སྙིགས་དུས་ཀྱི་བླ་མའི་གཟུགས་བརྙན་འཛིན་འས་རང་གི་མཚན་ཉིད་ཇི་ལྟ་བར་བརྗོད་པ་དྲང་པོའི་ས་བོན།
སྙིགས་དུས་ཀྱི་བླ་མའི་གཟུགས་བརྙན་འཛིན་འས་རང་གི་མཚན་ཉིད་ཇི་ལྟ་བར་བརྗོད་པ་དྲང་པོའི་ས་བོན་ཅེས་བྱས་བ་བཞུགས་སོ།
ན་མོ་གུ་རུ་བུདྡྷ་བོ་དྷི་སཏྭ་བྷྱ། །ཆོས་དབྱིངས་མཁའ་ལ་ཐུགས་རྗེའི་འོད་སྟོང་ཕྱོགས་མེད་འཕྲོ། །མཐའ་ཡས་འགྲོ་བ་ངན་གྲོའི་གཡང་སར་འཁྱམས་པ་རྣམས། །ཐུགས་རྗེའི་རོལ་གར་མཛད་ཕྲིན་དཔག་ཡས་འོད་ཟེར་གྱིས། །སྣང་བས་ཁྱབ་མཛད་ཀུན་བཟང་རྡོར་འཆང་སྤྱི་བོས་མཆོད། །བསྐལ་མང་གྲངས་མེད་སྔོན་ནས་སེམས་བསྐྱེད་ཅིང༌། །ཁམས་གསུམ་འཁོར་བའི་འགྲོ་བ་བསྒྲལ་སླད་དུ། །དཀའ་བའི་སྤྱོད་པ་དཔག་མེད་ལྷུར་བླངས་ནས། །འགྲོ་ལ་ཕན་བདེ་སྩོལ་མཛད་ཐུགས་རྗེ་ཅན། །རྒྱལ་དང་རྒྱལ་སྲས་
བྱང་སམས་འཕགས་ཚོགས་ལ། །མི་ཕྱེད་དད་པའི་ཡིད་ཀྱིས་ཕྱག་འཚལ་ལོ། །བསོད་ནམས་ཆུ་གཏེར་དབུས་ནས་ལེགས་འོངས་ཤིང༌། །ཟབ་རྒྱས་བདུད་རྩིའི་འཕྲེང་བས་རབ་མཛེས་ཀླུབས། །སྨིན་གྲོལ་ལེགས་བཤད་གདེངས་ཀ་མངོན་མཐོ་བའི། །རྩ་རྒྱུད་བླ་མའི་ཚོགས་ལ་སྙིང་ནས་འདུད། །འགྲོ་བའི་ཁམས་ཀུན་བདེ་གཤེགས་སྙིང་པོས་ཁྱབ། །རབ་འབྱམས་ཞིང་ཀུན་རྒྱལ་བའི་ཕྲིན་ལས་ཉིད། །སྣང་གྲགས་ཡེ་ནས་ཆོས་ཉིད་རྣམ་རོལ་འཕྲུལ། །ཐམས་ཅད་རྒྱལ་བའི་དཀྱིལ་འཁོར་ལ་ཕྱག་འཚལ། །སྙིགས་དུས་སྐྱེ་བོ་རྨོངས་པ་བདག་ལྟ་བུ། །ཐོས་བསམ་སྒོམ་པའི་
ནོར་གྱི་རབ་དབེན་ཞིང༌། །འཆད་རྩོད་རྩོམ་པའི་ནུས་པ་ལྟ་ཞོག་གི །སྐྱེ་བོ་ཕལ་པའི་རྣར་སྙན་ཚིག་ཙམ་ཡང༌། །བརྗོད་པར་ནུས་པའི་རྣམ་དཔྱོད་མེད་མོད་ཅིང༌། །ཐོག་མེད་དུས་ནས་བག་ཆགས་ངན་གོམས་ཤུགས། །འཁྲུལ་པའི་རྒྱ་མཚོ་རྣམ་རྟོག་རྦ་རླབས་དང༌། །ཉོན་མོངས་དབུ་བའི་ཕུང་པོ་འཁྲིགས་པ་ལས། །བྱུང་བའི་ཅལ་ཅོལ་གཏམ་རྣམས་ཡི་གེ་རུ། །བྲིས་ཀྱང་དོན་གྱི་སྙིང་པོ་ཅང་མཆིས་སམ། །ད་དུས་འགྲོ་བ་ཕལ་ཆེར་ཉོན་མོངས་རག །སངས་རྒྱས་བྱང་སེམས་གྲུབ་མཆོག་སྐྱེས་བུ་དང༌། །ཆོས་རྒྱལ་བྱང་སེམས་མཛད་སྤྱོད་རྣམ་ཐར་ལའང༌། །གུས་པས་འཆད་ཉན་བལྟ་རྟོག་མི་བྱེད་པར། །ཆོས་དང་གང་ཟག་ཡ་བྲལ་དུས་འདི་འདྲར། །བདག་འདྲས་སྨྲས་ཀྱང་ངལ་བ་དོན་མེད་ལས། །ཕན་པའི་དོན་དུ་ཇི་ལྟར་འགྱུར་ཞིག་གུ། །འོན་ཀྱང་བསྐུལ་བ་པོ་ཡི་བཞེད་སྐོང་ཕྱིར། །རང་གི་ཚུལ་རྣམས་དྲང་པོར་བརྗོད་པ་འདི། །མཁས་པའི་སྤྱན་སྔར་
བྲིམ་པ་མེད་ནའང༌། །ཅུང་ཟད་སྨྲས་ལ་བཟོད་པར་མཛད་དུ་གསོལ། དེ་ཡང་ལོངས་སྤྱོད་རྫོགས་སྐུ་རྣམ་པར་སྣང་མཛད་གངས་ཆེན་མཚོའི་ཕྱག་གི་ལྷུང་བཟེད་ཀྱི་ནང༌། སྤོས་ཆུའི་རྒྱ་མཚོ་ལས་མངོན་པར་བྱུང་བའི་པདྨ་ཉི་ཤུ་རྩ་ལྔ་བརྩེགས་པའི་ཁྱོན་ཀུན་ཞིང་ཁམས་ཀྱིས་བརྒྱན་པ་ལས། མཆོག་ཏུ་གྱུར་པ་གསང་ཆེན་རྡོ་རྗེ་ཐེག་པའི་གནས། བཅུ་གསུམ་པ་མི་མཇེད་ཀྱི་ཞིང་འདི་ཉིད་ལས། དབུས་ཀྱི་རི་བོ་མཆོག་རབ་ཀྱི་ལྷོ། འཛམ་གླིང་སོག་ཁ་ཤིང་རྟའི་དབྱིབས་ཅན་གྱི་དབུས་མ་གྷ་དྷ་རྡོ་རྗེ་གདན་ཞེས་བྱ་བ་ཤཱཀྱའི་དབང་པོ་མངོན་པར་བྱང་ཆུབ་པའི་བསྟི་གནས་དམ་པ་དེ་ཉིད་ལས། དཔག་ཚད་བརྒྱ་ལྷག་བྱང་ཕྱོགས་སུ་བགྲོད་པའི་ཡུལ། གངས་རིའི་ཕྲེང་བས་མངོན་པར་དཀྲིགས་པའི་ཡུལ་ལྗོངས་བོད་ཅེས་བྱ་བ་འདི་ཉིད་དུ་འོད་གསལ་གྱི་ལྷ་ལས་བབས་པའི་རྒྱལ་རྒྱུད་རིམ་བཞིན་བྱོན་པའི་ནང་ནས། ཐུགས་རྗེའི་
བདག་ཉིད་སྤྱན་རས་གཟིགས་དབང་མིའི་གཟུགས་སུ་བཞེངས་ནས་འགྲོ་བའི་དོན་མཛད་པའི་ཆོས་རྒྱལ་སྲོང་བཙན་སྒམ་པོ་ཕྲིན་ལས་ཀྱི་རོལ་པ་མངོན་པར་བསྟན་པའི་དུས་ན། ཆོས་བློན་ཆེན་པོ་ཐོན་མི་སམ་བྷོ་ཊ་ཞེས་བྱ་བ། ལུགས་གཉིས་ཀྱི་མཁྱེན་རབ་ཟླ་མེད་དུ་མཆིས་པས། རྒྱལ་པོས་རྒྱ་གར་དུ་བརྫངས་ཤིང་མཁས་པ་ལི་བྱིན་ལ་སོགས་པ་དགེ་བའི་བཤེས་གཉེན་མང་ཞིག་གིས་རྗེས་སུ་བཟུང་ནས། སྒྲ་དང་ཡི་གེའི་རིག་གནས་མཐའ་དག་ལ་མཁས་པའི་ཕུལ་དུ་ཕྱིན་པར་གྱུར་ཏེ། སླར་ལོག་ནས་བོད་དུ་ཡི་གེའི་བསྟན་པ་དར་བར་བྱས་ཞིང༌། དཀོན་མཆོག་སྤྲིན་དང་པདྨ་དཀར་པོ་ལ་སོགས་པའི་དམ་ཆོས་མང་དུ་བསྒྱུར། ཤེས་རབ་ཀྱི་སྟོབས་རྩལ་མཐའ་ཡས་པའི་སྒོ་ནས་འགྲོ་བ་རྣམས་ལ་ཕན་པ་རྒྱ་ཆེར་མཛད་ཅིང༌། རྒྱལ་པོ་ཉིད་ཀྱི་ཕྲིན་ལས་པར་གྱུར་པ་སྟེ། བདག་དེའི་ཚེ་དེའི་དུས་ན། ཆོས་བློན་དེ་ཉིད་དུ་གྱུར་ཏོ་ཞེས། རིག་འཛིན་གྱི་གཏེར་སྟོན་ཆེན་པོ་འཇའ་
ཚོན་སྙིང་པོས་བཀའ་བསྩལ་ཞིང༌། གཞན་ཡང༌། བཅོམ་ལྡན་འདས་ཀྱི་ཉེ་གནས་ཀུན་དགའ་བོར་གྱུར་ནས་བཀའི་སྡུ་བ་པོ་བྱས་ཤིང་བསྟན་པའི་སྲོག་ཤིང་དམ་པར་གྱུར་པ་དང༌། བོད་ཀྱི་བསྟན་པ་སྔ་དར་གྱི་ཚེ། ལོ་ཙཱ་བ་ཆེན་པོ་བཻ་རོ་ཙ་ནར་གྱུར་ནས་སྤྱིར་སྡེ་སྣོད་རྒྱུད་སྡེ་མང་པོ་དང་ཁྱད་པར་མན་ངག་རྫོགས་པ་ཆེན་པོའི་བསྟན་པ་སྤེལ་བའི་ཚུལ་དང༌། གཞན་ཡང་༧རྗེ་བཙུན་ས་སྐྱ་པཎ་ཆེན་གྲུབ་ཆེན་ཁྱུང་པོ་རྣལ་འབྱོར། གཏེར་སྟོན་རྡོ་རྗེ་གླིང་པ། སྤྲུལ་སྐུ་མཆོག་ལྡན་མགོན་པོ། གཏེར་སྟོན་ཀུན་སྐྱོང་གླིང་པ་ལ་སོགས་པ་མཁས་གྲུབ་སྐྱེས་ཆེན་དམ་པ་མང་པོ་ཞིག་གི་སྐྱེ་བ་དང་སྤྲུལ་པ་ཁྱོད་ཡིན་པས། སེམས་ཅན་གྱི་དོན་ལ་བློ་རྒྱ་བསྐྱེད་པར་གྱིས་ཤིག་ཅེས། བདག་ལ་བཀའ་ཡི་ནན་ཐུག་ཡང་ཡང་མཛད་ཅིང་མཆིས་ནའང༌། བདག་ལྟ་བུ་ནི་ཐོག་མ་མེད་པ་ནས་བསགས་སྦྱང་གི་ནུས་པ་དམན་པའི་དབང་གིས། ད་
ལྟའི་བར་དུ་འཁོར་བའི་འཁྲུལ་འཁོར་ཟོ་ཆུའི་འཁྱུད་མོ་ལྟ་བུའི་ཀློང་ན་རྒྱུན་དུ་འཁྱམ་ཞིང༌། ཐོས་བསམ་སྒོམ་སོགས་ཀྱི་སྦྱངས་ཡོན་དང་སྤངས་རྟོགས་ཀྱི་འབྲས་བུ་ནི་སྒོ་དུ་མ་ནས་རབ་ཏུ་དམན་པ་ལས་ཀྱང༌། ཉོན་མོངས་ཀྱི་འཆིང་བ་དམ་པོས་རྟག་ཏུ་བཅིངས་ཏེ་འཁྲུལ་པ་ལུ་གུ་རྒྱུད་ཀྱི་རྗེས་སུ་འབྲངས་ཤིང་ཉིན་མཚན་ཀུན་ཏུ་ལེ་ལོ་རྣམ་གཡེང་གིས་དུས་འདའ་བ་འདི་ལྟ་བུ་ནི་སྐྱེས་ཆེན་དམ་པ་དེ་དག་གི་སྐྱེ་བར་ཅི་ཞིག་རུང་མོད་ཀྱི། འདི་ནི་ངེས་པར་བདག་ལ་དགེ་སྦྱོར་ལ་བསྐུལ་ཞིང་སྤྲོ་བ་བསྐྱེད་པའི་ཕྱིར་གསུངས་པར་གོར་མ་ཆགས་སྙམ་མོ། རིང་ནས་གོམས་ཤིང་སྦྱངས་པས་ལེགས་བཤད་ཀྱིས། །སྐལ་ལྡན་ཐར་གླིང་འཁྲིད་མཁས་དེད་དཔོན་མཆོག སྐྱེས་མཆོག་མི་ཡི་སེངྒེ་དེ་རྣམས་ནི། །གངས་ཅན་མུན་སེལ་སྒྲོན་མེར་ལེགས་གྱུར་མོད། །རྒྱལ་སྲས་དམ་པའི་རྨད་བྱུང་མཛད་ཕྲིན་ནི། །སེ་གོལ་ཡུན་ལའང་སྟོང་གསུམ་བྱེ་ཕྲག་བརྒྱར། །
རྣམ་གྲོལ་དུ་མས་འགྲོ་བ་སྒྲོལ་ནུས་པའི། །མཁྱེན་བརྩེའི་གཏིང་མཐའ་དཔོག་པར་སུ་ཡིས་ནུས། །མ་རིག་མུན་པར་འཁྱམས་པ་བདག་འདྲའི་རིགས། །གཞན་དོན་ལྟ་ཞོག་རང་གི་མདུན་མ་ཡང༌། །ལས་རླུང་ཤུགས་ཀྱིས་གར་བསྐྱོད་མ་གཏོགས་པ། །འདི་ལྟར་བྱ་ཞེས་རང་དབང་མ་ཐོབ་པའི། །ཉམས་ཆུང་འདི་འདྲའི་ཚེ་རབས་གོང་མ་ནི། །བླུན་རྨོངས་བྱོལ་སོང་ལས་གཞན་འོས་ཅི་ཞིག །འོན་ཀྱང་རྒྱལ་བ་རྣམས་ཀྱི་མཛད་པ་ལ། །མི་སྲིད་པ་ནི་གང་ཡང་མེད་པ་སྟེ། །ཤཱཀྱའི་དབང་པོ་བྱང་ཆུབ་སྤྱོད་པའི་ཚེ། །ཉ་སོགས་དུད་འགྲོའི་ཚུལ་དུའང་སྣང་བར་འགྱུར། །ཇི་ལྟར་ནགས་ན་གནས་པའི་བྱ་ཚོགས་དག རང་འདྲའི་རིགས་མཐུན་རྣམས་ལ་དགའ་བྱེད་ཅིང༌། །ཤེས་ལྡན་མི་ལ་ལོག་ལྟས་འབྲོས་བྱེད་བཞིན། །མ་རིག་མུན་པས་ལྡོངས་པའི་སྐྱེ་བོ་རྣམས། །སྐུ་དངོས་ཀྱིས་ནི་འདུལ་བའི་སྐལ་མེད་ཚེ། །རིགས་མཐུན་
གཟུགས་སྤྲུལ་ཡིན་པར་རློམ་ན་རུང༌། །གདོད་མའི་མགོན་པོ་ཆོས་སྐུ་མན་ཆད་ནས། །འཇག་མིག་གནས་པའི་སྲིན་འབུ་ཡོན་ཆད་ཀུན། །བདེ་གཤེགས་སྙིང་པོར་ཡེ་ནས་གཅིག་པ་ཡིན། །མདོ་རྒྱུད་ལུང་ལ་རྟེན་པར་རུང་ངམ་ཅི། ཡང༌། བདག་གི་སྐྱེ་བ་འདི་ཡི་གོང་མ་ནི་མཚུངས་མེད་བསྟན་འཛིན་རྡོ་རྗེ་དེ་ཉིད་ཡིན་པར་གྲགས་པ་སྟེ། དེ་ཡང་སློབ་དཔོན་རིན་པོ་ཆེ་པདྨ་འབྱུང་གནས་ཀྱི་སྤྲུལ་པ། ཕ་སྒོམ་པ་སངས་རྒྱས་ཞེས་བྱ་བ་དེ་ཉིད་ཤམ་པོའི་གངས་ལ་སྒྲུབ་པ་མཛད་ཅིང་བཞུགས་པའི་ཚེ། གུ་རུ་པདྨ་ཉིད་ཁྱེའུ་ལོ་བརྒྱད་པའི་གཟུགས་སུ་སྤྲུལ་བས་ལུང་བསྟན་པ་ལ་བརྟེན་ནས། རྫུ་འཕྲུལ་གྱིས་ནམ་མཁའ་ལ་འཕུར་ནས་བྱོན་སྟེ། མཆིམས་ཡུལ་ང་ལ་ཞེས་བྱ་བའི་རི་རྩེར་བབས་ནས་བཞུགས་ཤིང༌། ང་ལ་བྲག་བཙན་དམ་ལ་བཏགས་ཏེ་རི་སྟེང་གི་དགོན་པ་འདེབས་པར་མཛད། དེ་ཉིད་ཀྱི་མཐུན་རྐྱེན་ལ་དགོངས་པའི་ཞིང་མོ་ཆེ་ཞེས་བྱ་བ་ཞིག་ཡོད་པས་
ང་ལ་བྲག་བཙན་ལ། ཞིང་འདི་ནི་ནམ་འདེབས་པའི་ཆར་པ་རེ་ཡོང་བ་གྱིས་གསུངས་པ་ལ་བརྟེན། ད་ལྟ་ཡང་ཞིང་དེ་ནི་ནམ་འདེབས་ཀྱང་ཁ་ཆར་ངེས་པར་འབབ་པའི་ཡ་མཚན་ཀྱང་ཡོད་ཅིང༌། སྒོམ་པ་སངས་རྒྱས་དེ་གཉིས་ཀྱི་གདུང་རབས་ཡན་ཆད་ཀྱི་རིམ་པར་བྱོན་པ་ཐམས་ཅད་ཀྱང་འགྲོ་དོན་རླབས་ཆེན་ནུས་པ་ཤ་སྟག་བྱོན་ཞིང༌། སྒོམ་པ་སངས་རྒྱས་ཀྱི་སྲས་ནི་པདྨ་ལས་འབྲེལ་རྩལ་གྱི་སློབ་མ་བློ་གྲོས་རྒྱལ་མཚན། དེའི་སྲས་ཆོས་རྗེ་བྱང་ཆུབ་རིན་ཆེན། དེ་སྲས་མཚུངས་མེད་རིན་ཆེན་རྒྱ་མཚོ། དེའི་སྲས་གསུམ་ཡོད་པ་ལས་བླ་མ་དབང་ཕྱུག་རྒྱ་མཚོའི་སྲས་སུ་མཚུངས་མེད་བསྟན་འཛིན་རྡོ་རྗེ་འདི་ཉིད་འཁྲུངས། དབང་ཕྱུག་རྒྱ་མཚོའི་སྲས་ཆེ་བ་ངག་དབང་ཆོས་ཀྱི་རྒྱལ་པོ། དེའི་སྲས་བླ་མ་ངག་དབང་གྲགས་པ། དེའི་སྲས་བླ་མ་ཚེ་བརྟན་སོགས་འདི་དག་ཡིན་ནོ། མཆན། གདུང་རབས་དྲུག་པའི་ཐོག་ཏུ་བྱོན་པའི་དམ་པ་འདི་ཉིད། སྐུ་གཞོན་ནུའི་ཚེ་ཆུ་སྤྲུལ་དུ་འཁྲུངས་ནས་དགུང་ལོ་བཅུ་གཉིས་ལ། ས་ལུགས་ཀྱི་གྲྭ་ས་གཅིག་ཏུ་བྱོན་ནས། དབུ་མཛད་
སོགས་རྒྱུ་མཚན་ཉིད་ཀྱི་ཐོག་པའི་གནས་མཐའ་དག་ལ་མཁས་པར་མཛད། སླར་སྔོན་གྱི་སྨོན་ལམ་གྱིས་རྒྱུད་བསྐུལ་བས། དྭགས་པོ་རྩེ་ལེ་གསང་སྔགས་ཀྱི་ཕོ་བྲང་དུ་རིག་འཛིན་ཆེན་པོ་བསོད་ནམས་རྣམ་པར་རྒྱལ་བ་དང༌། དེ་སྲས་དཔལ་ཨོ་རྒྱན་བསྟན་འཛིན་ཞེས་བྱ་བ། གཡུ་སྒྲ་སྙིང་པོའི་སྐྱེ་བ་འགྲན་ཟླ་མེད་པའི་མཁས་གྲུབ་ཆེན་པོ་དེ་ཉིད་ཀྱི་དྲུང་དུ་དགུང་ལོ་བཅུ་བདུན་ལ། མཆན། བྱོན་ནས། ནོར་བཟང་དང་རྟག་ཏུ་ངུ་ལྟ་བུའི་དགེ་བའི་བཤེས་གཉེན་ལ་བསྐུར་བསྟིའི་བྱ་བ་ལ་ཉིན་མཚན་དུས་རྣམས་ཀུན་ཏུ་ངལ་བ་མེད་པར་མཛད་ཅིང་བླ་མ་མཉེས་པར་བྱས་ཏེ། བཀའ་མདོ་རྒྱུད་ལུང་མན་ངག་དཔག་ཏུ་མེད་པ་དང༌། ཁྱད་པར་གསང་སྔགས་སྔ་འགྱུར་གྱི་གདམས་པ་བཀའ་གཏེར་མཐའ་དག་ལ་སྒྲོ་འདོགས་ཆོད་པར་འགྱུར། དཔལ་ཨོ་རྒྱན་བསྟན་འཛིན་དེ་ཉིད་ལ་བུ་སློབ་དགེ་བའི་བཤེས་གཉེན་ཆེན་པོ་གྲངས་ལས་འདས་པ་ཡོད་ནའང༌། དམ་པ་འདི་ཉིད་ཁོ་ན་ལ་དགོངས་རྩི་གཏོད་པར་མཛད་ཅིང༌། ཁྱད་
པར་གསང་སྔགས་རྙིང་མ་ལ་དགེ་འདུན་གྱི་སྡེ་ཚོགས་དཀོན་པར་འདུག་པས། ཁྱེད་རྣམས་ཀྱི་མདོ་སྔགས་ཟུང་འབྲེལ་གྱི་སྒོ་ནས་སྔ་འགྱུར་གྱི་བསྟན་པ་ལ་ཕན་པ་ཞིག་གྱིས་ཅེས་བཀའ་སྩལ་ཞིང༌། སྨིན་གྲོལ་སྐྱེད་རྫོགས་གླིང་གི་ཆོས་སྡེ་གཙུགས་ནས་དེའི་དབུ་མཛད་དུ་བཀོས། སླར་ཡོངས་འཛིན་དམ་པ་ཨོ་རྒྱན་བསྟན་འཛིན་དེ་ཉིད་ཞིང་གཞན་དུ་གཤེགས་པའི་རྗེས་སུ་གྲྭ་ཚང་ཉིད་དུ་གང་ཡོད་རྣམས་ཀྱིས་༼དགུང་ལོ་ཉེར་བརྒྱད། མཆན།༽ཀོང་ཕྱོགས་སུ་ཕྱིན་ཏེ་དཔལ་རྣམ་ཐོས་ཀྱི་རི་བོར་རྗེ་ཐམས་ཅད་མཁྱེན་པ་གཙུག་ལག་འཕྲེང་བའི་སྒར་འདབས་སུ་ཡོད་སྐབས། གྲྭ་ཚང་གི་བླ་མ་མཁྱེན་རབ་རྣམ་རྒྱལ་ཞེས་པའི་བྱང་ཆུབ་སེམས་དཔའ་ཞིག་ཡོད་པ་སྐུ་མ་འཚོ་བའི་ཚེ། རྗེ་གཙུག་ལག་ཕྲེང་བས། དམ་པ་འདི་ཉིད་གྲྭ་ཚང་གི་བླ་མར་བཀོད་བར་མཛད་ཅིང༌། ལྟ་བ་ཡུལ་གྱི་རྒྱ་བདག་སོགས་ཡོན་བདག་ཏུ་སྦྱོར་བ་གནང་ནས། །ལུགས་གཉིས་ཀ་ནས་བཀའ་དྲིན་ཟླ་མེད་དུ་བསྐྱངས་བར་འགྱུར་
སླར་རིམ་གྱིས་དཔོན་བསམ་འཕེལ་དོན་འགྲུབ་སོགས་ཀྱིས་ཐང་འབྲོག་གི་དགོན་གཞིས་ཕུལ་བ་ལ་བརྟེན་ནས། སོ་གཅིག་པ་ལ། མཆན། བླ་བྲང་དང་ཤག་སྒོར་སོགས་བཟོས་ཤིང་གྲྭ་ཚང་གི་རྟེན་གཞི་ལེགས་པར་གྲུབ། དཔལ་ཨོ་རྒྱན་བསྟན་འཛིན་གྱི་སྐུ་སྐྱེ་བ་ཕྱི་མ་གདན་དྲངས་ནས་གྲྭ་ཚང་གཙུག་རྒྱན་དུ་མངའ་གསོལ་བས་ཕྲིན་ལས་ཀྱི་སྒོ་ཉི་མ་ཤར་བ་ལྟ་བུས་སྔ་འགྱུར་གྱི་བསྟན་པའི་སྒྲོན་མེ་གཅིག་པུ་པར་གྱུར། དེ་དག་གི་སྐབས་སུ་ཀོང་བཙུན་དེ་མོ་མནལ་ལམ་དུ་ཡང་ཡང་བྱུང་ནས་ཕྲིན་ལས་བསྒྲུབ་པར་ཁས་བླངས་བ་མང་དུ་བྱུང་རུང༌། རྨི་ལམ་འཁྲུལ་པའི་འཆར་སྒོ་ལ་སྙིང་པོ་མེད་པར་དགོངས་པས་ཇི་མི་སྙམ་པའི་ངང་དུ་བཞུགས་ཀྱང་གདོང་གྲོགས་བྱེད་པའི་རྟགས་མཚན་ནི་རྒྱུན་དུ་བྱུང༌། ལོང་ཞེ་བདུན་ལ། མཆན། པོ་བདེ་ཆེན་དགོན་དུའང་དགེ་འདུན་གྱི་སྡེ་དང༌། གནས་ལྔ་ལ། མཆན། ཆེན་ཆུ་བོ་གཡས་འཁྱིལ་དུ་སྙིང་པོའི་དོན་ལ་སྤྱོད་པའི་སྒྲུབ་གྲྭ་ཡང་རྒྱ་ཆེར་འཇུག་པར་མཛད། དེ་དག་གི་སྐབས་འགའ་ཞིག་ཏུ་
བདུད་རིགས་ཀྱི་སྐྱེ་བོ་མ་རུངས་པ་དག་གིས་སྔ་འགྱུར་སྙིང་པོའི་བསྟན་པ་ལ་ཕྲག་དོག་གིས་ཀུན་ནས་བླངས་པས་མི་འཚམས་པའི་སྤྱོད་པ་དུ་མའི་སྒོ་ནས་བར་ཆད་བརྩམས་ཀྱང༌། བྱམས་སྙིང་རྗེས་ཀུན་ནས་བླངས་ཏེ་རང་སར་ཞི་བར་མཛད། འགའ་ཞིག་ལ་ནི་དྲག་པོ་མངོན་སྤྱོད་ཀྱི་ཕྲིན་ལས་ཆོས་སྐྱོང་གནད་ནས་བསྐུལ་ཞིང་བྲན་ཏུ་བཀོལ་བས། ལོག་པར་འདྲེན་པ་རྣམས་ཚར་གཅོད་རྗེས་འཛིན་གྱི་བརྟུལ་ཞུགས་ཀྱིས་ཀྱང་འདུལ་བར་མཛད་པ་སྟེ། མདོར་ན་རྗེ་བརྩུན་མི་ཏྲ་ཛོ་གིས་རྡོ་རྗེ་གདན་དུ་གར་ལོག་གི་དམག་དཔུང་བཟློག་པའི་མཛད་པ་དང་རྗེས་སུ་མཐུན་པའི་སྒོ་ནས་འབྲེལ་ཚད་དོན་ལྡན་དུ་མཛད། སྣོད་ལྡན་གྱི་གདུལ་བྱ་རྣམས་ལ། སྨིན་བྱེད་ཀྱི་སྒྲུབ་དབང་དང་གྲོལ་བྱེད་ཀྱི་ཟབ་ཁྲིད་ལ་སོགས་པ་དང་རྒྱ་ཆེ་བའི་ཆོས་ཀྱི་འཁོར་ལོ་ནི་རྟག་པ་རྒྱུན་གྱི་འཁོར་ལོར་སྩལ་ཞིང༌། དེ་དག་གི་སྐབས་རྣམས་སུ་གུ་རུ་
མཚན་བརྒྱད་ལ་སོགས་པའི་ཡི་དམ་གྱི་ལྷ་ཚོགས་ཞལ་གཟིགས་པ་དང༌། མནལ་ལམ་དག་སྣང་ལ་རྔ་ཡབ་གླིང་དུ་བྱོན་ནས་ཟངས་མདོག་དཔལ་རིའི་པདྨ་འོད་ཀྱི་ཕོ་བྲང་ལ་བསྐོར་བ་མཛད་པ་སོགས་དག་པའི་གཟིགས་པ་ནི་མཐའ་ཡས། དུས་དང་རྣམ་པ་ཀུན་ཏུ་སྐུ་ལ་ཆོས་གོས་རྣམ་གསུམ་འབྲལ་མེད། གསུང་ཡི་དམ་གྱི་བཟླས་བརྗོད། ཐུགས་སྟོང་ཉིད་སྙིང་རྗེ་སོགས་མདོ་སྔགས་ཟུང་འཇུག་གི་ཉམས་བཞེས་དང་མཛད་བཟང་གི་སྤྱན་ལྟོས་ནི་གཞན་ལས་ཁྱད་པར་འཕགས་ཤིང་སྐུ་འཁོར་དུ་འཁོད་པ་ཐམས་ཅད་ཀྱང་སྡོམ་གསུམ་རྣམ་པར་དག་ཅིང་སྦྱངས་ཡོན་ཕུན་སུམ་ཚོགས་པའི་དགེ་སྦྱོང་ཤ་སྟག་ཏུ་འགྱུར་བའི་ཐུགས་རྗེ་དང་ལྡན་པ་སྟེ་སྐྱེས་བུ་དམ་པའི་མཚན་ཉིད་མཐའ་དག་དང་ལྡན། སྐུ་ཚེའི་སྨད་དུ་ཕལ་ཆེར་སྒྲུབ་པ་ལ་བཞུགས་ཤིང༌། ཞལ་ནས་ཀྱང་ཁོ་བོའི་བསམ་པ་ཐམས་ཅད་ཆོས་མཐུན་དུ་འགྲུབ་ཅིང༌། ད་ནི་ཚེ་ཡི་ཚད་ཀྱང་མཐར་ཕྱིན་པས། ལོ་ཆེན་རིན་ཆེན་བཟང་པོའི་སྐུ་ཚེའི་སྨད་ཀྱི་མཛད་པ་ལ་ཡིད་སྨོན་དུ་
བགྱིས་པ་ཡིན་ཞེས་ཀྱང་གསུངས་ཞིང༌། དགོངས་བཞེད་མཐའ་དག་འགྲུབ་ཅིང་དགུང་ལོ་དོན་གསུམ་གྱི་བར་དུ་མཛད་པ་མཐར་ཕྱིན་ཏེ། སྐུ་མྱ་ངན་ལས་འདའ་ཁར་དད་ལྡན་འགའ་ཞིག་ལ། ངའི་སྐྱེ་བ་ཕྱི་མ་ནི་ཡུལ་ཕྱོགས་ཐ་འཁོབ་བཀྲེས་ཤིག་ཏུ་སྐྱེ་བར་འདུག་གོ ཞེས་ཡང་ཡང་གསུངས་པ་ལ་བརྟེན། སྐུའི་སྐྱེ་བ་བདག་ཡིན་པར་གྲགས་པ་ལས། དམ་པ་དེ་དག་གི་ཡོན་ཏན་དང་མཛད་པ་ནི་སྐྲ་རྩེའི་ཁྱོན་ཙམ་ཡང་བདག་འདྲས་རྗེས་སུ་སྙེགས་པ་མ་མཆིས་སོ། །དམ་པ་དེ་ཉིད་ལ་ཨོ་རྒྱན་རིན་པོ་ཆེས་ལུང་བསྟན་པ་ཡང༌། ཐར་པ་གླིང་གི་གནས་ཡིག་ལས། །བཻ་རོ་ཙ་ནའི་སྤྲུལ་པ་སྙིང་སྟོབས་ཅན། །རྫོགས་ཆེན་ཨ་ཏི་རྟོགས་པའི་རྣལ་འབྱོར་པ། །ཉན་ཐོས་ཚུལ་གྱི་མཐུ་སྟོབས་ཅན། །སྦྲང་ཚང་ལྟ་བུའི་དགོན་གྲྭ་འདེབས། །ཡི་དམ་སྙིང་པོ་རྒྱ་རྩ་བཟླས། །རྟ་མགྲིན་གསུང་ཡང་ཐོས་པ་འབྱུང༌། ཞེས་གསུངས་པ་དང་རྗེས་སུ་མཐུན་པར། གྲྭ་
ཚང་དང་སྒྲུབ་སྡེ་སོགས་དར་རྒྱས་སུ་མཛད་ཅིང༌། བླ་མ་གསང་བ་འདུས་པའི་སྒྲུབ་པ་ཆེན་མོ་མཛད་པའི་སྐབས་སུ། དཔལ་རྟ་མགྲིན་གྱི་རྟ་མགོས་རྟ་སྐད་རབ་ཏུ་འཚེར་བ་གསན་ཚེ། ཉིད་ཀྱི་ཐུགས་དགོངས་ལ། རྟ་སྐད་འདིས་འཛམ་གླིང་སུམ་གཉིས་ཙམ་དུ་ཐོས་ཡོད་ལས་ཆེ་སྙམ་པ་བྱུང་གསུངས་པར་སྣང་ངོ༌། ཨེ་མ། རྒྱལ་བ་རྣམས་ཀྱི་ཐུགས་རྗེའི་དམ་བཅའ་ནི། །རི་རབ་རྡུལ་དུ་སིལ་ལའང་ངལ་བྲལ་ཞིང༌། །དམྱལ་མེར་ལན་བརྒྱར་ཞུགས་ལའང་མི་འཇིགས་པར། །འགྲོ་བ་སྒྲོལ་ལ་བརྩོན་མཛད་ལ་ལྟོས་ན། །འཁོར་བ་ད་དུང་མ་སྟོང་ཅི་ཞིག་གུ །དམ་པ་འདི་ལྟའི་རྣམ་པར་ཐར་པ་ནི། །བསགས་སྦྱངས་འབད་པས་འབྲས་བུ་ལེགས་སྨིན་ཀྱང༌། །རྒྱ་མཚོ་ཆུ་ཡི་ངོམས་པ་མེད་པ་བཞིན། །བླང་དོར་གནས་ལ་རྩེ་གཅིག་མཛད་པ་དེས། །བཀོད་པ་དུ་མས་བརྒྱན་པའི་ཞིང་དག་ཏུ། །འཕོ་དང་ལྷུམས་ཞུགས་བལྟམས་ཤིང་རོལ་རྩེད་དང༌། །མངོན་བྱུང་བྱང་ཆུབ་སྙིང་པོར་བདུད་སྡེ་གཞོམ།
།སངས་རྒྱས་ཆོས་འཁོར་བསྐོར་བ་ལས་གཞན་པའི། །ཉོན་མོངས་མངལ་སྒོ་འགྲིམ་ཞིང་ཅི་ཕྱིར་བཞུགས། །འོན་ཏེ་འགྲོ་ཕན་སླད་དུ་སྐྱེ་བཞེས་ཀྱང༌། །འདོད་དགུར་བསྒྱུར་བའི་རྣམ་རོལ་ཅན་དག་ལས། །རང་གཞན་དོན་གཉིས་སྤྱོད་ལ་རྨོངས་པ་ཡི། །ཉམ་ཆུང་བདག་འདྲར་འགྱུར་བ་ཅང་སྲིད་དམ། །སྙིགས་མའི་ཡང་སྙིང་རྩོད་ལྡན་མཐར་ཐུག་ཅིང༌། །བསྟན་པའི་ཉི་མ་ནུབ་རིར་གཞོལ་དུས་འདིར། །ཐབས་མཁས་ཐུགས་རྗེ་ལྡན་པའི་སྐྱེས་བུའི་མཆོག །བྱམས་པའི་གོ་བགོས་སྙིང་རྗེའི་མཚོན་འཐོགས་ཤིང༌། །བརྩོན་འགྲུས་རྟ་ཞོན་སྨོན་འཇུག་རུ་དར་འཕྱར། །ཐོས་བསམ་སྒོམ་པའི་དཔུང་ཚོགས་མཐུ་ལྡན་གྱིས། །འཁོར་བའི་གཡུལ་ངོ་བཟློག་བྱེད་མ་གཏོགས་པའི། །བླ་མའི་གོ་ས་འཛིན་རྣམས་སྙིང་རྗེའི་གནས། །ལྟར་སྣང་མཛེས་པའི་འདུན་མ་བསྒྲུབ་བསྒྲུབ་ནས། །ཡང་དག་དོན་གྱི་འདུན་མ་སྟོར་ཉེན་
གདའ། །བདག་ཀྱང་ཆོས་ཀྱི་སྐལ་བ་དམན་པའི་མཐུས། །སྐུ་སྐྱེར་མིང་དུ་ཐོགས་པ་འདི་ཡིས་བསླུས། །བསླབ་སྦྱངས་ཡོན་ཏན་ནོར་རྫས་འཚོལ་ཕྱིར་ཙམ། །བྱ་བའི་ལས་ཀུན་བླུན་པོ་མགུ་བྱེད་ཉིད། །བཤད་པའི་ཆོས་ཀྱང་གེ་སར་སྒྲུངས་གཏམ་འདྲ། །འདི་འདྲའི་བླ་མས་རང་གཞན་སྨིན་འགྱུར་རམ། །ངེས་འབྱུང་བསམ་པ་འདུ་འཛིའི་གྲོག་གིས་བཅིངས། །དགེ་བློའི་མར་མེ་རྣམ་གཡེང་རླུང་གིས་བསྐྱོད། །ཟབ་མོའི་གདམས་པ་ཡིག་ཐོག་དཔེ་ལ་ལུས། །བྱེད་ལོའི་ཆོས་ཀྱི་མི་ཚེ་བུད་དེ་མཆིས། །ད་ནས་ཚེ་རབས་གར་སྐྱེ་ཀུན་ཏུ་ཡང༌། །རྙེད་འཚོལ་སྐྱེ་བོ་མགུ་བྱེད་སྐུ་སྐྱེས་དང༌། །ཀུན་ཕུང་ཚུལ་ཆོས་སྤྱོད་པའི་བླ་མ་དང༌། །རང་འདོད་ཆོས་བརྒྱད་མཁན་གྱི་བཤེས་གཉེན་སོགས། །བསྟན་པའི་ཞབས་འདྲེན་རྣམས་སུ་མ་གྱུར་ཅིག མི་མེད་ལུང་སྟོང་རྒྱལ་བས་བསྔགས་པའི་གནས། །འདུ་འཛི་ཆགས་སྡང་བྲལ་བའི་བསྟི་གནས་སུ། །ཚེ་འདི་བློས་
ཐོངས་སྒྲུབ་པ་མཐར་ཕྱིན་ནས། །རང་གཞན་དོན་གཉིས་ཡང་དག་འགྲུབ་པར་ཤོག ཚེ་རབས་སྔ་མའི་ཚུལ་ལས་འཕྲོས་པའི་ལེའུ་སྟེ་དང་པོའོ། །ད་ནི་སྐྱེ་བ་འདི་ཡི་བྱེད་སྤྱོད་ཀྱི་ཚུལ་བརྗོད་པ་ལ། ཡ་མཚན་ཞིང་ངོ་མཚར་བའི་རྣམ་ཐར་ནི་བདག་ལ་མ་མཆིས། ཐ་མལ་གྱི་སྤྱོད་པ་ཅི་བྱེད་ཐམས་ཅད་ཡི་གེར་བྲིས་ན་ནི། ས་གཞི་ལ་ཤོག་གུ་བྱས་ཤིང་ཕྱིའི་རྒྱ་མཚོ་ལ་སྣག་ཚ་བྱས་ཏེ་བྲིས་ཀྱང་མི་ལངས་ཤིང་ངལ་བའི་རྒྱུར་ཟད་མདོ་ཀྱང༌། བསྐུལ་བ་པོ་ཡི་ངོ་མི་བཟློག་ཕྱིར་རང་ཚུལ་ཅུང་ཟད་བརྗོད་པར་བྱ་སྟེ། དེ་ཡང་བདག་སྐྱེ་བའི་ཡུལ་ནི། གུ་རུའི་སྦས་ཡུལ་དྭགས་པོ་ལུང་པའི་མཇུག ཀོང་ཡུལ་ཤིང་ལོའི་ཚལ་གྱི་འགོ མཁའ་སྤྱོད་དཔལ་གྱི་རྩྭ་རིའི་བྱང་ཕྱོགས། ཆུ་བོ་གསེར་ལྡན་རྦ་ཀློང་འཁྲུག་པའི་འགྲམ། སློབ་དཔོན་པདྨས་བྱིན་གྱིས་བརླབས་ཤིང༌། བླ་མ་དགོངས་པ་འདུས་པའི་རྩ་
བའི་རྒྱུད་དྲུག་གཏེར་དུ་སྦས་པའི་སར་ཡིན་ཏེ། དེ་ཡང་དགོངས་འདུས་ཀྱི་ལོ་རྒྱུས་ཤེལ་འཕྲེང་ལས། འདི་དག་ནི་རྒྱ་རིམ་པ་བདུན་གྱིས་བཏབ་ནས། སྦས་པའི་ཡུལ་ཆུང་ངམ་དང་དུལ་ཞེས་བྱ་བའི་ལུང་པར། ཤར་ཕྱོགས་སུ་རི་ཁ་ཊྭཱོཾ་གདེངས་པ་ལྟ་བུ། ལྷོ་ཕྱོགས་ནི་སྲིན་པོ་ཁྲོས་པ་འདྲ་བ། ནུབ་ཕྱོགས་ནི་སོག་པོ་ཁྲོས་པ་འདྲ་བ། བྱང་ཕྱོགས་སུ་ཆུ་དར་དཀར་འཕྱར་བ་འདྲ་བའི་ལུང་པར། ནེལ་མའི་ལྗོངས་ཧ་ཅང་མི་ཆེ་བའི་དཀྱིལ་དུ། བྲག་གུ་རྟ་ཐོད་བཞག་པ་འདྲ་བའི་སྣ་ལ་སྦས་ཞིང་རྒྱས་བཏབ་སྟེ། ཞེས་སོགས་གསུངས་པའི་གཏེར་གནས་དེ་ཉིད་དང་ཉེ་བ་དུལ་ཞེས་བྱ་བའི་ཡུལ་དུ། ཨོ་རྒྱན་རིན་པོ་ཆེའི་སྒྲུབ་གནས་ཀྱི་མདུན་དུ། རྒྱལ་མེ་ཏོག་ཐང་ནས་ཆད་པའི་མི་རྒྱུད་ལས་བྱུང་བའི་ཕ་སྐྱབས་པ་དང་མ་རྟ་མགྲིན་བུ་ཁྲིད་གཉིས་ཀྱི་བུ་གཅིག་པུར་བདག་སྐྱེས་པ་ལགས་ཏེ། དེ་ཡང་རིག་འཛིན་ཆེན་པོ་འཇའ་ཚོན་སྙིང་པོས་གསུངས་ནས་
བདག་གི་ཕ་འདི་སྐྱེ་བ་སྔ་མ་ལྷའི་གནས་འཕོས་པ་ཡིན་ཞིང༌། མ་ནི་སྔོན་སྨན་མོའི་རིགས་ཞིག་ཏུ་སྐྱེས་པ་ཡིན་འདུག་ཅེས་གསུང་བ་ཐོས་ཤིང༌། ཕ་མ་གཉིས་ཀའང་རང་བཞིན་གྱིས་རྒྱུད་དྲང་ཞིང་དགེ་ལ་དགའ་བའི་རིགས་ཅན་དུ་གྱུར། དེ་ལ་བདག་ཐོག་མར་མའི་ཁོང་དུ་ཞུགས་དུས་མའི་རྨི་ལམ་ན། བླ་མ་བགྲེས་པོ་དབུ་སྐྲ་དཀར་པོ་ཅན། སྐུ་ལ་ཆོས་གོས་དམར་པོ་གསོལ་བ་ཆིབས་པ་དང་བཅས་པ་ཞིག་རང་གི་ཁྱིམ་དུ་བྱོན་པ་ཡང་ཡང་རྨིས་པ་ཕ་ལ་བཤད་པས། དེ་འདྲ་རྒྱལ་པོའི་ཆོ་འཕྲུལ་ལས་འོས་ཅི་ཡོད་ཟེར་ཀྱང༌། ཕྱིས་ཁྱེད་ལ་བལྟ་བར་འདུག་ཟེར། ཡང་བདག་ཉིད་ཁོང་དུ་ཡོད་པའི་དུས་ཞིག་དུ། མའི་རྨི་ལམ་དུ་ནམ་མཁའ་ནས་ཉི་མ་གསུམ་དུས་གཅིག་ཏུ་ཤར་བའི་གཡས་གཡོན་གཉིས་ཅུང་ཟད་འོད་ཆུང་ཞིང༌། དབུས་མ་དེ་འོད་རབ་ཏུ་འབར་བ་འཇའ་སྐོར་རིམ་པ་མང་
པོས་བསྐོར་བ་ཤར་བ་དང༌། ཡང་ལན་གཅིག་ཤིང་ཆེན་པོ་སྔར་མཐོང་མ་མྱོང་བ་གུང་ལ་རེག་པ་ཞིག་ལ་དར་ཅོག་དཔག་ཏུ་མེད་པ་གཙུགས་པ་གཅིག་གི་རྩ་བར་བསྡད་ནས། །ཤིང་སྡོང་འདི་ལས་ཆེ་བ་ལྷོ་ཛམ་བུ་གླིང་ན་མེད་བྱས་པ་རྨིས་ཟེར་བ་སོགས་རྨི་ལམ་མང་པོ་ཕྱིས་བདག་ལ་བཤད་བྱུང་རུང་གཏད་པ་མི་ཡོང་བསམ་ནས་བདག་གི་ཡིད་ལ་མ་བཞག དེ་ནས་ས་ཕོ་སྤྲེའུའི་ལོ། དུས་འཁོར་ལུགས་ཀྱི་སྟོན་ཐ་འབྲིང་པོའི་ཚེས་བཅུའི་ཉི་མ་རྩེ་ཤར་ལ་བདག་བཙས་པར་གདའ་ཞིང༌། བདག་གི་གོང་དུ་བྱིས་པ་གཅིག་གཉིས་མ་སོས་པའི་རྐྱེན་གྱིས་བདག་ཀྱང་འབྲུག་ལུགས་ཀྱི་གྲུབ་ཆེན་པ་ཤེས་རབ་དཔལ་བཟང་ཟེར་བ་ཞིག་གི་དྲུང་དུ་སྲོག་བཅོལ་གྱི་རྣམ་པ་བྱས་ཤིང་མིང་ཡང་ཤེས་རབ་ཏུ་བཏགས། བཤད་མི་ཤེས་པའི་དུས་ནས་གར་འདུག་ལྟ་སྟངས་ཀྱི་རྣམ་པ་བྱས་ནས་སྡོད་ཅིང༌། ཟས་ཟ་བའི་ཚེ་ཡང་ཅོག་རྩེའི་རྣམ་པ་ཤིང་
ལེབ་ལྟ་བུ་གཅིག་མདུན་དུ་མ་བཞགས་པ་ལ་ཟས་མི་ཟ་བ་བྱེད་འདུག་ཟེར། དེ་ནས་རིམ་གྱིས་བཤད་ཤེས་འཕྲལ་ནས་གཙང་པོ་མགོ་དགུར་འགྲོ་དགོས་ཡོད། དེར་ངའི་རྡོར་ དྲིལ་ལ་སོགས་ཆས་མང་པོ་ཡོད་ཅིང༌། རྟ་དམར་པོ་གདོང་ལ་མར་གྱིས་བྱུགས་པ་ལྟ་བུ 
་གཅིག་ཀྱང་ཡོད་ཟེར་བ། ཆིབས་ནོར་བུ་རླུང་གཤོག་ལ་ཟེར་བ་ཡིན་པར་འདུག་ཅེས་ཕྱིས་གྲྭ་པ་རྣམས་ཀྱིས་གླེང་བ་མཐོང༌། ཆུང་ངུའི་དུས་ནས་ཟས་སྔོ་ངད་དང་དཀར་གྱི་རིགས་མ་གཏོགས་པ་ཤ་དམར་པོ་སོགས་མཐོང་ན་སྐྱུག་བྲོ་ཞེས་ཟེར་ཞིང་འབྲོས་པར་བྱེད། སྐབས་སུ་ཉིན་གུང་ཙམ་གྱི་ཚེ་ཕ་མ་ཡོད་སར་ལག་གཉིས་གདོང་ལ་དལ་བུས་འཕུར་ཞིང་སྙུག་བུད་པའི་ཚུལ་གྱིས། ཨེ་མ། གཙང་པོ་མགོ་དགུར་ཡིན་ན་ཉི་མ་ད་ཚོད་ཙམ་ལ་ཇ་འཐུང་རྒྱུ་ཡོད་པ་ཡིན་ཏེ་འདིར་མི་འདུག ཅེས་ཟེར་ཏེ། ཕ་མས་ནི་གཙང་པོ་མགོ་
དགུ་ཞེས་པ་གར་ཡོད་ཀྱང་མ་ཤེས་ཤིང་ཆ་མ་འཚལ། ཉིན་པར་ཐམས་ཅད་དུ་མི་མེད་པའི་སར་ཕྱིན་ནས་ལུས་ལྟ་སྟངས་དང་ལག་པ་མཉམ་བཞག་བྱས་ནས་སྡོད་པ་ལ་བརྟེན་ནས། མི་ཀུན་གྱི་འདི་སྒོམ་ཆེན་པ་བཟང་པོ་གཅིག་གི་སྐྱེ་བ་ཡིན་པ་འདྲ་ཞེས་གླེང༌། ཕ་མ་སོགས་ཞིང་ལས་ལ་འགྲོ་དུས་ལྷན་ཅིག་འཁྲིད་ཚེ། ང་ཞིང་ལ་མི་འགྲོ། འབུ་མང་པོ་གསད་ཡོང་ཟེར་ནས་འགོལ་བའི་སར་གཅིག་པུར་འདུག་པར་བྱེད། སྐབས་སུ་བྲག་གི་སྟེང་དུ་འདུག་ནས་བྱིས་པ་ཟླ་བོ་རྣམས་ལ་ཆོས་བཤད་པའི་ཚུལ་དང་དབང་བསྐུར་བའི་རྣམ་འགྱུར་ཁོ་ན་བྱེད་ཅིང༌། རོགས་གཞན་མེད་ཙ་ན་རྡོ་མང་པོ་སྒྲིགས་ནས་དབང་བསྐུར་བའི་ཚུལ་བྱེད། རྟག་ཏུ་འཁར་བ་ཞིག་འཐོགས་ཤིང་ན་སོ་རྒན་པོ་ཡིན་པའི་བག་ཆགས་ཤ་སྟག་དང༌། དགོན་པའི་དབྱིབས་དང་གྲྭ་པའི་མིག་སོགས། ང་ལ་གྲྭ་པ་དམ་ཆོས་གསུམ་ཡོད་དེ། དམ་ཆོས་དཔལ་བཟང༌། དམ་ཆོས་ཕུན་ཚོགས། དམ་ཆོས་བཤེས་གཉེན་དང་གསུམ། དཀོན་མཆོག་གསུམ་ཡོད་དེ། དཀོན་མཆོག་
རྡོ་རྗེ། དཀོན་མཆོག་བསྟན་འཛིན། དཀོན་མཆོག་བསྟན་འཕེལ་དང་གསུམ་ཡིན་ནོ། མཆན། བརྗོད་པ་ལ་ཕ་མས་བཀག་ཅིང་ཚེ་ལ་བར་ཆད་ཡོང་གི་དོགས་པའི་སེམས་འཕྲལ་གྱིས་གཞན་ལ་གསང༌། བན་དེ་མཐོང་ཚད་ལ་ང་བསུ་མཁན་ཡིན་ལས་ཆེ་ཟེར་ཞིང་རྒྱུགས། བདག་སྐྱེས་ནས་ལོ་ལྔ་ལོན་ཚེ་སྲིང་མོ་གཅིག་སྐྱེས་པ་དེ་ཉིད་ལོ་བཞི་ལོན་ནས་ཤི་བའི་རོ་ལ་འཇའི་གུར་ཁང་ཕུབ་པར་གྱུར། བདག་ནི་དུས་རྟག་ཏུ་དམ་པའི་ཆོས་ཁོ་ན་ལ་འགྲོ་རེངས་ཤིང༌། ཡུལ་མི་རྣམས་ཀྱིས་ཀྱང་ཕ་མ་ལ། བྱིས་པ་འདིས་ཁྱོད་གཉིས་ཀྱི་བུ་བྱེད་པ་མི་འདུག ཁོ་རང་ཆོས་ལ་མ་བཏང་ན་ཚེའི་བར་ཆད་ཡོང་ཉེན་ཡོད་པས་བཏང་བ་དྲག །ཅེས་ཟེར་ནའང་ཕ་མ་ནི། བུ་གཞན་མེད་པའི་སྟབས་ཀྱིས་སེམས་ལ་མ་རངས། དེ་ནས་བདག་ལོ་ལྔ་པའི་ཚེ། གྲྭ་ཚང་ནས་ཀྱང་མཚུངས་མེད་དེ་ཉིད་ཀྱི་ཕྱག་འཕྲེང་ལ་སོགས་པའི་སྐུ་ཆས་ཁྱེར་ནས་བརྟག་
དཔྱད་བྱེད་པར་སླེབས་ཚེ། ཆས་རྣམས་ལ་ངོས་འཛིན་གསལ་པོར་བྱུང་ཟེར་ཏེ་ཕྱིས་བདག་གིས་ནི་མ་དྲན། ཉིན་མཚན་མེད་པར་དགོན་པ་ཁོ་ན་ཡིད་ལ་བཅགས་ཤིང༌། ཁྱིམ་ཚང་ལ་བཙོན་ར་ལྟ་བུའི་འདུ་ཤེས་བྱུང་རུང་དབང་ནི་མེད། ཁོང་རྣམས་ཀྱི་འབོད་མཁན་ནི་རིམ་པ་བཞིན་སླེབས་ཀྱང་ཕ་མས་ནི་མ་བཏང༌། ལན་གཅིག་ཁོང་རྣམས་གྲོས་བྱེད་པར་ཉན་པས་ཆོས་ལ་མི་གཏོང་བར་གོ་ནས། བདག་བྲོས་ནས་ཕྱིན་ཏེ་ལུང་པའི་མདའ་ན་ཟམ་པ་ཡོད་སར་སླེབ་ཚེ། རང་གི་མེས་པོ་རྒན་པོ་རྗེས་སུ་སླེབས་ནས་བདག་པང་པས་བཏབ་ནས་ཁྱེར་ཏེ་ཡར་ལོག་པར་བརྩམས་ཚེ། བདག་གི་བསམ་པར་འོ་ན་ཅིས་ཀྱང་མི་གཏོང་ན་ཆུ་འདི་ལ་ཤི་ན་རུང་སྙམ་སྟེ་ལུས་སྟོབས་ཅི་ཡོད་ཀྱི་ཕྲ་ཤག་བྱས་ཏེ་ཟམ་ཁ་ནས་ལྷུང་བར་འདོད་ཀྱང་ཤེད་ཀྱིས་མ་འཁྱོངས་པར་ཨ་མེས་ཡར་ཁྱེར། ཁྱིམ་དུ་སླེབས་ནས་ཉིན་མཚན་མེད་པར་ངུ་ཞིང་ཟས་སྐོམ་ཡང་མི་འདོད་པར་ཕ་
མ་ལ་ཁྲོས་ཏེ་བསྡད་པས། དེ་ནས་ཕ་མས་ཀྱང་ད་འདི་མ་བཏང་ན་ལར་ནས་ཡོང་བ་མི་འདུག་པས་ཆོས་ལ་གཏོང་དགོས་ཅེས་གླེང་བ་བྱུང་ངོ༌། ཀྱེ་མ་མི་ལུས་རིན་ཆེན་ཐོབ་དུས་འདིར། །འཁོར་བའི་འདམ་ནས་ཐར་པའི་དཀའ་ལས་ལ། །ཆོས་ལས་ལོག་ནས་ཁྱིམ་ཐབས་བྱེད་པ་རྣམས། །ཁོང་སྙིང་རྣག་ཏུ་རུལ་ལམ་གདོན་གྱིས་བརློམ། །དལ་འབྱོར་ཐོབ་པ་བརྒྱ་ལ་རེ་འགའ་ཙམ། །འཁོར་འདས་སོ་མཚམས་ད་རེས་བྱེད་དུས་འདིར། །གྲུ་ལས་འཐོན་ནས་ཆུ་ལ་སླར་འཆོང་ལྟར། །རང་ཕུང་རང་གིས་བསྒྲུབ་ཀུན་ཅི་ཞིག་བསམ། །རང་དབང་ཡོད་དུས་དམ་ཆོས་བསྒྲུབ་བྱས་ནས། །འཆི་ཁར་འགྱོད་མེད་གྲབས་གཤོམ་མི་བྱེད་པར། །མི་ཚེ་དོན་མེད་སྟོང་ཟད་བཏང་བཏང་སྟེ། །ནམ་ཞིག་འགྱོད་ཀྱང་མི་ཕན་གྲོས་ཉེས་སོ། །ཚེ་འདི་རིང་ཀྱང་ལོ་བརྒྱར་བསྡོད་མཁན་དཀོན། །དེ་ཡི་བར་དུ་ཚེ་ཕྱེད་གཉིད་
ཀྱིས་འདས། །དེ་ལྷག་རྣམས་ཀྱང་ཕལ་ཆེར་རྣམ་གཡེང་ངང༌། །དོན་དུ་འགྱུར་ངེས་ཅི་ཞིག་འདུག་གམ་བསོམས། དེ་ནས་བདག་རང་ལོ་དྲུག་པའི་ཐོག་ཏུ། དྭགས་པོ་སྐྱེ་ཞེས་བྱ་བར་སྨིན་གྲོལ་སྐྱེད་རྫོགས་གླིང་ནས་དཔོན་སློབ་རྣམས་ཡིག་དྲུག་དུང་ཕྱུར་འདྲེན་པར་བྱོན་པའི་དྲུང་དུ་ཕྱིན་ཏེ། པཎ་ཆེན་དཱ་ན་ཤི་ལ་ཉིད་འགྲོ་བའི་དོན་དུ་བསམ་བཞིན་སྲིད་པ་བཞེས་པའི་ཆོས་ཀྱི་རྗེ་མཆོག་གྲུབ་རྣམ་པར་རྒྱལ་བའི་དྲུང་ལ་སྐྲ་གཅོད་པར་ཞུས་ཚེ། ཁྱོད་ཀྱི་སྐྲ་གཅོད་པའི་བླ་མ་ངས་མི་ཡོང་བས། རྒྱལ་བ་ཡབ་སྲས་གཅིག་གི་དྲུང་སྐྲ་ཕུད་འབུལ་དུ་འཇུག་པ་ཡིན་གསུངས་ཤིང༌། རིམ་གྱིས་ཀོང་པོའི་ཕྱོགས་སུ་ཕྱིན་ནས་གཙང་པོ་མགོ་དགུར་ཐོག་མར་སླེབ་དུས། ཁོང་རྣམས་ཀྱི་རོལ་མོ་ལ་སོགས་པའི་བསུ་བ་དང་བཅས་པའི་དགོན་པའི་དགོན་པ་མཐོང་བ་ཙམ་གྱིས་རྨི་ལམ་མངོན་སུམ་ཡིན་སྙམ་པའི་དགའ་སྤྲོ་ཚད་མེད་པ་བྱུང༌།
གཟིམ་ཁང་དུ་སླེབས་འཕྲལ། སྔོན་མཚུངས་མེད་དེ་ཉིད་ཀྱི་གསོལ་དཀར་སྔོ་ཁྲ་མ་ཞིག་ཡོད་པ་དེ་ཅུང་ཟད་ཆག་ནས་མཆོད་བཤམས་ཀྱི་འོག་ཏུ་ཁ་སྦུབ་ཏེ་བཞག་འདུག་པ་མཐོང་ཚེ། ཁྱོད་ཚོས་ང་ཡི་དཀར་ཡོལ་བཅག་འདུག་བྱས་ནས་ངུས་པས། ཁོང་གཞན་རྣམས་ནི་མིག་རིག་རིག་པོར་འདུག་ཅིང༌། སློབ་དཔོན་དམ་ཆོས་དཔལ་བཟང་ནི་མཆི་མ་འབྱིན་ཞིང་གདའ་བ་ད་ལྟ་ཡང་དྲན། སླར་རིམ་པས་ཐང་འབྲོག་གཞིས་ཁ་སོགས་སུ་སླེབས་ནས་ཡོད་སྐབས། སྐྱབས་གནས་དམ་པ་དཔལ་གཙུག་ལག་རྒྱ་མཚོ་དགའ་བའི་དབྱངས་ཀྱི་ཞལ་སྔ་ནས་ཀོང་ཕྱོགས་སུ་འགྲོ་དོན་ལ་བྱོན་ནས། ཐང་འབྲོག་ཏུ་ཕེབས་ཚེ་སྐྲ་ཕུད་ཕུལ་ཞིང༌། ཀརྨ་རིག་འཛིན་རྣམ་པར་རྒྱལ་བ་ཞེས་པའི་མིང་གནང་ནས། སྐྱབས་གསུམ་འཛིན་པའི་དགེ་བསྙེན་གྱི་བསླབ་པ་ལེགས་པར་སྩལ། གྲུབ་རྒྱལ་མ་ནས་བརྒྱུད་
པའི་ཚེ་དབང་དང༌། སྒྲོལ་དཀར་ཡིན་བཞིན་འཁོར་ལོའི་རྗེས་གནང་དང༌། རྗེ་བཙུན་མེ་ཏྲིའི་སྙིང་པོ་དོན་གསུམ་ལ་སོགས་པའི་ཟབ་ཆོས་མང་དུ་གནང༌། དེའི་སྐབས་ཤིག་གི་རྨི་ལམ་དུ། བདག་གཅིག་པུ་ས་ཕྱོགས་གཅིག་ནས་ཕར་ཕྱིན་ཚེ། མི་ནག་པོ་ཕག་གི་མགོ་ཅན་འཇིགས་སུ་རུང་བ་གཅིག་གི་ལག་ན་ལྕགས་གཟེར་མཐོ་གང་ཙམ་པ་མང་པོ་ཁྱེར་ནས་བྱུང་བ་ལ། བདག་གི་ཁྱེད་སུ་ཡིན། ལྕགས་གཟེར་དེ་རྣམས་ཀྱི་ཅི་བྱེད་དྲིས་པས། དེ་ན་རེ། བདག་ནི་གཤིན་རྗེ་ཆོས་ཀྱི་རྒྱལ་པོའི་ལས་མཁན་རཀྵ་ཕག་མགོ་ཡིན། ལྕགས་གཟེར་འདི་རྣམས་ནི་འཇིག་རྟེན་གྱི་ཁམས་ན་ཤ་ཟ་མཁན་གྱི་ལུས་ལ་བཏབ་རྒྱུ་ཡིན་ཟེར་བས། བདག་གི་བསམ་པ་ལ། འོ་ན་བདག་ཀྱང་ཤ་ཟོས་པ་ཡིན་པས་བཏབ་ལས་ཆེ། སེམས་ཅན་གྱི་ཤ་ཟོས་པ་ལ་ཉེས་དམིགས་འདི་ལྟ་བུ་ཡོད་པར་འདུག ད་ནི་བདག་ཐབས་གཞན་མེད་པས་གུ་རུ་པདྨ་འབྱུང་གནས་ལ་སྐྱབས་ཞུ་
བ་དྲག་སྙམ་སྟེ་མིག་བཙུམ་སྟེ་རྩེ་གཅིག་ཏུ་གསོལ་བ་བཏབ་ནས་ཡུན་ཅིག་སོང་བ་དང་མིག་ཕྱིས་ནས་བལྟས་པས། སྔར་གྱི་མི་ནག་པོ་དེ་མེད་པར་བདག་གི་མདུན་གྱི་ནམ་མཁར་མེ་ཏོག་པདྨ་དམར་པོའི་གདན་གྱི་སྟེང་དུ། གུ་རུ་པདྨ་ཡིན་བསམ་པའི་བླ་མ་གཟི་མདངས་དང་ལྡན་པ་ཞལ་འཛུམ་བག་ཅན། སྐུ་ལ་ན་བཟའ་ཐམས་ཅད་དམར་པོ་ཁོ་ན་གསོལ་ཞིང་དབུ་ལ་པཎ་ཞུ་ཅན་ཞིག་ཕྱག་ན་ཤེལ་ལས་གྲུབ་པའི་ཉིད་ཀྱི་སྐུ་ཚབ་ཤིག་བསྣམས་འདུག་པ་དེ་དག་གི་སྤྱི་བོར་བཞག་ཅིང་སྨོན་ལམ་མང་པོ་གསུངས་པའི་འཇུག་ཏུ་སེམས་ཅན་གྱི་དོན་རྒྱ་ཆེན་པོ་འབྱུང་བར་གྱུར་ཅིག་ཅེས་གསུང་གྲགས་པའི་འཕྲོ་ལ་གཉིད་སད་ནས། ལུས་ཐམས་ཅད་རྔུལ་ཞུམ་མེ་བར་འདུག་ཅིང་སེམས་སྤྲོ་བའི་རྣམ་པ་ཞག་མང་པོའི་བར་དུ་བྱུང་ངོ༌། དེ་ནས་ཆོས་ཀྱི་རྗེ་མཆོག་གྲུབ་པས་བདག་གི་སློབ་དཔོན་དུ་དགེ་སློང་དགེ་འདུན་དཔལ་བཟང་འཇོག་པར་གནང་བ་
ལས། དེ་ཉིད་ཀྱིས་བདག་ལ་ཐུགས་ཧ་ཅང་བརྩེ་དྲག་པའི་རྣམ་པས། བདག་གི་སློབ་གཉེར་གྱི་འཕར་སྒོ་ཞིག་མ་བྱུང་བར། སླར་སློབ་དཔོན་རིན་པོ་ཆེ་དམ་ཆོས་ཕུན་ཚོགས་ཀྱི་དྲུང་དུ་བསྡད་ཅིང༌། ཀློག་པ་ནས་ཉེ་བར་བཟུང་སྟེ་སྐུ་དྲིན་ཤིན་ཏུ་ཆེ་བར་བྱུང༌། རང་ལོ་བརྒྱད་ནས་བཅུ་གཅིག་གི་བར་དུ་རྗེ་བཙུན་དམ་པ་བསོད་ནམས་དབང་པོའི་དྲུང་དུ་བསྡད། ཟབ་ཆོས་ཞི་ཁྲོ་དགོངས་པ་རང་གྲོལ། རྡོ་རྗེ་སེམས་དཔའ་སྙིང་གི་ཐིག་ལེ། གཞན་ཡང་སྙིང་ཐིག་གི་སྐོར་བཞི། བླ་མ་དགོངས་པ་འདུས་པའི་ཕྱག་གཅོད་གཉིས། ཀུན་མཁྱེན་ཀློང་ཆེན་པའི་བསྟན་བཅོས་མཛོད་བདུན་གྱི་སྐོར་ཁ་ཡར་དང་གྲུབ་ཐོབ་ཚེམ་བུ་པ་ནས་བརྒྱུད་པའི་ཐུགས་རྗེ་ཆེན་པོའི་དམར་ཁྲིད་སོགས་ཆོས་བཀའ་མང་པོ་ཞིག་གི་དབང་ལུང་ཁྲིད་སོགས་མཐའ་དེ་དག་སྒོ་ནས་རྗེས་སུ་བཟུང་སྟེ། མདོར་ན་རང་རིག་ཆོས་སྐུར་ངོ་སྤྲོད་པའི་བླ་མ་ནི་དམ་པ་འདི་ཉིད་ཁོ་ན་ཡིན་ཞིང་སྐུ་དྲིན་དཔག་ཏུ་མེད་དོ། གཞན་ཡང་ཆོས་
ཀྱི་རྗེ་མཆོག་གྲུབ་རྣམ་རྒྱལ་གྱི་དྲུང་དུ། རྫོགས་ཆེན་གྱི་རྒྱུད་བཅུ་བདུན་དང༌། དགོངས་འདུས་ཀྱི་དོན་དབང་ལ་སོགས་པའི་དབང་རྗེས་གནང་མང་རབ་ཞིག་ཐོབ། རང་ལོ་བཅུ་གཅིག་པའི་ཚེ། སྤོ་བོ་ཡེ་གོང་གི་ཕྱོགས་སུ་ཕྱིན་ནས། གུ་རུ་ཨོ་རྒྱན་བསྟན་འཛིན་པའི་དྲུང་དུ་དགོངས་འདུས་ཁ་ཐོར་དང༌། ཐུགས་རྗེ་ཆེན་པོ་ཡང་སྙིང་འདུས་པ་ལ་སོགས་ཆོས་བཀའ་འགའ་ཞིག་ཞུས། གཞན་ཡང་ལྷ་ལྕམ་པདྨ་གསལ་གྱི་སྐྱེ་མཐའ་གཏེར་སྟོན་རིག་འཛིན་སྩལ་དང་མཇལ་ཚེ། ཐུན་མོང་མ་ཡིན་པའི་གུས་པ་ཐོབ་ཅིང༌། དེ་ཉིད་ཀྱིས་ཀྱང་བདག་སྐུ་པང་དུ་བླངས་ནས་མགོ་ལ་ཕྱག་གིས་བྱིལ་བྱིལ་མཛད་ཅིང༌། ཨ་ལ་ལ། སྔོན་གྱི་གན་ཇག་ཐང་ལྟ་དེ་ད་ལྟ་འདི་ལྟ་བུ་གཅིག་ཏུ་གྱུར་ཟིན་ཞེས་ཡང་ཡང་གསུངས་ཤིང་རབ་ཏུ་མཉེས་པར་མཛད་ཅིང༌། ཁོང་རང་གིས་གཏེར་ནས་སྤྱན་དྲངས་པའི་ཟབ་ཆོས་བླ་མ་ནོར་བུ་པད་འཕྲེང་གི་
སྒྲུབ་སྐོར་ཞི་དྲག་ཐམས་ཅད་ཀྱི་དབང་ལུང་བཀའ་གཏད་དང་བཅས་པ་མཛད་ཅིང༌། ཕར་ལའང་ཚེ་ཁྲིད་རྡོ་རྗེ་འཕྲེང་བའི་དབང་སོགས་དགོངས་བཞེད་ལྟར་ཕུལ། དུས་ཕྱིས་ཀྱང་ཁོང་རང་གིས་ཆོས་བཀའ་དེ་རྣམས་རྒྱལ་བའི་དབང་པོ་ཆོས་དབྱིངས་རྡོ་རྗེ་ལ་འབུལ་བར་བྱོན་ནས་ཕྱིར་འཁོར་བའི་སྐབས་སུའང་བདེ་གཤེགས་འདུས་པའི་རྒྱུད་ལུང་ཉི་ཤུ་དང༌། རིག་འཛིན་ཞིག་པོ་གླིང་པའི་གཏེར་ཆོས་མཐའ་དག་དང༌། མངའ་བདག་མྱང་ལུགས་ཀྱི་མགོན་པོ་ཕྱག་བཞི་པའི་ཆོས་སྐོར་ལ་སོགས་དཔག་ཏུ་མེད་པ་སྐུ་དྲིན་དུ་སྩོལ་བར་མཛད། དེ་དག་གི་སྐབས་ལན་གཅིག་གི་ཚེ། གུ་རུ་རིན་པོ་ཆེས་བྱིན་གྱིས་བརླབས་པའི་གནས་ཕྲན་རྒྱབ་མཐའ་བྲག་ཞེས་པའི་རི་ཁྲོད་གཅིག་ཏུ་མཚམས་ལ་བསྡད་ཡོད་པའི་ཚེས་བཅུའི་ནུབ་རྨི་ལམ་དུ། བདག་རང་ཟངས་མདོག་དཔལ་རིའི་ཕོ་བྲང་དུ་འགྲོ་བའི་འདུན་པས་ལྷོ་ནུབ་ཀྱི་ནམ་མཁའ་ལ་འཕུར་ཏེ་ཕྱིན་པས། སྤང་ལྗོངས་ཤིན་ཏུ་
ཉམས་དགའ་བ་མེ་ཏོག་གི་རིགས་མི་འདྲ་བ་མང་པོ་སྐྱེས་པ་ཞིག་ཏུ་སླེབ་ཚེ། ཟངས་མདོག་དཔལ་རི་ཡིན་ཟེར་བའི་ཤེལ་གྱི་ཕ་བོང་ཆེན་པོ་སྦྲ་ཕུབ་པ་ཙམ་ཞིག་ལ་ཉི་མའི་མདངས་ཕོག་ཚེ་འཇའ་འོད་ཀྱི་ལུང་པ་ཐམས་ཅད་ཁྱབ་པ། རྩ་བའི་ཕྱོགས་ཐམས་ཅད་ནས་ཆུ་མིག་མང་པོ་འབབ་པ་ཞིག་འདུག་པ། བདག་གི་བསམ་པ་ལ། སྔོན་གུ་རུ་ཆོས་དབང་དང་རཏྣ་གླིང་པ་སོགས་ཀྱིས་རྔ་ཡབ་གླིང་དུ་བྱོན་དུས་ཀྱི་བཀོད་པ་ལོ་རྒྱུས་རྣམས་སུ་ཡོད་པ་བདག་ནི་ཕྱོགས་མཚམས་ཡང་འདིར་མི་འདུག འོན་ཀྱང་བདག་རང་གི་སྐལ་བ་དང་འཚམས་པ་འདི་ཙམ་ཞིག་མ་གཏོགས། ཕོ་བྲང་དངོས་དང་གུ་རུ་རིན་པོ་ཆེ་སོགས་མཇལ་བའི་སྐལ་བ་དང་མི་ལྡན་ཞིང་ལས་སྒྲིབས་ཀྱིས་བཏུམ་ཡོད་པར་འདུག་སྙམ་པའི་ཡིད་སྐྱོ་ལྷང་ངེ་བའི་ངང་ནས། བྲག་དེ་ལ་སྐོར་བ་བསྐོར་ཞིང་ཆུ་མིག་ནས་འཐུང་བ་དང་ཁྲུས་བྱས་པ་རྨིས། དེའི་སང་ནུབ་དེ་ཡང་གུ་རུ་རིན་པོ་ཆེ་
ལ་གསོལ་བ་བཏབ་ཅིང་རྨི་ལམ་བཟུང་ནས་རྔ་ཡབ་གླིང་དུ་འགྲོ་བའི་འདུན་པ་བྱས་པའི་རྨི་ལམ་ན། རི་ཆེན་པོ་གཅིག་གི་སྐེད་པ་ཡན་ཆད་ཐམས་ཅད་ན་བུན་ཐིབས་ནས་མི་མཐོང་བའི་སྐེད་སྨད་ཙམ་དུ་བདག་དང་གྲོགས་འགའ་རེ་འདུག་པ་གཅིག་ཏུ། མེ་ཏོག་སེར་པོ་ཤིན་ཏུ་ཆེ་བ་མང་པོ་སྐྱེས་འདུག་པ་ལ། བདག་གི་མེ་ཏོག་གཅིག་ལག་ཏུ་ལེན་གྲབ་བྱས་པས། གྲོགས་གཅིག་གིས། གཞོག་གཞོག དེ་ཁྱེད་རང་སྐྱེ་བ་ཕྱི་མ་སྐྱེ་བ་ཡིན་ཟེར་བའི་མོད་ལ་གཉིད་སད་དོ། དེ་ཡང་བདག་ལོ་བཅུ་གཅིག་པའི་ཐོག་ཏུ་ཆོས་ཀྱི་རྗེ་མཆོག་གྲུབ་རྣམ་པར་རྒྱལ་བ་ཉིད་ཞིང་གཞན་དུ་གཤེགས་པའི་སྟབས་ཀྱིས། བདག་ལ་བླ་མའི་མིང་འཁྲལ་དང་གྲྭ་ཚང་གི་རྙེད་འཚོལ་བ་ལ་བབས་པས། རྣམ་གཡེང་འདུ་འཛིས་རྟག་ཏུ་གཡེང་སྟེ་ཐོས་བསམ་སྒོམ་པའི་བྱ་བ་ཀུན་དང་རྒྱབ་གྱེས་སུ་གྱུར། ལ་ལུང་ཀུན་ཏུ་འཁྱམས་ཞིང་སྐྱེ་བོ་མགུ་བྱེད་ཀྱི་བྱ་བ་སྣ་ཚོགས་
བགྱིས་པའི་དོན་འབྲས་སུ་ཟང་ཟིང་གི་དངོས་པོ་འགའ་ཞིག་རྙེད་པའི་ཚེ་འཁོར་སློབ་མཐའ་དག་ཡིད་མགུ་ཞིང་ཁ་བསག་གིས་ཀུན་ནས་བསྟོད་ཅིང་ག་ཞའི་སྒྲ་འབྱིན། དར་ཅིག་ཙམ་ཞིག་འདུ་འཛི་བསྐྱུངས་ནས་དབེན་པར་གནས་ན་ཁྱེད་ཀྱིས་བདག་ཅག་འདོར་བར་ཕོད་དམ་ཞེས་ཉམ་ཐག་པའི་རྣམ་འགྱུར་སྟོན། འོན་ཏེ་ཇི་ཙམ་རྙེད་པའི་ནོར་རྫས་དག་ཀྱང་མཆོད་སྦྱིན་སོགས་བགྱིས་ནས་ཚོགས་གཉིས་བསོག་པའི་བྱ་བ་ལ་གཞོལ་ན་ནི་སུ་གང་གིས་འདུན་པར་མི་བྱེད། རྙེད་པས་རྙེད་པ་འཚོལ་བ་ཚོང་པ་གཡོ་ཅན་ལྟ་བུའི་སྤྱོད་པ་དང༌། ལུས་ཀྱི་ཕྱི་བཙོངས་ནས་ནང་གསོ་བའི་ངང་ལ་མི་ཚེ་འབུད་པ་འདི་ཡིད་ལ་མ་རངས་ཀྱང༌། ཀླུའི་རྒྱལ་པོ་ཨེ་ལའི་འདབས་ཀྱི་སྤྱི་བོའི་ལྗོན་ཤིང་ལྟར། རང་གི་ལས་ཀྱིས་གྲུབ་ཚེ་འདོར་བའི་ནུས་པ་མ་མཆིས་པ་
འདི་ནི་ཡིད་ཤིན་ཏུ་སྐྱོ་བའི་གནས་ཏེ། བདག་གི་རྣམ་ཐར་གྱི་ངོ་བོ་ནི་དེ་ལྟ་བུ་ལས་མ་འདས་སོ། ཡང་རང་ལོ་ཉེར་གཅིག་པའི་ཚེ་སྐྱབས་གནས་དམ་པ་རིག་འཛིན་ཆེན་པོ་འཇའ་ཚོན་སྙིང་པོ་གྲྭ་ཚང་དུ་སྤྱན་དྲངས་ཏེ། ཁོ་རང་གི་གཏེར་ཆོས་རྣམས་དང༌། གཞན་ཡང་དབང་ཆོས་དཔག་ཏུ་མེད་པ་བུམ་པ་གང་བྱོའི་ཚུལ་དུ་གནང་ཞིང༌། དེའི་ཚེ། ཡང་ཟབ་དཀོན་མཆོག་སྤྱི་འདུས་ཀྱི་དབང་གི་སྐབས་སུ་བུམ་དབང་གྲུབ་ཕྲལ་ཡུད་ཙམ་སྤྱན་ནམ་མཁའ་ལ་གཟིགས་ཤིང་དགོངས་པ་ལ་བཞུགས་ནས། དར་ཅིག་ན་བདག་ལ་འདི་སྐད་གསུངས་ཏེ། ཁྱོད་ནི་གཏེར་ཁ་གོང་འོག་མང་པོ་ཞིག་ནས་ལུང་གིས་ཀྱང་ཟིན་པ་ཡིན་ཞིང༌། ཁྱད་པར་རྫོགས་ཆེན་སོགས་ཟབ་ཁྲིད་ཀྱི་སྒོ་ནས་འགྲོ་དོན་ཆེན་པོ་འགྲུབ་པར་འདུག །ད་ལྟ་བདག་གི་གསལ་སྣང་ལ་ཁྱེད་ནི་ཤེལ་གྱི་མཆོད་རྟེན་འོད་འཕྲོ་བ་གཅིག་ཏུ་གྱུར་ནས་འདུག །
པའི་བུམ་པའི་ཐད་ཀྱི་ཕྱོགས་མཚམས་བརྒྱད་དུ་ཀརྨ་རབས་བརྒྱད་རྣམས་ཞལ་ཕྱིར་གཟིགས་ཏེ་ཆོས་ཀྱི་སྒྲ་སྒྲོག་པར་མཐོང༌། ཞེས་གསུངས་ཤིང༌། བདག་ལ་ཐུགས་རྗེས་དགོངས་པ་རྩེ་གཅིག་ཏུ་གཏད་ནས་ལུགས་གཉིས་ཀ་ནས་འཁོར་བ་མེད་པའི་སྐུ་དྲིན་གྱིས་བསྐྱང་བར་མཛད་དོ། དེའི་སྐབས་སུ་བདག་ཅག་རྣམས་ལྷོ་ཕྱོགས་ཡངས་པའི་རྒྱལ་ཁམས་ཀྱི་སའི་ཐིག་ལེ་བཀའ་བརྒྱུད་ཀྱི་གདན་ས་ཆེན་པོ་དཔལ་གྱི་གྲོ་བོ་ལུང་གི་སྲས་མཁར་སྤྲུལ་པའི་ཕོ་བྲང་ཆེན་པོར། རྗེ་བཙུན་དམ་པ་དཔལ་གཙུག་ལག་རྒྱ་མཚོ་མཇལ་བ་ལ་ཕྱིན་ཏེ། སྐུ་དྲུང་དུ་སླེབས་མ་ཐག་ཕ་བུ་ཕྲད་པ་ལྟར་གྱུར་ཞིང་སྐུ་དྲིན་ཟླ་མེད་དུ་བསྐྱངས་ཏེ། བཀའ་ཆོས་ཀྱི་སྒོ་དུ་མ་ནས་ཡིད་ཀྱི་རེ་བ་རྫོགས་པར་མཛད་ཅིང༌། ཁྱད་པར་དུ་བསྟན་པའི་གཞི་མ་འདུལ་བའི་སྡེ་སྣོད་ལས། ཐོག་མར་དགེ་བ་དགེ་བསྙེན། བར་དུ་དགེ་བ་དགེ་ཚུལ། ཐ་མར་དགེ་བ་དགེ་སློང་གི་
བསླབ་པ་ཡོངས་སུ་རྫོགས་པར་སྩལ་བར་གྱུར། སློབ་དཔོན་རིན་པོ་ཆེ་ཀརྨ་ལེགས་པའི་དྲུང་དུ་ཡང་ཐེག་པ་ཆེན་པོའི་གཞི་རྟེན་དམ་པར་གྱུར་པ་བྱང་ཆུབ་སེམས་བསྐྱེད་ཀྱི་བསླབ་པ་སྨོན་འཇུག་དོན་དམ་ཐམས་ཅད་ཡོངས་སུ་རྫོགས་པར་ཞུས། ལྷོ་བྲག་སྐོར་གྱི་གནས་མཇལ་རྣམས་ལེགས་པར་གྲུབ་ཅིང༌། རིམ་པས་གཏམ་ཤུལ་དང་བཙན་གྲོ་ཕྱོགས་སུ་ཕྱིན་ཏེ་གནས་གཞི་བཀྲ་ཤིས་རབ་བརྟན་དུ། གུ་རུ་རིན་པོ་ཆེ་ཆོས་ཀྱི་དབང་ཕྱུག་གི་གདུང་རབ་བརྒྱད་པ། ཆོས་ཀྱི་རྗེ་འཇམ་དབྱངས་བསྟན་འཛིན་གྲགས་པའི་དྲུང་དུ། ཞི་ཁྲོ་བཀའ་བརྒྱད་གསང་བ་ཡོངས་རྫོགས་དང༌། བླ་མའི་ཐུགས་སྒྲུབ་གསང་བ་འདུས་པ་ལ་སོགས་པའི་དབང་ལུང་མང་དུ་ཞུས། སླར་གདན་ས་ཆེན་པོ་སྣ་བོ་ལྕོག་པོར་མངའ་བདག་གི་གདུང་རབས་བཅུ་གསུམ་པའི་དྲུང་དུའང་བཀའ་ཆོས་ཕྲན་བུ་ཐོབ་ཅིང༌། དེ་ནས་རིམ་གྱིས་དབུས་ཕྱོགས་ཀྱི་སྒྲུབ་གནས་རྣམས་ཀྱང་བདེ་བར་འཁོར་ཞིང༌། ཁྱད་པར་བསམ་ཡས་སུ་སླེབ་པའི་ཉིན། བདག་ཅག་
རྣམས་དང་བསམ་ཡས་ཀྱི་བར་དུ་འཇའི་གུར་ཕུབ་པ་ལ་སོགས་པའི་དགེ་མཚན་ཀྱང་བྱུང་ཞིང༌། རིམ་པས་དབུས་ཕྱོགས་ཀྱི་གནས་མཇལ་ལེགས་པར་གྲུབ། ལར་གནས་རྣམས་ལ་ཕྱིན་དུས་འཇའ་ཟུག་པ་འདི་ཤིན་ཏུ་མང་བར་བྱུང་བ། འབྱུང་བའི་བྱེར་སྡུད་ཀྱི་འདུ་འཕྲོད་ལ་མཚན་མར་འཛིན་པ་བླུན་པོའི་རྟགས་སུ་ངེས་མོད་ཀྱང༌། དུས་བཟང་ལ་གནས་ཆེན་རྣམས་སུ་བྱུང་བ་ནི་བྱིན་རླབས་ཀྱི་མཚན་མ་ཡིན་ནམ་སྙམ་པའི་འཛིན་པ་བྱུང་ངོ༌། ཡང༌། དུས་ལན་གཅིག་གི་ཚེ། མཚམས་ཞིག་བྱས་ནས་མཁའ་འགྲོ་སེང་གདོང་མའི་བཟླས་པ་ལ་བརྩོན་པའི་སྐབས་ཤིག་གི་རྨི་ལམ་འཁྲུལ་སྣང་དུ། བདག་ཉིད་གཅིག་པུ་ལྷོ་བྲག་མཁར་ཆུ་ལྟ་བུ་གཅིག་ཏུ་བསྡད་འདུག་ཙ་ན། མདུན་དུ་ཤེལ་གྱི་རི་ཆེན་པོ་ཟུར་གསུམ་པ་ཤིན་ཏུ་མཐོ་བ་སྐེད་པ་མན་ཆད་སྤྲིན་དང་ན་བུན་འཁྲིགས་པ་ཞིག་གི་རྩེ་མོ་ན་མཁའ་འགྲོ་སེང་གདོང་མ་སྐུ་མདོག་དཀར་མོ་
ཕྱག་གཡས་རལ་གྲི་དང་གཡོན་ཐོད་ཁྲག་འཛིན་པ། སྐུ་སྟོད་ཡན་ཆད་ན་བུན་གྱི་བསེབ་ནས་ཐོན་པ་ཞིག་མཐོང་བས། བདག་གི་བསམ་པ་ལ་ལྷོ་བྲག་མཁར་ཆུ་འདི་ནི། གུ་རུ་རིན་པོ་ཆེས་གསུངས་པའི་བཀའ་ཐང་དུ། མཁར་ཆུ་དུང་སྒོ་རྟ་གདོང་དཀར་མོའི་གནས། །ཞི་བའི་ལས་རྣམས་བསྒྲུབ་པར་ཤིས་པ་ཡིན། ཞེས་གསུངས་འདུག་ཀྱང༌། འདི་ནི་མཁའ་འགྲོ་སེང་གདོང་མའི་གནས་ཡིན་པར་འདུག་སྙམ་པའི་མོད་ལ་གཉིད་སད་དོ། དེ་ཡང་དུས་རེ་ཞིག་ཏུ་བདག་གི་བསམ་པ་ལ། ལུས་ཀྱི་ཁང་བུ་འདི་ནི་ནད་རྐྱེན་གྱིས་རྟག་ཏུ་གཙེས་ནས་བདེ་བའི་གོ་སྐབས་མི་གདའ། ནམ་འཆི་ངེས་པ་མེད་པའི་ཚེ་ཡུད་ཙམ་འདི་ལ། དེ་སྔ་ཡན་ཆད་བྱས་པ་ཐམས་ཅད་ནི་ཚེ་འདི་སྣང་གི་མདུན་མ་ཁོ་ནས་འདས་ཏེ་ཐལ། ད་དུང་འདི་ལྟ་བུའི་ངང་ལ་མི་ཚེ་བསྐྱེལ་བ་མི་རིགས་ཤིང༌། ལྟར་སྣང་གི་གཞན་དོན་འདི་ནི་རང་གཞན་གཉིས་ཀ་ཕུང་
བའི་འདུན་མ་ཤ་སྟག་ཏུ་འདུག་སྙམ་ནས། རང་ལོ་ཉེར་གསུམ་པའི་ཐོག་ཏུ་འདག་སྦྱར་སྨྲ་བཅད་ཀྱི་དམ་བཅའ་ལོ་གསུམ་པ་གཅིག་བགྱིས་ཏེ་མཆིས་སྐབས་སུ། ཐུགས་རྗེ་ཆེན་པོ་ངན་སོང་རང་གྲོལ་གྱི་སྒྲུབ་པ་བྱེད་དུས། སྒྲུབ་ཁང་ལ་འཇའ་ཟུག་པ་ཡང་ཡང་བྱུང་ཞིང༌། ལན་ཞིག་ཉམས་ཀྱི་སྣང་བ་ལ། ང་རང་གི་མདུན་དུ་གཏེར་སྒྲོམ་ཞིག་ཡོད་པའི་ཐད་ཀར་ཐུགས་རྗེ་ཆེན་པོ་ཞལ་བཅུ་གཅིག་པ་རྩ་ཕྱག་བརྒྱད་པ་ཞིག་ཁྲ་ལམ་གྱི་མཐོང་ཞིང༌། ཁྱད་པར་རྩ་ཞལ་གྱི་གཡོན་མ་དེ་སྐུ་མདོག་ལྗང་ཁུ་ཁྲོ་འཛུམ་གྱི་རྣམས་པ་ཅན་བྱིས་པ་ལོ་བརྒྱད་པའི་ཚད་ཙམ་ཞིག་བདག་ལ་སྤྱན་ཁྲ་ཧྲིག་ཧྲིག་གཟིགས་པ་མཐོང་བས། འདི་རྨི་ལམ་ཡིན་ནམ་མངོན་སུམ་ཡིན་བསམ་པའི་བརྟག་དཔྱད་བཏང་གིན་བསྡད་པའི་འཕྲོ་ལ་ཡལ་ནས་སོང༌། ཡང་ལན་ཞིག་གི་རྨི་ལམ་དུ། བདག་ནི་རྒྱ་གར་གྱི་ཡུལ་དུ་རྒྱལ་
པོ་ཞིག་གི་བུར་སྐྱེས་ཏེ། རང་གི་ནུ་བོ་གཅིག་དང་བཅས་འདུག་པ་ལ། ཕོ་བྲང་གི་ཕྱི་རོལ་དུ་ལྗོན་ཤིང་གི་སྡོང་པོ་དག་གི་དྲུང་ན་མུ་སྟེགས་ཀྱི་སྟོན་པ་རལ་པའི་ཐོར་ཅོག་ཅན། རི་དྭགས་ཀྱི་ལྤགས་པ་གྱོན་པ་ཞིག་ལ་བདག་ཅག་མ་བུ་གསུམ་ཆོས་ཉན་ཞིང་གདའ་བ་ལས་བདག་གི་ཕ་ལ་ལྐོག་ཏུ་འདི་སྐད་སྨྲས་ཏེ། རང་ཅག་རྣམས་མུ་སྟེགས་པའི་སྦྱིན་བདག་བྱེད་པ་འདི་མི་འཐད། ནང་པ་སངས་རྒྱས་པ་ལ་གུ་རུ་པདྨ་འབྱུང་གནས་ཅེས་བྱ་བ་ཁྱད་པར་འཕགས་པ་ཞིག་ཡོད་འདུག་པས། དེ་ལ་གསོལ་བ་བཏབ་ཅིང་ནང་པའི་ཆོས་ལུགས་འཛིན་པ་འཐད། ཅེས་སྨྲས་པའི་འཕྲོ་ལ་གཉིད་སད་ཅིང༌། དུས་ཕྱིས་རིན་པོ་ཆེ་གཏེར་སྟོན་ལ་ཞུས་པས། དེ་འདྲ་སྐྱེ་བ་སྔ་ཕྱི་གང་རུང་ཞིག་གི་བག་ཆགས་ཡིན་ལས་ཆེ་ཡི་གེར་ཐོབ་གསུངས་བྱུང་བས་བཏབ་པ་ཡིན་ནོ། ཡང་རྨི་ལམ་ཞིག་ཏུ། བདག་གཅིག་པུར་ཆུ་འགྲམ་ཞིག་ཏུ་སྡད་འདུག་ཚེ། སྐྱེས་
པ་དར་སྒང་མ་ཤ་ཙ་དམར་བ་གཅིག་གིས། ཇ་སྤོབས་རྩེ་འདྲ་བའི་ཀོ་ཐུམ་ཅན་ཞིག་བདག་གི་མདུན་དུ་བཞག་ཅིང་ཕྱག་འཚལ་ནས་འདི་སྐད་ཟེར་ཏེ། བདག་ནི་ལྷ་འདྲེ་ཡིན་ཏེ། བདག་ཅན་ལྷ་འདྲེའི་རིགས་ཐམས་ཅད་ཉོན་མོངས་པ་དུག་གསུམ་ལ་བརྟེན་ནས་བྱུང་བ་ཡིན་ཞིང༌། དེའི་ནང་ནས་བདག་ནི་ཉོན་མོངས་པ་འདོད་ཆགས་ལས་གྱུར་པའི་རིགས་སུ་གཏོགས་པ་ཡིན་ཞིང༌། བདག་གི་སྤུན་ཟླ་ཉོན་མོངས་པ་ཕྲག་དོག་ལས་གྱུར་པའི་རིགས་སུ་གཏོགས་པ་གཅིག་ཡོད་པའི་མིང་ལ་ཀརྨ་དོན་འགྲུབ་ཟེར་བ་ཡིན་ཏེ། དེ་ཤི་བ་ཡིན་པས་ཁྱེད་ཀྱིས་དེ་ལ་དམིགས་པས་བསྔོ་བ་གཅིག་མཛད་དགོས་ཟེར་བྱུང་ཚེ་བདག་གི་བསམ་པར། ཁོ་རང་ཟེར་ལུགས་ལ་ནི་ལྷ་དྲེ་ཐམས་ཅད་དུག་གསུམ་ལ་བརྟེན་ནས་བྱུང་བ་ཡིན་ཟེར་འདུག་རུང༌། ཕྲག་དོག་དང་ང་རྒྱལ་གཉིས་བགྲང་ན་དུག་ལྔ་རུ་འགྱུར་བ་ཡིན་པ་ལ་བསམ་པ་བྱུང་ཞིང་བསྔོ་བ་ཞིག་ཀྱང་བྱས། ད་ནི་འདི་ལ་སྐྱེ་རྒྱུད་
དང་གནས་ཡུལ་སོགས་ཞིབ་ཏུ་དྲིས་ནས། སྐྱབས་འགྲོའི་སྡོམ་པ་ཞིག་ཀྱང་ཕོག་དགོས་སྙམ་པའི་མོད་ལ་གཉིད་སད་དོ། །གཞན་ཚེ་འདས་ལྷ་འདྲེར་སྐྱེས་པའི་ཚུལ་འགའ་ཞིག་མཐོང་ཀྱང་བཤད་པའི་དགོས་པ་ཆུང་ཞིང་ཤུལ་གྱི་ཉེ་འབྲེལ་རྣམས་སེམས་མི་བདེ་བར་འགྱུར་བས་མ་བརྗོད་དོ། མཆན། དེ་ནས་ལོ་མཚམས་ཀྱི་བཅད་རྒྱ་གྲོལ་འཕྲལ་དུ། མདོ་ཁམས་ཀཿཐོག་ནས་ཆོས་ཀྱི་རྗེ་བླ་མ་བློ་གྲོས་དཔོན་སློབ་རྣམས་ཕེབས་པ་དང་མཇལ་བས། བདེ་གཤེགས་འདུས་པའི་རྩ་རྒྱུད་ཆེན་མོ་སོགས་ཀྱི་ཆོས་འབྲེལ་ཞུས་ཤིང༌། ཕར་ལའང་ཉིད་ཀྱི་དགོངས་བཞེད་དང་མཐུན་པའི་དབང་ཆོས་ཕུལ། དེ་ནས་རིམ་གྱིས་ཀོང་སྟོད་གད་པ་སྐྱ་བོར། རིག་འཛིན་ཆེན་པོ་སངས་རྒྱས་གླིང་པའི་གདུང་རབས་བདུན་པ། མཚུངས་མེད་རིག་འཛིན་སྙིང་པོའི་གོང་དུ། ཟབ་ཆོས་དགོངས་པ་འདུས་པའི་དབང་ལུང་ཡོངས་སུ་རྫོགས་པ་དང༌། གཞན་ཡང་སངས་རྒྱས་གླིང་པའི་གཏེར་ཕྲན་སྐོར་དང༌། པཎ་ཆེན་བི་མ་ལའི་ཟབ་པ་པོད་བཞི་ལ་
སོགས་པའི་ཆོས་བཀའ་ཤིན་ཏུ་མང་བར་ཐོབ། གཞན་ཡང་བླ་མ་དང་སློབ་དཔོན་མང་དག་གི་ཞབས་ལ་རེག་ཅིང༌། ཐམས་ཅད་ཀྱི་བདག་ལ་སྐུ་དྲིན་ཆེན་པོས་བརྩེ་བསྐྱངས་སུ་མཛད་ཅིང༌། དབང་ལུང་ཁྲིད་མན་ངག་ལག་ལེན་མཐའ་དག་སོ་སོ་ནས་རྩལ་སྤྲུགས་སུ་གནང་བ་ཁོ་ན་བྱུང་རུང༌། རང་ཉིད་བརྩོན་འགྲུས་ཀྱི་སྟོབས་ཤུགས་ཆུང་ཞིང་དཀོར་སྒྲིབ་ཀྱི་འཐུམས་པའི་དབང་གིས། རང་རྒྱུད་སྨིན་གྲོལ་དུ་གྱུར་པའི་ཡོན་ཏན་ནི་ལྟ་ཞོག ཉོན་མོངས་ཅུང་ཟད་ཁ་བྲི་བ་ཙམ་ཡང་ཤིན་ཏུ་དཀའ་བའི་གནས་སུ་གྱུར་ཏེ། །འོན་ཀྱང་ད་དུང་ཟབ་མོའི་གདམས་པ་ཞུ་བ་དང་དགེ་བའི་བཤེས་གཉེན་བསྟེན་པ་ལ་ཆོག་ཤེས་མེད་པར་མཆིས་སོ། སྔོན་དུས་སྐལ་བཟང་སྐྱེ་བོ་དུ་མ་རྣམས། །དམ་པ་བསྟེན་ཞིང་དམ་ཆོས་འཆད་ཉན་དང༌། །དེ་བཞིན་སྒོམ་སྒྲུབ་ལ་སོགས་བྱ་བ་ཀུན། །སྤྱོད་སྲོལ་བཟང་པོས་གྲུབ་ཐོབ་ཁྱུ་མང་ཚོགས། །ད་ལྟ་རྩོད་དུས་གཟུགས་བརྙན་བསྟན་པ་འདིར། །རྙེད་བཀུར་
དོན་མི་གཉེར་བའི་ཆོས་སྨྲ་བ། །ཉིན་སྐར་ལས་དཀོན་འགའ་ཙམ་བྱུང་རྣམས་ལའང༌། །དད་པར་མི་བྱེད་གྲོང་རྒྱུག་ཁྱི་ལྟར་བརྙས། །རྙེད་དང་བཀུར་བསྟི་གྲགས་པ་དོན་གཉེར་ཞིང༌། །ཟས་གོས་གཏམ་གྱིས་གཞན་མགོ་བསྐོར་བྱེད་པའི། །ཁ་གསག་ཅན་གྱི་བླ་གཟུགས་འཛིན་པ་རྣམས། །འཛམ་བུ་ཆུ་བོའི་གསེར་བཞིན་མཆོག་ཏུ་བྲིམ། །ཚུལ་འདིར་བསམ་ན་ཤེས་ལྡན་སྐྱེས་བུ་དག །རི་གླིང་ནགས་ཁྲོད་དབེན་པའི་བས་མཐའ་རུ། །ཚེ་དང་སྒྲུབ་པ་མཉམ་པའི་བརྟུལ་ཞུགས་ཀྱིས། །རང་གཞན་དོན་མཆོག་བསྒྲུབ་ན་ལེགས་བསམ་སྙམ། རང་ཉིད་སྐྱེས་པ་ནས་བཟུང་སྟེ་ལོ་ཉེར་དྲུག་གི་ཆེ་བར་གྱི་སྤྱོད་ཚུལ་རྣམས་རག་རིམ་བརྗོད་པའི་ལེའུ་གཉིས་པའོ། གང་ཞིག་འགྲོ་ལ་རྗེས་ཆགས་བརྩེ་བ་ཅན། །སྡུག་བསྔལ་མནར་ལ་སྨན་མཛད་མགོན་པོ་མཆོག །ཐུགས་རྗེ་རྨད་བྱུང་ཟླ་འདྲའི་མདོག་མངའ་ཞིང༌། །ཕྱག་
ན་པད་དཀར་འཛིན་པ་དེས་སྐྱོངས་ཤིག ཀྱེ་མ་ཀོང་རོང་ཐིབ་པོའི་སྨག་ནང་དུ། །དགེ་བློ་སྲིན་བུའི་སྣང་བ་ཙམ་ལྡན་བདག སྔ་འགྱུར་བསྟན་པའི་སྙིང་པོ་རིན་ཆེན་འདི། །མུན་ནང་སྟོར་ལ་སྐྱོ་བས་ཡིད་ཕམ་ཡང༌། །ཐོས་བསམ་སྒོམ་འབྲས་སྣང་བས་འཕོངས་པའི་ཕྱིར། །ལོག་ལྟའི་མིག་སྨན་གཞོམ་པར་མི་ནུས་པས། །འོད་མའི་ཁང་བུར་འདག་སྦྱར་སྨྲ་བཅད་དང༌། །གསོལ་འདེབས་ཙམ་གྱི་དགེ་སྦྱོར་འབད་བཞིན་གནས། །དེ་ཚེ་ཕྱོགས་དུས་རྒྱལ་བའི་ཐུགས་རྗེ་ཡི། །དབྱིངས་ནས་འགྲོ་ལ་ཕན་བདེའི་འོད་སྟོང་ཅན། །ངག་གི་དབང་ཕྱུག་གཞན་ཕན་རྡོ་རྗེའི་མཚན། །མཁྱེན་བརྩེ་མཚུངས་མེད་ནམ་མཁའ་ནོར་བུའི་ཟེར། །འགྲོ་ལ་འཆར་བྱེད་སྐྱ་རེངས་བྱ་མ་རྟ། །ངོ་མཚར་སྙན་ངག་རྒྱུ་སྐར་འཕྲེང་བ་དང༌། །ལྷན་ཅིག་མུན་པའི་གླིང་འདིར་ཤར་བ་ཡིས། །བདག་བློའི་ཆུ་སྐྱེས་ཟེའུ་
འབྲུ་གསལ་བར་གྱུར། །བླང་དོར་ཙ་ཀོ་ར་ཡི་མིག་ཅན་དག སྣང་བྱེད་ཕོ་ཉ་ལ་དགའི་བློ་བྲལ་ཡང༌། །དམ་ཆོས་ནམ་མཁའི་ནོར་བུ་བལྟ་འདོད་བྱིའུ། །དགའ་བའི་ནམ་ལངས་མཁའ་ལ་འཕུར་བར་བརྩམ། །འོན་ཀྱང་ནད་ལྡན་སྨན་མི་ཤེས་པའི་བྱིས། །ཁ་བའི་རོ་ལ་བྱོལ་ཡང་བརྩེ་བའི་མས། །ཁ་ཟས་དང་སྦྱར་སྦྱིན་འདྲའི་ཐབས་དག་དང༌། །མ་ལྡན་དོན་མི་འགྲུབ་མཐོང་བག་ཕེབས་བྱས། །ཀྱེ་ཧུད་སྔོན་ཚེ་ཆོས་རྒྱལ་བྱང་སེམས་ཀྱིས། །མི་འཕངས་གསེར་ལ་བྱས་ནས་བརྫངས་ཚུལ་ལ། །དེང་སང་ཆོས་ལ་སྐྱོབ་ཅིང་བསྲུང་ཐབས་ཀྱི། །ཡན་ལག་མཆོད་སྐོར་བརྩོན་འདི་རིགས་སམ་ཅི། །ཉལ་འགྲོ་གཡས་སུ་འཁྱིལ་བའི་སུམ་བརྩེན་གནས། །ལྷག་བསམ་ལང་ཚོས་བརྒྱན་པའི་ལྷ་ཡི་བུ། །འགའ་ལ་ཟབ་ཆོས་མེ་ཏོག་འཕྲེང་བ་ཡིས། །ཀླུབས་ནས་དགེ་བློས་མཛེས་པའི་ཐབས་ཀྱང་བགྱིས། །དེ་ནས་དབོ་ཡི་ཟླ་བའི་
ཚེས་བཅུའི་ཚེ། །ཡིད་ཀྱིས་ཤིང་རྟ་གྱེན་དུ་ཁ་བསྒྱུར་ནས། །ཕ་རོལ་ཕྱིན་པའི་གྲངས་ལྡན་གྲོགས་དང་བཅས། །ཆོས་དོན་གཉེར་བ་ཁོ་ནའི་བསམ་པས་ཆས། །དེ་ཚེ་བདག་གི་ལྷག་བསམ་རབ་དཀར་ལ། །དགའ་བའི་པད་ཚོགས་ཟེའུ་འབྲུའི་འཛུམ་མདངས་སྟོན། །ས་འཛིན་རྣམས་ནི་དར་དཀར་ཐོད་ཀྱང་ཕུད། །མྱུ་གུའི་ཚོགས་ཀྱང་ས་ལས་མངོན་འཕགས་ནས། །སྤྲོ་བས་མགྲིན་པ་བསྲིང་ཞིང་ལང་ཚོ་སྟོན། །མཁའ་ལས་ལེགས་སོའི་འབྲུག་སྒྲ་གྲགས་བཞིན་པས། །མུ་ཏིག་ཆུན་བུའི་ཆར་རྒྱུན་སྐྱེས་སུ་བརྫངས། །བླ་མ་ཟང་ཟིང་རིན་དུ་སྤྲོད་མཁས་པའི། །འདི་ནང་དོན་ཆེན་གཉེར་བའི་ཚོང་པ་དག ཟོང་དང་བྲལ་བའི་གྱུར་བྱེད་ངང་ཚུལ་གྱི། །རྣམ་འགྱུར་དགའ་བ་ལས་གཞན་དུ་མ་སྟོན། །ཆོས་བརྒྱད་འཁོར་ལོ་བསྒྱུར་བའི་རྒྱལ་སྲིད་ཀྱི། །ཨ་ཝ་ལེ་པའི་མངའ་ཐང་མི་ལྡན་ཀྱང༌། །རང་དབང་མངོན་དུ་སྤྱོད་
པའི་ཡིད་བཞིན་ནོར། །ལྡན་དེས་ཕྱི་བཤོལ་རྒུད་བས་མ་མནར་ཙམ། །ཉོན་མོངས་ཞུགས་ལ་འཆོལ་བའི་བུད་ཤིང་བསྣན། །ལྷ་ཆེན་རྣམ་ཐར་ཁོ་ནས་དུས་འདའ་ཡང༌། །དད་རྫས་ཆེད་དུ་མཁས་བཙུན་བཟང་པོའི་ཚུལ། །སྟོན་མཁས་དེ་དག་ངག་ལ་བདག་མ་ཉན། །དཀོན་པའི་མཆོག་དང་དཀར་པོའི་ལྷ་རྣམས་ཀྱིས། །མཐུ་ལས་ལམ་གྱི་ཉེར་འཚེའི་རིགས་མཐའ་དག བྲལ་བཞིན་དྲིན་ཅན་ཕ་དེའི་ཞལ་དཀྱིལ་ཟླ། །ནམ་ཞིག་མཐོང་བར་འགྱུར་གྱི་རེ་བ་དོང༌། །ཀོང་རོང་ཡུལ་སྲིད་འཚོ་བའི་གསལ་ལྷ་པས། །མཐུན་རྐྱེན་དུ་མས་ཡིད་ཀྱི་རེ་བ་བསྐངས། །འབྱོར་ལྡན་གནོད་མཛེས་མཁར་འཛིན་མ་དང་བུས། །ལམ་དུ་དབུལ་བ་སེལ་བའི་ཆ་རྐྱེན་སྦྱར། །སྒྱུ་ལུས་འཚོ་བྱེད་ཡོ་བྱད་འབྱོར་བཞིན་དུ། །ཡུལ་དང་གྲོང་བརྡལ་མྱུལ་ཞིང་དཀོར་ཟས་ལ། །ཆགས་ན་ཟབ་དོན་ནོར་བུ་མི་ལོན་སྙམ། །རི་དྭགས་རྨས་
པའི་བརྟུལ་ཞུགས་ཁོ་ནས་བགྲོད། །མཐོ་ཞིང་དབེན་པའི་མིང་ཅན་གང་དེ་དག བསམ་གཏན་གླིང་སོགས་ལོངས་སྤྱོད་པདྨའི་མཚོར། །ཆགས་མེད་མཁའ་ལ་འཕུར་བའི་ངང་པའི་ཚོགས། །དོལ་ཐང་དར་དཀར་བརྒྱངས་འདྲར་འབྱོར་པའི་ཚེ། །ཐུགས་རྗེའི་གཏེར་ཆེན་དཔལ་ལྡན་བླ་མ་དེས། །ཤུལ་རིང་ཉམ་ཐག་མགྲོན་པོ་དབུགས་འབྱིན་ཕྱིར། །མཐུན་རྐྱེན་དུ་མར་བཅས་པའི་ཕོ་ཉ་བ། །སྙན་ངག་མཛེས་པའི་བ་དན་འཕྱར་བ་དང༌། །འཛོམ་ཚེ་དངོས་དང་རྨི་ལམ་སོམ་ཉིར་གྱུར། །དམུས་ལོང་དམིགས་བུ་རྙེད་འདྲའི་དགའ་བ་དང༌། །བདེ་ལྡན་སྤྱོད་པས་ཉིན་ཚན་འདའ་བཞིན་དུ། །དཔལ་དང་འབྱོར་པས་བརྒྱན་པའི་དེ་འུར་སློབ། །འདོད་ཡོན་ལྷ་ཡི་དཔལ་ལ་འཕྱ་བཞིན་དུ། །མ་ཆགས་རྣམ་འདྲེན་དེ་དྲུང་རིངས་སྙེགས་མཐུས། །ཟླ་གཅིག་ཉིན་ཞག་གསུམ་གྱི་སྔ་དྲོ་ནས། །ཚོང་པ་རིན་ཆེན་གླིང་དུ་སླེབས་མཚུངས་གྱུར། །
ལྐོག་གྱུར་དྲི་མེད་གཟིགས་པའི་མགོན་པོ་ཞེས། །ལྷུན་གྲུབ་ཆོས་སྡིངས་གོང་རིའི་ཡང་དབེན་དུ། །རྣམ་འདྲེན་ནོར་བུའི་འཕྲེང་བ་དཀྲིགས་པའི་དབུས། །མདོ་འཛིན་དམ་པར་བཞུགས་པས་མངོན་གཤེགས་ཏེ། །ཟླ་འོད་གཞོན་ནུས་རིན་ཆེན་བརྩོན་འགྲུས་དང༌། །ཐམས་ཅད་གྲོལ་གྱིས་བྲམ་ཟེ་སློང་མའི་ཡིད། །རེ་བ་བསྐོང་ཕྱིར་མདུན་ནས་བསུ་མཛད་ལྟར། །འོངས་པ་ལེགས་ཞེས་དབུགས་དབྱུངས་ཚིམ་པར་མཛད། །དེང་སང་མིང་སྙན་བླ་མར་བཏགས་པ་ཕལ། །ཆོས་འདོད་དབུལ་ཚོགས་བྱེ་བ་ཕྲག་བརྒྱ་ལས། །ནོར་ལྡན་འབུལ་ནོད་གཅིག་ཉིད་ཁོ་ནར་དགྱེས། །རྒྱུ་དེས་ཚུལ་མཐུན་འཆད་ཉན་རབ་ཏུ་དཀོན། །ཟང་ཟིང་དགྲ་དང་དཀོར་ཟས་དུག་ཉིད་དུ། །མཁྱེན་གཟིགས་ཆོས་མིན་སྤྱོད་ལ་རབ་སྡང་བའི། །དཔའ་བོ་ཁྱོད་ཀྱི་མཛད་མཚུང་ཆོས་སྤྱོད་གཞན། །མཛད་ན་ཆོས་བརྒྱད་དགྲ་སྡེ་ཅི་ཕྱིར་ཆགས། །མགོན་དེའི་ཞལ་གྱི་ཟླ་སྣང་མཐོང་ཙམ་ལ། །འདིར་སྣང་
ཞེན་པ་བསྲ་འཐས་རྡོ་རྗེའི་བྲག བདེ་བླག་ཉིད་དུ་གཞོམ་པའི་ནུས་ལྡན་ཐོག ཐུགས་རྗེའི་དཔལ་ལྡན་དེ་ལས་གཞན་སུ་ཞིག དཔལ་ལྡན་དུས་ཀྱི་འཁོར་ལོ་གསུངས་པའི་ཚེས། །དགེ་ལྡན་ནག་ཟླའི་སྔ་དྲོ་དང་པོ་ལ། །མཐའ་འཁོབ་ཤུལ་རིང་ལམ་ནས་འོངས་པའི་མི། །ཁོ་བོའི་བསམ་པ་རྫོགས་པའི་དགའ་སྟོན་ཐོབ། །གོང་རའི་ཀུན་དགའ་ར་བའི་མེ་ལོང་ངོས། །གཟུགས་བརྙན་དཀྱིལ་འཁོར་བརྒྱ་ཕྲག་མངོན་འཆར་བས། །ལྷུན་གྲུབ་འོད་གསལ་དོན་གྱི་དཀྱིལ་འཁོར་མཆོག མཚོན་མཛད་རྣམ་འདྲེན་མཆོག་དེའི་གྲུབ་རྟགས་དངོས། །ངན་སོང་ནས་དྲངས་ལྷ་མིའི་ཐེག་པ་ནས། །བློ་འདས་རྫོགས་ཆེན་ཐེག་པའི་རྩེ་རྒྱལ་བར། །སྨིན་གྲོལ་འཇུག་སྒོའི་ཆུ་བོ་ཀུན་གཞོལ་བའི། །དབང་མཆོག་ཆུ་གཏེར་བདག་གི་སྐལ་བར་ཐོབ། །དེང་སང་སྒྲུབ་ཕྲན་སྣ་རེའི་སྨིན་བྱེད་ཀྱི། །ཁྲིད་ལ་རྫ་མཁན་འཁོར་ལོའི་དབུ་མངའ་བའི། །
བླ་ཆེན་གར་དབྱངས་རོལ་མོའི་དཔུང་ལྡན་དག མཐོང་ཚེ་རྣམ་འདྲེན་མཆོག་དེ་ལྷག་པར་དྲན། །སྔ་འགྱུར་རྒྱུད་སྡེ་འབུམ་གྱི་གླེགས་བམ་མཆོག །སྔོན་མེད་ངོ་མཚར་ཡིད་བཞིན་ནོར་བུའི་ཕྲེང༌། །དག་བྱེད་བྱི་དོར་ནན་ཏན་དང་ལྷན་ཅིག །རེ་བ་ལས་ཀྱང་ལྷག་པའི་འདོད་དགུ་ཐོབ། །སྨིན་དབང་གྲོལ་ཁྲིད་རྒྱུད་ལུང་མན་ངག་ཆོས། །མངའ་དབང་ཕྱུག་པ་དམ་པའི་ཆོས་ཉིད་ལ། །མཚར་ཅི་དེ་བས་ཉིན་ཚན་བར་མ་ཆད། །ངལ་བྲལ་ཆོས་ཆར་འབེབས་པ་འདི་ཆེས་འཕགས། །འགའ་ཞིག་ཐོས་ཤེས་མིན་ཡང་གྲགས་ཕྱིར་ཚོང༌། །ལ་ལ་ཤེས་ཀྱང་མི་ནུས་ཁོང་འདྲུལ་བྱེད། །ཁ་ཅིག་འོན་པའི་རོལ་མོ་མཁན་མཚུངས་པ། །རྣམ་མང་ཁོ་ནས་སྙིང་བསྟན་འདམ་དུ་བསྒྲུབ། །ངག་གི་དབང་ཕྱུག་དེ་ལྟའི་རྣམ་པར་ཐར། །དེང་སང་ཆེན་པོར་གྲགས་པ་རྣམས་ཀྱི་རྣར། །བརྙད་ན་ཁྲོན་པའི་སྦལ་ལ་རྒྱ་མཚོའི་ཁྱོན། །བརྗོད་
མཚུངས་མངོན་སུམ་འགྱུར་བར་གོར་མ་ཆགས། །ཟང་ཟིང་འབུལ་ལ་དམ་ཆོས་མི་འཚོང་བའི། །མཛད་བཟང་དེ་ཡང་སྔོན་དུས་བཻ་རོ་ཡིས། །རྗེ་ལ་ཐེག་པའི་རྒྱལ་པོ་ནམ་མཁའ་ཆེ། །དུད་འགྲོའི་རྒྱལ་པོ་རྟར་མི་ཚོང་གསུངས་དང༌། །མཚུངས་ལས་ཁྱད་པར་དེང་སང་ཟང་ཟིང་ཆེད། །ཆོས་འགྱེད་གཏོང་པའི་དུས་འདི་ལྷག་པར་འཕགས། །ཀྱེ་མ་སོ་སྔགས་ཙམ་གྱི་གདམས་ཕྲན་ལའང༌། །གསེར་གྱི་རིན་ཐང་བྱེད་ན་ཚེ་གཅིག་གིས། །སངས་རྒྱས་སྦྱོར་ལ་སྟོང་གསུམ་བྱེ་བྲག་བརྒྱ། །ནོར་བུས་བཀངས་ཀྱང་དེ་ལ་ཅི་ལྟར་བྱེད། །བཀའ་གཏེར་ཟབ་ཆོས་རྒྱ་མཚོ་མཐའ་ཡས་པ། །སྔོན་ཆད་ཕྱོགས་འདིར་མིང་ཙམ་མ་གྲགས་པའི། །ཚིག་དོན་བཅུད་ཀྱིས་བཏམས་པའི་འདབ་བརྒྱ་པ། །བདག་སོགས་རྐང་དྲུག་ཚོགས་ཀྱི་དཔལ་དུ་ཤར། །དེ་ཚེ་ནག་པོའི་ཕྱོགས་རྣམས་མ་བཟོད་དང༌། །འགྲོ་བའི་
སྡིག་འབྲས་སྨིན་གཉིས་འཛོམ་པའི་མཐུས། །མི་བཟད་དུ་རུ་ཀ་ཡི་དཔུང་ཚོགས་ཀྱིས། །གཙང་དབུས་ཡར་འབྲོག་མཐའ་དག་ཁྱབས་པར་གྱུར། །བདེན་བྲལ་མངོན་སུམ་འབྱུང་འདྲའི་ངང་ཚུལ་གཏམ། །ཐོས་ཚད་ཙིཏྟའི་ཤུན་པ་འགས་བྱེད་ཅིང༌། །མཐོང་ཚད་ལྔ་པར་འགོད་པའི་མཐུ་དཔུང་གིས། །སྐྱེ་འགྲོ་དུ་མ་དུཿཁའི་གནས་ལ་བཀོད། །གྲངས་མང་གཞོན་པའི་རྡོག་སྒྲ་ཁོ་ནས་ཀྱང༌། །ས་ཀུན་འུར་ཆེས་གཡོ་བའི་ཤུགས་ལྡན་ཞིང༌། །འཁྲུལ་ལྡན་མེ་མདའི་སྒྲ་ཆེན་གཅིག་པུས་ཀྱང༌། །རི་བྲག་བརྙིལ་ཞིང་འཐོར་བའི་ཆོ་འཕྲུལ་སྟོན། །དེ་ཚེ་འགྲོ་ཀུན་རབ་སྐྲག་རྟབ་རྟབ་པོར། །གྱུར་ཅིང་རྣམ་པར་འགྱུར་བ་དུ་མ་ཞིག །སྤྱོད་ཀྱང་མགོན་དེའི་ཐུགས་རྗེའི་ཉི་འོད་ལས། །ལོག་འདྲེན་འུག་པའི་ཚོགས་ཀྱིས་ཉེ་མ་ནུས། །སྔོན་ཚེ་བྱམས་པའི་སྟོབས་ཀྱི་བསོད་ནམས་མཐུས། །ཡུལ་ཁམས་ཀུན་ལ་ཤ་ཟས་
གནོད་མ་ནུས། །དེ་བཞིན་གཞན་ཕན་རྡོ་རྗེའི་མཚན་དོན་དང༌། །མཐུན་པའི་བྱིན་རླབས་མཐུ་ཡིས་བདག་སོགས་སྐྱབས། །ཟླ་བ་བཅོ་བརྒྱད་ཉིན་དང་མཚན་མཐར་ཐུག དམ་ཆོས་འདོད་དགུའི་ཆར་ཕབས་ཟས་གོས་བསྐྱངས། །དགོས་དགུའི་གླེགས་བམ་གྲངས་མེད་ཟང་ཟིང་བཅས། །བསྩལ་འདི་རྒྱལ་སྲིད་གཏད་པའི་དོ་ཟླ་མིན། །ཐ་སྙད་རིག་པའི་གནས་ཀྱི་གཞུང་ལུགས་ལ། །བདག་བློ་འཇུག་པའི་བརྩོན་འགྲུས་ཤེས་རབ་བློ། །མི་ལྡན་མོད་ཀྱང་རྗེ་དེའི་བྱིན་རླབས་ཟེར། །ཕོག་པས་ཆ་ཤས་ཙམ་ཡང་སྐལ་བར་ཐོབ། །རང་ཉིད་ཐོས་བསམ་སྒོམ་པའི་ནུས་བྲལ་ཟོངས། །བསྟེར་ཡང་གཞན་ཕན་མདངས་འབྱུང་མིན་མོད་ཀྱང༌། །བླ་མའི་བཀའ་དྲིན་རིན་ཆེན་སུ་ཝརྞ། །བཀྱེ་མཐུས་རྒྱལ་མཚན་རྩེ་མོར་བཀོད་རུང་ཙམ། །དེ་ཡང་མོས་པའི་རྨང་གཞི་ལེགས་བརྟན་ཞིང༌། །ཤེས་རབ་གསུམ་གྱི་བ་གམ་གསར་པ་ཅན། །
བློ་གྲོས་སྒོ་མང་ལྡན་པའི་ཁང་བཟང་ལས། །འཇག་ཁྱིམ་ཚང་ཚིང་གྲོང་ལ་ཅི་ཞིག་དགོས། །བླ་གོས་འོད་ཟེར་འཕྲོ་བ་སྣ་ཚོགས་ཀྱིས། །ལེགས་བརྒྱན་གྲེ་བ་བདེ་འཇམ་གླུ་དབྱངས་དག ལེན་མཁས་ནོར་རྫས་འགུགས་པའི་ནུས་ལྡན་གྱི། །མཁས་གྲུབ་མིན་ཚེ་གཞན་དོན་ག་ལ་འགྲུབ། །མཛེས་ཆོས་ཀཻ་ལ་ཤ་རི་མངོན་མཐོའི་ངོགས། །ཟང་ཟིང་ཆུ་ཀླུང་རྒྱུན་འབབ་ཉམས་དགའ་བས། །སྟོང་ཉིད་སྣོད་ལྡན་རི་དྭགས་གཞོན་ནུའི་སྡེ། །སྐྱོང་མཁས་ངོ་མཚར་དེ་འདྲའང་བདག་ལ་མེད། །བསམ་བཟང་ཕྱི་ནང་གསལ་བའི་གྲྭ་ཆུང་ནང༌། །ཟབ་དགུའི་གདམས་ངག་པོད་ཆུང་གཅིག་ཁོ་ན། །མཆིས་འདི་རང་གཞན་ཀུན་གྱི་སྤྱི་ནོར་དུ། །བྱ་སྙམ་ནོར་དང་གྲགས་ཕྱིར་ཅི་ལ་སྟོན། །ཙནྡན་སྡོང་པོ་མི་བྲིམ་ཚོང་འདུས་སུ། །སོལ་བ་རིན་ཐང་ཆེ་ཡང་བཙོང་དེས་ཅི། །བོང་ཤ་རི་དྭགས་རྔ་མས་བྲིད་བཙོང་ན། །བྲིམ་པར་མངོན་ཡང་དེ་འདྲས་བདག་མི་
མགུ། །འཕྲལ་དོན་རྣམ་རྟོག་ནད་ཟུག་ཅན་དགའ་བའི། །སྲུང་ཟློག་གསད་པའི་སྨན་དང་མ་ལྡན་ཞིང༌། །རྣམ་མང་ཤེས་བྱའི་གསོ་རིག་མ་སྦྱངས་པས། །མཁས་པའི་སྙན་གྲགས་ཐོབ་པ་ག་ལ་སྲིད། །དེ་ལྟ་མོད་ཀྱང་རྙིང་བསྟན་རིན་ཆེན་མཆོག སྐྱོང་ཕྱིར་གཞན་དག་སུ་མ་མགུ་ན་ཡང༌། །རང་ཉིད་ཁོ་ན་འབད་པར་དམ་པ་དེས། །བཀའ་སྩལ་སྤྱི་བོར་ལེན་པར་དམ་ཡང་བཅས། །གངས་ཅན་མཁས་གྲུབ་གཙུག་རྒྱན་ཀློང་ཆེན་ཞབས། །འགྲོ་ལ་བརྩེ་བས་སླར་ཡང་སྐུ་སྤྲུལ་པའི། །དམ་པ་མཆོག་དེས་ཟབ་ཆོས་འགའ་ཡི་རྒྱུན། །སྤེལ་སླད་ལྷོ་བྲག་ཕྱོགས་སུ་ཤོག་གསུངས་ཀྱང༌། །མི་ཟད་རིམས་དང་མཐའ་མིའི་གནོད་འཚེ་ལ། །འཛེམ་པས་རེ་ཞིག་བསྒྲོད་པར་མ་གྱུར་མོད། །གུ་རུའི་སྒྲུབ་གནས་ཤངས་ཀྱི་ཟབ་བུ་ལུང༌། །ངོ་མཚར་པདྨས་བརྒྱན་པའི་
མཚོ་ཆེན་དུ འཇུག་པར་འདོད་ཀྱང་གནས་སྐབས་དུས་དབང་གིས། །མ་ནུས་ངང་མོ་རང་གི་སྐྱོན་དུ་ཟད། །རང་ལུས་ཕུང་ཁམས་རྒྱལ་བའི་ཞིང་རབ་འབྱམས། །རིག་རྩལ་ལྷ་དང་བླ་མའི་རོལ་པ་རུ། །མ་ཤེས་རི་བྲག་ལྟད་མོ་བལྟ་འདོད་ཀྱི། །ཞེན་པའི་རྗེས་ཕྱིར་འབྲེལ་བའང་གད་མོའི་གནས། །དེ་ནས་ཁྲུམས་གྱི་ཟླ་བའི་དཀར་ཚེས་ལ། །མུན་གླིང་ཆོས་ཀྱི་སྒྲོན་འཁྱེར་དཱ་རི་འདྲའི། །བསྐྱེལ་ཐུང་ཁོ་ནར་དམ་པ་དེ་ཡང་གཤེགས། །ཆོས་ལ་སྒང་དུ་མངའ་བདག་མར་པ་ཡིས། །མི་ལ་རྗེ་ལ་ཇི་ལྟར་གདམས་བཞིན་དུ། །འདི་བཟུང་བྱང་ཆུབ་བར་གྱི་བླང་དོར་གནས། །སྙིང་གཏམ་གདམས་ངག་སྙིང་ལ་ཕན་པའི་གསུང༌། །དུ་མས་བདག་བློའི་རེ་བ་རྫོགས་པར་མཛད། །ཡར་འབྲོག་དཔལ་གྱི་དེའུ་བསོད་ནམས་གཏེར། །དབང་སྒྱུར་དད་འབྱོར་གདེངས་ཅན་དབང་པོ་གང༌། །དགྱེས་ཕྱིར་ཟབ་ཆོས་མེ་ཏོག་ཆུ་འཕྱང་དག ལྷག་བསམ་
དྲི་བཟང་འཕྲོ་བའི་མགུན་རྒྱན་ཕུལ། །ཡུལ་དབུས་དར་རྒྱས་ཆོས་སྡིངས་པདྨའི་ཚལ། །མཛེས་བྱེད་སྤྲུལ་པའི་སྐུ་མཆོག་ཨུ་དུམ་ཝར། །སྙན་གྲགས་དྲི་བསུང་མ་ལ་ཡ་རླུང་གིས། །ཡིད་འཕྲོག་གླུ་དབྱངས་དར་དིར་མང་བླངས་ཀྱང༌། །ཟབ་ཆོས་སྦྲང་རྩིའི་འདོད་པ་མ་ཐོབ་པས། །ཡིད་སྐྱོའི་བུང་བ་སྐྱོ་གླུ་ལེན་བཞིན་སོང༌། །ཨེ་རོང་འཆད་དཀར་བསོད་ནམས་རྒྱ་མཚོའི་དབུས། །ཟླ་བྲལ་ཐེག་བརྒྱད་བང་རིམ་མངོན་མཐོའི་རྩེར། །ཟབ་བཅུད་རྫོགས་ཆེན་རྣམ་རྒྱལ་ཁང་བཟང་ལ། །དབང་བསྒྱུར་མཆོག་དེའི་རྣམ་ཐར་ངོ་མཚར་བཀོད། །བལྟ་འདོད་ཏི་སེར་འགྲན་པའི་རི་བོའི་རྩེར། །ལེགས་བསྒྲོད་ཆོས་ཀྱི་གཏམ་གྱིས་བདག་ཡིད་ཚིམ། །དྭགས་ཀོང་རྙིང་མའི་རྡོར་གདན་རྩེ་ལེ་རུ། །རང་གཞན་ཕན་འདོད་ཕྱིན་པར་རབ་རྩམས་ཀྱང༌། །མི་བཟད་རྡོ་རྗེའི་ཚེར་མས་ལམ་བཅད་དེ། །ཡིད་ཀྱི་འདོད་པ་ཅུང་ཟད་
འགྲུབ་མ་གྱུར། །རང་གི་ལུས་སྲོག་སྐྱེད་བྱེད་དྲིན་ཅན་གཉིས། །བགྲང་གཞིའི་འཁུར་ལྕི་ཟུག་རྔུའི་ནད་ཀྱིས་གདུང༌། །ཉམ་ཐག་གྱུར་ལ་ཡིད་ཀྱི་མ་བཟོད་ནས། །སེམས་དང་བསྟུན་པའི་ཕན་ཐབས་ཅི་ནུས་བགྱིས། །ལུང་བསྟན་ནགས་ཁྲོད་བདེ་ཆེན་བསམ་འགྲུབ་ཏུ། །བླ་མས་འདོད་དགུའི་སྣེ་ལེན་ཕུན་ཚོགས་སྩལ། །རིམ་གྱིས་ཆུ་ཀླུང་གཡས་སུ་འཁྱིལ་བའི་གནས། །གང་དེར་ཕྱེད་གཉིས་ལོ་ལ་བདེ་བར་འཁོར། །ལམ་རིང་ཀུན་ཏུ་རབ་འཇིགས་འབྲུམ་ནད་ཀྱིས། །གདུང་བའི་སྐྱེ་བོས་གང་ཞིག་དབུགས་བྲལ་ཚོགས། །གྲམ་ལྟར་བརྡལ་བས་གཟུར་མེད་ཁོ་ནའི་དབུས། །བསྒྲོད་རུང་དྲི་ཙམ་མ་གོས་བླ་མའི་དྲིན། །འགའ་ཞིག་ཟང་ཟིང་ཆེད་དུ་ལུས་དང་སྲོག གཏན་གྱི་འདུན་མར་བཅས་པ་གཏོང་ནུས་ན། །ཁོ་བོ་དམ་ཆོས་ཁོ་ནའི་ཆེད་ཉིད་འདིར། །སྒྱུ་མའི་ལུས་ཙམ་བོར་ཡང་ཅི་ལྟོ་སྙམ། །འོན་ཀྱང་ད་དུང་ཟབ་ཆོས་
ཤ་སྟག་ཅིག །ཉམས་སུ་ལེན་པ་ཉིན་སྐར་ལྟར་མཆིས་ཀྱང༌། །འཆད་དང་ཉན་པའི་སྲོལ་ཀ་མ་ནུབ་ཙམ། །ཚེ་ལྷག་ཇི་ཙམ་ཐུབ་པར་བྱའོ་སྙམ། །དྲིན་ཅན་བླ་མའི་ཞལ་རས་གསལ་ལམ་ལམ། །བསྟན་ཅིང་ཟབ་རྒྱས་ཆོས་ཀྱི་གསུངས་ལྷང་ལྷང༌། །སྩལ་བའི་བཀའ་དྲིན་ད་དུང་དྲན་ལམ་ལམ། །མོས་གུས་གདུང་བས་གསོལ་འདེབས་དབྱངས་ལྷང་ལྷང༌། །རྒྱུན་ལྡན་བོད་ལ་རྒྱུན་དུ་བརྩེར་དགོངས་ནས། །རབ་ཟབ་ཆོས་སྒོ་རབ་འབྱམས་མཐའ་ཡས་པའི། །སྨིན་གྲོལ་གདམས་པས་སྨིན་པའི་ཐུགས་རྗེ་ནི། །བདག་སོགས་འགྲོ་ལ་བདག་ཉིད་ཁྱོད་ཀྱིས་སྩོལ། །དཔལ་སྐད་གཉིས་སྨྲ་བའི་དབང་པོའི་དྲུང་དུ་ཟབ་ཆོས་ཀྱི་དགའ་སྟོན་དུ་གཉེར་བ་ཐོབ་པའི་ཚུལ་བརྗོད་པའི་ལེའུ་སྟེ་གསུམ་པའོ། ༈ །རྒྱལ་ཀུན་ཐུགས་རྗེ་ཡེ་ཤེས་ལྷ་ལམ་ལས། །ཟབ་གསལ་སྟོང་ཉིད་སྙིང་རྗེའི་དབྱར་རྔ་ལྡིར། །སྨིན་གྲོལ་ཟབ་
མོའི་སྦྲང་ཆར་འབེབས་མཛད་པའི། །རྣམ་འདྲེན་ཕྲེང་བར་དཀྲིགས་པས་དགེ་ལེགས་སྩོལ། ཀྱེ་མ། སྙིགས་ལས་ཆེས་སྙིགས་རྩོད་དུས་ཐ་མ་འདོར། །ལོང་བས་ལོང་འཁྲིད་བླ་མའི་མིང་ཁྲལ་བབས། །བདག་དང་བདག་འདྲའི་ཚུལ་འདིས་འགྲོ་ཕན་ནི། །ཤིན་ཏུ་དཀའ་མོད་འོན་ཀྱང་མོས་བློ་ཙམ། །འབད་པས་བཙལ་བའི་དམ་ཆོས་ནི། །དྲིན་ཅན་བླ་མ་མཆོག་རྣམས་ཀྱིས། །བརྩེར་དགོངས་ཟབ་ཆོས་རིན་ཆེན་ནོར། །འགའ་ཙམ་རང་སྐལ་ཐོབ་ཚུལ་བརྗོད། །གཞན་དུ་བདག་གི་རྟོགས་བརྗོད་རྣམ་པར་ཐར། །ངོ་མཚར་རྣམ་གྲངས་གང་ཡང་བསྟན་རྒྱུས་དབེན། །དེ་སླད་གདམས་པ་ཐོབ་ཚུལ་ས་བོན་ཙམ། །འདི་ནི་ངོ་མཚར་སྙིང་པོ་བཀོད་པ་ལགས། །འདི་དག་རང་ཆེ་འདོད་དང་ཟང་ཟིང་དང༌། །གྲགས་དང་སྙན་པ་བསྒྲུབ་སླད་མ་ཡིན་ཏེ། །སྐྱེ་དང་སྐྱེ་བར་རང་གཞན་ཕན་ཕྱིར་ཉིད། །ཁོ་ན་བསམ་ལས་ཐོས་ཚུལ་འདི་ལྟར་ལགས། ༈ །དེ་ཡང་ཁམས་གསུམ་ཆོས་
ཀྱི་རྒྱལ་པོ་དཔལ་གཙུག་ལག་རྒྱ་མཚོའི་ཞབས་དྲུང་དུ། བསྟན་པ་རིན་པོ་ཆེ་ལ་རབ་ཏུ་བྱུང་བའི་བསླབ་པ་གསུམ་ལས་དང་པོར་དགེ་བ་དགེ་བསྙེན། བར་དུ་དགེ་བ་དགེ་ཚུལ། ཐ་མར་དགེ་བ་དགེ་སློང་གི་སྡོམ་པ་རྣམས་དང༌། གཞན་ཡང་སྟོན་པའི་འཁྲུངས་རབས་བརྒྱ་རྩ། ཞི་བ་ལྷའི་བསླབ་བཏུས། བཀའ་གདམས་གླེགས་བམ་ཡོངས་རྫོགས་དང༌། རྒྱལ་བ་རྒྱ་མཚོ་ལྷ་ལྔ་པའི་གཏོར་དབང་ཞིང་བཀོད་མར་གྲགས་པ་དང༌། འཕགས་མ་ཡིད་བཞིན་འཁོར་ལོའི་རྗེས་གནང༌། ཚེས་བཅུའི་གཏོར་དབང༌། གྲུབ་ཐོབ་ཤངས་པ་ནས་བརྒྱུད་པའི་མགོན་པོ་ཕྱག་དྲུག་པའི་གཏོར་དབང་བར་ཆད་ཀུན་སེལ། ཕག་མོའི་ལྷ་ཁྲིད། རྗེ་བཙུན་མི་ཏྲ་ནས་བརྒྱུད་པའི་སྙིང་པོ་དོན་གསུམ་གྱི་ཁྲིད་དང༌། རྗེ་བཙུན་དམ་པ་དཔལ་གཙུག་ལག་འཕྲེང་བའི་བཀའ་འབུམ་ཡོངས་རྫོགས་པོ་སྟི་བཅོ་ལྔ་རྣམས་ཀྱི་ལྗགས་ལུང་བཀའ་གཏད་དང་བཅས་པ་ཐོབ། ༈ གཏེར་སྟོན་པདྨ་རིག་འཛིན་རྩལ་གྱི་
དྲུང་དུ། ཁོང་རང་གི་གཏེར་ཆོས་བླ་མ་ནོར་བུ་པད་ཕྲེང་གི་དབང་ལུང་བཀའ་གཏད་ཡོངས་རྫོགས་དང༌། རིག་འཛིན་ཞིག་པོ་གླིང་པའི་གཏེར་ཆོས་ཀྱི་ཚེ་སྒྲུབ་རྒྱལ་བ་འདུས་པ། གུ་རུ་ཞི་བ། བླ་མ་དྲག་པོ་གཏུམ་དྲག་མེ་འཁོར་དང་གནམ་ལྕགས་མེ་འཁོར། ཐུགས་རྗེ་ཆེན་པོ་འཁོར་བ་ལས་སྒྲོལ། དཔལ་བདེ་མཆོག་འཁོར་ལོ། རྟ་མགྲིན་ནཱ་ག་ཀླུ་འདུལ། ཕྱག་རྡོར་སྟོབས་པོ་ཆེ། ཟབ་པ་སྐོར་བདུན། རྫོགས་ཆེན་གསང་བ་སྙིང་ཐིག མཐའ་དམག་བཟློག་པའི་ཆོས་སྐོར། སྣང་རྩེ་བའི་བཀའ་འབུམ་ཐོར་བུ་དང༌། བཀའ་བརྒྱད་བདེ་གཤེགས་འདུས་པའི་རྒྱུད་ལུང་ཉི་ཤུ་རྩ་ལྔ། ཞི་ཁྲོ་གསང་བ་ཡོངས་རྫོགས་ཀྱི་སྐོར་ཁ་ཐོར། མྱང་གི་གཏེར་མགོན་ཕྱག་བཞིའི་ཆོས་སྐོར་ཆ་ཚང་གི་དབང་ལུང་སོགས་ཐོབ། ༈ རིག་འཛིན་ཆེན་པོ་འཇའ་མཚོན་སྙིང་པོའི་དྲུང་དུ། དེ་ཉིད་ཀྱི་གཏེར་ཆོས་ཚེ་སྒྲུབ་གནམ་ལྕགས་རྡོ་རྗེ། ཐུགས་རྗེ་ཆེན་པོ་ངན་སོང་རལ་གྲོལ། ཡང་ཟབ་དཀོན་མཆོག་
སྤྱི་འདུས། གསང་ལམ་བླ་སྒྲུབ། ཞི་ཁྲོ་ངོས་དོན་སྙིང་པོ། རྟ་ཕག་ཡིད་བཞིན་ནོར་བུ། ལམ་ཡིག་པདྨ་དཀར་པོ། དཔལ་མགོན་མ་ནིང་ནག་པོ་སོགས་མདོར་ན་གཏེར་ཆོས་ཡོངས་རྫོགས་དང༌། རྣམ་ཐར་ཕྱི་ནང་གསང་གསུམ་གྱི་སྐོར་ཐོབ། གཞན་ཡང༌། སྙིང་མ་རྒྱུད་འབུམ་ཁ་ཐོར་ཙམ་དང༌། མི་ཏྲ་བརྒྱ་རྩ་དང་སྒྲུབ་ཐབས་རྒྱ་མཚོ། བདེ་མཆོག་ལྷ་ལྔ་དང༌། ཕག་མོ་བདེན་གཉིས་ཞལ་གྱི་དབང༌། རྡོར་གླིང་གི་གཏེར་ཆོས་རྫོགས་ཆེན་ལྟ་བ་ཀློང་ཡངས། ཧཱུྃ་སྐོར་སྙིང་ཐིག དྲག་པོ་དམར་ཆུང༌། བཻ་རོའི་འདྲ་འབག་གཏེར་མ། མངའ་བདག་མྱང་གི་གཏེར་ཆོས་གུ་རུ་དྲག་པོ་དམར་ཆེན། མཁའ་འགྲོ་ཁྲོས་ནག འཇམ་དཔལ་ནཱ་ག་རཀྴ། དྲང་སྲོང་ལོག་ཏྲི་ཆར་ཁ་གདོང་ཟོར། ལྷ་མོ་སྤྱང་ཞོན་མའི་སྒྲུབ་སྐོར་སོགས་དང༌། གུ་རུའི་ཐུགས་སྒྲུབ་དང༌། རྣམ་ཐར་ཟངས་གླིང་མ་སོགས་ཐོབ། ཆོས་དབང་གི་བཀའ་འབུམ་དང་ན་ག་རཀྴ། ཆོས་དྲུག་སྲས་མཁར་མ། ཀུན་སྐྱོང་གླིང་པའི་སྙིང་པོ་སྙིང་ཏིག བྱང་གཏེར་གྱི་རྫོགས་ཆེན་དགོངས་པ་ཟང་ཐལ། ཐུགས་རྗེ་ཆེན་པོ་འགྲོ་བ་ཀུན་གྲོལ། བཤད་རྒྱུད། ཨོ་རྒྱན་གླིང་པའི་གཏེར་
ཆོས་པདྨ་ཐང་ཡིག་ཆེན་མོ་དང༌། བཀའ་ཐང་སྡེ་ལྔ། དྲི་མེད་ལྷུན་པོའི་གཏེར་མ་དོན་ཏིག་འགྲོ་བ་ཀུན་གྲོལ་དང༌། ཟབ་ཏིག་དགོངས་པ་རང་གྲོལ། ཚེ་སྒྲུབ་རྫོགས་ཆེན་མ། སྙིང་ཁྲག་ཐིག་ལེ་ལེའུ་ལྔ་པ། ཞང་ཁྲོམ་གྱི་ཚེ་བདག་ལྕགས་སྡིག ཀིང་ཀང་དམར་ཆུང༌། ཡང་ཟློག་མེ་ཡི་སྤུ་གྲི། ངག་འཁྲོལ་དང་སྐུ་གསུམ་ཟ་ཡིག་སོགས་དང༌། ༈ པདྨ་ལས་འབྲེལ་རྩལ་གྱི་གཏེར་མ་གཉན་པོ་ལྷ་གསུམ། ཁ་ལ་རྒྱས་འདེབས། བཟའ་བདུད་དང་ཞིང་སྐྱོང་གི་སྒྲུབ་སྐོར། གྲྭ་པ་མངོན་ཤེས་ཀྱི་གཏེར་མ་འཛམ་ལྷ་དམར་པོ་དང༌། ཞང་བློན་རྡོ་རྗེ་བདུད་འདུལ་གྱི་སྒྲུབ་སྐོར་སྲུང་བ་དྲག་པོ་བཞི་དྲིལ་སོགས་དང༌། གཏེར་སྟོན་སར་པཎ་ཕྱོགས་མེད་དུ་གྲགས་པའི་གཏེར་མ་འཇམ་དཔལ་རྫོགས་ཆེན། སངས་རྒྱས་གླིང་པའི་གཏེར་མ་གུ་རུ་དྲག་པོ། དྲི་མེད་ཀུན་དགའི་གཏེར་མ་བླ་རྫོགས་ཐུགས་གསུམ་ཚང་མ་དང༌། གཏེར་སྟོན་བཀའ་འབུམ་དང༌། མཚོ་རྒྱལ་གྱི་རྣམ་ཐར་ཆེན་
མོ། ཉི་ཟླ་སངས་རྒྱས་ཀྱི་གཏེར་མ་ཁ་ལ་རྒྱས་འདེབས། ཆོས་རྒྱལ་རིན་ཆེན་གླིང་པའི་གཏེར་མ་ཟབ་ཆོས་ནོར་བུ་སྐོར་ལྔ་ཚང་མ་དང༌། རྣམ་ཐར་བཀའ་འབུམ། འགྲོ་མགོན་དུང་མཚོ་རས་པའི་གཏེར་མ་རྫོགས་ཆེན་ཡང་ཏི་ནག་པོ། སེམས་ཁྲིད་ཡིད་བཞིན་ནོར་བུ། ཏྲག་ཤད་ཤོག་དྲིལ་བཅུ་གསུམ། རིག་འཛིན་རཏྣ་གླིང་པའི་གཏེར་མ་ཐུགས་སྒྲུབ་ཡང་སྙིང་འདུས་པ། ཚེ་སྒྲུབ། ཐུགས་རྗེ་ཆེན་པོ། རྟ་མགྲིན། ཟབ་ལམ་སྟེ། འདུས་པ་སྐོར་ལྔ་ཚང་མ། གུ་རུ་དྲག་པོ། ཚེས་བཅུའི་ཕན་ཡོན། ཕུར་པ་ཡང་གསང་བླ་མེད། མ་ནིང་རྣམ་མང་དམར་པོ། དམ་ཅན་སྒྲུབ་སྐོར་སོགས་དང༌། གཏེར་སྟོན་པདྨ་གླིང་པའི་རྫོགས་ཆེན་ཀུན་བཟང་དགོངས་པ་ཀུན་འདུས། ཕྱག་རྡོར་དྲེགས་འདུལ། གུ་རུ་དྲག་པོ་དམར་ཆེན། གཉལ་སྨད་མདོ་སྔགས་གླིང་པའི་རྫོགས་ཆེན་ཀུན་འདུས་རྒྱ་མཚོ། རྗེ་རིན་ཆེན་ཕུན་ཚོགས་ཀྱི་ཟབ་ཆོས་
དགོངས་པ་ཡང་ཟབ། ཡིད་བཞིན་ནོར་མཆོག རྣམ་ཐར་བཀའ་འབུམ་དང་བཅས་པ། གཡུ་ཐོག་སྙིང་ཐིག་སྡུག་བསྔལ་མུན་སེལ་གསོ་དཔྱད་ཀྱི་རྒྱུད་བཞི་མན་ངག་བྱེ་བ་རིང་བསྲེལ་དང་བཅས་པ། ཀརྨ་གུ་རུའི་སྒྲུབ་སྐོར། རླུང་འཁོར་དྲེགས་པ་ཉི་ཤུ། ཀླུ་སྒྲུབ་ཀྱི་རྒྱ་ནག་ཆུ་འཁོར། ཁ་འབར་མའི་གཏོར་ཆོག ཕྱག་རྡོར་ཨུ་ཙཱརྻའི་ཆོས་སྐོར། པཎ་ཆེན་ནགས་རིན་གྱི་པདྨ་ཚེ་ཁྲིད། ས་སྐྱ་པ་ནས་བརྒྱུད་པའི་ཁྲོ་རྒྱལ་རྨེ་བརྩེགས་ཀྱི་སྒྲུབ་ཐབས་ལས་ཚོགས་དང་བཅས་པ། བ་རི་ལོ་ཙཱ་བའི་མཁའ་འགྲོ་སེང་གདོང་མའི་སྐོར། མི་ཏྲ་ནས་བརྒྱུད་པའི་ཐུགས་རྗེ་ཆེན་པོའི་གསང་སྒྲུབ་དང༌། མི་ཏྲ་ཁྲིད་དྲུག བློ་སྦྱོང་དོན་བདུན་མ། བཀའ་གདམས་ཐིག་ལེ་བཅུ་དྲུག་གི་དབང༌། ཐུགས་རྗེ་ཆེན་པོ་རྒྱལ་བ་རྒྱ་མཚོའི་ཆོས་སྐོར། དབོན་སྟོན་སྐྱེར་སྒང་པའི་རྟ་མགྲིན། བྱང་སེམས་ཟླ་རྒྱལ་ནས་བརྒྱུད་པའི་རྟ་མགྲིན། ཞི་བ་ལྷའི་སྤྱོད་འཇུག །
ཇོ་བོའི་ཆོས་ཆུང་བརྒྱ་རྩ། ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར་དང་ལྔ་ལྡན། བསྲེ་བ་འབུམ་དཀར་འབུམ་ནག སྙིང་པོ་ནཱ་རོ་ཆོས་དྲུག ལབ་སྒྲོན་གྱི་གཅོད་ཡུལ། ཨོ་རྒྱན་པའི་རྡོ་རྗེ་གསུམ་གྱི་བསྙེན་སྒྲུབ། བདེ་མཆོག་སྙན་རྒྱུད་གསར་རྙིང༌། ཟབ་ཆོས་ཁྲིད་བརྒྱའི་བསྐོར། ཆོས་རྒྱལ་སྲོང་བཙན་བཀའ་འབུམ། ཇོ་བོའི་བྱང་ཆུབ་ལམ་སྒྲོན་གཞུང་འགྲེལ། འབྲོམ་གྱི་མི་ཆོས་གནད་ཕྲེང༌། པུ་ཏོ་པའི་དཔེ་ཆོས་རིན་ཆེན་སྤུངས་པ། ཇོ་བོའི་ལམ་ཡིག་ཆེན་མོ། རྗེ་བཙུན་མི་ལའི་མགུར་འབུམ་ཆེན་མོ། མཉམ་མེད་ཟླ་འོད་གཞོན་ནུའི་བཀའ་འབུམ་ཆ་ཚང༌། རས་ཆུང་བཀའ་འབུམ། ཕག་གྲུ་དང་སྟག་ལུང་ཐང་པ་ཆེན་པོའི་བཀའ་འབུམ། ཞང་བཀའ་བརྒྱད་མ་ལ་སོགས་བཀའ་འབུམ་ཆ་ཚང༌། འབྲི་གུང་སྐྱོབ་པ་རིན་པོ་ཆེའི་དགོངས་གཅིག་རྩ་འགྲེལ། རྒྱལ་དབང་ཀརྨ་པ་དུས་མཁྱེན་ནས་རྗེ་དགུ་པ་ཡན་
གྱི་བཀའ་འབུམ་ཕལ་མོ་ཆེ་དང༌། དཔལ་མཁའ་སྤྱོད་པ་སྤྱན་སྔ་རིན་པོ་ཆེ། གར་དབང་དཀོན་མཆོག་ཡན་ལག་རྣམས་ཀྱི་བཀའ་འབུམ། གྲུབ་ཐོབ་གླིང་རས། རྒྱ་རས། རྒོད་ཚང་པ། ལོ་རས་ཡང་དགོན་པ། རྩྭ་རི་རས་ཆེན། འབའ་ར་བ། གྲུབ་ཐོབ་མགོན་ཡེ། རྒྱལ་སྲས་ཐོགས་མེད། གྲུབ་ཐོབ་ཨ་རེ་དགའ་ཕྱི་མ། མདོ་ཁ་རས་པ། རྗེ་དབུས་སྨྱོན། ཆོས་བཟང་ཉི་མ། རྒྱལ་དབང་རྗེ། མི་ཕམ་པད་དཀར་ལྷ་བརྩེ་བ། རྒྱལ་དབང་ལྷུན་གྲུབ། རྒྱ་སྟོན་ཆོས་བཟང༌། སྒམ་པོ་བཀྲ་ཤིས་རྣམ་རྒྱལ་ནོར་བུ་རྒྱན་པ་སོགས་ཀྱི་རྣམ་ཐར་བཀའ་འབུམ། མཚུངས་མེད་སཱུརྻ་ཙནྡྲའི་བཀའ་འབུམ་རྒྱ་མཚོ་དགུ་སྐོར། ཀར་ལུགས་དང་འབྲུག་ལུགས་སྒམ་པོ་པ་སོགས་ཀྱི་ཆོས་སྤྱོད་རབ་གསལ། དྲུང་པ་ཀུ་ཅོར་བས་མཛད་པའི་བཀའ་རྒྱུད་གསེར་ཕྲེང༌། ར་ལོ་ན་རོ་ནས་བརྒྱུད་པའི་འཇིགས་བྱེད་སྐོར། བཀའ་གདམས་ཀྱི་གྲི་གུག་གཙོ་འཁོར་དང༌། རྒ་
ལོའི་ཕྱག་བཞི་པ། ཀར་ལུགས་ཀྱི་མ་མགོན། ས་སྐྱའི་གུར་ཞལ། བྱ་པའི་སྤུ་གྲི་སྐོར་གསུམ། གཡའ་བཟང་པའི་ལྷ་མོ་དང་དྲང་སྲོང་སྐོར་སོགས་བསྟན་སྲུང་གི་སྐོར་མང་པོ། གཞན་ཡང་བཀའ་འགྱུར་སོགས་མདོར་ནོ་རིག་འཛིན་དེ་ཉིད་ཀྱིས་གསན་ན་ཅོག་ཐམས་ཅད་ཀྱིས་ཀྱང་བཀའ་གཏད་རྗེས་སུ་གནང་བ་ཡོངས་སུ་རྫོགས་པ་བུམ་པ་གང་བྱོའི་ཚུལ་དུ་སྩལ་བར་མཛད་པའི་བཀའ་དྲིན་ཐོབ་བོ། གྲུབ་མཆོག་བསོད་ནམས་དབང་པོའི་དྲུང་དུ། བླ་མ་དགོངས་པ་འདུས་པའི་རྫོགས་ཆེན་སྙིང་པོ་གསེར་གྱི་ཡང་ཞུན་ཕྱག་ཆེན་ཀློང་ཡངས་མཐའ་བྲལ། ཟབ་མོ་བདུད་ཀྱི་གཅོད་ཡུལ་དང་བཅས་པའི་ཁྲིད་ཆེན་གསུམ་གའི་ཉམས་ཁྲིད་ཞིབ་རྒྱས་དང༌། ཀུན་སྐྱོང་གླིང་པའི་གཏེར་མ་རྡོར་སེམས་སྙིང་ཏིག ལས་འབྲེལ་རྩལ་གྱི་མཁའ་འགྲོ་སྙིང་ཏིག མཁས་པ་ཀློང་ཆེན་པའི་བླ་མ་ཡང་ཏིག །
ཟབ་མོ་ཡང་ཏིག ཌཱཀྐི་ཡང་ཏིག གྲུབ་ཐོབ་ཀརྨ་གླིང་པའི་བར་དོ་ཐོས་གྲོལ་གྱི་སྐོར་དང་བཅས་པ་རྣམས་ཀྱི་དབང་ལུང་ཁྲིད་ངོ་སྤྲོད་ལག་ལེན་ཞལ་གདམས་དང་བཅས་པ་མཐའ་དག་ཡོངས་སུ་རྫོགས་པ་དང༌། གཞན་ཡང༌། ཚེམ་བུ་པ་ནས་བརྒྱུད་པའི་དམ་ཁྲིད། སྟོན་པའི་སྐྱེས་རབས། ལས་འབྲེལ་རྩལ་གྱི་ཕྱག་རྡོར་དྲེགས་འདུལ། བསྟན་བཅོས་རིན་པོ་ཆེ་མཛོད་བདུན་དང་ངལ་གསོ་སྐོར་གསུམ་སོགས་ཀློང་ཆེན་པའི་གསུང་འབུམ་ཁ་འཐོར་ཐོབ་བོ། དྲིན་ཅན་མ་ཧཱ་ལོ་ཙཱ་བ་ངག་དབང་གཞན་ཕན་རྡོ་རྗེའི་དྲུང་དུ། འདུས་པ་མདོ་དབང་ཆེན་མོ་ཡོངས་སུ་རྫོགས་པ། ཞི་ཁྲོ་ན་རག་དོང་སྤྲུགས་ཀྱི་དབང༌། སྒྱུ་འཕྲུལ་ཞི་བའི་ཚེ་དབང་ཆེན་མོ་སོགས་མདོར་ན་དཀྱིལ་འཁོར་ཆེན་མོ་མདུན་ཅུ་རྩ་ལྔ་དུས་གཅིག་ཏུ་ཞལ་ཕྱེས་ཏེ། དེ་དག་གི་སྨིན་གྲོལ་བྱིན་རླབས་བཀའ་གཏད་ཡོངས་རྫོགས་ཕྱག་བཞེས་ཇི་བཞིན་མ་ནོར་མངོན་སུམ་
དུ་གཏན་ལ་ཕབས་ཏེ་སྐུ་དྲིན་དུ་སྩོལ་བར་མཛད། གཞན་ཡང༌། གསང་སྔགས་སྔ་འགྱུར་གྱི་རྒྱུད་འབུམ་པོད་ཆེན་བཞི་བཅུ་ཞེ་བཞི་རྣམས་ཀྱི་ལྗགས་ལུང་ཡི་གེ་ན་གཅིག་ཀྱང་མ་ལུས་པར་གནང་བ་དང༌། ༈ བཀའ་བརྒྱད་བདེ་གཤེགས་འདུས་པ། མྱང་གཏེར་གྱི་པདྨ་ལམ་རིམ། ༈ ཆོས་དབང་གི་གཏེར་མའི་བླ་མ་ཡོངས་རྫོགས་གསང་བ་གྲུབ་ཆེན་གྱི་སྐོར། ཁ་འབར་དཀར་ནག་ཁྲ་གསུམ། ༈ རིག་འཛིན་རྒོད་ལྡེམ་ཅན་གྱི་བཀའ་བརྒྱད་རང་བྱུང་རང་ཤར། ཕུར་པ་ཆེ་མཆོག་དང་ལྕགས་ཁང་མ་གཉིས། ཐུགས་སྒྲུབ་ཆེན་མོ། ༈ རིག་འཛིན་གདུང་སྒྲུབ། ལས་འབྲེལ་རྩལ་གྱི་བླ་མ་སྤྱི་འདུས་འཁོར་ལོ། གཟའ་བདུད་ཀྱི་སྐོར། གནོད་སྦྱིན་དམར་ནག་གི་སྒྲུབ་སྐོར། ༈ རཏྣ་གླིང་པའི་ཟབ་ཆོས་ཀློང་གསལ་སྙིང་ཏིག གཟའ་སྒྲུབ། བཀའ་སྲུང་ཁྲོས་ནག གསང་བ་རག་གདོང་གི་ལས་རྒྱུད་ཆེན་མོ། ༈ པདྨ་གླིང་པའི་
བླ་མ་ནོར་བུ་རྒྱ་མཚོ། ཀློང་གསལ་གསང་བ་ཡང་བཅུད། ཡང་གསང་རྒྱུད་བུ་ཆུང༌། བཀའ་བརྒྱད་ཐུགས་ཀྱི་མེ་ལོང༌། ཐུགས་རྗེ་ཆེན་མོ་མུན་སེལ་སྒྲོན་མེ། ཚེ་ཁྲིད་ནོར་བུ་ལམ་ཁྱེར། ཕུར་པ། སྨན་སྒྲུབ། རྟ་མགྲིན་དཔའ་གཅིག བཀའ་སྲུང་དང་མངོན་སྤྱོད་ཀྱི་སྐོར། ༈ གཏེར་སྟོན་བསྟན་གཉིས་གླིང་པའི་བླ་མ་བྱིན་རླབས་ཀུན་འདུས། ཡང་དག་དགོངས་འདུས། ཚེ་སྒྲུབ་སྲོག་འཛིན་ཀུན་འདུས་དང༌། ཙིཏྟའི་རྒྱ་ཅན་གཉིས། རྫོགས་ཆེན། ཕྱག་ཆེན། གཅོད་ཡུལ། དུས་འཁོར། བོན་ཁྲིད། བཀའ་སྲུང་དྲག་སྔགས་དང་འཇོམས་བྱེད། འོད་གསལ་ཐིག་ལེ་ཉག་གཅིག རྒྱབ་ཆོས་རྒྱུ་འབྲས་ཕྲ་ཞིབ་དང་བཅས་པ་རྣམས་དང༌། ༈ གཏེར་སྟོན་ཚེ་བསྟན་རྒྱལ་མཚན་གྱི་གུ་རུ་སྤྱན་མང་སྒྲུབ་སྐོར། འཇམ་དབྱངས་བླ་མའི་གཏེར་མ་རྩ་གསུམ་དྲིལ་སྒྲུབ་ཀྱི་ཆོས་སྐོར། ༈ པཎ་ཆེན་པདྨ་དབང་རྒྱལ་གྱི་གུ་རུ་དྲག་པོ་ཡང་གསང་རྡོ་རྗེ་འབར་བ་དང༌། ཟབ་
ཆོས་པདྨ་སྙིང་ཐིག མཉམ་མེད་བསམ་གཏན་མ་གླིང་པའི་ཨ་ཏིའི་སྐོར། ༈ རིག་འཛིན་ནམ་མཁར་སྤྱོད་པའི་གཏེར་མ་བླ་སྒྲུབ་ཀྱི་རྩ་བ། སྣང་རྩེ་བའི་སྒྲོལ་མ་དམར་མོ་དང༌། བཀའ་འབུམ། ༈ རྫོགས་ཆེན་རྒྱུད་བཅུ་བདུན་གྱི་དབང་མོ་ཆེ། ཡང་ཏི་གསེར་གྱི་འབྲུ་གཅིག་གི་དབང་ལུང་ཉམས་ཁྲིད་དང་བཅས་པ། འོད་གསལ་སྒྲོན་མ་དྲུག་སྐོར། སྙན་རྒྱུད་རྡོ་རྗེ་ཟམ་པ། ཀརྨ་སྙིང་ཐིག གསང་འགྲེལ་ཕྱོགས་བཅུ་མུན་སེལ་སོགས་དྲི་མེད་པའི་བཀའ་འབུམ། ༈ ལང་ལབ་ནས་བརྒྱུད་པའི་ཕྱུར་པ་གཅིག་རྒྱུད་ལ། དུག་དབང་རྡོ་རྗེ་ཕ་ལམ། གནུབ་བན་ནས་བརྒྱུད་པའི་བཀའ་སྲུག་བརྒྱད་ཀྱི་སྒྲུབ་སྐོར། བསྲུགས་བ་འདམ་ཤོད་མ། ཞི་བ་འཚོ་ནས་རྒྱུད་པའི་འོད་ཟེར་དྲི་མེད་ཀྱི་སྐོར། མཉམ་མེད་སོག་ཟློག་པའི་བཀའ་འབུམ་ཁ་ཐོར་སོགས་ཐོབ་ཅིང༌། གཞན་ཡང་ཐ་སྙད་རིག་གནས་ཀྱི་སྐོར་ཕྲན་བུ་ས་བོན་ཐོས་པ་ཐམས་ཅད་ཀྱང་རྗེ་
འདི་ཉིད་ཀྱི་བཀའ་དྲིན་ཁོ་ནའོ། མཚུངས་མེད་རིག་འཛིན་སྙིང་པོའི་དྲུང་དུ། བླ་མ་དགོངས་པ་འདུས་པའི་དབང་ཆེན་དབང་ཕྲན་རྒྱུད་ལུང་མན་ངག་དང་བཅས་པའི་ཕྱག་བཞེས་དྲི་མ་མེད་པ་ཡོངས་སུ་རྫོགས་པ་དང་ལམ་འབྲས་བུ་དང་བཅས་པའི་ཟབ་ཁྲིད། སངས་རྒྱས་གླིང་པའི་གཏེར་མའི་ཐུགས་རྗེ་ཆེན་པོ་ཕྱི་རྒྱལ་པོ་ལུགས། ནང་ནོར་བུ་ལུགས། ཡང་གསང་བླ་ན་མེད་པ། ལམ་རིམ་འོད་ཀྱི་དྲྭ་བ་དང་བཅས་པ། བཀའ་ཐང་ཆེན་མོ། ཕུར་སྒྲུབ་ཐུགས་ཀྱི་སྙིང་ཁུ། ཚེ་སྒྲུབ་ཉི་ཟླ་ཁ་སྦྱོར། མཁའ་འགྲོ་ཁྲོས་ནག་དང་སྤྱི་རྒྱུད་རྒྱ་མཚོ། ཕྱག་རྡོར་ཁྱུང་གསང་བ། ཡང་ཁོ་ལ་རྟ་མགྲིན་ལྕགས་རལ། རྣམ་སྲས་གཉིས། གཞན་ཡང་སངས་རྒྱས་གླིང་པའི་གཏེར་ཕྲན་མཐའ་དག་དང༌། བི་མ་ལའི་སྙིང་ཐིག་ཟབ་པ་པོད་བཞི་མཛོད་བདུན་སྐོར་ཁ་ཡར་དང་བཅས་པ་ཐོབ་བོ། གཞན་ཡང་ཟབ་ཆོས་ཀྱི་འབྲེལ་པ་ཐོབ་པ་ནི། ༈ སྒམ་པོ་པ་མཆོག་སྤྲུལ་
མི་ཕམ་ཆོས་ཀྱི་དབང་ཕྱུག་གི་དྲུང་དུ། ལམ་ཟབ་བླ་མའི་རྣལ་འབྱོར་དང༌། གྲུབ་རྒྱལ་མ་ནས་བརྒྱུད་པའི་ཚེ་དབང་སོགས་ཐོབ། ༈ རིན་པོ་ཆེ་ཀརྨ་ལེགས་པའི་དྲུང་དུ། ཐེག་ཆེན་བྱང་སྡོམ་གྱི་ཆོ་ག་ཞིབ་རྒྱས་སུ་སྩལ་བ་ཐོབ། ༈ ཀུན་མཁྱེན་གསུང་སྤྲུལ་མཆོག་གི་དྲུང་དུ། ཀློང་ཆེན་པའི་མགུར་འབུམ་སོགས་ཐོབ། ༈ ལྷོ་བྲག་སྣ་བོ་ཆོས་རྗེའི་དྲུང་དུ། བདེར་འདུས་ཀྱི་རྩ་རྒྱུད་ཆེན་མོའི་ཆོས་འབྲེལ་རྒྱལ་པོའི་བླ་དཔེ་དངོས་ཀྱི་ཐོག་ནས་ཞུས། ༈ གནས་བཀྲ་ཤིས་རབ་བརྟན་དུ་ཆོས་དབང་གི་གདུང་རབས་བརྒྱད་པའི་དྲུང་དུ། བཀའ་བརྒྱད་གསང་བ་ཡོངས་རྫོགས་དང༌། བླ་མའི་ཐུགས་སྒྲུབ་གསང་བ་འདུས་པ། དཔལ་མགོན་མ་ནིང་ཆོས་སྐོར་སོགས་ཐོབ། ༈ སངས་རྒྱས་གླིང་པའི་གདུང་རབས་བདུན་པ་ཀརྨ་གསང་སྔགས་བསྟན་འཛིན་པའི་དྲུང་དུ། རྫོགས་ཆེན་སྙིང་པོ་བསྡུས་པའི་སྐོར་ཞུས། ༈
ཆོས་རྗེ་རྫོགས་ཆེན་པ་འོད་གསལ་ནམ་མཁའ་འབྲུག་སྒྲའི་དྲུང་དུ། བྱང་གཏེར་གྱི་ཚེ་སྒྲུབ་ལྕགས་སྡོང་མའི་དབང་ཐོབ། ༈ ཀཿཐོག་པདྨ་བློ་གྲོས་པའི་དྲུང་དུ། བཀའ་བརྒྱད་བདེ་གཤེགས་འདུས་པའི་པོད་ལུང་བཀའ་གཏད་དང་བཅས་པ་ཐོབ། ༈ ཆོས་ཀྱི་རྗེ་རིག་འཛིན་མཆོག་གྲུབ་རྣམ་རྒྱལ་གྱི་དྲུང་དུ། རྒྱུད་བཅུ་བདུན་གྱི་ལྗགས་ལུང༌། དགོངས་འདུས་ཀྱི་དོན་དབང་དང༌། བྱིན་རླབས་གཏོར་མའི་བརྡ་དབང༌། ཚེ་ཁྲིད་རྡོ་རྗེ་ཕྲེང་བ། འཇམ་དཀར་གྱི་རྗེས་གནང༌། ཆོས་དབང་ལུགས་ཀྱི་གུར་དྲག་གི་དབང༌། ཐུགས་རྗེ་ཆེན་པོ་ཡང་སྙིང་འདུས་པའི་དབང་སོགས་ཐོབ། གུ་རུ་ཨོ་རྒྱན་བསྟན་འཛིན་པ་ལ་དགོངས་འདུས་ཚར་གཅིག་པ་དང༌། ཡང་སྙིང་འདུས་པའི་སྐོར་གྱི་ལྗགས་ལུང་ཐོབ། བླ་མ་ངག་གི་དབང་པོའི་དྲུང་དུ། ཆོས་དབང་གི་དྲག་པོའི་སྐོར་དང༌། སངས་རྒྱས་གླིང་པའི་འཇམ་དཔལ་དཀར་ནག་ཁྲ་གསུམ། གཤིན་རྗེ་ཕ་རོལ་རྒོལ་འཇོམས། ཚེ་ཁྲིད་རྡོར་ཕྲེང༌། དམ་ཚིག་གསལ་སྐྲ་སོགས་
མང་དུ་ཐོབ། དྲིན་ཅན་དྷརྨའི་མཚན་ཅན་གྱི་དྲུང་དུ། དགོངས་འདུས་ཀྱི་པོད་ལུང༌། གསང་བ་སྙིང་པོའི་གཡུང་འགྲེལ་བསྐང་གསོ་ཆོས་སྤྱོད་སྐོར་དང༌། མན་ངག་གི་སྐོར་བསམ་གྱིས་མི་ཁྱབ་པ་དང༌། ཁོང་རང་གི་གང་གསན་ཐམས་ཅད་ཀྱི་བཀའ་གཏད་བྱིན་རླབས་ནན་དུ་སྩལ་བ་ཐོབ་པ་སྟེ། མདོར་ན་ཕྱི་ཐོས་བསམ་དང་རིག་གནས་ཀྱི་ཕྱོགས་ནས་སྐུ་དྲིན་ཆེ་བ་བདུན། ནང་གསང་སྔགས་ལག་ལེན་གྱི་ཕྱོགས་ནས་སྐུ་དྲིན་ཆེ་བ་གསུམ། དོན་དམ་པའི་ཡེ་ཤེས་སངས་རྒྱས་ལག་བཅང་དུ་ངོ་སྤྲོད་པའི་སྐུ་དྲིན་མཆོག་ཏུ་གྱུར་པ་གཉིས། ཐུན་མོང་ཟབ་ཆོས་དབང་ལུང་ཆོས་འབྲེལ་གྱི་བླ་མ་བཅོ་བརྒྱད་དང་བཅས་པ་རྣམས་ཀྱི་བཀའ་དྲིན་ལས། ཕྱོགས་མེད་ཀྱི་ཆོས་ལ་མོས་པ་ཐོབ་ཅིང་ལོག་ལྟའི་ལས་ངན་མི་གསོག་པར་དལ་འབྱོར་ཐོབ་པ་དོན་མེད་དུ་མ་གྱུར་ཙམ་འདི་བདག་གི་རྣམ་ཐར་གྱི་བཟང་ཤོས་སུ་རློམ་མོ། ༈ །སྔོན་བྱོན་
གྲུབ་མཆོག་རིག་འཛིན་མཐའ་ཡས་ཀུན། །དམ་པའི་ཟབ་ཆོས་ཚིགས་སུ་བཅད་པ་ནི། གཅིག་ཙམ་ཆེད་དུ་ལུས་སྲོག་རྒྱལ་སྲིད་དང༌། །ལོངས་སྤྱོད་ཅི་མཆིས་བཏང་ནས་མཉན་པར་མཛད། །དེང་སང་བསྐལ་མཐར་སྐྱེ་འགྲོ་ལས་སྒྲིབ་ཚན། །ཆེས་འཐུག་བག་ཆགས་ངན་གོམས་དབང་བཙན་ཆེ། །བཤེས་གཉེན་བཟང་དཀོན་རྙེད་ཀྱང་དད་ལྡན་དཀོན། །ཆོས་ལས་ཟན་རྡོག་འདམས་པ་ཆེས་ཆེར་མང༌། །བདག་ནི་དམ་ཆོས་དྲི་མེད་སུས་སྟོན་པར། །མོས་དང་དཀོན་པའི་འདུ་ཤེས་ཡོད་ནའང༌། །སྐལ་བ་དམན་མཐུས་རྒྱ་ཆེར་ཐོས་མ་གྱུར། །དེ་ཕྱིར་གང་ཐོབ་ཆོས་ཀྱི་རྣམ་གྲངས་ཀྱི། །མཚན་ཙམ་བརྗོད་འདིའང་མ་རྒན་འགྲོ་མང་འདིའི། །མ་རིག་མུན་པ་བསལ་ཞིང་ཐར་ལམ་གྱི། །ཉེ་རྒྱུའི་ས་བོན་ཉིད་དུ་འགྱུར་སྨོན་པས། །ཚུལ་འདི་ཡི་གེའི་ལམ་དུ་བཀོད་པ་ལགས། །སླད་ཀྱི་བློ་གསལ་སྐྱེས་བུའི་ཚོགས་རྣམས་ཀྱང༌། །མ་ནོར་
མཚན་ལྡན་བླ་མ་བཙལ་བ་གཅེས། །རྙེད་ནས་འགྱུར་མེད་གུས་པས་བརྟེན་པ་གཅེས། །གདམས་པའི་བཅུད་ལེན་ཉམས་ཆགས་མེད་པ་གཅེས། །གང་ཞུས་ཉམས་ལེན་ཐོག་ཏུ་ཁེལ་བ་གཅེས། །ཐེ་ཚོམ་སྒྲོ་འདོགས་ཞུན་ཐར་ཆོད་པ་གཅེས། །ཐོས་བསམ་སྒོམ་པའི་བྱས་ཡུས་མེད་པ་གཅེས། །ནམ་གཞག་གཏན་འདུན་ཆོས་ཀྱིས་བསྒྲུབ་པ་གཅེས། །གཅེས་པ་བདུན་འདི་ཁོ་བོའི་སྙིང་གཏམ་ལགས། །སྙིང་གཏམ་གདམས་ངག་སེམས་ལ་བཤད་བཤད་ཀྱང༌། རང་གི་ཚེ་ཕྱེད་གཡེང་བའི་ངང་དུ་སོང༌། །ད་ནས་ཚེ་དང་སྒྲུབ་པ་མཉམ་པར་ཤོག། ཅེས་དྲིན་ཅན་གྱི་རྣམ་འདྲེན་དམ་པ་དག་གི་དྲུང་དུ་ཟབ་ཆོས་ཀྱི་བདུད་རྩི་ཅུང་ཟད་ཐོབ་ཚུལ་བརྗོད་པའི་ལེའུ་སྟེ་བཞི་པའོ། ༈ །ད་ནི་བསམ་པ་སེམས་བསྐྱེད་ཀྱི་ཀུན་ནས་བླངས་ཏེ་དམ་པའི་ཆོས་ཀྱི་སྒོ་ནས་གཞན་ཕན་ཅུང་ཟད་བགྱིས་པའི་ཚུལ་བརྗོད་པ་ལའང་
སྤྱིར་སྐྱེས་བུ་དམ་པ་རྣམས་ཀྱི་རྣམ་པར་ཐར་པའི་བརྗོད་བྱའི་གཙོ་བོ་ཉིད་དུ་གྱུར་པ་ནི་རང་དོན་དུ་ཐོས་བསམ་སྒོམ་གསུམ་དང༌། གཞན་དོན་དུ་འཆད་རྩོད་རྩོམ་གསུམ་གྱི་མཛད་པ་རྒྱ་ཆེན་པོས་བསྟན་འགྲོའི་ཕན་བདེ་སྒྲུབས་ཚུལ་བརྗོད་པ་ཉིད་ཡིན་ནའང༌། བདག་ལྟ་བུ་ལས་ཉོན་གྱི་ཕུང་པོ་དང་འཁྲུལ་རྟོག་གི་ཡོ་ལང་ལ་སྤྱོད་པའི་རང་བཞིན་ཁོ་ནའི་གནས་ལུགས་འདི་ལྟ་བུའི་ཚུལ་དང་བརྟུལ་ཞུགས་ནི་མཁས་བླུན་མཐའ་དག་གིས་མངོན་སུམ་དུ་གཟིགས་ཡུལ་དུ་གྱུར་བཞིན་པ་འདི་ཉིད་ལས་གཞན་པའི་རྟོགས་བརྗོད་བྱ་རྒྱུས་དབེན་ཞིང༌། འོན་ཀྱང་གནས་སྐབས་ཀྱི་རང་ཚུལ་ལྷུག་པར་མ་བརྗོད་ན་བསྐུལ་བ་པོ་ཡི་དགོངས་པ་མི་རྫོགས་ཚེ། དེ་ཚུལ་འགའ་ཞིག་གླེང་བར་བགྱི་ན། འདི་ལ་ཡང་རང་དོན་དང་གཞན་དོན་གཉིས་ཀྱི་དང་པོ་རང་དོན་དུ་དབེན་པ་བསྟན་ཚུལ་ནི། དེ་ཡང་རང་ལོ་གཞོན་ནུའི་དུས་ནས་མི་མེད་དབེན་པར་སྤྲོ་བ་
ཞིག་ནི་ཐོག་མ་ནས་ཡོད་དེ། ལོ་གསུམ་བཞི་ཙམ་ལོན་པའི་དུས་ནས་ཀྱང་ཕ་མ་དང་བྱིས་པ་ཟླ་བོ་སོགས་མེད་པ་གཅིག་རང་དུ་ལྟ་སྟངས་བྱས་ནས་བསྡད་པའི་དབང་གིས་ཡུལ་མི་རྣམས་ཀྱི་སྒོམ་ཆེན་པར་འབོད་པ་དང༌། རི་ཁྲོད་དང་བྲག་ཕུག་སྒོམ་ཁང་སོགས་མཐོང་བ་དང་གླེང་བ་སོགས་ཀྱིས་ཡིད་འཕྲོག་པ་དང༌། རྒྱལ་བ་གོང་མ་རྣམས་ཀྱི་རྣམ་ཐར་སོགས་མཐོང་བའི་ཚེ་ཡང༌། མཛད་པ་ཕྲིན་ལས་གཞན་གང་ལས་ཀྱང་མི་མེད་ཀྱི་ལུང་སྟོངས་སུ་བྱ་བཏང་ཤ་སྟག་གིས་སྒྲུབ་པ་མཛད་རབས་རྣམས་ལ་ལྷག་པར་ཡིད་སྨོན་ཞིང༌། དེ་མཐུས་རྗེ་བཙུན་མི་ལ་དང༌། རྒྱལ་བ་རྨོག་པ་སོགས་ཀྱི་རྣམ་ཐར་དང༌། རྒོད་ཚང་པ་མགོན་པོ་རྡོ་རྗེ་དང༌། རྒྱལ་སྲས་ཐོགས་མེད་དཔལ་བཟང་པོ་སོགས་ཀྱིས་རང་ལས་གཞན་གཅེས་དང༌། གྲུབ་མཐའི་རིགས་སུ་གྱུར་ཚད་ལ་དག་སྣང་ཕྱོགས་མེད་དང༌། བཟང་ངན་འབྲིང་གསུམ་གོང་དུ་
འཁུར་བའི་དམ་བཅའ་སོགས་ཀྱི་མཛད་ཚུལ་རྣམས་ལ་ཆེས་སྨོན་ཞིང་མོས་པ་ཆེ་བར་ཡོད་ཀྱང༌། འཁོས་ཀ་མེད་རུང་བླ་ཚུགས་འཛིན་དགོས་པའི་རྣམ་པ་དང༌། སྐུ་སྐྱེར་མིང་དུ་བཏགས་ནས་ཟང་ཟིང་འཚོལ་ཐབས་ལ་ཚེ་ཕྱེད་འདའ་བ་ཞིག་བྱེད་དགོས་པར་སྔོན་ལས་ཀྱི་གྲུབ་ཚེ་འདོར་བར་དཀའ་བ་ཞིག་དང༌། དེ་ལ་བརྟེན་པས་དགེ་སྦྱོར་དང་སྒྲུབ་པའི་རིགས་ཚུལ་མཐུན་ཞིག་ནི་ནམ་ཡང་དཀའ་བར་བྱུང་ལ། འོན་ཀྱང་མཚམས་དང་བསྙེན་སྒྲུབ་ཀྱི་ཐོག་མ་ནི། རང་ལོ་བཅུ་གཅིག་གི་སྐབས་ཤིག་ཏུ་ཚེ་ཁྲིད་རྡོ་རྗེ་ཕྲེང་བའི་གསང་སྒྲུབ་ཀྱི་བཟླས་པ་འབྲུ་འབུམ་ཞིག་བཏང་བས། རྨི་ལྟས་ཀྱང་བཟང་བར་བྱུང་ཞིང༌། དེ་ནས་བཟུང་སྟེ་མཚམས་དང་བསྙེན་སྒྲུབ་ཀྱི་རིགས་གང་བྱེད་ཀྱང་བར་ཆད་མེད་པའི་རྟེན་འབྲེལ་འགྲིགས། དེ་ནས་རིམ་པ་བཞིན་དུ་བསྙེན་སྒྲུབ་ཀྱི་འབྲེལ་པ་ཐོས་པ་ལ། ཐུགས་སྒྲུབ་ཡང་སྙིང་འདུས་པའི་གུ་རུ་ཞི་
བ་ལ་གྲངས་བསྙེན་གསུམ་ལྷག་ཙམ་དང༌། ཡང་ཟབ་དཀོན་མཆོག་སྤྱི་འདུས་ལ་འབུམ་ཚོ་བརྒྱ་དང་ཉེར་བརྒྱད། དེ་ཉིད་ཀྱི་གུ་རུ་དྲག་སྒྲུབ་ལ་གྲངས་བསྙེན་བཞི་དང༌། མཁའ་འགྲོ་སེང་གདོང་མ་ལ་འབུམ་ཕྲག་བཅུ་བདུན་སོང་ཚེ། གོང་གི་ལེའུ་གཉིས་པར་བཤད་པ་བཞིན། རྨི་ལམ་ན་སེང་གདོང་མ་སྐུ་མདོག་དཀར་མོ་ཞིག་གསལ་བར་མཐོང་ངོ༌། ཡང་དེ་དུས་ལན་ཞིག་ཉམས་ཀྱི་སྣང་བ་ལ་མདུན་གྱི་ནམ་མཁར་རྒྱལ་ཆེན་རྣམ་སྲས་སེང་གེ་སྔོན་པོ་ལ་ཆིབས་པ་ཁྲུ་གང་གི་ཚད་ཙམ་ཞིག་ཡུན་རིང་དུ་མཐོང་ཞིང༌། དེ་ཉིད་བསྒྲུབས་ན་སྒྲུབ་ཐག་ཉེ་བ་ཙམ་ཡོང་ཤས་ཁ་ཡང༌། མཆོག་གི་དངོས་གྲུབ་གཅིག་མ་ཐོབ་ན་ཐུན་མོང་གི་ཟས་ནོར་བསྒྲུབ་པ་ལ་སྙིང་པོ་མེད་པར་བསམ་ནས་རྩོལ་བས་སྒྲུབ་པ་སོགས་མ་བྱས། ཡང༌། རེ་ཞིག་རྒྱབ་མཐའ་བྲག་ཕུག་ཏུ་གུ་རུ་ཞི་བསྙེན་བྱེད་ཚེ་གཟུགས་
མེད་ཀྱི་སྒྲ་ལས་བཛྲ་གུ་རུའི་འཛབ་དབྱངས་དིར་དིར་བ་རྒྱུན་ཆགས་སུ་ཐོས་པ་བྱུང་རུང༌། གཞན་ལ་བཤད་ན་ཟོག་མཐོང་ལས་མི་ཡོང་བར་བསམ་ནས་མ་བརྗོད། འདག་འབྱར་ལོ་གསུམ་པའི་སྐབས་ཤིག་ཏུ་ཐུགས་རྗེ་ཆེན་པོ་ངན་སོང་རང་གྲོལ་གྱི་རིལ་བུ་དང་ཁྲུས་ཆབ་ལ་བརྟེན་པའི་སྒྲུབ་པ་ཟླ་བ་གསུམ་བྱས་པའི་ཚེ། བཅུ་གཅིག་ཞལ་རྩ་ཕྱག་བརྒྱད་པ་ཞིག་གསལ་བར་མཐོང་བ་དང༌། སྒྲུབ་པ་འཐོན་པའི་ཉིན་སྒྲུབ་ཁང་ལ་ཤར་ཕྱོགས་ནས་འཇའ་ཁ་དོག་ལྔ་ལྡན་ཡུན་རིང་དུ་ཟུག་པ་དང༌། དེ་དང་དུས་མཉམ་དུ་རང་གི་སྤང་ཐོག་རྩེར་བྱེའུ་སྔར་མ་མཐོང་བའི་སྤུ་མདོག་འཇའ་འོད་འཁྱུག་པ་གཅིག་གི་སྐད་འགྱུར་རིགས་མི་གཅིག་པ་མང་པོ་སྒྲོག་པ་ཡང་བྱུང༌། རྩ་གསུམ་གྱི་བསྙེན་པའི་སྐབས་ཀྱི་ཚེས་བརྒྱད་ཀྱི་སྲོད་ཡོལ་ཙམ་ལ་གང་ནས་ཡོངས་དོན་མེད་པར་བདག་གི་སྟེང་ནས་མར་ལ།
ནས་དཀར་མོ་སྙིམ་པ་གང་ཙམ་ཞིག་ཤར་གྱི་བྱུང་སྟེ་མགོ་དང་སྒལ་ཁུངས་སུ་བབ་བྱུང་བ། དེ་དུས་སུ་ཉམས་སྣང་མ་བྱུང་སྟེ། རྗེས་སོར་བསམ་པས་དངོས་གྲུབ་ཀྱི་ལྟས་སུ་གོ་ཡང་བླ་བྲང་གི་དབུ་རྩེར་ཚེ་སྒྲུབ་ལྕགས་ཀྱི་རི་བོར་བསྙེན་པ་བྱེད་ཚེ། ཉིན་བྱེད་ཡིད་ལ་མེད་པར་མི་སུས་ཀྱང་མ་ཁུར་བར་བདག་གི་མདུན་དུ་གན་སྤོས་དྲི་ངད་གཞན་ལས་ཁྱད་དུ་འཕགས་པ་མཐོ་གང་ཙམ་ཞིག་རང་བཞིན་དུ་འབར་བ་ཡང་བྱུང༌། མདོར་ན་འདི་འདྲ་བའི་ཡ་མཚན་གྱིས་ལྟས་ཕྲན་བུ་མཐོང་བ་འགའ་ཞིག་བྱུང་རུང༌། སྐྱེ་འགྲོ་རྣམས་ལོག་པར་ལྟ་བ་ལ་ཆེས་གོམས་པས། སྔོན་བྱོན་གྱི་གྲུབ་ཐོབ་རྣམས་ཀྱིས་རྩོད་མེད་ཀྱི་གྲུབ་རྟགས་ནམ་མཁའ་ལ་བྱ་བཞིན་འཕུར་ཞིང༌། ཆུ་ལ་ངང་པ་ལྟར་གཤེགས། རི་བྲག་ཐམས་ཅད་ཟང་ཐལ་དུ་འཕུག་པ་སོགས་མཛད་པ་ལ་ཡང་བསྐུར་པ་འདེབས་པ་ཆེས་མང་བར་བྱུང་ན། བདག་འདྲའི་འཁྲུལ་
རྟོག་བཟང་ཤར་ཕྲན་བུ་འདྲ་བ་གཞན་ལ་བཤད་རུང་སྡིག་གསོག་གི་རྒྱུ་ལས་མི་ཡོང་བར་དངོས་སུ་གྲུབ་ཚེ། མི་སྨྲ་བའི་བརྟུལ་ཞུགས་ཁོ་ན་ཁེ་ཆེ་བར་མཐོང་ངོ༌། དེ་ལྟར་གོང་གི་འཕྲོ་བཞིན་བླ་མ་དགོངས་པ་འདུས་པའི་རྩ་བསྙེན་ཚ་བ་དམར་ཐག་ལ་ཟླས་པ་དུང་ཕྱུར་ཐེམ་པ་ཞིག་བྱ་བར་སེམས་ཀྱང་རང་དབང་མ་འདུས་ཤིང༌། འོན་ཀྱང་ས་ཡ་ཕྱེད་དང་ལྔ་ཙམ་སོང༌། གུ་རུ་དྲག་པོ་ཡང་གསང་རྡོ་རྗེ་འབར་བའི་རྩ་བའི་བསྙེན་པ་བདེ་གཤེགས་ཡོངས་རྫོགས་འདུས་པ་ལ། འབུམ་ཕྲག་བཞི་བཅུ་ཞེ་དྲུག་ནི་རང་ལོ་སོ་ལྔ་ཡན་ལ་སོང་ཞིང༌། གཞན་ཡང༌། ཕྱག་ན་རྡོ་རྗེ་དྲེགས་པ་ཀུན་འདུལ་ལ་འབུམ་ཕྲག་ཉི་ཤུ་རྩ་གསུམ། ཐུགས་རྗེ་ཆེན་པོ་ངན་སོང་རང་གྲོལ་ལ་བྱེ་བ་བརྒྱ། རྟ་མགྲིན་ནཱ་ག་ཀླུ་འདུལ་ལ་འབུམ་ཕྲག་བཅུ་དྲུག ཚེ་ཁྲིད་རྡོར་ཕྲེང་ལ་འབུམ་ཚོ་ལྔ་བཅུ་ང་གཉིས་རྣམས་ནི་སྤྲོས་བཅས་བསྙེན་སྒྲུབ་ཀྱི་བཟླས་གྲངས་
སོང་ཚུལ་ཡིན་ལ། དེ་དག་ཐམས་ཅད་ཀྱི་ཚེ་ཡང་སྤྲོས་མེད་གནས་ལུགས་ཁྱབ་གདལ་གྱི་ངང་ནས་སྒོ་གསུམ་རྡོ་རྗེ་གསུམ་གྱི་ངེས་ཤེས་དང་མ་བྲལ་ཙམ་དང༌། དེ་ཉིད་ཀྱང་རང་དོན་ཡིད་བྱེད་ཀྱི་ཞོན་རྟོག་སྤང་ནས་མཁའ་ཁྱབ་མར་གྱུར་གྱི་འགྲོ་བ་རྣམས་ལ་ཕན་འགྱུར་གྱི་སེམས་བསྐྱེད་དང་ལྡན་ངོས་ནས་བགྱིས་པའི་ཁུལ་མ་གཏོགས། རང་ཉིད་ཀྱི་ཚེ་དང་ལོངས་སྤྱོད་སྤེལ་བའམ། རང་ལ་གནོད་བྱེད་ཞི་ཐབས་སོགས་ཀྱི་འདུན་པ་ནི་གཏན་ནས་མ་བྱས་པར་གང་བྱུང་བླ་མ་དཀོན་མཆོག་གི་ཐུགས་རྗེར་བསྒོམ་པ་ནི་ཞེ་ཐག་པ་ནས་ཡོད་ཅིང༌། སྤྲོས་མེད་རྫོགས་རིམ་གྱི་ཉམས་ལེན་གདེང་ཚད་འདི་དང་འདི་ལྟ་བུ་མཆིས་སོ་ཞེས་བརྗོད་རྒྱུ་ནི་གང་ཡང་མེད་དེ། དེ་ཅིའི་ཕྱིར་ན། སྤྱིར་སྐལ་བ་དམན་ཞིང་དཀོར་གྲིབ་ཀྱིས་འཐུམས་པ་དང༌། ཁྱད་པར་དུ་དེ་དག་ནི་ལམ་རྟགས་ཀྱི་
ཡོན་ཏན་གོང་དུ་འཕེལ་བར་བྱེད་པ་ལ་དབེན་པའི་གནས་སུ་མི་ཚེ་དྲིལ་ཞིང་སྒོ་གསུམ་གྱི་བྱ་བ་དགུ་ཕྲུག་སུ་བཏང་བ་ཞིག་མེད་ཐབས་མེད་ཚེ། བདག་འདྲ་ནི་རྣམ་པར་གཡོ་བ་དང་གྲྭ་འཁོར་ཡོན་བདག་གི་འདུ་ལོང་ལ་གཏན་དུ་སྤྱོད་པ་འདི་མི་འདོད་ཐོག་ཏུ་བབས་ཚེ། ལམ་རྟགས་དང་ཉམས་རྟོགས་ཀྱི་ཡོན་ཏན་འཕེལ་བའི་ཐབས་མེད་པ་ནི་དངོས་ཀྱིས་བསྟན་མོད་ཅིང༌། འོན་ཀྱང་དྲིན་ཅན་བླ་མའི་ཐུགས་རྗེ་ལ་བརྟེན་ནས་དྲན་རིག་གི་ངོ་བོ་རྐྱེན་དང་བསྲེ་ཐུབ་ཙམ་དང༌། རྡོ་རྗེ་ལུ་གུ་རྒྱུད་མ་བུང་བ་བཅུད་ལ་འཁོར་བ་ཙམ་དང༌། འོད་གསལ་ཐོད་རྒལ་གྱི་མཐོང་སྣང་དུ་ཐིག་ལེ་སྟོང་སྒྲོན་མཁར་སྡེར་ཙམ་དགུ་འབྲེལ་དུ་འཆར་བ་དང༌། མུན་ཁྲིད་ཀྱི་ཚེ་ནི་རིག་པ་ཚད་ཕེབས་ཀྱི་འཆར་སྒོ་རྩལ་རྫོགས་སུ་མཐོང་བ་ཙམ་བྱུང་བ་ལ། མདོར་ན་རང་ལོ་སོ་ལྔ་ཡན་ཆད་དུ་མཚམས་ཀྱི་རིགས་ཀུན་དྲིལ་ལོ་ཕྱེད་དང་
དགུ་ཙམ་སོང་བ་སྟེ། གང་ལྟར་འདི་ཡན་ཆད་རང་དོན་བསྒྲུབས་ཚུལ་ས་བོན་ཙམ་བརྗོད་པའོ། །དེ་ནས་གཞན་དོན་བགྱིས་ཚུལ་དངོས་བརྗོད་པ་ལའང་གཉིས་ཏེ། ཡུལ་གོང་མ་རྣམས་ལ་ཆོས་ཀྱི་མཆོད་པ་ཕུལ་ཚུལ་དང༌། འོག་མ་རྣམས་ལ་ཆོས་ཀྱི་སྦྱིན་པ་བགྱིས་ཚུལ་ལོ། དང་པོ་ནི། དེ་ཡང་སྤྱིར་གཞན་ལ་སྨིན་གྲོལ་གྱི་གདམས་པ་སྟོན་པར་བྱེད་པ་ལ་བླ་མའི་མཚན་ཉིད་དྲུག་ལྡན་དང་དགུ་ལྡན་སོགས་དགོས་ཚུལ་རྒྱུད་སྡེ་རྣམས་ལས་གསུངས་པ་ལྟར་གྱི་ཡོན་ཏན་ནི་སྣ་གཅིག་ཙམ་ཡང་བདག་ལ་མ་མཆིས་མོད་ཀྱང༌། རང་ལ་སྐུ་དྲིན་ཆེ་བའི་བླ་མ་དམ་པ་སྤྱི་དང༌། ཁྱད་པར་རིག་འཛིན་ཆེན་པོ་འཇའ་ཚོན་སྙིང་པོའི་ཞལ་སྔ་ནས། བདག་ལ་དགོངས་པའི་གཏད་ཕྱོགས་དང་གཞན་དོན་གྱི་རེ་བ་ཆེར་མཛད་དེ། དེ་ཉིད་ཀྱི་བཀའ་ལས་ཀྱང༌། ཁྱེད་ལ་ཆོས་ཀྱི་འགྲོ་དོན་འབྱུང་བའི་ལུང་བསྟན་མང་དུ་ཡོད་དེ།
ཇི་སྐད་དུ། ཚེ་བསྒྲུབ་གནམ་ལྕགས་རྡོ་རྗེའི་ལུང་བསྟན་ལས། ད་ལྟའི་སྤ་གོར་བཻ་རོ་ནི༔ སྤྲུལ་པའི་འོད་ཟེར་བརྒྱ་ཕྲག་འགྱེད༔ མ་འོང་དྭགས་ཀོང་སོ་མཚམས་སུ༔ རྡོ་རྗེ་ཀརྨའི་མིང་འཆང་བས༔ ཚེ་སྒྲུབ་ཟབ་མོའི་འགྲོ་དོན་འབྱུང༔ ཞེས་པ་དང༌། ཐུགས་རྗེ་ཆེན་པོ་ངན་སོང་རང་གྲོལ་ལས༔ བྱང་ནས་ཀརྨ་ལས་དང་དར་རྒྱས་མིང༔ ཆོས་འདི་ཕྱོགས་མཚམས་ཡཽངས་ལ་མཆེད་པར་འགྱུར༔ ཞེས་དང༌། དཔལ་མགོན་གྱི་ཆོས་འཁོར་ལུང་བྱང་ལས༔ ལ་ལུང་མཎྜལ་འདྲ་བའི་ས་ཕྱོགས་ནས༔ མཁའ་འགྲོ་གནས་བཟང་འདབས་སུ་འཁྲུངས་པ་ནི༔ ཤེས་རབ་མིང་འཛིན་གཟུགས་བཟང་མཚན་དཔེ་ལྡན༔ ཌཱཀྐིའི་ཚོགས་དཔོན་དགེ་ལ་དད་པའི་མི༔ རྣམ་གསལ་རིགས་ལྡན་དེ་ལ་གཏད་རྒྱ་གྱིས༔ ཅེས་སོགས་གསུངས་ཡོད་པས་འགྲོ་དོན་ལ་དཀའ་ཚེགས་མི་ཡོང་བས་བྱམས་སྙིང་རྗེ་དང་སེམས་བསྐྱེད་སྨོན་ལམ་གྱི་རྒྱ་བསྐྱེད་ཅིང་གཞན་དོན་
ལ་བརྩོན་པའི་གོ་ཆ་ཆེར་བགོ་བར་གྱིས་ཤིག ཅེས་གསུངས་པ་དང༌། དེ་བཞིན་དུ། དཔལ་མ་ཧཱ་ལོ་ཙཱ་བའི་ཞལ་ནས་ཀྱང༌། དེང་སང་སྙིགས་དུས་ཀྱི་སེམས་ཅན་བསོད་ནམས་དང་སྐལ་བ་ཞན་པའི་དབང་གིས། དམ་ཆོས་ཚུལ་བཞིན་སྟོན་པའི་བཤེས་གཉེན་ནི་རབ་ཏུ་དཀོན་པའི་ཕྱིར་ན། སློབ་མའི་སྣོད་བརྟགས་པ་སོགས་ལས་ཀྱང་འབྲེལ་པ་བཟང་ཐོགས་རྒྱ་ཆེ་བ་བསོད་ནམས་ཆེ་ཞིང་དེ་ལའང་གདུལ་བྱ་རྣམས་ནི་ལས་ཉོན་གྱིས་འཐུམས་ཤིང་རྨོངས་པའི་དབང་གིས་ཟབ་ཆོས་ཞུ་ཤེས་པ་ཡང་དཀའ་བས། དེས་ན་སོ་སོའི་སྐལ་བ་དང་བསྟུན་པའི་ཆོས་ཀྱི་རྣམ་གྲངས་གང་ལ་གང་འཚམས་པར་སྟོན་པའི་སྒོ་ནས་སྤྱིར་སངས་རྒྱས་ཀྱི་བསྟན་པ་དང་ཁྱད་པར་གསང་སྔགས་སྔ་འགྱུར་གྱི་བསྟན་པ་ཉམས་དམའ་བ་འདི་ལྟ་བུ་ལ། ཉན་འཆད་སྒོམ་སྒྲུབ་ཀྱིས་ཕན་ཐོགས་རྒྱ་གང་ཆེ་ཞིག་བྱེད་པ་ཅི་ནས་ཀྱང་གལ་
ཆེའོ། ཞེས་སོགས་ནན་ཏན་གྱི་སྒོ་ནས་བསྟན་པ་གཏད་པའི་ཚུལ་མཛད་པ་དང༌། གཞན་ཡང༌། མཚུངས་མེད་རིག་འཛིན་སྙིང་པོ། དྲིན་ཅན་དྷརྨའི་མཚན། མཁས་གྲུབ་པདྨ་བློ་གྲོས་སོགས་ཐམས་ཅད་ཀྱིས་ཀྱང་དེ་དང་མཐུན་པར་འགྲོ་དོན་ཁོ་ན་ལ་བསྐུལ་བར་མཛད་ནའང༌། རང་ཉིད་ལ་ཐོས་བསམ་སྒོམ་པའི་ནུས་པ་ནི་དབེན། སྙིགས་དུས་ཀྱི་འགྲོ་བ་རྣམས་ནི་དུག་ལྔ་རགས་ཤིང་རྒྱུད་མི་སྲུན་པས་ཐུལ་བར་ནི་དཀའ། ཟབ་ཆོས་བཤད་ཀྱང་ཉམས་ལེན་བྱེད་མཁན་ནི་ཉིན་སྐར་ལས་དཀོན། གསང་སྔགས་ཀྱི་ཆོས་ནི་བཀའ་གཉན་ཞིང་བཀའ་སྲུང་གི་མཁའ་འགྲོ་ཆོས་སྐྱོང་རྣམས་རུ་ང་ནི་དོག དེང་སང་གི་སྐྱེ་འགྲོ་སྤྱི་དང་ཁྱད་པར་ཆོས་སྒོར་ཞུགས་པ་རྣམས་དང་གྲྭ་སློབ་ཀྱི་རིགས་མཐའ་དག་ཀྱང་དམ་ཚིག་བསྲུང་མི་ནི་མེད། རང་ཉིད་ལ་གཞན་རྒྱུད་ཤེས་པ་སོགས་སྣོད་དང་སྐལ་བར་ལྡན་མི་ལྡན་གྱི་དབྱེ་བ་ཤེས་པའི་ནུས་པ་ནི་མེད། དེའི་
ཕྱིར་གང་ནས་བསམ་ཀྱང་ཆོས་ཀྱི་འགྲོ་དོན་བྱེད་པའི་སྟོབས་དང་མཐུ་ནུས་ཡོད་པ་ཞིག་རང་ལ་ནམ་ཡང་མི་གདའ་བས་སྒྱིད་ལུག་ཅིང་ཡིད་སྐྱོ་བ་ཞིག་ལས་མི་འདུག་རུང༌། འོན་ཀྱང་རྟེན་འབྲེལ་གྱི་བབས་ཚུལ་ལ་བརྟེན་པའི། ཡུལ་གོང་འོག་རྣམས་ལ་ཟབ་ཆོས་ཀྱི་འབྲེལ་པ་བགྱིས་ཚུལ་ནི་རང་ལོ་བཅུའི་སྐབས་སུ་གཏེར་སྟོན་པདྨ་རིག་འཛིན་རྩལ་ལ་ཚེ་ཁྲིད་རྡོ་རྗེ་འཕྲེང་བའི་དབང་ལུང་ཕུལ་བ་འདི་ནི་གཞན་ལ་ཆོས་བཀའ་འབུལ་བའི་ཐོག་མ་ཡིན་ཞིང༌། གཞན་ཡང༌། སྤོ་བོ་གསང་སྔགས་ཆོས་གླིང་ནས་སྤྲུལ་པའི་སྐུ་མཆོག་རིག་འཛིན་རྒྱ་མཚོ་ལ་བསྟན་བཅོས་ཤིང་རྟ་ཆེན་པོའི་ལུང་ཕུལ། གུ་རུ་ཨོ་རྒྱན་བསྟན་འཛིན་པ་ལ་ཚེ་སྒྲུབ་རྡོར་འཕྲེང་གི་དབང་ཕུལ། རིག་འཛིན་ཆེན་པོ་འཇའ་ཚོན་སྙིང་པོ་ལ་སྐུ་ཚེའི་རྟེན་
འབྲེལ་ལ་དམིགས་པའི་ཚེ་སྒྲུབ་རྡོར་འཕྲེང་དང་རྒྱལ་བ་འདུས་པ་སོགས་ཀྱི་ཚེ་དབང་བརྒྱ་ཚར་དུ་མ་དང༌། གཞན་ཡང་བཀའ་བརྒྱད་ཡོངས་རྫོགས་སྐོར་དང༌། དགོངས་འདུས་དབང་འཐོར་སོགས་དང༌། མདོར་ན་མདོ་ཁང་རྒྱུད་འབུམ་སོགས་རང་གི་གངཐོབ་ཀྱི་ཆོས་སྐོར་སོ་སོའི་བཀའ་གཏད་སོགས་དགོངས་བཞེད་དང་མཐུན་པར་ཕུལ། མཉམ་མེད་སྐད་གཉིས་སྨྲ་བ་ཆེན་པོ་ལ། དེ་ཉིད་ཀྱི་བཞེད་པ་ལྟར་རང་ལ་རྒྱུན་ཙམ་གང་ཡོད་ཀྱི་ངོས་ནས་རྫོགས་ཆེན་ཟབ་ཁྲིད་ཀྱི་རིགས་མི་འདྲ་བ་བཅུ་བདུན་ཙམ་དང༌། གཞན་ཡང་རིག་འཛིན་འཇའ་ཚོན་པའི་གཏེར་ཆོས་ཡོངས་རྫོགས་དང༌། རྒྱུད་བཅུ་བདུན། སྙིང་ཐིག་ཡ་བཞི། རྡོར་སེམས་སྙིང་ཐིག་དང་སྙིང་པོ་སྙིང་ཐིག བར་དོ་ཐོས་གྲོལ། བླ་མ་གསང་འདུས། རཏྣའི་ཐུགས་སྒྲུབ། ཚེ་སྒྲུབ་གསང་འདུས། ཆོས་དབང་གི་ཐུགས་རྗེ་ཆེན་པོ། མྱང་གི་ལོཀྟི། རིན་ཆེན་གླིང་པའི་ཚེ་སྒྲུབ་འོད་ཟེར་
འཕྲེང་བ་དང་རྫོགས་ཆེན་སྐོར། དྲི་མེད་ཀུན་དགའི་མཁའ་འགྲོ་ཡང་ཏིག་དང་མཁའ་འགྲོ་བདེ་ཆེན། ལས་འགྲེལ་རྩལ་གྱི་ཕྱག་རྡོར། ཞང་ཁྲོམ་གྱི་ཡང་ཟློག དུང་མཚོ་རས་པའི་ཏྲག་ཤད། ཀློང་ཆེན་པའི་བསྟན་བཅོས་ཐོར་བུ། མྱང་གི་པདྨ་བཀའ་ཐང་སོགས་དང༌། གཞན་ཡང་གཏེར་ཁ་དུ་མ་ཞིག་གི་ཆོས་བཀའི་རྒྱུན་རང་གིས་གང་ཐོབ་དགོངས་བཞེད་དང་མཐུན་པར་ཕུལ། ཆོས་ཀྱི་རྗེ་གསུང་སྤྲུལ་དམ་པར་མཁའ་འགྲོ་སྙིང་ཐིག་གི་དབང་དང༌། ཐུགས་རྗེ་ཆེན་པོ་ཡང་སྙིང་འདུས་པའི་དབང་ལུང༌། དྲང་སྲོང་ལོཀྟྀའི་དབང་ལུང་ཐུགས་སྒྲུབ་གསང་འདུས་ཀྱི་དབང་སོགས་ཕུལ། རྒྱལ་སྲས་རིག་འཛིན་སྙིང་པོ་ལ། རྫོགས་ཆེན་དགོངས་པ་ཟང་ཐལ། ཐུབ་པའི་སྐྱེས་རབས་བརྒྱ་རྩ། གཏེར་གསར་གྱི་སྐོར། མཉམ་མེད་སོག་བཟློག་པས་མཛད་པའི་ཨོ་རྒྱན་རྣམ་ཐར་ཆེན་མོ། ཚེ་ཁྲིད་རྡོར་འཕྲེང་སོགས་
དང་གཞན་ཡང་མང་ཞིག་ཕུལ། མཁས་གྲུབ་པདྨ་བློ་གྲོས་པ་ལ་ཚེ་དབང་དང༌། འཁྲུངས་རབས་བརྒྱ་རྩ་སོགས་ཕུལ། རིག་འཛིན་མཆོག་གྲུབ་པའི་སྐུ་སྐྱེ་བ་ཕྱི་མ་ལ། ཡང་ཟབ་དཀོན་མཆོག་སྤྱི་འདུས་ཀྱི་དབང་ལུང་དང༌། པད་གླིང་ཚེ་སྒྲུབ་ཀྱི་དབང་ལུང་ཕུལ། ཆོས་ཀྱི་རྗེ་རྫོགས་ཆེན་པོའི་དྲུང་ལ་རྡོར་འཕྲེང་གི་ཚེ་དབང་ཕུལ། མོན་སྤ་གྲོ་ཆོས་རྗེའི་དྲུང་ལ་བླ་པ་ནོར་བུ་པད་འཕྲེང་གི་ཧཱུྃ་སྒྲུབ་དང་ཚེ་དབང་སོགས་ཕུལ། དཔོན་༼དེ་དུས་ཁོང་གི་ཐུགས་དམ་གསལ་སྣང་ལ། བདག་སྤྱན་རས་གཟིགས་ཕྱག་བཞི་པའི་སྐུར་མཐོང་བ་ཡུན་རིང་དུ་བྱུང་གསུངས་སྣང༌།༽སློབ་ཀུན་བཟང་རྣམ་རྒྱལ་དང་ཆོས་རྗེ་དཀར་ཆེན་པ་དཔོན་སློབ་ལྷན་ཅིག་པར་ཚེ་སྒྲུབ་རྒྱལ་བ་འདུས་པའི་དབང་དང༌། རང་གི་ཐོབ་ཡིག་རྣམ་ཐར་སོགས་ཕུལ། ཤེལ་བྲག་ཆོས་རྗེ་སྐུ་གཞོན་པར་ཚེས་བཅུའི་ཕན་ཡོན་གྱི་ཆོས་འབྲེལ་ཕུལ། བོན་ལུང་
གྱི་བླ་མ་དམ་པ་བློ་གྲོས་རྒྱལ་མཚན་དང༌། བླ་མ་རྟོགས་ལྡན་ནམ་མཁའ་བསོད་ནམས་གཉིས་ལ་བར་དོ་ཐོས་གྲོལ་དང༌། བོན་ཁྲིད་གསེར་ཐུར་སོགས་ཟབ་ཆོས་མང་བར་ཕུལ། དེ་ལྟར་འདི་དག་ནི་ཡུལ་གོང་མ་རྣམས་ལ་ཆོས་འབྲེལ་ཕུལ་བའི་ཚུལ་རགས་རིམ་ཙམ་བརྗོད་པ་ཡིན་ལ། དེར་མ་འདུས་པའི་རང་ཕྱོགས་ཀྱི་གྲྭ་བུ་སློབ་ཏུ་གཏོགས་པའི་རིགས་ཀྱི་བླ་མ། སྐུ་སྐྱེས། གདུང་རྒྱུད། དབོན་པོ། དགེ་བའི་བཤེས་གཉེན་གྱི་རིགས་སོགས་དང༌། གཞན་ཕལ་པའི་རིགས་ལ་དགེ་ཚུལ་སློང་གི་སྡོམ་པ་ཕོགས་པ་དང་བཀའ་ལུང་དབང་ཁྲིད་ཀྱི་འབྲེལ་པ་བགྱིས་པའི་རིགས་ཀྱི་སྔགས་བཙུན་སྒོམ་ཆེན་སྐྱ་སེར་ཕོ་མོ་སོགས། མདོར་ན་ཟབ་ཆོས་ཀྱི་འབྲེལ་པ་ཡོད་དོ་ཅོག་ནི་བགྲང་བར་ག་ལ་ལངས་ཤིང༌། བགྲངས་ཀྱང་དགོས་པ་ཆུང་ཚེ་བཏང་སྙོམས་སུ་
གཞག་པ་ཡིན་ལ། དབང་ཁྲིད་གདམས་པ་གཞན་ལྟ་ཞོག འཕོ་བའི་དགོངས་ཁྲིད་ཀྱི་རྟགས་འཐོན་པ་ཁོ་ན་ཡང་བགྲང་བར་མི་ལངས་པ་ལྟ་བུ་བྱུང་བ་དང༌། གཞན་ཡང་རང་ལོ་ཉེར་བརྒྱད་ནས་སོ་ལྔའི་བར་ལ། དབང་སྒྲུབ་ཆེན་མོའི་རིགས་ཀྱང་འདུས་པ་མདོ་དབང་ཆེན་མོ་ཚར་གསུམ། དགོངས་འདུས་ཀྱི་སྨན་སྒྲུབ་ལན་གཉིས། བཀའ་བརྒྱད་བདེ་གཤེགས་འདུས་པའི་སྨན་སྒྲུབ་ཆེན་མོ་དང༌། གཞན་ཡོངས་དྲིལ་སྒྲུབ་པ་ཆེན་པོ་བཅུ་གསུམ་༼མདོ་དབང་ཚར་གསུམ། དགོངས་འདུས་གཉིས། བདེར་འདུས། གསང་བ་ཡོངས་རྫོགས། བླ་མ་གསང་འདུས་དང་བསྟན་པ་རྒྱ་མཚོ་ལན་ཅིག ཐོས་གྲོལ་ཚར་གསུམ། ཕུར་སྒྲུབ་གཉིས་བཅས་སོ།༽དང༌། སྒྲུབ་དབང་ཕྲན་བུ་མང་བར་སོང་ཞིང༌། དེ་དག་གི་ཚེ་ཡང་འདུས་པ་ཤིན་ཏུ་ཆེ་བ་སྒྲུབ་ཁང་དུ་མི་ཤོང་ལ་ཁད་པ་ལྟ་བུ་དང༌། གྲོལ་དབང་གི་ཚེ་
ནི་འདུ་ཚོགས་ཧ་ཅང་ཆེས་པས་དབང་སྐུར་བས་མ་ལངས་པར་དར་ཐག་གི་འོག་ཏུ་གཤར་བས་ཀྱང་མི་རྫོགས་པ་ལྟ་བུ་བྱུང་ཀྱང༌། ཐམས་ཅད་ལ་རྟེན་འབྲེལ་གྱི་འདུ་འགོད་ཁྱད་པར་དུ་འཕགས་པ་ཕྱི་ནང་ནས་གུང་མཐུན་པ་དང༌། སྨན་སྒྲུབ་ཀྱི་ཚེ། དགུན་ཞིག་གི་སྐབས་ཤིན་ཏུ་གྲང་བའི་དུས་ཡིན་ཀྱང༌། སྒྲུབ་པ་དངོས་ཀྱི་དུས་སུ་ཤིན་ཏུ་དྲོ་བ་ས་ཆུ་མཐའ་དག་དྲོས་ཏེ་དབྱར་གྱི་དུས་ལྟ་བུར་གྱུར་པ་དང༌། རང་དང་སྒྲུབ་པ་པོ་འགའི་ཉམས་རྨིས་དག་ཏུ་སྨན་གྱིས་ལྷ་མོས་འཕྲིན་ལས་སྒྲུབ་ཅིང་ལུང་སྟོན་པ་མཐོང་བ་དང༌། སྨན་གྱི་གོང་བུ་ཆེར་འཕེལ་ཞིང་དྲི་བཟང་སོགས་ལེགས་པར་འགྲུབ་པའི་རྟགས་རྣམས་ཞག་གསུམ་ལ་ཚང་བ་དང༌། སྒྲུབ་ཁང་ལ་འཇའ་འོད་ལྔ་ལྡན་ཟུག་པ་དང༌། སྒྲུབ་པ་པོ་མཐའ་དག་ཁམས་བདེ་བག་དྲོ་བྱིན་ཆགས་ཏིང་འཛིན་འཕེལ་བ་ལ་སོགས་གཞུང་དང་མཐུན་པའི་བྱིན་རླབས་ཀྱི་
མཚན་མ་ཡང་དག་པ་ཐམས་ཅད་ཀྱིས་མཐོང་མཐུན་དང༌། རྡུལ་ཚོན་གཤེགས་པའི་ཆུ་ཀླུང་གིས་གང་ཁྱབ་ཏུ་ལོ་ལེགས་པ་སོགས་རྒྱལ་ཁམས་སྤྱིའི་མཐུན་སྣང་དུ་གྲུབ་པའི་དགེ་མཚན་ཀྱང་བྱུང་བ་འདི་ནི། རང་ཉིད་ལ་བྱིན་རླབས་ནུས་སྟོབས་ལྟ་སྒོམ་གྱི་གདེང་ཚད་སོགས་གང་ནས་ཀྱང་རྡོ་རྗེ་སློབ་དཔོན་གྱི་མཚན་ཉིད་དང་ལྡན་པ་མིན་རུང༌། མོས་གུས་དཀར་པོ་གཅིག་ཐུབ་དང་ལྷག་བསམ་གྱིས་བསྐུལ་བའི་མཐུས། རྒྱལ་དབང་པདྨ་འབྱུང་གནས་སྤྲུལ་འཁོར་དང་བཅས་པའི་ཐུགས་རྗེ་ལ་ལྡོག་མེད་དུ་ངེས་ཤེས་རྙེད་པ་བྱུང་ངོ༌། མདོར་ན་རང་གི་འཁོས་ཀ་ཅི་ཡོད་ཀྱི་ངོས་ནས་གཞན་ཕན་ལྷག་བསམ་རབ་དཀར་གྱིས་ཀུན་ནས་བླངས་པའི་དབང་བསྐུར་ཆོས་བཤད་དང༌། རྩོལ་བྱས་རྩོལ་མེད་སོགས་ཆོས་སྤྱོད་བཅུ་གང་༼རང་ལོ་སོ་ལྔ་ཡན་ལ་རང་ཉིད་གཅིག་པུས་ཡི་གེ་བྲིས་པ་ཡང་པོ་སྟི་ཆེན་པོ་སུམ་ཅུ་རྩ་གཉིས་ཙམ་སོང་འདུག །༽རུང་གི་བྱ་བ་ཅི་བྱེད་ཐམས་ཅད་དྲིན་ཅན་བླ་མ་རྣམས་
ཀྱི་དགོངས་པ་རྫོགས་ཐབས་དང༌། དད་ཟས་གཤིན་དཀོར་གྱི་འབྲེལ་པ་ཐོགས་ཚད་ཀྱི་སྣ་དྲངས་པའི་མཁའ་མཉམ་འགྲོ་བ་མཐའ་དག་ལ་ཅི་ཕན་གྱི་འདུན་པ་ཤ་སྟག་མ་གཏོགས། རང་ཉིད་རྙེད་བཀུར་གྲགས་འདོད་ཀྱི་བསམ་པས་བྱས་པ་ནི་སྤུ་ཙམ་མིན་ཚེ། གཞན་དག་གིས་ཅིར་མཐོང་ཀྱང་རང་ངོས་ནས་ནི་དཀོན་མཆོག་ཡེ་ཤེས་སྤྱན་ལྡན་རྣམས་ལ་མི་གནོང་ཞིང་འགྱོད་མེད་ཀྱི་གདེང་དང་བཅས་པའོ། ཡང་རེ་ཞིག་དཔལ་རྣམ་ཐོས་ཀྱི་རི་བོའི་ཕོ་བྲང་ནས་བཀས་བསྐུལ་བར་མཛད་པར་བརྟེན། བོད་ཁམས་ཀྱི་སའི་མེ་བཙའ་ཀོང་པོ་བུ་ཆུ་ལྷ་ཁང་དུ་གྲགས་པའི་གཙུག་ལག་ཁང་ཉིད་དུས་དབང་གིས་ཞིག་རལ་ཤིན་ཏུ་ཆེ་བར་གྱུར་པ་ལ། ཞིག་གསོས་ཀྱི་ཆེད་དུ་ཕྱིན་ཏེ། དེ་ཡང་བཀའ་སྲུང་གཉན་པའི་དབང་གིས་མི་དམངས་མཐའ་དག་འཁུ་འཕྲིག་ཐེ་ཚོམ་གྱི་བསམ་པ་སྣ་ཚོགས་
པའི་ལབ་བརྗོད་དུ་མ་དང༌། དེ་བཞིན་དུ་བཟོ་རིགས་པ་ཀུན་ཀྱང་ཡ་ང་བར་བྱེད་ནའང༌། བདག་གི་རྨི་ལམ་དུ་བཀའ་སྲུང་སྐྱེས་བུ་ཆེན་པོ་ཉིད་འོངས་ཏེ་ཉེན་མེད་ཀྱི་གནང་བ་སྦྱིན་པའི་ཚུལ་དང༌། ཁོང་རང་གི་རྟེན་གཙུག་སོགས་སྤོ་དགོས་ཚུལ་གྱི་རྣམ་འགྱུར་གསལ་བར་སྟོན་པ་འབྱུང་བས་ཡིད་ཆེས་རྙེད་ཅིང༌། དེ་དུས་ཀྱི་ལག་ཏུ་ཟང་ཟིང་གང་ཡོད་གང་བྱུང་ཐམས་ཅད་གཙུག་ལག་ཞིག་གསོས་ཀྱི་ཆ་རྐྱེན་ཁོ་ནར་སྤུངས་ཤིང༌། དེ་ཚེ་ལྷ་བཟོ་བ་འབུར་མ་ལ་མཁས་པ་སྤུས་གཙང་ཞིག་མ་རྙེད་པར། དཀོན་མཆོག་ལ་གསོལ་བ་བཏབ་ཅིང་མཆིས་ཚེ། འབོད་མི་དགོས་པར་ལྷ་བཟོ་མཁས་པ་མཆེད་གཉིས་ཀྱང་དུས་ལ་ནམ་བབ་ཚེ་རང་བཞིན་༼དེ་ཡང་ལྷ་བཟོ་བ་ཁོ་རང་སྔོན་ལ་ཕྱི་ཆུ་བར་དུ་ཡོད་ཚེ། རྨི་ལམ་དུ་བུད་མེད་གཅིག་གིས། ཁྱེད་རྩེ་ལེ་སྤྲུལ་སྐུའི་དྲུང་དུ་སོང་གཅིག་ཟེར་བ་ཡང་ཡང་བྱུང་བས། དེ་དུས་རྩེ་ལེ་སྤྲུལ་པའི་སྐུ་ཞེས་པ་རྣ་བས་ཀྱང་མ་ཐོས་པས། ཅི་ཡིན་ནམ་བསམ་ཀྱང༌། ཕྱིས་འདི་ལ་བལྟ་བ་ཡིན་པར་འདུག་ཟེར་རོ།༽དུ་སླེབས་བྱུང་བ། འདི་ལྟ་བུའི་རྟེན་འབྲེལ་ནི། སྔོན་བསམ་ཡས་བཞེངས་ཚེ་རྒྱལ་པོའི་མནལ་ལམ་དུ་ལྷས་ལུང་བསྟན་པའི་
སྤྲུལ་པའི་ལྷ་བཟོ་བྱུང་བའི་ཚུལ་དང་ཁྱད་མེད་པར་དཀོན་མཆོག་གི་ཐུགས་རྗེ་ལ་ལྷག་པར་ཡིད་ཆེས་པ་བྱུང་ཞིང༌། ལྷ་རྟེན་བྲིས་འབུར་རྙིང་པ་ཞིག་རལ་ཅན་རྣམས་ལ་ཨརྒྷའི་ཆོ་ག་དང༌། གསར་བཞེངས་རྣམས་ཀྱི་གཟུངས་བཞུགས་རབ་གནས་མངའ་གསོལ་དང་བཅས་པ་སོགས། མདོར་ན་ཕྱི་རྟེན་ནང་རྟེན་མཐའ་དག་ཟླ་བ་ཕྱེད་དང་དྲུག་ལ་གེགས་མེད་དུ་གྲུབ་པ་དང༌། དེའི་ཚེ་བཟོ་རིགས་དང་ལས་རིགས་སུ་གྱུར་པ་མཐའ་དག་ལ་ཆམ་པ་ཙམ་གྱི་ཉེར་འཚེ་ཡང་མེད་ཅིང༌། ཆར་ཆུ་དུས་སུ་འབབ་པ་སོགས་ཕྱི་ནང་གི་ལེགས་ཚོགས་སྒོ་དུ་མ་ནས་འཕེལ་ཞིང་བཟང་བར་གྱུར་པས་སྐྱེ་འགྲོ་ཐམས་ཅད་ཡ་མཚན་གྱི་གནས་
སུ་གྱུར། འདི་དུས་ཀྱང་ཕྱོགས་མཐའ་དག་ནས་འདུས་པའི་ལས་མི་རྣམས་ལ་ཉིན་རེ་བཞིན་ཟང་ཟིང་གི་སྦྱིན་པ་ཅི་འབྱོར་དང༌། སྒྲུབ་ཐབས་རྒྱ་མཚོའི་སྒོ་ནས་ཆོས་ཀྱི་སྦྱིན་པ་ཡང་རྒྱུན་ཆགས་སུ་བྱས་ཤིང༌། རང་གཞན་ཐམས་ཅད་ཀྱི་ལུས་ངག་ཡིད་གསུམ་དོན་ལྡན་དུ་བགྱིས་སོ། གཞན་ཡང་གཞིས་བྱེས་ལམ་དུ་དད་རྫས་དཀོར་ཟས་ཆེ་ཆུང་གང་བྱུང་ཐམས་ཅད་ཀྱང་འཕྲལ་གྱི་ཉེ་བར་འཁོ་བྱེད་ཕྲན་བུ་མ་གཏོགས་གཞན་ཟང་ཟིང་ཆེ་ཆུང་མཐའ་དག་དཀོན་མཆོག་གི་མཆོད་རྫས། མཁའ་འགྲོ་ཆོས་སྐྱོང་ལ་གཏོར་ཚོགས་དང༌། གྲུབ་མཐའ་རིས་མེད་ཀྱི་དགེ་འདུན་སེམས་ཅན་ཐམས་ཅད་ལ་དམིགས་ནས་དགེ་ཚོགས་སུ་གང་འགྱུར་ཁོ་ན་མ་གཏོགས་གནས་མིན་དུ་གོད་ཟ་མ་བྱས་པ་ལ། ཕལ་པ་
རྣམས་ཀྱིས་བདག་ལ་ལག་དམ་པའམ་མི་ཆོས་མི་ཤེས་པ་སོགས་ཀྱི་འབར་གཤེ་སྣ་ཚོགས་བྱེད་ཅིང༌། གདའ་ཡང༌། རང་ངོས་ནས་བློ་ཆོས་ཕྱོགས་སུ་དྲིལ་བའི་བྱ་བྱེད་ལ་འགྱོད་མེད་ཀྱི་བློ་ཕུགས་གཏད་པ་མ་གཏོགས། དེང་སང་གི་སྐྱ་སེར་ཕལ་མོ་ཆེའི་བསམ་སྤྱོད་དང་མཐུན་པར་མ་གྱུར་ན་སྤང་བཟོད་ཅིང༌། བླ་མ་དཀོན་མཆོག་གི་ཐུགས་ཀྱི་མ་འཁྲེལ་ན་དེ་ཀས་ཆོག་པ་དང༌། རང་ཉིད་ཀྱི་ཚེ་བསྟོད་ལ་འདི་ལྟ་བུ་ཞིག་འདོད་ཀྱང་རང་དབང་མ་བྱུང་ཞེས། ད་ལྟ་ཅི་ནུས་ཀྱི་རྒྱལ་བ་གོང་མའི་རྣམ་ཐར་གྱི་རྗེས་སུ་འབྲང་ཅི་ཐུབ་ལ་འདུན་པ་གཏད་པ་ལས་ལྷག་པ་ནི་བདག་གིས་ཤེས་ཀྱང་མི་ཤེས། ཡོང་ཡང་མི་ཡོང༌། སངས་རྒྱས་ཀྱི་བསྟན་པ་ལའང་དམ་པའི་ཆོས་ཀྱི་སྒོ་ནས་མ་ཕན་ན་འཇིག་རྟེན་འདི་སྣང་གི་འདུན་ཐབས་དང༌། ཁ་གསག་གཡོ་རྒྱུ་མི་ཆོས་ཀྱིས་ཕན་པ་ཡིན་ན་བཀའ་མདོ་རྒྱུད་ལུང་མན་ངག་ཐམས་ཅད་མི་བདེན་པར་
འགྱུར་ལ། སངས་རྒྱས་སྲས་བཅས་རིག་འཛིན་གྲུབ་ཐོབ་གོང་མ་རྣམས་ཀྱིས་མི་མཁྱེན་མི་གཟིགས་པའི་བསྟན་པའི་བྱ་བ་ཞིག་ནི་དེང་སང་གི་ཆོས་པ་རྣམས་ཀྱིས་ཤེས་ཨེ་ཡོད་ཅི་ཆ་ཞིང༌། ཡོད་ཀྱང་ཡ་མཚན་ཆེ་བར་བདག་ནི་མི་སེམས་ལ། སྤྱིར་ཡང་མི་ཚེ་ཡུད་ཙམ་སྤྲིན་བར་གྱི་ཉི་མ་ལྟ་བུ་འདི་ལ་ཐོག་མེད་ནས་བག་ཆགས་ལ་གོམས་ཚན་ཆེ་པས་ད་ལྟ་གཉིད་དང་རྣམ་གཡེང་ལྟོ་གོས་ཀྱི་ཆེད་དུ་མི་ཚེ་ཡེངས་མ་ལམ་ལ་ཟད་ལུགས་ལ་བསམ་ན། འཆི་བའི་ནང་པར་མཆི་མ་འཕྲུལ་མེ་འགྱོད་ཀྱང་ཕྱིས་པའི་དུས་ཤིག་ཡོང་བ་ནི་ཐམས་ཅད་ཀྱིས་གོ་ཞིང་མཐོང་མོད་ཀྱང༌། རྒྱལ་བ་བྱམས་པའི་བསྟན་པ་མ་ཤར་གྱི་བར་དུ་བསྡད་ལོང་ཡོད་པ་ཙམ་དུ་བྱེད་པ་ཤ་སྟག་གདའ་བ་རྣམས་རང་གི་རང་ལ་ལེགས་པར་བསམ་བློ་ཞིག་བཏང་ན་ཅི་མ་རུང་ཞེས། རང་ཚུལ་ལས་འཕྲོས་ཏེ་གླེང་བའོ། །མན་ངག་ཐོས་དང་དབེན་པ་བསྟེན་པ་དང༌། །གཞན་ལ་
ཕན་པའི་བྱ་བ་ཉུང་ཟད་དག ཇི་ལྟར་བགྱིས་ཚུལ་དྲང་པོར་བརྗོད་པ་འདི། །རང་ལ་གླེང་གི་གཞན་དག་ག་ལ་མགུ། །མཁས་པ་རྣམས་ནི་གཞུང་ལུགས་སྨྲ་ལ་མཉེས། །གྲུབ་པ་རྣམས་ནི་ངེས་དོན་རྟོགས་ལ་གཟིགས། །གྲྭ་འཁོར་ཕལ་ཆེར་ཆོས་བརྒྱད་ཤེས་ལ་དགའ། །སྐྱེ་བོ་རྣམས་ནི་མི་ཆོས་མཁས་ལ་དད། །བདག་ནི་འདི་དག་གང་ཡང་མི་ལྡན་ཚེ། །ཀུན་གྱི་སྤྱོད་ལམ་མཛེས་པ་རབ་ཏུ་དཀའ། །དཀའ་བ་དེ་ཉིད་རང་བློ་དང་མཐུན་པའི། །བློ་ཕུག་སྤྲང་ལ་གཏོད་པའི་རྣམ་ཐར་ལགས། །འཇིག་རྟེན་སྒྱུ་འཕྲུལ་བསྒྲུབ་པ་ལ། །བསྟན་པའི་བྱ་བར་བརློམ་པ་དང༌། །ནོར་ཕྱིར་གདམས་པ་འཚོང་བ་ལ། །སེམས་ཅན་འགྲོ་དོན་ཡིན་ནོ་ལོ། །ཆོས་བརྒྱད་འཁོར་ལོ་བསྐོར་བ་ལ། །བླ་མ་བཟང་པོར་གྲགས་པ་ཡི། །ལོངས་སྤྱོད་གཏོང་ཕོད་ཆེ་བ་ཀུན། །དུས་འདིར་བསྟན་པའི་བདག་པོར་མཛོད། །དད་རྫས་ཛ་ཧུའི་བུ་
མོ་ལ་བརྟེན་ཞིང༌། །ལོ་ཀའི་མངའ་ཐང་གཟི་འབར་འཕྲོག་བྱེད་དབང༌། །འདི་སྣང་མཁའ་ལྡིང་ཁྲི་ལ་བསྒྱིངས་བཞིན་པའི། །གྲྭ་སློབ་དེ་དག་བདག་དང་ཅང་འཛའམ། །ལང་ཚོ་ཉ་ཡི་བར་ཉིད་དུ། །འདོད་ཁམས་ལྟད་མོ་བལྟས་གྱུར་མེད། །ད་ནས་འཆི་བདག་གནམ་གང་ལ། །ཉེ་ཚེ་སྤྲོས་པའི་འོད་དཀར་བསྡུས། །གདུལ་ཡུལ་ཀུ་རན་ཧ་ཡི་མེ་ཏོག་རྣམས། །བླ་ཟོལ་རྟ་ལྗང་གར་འཆར་རྗེས་ཞུགས་ན། །ཨ་བ་དྷུ་ཏིའི་བརྟུལ་ཞུགས་ཀྱི་འཚོ་བའི། །ཆ་ཤས་ཅན་ཁྱོད་ཅི་ཕྱིར་བསིལ་ཟེར་འགྱེད། །མི་ཚེའི་ཉི་མ་ཕྱེད་ལྷག་བར། །སྣ་ཚོགས་ཆོས་དང་དེ་ལས་གཞན། །བསྒྲུབ་ཚུལ་སྒྲུང་གི་འཕྲེང་བ་འདིས། །འགའ་ལ་ཕན་པར་གྱུར་ཅིག་ཀྱཻ། ཞེས་རང་ལོ་སོ་ལྔའི་བར་གྱི་ཚུལ་རྣམས་དང་དེ་དག་ལས་འཕྲོས་པ་དང་བཅས་པ་བརྗོད་པའི་ལེའུ་སྟེ་ལྔ་བའོ། །གང་ལ་སྲིད་ཞི་འཁོར་འདས་དུས་གསུམ་
གྱི། །ཐ་སྙད་ཇི་ལྟར་བཏགས་ཀྱང་གདོད་མའི་གཤིས། །འཕོ་འགྱུར་བྲི་གང་བྲལ་བའི་ཆོས་ཀྱི་སྐུར། །ཡེ་རྫོགས་གདོད་མའི་མགོན་དེར་རིངས་བཏུད་ནས། །ལས་ཉོན་འཁྲུལ་པའི་འཆིང་བས་བསྡོམས་བཞིན་པར། །རང་གྲོལ་མིང་དུ་འབོད་པའི་སྙོམ་ལས་པས། །ཐ་མལ་སྤྱོད་ཚུལ་གླེང་བའི་སྒྲུང་འཕྲེང་གི །འཕྲོ་ཞིག་ད་དུང་བཤད་ཀྱིས་མཉན་པར་བྱོས། །རང་གི་ལས་ཀྱིས་སྐྱེས་ཤིང་འཁོར་བའི་གཞི། །དགོན་གནས་གྲྭ་འཁོར་འཛིན་པའི་གཟབ་རྒྱ་འདི། །ད་ནི་སྙིང་ནས་སྤངས་ཏེ་བྱ་བཏང་གི །བརྟུལ་ཞུགས་ཡང་དག་བྱ་སྙམ་ལིང་༼རང་ལོ་ཉེར་གསུམ་ལ།༽བསྐྱུར་བྱས། །ལོ་གྲངས་ཕྱེད་བཞིར་འདག་སྦྱར་སྨྲ་བཅད་ཀྱི། །སྐབས་དེར་རིག་འཛིན་འཇའ་ཚོན་སྙིང་པོ་བྱོན། །སྐྱེ་བ་གོང་མས་དཀའ་ལས་དེ་ཙམ་གྱིས། །བཙུགས་པའི་བསྟན་པ་དྲི་བྲལ་འདི་དག་རྣམས། །ཁྱེད་ཀྱི་འདོར་བར་རུང་བ་མ་ཡིན་པས། །བྱང་སེམས་
སྤྱོད་པས་ཅི་ནུས་སྐྱོངས་ཤིག་ཅེས། །སྤྱན་ཆབ་བསིལ་ཞིང་དམ་ཚིག་གནད་ལ་བཀར། །དེ་མཚུངས་ཕྱིས་ནས་ལོ་པཎ་རིན་པོ་ཆེ། །ཀཿཐོག་ཆོས་རྗེ་པདྨ་བློ་གྲོས་ཞབས། །སྙིམ་ཕུ་རིག་འཛིན་སྙིང་པོ་ལ་སོགས་པ། །རང་ལ་ཆོས་ཀྱི་བཀའ་དྲིན་ཅན་ཐམས་ཅད། །གསུང་གཅིག་མགྲིན་གཅིག་དབྱངས་གཅིག་ནན་ཏན་དུ། །བཀའ་སྩལ་གཅོག་པར་མ་ནུས་ཡང་ནས་ཡང༌། །དགོན་གསུམ་བསྟན་ལ་ཕན་པར་རེ་བ་ཡིས། །དབང་བསྐུར་ཆོས་བཤད་ཁྲིད་དང་སྡོམ་པ་ཕོགས། །གར་ཐིག་དབྱངས་དང་སྒྲ་རིས་སྙན་ངག་དང༌། །ཡིག་རིགས་སུམ་རྟགས་སྔགས་ཀློག་འབྲེལ་བཤད་རིགས། །རང་གི་ཇི་ཙམ་ཤེས་ཀུན་གང་དགོས་བསླབ། །སྒྲུབ་ཆེན་དབང་དང་རྒྱུད་འགྲེལ་གཞུང་མན་ངག །ཉམས་ལེན་སྐོར་སོགས་སྤྲོས་བཅས་སྤྲོས་མེད་ཀྱི། །ཆོས་ཀྱི་ཆར་ཕབས་བསླབ་གསུམ་རྒྱུད་ལ་སྦྱར། །མ་རུངས་འགའ་ཞིག་དྲག་པོས་ཚར་ཡང་བཅད། །རང་
ལ་རེ་ལྟོས་གདུལ་བྱའི་ཡུལ་གྱུར་ཀུན། །ཅི་ནུས་ཐབས་ཀྱི་ལེགས་ལམ་འཛུད་ལ་འབད། ཐ་ན་འགྲོ་འཆག་ཉལ་འདུག་ཟ་འཐུང་དང༌། །སྨྲ་བརྗོད་ཚུལ་སོགས་གནས་སྐབས་བྱ་སྤྱོད་ཀྱི། །སྤང་བླང་གནས་རྣམས་ཞིབ་ཐེམ་བསླབ་བྱ་སོགས། །མདོར་ན་བསྡུ་བ་རྣམ་བཞིས་ཡང་དག་བསྐྱངས། །ཁྱད་པར་རབ་བྱུང་དགེ་འདུན་སྡེ་ཚོགས་ཀྱིས། །བསྟན་པའི་ཞབས་འདྲེན་རྒྱུ་རྐྱེན་བག་མེད་པའི། །སྤྱོད་པ་མ་ལུས་ཆང་གི་སྐྱོན་ལས་འབྱུང༌། །སྔོན་ཚེ་བདུད་རྒྱལ་དགའ་རབ་དབང་ཕྱུག་གི །བུ་མོ་བདུན་གྱི་སངས་རྒྱས་བསྟན་པ་ལ། །གནོད་པ་སྣ་རེ་འཁྱོལ་བར་སྨོན་ལམ་བཏབ། །དེ་ལས་བུ་མོ་ཆེ་ཤོས་མྱོས་བྱེད་མས། ཆང་ཞེས་བྱ་བའི་སྨྱོ་བྱེད་རྫས་གྱུར་ནས། །འཇིག་རྟེན་ཁམས་ཀྱི་སྐྱེ་འགྲོ་སེམས་འཁྲུལ་བས། །བྱ་དང་མི་བྱའི་སྤྱོད་པ་གོ་ལྡོག་ཅིང༌། །དགེ་སྦྱོངས་རྣམས་ཀྱི་ཚུལ་ཁྲིམས་རྨོང་ཞིག་ནས། །
བསྟན་པའི་གཞི་མ་འཇིགས་པ་སྨོན་ལམ་བཏབ། །དེ་ཡི་མཐུ་ལས་ཆང་གི་འཇིག་རྟེན་ཁྱབ། །ཆོས་དང་འཇིག་རྟེན་གཉིས་ཀྱི་ཕུང་འདྲེར་གྱུར། །བསྟན་པའི་བདག་པོ་ཐུབ་དབང་ཞལ་བཞུགས་ཚེ། །ཁྱིམ་བདག་རྟོགས་ལྡན་ཞེས་བྱའི་བུ་རབ་བྱུང༌། །ལེགས་འོངས་ཞེས་པ་སྡེ་སྣོད་གསུམ་ཤེས་ཤིང༌། །དགྲ་བཅོམ་འབྲས་ཐོབ་མངོན་ཤེས་རྫུ་འཕྲུལ་ལྡན། །ཀླུ་རྒྱལ་སོག་མ་མེད་པ་འཁོར་དང་བཅས། །མེ་ཡི་ཁམས་ལ་སྙོམས་འཇུག་རྫུ་འཕྲུལ་གྱིས། །བཏུལ་བར་མཛད་པའི་འཕགས་པ་དེ་ལྟ་བུའང༌། །ཆང་གི་མྱོས་ཏེ་ལམ་པོ་ཆེར་ཉལ་བ། །སྟོན་པ་འཁོར་དང་བཅས་པས་གཟིགས་པའི་ཚེ། །ལྟོས་ཤིག་རྫུ་འཕྲུལ་ཐོབ་ཀྱང་འདི་འདྲ་བའི། །གནས་སྐབས་ལ་ལྟོས་ཆང་གི་བཏུང་བ་ནི། །བག་མེད་སྤྱོད་དེ་ང་ཡི་ཉན་ཐོས་མིན། །ང་ཡང་དེ་ཡི་སྟོན་པ་མིན་ནོ་ཞེས། །ཐུགས་ཀྱི་གཏིང་ནས་ཁྲེལ་བའི་བཀས་བཅད་
མཛད། །དེ་ཕྱིར་བསྟན་པ་འཇིག་པའི་རྒྱུ་རྐྱེན་ཆང༌། །སྤོང་བར་མི་ནུས་དགེ་སྦྱོང་མི་རུང་ཞེས། །རང་གི་དགོན་པ་གསུམ་གར་ཆང་ཁྲིམས་བསྡམས། ཁྱད་པར་གྲྭ་ཚང་ཉིད་དུ་མང་ཇ་སོགས། །བཞེས་སྒོ་བབས་ཀྱིས་བཟང་ཕྱིར་ཆང་རག་གི །དྲི་མ་གཏན་ནས་མེད་པར་གཞིས་བྱེས་ལམ། །ཀུན་ལ་ཁྱད་མེད་དགོས་ཞེས་ནན་གྱིས་སྨྲས། །རེ་ཤིག་ལོ་གསུམ་བར་དུ་ཚད་བཙུགས་ནས། །དཀོན་མཆོག་རྩ་གསུམ་མཁའ་འགྲོ་ཆོས་སྐྱོང་ཀུན། །དཔང་དུ་བཞག་ནས་མནའ་ཡིས་བསྡམས་པ་ལས། །ལ་ལས་ཐུབ་ཀྱང་ལ་ལས་ངོས་ལྐོག་དང༌། །མི་དྲན་དགུ་དྲན་ལོག་སྤྱོད་དུ་མས་འགལ། །དེ་འདྲའི་མནའ་གྲིབ་མཁའ་འགྲོ་ཆོས་སྲུང་ཕོག །དེ་ཡི་ཉེས་པས་རང་གི་ཚེ་ཚད་ཀྱང༌། །ལོ་བཞིས་བསྟུངས་ཞེས་རྨི་ཉམས་གསལ་བར་མཐོང༌། །ལོ་གསུམ་འདས་ཚེ་སྤྱི་བ་ཀུན་མཐུན་པར། །
ཆང་ཁྲིམས་འདི་བཞིན་བྱས་ན་གྲྭ་ཚོགས་རྣམས། །ལུས་གནད་མི་ཐེག་སྙོམ་ཆུང་འཚོ་མི་ཐུབ། །ཅིས་ཀྱང་ཆང་ཁྲིམས་གློད་པར་ཞུ་འབུལ་བྱེད། །བདག་ནི་ཡིད་ཆད་སྐྱོ་བ་གཏིང་ནས་སྐྱེས། །ཆང་ཁྲིམས་ཞིག་ན་བདག་ཀྱང་སྡོད་དོན་མེད། །བསྟན་པ་གནས་པའི་རེ་བ་མ་མཆིས་པས། །ཆང་དང་བདག་གཉིས་དགའ་འདམ་གྱིས་ཤིག་སྨྲས། །ཆང་ལ་འདམ་སོང་བདག་ནི་ཁོ་ཐག་ཆད། །ཆུ་བོ་རྟ་ལོ་སྨིན་དྲུག་ཟླ་བའི་ཚེས། །ཉེར་གཉིས་ནུབ་མོ་ནམ་ཕྱེད་ཟླ་ཤར་ཚེ། །བྱ་བཏང་ཆས་ཞུགས་བདག་ཅག་དཔོན་སློབ་བདུན། །གྲྭ་ཚང་ནས་ཐོན་ཀོང་སྨད་ཁ་བལྟས་ཕྱིན། །རྒྱ་ལ་དཔལ་རི་གངས་ཀྱི་འདབས་ཞོལ་དུ། །རྒོད་ཚང་བདེ་གཤེགས་ཚེ་ཡི་ཕུག་པ་དེར། །བྱ་སྐྱིབས་ཚང་ཚིང་སྨྱུག་མའི་ལོ་མ་ཡི། །རང་ཤོང་མལ་ས་སྐྱིལ་ཀྲུང་ཤོང་རེ་བཟོས། །ངོ་ཤེས་འདྲིས་མེད་དཀོར་ཟས་འདུ་ལོང་བྲལ། །
ཕྱེ་ཁལ་གཉིས་དང་མར་ལེབ་འགའ་ཞིག་ཉོས། །འཚོ་བའི་རྒྱགས་ཀྱི་བློ་ཕུགས་དེ་ལ་གཏད། །ཤིང་ལོའི་འབོལ་སྟན་སྟེང་དུ་གདིང་བ་བཏིང༌། །གཟན་འདེར་གཅིག་དང་ཆོས་གོས་བརྩེགས་པ་གྱོན། །ཇི་ལྟར་བྱང་ཆུབ་ཤིང་དྲུང་ཐུབ་དབང་དང༌། །བྲག་དཀར་རྟ་སོར་བཞད་པ་རྡོ་རྗེ་ཡི། །རྣམ་པར་ཐར་པའི་ཚུལ་ལ་ཡིན་སྨོན་བགྱིས། །དེ་ཚེ་ངེས་འབྱུང་སྐྱོ་ཤས་ཀྱིས་བསྐུལ་ཞིང༌། །དཀོར་གྱི་གྲིབ་སངས་རྣམ་གཡེང་ཀུན་དང་བྲལ། །རྒྱལ་བ་སྒྲུབ་རྒྱུད་གོང་མའི་མཛད་སྲོལ་གྱི། །རྗེས་སུ་འབྲངས་པའི་བྱིན་རླབས་ནུས་པ་དེས། །རྩ་ཁམས་དྭངས་ཤིང་རིག་པ་རང་དབང་འདུས། །གཉིད་ཆུང་རྨི་ལམ་གསལ་ཞིང་ཕལ་ཆེར་ཟིན། །ཉིན་སྣང་སྒྱུ་མ་ལྟ་བུའི་ཏིང་འཛིན་གྱིས། །ཨ་འཐས་འཁྲུལ་པའི་སྣང་བ་ཤས་ཆུང་དང༌། །སྔར་མི་ཤེས་པའི་གོ་རྟོགས་མང་དུ་
འཆར། །མི་ལུས་ཐོབ་ཅིང་ཆོས་ལ་སྤྱོད་པ་དང༌། །དགོན་འཛིན་འཁོར་སྐྱོང་མི་མགུ་རང་སྡུག་གི །འཆིང་ཐག་བཅད་པའི་ཕན་ཡོན་འདིའོ་ཞེས། །རང་གི་རང་ལ་སེམས་ཀྱི་དགའ་སྟོན་གྱུར། །དེ་སྐབས་ཧོར་སོག་དཔུང་ཆེན་ཀོང་ཡུལ་སླེབས། །སྐྱེ་འགྲོ་མཐའ་དག་བྱེ་ཚན་ཉ་བཞིན་དུ། །ཅི་བྱ་རྟོལ་བྲལ་ཡོམ་ཡོམ་འཁྲུག་འཁྲུག་བྱེད། །བདག་གི་རྨི་ལམ་ཞིག་ཏུ་ཀོང་བཙུན་མོ། །བུད་མེད་དར་མ་བག་དྲོ་ཀོང་ཆས་ཅན། །ལག་ན་མེ་ཏོག་མཐིང་གའི་ཆུན་པོ་ཐོགས། །བདག་གི་རང་ཤོང་མདུན་འོངས་ཕྱག་འཚལ་ཏེ། །ཁྱེད་རང་དཔོན་སློབ་དགོན་སྡེར་བཅས་པ་རྣམས། །ཉེས་སྐྱོན་མི་འབྱུང་ཆོས་མཐུན་གྱིས་ཅེས་པའི། །གྲྭ་ཚོགས་རྣམས་ལ་ཞལ་བཀོད་ཞིབ་པར་མཛོད། །ཡ་ང་བག་ཚ་མི་དགོས་བསླུ་བ་མེད། །དེ་སྐད་ཟེར་བའི་འཕྲོ་ལ་གཉིད་ཀྱང་སད། །དེ་མཐུན་དགོན་པ་ལ་ཡང་ཡི་གེ་བསྲིངས། །
རྒྱལ་པོ་རྣམས་ཀྱི་བཀའ་དྲིན་བསྐྱངས་མཛད་ཅིང༌། །དགོན་ཁག་རྣམས་ལ་ཉེར་འཚེ་མེད་པ་དེ། །བླ་མ་དཀོན་མཆོག་མཁའ་འགྲོ་ཆོས་སྐྱོང་གི །སྐུ་དྲིན་ཡིན་ཀྱང་གོ་མཁན་ག་ལ་ཡོད། །དེ་ནས་རིམ་པས་ཉེ་རིགས་ཐམས་ཅད་ནས། །ཟང་ཟིང་དཀོར་ཟས་སྐྱེལ་མཁན་ཇེ་མང་སོང༌། །བཟའ་བཏུང་ལོངས་སྤྱོད་འཕེལ་ཡང་དགེ་སྦྱོར་འགྲིབས། །དཀོར་ལྷོངས་དངོས་ཉམས་རྨི་ལམ་ཇེ་ཆེར་གསལ། །རེས་འགའ་ལུས་ལ་ན་ཟུག་བཟོད་གླགས་མེད། །སྤྱི་བོའི་གཙུག་ནས་རྐང་མཐིལ་ཡན་ཆད་ལ། །མི་ནའི་ས་ནི་ཁབ་རྩེ་གང་ཙམ་མེད། །རེས་འགའ་སེམས་ལ་དོན་མེད་ཟུག་རྔུ་ལྡང༌། །དགེ་སྦྱོར་ལམ་འཁྱེར་འབད་ཀྱང་ནུས་མི་ཐོན། །རྨི་ལམ་ཀུན་ལ་འཇིགས་རུང་ཆུ་བོ་དང༌། །གཡང་ས་ཆེན་པོར་མི་ཐར་བཞིན་དུ་འགྲོ། །རང་མི་ཐར་བཞིན་གཞན་གྱིས་འབྲང་ཞིང་འབོད། །འདི་འདྲའི་ཚུལ་མཐོང་རང་
གཞན་དཀོར་ཟན་གྱི། །བླ་མ་བཙུན་གཟུགས་གཤིན་གསོན་རེ་ལྟོས་ལ། །ཡ་ང་བག་ཚ་སྤུ་ཙམ་མེད་པ་ཚོ། །ཀྱི་ཧུད་བར་དོའི་འཕྲང་ལ་ཅི་ལྟར་བྱེད། །བདག་ནི་འདི་འདྲའི་ཚུལ་ལ་བསམ་ནས་ནི། །བཅད་རྒྱའི་རྣམ་གྲངས་ཇེ་མང་བྱས་པ་ལས། །གཞན་དག་ཟོག་དང་ཆོས་བརྒྱད་ཡིན་པར་མཐོང༌། །རྒྱུ་འབྲས་ལས་ལ་བསླུ་བ་མེད་པ་དང༌། །ཡེ་ཤེས་སྤྱན་ལྡན་རྣམས་ཀྱིས་མཁྱེན་གཟིགས་འགྱུར། །ཤིང་མོ་བྱ་ལོར་རྗེ་བཙུན་ལོ་ཆེན་དང༌། །ལྷ་བཙུན་ཆོས་རྗེ་ཀུན་བཟང་རྣམ་རྒྱལ་གཉིས། །བཀའ་གྲོས་མཛད་ནས་རྒྱུད་འབུམ་རིན་པོ་ཆེ། །མཐའ་འཁོབ་ཀོང་ཡུལ་སྔ་འགྱུར་བསྟན་བཙས་སུ། །སྤྱན་འདྲེན་བགྱི་བར་དུས་དབང་ལམ་སྟབས་སོགས། །དཀའ་བས་གཞན་གྱི་བགྲོད་པར་མི་ནུས་གཟིགས། །ལྷ་བཙུན་གྲྭ་པ་རྣལ་འབྱོར་པ་བཅུ་གཉིས། །བརྟུལ་ཞུགས་ཚུལ་གྱིས་གླེགས་བམ་རེ་རེ་ཁྱེར། །ཉེར་
འཚེ་མེད་པར་གཙང་རོང་གོང་ར་ནས། །རྒོད་ཚང་ཕུག་ཏུ་བཅོ་བརྒྱད་ཞག་གིས་འབྱོར། །བཀུར་བསྟི་བགྱིས་ཤིང་སྐུ་དྲིན་གསོ་བྱེད་ཀྱི། །ཞུ་ཡིག་ཕུལ་བ་ཡར་ལའང་བདེ་བར་འབྱོར། སྔོན་དུས་རང་ཉིད་གྲྭ་ཚང་འགན་ཁུར་ཚེ། །གཙང་ཁང་སྦུག་ཏུ་སྟོན་པ་གཙོ་འཁོར་དང༌། །རྩེ་ལ་གཉྫི་ར་དང་ཚོགས་དུང་ལ། །དངུལ་ཤོག་དང་བཅས་བསྒྲུབ་འདོད་ནན་ཏན་དུ། །འབད་རྩོལ་བྱས་རུང་ལས་འཛིན་སུ་ཡིས་ཀྱང༌། །གྲོགས་བྱེད་མ་ཉན་གྲུབ་པར་མ་གྱུར་པས། །རྒོད་ཕུག་སླེབས་ནས་རང་གི་ཉེ་གནས་པས། །རྩོལ་བ་བྱེད་པར་ཁས་བླངས་ཁོ་རང་གི །ཆོས་གོས་ལྷུང་བཟེད་ཚུན་ཆོད་དེ་དོན་བཏང༌། །གྲབས་ཡུལ་བྱེད་སྐབས་སྔོན་དུས་བུ་ཆུ་རུ། །འབོད་མི་དགོས་པར་དུས་བབས་སླེབས་མཁན་གྱི། །ལྷ་བཟོ་མཆེད་གཉིས་དེ་ཡང་བྱོན་བྱུང་བས། །ཐོག་མར་རྒོད་ཚང་ཉིད་ཀྱི་ནང་
རྟེན་དུ། །པདྨ་གུ་རུའི་སྐུ་བཞེངས་གསེར་རིས་ཀུན། །རང་གིས་བགྱིས་ཤིང་གཟུངས་དང་རབ་གནས་སོགས། །ཐམས་ཅད་ངེས་འདྲོངས་ཉིད་དུ་འབད་པས་བསྒྲུབས། །དེ་ནས་གྲྭ་ཚང་ཉིད་ཀྱི་མཆོད་ཁང་དུ། །བྱ་ལོར་བཞུགས་ཁྲི་རྒྱབ་ཡོལ་ལེགས་པར་གྲུབ། །དེ་ཡི་དགུན་དུས་ལྷ་བཙུན་ཀུན་རྣམ་པ། །དཔོན་སློབ་བཅོ་ལྔ་ཙམ་གྱིས་རྒྱུད་འབུམ་འཕྲོ། །གདན་དྲངས་ཕེབས་ཏེ་གྲྭ་ཚང་ཡས་མས་ལ། །མང་འགྱེད་མཆོད་འབུལ་བསམ་གྱིས་མི་ཁྱབ་མཛད། །བདག་ལ་རྟེན་མཆོད་སྐུ་གསུང་ཐུགས་རྟེན་རིགས། །གཙོ་བྱས་དགུ་མཚན་བཅུ་གསུམ་གནང་ཆ་མཛད། །ངོས་འཇལ་ཉིན་ཞག་བཅོ་ལྔ་ཉིན་དང་མཚན། །ཆོས་ཀྱི་བགྲོ་བ་རྒྱུན་མི་ཆད་པ་དང༌། །བཀའ་འབུམ་ལ་སོགས་བཞེད་པ་དང་མཐུན་པའི། །ཆོས་འབུལ་སྡིག་ཟས་མིན་པའི་བཀུར་བསྟིས་མཆོད། །འདི་བཟུང་བྱང་ཆུབ་བར་གྱི་གླེང་མཆིད་ཀུན། །ཁོ་ཐག་ཆོད་པར་ཞུས་ཏེ་
ཡར་ལ་བཞུད། །མེ་ཁྱི་ལོ་ལ་མཆོད་ཁང་རྟེན་རྣམས་བཞེངས། །གང་ཞིག་རྒྱལ་བའི་སྐུ་གསུང་ཐུགས་ཀྱི་རྟེན། །བཞེངས་ཞེས་སེམས་ཅན་མང་པོ་སྲོག་བཅད་པའི། །ཤ་ཁྲག་ལོངས་སྤྱོད་ཡོ་ལང་ལ་བརྟེན་པའི། །དགེ་རྩ་དེ་འདྲ་སྡིག་ལས་སྡིག་ཆེན་ཉིད། །ཅི་ཕྱིར་ཞེ་ན་དཀོན་མཆོག་ལ་བརྟེན་པའི། །སྡིག་ནི་སྡིག་པ་གཞན་ལས་ལྷག་པར་ལྕི། །ཡུལ་དང་རྟེན་གྱི་ནུས་པ་ཡིན་ཕྱིར་རོ། །དེས་ན་སྲོག་གཅོད་དག་དང་མ་འདྲེས་པར། །ལྷ་བཟོ་བ་ལ་དེ་ཡི་རྒྱུ་མཚན་ཕུལ། །གསོལ་སྐྲུམ་ལ་སོགས་སྐལ་བར་དར་རས་དང༌། །ཇ་སྣམ་རས་སོགས་སྐམ་ཟོག་གྱ་ནོམ་ཕུལ། །ཟླ་བ་དྲུག་ཏུ་སྐྱོ་ཚ་ཚོད་མ་ལ། །བརྟེན་ནས་ཕྱག་ལས་བརྩོན་པ་མཐའ་འཁྱོལ་མཛད། །བླ་བྲང་ནང་དང་གྲྭ་མང་སྤྱི་པ་ལ། །རྟེན་བཞེངས་ཆེད་དུ་རང་ལ་གང་འབྱོར་གྱི། །ལས་ཡོན་གསེར་ཞོ་ལྔ་བརྒྱའི་རྩིས་སུ་ཕུལ། །ལྷ་བཟོ་གསུམ་ལ་
གསེར་དང་དངུལ་སྲང་ཆེན། །ལྔ་བཅུས་ཐོག་དྲངས་གོས་དར་སྤུས་གཙང་སོགས། །རྟ་བཟང་དང་བཅས་དགུ་མཚན་བདུན་ཕུལ་བས། །ལྷ་བཟོ་ཡོན་གྱིས་མཉེས་རབ་ཕུལ་ཏུ་གྱུར། །དུས་གསུམ་སངས་རྒྱས་མཆོག་ཟུང་ཉེ་སྲས་བརྒྱད། །སྒོ་སྲུང་ཁྲོ་བོ་གཉིས་དང་རྒྱབ་ཡོལ་ལ། །བླ་བརྒྱུད་མདོར་བསྡུས་དང་བཅས་ལྷ་ཚོགས་རྣམས། །གནས་ཆེན་མཐའ་དག་ས་སྣ་ཆུ་ཤིང་རྡོ། །རིན་ཆེན་དར་ཟབ་སྨན་དང་སྦྱར་བའི་རྒྱུ། །སྐྱེས་ཆེན་དུ་མས་བྱིན་རླབས་མཛད་པའི་ཕབས། །བཀྲ་ཤིས་དགེ་ལེགས་འབྱུང་བའི་རྫས་ཚང་བའི། །སྐུ་སྒྱུ་ལས་བཞེངས་གསེར་ཞོ་བརྒྱ་དང་དགུ། །བཏུལ་བ་ཟངས་ཆུ་དང་བཅས་ན་བཟར་གསོལ། །གཟུངས་རྣམས་རང་ཉིད་ཁོ་ནས་ལཉྪ་བྲིས། །པར་དུ་བསྒྲུབ་པ་ཚར་གྲངས་ལྔ་བརྒྱར་བཏབས། །རབ་ཏུ་གནས་དང་དྲིལ་སོགས་རང་གིས་བགྱིས། །དེ་བཞིན་གཤེགས་པ་འོད་སྲུང་ཤཱཀྱ་
ཐུབ་ཀྱི། །འཕེལ་གདུང་གཙོ་བྱས་ནང་རྟེན་ཁྱད་འཕགས་རིགས། །དེ་དུས་རང་གི་ལག་ཏུ་གང་ཡོད་ཀུན། །ཐམས་ཅད་སྐུ་རྟེན་རྣམས་ལ་ནང་བཞུགས་ཕུལ། །རིང་སྲེལ་རྣམ་པ་གསུམ་གྱི་ལེགས་བཀང་བས། །མཐོང་ཐོས་དྲན་རེག་འབྲེལ་ཚད་དོན་ལྡན་བྱས། །ཡུལ་དུས་གནས་སྐབས་རང་དབང་མ་འདུས་པས། །སྤྲོས་བཅས་རབ་གནས་འར་འུར་མ་གྲུབ་རུང༌། །རྒོད་ཚང་ཉིད་ནས་ཡེ་ཤེས་འབེབས་བསྟིམ་གྱི། །ཏིང་འཛིན་རབ་གནས་ལན་བརྒྱར་ནན་ཏན་གྱིས། །བཞི་པའི་དུས་དེར་ལྷ་བབས་དུས་བཟང་འགྲིགས། །དེ་ནུབ་མེ་ཏོག་དངོས་སུ་བབས་པ་དང༌། །སྲུང་མ་དཔལ་མགོན་བདུན་ཅུས་བྱེད་སྐད་ཀྱི། །རྨི་ལམ་འཁྲུལ་སྣང་དེ་ཡང་དེ་ནུབ་བྱུང༌། །གོས་ཁ་ལྔ་བཅུ་ལས་སྒྲུབས་གནམ་རྒྱན་དང༌། །མཆོད་པའི་ཡོ་བྱད་གང་འབྱོར་རྩལ་ཕྲུགས་ཕུལ། །དེ་སྐབས་རང་གི་ལག་ཏུ་
ཅི་ཡོད་ཀྱི། །དངོས་པོ་བླ་ཆས་ཕོར་སྡེར་ཐེབས་འཁྲོལ་ཚུན། །ཐམས་ཅད་ལྷག་མ་མ་ལུས་དེ་ཕྱོགས་བཏང༌། །ཤི་གསོན་དད་ཟས་འབྲེལ་པ་ཐོགས་ཚད་དང༌། །ཁ་ལག་ཟས་ཆོས་འབྲེལ་ཐོགས་ལྟོས་བཅས་ཚོགས། །མ་རྒན་མཁའ་མཉམ་འགྲོ་བ་རིས་མེད་ཀུན། །བྱང་ཆུབ་ཆེན་པོའི་རྒྱུ་རུ་བསྔོ་སྨོན་འབད། །རང་ལ་འཁོས་ཁྱེར་འདི་ལས་མེད་ན་ཡང༌། །དགེ་བ་གང་བྱེད་སྡིག་དང་མ་འདྲེས་པར། །བྱང་ཆུབ་སེམས་དང་བསྔོ་བའི་རྒྱས་ཐེབས་པར། །བྱས་དང་བྱེད་འགྱུར་ཁ་ཞེ་མཚུངས་པ་ལ། །གཞན་དག་མགུ་བར་ཅི་ནུས་རང་མནོང་མེད། །མེ་ཕོ་ཁྱི་ལོ་རྒྱལ་ཟླའི་དུས་བཟང་ལ། །གཏེར་སྟོན་རིག་འཛིན་ཆེན་པོ་འཇའ་ཚོན་སྙིང༌། །ཞིང་འདིའི་གདུལ་བྱ་རྫོགས་ཉེའི་ཚུལ་སྟོན་ཁར། །བདག་ལ་ཤོག་གསུངས་ཕོ་ཉ་གནང་ན་ཡང༌། །ཧ་ཅང་ཕྱིས་པས་ཞལ་མི་མཇལ་
བར་རིགས། །བརྟན་བཞུགས་ཞུ་ཤོག་ཕུལ་དང་སྨོན་ལམ་རྟེན། །མར་ལ་བསྐྱེལ་མཁན་ལམ་དུ་ཕྲད་འཛོམ་གྱུར། །སྐུ་གདུང་རིན་ཆེན་ཞུགས་ལ་ཞེན་ཕྱིར་དུ། །བདག་ལ་ཅིས་ཀྱང་ཤོག་ཅེས་ནན་བྱུང་ཀྱང༌། །དུས་དབང་གཞན་རྐྱེན་སྐབས་སྟོབས་དབང་བཙན་ཕྱིར། །མ་ཕྱིན་མཚམས་ཁང་ཉིད་ནས་མཆོད་སྨོན་བགྱིས། །ས་བྱིའི་དཔྱིད་ཀ་ཨེ་རོང་གྲབ་ཕྱོགས་ནས། །ནམ་སྙིང་སྐྱེ་རྒྱུད་ཆོས་རྗེ་ནེ་རིང་པ། །སྔོན་ནས་ཞལ་འདྲིས་ཆེ་དང་དེ་དུས་ཀྱང༌། །རྗེ་བཙུན་ལོ་ཆེན་དྲུང་གི་བཀའ་ཐམ་བཅས། །བསྙེན་པར་རྫོགས་སོགས་ཆོས་དོན་གཉེར་བས་ཕེབས། །ནགས་ཁྲོད་ཤིང་ལོའི་སྤྱིལ་ཆུང་བཟོས་ནས་བཞུགས། །ཁ་ན་མ་ཐོ་མེད་པའི་འཚོ་བ་དྲངས། །ཟབ་ཆོས་ཞི་ཁྲོ་དགོངས་པ་རང་གྲོལ་གྱི། །ཉམས་ཁྲིད་བུག་སྒོ་ནས་ཕུལ་ཟབ་བཞེས་གནང༌། །བདག་ནི་བཅད་རྒྱའི་དབང་གིས་བསྙེན་རྫོགས་ནི། །འབུལ་མ་ཐུབ་ཀྱང་བྱང་
སྡོམ་བཀའ་འབུམ་སོགས། །བཞེད་མཐུན་ཆོས་ཕུལ་ཟླ་གསུམ་བཞུགས་ནས་ཐེགས། །སྔོན་དུས་གོང་རར་རྗེ་བཙུན་ལོ་ཆེན་གྱིས། །གྲྭ་ཚང་འདི་ལ་སྤྲེལ་ཟླ་ཚེས་བཅུ་ཡི། །ཐེབས་རྒྱུན་གནང་སྐབས་མཁའ་འགྲོས་འཕྲོས་ཁོར་དུ། །ཤ་ཅང་སྡིག་ཟས་མ་འདྲེས་ཚེས་བཅུ་ཡི། །མཆོད་པའི་རྒྱུན་འདི་ཁྱེད་ཀྱི་འཛུགས་ཐུབ་ཚེ། །བདག་གིས་དངོས་པོ་རིམ་པས་བསབ་རྩིས་དང༌། །གསོལ་འདེབས་ལེའུ་བདུན་གདངས་དབྱངས་རྒྱུན་ཁུངས་མ། །ཡི་གེ་ལ་སྟོད་སྲིད་གསུམ་རྣམ་རྒྱལ་ན། །ཡོད་པས་དེ་ཡང་ཞུས་ནས་འབུལ་ལུགས་བྱེད། །གྲྭ་ཚང་དེ་ལ་ཆང་གི་དྲི་ཙམ་ཡང༌། །ནམ་ཡང་མི་འབྱུང་ཐབས་དེ་ཁྱེད་ཀྱིས་རེམས། །དེ་སྐད་གསུངས་གདམས་བདག་གི་ཡིད་ལ་གཅགས། །ཇི་ཙམ་འབད་ཀྱང་ཆང་ཁྲིམས་འགྲུབ་དཀའ་མོད། །རྗེ་དེ་ཐུགས་ཟབ་བརྟན་བརླིང་ཕུལ་གྱུར་ཚེ། །ལ་སྟོད་ཕྱོགས་སུ་བླ་མ་དྲག་སྒྲུབ་པ། །དཀའ་སྤྱད་ཁྱད་
གསད་གདངས་རྒྱུན་ཞུ་བར་བཏང༌། །དྲུང་དུ་འཁོར་ཚེ་ཀོང་པོར་ཆེད་དུ་མངགས། །ཆང་ཁྲིམས་མ་འཁྱོལ་བདག་ཀྱང་ལུང་སྟོང་འགྲིམས། །གདངས་ཀྱི་དགོས་མེད་གྱུར་ཀྱང་རྗེ་དེ་ཉིད། །དགོངས་པ་བསྐང་ཕྱིར་བུག་སྒོར་གདངས་རྒྱུན་ཞུས། །བླ་མ་དེ་ལ་རྫོགས་ཆེན་ཧཱུྃ་སྐོར་གྱི། །ཟབ་ཁྲིད་བཤད་ནས་ཟླ་གསུམ་ནགས་སུ་བསྒོམས། །ཞུ་ཡིག་དང་བཅས་སླར་ཡང་ཞབས་ཕྱི་བརྫངས། །ཡང་ནི་སྔོན་ཚེ་ཆོས་རྗེ་ཀཿཐོག་པ། །པདྨ་བློ་གྲོས་དེ་ཉིད་དངོས་མཇལ་དུས། །གསང་སྔགས་སྔ་འགྱུར་ཆོས་ཀུན་སྤེལ་སླད་དུ། །མདོ་ཁམས་ཕྱོགས་སུ་ཅིས་ཀྱང་འོང་དགོས་ཞེས། །བཀའ་ནན་བརྩལ་ཡང་བདག་གི་མ་ཕྱིན་ཚེ། །རྗེ་དེས་དབོན་པོ་རྣམས་ལ་ཞལ་ཆེམས་བཞག །ས་མོ་གླང་ལོར་དབོན་པོ་དཔོན་སློབ་འགའ། །གདན་འདྲེན་ཡིན་པས་ཅིས་ཀྱང་ཁམས་ཕྱོགས་སུ། །དཔོན་སློབ་མ་ཉུང་བ་ཞིག་
ཕེབས་དགོས་ཞེས། །ནན་ཆགས་ཆེན་པོ་མཛད་ཀྱང་ད་ནི་བདག །གཞན་དོན་སྤྲོས་པའི་འཁོར་རྒྱུན་ཆོད་ཚར་བས། །དེ་འདྲའི་རེ་བ་བདག་ལ་མ་མཛད་ཞུས། །ཡང་ནི་སྟོང་ལོག་སླར་ཡང་བསྐྱར་ཆགས་ཀྱི། །བང་ཆེན་ཡི་གེ་མཚན་པ་ཐ་དད་བཅས། །བྱུང་ལ་འདུས་བྱས་སྒྱུ་མའི་ལུས་འདི་ཡིས། །ཕྱོགས་དེར་ནམ་ཡང་ཚེ་འདིར་འགྲོད་མིན་ཞེས། །ཁོ་ཐག་ཆོད་པའི་ཡིག་འཕྲིན་སོ་སོར་བསྲིངས། །ཟང་ཟིང་འདོད་ན་ཕྱོགས་དེར་འགྲོ་མོད་ཀྱི། །བདག་ལ་དེ་མིན་ཆོས་ཀྱི་སྣོད་ལྡན་དཀོན། །བསྟན་པའི་མཐར་ཐུག་སྐྱེ་འགྲོ་ཆགས་སྡང་རགས། །རང་ལ་ཐོས་བསམ་སྒོམ་སྟོབས་ནུས་པ་དམན། །གང་ནས་བསམ་ཀྱང་འགྲོ་ཕན་མི་འགྲུབ་ལ། །ཟང་ཟིང་བརྙེད་ཀྱང་དགྲ་འདྲེ་དཀོར་རྣམས་སྨིན། །སྡུག་བསྔལ་དུ་མའི་སྣོད་དང་ཉེས་པའི་གཞི། །གྲྭ་འཁོར་ཐམས་ཅད་ཕུང་ལ་སྦྱོར་འགྱུར་བར། །གོ་བཞིན་
མིག་ལྡན་གཡང་ལ་ཅི་ཕྱིར་མཆོང༌། །སྙིགས་དུས་འགྲོ་དོན་མཛད་པར་མིང་བཏགས་པའི། །རྣམ་འདྲེན་ཆེ་ཆུང་འབྲིང་ཀུན་ཆོས་ཀྱི་ནོར། །བསྒྲུབ་པའི་སྲོལ་འདི་མདོ་རྒྱུད་གང་ནས་བཤད། །གཞན་རྒྱུད་འདུལ་བར་བྱེད་ལ་རང་སྨིན་དགོས། །རང་ཉིད་ཟང་ཟིང་སྲེད་པ་མ་ཆད་བཞིན། །གཞན་ལ་ཆོས་བཤད་ཐང་མར་བརྡལ་ན་ཡང༌། །ཡེ་ཤེས་སྤྱན་དང་སྤྱོད་ལྡན་ཁྲེལ་བའི་རྒྱུ། །ཆོས་དང་ཟང་ཟིང་བརྗེ་བའི་འགྲོ་དོན་དེ། །རང་གཞན་གཉིས་ཕུང་སྒྲུབ་པའི་ལས་ཡིན་པར། །དཀོན་བརྩེགས་མདོ་དང་ངེས་དོན་འདུས་རྒྱུད་སོགས། །རྒྱལ་བའི་བཀའ་ལུང་ཀུན་ལ་ལེགས་པར་གཟིགས། །བསྐལ་བཟང་རྒྱལ་བ་སྟོང་དང་དེ་ཡི་འཁོར། །ཉན་ཐོས་མཐའ་དག་ཉིན་རེའི་བསོད་སྙོམས་ཀྱི། །འཚོ་བ་ལས་གཞན་འབུལ་སྡུད་ག་ལ་མཛད། །གསང་སྔགས་རྒྱུད་ལས་དབང་བཞིའི་ཡོན་གྱི་ཕྱིར། །རྟ་དང་གླང་
པོ་རིན་ཆེན་ནོར་གྱི་དབྱིག །བུ་དང་ཆུང་མ་རང་གི་ལུས་སྲོག་བཅས། །འབུལ་བར་གསུང་ཡང་སློབ་མའི་ཚོགས་རྫོགས་སླད། །མོས་པས་འབུལ་ལས་བླ་མས་ག་ལ་བཞེས། །དེ་ཕྱིར་ཆོས་དང་ཟང་ཟིང་བརྗེ་བ་ཡི། །རྣམ་འདྲེན་ཟོལ་མའི་རིགས་ནི་ཚེ་འདི་ནས། །སྐྱེ་བ་ཀུན་ཏུ་བྱེད་པར་མ་གྱུར་ཅིག །དེ་ལྟར་ས་བྱི་གླང་སྟག་ཡོས་ལོ་ཚོར། །དམར་སེར་བསྟན་པའི་ཆག་སྒོ་འཁྲུགས་ལོང་དང༌། །ཧོར་སོག་དམག་དཔུང་དཀག་རིགས་ལ་སོགས་ཀྱིས། །ཀོང་ཡུལ་སྨད་ཀུན་རྦ་ཀློང་བཞིན་འཁྲུགས་པས། །ཁྱིམ་པ་ཀུན་ཀྱང་ནགས་སུ་འབྲོས་ཤིང་ཡིབ། །ཟས་ནོར་ཐམས་ཅད་ཆོམ་རྐུན་ཧབ་ཐོབ་བྱེད། །བར་དོའི་ཡུལ་འདྲ་དེ་ཡི་གཞི་བདག་འཁྲུགས། །འབྱུང་བ་མ་སྙོམས་ས་ཆད་བྲག་རི་ཉིལ། །ཤྭ་འོད་ཆུ་ལོག་རླུང་འཚུབས་ཤིང་ཆེན་འགྱེལ། །སྣོད་བཅུད་མི་བདེ་སྐྱེ་འགྲོ་ཉམས་ཐག་ཅིང༌། །ལམ་འཕྲང་འགག་ཀུན་
མི་རོ་གྲམ་ལྟར་ཁྲོལ། །དེ་འདྲའི་རྐྱེན་གྱིས་རང་རེ་དཔོན་སློབ་ཀྱང༌། །འཚོ་བ་བསྒྲུབ་དཀའ་སྒྱུ་འགྲུལ་ལམ་མི་ཐར། །གང་ལྟར་བྱས་ཀྱང་ཟོལ་མི་བདེ་བ་ཡིས། །རང་རེའི་ཟླ་གྲོགས་རྣམས་ཀྱང་འགའ་ཞིག་འདས། །ལ་ལ་མ་ཆགས་དགོན་པར་ལོག་ནས་སོང༌། །རང་གི་གཅུང་དང་ཉེ་གནས་རྒན་པོ་དང༌། །བདག་ཅག་གསུམ་པོ་ལེགས་ཉེས་སྐྱིད་སྡུག་ཀུན། །བླ་མ་དཀོན་མཆོག་གསུམ་པོར་བློ་གཏད་མཐུས། །འགལ་རྐྱེན་ཉེར་འཚེ་མེད་པར་བདེ་བར་འཚོ། །དགེ་སྦྱོར་ཐུན་བར་དག་ཏུ་མཚན་བརྒྱད་ལ། །རྫོགས་ཆེན་སྙིང་ཐིག་བླ་རྒྱུད་ཀྱིས་བསྐོར་བའི། །ཞལ་ཐང་དགུ་ཚར་གོང་ཤམ་བཟང་སྒྲིགས་བཅས། །གཞན་ལག་མ་འདྲེས་རང་ཉིད་ཁོ་ན་ཡིས། །སྙིང་རུས་འབད་རྩོལ་ཆེན་པོས་བཞེངས་ཤིང་བཟོས། །རྒྱུད་འབུམ་རིན་ཆེན་གླེགས་བམ་ཐམས་ཅད་ལ། །པ་ཏི་དམར་པོ་གོས་ཆེན་མུ་འགྲིལ་དང༌། །མུ་ཏིག་བསྒྲེགས་པའི་ཀ་ཐོ་
དང་བཅས་པའི། །ཤུབས་དང་ན་བཟའ་སྐུ་རགས་གོས་ཆེན་ལས། །བསྒྲུབས་པའང་རང་གིས་ལག་བདར་འབད་པས་བཟོས། །སླར་ཡང་གནས་བཅུའི་སྐུ་ཐང་བདུན་ཚར་བཞེངས། །ཀུན་ཀྱང་རི་མོ་ཚོན་བྱུག་གོང་ཤམ་སོགས། །མ་ལུས་རང་ཉིད་གཅིག་པུས་སྙིང་རུས་འབད། །མཁས་པ་མགུ་བའི་རྣམ་དཔྱོད་ག་ལ་ཤེས། །རང་གཞན་འབྲེལ་ཐོགས་ཚོགས་རྫོགས་སྒྲིབ་སྦྱོང་དང༌། །མཁའ་མཉམ་འགྲོ་ལ་ཕན་ཕྱིར་ཁོ་ནར་སྨོན། །ཇི་ལྟར་སྔོན་ཚེ་ཇོ་བོ་ཨ་ཏིས་ཤས། །སཱཙྪ་ལ་སོགས་ཉིད་ཀྱི་ཕྱག་བདར་མཛད། །འདི་འདྲའི་འོ་བརྒྱལ་བདག་ཅག་བགྱིས་ཞུས་ཚེ། །འོ་ན་བདག་གི་ལྟོ་ཡང་ཁྱེད་ཟའམ། །དགེ་བ་ཐམས་ཆད་ལག་ལེན་འབའ་ཤིག་ཁྱད། །རང་གི་དགེ་བ་རང་གིས་འབད་དགོས་གསུངས། །བདག་ཀྱང་དེ་ལྟའི་རྗེས་སུ་འབྲང་ཁུལ་བགྱི། །ཆུ་འབྲུག་ལོ་ལ་རྗེ་བཙུན་ལོ་ཆེན་གྱི། །བཀའ་ཐམ་སྐྱེལ་བར་ཛྙཱ་ན་ཀཱིརྟི་གནང༌། །དེང་སང་ཀོང་ཡུལ་དུས་ཁམས་
མི་བདེ་ཞིང༌། །ཁྱད་པར་དེ་སྐོར་བཀག་རིགས་ཀྱིས་འཛིན་ཚེ། །དམག་དང་འཐབ་འཁྲུགས་ཟོལ་མི་བདེ་སྐད་ཐོས། །དེ་བས་དབུས་གཙང་ཕྱོགས་འདིར་བྱོན་པ་ན། །སྦྱར་ནས་དགོངས་པ་གཏད་ལྟར་ཟབ་ལུང་སོགས། །དབེན་པའི་སྒྲུབ་གནས་དགོངས་པར་གང་བབས་སུ། །བཞུགས་པའི་ཞབས་ཏོག་མཐུན་སྦྱོར་བདག་གི་ཞུ། །འདི་ཙམ་སྐབས་ལ་ཕེབས་པ་མ་གནང་ན། །མི་རྒན་བདག་ཀྱང་ད་ནི་ཡུན་མི་འཚོ། །དེ་སྐད་བཀའ་ཡིག་བྱུང་ཚེ་ཡིད་མ་བདེ། །བརྟན་བཞུགས་རྒྱུ་མཚན་ཞིབ་ཆའི་ཞུ་ཞིག་ནི། །འབུལ་དུ་རང་གི་ནུ་བོ་གྲོགས་བཅས་བརྫངས། དེ་ཉིད་ཞབས་སྲིད་བརྟན་པར་མི་དགོངས་ན། །བདག་ཀྱང་ཕྱོགས་དེར་ཅི་ལ་འོང་ཞེས་ཞུས། །འདི་བཟུང་བྱང་ཆུབ་བར་གྱི་ཞལ་གདམས་རྣམས། །བསྩལ་ནས་ནུ་བོ་གྲོགས་བཅས་མྱུར་བར་འཁོར། འདི་སྐབས་བསྟན་འགྲོའི་བསོད་ནམས་དམན་པའི་མཐུས། །ཁྱི་ལོར་རིག་འཛིན་
འཇའ་ཚོན་སྙིང་པོ་དང༌། །རྫོགས་ཆེན་ཆོས་རྗེ་ནམ་མཁའ་འབྲུག་སྒྲ་གཤེགས། །ཡོས་ལོར་མཚུངས་མེད་རིག་འཛིན་སྙིང་པོ་གཤེགས། །སྦྲུལ་ལ་ལྷ་བཙུན་ཀུན་བཟང་རྣམ་རྒྱལ་དང༌། །ཤིང་རྟའི་ལོ་ལ་རྗེ་བཙུན་ལོ་ཆེན་ཡང༌། །དགོངས་པ་ཆོས་དབྱིངས་ཐིམ་པ་རིམ་ཅན་གྱུར། །དེ་ཡི་རྐྱེན་ལས་རང་ཉིད་ཡིད་ཕམ་ཞིང༌། །རིང་པོར་མི་སྡོད་འཆི་བར་ངེས་སོ་སྙམ། །ལག་ཏུ་དད་རྫས་ལྷག་མ་གང་ཡོད་ཀུན། །ཀོང་ཡུལ་གྲུབ་མཐའ་རིས་མེད་དགོན་ཀུན་ལ། །མང་བསྐོལ་རྣམ་གཞག་བསྔོ་རྟེན་ཅི་འབྱོར་ཕུལ། །རྟེན་མཆོད་རོལ་ཆ་བླ་ཆས་ལ་སོགས་པ། །ཐམས་ཅད་རང་གི་དགོན་གསུམ་བགོས་ནས་སྦྱར། །གྲྭ་ཚོགས་རྣམས་ལའང་སྤྱི་འགྱེད་མང་བསྐོལ་དང༌། །འཕྲལ་ཡུན་ཕན་པའི་བསླབ་བྱ་སྙན་འབུལ་གྱི། །ཡི་གེ་དང་བཅས་སོ་སོར་གང་འཚམས་ཕུལ། །རང་གཞན་ཀུན་ལ་དེ་ལྟར་ཕུལ་བའི་དགེ །དེས་མཚོན་ཚེ་རབས་ཀུན་དང་དུས་གསུམ་གྱི། །
དགེ་བས་བླ་མ་རྣམས་ཀྱི་དགོངས་རྫོགས་དང༌། །རང་ལ་ཁ་ལག་ཟས་ཆོས་འབྲེལ་ཐོགས་ཀྱི། །གཤིན་གསོན་ལྟོས་བཅས་མཁའ་ཁྱབ་སེམས་ཅན་རྣམས། །རྫོགས་པའི་བྱང་ཆུབ་ཐོབ་ཕྱིར་ཁོ་ནར་བསྔོས། །གནས་ཆེན་ཙཱ་རིའི་མཚོ་རྣམས་ཐམས་ཅད་དུ། །བྱིན་རླབས་དམ་རྫས་རིན་ཆེན་དར་སྨན་འབྲུ། །སྨོན་ལམ་བདེན་ཚིག་ཤོག་དྲིལ་དང་བཅས་པ། །རཏྣའི་ཟ་མ་ཏོག་བཀངས་མཚོ་མཆོད་ཕུལ། །སངས་རྒྱས་བསྟན་དར་སེམས་ཅན་བདེ་ཞིང་སྐྱིད། །བསྟན་འཛིན་ཐུགས་མཐུན་ཆོས་སྤྱོད་བརྩོན་ཞིང་འཕེལ། །རྒྱལ་ཁམས་ནད་མུག་འཁྲུགས་བརྩོད་ཞི་བ་སོགས། །འདོད་གསོལ་ལྷག་བསམ་རྣམ་དག་ངང་ནས་བགྱིས། །རྒྱ་ལའི་གནས་མཐིལ་ཁྲིས་པ་ཞེས་པའི་སར། །ལྷ་སྲིན་འདུལ་བའི་ས་གནད་གཉན་པོ་རུ། །སྔོན་ཚེ་གུ་རུས་ལུང་བསྟན་ཇི་བཞིན་དུ། །རཏྣ་གླིང་པས་ས་ཡི་མེ་བཙའ་ལ། །རིགས་གསུམ་ལྷ་ཁང་བཞེངས་དེ་དུས་ཀྱིས་ཉམས། །མེ་
སྤྲེལ་ལོ་ལ་ཡུལ་པ་རྣམས་བགྲོས་ནས། །རྡོ་ཡི་ལྷ་ཁང་ཆུང་ངུ་ཞིག་བཞེངས་པར། །རབ་གནས་འདུན་གཏད་དགོས་ཟེར་སྤྲེལ་ལོ་ཡི། །སྤྲེལ་ཟླ་ཚེས་བཅུའི་སྔ་དྲོ་བྱིན་འབེབས་བྱས། །དེ་ཚེ་རྒོད་ཚང་ཕྱོགས་ཀྱི་ནམ་མཁའ་ནས། །ནས་ཀྱི་ཆར་པ་ལན་བཞི་བྱུང་ནས་ནི། །ལྷ་ཁང་དེ་ཡི་ཕྱི་ནང་ཁྱབ་པ་ནི། །དེར་ཡོད་ཀུན་གྱིས་མངོན་སུམ་ཧབ་ཐོབ་བྱས། །འདི་དང་མཚུངས་བར་དེ་གོང་སྙིམ་ཕུ་རུ། །མཚུངས་མེད་རིག་འཛིན་སྙིང་པོའི་སྤྲུལ་པའི་སྐུར། །མཚན་དང་ལེགས་བྱས་བརྟན་ཞུགས་ཕུལ་བའི་དུས། །ཁོང་གི་སྐུ་དཔང་མེ་ཏོག་དངོས་སུ་བབས། །གཞན་ཡང་ཐིམ་ཡུལ་གུ་རུ་སྒྲུབ་ཕུག་དང༌། །ཙཱ་གོང་ཡང་དགོན་ཉང་ཁ་བྲག་ལོགས་དགོན། །ཆབ་སྟེང་ལ་སོགས་སོ་སོར་ལྷ་ཁང་གི །རབ་གནས་དུས་ཚེས་བསྒྲིགས་པའི་མེ་ཏོག་ནི། །དངོས་སུ་བབས་ཚུལ་སོ་སོའི་ངག་ལས་ཐོས། །ཆོས་དབྱིངས་འོད་གསལ་རྩེ་མོའི་གཟིམས་ཁང་ནི།
།ལེགས་གྲུབ་ཞལ་བསོ་རབ་གནས་བགྱིས་པའི་དུས། །མགོ་དགུ་སྒྲུབ་སྡེའི་གཟིམས་ཆུང་སྟེང་འོག་གཉིས། །མེ་ཏོག་བསིལ་མས་གང་བའི་ངོ་མཚར་བྱུང༌། །རང་ལ་ཏིང་འཛིན་རྫུ་འཕྲུལ་ནུས་པའི་རིགས། །རྡུལ་ཙམ་མེད་པར་རང་གི་གོ་མོད་ཀྱང༌། །སྐྱབས་མཆོག་རྒྱལ་དབང་པདྨ་འབྱུང་གནས་ཀྱི། །ཐུགས་རྗེའི་སྒྱུ་འཕྲུལ་འདི་ནི་ཡིད་ཆེས་གནས། །རང་ཉིད་སྡོན་ནས་ཆང་ལ་མི་སྤྱོད་ཀྱང༌། །གྲོགས་འཁོར་ལ་སོགས་གཞན་ལ་ཕན་ཕྱིར་དག༌། །བསྟན་པའི་རྐང་དང་རྒྱུན་ལ་ཕན་རེ་བས། །མེ་ཕོ་བྱ་ལོ་ས་ག་ཟླ་བའི་ཉ། །ཐུབ་དབང་མངོན་པར་བྱང་ཆུབ་དུས་ཆེན་ནས། །བཟུང་སྟེ་མི་ཚེའི་ལྷག་མ་གང་ཡོད་རིང༌། །གཞིས་བྱེས་ལམ་དང་ས་ཕྱོགས་གར་འདུག་ཀྱང༌། །མྱོས་འགྱུར་ཕབས་ཀྱིས་བཏབ་པའི་རིགས་གྱུར་རྣམས། །ཉེ་འཁོར་དྲི་ཙམ་མི་བསྟེན་དམ་ཡང་བཅས། །ཆོ་གའི་སྐབས་ཀྱི་སྨན་རཀ་ནམ་དགོས་ཀྱང༌། །
རྩ་བརྒྱད་སྟོང་སྦྱར་རཀྟ་སུམ་ཅུ་ལྔ། །རྒྱུད་ནས་ཇི་ལྟར་གསུངས་བཞིན་སྦྱར་བའི་རྫས། །ཆུ་གཙང་ལ་བཏབ་ཀ་ར་བུ་རམ་སྦྱར། །ཐུགས་དམ་སྐོང་བྱེད་དམ་ཚིག་རྫས་སུ་བགྱིས། །ཆང་འཐུང་བཙུན་པའི་རིགས་དང་མི་འགྲོགས་ཤིང༌། །དེ་འདྲ་འཁོར་དུ་མི་བསྟེན་བཅད་རྒྱ་བྱས། །གཞན་ཡང་འོ་སྐོལ་རྣམས་ཀྱི་སྟོན་པ་དེས། །བསྟན་ལ་རབ་ཏུ་བྱུང་བ་ཕྱིན་ཆད་ནས། །མ་དག་དངོས་པོ་བརྒྱད་པོ་མ་སྤངས་པར། རབ་བྱུང་དགེ་སྦྱོང་རུང་བར་མ་གསུངས་ན། །དིང་སང་མཁན་སློབ་དགེ་སྦྱོང་རྣམས་ཀྱི་ཚུལ། །འདི་ལྟས་རུང་བར་བདག་ནི་གཏན་མི་སེམས། །ས་སྙིང་འཁོར་ལོ་བཅུ་པའི་མདོ་དང་ནི། །དཀོན་བརྩེགས་སོགས་ལས་སྙིགས་དུས་རབ་བྱུང་གིས། །སྟོན་པའི་བསྟན་པ་བསྣུབ་པར་གང་གསུངས་པའི། །ཚུལ་ཉིད་ཇི་བཞིན་ཐོག་ཏུ་བབ་པ་འདིར། །མ་བཟོད་གཞན་དག་ཅི་ཉན་རང་ཁོ་ན། །སྤོང་བའི་ཞེ་བཅད་མ་བཅའ་འགའ་བགྱིས་པའི། །
ཐོག་མར་ཉེར་གསུམ་ལོ་ལ་གཞོན་པ་སྤངས། །སོ་གསུམ་ལོ་ནས་གྲོང་ཡུལ་ཐེམ་པ་སྤངས། །སོ་བདུན་ལོ་ནས་དཀོན་མཆོག་སྐུ་བླུད་དང༌། །དབང་བསྐུར་ཆོས་བཤད་ཡོན་གྱི་ཟང་ཟིང་སྤངས། །སོ་དགུའི་ལོ་ནས་རྐང་བཞིའི་འབུལ་བ་དང༌། །ཞིང་དང་གོ་ཁྲབ་མཚོན་ཆའི་རིགས་མི་ལེན། །ཞེ་གཅིག་ལོ་ནས་གཤིན་དཀོར་མཐའ་དག་སྤངས། །ལྔ་བཅུར་མྱོས་འགྱུར་རིགས་ཀུན་དྲི་ཙམ་སྤངས། །ང་གསུམ་ལོ་ནས་སྐུ་གསུང་ཐུགས་རྟེན་ལས། །བཞེངས་པའི་དད་འབུལ་མཐའ་དག་ཅི་འཛེམས་བྱས། །གལ་ཏེ་ཅིས་ཀྱང་ལེན་དགོས་བྱུང་ན་ཡང༌། །མཆོད་རྫས་མར་མེ་གཏོར་ཚོགས་མང་བསྐོལ་སོགས། །དད་ཟས་ཆུས་ཟོས་མི་འགྲོའི་ཐབས་ལ་འབད། །དེ་ལྟར་བྱས་ཀྱང་ད་དུང་དཀོར་ཟས་དང༌། །ཁྱད་པར་གཤིན་པོའི་དཀོར་རིགས་ཕྲན་ཚེགས་ཙམ། །འོང་རྒྱུའི་ཚེ་ན་དངོས་ཉམས་རྨི་ལམ་ལ། །བཟོད་པར་དཀའ་ཞིང་འཇིགས་སུ་རུང་བ་ཡི། །མཚན་
ལྟར་མཐོང་ཞིང་ཉམས་སུ་མྱོང་བ་འདི། །བདག་ཉིད་ཁོ་ནར་འབྱུང་བ་ཅི་ཡི་ཕྱིར། །དིང་སང་བླ་གཟུགས་དགེ་སྦྱོང་ཕལ་མོ་ཆེ། །དཀོར་ཟས་འཛེམ་པ་ལྟ་ཞོག་ལོག་འཚོ་ལྔ། །འབད་པས་བསྒྲུབས་ནས་ཉམས་ང་མེད་སྤྱོད་པ། །དེ་ལ་དཀོར་ལྷོངས་རྣམ་སྨིན་གང་དུ་སོང༌། །བདག་འདྲ་སླན་ཆད་ཚེ་རབས་གང་དུ་ཡང༌། །ལོག་འཚོ་དཀོར་ཟས་ཟ་མཁན་མི་སྐྱེར་སྨོན། །སྔོན་ཚེ་དགྲ་བཅོམ་མང་པོས་དད་ཟས་ནི། །མི་འབྱུང་ཆེད་དུ་བསླབ་པ་ཕུལ་བར་གྲགས། །དིང་སང་དད་ཟས་འཚོལ་ཕྱིར་ཚུལ་འཆོས་ཀྱི། །སྤྱོད་པ་མི་བྱའི་སྣ་མེད་འདི་འདྲ་བའི། །དཀོར་ཟན་དེ་དག་ཕྱི་མ་ཅིར་འགྱུར་བསོམས། །རང་ལ་སྐྱབས་འགྲོ་ཙམ་གྱི་གོ་རྟོགས་དང༌། །ཡིག་དྲུག་འཕྲེང་སྐོར་ཙམ་གྱི་ནུས་པ་ཡང༌། །མེད་བཞིན་གཞན་གྱི་ཡར་འདྲེན་རིམ་གྲོ་སོགས། །མི་བྱེད་དགུ་བྱེད་མཁན་ཚོ་ལེགས་པར་བསོམས། །ཐོག་མེད་ཕ་མར་གྱུར་པའི་སེམས་ཅན་དག །བསད་པའི་ཤ་ཁྲག་
ཟས་ལ་བྲོད་གསར་རེ། །ཕོར་ཁ་མཐོ་དམན་ཙམ་ལའང་འཁང་ཞིང་བརྩོད། འདི་འདྲ་ཡོན་མཆོད་གང་ལ་ཕན་ནམ་བསོམས། །སྙིགས་དུས་བླ་མའི་ཚུལ་དང་དགེ་སྦྱོང་གཟུགས། །ཁྭའམ་སྤྱང་ལྟོགས་བཞིན་དུ་ཟས་གོས་ཆེད། །དམ་པའི་ཆོས་བཙོངས་ཟང་ཟིང་ནོར་བསྒྲུབ་པའི། སྐྱེ་བ་ནམ་ཡང་ལེན་པར་མ་གྱུར་ཅིག །ལྕགས་མོ་གླང་ལོ་དབོ་ཟླའི་གནམ་གང་ནུབ། །ཀོང་ལྷ་དཀར་པོ་དྲི་ལྷའི་གངས་ཉིལ་ཏེ། །གཙང་ཆབ་ཞག་དྲུག་བར་དུ་འཕྲེད་བཀག་གྱུར། །གྱེན་དུ་འཁྱིལ་བའི་ཀོང་ཡུལ་སྨད་ཀུན་ཁེངས། །ཞིང་དང་ཚལ་མནན་ཆུ་འགྲམ་ཡུལ་གྲོང་འཇིག །ཐམས་ཅད་ཅི་བྱ་རྟོལ་མེད་བདག་རྩར་རྒྱུགས། །འབྱུང་བར་རང་དབང་ཐོབ་པའི་གྲུབ་ཐོབ་ནི། །བདག་མིན་ཕན་ཐོགས་དཀའ་མོད་སྐྱེ་འགྲོའི་དོན། །གལ་ཆེར་ཐུག་པས་ཅི་ཕན་ལོས་བྱེད་སྨྲས། མཆོད་
པ་རྒྱས་བཤམས་གསོལ་བ་དྲག་ཏུ་བཏབས། །སྣང་སྲིད་ལྷ་འདྲེ་ཡུལ་ལྷ་གཞི་བདག་ལ། །བདེན་ཚིག་བཀའ་བསྒོའི་ཡི་གེ་དམ་རྫས་དང༌། །མེ་ཏོག་ལ་སྔགས་ཐུམ་བུར་བཅས་པ་རྣམས། །གཅུང་པོ་ལ་བསྐུར་ཁྱོད་ཀྱིས་མྱུར་སོང་ལ། །ཆུ་འགྲམ་དེ་རུ་བླ་མའི་རྣལ་འབྱོར་བསྒོམ། །གསོལ་བ་ཐོབ་ལ་ཕུང་པོ་ཚོགས་འཁོར་དང༌། །སྨོན་ལམ་གདབ་ཅིང་ཐུམ་འདི་ཆུ་དཀྱིལ་འཕངས། །དུང་འདི་ལན་གསུམ་བུས་ལ་ཤོག་ཅེས་སྨྲས། །ཁོས་ཕྱིན་དེ་བཞིན་བྱས་མ་ཐག་ཉིད་དུ། །གཙང་ཆབ་ཁོལ་ཏེ་འོག་ཏུ་འོར་ཁུངས་རྡོལ། །གང་ལའང་གནོད་མེད་གཙང་ཆབ་རང་མལ་སོང༌། །ཡུལ་ཁམས་མ་ལུས་བདེ་ལ་འཁོད་པར་གྱུར། །སང་ཕོད་དཔྱིད་ཀ་ཡང་ནི་སྔར་ལས་ཀྱང༌། །ཉིས་འགྱུར་ཙམ་གྱི་གངས་ཅན་ཁྱད་པར་སྣང༌། །འདི་བྱུང་ན་ནི་དྲི་དང་ཀུས་དཀར་གྱི། །ཡུལ་གྲུ་ཐམས་ཅད་ནོན་པར་འདུག་པས་ན། །ཅི་དྲག་མཁྱེན་ཟེར་
རིང་པར་རྒྱུགས་ནས་བྱུང༌། །དེ་ཚེ་དམ་ཅན་རྡོ་རྗེ་ལེགས་པ་ཉིད། །གནད་ལ་བཀར་བའི་བདེན་ཚིག་རས་ལ་བྲིས། །དམ་རྫས་བདུག་རྫས་མེ་ཏོག་འཐོར་རྒྱུ་བཅས། །བསྐུར་ནས་རས་དེ་དར་ཅོག་ཐོ་དང་སྦྲགས། །ཉེན་དུ་ཆེ་སའི་གདོང་དེར་བཙུགས་པ་དང༌། །དམ་ཅན་གསོལ་ཁ་བསངས་བསུར་དམ་རྫས་བདུགས། །མེ་ཏོག་འཐོར་སོགས་ཚུལ་ཁྲིམས་ལྡན་པས་གྱིས། །ཅེས་སྨྲས་དེ་ལྟར་བྱས་པས་གངས་ཆད་རྒྱུ། །དེ་ཉིད་རང་མལ་དུ་ཐིམ་ཉེན་དང་བྲལ། །འདི་དག་བདག་འདྲའི་ནུས་བྱིན་མ་ཡིན་ཏེ། །རང་བྱུང་ཆེན་པོ་པདྨ་རྒྱལ་པོ་ལ། །གསོལ་བ་རྩེ་གཅིག་བཏབ་པའི་བདེན་མཐུ་ལགས། །ལོ་དེའི་མཇུག་ཏུ་རྒྱལ་ཁམས་ཐམས་ཅད་ལ། །ནད་རིམས་སྣ་ཁ་མི་འདྲ་དུ་མས་ཁྱབ། །སྐྱེ་འགྲོ་མང་ཤི་སྨན་པས་མི་ཕན་པའི། །ཉམས་ཐག་སྡུག་བསྔལ་འགྱུར་མཐོང་སེམས་མ་བཟོད། །སངས་རྒྱས་རིང་སྲེལ་གཙོ་བྱས་བྱིན་རླབས་རྫས། །རྩ་བརྒྱད་སྟོང་
སྦྱར་བདུད་རྩི་ཨ་མྲྀ་ཏའི། །སྒྲུབ་པ་བྱས་མཐར་སྨན་གྱི་སྦྱིན་སྲེག་བགྱིས། །འབྱུང་བ་རྣམས་ལ་སྨན་གྱི་ལས་སྦྱོར་དང༌། །འགྲོ་བའི་ནད་རྣམས་ཞི་བར་སྨོན་ལམ་བཏབས། །དེ་འཕྲལ་ནད་རིམས་ཞི་བའི་ངེས་ཤེས་རྙེད། །དད་དང་དག་སྣང་མེད་ལ་ཅི་ཆ་ཡོད། །འགྲོ་ལ་ཕན་དེས་རང་ཉིད་བསམ་པ་རྫོགས། །ལྕགས་གླང་ཆུ་སྟག་ཡོས་སོགས་ལོ་དེ་སྐོར། །རྒྱལ་ཁམས་མི་བདེའི་མཚན་མ་མང་བ་དང༌། །ཉང་ལུང་ཧོར་སོགས་དཔུང་གིས་གང་བ་སོགས། །སེམས་ཅན་རྣམས་ལ་སྡུག་བསྔལ་མཚོ་རྡོལ་མཐོང༌། །བདག་འདྲས་ཕན་ཐོགས་ནུས་པ་མ་མཆིས་ཀྱང༌། །བསམ་པ་དགེ་བ་ཙམ་ཞིག་ལྷུར་བླངས་ནས། །ཆུ་ཕོ་སྟག་ལོ་ཟླ་བ་དྲུག་པ་ཡིས། །ཡར་ཚེས་གཅིག་ནས་ཐ་སྐར་ཉེར་གཉིས་བར། །ཟླ་གསུམ་ཞག་ནི་ཉི་ཤུ་རྩ་གཅིག་རིང༌། །གནས་ཆེན་བརྒྱ་ལ་དཔལ་རི་གངས་ཀྱི་འདབས། །བྱང་ཆུབ་ཡང་རྩེ་མཐོང་ཞིང་གཉན་པའི་གནས། །གང་དེར་
བདག་ཅག་མཆེད་གཉིས་གསང་ཐབས་སུ། །ཕྱིན་ནས་དབྱར་ཟླ་གསུམ་དེར་གཉན་ས་བཅད། །ས་དེ་ཀོང་ཡུལ་མཐིལ་གྱི་ས་གནད་དང༌། །རྟེན་འབྲེལ་བསྒྲིགས་པའི་སྙིང་པོར་ལུང་བསྟན་ཕྱིར། །རྒྱལ་ཁམས་སྤྱི་དང་ཀོང་ཡུལ་སྐྱེ་འགྲོ་ལ། །ཕན་དུ་རེ་བའི་རིན་ཆེན་བུམ་པའི་ནང༌། །བྱིན་རླབས་རྟེན་དང་བཀྲ་ཤིས་རྫས་ཀྱིས་བསྐངས། །བསྟན་འགྲོར་ཕན་པའི་སྨོན་ལམ་བདེན་ཆིག་བཅས། །བཅུག་ནས་སྤྲེལ་ཟླའི་ཚེས་བཅུར་རབ་ཏུ་གནས། །ས་དབྱིབས་རྒྱལ་མཚན་འདྲ་བའི་རྩེ་མོ་རུ། །རླན་གྱི་མི་འཇིག་བགྱིས་ནས་བུམ་གཏེར་སྦས། །ཀ་ཤིའི་རས་དང་དར་ཟབ་ལས་བཟོས་པའི། །འཕན་དར་ཆེ་བ་ཞིག་ལ་སྟོན་པ་དེས། །གྲོང་ཁྱེར་འཇུག་མདོར་གསུངས་པའི་བདེ་ལེགས་ཀྱི། །ཤིས་བརྗོད་ཆེན་མོ་ཡོངས་རྫོགས་བྲིས་ནས་བཙུགས། །ཙནྡན་ཨ་ཀ་རུ་སོགས་སྤོས་སྣ་དང༌། ཤིང་སྣ་བསུར་དུད་བྱིན་རླབས་ཨ་མྲྀ་ཏའི། །བསངས་དུད་
བར་སྣང་ཁེངས་བཏང་མེ་ཏོག་འཐོར། །འཇིག་རྟེན་སྐྱོང་བའི་ལྷ་ཀླུ་གཞི་བདག་དང༌། །གནས་བདག་དཔའ་བོ་མཁའ་འགྲོ་ཐམས་ཅད་ལ། །དཀོན་མཆོག་བདེན་པའི་ཚིག་གིས་བཀའ་བསྒོ་བྱས། །སྐྱབས་གནས་རྒྱལ་བ་སྲས་བཅས་ལྷ་བླ་མ། །ཀུན་ལ་སྙིགས་དུས་སེམས་ཅན་སྡུག་བསྔལ་ཅན། །མཐའ་དག་ཐུགས་རྗེའི་སྐྱོབས་པར་གསོལ་འདེབས་ནི། །གདུངས་ཤུགས་མཆི་མ་འཁྲུགས་པས་ནན་ཆེར་བགྱིས། །དེ་ཚེ་ཉི་ཆར་འདྲེས་པའི་མེ་ཏོག་ཆར། །འཇའ་འོད་ལྔ་ལྡན་རྒྱ་གྲམ་ཚུལ་དུ་ཟུག །ལྷོ་ནུབ་ཕྱོགས་ནས་ནམ་མཁའ་གཡའ་དག་དབུས། །འཇའ་དཀར་པད་སྡོང་ལོ་འདབ་རྒྱས་པའི་དབྱིབས། །ཇེ་ཉེར་ཚུར་བྱུང་མགོ་ཐོག་ཐད་སླེབས་ཚེ། །རྩ་བ་གཅིག་ལ་རྩེ་མོ་ལྔར་གྱེས་ནས། །ནམ་མཁའི་ཕྱོགས་བཞིར་ཟུག་ཏེ་ཡལ་ནས་སོང༌། །གནས་འདི་གཞན་ལས་འཕགས་པའི་ངོ་མཚར་ཅན། །ཚེ་འདི་བློ་ཡིས་ཐོངས་པ་མ་གཏོགས་པ། །སྐྱིད་ཆོས་ཟོལ་བདེ་བདག་གི་ཡུལ་མ་ཡིན། །སྐྱོ་ཤས་
ངེས་འབྱུང་འཕེལ་ཞིང་རིག་པ་དྭངས། །ཉིན་མཚན་གཉིས་ཀར་ཡེངས་འཁྲུལ་ཤས་ཆུང་བ། །དགེ་སྦྱོར་བོགས་སྐྱེད་ཐོན་པའི་གནས་ཤིག་གདའ། །དེ་ནས་ལྷ་བབས་དུས་ཆེན་ཉེར་གཉིས་ཉིན། །སུས་ཀྱང་མ་རིག་སླར་ཡང་རྒོད་ཕུག་ལོག །སྟག་ཡོས་གཉིས་ལ་དགེ་སྦྱོར་འཕེལ་བ་ལས། །ཆུ་ལུག་ཟླ་བ་དྲུག་པའི་བཅོ་ལྔ་ནས། །སྔོན་ལས་དཀོར་གྱི་རྣམ་པར་སྨིན་པ་དང༌། །འཕྲལ་རྐྱེན་དམ་སྲིའི་བར་ཆད་མཚམས་སྦྱོར་མཐུས། །བདག་ལུས་བློ་བུར་ནད་རྐྱེན་དྲག་པོས་ཕོག །གཉན་ཚད་རླུང་གསུམ་འཁྲུགས་པས་སྟོད་ལ་གཟིར། །ཁ་མེད་གཉན་གྱི་ནད་ཟུག་སྨད་ལ་བབས། །རྩ་དཀར་འགྲམས་པའི་ཟུག་ངུས་ཡན་ལག་གདུངས། །ཟས་ནི་ཉག་མ་གཅིག་ཀྱང་ཁར་མི་ཚུད། །ཉིན་མཚན་སྦྲེལ་ཏེ་སྤྱི་གཙུག་རྐང་མཐིལ་བར། །ཟུག་གཟེར་མེད་ཡུལ་ཁབ་རྩེ་གང་ཡང་མེད། །མིག་འགྲིབ་
རྣ་བ་འོན་ཅིང་ཁ་སོ་སྦིར། །རྩ་ཆུ་ཀུན་སྡམས་ཡན་ལག་འགུལ་མི་ནུས། སེམས་ལ་འཁྲུལ་པ་མེད་ཙམ་མ་གཏོགས་པ། །ལུས་ནི་དུད་ཁྲོད་རོ་དང་མཚུངས་པར་གྱུར། །འཆི་བར་ཐག་བཅད་བློ་ཁ་ནང་དུ་བཟློག །ཟླ་བ་ཕྱེད་བར་ཟས་སྐོམ་དྲི་ཙམ་མེད། །སྨན་གྱི་སྤྲོས་བཅད་ཤི་བའི་གྲབས་སྡོག་བྱས། །ཟླ་ཕྱེད་འདས་ཀྱང་ཚེ་དུས་མ་བྱས་པས། །ཡི་དྭགས་ལྟ་བུའི་ཉམ་ཐག་ངང་ཚུལ་ལ། །གཅུང་དང་ཉེ་གནས་རྒན་པོ་སེམས་མ་བཟོད། །ལྐོག་ཏུ་སྨན་པ་བོས་ནས་རྒྱུ་མཚན་བཤད། །བདག་ལའང་སྨན་ཞིག་ཅིས་ཀྱང་ཟོ་ཞིག་ཅེས། །ནན་སྐྱེད་བྱས་ངོར་སྨན་ཐུན་འགའ་བསྟེན་པས། །ཅུང་ཞིག་ཟུག་ཆོག་ཟས་སྐོམ་ཉུང་ཤས་འགྲོ། །རིམ་པས་བདེ་སྐྱེད་བྱུང་ཡང་ནད་ཀྱི་རྒྱུ། །དཀོར་གྱི་རྣམ་སྨིན་ཉིད་ཡིན་དཀོར་ཟས་ལས། །གཞན་པའི་འཚོ་བ་ནམ་ཡང་མ་མཆིས་ཚེ། །ད་ལྟའང་དཀོར་ལྷོངས་ནམ་བྱུང་ནད་ཀྱིས་མནར། །དཀོར་གྱི་རྣམ་སྨིན་
ད་ལྟ་འདི་འདྲ་ན། །ཤི་བའི་དུས་རྣམ་སྨིན་དངོས་གཞི་འབྱུང༌། །དེ་ཕྱིར་བདག་དང་བདག་འདྲའི་དཀོར་ཟན་ཚོ། །ཡ་རེ་ང་ཡང་བསམ་མཁན་ཤིན་ཏུ་དཀོན། །རང་ལ་དཀོར་ལྷོངས་ཟུག་རྔུ་བྱུང་དུས་སུ། །མཁའ་མཉམ་སེམས་ཅན་ཀུན་གྱི་ལས་སྒྲིབ་དང༌། །སྡུག་བསྔལ་མ་ལུས་བདག་ལ་སྨིན་ནས་ཀྱང༌། །འགྲོ་ཀུན་སྡིག་སྒྲིབ་སྡུག་བསྔལ་བྲལ་གྱུར་ཅིག །སྙམ་པའི་སེམས་བསྐྱེད་སྨོན་ལམ་སྙིང་ནས་བགྱིས། །དད་རྫས་དར་ཁའམ་ཇ་འདེབས་མར་ལེབ་ཙམ། །བྱུང་ཡང་ཕུད་ཀྱི་དཀོན་མཆོག་མཆོད་པ་དང༌། །བླ་མ་དགེ་འདུན་མཆོད་དང་སྦྱིན་པ་སོགས། །དད་ཟས་ཆུད་ཟོས་མེད་པར་དགེ་ཕྱོགས་གཏོང༌། །མི་ཟད་བྱང་ཆུབ་རྒྱུ་རུ་བསྔོ་ཞུས་བགྱིས། །རང་གི་འཁོས་ལ་དཔག་པའི་ཅི་ནུས་ཀྱིས། །རྒྱལ་སྲས་བྱང་སེམས་སྤྱོད་ལ་སློབ་པ་ལགས། །དེ་ལྟར་རང་ལུས་ནད་གཅོང་ཐར་མེད་ཀྱིས། །རྟག་ཏུ་མནར་
བཞིན་ཉེ་གནས་རྒན་པོ་ཡང༌། །སྔོན་ནས་ནད་གཞི་སྣ་མང་ཡོད་བཞིན་དུ། །གནས་དེར་ཀློ་རོང་ས་ཆུ་མ་ཕྲོད་དང༌། །ན་སོའི་ཁུར་གྱིས་ནོན་སོགས་མཐའ་དག་འཛོམ། །ཡོས་འབྲུག་སྦྲུལ་ལོར་རིམ་གྱིས་ནད་བབས་ལྗིད། །སྨན་དཔྱད་ཟས་སོགས་ཕྲོད་བསྟེན་ཅི་བྱས་ཀྱང༌། །ཕན་མེད་མེ་རྟ་ས་གའི་ཉེར་དགུ་ལ། །བདུན་ཅུའི་ལོ་ཐོག་ཚེ་འདིའི་སྣང་བ་ནུབ། །བློ་ཐག་ཆོད་དང་དགེ་སྦྱོར་ཡིད་ལ་གསལ། །མཚམས་སྦྱོར་བཟང་པོའི་ངང་ལ་འདས་པ་ལ། །ངོ་སྤྲོད་གསལ་འདེབས་སྲེག་ཆོག་བདུན་ཚིགས་སོགས། །མཐའ་དག་ངེད་རང་མཆེད་གཉིས་ཁོ་ནས་བསྒྲུབས། །ཕུང་པོ་བསྲེགས་ཤུལ་མེ་ཏོག་དཀར་པོ་སྐྱེས། །ནམ་མཁའི་གཡའ་དག་རྨི་ལམ་དགེ་བ་སོགས། །ཆོས་པའི་རྐང་མི་དྲང་བའི་མཚན་མ་མཐོང༌། །དེ་ལྟའི་ཉེ་གནས་གསོལ་དཔོན་རྒན་པོ་དང༌། །མི་ལོ་སུམ་ཅུ་སོ་དགུར་འབྲལ་མེད་འགྲོགས། །ཕ་མ་
ལས་ཀྱང་ལྷག་པའི་དྲིན་ཅན་དེ། །འདུས་བྱས་རང་མཚང་དེ་ལྟར་མངོན་སུམ་གྱུར། །དེ་ནས་རང་ལོའང་དྲུག་ཅུར་སླེབས་ཉེ་ཞིང༌། །ཕྱི་ནང་གསང་བའི་རྟེན་འབྲེལ་མཚམས་སྦྱོར་འགྱུར། །ན་རྒས་འཛོམ་པའི་རྒྱུ་ལུས་ཕུང་པོ་འདི། །རྒོད་ཚང་ཕུག་ཏུ་འཇོག་པར་མ་ཤར་ཞིང༌། །གནས་དེར་མི་ལོ་ཉི་ཤུ་རྩ་བཞིའི་བར། །རྣམ་གཡེང་ལེ་ལོར་མ་སྡད་ཅི་ནུས་ཀྱི། །འདུས་བྱས་འདུས་མ་བྱས་པའི་དགེ་ལ་འབད། །གྲོགས་དང་གྲྭ་འཁོར་རྣམས་ལའང་དགེ་སྦྱོར་བསྐུལ། །མཐའ་ཁོབ་ཡུལ་གྱི་སྐྱེ་བོ་སྡིག་པ་ཅན། །ཀུན་ཀྱང་སྡིག་སྤོང་དགེ་བའི་བག་ཆགས་བསྐྱེད། །སྒྲུབ་ཕུག་ནང་དུ་རྟེན་གསུམ་མཆོད་རྫས་དང༌། །དཀོར་གཉེར་བཅས་བཞག་དད་ལྡན་མཇལ་འདོད་རྣམས། །ཚོགས་གསོག་སྒྲིབ་སྦྱོང་ཡུལ་དུ་རུང་བར་བྱས། །སྨོན་ལམ་བཀྲ་ཤིས་རབ་གནས་རྟེན་འབྲེལ་དང༌། །ཡུལ་མི་སྐྱ་སེར་ཀུན་ལ་རང་རང་གི །
སྐལ་བར་གང་འཚམས་ཆོས་མཐུན་བསླབ་བྱ་བགྱིས། །མེ་རྟ་དབྱུག་ཟླ་ཉེར་ལྔ་རྒྱལ་ཕུར་གྱི། །འགྲུབ་སྦྱོར་ཉིན་པར་ཡར་ལ་ཁ་བལྟས་འོངས། །ལམ་བར་ཀུན་ཏུ་མཐོང་ཐོས་ཁ་ལག་ཟས། །ཆོས་ཀྱི་འབྲེལ་པ་ཐོགས་ཚད་མ་ལུས་པ། །མངོན་མཐོ་ངེས་ལེགས་འགྲུབ་པར་སྨོན་ལམ་བཏབ། །དད་འབུལ་ཟང་ཟྀང་སྤུ་ཙམ་མི་ལེན་ཅིང༌། །བདག་ཅག་བསྙེན་བཀུར་ཆེད་དུ་སེམས་ཅན་གྱི། །སྲོག་གཅོད་བྱེད་དོགས་ཚོགས་འཁོར་ཤ་ཆང་གི །ཡོ་བྱད་ཏིལ་ཙམ་བདག་གིར་མ་བགྱིས་ཤིང༌། །ཡུལ་ལྗོངས་ཀུན་ལ་བཀྲ་ཤིས་མེ་ཏོག་འཐོར། །སྐྱེ་འགྲོ་རྣམས་ལ་རྟེན་གྱིས་བྱིན་རླབས་དང༌། །སྨོན་ལམ་རྣམ་དག་མཚམས་སྦྱར་ཡང་དག་བགྱིས། །གྲུབ་མཐའ་རིས་མེད་དགེ་འདུན་མ་ལུས་པར། །རང་རང་དགོངས་བཞེད་དང་མཐུན་ཆོས་འབྲེལ་ཕུལ། །རིམ་པས་སྨིན་གྲོལ་སྐྱེད་རྫོགས་གླིང་དུ་འབྱོར། །དགེ་འདུན་རྣམས་ལ་རྒྱུད་འབུམ་རིན་པོ་ཆེ། །རང་རེའི་
བཀའ་འབུམ་བཅས་པའི་བཀའ་གཏད་བགྱིས། །གཙུག་ལག་ཁང་ལ་རབ་གནས་མེ་ཏོག་འཐོར། །ཞག་གསུམ་བསྡད་ནས་ཆོས་དབྱིངས་འོད་གསལ་རྩེར། །གདན་ཕབས་སླར་ཡང་དེབ་མཚམས་ལ་ཞུགས་སོ། །འདུས་བྱས་ཚེ་འདིའི་སྣང་བ་རྨི་ལམ་ལས། །ཆེས་ཆེར་རྨི་ལམ་ཉིད་འགྱུར་འཁྲུལ་པའི་གཟུགས། །མི་བདེན་བདེན་པར་འཛིན་ཅིང་ཨ་འཐས་ཀྱིས། །བྱ་བྱེད་ཟར་ཟིར་བྱིས་རྩེད་ལྟ་བུ་འདིས། །ཁམས་གསུམ་འགྲོ་བ་ཅོལ་ཆུང་གཏན་དུ་བྲིད། །མི་རྟག་རྟག་ཏུ་རེ་བའི་འདོད་ཡོན་ལ། །སྲེད་ཞེན་ལན་ཚྭའི་ཆུ་ནི་འཐུངས་བཞིན་སྐོམ། །ད་ནི་འཁྲུལ་ཞེན་གཏན་ཆོད་འགྱུར་བར་ཤོག། ཅེས་རང་ལོ་སོ་ལྔ་ནས་དྲུག་ཅུའི་བར་གྱི་ཚུལ་རྣམས་རགས་རིམ་ཙམ་བརྗོད་པའི་ལེའུ་སྟེ་དྲུག་པའོ། ༈ །དྲི་བྲལ་པད་སྡོང་གེ་སར་ལས། །མཚན་རྫོགས་རྡོ་རྗེའི་སྐུ་མཆོག་ནི། །སྐྱེ་འཆིའི་མཚན་མ་ལས་
འདས་པའི། །མཚོ་སྐྱེས་རྡོ་རྗེ་དེས་སྐྱོངས་ཤིག །རྣམ་གཡེང་འཁྲུལ་པའི་བྱ་བ་ལ། །སྙིང་པོ་མེད་པར་གོ་བཞིན་དུ། །རྣམ་པར་གཡེང་བའི་འཁོར་ལོ་རུ། །ཀུན་ནས་བསྐོར་བའི་ངང་ཚུལ་བརྗོད། །ངོ་མཚར་རྣམ་ཐར་བརྗོད་རྒྱུ་བདག་ལ་མེད། །ཐ་མལ་སོ་སྐྱེའི་ཀུན་སྤྱོད་ཡིག་གཟུགས་སུ། །བཀོད་ཀྱང་སྣག་ཤོག་གྲོན་ལས་གཞན་པ་ཡི། །དགོས་པས་དབེན་ཀྱང་བསྐུལ་ངོ་མ་ཆོག་བྲི། དེ་ལྟར་བདག་འདྲ་སྙིགས་དུས་ཀྱི་བཙུན་རྒན་རང་གྲོལ་བ་རྒོད་ཕུག་དབེན་པའི་ནགས་ཁྲོད་དུ་མི་ལོ་ཉེར་བཞིའི་ཅད་རྒྱ་གྲོལ་ནས་ཡར་ལ་འོངས་ཏེ། སྔོན་གྱི་སྐྱེས་ཆེན་གྲུབ་ཐོབ་མང་པོས་ཞབས་ཀྱིས་བཅགས་ཤིང་ཆོས་ཀྱི་འཁོར་ལོ་བསྐོར་བའི་བསྟི་གནས་ཐང་འབྲོག་འོད་གསལ་སྒང་གི་སྒྲུབ་སྡེ་ཉིད་ཕྱིས་སུ་སོག་དམག་བྱུང་སྐབས་འཇིག་ཅིང་སྟོངས་ཏེ་རྨེག་མེད་དུ་གྱུར་པ་དེ་གསོ་བ་ལ་བསམ་ནས་འདུན་པ་ཆེད་གཉེར་དུ་གཏད་
པ་ལས། གྲྭ་ཚང་ཉིད་ནས་བདག་གི་ཡུལ་དུ་དམིགས་པའི་སྤྱིལ་བུ་ཞིག་བཏབ་འདུག་པར་མེ་རྟ་དབྱུག་ཟླའི་ཡར་ཚེས་བརྒྱད་ལ་གདན་ཕབས་ཏེ་བཅད་རྒྱའི་འགོ་ཚུགས། དེ་ནས་ཆོ་འཕྲུལ་གྱི་ཟླ་བ་དང་ཉེ་བའི་ཚེ། རྒྱལ་བའི་སྤྱི་གཟུགས་འགྲོ་བའི་མགོན་པོ་མཉམ་མེད་སྒམ་པོ་པ་ཆེན་པོ་དེ་ཉིད་སྙིགས་མཐའི་འགྲོ་བ་རྣམས་ཀྱི་སྐྱབས་མགོན་དུ་བྱོན་པའི་རྗེ་བཙུན་མཆོག་གི་སྤྲུལ་སྐུ་བཟང་པོའི་མཚན་གྱི་གྲགས་དཀར་རྩེར་ཁྱབ་པ་ཉིད་ཤར་ཕྱོགས་ཀོང་ཡུལ་གྱི་བསྟན་འགྲོ་སྤྱི་དང་བྱེ་བྲག་པ་མཐའ་དག་ལ་སྨན་པ་དང་བརྩེ་བ་དང་བསོད་ནམས་མངོན་པར་སྤེལ་བའི་སླད་དུ་གཤེགས་པ་དང་དུས་མཚུངས་པར་གྱུར་པ། སྔོན་ནས་བདག་རྒན་པོ་ལ་བརྩེ་ཆེན་ཐུགས་རྗེའི་གཟིགས་ཚུལ་གང་དང་གང་མི་མཉམ་པས་བཀའི་གླེགས་བུ་བདུད་རྩིའི་ཆར་རྒྱུན་ལམ་གསུམ་བགྲོད་པའི་ཀླུངས་ལྟར་སྩལ་བཞིན་པ་ལས། སྐབས་འདིར་
བདག་གི་མོས་པ་དང་རྗེ་དེའི་ཐུགས་རྗེ་གཉིས་པོ་སྤྲ་བ་རླན་མེད་དང་མེ་སྟག་ཕྲད་པའམ། ཉའི་ཟླ་བ་དང་ཆུ་ཤེལ་གྱི་གོང་བུ་འཛོམ་པ་ལྟ་བུའི་རྟེན་འབྲེལ་གྱི་མཚམས་སྦྱོར་བདེ་བླག་ཉིད་དུ་འགྲིག་པའི་མཐུས། རྗེ་དེ་ཉིད་སྐུ་འཁོར་ཉུང་ངུ་དང་བཅས་ཏེ་བདག་གི་བསྟི་གནས་སུ་ཞབས་པད་བཀའ་དྲིན་གྱི་འཁོར་ལོ་ཉེ་བར་བཀོད་པ་གནང༌། དེ་ལ་བདག་ཅག་སྤྱིར་རི་ཁྲོད་པར་གྱུར་པ་དང༌། ཁྱད་པར་འཚོ་བ་ངན་ངོན་ལ་བརྟེན་པའི་རྒྱུས་བཀུར་བསྟིར་བྱ་བའི་དངོས་པོ་དང་ཡོ་བྱད་ཀྱི་འཕོངས་ཀྱང་ཕྱེ་དང་ཇའི་འཚོ་ཆས་ཕྲ་མོ་ཙམ་གྱིས་མཆོད་པ་ལ་དགྱེས་དགུར་རོལ་ཞིང༌། ཉིན་ཐོག་ཐག་ཏུ་དམ་པའི་ཆོས་ཀྱི་བཀའ་མཆིད་ཟབ་རྒྱས་མཐའ་ཡས་ལ་རྨད་དུ་བྱུང་བ་ཡིད་ལ་སིམ་པ་གནས་སྐབས་དང་མཐར་ཐུག་གི་དོན་དང་དགོས་པ་དང་ཆེད་དུ་བྱ་བར་འོས་པ་དང་རང་དང་གཞན་ལ་ཕན་པ་རླབས་པོ་ཆེ་འབྱུང་བའི་དགའ་སྟོན་དམ་པ་ལ་བསྙེལ་
བ་མེད་པ་རྒྱུན་མི་ཆད་པ་གེགས་མེད་པ་ནོར་པ་དང་འཁྲུལ་པའི་དྲི་མས་མ་སྦགས་པའི་དམ་ཆོས་བདུད་རྩིའི་དགའ་སྟོན་ལ་རོལ་བ་ཉིན་ཞག་བཅུ་ཕྲག་གི་བར་དུ་བཞུགས་ཡུལ་གནང་ཞིང༌། བདག་འདྲ་བའི་རྨོངས་རྒན་ལ་དག་པའི་སྣང་བ་རྨད་དུ་བྱུང་བའི་གཟིགས་པ་མཐའ་ཡས་པས་རབ་ཏུ་འདུད་ཚུལ་དང༌། རིན་ཐང་ཅན་གྱི་དངོས་པོ་གྱ་ནོམས་པས་བསྙེན་ཅིང༌། བཀུར་བའི་མཛད་པ་བསམ་འདས་ཀྱི་རྒྱལ་སྲས་བྱང་ཆུབ་སེམས་དཔའི་རྣམ་པར་ཐར་པ་མངོན་སུམ་ཏུ་སྟོན་པར་མཛད་ཀྱི། ཁོ་བོ་ཅག་གི་ནི་དམ་པ་ལ་དམ་པར་འོས་པའི་རི་མོར་བྱ་བ་དང་བཀུར་སྟིར་བྱ་བའི་དངོས་པོ་དང་རྩོལ་བ་དང་ནུས་པ་དམན་པས། ཐལ་མོ་སྦྱར་ཏེ་མྱ་ངན་ལས་མི་འདའ་བར་གསོལ་བ་འདེབས་པ་དང༌། སྨོན་ལམ་བཟང་པོས་མཚམས་སྦྱོར་བ་ཙམ་ཞིག་ཞབས་ཏོག་གི་སྙིང་པོར་བགྱིས་སོ། །ཡང་དེ་དང་རྗེས་སུ་མཐུན་
པར། མེ་ལུག་གི་དབྱར་གསུམ་མེ་ཏོག་གི་ལང་འཚོ་མངོན་པར་སྟོན་པའི་དུས་ཀྱི་ཚེ། རི་བོ་ཤཱནྟིའི་གདན་ས་ཆེན་པོ་ཉིད་ནས། རྒྱལ་བ་ལོ་རས། མཁས་གྲུབ་གཙང་ཆེན་ཆོས་ཀྱི་དབང་ཕྱུག་སོགས་སྐྱེས་ཆེན་ཚར་དུ་དངར་པའི་རྣམ་པར་འཕྲུལ་པ་རྒྱལ་སྲས་དམ་པ་ཆོས་ཉིད་ཀློང་གྲོལ་ལམ། མཚན་གཞན་འཛམ་གླིང་དཔལ་འབར་བསྟན་པའི་རྒྱལ་མཚན་དེ་ཉིད་ཀྱང༌། ལུགས་གཉིས་ཀ་ནས་སྐུ་ཡུལ་ཤིན་ཏུ་གཉན་ཅིང་ཆེ་བའི་རྒྱུ་མཚན་ཁྱད་དུ་གསད་ནས། སྤྲང་རྒན་བདག་འདྲར་ཐུགས་དག་པའི་སྣང་བ་མི་མཉམ་མཉམ་པ་མེད་པའི་གདུང་ཤུགས་ཀྱིས་རླབས་ཆེན་པོས་ཉེ་བར་བསྐུལ་ནས། དཔོན་སློབ་གསུམ་འབའ་ཤིག་ཏུ་མཛད་དེ་དམ་པའི་ཆོས་ཁོ་ན་ཆེད་གཉེར་གྱི་དགོངས་པ་རྩེ་གཅིག་པས་བྱོན་པ་ལ། སྔར་སྨོས་པ་བཞིན་ལོངས་སྤྱོད་ཀྱིས་མཆོད་པར་བྱ་བའི་དངོས་པོ་ནི་བདག་ཅག་གིས་རྔོ་མི་ཐོག་པ་
ཉིད་ལས། དེ་སྐབས་ནམ་དུས་ཀྱི་འབྱོར་པ་ཤ་མོ་དང་ལོ་ཚོད་ཀྱི་རིགས་སྣ་ཚོགས་རྒྱས་པའི་དུས་སུ་གྱུར་པས་ཇི་ལྟར་རྗེ་བཙུན་བཞད་པ་རྡོ་རྗེའི་རྣམ་ཐར་དང་རྗེས་སུ་མཐུན་པའི་མཆོད་པ་སྟབས་ཤིང༌། བཞུགས་ཁང་ནོར་ཉན་མེད་པའི་ཁར། ས་ཁད་མཐོ་ཞིང་ཆར་ཞོད་རབ་ཏུ་ཆེ་བས་འོ་བརྒྱལ་གྱི་རྒྱུ་ཁོ་ན་ལ་ཡང་ཇི་མི་སྙམ་པར་མཛད་ནས་དབྱར་ཟླ་གསུམ་གྱི་རིང་ལ་བཞུགས་ཏེ། དམ་པའི་ཆོས་ཀྱི་གཙོ་བོར་སོ་ཐར་བྱང་སེམས་སྔགས་སྡོམ་གྱི་ནོར་བུའི་དོ་ཤལ་ཚར་དུ་དངར་བ་མགུལ་པའི་རྒྱན་དུ་བཞེས་ཚུལ་གནང་ཞིང༌། གཞན་ཡང་ཐེག་མཆོག་རྫོགས་པ་ཆེན་པོའི་བསྟན་པ་མཐའ་དག་གི་ཡང་བཅུད་དམ་པ་ལ་ནན་དུ་སྒྲོ་འདོགས་གཅོད་པ་གནང་སྟེ། མཚན་ཐོག་ཐག་ཏུ་མི་གཟིམས་པར་ཉམས་བཞེས་ཀྱི་བརྩོན་པ་ཕུལ་དུ་ཕྱིན་པ་གནང་ནས་དམིགས་རིམ་རེ་རེ་
ལ་ཡང་དག་ཐེར་ཐོན་པ་མཛད། ཉིན་གྱི་རིང་ལ་བདག་གི་རྩར་བཞུགས་རིང་འཇིག་རྟེན་འཕྲོས་གཏམ་ལབ་ལབ་སོགས་ཀྱིས་སྐད་ཅིག་ཀྱང་མ་སླད་པར། རེས་འགའ་བསྐྱེད་རིམ། རེས་འགའ་ངེས་དོན། རེས་འགའ་རིག་གནས། རེས་འགའ་ཕྱག་ལེན། རེས་འགའ་གདངས་དབྱངས་ཚུན་གྱིས་མཐའ་བརྟེན་ཏེ། མདོར་ན་བདག་གིས་མ་ཐོས་མི་ཤེས་པ་ནི་ཕར་ཞོག ཐོས་ཤེས་སུ་གང་གྱུར་པ་ཕྲན་བུ་ཅི་ཡོད་མཐའ་དག་ལ་སྤོམ་ཡོར་དང་གལ་མ་མཆིས་སུ་མི་འཇོག་པར་ཕུ་ཐག་གཏིང་ནས་ཆོད་པར་མཛད་ནས། འདི་བཟུང་བྱང་ཆུབ་བར་གྱི་མོལ་མཆིད་མཐའ་དག་པའི་ཚུལ་ཡང་ལྷག་མ་མེད་པར་བཞེད་པ་ནི་གཏིང་རྫོགས་སུ་མཛད་དེ་གཤེགས་སོ། །ཡང་དེའི་དགུན་གྱི་དུས་ན། ཚེ་རབས་མང་པོ་ནས་སྨོན་ལམ་གྱི་འབྲེལ་པ་རྨད་དུ་བྱུང་བ་ཅན་གྱི་སྐྱེས་ཆེན་པ་མི་ཕམ་མགོན་པོའམ། ངེས་དོན་མཐར་ཕྱིན་དཔལ་
བཟང་པོ་དེ་ཉིད་ཀྱང་གོང་ནས་ཡིག་བརྒྱུད་ལ་བརྟེན་པའི་ཆོས་ཀྱི་ཚུལ་སྒོ་དུ་མ་ནས་དྲི་བ་དང་ལན་གྱི་ཚུལ་རྒྱུན་མ་ཆད་པས་རྗེས་འཇུག་རྣམས་ལ་ཆོས་སྦྱིན་འདོད་འཇོ་དམ་པར་འགྱུར་བའི་སྒོ་འབྱེད་དང་བསྐུལ་བ་པོར་གྱུར་པའི་སྐྱེས་ཆེན་དེ་ཡང་བྱོན་ཏེ། སྐུ་གསུང་ཐུགས་རྟེན་གཙོ་བོར་གྱུར་པའི་ཕྱག་རྫས་ཀྱི་སྙིང་པོ་མཐའ་དག་ངེད་ལ་སྤུངས་པར་མཛད་བཞིན་དུ། དད་པའི་དབང་པོ་མངོན་པར་བརྟས་པའི་ཐུགས་འགྱུར་བ་མེད་པའི་སྣོད་བཟང་པོར། ཐོག་མཐའ་བར་དུ་དགེ་བའི་དམ་པའི་ཆོས་འདུལ་བའི་སྡོམ་གསུམ་ཚོགས་རྫོགས་དང༌། ཐེག་ཆེན་སྨོན་འཇུག་གི་བྱང་སྡོམ་སེམས་གསུམ་གཅིག་ཏུ་དྲིལ་བ་དང༌། སྨིན་བྱེད་དབང་ལ་བརྟེན་པའི་རིག་འཛིན་སྔགས་ཀྱི་སྡོམ་པ་གསུམ་གྱི་བདུད་རྩིས་ཡོངས་སུ་གཏམས་པར་མཛད། དེ་དག་གི་དགོངས་དོན་སྙིང་པོ་རིམ་པ་གཉིས་ཀྱི་རྣལ་འབྱོར་ལ་སྔར་ནས་ཉམས་བཞེས་རྟག་པར་
མཛད་བཞིན་པ་ནས། སླར་ཡང་ཐེག་པ་ཀུན་གྱི་རྩེ་རྒྱལ་དུ་གྱུར་པའི་ཕྱག་རྫོགས་ཟབ་མོའི་གནད་དོན་གྲུབ་ཐོབ་རྒྱུད་པའི་ཞལ་རྒྱུན་དྲི་མ་མེད་པ་ལ་དོགས་གཅོད་ཞིབ་ནན་ཕུ་ཐག་ཆོད་པར་མཛད་ནས་སྒྲུབ་པའི་མཎྜལ་གྱི་ཞལ་བཞེས་དང་བཅས་པ་གནང་ཞིང༌། ཇི་ཙམ་བཞུགས་པའི་རིང་ལ་ཡང་ཐོ་རེངས་དང་པོ་ནས་སྐུ་བཞེངས་ཏེ་བདག་གི་སྒོམ་ཁང་ལ་སྐོར་བ་དང་བརྒྱ་ཕྱག་གསོལ་འདེབས་ཡན་ལག་བདུན་པ་སྨོན་ལམ་གྱི་མཐའ་རྟེན་དང་བཅས་པས་སྙིང་རུས་ཚད་མེད་དུ་གནང་བ་ཡང་རྗེས་འཇུག་དག་ལ་བརྡ་སྟོན་དུ་མཛད་ནས་ཐེགས་སོ། དེ་ཡང་ཐང་འབྲོག་གི་སྒྲུབ་གནས་སུ་གྲྭ་ཚང་ནས་ཕྲལ་བཟོས་ཀྱི་སྤྱིལ་བུ་དེ་ས་དམིགས་ཅུང་ཟད་མ་ནོན་པར་མཐོང་བས། ད་ལྟ་མ་འོངས་པའི་རྟེན་འབྲེལ་ལ་ཕན་དུ་རེ་བས་འོད་གསལ་སྒང་གི་རྩེ་མོ་རྒྱལ་མཚན་གྱི་ཏོག་ལྟ་བུའི་ས་དེ་ལ། གོང་དུ་མཆོག་སྤྲུལ་ཆེན་པོ་བྱོན་པའི་སྐབས་
སུ་ས་འདུལ་ལ་དམིགས་པའི་ཐུགས་དམ་ཕྱག་ནས་སོགས་ཀྱང་ཞུས་ཤིང༌། ལུག་ལོའི་དབྱར་ཁ་གྲྭ་ཚང་གི་དགེ་འདུན་བཅུ་ཕྲག་ཙམ་རེ་རེ་མོས་སུ་བྱས་ནས་ཁང་ལས་བགྱིད་པ་ལ་ཤ་དང་ཆང་གི་ལོངས་སྤྱོད་གཏན་ནས་སྤངས་ཏེ། གཟིམས་ཁང་ཁྱོན་མི་ཆུང་ཙམ་དུ་བཟོས་པ་བཀོད་པ་ཡང་རང་ཉིད་ཀྱི་ཤོག་བུ་ལ་རི་མོ་བྲིས་པ་བསྟན་ནས་བཟོ་བཅུག་པས་གེགས་མེད་དུ་འགྲུབ་ཅིང་ཆོས་དབྱིངས་འོད་གསལ་རྩེ་མོར་མིང་བཏགས། ཞལ་བསྲོ་བགྱི་བ་དང་ལྷན་ཅིག་དེར་སྤོས་ནས་མཚམས་མུས་ལ་བཞུགས་སོ། དེ་ནས་ས་སྤྲེལ་རང་ལོ་རེ་གཅིག་པའི་ཐོག་ཏུ་བབས་པའི་ཚེ། སྤྱིར་འདུས་བྱས་ཀྱི་ཆོས་ལ་རྟག་མི་ཐུབ་པ་དང༌། སྒོས་སུ་རང་གི་ཚེ་ཚད་ཕལ་ཆེར་ཡང་རྫོགས་པ་དང༌། ཁྱད་པར་ལུས་ལ་ནད་གཅོང་སྣ་མང་པོས་རྟག་ཏུ་མནར་བ་འདི་ནམ་ཞིག་དཀོར་ལྷོངས་དྲག་པོ་ཅིག་གིས་བློ་བུར་དུ་བསྡུ་བར་ངེས་པས་ན།
ལོང་ཡོད་རིག་པ་གསལ་དུས་འདིར་ཆག་མེད་ལུས་མེད་དུ་བྱས་ལ། ཤི་ནད་ཕོག་ཚེ་འགྱོད་མེད་དུ་བྱའོ་སྙམ་ནས། ས་སྤྲེལ་ཟླའི་ཚེས་བཅུ་ཉིན་དགོན་གསུམ་གའི་བླ་མ་དང་གྲྭ་པ་རགས་བསྡུས་འཛོམ་པ་བྱས་ཏེ། རང་གི་ལག་ཏུ་སྔར་གྱི་ལྷག་མ་དང་འཕྲལ་མར་གསར་བྱུང་གི་རིགས་ཀྱི་རྟེན་མཆོད་རོལ་ཆ་བླ་ཆས་མཆོད་རྫས་དབང་ཆས་སོགས་གང་ཡོད་དང༌། རྒྱུད་འབུམ་རིན་པོ་ཆེས་ཐོག་དྲངས་པའི་པོ་སྟི་གསུམ་བརྒྱ་ཙམ་ཡོད་པ་རྣམས་དང༌། མདོར་ན་བསྟན་པའི་ཞབས་ཏོག་གི་ཆ་རྐྱེན་དུ་གྱུར་པ་ཆེ་ཆུང་འབྲིང་གསུམ་ཐམས་ཅད་བགོས་ནས། གཙོ་ཆེ་བ་གྲྭ་ཚང་དང༌། གཞན་གཉིས་པོར་གང་འཚམས་པ་ཕུལ་ནས་འཆུག་མེད་ཀྱི་ཡི་གེར་བཏབ་སྟེ་སོ་སོ་ལ་བརྩིས་སྤྲད། སྒམ་པོ་ནས་བདག་གི་ཚེའི་རྟེན་འབྲེལ་ལ་དགོངས་ནས་ཆེད་གཏད་དུ་བཟོས་ཏེ་གནང་བའི་གཉྫི་ར་ཡང་གྲྭ་ཚང་གི་མཆོད་ཁང་རྩེ་ལ་གཟུངས་བཞུགས་ཁྱད་འཕགས་དང་བཅས་ཏེ་བསྟན་པ་ཡུན་དུ་གནས་
པའི་རྟེན་འབྲེལ་གྱི་སྲོག་ཤིང་དུ་ཕུལ། འོད་གསལ་རྩེའི་གཟིམས་ཁང་ཉིད་དུའང་སྐུ་རྟེན་ཁྱད་འཕགས་ཀྱི་རིགས་བདུན་བཅུ་རྩ་ལྔ་དང༌། དེའི་མཆོད་ཆ་སྣ་ཚང་སྤུས་གཙང་བའི་རིགས་ཆ་ཚང་བ་དང་བཅས་པ་བཞུགས་སུ་གསོལ་བར་བགྱིས་སོ། གཞན་ཡང་སྔར་ནས་རྗེ་ལོ་ཆེན་དྲུང་གི་དགོངས་པ་ཇི་ལྟ་བར་གྲྭ་ཚང་འདི་ལ་མྱོས་འགྱུར་ཆང་རག་གི་དྲི་ཙམ་ཡང་མེད་པ་གཅིག་ཐུབ་ན། དགེ་འདུན་རྣམས་འཚོ་བའི་སེམས་ཁྲལ་གྱིས་གཡེང་བ་བྱེད་མི་དགོས་པའི་གསོལ་ཕོགས་ཀྱི་ཐེབས་རྒྱུན་བསྐལ་པའི་བར་དུ་ཆགས་མེད་འཛུག་པའི་ཐུགས་རྩིས་དང༌། དེ་དང་མཐུན་པར་ངེད་རང་གིས་ཀྱང་ཐབས་དང་རྩོལ་བ་གང་ཟབ་བགྱིས་ནས་སྤོ་ཁམས་འཇང་ཞབས་སོགས་ནས་ཀྱང་མཐུན་འགྱུར་བྱེད་མཁན་མང་དུ་ཡོང་རྩིས་དང་བཅས་པས་ལེགས་ཚོགས་ཆེ་བ་ཞིག་འོང་བར་ཡོད་ནའང༌། གྲྭ་པ་རྣམས་ཀྱི་ཆང་ཁྲིམས་བྱེད་མ་ཉན་པའི་རྒྱུ་རྐྱེན་གྱི་དེ་ལྟར་མ་གྲུབ་པ་འདི་ནི་
རྗེ་ལོ་ཆེན་དྲུང་དང་བདག་གཉིས་ཀའི་བསམ་པ་མ་རྫོགས་པ་འདི་བསྟན་པའི་སྐུ་བསོད་ཀྱིས་མ་ཐེག་པར་སྣང་ངོ༌། དེ་ལྟར་ལུག་སྤྲེལ་བྱ་གསུམ་གྱི་ལོར་ཆོས་དབྱིངས་འོད་གསལ་རྩེ་མོར་ལོ་གསུམ་གྱི་བཅད་རྒྱའི་ངེས་པ་ཡང་གྲུབ་ཅིང༌། བསྟན་པའི་སྤྱི་བཙས་དང་སྒྲུབ་སྡེའི་ས་བོན་ཡང་ཐེབས་པར་གྱུར་མོད་ཀྱང༌། གནས་དེའི་ཆུ་དང་རང་གི་ལུས་ཁམས་ནད་གཞི་མཐུན་པར་མ་བྱུང་བ་དང༌། རང་གི་རྒྱུན་གྱི་འཚོ་བ་ནི་རྗེ་བཙུན་བཞད་པ་རྡོ་རྗེའི་རྣམ་ཐར་གྱི་རྗེས་སུ་འབྲང་དགོས་ཕྱིར་ས་ཁད་མཐོ་བའི་ཆུ་བསིལ་རྒོད་འདིས་ཀྱང་སྒྱུ་ལུས་ལ་ཅུང་གཟན་པར་སྣང་ཚེ་རེ་ཤིག་གཙང་ཆུ་ལ་བརྟེན་ན་ལེགས་སམ་སྙམ་པ་དང༌། དེ་བཞིན་བྱུང་ན་གནས་ཆེན་མགོ་དགུར་སྐྱེ་བ་གོང་མའི་མཛད་པ་དང་རྗེས་སུ་མཐུན་པའི་ངང་ལ་ཤི་ན་འགྱོད་པ་མི་འོང་སྙམ་སྟེ། ས་བྱ་ཐ་སྐར་གྱི་ཉེར་ལྔ་ལ་འོད་གསལ་རྩེ་ནས་བཏེགས་ཤིང༌། མ་འགྱངས་པར་ཤི་ན་སེམས་
ཀྱི་ལྷག་མ་མི་ལུས་པ་བསམ་སྟེ། ལམ་ཞོར་དུ་གྲྭ་ཚང་གི་ཆོས་རའི་བཞུགས་ཁྲི་ནས་དགེ་འདུན་རྣམས་ལ་འདི་ཕྱི་བར་གསུམ་གྱི་བྱ་སྤྱོད་སྤང་བླང་ཉམས་ལེན་སོགས་འཕྲལ་ཡུན་མཐའ་དག་པའི་བསླབ་བྱ་ཞིབ་ཐེམས་སུ་བགྱིས་ཤིང༌། སྔར་རྒོད་ཚང་ནས་ཡར་ལ་འོངས་སྐབས་དང་མཚུངས་པར་ལམ་བར་ཡུལ་གྲོང་ཐམས་ཅད་ལ་བཀྲ་ཤིས་བདེ་ལེགས་ཀྱི་ཤིས་བརྗོད་དང༌། རྨོངས་དད་ཀྱིས་འདུས་པའི་ཁྲོམ་ཚོགས་མཐའ་དག་ལ་ཡང་ཇི་ལྟར་སྔོན་འོ་སྐོལ་གྱི་སྟོན་པ་ཉིད་བྱང་ཆུབ་ཀྱི་སྤྱད་པ་སྤྱོད་ཚེ་སེམས་ཅན་གྱི་དོན་དུ་སྨོན་ལམ་ཇི་ལྟར་མཛད་པ་དང་རྗེས་སུ་མཐུན་པར། བདག་ཉིད་མཐོང་བ་དང་ཐོས་པ་དང་བཟའ་བཏུང་སོགས་མཐུན་རྐྱེན་སྦྱོར་ཞིང་སྟོབས་པ་དང༌། མོས་པས་ཕྱག་དང་སྐོར་བ་བྱེད་པ་མ་ཟད། ལོག་ལྟ་དང་སྐུར་འདེབས་བྱེད་པ་རྣམས་ཀྱང་བདག་གི་བྱང་ཆུབ་ཀྱི་སེམས་ཀྱི་ནུས་པས་མྱུར་དུ་བླ་ན་མེད་རྫོགས་པའི་བྱང་ཆུབ་ཀྱི་རྒྱུར་གྱུར་ཅིག ཅེས་སོགས་ཀྱི་སྨོན་
ལམ་ཁ་ཞེ་མེད་པར་བཏབས། ལམ་རིང་ཀུན་ཏུ་ཡུལ་དང་སྐྱེ་འགྲོ་སོགས་གང་མཐོང་ཡང༌། ད་ནི་བདག་མྱུར་དུ་འཆི་བར་ངེས་ཚེ་ད་ཕྱིན་ཆད་ནས་འདི་དག་མཐོང་བར་མི་འགྱུར་སྙམ་པའི་སྐྱོ་ཤས་དང་མ་བྲལ་བཞིན་དུ་ཕྱིན་པ་ནས། ན་སོ་རྒུད་ཅིང་ནད་གཅོང་གིས་ཉམས་ཐག་པའི་དབང་གིས་ལམ་རིང་བགྲོད་པའི་ཉམས་ཟུངས་དང་བྲལ་བས་གྲུའི་གཞོན་པས་དྲངས་ཏེ་ཞག་བདུན་དུ་ལམ་བར་ཐམས་ཅད་ལ་ཡང་དགོན་སྡེ་ཐ་དད་པའི་བླ་མ་དང་དགེ་འདུན་གྲུབ་མཐའ་ཐ་དད་པ་སོ་སོ་ནས་ཀྱང་ཁ་ན་མ་ཐོ་བ་མེད་པའི་ཉེར་སྤྱད་ཇ་དང་དཀར་སྤྲོ་སོགས་གྱ་ནོམ་པ་དག་སྟབས་ཅིང༌། རང་རང་གི་ཡིད་འདོད་དང་མཐུན་པའི་ཆོས་ཀྱི་རྣམ་གྲངས། ལ་ལས་བླ་མའི་རྣལ་འབྱོར། ལ་ལས་ལྷག་པའི་ལྷ་ཐ་དད་ཀྱི་སྒོམ་བཟླས། ལ་ལས་དཔེའི་བཀླགས་ལུང༌། འགའ་ཞིག་གིས་སྒོམ་གྱི་ངོ་སྤྲོད་དོགས་གཅོད་སོགས་སོ་སོས་ཇི་ལྟར་དོན་དུ་གཉེར་བ་དེ་དང་མཐུན་པའི་ཆོས་འབྲེལ་གྱིས་དགོངས་
པ་བསྐངས། འགའ་ཞིག་ནི་གཙང་པོ་ཕན་ཆུན་གྱི་འགྲམ་ངོགས་ནས་ཕྱག་དང་སྨོན་ལམ་བྱེད་པ་དག་ལ་ཡང་འབྲེལ་པ་བཟང་ཐོགས་ཀྱི་སེམས་བསྐྱེད་སྨོན་ལམ་རྣམ་དག་གི་ས་བོན་བཏབ་ཏེ། མདོར་ན་འཁོས་མེད་བདག་འདྲ་ལ་བླུན་དད་ཀྱིས་རེ་ལྟོས་བྱེད་པའི་སྐྱེ་འགྲོ་འདི་དག་གིས་ད་ནི་སླན་ཆད་བདག་མཐོང་བར་མི་འགྱུར་ལ་བདག་གིས་ཀྱང་འདི་དག་མཐོང་བ་མ་ཡིན་ནོ་ཞེས་ཡིད་ལ་སེམས་ཤིང་སྐྱོ་ཤས་དང་ངེས་འབྱུང་གི་རླབས་འཕྲེང་ཀྱང་གཡོ་བ་ཉིད་དང་མ་བྲལ་བའི་ངང་ནས་སྨིན་དྲུག་གི་ཡར་ཚེས་དང་པོར་གནས་མཆོག་མགོ་དགུ་སྒྲུབ་སྡེར་འབྱོར། དེ་ཉིན་ཀྱང་ཀོང་སྟོད་ཟིང་འོ་ཤོད་ཀྱི་དཔོན་ཁག་སོ་སོ་ནས་བརྟན་བཞུགས་ཀྱི་ཚོགས་མཆོད་སོགས་བདག་ཅག་གཞིས་བྱེས་ཚང་མར་གྱ་ནོམས་དང་བཅས། ཀུན་དགའ་ར་བར་སྒྲུབ་གྲྭ་དགེ་འདུན་རྣམས་ལ་ཐོག་མར་དལ་འབྱོར་རྙེད་དཀའ་ནས་
བརྩམས་ཏེ་མཐར་ཐུག་བྱང་ཆུབ་ལ་རེག་པ་ཚུལ་གྱི་ཉམས་སུ་བླང་བྱའི་རིམ་པ་ཐམས་ཅད་ལེགས་པར་འདོམས་པར་བགྱིས་ཤིང༌། དེར་ཚོགས་ཀྱི་ཁྲོམ་པ་དག་ལའང་མེ་ཏོག་འཐོར་ཞིང་བཀྲ་ཤིས་བདེ་ལེགས་ཀྱི་སྨོན་ལམ་བཟང་པོས་མཚམས་སྦྱར་ནས། བླ་བྲང་གཟིམས་ཆུང་དུ་སླེབས་མ་ཐག་ཐོ་གཙུགས་ཏེ་བཅད་རྒྱའི་མུ་ལ་ཞུགས། སླར་ཡང་དབེན་པའི་མཚམས་ཁང་ཞིག་མ་ཟོས་ན་བླ་བྲང་ཟོ་མི་སོད་པར་བསམ་སྟེ། ལྕགས་ཁྱིའི་དཔྱིད་ཀ་ནས་ཁང་ལས་ཀྱི་མགོ་ཚུགས་ཀྱང་རང་ཉིད་ནི་བཅད་རྒྱ་ལས་མ་གཡོས་པའི་ངང་ནས། གཅུང་པོ་དང་བླ་མ་རྟ་མགྲིན་རྡོ་རྗེ་གཉིས་ལ་བཀོད་ཁྱབ་ཀྱི་དོ་དམ་དང༌། ཐང་འབྲོག་གྲྭ་ཚང་གི་དགེ་འདུན་ཁ་ཤས་དང་བླང་ལ་བྱུང་བ་དང༌། གཞན་སྒྲུབ་སྡེ་ཉིད་ཀྱི་དགེ་འདུན་གང་ཡོད་དེས་ཆེ་འཁྱག་ཆུང་འཁྱག་གི་ལས་ཀར་འབད་ཅིང་ཡོན་བདག་གི་རིགས་ཀྱིས་དང་བླངས་དང་བཅས་པས་འབུངས་ཏེ་མ་འགྱངས་པར་
མཚམས་ཁང་ཉིས་ཐོག་ལེགས་པར་གྲུབ་ཅིང༌། ཚེར་མ་ཟུག་པ་ཙམ་གྱི་ཉེར་འཚེ་ཡང་མེད་པའི་ལེགས་ཚོགས་གོང་འཕེལ་དུ་གྱུར། སྨིན་དྲུག་གི་ཡར་ཚེས་བཟང་པོར་མཚམས་མུས་ནས་སྐྱ་རེངས་ཤར་བ་དང་མཚམས་ཁང་དེ་ཉིད་དུ་གཞན་དང་མ་ཕྲད་པར་བཞུགས་ཏེ་ནང་དུ་ཡང་དག་པར་འཇོག་པ་ལས་གཡོ་བ་མེད་པར་གནས་སོ། །མེ་ཕག་གི་ལོ་ལ་ལོང་ཡུལ་བདེ་ཆེན་དགོན་པར་མཆོད་ཁང་རྣམ་པ་སྔོན་ནས་ཡོད་ཀྱང་རྟེན་བཞེངས་ཀྱི་རིགས་གང་ཡང་མ་འགྲུབ་པར་ཡོད་པ་ལ། འདི་སྐབས་བླ་མ་རིག་འཛིན་ཡེ་ཤེས་པས་ལྷག་པའི་བསམ་པ་དང་སྦྱོར་བའི་བརྩོན་འགྲུས་རྨད་དུ་བྱུང་བས་ཉེ་བར་བསྐུལ་ཞིང་འབད་པ་ཆེ་ཐང་དུ་བགྱིས་ནས་རྟེན་བཞེངས་ཀྱི་འདུན་པ་ལ་གེགས་མེད་ཀྱི་སྲུང་འཁོར་དང༌། གཟུངས་རབ་གནས་མགོ་འདོན་བདག་རྐྱེན་སོགས་གང་ཅིར་དགོས་ཚུལ་བྱུང་བར་
རྗེས་སུ་ཡི་རངས་དབུགས་བྱུང་གཟེངས་བསྟོད་དུ་ཅི་འགྱུར་དང༌། སྐུ་རྒྱུ་ལ་ཉེ་བར་མཁོ་བའི་གནས་ཆེན་མཐའ་དག་གི་ས་རྡོ་བྱིན་རླབས་རྟེན་རྫས། ཚོན་དང་གསེར་ལ་སོགས་པ་ཇི་ལྟར་འབྱོར་པ་དང༌། བར་ཆད་བསྲུང་བའི་ཏིང་འཛིན་གསོལ་འདེབས་སྨོན་ལམ་སོགས་ཀྱང་རང་གི་འཁོས་དང་སྦྱར་ཏེ་བགྱིས། སྒམ་པོ་ནས་ཀྱང་རྟེན་གྱི་ན་བཟའ་དང་གསེར་ཤོག མཚོན་སོགས་ཀྱི་གནང་ཆ་དང༌། སྤྲུལ་སྐུ་བ་རྫོང་རྟ་སོགས་སྐུ་དྲིན་བསྐྱང་ཆ་མཐའ་ཡས་པ་མཛད་པ་ལ་རྟེན་ནས་མཚན་བརྒྱད་ལྷ་ཁང་སོགས་གེགས་མེད་ངོ་མཚར་གྱི་ཕུང་པོར་གྲུབ་པ་ལ་གཟུངས་རབ་གནས་ཀྱང་རང་ཉིད་ཀྱིས་རྟེན་འབྲེལ་མཚམས་སྦྱོར་ཅི་ནུས་དོ་གལ་དུ་བགྱིས་ཤིང་མེ་ཏོག་ཀྱང་བབས་པར་གྱུར་པས་ཡུལ་དུས་མཐའ་དག་ལ་དགེ་མཚན་གྱིས་ཁྱབ་པར་གྱུར་ཏོ། ༈ ཆུ་བྱིའི་ལོར་སྔར་ནས་དགོངས་པ་ཕུར་ཚུགས་སུ་གཏད་ཅིང་བཀའ་
གྲོས་ཀྱི་གསུང་ཤོག་རྒྱུན་ལྡན་དུ་ཕེབས་པ་ལྟར། རྒྱུད་འབུམ་རིན་པོ་ཆེའི་ལུང་རྒྱུན་གསན་པར་སྒམ་པོ་ནས་རྗེ་བཙུན་མཆོག་གི་སྤྲུལ་སྐུ་བཟང་པོའི་མཚན་གྱི་གྲགས་དཀར་སྲིད་པ་གསུམ་ན་ཁྱབ་པ་ཉིད་གདུང་བརྒྱུད་ཞབས་དྲུང་རིན་པོ་ཆེ་མཐུ་སྟོབས་དང་བཅས་པའི་དཔོན་སློབ་རྣམས་མགོ་དགུ་སྒྲུབ་སྡེར་ཆེད་གཏད་དུ་ཕེབས་པར། དངོས་འབྱོར་ཟང་ཟིང་གི་བཀུར་སྟིའི་མཆོད་པ་ནི། བདག་རང་ཡང་དད་ལྡན་འགའ་ཞིག་གིས་བྱིན་པའི་ཕྱེ་རྐྱལ་ཙམ་ལ་བརྟེན་པ་ལས་མ་མཆིས་ཚེ་ཞབས་ཏོག་ག་ལ་འབྱོར་ཀྱང༌། ཆོས་ཀྱི་མཆོད་པ་ནི་དགོངས་པ་དང་སྦྱར་བའི་ཇི་ལྟར་ནུས་པའི་ཞབས་ཕྱི་སྒྲུབ་ཁུལ་གྱིས། རྒྱུད་འབུམ་རིན་པོ་ཆེ་ལས་རྫོགས་ཆེན་སྐོར་གྱི་གླེགས་བམ་འགའ་ཞིག་དང༌། གཞན་རྫོགས་ཆེན་སྙིང་པོ་གསེར་གྱི་ཡང་ཞུན་གྱི་ཟབ་ཁྲིད་སྙན་རྒྱུད་མ་ནན་ཆགས་དང༌། རྡོར་སེམས་སྙིང་ཐིག ཞི་ཁྲོ་དགོངས་པ་རང་གྲོལ་གྱི་
ཟབ་ཁྲིད་སོགས་ཀྱང་དཔྱིས་ཕྱིན་དུ་གསན་པ་གནང་ཞིང༌། ཆོས་བཀའ་གཞན་མའི་བཀླགས་ལུང་སོགས་ཀྱང་བར་མཚམས་ཚར་འདྲོངས་གང་ཆེ་དང༌། བསྟན་འགྲོ་ལ་དགོངས་ཏེ་དམ་རྫས་བདུད་རྩི་སྨན་གྱི་སྒྲུབ་པ་ཞིག་ཀྱང་ཅི་ནས་བྱོས་ཤིག་གསུངས་ནས། དེ་བཞིན་གཤེགས་པའི་རིང་སྲེལ་གྱིས་གཙོས་པའི་བྱིན་རླབས་རྟེན་རྫས་ཁྱད་འཕགས་བསམ་འདས་སྨན་དང་བཅས་པ་སྩལ་བར་མཛད་པའི་བཀའ་སྤྱི་བོར་བླངས་ཏེ་རང་གི་ལག་ཐོག་ཏུ་གང་ཡོད་ཀྱི་སྨན་དང་དམ་རྫས་ཁུངས་ཐུབ་རྣམས་ཀྱང་རྩལ་སྤྲུགས་སུ་བགྱིས་པས། བདུད་རྩི་ཨ་མྲྀ་ཏ་སྤུངས་ཆེ་བར་བསྒྲུབས་ནས་སྐུ་ཚེའི་རྟེན་འབྲེལ་དང་དམ་རྫས་ཀྱི་ཕབས་རྒྱུན་དུ་ཕུལ་ཞིང་རང་གིས་ཀྱང་ཞུས། དེ་ལྟར་རྒྱུད་འབུམ་ཡོངས་རྫོགས་གསན་པ་དང༌། རྫོགས་པ་ཆེན་པོ་ཡང་ཏིག་གི་མུན་ཁྲིད་གཅིག་བརྒྱུད་མ་སོགས་གསན་ཞིང་ཉམས་བཞེས་གནང་བ་སོགས་ཀྱི་ཕྱིར། ཡུན་རིང་བ་ཞིག་བཞུགས་པ་གནང་བཞེད་དང༌། བདག་
རྒན་པོ་ཡང་ད་ནི་ཡུན་རིང་འཚོ་བ་ཡང་དཀའ་ལ། གལ་ཏེ་མ་ཤི་ནའང་མིག་དབང་རིམ་གྱིས་འགྲིབ་ཚུལ་འདིས་བཀླག་ལུང་སོགས་འབུལ་ཐུབ་པ་ཡང་དཀའ་བར་གདའ་བས་ད་རེས་ཞིབ་ནན་མཛད་ན་ལེགས་ཚུལ་ཞུས་ཤིང་དེ་ལྟར་གནང་རྩིས་ལ། འདི་སྐབས་ཀོང་ཡུལ་སྐོར་ལ་དགེ་ལུགས་ལས་གཞན་པ་སུས་ཀྱང་དད་འབུལ་དཀོར་ས་སོགས་དང་བླང་མི་ཆོག་པའི་བཀའ་ཁྲིམས་དམ་པ་དང༌། རྗེ་དེ་ཉིད་ལ་སྐྱ་སེར་ཕལ་མོ་ཆེས་དད་གུས་ཆེ་བའི་གཤིས་ཀྱིས། ཁྲིམས་བདག་རྣམས་ཀྱི་དགོངས་པ་འཁྲོལ་ཆ་མ་གནང་བའི་རྐྱེན་ལ་བརྟེན་ནས་ཟླ་གསུམ་ཙམ་ལས་ལྷག་པ་བཞུགས་པ་སྐབས་སུ་མ་བབས་པར། སླར་ཡང་གདན་ས་ཆེན་པོར་གཤེགས་པར་མཛད། ལར་རྗེ་ཉིད་མཆོག་གི་སྤྲུལ་པའི་སྐུ་དངོས་ཡིན་པ་ཙམ་དུ་མ་ཟད་པར། ཤེས་བྱའི་གནས་མཐའ་དག་
ལ་མཁྱེན་པ་རབ་མཆོག་ཕུལ་དུ་གྱུར་པས་འཆད་རྩོད་རྩོམ་པའི་མངའ་བདག་དམ་པར་གྱུར་ནའང༌། སྙིགས་དུས་ཀྱི་དགེ་སྦྱོང་ཕལ་མོ་ཆེ་རྣམས་ལོག་པར་ལྟ་བ་ལ་ཆེས་གོམས་ཤིང༌། ཁྱད་པར་གསང་སྔགས་སྔ་འགྱུར་བར་ཁས་འཆེ་བའི་རྨོངས་རྒན་དག་བདག་ཏུ་ལྟ་བའི་མུན་པ་དམ་པོས་བཅིངས་པ་རྣམས་ཆོས་ལ་ཕྱོགས་རིས་དང་བདག་བཟུང་བ་ལ་ཞེན་ཅིང་འཐས་པ་དག ཆོས་ཀྱི་རྣམ་གྲངས་འདི་དང་འདི་ནི་རང་ཕྱོགས་པས་བྱས་པའོ་སྙམ་པའི་ཞེ་འདོད་སྐོང་བར་འགྱུར་ཕྱིར་ལ་དགོངས་ནས། འཇའ་ཚོན་ཟབ་གཏེར་གྱི་ཆོས་ཀའི་ནང་ཚན་ཐ་དད་པ་སོ་སོའི་དབང་བསྐུར་ལ་ཉེ་བར་མཁོ་བའི་མཚམས་སྦྱོར་དམིགས་རིམ་ངོ་སྤྲོད་ལོ་རྒྱུས་དག་སྦྱོར་སོགས་མེད་མི་རུང་གི་ཡིག་ཆ་ལྟས་ཆོག་གིས་རིགས་རྣམས་དང༌། གཞན་ཡང༌། གནས་བཅུའི་ཆོ་ག བྱང་སྡོམ་ཐུགས་བསྐྱེད་ཆེན་མོ། བླ་མ་མཆོད་ཆོག་སོགས་ཉེར་མཁོ་ཇི་སྙེད་པ་དག་ཀྱང་ཁྱོད་
ཀྱིས་སྒྲིག་རྩོམ་གྱིས་ཤིག་ཅེས་པའི་བཀའ་རྗེས་སུ་གནང་བར་མཛད་པ་ལ། བདག་འདྲ་བའི་སོ་སྐྱེ་བླུན་པོ་ཐོས་བསམ་གྱི་སྒྲོ་འདོགས་མ་ཆོད་ཉམས་མྱོང་གི་རྩལ་དང་མ་ལྡན། ཐ་ན་གསུང་རབ་ཀྱི་བརྡ་དང་ཐ་སྙད་ཙམ་ལ་ཡང་མ་བྱང་བ་འདི་འདྲ་བས་ནི་བསྟན་བཅོས་རྩོམ་པ་པོའི་མཚན་ཉིད་རབ་འབྲིང་མཐའ་མ་གང་གི་ཕྱོགས་ཙམ་དུ་ཡང་མི་ཉེ་ནའང༌། མཆོག་གི་སྤྲུལ་པའི་སྐུ་དེ་ལྟ་བུ་དག་ནི་ཇི་ལྟར་སངས་རྒྱས་རྣམས་ཀྱིས་འཁོར་འདས་དུས་གསུམ་མཐའ་དག་གི་རྒྱུ་རྐྱེན་འབྲས་བུ་མཐར་ཐུག་གི་བར་གྱི་གནས་རྣམས་ཐམས་ཅད་ལག་མཐིལ་ན་ཀྱུ་རུ་རའི་འབྲས་བུ་བཞག་པ་ལྟར་སྒྲིབ་མེད་དུ་གཟིགས་ཤིང་མཁྱེན་ལ། མཁྱེན་བཞིན་དུ་དོན་མེད་དོན་ལོག་གི་གསུང་མི་འབྱོར་ཞིང་དོན་ལྡན་དོན་ཆེན་གྱི་དགོས་པ་བཏང་སྙོམས་སུ་འཇོག་པར་མི་མཛད་ཕྱིར། འདི་ལྟ་བུ་གྱིས་ཤིག་
པར་བཀའ་སྩོལ་བ་འདི་ནི་དགོས་པ་དང་ལྡན་ཡང་ངོ་སྙམ་པའི་མོས་པ་དག་ཡིད་རབ་ཏུ་གཞུངས་པས་ཇི་ལྟར་ནུས་པ་བཞིན་བྲིས་ཤིང༌། གང་བྲིས་པ་དེ་དག་ཀྱང་རྙེད་བཀུར་གྲགས་འདོད་ཀྱི་བསམ་པའམ། གཞན་དག་ཁྱད་དུ་གསོད་འདོད་སོགས་བསམ་པ་ཕྱིན་ཅི་ལོག་གི་དྲི་མ་སྐྲ་རྩེ་བརྒྱར་བཤགས་པའི་ཆ་ཤས་ཙམ་གྱིས་ཀྱང་མ་སླད་པར། གང་ཞིག་འདི་དག་གིས་ནི་སྐྱེས་ཆེན་དམ་པ་དེ་དག་གི་བཞེད་པ་ཇི་ལྟ་བུར་སྐོང་བ་དང༌། ཆོས་དེ་དང་དེ་དག་གིས་གདུལ་བར་བྱ་བའི་ཡུལ་དུ་གྱུར་པ་ཇི་རྙེད་པ་ཐམས་ཅད་དག་དང་སྨིན་དང་རྒྱུད་གྲོལ་ཞིང་ཡང་དག་པའི་འབྲས་བུ་མངོན་དུ་འགྱུར་བ་ལ་སོགས་པའི་དོན་བདེ་བླག་ཏུ་འགྲུབ་པའི་ཐབས་དང་ཆ་རྐྱེན་དུ་གྱུར་ཅིག་གུ་སྙམ་པའི་ལྷག་བསམ་འབའ་ཞིག་པས་ཀུན་ནས་བླངས་ཏེ་བྱས་ཀྱི་གང་ཞིག་ལྷག་པའི་བསམ་པ་རྣམ་པར་དག་པའི་བྱང་ཆུབ་ཀྱི་སེམས་ནི་ནོར་བུ་རིན་པོ་ཆེ་བསམ་འཕེལ་
དབང་གི་རྒྱལ་པོ་ལས་ཀྱང་ཆེས་ཆེར་ལྷག་པའི་ཡོན་ཏན་གྱི་ནུས་པ་དང་ལྡན་པར་རྒྱལ་བས་མདོ་སྡེ་རིན་པོ་ཆེ་ཐམས་ཅད་དུ་གསུངས་པའི་ཕྱིར་རོ། དེ་ལྟ་བས་ན་མཆོག་གི་སྤྲུལ་པའི་སྐུ་དེས་བཀའི་བསྐུལ་བ་ཇི་ལྟར་གནང་བ་བཞིན་རྩོམ་པའི་རིགས་མང་དུ་བགྱིས་ཏེ་སྤྱན་ལམ་དུ་བསྟར་ནས་ཚིག་དང་དོན་ལ་བདག་ཅག་སོ་སྐྱེའི་མ་རྟོགས་ལོག་རྟོག་གི་དྲི་མ་ཅི་མཆིས་པ་སེལ་བར་གསོལ་བ་བཏབ་ཀྱང༌། དེ་ལྟ་བུ་དགོས་པ་མ་མཆིས་ཞེས་རྗེས་སུ་གནང་བས་དབུགས་དབྱུང་བར་མཛད་པ་ཡང་བདག་གི་ནུས་པ་མ་ཡིན་ཏེ། རྗེ་དེ་ཉིད་ཀྱི་ཐུགས་རྗེའི་ནུས་པ་ལས་བྱུང་བའི་དགེ་མཚན་དུ་ངེས་ཤེས་བརྙེད་པར་གྱུར་ཏོ། ༈ ཡང་རེ་ཤིག་གི་ཚེ། བདག་སྔོན་སྨིན་གྲོལ་སྐྱེད་རྫོགས་གླིང་གི་ཚོགས་དུང་ཆེན་མོ་གཉིས་གཏེར་བྱོན་ཁུངས་བཙུན་བྱིན་རླབས་ཅན་ཡིན་རུང་འདབ་གཤོག་མེད་པས་དེ་ལ་གསེར་
དངུལ་གང་འཛོམ་གྱི་གཤོག་པ་ཞིག་བསྒྲོན་པའི་བསམ་པ་རྒྱུན་ལྡན་དུ་ཡོད་ནའང༌། བཟོ་ནོར་ཉན་དང་དོ་དམ་པ་ཉམས་ལྡན་སོགས་མ་འཛོམ་པ་ལ། ཕྱིས་སུ་གྲྭ་ཚང་གི་གཉེར་པ་ཕྲིན་ལས་ཆོས་འཕེལ་སོགས་ཀྱིས་ཉེ་བར་བསྐུལ་ཏེ་རྗེ་བཙུན་མཆོག་གི་སྤྲུལ་སྐུ་དེ་ཉིད་ལ་བདག་གིས་གསོལ་བ་བཏབ་པ་བཞིན་ཐུགས་རྗེས་དགོངས་ནས་ཞལ་གྱིས་བཞེས་པ་ལ། བདག་གི་ལག་ནས་དེའི་ཆ་རྐྱེན་དུ་དམིགས་ནས་གསེར་ཞོ་བཅོ་བརྒྱད་དང༌། དངུལ་སྲང་དྲུག་ཅུ་རེ་གཉིས། དངུལ་ཆུ་སྲང་བཞི་བཅུ་ཞེ་ལྔ་དང༌། ཕྲ་འདེབས་རྒྱུའི་རིན་ཆེན་འགའ་དང་གཞན་ཡང་དེའི་ཉེར་མཁོ་ལ་ཇ་གོས་དར་སོགས་དགུ་ཚན་ཕུལ། གྲྭ་ཚང་ནས་ཀྱང་རྟ་ཕོ་དང་དྲེལ་གཞོན་གྱིས་གཙོ་བྱས་ཏེ་བཅུ་གསུམ་ཚན་སོགས་ཕུལ་ནས། བལ་པོའི་གསོ་སྐྱོང་ཡོན་རྫོངས་སོགས་དགོས་ཆ་ཐམས་ཅད་དང་ཐ་ན་སོལ་བ་ཚུན་གྱི་ཡོ་བྱད་མ་ལུས་པ་སྐུ་ཞབས་རིན་པོ་ཆེ་ཉིད་ནས་ཁུར་བཞེས་
མཛད་པའི་དངུལ་ལྗང་བརྡུངས་ལ་གསེར་གྱི་གཡོགས་ཤིང་ཕྲ་ཚོམ་གྱིས་སྤྲས་པ་ལྟ་བས་ཆོག་མི་ཤེས་པ་གྲུབ་ནས་ཕྱི་སྣོད་སྒམ་ཆ་ཁྱད་པར་ཅན་དང་བཅས་པ་བཀའ་དྲིན་དུ་བསྩལ་བར་མཛད་དོ། ༈ དེ་ལས་གཞན་ཡང་མགོ་དགུ་སྒྲུབ་སྡེ་ཀུན་བཟང་ཆོས་གླིང་གི་ཀུན་དགའ་ར་བའི་ཚོགས་དབུར། བཞུགས་ཁྲི་སྟོང་པར་བཞག་པ་མི་ལེགས་པར་བསམ་ནས། ཇི་ལྟར་སྔོན་འོ་སྐོལ་གྱི་སྟོན་པ་དགའ་ལྡན་དུ་ཡུམ་ལ་ཆོས་གསུང་པ་དང་སུམ་ཅུ་རྩ་གསུམ་ན་དབྱར་གནས་ལ་གཤེགས་ནས་དགེ་འདུན་རྣམས་ཀྱི་གྲལ་དབུ་སྟོང་པར་གྱུར་པའི་ཚེ་ཙནྡན་གྱི་སྐུ་ཚབ་རིན་པོ་ཆེ་བཞེངས་ཏེ་བཞུགས་སུ་གསོལ་བས་བཀྲ་ཤིས་བྱིན་ཆགས་སུ་གྱུར་པའི་དཔེ་བཞིན་གནས་ཆེན་མཐའ་དག་གི་ས་རྡོ་ཆུ་ཤིང་དང༌། རྟེན་སྣ་ཚང་དང༌། དར་སྨན་རིན་ཆེན་འབྲུ་སྣང་དང་འཇིམ་པ་སྦྱར་བ་ལས་སྣ་ཚོགས་རང་གྲོལ་གྱི་
འདྲ་སྐུ་བཞེངས་སུ་གསོལ་བའི་ནང་བཞུགས་སུ་སངས་རྒྱས་ཀྱི་རིང་སྲེལ་དང༌། བྱང་ཆུབ་ཀྱི་ལྗོན་ཤིང་གང་གི་སྤྱི་བོར་རེག་པ་ཙམ་གྱིས་ངན་སོང་ལས་སྐྱོབ་པར་སངས་རྒྱས་ཉིད་ཀྱི་ཞལ་གྱིས་བཞེས་པ་དང༌། གུ་རུ་རིན་པོ་ཆེའི་ན་བཟའ་དང༌། བཻ་རོ་དང་ཆོས་རྒྱལ་གྱི་ན་བཟའ་སོགས་མདོར་ན་བྱིན་རླབས་ཅན་གྱི་ནང་རྟེན་བསམ་འདས་དང༌། རང་གྲོལ་ཉིད་ཀྱི་ཚེམས་མཆེ་བ། སྐྲ་སྦུབས་ན་བཟའ་སོགས་དང༌། གཞན་ཡང་གཟུངས་ཡོང་རྫོགས་ཚར་ཉེར་ལྔ་སོགས་བཞུགས་པ་དང་རབ་ཏུ་གནས་པ་ཡང་རང་ཉིད་ཁོ་ནས་མཚམས་མལ་དུ་ནན་ཆགས་སུ་བགྱིས་པས་ཡེ་ཤེས་བཞུགས་པའི་རྟགས་ལྡན་དུ་ངེས་ཤེས་བརྙེད་པ་ལ་ན་བཟའ་བཞུགས་ཁང་སོགས་ཀྱང་ཆ་འགྲིགས་སུ་བསྒྲུབས་ནས་དད་ལྡན་རྣམས་ཀྱིས་ཕྱག་མཆོད་ཀྱི་ཞིང་དམ་པ་དང༌། སྒྲུབ་གྲྭའི་འདུས་པ་རྣམས་ཀྱི་ཚོགས་ཀྱི་དཀྱིལ་འཁོར་བྱིན་ཆགས་སུ་འགྱུར་བ་དང༌། ཡུལ་དུས་གནས་
སྐབས་མ་ལུས་པའི་ས་གནད་རྟེན་འབྲེལ་གྱི་དགོས་པ་ཆེན་པོ་ལ་ཉེ་བར་དམིགས་ནས་བགྱིས་པའོ། ༈ །དེ་ལྟར་གོང་དུ་སྨོས་པ་བཞིན་རང་ཉིད་ཀྱི་ན་སོ་དང་ནད་གཞིའི་རྒྱུ་རྐྱེན་སྟོབས་ཆེ་བའི་མཐུས་འདི་ཙམ་ལ་འབྱུང་འདུས་ཀྱི་ཁང་རུལ་གོག་པོ་འདི་ཞིག་པར་གྱུར་ན་སྐབས་ལ་ཡང་བབས་ཤིང་འགྱོད་འཚེར་ཡང་མ་མཆིས་པ་དང༌། འཆི་བའི་གནས་ཀྱང་དུད་ཁྲོད་ཆེན་པོ་པདྨ་བརྩེགས་པའི་ཆ་ཤས་སུ་གསུངས་པའི་གཉན་ཁྲོད་འདི་ཁོ་ནར་གདོས་བཅས་ཀྱི་ཕུང་པོ་འདི་ལ་དཔའ་བོ་མཁའ་འགྲོའི་ཚོགས་མཆོད་དུ་གྱུར་ན་ཅི་མ་རུང་སྙམ་པའི་འདུན་པ་རྩེ་གཅིག་ཏུ་ཆེ་ཡང་རེ་ཤིག་ཐོག་ཏུ་མ་བབས། རང་ཕྱོགས་སུ་གཏོགས་པའི་རྨོངས་ཞེན་པ་རྣམས་ནི་བདག་འདྲ་འཆི་དོགས་ཀྱི་སེམས་ཁུར་བྱེད་མོད་ཀྱང༌། ངེད་ལས་གཞན་པ་མང་པོ་དག་མི་རྒན་བདག་འདུས་བྱས་ཀྱི་མཚན་ཉིད་
བསྟན་པར་གྱུར་ན་དགའ་མགུ་ཡིད་རངས་པར་འགྱུར་བའི་རིགས་ཅན་ཤིན་ཏུ་མང་བ་དང༌། གནས་དེ་ཡང་ས་འདུས་ཆེ་ཞིང་ལམ་པོ་ཆེའི་དབུས་སུ་གྱུར་གཤིས་ཀྱིས་རབ་ཏུ་མི་དབེན་པ་དང༌། རང་ཉིད་འདུ་ལོང་སྤངས་ཏེ་བསམ་གཏན་གྱི་ཁང་བུར་ཡང་དག་འཇོག་ལས་གཞན་པའི་བྱ་བ་མི་བྱེད་ནའང༌། ཐག་རིང་འགྲུལ་པ་ཚུན་གྱིས་བདག་གི་གྲགས་པ་སྐམ་པོ་ལ་ཡིད་བརྟན་དུ་བྱས་ཏེ་རྒྱང་རིང་ནས་དབེན་ཁང་མཐོང་བ་ལ་ཡང་ཕྱག་དང་སྨོན་ལམ་སོགས་བྱེད་པ་དེ་ལ་ཡུལ་གཉན་པོ་བདག་ཐུགས་ལ་མ་རན་པར་ཟུག་རྔུར་གྱུར་པ་སོགས་མདོར་ན་རང་ལ་བརྟེན་ནས་གཞན་སྡིག་གསོག་པ་མཐོང་བས་ཡིད་ཁོང་དུ་ཆུད་དེ་སླར་ཡང་དེ་ལས་ཆེས་ཆེར་དབེན་པའི་ལུང་སྟོངས་དག་འགྲིམས་པ་ཞིག་འདོད་ཀྱང་ལང་ཚོ་རྒུད་ཚབས་ཧ་ཅང་ཆེ་ཤིང་ཡན་ལག་ཀྱང་མི་བདེ་ལ་མིག་ཀྱང་འགྲིབ་པའི་གནད་ཀྱིས་ཐག་རིང་
བགྲོད་པའི་ནུས་སྟོབས་ནི་གཏིང་ནས་ཟད་པས་ན། སླར་ཡང་ཆོས་དབྱིངས་འོད་གསལ་རྩེ་མོར་འབྱུང་འདུས་ཕུང་པོ་འདོར་བ་ལས་གཞན་པའི་གོ་སྐབས་མ་རྙེད་ལ། དེར་བསྒྲོད་པ་ལ་ཡང་སྔར་ལྟར་མི་འདུས་ཀྱི་ཟིང་ལོང་དག་བྱུང་ན་ཁྲིམས་བདག་རྣམས་ཡིད་མི་དགྱེས་པའི་སྒྲིབ་གསོག་ཏུ་འགྱུར་བར་རིག་ནས། མགོ་དགུར་ལོ་བཞིའི་བཅད་རྒྱ་གྲུབ་པའི་ཆུ་གླང་དབྱུག་ཟླའི་ཉ་ལ་ཕྱི་ནང་སུས་ཀྱང་མ་ཚོར་བར་སྐྱ་རེངས་ཤར་མ་ཐག་ཏུ་གྲུ་བོ་ཆེ་ལ་ཞུགས་ནས་ཆུ་བོ་པཀྵུའི་གཞུང་ལམ་དྲང་པོར་བརྒྱུད་ནས་རིངས་རིངས་པར་སོང་སྟེ། ནུབ་མོ་ཡང་ནགས་ཚང་ཚིང་སྟུག་པོའི་ཁྲོད་དུ་ཞག་མལ་བགྱིས་ཤིང༌། གྲུ་ལས་ཐོན་པའི་ཚེ་ཡང་མཚན་ཐོག་ཐག་ཉིད་དུ་ལམ་སྲང་ལ་བཅོམ་སྐྱུངས་ཏེ་འབད་པས་འོང་ཤིངས་ཇི་ལྟར་དམུས་ལོང་ལ་དམིགས་བུས་བྱ་བ་བཞིན་དུ་གྲོགས་ཀྱི་སྣ་ཁྲིད་དང་འཐེན་
འཕུལ་ལ་བརྟེན་ནས་བགྲོད་དེ། ཆོས་དབྱིངས་འོད་གསལ་རྩེ་མོར་སླེབས་མ་ཐག་ནས་སྔར་བཞིན་རང་ཤོང་གི་མལ་དུ་ཞུགས་ཏེ། འདི་སྣང་གི་སྒྱུ་མའི་ལྟད་མོ་ལ་ཞེན་པའི་ཐག་པ་ནི་བཅད། སྔར་བྱས་ཀྱི་བག་ཆགས་རྨི་ལམ་ལས་ཀྱང་རྨི་ལམ་ཆེན་པོར་གྱུར་པའི་ངང་ཚུལ་ཇི་རྙེད་པའི་མཚང་ནི་རིག ད་ལྟ་ཇི་ལྟར་ཤར་ཞིང་མཐོང་ཚོར་ལྟར་སྣང་བ་འདི་ཐམས་ཅད་བྱིས་པའི་རྩེད་མོ་ལ་རྒན་པོས་ལྟ་བ་བཞིན་དུ་གྱུར། འཇིག་རྟེན་ཕལ་པའི་སྐྱེ་བོ་ལྟ་ཅི་སྨོས་ཏེ། བསྟན་པའི་སྒོར་ཞུགས་པའི་ཆོས་པ་སྤྱི་དང་ཁྱད་པར་དུ་རང་རེའི་སློབ་རིགས་གྲྭ་འཁོར་ཕལ་མོ་ཆེ་རྣམས་ཚེ་འདིའི་ལྟོ་གོས་གཏམ་གསུམ་འབའ་ཤིག་དོན་དུ་གཉེར་བ་ལས། ཚེ་ཕྱི་མ་དང་གཏན་གྱི་འདུན་མ་སྒྲུབ་མཁན་ནི་ཉིན་སྐར་ལས་ཀྱང་ཆེས་དཀོན་པར་ཡང་མཐོང༌། རང་གི་ནུས་པས་དེ་དག་གི་རྒྱུད་འདུལ་བའི་སྨིན་གྲོལ་དུ་བྱེད་པ་ནི་ལྟ་ཞོག །
ཚེ་འདིའི་སྣང་ཤས་ཅུང་ཞིག་ཆུང་དུ་གཏོང་ཐུབ་པ་ཙམ་ཡང་མི་ནུས་ཚེ་རང་གི་ཐུགས་རྗེ་བྱིན་རླབས་ནི་དེ་ལྟ་བུར་ཟད་ལ། གཞན་གྱི་དག་སྣང་མོས་གུས་ཀྱི་གདུང་ཤུགས་ཀྱང་དེ་དང་མཚུངས་ཤིང༌། དེང་སང་འཁོར་སློབ་ཀྱིས་བླ་མ་ལ་དད་གུས་ཆེ་ཆེ་མོར་འདོད་པ་ཐམས་ཅད་ནི་ཡང་དག་གི་དད་པ་མ་ཡིན་ནོ། འཇིག་རྟེན་གྱི་དཔོན་གཡོག་གི་སྡུག་ཞེན་ཕོ་རུས་དང་ཁྱད་ཅི་ཡང་མེད་ལ། དེ་ཡིན་པའི་རྟགས་སུ་བླ་མས་ཅི་མཛད་ལེགས་མཐོང་གི་བློ་རྒྱུད་ལ་མ་འཆར་བར། རང་ལ་མཉེས་པ་མཛད་ན་བླ་མ་བཟང༌། རང་ལ་མི་གཉེས་ན་ངན་པར་འཛིན་པ་འདི་ཁོ་ནས་སློབ་མའི་མཚན་ཉིད་བདེ་བླག་ཏུ་སྟོན་པ་ཉིད་དུ་གསལ་ཚེ། དེ་བས་ན་ད་ནི་རང་ལོ་བདུན་ཅུ་ལ་ཉེ་བའི་མི་ཚེ་ནུབ་ཀྱི་རི་མགོ་ནས་ཕྱི་མིག་ལྟ་བའི་དགོང་ཉི་ལྟ་བུ་འདི། དོ་ནུབ་འཆིའམ། སང་ཉིན་འཆིའམ་
སྙམ་པའི་བློ་ཐོག་ནས་འཕུར་ལ་ཁད་ཀྱི་བྱ་བཞིན་ཏེ། ཇི་ལྟར་སྔོན་བཀའ་གདམས་ཀྱི་དགེ་བའི་བཤེས་གཉེན་གླང་རི་ཐང་པ་སོགས་ཚོགས་ཆོས་གནང་བའི་ཐུན་མཚམས་སུ་འོ་སྐོལ་དོ་ནུབ་མ་ཤི་ན་འདིའི་འཕྲོ་སང་ཉིན་འཆད་པར་བགྱིའོ། ཞེས་རྒྱུན་པར་གསུང་བ་དེ་ལྟ་བུ་ལས་ཀྱང་ཁོ་བོ་ན་སོ་ནི་རྒུད། དབང་པོ་ནི་འགྲིབ། ཚེ་ཆད་ནི་རྫོགས། ནད་ཀྱིས་ནི་གདུངས། ལུས་ཉམས་ནི་ཟད་པ་འདི་ལྟ་བུ་ཅིའི་ཕྱིར་འཚོ། ནམ་འཆི་བའི་ཚེ་ཡང་ཉམས་ལེན་ཟབ་མོ་ལ་གདེང་ཐོབ་པ་གང་ཡང་མ་མཆིས་པའི་ཁར། དད་ཟས་ཤིན་དཀོར་ཁྲོ་ཆུ་ཁོལ་མ་དང་འདྲ་བ་འདི་ནུས་པ་ནན་ཏར་ཆེ་བའི་མཐུས། ལམ་དང་ལམ་མ་ཡིན་པ་དང་གནས་དང་གནས་མ་ཡིན་པ་ཤེས་པར་དཀའ་ཞིང་དཀོར་སྒྲིབ་ཀྱིས་འཐུམས་པས་རང་རིག་པའི་ཡེ་ཤེས་ལ་རང་དབང་ཐོབ་པ་ནི་དཀའ་སྟེ། གལ་ཏེ་རང་རིག་ཡེ་ཤེས་ལ་དབང་བསྒྱུར་ནུས་པ་ལྟ་བུའི་ཚེ་ན་ནི། ངོ་བོ་ཆོས་ཀྱི་
སྐུ་སྤྲོས་པ་དང་བྲལ་བའི་རང་ས་ཟིན་ཅིང༌། རང་བཞིན་ལོངས་སྤྱོད་རྫོགས་པ་གསལ་དག་ཐིག་ལེའི་དཀྱིལ་འཁོར་ཆོས་དབྱིངས་ཁྱབ་པ་ནས། ཐུགས་རྗེ་ཀུན་ཁྱབ་སྤྲུལ་པའི་སྐུ་གདུལ་བྱའི་ཁམས་དང་མཉམ་པའི་ཡེ་ཤེས་ཀྱི་སྒྱུ་འཕྲུལ་ཟད་མི་ཤེས་པའི་ཕྲིན་ལས་རླབས་པོ་ཆེ་ཕྱོགས་དང་རིས་སུ་མ་ཆད་པར་འཁོར་བའི་མཐའ་མཉམ་དུ་འབྱུང་བར་སྨོན་པ་མ་གཏོགས། དིང་སང་གི་སྐུ་སྐྱེའམ་སྤྲུལ་སྐུར་བཏགས་པའི་དད་ཟས་ཀྱི་ཟོང་རིན་འདི་ལྟ་བུར་མི་སྐྱེ་བ་དང༌། དེ་ཡང་ཐོས་བསམ་སྒོམ་དང་སྨིན་གྲོལ་གྱི་མཁྱེན་རྟོགས་འཛོམ་མ་འཛོམ་སོགས་བླ་མའི་མཚན་ཉིད་ལ་མི་ལྟ་བར། འཇིག་རྟེན་པའི་བག་མ་ལྟར། སྒོ་མཚར་ཁྱད། མི་ཆོས་མཁས་མི་མཁས། འཇིག་རྟེན་ཕེར་ཡོ་སོགས་ཡོད་མེད་ལ་སྐུ་སྐྱེའམ་བླ་མ་ཉན་མི་ཉན་གྱི་མཚན་ཉིད་དུ་བྱེད་པའི་ཡུལ་དུས་གང་ཟག་འདི་འདྲ་བའི་ཁྲོད་དུ་ནམ་ཡང་མི་སྐྱེ་བའི་
སྨོན་ལམ་སྙིང་ཁུང་རུས་པའི་དཀྱིལ་ནས་འདེབས་པ་ནི་བདག་འདྲའི་ཞེ་དམ་ཡིན་པ་དང༌། དེ་ལྟར་བདག་གི་ཚེ་འདིའི་བྱ་བྱེད་རགས་བསྡུས་ཙམ་གྱི་ཚུལ་བརྗོད་པ་འདི་ལ་ཟོལ་ཟོག་རྫུན་གྱི་དྲི་མ་རྡུལ་ཆ་ཙམ་གྱིས་ཀྱང་མ་སླད་པར། རང་བཞིན་གནས་ལུགས་དྲང་པོར་བརྗོད་པ་འདི་ལ་མཁས་རྣམས་མགུ་བར་ག་ལ་ནུས་ཀྱང༌། རང་དང་རིགས་མཐུན་རྣམས་བསམ་པ་རྫོགས་བྱེད་ཙམ་དུ་བྲིས་ལ། འདི་ལས་ཞིབ་པར་འདོད་ན་རྗེ་བཙུན་མཆོག་སྤྲུལ་ཆེན་པོ་བཟང་པོའི་ཞབས་ཀྱིས་མཛད་པའི་རྣམ་ཐར་ཆེན་མོ་དེར་ལྟ་བར་བྱོས་ཤིག ༈ རྒྱལ་བ་རྒྱལ་སྲས་རྣམས་ཀྱིས་རྣམ་པར་ཐར། །བྱང་ཆུབ་སྤྱོད་ལ་ངོ་མཚར་ལྟ་ཅི་སྨོས། །མཁས་རྣམས་ཐོས་པའི་སྒྲོ་འདོགས་བཅད་ཚུལ་དང༌། །གྲུབ་རྣམས་ཉམས་བཞེས་མངོན་དུ་གྱུར་ཚུལ་སོགས། །སྐྱེས་བུ་དམ་པའི་རྣམས་པར་ཐར་པས་ནི། །མཐོང་ཐོས་དད་བསྐྱེད་དང་བ་འདྲེན་པ་ཡིས། །གདུལ་བྱའི་རྒྱུད་ལ་ངེས་ལེགས་ས་བོན་
ཐེབས། །འཁོར་བའི་ཞེན་ལྡོག་ངེས་འབྱུང་མྱུ་གུ་བསྐྱེད། །མོས་པས་རྒྱུད་བསྐུལ་ཚོགས་གཉིས་འབྲས་སྨིན་བྱེད། །རྣམ་ཐར་མཐོང་བའི་དགོས་པ་དེ་འདྲ་ན། །དེང་སང་རང་རང་ཞེན་ཕྱོགས་ཕོ་རུས་ཀྱིས། །ལེགས་ཆ་སྒྲིགས་ཅིང་ཉེས་ཆ་སྦེད་པ་ཡིས། །རྣམ་ཐར་ངོ་མཚར་ཆེས་ཆེར་བརློམས་པ་ཡང༌། །ས་ཕྱོགས་འདིར་བྱོན་འབུལ་བ་འདི་བྱུང་དང༌། །གནང་སྦྱིན་འདི་བྱས་མཐར་ཆགས་བརྗོད་པ་ལ། །རྣམ་ཐར་ཟེར་ཡང་རང་མཚང་སྟོན་པར་ཟད། །ངོ་མཚར་མེད་ལ་ཡོད་པར་སྒྲོ་བཏགས་ན། །མི་ཆོས་བླ་མའི་རྫུན་ཏེ་དམ་སྡོམ་འཇིག །དེ་ཕྱིར་བདག་གི་དྲང་གཏམ་བརྗོད་པ་འདིར། །གཞན་དག་ཅི་སྙམ་རང་ལ་མནོང་སེམས་མེད། །གལ་ཏེ་ཅུང་ཟད་མོས་དང་དག་སྣང་དང༌། །དགེ་ལ་བསྐུལ་རྐྱེན་ཕྲ་མོ་བྱུང་སྲིད་ན། །དེ་ཡི་དགེ་ཚོགས་མཁའ་མཉམ་འགྲོ་ལ་བསྔོ། །འོན་ཏེ་ལ་ལ་སྐུར་འདེབས་ལོག་ལྟའི་སེམས། །སྐྱེས་ཀྱང་དེ་ལ་སྒྲིབ་པར་མི་འགྱུར་བར། །གནོད་པ་བྱས་ཀྱང་བདེ་བར་འབྲེལ་
འགྱུར་གྱི། །བྱང་སེམས་མཆོག་གི་སྨོན་ལམ་བདག་གྲུབ་ཤོག ཅེས། རང་ལོ་དྲུག་ཅུ་ནས་བདུན་ཅུར་ཉེ་བའི་བར་གྱི་སྤྱོད་ཡུལ་རགས་རིམ་འཕྲོས་པ་དང་བཅས་པ་མཐའ་དག་རྫོགས་པར་བརྗོད་པ་སྟེ་ལེའུ་བདུན་པའོ། །དགེའོ།།