཱཿ ཧཱུཾ། ཨོཾ་ཨཱཿཧཱུཾ་ཧཱུཾ། ཨོཾ་ཨཱཿཨཾ་ཧཱུཾ། ཨོཾ་ཨཱཿཧྲཱི་ཧཱུཾ། ཨོཾ་ཨཱཿཨོཾ་ཧཱུཾ། ཨོཾ་ཨཱཿམཾ་ཧཱུཾ། ཨོཾ་ཨཱཿསཾ་ཧཱུཾ། ཨོཾ་ཨཱཿཡ་མཱནྟ་ཀྲྀཏ་ཧཱུཾ། ཨོཾ་ཨཱཿཔྲཛྙཱནྟ་ཀྲྀཏ་ཧཱུཾ། ཨོཾ་ཨཱཿཔདྨནྟ་ཀྲྀཏ་ཧཱུཾ། ཨོཾ་ཨཱཿབིགྷྣན་ཏ་ཀྲྀ་ཏ་ཧཱུཾ། ཨོཾ་ཨཱཿཨཱརྱ་ཨ་ཙ་ལ་ཧཱུཾ། ཨོཾ་ཨཱཿཊཱཀྐི་རཱ་ག་ཛཱ་ཧཱུཾ། ཨོཾ་ཨཱཿནཱི་ལ་དཎྜ་ཧཱུཾ། ཨོཾ་ཨཱཿམཧཱ་བཱ་ལ་ཧཱུཾ། ཨོཾ་ཨཱཿཙཀྲ་ཝརྟི་ཧཱུཾ། ཨོཾ་ཨཱཿསུཾ་བྷ་རཱ་ཛཱཿཧཱུཾ།
དེ་ནི་གསང་བ་འདུས་པའི་འོ། །ཨོཾ་ཨཱཿཧྲཱིཿཧཱུཾ་ཕཊ་སྭཱཧཱ། ཨོཾ་བུདྡྷ་ཌཱ་ཀི་ནཱི་ཨཱཿཧྲི་ཧཱུཾ། ཨོཾ་བཛྲ་ཌཱ་ཀི་ནཱི་ཨཱཿཧྲཱིཿཧཱུཾ། ཨོཾ་རཏྣ་ཌཱ་ཀི་ནཱི་ཨཱཿཧྲཱིཿཧཱུཾ། ཨོཾ་པདྨ་ཌཱ་ཀི་ནཱི་ཨཱཿ ཧྲི་ཧཱུཾ། ཨོཾ་བི་ཤྭ་ཌཱ་ཀི་ནཱི་ཨཱཿཧྲི་ཧཱུཾ། དེ་ནི་མཧཱ་མ་ཡའི་འོ། །ཨོཾ་དེ་ཝ་པི་ཙུ་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱཧཱ། ཨོཾ་བཛྲ་ཀརྟ་རི་ཧེ་བཛྲ་ཡ་ཧཱུཾ་ཧཱུཾ་ཧཱུཾ་ཕཊ་སྭཱཧཱ། ཨོཾ་ཨཱཿཨཾ་ཧཱུཾ་སྭཱཧཱ། ཨོཾ་ཨཱཿགཾ་ཧཱུཾ་སྭཱཧཱ། ཨོཾ་ཨཱཿཙཾ་ཧཱུཾ་སྭཱཧཱ། ཨོཾ་ཨཱཿབཾ་ཧཱུཾ་སྭཱཧཱ། ཨོཾ་ཨཱཿགྷཾ་ཧཱུཾ་སྭཱཧཱ། ཨོཾ་ཨཱཿཔཾ་ཧཱུཾ་སྭཱཧཱ། ཨོཾ་ཨཱཿཤཾ་ཧཱུཾ་སྭཱཧཱ། ཨོཾ་ཨཱཿལཾ་ཧཱུཾ་སྭཱཧཱ། ཨོཾ་ཨཱཿཊཾ་ཧཱུཾ་སྭཱཧཱ། དེ་ནི། མཚོ་སྐྱེས་ལྷ་དགུའི་ཡིན་ནོ། །ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ་ཌཱ་ཀི་ནཱི་ཛ་ལ་སཾ་བྷ་ར་སྭཱཧཱ། ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཕཊ། ཨོཾ་ཧྲིཿཧ་ཧ་ཧཱུཾ་ཧཱུཾ་ཕཊ། ཨོཾ་སརྦ་བུདྡྷ་ཌཱ་ཀི་ནཱི་ཡཻ་བཛྲ་ཝརྞ་ནཱི་ཡཻ་ཧཱུཾ་ཧཱུཾ་ཕཊ་སྭཱ་ཧཱ། མཱཾ་ལཱཾ་པཱཾ་ཏཾ་པུ་ཛ་ཨོ་ཨ་གོ་ར་དེ་མ། ཀ་ཨོ་ཏྲི་ཀོ་ཀ་ལ་ཀ་ཧི། པྲེ་གྲི་སཽ་སུ་ན་སི་མ་ཀུ། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཞེས་བདེ་མཆོག་གི་སྔགས་ཕྲེང་བསྡུས་པའོ། །རྒྱས་པར་ནི་གཞན་དུ་ཤེས་པར་བྱའོ། །ཨོཾ་ཨཱ་དྷི་སྭཱཧཱ། ཨོཾ་ཡ་མཱནྟ་ཀ་ཧཱུཾ་ཕཊ། ཨོཾ་ཧྲཱིཿཥྟིཿབི་ཀྲི་ཏཱ་ན་ནཱ་ཧཱུཾ་ཕཊ། ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཕཊ། ཨོཾ་ཨཱ་ཛི་ན་ཛིཀ་ཧཱུཾ། ཨོཾ་ཨཱཿརཏྣ་དྷྲིཀ་ཧཱུཾ། ཨོཾ་ཨཱཿཨཱ་རོ་ལིཀ་ཧཱུཾ། ཨོཾ་ཨཱཿཔྲཛྙཱ་དྷྲིཀ་ཧཱུཾ། ཨོཾ་ཨཱཿམོ་ཧ་རཱ་ཏི་ཧཱུཾ། ཨོཾ་ཨཱཿདྭེ་ཥ་ར་ཏི་ཧཱུཾ། ཨོཾ་ཨཱཿརཱ་ག་རཱ་ཏི་ཧཱུཾ། ཨོཾ་ཨཱཿབཛྲ་ར་ཏི་ཧཱུཾ། ཨོཾ་ཨཱཿམུད་
ག་ར་དྷྲྀཀ་ཧཱུཾ། ཨོཾ་ཨཱཿ་དནྡྲ་དྷྲིཀ་ཧཱུཾ། ཨོཾ་ཨཱཿཔདྨ་དྷྲྀཀ་ཧཱུཾ། ཨོཾ་ཨཱཿཁརྒ་དྷྲྀཀ་ཧཱུཾ། ཨོཾ་ཨཱཿཎ་ཧཱུཾ། ཨོཾ་ཨཱཿཡོ་ཧཱུཾ། ཨོཾ་ཨཱཿནི་ཧཱུཾ། ཨོཾ་ཨཱཿར་ཧཱུཾ། ཞེས་པ་ནི་རྡོ་རྗེ་འཇིགས་བྱེད་ལྷ་ཚོགས་ཀྱི་ཡིན་ནོ། །རྒྱས་པར་ན་མཚོན་ཆ་ཅན་ལ་ཕྲེང་བའི་སྔགས་འདི་དག་བཟླ་བར་བྱའོ། །ཨོཾ་ཧྲིཿསྭཱཧཱ། ཨོཾ་བཛྲ་གུ་ཧྱེ་སིདྡྷི་པ་ར་མ་ཡོ་གེ་ཤྭ་རི་ཀ་པཱ་ལ་མཱ་ལ་དྷ་རི་ཎི་རུ་དྷི་ར་པྲ་ཡེ་ཤྨ་ཤཱ་ན་བཱ་སི་ནཱི་ཧཱུཾ་ཕཊ་སྭཱཧཱ། ཨོཾ་བཛྲ་ཙནྡྲི་ཤྭ་རི། ཁ་ཊྭཱཾདྒི། མཧཱ་བཛྲི་ཎི་ཀ་པཱ་ལ་མཱ་ལ། མུ་ཀུ་ཊོ་ཨཱའ་ཀཊདྷ། སརྦ་དུཥྟ་ད་བ་མཱ་ཀཊྚ། རུ་ལུ་རུ་ལུ་བྷྱོ་ཧཱུཾ་ཕཊ། ཨོཾ་བཛྲ་པ་ར་ཛི་ཏེ་པ་ར་མ་གུ་ཧྱེ་ཀ་པཱ་ལ་མཱ་ལཱ་ནི་བྷུ་ཏེ་སརྦ་དུཥྟ་མོ་ཧ་ནི་པྲི་ཡེ་ཨེ་ཧྱ་ཧི་བྷ་ག་ཝ་ཏི་བཛྲ་གུ་ཧྱེ་ཤྭ་རཱི། བ་ཧུ་བི་དྷ་བེ་ཤ་དྷ་རི་ཎི། སརྦ་དུཥྟ་ནི་བཱ་ར་ཎི་ཧཱུཾ་ཕཊ། ཨོཾ་བཛྲ་བེརྟཱ་ལི་ཁ་ཁ་ཁཱ་ཧི་ཁཱ་ཧི་སརྦ་དུཥྟ་བི་ཀྲྀ་ཏ་བེ་ཥ་དྷ་རི་ཎི། བི་ཀྲི་ཏ་ལངྒ་ར་བྷུ་ཥེ་ཏེ་ཧ་ན་ཧ་ན་ད་ཧ་ད་ཧ་པ་ཙ་པ་ཙ། མཱ་བི་ལམྦ། མཱ་བི་ལམྦ། ས་མ་ཡ་མ་ནུ་སྨ་ར་པྲ་བེ་ཤ་ཡ་མནྚ་ལ་མ་དྷྱེ། ཨུརྠཱ་པ་ཡ་སརྦ་ཧཱུཾ་ཧཱུཾ་ཕཊ། ཨོཾ་ཨེ་ཧྱེ་བྷ་ག་བ་ཏི་བཛྲ་གུ་ཧྱེ་ཤྭ་རི་བ་ཧུ་བི་དྷ་བེ་ཤ་དྷ་རི་ཎི། སརྦ་ཏ་ཐཱ་ག་ཏ་དུཥྟེ་ས་མཱ་ཡ་མ་ནུ་སྨ་ར་ཧ་ན་ཧ་ན། རངྒ་རངྒ། རངྒ་པཱ་ཡ་རངྒ་པཱ་ཡ། སཱུ་ར་ཡ་སཱུ་ར་ཡ། ཨཱ་བེ་ཤ་ཨཱ་བེ་ཤ །སརྦ་བྷུ་ཏ་ནརྟ་ནརྟ། ནརྟཱ་པ་ཡ་ནརྟཱ་པ་ཡ། ཧཿཧ་ཧ་ཧ་ཧ་ཧཱུཾ་ཧཱུཾ་ཧཱུཾ་ཕཊ། ཨོཾ་བཛྲ་ཤཱུ་ལ་ཨ་གྲི་བྷིནྡྷ་བྷིནྡྷ་སརྦ་དུཥྟ་ཧྲི་ད་ཡཾ། ཨཱ་ཀརྵ་ཡ། ཨཱ་ཀརྵ་ཡ། ཧ་ན་ཧ་ན། ད་ཧ་ད་ཧ། ནིརྨ་ཐ་ནིརྨ་ཐ། མཱ་ར་ཡ་
མཱ་རཱ་ཡ། མ་བི་ལམྦ་མཱ་བི་ལམྦ། ས་མ་ཡ་མ་ནུ་སྨ་ར་ཧཱུཾ་ཕཊ། ཨོཾ་བཛྲ་མ་ཧེ་ཤྭ་རི། ཧཾ་ཧཾ་ཧཾ་ཧཾ་ཧཿ རུ་ལུ་རུ་ལུ་བྷྱོ་ཧཱུཾ་ཕཊ། བྷཀྵ་ལ་སརྦ་དུཥྟན་ནིརྨ་ཐ་ཧྲི་ད་ཡཾ་ཧཱུཾ་ཕཊ་སྭཱ་ཧཱ། ཨོཾ་སུམྦྷ་ནི་དིཔྟ་ས་མ་ཡ་བཛྲ་ཧཱུཾ་ཕཊ། ཨོཾ་བཛྲ་བ་ཌ་བཱ་མུ་ཁི་ཡོ་གེ་ཤྭ་རི་ཧཱིཿཧི་ཧི་ཧི་ཧི་ཧཱུཾ་ཛཿ ཨོཾ་བཛྲ་བཱ་རཱ་ཧཱི་མུ་ཁཱི་ཏྲི་བཾ་བ་ཧཱུཾ། ཨོཾ་ཙནྡྲ་སཱུརྱ་ཧུ་ཏཱ་ཤ་ནི་སིཾ་ཧ་ཤ་ནི་ནིརྣཱ་དེ་སིཾ་ཧ་བགཏྲེ་ནི་ཊཱཾ་ཊཱཾ་བཾ། ཨོཾ་བཛྲ་དྷ་རུ་ཛཱི་བ་ནི་མཧཱ་ཡཀྵི་ཎཱི་ཤྭ་ནི་རུ་པི་ནཱི་མཧཱ་པྲཱ་ལ་ཡ་ནིརྣཱ་དཱེ་ཀཱ་མ་རུ་པི་ཎཱི་ཏྲཱཾ་ཏྲ་ཌ་ཊ་ཧོཿ དགྱེས་མཛད་ལྷ་དགུའི་གཙོ་བོ་ལ་ཡང་ཨཥྟ་མང་དུ་བཟླ་ཞིང་ཁྱད་པར་འཁོར་ལོ་སྡོམ་པའི་ཕྲེང་བའི་སྔགས་ཡོངས་སུ་རྫོགས་པའང་ཅི་རིགས་པར་བཟླས་ཏེ་ཟུར་དུ་རྟོགས་པར་བྱའོ། །ཐུན་མཚམས་སུ་གཏོར་བ་འབུལ་བར་འདོད་ན། གཏོར་མ་ནང་མཆོད་ལྟར་བྱིན་གྱིས་རླབས་ལ། རྒྱུད་སྡེ་ལྔའི་དཀྱིལ་འཁོར་གྱི་ལྷ་ཚོགས་འཁོར་དང་བཅས་པ་ཐམས་ཅད་མདུན་གྱི་ནམ་མཁར་སྐད་ཅིག་ཙམ་གྱིས་གྲུབ་པར་གྱུར། བཟླས་པའི་སྐབས་སུ་བསྟན་པ་ལྟར་སྔགས་རེ་རེའི་མཐར། ཨ་ཀཱ་རོ་སྦྱར་བའི་གཙོ་བོ་རྣམས་ལ་ལན་བདུན་བདུན། འཁོར་རྣམས་ལ་རེ་རེ་ཕུལ་ལ། གོང་དུ་ཡེ་ཤེས་པ་ལ་མཆོད་པ་འབུལ་བ་ལྟར༌། ཕྱྀི་ནང་གསང་བས་མཆོད། རང་རང་གི་བསྟོད་པས་ཀྱང་བདག་བསྐྱེད་ལྟར་བསྟོད། མཆོད་སྦྱིན་གཏོར་མ་འདི་བཞེས་ལ། ཞེས་སོགས་ཀྱིས་འདོད་དོན་གསོལ་བ་བཏབ། མྱུར་མཛད་ཡེ་ཤེས་མགོན་པོ་ལ་བར་འདིར་གཏོར་མ་འབུལ། དེ་ནས་སྤྱི་གཏོར་ནི། སླར་ཡང་གཞལ་ཡས་ཁང་གི་ཕྱི་རོལ་ནམ་མཁའ་
ལ་ཆོས་འབྱུང་སུམ་བརྩེགས་དབུས་མའི་ནང་དུ་པཾ་ལས་པདྨ་འདབ་མ་བརྒྱད་པ་སྔོན་པོ། སྟེང་མའི་ནང་དུ་པཾ་ལས་པདྨ་འདབ་མ་བརྒྱད་པ་དཀར་པོ། འོག་མའི་ནང་དུ་པཾ་ལས་པདྨ་འདབ་མ་བརྒྱད་པ་དམར་པོ། དབུས་མའི་པདྨའི་ལྟེ་བ་ལ་བཅོམ་ལྡན་འདས་ཐུགས་རྡོ་རྗེ། དེའི་འདབ་མ་བརྒྱད་ལ་ཤར་དུ་ཨིཾ་ལས་དབང་པོ་དཀར་པོ་གླང་པོ་ཆེ་ལ་བཞུགས་པ་རྡོ་རྗེ་དང་དྲིལ་བུ་འཛིན་པ། ལྷོར་ཡཾ་ལས་གཤིན་རྗེ་མཐིང་ནག་མ་ཧེ་ལ་བཞུགས་པ་དབྱུག་པ་དང་ཐོ་བ། ནུབ་ཏུ་ཝཱཾ་ལས་ཆུ་ལྷ་དམར་སྐྱ་ཆུ་སྲིན་ལ་ཞོན་པ་སྦྲུལ་ཞགས་དང་པདྨ། བྱང་དུ་ཡཾ་ལས་གནོད་སྦྱིན་སེར་པོ་རྟ་ལ་བཞོན་པ་ཤིང་ཐོག་དང་ནེའུ་ལེ། བྱང་ཤར་དུ་བྷཾ་ལས་འབྱུང་པོ་དཀར་པོ་སྤྱན་གསུམ་པ་གླང་ལ་བཞོན་པ་རྩེ་གསུམ་དང་ཞགས་པ། ཤར་ལྷོར་རཾ་ལས་མེ་ལྷ་དམར་པོ་ར་སྐྱེས་ལ་བཞུགས་པ་བགྲང་ཕྲེང་དང་སྤྱི་བླུགས། ལྷོ་ནུབ་ཏུ་ནཾ་ལས་སྲིན་པོ་ནག་པོ་རོ་ལངས་ལ་བཞོན་པ་རལ་གྲི་དང་ཐོད་པ། ནུབ་བྱང་དུ་བཱཾ་ལས་རླུང་ལྷ་ལྗང་གུ་རི་དྭགས་ལ་བཞོན་པ་བ་དན་དང་ཞགས་པ་འཛིན་པ། འཁོར་གནོད་སྦྱིན་དུ་མའི་ཚོགས་ཀྱིས་བསྐོར་བ། སྟེང་གི་པདྨའི་དབུས་སུ་བཅོམ་ལྡན་འདས་སྐུ་རྡོ་རྗེ། འདབ་མ་བརྒྱད་ལ་ཤར་དུ་ཤཾ་ལས་བརྒྱ་བྱིན་དཀར་པོ་རྡོ་རྗེ་དང་དྲིལ་བུ། ལྷོར་ཨོཾ་ལས་ཚངས་པ་སེར་པོ་ངང་པ་ལ་བཞུགས་པ་སྤྱི་བླུགས་དང་རྩེ་གསུམ། ནུབ་ཏུ་བིཾ་ལས་ཁྱབ་འཇུག་དམར་སེར་འཁོར་ལོ་དང་དུང༌། བྱང་དུ་ཏྲུཾ་ལས་
དབང་ཕྱུག་མཐིང་ག་རྩེ་གསུམ་དང་ཐོད་པ། བྱང་ཤར་དུ་ཀཾ་ལས་གཞོན་ནུ་སྨིན་དྲུག་དཀར་པོ་མདའ་གཞུ། ཤར་ལྷོར་གཾ་ལས་ཚོགས་བདག་དཀར་པོ་ལ་ཕུག་དང་ལ་དུའི་སྣོད་འཛིན་པ། ལྷོ་ནུབ་ཏུ་བྷྲིཾ་ལས་བྷྲིཾ་གི་རི་ཏི་དམར་པོ་མདུང་དང་མདའ། ནུབ་བྱང་དུ་ཀཾ་ལས་ལེགས་ལྡན་ནག་པོ་རལ་གྲི་དང་ཕུབ་འཛིན་པ། ཐམས་ཅད་ཀྱང་པད་ཟླའི་གདན་ལ་བཞུགས་པ། འཁོར་འདོད་ཁམས་ཀྱི་ལྷས་བསྐོར་བ། འོག་གི་འདབ་མ་བརྒྱད་ཀྱི་དབུས་སུ་བཅོམ་ལྡན་འདས་གསུང་རྡོ་རྗེ། འདབ་མ་བརྒྱད་ལ་ཤར་དུ་ཕཾ་ལས་དགའ་པོ་སེར་པོ། ལྷོར་ཕིཾཿལས་དུང་སྐྱོང་དཀར་པོ། ནུབ་ཏུ་ཕུཾ་ལས་མཐའ་ཡས་སྔོན་པོ། བྱང་དུ་ཕེཾ་ལས་རིགས་ལྡན་ལྗང་ཁུ། བྱང་ཤར་དུ་ཕོཾ་ལས་པདྨ་ཆེན་པོ་དཀར་པོ། ཤར་ལྷོར་ཕཱུཾ་ལས་འཇོག་པོ་དམར་པོ། ལྷོ་ནུབ་ཏུ་ཕཱིཾ་ལས་ནོར་རྒྱས་ཀྱི་བུ་ཁྲ་བོ། ནུབ་བྱང་དུ་ཕཻཾ་ལས་པདྨ་དཀར་པོ་ཐམས་ཅད་ཀྱང་པད་ཟླའི་གདན་ལ་བཞུགས་པ། སྦྲུལ་མགོ་བདུན་དང་ལྡན་ཞིང་སྟོད་ལྷའི་དབུ་ཅན་སྨད་སྦྲུལ་མཇུག་འཁྱིལ་བ། ཕྱག་གཡས་སྦྲུལ་དང་གཡོན་པདྨ་འཛིན་པ། འཁོར་ངན་སོང་གསུམ་གྱིས་བསྐོར་བ། འབྱུངཔོ་བརྒྱད་གསུམ་ཉི་ཤུ་བཞི་པོ་ཐམས་ཅད་རིན་པོ་ཆེས་བརྒྱན་པ། བུ་དང་ཆུང་མ་ལ་སོགས་པ་འཁོར་དཔག་ཏུ་མེད་པ་དང་བཅས་པའོ། །ཞེས་བསྐྱེད་ལ་སོ་སོའི་ཕྱག་རྒྱ་དང་བཅས། གཽ་རཱི་ཨ་ཀརྵ་ཡ་ཛཿ ཞེས་བརྗོད་པས་གཽ་
རཱིའི་ཐུགས་ཀ་ནས་འོད་ཟེར་ལྕགས་ཀྱུའི་རྣམ་པ་ཁ་དོག་ལྔ་འཕྲོས་ནམ་མཁའི་མཐའ་ཁྱབ་པའི་ཕྱོགས་སྐྱོང་ལྷ་ཀླུ་འཁོར་དང་བཅས་པ་མདུན་དུ་བཀུགས། ཙཽ་རི་པྲ་བེ་ཤ་ཡ་ཧཱུཾ་གི་དམ་ཚིག་པ་ལ་ཞུགས། བཻ་ཏཱ་ལི་བནྡྷ་བཾ་གྱིས་གཉིས་མེད་དུ་བསྟིམས། གྷསྨ་རཱི་ཝ་ཤཾ་ཀུ་རུ་ཧོཿ སྙོམས་པར་ཞུགས་པ་ལྟར་བདེ་བའི་རོ་མྱང་བས་ཞུ་སྟེ། དབུས་ཀྱི་ཕྱོགས་སྐྱོང་འཁོར་དང་བཅས་པ་རྣམས་ཧཱུཾ་སྔོན་པོའི་ཐིག་ལེར་གྱུར། སྟེང་གི་ལྷ་ཆེན་འཁོར་དང་བཅས་པ་རྣམས་ཨོཾ་དཀར་པོའི་ཐིག་ལེར་གྱུར། འོག་གི་ཀླུ་ཆེན་འཁོར་དང་བཅས་པ་རྣམས་ཨཱཿདམར་པོའི་ཐིག་ལེར་གྱུར་པ་ལས། བར་མའི་ཧཱུཾ་རྣམས་ལས་མི་བསྐྱོད་པ་རྡོ་རྗེ་དང་དྲིལ་བུ་འཛིན་པ་སྐུ་མདོག་མཐིང་ག་ཡུམ་དང་བཅས་པར་གྱུར། སྟེང་མའི་ཨོཾ་བརྒྱད་ལས་རྣམ་སྣང་སྐུ་མདོག་དཀར་པོ་རྡོ་རྗེ་དྲིལ་བུ་འཛིན་པ་ཡུམ་དང་བཅས་པར་གྱུར། འོག་གི་ཨཱཿབརྒྱད་ལས་སྣང་མཐའ་སྐུ་མདོག་དམར་པོ་རྡོ་རྗེ་དྲིལ་བུ་འཛིན་པ་ཡུམ་དང་བཅས་པར་གྱུར། ཐམས་ཅད་དུར་ཁྲོད་ཀྱི་རྒྱན་ཅན་ཞབས་གཡས་བརྐྱང་གཡོན་བསྐུམ་གྱིས་བཞུགས་པའོ། །གཽ་རཱྀ་ཛཿཞེས་པས་རང་བཞིན་གྱི་གནས་ནས་སྐུ་གསུང་ཐུགས་ཀྱི་ལྷ་ཚོགས་ཡེ་ཤེས་པ་བཀུག་ཙཽ་རི་ཧཱུཾ་གིས་སོ་སོར་གཞུག །བཻ་ཏཱ་ལི་བཾ་གྱིས་གཉིས་མེད་དུ་བསྟིམས། གྷསྨ་རཱི་ཧོཿ་ཡིས་དགྱེས་པར་བྱས། གོང་བཞིན་་སྐྱེ་མཆེད་དང་སྐུ་གསུང་ཐུགས་ཀྱི་བྱིན་རླབས་ནས་དབང་གི་ལྷ་སྤྱན་དྲངས།
མཆོད་དབང་བསྐུར་བར་གསོལ་བ་བཏབ་པས་དབང་བསྐུར། སྡིག་སྒྲིབ་སྦྱངས། ཆུའི་ལྷག་མ་གྱེན་དུ་འཁྱིལ་བས། བར་མ་རྣམས་ལ་མི་བསྐྱོད་པ། སྟེང་མ་རྣམས་ལ་རྣམ་སྣང༌། འོག་མ་རྣམས་ལ་སྣང་མཐའ་ཆགས་བྲལ་གྱི་ཆ་ལུགས་ཅན་རྣམས་ཀྱིས་དབུ་བརྒྱན་པར་བསམ་མོ། །བསྡུས་པར་བྱེད་ན། རང་གི་སྙིང་ཀ་ནས་འོད་ཟེར་འཕྲོས། ཕྱོགས་སྐྱོང་བཅུ་ལ་སྲིད་པ་གསུམ་གྱི་འབྱུང་པོའི་ཚོགས་ཐམས་ཅད་ཀྱིས་བསྐོར་བ་བཛྲ་ས་མ་ཛཿ རང་གི་སྙིང་ག་ནས་འོད་ཟེར་འཕྲོས། གཏོར་མགྲོན་རྣམས་ལ་ཕོག་པས་སྐད་ཅིག་གིས་འོད་གསལ་དུ་བཅུག་པའི་སྐུ་གསུང་ཐུགས་རྡོ་རྗེའི་སུ་འགྱུར། ཅེས་སོ། །ཨོཾ་ཨིན་ད། ཛ་མ་ཛ་ལ། ཛཀྑ་བྷུ་ཏ། བ་ཧི་ན་བཱ་ཨུ། རཀྑ་ཙནྡ། སུཛྫ། མཱ་ཏ་བསྤ་ཏཱ་ལ་པཏཱ་ལ། ཨརྠ་པལྤ་སྭཱ་ཧཱ། ཨེ་དཾ་བ་ལིཾ་བྷུ་ཛ་ཛི་གྷ། ཕུལླ་དྷུ་པ་མཾ་ས། སིཾ་གྷ། ཨཾ་བ། སསྤ། ཀཛྫ། མཱ་ད་ཁནྚི་ཁུ་ཎི་ཕེ་ཊ་ག་ཏ། ཨོཾ་ཨཱ་ཀ་རོ་སོགས་ལན་གསུམ་གྱིས་འབུལ། ཨརྒྷཾ་ལ་སོགས་པས་མཆོད། ཨོཾ་ཨཱཿཧཱུཾ་གིས་ནང་མཆོད་ཕུལ། མི་བསྐྱོད་པ་ནི་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་མཁའ་འགྲོ་ཕྱག་འཚལ་བསྟོད། །རྣམ་པར་སྣང་མཛད་རབ་ཏུ་དག །རྡོ་རྗེ་ཞི་བ་དགའ་ཆེན་པོ། །རང་བཞིན་གྱིས་ནི་འོད་གསལ་མཆོག །སངས་རྒྱས་མཁའ་འགྲོ༴ །རིན་ཆེན་རྒྱལ་པོ་
རབ་ཏུ་ཟབ། །མི་རྟོག་ནམ་མཁའ་དྲི་མ་མེད། །དངོས་འཛིན་དག་པས་གོས་པ་མེད། །རིན་ཆེན་མཁའ་འགྲོ༴ །རྡོ་རྗེ་མི་འཆི་འདོད་ཆགས་ཆེ། །མི་རྟོག་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །པདྨ་མཁའ་འགྲོ༴ །རྡོ་རྗེ་དག་པ་གདོད་མི་ཟ། །བསམ་པ་ཐམས་ཅད་རྫོགས་མཛད་པ། །སངས་རྒྱས་ངོ་བོ་ཉིད་ལས་བྱུང༌། །སྣ་ཚོགས་མཁའ་འགྲོ༴ །བླ་མ་ཡི་དམ་མཁའ་འགྲོ་དང༌། །སངས་རྒྱས་བྱང་སེམས་ཆོས་སྐྱོང་ལ། །བདུད་རྩི་འབར་བའི་གཏོར་མ་དང༌། །ཕྱི་ནང་གསང་བའི་མཆོད་པ་འབུལ། །རྣལ་འབྱོར་བདག་ཅག་འཁོར་བཅས་དང༌། །མཐའ་ཡས་སེམས་ཅན་མ་ལུས་ལ། །མཆོག་དང་ཐུན་མོང་དངོས་གྲུབ་སྩོལ། །ཡོན་ཏན་འཕྲིན་ལས་རྒྱས་པར་ཤོག །ཀཽལླ་ཨེ་རི་ཊ་ཋི་ཨ་བོལླ་མུམྨུ་ཎི་རི་ཀཀྐོ་ལ་སོགས་རྡོ་རྗེའི་གླུ་དབྱངས་ཡང་བླངས། ཨོཾ་ཕུན་སུམ་ཚོགས་པ་མངའ་བ་སོགས་ཤོ་ལོ་གསུམ་གྱིས་བཀྲ་ཤིས་བརྗོད། སྐྱེ་ཤིང་སྐྱེ་བར་རིགས་མཆོག་ཏུ། །སྐྱེ་ཤིང་ཁེངས་མེད་དམ་ཚིག་ལྡན། །དགྱེས་མཛད་རྡོ་རྗེ་སྟོན་པ་དང༌། །བརྩེ་ལྡན་བླ་མར་གུས་འགྱུར་ཤོག །སྐྱེ་ཤིང་སྐྱེ་བ་ཐམས་ཅད་དུ། །ལག་པས་རྡོ་རྗེ་དྲིལ་བུ་འཁྲོལ། །ཟབ་མོའི་ཆོས་ནི་ཀློག་པ་དང༌། །བཙུན་མོའི་ཁུ་བ་ལེན་པར་ཤོག །སེམས་ཅན་ཐམས་ཅད་བདེ་གྱུར་ཅིག །སེམས་ཅན་ཐམས་ཅད་སྐྱོན་མེད་པར། གང་གི་ལམ་ནས་འགྲོ་བ་ཡི། །ལམ་དེ་
མྱུར་དུ་འགྲུབ་གྱུར་ཅིག །མ་བསྒྲལ་བ་རྣམས་བདག་གིས་བསྒྲལ། །མ་སྒྲོལ་བ་རྣམས་བདག་གིས་སྒྲོལ། །རྣལ་འབྱོར་གཙུག་ལག་བསྟན་བཅོས་ལ། །ད་ལྟ་ཉིད་དུ་གནས་པར་ཤོག །ཅེས་སྨོན་ལམ་བཏབ་ཡི་གེ་བརྒྱ་པས་ཉམ་ཆགས་བསྐང༌། མ་འབྱོར་པ་དང་ཉམས་པ་དང༌། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་བ། །དེ་ཡང་མགོན་པོས་བཟོད་པར་མཛོད། །ལྷག་པ་དང་ནི་ཆད་པ་སོགས་དང༌། བག་མེད་སྤྱོད་པ་མ་དག་པས། །རྒྱུད་ལས་གསུངས་པའི་ཆོ་ག་ནི། །མ་ལྕོགས་འཁྲུལ་པ་ཅི་མཆིས་པ། །དེ་ཡང་མགོན་པོས་བཟོད་པར་མཛོད། །ཅེས་བཟོད་པར་གསོལ། ཨོཾ་ཁྱོད་ཀྱིས་སེམས་ཅན་སོགས། མཛད་དུ་གསོལ། ཅེས་བསྙན་མནན། འཇིག་རྟེན་ལས་འདས་པའི་དཀྱིལ་འཁོར་རྣམས་བདག་ཉིད་ལ་ཐིམ། ཨོཾ་མུཿ གཙྪ་གཙྪ་སྭཱ་བྷ་ཝ་ནཾ། ཞེས་འཇིག་རྟེན་པ་རྣམས་རང་བཞིན་གྱི་གནས་སུ་གཤེགས། བདག་ཉིད་ཀྱི་ལུས་ཀྱི་དཀྱིལ་འཁོར་དང་བསྒོམ་པའི་དཀྱིལ་འཁོར་ཡང་སྐད་ཅིག་གིས་མི་སྣང་བར་འགྱུར་ཏེ། འོད་གསལ་གྱི་ངོ་བོའོ། །དེའི་ངང་ལས་ཐ་མལ་གྱི་ཤེས་པ་ཡུན་རིང་དུ་བསྐྱང༌། སྟོང་པའི་ངང་ལས་བདག་ཉིད་དགྱེས་མཛད་རྡོ་རྗེ་ཕྱག་གཉིས་པར་གྱུར། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། སྣང་བ་ཐམས་ཅད་ཀྱང་ལྷའི་འཁོར་ལོར་གྱུར། སླར་ཡང་སྨོན་ལམ་བཏབ་ཏེ་ཐུན་
མཚམས་ལ་འཇུག་གོ །ཁ་ཟས་བཟའ་བའི་ཚེ་གཏོར་མ་ལྟར་བྱིན་གྱིས་བརླབས་ཏེ། ཕུད་བླ་མ་ཡི་དམ་མྱུར་མཛད་ཡེ་ཤེས་མགོན་པོ་རྣམས་ལ་གཏོར་མའི་ཚུལ་དུ་ཕུལ། རང་ཉིད་ཐུན་མཚམས་ཀྱི་ལྷ་ལ་སྙིང་ཁར་རྒྱུད་སྡེ་ལྔའི་དཀྱིལ་འཁོར་ཡོངས་རྫོགས་དང༌། ལྟེ་བར་མྱུར་མཛད་མགོན་པོ་དང༌། ཕྱོགས་སྐྱོང་པ་རྣམས་དང་མཁའ་འགྲོ་སྡེ་ལྔ་ལ་སོགས་པ་རྣམས། སྟེང་འོག་གི་ལྷ་དེ་དག་ཐམས་ཅད་ཀྱང་ལྟོ་བ་ཐབ་ཁུང་དུ་གྱུར་ནས་འབར་བའི་མེ་དཔུང་གི་དབུས་ན་གནས་པར་བསམ། དེ་རྣམས་མཆོད་པའི་ཚུལ་དུ་བཟའ་བར་བྱའོ། །གཞན་ཡང་ཁྲུས་ཀྱི་རྣལ་འབྱོར་དང། རྗེས་ཆགས་ཀྱི་རྣལ་འབྱོར་དང༌། ཉལ་བའི་རྣལ་འབྱོར་དང༌། ལྡང་བའི་རྣལ་འབྱོར་ཏེ་དུས་ཐམས་ཅད་དུ་ཡིད་གཞན་དུ་མ་གྱུར་བར་དེ་ལྟར་བསྒོམ་པར་བྱའོ། །དེ་ལྟར་དགྱེས་མཛད་གསལ་བར་བཀོད། །འགའ་ཞིག་ལམ་འདིར་མི་མོས་ཤིང༌། ཁ་ཅིག་མོས་ཀྱང་གཞན་དང་འདྲེས། །མ་འདྲེས་རྒྱས་བསྡུས་སྐྱོན་བྲལ་བ། །འགོད་པ་གང་དེའང་རྨད་དུ་བྱུང༌། །ཡང་དགྱེས་པ་རྡོ་རྗེ་མཚོ་སྐྱེས་ལ་སོགས་པར་དཀྱིལ་འཁོར་གཞན་ལྔ་པོའི་སྒྲུབ་ཐབས་ལ་བརྟེན་ནས་རྒྱུད་སྡེ་ལྔའི་དཀྱིལ་འཁོར་བསྒོམ་པ་འདོད་ནའང༌། ལུགས་འདི་ཉིད་ཀྱི་དེ་དང་དེའི་སྒྲུབ་པ་འོག་ནས་འབྱུང་བ་བཞིན་དུ་ཉམས་སུ་བླངས་ལ། གསང་འདུས་ལ་ལྷ་རྣམས་མངལ་བྱིན་གྲུབ་མཚམས་དང༌། གཞན་རྣམས་ལ་ཡེ་ཤེས་པ་བསྲེ་བའི་སྔོན་དུ་ལུས་དཀྱིལ་གོང་བཞིན་འགོད་པར་བྱའོ། །གལ་ཏེ་དགྱེས་མཛད་མཚོན་ཆ་ཅན་འབའ་ཞིག་བསྒོམ་པར་འདོད་ན་ལུས་དཀྱིལ་རྣམས་བོར་བས་འགྲུབ་ཅིང༌། ཡང་ཕྱི་དཀྱིལ་དྲུག་པོ་གང་ཡང་རུང་བ་ཡང་
སྐད་ཅིག་གིས་བསྐྱེད་པ་ལུས་དཀྱིལ་འགོད་པ་དང༌། ལྷན་སྐྱེས་ལ་གཙོ་བོ་ཕྱག་མང་ལྔ་འགོད་པ་དང༌། ལྷན་སྐྱེས་ལ་ལྷན་སྐྱེས་ལྔ་འགོད་པ་སྟེ། རྒྱས་བསྡུས་དྲུག་གི་དབྱེ་བས་རྒྱུད་སྡེ་ལྔའི་སྒྲུབ་ཐབས་ཉེར་མཁོ་སུམ་ཅུ་དྲུག་ཏུ་འགྱུར་ཞིང༌། ཕྱི་དཀྱིལ་རྒྱས་པ་ལ་ལུས་དཀྱིལ་བསྡུས་པ་བཀོད་པ་སོགས་ཀྱིས་ཕྱེ་ན་མཐའ་ཡས་པར་འགྱུར་ལ། དཀྱིལ་འཁོར་སོ་སོའི་ཉམས་ལེན་ལ་མངོན་རྟོག་རྒྱས་པ་དང་ས་བོན་ཙམ་ལས་བསྐྱེད་པ་དང༌། སྐད་ཅིག་གིས་བསྐྱེད་པ་དང་གཙོ་བོ་རྐྱང་བ་བསྒོམས་པ་དང༌། ལྷན་སྐྱེས་བསྒོམ་པས་དབྱེ་བས་སུམ་ཅུ་ཐམ་པར་འགྱུར་ཞིང༌། མེ་ཏོག་ཕོག་པའི་ལྷ་གང་དང་གང་ཡིན་པ་དེ། ༢སྒྲུབ་པར་བྱ་དགོས་པས་དཀྱིལ་འཁོར་དྲུག་པ་ལྷ་བརྒྱ་དང་སུམ་ཅུ་རྩ་བརྒྱད་ཡོད་ལ། དེ་དག་སྒྲུབ་ཚུལ་ན་སྟོང་པའི་ངང་ལས་རང་གི་ས་བོན་ལས་བསྐྱེད་ལ་དབུ་རྒྱན་རང་ཆས་སུ་བསམ། གནས་གསུམ་བྱིན་གྱིས་བརླབས་ལ། ཡེ་ཤེས་པ་དང་བསྲེས་ནས་སྔགས་བཟླས་པས་འགྲུབ་པ་ཡིན་ནོ། །༈ ལྭ་བ་པས་མཛད་གཞུང་བཞིན་ཏེ། ལུས་དཀྱིལ་འགོད་པ་མན་ངག་ཡིན། །གླེགས་བམ་ཀློག་པའི་ཕྱུགས་དེ་དག །གུས་དང་བྲལ་བ་སྐལ་བའི་སྐྱོན། །རྒྱུད་སྡེ་ལྔའི་ལུས་དཀྱིལ་གཅིག་ཏུ་སྒོམ་པའི་མངོན་རྟོགས་སྟོན་ཟིན་པའི་སྐབས་ཏེ་དང་པོའོ། །འདི་མན་ཆད་དུ་བཤད་པར་བྱ་བའི་དཀྱིལ་འཁོར་ལྔ་སོ་སོའི་སྒྲུབ་ཐབས་དང༌། མཚོན་ཆ་ཅན་གྱི་དཀྱིལ་འཁོར་འགའ་ཞིག་སྒོམ་པར་བྱེད་པ་ལའང་གོང་དུ་བཤད་པའི་བདག་བསྲུང་བ་ཡན་ཆད་བྱེད་པར་བླ་མ་རྣམས་བཞེད་པར་འདུག་པས། དེ་ལྟར་བྱས་ཀྱང་སྐྱོན་དུ་འགྱུར་བ་དཀའ་མོད། གོང་མ་རྣམས་ཀྱི་བཞེད་པ་
ནི། དཀྱིལ་འཁོར་བདུན་པོ་འདི་དག་གི་བསྙེན་པ་སོགས་བྱེད་པའི་ཚེ། དེ་ཡན་ཆད་གེགས་བསྲུང་བའི་དོན་དུ་ཡུན་རིང་བསྒོམ་པར་བཞེད་པར་མངོན་པས། དཀྱིལ་འཁོར་རྐྱང་པ་ཕྱི་མ་འདི་རྣམས་ལ་འདི་ཡན་ཆད་མ་བསྒོམས་ན་མངོན་རྟོགས་ཀྱི་ཡན་ལག་ཆད་པར་མི་འགྲོ་བར་མངོན་ལ། ཁྱད་པར་འདུས་པའམ་བདེ་མཆོག་ལ་ཕུར་གདབ་པ་ལན་གཉིས་སོགས་མི་དགོས་པར་མངོན་ནོ། །༈ ད་ནི་སོ་སོའི་མངོན་རྟོགས་བཤད་པར་བྱ་སྟེ། བདག་ཉིད་གང་ལ་མོས་པ་དེ་གྲུབ་པའི་དོན་དུའམ། དེ་ལ་རབ་ཏུ་རྒྱས་པ་དགྱེས་མཛད་རྡོ་རྗེ་ལྷ་དགུའི་བསྐྱེད་རིམ་འབའ་ཞིག་བསྒོམ་ན། རང་དགྱེས་མཛད་ཧེ་རུ་ཀར་གསལ་བའི་སྙིང་གར་རཾ་ལས་ཉི་མ་ལ་གནས་པའི་ཧཱུཾ། རང་གི་མདུན་དུ་བླ་མ་དང་དབྱེར་མེད་པའི་ཧེ་རུ་ཀ་བཞུགས་པ་ལ། སྙིང་ག་ནས་སྤྲུལ་པའི་ལྷ་མོ་བརྒྱད་ཀྱིས་མཆོད་པར་གྱུར། དཀར་མོ་རི་དྭགས་ཞེས་པ་ལ་སོགས་པ་བརྗོད། བདག་གིས་སྡིག་པ་སོགས། གྲོལ་བར་ཤོག །ཞེས་ཡན་ལག་ལྔ་པའམ། ཡང་ན་གང་ཞིག་འཁོར་བ་ཐོག་མ་མེད་ནས་ངན་པའི་རྣམ་པར་རྟོག་པ་ལས་སྐྱེས་པའི་བདག་གིས་སྡིག་པ་བྱས་པ་དེ་དག་ཐམས་ཅད་བཅོམ་ལྡན་འདས་ཀྱི་སྤྱན་སྔར་བཤགས་ཤིང་སླར་ཡང་མི་བགྱིད་དོ། །གང་གི་སེམས་ཅན་ཐམས་ཅད་ཀྱི་དགེ་བ་ཀུན་ལ་རྗེས་སུ་ཡི་རང་ངོ༌། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །སངས་རྒྱས་ཆོས་དང་ཚོགས་མཆོག་ལ། བྱང་ཆུབ་བར་དུ་སྐྱབས་སུ་མཆི། །བདག་དང་
གཞན་དོན་རབ་སྒྲུབ་ཕྱིར། །བདག་གིས་བྱང་ཆུབ་མཆོག་སེམས་བསྐྱེད། །ཨེ་མ་ཧོ་སེམས་ཅན་ཀུན་མགྲོན་གཉེར། །བྱང་ཆུབ་སྤྱོད་མཆོག་མཛད་བཞིན་སྤྱོད། །ཚོགས་ཀྱི་ཞིང་རང་ལ་ཐིམ། ཚད་མེད་བཞི་བསྒོམ། ཨོཾ་ཤཱུ་ནྱ་ཏ༴ སྟོང་པའི་ངང་ལས་རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུཾ་ལས་སྣ་ཚོགས་རྡོ་རྗེ་རྭ་བཅུ་གཉིས་པ། ཤར་དཀར། ལྷོ་སེར། ནུབ་དམར། བྱང་ལྗང་བ། དབུས་སྔོ་བ་དེ་ལས་འོད་ཟེར་ཕྱོགས་བཅུར་འཕྲོས་སྣ་ཚོགས་རྡོ་རྗེའི་རང་བཞིན་གྱི་རྡོ་རྗེའི་ས་གཞི། ར་བ་གུར་ཡེ་ཤེས་ཀྱི་མེ་དཔུང་འབར་བའི་བསྲུང་བའི་འཁོར་ལོ་དང་བཅས་པར་གྱུར། ཨོཾ་བཛྲ་རཀྵ༴ སོགས། དེ་ལས་མེ་ལྕེ་ཁྲོ་བོ་དང་བཅས་པ་མཆེད་དེ་ཕྱོགས་བཅུའི་བགེགས་རྣམས་བསྲེགས་ཤིང་ཚར་གཅོད་པར་གྱུར། དེའི་ནང་དུ་ཨེ་ལས་ཆོས་ཀྱི་འབྱུང་གནས་གྲུ་གསུམ་དཀར་པོ་ཡངས་ཤིང་རྒྱ་ཆེ་བ། དེའི་ནང་དུ་ལཾ་ལས་དཀྱིལ་འཁོར་གྲུ་བཞི་ལྗང་གུ། དེའི་འོག་ཏུ་བཾ་ལས་ཆུའི་དཀྱིལ་འཁོར་ཟླུམ་པོ་དཀར་པོ། དེའི་འོག་ཏུ་རཾ་ལས་མེའི་དཀྱིལ་འཁོར་གྲུ་གསུམ་དམར་པོ། དེའི་འོག་ཏུ་ཡཾ་ལས་རླུང་གི་དཀྱིལ་འཁོར་ཟླ་གམ་སྔོན་པོ། བདག་ཉིད་འོད་གསལ་ལས་ལངས་ནས་བར་དོ་ལོངས་སྤྱོད་རྫོགས་པའི་ང་རྒྱལ་དུ་གནས་པར་བྱས་ལ། འབྱུང་བ་བཞིའི་དཀྱིལ་འཁོར་ཡང་རང་གི་སེམས་ཀྱི་ངོ་བོའོ། །འབྱུང་བ་བཞི་གཅིག་ཏུ་འདྲེས་པ་ལས། གཞལ་ཡས་ཁང་གྲུ་བཞི་
སྒོ་བཞི་པ། རྟ་བབ་བཞིས་བརྒྱན་པ། རྩིག་པ་རིམ་པ་ལྔ་དང༌། ཁ་ཁྱེར་དང༌། ཕ་གུ་དང༌། མདའ་ཡབ་དང༌། པུ་ཤཱུ་ལ་སོགས་པ་མཚན་ཉིད་ཐམས་ཅད་ཡོངས་སུ་རྫོགས་པ་དོ་ཤལ་དང༌། དོ་ཤལ་ཕྱེད་པ་ལ་སོགས་པ་རྒྱན་ཐམས་ཅད་ཀྱིས་བརྒྱན་པ། ཕྱི་རོལ་དུ་དུར་ཁྲོད་ཆེན་པོ་བརྒྱད་ཀྱིས་ཡོངས་སུ་བསྐོར་བ་སྟེ། ཤིང་དང༌། ཆུ་དང༌། མེ་དང༌། རི་དང༌། མཆོད་རྟེན་དང༌། ཕྱོགས་སྐྱོང་དང༌། ཞིང་སྐྱོང་དང༌། ལྷ་དང༌། ཀླུ་དང༌། དངོས་གྲུབ་འགྲུབ་པའི་རྣལ་འབྱོར་པ་རྣམས་བརྒྱད་དང་བཅས་ཤིང༌། རོ་དང་རོ་ལངས་དང༌། དཔའ་བོ་དང༌། རྣལ་འབྱོར་མ་དང༌། མཁའ་འགྲོ་མ་དང༌། འབྱུང་པོའི་ཚོགས་རྣམས་དང༌། མཆོད་རྫས་ཐམས་ཅད་དང༌། རུས་པའི་ཚོགས་ཀྱིས་གང་བའོ། །གཞལ་ཡས་ཁང་གི་ནང་ཀ་བ་བརྒྱད་དང་ལྡན་པ། དབུས་ཕྱུར་བུར་གྱུར་པའི་རྩེ་མོར་རྡོ་རྗེ་རིན་པོ་ཆེས་བརྒྱན་པ། གཞལ་ཡས་ཁང་གི་ལྷ་སྣམ། ཤར་དཀར་ལྷོ་སེར་ནུབ་དམར་བྱང་ལྗང་དབུས་སྔོ་པའི་སྟེང་དུ་སྣ་ཚོགས་པདྨའི་ལྟེ་བ་ལ་ཉི་མའི་སྟེང་དུ་བདུད་བཞིའི་གདན་ཤར་སྒོར་ཚངས་པ་སེར་པོ། ལྷོར་དབང་པོ་ཁམ་སེར། ནུབ་ཏུ་ཉེ་དབང་ལྗང་ཁུ། བྱང་དུ་དྲག་པོ་ཐལ་དཀར་གན་རྐྱལ་དུ་བཀྲམ་པ། འདབ་མ་བརྒྱད་ལ་ཤར་དུ་ཚངས་པ། ལྷོ་རུ་བརྒྱ་བྱིན། ནུབ་ཏུ་ཉེ་དབང༌། བྱང་དུ་དྲག་པོ། བྱང་ཤར་གྱི་གྲྭར་གཤིན་རྗེ་ནག་པོ། ཤར་ལྷོར་གནོད་སྦྱིན་
སེར་པོ། ལྷོ་ནུབ་ཏུ་སྲིན་པོ་སྨུགས་ནག །ནུབ་བྱང་དུ་ཐགས་བཟང་རིས་ལྗང་ཁུ། དབུས་ཀྱི་གདན་གྱི་སྟེང་དུ་ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཱཿ དཀར་པོ་རྣམས་ཡོངས་སུ་གྱུར་བ་ལས་ཟླ་བའི་དཀྱིལ་འཁོར། དེའི་སྟེང་དུ་ཀ་ཁ་གྷ་ང༌། ཙ་ཚ་ཛ་ཛྙ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ་ཤ་ཥ་ས་ཧ་ཀྵ་དམར་པོ་རྣམས་ཡོངས་སུ་གྱུར་པ་ལས་ཉི་མའི་དཀྱིལ་འཁོར། དེ་གཉིས་ཀྱི་བར་དུ་ཧཱུཾ་ལས་ཐོད་པ་སྣ་ཚོགས་རྡོ་རྗེས་མཚན་པ། ཨཾ་ལས་རྡོ་རྗེས་མཚན་པའི་གྲི་གུག །དེ་རྣམས་གཅིག་ཏུ་འདྲེས་པ་ཡོངས་སུ་གྱུར་པ་ལས་དཔལ་ཧེ་རུ་ཀ །འོག་ནས་འབྱུང་བ་ལྟར་རྒྱས་པའམ། བསྡུས་ན། སྐུ་མདོག་ནག་པོ་ཞལ་བརྒྱད་པ། སྤྱན་ཉི་ཤུ་རྩ་བཞི་ཕྱེ་བ། ཕྱག་བཅུ་དྲུག་པ། ཞབས་བཞི་པ། ཞལ་ནས་ཧཱུཾ་སྤྲོ་བ། ལྷ་དང་ལྷ་མིན་ཐམས་ཅད་སྡིགས་པར་མཛད་པ། འཇིགས་པའང་འཇིགས་པར་མཛད་པ། ཡུམ་གྱི་མཁའ་ཧྲཱིཿ ལས་པདྨ་དམར་པོ་འདབ་བརྒྱད་ཟེ་འབྲུ་ལ་ཨས་མཚན་པ། ཨོཾ་པདྨ་སུ་ཁ༴ སོགས། ཥ་མེ། ཞེས་ཡབ་ཀྱི་ཞལ་ནས་གསུངས་པར་གྱུར། ཡབ་ཀྱི་གསང་གནས་ཧཱུཾ་ལས་རྡོ་རྗེ་ནག་པོ། བྷྲཱུཾ་སེར་པོ་ལས་བྱུང་བའི་ནོར་བུའི་བུ་གར་ཕཊ་ཀྱིས་བཀག་པ། ཨོཾ་བཛྲ་མཧཱ་སོགས། ཥ་མེ། ཞེས་ཡུམ་གྱིས་གསུང་བར་འགྱུར། མཆོག་ཏུ་དགའ་བའི་བདེ་
བ་ཆེན་པོས་དགྱེས་པ། བསྲུབས་པ་དང་སྲུབ་པའི་སྦྱོར་བས་ཞུ་བའི་བྱང་ཆུབ་ཀྱི་སེམས་ལ་སངས་རྒྱས་རྣམས་ཐིམ། ཡུམ་གྱི་མཁའ་ནང་དུ་བྱང་ཆུབ་ཀྱི་སེམས་སུ་གྱུར། གཾ་ཙཾ་བཾ་གཾ །པཾ་ཤཾ་ལཾ་ཊཾ། ས་བོན་བརྒྱད་དུ་གྱུར། ཕྱོགས་མཚམས་ཀྱི་གདན་རྣམས་ཀྱི་སྟེང་དུ་ཡང་ཉི་ཟླ་ཁ་སྦྱོར་རེ་རེ་གནས་པ། མཁའ་ནང་གི་ས་བོན་བརྒྱད་སྤྲོས་ཏེ། དེ་རྣམས་ཀྱི་བར་དུ་ཕྱིན་པས་ས་བོན་རྣམས་ཡོངས་སུ་གྱུར་པ་ལས། གྲི་གུགཅང་ཏེའུ། རུས་སྦལ། སྦྲུལ། སེངྒེ། དགེ་སློང༌། འཁོར་ལོ། རྡོ་རྗེ་རྣམས་ཡོངས་སུ་གྱུར་པ་ལས། སོ་སོར་ཉི་ཟླ་ཕྱག་མཚན་རོ་གཅིག་ཏུ་འདྲེས་པ་ལས། ཤར་དུ་གཽ་རི་སོགས་ནས། མེ་དཔུང་འབར་བའི་དབུས་ན་བཞུགས་པའོ། །ཡབ་ཡུམ་སྙོམས་པར་བཞུགས་པའི་བདེ་བ་ཆེན་པོ་ལྡན་པ་ལ་བར་དོའི་རྣམ་ཤེས་རྗེས་སུ་ཆགས་པས། བྱང་ཆུབ་ཀྱི་སེམས་སུ་ཞུ་བར་གྱུར། དེ་ནས་པུཀྐ་སི་ལ་སོགས་པའི་ལྷ་མོ་བཞིས་གདུང་བའི་དབྱངས་ཀྱི་བཞེངས་པར་བསྐུལ་བ་ནི། རྗེ་བཙུན་སྙིང་རྗེ་ནས། མ་མཛད་ཅིག །ཅེས་བསྐུལ་བས་བཅོམ་ལྡན་འདས་རབ་ཏུ་སད་དེ་ཐིག་ལེ་གོང་བཞིན་དུ་ཨཱ་ལི་ལས་ཟླ་བ་བསྐྱེད། དེའི་སྟེང་དུ་སྔར་བཞིན་ཀཱ་ལི་ལས་ཉི་མ་བསྐྱེད་དེ་གཉིས་ཀྱི་བར་དུ་ཧཱུཾ་དང་ཨཾ་ལས་ཐོད་པ་དང་གྲི་གུག་ཧཱུཾ་དང་ཨཾ་གིས་མཚན་པ། དེ་རྣམས་གཅིག་ཏུ་འདྲེས་པ་ལས་བདག་ཉིད་བཅོམ་ལྡན་འདས་དཔལ་དགྱེས་མཛད་རྡོ་རྗེ་སྐུ་མདོག ཞེས་པ་ནས། འཇིགས་
པར་མཛད་པའི་བར་སྔར་བཞིན། དྲག་པོ་ཆེན་པོ་རྩ་བའི་ཞལ་ནག་པོ་ནས། གཉིས་ཀའང་མེ་དཔུང་འབར་བའི་དབུས་ན་བཞུགས་པའོ། །དེའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། དེ་ལས་འོད་ཟེར་འཕྲོས། ཁམས་གསུམ་ཐམས་ཅད་ཁྱབ། སྣོད་གཞལ་ཡས་ཁང་བཅུད་ཧེ་རུ་ཀར་གྱུར། མཁའ་ལ་སྤྱོད་པ་རྣམས་ཨོཾ་ལ་ཐིམ། ས་འོག་ནས་སྤྱོད་པ་ཨཱཿལ་ཐིམ། ས་སྟེང་ནས་སྤྱོད་པ་རྣམས་སྙིང་ཁར་ཐིམ། ཡང་ཧཱུཾ་ལས་འོད་ཟེར་འཕྲོས་ཡེ་ཤེས་སེམས་དཔའ་ལྷ་དགུ་ཨོཾ་བཛྲ་ས་མ་ཛཿ ཨརྒྷ྄ཾ་ལ་སོགས་པས་མཆོད། ཛཿཧཱུཾ་བཾ་ཧོཿ ཡེ་ཤེས་སེམས་དཔའི་ངོ་བོ་གྱུར། ཡང་འོད་ཟེར་འཕྲོས་པས་སངས་རྒྱས་དང་བྱང་ཆུབ་སེམས་དཔའ་ཁྲོ་བོ་ལ་སོགས་པའི་ལྷ་ཚོགས་མདུན་གྱི་ནམ་མཁར་སྤྱན་དྲངས། ཨོཾ་ཨ་བྷི་ཥིཉྩ་ཏུ་མཾ་སརྦ་ཏ་ཐཱ་ག་ཏ། ཞེས་གསོལ་བ་བཏབ་པས། ཨོཾ་བཛྲ་བྷ་ཝ་ཨ་བྷི་ཥིཉྩ་ཧཱུཾ། ཞེས་རིག་མ་རྣམས་ཀྱིས་རྡོ་རྗེའི་གླུ་དང་བཅས་པས་དབང་བསྐུར། རྔའི་སྒྲ་བྱུང༌། གུར་གུམ་དང་མེ་ཏོག་གི་ཆར་ཕབ། ལྷ་མོ་རྣམས་ཀྱིས་མཆོད་པར་གྱུར། ཐབས་དང་ཤེས་རབ་དང༌། རྒོད་པ་དང༌། བལྟ་བ་དང༌། འཁྱུད་པ་དང༌། གཉིས་གཉིས་ལས། བུམ་པ་དང༌། གསང་བ་དང༌། ཤེས་རབ་དང༌། བདེ་བ་ཆེན་པོའི་དབང་རྣམས་ཐོབ། གཙོ་བོ་ཡབ་ཡུམ་དང༌། གཽ་རི་སོགས་ནས། འོད་དཔག་མེད་ཀྱིས་དབུ་བརྒྱན། ཁམས་གསུམ་པོ་ཐམས་ཅད་དཀྱིལ་འཁོར་དུ་གྱུར་པ་
བདག་ཉིད་ལ་ཐིམ་ཤིང༌། ལྷ་མོ་བརྒྱད་ཡང་ཞལ་བརྒྱད་ལ་ཐིམ། རྩ་འཁོར་ལོ་བཞི་པོ་རྣམས་ལ་སྤྱི་བོར་ཧཾ་མགྲིན་པར་ཨོཾ། སྙིང་གར་ཧཱུཾ། ལྟེ་བར་ཨཾ། གཏུམ་མོ་ཡོངས་སུ་འབར་ཏེ་དེ་བཞིན་གཤེགས་པ་རྣམས་ཀྱི་རྒྱུད་ལ་འགྲོ་འོང་བྱས། ཧཾ་ཡིག་ལ་ཐིམ། དེ་ལས་ཐིག་ལེ་ཡོངས་སུ་འཛག་པ་ཨཾ་ལ་ཐིམ། འཁོར་ལོའི་གཟུགས་ཀྱི་མི་བསྐྱོད་པ། །ཧཱུཾ། རྣ་ཆའི་བདག་ཉིད་འོད་དཔག་མེད། །ཛྲིཾ། མགུལ་གྱི་ཕྲེང་བ་རིན་ཆེན་བདག །ཨཾ། ལག་པ་རྣམ་པར་སྣང་མཛད་བརྗོད། ཁཾ། ཡན་ལག་ཀུན་ལ་རྡོར་འཛིན་འགོད། །ཧཱུཾ། ས་བོན་དེ་རྣམས་ལས་བྱུང་བའི། རུས་པའི་རྒྱན་ལྔ་ཐལ་ཆེན་རྣམས། རྒྱལ་བ་རིགས་དྲུག་གི་བདག་ཉིད་དུ་གྱུར། རྒྱས་པར་སྤོ་ན། རིགས་ལྔ་དང་རྡོར་སེམས་ཧེ་རུ་ཀ་ཕྱག་གཉིས་པར་བསྐྱེད་ལ། དེ་ཞུ་བའི་ཕྱག་རྒྱར་བསམ་ཞིང༌། ཨོཾ་དྷ་ར་དྷ་ར་སོགས་ཀྱིས་བྱིན་གྱིས་བརླབས་པར་བྱའོ། །མིག་ཏུ་ཨོཾ་ལས་གཏི་མུག་རྡོ་རྗེ་མ་སོགས། བདག་མེད་རྣལ་འབྱོར་མ་ནག་མོ། ཐམས་ཅད་ཀྱང་གྲི་ཐོད་འཛིན་པ་གཡོན་བརྐྱང་བའི་གར་སྟབས་ཅན་ནོ། །དེ་ཙམ་སྒོམ་པར་མི་ནུས་ན། ས་བོན་འབའ་ཞིག་བསྒོམ་པས་ཀྱང་ཆོག་གོ །དེ་ལ་ལྷ་ཕྱི་མ་གཉིས་ལྟེ་བ་དང་གསང་བར་འགོད་པར་བཞེད་དོ། །དེ་ནས་བཟླས་པའི་དམིགས་པ་གསལ་བཏབ་ནས། ཨོཾ་ཨཥྟ་སོགས་ནས། ཧཾ་ཧ་ཕཊ་སྭཱཧཱ། ཨོཾ་བཛྲ་ཀརྟ་རི་ཧེ་བཛྲ་ཡ་ཧཱུཾ་ཧཱུཾ་ཕཊ་སྭཱཧཱ། ཨོཾ་ཨ་ཀ་ཙ་ཊ་ཏ་པ་ཡ་ཤ་སྭཱཧཱ། ཞེས་པ་རྣམས་བཟླས་བྱའི་སྔགས་སོ། །དེ་ནས་མར་མེའི་རྩེ་མོ་ལྟ་བུའི་དམིགས་པ་
བསྒོམས་པས་འོད་གསལ་དུ་བསྡུ་བར་བྱ་སྟེ། རང་གི་སྙིང་གར་ཉི་ཟླ་ཁ་སྦྱོར་གྱི་ནང་དུ་ཧཱུཾ། བདག་མེད་མའི་སྙིང་གར་ཟླ་བ་ལ་ཨཾ། ཁམས་གསུམ་ཐམས་ཅད་འོད་དུ་ཞུ་ནས་ཐབས་ཀྱི་ཆ་རྣམས་རང་དང༌། ཤེས་རབ་ཀྱི་ཆ་རྣམས་ཡུམ་ལ་ཐིམ། ཡུམ་ཟླ་བ་ཨཾ་དང་བཅས་པ་བདག་ཉིད་ལ་ཐིམ། བདག་ཉིད་ཉི་ཟླ་ལ་ཐིམ། ཧཱུཾ་གིས་འོད་ཟེར་གྱི་ཚོགས་ཨཱ་ལི་ཀཱ་ལི་དང་བཅས་པས་ཁམས་གསུམ་གྱི་དངོས་པོ་ཐམས་ཅད་འོད་ཟེར་གྱི་རང་བཞིན་དུ་བྱས། ཐམས་ཅད་ཀྱང་ཧཱུཾ་ལ་ཐིམ། ཟླ་བ་དང་ཉི་མ་ཡང་ཧཱུཾ་ལ་ཞུགས། དེ་ཉིད་ཀྱང་ནཱ་དའི་བར་དུ་བསྡུས་ཏེ། ནཱ་ད་ཡང་མི་དམིགས་པར་གྱུར། འདིར་ནི་ཐོག་མ་མཐའ་དབུས་མེད། །སྲིད་མེད་མྱ་ངན་འདས་པ་མེད། །བདག་མེད་གཞན་ཡང་མེད་པ་སྟེ། །འདི་ནི་མཆོག་ཏུ་བདེ་ཆེན་ཉིད། །ཅེས་མཉམ་པར་བཞག་ལ། ཁམས་གསུམ་པོ་མཐའ་དག་སྒྱུ་མའོ། །རྨི་ལམ་ལྟ་བུར་ཤེས་པར་བྱས་ནས་བར་ཆད་བསྲུང་བའི་དོན་དུ་སྔར་བཞིན་གོ་ཆ་བཅུ་གཉིས་ལ་བཀོད་ནས་ཐུན་མཚམས་ལ་འཇུག་པ་ཡིན་ནོ། །ཧེ་རུ་ཀ་གཞན་གསུམ་ལ་གཙོ་བོའི་ཞལ་ཕྱག་འགྱུར་བ་དང༌། སྔགས་ཀྱི་ཁྱད་པར་མ་གཏོགས་འདི་ཁོ་ན་བཞིན་ཡིན་ལ། འཁོར་གྱི་སྔགས་སྒྲུབ་ཐབས་སུ་མ་བཤད་ཀྱང་བཟླ་བར་འདོད་ན། ཨོཾ་ཨ་ཨཱཿསོགས། ཨཾ་ཨཱཿཧཱུཾ་ཕཊ་སྭཱཧཱ། ཞེས་བཟླ་བར་བྱའོ། །ཞེས་པའང་འགྲུབ་པའི་སློབ་དཔོན་ཆེན་པོ་མཚོ་སྐྱེས་རྡོ་རྗེའི་སྒྲུབ་ཐབས་ཀྱི་དགོངས་པ་ཇི་ལྟ་བ་བཞིན་དུ་བྱས་པ་སྟེ། གྲུབ་ཆེན་ཁྱུང་པོ་རྣལ་འབྱོར་པའི་བཞེད་པའི་ལུགས་ལྟར་བཀོད་པ། དཔལ་དགྱེས་མཛད་རྡོ་རྗེའི་སྒྲུབ་ཐབས་ཚིག་ཟོར་ཡང་བ་ལ་དགའ་བ་
རྣམས་ལ་ཕན་པའོ། །འདིར་སྨྲས་པ། བྱིན་རླབས་ཆེ་ན་ཉུང་བའང་མཆོག །བྱིན་རླབས་ཆུང་ན་མང་བས་ཅི། །གཞུང་དོན་འཁྱོག་པོའི་བཤད་པ་ཡིས། །ཧ་ཅང་ཐལ་བར་མ་བྱེད་ཅིག །དགྱེས་མཛད་ལྷ་དགུའི་སྒྲུབ་ཐབས་ཀྱི་སྐབས་ཏེ་གཉིས་པའོ། །༈ འཁོར་ལོ་སྡོམ་པ་ཁོ་ནའི་བསྐྱེད་རིམ་རྒྱས་པ་བསྒོམ་པར་འདོད་པས། སེམས་ཅན་ཐམས་ཅད་བདེ་བ་དང་སོགས་གྱུར་ཅིག །གཟུགས་ཀྱི་ཕུང་པོ་རྣམ་པར་སྣང་མཛད་དོ། །ཚོར་བའི་ཕུང་པོ་ནི་རྡོ་རྗེ་ཉི་མའོ། །འདུ་ཤེས་ཀྱི་ཕུང་པོ་ནི་པདྨ་གར་གྱི་དབང་ཕྱུག་གོ །འདུ་བྱེད་ཀྱི་ཕུང་པོ་ནི་རྡོ་རྗེ་རྒྱལ་པོའོ། །རྣམ་ཤེས་ཀྱི་ཕུང་པོ་ནི་རྡོ་རྗེ་སེམས་དཔའོ། །དེ་བཞིན་གཤེགས་པ་ཐམས་ཅད་ཀྱི་བདག་ཉིད་གྱུར་པ་ནི་དཔལ་རྡོ་རྗེ་ཧེ་རུ་ཀའོ། །མིག་གཉིས་ལ་ནི་གཏི་མུག་རྡོ་རྗེའོ། །རྣ་བ་གཉིས་ལ་ནི་ཞེ་སྡང་རྡོ་རྗེའོ། །སྣ་ལ་སེར་སྣ་རྡོ་རྗེའོ། ཁ་ལ་ནི་འདོད་ཆགས་རྡོ་རྗེའོ། །ལུས་ལ་ནི་ཕྲག་དོག་རྡོ་རྗེའོ། །སྐྱེ་མཆེད་ཐམས་ཅད་ལ་དབང་ཕྱུག་རྡོ་རྗེའོ། །སའི་ཁམས་ལ་ནི་ལྟུང་བར་བྱེད་པ་མའོ། །ཆུའི་ཁམས་ལ་ནི་གསོད་བྱེད་མའོ། །མེའི་ཁམས་ལ་ནི་འགུགས་བྱེད་མའོ། །རླུང་གི་ཁམས་ལ་ནི་པདྨ་གར་གྱི་དབང་ཕྱུག་མའོ། །ནམ་མཁའི་ཁམས་ལ་ནི་པདྨ་དྲྭ་བ་ཅན་མ་སྟེ། ཚམ་རྔམ་དང་བཅས་པའི་ཞལ་བཞི་པའི་སྔགས་བརྗོད་དོ། །སྔགས་ཀྱི་འོད་ཟེར་ལས་བྱུང་བའི་རྡོ་རྗེའི་ས་གཞི། རྭ་བ་གུར་བླ་བྲེ་མདའི་དྲྭ་བ་ཡེ་ཤེས་ཀྱི་མེ་འབར་བའི་བསྲུང་བའི་འཁོར་ལོར་གྱུར། སྔགས་ཀྱི་འོད་ཟེར་ལས་བྱུང་བའི་སྒོ་མཚམས་མ་བརྒྱད།
གཡོན་ཕུར་བུ་དང་གཡས་ཐོ་བ་ཐོགས་པ་སྤྲོས། ཡང་སྤྲུལ་རྣམས་ཀྱི་ཕྱོགས་བཅུའི་བགེགས་རྣམས་བཀུག་སྟེ། རྭ་བའི་ཕྱི་རོལ་ཕྱོགས་མཚམས་བརྒྱད་དུ་ཧཱུཾ་ལས་བྱུང་བའི་གྲུབ་ཁུང་རྣམས་སུ་བཅུག །ཕུར་བུས་སྤྱི་བོར་བཏབ། ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུཥྟན་ཧཱུཾ་ཧཱུཾ་ཕཊ། ཀཱི་ལ་ཡ་ཀཱི་ལཱ་ཡ་སརྦ་པ་པཾཾ་ཧཱུཾ་ཧཱུཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཀི་ལ་བཛྲ་དྷ་རོ་ཨཛྙཱ་པ་ཡ་ཏི། སརྦཱ་བིགྷྣན་ཀཱ་ཡ་ཝཱཀ་ཙིཏྟ་བཛྲ་ཀཱ་ལ་ཡ་ཧཱུཾ་ཧཱུཾ་ཕཊ། ཅེས་ཐོ་བས་བརྡུང་བས་བགེགས་རྣམས་ཚར་བཅད། ཨོཾ་བཛྲ་མུཏྒ་ར་བཛྲ་ཀཱི་ལ་ཨ་ཀོ་ཊ་ཡ་ཨ་ཀོ་ཊ་ཡ་ཧཱུཾ་ཧཱུཾ་ཕཊ། རང་གི་སྙིང་གར་ཨ་ལས་ཟླ་བའི་སྟེང་དུ་ཧཱུཾ་སྔོ་སྐྱ་འོད་ཟེར་སྣ་ལྔ་འཕྲོ་བ། དེའི་འོད་ཀྱིས་བླ་མ་དང་དབྱེར་མེད་པའི་དཀྱིལ་འཁོར་གྱི་འཁོར་ལོ་མདུན་དུ་གསལ་བར་བྱས། གང་གི་དྲིན་གྱིས་བདེ་ཆེན་ཉིད། སོགས་དང༌། དཔལ་ལྡན་རྡོ་རྗེ་མཁའ་འགྲོ་སོགས། ཨརྒྷཾ་སོགས་ཀྱིས་མཆོད། དཀོན་མཆོག་གསུམ་ལ་བདག་སྐྱབས་མཆི། །སོགས་ཤོ་ལོ་ཀ་གཅིག་བརྗོད། སྭ་བྷཱ་ཝ་སོགས། ཤཱུ་ནྱ་ཏ་སོགས། སྟོང་པའི་ངང་ལས་རང་སེམས་ནཱ་དའི་རྣམ་པས་ནམ་མཁར་བཞག །འོག་ཏུ་ཡཾ་ལས་རླུང་གི་དཀྱིལ་འཁོར། རཾ་ལས་མེའི་དཀྱིལ་འཁོར། བཾ་ལས་ཆུའི་དཀྱིལ་འཁོར་ལཾ་ལས་སའི་དཀྱིལ་འཁོར་སུཾ་ལས་རིའི་རྒྱལ་པོ་རི་རབ་རྣམས་སྟེང་ནས་སྟེང་དུ་བརྩིགས་པ། དེའི་སྟེང་དུ་ཧཱུཾ་ལས་སྣ་ཚོགས་རྡོ་རྗེ། དེའི་ལྟེ་བར་པཾ་ལས་སྣ ་ཚོགས་པདྨ། དེ་ཉིད་ཀྱི་ལྟེ་བ་ལ་ཨ་ཨཱ། ཨི་ཨཱི། ཨུ་ཨཱུ།
རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཱཿ རྣམས་ཡོངས་སུ་གྱུར་པ་ལས་ཟླ་བའི་དཀྱིལ་འཁོར། དེའི་སྟེང་དུ། ཀ་ཁ་ག་གྷ་ང༌། ཙ་ཚ་ཛ་ཛྙ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ་ཤ་ཥ་ས་ཧ་ཀྵ་རྣམས་ཡོངས་སུ་གྱུར་པ་ལས་ཉི་མའི་དཀྱིལ་འཁོར། དེ་གཉིས་ཀྱི་བར་དུ་ནམ་མཁའི་ནཱ་ད་ཡོངས་སུ་གྱུར་པ་ཞུགས། ནཱ་ད་ལས་ཐིག་ལེ། དེ་ལས་ཟླ་ཚེས། དེ་ལས་ཧ། དེ་ལས་ཞབས་ཀྱུ་ཏེ་ཧཱུཾ་ཡིག་དཀར་པོའོ། །དེ་ལས་འོད་ཟེར་འཕྲོས་འདུས་ཐམས་ཅད་གཅིག་ཏུ་འདྲེས་པ་ཡོངས་སུ་གྱུར་པ་ལས། དཀྱིལ་འཁོར་ཐམས་ཅད་དུས་གཅིག་ཏུ་གྲུབ་པ་ནི། དུར་ཁྲོད་ཆེན་པོ་བརྒྱད་ཀྱི་དབུས་སུ་བསྲུང་བའི་འཁོར་ལོ། །དེའི་ནང་དུ་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་མཚན་ཉིད་ཐམས་ཅད་ཡོངས་སུ་རྫོགས་པ། ནང་གི་ལྷ་སྣམ་ཤར་དཀར། བྱང་ལྗང༌། ནུབ་དམར། ལྷོ་སེར། དབུས་སྔོ་བའི་སྟེང་དུ། སྐུའི་འཁོར་ལོ་དཀར་པོ་འཁོར་ལོའི་མུ་ཁྱུད་ཅན། དེའི་ལྟེ་བར་གསུང་གི་འཁོར་ལོ་དམར་པོ་པདྨའི་མུ་འཁྱུད་ཅན། དེའི་ལྟེ་བར་ཐུགས་ཀྱི་འཁོར་ལོ་སྔོན་པོ་རྡོ་རྗེའི་མུ་ཁྱུད་ཅན། གསུམ་གའང་རྩིབས་བརྒྱད་དང་ལྡན་པ། དབུས་སུ་བདེ་ཆེན་འཁོར་ལོ་པདྨ་འདབ་བརྒྱད། མུ་ཁྱུད་ལ་གྲི་གུག་གི་འཕྲེང་བ་ཅན། སྒོ་མཚམས་བརྒྱད་དུ་རོའི་གདན། སྣ་ཚོགས་པདྨའི་ལྟེ་བར་ཉི་མ་འཇིགས་བྱེད་དང་དུས་མཚན་མའི་གདན་གྱི་སྟེང་དུ།
བདག་ཉིད་འཁོར་ལོ་བདེ་མཆོག་སྐུ་མདོག་མཐིང་ནག་ཞལ་བཞི་ཕྱག་བཅུ་གཉིས་པ་སོགས། འོན་ཀྱང་ཕྱག་གཡས་པ་ནི་གྲི་གུག་བསྣམས་པའོ། །ཞེས་པའི་བར་གོང་བཞིན་ནོ། །དེ་ལྟར་དཀྱིལ་འཁོར་གྱི་འཁོར་ལོ་ཡོངས་སུ་རྫོགས་པར་གྱུར། ཡབ་ཀྱི་གསང་གནས་ཧཱུཾ་ལས་བྱུང་བའི་རྡོ་རྗེ་ཨཾ་ལས་བྱུང་བའི་ནོར་བུ་བྱཱཾ་གྱྀ་མཚན་པ། ཡུམ་གྱི་མཁའ་ཨ་ལས་པདྨ་དམར་པོ་ཨོཾ་ལས་ཟེའུ་འབྲུ་ཏྲཱཾ་གྱི་མཚན་པ། ལྟེ་བར་སརྦ་བུདྡྷའི་སྔགས། སྙིང་གར་བཻ་རོ་ཙ་ནའི་སྔགས། མགྲིན་པར་ཡི་གེ་བདུན་པ། དཔྲལ་བར་ཡི་གེ་ཉེར་གཉིས་པ། ཡུམ་གྱི་དཔྲལ་བར་བཻ་རཱོ་ཙ་ནཱ། མགྲིན་པར་སརྦ་བུདྡྷ། སྙིང་གར་ཡི་གེ་བདུན་པ། ཡབ་ཡུམ་སྙོམ་པར་ཞུགས། ཡི་གེ་རྣམས་ཀྱང་ཕན་ཚུན་རྗེས་སུ་ཆགས་པས་སྦྱོར་བ་ལ། གནས་པར་གྱུར། ཨོཾ་སརྦ་ཏ་ཐཱ་ག་ཏ་ཨ་ནུ་ར་ག་ཎ་བཛྲ་སུ་བྷཱ་ཝ་ཨཱཏྨ་ཀོ྅ཧཾ། ལུས་དྲན་པ་ཉེ་བར་བཞག་པ་ནི་མཁའ་འགྲོ་མའོ། །ཚོར་བ་དྲན་པ་ཉེ་བར་བཞག་པ་ནི་ལ་མའོ། །ཆོས་དྲན་པ་ཉེ་བར་བཞག་པ་ནི་དུམ་སྐྱེས་མའོ། །སེམས་དྲན་པ་ཉེ་བར་བཞག་པ་ནི་གཟུགས་ཅན་མའོ། །འདུན་པའི་རྫུ་འཕྲུལ་ཀྱི་རྐང་པ་ནི་རབ་ཏུ་གཏུམ་མའོ། །བརྩོན་འགྲུས་ཀྱི་རྫུ་འཕྲུལ་གྱི་རྐང་པ་ནི་གཏི་པའི་མིག་ཅན་མའོ། །སྤྱོད་པའི་རྫུ་འཕྲུལ་གྱི་རྐང་པ་ནི་འོད་ལྡན་མའོ། །སེམས་ཀྱི་རྫུ་འཕྲུལ་
གྱི་རྐང་པ་ནི་སྣ་ཆེན་མའོ། །དད་པའི་དབང་པོ་ནི་དཔའ་བོའི་བློ་གྲོས་མའོ། །བརྩོན་འགྲུས་ཀྱི་དབང་པོ་ནི་མིའུ་ཐུང་མའོ། །དྲན་པའི་དབང་པོ་ནི་ལངྒའི་དབང་ཕྱུག་མའོ། །ཏིང་ངེ་འཛིན་གྱི་དབང་པོ་ནི་ཤིང་གྲིབ་མའོ། །ཤེས་རབ་ཀྱི་དབང་པོ་ནི་ས་སྲུང་མའོ། །དད་པའི་སྟོབས་ནི་འཇིགས་བྱེད་ཆེན་མོའོ། །བརྩོན་འགྲུས་ཀྱི་སྟོབས་ནི་ཤུགས་ཅན་མའོ། །དྲན་པའི་སྟོབས་ནི་སུ་ར་བྷཀྵིའོ། །ཏིང་ངེ་འཛིན་གྱི་སྟོབས་ནི་སྔོ་བསངས་ལྷ་མོའོ། །ཤེས་རབ་ཀྱི་སྟོབས་ནི་རབ་ཏུ་བཟང་པོའོ། །ཏིང་ངེ་འཛིན་ཡང་དག་པར་བྱང་ཆུབ་ཀྱི་ཡན་ལག་ནི་རྟའི་སྣ་བ་མའོ། །བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་ནི་བྱ་གདོང་མའོ། །དགའ་བ་ཡང་དག་བྱང་ཆུབ་ཀྱི་ཡན་ལག་ནི་འཁོར་ལོའི་ཤུགས་ཅན་མའོ། །ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ནི་རོ་ཧཱིའོ། །ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་ནི་ཤཽ་ནྚི་ནཱིའོ། །དྲན་པ་ཡང་དག་བྱང་ཆུབ་ཀྱི་ཡན་ལག་ནི་འཁོར་ལོའི་གོ་ཆ་མའོ། །བཏང་སྙོམས་ཡང་དག་བྱང་ཆུབ་ཀྱི་ཡན་ལག་ནི་རབ་ཏུ་དཔའ་མོའོ། །ཡང་དག་པའི་ལྟ་བ་ནི་སྟོབས་ཆེན་མའོ། །ཡང་དག་པའི་རྟོག་པ་ནི་འཁོར་ལོའི་བསྒྱུར་མའོ། །ཡང་དག་པའི་ངག་ནི་བརྩོན་འགྲུས་ཆེན་མོའོ། །དཔའ་བོ་ཉི་ཤུ་རྩ་བཞི་ཡང་དེ་རྣམས་ཉིད་ཀྱི་རྣམ་པར་དག་པ་ཅན་ནོ། །ཡང་དག་པའི་
ལས་ཀྱི་མཐའ་ནི་ཁ་གདོང་མའོ། །ཡང་དག་པའི་རྩོལ་བ་ནི་ཁྱི་གདོང་མའོ། །ཡང་དག་པའི་དྲན་པ་ནི་ཕག་གདོང་མའོ། །ཡང་དག་པའི་ཏིང་ངེ་འཛིན་ནི་དཔལ་ཧེ་རུ་ཀ་དང་རྡོ་རྗེ་ཕག་མོའོ། །དགེ་བའི་ཆོས་མ་སྐྱེས་པ་བསྐྱེད་པ་ནི་གཤིན་རྗེ་བརྟན་མའོ། །དགེ་བའི་ཆོས་སྐྱེས་པ་རྣམས་བསྲུང་བ་ནི་གཤིན་རྗེ་ཕོ་ཉ་མོའོ། མི་དགེ་བའི་ཆོས་མ་སྐྱེས་པ་མི་བསྐྱེད་པ་ནི་གཤིན་རྗེ་མཆེ་བ་མའོ། །མི་དགེ་བའི་ཆོས་སྐྱེས་པ་སྤོང་བ་ནི་གཤིན་རྗེ་འཇོམས་མའོ། །སྤྱི་བོ་པུལླིར་མ་ལ་ཡར་ཁནྚ་ཀ་པ་ལ་དང་རབ་ཏུ་གཏུམ་མོ། །སྤྱི་གཙུག་ཛ་ལནྡྷ་རར་མ་ཧ་ཀཾ་ཀ་ལ། སོགས་གོང་བཞིན་ལ། པུས་མོ་གཉིས་ཀུ་ལུ་ཏར་རྡོ་རྗེ་སེམས་དཔའ་དང་བརྩོན་འགྲུས་ཆེན་པོ་སྟེ་ཉེ་བའི་དུར་ཁྲོད་དོ། །ཨོཾ་སརྦ་བཱི་ར་ཡོ་གི་ནི་ཀཱ་ཡ་ཝཱཀྩིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་བཛྲ་ཤུདྡྷོཿསརྦ་དྷརྨ་བཛྲ་ཤུདྡྷོ྅ཧཾ། སྙིང་གར་ཨོཾ་ཨོཾ་ཧ་དཀར་པོ་རྡོ་རྗེ་སེམས་དཔའ། མགོ་བོར་ན་མ་ཧི་སོགས། རྟ་མཆོག་གི་ངོ་བོ། ཡུམ་གྱི་ལྟེ་བར་ཨོཾ་བཾ་དམར་པོ་རྡོ་རྗེ་ཕག་མོ་སོགས། ཙཎྜ་ཀའི་ངོ་བོ། ཕེཾ། ཞེས་ཡེ་ཤེས་འཁོར་ལོའི་དབང་གི་ལྷ་དང་ལྷན་ཅིག་སྤྱན་དྲངས། ཛཿཧཱུྃ་བཾ་ཧོཿ དམ་ཚིག་པ་དང༌། ཡེ་ཤེ་པ་དབྱེར་མེད་དུ་གྱུར། ཨོཾ་ཡོ་ག་ཤུདྡྷ༴ སོགས། དབང་གི་ལྷ་མཁའ་འགྲོ་མ་རྣམས་ཀྱིས་ཀ་
པཱ་ལ་བདུད་རྩིས་གང་བ་བསྣམས་ཏེ་དབང་བསྐུར། ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར་སོགས། ཤྲཱི་ཧཱུཾ། ཞེས་གསུངས་ཞིང་དབང་བསྐུར་བས་ཆུའི་ལྷག་མ་ཡར་ལུད་པ་ལས་གཙོ་བོ་དང་ཐུགས་འཁོར་བ་རྣམས་ལ་མི་བསྐྱོད་པ། གསུང་འཁོར་བ་རྣམས་ལ་འོད་དཔག་མེད། ཡུམ་དང་སྐུ་འཁོར་བ་རྣམས་ལ་རྣམ་སྣང༌། སྙིང་པོའི་རྣལ་འབྱོར་མ་རྣམས་ལ་རིན་འབྱུང༌། སྒོ་མཚམས་མ་བརྒྱད་ལ་དོན་གྲུབ་ཀྱིས་དབུ་རྒྱན་པར་གྱུར། ཨརྒྷཾ་ལ་སོགས་པས་མཆོད། བདུད་རྩི་བྱིན་གྱིས་བརླབས་ཏེ། སྙིང་པོའི་མཐར་འབྲུ་གསུམ་བཏགས་ལ་མྱང༌། ལྷ་ཐམས་ཅད་ཐབས་ཤེས་སྙོམས་པར་འཇུག་པའི་བདེ་བས་མཉེས་པར་བསམ། རྐང་པ་བརྒྱད་པའི་སྔགས་ཀྱིས་བསྟོད་ལ། བཟླས་པའི་དམིགས་པ་གསལ་བཏབ་སྟེ། ཨོཾ་ཤྲཱི་བཛྲ་ཧེ་ཧེ་རུ་རུ་ཀ་སོགས། ཡབ་ཀྱི་སྙིང་པོའོ།། ཨོཾ་ཧྲིཿཧ་ཧ་སོགས་ཉེ་བའི་སྙིང་པོའོ། །ཨོཾ་སརྦ་བུདྡྷ་ཌཱ་ཀི་ནཱི་སོགས། ཡུམ་གྱི་ཉེ་སྙིང་ངོ༌། །ཨོཾ་བཛྲ་བེ་རོ་ཙ་ན་སོགས་སྙིང་པོའོ། །འཕྲེང་བའི་སྔགས་རྣམས་ནི་ལོགས་སུ་ཤེས་པར་བྱའོ། །ཨོཾ་ཨོཾ་ཧ། ཨོཾ་ན་མ་ཧི་སོགས། ཕཊ་ཕཊ། ཅེས་པ་ནི་གོ་ཆའི་སྔགས་སོ། །སྐབས་འདིར་རྫོགས་པའི་རིམ་པ་རྣལ་འབྱོར་ཆེན་མོ་ཡང་བསྒོམ་པར་བྱའོ། །ཐུན་མཚམས་ལ་འཇུག་པར་འདོད་ན། དཀྱིལ་འཁོར་ཐམས་ཅད་སྐད་ཅིག་ཙམ་གྱིས་བདག་ཉིད་ལ་ཐིམ། སྔར་བཞིན་གོ་ཆ་གཉིས་བཀོད། སོ་དང་སེན་མོ་ལ་ནི་ཐོད་
པའི་དུམ་བུའོ། །སྐྲ་དང་བ་སྤུ་ལ་ནི་ཀེང་རུས་ཆེན་པོ་མའོ་སོགས་ནས། སྣབས་ལ་ནི་རྡོ་རྗེ་སེམས་དཔའོ། །དཔའ་བོ་རྩ་བའི་སྔགས་སོགས་དང༌། ཚངས་པའི་སྐུད་པ་ལ་སོགས་བཏགས། །དཔའ་བོ་ཉི་ཤུ་རྩ་བཞི་ཡི། །ལུས་ཀྱི་ཁམས་ནི་བཏགས་པ་པོ། །དཔའ་བོའི་གོ་ཆ་དྲུག་གི་ནི། །ཕྱག་རྒྱ་ཡིས་ནི་ལུས་མཛེས་པའོ། །རྡོ་རྗེ་ཕག་མོའི་སྔགས་གང་ཡིན། །མགྲིན་པ་མགུར་ཆས་མཛེས་པ་ཉིད། །ལྷ་ཡི་སྙིང་པོ་སྔགས་ཀྱི་ནི། །འཕྲེང་བ་བརྒྱ་ཡི་ཕྱེད་ཀྱིས་མཛེས། །ཡི་གེ་བདུན་པའི་གསང་སྔགས་ཀྱིས། །གདུབ་སྐོར་གྱིས་ནི་རྣ་བར་མཛེས། །སངས་རྒྱས་ཀུན་གྱི་མཁའ་འགྲོ་ཡིས། །ལྤགས་པའི་གོས་མཆོག་འཛིན་པའོ། །རྣལ་འབྱོར་མ་དྲུག་གསང་སྔགས་ཀྱིས། །སྐ་རགས་བྱས་པ་རྣམ་པར་བརྒྱན། །འཁོར་ལོ་ཀུན་གྱི་རྣལ་འབྱོར་མའི། །སྔགས་ནི་འཐུང་བའི་ཐོད་པ་ཡིན། །རྣམ་སྣང་མཛད་ཀྱི་སྔགས་གང་ཡིན། །ཐོད་པོའི་དབུ་ལ་བརྒྱན་པ་པོ། །ཚམ་རྔམ་དང་བཅས་སུམྦྷ་ནི་ལན་གཉིས་ཀྱིས་ཕྱོགས་སྲུངས། གཟུགས་སུ་སྣང་བ་ཐམས་ཅད་ལྷའི་སྐུ། སྒྲར་གྲགས་པ་ཐམས་ཅད་གསུང་གི་རང་བཞིན། དྲན་རིག་རྣམ་རྟོག་ཐམས་ཅད་ཐུགས་ཀྱི་རང་བཞིན་དུ་རྣམ་པར་དག །ཁ་ཊྭཱཾ་ག་ནི་ལྷ་ཡི་སྐུ། །ཤེས་རབ་ཌཱ་མ་རུ་ཡི་སྒྲ། །ཉིན་མོ་བཅོམ་ལྡན་དཔའ་བོ་སྟེ། །རྣལ་འབྱོར་མ་ནི་མཚན་མོར་བརྗོད། །མྱ་ངན་ལས་འབྱུང་དཔའ་བོ་ནི། །དྲུག་པ་
སེམས་ཀྱི་སྤྲུལ་པ་སྟེ། །དག་པ་ཆོས་ཀྱི་སྤྲུལ་པ་ནི། །ཕག་མོའི་གཟུགས་སུ་བསྟན་པའོ། །ཤེས་རབ་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་ཚོགས་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །ཞེས་བརྗོད་ནས་ཐུན་མཚམས་ཀྱི་བྱ་བ་ལ་འཇུག་སྟེ། གཏོར་མ་ལ་སོགས་པ་ལས་ཀྱི་བྱ་བ་རྣམས་ཅི་བདེ་བྱའོ། །ཞེས་པའང་སློབ་དཔོན་ཆེན་པོ་ལཱུ་ཡི་པའི་གཞུང་ཇི་ལྟ་བའི་རྗེས་སུ་འབྲང་ཞིང་གྲུབ་པའི་སློབ་དཔོན་ཆེན་པོ་ཁྱུང་པོ་རྣལ་འབྱོར་གྱི་བརྒྱུད་པའི་ཕྱག་སྲོལ་གྱི་ཉམས་བཞེས་ལྟར་བཀོད་པའོ། །འདིར་སྨྲས་པ། དེང་སང་སྒྲུབ་ཐབས་མང་པོ་དག །དཔེ་ནི་སྣ་ཚོགས་ཀུན་བཏུས་ནས། །མན་ངག་བྱིན་རླབས་རྒྱུན་བྲལ་ཡང༌། །ཡིག་ཚོགས་ཆེ་བ་ངོམ་པར་བྱེད། །བདེ་མཆོག་ལཱུ་ཡི་པའི་སྒྲུབ་ཐབས་ཀྱི་སྐབས་ཏེ་གསུམ་པའོ། །འདུས་པའི་རྒྱུད་ལ་བརྟེན་ནས་བསྐྱེད་རིམ་སྒོམ་པར་འདོད་ན། རང་སྐད་ཅིག་གིས་ཞེ་སྡང་རྡོ་རྗེ་མི་བསྐྱོད་པ་ཞལ་གསུམ་ཕྱག་དྲུག་པར་གྱུར། སྙིང་གར་ཉི་མ་ལ་ཧཱུཾ་སྔོན་པོ་དེ་ལས་ཧཱུཾ་བཅུ་དེ་སྤྲོས་ཏེ། ཕྱོགས་བཅུར་ཉི་མའི་གདན་ལ་འཁོད་པ་ཡོངས་སུ་གྱུར་པ་ནི། ཤར་དུ་གཤིན་རྗེ་མཐར་བྱེད་ནག་པོ། ལྷོར་ཤེས་རབ་མཐར་བྱེད་དཀར་པོ། ནུབ་ཏུ་རྟ་མགྲིན་དམར་པོ། བྱང་དུ་བདུད་རྩི་འཁྱིལ་པ། ཤར་ལྷོར་མི་གཡོ་བ། ལྷོ་ནུབ་ཏུ་འདོད་རྒྱལ། ནུབ་བྱང་དུ་དབྱུག་སྔོན་ཅན། བྱང་ཤར་དུ་སྟོབས་པོ་ཆེ། སྟེང་དུ་གཙུག་ཏོར་འཁོར་ལོས་བསྒྱུར་བ། འོག་ཏུ་གནོད་མཛེས་ཏེ། དེ་རྣམས་ནག་པོ་ཐམས་ཅད་ཀྱང་ཞལ་གསུམ་ཕྱག་དྲུག་པ།
ཨོཾ་སུམྦྷ་ནི་སོགས། ཧཱུཾ། ཞེས་བཀའ་བསྒོ་བས་གནོད་མཛེས་དཔག་ཏུ་མེད་པ་བྱུང་ནས་ཕྱོགས་བཅུའི་བགེགས་རྣམས་ཐམས་ཅད་ཡན་ལ་ཞགས་པས་བསྡམས། ལྕགས་ཀྱུས་སྙིང་གར་བཏབ། ན་མཿས་མནྟ་ཀཱ་ཡ་ཝཀྩིཏྟ་བཛྲ་ཎཾ་ཨོཾ་ཌཀྐི་ཧཱུཾ་ཛཿཞེས་བཀུག་སྟེ། བྲུབ་ཁུང་གྲུ་གསུམ་རྣམས་སུ་བཅུག །བདུད་རྩི་འཁྱིལ་བ་ལས་རང་འདྲ་བའི་བདུད་རྩི་འཁྱིལ་བ་བཅུ། ལྟེ་བ་མན་ཆད་ཕུར་པའི་རྣམ་པ་ཅན་བྱུང་སྟེ། ཕྱོགས་བཅུའི་བགེགས་རྣམས་ཀྱི་སྤྱི་བོར་བཙུག །གནོད་མཛེས་རྣམས་ཕྱག་ཏུ་ཐོ་བ་ཐོགས་པར་གྱུར་ཏེ། ཕུར་བུས་སྤྱི་བོ་ནས་བརྡུངས་པས། བགེགས་རྣམས་བསྒྲལ་ཏེ་རྣམ་པར་ཤེས་པ་དབྱིངས་སུ་སྤར་བར་གྱུར། ཨོཾ་གྷ་གྷ་གྷཱ་ཏ་སོགས། ཧཱུཾ་ཕཊ། སྤྲུལ་པ་རྣམས་གནོད་མཛེས་ལ་ཐིམ། ཁྲོ་བོ་དང་ཕུར་བུ་ལས་མེ་ལྕེ་ཕྱོགས་ཀུན་ཏུ་སྤྲོས་ནས། བགེགས་རྣམས་ཀྱི་ལྷག་མ་ཐམས་ཅད་ཚིག་ཅིང་གདུག་པ་ཅན་རྣམས་མེ་རིའི་རང་བཞིན་དུ་གྱུར། དེའི་ནང་དུ་འོག་ཐམས་ཅད་རྡོ་རྗེའི་ས་གཞི། འཁོར་ཡུག་ཐམས་ཅད་རྡོ་རྗེའི་རྭ་བ། སྟེང་ཐམས་ཅད་རྡོ་རྗེའི་གུར་དུ་གྱུར་ཏེ་བགེགས་དང་བྲལ་བར་གྱུར། དངོས་པོ་མེད་ལ་སྒོམ་པ་མེད་སོགས། མེད་པའོ། །སྟོང་པ་ལ་ཅུང་ཟད་མཉམ་པར་བཞག །སྟོང་པའི་ངང་ལས་ཆོས་འབྱུང་གི་དབུས་སུ་ཧཱུཾ་ཡཾ་ཧཱུཾ་ལས་རླུང་གིས་དཀྱིལ་འཁོར་སྔོན་པོ་ཟླ་
གམ། དེའི་སྟེང་དུ་ཧཱུཾ་རཾ་ཧཱུཾ་ལས་མེའི་དཀྱིལ་འཁོར་དམར་པོ་གྲུ་གསུམ། དེའི་སྟེང་དུ་ཧཱུཾ་བཾ་ཧཱུཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ། དེའི་སྟེང་དུ་ཧཱུཾ་ལཾ་ཧཱུཾ་ལས་སའི་དཀྱིལ་འཁོར་སེར་པོ་གྲུ་བཞི། ཐམས་ཅད་ཀྱང་རྡོ་རྗེ་གཉིས་གཉིས་གྱིས་མཚན་པ། དེའི་སྟེང་དུ་བསྲུང་བའི་འཁོར་ལོའི་ནང་དུ་རྡོ་རྗེའི་ལྟེ་བར་གྷྲུཾ་ཡོངས་སུ་གྱུར་པ་ལས་གཞལ་ཡས་ཁང་གྲུ་བཞི་སྒོ་བཞི་རྟ་བབས་བཞིས་བརྒྱན་པ། ནང་གི་ལྷ་སྣམ་ཤར་དཀར། ལྷོ་སེར། ནུབ་དམར། བྱང་ལྗང༌། དབུས་ཨེནྡྲ་ནཱི་ལའི་སྟེགས་བུའི་སྟེང་དུ། རྡོ་རྗེའི་ར་བ་ཟླུམ་པོ་འོད་ཟེར་སྣ་ལྔ་འབར་བ། ནང་ལིང་ཚེ་དགུར་གྱུར་པ་དབུས་ཕྱུར་བུར་གྱུར་པའི་རྩེ་མོར་རྡོ་རྗེ་རིན་པོ་ཆེའི་ཏོག་གིས་སྤྲས་པ། དབུས་སུ་སྣ་ཚོགས་པདྨ་དང་ཉི་མའི་གདན། ཁྲོ་བོ་བཅུ་ལ་ཉི་མ། ཤར་ཕྱོགས་པ་རྣམས་ལ་ཟླ་བ། མཱ་མ་ཀཱི་ལ་རྡོ་རྗེ། གཞན་ལྷོ་ཕྱོགས་པ་རྣམས་ལ་རིན་པོ་ཆེ། ནུབ་ཕྱོགས་པ་རྣམས་ལ་པདྨ་དམར་པོ་བྱང་ཕྱོགས་པ་རྣམས་ལ་རྡོ་རྗེ་རྒྱ་གྲམ་གྱི་གདན། དབུས་སུ་རྡོ་རྗེ་འཆང་སྔོན་པོ་སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་པ་རྣམས་ཀྱིས་རྡོ་རྗེ་འཁོར་ལོ་པདྨ། གཡོན་པ་རྣམས་ཀྱིས་དྲིལ་བུ༴ འཛིན་པ། རྡོ་རྗེའི་སྐྱིལ་མོ་ཀྲུང་གིས་བཞུགས་པ། དར་དང་རིན་པོ་ཆེས་བརྒྱན་པ། ཕྱག་དང་པོ་གཉིས་འཁྱུད་རྒྱས་ཡུམ་རེག་བྱ་རྡོ་རྗེ་མ། རང་དང་འདྲ་བ།
པདྨའི་སྐྱིལ་ཀྲུང་གིས་བཞུགས་པ་དང་མཉམ་པར་སྦྱོར་བ། ལིང་ཚེ་རྣམས་ལ་ཤར་དུ་རྣམ་སྣང༌། ལྷོར་རིན་འབྱུང༌། ནུབ་ཏུ་འོད་དཔག་མེད། བྱང་དུ་དོན་ཡོད་གྲུབ་པ། ཤར་ལྷོར་སྤྱན་མ། ལྷོ་ནུབ་ཏུ་མཱ་མ་ཀཱི། ནུབ་བྱང་དུ་གོས་དཀར་མོ། བྱང་ཤར་དུ་སྒྲོལ་མ། རིམ་པ་གཉིས་པའི་ཤར་ལྷོར་གཟུགས་རྡོ་རྗེ་མ། ལྷོ་ནུབ་ཏུ་སྒྲ་རྡོ་རྗེ་མ། ནུབ་བྱང་དུ་དྲི་རྡོ་རྗེ་མ། བྱང་ཤར་དུ་རོ་རྡོ་རྗེ་མ། རིམ་པ་གསུམ་པའི་སྣམ་བུ་ལ། ཤར་སྒོའི་གཡས་གཡོན་དུ་བྱམས་པ་དང་ས་སྙིང༌། ལྷོ་སྒོའི་གཡས་གཡོན་དུ་ཕྱག་ན་རྡོ་རྗེ་དང་ནམ་མཁའི་སྙིང་པོ། ནུབ་སྒོ་གཡས་གཡོན་དུ་འཇིག་རྟེན་དབང་ཕྱུག་དང་འཇམ་དཔལ། བྱང་སྒོ་གཡས་གཡོན་དུ་སྒྲིབ་པ་རྣམ་སེལ་དང་ཀུན་ཏུ་བཟང་པོ། ཤར་སྒོར་གཤིན་རྗེ་གཤེད། ལྷོ་སྒོར་གཞན་གྱིས་མི་ཐུབ་པ། ནུབ་སྒོར་རྟ་མགྲིན། བྱང་སྒོར་བགེགས་མཐར་བྱེད། ཤར་ལྷོར་མི་གཡོ་བ། ལྷོ་ནུབ་ཏུ་འདོད་རྒྱལ། ནུབ་བྱང་དུ་དབྱུག་སྔོན་ཅན་བྱང་ཤར་དུ་འཆོལ་བ། སྟེང་གི་ཡ་ཕུག་གི་ནང་དུ་གཙུག་ཏོར། འོག་ཏུ་ས་གཞིའི་ནང་དུ་གནོད་མཛེས། ལྷ་ཐམས་ཅད་ཀྱི་ཐུགས་ཀ་ནས་འོད་འཕྲོས། སེམས་ཅན་ཐམས་ཅད་བཀུགས་ཏེ་དཀྱིལ་འཁོར་གྱི་སྒོ་བཞི་ནས་བཅུག །བྱང་ཆུབ་ཀྱི་སེམས་ཀྱི་དབང་བསྐུར། དེ་བཞིན་གཤེགས་པ་ཐམས་ཅད་ཀྱི་བདེ་བ་དང་ཡིད་བདེ་བ་ཐོབ་ནས་རང་གི་ཞིང་དུ་གཤེགས་
པར་གྱུར། གཙོ་བོའི་ཐུགས་ཀ་ནས་འོད་ཀྱི་རྣམ་སྣང༌། སྤྱན་མ། ས་སྙིང༌། གཟུགས་རྡོ་རྗེ་མ། བྱམས་པ། གཤིན་རྗེ་གཤེད། མི་གཡོ་བ་རྣམས་བདག་ལ་ཐིམ་ཞིང་འོད་གསལ་གྱི་ངང་དུ་ཡལ། རིན་འབྱུང༌། མཱ་མ་ཀཱི། ཕྱག་རྡོར། སྒྲ་རྡོ་རྗེ་མ་གཞན་གྱིས་མི་ཐུབ་པ། འདོད་རྒྱལ་རྣམས་འོད་གསལ་དུ་ཐིམ། འོད་དཔག་མེད་གོས་དཀར་མོ། ནམ་སྙིང༌། དྲི་རྡོ་རྗེ་མ། རྟ་མགྲིན་དབྱུག་སྔོན་ཅན་རྣམས་འོད་གསལ་དུ་ཐིམ། དོན་གྲུབ། སྒྲོལ་མ། འཇིག་རྟེན་དབང་ཕྱུག །རོ་རྡོ་རྗེ་མ། སྒྲིབ་སེལ། ཀུན་བཟང༌། བགེགས་མཐར་བྱེད། སྟོབས་པོ་ཆེ་རྣམས་འོད་གསལ་དུ་ཐིམ། གཙུག་ཏོར་གནོད་མཛེས། རེག་རྡོ་རྗེ་མ་རྣམས་འཇམ་དཔལ་ལ་ཐིམ། དེ་དག་གཙོ་བོ་ལ་ཐིམ། གཙོ་བོ་ཡང་ཐམས་ཅད་སྟོང་པ་འོད་གསལ་ལ་ཐིམ། དེ་ཡན་ཆད་སྔོན་འགྲོ་ཡིན་ནོ། །ཨོཾ་ཤཱུ་ནྱ་ཏས་དེ་བཞིན་ཉིད་ལ་ཡུན་རིང་དུ་དམིགས། སྔར་གྱི། གཞལ་ཡས་ཁང་གི་དབུས་ཀྱི་ནམ་མཁར། ཉི་མ་དང་ཟླ་བ་དང་པདྨ་དམར་པོ་འདབ་བརྒྱད་ཨོཾ་ཨཱཿཧཱུཾ་སྟེང་ནས་སྟེང་དུ་བརྩེགས་པ། འབྲུ་གསུམ་པདྨ་ཉི་མ་རྣམས་རིམ་པས་ཟླ་བ་ལ་ཐིམ། ཟླ་བའི་དཀྱིལ་འཁོར་ཡོངས་སུ་རྫོགས་པར་གྱུར། དེ་ལས་འོད་ཟེར་འཕྲོས། སྣོད་བཅུད་ཐམས་ཅད་ཟླ་བ་ལ་ཐིམ་པས་བྱང་ཆུབ་སེམས་ཀྱི་ངོ་བོར་གྱུར། ཨོཾ་དྷརྨཱ་དྷར་དུ་སྭ་བྷཱ་ཝ་
ཨཏྨ་ཀོ྅ཧཾ། ཟླ་བའི་དབུས་སུ། ཨོཾ་ཨཱཿཧཱུཾ། དེ་ལས་འོད་འཕྲོས། སངས་རྒྱས་ཐམས་ཅད་སྤྱན་དྲངས། ཐིམ་པ་ལས་རྡོ་རྗེ་དཀར་པོ་རྩེ་ལྔ་པར་གྱུར། ཨོཾ་བཛྲ་ཨཱཏྨ་ཀོ྅ཧཾ། ཟླ་བ་དང་རྡོ་རྗེ་འདྲེས་པ་ལས། དང་པོའི་མགོན་པོ་དཀར་པོ་རྡོ་རྗེ་དང་དྲིལ་བུ་འཛིན་པ། མི་བསྐྱོད་པ་དཔག་ཏུ་མེད་པ་སྤྲུལ། སེམས་ཅན་ཐམས་ཅད་དེ་བཞིན་གཤེགས་པའི་ཟག་པ་མེད་པའི་བདེ་བ་ལ་བཀོད། མི་བསྐྱོད་པ་ལ་ཐིམ། དེ་ཉིད་དབུས་ཀྱི་གདན་ལ་འདུག་པ་ལ། བདག་ཉིད་ཀྱང་ཐིམ་པས་རང་རྡོ་རྗེ་སེམས་དཔའ་ཞལ་གསུམ་ཕྱག་དྲུག་པ་དཔའ་བོ་གཅིག་པར་གྱུར། ལུས་གཞལ་ཡས་ཁང་གི་ངོ་བོ་ལ། སྤྱི་བོར་གཟུགས་ཕུང་ཨོཾ་ལས་རྣམ་སྣང༌། མགྲིན་པར་འདུ་ཤེས་ཨཱཿལས་སྣང་མཐའ། སྙིང་གར་རྣམ་ཤེས་ཧཱུཾ་ལས་མི་བསྐྱོད་པ། ལྟེ་བར་ཚོར་ཕུང་སྭཱ་ལས་རིན་འབྱུང༌། བརླའི་རྩ་བར་འདུ་བྱེད་ཧཱ་ལས་དོན་འགྲུབ། མིག་ལས་ས་སྙིང༌། ཨོཾ་ཡིག་བཞི་ལས་རྣ་བ་ཕྱག་རྡོར། སྣ་ནམ་སྙིང༌། ལྕེ་འཇིག་རྟེན་དབང་ཕྱུག །རྡོ་རྗེའི་སྒོར། ལུས་སྒྲིབ་སེལ། ཚིགས་པ་ལས་ཀུན་བཟང༌། སྙིང་གར་ཡིད་ཧཱུཾ་ལས་འཇམ་དཔལ། ཧཱུཾ་བཅུ་ལས་ལག་པ་གཡས་པ་གཤིན་རྗེ་གཤེད། ལག་པ་གཡོན་པ་ཤེས་རབ་མཐར་བྱེད། ཁ་ལ་རྟ་མགྲིན། རྡོ་རྗེ་ལ་བགེགས་
མཐར་བྱེད། དཔུང་པ་གཡས་ལ་མི་གཡོ་བ། གཡོན་ལ་ཌཀྐི། པུས་མོ་གཡས། སེར་པོ་བེ་ཅོན་སྔོན་པོ། །གཡོན་ལ་སྟོབས་པོ་ཆེ། སྤྱི་བོར་གཙུག་ཏོར་འཁོར་ལོས་བསྒྱུར་བ། རྐང་མཐིལ་གཉིས་སུ་གནོད་མཛེས་རྣམས་འཁོད་པར་གྱུར་པ། རང་གི་སྤྱི་བོར་ཟླ་བ་ལ་ཨོཾ་དཀར་པོ་ལས་འོད་ཟེར་སྣ་ལྔ་ལྷ་མོ་སྤྱན་མ་དང་བཅས་ནམ་མཁའ་གང་བ་སྤྲོས། སངས་རྒྱས་རྣམས་རྣམ་སྣང་དུ་གྱུར་པ་སྙོམས་འཇུག་གི་བདེ་བས་མཉེས་པར་བྱས། སྤྱན་དྲངས་ཏེ་མདུན་གྱི་ནམ་མཁར་བཞུགས། དཔལ་ལྡན་སངས་རྒྱས་སྐུ་འཆང་བ། །རྡོ་རྗེ་མི་ཕྱེད་གསུམ་བསྒོམ་པ། །དེང་བདག་བྱིན་གྱིས་བརླབས་ནས་སུ། །རྡོ་རྗེའི་སྐུ་ནི་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད༴ །དེང་བདག་བྱིན་གྱི་རླབས༴ །རྡོ་རྗེའི་སྐུ་ནི་མཛད་དུ་གསོལ། །ལྷ་ཐམས་ཅད་རྗེས་ཆགས་ཀྱིས་སྙོམས་པར་ཞུགས། འོད་ཟེར་དཀར་པོ་གྱུར་སྤྱི་བོ་ནས་ཐིམ་པས་སྐུའི་དབང་ཕྱུག་ཐོབ་པར་གྱུར། སངས་རྒྱས་ཀུན་གྱི་སྐུ་གང་ཡིན། །ཕུང་པོ་ལྔ་ཡི་རབ་ཏུ་རྒྱས། །སངས་རྒྱས་སྐུ་ཡི་རང་བཞིན་གྱི། །བདག་ཀྱང་དེ་དང་འདྲ་བར་ཤོག །ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། རང་གི་ལྕེའི་སྟེང་དུ་པདྨ་ལ་ཨཱཿ དམར་པོ་ལས་འོད་ཟེར་སྣ་ལྔ་གོས་དཀར་མོ་དང་བཅས་ནམ་མཁའ་གང་བ་སྤྲོས། སངས་རྒྱས་རྣམས་འོད་
དཔག་མེད་དུ་གྱུར་པར་སྙོམས་འཇུག་གི། སོགས་གོང་བཞིན། དཔལ་ལྡན་སངས་རྒྱས་གསུང་འཆང་བ། །ཆོས་ཀྱི་གསུང་ལམ་དཔལ་དང་ལྡན། །རྡོ་རྗེ་མི་ཕྱེད༴ གསུང་གི་རྡོ་རྗེ་མཛད༴ །ཕྱོགས་བཅུར་བཞུགས་ལ་སོགས།གསོལ། ལྷ་ཐམས་ཅད་རྗེས་ཆགས་ཀྱི་སྙོམས་པར་ཞུགས། འོད་ཟེར་དམར་པོ་གྱུར་ཏེ་མགྲིན་པ་ནས་ཐིམ་པས་གསུང་གི །དབང་ཕྱུག་ཐོབ་པར་གྱུར། རྡོ་རྗེ་ཆོས་ཀྱི་གསུང་གང་ཡིན། །གསུང་དེ་ངེས་ཚིག་ཕུན་སུམ་ཚོགས། །སངས་རྒྱས་གསུང་གི་རང་བཞིན་གྱི་བདག་གི་ཚིག་ཀྱང་དེ་འདྲར་ཤོག །ཨོཾ་སརྦ་ཏ་ཐཱ། ཝཀ༴ རང་གི་སྙིང་གར་ཉི་མ་ལ་ཧཱུཾ་སྔོན་པོ་ལས་འོད་ཟེར་སྣ་ལྔ་མཱ་མ་ཀཱི་དང་བཅས་ནམ་མཁའ་གང་བ་སྤྲོས། སངས་རྒྱས་རྣམས་མི་བསྐྱོད་པར་གྱུར་པ་སྙོམས་འཇུག་སོགས། དཔལ་ལྡན་རྡོ་རྗེ་ཐུགས་འཆང་བ། །རྡོ་རྗེ་མི་ཕྱེད་གསུམ༴ །དེང་བདག །ཐུགས་ཀྱི་རྡོ་རྗེ་༴ ཕྱོགས་བཅུ་སོགས། འོད་ཟེར་ནག་པོར་གྱུར་ཏེ་སྙིང་ག་ནས་ཐིམ་པས་ཐུགས་ཀྱི་དབང་ཕྱུག༴ །གསང་བའི་བདག་པོ་བློ་ལྡན་པ། །ཀུན་ཏུ་བཟང་པོའི་ཐུགས་གང་ཡིན། །རྡོ་རྗེ་འཛིན་པ་ལྟ་བུ་ནི། །བདག་གི་སེམས་ཀྱང་དེ་འདྲ་གྱུར། །ཨོཾ་སརྦ་ཏ་ཐཱ༴ ཙིཏྟ༴ བདག་ཉིད་སངས་རྒྱས་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་ངོ་བོར་གྱུར། ཨོཾ་སརྦ་ཏ་ཐཱ༴ ཀཱ་ཡ་ཝཱཀ་ཙིཏྟ༴ རང་དམ་ཚིག་སེམས་དཔའི་ཐུགས་ཀར་
ཡེ་ཤེས་སེམས་དཔའ་རྡོ་རྗེ་འཆང་ཡུམ་དང་བཅས་པ། དེའི་ཐུགས་ཀར་ཏིང་ངེ་འཛིན་སེམས་དཔའ་ཧཱུཾ་ནག་པོ་འོད་ཟེར་འབར་བ། སྤྱི་བོར་རིགས་བདག །རྡོ་རྗེ་སེམས་དཔའ་དཀར་པོ་ཡབ་ཡུམ་སྙོམས་པར་ཞུགས་པས་བྱང་ཆུབ་ཀྱི་སེམས་ཀྱིས་བདག་ཉིད་ཚིམ་པར་བྱེད་པར་འགྱུར། རང་གི་བར་དུ་སྨེ་ཤ་ཅན་གྱི་རིགས་ལས་བྱུང་བའི་བུ་མོ་སྔོ་བསངས་མིག་ཡངས་མ་གཟུགས་དང་ལང་ཚོས་བརྒྱན་པ། དེ་རེག་བྱ་རྡོ་རྗེ་མ་གཙོ་བོ་དང་འདྲ་བར་གྱུར། དེའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ལྟེ་བར་སྭཱ། བྱིན་པ་གཉིས་ལ་ཧཱ། རིམ་པ་བཞིན་དུ་དཀར་དམར་སྔོ་སེར་ལྗང་བ་རྣམས་ཡོངས་སུ་གྱུར་པ་ལས། ལྟེ་བར་ས་ཁམས་ལཾ་ལས་སྤྱན་མ། སྙིང་ཁར་ཆུ་ཁམས་མཾ་ལས་མཱ་མ་ཀཱི། མགྲིན་པར་མེ་ཁམས་པཾ་ལས་གོས་དཀར་མོ། སྤྱི་བོར་རླུང་ཁམས་ཏཾ་ལས་སྒྲོལ་མ་མིག་ཏུ་གཟུགས་ཛཿ ལས་གཟུགས་རྡོ་རྗེ་མ། རྣ་བར་སྒྲ་ཧཱུཾ་ལས་སྒྲ་རྡོ་རྗེ་མ། སྣར་དྲི་བཾ་ལས་དྲི་རྡོ་རྗེ་མ། ལྕེར་རོ་ཧོཿ ལས་རོ་རྡོ་རྗེ་མ། པདྨའི་སྣ་རྩེར་རེག་བྱ་ཁཾ་ལས་རེག་བྱ་རྡོ་རྗེ་མ། ཧཱུཾ་བཅུ་ལས་ལག་པ་གཡས་པ་རོ་ལངས་རྡོ་རྗེ་མ། གཡོན་ལ་གཞན་གྱིས་མི་ཐུབ་པ། ཁ་ལ་ཁྲོ་གཉེར་མ། བྷ་གར་རལ་པ་གཅིག་མ། དཔུང་པ་གཡས་ལ་དེ་བཞིན་གཤེགས་པའི་ཡུམ་སྣ་ཚོགས་རྡོ་རྗེ་མ། གཡོན་སྣ་ཚོགས་རིན་ཆེན་མ། པུས་མོ་གཡས་ལ་སྣ་ཚོགས་པདྨ། གཡོན་
པ་སྣ་ཚོགས་ལས་མ། རྐང་མཐིལ་གཉིས་སུ་ས་འཛིན་ལྷ་མོ། རྡོ་རྗེ་རོ་ལངས་མ་ལ་སོགས་པ་བཅུ་པོ་དེ་དག་ནི་ཁྲོ་བོ་བཅུ་དང་འདྲའོ། །ཡབ་ཀྱི་གསང་གནས་ཧཱུཾ་ལས་རྡོ་རྗེ་རྩེ་ལྔ་པ་རྩེ་མོ་ཨོཾ་གིས་མཚན་པ། ཡུམ་གྱི་མཁའ་ཨཱཿ ལས་པདྨ་འདབ་བརྒྱད་ཟེའུ་འབྲུ་ལ་ཨས་མཚན་པ། མཁའ་གསང་གི་ནང་འོད་ཟེར་སྣ་ལྔས་ཁྱབ་པར་གྱུར། བདག་རིན་ཆེན་འབྱུང་ལྡན་གྱི་ང་རྒྱལ་དུ་འཕོས་ལ། ཨོཾ་སརྦ་ཏ་ཐཱ་ག་ཏ་ཨ་ནུ་ར་ག༴ སོགས། ཞེས་འཁྱུད་དེ་རང་ཉིད་རྡོ་རྗེ་འཆང་དུ་གྱུར། ཧཱུཾ་ཧཱུཾ་ཧཱུཾ། སྙོམས་པར་ཞུགས་མཆོག་ཏུ་དགའ་བ་ཐོབ། ཕཊ་རང་ཉིད་དོན་འགྲུབ་ཏུ་གྱུར། བྱང་ཆུབ་ཀྱི་སེམས་ཕྱུང་བ་ལས་བྱུང་བའི་ལྷ་ཚོགས་ནམ་མཁའ་གང་བ་སྤྲོས་ཏེ། འགྲོ་དོན་མཛད་པའི་ཕྱོགས་བཅུའི་དེ་བཞིན་གཤེགས་པ་རྣམས་མཆོད་པར་གྱུར། ཨོཾ་སརྦ་ཏ་ཐཱ་ག་ཏ་པུ་ཛཿབཛྲ་སོགས་ལུས་དཀྱིལ་ཀྱི་འོད་ཟེར་གྱིས་སངས་རྒྱས་ཐམས་ཅད་ཀྱི་དཀྱིལ་འཁོར་སྤྱན་དྲངས། ཡབ་ཡུམ་གཉིས་ཀྱི་སྤྱི་བོ་ནས་ཞུགས། ལུས་དཀྱིལ་གྱི་ལྷ་ཚོགས་བྱང་ཆུབ་ཀྱི་སེམས་སུ་ཞུ་བ་དང་འདྲེས། མཁའ་ནང་དུ་འདུས་པའིཐིག་ལེ་ཆ་སུམ་ཅུ་རྩ་གཉིས་སུ་གྱུར། དབུས་ཀྱི་ཐིག་ལེ་མི་བསྐྱོད་པ་སྔོན་པོ། མི་བསྐྱོད་པའི་དབུ་རྒྱན་ཅན་སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་པ་རྣམས་ཀྱིས་རྡོ་རྗེ་འཁོར་ལོ་པདྨ། གཡོན་པ་རྣམས་ཀྱིས་
དྲིལ་བུ་རིན་ཆེན་རལ་གྲི་འཛིན་པ། རྡོ་རྗེའི་སྐྱིལ་མོ་ཀྲུང་གིས་བཞུགས་པ། དར་དང་རིན་པོ་ཆེས་བརྒྱན་པ། བཛྲ་དྷྲྀཀ་ཐུགས་ཀར་དྲངས་ཏེ་ཕྱིར་ཕྱུང༌། ཆོས་ཀྱི་འཁོར་ལོ་བསྐོར་བ་སོགས་སངས་རྒྱས་ཀྱི་རྫུ་འཕྲུལ་དང་མཛད་པ་ཐམས་ཅད་མཛད། སེམས་ཅན་ཐམས་ཅད་ཀྱི་ཞེ་སྡང་སྦྱངས། མི་བསྐྱོད་པའི་གོ་འཕང་ལ་བཀོད། ཡེ་ཤེས་པ་རྣམས་འདྲེས། གཅིག་ཏུ་འདུས་པར་རང་གི་སྙིང་གར་ཐིམ་པས། བདག་ཉིད་ཞེ་སྡང་རྡོ་རྗེ་མཐིང་ནག་རྩ་ཞལ་ཁྲོས་པ། གཡས་ཞི་བ་གཡོན་ཆགས་པའི་ཉམས་ཅན་དུ་གྱུར། ཤར་གྱི་ཐིག་ལེ་རྣམ་སྣང་དཀར་པོ་མི་བསྐྱོད་པའི་དབུ་རྒྱན་ཅན། དཀར་ནག་དམར་བའི་ཞལ་གསུམ་སོགས་གོང་བཞིན། རལ་གྲི་འཛིན། ཛི་ན་ཛིཀ་ཐུགས་ཀར་དྲངས་ཏེ་ཕྱིར་ཕྱུང༌། ཆོས་ཀྱི་འཁོར་ལོ་བསྐོར་བ་སོགས༴ གཏི་མུག་སྦྱངས། རྣམ་སྣང་གི་གོ་འཕང་ལ་བཀོད། སྤྲུལ་བ་རྣམས་དང་འདྲེས། གཅིག་ཏུ་འདུས་པ་ཤར་གྱི་ལེ་ཚེར་འཁོད། དེ་བཞིན་དུ་འདོན་པ་བསྒྱུར་ཏེ། ལྷོའི་ཐིག་ལེ་རིན་འབྱུང་སེར་པོ་མི་བསྐྱོད་པའི་དབུ་རྒྱན་ཅན་སེར་ནག་དཀར་བའི༴ རཏྣ་དྷྲིཀ་ཐུགས་ཀར༴ སེར་སྣ་སྦྱངས། རིན་འབྱུང་གི༴ ལྷོའི་ལེ་ཚེར་འཁོད། ནུབ་ཀྱི་ཐིག་ལེ་འོད་དཔག་མེད་དམར་པཽ་མི་བསྐྱོད་པའི་དབུ་རྒྱན་ཅན། ནག་དཀར་དམར་བའི༴ ཨ་རོ་ལིཀ་ཐུགས་ཀར༴ འདོད་ཆགས༴ འོད་དཔག་མེད་ཀྱི༴ ནུབ་ཀྱི་ལ༴ བྱང་གི་ཐིག་ལེ་དོན་གྲུབ་ལྗང་གུ་མི་བསྐྱོད་པའི༴ ལྗང་ནག་དཀར་བའི༴
པྲཛྙཱ་དྷྲིཀ་ཐུགས་ཀར༴ ཕྲག་དོག༴ དོན་གྲུབ་ཀྱི་གོ་འཕང་༴ བྱང་གི་ལེ་ཚེར་འཁོད། འདི་མན་ཆད་སྤྱིའི་མཛད་པའི་ཚིག་རྣམས་བོར་ལ། ཤར་ལྷོའི་ཐིག་ལེ་སྤྱན་མ་དཀར་མོ་རྣམ་སྣང་གི་དབུ་རྒྱན་ཅན། དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་པ་རྣམས་ཀྱིས་འཁོར་ལོ་རྡོ་རྗེ་ཨུཏྤལ་དཀར་པོ། གཡོན་པ་རྣམས་ཀྱིས་དྲིལ་བུ་རིན་ཆེན་རལ་གྲི་འཛིན་པ། མོ་ཧ་ར་ཏི་ཐུགས་ཀར་དྲངས་ཏེ་ཕྱིར་ཕྱུང༌། གདོན་དང་ནད་དང་གདུང་བ་ཐམས་ཅད་ཞི་བར་བྱས། སྤྱན་མའི་གོ་འཕང་ལ་བཀོད། སྤྲུལ་པ་རྣམས་དང་འདྲེས། གཅིག་ཏུ་འདུས་པ་ཤར་ལྷོའི་གྲྭར་འཁོད། ལྷོ་ནུབ་ཀྱི་ཐིག་ལེ་མཱ་མ་ཀཱི་སྔོན་མོ་མི་བསྐྱོད་པའི༴ སྔོ་དཀར་དམར༴ དཱི་ཥ་རཱ་ཏི་ཐུགས་ཀར༴ བགེགས་བསྲུང་བ་དང་རྒྱས་པར་མཛད། མཱ་མ་ཀཱིའོ༴ ལྷོ་ནུབ་ཀྱི་གྲྭར༴ བྱང་ཤར་གྱི་ཐིག་ལེ་གོས་དཀར་མོ་དམར་མོ། འོད་དཔག་ཏུ་མེད་ཀྱི་དབུ༴ དམར་ནག་དཀར་བའི༴ རཱ་ག་ར་ཏི་ཐུགས་ཀར༴ ནད་ཀྱི་ཉེན་པ་རྣམས་བསྲུང་བར་བྱས། གོས་དཀར་མོའི༴ ནུབ་བྱང་གི་གྲྭར༴ བྱང་ཤར་གྱི་ཐིག་ལེ་སྒྲོལ་མ་ལྗང་གུ་དོན་གྲུབ་ཀྱི༴ ལྗང་ནག་དཀར་བའི༴ བཛྲ་རཱ་ཏི་ཐུགས་ཀར༴ དེ་ཐམས་ཅད་དབང་དུ་བསྡུས༴ སྒྲོལ་མའི༴ བྱང་ཤར་གྱི་གྲར༴ དེའི་ཕྱི་རོལ་ཤར་ལྷོའི་ཐིག་ལེ་གཟུགས་རྡོ་རྗེ་མ་དཀར་མོ་རྣམ་སྣང་གི་དབུ་བརྒྱན་ཅན། དཀར་ནག་དམར་བའི་ཞལ་གསུམ་ཕྱག་
དྲུག་གི་དང་པོ་གཉིས་མེ་ལོང་དམར་པོ་འཛིན་པ། ལྷག་མ་གཡས་གཉིས་ཀྱིས་རྡོ་རྗེ་དང་ཨུཏྤ་དཀར་པོ། གཡོན་གཉིས་ཀྱིས་རིན་པོ་ཆེ་དང་རལ་གྲི་འཛིན་པ། ཐུགས་ཀར༴ གཟུགས་ཀྱི་སྐྱེ་མཆེད་སྦྱངས། གཟུགས་བདེ་བས་མཆོད། གཟུགས་རྡོ་རྗེ་མའི་གོ་འཕང་༴ རིམ་པ་གཉིས་པའི་ཤར་ལྷོའི་གྲར༴ ལྷོ་ནུབ་ཀྱི་ཐིག་ལེ་སྒྲ་རྡོ་རྗེ་མ་སྔོན་མོ་མི་སྐྱོད་པའི༴ སྔོ་དཀར་དམར་བའི༴ སྒྲའི་སྐྱེ་མཆེད༴ སྒྲ་བདེ་བས༴ སྒྲ་རྡོ་རྗེ་མའི༴ བདེན་བྲལ་གྱི་གྲྭར༴ ནུབ་བྱང་གི་ཐིག་ལེ་དྲི་རྡོ་རྗེ་མ་དམར་མོ་འོད་དཔག་མེད་ཀྱི༴ དམར་ནག་དཀར་བའི༴ དྲིའི་སྐྱེ་མཆེད༴ དྲི་བདེ་བས༴ དྲི་རྡོ་རྗེ་མའི༴ ནུབ་བྱང་གི་གྲྭར༴ བྱང་ཤར་གྱི་ཐིག་ལེ་རོ་རྡོ་རྗེ་མ་ལྗང་གུ་དོན་གྲུབ་ཀྱི༴ ལྗང་ནག་དཀར་བའི༴ རོའི་སྐྱེ་མཆེད༴ རོ་བདེ་བའི༴ རོ་རྡོ་རྗེ་མའི༴ བྱང་ཤར་གྱི་གྲར༴ དབུས་ཀྱི་ཐིག་ལེ་ཆ་གཅིག་རེག་རྡོ་རྗེ་མ་སྔོན་མོ་མི་བསྐྱོད་པའི༴ སྔོ་དཀར་དམར་བའི་ནས་རལ་གྲི་འཛིན་པ་ཞེས་པའི་བར་གཙོ་བོ་བཞིན། རེག་བྱའི་སྐྱེ་མཆེད། རེག་བྱའི་བདེ་བའི༴ རེག་བྱ་རྡོ་རྗེ་མའི༴ ཡུམ་ལ་ཐིམ། སྔ་མའི་ཕྱི་རོལ་རིམ་པ་གསུམ་པའི་ལྷ་སྣམ་གྱི་ཤར་སྒོའི་གཡས་སུ་ཤར་གྱི་ཐིག་ལེ་ཆ་གཅིག །མེཾ་ལས་བྱམས་པ་རྣམ་སྣང་དང་འདྲ་བ་ལས། རྣམ་སྣང་གི་དབུ་རྒྱན་ཅན། གཡས་ཀྱི་དང་པོ་ཀླུ་ཤིང་གི་ཡལ་ག་མེ་ཏོག་དང་བཅས་པ་འཁོར་ལོས་མཚན་པ་
འཛིན་པ། རྩ་རྒྱུས་དང་ཉོན་ཡིད་སྦྱངས། རྡོ་རྗེའི་རྩ་དང་ཟག་མེད་ཀྱི་མངོན་ཤེས་ལ་བཀོད། ཤར་སྒོའི་གཡོན་གྱི་ལྷ་སྣམ་ལ་ཤར་གྱི་ཐིག་ལེ་ཆ་གཅིག་ལས་སའི་སྙིང་པོ་རྣམ་སྣང་དང་འདྲ་བ་རྣམ་སྣང་གི་དབུ༴ མིག་དང་མིག་ཤེས་སྦྱངས། རྡོ་རྗེའི་མིག་དང་མིག་གི་མངོན་ཤེས་ལ་བཀོད། ལྷོ་སྒོའི་གཡས་སུ་ལྷོའི་ཐིག་ལེ་ཆ་གཅིག་ཨོཾ་ལས་ཕྱག་རྡོར་རིན་འབྱུང་ལྟ་བུ་རིན་འབྱུང་གི༴ རྣ་བ་དང་རྣ་བའི་ཤེས་པ་སྦྱངས། རྡོ་རྗེའི་རྣ་བ་དང་རྣ་བའི་མངོན་ཤེས༴ །ལྷོ་སྒོའི་གཡོན་དུ་ཐིག་ལེ་ཆ་གཅིག་ཨོཾ་ལས་ནམ་མཁའི་སྙིང་པོ་རིན་འབྱུང་ལྟ་བུ་རིན་འབྱུང་གི་དབུ་བརྒྱན། སྣའི་རྣམ་ཤེས་སྦྱངས། རྡོ་རྗེའི་སྣ་དང་སྣའི་མངོན་ཤེས༴ ནུབ་སྒོའི་གཡས་སུ་ནུབ་ཀྱི་ཐིག་ལེ་ཆ་གཅིག་ཨོཾ་ལས་འཇིག་རྟེན་དབང་ཕྱུག་འོད་དཔག་མེད་དང་མཚུངས་པ་འོད་དཔག་མེད་ཀྱི༴ ལྕེ་དང་ལྕེའི་རྣམ་ཤེས་སྦྱངས། རྡོ་རྗེ་ལྕེ་དང་ལྕེའི་མངོན་ཤེས༴ ནུབ་སྒོའི་གཡོན་དུ་ཐིག་ལེའི་ཆ་གཅིག་ཧཱུཾ་ལས་འཇམ་དཔལ་འོད་དཔག་མེད་དང་འདྲ་བ་འོད་དཔག་མེད་ཀྱི༴ ཡིད་ཀྱི་སྐྱེ་མཆེད་དང་ཡིད་ཤེས་སྦྱངས། རྡོ་རྗེའི་ཡིད་དང་གཞན་སེམས་ཤེས་པའི་མངོན་ཤེས་ལ་བཀོད། བྱང་སྒོའི་གཡས་སུ་བྱང་གི་ཐིག་ལེ་ཆ་གཅིག་ཨོཾ་ལས་སྒྲིབ་པ་རྣམ་སེལ་དོན་ཡོད་གྲུབ་པ་ལྟ་བུ་དོན་གྲུབ་ཀྱི༴ ལུས་དབང་རྣམ་ཤེས་དང་བཅས་པ། རྡོ་རྗེའི་ལུས་དང་རྫུ་འཕྲུལ་གྱི་མངོན་ཤེས༴ བྱང་སྒོའི་
གཡོན་དུ་ཐིག་ལེ་ཆ་གཅིག་སཾ་ལས་ཀུན་ཏུ་བཟངཔོ་དོན་གྲུབ་ལྟ་བུ་དོན་འགྲུབ་ཀྱི༴ ཚིགས་རྣམས་དང་ཀུན་གཞི་སྦྱངས། རྡོ་རྗེའི་ཚིགས་དང་སྔོན་གྱི་གནས་རྗེས་སུ་དྲན་པ་ལ་བཀོད། ལྷ་ཡབ་ཐམས་ཅད་རལ་པའི་ཐོར་ཚུགས་སོགས། རིན་པོ་ཆེས་བརྒྱན་པའོ། །མཁའ་ནང་གི་ཤར་གྱི་ཐིག་ལེ་གཤིན་རྗེ་མཐར་བྱེད་ནག་པོ་རྣམ་སྣང་གི༴ ནག་དཀར་དམར་བའི་ཞལ་གསུམ༴ དགྲ་སྟ་འཛིན་པ༴ ཡ་མནྟ་ཀྲྀཏྟ་ཐུགས་ཀར༴ དབང་པོ་ལ་སོགས་པ་བགེགས་རྣམས་ཚར་བཅད༴ ཤར་སྒོར༴ ལྷོའི་ཐིག་ལེ་ཤེས་རབ་མཐར་བྱེད་དཀར་པོ་རིན་འབྱུང་གི༴ དཀར་ནག་དམར་བའི་ཞལ༴ པྲཛྙཱནྟ་ཀྲྀཏྟ། གཤིན་རྗེ་དང་མེའི་གདོན་རྣམས། ལྷོ་སྒོར༴ ནུབ་ཀྱི་ཐིག་ལེ་རྟ་མགྲིན་དམར་པོ་འོད་དཔག་མེད་ཀྱི༴ དམར་ནག་དཀར་བའི༴ པདྨནྟ་ཀྲྀཏྟ༴ ཀླུའི་གདོན་རྣམས༴ ནུབ་སྒོར༴ བྱང་གི་ཐིག་ལེ་བགེགས་མཐར་བྱེད་ལྗང་ཁུ་དོན་གྲུབ་ཀྱི༴ ལྗང་ནག་དཀར་བའི༴ བཱིགྷྣནྟ་ཀྲིཏ༴ གནོད་སྦྱིན་གྱི་གདོན་རྣམས༴ བྱང་སྒོར༴ ཤར་ལྷོའི་ཐིག་ལེ་མི་གཡོ་བ་ནག་པོ་རྣམ་སྣང་གི༴ ནག་དཀར་དམར་བའི༴ ཨ་ཙ་ལ༴ རིམ་གཏོང་བའི་མེ་ལྷའི་གདོན༴ ཤར་ལྷོའི་གྲར༴ ལྷོ་ནུབ་ཀྱི་ཐིག་ལེ་འདོད་རྒྱལ་སྔོན་པོ་རིན་འབྱུང་གི༴ སྔོ་དཀར་དམར་བའི༴ ཏཀྐི་རཱ་ཛ༴ སྲིན་པོའི་གདོན༴ བདེན་བྲལ་གྱི་གྲར༴ ནུབ་བྱང་གི་ཐིག་ལེ་དབྱུག་སྔན་ཅན་སྔོན་པོ་
འོད་དཔག་མེད་ཀྱི༴ སྔོ་དཀར་དམར་བའི༴ ནཱི་ལ་དནྚ༴ རླུང་ལྷའི་གདོན་རྣམས༴ ནུབ་བྱང་གི་གྲར༴ བྱང་ཤར་གྱི་ཐིག་ལེ་སྟོབས་པོ་ཆེ་སྔོན་པོ་དོན་གྲུབ་ཀྱི་དབུ་བརྒྱན༴ ནག་དཀར་དམར་བའི༴ མཧཱ་བ་ལ༴ མཁའ་འགྲོ་མ་དང་དབང་ལྡན་གྱི་གདོན༴ བྱང་ཤར་གྱི་གྲར༴ སྟེང་གི་ཐིག་ལེ་གཙུག་ཏོར་འཁོར་ལོས་བསྒྱུར་བ་སྔོན་པོ་མི་བསྐྱོད་པའི༴ སྔོ་དཀར་དམར་བའི༴ ཨུཥྞི་ཥ་ཙཀྲ་ཝརྟི༴ ཚངས་པ་དང་གཟའ་སྐར་གྱི་གདོན༴ སྟེང་གི་གྲྭར༴ འོག་གི་ཐིག་ལེ་གནོད་མཛེས་ནག་པོ་མི་བསྐྱོད་པའི༴ ནག་དཀར་དམར་བའི་༴ བྷུདྡྷ་རཱ་ཛ༴ ཀུ་ལ་ཀུ་ཊ་ལ་སོགས་པའི་དུག་བརྟན་པ་དང་གཡོ་བ་ཐམས་ཅད༴ འོག་གི་ཕྱོགས་སུ་འཁོད་པར་གྱུར། ཁྲོ་བོ་ཐམས་ཅད་ཀྱང་སྟོབས་ཆེན་ཕ་རོལ་གནོན་པ་སོགས། ཚར་གཅོད་པའོ་ཞེས་པའི་བར་གོང་བཞིན། ཡང་ཁྲོ་བོ་དྲུག་ལ་ཧཱུཾ་ཁོ་ན་འབྱིན་སྔགས་སུ་མཛད་པ་ཡང་ཡོད་དོ། །རང་གི་སྙིང་གའི་འོད་ཟེར་གྱིས་དབང་གི་ལྷ་དཀྱིལ་འཁོར་གྱི་འཁོར་ལོ་མདུན་གྱི་ནམ་མཁར་བཞུགས་པ་ལ། བྱང་ཆུབ་རྡོ་རྗེ་སངས་རྒྱས་ལ་སོགས། དེང་བདག་སྩོལ། ཅེས་གསོལ་བ་བཏབ་པས། སངས་རྒྱས་རྣམས་ནི་ཐམས་ཅད་ཀྱི་སོགས། སྦྱིན་པར་བྱ། ཨོཾ་བཛྲ་བྷ་ཝ་ཨབྷི་ཥིཉྩ་ཧཱུཾ། ཞེས་དབང་བསྐུར་བར་གྱུར། དེ་ནས་བར་འདི་ཕྲ་ཐིག་གི་རྣལ་འབྱོར་བསྒོམ། རྡོ་རྗེའི་བཟླས་པ་བྱ། བཟླས་པའི་མན་ངག་གསལ་བཏབ། ཨོཾ་ཨཱཿབཛྲ་
དྷྲིཀ་ཧཱུཾ་ཧཱུཾ་ཕཊ། ཅེས་ངག་བཟླས་ཅི་ནུས་སུ་བཟླས་ཤིང༌། སྤྲོ་ན་འཁོར་གྱི་སྔགས་ཀྱང་བཟླས་པར་བྱའོ། །དེ་ནས་བདག་ཉིད་མི་བསྐྱོད་པ་ཡབ་ཡུམ་སྙོམས་པར་ཞུགས་པས་ཡུམ་ཡབ་ལ་ཐིམ། དེ་ཡེ་ཤེས་སེམས་དཔའ་ལ་ཐིམ། དེ་ཏིང་ངེ་འཛིན་སེམས་དཔའ་ལ་ཐིམ། དེ་ཡང་དེ་བཞིན་ཉིད་ཀྱི་འོད་གསལ་བ་ལ་ཞུགས་ཏེ་ཐམས་ཅད་སྟོང་པའི་ངོ་བོར་གྱུར། དེ་ནས་བདེ་བ་ཆེན་པོ་ལས་སད་པའི་ཕྱིར། ཚད་མེད་བཞིའི་ངོ་བོ་ལྷ་མོ་བཞིས་བསྐུལ་བ་ནི། མཱ་མ་ཀཱིས། སེམས་ཅན་ཁམས་ནི་གནས་ཀྱི་དབང་ཕྱུག་ཁྱོད་ནི་རྡོ་རྗེའི་ཐུགས། །དགའ་བ་ཡིད་འོང་དོན་ཆེན་འདོད་པའི་བདག་ལ་བསྐྱབ་ཏུ་གསོལ། །མགོན་པོ་གལ་ཏེ་བདག་ནི་དེ་རིང་གསོན་པར་མཆིས་བཞེད་ན། །སེམས་ཅན་ཡབ་ཆེན་གཉེན་མཆོག་བདག་ལ་དགྱེས་པར་མཛད་དུ་གསོལ། །སྤྱན་མས། རྡོ་རྗེའི་སྐུ་ཁྱོད་བཀའ་ཡི་འཁོར་ལོ་སེམས་ཅན་ཀུན་ལ་ཕན། །སངས་རྒྱས་དོན་དུ་བྱང་ཆུབ་དོན་དམ་རྗེས་སུ་ཕན་སྟོན་པ། །མགོན་པོ་གལ་ཏེ་བདག་ནི༴ འདོད་ཆགས་དམ་ཚིག་ཆགས་པས་བདག་ལ་དགྱེས་པར་མཛད་དུ་གསོལ། །གོས་དཀར་མོས། ཁྱོད་ནི་རྡོ་རྗེའི་གསུངས་ཏེ་ཀུན་ལ་ཕན། །ཐུགས་བརྩེ་བ༴ །འཇིག་རྟེན་དག་གི་དགོས་པའི་དོན་མཛད་པ་ལ་རྟག་ཏུ་བརྩོན། །མགོན་པོ་གལ་ཏེ་བདག་ནི༴ །རབ་དགའི་སྤྱོད་པ་ཀུན་ཏུ་བཟང་པོས་བདག་ལ་དགྱེས་པར་མཛོད། །སྒྲོལ་མས། ཁྱོད་ནི་རྡོ་རྗེ་འདོད་པ་དམ་ཚིག་མཆོག་གི་ཕན་དོན་ཆེ། །ཡང་དག་རྫོགས་སངས་
རྒྱས་ཀྱི་གདུང་མཆོག་མཉམ་པ་ཉིད་གཟིགས་པ། །མགོན་པོ་གལ་ཏེ༴ ཡོན་ཏན་རིན་ཆེན་མང་པོའི་གཏེར་གྱུར་བདག་ལ་དགྱེས་པར་མཛོད། །ཅེས་བསྐུལ་བས་ཡབ་ཡུམ་སྔོན་བཞིན་དུ་བཞེངས་པར་གྱུར། མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁས་པ་ཆེ། །རྡོ་རྗེ་གསུམ་མཆོག་དཀྱིལ་འཁོར་གསུམ། །གསང་བ་གསུམ་ཁྱོད་ཕྱག་འཚལ་ལོ། །རྣམ་པར་སྣང་མཛད་དག་པ་ཆེ། །རྡོ་རྗེ་ཞི་བ་དགའ་ཆེན་པོ། །རང་བཞིན་འོད་གསལ་ལམ་མཆོག་གི་མཆོག །སྟོན་པ་རྡོ་རྗེ་ཕྱག་འཚལ་ལོ། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའི་དྲི་མ་མེད། །རང་བཞིན་དག་པས་གོས་པ་མེད། །རྡོ་རྗེ་སྐུ་ལ༴ །རྡོ་རྗེ་དཔག་མེད་རྒྱལ་པོ་ཆེ། །མི་རྟོག་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །རྡོ་རྗེ་གསུང་ལ༴ དོན་ཡོད་རྡོ་རྗེ་རྫོགས་སངས་རྒྱས། །བསམ་པ་ཐམས་ཅད་རྫོགས་མཛད་པ། །དག་པ་ངོ་བོ་ཉིད་ལས་བྱུང༌། །རྡོ་རྗེ་སེམས་དཔའ་ཁྱོད་ཕྱག་འཚལ། །ཨརྒྷཾ་སོགས་ཀྱིས་མཆོད། ནང་མཆོད་བྱིན་གྱིས་བརླབས་ལ། འབྲུ་གསུམ་གྱིས་མྱང༌། སྙོམས་འཇུག་གི་བདེ་བ་ཆེན་པོས་མཉེས་པར་གྱུར། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག༴ སོགས། རང་གི་སྙིང་གའི་འོད་ཟེར་གྱིས་དཀྱིལ་འཁོར་གྱི་ལྷ་ཚོགས་ཐམས་ཅད་བདག་ཉིད་ལ་ཐིམ། གཞལ་ཡས་ཁང་ཡང་རང་ལུས་ལ་ཐིམ། ཡབ་ཡུམ་སྙོམས་པར་ཞུགས། སྦྱོར་མཚམས་ནས་བྱང་ཆུབ་སེམས་ཀྱིས་འོད་ཟེར་
སྤྲོས་ཏེ། སེམས་ཅན་རྣམས་ལ་དབང་བསྐུར་བས་སྒྲིབ་གཉིས་སྦྱངས་ཏེ་ཧཱུཾ་ཡིག་ཏུ་གྱུར་ནས་ནམ་མཁའ་གང༌། ཐམས་ཅད་ཀྱང་རྡོ་རྗེ་འཆང་དུ་གྱུར་པ་བདག་ཉིད་ཀྱི་ཐུགས་ཀར་ཐིམ། སྤྱི་བོར་མཐོ་གང་ཙམ་གྱི་ནམ་མཁའ་ལ་ཝ་ཡིག་ལས་བྱུང་བའི་ཟླ་བའི་དཀྱིལ་འཁོར། འོག་ཏུ་ཨོཾ་མགོ་བོ་ཐུར་དུ་བསྟན་པས་མཚན་པ། དེ་ལས་ཡེ་ཤེས་ལྔའི་བདུད་རྩི་བྱུང་སྟེ་སྤྱི་བོ་ནས་ཐིམ་པས་བདག་གི་ལུས་རྒྱས་པར་བསམ། རྗེས་ཀྱི་བྱ་བ་ནི་གཞན་དང་འདྲའོ། །འདུས་པའི་སྒྲུབ་ཐབས་མདོར་བསྡུས་ཁོ་ནའི་རྗེས་སུ་འབྲང་བ་གྲུབ་ཆེན་ཚུལ་ཁྲིམས་མགོན་གྱི་ཅི་བཞེད་པ་ལྟར་བཀོད་པའོ། །འདིར་སྨྲས་པ། བཞེད་པ་མི་འདྲ་བསྒྲིགས་པ་ལ། །ཕྱི་མའི་དུས་ཀྱི་མཁས་རྣམས་ངལ། །སློབ་དཔོན་གོང་མའི་བྱིན་རླབས་ཀྱི། །རྒྱུན་ལ་གནོད་པ་མ་བྱས་སམ། །ལུང་རྒྱུན་ཙམ་ཡང་མི་བཞུགས་པའི། །གླེགས་བམ་དག་གི་དོན་བསྒོམས་ཀྱང༌། །གླེགས་བམ་མཐོང་བས་ཁེངས་ཞེས་པའི། །ཚིག་དེ་ཐོག་ཏུ་བབས་མིན་ནམ། །འདུས་པའི་སྒྲུབ་ཐབས་ཀྱི་སྐབས་ཏེ་བཞི་པའོ། །སྒྱུ་འཕྲུལ་ཆེན་མོའི་རྒྱུད་ཀྱི་རྗེས་སུ་འབྲངས་ཏེ་ཧེ་རུ་ཀ་བསྒོམ་པར་འདོད་པས། སྔོན་འགྲོ་སྤྱི་དང་འདྲ། སྙིང་གར་ཉི་མ་ལ་ཧཱུཾ། དེའི་འོད་ཀྱིས་ཧེ་རུ་ཀའི་དཀྱིལ་འཁོར་བཛྲ་ས་མཱ་ཛ། ཨརྒྷཾ་སོགས་ཡན་ལག་ལྔའམ་ཡན་ལག་བདུན་པའི་རྒྱུན་བཤགས། ཨོཾ་ཤུ་ནྱ་ཏ་སོགས། སྟོང་པའི་ངང་ལས་ཆོས་འབྱུང་གི་ནང་དུ། པཾ་ལས་པདྨ་དམར་པོ་འདབ་བཞི། དེའི་ལྟེ་བ་དང་ཕྱོགས་བཞིར་ཉི་མ་ལ་རང་སེམས་ཐིག་ལེ་དཀར་པོ་རེ་རེ་དེ་ལས་འོད་
འཕྲོས་འདུས་ཡོངས་སུ་གྱུར་པ་ལས། ཤར་དུ་རྡོ་རྗེ་མཁའ་འགྲོ་མ་སྔོན་པོ་སྔོ་སེར་དཀར་ལྗང་བའི་ཞལ། ཕྱག་བཞིའི་གཡས་དང་པོ་རྡོ་རྗེ། གཡོན་དང་དང་པོ་གྲི་གུག་གཉིས་པ་ན་ཁ་ཊྭཱཾ་ག །གཡས་གཉིས་པ་ན་ཐོད་པ་བསྣམས་པ། ལྷོར་རིན་ཆེན་མཁའ་འགྲོ་མ་སེར་མོ་སེར་སྔོ་དཀར་ལྗང་བའི་ཞལ། གཡས་དང་པོ་རིན་པོ་ཆེའི་རྒྱལ་མཚན། གཡོན་དང་པོ་ཐོད་པ། གཉིས་པ་ཅེ་སྤྱང་གི་མགྲིན་པར་བཅིར་བ། གཡས་གཉིས་པ་ཁ་ཊྭཱཾ་ག་བསྣམས་པ། ནུབ་ཏུ་པདྨ་མཁའ་འགྲོ་མ་དཀར་ལ་དམར་བའི་མདངས་ཆགས་པ། དཀར་སེར་སྔོ་ལྗང་བའི་ཞལ། གཡས་དང་པོ་པདྨ། གཡོན་དང་པོ་ཐོད་པ། གཉིས་པ་གཞུ། གཡས་གཉིས་པ་མདའ་བསྣམས་པའོ། །བྱང་དུ་སྣ་ཚོགས་རྡོ་རྗེ་མཁའ་འགྲོ་མ་ལྗང་ཁུ། ལྗང་སེར་དཀར་སྔོ་བའི་ཞལ། གཡས་དང་པོ་རལ་གྲི་ གཡོན་དང་པོ་ཞགས་པ། གཉིས་པས་ཀ་པཱ་ལ། གཡས་གཉིས་པ་ན་ཌཱ་མ་རུ ་བསྣམས་པའོ། །དེ་ལྟར་ལྷ་མོ་བཞིས། ཨེ་མ་གཉེན་མཆོག་རྡོ་རྗེའི་འོད་ཀྱིས་པདྨ་རབ་ཕྱེ་ཞིག །ཨ་ལ་ལ་ལ་ལ་ཧོ། །བདེ་བ་ཆེན་པོས་རབ་ཏུ་དགྱེས་པའི་གར་མཛོད་ཅིག །ཇི་ལྟར་ཉི་མའི་འོད་ཀྱི་པདྨ་རབ་ཁ་འབྱེད་པ་བཞིན། །ཨ་ལ་ལ་ལ་ལ་ཧོ། བདེ་བ་ཆེན་པོ་རབ་ཏུ་དགྱེས་པའི་གར་མཛོད་ཅིག །ཅེས་བསྐུལ་བས་ཐིག་ལེ་ཧཱུཾ། དེ་ལས་རིགས་ལྔའི་སྤྲུལ་པ་དཔག་ཏུ་མེད་པ་སྤྲོས་ཡེ་ཤེས་ལྔ་ལ་བཀོད། ཚུར་འདུས་པ་ལས་དཔལ་ཧེ་རུ་ཀ་སྔོན་པོ་སྔོ་སེར་དམར་ལྗང་བའི་ཞལ་ཕྱག་འོག་མ་
གཉིས་ཀྱིས་ཐོད་པ་དང་ཁ་ཊྭཱཾ་བསྣམས་པས་རང་དང་འདྲ་བའི་ཡུམ་སངས་རྒྱས་མཁའ་འགྲོ་མ་ཕྱོགས་ཀྱི་གོས་ཅན་ལ་འཁྱུད་པ། དང་པོ་གཉིས་ཀྱིས་མདའ་གཞུ་འཛིན་པ། ཁྲོ་ཆགས་མཛེས་ཤིང་སྒེག་པའི་རབ་ཏུ་ཁྲོས་ཤིང་འཇིགས་པའང་འཇིགས་པར་མཛད་པ། སྤྱན་གསུམ་གསུམ་དམར་ཞིང་གཡོ་བ། སྐྲ་སེར་གྱེན་བརྫེས། ཐོད་སྐམ་ལྔའི་དབུ་བརྒྱན་དང༌། རློན་པ་ལྔ་བཅུའི་དོ་ཤལ། ཕྱག་རྒྱ་ལྔ་དང༌། གར་དགུས་རོལ་པ། ཐལ་ཆེན་གྱིས་བྱུགས་ཤིང་མི་ལྤགས་ཀྱི་སྟོང་གཡོགས་ཅན། གཡས་བརྐྱང་བའི་གར་སྟབས་ཀྱིས་ཉི་མའི་སྟེང་དུ། མི་རོའི་སྙིང་གར་མནན་པ་མེ་དཔུང་གི་དབུས་ན་བཞུགས་པའོ། །ལྷ་མོ་ལྔ་ནི་ཐལ་བ་དང་བྲལ་བ་ཐོད་སྐམ་གྱི་འཕྲེང་བ་ཅན་ནོ། །རང་གི་དཔྲལ་བར་ཨོཾ་དཀར་པོ། མིག་ཏུ་ཨ་དཀར་པོ། རྣ་བར་ཨཿ དམར་པོ། སྣ་ལ་ཁེ་དཀར་པོ། མགྲིན་པར་ཨཱཿ དམར་པོ། སྙིང་གར་ར་དམར་པོ། གནས་གསུམ་དུ་ཨོཾ་ཨཱཿཧཱུཾ། སྙིང་གར་ཉི་མ་ལ་རྡོ་རྗེ་སྔོན་པོའི་ལྟེ་བ་ལ་ཧཱུཾ། དེའི་འོད་ཀྱིས་ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོ། ཨོཾ་དྷརྨ་དྷརྟུ་བཛྲ་སྭཱ་བྷཱ་ཝ་ཨཱཏྨ་ཀོ྅ཧཾ། དབང་གི་ལྷ་སྤྱན་དྲངས་དེ་རྣམས་ཀྱིས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ༴ ཞེས་དབང་བསྐུར། སྐུ་གང་དྲི་མ་དག་ཆུའི་ལྷག་མ་སྤྱི་བོར་འཁྱིལ་བ་ལས། གཙོ་བོ་དང་རྡོ་རྗེ་མཁའ་འགྲོ་མ་ལ་མི་བསྐྱོད་པ། སངས་རྒྱས་མཁའ་འགྲོ་མ་ལ་རྣམ་སྣང༌། རིན་ཆེན་མཁའ་འགྲོ་མ་ལ་རིན་འབྱུང་པདྨ་མ་ལ་སྣང་མཐའ།
སྣ་ཚོགས་མ་ལ་དོན་གྲུབ་ཀྱིས་དབུ་བརྒྱན། ཐུགས་ཀའི་ས་བོན་ལས་མཆོད་པའི་ལྷ་མོ་སྤྲོས། ཨརྒྷཾ་སོགས་ཀྱིས་མཆོད། མཆེ་བ་གཙིགས་ཤིང་འཇིགས་པ་ཆེ། །སྔགས་ཀྱི་མེ་ཏོག་ཕྲེང་བས་བརྒྱན། །ཤ་ཆེན་རབ་ཏུ་གསོལ་མཛད་པའི། །ཧེ་རུ་ཀ་ལ་བདག་ཕྱག་འཚལ། །ཞེས་བསྟོད། སངས་རྒྱས་མཁའ་འགྲོ་མའི་མགོ་བོར་ཨོཾ་དཀར་པོ། སྙིང་ཀར་ཧཱུཾ་སྔོན་པོ། ལྟེ་བར་སྭཱ་སེར་པོ། གསང་གནས་སུ་ཨ་དམར་པོ། བརླ་གཉིས་སུ་ཧཱ་ལྗང་ཁུ། མཁའ་གསང་སྟོང་པའི་ངང་ལས་ཧཱུཾ་ལས་རྡོ་རྗེ། ཨོཾ་ལས་ནོར་བུ། ཧྲཱིཿལས་པདྨ༴ ཨ་ལས་ཟེའུ་འབྲུའོ། །ལྷ་མོ་བཞིས། ཨེ་མ་གཉེན་མཆོག་སོགས་ཀྱིས་བསྐུལ་བས། འདོད་པའི་སྒྱུ་རྩལ་དང་བཅས་སྙོམས་པར་ཞུགས་པའི་སྦྱོར་མཚམས་ནས་ཕཊ་ཀྱིས་སྒྲས། སངས་རྒྱས་ཐམས་ཅད་བཀུག་ཏེ་དྷཱུ་ཏཱིའི་ལམ་ནས་པདྨར་ལྷུང་བའི་བདེ་བ་བྱང་ཆུབ་ཀྱི་སེམས་མྱང་བར་བསམ། ཨོཾ་ཨཱཿཧྲཱིཿཧཱུཾ་ཧཱུཾ། ཞེས་བཟླས་པར་བྱ། བསྡུ་བ་ནི་སྤྱི་དང་མཐུན་ནོ། །ཞེས་པའང་གྲུབ་ཆེན་ཀུ་ཀུ་རི་པའི་གཞུང་ཆེ་བ་ཇི་ལྟ་བ་བཞིན་གྱི་ཉམས་ལེན་གྲུབ་ཆེན་ཚུལ་ཁྲིམས་མགོན་གྱི་མན་ངག་ཇི་ལྟ་བ་བཞིན་ནོ། །འདིར་སྨྲས་པ། ལུགས་འདི་སྤྱོད་པ་ཉུང་བའི་ཕྱིར། །བསྲེ་སླད་བྱས་པའང་ཤིན་ཏུ་ཉུང༌། །འོན་ཀྱང་ཉོག་པོའི་ཚིག་སྤངས་ནས། །ཉུང་ངུ་རྣམ་གསལ་ངོ་མཚར་ཆེ། །སྒྱུ་འཕྲུལ་ཆེན་མོའི་མངོན་རྟོགས་ཀྱི་སྐབས་ཏེ་ལྔའོ། །དཔལ་རྡོ་རྗེ་འཇིགས་བྱེད་ཆེན་པོ་བསྒོམ་པར་འདོད་པས། རང་གི་སྙིང་གར་ཧཱུཾ་སྔོན་པོ་ལས་འོད་
ཟེར་འཕྲོས། ཕྱི་རོལ་དུར་ཁྲོད་ཆེན་པོ་བརྒྱད་དང་བཅས་པ་གྱུར། འོད་ཟེར་དེའི་བདག་དང་སེམས་ཐམས་ཅད་སྦྱངས། བླ་མ་དང་དཀྱིལ་འཁོར་གྱི་འཁོར་ལོ་བཛྲ་ས་མཱ་ཛཿ ཞེས་སྤྱན་དྲངས། ཡན་ལག་བདུན་པའམ་ལྔ་པ་གང་རུང་བྱ། སེམས་ཅན་ཐམས་ཅད་བདེ་བ་དང༌། སོགས་ཚད་མེད་བཞི་བྱ།ཨོཾ་སྭ་བྷཱ་ཝ་སོགས། ཨོཾ་ཤཱུ་ནྱ་ཏ་སོགས། སྟོང་པའི་ངང་ལས་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ལས་སྣ་ཚོགས་རྡོ་རྗེ་ལས་འོད་ཟེར་ཕྱོགས་བཅུར་འཕྲོས། རྡོ་རྗེའི་ས་གཞི་ར་གུར་མེ་རི་དང་བཅས་པའི་བསྲུང་འཁོར་དུ་གྱུར། བསྲུང་བའི་འཁོར་ལོའི་ནང་དུ་ཤིན་ཏུ་འཇིགས་པའི་དུར་ཁྲོད་ཆེན་པོ་བརྒྱད། དབུས་སུ་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པ་རང་སྣང་གི་ཡུམ་དང་བཅས་པ་ཞུ་བ་ལས་ཆོས་འབྱུང་དུ་གྱུར། དེའི་ནང་དུ་སྣ་ཚོགས་པདྨ་ལ་གནས་པའི་སྣ་ཚོགས་རྡོ་རྗེ། དེའི་ལྟེ་བར་པད་ཉིའི་སྟེང་དུ། བྷྲུཾ་ལས་འཁོར་ལོའི་ལྟེ་བར་ཟླ་བ་བཾ་གྱིས་མཚན་པ་ཡོངས་སུ་གྱུར་པ་ལས། རྣམ་སྣང་དཀར་པོ་འཁོར་ལོ་དང་དྲིལ་བུ་འཛིན་པ་རང་སྣང་ཡུམ་དང་བཅས་པ་ཞུ་བ་ལས། གཞལ་ཡས་ཁང་མཚན་ཉིད་ཐམས་ཅད་ཡོངས་སུ་རྫོགས་པ། ནང་གི་ལྷ་སྣམ་ཤར་དཀར་ལྷོ་སེར་ནུབ་དམར་བྱང་ལྗང་དབུས་སུ་སྔོ་བའི་སྟེང་དུ་རྡོ་རྗེ་རྭ་བ་ཟླུམ་པོས་བསྐོར་བ་རྡོ་རྗེའི་གདུང་བཞིས་མིག་མངས་རིས་སུ་བྲིས་པས་རེ་མིག་དགུ་པ༌། འོག་གཞི་སྣ་ཚོགས་རྡོ་རྗེ་རྭ་བཅུ་གཉིས་པ། ལྟེ་བ་ལ་རླུང་གི་
དཀྱིལ་འཁོར་གྱི་སྟེང་དུ་ཉི་མའི་གདན། ཤར་གྱི་རྭ་དབུས་མ་དང་ཤར་ལྷོའི་གྲར་ཟླ་བ། གཞན་ལྷའི་གནས་བཅུར་ཉི་མའི་གདན་དང་བཅས་པ་གསལ་བར་གྱུར། རང་ཉིད་ཟླ་བ་ལ་དྷི་ལས་འཇམ་དཔལ་གཞོན་ནུ་དཀར་པོ་རྡོ་རྗེ་དྲིལ་བུའམ། དམར་སེར་པོད་རལ་གྲི་འཛིན་པ། གང་རུང་བསྐྱེད། ཐུགས་ཀར་ཉི་མ་ལ་ཧཱུཾ་དེའི་འོད་ཟེར་གྱིས་གཤིན་རྗེ་གཤེད་ཀྱི་ལྷ་ཚོགས་ཐམས་ཅད་སྤྱན་དྲངས་ཏེ་བདག་ཉིད་ཟླ་བ་དང་བཅས་པ་དེ་ཐམས་ཅད་ཉི་མ་ལ་ཐིམ། དེའི་སྟེང་དུ་ཧཱུཾ་ལས་རྡོ་རྗེ་རྩེ་དགུ་པའི་འོད་ཟེར་གྱིས་འཕྲོ་འདུ་ལས། དབུས་ཀྱི་གདན་གྱི་སྟེང་དུ་བདག་ཉིད་འཇིགས་མཛད་ནག་པོ་ནག་དཀར་དམར་བའི་ཞལ་གསུམ། རྩ་བའི་ཞལ་མ་ཧེའི་གདོང་པ་ཅན། ཕྱག་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་ཡུམ་རྡོ་རྗེ་ཕག་མོ་དམར་མོ་གྲི་ཐོད་འཛིན་པ་ལ་འཁྱུད་པ། ལྷག་མ་གཡས་གཉིས་ཀྱིས་ཁྲོ་བོའི་རྡོ་རྗེ་དང་རལ་གྲི། གཡོན་གཉིས་ཀྱིས་འཁོར་ལོ་དང་པདྨ་འཛིན་པ། ཞབས་གཡས་བསྐུམ་ཞིང་གཡོན་བརྐྱངས་པས་མ་ཧེའུ་སྟེང་དུ་ལས་ཀྱི་གཤིན་རྗེ་ཡབ་ཡུམ་དང་བཅས་མནན་པ༌། ཁྲོ་བོའི་རྒྱན་དང་ཆ་ལུགས་ཡོངས་སུ་རྫོགས་པ་མེ་དཔུང་འབར་བའི་དབུས་ན་ཞུགས་པར་གྱུར། ཨོཾ་དྷརྨ་དྷ་ཏུ་སོགས་སྤྲོ་ན་འོག་ནས་འབྱུང་བ་བཞིན་དུ་སྒོ་གསུམ་བྱིན་གྱིས་བརླབས་པ་དང་ཡན་ལག་དྲུག་པ་བཀོད། དབང་བསྐུར་རྣམས་ཀྱང་བྱའོ། །ཡུམ་གྱི་དཔྲལ་བར་ཨོཾ་དཀར་པོ། སྙིང་གར་ཧཱུཾ་ནག་པོ། ལྟེ་བར་སྭཱ་སེར་པོ།
གསང་བར་ཨཱཿ དམར་པོ། བརླ་ལ་ཧ་ལྗང་གུ་འོད་ཟེར་སྣ་ལྔས་ཁྱབ་པ། ཧཱུཾ་ལས་ཡབ་ཀྱི་རྡོ་རྗེ་ཨོཾ་ལས་བྱུང་བའི་ནོར་བུས་མཚན་པ། ཧྲཱིཿལས་ཡུམ་གྱི་པདྨ་ཨ་ལས་བྱུང་བའི་ཟེའུ་འབྲུས་མཚན་པ། གཉིས་ཀའི་བུ་ག་ཧོ་དམར་པོས་བཀག་པ། ཨོཾ་ཨ་ནུ་རཱ་ག་ཡ་མི། རྗེས་སུ་ཆགས་པར་བྱས། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་སོགས། ཞེས་སྙོམས་པར་ཞུགས་པར་བསམ་སྟེ་དང་པོར་སྦྱོར་བའོ། །ཐུགས་ཀའི་འོད་ཟེར་གྱིས་སྤྱན་དྲངས་པའི་སངས་རྒྱས་ཐམས་ཅད་ཞལ་དུ་ཞུགས། བྱང་ཆུབ་ཀྱི་སེམས་སུ་ཞུ་བ་ལྷ་མོའི་པདྨར་བྱུང་བའི་ཐིག་ལེ་ཆ་གཉིས་སུ་གྱུར། ཆ་གཅིག་གཞལ་ཡས་ཁང་གདན་དང་བཅས་པ་དང༌། ཆ་གཅིག་ཆ་བཅུ་བདུན་དུ་གྱུར་པ། ཡཀྵེ་ཡ་མེ་ད། ཛ་ས་དོ་རུ། ཡཙྪ་ཎི་ར། ཎ་ཡོ་ནི་ར་རྣམས་སུ་གྱུར། དབུས་ཀྱི་ཡ་ལས་རྡོ་རྗེ་འཇིགས་བྱེད་ཆེན་པོ་ཞལ་དགུ་ཕྱག་སུམ་ཅུ་རྩ་དྲུག་པར་རང་གི་ཐུགས་ཀར་དྲངས། ཡི་གེ་བཅུ་པ་དང༌། བཛྲ་དྷྲིཀ་ཐུགས་ཀ་ནས་ཕྱིར་ཕྱུང༌། ཞེ་སྡང་ཐམས་ཅད་སྦྱངས། ཞེ་སྡང་གཤིན་རྗེ་གཤེད་ཀྱི་གོ་འཕང་ལ་བཀོད། སླར་འདུས་ནས་བདག་ཉིད་ལ་ཐིམ་པས། བདག་ཉིད་སྤྲུལ་པའི་སྐུ་རྡོ་རྗེ་འཇིགས་བྱེད་དུ་གྱུར་པ་ནི། དུས་མཐའི་སྤྲིན་ལྟར་སྐུ་མདོག་ནག །ཞལ་དགུ་སུམ་ཅུ་རྩ་བཞིའི་ཕྱག །བཅུ་དྲུག་ཞབས་ཀྱི་གཡས་རྣམས་བསྐུམ། །གཡོན་བརྐྱང་རྣམ་པར་འགྱིང་བའི་བཞུགས་སོགས་ནས། གར་དགུའི་རོ་དང་ལྡན་པ་ཉིད། །ཡེ་ཤེས་མེ་
དཔུང་དབུས་ན་བཞུགས། །ཞེས་པའི་བར་མངོན་རྟོགས་ཚིགས་བཅད་མ་ལྟར་ལས། བཅོམ་ལྡན་དེ་ལ་འཁྱུད་པའི་ཡུམ། །དམར་མོ་གྲི་གུག་ཐོད་ཁྲག་འཛིན། །ཕྱག་རྒྱ་ལྔས་བརྒྱན་མགོ་ཕྲེང་ཅན། །ལང་ཚོ་དར་བབས་སྐྲ་སེར་འཁྱིལ། །གཡས་བརྐྱང་ཞབས་ཀྱིས་ཡབ་ལ་འཁྱུད། །དེ་ལྟར་རྡོ་རྗེ་ཕག་མོ་ནི། །འཇམ་དཔལ་ཁྲོས་དང་མཚུངས་པའོ། །ཤར་གྱི་ཀྵེ་ལས་གཏི་མུག་གཤིན་རྗེ་གཤེད་ནག་པོ་ནག་དཀར་དམར་བའི་སོགས། པདྨ་འཛིན་པ། རང་གི་ཐུགས་ཀར་དྲངས། ཨོཾ་ཛི་ན་ཛིཀ་ཐུགས་ཀ་ནས་ཕྱིར་ཕྱུང༌། གཏི་མུག་ཅན་སྦྱངས། གཏི་མུག་གཤིན་རྗེ་གཤེད་ཀྱི་གོ་འཕང་ལ་བཀོད། ཚུར་འདུས་ཤར་གྱི་རེ་མིག་ལ་འཁོད། ལྷོའི་མ་ལས་ཕྲ་མ་གཤིན་རྗེ་གཤེད་སེར་པོ་སེར་ནག་དཀར་བའི༴ རང་གི་ཐུགས་ཀར་དྲངས། ཨོཾ་རཏྣ་དྷིཀ་ཐུགས་ཀ་ནས་ཕྱིར་ཕྱུང༌། ཕྲ་མ་ཅན་སྦྱངས། ཕྲ་མ་གཤིན་རྗེ་གཤེད་ཀྱི་གོ་འཕང་ལ་བཀོད། ཚུར་འདུས་ལྷོའི་རེ་མིག་ལ་འཁོད། ནུབ་ཏུ་མེ་ལས་འདོད་ཆགས་གཤིན་རྗེ་གཤེད་དམར་པོ་དམར་ནག་དཀར་བའི་སོགས་རང་གི་ཐུགས་ཀར་དྲངས། ཨོཾ་ཨ་རོ་ལིཀ་ཐུགས་ཀ་ནས་ཕྱིར་ཕྱུང༌། འདོད་ཆགས་ཅན་སྦྱངས། འདོད་ཆགས་གཤིན་རྗེ་གཤེད་ཀྱི་གོ་འཕང་ལ་བཀོད། ཚུར་འདུས་ནུབ་ཀྱི་རེ་མིག་ལ་འཁོད། བྱང་གི་ད་ལས་ཕྲག་དོག་གཤིན་རྗེ་གཤེད་ལྗང་ཁུ་ལྗང་ནག་དཀར་བའི་སོགས། རང་གི་ཐུགས་ཀར་དྲངས། པྲཛྙཱ་དྷྲིཀ་ཐུགས་ཀ་ནས་ཕྱིར་ཕྱུང། ཕྲག་དོག་ཅན་སྦྱངས།
ཕྲག་དོག་གཤིན་རྗེ་གཤེད་ཀྱི་གོ་འཕང་ལ་བཀོད། ཚུར་འདུས་བྱང་གི་རེ་མིག་ལ་བཀོད། ཤར་ལྷོའི་ཛ་ལས་ལྷ་མོ་ཙརྩི་ཀ་གཏི་མུག་གཤིན་རྗེ་གཤེད་ལྟ་བུ་ཐུགས་ཀར་དྲངས། ཨོཾ་མོ་ཧི་རཱ་ཏི། བཛྲ་ཙ་རྩི་ཀའམ། ཐུགས་ཀ་ནས་ཕྱིར་ཕྱུང༌། སའི་ཁམས་ཀྱི་དྲི་མ་སྦྱངས། ཚུར་འདུས་མེ་མཚམས་ཀྱི་གྲར་འཁོད། ལྷོ་ནུབ་ཀྱི་ས་ལས་ཕག་མོ་སེར་མོ་དབུའི་སྟེང་དུ་ཕག་ཞལ་གྱེན་དུ་བལྟ་བ་དང་བཅས་པ་ཕྲ་མ་གཤིན་རྗེ་གཤེད་ལྟ་བུ། ཐུགས་ཀར་དྲངས། ཨོཾ་དྭེ་ཥ་རྭ་ཏི་ཐུགས་ཀ་ནས་ཕྱིར་ཕྱུང༌། ཆུའི་ཁམས་ཀྱི་དྲི་མ་སྦྱངས། ཚུར་འདུས་བདེན་བྲལ་གྱི་གྲར་འཁོད། ནུབ་བྱང་གི་དོ་ལས་དབྱངས་ཅན་མ་དམར་མོ་འདོད་ཆགས་གཤིན་རྗེ་གཤེད་ལྟ་བུ་ཐུགས་ཀར་དྲངས། ཨོཾ་ར་ག་རཱ་ཏི་ཐུགས་ཀར༴ མེའི་ཁམས་ཀྱི་དྲི་མ་སྦྱངས། ཚུར་འདུས་རླུང་མཚམས་ཀྱི་གྲར་འཁོད། བྱང་ཤར་གྱི་རུ་ལས་གཱཽ་རཱི་ལྗང་སྔོན་ཕྲག་དོག་གཤིན་རྗེ་གཤེད་ལྟ་བུ། ཐུགས་ཀར་དྲངས། ཨོཾ་བཛྲ་རཱ་ཏི་ཐུགས་ཀར༴ རླུང་ཁམས༴ ཚུར་འདུས་དབང་ལྡན་གྱི༴ ཕྱི་རོལ་གྱི་ཤར་སྒོ་ཡ་ལས་ཐོ་བ་གཤིན་རྗེ་གཤེད་ནག་པོ་ནག་དཀར་དམར་བའི་ཞལ་གསུམ་ཕྲག་དྲུག་གི་སོགས། འཁོར་ལོ་དང་པདྨ་འཛིན་པ། ཐུགས་ཀར་དྲངས། ཨོཾ་མུཏྒ་དྷྲྀཀ་ཐུགས་ཀ་ནས་ཕྱིར་ཕྱུང༌། ཚངས་པ་དང་དབང་པོ་དང་མེ་ལྷའི་གདོན་གྱི་དྲི་མ་སྦྱངས། ཚུར་འདུས་ཤར་སྒོར་གྱི་གྲྭར་འགོད། ལྷོའི་ཙ་ལས་དབྱུག་པ་གཤིན་རྗེ་གཤེད་དཀར་པོ་དཀར་ནག་དམར༴ ཨོཾ་རཏྣ་དྷྲྀཀ༴
གཤིན་རྗེ་སྲིན་པོའི་གདོན༴ ལྷོར་སྒོར༴ ནུབ་ཀྱི་ཎི་ལས་པདྨ་གཤིན་རྗེ་གཤེད་དམར་པོ་དམར་ནག་དཀར་བའི༴ ཨོཾ་པདྨ་དྷྲྀཀ༴ ལྷ་མ་ཡིན་དང་ཆུ་དང་རླུང་ལྷའི་གདོན༴ ནུབ་སྒོར༴ བྱང་གི་ར་ལས་རལ་གྲི་གཤིན་རྗེ་གཤེད་ལྗང་གུ་ལྗང་ནག་དཀར་བའི༴ ཨོཾ་ཁཏྒ་དྷྲྀཀ༴ གནོད་སྦྱིན་དང་འབྱུང་པོའི༴ བྱང་སྒོར༴ འཁོར་རྣམས་རྒྱན་ཆ་ལུགས་བཅོམ་ལྡན་འདས་དང་མཚུངས་ཤིང༌། འོན་ཀྱང་ལྷ་མོ་བཞི་ནི། བུད་མེད་སྒྱུ་མའི་ང་རྒྱལ་གྱིས་འགྱིང་བའི་རང་སྣང་གི་ཐབས་ལ་འཁྱུད་པའོ། །རིམ་པ་གཉིས་པའི་གྲ་བཞིར། ཎ་ཡོ་ནི་ར་རྣམས་ཡོངས་སུ་གྱུར་པ་ལས། ཐོད་པ་བཞིར་གྱུར་ཏེ་ཕྱིའི་གཞལ་ཡས་ཁང་གི་རིམ་པ་གཉིས་པའི་གྲ་བཞིར་འཁོད། གཞལ་ཡས་ཁང་རང་གི་ཐུགས་ཀར་དྲངས། ཕྱིར་བྱུང་སྣོད་ཀྱི་འཇིག་རྟེན་གྱི་དྲི་མ་སྦྱངས། ཚུར་འདུས་ཕྱིའི་གཞལ་ཡས་ཁང་ལ་ཐིམ། རང་གི་སྙིང་གར་ཧཱུཾ། དེ་ལས་འོད་ཟེར་འཕྲོས་པས་ཡེ་ཤེས་སེམས་དཔའ་ལྷ་བཅུ་གསུམ་པ། དཀྱིལ་འཁོར་དང་བཅས་པ་བཛྲ་ས་མཱ་ཛཿ ཨོཾ་ཨུཏྒ་ར་དྷྲྀཀ་ཧཱུཾ་ཕཊ། རཏྣ་དྷྲྀཀ་ཧཱུྃ་ཕཊ། པདྨ་དྷྲྀཀ་ཧཱུཾ་ཕཊ། ཁཏྒ་དྷྲྀཀ་ཧཱུཾ་ཕཊ། ཅེས་བགེགས་བསྐྲད། ཡི་གེ་བཅུ་པས་བསྲུང་བ་བྱས་ལ། ཨོཾ་མུཏྒ་ར་ཛ། དཎྜ་ཧཱུཾ། པདྨ་བཾ། ཁཏྒ་ཧོཿ དམ་ཚིག་པ་དང་རོ་གཅིག་ཏུ་གྱུར། ལྷ་ཐམས་ཅད་ཀྱི། མིག་ཏུ་ཀྵིཾ་དཀར་ས་
སྙིང་དངོས། །རྣ་བར་ཕྱག་རྡོར་ཛྲིཾ་ནག་པོ། །སྣ་ལ་ཁཾ་སེར་ནམ་མཁའི་སྙིང༌། །ལྕེ་ལ་གཾ་དམར་འཇིག་རྟེན་དབང༌། །དཔྲལ་བ་སྒྲིབ་སེལ་སྐཾ་ལྗང་ཁུ། །ལྟེ་བར་ཀུན་བཟང་སཾ་སྔོན་པོ། །དཔྲལ་བར་སྐུའི་རྡོ་རྗེ་ཨོཾ། །མགྲིན་པར་གསུང་གི་རྡོ་རྗེ་ཨཱཿ ཐུགས་ཀར་ཐུགས་ཀྱི་རྡོ་རྗེ་ཧཱུཾ། །སངས་རྒྱས་ཐམས་ཅད་སྐུ་གསུང་ཐུགས་རྡོ་རྗེའི་ལྷ་ཚོགས་ཀྱི་རྣམ་པར་སྤྱན་དྲངས། རང་གི་གནས་གསུམ་དུ་ཐིམ། ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏྟ་སྭ་བྷ་ཝ་ཨུཏྨ་ཀོ྅ཧཾ། ཐུགས་ཀར་རང་དང་འདྲ་བའི་ཡེ་ཤེས་སེམས་དཔའ་ཕྱག་གཉིས་པ་བསྒོམ། དེའི་ཐུགས་ཀར་ཏིང་འཛིན་སེམས་དཔའ་ཉི་མ་ལ་ཧཱུཾ་སྔོན་པོ། འདི་རྣམས་གོང་དུ་བྱས་ན་འདིར་མི་དགོས་སོ། །རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས། གཤིན་རྗེ་གཤེད་ཀྱི་ལྷ་ཚོགས་བཛྲ་ས་མཱ་ཛཿ ཨོཾ་བཛྲ་བྷ་ཝ་ཨ་བྷི་ཥིཉྩ་ཧཱུཾ། ཞེས་དབང་བསྐུར་བས་གཙོ་བོ་ལ་མི་བསྐྱོད་པ་དང༌། འཁོར་རྣམས་ལ་གཙོ་བོས་དབུ་བརྒྱན། ཨརྒྷཾ་ལ་སོགས་པས་མཆོད། ཧོ་གཤིན་རྗེ་གཤེད་ནག་པོ། །བླ་མ་སྲིན་པོའི་གཟུགས་རང་བཞིན། ཁྱོད་མཐོང་ཁོ་བོ་རྣམ་པར་འཇིགས། །བླ་མ་ཁྲོ་བོའི་རང་བཞིན་སྤོངས། ཁྱོད་ཀྱི་གར་གྱིས་ས་སྟེང་དང༌། །ས་བླ་དང་ནི་ས་འོག་སྤྱོད། །ཨཉྩ་ན་ནག་བཅས་འདྲ་བའི། །གར་མཛད་ཁྱོད་ནི་རོ་ལངས་ལགས། །སྐུ་ལུས་སྦོམ་ཐུང་ནག་པ་སྟེ། །རྣམ་པ་སྣ་ཚོགས་གཟུགས་སྤྲུལ་པ། །རྡོ་རྗེ་
དབྱངས་ཅན་མ་ཡིས་བཏུད། །གར་མཛད་ཁྱོད་ནི་བདེ་བ་ཆེ། །ཧྲིཿཥྟིའི་གསང་སྔགས་དག་གིས་ཁྱོད། །ས་གསུམ་པོ་ཡི་འཁྲུལ་བ་སེལ། །སྙིང་རྗེ་ཁྲོས་པ་རྗེ་བཙུན་ཁྱོད། །གར་མཛད་འགྲོ་བ་ཡོངས་ལ་གཟིགས། །ཨོཾ་སརྦ་ཏ་ཐཱ་ག་ཏ་པུ་ཛ་བཛྲ་སྭ་བྷ་ཝ་ཨཱཏྨ་ཀོ྅ཧཾ། དེ་ནས་བདུད་རྩ་མྱང་ལ། བཟླས་པའི་དམིགས་པ་གསལ་བཏབ་སྟེ། ཨོཾ་ཡ་མ་ར་ཛ་ས་དོ་མེ་ཡ་ཡ་མེ་དུ་རུ། ན་ཡོ་ད་ཡ། ཡ་ད་ཡོ་ནི། ར་ཡ་ཀྵེ་ཡ། ཡ་ཀྵེ་ཡེཙྪ་ནི་ར་མ་ཡ་ཧཱུཾ་ཕཊ། རྩ་སྔགས་སོ། །ཨོཾ་ཧྲཱིཿཥྟི་བི་ཀྲྀ་ཏཱ་ན་ན་ཧཱུཾ་ཕཊ། །སྙིང་པོའོ། །ཨོཾ་ཡ་མནྟ་ཀ་ཧཱུཾ་ཕཊཿ ཡེ་གེ་དྲུག་པ་ཉེ་སྙིང་ངོ༌། །ཨོཾ་ཨ་ཀྲོ་ཏེ་ཀ་ཡ་མནྟ་ཀ་ཧ་ན་མ་ཐ་བྷཉྫ་ཧཱུཾ་ཕཊ། ལས་སྔགས་སོ། །དེ་ལྟར་བཟླས་པ་བྱས་ལ། རྟེན་དང་བརྟེན་པའི་དཀྱིལ་འཁོར་བདག་ལ་ཐིམ། བདག་ཉིད་ཀྱང་ཡེ་ཤེས་སེམས་པ་ལ། དེ་ཏིང་ངེ་འཛིན་སེམས་དཔའ་ལ། དེ་ཡང་འོད་གསལ་དུ་ཉེ་བར་ཞུགས། རྗེས་ཀྱི་བྱ་བ་ཐམས་ཅད་སྤྱི་དང་མཐུན་ནོ། །ཞེས་པ་སློབ་དཔོན་ཀ་མ་ལ་རཀྵི་ཏའི་གཞུང་ལས་ཕལ་ཆེ་བར་བསྟན་པ། །གྲུབ་ཆེན་ཁྱུང་པོ་ཛྭ་ཀིའི་མན་ངག་ཇི་ལྟ་བའི་ལུགས་སོ། །འདིར་སྨྲས་པ། འགའ་ཞིག་རྒྱ་གཞུང་ཁུངས་ཚོལ་ཞིང༌། །དཀྱིའ་འཁོར་མཆོག་འདི་བསྒོམ་པ་འགོག །མ་མཐོང་བ་ལ་མེད་ཅེས་པའི། །ཚིག་འདིའང་དུབ་པ་ཡིན་ཅེས་གསུང༌། །རྡོ་རྗེ་འཇིགས་བྱེད་ལྷ་བཅུ་གསུམ་གྱི་སྐབས་ཏེ་དྲུག་པའོ། ༈ ད་ནི་ཅུང་ཟད་ཅིག་
དཔྱད་པར་བྱ་སྟེ། ཕྱི་མའི་དུས་འདིར་སྔགས་ལ་མཁས་པར་རློམ་པ་མང་པོ་ཞིག་ལོག་པར་རྟོག་ལ་འདི་དང་འདི་ལྟ་བུ་སེམས་པར་བྱེད་དེ། དཀྱིལ་འཁོར་ལྔ་པོ་འདི་དག་ཕྱོགས་གཅིག་ཏུ་འགོད་པའང་མི་རུང་ན་ལུས་དཀྱིལ་ལ་འགོད་པ་ག་ལ་ཞིག་སྙམ་པ་དང༌། འདི་ལུས་ལ་བཀོད་པའི་ལྷ་ཡིན་གྱི་ལུས་དཀྱིལ་མ་ཡིན་ནོ་སྙམ་པ་དང༌། ལུས་ལ་བཀོད་པའི་དཀྱིལ་འཁོར་ལྔ་ཆར་ལ། སོ་སོར་ཡན་ལག་བཞི་རྫོགས་མ་བྱས་ན། དཀྱིལ་འཁོར་དེ་དང་བསྒོམ་པའི་གོ་མི་ཆོད་སྙམ་པ་དང༌། དཀྱིལ་འཁོར་གྱི་ཆོ་ག་གཅིག་གིས་ལྔར་དབང་བསྐུར་མི་རུང་སྙམ་པ་དང༌། ལྷ་སྐད་ཅིག་གིས་བསྒོམ་པ་ཐམས་ཅད་རྫོགས་རིམ་ཁོ་ནའི་སྐབས་ཡིན་ནམ་སྙམ་པ་དང༌། སྐྱེ་ཤི་བར་དོ་གསུམ་སོ་སོར་སྦྱོང་བྱེད་ཀྱི་དམིགས་པ་མ་ཚང་ན་སྒོམ་དུ་མི་རུང་བར་འདོད་པ་དང༌། ཀྱེ་རྡོ་རྗེ་མཚན་ཆ་ཅན་བཅུ་བདུན་ནམ་མི་འཐད་སྙམ་པ་དང༌། འཇིགས་བྱེད་བཅུ་གསུམ་གྱི་དཀྱིལ་འཁོར་མི་འཐད་པའམ། འཐད་དུ་ཆུག་ཀྱང་ལྷ་དང་ཆོ་ག་མ་འཁྲུལ་བར་མེད་པར་འདོད་པ་རྣམས་སོ། །དེ་དག་གིས་ལན་ནི་མཐའ་ཡས་པར་ཡོད་མོད། རྒྱས་པར་མི་སྤྲོ་སྟེ་སྙིགས་མའི་དུས་ཀྱི་གང་ཟག་རྣམས། རང་ལུགས་ཀྱི་བླ་མ་ཤེས་རབ་ཀྱི་རྣམ་དཔྱོད་འཁྱོགས་པ་དང་ལྡན་ཞིང༌། ནུས་མཐུ་དང་ཐུགས་རྗེ་མངོན་དུ་གྱུར་པ་ནི་ཏིལ་འབྲུ་ཙམ་དང་བྲལ་བ་འགའ་ཞིག་གཙོ་བོར་བྱས་ཏེ། རིགས་པ་དང་མི་རིགས་པའི་བརྟགས་དཔྱད་གཏོང་ལོང་མེད་པར་གྲུབ་མཐའ་སྐྱོ་མ་སྔ་བཙན་ལ་ཞེན་པས་ཀུན་ནས་བསླངས་ཏེ་ཞེ་སྡང་མེ་བཞིན་འབར་
ནས་སྦྱོར་བ་ངན་པ་ཀུན་ཏུ་རྩོམ་པ་ཙམ་མ་གཏོགས། ལོག་རྟོག་བཟློག་པར་མི་བྱེད་པར་སྣང་བས་སོ། །མུ་སྟེགས་པ་རྣམས་ཀྱང་རིགས་པ་ལ་ཡིད་རྟོན་པར་བྱེད་ན། ད་ལྟ་བོད་ཀྱི་མཁས་རློམ་འདི་དག་ནི་ཕྱུགས་དང་མཚུངས་པ་ཉིད་དོ། །འོན་ཀྱང་ལུགས་འདི་ལ་མོས་པ་རྣམས་ལ་ངེས་པར་བྱེད་པའི་ཕྱིར་དུ། སྙིང་པོ་ཙམ་ཞིག་བརྗོད་ན། དཀྱིལ་འཁོར་ལྔ་ཕྱོགས་གཅིག་ཏུ་འགོད་མི་རུང་སྟེ། དེ་ལྟར་སྟོན་པའི་ལུང་གི་ཁུངས་མེད་ཅིང༌། རྒྱུད་སྡེ་ཐ་དད་ནས་བཤད་པའི་དཀྱིལ་འཁོར་ཕྱོགས་གཅིག་ཏུ་འགོད་པ་ཡང་རང་བཟོ་ཡིན་ནོ་སྙམ་དུ་བསམ་པའོ། །འདིར་སྨྲས་པ། ཁྱེད་ཀྱི་ལུགས་ལ་ལུང་དེ་ཅི། སངས་རྒྱས་ཀྱིས་གསུངས་པ་ཉིད་ཡིན་ནམ། ཁྱེད་ཀྱིས་མཐོང་བ་ལ་བྱེད། ཕྱི་མ་ལྟར་ན་ཁྱེད་རྣམས་བྱིས་པ་ཆུང་ངུའི་སྐབས་དཀྱིལ་འཁོར་གྱི་རྣམ་བཞག་ཕྲ་མོ་རྣམས་དང༌། མདོ་རྒྱུད་ཀྱི་བརྡ་ཆད་ཕལ་མོ་ཆེ་རྣམས་ཀྱང་ལུང་ཁུངས་མེད་ལ། ཁྱེད་རྣམས་ཀྱིས་ཕྱིས་མཐོང་བ་ན་དེ་ཡོད་པར་འགྱུར་བ་སོགས་ཧ་ཅང་ཡང་ཐལ་བར་འགྱུར་རོ། །དང་པོ་ལྟར་ན་ནི། སྡོམ་པ་རྒྱ་མཚོའི་རྒྱུད་ལས་བཤད་པར་བཞེད་དེ། བཞེད་པ་དེ་ལ་འགོག་བྱེད་ཅི་ཡོད། སྡོམ་པ་རྒྱ་མཚོའི་རྒྱུད་ཅེས་པ་གཏན་མེད་པའམ། གལ་ཏེ་ཡོད་ཀྱང་དེ་ནས་འདི་མ་བསྟན་པའི་ལུང་དང་རིགས་པ་རྣམ་དག་ཅི་ཡོད། རྒྱུད་སྡེ་མང་པོའི་ལྷའི་མངོན་རྟོགས་སྣ་ཚོགས་རྒྱུད་གཅིག་ཏུ་བསྡུས་ཏེ་འཆད་པ་མི་འཐད་དོ་སྙམ་ན། བདེ་མཆོག་ཨ་བྷི་ཏ་རྣ་ལས་སངས་རྒྱས་ཐོད་པའི་སྒྲུབ་
ཐབས་སོགས་བཤད་པ་དང༌། དུས་འཁོར་ནས་བདེ་མཆོག་གསང་འདུས་སྒྱུ་འཕྲུལ་དྲ་བ་རྣམས་ཀྱི་དཀྱིལ་འཁོར་བཤད་པ་དང༌། ཐོག་མར་རྒྱུད་སྡེ་གཉིས་ཁོག་ཅིག །ཡང་དེ་དག་རྒྱུད་སྡེ་གཞན་ནས་བཤད་པའི་ལྷ་མ་ཡིན་གྱིས་ཞལ་ཕྱག་སོགས་ཅུང་ཟད་མི་འདྲ་བའི་ཕྱིར། རྒྱུད་སྡེ་དེ་ཉིད་ཀྱི་ལྷ་ཡིན་ནོ་སྙམ་ན། ཞལ་ཕྱག་མི་འདྲ་བའི་རྒྱུ་མཚན་དེ་ཅི། མདོར་བྱས་དང་ལཱུ་ཡི་པ་སོགས་མི་འདྲ་བས་སོ་སྙམ་ན། ཡེ་ཤེས་ཞབས་ལུགས་ཀྱི་གསང་བ་འདུས་པའི་དཀྱིལ་འཁོར་དང༌། ནག་པོ་སྤྱོད་པས་མཛད་པའི་བདེ་མཆོག་གི་དཀྱིལ་འཁོར་སྒྲུབ་ཐབས་སོགས་ཀྱང་སོ་སོའི་རྒྱུད་ཀྱི་དཀྱིལ་འཁོར་མ་ཡིན་པར་འགྱུར་རོ། །རིགས་པ་འདི་མངོན་རྟོགས་དང་ཆོ་གའི་རིམ་པ་དང་ཡང་མཚུངས་སོ། །ཡང་ཅིག་ཏུ་ན་ཁོ་བོ་ཅག་གི་དཀྱིལ་འཁོར་འདི་ཡང་སྡོམ་པ་རྒྱ་མཚོའི་དེ་ཁོ་ནའི་དཀྱིལ་འཁོར་ཡིན་ཞེས་བརྗོད་ན་ཅི་ཞིག་སྨྲས། ཡང་ཁྱེད་ཀྱི་ལུགས་ལ། ཨ་བྷི་དྷ་ན་ནས་བཤད་པའི་སངས་རྒྱས་ཐོད་པ་དེ་ཡང་རྣམ་པར་མ་དག་སྟེ། ཐོད་པའི་རྒྱུད་ད་ལྟའི་འདི་ནས་ནི་དེ་མ་བཤད། མ་རྒྱུད་རྒྱས་པར་ནི་ད་ལྟ་མ་མཐོང་བས་ལུང་གི་ཁུངས་མེད་དོ་ཞེས་བསྐུར་བ་འདེབས་དགོས་པར་འགྱུར་རོ། །ཡང་ཁ་ཅིག་དུས་འཁོར་ནས་བཤད་པའི་བདེ་གསང་ལ་སོགས་པ་རྒྱུད་སྡེ་རྒྱས་པ་ནས་བཤད་པ་ཡིན་ནོ། །ཞེས་སྨྲ་བར་བྱེད་དོ། །དེ་ལྟར་ན་དུས་འཁོར་དང་གསང་འདུས་གཉིས་རྒྱུད་སྡེ་ཐ་དད་ཡིན་པའི་ཕྱིར། རྒྱུད་སྡེ་ཐ་དད་མང་པོའི་དཀྱིལ་འཁོར་རྒྱུད་སྡེ་གཅིག་ནས་གསུངས་པ་ཡང་ཡོད་པར་འགྲུབ་བོ། །
ཡང་རང་བཟོ་ཞེས་བྱ་བ་ཅི་ལ་ཟེར། བླ་མ་དམ་པའི་མན་ངག་གཅིག་ནས་གཅིག་ཏུ་བརྒྱུད་པ་མེད་པའོ་སྙམ་ན། ཁོ་བོ་ཅག་ལ་ནི་དེ་ཡོད་པར་འདོད་ཅིང༌། རྒྱ་གར་གྱི་གྲུབ་ཆེན་དངོས་ལ་ཐུག་པའི་ཁྱུང་པོ་རྣལ་འབྱོར་པས་འདིའི་སྒྲུབ་ཐབས་ཆེ་ཆུང་གཉིས་མཛད་ཅིང༌། བླ་མ་རྣམས་ཀྱི་ལོ་རྒྱུས་ཀྱི་ཡི་གེ་ཀུན་ལ་ཡང་འདིའི་དབང་བསྐུར་བ་སོགས་ཀྱི་གཏམ་རྒྱུད་དུ་མར་བྱུང་ཞིང༌། ཆིག་བརྒྱུད་ཀྱི་བཀའ་བརྒྱ་གྲོལ་ནས་ནི་ལག་ལེན་རྒྱུན་མ་ཆད་པ་འདིའོ། །ཡང་བཤད་པའི༌། ཁུངས་གསལ་ཁ་མེད་པ་ལ་རང་བཟོ་ཅིས་ཟེར་ན་ནི། བིརྺ་བའི་སྒྲུབ་ཐབས་ལ་སོགས་པ་གདམ་ངག་ཟབ་མོ་མཐའ་ཡས་པ་ཞིག་དང༌། བོད་ཕྱི་རབས་པ་ལ་ནི། བླ་མ་དབུ་མ་པའི་འཇམ་དབྱངས་ཆོས་སྐོར་ལ་སོགས་པ་སྟོན་བྱེད་ཀྱི་རྒྱུ་དང་རྒྱ་གཞུང་གང་ན་ཡོད། དེ་ལྟ་བས་ན་རང་བཟོ་ནི་ཁྱེད་ཅག་རྣམས་ལ་ཐོག་ཏུ་བབ་སྟེ་བརྒྱུད་པའི་བླ་མ་རྣམས་ལ། ཁ་ཅིག་རང་ལུགས་མ་ཡིན་ཅེས་པ་དང༌། ཁ་ཅིག་ལ་ལྷག་ཆད་ནོར་བའི་སྐྱོན་ཡོད་ཅེས་སྐྱོན་བཏང་སྟེ། རང་གི་དབང་ཞུས་པའི་བླ་མ་དེ་ལག་ལེན་དེ་ལྟ་བུ་བྱེད་པ་ལྟ་ཞོག་ཐོས་པ་ཙམ་ཡང་མེད་པར། རང་ཉིད་ཀྱི་རྒྱུད་འགྲེལ་པ་དང་རྒྱ་གཞུང་ཐ་ན་ལུང་རྒྱུན་ཙམ་ཡང་མེད་པ་རྣམས་ཀྱི་དོན་ཕྱོགས་གཅིག་ཏུ་དྲིལ་ནས། རང་ཡང་བསྒོམ་ཞིང་གཞན་ལ་ཡང་སྟོན་པར་བྱེད་དོ། །དེའི་བྱིན་རླབས་དང་ལག་ལེན་གྱི་རྒྱུན་ཡོད་འཕྲོ་ལ་ཆད་ནས། ཞི་གནས་སྐྱོན་ཅན་ཙམ་ཡང་རྒྱུད་ལ་མི་སྐྱེ་ཤིང༌། བྱིན་རླབས་ཀྱི་མཚན་མ་སྣ་གཅིག་ཀྱང་མེད་པར་ཉིན་བསམ་མཚན་བསམ་ཁོ་ན་འདས་ཤིང་ཚིག་གིས་བཤད་པས། མིའི་མངོན་དུ་ལུས་ཀྱི་
སྤྱོད་པའི་མཛེས་འཁྲིགས་དང༌། ཞིང་མ་ཡིན་པ་རྒྱལ་པོ་ལ་སོགས་པ་རྣམས་ལ་ངོ་དགའི་ཁྱོགས་ལ་སོགས་པའི་བྱ་བས་རང་ཕྱོགས་ཙམ་དར་བ་ལ་བསྟན་པ་སྐྱོང་བར་སེམས་པ་འདི་མཚར་རོ། །ཡང་རྒྱ་གཞུང་སོགས་ཀྱི་ཁུངས་གཙོ་བོར་བྱེད་ན་ནི། ཕྱི་རབས་ཀྱི་མཁས་རློམ་རྣམས་ཀྱིས་བྱས་པའི་སྒྲུབ་དཀྱིལ་རྣམས་ནི། རྒྱ་བོད་ཀྱི་ཡི་གེ་ཐམས་ཅད་བསྲེས་ཏེ་འདོར་ལེན་འབའ་ཞིག་བྱེད་ཀྱི། རྒྱ་གར་གྱི་པཎ་གྲུབ་ཚད་ལྡན་དང༌། བོད་ཀྱི་མཁས་པ་དང་སྒྲུབ་པ་པོ་ཚད་དང་ལྡན་པ་སུའི་ལུགས་དང་མི་མཐུན་པར་བྱེད་དོ། །དགྱེས་མཛད་ཀྱི་སྐུ་ལ་བདེ་གསང་སོགས་འགོད་པ་ཡང་མི་རིགས་པ་མ་ཡིན་ཏེ། སངས་རྒྱས་ཐོད་པའི་སྐུ་ལ་བདེ་མཆོག་གི་ལྷ་ཚོགས་བཀོད་པའི་ལུས་དཀྱིལ་ཨ་བྷི་ད་ན་རུས་གསུངས་པ་ཡིན་ནོ། །ཡང་སློབ་དཔོན་རྡོ་རྗེ་གདན་པ་པུ་ནྱཱ་ཤྲིས་མཛད་པའི་དཀྱིལ་ཆོག་དཀྱིལ་འཁོར་ལྔ་ཆར་གཅིག་བསྐུར་བའི་དཀྱིལ་འཁོར་ཆོ་ག་ཡོད་པའི་ཕྱིར། རྒྱ་གཞུང་གི་ཁུངས་མེད་པའང་ག་ལ་ཡིན། དེ་ཉིད་སློབ་དཔོན་དེས་མཛད་པ་མ་ཡིན་ནོ་སྙམ་ནའང། དེའི་རྒྱུ་མཚན་ཅི། བསྟན་བཅོས་འགྱུར་རོ་ཅོག་ཕྱོགས་གཅིག་ཏུ་གླེགས་བམ་དུ་བྱས་པ་རྣམས་ལ་མི་བཞུགས་པས་སོ་སྙམ་ན། དེ་འདྲ་བའི་མ་ངེས་པ། ཆེན་པོ་དེ་དཔྱོད་ལྡན་སུ་ཞིག་སྨྲ། སྔོན་འགྱུར་ངེས་པ་བསྟན་འགྱུར་བསྡུ་བ་པོ་རྣམས་ཀྱིས་མ་རྙེད་པ་ཡང་ཡོད་ལ། སླད་ཀྱི་འགྱུར་བ་ཡང་ཡོད་པའི་ཕྱིར་རོ། །རྩོད་པ་དང་བཅས་པ་རྣམས་ནི་གང་རྒྱུ་མཚན་དུ་ཡང་མི་རུང་སྟེ། ཐེག་པ་ཆེན་པོ་ཉིད་ཀྱང་རང་སྡེའི་རྩོད་པ་ཅན་ཡིན་པའི་ཕྱིར་རོ། །གཉིས་པའི་ལན་ནི། །ཡང་ལུས་དཀྱིལ་གྱི་ལྷ་དང༌། ལུས་ལ་བཀོད་པའི་ལྷ་ཙམ་ལ་
ཁྱད་པར་ཡོད་པ་ནི་ཁོ་བོ་ཅག་ཀྱང་འདོད་དེ་དཀྱིལ་འཁོར་དུ་བྱས་པ་དང༌། མ་བྱས་པའི་ལྷའི་ཁྱད་པར་ཉིད་དོ། །འོན་ཀྱང་གསང་འདུས་འཕགས་སྐོར་དང་བདེ་མཆོག །ལི་ནག་དྲིལ་གསུམ་ལྟ་བུའི་ལུས་དཀྱིལ་གྱི་མཚན་ཉིད་ལུས་ཐམས་ཅད་ངེས་པར་ཚང་དགོས་པ་ནི་མ་ཡིན་ཏེ། ལུས་དཀྱིལ་ལ་རྩ་ཁམས་ལྷར་བསྐྱེད་པ་དང༌། ཕུང་ཁམས་བསྐྱེད་པ་གཉིས་ཡོད་ལ། དེ་ལས་གཞན་མེད་པར་གང་ནས་ཀྱང་མ་བཤད་ཅིང་གཞན་དུ་ན། འདུས་པ་འཕགས་སྐོར་གྱི་ལུས་དཀྱིལ་དེ་ཡང༌། བདེ་མཆོག་ནས་བཤད་པའི་ལུས་དཀྱིལ་གྱི་མཚན་ཉིད་མི་སྣང་བའི་ཕྱིར། ལུས་དཀྱིལ་རྣམ་པར་དག་པ་མ་ཡིན་ནོ་ཞེས་སྨྲ་དགོས་པར་འགྱུར་རོ། །གཞན་ཡང་རྡོ་རྗེ་དབྱིངས་ཀྱི་དཀྱིལ་འཁོར་བསྒོམ་པའི་ཚེ། སྙིང་གའི་དཀྱིལ་འཁོར་ལ་བདག་འཇུག་བྱེད་པ་ཡོད་ཅིང༌། དེ་ལ་བླ་མེད་འགའ་ཞིག་དང་མཚུངས་པའི་ལུས་དཀྱིལ་ཀྱི་སྒྲུབ་གཞིར་བྱེད་པ་ནི་མེད་ལ། སྙིང་གའི་དཀྱིལ་འཁོར་ཡིན་པའི་ཕྱིར་དང༌། སྙིང་ག་དེ་ལུས་མ་ཡིན་ཅི་ཞིག་ཡིན། གཞན་ལུས་དཀྱིལ་གྱི་ལྷ་ལ་སྒྲུབ་གཞི་ལུས་ཡིན་པས་ཁྱབ་པར་སྨྲ་བ་ཤིན་ཏུ་མ་བརྟགས་པ་ཡིན་ཏེ། རང་ཉིད་ཀྱི་ལུས་དཀྱིལ་མཆོག་ཏུ་འབད་པས་སྒྲུབ་པའི་འདུས་པ་འཕགས་སྐོར་གྱི་ལུས་དཀྱིལ་དེ་ལ། སྒྲུབ་གཞི་ཚོར་བའི་ཕུང་པོ་ལས་བྱས་པའི་རིན་ཆེན་འབྱུང་ལྡན་དང༌། སྒྲུབ་གཞི་རྣམ་ཤེས་ཀྱི་ཕུང་པོ་ལ་བྱས་པའི་མི་བསྐྱོད་པ་ལ་སོགས་པ་དེ་དག །སྒྲུབ་གཞི་ལུས་ལ་ཡིན་པའི་ཕྱིར། ལུས་དཀྱིལ་གྱི་ལྷ་མ་ཡིན་པར་འདོད་དགོས་ཏེ། ཕུང་པོ་བཞི་པོ་དེ་དག་ལུས་སུ་ཁས་བླངས་པའི་སྐབས་ནམ་ཡང་མེད་
པའི་ཕྱིར་རོ། །དེ་བས་ན་ལུགས་འདི་སྐྱོངས་པའི་ཕྱི་རབས་པ་འགའ་ཞིག་འཁོར་ལོ་ལྔའི་ལྷ་རྩ་ཁམས་དེ་ཡོངས་སུ་གྱུར་པ་ལས། དཀྱིལ་འཁོར་ལྔར་བསྒོམ་པ་ཞིག་མ་བྱུང་ན། དེར་དེ་དག་འགོད་པ་ཙམ་གྱིས་ལུས་དཀྱིལ་དུ་མི་འགྱུར་ཞེས་སྨྲས་པའང༌། སྙིང་པོ་མེད་དོ། །དེ་བས་ན་ལུས་ལ་བཀོད་པའི་དཀྱིལ་འཁོར་གང་ཡིན་པ་དེ་དག་ཐམས་ཅད་ལུས་ཀྱི་དཀྱིལ་འཁོར་དུ་མིང་དོན་མཐུན་དུ་འཇུག་པ་ལ་ཅི་ཞིག་རྒོལ། གཞན་དུ་ན་འབྱུང་བ་བཞིའི་དཀྱིལ་འཁོར་དང་ཞལ་གྱི་དཀྱིལ་འཁོར་ལ་ཡང་ཁྱེད་ཅག་རྩོད་པར་བྱེད་དམ། དེ་བས་ན་ཕྱིས་བྱུང་བ་བྱིས་པའི་རྩོད་པ་འདི་དག་ནི་སྨིག་རྒྱུ་དང་མཚུངས་པར་མངོན་ནོ། །ལོག་རྟོག་གསུམ་པ་ཡང་ཕྱིས་བྱུང་བའི་ལུགས་འདི་འཛིན་པ་ཕལ་ཆེ་བ་ཞིག་དང༌། གཞན་ལུགས་པ་ཁ་ཅིག་ཀྱང་སྟེ། ས་བོན་ལས་བསྐྱེད་ཅིང་སོ་སོའི་ལུགས་ཀྱི་གོ་ཆ་འགོད་པ་དང༌། སོ་སོར་ཡེ་ཤེས་པ་བསྟིམས་པ་དང་རང་རང་གི་རིགས་བདག་གིས་རྒྱས་བཏབ་པ་རྣམས་བྱས་ན། དཀྱིལ་འཁོར་སོ་སོའི་མངོན་རྟོགས་བསྡུས་པ་རེ་བསྒོམ་པར་འགྱུར་ལ། གཞན་དུ་དཀྱིལ་འཁོར་ལྔ་པོ་བསྒོམ་པའི་གོ་མི་ཆོད་སྙམ་པ་ཡིན་མོད་ཀྱི། ལུས་དཀྱིལ་ཐམས་ཅད་ལ་ཡན་ལག་བཞི་རྫོགས་དགོས་པས་མ་ཁྱབ་སྟེ། ལཱུ་ནག་དྲིལ་གསུམ་གྱི་ལུས་དཀྱིལ་ནི་ས་བོན་ལས་མི་བསྐྱེད་པ་ཡང་ཤིན་ཏུ་མང་ལ། འདུས་པའི་ལུས་དཀྱིལ་ཡང་ས་བོན་ལས་ནི་བསྐྱེད་མོད་ཀྱི། ཡན་ལག་ལྷག་མ་རྣམས་ནི་གཏན་བསྒོམ་པར་མི་བྱེད་པ་བཞིན་ནོ། །གཞན་ཡང་པཎྜི་ཏ་ཆེན་པོ་འཇིགས་མེད་འབྱུང་གནས་ཀྱི་རྣལ་
འབྱོར་རྫོགས་པའི་རིམ་པ་དང་འཕྲེང་བར། དཀྱིལ་འཁོར་བཞི་བཅུ་རྩ་གཅིག་གཉིས་ལ་སྐད་ཅིག་གིས་བསྐྱེད་དེ་ཡན་ལག་ལྷག་མ་རྣམས་ཀྱང་མི་བྱེད་པའི་སྒྲུབ་ཐབས་ཀྱང་མཛད་ན། ལུས་ཀྱི་དཀྱིལ་འཁོར་ལ་དེ་དག་དགོས་པ་ལྟ་སྨོས་ཀྱང་ཅི་དགོས། འོན་ཏེ་དེ་བསྐྱེད་རིམ་གྱི་སྐབས་མ་ཡིན་གྱི། རྫོགས་རིམ་གྱི་བསྐྱེད་ཚུལ་ཡིན་ནོ་ཞེས་སྨྲ་བ་དང༌། ཁ་ཅིག་ལྟར་བསྐྱེད་རིམ་ལ་བསྟན་པ་ཐོབ་པ་རྣལ་འབྱོར་བཞི་པའི་སྐབས་ལ་བསྒོམ་པར་བྱ་བ་ཡིན་གྱི། ལས་དང་པོ་ལ་དེས་བསྐྱེད་པའི་རིམ་པས་གོ་མི་ཆོད་སྙམ་ན། དེ་ཉིད་ཀྱི་སྔོན་དུ་བསྲུང་བའི་འཁོར་ལོ་དང༌། ཚོགས་ཞིང་མཆོད་ཅིང་རྒྱུན་བཤགས་བྱེད་པ་སོགས་བཤད་པས་རྫོགས་རིམ་གྱི་ལྷ་བསྒོམ་པའི་ཡན་ལག་ཏུ། དེ་དག་དགོས་པར་འདོད་པ་ལས་ངོ་མཚར་ཆེ་བ་ཅི་ཞིག་ཡོད།བཞི་པའི་ལན་ནི། རེ་ཞིག་ཁྱེད་ཅག་ཉིད་ལ་འདྲི་སྟེ། གསང་བ་འདུས་པའི་དཀྱིལ་འཁོར་གྱི་ཆོ་ག་ཡན་ལག་དང་བཅས་པ་གང་ལ། འདུས་པ་རྩ་བཤད་ནས་བཤད་པ་འབའ་ཞིག་བྱ་དགོས་སམ། རྒྱུད་སྡེ་གཞན་ནས་བཤད་པས་རུང༌། དང་པོ་ལྟར་ན་ནི། དེ་ལྟར་ཁྱེད་རྣམས་ཀྱི་ལག་ལེན་བྱེད་པ་རྣམས་སྨོས་ཀྱང་ཅི་དགོས། ཚད་དང་ལྡན་པར་གྱུར་བའི་དཀྱིལ་འཁོར་གྱི་ཆོ་ག་ཉི་ཤུ་པ་དང། བཞི་བརྒྱ་ལྔ་བཅུ་པ་ལ་སོགས་པ་དེ་དག་ཀྱང་ཁྱེད་ཀྱི་ལུགས་ལ་ཤིན་ཏུ་འཁྲུལ་བར་ཐལ་བར་གྱུར་ཏེ། དེ་དག་གི་ཆོ་ག་མང་པོ་རྒྱུད་སྡེ་གཞན་ནས་དྲངས་པར་མི་སྣང་བའི་ཕྱིར་རོ། །གཞན་ཡང་རྒྱ་བོད་ན་ཆོ་ག་རྣམ་པར་དག་པ་
སྣ་གཅིག་ཀྱང་མེད་པར་ཁས་བླངས་པར་སོང་བས་རང་ཉིད་ལ་ཅོ་འབྲི་བར་བྱས་སོ། །གཉིས་པ་ལྟར་ན་རྒྱུད་སྡེ་སྣ་ཚོགས་ནས་བསྡུས་པའི་དབང་བསྐུར་བའི་ཆོ་ག་གཅིག་གིས་འདུས་པའི་དཀྱིལ་འཁོར་དུ་དབང་བསྐུར་དུ་རུང་ཞིང༌། འཁོར་ལོ་སྡོམ་པའི་དཀྱིལ་འཁོར་དུ་དབང་བསྐུར་དུ་མི་རུང་བའི་རྒྱུ་མཚན་ཡང་དག་པ་གཅིག་ཀྱང་མི་སྣང་ངོ༌། །འཇིགས་མེད་འབྱུང་གནས་ཀྱིས་ཞལ་སྔ་ནས། དཀྱིལ་འཁོར་གྱི་ཆོ་ག་རྡོ་རྗེ་འཕྲེང་བ་ཞེས་བྱ་བ་ཡང༌། རྒྱུད་སྡེ་མཐའ་དག་ནས་བཤད་པའི་དཀྱིལ་འཁོར་བཞི་བཅུ་རྩ་གཉིས་ལ་ཆོ་ག་གཅིག་ཁོ་ན་སྦྱར་བ་ཡིན་པས་རེ་ཞིག་དེ་ཉིད་ཁོག་ལ། ཕྱིས་འདི་དགག་པར་གྱིས་ཤིག །དེ་ལྟ་མོད་ཀྱི་མན་ངག་དང་ཁུངས་མེད་པར་ཕན་ཚུན་གཅིག་གིས་རང་བཟོའི་རྒྱས་འགེབ་པ་ཁོ་བོ་ཅག་ནི་རྨི་ལམ་ན་ཡང་མི་བྱེད་མོད། བླ་མེད་ཀྱི་ཆོ་ག་ཡང་དག་ལ་ཀྱཻ་རྡོ་རྗེའམ། གསང་བ་འདུས་པའི་འདྲེས་བྱེད་ཅིང༌། བདེ་མཆོག་དང་འདུས་པའི་རྫོགས་རིམ་མང་པོ་ལ་ཡང༌། ལམ་སྐོར་གྱི་བརྡ་ཆད་འདྲེས་པར་ཡང་སྣང༌། ལ་ལ་དག་ནི་རྫོགས་རིམ་ཐམས་ཅད་གནད་བཞི་དང་བསྲེ་བ་དགུ་ལ་སོགས་པ་སྦྱོར་བ་དང༌། རྡོ་རྗེ་འཇིགས་བྱེད་ལ་སོགས་པ་ཞལ་ཕྱག་དག་པའི་ངེས་དོན་དུ་བྱས་ན་རང་གི་རྩ་བའི་བླ་མ་ཡན་ཆོད་ཀྱི་རྣ་བར་མ་ཐོས་པའི་ཁྲིད་སྣ་ཚོགས་པ་ཟབ་ཟབ་ལྟར་བཅོས་ནས་མ་རྒྱུད་ཀྱི་འཕོ་བ་བསྣན་ཏེ་རྒྱ་ཆེར་འཆད་པའི་ཕྱིར་ཁྱེད་རྣམས་ཉིད་ཀྱིས་གཟབ་དགོས་སོ། །ལོག་རྟོག་ལྔ་པ་ནི། འཕགས་པའི་ཡུལ་དང་གངས་རིའི་ཁྲོད་འདིར། ལྷ་དཔའ་བོ་གཅིག་པ་ལ་སོགས་པ་སྐད་ཅིག་གིས་བསྐྱེད་པ་ཇི་
སྙེད་ཅིག་བྱུང་ཞིང༌། བརྒྱུད་པའི་སྲོལ་འདི་ལ་ཡང་སྐད་ཅིག་གིས་བསྐྱེད་པ་ལ་ཉམས་ལེན་གྱི་གཙོ་བོར་མཛད་དེ། དེ་ལ་བོད་ཁ་ཅིག་གིས་བླ་མའི་མན་ངག་མེད་པར་རང་གི་བློ་བཟོ་མ་སྐད་ཅིག་གིས་བསྒོམ་པའི་མངོན་རྟོགས་དང༌། དེའི་དབང་ཆོག་སོགས་གསར་དུ་བརྩམས་པ་དག་བྱུང་བ་ལ། རང་བཟོའི་ཀྲོང་བསྐྱེད་བསྒོམ་དུ་མི་རུང་ཞེས་ཆོས་ཀྱི་རྗེ་ས་སྐྱ་པཎྜི་ཏས་འགོག་པར་མཛད་པ་ཡིན་མོད་ཀྱི། ཀྲོང་བསྐྱེད་ཐམས་ཅད་བཀག་པ་ག་ལ་ཡིན། དེ་བས་ཕྱི་མའི་དུས་འདིར་སྐད་ཅིག་གིས་བསྐྱེད་པ་རྫོགས་རིམ་གྱི་ལྷ་འབའ་ཞིག་ཏུ་འདོད་པ་དང༌། བསྐྱེད་རིམ་གྱི་རྣལ་འབྱོར་བཞི་པའི་སྐབས་ཁོ་ནའི་བསྒོམ་བྱ་ཡིན་པར་འདོད་པ་ནི་གཙོ་བོའི་དོན་ལ་མཚུངས་ཏེ། བསྐྱེད་རིམ་རྣལ་འབྱོར་བཞི་པ་ཡང་རྫོགས་རིམ་གྱི་རྟོགས་པ་བཟང་པོ་མ་སྐྱེས་པ་ལ་འབྱུང་བའི་ཕྱིར་རོ། །དེ་ལ་འདི་ལྟར་བཏགས་ཏེ། རྫོགས་རིམ་གྱི་སྐབས་མ་ཡིན་པར་ལྷ་སྐད་ཅིག་གིས་བསྐྱེད་པ་གཏན་ནས་མི་རུང་བའམ། སྤྱིར་རུང་དུ་ཆུག་ཀྱང་དེ་འབའ་ཞིག་ལ་སེམས་འཛིན་དུ་མི་རུང་བའོ། །དེ་ཡང་རུང་དུ་ཆུག་མོད་ཀྱི་ས་བོན་ལ་སོགས་པ་ལས་བསྐྱེད་པ་གཞན་ཞིག་མེད་པར། ཀྲོང་བསྐྱེད་ཀྱི་ལྷ་འབའ་ཞིག་བསྒོམ་པ་མི་རུང་བ་ཡིན། དང་པོ་ལྟར་ན་གསང་འདུས་འཕགས་སྐོར་གྱི་ལྷག་མོས་དང༌། ཐུན་མཚམས་ཀྱི་ལྷ་བསྐྱེད་པ་ཡང་མི་རུང་བར་འགྱུར་ཞིང༌། གཉིས་པ་ལྟར་ན་ཡང་དེ་ལྟར་མི་རུང་བའི་རྒྱུ་མཚན་ཅུང་ཟད་ཀྱང་མེད་པ་ཁོ་ནར་མ་ཟད་བསྐྱེད་རིམ་ལ་སེམས་འཛིན་པའི་ཚེ་གཞན་དུ་ཅུང་ཟད་
སེམས་ཡེངས་པ་ན་སླར་ཡང་མངོན་རྟོས་མགོ་ནས་མ་བཅད་པར་སེམས་འཛིན་དུ་མི་རུང་བར་འགྱུར་རོ། །དེས་ན་སེམས་གཞན་དུ་ཡེངས་པ་ན་སླར་སེམས་འཛིན་པའི་ཚེ་སྐད་ཅིག་གིས་བསྐྱེད་པ་ལས་འོས་ཅི་ཡོད། གསུམ་པ་ལྟར་ན་མི་རུང་ཞེས་བྱ་བ་ནི་ཅི་ཞིག །འགའ་ཞིག་ཐུན་མཚམས་ཀྱི་ལྷ་ཙམ་བསྒོམ་སྟེ། ཐུན་བཞིའི་རྣལ་འབྱོར་ལ་སོགས་པ་མི་བྱེད། དེ་དག་ལ་མི་རུང་བ་མེད་ན། ཐུན་བཞིའི་ལྷ་སྐད་ཅིག་གིས་བསྐྱེད་པ་ལ་སེམས་གནས་པ་བརྟན་པོར་བྱེད་པ་དང༌། དེའི་སྔགས་བཟླ་བ་ལ་སྐྱོན་དུ་བལྟ་བ་ནི། སྐྱེས་བུ་ཞིག་ཚོང་དུས་ཀྱི་ལམ་དུ་ཉེ་བར་ཞུགས་པ་ལ་ཡང་ན་ཁྱོད་མ་འགྲོ། ཅི་སྟེ་འགྲོ་ན་འཁོར་ཡུག་གི་ཕ་རོལ་ཏུ་འགྲོ་དགོས་སོ་ཞེས་སྨྲ་བ་དང་མི་མཚུངས་སམ། རང་གི་བློ་དང་འཚམ་པ། དེ་ཙམ་བསྒོམ་པ་ལ་སྐྱོན་དུ་མ་འཛིན་ཞིག །ལོག་རྟོག་དྲུག་པ་ནི། བོད་ཀྱི་ཕྱི་རབས་པ་འགའ་ཞིག་ལ་སྣང་སྟེ། སྐྱེ་ཤི་བར་དོ་གསུམ་སྦྱོང་བྱེད་སོ་སོར་ཚང་ཞིང༌། སྐུ་གསུམ་ལམ་བྱེད་སོ་སོར་ཡོད་པ་ཞིག་བསྒོམ་ན། རྫོགས་རིམ་གྱི་སྨིན་བྱེད་དུ་འགྱུར་ཞིང་བག་ཆགས་དེ་དང་དེ་སྦྱོངས་པའི་ནུས་པ་ཡོད་ཅིང༌། མངོན་རྟོགས་བསྡུས་པ་རེ་ལ་ཟབ་མོར་བསྒོམ་པ་རྣམ་པ་རྣམས་ནི་སྙིང་པོ་མེད་པ་ལ་བརྩོན་པར་བྱེད་པས་དུས་དོན་མེད་དུ་འདའོ། །ཞེས་སྨྲ་བར་བྱེད་དོ། །ཚིག་འདི་ནི་ཤིན་ཏུ་མི་རུང་བ་ཡིན་ཏེ། ཆོས་དང་གང་ཟག་དམ་པ་མཐའ་ཡས་པ་ཞིག་ལ་ངན་སྨྲས་སུ་སོང་བའི་ཕྱིར་རོ། །ཡང་ཌོཾ་བྷི་ཧེ་རུ་ཀ་སོགས་གྲུབ་པའི་སྐྱེས་བུ་ཇི་སྙེད་པ་ཞིག་གིས་མཛད་པ་
བདེ་དགྱེས་གསང་འདུས་དུས་འཁོར་གཤིན་རྗེ་གཤེད་ལ་སོགས་པའི་སྒྲུབ་ཐབས་མཐའ་ཡས་པ་ཞིག་མཛད་པ་མ་ཡིན་ནམ། ཡང་སྒྲུབ་ཐབས་བསྡུས་པ་འདི་དག་གིས་སྐྱེ་ཤི་བར་དོའི་ས་བོན་དངོས་སུ་འཇོམས་མི་ནུས་པས་སྒོམ་དུ་མི་རུང་བ་ཡིན་ན་ནི། ཤིན་ཏུ་མ་ངེས་ཏེ་དེ་ལྟ་ན་བསྐྱེད་རིམ་མཐའ་དག་དང༌། སོ་སོའི་སྐྱེ་བོའི་ལམ་གྱི་རྫོགས་རིམ་ཐམས་ཅད་ཀྱིས་ས་བོན་དེ་རྣམས་དངོས་སུ་འཇོམས་མི་ནུས་པའི་ཕྱིར་བསྒོམ་དུ་མི་རུང་བར་འགྱུར་ལ་རྒྱུད་ནས་དེ་རྣམས་འཇོམས་པའི་རྒྱུ་མཚན་ནི། བྱང་ཆུབ་ཏུ་སེམས་བསྐྱེད་པ་དང་སྨོན་ལམ་བཏབ་པ་ཙམ་ཡང་འགྱུར་ན། སྒྲུབ་ཐབས་བསྡུས་པ་རྣམས་ཁོ་ནས་ཉེས་པ་ཅི་ཞིག་བྱས། གཞན་ཡང་དུས་གསུམ་གྱི་སྣང་བ་ལྷར་བསྒོམ་པ་ཁོ་ནས་ཐ་མལ་གྱི་སྣང་ཞེན་ཡིན་ནོ་ཅོག་ཐམས་ཅད་མགོ་ནོན་པར་འགྱུར་ན། སྐྱེ་ཤི་བར་དོ་གསུམ་ཁོ་ནས་སྣང་ཞེན་ལོག་ཞིག་ཏུ་ཅི་ལ་སྡོད། དོན་གྱི་གཙོ་བོ་ཡང་ཐ་མལ་གྱི་སྣང་ཞེན་བཟློག་པ་ཡིན་པའི་ཕྱིར་བསྐྱེད་རིམ་གྱི་གཙོ་བོའི་དོན་སྒྲུབ་ཐབས་བསྡུས་པ་རྣམས་ལ་ཡང་ཚང་བ་ཡིན་ནོ། །སྐུ་གསུམ་ལམ་དུ་བྱེད་མི་ནུས་པ་ཞེས་པ་ལ་ཡང་རིགས་པ་འདི་ཉིད་སྦྱར་བར་བྱའོ། །ཅི་སྟེ་སྐུ་གསུམ་ལམ་བྱེད་དང༌། སྲིད་པ་གསུམ་སྦྱོང་བྱེད་ཙམ་ཡོད་དུ་ཆུག་ཀྱང༌། བསྡུས་པ་དེ་དག་མི་ཟབ་ཅིང་རྒྱས་པ་དེ་དག་ཟབ་སྙམ་ན། འདི་ལ་ནི་གང་ཟག་གི་ཁྱད་པར་ཤེས་དགོས་ཏེ། དཀྱིལ་འཁོར་རྒྱས་པ་གསལ་ཐེབས་ཤིང་མངོན་རྟོགས་རྒྱས་པ་དེ་ཡང་མྱུར་དུ་བསྒོམ་ཐུབ་པའི་གང་ཟག་ལ་ནི་རྒྱས་པ་དེ་དག་ཤིན་ཏུ་ཟབ་པ་ཡིན་པ་ཁོ་བོ་ཅག་ཀྱང་འདོད་མོད། དེ་ལྟ་བུའི་གང་ཟག་ནི་
ཤིན་ཏུ་ཉུང་སྟེ། དཀྱིལ་འཁོར་དེའི་ངོར་གསལ་ཐེབས་དགོས་ཀྱི། མངོན་རྟོགས་འདོན་ཤེས་པ་དང་གོ་བ་ཡོད་པ་ཙམ་གྱིས་མི་ཆོག་པའི་ཕྱིར་རོ། །དེས་ན་ཞལ་གཅིག་ཕྱག་གཉིས་པའམ། གཙོ་རྐྱང་ཙམ་འོལ་སྤྱི་གསལ་ཐེབས་ལ། དཀྱིལ་འཁོར་ཆེན་པོ་བསྒོམ་པའི་ཚཻ་འོལ་སྤྱི་ཙམ་ཡང་གསལ་ཐེབས་དཀའ་བ་ཤ་སྟག་འདུག་སྟེ། མངོན་རྟོགས་ཆེན་པོ་འདོན་ཅིང་བསྒོམ་པ་ལྟར་བཅོས་ནས་ཉིན་ཞག་བརྒྱ་སྟོང་འདས་ཀྱང་མངོན་རྟོགས་རྒྱས་པ་ལན་ཅིག་ཙམ་ཡང༌། ཚང་བར་གསལ་ཐེབས་དཀའ་ཞིང༌། ངག་གི་ནུས་པ་རྙེད་པ་དང་སེམས་གནས་ཐོབ་ཅིག་ཀྱང་མི་ཡོང་བའི་ཚོད་དུ་སྣང་བས། གང་ཟག་དེ་ལ་མི་ཟབ་བོ། །དེས་ན་དེ་ལ་ནི་ཉུང་ངུ་ཙམ་བསྒོམ་ན་གསལ་ཡང་ཐེབས་ལ། བསྒོམ་བཟླས་མང་དུ་བྱས་པས་མཐུ་ནུས་པ་ཡང་རྙེད། སེམས་ཟིན་སླ་བས་མི་རིང་བར་གསལ་སྣང་མཆེད་ནས། དཀྱིལ་འཁོར་རྒྱས་པ་བསྒོམ་པའི་སྐལ་པ་ཅན་དུ་ཡང་འགྱུར་བས་ན། གང་ཟག་འདི་ལ་ནི་མངོན་རྟོགས་ཀྱང་བསྡུས་པ་རྣམས་ཟབ་པ་ཡིན་ནོ། །འོ་ན། བསྡུས་པ་དེ་རྣམས་དབང་པོ་རྟུལ་བོའི་ཉམས་ལེན་དུ་སྣང་བས། མི་ཟབ་པར་གྲུབ་པའི་ཕྱིར་ཁོ་བོ་ཅག་རྒྱས་པ་བསྒོམ་མོ་སྙམ་ན། ལྷ་ཞལ་གཅིག་ཕྱག་གཉིས་པོ་ཡང་གསལ་མི་ཐེབས་བཞིན་དུ་དབང་པོ་རྣོན་པོའི་ང་རྒྱལ་མི་འཚལ་ཞིང༌། ཁྱེད་ཅག་དཀྱིལ་འཁོར་རྒྱས་པ་བསྒོམ་པ་ལ་ནི་ཁོ་བོ་ཅག་དགག་པ་བརྗོད་པ་དང་ངན་པར་ག་ལ་སེམས་ཏེ། དེ་ཙམ་གྱིས་ཀྱང་བག་ཆགས་ཁྱད་པར་ཅན་འཇོག་པར་སྣང་བས་སོ། །འོན་ཀྱང་ད་
ལྟ་གསང་སྔགས་ཀྱི་སྒོར་ཞུགས་པར་སེམས་པ་རྣམས་ནི། རེ་རེ་ཙམ་མ་གཏོགས་དབང་པོ་རྟུལ་པོར་སྣང་བའི་ཕྱིར་དབང་པོ་མཆོག་དམན་གྱི་ཁྲིད་ལུགས་ཤེས་དགོས་སོ། །ལོག་རྟོག་བདུན་པ་ནི་ཁ་ཅིག་ན་རེ། སློབ་དཔོན་ཀ་མ་ལ་པས་སམྦུ་ཊའི་སྙིང་པོ་ཧེ་རུ་ཀ་བཅུ་བདུན་པའི་དཀྱིལ་འཁོར་མཚན་མ་བཞི་བོར་ནས། དེའི་ཕྱག་མཚན་སྒོ་མ་བཞི་གཏད་ནས་བཅུ་གསུམ་པའི་དཀྱིལ་འཁོར་དུ་འདོད་དེ། རྒྱུད་ལས། པི་ཝཾ་དང་ནི་གླིང་བུ་དང༌། །ཀུ་མུད་དག་དང་རྫ་རྔ་སྟེ། །ཕྱག་གཉིས་པ་ལ་ཞལ་གཅིག་པ། །རྒྱན་རྣམས་ཀུན་གྱིས་རྣམ་པར་བརྒྱན། །ཞེས་བཤད་པ་དང༌། འགལ་ལམ་སྙམ་ན། འདི་ཁྱུང་པོ་རྣལ་འབྱོར་གྱི་ཀྱཻ་རྡོར་མཚོན་ཆ་ཅན་ཟེར་ཏེ། རྒྱུད་འགྲེལ་རྣམས་ནས་དེའི་ཐ་སྙད་མ་བཤད་དོ། །ཞེས་འདྲི་སྟེ། དེ་ལ་སྨྲས་པ། ཁྱེད་ནི་གྲགས་པ་དང་ལྡན་པ་ཞེས་ཀྱང་སྣང་སྟེ། སྨྲ་བ་འདི་ལྟ་བུ་ལ་ཅིའི་ཕྱིར་འབྱུང་བར་མི་འགྱུར། དགོས་པ་མེད་བཞིན་དུ་རིགས་པ་མ་ཡིན་པའི་ཚིག་གི་ཆོས་དང་གང་ཟག་མཆོག་ལ་སྡང་བའི་སྡིག་པ་རྔམ་པོ་ཆེ་བསགས་པའི་ཕྱིར་རོ། །སྤྱིར་གྲུབ་ཐོབ་ཀྱི་འཁོར་ལོས་བསྒྱུར་བ་ལྭ་བའི་ན་བཟའ་ཅན་ལྟ་བུ་ལ་སྐྱོན་འཛིན་པ་འདི་ལྟ་བུའི་སྙིང་ཁམས་ནི་ནམ་མཁར་མི་ཤོང་བ་ཙམ་སྟེ། དེ་ལྟ་བུར་ན་གྲུབ་ཆེན་མཚོ་སྐྱེས་ཀྱིས་བསྟོད་པ་དང་སྒྲུབ་ཐབས་ལས། ཤ་ར་བྷ་དང་བྱི་ལའི་དོད་དུ་ཁྱི་དང་མ་ཧེ་བཤད་པ་ཡང་རྒྱུད་དང་མི་མཐུན་ཅེས་ཁོག་ཅིག ཉི་ཟེར་ལ་ཆིབས་པ་སོགས་ཀྱི་ཆོ་འཕྲུལ་ལ་མངའ་བརྙེས་ཤིང༌། ཤིང་གི་ལྷ་མོས་
བསོད་སྙོམས་འབུལ་སོགས་ཀྱི་རྟགས་ལས་དངོས་གྲུབ་བརྙེས་ངེས་པ། རང་གི་བརྒྱུད་པའི་བླ་མ་བཀའ་དྲིན་ཅན། རྒྱ་གར་གྱི་མཁས་པ་ཆེན་པོ་དཔའ་བོ་རྡོ་རྗེ་ནི་ཞབས་ཀྱིས་བཞུགས་སྟངས་སྐབས་རྒྱུད་དང་མི་མཐུན་ཞེས་ཁྱེད་ཉིད་ཀྱིས་བཀག་ཟིན་ཏོ། །ཁྱུང་པོའི་དགྱེས་མཛད་ཅེས་གསུངས་པའི་མིང་ཙམ་གྱིས་ཡང་ཁུངས་མི་ཆོད་ཅིང༌། མཚོན་ཆ་ཅན་གྱི་ཐ་སྙད་ཁུངས་མེད་ཟེར་བཞིན་དུ་རང་ཡང་དེ་ལྟར་བརྡ་ཆད་བྱེད་པ་ནི་ཤིན་ཏུ་བླུན་ནོ། །ཀྱཻ་རྡོར་གྱི་རྒྱུད་ད་ལྟའི་འབྲོག་མིའི་འགྱུར་གསུམ་པོ་འདི་མ་གཏོགས་གཞན་ཤེས་བྱ་ལ་མི་རིགས་ཅིང༌། ཞལ་གཟིགས་དང་མན་ངག་སོགས་ཀྱི་སྒྲུབ་ཐབས་གཏན་བྱེད་དུ་མི་རུང་ན་ནི་ཁྱེད་ཀྱི་དེ་བདེན་བདེན་འདྲའོ། །དེ་ལྟ་ན་ནི་བིརྺ་པའི་གཤེད་དམར་སྒྲུབ་ཐབས་ཀྱང་རྒྱུད་འདི་དང་མི་མཐུན་ཅེས་དགག་དགོས་པར་འགྱུར། རྒྱུད་འགྲེལ་ནས་མ་བཤད་པ་ཁོ་ནས་རྣམ་དག་མ་ཡིན་པར་འགྱུར་ན་བཀག་ཆོག་དང༌། མགོན་པོ་དང་ལྷ་མོ་ལ་སོགས་པའི་རང་ཉིད་ཉམས་སུ་ལེན་པ་དུ་མ་ཞིག་ལ་ཅོ་འདྲི་བར་གྱུར་ལ། ཕག་མོ་ཞལ་གཉིས་མ་དང་ཕག་དཀར། ཤེས་རབ་གསལ་བྱེད་ཀྱི་སྒྲུབ་ཐབས་སོགས་ཀྱང་མི་འཐད་པར་འགྱུར་ཏེ། བདེ་མཆོག་གི་རྒྱུད་འགྲེལ་རྣམས་ནས་མ་བཤད་པའི་ཕྱིར། བརྡ་ཆད་ཀྱང་རྒྱུད་འགྲེལ་ནས་བཤད་པ་དགོས་ན། ལམ་འབྲས་གདམས་ངག་ཏུ་ཉམས་ལྔ་གསུམ་བཅོ་ལྔ་དང་གྲུབ་བརྒྱད་མཉེན་ལྕུག་བཞི་ལ་སོགས་པ་ཐམས་ཅད་མི་འཐད་པར་ཐལ་བར་འགྱུར་ཏེ་རྒྱུད་འགྲེལ་རྣམས་ན་དེ་འདྲའི་ཐ་སྙད་མ་བཤད་པས་སོ། །
དེ་དག་གྲུབ་ཆེན་རྒྱ་གཞུང་ཁུངས་ཡོད་པས་སོ་སྙམ་ན། དགྱེས་མཛད་བཅུ་གསུམ་ཡང་རྒྱ་གཞུང་གི་ཁུངས་ཡོད་པ་དང༌། ཕྱོགས་འདིར་སྐྱེ་བོ་ཕལ་མོ་ཆེའི་སྔོན་དུ་རྫུ་འཕྲུལ་དཔག་མེད་སྟོན་པ་སོགས་གྲུབ་རྟགས་མངོན་གྱུར་ཅན། རྒྱ་གར་གྱིས་པཎྜི་ཏ་ལྔ་བཅུའི་རྗེས་སུ་བཟུང་བའི་མཁས་གྲུབ་འདི་ཉིད་ཀྱིས་གང་གསུངས་པ་དེ་ཉིད་ལས་ཟབ་པར་བཟང་བའི་ཁུངས་ཅི་ཞིག་འཚལ། ཁོ་བོ་ཅག་ནི་རྗེ་བཙུན་རྡོ་རྗེ་རྣལ་འབྱོར་མས་རྗེས་སུ་བཟུང་ཞིང་ལུང་བསྟན་པ་བར་དོར་མཆོག་བརྙེས་པ་ངེས་པ། མདོ་སྔགས་གཞུང་ལུགས་རིག་གནས་ཐམས་ཅད་ལ་ཆེར་མཁས་པ། རྒྱུད་ཆེན་པོ་སུམ་བརྒྱ་ཐུགས་ནས་གསུངས་པའི་རྒྱ་གར་གྱི་པཎྜི་ཏ་ཆེན་པོ་ཨ་བྷ་ཡས་གསུངས་པ་ཀྱཻ་རྡོ་རྗེ་བདུད་བཞི་བཀྲམ་གདན་པ་ལ་སོགས་འདི་ཐམས་ཅད་སྐྱོན་དུ་ག་ལ་འཛིན།ལོག་རྟོག་བརྒྱད་པ་བསལ་བ་ནི། འདི་ན་མི་མཁས་ཀྱང་མཁས་སུ་རེ་བ། འགའ་ཞིག་འཇིགས་བྱེད་ལྷ་བཅུ་གསུམ་གྱི་དཀྱིལ་འཁོར་མི་འཐད་དེ། རྒྱ་གཞུང་གི་ཁུངས་མེད་པའི་ཕྱིར་དང༌། ལྷ་རྣམས་མངའ་འབྱིན་བྱེད་པ་ཡང་འཇིགས་བྱེད་ལ་ཡུམ་མེད་པར་བཤད་པ་དང་འགལ་བ་ཡིན་ཞེས་མང་དུ་སྨྲ་ཞིང་ཡི་གེ་འབྲི་བར་བྱེད་དོ། །ཚུལ་འདི་ལ་དཔྱོད་ལྡན་རྣམས་ཀྱི་ས་མང་དུ་བརྒལ་ལན་བྱས་པ་ཡང་ཡོད་ཅིང༌། རྒྱས་པར་གཞན་དུ་འདྲི་བར་འགྱུར་བས་འདིར་མི་བརྗོད་དོ། །འོན་ཀྱང་སློབ་དཔོན་ཆེན་པོ་ཀ་མ་ལ་རཀྵིས་ཏས་མཛད་པའི་སྒྲུབ་ཐབས་ཀྱང་ཡོད་ལ། སྤྱིར་ཁུངས་ཡོད་མེད་ཀྱི་དཔྱད་པ་ནི་གོང་དང་མཚུངས་སོ། །འཇིགས་བྱེད་ལ་ཡུམ་བྱར་མི་རུང་བའི་ལུང་ཚིག་གསལ་
ཁ་མེད་ལ། ཡུམ་ཡོད་པ་བྱར་མི་རུང་སྟེ་སྒྲུབ་ཐབས་ཕལ་ཆེར་ན་མེད་པའི་ཕྱིར་རོ་སྙམ་ན། དེ་ལྟ་ན་བདེ་མཆོག་དཔའ་བོ་གཅིག་པའི་སྒྲུབ་ཐབས་ཀྱང་མི་རུང་སྟེ། སྒྲུབ་ཐབས་ཕལ་ཆེར་ན་ཡུམ་ཡོད་པར་བཤད་པའི་ཕྱིར་ཅེས་དང་མི་མཚུང་ངམ། དེས་ན་རྒོལ་བ་དེ་ལ་ནི་སྙིང་པོ་མ་མཆིས་སོ། །འཇིགས་བྱཻད་བཅུ་གསུམ་མ་མཆོག་ཏུ་འདོད་པ་རྣམས་ཀྱང་དང་པོར་ཞལ་གསུམ་པ་བསྐྱེད། དཀྱིལ་འཁོར་རྒྱལ་མཆོག་གི་ཚེ་ཞལ་དགུ་པར་བསྒྱུར་བ་ནི་མི་འཐད་པར་འདོད་པ་ཡང་གོང་དུ་བཤད་པའི་ཡུམ་འགོག་བྱེད་ཀྱི་རིགས་པ་དང་མཚུངས་སོ། །གཙོ་བོའི་ཡུམ་རྡོ་རྗེ་རྣལ་འབྱོར་མས་བྱེད་པ་མི་འཐད་སྙམ་པ་ཡང་དེ་དང་འདྲ་ལ་ཁྱད་པར་ཕག་མོ་སེར་མོ་བྱེད་པ་ནི་མི་རུང་ཞེས་པ་ནི། གཤིན་རྗེ་གཤེད་ནག་པོ་དང་འདི་མཚུངས་དགོས་པ་ལས། གཤེད་ནག་གི་དཀྱིལ་འཁོར་ལ་ནི་ཕག་མོ་སྔོན་མོར་ཡོད་པའི་ཕྱིར་སྙམ་པའོ། །གཤིན་རྗེ་དགྲ་ནག་གི་དཀྱིལ་འཁོར་ཡིན་ན་དེ་ནི་འཐད་དུ་ཆུག་ཀྱང༌། དགྲ་ནག་དང་ཕྱོགས་མཐུན་ཙམ་བཀོད་པ་མ་གཏོགས་རྒྱུད་ཐ་དད་པ་ཡིན་པའི་ཕྱིར་མ་ངེས་ལ། ཕྱོགས་ཙམ་ནི་གཤེད་དམར་དང་ཡང་མཐུན་ཅིང༌། དེ་ནི་ཕག་མོ་སེར་མོ་ཡང་བཤད་དོ། །སྤྱིར་ཕག་མོ་མཱ་མ་ཀིའི་ངོ་བོ་ཡིན་ལ། དེ་ནི་མི་བསྐྱོད་པ་དང་རིན་འབྱུང་གཉིས་ཀའི་རིགས་བསྟན་པ་ཡིན་པར་རྒྱུད་སྡེ་ཕལ་མོ་ཆེ་ལ་གྲགས་པ་ཡིན་པས། ཁ་དོག་ཀྱང་གཉིས་ཀ་ལྟར་རུང་བར་མངོན་ཅིང༌། ཁྱད་པར་ཀ་མ་ལ་རཀྵི་ཏིའི་སྒྲུབ་ཐབས་ནས་འབྱུང་བ་ཡིན་ནོ། །དེ་ལྟ་བས་ན་བསྐྱེད་རིམ་གྱི་ལམ་བཟང་པོ་ལུགས་སྲོལ་མཆོག་འདི་ལ་ཡིད་གཉིས་
དང་ལོག་རྟོག་གི་དབང་དུ་མ་གྱུར་པར་གུས་པ་ཆེན་པོས་ནན་དུ་བྱོས་ཤིག །འདིར་སྨྲས་པ། ཡིད་བཞིན་རིན་ཆེན་འདམ་རྫབ་ཀྱིས་གོས་བླུན་པོ་རྣམས་ཀྱིས་སྤངས་གྱུར་པ། །ནོར་བུ་མཁན་མཆོག་བློ་ལྡན་མཁས་པས་ཉེར་བླངས་རང་གཞན་དོན་སྟོན་བྱེད། །བླུན་པོས་བླངས་ན་ཆུད་འཛར་གྱུར་བས་རེ་ཞིག་བོར་བ་ཉིད་ནི་མཆོག །ཉ་པའི་ཚོགས་ཀྱིས་རིན་ཆེན་རྙེད་པའང་ཕྱེ་མར་བརྡུང་སྟེ་བོར་ལ་ལྟོས། །བླུན་པོ་མཁས་པར་འཆོས་གང་དེ་རྣམས་ཀྱིས། །ཚད་མར་བྱས་གང་བསྲེ་བསླད་མང་པོས་ཁྱབ། །དེ་དག་རྣམས་ཀྱིས་བོར་གང་ལམ་མཆོག་འདི། །ཉེས་སྐྱོན་དྲི་མ་བྲལ་གང་ངོ་མཚར་རྨད། །རིགས་པས་སྒྲུབ་པའི་སྐབས་ཏེ་བཅུ་བདུན་པའོ། །འབྲས་བུ་ལམ་བྱེད་བདེ་བ་ཆེན་པོའི་རྒྱུད། །མཐར་ཐུག་སྟོན་བྱེད་རྒྱུད་རྒྱལ་རྣམ་པ་ལྔའི། །སྒྲུབ་ཐབས་ཀུན་ནི་མཆོག་གྱུར་ཟླ་བྲལ་བ། །སྨྲ་བ་གང་དེ་ཟླ་མེད་དཔའ་བོ་ཡིན། །སངས་རྒྱས་ཀུན༵་གྱི་དཀྱིལ་འཁོར་ཆེ། སྤྱོད་འཆང་དག༵འ་བའི་བདེ་སྒྲུབ་པས། །སྙིང༵་པོ༵་མཆོག་འདི་སེམས་ཅན་ཀུན། །རྡོ་རྗེ་འཛིན་ཆེན་རྒྱལ་གྱུར་ཅིག །རྒྱུད་སྡེ་ལྔའི་དཀྱིལ་འཁོར་གྱི་སྒྲུབ་ཐབས་བསྐྱེད་རིམ་མཐའ་དག་གསལ་བར་བྱེད་པ་ཞེས་བྱ་བ་མཁས་པ་དང་གྲུབ་པའི་དབང་ཕྱུག་ཁྱུང་པོ་རྣལ་འབྱོར་པའི་ཆོས་ཀྱི་རིགས་རུས་སུ་སྐྱེས་པ་ཏཱ་ར་ནཱ་ཐས་སྔ་ཕྱི་བསྐུལ་བ་པོ་མང་པོ་དང༌། ཉེ་བར་དད་ལྡན་གྲགས་པ་བཟང་པོས་ཡི་གེ་པ་དང་བསྐུལ་བ་པོ་བྱས་ནས། རྒྱས་བསྡུས་བསྲེ་སླད་སོགས་ཀྱི་སྐྱོན་དང་བྲལ་བར་ཉེ་བར་སྦྱར་བ་སྟེ་ཡོན་ཏན་རིན་པོ་ཆེ་དུ་མའི་འབྱུང་
གནས་དཔལ་སྟག་ལུང་ཐང་གི་དབེན་གནས་རྣམ་རྒྱལ་རབ་བརྟན་ཞེས་བྱ་བའི་གནས་སུའོ།། །།འདིས་རྒྱལ་བའི་བསྟན་པ་རིན་པོ་ཆེ་སྤྱི་དང༌། ཁྱད་པར་གྲུབ་ཆེན་ཤངས་པའི་བཀའ་སྲོལ་གྱི་སྒྲུབ་རྒྱུད་འདི་ཉིད་ཕྱོགས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །བཀྲ་ཤིས། རྗེ་བཙུན་པད་དཀརའཆང་བའི་རྣམ་འཕྲུལ་མགོན། །སྨྲ་བའི་དབང་ཕྱུག་མོན་ཏན་བཟང་པོ་ཡིས། །སྤྱི་ལོ་གཅིག་སྟོང་དགུ་བརྒྱ་གོ་དྲུག་བྲ། །བསྟན་པ་སྤྱི་དང་ཁྱད་པར་ཇོ་ནང་བའི་། །བཤད་སྒྲུབ་སླྲ་གསོ་བྱ་བ་སྤེལ་བའི་ཆེད། །འཇམ་མགོན་ཏཱ་ར་ནཱ་ཐའི་གསུང་འབུམ་གྱི། །མི་ཟད་ཆོས་སྦྱིན་དཔལ་ལྡན་ཛམ་ཐང་གི །གཙང་པའི་ཆོས་གྲྭར་བསྐྲུན་པའི་དགེ་བ་ཡིས། །མ་གྱུར་འགྲོ་ལ་གནས་སྐབས་བདེ་བ་དགན་། །མཐར་ཐུག་གཏན་བདེ་བླ་མེད་བྱང་ཆུབ་མཆོག །མྱུར་དུ་ཐོག་པའི་དཔུང་གྱེན་དམ་པ་རུ། །གཞི་དབྱིང་མཆོག་གསུམ་དམ་པས་ཤིས་པ་རྩོལ། །འདི་ཡང་བསོད་ནམས་དཔལ་གྱིས་བྲིས་པ་དགེ། །།