རྒྱུད་སྡེ་སྤྱིའི་རྣམ་བཞག་གི་ཟིན་བྲིས་བསྟན་པའི་ནོར་རྫས།
རྒྱུད་སྡེ་སྤྱིའི་རྣམ་བཞག་གི་ཟིན་བྲིས་བསྟན་པའི་ནོར་རྫས་ཞེས་བྱ་བ་བཞུགས།
ཨོཾ་གུ་རུ་བུདྡྷཱ་བོ་དྷི་སཏྭ་བྷྱོ་ན་མོ་ན་མཿ གངས་རིའི་ཁྲོད་འདིར་ངེས་དོན་བསྟན་པའི་བདག །འགྲན་མེད་དམ་པའི་ཆོས་ཀྱི་འཁོར་ལོ་བསྐོར། །འཇིག་རྟེན་མགོན་པོའི་རྣམ་འཕྲུལ་ཇོ་ནང་པ། །ཀུན་མཁྱེན་ཆེན་པོའི་ཞབས་ལ་ཕྱག་འཚལ་ལོ། །རིགས་ཀུན་བདག་པོ་མ་ལུས་འཁོར་ལོའི་མགོན། །གསང་གསུམ་ཟུང་འཇུག་བདེ་ཆེན་རྡོ་རྗེའི་དངོས། །སྐྱབས་གནས་ཐམས་ཅད་གཅིག་ཏུ་འདུས་པའི་རྗེ། །ཀུན་དགའ་སྙིང་པོའི་ཞབས་ལ་ཕྱག་འཚལ་ལོ། །ཞེས་མཆོད་པར་བརྗོད་ནས། འདིར་བཤད་པར་བྱ་བ་ལ་བཞི་སྟེ། འཇིག་རྟེན་དང་འཇིག་རྟེན་ལས་འདས་པའི་དགེ་བ་མཐའ་དག་སངས་རྒྱས་ཀྱི་འཕྲིན་ལས་སུ་སྒྲུབ་པ་དང༌། རྒྱལ་བའི་བསྟན་པ་ཁོ་ན་ཐར་འདོད་རྣམས་ཀྱི་འཇུག་ངོགས་སུ་བསྟན་པ་དང༌། དེ་གདུལ་བྱ་མཆོག་དམན་གྱི་དབང་གིས་ཐེག་པ་ཐ་དད་དུ་འགྱུར་ཚུལ་དང༌། དེ་ལས་སྐབས་སུ་བབས་པའི་དོན་བཤད་པའོ། །དང་པོ་ནི། རྒྱལ་སྲས་ཆེན་པོ་ཞི་བ་ལྷས། ཇི་ལྟར་མཚན་མོ་མུན་ནག་སྤྲིན་རུམ་ན། །གློག་འགྱུ་སྐད་ཅིག་རབ་སྣང་སྟོན་པ་ལྟར། །
དེ་བཞིན་སངས་རྒྱས་མཐུ་ཡིས་རྒྱ་ལམ་ན། །འཇིག་རྟེན་བསོད་ནམས་བློ་གྲོས་ཐང་འགའ་འབྱུང༌། །ཞེས་སྤྱོད་འཇུག་ལས་གསུངས་པ་ལྟར། གྲུབ་མཐས་བློ་ཁ་མ་བསྒྱུར་བའི་སེམས་ཅན་རྣམས་ཆོས་དགེ་བ་ལ་འཇུག་པ་ཐམས་ཅད་དང༌། ཆོས་འདི་ལས་ཕྱི་རོལ་ཏུ་གྱུར་པ་རྣམས་ཀྱིས་དཀའ་ཐུབ་དང་གཙང་སྦྲ་ལ་སོགས་པ་དགེ་བའི་ཆོས་ལ་འཇུག་པ་གང་ཡོད་པ་དེ་དག་ཐམས་ཅད་ཀྱང༌། སངས་རྒྱས་རྣམས་ཀྱིས་གང་ལ་གང་འདུལ་གྱི་ཐུགས་རྗེའི་འཇུག་པ་ཡིན་པར་ཤེས་པར་བྱའོ། །༈ གཉིས་པ་ནི། རྒྱལ་བའི་བསྟན་པ་ལས་ཕྱི་རོལ་ཏུ་གྱུར་པ་རྣམས་ལ། ཐར་པ་བསྒྲུབ་པའི་ལམ་ཚང་ལ་མ་ནོར་བ་མེད་པས། སངས་རྒྱས་ཀྱི་དམ་པའི་ཆོས་ཁོ་ན་བླང་བར་བྱ་བ་ཡིན་ལ། དེ་ཡང་ཕྱོགས་ཞེན་ཙམ་ནི་མ་ཡིན་ཏེ། ཕྱི་ནང་གི་གཞུང་ལུགས་མཐའ་དག་ལ་བརྟག་པས། རྒྱལ་བའི་བསྟན་པ་ཁོ་ན་སྡིག་པ་མཐའ་དག་སྤངས་པ་དང༌། དགེ་བ་མཐའ་དག་གིས་ལེགས་པར་བརྒྱན་པས། ངན་སོང་གི་སྒོ་ཁེགས་ཤིང༌། མཐོ་རིས་ཀྱི་གོ་འཕང་
བདེ་བླག་ཏུ་སྒྲུབ་པ་དང༌། ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་ལ་སོགས་པའི་སྒོས་ཐར་པ་བསྒྲུབ་པ་དང༌། བསམ་པ་བྱང་ཆུབ་ཀྱི་སེམས་དང༌། སྦྱོར་བ་ཕ་རོལ་ཏུ་ཕྱིན་པ་བཅུ་ལ་སོགས་པའི་སྒོ་ནས་ཐམས་ཅད་མཁྱེན་པ་སྒྲུབ་པའི་ལམ་སྟོན་པ་དང༌། གཞུང་ལུགས་གཞན་དེ་དག་ལས་ནི་ཐར་པ་དང་ཐམས་ཅད་མཁྱེན་པའི་ལམ་སྟོན་པ་ལྟ་ཅི་ཞིག་སྨོས། དཀར་ནག་རྒྱུ་འབྲས་ཀྱི་བླང་དོར་ལ་བརྟེན་ནས། མཐོ་རིས་སྒྲུབ་པའི་ལམ་སྟོན་པ་ཙམ་ཡང་ཤིན་ཏུ་དཀོན་པའི་ཕྱིར་རོ། །དེ་སྐད་དུ་ཡང༌། བདག་ནི་སངས་རྒྱས་ཕྱོགས་མི་འཛིན། །སེར་སྐྱ་སོགས་ལ་མི་སྡང་ཡང༌། །གང་ཞིག་རིག་པར་ལྡན་པའི་ཚིག །དེ་ཉིད་འབའ་ཞིག་ཁོ་བོས་ལེན། །ཞེས་སློབ་དཔོན་བདེ་བྱེད་བདག་པོས་ལྷ་ལས་ཕུལ་བྱུང་གི་བསྟོད་པར་བཤད་པ་བཞིན་ནོ། །གསུམ་པ་ནི། དེ་སྐད་དུ་ཡང༌། གཏམ་བྱ་རིན་ཆེན་ཕྲེང་བ་ལས། བརྡའ་སྤྲོད་པ་དག་ཇི་ལྟ་བུར། །ཡི་གེའི་ཕྱི་མ་གློག་འཇུག་ལྟར། །དེ་བཞིན་སངས་རྒྱས་སེམས་ཅན་ལ། །ཇི་ཙམ་བཟོད་པའི་ཆོས་བསྟན་ཏོ། ཁ་ཅིག་ལ་ནི་སྡིག་པ་ལས། །རྣམ་པར་བཟློག་ཕྱིར་ཆོས་བསྟན་ཏོ། ཁ་ཅིག་བསོད་ནམས་བསྒྲུབ་བྱའི་ཕྱིར། ཁ་ཅིག་ལ་ནི་གཉིས་བརྟེན་པ། ཁ་ཅིག་ལ་ནི་གཉིས་མི་བརྟེན།། ཟབ་མོ་འཁུ་འཁྲིག་ཅན་འཇིག་པ། །སྟོང་ཉིད་སྙིང་རྗེའི་སྙིང་པོ་ཅན། །བྱང་ཆུབ་སྒྲུབ་པ་ཁ་ཅིག་ལའོ། །ཞེས་པ་ལྟར། རེ་ཞིག་བྱང་ཆུབ་སྒྲུབ་པའི་སྐལ་བ་མེད་པ་རྣམས་ལ། ལས་འབྲས་
ཀྱི་བླང་དོར་ཙམ་བསྟན་ནས་མཐོ་རིས་ལ་འཇོག་པ་དང༌། ཐར་པ་ཙམ་སྒྲུབ་པའི་སྐལ་བ་ཡོད་ཀྱང་བློ་ཆུང་རྣམས་ལ་ཐེག་དམན་གྱི་སྡེ་སྣོད་བསྟན་ནས། ཉན་རང་གི་ས་ལ་འགོད་པ་དང༌། བློ་གྲོས་ཆེན་པོ་རྣམས་ལ་ཐེག་པ་ཆེན་པོ་བསྟན་ཅིང༌། དེ་ལ་ཡང་གདུལ་བྱ་གཙོ་བོ་དང་ཕལ་པའི་དབྱེ་བས། གནས་སྐབས་དང་མཐར་ཐུག་གི་ངེས་དོན་སྟོན་པའི་མདོ་སོ་སོར་གསུངས་པ་དང༌། བློ་གྲོས་ཆེས་ཆེ་བ་དབང་པོ་རྣོན་པོ་རབ་ཀྱི་ཕུལ་དུ་གྱུར་པ་རྣམས་ལ་སྔགས་ཀྱི་ཐེག་པ་བསྟན་ཏེ། དེ་ལ་རྒྱུད་སྡེ་བཞིར་ཡོད་པ། དེ་དག་ཀྱང་སོ་སོའི་མོས་པའི་དབང་གིས་ཡིན་ཏེ། རྡོ་རྗེ་གུར་ལས། དམན་པ་རྣམས་ལ་བྱ་བའི་རྒྱུད། །བྱ་མིན་རྣལ་འབྱོར་དེ་ལྷག་ལ། །སེམས་ཅན་མཆོག་ལ་རྣལ་འབྱོར་མཆོག། རྣལ་འབྱོར་བླ་མེད་དེ་ལྷག་ལའོ། །ཞེས་གསུངས་པ་ལྟར་རོ། །བཞི་པ་ལ། ཐེག་པ་མཆོག་དམན་གྱི་ལམ་གྱི་ཁྱད་པར་དང༌། ཐེག་མཆོག་གསང་སྔགས་ཀྱི་ཐུན་མོང་མ་ཡིན་པའི་ལམ་གྱི་རྣམ་བཞག་དང༌། དེ་ལས་མཐར་ཐུག་གི་འབྲས་བུ་ཇི་ལྟར་འགྲུབ་ཚུལ་ཏེ་གསུམ་ལས། དང་པོ་ལ་ཐེག་དམན་གྱི་ལམ་དང་འབྲས་བུའི་རྣམ་བཞག་དང༌། ཕ་རོལ་ཏུ་ཕྱིན་པའི་ལམ་དང་འབྲས་བུའི་རྣམ་བཞག་དང༌། དེ་དག་ལས་གསང་སྔགས་ཁྱད་པར་འཕགས་པའི་ཚུལ་དང་གསུམ་ལས། །དང་པོ་ནི། བསམ་པ་ཁམས་གསུམ་གྱི་སྡུག་བསྔལ་ཐམས་ཅད་ལས་དང་ཉོན་མོངས་པ་ལས་བྱུང་བར་ཤེས་
ནས། དེ་ལས་ཐར་འདོད་ཀྱི་སེམས་བདེན་ཞེན་དང་བཅས་པས། ལམ་གྱི་འཇུག་སྒོ་ཐུན་མོང་གི་སྐྱབས་འགྲོ་དང༌། ཉེས་སྤྱོད་སྡོམ་པ་ལ་བརྟེན་ནས་ལྟ་བ་གང་ཟག་གི་བདག་མེད་དང༌། སྤྱོད་པ་གཞན་གནོད་གཞི་བཅས་ལས་བཟློག་པ་དང༌། སྒོམ་པ་ཞི་གནས་དང༌། ལྷག་མཐོང་ཉམས་སུ་བླངས་པས། འབྲས་བུ་ཁམས་གསུམ་གྱི་ཉོན་མོངས་པ་ལས་གྲོལ་བའི་ཕུང་པོ་ལྷག་མེད་ཀྱི་མྱང་འདས་སྒྲུབ་པར་བྱེད་དོ། །དེ་ཡང་ཉན་ཐོས་རྣམས་ལ་ནི་ཡོན་ཏན་གྱི་ཁྱད་པར་མང་པོ་ཐོབ་པ་དང༌། སེམས་ཅན་གྱི་དོན་ཅི་རིགས་པར་སྤྱོད་པ་ཡོད་མོད་ཀྱི། །འོན་ཀྱང་ཉན་ཐོས་དགྲ་བཅོམ་པ་ལ་ཡོན་ཏན་གྱི་ཁྱད་པར་དེ་དག་ངེས་པ་དགོས་པ་ནི་མ་ཡིན་ཏེ། ཤེས་རབ་རྐྱང་གྲོལ་གྱི་དགྲ་བཅོམ་པ་ལ། མངོན་ཤེས་ལྔ་ལ་སོགས་པ་མེད་པ་དང༌། དགྲ་བཅོམ་པ་འགའ་ཞིག་ལུང་གི་ཆོས་ཚིགས་སུ་བཅད་པ་གཅིག་ཙམ་ལས་མི་མཁྱེན་པ་ཡང་ཡོད་པར་བཤད་པའི་ཕྱིར་རོ། །ཉན་རང་དགྲ་བཅོམ་པ་གཉིས་ཅར་ཡང༌། ཁམས་གསུམ་གྱི་ཉོན་མོངས་པ་ས་བོན་དང་བཅས་པ་སྤངས་པ་ནི་ཡིན་མོད་ཀྱང༌། དེ་དག་གི་བག་ལ་ཉལ་དང་གནས་ངན་ལེན་སྤངས་པ་མ་ཡིན་ཞིང༌། ཤེས་བྱའི་སྒྲིབ་པ་ཡང་མ་སྤངས་པས་ན། སྤངས་པ་མཐའ་དག་མ་རྫོགས་པ་དང༌། ཇི་ལྟ་བ་དང་ཇི་སྙེད་པའི་ཆོས་ཀྱི་གནས་ཚུལ་མ་ལུས་པ་མངོན་སུམ་དུ་མ་རྟོགས་པས། རྟོགས་པའི་ཡོན་ཏན་མཐའ་དག་མ་རྫོགས་པ་དང༌། སེམས་ཅན་རྣམས་ལ་ཚད་མེད་པའི་སྙིང་རྗེ་ཙམ་
འཇུག་པ་ཡོད་ཀྱང༌། དེ་དག་བདག་ཉིད་ཀྱིས་འཁོར་བ་ལས་སྒྲོལ་བར་བརྩོན་པའི་ལྷག་པའི་བསམ་པ་མེད་པ་དང༌། སེམས་ཅན་ཉེ་ཚེ་བ་ཙམ་མ་གཏོགས། ཕྱོགས་དུས་ཚད་མེད་པའི་སེམས་ཅན་འཁོར་བ་ལས་སྒྲོལ་བར་ནུས་པ་མ་ཡིན་ནོ། །གཞན་ཡང་ཉན་ཐོས་ཀྱི་ཐེག་པའི་སྡེ་སྣོད་གསུམ་གྱིས་ཀྱང༌། བླ་ན་མེད་པའི་བྱང་ཆུབ་ཀྱི་ལམ་ཡོངས་སུ་རྫོགས་པར་མ་བསྟན་ཏེ། དེ་ལྟར་ཡང༌། རིན་ཆེན་ཕྲེང་བ་ལས། ཉན་ཐོས་ཐེག་པ་དེ་ལས་ནི། །བྱང་ཆུབ་སེམས་དཔའི་སྨོན་ལམ་དང༌། །སྤྱོད་པ་ཡོངས་བསྔོ་མ་བཤད་དེ། །བྱང་ཆུབ་སེམས་དཔར་ག་ལ་འགྱུར། །ཞེས་དང༌། མདོ་སྡེ་རྒྱན་ལས་ཀྱང༌། བསམ་པ་དང་ནི་བསྟན་པ་དང༌། །སྦྱོར་བ་དང་ནི་སྟོན་པ་དང༌། །དུས་འགལ་ཕྱིར་ན་དམན་པ་གང༌། །དེ་ནི་དམན་པ་ཁོ་ན་ཡིན། །ཞེས་གསུངས་སོ། །རང་རྒྱལ་རྣམས་ལ་ཡང༌། གཟུང་བ་ཆོས་ཀྱི་བདག་མེད་ལ་གསལ་སྣང་སྐྱེས་པ་ལ་སོགས་པའི་ལམ་གྱི་མངོན་རྟོགས་ཀྱི་ཁྱད་པར་ཅུང་ཟད་ཙམ་མ་གཏོགས། ལྷག་མ་གཞན་རྣམས་ཉན་ཐོས་དང་འདྲ་ལ། རང་རྒྱལ་གྱི་ལམ་སྟོན་པའི་སྡེ་སྣོད་ལ་སོགས་པ་ཞིག་ཡོད་པ་དང༌། མེད་པ་སྣ་ཚོགས་སུ་གསུངས་པ་ལ། མེད་པ་ནི་རང་རེའི་སྟོན་པ་འདི་ཉིད་ཀྱི་བསྟན་པའི་དབང་དུ་བྱས་ལ། ཡོད་པ་ནི་བསྟན་པ་སྤྱིའི་དབང་དུ་བྱས་སོ། །གཉིས་པ། ཕ་རོལ་དུ་ཕྱིན་པའི་ལམ་དང་འབྲས་བུ་བཤད་པ་ལ། དེ་ལ་ཕ་རོལ་ཏུ་ཕྱིན་པའི་ཐེག་པ་དངོས་ནི་ཐེག་པ་ཆེན་པོ་འདི་ཉིད་
དེ། སློབ་དཔོན་དཔའ་བོས་བསྟོད་པ་བརྒྱ་ལྔ་བཅུ་པ་ལས། བསེ་རུ་ལྟ་བུ་རྣམས་ལ་ནི། །ཕ་རོལ་ཕྱིན་པའི་མིང་ཡང་མེད། །བཅོམ་ལྡན་ཉག་གཅིག་ཕ་རོལ་ཕྱིན། །དྲུག་གི་སྤྱི་ལ་བཞུགས་པ་ལ། །ཞེས་གསུངས་པས་སོ། །འོན་ཀྱང་ཐེག་པ་དམན་པ་རྣམས་ཀྱང་ཕ་རོལ་ཏུ་ཕྱིན་པའི་ཐེག་པའི་ཕྱོགས་མཐུན་ནམ། ཡན་ལག་ཉེ་ཚེ་བ་ཙམ་ཡིན་པར་ནི་ཤེས་སོ། །འདི་ལ་གསུམ་སྟེ། ཕ་རོལ་ཏུ་ཕྱིན་པའི་ཐེག་པའི་སྡཻ་སྣོད་བཤད་པ་དང༌། དེ་ཐེག་དམན་ལས་ཁྱད་པར་དུ་འཕགས་པའི་ཚུལ་དང༌། ཕ་རོལ་ཏུ་ཕྱིན་པའི་ལམ་དང་འབྲས་བུ་དངོས་བཤད་པའོ། །དང་པོ་ནི། སྤྱིར་རྒྱལ་བའི་བཀའ་ལ་གསུང་རབ་ཡན་ལག་བཅུ་གཉིས་སུ་ཡོད་དེ་དེ་ལ་ཡན་ལག་བཅུ་གཉིས་ནི། བརྒྱད་སྟོང་པའི་འགྲེལ་པ་སྙིང་པོའི་མཆོག་ལས། མདོ་སྡེ་དབྱངས་བསྙན་ལུང་དུ་བསྟན། །ཚིགས་བཅད་ཆེད་བརྗོད་གླིང་གཞི་དང༌། །རྟོག་བརྗོད་དེ་ལྟ་བུ་བྱུང་དང༌། སྐྱེས་རབས་ཤིན་ཏུ་རྒྱས་པ་དང༌། །རྨད་བྱུང་གཏན་ལ་དབབ་པའི་སྡེ། །ཞེས་གསུངས་པ་ལས། ཤིན་ཏུ་རྒྱས་པའི་སྡེ་ནི་ཐེག་ཆེན་ཐུན་མོང་མ་ཡིན་པའི་མདོ་སྡེ་ཡིན་ལ། ལྷག་མ་རྣམས་ལའང་ཐེག་པ་ཆེན་པོ་ཅི་རིགས་པ་ནི་ཡིན་མོད་ཀྱི། །ཕལ་ཆེར་ཐུན་མོང་ཡིན་ལ། མདོ་སྡེ་ལ་སོགས་པ་གསུང་རབ་ཡན་ལག་བཅུ་གཉིས་ནི། ཉུང་ཞིངཉེ་ཚེ་བ་ཙམ་ཡིན་ལ་ཤིན་ཏུ་རྒྱས་པའི་སྡེ་ལ་ནི། མཐའ་མེད་པར་བཤད་དོ། །གཉིས་པ་ཐེག་དམན་ལས་ཁྱད་པར་འཕགས་པའི་ཚུལ་ནི། མདོ་སྡེ་རྒྱན་ལས་ཇི་སྐད་དུ། དམིགས་པ་ཆེ་བ་
ཉིད་དང་ནི། །དེ་བཞིན་སྒྲིབ་པ་གཉིས་དག་དང༌། །ཡེ་ཤེས་བརྩོན་འགྲུས་རྩོམ་པ་དང༌། །ཐབས་ལ་མཁས་པར་གྱུར་པ་དང༌། །ཡང་དག་འགྲུབ་པ་ཆེན་པོ་དང༌། །སངས་རྒྱས་འཕྲིན་ལས་ཆེན་པོ་སྟེ། །ཆེན་པོ་བདུན་དང་ལྡན་པའི་ཕྱིར། །ཐེག་ཆེན་ཞེས་ནི་ངེས་པར་བརྗོད། །ཅེས་ཐེག་པ་ཆེན་པོ་བདུན་དང་ལྡན་པའི། །ལམ་དང་འབྲས་བུའི་སྒོ་ནས་ཁྱད་པར་དུ་འཕགས་པ་དང༌། ཤིན་ཏུ་རྒྱས་པའི་སྡེ་སྣོད་ཀྱང་ཐེག་དམན་གྱི་སྡེ་སྣོད་ལས་ཁྱད་པར་འཕགས་པའི་ཚུལ་ནི། ཐེག་བསྡུས་ལས། ཤེས་བྱའི་གནས་དང་མཚན་ཉིད་དེར་འཇུག་དང༌། །དེ་ཡི་རྒྱུ་དང་དེ་རབ་དབྱེ་བ་དང༌། །བསླབ་པ་གསུམ་དང་དེ་འབྲས་སྤངས་པ་དང༌། །ཡེ་ཤེས་ཐེག་པ་མཆོག་གྱུར་ཁྱད་པར་འཕགས། །བསྟན་འདི་འདི་ལྟར་གཞན་ལ་མ་མཐོང་ལ། །འདི་དག་བྱང་ཆུབ་མཆོག་གི་རྒྱུའི་མཐོང་བས། །གནས་བཅུ་བསྟན་པས་ཁྱད་ཞུགས་གང་ཡིན་དེས། ཐེག་པ་ཆེན་པོ་སངས་རྒྱས་བཀའ་འདོད་དོ། །ཞེས་གསུངས་ཤིང༌། གཞན་ཡང་ཐེག་པ་ཆེན་པོ་མདོ་སྡེ་རྒྱན་དང༌། དབུ་མ་རིན་ཆེན་ཕྲེང་བ་དང༌། བྱང་ཆུབ་སེམས་དཔའི་སྤྱོད་པ་ལ་འཇུག་པ་དང༌། སའི་དངོས་གཞི་ལ་སོགས་པ་ནས་ཀྱང༌། ཐེག་པ་མཆོག་དམན་གྱི་ཁྱད་པར་དང༌། ཐེག་པ་ཆེན་པོ་བཀའ་སྒྲུབ་པའི་ཚུལ་མང་དུ་གསུངས་སོ། །གསུམ་པ་ཕ་རོལ་དུ་ཕྱིན་པའི་ལམ་དང་འབྲས་བུ་དངོས་བཤད་པ་ནི། དེ་ཡང་མདོ་སྡེ་རྒྱན་ལས། རིགས་དང་ཆོས་ལ་མོས་པ་དང༌། །དེ་བཞིན་སེམས་ནི་
བསྐྱེད་པ་དང༌། །སྦྱིན་ལ་སོགས་པ་བསྒྲུབ་པ་དང༌། །སྐྱོན་མེད་པ་ལ་འཇུག་ཉིད་དང༌། །སེམས་ཅན་རྣམས་ཡོངས་སྨྀན་བྱེད་དང༌། །ཞིང་ནི་རྣམ་པར་སྦྱོང་བ་དང༌། །མི་གནས་མྱ་ངན་འདས་པ་དང༌། །བྱང་ཆུབ་མཆོག་དང་སྟོན་པའོ། །ཞེས་གསུངས་ཏེ། དེ་ལ་དང་པོ་རིགས་ནི། སེམས་རང་བཞིན་གྱི་འོད་གསལ་བ་ནི་རང་བཞིན་དུ་གནས་པའི་རིགས་དང༌། བརྒྱད་སྟོང་དོན་བསྡུས་ལས། འདི་ལྟར་རྣམ་ཤེས་རང་བཞིན་རིགས། །བདེ་དང་ཤེས་རབ་བདག་ཉིད་ཡིན། །ཅེས་གསུངས་སོ། །སེམས་དེ་ཉིད་དགེ་བའི་ཆོས་ལ་གོམས་པ་ལས། བྱང་ཆུབ་ལ་ཉེ་བར་གྱུར་པའི་ཡོན་ཏན་རྒྱས་པར་འགྱུར་བ་ནི་རྒྱས་འགྱུར་གྱི་རིགས་སོགས་འཕགས་པ་ཀླུ་སྒྲུབ་ཀྱི་ཞལ་སྔ་ནས་ཀྱང༌། དཀའ་སྤྱོད་སྣ་ཚོགས་སྦྱིན་པ་དང་སོགས། རྒྱུད་བླ་མར་ཇི་ལྟར་མྱུག་སོགས་རིམ་སྐྱེ་བས་སོགས། མདོ་ལུགས་ལྔ་བཅུ་པ་སོགས། དེ་ཕྱིར་རང་བཞིན་གནས་རིགས་དེ་གདོད་མ་ནས་སངས་རྒྱས་ཡིན་ཀྱང༌། དེ་སད་བྱེད་ཀྱི་རྐྱེན་གྱིས་མ་སད་ན་ལམ་དུ་མི་འཇུག་པ་ལས། དེ་ལ་སྐབས་འདིར་རིགས་སད་པ་ནི་ལམ་གྱི་འཇུག་སྒོ་ཐོག་མ་ཡིན་ནོ། །རིགས་ཀྱི་རྣམ་བཞག་ནི། མདོ་སྡེ་རྒྱན་ལས། ཡོད་དང་མཆོག་དང་མཚན་ཉིད་དང༌། །རྟགས་དང་རིགས་རབ་དབྱེ་བ་དང༌། །ཉེས་དམིགས་དང་ནི་ཕན་ཡོན་དང༌། །དཔེ་རྣམས་གཉིས་དེར་རྣམ་པ་བཞི། །ཞེས་གསུངས་ཏེ། དེ་ཡང་རིགས་ཐ་དད་པ་དུ་མ་ཡོད་པ་དང༌། རིགས་མཆོག་དམན་གྱི་དབྱེ་བ་དང༌། སོ་སོའི་མཚན་ཉིད་དང་
རིགས་སད་པའི་རྟགས་དང༌། རིགས་ཀྱི་རབ་ཏུ་དབྱེ་བ་དང༌། རིགས་སད་པ་ལ་བར་དུ་གཅོད་པའི་ཉེས་དམིགས་དང༌། རིགས་སད་པའི་ཕན་ཡོན་དང༌། ཐེག་པ་ཆེན་པོའི་རིགས་ཀྱི་དཔེ་རྣམ་པ་གཉིས་དང༌། རིག་བཞིའི་དབྱེ་བ་ལ་སོགས་པ་རྒྱས་པར་བཤད་དོ། །རིགས་སད་ན་མོས་པའི་བློ་སྐྱེ་བས། དེའི་འོག་ཏུ་མོས་པ་བསྟན་ཏེ། དེ་ལ་མོས་པ་ནི། དཀར་པོའི་ཆོས་ཐམས་ཅད་ཀྱི་རྩ་བར་གསུངས་ཏེ།སྤྱོད་འཇུག་ལས། དགེ་བའི་ཆོས་རྣམས་ཐམས་ཅད་ཀྱི་རྩ་བའང་མོས་པར་ཐུབ་པས་གསུངས། །ཞེས་གསུངས་པ་འདི་ལ། མོས་པའི་དབྱེ་བ། བར་ཆད་ཕན་ཡོན། མོས་པའི་འབྲས་བུའོ། །དང་པོ་ལ། ངོ་བོའི་སྒོ་ནས། སའི་སྒོ་ནས། བདག་པོའི་སྒོ་ནས། ཆུང་འབྲིང་གི་སྒོ་ནས། ཡུལ་གྱི། ལམ་གྱི་དབྱེ་བ་སྟེ་དྲུག་ལས། དང་པོ་ནི། སྐྱེ་དང་མ་སྐྱེས་ཞེས་སོ། །གཉིས་པ་ནི། འཛིན་དང་བཟུང་དང་ཞེས་སོ། །གསུམ་པ་ནི། གྲོགས་བླང་བདག་ཉིད་དང་ནི་ནོར་པ་དང༌། །མ་ནོར་གཞན་དང་མངོན་སུམ་མ་ཡིན་གཞན། །སྒྲ་བྱུང་འཚོལ་བ་དང་ནི་ལྟ་བའོ། །བཞི་པ་ནི། འཕྲོག་དང་འདྲེས་དང་མི་མཐུན་ཕྱོགས་མ་འདྲེས། །ཞེས་སོ། །ལྔ་པ་ནི། དམན་དང་རྒྱ་ཆེ་ཞེས་སོ། །དྲུག་པ་ནི། བསྒྲིབས་དང་མ་བསྒྲིབས་དང༌། བརྩོན་དང་མི་བརྩོན་བསགས་དང་མ་བསགས་དང༌། །བརྟན་བཞུགས་རིང་དུ་སོང་བའི་མོས་པའོ། །ཞེས་སོ། །གཉིས་པ་མོས་པའི་བར་ཆད་ནི། ཡིད་ལ་མི་
བྱེད་པ་མང་བ་དང༌། །ཞེས་སོ། །གསུམ་པ་ཕན་ཡོན་ནི། བསོད་ནམས་ཆེ་དང་འགྱོད་པ་མེད། །ཅེས་སོགས་སོ། །བཞི་པ་འབྲས་བུ་ནི། དེ་ལྟར་འཕགས་པ་ཆེན་པོའི་ཆོས་ནི་ཡངས་གྱུར་ལ། །བློ་དང་ལྡན་པས་རྟག་ཏུ་མོས་པ་ཆེ་བསྐྱེད་ན། །བསོད་ནམས་རྒྱ་ཆེན་རྒྱུན་མི་འཆད་དང་དེ་འཕེལ་དང༌། །ཡོན་ཏན་དཔག་ཏུ་མེད་པའི་བདག་ཉིད་ཆེན་པོར་འགྱུར། །ཞེས་མོས་པའི་ལེའུར་རྒྱས་པར་བཤད་པ་ལས་ཤེས་པར་བྱའོ། །མོས་པ་ལ་གནས་པས་སེམས་བསྐྱེད་པར་བྱེད་པས། དེའི་འོག་ཏུ་སེམས་བསྐྱེད་བསྟན་ཏེ། དེའི་རྣམ་བཞག་ནི། བྱང་ས་དང༌། མདོ་སྡེ་རྒྱན་དང༌། བསླབ་བཏུས་སོགས་ལས་རྒྱས་པར་བཤད་པས། མདོ་སྡེ་རྒྱན་ལས་འབྱུང་བ་ལྟར་མདོ་ཙམ་བརྗོད་ན། མཚན་ཉིད། དབྱེ་བ། བསྡུས་ཏེ་སེམས་བསྐྱེད་པར་གདམས་པ་སྟེ་གསུམ་ལས། དང་པོ་ནི། སྤྲོ་བ་ཆེ་དང་རྩོམ་པ་ཆེ། །དོན་ཆེ་བ་དང་འབྱུང་བ་ཆེ། །བྱང་ཆུབ་སེམས་དཔའི་སེམས་དཔའ་སྟེ། །དོན་གཉིས་ལྡན་པའི་སེམས་འབྱུང་བ། །ཞེས་སོ། །གཉིས་པ་ལ་ས་མཚམས་ཀྱི་དབྱེ་བ། རང་བཞིན་གྱི་དབྱེ་བ། ཆེ་བའི་དཔེས་དབྱེ་བའོ། །དང་པོ་ནི། སེམས་བསྐྱེད་དེ་ནི་ས་རྣམས་ལ། །མོས་དང་ལྷག་བསམ་དག་པ་དང༌། །རྣམ་པར་སྨིན་པ་གཞན་དུ་འདོད། །དེ་བཞིན་སྒྲིབ་པ་སྤངས་པའོ། །ཞེས་སོ། །གཉིས་པ་ལ་ཀུན་རྫོབ་སེམས་བསྐྱེད་དང༌། དོན་དམ་སེམས་བསྐྱེད་གཉིས་སོ། །དང་པོ་ནི། གྲོགས་སྟོབས་རྒྱུ་སྟོབས་རྩ་བའི་སྟོབས། །ཐོས་སྟོབས་དགེ་བ་གོམས་པ་
ལས། །མི་བརྟན་པ་དང་བརྟན་འབྱུང་བ། །གཞན་གྱི་བརྟན་པའི་སེམས་བསྐྱེད་བཤད། །ཅེས་སོ། །གཉིས་པ་ནི། རྫོགས་པའི་སངས་རྒྱས་རབ་བརྙེས་བྱ། །བསོད་ནམས་ཡེ་ཤེས་ཚོགས་རབ་བསགས། །ཆོས་ལ་མི་རྟོག་ཡེ་ཤེས་ནི། །སྐྱེས་ཕྱིར་དེ་བཞིན་དམ་པར་འདོད། །ཅེས་སོ། །གསུམ་པ་ཆེ་བའི་དཔེས་དབྱེ་བ་ནི། །བསྐྱེད་པ་ས་མཚུངས་པ་སྟེ། །གཞན་ནི་བཟང་པོའི་གསེར་དང་འདྲ། །ཟླ་བ་ཡར་གྱི་ཚེས་པ་བཞིན། །གཞན་ནི་མེ་དང་འདྲ་ཤེས་བྱ། །གཞན་ནི་གཏེར་ཆེན་བཞིན་ཤེས་བྱ། །གཞན་ནི་རིན་ཆེན་འབྱུང་གནས་བཞིན། །རྒྱ་མཚོ་འདྲ་བར་ཤེས་བྱ་གཞན། །རྡོ་རྗེ་དང་འདྲ་རི་རབ་འདྲ། །སྨན་གྱི་རྒྱལ་པོ་འདྲ་བ་སྟེ། །གཞན་ནི་འཛའ་ཆེན་འདྲར་ཤེས་བྱ། །ཡིད་བཞིན་ནོར་བུ་འདྲ་བ་དང༌། །གཞན་ནི་ཉི་མ་འདྲར་ཤེས་བྱ། །གཞན་ནི་དྲི་ཟའི་དབྱངས་སྙན་བཞིན། །གཞན་ནི་རྒྱལ་པོ་ལྟར་ཤེས་བྱ། །དེ་བཞིན་གཞན་ནི་མཛོད་ལྟ་བུ། །ལམ་པོ་ཆེ་དང་འདྲར་ཤེས་བྱ། །ཐེག་པ་འདྲ་བར་ཤེས་བྱ་སྟེ། །སེམས་བསྐྱེད་བཀོད་མ་འདྲ་བ་ཡིན། །ཀུན་གཞིའི་སྒྲ་དང་འདྲ་བ་སྟེ། །ཀླུང་ཆེན་རྒྱུན་དང་འདྲ་བའོ། །རྒྱལ་སྲས་རྣམས་ཀྱི་སེམས་བསྐྱེད་པ། །སྤྲིན་དང་འདྲ་བར་བསྟན་པ་སྟེ། །ཞེས་སོ། །གསུམ་པ་བསྡུས་ཏེ་སེམས་བསྐྱེད་པར་གདམས་པ་ནི། དེ་ཕྱིར་དེར་ཡོན་ཏན་དབང་ཕྱུག །སེམས་ནི་དགའ་བས་ཡང་དག་བསྐྱེད། །ཅེས་འབྱུང་བ་ལྟར་རོ། །བསམ་པ་བྱང་ཆུབ་ཀྱི་སེམས་བརྟན་པས། སྦྱོར་བ་ཕ་རོལ་ཏུ་ཕྱིན་པ་ལ་སློབ་པའི་ཕྱིར། དེའི་
འོག་ཏུ་ཕ་རོལ་ཏུ་ཕྱྀན་པ་དྲུག་བསྟན་ཏེ། དེ་ལ་ཕ་རོལ་ཏུ་ཕྱིན་པ་དྲུག་གི་རྣམ་བཞག་ནི། ཐེག་པ་ཆེན་པོ་མདོ་སྡེ་ཐམས་ཅད་ནས། ཟད་པ་མེད་པར་གསུངས་ལ། མདོ་དོན་སྙིང་པོར་དྲིལ་བ་ནི། མདོ་སྡེ་རྒྱན་ལས། གྲངས་དང་དེ་ཡི་མཚན་ཉིད་གོ་རིམ་དང༌། །ངེས་པའི་ཚིག་དང་གོམས་པའི་ཡོན་ཏན་དང༌། །དེ་དག་རབ་དབྱེ་བསྡུ་དང་མི་མཐུན་ཕྱོགས། །ཡོན་ཏན་ཕན་ཚུན་རྣམ་ངེས་ཡིན་ཤེས་བྱ། །ཞེས་རྣམ་བཞག་རྣམ་པ་བཞིར་གསུངས་ལ། དེའི་དོན་མདོ་ཙམ་ཞིག་བརྗོད་ན། ཕ་རོལ་ཏུ་ཕྱིན་པ་དྲུག་གི་སྒྲ་དོན་དང༌། གོ་རིམ་དང༌། ཡན་ལག་དང༌། དབྱེ་བ་དང༌། དངོས་བཏགས་ཀྱི་ཁྱད་པར་སྟེ་རྣམ་པ་ལྔ་ལས། དང་པོ་མདོ་སྡེ་རྒྱན་ལས། དབུལ་བ་འདོར་བར་བྱེད་པ་དང༌། །བསིལ་བ་ཐོབ་དང་ཁྲོ་བཟོད་དང༌། །མཆོག་སྦྱོར་བ་དང་ཡིད་འཛིན་དང༌། །དོན་དམ་ཤེས་པའི་ཕྱིར་བཤད་དོ། །ཞེས་གསུངས། གཉིས་པ་ནི། ཡང་དེ་ཉིད་ལས། སྔ་མ་ལ་བརྟེན་ཕྱི་མ་སྐྱེ། །དམན་དང་མཆོག་ཏུ་གནས་ཕྱིར་དང༌། །རགས་པ་དང་ནི་ཕྲ་བའི་ཕྱིར། །དེ་དག་རིམ་པར་བསྟན་པ་ཡིན་ཞེས་གསུངས། །གསུམ་པ་ནི་དེ་ཉིད་ལས། །སྦྱིན་པ་མི་མཐུན་ཕྱོགས་ཉམས་དང༌། །རྣམ་པར་མི་རྟོག་ཡེ་ཤེས་ལྡན། །འདོད་པ་ཐམས་ཅད་ཡོངས་རྫོགས་བྱེད། །སེམས་ཅན་རྣམ་སྨིན་བྱེད་རྣམ་གསུམ། །ནས་ཤེས་རབ་མི་མཐུན་ཕྱོགས་ཉམས་དང༌། ནས་བྱེད་རྣམ་གསུམ་ཞེས་གསུངས་ཏེ། དེ་ཡང་སྦྱིན་པ་ལ་མཚོན་ན། སྦྱིན་པའི་མི་མཐུན་ཕྱོགས་སེར་སྣ་ཉམས་པ་དང༌། སྦྱིན་པ་
སྦྱིན་བྱ། ལེན་པ་པོ་གསུམ་མི་དམིགས་པའི་ཤེས་རབ་ཀྱི་ཟིན་པ་དང༌། སྦྱིན་པ་དེ་ཉིད་ཀྱིས་སེམས་ཅན་ཐམས་ཅད་ཀྱི་འདོད་པ་ཡོངས་སུ་རྫོགས་པར་བྱེད་པ་དང༌། དེ་ལ་བརྟེན་ནས་སེམས་ཅན་རྣམས་བྱང་ཆུབ་ཏུ་སྨིན་པར་བྱེད་པ་སྟེ། ཁྱད་ཆོས་བཞི་དང་ལྡན་པའོ། །ལྷག་མ་རྣམས་ལའང་དེ་བཞིན་དུ་སྦྱར་བས་ཤེས་སོ། །བཞི་པ་ནི་སྦྱིན་པ་ལ། ཟང་ཟིང་གི་ཆོས་ཀྱི་མི་འཇིགས་པ་སྟེ་གསུམ། ཚུལ་ཁྲིམས་ལ་ཉེས་སྤྱོད་སྡོམ་པའི་དགེ་བ་ཆོས་སྡུད། སེམས་ཅན་དོན་བྱེད་གསུམ། བཟོད་པ་ལ་སྡུག་བསྔལ་དང་ལེན་གྱི། གནོད་པ་ལ་ཇི་མི་སྙམ་པ། ཆོས་ལ་ངེས་པར་སེམས་པའི་གསུམ། བརྩོན་འགྲུས་ལ། གོ་ཆའི། སྦྱོར་བའི། སེམས་ཅན་དོན་བྱེད་པའི་གསུམ། བསམ་གཏན་ལ། མཐོང་ཆོས་ལ་བདེ་བར་གནས་པའི། ཡོན་ཏན་མངོན་པར་སྒྲུབ་པའི། སེམས་ཅན་དོན་བྱེད་ཀྱི་གསུམ། ཤེས་རབ་ལ། ཀུན་རྫོབ་ཤེས་པའི། དོན་དམ་ཤེས་པའི། སེམས་ཅན་གྱི་དོན་ཤེས་པའི་ཤེས་རབ་སྟེ་གསུམ་མོ། །ཕ་རོལ་ཏུ་ཕྱིན་པ་དྲུག་པོ་དེ་དག་ལས། དང་པོ་གསུམ་བསོད་ནམས་གྱི་ཚོགས་དང༌། ཕྱི་མ་གསུམ་ཡེ་ཤེས་ཀྱི་ཚོགས་སུ་ཟླ་བ་གྲགས་པས་བཤད་དེ། ཇི་སྐད་དུ། སྦྱིན་སོགས་ཆོས་གསུམ་དེ་དག་ཕལ་མོ་ཆེར། །བདེ་བར་གཤེགས་པས་ཁྱིམ་པ་རྣམས་ལ་བསྔགས། །བསོད་ནམས་ཞེས་བྱའི་ཚོགས་ཀྱང་དེ་དག་སྟེ། །སངས་རྒྱས་གཟུགས་ཀྱི་བདག་ཉིད་སྐུ་ཡི་རྒྱུད། །ཅེས་གསུངས་
ཞིང༌། རྒྱལ་ཚབ་བྱམས་པས་ནི། དང་པོ་གཉིས་བསོད་ནམས་ཀྱི་ཚོགས་དང༌། ཕྱི་མ་ཡེ་ཤེས་ཀྱི་ཚོགས་དང༌། བར་པ་གསུམ་ཚོགས་གཉིས་ཀས་བསྡུས་པར་གསུངས་ཏེ། །དེ་སྐད་དུ་ཡང་མདོ་རྒྱན་ལས། སྦྱིན་དང་ཚུལ་ཁྲིམས་བསོད་ནམས་ཀྱི། །ཚོགས་ཡིན་ཤེས་རབ་ཡེ་ཤེས་ཏེ། །གསུམ་པོ་གཞན་ནི་གཉིས་ཀའི་སྟེ། །ལྔ་ཆར་ཡང་ནི་ཡེ་ཤེས་ཚོགས། །ཞེས་དང༌། །གཞན་ཡང་རིན་ཆེན་ཕྲེང་བ་ལས། ཚུལ་ཁྲིམས་སྦྱིན་པ་གཞན་གྱི་དོན། །བརྩོན་འགྲུས་བཟོད་པ་བདག་ཉིད་ཀྱི། །བསམ་གཏན་ཤེས་རབ་ཐར་པའི་རྒྱུ། །སྙིང་བརྩེ་བས་ནི་དོན་ཀུན་འགྲུབ། །ཅེས་ཀྱང་གསུངས་སོ། །གཞན་ཡང་བྱང་ཆུབ་སེམས་དཔས་གཞན་གྱི་དོན་སྤྱོད་པ་ལ་བསྡུ་བའི་དངོས་པོ་བཞི་དགོས་ཏེ། འདིའི་རྒྱས་བཤད་ཕར་ཕྱིན་ལེའུ་ན་ཡོད། དེ་དག་ནི་ཕ་རོལ་ཏུ་ཕྱིན་པ་དྲུག་པོ་དེ་དག་ལས་རྫས་ཐ་དད་དུ་མེད་དེ། དེ་ཡང་ཟང་ཟིང་སྦྱིན་པ་དང༌། ཆོས་ཀྱི་སྦྱིན་པ་དང༌། ཕྱིན་དྲུག་གི་དོན་ལ་གཞན་གཞུག་པ་དང༌། རང་ཉིད་ཀྱང་འཇུག་པ་སྟེ། རིམ་པ་བཞིན་དུ་བྱིན་པ་དང༌། སྙན་པར་སྨྲ་བ་དང༌། དོན་སྤྱོད་པ་དང༌། དོན་མཐུན་པ་རྣམས་ཡིན་ཏེ། བྱིན་མཚུངས་དེ་སྟོན་ལེན་འཇུག་དང༌། །བདག་ཉིད་རྗེས་སུ་འཇུག་བྱེད་པ། །སྙན་པར་སྨྲ་དང་དོན་སྤྱོད་དང༌། །དོན་མཐུན་ཉིད་དུ་འདོད་པ་ཡིན། །ཞེས་སོགས། ལྔ་པ་དངོས་བཏགས་ཀྱི་ཁྱད་པར་ལ། འགའ་ཞིག་ནི་
ཕ་རོལ་ཏུ་ཕྱིན་པ་དངོས་ནི་སངས་རྒྱས་ཁོ་ན་ལ་ཡོད་པ་དང༌། ལམ་ཞུགས་ཀྱི་སྦྱིན་སོགས་ནི། དེའི་སྒྲུབ་པ་ཡིན་པས་བཏགས་པ་བ་དང༌། དབུ་མ་ལ་འཇུག་པར་ནི། རྫོགས་སངས་རྒྱས་ཀྱི་བྱང་ཆུབ་ཕྱིར་དངོས་ཀྱང༌། །གསུམ་དམིགས་ཡོད་ན་དེ་ནི་འཇིག་རྟེན་པའི། །དམིགས་པ་མེད་ན་དེ་ཉིད་སངས་རྒྱས་ཀྱིས། །འཇིག་རྟེན་འདས་པའི་ཕ་རོལ་ཕྱིན་ཅེས་བསྟན། །ཅེས་སོ་སོའི་སྐྱེ་བོའི་ལམ་ནའང་ཕར་ཕྱྀན་དྲུག་དངོས་ཡོད་པར་བཤད་ཡོད་ཀྱི། འདིར་རེ་ཞིག །མདོ་དང་བསྟན་བཅོས་ཤས་ཆེ་བའི་དབང་དུ་བྱས་ན། འཕགས་རྒྱུད་ཀྱི་དེ་རྣམས་དངོས་དང༌། ཚོགས་སྦྱོར་གྱི་དེ་རྣམས་བཏགས་པ་བ་ཡིན་ནོ་ཞེས་ཤེས་པར་བྱའོ། །དེ་ལྟ་མོད་ཀྱི། ཡན་ལག་བཞི་པོ་དང་མི་ལྡན་པའི་སྦྱིན་སོགས་ནི་ཕ་རོལ་ཏུ་ཕྱིན་པ་དངོས་དང་བཏགས་པ་གང་དུ་ཡང་མི་རུང་ངོ༌། །དེ་ལྟར་ན། སྦྱོར་བའི་ལམ་དུ་ཕ་རོལ་ཏུ་ཕྱིན་པ་དྲུག་གི་སྒྲུབ་པ་ལ་གནས་པས། མཐོང་བའི་ལམ་སྐྱེ་བར་འགྱུར་བས། དེ་འོག་ཏུ་སྐྱོན་མེད་པ་ལ་འཇུག་པ་སྟེ། མཐོང་ལམ་གྱི་རྣམ་བཞག་འབྱུང་ངོ༌། །དེ་ནས་ས་བདུན་པའི་བར་ནི། སེམས་ཅན་རྣམས་ཡོངས་སུ་སྨིན་པའི་ས་དང༌། ས་བརྒྱད་པ་དང༌། དགུ་པ་གཉིས་ནི་ཞིང་རྣམ་པར་སྦྱོང་བའི་ས་དང༌། ས་བཅུ་པ་ནི་མི་གནས་པའི་མྱ་ངན་ལས་འདས་པའི་ས་དང༌། བཅུ་གཅིག་པ་ཀུན་ཏུ་འོད་ཀྱི་སའམ། སངས་རྒྱས་ཀྱི་ས་ནི་བྱང་ཆུབ་མཆོག་སྟེ་བདག་ཉིད་ཀྱིས་རང་དོན་ཆོས་
ཀྱི་སྐུ་མངོན་དུ་བྱེད་པ་དང༌། མི་གནས་པའི་མྱ་ངན་ལས་འདས་པ་སྟོན་ཏེ། གཟུགས་ཀྱི་སྐུ་རྣམ་པ་གཉིས་ཀྱིས། གཞན་གྱི་དོན་རྒྱུན་ཆད་མེད་པར་སྤྱོད་པའོ། །གསུམ་པ་དེ་དག་ལས་གསང་སྔགས་ཁྱད་པར་དུ་འཕགས་པའི་ཚུལ་ལ། སྤྱིར་མདོ་སྔགས་ཀྱི་ཁྱད་པར་དང༌། བྱེ་བྲག་ཏུ་མདོ་ལས་སྔགས་ལྷག་པའི་ཚུལ་གཉིས་ལས། དང་པོ་ལ། སྤྱིར་མདོ་སྡེ་དང༌། རྒྱུད་སྡེ་ཞེས་པ་དང༌། མདོ་རྒྱུད་ཅེས་པ་འགལ་བ་ནི་མ་ཡིན་ཏེ། གསང་སྔགས་ཀྱི་རྒྱུད་སྡེ་ཐམས་ཅད་ཀྱང་མདོ་སྡེ་ཡིན་པ་དང༌། ཆ་ཤས་ཙམ་སྟོན་པའི་དབང་དུ་བྱས་ནས། སྡེ་སྣོད་གསུམ་ཆར་དུ་གཏོགས་པ་དང༌། རིག་པ་འཛིན་པའི་སྡེ་སྣོད་ཅེས་ཀྱང་བྱ་བ་ཡིན་ཏེ། དེ་ཡང་སློབ་དཔོན་ཤནྟི་པས་ཟབ་མོའི་དོན་བསྡུས་ཏེ་སྟོན་པས་མདོ་སྡེའོ། །ཞེས་པ་དང༌། དཔུང་བཟང་ལས། གསང་སྔགས་མདོ་སྡེའི་ཚུལ་དུ་བཤད་ཀྱིས་ཉོན། །ཞེས་པ་དང༌། མདོ་སྡེ་འདི་ནི་ཉན་བྱེད་ན། །ཞེས་དང༌། གསེར་འོད་དམ་པ་མདོ་སྡེའི་དབངཔོའི་རྒྱལ་པོ་ཞེས་སོགས་རྒྱུད་མང་པོ་ལ་མདོ་སྡེའི་མཚན་ཡོད་པའང་མང་དུ་འབྱུང་ངོ༌། །སློབ་དཔོན་ཨ་བྷ་ཡཱ་ཀ་ར་ནི་གསང་སྔགས་བསླབ་པ་གསུམ་ཀ་སྟོན་པས་སྡེ་སྣོད་གསུམ་ཀའོ། །ཞེས་པ་དང༌། སློབ་དཔོན་ཨརྻ་དེ་བ་ནི་རྒྱུད་སྡེ་རྣམས་རིག་པ་འཛིན་པའི་སྡེ་སྣོད་ཅེས་པ་སྡེ་སྣོད་བཞི་པ་ཡིན་ནོ་ཞེས་དང༌། དཔུང་བཟང་ལས། ལྷ་དང་ལྷ་མིན་རྣམས་ལ་ཕན་གདགས་ཕྱིར། །གསང་སྔགས་རིག་སྔགས་རྣམ་པ་སྣ་ཚོགས་དག །བྱེ་བ་ཕྲག་
གསུམ་དང་ནི་འབུམ་ཕྲག་ལྔ། །རིག་འཛིན་སྡེ་སྣོད་དུ་ནི་རྒྱལ་བས་གསུངས། །ཞེས་གསུངས་སོ། །དེས་ན་མདོ་དང་བསྟན་བཅོས་ཙམ་གྱི་དབང་དུ་བྱས་ན་མུ་བཞི་བརྩིར་ཡོད་པ་ཡིན་ཏེ། མདོ་ཡིན་ལ་རྒྱུད་མ་ཡིན་པ་ནི། གཅིག་ལ་འཕྲོས་པ་ལ་སོགས་པ་ཕལ་ཆེ་བ་དེ་དག་དང༌། རྒྱུད་ཡིན་ལ་མདོ་མ་ཡིན་པ་ནི། མཁའ་ལྡིང་གི་སྦྱོར་བ་ལ་སོགས་པ་དང༌། མདོ་ཡང་མ་ཡིན་ལ་རྒྱུད་ཀྱང་མ་ཡིན་པ་ནི་རྟོག་གེ་ལ་སོགས་པའོ། །འོན་ཀྱང་རྒྱུ་ཕ་རོལ་ཏུ་ཕྱིན་པའི་ཐེག་པ་དང༌། འབྲས་བུ་སྔགས་ཀྱི་ཐེག་པའི་ཁྱད་པར་ནི། ཚོགས་ལམ་གྱི་གཙོ་བོར་བྱེད་པ་དང་མི 
་བྱེད་པའི་ཁྱད་པར་རོ། །སྡོམ་གསུམ་རབ་དབྱེར་ཡང་མདོ་དང་རྒྱུད་ཀྱི་ཁྱད་པར་ནི། ཆོ་གའི་བྱ་བ་ཡོད་མེད་ཡིན། །ཞེས་པའི་དགོངས་པའང་དོན་དེ་བཞིན་བཤད་ན་སྐྱོན་མེད་པར་འགྱུར་རོ། །གཞན་ཡང་འབྲས་བུའི་རྣམ་པ་ལམ་དུ་བྱེད་པ་ཡོད་མེད་ཀྱི་ཁྱད་པར་གྱིས། རྒྱུ་དང་
འབྲས་བུའི་ཐེག་པར་བཞག་པ་དང༌། སྔགས་དང་སྦྱོར་བ་གཙོ་བོར་སྟོན་མི ་སྟོན་གྱི་སྒོ་ནས། མདོ་དང་སྔགས་ཀྱི་ཁྱད་པར་འཇོག་པའམ་རུང་སྟེ། དེ་དག་ནི་སྒྲ་དོན་གཙོ་བོར་གྱུར་པས་སོ། །གཉིས་པ་མདོ་ལས་སྔགས་ཁྱད་པར་དུ་འཕགས་ཚུལ་ལ། སྤྱིར་མདོ་ལས་སྔགས་ཁྱད་པར་དུ་འཕགས་ཚུལ་དང༌། བྱེ་བྲག་ཏུ་རྒྱུད་སྡེ་རྣམས་ཀྱང་གོང་མ་གོང་མ་ཁྱད་པར་དུ་འཕགས་ཚུལ་ལོ། །དང་པོ་ནི། སློབ་དཔོན་ཏྲི་པི་ཏ་ཀ་མ་ལའི་ཚུལ་གསུམ་སྒྲོན་
མེ་ལས། དོན་གཅིག་ན་ཡང་མ་རྨོངས་དང༌། །ཐབས་མང་དཀའ་བ་མེད་པ་དང༌། །དབངཔོ་རྣོན་པོའི་དབང་བྱས་ནས། །སྔགས་ཀྱི་ཐེག་པ་ཁྱད་པར་འཕགས། །ཞེས་སོ། །རྒྱ་བོད་ཀྱི་སློབ་དཔོན་ཐ་དད་པའི་འདོད་པ་སྣ་ཚོགས་པ་ཞིག་ཡིན་མོད་ཀྱི། །དེ་དག་ཀྱང་ཕལ་ཆེ་བ་གཙོ་བོའི་དོན་ལ་རུང་བ་ཁོ་ན་ཡིན་ཀྱང༌། རང་ལུགས་ནི། རྣམ་པ་གསུམ་གྱི་ཁྱད་པར་དུ་འཕགས་པ་ཡིན་ཏེ་ལམ་མྱུར་བ་དང༌། ལམ་བདེ་བ་དང༌། ཐབས་ལ་མཁས་པའི་ཁྱད་པར་དང་གསུམ་མོ། །དང་པོ་ལམ་མྱུར་བས་ཁྱད་པར་དུ་འཕགས་ཚུལ་ལ། ལམ་མྱུར་བའི་ངོ་བོ་ངོས་གཟུང་བ་དང༌། ལམ་མྱུར་བའི་རྒྱུ་མཚན་བཤད་པའོ། །དང་པོ་ནི། སྐྱེ་བ་འདིའམ། སྐྱེ་བ་བཅུ་དྲུག་གམ། བསྐལ་བ་གསུམ་མམ། བསྐལ་བ་བརྒྱད་ཀྱིས་བྱང་ཆུབ་ཐོབ་པའོ། །གཉིས་པ་ནི་ཆོ་གའི་ཁྱད་པར་གྱི་ལྷ་རྣམས་དངོས་སུ་མཆོད་པ་ལེན་པར་ཡོངས་སུ་སྤྱད་པ་ལས་བྱུང་བའི་བསོད་ནམས་ཡོད་པ་དང༌། སྔགས་ཀྱི་མཐུས་ཆུ་ཐིག་པ་གཅིག་ལ་ཡང་གངྒཱའི་བྱེ་སྙེད་ཀྱི་བསོད་ནམས་འབྱུང་བ་དང༌། ལས་དང་པོ་པས་མ་དག་པའི་སྣང་བ་འགོག་པའི་ཞིང་སྦྱོང་བའི་ཏིང་ངེ་འཛིན་མངོན་དུ་བྱེད་པ་དང༌། སྔགས་སམ་ཏིང་ངེ་འཛིན་གྱི་ཁྱད་པར་རེ་རེས་ཀྱང་སེམས་ཅན་རྣམས་སྨིན་པའི་རྒྱུ་ཁྱད་པར་ཅན་འདི་དག །ཐེག་པ་ལ་ཞུགས་པ་ཙམ་ལ་ཡང་ཡོད་པ་དང༌། ཏིང་ངེ་འཛིན་གྱི་སྤྱོད་ཡུལ་གྱི་གཟུགས་བདེན་པ་གཉིས་ཀའི་ཚུལ་གྱིས་འབྲས་བུའི་རྣམ་པ་
ལ་དམིགས་པའི་ཤེས་རབ་རྣམས། དང་པོ་དང་ཐ་མའི་བར་དུ་ཡོད་པས་ན་ཁྱད་པར་དུ་འཕགས་པའོ། །གཉིས་པ་ལམ་བདེ་བས་ཁྱད་པར་དུ་འཕགས་ཚུལ་ལ། ལམ་བདེ་བའི་ངོ་བོ་དང༌། བདེ་བས་ལམ་བགྲོད་པའི་རྒྱུ་མཚན་བཤད་པའོ། །དང་པོ་ནི། ལུས་དང་སེམས་ལ་ཚོར་བ་རྩུབ་པཽ་མེད་པས་ན་བདེ་བ་ཉིད་དོ། །གཉིས་པ་ནི། འདི་ལ་སྐལ་བ་དྲུག་དང་ལྡན་པའི་ལུས་ཀྱང་གྲུབ་པ་དང༌། རྫུ་འཕྲུལ་དང་ཏིང་ངེ་འཛིན་མང་པོ་ཐོབ་པ་དང༌། སྔགས་ཀྱི་མཐུས་སངས་རྒྱས་རྣམས་མངོན་སུམ་དུ་བཞུགས་པ་དང༌། སྔགས་དང་རྒྱུད་ཀྱི་སྦྱོར་བས་འགྲོ་བའི་བསམ་པ་ཐམས་ཅད་བསྒྲུབས་པས་ནའོ། །གསུམ་པ། ཐབས་ལ་མཁས་པས་ཁྱད་པར་དུ་འཕགས་པ་ལ། བསླབ་པ་གསུམ་གྱི་སྒོ་ནས་དང༌། སྤྱོད་ཡུལ་དུ་འཇུག་པའི་སྒོ་ནས་ཁྱད་པར་དུ་འཕགས་པ་སྟེ་གཉིས་ལས། དང་པོ་ནི། རིག་པ་འཛིན་པ་རྣམས་དང་ཚུལ་ཁྲིམས་མཉམ་པས། ལྷ་དགྱེས་པ་དང༌། སྤྱོད་ཡུལ་ཁྱད་པར་ཅན་དང་འབྲེལ་བའི་ཏིང་ངེ་འཛིན་དང༌། ཤེས་རབ་དང་གསུམ་མོ། །གཉིས་པ་ནི། སྤྱོད་ཡུལ་ཐམས་ཅད་དུ་ལྷ་དང་སྔགས་ཀྱི་ཐབས་ཁྱད་པར་ཅན་ཡོད་པས་ན། ཐབས་ལ་མཁས་པས་ཁྱད་པར་དུ་འཕགས་པའོ། །དེ་ཡང་ཕ་རོལ་ཏུ་ཕྱིན་པའི་ཚུལ་ལས་བཤད་པའི་བསླབ་པ་གསུམ་དང༌། སྤྱོད་ཡུལ་ལ་འཇུག་པའི་ཐབས་མཁས་
ཀྱི་ཁྱད་པར་དེ་དག་ནི་འདིར་ཡོད་མོད་ཀྱི། ཕ་རོལ་ཏུ་ཕྱིན་པ་ལ་མེད་པའི་ཁྱད་པར་དེ་དག་དང་ལྡན་པས་ན། ཐབས་ལ་མཁས་པའི་ཁྱད་པར་དུ་གྱུར་པ་སྟེ། གོ་རིམ་བཞིན་དུ། སྒྲོལ་མ་འབྱུང་བའི་རྒྱུད་ལས། བསྐལ་བ་གྲངས་མེད་སུམ་ཅུ་གཉིས། །འབད་ཀྱང་ད་དུང་བྱང་ཆུབ་མེད། །བདེ་བས་ཚེ་འདིར་འགྲུབ་འགྱུར་བ། །དེ་ཕྱིར་འདོད་ཆགས་ཆེན་པོ་བསྟན། །ཞེས་དང༌། བདེ་བས་བདེ་བ་ཐོབ་གྱུར་ཏེ། །སངས་རྒྱས་བདེ་བ་བདེ་ཆེན་ནོ། །འབྲས་བུ་དང་མཚུངས་རྒྱུ་སྒྲུབ་པ། །མ་ཚང་སྟོང་པས་མྱ་ངན་འདས། །ཞེས་དང༌། ཇི་སྐད་དུ། །སེམས་ཅན་དོན་ཀུན་ལེགས་བསྒྲུབ་ཕྱིར། །བློ་ཆེན་ལ་ནི་ཐབས་ཐམས་ཅད། །དབྱེ་བ་རྣམ་བཞིར་ཚུལ་གྱིས་མཆོག །འགྲོ་བའི་སྟོན་པས་གསུངས་པ་ཡིན། །ཞེས་སོ། །གཉིས་པ་རྒྱུད་སྡེ་རྣམས་ཀྱང་གོང་མ་གོང་མ་ཁྱད་པར་དུ་འཕགས་པའི་ཚུལ་ནི། དེ་ཡང་བྱ་བའི་རྒྱུད་ལ་གོང་དུ་བཤད་པའི་ཁྱད་པར་འཕགས་ཆོས་དེ་དག་ནི་ཚང་བ་ཡིན་ཀྱང་བདག་བསྐྱེད་ཀྱི་ལྷའི་བསྙེམས་པ་མེད་པ་དང༌། བྲིས་སྐུ་ལ་སོགས་པའི་རྟེན་འགའ་ཞིག་ལྷར་སྒོམ་པ་དང༌། དཀྱིལ་འཁོར་དུ་ལྷ་སྤྱན་འདྲེན་པ་སོགས་ལྷའི་སྙེམས་པ་ཉེ་ཚེ་བ་ཙམ་ཞིག་ཡོད་པ་དང༌། བྱ་བའི་རྒྱུད་ཆེན་པོའམ་གཉིས་ཀའི་རྒྱུད་དམ། སྤྱོད་པའི་རྒྱུད་དུ་བདག་ཉིད་ལྷར་བསྐྱེད་པ་ཡོད་པ་དང༌། དཀྱིལ་འཁོར་
གྱི་ལྷ་བསྐྱེད་ཆོག་གི་བསྐྱེད་པ་ཡོད་པས། ལྷའི་སྙེམས་པ་ཅུང་ཟད་རྒྱས་པའི་ཚུལ་གྱིས་འཇུག་པ་ཡིན་ལ། རྒྱུད་སྡེ་དེ་གཉིས་ཆར་དུ། ལྷ་དང་སྔགས་ཀྱི་དམ་ཚིག་དང་སྡོམ་པ་ཙམ་ཡོད་ཀྱང༌། རིགས་ལྔའི་དམ་ཚིག་དང༌། ཁྱད་པར་ཅན་གྱི་ལྷའི་སྡོམ་པ་སོགས་མེད་ལ། རྣལ་འབྱོར་གྱི་རྒྱུད་ཡན་ཆད་དུ་ནི་དེ་དག་ཀྱང་ཡོད་པ་དང༌། ཁྱད་པར་རྣལ་འབྱོར་རྒྱུད་དུ་ཐུན་མཚམས་སུ་སྣང་བ་ཐམས་ཅད་ལྷར་སྒོམ་པ་སོགས་མེད་ཀྱང༌། དང་པོར་མ་དག་པའི་སྣང་བ་ཐམས་ཅད་སྟོང་པ་ཉིད་དུ་སྦྱངས་ནས། དེ་ནས་བདག་ཉིད་དཀྱིལ་འཁོར་གྱི་འཁོར་ལོ་རྒྱས་པར་བསྒོམས་པ་སྟེ། ལྷའི་སྙེམས་པ་ཁྱབ་པའི་ཚུལ་གྱིས་འཇུག་པའོ། །གཞན་ཡང་འདི་ལ་མངོན་བྱང་ལྔས་ལྷར་བསྐྱེད་པ་ཡོད་པས། འབྲས་བུ་ལམ་བྱེད་མཆོག་ཀྱང་ཚང་བ་ཡིན་ནོ། །རྣལ་འབྱོར་བླ་ན་མེད་པའི་ཐེག་པ་འདི་ལ་ནང་ཚན་དུ་ལམ་གྱི་འགྲོས་མི་འདྲ་བ་ཅུང་ཟད་ཡོད་ཀྱང༌། གཙོ་བོའི་དོན་ལ་མཚུངས་པ་ཁོ་ན་ཡིན་པས། འདི་ལ་རྒྱུད་སྡེ་འོག་མ་རྣམས་ལ་ཡང་མེད་པའི་བསྐུར་བྱ་དབང་བཞིའི་སྒོ་ནས་ཁྱད་པར་དུ་འཕགས་པ་དང༌། རིགས་ལྔའི་དམ་ཚིག་ཀྱང་རྣལ་འབྱོར་རྒྱུད་ལས་ཆེས་ལྷག་པ་དང༌། བསྲུང་བྱའི་དམ་ཚིག་ཀྱང་ཤིན་ཏུ་རྒྱས་པར་ཡོད་པ་དང༌། བདེ་བའི་སྡོམ་པ་ཡོངས་སུ་རྫོགས་པར་ཐོབ་པ་དང༌། འབྲས་བུ་ལམ་བྱེད་ཀྱང་འོག་མ་ལས་ལྷག་པ་དང༌། བསྐྱེད་རིམ་གྱི་སྐབས་
སུ་འཁོར་བའི་རྣམ་པ་དང་མཐུན་པའི་ལམ་བསྒོམས་པས། དེ་སྦྱོང་བའི་གནད་ཟབ་མོ་ཡོད་པ་དང༌། སྣང་བ་ཐམས་ཅད་དཀྱིལ་འཁོར་གྱི་འཁོར་ལོ་སྒོམ་པའི་ཐབས་མཁས་ཁྱད་པར་ཅན་དང༌། ཡན་ལག་དྲུག་དང༌། རིམ་པ་ལྔ་དང༌། ཕྱག་རྒྱ་བཞི་ལ་སོགས་པ། རྩ་ཐིག་རླུང་གསུམ་ལ་གནད་དུ་བསྣུན་པའི་དམིགས་བཅས་ཀྱི་རྫོགས་རིམ་དང༌། ཞུ་བདེ་ལྷན་སྐྱེས་དང༌། རང་བཞིན་ལྷན་སྐྱེས་ཀྱི་བདེ་བ་སྒོམ་པ་དམིགས་མེད་རྫོགས་རིམ་དང༌། བདེ་བ་ཆེན་པོས་བརྒྱན་པའི་ལྟ་བ་རྣམ་པར་དག་པ་དང༌། ལམ་གྱི་གྲོགས་སྤྱོད་པ་དང་ཉེ་རྒྱུ་སོགས་མདོར་ན་ཐུན་མོང་མ་ཡིན་པའི་ཁྱད་པར་དཔག་ཏུ་མེད་པ་ལྷག་པ་ཡིན་ལ། དེ་དག་ཀྱང་མདོར་བསྡུ་ན། བདེ་བའི་སྡོམ་པ་ཚུལ་ཁྲིམས་དང༌། བག་ཆགས་སྦྱོང་བ་དང༌། གོང་མའི་རྣམ་པའི་ཏིང་ངེ་འཛིན་དང༌། བདེ་བ་ཁྱབ་པ་དང༌། སྤྱོད་ཡུལ་དེ་ཉིད་ལ་དམིགས་པའི་ཤེས་རབ་དང༌། སྙིང་རྗེ་ཆེན་པོ་དང༌། མཉམ་པ་ཉིད་དང་རང་བཞིན་མེད་པ་དང༌། བདེ་བ་དང༌། ལྷའི་རྣམ་པས་ཁྱབ་པ་དང༌། དེས་དེ་དག་ཉིད་མཆོག་ལ་སྦྱོར་བས་སྤྱོད་ཡུལ་ལ་འཇུག་པ་དང༌། ཚུལ་ཁྲིམས་ནི་ཐུན་མོང་དང་ཐུན་མོང་མ་ཡིན་པ་དང༌། རྒྱ་ཆེ་བ་དང༌། ཟབ་པའི་ཁྱད་པར་དང༌། ཏིང་ངེ་འཛིན་དང་ཤེས་རབ་ཀྱི་ཐུན་མོང་དང་མ་ཡིན་པ་དང༌། རྒྱ་ཆེ་བ་དང༌། ཟབ་པའི་ཁྱད་པར་དུ་འཕགས་པ་དང༌། གཞན་ཡང་བདེ་བ་ཆེན་པོའི་ཡེ་ཤེས་ཀྱི་
རྒྱུས་ཚོགས་གཉིས་མྱུར་དུ་རྫོགས་པར་བྱེད་པ་ཡིན་ཏེ། དེ་ལ་བདེ་བ་ནི་སྙིང་རྗེའི་རང་བཞིན། དེ་ཉིད་རང་བཞིན་མེད་ཅིང༌། དམིགས་པ་མེད་པར་མངོན་སུམ་མམ། མངོན་སུམ་གྱི་ཚུལ་གྱིས་ལས་དང་པོ་པས་བསྐྱེད་པས། བདེ་བས་སྟོང་པ་ཕུལ་དུ་འགྱུར་བ་མངོན་སུམ་གྱིས་རྣམ་པ་དང༌། དེས་ཀྱང་བསོད་ནམས་ཕུལ་དུ་ཕྱིན་པར་འགྱུར་བའི་ཕྱིར་རོ། །གཉིས་པ་ཐེག་མཆོག་གསང་སྔགས་ཀྱི་ཐུན་མོང་མ་ཡིན་པའི་ལམ་གྱི་རྣམ་པར་གཞག་པ་ལ་གཉིས། སྔགས་རྒྱུད་ཀྱི་རབ་དབྱེ་བཤད་པ་དང༌། ལམ་གྱི་རིམ་པ་དངོས་བཤད་པའོ། །དངཔོ་ལ་སྔགས་རྒྱུད་ཀྱི་ངོ་བོ་བཤད་པ་དང༌། དེའི་རྣམ་གྲངས་དང༌། འཇིག་རྟེན་པའི་རྒྱུད་བཤད་པ་དང༌། སྔགས་ཀྱི་ཐེག་པའི་རང་བཞིན་བཤད་པ་དང༌། དེའི་དབྱེ་བ་བཤད་པ་དང༌། འཇིག་རྟེན་པའི་ཐེག་པ་ལ་དངོས་བཏགས་ཀྱི་དབྱེ་བ་བཤད་པའོ། །དང་པོ་ལ་སྔགས་ནི་གསང་སྔགས་རྣམས་དང་བདེ་བ་ཆེན་པོའི་ཡེ་ཤེས་སོ། །རྒྱུད་ནི་དེའི་སྦྱོར་བ་སྟེ་ལས་དང༌། དངོས་གྲུབ་ཀྱི་ཚོགས་རྣམས་ཏེ། ཇི་སྐད་དུ། ཡིད་ནི་མན་ཞེས་བྱ་བར་བཤད། །ཏྲ་ནི་སྐྱོབ་པར་བྱེད་པའི་དོན། །ཞེས་སྔགས་ཀྱི་དོན་བདེ་བ་ཆེན་པོའི་ཡེ་ཤེས་ཀྱིས་མཚན་རྟོག་ལས་སྐྱོབ་པའོ། །ཡང་ན་གསང་སྔགས་ཞེས་བྱ་བ་ནི་མནྟྲ་སྟེ། དེ་ལས་མ་ནུ་ན་ཡིད་ཡིན་ལ། སྒོ་ལྔའི་རྣམ་ཤེས་རྗེས་སུ་འབྲང་བའི་ཡིད་དང་བཅས་པའོ། །ཏྲ་]ཡ་ནི་སྐྱོབ་པ་སྟེ། བསྐྱེད་རྫོགས་
གཉིས་ཀྱི་ཐབས་མཁས་ཀྱིས། སྒོ་ལྔའི་རྣམ་ཤེས་རྗེས་འབྲང་དང་བཅས་པའི་རྣམ་རྟོག་གི་ཡིད་ལ་སྐྱོབ་པས་ན་གསང་སྔགས་སོ། །བསྐྱེད་རྫོགས་གཉིས་པོ་དེ་བཞོན་པར་བྱེད་པས་ན་གསང་སྔགས་ཀྱི་ཐེག་པའོ། །དེ་སྐད་དུ་ཡང༌། མ་ནི་དེ་བཞིན་ཡིད་ཡིན་ཏེ། །གང་གང་རྒྱུ་དང་རྐྱེན་ལས་བྱུང༌། །ཡུལ་དང་དབང་པོ་ཡིན་ནོ་གསུངས། །ཏྲ་ནི་དེ་བཞིན་སྐྱོབ་པར་མཛོད། །ཅེས་དང༌། མ་ནི་སྟོན་པ་མཚན་མ་བྲལ། །རྡོ་རྗེ་འཛིན་པའི་དབུགས་དབྱུང་བ། །ཤེས་རབ་ཆེན་པོ་བདག་གིས་བཤད། །ཏྲ་ནི་དེ་བཞིན་སྐྱོབ་པར་བརྗོད། །དེ་བཞིན་གཤེགས་པའི་དབུགས་དབྱུང་བ། །སྙིང་རྗེ་ཆེན་པོ་བདག་གིས་བཤད། །སྟོང་པ་དང་ནི་སྙིང་རྗེ་གཉིས། །གཉིས་སུ་མེད་པ་གཉིས་ཀྱི་ཚུལ། །གསང་སྔགས་ཞེས་ནི་དེ་ལ་བརྗོད། །ཞེས་སོ། །ཡང་ན་སྔགས་རྣམས་རྒྱུད་ཀྱི་ནང་དུ་འདུ་བ་ཡིན་ཏེ། དེ་ལ་རྒྱུད་ཅེས་བྱ་བ་ནི་སྔགས་རྣམས་དང་དེའི་ཆོ་གའོ། །དེ་སྟོན་པར་བྱེད་པའི་བཀའི་ཚོགས་ལ་རྡོ་རྗེ་ཐེག་པའི་སྡེ་སྣོད་དང༌། རྒྱུད་ཅེས་བྱ་བ་ཡིན་པའི་ཕྱིར་རོ། །གཉིས་པ་ནི། རིག་པ་འཛིན་པའི་སྡེ་སྣོད་དང༌། སྔགས་ཀྱི་སྡེ་སྣོད་དང༌། ཆོས་འདི་པ་རྣམས་ཀྱི་རྒྱུད་དང༌། རྡོ་རྗེ་ཐེག་པའི་སྡེ་སྣོད་ཞེས་པ་རྣམས་རྣམ་གྲངས་དང༌། གཞན་ཡང་རྡོ་རྗེ་ཐེག་པ་དང༌། སྔགས་ཀྱི་ཐེག་པ་དང༌། རིག་པ་འཛིན་པའི་ཐེག་པ་དང༌། འབྲས་བུའི་ཐེག་པ་ཞེས་པ་རྣམས་རྣམ་གྲངས་ཡིན་ནོ། །གསུམ་པ་ནི། དབང་ཕྱུག་གིས་བྱས་
པ་དང༌། དྲང་སྲོང་གིས་བྱས་པ་དང༌། ལྷ་དང་འབྱུང་པོ་དང༌། གསང་བ་པ་དག་དང༌། སྔགས་མཁན་དག་གིས་བྱས་པ་དག་ཡིན་ཏེ། དེ་དག་ནི་རྡོ་རྗེའི་ཐེག་པ་དང༌། སྔགས་ཀྱི་སྡེ་སྣོད་ནི་མ་ཡིན་ཏེ། གཞན་དུ་སྔགས་དང༌། རྒྱུད་ཅེས་བྱ་བ་ཡིན་ནོ། །བཞི་པ་ནི། རིག་སྔགས་ཀྱི་སྦྱོར་བ་གཙོ་བོར་སྟོན་པའི་ལམ་དང༌། དེའི་འབྲས་བུ་ནི་སྔགས་ཀྱི་ཐེག་པ་ཡིན་ནོ། །ལྔ་པ་ལ་གཉིས། འཇིག་རྟེན་པའི་ཐེག་པ་དང༌། འཇིག་རྟེན་ལས་འདས་པའི་ཐེག་པའོ། །དང་པོ་ནི། འཇིག་རྟེན་པའི་ཐེག་པ་གང་ཞེ་ན། འདོད་པའི་རིག་པ་འཛིན་པ་དང༌། གཟུགས་ཀྱི་རིག་པ་འཛིན་པ་དང༌། དེ་དག་གི་ལམ་དང་གཟུགས་མེད་པའི་ཁམས་སུ་སྐྱེ་བ་གཞན་ལ་སྔགས་ཀྱི་སྦྱོར་བས་བགྲོད་པར་བྱེད་པའི་ལམ་རྣམས་སོ། །གཉིས་པ་ནི། ཐེག་པ་གསུམ་པོ་དག་གོ །འཇིག་རྟེན་པའི་ཐེག་པ་ནི་མིང་ཙམ་སྟེ། གོ་འཕང་མི་གཡོ་བ་མ་ཡིན་པའི་ཕྱིར་དང༌། དེ་ལ་ངེས་པར་འཇུག་པ་མ་ཡིན་པའི་ཕྱིར་དང༌། ཡུལ་དུས་ཉི་ཚེ་བའི་ཕྱིར་རོ། །འཇིག་རྟེན་ལས་འདས་པའི་ཐེག་པ་ནི་དངོས་ཏེ། རྡོ་རྗེའི་ཐེག་པའོ། །དེའི་ཡང་ཉན་ཐོས་དང་རང་སངས་རྒྱས་ཀྱི་ཐེག་པ་ནི་གཙོ་བོ་མ་ཡིན་ནོ། །དྲུག་པ་འཇིག་རྟེན་པའི་ཐེག་པ་ལ་དངོས་བཏགས་ཀྱི་དབྱེ་བ་བཤད་པ་ལ། འཇིག་རྟེན་པའི་ཐེག་པ་ཡང་རྣམ་པ་གསུམ་སྟེ། འཇིག་རྟེན་པ་ཉིད་ཀྱི་ཐེག་པ་དང༌། ངེས་པ་ལ་འཇུག་པའི་འཇིག་རྟེན་པ་དང༌། སེམས་
ཀྱི་རྟེན་འཇིག་རྟེན་པའོ། །དང་པོ་ནི། སོ་སོ་སྐྱེ་བོས་བྱས་པའོ། །གཉིས་པ་ནི་རིག་པ་འཛིན་པའི་སྡེ་སྣོད་ལས་འབྱུང་བ་འཇིག་རྟེན་པའི་ཐེག་པའོ། །གསུམ་པ་ནི། ཚོགས་ཀྱི་ལམ་དང་སྦྱོར་བའི་ལམ་མོ། །དེ་ལ་ཕྱི་མ་གཉིས་ནི་འཇིག་རྟེན་ལས་འདས་པའི་སྡེར་གཏོགས་ཏེ། དེ་སྟོན་པར་བྱེད་པ་རྣམས་ཀྱང་དེའི་སྡེ་སྣོད་དུ་གཏོགས་སོ། །འཕགས་པའི་སེམས་ཀྱི་རང་དགར་བྱས་པ་ཡང༌། དེའི་སྡེར་གཏོགས་མོད་ཀྱི། འོན་ཀྱང་སྡེ་སྣོད་ནི་མ་ཡིན་ནོ། །གཞན་ཡང་སྔགས་ཀྱི་ཚུལ་གསུམ་སྟེ། མཆོག་དང་དམན་པ་ཡན་ལག་གོ །དེ་གསུམ་གྱི་ངོ་བོ་ནི་བདེ་བ་ཆེན་པོ་དང༌། ལྷའི་བསྙེན་པ་དང༌། སྔགས་དང་སྦྱོར་བ་ཙམ་དང་བཅས་པའོ། །དང་པོ་གཉིས་ནི་དངོས་དང༌། སྔགས་པའི་ཐེག་པ་དང༌། རིག་པ་འཛིན་པའི་ཚུལ་དང༌། སྡོམ་པ་དང་འབྲེལ་བ་ཡིན་ནོ། །ཕྱི་མ་ནི་དེ་རྣམས་མ་ཡིན་ཏེ། གཞན་དུ་སྔགས་ཞེས་པ་ཙམ་མོ། །ཡང་སྔགས་ཀྱི་ཚུལ་བདུན་ཏེ། གཏན་དུ་སའི་ལམ་དང༌། ཆ་ཤས་ཅན་དང༌། ཁྱད་པར་དུ་གྱུར་པ་དང༌། དང་པོར་བདེན་པ་དང༌། ཕལ་ཆེར་བདེ་ཆེན་གྱི་ཚུལ་དང༌། འགའ་ཞིག་བདེ་ཆེན་དང༌། ཅུང་ཟད་བདེ་ཆེན་གྱི་ཚུལ་ལ་སོགས་པ་མང་དུ་ཡོད་ཀྱང་རེ་ཞིག་འདིར་མི་བརྗོད་དོ། །གཉིས་པ་ལམ་གྱི་རིམ་པ་དངོས་བཤད་པ་ལ། ལམ་སྟོན་བྱེད་ཀྱི་གཞུང་གི་ཚོགས་ངེས་པར་བྱ་བའི་ཕྱིར་དུ་རྗོད་བྱེད་ཚིག་གི་རྒྱུད་མདོར་བསྟན་པ་དང༌། ཉམས་སུ་བླངས་པའི།
སྒྲུབ་པ་བརྗོད་བྱ་དོན་གྱིས་རྒྱུད་རྒྱས་པར་བཤད་པ་གཉིས་ལས། དང་པོ་ལ་རྗོད་བྱེད་ཚིག་གི་རྒྱུད་ངོས་བཟུང་བ་དང༌། དེའི་དབྱེ་བ་ཅུང་ཟད་བཤད་པ་དང༌། གསང་སྔགས་ཀྱི་ཐེག་པ་ཇི་ལྟར་བྱུང་བའི་ཚུལ་གསུམ་ལས། དང་པོ་ནི། གོང་དུ་བཤད་པ་ལྟར་རིག་པ་འཛིན་པའི་སྡེ་སྣོད་རྣམས་སོ། །གཉིས་པ་ནི། འོག་ཏུ་འཆད་པ་ལྟར་གཙོ་བོ་རྒྱུད་སྡེ་བཞི་པོ་རྣམས་ཡིན་མོད་ཀྱི། རྒྱུད་སྡེ་ཐམས་ཅད་བསྡུ་ན། རྩ་བའི་རྒྱུད་དང་བསྡུས་པའི་རྒྱུད་གཉིས་སུ་འདུ་བ་ཡིན་ལ། ཡང་ན་རྩ་བའི་རྒྱུད་དང༌། ཕྱི་མའི་དང༌། བཤད་པའི་དང༌། ཆ་མཐུན་གྱི་དང༌། འཕྲོས་པའི་རྒྱུད་དེ་ལྔའོ། །ཡང་མདོ་དང༌། རྟོག་པ་དང༌། ཆོ་ག་ཞིབ་མོ་དང༌། གཟུངས་ཏེ་བཞི་དང༌། དེ་དག་གི་ཟླས་ཕྱེ་བའི་རྩ་བའི་རྒྱུད་དེ་ལྔར་དབྱེ་བ་ལ་སོགས་པ་ཡོད་དོ། །གསུམ་པ། སྔགས་ཀྱི་ཐེག་པ་ཇི་ལྟར་བྱུང་བའི་ཚུལ་ནི། འདི་ལ་ཆེས་སྔ་རབས་པ་རྣམས། དཔལ་སྡོམ་པའི་རྒྱུད་ཕྱི་མ་ལས། ང་ནི་འདི་ནས་མི་སྣང་ནས།། ལོ་ནི་བརྒྱ་དང་བཅུ་གཉིས་ན། །བསྟན་པའི་སྙིང་པོ་དམ་པ་ཞིག །ལྷ་གནས་གསུམ་དུ་གྲགས་པ་དེ། །འཛམ་གླིང་ཤར་ལྷོའི་ཕྱོགས་མཚམས་ནས། །དཔལ་ཞེས་བྱ་བའི་རི་བོ་ལ། །ཐུགས་རྗེ་མཐུན་པའི་བྱིན་རླབས་ཀྱིས། །རྒྱལ་པོ་ཛ་ཞེས་བྱ་བ་ལ། །ལག་ན་རྡོ་རྗེ་སྣང་བར་བྱེད། །མི་ལ་སྐལ་ལྡན་དམ་པ་རྣམས། །བྱང་ཆུབ་
མཆོག་ཏུ་འགྲུབ་འགྱུར་བས། །དེ་ལ་རྟག་ཏུ་གུས་པར་བྱོས། །ཞེས་སྟོན་པ་མྱ་ངན་ལས་འདས་ནས། ལོ་ཉི་ཤུ་རྩ་བདུན་ན། རྒྱལ་པོ་ཛ་ཧིའི་ཁང་སྟེང་དུ་སྔགས་ཀྱི་མདོ་སྡེ་རྣམས་བབ་པར་འདོད་པ་དང༌། ཡང་སྟོན་པ་མྱ་ངན་ལས་འདས་ནས། ལོ་བརྒྱ་དང་ཉི་ཤུ་ན། རྒྱལ་པོ་ས་ཧིའི་ཁང་སྟེང་དུ། སྔགས་ཀྱི་སྡེ་སྣོད་བབ་པར་འདོད་པ་དང༌། ཡང་ཁ་ཅིག་རྒྱལ་པོ་རབ་གསལ་ཟླ་བའི་ཁྱིམ་དུ་བྱུང་བར་འདོད་པ་དང༌། དུས་ཀྱི་འཁོར་ལོ་ནི། སྟོན་པས་དཔལ་ལྡན་འབྲས་སྤུང་གི་མཆོད་རྟེན་དུ་སྔགས་ཀྱི་ཐེག་པ་གསུངས་ཤིང༌། དེ་ཡང་ལྷ་ལ་སོགས་པའི་འགྲོ་བ་གཞན་རྣམས་ཀྱི་སྤྱད་བྱར་གྱུར་ཅིང༌། རེ་ཞིག་འཛམ་བུ་གླིང་པའི་མི་རྣམས་ལ་མི་སྣང་བ་དང༌། འོན་ཀྱང་ཤམྦྷ་ལ་ལ་སོགས་པའི་ཡུལ་ཁྱད་པར་ཅན་འགའ་ཞིག་ཏུ་དར་བ་ཡིན་ནོ། །གཞན་ཡང་རྒྱུད་སྡེ་སོ་སོ་ནས་གྲུབ་པའི་སློབ་དཔོན་སོ་སོས་སྤྱན་དྲངས་པའི་ལོ་རྒྱུས་ཀྱང་ཡོད་པ་ཐམས་ཅད་ཀྱང་མི་འཐད་པ་མེད་དོ། །འོན་ཀྱང་རང་ལུགས་ཀྱི་རྣམ་པར་བཞག་པ་ལ་གཉིས་ཏེ། སྤྱིར་གསང་སྔགས་ཀྱི་ཐེག་པ་ཇི་ལྟར་བྱུང་ཚུལ་དང༌། བྱེ་བྲག་ཏུ་འོ་སྐོལ་གྱི་སྟོན་པས་གསུངས་ཚུལ་ལོ། །དང་པོ་ནི། རྡོ་རྗེ་འཆང་གིས་དབུགས་དབྱུང་བ་དང༌། རིགས་ལྔའི་དབུགས་དབྱུང་བའི་དཀྱིལ་འཁོར་སྤྲུལ་ཞིང་བཤད་པ་མཛད་པ་རྣམས་ཏེ། སྒྲོལ་མ་འབྱུང་བའི་རྒྱུད་ལས། དབུགས་དབྱུང་རྣམ་པ་གཉིས་བསྟན་ཏོ། །འདི་ལ་དང་པོར་རྡོ་རྗེ་
སེམས། །ཕྱི་ནས་དེ་བཞིན་གཤེགས་པའོ། །འདས་པའི་དུས་ན་སྔོན་བྱུང་བ། །རྡོ་རྗེ་སེམས་དཔའ་ལྷག་པའི་ལྷ། །སངས་རྒྱས་བདག་ཉིད་རྣམ་བསྡུས་ནས། །རིག་མ་བཙུན་མོ་རྣམ་པར་རོལ། །ཆོས་འབྱུང་ནམ་མཁའི་ཁམས་གནས་པ། །ཡེ་ཤེས་རྒྱ་མཚོའི་རྣམ་རོལ་པ། །སངས་རྒྱས་བྱང་ཆུབ་སེམས་དཔའ་ནི། །མ་ལུས་ལུས་པ་མེད་པར་བསྐྱེད། །བདག་ཉིད་བདེ་བ་ཆེ་རང་བཞིན།། སེམས་ཅན་ཁམས་ལ་རྗེས་ཞུགས་པས། །ཐམས་ཅད་བདེ་ཆེན་བྱང་ཆུབ་ཐོབ། །བདེ་བས་མངོན་པར་ཞེན་རྣམས་ལ། །སངས་རྒྱས་རྣམས་ཀྱིས་སྟོང་ཉིད་བསྟན། །དེ་དེས་གྲངས་མེད་མངོན་བྱང་ཆུབ། །ཕྱིས་ནས་སྟོང་པར་མངོན་ཞེན་རྣམས། །ཐམས་ཅད་དམྱལ་བར་ལྷུང་གྱུར་པས། །རྒྱལ་བ་རྟག་པ་རྣམ་སྤྲུལ་ཏེ། །དབུ་མ་ལ་ནི་རྣམ་པར་གཞག །རང་དང་གཞན་དོན་ཆེར་བསྒྲུབས་པས། །དཔག་ཡས་མཆོག་ཏུ་དགྲོལ་བར་བྱས། །ཀུན་རྫོབ་རྗེས་ཞུགས་ངར་འཛིན་ཅན། །རྣམ་རྟོག་དུ་མས་རྣམ་དཀྲུགས་ནས། །དེ་དག་གཞན་གྱི་བསམ་པ་ཀུན། །རྫོགས་བྱེད་བྱ་བ་མཆོག་ལ་བསྐུལ། །རིན་ཆེན་ཉི་མ་རྣམ་སྤྲུལ་པས། །དེ་དག་བླ་མེད་བྱང་ཆུབ་ལ། མཆོག་ཏུ་དགའ་བས་གཞོལ་བར་འགྱུར། །གཞན་ལས་རྗེས་སུ་ཆགས་ལྡན་པ། །དེའི་ཚེ་འདོད་ཆགས་ཀྱིས་བཅིངས་པ། །པདྨ་གར་དབང་རྣམ་སྤྲུལ་ཏེ། །འདོད་ཆགས་བདེ་བའི་ལམ་
གྱིས་ནི། །བརྗོད་མེད་འགྲོ་བ་མངོན་བྱང་ཆུབ། །ཕྱི་ནས་བདེ་བ་ཆགས་ལྡན་རྣམས། །ལེ་ལོས་མང་པོར་ཉམས་གྱུར་ནས། །བློ་ངན་འཇིག་རྟེན་རྣམ་པར་འཁྲུགས། །རྟ་མཆོག་རྒྱལ་པོར་རང་སྤྲུལ་ཏེ། །སེམས་ཅན་བརྩོན་འགྲུས་གནས་ལ་བཞག །བྱི་བོ་རྐུན་པོ་དགྲ་ལ་སོགས། །རང་རང་ཚུལ་གྱིས་མངོན་སྤྲུལ་པས། །ཐམས་ཅད་རྡོ་རྗེའི་གནས་ལ་བཞག །བརྩོན་ལྡན་སྤྱོད་པ་སྣ་ཚོགས་པས། །ཤིན་ཏུ་ཁྲོ་གཏུམ་གདུག་པ་ཅན། །རབ་འཕྲོས་ཧེ་རུ་ཀར་སྤྲུལ་པ། །དྲག་ཤུལ་གསོད་ལ་དགྱེས་པར་གྱུར། །སྲིན་པོ་གནོད་སྦྱིན་འབྱུང་པོ་གདོན། །མ་མོ་བཅོམ་བྱས་རིག་སྔགས་དང༌། །རྫས་དང་མཚོན་ཆ་འཁྲུལ་འཁོར་དང༌། །སྨན་གྱིས་ཀྱང་ནི་ཐམས་ཅད་བཅོམ། །ཞེ་སྡང་གདུག་རྣོན་ཞི་བའི་ཕྱིར། །སླར་ཡང་བདེ་ཆེན་མགོན་པོ་ལ། །མ་འོངས་དུས་ནས་རབ་འཇུག་སྟེ། །དབུགས་དབྱུང་དཀྱིལ་འཁོར་དམ་པའོ། །འདིར་ནི་དོན་དམ་ཀུན་རྫོབ་སྟེ། །ལོངས་སྤྱོད་རྫོགས་དང་སྤྲུལ་པ་ཞེས། །གཞན་ནི་རྒྱུ་དང་འབྲས་བུ་སྟེ། །དབུགས་དབྱུང་གཉིས་སུ་བསྟན་པའོ། །འདིར་ཡང་དོན་དམ་རྣམ་པ་གཉིས། །བདེ་བ་ཆེ་དང་དེ་ཉིད་དོ། །ཀུན་རྫོབ་གཉིས་ཀྱང་འཇིག་རྟེན་དང༌། །དཀྱིལ་འཁོར་ཞེས་ནི་རེ་ཞིག་བཞག །ཞེས་གསུངས་ཞིང༌། གཞན་ཡང༌། དཔལ་སངས་རྒྱས་ཐམས་ཅད་མཉམ་པར་སྦྱོར་བ་མཁའ་འགྲོ་མ་སྒྱུ་མ་བདེ་མཆོག་གི་རྒྱུད་དང༌། རྡོ་རྗེ་མཁའ་འགྲོ་ལ་སོགས་པ་ནས་གསུངས་པ་བཞིན་ཤེས་པར་བྱའོ། །
འདི་ལ་དཔྱད་པར་བྱ་བ་ལ། །མཚན་བརྗོད་ལས། འདས་པའི་སངས་རྒྱས་རྣམས་ཀྱིས་གསུངས། །ཞེས་སོགས་དུས་གསུམ་གྱི་སངས་རྒྱས་ཐམས་ཅད་གསང་སྔགས་གསུངས་པར་བཤད་པ་དང༌། གསང་བ་འདུས་པ་སོགས་ལས། གསང་སྔགས་འོ་སྐོལ་གྱི་སྟོན་པས་ཁྱད་ཆོས་སུ་བཤད་པ་མི་འདྲ་བ་མང་པོ་ཡོད་པ། དེ་རྣམས་ཇི་ལྟར་དྲང་ཞེ་ན། རྒྱལ་སྲས་འཕགས་པ་རྣམས་དང༌། ལྷ་ཀླུ་གནོད་སྦྱིན་ལ་སོགས་པའི་འཁོར་གྱི་དཀྱིལ་འཁོར་དུ་ནི། དུས་གསུམ་གྱི་སྤྲུལ་པའི་སྐུ་ཐམས་ཅད་ཀྱིས་གསང་སྔགས་གསུངས་པ་ཡིན་ལ། མིའི་འཇིག་རྟེན་དུ་ནི། སྨོན་ལམ་གྱི་ཁྱད་པར་མཆོག་དང་ལྡན་པའི་འོ་སྐོལ་གྱི་སྟོན་པ་སོགས་འགའ་ཞིག་ཙམ་མ་གཏོགས། སངས་རྒྱས་ཐམས་ཅད་ཀྱི་བསྟན་པ་ལ་གསང་སྔགས་འབྱུང་བ་མ་ཡིན་ནོ། །དེ་ལ་ཁ་ཅིག་སྤྲུལ་པའི་སྐུས་གསང་སྔགས་གསུངས་པ་དང༌། ཤཱཀྱ་སེངྒེས་གསང་སྔགས་གསུངས་ཞེས་པའི་ཚིག་ལ་འཁྲུལ་ཏེ། དཀྱིལ་འཁོར་སྤྲུལ་ཞིང་བཤད་པ་མཛད་པ་ཞེས་པའི་རྣམ་དབྱེ་མ་ཆགས་པར། སྤྲུལ་པའི་སྐུ་ཆགས་བྲལ་གྱི་རྣམ་པ་ཅན་གྱིས་གསང་སྔགས་གསུངས་པར་འདོད་པ་སོགས་ནི། མུན་སྤྲུལ་དུ་ཤེས་པར་བྱའོ། །གཉིས་པ་ལ། མིའི་འཇིག་རྟེན་དུ་ནི། སྡེ་སྣོད་ཀྱི་སྔ་རོལ་ཏུ་ཡང་གསང་སྔགས་ཀྱི་ཐེག་པ་གསུངས་པ་ཡིན་ཏེ། བདུད་བཏུལ་བའི་ཚེ། གཤིན་རྗེ་གཤེད་ཀྱི་རྒྱུད་འབུམ་པ་གསུངས་པར་བཤད་པ་
བཞིན་ནོ། །དེ་ཡང་འོ་སྐོལ་གྱི་སྟོན་པའི་སྐུ་ཚེའི་ཐོག་མཐའ་བར་མའི་གནས་སྐབས་སྣ་ཚོགས་སུ་གསང་སྔགས་གསུངས་པ་ཡིན་པ་ལས། བྱ་བའི་རྒྱུད་རྣམས་ནི། གླེང་གཞི་ནས་འབྱུང་བ་ལྟར། ལྷ་དང་མིའི་གནས་སོ་སོར་གསུངས་པ་དང༌། སྤྱོད་པའི་རྒྱུད་དང༌། རྣལ་འབྱོར་རྒྱུད་ཀྱང༌། འོག་མིན་དང༌། གཞན་འཕྲུལ་དབང་བྱེད་དང༌། རི་རབ་ཀྱི་རྩེ་མོ་ལ་སོགས་པར་གསུངས་པ་གླེང་གཞི་ལས་ཤེས་ལ། རྣལ་འབྱོར་བླ་མེད་ཀྱི་རྒྱུད་ཕལ་ཆེར་ནི་ལྷ་དང་མིའི་འཇིག་རྟེན་དུ་གསུངས་པ་ཉུང་སྟེ། སངས་རྒྱས་ཉིད་ཀྱི་བྱིན་གྱིས་བརླབས་པའི་ཡེ་ཤེས་ཀྱི་རང་སྣང་ལས་གྲུབ་པའི་བཙུན་མོའི་བྷ་ག་ཆོས་ཀྱི་འབྱུང་གནས་སམ། ཆོས་ཀྱི་དབྱིངས་སུ་གསུངས་པ་ཡིན་ནོ། །དེ་ལྟ་བུའི་ཆོས་ཀྱི་འབྱུང་གནས་དེ་ཡང༌། སངས་རྒྱས་རང་སྣང་གིས་བསྡུས་པའི་ཞིང་འོག་མིན་སྟུག་པོ་བཀོད་པ་ལས་གཞན་དུ་བསམ་པར་མི་བྱའོ། །བླ་མེད་ཀྱི་རྒྱུད་འགའ་ཞིག་ནི། ཨུ་རྒྱན་རྡོ་རྗེའི་གནས་དང༌། སུམ་ཅུ་རྩ་གསུམ་གྱི་གནས་དང༌། དཔལ་ལྡན་འབྲས་སྤུངས་སུ་གསུངས་པའང་ཡོད་དོ། །དེ་ལྟར་སྟོན་པས་གསང་སྔགས་ཀྱིས་ཐེག་པ་མཐའ་དག་གསུངས་ནས། མཐར་གསང་བའི་བདག་པོ་ཕྱག་ན་རྡོ་རྗེའམ། རྒྱལ་པོ་ཨིནྡྲ་བྷུ་ཏི་ཆེན་པོ་ལ་གཏད་པར་གྲགས་སོ། །དེས་ན་སྔགས་ཀྱི་ཐེག་པའི་རྒྱུད་བསྡུ་བ་པོ་ནི། གསངབའི་བདག་པོ་ཉིད་ཡིན་ཞིང། ལྷ་ཀླུ་གནོད་སྦྱིན་མཐུ་བོ་ཆེ་རྣམས་ཀྱིས་གནས་ན་རྒྱུད་རྒྱས་པ་རྣམས་ཀྱང་
བཞུགས་ལ། དཔལ་དེ་ཁོ་ན་ཉིད་བསྡུས་པ་ལ་སོགས་པའི་རྣལ་འབྱོར་ཕྱི་ནང་གི་རྒྱུད་མང་པོ་ཞིག་ནི་ལྷའི་གནས་ནས་མིའི་ཡུལ་དུ་བྱོན་པར་གྲགས་ཤིང༌། བླ་མེད་ཀྱི་རྒྱུད་ཕལ་ཆེར་ནི་ཨོ་རྒྱན་རྡོ་རྗེའི་གནས་ཧེ་རུ་ཀ་རང་བྱུང་གི་གཙུག་ལག་ཁང་ནས་གྲུབ་པའི་སློབ་དཔོན་སོ་སོས་སྤྱན་དྲངས་པ་དང༌། དུས་ཀྱི་འཁོར་ལོ་ལ་སོགས་པའི་རྒྱུད་སྡེ་འགའ་ཞིག་ནི་ཤམྦྷ་ལ་ནས་སྤྱན་དྲངས་པ་ཡང་ཡོད་དོ། །འོ་ན་གསང་སྔགས་ཀྱི་ཐེག་པ་འདི་དུས་ནམ་གྱི་ཚེ་ན་དར་བར་གྱུར་སྙམ་ན། འདི་ལ་བཀའ་བསྡུ་བ་གསུམ་པ་མཛད་པ་ཡན་ཆོད་དུ་ནི། ཐེག་པ་ཆེན་པོའི་མདོ་རྒྱུད་ཉི་ཚེ་བ་ཙམ་ལས་གསལ་བར་དར་བ་མེད་ལ། དེའི་འོག་ཏུ་རིང་པོར་མ་ལོན་པར། ལྷ་དང་ཀླུ་དང༌། གནོད་སྦྱིན་དང༌། དྲི་ཟ་དང༌། སྲིན་པོ་རྣམས་ཀྱིས་གནས་ན། ཐེག་པ་ཆེན་པོའི་མདོ་རྒྱུད་དཔག་ཏུ་མེད་པ་བཞུགས་པ་རྣམས་ཡི་གེར་འདྲི་བ་སོགས་རྩོལ་བ་ལ་མ་ལྟོས་པར། སྤྲུལ་པའི་ཚུལ་གྱིས་འཇིག་རྟེན་དུ་ཅིག་ཅར་དུ་བྱུང་བ་ཡིན་ནོ། །བྱ་སྤྱོད་ཀྱི་རྒྱུད་རྣམས་ནི་ཐེག་པ་ཆེན་པོ་དར་བ་དང་དུས་མཚུངས་ཤིང༌། གོང་དུ་བཤད་པའི་ལྷ་ཡུལ་ནས་འབྱུང་བའི་རྣལ་འབྱོར་ཕྱི་ནང་གི་རྒྱུད་རྣམས་ཀྱང་དུས་དེ་ཉིད་ཀྱི་དར་བ་ཡིན་ནོ། །ཤེར་ཕྱིན་འབུམ་པ་ལ་སོགས་པའི་མདོ་སྡེ་འགའ་ཞིག་དང༌། གསང་སྔགས་ཀྱི་རྒྱུད་སྡེ་འགའ་ཞིག་ནི་ཕྱི་ནས་རིམ་གྱིས་དར་བ་དང༌། ཐམས་ཅད་ཀྱི་ཐ་མར་འབྱུང་བ་ནི། དུས་ཀྱི་འཁོར་ལོ་ཡིན་པར་གྲགས་སོ། །
གཉིས་པ་ཉམས་སུ་བླངས་པའི་སྒྲུབ་པའི་བརྗོད་བྱ་དོན་གྱི་རྒྱུད་རྒྱས་པར་བཤད་པ་ལ། རྒྱུད་སྡེ་བཞིར་འཇོག་པའི་རྒྱུ་མཚན་བཤད་པ་དང༌། དེ་དག་གི་ལམ་རིམ་བཤད་པ་གཉིས་ལས། དང་པོ་ལ། །འདི་ལ་སྔ་རབས་པའི་བླ་མ་དགགྲུབ་མཐའ་བཞི་དང༌། ཕྱི་རོལ་པའི་རྒྱུད་བཞི་དང༌། རྫོགས་ལྡན་ལ་སོགས་པའི་དུས་བཞི་དང༌། མི་རིགས་བཞི་ལ་སོགས་པ་དེ་རྣམས་འདུལ་བའི་དོན་དུ་དེ་དག་དང་མཐུན་པར་རྒྱུད་སྡེ་བཞིར་གསུངས་པ། ཕལ་ཆེར་མི་འཐད་པ་མེད་མོད་ཀྱང༌། དེ་དང་དེ་ཁོ་ནས་དབྱེ་བར་ནུས་པ་ཡང་མ་ཡིན་ལ། དེ་དག་གདུལ་བྱའི་གཙོ་བོར་བྱེད་ན་ནི་མི་རུང་ཞིང། ཁྱད་པར་སྤྱོད་པའི་རྒྱུད་རྣམས་ཞེ་སྡང་གི་རྒྱུད་སྟོན་པ་འདུལ་བར་སྦྱོར་བ་ནི་མི་འགྲིག་གོ །དེས་ན་རང་ལུགས་རྣམ་པར་གཞག་པ་ནི། མི་རིགས་བཞི་དང༌། གྲུབ་མཐའ་བཞི་ལ་སོགས་པ་དེ་དག་མོས་པའི་དགོས་པ་ནི་ཡོད་མོད་ཀྱིས། རྒྱུད་སྡེ་བཞི་ཁའི་གདུལ་བྱའི་གཙོ་བོ་ནི། ཐེག་ཆེན་གྱི་ལམ་དུ་ཞུགས་པ་ཁོ་ན་ཡིན་ནོ། །དེ་ལ་འདོད་ཁམས་ན་འདོད་ཆགས་མི་འདྲ་བ་རིགས་བཞི་ཡོད་དེ། མཛོད་ལས་གཉིས་གཉིས་འཁྱུད་དང་ལག་བཅང་དང༌། །རྒོད་དང་བལྟས་པས་འཁྲིག་པ་ཡིན། །ཞེས་སོ། །དེ་དག་དང་མཚུངས་པར་ལམ་བྱེད་བཞིའི་སྒོ་ནས་དབྱེ་བ་དང༌། ལྷའི་རྣལ་འབྱོར་བཞིའི་ཁྱད་པར་གྱི་དབྱེ་བའོ། །དང་པོ་ལ། བྱ་བའི་རྒྱུད་ནི་ལྟ་བའི་བདེ་བ་ལམ་དུ་བྱེད་པ་ཡིན་ཏེ། དེ་ཡང་དོན་ཡོད་ཞགས་པའི་ཆོ་ག་
ཞིབ་མོ་ལས། བཅོམ་ལྡན་འདས་ཞལ་ཁྲོ་གཉེར་ཅན་ལ་གཏོད་པར་བྱ་ཞིང༌། ཞེས་དང༌། གཡས་ཕྱོགས་ན་ལྷ་མོ་སྒྲོལ་མ་འཛེམ་བག་དང་བཅས་ཤིང་ལུས་བཏུད་པས་མཆོག་སྦྱིན་པའི་ཕྱག་རྒྱ་ལ་མིག་གཏོད་པར་བྱའོ། །གཡོན་དུ་པདྨ་རིགས་མཛེས་མ་འཛེམ་བག་དང་བཅས་པ་གསང་སྔགས་ཀྱི་ཚུལ་དང་རྗེས་སུ་མཐུན་ཞིང༌། དོན་ཡོད་ཞགས་པ་ལ་མིག་གཏོད་པར་བྱའོ། །ཞེས་དང༌། རྡོ་རྗེ་གཙུག་ཏོར་ལས། དཀྱིལ་འཁོར་ལྷ་རྣམས་ཐམས་ཅད་ནི། །དཀར་པོའི་རས་ལ་རྟག་གནས་ཤིང༌། །ཕོའང་མོ་ལ་ལྟ་བ་དང༌། །མོའང་ཕོ་ལ་ལྟ་བ་བྲི། །ཞེས་སོགས་བྱ་རྒྱུད་ཀྱི་ཆོ་ག་ཞིབ་མོ་ཐམས་ཅད་ནས་གསུངས་པ་ཡིན་ནོ། །སྤྱོད་པའི་རྒྱུད་ནི་རྒོད་པའི་བདེ་བ་ལམ་དུ་བྱེད་པར་རྣམ་སྣང་མངོན་བྱང་ལས། རྣམ་པར་སྣང་མཛད་རྒྱལ་པོ་ཆེ། །ཡིད་ཙམ་འཛུམ་པ་བཞིན་དུ་བྲི། །ཞེས་དང༌། དེ་ཡི་གཡས་སུ་ལྷ་མོ་ནི། །སངས་རྒྱས་སྤྱན་ཞེས་བྱ་བ་སྟེ། །ལྷ་མོ་ཅུང་ཟད་འཛུམ་པའི་ཞལ། །འོད་ཀྱི་དཀྱིལ་འཁོར་འདོམ་གང་བ། །མཚུངས་མེད་སྐུ་ནི་རབ་ཏུ་དྭངས། །དེ་ནི་ཤཱཀྱ་ཐུབ་པའི་ཡུམ། །ཞེས་དང༌། སྤྱན་རས་གཟིགས་དབང་དཔའ་བོ་ནི། །པདྨ་དཀར་པོའི་གདན་ལ་འདུག །དུང་དང་ཀུནྡ་ཟླ་བ་འདྲ། །དབུ་ལ་འོད་དཔག་མེད་བཞུགས་པ། །དེ་ནི་བག་ཙམ་འཛུམ་པར་བྲི། །དེ་ཡི་གཡས་སུ་ལྷ་མོ་ནི། །སྒྲོལ་མ་གྲགས་པ་ཆེན་མོ་དེ། །
དགེ་ཞིང་འཇིགས་པ་སེལ་བ་སྟེ། །ཞེས་སོགས་གསལ་བར་གསུངས་ལ། རྣལ་འབྱོར་རྒྱུད་ལག་བཅང་གི་བདེ་བ་ལམ་དུ་བྱེད་པར་གཞན་རྣམས་ན་རྒྱས་པར་མ་གསུངས་ཀྱང༌། རྡོ་རྗེ་རྩེ་མོར་གསལ་བར་གསུངས་ཏེ། དེ་ཉིད་ལས། ལྷ་མོ་རྡོ་རྗེ་ཅ་ཅོ་སྒྲོག །པུས་ཁྱུད་རང་གི་ལྷ་མོ་དེ། །དེ་ཡི་གློ་ན་མགོ་བསྒྱུར་ཞིང༌། །འཛུམ་བཅས་ཀུན་ཏུ་ལྟ་བ་སྟེ། །བཅོམ་ལྡན་འདས་ཀྱི་ཕྱག་ལ་འཇུས། །ཞེས་པ་དང༌། དཔལ་མཆོག་དང་པོ་ལས། དེ་ཡི་ལོགས་ལ་རྡོ་རྗེ་ཆེ། །མདའ་ནི་གསོར་བ་ལ་བརྩོན་པ། །མཉེན་པའི་ཕྱག་གིས་ཡོངས་འཁྱུད་པའི། །ཚུལ་ཁྲིམས་རྒྱལ་མཚན་བསྒྲེང་དང་བཅས། །ཞེས་གསུངས་ཤིང༌། རྣལ་འབྱོར་བླ་མེད་ནི། གཉིས་སྦྱོར་གྱི་བདེ་བ་ལམ་དུ་བྱེད་པར་རང་གི་རྒྱུད་སྡེ་རྣམས་ནས་ཡང་ཡང་གསུངས་ཏེ། དེ་ཡང༌། དཔལ་གསང་བ་འདུས་པ་ལས། དེ་བཞིན་གཤེགས་པའི་བཙུན་མོ་མཆོག །སྤྱན་ལ་སོགས་པ་བསྒོམ་པར་བྱ། །དབངཔོ་གཉིས་ནི་མཉམ་སྦྱོར་བས། །སངས་རྒྱས་དངོས་གྲུབ་ཐོབ་པར་འགྱུར། །ཞེས་དང༌། སམ་བུ་ཊ་ལས། བདག་མེད་ལྷན་ཅིག་མཉམ་སྦྱོར་ཞིང༌། །དགའ་བའི་གཉིས་གཉིས་སྙོམས་འཇུག་པས། །རྦ་རླབས་མེད་པའི་རང་བཞིན་ཅན། །ཞེས་སོ། །གཉིས་པ་ལ། བྱ་བའི་རྒྱུད། མདུན་དུ་ལྷ་སྤྱན་དྲངས་ནས་བཟླས་བརྗོད་བྱེད་པ་ཙམ་ལས། བདག་ཉིད་ལྷར་བསྐྱེད་པ་མེད་པ་རྗེས་དཔོན་ལྟ་བུའི་ཚུལ་གྱིས་དངོས་གྲུབ་ལེན་པ་དང༌། སྤྱོད་རྒྱུད་དུ་བདག་
མདུན་གྲོགས་པོ་ལྟ་བུའི་ཚུལ་གྱིས་དངོས་གྲུབ་ལེན་པ་དང༌། རྣལ་འབྱོར་རྒྱུད་དུ། ཕྱི་རོལ་གྱི་ལྷ་དམིགས་པའི་རྟེན་ཙམ་དུ་བཞག་ལ། གཙོ་བོར་ནང་གི་ལྷའི་རྣལ་འབྱོར་ལ་སྤྱོད་པ་དང༌། དེ་གསུམ་ཆར་གྱི་ལྷའི་རྣལ་འབྱོར་ལ་བསྐྱེད་རིམ་གྱི་ཐ་སྙད་དོན་མཐུན་དུ་མི་འཇུག་པ་དང༌། སྦྱང་གཞིའི་རྣམ་པ་ལམ་དུ་བྱེད་པའི་ཚུལ་གྱིས་སྒོམ་པ་ཡང་མེད་དོ། །རྣལ་འབྱོར་བླ་ན་མེད་པར་ན་དེ་དག་ཀྱང་ཡོད་པ་དང༌། སྣང་བ་ཐམས་ཅད་ལྷར་སྒོམ་པ་དང༌། བདག་བསྐྱེད་ཀྱི་ལྷ་གནས་གཞན་དུ་གཤེགས་གསོལ་མི་མངའ་བ་སོགས་ཁྱད་པར་དུ་མས་འཕགས་པ་ཡིན་ནོ། །དེས་ན་ཕྱིའི་བྱ་བ་གཙོ་བོར་སྟོན་པས་ན་བྱ་བའི་རྒྱུད་དང༌། ཕྱི་ནང་གི་བྱ་བ་གཉིས་ཆ་མཉམ་དུ་སྤྱོད་པས་ན། གཉིས་ཀའི་རྒྱུད་དམ། སྤྱོད་པའི་རྒྱུད་དང༌། ཕྱིའི་བྱ་བ་སྙིང་པོ་མེད་པར་ཤེས་པས། ནང་གི་རྣལ་འབྱོར་ལ་གཙོ་བོར་སྤྱོད་པས། རྣལ་འབྱོར་གྱི་རྒྱུད་དང༌། ཕྱི་ནང་མཉམ་པ་ཉིད་དུ་ཤེས་ཏེ། ནང་གི་རྣལ་འབྱོར་ཁོ་ན་ལ་སྤྱོད་པ་རྣལ་འབྱོར་བླ་ན་མེད་པའི་རྒྱུད་དེ། དགྱེས་རྡོར་དོན་བསྡུས་ཀྱི་འགྲེལ་པ་ལས། དེ་ཁོ་ན་ཉིད་སྒོམ་པའི་ནུས་པ་ཆུང་བ་མཚན་མ་ཅན་གྱི་སྤྱོད་པ་ལ་མངོན་པར་དགའ་བ་རྣམས་ཕྱིའི་སྤྱོད་པ་དེ་དག་ཤས་ཆེར་སྟོན་པ་བྱ་བའི་རྒྱུད་རྡོ་རྗེ་གཙུག་ཏོར་གྱི་ཞེས་པ་དང༌། ཡང་དེ་ཉིད་ལས། གང་ཞིག་བྱ་བའི་ཁྱད་པར་ལ་ཡང་མོས་ཤིང༌། ཐབས་དང་ཤེས་རབ་ཀྱི་སྤྱོད་པ་རྒྱ་ཆེན་པོ་ལ་ཡང་སྦྱོར་བའི་ནང་གི་བདག་ཉིད་
ཅན་གྱི་ཚུལ་ཡང་མི་འདོར་བར་སྤྲོ་བ་དེ་དག་ནི་བྱ་བ་དང་རྣལ་འབྱོར་གྱི་ཆ་གཉིས་ལ་མཐུན་པ་གཉིས་ཀའི་རྒྱུད། ཕྱག་ན་རྡོ་རྗེ་ལ་དབང་བསྐུར་བ་ཞེས་བྱ་བ་དང༌། ཞེས་དང༌། དེ་ཉིད་སྣང་བ་ལས། རྒྱུད་འདི་ནི་སྒོམ་པ་གཙོ་བོར་གྱུར་པ་ཡིན་པས་ཞེས་པ་དང༌། འཇིག་རྟེན་གསུམ་རྒྱལ་གྱི་རྟོག་པའི་འགྲེལ་པ་ལས། དེ་ལ་རྣལ་འབྱོར་ཞེས་བྱ་བ་ནི་སེམས་མཉམ་པར་བཞག་པའོ། །དེའི་མཐུས་སྔགས་ཀྱི་སྒོ་ནས་བྱང་ཆུབ་སེམས་དཔའི་དགོས་པ་བསྒྲུབ་པའི་ཕྱིར། སྔགས་དང༌། ཕྱག་རྒྱ་དང༌། དཀྱིལ་འཁོར་དང༌། དབང་སྦྱིན་པ་ལ་སོགས་པ་སྣ་ཚོགས་སྦྲེལ་ཞིང༌། བརྒྱུད་པས་རྣལ་འབྱོར་གྱི་རྒྱུད་ཅེས་བྱའོ། །ཞེས་དང༌། རྣམ་སྣང་མངོན་བྱང་གི་ཚིག་འགྲེལ་ལས། འཕགས་པ་དེ་ཁོ་ན་ཉིད་བསྡུས་པ་ལ་སོགས་པ་ནང་གི་སྦྱོར་བ་གཙོ་བོར་གྱུར་པ་ཡིན་མོད་ཀྱི། ཕྱིའི་སྤྱོད་པ་རྣམས་ཀྱང་མེད་པ་མ་ཡིན་ནོ། །ཞེས་དང༌། གསང་འདུས་རྒྱུད་ཕྱི་མ་ལས། ཨེ་མ་ཧོ་ཤིན་ཏུ་རྙེད་དཀའ་བ། །བྱང་ཆུབ་སྒྲུབ་པའི་ཐབས་འདི་ཡིན། །རྒྱུད་ཀྱི་མཆོག་གི་མཆོག་གྱུར་པ། །གསང་བ་འདུས་པ་ཞེས་པའི་རྒྱུད། །ཅེས་དང༌། རྡོ་རྗེ་སྙིང་པོ་རྒྱན་གྱི་རྒྱུད་ལས། བཅོམ་ལྡན་དེ་བཞིན་གཤེགས་ཀུན་གྱི། །ཡེ་ཤེས་ཞེས་པ་དྲི་མེད་པ། །བྱང་ཆུབ་སེམས་ནི་རིན་པོ་ཆེ། བླ་ན་མེད་པ་བཤད་དུ་གསོལ། ཞེས་དང༌། གུར་ལས་ཀྱང༌། ཨེ་མ་མཁའ་འགྲོ་མ་ཡི་རྒྱུད། །རྒྱུད་རྣམས་ཀུན་གྱི་བླ་མ་སྟེ། །
རྟོགས་སླའང་རྟོགས་པར་དཀའ་བ་དང༌། །རིག་ན་མི་རིག་པ་ཉིད་དོ། །ཞེས་པའི་འགྲེལ་པར། རྒྱུད་རྣམས་ཀུན་གྱི་བླ་མ་སྟེ། །ཞེས་བྱ་བ་ནི་རྣལ་འབྱོར་གྱི་རྒྱུད་བླ་ན་མེད་པ་སྟེ། བྱ་བ་དང་སྤྱོད་པ་ལ་སོགས་པའི་བླ་མར་གྱུར་པའི་ཕྱིར་རོ། །ཞེས་སོ། །གཉིས་པ། དེ་དག་གི་ལམ་རིམ་བཤད་པ་ལ། བྱ་རྒྱུད་ཀྱི་ལམ་རིམ་དང༌། སྤྱོད་རྒྱུད་ཀྱི་དང༌། རྣལ་འབྱོར་གྱི་དང༌། རྣལ་འབྱོར་བླ་ན་མེད་པའི་རྒྱུད་ཀྱི་ལམ་རིམ་བཤད་པའོ། །དང་པོ་ལ། འཇུག་པའི་སྤྱོད་པ། སྦྱོར་བའི་སྤྱོད་པ། གྲུབ་པའི་སྤྱོད་པ། གྲུབ་པ་ཆེན་པོའི་སྤྱོད་པ་སྟེ་བཞི་ལས། དང་པོ་ལ། དབང་དང་དམ་ཚིག་གཉིས་ལས། དེ་ལ་དབང་ནི་ཆུའི་དབང་བསྐུར་དབུ་རྒྱན་དག །བྱ་བའི་རྒྱུད་ལ་རབ་ཏུ་གྲགས། །ཞེས་པ་ལྟར། དམ་ཚིག་སྦྱིན་པའི་དབང༌། ཆུ་དང༌། ཅོད་པན་དང༌། བགེགས་ཞི་བའི་དབང་བཀྲུ་བ་བྱབ་སྲུང་གསུམ་དང༌། ནུས་པ་བསྐྱེད་པའི་དབང་སྔགས་ཀྱི་བཟླས་ལུང་སྦྱིན་པ་དང༌། ལོངས་སྤྱོད་ལ་སོགས་ཕུན་ཚོགས་འཕེལ་བའི་དབང་ཤིས་པ་བརྗོད་པ་སྟེ། དབང་གི་ཆོ་ག་རྣམ་པ་བཞི་སྟེ། དེ་ལྟར་ཡང༌། གསང་བ་སྤྱི་རྒྱུད་ལས། ལྷ་ཡི་རིགས་རྣམས་མཐོང་བ་ལ། །དབང་བསྐུར་བ་ནི་རྣམ་པ་བཞི། །བླ་མ་མཉམ་པར་བཞག་པ་ཡིས། །དེ་དག་ཤེས་ནས་ཅི་རིགས་བྱ། །སློབ་དཔོན་གོ་འཕང་ཐོབ་པའི་ཕྱིར། །དང་པོ་ཡོངས་སུ་བསྒྲགས་པ་ཡིན། །རིག་སྔགས་རྣམས་ནི་བསྒྲུབ་
པའི་ཕྱིར། གཉིས་པ་ལེགས་པར་བཤད་པ་ཡིན། །རིག་གསུམ་དབང་བསྐུར་ཆོ་ག་ཡང༌། །མདོར་བསྡུས་ནས་ནི་བསྒྲགས་པ་ཡིན། །བཞི་པ་འབྱོར་པ་ཐོབ་པའི་ཕྱིར། །ཆོ་ག་རྒྱས་པར་བཤད་དོ། །ཞེས་གསུངས་སོ། །གཉིས་པ་ལ་ཐུན་མོང་དང་ཐུན་མོང་མ་ཡིན་པ་གཉིས། དང་པོ་ལ། དེའི་བསླབ་བྱ་ནི། དཀོན་མཆོག་ལ་དད་པ་དང༌། གསང་སྔགས་ལ་དད་པ་དང༌། ཐེག་པ་ཆེན་པོ་ལ་དགའ་བ་དང༌། དམ་ཚིག་དང་ལྡན་པ་ལ་གུས་པས་བསྐུར་བ་དང༌། འཇིག་རྟེན་དང་འཇིག་རྟེན་ལས་འདས་པའི་ལྷ་ལ་མི་སྡང་བ་དང༌། རང་གི་ལྷ་ལ་དུས་ཚིགས་སུ་མཆོད་པ་དང༌། སྟོན་པ་གཞན་གྱི་གཞུང་མི་མཆོད་པ་དང༌། གློ་བུར་དུ་འོངས་པ་ལ་མགྲོན་མཆོད་བྱེད་པ་དང༌། བྱམས་པ་མི་བཏང་བ་དང༌། སེམས་ཅན་གྱི་དོན་བྱེད་པ་ལ་བརྩོན་པ་དང༌། བཟླས་བརྗོད་ལ་བརྩོན་པ་དང༌། དམ་ཚིག་གཞན་ཡང་ཅི་ནུས་སུ་བསྲུང་བ་དང༌། སྔགས་དང་ཕྱག་རྒྱ་སྣོད་མིན་ལ་མི་སྟོན་པ་དང༌། རང་གི་སྔགས་རྒྱུད་བསྲུང་བའོ། །འདི་དག་རྒྱས་པ་ནི་གསང་བ་སྤྱི་རྒྱུད་ཉིད་ལས་ཤེས་པར་བྱའོ། །གཉིས་པ་ནི། དཔུང་བཟང་ལ་གསུངས་པའི་བསླབ་བྱ་རྣམས་དང༌། ལེགས་གྲུབ་ཀྱི་འདུལ་པའི་ལེའུར་གསུངས་པའི་བསླབ་བྱ་རྣམས་ཡིན་ལ། དེ་དག་ནི་བྱ་རྒྱུད་སྤྱི་ལ་འགྲོ་བ་ཡིན་ལ་སོ་སོའི་རྒྱུད་སྡེ་ནས་གསུངས་པའི་བསླབ་བྱ་རྣམས་ལ། བྱ་རྒྱུད་སྤྱི་ལ་འགྲོ་བ་དང༌། དགོས་ཀྱི་བསླབ་བྱ་སྣ་ཚོགས་པ་ཡོད་པས། བྱེ་བྲག་ཕྱེད་པར་བྱའོ། །གཉིས་པ་སྦྱོར་བའི་སྤྱོད་པ་ནི། རིགས་དྲུག་སོ་སོའི་
བསྙེན་པའི་ཆོ་ག་ཡན་ལག་དང་བཅས་པ་རྣམས་ཡིན་ཏེ། དེ་ཡང་ཁྱད་ཆོས་བཅུ་དང་ལྡན་པའི་བསྙེན་པ་དེ་ཁོ་ན་ཉིད་བཞི་དང་ལྡན་པར་བསྒོམ་པའོ། ཁྱད་ཆོས་བཅུ་ནི། དཔུང་བཟང་ལས། དངོས་གྲུབ་ཕྱིར་ནི་རྣམ་པ་བཅུར་གསུངས་ཏེ། །སྔགས་པ་དང་ནི་རང་སྔགས་གཡོག་དང་རྫས། །བརྩོན་འགྲུས་ཕྱོགས་དང་ས་བཞིན་དུས་དག་དང༌། །ཡན་ལག་རྫོགས་པའི་ལྷ་དང་སེམས་སྟོབས་སོ། །གཞན་དག་ཁ་ཅིག་རིག་འཛིན་གྲོགས་ཞེས་ཟེར། །གཞན་དག་ཕྱོགས་དང་བརྩོན་འགྲུས་དུས་རྣམས་ཉིད། །གཞན་ནི་རྫས་དང་ས་བཞིན་ལྷ་དང་སྔགས། ཁ་ཅིག་སེམས་སྟོབས་ཡིན་ཞེས་རྣམ་པར་སྨྲ། །བ སྒྲུབ་ཕྱིར་དེ་ལྟར་བཅུ་དང་བརྒྱད་དག་ལྔ། །དེ་བཞིན་བཞི་དང་གསུམ་དང་གཅིག་ཉིད་ཅེས། །སྔགས་རིགས་རང་རང་བློ་ཡི་རྣམ་པར་འཆད། །སངས་རྒྱས་རྒྱུད་ལ་ཆོ་ག་གཉིས་ཀྱིས་འགྲུབ། །སྒྲུབ་པོ་གང་ཞིག་རང་གི་ཡོན་ཏན་རྫོགས། །བརྩོན་འགྲུས་མཆོག་དང་ཡང་དག་ལྡན་པ་དང༌། །གཞན་གྱིས་རྙེད་པ་དག་ལ་ཕྲག་དོག་མེད། །འདོད་ལ་མ་ཆགས་ལུས་ཀྱིས་ཉོན་མོངས་བཟོད། །གུག་བསྐྱེད་ཀླད་ཀོར་ཚང་བ་ཟུར་ཕྱིན་ལ། །གསང་སྔགས་དག་ཅིང་ཤིན་ཏུ་ཆོ་གར་བཅས། །སངས་རྒྱས་བྱང་ཆུབ་སེམས་དཔའ་བསྟེན་པ་ཡི། །གནས་སུ་བཟླས་ནས་ཡིད་འོང་དངོས་གྲུབ་ཐོབ། །ཅེས་གསུངས་ཏེ། སྒྲུབ་པ་པོ་མཚན་ཉིད་དང་ལྡན་པ་དང༌། སྔགས་དག་ཅིང་ཆོ་ག་མ་ཉམས་
པ་གཉིས་གཙོ་བོར་བཟུང་ལ། གཞན་རྣམས་ཕལ་པའི་ཚུལ་དུ་བསྟན་ནོ། །དེ་ཁོ་ན་ཉིད་བཞི་ནི། བདག་ཉིད་དང༌། ལྷའི་དང༌། བཟླས་བརྗོད་ཀྱི་དང༌། བསམ་གཏན་གྱི་དེ་ཁོ་ན་ཉིད་བཞིའོ། །དང་པོ་བདག་གི་དེ་ཁོ་ན་ཉིད་ནི། ཇི་སྐད་དུ། དང་པོ་ཁྲུས་བྱས་རྣལ་འབྱོར་པས། །རྡོ་རྗེ་གདན་ལ་གནས་ནས་ནི། །མཆོད་དང་གསོལ་བ་ལྷ་དྲུག་སྒོམ། །སྟོང་དང་ཡི་གེ་སྒྲ་གཟུགས་དང༌། །ཕྱག་རྒྱ་མཚན་མ་དྲུག་ཡིན་ཏེ། །ཞེས་གསུངས་པ་ལྟར་ཏེ། སྔོན་འགྲོ་ཕྱི་ནང་གི་ཁྲུས་གཉིས་དང༌། བདག་དང༌། གནས་དང་རྣལ་འབྱོར་བསྲུང་བ་དང༌། དངོས་གཞི་ཡེ་ཤེས་པ་སྤྱན་དྲངས་ཤིང་བཞུགས་སུ་གསོལ་བ་དང༌། མཆོད་ཅིང་གསོལ་བ་གདབ་པ་དང༌། ལྷ་དྲུག་གི་རྣལ་འབྱོར་ལ་སེམས་འཛིན་པ་རྣམས་སོ། །གཉིས་པ་ལྷའི་དེ་ཁོ་ན་ཉིད་ནི། དེའང་ལྷ་དྲུག་སྟེ། ཡེ་ཤེས་ཀྱི་ལྷ་དམིགས་པའི་རྟེན་དུ་བྱས་ཏེ། དེ་ལ་སྟོང་པ་ཉིད་ཀྱི་རྒྱས་འདེབས་པ་ནི་སྟོང་པའི་ལྷ་དང༌། ལྷའི་ཐུགས་ཀར་སྔགས་ཀྱི་ཡིག་འབྲུ་ལ་སོགས་པ་བཀོད་པ་ཡི་གེའི་ལྷ་དང༌། བཟླས་བརྗོད་ཀྱི་སྒྲ་གྲག་སྟོང་དུ་ཤེས་པ་ནི། སྒྲའི་ལྷ་དང༌། ཞལ་ཕྱག་གི་རྣམ་པ་ཅན་གྱི་སྐུ་ནི་གཟུགས་ཀྱི་ལྷ་དང༌། རྡོ་རྗེ་གཙུག་ཏོར་ལ་སོགས་པའི་ཕྱག་རྒྱ་བྱིན་གྱིས་བརླབས་པ་ནི། ཕྱག་རྒྱའི་ལྷ་དང༌། རྡུལ་ཚོན་ལ་སོགས་པ་ལྷ་མཚོན་བྱེད་དུ་བཞག་པའི་རྟེན་ནི། མཚན་མའི་ལྷ་སྟེ། དེ་ལྟར་ན་དྲུག་གོ །གསུམ་པ་བཟླས་བརྗོད་ཀྱི་དེ་ཁོ་ན་ཉིད་ནི། སོ་སོའི་རྒྱུད་སྡེ་ནས་གསུངས་པ་བཞིན་
དུ་བགྲང་ཕྲེང་གི་ཁྱད་པར་ནི། ལེགས་གྲུབ་ལས། རྒྱལ་བའི་རིགས་ལ་བོ་ཏེ་ཙེ། །སྔགས་ཀྱི་ནོར་བུ་རབ་ཏུ་བསྒྲགས། །པདྨའི་རིགས་ལ་པདྨའི་སྙིང༌། །རྡོ་རྗེའི་རིགས་ལ་རུ་རག་ཤ །ཞེས་དང༌། གཞན་ཡང་དམིགས་པའི་ཁྱད་པར་དང༌། བཟླས་པའི་མན་ངག་དང་ལྡན་པས་སྔགས་ཀྱི་བཟླས་བརྗོད་བྱེད་པའོ། །བཞི་པ་བསམ་གཏན་གྱི་དེ་ཁོ་ན་ཉིད་ནི། ཇི་སྐད་དུ། སྔགས་ཀྱི་རྣམ་པར་ཤེས་པ་སྒོམ། །བསྡམས་ན་ཏིང་ངེ་འཛིན་ལ་གནས། །སྲོག་དང་རྩོལ་བ་རབ་ཏུ་བསྡམ། །ཞེས་པ་ལྟར། སྲོག་རྩོལ་བསྡམ་པའི་སྦྱོར་བས་ཞི་གནས་དང་ལྷག་མཐོང་གི་ཏིང་ངེ་འཛིན་བསྒྲ྄ུབས་པ་སྟེ། མཚན་མ་མེད་པའི་རྣལ་འབྱོར། དེ་ཁོ་ན་ཉིད་བཞིའི་ནང་ནས་ཀྱང་འདི་ཁོ་ན་གཙོ་བོ་ཡིན་ཏེ། ཇི་སྐད་དུ། ཡེ་ཤེས་གྲགས་པས། མཚན་མར་བཅས་པ་མཚན་བཅས་ཀྱི། །དངོས་གྲུབ་དམ་པ་རྒྱལ་བ་བཞེད། །མཚན་མ་མེད་ལ་གནས་པས་ནི། །མཚན་མར་བཅས་པ་འགྲུབ་ཏུ་རུང༌། །ཞེས་སོ། །དེ་ལྟར་སྔགས་དང༌། བདག་དང་བཟླས་བརྗོད་ཀྱི་དེ་ཉིད་གསུམ་ཤེས་ནས་བསྒྲུབས་ན་སངས་རྒྱས་ཐོབ་སྟེ། དེ་ཉིད་ལས། སྒྲ་དང་སེམས་དང་དེ་ཉིད་གཞོལ། །གསང་སྔགས་མི་འགྱུར་གཞི་ལ་གནས། ཡན་ལག་མ་ཉམས་གསང་སྔགས་བཟླས། །ངལ་ན་བདག་ལ་ངལ་གསོ་ཞིག །མི་འགྱུར་བ་ནི་ཡི་གེར་ལྡན། །གཞི་ལས་གཞི་འགྱུར་དེ་བཞིན་ཏེ། །
གསང་སྔགས་ཕྱིར་ནི་གང་བརྟག་པ། །ཡིད་ཀྱིས་དག་པ་བསམ་པར་བྱ། །སླར་བསྡུས་པ་ཡིས་བཀུག་ནས་ནི། །སྲོག་དང་རྩོལ་བ་བསྡམས་པའི་ཡིད། །གསང་སྔགས་རིག་པ་སྔགས་ལ་སྦྱར། ཡིད་ཀྱིས་བཟླས་བརྗོད་བརྩམ་པར་བྱ། འདི་ཉིད་ཀྱིས་ནི་ཆོ་ག་ཡི། །ཡང་ན་ཤུབ་བུར་བྱ་ཡང་རུང༌། །སྔགས་རིག་དངོས་གྲུབ་འདོད་པ་ཡིས། །བཟླས་བརྗོད་གཞན་དུ་མི་བྱའོ། །རིག་སྔགས་དེ་ཉིད་མ་ལུས་དང༌། །བདག་གི་དེ་ཉིད་ཆོ་ག་དང༌། །བཟླས་བརྗོད་དེ་ཉིད་མཆོག་ཤེས་དང༌། །མིས་ནི་དངོས་གྲུབ་ཐོབ་པར་འགྱུར། །ཞེས་དང༌། དེ་གསུམ་འབྲས་བུ་དང་བཅས་པ་ཡང༌། དེ་ཉིད་ལས། གསང་སྔགས་མེར་གནས་དངོས་གྲུབ་སྟེར། །སྒྲ་གནས་རྣལ་འབྱོར་སྟེར་བར་ལྡན། །སྒྲ་མཐར་ཐར་པ་སྟེར་པ་ཉིད། །དེ་དག་དེ་ཉིད་གསུམ་པོ་ཡིན། །ཞེས་སོ། །བསམ་གཏན་ཕྱི་མ་ལ་གསང་བའི་བཟླས་བརྗོད་དང༌། བསམ་གཏན་ནི་འགའ་ཞིག་གི་སྦྱོང་རྒྱུད་ཀྱི་ཉམས་ལེན་དུའང་ཡོད། གསུམ་པ་གྲུབ་པའི་སྤྱོད་པ་ནི། ཞི་བ་ལ་སོགས་པའི་ལས་རྣམས་དང༌། ལུས་དང༌། ལོངས་སྤྱོད་དང༌། རྫས་ཀྱི་རིག་པ་འཛིན་པ་ཏེ། ཐུན་མོང་སྒྲུབ་པའི་ཐབས་རྣམས་སོ། །བཞི་པ་གྲུབ་པ་ཆེན་པོའི་སྤྱོད་པ་ནི། ཐུན་མོང་གི་གྲུབ་པ་ལ་གནས་ནས་བྱང་ཆུབ་ལ་སྦྱོར་བའི་ཕྱིར། ཕ་རོལ་ཏུ་ཕྱིན་པ་བཅུ་ལ་སོགས་པའི་སྒྲུབ་པ་ལ་རྩོལ་བའོ། །རྒྱུད་འདིར་ནི་ཐུན་མོང་གི་དངོས་གྲུབ་གྲུབ་ནས། མཆོག་གི་དངོས་གྲུབ་རབ་འབྲིང་ཐ་མ་གསུམ་
གྱི་དབྱེ་བས་བྱང་ཆུབ་རྣམ་པ་གསུམ་ཡིན་ལ། འདིའི་ལམ་ལ་བརྟེན་ནས། འཕགས་པའི་གནས་ཐོབ་པའི་ཉན་རང་དེ་དག་ནི། ལྟ་བ་དང་གྲུབ་མཐའ་ནི་ཐེག་ཆེན་ཡིན་ལ། རང་རྒྱུད་ལ་སྐྱེས་པའི་ལམ་ནི་ཐེག་དམན་ཡིན་པར་ཤེས་སོ། །རྒྱུད་འདིར་ནི་སྐུ་གསུམ་གྱི་རྣམ་བཞག་ཀྱང་རྒྱས་པར་གསུངས་ཏེ། ཐེག་ཆེན་སྤྱི་དང་མི་འདྲ་བའི་ཁྱད་པར་ཡང་གསུངས། བྱ་བའི་རྒྱུད་ཁ་ཅིག་ལས་ནི། ལམ་ལྔ་ས་བཅུའི་རྣམ་བཞག་ཐེག་ཆེན་སྤྱི་དང་འདྲ་བར་བཤད་པ་ཡོད་ལ། འཇམ་དཔལ་རྩ་རྒྱུད་ཀྱི་དངོས་བསྟན་ལས་ནི། བསྐལ་བ་གྲངས་མེད་གསུམ་དུ་ཚོགས་བསགས་ཏེ། དགའ་ལྡན་དུ་དམ་པ་ཏོག་དཀར་པོ་གྱུར་པ་དང༌། དེ་ནས་ཤཱཀྱའི་རིགས་སུ་སྐྱེ་བ་ཞེས་པ་དང༌། ཁྱིམ་ནས་ཁྱིམ་མེད་པར་རབ་ཏུ་བྱུང་བ་དང༌། ལོ་དྲུག་དཀའ་བ་སྤྱད་པ་དང༌། བྱང་ཆུབ་ཀྱི་སྙིང་པོ་ལ་འདུག་པ་སྟེ། དེ་ཡན་ཆད་ནི་སོ་སོ་སྐྱེ་བོ་དང༌། དེ་ནས་བདུད་བཅོམ་སྟེ། རྡོ་རྗེ་ལྟ་བུའི་ཏིང་ངེ་འཛིན་གྱི་སྤང་བྱ་ཐམས་ཅད་ཅིག་ཅར་སྤངས་ཏེ་མངོན་པར་རྫོགས་པར་སངས་རྒྱས་ཞེས་ཐེག་དམན་གྱི་སྡེ་སྣོད་དང་མཐུན་པར་གསུངས། དེ་ནས་ཞི་བའི་ལམ་ལ་འགོད་པའི་འཁོར་ལོ་དང་པོ་དང༌། སངས་རྒྱས་ཐམས་ཅད་ཀྱི་གསུང་འཁོར་ལོ་བར་པ་དང༌། སྟོན་པ་ཉིད་ཀྱི་ཉམས་མྱོང་མངོན་དུ་མཛད་པ་འཁོར་ལོ་ཐ་མ་རྣམས་རིམ་ཅན་དུ་གསུངས་ཤིང༌། དེ་ནས་མཉན་ཡོད་དུ་མུ་སྟེགས་བརྟུལ་བ་དང༌། གྲོང་ཁྱེར་མེ་ཐབ་ཏུ་ལྷ་ལས་བབ་པ་
དང༌། སུམ་སུ་རྩ་གསུམ་དུ་གཤེགས་ནས་ལྷ་ལ་སོགས་པའི་འགྲོ་བ་དཔག་ཏུ་མེད་པ་བདེན་པ་ལ་བཀོད་པ་དང༌། དེ་ནས་གནས་གཙང་མའི་སྟེང་གི་ནམ་མཁར་བཞུགས་ཏེ། སྔགས་ཀྱི་ཐེག་པ་གསུངས་པར་བཤད་དོ། །ལམ་དང་འབྲས་བུ་དེ་ལྟ་བུ་སྟོན་པའི་རྒྱུད་ལ་རིགས་དྲུག་ཏུ་ཡོད་དེ། དེ་བཞིན་གཤེགས་པའི་རིགས། རྡོ་རྗེའི་རིགས། པདྨའི་རིགས་ཏེ་འཇིག་རྟེན་ལས་འདས་པའི་རིགས་གསུམ་དང༌། ནོར་བུའི་རིགས། ལྔ་རྩེན་གྱི་རིགས། འཇིག་རྟེན་ཕལ་པའི་རིགས་ཏེ་འཇིག་རྟེན་པའི་རིགས་གསུམ། དེ་ལྟར་ན་དྲུག་གོ །དེ་དག་ལ་རྒྱས་པར་ཕྱེ་ན་འཇིག་རྟེན་ལས་འདས་པ་གསུམ་པོ་དེ་དག་རེ་རེ་ལ་ཡང་རིགས་ཀྱི་གཙོ་བོ་དང༌། རིགས་ཀྱི་བདག་པོ་དང༌། རིགས་ཀྱི་ཡུམ་དང༌། གཙུག་ཏོར་བ་དང༌། རིགས་ཀྱི་ཁྲོ་བོ་ཁྲོ་མོ་དང༌། རིགས་ཀྱི་ཕོ་ཉ་ཕོ་མོ་དང༌། དེ་བཞིན་གཤེགས་པའི་རིགས་སུ་བསྡུས་པའི་བྱང་སེམས་དང༌། གནས་གཙང་གི་ལྷ་ལ་སོགས་པའི་རྒྱུད་སྡེ་བརྒྱད་དམ་བདུན་དུ་ཕྱེ་བ་དང༌། ལྷག་མ་རྣམས་ལ་འདི་ཅི་རིགས་པར་ཕྱེ་བ་ཡོད་དོ། །དེ་ཐམས་ཅད་བསྡུ་ན། རིགས་བཞིར་འདུ་བ་ཡིན་ཏེ། འཇིག་རྟེན་ལས་འདས་པའི་རིགས་གསུམ་དང་འཇིག་རྟེན་འཁྱམ་པའོ། །དེ་ལྟར་རིགས་དྲུག་ཀྱང་གསུམ་དུ་འདུས་ཏེ། དཔུང་བཟང་གི་བསྡུས་དོན་འགྲེལ་པའི་བརྗེད་བྱང་ལས། ནོར་ཅན་ནི་པདྨའི་རིགས་ཀྱིས་བསྡུས་སོ། །རྒྱས་པ་ནི་རྡོ་རྗེའི་རིགས་ཀྱིས་བསྡུས་སོ། །འཇིག་རྟེན་པའི་རིགས་ཀྱང་དེ་དག་གི་འགབ་ཏུ་འདུས་
པར་རིག་པར་བྱའོ། །དེ་དག་གིས་མ་བསྡུས་པ་རྣམས་ནི་དེ་བཞིན་གཤེགས་པའི་བྱིན་གྱིས་བརླབས་ལས་བྱུང་བ་མ་ཡིན་ཡང་བྱང་ཆུབ་སེམས་དཔའ་ས་གནས་པ་ལྟར་བདེ་བར་གཤེགས་པ་ཉིད་ཀྱི་རིགས་སུ་སྐྱེས་པ་ཡང་མ་ཡིན་པས། དེ་བཞིན་གཤེགས་པའི་རིགས་ལ་བརྟེན་པ་ཞེས་གདགས་ཏེ། ཞེས་བཤད་ལ། མཚན་ཉིད་དང་སྔགས་ལ་བལྟས་ན་ནོར་བུའི་རིགས་དང༌། རྒྱས་པའི་རིགས་གཉིས་ཀ་རྡོ་རྗེའི་རིགས་སུ་འདུ་བ་འདྲའོ། །དཔུང་བཟང་ལས། ཁ་ཅིག་ངའི་རིགས་སུ་གཏོགས་པ་སྟེ། ཁ་ཅིག་ཀྱང་ནི་པདྨའི་རིགས་སུ་གཏོགས། ཁ་ཅིག་ནོར་གྱིས་རིགས་སུ་གཏོགས་པ་ཡིན། །གཞན་ཡང་ཁ་ཅིག་གནས་མེད་རྣམ་པར་འཁྱམས། །ནོར་སྤྱོད་ཅེས་པ་ནོར་གྱི་རིགས་སུ་གསུངས། །ང་ཡིས་རྡོ་རྗེའི་རིགས་ལ་རབ་ཏུ་བསྟེན། །སྤྱན་རས་གཟིགས་དབང་པདྨའི་རིགས་ཡིན་ཏེ། །རིགས་བཞི་པ་ནི་འདིར་ནི་ལྔ་རྩེན་ཡིན། །ཅེས་གསུངས་ལ། འཇིག་རྟེན་པས་ཕུལ་བའི་གསང་སྔགས་ཁ་ཅིག་རིགས་བཞི་ལ་བརྟེན་པའི་གནས་མེད་པས་རྣམ་པར་འཁྱམས་པ་སྟེ། རིགས་ལ་སོགས་པ་ཡིན་པར་བསྟན་ནོ། །འོ་ན་དེ་བཞིན་གཤེགས་པའི་རིགས་ཀྱིས་མ་བསྡུས་སམ་ཞེ་ན། དེའི་རིགས་སུ་གཏོགས་པ་ནི་གཙུག་ཏོར་ལ་སོགས་པའི་ཡེ་ཤེས་ལས་བྱུང་བ་ཡིན་ལ། འདི་དག་རྣམ་སྨིན་གྱིས་བསྐྱེད་པ་ཡིན་པའི་ཕྱིར་རིགས་དངོས་ཀྱི་མ་བསྡུས་ཀྱང༌། དད་པས་སངས་རྒྱས་ལ་རིག་སྔགས་ཀྱི་ཆོ་ག་ཕུལ་བ་ཡིན་པས།
དེ་བཞིན་གཤེགས་པ་ལ་བརྟེན་པ་ཞེས་བྱ་བ་དངོས་སུ་རིགས་ལྔ་ཆར་གྱིས་མ་བསྡུས་པས་ཡོངས་སུ་འཁྱམས་པ་ཡིན་ཏེ། ཡོངས་སུ་འཁྱམས་པའི་རིགས་ཞེས་ཚིག་དོན་འགྲེལ་པའི་བརྗེད་བྱང་ལས་བཤད་དོ། །དཔུང་བཟང་ལས་ཀྱང༌། གཞན་ཡང་འདི་ན་ཁ་ཅིག་གནས་མེད་ཅིང༌། །བདེ་བར་གཤེགས་ལ་བརྟེན་ཅིང་ཡོངས་འཁྱམས་པ། །མདོ་སྡེ་འདིར་ནི་དེ་དག་ཐམས་ཅད་ཀྱང༌། །འབྱོར་བ་འདོད་པའི་མིས་ནི་རྣམ་པར་སྦྱར། །ཞེས་འཕགས་པའི་རིགས་ལྔ་འཇིག་རྟེན་པའི་རིགས་དང་དྲུག་ཀ་ལ་དཔུང་བཟང་ནས་འབྱུང་བའི་ཆོ་ག་བཞིན་སྦྱར་བར་བཤད་དོ། །རྒྱུད་སྡེ་སྒོ་དྲུག་གམ། གསུམ་པོ་ཡང༌། བསྡུ་ན་གསང་སྔགས་དང༌། རིག་སྔགས་གཉིས་སུ་འདུ་ལ། གསང་སྔགས་ནི་ཐབས་ལྷ་ཕོ་གཙོ་ཆེ་བའི་རྒྱུད། རིག་སྔགས་ནི་ཤེས་རབ་ལྷ་མོ་གཙོ་ཆེ་བའི་རྒྱུད་ཡིན་ལ། གཟུངས་ནི་དེ་གཉིས་ཀའི་དོན་སྟོན་པ་དང༌། ཤེས་རབ་ཀྱིས་རྟོགས་ནས་མི་བརྗེད་པར་འཛིན་པ་ཡིན་པས་གཉིས་ཀར་དུ་འདུས་པའམ། ཡང་ན་སྔགས་གཅིག་ལྷ་ཕོ་མོ་གཉིས་ཀའི་སྔགས་སུ་འགྱུར་བ་ནི་གཟུངས་སྔགས་ཡིན་ནོ། །གཉིས་པ། སྤྱོད་རྒྱུད་ཀྱི་ལམ་རིམ་ལ། བསྐུར་བྱ་དབང་དང༌། བསྲུང་བྱ་དམ་ཚིག་དང༌། བསྒོམ་བྱ་མངོན་རྟོགས་དང༌། བགྲོད་བྱ་ས་ལམ་གྱི་རྣམ་བཞག་དང་བཞི་ལས། དང་པོ་ནི། ཇི་སྐད་དུ། རྡོ་རྗེ་དྲིལ་བུ་དེ་བཞིན་མིང༌། །སྤྱོད་པའི་རྒྱུད་ལ་རབ་ཏུ་གྲགས། །ཞེས་པ་ལྟར། ཆུ་དང༌། ཅོད་པན་དང༌། རྡོ་རྗེ་དང༌། བདག་པོ་དང༌། མིང་སྟེ་
དབང་གི་དངོས་གཞི་རྣམ་པ་ལྔ་དང༌། མིག་ཐུར་མེ་ལོང་ཆོས་བཤད་སོགས་དབང་གི་ཆོ་ག་ཡན་ལག་དང་བཅས་པ་རྣམས་སོ། །གཉིས་པ་དམ་ཚིག་ལ། བཟུང་བའི་ཚུལ། ཐོབ་པའི་དུས་མཚམས། བསྲུང་བྱ་དམ་ཚིག་རང་གི་ངོ་བོ་བཤད་པའོ། །དང་པོ་ནི། སྟ་གོན་གྱི་ཚེ་དུས་གསུམ་སྒྲིབ་པ་མེད་པའི་དམ་ཚིག་གི་ལུས་དབུལ་བ་སྟེ། ཀུན་རྫོབ་ཏུ་སེམས་བསྐྱེད་པ་དང༌། འཇུག་པའི་ཚེ། ཟླ་བ་རྡོ་རྗེའི་ཆོ་གས་དོན་དམ་དུ་སེམས་བསྐྱེད་པ་དང༌། མཇུག་གི་ཚེ། ཁས་བླངས་པའི་ཚུལ་གྱིས་བཟུང་བའོ། །གཉིས་པ་ནི། སེམས་བསྐྱེད་གཉིས་དང་དབང་གི་དངོས་གཞིའི་ཚེའོ། །གསུམ་པ་ནི། ཉེས་སྤྱོད་སྡོམ་པའི་ཕྱོགས་སུ་གཏོགས་པ་མི་དགེ་བ་བཅུ་སྤོང་བ་དང༌། སེམས་ཅན་དོན་བྱེད་ཀྱི་ཕྱོགས་སུ་གཏོགས་པ་དམ་པའི་ཆོས་སྤོང་བ། བྱང་ཆུབ་ཀྱི་སེམས་སྤོང་བ་སེར་སྣ་བྱེད་པ། སེམས་ཅན་བློས་སྤོང་བ་དང་བཞི་སྟེ། གཞན་ཡང་སྤྱོད་རྒྱུད་རིགས་གསུམ་སོ་སོ་ནས་གསུངས་པ་སྣ་ཚོགས་པ་དག་ཡོད་དོ། །གསུམ་པ་བསྒོམ་བྱ་མངོན་རྟོགས་ཀྱི་རིམ་པ་ལ། ཆ་སྤྱིར་སྤྱོད་རྒྱུད་ཀྱི་ལམ་ཐམས་ཅད་འཇུག་པ། སྦྱོར་བ་གྲུབ་པའི་སྤྱོད་པ་གསུམ་དུ་འདུ་ཚུལ་བཤད་པའི་དང་པོ་དང་གཉིས་པ་གང་རུང་ལ་ཆད་ལྷག་ཅུང་ཟད་ཡོད་དམ་དཔྱོད། ཆ་སྤྱིར་སྤྱོད་རྒྱུད་ཀྱི་ལམ་ཐམས་ཅད་འཇུག་པ། སྦྱོར་བ་གྲུབ་པའི་སྤྱོད་པ་གསུམ་དུ་འདུ་བ་ལས། འཇུག་པ་ལ་ཕྱི་
འཇུག་དང༌། ནང་འཇུག་གཉིས་ལས། དངཔོ་ནི། གོང་དུ་བཤད་པའི་དབང་ཐོབ་ནས་དམ་ཚིག་ལ་གནས་པར་བྱེད་པའོ། །གཉིས་པ་ནི། མཚན་བཅས་དང༌། མཚན་མེད་ཀྱི་རྣལ་འབྱོར་གྱི་རྣམ་བཞག་ལེགས་པར་ཐོབ་ནས་མཁས་པར་བྱེད་པ་སྟེ། རྣམ་སྣང་མངོན་བྱང་ལས། གསང་བའི་བདག་པོ་དེ་ལ་ལྷའི་གཟུགས་ཀྱང་རྣམ་པ་གསུམ་སྟེ། ཡི་གེ་དང༌། ཕྱག་རྒྱ་དང༌། གཟུགས་སོ། །དེ་ལ་ཡི་གེ་ལ་ཡང་རྣམ་པ་གཉིས་ཏེ། སྒྲ་དང་བྱང་ཆུབ་ཀྱི་སེམས་སོ། །ཕྱག་རྒྱའི་གཟུགས་ལའང་རྣམ་པ་གཉིས་ཏེ། གཟུགས་དང་བཅས་པ་དང༌། གཟུགས་དང་བཅས་པ་མ་ཡིན་པའོ། །གསང་བའི་བདག་པོ་ལྷའི་གཟུགས་ཀྱང་རྣམ་པ་གཉིས་ཡོངས་སུ་དག་པ་དང༌། ཡོངས་སུ་མ་དག་པའོ། །དེ་ལ་ཡོངས་སུ་དག་པ་ནི། རྟོག་པའི་ངོ་བོ་སྟེ། མཚན་མ་ཐམས་ཅད་དང་བྲལ་བའོ། །ཡོངས་སུ་མ་དག་པ་ནི་མཚན་མ་དང་བཅས་པའི་གཟུགས་ཏེ་ཁ་དོག་དང་དབྱིབས་སོ། །དེ་ལ་ལྷའི་གཟུགས་རྣམ་པ་གཉིས་ཀྱི་དགོས་པ་རྣམ་པ་གཉིས་འགྲུབ་པར་འགྱུར་ཏེ། མཚན་མ་དང་བཅས་པ་ནི་མཚན་མ་དང་བཅས་པའོ། །མཚན་མ་མེད་པས་ནི་མཚན་མ་མེད་པ་དང་བཅས་པའི་དངོས་གྲུབ་ཀྱང་འབྱུང་བར་འགྱུར་རོ། །ཞེས་གསུངས་སོ། །གཉིས་པ་སྦྱོར་བའི་དཔྱོད་པ་ལ། མཚན་བཅས་དང་མཚན་མེད་གཉིས་ལས། དང་པོ་ནི་ལྷ་ཡི་གེའི་གཟུགས་མཚན་མ་གསུམ་གྱི་རྣལ་འབྱོར་ལ་གནས་ནས་བཟླས་
བརྗོད་བྱེད་པ་སྟེ། ཇི་སྐད་བཤད་པའི་བསྙེན་པ་ཡན་ལག་དང་བཅས་པ་རྣམས་སོ། །གཉིས་པ་མཚན་མེད་ཀྱི་རྣལ་འབྱོར་ནི། སྟོང་པ་ཉིད་ཀྱྀ་དོན་ངེས་པར་བྱས་ནས། རིགས་པས་དཔྱད་པའི་དོན་བསྒོམ་པ་ནི། འཇུག་པའི་སེམས་དང༌། རྣམ་པར་མི་རྟོག་པའི་དབྱིངས་བསྒོམ་པ་ནི་གནས་པའི་སེམས་དང༌། དེ་ལྟར་མ་རྟོགས་པའི་སེམས་ཅན་རྣམས་ལ་སྙིང་རྗེ་ཆེན་པོ་བསྒོམ་པ་ནི་ལྡང་བའི་སེམས་ཏེ། ཞི་ལྷག་ཟུང་འཇུག་གི་ཏིང་ངེ་འཛིན་ནོ། །གསུམ་པ་གྲུབ་པའི་སྤྱོད་པ་ལ། ཐུན་མོང་དང༌། མཆོག་གཉིས་ལས། དང་པོ་ནི། རྫས་ལ་སོགས་པའི་རིག་པ་འཛིན་པ་དང༌། འདོད་གཟུགས་ཀྱི་རིག་པ་འཛིན་པ་དང༌། ཏིང་ངེ་འཛིན་གྱི་ཁྱད་པར་གྱིས་རྫུ་འཕྲུལ་དང་མངོན་ཤེས་སྒྲུབ་པ་ལ་སོགས་པའོ། །དེ་དག་ཀྱང་སྐྱེ་བ་འདི་ཉིད་ལ་འགྲུབ་པ་དང༌། བར་མ་དོར་འགྲུབ་པ་དང༌། སྐྱེ་བ་བརྒྱུད་ནས་འགྲུབ་པ་དང་གསུམ་དུ་ཡོད་དོ། །གཉིས་པ་མཆོག་ནི་སྐུ་བཞི་དང་ཡེ་ཤེས་ལྔ་སྒྲུབ་པར་བྱེད་པའི་ཐབས་ཕ་རོལ་ཏུ་ཕྱིན་པ་བཅུ་དང༌། བསྡུ་བའི་དངོས་པོ་བཞི་ལ་ནན་ཏན་དུ་བྱེད་པའོ། །བཞི་པ་བགྲོད་བྱ་ལམ་གྱི་རྣམ་པར་གཞག་པ་ལ་འཇིག་རྟེན་པ་དང༌། འཇིག་རྟེན་ལས་འདས་པའི་ལམ་གཉིས་ལས། དང་པོ་ནི། ས་བོན་ལྟ་བུའི་སེམས་དང༌། མྱུ་གུ་ལྟ་བུའི་སེམས་ལ་སོགས་པ་རྩ་བའི་སེམས་བརྒྱད་དང༌། འདོད་ཆགས་དང་བཅས་པའི་སེམས་དང༌།
འདོད་ཆགས་དང་བྲལ་བའི་སེམས་ལ་སོགས་པ་འཇིག་རྟེན་པའི་སེམས་བརྒྱ་དྲུག་ཅུ་ཏེ། མངོན་མཐོའི་ལམ་དང༌། གཉིས་པ་འཇིག་རྟེན་ལས་འདས་པའི་ལམ་ནི། གང་ཟག་གི་བདག་མེད་པའི་དོན་སྒོམ་པ་ངེས་ལེགས་ལ་འཇུག་པའི་ལམ་སྟེ། ལམ་དེ་དག་གིས་ཉན་ཐོས་དང་ཐུན་མོང་གི་མཐོང་ལམ་མངོན་དུ་བྱེད་ཅིང༌། འདི་ཚུན་ཆད་དུ་བསྐལ་བ་ཆེན་པོ་གཅིག་ཐོགས་པར་བཤད་དོ། །དེ་ནས་ཉན་ཐོས་ཀྱི་ཞུགས་འབྲས་བརྒྱད་དང༌། ཐུན་མོང་གི་རྟོགས་པ་རྒྱུད་ལ་རིམ་གྱིས་བསྐྱེད་ཅིང༌། འདི་ལ་ཡང་བསྐལ་བ་ཆེན་པོ་ཕྱེད་ཐོགས་ཤིང༌། དེ་ནས་ཐེག་ཆེན་ཐུན་མོང་མ་ཡིན་པའི་མོས་པས་སྤྱོད་པ་ལ་འཇུག་ཅིང༌། འདིའི་མོས་སྤྱོད་ནི་ཚོགས་ལམ་ལ་བྱེད་ཅིང༌། འདི་ལ་ཡང་བསྐལ་བ་ཆེན་པོ་ཕྱེད་ཐོགས་སོ། །དེ་ནས་མོས་སྤྱོད་ས་བཅུ་སྦྱོར་བའི་ལམ་ལ་འཇུག་སྟེ། ཇི་སྐད་དུ། མོས་པའི་སྤྱོད་པ་ཡིས་ནི་ས། །སེམས་གསུམ་རྣམ་པར་བསྒོམས་བྱས་ནས། །ཕ་རོལ་ཕྱིན་པ་དྲུག་རྣམས་དང༌། །བསྡུ་བའི་དངོས་པོ་བཞི་རྣམས་ཀྱི། །མོས་པའི་ས་ནི་མཚུངས་པ་མེད། །ཞེས་པ་ལྟར་སྦྱཽར་ལམ་ས་བཅུ་སྟེ། རིམ་པ་བཞིན་དུ། ཕ་རོལ་ཏུ་ཕྱིན་པ་དྲུག་གི་སྒྲུབ་པ་དང༌། བསྡུ་བའི་དངོས་པོ་བཞི་ལ་རིམ་གྱིས་སློབ་པའི་སའོ། །དེ་ལྟར་མོས་སྤྱོད་ཀྱི་ས་བཅུ་ལ་བསྐལ་ཆེན་ཕྱེད་དང༌། དེ་ནས་ཐེག་ཆེན་ཐུན་མོང་མ་ཡིན་པའི་མཐོང་མ་མངོན་དུ་བྱས་ནས། འཕགས་
པའི་ས་བཅུ་བསྐལ་ཆེན་ཕྱེད་ཀྱིས་བགྲོད་དེ། མཐར་ཨ་ཁཾ་ཝི་ར་ཧཱུཾ་ཞེས་པ་ཡི་གེ་ལྔའི་གཟུངས་ཀྱི་སྒོ་ལ་བརྟེན་ཏེ། རྫོགས་པའི་བྱང་ཆུབ་མངོན་དུ་བྱེད་དོ། །འབྲས་བུའི་རྣམ་བཞག་ནི་ཐེག་ཆེན་སྤྱི་དང་འདྲ་བར་ཤེས་པར་བྱའོ། །དེ་ལྟར་སྟོན་པའི་རྒྱུད་ལ་རིགས་གསུམ་དུ་གནས་ཏེ། སྐུ་མི་ཟད་པ་རྒྱན་གྱི་འཁོར་ལོ། གསུང་མི་ཟད་པ་རྒྱན་གྱིས་འཁོར་ལོ། ཐུགས་མི་ཟད་པ་རྒྱན་གྱིས་འཁོར་ལོའི་རིགས་རྣམས་སྟོན་པའི་རྒྱུད་གསུམ་མོ། །དང་པོ་ནི། རྩ་བའི་རྒྱུད་རྣམ་སྣང་མངོན་བྱང་དང༌། མི་གཡོ་བ་བརྟུལ་ཕོད་ལ་སོགས་དང༌། གཉིས་པ། གསུང་གི་རྒྱུད་ནི་བོད་དུ་མ་གྱུར་བར་གྲགས་ལ། གསུམ་པ་ནི། ཕྱག་ན་རྡོ་རྗེ་དབང་བསྐུར་བའི་རྒྱུད་ལ་སོགས་པ་རྣམས་སོ། །གསུམ་པ་རྣལ་འབྱོར་གྱི་རྒྱུད་ཀྱི་ལམ་རིམ་ལ། འཇུག་སྒོ་དབང་གི་དང༌། བསྲུང་བྱ་དམ་ཚིག་དང༌། བསྒོམ་བྱ་མངོན་རྟོགས་ཀྱི་དང༌། བགྲོད་བྱ་ལམ་གྱིས་རྣམ་བཞག་དང་བཞི་ལས། དང་པོ་ནི། ཇི་སྐད་དུ་ཕྱིར་མི་ལྡོག་པ་ཡི་ནི་དབང༌། །རྣལ་འབྱོར་རྒྱུད་དུ་གསལ་བར་བྱས། །དེ་ནི་དྲུག་གི་བྱེ་བྲག་དབང༌། །དེ་ནི་སློབ་དཔོན་དབང་ཞེས་བྱ། །ཞེས་གསུངས་པ་ལྟར་ཡིན་ཏེ། དེ་ལ་གང་དུ་དབང་བསྐུར་བྱའི་དཀྱིལ་འཁོར་ནི། དུག་ལྔ་ཆ་མཉམ་དུ་སྤྱོད་པ་རྣམས་འདུལ་བའི་དོན་དུ། དེ་བཞིན་གཤེགས་རིགས་ཏེ། རྡོ་རྗེ་སེམས་དཔའི་དཀྱིལ་འཁོར་དང༌། ཞེ་སྡང་ཅན་འདུལ་བའི་དོན་དུ། ཁྲོ་བོའི་དཀྱིལ་འཁོར་དང༌། གཏི་མུག་ཅན་འདུལ་བའི་དོན་དུ།
འགྲོ་བ་འདུལ་བའི་དཀྱིལ་འཁོར་དང༌། སེར་སྣ་དང་ཕྲག་དོག་ཅན་འདུལ་བའི་དོན་དུ། རིན་ཆེན་འབྱུང་ལྡན་གྱི་དཀྱིལ་འཁོར་རྣམས་ཏེ། ཇི་སྐད་དུ། སྒེག་པའི་རྡོ་རྗེ་སེམས་དཔའ་ཉིད། །ཅེས་པ་དང༌། རྩེ་མོར་རྡོ་རྗེ་ཅན་ཀུན་ཁྲོ་གཉེར་ཅན། །རིན་ཆེན་ཚོགས་ནི་རབ་བཞེད་ལ། །པདྨ་ཆེན་པོ་དུལ་ཞི་ཞིང༌། །དྲག་པོ་ཞི་བ་ལས་འཛིན་པ། །ཞེས་དང༌། ཁ་དོག་ལྗང་གུ་ལས་འཛིན་པ། །ཞེས་སོ། །འདིའི་དོན་ཡོད་གྲུབ་པ་ནི་རིན་ཆེན་འབྱུང་ལྡན་གྱི་ནང་དུ་འདུ་བའོ། །དེ་དག་རེ་རེ་ལ་ཡང་སྐུ་ཕྱག་རྒྱ་ཆེན་པོའི་རྩ་བའི་དཀྱིལ་འཁོར་དང༌། གསུང་ཆོས་ཀྱི་ཕྱག་རྒྱ་ཆོས་ཀྱི་དཀྱིལ་འཁོར་དང༌། ཐུགས་དམ་ཚིག་གི་ཕྱག་རྒྱ་གཟུངས་ཀྱི་དཀྱིལ་འཁོར་དང༌། འཕྲིན་ལས་ལས་ཀྱི་ཕྱག་རྒྱ་ལས་ཀྱི་དཀྱིལ་འཁོར་རྣམས་དང༌། དེ་རེ་རེ་ལ་ཡང༌། རྒྱས་པ་ལ་དགའ་བ་རྣམས་ཀྱི་དོན་དུ། དཀྱིལ་འཁོར་རྒྱས་པ་དང༌། འབྲིང་པོ་ལ་དགའ་བ་རྣམས་ཀྱི་དོན་དུ། ཕྱག་རྒྱ་བཞི་པོའི་དཀྱིལ་འཁོར་དང༌། བསྡུས་པ་ལ་དགའ་བ་རྣམས་ཀྱི་དོན་དུ། ཕྱག་རྒྱ་གཉིས་པའི་དཀྱིལ་འཁོར་རྣམས་གསུངས་སོ། །དཀྱིལ་འཁོར་དེ་དག་ཏུ་དབང་བསྐུར་བའི་ཆོ་ག་ནི། ཡེ་ཤེས་ཐིག་ལེའི་འགྲེལ་པར། དེ་ནི་དྲུག་གི་བྱེ་བྲག་དབང༌། །ཞེས་པ་ཆུ་ལ་སོགས་པ་ལྔའི་སྟེང་དུ་སློབ་དཔོན་གྱི་དབང་དང་དྲུག་ལ་འདོད་པ་ནི་མི་འཐད་དེ། སློབ་དཔོན་གྱི་དབང་རང་ལ་དྲུག་ཚང་དགོས་ཏེ། ཡེ་ཤེས་ཐིག་ལེ་ཉིད་ལས། བདུན་གཉིས་བྱེ་བྲག་ཏུ་ནི་ཡོད། །ཅེས་ཆུ་ནས་དབང་བཞིའི་བར་ལ་དབང་བཅུ་བཞིར་བཤད་ཅིང༌། ཕྱག་ཆེན་ཐིག་ལེ་ལས་ཀྱང༌། སློབ་དཔོན་
དབང་ལ་བཅུ་གཅིག་དབྱེ། །ཞེས་དང༌། རྡོ་རྗེ་ཕྲེང་བ་ལས་ཀྱང༌། དང་པོའི་དབང་ནི་གཙོ་བོ་སྟེ། །གཉིས་པ་གསང་བའི་མིང་ཅན་ནོ། །གསུམ་པ་ཀུན་ནས་སྦྱོར་བ་སྟེ། །བཞིའི་བདག་ཉིད་དོན་དམ་པའོ། །གཙོ་བོའི་དབྱེ་བ་བཅུ་གཅིག་སྟེ། །བཅུ་གཉིས་པ་ནི་གསང་བའོ། །བཅུ་གསུམ་པ་ནི་ཡང་དག་སྦྱོར། །བཅུ་བཞི་པ་ནི་དོན་དམ་སྟེ། །དབང་བསྐུར་རེ་རེ་ས་རེའོ། །ཞེས་བཤད་པས་ཆུ་དང༌། ཅོད་པན་དང༌། རྡོ་རྗེ་དང༌། དྲིལ་བུ་དང༌། མིང་སྟེ་ཐུན་མོང་གི་དབང་ལྔ་དང༌། དམ་ཚིག་གསུམ་སྦྱིན་པ་ཕྱིར་མི་ལྡོག་པའི་དབང་དང༌། དེ་ཁོ་ན་ཉིད་གསུམ་བརྗོད་པ་གསང་བའི་དབང༌། རྗེས་གནང་ལུང་བསྟན་དབུགས་དབྱུང་གཟེངས་བསྟོད་བཞི་སྟེ། ཐུན་མོང་མ་ཡིན་པའི་དབང་དྲུག་གོ །ཡང་ན་ཡེ་ཤེས་ཐིག་ལེ་ལས། ཆུ་དང་དབུ་རྒྱན་རྡོ་རྗེ་དང༌། །དྲིལ་བུ་མིང་དང་བརྟུལ་ཞུགས་དང༌། །ལུང་བསྟན་པ་དང་སྐྱབས་སྦྱིན་དང༌། །སྔགས་དང་ཕྱག་རྒྱ་ཡེ་ཤེས་སོ། །རྣལ་འབྱོར་རྒྱུད་ལ་མོས་པ་ལ། །དབང་བརྒྱད་ཕྱེ་ལ་སྦྱིན་པར་བྱ། །རྣལ་འབྱོར་བླ་མ་ལ་མོས་ལ། །བཅུ་གཅིག་བདག་ཉིད་སྦྱིན་པར་བྱ། །ཞེས་པའི་དོན་འགྲེལ་པར། སྔགས་ཕྱག་རྒྱ་ཡེ་ཤེས་རྣམས་ཞར་བྱུང་དུ་བྱས་ནས་བརྒྱད་དུ་བྱས་ནས། དེའི་སྟེང་དུ་དམ་ཚིག་གསུམ་བསྣན་ནས་བཅུ་གཅིག་ཏུ་བྱེད་དོ། །སངས་རྒྱས་ཐོད་པར། གསང་བ་ཕྱི་ཡི་ལྔ་དང་ནི། །བདུན་པ་བཅུ་བཞིར་བཤད་པ་དང༌། །གཉིས་ཀ་གཅིག་ཏུ་འདུས་པ་ཡི། །ཞེས་པའི་འགྲེལ་པར། ཕྱིའི་ལྔ་ནི་
རིག་པའི་དབང་ལྔ་དང༌། བདུན་ནི་སྔགས། རྡོ་རྗེའི་བརྟུལ་ཞུགས་དང༌། སྤྱོད་པའི་བརྟུལ་ཞུགས་དང་ལུང་བསྟན་པ། ཕྱིར་མི་ལྡོག་པའི་དབང་དང༌། རིག་མའི་བརྟུལ་ཞུགས་དང་བདུན་ནོ། །གཉིས་ཀ་དང་ནི་གསུམ་དང་བཞི་པ་སྟེ། ཐམས་ཅད་གཅིག་ཏུ་བསྡུས་ནས་བཅུ་བཞིར་བཤད་དོ། །གཉིས་པ་བསྲུང་བྱ་དམ་ཚིག་གི་རྣམ་བཞག་ལ། སྤྱིར་བཏང་གི་དམ་ཚིག་རིགས་ལྔའི་དམ་ཚིག་བཅུ་བཞི་དང་བྱང་ཆུབ་སེམས་དཔའི་ཕས་ཕམ་པ་བཅུ་བཞི་དེ། རིགས་ལྔ་སོ་སོའི་དབང་དུ་བྱས་ཏེ། དེ་བཞིན་གཤེགས་རིགས་ཀྱི་དམ་ཚིགསེམས་ཅན་ཐམས་ཅད་ལ་སྙིང་རྗེ་ཆེན་པོས་རྗེས་སུ་ཆགས་པར་བྱ་བ་དང༌། ཁྲོ་བོའི་རིགས་ལ་ཧཱུཾ་མཛད་ཀྱི་རྣལ་འབྱོར་གྱིས་མངོན་སྤྱོད་ཀྱི་ལས་སྒྲུབ་པ་དང༌། པདྨའི་རིགས་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་ལས་མ་གཡོས་བཞིན་དུ། སེམས་ཅན་རྣམས་ལ་གང་ལ་གང་འདུལ་གྱི་ཆོས་སྟོན་པ་དང༌། རིན་པོ་ཆེ་དང་ལས་ཀྱི་རིགས་ལ། སྦྱིན་པ་རྣམ་བཞིས་སེམས་ཅན་རྣམས་ཚིམ་པར་བྱེད་པ་སོགས། རྒྱས་པར་རྡོ་རྗེ་རྩེ་མོ་ལས་གསུངས་པ་ཡིན་ནོ། །གསུམ་པ། བསྒོམ་བྱ་མངོན་རྟོགས་ལ། བསྙེན་པ་དང༌། སྒྲུབ་པ་གཉིས་ལས། དང་པོ་ནི། ཏིང་ངེ་འཛིན་གསུམ་མམ་རྣལ་འབྱོར་བཞི་སྟེ། དེ་ཡང་སྔོན་བྱུང་དང་མཐུན་པར་དང་པོར་འོག་མིན་དུ་འཚང་རྒྱ་ཚུལ་དང་མཐུན་པར་དང་པོར་སྦྱོར་བ། བར་དུ་རི་རབ་ཀྱི་རྩེར་དཀྱིལ་འཁོར་སྤྲུལ་བཤད་མཛད་པ་དང་མཐུན་པར་དཀྱིལ་འཁོར་རྒྱལ་མཆོག །མཐར་རིགས་སོ་སོའི་འཁོར་ལོ་
བསྒྱུར་བར་བྱས་སྟེ་འཕྲིན་ལས་མངོན་པར་འདུ་མཛད་པ་དང་མཐུན་པར་ལས་རྒྱལ་མཆོག་སྟེ། ཏིང་ངེ་འཛིན་གསུམ་དང༌། རང་ཉིད་རིགས་ཀྱི་ལྷ་དམ་ཚིག་པར་བསྐྱེད་པར་རྣལ་འབྱོར། དེ་ལ་ཡེ་ཤེས་པ་གཞུག་པ་རྗེས་སུ་རྣལ་འབྱོར། བརྟན་གཡོ་ཐམས་ཅད་རང་རིགས་ཀྱི་ལྷའི་རྣལ་འབྱོར་དུ་བྱེད་པ་ཤིན་ཏུ་རྣལ་འབྱོར། དེ་གསུམ་སྔོན་དུ་འགྲོ་བའི་སྣང་སྟོང་ལ་རྩེ་གཅིག་པ་རྣལ་འབྱོར་ཆེན་པོ་སྟེ་རྣལ་འབྱོར་བཞིར་གསུངས་ཏེ། དཔལ་མཆོག་འགྲེལ་པར། དེ་ལ་དེ་ཁོ་ན་ཉིད་རྣམ་པ་ལྔ་བསྒོམས་པས་བདག་ཉིད་རང་གི་ལྷའི་ངོ་བོ་ཉིད་དུ་བསྐྱེད་པ་བསྒོམ་པ་ནི་རྣལ་འབྱོར་ཞེས་བྱའོ། །ཡེ་ཤེས་སེམས་དཔའ་བཅུག་ནས་དེ་དང་ལྷན་ཅིག་ཏུ་གྱུར་པར་ལྷག་པར་མོས་པ་ནི་རྗེས་སུ་རྣལ་འབྱོར་ཞེས་བྱའོ། །རྒྱུ་བ་དང་མི་རྒྱུ་བ་ཐམས་ཅད་ངོ་བོ་ཉིད་ཀྱི་རང་བཞིན་དུ་བདག་ཉིད་སྒོམ་པ་ཐམས་ཅད་ཀྱི་རྣལ་འབྱོར་ཞེས་བྱའོ། །རྣལ་འབྱོར་དང་རྗེས་སུ་རྣལ་འབྱོར་དང་ཐམས་ཅད་ཀྱི་རྣལ་འབྱོར་རྣམ་པར་བསྒོམས་པས་སེམས་རྩེ་གཅིག་ཏུ་གྱུར་པ་གང་ཡིན་པ་ནི་ཤིན་ཏུ་རྣལ་འབྱོར་ཞེས་བྱའོ། །ཞེས་སོ། །དེ་དག་ལ་མཚན་མ་རྙེད་རྙེད་སྒོམ་པ་བསྙེན་པའོ། །གཉིས་པ་བསྒྲུབ་པ་ནི། འཇིག་རྟེན་འདས་པའི་དངོས་གྲུབ་ཏིང་ངེ་འཛིན་ལ་བརྟེན་ནས་གཙོ་བོར་སྒྲུབ་པ་དང༌། བཟླས་པ་ལ་བརྟེན་ནས་འཇིག་རྟེན་འདས་མ་འདས་ཀྱི་དངོས་གྲུབ་གཉིས་ཀའི་ཐུན་མོང་བའི་སྒྲུབ་པའོ། །དེའི་དང་པོ་ནི། ལྷའི་སྣང་བ་དང༌། དེ་ཉིད་སྒྱུ་མ་ལྟ་བུ་ལ་གསལ་སྣང་དང་ངེས་ཤེས་བརྟན་པོ་རྙེད་ནས། འཁོར་གསུམ་
ཡོངས་དག་གི་མཆོད་པས་ལྷ་རྣམས་མཉེས། དེ་ནས་ཕྱག་རྒྱ་སྒྲུབ། གྲུབ་ནས་ཕྱག་རྒྱའི་ལས་རབ་འབྱམས་ལ་སྦྱར། དེ་ནས་མཚན་མ་ཁྱད་པར་ཅན་ཐོབ་ནས་མངོན་ཤེས་ལྔ་སྒྲུབ། དེ་གྲུབ་ནས་དཔལ་མཆོག་ནས་བཤད་པའི་རིག་པའི་སྤྱོད་པའི་བླ་ན་མེད་པའི་སྤྲོས་བཅས་ཀྱི་སྤྱོད་པ་དང་ཕྱོགས་འདྲ་ཞིག་སྤྱད་པས། མཆོག་གྲུབ་ལ། ལན་གཅིག་གིས་མ་གྲུབ་ན་ལན་བདུན་བསྐྱར། དེས་ཀྱང་མ་གྲུབ་ན་དྲག་ཤུལ་སྦྱོར་བས་འགྲུབ་པ་ཡིན་ནོ། །གཉིས་པ་བཟླས་པ་ལ་བརྟེན་པ་ལ། དབུགས་འགྲོ་འོང་ལ་བརྟེན་པ་ཀུན་རྫོབ་དམིགས་བཅས་ཀྱི་རྡོར་བཟླས་དང་སྲོག་རྩོལ་བཀག་སྟེ་བདག་དང་ལྷ་སྔགས་སྐྱེ་མེད་ལ་སྒོམ་པ་དོན་དམ་དམིགས་མེད་ཀྱི་རྡོར་བཟླས་ཏེ། དབང་རྣོན་ལ་རྡོར་བཟླས་གཉིས་དང༌། དེ་བཞིན་གཤེགས་རིགས་ལ་སྒྲ་མེད། རྡོ་རྗེའི་རིགས་ལ་འབྲུག་གི་སྒྲ་ལྟ་བུ། པདྨའི་རིགས་ལ་ཕྲ་ཞིང་གསལ་བ། རིན་པོ་ཆེའི་རིགས་ལ་ཤིན་ཏུ་གསལ་བར་བཟླ་བ་དབང་བརྟུལ་ལ་ཚིག་གི་བཟླས་པ་སྟེ། རྡོར་བཟླས་འཇིག་རྟེན་འདས་པའི་དངོས་གྲུབ་དང༌། ཚིག་བཟླས་འཇིག་རྟེན་པའི་དངོས་གྲུབ་ཀྱི་རྒྱུའོ། །བཞི་པ་ནི། བགྲོད་བྱ་ས་ལམ་གྱི་རྣམ་བཞག་ལ། ཐོབ་བྱེད་ཉེར་ལེན་གྱི་རྒྱུ། ཐོག་མཐའ་མེད་པའི་སེམས་པ། བྱང་ཆུབ་ཀྱི་སེམས་ཀུན་ཏུ་བཟང་པོ། ལྷ་དང་སྔགས་དང་དཀྱིལ་འཁོར་དང་ཕྱག་རྒྱ་ཐམས་ཅད་ཀྱི་འཆར་བའི་གཞི་སེམས་ཀྱི་དེ་ཁོ་ན་ཉིད་དེ། རྡོ་རྗེ་རྩེ་མོ་ལས། རྒྱུད་ནི་རྒྱུན་
ཞེས་བྱ་བ་སྟེ། །འཁོར་བ་བརྒྱུད་དུ་འདོད་པ་ཡིན། །ཅེས་རྒྱུ་རྒྱུད་དོ། །ཐོབ་བྱ་འབྲས་བུ་ནི། སྒྲིབ་པ་ཀུན་བྲལ་གྱི་རྣམ་སྣང་སྐུ་བཞིའི་བདག་ཉིད་ཅན་ནོ། །རྒྱུ་དཻས་འབྲས་བུ་མངོན་དུ་བྱེད་པའི་ཐབས་རྒྱུད་ནི། ཐབས་ཕྱག་རྒྱ་བཞི་དང་འབྲེལ་བའི་ལྷའི་རྣལ་འབྱོར་དང༌། ཤེས་རབ་སེམས་ཀྱི་དེ་ཁོ་ན་ཉིད་མངོན་སུམ་དུ་རྟོགས་པ། སོ་སོར་རང་གི་རིག་པའི་ཡེ་ཤེས་སོ། །དེ་ལ་ལྷའི་རྣལ་འབྱོར་ནི། ཀུན་གཞི་རྣམ་ཤེས་ཀྱི་གཉེན་པོར་སྐུ་ཕྱག་རྒྱ་ཆེན་པོའི་རྣལ་འབྱོར་བསྒོམས་པས། མེ་ལོང་ཡེ་ཤེས་མངོན་དུ་བྱེད། ཉོན་ཡིད་ཀྱི་གཉེན་པོར་ཐུགས་དམ་རྒྱ་བསྒོམས་པས་མཉམ་ཉིད་ཡེ་ཤེས་མངོན་དུ་བྱེད། ཡེ་ཤེས་ཀྱི་གཉེན་པོར་གསུངས་ཆོས་རྒྱ་བསྒོམས་པས་སོར་རྟོག་ཡེ་ཤེས་མངོན་དུ་བྱེད། དབང་ཤེས་ཀྱི་གཉེན་པོར་འཕྲིན་ལས་རྒྱ་བསྒོམས་པས། བྱ་གྲུབ་ཡེ་ཤེས་མངོན་དུ་བྱེད། ཆོས་དབྱིངས་ཡེ་ཤེས་དེ་ཐམས་ཅད་ཀྱི་རང་བཞིན་དུ་གནས་སོ། །གཞི་ལམ་འབྲས་བུའི་ཆིངས་དེ་ལྟར་ངེས་ནས། ལམ་སྐྱེ་ཚུལ་བཤད་ན་རྩེ་མོར། བསྐལ་བ་བརྒྱ་ཕྲག་དག་ཏུ་ནི། །ཅི་སྟེ་མངོན་པར་བརྩོན་བྱས་ཀྱང༌། །གང་ཟག་བཞིས་ནི་འཇིག་རྟེན་དུ། །བསྒྲུབས་ཀྱང་འགྲུབ་པར་ཉིད་མི་འགྱུར། །བྱང་ཆུབ་སེམས་ནི་མ་སྐྱེས་དང༌། །ཐེ་ཚོམ་ལྡན་པ་ཉིད་དང་ནི། །བཀའ་བཞིན་དུ་ནི་མི་བྱེད་པ། །དད་པ་མེད་ཉིད་གྲུབ་མི་འགྱུར། །ཞེས་གསུངས་པས། སེམས་བསྐྱེད་ལྡན་པ། རྒྱུད་ལ་
ཡིད་ཆེས་པ། དམ་ཚིག་བཀའ་བཞིན་སྒྲུབ་པ། ལམ་དང་ལམ་སྟོན་ལ་དད་པ་ཕུན་སུམ་ཚོགས་པ་སྟེ། ཆོས་བཞི་ལྡན་གྱི་སྒྲུབ་པ་པོ། བསྙེན་པ་ལ་བརྟེན་ནས། ལྷའི་གསལ་སྣང་རབ་ཏུ་ཕྱིན་པ་ན་བཟླས་པ་རྩལ་ཐོན་པར་གྱུར་པའི་ཚེ་ཚོགས་ལམ་ཆེན་པོའོ། །དེ་ལ་སྟོང་པའི་གསལ་སྣང་ཐོབ་པའི་ཚེ་སྦྱོར་ལམ་དྲོད་ཀྱི་རྟོགས་པ་སྐྱེས། དེ་ལས་མངོན་ཤེས་ལྔ་ཐོབ་པ་རྩེ་མོའོ། །དེ་ཕན་ཆད་ས་བཅུ་པ་ཐོབ་ཀྱི་བར། ལམ་གྱི་ངོ་བོའི་ཁྱད་པར་མ་གཏོགས་བགྲོད་ལུགས་མདོ་དང་མཐུན། འོན་ཀྱང་མྱུར་དུ་ཐོབ་པར་འདོད་པས་བརྩོན་འགྲུས་རྩོམ་ཤིང་བར་ཆད་མེད་ན། དབང་རྣོན་དང༌། དབང་བརྟུལ་གྱི་བྱེ་བྲག་གིས། ཚེ་ལོ་བརྒྱ་པའི་མི་ནས་མིར་སྐྱེ་བ་བདུན་ནམ་བཅུ་དྲུག་གི་ཡུན་ཚད་ལ་སངས་རྒྱས་ཐོབ་ཅིང༌། དེ་ཡང་ས་བཅུ་པ་ཐོབ་ནས་བསམ་གཏན་བཞིའི་རབ་མཐའ་སྒྲུབ་པར་བཤད་ལ། རབ་མཐའི་སྙོམས་འཇུག་འཇིག་རྟེན་པ་མངོན་པ་ནས་བཤད་པ་དང་ནི་མི་གཅིག་སྟེ། འདི་ནི་སྒྱུ་མ་ལྟ་བུ་དང༌། རྡོ་རྗེ་ལྟ་བུ་དང༌། དཔའ་བར་འགྲོ་བ་གསུམ་ཚོགས་པའི་ཏིང་ངེ་འཛིན་ལ་རྣམ་པའི་ཁྱད་པར་འགའ་ཞིག་ཕྱོགས་མཚུངས་པ་ལ་བསམ་གཏན་དང་པོ་ནས་སྲིད་རྩེའི་བར་དུ་མིང་བཏགས་ཏེ། དེ་ལ་ལྟོས་པའི་བར་མཐའ་ཡིན་ལ། དེ་ཡང་བསམ་གཏན་དང་པོའི་ཉེར་བསྡོགས་མི་ལྕོག་མེད་པ་དང༌། དང་པོ་ཙམ་ཁྱད་གཉིས་གཉིས་པ་སོགས་གསུམ། གཟུགས་མེད་བཞི་རྣམས་ལ་མཐར་
ཆགས་སུ་ལུགས་འབྱུང་ལུགས་ལྡོག །རེ་རེ་བོར་བའི་ཐོད་རྒལ་དུ་ལུགས་འབྱུང་ལུགས་ལྡོག་ཏུ་བྱས་ནས། ཡང་མི་ལྕོགས་མེད་པ་ནས་གསུམ་པའི་བར་དུ་སོང་བཞི་པ་ལ་ཆེ་འབྲིང་ཆུང་གསུམ་སོགས་དགུར་ཕྱེ་བའི་ཆེན་པོའི་ཆེན་པོའི་རབ་མཐའ་ཏེ། དེ་གྲུབ་པ་ན། བྱང་ཆུབ་སེམས་དཔའ་དེ་ལ་ནི་དོན་ཐམས་ཅད་གྲུབ་པ་ཞེས་བྱ་བ་སྟེ། དེའི་འོག་མིན་དུ་བཞུགས། མི་གཡོ་བའི་ཏིང་ངེ་འཛིན་ལས་སངས་རྒྱས་རྣམས་ཀྱིས་བསླངས། མངོན་བྱང་ལྔའི་གདམས་ངག་ཕོག་པས། ཡེ་ཤེས་ལྔའི་ངོ་བོར་སངས་རྒྱས་ཏེ། འཇིག་རྟེན་ཐམས་ཅད་དུ་འཁོར་བ་ཇི་སྲིད་པར་སྤྲུལ་པའི་སྐུའི་འཕྲིན་ལས་འཇུག་པ་ཡིན་ལ། མདོ་ལམ་ནས་སྔགས་ལ་འཇུག་ཚུལ་སོགས་ཀྱང་སྤྱི་དང་འདྲ་བའི་རྣམ་བཞག་ཡོད་དོ། །ལམ་རིམ་དེ་ལྟ་བུ་སྟོན་པའི་རྒྱུད་ལྔ་ནི་རྣལ་འབྱོར་རྒྱུད་དེ། དེ་ལ་ཕ་རྒྱུད་དང་མ་རྒྱུད་གཉིས་ཏེ། དང་པོ་ལ་རྩ་བའི་རྒྱུད་དེ་ཉིད་བསྡུས་པ། བཤད་རྒྱུད་རྡོ་རྗེ་རྩེ་མོ་ཐམས་ཅད་གསང་བ། ཁམས་གསུམ་རྣམ་རྒྱལ་ཏེ་གསུམ། གྲགས་ཚོད་ལྟར་ན་ཆ་མཐུན་གྱི་རྒྱུད་ངན་སོང་སྦྱོང་རྒྱུད་དོ། །གཉིས་པ་ལ་རྩ་བའི་རྒྱུད། ཤེར་ཕྱིན་ཚུལ་ལ་བརྒྱ་ལྔ་བཅུ་པའམ། དཔལ་མཆོག་དང་པོ་ཡིན་ལ། གྲགས་པ་དང་བསྟུན་ན་ཆ་མཐུན་རྡོ་རྗེ་སྙིང་རྗེ་རྒྱན། གསང་བ་རྒྱན་བཀོད། གསང་བ་ནོར་ཐིག་ལ་སོགས་པ་ཡིན་ལ། དཔལ་མཆོག་ལ་བཤད་རྒྱུད་ཡོད་དུ་རུང་མོད་ཀྱང་བོད་དུ་མ་འགྱུར་ཞིང༌། འཕགས་ཡུལ་ན་ཡང་མ་གྲགས་སོ། །
ཡང་དཔལ་མཆོག་དང་པོ། དེ་ཉིད་བསྡུས་པའི་ཆ་མཐུན་གྱི་རྒྱུད་ཡིན་གསུང་བ་ཡོད་ནའང༌། ཕན་འདོགས་ཤིང་ཕྱོགས་མཐུན་ལ་དགོངས་ན་རུང་ལ། དེའི་ཚེ། དེ་ཉིད་བསྡུས་པ་ཡང་དཔལ་མཆོག་གི་ཆ་མཐུན་དུ་འགྱུར་ལ། གཞན་དུ་ན། རང་གིས་ཀྱང་ཕ་རྒྱུད་མ་རྒྱུད་གྱི་དབྱེ་བ་མཛད་པ་དང་འགལ་ལོ། ཁ་ཅིག་འདིར་བཤད་ཕ་རྒྱུད་རྣམས་དང༌། དཔལ་མཆོག་རྣལ་འབྱོར་ཙམ་གྱི་རྒྱུད། རྣམ་སྣང་སྒྱུ་འཕྲུལ་དྲྭ་བ་རྗེས་སུ་རྣལ་འབྱོར། སྙིང་རྒྱན་གསང་རྒྱན་གཉིས་ཤིན་ཏུ་རྣལ་འབྱོར། ནོར་ཐིག་རྣལ་འབྱོར་ཆེན་པོ་ཞེས་བྱ་བ་ཡིན་གསུང་ནའང༌། སྒྱུ་དྲྭ་ཚིགས་རིགས་ཐམས་ཅད་ཀྱང་གསང་འདུས་དང་མཐུན་པ་སོགས་རྣལ་འབྱོར་རྒྱུད་མ་ཡིན་པའི་རྒྱུ་མཚན་མང་པོ་ཡོད་ལ། ཡོ་གར་འགྲེལ་མཁན་མང་དུ་བྱུང་ཀྱང་རྒྱུ་མཚན་དུ་མི་རུང་ཞིང༌། ལྷག་མ་རྒྱུད་དེ་དག་ལ་ཚིག་ཟིན་ལ་ཟབ་ཁྱད་རེ་སྣང་ལ། རྣལ་འབྱོར་བཞིར་འབྱེད་པ་ཡིད་ཆེས་བྱུང་ན་ལེགས་པོར་ཡང་འགྱུར་མོད། འོན་ཀྱང་ཕྱི་མ་གསུམ་པོ་འདི་བཤད་རྒྱུད་རྡོ་རྗེ་སྙིང་རྒྱན་ནས། བླ་མེད་རྣམས་དང་ལྷན་ཅིག་བགྲངས་པ་དང་རྒྱུད་ཀྱི་རང་བཞིན་ལ་དཔག་ན་བླ་མེད་ཡིན་ལ། བརྡ་ཆད་མང་པོ་རྣལ་འབྱོར་རྒྱུད་ལྟར་བཤད་ནའང་ཡོ་ག་ནས་བླ་མེད་ལ་འཇུག་པའི་ལམ་གྱི་མཚམས་སྦྱཽར་དུ་བཤད་པ་ཡིན་པར་སེམས་སོ། །ཆ་འདིར་བཤད་མ་ཐག་པའི་དཔལ་མཆོག་དང་པོ་སོགས་བཞི་ག་རྣལ་འབྱོར་ཆེན་པོའི་རྒྱུད་དུ་རང་ལུགས་ལ་བཞེད་དམ་དཔྱོད། བཞེད་ན་དེ་དག་གཙོ་བོར་རྣལ་འབྱོར་བླ་མེད་དོ། །
ཆ་བཞི་པ་རྣལ་འབྱོར་བླ་ན་མེད་པའི་རྒྱུད་ཀྱི་ལམ་རིམ་ལ། ལམ་རིམ་དངོས་བཤད་པ། དེ་སྟོན་བྱེད་རྒྱུད་སྡེ་བཤད་པ། རྒྱུད་སྡེ་འཆད་ཚུལ་གྱི་མན་ངག་བསྟན་པའོ། །དང་པོ་ནི། རྒྱུད་གསུམ་གྱིས་གཏན་ལ་དབབ་དགོས་ཏེ། སྤྱོད་པ་བསྡུས་པའི་འགྲེལ་པ། སློབ་དཔོན་ཤཱཀྱ་བཤེས་གཉེན་གྱིས་མཛད་པར། རྒྱལ་བ་སྟོབས་ཅན་སྙིང་པོ་ཡིས། །སྔོན་འགྲོ་འགྲེལ་པ་ཀུན་བརྗོད་དེ། །དོན་ནི་རྣམ་པ་གསུམ་དུ་འདུས། །རྒྱུད་དང་ཐབས་དང་འབྲས་བུའོ། །རྒྱུ་ནི་ཐེག་ཆེན་རིགས་ཅན་ཏེ། །དགེ་བའི་ཆོས་ཀྱིས་རྣམ་པར་བརྒྱན། །ཐབས་ནི་རྣམ་པ་གཉིས་ཡིན་ཏེ། །དབང་བཀུར་དེ་ཉིད་སྤྱོད་དང་བཅས། །འབྲས་བུ་སྐུ་གསུང་ཐུན་མོང་གྲུབ། །ཅེས་རྒྱུད་ཀྱི་དོན་ཐམས་ཅད་རྒྱུ་ཐབས་འབྲས་བུ་གསུམ་དུ་འདུས་པ་དེ་ཉིད་རྣམ་པར་བཤད་པར་བྱ་སྟེ། རྒྱུའི་རྒྱུད་དང༌། ཐབས་ཀྱི་རྒྱུད་དང༌། འབྲས་བུ་རྒྱུད་དོ། །དེ་སྐད་དུ་ཡང༌། རྒྱུད་ནི་རྒྱུན་ཞེས་བྱ་བ་སྟེ། །རྒྱུད་དེ་རྣམ་པ་གསུམ་དུ་འགྱུར། །གཞི་དང་དེ་ཡི་རང་བཞིན་དང༌། །མི་འཕྲོག་པ་ཡི་རབ་ཕྱེ་བ། །ཞེས་པ་འདི་ནི་རེ་ཞིག་ལུང་ངོ༌། །དང་པོ་ལ་སྡོམ་ནི། ངོ་བོ་གཙོ་བོ་མཚན་ཉིད་དང༌། །རྣམ་གྲངས་ལྡན་པ་གནས་སྐབས་དང༌། །མི་འགྱུར་བས་ཀྱང་རྒྱུ་རྒྱུད་བསྡུས། །རྒྱུའི་རྒྱུད་གང་ཞེ་ན། ཐོག་མ་མེད་པའི་དུས་ནས་བརྒྱུད་དེ་འོང་བ། སེམས་རང་བཞིན་གྱི་འོད་གསལ་བ་གང་ཡིན་པ་དང༌། སེམས་དང་སེམས་ལས་བྱུང་བ་རྣམས་དང༌། སྣོད་དང་བཅུད་ཀྱི་རང་བཞིན་དང༌། རྩ་དང༌།
ཁམས་དང༌། ཆོས་ཀྱི་དབྱིངས་གང་ཡིན་པ་དེ་རྣམས་སོ། །དེ་རྣམས་ཀྱི་གཙོ་བོ་ནི། སེམས་ཀྱི་རང་བཞིན་འོད་གསལ་བའོ། །དེ་ཉིད་གང་ཞེ་ན། ཞིང་དང༌། སྐུ་དང༌། ཡེ་ཤེས་ལ་སོགས་པ་འབྲས་བུའི་ཆོས་དང་མཐུན་པའི་ཁྱད་པར་ཅན། རང་བཞིན་བདེ་བ་ཆེན་པོ་རྒྱུན་ཆད་པ་མེད་པ། ཆོས་ཉིད་ཀྱིས་ཐོབ་པ་སྟེ། ཁྱད་པར་བཞི་དང་ལྡན་པའོ། །རྒྱུའི་རྒྱུད་དང༌། སྦྱང་གཞི་དང༌། ཀུན་གཞི་དང༌། དང་པོའི་སངས་རྒྱས་ནི་རྣམ་གྲངས་སོ། །རྒྱུ་ནི་དུ། གཞི་ནི་དུ། ཀུན་གཞི་ནི་དུ། དང་པོའི་སངས་རྒྱས་ནི་དུ་ཞེ་ན། རྒྱུ་ནི་བཅུ་བཞི་སྟེ། ཉོན་མོངས་པའི་རྒྱུ་དང༌། ལས་ཀྱི་རྒྱུ་དང༌། སྡུག་བསྔལ་གྱི་སྟེ། ཀུན་ནས་ཉོན་མོངས་པ་དང༌། སྣོད་དང༌། བཅུད་དང༌། ལམ་གྱི་རྒྱུ་དང༌། སྟོང་པ་དང༌། བདེ་བ་དང་ཟུང་དུ་འཇུག་པའི་རྒྱུ་དང༌། རགས་པ་དང༌། ཕྲ་བ་དང༌། ཤིན་ཏུ་ཕྲ་བའི་རྒྱུ་དང༌། གཟུགས་ཀྱི་སྐུ་གཉིས་དང༌། ཆོས་ཀྱི་སྐུའི་རྒྱུ་རྣམས་སོ། །གཞི་ནི་བཅོ་ལྔ་སྟེ། སྣོད་དག་པའི་གཞི་དང༌། བཅུད་དག་པའི་གཞི་དང༌། ཉེར་སྤྱོད་དག་པའི་གཞི་དང༌། རྣམ་པར་འགྱུར་བ་དག་པའི་གཞི་དང༌། རང་བཞིན་དག་པའི་གཞི་དང༌། འཁོར་བའི་གཞི་དང༌། མྱ་ངན་ལས་འདས་པའི་གཞི་དང༌། རང་བཞིན་གྱི་གཞི་དང༌། རྣམ་གྲངས་ཀྱི་གཞི་དང༌། མཐར་གཏུགས་པའི་གཞི་དང༌། ཀུན་རྫོབ་ཀྱི་གཞི་དང༌། དོན་དམ་པའི་གཞི་དང༌། རགས་པའི་གཞི་དང༌། ཕྲ་བའི་གཞི་དང༌། ཤིན་ཏུ་ཕྲ་བའི་གཞི་
རྣམས་སོ། །དང་པོ་ལྔ་ནི་ལས་དང་བྱ་བའི་སྒོ་ནས་སྟེ། སྦྱང་བྱའི་རབ་ཏུ་དབྱེ་བའོ། །དེ་ནས་གསུམ་ནི་བཅིངས་གྲོལ་གྱིས་རབ་ཏུ་དབྱེ་བའོ། །དེ་ནས་གཉིས་གཉིས་ནི་དངོས་དང་བཏགས་པ་དང༌། རྫས་དང་བཏགས་པས་རབ་ཏུ་ཕྱེ་བའོ། །ཐ་མར་གསུམ་ནི་རྟོགས་ཚུལ་གྱིས་རབ་ཏུ་ཕྱེ་བའོ། །དེ་ལ་རགས་པའི་གཞི་གང་ཞེ་ན། དགུ་པོ་འདི་དག་སྟེ། གང་ཟག་ཏུ་བཏགས་པས་ཡོད་པ་དག་ལ་བརྗོད་དེ། ཙན་དན་དང༌། ཨུཏྤལ་དང༌། པདྨ་དང༌། པདྨ་དམར་པོ་དང༌། རིན་པོ་ཆེ་ལྟ་བུ་དང༌། ཉོན་མོངས་པས་རྣམ་པར་ཕྱེ་བ་དང༌། ལས་ཀྱིས་རྣམ་པར་ཕྱེ་བ་དང༌། ལུས་ཀྱིས་རྣམ་པར་ཕྱེ་བ་དང༌། རིགས་ཀྱིས་རྣམ་པར་ཕྱེ་བའོ། །དང་པོ་ལྔ་ནི་མཚན་ཉིད་ཀྱིས་རབ་ཏུ་ཕྱེ་བའོ། །ཕྱི་མ་བཞི་ནི་རྣམ་གྲངས་ཀྱིས་རབ་ཏུ་ཕྱེ་བའོ། །འདིར་ཀུན་གཞི་ཞེས་བྱ་བ་ནི། སྡེ་སྣོད་ཀྱི་ཚུལ་ལས་འབྱུང་བ་ཁོ་ན་བཞིན་ནོ། །དང་པོའི་སངས་རྒྱས་ནི་གཉིས་ཏེ། རང་བཞིན་གྱི་དང་པོ་དང༌། གློ་བུར་གྱི་དང་པོ་སངས་རྒྱས་སོ། །འདི་ལ་ཇི་ལྟར་ན་སྐྱོན་དང༌། ཡོན་ཏན་དང༌། རྒྱུ་དང་འབྲས་བུ་དག་དང་འབྲེལ་བར་ལྡན་ཞེ་ན། སད་པའི་གནས་སྐབས་དང༌། རྨི་ལམ་གྱི་གནས་སྐབས་དང༌། གཉིད་འཐུག་གི་གནས་སྐབས་དང༌། བཞི་པའི་གནས་སྐབས་ཀྱི་སྒྲིབ་པ་ཞེས་བྱ་བ་གནས་ཏེ། དགའ་བ་བཞིའམ་སྣང་བ་བཞི་དང་ལྷན་ཅིག་གནས་པ་
ཡིན་ནོ། །རླུང་བཞི་དང༌། ཐིག་ལེ་བཞི་དང༌། འཁོར་ལོ་བཞི་ལས་དྲི་བཅས་དང༌། ཅུང་ཟད་དྲི་བྲལ་དང༌། ཆེས་དྲི་བྲལ་ལམ། འཛག་བཅས་ཀྱི་དབང་དང༌། འཛག་མེད་ཀྱི་དབང་དང༌། ཤིན་ཏུ་འཛག་པ་དང་བྲལ་བའི་དབང་ལས། རིགས་བཞི་དང༌། རྒྱུད་བཞི་དང༌། འགྲོ་བ་བཞི་དང༌། ཡོན་ཏན་བཞི་དང༌། ཐུན་ཚོད་བཞི་དང༌། བག་ཆགས་བཞིས་རྣམ་པར་རྟོག་པ་བཞི་འབྱུང་སྟེ། ཐམས་ཅད་ཡོད་པར་རྟོགས་པ་དང༌། རྡུལ་ཕྲན་ཏུ་རྟོགས་པ་དང༌། སེམས་ཙམ་དུ་རྟོག་པ་དང༌། དེ་ཡང་མི་དམིགས་པ་སྟེ། གྲུབ་མཐའ་བཞི་དང༌། སྡེ་པ་བཞི་དང༌། སྐད་ཅིག་མ་བཞི་དང༌། དགའ་བ་བཞི་དང༌། བདེན་པ་བཞི་ལ་སྒྲོ་འདོགས་པའམ་དེ་དག་ལ་ཇི་བཞིན་དུ་རྟོགས་པ་སྟེ། དེ་བཞིན་དུ་ཨེ་ཝཾ་མ་ཡ་དང༌། གནས་བཞི་དང༌། རིགས་བཞིའི་ཕྱག་རྒྱས་དྲི་མ་སྦྱོང་བའི་ཁྱད་པར་དང༌། སྐུ་བཞི་དང༌། རྡོ་རྗེ་བཞི་ལ་སོགས་པ་ཇི་ལྟར་རྒྱུད་ལས་རྒྱས་པར་འབྱུང་བ་དེ་ལྟར་ཤེས་པར་བྱའོ། །འདིར་གནས་སྐབས་གང་ཞེ་ན། ཐར་པའི་ཆ་མཐུན་མ་བསྐྱེད་པ་དང༌། སྐྱེད་པ་དང༌། སོ་སོ་སྐྱེ་བོའི་ལམ་དང༌། སློབ་པའི་ལམ་དང༌། མི་སློབ་པའི་ལམ་རྣམས་སུ། དང་པོའི་སངས་རྒྱས་དང༌། རྒྱུའི་རྒྱུད་དང༌། ལམ་དུ་ཞུགས་པ་དང༌། འཕགས་པ་དང༌། འབྲས་བུའི་རྡོ་རྗེ་འཛིན་པ་ཞེས་མིང་གིས་བཏགས་སོ། །དེ་རྣམས་སུ་འགྱུར་བ་མེད་པ་ཇི་ལྟ་བུ་ཞེ་ན། སྔ་མ་ལས་ཕྱི་མའི་ཚེ་ངོ་བོར་མི་འགྱུར་བ་སྟེ།
སྐྱེ་བ་དང༌། རྒ་བ་དང་ན་བ་དང་འཆི་བ་དང༌། འགྲོ་བ་རྣམས་དང༌། རྟེན་འབྲེལ་རྣམས་དང༌། རིག་པ་དང། བདེན་པ་མཐོང་བ་དང༌། རྣམ་པར་མི་རྟོག་པ་ལ་ཞུགས་པ་དང༌། རྡོ་རྗེ་ལྟ་བུའི་ཏིང་ངེ་འཛིན་གྱིས་ཀྱང་མི་འཇིག་ཅིང་མི་འགྱུར་བའོ། །གཉིས་པ་ཐབས་ཀྱི་རྒྱུ་གང་ཞེ་ན། སྡོམ་ནི། དབང་བསྐུར་དམ་ཚིག་སྡོམ་པ་དང༌། །ཏིང་འཛིན་རྒྱུད་ཀྱིས་སྦྱོར་བའོ། །ལྔ་པོ་འདི་དག་ནི་ཐབས་ཀྱི་རྒྱུད་དེ། དབང་བསྐུར་བ་དང༌། དམ་ཚིག་རྣམས་དང༌། སྡོམ་པ་དང༌། ཏིང་ངེ་འཛིན་དང༌། ལས་དང༌། དངོས་གྲུབ་ཀྱི་སྦྱོར་བའོ། །དབང་བསྐུར་བ་གང་ཞེ་ན། བུམ་པ་དང་གསང་བ་དང༌། ཤེས་རབ་ཡེ་ཤེས་དང༌། བཞི་པ་དང༌། འཇིག་རྟེན་པ་དང༌། འཇིག་རྟེན་ལས་འདས་པ་དང༌། སློབ་མའི་དབང་དང་ཕྱིར་མི་ལྡོག་པའི་དབང་དང༌། ཐ་མལ་གྱི་དབང་དང༌། མཆོག་གི་དབང་དང༌། འཇུག་པའི་ཆོ་ག་དང༌། དངོས་གཞི་དང༌། རྗེས་སུ་གནང་བ་དང༌། ལུང་བསྟན་པ་དང། གཟེངས་བསྟོད་དང༌། ཡོན་འབུལ་བ་དང་བཅས་པ་རྣམས་སོ། །དམ་ཚིག་གང་ཞེ་ན། ངོ་བོའི་སྒོ་ནས། བསྲུང་བའི་དམ་ཚིག་དང༌། སྒྲུབ་པའི་དམ་ཚིག་གོ །བསྲུང་བའི་དམ་ཚིག་གང་ཞེ་ན། རྩ་བའི་ལྟུང་བ་དང། ཡན་ལག་གི་ལྟུང་བ་ལ་སོགས་པ་བསྲུང་བ་ཉིད་དོ། །རྩ་བའི་ལྟུང་བ་གང་ཞེ་ན། བཅུ་བཞི་པོ་རྣམས་ཏེ། སློབ་དཔོན་སྨད་པར་མི་བྱ་ཞིང༌། །བདེ་
གཤེགས་བཀའ་ལས་འདའ་མི་བྱ། །སྤུན་ལ་སྨད་པར་མི་བྱ་ཞིང༌། །སེམས་ཅན་རྣམས་ལ་བྱམས་མི་སྤངས། །བྱང་ཆུབ་སེམས་ནི་དོར་མི་བྱ། །རང་གཞན་ཆོས་ལ་སྨད་མི་བྱ། །མ་སྨིན་པ་ལ་གསང་མི་བསྒྲགས། །ཕུང་པོ་རྣམས་ལ་སྨད་མི་བྱ། །དག་པའི་ཆོས་ལ་སོམ་ཉི་སྤོང༌། །གདུག་པ་ཅན་ལ་བྱམས་པ་སྤངས། །མིང་སོགས་བྲལ་བ་དེར་མི་རྟོག །དད་ལྡན་སེམས་ནི་སུན་མི་དབྱུང༌། །དམ་ཚིག་སྤོང་དང་བུད་མེད་སྨོད། །རྩ་བའི་ལྟུང་བ་ཞེས་བརྗོད་དོ། །འདི་དག་མི་ཤེས་མི་རུང་བས། །སྔོན་གྱི་མཁན་པོའི་ལུང་ལས་ཤེས། །ཞེས་པ་ནི་བསྡུ་བའི་ཚིགས་སུ་བཅད་པའོ། །ཡན་ལག་གི་ལྟུང་བ་གང་ཞེ་ན། བསྐྱར་དམ། དགུ་པོ་རྣམས་སོ། །སྒྲུབ་པའི་དམ་ཚིག་གང་ཞེ་ན། ཏིང་ངེ་འཛིན་དང༌། སྤྱོད་ལམ་དང༌། བཟའ་བའི་དམ་ཚིག་དང༌། མི་འབྲལ་བའི་ཡོ་བྱད་ཀྱི་དམ་ཚིག་གོ །རིགས་ལྔ་པོ་རྣམས་ཀྱི་དམ་ཚིག་གང་ཡིན་པ་དེ་རྣམས་ནི་ཏིང་ངེ་འཛིན་གྱི་དམ་ཚིག་གོ །གཞན་ཡང་དམ་ཚིག་ནི་གསུམ་སྟེ། ལས་དང་པོ་པ་དང༌། བརྟན་པ་ཐོབ་པ་དང༌། བརྟན་པ་ཆེར་ཐོབ་པའི་དམ་ཚིག་རྣམས་སོ། །ཡང་དམ་ཚིག་ནི་གསུམ་སྟེ། སྐུ་དང་གསུང་དང་ཐུགས་ཀྱི་རྡོ་རྗེའི་དམ་ཚིག་གོ །ཡང་གསུམ་སྟེ། བུམ་དབང་གི་དམ་ཚིག་དང༌། གསང་དབང་གི་དམ་ཚིག་དང༌། ཤེས་རབ་ཡེ་ཤེས་ཀྱི་དམ་ཚིག་གོ །གཞན་ཡང་བསྙེན་པའི་དམ་ཚིག་དང༌། འཇིག་རྟེན་པ་སོ་སོའི་སྒྲུབ་
པའི་དམ་ཚིག་དང༌། ལས་སོ་སོའི་དང༌། འཇིག་རྟེན་ལས་འདས་པའི་སྒྲུབ་པའི་དང༌། སྒྲུབ་པ་ཆེན་པོའི་དམ་ཚིག་གོ །དེ་ལ་དམ་ཚིག་དམ་ཚིག་ཅེས་བྱ་བ་ནི་བརྟུལ་ཞུགས་སོ། །སྡོམ་པ་ནི་ཐོབ་པར་བྱེད་པའི་ཆོ་ག་དང༌། ཐོབ་པའི་དུས་དང༌། ངོ་བོ་དང༌། དབྱེ་བ་དང༌། གཏོང་བའི་དུས་དང༌། གསོ་བའི་ཆོ་ག་སྟེ། དྲུག་པོ་དེ་དག་གོ །སྡོམ་ནི། ཆོ་ག་དུས་དང་ངོ་བོ་དབྱེ། །གཏོང་དུས་གསོ་བའི་ཐབས་རྣམས་སོ། །དེ་ལ་སངས་རྒྱས་ཀྱིས་མ་བཤད་པའི་ཆོ་ག་ལས་ནི་སྡོམ་པ་མེད་དེ་བརྟུལ་ཞུགས་ཙམ་མོ། །དེའི་ཕྱིར་ཆོ་ག་ནི་རིག་པ་འཛིན་པའི་སྡེ་སྣོད་ལས་བཤད་པའི་དབང་བསྐུར་བའོ། །དུས་ནི་དབང་སོ་སོའི་དངོས་གཞི་རྫོགས་པ་ནའོ། །ངོ་བོ་ནི་བྱིན་གྱིས་བརླབས་པའི་སེམས་ཀྱི་རྒྱུན་གྱི་ཁྱད་པར་ཉེས་པ་རྣམས་བཟློག་པར་བྱེད་པ་ཡོན་ཏན་གྱི་རྟེན་ཐུན་བརྟས་པའོ། །དབྱེ་བ་ནི། ཐུན་མོང་དང༌། ཐུན་མོང་མ་ཡིན་པའི་སྡོམ་པའོ། །ཐུན་མོང་གི་སྡོམ་པ་གང་ཞེ་ན་བྱ་བ་དང་རྣལ་འབྱོར་ཕྱིའི་སྡོམ་པའོ། །ཐུན་མོང་མ་ཡིན་པ་གང་ཞེ་ན། བདེ་བས་བྱིན་གྱིས་བརླབས་པ་སྟེ། སློབ་མ་དང༌། བུམ་པ་དང༌། གསང་བ་དང༌། ཤེས་རབ་ཡེ་ཤེས་ཀྱི་སྡོམ་པ་རྣམས་སོ། །དེ་དག་ཐམས་ཅད་ཀྱང་འཇིག་རྟེན་པ་དང༌། འཇིག་རྟེན་འདས་པ་གཉིས་གཉིས་སུ་རྟོགས་པར་བྱའོ། །འཇིག་རྟེན་པ་རྣམས་ཀྱང་ཕལ་ཆེར་འདོད་པས་
བསྡུས་སོ། །གཟུགས་དང་གཟུགས་མེད་པས་བསྡུས་པ་དག་ཀྱང་ཡོད་དོ། །གཏོང་བའི་དུས་ནི་རྩ་བའི་ལྟུང་བ་དག་བྱུང་བ་དང༌། སྔགས་ཀྱི་ཐེག་པ་སྤོང་བ་དེའི་ཚེའོ། །ཆ་ཤས་ཆ་ཤས་ནི་རང་རང་གི་རྩ་བའི་དམ་ཚིག་ལས་འདས་པ་ནའོ། །གསོ་བའི་ཆོ་ག་ནི། སྡིག་པ་ཡོངས་སུ་སྦྱངས་ནས་སླར་ཡང་བླང་བ་ཡིན་ནོ། །ཏིང་ངེ་འཛིན་གང་ཞེ་ན། འདིར་ནི་བསྐྱེད་པའི་རིམ་པ་དང་རྫོགས་པའི་རིམ་པའོ། །དེ་གཉིས་སྒོམ་དགོས་པའི་རྒྱུ་མཚན་དང༌། སྒྲ་དོན་དང༌། གྲངས་དང༌། གོ་རིམ་ངེས་པ་ནི་སྔོན་གྱི་མཁན་པོ་དག་གིས་བཤད་པ་དང་གཞན་དུ་སྨྲ་བར་འདོད་དོ། །འདིར་རེ་རེ་ཡང༌། ངོ་བོ་དང་ཡན་ལག་དང༌། དབྱེ་བ་དང༌། གནས་སྐབས་དང༌། དངོས་དང་བཏགས་པའི་ཁྱད་པར་རོ། །བསྐྱེད་པའི་ངོ་བོ་གང་ཞེ་ན། རྣམ་པར་རྟོག་པས་གསར་དུ་སྒོམ་པ་ལས་བྱུང་བའི་ལྷ་སྐུའི་རྣམ་པ་ཅན་སྲིད་པ་གསུམ་དང་ཆོས་མཐུན་དུ་སྒོམ་པའི་ཞུ་བདེ་ཏིང་ངེ་འཛིན་ནོ། །ཡན་ལག་གང་ཞེ་ན། །ཐུན་མཚམས་སམ་མཆོད་པའི་བསྟོད་པ་ལ་སོགས་པ་དང༌། རྣལ་འབྱོར་བརྒྱད་ལ་སོགས་པའོ། །ཅིའི་ཕྱིར་ཡན་ལག་ཅེས་བྱ་ཞེ་ན། རང་གི་རང་གི་ངོ་བོའི་སྲིད་པ་དང་ འབྲས་བུའི་རྣམ་པ་ལམ་དུ་མི ་བྱེད་པའི་ཕྱིར་རོ། །དབྱེ་བ་གང་ཞེ་ན། དང་པོ་སྦྱོར་བ་དང༌། དཀྱིལ་འཁོར་རྒྱལ་མཆོག་དང༌། ལས་རྒྱལ་མཆོག་དང༌། བསྙེན་པ་དང༌། ཉེར་སྒྲུབ་དང༌། སྒྲུབ་པ་དང༌། སྒྲུབ་ཆེན་དང༌། རྣལ་འབྱོར་དང༌།
རྗེས་སུ་རྣལ་འབྱོར་དང༌། ཤིན་ཏུ་རྣལ་འབྱོར་དང༌། རྣལ་འབྱོར་ཆེན་པོ་རྣམས་སོ། །གནས་སྐབས་གང་ཞེ་ན། ལས་དང་པོ་པ་དང༌། ཡེ་ཤེས་ཕེབས་པ་དང༌། ཡེ་ཤེས་ལ་དབང་བ་དང་ཡེ་ཤེས་ལ་ཆེས་དབང་བ་རྣམས་སོ། །དང་པོ་ནི་ཡན་ལག་བདུན་དང་ལྡན་པ་ཡིན་ལ། གཞན་རྣམས་ནི་བཏགས་པ་བའོ། །བསྐྱེད་རིམ་གྱི་དཔྱད་པའི་གནས་དྲུག་གང་ཞེ་ན། སྨྲས་པ། སྦྱང་གཞི་གང་ཡིན་མཐར་ཐུག་འབྲས་བུ་གང༌། །རྫོགས་རིམ་གང་གི་སྨིན་བྱེད་དགོས་པ་གང༌། །ངོ་བོ་གང་ཡིན་མཐར་ཕྱིན་ཚད་གང་ཡིན། །དཔྱད་པའི་གནས་དྲུག་ཡན་ལག་ཀུན་ལ་སྦྱར། །རྫོགས་པའི་རིམ་པ་གང་ཞེ་ན། སྡོམ་ནི་ངོ་བོ་དབྱེ་བ་སོ་སོ་ཡི། །རང་བཞིན་དང་ནི་དཔྱད་པའི་གནད། །ངོ་བོ་གང་ཞེ་ན། སེམས་དང་ཡིད་དང་རླུང་དབུ་མར་ཐིམ་པས། མངོན་དུ་གྱུར་པའི་བདེ་སྟོང་ངོ༌། །དབྱེ་བ་གང་ཞེ་ན། དངོས་དང་བཏགས་པ་དང༌། མཚན་མ་ཅན་དང༌། མཚན་མ་མེད་པ་དང༌། ཁྱབ་བྱེད་དང༌། ཁྱབ་བྱ་རྫོགས་པའི་རིམ་པའོ། །དེ་ལ་ཐོག་མ་གཉིས་ནི་རང་བཞིན་གྱིས་དབྱེ་བའོ། །ཐ་མ་གཉིས་ནི་ཐ་སྙད་ཀྱིས་ཕྱེ་བའོ། །བར་བ་གཉིས་ནི་རྣམ་པས་རབ་ཏུ་ཕྱེ་བའོ། །དེ་རྣམས་ཉིད་ཀྱི་རང་བཞིན་གང་ཞེ་ན། དེ་ཡང་ཞུ་བའི་བདེ་བ་ལྷན་སྐྱེས་ཆེན་པོ་དང༌། སྒྱུ་མའི་སྐུ་དང༌། རང་བཞིན་ལྷན་སྐྱེས་དང༌། ཟུང་འཇུག་གི་སྐུ་དང༌། རླུང་དབུ་མར་ཐིམ་པའི་མཐར་ཐོབ་པ་ཀུན་ནས་ཉོན་མོངས་པ་དང༌། རྣམ་པར་བྱང་བའི་སྣང་བ་གསུམ་
དང༌། དགའ་བ་གསུམ་དང༌། དེ་རྣམས་དངོས་སུ་འཐོབ་པའི་ལམ་གང་ཡིན་པ་དེ་རྣམས་རྫོགས་པའི་རིམ་པ་དངོས་ཞེས་བྱའོ། །བཏགས་པ་གང་ཞེ་ན། རྩའི་རྣལ་འབྱོར་དང༌། རླུང་དང་ཕྲ་མོ་དང༌། ཐིག་ལེ་དང༌། ཕྱག་རྒྱའི་རིམ་པ་རླུང་དབུ་མར་འཇུག་པ་དང༌། གནས་པ་དང༌། ཐིམ་པར་བྱེད་པའི་ལས་ཅན་རྣམས་སོ། །མཚན་མའི་རྫོགས་པའི་རིམ་པ་གང་ཞེ་ན། ངོ་བོ་ཉིད་ཀྱི་མཚན་མ་དང༌། བཏགས་པའི་མཚན་མ་ཅན་ནོ། །ངོ་བོ་ཉིད་ཀྱི་མཚན་མ་གང་ཞེ་ན། སྣང་བ་གསུམ་སེམས་དང༌། སེམས་ལས་བྱུང་བའི་མཚན་ཉིད་ཅན་འོད་གསལ་བར་གནས་ཡོངས་སུ་མ་གྱུར་པ་སྟེ་སོ་སོའི་སྐྱེ་བོ་ཐམས་ཅད་དང་གཞན་ལ་ཡང་ཡོད་དོ། །བཏགས་པའི་མཚན་མ་གང་ཞེ་ན། སྒྲ་དོན་ཅན་གྱི་རྟོག་པ་དང་མཚུངས་པར་ལྡན་པ་གང་ཡིན་པ་སྟེ། དོན་གྱི་འོད་གསལ་མ་ཐོབ་པའི་བར་དག་ཏུ་ཅི་རིགས་པར་ཡོད་དོ། །མཚན་མ་མེད་པ་གང་ཞེ་ན། ངོ་བོ་ཉིད་ཀྱི་མཚན་མ་མེད་པ་དང༌། བཏགས་པའི་མཚན་མ་མེད་པའོ། །དང་པོ་ནི། འཕགས་པ་ཁོ་ན་ལ་ཡོད་དོ། །ཕྱི་མ་ནི་སོ་སོའི་སྐྱེ་བོ་ལ་ཡང་ཡོད་དོ། ཁྱབ་བྱེད་རྫོགས་པའི་རིམ་པ་གང་ཞེ་ན། སོ་སོར་སྡུད་པ་དང༌། བསམ་གཏན་དང༌། སྲོག་རྩོལ་དང༌། འཛིན་པ་དང༌། རྗེས་སུ་དྲན་པ་དང༌། ཏིང་ངེ་འཛིན་དང༌། དགའ་བ་བཞི་དང༌། སྣང་བ་དང༌། སྣང་བ་མཆེད་པ་དང༌། སྣང་བ་ཉེ་བར་ཐོབ་པ་དང༌། འོད་གསལ་བ་དང༌། སྣང་ཕྱོགས་དང༌།
སྟོང་ཕྱོགས་དང༌། བདེ་བའི་ཕྱོགས་དང༌། ཕྱོགས་དང་བྲལ་བ་རྣམས་སོ། །དེ་ལ་དང་པོ་དྲུག་ནི་ཡན་ལག་གིས་རབ་ཏུ་ཕྱེ་བ་དང༌། དེ་ནས་བརྒྱད་ནི་ངོ་བོ་ཉིད་དང༌། དེ་ནས་གསུམ་ནི་རྣམ་པ་དང༌། ཐ་མ་ནི་རང་བཞིན་གྱིས་རབ་ཏུ་ཕྱེ་བའམ། ཡང་ན་བཞི་ཀའང་རྣམ་པས་རབ་ཏུ་ཕྱེ་བའོ། །ཅིའི་ཕྱིར་ཁྱབ་བྱེད་ཅེས་བྱ་ཞེ་ན། གང་རྫོགས་པའི་རིམ་པ་དེ་ཐམས་ཅད་ལ་ཁྱབ་པའི་ཕྱིར་རོ། ཁྱབ་བྱ་གང་ཞེ་ན། ལུས་རྣམ་པར་དབེན་པ་དང༌། ངག་དབེན་པ་དང༌། སེམས་དབེན་པ་དང༌། བདག་བྱིན་རླབས་པ་དང༌། འོད་གསལ་བ་དང༌། ཟུང་འཇུག་དང༌། རྫོགས་པའི་རིམ་པའི་སྤྱོད་པའི་ཏིང་ངེ་འཛིན་དང༌། བདག་བྱིན་རླབས་པ་དང༌། སྣ་ཚོགས་རྡོ་རྗེ་དང༌། ནོར་བུ་འགེངས་པ་དང༌། ཛྭ་ལནྡྷ་ར་དང༌། བསམ་མི་ཁྱབ་དང༌། རང་བྱིན་རླབས་པ་དང༌། དཀྱིལ་འཁོར་འཁོར་ལོ་དང༌། རྒྱུད་ཀྱི་རིམ་པ་དང༌། སྔགས་དང༌། ཡེ་ཤེས་དང༌། གསང་བའི་རིམ་པ་དང༌། སོ་སོར་སྡུད་པ་ལ་སོགས་ཡང་འགའ་ཞིག་ཏུ་ཡོད་དོ། །གཞན་ཡང་སྔགས་དང༌། དབྱིབས་དང༌། ཆོས་དང༌། རྩ་དང༌། རླུང་དང༌། ཐིག་ལེ་དང༌། མེ་དང༌། ལས་ཀྱི་ཕྱག་རྒྱ་དང༌། ཡེ་ཤེས་དང༌། དམ་ཚིག་དང༌། ཕྱག་རྒྱ་ཆེན་པོ་དང༌། སྙིང་གའི་ཐིག་ལེ་དང༌། ནོར་བུ་དང༌། སྤྲུལ་པ་དང༌། མི་ཤིགས་པའི་རྣལ་འབྱོར་དང༌། དེ་དག་ལ་སོགས་པ་དཔག་ཏུ་མེད་པ་དག་གོ །དཔྱད་པའི་གནད་རྣམས་གང་ཞེ་ན། སྨྲས་པ། ངོ་བོ་གང་ཡིན་གང་ལ་གནད་དུ་བསྣུན། །ཇི་ལྟར་
གནས་བསྣུན་དེ་ཡི་ཉམས་རྟགས་གང༌། །ཡོན་ཏན་གང་བསྐྱེད་དེ་ཡི་རྒྱུ་མཚན་གང༌། །དངོས་བརྒྱུད་སྤངས་བྱ་གང་སྤོང་མཐར་ཕྱིན་ཚད། །ས་དང་ལམ་གྱི་མཚམས་གང་བགེགས་སེལ་དང༌། །བོགས་འདོན་ཅི་ཞིག་གཙོ་འཁོར་ཁྱད་གང་ཡིན། །དཔྱད་པའི་གནས་བཅུ་གཅིག་གི་སྒོ་ནས་དཔྱད། །རྫོགས་པའི་རིམ་པ་ཀུན་གྱི་གནད་ཤེས་འགྱུར། །གང་ལ་གནད་དུ་བསྣུན་པ་ལུས་ཀྱི་རྣམ་པར་བཞག་པ་གང་ཞེ་ན། ལུས་ཆགས་པ་དང༌། གནས་པ་དང༌། འཇིག་པའི་ཚུལ་ལོ། །བརྗོད་པ། བ་སྤུའི་བུ་གའི་གྲངས་ཉིད་ཀྱི། །རྩ་ནི་བྱེ་བ་ཕྱེད་དང་བཞི། །དེ་ལས་སྟོང་ཕྲག་བདུན་བཅུ་གཉིས། །དེ་ལས་བརྒྱ་བཅུ་གཉིས་ལྷག་བརྒྱ། །དེ་བཞིན་བརྒྱ་དང་ཉི་ཤུ་དང༌། །སུམ་ཅུ་གཉིས་དང་རྩ་གསུམ་མོ། །བསྐྱེད་དང་སྡུད་པ་ཐམས་ཅད་ཀྱི། །གནས་ནི་སྙིང་ག་ཡིན་པའི་ཕྱིར། །གྲུབ་པ་རྣམས་དང་མཁས་རྣམས་ཀྱིས། །སྙིང་ག་ཁོ་ན་བསྔགས་པ་ཡིན། ཁམས་ཀྱང་སོ་གཉིས་བཅུ་དྲུག་དང༌། ཁུ་ཁྲག་འཁོར་ལོ་གནས་ཚུལ་དང༌། །དཀར་དམར་འཕེལ་གྲིབ་འཕོ་བའི་འགྲོས། །རླུང་ཡང་ཉི་ཁྲི་ཆིག་སྟོང་དང༌། །དྲུག་བརྒྱ་བརྒྱད་ལྷག་བརྒྱ྄་དག་ལ། །བཅུ་ནི་རྣམ་པར་ཤེས་པར་བྱ། །རེ་རེ་ཡང་ནི་གནས་དང་གྲངས། །རྒྱུ་ཚུལ་ཁ་དོག་མགོན་པོ་དང༌། །ལྷ་མོ་རྣམས་ཀྱི་དབྱེ་བ་དང༌། །འཇུག་གནས་འབྱུང་དང་འཕོ་ཚུལ་ལོ། །ཕུང་ཁམས་དབང་ཡུལ་ཡེ་ཤེས་ལྔ། །ཉེར་ལྔ་ཕྲ་དང་རགས་པའི་ཚུལ། སེམས་དེའི་
བཞོན་པར་གྱུར་པ་ནི། །རླུང་ཡང་ཕྲ་རགས་རྣམ་གསུམ་མོ། །ཇི་ལྟར་གནད་དུ་བསྣུན་ཞེ་ན། །ཡུལ་གྱི་གནད་དང༌། དུས་དང༌། ལུས་དང༌། རླུང་དང༌། དམིགས་པའི་གནད་དོ། །དམིགས་པའི་གནད་ཀྱང༌། གང་ལ་སེམས་འཇོག་པ་དང༌། རླུང་སྡུད་ཚུལ་དང༌། དམིགས་པ་དང་རྣམ་པའི་ཁྱད་པར་ཏེ། བཞི་པོ་དེ་དག་གིས་ཡོན་ཏན་མངོན་དུ་བྱེད་ཅིང༌། དྲི་མ་རྣམས་སྦྱོང་བར་བྱེད་དེ། ས་དང་ལམ་གྱི་མཚམས་གང་ཞེ་ན། ལམ་ནི་ལྔ་སྟེ། ཚོགས་དང༌། སྦྱོར་བ་དང༌། མཐོང་ལམ་དང༌། སྒོམ་ལམ་དང༌། མི་སློབ་པའི་ལམ་མོ། །ཡེ་ཤེས་ཕེབས་པ་ནི་ཚོགས་ཀྱིས་ལམ་ཆུང་ངུ་སྟེ་དྲན་པ་ཉེ་བར་བཞག་པའོ། །ཡེ་ཤེས་ལ་ཆེས་དབང་བ་ནི་ཡང་དག་སྤོང་བ་སྟེ་ཚོགས་ཀྱི་ལམ་འབྲིང་པོའོ། །དེ་ཉིད་སྤྱོད་པས་མཐར་ཕྱིན་ཅིང་ལྟ་སྟངས་རྣམས་ཐོགས་པ་མེད་པ་དང༌། སངས་རྒྱས་རྣམས་མངོན་དུ་གྱུར་པ་དང༌། སྐྱེ་བ་གཅིག་གིས་ཐོགས་པ་འདི་ནི་རྫུ་འཕྲུལ་གྱི་རྐང་པ་ཅན་ཚོགས་ལམ་ཆེན་པའོ། །རྫོགས་རིམ་དངོས་ཀྱི་སེམས་དབེན་པ་ཐོབ་པ་ཞུ་བའི་བདེ་བ་མཐར་ཐུག་པ་དབང་པོ་ལྔའི་རང་བཞིན་དྲོད་དང་རྩེ་མོ་ཞེས་བྱ་ལ། ཡེ་ཤེས་ཀྱི་སྐུ་ནམ་མཁའ་མཛོད་ཐོབ་པ་སྟོབས་ལྔ་དང་ལྡན་པ་བཟོད་པ་དང་ཆོས་མཆོག་གོ །འདིར་རྩ་དང་རླུང་དང༌། ཐིག་ལེ་ཐིམ་པའི་ཡེ་ཤེས་ཡོན་ཏན་གྱི་གཞིར་གྱུར་པ་གོང་མའི་ལམ་དང་མཐུན་པ་བཅུ་གཉིས་སོ། །དེའི་ཚེ་
ཡེ་ཤེས་ཀྱི་སྐུ་ལ་སངས་རྒྱས་ཞེས་བཏགས་སོ། །དེ་ལས་གཞན་པའི་མོས་སྤྱོད་ཀྱི་ས་བཅུ་ཡང་ཡོད་དོ། །འཕགས་པའི་ས་བཅུ་དང༌། མོས་སྤྱོད་ཀྱི་ས་དང༌། སངས་རྒྱས་ཀྱི་ས་སྟེ་བཅུ་གཉིས་ནི། ལམ་འདིའི་སའོ་ཅོག་པ་བཅུ་གཉིས་སུ་སྡུད་པ་རྒྱུད་ལས་འབྱུང་ཞིང་མཁན་པོ་རྣམས་ཀྱིས་ཀྱང་བཤད་དོ། །དོན་དམ་པའི་སོ་སོར་རང་གི་རིག་པ་ཐམས་ཅད་སྟོང་པ་འོད་གསལ་བ་ནི་དང་པོར་བྱང་ཆུབ་ཡན་ལག་མཐོང་བའི་ལམ་མོ། །འདི་ལ་དགའ་བའི་རང་བཞིན་བདེན་པ་བཅུ་དྲུག་དག་གོ །སློབ་པའི་ཟུང་འཇུག་རྣམ་པ་དགུ་ནི་ས་ལྷག་མ་དགུའོ། །ས་བཅུ་ཙམ་དང༌། རྒྱུན་མཐའི་ཡེ་ཤེས་དག་ལས། རྣམ་གྲོལ་ལམ་དང༌། ཁྱད་པར་ལམ་ནི་ས་བཅུ་གཉིས་སམ་བཅུ་གསུམ་སྟེ། ཡན་ལག་བདུན་དང་ལྡན་པའི་ཡེ་ཤེས་གོང་མའི་གཞིར་གྱུར་པའོ། །འདི་དག་ནི་སྒོམ་པའི་ལམ་འཕགས་ལམ་ཡན་ལག་བརྒྱད་དོ། །མི་སློབ་པའི་ཟུང་འཇུག་ནི་མཐར་ཕྱིན་པའོ། །མན་ངག་ལས་ནི་ཐོག་མར་རྫོགས་པའི་རིམ་པ་དང༌། གཞན་ཡང་སྣ་ཚོགས་པར་འཆད་དོ། །དེ་དག་ལ་ནི་རིམ་པ་མི་འདྲ་བ་དག་འབྱུང་སྟེ། གལ་ཏེ་སྦྱོར་བའི་ལམ་དུ་ཞུགས་ན་བྱེ་བྲག་མེད་པ་ཁོ་ནའོ། །མོས་པས་སྤྱོད་པ་དང༌། ལྷག་པའི་བསམ་པ་དག་པ་ལ་སྤྱོད་པ། མཚན་མ་ལ་སྤྱོད་པ་དྲུག་དང༌། མཚན་མ་མེད་པ་ལ་སྤྱོད་པ་བདུན་དང༌། མངོན་པར་འདུ་བྱེད་པ་མེད་པར་སྤྱོད་པ་གསུམ་ལ་སོགས་པ་དང༌། ཕ་རོལ་ཏུ་ཕྱིན་པ་བཅུ་ལ་སྤྱོད་པ་དང༌། ཡོན་ཏན་བརྒྱ་ཕྲག་བཅུ་
ལ་སོགས་པ་ནི་ཐམས་ཅད་དུ་མདོ་སྡེ་བཞིན་ཏེ། འོན་ཀྱང་འདིར་ནི་ཚེ་གཞན་དུ་མ་གྱུར་པ་ཁོ་ན་ཡིན་གྱི་སྐྱེ་བ་གཅིག་གིས་ཐོགས་པའང་མ་ཡིན་ན། བསྐལ་བ་མང་པོ་ནི་ལྟ་སྨོས་ཀྱང་ཅི་དགོས། དེའི་ཕྱིར་དུས་མྱུར་བ་ཁོ་ནས་རྡོ་རྗེ་སེམས་དཔས་ཡང་དང་ཡང་དུ་མ་བསྟན་ནོ། །གཞན་དག་ནི་རང་རང་གི་མན་ངག་ཉིད་དུ་རྣམ་པར་བཞག་གི་འདིར་མི་བརྗོད་དོ། །འདིར་སྨྲས་པ། གྲངས་ངེས་མཚན་ཉིད་གོ་རིམ་ངེས་པ་དང༌། །ངེས་ཚིག་ཡོན་ཏན་སྦྱང་བྱ་འབྲས་བུ་དང༌། །རྟེན་དང་ཤེས་བྱ་སྤང་བྱ་ཉམས་ལེན་ཚད། །དབྱེ་བསྡུ་འདི་རྣམས་རིམ་པ་ཀུན་ལ་སྦྱར། །ཕུང་ཁམས་ཁམས་གསུམ་འདུས་བྱས་རྫས་ཡོད་དང༌། །ཀུན་རྫོབ་ཡོད་དང་ལུས་སེམས་རྟེན་གྱི་ཁྱད། །བློ་རིག་རྟེན་འབྲེལ་ཟག་མེད་རབ་དབྱེ་བཅུ། །རིམ་པ་གཉིས་ཀྱི་ཁྱད་པར་གཞན་ཡང་ནི། །བཏགས་པ་དང་ནི་མངོན་སུམ་འགྱུར་པའི་ལྷ། །རགས་དང་ཕྲ་བའི་སྔགས་དང་རིག་འཛིན་གཉིས། །ལས་དང་དངོས་གྲུབ་སྒྲུབ་པའི་ཁྱད་པར་དང༌། །སྔགས་དང་ཡེ་ཤེས་སྐུ་ཞེས་རྣམ་པར་ཕྱེ། །ཐ་མལ་བག་ཆགས་དངོས་སུ་གནོན་དང་འཇོམས། །རྟོག་པའི་སྲིད་དང་སྣང་བའི་སྲིད་འཇོམས་དང༌། །ལས་དང་ཡེ་ཤེས་སྒྲིབ་སེལ་རྣམ་ཤེས་དང༌། །ཡེ་ཤེས་ཀྱིས་རབ་ཕྱེད་དང་དངོས་གྲུབ་གཉིས། །ཞེས་པ་ནི་བར་སྐབས་ཀྱི་ཚིགས་སུ་བཅད་པའོ། །རྒྱུད་ཀྱི་སྦྱོར་བ་གང་ཞེ་ན། ལས་ཀྱི་རྒྱུད་དང༌།
དངོས་གྲུབ་ཀྱི་རྒྱུད་དོ། །དེ་ལ་ལས་ཀྱི་རྒྱུད་གང་ཞེ་ན། ཁྱད་པར་བཅུའམ་བརྒྱད་དེ། ཕྱོགས་དུས་ལྷ་དང་ཆ་བྱད་བསམ་པ་དང༌། །གནས་དང་ཡུལ་དང་ཟས་དང་ཆོ་ག་སྔགས། །དེ་ཡང་བཞི་སྟེ། བསམ་གཏན་གྱི་ལས་དང༌། སྦྱིན་སྲེག་གི་ལས་དང༌། འཁྲུལ་འཁོར་གྱི་ལས་དང༌། སྦྱོར་བའི་ལས་ཕལ་པའོ། །དེ་ཁོ་ན་ལྟར་དངོས་གྲུབ་ཀྱི་རྒྱུད་དེ། འོན་ཀྱང་དམ་ཚིག་གི་ཁྱད་པར་དང༌། ཐུན་མོང་མ་ཡིན་པའི་རྫས་ནི་ལྷག་པའོ། །ལས་ནི་ལས་ཆེན་བཅུ་གཉིས་ལ་སོགས་པའོ། །དངོས་གྲུབ་ཀྱི་རྒྱུད་ནི་གཉིས་སྟེ། ཐུན་མོང་དང་མཆོག་གི་དངོས་གྲུབ་སོ། །ཐུན་མོང་གི་དངོས་གྲུབ་གང་ཞེ་ན། རྫས་ཀྱིས་རིག་པ་འཛིན་པ་དང༌། ལུས་དང༌། ལོངས་སྤྱོད་དང༌། འདོད་པ་དང༌། གཟུགས་ཀྱི་རིག་པ་འཛིན་པ་དང༌། གཟུགས་མེད་པར་འགྲོ་བའོ། །ངང་པ་དང༌། མཁའ་ལྡིང་དང༌། ཁྱུ་མཆོག་སོགས་བཞོན་པ་དང༌། རིན་པོ་ཆེ་སྣ་བདུན་དང༌། རྡོ་རྗེ་དང༌། འཁོར་ལོ་པདྨ་ལ་སོགས་པ་དང༌། འཇིག་རྟེན་པ་རྣམས་ཀྱི་མཚོན་ཆ་དང༌། ཡི་གེ་དང༌། མིང་གི་སྔགས་ཀྱི་རིག་པ་འཛིན་པ་ལ་སོགས་པ་དང། ལྷ་དང་ཀླུ་དང༌། གནོད་སྦྱིན་དང༌། སྲིན་པོ་ལ་སོགས་པ་བསྒྲུབས་པས་གཞན་ལ་བརྟེན་པའི་དངོས་གྲུབ་མཐའ་ཡས་པ་ཡོད་དོ། །འདི་ལས། ཆེ་ལོང་ཙམ་བསྡུས་པ་ནི། ཆུང་ངུ་ནི་བརྒྱད་དེ། རིལ་བུ་མིག་སྨན་དངོས་གྲུབ་དང༌། །ས་འོག་རལ་གྲིའི་དངོས་གྲུབ་དང༌། །
མཁའ་ལ་འཕུར་དང་མི་སྣང་དང༌། །ཤི་བ་མེད་དང་ནད་འཇོམས་སོ། །འབྲིང་ནི་འདོད་པའི་རིག་པ་འཛིན་པ་ཕལ་པའོ། །ཆེན་པོ་ནི། ཚེ་དང་ལོངས་སྤྱོད་ལ་སོགས་པ་བསྐལ་བ་དྲུག་པ་དཔག་ཏུ་མེད་པ་འདོད་པ་དང༌། གཟུགས་ཀྱི་རིག་པ་འཛིན་པའོ། །དངོས་གྲུབ་གཉིས་ཀར་ཡང་སྤྱོད་པས་སྒྲུབ་པ་ཡིན་ཏེ། ཐུན་མོང་དང་མཆོག་གི་བསྙེན་པ་ལ་ཞི་གནས་དག་ལྷག་མཐོང་གྲུབ་པ་ནའོ། །དེ་ལ་སྤྱོད་པ་གང་ཞེ་ན། གང་ཟག་དང༌། འབྲས་བུ་དང༌། དུས་དང༌། ངོ་བོ་དང༌། ངེས་ཚིག་དང༌། དབྱེ་བ་དང༌། ཆོ་གའོ། །དེ་ལ་དབྱེ་བ་གང་ཞེ་ན། སྤྲོས་བཅས་དང༌། སྤྲོས་མེད་དང༌། ཤིན་ཏུ་སྤྲོས་མེད་དང༌། ཡང་ན་གཉིས་སྤངས་དང༌། ཀུན་བཟང་དང༌། ཕྱོགས་ལས་རྣམ་རྒྱལ་དང༌། ཡང་ན་འདོད་འཇུག་དང༌། རྟེན་སློབ་དང༌། རིག་པ་བརྟུལ་ཞུགས་དང་ཡང་ན་རེ་འཇོག་དང༌། མཉམ་པར་སྤྱོད་པ་དང༌། མཉམ་བཞག་དང༌། རྗེས་ཐོབ་དང༌། ཆགས་བྲལ་དང༌། ཆགས་ཅན་དང༌། འདོད་ཆགས་ཆེན་པོའོ། །དེ་ཡང་སྒོམ་བསམ་དང༌། དུས་དང༌། བྱ་བ་དང༌། ངོ་བོའི་སྒོ་ནས་སྤྱོད་པ་གསུམ་དུ་བཞག་གོ །སྨྲས་པ། གནས་དང་ཕྱག་རྒྱའི་གྲངས་དབྱེ་བ། །མཚན་ཉིད་ཆ་ལུགས་ཁྱད་པར་རོ། །ཆོ་ག་དང༌། ངོ་བོ་དང༌། སྤྱོད་ཚུལ་དང༌། དབང་པོ་སྦྱངས་མ་སྦྱངས་དང༌། གནས་སྐབས་དང༌། རང་བཞིན་གྱི་སྒོ་ནས་དེ་རྣམས་སུ་དབྱེ་བའོ། །འདི་དག་ནི་བརྗོད་པར་
བྱ་བ་མང་ངོ༌། །མཆོག་གི་དངོས་གྲུབ་གང་ཞེ་ན། འབྲས་བུའི་རྒྱུད་དོ། །སྡོམ་ནི། ཁྱད་པར་ངོ་བོ་དཔེ་རྣམས་དང༌། །དེ་ཡི་རིག་འཛིན་གྱི་ཁྱད་དང༌། །རིག་འཛིན་ཟུང་འཇུག་ཡོན་ཏན་དང༌། །སྐུ་དང་ཡེ་ཤེས་ཉེ་རྒྱུའི་ཚུལ། །གསུམ་པ་ནི། འབྲས་བུའི་རྒྱུད་གང་ཞེ་ན། དངོས་དང་བཏགས་པའོ། །དངོས་ནི་རྡོ་རྗེའི་འཆང་ཆེན་པོའོ། །བཏགས་པ་ནི་སྒྱུ་མའི་སྐུ་དང༌། ཟུང་འཇུག་གི་སེམས་ཅན་ནོ། །འདི་གཉིས་དྲི་མ་ཅན་དང༌། དྲི་མ་མེད་པའི་ཡེ་ཤེས་ཀྱི་སྐུ་སྟེ། རིག་པ་འཛིན་པ་དང༌། འཇའ་ལུས་ཞེས་བརྗོད་ཀྱི་ཁམས་གསུམ་པ་མ་ཡིན་ནོ། །རྡོ་རྗེ་སྐུའི་དཔེ་བཅུ་གཉིས་གང་ཞེ་ན། སྒྱུ་མ་ཆུ་ཟླ་མིག་ཡོར་སྨིག་རྒྱུ་དང༌། །རྨི་ལམ་བྲག་ཆ་མིག་འཕྲུལ་དྲི་ཟའི་གྲོང༌། །འཇའ་ཚོན་གློག་དང་ཆུ་བུར་མེ་ལོང་གཟུགས། །རིག་པ་འཛིན་པ་གང་ཞེ་ན། འདི་ནི་ཁྱད་པར་དུ་བདུན་དང་ལྡན་པ་སྟེ། ཏིང་ངེ་འཛིན་ལ་གནས་པ་དང༌། མངོན་ཤེས་ལྔ་དང་ལྡན་པ་དང༌། ཞིང་སྣ་ཚོགས་སུ་འགྲོ་བའི་དོན་སྤྱོད་པ་དང༌། འདོད་ཅིང་འཆུམས་པ་མེད་པ་དང༌། འདོད་པ་མཐའ་ཡས་པ་ལ་བདེ་བ་ཆེན་པོར་སྤྱོད་པ་དང༌། ཚེ་ཚད་ལས་བརྒལ་བ་དང༌། ཡིད་ཀྱི་ལུས་སོ། །འདིར་རིག་པ་འཛིན་པ་དང༌། ཡེ་ཤེས་ཀྱི་སྐུ་ལ་ཁྱད་པར་ཅི། ཕུང་པོ་ཟ་མ་ཏོག་མ་ཉམས་པ་ནི་ཡེ་ཤེས་ཀྱི་སྐུ་ཙམ་མོ། །ལས་སམ་ཏིང་ངེ་འཛིན་གྱིས་ཉམས་པ་དེའི་ཚེ་རིག་པ་འཛིན་པའི་ཡེ་ཤེས་ཀྱི་སྐུ་ཞེས་བྱའོ། །རིག་པ་འཛིན་པ་ཐམས་ཅད་ཀྱང༌།
ཡོན་ཏན་བརྒྱད་ཚན་གཉིས་ཏེ། བཅུ་དྲུག་དང་ལྡན་པའོ། །ཟུང་འཇུག་གི་ཡོན་ཏན་གང་ཞེ་ན། རོ་མྱང་བརྒྱད་དང༌། དབང་ཕྱུག་བརྒྱད་དང༌། ཁ་སྦྱོར་བདུན་དང༌། ཡོན་ཏན་བརྒྱད་ཅེས་བྱ་བ་སྟེ། རྟག་པ་དང་མི་གདུང་དང༌། །བསིལ་བ་དང་ནི་གཅིག་པ་དང༌། །བདེ་བ་དང་ནི་དྲི་མེད་དང༌། །དགའ་བ་དང་ནི་ཡིད་དང་བ། སྐུ་ཡི་དབང་ཕྱུག་དང་ནི་གསུང་གི་དབང་ཕྱུག་དང༌། །དེ་བཞིན་དུ་ནི་ཐུགས་ཀྱི་དབང་ཕྱུག་དང༌། །རྫུ་འཕྲུལ་ཀུན་འགྲོ་གནས་ཀྱི་དབང་ཕྱུག་དང༌། །ཅི་འདོད་བྱེད་དང་ཡོན་ཏན་བརྒྱད་པའོ། །ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ཡོངས་གང་རྒྱུན་མི་འཆད་དང་འགོག་པ་མེད། །གཟུགས་ཕྲ་རེག་པ་ཡང་བ་དང༌། ཁྱབ་དང་ཡང་དག་ཐོབ་པ་ཉིད། །རབ་ཏུ་གསལ་བ་ཉིད་བརྟན་པ། །དབང་ཕྱུག་ཉིད་དང་འདོད་དགུར་བསྒྱུར། །གཞན་ཡང་བྱང་ཆུབ་ཀྱི་ཕྱོགས་དང༌། ཚད་མེད་དང༌། དབང་བཅུ་དང༌། སྟོབས་བཅུ་དང༌། ཤེས་པ་བཅུ་དང༌། མ་འདྲེས་པ་བཅོ་བརྒྱད་དང༌། མི་འཇིགས་པ་དང༌། ཉོན་མོངས་མེད་པ་དང༌། སྔོན་གནས་མཁྱེན་པ་དང༌། ཐུགས་རྗེ་ཆེན་པོ་དང༌། ཟད་པར་དང༌། ཟིལ་གནོན་དང༌། རྣམ་ཐར་ལ་སོགས་པའང་བཤད་པར་བྱ་མོད་ཀྱི། དེ་དག་ནི་སྡེ་སྣོད་གསུམ་གྱི་ཚུལ་ལས་འབྱུང་བ་ལྟར་རོ། །སྡེ་སྣོད་འདིར་ཡང་མཚན་ཡང་དག་པར་བརྗོད་པ་ལ་སོགས་པར་ཡང་བཤད་དོ། །སྐུ་གང་ཞེ་ན།
ཆོས་དང༌། ལོངས་སྤྱོད་དང༌། སྤྲུལ་པ་དང༌། བདེ་བ་ཆེན་པོ་དང༌། སྐུ་བཅུ་དྲུག་ལ་སོགས་པ་དང༌། རྡོ་རྗེ་རྣམ་པ་བཞི་ཡོངས་སུ་མངོན་དུ་གྱུར་པ་ཡིན་ནོ། །ཆོས་ཀྱི་སྐུ་གང་ཞེ་ན། དེ་བཞིན་ཉིད་ཀྱི་རང་བཞིན་ནོ། །ལོངས་སྤྱོད་རྫོགས་པའི་སྐུ་གང་ཞེ་ན། ཁ་སྦྱོར་ཡན་ལག་བདུན་མཐར་ཐུག་པ་གཅིག་གྱུར་པ། ཆོས་ཐམས་ཅད་ལ་རྫོགས་པར་སྤྱོད་པའོ། །དེ་ཡང་བརྡ་དང་དོན་ནོ། །བརྡ་ནི་བྱང་ཆུབ་སེམས་དཔའ་ཆེན་པོ་རྣམས་ཀྱི་མངོན་སུམ་དུ་གྱུར་པའོ། །དོན་ནི་སངས་རྒྱས་རྣམས་ཀྱི་ཡེ་ཤེས་ཁོ་ན་སྟེ། སེམས་ཅན་ལ་སྣང་བ་མེད་དོ། །སྤྲུལ་པའི་སྐུ་གང་ཞེ་ན། བརྡ་དང་དོན་ནོ། །བརྡ་ནི་སོ་སོ་སྐྱེ་བོ་འགའ་ཞིག་ལ་སྣང་བའོ། །དོན་ནི་བཅོམ་ལྡན་འདས་ཀྱི་བྱ་བ་སྒྲུབ་པའི་ཡེ་ཤེས་ཐུགས་རྗེ་ཆེན་པོའོ། །ལྷན་ཅིག་སྐྱེས་པའི་སྐུ་གང་ཞེ་ན། སེམས་ཀྱི་རང་བཞིན་བདེ་བ་ཆེན་པོ་དང༌། རོ་མྱང་བརྒྱད་དང་ལྡན་པ། དོན་དམ་པར་སྤྲོས་པ་དང་བྲལ་བ་གང་ཡིན་པ་སྟེ། འདི་ཡང་ཆོས་ཀྱི་སྐུ་ཞེས་བྱ་བའོ། །དབང་ཕྱུག་བརྒྱད་ནི་སྐུ་བཞི་གས་བསྡུས་པར་རིག་པར་བྱའོ། །སྐུ་བཅུ་དྲུག་གང་ཞེ་ན། བཞི་པོ་དེ་དག །ཐུགས་དང༌། གསུང་དང༌། སྐུ་དང༌། ཡེ་ཤེས་ཀྱིས་དབྱེ་བས་བཅུ་དྲུག་སྟེ། རླུང་དང༌། རྡུལ་དང༌། ཁུ་བ་དང༌། རྣམ་པར་ཤེས་པ་དག་པས་འདུས་མ་བྱས་ཀྱི་རང་བཞིན་དང༌། སྡུག་བསྔལ་དང་ཀུན་འབྱུང་གི་གདུང་བ་མེད་པ་དང༌། རྡོ་རྗེ་སྙིང་རྗེས་སེམས་ཅན་སྒྲོལ་བ་དང༌། བདེ་བ་ཆེན་པོ་
ཟུང་འཇུག་གི་རང་བཞིན་ནོ། །དེ་ཡང༌། ཡང་ན་གཉིས་སུ་མེད་པ་དང༌། གཡོ་བ་མེད་པ་དང༌། རིས་མེད་པ་དང༌། འདོད་པ་དང༌། མཆོག་ཏུ་མི་འགྱུར་བ་དང༌། འདོད་ཆགས་ཆེན་པོ་དང༌། དངོས་པོ་དང་དངོས་མེད་ཟད་པ་དང༌། ཡེ་ཤེས་དང༌། སེམས་པ་དང༌། ཀུན་ཏུ་བཟང་པོ་དང༌། ཉོན་མོངས་པ་མེད་པ་དང༌། ཉོན་མོངས་ཆེན་པོ་དང༌། ལྷན་ཅིག་སྐྱེས་པ་དང༌། བྱང་ཆུབ་ཀྱི་སེམས་འཛིན་པ་དང༌། དུས་ཀྱི་འཁོར་ལོ་རྡོ་རྗེ་དང༌། ཐབས་དང་ཤེས་རབ་ཀྱི་རྣལ་འབྱོར་རོ། །ཡང་ན་མཉམ་པ་ཉིད་དང༌། ཡིད་ཀྱི་གཟུགས་གཉིས་སྣང་སྤངས་པ་དང༌། ལྷུན་གྱིས་གྲུབ་པའི་འཕྲིན་ལས་དང༌། བག་ཆགས་སྤངས་པ་ཞེས་པ་ནི་སྐུ་བཞིའི་དོན་ནོ། །འདིར་ཚིགས་སུ་བཅད་པ་ཡང་བཤད་པ། སྤྲུལ་པ་ཡིས་ནི་སྐུ་གསུང་ཐུགས། །ཡེ་ཤེས་གཅིག་སྦྱོར་སྡོམ་པ་དང༌། །ལོངས་སྤྱོད་རྫོགས་པའི་སྐུ་གསུང་ཐུགས། །ཡེ་ཤེས་གཅིག་སྦྱོར་སྡོམ་པ་དང༌། །དཔལ་ལྡན་ཆོས་ཀྱི་སྐུ་གསུང་ཐུགས། །ཡེ་ཤེས་གཅིག་སྦྱོར་སྡོམ་པ་དང༌། །ལྷན་ཅིག་སྐྱེས་པའི་སྐུ་གསུང་ཐུགས། །ཡེ་ཤེས་གཅིག་སྦྱོར་སྡོམ་པ་ནི། །སད་རྨི་གཉིད་སྟུག་བཞི་པ་ཡི། །དབང་པོ་གཉིས་སྐྱེས་བདེ་མིན་ཞིང༌། །ཞེས་འབྱུང་བའོ། །ཡེ་ཤེས་གང་ཞེ་ན། ལྔའམ་བདུན་ནོ། །ལྔ་ནི་མེ་ལོང་ལྟ་བུ་དང༌། མཉམ་པ་ཉིད་དང༌། སོ་སོར་རྟོག་པ་དང༌། བྱ་བ་སྒྲུབ་པ་དང༌། ཆོས་ཀྱི་དབྱིངས་ཀྱི་ཡེ་ཤེས་སོ། །
བདུན་གང་ཞེ་ན། ཟབ་པའི་ཡེ་ཤེས་དང༌། རྒྱ་ཆེ་བ་དང༌། ཁྱབ་པ་དང༌། རྟག་པ་དང༌། བདེ་བ་དང༌། སྐུ་དང༌། ཟུང་འཇུག་རྣམས་སོ། །དེ་དག་སོ་སོའི་མཚན་ཉིད་ཀྱང༌། ཇི་སྐད་དུ། དེ་ཉིད་བདུན་འགྲེལ་ལས། རང་བཞིན་མེད་དང་རང་རིག་པ། །འཕེལ་བ་བྲི་བ་མེད་པ་དང༌། །རྣམ་པར་མི་རྟོག་སྣང་བ་པོ། །བསོད་ནམས་ཡེ་ཤེས་ཡུལ་དང་ནི། །དམིགས་པ་འཇུག་པ་ལས་རྣམས་ནི། །རྒྱ་ཆེ་རབ་ཏུ་བཤད་པ་ཡིན། །ཡུལ་དང་དུས་དང་རྒྱུད་གསུམ་དང༌། །སྟོང་དང་མཉམ་པ་ཉིད་ཀྱིས་ཁྱབ། །རྒྱུན་མི་འཆད་ཅིང་འགོག་པ་མེད། །ཕྲ་རབ་མེད་ཅིང་འགྱུར་བ་མེད། །བསམ་ཡས་ཡེ་ཤེས་རྟག་པ་ཉིད། ཁ་སྦྱོར་རང་བཞིན་བདེ་བ་དང༌། །སྙིང་རྗེ་ཆེན་པོ་གསུམ་རང་བཞིན། །ཡིད་ནི་རླུང་བཅས་ཐིམ་པ་དང༌། །ཞུ་བ་དང་ནི་མི་འཛག་བདེ། །སྟོང་པ་ལས་སྐྱེས་སྡུག་བསྔལ་འགོག །གར་ཡང་ཕྱིན་དང་མི་གཡོ་བ། །ཡིད་དང་རླུང་གི་ལུས་ཅན་དང༌། །སྐད་ཅིག་གཅིག་གིས་ཀུན་སྟོན་དང༌། །མཚན་དང་དཔེ་བྱད་སྤྲིན་སྤྲོ་བ། །དེ་ནི་རྡོ་རྗེའི་སྐུ་རུ་གསུངས། །གཉིས་མིན་མི་རྟོག་རང་བཞིན་ཞུགས། །སྣང་མེད་ཀུན་ནས་ཀུན་ཏུ་སྣང༌། །ནམ་ཡང་གཡོ་བ་མེད་པའི་ཕྱིར། །རྡོ་རྗེ་སེམས་དཔའི་ཟུང་འཇུག་གོ །ཞེས་གསུངས་པ་ལྟར་རོ། །ཉེ་རྒྱུ་གང་ཞེ་ན། མཆོག་གི་དངོས་གྲུབ་ལ་དང་པོར་དངོས་སུ་རེག་པ་དང༌། མཐར་ཐུག་པར་
དངོས་སུ་རེག་པ་དང༌། གཉིས་ཀར་བརྒྱུད་མར་རེག་པའོ། །དང་པོ་ནི་སངས་རྒྱས་རྣམས་ཀྱི་ཡང་དག་པར་དབང་བསྐུར་བ་ལས་འབྱུང་བའི་སྤྱོད་པའི་ཡེ་ཤེས་སོ། །གཉིས་པ་ནི་ལོངས་སྤྱོད་རྫོགས་པས་དབང་བསྐུར་བའོ། །གསུམ་པ་རིག་པའི་བརྟུལ་ཞུགས་ཀྱི་སྤྱོད་པ་ཐམས་ཅད་དེ། དེ་ཡང་ཚོགས་ཀྱི་དཀྱིལ་འཁོར་དུ་དབང་བསྐུར་བར་བྱས་ཏེ། ཆུ་དང་ཅོད་པན་ལ་སོགས་པ་གསང་བའི་དབང་གི་བར་དུ་སྦྱིན་ནས། ཉི་མ་དམར་ཐག་ཆོད་པ་ནི། ཤེས་རབ་ཡེ་ཤེས་སྦྱིན་ཏེ་རིག་མ་དང་ལྷན་ཅིག་ཐོ་རངས་མངོན་པར་བྱང་ཆུབ་པ་ཐོབ་པར་འགྱུར་རོ། །དེ་ལྟར་ཡང༌། རྡོ་རྗེ་ཉི་མ་ནུབ་ནས་ནི། །སྒྲུབ་པ་ཀུན་ཏུ་བརྩམ་པར་བྱ། །སྐྱ་རེངས་འཆར་བའི་དུས་སུ་ནི། །སྒོམ་པ་མཆོག་ནི་འགྲུབ་པར་འགྱུར། །ཞེས་པ་འདི་ནི་རེ་ཞིག་ལུང་ངོ༌། །འདི་ལ་དང་པོ་དང་ཐ་མ་ལ་ནི། ཕྱག་རྒྱ་གསུམ་ག་ཡང་ཡོད་དོ། །བར་པ་ལ་ནི་ལས་ཀྱི་ཕྱག་རྒྱ་དང༌། ཕྱག་རྒྱ་ཆེན་པོ་ཁོ་ན་ཡོད་དོ། །ཐ་མ་ཁོ་ན་བདེ་ཆེན་གྱི་ལམ་ལ་ནི། དེ་དག་ཕྱག་རྒྱ་ཆེན་པོ་ཁོ་ནའོ། །གཉིས་པ་དེ་སྟོན་བྱེད་ཀྱི་རྒྱུད་བཤད་པ་ལ། ཕ་རྒྱུད་མ་རྒྱུད་འདོད་ཚུལ་ལ་དཔྱད་པ། རྒྱུད་སྡེ་རིགས་གང་དུ་གཏོགས་ངོས་བཟུང་བ་འཕྲོས་དང་བཅས་པ། བཞི་པའི་ཡེ་ཤེས་ལ་དཔྱད་པ་སྟེ་གསུམ་མོ། །དང་པོ་ནི། བླ་ན་མེད་པའི་རྒྱུད་གང་ཞེ་ན། ཞུ་བ་དང༌། རང་བཞིན་གྱི་བདེ་སྟོང་གཉིས་སུ་མེད་པ་སྟོན་པ་གང་ཡིན་པ་སྟེ། དེའི་ཕྱིར་འདི་ཁོ་ནས་
སྐྱེ་བ་འདི་ལ་སངས་རྒྱས་སྦྱིན་པར་བྱའོ། །དབྱེ་བ་གང་ཞེ་ན། རྣལ་འབྱོར་དང་རྣལ་འབྱོར་མའི་རྒྱུད་དོ། །བུ་ནི་བུ་མོ་དང༌། བུ་ཕོའི་དབྱེ་གཞི་སྟེ། འོན་ཀྱང་བུ་ནི་ཕོ་ཁོ་ན་ལ་བརྗོད་པ་ལྟར་རྣལ་འབྱོར་གྱི་རྒྱུད་དོ། །གང་དུ་རྣལ་འབྱོར་མ་རྣམས་ཀྱི་དཀྱིལ་འཁོར་དང༌། སྔགས་དང་སྦྱོར་བ་རྒྱས་པ་དེ་ནི་རྣལ་འབྱོར་མའི་རྒྱུད་དོ། །སངས་རྒྱས་རྣམས་ཀྱི་དཀྱིལ་འཁོར་དང༌། སྔགས་དང༌། སྦྱོར་བ་ཁོ་ན་རྒྱས་པ་དེ་ནི་རྣལ་འབྱོར་གྱི་རྒྱུད་དོ། །རྫོགས་པའི་རིམ་པ་དངོས་ནི་ཐམས་ཅད་ཀྱང་དབྱེ་བ་མེད་དོ། །དོན་འདི་མ་རྟོགས་པར། ཕྱོགས་འདིར་མཁས་པ་དང་མི་མཁས་པ་དག་ཁ་ཅིག་ནི་ཆ་ཆུང་ངུས་དབྱེ་བར་འདོད། ཁ་ཅིག་ནི་རྣམ་གྲངས་དུ་མར་བྱེད། གཞན་དག་དོན་བཟང་པོར་རློམ་པ་དག་གི་དབྱེ་བར་འདོད་དེ། དེ་ཡང་འདི་ལྟར་དགུག་གཞུག་ལ་སོགས་པ་ཕོ་མོས་བྱེད་པའི་དོན་ཟེར་བ། དེ་མཚོན་བྱེད་དུ་བྱས་པ་ཡིན་གྱི་དེ་ཁོ་ན་མ་ངེས་ཏེ། དཀྱིལ་འཁོར་དགུག་གཞུག་མོས་བྱེད་ཀྱང༌། འཕྲིན་ལས་ཕལ་ཆེར་ཕོས་བྱེད་ན་ཕ་རྒྱུད་དུ་འཇོག་དགོས་པ་ལྟ་བུའོ། །དེས་ན་དགུག་གཞུག་བཅིངས་མཉེས་འཕྲིན་ལས་བྱེད་པའི་དཔེ་ཙམ་མོ། །གཞན་ཡང་ཐབས་མི་གཡོ་ཤེས་རབ་རྒྱུ་བ་དེ་ཡིན་ན་རྣལ་འབྱོར་མའི་རྒྱུད་ཀྱིས་ཁྱབ་པར་གསུངས་ཀྱང༌། རྣལ་འབྱོར་མའི་རྒྱུད་ལས་དེས་ཁྱབ་པར་ཡང་མ་གསུངས། རྒྱུ་བའི་དོན། ཡེ་ཤེས་པ་དགུག་གཞུག་ཁོ་ན་ལ་འཆད་ན། ད་ལྟའི་གདན་བཞིའི་རྩ་བའི་དཀྱིལ་འཁོར་ཡེ་ཤེས་དབང་ཕྱུག་མ་ཡིན་པས། གདན་བཞི་ཕ་རྒྱུད་མ་རྒྱུད་གཉིས་
ཀ་མ་ཡིན་པར་ཐལ་བར་འགྱུར་ཏེ། ཤེས་རབ་རྒྱུ་བས་ཕ་རྒྱུད་མ་ཡིན་པ་དང༌། ཐབས་མི་གཡོ་བ་མ་ཚང་བས་མ་རྒྱུད་ཀྱང་མ་ཡིན་པར་འགྱུར་བས་སོ། །དགུག་གཞུག་ལ་འདོད་པ་འདི་དུས་འཁོར་བ་སྔ་རབས་པ་འགའ་རེ་དང༌། ཕྱོགས་མཆན་དང༌། བུ་མཆན་གཉིས་ཀ་ན་ཡོད། འཁྲུལ་གཞི་སེམས་འགྲེལ་གཞན་གྱིའང་བྱས་སོ། །གཞན་ཡང་མར་དོའི་རྗེས་འབྲང་སོགས་དཀྱིལ་འཁོར་གྱི་དབུས་གཙོ་བོའི་གནས་ན་ཕོ་མོ་མང་ཉུང་ལ་འཆད་པ་དང༌། གཞན་དག་ཕོ་མོ་གཙོ་ཆེ་ཆུང་ལ་འཆད་པ་དང༌། ལྷ་གྲངས་ཕོ་མོའི་མང་ཉུང་དང༌། གཞན་དངོས་གསུང་བ་པོ་ཡབ་ཡུམ་གྱི་ཁྱད་དང༌། ཁ་ཅིག་ཞུ་བ་པོ་ཕོ་མོའི་ཁྱད་དང༌། འགའ་ཞིག་གླེང་གཞི་འདི་སྐད་སོགས་དང་གསང་བ་སོགས་ཀྱི་ཁྱད་དུ་འདོད་པ་དང༌། གཞན་ཡང་ཆ་ཕྲ་བ་གཡས་བརྐྱང་གཡོན་བརྐྱང་དང༌། ཞི་ཁྲོའི་ཉམས་སོ་སོ་བ་དང༌། འདྲེས་པ་དང༌། རྒྱན་དང༌། ཕྱག་མཚན་ན་བཟའ་ལ་སོགས་པ་དང༌། དུར་ཁྲོད་ཡོད་མེད་སོགས་འདོད་པ་དང༌། དུས་འཁོར་ལས་དཔལ་ལྡན་རྒྱུ་སྐར་གྱི་དཀྱིལ་འཁོར་གྱི་དག་པའི་འགྲེལ་ཚིག་འགའ་ལས་འཁྲུལ་གཞི་བྱུང་ནས། ལྷ་བཞུགས་བཞེངས་ཤས་ཆེ་ཆུང་དང༌། ཡབ་ཡུམ་ཞལ་ཕྱག་གྲངས་མཉམ་མི་མཉམ་དང༌། གཞལ་ཡས་ཁང་འབྱུང་བཞི་ལས་བསྐྱེད་པ་དང༌། འབྱུང་བཞིའི་སྟེང་དུ་བསྐྱེད་པའི་ཁྱད་པར་དུ་འདོད་པ་སོགས་བྱུང་སྟེ་ཐམས་
ཅད་མ་ངེས་པ་ཤ་སྟག་ཡིན་ནོ། ཁ་ཅིག་རྫོགས་རིམ་ཕྱག་རྒྱའི་ལམ་གཙོ་བོར་འདོན་པ་མ་རྒྱུད། རང་ལུས་ཀྱི་གཙོ་བོར་འདོན་པ་ཕ་རྒྱུད་ཡིན་ཟེར་ཏེ། གསང་འདུས་ནས་ཆགས་ལམ་ཞལ་གསལ་ལ་གྲོལ་ལམ་པའི་རྫོགས་རིམ་བསྡུས་ཤིང་གབ་པར་ཡོད་པ་དང༌། མ་རྒྱུད་ཕལ་ཆེར་གཉིས་ཀ་གསལ་བར་ཆེར་མ་ངེས། གཞན་རླུང་གཙོ་བོར་སྟོན་པ་ཕ་རྒྱུད་རྩའམ་ཐིག་ལེ་གཙོ་བོར་སྟོན་པ་མ་རྒྱུད་ཟེར་ཡང༌། རྡོ་རྗེ་འཇིགས་བྱེད་གཉིས་ཀ་མ་ཡིན་པར་ཐལ་བ་དང༌། གསུང་འདུས་རྡོར་ཕྲེང་གཉིས་ཀར་ཐལ་བ་སོགས་འབྱུང་ཞིང༌། སྡོམ་བྱུང་སམ་བུ་ཊི་སོགས་ཀྱང་གཉིས་ཡིན་དུ་འགྱུར་རོ། །ས་སྐྱ་པ་རྣམས་བསྐྱེད་རིམ་གཙོ་བོར་འདོན་པ་ཕ། མི་ཟབ་པའི་རྫོགས་རིམ་གཙོ་བོར་འདོན་པ་མ་རྒྱུད་ཕལ་པ། ཟབ་མོའི་རྫོགས་རིམ་གཙོ་བོར་འདོན་པ་གཉིས་མེད་ཅེས་གསུངས། གཞན་འགའ་ཡང་དེ་མཚུངས་ལ་གཉིས་མེད་མི་འདོད་པར་རིམ་གཉིས་ཕ་མ་སོ་སོ་སྦྱར་རོ། །འདི་ནི་ལེགས་པར་བརྟགས་ན། གང་ན་བསྐྱེད་རིམ་གྱི་རྣམ་བཞག་རྒྱས་པར་སྟོན་པ་ཕལ་ཆེར་ན་རྫོགས་རིམ་རྒྱས་པར་སྟོན་པ་རང་མང་ལ། རྫོགས་རིམ་བསྡུས་ཙམ་ལས་མི་སྟོན་པ་རྣམས་ན་བསྐྱེད་རིམ་ཡང་མི་རྒྱས་པ་ཁོ་ན་མཐོང་བས་སྤྱིར་ཡང་མི་འཐད། ཕ་མ་གཉིས་ཀྱི་ཁྱད་དུ་འདོད་པ་ལ། བརྟག་གཉིས་སམ་བུ་ཊ་སྡོམ་བྱུང་གདན་བཞི་གསང་འདུས་རྡོར་ཕྲེང་སོགས་གཉིས་ཀར་ཐལ་བ་དང༌། གསང་འདུས་དགོངས་པ་
ལུང་སྟོན་དང༌། ལྷ་མོ་བཞི་ཞུས་ཀྱི་རྒྱུད་མ་རྒྱུད་དུ་ཐལ་བ་དང༌། རྡོ་རྗེ་གུར་དང་སངས་རྒྱས་ཐོད་པ་སོགས་ཕ་རྒྱུད་དུ་ཐལ་བར་འགྱུར་བ་དང༌། ཀུ་རུ་ཀུལླེའི་རྟོག་པ་དང༌། རྡོ་རྗེ་འཇིགས་བྱེད་ལ་སོགས་འགའ་ཞིག་གཉིས་ཀ་མ་ཡིན་པར་ཐལ་བར་འགྱུར་རོ། །ས་ལུགས་དེ་ལྟར་ན་ཡང༌། ཐལ་བ་དེ་དག་ཕལ་ཆེར་འཇུག་ཅིང༌། འདིའི་ལུགས་ལ་མཉམ་སྦྱོར་སོགས་མ་རྒྱུད་ཕལ་པ་དང༌། ཕྲ་ཐིག་གི་རྣལ་འབྱོར་རྫོགས་རིམ་མི་ཟབ་པ་དང༌། ཙཱཎྜ་ལི་དང་ཕོ་ཉ་ལ་རྫོགས་རིམ་ཟབ་མོ་དང༌། གཉིས་མེད་ཀྱི་ངོས་འཛིན་ཀྱཻ་རྡོར་ལ་མཛད། བདེ་མཆོག་གི་རྒྱུད་དེ་དག་གང་ཡིན་དེ་སྐབས་མི་སྨྲ་ལ། འདི་སྐབས་མ་རྒྱུད་ཁྱད་པར་ཅན་ལ་གཉིས་མེད་དུ་བཏགས་པར་དོན་གྱི་ཁས་ལེན་ཅིང༌། བདེ་མཆོག་གི་ཆོས་སྐོར་དུ་མ་རྒྱུད་སྤྱི་དང་གསང་མཐའ་ཟེར་ནས། མ་རྒྱུད་ཁྱད་པར་ཅན་མ་རྒྱུད་དངོས་སུ་ཡང་འཆད་དོ། །ཕྲ་ཐིག་གསང་འདུས་དགྲ་ནག་རྡོ་རྗེ་གུར་རྣམས་ལས་རྒྱས་པར་འཆད་པས། མ་རྒྱུད་ཕལ་པར་ཐལ་བ་དང༌། ཟབ་མོའི་རྫོགས་རིམ་གཙོ་བོར་སྟོན་པས་བདེ་མཆོག་ཀྱང་གཉིས་མེད་དུ་ཐལ་བ་དང༌། ཁྱེད་ཀྱི་བཞེད་པའི་ཟབ་མོའི་རྫོགས་རིམ་གྱི་ཕོ་ཉའི་ལམ་ནི་ཕལ་བར་གསལ་ཞིང་གསང་འདུས་ཀྱང་གཉིས་མེད་དུ་ཐལ་ལོ། །མ་རྒྱུད་ཁྱད་པར་ཅན་ལ་གཉིས་མེད་ཟེར་བ་དང༌། མ་རྒྱུད་ཁོ་ནར་འཆད་པའང་འགལ་ལོ། །ཡང་འདི་སྐད་ཅེས། ཀྱཻ་རྡོར་གཉིས་མེད་ཡིན་པས་
གཉིས་མེད་ལ་ཤེས་རབ་ཀྱི་ཆ་དགོས་པས། མཁའ་འགྲོ་མ་དྲྭ་བ་སྡོམ་པ་སོགས་དང༌། མཁའ་འགྲོ་མ་ཡི་རྡོ་རྗེ་གུར། །ཞེས་སོགས་གསུངས་པ་ཡིན་སྐད། དེ་ལྟར་ན་གཉིས་མེད་ཡིན་པས་ཕ་རྒྱུད་དུ་ཡང་ཅིའི་ཕྱིར་མི་འཆད། ཡང་མ་རྒྱུད་ཁྱད་པར་ཅན་ཕུང་གསུམ་པ་གཉིས་མེད་ཡིན་ན། ཕ་རྒྱུད་ཁྱད་པར་ཅན་ཡང་དེར་ཐལ་བར་འགྱུར། ཡང་མ་རྒྱུད་ཁྱད་པར་ཅན་བདེ་མཆོག་ཡིན། ཀྱཻ་རྡོར་གཉིས་མེད་ཡིན། གཉིས་ཀས་ཀྱང་ཟབ་མོའི་རྫོགས་རིམ་སྟོན་ན། མ་རྒྱུད་ཁྱད་པར་ཅན་དང༌། གཉིས་མེད་ཀྱི་ཁྱད་པར་ད་གདོད་སྟོན་དགོས་སོ། ཁ་ཅིག་ཐབས་རྒྱ་ཆེ་བ་ཕ་རྒྱུད། ཤེས་རབ་ཟབ་པ་མ་རྒྱུད་ཟེར་བ་ཡང༌། བདེ་དགྱེས་ལས་སྟོང་ཉིད་གསང་འདུས་ཞལ་གསལ་ཞིང༌། དཀྱིལ་འཁོར་ཆོ་གའི་ལས་རིམ་སོགས། གསང་འདུས་ལས། དགྱེས་རྡོར་ཞལ་གསལ་བ་སོགས་འགལ་བ་མང་ངོ༌། །གསལ་སྟོང་སྟོན་པ་དང༌། བདེ་སྟོང་སྟོན་པ་ཁྱད་པར་དུ་འདོད་པའང་ཡོད་དེ། འདི་གཉིས་བླ་མེད་ཐམས་ཅད་ནས་རྩལ་དུ་སྟོན་པ་མཉམ་མོ། །གདུལ་བྱ་སྐྱེས་པ་འདུལ་བ་ལ་ཕ་རྒྱུད། བུད་མེད་འདུལ་བ་མ་རྒྱུད་ཟེར་རྡོ་རྗེ་གུར་གྱི་ལུང་འདྲེན་ནོ། །ལུང་དོན་ནི་སྐྱེས་པ་འདུལ་བ་གཙོ་བོའི་དོན་ལ་ལྷ་ཡབ་གཙོ་བོར་གྱུར་པའི་ཆོ་ག་དང༌། བུད་མེད་གཙོ་བོར་འདུལ་བ་ལ་ཡུམ་གཙོ་ཆེ་བའི་དཀྱིལ་འཁོར་དང་ཆོ་ག་གསུངས་ཞེས་པའི་དོན་ཡིན་གྱི་གསང་འདུས་ལས་ཀྱང་བུད་མེད་འཚང་
རྒྱ་ཚུལ་གསལ་བར་གསུངས་ལ། བདེ་མཆོག་གདན་བཞི་སོགས་ལས་ཀྱང་སྐྱེད་པ་སྒོམ་པའི་དབང་དུ་བྱས་པ་གཙོ་ཆེ་བས་དེ་མི་འཐད་དོ། །ཡང་ཁ་ཅིག་གུར་གྱི་ཚིག་ལས་འཁྲུལ་ནས་དང་པོ་ནང་པ་ཁོ་ན་ལ་ཞུགས་པ་དང༌། ཐོག་མ་མུ་སྟེགས་ལ་ཞུགས་པ་རྗེས་སུ་འཛིན་པའི་དོན་དུ་རིམ་པས་ཕ་མ་གསུང་ཟེར་བ་རྒྱུ་མཚན་ཡེ་མེད་ཅིང༌། ནང་པ་ཐབས་དང༌། ཕྱི་པ་ཤེས་རབ་དང་རིགས་མཐུན་ཡེ་མེད་པས་འབྲེལ་མེད་ཁོ་ནའོ། །སྦྱོར་སྒྲོལ་སོགས་མུ་སྟེགས་དང་ཕྱོགས་མཚུངས་སོ་སྙམ་པ་འདུག་ནའང་སྦྱོར་བའི་ཕྱོགས་ནས་ཕ་རྒྱུད་ཁ་ཟིན་ཆེའོ། །དེས་ན་ཆེས་མ་ངེས། རྔོག་པ་རྣམས། བརྗོད་བྱ་ཐབས་དང་ཤེས་རབ། གདུལ་བྱ་སྐྱེས་པ་བུད་མེད་ཀྱི་ཁྱད་པར་དུ་འདོད་པའང་དེ་རྣམས་ཀྱིས་བགག་ཟིན་པ་དེའོ། །དེ་དག་ནི་བོད་སྔ་རབས་པའི་འདོད་པ་ལ་རྣམ་པར་བརྟགས་པའོ། །ཕྱིས་བྱུང་ལ་བུ་སྟོན་རིན་པོ་ཆེས་དེ་དག་ཕལ་ཆེར་དྲངས། ཕ་མ་གཉིས་ལ་གཞན་ཟེར་ཐམས་ཅད་འཐད་ལྡན་དུ་མཛད། གཉིས་མེད་ཕུང་གསུམ་པའི་འཇོག་ལུགས་རེ་རེ་ཐུགས་བཟོ་མཛད་ནས་མཐར་དེ་དག་རེ་རེས་འཇོག་མི་ཐུབ། ཐམས་ཅད་ཚང་བའང་དཀོན་པས། ཤས་ཆེར་ཚང་བ་ལ་བྱའོ་གསུངས་ནས། ཐེ་ཚོམ་མེད་གཡོལ་ལེ་བཞུགས་སོ། །བོ་དོང་པས་ཀྱང་དེ་དག་ཐམས་ཅད་བསྐྱེད་ནས་རེ་རེ་ཞིང་སྔ་རབས་པའི་ལུགས་ལ་
དགག་པ་ཅུང་ཟད་རེ་མཛད་ནས། རང་ལུགས་དེ་དག་དང་འདྲ་མིན་རེ་མཛད། གཉིས་མེད་ཕུང་གསུམ་པའི་འཇོག་བྱེད་རེ་རེ་ཐུགས་བཟོ་མ་རེ་མཛད་ནས། རེ་རེས་ཀྱང་འཇོག་ཐུབ་ཐམས་ཅད་ཚང་ཞིང་གསུངས་ཏེ་ཞིབ་ཏུ་ཡི་གེས་འཇིགས་སོ། །ཀྱཻ་རྡོར་གཉིས་མེད་ཡིན་ཏེ། རྒྱུད་གཞན་ལས་རྐྱང་མ་ཐབས་རོ་མ་ཤེས་རབ་དུ་གསུངས། འདིར་དེ་གོ་ཟློག་ནས་ཐབས་ཤེས་ཕན་ཚུན་རྒྱས་བཏབ་བྱས་པ་དང་ཤེས་རབ་ཟླ་བ་འབབ་བཤད་པ་སོགས་ཕྲན་ཚེགས་མང་རབ་གསུངས་གུར་ལས། ཀྱཻ་རྡོ་རྗེ་རྣལ་འབྱོར་རྒྱུད། །དང་པོ་རྒྱལ་བ་རྣམས་ཀྱི་བཤད། །ཕྱི་མ་རྣལ་འབྱོར་མ་རྒྱུད་ནི། །དེ་ཉིད་བུད་མེད་བཟུང་ཕྱིར་རོ། །ཞེས་བརྟག་པ་དང་པོ་ཐབས་རྒྱུད། གཉིས་པ་ཤེས་རབ་རྒྱུད་དུ་བཤད་པས་གཉིས་མེད་ཡིན་གསུངས་ཡང་བཤད་རྒྱུད་སམ་བུ་ཊ་ཀྱཻ་རྡོར་རང་གཙོ་ཆེ་གཉིས་མེད་ཡིན། ལམ་འབྲས་ཀྱང་སམ་བུའི་ཊིའི་མན་ངག་རང་གཙོ་ཆེ། གུར་དང་ཐིག་ལེ་སྐོར་བཞི་བརྟག་གཉིས་ཀྱི་བཤད་རྒྱུད་ཡིན་ཡང་མ་རྒྱུད་ཡིན་གསུང༌། ཕ་རྒྱུད་མ་རྒྱུད་གཉིས་མེད་གསུམ་ཕྱི་མ་ཕྱི་མ་མཆོག་ཏུ་བཞེད་དོ། །དེ་ཡང་ཡེ་མི་འཐད་དེ། རྒྱུད་གཞན་ལས་རྐྱང་མ་ཐབས་ཁོ་ནར་དང་རོ་མ་ཤེས་རབ་ཁོ་ནར་བཤད་པའི་ངེས་པ་མི་སྣང་བ་དང༌། གསང་འདུས་རིམ་ལྔ་དང༌། སྤྱོད་བསྡུས་སུ་འབྱུང་བ་ལྟར་འདུས་པའི་རྒྱུད་མང་པོ་ལས་གསལ་བ། སྣང་བ་ཟླ་བའི་ཆོས་ཤེས་རབ་དང༌། མཆོད་པ་ཉི་མའི་ཆོས་ཐབས་སུ་བསྟན་
པས་དེ་དག་ཀྱང་གཉིས་མེད་ཕུང་གསུམ་དུ་ཐལ་བ་དང༌། བརྟག་པ་དང་པོ་ཆོས་ཅན། གཉིས་མེད་ཕུང་གསུམ་པ་མ་ཡིན་པ་ཐལ། ཕ་རྒྱུད་ཡིན་པའི་ཕྱིར། ཕྱི་མ་ཆོས་ཅན། དེར་མ་ཡིན་པར་ཐལ། མ་རྒྱུད་ཡིན་པའི་ཕྱིར། བརྟག་གཉིས་གཉིས་མེད་ཕུང་གསུམ་མ་ཡིན་པར་ཐལ། བརྟག་པ་གཉིས་པ་དེ་ནི་ཕ་མ་ཕྱོགས་རེ་ཡིན་པའི་ཕྱིར། བརྟག་གཉིས་ལ་བརྟག་པ་གཉིས་པོ་མ་ཡིན་པའི་ཚིགས་བཅད་ཀྱང་མེད་པའི་ཕྱིར། སྡོམ་པས་ཐབས་ཤེས་གཉིས་ཀ་ཡོད་པའི་ཕྱིར་དེའོ་སྙམ་ན། གསང་འདུས་ཀྱི་རྒྱུད་དང་བདེ་མཆོག་གི་རྒྱུད་ཆོས་ཅན། གཉིས་མེད་ཀྱི་རྒྱུད་ཕུང་གསུམ་པ་ཡིན་པར་ཐལ། སྡོམ་པས་ཕ་རྒྱུད་མ་རྒྱུད་གཉིས་ཀ་ཡོད་པའི་ཕྱིར། རེ་རེ་བ་ཕ་མ་ཕྱོགས་རཻ་མ་ཡིན་ན་ནི། ལུང་དེའི་དང་པོ་ཕ་རྒྱུད་གཉིས་པ་མ་རྒྱུད་དུ་བཤད་པས་ཞེས་པ་ལས་འབྲེལ་མ་བྱུང་སྟེ། དེ་དག་གཉིས་མེད་ཀྱི་ཕ་རྒྱུད་མ་རྒྱུད་སོགས་སུ་འཆད་དགོས་པས། ཡང་ན་གཉིས་མེད་ཡིན་སྟེ་གཉིས་མེད་ཀྱི་ཕ་མ་ཡིན་པའི་ཕྱིར་ཞེས་གྲུབ་ཟིན་སྒྲུབ་པའམ། སྒྲུབ་བྱེད་བསྒྲུབ་པ་དང་མཚུངས་སོ། །ཡང་ན་ཕ་མ་ཐམས་ཅད་གཉིས་མེད་དུ་འདོད་དགོས་པ་ལས་འོས་མི་འབྱུང་ངོ༌། །ལུང་དེ་འབྲོག་འགྱུར་དུ་སྣང་ལ། དེ་ལ་འབྲུ་དེ་ལྟར་བོད་སྔ་མ་འགས་བྱས་པ་ཚད་ལྡན་བྱས་ན་དེ་ལྟར་ཁས་ལེན་དགོས་སྲིད་ནའང༌།
དེའི་དོན་རྡོ་རྗེ་གུར་གསུང་བ་པོ་ཀྱཻ་རྡོར་གྱིས་དང་པོ་རྣལ་འབྱོར་རྒྱུད་མང་དུ་གསུངས། ཕྱིའི་བུ་མེད་དེ་མཁའ་འགྲོ་མ་རྣམས་འཁོར་དུ་བསྡུ་བའི་ཕྱིར་རྣལ་འབྱོར་མའི་རྒྱུད་གསུངས་ཞེས་པའི་དོན་ཡིན་པས། སྤྱིར་སངས་རྒྱས་ཀྱིས་བླ་མེད་གསུང་ཚུལ་ལ་ཕ་རྒྱུད་ལས་མ་རྒྱུད་ཕྱི་མར་སྟོན་པ་ཡིན་གྱི། བརྟག་པ་སུམ་ཅུ་རྩ་གཉིས་པའི་ཕྱི་མ་གཉིས་ཀྱི་སྐབས་ཀྱང་མ་ཡིན། ད་ལྟའི་བརྟག་གཉིས་ལ་ཟེར་བའང་མ་ཡིན་ཏེ། དེ་གཉིས་ལ་བརྟག་པའི་འགྲོས་ཀྱང་མེད་ལ། འབྲོག་འགྱུར་ཡི་གེ་ཉམས་པའི་འགྱུར་ནོར་པས་རྡོ་རྗེས་ཞེས་པ་སྒྲ་ཆད་དང་པོར་ཞེས་པའི་དོན་ར་སྒྲ་ཆད། རྣམས་ལ་ཞེས་པ་རྣམས་ཀྱིས་ཞེས་འབྱུང་ཀྱང༌། འགོས་འགྱུར་དང་དེ་ལས་མར་པས་བཅོས་པ་གཉིས་ཀ་ལ་དགྱེས་པའི་རྡོ་རྗེས་རྣལ་འབྱོར་རྒྱུད། །དང་པོར་རྒྱལ་བ་རྣམས་ལ་བཤད། །ཕྱིས་ནས་རྣལ་འབྱོར་མ་རྒྱུད་ནི། །དེ་ཉིད་མོ་གཟུགས་བསྡུ་ཕྱིར་རོ། །འགྱུར་འདི་ལེགས་ཏེ། འབྲོག་འགྱུར་ལྟར་ན། དང་པོ་ཉན་པ་པོ་མ་གསུངས་པས། རྗེས་མ་ལ་དེ་ཉིད་ཟེར་བ་གང་ལ་སྙེག་མ་བྱུང༌། ཀྱཻ་རྡོར་ཟེར་བ་རྒྱུད་བརྟག་གཉིས་ལ་ཟེར་ན་བརྟག་གཉིས་ཕ་རྒྱུད་དུ་ཐལ་བར་འགྱུར་ཞིང༌། དང་པོ་ཀྱཻ་རྡོར་ཟེར་བའི་ཕ་རྒྱུད་གཅིག་རྒྱལ་བ་མང་པོས་གསུང༌། རྣལ་འབྱོར་མའི་རྒྱུད་ཕྱི་མ་དེ་ནི་བུད་མེད་བཟུང་ཕྱིར་ཡིན་ཟེར་བ་ལས་མ་བྱུང་ངོ༌། །དེས་ན་གུར་ལས་མི་བསྐྱོད་པ་དང༌།
རྡོ་རྗེ་འཆང་བསྲེས་པ་ལ་དགྱེས་རྡོར་ཅེས་མཚན་བརྟགས་པ་ཡང་ཡང་བྱུང་བ་ཡིན་མོད། དགྱེས་རྡོར་ཟེར་ཚད་བརྟག་གཉིས་ཡིན་ན། ཨ་ཀ་རུ་ནག་དགྱེས་རྡོར་ལ་ཟེར་བ་ཡང་བརྟག་གཉིས་ལ་ཨ་ཀ་རུ་འབུལ་བ་ལགས་སམ། དེས་ན་དགྱེས་རྡོར་གྱིས་ཞེས་པ་རྡོ་རྗེ་འཆང་གི་ཞེས་པ་ཡིན། དང་པོར་རྒྱལ་བ་རིགས་ལྔ་ཕོ་གཟུགས་འཛིན་པ་ལ་གསུངས། ཕྱི་མ་ཟེར་བ་མ་འབྲེལ་ལ། ཕྱིས་ནས་མ་རྒྱུད་ནི། རྒྱལ་བ་དེ་རྣམས་ཉིད་མོ་གཟུགས་འཛིན་པའི་འཁོར་བསྡུ་ཕྱིར་ཡིན། །ཅེས་པ་ཡིན་ནོ། །ཡང་མར་དོའི་འགྱུར་ལས་དགེས་རྡོར་ལ་སོགས་རྒྱལ་རྣམས་ཀྱིས། །སྦྱོར་བའི་རྒྱུད་ནི་བཞད་པ་ལས། །དེ་རྣམས་བུད་མེད་གཟུགས་འཛིན་པ། །རྣལ་འབྱོར་མ་རྒྱུད་མཆོག་ལའོ། །ཞེས་བསྒྱུར་བ་ལྟར་བཤད་ཀྱང་ལེགས་པར་འོང་ངོ༌། །ཡང་བརྟག་གཉིས་ཆོས་ཅན་ཁྱོད་མ་རྒྱུད་ཡིན་པར་ཐལ། ཁྱོད་རྡོ་རྗེ་གུར་སོགས་ཀྱིས་མ་རྒྱུད་དུ་བཀྲལ་བའི་ཕྱིར། མ་ཁྱབ་ན། བཤད་རྒྱུད་ཀྱིས་རྩ་རྒྱུད་ཀྱི་དོན་ལོག་པར་བཀྲལ་བར་ཐལ། རྩ་རྒྱུད་ཀྱི་དོན་ཆོག་གཉིས་མེད་དུ་གནས་པ་དེ་བཤད་རྒྱུད་ཀྱིས། དམན་པ་ལ་མ་རྒྱུད་ཏུ་བཀྲལ་པའི་ཕྱིར་རོ། །དགེ་ལུགས་ལ་ནི། བླ་མེད་ངེས་པས་མ་ཁྱབ་ཀྱང༌། དེའི་འཇོག་བྱེད་གཞན་ཚོ་ནོར། སྣང་གསུང་འོད་གསལ། སྒྱུ་ལུས་ཀྱི་སྐུ་དང་བཅས་རྩལ་དུ་འདོན་པ་ཕ་རྒྱུད་
ཐིག་ལེ་དབབ་ཟློག་གི་དགའ་བཞི་རྩལ་དུ་འདོན་པ་མ་རྒྱུད་ཟེར། མཁའ་འགྲོ་རྒྱ་མཚོ་ལས། རྣལ་འབྱོར་རྣམས་ལ་རྒྱུད་དུ་ནི། །འོད་གསལ་སྒྱུ་མ་ཞེས་བྱ་བ། །སྒྱུ་མའི་འཇིག་རྟེན་ལ་བཤད་དོ། །ཞེས་པས་ཕ་རྒྱུད་ཀྱི་ཁྱད་པར་བསྟན། མ་རྒྱུད་ཀྱི་ཁྱད་པར་མངོན་སུམ་གྱིས་གྲུབ་གསུང་བར་གདའ། ལུང་དེའི་དོན་འོད་གསལ་དང་སྒྱུ་མ་སྒོམ་པ་ལས་ཤེས་པ་རྣམས་ཏེ། དེ་དེའི་ཆོ་ག་སྟེ་ཐབས་ཤེས་པའི་རྣལ་འབྱོར་པས་རྒྱུད་ལ་འཇུག་ཅེས་པའི་དོན་ཙམ་ཞིག་ཡིན་པས་དེའི་ཁུངས་སུ་མི་རུང་ལ། གསང་འདུས་རྩ་རྒྱུད་ཆོས་ཅན་ཕ་མ་གཉིས་ཀ་མ་ཡིན་པར་ཐལ། ཚིག་ཟིན་ལ་དེ་གཉིས་ཀ་ལ་གསལ་བ་དང་རྒྱས་པར་མ་བསྟན་པའི་ཕྱིར་བཤད་རྒྱུད་རྡོར་ཕྲེང་ཆོས་ཅན་ཕ་མ་གཉིས་ཀ་ཡིན་པར་ཐལ། དེ་གཉིས་ཀ་རྩལ་དུ་བཏོན་ནས་འཆད་པའི་ཕྱིར། དེས་ན་དགོངས་པ་ལུང་སྟོན་སོགས་དང་སྦྱར་ནས་སྒྲོན་གསལ་གྱིས་འཆད་ལུགས་ལ་སྒྱུ་ལུས་འོད་གསལ་སྣང་གསུམ་སྟོན་པའི་ཚིག་རྣམས་དེ་དང་དེར་འཆད་པའི་ཚེ་ཤིན་ཏུ་གབ་ཚུལ་དུ་སྣང་ལ། འགྲེལ་པ་གཞན་གྱིས་འཆད་ཚུལ་གཞན་དུ་བཤད་པ་ན། དེ་དག་གི་ཚིག་དོན་ལ་གསལ་བར་ཞུགས་པ་ཤ་སྟག་སྣང་བ་དང༌། ཞབས་ལུགས་ལྟ་བུ་ལ་རྗེས་མཐུན་ཡོད་དུ་ཆུག་ཀྱང་གསང་འདུས་ཀྱི་ལུགས་གཞན་རྩ་རྒྱུད་ཀྱི་དགོངས་པ་རྫོགས་པར་འགྲེལ་པའང་སྣང་བཞི་དང་སྒྱུ་ལུས་ཀྱི་ཐ་སྙད་ཡེ་མེད་
དོན་ཡང་འཕགས་སྐོར་ལུགས་བཞིན་མེད་པ་ཤིན་ཏུ་མང་བ་དང༌། ཕུག་རང་ཞིག་གི་དོན་གཅིག་པ་ཙམ་ལ་བསམ་ན་ཕ་རྒྱུད་མ་རྒྱུད་ཐམས་ཅད་གཅིག་ཅིང༌། ཁྱེད་རང་ཡང་སྒྱུ་ལུས་དང་སྣང་བཞི་ཀྱཻ་རྡོར་བདེ་མཆོག་ལུགས་ལ་ཡང་འདོད་པས་དབྱེ་བ་མི་འབྱུང་ཞིང་འཇིགས་བྱེད་སོགས་མང་པོ་ཞིག་ལ་གཉིས་ཀ་མི་གསལ་བས། གཉིས་མིན་དུ་འགྱུར་བ་དང༌། ཁྱད་ཆོས་དེ་གཉིས་ཕ་རྒྱུད་ལ་འཕགས་སྐོར་གྱི་གཞུང་ཁོ་ན་དང༌། མ་རྒྱུད་བརྟག་གཉིས་ལྟ་བུ་གཅིག་གི་ཚིག་ཟིན་ལ་འགྲིག་རུང་ཙམ་ལས་གཞན་ལ་མ་ཁྱབ་ཁྱབ་ཆེས་མི་སྲིད་གསུམ་ཚང་བ་ལ་ལགས་སོ། །ཤེས་རབ་རིན་ཆེན་པ་ནི་ལས་དབང་དང་སྒྱུ་ལུས་གཙོ་བོར་སྟོན་པ་ཕ་རྒྱུད། ཤེར་དབང་དང་འོད་གསལ་གཙོ་བོར་སྟོན་པ་མ་རྒྱུད་བཞི་པ་དང་ཟུང་འཇུག་གཙོར་སྟོན་གཉིས་མེད། གཉིས་མེད་དངོས་དུས་འཁོར་རོ། །ཀྱཻ་རྡོར་ཡང་མི་འགལ་ཏེ། བཞི་པ་ཤིན་ཏུ་གསལ་བས་སོ་ཟེར། ཡིད་བཟང་རྩེ་བ་ཡང༌། བཞི་པ་རྒྱུད་གཞན་ལས་སྦས་པར་རྒྱུད་འགྲེལ། བི་མ་ལ་པྲ་བྷ་ར་གསུངས་པ་ལ་བདེ་གསང་ཐེ། ཀྱཻ་རྡོར་མི་ཐེ་ཡེ་ཤེས་འདི་ནི་སོགས་བཞི་པ་གསལ་བས་སོ། །གསང་འདུས་རྒྱུད་ཕྱི་མ་ཤེར་དབང་གསལ་བ་དང༌། རྩ་རྒྱུད་ལས་ཀྱང་གསལ་བ་དང༌། རྡོ་རྗེ་ཕྲེང་བར་དབང་མཐའ་དག་གསལ་བ་དང༌། སམ་བུ་ཊི་སོགས་ལས་གསང་དབང་ཤིན་ཏུ་གསལ་བ་དང༌།
དུས་འཁོར་ལུགས་ཀྱི་བཞི་པ་དེ་ཀྱཻ་རྡོར་ལས་ཀྱང་བདེ་གསང་ན་མེད་པའི་གསལ་པོ་རང་མི་སྣང་བ་དང༌། ཡེ་ཤེས་འདི་ནི་སོགས་དགོངས་པ་གཞན་དུ་འདྲེན་སླ་ཞིང་འདྲེན་པ་མང་བ་དང༌། དབང་བཞིའི་ཡེ་ཤེས་སྟོན་བྱེད་སྡོམ་འབྱུང་དང་མངོན་བརྗོད་བླ་མ་སོགས་དང་སངས་རྒྱས་ཐོད་པ་སོགས་མང་པོར་གསལ་པོ་གསུངས་པས་དབང་ལ་སྦྱོར་བ་མི་འཐད་ལ། སྒྱུ་ལུས་ཕ་རྒྱུད་ཀྱི་འཇོག་བྱེད་གོང་དུ་བཀག་ཟིན། འོད་གསལ་གཙོ་བོར་སྟོན་པ་མ་རྒྱུད་དུ་འཇོག་པའང་མི་འཐད་དེ་རང་བཞིན་འོད་གསལ་ཙམ་ལ་བསམ་ན་མདོ་སྡེ་ཀུན་ཡང་དེར་ཐལ། ཕ་རྒྱུད་ཀྱང་ཐལ་རླུང་སེམས་སྙིང་གར་ཐིམ་པའི་དེ་ནི་མ་རྒྱུད་མང་པོ་ལས་ཀྱང་གསལ་པོ་མ་བཤད། ཕ་རྒྱུད་རྡོར་ཕྲེང་ལ་སོགས་པས་གསལ་པོར་བསྟན་པས་སོ། །འོ་ན་ཞུ་བདེ་རྩལ་དུ་སྟོན་པས་དེ་འོད་གསལ་ཡིན་ནོ་སྙམ་ན། དེ་ལ་ཡང་འོད་གསལ་དུ་འཇོག་དགོས་པའི་སྐབས་ཡོད་ནའང༌། འོད་གསལ་ཆོས་སྐུ་ལམ་དང༌། དེ་བདེ་ཆེན་སྤྱི་བོ་སྐུའི་ལམ་དང༌། གནད་དུ་བསྣུན་པ་སོགས་མི་འདྲའོ། །ཞུ་བདེ་ཕ་རྒྱུད་ཀྱི་ལམ་གྱི་སྐབས་སུ་རྒྱས་པས་དེ་ཡང་མི་རུང་ངོ༌། །དེས་ན་རང་ལུགས་ནི་རྣལ་འབྱོར་བླ་མེད་ཐམས་ཅད་གཉིས་སུ་མེད་པའི་རྒྱུད་ཡིན་ཅིང༌། དེ་ལ་ཕ་མ་གཉིས་སུ་ཕྱེ་བ་ནི་དུས་འཁོར་འགྲེལ་ཆེན་ན་ཆེས་གསལ་བ་ཡིན། རྒྱ་གར་ན་ནའང་དེ་ཁོ་ན་ལྟར་གྲགས། བོད་རྣམས་གསུམ་དུ་འབྱེད་པ་ནི། རང་གང་ལ་གཙོ་བོར་བྱེད་པ་དེ་གཉིས་མེད་དུ་འབད་དེ་སྒྲུབ་པའི་
དགེ་བ་ལས། རྒྱུད་མཆོག་གཞན་རྣམས་ཐབས་ཤེས་ཡ་བྲལ་དུ་ཕབ་པའི་སྡིག་པ་ཆེ་བ་གཅིག་ལགས། དེས་ན་ཕ་རྒྱུད་ལ་རིགས་ལྔ་ཡོད་ཅིང་ཡོད་པར་སྔ་རབས་པ་མང་པོའང་བཞེད། བུ་སྟོན་གྱི་བཞེད་པ་ལ་ངོར་ཕྱོགས་པས་ཁྲེལ་རྒོད་བྱས་ཏེ། རིན་པོ་ཆེ་དང་ལས་རིག་བོད་དུ་མ་འགྱུར་བས་མ་མཐོང་གསུངས་པ་དེ་བདེན་ཏེ་མེད་པས་སོ་ཟེར་ཏེ། བཤད་རྒྱུད་རྡོ་རྗེ་སྙིང་རྒྱན་ལས། དམ་ཚིག་མངོན་བརྒྱད་སྟོང་ཕྲག་གསུམ། །ཞེས་དང༌། རིན་ཆེན་སྡོང་པོ་དགུ་བརྒྱ་བདུན། །དུས་ཀྱི་ཐིག་ལེ་བརྒྱ་བརྒྱད་བཅུ། །ཞེས་འབྱུང་བ་ལ་ལྟ་ལུང་ཉན་ལུང་མ་བྱུང་བའི་འཆལ་གཏམ་ཡིན་ལ། དུག་གསུམ་ཅན་འདུལ་བའི་དབྱེ་བ་གསུམ་དུ་ཕ་རྒྱུད་པ་རྣམས་བྱེད་པ་ནི་ཆོས་ལེགས་ཀྱང་མཚན་གཞིར་གསང་འདུས་རྣམ་སྣང་སྒྱུ་དྲྭ་གཤིན་རྗེ་གཤེད་གསུམ་ལ་བྱེད་པ་མི་འཐད་དེ། སྒྱུ་དྲྭ་ཆགས་ཅན་གྱི་རྒྱུད་དུ་བཤད་ནས་ཞེ་སྡང་གཏི་མུག་ལོགས་སུ་རྒྱུད་སྡེར་བཤད་པའི་ཕྱིར་ཏེ། སྣང་མཛད་སྒྱུ་འཕྲུལ་སྟོང་དང་བརྒྱ། །ཞེས་གསུངས། དེ་རྣམས་བཤད་ཟིན་པ་ན། འདི་རྣམས་དགོས་པའི་བྱེ་བྲག་གིས། །ང་ཡིས་ཡང་དག་བསྟན་པར་བྱ། །འདི་ནི་གཉིས་མེད་འཁྱུད་པ་ཡིས། །རྒྱུད་ཀྱི་དབྱེ་བ་བསྟན་པ་ཡིན། །དེ་བཞིན་དུ་ནི་ལག་བཅངས་དང༌། །དགོད་དང་བལྟས་པའང་ཤེས་པར་བྱ། །དེ་བཞིན་ཞེ་སྡང་གཏི་མུག་གི །རྒྱུད་རྣམས་ཀུན་ཀྱང་ཤེས་པར་བྱ། །མཁའ་འགྲོ་མ་ཡི་རྒྱུད་ཀུན་ཡང༌། །འདི་ཡི་རིམ་པས་ཤེས་
པར་བྱ། །ཕྱི་ནང་དབྱེ་བ་ཤེས་པར་བྱ། །ཞེས་གསུངས། འདིས་ནི་རི་དྭགས་རྒྱལ་པོ་སེང་གེ །ཁ་ཅིག་གསང་སྔགས་ཕྱི་ནང་བྱ་བ་རྙིང་མ་པ་ལ་གྲགས་ཁུངས་མེད་གསུང་བ་ཡང༌། ལན་རེ་ཟུང་རེ་ཙམ་གྱིས་གཞུང་ལུགས་ཀུན་ཤེས་སོ། །ཞེས་ཐུགས་ཁེངས་པས་རྒྱལ་ནས་རྒྱུད་གྲགས་ཆེན་པོ་ཚོ་ལ་ཡང་གཟིགས་ལོང་མ་བྱུང་སྣང་བས། རྗེས་འབྲངས་ཕྱིས་འབྱུང་ཝ་སྐྱེས་ལོང་བ་ཚོ་ལ་ནི་རེ་མེད།གཉིས་པ། རྒྱུད་སྡེ་རིགས་གང་དུ་གཏོགས་ངོས་བཟུང་བ་འཕྲོས་དང་བཅས་པ་ནི། རྒྱུད་སྡེའི་དོན་སྤྱིར་དུག་གསུམ་འདུལ་བའི་རྒྱུད་ཡོད། འདོད་ཆགས་རྗེས་སུ་འཛིན་པ་ཁོ་ན་ལ་ཡང་འདོད་ཆགས་བཞིའི་དབྱེ་བས་རྒྱུད་སྡེ་བཞི་ཡོད། བླ་མེད་གསང་འདུས་དང་འབྲེལ་བ་ཆགས་ཅན་འདུལ་བ་ཕ་རྒྱུད་ཤེས་ཆེ་བ་ཙམ་དངོས་སུ་བགྲངས། རྒྱུད་སྡེ་འོག་མའི་ཆགས་ཅན་འདུལ་བའི་རྒྱུད་ཀྱང་འདིས་མཚོན། དེ་བཞིན་དུ་ཞེ་སྡང་གཏི་མུག་གི་རིགས་ལའང་རྒྱུད་སྡེ་བཞི་ཆར་ཡོད། ཡབ་གཙོ་བོར་སྟོན་པ་ཚོ་ལ་དེ་ལྟར་ཡིན་པར་མ་ཟད། མ་རྒྱུད་ལ་ཡང་དུག་གསུམ་འདུལ་བའི་དབྱེ་བ་ཡོད། དེས་ན་དུག་གསུམ་འདུལ་བ་དང༌། ཕ་མའི་དབྱེ་བ་འདི་གསང་སྔགས་ཕྱི་ནང་གཉིས་ཀ་ལ་ཡོད་གསུངས་པར་སྣང་བ་ལ། ངོར་ཕྱོགས་པ་རྣམས་ལ་རྒྱུད་ལ་དུག་གསུམ་གྱི་རིགས་གསུམ་དང་མ་རྒྱུད་ལ་ལྔའམ། དྲུག་ཁོ་ན་འཐད་ཀྱི་གཞན་མིན་ཟེར་བ་དང༌། དྲུག་ཀྱང་མི་འཐད་ལྔ་འཐད་ཟེར་བ་སོགས་ནི་རྒྱུད་གཞུང་གི་དགོངས་དོན་ཤོད་མཁན་ནི་
མ་བྱུང༌། རང་གིས་ནི་ཕལ་ཆེར་མ་མཐོང༌། ཅུང་ཟད་མཐོང་ཀྱང་མ་གོ །བློ་གྲོས་ཀྱི་མཐུ་ནི་མེད། བླ་མའི་གསུང་རྒྱུན་རྣམ་དག་གི་ལྡེ་མིག་མེད་ཀྱང་གསུང་རབ་ཀྱི་བལྟས་པས་ཀ་ཆོག་པ་ཞིག་ཡོད་པར་འདུག་བསམ་ནས་འགའ་ཞིག་བལྟས་པས། དེ་རྣམས་རང་གི་མགོ་མ་གོ་བ་དེ་རང་གིས་མ་ཤེས་ནས་དཔེ་སྒྲོག་འདྲ་བྱས་པས་ཐུགས་ཡུས། མཁས་པ་ཚོ་དང་ང་འདྲ་སྙམ་ནས་བློ་ཆུང་ཚོ་མགོ་བསྡུམས་ནས་བསམ་མོད་རིགས་དྲས་བྱས་པའི་ཆོས་སྐད་དུ་གདའོ། །དེས་ན་ཕ་བརྒྱུད་ལ་རིགས་ཀྱི་དབྱེ་ན་རིགས་ལྔ་དང༌། གདུལ་བྱ་འདུལ་ཚུལ་གྱིས་ཕྱེ་ན་རིགས་གསུམ་སྟེ། ལྔ་ཆར་ལ་ཕྱི་མ་གསུམ་ཆར་ཡོད་ཅིང༌། དོན་ལ་ནི་རྒྱུད་སྡེ་གོ་འཕང་མཉམ་པོ་ལ་ལམ་རིམ་མི་འདྲ་བ་མེད་དོ། །རྒྱུད་ནང་ཕན་ཚུན་ཁ་སྐོང་དགོས་པས་སོ། །འོན་ཀྱང་དངོས་བསྟན་ལ་དཀྱིལ་འཁོར་ལྷ་ལ་ཁ་སྦྱོར་ཡོད་མེད་སོགས་ལྷའི་རྣམ་པ་དང༌། དྲག་པོའི་ལས་གཙོ་བོར་སྟོན་མི་སྟོན་དང༌། སྟོང་ཉིད་དང་རྟེན་འབྲེལ་ཞིབ་མོར་སྟོན་མི་སྟོན། ཕྱག་རྒྱའི་ལམ་དངོས་སུ་གསལ་མི་གསལ་སོགས་ཀྱིས་འབྱེད་དེ། དེ་ཡང་རིགས་ལྔའི་དབང་དུ་བྱས་ན། གསང་འདུས་དང་གཤེད་སྐོར་རྡོ་རྗེའི་རིགས་དང༌། སྒྱུ་དྲྭ་རྣམ་སྣང་གི་རིགས་ཡིན་ལ། རིགས་གསུམ་ལྟར་ན་གསང་འདུས་བཤད་རྒྱུད་དང་བཅས་པ་དང༌། རྣམ་སྣང་སྒྱུ་དྲྭ་དང༌། འཇམ་དཔལ་དཔའ་བོ་འབུམ་ཕྲག་གཅིག །ཅེས་
གསུངས་པ་ལྟར། དགྲ་ནག་གཤེད་དམར་ལེའུ་བཅུ་དྲུག་པ་གདོང་དྲུག་པ་རྣམས་ཆགས་ཅན་དང༌། འཇིགས་བྱེད་ཞེ་སྡང་ཅན་འདུལ་བ་ཡིན་ཏེ། ལྷ་ཁ་སྦྱོར་དང་ཡབ་རྐྱང་ཕྱག་རྒྱའི་ལམ་བཤད་མ་བཤད། དྲག་ལས་གཙོ་བོར་མི་སྟོན་དང་སྟོན་པས་སོ། །གཤེད་དམར་ཉེར་གཉིས་པ་དང༌། མི་གཡོ་བ་བླ་མེད་ནི་མ་རྒྱུད་ཡིན་པར་མངོན་ལ། བདེ་ཆེན་རལ་གཅིག་དང་ཕྱག་རྡོར་གྱི་རྒྱུད་དུ་གྲགས་པ་འགའ་རེའང་འདུག་སྟེ་རེ་ཞིག་བཏང་སྙོམས་སུ་བཞག་གོ །མ་རྒྱུད་ལ་རིགས་དྲུག་གི་རྡོར་སེམས་ཀྱི་རིགས་ནི་མཉམ་སྦྱོར་དང༌། ཟླ་གསང་ཐིག་ལེ། རྟག་པའི་རིགས་ནི་གདན་བཞི། རྡོ་རྗེ་ཉི་མའི་རིགས་རྡོ་རྗེ་བདུད་རྩི། ལས་ཀྱི་རིགས་འཇིག་རྟེན་གསུམ་རྒྱལ་རྟ་མཆོག་དང༌། པདྨའི་རིགས་པདྨ་དྲྭ་བའམ་འབར་བ། སོགས་ཏེ་འདི་གཉིས་བོད་ན་མེད། སྒྲོལ་མ་འབྱུང་བ་དང༌། ཕྱག་འཚལ་ཉེར་གཅིག་སོགས་རྟ་མཆོག་གི་རིགས་ཡིན་ལ། རིགས་འཇིགས་ལྔ་བཅུ་པ་པདྨ་གར་དབང་གི་རིགས་སུ་གྲགས། བརྟག་གཉིས་ཨ་རྀ་ལྀ་རིགས་གཉིས། ཐིག་ལེ་སྐོར་བཞི་སངས་རྒྱས་ཐོད་པ་མ་ཧཱ་མ་ཡ་རྣམས་ཧེ་རུ་ཀ་ཁོ་ནའི་རྒྱུད་ཡིན། གཤེད་དམར་ལེའུ་ཉེར་གཉིས་པ་དང༌། མི་གཡོ་བླ་མེད་ཀྱང་ཧེ་རུ་ཀར་གཏོགས། བདེ་མཆོག་གཙོ་བོར་ཧེ་རུ་ཀ་ཡིན་ལ། རྡོ་རྗེ་སེམས་དཔའི་རིགས་དང་ལྷག་པར་འབྲེལ། སམ་བྷུ་ཊི་ཡང་དེ་དང་འདྲ། དུས་འཁོར་རྡོར་སེམས་དང་ཧེ་རུ་ཀའི་
རིགས་ཅི་རིགས་སུ་འདོད་པ་ཡོད་པ། མི་འགལ་བ་ལྟ་བུ་སྣང་ནའང་རེ་ཞིག་ འབྲས་བུ་རྡོ་རྗེ་འཛིན་པ་མི ་བསྐྱོད་པ་ཡིན་པར་ཐམས་ཅད་ཞལ་འཆམས་པ་དང༌། རེས་འགའ་ཧེ་རུ་ཀར་རྒྱུད་ལས་གསུངས་པ་ལྟར་ན་ཧེ་རུ་ཀ་གཙོ་ཆེ་བར་བསྡུ་རྡོ་རྗེ་གུར་དང་མངོན་བརྗོད་ལ་སོགས་རིགས་ལྔའམ་དྲུག་གི་དཀྱིལ་འཁོར་ཆ་མཉམ་པ་འདྲ་ཡོད་ཀྱང༌། གང་གི་དབང་དུ་བྱས་ཏེ་ཧེ་རུ་ཀ་ཡིན་པས་དེ་ཁོ་ནར་བསྡུ། མཉམ་སྦྱོར་དང་ཟླ་གསང་ཡང་དེ་འདྲ་བས་རིགས་དྲུག་ཆ་མཉམ་དུ་མི་བྱ་རྡོ་རྗེ་སེམས་དཔའོ། །ཡང་ཟླ་གསང་མ་རྒྱུད་འདྲ་བ་ཙམ་སྣང་ནའང་ཕ་རྒྱུད་དུ་གྲགས་པ་ལྟར་ན་བརྟག་དགོས་ལ། གལ་ཏེ་ཕ་རྒྱུད་ཡིན་ན། ཕ་རྒྱུད་ལ་ཡང་རྡོ་རྗེ་སེམས་དཔའི་རིགས་ལོགས་སུ་བྱས་ཏེ། རིགས་དྲུག་ཏུ་བྱེད་དགོས་སོ། །དེ་ལྟར་ཕ་རྒྱུད་ལ། རིན་ཆེན་སྡོང་པོ་རིན་ཆེན་རིགས། དམ་ཚིག་མངོན་རྒྱན་དང༌། རྡོ་རྗེ་ལྔ་འདུས་ལས་ཀྱི་རིགས། དུས་ཀྱི་ཐིག་ལེའི་པདྨའི་རིགས་ཡིན་པར་མཚན་ཙམ་ལས་ཀྱང་ཤེས་སོ། །རྒྱུད་སྡེ་དེ་དག་བོད་དུ་མ་འགྱུར་ཡང༌། རྡོ་རྗེ་སྙིང་རྒྱན་དུ་མིང་སྨོས་པ་དེ་དག་སྔོན་འཕགས་ཡུལ་དུ་དར་ངེས་པ་དང༌། ཕྱིས་ཀྱང་ཅི་རིགས་པ་ཡོད་དོ། །གཏི་མུག་ཅན་འདུལ་བའི་རྒྱུད་ནི་འཇམ་དཔལ་སྒྱུ་དྲྭ་མཚན་བརྗོད་ཡིན་ནམ་སྙམ་པ་བདག་ནི་རྣམ་པར་རྟོག་པའོ། །ཞེས་གསུངས། ཕ་རྒྱུད་མ་རྒྱུད་ཅེས་བྱ་བ་བྱ་རྒྱུད་དང་སྤྱོད་རྒྱུད་ལ་དོན་ཙམ་
གནས་པ་སྲིད་ན་ཡང་གསལ་ཁ་མ་བཤད། རྣལ་འབྱོར་ཕྱི་ནང་གཉིས་ལ་ཡོད། རྣལ་འབྱོར་རྒྱུདལ། ཤེར་ཕྱིན་བརྒྱ་ལྔ་བཅུ་པའི་འགྲེལ་པ་ལས། དེ་བཞིན་གཤེགས་པ་ཐམས་ཅད་ཀྱི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་དཔལ་དམ་པ་ཕྲེང་བ་ཞེས་བྱ་བ་འདི་ཡིན་ནོ། །ཡུམ་སྨོས་པ་ལས་ནི་དེ་བཞིན་གཤེགས་པའི་ཡབ་ཀྱང་སྨོས་དགོས་ཏེ། གང་ཞེ་ན་ཡབ་ནི་ཏྲནྟྲ་ཏ་ཏཱ་སཾ་གྲ་ཧ་ཞེས་བྱ་བ་སྔགས་ཀྱི་མདོ་སྡེ་ཟབ་མོ་ཡིན་པར་བཤད་དེ་ཞེས་གསུང༌། གསང་བ་རྒྱན་བཀོད་ཡོ་ག་ཡིན་པ་ལྟར་ན། དེ་ལས་རྒྱུད་ཀྱི་མཚན་ཉིད་འཆད་དུས། ཤེས་རབ་ཡུམ་དུ་ལེགས་བཤད་དེ། །ཐབས་ནི་ཡབ་ཏུ་ལེགས་བཤད་པའོ། །ཞེས་གསུངས། ཐབས་ཤེས་སུ་འཇོག་ཚུལ་མཚན་ཉིད་མཚུངས་པས། བླ་མེད་ཀྱི་ཡང་འདི་གོ་དགོས་སོ། །བླ་མེད་ཀྱི་དབྱེ་བའི་སྐབས་འདིར། ངེས་པའི་ལམ་ལ་ལྟོས་ན་ཐམས་ཅད་ཐབས་ཤེས་གཉིས་མེད་ཀྱི་རྒྱུད་ཡིན་པས་ཁྱབ། གནས་སྐབས་ཀྱི་ཁྱད་ཆོས་ཀྱིས་ཕྱེ་བའི་དབང་དུ་བྱས་ན། ཐབས་ཤེས་གང་རུང་གི་རྒྱུད་ཡིན་པས་ཁྱབ། དེ་ལ་རང་ལུགས་དཀྱུས་ན་གསལ་བ་ལྟར་མཚན་ཉིད་གསང་བ་རྒྱན་བཀོད་ཀྱི་ལུང་གིས་གྲུབ། ཕ་རྒྱུད་མ་རྒྱུད་སོ་སོར་ངེས་པའི་མཚན་གཞིའི་སྟེང་དུ་ཁྱད་ཆོས་དེ་དག་ཚང་བ་མངོན་སུམ་གྱིས་གྲུབ་བོ། །རྣལ་འབྱོར་བླ་མེད་ཀྱི་རྒྱུད་ཐམས་ཅད་ལམ་གྱི་ཆ་རྐྱེན་མ་ཚང་བ་མེད་པར་སྟོན་པ་ཡིན་པ་གང་ཞིག་
སྔགས་དང་རྒྱུད་ཀྱི་སྦྱོར་བ་སོགས། ཡབ་ཁོ་ནའི་དབང་དུ་བྱས་པ་གཙོ་བོར་སྟོན་པ་ཕ་རྒྱུད་ཀྱི་མཚན་ཉིད། ཡུམ་གཙོ་ཆེ་བའམ་ཡབ་ཡུམ་ཆ་མཉམ་དུ་སྟོན་པ་གང་རུང་ཡིན་པ་མ་རྒྱུད་ཀྱི་མཚན་ཉིད། ཡང་ན་ཡུམ་གྱི་དབང་དུ་བྱས་པ་རྩལ་དུ་འདོན་པ་ཞེས་བྱས་ཀྱང་ཆོག་གོ །དེ་ལ་ཀྱཻ་རྡོར་བདེ་མཆོག་མི་གཡོ་བ་བླ་མེད་སོགས་ཐམས་ཅད་ཡབ་ཡུམ་ཆ་མཉམ། མཉམ་སྦྱོར། མ་ཡ། བདུད་རྩི། ཨར་རལླྀ། སངས་རྒྱས་ཐོད་པ་རྣམས་ནས། ཡུམ་གཙོ་བོར་གྱུར་པའི་དཀྱིལ་འཁོར་ད་ལྟའི་རྒྱུད་ཆུང་འདི་དག་ཏུ་མི་གསལ་ཡང༌། སྔགས་དང་ལས་ཚོགས་མཁའ་འགྲོ་མའི་གཙོ་ཆེ་བར་རྒྱུད་ལས་གསལ། གདན་བཞི་དང་སྒྲོལ་མ་འབྱུང་བ་སོགས། ཡུམ་ཁོ་ན་རྩལ་དུ་འདོན། མཚན་ཉིད་ཀྱི་ཟུར་དང་པོས་བྱ་རྒྱུད་སོགས་དང༌། རྒྱུད་ཀྱི་ཆ་ཤས་དམ་དུམ་བསྒྱུར་བ་རྣམས་དཔྱོད་དོ། །དུས་འཁོར་ཡང་སྡོམ་ཆེན་གྱི་ཡུམ་གྱི་སྐབས་དང༌། རིགས་བརྒྱ་སོགས་རྣལ་འབྱོར་མའི་དཀྱིལ་འཁོར་ཅི་རིགས་པ་སྟོན་ཅིང༌། སྔགས་དང་ལས་ཚོགས་རྣལ་འབྱོར་མའི་དབང་དུ་བྱས་པ་རྩལ་དུ་འདོན་ཏེ། ཡང་ན། མཐའ་དག་ཡོན་ཏན་གཏེར་བ་ནི་བསྟན་པའི་སླད་དུ་རྣལ་འབྱོར་མ་རྣམས་དག་ལ་མཆོད་པར་བྱ། །མཆོད་པ་མེད་ན་ལོ་གཅིག་ཏུ་ནི་རྒྱུད་ཀྱི་རྒྱལ་པོ་དག་ནི་བླ་མས་བསྟན་པར་མི་བྱའོ། །ཞེས་གསུངས་ལ་
འགྲེལ་པར་བགེགས་ཞི་བའི་དོན་དུ་རྣལ་འབྱོར་མ་ལ་ངེས་པར་མཆོད་པ་བྱ་དགོས་པ་དང༌། བསོད་ནམས་ཀྱི་དོན་དུ་འབྱུང་པོ་ལའང་གཏོར་མ་སྦྱིན་པར་བཤད་དེ། འདིས་རྒྱུད་འདིའི་བདག་མོ་རྣལ་འབྱོར་མ་ཡིན་པར་བསྟན་པས་མ་རྒྱུད་དོ། །དེ་ལྟར་མ་ཡིན་ན་ལྷ་ཡབ་ཁྲོ་བོ་སོགས་ཀྱིས་བགེགས་ཞི་མི་ཐུབ་པ་ལགས་སམ། ཁྲོ་བོ་དང༌། ཀླུ་དང༌། ཕྱོགས་སྐྱོང་སོགས་སྙད་འདོག་ཆུང༌། མཁའ་འགྲོ་མ་ཀོ་ལོང་དམ་པས་ཡིན་ལགས།ད་ནི་དུས་འཁོར་རྣལ་འབྱོར་མའི་རྒྱུད་མ་ཡིན་ཟེར་བ་རྣམས་ལ་ཐོག་མགོ་བོར་བབས་པ་འདྲ་བ་གཅིག་ཡོད་དེ། ནང་ལེའི་ཚིག་ཚིགས་བཅད་ལྔ་བཅུ་ང་གཅིག་པ། དུས་ཀྱི་ལོ་ནི་མི་གྲངས་ལོ། །ཞེས་པ་ནས། ཤློ་ཀ་ང་བདུན་པའི་ཚིག་གཉིས་པ་ཕྱི་རོལ་གྱི་ཕྱག་རྒྱ་དྲུག་ཅེས་པའི་བར་གྱིས་འགྲེལ་པ་མཐོང་བ་ཙམ་གྱིས་སོ། །དེ་ཡང་ནང་ལེའི་མདོར་བསྡུས་གསུམ་པའི་སྟོད་ཀྱི་ཆ་ལ་གཏོགས་ཏེ། ད་ནི་ཉིན་ཞག་གི་ཚོགས་སྟོང་བརྒྱད་ཅུ་པོ་དེ་ལས་ཞེས་པ་ནས། རིགས་གསུམ་ཅུ་རྩ་དྲུག་ནི་རྣལ་འབྱོར་མའི་རྒྱུད་ཀྱི་ངེས་པའོ། །ཞེས་དཔལ་ལྡན་རྒྱུ་སྐར་གྱི་དཀྱིལ་འཁོར་ནང་གི་དུས་འཁོར་སྐུ་གསུང་ཐུགས་ཡོངས་རྫོགས་དང༌། སྡོམ་ཆེན་དང་སྡོམ་ཆུང་གི་དག་པ་བཤད་ནས་རྣལ་འབྱོར་མའི་རྒྱུད་ཀྱི་ངེས་པའོ། །ད་ནི་སྒྱུ་འཕྲུལ་དྲྭ་བ་ཞེས་པ་ནས་བརྗོད་པར་བྱའོ་ཞེས་པ་རྣལ་འབྱོར་རྒྱུད་ཀྱི་ངེས་པའོ་ཞེས་གསུང༌། འདིའི་འཕྲོ་མཐུད་ནས་སླར་ཡང་མི་
གསལ་དང་བཅས་རྒྱས་པར་གསུངས་གདའ། ཕ་མ་གཉིས་སུ་གཏོགས་པ་མ་ཡིན་ན། སྡོམ་ཆུང་ལ་རྣལ་འབྱོར་མའི་རྒྱུད་ཀྱི་ངེས་པའོ། །སྡོམ་ཆེན་ལ་རྣལ་འབྱོར་མ་དང་གཉིས་མེད་བསྲེས་པའི་ངེས་པའོ། །དུས་འཁོར་ཡོངས་རྫོགས་ལ་གཉིས་མེད་ཀྱིས་ངེས་པའོ། །ཞེས་གསུངས་ཙང༌། ཀྱཻ་རྡོར་གཉིས་མེད་ཡིན་ན་མ་རྒྱུད་མ་ཡིན་ཟེར་བ་ལ། བརྟག་གཉིས་དང་གུར་དང་ཕྱོགས་མཐུན་དུ་འདོད་པ་ཐིག་ལེ་སྐོར་བཞི་ཨ་རིལླྀ་གཉིས་རྣམས་ནས་རྣལ་འབྱོར་མའི་རྒྱུད་ཅེས་ཡང་ཡང་གསུངས་པས་རང་གི་ལུང་དང་འགལ་ལོ། །མ་རྒྱུད་ཀྱི་མཚན་གཞི་ཡིན་ཡང་ཡིན་ལ་མཁས་པ་དང་གྲུབ་པ་གྲགས་ཀྱང་གྲགས་པའི་དབང་དུ་མཛད་ནས་འགྲེལ་ཆེན་དྲི་མེད་འོད་ཀྱིས་ལེའུ་ལྔ་པའི་མདོར་བསྡུས་དང་པོར། རང་གི་ངོ་བོས་ནི་ཤེས་རབ་དང་ཐབས་ཀྱི་བདག་ཉིད་སྦྱོར་བའི་རྒྱུད་ཉིད་དེ། དེ་སྐད་དུ་ཡང༌། ཀྱཻ་རྡོར་ལས་གསུངས་པ་ཧེ་ཡིག་རྙིང་སྙིང་རྗེ་ནས། བཤད་ཀྱིས་ཉོན་ཞེས་གསུངས་པའི་ཕྱིར། ཀྱཻའི་རྡོ་རྗེ་ནི་ཤེས་རབ་ཀྱི་རྒྱུད་དུ་མི་འགྱུར་ཏེ། ཤེས་རབ་ཀྱི་རྒྱུད་ཉོན་ཅེས་གསུངས་པ་མེད་པའི་ཕྱིར། དེ་བཞིན་དུ་འདུས་པ་ལ་སོགས་པ་ནས། འདི་ནི་ཐབས་ཀྱི་རྒྱུད་དུ་མི་འགྱུར་རོ། །དེ་བཞིན་དུ་དང་པོའི་སངས་རྒྱས་ལ་སོགས་གསུང་ཞིང༌། དེ་ཁའི་གོང་དུ་ཀུན་རྫོབ་ཀྱི་ས་གང་དུ་རྣལ་འབྱོར་མ་རྣམས་ཡང་དག་པར་རྒྱུ་ཞིང༌། གཙོ་བོ་མི་གཡོ་བ་དེ་ནི་རྣལ་འབྱོར་མའི་རྒྱུད་དོ། །གང་དུ་ཐབས་ཡང་དག་
པར་བརྒྱུ་ཞིང༌། ཤེས་རབ་མི་གཡོ་བ་དེ་ནི་ཐབས་ཀྱི་རྒྱུད་དོ་ཞེས་གསུངས་པ་གཉིས་མ་ཡིན་པའི་གཉིས་མེད་ཡོད་ན་དེ་འདི་ལྟ་བུའོ་གསུངས་ཙང༌། ཀྱཻ་རྡོར་དེ་འདྲའི་མཚན་གཞི་ཡིན་ཅིང་མ་རྒྱུད་མ་ཡིན་ན་རང་གི་ངོ་བོས་ཀྱཻ་རྡོར་མ་རྒྱུད་དུ་མི་འགྱུར་གསུངས་ག་ལ་དགོས་ཏེ། མ་རྒྱུད་མ་ཡིན་པར་གཉིས་མེད་དུ་གྲགས་པ་ལ་གྲུབ་ཟིན་སྒྲུབ་པར་ཐལ་བས་སོ། །དེས་ན་ཚིག་འདིས་བླ་མེད་ལ་ཕ་མ་གཉིས་ཀྱི་ཁྱབ་པ་དང༌། གསང་འདུས་གཉིས་མེད་ཕ་རྒྱུད་ཡིན་པ་བཞིན། ཀྱཻ་རྡོར་གཉིས་མེད་དང་མ་རྒྱུད་ཀྱི་མཚན་གཞི་ཡང་ཡིན་པ་དང༌། གསང་འདུས་ཕ་རྒྱུད་ཁོ་ནར་གྲགས་པ་བཞིན། ཀྱཻ་རྡོར་མ་རྒྱུད་ཁོ་ནར་གྲགས་པ་རྣམས་ཤུགས་བསྟན་ལ་གསལ་པོར་བྱུང༌། ཀྱཻ་རྡོར་མ་རྒྱུད་དང་ཕ་རྒྱུད་གང་རུང་མ་ཡིན་པ་ཕུང་གསུམ་གཉིས་མེད་དུ་འདོད་པ་འདི་ཤམྦྷ་ལ་དང་རྒྱ་གར་ལ་སོགས་སུ་ཡེ་མ་གྲགས་པའི་བོད་པའི་ངན་རྟོག་ཏུ་གསལ་བར་བྱས་སོ། །གཞན་ཡང་བླ་མེད་ལ་གསུམ་དུ་྄འབྱེད་པའི་ཁུངས་རྒྱ་གར་ནས་བསྒྱུར་བ་གང་ན་ཡང་མེད། བོད་ཀྱི་ལོ་ཙྪ་བ། འགོས། གྱི་ཇོ། མར་པ། ནག་ཚོ། དཔྱལ་ཆག །མར་དོ། ལོ་ཆུང༌། རྭ་སྐྱོ་ཞིང་གཉིས་སོགས་ཀྱི་རྗེས་འཇུག་ཚུན་ཆད་ཀྱི་ཡི་གེ་གང་ནའང་མེད་ལ། འབྲོག་མི་འབྲོ་བ། དངོས་སློབ་དང་བཅས་པའང་མི་བཞེད། ས་སྐྱ་རྙིང་པ་དང༌། ངོར་པ་ཕལ་ཆེར་ཀྱཻ་རྡོར་གཉིས་མེད་དུས་འཁོར་མ་རྒྱུད་ཟེར། རྗེ་བཙུན་གོང་མས་ཀྱཻ་རྡོར་གཉིས་མེད་གསུང་བ་
ལས་གཞན་མི་གསལ། རོང་པ་དང༌། ཤོང་དཔང༌། བུ་སྟོན་རྣམས་ཀྱཻ་རྡོར་མ་རྒྱུད། དུས་འཁོར་གཉིས་མེད་ཅེས་རྒྱུ་མཚན་དུ་མ་གསུང༌། ཇོ་ནང་པ་ཡབ་སྲས་གསུམ་དཔྱད་པ་མ་མཛད་པར་དེའི་རྗེས་སུ་འབྲང༌། ཀུན་མཁྱེན་རིན་པོ་ཆེས་གསལ་ཁ་མ་གསུངས། ཕྱོགས་པས་མ་རྒྱུད་དུ་བཞེད་ཟེར་ནའང་དེ་འདྲའི་ཡི་གེ་མ་མཐོང༌། ཁྲིད་ཡིག་ན་གཞན་གྱི་རྗེས་སུ་འབྲང་གདའ། རྫོང་པ་ཚོ་དང༌། ངོར་པ་ཅི་རིགས་ཀྱང་བོ་དོང་པའི་རྗེས་སུ་འབྲངས་ནས་ཟབ་པ་གཉིས་མེད་ཀྱི་ཀྱཻ་རྡོར། རྒྱ་ཆེ་གཉིས་མེད་དུས་འཁོར་ཟེར། ཆོས་རྗེ་ཤེས་རབ་རིན་ཆེན་དང༌། བླ་མ་དམ་པ་རྗེས་འབྲང་དང་བཅས་པ་དེ་དང་མཐུན་པ་ལས་ཟབ་དང་རྒྱ་ཆེ་བའི་ཐ་སྙད་མི་བྱེད་དོ། །རང་ལུགས་སྟོང་པ་དང་སྙིང་རྗེ། བསྐྱེད་རྫོགས་བདེ་སྟོང༌། སྐུ་དང་ཡེ་ཤེས་སོགས་དང༌། དངོས་པོའི་གནས་ལུགས་ཤེས་རབ་དང༌། རྟོགས་བྱེད་ཀྱི་ཐབས་སོགས་ཀྱི་སྒོ་ནས། བླ་མེད་ཐམས་ཅད་ཐབས་ཤེས་ཆ་མཉམ་པས། རང་གི་ངོ་བོས་ཤེས་སམ། དོན་དམ་པར་ཞེས་པ། ཐབས་དང་ཤེས་རབ་དངོས་སམ། དོན་གྱི་ཐབས་དང་ཤེས་རབ་ཀྱི་ཆ་ནས་གཉིས་མེད་ཅེས་ཀྱང་བྱ། ཐབས་ཤེས་སྦྱོར་བའི་རྒྱུད་ཅེས་ཀྱང་བྱ། ཤེས་རབ་དང་ཐབས་ཀྱི་བདག་ཉིད་ཅེས་ཀྱང་བྱའོ། །ཐབས་ཀྱི་རྒྱུད་དང་ཤེས་རབ་ཀྱི་རྒྱུད་ཅེས་མི་བྱ། ཐབས་ཤེས་དངོས་མ་ཡིན་ཀྱང་བཏགས་པའི་ཐབས་ཤེས་སོ། །དོན་གྱི་ཐབས་ཤེས་མ་ཡིན་ཀྱང༌།
བརྡའི་སྒོ་ནས་མཚོན་པའི་ཐབས་ཤེས་གཉིས་ཀྱི་དབང་དུ་བྱས་ན་རྒྱུད་གཉིས་སུ་འགྱུར། དེ་ཡང་གདུལ་བྱ་གཞན་སྣང་ལ་སྣང་བ་ཡིད་ཀྱིས་སྒོམ་པའི་ལྷ་ཡབ་དེ་ཐབས་སྙིང་རྗེ་དངོས་མ་ཡིན་ཀྱང༌། དེའི་བརྡ་ཡིན་པས་དེར་བཏགས་པ་ཡིན་ནོ། །དེའདྲའི་ལྷ་ཡུམ་དེ་སྟོང་ཉིད་རྟོགས་པའི་ཤེས་རབ་དངོས་མ་ཡིན་ཀྱང་དེའི་བརྡ་ཡིན་པས་དེར་བཏགས་པ་ཡིན་པས་སོ། །མདོར་ན་ཐབས་མི་གཡོ་བ་ནི་ལྷ་ཡབ་ཀྱི་དཀྱིལ་འཁོར་དང་སྔགས་སོགས་གཙོ་བོའམ་གྲོགས་སུ་དགོས་ཀྱང་དེས་བྱ་བ་གཙོ་བོར་མི་བྱེད། འཕྲིན་ལས་གཙོ་བོར་རྣལ་འབྱོར་མའི་སྔགས་རྒྱུད་ཀྱི་བྱེད་པའི་དོན་ཡིན། དེས་གཅིག་ཤོས་ཀྱང་རིགས་འགྲེའོ། །དེ་ལ་བོད་སྔ་ཕྱི་མང་པོས་རང་གང་ལ་གཙོ་བོར་བྱེད་པ་གཉིས་མེད་དུ་བསྒྲུབས། གཞན་རྣམས་ཕྱོགས་རེ་བར་གནས་ན་རང་གི་དེ་གཞན་ལས་མཆོག་ཏུ་འགྲུབ་བོ་སྙམ་ནས་བླ་མེད་ལ་གསུམ་དུ་འབྱེད་པར་སྣང་བ། སྔོན་སྔགས་རྙིང་མ་པའི་རྫོགས་ཆེན་པ་བསྟན་པ་སྔ་དར་གྱི་དུས་ན་ངེས་ཀྱི་རྫོགས་ཆེན་འདི་མདོ་སྔགས་མ་ཡིན་དེ་བས་ལྷག་བྱས་པ། བན་དེ་ཡེ་ཤེས་སྡེས་ལྷག་མཐོང་བ་བསྐྱེད་ཐབས་ཆེན་མོར་བཀག །དེ་ནས་སྔ་དར་ཕྱི་དར་གྱི་མཚམས་ལས་མདོ་སྔགས་གང་དང་བསྟུན་ཡང་མ་ཤེས། མདོ་སྔགས་གཉིས་ཀ་མ་ཡིན་བྱས་ན་ཆོས་མ་ཡིན་པར་སོང་དགོས་ནས། རྫོགས་ཆེན་ཨ་ཏི་ཡོ་ག་ལ་ལོགས་སུ་རྒྱུད་མང་པོ་བསྒྲིགས་ཏེ། མཧཱ་དང་ཨ་ནུ་ལས་
ཁྱད་པར་དུ་གྱུར་པ། ཨ་ཏིའོ་ཟེར། མཧཱ་ཕ་རྒྱུད། ཨ་ནུ་མ་རྒྱུད། ཨ་ཏི་གཉིས་མེད་ཟེར། གསར་མ་བ་བླ་མེད་པ་རྣམས། བདེ་དགྱེས་གསང་འདུས། དུས་འཁོར་གཤེད་སྐོར་ལ་གཙོ་བོར་བྱེད་པ་ཁོ་ན་དར། གཞན་ཚོ་ལ་ཞར་བྱུང་བྱེད་པས། གཞན་རྣམས་གཉིས་མེད་ཕུང་གསུམ་པ་ཡིན་ཟེར་མཁན་མ་བྱུང༌། བདེ་གསང་མཁན་པོས་བདེ་གསང་གཉིས་མེད་ཕུང་གསུམ་ཡིན་ཟེར་མཁན་མ་བྱུང་བར་མངོན། ཀྱཻ་རྡོར་འབྲོག་མི་ལུགས་པ་དང་དུས་འཁོར་བ་མང་པོ་དང༌། རྒྱ་སྟོན་སོགས་གཤེད་སྐོར་བ་འགའ་རེས་དེ་ལྟར་འཆད་མོད། མདོར་ན་ཕུང་གསུམ་པ་མི་སྲིད་པས་དེ་འདྲ་བསྒྲུབ་པ་ངལ་བ་འབའ་ཞིག་ཏུ་ཟད་དེ། མ་རྒྱུད་ཡིན་པས་མི་ཟབ་པ་དང་ངན་པར་འགྲོ་བ་མ་ཡིན། གཉིས་མེད་ཡིན་བྱས་པས་དེ་ལས་ཟབ་པར་འགྲོ་བའང་མ་ཡིན་ཏེ་ཕ་རྒྱུད་ཀྱང་གཉིས་མེད་ཡིན་པ་དང༌། གཉིས་མེད་ཕུང་གསུམ་པ་རི་བོང་རྭ་དང་མཚུངས་པས་སོ། །དེས་ན་རང་གི་བདག་གིར་བྱས་པའི་རྒྱུད་ལ་བསྟོད་པ་བྱས་པ་ཙམ་ཡིན་ཀྱང༌། དོན་ལ་མ་ཞུགས་པས་ཕན་ཡོན་མེད་ཅིང་རྫུན་གྱིས་གཞན་མགོ་བསྐོར་བའི་ཉེས་པ་དང༌། རྒྱུད་སྡེ་གཞན་སྨོད་པའི་ཉེས་པ་མ་བསོགས་ཅིག །དེས་ན་གཞི་བདེན་གཉིས་སམ། ཤེས་བྱ་གཏན་ལ་འབེབས་ཚུལ་དང་གཅིག །འབྲས་བུ་སངས་རྒྱས་པའི་བཞུགས་ཚུལ་གཏན་ལ་འབེབས་པ་དང་གཉིས། ཐབས་ལ་ལམ། མོས་པ།
ངེས་འབྱུང་གསུམ། ལས་འབྲས་ཀྱི་བླང་དོར་བཞི། བདག་མེད་རྟོགས་པའི་ཤེས་རབ། སྐྱོན་དང་བྲལ་བའི་ཞི་གནས། བརྩེ་བ་སྙིང་རྗེ་ཆེན་པོ་སྨོན་འཇུག་གི་སེམས་བསྐྱེད། སྤྱོད་པ་ཕར་ཕྱིན་སོགས་དང༌། ལམ་ཐུན་མོང་མ་ཡིན་པ། སྨིན་བྱེད་དབང༌། བསྲུང་བྱ་དམ་ཚིག་དངོས་བསྒོམ་བྱ་རྫོགས་རིམ་ཡོངས་རྫོགས་བསྐྱེད་རིམ་གྱི་ངོ་བོ་དང་རིམ་པ་རྣམས་ཀྱིས་སྒོ་ནས་ཕ་མའི་དབྱེ་བ་མེད། ཐམས་ཅད་གཉིས་མེད་ཡིན་པའི་རྒྱུ་མཚན་དེ་ཡིན། བསྐྱེད་རིམ་གྱི་རྣམ་པའི་ཁྱད་པར་དང༌། བསྐྱེད་རིམ་གྱི་ཡན་ལག་སྔགས་དང་འཕྲིན་ལས་ཀྱི་ཁྱད་པར་ལས་ཕ་མ་གཉིས་སུ་འབྱེད་པས་དེ་ལས་ཕུང་གསུམ་པ་མེད་དོ། །དེའི་རིགས་འགྲོས་ལས་སྤྲོས་བཅས་སྤྲོས་མེད་ཀྱི་སྤྱོད་པའི་སྐབས་དང་ཁྱད་པར་ཅུང་ཟད་འབྱུང་ངོ༌། །དངོས་བསྟན་ཚིག་ཟིན་གྱི་དབང་དུ་བྱས་ན། ཕ་རྒྱུད་ལས་མ་རྒྱུད་ཅུང་ཟད་ཟབ། རྒྱུད་སོ་སོ་ལའང་ཟབ་མི་ཟབ་ཡོད། རྒྱུད་ནི་རྒྱུད་གཞན་གྱིས་ཤེས་པའི་ངེས་པ་དང༌། མཐར་ཐུག་གི་དགོངས་དོན་ལ་མཐོ་དམན་མེད། སློབ་དཔོན་སོ་སོར་བྱས་པའི་དགོངས་འགྲེལ་ལ་ཟབ་མི་ཟབ་དང་བཟང་ངན་ཁྱེད་ཤིན་ཏུ་ཆེ། དེས་ན་དོན་དམ་པར་བླ་མེད་ཐམས་ཅད་གཉིས་མེད་ཀྱི་རྒྱུད་ཡིན། ཀུན་རྫོབ་དབྱེ་གསུངས་པ་ཡང༌། བླུན་ངོར་བཟང་བཟང་འདྲ་ཡང་མ་བརྟགས་ཉམས་དགའ་ཙམ་སྟེ། གསང་འདུས་ཀུན་རྫོབ་ཏུ་ཕ་རྒྱུད་དོན་དམ་པར་གཉིས་མེད། བདེ་
མཆོག་ཀུན་རྫོབ་ཏུ་མ་རྒྱུད་དོན་དམ་པར་གཉིས་མེད། དུས་འཁོར་སོགས་ཀུན་རྫོབ་དོན་དམ་གཉིས་ཀར་གཉིས་མེད་ཅེས་གསུང་དགོས་པར་གདའ་བ་ལ། དེ་ལྟར་དུ་འཇོག་པའི་རྒྱུ་མཚན་ཤིན་ཏུ་མ་གྲུབ་པའི་ཕྱིར་རོ། །གསུམ་པ་ནི་བཞི་པའི་ཡེ་ཤེས་ལ་དཔྱད་པར་བྱ་སྟེ། རྒྱུད་གང་ལས་མཐར་ཐུག་གི་ལམ་གྱི་གཙོ་བོ་བརྗོད་བྱའི་སྙིང་པོ་བཞི་པར་བྱེད་པ་ལ་བསམ་ན་བླ་མེད་ཐམས་ཅད་དེ་ཡིན་ལ། དེ་མིན་བཞི་པ་དང་དངོས་ཀྱི་མཚན་ཉིད་སྟོན་བྱེད་གསལ་པོ་ཤོ་ལོ་ཀ་རེ་རེ་གཉིས་གཉིས་ཡོད་པས། རྒྱུད་དེ་བཞི་པ་ཙམ་དུ་འདོན་པས་ཀྱང་མ་ཁྱབ་ཅིང༌། དབང་ཆོག་གི་སྐབས་དང་དབང་བཀུར་བ་བཞི་པ་ཟེར་བའི་མིང་འདོགས་གསལ་པོ་མེད་ན་བཞི་པ་རྒྱས་པར་མི་སྟོན་པས་ཀྱང་མ་ཁྱབ་བོ། །དེས་ན་འདུས་པའི་བྱང་ཆུབ་སེམས་ཀྱི་ལེའུས་ལས་ཀྱང་བཞི་པ་རྒྱས་པར་བསྟན་པ་ཡིན་ལ། བདེ་མཆོག་ཡང་དབང་པོ་གང་དང་སོགས་དང༌། སྔགས་བཟླས་པ་དང་སོགས། ཕོ་ཉ་ལྷན་ཅིག་སྐྱེས་གྲུབ་སོགས་དང༌། འཕེལ་འགྲིབ་སྤངས་པས་གནས་པ་ཡིན། །སོགས་ཀྱིས་ཀྱང་བཞི་པ་གསལ་བར་བསྟན་ཅིང༌། དེ་བཞིན་དུ་གཤིན་རྗེ་གཤེད་དམར་ནག་སོགས་ལས་ཀྱང་སྟེ་བཤད་རྒྱུད་རྣམས་ལས་སྨོས་ཅི་དགོས། འོན་ཀྱང་དུས་ཀྱི་འཁོར་ལོ་ལ་ལྟོས་ན་དེ་དག་ཤིན་ཏུ་མི་འགལ་ཚུལ་བ་ལ་དགོངས་སོ། །དེས་ན་འདིར་དབང་བཞི་པའི་ཡེ་ཤེས་གོ་ཆོད་པ་དེ་དུས་འཁོར་དང་སེམས་འགྲེལ་སྐོར་གསུམ་གྱིས་འཆད་པ་
ཡིན། རྒྱུད་ཐམས་ཅད་ཀྱི་དགོངས་པའང་དེ་ཡིན། དགོངས་འགྲེལ་མཁན་པོ་གྲུབ་ཆེན་གཞན་རྣམས་ཀྱིས་དགོངས་པའི་གནད་དང་མི་འགལ་ལོ། །བཞི་པ་ཆོ་གས་བསྐུར་བ། བརྡ་ཐབས་ཡིན་པས་གང་ལྟར་བྱས་ཀྱང་འདྲ་བ་ཞིག་ཡོད། དངོས་ལ་འཁྲུལ་བ་འཕགས་ཡུལ་དུ་མང་དུ་བྱུང༌། བོད་དུ་ཡང་མང༌། ལམ་འབྲས་ཀྱི་རྡོ་རྗེའི་རྦ་རླབས་ཀྱང་དབང་པོ་གཉིས་སྐྱེས་བཞི་པར་འདོད་པའི་ལུགས་ཡིན། མངོན་རྟོགས་ལྗོན་ཤིང་ན་དབང་པོ་གཉིས་སྐྱེས་བཞི་བར་འདོད་པ་ལ་དགག་པ་ཡང་མང་པོ་མཛད་ཀྱང༌། རང་ལུགས་སྟོང་ཉིད་དུ་ངོ་འཕྲོད་པའི་དབང་པོ་གཉིས་སྐྱེས་ལ་ཀ་ངོས་འཛིན་ཅིང༌། དེའི་ཡས་བབ་ཀྱང་བཞི་པ་ཡིན་པས་ནི་འདོད་ལ་མས་བརྟན་གཙོ་བོར་མཛད་དོ། །བོ་དོང་པ་ཡང་ལམ་འབྲས་ཀྱི་མཐར་ཐུག་ཏུ་མཛད། བོད་ཕྱི་མ་ནི། དབང་པོ་གཉིས་སྐྱེས་ཀྱི་བདེ་སྟོང་བཞི་པར་བྱེད་པ་རྒྱུད་སྤྱིའི་དགོངས་པ་ཡིན་ལ། སྟོང་གཟུགས་ཕྱག་ཆེན་གྱིས་དྲངས་པའི་ཞུ་བདེ་བཞི་པར་བྱེད་པ་དུས་འཁོར་གྱི་ལུགས་ཡིན། གཉིས་པོ་ལུགས་ཐ་དད་ཡིན་པས་མི་འགལ་ཟེར་ཡང༌། སྔ་མ་མི་འཐད་ལ། ལུགས་ཐ་དད་ཡིན་པ་ཡང་མི་འཐད་ཅིང༌། འཐད་ན་བཞི་སྒོ་གཉིས་སུ་ཐལ་བ་བཟློག་ཏུ་མེད་ལ། ཕྱི་མ་ཡང་སྟོང་གཟུགས་ཡིད་ངོར་ཤར་བའི་འཁྲུལ་སྣང་དུ་འདོད་པ་དང༌། མི་འགྱུར་བདེ་བའི་རྟེན་ཐིག་ལེ་བེམ་ཆོས་སོགས་ཆོས་སྐད་བསིལ་ན་ནོར་པ་ཤིན་ཏུ་
ཆེ། རྗེས་དཔག་གི་རྩིས་ཟིན་པ་དགོས་ཚུལ་སོགས་གྲུབ་མཐའི་སྐྱོན་དང༌། སྟོང་གཟུགས་དང་བདེ་ཆེན་ངོ་བོ་ངོས་མ་ཟིན་ཅིང་སྦྱོར་ཚུལ་རྣམས་ལ་སྤྱི་མ་ཤར་བ་དུ་མ་ཡོད་དོ། །སྒོམ་ཆེན་པ་གཞན་མང་དག་དང༌། བཀའ་བརྒྱུད་པ་རྣམས་སྟོང་པ་ཕྱལ་ཡུལ་ལ་བཞི་པར་ངོས་འཛིན་པས་ཕལ་ཆེར་གྱིས་བཞི་པའི་དོན་མ་རྟོགས་ལ། བཞི་པའི་དོན་ལ། ཇོ་ནང་པ་དང༌། བུ་སྟོན་སོགས་དང༌། དེ་ཡན་ཆད་ཀྱི་དུས་འཁོར་བ་རྣམས་ལ་གནད་མ་ནོར་བ་དེ་ཡོད་དེ་ཞིབ་ཏུ་ཞལ་ལས་ཤེས་སོ། །གསུམ་པ་རྒྱུད་སྡེ་འཆད་ཚུལ་གྱི་མན་ངག་བསྟན་པ་ལ་ལྔ། བསྡུས་པའི་དོན་འཆད་ཚུལ་དང༌། རྡོ་རྗེའི་ཚིག་བཤད་ཐབས། རྒྱུད་བཤད་པའི་དགོས་པ། འཆད་དུས་ཀྱི་བྱ་བའི་རིམ་པ། ལེགས་པར་བཤད་པའི་ཕན་ཡོན་ནོ། །དང་པོ་ནི། རྒྱུད་ཀྱི་གནས་ལྔ་གང་ཞེ་ན་སྡོམ་ནི། ལས་རིམ་དངོས་གྲུབ་དམ་ཚིག་སྡོམ། །ཏིང་འཛིན་རྒྱུད་ཀྱི་སྦྱོར་བའོ། །ལས་ཀྱི་རིམ་པ་ནི་དཔག་ཏུ་མེད་དེ། ཆེ་ལོང་ཆེ་ལོང་བསྡུས་པ་ནི། དེ་ཉིད་བཅུ་ཕྱི་ཡི་དང༌། གསང་བའི་དེ་ཉིད་བཅུའོ། །ཡང་བཅུ་གཅིག་སྟེ། སྡོམ་ནི། ས་ཆོག་སྒྲུབ་དང་མཆོད་པ་དང༌། །སྦྱིན་སྲེག་དབང་བསྐུར་རབ་གནས་དང༌། །ཡོ་བྱད་དཀྱིལ་འཁོར་མཚན་ཉིད་དང༌། །ཚོགས་འཁོར་བསྙེན་པ་ལས་ཚོགས་སོ། །ཡོ་བྱད་ནི། རྡོ་རྗེ་
དང༌། དྲིལ་བུ་དང༌། ཕྱག་མཚན་དང༌། རྒྱན་དང་དེ་དག་ལ་སོགས་པའོ། །དཀྱིལ་འཁོར་གྱི་མཚན་ཉིད་བྲི་བ་དང༌། སླད་པ་དང་ལུས་དང༌། བསམ་གཏན་ནོ། །སྔགས་ཀྱི་སྟོབས་ལས་བསོད་ནམས་འཕེལ་ཚུལ་དང༌། བདེ་བས་སྟོང་པ་རྟོགས་པའི་ཚུལ་མཆོག་དང༌། བདེ་དང་མྱུར་དང་ཐབས་མཁས་ཁྱད་པར་དང༌། །བསླབ་གསུམ་ཉོན་མོངས་ལམ་སྤྱོད་འབྲས་བུ་ཚུལ། །དམིགས་པས་དམ་ཚིག་རྒྱུད་གཞན་བསྐུལ་བ་ཡིས། །ལམ་འདི་ཁྱད་པར་འཕགས་པར་ཀུན་གྱིས་བཤད། །བཅུ་གཅིག་པོ་འདི་གཞན་ལ་ཡོད་མ་ཡིན། །འདི་གཉིས་བྱང་ཆུབ་མཆོག་ལ་ཁྱད་པར་མེད། །ཞེས་པ་འདི་བསྡུ་བའི་ཚིགས་སུ་བཅད་པའོ། །གཉིས་པ་ནི། རྣལ་འབྱོར་བླ་ན་མེད་པ་ལ་ནི་རྒྱུད་བདུན་དང༌། དེའི་གཏམ་གྱི་སྦྱོར་བ་ལ་ནི་སྔོན་བྱུང་དང་རྗེས་འཇུག་དང༌། རྒྱུད་འགའ་ཞིག་ལ་ནི། ཕྱི་ནང་གསང་བ་དེ་བཞིན་ནང༌། །དེ་བཞིན་ཉིད་དོན་རྣམ་པ་བཞི། །ཞེས་དང༌། ཕྱི་དང་ནང་དང༌། གཞན་དང༌། རྟོན་པ་བཞིར་བཤད་པ་དག་གོ །ཤིན་ཏུ་སྦས་པའི་རྒྱུད་ལ་ནི་ཚུལ་བཞིའོ། །མཐའ་དྲུག་ནི་ཐམས་ཅད་ལ་སྟེ། ངེས་པ་དང་དྲང་དོན་ལ་ལྷག་མ་བཞི་བཞིས་ཕྱེ་བས་བརྒྱད་དོ། །དེ་བཞིན་དུ་གཞན་ལ་ཡང་སྟེ་ཉི་ཤུ་རྩ་བཞི་ཡོད་དོ། །ཚུལ་བཞིར་འཆད་པ་མེད་པ་ལ་ནི་ཚོགས་དང་སློབ་མའི་དབྱེ་བ་མེད་དོ། །ཡི་གེ་གསང་ཆེན་དུ་བཤད་པ་ནི་ཡི་གེའི་དོན་མ་ཡིན་ཞེས་ཁོ་བོས་
སྨྲའོ། །ཚིག་གཅིག་ལ་དོན་གཅིག་གམ་གཉིས་སུ་སྟོན་པ་ནི་མཐའ་དྲུག་དང། དོན་རྣམ་གྲངས་དུ་མ་ནི་ཚུལ་བཞིས་འཆད་དོ། །དེ་ཡང་མཐའ་གཅིག་ཏུ་ནི་མ་ཡིན་ཏེ། སྤྱིའི་དོན་དུ་གསུམ་མམ་བཞི་ལ་སོགས་པར་བཤད་པ་ཡང་ཡོད་དེ། དེ་དག་རྒྱུད་གསུམ་གྱི་སྒོ་ནས་བཤད་པ་ལ་སོགས་པ་མན་ངག་ཡོད་པར་ཡང་འདོད་དོ། །གསུམ་པ་ནི། གལ་ཏེ་ཚེ་འདི་ཉིད་ལ་སངས་རྒྱས་ཐོབ་པར་འདོད་པས་རྒྱུད་མཉན་པར་བྱའོ། །བཞི་པ་ནི། དེ་ལ་སློབ་དཔོན་དང་སློབ་མའི་མཚན་ཉིད་ཤེས་པས་བརྟགས་ནས་བླངས་ལ་དབང་བསྐུར་བ་ནོད་པར་བྱའོ། །དམ་ཚིག་དང་སྡོམ་པ་ལ་གནས་པས། རིམ་པ་གཉིས་ལ་ཞིབ་མོར་མཁས་པར་བྱས་ལ་རྒྱུད་ཉན་ནོ། །བསྲུང་བའི་འཁོར་ལོ་ཡང་སྒོམ་པ་དང༌། གཏོར་མ་ཡང་སྦྱིན་པ་དང༌། ཐམས་ཅད་དཀྱིལ་འཁོར་དུ་བལྟས་ལ་སློབ་དཔོན་རྡོ་རྗེ་སེམས་དཔའ་ལ་ཡོན་དང༌། མཎྜལ་བྱས་ལ། སྔོན་བྱུང་ཇི་ལྟ་བར་སྒོམ་པ་ནི། སློབ་དཔོན་དང་སློན་མ་གཉིས་ཀས་སོ། །ལུས་དང༌། ངག་དང༌། སེམས་ཀྱི་སྐྱོན་བཅུ་གཅིག་སྤངས་ཏེ། དེ་དག་གང་ཞེ་ན། ཉལ་བ་ལ་སོགས་པ་ལུས་ཀྱི་གནས་ངན་ལེན་དང༌། རྩེད་མོ་དང༌། ཀྱལ་ཀ་དང༌། ཞེ་སྡང་བའི་བརྒལ་ལན་དང༌། ཅ་ཅོ་དང༌། ཧ་ཅང་རྟོག་གེ་ལ་དགའ་བས་གཏན་ཚིགས་དང༌། ཐལ་འགྱུར་གྱི་རྣམ་བཞག་ཐལ་བ་དང༌། མན་ངག་
མེད་པ་དང༌། རྫུན་གྱི་མན་ངག་དང༌། མ་སྨིན་པའི་སྐྱེ་བོས་ཐོས་པ་དང༌། འགྲན་པ་དང༌། རྙེད་པའི་སེམས་སོ། །གཞན་ཡང་སྨྲ་བའི་རྒྱན་དང་ལྡན་པས་བརྗོད་པར་བྱའོ། །ལྔ་པ་ནི་རྣལ་འབྱོར་ལ་མི་གཡོ་བས་འཆད་པ་དང༌། མཉན་པ་ལ་ནི་རྡོ་རྗེ་འཛིན་པ་རྣམས་ལྷག་པར་ཡང་གཟིགས་སོ། །འདིའི་དགེ་བ་ཡང༌། སྐྱེ་བ་འདི་ཁོ་ན་ལ་རྡོ་རྗེ་སེམས་དཔའ་ཞེས་བྱ་བ་འགྲོ་བ་ལ་ཕན་པའི་རྒྱུར་བསྔོའོ། །རྒྱུད་སྡེ་སྤྱིའི་རྣམ་པར་གཞག་པའི་སྙིང་པོ་ཙམ་འདི་ནི། སྡེ་སྣོད་གསུམ་དང་རྒྱུད་སྡེ་མཐའ་དག་གི་དྲང་ངེས་མ་ནོར་བར་འཆད་པ་དང་རྩོད་པ་དང༌། རྩོམ་པ་དང༌། དེ་དག་གི་དོན་བསམ་པ་དང་སྒོམ་པའི་དོན་ལ་ཚད་མའི་སྐྱེས་བུར་གྱུར་པ་རིགས་བརྒྱའི་བདག་པོ་རྡོ་རྗེ་འཆང་ཆེན་པོ། དོན་གྱི་སླད་དུ་མཚན་ནས་སྨོས་ཏེ་རྗེ་བཙུན་ཏཱ་ར་ནཱ་ཐ་ཀུན་དགའ་སྙིང་པོ་བཀྲ་ཤིས་རྒྱལ་མཚན་དཔལ་བཟང་པོའི་གསུང་ལས་སློབ་མ་འགའ་ཞིག་གིས་ཟིན་བྲིས་སུ་བྱས་པའོ། །དར་རྒྱས་འཕེལ། གཅིག་ཞུས་དག་གོ །བཀྲ་ཤིས་དགྲ་དང་འཇིགས་པ་ཀུན་ལས་བརྒལ། །རྣམ་པར་གཟིགས་ནི་གཟི་བརྗིད་ཆེ། །རྫུ་འཕྲུལ་ངོ་བོ་གཙུག་ཏོར་རོ། །ཐམས་ཅད་སྐྱོབ་པའི་ཤེས་རབ་དང༌། །ལོག་དང་སེལ་བའི་སྟོབས་ཉིད་དང༌། །གསེར་སྡུག་ལ་ནི་བསླབ་པ་དང༌། །འོད་བསྲུང་གི་ནི་ཡོན་ཏན་དང༌། །ཤཱཀྱ་ཐུབ་པའི་བརྩོན་འགྲུས་ཀྱི། །བདག་ནི་རྟག་ཏུ་བདེ་བར་ཤོག། བཀྲ་ཤིས།།