ཚེ་དབང་འཆི་མེད་བདུད་རྩིའི་བུམ་པ།
དག་སྣང་མཚོ་རྒྱལ་དགོངས་པའི་གསང་མཛོད་ལས༔ ཚེ་དབང་འཆི་མེད་
བདུད་རྩིའི་བུམ་པ་བཞུགས༔
རབ་འབྱམས་རྒྱལ་བ་ཐམས་ཅད་ཀྱི༔ སྐུ་གསུང་ཐུགས་ཀྱི་བདག་ཉིད་ཅན༔ གུ་རུ་ཚེ་དཔག་མེད་པ་ཡི༔ ཚེ་དབང་བདུད་རྩིའི་བུམ་པ་བསྟན༔ དཀྱིལ་འཁོར་བློ་དང་འཚམས་པ་རུ༔ ཡིད་འོང་མཛེས་པའི་གདན་གྱི་ཁར༔ འབྲས་ཀྱི་ཚོམ་བུ་ལྷ་གྲངས་བཀོད༔ དབུས་སུ་བུམ་པ་བཅུད་ཀྱིས་བཀང་༔ ཁ་རྒྱན་སྐུ་དང་བཅས་པ་གཟུགས༔ ཤར་དུ་ཚེ་ཡི་རིལ་བུ་དང་༔ དེ་བཞིན་ལྷོ་རུ་ཚེ་ཆང་ངོ་༔ ནུབ་ཏུ་སྒྲུབ་གཏོར་བྱང་མདའ་དར༔ གཞན་ཡང་ལྷ་གྲངས་གཟུགས་བརྙན་འགོད༔ སྨན་རཀ་ཉེར་སྤྱོད་ཚོགས་ཀྱི་རྫས༔ མ་ཚང་མེད་པར་འདུ་བྱས་ལ༔ བསྙེན་དང་སྒྲུབ་པ་སྔོན་སོང་ནས༔ བུམ་པར་དཀྱིལ་འཁོར་ལྷ་ཚོགས་བསྐྱེད༔ བདག་གི་ཐུགས་ཀའི་འོད་ཟེར་གྱིས༔ ལྷ་ཚོགས་སྐུ་ལས་བདུད་རྩིའི་རྒྱུན༔ འཆི་མེད་ཚེ་ཡི་རང་བཞིན་ཅན༔ བབས་པས་བུམ་པ་སྟེམ་གྱིས་གང་༔ བཟླས་པ་བྱ་ཞིང་མཆོད་བསྟོད་མཐར༔ དབང་བླངས་ལས་བུམ་བདུད་རྩི་འཁྱིལ༔ བསྐྱེད་ཅིང་སྔགས་བཟླས་མཆོད་པའི་མཐར༔ གུས་པས་བསྟོད་པ་འདི་བཞིན་བྱ༔ རྒྱལ་ཀུན་ཕྲིན་ལས་བདག་ཉིད་ཅན༔ ཉོན་མོངས་བདུད་བཞིའི་ནད་རྣམས་ཀུན༔ འཇོམས་མཛད་སྔགས་ཀྱི་རྩི་བཅུད་འཆང་༔ ཆོས་ཉིད་ཀློང་དུ་འཁོར་འདས་ཀུན༔ བདེ་ཀློང་ཡངས་པར་འཁྱིལ་མཛད་པ༔ ཁྲོ་བོའི་དབང་པོ་ཁྱེད་ལ་བསྟོད༔ མི་གཙང་དྲི་མ་དག་མཛད་གསོལ༔ ཞེས་བརྗོད་ལྷ་ཉིད་འོད་དུ་ཞུ༔ བདུད་རྩི་བུམ་ཆུའི་རྣམ་པར་བསམ༔ དེ་ནས་སློབ་མ་མདུན་དུ་འཁོད༔ ལས་བུམ་ཆུ་ཡིས་ཁྲུས་བྱས་ཏེ༔ བགེགས་གཏོར་འབྲུ་གསུམ་སྔགས་ཀྱིས་བརླབས༔ ནམ་མཁའ་མཛོད་དང་གནོད་མཛེས་ཀྱི༔ སྔགས་གསུམ་བཟླ་ཞིང་གཡས་གཡོན་བསྐོར༔ བགེགས་ལ་བསྔོ་བའི་ཚིག་འདིས་སྦྱིན༔ ཧཱུྃ་ཧྲཱིཿ ཚེ་རབས་སྔོན་ནས་ཆགས་པའི་ལན་ཆགས་བགེགས༔ གློ་བུར་རྐྱེན་ལས་བྱུང་བའི་འབྱུང་པོའི་རིགས༔ ཚེ་ལ་རྐུ་ཞིང་སྲོག་ལ་འཇབ་པ་རྣམས༔ བླ་གླུད་མར་མེ་ཆངས་བུས་ཚིམས་པར་གྱིས༔ འདི་རུ་མ་འདུག་རྒྱ་མཚོའི་ཕ་མཐར་དེངས༔ བཀའ་ལས་འདས་ན་ཁྲོ་མཚོན་མེ་དཔུང་གིས༔ ཐལ་བའི་རྡུལ་དུ་བརླག་པར་གདོན་མི་ཟ༔ སུམ་བྷ་ནི་བརྗོད་ཡུངས་ཐུན་བྲབ༔ ཚམས་རྔམ་རོལ་མོ་དྲག་ཏུ་བྱ༔ སྲུང་བའི་འཁོར་ལོས་རྒྱས་གདབ་ཅིང་༔ རྡོ་རྗེ་བསོར་ཞིང་རཀྵ་བརྗོད༔ སློབ་མ་ཆོས་ལ་བློ་བསྐུལ་ཕྱིར༔ དལ་འབྱོར་རྙེད་དཀའ་མི་རྟག་དང་༔ ཁྱད་པར་དུས་མིན་འཆི་རྐྱེན་དང་༔ ཚེ་ཟད་རྟགས་དང་གསོ་བྱེད་ཀྱི༔ སློབ་དཔོན་གསོ་ཐབས་ཆོས་འདི་ཡི༔ ལོ་རྒྱུས་བརྗོད་ཅིང་སློབ་མས་ཀྱང་༔ རིན་ཆེན་སྨན་འབྲུའི་མཎྜལ་འབུལ༔ བླ་མ་པད་འབྱུང་དབྱེར་མེད་ལ༔ དབང་དོན་གསོལ་བ་འདི་བཞིན་གདབ༔ ཧྲཱིཿ འདས་དང་མ་འོངས་ད་ལྟ་དུས་གསུམ་གྱི༔ རྒྱལ་བ་སྲས་དང་བཅས་པའི་ངོ་བོ་ཉིད༔ འཆི་མེད་རིག་འཛིན་པདྨ་ཐོད་ཕྲེང་རྩལ༔ བདག་ལ་ཚེ་ཡི་དབང་བསྐུར་བསྩལ་དུ་གསོལ༔ ཅེས་པས་ལན་གསུམ་གསོལ་བཏབ་རྗེས༔ སློབ་མར་དམ་ཆུ་བླུད་བྱས་ཏེ༔ ཧཱུྃ་ཧྲཱིཿ ཁྱོད་ཉིད་དུས་མིན་འཆི་བའི་འཇིགས་པ་ལས༔ སྐྱོབས་མཛད་ཚེ་ཡི་བདག་པོ་བླ་མ་ལ༔ སྐད་ཅིག་ཙམ་ཡང་ལོག་པའི་བློ་སྤངས་ནས༔ རྩ་གསུམ་དམ་ཚིག་སྲོག་ལ་བབ་ཀྱང་བསྲུང་༔ གལ་ཏེ་འདས་ན་མནར་མེད་མེ་ཡིས་འཚིག༔ དེ་ཕྱིར་སྙིང་ནས་རྡོ་རྗེའི་བྲོ་བོར་ཅིག༔ སློབ་མས་སྔགས་ཀྱི་རྗེས་བཟློས་བྱ༔ བཛྲ་ས་མ་ཡཱ་ན་ར་ཀན༔ རཀྴ་སི་ཧཱུྃ༔ མནའ་ཆུ་འཆང་ཞིང་ཡིད་ལ་བརྣག༔ མདུན་མཁར་ཚོགས་ཞིང་གསལ་གདབ་སྟེ༔ གཞུང་གི་སྐྱབས་སེམས་རྗེས་བཟློས་བྱ༔ སླར་ཡང་གསོལ་བ་འདི་བཞིན་འདེབས༔ ཨེ་མ་ཧོ༔ ངོ་མཚར་རྨད་བྱུང་ཚེ་ཡི་རིག་པ་འཛིན༔ ལྷག་པའི་ལྷ་མཆོག་མཚོ་སྐྱེས་སྤྲུལ་པའི་སྐུ༔ བདག་ཅག་སྲོག་གི་འཇིགས་ལས་སྐྱོབ་པའི་ཕྱིར༔ ཁྱོད་ལ་གསོལ་བ་འདེབས་སོ་བྱིན་གྱིས་རློབས༔ ལན་གསུམ་གསོལ་བ་བཏབ་པའི་མཐར༔ བླ་མས་བུམ་པ་ཕྱག་ཏུ་བླངས༔ ཧྲཱིཿ བཀྲ་ཤིས་ཡོན་ཏན་ཀུན་འབྱུང་བུམ་པ་བཟང་༔ འཆི་མེད་བུམ་བཅུད་རིག་འཛིན་ཚེ་ཡི་ལྷ༔ ཟག་མེད་བདུད་རྩིའི་རྣམ་པར་འོད་དུ་ཞུ༔ སྐལ་ལྡན་བུ་ཡི་སྒོ་གསུམ་ལ་ཐིམ་པས༔ ལས་ཉོན་བག་ཆགས་སྒྲིབ་པ་ཀུན་དག་ནས༔ འགྱུར་མེད་རྡོ་རྗེ་གསུམ་གྱི་དཔལ་ཐོབ་ཤོག༔ མ་ཧཱ་གུ་རུ་ཨ་ཡུརྫྙཱ་ན་ཀཱ་ཡ་ཨ་བྷི་ཥིཉྩ་ཧཱུྃ༔ བུམ་པ་མགོར་བཞག་བུམ་ཆུ་བླུད༔ ཚེ་གཟུངས་ལན་གསུམ་བརྗོད་པའི་མཐར༔ ཤིས་པ་བརྗོད་ཅིང་མེ་ཏོག་འཐོར༔ ཚེ་རིལ་སློབ་བུའི་ལག་གཡས་སྦྱིན༔ ཧྲཱིཿ སྔོན་ཚེ་རྒྱལ་པོ་གཙུག་ལག་འཛིན་པ་ཡིས༔ སྐྱེ་བདུན་རིལ་བུས་ཚེ་ཡི་གྲུབ་བརྙེས་ལྟར༔ ལྷ་སྔགས་ཏིང་འཛིན་ནུས་པས་བྱིན་བརླབས་པའི༔ ཚེ་ཟན་སྐལ་ལྡན་ཁྱོད་ལ་སྦྱིན་པ་ཡིས༔ ལོ་བརྒྱ་འཚོ་བའི་ཚེ་ལ་མངའ་བརྙེས་ཤིང་༔ སྟོན་བརྒྱ་མཐོང་བའི་དཔལ་ལ་ལོངས་སྤྱོད་ཤོག༔ མ་ཧཱ་གུ་རུ་ཨ་ཡུརྫྙཱ་ན་ཝཀྐ་ཨ་བྷི་ཥིཉྩ་ཧཱུྃ༔ བཟའ་རུ་བཅུག་ཅིང་ཚེ་ཡི་གཟུངས༔ ལན་གསུམ་བཟླ་ཞིང་ཤིས་པ་བརྗོད༔ ཚེ་ཆང་ཤེས་རབ་ལག་གཡོན་སྦྱིན༔ ཧྲཱིཿ ཕོ་བྲང་རི་བོ་ཏ་ལའི་བྱང་ཤར་མཚམས༔ མཱ་ར་ཏི་ཀར་ཤེས་རབ་མནྡྷ་རས༔ བྱང་སེམས་བདུད་རྩིས་རྡོ་རྗེའི་སྐུ་བརྙེས་ལྟར༔ སྐལ་ལྡན་མགྲིན་པར་ཚེ་ཆང་བཅུད་བསྟིམ་པས༔ ཇི་སྲིད་འཁོར་བའི་འཇིག་རྟེན་མ་སྟོངས་བར༔ དེ་སྲིད་འོད་ལུས་འགྲོ་བའི་དོན་བྱེད་ཤོག༔ མ་ཧཱ་གུ་རུ་ཨ་ཡུརྫྙཱ་ན་ཙིཏྟ་ཨ་བྷི་ཥིཉྩ་ཧཱུྃ༔ ཚེ་ཆང་བཏུང་ཞིང་སློབ་དཔོན་གྱིས༔ ཚེ་གཟུངས་བཟླས་རྗེས་ཤིས་པ་བརྗོད༔ དབང་རྫས་སྒྲུབ་གཏོར་སྤྱི་བོར་བཞག༔ ཨོཾ་ཨཱཿཧཱུྃ༔ ཆོས་སྐུ་སྣང་མཐའ་ལོངས་སྐུ་ཚེ་དཔག་མེད༔ སྤྲུལ་སྐུ་པད་འབྱུང་ཚེ་ཡི་རིག་པ་འཛིན༔ བརྒྱུད་གསུམ་བླ་མ་ཡི་དམ་དཀྱིལ་འཁོར་ལྷ༔ མཁའ་འགྲོ་ཆོས་སྐྱོང་དམ་ཅན་རྒྱ་མཚོའི་ཚོགས༔ སྐལ་ལྡན་བུ་ལ་བྱིན་གྱིས་བརླབ་ཏུ་གསོལ༔ དུས་མིན་འཆི་བའི་ཚེ་ཡི་བར་ཆད་ལས༔ བརྩེ་ལྡན་ཁྱེད་ཀྱི་ཐུགས་རྗེས་བསྐྱབ་ཏུ་གསོལ༔ ཚེ་སྲོག་ཆད་དང་ཡར་བ་ལྷ་འདྲེས་བརྐུས༔ དབང་བཅུ་མངའ་བས་མཐུད་དང་བསྡུད་ཅིང་ཕྲོག༔ མི་འགྱུར་མི་ཤིགས་བརྟན་པར་མཛད་དུ་གསོལ༔ གུ་རུ་ཨ་ཡུརྫྙཱ་ན་གུརྞ་ཨ་བྷི་ཥིཉྩ་ཧཱུྃ༔ མདའ་དར་གཡབ་ཅིང་ཚེ་འགུགས་འདོན༔ སློབ་བུའི་སྤྱི་བོར་རྒྱས་གདབ་ཅིང་༔ ཧྲཱིཿ དང་པོ་སྤྲོས་བྲལ་ཆོས་སྐུ་སྟོང་པའི་རྒྱ༔ གཉིས་པ་ཐབས་ཤེས་ལོངས་སྐུ་ཟུང་འཇུག་རྒྱ༔ གསུམ་པ་སྣ་ཚོགས་སྤྲུལ་སྐུ་འགྲོ་འདུལ་རྒྱ༔ བཞི་པ་ཚད་མེད་ཕྲིན་ལས་རྣམ་བཞིའི་རྒྱ༔ ལྔ་པ་རང་བྱུང་ཡེ་ཤེས་རྣམ་ལྔའི་རྒྱ༔ དྲུག་པ་རིགས་དྲུག་གནས་སྒྲོལ་ཐུགས་རྗེའི་རྒྱ༔ བདུན་པ་བྱང་ཆུབ་ཡན་ལག་བདུན་གྱི་རྒྱ༔ རྒྱ་བདུན་གདབ་པས་སློབ་བུའི་ཚེ་དང་སྲོག༔ ཕྲ་རགས་བགེགས་ཀྱི་འཚེ་བས་མི་ཚུགས་ཤིང་༔ གཟུང་འཛིན་བདུད་ལས་རྒྱལ་བའི་གདེང་ཐོབ་ཤོག༔ བཛྲ་རཀྵ་རཀྵ་བྷྲུཾ༔ ཚེ་གཟུངས་བརྗོད་ཅིང་རྒྱ་གྲམ་གདབ༔ ཤིས་པ་བརྗོད་པས་མཐའ་བརྒྱན་ནོ༔ གལ་ཏེ་ཚེ་ཡི་གདམས་པ་འདི༔ བསྙེན་སྒྲུབ་ལྷག་པའི་ལྷར་འཛིན་ན༔ གོང་གི་བུམ་པའི་དབང་བསྐུར་རྗེས༔ ལྷ་གྲངས་ཙཀ་ལི་སྤྱི་བོར་བཞག༔ སློབ་བུའི་ལག་ཏུ་རིམ་བཞིན་གཏད༔ དང་པོ་གཙོ་བོའི་སྐུ་ཐོགས་ཏེ༔ ཧཱུྃ་ཧྲཱིཿ སྐྱེ་རྒ་ན་འཆི་བདུད་བཞིའི་ཆུ་བོ་ལས༔ ཚད་མེད་ཐུགས་རྗེའི་གྲུ་བོས་ལེགས་བརྒལ་ཏེ༔ མཆོག་ཐུན་དངོས་གྲུབ་ནོར་བུའི་གཏེར་འཆང་བ༔ རིག་འཛིན་མཚོ་སྐྱེས་རྡོ་རྗེའི་དབང་བསྐུར་རོ༔ ཨོཾ་ཨཱཿཧཱུྃ་མ་ཧཱ་གུ་རུ་པདྨ་ཐོད་ཕྲེང་རྩལ་ཨ་བྷི་ཥིཉྩ་ཧཱུྃ༔ བཱི་མ་བོ་དྷི་ཆོས་ཀྱི་རྒྱལ༔ སྐུ་གཟུགས་སྤྱི་བོར་དབང་བསྐུར་ཏེ༔ ཧྲཱིཿ བཱི་མ་མི་ཏྲ་པཎ་གྲུབ་རྒྱ་མཚོའི་གཙོ༔ བོ་དྷི་ས་ཏྭ་ཐུབ་བསྟན་རྒྱ་མཚོའི་སྲོག༔ ཆོས་ཀྱི་རྒྱལ་པོ་འགྲོ་ཁམས་རྒྱ་མཚོའི་མགོན༔ བསྟན་འགྲོའི་སྲོག་ཤིང་གསུམ་གྱི་དབང་བསྐུར་རོ༔ ཨོཾ་ཨཱཿཧཱུྃ་མ་ཧཱ་གུ་རུ་བཱི་མ་མི་ཏྲ་བོ་དྷི་ས་ཏྭ་དྷརྨ་རཱ་ཛ་ཨ་བྷི་ཥིཉྩ་ཧཱུྃ༔ རྟ་མཆོག་འཆི་མེད་མགོན་པོ་དང༔ སྣང་མཐའ་གསུམ་གྱི་སྐུ་ཐོགས་ཏེ༔ སྤྱི་བོར་དབང་བསྐུར་འདི་སྐད་དོ༔ ཧྲཱིཿ རྟ་མཆོག་རྒྱལ་པོས་འཁོར་འདས་ཟིལ་གྱིས་གནོན༔ ཚེ་དཔག་མེད་མགོན་དྲན་པས་བདུད་ལས་སྐྱོབ༔ སྣང་བ་མཐའ་ཡས་འགྲོ་ཀུན་རྗེས་སུ་སྐྱོང༔ རྩ་བའི་ལྷ་མཆོག་གསུམ་གྱི་དབང་བསྐུར་རོ༔ ཨོཾ་ཨཱཿཧཱུྃ་ཧྱ་གྷྲི་ཝ་ཨ་ཡུ་དྷེ་ཝ་ཨ་མི་ཏ་བྷ་ཨ་བྷི་ཥིཉྩ་ཧཱུྃ༔ ནམ་སྙིང་དཔལ་ཡེ་གཉིས་ཀྱི་དབང་བསྐུར་ཏེ༔ ཧྲཱིཿ ནམ་མཁའི་སྙིང་པོ་ཡང་དག་གྲུབ་པ་བརྙེས༔ ཉི་ཟླ་གདན་བཏིང་དཔལ་གྱི་ཡེ་ཤེས་ཀྱིས༔ སྣང་སྲིད་མ་མོ་བྲན་ཁོལ་དབང་དུ་བསྡུས༔ གསང་སྔགས་གྲུབ་བརྙེས་རིག་འཛིན་དབང་བསྐུར་རོ༔ ཨོཾ་ཨཱཿཧཱུྃ་མ་ཧཱ་གུ་རུ་ག་ག་གརྦྷ་ཤྲི་ཛྙཱ་ན་ཨ་བྷི་ཥིཉྩ་ཧཱུྃ༔ གནུབས་ཆེན་གཉགས་ལོ་གཉིས་ཀྱི་དབང་བསྐུར་ཏེ༔ ཧྲཱིཿ བྷུདྡྷ་ཛྙཱ་ནས་གཤིན་རྗེའི་གྲུབ་པ་བརྙེས༔ བྲག་ལ་ཕུར་གདབ་ཛྙཱ་ན་ཀུ་མཱ་རས༔ སྲ་བའི་བྲག་ལས་ཟག་མེད་བདུད་རྩི་འབྱིན༔ གསང་སྔགས་གྲུབ་བརྙེས་རིག་འཛིན་དབང་བསྐུར་རོ༔ ཨོཾ་ཨཱཿཧཱུྃ་མ་ཧཱ་གུ་རུ་བྷུདྡྷ་ཛྙཱ་ན་ཛྙཱ་ན་ཀུ་མཱ་ར་ཨ་བྷི་ཥིཉྩ་ཧཱུྃ༔ མཆོག་དབྱངས་དཔལ་སེང་གཉིས་ཀྱི་དབང་བསྐུར་ཏེ༔ ཧྲཱིཿ རྒྱལ་བ་མཆོག་དབྱངས་གསུང་གི་གྲུབ་པ་བརྙེས༔ རྟ་སྐད་གཙུག་བཏོན་དཔལ་གྱི་སེང་གེ་ཡིས༔ སྣང་སྲིད་ལྷ་སྲིན་སྡེ་བརྒྱད་བྲན་དུ་བཀོལ༔ གསང་སྔགས་གྲུབ་བརྙེས་རིག་འཛིན་དབང་བསྐུར་རོ༔ ཨོཾ་ཨཱཿཧཱུྃ་མ་ཧཱ་གུ་རུ་ཛི་ན་པྲ་སྭ་ར་ཤྲི་སེང་ཨ་བྷི་ཥིཉྩ་ཧཱུྃ༔ མཚོ་རྒྱལ་བཻ་རོ་གཉིས་ཀྱི་དབང་བསྐུར་ཏེ༔ ཧྲཱིཿ མཁར་ཆེན་མཚོ་རྒྱལ་ཕུར་པའི་གྲུབ་པ་བརྙེས༔ བསད་པ་གསོ་ནུས་རྣམ་སྣང་ལོ་ཙཱ་ཡིས༔ དྲག་སྔགས་དམོད་པས་ལོག་འདྲེན་ཆམ་ལ་འབེབས༔ གསང་སྔགས་གྲུབ་བརྙེས་རིག་འཛིན་དབང་བསྐུར་རོ༔ ཨོཾ་ཨཱཿཧཱུྃ་མ་ཧཱ་གུ་རུ་ཛྙཱ་ན་སྭ་ར་རཱ་ཛ་བཻ་རོ་ཙ་ན་ཨ་བྷི་ཥིཉྩ་ཧཱུྃ༔ སྒོ་སྲུང་ལྷ་མོ་བཞི་ཡི་དབང་བསྐུར་ཏེ༔ ཧྲཱིཿ ཚེ་སྲོག་ཆད་ཉམས་འཐོར་བ་འགུགས་ཤིང་འཆིང་༔ ཚེ་བདུད་བར་ཆད་མྱོས་ཤིང་བརྒྱལ་བར་བྱེད༔ སྒོ་སྲུང་ཚེ་ཡི་ལྷ་མོ་རྣམ་པ་བཞིས༔ སྐལ་ལྡན་ཚེ་ཡི་བར་ཆད་སེལ་བར་ཤོག༔ ཛཿཧཱུྃ་བཾ་ཧོ༔ ཨ་ཡུརྫྙཱ་ན་ཨ་བྷི་ཥིཉྩ་ཧཱུྃ༔ ཚེ་རྫས་སྦྱིན་ཅིང་ཤིས་པ་བརྗོད༔ དགའ་སྟོན་བྱ་ཞིང་བསྲུང་བྱ་ནི༔ རྟེན་གསུམ་བཞེངས་དང་ཚེ་ཐར་གཏོང་༔ ཉེའུ་འདོན་དང་ཚེ་གཟུངས་བཟླ༔ གཞན་ལ་གནོད་པ་སྤངས་པ་སོགས༔ དམ་ཚིག་ཁས་བླངས་མཎྜལ་འབུལ༔ ལུས་དང་ལོངས་སྤྱོད་བླ་མར་བསྔོ༔ དགེ་བ་མཁའ་ཁྱབ་གཞན་དོན་དུ༔ ཕངས་པ་མེད་པའི་བློ་ཡིས་གཏོང་༔ ས་མ་ཡཱཿ མ་འོངས་སྐལ་ལྡན་དོན་ཆེད་དུ༔ ཚེ་ཡི་སྒྲུབ་པ་དཔག་མེད་སྦས༔ ཁྱད་པར་དགོངས་པའི་བརྡའ་རིས་ནི༔ དུས་བབ་ལས་ལྡན་བློ་ལ་འཆར༔ བཀའ་ཡི་སྲུང་མ་སྔགས་བདག་མས༔ རྟག་ཏུ་མེལ་ཚེ་གཡེལ་མེད་མཛོད༔ གུ་ཧྱ༔ སྐལ་ལྡན་ལུང་རིག་གླིང་པ་ཞེས། །འགྲོ་ལ་ཕན་སེམས་འཆང་བ་ཡིས། །སྙིང་ལ་སྦས་ཏེ་གབ་སྙམ་ཡང་། །དུས་བབས་ཉམས་ཀྱི་སྣང་བ་ལ། །ལྷ་དང་བླ་མས་བསྐུལ་བྱང་བྱུང་། །ཐེ་ཚོམ་མེད་པར་སྤེལ་བ་འདིར། །ཉེས་ པ་གང་བྱས ་ལྷ་ལ་བཤགས། །དགེ་བས་འདི་དང་གང་འབྲེལ་ཀུན། །འཆི་བདག་བདུད་ཀྱི་གཡུལ་ངོ་ལས། །རྣམ་པར་རྒྱལ་ཏེ་རྣམ་མཁྱེན་གྱི། །གོ་འཕང་མཆོག་ལ་འགོད་པར་ཤོག །