འཇམ་དཔལ་ཁྲོ་ཆུའི་བརྒྱུད་འདེབས།
འཇམ་དཔལ་ཁྲོ་ཆུའི་བརྒྱུད་འདེབས་བཞུགས། །རྡོ་རྗེ་འཆང་ཆེན་འཇམ་དཔལ་ཡེ་ཤེས་སེམས། །ལས་ཀྱི་གཤིན་རྗེ་ཁྲོ་ཆུ་དུག་གི་གདོང་། །འཇམ་དཔལ་བཤེས་གཉེན་པདྨ་འབྱུང་གནས་དང་། །ཁྲག་འཐུང་ནག་པོ་བཱ་སུ་དྷཱ་ར་དང་། །སངས་རྒྱས་ཡེ་ཤེས་གཏེར་སྟོན་ཞང་ཁྲོ་པ། །དར་དབང་ཤཱཀྱ་རྡོ་རྗེ་ཨ་གྲགས་དང་། །ཨ་དབང་མི་བསྐྱོད་རྡོ་རྗེ་ཆོས་རྒྱལ་མཚན། །བྲག་ལྷ་ཨ་རྡོར་བསོད་ནམས་རྣམ་རྒྱལ་དང་། །གྲགས་པ་རིན་ཆེན་ཨ་མོ་གྷ་སིདྡྷི། །ཁྲོ་ཆུ་ལས་གཤིན་རྣམས་ལ་གསོལ་བ་འདེབས། །སངས་རྒྱས་ཡེ་ཤེས་རྒྱལ་བ་རྡོ་རྗེ་དང་། །རོལ་པའི་རྡོ་རྗེ་རང་བྱུང་རྡོ་རྗེ་དང་། །མི་བསྐྱོད་རྡོ་རྗེ་ཛྷཱ་ན་རིན་ཆེན་དང་། །ཆོས་ཀྱི་རྒྱལ་མཚན་བྲག་ལྷ་ཨ་རྡོར་དང་། །བསོད་ནམས་རྣམ་རྒྱལ་གྲགས་པ་རིན་ཆེན་དང་། །ཨ་མོ་གྷ་དང་ཡི་དམ་ཁྲོ་ཆུ་ལ། །གསོལ་བ་འདེབས་སོ་ནུས་པའི་དངོས་གྲུབ་སྩོལ། །སངས་རྒྱས་འཇམ་དབྱངས་པད་འབྱུང་ཁྲག་འཐུང་ནག །ཞང་ཁྲོ་གཡུང་སྟོན་སྐྱོ་སྟོན་གསང་བདག་དང་། །ཞང་སྟོན་འཁོར་ལོ་རྒྱལ་དང་བསོད་རྣམ་རྒྱལ། །སངས་རྒྱས་དཔལ་དང་བསོད་ནམས་མགོན་པོ་དང་། །བསམ་འགྲུབ་རྡོ་རྗེ་ཤཱཀྱ་
འབྱུང་གནས་དང་། །བྱང་ཆུབ་འོད་དང་ཀུན་བཟང་པད་ཐོད་ཕྲེང་། །ཉི་མ་ཐོད་ཕྲེང་དཔལ་འབྱོར་རྒྱ་མཚོ་དང་། །བྱང་ཆུབ་རྒྱ་མཚོ་བསོད་ནམས་རྣམ་རྒྱལ་དང་། །གྲགས་པ་རིན་ཆེན་ཨ་མོ་གྷ་སིདྡྷི། །རཱ་ག་ཨ་སྱ་མ་ཏི་བྷ་དྲའི་མཚན། །ཁྲོ་ཆུ་ཡ་མའི་ཚོགས་ལ་གསོལ་བ་འདེབས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞི་རྒྱས་དབང་དྲག་ཕྲིན་ལས་རྣམ་པ་བཞི། །འབད་མེད་དགོས་པར་ལྷུན་གྱིས་གྲུབ་པ་དང་། །བསམ་དོན་ཡིད་བཞིན་འགྲུབ་པར་བྱིན་གྱིས་རློབས། །ཕྱི་ནང་བར་ཆད་ཐམས་ཅད་ཞི་བ་དང་། །ཚེ་འདི་ཉིད་ལ་ཡི་དམ་ཞལ་མཐོང་ནས། །མཆོག་དང་ཐུན་མོང་དངོས་གྲུབ་ཐོབ་པ་དང་། །བཅུ་གསུམ་རྡོ་རྗེ་འཛིན་པའི་ས་ཐོབ་ཤོག །ཅེས་འཇམ་དཔལ་ཁྲོ་ཆུའི་བརྒྱུད་རིམས་གསོལ་འདེབས་༧ ཀརྨ་ཨ་རཱ་གས་སོ། །མངྒ་ལཾ།། །།