བདེར་གཤེགས་སྒྲུབ་པ་བཀའ་བརྒྱད་གསང་བ་ཡོངས་རྫོགས་ཀྱི་ལས་བྱང་གཞུང་སྲོང་གི་རིམ་པ་རྣམས།
བདེར་གཤེགས་སྒྲུབ་པ་བཀའ་བརྒྱད་གསང་བ་ཡོངས་རྫོགས་ཀྱི་ལས་བྱང་གཞུང་སྲོང་གི་རིམ་པ་རྣམས་བཞུགས་སོ། །
ཤྲཱི་ཧེ་རུ་ཀ་གུ་རུ་ཨ་དྭ་ཡ་ན་མོ། །བདེར་གཤེགས་རྒྱལ་བའི་དཀྱིལ་འཁོར་རབ་འབྱམས་ཀུན། །སྒྲུབ་པ་བཀའ་བརྒྱད་གསང་བ་ཡོངས་རྫོགས་སུ། །གདོད་ནས་ལྷུན་གྲུབ་ཆེན་པོར་ཡོངས་འདུས་པའི། །ཁྱབ་བདག་ཆེ་མཆོག་པདྨ་ཐོད་ཕྲེང་མཆོད། །གང་དེའི་ཐུགས་རྗེའི་རོལ་རྩལ་སྒྱུ་འཕྲུལ་ནི། །ཡེ་ཤེས་དཀྱིལ་འཁོར་རྣམ་དགུར་ཤར་བ་ལ། །བསྙེན་སྒྲུབ་མཆོད་བསྟོད་ཕྲིན་ལས་གཞུང་སྲོང་གི། །ལས་རིམ་གཏེར་གཞུང་ཇི་བཞིན་འདིར་བཀོད་བྱ། གུ་རུ་རིན་པོ་ཆེ་ཆོས་ཀྱི་དབང་ཕྱུག་གིས་གཏེར་ནས་སྤྱན་དྲངས་པའི་ཞི་ཁྲོ་བཀའ་བརྒྱད་གསང་བ་ཡོངས་
རྫོགས་ཆེན་པོའི་བསྙེན་སྒྲུབ་ལས་གཞུང་གི་རིམ་པ་ཇི་ལྟར་བྱ་བ་ནི། ཐོག་མར་གང་དུ་བྱ་བའི་གནས་དེར་འཕྱག་བདར་རྐྱང་ནུལ་སོགས་ལེགས་པར་བྱས་ནས། དེ་ཡང་དབང་དང་སྒྲུབ་ཆེན་སོགས་མདུན་སྐྱེད་གཙོ་བོར་བཏོན་པའི་སྐབས་དག་ཏུ་ནི། དེ་དང་མཐུན་པའི་དཀྱིལ་འཁོར་གྱི་བཤམས་བཀོད་རྒྱས་པར་དགོས་མོད་ཀྱང་། འདིར་ནི་བདག་སྐྱེད་རྐྱང་སྒྲུབ་ཀྱི་སྐབས་ཁོ་ནའི་དབང་དུ་བྱས་ཕྱིར། གཏོར་མཆོད་གང་རྒྱས་ཙམ་བཤམས་པའི་ཚུལ་བཤད་པར་བྱ་སྟེ། ཞི་ཁྲོ་བཀའ་བརྒྱད་ལྷ་ཚོགས་ཀྱི་སྐུ་རྟེན་སོགས་ཇི་ལྟར་འབྱོར་བ་བཀྲམ་པའི་མདུན་དུ་ཅོག །རྩེ་སོགས་སྟེགས་བཟང་པོ་ལྷ་གོས་མཛེས་པས་གཡོགས་པའི་ཁར་མེ་ཏོག་སིལ་མ་དཀྲམ་ཞིང་། རིན་ཆེན་གྱི་སྣོད་ཆེ་བ་ཞིག་ཏུ་ཆེ་མཆོག་
དཔལ་དགུའི་གཏོར་མ་དཔལ་གཏོར་ཟུར་གསུམ་པ་འཁོར་བརྒྱད་དང་མཐེབ་ཀྱུས་བསྐོར་ཞིང་རྒྱན་དཀར་དམར་གྱིས་མཛེས་པ་སྟེང་ན་དར་མཐིང་ནག་གི་གུར་ཕུབ་པ་གཟི་བརྗིད་དང་ལྡན་པ་དབུས་སུ་བཞག །དེའི་གཡས་སུ་བླ་མའི་གཏོར་མ། གཡོན་དུ་ཡི་དམ་མཁའ་འགྲོ་ཆོས་སྐྱོང་སྤྱིའི་གཏོར་མ་དང་། གཡས་ཀྱི་མཐའ་ལོགས་སུ་འདི་ཉིད་ཀྱི་བཀའ་སྲུང་དྲེགས་པའི་སྡེ་དཔོན་སུམ་ཅུའི་སྒེར་གཏོར་གཙོ་བོ་ཟུར་གསུམ་པ་གྲི་རིས་ཅན་ཆེ་བ་གཅིག་ལ་འཁོར་ཟུར་གསུམ་སུམ་ཅུས་བསྐོར་བ་ཤ་ཁྲག་གིས་རྒྱན་པ་བཞག །གཡོན་གྱི་མཐའ་འགྲམ་དུ་དཔལ་གྱི་བཀའ་སྡོད་རྣམས་ཀྱི་གཏོར་མ་ཡང་སྔ་མ་ལྟར། གཙོ་བོ་ནི་ཟུར་གསུམ་གྲི་རིས་ཅན་དེ་ཁམས་གསུམ་ཧཱུྃ་སྒྲ་ཅན་ཞེས་ཁྱུང་གི་གཏོར་མ་ཡིན་ལ། དེའི་འཁོར་ནི་ལྷ་གྲངས་མང་བས་གྲངས་མཉམ་པ་ནི་མི་འགྲུབ་ཀྱང་ཇི་ཙམ་ཤོང་ཤོང་གིས་བསྐོར་ཞིང་ཤ་ཁྲག་གིས་བརྒྱན་པ་བཞག །དེ་དག་གི་གཡས་གཡོན་དུ་ཀ་པཱ་ལར་བདུད་རྩི་སྨན་རཀ་སྤྱི་ལྟར་དང་། འདི་ལ་ཁྱད་པར་དུ་བདུད་རྩི་བསང་ནན་ཞེས་པ། རིན་ཆེན་གྱི་སྣོད་ཅི་རིགས་པར་ཛཱ་གད་ཆང་ཕུད་བཟང་པོས་བཀང་བ་ཞིག་ཀྱང་གཙོ་གཏོར་གྱི་མདུན་དུ་བཞག་ཅིང་། གཞན་ཡང་ཕྱི་ནང་གསང་མཆོད་སྤྱན་
གཟིགས་འདོད་ཡོན་ཕུན་སུམ་པའི་མཆོད་རྫས་དང་བཀོད་པའི་ཁྱད་པར་མཛེས་ཤིང་བརྗིད་ལ་བག་དྲོ་བ་སྒྲུབ་པ་པོ་རྣམས་སྣང་བ་འགྱུར་ཐུབ་པའི་བཤམ་བཀོད་དང་། སྤོས་དང་རོལ་མོའི་བྱེ་བྲག་སོགས་མདོར་ན་རྩ་གསུམ་ཞི་ཁྲོ་དམ་ཅན་གྱི་ཚོགས་ཐམས་ཅད་མཉེས་ཤིང་དམ་ལ་འདུ་བའི་རྟེན་འབྲེལ་གྱི་གནད་ཡོད་པས། གཡས་མེད་ཁྱེར་བདེ་སྒྱིད་ངན་གྱི་དབང་དུ་མི་བཏང་ཞིང་། གཏོར་ཚོགས་མར་མེ་མཆོད་རྫས་ཡོ་བྱད་སོགས་ལ་འབགས་རྩོགས་དང་སེར་སྣ་སོགས་སྐྱོན་གྱིས་བསླད་ན། ཡེ་ཤེས་ལྷ་ལ་རྟོག་པའི་འཛིན་པ་དང་བྲལ་ཡང་བཀའ་སྲུང་དམ་ཅན་རྣམས་ནི་ལེགས་ཉེས་ཕྲ་མོ་ལའང་མགུ་ཁང་བྱེད་ཅིང་། དེའི་ཕན་གནོད་ཀྱི་འབྲས་བུ་སྒྲུབ་པ་པོ་ལ་འཕྲལ་དུ་འབྱུང་ཕྱིར། རྩིངས་ཆོས་སུ་མ་སོང་བར་བྱ་དགོས་པ་ནི་གསང་སྔགས་ཀྱི་དམ་ཚིག་གི་སྒོ་དང་པོ་ཡིན་ནོ། དེ་ནས་ཆོ་ག་དངོས་ལ་འཇུག་པའི་དང་པོར། སྐྱབས་སེམས་ཚོགས་གསོག་སྡོམ་གཟུང་རྣམས་ཀྱིས་རང་རྒྱུད་ལས་རུང་དུ་མ་སྒྲུབས་ན་གསང་སྔགས་རྡོ་རྗེ་ཐེག་པའི་ལམ་ལ་འཇུག་པར་མི་དབང་བས་དེ་དག་བྱ་བ་ནི། ཕྱོགས་བཅུ་མཐའ་ཡས་པའི་ཞིང་ཁམས་ན་བཞུགས་པའི་རྒྱལ་བ་སྲས་བཅས་ཡེ་ཤེས་ཀྱི་སྤྱན་ལྡན་རྣམས་ལ་མོས་གུས་གདུངས་ཤུགས་
ཀྱི་འདུན་པ་བསྐྱེད་ཅིང་། ཇི་སྐད་དུ། ཡེ་ཤེས་ལྷ་ལ་རང་རྒྱུད་ཀྱི། །རྩིས་གདབ་ཁྲིགས་སུ་བཅད་པ་མེད། །གང་ལྟར་མོས་པ་དེ་བཞིན་སྣང་། ཞེས་གསུངས་པ་བཞིན་མོས་པའི་རང་གཟུགས་ཇི་ལྟར་འདོད་བཞིན་འཆར་བ་ཡིན་ཕྱིར། འདི་སྐབས་སུ་ཕྱོགས་བཅུའི་རྒྱལ་བ་མ་ལུས་སྒྲུབ་པ་བཀའ་བརྒྱད་ཀྱི་ལྷ་ཚོགས་འབའ་ཤིག་པའི་རྣམ་འགྱུར་གྱིས་ཞིང་ཁམས། ཁྱབ་པར་བཞུགས་པར་མོས་ལ་ཚིག་གི་རྗེས་སུ་དོན་སེམས་ལ་དྲན་པའི་ངང་ནས་འདི་སྐད་དོ། །ན་མོ། །ཕྱོགས་བཅུའི་འཇིག་རྟེན་རབ་འབྱམས་གཞལ་ཡས་ནས། །བླ་མེད་དཀོན་མཆོག་རྒྱལ་བ་སྲས་བཅས་དགོངས། །བདག་སོགས་མཐའ་ཡས་སེམས་ཅན་མ་ལུས་ཀུན། །དུས་འདི་ནས་བཟུང་སངས་རྒྱས་མ་ཐོབ་བར། །ཐུགས་རྗེའི་དབང་གིས་འགྲོ་ལ་དགོངས་མཛད་པའི། །བླ་མ་རྣམས་ལ་ཕྱག་འཚལ་སྐྱབས་སུ་མཆི། །རྩེ་གཅིག་ཐུགས་རྗེས་བྱིན་རླབས་ཡེ་ཤེས་སྐུ། །ཡི་དམ་ལྷ་ལ་ཕྱག་འཚལ་སྐྱབས་སུ་མཆི། །རྩོལ་རྟོག་མི་མངའ་ཡོན་ཏན་ཐུགས་རྗེའི་བདག །སངས་རྒྱས་རྣམས་ལ་ཕྱག་འཚལ་ལོ། །ཆགས་པ་མེད་པར་འགྲོ་དོན་མ་ལུས་འབྱུང་།
དམ་ཆོས་རྣམས་ལ་ཕྱག་འཚལ་ལོ། །མ་ནོར་ལམ་ལ་གནས་མཛད་ཞིང་མཆོག་སྐྱོང་། དགེ་འདུན་རྣམས་ལ་ཕྱག་འཚལ། འགྲོ་བའི་དོན་དུ་རང་བྱུང་སྐུར་སྤྲུལ་པ། །པདྨ་འབྱུང་གནས་སྐུ་ལ་ཕྱག་འཚལ་ལོ། །གཅིག་ཤེས་ཀུན་གྲོལ་སྐད་ཅིག་སངས་རྒྱས་སྟོན། འགྲོ་མགོན་ཆོས་དབང་སྐུ་ལ། ཇི་བཞིན་རྟོགས་པའི་གདེངས་ལྡན་ཐུགས་རྗེའི་བདག །རྒྱལ་སྲས་སྨན་ལུང་པ་ལ། མཐར་ཕྱིན་ངེས་པའི་དོན་སྟོན་མཁྱེན་བརྩེའི་སྐུ། སངས་རྒྱས་དྭགས་སྟོན་སྐུ་ལ༴ བཀའ་ལུང་དབང་བསྒྱུར་མཐར་ཕྱིན་ངེས་དོན་བདག །བཛྲ་ཛྙཱ་ནའི་སྐུ་ལ༴ གསང་སྔགས་རྒྱུད་འཛིན་ལུང་རིག་ཀུན་གྱིས་བདག །བུ་དྷ་ཤྲཱིའི་སྐུ་ལ༴ སྔོན་གྱི་ལས་སད་གུ་རུས་བྱིན་བརླབས་པ། གུ་ཎ་ཕ་ལའི་སྐུ་ལ༴ ཨུ་རྒྱན་ལུང་བསྟན་ཆོས་དབང་ཐུགས་ཀྱི་སྲས། ཆོས་སྐུ་འོད་ཟེར་སྐུ་ལ༴ རང་སེམས་ཆོས་སྐུར་རྟོགས་ནས་གཞན་
དོན་མཛད། ཡེ་ཤེས་ཀུན་དགའི་སྐུ་ལ་ཕྱག་འཚལ། སྐྱེད་རྫོགས་མཐར་ཕྱིན་སྒྲུབ་རྒྱུད་བསྟན་པ་འཛིན། དཔལ་འབྱོར་དབང་ཕྱུག་སྐུ་ལ༴ མཐུ་སྟོབས་ནུས་པའི་དཔུངས་ལ་མངའ་བརྙེས་པ། །ནམ་མཁའ་གུ་རུའི་སྐུ་ལ༴ སྔགས་ཀྱི་རབ་འབྱམས་བསླབ་གསུམ་རྒྱན་གྱིས་མཛེས། །བསོད་ནམས་རྣམ་རྒྱལ་སྐུ་ལ༴ །རྒྱལ་བས་བྱིན་རླབས་ལུང་རིགས་ཀུན་གྱི་བདག །ཨོ་རྒྱན་བསྟན་འཛིན་སྐུ་ལ༴ །ལེགས་ངེས་སྟངས་འཛིན་དངོས་གྲུབ་སྟེར་མཛད་པ། །མཁའ་འགྲོའི་ཚོགས་ལ་ཕྱག་འཚལ་ལོ། །སངས་རྒྱས་བསྟན་བསྲུང་བཀའ་ཡི་བྱ་ར་མཛད། །ཆོས་སྐྱོང་སྲུང་མའི་ཚོགས་ལ་ཕྱག་འཚལ་སྐྱབས་སུ་མཆི། བཛྲ་ས་མ་ཡ་ཛཿ བཛྲ་ས་མ་ཡ་ཧཱུྃ། ཡོ་ག་ས་མ་ཡ་ཛཿ ཡོ་ག་ས་མ་ཡ་ཧཱུྃ། ཀྲོ་དྷ་ས་མ་ཡ་ཛཿཀྲོ་དྷ་ས་མ་ཡ་ཧཱུྃ། ཛཿཧཱུྃ་བྃ་ཧོ། བདག་གཞན་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་སྙིང་པོ་སངས་རྒྱས་མ་ཐོབ་ཀྱི་བར་དུ་
དྲིན་ཅན་རྩ་བ་དང་རྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །སངས་རྒྱས་བཅོམ་ལྡན་འདས་ལ་སྐྱབས་སུ་མཆིའོ། །དམ་པའི་ཆོས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །བླ་མ་ལ་སྐྱབས་སུ་མཆིའོ། །སངས་རྒྱས་ལ༴ ཆོས་ལ༴ དགེ་འདུན་ལ༴ བླ་མ་ལ༴ སངས་རྒྱས་ལ༴ ཆོས་ལ༴ དགེ་འདུན་ལ༴ ཡི་དམ་དཀྱིལ་འཁོར་ལྷ་ཚོགས་རྣམས་ལ༴ མཁའ་འགྲོ་དཔའ་བོ་དཔའ་མོ་རྣམས་ལ༴ དམ་པ་ཡེ་ཤེས་ཀྱི་ཆོས་སྐྱོང་བའི་སྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་ལ་སྐྱབས་སུ་མཆིའོ། །སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ཆེན་པོ་ལ་གནས་པར་གྱུར་ཅིག །ཨོཾ། བདེར་གཤེགས་ཡོངས་
རྫོགས་རྒྱལ་བ་ཞི་ཁྲོའི་ངང་། །ཆོས་སྐུ་སྤྲོས་བྲལ་བདེ་ཆེན་གདོད་ནས་དག །ལོངས་སྤྱོད་རྫོགས་སྐུ་བསམ་འདས་བརྗོད་ལས་འདས། །སྤྲུལ་སྐུ་འགྲོ་དོན་རྫོགས་མཛད་བདག་ལ་དགོངས། །ཀུན་ཏུ་བཟང་པོ་ཆེ་མཆོག་ཧེ་རུ་ཀ །འགྲོ་འདུལ་ཐབས་ཀྱི་གཙོ་བརྒྱད་འཁོར་དང་བཅས། །ཡོན་ཏན་སྐུ་གསུང་ཐུགས་དང་ཕྲིན་ལས་བདག །འདོད་འཇོའི་ཀུན་མཛོད་ཁྱོད་ལ་ཕྱག་འཚལ་ལོ། །ཨོཾ། །དཔལ་ལྡན་ཞི་ཁྲོ་དབང་ཕྱུག་གསང་བའི་བདག །ཕྱི་ནང་གསང་བ་དེ་ཉིད་མཆོད་པའི་སྤྲིན། །སྐུ་གསུང་ཐུགས་མཆོག་ནམ་མཁའི་གཏེར་མཛོད་ཀྱི། །བླ་མེད་མཆོད་སྤྲིན་མཆོག་སྦྱར་མཆོད་པ་བཞེས། ཨོཾ། ཐོག་མེད་དུས་ནས་འཁོར་འདས་བདག་གཞན་དོན། །གཉིས་མེད་བྱང་ཆུབ་སེམས་སུ་གཅིག་ཉིད་ཀྱང་། །ལས་ཀྱིས་འཁྲུལ་པས་ཐ་དད་སོ་སོར་བཟུང་། །གཉིས་འཛིན་ལོག་རྟོག་ཡིད་ཀྱི་ཐེ་ཚོམ་བྱུང་། །མ་རིག་བག་ལ་ཉལ་
བའི་རྣམ་སྨིན་གྱིས། །རྒྱལ་བའི་དགོངས་སྤྱོད་ཟབ་མོའི་གཏིང་མ་རྟོགས། །ཐབས་དང་ཤེས་རབ་ཡ་བྲལ་བླང་དོར་སྤྱད། །ཆེ་མཆོག་གསང་བའི་བཀའ་ལས་འགལ་ཞིང་ཉམས། །འབྲས་བུ་དོན་ཆེན་སྒྲིབ་པའི་རྒྱུར་གྱུར་པ། །མནོང་འགྱོད་ཞི་བའི་སེམས་ཀྱིས་རབ་སྦྱང་ཞིང་། །རྩ་བ་ཡན་ལག་སྐུ་གསུང་ཐུགས་ཀྱི་གསང་། །ཐུན་མོང་མཆོག་དང་བྱེ་བྲག་བསམ་མི་ཁྱབ། །ཇི་ལྟར་གདམས་པ་གཞུང་བཞིན་མ་བགྱིས་པ། །བདེར་གཤེགས་རྒྱལ་བ་ཞི་ཁྲོ་འཁོར་དང་བཅས། །ཐུགས་རྗེའི་མངའ་བདག་ཁྱེད་ལ་བཟོད་གསོལ་བཤགས། ཨོཾ། ཡེ་ཤེས་རྩལ་གྱིས་སངས་རྒྱས་ས་ནོན་ཅིང་། །ཐུགས་རྗེའི་ཤུགས་ཀྱིས་གང་འདུལ་འགྲོ་དོན་མཛད། །དུས་གསུམ་མི་འབྲལ་ཀུན་ཏུ་དགོངས་མཛོད་ལ། །དག་ཚངས་མཆོག་གི་དངོས་གྲུབ་སྩལ་དུ་གསོལ། ཨོཾ། ཞི་ཁྲོ་རྒྱལ་བ་ཡེ་ཤེས་སྐུ། །འགྲོ་ལ་ཕན་མཛད་
ཐུགས་རྗེ་ཅན། །སྲིད་པ་གསུམ་གྱི་གཉེན་གཅིག་བུ། །ལྷ་ཡི་ལྷ་རྣམས་དགོངས་སུ་གསོལ། །བདེ་བར་གཤེགས་པ་ཀུན་འདུས་པ། །སྤྲུལ་པ་རྒྱ་མཚོའི་ཚོགས་དང་བཅས། །ཕྱོགས་དུས་ཀུན་ཏུ་བཞུགས་པ་རྣམས། །མ་ལུས་འདུས་པ་མཁྱེན་པར་གསོལ། །བདག་ནི་རྒྱལ་སྲིད་ལོངས་སྤྱོད་དང་། །རང་དོན་ཆེད་དུ་མི་སྒྲུབ་ཅིང་། །འགྲོ་གཞན་དོན་དུ་འབད་བརྩོན་ནས། །ཀུན་གྱི་དཔལ་དུ་འགྱུར་བར་བྱ། །ཀུན་མཁྱེན་ཡེ་ཤེས་སྤྱན་ལྡན་པས། །བདག་གཞན་ཀུན་གྱི་ལྷག་བསམ་མཁྱེན། །སྤྱན་སྔར་བདག་གིས་དམ་བཅས་པ། །རྣལ་འབྱོར་བསླུ་བར་མི་བགྱིའོ། །ཁེ་དང་གྲགས་པ་འཇིག་རྟེན་ཆོས། །གཡོ་སྒྱུ་ངན་པའི་སེམས་སྤངས་ནས། །ཀུན་ཏུ་བཟང་པོ་བྱང་ཆུབ་སེམས། །དོན་དམ་ཀུན་རྫོབ་ཚུལ་བཟུང་ངོ་། །སེམས་ཅན་ཐམས་ཅད་འདུས་གྱུར་ཏེ། །བདག་ལ་གནོད་པར་རབ་སྦྱར་ཀྱང་། །ཤེས་རབ་སྙིང་རྗེ་དང་བྲལ་བས། །ཡི་དམ་ལྷ་དང་བླ་མ་དང་། །མཆོད་བཟུང་ཐེག་
པ་ཆེར་གནས་པ། །སྲོག་གི་ཕྱིར་ཡང་མི་གཏོང་སྒྲུབས། །སྣང་སྲིད་རྨི་ལམ་སྒྱུ་མ་ལ། །འཆི་བའི་འཇིགས་པ་མ་མཆིས་པས། །སྐྱེ་བོ་གཞན་གྱི་དོན་འགྱུར་ན། །བྱང་ཆུབ་སེམས་ཀྱི་སྤྱོད་པ་ཡིས། །རང་དབང་དུ་ནི་སྐྱེ་བ་བླང་། །བདག་ནི་གཅིག་པུ་ཞི་བདེ་ལ། །མྱུར་འགྲོའི་སྤྲོ་བ་མ་མཆིས་པར། །ཇི་སྲིད་འཁོར་བ་མ་སྟོངས་བར། །བསྐལ་པ་རྒྱ་མཚོར་མི་གཏོང་ཞིང་། །བྱང་ཆུབ་སེམས་ཀྱི་དགའ་བས་ཀྱང་། །ཤེས་རབ་ཐབས་ཀྱིས་དོན་མཛད་ཚེ། །འགྲོ་བ་ལས་ཀྱི་འདུལ་སྐལ་ལ། །སོ་སོའི་བློ་དང་སྐད་བཞིན་དུ། །ཇི་ལྟར་འཚས་པ་དེ་སྟོན་ནོ། །རྣལ་འབྱོར་མཆོག་གི་ལམ་ཞུགས་ཏེ། །སྐྱེས་ཆེན་རིག་པ་འཛིན་པ་དག །ནུས་པ་ཇི་སྙེད་ཤུགས་ཀྱིས་ནི། །བརྩོན་འགྲུས་འདབ་པས་བསྙེན་བཀུར་རོ། །གསང་བའི་ཐེག་པ་བླ་མེད་ལ། །རབ་སྡང་གདུག་པའི་ཚུལ་
འཆང་བ། །ནུས་མཐུ་དྲག་རྩལ་ཅི་ཡོད་ཀྱིས། །མྱུར་དུ་སྒྲོལ་བར་དྲག་བརྩམ་མོ། །ད་ལྟའི་དུས་ཆེན་འདི་ཉིད་ནས། །ཐེག་ཆེན་བླ་མེད་ཐུག་གི་བར། །དཔལ་ཆེན་བདེ་བར་གཤེགས་རྣམས་ཀྱིས། །ཇི་ལྟར་དམ་བཅས་དེ་བཟུང་ངོ་། །དེ་ལྟར་འདི་ཡན་ཆད་རྣམས་ཐུན་མོང་གི་སྔོན་འགྲོ་ཡིན་ལ། དེ་ནས་ལས་གཞུང་ཉིད་ལ་ཐུན་མོང་མ་ཡིན་པའི་སྔོན་འགྲོ་དང་། དངོས་གཞི། རྗེས་དང་གསུམ་གྱི་ས་བཅད་རྩ་ཐོ་གུ་རུ་རིན་པོ་ཆེ་པདྨ་འབྱུང་གནས་ཉིད་ཀྱིས་མཛད་པ་ལས།། ༈ །།ཞི་ཁྲོ་གསང་བ་ཡོངས་རྫོགས་ཀྱི། །སྒྲུབ་ཆེན་ལས་གཞུང་བསྲང་བ་ལ། །སྔོན་འགྲོ་དངོས་གཞི་རྗེས་དང་གསུམ། སྔོན་འགྲོ་ཐུན་མོང་ལས་བདུན་ནི། མཚམས་བཅད། བརྡ་སྒོ། བརྡ་ཕྱག་འཚལ། དམ་བཅའ། བྱིན་དབབ། མཆོད། བཤགས་བྱ། ཞེས་གསུངས་པའི་དང་པོར་མཚམས་གཅོད་ཀྱི་སྔོན་དུ་བདག་ཉིད་ལྷའི་ཏིང་འཛིན་བསྒོམ་ནས་བར་གཅོད་ཀྱི་བགེགས་བསྐྲད་པ་འདི་བཞིན་ཚིག་དོན་མཐུན་པར་བྱ་སྟེ། ཨོཾ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧྃ། སྣང་སྲིད་འཁོར་འདས་ཀྱིས་
བསྡུས་པའི་ཆོས་ཐམས་ཅད་མི་དམིགས་པར་སྟོང་པ་ཉིད་དུ་གྱུར། སྟོང་པའི་ངང་ལས་སྐད་ཅིག་གིས་རྃ་ལས་བསྐལ་པའི་མེ་རབ་ཏུ་འབར་བའི་ཀློང་ན། བདག་ཉིད་སྐད་ཅིག་གིས་ཆེ་མཆོག་ཧེ་རུ་ཀ་དབུ་གསུམ་པ་ཕྱག་དྲུག་པ། ཞབས་བཞི་པ་སྐུ་མདོག་མཐིང་ནག་རབ་ཏུ་འབར་བ། གཡས་ཞལ་དཀར་ལ་འཚེར་བ། གཡོན་ཞལ་དམར་ལ་གཤེ་བ། དབུས་ཞལ་མཐིང་ལ་རྔམས་པ། །སྤྱན་གཡས་གསུམ་གྱེན་དུ་གཟིགས་པ། །གཡོན་གསུམ་ཐུར་དུ་གཟིགས་པ། །དབུས་གསུམ་ཐད་ཀར་གདངས་མིག་ཏུ་བགྲད་པ། ཞལ་བགྲད་པ་ལྗགས་འདྲིལ་བ་མཆེ་བ་གཙིགས་པ། སྨིན་མ་ཨག་ཚོམ་རལ་པ་ཁམ་ནག་མུན་ལྟར་གཏིབས་པ། སྙན་དྲུག་གསངས་ལ་མ་འགགས་པར་གསལ་བ། ཞལ་གསུམ་ནས་ཕཊ་སྒྲ་སྒྲོག་པ། ཤངས་གསུམ་ནས་ཧཱུྃ་སྒྲ་འབྱིན་པ། ཨུཏྤལ་ཉི་མ་ཟླ་བས་སྙན་གོང་
བརྒྱན་པ། །ཀླུ་རིགས་ལྔ་སྦྲུལ་གྱི་རྣམ་པས་བརྒྱན་པ། ཕྱག་གཡས་ཀྱི་དང་པོ་ན་རྡོ་རྗེ་རྩེ་དགུ་པ། བར་པ་ན་རྩེ་ལྔ་པ། མཐའ་མ་ན་རྩེ་གསུམ་པ་བསྣམས་པ། གཡོན་གྱི་དང་པོ་ན་བནྡྷ་ལྕང་ལོ་ཅན་ཁྲག་གིས་བཀང་བ། བར་པ་ན་ཐོད་རློན་ཁྲག་གིས་བཀང་བ། མཐའ་མ་ན་ཐོད་སྐམ་ཁྲག་གིས་གང་བ་བསྣམས་པ། གཡས་དང་པོའི་རྡོ་རྗེ་གཡོན་དང་པོའི་བན་དམར་དཀྲུག་པའི་ཚུལ་གྱིས་ཡུམ་ལ་འཁྱུད་པ། ཞབས་བཞི་བརྐྱང་བསྐུམ་དོར་སྟབས་སུ་བགྲད་པ། གསང་བཀབ་དར་སྣ་ལྔ་དང་སྟ་ཟུར་དར་དཔྱངས་གསུམ་གྱིས་བརྒྱན་པ། སྐུ་སྟོད་ལ་གླང་ཆེན་གྱི་ཀོ་རློན་དང་མི་ལྤགས་ཀྱི་གཡང་གཞི་གསོལ་བ། སྐུ་སྨད་ལ་སྟག་ལྤགས་ཀྱི་ཤམ་ཐབས་དཀྲིས་པ། ཐོད་པ་སྐམ་པོ་ལྔ་ཡིས་དབུ་ལ་བརྒྱན་ཅིང་ཐོད་རློན་ལྔ་བཅུས་དོ་ཤལ་བྱས་པ། ཐལ་ཆེན་ཞག་ཆེན་དམར་ཆེན་གསུམ་གྱིས་ཞལ་གྱི་འབུར་བཞི་དང་སྐུ་སུལ་ཐམས་ཅད་བརྒྱན་པ་
རྡོ་རྗེའི་གཤོག་པ་གཡས་སུ་གདེངས་པ། རིན་པོ་ཆེའི་གཤོག་པ་གཡོན་དུ་གདེངས་པ། དཔུངས་པ་གཡས་གཡོན་གཉིས་ན་ཡེ་ཤེས་ཀྱི་ཁྱུང་དཀར་ནག་རེ་རེ་ལྡིང་བ། དབུ་སྐྲ་དང་བ་སྤུ་ཐམས་ཅད་ཁྲོ་ཆུང་དང་མཚོན་ཆའི་རྣམ་པར་འཕྲོ་བ་རྡོ་རྗེའི་སླག་པ། དབང་གི་བསེ་ཁྲབ། དཔལ་གྱི་ཆས་བཅུ། དུར་ཁྲོད་ཀྱི་ཆས་བརྒྱད། གར་གྱི་ཉམས་དགུ། རུས་པའི་རྒྱན་དྲུག །ཧེ་རུ་ཀའི་རྔམས་བརྗིད་དང་ལྡན་པ། །དེའི་པང་དུ་ཡུམ་གནམ་ཞལ་ཀུན་ཏུ་བཟང་མོ་སྐུ་མདོག་མཐིང་ནག །ཞལ་གཅིག་ཕྱག་གཉིས། ཕྱག་གཡས་ཁ་ཊྃྭཱ་ག་ཡབ་ལ་འཁྱུད་ཅིང་གཡོན་པ་དུང་དམར་གཙོ་ལ་སྟོབ་པ། ཞབས་གཡས་ཕབ་ཀྱི་སྐེད་ལ་འཁྲིལ་ཞིང་གཡོན་བརྐྱང་བ་གཟིག་གི་པགས་པའི་ཤམ་ཐབས་དང་དུར་ཁྲོད་རུས་པའི་དྲ་བས་བརྒྱན་པ། ཡབ་ཡུམ་གཉིས་སུ་མེད་པར་བསྐལ་པའི་མེ་རབ་ཏུ་འབར་བའི་ཀློང་
ན་བཞུགས་པའི་ཐུགས་ཀའི་ཧཱུྃ་ལས། ཤར་དུ་ཐུགས་ལས་སྤྲུལ་ཏེ་བཛྲ་ཧེ་རུ་ཀ་འཕྲོས། །ལྷོར་སྐུ་ལས་སྤྲུལ་ཏེ་གཤིན་རྗེའི་གཤེད་པོ། ནུབ་ཏུ་གསུང་ལས་སྤྲུལ་ཏེ་རྟ་མགྲིན་དབང་ཆེན། བྱང་དུ་ཕྲིན་ལས་ལས་སྤྲུལ་ཏེ་རྡོ་རྗེ་གཞོན་ནུ། ཤར་ལྷོར་གཟི་བརྗིད་ལས་སྤྲུལ་ཏེ་བླ་མེད་ཧེ་རུ་ཀ །ལྷོ་ནུབ་ཏུ་རིགས་ལས་སྤྲུལ་ཏེ་རིག་འཛིན་ཐོད་པ་རྩལ། ནུབ་བྱང་དུ་འཇིགས་བྱེད་ལས་སྤྲུལ་ཏེ་དྲེགས་པ་ཀུན་འདུལ། བྱང་ཤར་དུ་སྟོབས་ལས་སྤྲུལ་ཏེ་སྟོབས་ལྡན་ནག་པོ་འཕྲོས། དེའི་སྟེང་གི་ཕྱོགས་སུ་ཁྲོ་བོ་ཆེན་པོ་ཧཱུྃ་ཀ་ར་ཤར་དུ་རྣམ་པར་རྒྱལ་བ། ལྷོར་གཤིན་རྗེ་གཤེད་པོ། ནུབ་ཏུ་རྟ་མགྲིན་རྒྱལ་པོ། བྱང་དུ་བདུད་རྩི་འཁྱིལ་པ། ཤར་ལྷོར་དབྱུག་པ་སྔོན་པོ། ལྷོ་ནུབ་ཏུ་མི་གཡོ་མགོན་པོ། ནུབ་བྱང་དུ་འདོད་པའི་རྒྱལ་པོ། བྱང་ཤར་དུ་ཁམས་གསུམ་རྣམ་རྒྱལ། འོག་ཏུ་སྟོབས་
པོ་ཆེ། དེ་ཐམས་ཅད་ཀྱི་སྤྲུལ་པ་ཡང་སྤྲུལ་ཉིང་སྤྲུལ་གསུམ་སྤྲུལ་བསམ་གྱིས་མི་ཁྱབ་པའི་ཕྱག་ན་མཚོན་ཆ་སྣ་ཚོགས་ཀྱི་ཆར་འབེབས་ཤིང་ཞལ་ནས་ཧཱུྃ་སྒྲ་འབྱིན་པ་རོལ་པ་ཁྲོ་བོ་ཆེན་པོའི་དཀྱིལ་འཁོར་དུ་གྱུར། ལྷ་ཚོགས་དེ་དག་ཐམས་ཅད་ཀྱི་སྤྱི་བོར་ཨཱོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ་ལས་འོད་ཟེར་འཕྲོས་པས་འོག་མིན་ནས་ཡེ་ཤེས་པ་སྤྱན་དྲངས། གཉིས་སུ་མེད་པར་གྱུར། ཨོཾ་བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊཿ ན་མོ། །སངས་རྒྱས་ཀྱི་བདེན་པ་དང་། ཆོས་ཀྱི་བདེན་པ་དང་། དགེ་འདུན་གྱི། གསང་སྔགས་དང་རིགས་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་དང་ཏིང་ངེ་འཛིན་གྱི་བདེན་པ་དང་། བདེན་པ་ཆེན་པོ་དེ་རྣམས་ཀྱི་མཐུ་དང་ནུས་པ་བྱིན་རླབས་ལ་བརྟེན་ནས། གནོད་བྱེད་ལོག་འདྲེན་བར་ཆད་འབྱུང་པོ། མི་མིན་མི་རུ་བརྫུ་བ། ལྷ་མིན་ལྷ་རུ་བརྫུ་བ་
གང་དག་ཚེ་དང་སྲོག་ལ་བར་དུ་གཅོད་པ། དཀྱིལ་འཁོར་གྱི་མདངས་འཕྲོག་པ། བདུད་རྩིའི་བཅུད་འཕྲོག་པ། གཏོར་མའི་རོ་འཕྲོག་པ། རཀྟའི་ཞག་འཕྲོ་པ། བདུག་སྤོས་ཀྱི་དྲི་འཕྲོག་པ། མེ་ཏོག་གི་མདངས་འཕྲོག་པ། མར་མེའི་འོད་འཕྲོག་པ། དྲི་ཆབ་ཀྱི་བསུང་འཕྲོག་པ། ཞལ་ཟས་ཀྱི་གཟུགས་འཕྲོག་པ། རོལ་མོའི་སྒྲ་གཅོག་པ། རྣལ་འབྱོར་པའི་དྲོད་ལ་མྱུལ་ཞིང་སྒྲུབ་པ་པོ་ལ་བར་དུ་གཅོད་པ་ཐམས་ཅད་གནས་འདིར་མ་འདུག་པར་གཞན་ལ་ཕར་བྱེར་ཞིག །དེང་ཞིག །སོང་ཞིག །སརྦ་བྷཱུ་ཏ་ཨུཙྪ་ཊ་ཡ་ཕཊཿ ཞེས། རོལ་མོའི་སྒྲ་དྲག་པོ་དང་ཏིང་འཛིན་གསལ་བས་བགེགས་བསྐྲད་དོ། །སླར་ཡང་ལས་གཞུང་ཉིད་ཀྱི་མཚམས་གཅོད་ལ་རིམ་པ་གསུམ་ཡོད་པའི་དང་པོ་རང་བཞིན་ལྟ་བའི་གདེངས་ཀྱིས་བགེགས་སྐྲོད་པ་ནི། བདག་ཉིད་དཔལ་ཆེན་པོའི་སྐུ་གསུམ་ཐུགས་རྡོ་རྗེ་གསུམ་གྱི་ངོ་བོར་གསལ་བའི་ངང་ནས། ཧཱུྃ། རྒྱལ་བ་ཞི་ཁྲོ་ཡོངས་རྫོགས་དཀྱིལ་འཁོར་དུ། །སྣང་སྲིད་རྣམདག་ཡེ་ཤེས་ལྷ་ཡི་ཚོགས། །ཀུན་བཟང་ཆོས་
ཀྱི་དབྱིངས་ལས་མ་གཡོས་ཀྱང་། །རིག་རྩལ་རྣམ་དག་ཐབས་ཤེས་གཡུ་དྲུང་ལྷ། །འདི་ལ་ལོག་པར་ལྟ་བའི་དགྲ་དང་བགེགས། །བདུད་སྡེ་དཔུངས་བཅས་ཐམས་ཅད་ཕྱིར་དེངས་ཤིག །ཨོཾ་སུམྦྷ་ནི་སུམྦྷ་ཧཱུྃ། གྲྀཧྣ་གྲྀཧྣ་ཧཱུྃ། གྲྀཧྣ་པཱ་ཡ་གྲྀཧྣ་པཱ་ཡ་ཧཱུྃ། ཨཱ་ན་ཡ་ཧོ། བྷ་ག་ཝཱ་ན། བཛྲ་བི་དྱཱ་རཱ་ཛཱ་ཡ་ཧཱུྃ་ཕཊཿ གཉིས་པ་དྲག་པོ་མཚོན་ཆའི་མཚམས་ཀྱི་བསྲུང་བ་ནི། བདག་ཉིད་དཔལ་ཀྱི་ཐུགས་ཀའི་ཧཱུྃ་ལས་འོད་ཟེར་གྱི་མཚོན་ཆ་སྣ་ཚོགས་བུ་ཡུག་འཚུབ་པ་བཞིན་འཕྲོས་པས་གུར་ཁང་དུ་གྱུར་པར་དམིགས་ལ། ཧཱུྃ། བདག་ཉིད་དཔལ་ཆེན་ཁྲག་འཐུང་ཐུགས་ཀ་ནས། །དྲག་པོའི་བྱིན་རླབས་མཚོན་ཆའི་འོད་ཟེར་འཕྲོ། །མཚོན་ཆའི་གུར་ཆེན་ཡེ་ཤེས་མེ་དཔུང་འབར། །ཕྱོགས་མཚམས་སྟེང་འོག་ཀུན་ཏུ་ཁྱབ་པར་བསྲུང་། ཨོཾ་བཛྲ་ཙཀྲ་ཏཱིཀྵཱ་ཀརྨ་ཀཱི་ལ་ཡཿ ཛྭ་ལ་རཾ་ཧཱུྃ་ཕཊཿ གསུམ་པ་ཁྲོ་བོ་རོལ་པའི་
མཚམས་ཀྱིས་ཚར་བཅད་པ་ནི། སླར་ཡང་བདག་གི་ཐུགས་ཀའི་ཧཱུྃ་ལས་སྤྲུལ་པའི་ཁྲོ་ཚོགས་མཐིང་ནག་རབ་འཇིགས་གྲངས་མེད་འཕྲོས་པས། ཕྱོགས་བཅུའི་བགེགས་རིགས་ཐམས་ཅད་བསྒྲལ་ཏེ་རྣམ་ཤེས་ཆོས་དབྱིངས་སུ་སྤར་ཞིང་གཟུགས་ཕུང་གདན་དུ་བཏིང་བའི་ཁར་བཞུགས་ནས་བར་ཆད་བསྲུང་བར་བསམ་ལ། ཧཱུྃ། དྲེགས་པ་ལྷ་ཆེན་ཕྱོགས་སྐྱོང་བསྣོལ་བའི་སྟོང་། །ཆེ་མཆོག་ལ་སོགས་དཔལ་ཆེན་ཁྲོ་རྒྱལ་ཚོགས། །གར་དགུའི་ཚུལ་གྱིས་ཧཱུྃ་སྒྲ་སྒྲོག་ཅིང་བཞུགས། །བར་ཆད་འབྱུང་པོ་ཐམས་ཅད་རྡུལ་དུ་རློག །ཨོཾ་བཛྲ་ཀྲོ་དྷ་སྭ་བྷཱ་ཝ་ས་མ་ཡ་རུ་ལུ་རུ་ལུ་ཧཱུྃ་ཕཊཿ ཧཱུྃ་ཧཱུྃ་ཧཱུྃ། བི་ཤྭ་བཛྲ་ཙཀྐྲ་ཛྭ་ལ་མཎྜ་ལ་ཧ་ལ་ཧ་ལ་ཧཱུྃ་ཕཊཿ ཧཱུྃ། ཕྱོགས་མཚམས་ཀུན་ཏུ་རྡོ་རྗེའི་མེ། །རྣམ་པར་འཕྲོ་བ་རབ་བསམ་སྟེ། །མ་རུངས་པ་དག་ཚིག་བྱས་ནས། །ཕྱོགས་བཅུ་རབ་ཏུ་འཕྲོ་བར་གྱུར། །ཕྱོགས་མཚམས་ཕུར་བུས་གདབ་ནས་ཀྱང་། སྟེང་འོག་ཡན་ལག་བྱིན་རླབས། བཛྲ་བཛྲ་བཛྲ་རྃ་ཡྃ་ཝྃ།
སྔོན་འགྲོའི་ལས་རིམ་གཉིས་པ་བརྡ་སྒོ་དབྱེ་བ་ནི། སྣོད་དང་བཅུད་གཞལ་ཡས་ཁང་དང་ལྷའི་རང་བཞིན་ཡེ་ནས་ཡིན་པའི་ཡིན་ཚུལ་དྲན་པར་བྱས་ཏེ། ཧཱུྃ། སྣང་སྲིད་ཐམས་ཅད་བདེ་ཆེན་གཞལ་ཡས་ཁང་། །གཟུགས་སྣང་ཐམས་ཅད་རང་རིག་ཡེ་ཤེས་ལྷ། །དེ་ཉིད་མ་རྟོགས་མ་རིག་སྒོ་བཅད་པས། །རང་གསལ་ཡེ་ཤེས་འཆར་སྒོ་ད་ཕྱེས་ཅིག །བྷྲུྃ་པྲ་བེ་ཤ་ཡ་ཕཊཿ གསུམ་པ་བརྡ་ཕྱག་འཚལ་བ་ནི། སྣོད་བཅུད་ལྷའི་དཀྱིལ་འཁོར་དེ་ཐམས་ཅད་ཀྱང་རང་སེམས་ལས་གཞན་དུ་མ་མཆིས་པར་རང་ངོ་ཤེས་པའི་ཕྱག་འཚལ་བ་ནི། ཧཱུྃ། རང་བྱུང་ཡེ་ཤེས་སྙིང་པོ་སེམས་ཀྱི་ལྷ། །མ་རྟོགས་རང་ངོ་རང་གིས་མ་ཤེས་པས། །ཡེ་ནས་རང་དང་འགྲོགས་ཀྱང་ཞལ་མ་མཇལ། །རང་གསལ་བརྡ་ཡི་དོན་དང་མཇལ་ཕྱག་འཚལ། ཧཱུྃ་ཧེ་རུ་ཀ །ཨ་ཏི་པུ་ཧེ། པྲ་ཏྲཱིཙྪ་ཧོ། བཞི་པ་ལྷ་དང་མི་འབྲལ་བར་དམ་བཅའ་བ་ནི། ལྷ་དང་རང་སེམས་དབྱེར་མེད་ཡིན་པར་སྔན་ཆད་མ་རིག་པ་དེ་ད་ལྟ་རྟོགས་པ་འདི་ལས་མི་འདའ་ཞིང་མི་གཏོང་བར་ཞེ་དམ་བཅས་ཞིང་། ཧཱུྃ། དུས་གསུམ་
བདེར་གཤེགས་རྒྱལ་བ་ཞི་ཁྲོའི་ཚོགས། །བསྐལ་པ་སྔོན་འདས་དུས་ནས་ཡི་དམ་ལྷ། །ད་ལྟ་གཉིས་མེད་དོན་དམ་རང་ངོ་ཤེས། །སྲོག་གི་ཕྱིར་ཡང་མི་བཏང་བསྒྲུབ་ལགས་སོ། །ཧཱུྃ་བཛྲ་ཙིཏྟ་ས་མ་ཡ་ཧཱུྃ། བཛྲ་ས་མ་ཡ་ཛཿ ས་མ་ཡ་ཧཱུྃ། ལྔ་པ་བྱིན་དབབ་པ་ནི། བདག་གི་ཐུགས་སྲོག་ཧཱུྃ་ལས་དད་པའི་འོད་ཟེར་ལྕགས་ཀྱུ་ལྟ་བུ་གྲངས་མེད་པ་འཕྲོས་པས། ཕྱོགས་བཅུའི་རྒྱལ་བ་ཐམས་ཅད་ཀྱི་ཐུགས་དམ་རྒྱུད་བསྐུལ་ཏེ་སངས་རྒྱས་མ་ལུས་རྒྱལ་བ་ཞི་ཁྲོ་ཡོངས་རྫོགས་ཀྱི་ལྷའི་རྣམ་པར་བྱོན་ནས་བདག་ལ་དབང་བསྐུར། གནས་ཁང་ཡོ་བྱད་དཀྱིལ་འཁོར་མཆོད་རྫས་ཐམས་ཅད་ལ་བྱིན་གྱིས་བརླབས་པར་མཛད་ཅིང་བདག་དང་སྣོད་བཅུད་ཐམས་ཅད་ཡེ་ཤེས་ཆེན་པོའི་རང་བཞིན་དུ་གྱུར་པར་མོས་ལ། ཧཱུྃ། ཆོས་དབྱིངས་ཡེ་ཤེས་ལྔ་ཡི་ཕོ་བྲང་ནས། །ཆོས་སྐུ་སྐྱེ་མེད་དབྱིངས་ལས་མ་གཡོས་ཀྱང་། །ལོངས་སྐུ་རིགས་ལྔ་ཞི་ཁྲོ་འཁོར་དང་བཅས། །སྤྲུལ་སྐུ་ཡི་དམ་དཀྱིལ་འཁོར་ལྷ་ཚོགས་རྣམས། །ཐུགས་དམ་དབང་གིས་གནས་འདིར་གཤེགས་སུ་གསོལ། །སྐུ་གསུང་ཐུགས་ཀྱི་བྱིན་
གྱིས་བརླབ་ཏུ་གསོལ། །ཡེ་ཤེས་ལྔ་ཡི་དབང་མཆོག་བསྐུར་དུ་གསོལ། །གསང་བའི་དཀྱིལ་འཁོར་འདི་ལ་བྱིན་ཅིག་ཕབ། །ཁྱེད་ཀྱི་ཐུགས་རྗེས་མཆོག་གིས་བཟུང་དུ་གསོལ། ཨོཾ་ཤྲཱི་བཛྲ་ཀྲོ་དྷ་ཧེ་ཝ་དེ་ཝ་སརྦ་དུཥྚན་ཌཱ་ཀི་ནཱི་ས་མ་ཡ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཨཱ་ཝེ་ཤ་ཡ་ཨ་ཨཱཿ། དྲུག་པ་མཆོད་པ་འབུལ་བ་ནི། མཆོད་པ་བྱིན་རླབས་རྒྱས་པར་སྤྲོ་ན་སངས་རྒྱས་དྭགས་སྟོན་པས་མཛད་པའི་སྐབས་འདིར་གུ་རུ་རིན་པོ་ཆེའི་ཚིག་བདུན་གསོལ་འདེབས་ཀྱིས་བྱིན་འབེབས་བྱ་བ་ཡང་། ཆོས་དབང་རིན་པོ་ཆེའི་ཕྱག་བཞེས་སོ། །ལྷན་ཐབས་སོགས་གཞན་ནས་འབྱུང་བ་བཞིན་དང་། བསྡུས་པ་ནི་གོང་གི་བྱིན་འབེབས་དེས་སྣོད་བཅུད་མ་ལུས་བྱིན་གྱིས་བརླབས་པ་ཡིན་ཕྱིར་དེས་ཆོག་ཅིང་། འབུལ་ཚིག་ནི། མཆོད་བྱ་མཆོད་བྱེད་གཉིས་མེད་དུ་ཤེས་པའི་ངང་ནས། ཧཱུྃ། རང་དང་གཉིས་མེད་ལྷ་ཚོགས་ལ། །མར་མེ་སྨན་གཏོར་རཀྟ་དང་། །ཕྱི་ནང་གསང་བའི་མཆོད་སྤྲིན་གཏིབས། །ཐུགས་དམ་བསྐང་ཕྱིར་འབུལ་གྱི་བཞེས། ཨོཾ་ཨཱཿཧཱུྃ། བཛྲ་པུཥྤེ་ཧཱུྃ། བཛྲ་དྷུ་པེ་ཧཱུྃ།
བཛྲ་ཨཱ་ལོ་ཀེ་ཧཱུྃ། བཛྲ་གནྡྷེ་ཧཱུྃ། བཛྲ་ནཻ་ཝི་དྱཱ་ཧཱུྃ། བཛྲ་ཤབྟ་ཧཱུྃ། བཛྲ་སརྦ་པཱུ་ཛ་མེ་གྷ་ཧཱུྃ། དེས་ནི་ཕྱི་མཆོད་རྣམས་བྱིན་གྱིས་བརླབས་ཅིང་ཕུལ་ནས། ནང་མཆོད་སྨན་གཏོར་རཀྟ་བྱིན་བརླབས་པ་ཡང་། རྒྱས་པར་སྤྲོ་ན་གཞན་ནས་བྱུང་བ་ལྟར་དང་། བསྡུ་ན་གཏེར་གཞུང་ཉིད་ཀྱི་སྔགས་ཀྱིས་བྱིན་རླབས་འདི་ནས་འགྲུབ་སྟེ། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཐཱ། ཞེས་ལན་བདུན་ནམ་གསུམ་གྱིས་རྩ་བརྒྱད་ཡན་ལག་སྟོང་སྦྱར་གྱི་བདུད་རྩིའི་རྒྱ་མཚོར་གྱུར་པར་མོས། ཨོཾ་ཨཱཿཧཱུྃ་མ་ཧཱ་བ་ལིནྟ་ཏེ་ཇོ་བ་ལིནྟ་བ་ལ་བྷ་ཏེ་གུ་ཧྱ་ས་མ་ཡེ་སྭཱ་ཧཱ། ཞེས་བཟླས་པས་དམ་རྫས་གཏོར་མ་འདོད་ཡོན་ཕུན་ཚོགས་ནམ་མཁའ་དང་མཉམ་པར་བསམ། ཨོཾ་ཨཱཿཧཱུྃ་མ་ཧཱ་རཀྟ་ཛྭ་ལ་མཎྜ་ལ་ཧཱུྃ་ཕཊཿ ཞེས་བཟླས་པ་ཙམ་གྱིས་རཀྟའི་རྒྱ་མཚོ་སྟོང་གསུམ་གང་བར་གྱུར་པར་བསམ་མོ། །གསུམ་པ་ཕྱི་ནང་གསང་བའི་མཆོད་པ་ཐམས་ཅད་བྱིན་གྱིས་བརླབས་པ་ནི། ཨོཾ་སརྦ་ཏ་ཐཱ་ག་ཏ་པཱུ་ཛ། མ་ཧཱ་པཉྩ། མ་ཧཱ་བ་ལིནྟ། མ་ཧཱ་རཀྟ།
ཨ་ཧོ་སུ་ཁ་ས་མ་ཡེ་སྭཱ་ཧཱ། ཞེས་བརྗོད་པས་མཆོད་པའི་རྫས་དང་དངོས་པོར་གྱུར་ཚད་ཐམས་ཅད་རྒྱ་ནམ་མཁའི་ཁམས་དང་མཉམ་ཞིང་རྒྱུན་འཁོར་བ་མ་སྟོངས་ཀྱི་བར་དུ་ཟད་པ་མེད་ཅིང་ཡོངས་སུ་འཕེལ་བས། མཆོད་ཡུལ་ཐམས་ཅད་ཀྱི་ཐུགས་རྒྱུད་ལ་ཟག་མེད་ཀྱི་བདེ་བ་ཁྱད་པར་ཅན་བསྐྱེད་ནུས་པར་བསམ་མོ།། ༈ །།བདུན་པ་བཤགས་པ་བྱ་བ་ནི། རང་གི་ཐུགས་ལས་སྤྲུལ་པའི་རྩ་གསུམ་ཞི་ཁྲོའི་ལྷ་ཚོགས་མདུན་གྱི་ནམ་མཁའ་གང་བར་བཞུགས་པར་མོས་ལ། ཧཱུྃ། བླ་མ་ཡི་དམ་མཁའ་འགྲོ་ཐམས་ཅད་དགོངས། །བསྐལ་པ་སྔོན་ནས་ད་ལྟའི་དུས་ཡན་ཆད། །རྩ་བ་ཡན་ལག་དམ་ཚིག་ཉམ་ཆགས་སོགས། །རང་གནོང་འགྱོད་སེམས་དྲག་པོས་མཐོལ་ཞིང་བཤགས། ཨོཾ་ཨཱཿཧཱུྃ་སྭཱ་ཧཱ། བཛྲ་ས་མ་ཡ་ཛཿ ན་ར་ཀ །པྲེ་ཏ་ཀ །ཏིཏྱ་ཀ །ནི་བེ་ཤ །དེ་ཝ་ཨ་ལི་བི་ཤུདྡྷེ། དཀྵ་ཀ་ཤུདྡྷེ་ཤུདྡྷེ་སྭཱ་ཧཱ། ཞེས་བཤགས་པས་སྡིག་སྒྲིབ་ཉམ་ཆགས་ཐམས་ཅད་གཞི་མེད་དུ་བྱང་ཞིང་དག་ནས། མདུན་གྱི་བཤགས་ཡུལ་ཐམས་ཅད་ཀྱང་རང་ཉིད་ལ་
ཐིམ་མ་ཐག །རང་ཉིད་ལྷ་ཚོགས་སུ་སྣང་བ་ཐམས་ཅད་ཀྱང་རེ་ཤིག་ལ་སྤྲིན་ནམ་མཁའ་ལ་ཡལ་བ་བཞིན་ཆོས་དབྱིངས་སྟོང་པ་ཆེན་པོར་ཡལ་བར་བསམ་མོ། །དེ་ལྟར་འདི་ཡན་ཆད་ཀྱིས་སྔོན་འགྲོའི་ལས་རིམ་བདུན་པོ་གྲུབ་པའོ།། ༈ །།དེ་ནས་དངོས་གཞིའི་ལས་རིམ་ཉེར་ལྔ་ནི། རྩ་ཐོ་ལས། ཏིང་འཛིན་རྣམ་གསུམ་འབྱུང་རིམ་བརྩེགས། །གཞལ་ཡས་ལྷ་བསྐྱེད་བྱིན་རླབས་བསྐུར། །རང་བཞིན་སྤྱན་དྲངས་བརྟན་པར་བཞུགས། །ཕྱག་དང་ཕྱག་རྒྱ་གླུས་མཆོད་ཅིང་། །ཕྱི་དང་ནང་དང་གསང་མཆོད་འབུལ། །དུག་གསུམ་སྨན་གཏོར་རཀྟ་དང་། །བདུད་རྩི་བསང་ནན་སྦྱོར་སྒྲོལ་མཆོད། །བསྟོད་བཤགས་འཛབ་བཟླས་དངོས་གྲུབ་བླང་། ཞེས་གསུངས་པའི་དངོས་པོར་ཏིང་འཛིན་རྣམ་པ་གསུམ་གྱི་ཐོག་མར་དེ་བཞིན་ཉིད་ཀྱི་ཏིང་འཛིན་ནི། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རང་སེམས་གདོད་མའི་གནས་ལུགས་ཉིད་ལས་མ་གཡོས་པའི་དོན་ལ་མཉམ་པར་བཞག་ཏེ། ཧཱུྃ། སྤྲོས་མེད་ཡང་དག་དེ་བཞིན་ཉིད། །མཉམ་ཡངས་ཕྱོགས་བྲལ་ཀུན་ཏུ་གདལ། །མ་ནོར་མ་བཅོས་ཆོས་ཀྱི་སྐུ།
རང་བཞིན་ལྷུན་གྲུབ་ངང་གི་གསལ། ཨོཾ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭཱ་བྷཱ་ཝ་ཨཏྨ་ཀོ྅ཧཾ། གཉིས་པ་ཀུན་ཏུ་སྣང་བའི་ཏིང་འཛིན་ནི། དེ་ལྟ་བུའི་རང་སེམས་ཆོས་སྐུའི་རང་ཞལ་མ་མཐོང་བའི་སེམས་ཅན་བདག་མེད་ལ་བདག་ཏུ་འཛིན་ཞིང་དངོས་མེད་ལ་དངོས་པར་བཟུང་བས་འཁོར་བ་མཐའ་མེད་དུ་འཁྱམས་པ་རྣམས་ལ་སྟོང་ཉིད་ཀྱི་རྩལ་མདངས་སྙིང་རྗེ་ཕྱོགས་མེད་དུ་བསྒོམ་ཞིང་། ཧཱུྃ། དེ་བཞིན་ཀུན་ཁྱབ་ཀུན་ཏུ་སྣང་། །མ་རིག་འཁྲུལ་སྣང་འཁོར་བའི་ཀློང་། །གཟུང་འཛིན་བག་ཆགས་རབ་ཏུ་འཐས། །མ་རྟོགས་སེམས་ཅན་སྙིང་རེ་རྗེ། ཨོཾ་དྷརྨ་དྷཱ་ཏུ་སྱ་བྷཱ་ཝ་བི་ཤུདྡྷེ་མཎྜ་ལ་ཧཱུྃ། གསུམ་པ་རྒྱུའི་ཏིང་ངེ་འཛིན་ནི། རང་སེམས་སྟོང་ཉིད་སྙིང་རྗེ་ཟུང་འཇུག་གི་ངོ་བོ་དེ་ཉིད་སེམས་ཅན་གྱི་དོན་རྒྱ་ཆེར་བྱ་བའི་ཕྱིར། སྤྲུལ་པ་ཐམས་ཅད་སྤྲོ་བའི་གཞིའམ་རྒྱུ་རང་རིག་ཡི་གེ་ཧཱུྃ་མཐིང་ནག་འོད་འབར་བ་གཅིག་ཏུ་གྱུར་པ་ཆོས་དབྱིངས་ནམ་མཁའི་ཐོངས་སུ་ཟླ་བ་ལྟར་ལྡིང་བར་དམིགས་ལ། ཧཱུྃ། ཆོས་རྣམས་རང་བྱུང་རྟེན་འབྲེལ་ཏེ། །རྒྱུ་ལས་མ་བྱུང་གང་ཡང་
མེད། ཧཱུྃ་ནི་ཐམས་ཅད་སྐྱེད་པའི་རྒྱུ། །དགོས་འདོད་འབྱུང་བའི་ཡི་གེ་བསྒོམ། ཙིཏྟ་བཛྲ་ས་མཱ་དྷི་ཧཱུྃ། བཞི་པ་འབྱུང་བ་རིམ་རྩེགས་ནི། རང་རིག་རྒྱུའི་ཡི་གེ་ཧཱུྃ་དེ་ལས་རྃ་ཡྃ་ཁྃ་གསུམ་འཕྲོས་པ་ལས། མེ་རླུང་ཆུ་གསུམ་གྱི་སྐལ་པ་བྱུང་སྟེ་མ་དག་འཇིག་རྟེན་གྱི་སྣོད་བཅུད་ཐམས་ཅད་བསྲེག་གཏོར་བཀྲུས་ནས་ནམ་མཁའ་སྟོང་པ་མཐའ་དབུས་བྲལ་བར་གྱུར་པ་ལ། སླར་ཡང་རྒྱུའི་ཡི་གེ་ཧཱུྃ་ལས་ཡུམ་ལྔའི་རང་བཞིན་འབྱུང་བ་རྣམས་ཀྱི་ས་བོན་ཡི་གེ་རྣམས་འཕྲོ་བར་བསམ་སྟེ། རྃ་ཡྃ་ཁྃ། ཧཱུྃ། བསྐལ་པ་གསུམ་གྱིས་འཇིག་རྟེན་སྟོངས། །ཡི་ནས་དག་པའི་ངང་ཉིད་ལས། །སྣོད་བཅུད་སྦྱང་ཕྱིར་འབྱུང་རིམ་བརྩེགས། །རྣམ་དག་ཡུམ་ལྔའི་མཁའ་ཀློང་གསལ། ཧཱུྃ་ཨེ་ཡྃ་ར་སུྃ་ཀེ༚་རྃ་བྷྲུྃ། ཧཱུྃ། ཨེ་ལས་ནམ་མཁའ་མཐའ་དབུས་མེད། །ཡྃ་ལས་རླུང་གི་དཀྱིལ་འཁོར་སྟེང་། །ར་ལས་རཀྟའི་རྒྱ་མཚོ་འཁྱིལ། །སུྃ་ལས་ཞིང་ཆེན་ས་གཞི་གདལ། །ཀེ༚་ལས་རུས་པའི་རི་རབ་སྟེང་། །རྃ་ལས་བསྐལ་པའི་མེ་དཔུང་འབར།
ལྔ་པ་གཞལ་ཡས་ཁང་གདན་དང་བཅས་པ་སྐྱེད་པ་ནི། རྒྱུའི་ཡི་གེ་ཧཱུྃ་ལས་བྷྲུྃ་ཁ་དོག་ལྔ་ལྡན་འཕྲོས་པ་གནས་འགྱུར་བ་ལས་གཞལ་ཡས་ཁང་དུ་གྱུར་ཏེ། ཕྱི་ཕོ་བྲང་ཆེན་པོ་གཅིག་ལ་ནང་དཀྱིལ་འཁོར་ཡོངས་རྫོགས་དགུ་དང་ལྡན་པའི་ཕྱི་རོལ་འཁོར་ཡུག་ཏུ་དུར་ཁྲོད་བརྒྱད་ཀྱིས་བསྐོར་ཞིང་། དེའི་ཕྱི་རོལ་ཏུ་པདྨ་འདབ་སྟོང་ཁ་གྱེན་དུ་ལྟ་བ་དང་། གསེར་གྱི་འཁོར་ལོ་རྩིབས་སྟོང་སྟེང་ནས་མར་ཕུབས་པའི་མཐའ་སྐོར་རྡོ་རྗེའི་བྲག་རིས་བསྐོར་བའི་ཕྱི་ནས་ཡེ་ཤེས་ཀྱི་མེའི་ར་གུར་སྟེང་འོག་ཕྱོགས་མཚམས་ཀུན་ཏུ་འབར་བ། དེའི་ཕྱི་རོལ་འོག་བཞི་ཀེ༚་རུས་ཀྱི་རི་རབ་སྟེང་གི་ཟུར་བཞིར་གཏེར་གྱི་བུམ་པ་རི་བོ་ཙམ་བཞིའི་ཁ་རྒྱན་དཔག་བསམ་གྱི་ཤིང་ལོ་མེ་ཏོག་འབྲས་བུར་འཛོམ་པས་ནམ་མཁའ་ཁྱབ་སྟེ། འདི་དག་གསང་སྔགས་ཀྱི་དཀྱིལ་འཁོར་གཞན་ལས་མ་བཤད་ཀྱང་སྒྲུབ་པ་བཀའ་བརྒྱད་ཀྱི་ཁྱད་ཆོས་ཡིན་ནོ། །གདན་བསྐྱེད་པ་ལ་ཡང་། ཕོ་བྲང་གླིང་དགུ་རེ་རེ་བཞིན་དུ་ནང་གི་དབུས་སུ་གསེར་གྱི་འཁོར་ལོ་རྩིབས་བཞི་མུ་འཁྱུད་དང་བཅས་པ་རེ་རེ་དང་། ཕོ་བྲང་དབུས་མ་གཙོ་མཆོག་གི་གནས་སུ་འཁོར་ལོའི་ལྟེ་བར་ཟླ་གམ་
སྒོ་གཅིག་པ། དེའི་ནང་དུ་ཆོས་འབྱུང་མཐིང་ནག་གྲུ་གསུམ་གྱི་སྟེང་དུ་སྣ་ཚོགས་པདྨ་ཟླ་བ་ཉི་མ་རྣམས་བརྩེགས་པའི་ཁར། དྲེགས་པའི་གདན་ནི། ཚངས་པ། ཁྱབ་འཇུག །དབང་ཕྱུག་དབང་པོ། ཚོགས་བདག །བྷྲིངྒི་རི་རི། དགའ་བྱེད་དབང་ཕྱུག །ཀརྟཱི་ཀ་སྡེ་ལྷ་ཆེན་བརྒྱད། མཐའ་ཡས། དུང་སྐྱོང་། འཇོག་པོ། པད་ཆེན། སྟོབས་རྒྱུ། རིགས་ལྡན། ཧུ་ལནྟ། བ་སུ་ཀ་སྟེ་ཀླུ་ཆེན་བརྒྱད་པོ་རྣམས་བསྣོལ་བའི་ཁར། བྱོལ་སོང་གཙོ་བོ་བརྒྱད་ནི། མི་འཇིགས་པ་སེང་གེ། དཔའ་བ་སྟག །རྔམས་པ་གཟིག །གཏུམ་པ་དོམ། སྟོབས་གླང་པོ་ཆེ། བརྗིད་པ་མ་ཧེ། འཇིགས་པ་ཆུ་སྲིན། གདུག་པ་སྦྲུལ་དང་བརྒྱད་ཀྱིས་གནོན་པ། དེ་དག་གི་སྟེང་དུ་གསེར་གྱི་འཁོར་ལོ་རྩིབས་བཅུ་གཉིས་པ་བཏིང་བའི་ཁར། འཁོར་བའི་རྒྱུ་ཆགས་སྡང་གཉིས་ཀྱི་རང་གཟུགས་དྲེགས་པ་ཅན་ཐམས་ཅད་ཀྱི་གཙོ་བོ་དབང་ཕྱུག་དང་ཨུ་མ་གཉིས་ཁ་སྤུབ་དང་གན་རྒྱལ་དུ་བསྐྱེལ་བའི་གདན་དང་། ཕྱོགས་མཚམས་ཀྱི་གཙོ་བོ་བརྒྱད་ལ་པདྨ་ཉི་ཟླའི་སྟེང་དུ། ཤར་དུ་རུ་དྲ་ཕོ་མོ་བསྣོལ་བ་ལྷོར་ཆུང་གླང་ཟུང་བཞི། ནུབ་ཏུ་ཀླུ་རྒྱལ་ཕོ་མོ། བྱང་དུ་ལྷ་ཆེན་ཕོ་མོ། ཤར་ལྷོར་སྲིད་པའི་ཕོ་མོ་བསྣོལ་
བ། ལྷོ་ནུབ་ཏུ་དར་ཟབ་སྣ་ལྔའི་འབོལ་སྟན། ནུབ་བྱང་དུ་འཇིག་རྟེན་དྲེགས་པ་བསྣོལ་བ། བྱང་ཤར་དུ་དགྲ་གེགས་བསྣོལ་བའི་གདན་གྱིས་མཚན་པ། རྩིབས་བཞི་རེ་རེ་ལ་ཡང་པདྨ་ཉི་ཟླ་དགྲ་གེགས་ཀྱི་གདན་དང་། སྒོ་བ་རྣམས་ལ་བམ་རོའི་གདན་རེ་དང་བཅས་པ་བསྐྱེད་དེ། ཧཱུྃ། བྷྲུྃ་ལས་རིན་ཆེན་གཞལ་ཡས་ཁང་། །དུར་ཁྲོད་རབ་འཇིགས་དཀྱིལ་འཁོར་བསྐྱེད། །ཟླ་གམ་ཡེ་ཤེས་འཆར་སྒོའི་དབུས། །ཆོས་སྐུ་འགྱུར་མེད་ཨེ་རུ་གསལ། །བྷཉྫ་སྐམ་རློན་ཕོ་བྲང་བརྩིགས། །རིན་ཆེན་མཛེས་པའི་དཀྱིལ་འཁོར་དགུ། །འཁོར་ལོ་རྩིབས་བཞི་མུ་འཁྱུད་བཅས། །གྲུ་ཆད་བར་འཁྱམ་སྒོ་འཁྱུད་རྫོགས། །རང་བྱུང་ལྷུན་གྲུབ་ངོ་མཚར་ཆེ། །དྲེགས་པ་པདྨ་ཉི་ཟླའི་གདན། །གཙོ་དང་འཁོར་ལ་འཚམ་པར་བསལ། བྷྲུྃ་བི་ཤྭ་བི་ཤུདྡྷེ། བྷཉྫ་ཛྙཱ་ན་ཨེ་ཙཀྲ་མཎྜ་ལ་བྷྲུྃ། །ཏུ་དྲ་ཀྲོ་དྷི་ཏི་ར་བམ། མ་སཱུ་རྱ་མཎྜ་ལ། ཨ་ཙནྟྲ་མཎྜ་ལ། སམ་པདྨ་མཎྜ་ལ།། ༈ །།དྲུག་པ་ལྷ་བསྐྱེད་པ་ནི། དེ་ལྟར་འབྱུང་རིམ་གཞལ་ཡས་གདན་དང་བཅས་པ་གསལ་
བའི་ངང་ནས། རང་སེམས་རྒྱུའི་ཡི་གེ་ཧཱུྃ་དེ་ཉིད་བྱ་ཆེན་བཟླས་ལ་བབས་པ་ལྟར་ནམ་མཁའི་དབྱིངས་ནས་ཕོ་བྲང་དབུས་མའི་གདན་གྱི་སྟེང་དུ་བབས་ཏེ། ཧཱུྃ་ལས་འོད་ཟེར་འཕྲོས་པས་ཕྱོགས་བཅུའི་རྒྱལ་བ་ཐམས་ཅད་ལ་མཆོད་པ་འབུལ། འགྲོ་དྲུག་སེམས་ཅན་ཐམས་ཅད་ཀྱི་སྡིག་སྒྲིབ་སྡུག་བསྔལ་སྦྱངས། བསྟན་པའི་རུ་དྲ་གདུག་པ་ཅན་ཐམས་ཅད་ཚར་བཅད། འོད་ཟེར་ཚུར་འདུས་ནས་ཧཱུྃ་ལ་ཐིམ་པ་ཙམ་གྱིས་གནས་འགྱུར་ཏེ། བདག་ཉིད་གཙོ་མཆོག་ཡབ་ཡུམ་དུ་གསལ་བར་བྱ་བ་འདི་ནི་ཆོ་ག་གསུམ་བསྐྱེད་ཀྱི་སྒོམ་ཚུལ་ཡིན་ལ། རྒྱས་པར་མངོན་བྱང་ལྔ་བསྐྱེད་ཀྱི་ལུགས་སུ་བྱེད་ན་ཧཱུྃ་ཡིག་དེས་འོད་ཟེར་སྤྲོ་བསྡུ་དོན་གཉིས་བྱས་ནས་འོད་ཟེར་ཚུར་འདུས་ཧཱུྃ་ལ་ཐིམ་མ་ཐག་རྡོ་རྗེ་མཐིང་ནག་རྩེ་དགུ་པ་ལྟེ་བར་ཧཱུྃ་གིས་མཚན་པར་གྱུར། དེ་ལས་འོད་འཕྲོས་དོན་གཉིས་གོང་བཞིན་བྱས་ནས་ཚུར་འདུས་ཡོངས་སུ་གྱུར་པ་ལས་གཙོ་མཆོག་གི་སྐུར་གསལ་བའོ། ཧཱུྃ། རྒྱུ་ཡི་ཡི་གེ་གདན་ལ་བབས། །སྤྲོ་བསྡུའི་སྦྱོར་བས་དཔལ་ཆེན་སྐུ། །བདག་ཉིད་ཆེ་མཆོག་ཧེ་རུ་ཀ །མཐིང་ནག་ཞལ་གསུམ་ཕྱག་དྲུག་པ། །ཞབས་བཞི་གྱད་ཀྱི་དོར་ཐབས་
བགྲད། །གཡས་དཀར་གཡོན་དམར་དབུས་མཐིང་ཞལ། །རིགས་ལྔས་དབུས་བརྒྱན་ཐུགས་སྲོག་ཧཱུྃ། །སྤྱན་དགུ་ཞལ་བགྲད་མཆེ་བ་གཙིགས། །གཡས་ཀྱི་ཕྱག་གསུམ་རྡོ་རྗེ་གསོར། །གཡོན་གྱི་ཕྱག་གསུམ་བྷན་དམར་འཛིན། །དུར་ཁྲོད་འཇིགས་པའི་ཆས་ཀྱིས་བརྒྱན། །གནམ་ཞལ་ཡུམ་ཆེན་ཀུན་བཟང་འཁྲིལ། །ཞལ་གཅིག་ཕྱག་གཉིས་སྐུ་མདོག་མཐིང་། །གཡས་པ་གཙོར་འཁྱུད་ཁ་ཊྭཱྃ་བསྣམས། །གཡོན་པ་དུང་དམར་གཙོ་ལ་སྟོབ། །ཡབ་ཡུམ་སྦྱོར་བའི་བྱིན་རླབས་ལས། །རིགས་བཞི་ལྷ་ཚོགས་འཁོར་བཅས་གསལ། །བསྐལ་པའི་མེ་དཔུངས་ཀློང་ན་བཞུགས། ཨོཾ་བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊཿ མ་ཧཱ་ཀྲོ་དྷི་ཤྭ་རི་སྟྭཾ། དེ་ནས་ཡབ་ཡུམ་ཀྱི་མཁའ་གསང་བྱིན་བརླབས་ཅིང་ཐབས་ཤེས་བདེ་སྦྱོར་གྱི་བྱང་ཆུབ་སེམས་ལས་སྲས་འཁོར་སྤྲོ་བ་ནི། མ་སཱུརྱ་མཎྜ་ལ་ཧཱུྃ་བཛྲ་ཨོཾ། ཨ་ཙནྡྲ་མཎྜ་ལ་ཨེ་ཨཾ། ས་མ་
ཡ་ཧོ། ས་མ་ཡ་སྟྭཾ། ར་ཧོ་ཧཾ། ར་ག་ཡ་མི། ཛཿཧཱུྃ་བྃ་ཧོ། ས་མ་ཡ་མུ་དྲ་པྲ་ཝེ་ཤ་ཡ་ཕཊཿ ཨོཾ་ཨོཾ་ཨོཾ། ཧཱུྃ་ཧཱུྃ་ཧཱུྃ། ཕཊ་ཕཊ་ཕཊཿ སྥ་ར་ཎ་ཕཊཿ ཧཱུྃ་ཧཱུྃ་ཧཱུྃ་ཧཱུྃ། དེ་ལྟར་ཡབ་ཡུམ་སྦྱོར་བའི་བྱང་སེམས་ཡུམ་གྱི་པདྨ་ནས་ཡབ་ཀྱི་གསང་བའི་ལམ་དུ་ཡར་ལོག་པ་ཧཱུྃ་མཐིང་ནག་ཉིས་འབྲེལ་བརྒྱད་དུ་གྱུར་པ་རྣམས་གཙོ་བོའི་ཐུགས་ཀ་ནས་ཕྱིར་འཕྲོས་ཏེ་ཕྱོགས་མཚམས་བརྒྱད་ཀྱི་གདན་ཐོག་ཏུ་བབས་གནས་གྱུར་བས་ལྷ་སོ་སོའི་སྐུར་གྱུར་པར་བསམ་ལ། ཧཱུྃ། དཔལ་ཆེན་ཡབ་ཡུམ་ཐུགས་ཀ་ནས། །ཕྱོགས་བཞི་མཚམས་བཞིའི་དཀྱིལ་འཁོར་དུ། །མཐིང་ནག་ཧཱུྃ་ཆེན་ཡིག་འབྲུ་སྤྲོ། །ཁྲག་འཐུང་ཡབ་ཡུམ་སྲས་བཅས་བསྐྱེད། ཧཱུྃ་ཧཱུྃ། ཧཱུྃ་ཧཱུྃ། ཧཱུྃ་ཧཱུྃ། ཧཱུྃ་ཧཱུྃ། ཧཱུྃ་ཧཱུྃ། ཧཱུྃ་ཧཱུྃ། ཧཱུྃ་ཧཱུྃ། ཧཱུྃ་ཧཱུྃ། ཧཱུྃ། ཤར་དུ་བཛྲ་ཧེ་རུ་ཀ །བཛྲ་ཀྲོ་དྷི་ཤྭ་རི་ཡུམ། རིགས་བཞི་ལ་སོགས་འཁོར་བཅས་ལ། ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊཿ ཧཱུྃ། ལྷོ་རུ་འཇམ་དཔལ་གཤིན་རྗེའི་གཤེད།
ཟ་བྱེད་བཻ་ཏྲ་ནག་མོ་ཡུམ། རིགས་བཞི་ལ་སོགས། ཨོཾ་ཨ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྫ། ཧཱུྃ་ཕཊཿ ཧཱུྃ། ནུབ་ཏུ་དབང་ཆེན་རྟ་མཆོག་དཔལ། །པདྨ་གཟི་ལྡན་ཁྲོ་མོ་ཡུམ། རིགས་བཞི། ཨོཾ་པདྨ་ཏ་ཀྲྀ་མ་ཧཱ་ཀྲོ་དྷ་ཧ་ཡ་གྲཱྀ་ཝ་ཧུ་ལུ་ཧུ་ལུ་ཧཱུྃ་ཕཊཿ ཧཱུྃ། བྱང་དུ་རྡོ་རྗེ་གཞོན་ནུ་ཆེ། འཁོར་ལོ་རྒྱས་འདེབས་དཔལ་གྱི་ཡུམ། རིགས་བཞི། ཨཱོཾ་བཛྲ་ཀཱི་ལི་ཀཱི་ལ་ཡ་ཡ། སརྦ་བིགྣན་བཾ་ཧཱུྃ་ཕཊཿ ཧཱུྃ། ཤར་ལྷོར་བླ་མེད་ཧེ་རུ་ཀ །ཉིད་བཞི་བདེ་མཆོག་ཆེན་མོ་ཡུམ། །མ་ལྔ་ལ་སོགས་འཁོར་བཅས་གསལ། །ཨཱོཾ་གུ་ཧྱ་ཛྙཱ་ན་ཤྲཱི་ཧེ་རུ་ཀ །ཀྲོ་དྷི་ཤྭ་རི་ཧཱུྃ་ཕཊཿ ཧཱུྃ། ལྷོ་ནུབ་རིག་འཛིན་ཐོད་པ་རྩལ། །རྡོ་རྗེ་རྣལ་འབྱོར་གསང་བའི་ཡུམ། །རིགས་བཞི། ཨོཾ་བཛྲ་མ་ཧཱ་གུ་རུ་སརྦ་ཧཱུྃ་ཕཊཿ ཧཱུྃ། ནུབ་བྱང་དྲེགས་པ་ཀུན་འདུལ་ཆེ། ཁམས་གསུམ་སྲིད་པའི་སྤྱི་འདུལ་ཡུམ།
རིགས་བཞི་ལ༴ ཨོཾ་བཛྲ་ཙཎྜ་སརྦ་དུཥྚན་ཧཱུྃ་ཕྲཊཿ ཧཱུྃ། བྱང་ཤར་སྟོབས་ལྡན་ནག་པོ་ཆེ། །འབྱུང་བ་ལྔ་ཡི་བདག་མོ་ཡུམ། རིགས་བཞི། །ཨོཾ་བཛྲ་སརྦ་དུཥྚན་ཨེ་ཛ་བྷྱོ་ཧཱུྃ་ཕཊཿ ཧཱུྃ། ཉི་མ་དང་ནི་འོད་ཟེར་བཞིན། །དཔལ་ཆེན་སོ་སོའི་སྤྲུལ་འཁོར་བཅས། །ཕྱི་རོལ་སྒོ་བ་རིགས་བཞི་ནི། །ཡ་མན་པྲཛྙཱ་པདྨ་བིག །ལྕགས་ཀྱུ་ཞགས་པ་ལྕགས་སྒྲོགས་དྲིལ། །ཚོམ་བུ་དགུ་ཡི་ལྷ་ཚོགས་རྣམས། །སྐུ་མདོག་ཕྱག་མཚན་རྒྱན་ཆ་ལུགས། །མ་འདྲེས་ཡོངས་སུ་རྫོགས་པར་གསལ། ཛཿཧཱུྃ་བྃ་ཧོ། ཧཱུྃ། ཕྱི་རོལ་ལྕགས་རི་ཁོར་ཡུག་ལ། །མཁའ་འགྲོ་དབང་ཕྱུག་གིང་ལངྒ། །འབར་མ་མ་སྲིང་བཀའ་སྡོད་ཚོགས། །བསམ་གྱིས་མི་ཁྱབ་ཡོངས་རྫོགས་གཏིབས། །མ་ཧཱ་མུ་དྲ་ས་མ་ཡ་ཧོ།། ༈ །།དེ་ལྟར་ཕོ་བྲང་གླིང་དགུ་རེ་རེ་བཞིན་དུ་གཙོ་བོ་ཡབ་ཡུམ་གྱི་ཕྱོགས་བཞིར་རིགས་བཞི་ཡབ་ཡུམ་དང་། ལྷག་མ་ཐམས་ཅད་རང་རང་བར་འཁྱམས་སུ་བཞུགས་ཤིང་། སྒོ་བཞིར་རང་རང་གི་སྒོ་བ་རྣམས་དང་བཅས་
པ་ཡོངས་བསྡོམ་གྱི་ལྷ་གྲངས་ནི། ཆེ་མཆོག་ཡོན་ཏན་གྱི་ལྷ་ཚོགས་སུམ་ཅུ་སོ་གཉིས། ཡང་དག་ཐུགས་ཀྱི་ལྷ་ཚོགས་ལྔ་བཅུ་རྩ་བརྒྱད། འཇམ་དཔལ་སྐུའི་ལྷ་ཚོགས་ལྔ་བཅུ་རྩ་དགུ། པདྨ་གསུང་གི་ལྷ་ཚོགས་དགུ་བཅུ་རྩ་བརྒྱད། ཕུར་པ་ཕྲིན་ལས་ལྷ་ཚོགས་བདུན་བཅུ་རྩ་བཞི། མ་མོ་རྦོད་གཏོང་ལྷ་ཚོགས་བདུན་ཅུ་དོན་དགུ། རིག་འཛིན་སློབ་དཔོན་ལྷ་ཚོགས་ཉི་ཤུ་རྩ་དྲུག འཇིག་རྟེན་མཆོད་བསྟོད་ཀྱི་ལྷ་ཚོགས་བཞི་བཅུ་ཐམ་པ། དམོད་པ་དྲག་སྔགས་ཀྱི་ལྷ་ཚོགས་ཉི་ཤུ་རྩ་བརྒྱད། དཔལ་གྱི་བཀའ་སྡོད་ཀྱི་ལྷ་ཚོགས་ཉིས་བརྒྱ་དང་སོ་དྲུག་རྣམས་བསྡོམས་པས་བདུན་བརྒྱ་ཉེར་ལྔར་བསྡུས་པ་ཡིན་ནའང་། ནང་ཚན་དུ་ཕྱེས་ན། འབུམ་ཕྲག་ཡངས་པའི་མཁའ་འགྲོ་མ་འབུམ་ཚོ་ཉི་ཤུ་ཡོད་ཀྱང་ཡོད་ཀྱང་འདིར་དེ་དག་གི་གཙོ་མོ་ཉི་ཤུ་ལ་བསྡུས་ནས་བགྲངས་པ་ཡིན་ནོ། །དེ་ལྟར་ལྷ་ཚོགས་ཐམས་ཅད་ཀྱང་ངོ་བོ་གཅིག་ལ་རྣམ་འགྱུར་ཐ་དད་པའི་གཙོ་བོ་སོ་སོའི་འཁོར་ཐམས་ཅད་ཀྱང་ཉི་མ་དང་འོད་ཟེར་གྱི་ཚུལ་ལྟར་རང་བྱུང་ལྷུན་གྲུབ་ཏུ་གསལ་བའི་ལྷ་ཐམས་ཅད་ཀྱི་སྤྱི་བོར་འཁོར་ལོ་དཀར་པོ་རྩིབས་བརྒྱད་པའི་ལྟེ་བར་ཨོཾ་དཀར་པོ། མགྲིན་པར་པད་དམར་འདབ་བརྒྱད་ཀྱི་ཟེའུ་འབྲུར་ཨཱཿདམར་པོ། ཐུགས་ཀར་
རྡོ་རྗེ་རྒྱ་གྲམ་མཐིང་གའི་ལྟེ་བར་ཧཱུྃ་མཐིང་ནག་གིས་མཚན་པ་རེ་རེ་བསྒོམ་པར་བྱའོ།། ༈ །།བདུན་པ་དབང་བསྐུར་བ་ནི། ལྷ་ཐམས་ཅད་ཀྱི་གནས་གསུམ་འབྲུ་གསུམ་ལས་འོད་འཕྲོས་འོག་མིན་ཆོས་ཀྱི་དབྱིངས་ནས་རྒྱལ་བ་ཀུན་བཟང་རིགས་ལྔ་ཡབ་ཡུམ་ལ་ཕྱོགས་བཅུའི་རྒྱལ་བ་སྲས་བཅས་ཉི་ཟེར་གྱི་རྡུལ་བཞིན་བྱོན་ནས་བདག་དམ་ཚིག་འཁོར་བཅས་རྣམས་ལ་སྐུ་གསུམ་ཡེ་ཤེས་ལྔའི་དབང་བསྐུར་བར་མོས་ལ། ཧཱུྃ། རང་བྱུང་དཀྱིལ་འཁོར་དཔལ་ཆེན་ཚོགས། །མཐུ་རྩལ་ཡོངས་སུ་རྫོགས་བྱའི་ཕྱིར། །སྐུ་གསུང་ཐུགས་སུ་བྱིན་རླླབས་ལ། །ཡེ་ཤེས་རྣམ་ལྔའི་དབང་བསྐུར་ཅིག །ཨོཾ་ཨཱཿཧཱུྃ། ཨོཾ་ཧཱུྃ་སྭཱ་ཧྲཱིཿཧ་ཨོཾ་ན་མཿསརྦ་ཏ་ཐཱ་ག་ཏ་ཀཱ་ཡ་ཝཀྩི་ཏྟྟ་ཛྙཱ་ན་པཉྩ་བཛྲ་སཱ་བྷཱ་ཝ་ཨཏྨ་ཀོ྅ཧཾ། ཞེས་དབང་བསྐུར་བའི་དབང་རྟགས་སུ་ལྷ་ཐམས་ཅད་ཀྱི་དབུའི་གཙུག་ཏུ་ཀུན་བཟང་དང་། གཞན་རྒྱལ་བ་རིགས་ལྔ་རྣམས་ལྷ་སོ་སོའི་རིགས་མཐུན་གྱིས་གཙོ་བོ་མཛད་པའི་རིགས་ལྔས་དབུ་བརྒྱན་པའོ། །བརྒྱད་པ་ཡེ་ཤེས་པ་སྤྱན་དྲངས་བ་ནི། ལྷ་གཙོ་འཁོར་རང་རང་སོ་སོའི་ཐུགས་ཀ་ནས་འོད་ཟེར་
ཚད་མེད་བཞིའི་ལྷ་མོ་གྲངས་མེད་པ་འཕྲོས་པས། རང་བཞིན་གྱི་གནས་ན་ཡེ་ཤེས་སེམས་དཔའ་རྣམས་ཀྱི་ཐུགས་རྒྱུད་བསྐུལ་བས། ཆོས་སྐུ་ལས་གཟུགས་སྐུར་བཞེངས་ཏེ་ནམ་མཁའི་ཁམས་་ཁེངས་པར་བྱོན་པའི་མོས་པ་དང་དད་གདུང་བསྐྱེད་ལ། ཧཱུྃ། རྣམ་དག་ཆོས་དབྱིངས་མཉམ་ཉིད་ལས། །ཞི་ཁྲོ་ཡོངས་རྫོགས་སྐུ་བཞེངས་ལ། །སྲིད་གསུམ་གདུག་པའི་ཚོགས་བསྒྲལ་ཕྱིར། །གནས་འདིར་སྤྱན་འདྲེན་གཤེགས་སུ་གསོལ། ཨོཾ་ཨེ་ཧྱེ་ཧེ་ཛཿཧཱུྃ་བྃ་ཧོ། ས་མ་ཡ་ཧྲི༚་ཧྲི༚་ཛཿ དགུ་པ་བཞུགས་གསོལ་ནི། དེ་ལྟ་བུའི་ལྷ་ཚོགས་ཐམས་ཅད་ཡེ་ནས་རང་རིག་ཡེ་ཤེས་སུ་དབྱེར་མེད་ཀྱང་། རྣམ་པ་སྒྱུ་མ་ཙམ་དུ། གཙོ་བོ་ལ་གཙོ་བོ། འཁོར་ལ་འཁོར་གཉིས་མེད་དུ་ཐིམ་པར་བསམ་ཞིང་། ཧཱུྃ། བདེར་གཤེགས་ཀུན་འདུས་དཀྱིལ་འཁོར་འདིར། །དམ་ཚིག་ཡེ་ཤེས་དབྱེར་མེད་པར། །ཆུ་ལ་ཆུ་བཞག་ཇི་བཞིན་དུ། །དུ་མ་རོ་གཅིག་བརྟན་པར་བཞུགས། །ས་མ་ཡ་ཨ་ཝེ་ཤ་ཡ་ཏིཥྛ་སྟྭཾ། བཅུ་པ་ཕྱག་འཚལ་བ་ནི་
བདག་ཉིད་ཀྱི་ཐུགས་ཀ་ནས་སྤྲུལ་པའི་ལྷ་མོ་བཞི་ལ་རང་འདྲའི་འཁོར་ཚོགས་གྲངས་མེད་པས་བསྐོར་བ་འཕྲོས་པས་དཀྱིལ་འཁོར་གྱི་ཕྱོགས་བཞི་ནས་ཕྱག་བསམ་གྱིས་མི་ཁྱབ་པ་བཙལ་ནས་སླར་རང་གི་ཐུགས་ཀར་ཐིམ་པར་བསམ་ཞིང་། ཧཱུྃ། ཆོས་རྣམས་རང་བཞིན་ཡེ་ནས་དག །རྟོག་འཁྲུལ་འཇིག་རྟེན་སེམས་ཅན་ལ། །སྐུ་གསུང་ཐུགས་ཡོན་ཕྲིན་ལས་སྟོན། །དཀྱིལ་འཁོར་ལྷ་ལ་ཕྱག་འཚལ་ལོ། ཨ་ཏི་པུ་ཧོ། ན་མཿཧྲི། སླར་ཡང་ཕྱག་འཚལ་རྒྱས་པར་སྤྲོ་ན་ཆོས་བཀའ་འདི་ཉིད་ཀྱི་ན་རག་བཤགས་སྐོངས་ནས་གསུངས་པའི་ཕྱག་འཚལ་ཡང་སྐབས་འདིར་དྲངས་ཏེ། ན་མོ། ཡོན་ཏན་ཕུན་ཚོགས་བླ་མ་རྣམས་ལ་ཕྱག་འཚལ་ལོ། །དམིགས་མེད་སྤྲོས་བྲལ་ཆོས་ཀྱི་སྐུ་ལ་ཕྱག་འཚལ་ལོ། །བདེ་ཆེན་ལོངས་སྤྱོད་རྫོགས་པའི་སྐུ་ལ། །འགྲོ་མགོན་སྤྱིར་ཡང་སྤྲུལ་པའི་སྐུ་ལ༴ གནས་ལུགས་མི་འགྱུར་རྡོ་རྗེའི་སྐུ་ལ༴ ཡང་དག་མངོན་པར་བྱང་ཆུབ་སྐུ་ལ༴ ཉོན་མོངས་ཞི་མཛད་ཞི་བའི་ལྷ་ལ༴ ལོག་ལྟ་ཚར་གཅོད་ཁྲོ་བོའི་ཚོགས་ལ༴ ཐབས་མགོན་ཚེ་བདག་འཇམ་དཔལ་
སྐུ་ལ་ཕྱག་འཚལ་ལོ། །སྐྱོན་བྲལ་སྒྲ་སྒྲོག་པདྨ་གསུང་ལ༴ ཡང་དག་དོན་རྟོགས་བཛྲ་ཐུགས་ལ༴ དུག་ལྔའི་ནད་སེལ་བདུད་རྩི་སྨན་ལ༴ དྲེགས་པ་འཇོམས་མཛད་ཕུར་པའི་ཚོགས་ལ༴ འབྱུང་བའི་མངའ་བདག་མ་མོའི་ཚོགས་ལ༴ ས་དང་ལམ་རྫོགས་རིག་འཛིན་རྣམས་ལ༴ བསྟན་པ་སྲུང་མཛད་དམ་ཅན་རྣམས་ལ༴ དགྲ་གེགས་བདུད་འདུལ་སྔགས་བདག་ཚོགས་ལ་ཕྱག་འཚལ་ལོ། །རྩ་བའི་བླ་མ་རྒྱུད་པའི་རྗེ། །དངོས་གྲུབ་སྩོལ་བའི་ཡི་དམ་ལྷ། །ལས་བྱིན་རློབས་པའི་མཁའ་འགྲོ་མ། །རྩ་བ་གསུམ་ལ་ཕྱག་འཚལ་ལོ། །ཕྱི་དཀོན་མཆོག་གསུམ། ནང་རྩ་བ་གསུམ། གསང་བ་སྐུ་གསུམ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །མཆོད་པ་འབུལ་ལོ། །སྡིག་པ་བཤགས་སོ། །དགེ་བ་ལ་རྗེས་སུ་ཡི་རང་ངོ་། །སྐུ་མྱ་ངན་ལས་མི་འདའ་བར་འགྲོ་བ་སེམས་ཅན་གྱི་དོན་རྒྱ་ཆེན་པོ་མཛད་དུ་གསོལ་ལོ། །བཅུ་གཅིག་པ་ཕྱག་རྒྱ་གར་མཆོད་ནི། སླར་ཡང་བདག་ཉིད་ཀྱི་ཐུགས་
ཀ་ནས་མཆོད་པའི་ལྷ་མོ་བསམ་གྱིས་མི་ཁྱབ་པ། རྣམས་ཀྱིས་མཆོད་པའི་རྣམ་གྲངས་མཐའ་དག་རིམ་པ་བཞིན་འབུལ་བར་དམིགས་ཏེ། ཐོག་མར་ལྷ་སོ་སོའི་སྐུ་མདོག་ཕྱག་མཚན་བཞུགས་སྟངས་སོགས་ཇི་ལྟ་བའི་རྣམ་འགྱུར་དང་མཐུན་པའི་ཕྱག་རྒྱ་གར་གྱིས་མཆོད་པར་བསམ་ལ། ཧཱུྃ། །གདུལ་བྱའི་མོས་བློ་ཐ་དད་པས། །ཞི་དང་ཁྲོ་དང་འདྲེས་པའི་ཚུལ། །སྐུ་མདོག་ཞལ་ཕྱག་བསམ་འདས་ཀྱང་། །ལྷ་རྣམས་གསལ་འདེབས་གར་མཆོད་འབུལ། ཧཱུྃ། དཔེན་ཆེ་མཆོག་ཧེ་རུ་ཀ །དབུ་གསུམ་ཕྱག་དྲུག་ཞབས་བཞི་བགྲད། །གཡས་དཀར་གཡོན་དམར་དབུས་མཐིང་ཞལ། །རིགས་ལྔས་དབུ་བརྒྱན་ཐུགས་སྲོག་གསལ། །གཡས་ཀྱི་ཕྱག་གསུམ་རྡོ་རྗེ་གདེངས། །གཡོན་གྱི་ཕྱག་གསུམ་བྷན་དམར་འཛིན། །ཡུམ་ཆེན་གནམ་ཞལ་ཀུན་བཟང་མོ། །གཡས་པ་གཙོར་འཁྱུད་ཁ་ཊྭཱཾ་ག །གཡོན་པ་ཆགས་པའི་དུང་དམར་སྟོབ། ཡབ་ཡུམ་ཐབས་ཤེས་ཟུང་འཇུག་རྒྱ། །ཕྱག་རྒྱ་གར་གྱི་མཆོད་པ་བཞེས་
མ་ཧཱ་མུ་དྲ་པཱུ་ཛ་ཧོ། ཧཱུྃ། དཔལ་ཆེན་བཛྲ་ཧེ་རུ་ཀ །དབུ་གསུམ་ཕྱག་དྲུག༴ གཡས་དཀར༴ རིགས་ལྔས༴ གཡས་གསུམ་རྩེ་དགུ་ཁ་ཊྭཱཾ་རྔ༴ གཡོན་གསུམ་དྲིལ་བྷན་རྒྱུ་ཞགས་བསྣམས། ཡུམ་ཆེན་ཀྲོ་དྷི་ཤྭ་རི་མ། གཡས་པ་གཙོ་གཡོན་པ་དུང་། ཡབ་ཡུམ་ཐབས་ཤེས༴ ཕྱག་རྒྱ་གར༴ མ་ཧཱ་མུ་དྲ་པཱུ་ཛ་ཧོ། ཧཱུྃ། དཔལ་ལེན་འཇམ་དཔལ་གཤིན་རྗེའི་གཤེད། དབུ་གསུམ༴ གཡས་དཀར༴ རིགས་ལྔས༴ གཡས་གསུམ་བེ་ཅོན་རལ་གྲི་སྟེ། གཡོན་གསུམ་སྡིགས་མཛུབ་མདུང་བྷན་དམར། ཡུམ་ཆེན་བཛྲ་བེ་ཏཱ་ལི། གཡས་པ་གཙོར༴ གཡོན་པ༴ ཡབ་ཡུམ༴ ཕྱག་རྒྱ༴ མ་ཧཱ་མུ༴ ཧཱུྃ། དཔལ་ལེན་རྟ་མགྲིན་པདྨ་དབང་། དབུ་གསུམ༴ གཡས་དཀར་གཡོན་སྔོ་དབུས་དམར་ཞལ། དབུ་གཙུག་རྟ་སྐད་ཕྱོགས་བཅུར་སྒྲོག །རིགས་ལྔས༴ གཡས་གསུམ་རྡོ་རྗེ་ཁ་ཊྭཱཾ་ཞགས། །གཡོན་གསུམ་ དྲིལ་བུ 
་བྷན་དམར་སྒྲོགས།
ཡུམ་ཆེན་ཨེ་ཀ་ཛྭ་ཊི་མ། གཡས་པ་གཙོར༴ གཡོན་པ་ཆགས༴ ཡབ་ཡུམ༴ ཕྱག་རྒྱ་གར༴ མ་ཧཱ་མུ༴ ཧཱུྃ། དཔལ་ལེན་རྡོ་རྗེ་གཞོན་ནུ་ཆེ། དབུ་གསུམ༴ གཡས་དཀར༴ རིགས་ལྔས༴ གཡས་གཉིས་རྩེ་དགུ་རྩེ་ལྔ་སྟེ། །གཡོན་གཉིས་མེ་དཔུང་ཁ་ཊྭཾ་ག །མཐའ་གཉིས་རི་རབ་ཕུར་བུ་འདྲིལ། །ཡུམ་ཆེན་འཁོར་ལོ་རྒྱས་འདེབས་མ། གཡས་པ༴ གཡོན་པ༴ ཡབ་ཡུམ་ཐབས་ཤེས༴ ཕྱག་རྒྱ༴ མ་ཧཱ་མུ་དྲ༴ ཧཱུྃ། དཔལ་ཆེན་བླ་མེད་ཧེ་རུ་ཀ །དབུ་གསུམ༴ གཡས་དཀར༴ རིགས་ལྔས༴ གཡས་གསུམ་རྡོ་རྗེ་ཁྱུང་སྦྲུལ་ཞགས། །གཡོན་གསུམ་དུང་དམར་ཞིང་ག་འུ། །ཡུམ་ཆེན་ཉིད་ཞི་མུ་ཁ་ལེ། གཡས་པ༴ གཡོན་པ༴ ཡབ་ཡུམ༴ ཕྱག་རྒྱ༴ མ་ཧཱ་མུ་དྲ་པཱུ་ཛ་ཧོ། ཧཱུྃ། དཔལ་ལེན་རིག་འཛིན་ཐོད་པ་སྩལ། །ཞལ་གཅིག་ཕྱག་གཉིས་ཞབས་གཉིས་བགྲད། །སྐུ་མདོག་དཀར་དམར་རུས་རྒྱན་མཛེས། རིགས་ལྔས༴ རྡོ་རྗེ་
དྲིལ་བུ ་ཕྱག་རྒྱ་བསྒྱུར། །ཡུམ་ཆེན་ཆོས་
དབྱིངས་རྣལ་འབྱོར་མ། །གཉིས་མེད་འཁྲིལ་སྦྱོར་བདེ་ཆེན་བསྐྱེད། གཡས་པ་གཙོར༴ གཡོན་པ་དུང་༴ ཡབ་ཡུམ༴ ཕྱག་རྒྱ༴ མ་ཧཱ༴ ཧཱུྃ། དཔལ་ཆེན་དྲེགས་པ་ཀུན་འདུལ་ཆེ། དབུ་གསུམ༴ གཡས་དཀར༴ རིགས་ལྔས་དབུ༴ གཡས་གསུམ་རྡོ་རྗེ་ལྷ་བརྒྱདམགོ་གཡོན་གསུམ་བྷན་དམར་ཀླུ་བརྒྱད་མགོ། །ཡུམ་ཆེན་སྲིད་པ་སྤྱི་འདུལ་མ། གཡས་པ༴ གཡོན་པ༴ ཡབ་ཡུམ༴ ཕྱག་རྒྱ༴ མ་ཧཱ༴ ཧཱུྃ། དཔལ་ཆེན་སྟོབས་ལྡན་ནག་པོ་ཆེ། དབུ་གསུམ༴ སྐུ་མདོག་མཐིང་ནག་འཇིགས་པ་ལ། རིགས་ལྔས༴ གཡས་གསུམ་རྡོ་རྗེ་ལྷ་བརྒྱད་སྙིང་། །གཡོན་གསུམ་བྷན་དམར་ཀླུ་བརྒྱད་སྙིང་། །ཡུམ་ཆེན་འབྱུང་བ་ལྔ་ཡི་བདག །གཡས་པ་གཟུགས་ཁམས་མཁའ་ལ་འདེགས། །གཡོན་པ་འདོད་ཁམས་ས་ལ་གནོན། ཡབ་ཡུམ༴ ཕྱག་རྒྱ༴ མ་ཧཱ་མུ་དྲ་པཱུ་ཛ་ཧོ། ཧཱུྃ། སོ་སོའི་རིགས་བཞི་འཁོར་ཚོགས་རྣམས། །ཞལ་དང་ཕྱག་མཚན་ཅིར་ཡང་བསྒྱུར། །བདེར་གཤེགས་ཐམས་ཅད་གར་གྱི་
བདག །ཕྱག་རྒྱ་གར་གྱི་མཆོད་པ་བཞེས། མ་ཧཱ་མུ་དྲ་པཱུ་ཛ་ཧོ། །བཅུ་གཉིས་པ་གླུ་བྲོའི་མཆོད་པ་ནི། སྤྲུལ་པའི་ལྷ་མོ་རྣམས་ཀྱིས་སྐྱེ་མེད་སྟོང་པའི་གླུ་དང་། འགག་མེད་སྣང་བའི་བྲོའི་བྱེ་བྲག་བསམ་གྱིས་མི་ཁྱབ་པས་མཆོད་པར་བསམ་ལ། ཧཱུྃ། སྟོང་པའི་རང་བཞིན་ཅིར་ཡང་སྣང་། །སྣང་བའི་མཚན་ཉིད་སྐྱེ་བ་མེད། །གླུ་ནི་འདུ་འབྲལ་མེད་པའི་གླུ། །བྲོ་ནི་བར་ཆད་མེད་པར་བརྡུང་། ཨོཾ་མ་ཧཱ་ཛྙཱ་ན་ཏེ་ན་ཧཱུྃ། ཏེ་ན་ཏེ་ཏེ་ཧཱུྃ། དེ་ནས་བཅུ་གསུམ་པ་ཕྱིའི་མཆོད་པ་ནི། ཐུན་མོང་ཐེག་པ་དང་མཐུན་པའི་མཆོད་པ་རྣམ་ལྔ་འབུལ་ཏེ། ཧཱུྃ། རྒྱལ་བ་རྒྱ་མཚོའི་དཀྱིལ་འཁོར་དུ། །བདུག་སྤོས་མེ་ཏོག་མར་མེ་དྲི། །ཞལ་ཟས་སིལ་སྙན་མཆོད་པའི་སྤྲིན། །དབྱིངས་ནས་བཏོན་ཏེ་དབྱིངས་སུ་འབུལ། ཨོཾ་ས་ན་སེམ། པེ་ནུ་པ་ར་ཏེ། ཏི་པུ་པ་ར་མུ། སརྦ་ཐཱ་ག་ཏ་སིདྡྷི་ས་མ་ཡ་ཧོ། ཨོཾ་ཤྲཱི་བཛྲ་རཱ་ག་དྷུ་པེ་ཧཱུྃ། ཨོཾ༴ པུཥེྤ་ཏྲཾ། ཨོཾ༴ ཨ་ལོ་ཀཻ་ཧྲཱིཿ ཨོཾ༴ གནྡྷེ་ཧོ། ཨོཾ༴ ནཻ་ཝི་དྱ་ཨཿ ཨོཾ་ཤྲཱི་བཛྲ་རཱ་ག་གཱིརྟི་ཤབྟ།
ཧཱུྃ། བཅུ་བཞི་པ་ནང་འདོད་ཡོན་ལྔའི་མཆོད་པ་འབུལ་བ་ནི། སྣང་སྲིད་སྣོད་བཅུད་ཀྱི་འདོད་ཡོན་མཐའ་དག་བློས་བླངས་ནས་འབུལ་ཞིང་། ཨོཾ། མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་བཞིན་སྤྲིན་ཚོགས་གཏིབས། །གཟུགས་སྒྲ་དྲི་རོ་རེག་བྱ་ཚོགས། །འདོད་ཡོན་ལྔ་ལྡན་མཆོད་པ་བཞེས། ཨོཾ་སརྦ་པཱུ་ཛ་ས་མ་ཡ་ཧོ། བཅོ་ལྔ་པ་གསང་མཆོད་ནི། ཉོན་མོངས་པ་དུག་ལྔ་པོ་ཡེ་ནས་ཡེ་ཤེས་ལྔར་ལྷུན་གྱིས་གྲུབ་པའི་རང་བཞིན་དུ་རྟོགས་པའི་མཆོད་པ་འབུལ་ཞིང་། ཧཱུྃ། འདོད་ཆགས་ཞེ་སྡང་གཏི་མུག་ཆེ། །ང་རྒྱལ་ཕྲ་དོག་ཉོན་མོངས་ལྔ། །ཡེ་ནས་རིམས་ལྔའི་རང་བཞིན་ཏེ། །སྦྱོར་སྒྲོལ་ཏིང་འཛིན་དམ་མཆོད་བཞེས། །ཧ་ལ་པཉྩ་པཱུ་ཛ་ཧོ། ཧ་ལ་པཉྩ་ཁ་རཾ་ཁཱ་ཧི། བཅུ་དྲུག་པ་དེ་ཁོ་ན་ཉིད་དུག་གསུམ་གཏན་ཡན་ལག་གི་མཆོད་པ་ནི་འཁོར་བར་འཁྱམས་པའི་རྒྱུ་རྐྱེན་གྱི་རྩ་བ་དུག་གསུམ་པོ་རྩད་ནས་བཅད་པའི་ཕྱིར། ལྷ་མོ་རྣམས་ཀྱིས་ཁམས་གསུམ་སེམས་ཅན་གྱི་རྒྱུད་ལ་ཡོད་པའི་དུག་གསུམ་ཐམས་ཅད་གཏི་མུག་ཤ །འདོད་ཆགས་
ཁྲག །ཞེ་སྡང་རུས་པའི་རྣམ་པར་ལྷ་ཚོགས་ཀྱི་ཞལ་དུ་ཕུལ་ཞིང་མཆོད་པས། སེམས་ཅན་ཀུན་གྱི་དུག་གསུམ་བག་ཆགས་དང་བཅས་པའི་ཁུངས་སྟོང་པར་བསམ་ལ། ཧཱུྃ། ཤ་ཁྲག་རུས་པ་རྣམ་པ་གསུམ། །དུག་གསུམ་མཆོད་པ་བླ་ན་མེད། །ཡེ་ནས་སྐུ་གསུམ་རང་བཞིན་ཏེ། །རང་གྲོལ་ཉིད་དུ་མཆོད་པ་བཞེས། མ་ཧཱ་མཾ་ས། མ་ཧཱ་རཀྟ། མ་ཧཱ་ཀེ༚་ནི་རི་ཏི་ཁཱ་ཧི། བཅུ་བདུན་པ་བདུད་རྩི་སྨན་མཆོད་བྱ་བ་ལ་གསུམ་སྟེ། སྨན་གྱི་ཆེ་བའི་ཡོན་ཏན་བརྗོད་པ་དང་། ལྷ་ཚོགས་རྣམས་ལ་ཇི་ལྟར་འབུལ་བ་དང་། །སྨན་གྱི་དངོས་གྲུབ་བླང་བ་དང་གསུམ་གྱི་དང་པོ་ནི། ཧཱུྃ། རང་བྱུང་གདོད་ནས་རྣམ་པར་དག །རྩ་བརྒྱད་སྟོང་ལས་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་སྒྲུབ་པའི་རྫས། །རྒྱུད་ལྔ་སེམས་ཅན་ཀུན་གྲོལ་ཕྱིར། །དུག་ལྔ་སེལ་བའི་བདུད་རྩི་ཆེ། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཐཱཿ གཉིས་པ་བདུད་རྩིའི་འབུལ་བ་ལ་སྤྱིར་འབུལ་བ་དང་། བྱེ་བྲག་ཏུ་འབུལ་བ་གཉིས་ཀྱི་དང་པོ་ནི། ཧཱུྃ། རྩ་བརྒྱད་ཡན་ལག་སྟོང་
སྦྱར་བའི། ཐུན་མོང་མཆོག་དང་ཁྱད་འཕགས་འདི། དུས་གསུམ་བླ་མ་ཡི་དམ་ལྷ། རྒྱལ་བ་ཞི་ཁྲོའི་ལྷ་ཚོགས་ལ། རྣམ་དག་བདུད་རྩི་དམ་རྫས་མཉེས་མཆོད་འབུལ། ཐུགས་རྗེ་བརྩེར་དགོངས་དབང་དང་དངོས་གྲུབ་སྩོལ། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཁ་རྃ་ཁཱ་ཧི། བྱེ་བྲག་རྒྱས་པར་ལྷ་སོ་སོའི་མཚན་དོན་ལྟར་འབུལ་བ་ནི། ཧྲཱི། དམ་སྐོངས་དབང་དང་ཤེས་རྒྱུད་ལུང་སྟོན་པའི། ངེས་པའི་དོན་སྟོན་རྡོ་རྗེའི་སློབ་དཔོན་ལ། རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེ་བརྩེར་དགོངས་དབང་དང་དངོས་གྲུབ་སྩོལ། །ཞི་བ་ལྷུན་གྱིས་གྲུབ་པའི་དཀྱིལ་འཁོར་ནས། །སངས་རྒྱས་བཞི་བཅུ་རྩ་གཉིས་ལྷ་ཚོགས་ལ། རྣམ་དག །ཐུགས་རྗེ་བརྩེར༴ ཁྲོ་བོ་རོལ་པའི་དཀྱིལ་འཁོར་ཆེན་པོ་ནས། ཆེ་མཆོག་ཡོན་ཏན་ལྷ་ཚོགས་འཁོར་བཅས་ལ། རྣམ་དག༴ ཐུགས་རྗེ༴ ཁྲག་འཐུང་རོལ་པའི་དཀྱིལ་འཁོར་ཆེན་པོ་ནས། ཡང་དག་ཐུགས་ཀྱི་ལྷ་ཚོགས་འཁོར་བཅས་ལ༴ གཤིན་རྗེ་རོལ་པའི་དཀྱིལ་འཁོར་ཆེན་པོ་ནས། འཇམ་དཔལ་སྐུ་
ཡི་ལྷ༴ དབང་ཆེན་རོལ་པའི༴ པདྨ་གསུང་གི༴ ཕུར་པ་རོལ་པའི༴ ཕུར་པ་ཕྲིན་ལས༴ ཤ་ཁྲག་རྒྱ་མཚོར་འཁྱིལ་བའི་དཀྱིལ་འཁོར་ནས༴ མ་མོ་རྦོད་གཏོང་ལྷ༴ ཐུགས་རྗེ་གདུང་ཚོབ་སྐུ་ཡི་དཀྱིལ་འཁོར་ནས། རིག་འཛིན་བླ་མའི་ལྷ་ཚོགས༴ དུག་ལྔ་མེ་ལྟར་འབར་བའི་དཀྱིལ་འཁོར་ནས། །འཇིག་རྟེན་མཆོད་བསྟོད་ལྷ་ཚོགས་འཁོར་བཅས་ལ། གཏུམ་དྲག་མེ་ལྟར་འབར་བའི་དཀྱིལ་འཁོར་ནས། དམོད་པ་དྲག་སྔགས༴ ཞིང་ཆེན་བཅལ་དུ་དཀྲམ་པའི་དཀྱིལ་འཁོར་ནས། །བཀའ་སྲུང་ཕོ་ཉའི་ལྷ་ཚོགས་འཁོར་བཅས་ལ། །དཀྱིལ་འཁོར་དགུ་ཡི་བར་འཁྱམས་འཁོར་ཡུག་ན། །དཔལ་གྱི་བཀའ་སྲུང་དམ་ཅན་རྒྱ་མཚོ་ལ། །སངས་རྒྱས་ཀྱི་བཀའ་སྲུང་ཞལ་བཞེས་པའི། །དྲེགས་པའི་སྡེ་དཔོན་སུམ་ཅུ་འཁོར་བཅས་ལ། རྣམ་དག་བདུད་རྩི༴ ཐུགས་རྗེ་བརྩེར་དགོངས་དབང༴ ཨོཾ་ཨཱཿཧཱུྃ་སརྦ་ཨ་མྲྀ་ཏ་ཁ་རཾ་ཁཱ་ཧི། གསུམ་པ་བདུད་རྩིའི་དངོས་གྲུབ་བླང་བ་ནི། མཐེབ་སྲིན་གཉིས་སྦྱར་བ་ཐབས་ཤེས་ཀྱི་ཕྱག་རྒྱས་བདུད་རྩི་ཐིགས་གཅིག་བླང་ནས་
རང་གི་གནས་གསུམ་དུ་རེག་ཅིང་ལྕེ་ཐོག་ཏུ་མྱང་ལ། ལྷ་ཚོགས་ཐམས་ཅད་མཉེས་ནས་དངོས་གྲུབ་ཡི་གེ་འབྲུ་གསུམ་གྱི་རྣམ་པ་རང་གི་གནས་གསུམ་དུ་ཐིམ་པར་བསམ་ཞིང་། ཧཱུྃ། ལྕེ་ཡི་དམ་ཚིག་རྡོ་རྗེ་ལ། །དམ་ཚིག་ཅན་གྱིས་ཧཱུྃ་སྒོམས་ཏེ། །མཐེབ་སྲིན་ཐབས་ཤེས་ཕྱག་རྒྱ་ཡིས། །མྱ་ན་དངོས་གྲུབ་མཆོག་ཐོབ་འགྱུར། ཀཱ་ཡ་སིདྡྷི་ཨོཾ། ཝཱཀཱ་སིདྡྷི་ཨཱཿ ཙིཏྟ་སིདྡྷི་ཧཱུྃ། སརྦ་སིདྡྷི་ཧྲཱིཿབཅོ་བརྒྱད་པ་གཏོར་མའི་མཆོད་པ་ནི། གཏོར་མའི་ངོ་བོ་ཡེ་ཤེས་ཀྱི་བདུད་རྩི་ལ་རྣམ་པ་འདོད་ཡོན་གང་ལ་གང་དགྱེས་ཀྱི་རྫས་དང་ཡོ་བྱད་ཀྱིས་ལྷ་ཐམས་ཅད་མཉེས་ཚིམ་དུ་གྱུར་པར་དམིགས་ཤིང་། ཧཱུྃ། དམ་རྫས་རྨད་བྱུང་གཏོར་ཆེན་པོ། །འདོད་ཡོན་ལྔ་ཡི་ཕུང་པོ་འབར། །ཐམས་ཅད་ཚིམ་བྱེད་ཆོས་སྦྱིན་ཆེ། །ཞི་ཁྲོ་ཡོངས་རྫོགས་ཐུགས་དམ་བསྐང་། མ་ཧཱ་བ་ལིནྟ་པཱུ་ཛ་ཧོ། མ་ཧཱ་བ་ལིནྟ་ཁ་རྃ་ཁཱ་ཧི། བཅུ་དགུ་པ་རཀྟ་དམར་གྱི་མཆོད་པ་ནི། སྟོང་གསུམ་དང་མཉམ་པའི་པཱ་ལར་བསྟན་པའི་རུ་དྲ་བསྒྲལ་བའི་ཁྲག་གིས་
བཀངས་ཏེ་ཕུལ་བ་ལྷ་ཚོགས་ཐམས་ཅད་རྔམས་པའི་ཚུལ་གྱིས་གསོལ་བར་བསམ་ལ། ཧཱུྃ། རུ་དྲ་བསྒྲལ་བའི་ཁྲག་ཆེན་པོ། །ལྕང་ལོར་བཅས་པའི་བྷཉྫར་བསྐྱིལ། འཁོར་བ་དབྱིངས་སུ་དག་བྱའི་ཕྱིར། །དཔལ་ལེན་ཚོགས་ཀྱི་ཞལ་དུ་འབུལ། མ་ཧཱ་རཀྟ་པཱུ་ཛ་ཧོ། མ་ཧཱ་རཀྟ་ཁ་རཾ་ཁཱ་ཧི། ཉི་ཤུ་པ་བདུད་རྩི་བསང་ནན་གྱི་མཆོད་པ་ནི། ནས། འབྲས། གྲོ། སྦྲང་། ཤིང་ཏོག་དང་བཅས་པ་ལས་བྱུང་བའི་ཛྭ་གད་དཔའ་བོའི་མཆོད་པ་ཕུལ་བས་ལྷ་ཚོགས་ཐམས་ཅད་མཉེས་པར་བསམ་ལ། ཧཱུྃ། རྒྱུ་གཉིས་རྐྱེན་སྦྱར་འབྲུ་བཅུད་འདི། །དུག་ལྔ་སྨན་གྱུར་དམ་པའི་རྫས། །ཛ་གད་དཔའ་བོའི་བདུད་རྩི་འདིས། རྒྱལ་བ་ཞི་ཁྲོའི་ཐུགས་དམ་བསྐང་། མ་ཧཱ་ཇ་གད་པཱུ་ཛ་ཧོ། མ་ཧཱ་ཛ་གད་ཁ་རཾ་ཁཱ་ཧི། ཉེར་གཅིག་པ་སྦྱོར་བའི་མཆོད་པ་ནི། ལྷ་ཚོགས་ཡབ་ཡུམ་སོ་སོ་རྣམས་མ་ཆགས་ཐབས་ཀྱི་སྦྱོར་བ་ལྷན་སྐྱེས་ཟག་མེད་ཀྱི་ཡེ་ཤག་སྐུ་ཉམས་སུ་བསྟར་བས་ཤེས་རབ་སྟོང་པ་ཆོས་ཀྱི་དབྱིངས་དང་ཐབས་བདེ་ཆེན་རིག་པའི་ཡེ་ཤེས་དབྱེར་མེད་ཟུང་འཇུག་ཆེན་པོ་མངོན་དུ་མཛད་པར་
མོས་ལ། ཧཱུྃ། དབྱིངས་རིགས་གཉིས་མེད་སྦྱོར་བ་ཡིས། །འཁོར་འདས་གཉིས་སུ་མེད་པར་སྦྱོར། །གཉིས་མེད་རྟོགས་པའི་སྦྱོར་མཆོད་འདིས། །རྒྱལ་བ་ཡབ་ཡུམ་མཉེས་གྱུར་ཅིག །ཛཿཧཱུྃ་བྃ་ཧོ། པདྨ་ཡོ་གི་ནཱི་ས་མ་ཡ་པྲ་ཝེ་ཤ་ཡ་ཕཊཿ ཉེར་གཉིས་བསྒྲལ་མཆོད་ནི། ལྷ་ཚོགས་ཡབ་ཡུམ་ཀུན་གྱི་སྦྱོར་མཚམས་ནས་སྤྲུལ་པའི་ལས་མཁན་འཁོར་ཚོགས་གྲངས་མེད་པ་ཉི་ཟེར་གྱི་རྡུལ་བཞིན་འཕྲོས་པས་འཇིག་རྟེན་གྱི་ཁམས་ཐམས་ཅད་ཁྱབ་ནས། མ་རུང་ལོག་པར་སྤྱོད་པའི་རུ་དྲ་དམ་ཉམས་རྣམས་བསྒྲལ་ནས་གཟུགས་ཕུང་ཞལ་དུ་བཞེས་ཤིང་རྣམ་ཤེས་ཆོས་དབྱིངས་སུ་སྤར་བས། སྐྱེ་འགྲོ་ཐམས་ཅད་ཀྱི་འཁོར་བར་འཁྱམས་པའི་རྩ་བར་འཛིན་རྩ་ནས་བཅད། གཟུང་འཛིན་དྲུངས་ནས་ཕྱུངས། འཁོར་བ་ཁུངས་ནས་སྟོངས་པར་གྱུར་པར་དམིགས་ཏེ། ཧཱུྃ། ཡང་དག་དོན་རྟོགས་བློ་ཡིས་ནི། །མ་རྟོགས་སེམས་ཅན་གནས་སུ་བསྒྲལ། །དུས་གསུམ་བདེར་གཤེགས་དེ་ལ་མཉེས། །མཆོག་གི་མཆོད་པ་ཆེན་པོ་བཞེས། །ཨོཾ་མ་ཧཱ་ཤྲཱི་ཧེ་རུ་ཀ །མ་ཏྲམ་རུ་དྲ༴
པྲ་བཉྩཀྲ་ཧཱུྃ་ཕྲཊཿ པྲ་ཝེ་ཤ་ཡ་ཕཊ། ཏི་ཧཱུྃ་ཨཿཡྃ་སྥ་ར་ཎ་ཕཊ། ཅེས་མཆོད་པའི་རིམ་པ་ཐམས་ཅད་གྲུབ་པ་ནས་ལྷ་མོ་དང་ཁྲོ་ཚོགས་སོགས་ཐམས་ཅད་ཀྱང་གཙོ་འཁོར་རྣམས་ལ་ཚུར་ཐིམ་པས་ལྷ་ཐམས་ཅད་སྟོབས་དང་གཟི་བརྗིད་སྔར་ལས་ཀྱང་ལྷག་པར་བསམ་མོ། །ཉེར་གསུམ་པ་བསྟོད་པའི་ལས་རིམ་ལ་སྤྱི་དང་བྱེ་བྲག་གི་བསྟོད་པ་གཉིས་ཀྱི་དང་པོ་ལྷ་ཚོགས་སྤྱི་ལ་སྐུ་གསུང་ཐུགས་ཡོན་ཕྲིན་ལས་ཀྱི་ཆེ་བའི་ཡོན་ཏན་ལ་བསྟོད་པ་ནི། ཡེ་ཤེས་ཀྱི་ལྷ་ལ་བསྟོད་པས་མཉེས་པ་དང་མ་བསྟོད་པས་མི་མཉེས་པ་ལྟ་བུའི་འཛིན་རྟོག་མི་མངའ་ཡང་། བདག་སོགས་འགྲོ་བའི་ཚོགས་གཉིས་སྤེལ་ཞིང་བདེ་བར་གཤེགས་པའི་ཡོན་ཏན་ལ་ངེས་ཤེས་བསྐྱེད་ཕྱིར་སྒོ་གསུམ་གུས་པ་ཆེན་པོས་བསྟོད་པར་བྱ་སྟེ། ཨོཾ། མཉམ་ཉིད་ཆོས་སྐུའི་རང་བཞིན་ལས། །ཀུན་བཟང་ཟག་པ་མེད་པར་བདེ། །སེམས་ཅན་དོན་ལ་དེ་བཞིན་གཤེགས། །ཐུགས་རྗེའི་སྐུ་ལ་ཕྱག་འཚལ་བསྟོད། ཨཱཿ རྩོལ་མེད་རང་བྱུང་ཆོས་ཀྱི་སྒྲ། །མ་འགག་རང་གསལ་འཛིན་པ་མེད། །ཆད་མེད་སྐྱོན་བྲལ་པདྨའི་གསུང་། ཡང་དག་གསུང་ལ༴ ཧཱུྃ། སྤྲོས་པ་
མེད་པ་དབྱིངས་ཀྱི་ངང་། །མ་སྐྱེས་འཇིགས་མེད་རྡོ་རྗེའི་ཐུགས། །བླང་དོར་མེད་པ་ཆོས་ཀྱི་དབྱིངས། །འགྱུར་མེད་ཐུགས་ལ༴ སྭཱ། ཆོས་དབྱིངས་རོལ་པ་ཆེན་པོ་ལས། །རྩལ་དང་རོལ་པར་མི་དམིགས་ཀྱང་། །ནམ་མཁའ་མཛོད་ཀྱི་ཆོ་འཕྲུལ་གྱིས། །ཡོན་ཏན་རེ་སྐོངས་ཕྱག་འཚལ་བསྟོད། ཧཱ། རང་བཞིན་ཅིར་ཡང་མ་ངེས་ཀྱང་། །དཀྱིལ་འཁོར་ཆེན་པོའི་ཆ་བཟུང་ནས། །རྟོག་མེད་དྲེག་པ་ངང་གིས་འདུལ། །ཕྲིན་ལས་མཛད་ལ་ཕྱག་འཚལ་བསྟོད། ཨོཾ་ཨཱཿཧཱུྃ་ན་མོ་ཧྲི་ད་ཡ་ཨོཾ་ན་མ༔ གཉིས་པ་བྱེ་བྲག་ཏུ་བསྟོད་པ་ལ་རྒྱས་པར་ནི་དཀྱིལ་འཁོར་ཕོ་བྲང་ལ་གཞལ་ཡས་དོན་གྱི་བསྟོད་པ་དང་། ལྷ་ཚོགས་རྣམས་ལ་མཚན་གྲངས་དང་རྒྱན་ཆས་བརྡ་རྟགས་ཀྱི་སྒོ་ནས་བསྟོད་པ་སོགས་མང་ཡང་། འདིར་མདོར་བསྡུས་དཀྱིལ་འཁོར་ཚོམ་བུར་དྲིལ་རེ་བསྟོད་པ་ནི། ཚིག་དང་མཐུན་པའི་དོན་ཡིད་ལ་དྲན་པའི་ངང་ནས་བསྟོད་དེ། ཧཱུྃ། དུས་གསུམ་བདེར་གཤེགས་ཆོས་རྣམས་རྫོགས་པའི་དཔལ། །ཞི་བ་ཡོངས་རྫོགས་ལྷ་ལ་ཕྱག་འཚལ་
བསྟོད། དུས་གསུམ་བདེར་གཤེགས་ཡོན་ཏན་རྫོགས་པའི་དཔལ། ཆེ་མཆོག་ཡོངས་རྫོགས་ལྷ་ལ༴ དུས་གསུམ་བདེ་གཤེགས་ཐུགས་མཆོག་རྫོགས་པའི་དཔལ། ཡང་དག་ཡོངས་རྫོགས་ལྷ༴ དུས་སུམ་བདེ་གཤེགས་སྐུ་མཆོག་རྫོགས་པའི་དཔལ། གཤིན་རྗེ་ཡོངས་རྫོགས་ལྷ༴ དུས་གསུམ་བདེ་གཤེགས་གསུང་མཆོག་རྫོགས་པའི་དཔལ། དབང་ཆེན་ཡོངས་རྫོགས༴ དུས་གསུམ་བདེ་གཤེགས་ཕྲིན་ལས་རྫོགས་པའི་དཔལ། ཕུར་པ་ཡོངས་རྫོགས༴ དུས་གསུམ་བདེ་གཤེགས་གཟི་བརྗིད་རྫོགས༴ མ་མེ་ཡོངས༴ དུས་གསུམ་བདེ་གཤེགས་ཕྱག་རྒྱ་རྫོགས་པའི་དཔལ། རིག་འཛིན་ཡོངས་རྫོགས་ལྷ༴ དུས་གསུམ་བདེ་གཤེགས་མངོན་སྤྱོད་རྫོགས་པའི་དཔལ། །འཇིག་རྟེན་ཡོངས་རྫོགས་ལྷ༴ དུས་གསུམ་བདེ་གཤེགས་དམོད་མཐུ་རྫོགས་པའི་དཔལ། དྲག་སྔགས་ཡོངས་རྫོགས་ལྷ༴ ཕྲིན་ལས་བཞི་བསྒྲུབ་ཕྱི་ནང་བར་ཆད་སེལ། སྒོ་བ་སྒོ་མའི་ཚོགས་ལ༴ རྒྱལ་བའི་སྤྱན་སྔར་བསྟན་པའི་གཉེར་བླངས་པའི། བཀའ་ཉན་སྲུང་མའི་ཚོགས་ལ༴ ཕྱི་ནང་
གསང་བའི་མཆོད་པ་འདི་བཞེས་ལ། །བླ་མེད་སྐུ་གསུང་ཐུགས་ཀྱི་དངོས་གྲུབ་རྣམས། །བདག་སོགས་མོས་པའི་བུ་ལ་སྩལ་དུ་གསོལ། ཉེར་བཞི་པ་བཤགས་པ་བྱ་བ་ནི། ཡི་དམ་གྱི་ལྷ་ཡང་ཡེ་གདོད་མ་ནས་རང་རིག་པ་ཆོས་ཀྱི་སྐུ་དང་ཐ་དད་མེད་ཅིང་འདུ་འབྲལ་སྐད་ཅིག་མེད་ཀྱང་དེ་ལྟར་མ་རྟོགས་པས་གཉིས་འཛིན་མཚན་མའི་བག་ཆགས་ལུ་གུ་རྒྱུད་ཀྱིས་དངོས་གྲུབ་ཀྱི་གེགས་སུ་གྱུར་པ་དེ་ཉིད་བཤགས་བྱ་བཤགས་བྱེད་ལས་འདས་པའི་ངང་དུ་མཉམ་པར་བཞག་ཅིང་། ཧཱུྃ། ཞི་ཁྲོ་བདེར་གཤེགས་ཡོངས་རྫོགས་དགོངས། །སྔོན་ནས་རང་དང་མཉམ་ཉིད་དོན། །མ་རྟོགས་རིས་ཚན་སོ་སོར་བཟུང་། །དབྱེར་མེད་རྣམ་དག་ཀློང་དུ་བཤགས། ས་མ་ཡ་ཨེ་ཧོ་ཤུདྡྷེ་ཨཱཿ ཞེས་དང་། ཧེ་རུ་ཀའི་ཡིག་བརྒྱ་ཡང་བཟླ་སྟེ། ཨོཾ་ཤྲཱི་བཛྲ་ཧེ་རུ་ཀ་ས་མ་ཡ་མ་ནུ་པ་ལ་ཡ། བཛྲ་ཧེ་རུ་ཀ་ཏེ་ནོ་པ་ཏིཥྠ། དྲི་དྡྷོ་མེ་བྷ་ཝ། སུ་ཏེ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་སོ་ཥྱོ་མེ་བྷ་
ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲཱི་ཡཿཀུ་རུ་ཧཱུྃ། ཧ་ཧ་ཧ་ཧ་ཧོཿ བྷ་ག་ཝཱནཱ། བཛྲ་ཧེ་རུ་ཀ་མ་མེ་མུཉྩ་ཧེ་རུ་ཀོ་བྷ་ཝ། མ་ཧཱ་ས་མ་ཡ་ས་ཏྭ་ཨཱ་ཧཱུྃ་ཕཊཿ ཉེར་ལྔ་པ་ཛྲབ་བསྙེན་བྱ་ཞིང་དངོས་གྲུབ་བླང་བ་ལ་ཐོག་མར་ཛྲབ་ལ་ཞི་ཁྲོ་གཉིས་ལས་ཞི་བར་བསྙེན་་ཅིང་ཁྲོ་བོར་བསྒྲུབ། ཅེས་གསུངས་པའི་ཞི་བསྙེན་ལ་ཛྲབ་ཀྱི་དགོངས་པའི་ཏིང་ངེ་འཛིན་ནི། བདག་ཉིད་དཀྱིལ་འཁོར་དགུའི་ལྷ་ཐམས་ཅད་ཀྱི་དབུ་རྒྱན་རིགས་བདག་གི་ལྷ་ནི་སྤྱི་བོའི་གཙུག་ཏུ་པདྨ་ཉི་ཟླའི་གདན་ལ་ཁྱབ་བདག་ཀུན་བཟང་ཡབ་ཡུམ། དེའི་མདུན་དུ་མི་སྐྱོད་རྡོར་སེམས་ཡབ་ཡུམ་དང་། ཆེ་མཆོག་ཡོན་ཏན་གྱི་ལྷ་རྣམས་ཀྱི་དཔྲྲལ་བར་རིན་འབྱུང་། རྣ་ལྟག་གཡས་སུ་རྣམ་སྣང་ལྟག་པར་སྣང་མཐའ་རྣ་ལྟག་གཡོན་པར་དོན་གྲུབ་ཡབ་ཡུམ་སྟེ། སོ་སོའི་འཁོར་ཚོགས་ཀྱང་ཉི་མ་ལ་འོད་ཟེར་ཞར་འབྱུང་ལྟར་ལྷུན་གྲུབ་ཏུ་བཞུགས་པར་མོས། དེ་བཞིན་དུ། ཡང་དག་ཐུགས་ཀྱི་ལྷ་ཚོགས་རྣམས་ཀྱི་གཙུག་ཏུ་ཀུན་བཟང་ཡབ་ཡུམ་གྱི་མདུན་དུ་རྣམ་སྣང་། དཔྲལ་བར་མི་སྐྱོད། གཡས་སུ་རིན་འབྱུང་། རྒྱབ་ཏུ་སྣང་མཐའ། གཡོན་དུ་དོན་གྲུབ་དང་། འཇམ་དཔལ་སྐུའི་ལྷ་ཚོགས་ལ་གཞན་འདྲ་བ་ལས། དཔྲལ་བར་རྣམ་སྣང་
པདྨ་གསུང་གི་ལྷ་ཚོགས་ དཔྲལ་བར་ བར་སྣང་མཐའ། ཕུར་པ་ཕྲིན་ལས་ལ་དཔྲལ་བར་དོན་གྲུབ། མཚམས་བཞིའི་ཤར་ལྷོ་བླ་མེད་ཧེ་རུ་ཀ་ལ་ཆེ་མཆོག་གི་ཇི་ལྟ་བ་དང་། ལྷོ་ནུབ་རིག་འཛིན་ལ་དཔྲལ་བར་རྣམ་སྣང་དང་། མཆོད་བསྟོད་དྲག་སྔགས་གཉིས་ཀྱི་དཔྲལ་བར་མི་སྐྱོད་དང་གཞན་རྣམས་མཚུངས་པ་སྟེ། དེ་ལྟར་ཞི་བའི་ལྷ་ཚོགས་ཐམས་ཅད་དབུའི་རྒྱན་ལ་རྫོགས་པར་བཞུགས་པ་ཐམས་ཅད་ཀྱི་སྐུ་གསུང་ཐུགས་ཀྱི་གནས་གསུམ་དུ་ཡི་གེ་གསུམ་དང་ཐུགས་ཀའི་ཧཱུྃ་ལ་རྩ་སྔགས་ཀྱིས་བསྐོར་བར་མོས་ཤིང་། ལྷ་ཐམས་ཅད་ཀྱི་ཞལ་ནས་ཛྲབ་ཀྱི་སྒྲ་བསྒྲག་པས། སྔགས་ཕྲེང་ལས་འདོག་ཕྲོས་པས་སྟོང་གསུམ་ཐམས་ཅད་ཞི་བའི་ལྷ་ཚོགས་དང་སྔགས་ཀྱི་སྒྲས་འུར་དིར་དུ་སོང་བ་དང་། ཕྱོགས་བཅུའི་རྒྱལ་བ་སྲས་བཅས་ཀྱི་བྱིན་རླབས་ཚུར་བསྡུས་ནས་ལྷ་རྣམས་ཀྱི་ཐུགས་ཀར་ཐིམ་པར་དམིགས་ལ། ཧཱུྃ། གསང་བ་ཡོངས་རྫོགས་དཀྱིལ་འཁོར་དུ། །ཆེ་མཆོག་དཔལ་དགུའི་དབུ་རྒྱན་ནང་། །ཐབས་ཤེས་ཉི་ཟླ་པདྨའི་སྟེང་། མི་སྐྱོད་རྣམ་པར་སྣང་མཛད་དང་། རིན་འབྱུང་སྣང་མཐའ་དོན་ཡོན་གྲུབ། །ཡུམ་ཆེན་ཀུན་བཟང་སངས་རྒྱས་སྤྱན། །མཱ་ཀི་གོས་དཀར་དམ་ཚིག་སྒྲོལ། །རྒྱལ་བ་ཡབ་ཡུམ་ཕྱག་མཚན་བཅས། །ཀུན་བཟང་
ཡབ་ཡུམ་དགྱེས་པར་སྦྱོར། །སྲས་མཆོག་སེམས་དཔའ་སེམས་མར་བཅས། །སྤྲུལ་སྐུ་ཐུབ་དྲུག་མཐར་བྱེད་བརྒྱད། །མཉེན་ལྕུག་འཁྲིལ་ལྡེམ་གཞོན་ཚུལ་ཅན། །གསལ་འཚེར་ལྷུན་སྡུག་གཟི་བརྗིད་འབར། །དབུ་རྒྱན་ཅོད་པན་འཕྲེང་བ་དང་། །དོ་ཤལ་དཔུང་རྒྱན་སེ་མོ་དོ། །རིན་ཆེན་དར་དཔྱངས་ཆས་རྣམས་རྫོགས། །གསུང་ནི་ཡང་སྙིང་སྔགས་སྒྲ་སྒྲོག །ཐུགས་ནི་རང་བྱུང་ཡེ་ཤེས་གསལ། །ཛྲབ་ཀྱིས་སྐུ་གསུང་ཐུགས་རྒྱུད་བསྐུལ། །སྤྲོས་པས་སྟོང་གསུམ་སྐུ་ཡིས་གང་། །སྐུ་ལས་གསུང་བྱོན་སྔགས་འབྲུག་ལྡིར། །བསྡུས་པས་ཆོས་དབྱིངས་མཁའ་ལ་ཐིམ། །མ་གསལ་བར་དུ་བསྐྱེད་ཅིང་སྒོམ། །མ་སྒྲུབ་བར་དུ་མི་བཏང་ངོ་། །ཞེས་གསལ་གདབ་ཅིང་དམ་བཅས་ལ། །ཛྲབ་དངོས་ལ་གསུམ་གྱི་དང་པོ་ཞི་བ་དམ་པ་རིགས་བརྒྱའི་རྩ་སྔགས་ནི། ཨོཾ་ཨཱཿལི་ཀཱ་ལོ་ཛྙཱ་ན་པཉྩ་སཏྭ་ཀྲོ་དྷ་མུ་ནི་ཡེ་སྭཱ་ཧཱ། ཞེས་བཞི་བཅུ་རྩ་གཉིས་ཀྱི་རྩ་སྔགས་ནི། ཨོཾ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷ་ཏུ་ཨཱཿགཙོ་བོ་རིགས་ལྔ་ཡབ་ཡུམ་ཀྱི་སྙིང་པོ་ནི་
ཨོཾ་ཨཱཿཧཱུྃ་སྭཱ་ཧཱ། མུྃ་ལཱྃ་མྃ་པྱྃ་ཏཱྃ། ཞེས་པའི་ཛྲབ་རྣམས་བརྒྱ་སྟོང་ཁྲི་འབུམ་ལ་སོགས་ལ་ལོང་སྐབས་དང་བསྟུན་ཏེ་བཟླས་པའི་མཐར་སྟོང་ཚིག་ཀྱི་མཆོད་པ་ནི། །བདེར་གཤེགས་ཞི་བའི་ལྷ་ཚོགས་སྤྱན་འདྲེན་གཤེགས། །ཕྱི་ནང་གསང་བའི་ཛྲབ་བསྙེན་མཆོད་པ་འབུལ། །སྐུ་གསུང་ཐུགས་དང་ཡོན་ཏན་ཕྲིན་ལས་བསྟོད། །ཉམ་ཆགས་འགལ་འཁྲུལ་ཅི་མཆིས་མཐོལ་ལོ་བཤགས། མ་ཧཱ་པཉྩ། རཀྟ། བ་ལིནྟ། སརྦ་པཱུ་ཛ་ཁཱ་ཧི། ཞི་བའི་ལྷ་ཚོགས་ཁྱེད་སྐུ་ཅི་འདྲ་དང་། ཞེས་སོགས་ཀྱི་སྨོན་ལམ་ཡང་གདབ་བོ།། ༈ །།གཉིས་པ་ཁྲོ་བོར་སྒྲུབ་པའི་ལས་རིམ་གྱི་ཛྲབ་དགོངས་ནི། དེ་ཡང་སྒྲུབ་པ་ཆེན་པོའི་སྐབས་ལྟ་བུར་ནི་འཛབ་དགོངས་རྒྱས་པའི་གཞུང་ལྟར་དགོས་མོད་ཀྱང་། ལས་བྱང་གི་སྐབས་འདིར་ནི། ཕྲ་མོའི་ཏིང་འཛིན་ཡིད་ལ་གསལ་བས་རང་གི་གནས་སྦྱང་བ། བཟླས་བརྗོད་བསྙེན་པའི་འཕྲོ་འདུས་ཡེ་ཤེས་ཀྱི་ལྷ་ཉེ་བར་བསྙེན་པ། གསང་བ་བྱང་ཆུབ་སེམས་ཀྱི་འཕྲོ་འདུས་དངོས་གྲུབ་ཡུམ་གྱི་མཁར་བསྡུ་བ་དང་གསུམ་གྱི་ཛྲབ་དགོངས་ཡིན་ཏེ། དེ་ཡང་བདག་ཉིད་གཙོ་བོ་ཡབ་ཡུམ་དམ་ཚིག་སེམས་དཔའི་ཐུགས་ཀར་རིགས་འདུས་ཡེ་ཤེས་
སེམས་དཔའ་དཀར་པོ་རྡོར་སེམས་ཀྱི་ཆ་བྱད་ཅན་དུ་གསལ་བའི་ཐུགས་རིན་པོ་ཆེ་ཟུར་བརྒྱད་པའི་ནང་དུ་ཉི་མའི་གདན་ལ་ཏིང་འཛིན་སེམས་དཔའ་རྡོ་རྗེ་རྩེ་ལྔ་སྔོན་པོའི་ལྟེ་བར་ཧཱུྃ་མཐིང་ནག་གི་མཐའ་སྐོར་དུ་གཙོ་བོའི་སྔགས་ཀྱིས་བསྐོར་བར་གསལ་བ་ནི་རང་གི་གནས་སྦྱང་བའོ། །དེ་ནས་ཛྲབ་བཟླས་པ་ཙམ་གྱིས་ཡེ་ཤེས་སེམས་དཔའི་ཐུགས་ཀར་བསྐར་བའི་སྔགས་འཕྲེང་སྔོ། རྒྱངས་ཀྱི་གྱེན་དུ་བྱུང་ནས་མགྲིན་པའི་ལམ་ནས་ལྗགས་ཀྱི་སྟེང་དུ་གསུང་གི་སྙིང་པོ་ཨཱཿལ་བསྐོར་བ་གཅིག་བྱས། སླར་ཤངས་བུག་གཡས་ནས་ཡར་བརྒྱུད་དེ་སྤྱི་བོའི་ཨཱོཾ་ལ་སྐོར་བ་བྱས་ནས་མར་ལ་ཤངས་བུག་གཡོན་གྱི་སྐོར་ཐོན་པ་ཡུམ་གྱི་ཤངས་བུག་གཡས་སུ་ཞུགས་ཤིང་ཐུགས་ཀའི་ཧཱུྃ་ལ་སྐོར་བ་བྱས་ཏེ་གསང་བའི་པདྨོར་བབས་པར་བསམ་ཞིང་ཛྲབ་བཟླ་བ་ནི་ཡེ་ཤེས་ཀྱི་ལྷ་ཉེ་བར་བསྙེན་པའོ། དེ་ནས་ཡུམ་གྱི་མཁའ་དབྱིངས་ནས་སྔགས་ཕྲེང་ལས་འོད་ཟེར་ཕྱོགས་བཅུར་འཕྲོས་པས་རྒྱལ་བ་ཐམས་ཅད་མཆོད། དེ་དག་གི་ཐུགས་རྗེ་བྱིན་རླབས་དངོས་གྲུབ་བསྡུས་ནས་ཡུམ་གྱི་པདྨར་བསྐྱིལ་བ་དེ་ཡབ་ཀྱི་གསང་རྡོར་གྱིས་རྔུབ་སྲེ་ཡར་དྲངས་ནས་ཐུགས་ཀའི་ཧཱུྃ་ལ་ཐིམ་པར་དམིགས་པ་ནི་བྱང་ཆུབ་སེམས་ཀྱི་འཕྲོ་འདུས་དངོས་གྲུབ་བསྡུ་བའོ། དེ་ལྟ་བུ་གཙོ་བོའི་ཛྲབ་དགོངས་འདི་ནི་བསྙེན་སྒྲུབ་ཡན་ལག་
བཞི་ཡོངས་རྫོགས་ཀྱི་དགོངས་པ་ཡིན་པས་གཙོ་འཁོར་ཐམས་ཅད་ཀྱི་ཛྲབ་དགོངས་འདི་ཀས་འགྲུབ་པར་གསུང་མོད་ཀྱི། རྒྱས་པར་སྤྲོ་ན་གཙོ་བརྒྱད་རྣམས་ལ་གོང་གི་འདི་དང་མཚུངས་པར་བསྒོམ་ཞིང་། འཁོར་ཐམས་ཅད་ལ་ཐུགས་སོགས་ལ་སྔགས་ཕྲེང་གིས་བསྐོར་བར་མོས་པ་ཙམ་གྱིས་འགྲུབ་བོ། ཧཱུྃ། དབུས་ཕྱོགས་འཁོར་ལོའི་གཞལ་ཡས་ནས། །ཟླ་གམ་དབང་ཆེན་ཨེ་དཀྱིལ་དུ། །བྱོལ་སོང་གཙོ་བརྒྱད་དྲེགས་པའི་སྟེང་། །ཐབས་ཤེས་ཉི་ཟླ་འོད་ཀྱི་དཀྱིལ། །མ་ཆགས་པདྨའི་གེ་སར་ལ། །བཅོམ་ལྡན་ཆེ་མཆོག་ཧེ་རུ་ཀ །ཡུམ་ཆེན་གནམ་ཞལ་དབྱིངས་ཕྱུག་མ། །གཉིས་མེད་འཁྲིལ་སྦྱོར་ཆ་ལུགས་ནི། །སྒེག་པ་དཔའ་བ་འཇིགས་སུ་རུང་། །རྒོད་དང་གཤེད་དང་སྙིང་རྗེ་རྔམ། །འབར་ཁྲོ་ཞི་སོགས་གར་དགུར་ལྡན། །སྐུ་ལ་དུར་ཁྲོད་ཆས་རྣམས་རྫོགས། །གསུང་ནི་དྲག་པོའི་སྔགས་སྒྲ་སྒྲོག །ཐུགས་ནི་སྒྲོལ་མཛད་སྲོག་དང་བཅས། །ཛྲབ་ཀྱི་སྐུ་གསུང་ཐུགས་རྒྱུད་བསྐུལ། ཕཊཿཀྱིས་སྤྲོས་པས་སྟོང་གསུམ་
གང་། །བསྡུས་པས་ཡུམ་གྱི་མཁའ་ལ་འཁྲིལ། །གསང་བའི་སྦུབས་ནས་ཐུགས་ཀར་ཐིམ། །མ་གསལ་བར་དུ་བསྐྱེད་ཅིང་སྒོམ། །མ་གྲུབ་བར་དུ་མི་གཏང་ངོ་། །ཨོཾ་བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊཿ ཅེས་གཙོ་མཆོག་གི་སྙིང་པོ་ནན་ཏན་དུ་བཟླ་ཞིང་། འཁོར་རྣམས་ལ་ཅི་ནུས་སྐབས་དང་བསྟུན་ནས་རིམ་པར་བཟླའོ། ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊཿ ཡང་དག་ཐུགས་ཀྱི་སྙིང་པོའོ། ཨོཾ་ཧྲཱིཥཱིྚ་ཝི་ཏྲི་ཏཱ་ན་ན་ཧཱུྃ་ཕཊཿ འཇམ་དཔལ་གཤིན་རྗེའི་སྙིང་པོའོ། །ཨོཾ་ཧ་ཡ་གྲྀ་ཝ་ཧུ་ལུ་ཧུ་ལུ་ཧཱུྃ་ཕཊཿ པདྨ་གསུང་གི་སྙིང་པོའོ། །ཨོཾ་བཛྲ་ཀི་ལི་ཀི་ལ་ཡ་ཧཱུྃ་ཕཊཿ ཕུར་པ་ཕྲིན་ལས་ཀྱི་སྙིང་པོའོ། ཨོཾ་གུ་ཧྱ་ཛྙཱ་ན་ཤྲཱི་ཧེ་རུ་ཀ་ཀྲོ་དྷི་ཤྭ་རི་ཧཱུྃ་ཕཊཿ མ་མོ་རྦོད་གཏོང་གི་སྙིང་པོའོ། །ཨོཾ་བཛྲ་མ་ཧཱ་གུ་རུ་སརྦ་ཧཱུྃ་ཕཊཿ རིག་འཛིན་སློབ་དཔོན་གྱི་སྙིང་པོའོ། །ཨོཾ་བཛྲ་ཙཎྜ་སརྦ་དུཥྚན་ཧཱུྃ་ཕཊཿ མཆོད་བསྟོད་ཡོངས་རྫོགས་ཀྱི་སྙིང་པོའོ། །ཨོཾ་བཛྲ་སརྦ་དུཥྚན་ཨེ་ཛབྷྱོ་ཧཱུྃ་ཕཊཿ དམོད་པ་དྲག་སྔགས་འདུས་པའི་སྙིང་པོའོ།
ཧཱུྃ། ཡང་སྤྲུལ་ཁྱུང་ཆེན་བཀའ་སྡོད་ཚོགས། །བཟླས་བརྗོད་བསྙེན་པའི་མཆོད་པ་བཞེས། ཨོཾ་ཁྲོམ་ག་རུ་ཌ་ཧཱུྃ་ཕཊཿ སརྦ་ཌཱཀྐི་ནི་ས་མ་ཡ་ཧྲིང་ཧྲིང་ཧཱུྃ་ཕཊཿ ཅེས། སྤྲུལ་པའི་ཁྱུང་ཆེན་དཀར་ནག་དང་། །དཔལ་གྱི་བཀའ་སྡོད་རྣམས་ཀྱི་སྲོག་སྔགས་ཀྱང་ཅུང་ཟད་བཟླའོ། །དེ་ལྟར་སྒྲུབ་པ་བཀའ་བརྒྱད་ཚོམ་བུ་དགུའི་ལྷ་ཚོགས་སོ་སོའི་ཛབ་བསྙེན་གྲུབ་པའི་མཐར། གསང་སྔགས་ཁྲོ་བོ་ཡོངས་འདུས་ཀྱི་སྙིང་པོ་བཀའ་བརྒྱད་བདུན་བརྒྱ་ཉེར་ལྔའི་སྤྱི་དྲིལ་བསྙེན་སྒྲུབ་ལས་སྦྱོར་གཅིག་ཏུ་དྲིལ་བའི་དྲག་སྔགས་ཆེན་མོ་སྤུ་གྲི་རེག་ཆོད་གནམ་ལྕགས་ཐོག་རྒོད་ལྟ་བུའི་བཟླས་པ་བྱ་བ་ནི། བདག་ཉིད་ལུས་ལྷའི་དཀྱིལ་འཁོར་ལྷ་ཚོགས་བདུན་བརྒྱ་ཉེར་ལྔ་ཡོངས་རྫོགས་རྣམས་ངག་སྔགས་ཀྱི་དཀྱིལ་འཁོར་དྲག་སྔགས་སོ་ལྔ་པ་ལྷ་ཐམས་ཅད་ཀྱི་ཞལ་ནས་འབྲུག་སྟོང་དུས་གཅིག་ལྡིར་བ་བཞིན་སྟོང་ཁམས་གང་བར་སྒྲོག་པ། སེམས་ཆོས་ཉིད་ཀྱི་དཀྱིལ་འཁོར་དུག་གསུམ་གཏན་སྤྲུགས་ཁམས་གསུམ་ཡོངས་སྒྲོལ་ཆེན་པོའི། ཐུགས་རྗེའི་སྟོབས་དང་རིག་རྩལ་གྱི་ངར་བསྐྱེད་དེ། བདག་ཉིད་ཀྱི་སྐུའི་བ་སྤུའི་བུ་ག་རེ་རེ་ཚུན་ཆད་ནས་ཡེ་ཤེས་མེའི་ཚ་ཚ་འགར་གྱི་ལྕགས་སྲེག་བརྡབ་པ་
ལྟར་འཕྲོས་ཤིང་མེ་སྤུངས་གིས་སྣང་སྲིད་ཁེངས་པས། ཕྱི་སྐྱེ་འགྲོ་སེམས་ཅན་གྱི་ལས་དང་ཉོན་མོངས་པའི་ཕུང་པོ། །ནང་སྒྲུབ་པོའི་རྣམ་རྟོག་བག་ཆགས་འཁྲུལ་འཛིན། བར་གདོན་བགེགས་འབྱུང་པོ་གནོད་བྱེད་ཀྱི་ཚུལ་དུ་སྣང་ཚད་སྲིད་ཚད་ཐམས་ཅད་གཞོན་ཏུ་བསྲེག །རྡུལ་དུ་རླགས། སྐྱེ་མེད་ཀྱི་དབྱིངས་སུ་ཐིམ་པར་དམིགས་ལ། དྲག་སྔགས་ཆེན་མོ་འདི་ཉིད་གནམ་ལྕགས་ཀྱི་ཐོག་ལྟར་བཟླའོ། །ཨོཾ་བཛྲ་མ་ཧཱ་ཀྲོ་དྷ་པདྨ་ཀྲོ་དྷི་ཤྭ་རི་བཛྲ་ཀཱི་ལི་ཀཱི་ལ་ཡ། མ་ཧཱ་ཡཀྴ་ཀཱ་ལ་རཱུ་པ་ཀརྨ་རཾ་རཾ་ཛྭ་ལ་རཾ་ཧཱུྃ་ཕཊཿ དེ་ནས་སྟོང་ཚིག་ཀྱི་མཆོད་པ་ནི། །ཡེ་ཤེས་ལྷ་ཚོགས་སྤྱན་འདྲེན་གཤེགས། །ཕྱི་ནང་གསང་བའི་མཆོད་ཚོགས་འབུལ། །སྐུ་གསུང་ཐུགས་ཡོན་ཕྲིན་ལས་བསྟོད། །ཉམ་ཆགས་འགལ་འཁྲུལ་ཅི་མཆིས་བཤགས། །མ་ཧ་པཉྩ་བ་ལིནྟ་རཀྟ་ཁཱ་ཧི། དེ་ནས་སླར་ཡང་ལྷ་ཚོགས་རྣམས་ལ་གཏང་རག་གི་ཚུལ་དུ་བསྟོད་པར་བྱ་བ་ནི། །དང་པོ་ཞི་བའི་ལྷ་ཚོགས་ལ་བསྟོད་པ་བྱ་སྟེ། ཧཱུྃ། བཅོམ་ལྡན་བདེར་གཤེགས་ཀུན་བཟང་རིགས་ལྔ་ཡབ། །གདུལ་པ་འདུལ་ཕྱིར་ཁྲག་འཐུང་སྐུ་ལྔར་སྟོན། །
བཟང་མོ་ལ་སོགས་ཀྲོ་དྷི་ཡུམ་དང་སྦྱོར། །སེམས་དཔའ་ལྕམ་དྲལ་མཐར་བྱེད་ཐུག་པ་དྲུག །དྲེགས་པ་འཇོམས་མཛད་གཏུམ་རྔམས་ཚོགས་དང་བཅས། །ཞི་བ་ཡོངས་རྫོགས་ལྷ་ལ་ཕྱག་འཚལ་བསྟོད། །མི་མངོན་དབྱིངས་ནས་གནས་འདིར་སྐུ་བསྐྱོད་ལ། །དམ་ཚིག་དཀྱིལ་འཁོར་འདི་ལ་བརྟན་པར་བཞུགས། །གཉིས་མེད་ངང་དུ་ཕྱག་འཚལ་མཆོད་པ་འབུལ། །སྨན་གཏོར་རཀྟ་སྦྱོར་དང་བསྒྲལ་མཆོད་བཞེས། །ཉམས་ཆག་འགལ་འཁྲུལ་ཕམ་ལྟུང་ཉེས་བྱས་བཤགས། །ཞི་རྒྱས་དབང་དྲག་ལས་བཞིའི་དངོས་གྲུབ་སྩོལ། །གཞན་སྤྲུལ་གནོད་བྱེད་ཐམས་ཅད་བཟློག་པ་དང་། །བླ་མེད་སྐུ་གསུང་ཐུགས་ཀྱི་དངོས་གྲུབ་སྩོལ། དེ་ནས་ཁྲོ་བོའི་ལྷ་ཚོགས་ཚོམ་བུ་དགུའི་དཀྱིལ་འཁོར་ལ་བསྟོད་པ་ནི། ཧཱུྃ། །བཅོམ་ལྡན་དཔལ་ཆེན་ཆེ་མཆོག་ཧེ་རུ་ཀ །གཉིས་མེད་ཡུམ་ཆེན་གནམ་ཞལ་དབྱིངས་ཕྱུག་འཁྲིལ། །རིགས་བཞི་ཧེ་རུ་ཡབ་ཡུམ་ཡོན་ཏན་སྲས། །སྤྲུལ་པའི་ཁྲོ་བཅུ་སྒོ་སྐྱོང་འཁོར་གྱིས་བསྐོར། །
བདེར་གཤེགས་དགོངས་འདུས་ཆེ་བའི་ཡོན་ཏན་རྒྱས། །ཆེ་མཆོག་ཡོངས་རྫོགས་ལྷ༴ བཅོམ་ལྡན་དཔལ་ལེན་བཛྲ་ཧེ་རུ་ཀ །གཉིས་མེད་ཡུམ་ཆེན་ཀྲོ་དྷི་ཤྭ་རི་འཁྲིལ། །ཁྲག་འཐུང་རིགས་བཞི་ཡབ་ཡུམ་ཐུགས་ཀྱི་སྲས། །གནས་དང་ཡུལ་གྱི་མ་ཚོགས་སྒོ་མར་བཅས། །དྲི་མེད་རྣམ་དག་ཐུགས་མཆོག་འགྱུར་བ་མེད། །ཡང་དག་ཡོངས་རྫོགས་ལྷ༴ བཅོམ་ལྡན་དཔེན་འཇམ་དཔལ་གཤིན་རྗེའི་གཤེད། །སྐུ་ལྔ་སྦྱར་དང་དུག་ལྔ་སྦྱོར་ཡུམ་འཁྲིལ། །གཤེད་བཞི་ཡབ་ཡུམ་སྐུ་ཡི་སྲས་དང་བཅས། །ཕྱོགས་སྐྱོང་གིང་བདུད་སྒོ་བཞི་ཕྲ་མེན་བསྐོར། །རབ་འཇིགས་རྔམས་པའི་སྐུ་མཆོག་ཁྱད་པར་ཆེ། །གཤིན་རྗེ་ཡོངས་རྫོགས་ལྷ་ལ༴ བཅོམ་ལྡན་དཔེན་རྟ་མགྲིན་པདྨ་དབང་། །པདྨ་གཟི་ལྡན་བདེ་ཆེན་ཡུམ་མཆོག་འཁྲིལ། །དབང་ཆེན་རིགས་བཞི་ཡབ་ཡུམ་གསུང་གི་སྲས། །ཕྲ་མེན་ཟིལ་གནོན་ཁྲོ་རྒྱལ་སྒོ་བར་བཅས། །གསུང་གི་དབང་ཕྱུག་རྟ་སྐད་ཕྱོགས་བཅུར་སྒྲོག །དབང་ཆེན་ཡོངས་རྫོགས་སྐུ༴ བཅོམ་ལྡན་དཔལ་ཆེན་
རྡོ་རྗེ་གཞོན་ནུ་ཆེ། །གསང་ཆེན་རྒྱས་མཛད་འཁོར་ལོ་རྒྱས་འདེབས་འཁྲིལ། །ཕྲིན་ལས་སྲས་བཞི་ཁྲོ་བཅུ་ཡབ་ཡུམ་བཅས། །ཟ་གསོད་མ་ཚོགས་མིང་པོ་སྒོ་བས་བསྐོར། །ཕྲིན་ལས་བདག་ཉིད་རྩལ་ཆེན་འགྲོ་བ་འདུལ། །ཕུར་པ་ཡོངས་རྫོགས་ལྷ༴ བཅོམ་ལྡན་དཔེན་བླ་མེད་ཧེ་རུ་ཀ །དགྱེས་མཛད་ཡུམ་ཆེན་ཉིད་ཞི་མུ་ཁ་ལེ། །རྟག་རྒྱལ་མ་ལྔ་བདེ་ཆེན་ཀུན་བསྐྱེད་སྲས། །ཡེ་ཤེས་རྗེ་མོ་སྨན་མོ་སྒོ་སྐྱོང་ཚོགས། །ལས་ཀྱི་བདག་མོ་མ་མོ་རྦོད་གཏོང་འགྱེད། །མ་མོ་ཡོངས་རྫོགས་ལྷ༴ བཅོམ་ལྡན་དཔེན་རིག་འཛིན་ཐོད་པ་རྩལ། །གཉིས་མེད་ཡུམ་མཆོག་རྡོ་རྗེ་རྣལ་འབྱོར་འཁྲིལ། །ཐུགས་ཀྱི་སྲས་མཆོག་སློབ་དཔོན་རིགས་བཞི་དང་། །དཔའ་བོ་དཔའ་མོ་སྒོ་བཞི་སྲུང་མཛད་བཅས། །རྒྱུད་ལུང་མན་ངག་འགྲོ་འདུས་རིག་པ་འཛིན། །རིག་འཛིན་ཡོངས་རྫོགས་ལྷ་ལ༴ དྲེགས་པ་ཀུན་འདུལ་ཁྲོ་རྒྱལ་མི་བཟད་པ། ཁམས་གསུམ་སྲིད་པ་སྤྱི་འདུས་ཡུམ་
མཆོག་འཁྲིལ། །ཐུགས་སྲས་ཕོ་ཉ་སྡེ་བཞི་ཡབ་ཡུམ་བཅས། །སྡེ་དཔོན་འཁོར་བཅས་སྒོ་སྐྱོང་དྲེགས་པའི་ཚོགས། །ཞི་རྒྱས་དབང་དྲག་ལས་རྣམས་ཅི་བཅོལ་བསྒྲུབ། །འཇིག་རྟེན་ཡོངས་རྫོགས་ལྷ༴ མཐུ་སྟོབས་རྩལ་ལྡན་རབ་གཏུམ་ཁྲོ་བོའི་རྒྱལ། །འབྱུང་ལྔའི་བདག་མོ་ཡུམ་ཆེན་སྐུ་ལ་འཁྲིལ། །ཐུགས་སྲས་སྔགས་བདག་ལས་མཁན་སྡེ་བཞིར་བཅས། །དམ་ཚིག་དབང་གིས་བསྟན་སྲུང་སྔགས་བདག་ཚོགས། །དྲེགས་པ་བཅོ་བརྒྱད་གདུག་པའི་མཚོན་ངར་ཅན། །དྲག་སྔགས་ཡོངས་རྫོགས་ལྷ་ལ༴ དུས་གསུམ་རྒྱལ་བ་ཡོངས་རྫོགས་སྤྱན་སྔ་རུ། །དམ་མནོན་རང་རྟགས་སྲོག་གི་སྙིང་པོ་ཕུལ། །བཀའ་སྩལ་གཉེར་བླངས་རྫུ་འཕྲུལ་གར་གྱི་བདག །མ་ལྟར་བྱམས་ཤིང་སྲིད་ལྟར་གདུངས་ལ་སོགས། །དཀྱིལ་འཁོར་ཚུལ་འཛིན་རྣལ་འབྱོར་ཡོངས་ལ་སྐྱོབས། །བཀའ་སྲུང་ཡོངས་རྫོགས་ལྷ་ལ༴ ཧཱུྃ། རྣམ་དག་ཡེ་ཤེས་ཐུགས་ཀྱི་དཀྱིལ་འཁོར་ནས། །འགྲོ་དོན་འདོད་དགུར་བསྒྱུར་བའི་གཙོ་
དང་འཁོར། །ཇི་ལྟར་སྤྲུལ་ཡང་ཡེ་ཤེས་རིག་པའི་རྩལ། །རང་ཤར་རང་གྲོལ་བདེ་ཆེན་གཡུང་དྲུང་ལྷ། །རྣམ་དག་ཆོས་ཀྱི་དབྱིངས་ལས་མ་གཡོས་པས། །ཐམས་ཅད་ཆོས་སྐུར་ཡོངས་རྫོགས་ལྷ་ལ་བསྟོད། །བདུན་བརྒྱ་ཉེར་ལྔ་རྒྱལ་བ་ཐུགས་དམ་ཅན། །མི་མངོན་དབྱིངས་ནས་གནས་འདིར་སྐུ་བསྐྱོད་ལ། །ཞེས་པ་ལ་སོགས་པའི་འདོད་གསོལ་རྣམས་གོང་གི་ཞི་བའི་མཇུག་དང་མཚུངས་པར་བྱའོ། །དེ་ལྟར་ཛྲབ་བསྙེན་བསྟོད་པ་དང་བཅས་པ་གྲུབ་རྗེས། ཐུན་ལ་མཚམས་སུ་དངོས་གྲུབ་བླང་བ་ནི། བདག་ཉིད་ཀྱི་ཐུགས་སྲོག་ཧཱུྃ་ལས་འོད་ཟེར་འཕྲོས་ཏེ་རྒྱལ་བའི་དཀྱིལ་འཁོར་རབ་འབྱམས་ཡི་དམ་ལྷ་དང་མཁའ་འགྲོ་དམ་ཅན་ཆོས་སྲུང་ཐམས་ཅད་ལ་ཕོག་པས་ཐུགས་དམ་གྱི་རྒྱུད་བསྐུལ། སོ་སོའི་སྐུ་གསུང་ཐུགས་ཀྱི་གནས་རྣམས་ནས་བྱིན་རླབས་མཆོག་ཐུན་གྱི་དངོས་གྲུབ་ཐམས་ཅད་འདིར་ལྔ་ལྡན་གྱི་ཚུལ་དུ་བྱུང་ནས་བདག་གི་གསུམ་དུ་ཐིམ་པར་བསམ་ལ། ཧཱུྃ། ལྷ་དང་རིག་འཛིན་མཁའ་འགྲོ་དགོངས། །འདིར་འདུས་རིག་འཛིན་བདག་ཅག་རྣམས། །སྨིན་གྲོལ་གཉིས་ཀྱི་རྒྱུད་སྦྱངས་ཤིང་། །སྐྱེད་རྫོགས་གཉིས་ཀྱི་ལས་
གཞུང་སྲོང་། །བསྙེན་སྒྲུབ་རྣམ་གསུམ་མཐའ་རུ་ཕྱིན། །ལས་དང་ཐུགས་རྗེ་མཐུན་པ་ཡི། །ཞི་རྒྱས་དབང་དྲག་ཡིད་བཞིན་གཏེར། །སྐུ་གསུང་ཐུགས་ཀྱི་དངོས་གྲུབ་སྩོལ། ཨོཾ་ཨཱཿཧཱུྃ། །ཀཱ་ཡ་ཝཀྩིཏྟ་སིདྡྷི་ཧཱུྃ་ཨཱཿ དེ་ཡན་ཆད་ཀྱི་དངོས་གཞིའི་ལས་རིམ་ཉེར་ལྔ་རྣམས་གྲུབ་ནས།། ༈ །།གསུམ་པ་རྗེས་ཀྱི་ལས་རིམ་བཅུ་གཅིག་ནི། རྩ་ཐོ་ལས། ཆེ་བ་བསྐྱེད་ཅིང་། ཕྲིན་ལས་བསྐུལ། ཚོགས་དང་། ལྷག་ཆོག གཏོར་སྐྱོང་བྱ། གཏོར་ཟོར། བསྟན་མ་རྣམ་བཞིའི་བྲོ། དཀྱིལ་འཁོར་བསྡུ། བཀང་རྒྱུན་སྤྱོད་བྱ། ཞེས་གསུངས་པའི་དང་པོར། ཆོག་གཞུང་ལ་ལར་ཐུགས་བསམ་བསྐུལ་བ་སོགས་ཚོགས་ཀྱི་ལས་རིམ་གྲུབ་པའི་རྗེས་ཐོག་ཏུ་འབྱུང་མོད་ཀྱི། འདིར་ནི་བསྙེན་སྒྲུབ་ལས་གསུམ་གྱི་གོ་རིམ་དང་བསྟུན་པས་སྐབས་འདིར་བྱུང་བར་སྣང་བས། དེ་ལས་ཐོག་མར་བཀའ་སྡོད་ཕོ་ཉའི་ཚོགས་ལ་ཕྲིན་ལས་གཞོལ་བར་བྱེད་པ་ལ་རང་ཉིད་ལྷའི་ང་རྒྱལ་དང་མ་ལྡན་ན་སྲུང་མ་དམ་ལ་མི་འདུ། ཟིལ་གྱིས་མི་ནོན། ལས་ལ་མི་ཁོལ་བའི་ཕྱིར། བདག་ཉིད་ཡེ་གདོད་མ་ནས་རང་བཞིན་ཆོས་སྐུ་ཀུན་ཏུ་བཟང་པོའི་ངོ་བོར་ལྷུན་གྱིས་གྲུབ་པའི་
རང་གདངས་འགག་མེད་ཀྱི་རོལ་པ་ལས་གཟུགས་སྣང་ཐམས་ཅད་སྐུ། སྒྲ་སྒྲག་ཐམས་ཅད་སྔགས། དྲན་རྟོགས་ཐམས་ཅད་ཆོས་ཉིད་ཀྱི་རྣམ་རོལ་ཡིན་ལ་ཡིན་པར་ཤེས་པའི་ང་རྒྱལ་གྱི་དཔའ་གདེངས་བསྐྱེད་ལ། ཧཱུྃ། སྣང་སྲིད་ཐམས་ཅད་གཞལ་ཡས་ཁང་། །གཟུགས་སྣང་ཐམས་ཅད་ཧེ་རུ་ཀ །ཐམས་ཅད་ཐམས་ཅད་བྲན་དུ་ཁོལ། །ང་ལས་ཆེ་བ་སུ་ཡང་མེད། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། ཞེས་ཆེ་བ་བསྐྱེད་པས་སྣང་སྲིད་ཐམས་ཅད་མངའ་འོག་ཏུ་འདུས་པས་ཅི་བསྒོ་བའི་བཀའ་ཉན་པར་བསམ་མོ།། ༈ །།གཉིས་པ་ཕྲིན་ལས་བསྐུལ་བ་ནི། ཚོམ་བུ་དགུའི་ལྷ་ཚོགས་རྣམས་ལ་འགྲོ་བའི་དོན་དུ་ཐུགས་དམ་བསྐུལ་བ་ཙམ་གྱིས། ལྷ་ཐམས་ཅད་ལས་རང་འདྲའི་སྤྲུལ་པ་གྲངས་མེད་ཉི་ཟེར་གྱི་རྡུལ་བཞིན་སྤྲོས་ཏེ། འཇིག་རྟེན་གྱི་ཁམས་གང་བས་འཇིགས་བརྒྱད་ཞི་བ་དང་། འབྱོར་དྲུག་རྒྱས་པ་དང་། མོས་པ་རྣམ་བཞི་དབང་དུ་བསྡུ་བ་དང་། དགྲ་གེགས་འབྱུང་པོ་རྡུལ་དུ་རློག་པ་སོགས་ཕྲིན་ལས་གང་འདོད་ཐོགས་མེད་དུ་བསྒྲུབ་པར་དམིགས་ལ། ཧཱུྃ། ཆོས་སྐུ་སྐྱེ་མེད་ངང་ཉིད་ལས། །གཟུགས་སྐུ་འཇིགས་པའི་ཆ་ལུགས་བཞེངས། །ཞི་རྒྱས་དབང་དང་མངོན་སྤྱོད་ལས། །
བཅོལ་བའི་ཕྲིན་ལས་གྲུབ་པར་མཛོད། ཧཱུྃ་སརྦ་དུཥྚན། ཨོཾ་ཤནྟིང་། པུཔུཥྚི༚། ཨ་ཝ་ཤམ། ཧཱ་མ་ར་ཡ་ཕཊ། སརྦ་སིདྡྷི་ཀུ་རུ་ཧཱུྃ་རྦོད་ཟོར་སརྦ་ཟློག་བྷྱོཿ ༈ །།གསུམ་པ་ཚོགས་ཀྱི་ལས་རིམ་རྣམས་ཀྱི་དང་པོར་བསང་སྦྱང་། བྱིན་གྱིས་བརླབས་པ་ནི། འདོད་ཡོན་གྱི་ལོངས་སྤྱོད་ཐབས་ཤེས་བཟའ་བཏུང་གཟུགས་སྒྲ་དྲི་རོ་རེག་བྱ་མ་ཚང་བ་མེད་ཅིང་སེར་སྣ་དང་རློམ་སེམས་ཀྱིས་མ་བསླད་པར་བསགས་ནས་ཞིང་ཆེན་གཡང་གཞིའམ་སྟག་པགས་སོགས་ཀྱི་གདན་ཁར་བཤམས་ལ། རྡོ་རྗེའི་ཕྱག་མཚན་དང་བཅས་པས་བདུད་རྩིའི་ཟེར་གྱིས་ཁྱབ་པར་འཐོར་ཏེ། ཨོཾ་ཨུཙྪུཥྨ་བཻ་ཏཱ་ལི་ཀྲོ་དྷ་ནཱི། སརྦ་དྲཱ་ཕྱཾ་སཾ་ཤོ་དྷ་ནི་ཧཱུྃ་ཕཊཿསྭཱ་ཧཱ། ཞེས་ཁྲོ་མོ་ཉེས་སྒྲིབ་ཟ་བྱེད་མའི་སྔགས་ཀྱིས་ཚོགས་ཀྱི་བགེགས་སྦྱང་། དེ་ནས་རང་རིག་མ་བཅོས་སྤྲོས་མེད་རྡོ་རྗེ་ལྟ་བུའི་ཏིང་འཛིན་གྱིས་འཁོར་འདས་བཟང་ངན་གཙང་རྩོགས་སོགས་ཀྱི་རྣམ་པར་རྟོགས་པ་བདེན་མེད་སྒྱུ་མར་ཤེས་པའི་ངང་ནས། བདག་སྐྱེད་ཀྱི་ཐུགས་སྲོག་ཧཱུྃ་ལས་ཡི་གེ་རཾ་ཡཾ་ཁཾ་འཕྲོས་པ་ལས་བྱུང་བའི་ཡེ་ཤེས་ཀྱི་མེ་རླུང་ཆུ་གསུམ་གྱིས་དྲི་མ་སྦྱང་། ཨཱོཾ་
ཨཱཿཧཱུྃ་གསུམ་གྱིས་ཟག་མེད་ཀྱི་ལོངས་སྤྱོད་དུ་བྱིན་བརླབས་པར་མོས་ལ། ཧཱུྃ། རྡོ་རྗེ་ལྟ་བུའི་ཡེ་ཤེས་ཀྱིས། །ཆོས་ཀུན་ཐམས་ཅད་སྒྱུ་མར་རིག །རིག་པའི་ཡེ་ཤེས་རྃ་ཡྃ་ཁྃ། །ཚོགས་ཀྱི་དངོས་པོ་སྲོག་སྦྱང་བཀྲུ། རྃ་ཡྃ་ཁྃ། རྃ་སྥ་ར་ཎ་ཕཊཿ སྃ་ཧ་ར་ཎ་ཧཱུྃ། ཡྃ་སྥ་ར་ཎ་ཕཊཿ སྃ་ཧ་ར་ཎ་ཧཱུྃ། ཁྃ་སྥ་ར་ཎ་ཕཊཿ སྃ་ཧ་ར་ཎ་ཧཱུྃ། ཨོཾ་ཨཱཿཧཱུྃ། །ལྷར་གསལ་ཐུགས་ལས་སྦྱང་ཡིག་འཕྲོས། རྃ། རཾ་ལས་མེ་བྱུང་དངོས་འཛིན་བསྲེག །ཡྃ། ཡཾ་ལས་རླུང་འབྱུང་བག་ཆགས་གཏོར། ཁྃ། ཁཾ་ལས་ཆུ་བྱུང་གཉིས་འཛིན་བཀྲུ། །རང་ཉིད་ལྷ་ཡི་ཐུགས་ཀ་ནས། །བྱིན་གྱིས་རློབས་པའི་ཡི་གེ་སྤྲོ། ཧཱུྃ། ཧཱུྃ་གིས་རྣམ་པར་རྟོག་པ་སྦྱང་། ཨཱཿ ཨཱཿཡིས་ཡེ་ཤེས་བདུད་རྩིར་བསྒྱུར། ཨོཾ། ཨོཾ་གིས་འདོད་ཡོན་སྣང་། ཧྲཱིཿ ཧྲཱིཿཡིས་ཐུགས་ཀར་ལྷ་ཚོགས་དགྱེའོ། ཞེས་བྱིན་བརླབ་ཅིང་།། ༈ །།དེ་ནས་ཚོགས་མགྲོན་སྤྱན་དྲངས་
དྲངས་ཤིང་ཕྱག་མཆོད་བྱ་བ་ནི། བདག་ཉིད་ཀྱི་ཐུགས་ཀ་ནས་ཚད་མེད་བཞིའི་ལྷ་མོ་དཔག་ཏུ་མེད་པ་འཕྲོས་པས། རང་བཞིན་གྱི་གནས་རྣམས་ནས་རྒྱལ་བ་སྲས་བཅས་བླ་མ་ཡི་དམ་མཁའ་འགྲོ་དམ་ཅན་མཐའ་དག་སྤྱན་དྲངས་ནས་མདུན་གྱི་ནམ་མཁར་བཞུགས་པར་མོས་ལ། ཧཱུྃ། རྒྱལ་བ་ཞི་ཁྲོའི་ལྷ་ཚོགས་རྣམས། །ཡེ་ཤེས་རོལ་པའི་ཚོགས་ལ་གཤེགས། །དམ་ཚིག་དཀྱིལ་འཁོར་གནས་འདིར་བཞུགས། །བདག་དང་གུས་པས་ཕྱག་འཚལ་ལོ། །གཟུགས་སྒྲ་དྲི་རོ་རེག་བྱ་ཆོས། །མཛེས་སྙན་དྲི་ཞིམ་རོ་བདའ་ཞིང་། །རེག་བདེ་གླུ་གར་ཆོས་ཡིད་ཚིམ། །འདོད་ཡོན་མཆོད་པས་ཐུགས་དམ་བསྐང་། །དེ་ནས་ཚོགས་མཆོད་ཀྱི་བསྐང་བ་བྱ་བའི་སྔོན་དུ་བསྐང་ཡུལ་རྣམས་ལ་སྙན་གསན་དབབ་པའི་དགོངས་གསོལ་ནི། ཧཱུྃ། ཞི་ཁྲོ་བདེར་གཤེགས་ཡོངས་རྫོགས་ལྷ། །འགྲོ་ལ་ཕན་མཛད་ཐུགས་རྗེའི་བདག །སེམས་ཅན་ཡོངས་ཀྱི་གཉེན་གཅིག་པུ། །ཀུན་ནས་བདག་ལ་དགོངས་སུ་གསོལ། །ཞེས་པའི་མཐར་བཤགས་སྐོངས་དངོས་ནི། །ཚོར་དང་མ་ཚོར་བའི་དམ་ཚིག་ཉམས་ཆག་མཐའ་དག་མནོང་
དང་བཅས་པས་མཐོལ་བཤགས་བྱ་སྟེ། ཧཱུྃ། ཤར་ནས་བཛྲ་ཨཀྵོ་བྷྱ། །རྡོ་རྗེ་རིགས་ཀྱི་ཐུགས་དམ་ལས། །ཞེ་སྡང་དམ་ཚིག་ཉམས་པོ་འཚལ། །འདི་ཡང་མི་འཆབ་མཐོལ་ལོ་བཤགས། །ལྷོ་ནས་རཏྣ་སམྦྷ་ཝ། །རིན་ཆེན་རིགས་ཀྱི་ཐུགས་དམ་ལས། །ང་རྒྱལ་དམ་ཚིག་ཉམས་པོ་འཚལ། འདི་ཡང་མི་འཆབ༴ ནུབ་ནས་པདྨ་དེ་ཝ་ཧྲཱིཿ པདྨ་རིགས་ཀྱི་ཐུགས་དམ་ལས། །འདོད་ཆགས་དམ་ཚིག་ཉམས་པོ་འཚལ། འདི་ཡང་༴ བྱང་ནས་ཨ་མོ་བྷ་སིདྡྷི༴ ལས་ཀྱི་རིགས་ཀྱི་ཐུགས་དམ་ལས། །ཕྲ་དོག་དམ་ཚིག་ཉམས༴ འདི་ཡང་༴ དབུས་ནས་བཻ་རོ་ཙ་ན་ཨོཾ། དེ་བཞིན་རིགས་ཀྱི་ཐུགས་དམ་ལས། །གཏི་མུག་དམ་ཚིག་ཉམས༴ འདི་ཡང་༴ ཡང་ཡང་ཡང་མི་བྱེད་མཐོལ་ལོ་བཤགས། ལང་ལང་ལང་མི་འཆབ་མཐོལ་ལོ་བཤགས། ཧཱུྃ། རྩ་བའི་དམ་ཚིག་གསོ་བའི་ཕྱིར། །མཆེད་དང་སློབ་དཔོན་ཐུགས་དམ་བསྐང་། །མི་སྤང་དམ་ཚིག་གསོ་བའི་ཕྱིར། གཉིས་སུ་མེད་པའི༴ དང་དུ་བླང་བའི་དམ་ཚིག་ལས། །ཉམས་པ་གསོ་བར་བྱ་བའི་ཕྱིར།
དམ་རྫས་ལྔ་ཡིས་ཐུགས་དམ་བསྐང་། །སྤྱད་པར་བྱ་བའི་དམ་ཚིག་ལས། ཉམས་པ་གསོ༴ སྦྱོར་དང་སྒྲོལ་བའི་ཐུགས་དམ་བསྐང་། སྒྲུབ་པར་བྱ་བའི་དམ་ཚིག་ལས། ཉམས་པ་གསོ༴ རིགས་ལྔ་དག་པས་ཐུགས་དམ་བསྐང་། ཤེས་པར་བྱ་བའི་དམ་ཚིག་ལས། ཉམས་པ༴ ཕུང་པོ་ཞིག་ཁྲོལ་འདི་ཡི་ཐུགས་དམ་བསྐང་། ཧཱུྃ། བསྐང་བ་མེད་དེ་ཁམས་གསུམ་ཡོངས་ཀྱིས་བསྐང་། །སྦྱོར་བ་མེད་དེ་སྲིད་གསུམ་ཡོང་ལ་སྦྱོར། །སྒྲོལ་བ་མེད་དེ་དུག་གསུམ་ཡེ་ནས་སྒྲོལ། །ཡེ་སྦྱོར་ཡེ་སྒྲོལ་ཆེན་པོས་ཐུགས་དམ་བསྐང་། །ཐུགས་དམ་གཉན་པོ་བསྐང་བའི་དམ་རྫས་ནི། །རྩ་བརྒྱད་སྟོང་ལས་སྦྱར་བའི་བདུད་རྩི་དང་། །ཁྱད་པར་རྨད་དུ་བྱུང་བའི་གཏོར་མ་དང་། །འཁོར་བ་རྒྱུ་ལས་བསྒྲལ་བའི་རཀྟ་དང་། །རྣམ་དག་རྒྱུད་ལས་བྱུང་བའི་བམ་ཆེན་དང་། །འབྲུ་བཅུད་སྟོང་ལས་སྦྱར་བའི་ཛཱ་གད་དང་། །ཕྱི་ནང་མཆོད་པའི་ཚོགས་ཀྱི་ཡོ་བྱད་ཀྱིས། །བཀའ་རྒྱུད་བླ་མ་རྣམས་ཀྱི་ཐུགས་དམ་བསྐང་། །ཞི་བ་ལྷུན་གྱིས་གྲུབ་པའི་དཀྱིལ་འཁོར་ནས། །བཞི་བཅུ་རྩ་གཉིས་རྒྱལ་བའི་ཐུགས་དམ་བསྐང་། ཁྲོ་བོ་རོལ་པའི་
དཀྱིལ་འཁོར་ཆེན་པོ་ནས། །ཆེ་མཆོག་ཡོན་ཏན་ལྷ་ཚོགས༴ ཁྲག་འཐུང་རོལ་པའི༴ ཡང་དག་ཐུགས་ཀྱི་ལྷ༴ གཤིན་རྗེ་རོལ་པའི་དཀྱིལ་འཁོར༴ འཇམ་དཔལ་སྐུ་ཡི༴ དབང་ཆེན་རོལ་པའི༴ པདྨ་གསུང་གི༴ ཕུར་པ་རོལ་པའི༴ ཕུར་པ་ཕྲིན་ལས་ལྷ༴ ཤ་ཁག་རྒྱ་མཚོར་འཁྱིལ་བའི་དཀྱིལ་འཁོར་ནས། མ་མོ་རྦོད་གཏོང་༴ ཐུགས་རྗེ་གདུང་ཚོབ་སྐུ་ཡི་དཀྱིལ་འཁོར་ནས། རིག་འཛིན་བླ་མའི་ལྷ༴ དུག་ལྔ་མེ་ལྟར་འབར་བའི༴ འཇིག་རྟེན་མཆོད་བསྟོད༴ གཏུམ་དྲག་མེ་ལྟར་འབར་བའི་དཀྱིལ་འཁོར་ནས། དམོད་པ་དྲག་སྔགས་ལྷ༴ དཀྱིལ་འཁོར་དགུ་ཡི་བར་འཁྱམ་འཁོར་ཡུག་ནས། །བཀའ་སྲུང་དམ་ཅན་རྒྱ་མཚོའི་ཐུགས་དམ་བསྐང་། །ཞིང་ཆེན་བཅལ་དུ་བཀྲམ་པའི་དཀྱིལ་འཁོར་ནས། །ཕོ་ཉ་ལས་བྱེད་ཚོགས་ཀྱི༴ སངས་རྒྱས་བསྟན་པ་བསྲུང་བར་ཞལ་བཞེས་པའི། །སྔགས་བདག་སྡེ་དཔོན་སུམ་ཅུའི༴ ཕོ་རྒྱུད་མགོན་པོའི་ཚོགས་ཀྱི༴ མ་རྒྱུད་ལྷ་མོའི་ཚོགས་ཀྱི༴ གནོད་སྦྱིན་ནོར་ལྷའི་ཚོགས༴ དྲང་སྲོང་གཟའ་ཡི་ཚོགས་ཀྱི༴
དམ་ཅན་དཔེ་སྲོག་གཙང་གསུམ་ཐུགས་དམ་བསྐང་། །ཡུལ་ལྷ་གཞི་བདག་རྣམས་ཀྱི་ཐུགས་དམ་བསྐང་། ཨོཾ་ཨཱཿཧཱུྃ། རྒྱལ་བ་ཞི་ཁྲོ་རྡོ་རྗེ་སློབ་དཔོན་དང་། །བདེར་གཤེགས་ཡོངས་རྫོགས་སྲུང་མ་དམ་ཚིགས་ཅན། །སྐུ་གསུམ་གདུང་ཚོབ་རྡོ་རྗེ་ལྕམ་དྲལ་མཆེད། །དཔང་གྱུར་སྐྱབས་མཆོག་མ་ལུས་དགོངས་སུ་གསོལ། །བདག་ནི་མ་རིག་ལུས་དང་ངག་སེམས་ཀྱིས། །སློབ་དཔོན་མཆེད་སོགས་སྐུ་སྨོད་ངན་སྨྲ་ཞིང་། །ཡི་དམ་སྔགས་དང་ཕྱག་རྒྱ་གསང་བའི་བསྒྲགས། །རྩ་བའི་དམ་ལས་འགལ་གྱུར་མཐོལ་ལོ་བཤགས། །ཤེས་བྱ་ལྔ་དང་སྤྱད་པར་བྱ་བ་ལྔ། །མི་སྤང་ལྔ་དང་བསྒྲུབ་པར་བྱ་བ་ལྔ། །དང་ལེན་ལྔ་སོགས་ཡན་ལག་དམ་ཚིག་རྣམས། །ཉམས་གྱུར་རང་མནོང་འགྱོད་པ་མཐོལ་ལོ་བཤགས། །སྔགས་ལ་ཐེ་ཚོམ་བླ་མེད་ཐེག་པ་སྨོད། །ལྟ་སྤྱོད་ཡ་བྲལ་བསྙེན་སྒྲུབ་གཞུང་མ་སྲོང་། །ལོང་ཡོད་ལེ་ལོས་དུས་ཀྱི་མཆོད་པ་ཆག །སྡོམ་གསུམ་ཐུན་མོང་དམ་ཉམས་མཐོལ་ལོ་བཤགས། །རིགས་པའི་རྩལ་ཆུང་སྙིང་པོའི་དོན་མ་རྟོགས། །སྒོམ་
པའི་སྲན་ཆུང་གནས་ལུགས་སོ་མ་ཐུབ། །བློ་ཡི་སྟོབས་ཆུང་སྤྱོད་པའི་བོག་མ་ཐོན། །ལེགས་སམ་སྤྱད་ཀྱང་དོན་ལ་ཐུགས་འགལ་བསགས། །འབྲས་བུ་ཡིད་སྨོན་ལུས་པ་མཐོལ་ལོ་བཤགས། ཡིག་བརྒྱའང་བརྗོད། ཧཱུྃ། དུར་ཁྲོད་གསང་བ་མཆོག་གི་དཀྱིལ་འཁོར་འདིར། །གསང་བའི་ཕོ་བྲང་གཞུང་བཞིན་བཀོད་ནས་ཀྱང་། །སྒྲུབ་རྫས་གཉན་པོ་ཚུལ་བཞིན་བཀྲམ་ལགས་ན། །རྒྱལ་བ་ཞི་ཁྲོའི་ཐུགས་དམ་གཉན་བསྐོངས་ཏེ། །རྣལ་འབྱོར་བདག་ལ་གཡར་དམ་གསོར་སྩོལ་ཅིག །ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ། དེ་ནས་ཚོགས་ཀྱི་ཡོ་བྱད་ཆེ་ཆུང་ཇི་ཙམ་ཡོད་པ་དེ་ཐམས་ཅད་གསིལ་ནས་མང་དུ་སྤྲོས་ལ། དཀྱིལ་འཁོར་པ་ལ་ཇི་ཙམ་འབུལ་རྒྱུ་དེ་ལའང་རིམ་པ་གསུམ་སྟེ། དངོས་ཕུད། བར་པ་ཉམམ་ཆགས་བཤགས་རྟེན། ཐ་མས་གནོད་བྱེད་བསྒྲལ་སྟབས་བྱ་རྒྱུ་དང་། བར་དུ་སྒྲུབ་པ་པོ་རྣམས་དངོས་གྲུབ་ཏུ་ལོངས་སྤྱད་རྒྱུ་དང་། ཚོགས་ལྷག་ལ་ཡང་ཡར་གནས་ཀྱི་མགྲོན་རྣམས་ལ་གཙང་ལྷག་དང་། མར་གནས་རྣམས་ལ་སྒྲུབ་པ་པོ་རྣམས་ཀྱི་ལོངས་སྤྱོད་པའི་
ལྷག་མ་བསྡུ་བའམ། འོན་ཀྱང་དིང་སང་ནི་ཆོ་ག་བ་ནུས་ལྡན་དགོན་པའི་གཤིས་ཀྱིས། རྡོ་རྗེ་སློབ་དཔོན་གཅིག་པུའི་བཞེས་ལྷག་ལ་བརྟེན་པའི་ཕྱག་སྲོལ་ཉིད་ལེགས་པར་སྣང་ངོ་། །དེ་ལས་ཐོག་མར་ཚོགས་ཕུད་རིམ་པ་གསུམ་གྱི་དང་པོ་ཚོགས་ཀྱི་རྩེ་མོ་དང་བཟའ་བཏུང་ཐམས་ཅད་ཀྱི་ཕུད་བསྡུས་ནས་རིན་ཆེན་སྣོད་དུ་ཡུངས་རེ་དཀྱིལ་འཁོར་རམ་གཏོར་མའི་དྲུང་དུ་འབུལ་ཞིང་། ཚོགས་ཀྱི་མཆོད་པ་དེ་ལས་གཟུགས་སྒྲ་དྲི་རོ་རེག་བྱའི་མཆོད་པ་ཐོགས་པའི་ལྷ་མོ་གྲངས་མེད་འཕྲོས་པས་མཆོད་ཡུལ་ལྷ་ཚོགས་ཐམས་ཅད་མཉེས་པའི་མཆོད་པ་འབུལ་བར་དམིགས་ཤིང་། ཧཱུྃ། བླ་མེད་མཆོག་གི་མཆོད་སྦྱར་བས། །ཡེ་ཤེས་ལྔ་ཡི་འོད་ཟེར་འཕྲོ། །འདོད་ཡོན་ལྷ་མོས་རབ་བརྒྱན་འབུལ། །དམ་སྐོངས་དབང་དང་དངོས་གྲུབ་སྩོལ། ཨོཾ་ན་མསྶ་རྤ་ཏ་ཐཱ་ག་ཏེ། བྷྱོ་བི་ཤྭ་མུ་ཁེ་བྷྱཿ སརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ། ག་ག་ན་ཁ་སྭ་ཧཱ། ཚོགས་ཕུད་བར་པ་ཡང་སྔར་བཞིན་གཏོར་མའི་དྲུང་དུ་ཕུལ་ཞིང་བཤགས་ཚིག་བརྗོད་པས། ཚོགས་གཏོར་དང་མཆོད་པའི་དངོས་པོ་ཞེན་ཅིང་མ་ཚང་བ་དང་སྒོ་གསུམ་གྱི་སྤྱོད་པ་ལ་སོགས་པའི་ཉེས་སྐྱོན་དག་ཅིང་ཐུགས་
དམ་བསྐོངས་པར་མོས་ལ། ཧཱུྃ། མ་རིག་བདག་ཅག་ལུས་ངག་སེས། །བག་མེད་དམ་འགལ་འབྱོར་ཚོགས་ཆུང་། །བླ་མ་ཡི་དམ་མཁའ་འགྲོ་ཡི། །ཐུགས་དང་འགལ་གྱུར་བཟོད་པར་གསོལ། ཨ་ཧོ་མ་ཧཱ་སུ་ཁ་ས་མ་ཡ་ཧོ། ཚོགས་ཕུད་ཐ་མ་ལ་བསྒྲལ་སྟབས་བྱ་བ་ནི་དེ་ཡང་སྒྲུབ་ཆེན་ནམ། གཏོར་ཟློག་སོགས་དྲག་ལས་རྒྱས་པར་བྱ་བའི་སྐབས་དག་ཏུ་ནི་ལིངྒ་སོགས་བཅའ་གཞི་ཚང་བ་དང་། ཕུར་ཐུན་ཚོམ་བུར་བསྐུལ་བ་སོགས་ག་བ་ས་ལས་བརྒྱད་རྫོགས་པར་བྱ་དགོས་མོད་ཀྱི། ལས་གཞུང་རྒྱུན་ཁྱེར་གྱི་སྐབས་འདིར་ནི་ཚོགས་ཐ་མ་ལ་བརྟེན་ནས་དགུག་བསྒྲལ་སྟབས་གསུམ་མདོར་བསྡུས་ཙམ་བྱ་བ་ཡིན་ཏེ། ཚོགས་ཕུད་ཐ་མ་དེ་ཉིད་ཟན་དང་ཤ་ཁྲག་རུས་གསུམ་གཙོ་བོར་སྤུངས་ནས་ལྕགས་ཟེར་ལྟ་བུ་དྲག་པོའི་སྣོད་གཅིག་ཏུ་བཤམས་ལ། སྒྲོལ་བའི་ཕྱག་མཚན་ལྕགས་ཕུར་སོགས་ཐང་གསར་ནས། བརྗོད་ཚིག་དང་མཐུན་པའི་ཏིང་འཛིན་གསལ་ངར་དང་ལྡན་པས་བདག་ཉིད་གཙོ་བོའི་ཐུགས་ཀ་ནས་སྤྲུལ་པའི་ཆེ་མཆོག་བཛྲ་ཀཱི་ལ་ཡ་མཐིང་ནག་ཕྱག་གཉིས་ཕུར་བུ་འདྲིལ་ཞིང་། སྐུ་སྟོད་ཁྲོ་བོ་
ཆེན་པོ་ལ་སྐུ་སྨད་གནམ་ལྕགས་ཀྱི་ཕུར་པ་རབ་ཏུ་རྣོ་བས་གཏམས་པ་མེ་སྤུངས་ཀྱི་ཀློང་ན་རྔམས་པར་བཞུགས་པའི་མདུན་ན། ལྕགས་ཀྱི་ཁང་སྒྲོམ་སྒོ་མེད་འཇིགས་སུ་རུང་བའི་ནང་དུ་གནོད་བྱེད་བསྒྲལ་བའི་ཞིང་དུ་གྱུར་པ་གང་ཡིན་དེ་དག་དབང་པོ་སྐྱེ་མཆེད་ཚང་ཞིང་ཡན་ལག་ལྕགས་སྒྲོག་གིས་བསྡམས་པ་མངོན་སུམ་དུ་གསལ་བར་གྱུར། ན་མོ། །རྗེ་བཙུན་རྩ་བ་དང་རྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི༴ དགེ་འདུན་གྱི༴ གསང་སྔགས་དང་རིགས་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་དང་ཏིང་ངེ་འཛིན་གྱི་བདེན་པ་དང་། ཡི་དམ་ཞི་ཁྲོ་རབ་འབྱམས་སྒྲུབ་པ་བཀའ་བརྒྱད་ལྷ་ཚོགས་བདུན་བརྒྱ་ཉེར་ལྔ་སྤྲུལ་འཁོར་དང་བཅས་པའི་བདེན་པ་དང་། གནས་གསུམ་དཔའ་བོ་མཁའ་འགྲོ་ཆོས་སྲུང་བཀའ་སྡོད་དམ་ཅན་རྒྱ་མཚོ་དཀར་ཕྱོགས་ཡུལ་ལྷ་གཞི་བདག་དང་བཅས་པའི་བདེན་
པ་དང་། དོན་དམ་ཆོས་ཀྱི་དབྱིངས་རྣམ་པར་དག་ཅིང་ཀུན་རྫོབ་བརྟེན་ཅིང་འབྲེལ་བར་འབྱུང་བ་རྒྱུ་འབྲས་བསླུ་བ་མེད་པའི་བདེན་པ་ཆེན་པོའི་སྟོབས་ལ་བརྟེན་ནས། སྤྱིར་སངས་རྒྱས་ཀྱི་བསྟན་པ་བཤིག་པ། དཀོན་མཆོག་གི་དབུ་འཕང་སྨོད་པ། དགེ་འདུན་གྱི་སྤྱི་དགྲ་བྱེད་པ། སེམས་ཅན་ཡོངས་ལ་གནོད་པ་ཁྱད་པར་དུ་ཡང་། རྡོ་རྗེའི་སློབ་དཔོན་གྱི་སྐུ་ལ་བདོ་བ། མཆེད་དང་ལྕམ་དྲལ་གྱི་དམ་ལས་འགལ་བ། རྣལ་འབྱོར་སྒྲུབ་པ་པོ་ལ་གནོད་ཅིང་འཚེ་བ། དམ་པའི་ཆོས་དང་བྱང་ཆུབ་སྒྲུབ་པ་ལ་བར་དུ་གཅོད་པར་བྱེད་པའི་གཟུགས་ཅན་གྱི་དགྲ། གཟུགས་མེད་ཀྱི་བགེགས། ལས་ངན་གྱི་སྲི། བཀའ་ལས་འདའ་བ། དམ་ལས་ཉམས་པ། ཁྲིམས་ལས་དྲལ་བ། ཞིང་བཅུར་གྱུར་པའི་དགྲ་གེགས་འབྱུང་པོ་གང་ཡིན་པ་དེ་དག་སྲིད་པ་གསུམ་གང་དུ་གནས་ཀྱང་། ཕོ་ཉ་ལས་མཁན་དྲེགས་པའི་ཚོགས་རྣམས་ཀྱི་ལྕགས་ཀྱུས་སྙིང་ནས་བཟུང་སྟེ་རང་དབང་མེད་པར་སྐད་
ཅིག་ཙམ་ལ་ཚོགས་ཐ་མ་འདི་ལ་ཁུག་ཛཿ ནྲྀ་ཏྲི་བཛྲ་ཨང་ཀུ་ཤ་ཛཿ བཛྲ་པཱ་ཤ་ཧཱུ། བཛྲ་སྥོ་ཊ་བཾ། བཛྲ་གྷཎྜེ་ཧོ། ཞེས། རོལ་མོའི་སྒྲ་དྲག་པོ་དང་བཅས་པས་བཀུག་བསྟིམ་བྱ། དེ་ནས་ལྷ་ཚོགས་རྣམས་དྲག་པོའི་ཕྲིན་ལས་ལ་བསྐུལ་ཏེ། ཧཱུྃ། ཆོས་ཀྱི་དབྱིངས་ལས་རང་བྱུང་གྲུབ་པའི་ལྷ། །ཁྲོ་བོ་རོལ་པའི་དུར་ཁྲོད་ཆེན་པོ་ནས། །ཤིན་ཏུ་མི་བཟད་རབ་འཇིགས་སྐུར་སྟོན་པ། །དཔལ་ཆེན་ཡོངས་རྫོགས་དྲག་པོའི་ཕྲིན་ལས་མཛོད། ཧཱུྃ་ཧཱུྃ་བི་ཤྭ་ཀྲོ་དྷ་ཛྭ་ལ་མཎྜ་ལ་ཧཱུྃ་ཕཊཿ དེ་ནས་མགོན་སྐྱོབས་བྱེད་པའི་ལྷ་སྲུང་དང་འཕྲལ་ཏེ། ཧཱུྃ་བཛྲ་ཡཀྴ་ཀྲོ་དྷ་ཨ་ནྲྀ་དེ་ཝ་མ་ནུ་ཤག་ཕྱེ་ཕྱེ། དེ་ནས་བདག་ཉིད་ཧེ་རུ་ཀའི་རྒྱལ་གྱིས་ཕུར་པ་ཐལ་མོ་སྦྱར་བའི་བར་དུ་བཟུང་སྟེ་ལིངྒ་ལ་གཟིར་བས། འཁོར་འདས་སེམས་སུ་ཐག་ཆོད་པ་ནི་རིག་པ་ཆོས་སྐུ་ཡེ་ཤེས་ཀྱི་ཕུར་པ། དེ་ལྟར་མ་རྟོགས་པའི་སེམས་ཅན་འཁྲུལ་པ་ཨ་འཐས་ཀྱི་དགྲ་གེགས་ལ་ཚད་མེད་སྙིང་རྗེ་བསྐྱེད་པ་ནི་གསལ་མདངས་ལོངས་སྐུ་སྙིང་རྗེའི་ཕུར་པ། ལག་པའི་སོར་མོ་བཅུ་པོ་ཁྲག་འཐུང་རིགས་ལྔ་ཡབ་ཡུམ་སྦྱོར་བའི་སྲས་སུ་བཛྲ་ཀི་ལ་
ཡ་བྱུང་བ་ནི་སྤྲུལ་སྐུ་རྫས་ཀྱི་ཕུར་པ་རེ། བདག་ཕུར་འབེན་གསུམ་སྐུ་གསུམ་གྱི་རྣམ་རོལ་དུ་ཤེས་པ་ནི་ལྟ་བའི་རྫོང་ཡིན་ཞིང་ཕུར་པའི་དབལ་རྩིར་ཧཱུྃ་ཡིག་ལས་མེ་འོད་འཕྲོས་པས་གནོད་བྱེད་དེའི་སྙིང་དཀྱིལ་དུ་ཡིད་ཀྱི་རྟེན་དབུགས་ཀྱི་དངས་མ་གཏོར། སྲོག་གི་རྟེན་ཁྲག་གི་དངས་མ་སྙམ། ཚེ་བསོད་ཀྱི་རྟེན་ཨ་ཡིག་དཀར་པོ་ཕུར་པའི་རྩེ་ལ་ཚུར་བྱུང་བ་བདག་གི་སྙིང་གར་བསྟིམ། རྣམ་ཤེས་ཀྱི་ནྲྀ་ལྗང་གུ་ཕུར་པའི་ཁོང་སེང་ནས་ཡར་བརྒྱུད་དེ་དཔལ་ཆེན་པོ་ནི་རུ་ཀའི་སྐུ་གསུང་ཐུགས་ལ་བསྟིམ་ཞིང་། སླར་ཡང་ཡབ་ཀྱི་དབུ་མའི་ལམ་བརྒྱུད་ནས་ཡུམ་གྱི་གསང་བར་བབས་པ་སྤྲུལ་པའི་སྲས་མཆོག་ཏུ་བལྟམས་ཤིང་འགྲོ་བའི་དོན་མཛད་པར་དམིགས་པ་ནི་སྒོམ་པའི་འཕྲང་། དེ་ལྟ་བུ་གསལ་སྟོང་ཟུང་འཇུག་ཐབས་ཤེས་དབྱེར་མེད་ཀྱི་སྒོ་ནས་སྒྲོལ་བ་ནི་སྤྱོད་པའི་སྲོག་སྟེ། རྫོང་འཕྲང་སྲོག་གསུམ་ཚང་བའི་ཏིང་འཛིན་དང་ལྡན་པས། གཟུགས་ལིང་གཏུབ་ཅིང་། ཧཱུྃ། ང་ནི་ཆེ་མཆོག་ཧེ་རུ་ཀ །གཡས་པ་ཐབས་ཀྱི་རང་བཞིན་ལ། གཡོན་པ་ཤེས་རབ་རང་བཞིན་ཏེ། །ཐབས་དང་ཤེས་རབ་སྦྱར་བ་ལས། །སྲས་མཆོག་བཛྲ་ཀཱི་ལ་
ཡ། དགྲ་གེགས་སྒྲོལ་བའི་དུས་ལ་བབས། །གང་ལ་བྱ་བ་ཁྱེད་ཀྱིས་ཤེས། །ཡིད་ལ་བརྣག་པའི་དགྲ་གེགས་འདི། །མ་ཐོགས་མྱུར་དུ་སྒྲོལ་བར་མཛོད། ཅེས་པའི་མཇུག་ཏུ་དྲག་སྔགས་སོ་ལྔ་པའི་ཤམ་དུ། ཀརྨ་རཾ་རཾ་ཛྭ་ལ་རཾ། །དགྲ་གེགས་འབྱུང་པོ་མཱ་ར་ཡ་ཧཱུྃ་ཕཊ། ཅེས་བསྒྲལ་ཞིང་གནས་སྤར་བས་འབྲས་བུ་ཡེ་ཤེས་ཀྱི་ཚོགས་བསྒྲུབས་ཏེ། ཤ་ཁྲག་གཟུགས་ཀྱི་ཕུང་པོའི་ལྷག་རོལ་དེ་ཉིད་ཤའི་ཕུང་པོ། ཁྲག་གི་རྒྱ་མཚོ། རུས་པའི་རི་བོར་གྱུར་པ་དེ་དག་ལྷ་ཚོགས་རྣམས་ཀྱི་ཞལ་དུ་སྟབས་པས་རྒྱུ་བསོད་ནམས་ཀྱི་ཚོགས་རྫོགས་ཤིང་འཁོར་བའི་རྒྱུ་རྐྱེན་རྩད་ནས་ཆོད་པར་བསམ་ལ་བསྒྲལ་བའི་རོ་མ་རྣམས་དཀྱིལ་འཁོར་དུ་འབུལ་ཞིང་། ཧཱུྃ། དཔལ་ཆེན་ཁྲག་འཐུང་ལྷ་ཚོགས་ཞལ་ཕྱེ་ཅིག །བག་ཆགས་ཀུན་སྦྱོང་འཁོར་བའི་ལམ་དགག་ཕྱིར། །དགྲ་གེགས་བསྒྲལ་བའི་དུག་གསུམ་ཤ་ཁྲག་རུས། །ཟ་བྱེད་མི་འགྱུར་ཆོས་ཉིད་ཀློང་དུ་རོལ། །བཛྲ་ཡཀྵ་ཀྲོ་དྷ་བི་ཛ་ཡེ་ཁཱ་ཧི། དེ་ལྟར་དཀྱིལ་འཁོར་ལྷ་ཚོགས་ལ་ཚོགས་མཆོད་གྲུབ་པའི་རྗེས་ལ་ལྷག་མའི་མགྲོན་ཡར་གནས་ཡེ་ཤེས་པ་ལ་འབུལ་རྒྱུའི་གཙང་ལྷག་སྣོད་
བཟང་པོར་བླུག་ནས་དཀྱིལ་འཁོར་གྱི་འགྲམ་དུ་བཞག་པ་དང་། བར་འདིར་སློབ་དཔོན་མཆེད་ལྕམ་རྣམས་ཚོགས་ཀྱི་དངོས་གྲུབ་བླང་བ་ནི། ལྷ་ཚོགས་ཀྱི་གནས་གསུམ་འབྲུ་གསུམ་ལས་འོད་འཕྲོས་པས་ཚོགས་ལ་ཐིམ་པས་ཡིད་བཞིན་ནོར་བུ་ལྟར་ཅི་འདོད་ཀྱི་དངོས་གྲུབ་འབྱུང་བར་མོས་ལ། ཚོགས་རྫས་ཀྱི་དངོས་པོ་གང་ཡོད་སྣ་ཚང་དུ་རིམ་པར་དྲངས་ཤིང་ཧོ། །ཞལ་ཟས་ཚོགས་ཀྱི་མཆོད་པ་འདི། །འདོད་ཡོན་མ་སྤངས་ལོངས་སྤྱོད་བརྒྱན། །དངོས་གྲུབ་སྣ་ཚོགས་འདི་ལས་འབྱུང་། །རྣལ་འབྱོར་དགྱེས་པར་ཚོགས་ལ་རོལ། །སིདྡྷི་ཕ་ལ་ཨ་ལ་ལ་ཧེ། ཞེས་བརྗོད་ནས་རང་རང་སྒོ་གསུམ་ལྷའི་རྣལ་འབྱོར་དང་ལྡན་པས་ཚོགས་ལ་རོལ་ཞིང་། དེ་ཚེ་ཚོགས་ཀྱི་ཟས་ལ་བཟང་ངན་ཞིམ་མངར་གྱི་སྤོང་ལེན་མི་བྱ། ཚོགས་རྫས་ལ་ཐ་མལ་གྱི་མིང་མི་འབོད། བྱིན་གྱིས་བརླབས་པའི་རྫས་ཡིན་པས་ཟོས་ལྷག་སོགས་གང་བྱུང་དུ་མི་བསྐྱུར། བཟི་བ་དང་ཀུ་ཅོ་འཐབ་རྩོད་བག་མེད་པའི་སྤྱོད་པ་མི་བྱ། རྡོ་རྗེའི་གླུ་གར་བྱ་བར་གསུངས་ནའང་གསང་སྔགས་ཟབ་མོའི་རྒྱུད་ནས་གསུངས་པའི་རྡོ་རྗེའི་ཚིག་དང་གྲུབ་པའི་རིག་འཛིན་དག་གི་ཉམས་རྟོགས་
པར་ཤར་བའི་རྡོ་རྗེའི་མགུར་སོགས་མ་གཏོང་འཇིག་རྟེན་གྱི་གླུ་གར་མི་བྱ་བ་ལ་སོགས་མདོར་ན་ཚོགས་ཀྱི་འཁོར་ལོའི་དམ་ཚིག་རྣམས་དང་མི་འགལ་བར་བྱ་ཞིང་། མཇུག་ཏུ་ཧེ་རུ་ཀ་ཡི་དཀྱིལ་འཁོར་དུ། །ཚོགས་ཀྱི་འཁོར་ལོས་མཆོད་པ་ཡིས། །བདག་གཞན་འགྲོ་བ་མ་ལུས་པ། །དཀྱིལ་འཁོར་གཅིག་ཏུ་འགྲུབ་པར་ཤོག །ཅེས་པའི་སྨོན་ལམ་ཀྱང་གདབ་པོ། །བཞི་པ་ལྷག་མའི་ཆོ་ག་ལ། ཚོགས་གཞོང་སོགས་སྣོད་རྣམས་ཀྱི་ནང་དུ་ཚོགས་རྫས་ལྷག་རོལ་ཇི་ཙམ་ཡོད་པ་ཐམས་ཅད་སྣོད་ཆེ་བ་གཅིག་ཏུ་སྤུངས་པའི་ཁར་རྡོ་རྗེ་སློབ་དཔོན་གྱི་བཞེས་ལྷག་རྣམས་བཅུག་ལ། སློབ་དཔོན་ནུས་ལྡན་ཡིན་ན་སོར་མོ་ནང་དུ་བསྣོལ་བ་རྡོ་རྗེ་དྲ་མིག་གི་ཕྱག་རྒྱའི་ཁོང་སེང་ནས། བདུད་རྩི་ཨ་མྲྀ་ཏ་ཞལ་དུ་འཐོགས་པའི་ཞལ་ཕྲུ་ཕྱག་རྒྱའི་ཁོང་སེང་ནས་ལྷག་མ་ལ་བཏབ་ཅིང་། ནུས་པར་མི་ལྡན་ན་བདུད་རྩི་སྨན་བདུད་རྩི་སྨན་རག་འཐོར་བས་ཆོག་པ་ཉིད་དེ། བདག་གི་དཔལ་གྱི་ཐུགས་སྲོག་ལས་འོད་ཟེར་ཨོཾ་ཨཱཿཧཱུྃ་གིས་མཚན་པ་འཕྲོས་ཏེ་ཚོགས་ལྷག་གཉིས་ལ་ཕོག་པ་ཙམ་གྱིས། ཡར་གནས་མར་གནས་ཀྱི་མགྲོན་རིགས་སོ་སོའི་ཐུགས་དང་མཐུན་པའི་
དངོས་པོ་གང་ལ་ཅི་འདོད་དུ་གྱུར་པར་དམིགས་ནས་འབྲུ་གསུམ་ལན་བདུན་ནམ་གསུམ་གྱིས་བྱིན་བརླབ་སྟེ། ཐོག་མར་ཡར་གནས་རྣམས་ལ་གཙང་ལྷག་འབུལ་བ་ནི། ཧཱུྃ། ཆོས་དབྱིངས་སྐྱེ་མེད་རྣམ་དག་ལས། སྐྱེ་བའི་ཆོ་འཕྲུལ་ཞི་ཁྲོའི་ཚོགས། །འདིར་བྱོན་རྒྱན་གྱི་མཆོད་གཏོར་བཞེས། །སྐུ་གསུང་ཐུགས་ཀྱི་དངོས་གྲུབ་སྩོལ། ཨོཾ་ཨཱཿཧཱུྃ། ཨོཾ་ཨ་ཀཱ་རོ་མུ་ཁཾ། སརྦ་དྷརྨ་ཎཾ། ཨུདྱ་ནུཏྤནྣ་ཏྭད། ཨོཾ་ཨཱཿཧཱུྃ་ཕཊ་སྭཱ་ཧཱ། ཞེས། གཙང་ལྷག་ནམ་མཁར་འཐོར་ཞིང་། བདུད་རྩི་གསང་ནན་ཀྱང་འདི་སྐབས་ལྷན་ཅིག་འབུལ་བའི་ཕྱག་བཞེས་སྣང་། ཆོག་གཞུང་གཞན་ལ་ལར་འདི་ལ་གནམ་ཕུད་ཅེས་ཀྱང་གྲངས་པ་དེ་དང་དོན་གཅིག་གོ། །དེ་ནས་གོང་དུ་བཤད་པའི་ལྷ་མོ་དངོས་དེ་ཉིད་མར་གནས་རྣམས་ལ་འབུལ་བ་ནི། རང་ཉིད་ལྷའི་ང་རྒྱལ་གྱིས་ལྷག་མགྲོན་རྣམས་བཀུག་ཅིང་། ཟིལ་གྱིས་མནན་པར་མོས་ཏེ། འདི་ལ་ཡང་རིམ་པ་བཞི་ཡོད་དེ། དང་པོ་དབང་ཕྱུག་དང་མཁའ་འགྲོ་སུམ་ཅུ་རྩ་གཉིས། གཉིས་པས་གིང་ཕོ་མོ་རྣམས་དང་། གསུམ་པས་མ་
བདུན་སྲིང་བཞི་འབར་མ་ཕོ་ཉ་རྣམས་དང་། བཞི་པས་ལངྒ་དང་འབུམ་ཕྲག་མཁའ་འགྲོ་ལྷ་སྲིན་སྡེ་བརྒྱད་སོགས་མཆོད་པའི་རིམ་པ་ནི། ཧཱུྃ། དང་པོར་ཕུད་ཀྱིས་མི་མཆོད་དུ། །བཀའ་བརྒྱད་ཡོངས་རྫོགས་ལྷ་རྣམས་གཉན། །བར་དུ་ལྷག་མས་མི་མཆོད་དུ། །མ་དང་མཁའ་འགྲོ་ལྷག་ལ་དགྱེས། །ཐ་མ་གཅིག་ཏུ་མི་བསྲེ་རུ། །ཆོས་ཉིད་ཡེ་ནས་རྒྱུ་འབྲས་ཅིག །ཧཱུྃ། དཔལ་གྱི་བཀའ་ཉན་ལྷག་སྡུད་མ། །རིགས་བཞི་མཁའ་འགྲོ་ཤུགས་འགོད་བཅས། །དབང་ཕྱུག་ཆེན་མོ་ཉེར་བརྒྱད་དང་། །མཁའ་འགྲོ་སུམ་ཅུ་རྩ་གཉིས་རྣམས། །གནས་བཟང་དེ་ནི་དུར་ཁྲོད་འཛིན། །གོས་བཟང་དེ་ནི་ཞིང་ཆེན་གྱོན། །སྐྱོགས་བཟང་དེ་ནི་བྷཉྫ་ཐོགས། །ཟས་བཟང་དེ་ནི་མམ་ས་གསོལ། །སྐྱིམ་བཟང་དེ་ནི་རཀྟ་འཐུང་། །དམ་ཚིག་བསྲུང་ཞིང་མཁའ་ལ་འགྲོ། །ཟས་སུ་ཤ་དང་ཁྲག་ལ་དགྱེས། །ལས་སུ་གསོད་དང་གཅོད་ལ་བརྩོན། །ཤ་ཁག་གཏོར་མ་འདི་བཞེས་ལ།
སྔོན་ཚེ་དཔལ་གྱི་བཀའ་བཞིན་དུ། །བཅོལ་བའི་ཕྲིན་ལས་སྒྲུབ་པར་མཛོད། ཧཱུྃ། དཔལ་གྱི་བཀའ་ཉན་ལྷག་སྡུད་མ། །སྐྱེས་མཆོག་གིང་ཆེན་བཅོ་བརྒྱད་པོ། །དབུ་ལ་རལ་ཕུར་ཤར་ར་ར། །ཕྱག་ན་གྲི་ཐོག་ཟིངས་སེ་ཟིང་། །གིང་ཕོ་དགུ་ནི་ཤ་ར་ར། །གིང་མོ་དགུ་ནི་སིལ་ལི་ལི། །ཐམས་ཅད་རུ་མཚོན་ཆེམས་སེ་ཆེམ། །དམ་ཚིག་བསྲུང་ཞིང་མཁའ་ལ་འགྲོ། །ཟས་སུ་ཤ་དང་ཁྲག་ལ་དགྱེས། །ལས་སུ་གསོད་དང་གཅོད་ལ་བརྩོན། །ཤ་ཁྲག་གཏོར་མ་འདི་བཞེས་ལ། །སྔོན་ཚེ་དཔལ་གྱི་བཀའ་བཞིན་དུ། །བཅོལ་བའི་ཕྲིན་ལས་གྲུབ་པར་མཛོད། ཧཱུྃ། དཔལ་གྱི་བཀའ་ཉན་ལྷག་སྡུད་མ། །མ་མོ་བདུན་དང་སྲིང་མོ་བཞི། །འབར་མ་ཆེན་མོ་བརྒྱད་རྣམས་དང་། །ཕོ་ཉ་དྲུག་ཅུ་རྩ་བཞི་རྣམས། །མཛེས་པའི་སྐུ་ལ་སྒེག་ཚུལ་ཅན། །དུར་ཁྲོད་རྒྱན་ཆ་
སྤུངས་སེ་སྤུངས། །རྣལ་འབྱོར་ཀུན་གྱི་དྲོད་མྱུལ་ཞིང་། །སྒྲུབ་པ་པོ་ཡི་གྲོག་མཛད་མ། །དམ་ཚིག་བསྲུང་༴ ཟས་སུ་ཤ་དང་༴ ལས་སུ་གསོད་དང་། ཤ་ཁྲག་གཏོར་མ༴ སྔོན་ཚེ་དཔལ༴ བཅོལ་བའི་ཕྲིན་ལས༴ ཧཱུྃ། དཔལ་གྱི་བཀའ་ཉན་ལྷག་སྡུད་མ། །ལངྐ་དུར་ཁྲོད་བདག་མོ་དང་། །འབུམ་ཕྲག་ཡངས་པའི་མཁའ་འགྲོ་མ། །ལྷ་སྲིན་སྡེ་བརྒྱད་ཐམས་ཅད་ཀྱང་། །དུར་ཁྲོད་རྫས་ལ་ལོངས་སྤྱོད་ཅིང་། །བསྟན་པའི་དགྲ་གེགས་གཉན་པོར་ཆེ། །དམ་ཚིག་བསྲུང་ཞིང་༴ ཟས་སུ་ཤ་དང་༴ ལས་སུ་གཅོད་དང་༴ ཤ་ཁྲག་གཏོར་མར༴ སྔོན་ཚེ་དཔལ༴ བཅོལ་བའི་ཕྲིན་ལས༴ ཨོཾ་མ་ཧཱ་ཤྲཱི་ཧེ་རུ་ཀ །ས་མ་ཡ་དེ་ཝི་ཀྲོ་དྷ་སརྦ་བ་ལི༚་ཏ་ཁ་ཁ་ཁཱ་ཧི་ཁཱ་ཧི། ཨོཾ་ཨཱཿཧཱུྃ་ཨུཙྪཥྚ་བཛྲ་ཨ་དྷིཥྠ། ས་མུ་དྲ་ཀྲ་མ། ས་མ་ཡ་ཧཱུྃ་ཕཊཿཧཱུྃ་ཧཱུྃ་ཧཱུྃ། ཧྲཱིཿཧྲཱིཿཧྲཱིཿ བྷྱོ་བྷྱོ་བྷྱོ། ཨ་ར་ལི་ཛཿ ཞེས་པས་ཕུལ་ཞིང་ལྷག་མ་སྒྲུབ་ཁང་གི་ཕྱི་རོལ་གཙང་སར་སྤུངས་ལ་
བཞག་སྟེ་སྣོད་ཆུས་བཤལ་ལ་དེ་ཕྱོགས་སུ་འཐོར་རོ། །ཚོགས་ལྷག་འདི་དཔལ་གྱི་བཀའ་སྡོད་སྲུང་མའི་རིགས་ཐམས་ཅད་ཀྱི་ཚོགས་མཆོད་ཡིན་ཅིང་། དེ་དག་གཉན་ལ་ཏུ་དོག་པ་ཁང་སྐྱེན་པས་ན། ལྷག་ཆོག་ལ་བརྙས་བཅོས་དང་སྒྱིད་ངན་མི་རུང་བས་གནད་བསྣུན་དུ་བྱས་ན་ཕྲིན་ལས་གང་འདོད་འགྲུབ་པའི་གནད་ཡོད་པར་གསུངས་སོ།། ༈ །།དེ་ལྟར་འདི་ཡན་ཆད་ཀྱིས་རྒྱུན་གྱི་ལས་གཞུང་དཀྱུས་མ་རྣམས་གྲུབ་པ་ཡིན་ཚེ་མཇུག་ཆོག་བསྔོ་སྨོན་ཤིས་བརྗོད་བྱ་བའམ། གཏོར་མ་འབུལ་རྒྱུ་ལྟ་བུ་ཡོད་ན་སྐབས་འདིར་དམ་ཚིག་འཆད་མོད་བསྒྲགས་ནས་གཏོར་མ་ཕུལ་ལ་བརྟན་མ་སྐྱོང་བྱས་པའི་མཇུག་ཏུ་བསྡུ་ཆོག་བྱ་བ་ཡིན་ལ། གལ་ཏེ་དྲག་པོ་མངོན་སྤྱོད་ཀྱི་ལས་བསྒྲུབས་པའམ། དུས་བཟང་གལ་ཆེན་ལྟ་བུའི་སྐབས་སུ་གཏོར་མ་འཕང་བའི་ལས་རིམ་རྒྱས་པར་བྱེད་ན། ཐོག་མ་ནས་གཏོར་མའི་བཅའ་གཞི་ཡང་རྒྱས་པར་དགོས་ཕྱིར། གཙོ་བོ་དགུ་ཀའི་གཏོར་མ་ཟུར་གསུམ་གྲི་རིས་ཅན་ལ་འཁོར་རིགས་བཞི་བཞི་དང་འཁོར་ཕྲག་ཇི་ཙམ་ཤོང་ཤོང་མཐེབ་ཀྱུ་དང་བཅས་པས་བསྐོར་ཞིང་། ཤ་ཁྲག་སོགས་གཏོར་རྒྱན་ཅི་བཟང་དང་།
དཔལ་གྱི་བཀའ་སྡོད་ལའང་སྔར་བཤད་པ་བཞིན་བྱ། གལ་ཏེ་ཅེས་ཀྱང་གཙོ་བོ་དགུ་ཐ་དད་མ་འབྱོར་བར་སྣོད་གཅིག་ཏུ་བསྡོམ་པའི་ཚེ་ན་ནི་ཀ་ཊོ་རའམ་ལྕགས་སླང་སོགས་ཆེ་བའི་ནང་དུ་སྤུངས་དགོས་ཏེ། ལར་ཡང་གསང་སྔགས་བླ་མེད་ཀྱི་ཆོ་གའི་རིགས་མ་གཏོར་ཚོགས་སྤུངས་ཆེར་མ་བསྐྱེད་ན་ལྷ་ཚོགས་ཐུགས་དམ་མི་སྐོངས། དེ་མ་ཁོངས་ན་དངོས་གྲུབ་མི་འབྱུང་བའི་བར་ཆད་དང་འཁུ་ལྡོག་གི་རྒྱུ་གྱེན་དུ་འགྱུར་ཕྱིར་གཏོར་ཚོགས་བཟང་བར་གལ་ཆེ་ཞིང་། དེ་ལྟར་ཕྲིན་ལས་དྲག་པོའི་ཐུགས་དམ་བསྐུལ་བར་བྱ་བའི་ཚིག་མདོར་བསྡུས་ནི་ལས་གཞུང་འདི་ཉིད་ནས་བྱུང་བ་གོང་དུ་སྨོས་ནའང་། གལ་ཆེན་སྐབས་འདིར་གསང་བ་ཡོངས་རྫོགས་ཀྱི་བསྐུལ་བྱང་རྒྱས་འབྲིང་ཅི་རིགས་བྱ་བར་གསུངས་པ་བཞིན། ལྷ་ཚོགས་བདུན་བརྒྱ་ཉེར་ལྔའི་བསྐུལ་བྱང་བསྡུས་པ་འདི་བྱ་སྟེ། ཐུགས་དམ་སྐོང་བའི་དམ་རྫས་སྤྱན་གཟིགས་མཆོད་གཏོར་རོལ་མོའི་སྒྲ་མི་རྐང་གི་གླིང་བུ་སོགས་ཐུགས་དམ་རྒྱུད་བསྐུལ་གྱི་ཡོ་བྱད་ཅི་འཛོམ་དང་བཅས། གཏོར་མ་བསྐུལ་ནས་སྨན་རཀ་སྦྲིང་། སྒྲུབ་པ་པོ་རྣམས་ཏིང་འཛིན་གྱི་ངར་དང་དད་གདུང་གྱི་ཤུགས་བསྐྱེད་ལ་འདི་ལྟར་བསྐུལ་བར་བྱའོ། ཧཱུྃ། མི་མངོན་དབྱིངས་ན་བཞུགས་པའི་རྒྱལ་བ་ཞི་ཁྲོའི་ཚོགས། །བཞེངས༴
ཅིག་བཞེངས་ཅིག་ཆོས་ཀྱི་དབྱིངས་ནས་བཞེངས། །བསྐུལ་ལོ་བསྐུལ་ལོ་སེམས་ཅན་དོན་དུ་བསྐུལ། །མཛོད་ཅིག་མཛོད་ཅིག་དྲག་པོའི་ཕྲིན་ལས་མཛོད། ཧཱུྃ། ཞི་བ་ལྷུན་གྱིས་གྲུབ་པའི་དཀྱིལ་འཁོར་ནས། །སེང་གེ་གླང་ཆེན་ལ་སོགས་ཁྲི་སྟེང་ན། །བཅོམ་ལྡན་རྡོ་རྗེ་སེམས་དཔའ་ཡུམ་དང་འཁྲིལ། །རིགས་བཞི་ཡབ་ཡུམ་སེམས་དཔའ་ལྕམ་དྲལ་དང་། །ཡིད་ཆོས་ཐུབ་དྲུག་མཐར་བྱེད་བརྒྱད་ལ་སོགས། །བཞི་བཅུ་རྩ་གཉིས་རྒྱལ་བ་ཐུགས་དམ་ཅན། །དབྱིངས་ནས་སྐུ་བསྐྱོད་དམ་རྫས་མཆོད་གཏོར་བཞེས། །ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད། ཧཱུྃ། དབུས་ཕྱོགས་གཙོ་བརྒྱད་ཉི་ཟླ་ས་སྟེང་ན། །དཔལ་ཆེན་ཆེ་མཆོག་གནམ་ཞལ་ཡུམ་དང་འཁྲིལ། །རིགས་བཞི་ཡབ་ཡུམ་ཕྱོགས་སྐྱོང་འདུལ་བྱེད་བཅུ། །ཏ་ཀྲིད་བཞི་དང་ལྕེ་སྤྱང་མ་བརྒྱད་སོགས། །ཆེ་མཆོག་ཡོན་ཏན་ཡོངས་རྫོགས་ལྷ་ཚོགས་ནི། །སུམ་ཅུ་རྩ་གཉིས་རྒྱལ་བ་ཐུགས་དམ་ཅན། དབྱིངས་ནས་སྐུ། ཐུགས་དམ་རྒྱུད་བསྐུལ༴
ཧཱུྃ། ཤར་ཕྱོགས་ཏུ་དྲ་ཉི་ཟླ་པད་སྟེངས་སུ། །དཔལ་ལེན་བཛྲ་ཧེ་རུ་ཀྲོ་དྷི་འཁྲིལ། །རིགས་བཞི་ཡབ་ཡུམ་ཀི་སིང་བཅུ་དྲུག་དང་། །སྒོ་སྐྱོང་བཞི་དང་དབང་མོ་ཉེར་བརྒྱད་སོགས། །ཐུགས་དམ་ཡང་དག་ཡོངས་རྫོགས་ལྷ་ཚོགས་ནི། ལྔ་བཅུ་རྩ་བརྒྱད་རྒྱལ༴ དབྱིངས་ནས༴ ཐུགས་དམ་རྒྱུད༴ ཧཱུྃ། ལྷོ་ཕྱོགས་ཆུ་གླང་ཉི་ཟླ་པད་སྟེངས་སུ༴ དཔེན་གཤིན་རྗེའི་གཤེད་པོ་བཻ་ཏཱ་འཁྲིལ། །སྒྲོལ་བའི་ཡུམ་དང་རིགས་བཞི་ཡབ་ཡུམ་དང་། །ཕྱོགས་སྐྱོང་གཤིན་རྗེ་ཡབ་ཡུམ་སྒོ་སྐྱོང་བཅས། །གྲི་ཐོགས་གིང་སོགས་ཕོ་ཉ་བཅུ་དྲུག་སྟེ། ལྔ་བཅུ་རྩ་དགུ༴ དབྱིངས་ནས༴ ཐུགས་དམ་རྒྱུད༴ ཧཱུྃ། ནུབ་ཕྱོགས་ཀླུ་རྒྱལ་ཉི་ཟླ་པད་སྟེངས་སུ། །དཔེན་རྟ་མགྲིན་པདྨ་གཟི་ལྡན་འཁྲིལ། །རིགས་བཞི་ཡབ་ཡུམ་ཕྲ་མེན་ཟིལ་གནོན་བརྒྱད། །ཡུམ་བཅས་སྒོ་བཞི་ཁྱི་སྤྱང་ཁམ་རྒྱ་དྲུག །དམུས་ལོང་བཞི་བཞི་དང་མཆེ་གཤོག་ངུར་འབྲུག་བཞི། དགུ་བཅུ་རྩ་བརྒྱད༴ དབྱིངས་ནས༴ ཐུགས་དམ་རྒྱུད༴ ཧཱུྃ། བྱང་ཕྱོགས་ལྷ་ཆེན་པདྨ་ཉི་ཟླའི་སྟེང་། །
དཔལ་ལེན་རྡོ་རྗེ་གཞོན་ནུ་རྒྱས་འདེབས་འཁྲིལ། །རིགས་བཞི་ཡབ་ཡུམ་ཁྲོ་བཅུ་ཡུམ་དང་བཅས། །ཟ་གསོད་སྒོ་བ་ཕུར་བསྲུང་བཅུ་གཉིས་དང་། །བསེ་ལྕགས་དུང་གི་སྐྱེས་བུ་ཕོ་ཉའི་ཚོགས། །བདུན་བཅུ་རྩ་བཞི་རྒྱལ༴ དབྱིངས་ནས༴ ཐུགས་དམ༴ རྒྱུད་བསྐུལ༴ ཧཱུྃ། ཤར་ལྷོར་མ་མོ་པདྨ་ཉི་ཟླའི་སྟེང་། །དཔལ་ཆེན་བླ་མེད་ཧེ་རུ་མུ་ཁ་འཁྲིལ། །རྟག་རྒྱལ་མ་ལྔ་སྲིད་འགྲོ་ས་བདེ་འགྲོ་དང་། །ཡེ་ཤེས་རྗེ་མོ་སྨན་མོ་སྒོ་མ་བཞི། །སྦས་པའི་མ་བཞི་ལ་སོགས་ཕོ་ཉའི་ཚོགས། །བདུན་ཅུ་རྩ་དགུ་རྒྱལ་ཐུགས་དམ་ཅན། དབྱིངས་ནས༴ ཐུགས་དམ་རྒྱུད༴ ཧཱུྃ། ལྷོ་ནུབ་དར་ཟབ་ཉི་ཟླ་པད་སྟེངས་སུ། །རིག་འཛིན་སློབ་དཔོན་རྡོ་རྗེ་རྣལ་འབྱོར་འཁྲིལ། །སྲས་མཆོག་རིགས་བཞི་བཀའ་བརྒྱད་རིག་འཛིན་དང་། །དཔའ་བོ་དཔའ་མོ་སྒོ་སྐྱོང་བཞི་ལ་སོགས། །རིག་འཛིན་སློབ་དཔོན་ཡོངས་རྫོགས་ལྷ་ཚོགས་ནི། །ཉི་ཟླ་རྩ་དྲུག་རྒྱལ༴ དབྱིངས་ནས༴
ཐུགས་དམ་རྒྱུད༴ ཧཱུྃ། ནུབ་བྱང་ལྷ་ཆེན་ཉི་ཟླ་པད་སྟེངས་སུ། །དཔལ་ལེན་དྲེགས་པ་ཀུན་འདུལ་སྤྱི་འདུལ་འཁྲིལ། །རིགས་བཞི་ཡབ་ཡུམ་སྡེ་དཔོན་སུམ་ཅུ་དང་། །དྲེགས་པ་སྡེ་བརྒྱད་སྒོ་སྐྱོང་བཞི་ལ་སོགས། །འཇིག་རྟེན་མཆོད་བསྟོད་ཡོངས་རྫོགས་ལྷ་ཚོགས་ནི། །སུམ་ཅུ་རྩ་གཉིས་རྒྱལ་བ༴ དབྱིངས་ནས༴ ཐུགས་དམ་རྒྱུད༴ ཧཱུྃ། བྱང་ཤར་དགྲ་གེགས་པདྨ་ཉི་ཟླའི་སྟེངས། །དཔེན་སྟོབས་འབྱུང་ལྔ་བདག་མོས་འཁྲིལ། །རིགས་བཞི་ཡབ་ཡུམ་སྔགས་བདག་བཅོ་བརྒྱད་དང་། །ཕོ་ཉ་དམ་ཅན་སྒོ་སྐྱོང་ལ་སོགས་ཏེ། །དྲག་པོ་སྔགས་ཀྱི་ལྷ་ཚོགས་དམོད་པའི་བདག །ཉི་ཤུ་རྩ་བརྒྱད་རྒྱལ༴ དབྱིངས་ནས༴ ཐུགས་དམ་རྒྱུད༴ ཧཱུྃ། དཔལ་གྱི་ཐུགས་ལས་སྤྲུལ་པའི་ཕོ་ཉ་ནི། །ཡེ་ཤེས་ཁྱུང་ཆེན་གཟུགས་སྐུར་སྟོན་མཛད་ཅིང་། །ལོག་འདྲེན་དགྲ་གེགས་མ་ལུས་བསྒྲིལ་བ་དང་། །བསྒོ་བ་ཉན་ཅིང་མི་མཐུན་ཕྱོགས་རྣམས་འདུལ། །གཞལ་ཡས་བར་འཁྱམ་དང་ནི་སྒོ་བཞི་ན། །དཔའ་བོ་དཔའ་མོ་
ཡབ་ཡུམ་ཟུང་བཞི་དང་། །མཁའ་འགྲོ་སོ་གཉིས་དབང་མོ་ཉི་ཤུ་བརྒྱད། །མ་བདུན་སྲིང་བཞི་འབར་མ་བརྒྱད་རྣམས་དང་། །གིང་ཆེན་བཅོ་བརྒྱད་སྒོ་བ་ཡབ་ཡུམ་བརྒྱད། །བརྒྱ་དང་རྩ་བརྒྱད་བར་འཁྱམ་ལྷ་ཚོགས་རྣམས། དབྱིངས་ནས༴ ཐུགས་དམ་རྒྱུད༴ ཧཱུྃ། ཕྱི་རོལ་ལྕགས་རི་འཁོར་ཡུག་ལ་གནས་པ། །ས་བདག་སོ་གཉིས་ལངྐ་བཅུ་དྲུག་དང་། །ཕོ་ཉ་དྲུག་ཅུ་རིགས་འདུས་ཌཱཀིྐ་བརྒྱད། །བསྟན་མ་བཅུ་གཉིས་ལ་སོགས་བརྒྱ་སོ་གཉིས། དཔལ་གྱི་བཀའ་ཉན་འཁོར་ཡུག་སྐྱོང་མཛད་པའི། །བཀའ་སྡོད་དམ་ཅན་ཡོངས་རྫོགས་ཐུགས་དམ་ཅན། དབྱིངས་ནས༴ ཐུགས་དམ་རྒྱུད༴ ཧཱུྃ། ཞི་ཁྲོའི་ལྷ་ཚོགས་བཞི་བརྒྱ་སོ་དྲུག་ལ། །ཡེ་ཤེས་ལྷ་ནི་ཉིས་བརྒྱ་སོ་བརྒྱད་དེ། །ཚོམ་དགུའི་ཕོ་ཉ་བརྒྱ་དང་གོ་དགུ་སོགས། ། ལས་བྱེད་བར་འཁྱམས་སྐྱོང་མཛད་བརྒྱ་བཅུ་གསུམ། །ལྕགས་རི་སྐྱོང་བ་བརྒྱ་དང་སུམ་ཅུ་སྟེ། །བདུན་བརྒྱ་ཉེར་
ལྔ་རྒྱལ་བ་ཐུགས་དམ་ཅན། དབྱིངས་ནས་སྐུ་སྐྱོད་དམ་རྫས་མཆོད་གཏོར་བཞེས། །ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད། ཅེས་བསྐུལ་ལོ་ལྔ་པ་གཏོར་སྐྱོང་བྱ་བ་ལ་ཐོག་མར་སྔོན་གྱི་དམ་ཚིག་གཉན་པོའི་མཐའ་ཚིག་གི་ཆད་མདོ་བསྒྲག་པ་ནི། གཏོར་ཟློག་ཆེན་མོ་ལྟ་བུ་ལ་ནི་ཆད་མདོ་གཏོར་མ་འཕང་སར་སླེབ་ནས་བྱེད་པར་ཕྱག་སྲོལ་དང་། དེ་ལྟར་མ་ཡིན་པའི་ཚེ་ཡང་། གཏོར་མ་རྣམས་དཀྱིལ་འཁོར་ལས་ཕྱིར་དཔགས་རེ་ཅོག་རྩེ་ལྟ་བུའི་ཁར་བཞག་ནས་སྨན་རཀ་སྦྲིང་ཞིང་། དེ་ཡང་ཆད་མདོའི་དགོས་ཆེད་ནི། ད་ལྟ་འོ་སྐོལ་སྒྲུབ་པ་པོ་རྣམས་ལྟ་དགོངས་ཏིང་འཛིན་གྱི་ནུས་པ་དམན་པས། སྲུང་མ་ལས་ལ་བཀོལ་ནུས་པའི་གདེངས་དང་མི་ལྡན་ཡང་། སྔོན་གྱི་རྒྱལ་བ་རིག་འཛིན་རྣམས་ཀྱིས་བཀའ་དང་དམ་ཚིག་གི་གཉེར་ཕོགས་ཚུལ་གྱི་དྲན་གསོ་ལྟ་བུར་བགྱིས་པས་ཁོངས་རྣམས་ཕྲིན་ལས་མི་སྒྲུབ་པའི་རང་དབང་མེད་པར་འགྱུར་བ་ཡིན་ཕྱིར་ཆད་མདོ་འདི་ལྟར་བསྒྲག་པར་བྱའོ། ཧཱུྃ་བྷྱོ། སྔོན་ཚེ་འདས་དུས་བསྐལ་པ་དང་པོ་ལ། །འོག་མིན་དགའ་ལྡན་
གནས་མཆོག་དམ་པ་རུ། །བཅོམ་ལྡན་དཔལ་ཆེན་ཁྲག་འཐུང་རྒྱལ་པོ་ཡིས། །སྣང་སྲིད་མ་མོ་དམ་ལ་བཏགས་པའི་ཚེ། །ཀོའུ་རི་ལ་སོགས་གནས་ཀྱི་མ་མོ་བརྒྱད། །སིངྷ་ལ་སོགས་ཡུལ་གྱི་ཕྲ་མེན་བརྒྱད། །རྟ་གདོང་ལ་སོགས་ཡེ་ཤེས་སྒོ་མ་བཞི། །སོ་སོའི་གཟུགས་མཆོག་དམ་པ་བསྟན་ནས་ཀྱང་། །བཀའ་ཡི་གཏོར་མ་ལེན་པར་མ་ཆད་དམ། །སངས་རྒྱས་བསྟན་པ་བསྲུང་བར་མ་ཆད་དམ། །རྣལ་འབྱོར་ཚེ་སྲོག་བསྲིང་བར་མ༴ རྒྱུ་སྦྱོར་བར་ཆད་བསལ་བར་མ༴ བརྣག་པའི་དགྲ་གེགས་བསྒྲལ་བར་མ༴ བཅོལ་བའི་ཕྲིན་ལས་སྒྲུབ་པར་མ་ཆད་དམ། །སྔོན་ཚེ་ཞལ་བཞེས་དམ་ལས་མ་འདའ་བར། །ཤ་ཁྲག་བརྒྱན་པའི་གཏོར་མ་འདི་བཞེས་ལ། །ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད། །དེ་འོག་བར་གྱི་བསྐལ་པ་དབུས་མ་ལ། །བལ་ཡུལ་ཡང་ལོ་ཤོད་ཀྱི་དབེན་གནས་སུ། །སློབ་དཔོན་ཆེན་པོ་པདྨ་
འབྱུང་གནས་དང་། །སློབ་མ་མཁས་པ་བི་མ་མི་དྲ་ཡིས། །རྡོ་རྗེ་དབྱིངས་ཀྱི་དཀྱིལ་འཁོར་ཞལ་ཕྱེའི་ཚེ། །རྡོ་རྗེ་རིགས་ཀྱི་སྲུང་མ་ཡོངས་འདུས་ནས། སོ་སོའི་གཟུགས༴ བཀའ་ཡི༴ སངས་རྒྱས༴ རྣལ་འབྱོར་ཚེ༴ རྒྱུ་སྦྱོར་བར་ཆད༴ བརྣག་པའི་དགྲ་གེགས༴ བཅོལ་བའི༴ སྔོན་ཚེ་ཞལ༴ ཤ་ཁྲག་བརྒྱན༴ ཐུགས་དམ་རྒྱུད་བསྐུལ༴ དེ་འོག་བསྐལ་པ་དུས་ཀྱི་ཐ་མ་ལ། །བསམ་ཡས་ལྷུན་གྱིས་གྲུབ་པའི་གཙུག་ལག་ཏུ། །སློབ་དཔོན་ཆེན་པོ་པདྨ་འབྱུང་གནས་དང་། །སློབ་མའི་དངས་མ་རྗེ་འབངས་གྲོགས་བཅས་ཀྱིས། །ཞི་ཁྲོ་ཡོངས་རྫོགས་དཀྱིལ་འཁོར་ཞལ་ཕྱེའི་ཚེ། །སྒྲུབ་པ་བཀའ་བརྒྱད་དམ་ཅན་ཡོངས་འདུས་ནས། སོ་སོའི༴ གཟུགས༴ བཀའ་ཡི༴ སངས་རྒྱས༴ རྣལ་འབྱོར་ཚེ༴ རྒྱུ་སྦྱོར༴ བརྣག་པའི༴ བཅོལ་བའི༴ སྔོན་ཚེ༴ ཤ་ཁྲག༴ ཐུགས་དམ༴ དེ་འོག་ལྔ་རྒྱ་དུས་ཀྱི་མཐའ་མ་ལ། །དཔལ་རི་པདྨ་འོད་ཀྱི་གཞལ་ཡས་སུ། །སློབ་དཔོན་ཆེན་པོ་པདྨ་ཐོད་འཕེྲང་དང་། །ཐུགས་རྗེ་ཆེན་པོའི་རྣལ་འབྱོར་ཆོས་དབང་གིས། །གསང་བ་སྒྲུབ་ཆེན་དཀྱིལ་འཁོར་ཞལ་
ཕྱེའི་ཚེ། །དྲེགས་པའི་སྡེ་དཔོན་ཆེན་པོ་སུམ་ཅུ་ཡིས། སོ་སོའི་གཟུགས༴ བཀའ་མི༴ སངས་རྒྱས༴ རྣལ་འབྱོར་ཚེ༴ རྒྱུ་སྦྱོར༴ བརྣག་པའི༴ བཅོལ་བའི༴ སྔོན་ཚེ༴ ཤ་ཁྲག༴ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད། ཅེས་པའི་ཆད་མདོ་བསྒྲག་ནས་གཏོར་མ་འབུལ་བའི་དུས་ཡིན་ན་ཕྱི་རོལ་གཙང་ཞིང་མཐོ་བའི་སར་དངོས་གྲུབ་ཕྱིར་མི་ཡལ་བའི་རྟེན་འབྲེལ་གྱི་གཏོར་ཁ་ནང་དུ་བསྟན་ནས་ཕུལ་ལ་བཞག་ཅིང་བཤལ་ཆུས་བསྟན་སྐྱོང་བྱའོ། །གཏོར་མ་འཕང་བའི་དུས་ཡིན་ན། དྲུག་པ་གཏོར་ཟོར་ནི། དེ་ཡན་ཆད་ཐམས་ཅད་གཏོར་མ་ཡེ་ཤེས་ཀྱི་བདུད་རྩི་འདོད་ཡོན་ཕུན་སུམ་ཚོགས་པའི་དངོས་པོར་འདུ་ཤེས་པར་བྱ་བ་ཡིན་ཀྱང་། འདི་ནས་གཏོར་མ་ནི་དྲག་པོའི་མཚོན་ཆ་ཐོག་གི་ཆར་པ་ནད་ཀྱི་ན་བུན་དུག་གི་འཚུབ་མ་མིའི་ཕུང་པོ་ཁྲོ་ཆུང་གི་ཚ་ཚ་ལ་སོགས་འཇིགས་པའི་སྤྲུལ་པ་སྣ་ཚོགས་པར་གྱུར་ནས། བསྟན་པ་བཤིག་པའི་དགེགས་ཀྱི་སྣོད་བཅུད་ཡུལ་མཁར་མི་ནོར་དང་བཅས་པ་རྡུལ་དུ་རློག་པའི་ནུས་ལྡན་དུ་གྱུར་པར་དམིགས་ཤིང་། སྲུང་མ་དམ་ཅན་ཕོ་ཉ་
ལས་བྱེད་ཀྱི་ཚོགས་རྣམས་དམིགས་བྱའི་ཡུལ་དུ་དམག་དཔུངས་ལ་འཆས་པར་བསམ་ལ། གསེར་སྐྱེམས་ཕུལ་ནས་གཟུག་ཅིང་གཏོར་ཟོར་འཕང་བ་ནི། ཧཱུྃ། མ་ཉེས་དཔང་དུ་དཀོན་མཆོག་བཞུགས། །དགྲ་གེགས་མ་གཏོགས་སྐུ་གཟུར་ཅིག །བཀའ་བརྒྱད་ལྷ་ཚོགས་དམག་དཔུངས་འགྱེད། །དགྲ་གེགས་སྙིང་ལ་གཏོར་ཟོར་རྒྱོབ། བཛྲ་སརྦ་དུཥྚཱན་ཏིགྣན། ཨེ་ཧུར་ཐུཾ་ཛཿ དགྲ་གེགས་ནྲྀ་ཏི་ཤཏྲཾུ་མཱ་ར་ཡ་རྦད། ཅེས་པས་གཏོར་མ་འཕང་ཞིང་དྲག་སྔགས་དམོད་པ་སྣ་ཚོགས་བརྗོད་ཅིང་ཐལ་མོ་བརྡབ་མ་ཏིང་འཛིན་གྱིས་གཟིར་རོ། །བདུན་པ་བསྟན་མ་བསྐྱང་བ་ནི། གཏོར་གཞོང་རྣམས་རཀྟའམ་ཆང་ཕུད་ཀྱིས་བཤལ་བ་དེ་ལ་འབྲུ་གསུམ་གྱིས་བྱིན་བརླབས་ནས་དམ་ཚིག་གི་བདུད་རྩི་འདོད་ཡོན་ཕུན་ཚོགས་སུ་དམིགས་པ་འཐོག་ཏེ། བསྟན་མ་འཁོར་བཅས་བཀུག་ཅིང་མཆོད་དེ་དམ་ཚིག་བསྒྲག་པ་ནི། ཧོ། དེ་ཡན་ཆད་དུ་དཔལ་ཆེན་པོའི་ཕ་ཕོག་ལ་མ་གཏོགས་པར་ཕྱིན་ན་ཡང་། ནག་མོ་བཞིན་མི་སྡུག་གི་བུ་མོ་བདུད་མོ་ཆེན་མོ་བཞི་དང་། དམར་མོ་ཁྲོ་གཉེར་
ཅན་གྱི་བུ་མོ་གནོད་སྦྱིན་མོ་ཆེན་མོ་བཞི་དང་། དཀར་མོ་མདངས་ལྡན་མའི་བུ་མོ་སྨན་བཙུན་ཆེན་མོ་བཞི་ལ་སོགས་པ་བོད་ཁམས་སྐྱོང་བའི་བསྟན་མ་བཅུ་གཉིས་འཁོར་རྡུལ་སྙེད་དང་བཅས་པ་ཐམས་ཅད། སྔོན་གྱི་ཐུགས་དམ་དང་དམ་ཚིག་ལས་མ་གཡེལ་བར། བསྟན་པ་གཉན་པ་བསྲུང་བ་དང་སྒྲུབ་པ་པོའི་གདོང་གྲོག་ལ་སྐད་ཅིག་ཡུད་ཙམ་ཐང་གཅིག་གིས་གཤེགས་ཤིག །ཨེ་ཨ་ར་ལི་ཧོ། ཧྲི༚་ཧྲི༚་ཛ་ཧཱུྃ་བྃ་ཧོ། བཛྲ་ཌཱཀིྐ་ནི་ཧཱུྃ་ཛཿ བྷྱོ། བསྟན་མ་སྐྱོང་མཛད་མ་དང་སྲིང་། །དཔལ་གནས་མ་དང་ཡང་དག་བཤེས། །ཁྱུང་བཙུན་ཀོང་ལྷ་གཡུ་བུན་མ། །མེ་སྟག་ཟླ་འོད་བྱང་རྒྱལ་མ། །གསེར་ཐང་ཀུན་བཟང་ཤནྟིང་དཔལ། །ཀླུ་མོ་གཟི་འབར་ལ་སོགས་པའི། །བསྟན་མ་བཅུ་གཉིས་གཏོར་མ་ལོངས། །མི་མཐུན་གནོད་པའི་ཕྱོགས་རྣམས་བཟློག །མ་མ་ཧྲིང་། མ་མ་
ཧྲི༚། བསྟན་སྐྱོང་ཆེན་མོ་ཁྱེད་རྣམས་ཀྱང་། །སྔོན་ཚེ་སྔོན་གྱི་དུས་ཙ་ན། །སློབ་དཔོན་པདྨ་འབྱུང་གནས་ཀྱིས། །ཨ་སུ་ར་ཡི་བྲག་ཕུག་ཏུ། །ཞིང་ཆེན་མཆོག་གི་བཅལ་བཀྲམ་ནས། །ལག་ཏུ་རྡོ་རྗེ་བྱིན་ནས་ཀྱང་། །རྡོ་རྗེ་འཆང་གི་གྲལ་དུ་བཞག །ཐར་པ་ཐོབ་པར་མིང་ཡང་བཏགས། །མ་ཚོགས་ཁྱེད་ཀྱིས་དམ་བཅས་པ། །རྣལ་འབྱོར་སྒྲུབ་པའི་གྲོགས་བྱའོ་ཞེས། །ནད་ཡམ་ཐམས་ཅད་ཞི་བ་དང་། །དགྲ་གེགས་ཐམས་ཅད་སྒྲོལ་བ་དང་། །བསམ་པ་ཐམས་ཅད་སྒྲུབ་བོ་ཅེས། །ཇི་ལྟར་ཁས་བླངས་དམ་བཅས་བཞིན། །དམ་ཚིག་དེ་ལས་ཁྱེད་མ་འདའ། །དམ་ཚིག་དེ་ལས་འདས་གྱུར་ན། །བཛྲ་ཡཀྵ་དྲག་པོ་ཡིས། །སྙིང་གི་དཀྱིལ་ནས་ཁྲག་ཕྱུངས་ཏེ། །དེ་བས་ཐུགས་དམ་ཆེར་དགོངས་ལ། །བཅོལ་བའི་ཕྲིན་ལས་གྲུབ་པར་མཛོད། །ཅེས་བནལ་ཆུ་ནམ་མཁར་འཐོར་ཞིང་། བཛྲ་ཨ་མྲྀ་ཏ་ཁཱ་ཧི། ཡ་ཧི་གཙྪ། ཞེས་པས་རང་རང་གི་གནས་སུ་གཤེགས་གསོལ་བྱའོ།། ༈ །།བརྒྱད་པ་གཏོར་གཞོང་གི་འོག་ཏུ་དམ་སྲི་མནན་པའི་ལས་བཞིའི་བྲོ་ནི་
ལམ་རྒྱ་གྲམ་མམ། སྒོ་ཁང་གི་འོག་ལྟ་བུར་གཏོར་གཞོང་གང་ཡོད་རྣམས་ཁ་སྤུབས་པའི་འོག་ཏུ་ཨེ་གྲུ་གསུམ་འཇིགས་སུ་རུང་བ་དབང་ཆེན་གསེར་གྱི་ས་གཞིའི་འོག་ཏུ་ཐུག་པའི་གཏིང་ན། དམ་སྲི་འབྱུང་པོའི་རིགས་ཐམས་ཅད་བཀུགས་ནས་བཅུག་པའི་ཁ་རྡོ་རྗེ་རི་རབ་ཀྱིས་མནན་པའི་སྟེང་དུ་བདག་ཉིད་ཧེ་རུ་ཀའི་འཁོར་དུ་རིགས་བཞིའི་ཧེ་རུ་ལས། བཞིའི་མདོག་ཅན་ཕྲིན་ལས་བཞིའི་ཕུར་པ་བསྣམས་པ་གྲངས་མེད་པས་བསྐོར་ཏེ་ཁྲོ་བོའི་རྟ་བྲོ་བརྡུང་བར་དམིགས་ཤིང་། ན་མོ། །རྗེ་བཙུན་རྩ་བ་དང་རྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི། ཆོས་ཀྱི༴ དགེ་འདུན་གྱི༴ ཡི་དམ་དཀྱིལ་འཁོར་གྱི་ལྷ་ཚོགས་དཔའ་བོ་མཁའ་འགྲོ་ཆོས་སྲུང་དམ་ཅན་རྒྱ་མཚོའི་བདེན་པ་ཆེན་པོའི་སྟོབས་ཀྱིས། བསྟན་པ་ལ་གནོད་ཅིང་སེམས་ཅན་ལ་འཚེ་བར་བྱེད་པ་དང་དམ་པའི་ཆོས་ཟབ་མོ་སྒྲུབ་པ་ལ་བར་དུ་གཅོད་པའི་གནོད་བྱེད་དམ་སྲི་འབྱུང་པོའི་རིགས་སུ་གྱུར་པ་ཐམས་ཅད། སྐད་ཅིག་ཙམ་ལ་གཏོར་གཞོང་རི་རབ་ཆེན་པོའི་འོག་ཏུ་ཁུག་ཅིག །ཏྲི་ཡྃ་
ཀཾ་པ་རི་ཨཾ་ཀུ་ཤ་ཛཿ ཞེས་བཀུག་ལ། དེ་ནས་སྒྲུབ་པ་པོ་རྣམས་གཡས་གཡོན་སྲིན་ལག་ལུ་གུ་རྒྱུད་དུ་སྦྲེལ་ནས་བྲོ་ར་ཟླུམ་པོ། གྲུ་བཞི། ཟླ་གམ། གྲུ་གསུམ་གྱི་བསྐོར་བའི་དཀྱིལ་དུ་རྡོ་རྗེ་སློབ་དཔོན་གྱིས་ཁྲོ་བོའི་སྟངས་སྟབས་འགྱིང་གར་གྱིས་གཏོར་གཞོང་ཞབས་ཀྱིས་གནོན་ཚུལ་དང་བཅས་པས་དབྱངས་ཀྱི་ང་རོས་རྟ་བྲོ་བརྡུང་སྟེ། ཧཱུྃ། སངས་རྒྱས་ཀུན་གྱི་སྐུ་གསུང་ཐུགས། །ཡོན་ཏན་ཕྲིན་ལས་རྫོགས་པའི་དཔལ། །གཏི་མུག་བུདྡྷ་རྡོ་རྗེ་ལ། ཞི་བའི་ལྷ་དང་ལྷ་མོས་བསྐོར། །དངུལ་ལམ་དཀར་པོའི་ཤིང་དག་ལ། །མགོ་བོ་བརྒྱ་མདུད་རྩེ་ཟླུམ་པོ། །ངོས་ལ་ཞི་བའི་ལྷ་བཀོད་དེ། །བཏབ་པས་འཇིགས་བརྒྱད་ཞི་བར་འགྱུར། །ཞི་བར་མ་གྱུར་གང་ཡང་མེད། །ཞི་མཛད་ལྷ་ལ་ཕྱག་འཚལ་བསྟོད། ཨོཾ་ཨོཾ་ཨོཾ་མི་མཐུན་ཕྱོགས་རྣམས་ཤནྟིང་ཀུ་རུ་ཡེ་སྭཱ་ཧཱ། ཧཱུྃ། སངས་རྒྱས་ཀུན་གྱི་སྐུ་གསུང་ཐུགས། །ཡོན་ཏན་ཕྲིན་ལས་རྫོགས་པའི་དཔལ། །ང་རྒྱལ་རིན་ཆེན་རྡོ་རྗེ་ལ། །རྒྱས་པའི་ལྷ་དང་༴ གསེར་རམ་སེར་པོའི་ཤིང་༴ མགོ་བོ་བརྒྱ་མདུད་རྩེ་གྲུ་བཞི། །
ངོས་ལ་རྒྱས་པའི་ལྷ་བཀོད་དེ། །བཏབ་པས་འབྱོར་དྲུག་རྒྱས་པར་འགྱུར། རྒྱས་པར་མ༴ རྒྱས་མཛད་ལྷ་ལ༴ སྭཱ་སྭཱ་སྭཱ། ཚེ་དང་བསོད་ནམས་པུཥྚིང་ཀུ་རུ་ཡེ་སྭཱ་ཧཱ། ཧཱུྃ། སངས་རྒྱས་ཀུན༴ ཡོན་ཏན་ཕྲིན་ལས༴ འདོད་ཆགས་པདྨ་རྡོ་རྗེ་ལ། དབང་གི་ལྷ༴ ཟངས་སམ་དམར་པོའི༴ མགོ་བོ་བརྒྱ་མདུད་རྩེ་ཟླ་གམ། ངོས་ལ་དབང་གི༴ བཏབ་པས་སྣང་སྲིད་དབང་དུ་འགྱུར། དབང་དུ་མ་གྱུར༴ དབང་མཛད་ལྷ་ལ༴ ཧྲཱི་ཧྲཱི་ཧྲཱི་༴ ལྷ་འདྲེ་མི་གསུམ་ཝ་ཤཾ་ཀུ་རུ་ཡེ་སྭཱ་ཧཱ། ཧཱུྃ། སངས་རྒྱས༴ ཡོན་ཏན་ཕྲ་དོག་ཀརྨ་རྡོ་རྗེ་ལ། དྲག་པོའི་ལྷ་དང་ལྷ་མོས་བསྐོར། ལྕགས་སམ་ནག་པོའི་ཤིང་དག་ལ། མགོ་བོ་བརྒྱ་མདུད་རྩེ་ཟུར་གསུམ། ངོས་ལ་དྲག་པོའི་ལྷ༴ བཏབ་པས་དགྲ་གེགས་རླག་པར་འགྱུར། རླག་པར་མི་འགྱུར་གང་ཡང་མེད། །རླག་མཛད་ལྷ་ལ་ཕྱག་འཚལ་བསྟོད། ཧཱ་ཧཱ་ཧཱ། །གནོད་བྱེད་དགྲ་གེགས་མཱ་ར་ཡ་ཕཊཿ ཅེས་ཕྲིན་ལས་བཞིའི་བྲོ་བརྡུངས་པའི་རྗེས་སུ། གཏོར་གཞོང་རྣམས་ཁ་
ཡར་ཕྱེས་པ་ཙམ་གྱི། རྣལ་འབྱོར་སྒྲུབ་པ་པོ་ཡོན་མཆོད་རྣམས་ཀྱི་ཚེ་བསོད་དཔལ་འབྱོར་ལོངས་སྤྱོད་མཐའ་དག་ཡར་ངོའི་ཟླ་བ་ལྟར་འཕེལ་ཞིང་རྒྱས་པར་གྱུར། ཞེས་མོས་ལ་ནང་དུ་ལོག་གོ།། ༈ །།དགུ་པ་སྐྱེད་རིམ་ཉིད་རྫོགས་རིམ་གྱི་དབྱིངས་སུ་བསྡུ་བ་ནི། ཧཱུྃ། དང་པོ་ཆོས་སྐུ་སྐྱེ་མེད་ངང་ཉིད་ལས། །འགྲོ་དོན་སྐྱེ་བའི་ཆོ་འཕྲུལ་ཚོམ་བུ་དགུ། །ཞི་ཁྲོ་ཡོངས་རྫོགས་འགྲོ་བ་ཀུན་བཏུལ་ནས། །སླར་ཡང་ཆོས་དབྱིངས་རྣམ་དག་ཀློང་དུ་བསྡུ། ཨོཾ་ཨཱཿཧཱུྃ་བཛྲ་མུཿ ཞེས་བརྗོད་པ་ཙམ་གྱིས། བདག་ཉིད་ཀྱི་སྤྲུལ་པ་ལས་ཀྱི་ཧེ་རུ་ཀ་དེ་ཉིད་བདག་གཙོ་བོ་ལ་ཚུར་ཐིམ་པས་གཙོ་མཆོག་གི་ཞལ་ནས་ཧཱུྃ་ཞེས་གསུངས་མ་ཐག་ཕྱི་རོལ་སྣོད་བཅུད་བརྟན་གཡོའི་དངོས་པོ་མཐའ་དག་འོད་དུ་ཞུ་བས་འོད་མཐིང་གའི་རང་བཞིན་དུ་གྱུར་པ་གཞལ་ཡས་ཁང་ལ་ཐིམ་ཞིང་། གཞལ་ཡས་ཁང་འཁོར་གྱི་ལྷ་ཚོགས་ལ་ཐིམ། འཁོར་དང་གཙོ་མཆོག་ལ་ཐིམ། གཙོ་བོ་ཉིད་ཀྱང་རིམ་པས་ཡས་མན་རྣམས་ཐུགས་སྲོག་ཧཱུྃ་ལ་འདུས་ཏེ་ཧཱུྃ་ཡང་མས་རིམ་བཞིན་གྱེན་རྫོགས་སུ་ཐིག་ལེ་ནཱ་ད་ལ་འདུས་པའི་མཐར་འཇའ་སྤྲིན་
ནམ་མཁའ་ཡལ་བ་བཞིན་གྱུར་པའི་ངང་ནས། འཁོར་འདས་ལམ་གསུམ་གྱི་འཛིན་རྟོག་གང་གིས་ཀྱང་མ་བསླད་པའི་གནས་ལུགས་གདོད་མའི་ཡེ་ཤེས་ཁྱབ་གདལ་ཆེན་པོར་མཉམ་པར་བཞག་བྱ་འཇོག་བྱེད་དང་བྲལ་བར་གློད་པ་ནི་ཀུན་བཟང་ཆེ་མཆོག་ཧེ་རུ་ཀའི་ཏིང་འཛིན་ཡང་དག་པའི་སྙིང་པོའོ།། ༈ །།བཅུ་པ་ཆོ་གའི་ལྷག་ཆད་བསྐང་བ་ནི། སྐུ་སྐྱེད་རིམ་མ་གསལ་བ་དང་བསྒོམ་ཚུལ་མ་ཤེས་པ། བརྡ་དོན་རྟགས་གསུམ་རྒྱུད་ལ་མ་འབྱོར་བ་ལ་སོགས་ཀྱི་ཉེས་སྐྱོན་ཐམས་ཅད་ཀཱ་ལི་ཐབས་ཀྱི་ཡི་གེས་བསྐང་སྟེ། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ གསུང་བཟླས་བརྗོད་སྔགས་ཀྱི་སྒྲ་མ་དག་པ། གྲངས་མ་ཚང་བ། གོ་རིམ་མ་ཤེས་པ་ལ་སོགས་ཀྱི་ཉེས་སྐྱོན་ཐམས་ཅད་ཤེས་རབ་ཨཱ་ལིས་བསྐང་སྟེ། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཱཿ ཐུགས་ཏིང་འཛིན་འཕྲོ་འདུའི་རིམ་པ་ནོར་འཁྲུལ་འགལ་ཉེས་ཅི་མཆིས་པ་ཐམས་ཅད་ཞི་ཁྲོ་ཀུན་འདུས་ཀྱི་སྙིང་པོ་
རྡོ་རྗེ་སེམས་དཔའི་ཡི་གེ་བརྒྱ་པས་བསྐང་སྟེ། ཨཱོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏེ་ནོ་པ་ཏིཥྠ། དྲྀ་ཌྷོ་མེ་བྷ་ཝ། སུ་ཏཥྱོ་མེ་བྷ་ཝ། སུ་པོཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲཱི་ཡཿཀུ་རུ་ཧཱུྃ། ཧ་ཧ་ཧ་ཧ་ཧོཿ བྷ་ག་ཝཱན། སརྦ་ཏ་ཐ་ག་ཏོ་བཛྲ་མཱ་མེ་མུཉྩ། བཛྲི་བྷ་ཝ་མ་ཧཱ་ས་མ་ཡ་སཏྭ་ཨཱཿ དེ་ལྟར་སྔགས་རྣམས་ཚར་གསུམ་སོགས་བརྗོད་ཅིང་། དོན་དམ་པར་ནི་ཉེས་སྒྲིབ་བསག་བྱ་གསོག་བྱེད་དང་བསྐང་བྱ་བསྐོངས་བྱེད་ཀྱི་ཆོས་ཐམས་ཅད་ཀྱང་ཆོས་དབྱིངས་སྤྲོས་ཐལ་ཆེན་པོ་ལས་གཞན་མི་དམིགས་སོ། །བཅུ་གཅིག་པ་ཆད་མཐའ་བསལ་ཕྱིར་སླར་ཡང་ལྷར་ལྡང་ཞིང་སྤྲུལ་པ་སྒྱུ་མའི་ཚུལ་གྱིས་འགྲོ་དོན་རྒྱུན་དུ་སྤྱོད་པའི་གོ་ཆ་བགོ་བ་དང་སྨོན་ལམ་གྱིས་མཚམས་སྦྱར་བ་ནི། ཆོས་དབྱིངས་སྟོང་པ་ཉིད་དེའི་ངང་ནས་སྐད་ཅིག་གིས་གསལ་མདངས་འགག་མེད་ཆུ་བུར་རྡོལ་བ་ལྟར། རང་ཉིད་དཔལ་ཆེན་ཧེ་རུ་ཀ་མཐིང་ནག་རྡོ་རྗེ་ཐོད་ཁྲག་བསྣམས་ཤིང་ཁྲོ་ཆས་ཐམས་ཅད་རྫོགས་པ་ཡེ་ཤེས་ཀྱི་མེ་སྤུངས་འབར་
བའི་ཀློང་ན་འགྱིངས་པའི་ཚུལ་དུ་ལམ་གྱི་གསལ་བའི་གནས་གསུམ་འབྲུ་གསུམ་གྱིས་མཚན་པ་ལས་འོད་འཕྲོས་ནས་སྣོད་བཅུད་ཐམས་ཅད་ལ་ཕོག་པའི་མཐུས། སྣོད་ཀྱི་འཇིག་རྟེན་ཐམས་ཅད་གཞལ་ཡས་ཁང་དང་། བཅུད་ཀྱི་སྐྱེ་འགྲོ་མཐའ་དག་ཧེ་རུ་ཀ་ཁོ་ནའི་ངོ་བོར་གྱུར་ཏེ། སྣང་ཚད་སྐུ། གྲག་ཚད་གསུང་དྲན་རྟོག་མཐའ་དག་ཆོས་ཉིད་རོལ་པ་ཆེན་པོ་འབའ་ཤིག་ཏུ་རིག་ཅིང་རྟོགས་པའི་རྣལ་འབྱོར་དང་མ་བྲལ་བའི་ངང་ནས་བྱ་སྤྱོད་ཐམས་ཅད་མཁའ་མཉམ་འགྲོ་བའི་དོན་དུ་དམིགས་ཤིང་། ཧཱུྃ། ངར་འཛིན་རྣམ་དག་སྒྱུ་ལུས་འཇའ་འདྲ་འདི། །དཔལ་ཆེན་སྐུ་གསུང་ཐུགས་ཀྱི་རྒྱས་བཏབ་སྟེ། །བདེན་པ་དབྱེར་མེད་ལྟ་སྤྱོད་ཟུང་འབྲེལ་བས། །རྒྱུན་དུ་འགྲོ་བ་འདྲེན་པའི་སྤྱོད་ལམ་བྱའོ། ཨོཾ་ཨཱཿཧཱུྃ་བཛྲ་ཧྲི༚། ཞེས་དམ་བཅའ་ཞིང་། དགེ་བ་མི་ཟད་ཅིང་གོང་དུ་འཕེལ་ཕྱིར་བསྔོ་བ་སྨོན་ལམ་གྱི་རྒྱས་གདབ་པ་འདི་ཡང་བྱ་སྟེ། ཧོ། བསོད་ནམས་ཡེ་ཤེས་ཚོགས་གཉིས་མཐུ་བྱིན་གྱིས། །བདག་གཞན་འགྲོ་བ་མ་ལུས་ཐམས་ཅད་ཀུན། །ཞི་
རྒྱས་དབང་དྲག་ཕྲིན་ལས་མངའ་བརྙེས་ཤིང་། །སྐུ་གསུམ་ལྷུན་གྲུབ་འགྲོ་དོན་མཐའ་ཕྱིན་ཤོག །དེ་ནས་མཇུག་གི་མཐའ་རྒྱན་དུ་བཀྲ་ཤིས་བདེ་ལེགས་ཀྱི་ཚིགས་སུ་བཅད་པ་བརྗོད་ཅིང་རྟེན་འབྲེལ་སྙིང་པོ་བཟླས་པའི་མེ་ཏོག་གི་ཆར་དབབ་ཅིང་དབྱངས་དང་བཅས་པས། ཁྱབ་བདག་ཀུན་ཏུ་བཟང་དང་རྡོ་རྗེ་སེམས། །དགའ་རབ་ཤྲཱི་སིང་ཨུ་རྒྱན་ཡབ་ཡུམ་དང་། །ཆོས་ཀྱི་དབང་ཕྱུག་ཡབ་སྲས་རྒྱུད་པར་བཅས། །རྩ་རྒྱུད་བླ་མ་རྣམས་ཀྱི་བཀྲ་ཤིས་ཤོག །ཆོས་སྐུ་མི་འགྱུར་ཀུན་ཏུ་བཟང་པོའི་ཀློང་། །ལོངས་སྐུ་རིགས་ལྔ་སྐུ་ལྔ་ཡེ་ཤེས་ལྔ། །སྤྲུལ་སྐུ་སྣ་ཚོགས་འགྲོ་དོན་ཡིད་བཞིན་གཏེར། །བདེར་གཤེགས་ཞི་བའི་ལྷ་ཚོགས༴ ཆོས་དབྱིངས་རྣམ་དག་ངང་ལས་མ་གཡོས་ཀྱང་། །ཐབས་ཀྱིས་ཁྲོ་བོར་སྐུར་བསྟན་གདུག་པ་འདུལ། །ཆེ་བའི་ཆེ་མཆོག་ལྷ་ཡི་ལྷར་གྱུར་པ། །ཀུན་བཟང་ཧེ་རུ་ཀ་ཡི༴ སྐུ་མཆོག་འགྱུར་བ་མེད་པའི་དཀྱིལ་འཁོར་ནས། །འཇམ་དཔལ་བཤེས་གཉེན་སྲིད་སྐུ་
ཡི་དཔལ། །འགྱུར་མེད་དོན་ནི་ཡེ་ནས་ལྷུན་གྲུབ་པའི། །བཤེས་གཉེན་ཡོངས་རྫོགས་སྐུ་ཡི་བཀྲ་ཤིས་ཤོག །གསུང་མཆོག་འགག་པ་མེད་པའི་དཀྱིལ་འཁོར་ནས། །དབང་ཆེན་རྟ་མགྲིན་ཆོས་སྒོ་འདུས་པའི་དཔལ། །འགག་མེད་དོན་ནི་ཡེ་ནས་ལྷུན་གྲུབ་པའི། །དབང་ཆེན་ཡོངས་རྫོགས་གསུང་གི༴ ཐུགས་མཆོག་འཁྲུལ་པ་མེད་པའི་དཀྱིལ་འཁོར་ནས། །བཛྲ་ཧེ་རུ་ཀ་རང་བྱུང་ཐུགས་ཀྱི་དཔལ། །འཁྲུལ་མེད་དོན་ནི་ཡེ་ནས་ལྷུན་གྲུབ་པའི། །ཡང་དག་ཡོངས་རྫོགས་ཐུགས་ཀྱི༴ ཡོན་ཏན་མི་ཟད་གཏེར་གྱི་དཀྱིལ་འཁོར་ནས། །ཆེ་མཆོག་ཧེ་རུ་ཀ་ཡོན་ཏན་རྫོགས་པའི་དཔལ། །ཡོན་ཏན་དོན་ནི་ཡེ་ནས་ལྷུན་གྲུབ་པའི། །བདུད་རྩི་ཡོན་ཏན་ཡོངས་རྫོགས༴ ཕྲིན་ལས་ཐོགས་པ་མེད་པའི་དཀྱིལ་འཁོར་ནས། །རྡོ་རྗེ་གཞོན་ནུ་མཐུ་སྟོབས་རྫོགས་པའི་དཔལ། །ཕྲིན་ལས་དོན་ནི་ཡེ་ནས་ལྷུན་གྲུབ་པའི། །ཕུར་པ་ཕྲིན་ལས་
ཡོངས་རྫོགས༴ གཟི་བརྗིད་ཡོངས་སུ་རྫོགས་པའི་དཀྱིལ་འཁོར་ནས། །བླ་མེད་ཧེ་རུ་ཀ་མ་མོ་འདུས་པའི་དཔལ། །སྐྱེ་འགག་གཉིས་མེད་དོན་ནི་ལྷུན་གྲུབ་པའི། །མ་ཚོགས་ལས་ལ་འཁོར་བའི༴ བྱིན་རླབས་ཡོངས་རྫོགས་འདུས་པའི་དཀྱིལ་འཁོར་ནས། །རིག་འཛིན་གཙོ་མཆོག་རྒྱུད་ལུང་མན་ངག་དཔལ། ས་ལམ་ཡོན་ཏན་རང་བཞིན་ལྷུན་གྲུབ་པའི། །ཤེས་རབ་རྣམ་གསུམ་མངའ་བརྙེས༴ དྲག་རྩལ་མེ་ལྟར་འབར་བའི་དཀྱིལ་འཁོར་ནས། །དྲེགས་པ་ཀུན་འདུལ་བདུད་དཔུངས་འཇོམས་པའི་དཔལ། །མཐུ་རྩལ་རྨད་བྱུང་སངས་རྒྱས་བསྟན་པ་བསྲུང་། །སྡེ་བརྒྱད་བྲན་དུ་འཁོལ་བའི༴ དགྲ་གེགས་གདུག་པ་ཚར་གཅོད་དཀྱིལ་འཁོར་ནས། །སྟོབས་ལྡན་ནག་པོ་སྣང་སྲིད་སྲོག་བདག་དཔལ། །དྲག་སྔགས་དམོད་པས་མ་རུངས་ལོག་ལྟ་སྒྲོལ། །ནུས་མཐུ་ཡོངས་སུ་རྫོགས་པའི་བཀྲ་ཤིས་ཤོག །བཀའ་དང་དམ་ལ་གནས་པའི་དཀྱིལ་འཁོར་ནས། །དམ་ལྡན་
སྐྱོངས་ཤིང་དམ་ཉམས་རྡུལ་དུ་རློག །རྣམ་བཞིའི་ཕྲིན་ལས་ལྷུན་གྱིས་གྲུབ་པའི་དཔལ། །བཀའ་སྡོད་ཡོངས་རྫོགས་སྲུང་མའི་བཀྲ་ཤིས་ཤོག །ཐོས་བསམ་སྒོམ་པ་མཐར་ཕྱིན་བླ་མ་མཆོག །དངོས་གྲུབ་ཀུན་སྩོལ་ཡི་དམ་ཡོངས་རྫོགས་ལྷ། བར་ཆད་སེལ་མཛད་མཁའ་འགྲོ་ཆོས་སྐྱོང་ཚོགས། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཅེས་སོགས་ཤིས་བརྗོད་རྒྱས་པར་བྱའོ། །དེ་ནས་བླ་མའི་གཏོར་མ་དང་བདུད་རྩི་སྨན་སོགས་དངོས་གྲུབ་ཏུ་ལེན་པར་འོས་པའི་རྫས་རྣམས་དངོས་གྲུབ་ཏུ་བླངས་ཤིང་། གཞན་མཆོད་རྫས་ཡོ་བྱད་སོགས་བསྡུ་བར་འོས་པ་རྣམས་གཤེགས་བསྡུ་བྱ་ཚུལ་མཇུག་གི་བྱ་བ་མཐའ་དག་སྤྱི་དང་མཐུན་པར་བྱའོ། །འདི་ལ་གང་ཟག་ལ་ལའི་བསམ་ཡུལ་དུ་རྒྱུད་སྡེ་འོག་མ་དག་གི་འགྲོས་དང་བསྟུན་ན་ཡེ་ཤེས་པ་རང་བཞིན་གྱི་གནས་སུ་གཤེགས་ཚུལ་མི་འདུག་པས་ཅི་ཞིག་སྙམ་དུ་སེམས་པ་འབྱུང་སྲིད་འདི་ནི་གསང་སྔགས་བླ་མེད་རྒྱུད་སྡེ་གོང་མའི་ལུགས་ཀྱིས། དམ་ཡེ་དབྱེར་མེད་དུ་བསྲིས་ཚར་ནས་སླར་གཤེགས་
གསོལ་བྱ་མི་དགོས་པར་ཆོས་ཉིད་ཐིག་ལེ་ཉག་གཅིག་ཆེན་པོར་བསྡུ་བ་ནི་ཁྱད་པར་འཕགས་པའི་སྐབས་དོན་ཡིན་ནོ། །དེ་ལྟར་འདི་ཡན་ཆད་ཀྱིས་ཞི་ཁྲོ་བཀའ་བརྒྱད་གསང་བ་ཡོངས་རྫོགས་ཆེན་པོའི་ལས་བྱང་གཞུང་སྲོང་གི་རིམ་པ་གུ་རུ་རིན་པོ་ཆེ་པདྨ་འབྱུང་གནས་ཉིད་ཀྱིས་མཛད་ནས་རྗེ་འབངས་གྲོགས་གསུམ་ལ་ཟབ་པར་གདམས་པ་ཆོས་དབང་གི་གཏེར་བྱོན་སོར་བཞག་དང་། ས་བཅད་ཀྱི་གོ་རིམ་ཀྱང་རྩ་ཐོ་ཉིད་ཇི་ལྟ་བ་ལས་གཞན་པའི་བཅོས་སླད་ཀྱི་དྲི་མ་མེད་པར་བསྟན་ཟིན་ཏོ། །དེ་ཡང་སྤྱིར་གང་ཟག་གི་བསམ་པའི་བྱེ་བྲག་ཐ་དད་སྣ་ཚོགས་པའི་དབང་གིས། གསང་སྔགས་སྔ་འགྱུར་གཏེར་བྱོན་གྱི་ལས་གཞུང་སོགས་ལ། ལ་ལས་ཧ་ཅང་རྒྱས་ནས་ཉོག་འདུག་ཅེས་ཟེར་ནས་འཕྲི་བ་དང་། ལ་ལས་བསྡུས་པས་མ་ཚང་འདུག་ཅེས་གཞན་ནས་འགེབས་པ་དང་། འགའ་ཞིག་གིས་གསང་སྔགས་གསར་མའི་ཆོག་གཞུང་སོགས་ཀྱི་འགྲོས་དང་བསྟུན་ནས་བཅོས་བསྒྱུར་སྣ་ཚོགས་བྱེད་པ་སྣང་ཡང་། འཁོར་འདས་དུས་གསུམ་མ་ལུས་སྒྲིབ་མེད་དུ་གཟིགས་པའི་རྒྱལ་མཆོག་པདྨ་འབྱུང་གནས་ཀྱིས་མ་མཁྱེན་མི་དགོངས་པ་ཅིག་ནམ་དུའང་སྲིད་པ་མ་ཡིན་ཚེ། དེའི་བཀའ་གཞུང་ལྷད་མེད་དྲི་བྲལ་
ཉིད་ལག་ཏུ་བླངས་ཤིང་ཉམས་སུ་ལོན་ན་བྱིན་རླབས་ཀྱི་འཇུག་ཚུལ་བསླུ་བ་མེད་པ་ཆོས་ཉིད་ཡིན་པས་ན། ཟབ་མོའི་ཆོས་ལ་རང་བཟོའི་དྲི་མས་མ་བསླད་པ་ཤིན་ཏུ་གལ་ཆེ་བའི་ཚུལ་ཡང་ཕྱིས་འབྱུང་གི་གང་ཟག་རྣམས་ཀྱིས་ཤེས་པར་བྱའོ།། ༈ །།རྒྱལ་བའི་དཀྱིལ་འཁོར་རབ་འབྱམས་མཐའ་ཡས་ཀུན། །ཞི་ཁྲོ་བཀའ་བརྒྱད་སྙིང་པོར་མ་འདུས་མེད། །འདི་བསྒྲུབ་རྒྱལ་བའི་དཀྱིལ་འཁོར་མ་ལུས་ཀྱི། །ཐུགས་སྲོག་སྙིང་པོའི་དངོས་གྲུབ་བདེ་བླག་གྲུབ། །དུས་གསུམ་རྒྱལ་བའི་སྤྱི་སྒྲུབ་ཟབ་མོ་ལ། །གང་གིས་རྩེ་གཅིག་གུས་པས་མཆོད་དང་བསྒྲུབ། །དེ་ལ་རྒྱལ་བ་རྣམས་ཀྱིས་བྱིན་རློབས་ཤིང་། །རིག་འཛིན་དཔའ་བོ་མཁའ་འགྲོས་སྤུན་དུ་དགོངས། །བཀའ་སྡོད་དམ་ཅན་རྣམས་ཀྱང་རྗེ་བོར་ཁུར། །མ་རུངས་འབྱུང་པོ་འདུག་པའི་གཉེན་པོར་ཆེ། །མཆོག་དངོས་གེགས་མེད་ཚེ་གཅིག་ཐོབ་འགྱུར་ན། །ཐུན་མོང་ཕྲིན་ལས་བཞི་སོགས་སྨོས་ཅི་དགོས། །དེ་ཕྱིར་གསང་བ་ཡོངས་སུ་རྫོགས་པའི་གཞུང་། །འདི་ནི་རྒྱལ་དབང་པདྨའི་བཀའ་ཟོལ་མེད། །ཆོས་ཀྱི་དབང་ཕྱུག་ཟབ་གཏེར་ཡང་བཅུད་དེ། །རིག་འཛིན་བརྒྱུད་པའི་ཐུགས་དམ་སྙིང་པོའོ།། ༈ །།དེ་ལྟ་བུའི་གསང་སྔགས་སྙིང་པོ་སྒྲུབ་པ་བཀའ་བརྒྱད་ཡོངས་རྫོགས་ཆེན་པོའི་ཕྲིན་ལས་
ཕྲིན་ལས་གཞུང་སྲོང་གི་རིམ་པ་འདི་ཉིད་ཀྱི་ངག་འདོན་གྱི་ཚིག་རྣམས་གཏེར་གཞུང་སོར་བཞག་དང་། ཅུང་ཟད་ཙམ་ཁ་སྐོང་ལྷན་ཐབས་མེད་མི་རུང་གི་རིགས་དག་ཀྱང་བཀའ་བརྒྱད་ཡོངས་རྫོགས་ཉིད་ཀྱི་ཡིག་ཆ་ལས་བྱུང་བ་ཁོ་ན་མ་གཏོགས་གཞན་དང་མ་འདྲེས་པ་དང་། ས་བཅད་སོ་སོའི་སྐབས་དོན་བསྒོམ་བྱའི་དམིགས་རིམ་རྣམས་མདོ་ཙམ་མ་བསྟན་ན། དིང་སང་གི་ཆོས་པ་སྤྱི་དང་ཁྱད་པར་གསང་སྔགས་པར་རློམ་པ་ཕལ་མོ་ཆེས་ཆོ་ག་ཏིང་འཛིན་དང་མ་ལྡན་པར་བྲོ་པ་གླུ་གྲ་བསྒྲིགས་པ་ལྟར་གདངས་དབྱངས་དང་རོལ་མོའི་སྒྲ་ཙམ་འབའ་ཤིག་དོན་དུ་གཉེར་བ་ཆོ་གའི་གཟུགས་བརྙན་གྱིས་འཚོ་བ་ཤ་སྟག་མཐོང་བས། དེ་འདྲ་བས་དོན་འགྲུབ་པ་མ་ཡིན་ཚེ། བསྐལ་བཟང་དོན་ལ་བརྟེན་པའི་སྐྱེས་མཆོག་དག་ལ་ཕན་པར་བསམ་ནས། བཀའ་བརྒྱད་ཡོངས་རྫོགས་ཀྱི་སྐྱེད་རྫོགས་གསུམ་གྱི་གཞུང་འགྲེལ་སྒོམ་ཁོག་སོགས་ལས་ཇི་ལྟར་བྱུང་བ་ལྷད་མེད་འགག་བསྡུས་གོ་བདེར་བཀོད་པ་ལས། མི་ཤེས་ཤེས་བརྫུའི་སྤྱི་བརྟོལ་གྱིས་གཟུ་ལུམ་རས་ཆོད་དུ་བྱས་པ་མ་ཡིན་ལ། འདི་ལྟ་བུ་ཡི་གེའི་ལམ་དུ་འཁོད་ནས་སྒྲུབ་པ་པོ་མཆོག་དམན་བར་མ་ཐམས་ཅད་ཀྱིས་ཚིག་དོན་ལག་ཏུ་
བླང་བདེ་བ་ཞིག་ཀྱང་གྱིས་ཤིག་ཅེས། མདོ་ཁམས་ཤར་ཕྱོགས་སུ་གསང་སྔགས་རྙིང་པོའི་བསྟན་པ་རིན་པོ་ཆེ་འཛིན་སྐྱོང་བསྲུང་སྤེལ་གྱི་མངའ་བདག་དམ་པར་གྱུར་པ་མི་ཡི་མགོན། ལྷའི་རྗེ་གདུལ་བྱའི་དེད་དཔོན། མངོན་པར་མཐོ་བ་དང་ངེས་པར་ལེགས་དཔལ་ལ་དབང་འབྱོར་བ་མཚུངས་བྲལ་ཆོས་ཀྱི་རྗེ་ངག་དབང་བསྟན་སྐྱོང་དཔལ་བཟང་པོ་ཕྱོགས་ཐམས་ཅད་ལས་རྣམ་པར་རྒྱལ་བའི་སྡེབ་བཀའི་བསྐུལ་བ་ཡང་དག་པ་གསེར་གྱི་མེ་ཏོག་དང་བཅས་པ་བསྩལ་བ་ཉིད་ལྷག་བསམ་བཟང་པོའི་ཐོད་དུ་བཅིངས་ཏེ་ཡི་གེར་སྒྲིགས་ཆགས་སུ་བཀོད་པ་འདི་ནི། ཡང་དག་པར་སྤོང་བ་བཞི་ལ་མོས་པ་ལམ་དུ་བྱེད་པའི་བཙུན་པ་མཁས་མཆོག་པདྨ་ལེགས་གྲུབ་རྩལ་གྱིས། ཆུ་ཀླུང་པཀྵུ་གཡས་སུ་འཁྱིལ་བའི་ངོགས་ཀྱི་རི་བོའི་སྤོ་བསམ་གཏན་དང་རྣམ་པར་གྲོལ་བ་ལ་མངོན་པར་སྦྱོར་བའི་དབེན་ཁང་གསེར་གྱི་རྒྱལ་མཚན་ཅན་དུ་ཡིག་ལམ་དུ་བཀོད་པ་འདིས་མཚོན་ཚེ་རབས་ཀུན་གྱི་ལེགས་བྱས་མ་ལུས་གཅིག་ཏུ་བཟླུམས་པའི་མཐུ་འབྲས་ཀྱིས། ཕྱོགས་བཅུ་རབ་འབྱམས་ནམ་མཁའི་མཐའ་ཀླས་པའི་སེམས་ཅན་རྣམས་
མི་གནས་པའི་མྱང་འདས་ཆེན་པོ་ལ་འཁོད་པར་གྱུར་ཅིག །མསྡུ་སརྦ་ཛ་ག་ཏཱཾ། གཅིག་ཞུས་ཁུལ་ལགས།