ལམ་ལྔ་རིམ་གྱིས་བགྲོད་ཚུལ་དང་ས་བཅུའི་ཡོན་ཏན་ཐོབ་ཚུལ་བྱེ་བྲག་ཏུ་བཤད་པ།
ལམ་ལྔ་རིམ་གྱིས་བགྲོད་ཚུལ་དང་ས་བཅུའི་ཡོན་ཏན་ཐོབ་ཚུལ་བྱེ་བྲག་ཏུ་བཤད་པ་བཞུགས་སོ།། །།
དེ་ལ་འདིར་ལམ་ལྔ་རིམ་གྱིས་བགྲོད་ཚུལ་དང༌། ས་བཅུའི་ཡོན་ཏན་ཐོབ་ཚུལ་བྱེ་བྲག་ཏུ་བཤད་པ་གཉིས་ལས། དང་པོ་ལ་ཚོགས་ལམ་སྦྱོར་ལམ། མཐོང་ལམ། བསྒོམ་ལམ། མི་སློབ་པའི་ལམ་དང་ལྔའི། ཚོགས་ལམ་ལ། རྟེན་་ངོ་བོ་་དབྱེ་བ་་སྒྲ་དོན་་ས་དང་ལྔ་ལས། དང་པོ་ལ་ལུས་རྟེན་དང༌། སེམས་རྟེན་གཉིས་ལས། ལུས་རྟེན་ལ་འདོད་གཟུགས་ཀྱིས་བསྡུས་པ་གང་རུང༌། སེམས་རྟེན་ནི་འདོད་སེམས་རྩེ་གཅིག་པའམ། བསམ་གཏན་ས་དྲུག་གིས་བསྡུས་པའོ། །བྱང་སེམས་ཀྱི་རྟེན་དང་ལུས་འདྲ། །ཐེག་དམན་གླིང་གསུམ་གྱི་སྐྱེས་པ་བུད་མེད་ཀྱི་ལུས། གཉིས་པ་ཚོགས་ལམ་་མངོན་པ་ཀུན་བཏུས་ཀྱི་དགོངས་པ། གྱི་རྣལ་འབྱོར་བདུན་ཏེ། སོ་སོའི་སྐྱེ་བོའི་ཚུལ་ཁྲིམས་དང༌།
དབང་པོའི་སྒོ་བསྡམ་པ་དང༌། ཟས་ཀྱི་ཚོད་རིག་པ། ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་བརྩོན་པ་དང༌། བླང་དོར་གྱི་གནས། ཤེས་བཞིན་དུ་གནས་པ་ལ་མངོན་པར་དགའ་བ་དང༌། །དགེ་བ་ལ་མི་འགྱོད་པ་དང༌། སྤྲོ་བ་དང༌། དད་པ། མོས་པ་ལ་སོགས་པ་ཐར་བའི། རྒྱུར་གྱུར་བའི་དགེ་བ་གཞན་ལ་འབད་པ། ཐོས་བསམ་སྒོམ་གསུམ་ལ་བརྩོན་པ་བསྐྱེད་པའོ། །གསུམ་པ་ལ་གསུམ་སྟེ། དེ་ཡང་སྦྱོར་ལམ་ནམ་སྐྱེ་མ་ངེས་པ་ཚོགས་ལམ་ཆུང་ངུ༌། །ཕྱི་མར་སྐྱེ་ངེས་པ་འབྲིང་པོ། །ཚེ་འདིར་སྐྱེ་ངེས་པ་ཚོགས་ལམ་ཆེན་པོའོ། །དེ་ལ་ཚོགས་ལམ་ཆུང་ངུ་དྲན་པ་ཏེ་བར་བཞག་པ་བཞི། །འབྲིང་པོ་ཡང་དག་པའི་སྤོང་
བ་བཞི། ཆེན་པོ་རྫུ་འཕྲུལ་གྱི་རྐང་པ་བཞིས་བགྲོད་པའོ། །དང་པོ་དངོས་པོ་ལ་ཡོངས་སུ་རྟོག་པའི་ལམ་དྲན་པ་ཉེ་བར་བཞག་པ་བཞི་བསྒོམ་པ་སྟེ། དེ་ཡང༌། ཡུལ་གང་དུ། ཚུལ་ཇི་ལྟར། ངོ་བོ་གང༌། དགོས་ཆེད་ཅི། སྒྲ་དོན་དང་ལྔ། དང་པོ་ལུས་ཚོར་སེམས་ཆོས་བཞི། དེའང་ལུས་ལ་ཕྱི་དང༌། ནང་དང༌། །ཕྱི་ནང་གི་ལུས་དང་གསུམ། ཚོར་བ་ལ་བདེ་སྡུག་བར་མ་གསུམ། སེམས་ལའང་ཚོགས་བརྒྱད་དམ་དྲུག་གོ །གཙོ་སེམས་ཡིད་ཀྱི་རྣམ་ཤེས། །ཆོས་ལ་ཚོར་བ་མ་གཏོགས་པའི། འདུ་བྱེད་ལྷག་མ་རྣམས་དང་པོ་སེམས་ཅན་གྱི་དབང་པོ་གཏོགས་པ་ལུས་དང་ཡུལ་ལྔ། གཉིས་པ་རང་གི་དབང་པོ། །གསུམ་པ་སེམས་ཅན་གྱི་དབང་པོ་དང་རང་གི་དབང་རྟེན་ནོ། །དང་ལྡན་མིན་འདུ་བྱེད་བཅུ་བཞི་འདུས་མ་བྱས་གསུམ་དང་བཅས་པའོ། །དེ་ཡང་རིམ་པ་ལྟར་བྱིས་པ་རྣམས་ལུས་ནི་བདག་གི་རྟེན། ཚོར་བ་ནི་བདག་གི་ལོངས་སྤྱོད་ཀྱི་གཞི། སེམས་ནི་བདག་གི་ངོ་བོ། །ཆོས་ནི་བདག་ཀུན་བྱང་དུ་འགྱུར་བའི་གཞིར་རྟོག་པའོ། །ཀུན་ནས་ཉོན་མོངས་པས་ངན་སོང་དང་རྣམ་པར་བྱང་བའི་ཐར་པའི་འཕེན་པ་ཆོས་སོ་ཞེས་སོ་སོའི་སྐྱེ་བོས་དེ་ལྟར་ལོག་ཤེས་སུ་འཛིན། གཉིས་པ་ལ། ཐུན་མོང་ཐུན་མིན་གཉིས། དང་པོ་ལ་སྤྱི་མཚན་མི་རྟག་པ་སྡུག་བསྔལ་བ་སྟོང་པ་བདག་མེད་པ་དང་བཞི། དེ་ཡང་ལུས་ལ་ལུས་ཀྱི་རྗེས་སུ་བལྟ་བ་སོགས་ནས་ཆོས་ལ་ཆོས་ཀྱི་རྗེས་སུ་བལྟ་བའི་བར་རོ། །དང་པོ་ལུས་ནི། རོ་རུལ་བ། འབུས་གཡེང་
བ། དེ་ལྟ་བུའི་ཆོས་ཅན། དེ་ལྟ་བུའི་རང་བཞིན་ཅན། དེ་ལྟ་བུའི་ཆོས་ཉིད་ལས་མ་འདས་པ་ཤེས་པར་བྱའོ། །ཚོར་བ་ཐམས་ཅད་སྡུག་བསྔལ་བའོ། །ཚོར་བ་སྡུག་བསྔལ་ལ་མི་དགའ་ཞིང་བདེ་བར་སྲེད་ནའང་དོན་ལ་སྡུག་བསྔལ་ཡིན་པ་ཁྱབ་མཉམ་མོ། །དེ་ལས་བཟློག་ན་ཅི་ཙམ་སྤྱད་ཀྱང་དེ་ཙམ་བདེ་བ་ཡིན་དགོས་སོ། །སྔ་མའི་ཕྱིར་ན་གང་ཅི་ཚོང་པ་ཐམས་ཅད་སྡུག་བསྔལ་བའོ། །སེམས་ནི་ཡུལ་རྟེན་སོགས་ཐ་དད་ལས་གཞན་དང་གཞན་ཏུ་སྐྱེ་བས་མི་རྟག་པ། ཡུལ་ལྔ། རྟེན་དབང་པོ། །རྟེན་པའི་ཤེས་པ་ཡང་གཞན་དུ་འགྱུར་བའི་སྐད་ཅིག་མར་མི་རྟག་གོ །ཆོས་ཐམས་ཅད་བདག་མེད་པ་སྟེ། གང་ཟག་གི་བདག་མེད་པས་སོ། །རང་མཚན་ས་སོགས་འབྱུང་བ་དང༌། མིག་སོགས་འབྱུང་འགྱུར་གྱི་མཚན་ཉིད་ཅན་ལུས། ཉམས་སུ་མྱོང་བ་ཚོར་བའི་མཚན་ཉིད། ཡུལ་གྱི་རྣམ་པར་རིག་པ་སེམས་ཀྱི་མཚན་ཉིད། རང་རང་གི་མཚན་ཉིད་སོ་སོར་འཛིན་པ་ནི་ཆོས་སོ། །ཐུན་མིན་ལ། དམིགས་པའི་ཁྱད་པར་ཐེག་དམན་པས་རང་གི་ལུས་སོགས་ཁོ་ན་དང༌། ཐེག་ཆེན་པས་རང་གཞན་གཉིས་ཀའི་ལུས་སོགས་དང༌། ཡིད་བྱེད་རྣམས་ཀྱི་ཁྱད་པར་ཐེག་དམན་གྱིས་མི་གཙང་བ་སོགས་དང༌། ཐེག་ཆེན་པས་ཆོས་ཐམས་ཅད་སྟོང་ཉིད་དུ་གཏན་ལ་ཕབ་པ་དང༌། འཐོབ་པའི་ཁྱད་པར་ཐེག་དམན་གྱིས་སྤང་བློ་དང་ཐེག་ཆེན་པས་མཚན་ཉིད་རྟོགས་ནས་སྤང་བླང་མེད་པར་མི་གནས་པའི་མྱང་འདས་སྒྲུབ་པ་ཐོབ་པའོ། །གསུམ་པ་ནི། ཤེས་རབ་དང་དྲན་པའོ། །བཞི་པ་ཚུལ་མིན་ཡིད་བྱེད་ཀྱི་
ཕྱིན་ཅི་ལོག་བཞིར་ཞེན་པའི་གཉེན་པོར་འགྲོ་བ་དང༌། འོ་ན་སྤྱིར་འགྲོ་དྲུག་ལས་ལ་བརྟེན། ལས་ཉོན་མོངས་པ་ལ། དེ་ཚུལ་མིན་ཡིད་བྱེད་ཀྱི་ཕྱིན་ཅི་ལོག་བཞི་ལ། དེ་སེམས་ཉིད་དམ་པ་འོད་གསལ་ལ་བརྟེན། དེ་བརྟན་པ་མེད་པ་དཔེ་འབྱུང་བཞི་ནམ་མཁའ་ལ་བརྟེན་པ་ལྟ་བུའོ། །བདེན་བཞི་ལ་འཇུག་པའི་རྒྱུ་ཡང་ཡིན་ཏེ། དབུས་མཐའ་ལས། །གནས་ངན་ལེན་ཕྱིར་སྲིད་རྒྱུའི་ཕྱིར། །གཞི་ཡི་ཕྱིར་དང་མ་རྨོངས་ཕྱིར། །བདེན་པ་བཞི་ལ་འཇུག་བྱ་བས། །དྲན་པ་ཉེར་བར་བཞག་པ་བསྒོམ། ལྔ་པ་ནི། ཐེག་དམན་གྱིས་དྲན་པའི་ཡུལ་དུ་ཤེས་རེག་འཇོག་པ། ཐེག་ཆེན་གྱིས་ཤེས་རབ་ཀྱི་ཡུལ་དུ་དྲན་པ་འཇོག་པའོ། །སྤྱི་མཚན་ལུས་ལ་སོགས་པའི་སྤྱི་དང་རང་གི་མཚན་ཉིད་ཤེས་རབ་ཀྱིས་སོ་སོར་ཕྱེས་ནས་དེའི་རྒྱུན་དྲན་པས་སྐྱོང་བས་ན་ཤེས་རབ་ཀྱི་ཡུལ་ལ་དྲན་པ་ཉེ་བར་འཇོག་པ། དམིགས་པའི་ཡུལ་དྲན་པས་མི་བརྗེད་པར་ཤེས་རབ་ཀྱི་དཔྱད་པས་བདག་མེད་དུ་གཏན་ལ་འབེབས་པས་ན་དྲན་པའི་ཡུལ་ལ་ཤེས་རབ་ཉེ་བར་འཇོག་པའོ། །གཉིས་པ་རྩོལ་བ་ལས་བྱུང་བའི་ལམ་ཡང་དག་སྤོང་བ་བཞི་བསྒོམ་པ་སྟེ། དེ་ལ་ཡུལ་གང་ལ། ཚུལ་ཇི་ལྟར། ངོ་བོ་གང་གིས། དགོས་ཆེད་ཅི། སྒྲ་དོན་དང་ལྔ་ལས། དང་པོ་ནི་དགེ་བ་རྣམ་བྱང་དང་མི་དགེ་བ་ཀུན་ཉོན་གཉིས་སྐྱེས་པ་དང༌། མ་སྐྱེས་པའི་དབྱེ་བས་བཞིའོ། །གཉིས་པ་ནི། མི་དགེ་བའི་ཆོས་མ་སྐྱེས་པ་མི་བསྐྱེད་པའི་ཕྱིར། འདུན་པ་བསྐྱེད་དོ། །གནས་ཏེ་བརྩོན་འགྲུས་ཀྱི་སྔོན་ཏུ་འགྲོ་བའི་དོན་གཉེར། འབད་དོ། ཞི་ལྷག་བཏང་སྙོམས་གསུམ་ཡིད་ལ་བྱེད་པའོ། །བརྩོན་འགྲུས་རྩོམ་མོ། །བྱིང་རྒོད་ཀྱི་གཉེན་པོའོ། །སེམས་རབ་ཏུ་འཛིན།
བྱིང་ན་སྐུ་གཟུགས་སོགས་ཡིད་བྱེད་ཀྱིས་སེམས་གཟེང་བསྟོད་དོ། །སེམས་རབ་ཏུ་འཇོག །རྒོད་ན་འཁོར་བ་ལ་ཡིད་འབྱུང་ཏེ་སྐྱོ་བས་སེམས་ནང་དུ་འདུའོ། །གསུམ་པ་ནི་བརྩོན་འགྲུས་སོ། །བཞི་པ་ནི། །མི་དགེ་བ་ཉམས་ཤིང་དགེ་བའི་ཕྱོགས་འཕེལ་བའི་ཕྱིར་རོ། །ལྔ་པ་ནི་མི་དགེ་སྤོང་བའི་ཕྱོགས་གཅིག་གི་མིང་ངོ༌། །ཡང་ན་སྒོ་གསུམ་ཡང་དག་པར་འཇོག་པའི་དོན་ཡིན། གསུམ་པ། ཏིང་ངེ་འཛིན་ཡོངས་སུ་སྦྱོང་བར་བྱེད་པའི་ལམ་རྫུ་འཕྲུལ་གྱི་རྐང་པ་བཞི་བསྒོམ་པ་སྟེ། དེ་ཡང་ཡུལ་གང༌། ཚུལ་ཇི་ལྟར། ངོ་བོ། དགོས་ཆེད། སྒྲ་དོན་དང་ལྔ་ལས། དང་པོ་ནི་རྫུ་འཕྲུལ་ལ་སོགས་པ་དགེ་བའི་ལམ་ལ་དམིགས་པའོ། །གཉིས་པ་ནི། ཉེས་པ་ལྔ་སྤང་ཞིང་འདུ་བྱེད་བརྒྱད་བརྟེན་པ་སྟེ། དང་པོ་ནི། སྦྱོར་བ་བརྩམ་པའི་དུས་སུ་ལེ་ལོ་གེགས་ཆེ་སྟེ་དེའི་གཉེན་པོ་འདུན་པ་བརྩོན་འགྲུས། དད་པ། ཤིན་སྦྱང་བཞི་པོ་བརྟེན། འཇུག་པའི་ཚེ་གདམ་ངག་བརྗེད་བ་གེགས་ཆེ་སྟེ་དེའི་གཉེན་པོར་དམིགས་རྣམ་མི་བརྗེད་པའི་དྲན་པ་བརྟེན། བསྒོམ་པའི་ཚེ་བྱིང་རྒོད་གཉིས་གེགས་ཆེ་བས་དེའི་གཉེན་པོར་ཤེས་བཞིན་བརྟེན། དང་པོ་གཉིས་རྒྱུ་འབྲས་དང་པོའི་རྟེན་གསུམ་གསུམ་པར་བརྟེན་པ་བཞི་པའོ། །བྱིང་རྒོད་སེལ་ཐབས་གཉེན་པོ་འདུ་མི་བྱེད་པའི་གཉེན་པོར་འཛིན་པ་རབ་འཇོག་གི་སེམས་པ་སྟེ། འདུ་བྱེད་ཀྱི་གཉེན་པོར་བཏང་སྙོམས་བསྒོམ་པའོ། །གསུམ་པ་ལ་སྤྱིར་ཏིང་ངེ་འཛིན་ནོ། །བྱེ་བྲག་ཏུ་འདུན་པ་བརྩོན་པ། སེམས་པ། དཔྱོད་པ་བཞིའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་ཞེས་སོ་སོར་སྦྱར་བའོ། །བསྒོམ་བྱའི་དོན་ལ་ཡིད་ཆེས་པས་དོན་དུ་གཉེར་བའི་འདུན་
པ། སྤྲོ་བཞིན་འཇུག་པའི་བརྩོན་འགྲུས། དེའི་སེམས་རྩེ་གཅིག་པའི་ཏིང་ངེ་འཛིན་དུ་སོང་བ་ཏིང་ངེ་འཛིན། དེ་ལ་བྱིང་རྒོད་ལ་སོགས་པའི་སྐྱོན་ཞུགས་མ་ཞུགས་དཔྱོད་པ་ནི་དཔྱོད་པའོ། །བཞི་པ་ནི་རྫུ་འཕྲུལ་ལ་སོགས་གང་མངོན་དུ་བྱེད་པར་འདོད་པའི་འབྲས་བུ་ཐམས་ཅད་གྲུབ་པའོ། །ལྔ་པ་ནི། རྫུ་འཕྲུལ་ཞེས་པ་མངོན་ཤེས་ལྔ་སོགས་ཡོན་ཏན་ཐམས་ཅད་ཡིན་ལ། དེ་གྲུབ་བྱེད་ཀྱི་རྩ་བའམ་རྐང་པ་ལྟ་བུ་ཡིན་པས་དེ་ལྟར་དུ་བཏགས་པའོ། །བཞི་པ་སྒྲ་དོན་ནི་བྱང་ཆུབ་ཆེན་པོའི་རྒྱུ་ཚོགས་བསགས་པའི་ཕྱིར་དེ་སྐད་དུ་བརྗོད་པའོ། །ལྔ་པ་ས་ནི་ཆོས་ཉིད་དོན་དམ་པར་ཡིད་ཆེས་འཇུག་པས་དད་པའི་སའོ། །འདིའི་སྐབས་གཉེན་པོ་ནི་ཉེས་དམིགས་སུ་བལྟ་བས་སུན་འབྱིན་ནོ། །གཉིས་པ་སྦྱོར་ལམ་ལ་རྟེན། ངོ་བོ་དབྱེ་བ། སྒྲ་དོན་ས་དང་ལྔའོ། །དང་པོ་ལ་ལུས་དང་སེམས་གྱིས་རྟེན་གཉིས་ལས། སྔ་མ་ནི་ཚོགས་ལམ་དང་འདྲ་ལ། ཕྱི་མ་ནི་བསམ་གཏན་ས་དྲུག་གང་རུང་ངོ༌། །གཉིས་པ་ནི། རྣལ་འབྱོར་བདུན་གཞིར་བཞག་གི་སྟེང་དུ་བསྒོམ་བྱུང་གི་ཤེས་རབ་སྟེ་སྟོང་ཉིད་དོན་སྤྱིའི་ཚུལ་དུ་རྟོགས་པའོ། །འདི་ལོ་ཆེན་གྱིས་སྟོང་ཉིད་དོན་སྤྱིའི་ཚུལ་དུ་རྟོགས་པ་དང༌། ས་པཎ་གྱིས་རང་རིག་མངོན་སུམ་དུ་བཞེད་དོ། །གསུམ་པ་ལ་བཞི་སྟེ། དྲོད་སྣང་བ་ཐོབ་པའི་ཏིང་ངེ་འཛིན་དེའང་མཐོང་ལམ་མེ་ལྟ་བུ་དེ་དག་སྐྱེ་བའི་རྟགས་དྲོད་དེ་འཁོར་བའི་རྒྱུ་འབྲས་ཀྱི་གཟུང་རྟོག་མ་གྲུབ་པའི་གསལ། རང་རིག་ཞེས་པ་བེམ་པོ་ལས་ལོག་ཙམ་ཡིན། དེ་ཚེ་ཤེས་པ་རང་རིག་ཞེས་ཟེར་རོ། །གསུངས། སྣང་གསར་དུ་ཐོབ་པའོ། །རྩེ་མོ་སྣང་བ་མཆེད་པའི་ཏིང་ངེ་འཛིན།
རྩེ་མོ་ཐོབ་པ་རྩེ་མོ་འཆར། ཅེས་སོ། །དགེ་རྩ་གཡོ་བ་ཐམས་ཅད་ཀྱི་རྩེ་མོ་སྟེ་སྔ་མར་ངེས་པ་ཆེར་སོན་ནས་རྒྱུ་འབྲས་ཀྱི་གཟུང་རྟོག་ཀྱང་རང་བཞིན་མ་གྲུབ་པའོ། །བཟོད་པ་དེ་ཁོ་ན་ཉིད་ཕྱོགས་གཅིག་ལ་ཞུས་པའི་ཏིང་ངེ་འཛིན་ནོ། །བཟོད་ཐོབ་ངན་སོང་ལྷུང་མི་སྲིད། ཅེས་སོ། །ཟབ་མོའི་དོན་ལ་མི་སྐྲགས་པའི་བཟོད་པ་ཐོབ་པ་སྟེ། ཐམས་ཅད་སེམས་ཀྱི་སྣང་བ་ཙམ་ལས་གཞི་བདག་རྫས་སུ་གྲུབ་པའི་རང་བཞིན་མ་གྲུབ་པའོ། །ཆོས་མཆོག་དེ་མ་ཐག་པའི་ཏིང་ངེ་འཛིན་ཏེ་སྦྱོར་ལམ་ངེས་འབྱེད་བཞིའོ། །འཇིག་རྟེན་པའི་ལམ་གྱི་ཆོས་ཐམས་ཅད་ཀྱི་རྩེ་མོ་ཡིན་ཏེ། གང་ཟག་གི་བདག་བཏགས་པའི་འཛིན་རྟོག་ཀྱང་མ་གྲུབ་པའི་གཟུང་འཛིན་གཉིས་མེད་ཀྱི་ཤེས་རབ་སྟེ། དེ་རྣམས་ཀྱང་སྒྲ་དོན་འབྲེལ་བ་དོན་སྤྱིའི་ཚུལ་དུ་རྟོགས་པའོ། །དེ་དང་མེད་པ་གསལ་སྣང་དོན་གཅིག་ཅིང༌། དཔེར་ན་ཟླ་བ་གཉིས་པ་དང་བསྐྱེད་རིམ་ལྟ་བུའོ། །སྒྲ་་རྟོག་ཀྱང་ངོ༌། །དེ་ཡང་དང་པོ་མངོན་པར་རྟོགས་པ་དང་སྦྱོར་བའི་ལམ་དྲོད་རྩེ་གཉིས་སུ་དབང་པོ་ལྔ་བསྒོམ་པ་དེ་ལ་ལྔ་སྟེ། དེ་ཡང་ཡུལ་གང་ལ། ཚུལ་ཇི་ལྟར། ངོ་བོ་གང༌། དགོས་ཆེད་ཅིའི་ཕྱིར། སྒྲ་དོན་ནོ། །དང་པོ་ནི་བདེན་པ་བཞི་ལ་སྟེ། དེ་ལའང་སྒྲ་དོན། མཚན་གཞི། མཐོང་ལམ་ནམ་སྐྱེ་མ་ངེས་པ་་མཚན་ཉིད། གཅིག་ཐ་དད། གྲངས་ངེས། གོ་རིམ་དང་དྲུག་ལས། དང་པོ་ནི་བསྟན་པ་མི་མཐུན་པ་མེད་པ་ནི་རྒྱལ་བལ་ཇི་ལྟར་བསྟན་པ་བཞིན་ངེས་པ་དང༌། དེ་མཐོང་ན་རྣམ་པར་དག་པའི་རྒྱུར་གྱུར་པས་བློ་ཕྱིན་ཅི་མ་ལོག་པར་སྐྱེ་བ་སྟེ་ཡུལ་དང་ཡུལ་ཅན་གཉིས་ཀྱི་ངོས་ནས་བདེན་པའོ། །དེ་ཡང་འཕགས་པའི་གཟིགས་དོར་བདེན་པས་ན་བདེན་པའོ། །གཉིས་
པ་ལ་སྡུག་བདེན་གྱི་མཚན་གཞི་ནི། མ་དག་པའི་སྣོད་བཅུད་གཉིས་ཏེ། ཀུན་བཏུས་སུ། སྡུག་བསྔལ་གྱི་བདེན་པ་གང་ཞེ་ན། དེ་ནི་སེམས་ཅན་སྐྱེ་བ་དང༌། སྐྱེ་བའི་གནས་ཀྱང་རིག་པར་བྱའོ། །ཞེས་སོ། །ཀུན་འབྱུང་ནི། ཉོན་མོངས་དང༌། ཉོན་མོངས་པའི་དབང་གིས་བྱུང་བའི་ལས་སོ། །འགོགས་པ་ནི། བརྡ་དང་འཇིག་རྟེན་པའི་ལམ་གྱིས་ས་བོན་ཉམས་སྨད་པའོ། །ཉོན་མོངས་པ་མངོན་གྱུར་མགོ་གནོན་པ་དང༌། དོན་དམ་པ་འཕགས་པས་ས་བོན་དྲུང་ནས་ཕྱུང་བའོ། །ཡོངས་སུ་མ་རྫོགས་པ་དང་ཡོངས་སུ་རྫོགས་པའི་འགོགས་པའོ། །བཞི་པ་སངས་རྒྱས་ཀྱི་སའོ། །ཇི་ལྟ་བུ་ཞེ་ན། དེ་བཞིན་ཉིད་དང༌། ལམ་དང༌། ཉོན་མོངས་པ་སྟེ། གང་ཞིག །གང་གིས། གང་དུ་འགོགས་པའོ། །ལམ་ནི། ཤེས། སྤོངས། མངོན་བྱེད། བསྒོམ་པ་སྟེ་ལམ་གྱི་མཚན་ཉིད་མདོར་བསྡུས་པའོ། །ཡང་ན་ལམ་ལྔ་ཀ་ལམ་བདེན་དུ་འདོད་པ་ཡིན་ནོ། །དེ་དག་ནི་མཚན་གཞི་ཡིན་ནོ། །གསུམ་པ་བདེན་པ་རེ་རེ་བཞི་བཞི་སྟེ་བཅུ་དྲུག་གོ །དེ་ཡང་དང་པོ་མི་རྟག་པ་སྐད་ཅིག་གིས་སྐྱེ་འགགས་བྱེད་པས། གང་ཅི་ཚོར་བ་ཐམས་ཅད་སྡུག་བསྔལ་ལས་མ་འདས་པས། སྡུག་བསྔལ་བ། ངར་འཛིན་གྱི་དངོས་པོ་རྣམས་ལ་བདག་པོ་མེད་པས་སྟོང་པ། གང་ཟག་གི་བདག་གཞི་མེད་པས་བདག་མེད་པའོ། །གཉིས་པ་ཀུན་འབྱུང་ལ་སྡུག་བསྔལ་ཐམས་ཅད་ཀྱི་རྩ་བར་གྱུར་པས་རྒྱུ། སྡུག་བསྔལ་ཐམས་ཅད་འབྱུང་བས་ཀུན་འབྱུང་བ། སྡུག་བསྔལ་དྲག་པོ་ཕྲལ་ཏུ་སྐྱེ་བས་རབ་སྐྱེ། སྡུག་བསྔལ་ཉམས་སུ་མྱོང་བའི་འཚམ་སྦྱོར་བས་རྐྱེན་ནོ། །གསུམ་པ་འགོགས་པ་ལ་མ་འོང་པའི་སྡུག་བསྔལ་དང་ཀུན་འབྱུང་གི་རྒྱུ་འགོགས་པས། འཁྲུལ་པའི་ཉོན་མོངས་པ་ཐམས་
ཅད་ཞི་བས་ཞི་བ། ཕུན་སུམ་ཚོགས་པ་མཆོག་གི་ཆོས་ཡིན་པས་གྱ་ནོམ་པ། སླར་མི་ཟློག་པར་འཁོར་བ་ལས་ངེས་པར་ཐར་བས་ངེས་པར་བྱུང་པའོ། །ཉོན་མོངས་པ་བྲལ་བའི་ཕྱིར། སྡུག་བསྔལ་དང་བྲལ་བའི་ཕྱིར། མི་གཙང་བ་མེད་པའི་དངོས་པོ་ཡིན་པའི་ཕྱིར། རྟག་ཕན་གྱི་གཞིའོ། །བཞི་པ་ལམ་ལ། གོང་ནས་གོང་དུ་བགྲོད་པར་བྱ་བའི་ལམ། ཉོན་མོངས་པའི་གཉེན་པོ་བྱེད་པས་རིག་པ། སེམས་ཕྱིན་ཅི་མ་ལོག་པར་བསྒྲུབ་པས་སྒྲུབ་པ། གཏན་དུ་ཐར་བ་མྱང་འདས་ཀྱི་གནས་སུ་ཁྲིད་པས་ངེས་པར་འབྱིན་པའོ། །བཞི་པ་ནི། འགོགས་པ་དང་གཞན་གསུམ་པོ་གཅིག་བཀགས་པའི་ཐ་དད་དོ། །འཕགས་པའི་མཉམ་བཞག་གི་སྐབས་སུ་ལམ་བདེན་དང་སྡུག་བདེན་གཉིས་ཐ་དད་ཀྱང་རྗེས་ཐོབ་དུ་མི་འགལ་ལོ། །ལམ་ཀུན་གཉིས་ནི་རྫས་ཐ་དད་པའོ། །སྡུག་ཀུན་གཉིས་གཞི་གཅིག་ཀྱང་ཀུན་འབྱུང་ལ་སྡུག་བསྔལ་གྱིས་ཁྱབ་ཀྱང་སྡུག་བསྔལ་ལ་ཀུན་འབྱུང་གིས་མ་ཁྱབ་བོ། །ལྔ་པ་ནི་རྟོག་ལྡན་གྱི་བླང་དོར་བྱ་བའི་གནས་ཀུན་བྱང་གི་རྒྱུ་འབྲས་གཉིས་རེར་ངེས་པའི་ཕྱིར་རོ། །དྲུག་པ་ནི། དང་པོ་བསྒོམ་པ་པོས་རིམ་པ་དང་བསྟུན་ཏེ། རྒྱུད་བླ་མ་ལས། ནད་ནི་ཤེས་བྱ་ནད་ཀྱི་རྒྱུ་ནི་སྤངས་བྱ་ལ། བདེར་གནས་ཐོབ་ཕྱིར་སྨན་ནི་བསྟེན་པར་བྱ་བ་ལྟར། སྡུག་བསྔལ་རྒྱུ་དང་འགོག་པ་དེ་དང་དེ་བཞིན་ལམ། ཤེས་བྱ་སྤངས་བྱ་རིག་པར་བྱ་ཞིང་བསྟེན་པར་བྱ། ཞེས་སོ། །གཉིས་པ་ནི། སྔ་མ་སྔ་མ་རྒྱུ་ཡོད་པ་ལ་བསྙེན་ནས་ཕྱི་མ་ཕྱི་མ་རྣམས་ལ་འཇུག་སྟེ། དེ་ཡང་རིམ་པ་ལྟར་བདེན་བཞི་ལ། ཡིད་ཆེས་པའི་དང༌། སྤྲོ་བའི་དང༌། དམིགས་རྣམ་མི་བརྗེད་
པའི་དང༌། སེམས་རྩེ་གཅིག་པའི་དང༌། དེ་དག་སོ་སོར་རབ་ཏུ་རྣམ་པར་འབྱེད་པའི་སྒོ་ནས་བསྒོམ་པར་བྱའོ། །གསུམ་པ་ནི་རང་རང་གི་མཚན་ཉིད་དོ། །བཞི་པ་ནི། སྦྱོར་ལམ་བཞི་གྲུབ་པ་དང༌། མཐོང་ལམ་ཐོབ་པར་བྱེད་དོ། །ལྔ་པ་ནི། རྣམ་བྱང་ཆོས་ལ་དབང་བསྒྱུར་བ་ལས་བདག་པོར་གྱུར་པའོ། །གཉིས་པ་མངོན་པར་རྟོགས་པ་དང་འབྲེལ་པའི་ལམ། བཟོད་ཆོས་གཉིས་སུ་སྟོབས་ལྔ་བསྒོམ་པ་དེ་ལ་ལྔ་སྟེ། མཐོང་ལམ་ཕྱི་མར་སྐྱེ་ངེས་དང་པོ། །ཚེ་འདིར་སྐྱེ་ངེས་གཉིས་པ། །ཡུལ་དང་ཚུལ་དང་ངོ་བོ་གསུམ་ནི་སྔ་མ་ལྟར་རོ། །དགོས་པ་ནི། སྦྱོར་ལམ་གཉིས་གྲུབ་པ་དང༌། མཐོང་ལམ་མ་ཐོབ་པར་བྱེད་དོ། །སྒྲ་དོན་ནི། མི་མཐུན་པའི་ཕྱོགས་ཀྱིས་མ་འདྲེས་པར་གཉེན་པོ་འབའ་ཞིག་འབྱུང་བས་ན་སྟོབས་ཞེས་བྱའོ། །བཞི་པ་སྦྱོར་ལམ་སྤྱིའི་སྒྲ་དོན་ནི། མཐོང་ལམ་གྱི་བདེན་པ་ལ་སྦྱོར་བས་སོ། །ལྔ་པས་ནི། བསྒོམ་བྱུང་གིས་ངེས་ཤེས་འགྲོང་བ་མོས་པའི་སྤྱོད་པའི་སའོ། །གསུམ་པ་མཐོང་ལམ་ལ། རྟེན་ངོ་བོ་དབྱེ་བ། སྒྲ་དོན་ནི། མི་མཐུན་པའི་ཕྱོགས་ཀྱིས་མ་འདྲེས་པར་གཉེན་པོ་འབའ་ཞིག་འབྱུང་བས་ན་སྟོབས་ཞེས་བྱའོ། །བཞི་པ་སྦྱོར་ལམ་སྤྱིའི་སྒྲ་དོན་ནི། མཐོང་ལམ་གྱི་བདེན་པ་ལ་སྦྱོར་བས་སོ། །ལྔ་པ་ས་ནི། བསྒོམ་བྱུང་གིས་ངེས་ཤེས་འགྲོང་བ་མོས་པའི་སྤྱོད་པའི་སའོ། །གསུམ་པ་མཐོང་ལམ་ལ། རྟེན་་ངོ་བོ་དབྱེ་བ། སྒྲ་དོན། །སའོ། །དང་པོ་ལུས་རྟེན་ནི། སྒྲ་མི་སྙན་མ་གཏོགས་པའི་མི་དད་འདོད་པའི་ལྷ་དྲུག་གོ །ངན་སོང་གསུམ་དང་སྒྲ་མི་སྙན་པ་རྣམ་སྤྲིན་གྱི་སྒྲིབ་པ་ཅན་དང༌། །ཁམ་གོང་མར་སྐྱོ་ཤས་མེད་པས་དེ་དག་གིས་བདེན་པ་མི་རྟོགས་སོ། །སེམས་རྟེན་བསམ་གཏན་ས་དྲུག་གང་རུང་ངམ་བཞི་པའི་དངོས་གཞིར་བརྟེན་ཞེས་པ་ཐེག་པ་ཆེན་པོ་པས་སོ། །གཉིས་པ་ནི་ཆོས་ཉིད་རང་མཚན་མ་གྲུབ་པའི་དོན་རྣལ་འབྱོར་མངོན་སུམ་དུ་རྟོགས་པའོ། །ཡུལ་ཡུལ་ཅན་རྣམ་པར་མི་རྟོག་པའི་ཤེས་རབ་ཀྱིས་
ཁམས་གསུམ་གྱི་རྟོག་པ་ལས་གྲོལ་བའི་ཡིད་ཤེས་ཉམས་མེད་དུ་སྐྱེ་བ་གྲོགས་དང་བཅས་པ་སྒྲ་རྟོག་གི་ཡུལ་ལས་འདས་པའོ། །གསུམ་པ་སྐད་ཅིག་བཅུ་དྲུག་སྟེ། དེ་ལ་མཐོང་ལམ་དེར་སྐད་ཅིག་མ་དུ་ཡོད་པ་དང༌། །མཐོང་སྤོང་སྤོངས་ཚུལ་དང༌། སྐད་ཅིག་མ་ཅི་ཙམ་གྱིས་ཡུན་དུ་སྐྱེ་བ་དང་གསུམ་ལས། དང་པོ་ནི། ཐེག་དམན་གྱི་མཛོད་ལྟར་སྐད་ཅིག་བཅོ་ལྔ་དང༌། ཐེག་ཆེན་པས་ཡུམ་རྒྱན་དང་ཀུན་བཏུས་ལ་སོགས་པར་སྐད་ཅིག་བཅུ་དྲུག་དུ་འདོད་དོ། །གཉིས་པ་ནི་མངོན་མཛོད་དུ་ཆོས་བཟོད་བཞིས་འདོད་པའི་མཐོང་སྤང་སྤང་བའི་བར་ཆད་མེད་ལམ་དང༌། ཆོས་ཤེས་བཞིས་རྣམ་གྲོལ་ལམ་མངོན་དུ་བྱེད་དོ། །རྗེས་བཟོད་བཞིས་སྔ་མ་གཉིས་ལ་དམིགས་ནས་འདི་ནི་འཕགས་པའི་ཆོས་རྣམས་ཀྱི་རྒྱུའོ། །ཞེས་འཛིན་ལ། རྗེས་ཤེས་བཞིས་དེའི་རྣམ་གྲོལ་རྗེས་བཟོད་ལ་དམིགས་ནས་སྔར་ལྟར་འཛིན། གསུམ་པ་ལ་ལུགས་དང་པོ་ལྟར་ན། སློབ་དཔོན་སེང་གེ་བཟང་པོའི་འགྲེལ་དོན་གསལ་ལོ། །འབྲས་བུ་མངོན་རྟོགས་ལ་ལྟོས་ནས་སྐད་ཅིག་མ་གཅིག་ཡིན་ལ། སོ་སོར་རྟོགས་པའི་མངོན་རྟོགས་ལ་ལྟོས་ན་སྐད་ཅིག་བཅུ་དྲུག་གོ །ཞེས་ཟེར་རོ། །བྱ་བ་བྱེད་ཚུལ་ལ་ལྟོས་ནས་སྐད་ཅིག་མ་གཅིག་ཡིན་ཀྱང༌། བདེན་པ་ལུགས་གཉིས་པ་ལྟར་ན། རེ་རེ་སྒྲོ་འདོགས་གྱི་རྣམ་པ་མི་འདྲ་བ་བཅད་ནས་རྗེས་སུ་ངེས་པ་སྐྱེ་བའི་རིམ་པ་ལ་ལྟོས་ནས་བཅུ་དྲུག །འདི་ལྟར་ན་ཞུགས་གནས་ཀྱི་རྣམ་བཞག་ཀྱང་རུང་ངོ༌། །སོ་སོར་རྟོགས་པའི་མངོན་རྟོགས་ཀྱང་སྐད་ཅིག་གཅིག་ཡིན་ནོ། །བདེན་བཞིའི་དེ་ཁོ་ན་ཉིད་ཡུལ་ཅན་ཡིད་ཤེས་ཟག་མེད་དུ་སྐྱེ་བས་སླར་མ་མཐོང་བ་མཐོང་རྒྱུ་དང་བདེན་ཞེན་གྱི་རྩ་བ་ཆད་པས་སྒྲོ་འདོགས་ཀྱང་གཅོད་རྒྱུ་མེད་དོ། །ཡང་དབུ་
མ་ནས་བཤད་པའི་རིག་པ་དྲུག་ཅུ་པར་གསུངས་པ་ལྟར་རྟེན་འབྲེལ་གྱི་ཆོས་ལ་སྐྱེ་འགགས་མེད་པར་ཤེས་པས་སྡུག་ཀུན་ལམ་གསུམ་གྱི་རང་བཞིན་ཡང་དེར་རྟོགས་ལ། དེ་ཉིད་འགོགས་པའི་རང་བཞིན་ཡིན་པས་ན་སྐད་གཅིག་ལས་རིམ་ཅན་དུ་རྟོགས་པ་མེད་དོ། །འོན་ཀྱང་སྐད་ཅིག་བཅོ་ལྔ་དང་བཅུ་དྲུག་དུ་བཞག་པ་ནི་སྤྲོས་པ་ལ་དགའ་བ་རྣམས་ལ་ཕན་པའི་ཕྱིར་ཤེས་པའི་ངོ་བོ་གཅིག་ཆར་བྱས་ནས་སོ། །གཏན་ལ་ཕབ་པ་བསྡུ་བར། བསྟན་པ་གནས་པ་རྒྱས་པ་རྣམ་པར་བཞག་པ་སྤྲོས་པ་དང་བཅས་པ་དང༌། བདེན་གཞིའི་རང་བཞིན་ལ་མི་སྐྲག་པའི་ཆོས་བཟོད་བཞིའི་ཚུལ་བཞིན་དུ་རིག་པས་ཆོས་ཤེས། རྗེས་ཤེས་ཀྱི་ཆ་ཡང་དེ་ལྟར་མི་སྐྲག་ཅིང་རིག་པའི་ནུས་པ་དང་ལྡན་པས་རྗེས་བཟོད་རྗེས་ཤེས་སོ་ཞེས་བཞེད་དོ། །དོན་དམ་པར་རྣམ་པར་བཞག་པ་སོ་སོ་རང་གི་སྤྲོས་པ་མེད་པའོ། །དེ་ལྟ་བུའི་མཐོང་ལམ་དེར་མངོན་པར་རྟོགས་པའི་ལམ་བྱང་ཆུབ་ཀྱི་ཡན་ལག་བདུན་བསྒོམ་པ་དེ་ལ་ལྔ་སྟེ། ཡུལ་གང་དུ། ཚུལ་ཇི་ལྟར། །ངོ་བོ་དགོས་ཆེད་སྒྲ་དོན། དང་པོ་ནི་བདེན་པ་བཞིའོ། །གཉིས་པ་ནི། དྲན་པ་ཡང་དག་བྱང་ཆུབ་ཀྱི་ཡན་ལག་གིས་དྲན་པས་བདེན་བཞིའི་དམིགས་རྣམ་མི་བརྗེད་པར་འཛིན། ཆོས་རབ་རྣམ་འབྱེད་ཀྱིས་བདེན་བཞིའི་ཆོས་ཉིད་ཀྱི་མཚན་ཉིད་ཇི་བཞིན་གཏན་ལ་ཕབ། བརྩོན་འགྲུས་ཀྱིས་དེ་ལ་སྤྲོ་བཞིན་དུ་འཇུག །དགང་བས་བདེན་བཞིའི་ཆོས་ཉིད་གསར་དུ་མཐོང་བ་ལ་དགའ་བ་སྐྱེ། ཤིན་ཏུ་སྦྱང་བས་ལུས་དང་སེམས་ལས་སུ་རུང་བར་བྱེད། །ཏིང་ངེ་འཛིན་གྱིས་སེམས་གཞན་དུ་མི་གཡེངས་བར་བྱེད། བཏང་སྙོམས་ཀྱིས་སེམས་བྱིང་རྒོད་མེད་པར་རྣལ་དུ་བདུག་པ་བྱེད་དོ། །སྡུག་བསྔལ་ལ་དམིགས་ནས་དེའི་དབེན་པ་ཚོལ་ཞིང་གནས། །
ཀུན་འབྱུང་ལ་དམིགས་ནས་དེའི་འདོད་ཆགས་དང་བྲལ་བ་ཚོལ་ཞིང་གནས། སྡུག་བསྔལ་འགགས་པར་དམིགས་ནས་དེ་མངོན་དུ་བྱེད་པ་ཚོལ་ཞིང་གནས། སྡུག་བསྔལ་འགོགས་པར་འགྱུར་བ་ལ་དམིགས་ནས་དེའི་བསྒོམ་པ་ཚོལ་བ་སྟེ་ལྷག་མ་དྲུག་ལའང་དེ་ལྟར་རོ། །གསུམ་པ་ནི། དྲན་པ་སོགས་བདུན་པོ་དེའང་བསྡུ་ན་ཡན་ལག་ལྔ་སྟེ། དབུས་མཐའ་ལས། རང་བཞིན་ཡན་ལག་ནས་ཡན་ལག །གསུམ་པ་ངེས་འབྱུང་ཡན་ལག་སྟེ། བཞི་པ་ཕན་ཡོན་ཡན་ལག་ཡིན། རྣམ་གསུམ་ཉོན་མོངས་མེད་ཡན་ལག །འདི་ལ་གཞི་དང་གནས་དང་ནི། ངོ་བོ། བཏང་སྙོམས་ཉིད་་ཆོས་རབ་རྣམ་འབྱེད་ངོ་བོ་ཡན་ལག་གཞན་རྣམས་ལས་མི་གཡེང་བར། སོ་སྐྱེའི་ས་ལས་རིང་དུ་འདའ་བར་བྱེད་པའི་བརྩོན་འགྲུས། ལུས་སེམས་ལ་ཕན་པ་དང་དགའ་པའོ། །དུ་བསྟན་པ་ཡིན། ཞེས་སོ། །ཤིན་སྦྱང་བཞི་ཏིང་ངེ་འཛིན་པ་ནི། མཐོང་སྤངས་རྣམས་སྤོང་བར་བྱེད་དོ། །ལྔ་པ་ནི། མཐོང་ལམ་རྣམ་པར་མི་རྟོག་པའི་ཡེ་ཤེས་ནི་བྱང་ཆུབ་ཡིན་ལ་གཞན་རྣམས་དེའི་ཡན་ལག་དུ་འགྱུར་བས་ན་བྱང་ཆུབ་ཀྱི་ཡན་ལག་གོ །བཞི་པ་སྒྲ་དོན་ནི། སྔར་མ་མཐོང་བའི་ཡེ་ཤེས་གསར་དུ་མཐོང་བས་མཐོང་ལམ་མོ། །གསར་མཐོང་ཞེས་པའང་ཐ་སྙད་ཙ་ལས་དོན་ལ་མཐོང་བ་མེད་བ་སྟེ་ནམ་མཁའ་མཐོང་ཞེས་པ་ལྟ་བུའོ། །སྐྱེ་བ་ཡོད་ན་འཇིག་པའང་ཡོད་པས་སོ། །ལྔ་པས་ནི། ས་དང་པོ་རབ་ཏུ་དགའ་བའོ། །བཞི་པ་བསྒོམ་ལམ་ལ། རྟེན་ངོ་བོ་་དབྱེ་བ་་སྒྲ་དོན་་ས་དང་ལྔའོ། །དང་པོ་ལ་ལུས་རྟེན་ནི།
གླིང་གསུམ་གྱི་མི་དང་འདོད་ལྷ་རིགས་དྲུག་དང༌། གཟུགས་ཁམས་ལས་ཚངས་ཆེན་དང་འདུ་ཤེས་མེད་པ་མ་གཏོགས་སོ། །སྲིད་རྩེ་མ་གཏོགས་པའི་གཟུགས་མེད་ལྷག་མ་གསུམ་དང་བཅས་པའོ། །སེམས་རྟེན་ནི། བསམ་གཏན་ས་དྲུག་དང་གཟུགས་མེད་གསུམ་སྟེ་ས་དགུའོ། །ཟག་མེད་ཀྱི་རྟེན་དུ་འདི་ཁོ་ན་ལོག་ལྟའི་རང་བཞིན་ཅན་ནོ། ༈ སྔར་མཐོང་ལམ་གྱི་ཡེ་ཤེས་དེ་ཀ་འཇིག་རྟེན་པའི་བསམ་རུང་བས་ས་དགུའོ། །གཟུགས་ལ་བརྟེན་ནས་སྐྱེ་བ་སྒོམ་པ་ནི་བསྒོམ་ལམ་གྱི་ངོ་བོ་རེད་གསུངས། གཉིས་པ་ནི། བདེན་བཞིའི་དོན་མངོན་སུམ་དུ་རྟོགས་པའི་མཁྱེན་པའོ། །གསུམ་པ་ལས་དགུ་སྟེ། འཇིག་རྟེན་པ་དང༌། འདས་པ་དང༌། ཆུང་འབྲིང་ཆེ་གསུམ། སྦྱོར་བ། བར་ཆད་མེད། རྣམ་གྲོལ་གྱི་ལམ། ཁྱད་པར་གྱི་ལམ་མོ། །དང་པོ་གཉིས་ལ། གང་གིས་ཐོབ་བྱེད་ཀྱི་རྒྱུ། གང་གིས་ཐོབ་བྱའི་ངོ་བོ། །དེ་ལྟར་ཐོབ་པའི་རྟགས། །ཐོབ་པ་པོའི་གང་ཟག་དང་བཞི་ལས། །དང་པོ་ལ་སྤོང་བའི་ཡིད་བྱེད་བདུན་བསྒོམ་པ་སྟེ། དེའི་གྲངས་ངེས་ནི། མཚན་ཉིད་མཱོས་པ་དཔྱོད་པ་གསུམ་རྒྱུ། དབེན་པ་དགའ་བ་སྦྱོར་མཐའ་གསུམ་ངོ་བོ། །སྦྱོར་བའི་འབྲས་བུ་ཡིད་བྱེད་འབྲས་བུའོ། །དེ་ཡང་དང་པོ་གཉིས་མ་སྐྱེས་པ་སྐྱེ་བར་བྱེད་པ་དང་ལྔ་པ་སྐྱེས་ཟིན་ཁྱད་པར་དུ་བྱེད་པའི་རྒྱུའོ། །སོ་སོའི་ངོས་འཛིན་ནི། དེ་ཡང་ཁམས་གོང་འོག་གི་སྤོང་ཐོབ་ཀྱི་ཞི་རགས་ཐོས་བསམ་འདྲེས་མའི་སྒོ་ནས་དེ་དག་གི་མཚན་ཉིད་རབ་ཏུ་རིག་པ་ནི་ཡིད་བྱེད་དང་པོ་དང༌། །དེ་ལྟའི་ཞི་རགས་ལ་ཡུན་རིང་དུ་བརྩོན་ཏེ་མོས་པར་བྱ་ཏེ་ཐོས་བསམ་
ལས་འདས་པའི་ཞི་ལྷག་དུ་སོན་པ་ནི་གཉིས་པ་དང༌། དེ་ཡུན་དུ་བསྒོམ་པས་འདོད་ཉོན་ཆེན་པོ་གསུམ་སྤངས་པའི་ལམ་གསུམ་པ་དང༌། དགའ་བ་སྡུད་པས་ནི་འདོད་ཉོན་འབྲིང་གསུམ་སྤོང་བ་བཞི་པ་དང༌། སླར་སྡུག་མཚན་ཡིད་ལ་བྱས་པས་འདོད་འདུན་འབྱུང་ན་སྤང་བྱའི་ལྷག་མ་ཞི་རགས་བསྒོམ་པ་ལྔ་པ་དང༌། དེ་ལྟར་བསྒོམ་པས་འདོད་ཉོན་ཆུང་གསུམ་སྤོང་བ་དྲུག་པ་དང༌། དེས་མཐུས་བསམ་གཏན་དང་པོའི་དངོས་གཞི་དང་ལྡན་པས་ཡིད་བྱེད་སྐྱེས་པ་ནི་ཡིད་བྱེད་བདུན་པའོ། །གཉིས་པ་ལ་འཇིག་རྟེན་པ་དང་སྤྱིར་འཇིག་འདས་ལ། ས་འཚམས་ཀྱི་དང༌། མཉམ་རྗེས་ཀྱི་ས་དང༌། བསམ་གཟུགས་བརྒྱད་པོར་ཤེས་རབ་ཀྱིས་ཟིན་མ་ཟིན་ཏེ་གསུམ་ལས་འདིར་ཕྱི་མ་ལྟར་རོ། །དག་པའི་འཇིག་རྟེན་པ་ཟེར་མཆན། །འཇིག་རྟེན་ལས་འདས་པ་དང༌། དེ་དག་གི་རྣམ་བཞག་བཤད་པ་དང་གསུམ་མོ། །དང་པོ་ལ་ཉོན་མོངས་ཅན་དང་དག་པ་གཉིས་ཀྱིས་དང་པོ་ནི། གང་ཉོན་མོངས་པར་བྱ་བའི་གཞི་ནི་བསམ་གཟུགས་ཀྱི་དངོས་གཞི་དག་པའོ། །གང་གིས་ཉོན་མོངས་པར་བྱེད་པའི་ཆོས་བསྒྲིབ་ལུང་མ་བསྟན། སྲེད་ལྟ་ང་རྒྱལ་མ་རིག་པ་བཞིའོ། །ཇི་ལྟར་ཉོན་མོངས་པར་བྱེད་ཚུལ་དེ་དང་དེར་མཚུངས་ལྡན་དུ་སོང་བའོ། །གཉིས་པ་ནི་རང་སའི་ཀུན་དཀྲིས་དང་བྲལ་བའི་བསམ་གཏན་སྐྱོན་མེད་དོ། །དེ་ལ་ཉམས་པ། གནས་པ། ཁྱད་པར། དེས་འབྱེད་ཆ་མཐུན་དང་བཞི་ཡོད་དོ། །གཉིས་པ་ནི་བསམ་གཟུགས་དགུ་པོ་བདག་མེད་རྟོགས་པའི་ཤེས་རབ་ཀྱིས་ཟིན་པའོ། །གསུམ་པ་ལ་གཉིས་སྟེ། བསམ་གཏན་ཡན་ལག་བཤད་པ་
དང༌། གཟུགས་མེད་དམིགས་རྣམ་བཤད་པའོ། །དང་པོ་ལ་བཞི་སྟེ། དེ་ཡང་བསམ་གཏན་དང་པོར་དེ་ཡང་བསམ་གཏན་རྟོག་དཔྱོད་གཉིས་ཡོད་པ་དངོས་གཞི་ཙམ་པོ་བ་དང༌། རྟོག་མེད་དཔྱོད་བཅས་ཁྱད་པར་པའོ། །རྟོག་དཔྱོད་དགའ་བདེ་ཏིང་ངེ་འཛིན་དང་ལྔའོ། །གཉིས་པར་རབ་དང༌། དགའ་བདེ། ཏིང་ངེ་འཛིན་དང་བཞིའོ། །གསུམ་པར་བཏང་སྙོམས་དྲན་ཤེས་བདེ་བ་ཏིང་ངེ་འཛིན་ལྔའོ། །བཞི་པར་བཏང་སྙོམས་དྲན་པ་ཚོར་བ་བཏང་སྙོམས་ཏིང་ངེ་འཛིན་བཞིའོ། །དེ་དག་གི་ཁྱད་པར་ནི། རྟོག་དཔྱོད་སྤངས་པ་གཉིས་པ། དང་པོ་གཉིས་པ་ལ་ཁྱད་པར་ཅི་ཡོད་ན་ཏིང་ངེ་འཛིན་ཡོངས་སུ་རྫོགས་པའི་ཁྱད་པར་ཡོད་དོ། །དགའ་བ་སྤང་བ་གསུམ་པ་གཉིས་པ་གསུམ་པ་ལ་ཕན་འདོགས་ཡོངས་སུ་རྫོགས་པའི་ཁྱད་པར་རོ། །བདེ་བ་སྤངས་པ་བཞི་པ། གསུམ་པ་བཞི་པར་ཡོངས་སུ་དག་པ་རྫོགས་པའི་ཁྱད་པར་རོ། །བསམ་གཏན་བཞི་པའི་ཡན་ལག་ནི། རྟོག་དཔྱོད་གཉིས། དགའ་བདེ་གཉིས། སྡུག་བསྔལ་ཡིད་མི་བདེ་བ། །འབྱུང་རྔུབ་གཉིས་ཏེ་སྐྱོན་བརྒྱད་དང་བྲལ་བའོ། །དེ་ལྟར་ཡན་ལག་བཞི་དང༌། ལྔར་གྲངས་ངེས་པ་ཡང༌། གཉེན་པོ་དང༌། ཕན་ཡོན་དང༌། གནས་ཀྱི་ཡན་ལག་གསུམ་གྱི་དབང་དུ་བྱས་ནས་སོ། །གཉིས་པ་གཟུགས་མེད་ཀྱི་དམིགས་རྣམ་བཞི་ལས་དང་པོ་ནི། །བསམ་གཏན་བཞི་པ་ཐོབ་པ་དེའི་གཟུགས་ལ་སྐྱོན་དང་གཟུགས་མེད་པར་ཡོན་ཏན་དུ་མཐོང་ནས་གཟུགས་ཀྱི་འདུ་ཤེས་བཟློག་ཕྱིར་ཁ་དོག་དང་དབྱིབ་རེག་བྱ་སོགས་ཀྱི་མཚན་མ་བྲལ་བའི་ནམ་མཁའི་འདུ་ཤེས་ཁོ་ན་བསྒོམ་པས། རགས་པ་དེ་དག་གི་སྣང་བ་ནུབ་སྟེ་
ནམ་མཁའི་འདུ་ཤེས་ཁོ་ན་འབྱུང་བ་དང་པོ། །རྣམ་ཤེས་མཐའ་ཡས། ཅི་ཡང་མེད་པ། འདུ་ཤེས་མེད་འདུ་ཤེས་མེད་མིན་རྣམས་སྐྱེ་མཆེད་སྔ་མ་སྔ་མ་རགས་པར་མཐོང་ནས་དེ་དག་བཟློག་ཕྱི་མ་ཕྱི་མའི་སེམས་ལ་མོས་པའོ། །གསུམ་པ་ནི། བསམ་གཏན་ཐོབ་རྟགས་ལུས་ས་འོག་ཏུ་བྱིང་བ་ལྟ་བུའི་སྣང་བ་དང༌། གཟུགས་མེད་ཐོབ་རྟགས་ནམ་མཁར་འཕྱོ་བ་ལྟ་བུའི་རྟགས་འབྱུང་ངོ༌། །བཞི་པ་ནི། མཛོད་ལས། བསམ་གཏན་གཟུགས་མེད་རང་ས་དང༌། འོག་སའི་རྟེན་ཅན་འོག་དགོས་མེད། ཅེས་སྤྱིར་བཏང་དང༌། །སྲིད་རྩེའི་འཕགས་པ་ཅི་ཡང་མེད། །མངོན་སུམ་བྱས་ནས་ཟག་པ་ཟད། ཅེས་དམིགས་གསལ་ལོ། །དེ་ཡང་བསྒོམ་ལམ་ཆེ་འབྲིང་ཆུང་གསུམ་དུ་ཕྱེ་བས་དགུ་དང༌། དེ་དག་རེ་རེ་ལའང༌། སྦྱོར་བ། བར་ཆད་མེད་པ། རྣམ་གྲོལ་དང༌། ཁྱད་པར་གྱི་ལམ་སྟེ་སོ་དྲུག་གོ །དེ་ལྟ་བུའི་ལམ་དེ་བསྒོམ་པར་བྱེད་པ་ལ་རྣམ་དག་ངེས་འབྱིན་འཕགས་ལམ་ཡན་ལག་བརྒྱད་བསྒོམ་པ་སྟེ། ཡུལ་གང་ལ། ཚུལ་ཇི་ལྟར། ངོ་བོ་གང༌། དགོས་ཆེད། སྒྲ་དོན་དང་ལྔ། དང་པོ་བདེན་པ་བཞི་ལའོ། །གཉིས་པ་ཚུལ་ཇི་ལྟར། ཡང་དག་པའི་ལྟ་བ་སྡང་མཐོང་ལམ་གྱི་དུས་ན་བདེན་བཞིའི་ཆོས་ཉིད་འདི་ལྟར་རྟོགས་ཞེས་ཡོངས་གཅོད་ཀྱི་སྒོ་ནས་ངེས་པར་བྱེད། རྟོག་པས་དེ་ལྟ་བུའི་རྟོགས་པ་དེ་རྟགས་དང་གཏན་ཚིག་གི་སྒོ་ནས་རྟོག་ཤིང་དེ་ཇི་ལྟར་གཞན་ལ་མཚོན་པའི་ཚུལ་གང་ལ་འབེབས་ཤིང་གོ་བར་བྱེད། ངག་གིས་ཆོས་ཉིད་སྤྲོས་
བྲལ་གྱི་རྟོགས་པ་དེའི་རང་བཞིན་ཐ་སྙད་ཙམ་དུ་ཚིག་གིས་མཚོན་པས་འཆད་རྩོད་རྩོམ་གསུམ་གྱི་སྒོ་ནས་གཞན་ལ་སྟོན་ཞིང་ལྟ་བ་རྣམ་དག་ཏུ་ཡིད་ཆེས་པར་བྱེད། ལས་ཀྱི་མཐས་སྤྱོད་ལམ་ཐམས་ཅད་ཆོས་དང་མི་མཐུན་པ་མེད་ཅིང་ཆོས་དང་མཐུན་པས་ཚུལ་ཁྲིམས་རྣམ་དག་ཏུ་ཡིད་ཆེས་པར་བྱེད། འཚོ་བས་ལོག་འཚོ་སྡིག་པའི་ཟས་དང་མ་འདྲེས་ཤིང་ཡང་དག་པའི་འཚོ་བ་རྣམ་དག་དུ་ཡིད་ཆེས་པར་བྱེད། རྩོལ་བས་ནི་མཐོང་ཟིན་ཆོས་ཉིད་ཀྱི་དོན་ལ་ཡང་དང་ཡང་དུ་གོམས་པར་བྱེད་པས་ཉོན་མོངས་པའི་གཉེན་པོ་བྱེད། དྲན་པས་ནི་ཞི་ལྷག་གི་དམིགས་རྣམ་མི་བརྗེད་པར་འཛིན་པས་ཉེ་ཉོན་བརྗེད་ངེས་ཀྱི་གཉེན་པོར་བྱེད། །ཏིང་ངེ་འཛིན་གྱིས་བྱིང་རྒོད་ལ་སོགས་པའི་སྐྱོན་མེད་པའི་ཏིང་ངེ་འཛིན་བསྒྲུབ་ཅིང་ལམ་གྱི་ཡོན་ཏན་གོང་ནས་གོང་དུ་འཕེལ་ནས་མི་མཐུན་པའི་ཕྱོགས་ཀྱི་གཉེན་པོ་བྱེད་དོ། །གསུམ་པ་ངོ་བོ་ནི། ཡང་དག་པའི་ལྟ་བ་སོགས་འཕགས་ལམ་ཡན་ལག་བརྒྱད་པོ་དེ་དག་ཀྱང་ཡན་ལག་བཞིར་འགྱུར་ཏེ། དབུས་མཐའ་ལས། ཡོངས་སུ་གཅོད་དང་གོ་བྱེད་དང༌། རྣམ་གསུམ་གཞན་ཡིད་ཆེས་པར་བྱེད། ལྷག་མ་གཉེན་པོའི་ཡན་ལག་གོ །ཞེས་སོ། །བཞི་པ་དགོས་ཆེད་ནི། བསྒོམ་སྤང་རྣམ་སྤོང་བར་བྱེད་དོ། །ལྔ་པ་སྒྲ་དོན་ནི། ཆོས་ཉིད་ཀྱི་དོན་རྟོགས་པ་ནི་འཕགས་པའི་ལམ་སྟེ་དེའི་ཡན་ལག་གོ །བཞི་པ་སྒོམ་ལམ་སྤྱིའི་སྒྲ་དོན་ནི་མཐོང་ཟིན་གོམས་པར་བྱེད་པའོ། །ལྔ་པ་ས་ནི། ལམ་དགུ་པོ་དང་སྦྱར་ཏེ་དྲི་མ་མེད་པ་ནས་ཆོས་ཀྱི་སྤྲིན་གྱི་བར་དུའོ། །དེ་ལྟར་ཕྱོགས་ཆོས་སོ་བདུན་རྣམས་ཀྱང་རྫས་སུ་བསྡུ་
ན་བཅུའམ་བཅུ་གཅིག་སྟེ། དད་བརྩོན་དྲན་པ་ཏིང་ངེ་འཛིན་ཤེས་རབ་ལྔ། །དགའ་བ་ཤིན་ཏུ་སྦྱང་བ་བཏང་སྙོམས་རྟོགས་པ་ཚུལ་ཁྲིམས་དང་བཅུའོ། །དེ་ཡང་དྲན་པ་ཉེ་བར་བཞག་བཞི་ནི་ཤེས་རབ་ཏུ་འདུ། ཡང་དག་སྤོང་བཞི་ནི་བརྩོན་འགྲུས། རྫུ་འཕྲུལ་རྐང་བཞི་ནི་ཏིང་ངེ་འཛིན་དུ་འདུས་སོ། །ཆོས་རབ་རྣམ་འབྱེད་དང་ཡང་དག་པའི་ལྟ་བ་ནི་ཤེས་རབ། ངག་ལས་མཐའ་འཚོ་བ་གསུམ་ནི་ཚུལ་ཁྲིམས་སོ། །ཡང་ན་ངག་སོ་སོར་བསྒྲང་བས་བཅུ་གཅིག་གོ །ལྔ་པ་མི་སློབ་པའི་ལམ་ལ། རྟེན་ངོ་བོ་དབྱེ་བ་སྒྲ་དོན་ས་དང་ལྔའོ། །དང་པོ་ལུས་རྟེན་ནི། ཉན་ཐོས་ལྟར་འཛམ་བུའི་གླིང་གི་རྒྱལ་རིགས་སམ་བྲམ་ཟེ་གང་རུང༌། ཐེག་ཆེན་པས་གཙང་གནས་ཀྱི་འོག་མིན་དུ་སངས་རྒྱས་པར་འདོད་པའི་ཕྱིར་གཟུགས་ཁམས་ཀྱི་རྟེན་ཅན་དུ་འདོད་དོ། །སེམས་རྟེན་ནི་བསམ་གཏན་བཞི་པར་ཐེག་ཆེན་པས་འདོད་དོ། །སྟོན་དང་བསེ་རུ་བྱང་ཆུབ་པ། །བསམ་གཏན་མཐའ་རྟེན་གཅིག་ལ་ཀུན། ཅེས་པ་ལྟར། ཐེག་དམན་པས་རྡོ་རྗེ་གདན་དུ་བྱང་ཆུབ་ཤིང་དྲུང་དུ་བཞུགས་པའང་སོ་སྐྱེའི་དབང་རྣོན་ཞིག་སྟེ། དེས་བསམ་གཏན་བཞི་པར་བརྟེན་ནས་ལམ་ལྔ་ས་བཅུ་སྟན་ཐོག་དེར་མངོན་དུ་མཛད་ཟེར། གཉིས་པ་ནི། སྤང་རྟོགས་མཐར་ཕྱིན་པའི་ཇི་ལྟ་བ་དང་ཇི་སྙེད་མཁྱེན་པའི་ཡེ་ཤེས་མངོན་དུ་བརྙེས་པའོ། །གསུམ་པ་ལ་བཞི་སྟེ། དེ་ཡང་རྟེན་སྐུ། བརྟེན་པ་ཡེ་ཤེས། །ཆེ་བའི་ཡོན་ཏན། མཛད་པའི་ཕྲིན་ལས་རྣམས་སོ། །བཞི་པ་ནི། བསླབ་བྱ་ཐམས་ཅད་
འགྲུབ་ནས་སློབ་རྒྱུ་མེད་པས་ན་མི་སློབ་པའི་ལམ་མོ། །ལྔ་པ་ནི། བཅུ་གཅིག་ཀུན་ཏུ་འོད་ཀྱི་ས་སྟེ། སྟོང་གསུམ་གྲངས་མེད་པ་ཅིག་ཆར་སྣང་བར་བྱེད་པའི་སྐུའི་འོད་ཟེར་འཕྲོ་བ་དང༌། ནམ་མཁའ་གར་ཁྱབ་དམ་པའི་ཆོས་ཀྱི་སྣང་བ་ཆེན་པོ་འཁོར་བ་མ་སྟོང་བར་དུ་བྱེད་དོ། །གཉིས་པ་ས་བཅུའི་ཡོན་ཏན་བྱེ་བྲག་ཏུ་བཤད་པ་ལ། ཁྱད་གཞི་སའི་ངོ་བོ་དང༌། རྣམ་བཞག་དང༌། ངེས་ཚིག་དང་གསུམ་ལ། དང་པོ་ཡོན་ཏན་ཐམས་ཅད་ཀྱི་གཞི་རྟེན་བྱེད་པ་ཡེ་ཤེས་དང་སྙིང་རྗེ་ཆེན་པོ་དབྱེར་མེད་པ་སྐབས་འདིའི་སའི་ངོ་བོ། །གཉིས་པ་ལ་ཤས་ཆེ་བའི་ཁྱད་པར་དང༌། ཀུན་རྫོབ་པའི་ཡོན་ཏན་དང༌། སྐྱེ་བ་འཛིན་ཚུལ། གཉེན་པོའི་རྟོགས་པ། སྤང་བྱ་མི་མཐུན་པའི་ཕྱོགས། །ས་ཐོབ་རྟགས། འབྲས་བུའི་ཁྱད་པར་དང་བདུན་ལས། དང་པོ་ཤེས་ཆེ་བ་ནི། ཕར་ཕྱིན་བཅུ་ལ་ལྟོས་པ་དང༌། །བསླབ་པ་གསུམ་ལ་ལྟོས་པ་ནི། །བསླབ་གསུམ་འབྲས་བུ། མཚན་མེད་འབད་རྩོལ་དང་བཅས་པ་ས་བདུན་པ། ས་བརྒྱད་པར་མཚན་མེད་འབད་རྩོལ་དང་བྲལ། དགུ་པ་སེམས་ཅན་སྨིན་པར་བྱེད་པ། བཅུ་པ་གཟུང་དང་ཏིང་ངེ་འཛིན་ལ་དབང་འབྱོར་པའོ། །མདོ་སྡེ་རྒྱན་ལས། །ཆོས་ཉིད་རབ་ཏུ་རྟོགས་ནས་འདི་ན། བསླབ་པ་གསུམ་ཀྱི་རྟེན་ཆོས་ཉིད། ལྷག་པའི་ཚུལ་ཁྲིམས་ལྷག་སེམས་དང༌། །ལྷག་པའི་ཤེས་རབ་ལ་རྗེས་སློབ། །ཤེས་རབ་སྤྱོད་ཡུལ་གཉིས་ཡིན་ཏེ། །ཆོས་ཀྱི་དེ་ཉིད་དང་དེ་ནི། །མི་ཤེས་ཤེས་སོགས་འཇུག་པ་ཉིད། །ཤེས་རབ་སྤྱོད་ཡུལ་དེ་ལྟ་བས། །དེས་གཉིས་ལ་རྣམ་པར་གནས། །བསླབ་པ་རྣམས་དང་བསྒོམ་པ་ཡིས། །
འབྲས་བུ་གཞན་ནི་རྣམ་པ་བཞི། །མཚན་མེད་འདུ་བྱེད་དང་བཅས་པར། །གནས་པ་འབྲས་བུ་དང་པོ་ཡིན། །དེ་ཉིད་མངོན་འདུ་བྱེད་མེད་དང༌། །ཞིང་ནི་རྣམ་པར་དག་པ་དག །འབྲས་བུ་གཉིས་བར་འདོད་པ་ཡིན། །སེམས་ཅན་སྨིན་་སོ་སོ་ཡང་དག པར་འགྲུབ་ཉིད་དང༌། །ཏིང་ངེ་འཛིན་དང་གཟུངས་རྣམས་ནི། །འགྲུབ་པ་འབྲས་བུ་དམ་པ་ཡིན། །འབྲས་བུ་རྣམ་པ་འདི་བཞི་ནི། །ས་བཞི་པོ་ལ་ཡང་དག་བརྟེན། གེགས་བཞི་སྤང་རྣམ་པར་གྲོལ་བ་དང་རྣམ་གྲོལ་ཡེ་ཤེས་གཟིགས་པ་ཐོགས་སྒྲིབ་ལས་གྲོལ་བའོ། །ཟག་མེད་ཀྱི་ཕུང་པོ་ལྔ་ལ་ལྟོས་པ་ནི། རྒྱན་ལས། །ཆོས་ཉིད་རབ་ཏུ་རྟོགས་ནས་འདིར། ཟག་མེད་ཀྱི་ཕུང་པོ་ལྔའི་རྟེན་ཆོས་ཉིད། །ཚུལ་ཁྲིམས་ཀྱི་ནི་ཕུང་པོ་སྦྱང༌། །དེ་ཡི་འོག་ཏུ་ཏིང་འཛིན་དང༌། །ཤེས་རབ་ཕུང་པོ་རྣམ་པར་སྦྱོངས། །དེ་ལས་གཞན་པ་དག་ལ་ནི། །སྒྲིབ་རྣམ་བཞི་དང་ཐོགས་པ་ཡི། །སྒྲིབ་པ་ལས་ནི་རྣམ་གྲོལ་དང༌། །གྲོལ་པའི་ཡེ་ཤེས་རྣམ་པར་སྦྱོང༌། །བྱང་ཕྱོགས་རྟོགས་པའི་ཤེས་རབ། །བདེན་བཞི་ཤེས་པའི་ཤེས་རབ། །རྟེན་འབྲེལ་ཤེས་པའི་ཤེས་རབ་པོ། །ཀུན་རྫོབ་པའི་ཡོན་ཏན་ནི། །ས་དང་པོ་ཡོན་ཏན་བརྒྱ་ཕྲག་བཅུ་གཉིས་ཐོབ་སྟེ། ཏིང་ངེ་འཛིན་བརྒྱ་ཐོབ་ཅིང་དེ་དག་ལ་འཇུག་པ་དང༌། སངས་རྒྱས་བརྒྱའི་ཞལ་མཐོང་དེ་རྣམས་ཀྱི་བྱིན་གྱིས་བརླབ་པར་ཤེས། འཇིག་རྟེན་གྱི་ཁམས་བརྒྱ་གཡོ་བར་བྱེད་པ་དང༌། །གདུལ་བྱ་འདུན་པར་བྱེད། ཞིང་ཁམས་བརྒྱར་འགྲོ་བ། འདི་གཉིས་ནི་དེར་སོང་སྟེ་མཐོང་ནས་སྨིན་པར་བྱེད། དེ་དག་དུ་འོད་ཟེར་གྱི་སྣང་བར་བྱེད་པ། སེམས་ཅན་བརྒྱ་སྨིན་པར་བྱེད་པ། བསྐལ་པ་བརྒྱར་གནས་
པར་བྱེད་པ། བསྐལ་པ་བརྒྱའི་སྔོན་དང་ཕྱི་མའི་མཐའ་གཟིགས་པ་ཆོས་སྒོ་བརྒྱ་འབྱིད་པར་བྱེད། ལུས་བརྒྱ་སྟོན་པ་དང་ལུས་རེ་རེ་ལའང་འཁོར་ཕུན་སུམ་ཚོགས་པ་བརྒྱ་རེས་བསྐོར་བར་སྟོན་པའོ། །ས་གཉིས་པ་ལ་སྟོང་སེམས་ཅན་གྱི་སྡིག་པ་བྲལ་བའི་ཚད་དུས་ཀྱིས་འཁོར་བར་འགྲོ་བའི་ཚུལ་སྟོན་ནོ། །རང་གི་བློ་གྲོས་སྨིན་པའི་ཆེད་དུ་ཆོས་ཀྱི་རྣམ་གྲངས་རྣམས་ལ་བསམ་པའོ། །འགྱུར་དང༌། གསུམ་པ་ལ་འབུམ། བཞི་པ་ལ་བྱེ་བ་ཕྲག་བརྒྱ་དང༌། ལྔ་པ་ལ་བྱེ་བ་འབུམ་ཕྲག་སྟོང༌། དྲུག་པ་ལ་བྱེ་བ་བརྒྱ་ཕྲག་སྟོང༌། བདུན་པར་བྱེ་བ་ཁྲག་ཁྲིག་འབུམ་དང༌། བརྒྱད་པར་སྟོང་ཆེན་འབུམ་ཕྲག་གཅིག་གི་རྡུལ་གྱི་གྲངས་དང་མཉམ་པ་དང༌། ས་དགུ་པ་ལ་སྟོང་ཆེན་གྲངས་མེད་འབུམ་ཕྲག་བཅུའི་རྡུལ་གྱི་གྲངས་དང་མཉམ་པ་དང༌། ས་བཅུ་པ་ལ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཕྲ་རབ་ཀྱི་གྲངས་དང་མཉམ་པའི་ཡོན་ཏན་རྣམས་འཐོབ་བོ། །གསུམ་པ་སྐྱེ་བ་འཛིན་ཚུལ་ནི། དབང་རྣམ་སྨིན་གཉིས་ལས། དང་པོ་ནི། །རྒྱན་ལས། བློ་ལྡན་རྣམས་ཀྱི་ལས་དང་ནི། །གཞན་ཡང་སྨོན་ལམ་དག་དང་ནི། །ཏིང་ངེ་འཛིན་དང་དབང་འབྱོར་བའི། །དབང་གིས་སྐྱེ་བར་འདོད་པ་ཡིན། ཞེས་པ་ལྟར་བཞི། གཉིས་པ་ནི། འཁོར་ལོས་སྒྱུར་བ་སོགས༴༌།བཞི་པ་གཉེན་པོ་་མོས་སྤྱོད་རྣམས་འདོད་པར་སྐྱེ་བ་ལས་སོ། །རྟོགས་པ་ནི། དབུས་མཐའ་ལས། །ཀུན་ཏུ་འགྲོ་དོན་མཆོག་གི་དོན། །རྒྱུ་མཐུན་དོན་གྱི་མཆོག་ཉིད་དང༌། །ཡོངས་སུ་འཛིན་པ་མེད་དོན་དང༌། །རྒྱུད་རྣམས་
ཐ་དད་མེད་དོན་དང༌། །ཉོན་མོངས་རྣམ་དག་མིན་དོན་དང༌། འཁོར་འདས་ལ་བླང་དོར་འཛིན་པ་བཟློག་གོ །ཐ་དད་མེད་པའི་དོན་ཉིད་དང༌། །འབྲི་མེད་འཕེལ་བ་མེད་དོན་དང༌། །དབང་ནི་རྣམ་པ་བཞི་ཡི་གནས། །ཞེས་སོ། །དེ་ཡང་མཚན་འཛིན་བཟློག་གོ །སར་རྟོགས་པས་སངས་རྒྱས་ཐམས་ཅད་མཉམ་པ་ཉིད་བཅུའི་མཉམ་པར་རྟོགས་སོ། །ས་བརྒྱད་པར་འབྲི་མེད་འཕེལ་བ་མེད་པའི་དོན་དུ་རྟོགས་པ་དང༌། རྣམ་པར་མི་རྟོགས་པ་ལ་དབང་བའི་གནས་སུ་དེའང་ཉོན་མོངས་པ་ཅན་གྱི་ཡིད་གནས་འགྱུར་བས་རྣམ་པར་མི་རྟོག་པ་ལ་དབང་ཐོབ་པ་དང༌། ཞིང་དག་པ་ལ་དབང་བའི་གནས་སུ་འཛིན་པ་སྒོ་ལྔའི་རྣམ་ཤེས་གནས་འགྱུར་བས་ཞིང་དག་པ་ལ་དབང་ཐོབ་པའོ། །དགུ་པ་སོ་སོ་ཡང་དག་རིགས་བཞིའི་ཡེ་ཤེས་ལ་དབང༌། ཡིད་ཀྱི་རྣམ་ཤེས་གནས་འགྱུར་བ་སོ་སོ་ཡང་དག་རིགས་བཞི་ལ་མངའ་བརྙེས་ཤིང་ཕྲིན་ལས་ཕུན་སུམ་ཚོགས་པ་ལ་དབང་ཐོབ་པས་སེམས་ཅན་སྨིན་པར་བྱེད་པའོ། །བཅུ་པར་ཕྲིན་ལས་ལ་དབང་བའི་གནས་སུ་རྟོགས། །རྟོགས་པ་སྟེ་ཡིད་ཤེས་ཀྱི་འཆར་གཞི་ཀུན་གཞིའི་རྣམ་ཤེས་གནས་འགྱུར་བས་ཡེ་ཤེས་མེ་ལོང་ལྟ་བུ་ལ་དབང་ཐོབ་སྟེ་ཕྲིན་ལས་ཆེན་པོ་སངས་རྒྱས་དང་བྱ་བ་ཡུལ་ལ་ཡོད་པའི་ཕྲིན་ལས་འདྲ་རུང་དུ་བྱེད། དེའང་ས་བརྒྱད་པར་མཉམ་ཉིད་དང་སོ་སོར་རྟོགས་པ། དབུ་བར་བྱ་བ་གྲུབ་པ། བཅུ་པར་མེ་ལོང་ལྟ་བུའི་ཡེ་ཤེས་བཞི་ལ་དབང་ཐོབ་ནས་རྒྱུན་མཐར་བག་ཆགས་སྣ་ཚོགས་པའི་ཀུན་གཞི་གནས་འགྱུར་མ་ཐག་ཆོས་ཀྱི་དབྱིངས་ཀྱི་ཡེ་ཤེས་ལ་དབང་ཐོབ་སྟེ་འཚང་རྒྱ་བ་ཡིན་ནོ། །རྒྱུན་མཐར་འོད་ཟེར་ཆེན་པོའི་དབང་བསྐུར་པ་ཡིན་ནོ། །ལྔ་པ་སྤང་བྱའི་སྒྲིབ་པ་
བཤད་པ་ལ། །སྒྲིབ་གཉིས་སྤྱིའི་ངོས་འཛིན་དང༌། བྱེ་བྲག་གི་མཚན་ཉིད་དོ། །དང་པོ་ལ་རྒྱུ་ཉོན་མོངས་ཅན་མ་ཡིན་པས་འཁོར་བར་འཕེན་བྱེད་ཀྱི་ལས་མི་གསོག་ཀྱང༌། ཤེས་བྱ་ཆུང་ངུ་ནས་ཐམས་ཅད་མཁྱེན་པའི་ཡེ་ཤེས་ཐོབ་པའི་བར་སྒྲིབ་བྱེད་དུ་འགྱུར་བ་ནི་ཤེས་སྒྲིབ་དང༌། འདི་ལ་ཉན་ཐོས་ཀྱི་མི་ཤེས་པའི་རྒྱུ་བཞི་སོགས་དང༌། ཤེས་སྒྲིབ་ནི་ཆོས་བདག་ཉོན་སྒྲིབ་དུ་མི་འདོད་ཚད་ཀྱི་ཐེག་ཆེན་པའི་འཁོར་གསུམ་བདེན་ཞེན་ཏུ་འདོད་གསུངས། དེ་ཡང་ཆོས་བདག་དང་གཅིག་ཡིན། །དེ་ཡང་ཤེས་སྒྲིབ་ཀྱི་མཚན་ཉིད་ཡིན། ཡང་རྒྱུ་ཉོན་མོངས་པས་བསྐྱེད་ཅིང་འཁོར་བར་འཕེན་པའི་ལས་གསོག་པའི་ནུས་ལྡན་ཐར་ལམ་ལ་སྒྲིབ་བྱེད་དུ་འགྱུར་བ་ཉོན་སྒྲིབ་བོ། །དེ་དག་ལ་ལྷན་སྐྱེས་དང་ཀུན་བརྟག་གཉིས་རེ་སྟེ། །ལྷན་སྐྱེས་ནི་ཡེ་ནས་སེམས་དང་ལྷན་ཅིག་ཏུ་སྐྱེས་པའི་སྒྲིབ་པ་དཔེར་ན་ལྕགས་ལ་བཙའ་ཞུགས་པ་ལྟ་བུ་བསྒོམ་ལམ་རྣམས་མ་གཏོགས་སྤང་མི་ནུས་པའི་ཕྲ་བའི་ཆའོ། །ལྷན་ཅིག་སྐྱེས་ཞེས་པ་འདི་སེམས་དང་སྒྲིབ་པ་ན་ཚོད་མཉམ་པ་ལྟ་བུ་ལས་མེ་དང་ཚ་བའི་རང་བཞིན་ཏུ་འདོད་པ་ནི་མེད་མོད། ཡོད་ན་སྤོང་མི་རུང་ངོ༌། །དཔེར་ན་དྲི་མ་རྣམས་ནི་གློ་བུར་བ་འཕྲལ་དུ་སྤང་རུང་འདོད་པ་ལ་ཟེར་གྱིས། བྲལ་མི་ཤེས་པར་འདོད་པ་ནི་ནང་པའི་གྲུབ་མཐའ་གང་དུའང་མེད་མོད། །འོན་ཀྱང་ཕྱི་རོལ་པ་བདེན་པར་རྨོངས་པས་ལམ་ཕྱིན་ཅི་ལོག་གིས་དོན་མེད་པར་འགྱུར་བ་དང༌། ནང་པའི་ཐེག་དམན་གྱིས་ཀྱང་ཟད་དང་མི་སྐྱེ་ཞེས་བདེན་གྲུབ་ཀྱི་སྒྲིབ་པ་སྤང་རུང་དུ་འདོད། ཐེག་ཆེན་པས་ནི་ཐ་སྙད་འཁྲུལ་ཤེས་ཀྱི་ངོར་དེ་བཞིན་ཏུ་སྣང་བ་ནམ་མཁའི་སྐྲ་ཤད་ལྟར་དོན་ལ་ཡོད་མ་མྱོང་པས་སྤངས་བྱའི་གཞི་མ་ཐུབ་པའི་ཟད་མེད་སྐྱེ་མེད་དུ་
འདོད་མཆན། བདེན་པ་མཐོང་བ་ཙམ་གྱིས་བྲལ་འགྲོ་བ་རགས་པའི་ཆ་ཡིན་ནོ། །ཀུན་བཏགས་ནི་གྲུབ་མཐས་གསར་དུ་བསྒྱུར་བའི་བློ་དཔེར་ན་མིན་ན་ཡིན་རློམ་རྫུན་གྱི་མ་གོ་བ་ལྟ་བུའོ། །སྤྱིར་ཉོན་སྒྲིབ་ཡིན་ན་ཤེས་སྒྲིབ་ཡིན་པས་ཁྱབ་ལ། ཤེས་སྒྲིབ་ནི་ཉོན་སྒྲིབ་ཡིན་པས་མ་ཁྱབ་བོ། །གཉིས་པ་ལ་གཉིས་རྡུལ་ཕྲན་དང་ཤེས་པ་སྐད་ཅིག་དང་གཉེན་པོའི་མཆོག་འཛིན་ལྟ་བུ་ནང་པའི་གྲུབ་མཐས་སོ། །ཕྱི་རོལ་པའི་གྲུབ་མཐའ་བློ་ཕྱིན་ཅི་ལོག་གི་ལམ་ལ་གསར་དུ་བསྒྱུར་བའོ། །ཏེ། ཤེས་ཉོན་དག་གི་བྱེ་བྲག་གི་དབྱེ་བས་གཉིས་སོ། །དང་པོ་ཤེས་སྒྲིབ་ལ་ཐུན་མོང་ཐུན་མིན་གཉིས་ཀྱི། དང་པོ་ནི། འཁོར་བའི་རྒྱུ་འབྲས་གཉིས་པོ་རང་བཞིན་མེད་དོ་བ་ཀུན་ཉོན་ཕྱོགས་ཀྱི་དང༌། མྱང་འདས་ཀྱི་རྒྱུ་འབྲས་གཉིས་རང་བཞིན་མེད་དོ་བ་རྣམ་བྱང་ཕྱོགས་ཀྱི་གཟུང་རྟོག །བདག་གང་ཟག་རྫས་སུ་གྲུབ་པ་མེད་དོ་བ་རྫས་འཛིན་དང༌། བཏགས་པས་གྲུབ་པ་མེད་དོ་བ་བཏགས་འཛིན་གྱི་སྟེ་གཟུང་འཛིན་གྱི་རྟོག་པ་བཞིའོ། །དོན་སྤྱིའི་ཚུལ་དུ་རྟོགས་པའི་དགགས་རྟོག་བཞིའི་ངོ་བོ་རྣལ་མ་ཡིན་གསུངས་མཆན། ཡང་ན་སྒྲུབ་རྟོག་བཞི་པོ་ཤེས་སྒྲིབ་ཏུ་འདོད་པའང་ཡོད་དེ། དེ་ལྟར་ན་རྫས་འཛིན་གྱི་སྒྲུབ་རྟོག་ནི་གང་ཟག་གི་གདག་གཞིའི་ཕུང་ལྔའི་ཆོས་རྫས་སུ་གྲུབ་པར་ཡོད་པའོ། །མདོར་ན་གཟུང་འཛིན་གྱི་རྟོག་པ་ཐམས་ཅད་ཤེས་སྒྲིབ་ཡིན་གསུངས། གཉིས་པ་ཐུན་མིན། ས་བཅུ་པོའི་རེ་རེར་ཞིང་རྨོངས་གཉིས་དང་གནས་ངན་ལེན་གཅིག་བཅས་གསུམ་རེ་ཡོད། །གཉིས་པ་ཉོན་སྒྲིབ་ལ་མཐོང་སྤངས་ལོག་
ཞུགས་དང༌། བསྒོམ་སྤང་བའི་སྒོ་ནས་སོ། །དང་པོ་ལ་གཉིས་ཏེ། ལོག་པར་ཞུགས་ཚུལ་དང༌། རྣམ་གྲངས་གི་འདོད་ཚུལ་དགོད་པའོ། །དང་པོ་གང་འཇུག་ན། གཙོ་བོ་སྲིད་པའི་ཕྲ་རྒྱས་བཅུ་སྟེ། འཇིག་མཐར་ལོག་གསུམ་དང༌། ལྟ་བ་དང༌། ཚུལ་ཁྲིམས་བརྟུལ་ཞུགས་མཆོག་འཛིན་ཏེ་ལྟ་བ་ལྔ་དང༌། འདོད་ཆགས་ཁོང་ཁྲོ་ང་རྒྱལ་མ་རིག་ཐེ་ཚོམ་སྟེ་ལྟ་མིན་ལྔའོ། །གང་ལ་ན་བདེན་བཞིའོ། །ཚུལ་ཇི་ལྟར་ཞུགས་ན་དངོས་ བརྒྱུད་དབང་གིས་ལོག་ཞུགས་གསུམ 
་སྟེ། དང་པོ་ནི། འཇིག་མཐར་ལོག་གསུམ་དང་ལྟ་མིན་མ་རིག་པ་ཐེ་ཚོམ་གཉིས་དང་ལྔ་པོ་བདེན་པ་ལ་དངོས་སུ་ལོག་པར་ཞུགས་པའོ། །གཉིས་པ་ནི་ལྟ་བ་མཆོག་འཛིན་ལྟར་ན་དེ་ལ་མཆོག་ཏུ་རློམ་པས་སོ། །ཚུལ་ཁྲིམས་དང་བརྟུལ་ཞུགས་མཆོག་འཛིན་་ལྟ་ངན་དེ་དང་འབྲེལ་བའི་སྤྱོད་ངན་ལ་དག་གྲོལ་ངེས་འབྱིན་ཏུ་ལྟ་བས་སོ། །འདོད་ཆགས་ལྟ་ངན་ལ་སྲེད་པའོ། །ང་རྒྱལ་ཏེ་བཞི་པོ་དངོས་སུ་ལོག་ཞུགས་ཀྱི་ལྟ་ངན་ལ་དམིགས་ནས་འཇུག་པས་བརྒྱུད་དེ་ལོག་པར་ཞུགས་པའོ། །གསུམ་པ་ནི་ཁོང་ཁྲོ་སྟེ་རང་གི་ལྟ་ངན་དང་མི་མཐུན་པའི་ལྟ་བར་མི་བཟོད་པར་དབང་གིས་ལོག་པར་ཞུགས་པའོ། །ལྟ་ངན་དང་ལྡན་པའི་གང་ཟག་བདག་མཆོག་གོ་སྙམས་ནས་སེམས་ཁེང་པས་སོ། །གཉིས་པ་རྣམ་གྲངས་གི་འདོད་ཚུལ་ལ་གསུམ་སྟེ། དང་པོ་ནི། ཀུན་བཏུས་ལས་གསུངས་པ་ལྟར་སྡུག་བདེན་གྱི་མཐོང་སྤང་ལའང་འདོད་ཁམས་ལ་ཕྲ་རྒྱས་བཅུ། ཁམས་གོང་མ་གཉིས་སུ་ཁོང་ཁྲོ་དོར་བས་ལྷག་མ་དགུ་སྟེ་ཁྱོན་ཉེར་བརྒྱད་བདེན་པ་གཞན་གསུམ་ལའང་ཉེར་བརྒྱད་
རེ་དྲིལ་བའི་བརྒྱ་དང་བཅུ་གཉིས་སོ། །གཉིས་པ། གཏན་ལ་དབབ་པ་བསྡུ་བ་ལྟར་ན། སྡུག་བདེན་སྔར་ལྟར་ཉེར་བརྒྱད་དང༌། ཀུན་འགོགས་གཉིས་པོར་འཇིག་མཐར་དང་ཁམས་གོང་མ་གཉིས་ལ་ཁོང་ཁྲོ་བཅས་དོར་པས་ལྷག་མ་དྲིལ་བས་གོ་བཞིར་བཤད་དོ། །གསུམ་པ་མངོན་མཛོད་ལྟར་ན། སྡུག་བདེན་སྔར་ལྟར་ཉེར་བརྒྱད་དང༌། ཀུན་འགོགས་གཉིས་པོར་འཇིག་མཐར་གཉིས་མཆོག་འཛིན་ཐ་མ་གསུམ་དང༌། ལམ་ལ་འཇིག་མཐར་གཉིས། ཁམས་གོང་མ་གཉིས་སུ་ཁོང་ཁྲོ་བཅས་དོར་བས་ལྷག་མ་གྱ་བརྒྱད་དོ། །དེ་དག་ཀྱང་བསྡུ་ན་ཀུན་ཏུ་སྦྱོར་བ་གསུམ་ལ་འདུའོ། །འཇིག་མཐར་ལོག་གསུམ་མོ། །མདོར་ན་མཐོང་ལམ་ཐོབ་ཕྱིན་ཆད་སྐྱབས་དཀོན་མཆོག་གསུམ་དང་ཆོས་བདེན་པ་བཞི་ལ་ངེས་ཤེས་གཏིང་ནས་རྙེད་པས་གང་དང་གང་དུ་སྐྱེས་ཀྱང་བློ་ལྟ་ལོག་གིས་བསྒྱུར་མི་བཏུབ་སྟེ་ལོག་ཞེན་གྱི་རྩ་བ་ཆད་པས་སོ། །གཉིས་པ་བསྒོམ་སྤང་ལ། སྤང་བྱའི་དབྱེ་བ་དང༌། ཇི་ལྟར་སྤོང་ཚུལ་ལོ། །དང་པོ་ལ་དབྱེ་གཞི་ནི། མ་རིག་པ། འདོད་ཆགས། ང་རྒྱལ། ཁོང་ཁྲོ། །འཇིག་ལྟ། མཐར་འཛིན་གྱི་ལྟ་བ་དང་དྲུག་གོ །ཇི་ལྟར་ན་ལམ་གྱི་དབྱེ་བའི་སྒོ་ནས་དབྱེ་ན་བཅུ་དྲུག་དང༌། འདོད་ཁམས་སུ་དེ་དྲུག་པོ་དང་ཁམས་གོང་མ་གཉིས་སུ་ཁོང་ཁྲོ་དོར་ལྷག་ལྔ་རེ་སྟེ་བསྡོམ་པས་བཅུ་དྲུག་གོ་མཆན་སའི་སྒོ་ནས་སྤང་བྱའི་རྟེན་གྱིས་དགུའོ། །དབྱེ་ན་ཞེ་དྲུག་པ་དང་ཆེ་འབྲིང་གི་དབྱེ་ན་བཞི་བརྒྱ་དང་བཅུ་བཞིའོ། །གཉིས་པ་ལ། སྤང་བྱ། སྤོང་བྱེད། སྤོང་ཚུལ་གསུམ་ལ་ཐེག་པ་ཆེ་ཆུང་གི་བཞེད་ཚུལ་གཉིས་སོ། །དེ་ལ་དང་པོ་ལ་སྤང་བྱ་བ་གཉིས། དེ་ཡང་མངོན་གྱུར་ནི་འདི་ཡི་སྦྱོར་ལམ་སྤངས་ནས་མགོ་ནོན་ཀྱི་གཉེན་པོས་སྤང་ཀྱང་སླར་སྐྱེ་བས་
ན་སྤོང་བའི་གོ་མི་ཆོད། །ས་བོན་གནས་ངན་ལེན་གསུམ་དོན་གཅིག་མིང་གི་རྣམ་གྲངས་ཏེ་དེ་ཉིད་དྲུང་ནས་བྱུང་ངོ༌། །གཉིས་པ་ནི། ཞི་ལྷག་ཟུང་དུ་འབྲེལ་བའི་བདག་མེད་རྟོགས་པའི་ཤེས་རབ་ཀྱིས་སོ། །གསུམ་པ་ནི། ཅིག་ཆར་སྟེ་ཁམས་གསུམ་གྱི་སྒྲིབ་པ་ཆེ་ཆུང་རྣམས་དྲིལ་ནས་སྤངས་བར་འདོད་དེ། ཇི་ལྟར་ན་ཁམས་གསུམ་གྱི་ཉོན་སྒྲིབ་ཆེན་པོའི་ཆེན་པོ་ཞེ་དྲུག་པོ་བསྒོམ་ལམ་ཆུང་ངུའི་ཆུང་ངུས་སྤོང་ཞིང༌། ས་གཉིས་པ་དྲི་མ་མེད་ཀྱི་སའོ། །དེ་བཞིན་དུ་རིམ་པ་ལྟར་སྦྱར་ནས་སྒྲིབ་པ་ཆུང་ངུའི་ཆུང་ངུ་བསྒོམ་ལམ་ཆེན་པོའི་ཆེན་པོས་སྤོང་བའི་བར་རིགས་འགྲེས་སོ། །བཅུ་པ་ཆོས་ཀྱི་སྤྲིན་ནོ། །དེ་དག་དེ་རེ་རེ་ནས་སྦྱོར་ལམ། མཐོང་ཟིན་གོམ་པའི་ས་རྗེས་མར་བརྩོན་ཏེ་དེའི་སྒྲིབ་པ་ཉམས་སྨད་པས་མགོ་ནོན་གྱི་གཉེན་པོའོ། །དེ་བར་ཆད་མེད་པའི་ལམ། སྤང་གཉེན་འཐབ་སྟེར་བའི་སྒྲིབ་པ་དང་ཚན་པའི་པད་ཆད་དེ་ལ་སྤྲོས་པའི་གཉེན་པོའོ། །རྣམ་གྲོལ་ལམ། རིགས་པའི་སྒྲིབ་པ་བྲལ་ནས་གཉེན་པོའི་ཡེ་ཤེས་རྫོགས་པ་རྟེན་གཉེན་པོའོ། །ཁྱད་པར་ལམ་རིགས་པའི་ཡེ་ཤེས་ཁྱད་པར་གྱུར་ནས་ལམ་གོང་མར་སྦྱོར་བའི་ཐག་བསྲིང་གི་གཉེན་པོའོ། །སྟེ་བཞི་རེས་བགྲོད་པར་བྱེད་དོ། །དེ་ཡང་བྱང་སེམས་ཀྱི་ཡེ་ཤེས་སྟོབས་དང་ལྡན་པས་ཉོན་སྒྲིབ་ཟིལ་གྱིས་མནན་ནས་སྤང་བྱའི་གཙོ་བོ་ཤེས་སྒྲིབ་དང༌། ཉན་ཐོས་རྣམས་ཀྱི་ཉོན་སྒྲིབ་སྤང་བྱའི་གཙོ་བོ་བྱེད་དོ། །དེ་གཉེན་པོ་ཆུང་རིམ་ནས་སྐྱེ་ཚུལ་དང་བསྟུན་སྤང་བྱ་ཆེ་རིམ་ནས་བྲལ་རྒྱུ་ཡིན་པས་དཔེར་ན་སྲང་མདའི་མཐོ་དམན་ལྟར་རོ། །གཉིས་པ་ཐེག་དམན་གྱི་བཞེད་པ་ལྟར་ན་དང་པོ་ནི་མྱོང་བྱར་གྱུར་རམ་ཀུན་དཀྲིས་སོ། །གཉིས་པ་ནི་བསམ་གཏན་ས་དྲུག་དང་གཟུགས་མེད་སྔ་མ་གསུམ་གྱིས་སྤང་བར་འདོད། །གསུམ་པ་ནི། རིམ་གྱིས་ཏེ་ཁམས་གོང་འོག་གི་
སྒྲིབ་པ་སོ་སོར་ཕྱེ་ནས་སོ། །དེ་བསམ་གཏན་དང་པོའི་བསྡོས་མི་ལྕོགས་པ་མེད་ལས་རབ་ཏུ་དབེན་པའི་ཡིད་བྱེད་སྐྱེས་པས། འདོད་ཁམས་ཀྱི་ཉོན་མོངས་ཆེན་པོ་གསུམ་དང༌། ཡང་དགའ་བ་སྡུད་པས་འདོད་ཉོན་འབྲིང་གསུམ་དང༌། སྦྱོར་བ་མཐར་ཐུག་པས་འདོད་ཉོན་ཆུང་ངུ་གསུམ་དང་དགུ་པོ་སྤང་ངོ༌། །དེ་བཞིན་རིམ་པ་ལྟར་བསམ་གཏན་རང་རང་ཐོབ་བྱེད་ཀྱི་ཉེར་བཟློག་གི་ངོ་བོ་གསུམ་པོས་ས་འོག་མ་འོག་མའི་སྒྲིབ་པ་ཆེ་འབྲིང་ཆུང་གསུམ་སྤང་བར་བྱེད་དོ། །འཇིག་རྟེན་པའི་ལམ་ལའང་སྦྱོར་ལམ་སོགས་བཞི་པོའི་རྣམ་བཞག་འདོད་ཚུལ་ཡོད་པར་གསུངས། །མཆན། ཡང་སྲིད་རྩེའི་སྒྲིབ་པ་ཁོ་ན་གཅོད་བྱེད་ཀྱི་ཤེས་རབ་དེ་ཀ་ནང་པའི་ཁྱད་ཆོས་ལས་གཞན་བརྒྱད་པོའི་སྒྲིབ་པ་ཟག་མེད་ཀྱི་ལམ་མིན་ཀྱང་གཏན་སྤོང་ནུས་ཟེར་བ་ཐེག་དམན་ནོ། །དྲུག་པ་ས་ཐོབ་པའི་རྟགས་ནི། ས་དང་པོ་ལ་སྟོང་གསུམ་གཏེར་གྱིས་གང་བ། གཉིས་པ་ལ་འཇིག་རྟེན་ཐམས་ཅད་དུ་རིན་པོ་ཆེ་དུ་མས་བརྒྱན་པ། གསུམ་པ་ལ་གོ་ཆ་ཐོགས་ནས་ཕས་རྒོལ་འཇོམ་པ། བཞི་པ་ལ་ཕྱོགས་བཞིར་རླུང་གིས་མེ་ཏོག་སྣ་ཚོགས་འཐོར་བ། ལྔ་པར་རྒྱན་གྱིས་བརྒྱན་པའི་བུད་མེད་ཀྱི་མགོ་ལ་མེ་ཏོག་གི་འཕྲེང་བ་འདོགས་པ། དྲུག་པར་ཐེམ་སྐས་བཞི་རྫིང་བུ་གསེར་གྱི་བྱེ་མ་བརྡལ་བ་དངས་ཞིང་རྙོགས་མེད་ཆུ་བོ་ཡན་ལག་བརྒྱད་ལྡན། ཨུཏྤལ་དང༌། ཀུ་མུད་ཏ་དང༌། པདྨ་དཀར་པོས་བརྒྱན་པ། བདུན་པར་རང་གི་གཡས་གཡོན་ན་དམྱལ་བའི་གཡང་སར་མ་སྨས་མ་ཉམས་པར་སླར་ལྡོག་པ། བརྒྱད་པར་འཕྲག་
པ་གཉིས་སུ་སེང་གེ་རལ་པ་ཅན་གཉིས་ཀྱིས་སྲོག་ཆགས་ཕྲ་མོ་ཟིལ་གྱིས་གནོན་པ། །དགུ་པ་འཁོར་ལོས་བསྒྱུར་བའི་རྒྱལ་པོ་ལ་སྐྱེ་བོའི་ཚོགས་ཀྱིས་བསྐོར་བ། བཅུ་པ་ལ་དེ་བཞིན་གཤེགས་པའི་སྐུ་མཐོང་བའོ། །བདུན་པ་སའི་འབྲས་བུ་ནི་གནས་སྐབས་ཀྱི་འབྲས་བུས་ས་ཕྱི་མའི་ཡོན་ཏན་དང་མཐར་ཐུག་གི་འབྲས་བུ་སངས་རྒྱས་འགྲུབ་པའོ། །གསུམ་པ་ཁྱད་པར་དེ་ལྡན་གྱི་ངེས་ཚིག་ནི། མདོ་སྡེ་རྒྱན་ལས། །བྱང་ཆུབ་ལ་ནི་ཉེ་བ་དང༌། །སེམས་ཅན་དོན་བསྒྲུབ་མཐོང་པ་ལ། །རབ་ཏུ་དགའ་བ་སྐྱེ་འགྱུར་ཏེ། །དེ་ཕྱིར་རབ་དགའ་ཞེས་བརྗོད་དོ། །འཆལ་ཚུལ་རྩོལ་བའི་དྲི་བྲལ་ཕྱིར། །དྲི་མ་མེད་པའི་ས་ཞེས་བརྗོད། །ཆོས་ཀྱི་སྣང་བ་ཆེན་པོ་ནི། །བྱེད་པའི་ཕྱིར་ན་འོད་བྱེད་པའོ། །འདི་ལྟར་བྱང་ཆུབ་ཕྱོགས་མཐུན་ཆོས། །རབ་ཏུ་སྲེག་བྱེད་འོད་ལྟ་བུ། །དེ་དང་ལྡན་ཕྱིར་ས་དེ་ནི། །གཉིས་པོ་སྲེགས་པའི་འོད་འཕྲོ་ཅན། །སེམས་ཅན་རྣམས་ཡོངས་སྨིན་བྱེད་ཅིང༌། །རང་གི་སེམས་ཀྱང་བསྲུང་བའི་ཕྱིར། །བློ་ལྡན་རྣམས་ཀྱིས་སྦྱང་དཀའ་བ། །དེ་ཕྱིར་སྦྱང་དཀའ་ཞེས་བྱའོ། །ཤེས་རབ་ཕ་རོལ་ཕྱིན་བརྟེན་ནས། །འཁོར་བ་དང་ནི་མྱ་ངན་འདས། །གཉིས་འདིར་མངོན་དུ་གྱུར་པའི་ཕྱིར། །མངོན་ཏུ་གྱུར་པའི་ས་ཞེས་བཤད། །བགྲོད་གཅིག་ལམ་དང་འབྲེལ་བའི་ཕྱིར། །རིང་དུ་སོང་བའི་སར་འདོད་དོ། །འདུ་ཤེས་གཉིས་ཀྱིས་མི་གཡོའི་ཕྱིར། །མི་གཡོ་བ་ཡི་ས་ཞེས་བརྗོད། །སོ་སོ་ཡང་དག་རིག་བློ་བཟང༌། །ས་དེ་ལེགས་པའི་བློ་གྲོས་ཡིན། །སྤྲིན་བཞིན་གཉིས་ཀྱི་ནམ་
མཁའི་ཆོས། །ཁྱབ་པའི་ཕྱིར་ན་ཆོས་ཀྱི་སྤྲིན། ཞེས་བྱེ་བྲག་གི་ངེས་ཚིག་དང༌། །སྤྱིའི་ངེས་ཚིག་ནི། །འབྱུང་པོ་དཔག་མེད་འཇིགས་མེད་ཕྱིར། །དཔག་ཏུ་མེད་པ་དེ་དག་ལ། །ཕྱི་ཕྱིར་གོང་དུ་འགྲོ་ལྡན་ཕྱིར། །དེ་དག་ཉིད་ནི་སར་འདོད་དོ། །ཞེས་སོ། ༈ །མངོན་རྟོགས་རྒྱན་ལས། །ཐུབ་པའི་ངོ་བོ་མཐོང་སྤང་དང་བསྒོམ་སྤང་ཉོན་མོངས་པའི་འབྱུང་པོ་དཔག་ཏུ་མེད་པའི་འཇིགས་པ་ལས་སྐྱོབ་པ། ཉིད་སྐུ་ནི། །ཟག་པ་མེད་པའི་ཆོས་གང་དག །ཐོབ་གྱུར་རྣམ་ཀུན་རྣམ་དག་པ། །དེ་དག་རང་བཞིན་ཉིད་མཚན་ཅན། །ཞེས་དང༌། བྱང་ཆུབ་ཕྱོགས་མཐུན་ཚད་མེད་དང༌། །རྣམ་པར་ཐར་དང་མཐར་གྱིས་ནི། །སྙོམ་འཇུག་དགུ་ཡི་བདག་ཉིད་དང༌། །ཟད་པར་བཅུ་ཡི་བདག་ཉིད་དང༌། །ཟིལ་གྱིས་གནོན་པའི་སྐྱེ་མཆེད་ནི། །རབ་ཏུ་དབྱེ་བས་རྣམ་བརྒྱད་དང༌། ཉོན་མོངས་མེད་དང་སྨོན་མཁྱེན་དང༌། །མངོན་ཤེས་སོ་སོ་ཡང་དག་རིགས། །རྣམ་པ་ཐམས་ཅད་དག་བཞི་དང༌། །དབང་བཅུ་དང་ནི་སྟོབས་བཅུ་དང༌། །མི་འཇིགས་པ་ནི་བཞི་དག་དང༌། །བསྲུང་བ་མེད་པ་རྣམ་གསུམ་དང༌། །དྲན་པ་ཉེ་བཞག་རྣམ་གསུམ་དང༌། །བསྙེལ་བ་མི་མངའི་ཆོས་ཉིད་དང༌། །བག་ཆགས་ཡང་དག་བཅོམ་པ་དང༌། །སྐྱེ་ལ་ཐུགས་རྗེ་ཆེན་པོ་དང༌། །ཐུབ་པ་ཁོ་ནའི་མ་འདྲེས་ཆོས། །བཅོ་བརྒྱད་བཤད་པ་གང་ཡིན་དང༌། །རྣམ་པ་ཐམས་ཅད་མཁྱེན་ཉིད་དང༌། །ཆོས་ཀྱི་སྐུ་ཞེས་བརྗོད་པ་ཡིན། །ཞེས་སོ། །མ་འདྲེས་པ་བཅོ་བརྒྱད་ནི། རྒྱུད་བླ་མ་ལས། འཁྲུལ་དང་ཅ་ཅོ་བསྙེལ་དང་ཐུགས་གཡོ་ཐ་དད་ཀྱི་ནི་འདུ་ཤེས་དང༌། ངང་གི་བཏང་སྙོམས་
དྲང་སྲོང་ལ་མེད་འདུན་པ་དང་ནི་བརྩོན་འགྲུས་དང༌། དྲན་པ་རྣམ་དག་དྲི་མེད་ཤེས་རབ་རྟག་ཏུ་རྣམ་པར་གྲོལ་པ་དང༌། ཤེས་བྱའི་དོན་ཀུན་གཟིགས་པ་གྲོལ་བའི་ཡེ་ཤེས་ལས་ནི་ཉམས་མི་མངའ། གང་གི་ལས་གསུམ་ཐམས་ཅད་ཡེ་ཤེས་སྔོན་འགྲོ་རྗེས་སུ་འཇུག་པ་དང༌། །དུས་གསུམ་རྟག་ཏུ་ཐོགས་པ་མེད་པ་མཁྱེན་པ་རྒྱ་ཆེན་འདུག་པ་སྟེ། །ཞེས་སོ། །སངས་རྒྱས་ཀྱི་ཡོན་ཏན་སྡེ་ཚན་ཉེར་གཅིག་སྟེ། སྟོབས་བཅུ་དང༌། མི་འཇིགས་པ་བཞི་དང༌། མ་འདྲེས་བཅོ་བརྒྱད་དང༌། སྤྱན་ལྔའོ། །དེ་ལ་ཤའི་སྤྱན་ནི། གཟུགས་མཐོང་བྱེད་ཀྱི་དབང་པོའི་ཡོན་ཏན་ཁྱད་པར་ཅན་དང༌། ལྷའི་སྤྱན་གྱིས་འཆི་འཕོ་བ་དང་སྐྱེ་བ་གཟིགས་པའི་མིག་ཤེས་ཀྱི་ཡོན་ཏན་ཏེ་འདི་གཉིས་པོ་སྔོན་གྱི་ལས་ལས་འབྱུང་བར་བཞེད་དོ། །ཤེས་རབ་ཀྱི་སྤྱན་ནི། མཐོང་ལམ་རྣམ་པར་མི་རྟོག་པའི་ཡེ་ཤེས། ཆོས་ཀྱི་སྤྱན་གསུང་རབ་ཡན་ལག་བཅུ་གཉིས་ལ་ཐོགས་མེད་དུ་འཇུག་པ་དང༌། འཕགས་པའི་གང་ཟག་དབང་པོ་རྣོ་རྡུལ་ཐམས་ཅད་མཁྱེན་པ། སངས་རྒྱས་ཀྱི་སྤྱན་ནི་ཇི་ལྟ་བ་དང་ཇི་སྙེད་པ་ཐམས་ཅད་ཆགས་ཐོགས་མེད་པར་མངོན་སུམ་དུ་གཟིགས་པའོ། །བཞི་པ་མངོན་ཤེས་དྲུག་ནི། རྫུ་འཕྲུལ་གྱི་མངོན་པར་ཤེས་པ་དང༌། ལྷའི་མིག་གི་མངོན༴་ལྷའི་རྣ་བའི༴་གཞན་སེམས་འགྱུ་བ་མཐའ་དག༴་སྔོན་གནས་རྗེས་སུ་དྲན་པའི༴་ཟག་པ་ཟད༴་དེ་དག་ཀྱང་ཉན་རང་གིས་རང་འདྲ་ལ་གཟིགས་པ་དང༌། །བྱང་སེམས་ལྷག་པ་དང༌།
སངས་རྒྱས་ཀྱི་ཐམས་ཅད་གཟིགས་པའོ། །ལྔ་པ་ནི། རྟེན་དང་བརྟེན་པ་བཤད་བྱ་དང༌། ཞེས་པས། རྟེན་ཆོས་གསུང་རབ་ཀྱི་སྡེ་སྣོད་ཐམས་ཅད་དང༌། བརྟེན་པ་དེའི་དོན་ཐམས་ཅད་སོ་སོར་རིག་པའི་བཤད་བྱ་དང༌། གསུང་དང་མཁྱེན་པ་འཆད་བྱེད་པ། ཞེས་པས། གསུང་ཚུལ་ཚིག་གི་ངེས་པ་སྟེ་སྐད་རིགས་སོགས་མིང་གི་ཐ་སྙད་དུ་གདགས་པའི་ཚུལ་ཐམས་ཅད་དང་ཐུགས་མཁྱེན་པའི་སྤོབ་པ་གང་ཟད་མི་ཤེས་པས་འཆད་པར་བྱེད་པའོ། །དྲུག་པ་ནི། གཟུངས་ཀྱི་སྒོ་བཞི་སྟེ། བཟོད་པ་ཐོབ་པའི་སྒོའི་གཟུངས་ནི། །དཔེར་ན་ཡི་གེ་ཨ་ལྟ་བུ་ཞིག་གིས་མཚོན་ནས་འཁོར་འདས་ཀྱི་ཆོས་ཐམས་ཅད་ཀྱི་རྟེན་འབྲེལ་འགགས་མེད་དུ་ཤེས་ནས་བརྗོད་མེད་ཀྱི་དོན་རྟོགས་ནུས་པ་དང༌། སྔགས་ཀྱི་གཟུངས་ནི་དཔེར་ན་ཕན་གནོད་ཐམས་ཅད་སྒྲུབ་བྱེད་ཀྱི་སྔགས་བརྩམ་པ་ཏིང་ངེ་འཛིན་གྱིས་བྱིན་གྱིས་བརླབ་པ་དེའི་ནུས་པ་བསམ་གྱིས་མི་ཁྱབ་པ་འབྱུང་བའོ། །ཚིག་དོན་གྱི་གཟུང་གཉིས་ནི་ནོར་འཁྲུལ་མེད་པར་བློ་ལ་འཛིན་ནུས་པ་སྟེ། དེ་དག་གི་ངོ་བོ་ནི་དྲན་པ་དང་ཤེས་རབ་དང་ཏིང་ངེ་འཛིན་གསུམ་མོ། བདུན་པ་ཟད་པ་ནི། ངོ་བོ་ཏིང་ངེ་འཛིན་དང་ཤེས་རབ་ཁྱད་པར་ཅན་ཡིན་ལ། །དབྱེ་ན་ས་ཆུ་མེ་རླུང་བཞི་དང་ཁ་དོག་སྔོ་སེར་དཀར་དམར་བཞི་ཟད་པར་ཏིང་ངེ་འཛིན་མངོན་དུ་བྱེད་པ་དང༌། དེ་བཞིན་དུ་ནམ་མཁའ་
དང་རྣམ་ཤེས་མཐའ་ཡས་ཀྱི་ཏིང་ངེ་འཛིན་མངོན་དུ་བྱེད་པའོ། །དེ་དག་བསྒོམ་ཚུལ་ཀྱང་ཆུའི་སྟེང་གི་ས་ཟམ་པ་ལྟ་བུ་དང༌། ནམ་མཁའ་ནས་ཆུ་འབེབ་པ་དང༌། ཤིང་གི་མེ་སྦར་བ་དང༌། རླུང་གི་རེག་བྱ་ལ་བསྒོམ་པ་དང༌། ཁ་དོག་བཞི་པའི་ཟླུམ་གོར་ལྟ་བུ་ཅན་ལ་བརྟེན་པ་དང༌། བུག་པའི་ནམ་མཁའ་དང༌། ཉི་ཟེར་གྱི་ཐིག་ལེ་གཞན་ཏུ་ཤར་བ་སོགས་ལ་བརྟེན་ནས་བསྒོམ་པའོ། །འགྲུབ་རྟགས་ནི་དེ་དག་གྱེན་དུ་འཕགས་པ་སོགས་འབྱུང་ངོ༌། །བརྒྱད་པ་ཟིལ་གནོན་ནི། དབྱིབས་དང་ཁ་དོག་གིས་དབྱེ་བས་བརྒྱད་དོ། །དང་པོ་དབྱིབས་ནི། ནང་གཟུགས་སུ་འདུ་ཤེས་ནས་ཕྱི་རོལ་གྱི་གཟུགས་ཆེན་པོ་ཐམས་ཅད་ཟིལ་གྱིས་མནན་ཏེ་ཤེས། ཞི་གནས། ཟིལ་གྱིས་མནན་ཏེ་མཐོང་དེ་ལྟར་འདུ་ཤེས་པའོ། །མངོན་པའི་ང་རྒྱལ། །ཡང་ཕྱི་རོལ་གྱི་གཟུགས་ཆུང་ངུ་ལ་ཡང་དེ་བཞིན་དུ་བསྒོམ་པ་དང༌། ནང་གཟུགས་མེད་པར་འདུ་ཤེས་ཏེ་ཕྱི་རོལ་གྱི་གཟུགས་ཆེ་ཆུང་གཉིས་སྔ་མ་ལྟར་བསྒོམ་་ལྷག་མཐོང་པ་དང་བཞི་ཡང་ནང་གཟུགས་མེད་པར་འདུ་ཤེས་ནས་ཕྱི་རོལ་གྱི་ཁ་དོག་སྔོ་སེར་དཀར་དམར་བཞི་ཟིལ་གྱིས་མནོན་ཏེ་ཤེས་པ་སོགས་སྔར་ལྟར་རོ། །དགུ་པ་ཐུགས་རྗེ་ཆེན་པོ་ནི། །ཐུགས་རྗེ་ཆེན་པོས་སེམས་ཅན་ཐམས་ཅད་ལ་ཉིན་ལན་གསུམ་མཚན་ལན་གསུམ་དུ་གཟིགས་ནས། སུ་ནི་རྒུད་སུ་ནི་དར་བ་སོགས་ལེགས་པར་མ་བྱིན་པའོ། །
བཅུ་པ་ཉོན་མོངས་མེད་པ་ནི། །ཉོན་མོངས་མེད་པའི་ཏིང་ངེ་འཛིན་ཏེ། དེ་ལ་ཉན་རང་རྣམས་ཀྱིས་བསོད་སྙོམས་སོགས་ལ་རྒྱུ་བའི་ཐོག་མར་བརྟགས་ཏེ། །གལ་ཏེ་བདག་ལ་བརྟེན་ནས་དེ་དག་ཉོན་མོངས་པར་གྱུར་ན་བྱོལ། །སངས་རྒྱས་ནི་དཔེར་ན་གླང་པོ་ནོར་སྐྱོང་བཏུལ་བ་ལྟ་བུའོ། །ཉོན་མོངས་པ་བསྐྱེད་པའི་སེམས་ཅན་གྱི་གནས་དེ་མི་འདོར་བར་དེར་ངེས་པར་བྱོན་ནས། དེའི་རྒྱུད་ཀྱི་ཉོན་མོངས་པ་ཐམས་ཅད་འཇོམས་དེ་ཕྱོགས་སུ་མི་འགྲོ། །བར་མཛད་པའོ། །བཅུ་གཅིག་པ་སྨོན་མཁྱེན་ནི། །ཉན་ཐོས་རྣམས་ཀྱི་སྨོན་གནས་མཁྱེན་པ་སྟེ། །གནས་འདི་ཤེས་པར་བྱ་སྙམ་ནས། རབ་མཐའི་ཏིང་ངེ་འཛིན་ལ་སྙོམ་པར་ཞུགས་ནས་ཤེས་པ་ལྟ་བུ་སྟེ། དཔེར་ན་མོའུ་འགལ་གྱི་བུས་་རྒྱལ་རྒྱུད་བརྗོད་པ་ལྟ་བུའོ། །རྫོགས་པའི་སངས་རྒྱས་ཀྱི་ནི་འབད་རྩོལ་མི་དགོས་པར་ལྷུན་གྱིས་གྲུབ་པ་དང༌། ཆགས་པ་མེད་པ་དང༌། ཐོགས་པ་མེད་པ་དང༌། དུས་འཁོར་བ་མ་སྟོང་བར་དུ་རྟག་པ། མཉམ་བར་མ་བཞག་པ་མེད་བཞིན་དུ་སེམས་ཅན་རྣམས་ཀྱིས་དྲི་བ་མི་འདྲ་བ་བསམ་གྱིས་མི་ཁྱབ་པ་དུས་གཅིག་ལ་དྲིས་པའི་ལན་ཀུན་དུས་གཅིག་ལ་ལྡོན་ཏེ། ཁྱད་ཆོས་ལྔ་དང་ལྡན་པ་ནི་སྨོན་གནས་མཁྱེན་པའོ། །བཅུ་གཉིས་པ་དབང་བཅུ་ནི། ཚེ་སེམས་ཡོ་བྱད་ལ་དབང་བ་གསུམ་ནི་སྦྱིན་པའི་འབྲས་བུ་དང༌། ལས་དང་སྐྱེ་བ་ལ་དབང་བ་ནི་ཚུལ་ཁྲིམས་ཀྱི་འབྲས་བུ། མོས་པ་ལ་དབང་བ་ནི་བཟོད་པའི་
འབྲས་བུ་དང༌། སྨོན་ལམ་ལ་དབང་བ་ནི་གནས་ཀྱི་དབང་དུ་བྱས་ནས་སྨོན་ལམ་ཐམས་ཅད་འགྲུབ་པ་སྟེ་བརྩོན་འགྲུས་ཀྱི་འབྲས་བུ་དང༌། རྫུ་འཕྲུལ་ལ་དབང་བ་ནི་བསམ་གཏན་གྱི་འབྲས་བུ་དང༌། ཡེ་ཤེས་དང་ཆོས་ལ་དབང་བ་ནི་ཤེས་རབ་ཀྱི་འབྲས་བུའོ། །བཅུ་གསུམ་པ་གོང་གི་ཕྱོགས་ཆོས་དང༌། བཅུ་བཞི་པ་ཚད་མེད་བཞི་དང༌། གཞུང་འདིར་མི་གསལ་བ། བཅོ་ལྔ་པ་རྣམ་ཐར་བརྒྱད་ནི། གཟུགས་ལ་རྣམ་ཐར་ནི་ནང་གཟུགས་སུ་འདུ་ཤེས་ནས། གཟུགས་ཅན་མ་ཡིན་པ་ནི་ནང་གཟུགས་མེད་པར་འདུ་ཤེས་ནས། སྡུག་པའི་རྣམ་པ་ཅན་བསྒོམ་པ་དང་གསུམ་མོ། །མངོན་མཛོད་ལྟར་ན་མི་སྡུག་པ་བསྒོམ་པར་ཡང་འདོད། དེ་ཡང་རྣམ་ཐར་ནི། གཟུགས་མེད་དང་འགོགས་པ་རྣམས་རང་སའི་སྒྲིབ་པ་ལས་གྲོལ་བའོ། །བཅུ་དྲུག་པ་མཐར་གནས་དགུ་ནི་རིམ་གྱིས་གནས་པའོ། །སྙོམས་འཇུག་དགུ་ཞེས་པ་ནི་ལུས་ཀྱི་འབྱུང་བ་སྙོམས་པ་དང་སེམས་དང་སེམས་བྱུང་ཐམས་ཅད་སྙོམས་པའོ། །དེ་ཡང་བསམ་གཟུགས་བརྒྱད་པོ་མ་གཏོགས་འགོགས་པ་ལ་ཚུལ་ཙམ་ལས་དངོས་སུ་མི་འཇུག་པའོ། །འགོགས་པ་ནི་འདུ་ཤེས་དང་ཚོར་བ་འགོག་པ་སྟེ་ཀུན་གཞི་མ་གཏོགས་པའི་རྣམ་ཤེས་བདུན་པོ་བཀག་པའོ། །བཅུ་བདུན་པ་ནི་སྐུ་གསུང་ཐུགས་ཀྱི་མཛད་པ་ལ་གསང་བྱ་ཅི་ཡང་མེད་པས་ཡེ་བསྲུང་ཏེ་བསྲུང་བ་མེད་པ་གསུམ། བཅོ་བརྒྱད་པ་དྲན་པ་ཉེ་བར་བཞག་པ་གསུམ་ནི། འཁོར་གྱིས་གུས་པར་ཉན་པ་དང༌། མ་དད་པར་ཉན་པ་གཉིས་མཉམ་པར་ཆགས་པ་དང་སྡང་བ་མེད་པ་དང་ཆགས་སྡང་
གཉིས་མེད་པ་དང་གསུམ་མོ། །བཅུ་དགུ་པ་བསྙེལ་བ་མི་མངའ་བའི་ཆོས་ཉིད་བརྗེད་པ་མེད་པའོ། ཉི་ཤུ་པ་ཡོངས་དག་བཞི་ནི། རྟེན་ཡོངས་སུ་དག་པ་ནི་ལུས་གཏོང་ལེན་སོགས་ཡོངས་སུ་དག་པ་དང༌། །དམིགས་པ་ཡོངས་སུ་དག་པ་ནི་སྤྲུལ་པ་དང་བསྒྱུར་བ་ཡོངས་སུ་དག་པ་དང༌། ཐུགས་ཡོངས་སུ་དག་པ་ནི་ཏིང་ངེ་འཛིན་བསམ་གྱིས་མི་ཁྱབ་པ་དང༌། ཡེ་ཤེས་ཡོངས་སུ་དག་པ་ནི་ཤེས་བྱ་ཐམས་ཅད་དག་པར་མཁྱེན་པའོ། །ཉེར་གཅིག་པ་ནི། ཉོན་མོངས་པའི་བག་ཆགས་ཡང་དག་པར་བཅོམ་པ་དང༌། མཁྱེན་གསུམ་ནི། གཞི་ཤེས་ནི། ཕུང་པོ་ཁམས་སྐྱེ་མཆེད་ལ་སོགས་པ་ཐམས་ཅད་ཤེས་པ་དང༌། ལམ་ཤེས་ནི་ཉན་རང་བྱང་སེམས་ཀྱི་ལམ་ཐམས་ཅད་ཤེས་པ་དང༌། ཐམས་ཅད་མཁྱེན་པ་ནི་རྣམ་པ་ཐམས་ཅད་ཀུན་ནས་རྟོགས་པར་མཁྱེན་པའོ། །དེ་ལྟ་བུའི་ཡོན་ཏན་དེ་དག་ལས་དྲུག་ཅུ་རྩ་བཞི་ནི་ཐུན་མིན་ཡིན་ལ། ལྷག་མ་རྣམས་ཐུན་མོང་ངོ༌། །དེ་ལྟར་ཡོན་ཏན་སྡེ་ཚན་ཉེར་གཅིག་ཏུ་བཅད་པ་དེ་དག་དབྱེ་ན་བརྒྱ་ཞེ་བཞི་དང་གཞུང་འདི་ནས་བཤད་པའི་སྤྱན་ལྔ་དང་བཅས་བརྒྱ་དང་ཞེ་དགུར་བསྡུས་སོ། །དགེའོ། །ས་ལམ་དང་འབྲས་བུའི་རྣམ་བཞག་འདི་ཉིད་ཆོས་རྗེ་དཔལ་སྤྲུལ་རིན་པོ་ཆེའི་ཡོན་ཏན་མཛོད་འཆད་སྐབས་གཤི་ཆེན་སྤྲུལ་སྐུའི་ཟིན་བྲིས་སུ་གནང་བའོ།། །།