དབང་ཆེན་ཐུགས་ཀྱི་སྒྲུབ་པ་སྣང་སྲིད་ཟིལ་གནོན།
དག་སྣང་མཚོ་རྒྱལ་དགོངས་པའི་གསང་མཛོད་ལས༔ དབང་ཆེན་ཐུགས་ཀྱི་སྒྲུབ་པ་སྣང་སྲིད་ཟིལ་གནོན་བཞུགས༔
ཨེ་མ་ཧོ༔ སྐྱེ་མེད་དབྱིངས་ལས་རོལ་བའི་གར༔ གདུལ་བྱའི་དབང་གིས་ཞི་ཆགས་ཁྲོ༔ སྣ་ཚོགས་ཅིར་ཡང་སྟོན་མཛད་པ༔ དབང་ཆེན་རྒྱལ་པོའི་སྐུ་ལ་འདུད༔ དེ་ཉིད་སྒྲུབ་པའི་ཐབས་ཟབ་མོ༔ རྔམ་པ་དབང་གི་ཏནྟྲ་ཡི༔ བཅུད་ཕྱུང་འགྲོ་ལ་ཕན་པའི་ཕྱིར༔ བདག་ཉིད་རིག་འཛིན་པདྨས་བསྟན༔ མཚོ་རྒྱལ་རྗེ་འབངས་སྙིང་ལ་སྦོས༔ མ་འོངས་བསྟན་འགྲོའི་གསོས་སུ་གྱུར༔ གང་འབྲེལ་དོན་དང་ལྡན་པའི་ཆོས༔ སྐལ་བ་ལྡན་པའི་གྲོགས་སུ་ཤོག༔ ས་མ་ཡཱ༔ ཤིན་ཏུ་དབེན་ཅིང་དྭངས་པའི་གནས༔ མདོག་དམར་ནུབ་ནས་རྒྱུན་འབེབས་ཤིང་༔ མཚན་ཉིད་ལྡན་པའི་གྲོགས་དང་འབྲེལ༔ ཚེས་བརྒྱད་ལ་སོགས་དུས་དང་བསྟུན༔ དཀྱིལ་འཁོར་བློ་དང་འཚམས་པ་ལ༔ ཁྱམས་དང་གྲུ་ཆད་འདོད་སྣམ་དང་༔ ལྷ་གནས་རང་གཞུང་མཐར་དུར་ཁྲོད༔ མེ་རི་རྡོ་རྗེའི་ཕྲེང་བས་བསྐོར༔ སྐུ་གསུང་ཐུགས་ཀྱི་རྟེན་མཆོག་ནི༔ བུམ་པ་དར་དམར་མགུལ་ཆིངས་སྤྲས༔ བླ་མེད་དམ་ཚིག་རྫས་བཅུད་ལྡན༔ སྔགས་བྱང་གསེར་བྲིས་དྭངས་ཤེལ་གསལ༔ སྒྲུབ་ཕུར་ཙན་དན་དམར་པོ་ཡི༔ ཁྲོ་ཞལ་ལྡན་པ་སོར་བཅུ་དྲུག༔ ཡང་ན་ལྕགས་སམ་གང་རུང་ནང་༔ གཏོར་མ་ཟླ་གམ་ལྷ་གྲངས་བཀོད༔ སྨན་རཀ་ཉེར་སྤྱད་འཚོ་བའི་རྫས༔ མ་ཚང་མེད་པར་འདུ་བྱས་ལ༔ རང་ཉིད་བདེ་བའི་སྟན་ལ་འདུག༔ གཉུག་མའི་སེམས་ཀྱི་རང་མདངས་ལས༔ མདུན་མཁར་བླ་མ་དབང་ཆེན་ལྷ༔ དབྱེར་མེད་སྐྱབས་ཡུལ་གསལ་གདབ་ལ༔ ཧྲཱིཿ གདོད་ནས་སྤྲོས་བྲལ་སྲིད་ཞི་མཉམ་ཉིད་ཀློང་༔ ལྷུན་གྲུབ་རང་རྩལ་མཆོག་གསུམ་དབང་ཆེན་ལྷ༔ འགྲོ་ཀུན་རྣམ་མཁྱེན་གོ་སར་དབུགས་དབྱུང་ཕྱིར༔ བྱང་ཆུབ་སྙིང་པོའི་བར་དུ་སྐྱབས་སུ་མཆི༔ ལན་གསུམ༔ བྱང་ཆུབ་སེམས་བསྐྱེད་ནི༔ ཧྲཱིཿ ཡེ་དག་ཆོས་དབྱིངས་རང་ཞལ་མ་མཇལ་བས༔ གློ་བུར་རྐྱེན་སྣང་གཟུང་འཛིན་དགྲ་གདོན་བགེགས༔ བདེ་ཆེན་དག་པའི་དབྱིངས་སུ་སྒྲོལ་བའི་ཕྱིར༔ དཀྱིལ་འཁོར་ལྷ་ཚོགས་སྒྲུབ་པར་སེམས་བསྐྱེད་དོ༔ ལན་གསུམ༔ ཚོགས་བསག་རིམ་པ་ནི༔ ཧྲཱིཿ རང་མདངས་བདེ་སྟོང་དབྱེར་མེད་དབྱིངས་ཀྱི་ལྷ༔ འདིར་གཤེགས་འགྲོ་རྣམས་ཡོངས་སུ་སྒྲོལ་ཕྱིར་དུ༔ རྩེ་གཅིག་སྒྲུབ་པའི་དམ་བཅའ་འདི་བཞེས་ལ༔ བསོད་ནམས་ཡེ་ཤེས་ཚོགས་ཆེན་རྫོགས་པར་བགྱི༔ དེ་ནས་གཉུག་གནས་ལྷ་འདྲེ་ལ༔ གཏོར་མ་སྔགས་ཀྱིས་ཚིམས་པར་བསྔོ༔ བགེགས་ལ་བཀའ་བསྒོའི་ཐོག་མ་རུ༔ ཧྲཱིཿ བརྗོད་པ་སྔགས་ཀྱི་སྒྲ་གདངས་ལས༔ རང་ཉིད་ལྷ་ཡི་ང་རྒྱལ་བསྒོམས༔ ཧྲཱིཿ ཐོག་མར་འཁྲུལ་བའི་གཞི་བཟུང་བདག་ལྟའི་བགེགས༔ ཚེ་ཆོས་སྲིད་ནོར་ཐར་པའི་ལམ་ལ་རྒོལ༔ བདེན་པའི་ཚིག་ཉོན་གཏོར་མས་ཚིམས་པར་གྱིས༔འདི་རུ་མ་གནོད་ཕན་པའི་སེམས་ཀྱིས་དེངས༔ གལ་ཏེ་བཀའ་ལས་འདས་ཤིང་བར་གཅོད་ན༔ ང་ནི་དབང་ཆེན་ཁྲོ་བོའི་རྒྱལ་པོ་ཆེ༔ འཁོར་འདས་ཆེ་བཙན་དྲེགས་པའི་གཤེད་དུ་རྔམ༔ སྤྲུལ་པ་ཁྲོ་མཚོན་མེ་ཡི་ཕུང་པོར་འབར༔ ཐལ་བའི་རྡུལ་དུ་བརླག་པར་གདོན་མི་ཟ༔ ཧཱུྃ༔བཞིའི་སྔགས་དང་ཐུན་གྱིས་བརྡེག༔ སྲུང་བའི་འཁོར་ལོ་བསྒོམ་པ་ནི༔ ཧཱུྃ་ཧྲཱིཿ སྟེང་འོག་ཕྱོགས་མཚམས་རིགས་ལྔ་མཚོན་ཆའི་གུར༔ བར་གཅོད་འབྱུང་པོའི་གདོན་ཚོགས་ཐལ་བར་བྱེད༔ སྲིད་པའི་རླུང་ཡང་རྒྱུ་བའི་སྐབས་དང་བྲལ༔ གཞོམ་བྲལ་མི་ཤིགས་སྟོང་པས་རྒྱས་གདབ་བོ༔ བཛྲ་རཀྵ་རཀྵ་བྷྲུཾ༔ སྒོ་གསུམ་བྱིན་བརླབས་རྩལ་བསྐྱེད་དེ༔ ཧྲཱིཿ དབང་ཆེན་ཟླ་གམ་འབར་བའི་ད་ལ་འདིར༔ དབང་མཛད་པདྨ་གར་གྱི་ལྷ་ཡི་ཚོགས༔ སྐུ་ཡི་མདངས་ཕྱུངས་གསུང་གི་རྔམ་སྒྲ་སྒྲོགས༔ བདེ་ཆེན་སྟོང་དབྱིངས་ཐུགས་ཀྱི་བྱིན་ཆེན་ཕོབ༔ མ་དག་སྣང་བ་སྣང་གྲགས་བདེ་སྡུག་ཆོས༔ ལྷ་སྔགས་ཏིང་འཛིན་ནུས་པར་རབ་སྦྱངས་ནས༔ བདག་གཞན་སྒོ་གསུམ་རྟེན་དང་བརྟེན་པར་བཅས༔ དབང་ཆེན་ལྷ་ཡི་རོལ་པར་བྱིན་གྱིས་རློབས༔ ཨོཾ་ཨཱཿཧཱུྃ་ཧྲཱིཿཔདྨ་ཀྲོ་ཏ་ཧྱཱ་གྷྲཱི་བ་ཛྙཱ་ན་བཛྲ་ཨ་བེ་ཤ་ཡ་ཕེཾ་ཕེཾ༔ མཆོད་རྫས་བསངས་ཤིང་བྱིན་བརླབ་ནི༔ ཧྲཱིཿ མ་དག་འཁྲུལ་བའི་རྟེན་གཞི་རྩ་ཐིག་རླུང༔ སྨན་རཀ་གཏོར་མ་མཚོན་བྱེད་མཆོད་པའི་རྫས༔ ཡོངས་གྲུབ་ཀུན་ཏུ་བཟང་པོའི་མཆོད་སྤྲིན་དུ༔ ཟག་མེད་ཡེ་ཤེས་བསྐྱེད་ནུས་རྫས་སུ་གྱུར༔ སྨན་རཀ་གཏོར་མའི་སྔགས་རྣམས་དང་༔ ཨོཾ་བཛྲ་ཤྲྀ་ཧེ་རུ་ཀ་པདྨ་ཀྲོ་ཏ་ས་པ་རི་ཝ་ར་ཨརྒྷཾ་སོགས་ནས་ཤཔྟ་ཨཱ༔ཧཱུྃ༔ དེ་ཡིས་སྔོན་འགྲོའི་ཆོས་རྣམས་རྫོགས༔ དངོས་གཞི་ཁམས་གསུམ་ཀུན་བརྟགས་ཆོས༔ གཞན་དབང་ལྷ་ཡི་རོལ་བ་རུ༔ ཡོངས་གྲུབ་སེམས་ཀྱི་རང་མདངས་རྩལ༔ བསྐྱེད་པའི་རིམ་པ་འདི་ལྟར་བསྒོམ༔ ཧྲཱིཿ འཁོར་འདས་གཉིས་ཀྱི་ཆོས་རྣམས་ཀུན༔ རང་བཞིན་སྤྲོས་བྲལ་ཆོས་ཀྱི་སྐུ༔ སྨྲ་བསམ་བརྗོད་པའི་ཡུལ་ལས་འདས༔ གདོད་མ་གཞི་ཡི་དབང་ཆེན་ནོ༔ ཨོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷ་ཝ་ཨཏྨ་ཀོ྅་ཧཾ༔ དེ་ལྟར་མ་རྟོགས་སེམས་ཅན་རྣམས༔ ཁམས་གསུམ་འཁོར་བའི་འཁྲུལ་སྣང་ལས༔ བདེ་སྡུག་དངོས་འཛིན་རྟོག་པས་བསླུས༔ བརྩེ་བའི་སྙིང་རྗེ་ཆེན་པོ་ཤར༔ སྟོང་ཉིད་རང་མདངས་ཟུང་འཇུག་ལས༔ རང་རིག་ཧྲཱིཿཡིག་དམར་པོ་ནི༔ འོད་ཟེར་སྟོང་ཁམས་གང་བར་བསྒོམ༔ ཧྲཱིཿབཛྲ་ཀྲོ་ཏ་ཧྱ་གྷྲི་ཝ་ཧུ་ལུ་ཧུ་ལུ་ཧཱུྃ་ཕཊ༔ རྩ་བའི་སྔགས་ཀྱིས་རབ་བསྐུལ་ཏེ༔ ཧྲཱིཿ ཨེ་ཡཾ་རཾ་ཁཾ་སུམ་ཀེཾ་བྷྲུཾ༔ ལྔ་ལྡན་འོད་ཀྱི་འཕྲོ་འདུ་ལས༔ ཨེ་ལས་ནམ་མཁའ་མཐའ་དབུས་བྲལ༔ ཡཾ་ལས་སྲ་བརྟན་རྔམ་མཁྲེགས་རླུང༔ རཾ་ལས་མེ་དཀྱིལ་ཟུར་གསུམ་འབར༔ ཁཾ་ལས་ཁྲག་མཚོ་སྟོང་ཁམས་འཁྱིལ༔ སཾ་ལས་ཤ་ཆེན་ས་གཞི་བརྡལ༔ བདེ་ཆེན་ཡུམ་ལྔའི་མཁའ་ཀློང་དུ༔ ཀེཾ་ལས་རུས་པའི་རི་རབ་བརྗིད༔ རྩ་བ་འདོད་ཆགས་ཁྲག་མཚོར་ཟུག༔ རྩེ་མོ་མི་མངོན་དབྱིངས་སུ་མཐོ༔ བྷྲུཾ་ལས་དབང་གི་གཞལ་ཡས་ཁང༔ ཕྱི་ནི་པདྨ་དམར་པོར་འབར༔ ནང་ནི་དུག་གསུམ་ཐོད་པའི་མཁར༔ ཕྱོགས་བཞིར་ཟླ་གམ་དབང་གི་སྒོ༔ རྟ་བབས་བང་རིམ་བཞི་དང་ལྡན༔ པདྨ་ཆོས་འཁོར་གདུགས་རི་དྭགས༔ རཱུ་ཏྲའི་བམ་གྱི་རྒྱལ་མཚན་ལ༔ བདག་ལྟ་དབྱིངས་སྒྲོལ་ཙིཏྟའི་ཏོག༔ ཚོགས་བརྒྱད་ལྷ་ཀླུའི་ཀ་བ་རྔམ༔ ཉེ་ཉོན་རྒྱུ་སྐར་དྲལ་ཕྱམ་བརྡལ༔ ཕྱི་རོལ་པདྨའི་རྭ་བ་དང་༔ ཡུལ་བརྒྱད་གནས་དག་དུར་ཁྲོད་བརྗིད༔ རྡོ་རྗེའི་ཕྲེང་མཛེས་མེ་རི་འཁྲིགས༔ དེ་དབུས་འཁོར་ལོ་རྩིབས་བརྒྱད་འབར༔ དབུས་སུ་ཆོས་འབྱུང་ཟླ་གམ་དམར༔ ཁྱམས་ལ་པད་ཉི་སོ་གཉིས་གདན༔ བཾ་རུ་ཏྲ་ཀྲོ་ཏི་ཏི་ར༔ ཨ་ཙནྟྲ་མ་སུརྱ༔ པཾ་པདྨ་མཎྜལ་བྷྲུཾ༔ དཀྱིལ་འཁོར་དབུས་ཀྱི་ལྟེ་བ་ལ༔ འདོད་ཆགས་པདྨ་ཞེ་སྡང་ཟླ༔ གཏི་མུག་ཉི་མའི་གདན་གྱི་ཁར༔ གཟུང་འཛིན་རུ་ཏྲ་ཕོ་མོ་དང་༔ ཚེ་བདུད་བཞི་བསྣོལ་ཁྲི་ཡི་སྟེང་༔ རང་རིག་མཁའ་ལས་ཐོག་མདའ་ལྟར༔ རྩ་བའི་ཡི་གེའི་རྣམ་པར་བབས༔ ཧྲཱིཿ ཧྲཱིཿཡིག་པདྨ་འདབ་བརྒྱད་པ༔ འོད་ཞུ་སྐད་ཅིག་དྲན་རྫོགས་སུ༔ རང་ཉིད་པདྨ་དབང་ཆེན་ལྷ༔ འཁོར་འདས་ཡོངས་ཀྱི་ཆེ་བཙན་མཆོག༔ སྐུ་མདོག་བསྐལ་པའི་མེ་ལྟར་འབར༔ ཞལ་གསུམ་གཡས་དཀར་བཞད་པའི་ཉམས༔ གཡོན་སྔོ་ཨམ་གཙིགས་འཇིགས་པར་བསྡམས༔ རྩ་ཞལ་དམར་ནག་རབ་ཏུ་རྔམ༔ ཕྱག་དྲུག་གྲི་གུག་ཙིཏྟ་གཡས༔ ཐོད་ཁྲག་སྦྲུལ་གྱི་ཞགས་པ་གཡོན༔ ཐ་གཉིས་དབང་གི་ཕྱག་རྒྱ་ཡིས༔ སྦྱོར་ཡུམ་གར་གྱི་དབང་མོར་འཁྱུད༔ དབུ་སྐྲ་ཁམ་སེར་སྤྲིན་ལྟར་གཏིབས༔ སྐྲ་གསེབ་དབང་གི་རྟ་ཞལ་གསུམ༔ ཧ་ཧེའི་སྒྲ་ཡིས་སྟོང་གསུམ་གཡོ༔ ཐོད་སྐམ་རིགས་ལྔའི་རྩེ་ཕྲན་འབར༔ རིགས་བདག་འོད་དཔག་མེད་པས་མཚན༔ སྐུ་སྟོད་གླང་ཆེན་སྟོད་གཡོགས་གསོལ༔ སྨད་དཀྲིས་སྟག་གི་ཤམ་ཐབས་བྱས༔ ཞིང་ལྤགས་སྦྲུལ་ཆུན་རིགས་ལྔ་དང་༔ བསེ་ཁྲབ་དབང་གི་གོ་ཆས་སྤྲས༔ རྡོ་རྗེའི་གཤོག་པ་གཡས་གཡོན་གདེངས་༔ ཞབས་གཉིས་བརྐྱང་བསྐུམ་རོལ་བའི་པང༔ ཡུམ་ཆེན་རལ་གཅིག་སྔོ་སྐྱའི་མདངས༔ ཁྲག་སྐྱོགས་ཙིཏྟའི་ཕྱག་རྒྱ་བསྒྱུར༔ ཞབས་གཉིས་གར་སྟབས་ཚུལ་དུ་སྦྱོར༔ པདྨའི་ཕྲེང་བ་གཟིག་ཤམ་དང་༔ རུས་པའི་རྒྱན་ཆ་ལྔ་དང་ལྡན༔ རལ་པ་མཐུར་འཕྱང་ཕག་ཞལ་མཐིང་༔ ཡབ་ཡུམ་ཤིན་ཏུ་ཁྲོས་པའི་ཉམས༔ ཞལ་གདངས་ལྗགས་འདྲིལ་མཆེ་བ་གཙིགས༔ སྤྱན་གསུམ་ཁྲག་མཚོ་ལྟ་བུར་ཁོལ༔ ཡེ་ཤེས་མེ་ཡི་ཀློང་དུ་བཞུགས༔ ཧྲཱིཿ ཡབ་ཡུམ་མཁའ་གསང་མཉམ་པར་སྦྱོར༔ དགའ་བཞིའི་ཡེ་ཤེས་རང་རྩལ་ལས༔ འཁོར་གྱི་ལྷ་ཚོགས་བསྐྱེད་པ་ནི༔ ཆོས་འབྱུང་ཕྱོགས་བཞིར་པད་ཉི་དང་༔ དྲི་ཟ་གཤིན་རྗེ་ཀླུ་གནོད་སྦྱིན༔ དྲེགས་པ་ཁྱོ་ཤུག་བསྣོལ་བའི་སྟེང༔ ཧཱུྃ་ཡིག་ཕྱོགས་མདོག་སྤྲོས་པ་ལས༔ ཤར་དུ་རྡོ་རྗེ་དབང་ཆེན་དཀར༔ བཛྲ་ཀྲོ་ཏི་ཤྭ་རི་ཡུམ༔ ལྷོ་རུ་རིན་ཆེན་དབང་ཆེན་སེར༔ རཏྣ་ཀྲོ་ཏི་ཤྭ་རི་ཡུམ༔ ནུབ་ཏུ་པདྨ་དབང་ཆེན་དམར༔ པདྨ་ཀྲོ་ཏི་ཤྭ་རི་ཡུམ༔ བྱང་དུ་ཀརྨ་དབང་ཆེན་ལྗང་༔ ཀརྨ་ཀྲོ་ཏི་ཤྭ་རི་ཡུམ༔ གྲི་ཐོད་ཕྱག་རྟགས་ཁྲོ་ཆས་རྫོགས༔ ཡུམ་རྣམས་ཁྲག་སྐྱོགས་སྙིང་སྟེང་བསྣམས༔ རྩིབས་བརྒྱད་པད་ཉི་བམ་རོའི་སྟེང་༔ དཔལ་ཆེན་རོལ་པའི་ཧེ་རུ་ཀ༔ ཤར་དུ་ཡང་དག་ལྷོར་གཤིན་རྗེ༔ ནུབ་ཏུ་རྟ་མཆོག་བྱང་ཕྲིན་ལས༔ ཤར་ལྷོར་རྦོད་གཏོང་ལྷོ་ནུབ་ཏུ༔ རིག་འཛིན་རྒྱལ་པོ་ནུབ་བྱང་མཚམས༔ གསང་བདག་བྱང་ཤར་སྟོབས་ལྡན་ནག༔ མ་ངེས་སྤྲུལ་པའི་སྒྱུ་འཕྲུལ་ངོམ༔ ཁྱམས་ལ་མཁའ་འགྲོ་སུམ་ཅུ་གཉིས༔ དཀར་སེར་དམར་ལྗང་མཁའ་འགྲོའི་ཆས༔ རུས་རྒྱན་གཡེར་ཁ་མེ་ལོང་སྤྲས༔ ཅང་ཏེའུ་གྲི་ཐོད་གསང་བའི་རྔ༔ ཕྱག་མཚན་སྣ་ཚོགས་གར་སྟབས་བསྒྱུར༔ སྒོ་བཞིར་ཞིང་དང་ཉི་གདན་ལ༔ སྒོ་སྲུང་རིགས་བཞི་ཡུམ་དང་བཅས༔ ཕྲིན་ལས་བཞི་ཡི་མངའ་དབང་བསྒྱུར༔ ལྕགས་ཀྱུ་ཞགས་པ་ལྕགས་སྒྲོག་དྲིལ༔ མ་འདྲེས་མཁའ་ལ་འཇའ་ཚོན་བཞིན༔ རང་སེམས་སྟོང་པའི་ཆོ་འཕྲུལ་ལས༔ ཡོངས་གྲུབ་དཀྱིལ་འཁོར་ཆེན་པོར་གསལ༔ ཨོཾ་ཨཱཿཧཱུྃ༔ ཞེས་པ་ལན་བདུན་བརྗོད་པའི་མཐུས༔ རང་གི་ཐུགས་ཀར་འདབ་བརྒྱད་དམར༔ ལྟེ་བར་ཧྲཱིཿཡིག་དམར་པོའི་མཐར༔ སྔགས་ཕྲེང་རྒྱུ་སྐར་ལྟ་བུར་བཀྲ༔ གཡས་སུ་འཁོར་བའི་འོད་ཟེར་གྱིས༔ དབང་ལྷ་རིགས་ལྔ་སྤྱན་དྲངས་པས༔ བདུད་རྩིའི་ཆུ་ཡིས་དུག་ལྔ་སྦྱངས༔ ཡེ་ཤེས་ལྔ་ཡི་དབང་ཐོབ་བརྡར༔ འོད་དཔག་མེད་པ་སྐུ་མདོག་དམར༔ པད་ཕྲེང་འཛིན་པས་རྒྱས་གདབ་གྱུར༔ རིགས་ཀྱི་དབང་ལྷ་རང་ལ་བསྟིམ༔ དེ་ནས་སྤྱན་འདྲེན་སྤོས་རོལ་དང་༔ གདུང་དབྱངས་དྲག་པོས་འདི་ལྟར་བསྐུལ༔ ཧྲཱིཿ བདེ་ཆེན་པདྨ་འོད་ཀྱི་ཕོ་བྲང་ནས༔ རབ་འབྱམས་རྒྱལ་བའི་སྤྱི་གཟུགས་པདྨ་དབང༔ གདུལ་བྱ་མ་རུངས་གདུག་པ་འདུལ་བའི་ཕྱིར༔ ཞི་བ་ཆོས་ཀྱི་སྐུ་ལས་མ་གཡོས་ཀྱང་༔ ཐུགས་རྗེ་དྲག་ཤུལ་རྔམ་སྟབས་རོལ་པའི་གར༔ ཅིར་ཡང་བསྒྱུར་བས་གནས་འདིར་གཤེགས་སུ་གསོལ༔ རྣལ་འབྱོར་བདག་གི་ཚེ་སྔོན་ཡི་དམ་ལྷ༔ ད་ལྟ་ཁྱེད་ལ་རྩེ་གཅིག་གསོལ་འདེབས་ན༔ དབང་ཆེན་ཁྲོས་པའི་རྟ་སྐད་འཚེར་བཞིན་དུ༔ དབང་དྲག་རོལ་པའི་གནས་འདིར་གཤེགས་སུ་གསོལ༔ གངས་ཅན་ལྷ་གཅིག་བྱམས་མགོན་ཐུགས་རྗེའི་བདག༔ སྙིགས་དུས་བདུད་དང་དམ་སྲི་ཁ་དར་བས༔ རིས་མེད་འགྲོ་རྣམས་སྡུག་བསྔལ་ཉམ་ཐག་ཚེ༔ འཇིགས་མཛད་དཔའ་བའི་ཚུལ་གྱིས་གཤེགས་སུ་གསོལ༔ ཡེ་ཤེས་ལྔ་ཡི་རང་རྩལ་ཕྱིར་ཤར་བ༔ དབང་ཆེན་རྟ་མཆོག་རིགས་བཞི་གཤེགས་སུ་གསོལ༔ ཚོགས་བརྒྱད་གདུག་པའི་དགྲ་གདོན་འཇོམས་མཛད་པ༔ སྒྲུབ་སྡེ་བརྒྱད་ཀྱི་ལྷ་ཚོགས་གཤེགས་སུ་གསོལ༔ དབང་ཡུལ་རྟོག་ཚོགས་ཉོན་མོངས་གནས་དག་པའི༔ སྤྲུལ་པའི་མཁའ་འགྲོ་སོ་གཉིས་གཤེགས་སུ་གསོལ༔ རྣམ་བཞིའི་ཕྲིན་ལས་མ་ལུས་སྒྲུབ་མཛད་པའི༔ སྒོ་སྲུང་རིགས་བཞིའི་ཚོགས་རྣམས་གཤེགས་སུ་གསོལ༔ ཧྲཱིཿཔདྨ་ཀྲོ་ཏ་ཧྱ་གྷྲི་ཝ་ས་པ་རི་ཝ་ར་ཛྙཱ་ན་བཛྲ་ཨ་བེ་ཤ་ཡ་ཕེཾ་ཕེཾ༔ ས་མ་ཡཱ་ཛ་ཛཿ ཡེ་ཤེས་ལྷ་ཚོགས་བཞུགས་སུ་གསོལ་བ་ནི༔ ཧྲཱིཿ དམ་ཚིག་ལྷ་ཚོགས་བསྐྱེད་པའི་དཀྱིལ་འཁོར་ལ༔ ཡེ་ཤེས་རང་བྱུང་རང་བབས་དབྱིངས་ཀྱི་ལྷ༔ དབང་ཆེན་རོལ་པ་རྟ་གདོང་ཁྲོ་བོའི་རྒྱལ༔ འཁོར་བཅས་དགྱེས་ཤིང་བརྟན་པར་བཞུགས་སུ་གསོལ༔ ཛཿཧཱུྃ་བཾ་ཧོ༔ ས་མ་ཡཱ་ཏིཥྛ་ལྷན༔ འཕྲུལ་དགའི་ཚུལ་གྱིས་བརྡའ་ཕྱག་འཚལ༔ ཧྲཱིཿ ཡེ་ནས་རང་དང་ལྷ་ཚོགས་དབྱེར་མེད་ཀྱང་༔ རང་ཞལ་མ་མཇལ་གཉིས་འཛིན་སྐྱོན་སྦྱང་ཕྱིར༔ དམ་ཚིག་བསྐྱེད་པ་རྒྱུ་ཡི་ཧེ་རུ་ཀས༔ བརྡ་རྟགས་དྲན་པའི་ཀློང་དུ་ཕྱག་བགྱི་འོ༔ ཤྲཱི་པདྨ་ཀྲོ་ཏ་ཧྱ་གྷྲི་ཝ་ན་མོ་པཱུ་ཛ་ཧོ༔ མཆོད་པའི་བྱེ་བྲག་འབུལ་བ་ལ༔ ཕྱི་ཡི་མཆོད་པ་འབུལ་བ་ནི༔ ཧྲཱིཿ དབང་ལྔའི་ལོངས་སྤྱོད་མཆོད་པའི་རྫས༔ མེ་ཏོག་བདུག་སྤོས་མར་མེ་དང་༔ དྲི་ཆབ་ཞལ་ཟས་རོལ་མོའི་སྒྲ༔ དབང་ཆེན་དཀྱིལ་འཁོར་ལྷ་ལ་འབུལ༔ ཨོཾ་ཤྲཱི་པདྨ་ཀྲོ་ཏ་ས་པ་རི་ཝ་ར་ཨརྒྷཾ་ནས་པྲ་ཏིཥྩ་ཡེ་སྭཱ་ཧཱ༔ ནང་མཆོད་བྱེ་བྲག་བདུད་རྩི་སྨན༔ ཧྲཱིཿ གདོད་ནས་རང་བྱུང་བདེ་སྟོང་སྣོད་མཆོག་ཏུ༔ རྩ་བརྒྱད་ཡན་ལག་སྟོང་སྦྱར་བདུད་རྩི་སྨན༔ ཉོན་མོངས་ཡེ་ཤེས་ལྔ་རུ་གནས་འགྱུར་ཕྱིར༔ དབང་ཆེན་དཀྱིལ་འཁོར་ལྷ་ལ་མཆོད་པ་འབུལ༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ བདེ་ཆེན་རིགས་མཆོག་ཆོས་སྐུ་སྣང་མཐའ་ཡས༔ བརྩེ་ཆེན་འགྲོ་ལ་རྗེས་ཆགས་པདྨ་དབང་༔ མཐུ་ཆེན་བདུད་ལས་རྣམ་རྒྱལ་ཐོད་ཕྲེང་རྩལ༔ སྐུ་གསུམ་བརྒྱུད་པའི་བླ་མར་སྨན་མཆོད་འབུལ༔ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ གངས་ཅན་བསྟན་པའི་རྒྱལ་མཚན་ཁྲི་སྲོང་རྗེ༔ དབང་ཆེན་གསུང་གི་བཀའ་བབས་རྒྱལ་མཆོག་དབྱངས༔ བདེ་སྟོང་ཐུགས་ཀྱི་ཕྱག་རྒྱ་མཁར་ཆེན་བཟའ༔ རྗེ་འབངས་གྲོགས་གསུམ་བརྒྱུད་པར་སྨན་མཆོད་འབུལ༔ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ དཀྱིལ་འཁོར་གཙོ་མཆོག་པདྨ་གར་དབང་ཕྱུག༔ ཤེས་རབ་བསྐྱེད་ཡུམ་དབང་གི་རྣལ་འབྱོར་མ༔ ཡེ་ཤེས་སྒྱུ་མ་སྤྲུལ་པའི་འཁོར་གྱི་ལྷ༔ རྩ་གསུམ་དཀྱིལ་འཁོར་འཁོར་ལོར་སྨན་མཆོད་འབུལ༔ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ འབྲུ་གསུམ་སྔགས་ཀྱིས་དངོས་གྲུབ་བླངས༔ དམར་ཆེན་རཀྟའི་མཆོད་འབུལ་ནི༔ ཧྲཱིཿ ཆོས་ཅན་བློ་ཡིས་འཁྲུལ་བའི་སེམས་ཅན་ལ༔ ཆོས་ཉིད་རྗེས་ཆགས་དབང་གི་ཁ་དོག་དམར༔ ཞིང་བཅུ་གདུག་ཅན་བསྒྲལ་བའི་རཀྟ་མཆོག༔ དབང་མཛད་དཀྱིལ་འཁོར་ལྷ་ལ་མཆོད་པར་འབུལ༔ མ་ཧཱ་རཀྟ་ཁཱ་ཧི༔ དམ་རྫས་གཏོར་མའི་མཆོད་པ་ནི༔ ཧྲཱིཿ དུག་གསུམ་ཤ་ཁྲག་རུས་པའི་བ་ལིང་ཏ༔ ལྕང་ལོར་བཅས་པའི་བྷནྡྷའི་སྣོད་དུ་གཏམས༔ ཉོན་དྲུག་དགྲ་བགེགས་དབང་ཤེས་ཚར་གཅོད་ཕྱིར༔ ཁྲག་འཐུང་དཀྱིལ་འཁོར་ལྷ་ལ་མཆོད་པ་འབུལ༔ མ་ཧཱ་བྷ་ལིང་ཏ་ཁཱ་ཧི༔ གསང་བའི་མཆོད་པ་འབུལ་བ་ནི༔ ཧྲཱིཿ སྣང་བ་སྙིང་རྗེ་ཆེན་པོ་བདེ་བའི་ཡབ༔ སྟོང་པ་ཤེས་རབ་གསལ་བ་དབྱིངས་ཀྱི་ཡུམ༔ ཟུང་འཇུག་བཅུ་དྲུག་དགའ་བ་མཆོད་པའི་མཆོག༔ བདེ་ཆེན་དབང་གི་ལྷ་ལ་མཆོད་པ་འབུལ༔ མ་ཧཱ་མུ་ཏྲ་སུ་ཁ་པུ་ཛ་ཧོ༔ ཀུན་འདུས་དོན་གྱི་མཆོད་འབུལ་ནི༔ ཧྲཱིཿ མཆོད་བྱ་མཆོད་བྱེད་མཆོད་ཡུལ་སེམས་ཀྱི་རྩལ༔ དེ་ཡང་རང་བཞིན་བྲལ་བ་གདོད་མའི་གཤིས༔ འགྱུ་གྲོལ་གཉིས་མེད་ཕྱག་རྒྱ་ཆེན་པོའི་ངང༔ རང་རིག་དཀྱིལ་འཁོར་ལྷ་ཚོགས་མཉེས་གྱུར་ཅིག༔ ཛྙཱ་ན་དྷརྨ་དྷརྟུ་པཱུ་ཛ་སྤ་ར་ཎ་ས་མ་ཡེ་སྭཱ་ཧཱ༔ བསྟོད་པ་ལའང་ཀུན་རྫོབ་བརྡ༔ དོན་དམ་ལྟ་བའི་ཀློང་དུའོ༔ ཧྲཱིཿ ཐུགས་རྗེའི་མངའ་བདག་གསུང་མཆོག་སྙིང་རྗེའི་ལྷ༔ གདུལ་བྱའི་དབང་གིས་ཁྲོ་བོའི་སྐུར་བཞེངས་ནས༔ ཁམས་གསུམ་དབང་སྡུད་དྲེགས་པ་ཚར་གཅོད་པ༔ དབང་དྲག་རོལ་པའི་ལྷ་ལ་ཕྱག་འཚལ་བསྟོད༔ བསྐལ་པའི་མེ་དབུས་དུར་ཁྲོད་ཕོ་བྲང་ཆེ༔ རབ་འཇིགས་བདུད་སྲིན་འབྱུང་པོ་བརྫིས་པའི་ཁྲིར༔ ཁམས་གསུམ་བླ་ཡིད་འགུགས་པའི་བརྡ་རྟགས་ཀྱིས༔ ལེབ་བརྒན་དབང་གི་མདངས་འོད་འཕྲོ་ལ་བསྟོད༔ སྐུ་གསུམ་ཡོན་ཏན་རྫོགས་པའི་ཞལ་མངའ་ཞིང་༔ ས་གསུམ་གཡུལ་ལས་རྒྱལ་བའི་རྟ་སྐད་འཚེར༔ ཕ་རོལ་ཕྱིན་དྲུག་རྫོགས་པའི་ཡན་ལག་ཅན༔ བདེན་གཉིས་རྐང་པའི་ཡོན་ཏན་ལྡན་ལ་བསྟོད༔ ཞིང་བཅུ་སྒྲོལ་བ་གྲི་གུག་དཔའ་བོའི་མཚོན༔ གཉིས་སྣང་དབྱིངས་སུ་རྔུབ་པའི་དུང་ཁྲག་དམར༔ ཆོས་ཀུན་གཅིག་བསྡུམ་དབང་རྒྱལ་ཡུམ་ལ་འཁྱུད༔ ཟུང་འཇུག་ཤེས་རབ་ཡུམ་དང་སྦྱོར་ལ་བསྟོད༔ གཙོ་དང་འཁོར་གྱི་རོལ་པ་ཅིར་སྣང་ཡང་༔ དངོས་གྲུབ་སྒྲུབ་ལ་བསླུ་མེད་ཡི་དམ་ལྷ༔ གང་འདུལ་སྤྲུལ་པའི་རོལ་པར་ཡོངས་ཤར་བ༔ ཡོངས་རྫོགས་དོན་གྱི་ལྷ་ལ་བསྟོད་པར་བགྱི༔ དེ་ནས་བཤགས་པ་འབུལ་བ་ནི༔ ཧྲཱིཿ དབང་ཆེན་རྒྱལ་པོ་རྟ་མཆོག་ཁྲོ་བོའི་རྒྱལ༔ ཡེ་ནས་རང་དང་འདུ་འབྲལ་མེད་པ་ལ༔ བདག་རྟོག་དབང་གིས་བཟང་ངན་སོ་སོར་བཟུང་༔ ཐམས་ཅད་ཆོས་སྐུ་མཉམ་ཉིད་ཀློང་དུ་བཤགས༔ ཡི་གེ་བརྒྱ་བས་ནོངས་པ་བཤགས༔ དངོས་གཞིའི་རྩ་བ་བསྙེན་སྒྲུབ་ཀྱི༔ དམ་བཅའ་བརྟན་པོར་སྙིང་ནས་བཟུང་༔ ཧོ༔ རྩ་གསུམ་དབང་གི་ལྷ་ཚོགས་དགོངས་སུ་གསོལ༔ དེང་བཟུང་རྫོགས་པའི་བྱང་ཆུབ་མ་ཐོབ་བར༔ དངོས་གྲུབ་རྩ་བ་པདྨ་གར་དབང་ལྷ༔ འགྲོ་དྲུག་སེམས་ཅན་ཀུན་ལ་ཕན་གདགས་ཕྱིར༔ བསྙེན་སྒྲུབ་སྲོག་གི་ཕྱིར་ཡང་མི་གཏོང་སྒྲུབ༔ བཛྲ་ས་མ་ཡཱ་ཙིཏྟ་ཧཱུྃ༔ ས་མ་ཡཱ༔ དཀྱིལ་འཁོར་སྤྲོས་པའི་སྤྲོ་བསྡུ་ཡིས༔ སུན་ན་གཙོ་བོ་རྐྱང་པར་བསྒོམ༔ དེ་ནས་བཟླས་པའི་དམིགས་པ་ལ༔ དང་པོ་བསྙེན་པ་བྱ་བ་ནི༔ ཧྲཱིཿ བདག་གི་ཐུགས་ཀར་པདྨ་འདབ་བརྒྱད་དམར༔ ལྟེ་བར་ཉི་མའི་དཀྱིལ་འཁོར་སྲན་མ་ཙམ༔ དེ་དབུས་ཧྲཱིཿཡིག་རིང་ཆ་ཚེག་དྲག་བཅས༔ བྱུ་རུའི་མདོག་ཅན་འོད་ཟེར་བཀྲག་མདངས་འབར༔ སྔགས་ཕྲེང་ཡིག་འབྲུ་བཅོ་ལྔ་གཡས་སུ་འཁོར༔ འོད་ཟེར་ཡར་འཕྲོས་རྒྱལ་ཀུན་བྱིན་ནུས་བསྡུས༔ འཁོར་འདས་སྣོད་བཅུད་ཚེ་དཔལ་ཡོན་ཏན་ཀུན༔ རང་ལ་ཐིམ་པས་ལྷ་དང་གཉིས་མེད་བསམ༔ གསང་སྔགས་རྒྱལ་པོ་ཤུབ་བུར་བཟླ༔ ཧྲཱིཿབཛྲ་ཀྲོ་ཏ་ཧྱཱ་གྷྲི་བ་ཧུ་ལུ་ཧུ་ལུ་ཧཱུྃ་ཕཊ༔ དེ་ནས་སྒྲུབ་པའི་རིམ་པ་ནི༔ སྔགས་ལས་འོད་ཟེར་མར་འཕྲོས་འགྲོ་སྒྲིབ་སྦྱངས༔ ཀུན་འདུས་ཡི་དམ་ལྷ་ཡི་ངོ་བོར་གྱུར༔ སྔགས་སྒྲ་བུང་བས་ཚང་ཚོལ་བཞིན་དུ་ལྡིར༔ ཕར་འཕྲོས་སྡེ་བརྒྱད་དྲེགས་པའི་སྲོག་ནས་དྲངས༔ བདག་ཉིད་དབང་ཆེན་བཀའ་ཉན་གསུང་སྡོད་ཅིང་༔ བར་ཆད་བདུད་དགྲ་ཆོས་ཉིད་ཀློང་དུ་ཐིམ༔ གཙོ་བོ་འབྲུ་འབུམ་ལས་རུང་ཞིང་༔ མཚམས་ཀྱི་བསྙེན་པ་སྔགས་དང་སྦྱར༔ རབ་འབྲིང་དངོས་ཉམས་རྨི་ལམ་དུ༔ དབང་ཆེན་ཞལ་མཐོང་གསུང་ཐོས་ཤིང་༔ སྡེར་སོ་བཅོམ་དང་སྲོག་ཆགས་གསོད༔ ཆུ་ཆེན་བརྒལ་དང་ཉི་ཟླ་འབར༔ རི་བོའི་རྩེར་ཕྱིན་གཡུལ་ལས་རྒྱལ༔ སྒྲུབ་པ་ཡུམ་སྔགས་ཤམ་དུ་སྦྲེལ༔ ཤྲཱི་ཌཀྐི་ཛྙཱ་ན་ཨེ་ཀ་ཛ་ཊི་རཱུ་ལུ་ཧཱུྃ་ཕཊ༔ ཧྱཱ་གྷྲི་ཝའི་མཇུག་ཏུ་གདགས༔ ཧྲཱིཿབཛྲ་ཀྲོ་ཏ་ཧྱཱ་གྷྲཱི་ཝ་ཤྲི་ཌཀྐི་ཛྙཱ་ན་ཨེ་ཀ་ཛ་ཊི་རུ་ལུ་ཧཱུྃ་ཕཊ༔ དེ་ནས་འཁོར་སྔགས་འདི་བཞིན་ནོ༔ ཧྲཱིཿབཛྲ་ཀྲོ་ཏ་ཧྱ་གྷྲི་ཝ་བཛྲ་ཀྲོ་ཏི་ཤྭ་རི་ཧཱུྃ་ཕཊ༔ དེ་བཞིན་དུ་རཏྣ་པདྨ་དང་༔ ཀརྨ་ཞེས་བརྗོད་དེ་བཞིན་དུ༔ དཔལ་བརྒྱད་སོ་སོའི་བསྙེན་པའམ༔ ཡང་ན་སྤྱི་དྲིལ་ཁྲོ་བོའི་སྔགས༔ ཨོཾ་བཛྲ་ཙཎྜ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ༔ ཨོཾ་བཛྲ་ཌཀྐི་ས་མ་ཡཱ་ཧཱུྃ་ཕཊ༔ ཕྲིན་ལས་ཤམ་བུ་ཁ་བསྒྱུར་ནི༔ ཤནྟིཾ་པུཥྚིཾ་ཝ་ཤང་མ་ར་ཡ་ཛཿཧཱུྃ་བཾ་ཧོ༔ དེ་ནས་ལས་སྦྱོར་དམིགས་པ་ནི༔ ཧྲཱིཿ བདག་མདུན་ཕོ་བྲང་ཕྱི་རོལ་དུར་ཁྲོད་བརྒྱད༔ དེ་ཕྱིར་རྡོར་ཕྲེང་མེ་རི་དམར་ནག་འཁྲུགས༔ སྟེང་འོག་ཟངས་ལྕགས་འཁོར་ལོ་རྩིབས་སྟོང་འབར༔ རྩེ་བསྣོལ་བར་དུ་དམ་སྲི་ཐལ་བར་བརླགས༔ གཙོ་འཁོར་ཞལ་ནས་དྲག་སྔགས་འབྲུག་སྟོང་ལྡིར༔ དགྲ་གདོན་ཆོས་ཉིད་གདོད་མའི་དབྱིངས་སུ་བསྒྲལ༔ བློ་འདས་སྟོང་ཉིད་སྤྲོས་བྲལ་ངང་དུ་བཞག༔ དྲག་སྔགས་མེ་དཔུང་རྩུབ་དྲག་བཟླ༔ གཞན་ཡང་དབང་སྡུད་དམིགས་པ་ནི༔ ཧྲཱིཿ བདག་གི་ཐུགས་ལས་འོད་དམར་གློག་ལྟར་འཕྲོས༔ སྣང་སྲིད་ཕོ་རྒྱུད་མོ་རྒྱུད་དྲེགས་ཚོགས་ཀྱི༔ སྙིང་གར་ཕོག་པས་རང་དབང་བརྟན་པ་ཕྲོག༔ ཡིད་ཆགས་མྱོས་ཏེ་རང་ལ་འདུད་པར་གྱུར༔ འཇིག་རྟེན་ནོར་རྫས་མཁོ་དགུའི་ཡོ་བྱད་ཀུན༔ སྦུར་མ་རླུང་གིས་དེད་པ་བཞིན་ཏུ་བསྡུས༔ དཀོན་མཆོག་མཆོད་དང་དབུལ་བ་སེལ་ཕྱིར་དུ༔ ཉམ་ཐག་སྐྱོང་སོགས་ཚོགས་གཉིས་གྲོགས་སུ་འགྱུར༔ རྩ་སྔགས་ཤམ་བུར༔ ལོ་ཀ་ཨ་ནྲི་ཏྲི་ཕོ་རྒྱུད་མོ་རྒྱུད་པ་ཤང་ཀུ་རུ་སྡུས་སྡུས་བ་སུ་རཏྣ་སིདྡྷི་ཕ་ལ་ཧཱུྃ༔ སྲུང་ཟློག་གུད་དུ་སྦས་ལས་ཤེས༔ གཞན་ཡང་ལས་ཚོགས་ཉེར་གཅིག་ནི༔ མན་ངག་གབ་བྱང་དག་ལས་གསལ༔ ཐུན་སྐབས་མཆོད་བསྟོད་ནོངས་པ་བཤགས༔ རྗེས་ལ་ཚོགས་ཀྱི་རིམ་པ་ནི༔ བཟའ་བཅའ་བཏུང་བའི་ཡོ་བྱད་དང་༔ སྤྱན་གཟིགས་གསལ་བའི་མར་མེ་དང་༔ དྲི་ཞིམ་སྤོས་ཀྱི་དུད་པ་སོགས༔ མ་ཚང་མེད་པར་འདུ་བྱས་ལ༔ རཾ་ཡཾ་ཁཾ༔ ཞེས་པའི་སྔགས་ཀྱི་འཕྲོ་འདུ་ལས༔ ཧྲཱིཿ བདག་ཉིད་ལྷར་གསལ་ཐུགས་ལས་རཾ་ཡཾ་ཁཾ༔ འཕྲོས་པས་ཞལ་ཟས་ཚོགས་ཀྱི་ཡོ་བྱད་རྣམས༔ རཾ་གྱི་མེས་བསྲེགས་ཡཾ་ལས་རླུང་བྱུང་གཏོར༔ ཁཾ་ལས་ཆུ་བྱུང་དངོས་འཛིན་དྲི་མ་བཀྲུས༔ ཆབ་ཀྱིས་གཏོར་ཞིང་བདུད་རྩིས་བྲན༔ སླར་ཡང་འབྲུ་གསུམ་སྔགས་ཀྱི་འཕྲོ་འདུ་ལས༔ ཨོཾ་གྱིས་ཟབ་ཡངས་རིན་ཆེན་སྣོད་མཆོག་ཏུ༔ ཨཿཡིས་ཟག་མེད་བདུད་རྩི་རོ་བརྒྱ་ལྡན༔ ཧཱུྃ་གིས་ཀུན་བཟང་མཆོད་སྤྲིན་རྒྱ་མཚོར་སྤེལ༔ ཨོཾ་ཨཱཿཧཱུྃ༔ ལན་གསུམ་བརྗོད་ཅིང་ཚོགས་ཞིང་རྣམས༔ སྤྱན་དྲངས་གདུང་དབྱངས་སྤོས་རོལ་བཅས༔ ཧྲཱིཿ ཀུན་བཟང་མཉམ་བརྡལ་འོག་མིན་སྐུ་གསུམ་ཞིང༔ རང་བྱུང་བདེ་ཆེན་དག་པའི་མཁའ་དབྱིངས་ནས༔ རྩ་གསུམ་ཀུན་འདུས་ཡི་དམ་དབང་ཆེན་ལྷ༔ སྐྱབས་མཆོག་ཚོགས་ཞིང་དཀྱིལ་འཁོར་སྤྱན་འདྲེན་ནོ༔ རྡོ་རྗེའི་སྐུ་མཆོག་མཚན་དཔེའི་གཟི་མདངས་ངོམ༔ འགགས་མེད་གསུང་གི་རྔམ་སྒྲས་ས་གསུམ་གཡོ༔ བརྩེ་ཆེན་ཐུགས་རྗེས་མཁའ་ཁྱབ་རྗེས་སུ་སྐྱོང་༔ རྟ་མཆོག་རོལ་པའི་ལྷ་ཚོགས་འདིར་གཤེགས་ལ༔ རྣལ་འབྱོར་སྒྲུབ་པོའི་སྒོ་གསུམ་བྱིན་གྱིས་རློབས༔ མཆོད་རྫས་ཡོ་བྱད་ཟག་མེད་བདུད་རྩིར་བསྒྱུར༔ སྣང་གྲགས་ལྷ་སྔགས་བདེ་ཆེན་རོལ་པར་གྱུར༔ ཛྙཱ་ན་བཛྲ་ས་མ་ཡཱ་ཕེཾ་ཛཿཧཱུྃ་བཾ་ཧོ༔ ཚོགས་ཕུད་རིམ་པ་གསུམ་དུ་སྤྲོས༔ འདོད་ཡོན་དྲུག་གི་ལྷ་མོ་ཡིས༔ དཀྱིལ་འཁོར་ལྷ་ཚོགས་མཆོད་པར་བསམ༔ ཧྲཱིཿ ཞལ་ཟས་ཚོགས་ཀྱི་ཡོ་བྱད་མཆོད་པའི་རྫས༔ དཀྱིལ་འཁོར་ལྷ་ཚོགས་མཉེས་བྱེད་བདུད་རྩིར་གྱུར༔ དབང་ཆེན་དབང་གི་ལྷ་ལ་འབུལ་ལགས་ན༔ བརྩེ་བའི་ཐུགས་ཀྱི་དགྱེས་པར་བཞེས་སུ་གསོལ༔ མ་ཧཱ་ག་ན་ཙཀྲ་པུ་ཛ་ཁཱ་ཧི༔ སྡོམ་གསུམ་ཉམས་ཆག་བཤགས་པ་ནི༔ ཧོ༔ རྩ་གསུམ་དབང་གི་ལྷ་ཚོགས་དགོངས་སུ་གསོལ༔ བདག་དང་གསང་སྔགས་སྒོར་ཞུགས་ཐམས་ཅད་ཀྱི༔ སྡོམ་གསུམ་འགལ་འཁྲུལ་ཉེས་ལྟུང་ཅི་མཆིས་པ༔ སྙིང་ནས་བཤགས་སོ་ཉམས་པ་སོར་ཆུད་ནས༔ ཚངས་པ་མཆོག་གི་དངོས་གྲུབ་སྩལ་དུ་གསོལ༔ ཡིག་བརྒྱས་ནོངས་པ་ཐམས་ཅད་བཤགས༔ ཚོགས་རྫས་ཐ་མ་དགྲ་བགེགས་སུ༔ དམིགས་ནས་འགུག་གཞུག་ལན་གསུམ་བྱ༔ ཕྱག་རྒྱ་བཞི་ཡིས་འཆིང་ཞིང་སྡོམ༔ ཧྲཱིཿ དབང་ཆེན་ཁྲོས་པ་རྟ་མཆོག་རྒྱལ་པོའི་སྐུར༔ བདག་ཉིད་གསལ་བ་གསུམ་ལྡན་ཏིང་འཛིན་གྱིས༔ དགྲ་བགེགས་ཞིང་བཅུ་ཚང་བ་དམ་སྲིའི་རིགས༔ སྐྱེ་མེད་ཡངས་པ་ཆོས་སྐུའི་ཀློང་དུ་སྤོར༔ ཤ་ཁྲག་དྭངས་མ་བདུད་རྩིར་སྦྱངས་སྤེལ་བསྒྱུར༔ རྩ་གསུམ་དཀྱིལ་འཁོར་ལྷ་ཚོགས་ཞལ་དུ་བསྟབ༔ ཧ་ལ་པཉྩ་མཾ་ས་ཙིཏྟ་རཀྟ་ཁ་ཁ་ཁཱ་ཧི་ཁཱ་ཧི༔ དེ་ནས་དཀྱིལ་འཁོར་ལྷ་ཚོགས་དང་༔ དབྱེར་མེད་རྣལ་འབྱོར་ཚོགས་ལ་རོལ༔ ལྷག་མར་ཁ་ཕྲུ་བདུད་རྩི་གདབ༔ འབྲུ་གསུམ་སྔགས་ཀྱིས་སྦྱངས་སྤེལ་བསྒྱུར༔ ཧྲཱིཿ དབང་ཆེན་བཀའ་འཁོར་སྐྱོང་བའི་ལྷག་སྡུད་མ༔ རྡོ་རྗེ་རིགས་ཀྱི་ཕྲ་མེན་སྐུ་མདོག་དཀར༔ རིན་ཆེན་རིགས་ཀྱི་ཕྲ་མེན་གསེར་མདོག་འཛུམ༔ པདྨ་རིགས་ཀྱི་ཕྲ་མེན་དམར་མདངས་བཞད༔ ལས་ཀྱི་རིགས་ཀྱི་ཕྲ་མེན་ལྗང་ནག་ཁྲོ༔ མ་ངེས་སྤྲུལ་བསྒྱུར་བྱེ་བ་འབུམ་འབུམ་འཕྲོ༔ འཁོར་བཅས་ཚོགས་ཀྱི་ལྷག་མ་འདི་བཞེས་ལ༔ ཕྲིན་ལས་རྣམ་བཞིའི་ལས་ཀུན་ཐོགས་མེད་སྒྲུབ༔ ཨོཾ་ཨུ་ཙུཥྚ་བྷ་ལིངྟ་ཁཱ་ཧི༔ ཐུགས་དམ་དབྱིངས་ནས་བསྐུལ་བ་ནི༔ ཧཱུྃ་ཧྲཱིཿ སྐྱེ་བ་མེད་པ་ཆོས་སྐུའི་རང་མདངས་ལས༔ འགགས་པ་མེད་པ་ལོངས་སྐུའི་རྣམ་རོལ་བསྒྱུར༔ ཐུགས་རྗེ་ཆེན་པོ་ཁྲོས་པའི་ཚུལ་སྟོན་པ༔ དབང་ཆེན་རྟ་མཆོག་རྒྱལ་པོ་ཡབ་དང་ཡུམ༔ སྒྲུབ་པ་སྡེ་བརྒྱད་རྟ་མགྲིན་རིགས་བཞི་དང་༔ མཁའ་འགྲོ་སོ་གཉིས་བཀའ་སྡོད་སྲུང་མར་བཅས༔ བཞེངས་ཤིག་ཆོས་ཀྱི་དབྱིངས་ནས་སྐུར་བཞེངས་ལ༔ བསྐུལ་ལོ་འགྲོ་བའི་དོན་དུ་ཐུགས་དམ་བསྐུལ༔ མཛོད་ཅིག་དྲག་པོའི་ཕྲིན་ལས་དུས་ལ་བབས༔ བསྟན་ལ་སྡང་བའི་དམ་སྲི་རྨིང་ནས་རློགས༔ རྣལ་འབྱོར་ཚེ་གེགས་བར་ཆད་བསུན་མ་ཟློག༔ འགྲོ་བའི་བདེ་སྐྱིད་ཕྲོག་པའི་མཐའ་དམག་དང་༔ རྒྱ་འདྲེ་འགོང་པོ་ལོག་འདྲེན་ཆམ་ལ་ཕོབ༔ བར་ཆད་འཚེ་བའི་བདུད་བཞི་དབྱིངས་སུ་སོལ༔ རྣལ་འབྱོར་སྒྲུབ་པའི་ལས་འབྲས་མཆིས་པར་མཛོད༔ ཆད་མདོའི་གཏོར་མར་སྨན་དང་རཀྟས་བྲན༔ ཐ་ཚིག་བསྒྲགས་པ་འདི་བཞིན་ནོ༔ ཧཱུྃ་ཧྲཱིཿ སྔོན་ཚེ་འདས་དུས་བསྐལ་པའི་དང་པོ་ལ༔ འོག་མིན་རྣམ་གསུམ་རིགས་ལྔའི་ཞིང་ཁམས་སུ༔ ཡིད་ཆོས་གནས་དག་ཆོས་སྐུའི་སྟོན་པ་ཡིས༔ ཕུང་ལྔ་དབྱིངས་གྲོལ་སྟོན་མཆོག་རིགས་ལྔ་ལ༔ དགོངས་བརྒྱུད་བརྗོད་བྲལ་གདམས་པ་བསྟན་པའི་ཚེ༔ རིགས་དྲུག་སེམས་ཅན་གནས་སུ་སྤོར་བ་དང་༔ གང་འདུལ་སྤྲུལ་བ་སྒྱུ་མའི་ཆོ་འཕྲུལ་གྱི༔ རྟོག་པ་མེད་བཞིན་བདེ་ལེགས་ཕུན་ཚོགས་གྱིས༔ བསྟན་འགྲོའི་གསོས་སུ་འགྱུར་བར་ཞལ་བཞེས་བཞིན༔ མཁའ་ཁྱབ་འགྲོ་ཀུན་ཐུགས་རྗེས་སྐྱོང་བར་མཛོད༔ ཧྲཱིཿ དེ་འོག་བསྐལ་པ་རྫོགས་ལྡན་དུས་ཀྱི་ཚེ༔ སྨོན་ལམ་ལོག་པའི་རཱུ་དྲ་སྡེ་གསུམ་གྱིས༔ འགྲོ་ཀུན་མི་དགེའི་སྡུག་བསྔལ་སྦྱོར་བའི་ཚེ༔ ཕྱོགས་དུས་རྒྱལ་བ་སྲས་བཅས་བཀའ་བགྲོས་ནས༔ མཐུ་སྟོབས་རྩལ་ལྡན་པདྨ་དབང་ཆེན་དང་༔ རྒྱལ་ཡུམ་དཔའ་མོ་རྡོ་རྗེ་རྣལ་འབྱོར་མས༔ བདུད་པོ་མ་ཏྲཾ་རུ་ཏྲ་སྡེ་དང་བཅས༔ དྲག་ཤུལ་འབར་བའི་སྟོབས་ཀྱིས་བཏུལ་བའི་ཚེ༔ ལྷ་སྲིན་དྲེགས་པའི་དཔུང་དང་བཅས་པ་ཡིས༔ སངས་རྒྱས་བསྟན་པ་སྲུང་བར་ཞལ་བཞེས་བཞིན༔ བསྟན་དང་འགྲོ་བའི་ཉེར་འཚེ་ཕྱིར་བཟློག་ནས༔ འགྲོ་རྣམས་བདེ་ལ་འགོད་པའི་ཕྲིན་ལས་མཛོད༔ ཧྲཱིཿ དེ་འོག་རྩོད་ལྡན་སྙིགས་མའི་དུས་ཀྱི་ཚེ༔ འཇམ་དབྱངས་སྤྲུལ་པ་ཁྲི་སྲོང་ལྡེའུ་བཙན་གྱིས༔ རང་བྱུང་པདྨ་རྒྱལ་པོ་སྤྱན་དྲངས་ནས༔ ལོ་པཎ་ཆོས་བསྒྱུར་ཐུབ་པའི་བསྟན་པ་སྤེལ༔ འོག་མིན་སྤྲུལ་པའི་བསམ་ཡས་དབུ་རྩེ་རུ༔ ཨོ་རྒྱན་ཆེན་པོས་གསང་ཆེན་སྤྱན་དྲངས་ནས༔ རྗེ་འབངས་སྤྱི་དང་རྒྱལ་ཡུམ་མཚོ་རྒྱལ་མ༔ དབང་ཆེན་བཀའ་བབས་རྒྱལ་བ་མཆོག་དབྱངས་ལ༔ རྟ་མགྲིན་རོལ་པ་ཕྱི་ནང་གསང་གསུམ་གྱི༔ སྨིན་གྲོལ་གདམས་པས་གཏད་རྒྱ་མཛད་པའི་ཚེ༔ པདྨའི་རིགས་ཀྱི་སྲུང་མ་ཐམས་ཅད་དང་༔ ཁྱད་པར་གནོད་སྦྱིན་བསེ་ཁྲབ་དམར་པོ་ཡིས༔ རྣལ་འབྱོར་སྐུ་ཚེ་བསྲིང་བར་མ་ཆད་དམ༔ བཅོལ་བའི་ལས་རྣམས་བསྒྲུབ་པར་མ་ཆད་དམ༔ སངས་རྒྱས་བསྟན་པ་སྤེལ་བར་མ་ཆད་དམ༔ ཇི་ལྟར་ཞལ་བཞེས་དམ་བཅས་མ་གཡེལ་བར༔ མཆོད་གཏོར་བཞེས་ལ་ཕྲིན་ལས་སྒྲུབ་པར་མཛོད༔ ཧྲཱིཿ དེ་འོག་རྩོད་ལྡན་བསྐལ་པའི་ཡང་མཐའ་འདིར༔ རང་སྣང་རྣམ་དག་རྔ་ཡབ་གླིང་མཆོག་ཏུ༔ ཨོ་རྒྱན་སློབ་དཔོན་པདྨ་ཐོད་ཕྲེང་དང་༔ རྒྱལ་ཡུམ་དཔའ་མོ་ཇོ་མོ་མཁར་ཆེན་བཟའ༔ ལྷ་སྲས་རྣམ་རོལ་གྲུབ་དབང་བླ་མ་ཡིས༔ སྐལ་ལྡན་སློབ་མ་ལུང་རིག་གླིང་པ་ལ༔ དབང་ཆེན་འབར་བའི་དཀྱིལ་འཁོར་ཞལ་ཕྱེས་ནས༔ རབ་འབྱམས་ལྷག་པའི་ལྷ་ཚོགས་ཐམས་ཅད་དང་༔ རང་སྐལ་སྨིན་གྲོལ་གདམས་པས་དབུགས་དབྱུང་ཚེ༔ མ་གཟའ་དམ་ཅན་གནོད་སྦྱིན་སྡེ་བདུན་གྱི༔ ཟབ་གཏེར་ཉམས་སུ་ལེན་པའི་སྐལ་ལྡན་ལ༔ ཚེ་ཆོས་སྲིད་ནོར་དངོས་གྲུབ་སྦྱིན་པ་དང་༔ བར་ཆད་བདུད་སྡེའི་འཕྲང་ལས་སྒྲོལ་ལོ་ཞེས༔ ཇི་ལྟར་ཁས་བླངས་དམ་བཅས་དེ་བཞིན་དུ༔ གཏོར་མ་བཞེས་ལ་ཕྲིན་ལས་གྲུབ་པར་མཛོད༔ ཨ་ཡ་མ་དུ་རུ་ཙ་ཤ་ན་ཤུ་ལ་རཀྴ་བྷ་ལིང་ཏ་ཁཱ་ཧི༔ བཤལ་ཆུ་གཏོར་མ་བྱིན་གྱིས་བརླབས༔ བསྟན་མ་སྐྱོང་བ་འདི་བཞིན་ནོ༔ ཧྲཱིཿ རྒྱལ་དབང་པདྨ་ཀཱ་ར་ཡིས༔ བལ་ཡུལ་རྒྱ་བོད་ས་མཚམས་སུ༔ དབང་ཆེན་འབར་བའི་སྐུར་བཞེངས་ནས༔ དམ་ལ་བཞག་པའི་བསྟན་མ་རྣམས༔ བཤལ་ཆུའི་གཏོར་མ་འདི་བཞེས་ལ༔ བོད་ཡུལ་བསྟན་པའི་གཞི་མ་འདིར༔ མུ་སྟེགས་རྒོལ་ངན་སྲུང་བ་དང་༔ མཐའ་དམག་འཁྲུག་རྩོད་ནད་མུག་མཚོན༔ ཆག་ཆེ་ཉམ་ང་ཞི་བ་དང་༔ གངས་ཅན་བསྟན་པའི་མངའ་བདག་དང་༔ གཙུག་ལག་ཆོས་འཁོར་སྐྱོང་བར་མཛོད༔ མ་མ་ཧྲིང་ཧྲིང་བ་ལིང་ཏ་ཁཱ་ཧི༔ གཏོར་གཞོང་ཁ་སྦུབ་དམ་སྲི་བཀུག༔ རྡོ་རྗེའི་བྲོ་བརྡུང་ཚིག་འདིས་གནོན༔ ཧཱུྃ་ཧྲཱིཿ དབང་ཆེན་རྟ་མཆོག་རྔམ་པའི་ཏིང་འཛིན་གྱིས༔ གཏོར་གཞོང་རི་རབ་གླིང་བཞིའི་འོག་རོལ་དུ༔ རྒབ་འདྲེ་དམ་སྲི་བར་གཅོད་འབྱུང་པོ་གནོན༔ ཇི་སྲིད་བྱང་ཆུབ་སེམས་མཆོག་མ་སྐྱེ་བར༔ ནམ་ཡང་ལྡང་མེད་རྡོ་རྗེའི་བྲོ་རྒྱས་གདབ༔ ལྟ་བ་བློ་བྲལ་སྟོང་གསལ་དབྱེར་མེད་བྲོ༔ སྒོམ་པ་ཡེངས་འཁྲུལ་རང་གྲོལ་གོམས་པའི་བྲོ༔ སྤྱོད་ པ་རང་བབས་མ་འདྲེས་ཤུགས་འབྱུང་བྲོ༔ འབྲས་བུ་རེ་དོགས ་ཐོབ་ཤོར་མེད་པར་བརྡུང༔ ཨོཾ་ལཾ༔ ཨཱཿལཾ༔ ཧཱུྃ་ལཾ་སྟྭཾ་བྷ་ཡ་ནན༔ དེ་ནས་རྗེས་ཀྱི་ལས་རིམ་ལ༔ མཆོད་བསྟོད་དངོས་གྲུབ་ཚིག་འདིས་བསྐུལ༔ ཧྲཱིཿ ཐོག་མེད་དུས་ནས་ལས་ཀྱིས་འབྲེལ་བ་ཡི༔ ཡི་དམ་རྟ་མཆོག་རྒྱལ་པོའི་ལྷ་ཡི་ཚོགས༔ དང་པོ་བསྙེན་ནས་བར་དུ་རྩེ་གཅིག་སྒྲུབ༔ ད་ལྟ་རང་དང་དབྱེར་མེད་གདེང་དང་ལྡན༔ མཆོག་ཐུན་དངོས་གྲུབ་སྩོལ་བའི་དུས་ལགས་ན༔ ཐུན་མོང་གྲུབ་པ་བརྒྱད་དང་ཕྲིན་ལས་བཞི༔ མཆོག་ཏུ་མི་འགྱུར་གདོད་མའི་སར་བགྲོད་ནས༔ རང་གཞན་དོན་གཉིས་འགྲུབ་པའི་དངོས་གྲུབ་སྩོལ༔ རྩ་སྔགས་ཤམ་བུར༔ ཀཱ་ཡ་ཝཀྐ་ཙིཏྟ་སརྦ་སིདྡྷི་ཕ་ལ་ཧཱུྃ༔ ནོངས་བཤགས་བྱ་ཞིང་སྒྲུབ་པའི་རྫས༔ གནས་གསུམ་གཏུག་ཅིང་ཚེ་འགུགས་བྱ༔ དེ་ནས་ལྷར་སྣང་བསྡུ་བ་ནི༔ ཧྲཱིཿ སྐྱེ་བའི་བག་ཆགས་བསྐྱེད་པའི་རིམ་པས་སྦྱངས༔ དབང་ཆེན་ལྷ་ཡི་ཕོ་བྲང་རྟེན་པར་བཅས༔ གཙོ་བོ་ཡབ་ཡུམ་སྦྱོར་བའི་འོད་ཀྱིས་བསྡུས༔ འཁོར་རྣམས་གཙོ་བོ་དེ་ཡང་དྭངས་མའི་སྲོག༔ ཧྲཱིཿཡིག་གྱེན་རྫོགས་དམིགས་མེད་མཁའ་དང་འདྲེས༔ ཨ་ཨ༔ སྒྱུ་མའི་ལྷར་ལྡང་རང་ཉིད་ཀྱི༔ གནས་གསུམ་ཡི་གེའི་མཚན་པས་བསྲུང་༔ ཨོཾ་ཨཱཿཧཱུྃ༔ བཛྲ་ཀ་ཝ་ཙི་རཀྵ་རཀྵ་བྷྲུཾ༔ དགེ་རྩ་འགྲོ་ལ་བསྔོ་བ་ནི༔ ཧྲཱིཿབདག་གིས་དུས་གསུམ་དགེ་བའི་དངོས་པོ་དང་༔ ཁྱད་པར་བསྙེན་སྒྲུབ་ཟབ་མོའི་ཚོགས་གཉིས་ཀུན༔ མཐའ་ཡས་འགྲོ་རྣམས་སངས་རྒྱས་ཐོབ་ཕྱིར་བསྔོ༔ ཀུན་ཀྱང་གདོད་མའི་གྲོལ་གཞི་མངོན་གྱུར་ཤོག༔ སླར་ཡང་སྨོན་ལམ་གདབ་པ་ནི༔ ཧྲཱིཿ དབང་ལ་མངའ་མཛད་རྟ་མཆོག་རྒྱལ་པོ་ཡི༔ སྐུ་གསུང་ཐུགས་ཀྱི་བྱིན་རླབས་ཟབ་མོའི་མཐུས༔ བདག་དང་གསང་ཆེན་སྒོར་ཞུགས་མཆེད་ལྕམ་ཀུན༔ བར་ཆད་ཚེ་འཕྲང་གེགས་ལས་གྲོལ་བ་དང་༔ འབྲས་བུ་ལམ་བྱེད་རིམ་གཉིས་སྦྱངས་གོམས་མཐུས༔ རབ་འབྱམས་ལས་ལ་རང་བྱན་ཆུད་པ་ཡི༔ བསྟན་འགྲོའི་དཔལ་དང་མགོན་དུ་འགྱུར་བར་ཤོག༔ མཐར་ཕྱིན་བཀྲ་ཤིས་ཚིག་འདི་བརྗོད༔ ཧྲཱིཿ སྐུ་གསུམ་རྒྱལ་བ་ཡོངས་ཀྱི་གསུང་གི་མཆོག༔ རིགས་ཀྱི་བདག་པོ་པདྨ་དབང་གི་ལྷ༔ ཡབ་ཡུམ་སྤྲུལ་འཁོར་དམ་ཅན་སྲུང་མར་བཅས༔ རྩ་གསུམ་རབ་འབྱམས་རྒྱ་མཚོའི་བཀྲ་ཤིས་ཤོག༔ རྡོ་རྗེ་སློབ་དཔོན་མཆེད་དང་ལྕམ་དྲལ་སོགས༔ མི་འབྲལ་ཚོམ་བུ་གཅིག་ཏུ་འགྲོགས་ནས་ཀྱང་༔ ལྟ་སྒོམ་སྤྱོད་པ་བླ་མེད་ཐེག་པའི་རྩེ༔ མི་ནུབ་དར་ཞིང་རྒྱས་པའི་བཀྲ་ཤིས་ཤོག༔ དེ་ལྟར་ཤིན་ཏུ་ཡང་ཟབ་པའི༔ དབང་ཆེན་སྒྲུབ་པ་ཟབ་མོ་འདི༔ ལྷ་དང་བླ་མའི་བྱིན་རླབས་ཀྱིས༔ དགོངས་གཏེར་ཆོས་ཀྱི་རྩ་བར་ཕབ༔ ས་མ་ཡཱ༔ རྒྱ་རྒྱ་རྒྱ༔ བདག་འདྲ་མཁར་ཆེན་མཚོ་རྒྱལ་ལ༔ མཚོ་སྐྱེས་བླ་མའི་བཀའ་དྲིན་གྱིས༔ ཡང་ཟབ་གདམས་པའི་སྙིང་པོ་འདི༔ ཤིན་ཏུ་གསང་བའི་ཕུལ་དུ་གདམས༔ མ་འོངས་ལས་སྐལ་ལྡན་པ་ཡི༔ རིག་འཛིན་སྐྱེས་བུ་ལས་འཕྲོ་ཅན༔ མཆོག་དབྱངས་སྤྲུལ་པའི་གང་ཟག་ལ༔ བདག་ཉིད་ཕྲིན་ལས་སྤྲུལ་བ་དེའི༔ ཚེ་འཕྲང་གེགས་ལས་གྲོལ་བའི་ཕྱིར༔ ཚུལ་བཞིན་སྟོན་གཅིག་གུ་ཧྱ་རྒྱ༔ བཀའ་སྲུང་གནོད་སྦྱིན་སྡེ་བདུན་དང་༔ དུད་སོལ་ལྷ་མོས་མེལ་ཚེ་མཛོད༔