དཔལ་ལྡན་བླ་མ་དམ་པ་ཤེས་བྱ་ཀུན་མཁྱེན་ཤྲཱི་ནི་རྨ་ཀའི་གསུང་འབུམ་གྱི་བཞུགས་བྱང་འདོད་འབྱུང་རིན་པོ་ཆེའི་ཏོག
དཔལ་ལྡན་བླ་མ་དམ་པ་ཤེས་བྱ་ཀུན་མཁྱེན་ཤྲཱི་ནི་རྨ་ཀའི་གསུང་འབུམ་གྱི་བཞུགས་བྱང་འདོད་འབྱུང་རིན་པོ་ཆེའི་ཏོག་ཅེས་བྱ་བ་བཞུགས་སོ།།
ཨོཾ་དགེ་ལེགས་རྣམ་པར་རྒྱལ། །མཚུངས་མེད་སྟོན་པ་ཆོས་དང་དགེ་འདུན་ཏེ། །སྐྱབས་ཀྱི་མཆོག་གྱུར་རིན་ཆེན་རྣམ་གསུམ་གྱི། །
ཞབས་པད་ལྷར་བཅས་གཙུག་གི་རྒྱན་གྱུར་པ། །མི་ཕྱེད་དད་པའི་ཡིད་ཀྱི་དཔལ་དུ་བསྟན། །
བརྒྱུད་པ་གསུམ་ལྡན་རྗེ་བཙུན་བླ་མ་དང་། །རབ་འབྱམས་ཡི་དམ་ལྷ་ཡི་དཀྱིལ་འཁོར་མཆོག །གནས་གསུམ་མཁའ་འགྲོ་དམ་ཅན་ཚོགས་རྣམས་ཀྱིས། །ཕུན་ཚོགས་དགེ་ལེགས་ཤིས་པའི་དཔལ་སྩོལ་ཅིག །གདོད་མའི་མགོན་པོ་རྒྱལ་བ་ཀློང་ཆེན་པ། །མཁྱེན་བརྩེའི་འོད་ཟེར་སྟོང་འབར་འཇིགས་མེད་གླིང་། །རྒྱལ་བ་ཀུན་དངོས་མི་འགྱུར་ནམ་མཁའི་ཞབས། །རྒྱལ་བའི་མྱུ་གུར་བཅས་ལ་གུས་ཕྱག་འཚལ། །ཤེས་བྱ་ཀུན་མཁྱེན་འཇམ་དཔལ་དཔའ་བོ་དང་། །སྙིང་རྗེའི་མངའ་བདག་མགོན་པོ་སྤྱན་རས་གཟིགས། །དབྱེར་མེད་བླ་མ་བསྟན་འགྲོའི་དཔལ་མགོན་མཆོག །འཇིགས་མེད་ཆོས་ཀྱི་དབང་པོའི་ཞབས་སུ་འདུད། །དམ་པ་མཆོག་དེའི་ཞལ་ནས་ལེགས་གསུངས་པའི། །ལེགས་བཤད་རིན་ཐང་བྲལ་བའི་རིན་ཆེན་ཚོགས། །ཕྱོགས་གཅིག་ལེགས་པར་བསྟར་བའི་གླེགས་བམ་གྱི། །བཞུགས་བྱང་དཀར་ཆག་ཡི་གེར་འགོད་པར་བྱ། །དེ་ལ་འདིར་མཁྱེན་རྟོགས་ཀྱི་ཡོན་ཏན་རྨད་དུ་བྱུང་བ་དཔལ་དགེ་སྤྲུལ་པའི་སྐུ་རིན་པོ་ཆེ་ཨོ་རྒྱན་འཇིགས་མེད་ཆོས་ཀྱི་དབང་པོ་ཞེས་མཚན་གྱི་བ་དན་སྲིད་ན་མངོན་པར་མཐོ་བ་གང་ཉིད་སྐུ་ན་ཆུང་ངུའི་དུས་ནས་ཐེག་པ་ཆེན་པོའི་རིགས་སད་ཅིང་སྐྱེས་
ཐོབ་ཀྱི་མཁྱེན་རབ་ཕུལ་དུ་བྱུང་བ་མངའ་བ་དང་ལྷག་པའི་ལྷས་བྱིན་གྱིས་བརླབ་པའི་མཐུས་ཡོངས་འཛིན་དགེ་བའི་བཤེས་གཉེན་རྣམས་ཀྱི་ཞལ་ནས་ཆོས་ཀྱི་བདུད་རྩི་ཐོབ་པ་རྣམས་ཚེགས་ཆུང་ངུས་མཁྱེན་པས་མདོ་རྒྱུད་རིག་གནས་དང་བཅས་པའི་གཞུང་ལ་གཞན་དྲིང་མི་འཇོག་པའི་རྣམ་དཔྱོད་རྣམ་པར་དག་པས་ལེགས་བཤད་སྨྲ་བ་ལ་མི་ཟད་པའི་སྤོབས་པ་ཐོབ་ཅིང་། །འཇིག་རྟེན་ཆོས་བརྒྱད་ཀྱི་ཞེན་འཁྲིས་གཏན་ནས་ལོག་པས་སྐུ་ཚེ་ཧྲིལ་པོར་ཟོལ་མེད་ཀྱི་བྱ་བཏང་ཡང་དག་པའི་རྩེ་མོར་སོན་ཅིང་། །བསྟན་དང་འགྲོ་ལ་རྗེས་སུ་ཆགས་པའི་ཐུགས་ཀྱིས། མདོ་རྒྱུད་རིགས་གནས་དང་བཅས་པའི་འཆད་ཉན་སྣ་ཚོགས་དང་། ཁྱད་པར་ཐེག་པ་ཆེན་པོའི་ལམ་གྱི་རྩ་བ་བྱང་ཆུབ་ཀྱི་སེམས་རིན་པོ་ཆེའི་གཞུང་ཤིང་གཙུགས་པར་བཞེད་པས། རྒྱལ་སྲས་ཞི་བ་ལྷའི་གསུང་བྱང་ཆུབ་སེམས་དཔའི་སྤྱོད་པ་ལ་འཇུག་པའི་གཞུང་རྩལ་དུ་བཏོན་ཏེ་འཆད་ཉན་གྱི་སྲོལ་བཙུགས་པས། །གསར་རྙིང་རིས་མེད་ཀྱི་དགེ་བའི་བཤེས་གཉེན་ཆོས་ཀྱི་སྤྱན་དང་ལྡན་པ་རྣམས་ཀྱིས་བདག་ཉིད་ཆེན་པོ་འདི་ནི་སྔོན་གྱི་བཀའ་གདམས་གོང་མ་རྣམས་ཀྱི་རྣམ་ཐར་དང་ཁྱད་པར་དབྱེ་བ་མེད་པ་ཡོན་ཏན་རྒྱ་མཚོ་ཆེན་
པོའི་མཛོད་དུ་གྱུར་པའོ་ཞེས་བསྔགས་པའི་མེ་ཏོག་ཕྱོགས་ཀྱི་ཐ་གྲུ་ཀུན་ནས་འཐོར་ཞིང་ཞབས་པད་གུས་པའི་གཙུག་གིས་ལེན་པར་གྱུར་ཅིང་། དུས་རྒྱུན་དུ་བྱང་ཆུབ་ཀྱི་སེམས་རིན་པོ་ཆེ་རྣམ་པ་གཉིས་ཀྱི་ཉམས་ལེན་ལ་གཞོལ་ཞིང་། ཁྱད་པར་རིག་འཛིན་བླ་མ་གོང་མ་རྣམས་ཀྱི་དོན་བརྒྱུད་བྱིན་རླབས་ཀྱི་རྟོགས་པ་འཕོས་པའི་སྟོབས་ཀྱིས་འོད་གསལ་རྡོ་རྗེ་སྙིང་པོའི་དགོངས་པ་མངོན་དུ་གྱུར་ཏེ་ནང་གི་ཉམས་རྟོགས་ཀྱི་དྲོད་ཚད་ཤིན་ཏུ་མཐོན་པོར་གྱུར་ཀྱང་། ཕྱི་ཚུལ་སྔོན་གྱི་རྒྱལ་སྲས་དེས་པ་ཞེས་པའི་རྣམ་ཐར་དང་མཚུངས་པར། རྟག་ཏུ་རང་གི་ཡོན་ཏན་ལ་མངོན་རློམ་ཅུང་ཟད་མེད་པར་སྦས་ཤིང་བདག་ཉིད་ལ་དམན་པའི་འདུ་ཤེས་ཀྱི་ས་དམན་ས་འཛིན་པ་ཁོ་ནའི་གནས་པར་མཛད་ཀྱང་། མཁྱེན་རྩེ་ཉི་མ་ལྟ་བུའི་རང་རྟགས་ཀྱི་འོད་ཟེར་སྒྲིབ་དུ་མེད་པ་ཇེ་བས་ཇེ་གསལ་དུ་སྐུ་ཚེའི་མཐར་སོན་པར་གྱུར་ཅིང་། དམ་པ་འདི་ཉིད་གྲུབ་མཐའ་རིས་མེད་ལ་དག་པའི་སྣང་བ་དཀར་འབྱམས་ཡུག་གཅིག་ཏུ་སོང་བ་དང་། སྒྱུ་མེད་པའི་ཚིག་དྲང་པོར་སྨྲ་བ་ཁོ་ནས་དྲག་ཞན་སུ་ལའང་ངོ་བསྟོད་དང་ཟོལ་ཚིག་མེད་པར་སྨྲ་བས། གནས་སྐབས་བརླང་བ་ལྟར་སྣང་བའི་ཚིག་རྣམས་ཀྱང་གཞན་ལ་ཕན་པ་འབའ་ཞིག་ཏུ་གྱུར་པ་དང་། །
སྐུ་མཐོང་བ་དང་གསུང་ཐོས་པ་དང་གསུང་རྩོམ་གྱི་རྣམ་པ་ཕྲ་མོས་ཀྱང་གདུལ་བྱའི་རྒྱུད་ལ་རྣམ་དཀར་གྱི་ས་བོན་ཐེབ་པ་ཁོང་དང་འདྲ་བ་གཞན་སྙིགས་མའི་དུས་འདིར་འབྱུང་བར་དཀའོ་ཞེས་བློ་ལྡན་གཟུར་གནས་ཐམས་ཅད་ཀྱིས་བསྔགས་ཤིང་དད་པའི་བ་སྤུ་གཡོ་བའི་གནས་སུ་གྱུར་བ་འདི་ཉིད་ལེགས་བཤད་སྨྲ་བའི་སྦོབས་པ་མི་ཟད་པ་ཐོབ་པས་སྐུ་ན་ཆུང་ངུའི་དུས་ནས་བཟུང་སྟེ་ཕྱིས་སྐུ་ཚེ་ན་ཡོལ་ཙམ་གྱི་བར་དུ་གསུང་རྩོམ་སྣ་ཚོགས་པའི་རྣམ་པ་མང་དུ་མཛད་པར་འདུག་ཀྱང་། རྗེ་ཉིད་ཀྱིས་ནི་གཞན་དང་གཞན་ལ་གནང་བ་ལས། རང་རྩོམ་གྱི་དཔེ་ཆ་ཤོག་བྱང་གཅིག་ཀྱང་ཚགས་སུམ་མཛད་པས། གཞན་དག་གིས་ཀྱང་རེ་ཞིག་རྩོལ་བསྡུ་བྱེད་པའི་སྐབས་མ་རྙེད་པས། གསུངས་རྣམས་ཕྱོགས་དང་ཕྱོགས་སུ་འཐོར་བ་ལས་རྒྱ་ཆེར་མི་སྣང་ན་ཡང་། ཕྱིས་སུ་བདག་ཉིད་ཆེན་པོ་འདི་ཡི་དངོས་སློབ་བླ་མ་ལ་གུས་པ་མཆོག་དང་ལྡན་པ་བསླབ་པ་གསུམ་གྱི་མཛོད་འཛིན་དགེ་མང་དབོན་རིན་པོ་ཆེ་ཨོ་རྒྱན་བསྟན་འཛིན་ནོར་བུས་ཕྱོགས་རྣམས་ནས་ཇི་ལྟར་རྙེད་པ་བསྡུ་རྩོལ་མཛད་དེ་ཕྱོགས་གཅིག་གླེགས་བམ་དུ་བཀོད་ཅིང་། ཡིག་ནོར་ཤིན་ཏུ་མང་བ་རྣམས་ཅི་རིགས་དག་
བར་བྱས་ཤིང་ཡོན་སྦྱོར་དང་བཅས་ཏེ་སྐུ་ཞབས་སྤྲུལ་པའི་སྐུ་རིན་པོ་ཆེ་རྒྱལ་སྲས་གཞན་ཕན་ཆོས་ཀྱི་སྣང་བ་ལ་སྤར་དུ་འཁོད་པའི་མགོ་འདྲེན་ཞུས་པ་བཞིན། །སྤྲུལ་པའི་སྐུ་དེ་ཉིད་ཀྱིས་སྦར་དུ་ལེགས་པར་བསྒྲུབ་ཅིང་། སྡེ་སྣོད་འཛིན་པ་མཁན་བློ་གསལ་ནས་ཞུས་དག་བགྱིས་ཏེ་རུ་དམ་ཤྲཱི་སེངྒར་ཆོས་མཛོད་གྱི་གྲལ་དུ་བཀོད་པའི་གླེགས་བམ་ཕ་རོལ་ཕྱིན་པའི་གྲངས་ལྡན་བཞུགས་པ་ལས། གླེགས་བམ་དང་པོ། །ཀ་བ་ལ། བཞུགས་བྱང་འདོད་འབྱུང་རིན་པོ་ཆེའི་ཟ་མ་ཏོག་ཅེས་བྱ་བ། སྤྱིར་གསུང་འབུམ་ཡོངས་རྫོགས་ལ། ཐུན་མོང་རིག་གནས་ཀྱི་སྐོར་དང་། ཐུན་མིན་ནང་དོན་གྱི་སྐོར་གཉིས་ལས། དང་པོ་ལ། སྙན་དངགས། སྡེབ་སྦྱོར། སྐར་རྩིས་ཀྱི་བསྟན་བཅོས་གསུམ་སྟེ། དང་པོ་སྙན་དངགས་གི་ཕྱི་མོ་མེ་ལོང་གི་དཔེར་བརྗོད་རྣ་བའི་གླིང་བུ། བསྟོད་ཚོགས་འདི་དག་གི་བརྗོད་བྱེད་ཀྱང་དནྜི་པའི་གཞུང་གི་ཚིག་དང་དོན་གྱི་རྒྱན་གྱིས་སྤྲས་པ་ཁོ་ནའི་ཕྱིར་ས་བཅད་འདི་ལ་འགོད་པ་མི་འགལ་ཞིང་འཐད་དེ། དེ་ལ་དཔལ་ལྡན་རྡོ་རྗེ་སེམས་དཔའ་ལ་བསྟོད་པ། འཁོར་ལོ་དང་པོའི་དམ་པའི་ཆོས་འདུལ་བ་ལ་བསྔགས་པ་མེ་ཏོག་གི་སྐྱེད་མོའི་ཚལ། སྟོན་པ་མཆོག་གི་གསུང་ཐེག་པའི་
བྱེ་བྲག་སོ་སོ་ལ་བསྔགས་པ་ཆུན་འཕྱང་བརྒྱད་དེ། དང་པོ་གསུང་གསང་བ་བསམ་གྱིས་མི་ཁྱབ་པ་ལ་བསྔགས་པ་པདྨ་དཀར་པོའི་ཆུན་འཕྱང་། གཉིས་པ་གསུང་རྣམ་པ་ཐམས་ཅད་པ་ལ་བསྔགས་པ་ཨུ་དུམ་ཝ་རའི་ཆུན་འཕྱང་། གསུམ་པ་གསུང་དམ་པའི་ཆོས་ལ་བསྔགས་པ་ཨུ་ཏྤལ་གཞོན་ནུའི་ཆུན་འཕྱང་། བཞི་པ་གསུང་ཡི་གེའི་ཕྲེང་བ་ལ་བསྔགས་པ་ཀུ་མུད་དཱའི་ཆུན་འཕྱང་། ལྔ་པ་གསུང་གསང་སྔགས་ཀྱི་ཚུལ་ལ་བསྔགས་པ་མེ་ཏོག་གི་ཆུན་འཕྱང་། དྲུག་པ་གསུང་ཟབ་དོན་གསང་བ་ལ་བསྔགས་པ་ཟླ་བ་ཐིག་ལེའི་ཆུན་འཕྱང་། བདུན་པ་གསུང་ཡོན་ཏན་རྒྱ་མཚོའི་ཆེ་བ་ལ་བསྔགས་པ་མུ་ཀྟི་ཀའི་ཆུན་འཕྱང་། བརྒྱད་པ་གསུང་ཡེ་གྲོལ་རྫོགས་ཆེན་ལ་བསྔགས་པ་བཻཌུར་ཡའི་ཆུན་འཕྱང་རྣམས་དང་། ཀུན་མཁྱེན་བླ་མའི་གསུང་རབ་ལ་བསྔགས་པ་ཡོངས་རྫོགས་བསྟན་པའི་པད་ཚལ་ཞེས་བྱ་བ་དང་། བསྔགས་པའི་ཡུལ་དེར་འཇལ་བའི་ཡོན་ཏན་ལ་བསྔགས་པའི་སྒོ་ནས་བལྟ་བར་བསྐུལ་བ་རྣམས་དཔེ་བམ་གཅིག་གོ །རྗེ་བླ་མ་བཀའ་དྲིན་ཅན་འཇིགས་མེད་རྒྱལ་བའི་མྱུ་གུའི་གསང་གསུམ་ཡོན་ཏན་མི་ཟད་རྒྱན་གྱི་འཁོར་ལོ་ལ་ཤར་ཕྱོགས་གོ་ཌཱ་བའི་ལུགས་ཀྱི་བྱ་དཀའི་ཚིག་རྒྱན་ཀུན་
བཟང་འཁོར་ལོ་བཞི་ལྡན་གྱི་སྒོ་ནས་བསྔགས་པ། སྐྱབས་རྗེ་རྒྱལ་བའི་སྲས་པོ་གཞན་ཕན་མཐའ་ཡས་ལ་རོ་དྲུག་སྨན་གྱི་བྱེད་པས་ནད་དྲུག་སྦྱོང་བའི་དཔེས་ཕྱིན་དྲུག་གི་ཡོན་ཏན་དང་ལྡན་པར་བསྔགས་པ་ན་མོ་གུ་རུ་བཻ་ཥ་ཛྱ་སོགས། ཐབས་ལམ་མཆོག་གི་སྤྱོད་པ་ལ་དབང་བའི་ཡོན་ཏན་བསྐུལ་བའི་ཟོལ་གྱིས་བསྔགས་པ། །གཞན་ཕན་ཐུགས་བསྐྱེད་སོགས། སྣང་བཞི་ཚད་དུ་ཕེབས་པ་སོགས་རང་དོན་མངོན་དུ་གྱུར་ཅིང་སྡེ་སྣོད་གསུམ་སྟོན་པ་སོགས་གཞན་དོན་མཛད་པའི་ཡོན་ཏན་ལ་བསྔགས་པ། གཉིས་ཀྱི་གཉིས་པ་སོགས་བཤད་སྒྲུབ་གསེར་གྱི་འཁོར་ལོ་སོགས་ཆོས་ཀྱི་རྒྱལ་སྲིད་དང་ལྡན་པར་བསྔགས་པ། རིམ་རྩོལ་སྤྲོས་པས་སོགས། གཞན་ཡང་ལྟ་བ་ཆོས་སྐུའི་དབྱིངས་ལས་མ་གཡོས་བཞིན་སྤྱོད་པ་གཟུགས་སྐུའི་འགྲོ་དོན་མཛད་པ་ལ་བསྔགས་པ་རིང་ནས་མཐའ་ཀླས་སོགས་རྒྱ་ནག་ལྕང་ཀྱ་ལ་སྤྲིང་བ། སྒྲུབ་པའི་རྒྱལ་མཚན་འཛིན་བཞིན་སྐལ་ལྡན་སློབ་ཚོགས་ལ་ཟབ་རྒྱས་བདུད་རྩིའི་དགའ་སྟོན་འགྱེད་པ་ལ་བསྔགས་པ་མཐའ་ཀླས་འགྲོ་ལ་སོགས་རྒྱ་ནག་ཆོས་བཟང་ལ་སྤྲིང་པ། དཔོན་སློབ་བཤེས་པའི་ངང་ཚུལ་གྱིས་བརྩེ་བའི་
ཡོན་ཏན་ལ་བསྔགས་པ་ཟླ་གཞོན་ཐིག་ལེའི་སོགས་རྒྱ་རོང་དབོན་པོ་ལ་སྤྲིང་བ་སྟེ་འདི་རྣམས་སྐྱབས་རྗེ་དབུས་སུ་བཞུགས་སྐབས་སོགས་སུ་སྤྲིང་ཡིག་ཕུང་བའི་འཚམ་གསོལ་ཡིན་ཡང་དོན་ལ་གང་དེའི་གསང་གསུམ་དམ་པའི་ཚུལ་དགུའི་ཡོན་ཏན་ལ་རབ་བརྟགས་ཙམ་མིན་པ་ཚུལ་བཞིན་བསྔགས་པའི་ཚིག་རྒྱན་འཇེ་བ་མཛེས་ཀྱིས་སྤྲས་པས་བསྟོད་ཚོགས་སུ་སྡེབ་པར་འོས་པ་དང་། སྐྱབས་རྗེས་གསན་ཡིག་གི་མགོ་རྒྱན་འདི་ཡང་རྒྱལ་བསྟན་རིས་མེད་ལ་གསན་བསམ་བཞེས་པ་བསྟན་འཛིན་དམ་པའི་རྣམ་ཐར་མཆོག་གི་ཆེ་བས་བསྔགས་པ་རྣམས་དཔེ་བམ་གཅིག་གོ །དེ་ནས་གཏམ་ཚོགས་ཀྱི་སྐོར་ལ། ངེས་འབྱུང་སྐྱོ་ཤེས་ཀྱི་བློ་བསྐྱེད་པའི་གཏམ་པདྨའི་ཚལ་ཞེས་བྱ་བ་ཆོས་དང་མཐུན་པའི་ཟློས་གར་དུ་བསྒྱུར་བ། ངེས་འབྱུང་དང་བརྩོན་འགྲུས་ལ་བསྐུལ་བའི་གཏམ་སྔོན་ཤཱཀྱའི་ཁྱེའུ་གཞོན་ནུ་ཟུང་གི་གཏམ་རྒྱུད་དང་སྦྱར་བ། བསོད་ནམས་ཀྱི་ཚོགས་ལ་བསྐུལ་བའི་གཏམ་གུ་རུའི་སྐུ་ཚབ་གཙོ་བོར་གྱུར་པའི་རྟེན་གསུམ་ལ་གུས་པ་བྱ་ཚུལ་ལེགས་ལམ་དམ་པའི་གསོས་སྨན་ཞེས་བྱ་བ། ཆོས་དང་འཇིག་རྟེན་རྟོགས་པར་བྱེད་པའི་གཏམ་
གདོལ་བའི་དྲང་སྲོང་གི་བསྟན་བཅོས་ཐར་བའི་ཐེམ་སྐས་ཞེས་བྱ་བ། ལུགས་ཟུང་ཕུན་སུམ་ཚོགས་བཤད་འཕེལ་བའི་གཏམ་ལྷའི་སིལ་སྙན་ཞེས་བྱ་བ། ལུགས་ཟུང་ཚོགས་གཏམ་གྱི་ལྷན་ཐབས་རིན་ཆེན་ཕྲ་ཚོམ། ཚོགས་ཀྱི་གཏམ་མཎྜལ་རྣམ་བཤད་ཚོགས་གཉིས་ལམ་ བཟང་། ངོ་མཚར་བསྐྱེད་པ་བཞེད་གད་ཀྱི་གཏམ་ཆུ 
་གྲུ་ལུས་ཀྱི་རྣམ་བཤད་བརྒལ་བའི་ལན་དང་བཅས་པ། འདུ་འཛི་སྤངས་ཏེ་དབེན་པར་བསྐུལ་བ་ཐེག་པ་མཆོག་གི་ཚུལ་དང་མཐུན་པ་དབེན་པའི་གཏམ་ལྷའི་རྔ་སྒྲ། སྐྱེལ་འཕོ་སོགས་ཀྱི་འདུ་འཛིས་ཀློག་སྤོང་ལ་གཡེང་བའི་རྒྱུ་སྤོར་བར་བསྐུལ་བའི་གཏམ་རྫ་དགོན་ལ་སྤྲིང་བ། རྡོ་གྲུབ་ལ་སྤྲིང་བ། བཟོད་པའི་གོ་ཆས་ཚིག་རྩུབ་ཀྱི་མདའ་བསྲུང་བ་མེད་ན་བླ་མ་དང་མཆེད་ཀྱི་དམ་ལ་འགལ་ཏེ་དམྱལ་བར་འགྲོ་བའི་ཉེས་སྤྱོད་སྤོང་བར་བསྐུལ་བའི་གཏམ་ཀུན་བསྟན་ལ་སྤྲིང་བ། དབྱར་དུས་སུ་བབས་པའི་ཆར་པ་ཡིད་ཅན་དགའ་བའི་གསོས་སུ་གྱུར་བ་ཉིད་གཅོད་པ་རང་གཅིག་བུའི་དོན་དུ་གཞན་མང་པོ་ལ་འཚེ་བ་སྤོང་བར་བསྐུལ་བའི་གཏམ་ཆར་གཅོད་མཁན་ལ་སྤྲིང་བ། གཞན་ནོར་
མཐུས་ལེན་པའི་ལས་འབྲས་བསྟན་ཏེ་སྤོང་བར་བསྐུལ་བའི་གཏམ་ཨར་ཇག་སྤྱི་ལ་སྤྲིང་བ། པདྨའི་རྒྱལ་ཚབ་སྤྲུལ་པའི་གཏེར་ཆེན་མཆོག་གྱུར་གླིང་པ་ལ་ཕུལ་བའི་འབུལ་ཡིག་རྣམས་སོ། །གཉིས་པ་ནི། སྡེབ་སྦྱོར་གྱི་མན་ངག་ངོ་མཚར་རྟོགས་བྱེད་རིན་ཆེན་ཕྲེང་བ་ཞེས་བྱ་བའོ། །གསུམ་པ་ལ། རྩིས་གཞུང་ཉིན་བྱེད་སྣང་བའི་འདས་ལོ་སོགས་ངེས་པ་གསར་སྤོས་མཛད་པ་དགེ་ལེགས་ཉི་མ་ཞེས་བྱ་བ། ཉིན་སྣང་བུ་ཡིག་བསྟན་རྩིས་ལ་ཆོས་འབྱུང་རག་པ་མཆན་དུ་སྟོན་པ་ངོ་མཚར་ཕྲེང་བ། རྩིས་སྐར་ནག་ཟུང་འཇུག་གི་ལེའུ་ཐུའི་རྣམ་བཤད་གོ་ལའི་རྣ་རྒྱན། ཡུལ་དུས་ལོངས་སྤྱོད་བསྒྲིགས་ཐབས་ཀྱི་མན་ངག་དང་། དུས་གཟེར་འགོད་པའི་ལག་ལེན་དང་རྩིས་འབྲས་མདོར་བསྡུས་སྤང་བླང་འདོད་པའི་སྙེ་མ། ལེའུ་ཐུའི་མགོ་རྒྱན་དཔྱོད་ལྡན་མཁས་པའི་ཡིད་འཕྲོག །ཕྱི་ནང་གཞན་གསུམ་དག་པར་བསྟན་པའི་དོན་འགྲེལ་བླང་དོར་གསལ་བའི་རེ་མིག་གི་མགོ་རྒྱན་རྣམས་དང་། ཞར་ལ་གོས་བ་རིག་པའི་བྱེ་བྲག་ཕྲན་ཚེག་འབམ་བཅོས་ཀྱི་ལག་ལེན་གོ་བདེར་བསྡུས་པ་བཅས་བཞུགས་སོ།། །།གླེགས་བམ་གཉིས་པ།
ཁ་པ་ལ། གཉིས་པ་ཐུན་མོང་མ་ཡིན་པ་ནང་དོན་རིག་པ་ལ། ཆོས་གང་ཞིག་འཆད་བྱེད་ཀྱི་ཡན་ལག་དང་། འཆད་བྱའི་གཞུང་གཉིས་ལས། དང་པོ་མདོ་སྔགས་ཐེག་པ་རྒྱ་མཚོའི་ཆོས་ཚུལ་གང་ཡང་གཞན་ལ་སྟོན་ཅིང་འཆད་པ་ལ། འཆད་བྱེད་ཀྱི་ཐབས་ཚུལ་མེད་དུ་མི་རུང་བ་ནི། དཀྱུས་ཀྱི་ས་གཅོད་པ་སྟག་མོའི་འཆོང་སྟབས་ལྟ་བུ་ཞེས། །གཞུང་དོན་ཚན་རེ་རེ་བཞིན་གྱིས་བསྟན་པའི་དོན་བསྡུས་ཏེ་སོ་སོར་མ་འདྲེས་པར་འཆད་ཤེས་པ་འཆད་ཚུལ་གྱི་མན་ངག་མཆོག་ཏུ་གྱུར་བ་སྟེ། བསྡུས་དོན་ས་བཅད་སྣ་ཚོགས་ཀྱི་སྐོར་ཕྱོགས་གཅིག་ཏུ་འགོད་པ་ལ། བཀའ་བསྟན་སྤྱིའི་བཤད་བྱའི་ཡན་ལག་ཀུན་མཁྱེན་དྲི་མེད་འོད་ཟེར་གྱིས་མཛད་པའི་བསྟན་བཅོས་ཡིད་བཞིན་རིན་པོ་ཆེའི་མཛོད་ལ་དཔེར་མཚོན་པ་དང་། འཁོར་ལོ་དང་པོ་གཙོ་ཆེ་བའི་བསྟན་བཅོས་མངོན་པའི་མཛོད་ཀྱི་ས་བཅད། འཁོར་ལོ་དང་པོ་གཙོ་ཆེར་སྟོན་པའི་བསྟན་བཅོས་དབུ་མ་རྩ་བ་ཤེས་རབ་ཀྱི་ས་བཅད། ཤེར་ཕྱིན་མངོན་རྟོགས་རྒྱན་གྱི་ས་བཅད། འཁོར་ལོ་ཐ་མ་གཙོ་ཆེར་འགྲེལ་བའི་བསྟན་བཅོས་རྒྱུད་བླ་མའི་ས་བཅད། སྤྱོད་ཕྱོགས་གཙོ་ཆེ་བ། བྱང་ཆུབ་སེམས་དཔའི་སྤྱོད་པ་ལ་འཇུག་པའི་ས་བཅད།
མདོ་སྡེའི་རྒྱན་གྱི་ས་བཅད། ཐེག་པ་གསུམ་དང་རིག་འཛིན་གྱི་སྡེ་སྣོད་དང་བཅས་པའི་ཉམས་ལེན་བསྟན་པའི་བསྟན་བཅོས་སྡོམ་གསུམ་རྣམ་པར་ངེས་པའི་ས་བཅད། རྒྱུད་ཐམས་ཅད་ཀྱི་རྒྱལ་པོ་སྒྱུ་འཕྲུལ་གསང་བ་སྙིང་པོའི་འཆད་ཐབས་བརྒྱུད་པ་གསུམ་གྱི་ལོ་རྒྱུས་དང་། མ་ཧཱ་ཡོ་གའི་རྒྱན་བདུན་བཤད་པ། གསང་སྔགས་གཙོ་ཆེར་སྟོན་པའི་བསྟན་བཅོས་ཡོན་ཏན་རིན་པོ་ཆེའི་མཛོད་ཀྱི་འཆད་ཐབས་ཡིད་ཀྱི་མེ་ལོང་། ཡོན་ཏན་མཛོད་ཀྱི་བསྡུས་དོན་ས་བཅད་ཨུཏྤ་ལ་གསར་བའི་ཕྲེང་བ། ཡོན་མཛོད་ས་བཅད་འབྲིང་པོ་ལྟར་བྱས་པ་མུ་ཏིག་དཀར་པོའི་ཕྲེང་བ། ཡོན་མཛོད་གྱི་ས་བཅད་རྒྱས་པ་འབྱེད་འགྲེལ་མེ་ཏོག་གི་ཕྲེང་བ་རྣམས་དང་། རྫོགས་པ་ཆེན་པོ་གཙོ་ཆེར་སྟོན་པའི་བསྟན་བཅོས་ངལ་བསོ་སྐོར་གསུམ་གྱི་འཆད་ཐབས་མན་ངག་གསལ་བ། སེམས་ཉིད་ངལ་བསོའི་བསྡུས་དོན་ས་བཅད་པདྨ་དཀར་པོའི་ཟིལ་མངར། ཀུན་མཁྱེན་འཇིགས་མེད་གླིང་པའི་གསུང་གུ་རུའི་གསོལ་འདེབས་བསམ་པ་མྱུར་འགྲུབ་མའི་ས་བཅད། དམ་པའི་རིགས་ཅན་དྲྭ་མ་ལྔ་དང་རིག་འཛིན་འདུས་པའི་འཁོར་གྱི་གསུང་སྤྱི་བཤགས་དུས་གསུམ་
བདེ་གཤེགས་མའི་ས་བཅད། སངས་རྒྱས་ཕལ་པོ་ཆེའི་མདོ་ལས་བྱུང་བ་བཟང་པོ་སྤྱོད་པའི་སྨོན་ལམ་གྱི་ས་བཅད་བསྡུས་པ་སྡོམ་སུ་བསྟན་པ། མཁས་གྲུབ་ཀརྨ་ཆགས་མེད་ཀྱིས་གསུངས་པའི་བདེ་སྨོན་ས་བཅད། རྗེ་རིན་པོ་ཆེ་བློ་བཟང་གྲགས་པའི་དཔལ་གྱི་གསུངས་པའི་བདེ་སྨོན་ཞིང་མཆོག་སྒོ་འབྱེད་ཀྱི་འདོན་འགྲིགས་ས་བཅད། གཏེར་ཆེན་འགྱུར་མེད་རྡོ་རྗེས་གསུངས་པའི་སྨོན་ལམ་སྤྱི་འགྲོ་བླ་མ་ཡི་དམ་མའི་ས་བཅད། སློབ་གསར་རྣམས་ཀྱི་བློ་གྲོས་རྩལ་སྦྱོང་བ་ཚོགས་བཤད་འབུལ་བའི་མགོ་བསྐུལ་དང་མཇུག་གི་མཚམས་སྦྱོར་བཅས་སོ། །གཉིས་པ་འཆད་བྱའི་གཞུང་ལ། རྒྱུ་མཚན་ཉིད་ཀྱི་ཐེག་པ་དང་། འབྲས་བུ་གསང་ཆེན་ངེས་པའི་ཐེག་པར་གཏོགས་པ་གཉིས་ལས། །དང་པོ་ལ། འཁོར་ལོ་གསུམ་སོ་སོ་བ་དང་། ཐུན་མོང་བ་རིག་འཛིན་གྱི་སྡེ་སྣོད་བཅས་འདུས་པའི་སྡེ་སྟེ་གཉིས་སོ། །དང་པོ་ལ། འཁོར་ལོ་དང་པོར་གཏོགས་པ། བདེན་པ་བཞི་སོགས་ཀྱི་ཟིན་བྲིས། དགེ་སློང་གིས་བསྒྲུབ་པའི་བསླབ་བྱ་གཞི་བཅུ་བདུན་གྱི་ཟིན་བྲིས་ཆེ་ཆུང་ཚན་གཉིས། སྤྱིར་དུས་ཁྲིམས་ཡན་ལག་བརྒྱད་པ་འདུལ་བར་གཏོགས་ཀྱང་འདི་ཐེག་ཆེན་གསོ་སྦྱོང་ཡིན་པ་
སྐབས་ཀྱི་ཐེག་རིམ་དགུའི་རྣམ་བཞག །ལེའུ་གསུམ་པ་བྱང་སེམས་ཀྱི་འབྲུ་འགྲེལ། ཉེས་བྱས་ཕྲ་བ་བརྒྱད་ཅུའི་རེ་མིག །འབྲས་བུ་སྐུ་དང་ཡེ་ཤེས་ཀྱི་ཟིན་བྲིས། སྡོམ་པ་གསུམ་གྱི་གནད་བསྡུས་པ། རྒྱལ་དབང་ལྔ་པ་ཆེན་པོས་གསུངས་པའི་སྡོམ་གསུམ་སྨོན་ལམ་གྱི་ཚིག་འགྲེལ། ཡོན་ཏན་རིན་པོ་ཆེའི་མཛོད་ཀྱི་བཀའ་འགྲེལ་ཉིན་བྱེད་སྣང་བ་དེའི་ཞིབ་དཔྱོད་ས་ལམ་བྱེ་བྲག་ཏུ་བཤད་པ་གསུང་རྒྱུན་གྱི་ཟིན་བྲིས། །བྱང་ཆུབ་སྤྱོད་པའི་སྨོན་ལམ་ཕན་བདེའི་ལྗོན་པའི་དཀའ་འགྲེལ་ས་ལམ་རྣམ་བཞག་དང་མཚམས་སྦྱོར་གྱི་ངག་བཀོལ། གསང་བ་སྔགས་ཀྱི་སྨོན་ལམ་འདོད་འཇོའི་དགའ་སྟོན་གྱི་དོན་འགྲེལ་དང་། དེའི་སྨད་ཆའི་རྫོགས་ཆེན་སྡེ་གསུམ་གྱི་ཚིག་འགྲེལ་རྣམས་སོ། །གཉིས་པ་འབྲས་བུ་སྔགས་ཀྱི་ཐེག་པའི་ཕྱོགས་ཀྱི་དགོངས་འགྲེལ་ལ། འཇུག་སྒོ་དབང་གི་གསལ་བྱེད་དང་། དབང་ཐོབ་པའི་གང་ཟག་གིས་སྔགས་ལ་སློབ་ཚུལ་གྱི་རིམ་པ་གཉིས་སོ། །དང་པོ་ལ། བླ་མེད་སྤྱིའི་དབང་བཞིའི་རྣམ་བཤད་རིན་ཆེན་ཕུང་པོ། །ཀར་གླིང་ཞི་ཁྲོའི་མཚོན་ནས་མ་ཧཱ་ཡོ་ག་གཙོ་བོར་གྱུར་པའི་དབང་གི་མཚམས་སྦྱོར་པུནྡྲཱ་རི་ཀའི་དོ་ཤལ། དེ་དང་འབྲེལ་བ་
ཀར་གླིང་ཞི་ཁྲོའི་བསྙེན་ཡིག་དང་ཆོ་གའི་ལས་འགྲིགས། བླ་སྒྲུབ་རིག་འཛིན་འདུས་པའི་ལས་འགྲིགས། ལུང་ཨ་ནུ་ཡོ་ག་འདུས་པ་མདོ་དབང་གི་ལས་འགྲིགས། མན་ངག་རྫོགས་པ་ཆེན་པོ་སྙིང་ཐིག ཡ་བཞིའི་མཁའ་འགྲོ་སྙིང་ཐིག་སོགས་ཀྱི་སོགས་ཀྱི་དབང་གི་ཟིན་བྲིས་ལས་འགྲིགས་བཅས་སོ། །གཉིས་པ་ལ་བུམ་དབང་གི་ལམ་བསྐྱེད་རིམ་ཡན་ལག་དང་བཅས་པ། གསང་ཤེར་དབང་གི་ལམ་རྫོགས་རིམ་དུ་གཏོགས་པ། དབང་བཞི་པའི་ལམ་ཕྱག་རྫོགས་ཀྱི་ཉམས་ལེན་སྟོན་པ། དེ་དག་གི་ཆ་ལག་ངག་འདོན་ཐོར་བུའི་སྐོར། ལམ་ཉམས་སུ་ལེན་ཚུལ་གྱི་མན་ངག་སྐལ་བ་དང་མཚམས་པར་གདམས་པའི་ཞལ་གདམས་སྣ་ཚོགས་ཀྱི་སྐོར་ཏེ་ལྔ་ལས། །དང་པོ་ལ། བླ་མེད་སྤྱིའི་བསྐྱེད་རིམ་ལྷའི་ཁྲིད་འོག་མིན་བགྲོད་པའི་ཐེམ་སྐས་ཀྱི་དཀའ་འགྲེལ། སྲོག་སྡོམ་གཟེར་བཞི་བཤད་པ་ཚངས་པའི་སྒྲ་དབྱངས། རྫོང་འཕྲང་སྲོག་གསུམ་གྱི་བཤད་པ་རྣམས་དང་། ལམ་གྱི་ཡན་ལག་དམ་ཚིག་གི་རྟེན་རྡོར་དྲིལ་རྣམ་བཤད་རྒྱལ་བའི་དགོངས་པ་གསལ་སྟོན། དཔལ་ལྡན་དུས་ཀྱི་འཁོར་ལོའི་སྙིང་པོ་སྔགས་ཀྱི་དཀྱིལ་འཁོར་རྣམ་བཅུ་དབང་ལྡན་གྱི་ཐིག་དང་དོན་བཤད་བཅས་སོ། །གཉིས་པ་ལ། ཐབས་གྲོལ་
མ་ཟད་གསང་སྔགས་བྱ་བའི་རྒྱུད་ཀྱི་དཀའ་ཐུབ་ཀྱི་ཡན་ལག་ཀྱང་ཡིན་མོད། དེ་ལྟ་ནའང་བསྲུང་བྱ་དུས་ཁྲིམས་ཀྱི་རྣམ་པ་དབང་བཙན་དུ་འདིར་འགོད་པ་ལ། །བསྙེན་གནས་དང་འབྲེལ་བའི་ཐེག་ཆེན་གསོ་སྦྱོང་སྦྱིན་པའི་མཚམས་སྦྱོར་འཆད་ཚུལ་ཐ་དད་པ་གཉིས་དང་། བཀའ་འཁོར་ལོ་བར་ཐ་ཐུན་མོང་གི་དང་པོའི་འཇུག་སྒོ་བྱང་ཆུབ་སེམས་བསྐྱེད་ཀྱི་སྡོམ་པ་འབོགས་ཆོག་རྒྱལ་སྲས་སཧནྟཱ་དེ་ཝའི་སྤྱོད་འཇུག་གི་ལུགས་ཀྱི་མཚམས་སྦྱོར། སེམས་བསྐྱེད་རྒྱུད་ལྡན་གྱི་གང་ཟག་བློ་དམན་གྱིས་བསྲུང་ཚུལ་གྱི་ཟིན་བྲིས་མདོར་བསྡུས་ལེ་ཚན་གསུམ། སྐྱབས་འགྲོ་དང་སེམས་བསྐྱེད་ཀྱི་ཟིན་བྲིས། བསླབ་པ་ཀུན་ལས་བཏུས་པ་ཞི་བའི་ལྷས་གསུངས་པ་ལ་མཆན་འགྲེལ་མཛད་པ། བྱང་སེམས་ཀྱི་བློ་སྦྱོང་གི་སྤྱོད་པ་གཙོ་བོར་སྟོན་པ་སྤྱོད་འཇུག་གི་སྒོམ་རིམ་རབ་གསལ་ཉི་མ་ཞེས་བྱ་བ། རྒྱལ་བའི་སྲས་ཀྱི་བསླབ་བྱ་མདོར་བསྡུས་པ་ཉམས་ལེན་སྙིང་པོ་ཞེས་བྱ་བ། ཐེག་པ་ཆེན་པོ་མདོ་སྡེའི་རྒྱན་གྱི་དོན་བསྡུས་པ། །བསླབ་པ་ཐམས་ཅད་ཀྱི་བསྲུང་ཐབས་དྲན་ཤེས་བག་ཡོད་བསྟེན་ཚུལ་གྱི་ཟིན་བྲིས། །ཐེག་ཆེན་ལམ་གྱི་རྩ་བ་དམ་པ་གསུམ་གྱི་ཟིན་བྲིས་
ཚན་གཉིས་བསྐུལ་པ་པོ་སོ་སོ་ལ་གསུངས་པ་དང་། །བྱང་ཆུབ་སེམས་དཔས་སེམས་ཅན་གྱི་དོན་སྤྱོད་པའི་ཚེ་རང་གཞན་གྱི་འབྱོར་བའི་གནས་སྐབས་དགུ་ལ་བརྟགས་པའི་ཚུལ། ཐེག་ཆེན་གྱི་ལྟ་བ་ངོ་སྤྲོད་པའི་ཁྲིད། དཀོན་མཆོག་བསྡུས་པའི་སྡོམ་བྱང་། བྱང་ཆུབ་སེམས་དཔའི་འགལ་རྐྱེན་བདུད་ཀྱི་བར་ཆད་བརྟགས་ནས་སྤོང་ཚུལ་གྱི་མན་ངག །བྱང་ཆུབ་སེམས་ཀྱི་མཐུན་རྐྱེན་ཐེག་ཆེན་མདོ་སྡེ་མཐོང་བའི་ཕན་ཡོན་རྣམས་བཞུགས་སོ།། ༈ །།གླེགས་བམ་གསུམ་པ། ག་པ་ལ། འཁོར་ལོ་བར་པའི་དགོངས་འགྲེལ་གྱི་བསྟན་བཅོས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་སྤྱི་དོན་དང་། འབྲུ་འགྲེལ། ཐེག་ཆེན་དགེ་འདུན་ཉི་ཤུའི་ཟུར་བཀོལ། ཤེས་རབ་བསྡུས་པའི་སྡོམ་བྱང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོམ་རིམ། ཤེས་རབ་ཁྲི་བའི་ལུང་འགྲེལ་དང་དོན་བསྡུས་རྣམས་བཞུགས་སོ།། ༈ །།གླེགས་བམ་བཞི་པ། ང་པ་ལ། འཁོར་ལོ་ཐ་མ་གཙོ་བོར་གྱུར་པའི་ཐེག་གསུམ་སྔགས་དང་བཅས་པའི་ཉམས་ལེན་གྱི་ཕྱོགས་ཏེ། ཕྱི་ནང་གྲུབ་མཐའི་དབྱེ་ཚུལ་ས་བོན། སྡོམ་གསུམ་རྣམ་ངེས་ཀྱི་ལེའུ་དང་པོའི་
ལམ་གྱི་ཁྱད་པར་སྤྱིར་བཤད་པ། རྫོགས་རིམ་གྱི་ཆོས་དྲུག་བསྡུས་ཏེ་བསྟན་པ་འདའ་ཁའི་ཉམས་ལེན་བར་དོའི་ངོ་སྤྲོད། རྫོགས་རིམ་གྱི་འབྲས་བུ་འཕོ་མེད་མི་འགྱུར་བའི་སྐུའི་དོན་བཤད་པ་སྐྱབས་རྗེ་གཞན་ཕན་མཐའ་ཡས་ཀྱི་བརྟན་བཞུགས་ཚིག་འགྲེལ་རྡོ་རྗེའི་ཚིག་གི་ཁ་འབྱེད་ཅེས་བྱ་བ་རྣམས་སོ། །གསུམ་པ་ལ། གནས་ལུགས་ཕྱག་རྒྱ་ཆེན་པོ་གཅིག་ཆར་དུ་སྟོན་པའི་ཁྲིད་ཡིག་མངའ་བདག་མར་པ་ལོ་ཙ་སོགས་ཀྱི་གསུང་གི་གནད་བསྡུས་པ་གེགས་སེལ་དང་བོགས་འདོན་གྱི་མན་ངག་དང་བཅས་པ། བསྐྱེད་རྫོགས་ཀྱི་འབྲས་བུ་གསང་སྔགས་ནང་ལྟར་ས་བཅུ་ལམ་ལྔ་བྱང་ཆུབ་ཕྱོགས་ཆོས་སོ་བདུན་གྱིས་བགྲོད་ཚུལ་མཚུངས་མེད་བླ་མའི་ཡོན་ཏན་དང་སྦྱར་ནས་བརྒྱུད་གསུམ་བླ་མ་རྒྱང་འབོད་ཀྱི་ཚུལ་དུ་བཤད་པ་བླ་མ་རྒྱང་འབོད་རྩ་འགྲེལ་དཀྱུས་སུ་བཀོད་པ་མོས་གུས་གདུང་བའི་རྒྱངས་གླུ་བརྒྱུད་གསུམ་བླ་མའི་བྱིན་རླབས་རང་རྒྱུད་ལ་ལེན་པའི་ཕོ་ཉ་ཞེས་བྱ་བ། རྫོགས་པ་ཆེན་པོ་སེམས་སྡེ་ཨ་རོའི་ལུགས་ཀྱི་ཁྲིད་ཡིག་སྙིང་པོར་བསྡུས་ཏེ་གང་ཟག་བློ་རིམ་དགུ་ལ་སོ་སོར་འཁྲིག་ཚུལ་རྗེ་བཙུན་བླ་མ་དམ་པའི་ཞལ་ཤེས་དང་བཅས་པ། རྫོགས་པ་ཆེན་པོ་མན་ངག་སྡེ་གསང་བ་སྙིང་
ཐིག་གི་འཕྱོང་དང་རྣམ་དབྱེ་སྟོན་པ་མུན་ཁང་སྒྲོན་མེ། སེམས་ཉིད་ཀྱི་རང་ངོ་གཅིག་ཐོག་ཏུ་ལྟ་ཞིང་རྟེན་བསླབ་གསུམ་ལ་གནས་པར་གདམས་པ་ངོ་སྤྲོད་གནད་ཀྱི་མེ་བཙའ། མཚུངས་མེད་བླ་མ་འཇིགས་མེད་རྒྱལ་བའི་མྱུ་གུའི་འདས་རྗེས་ཐུགས་སྲས་འཁོར་ལོའི་དབང་ཕྱུག་རྫོགས་སྤྲུལ་བཞི་པ་ལ་བབས་པ་རྫོགས་པ་ཆེན་པོའི་ཉམས་ལེན་མཐར་ཐུག་གི་འགྲེལ་པ་འོད་གསལ་གྱི་སྣང་ཆ་ཞེས་བྱ་བ། དགའ་རབ་དཔའ་བོའི་འདས་རྗེས་ཚིག་གསུམ་གནད་དུ་བརྡེག་པའི་མན་ངག་རྩ་འགྲེལ་སྡེབ་པ་མཁས་པ་ཤྲཱི་རྒྱལ་པོའི་ཁྱད་ཆོས་རྣམས་དང་། རྫོགས་ཆེན་རྟོགས་པའི་རྣལ་འབྱོར་པས་རོ་སྙོམ་བརྟུལ་ཞུགས་སྤྱོད་པའི་ལམ་ཁྱེར་གཅོད་ཡུལ་མཁའ་འགྲོའི་གད་རྒྱངས་ཀྱི་དམིགས་གནད་སྟོན་པའི་འགྲེལ་བཤད། རྫོགས་པ་ཆེན་པོ་ལ་ལོག་པར་རྟོག་པ་སེལ་བ་བརྒལ་ལན་སྨྲ་ངན་ཞི་བྱེད་ཅེས་བྱ་བ་རྣམས་བཞུགས་སོ།། ༈ །།གླེགས་བམ་ལྔ་པ། ཅ་པ་ལ། རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་ཐུན་མོང་དང་། ཁྱད་པར་གྱི་སྔོན་འགྲོའི་ཁྲིད་ཡིག་རྗེ་བླ་མ་དམ་པ་མཚུངས་མེད་རྒྱལ་བའི་མྱུ་གུའི་གསུང་རྒྱུན་ཇི་བཞིན་པར་བཀོད་པ་ཀུན་བཟང་བླ་མའི་ཞལ་ལུང་ཞེས་བྱ་བ། དེ་ལས་
ཁྱད་པར་གྱི་སྔོན་འགྲོའི་དམིགས་རིམ་རྣམས་ཟུར་བཀོལ་བགྱིས་པ། ཞར་བྱུང་ཤ་ཆང་གི་ཉེས་དམིགས་བསྟན་པ་ལེགས་བཤད་ཀུན་ལས་བཏུས་པ་བཅས་བཞུགས་སོ། །གླེགས་བམ་དྲུག་པ། ཆ་པ་ལ། བཞི་པ་ངག་འདོན་ཐོར་བུའི་སྐོར་ཏེ། སངས་རྒྱས་ཕལ་པོ་ཆེའི་མདོའི་དགོངས་པ་བཞིན་བྱང་ཆུབ་སེམས་དཔའི་སྤྱོད་ཡུལ་རྣམ་བཞི་ཐམས་ཅད་ཡོངས་སུ་དག་པར་བྱེད་པའི་སེམས་བསྐྱེད་ཀྱི་གསལ་འདེབས་སྨོན་ལམ། མདོ་དེ་ཉིད་དུ་བསྟན་པའི་རྒྱལ་སྲས་བྱང་ཆུབ་སེམས་དཔའ་ནོར་བཟང་གིས་ཐོག་མར་རྗེ་བཙུན་འཇམ་དཔལ་ལས་བྱང་ཆུབ་མཆོག་ཏུ་ཐུགས་བསྐྱེད་ནས་རྒྱལ་སྲས་ཀྱི་སྤྱོད་པའི་ཆོས་ཚོལ་ཏེ་དགེ་བའི་བཤེས་གཉེན་བྱང་ཆུབ་སེམས་དཔའ་སེམས་མ་ཆེན་པོ་ལྔ་བཅུ་རྩ་གཅིག་བསྟེན་པ་དེ་རྣམས་ལ་ཕྱག་འཚལ་ནས་དེ་དག་གིས་ནོར་བཟང་ལ་བསྟན་པའི་རྒྱལ་བའི་སྲས་ཀྱི་ཀུན་ཏུ་སྤྱོད་པའི་ཏིང་ངེ་འཛིན་རྒྱུད་ལ་སྐྱེ་བར་སྨོན་ལམ་གདབ་པ། ཡང་དེ་ལས་ཁྱིམ་བདག་སེམས་དཔའ་ཆེན་པོ་ནན་ཞུགས་བྱ་བས་ནོར་
བཟང་ལ་ལྷོ་ཕྱོགས་དཔལ་གྱི་ཆུ ་རྒྱལ་ཆེན་པོའི་དབུས་ན་རི་མཆོག་གྲུ་འཛིན་གྱི་ཕོ་བྲང་དུ་བརྟན་པ་སྤྱན་རས་གཟིགས་དབང་ཕྱུག་གི་དྲུང་དུ་
སོང་ལ་རྒྱལ་སྲས་ཀྱི་སྤྱོད་པའི་ཆོས་ཞུས་ཞེས་ལུང་བསྟན་པའི་ཚིག་ཕྲད་སྨོན་ལམ་དུ་བསྒྱུར་བ། བྱང་ཆུབ་སེམས་དཔའི་སྤྱོད་པ་ལ་འཇུག་པའི་གཞུང་བཤད་ཀྱི་བརྒྱུད་པའི་གསོལ་འདེབས། བླ་མ་འཇའ་ལུས་རྡོ་རྗེའི་མཚན་དོན་གསོལ་འདེབས། བླ་མ་བཀའ་དྲིན་ཅན་འཇིགས་མེད་རྒྱལ་བའི་མྱུ་གུའི་གསོལ་འདེབས་སྨོན་ལམ་དང་བཅས་པ། ཡང་བླ་མ་ལ་གསོལ་བ་འདེབས་པ་སྐྱབས་གནས་བསླུ་མེད་ཅེས་པའི་དབུ་ཅན། རྒྱལ་སྲས་ཞི་བའི་ལྷ་དང་ཀཿཐོག་པ་དམ་གཙང་བྱམས་གསུམ་གྱི་གསོལ་འདེབས། འཕགས་པ་འཇམ་དཔལ་དབྱངས་ཀྱི་རྒྱུན་ཁྱེར་བསྡུས་པ། རྗེ་བཙུན་བླ་མ་བཀའ་བབས་བདུན་ལྡན་པདྨའི་རྒྱལ་ཚབ་འཇམ་དབྱངས་མཁྱེན་བརྩེའི་དབང་པོ་ལ་ཕུལ་བའི་བརྟན་བཞུགས་གསོལ་འདེབས་ཚན་པ་བདུན། རྗེ་བླ་མ་མཚམས་པ་རིན་པོ་ཆེའི་ཡང་སྲིད་ཀྱི་བརྟན་བཞུགས་གསོལ་འདེབས། ཤར་ཛམ་ཐང་གི་གཙང་བ་དགེ་བཤེས་ཀྱི་ཞབས་བརྟན། ཞབས་དཀར་ཚོགས་དྲུག་རང་གྲོལ་གྱི་ཡང་སྲིད་མྱུར་འབྱོན་གསོལ་འདེབས། དཔལ་སྤུངས་ཟླ་བཟང་སྤྲུལ་སྐུའི་ཡང་སྲིད་མྱུར་འབྱོན། སྒྲོལ་མའི་མཎྜལ་བཞི་ཆོག་མདོར་བསྡུས་གཏོང་ཚུལ།
སྤུང་གཏོར་ཆ་བཞིའི་ཆོ་ག་བསྡུས་པ། གསུར་མཆོད་བདུད་རྩིའི་ཆར་འབེབས། དེ་ལས་སྙིང་རྗེའི་མགྲོན་དམིགས་བསལ་ལ་བསྔོ་བའི་ཁོལ་བཏོན་ལེ་ཚན། བློ་སྦྱོང་ལུགས་ཀྱི་ལུས་སྦྱིན་ཚོགས་གཉིས་ཟུང་འཇུག །བདེ་མཆོག་བཀའ་བསྲུང་དུར་ཁྲོད་བདག་པོའི་བསང་མཆོད། གནོད་སྦྱིན་ཙིའུ་དམར་པོའི་བསང་མཆོད་བྱ་ཚུལ། ཆོས་སྐྱོང་གི་འཁུ་ལྡོག་ཞི་བ་ཟ་དུའི་ཕྲིན་བཅོལ། མཐུ་ལྡན་དྲེག་པའི་ཚོགས་ལ་ཞི་རྒྱས་ཀྱི་ཕྲིན་ལས་བཅོལ་བ་བཀྲ་ཤིས་དགེ་ལེགས་ཀུན་འབྱུང་། དྲག་པོ་མངོན་སྤྱོད་ཀྱི་ཕྲིན་ལས་བཅོལ་བ་དམོད་ངན་དུག་གི་མེ་ཏོག །ཚེ་རབ་ཀུན་ཏུ་མཆོག་གསུམ་དང་མི་འབྲལ་ཞིང་མདོ་སྔགས་ལམ་གྱི་རིམ་པ་ཡོངས་རྫོགས་ལ་སློབ་པའི་སྨོན་ལམ། ན་མོ་གུ་རུ་བསྐལ་མང་གོང་ནས་སོགས། ཀུན་མཁྱེན་ཡབ་སྲས་ཀྱི་བསྟན་པ་ལ་ཐོས་བསམ་བཤད་བསྒྲུབ་ཀྱི་བྱ་བས་མི་ནུབ་པར་འཛིན་པའི་བསྟན་རྒྱས་སྨོན་ལམ། ཐུབ་བསྟན་མཛེས་པའི་རྒྱན་གཅིག་སོགས་སོ། ལྔ་པ་སྐལ་བཟང་སློབ་མའི་ཚོགས་ལ་རང་སྐལ་དང་མཚམས་པར་གདམས་པའི་མན་ངག་ཞལ་གདམས་སྣ་ཚོགས་ཀྱི་སྐོར་ལ། ཐོག་མར་དགེ་བ་
ངེས་འབྱུང་ཆོས་ལ་བསྐུལ་བའི་གཏམ་གྱིས་ཡང་དག་པའི་ཆོས་ལ་བློ་འདུན་པར་གདམས་ཏེ། བར་དུ་དགེ་བ་ལྟ་སྒོམ་གཏན་ལ་དབབ་པའི་གཏམ་གྱིས་སྣང་སྤྱོད་ཐམས་ཅད་ལྷ་མཆོག་ཐུགས་རྗེ་ཆེན་པོའི་རང་བཞིན་དུ་ཤེས་ཤིང་བསྒོམ་ལ་ཆོས་ཀྱི་སྙིང་པོ་ཡི་གེ་དྲུག་མ་བགྲང་བར་གདམས་ནས། ཐ་མར་དགེ་བ་སྙིགས་མའི་སྤྱོད་ཚུལ་ལ་སྐྱོ་བའི་གཏམ་གྱིས་བསླུ་བྲིད་འཁྲུལ་བའི་བདུད་དབང་དུ་མི་བཏང་བར་ལྷ་ཆོས་མཐར་ཕྱིན་པར་ཚུལ་བྱེད་ཚུལ་གདམས་པའི་མན་ངག་ཐོག་ཐ་བར་དུ་དགེ་བའི་གཏམ་ལྟ་སྒོམ་སྤྱོད་གསུམ་ཉམས་ལེན་དམ་པའི་སྙིང་ནོར་ཞེས་བྱ་བ། རང་གི་བློ་གྲོས་ཀྱིས་རང་ལ་གདམས་པའི་བརྡར་བརྟགས་པ་བྱར་མེད་རྫོགས་ཆེན་གྱི་ངང་སྒོམ་ཉལ་ཆོག་གི་གདམས་པ་གླང་ཉལ་མ། འདི་སྣང་ཚུལ་འཆོས་སོགས་སྙིང་པོ་མེད་པའི་ཆོས་དང་ཆོས་འདྲའི་ཤན་འབྱེད་ལ་གདམས་པ། གང་ཞིག་འཁོར་བར་སོགས། རང་ལ་གྲོས་འདེབས་ཀྱི་རྣམ་པས་བརྗེད་མི་ཉན་པ་གསུམ་སོགས་གསུམ་ཉེར་གཅིག་གི་གདམས་པ་ཆིག་བརྒྱུད་མན་ངག་གི་ཡི་གེ་རིན་པོ་ཆེའི་མཛོད་ཅེས་བྱ་བ། ངེས་འབྱུང་བྱང་སེམས་ཡང་དག་པའི་ལྟ་བ་སོགས་ཆོས་ཀྱི་ལུས་ཚང་བར་ཉམས་སུ་ལེན་ཚུལ་ཀུན་བཟང་ཆོས་རྒྱལ་ལ་གདམས་
པ། ཐོས་བསམ་སྒོམ་གསུམ་ཡུལ་དང་བཅས་པའི་རིམ་པ་མ་ནོར་བར་སློབ་ཚུལ་ལྷུན་གྲུབ་རྡོ་རྗེ་ལ་གདམས་པ། སྐྱབས་སེམས་ཀྱི་རྟེན་གཞི་མ་འཆོལ་པར་ངེས་འབྱུང་སོགས་ལ་སློབ་ཚུལ་གདམས་པ། བཀའ་དྲིན་མཚུངས་པ་མེད་པའི་སོགས། ས་གཡོས་ཀྱིས་དགོན་སྡེ་སོགས་ཐལ་བར་བཏང་བའི་མི་རྟག་པ་མངོན་གྱུར་གྱིས་དཔེར་མཚོན་ནས་འདུ་འཛི་སྤང་ལ་དབེན་པ་བསྟེན། འདི་སྣང་སྤང་ལ་ལྷ་ཆོས་བསྒྲུབ་དགོས་པར་བླ་མ་སངས་རྒྱས་ཚེ་རིང་ལ་གདམས་པ། ཡུལ་སྣང་དཔེ་རུ་མཚོན་ནས་ཆོས་ལ་བསྐུལ་བའི་གདམས་པ། ན་མོ་གུ་རུ་སྐྱེ་མེད་ཆོས་སྐུའི་སོགས། ཕྱི་ནང་གི་དབེན་པ་ལམ་བྲལ་བར་བསྟེན་ཚུལ་སོགས་འཇའ་བ་མདོ་སྔགས་ལ་གདམས་པ། འདུ་འཛི་སྤང་ནས་དབེན་པར་བསྐུལ་བའི་གདམས་པ། འཇིག་རྟེན་འཁྲུལ་སྣང་སོགས། དུས་མཐའི་སྙིགས་སྤྱོད་ལ་དཔྱད་དེ་སྤོང་བར་གདམས་པ། །མཚུངས་མེད་བླ་མ་སོགས། །འདི་སྣང་ཆོས་བརྒྱད་ཀྱི་ཕྱོགས་སྤང་ནས་ཉིད་ཀྱི་རྣམ་ཐར་ལྟར་སློབ་པར་གདམས་པ། །བླ་མའི་ཞབས་ལ་སོགས་སློབ་མ་རྡོ་དེད་མ་ཞེས་བྱ་བ། སྨྲར་ཁོག་ནས་རྡོ་ཁོག་ཏུ་ཕེབ་ཁར་
གསུངས་པའི་ཡུལ་ཤེས་ཀྱི་ཞེན་འབྲིལ་གཅོད་པར་གདམས་པ། སྣང་བ་སྒྱུ་མའི་སོགས། མཚན་ལྡན་བླ་མ་ཚུལ་བཞིན་བསྟེན་ནས་གདམས་ངག་ཉན་ཚུལ་གདམས་པ། སྐྱབས་གསུམ་ཀུན་འདུས་སོགས། འདི་སྣང་གི་ཞེན་པ་སྤང་ནས་དོན་གཉིས་བསྒྲུབ་ཚུལ་གདམས་པ། ན་མོ་གུ་རུ། གང་ལ་བསྟེན་ན་སོགས། ལམ་མཆོག་ཚང་ལ་མ་ནོར་བ་མཛོད་ཆེན་བདུན་དང་ཤིང་རྟ་གསུམ་བཞིན་སློབ་པར་གདམས་པ། སྟོབས་བཅུ་མངའ་བ་སོགས། །ལམ་བཟང་སྡོམ་པ་གསུམ་གྱི་བསྟན་བཅོས་སོགས་ལ་འཆད་ཉན་གྱི་ཉིན་སྣང་འཆར་བའི་དུས་སུ་འཇུག་དགོས་པར་གདམས་པ། ངེས་འབྱུང་སོ་ཐར་སོགས། གྲོགས་ཀྱི་ཀུན་སྤྱོད་འགོ་བར་ཤེས་ནས་སྤང་བླང་ལ་གདམས་པ། གྲོགས་བཟང་པོའི་སོགས་བླ་མ་རིག་འཛིན་རྒྱ་མཚོ་ལ་གནང་བ། གཞོན་པའི་དུས་ནས་ཐོས་པ་བྱ་བ་སོགས་ལམ་ལ་འཇུག་ཚུལ་མ་འཆོལ་བར་གཞོན་ནུ་པདྨ་དཔལ་བཟང་ལ་གདམས་པ། །ན་མོ་མཉྫུ་ཤྲཱི་ཡེ་སོགས། བྱ་བ་མང་པོའི་བློ་སྣ་སྤང་སྟེ་དབེན་པར་རང་རྒྱུད་འདུལ་བ་ལ་གདམས་པ། བསྐལ་བཟང་ཐུབ་པ་སོགས། སྙིགས་དུས་གྱི་བསམ་སྤྱོད་གཡོ་རྒྱུས་གཞན་བསླུ་ཐབས་ཀྱི་བསམ་སྦྱོར་མེད་པར་
བློ་ཆེན་ངང་རིང་རྒྱལ་སྲས་ཀྱི་སྤྱོད་པ་ལ་སློབ་ཚུལ་སྡེ་དགེའི་ཆོས་བློན་ལ་གདམས་པ། སྐྱབས་གསུམ་རྒྱལ་བ་སོགས། །ཆོས་ལ་གྱ་ཚོམ་མིན་པ་སེམས་ལ་ངེས་པ་ཐོབ་ནས་རིམ་པར་འཇུག་ཚུལ་སོགས་ཐོས་ཆུང་རྣམས་ལ་གདམས་པ། ཤར་རྒྱལ་མོ་རོང་པ་སོགས། མཉམ་པ་གཉེན་དུ་སྡེབ་པའི་བག་སྟོན་ལ་ཕྱུག་ལུག་མི་གསོད་པར་གདམས་པ་འདྲེ་མོ་ལྟས་བརྒྱ་མ་བྱ་བ། ཇི་སྐད་དུ་སོགས། བསྒྲུབ་བརྩོན་གཅོད་པ་པདྨ་ཚེ་བརྟན་གྱིས་གསོལ་བའི་ཚོགས་གླུའི་ལན་གནང་བ། བརྟུལ་ཞུགས་རྣལ་འབྱོར་སོགས། ཚོགས་གླུ་སྔོན་གནས་རྗེས་དྲན་གྱི་ཚུལ་བརྡའ་ཙམ་བསྟན་པ། མཁའ་སྤྱོད་མངོན་དགའི་སོགས། རྟོགས་པའི་སྐྱིད་གླུ་ཆེད་དུ་བརྗོད་པ་ཉིན་བྱེད་སྣང་བ་སོགས། །རང་བཞིན་རྫོགས་པ་ཆེན་པོའི་དོན་ཉམས་སུ་ལེན་ཚུལ་གདམས་པ། བླ་མ་ལ་ཕྱག་འཚལ་ལོ། །བསམ་གྱིས་མི་ཁྱབ་སོགས། །བླ་མ་བསྟེན་ནས་ཆོས་ཀྱི་བདུད་རྩི་ཐོབ་སྟེ་རང་གནས་སུ་འགྲོ་བ་དོན་འགྲུབ་མགྲོན་པོའི་དཔེས་བསྔགས་ཤིང་དེའི་རྒྱུན་བསྐྱངས་ཏེ་གནས་པར་ཚ་ཁབ་འོད་གསལ་ལ་གདམས་པ། མཐོན་མཐིང་ཟུར་ཕུད་སོགས། སྙིགས་མའི་བསམ་སྦྱོར་སྨྲ་བ་ཕྱིན་ཅི་ལོག་ལ་སྐྱེ་བོ་ཕལ་ཆེར་གནས་པ་ལྡོག་ཕྱིར་
རྒྱལ་བ་སྲས་དང་བསྲུང་མར་བཅས་པའི་ཐུགས་རྗེ་གནད་ནས་བསྐུལ་ཏེ་གསོལ་བ་གདབ་པ་ལྟ་བུའི་ཟོལ་ཚིག་ཉམས་ལྡན་གྱི་གདམས་པ། ན་མོ་གུ་རུ་ལོ་ཀི་ཤྭ་ར་ཡ་སོགས་སོ། །དྲན་ཤེས་ཀྱི་གཉེན་པོས་ཉོན་མོངས་གྱི་རྟོག་པ་གདོང་བཟློག་བྱས་ཏེ་འདི་སྣང་ལ་ཞེན་པ་སྤང་ཞིང་ཕྱི་མའི་ལྷ་ཆོས་བསྒྲུབ་ནས་རྙེད་ཕྱིར་རྒྱུ་འགྲུལ་སོགས་སྤང་བ་ལྷ་པ་བློ་ལྡན་ཉི་མ་ལ་གདམས་པ་ཚིག་ལྷུབ་མ། གོ་འཇོ་བླ་མ་པདྨ་རྡོ་རྗེ་ལ་གདམས་པ་ཚིག་ལྷུབ་མཚན་གཉིས། ལམ་ཡོངས་རྫོགས་ཀྱི་གདམས་པ། རྒྱལ་བ་ཀུན་གྱི་ཡེ་ཤེས་གཅིག་བསྡུས་སོགས། དེ་ལྟ་བུའི་ཟབ་རྒྱས་ཆོས་ཀྱི་བདུད་རྩི་མི་ཟད་རིན་པོ་ཆེའི་གཏེར་བཞིན་འཇོ་བས་སྐལ་ལྡན་སྐྱེ་བོའི་རེ་བ་ཡོངས་སུ་བསྐོད་བར་མཛད་པ་བོ་ཉིད་ལ་བཀའ་དྲིན་རྗེས་སུ་དྲན་པའི་ཕྱག་འཚལ་བ་གསང་བ་གསུམ་གྱི་ཡོན་ཏན་ལ་བསྔགས་པ། རྗེ་བཙུན་བླ་མ་འཇམ་དབྱངས་མཁྱེན་བརྩེའི་དབང་པོའི་ཞལ་སྔ་ནས་རྩལ་བས་མཐའ་རྟེན་པར་བྱས་པའོ། །དེ་ལྟར་གླེགས་བམ་རྣམས་ཀྱི་བཞུགས་བྱང་སྨྲོས་ནས་ཕྱོགས་འདིར་འབྲེལ་བའི་རྣམ་དཀར་གྱི་བགྱི་བ་རྣམས་དོན་ཡོད་པར་བྱ་བའི་ཕྱིར་ཡོངས་སུ་བསྔོ་ཞིང་སྨོན་པའི་ཚིགས་སུ་བཅད་པ་ནི། སྒྲིབ་མེད་གཟིགས་མངའ་རྒྱལ་བ་མཆོག་དང་རྒྱལ་སྲས་རིག་པ་འཛིན་པའི་ཚོགས། །ཕྱོགས་བཅུ་ཀུན་ནས་ལྷམ་མེར་གསལ་བ་དྭངས་བའི་ཡིད་ཀྱིས་མངོན་བྱས་ཏེ། །མཁྱེན་བརྩེའི་རྒྱུས་བྱུང་དམ་