བསྟོད་ཚོགས་ནོར་བུའི་ཕྲེང་བ།
མི་འཕྲོག་པའི་མཁྱེན་རབ་དང་ཐུགས་རྗེ་ལྡན་པ་སྡེ་གཞུང་སྤྲུལ་སྐུ་རིན་པོ་ཆེ་འཇམ་དབྱངས་ཀུན་དགའ་བསྟན་པའི་རྒྱལ་མཚན་དཔལ་བཟང་པོའི་བཀའ་འབུམ་ལས་བསྟོད་ཚོགས་ནོར་བུའི་ཕྲེང་བ་ཞེས་བྱ་བ་བཞུགས་སོ། །
ཐུབ་པའི་དབང་པོའི་བསྟོད་པ།
བླ་མ་དང་འཇམ་པའི་དབྱངས་ལ་ཕྱག་འཚལ་ལོ། །མཚན་དཔེའི་གཟི་འོད་འབར་བའི་སྐུ་མཆོག་འགྲོ་ཀུན་མིག་གི་བདུད་རྩིར་གྱུར། །སྣ་ཚོགས་འགྲོ་བའི་བློ་དང་འཚམ་པར་ཐེག་གསུམ་ཆོས་ཀྱི་སྒྲ་ཆེན་བསྒྲགས། །ཡུལ་དང་ཡུལ་ཅན་གཉིས་སུ་འཛིན་པའི་རྟོག་པ་མཐའ་དག་ནུབ་གྱུར་ཀྱང་། །མ་འདྲེས་ཆོས་ཀུན་སྒྲིབ་མེད་གཟིགས་པ་ཐུབ་དབང་འགྲོ་བའི་བླ་མར་འདུད། །སྐྱེ་མེད་ཆོས་ཀྱི་དབྱིངས་ལས་མ་གཡོས་ཀྱང་། །གྲངས་མེད་འཇིག་རྟེན་ཁམས་སུ་སྐད་ཅིག་ལ། །འགག་མེད་སྐུ་ཡི་རྣམ་རོལ་སྟོན་མཛད་པ། །མཚུངས་མེད་ལྷཡི་འདྲེན་པ་མཆོག་ལ་འདུད། །བརྗོད་བྲལ་གསུང་གིས་ཆོས་ཉིད་མི་འདོར་བར། །ཁམས་དང་དབང་པོ་མོས་པ་ཐ་དད་པའི། །སྣ་ཚོགས་འགྲོ་བའི་རྣ་བར་ཆོས་ཀྱི་སྒྲ། །བློ་དང་འཚམས་པར་སྐད་ཅིག་ཉིད་ལ་སྒྲོག །རྟོག་པའི་མཚན་མ་མཐའ་དག་ཉེར་ཞི་ཡང་། །མཐའ་ཀླས་འགྲོ་རྣམས་ཐུགས་རྗེས་མི་གཏོང་ཞིང་། །ཆོས་རྣམས་དེ་ཉིད་ལྐོག་ཏུ་གྱུར་བ་མེད། །དེ་ཕྱིར་ཁྱོད་ཐུགས་གཞལ་བྱའི་ཡུལ་ལས་འདས། །བགྲངས་ཡས་བསྐལ་པར་ཚོགས་གཉིས་ལེགས་བསྒྲུབས་ཤིང་། །ཉེས་ཚོགས་མ་ལུས་རྣམ་པར་སྤངས་པའི་མཐུས། །གནས་དང་གནས་མིན་མཁྱེན་པ་ལ་སོགས་པའི། །བྲལ་སྨིན་ཡོན་ཏན་རྒྱ་མཚོའི་ཕ་མཐར་སོན། །འདྲེན་པ་ཁྱོད་ཀྱི་མཛད་འཕྲིན་ཡིད་བཞིན་ནོར། །འབད་དང་རྩོལ་བའི་རྟོག་པ་ཀུན་ཞི་ཡང་། །སྨོན་པའི་རྒྱལ་མཚན་རྩེ་མོར་ལེགས་མཆོད་ཚེ། །འགྲོ་ཀུན་རེ་བ་ཡོངས་སུ་སྐོང་བར་མཛད། །རབ་འབྱམས་ཞིང་གཙོ་ཐུབ་པའི་དབང་པོ་ལ། །རབ་དང་ཡིད་ཀྱིས་ཅུང་ཟད་བསྟོད་པའི་མཐུས། །རབ་ཏུ་དགྱེས་པའི་ཞལ་བཟང་ལེགས་བསྟན་ནས། །རབ་དགའི་ས་དེ་མངོན་དུ་འགྱུར་བར་ཤོག །ཅེས་ཐུབ་པའི་དབང་པོའི་གསང་གསུམ་ཕྲིན་ལས་དང་བཅས་པའི་ཡོན་ཏན་གྱི་ཆ་ལ་གནས་ཚུལ་གྱི་སྒོ་ནས་བསྟོད་པ་ཤཱཀྱའི་དགེ་ཚུལ་ཀུན་དགའ་རྒྱལ་མཚན་གྱིས་སྦྱར་བའོ། །དགེའོ། །
དཔལ་ས་སྐྱ་པཎྜི་ཏ་ཆེན་པོའི་ཞབས་ལ་བསྟོད་པ་མེ་ཏོག་ཕྲེང་བ།
བླ་མ་དང་འཇམ་པའི་དབྱངས་ལ་ཕྱག་འཚལ་ལོ། །ཤེས་བྱ་མཐའ་དག་རྣམ་ཀུན་གཟིགས་པས་འཇིགས་མེད་སྤོབས་པའི་གདེང་དང་ལྡན། །ལུང་དང་རིག་པའི་ང་རོ་བསྒྲགས་པས་ཕས་རྒོལ་སྦྱིན་སྐྱེས་ཚོགས་རྣམས་བསྐྲད། །འཆད་རྩོད་རྩོམ་པའི་རལ་ལྗང་གཡོ་ཞིང་ཐུབ་བསྟན་གངས་རིའི་རྒྱན་གྱུར་པ། །འཇམ་དབྱངས་བླ་མའི་ཞབས་ཀྱི་པདྨོ་ཚེ་རབས་ཀུན་ཏུ་ཐོད་དུ་འཆང་། །འདྲེན་པ་ཁྱོད་ཀྱི་དཔག་ཡས་ཡོན་ཏན་ནི། །འཕགས་མཆོག་གིས་ཀྱང་བརྗོད་པར་ནུས་མིན་ན། །བྱིས་པའི་བློ་ཅན་བདག་འདྲའི་ཡུལ་མིན་མོད། །འོན་ཀྱང་གུས་པའི་ཡིད་ཀྱིས་ཅུང་ཟད་བརྗོད། །གངས་རིའི་ལྗོངས་འདིར་མཁས་དང་གྲུབ་པ་ཡི། །སྐྱེས་མཆོག་བྱེ་བ་ལས་ལྷག་བྱུང་མོད་ཀྱང་། །འདྲེན་པའི་རྣམ་ཐར་འགྲན་ནུས་མ་མཆིས་པས། །དེ་ཕྱིར་བདག་བློ་ཁྱོད་ཀྱི་རྗེས་སུ་ཕྱོགས། །བླང་དོར་འབྱེད་པའི་བློ་གྲོས་མིག་བྲལ་བའི། །ཁ་བ་ཅན་ལྗོངས་འགྲོ་ལ་བརྩེར་དགོངས་ནས། །བསམ་བཞིན་དཔལ་ལྡན་ས་སྐྱའི་གཙུག་ལག་ཏུ། །ངོ་མཚར་ལྟས་བཅས་ལེགས་པར་འཁྲུངས་ལ་འདུད། །གང་སྔོན་འཇམ་དཔལ་དབྱངས་དངོས་ལྷག་པའི་ལྷར། །ཡང་ཡང་བསྟེན་ཅིང་རྗེས་སུ་བཟུང་གྱུར་པས། །ཚེ་འདིར་དབུ་ཚད་གྲུབ་མཐའི་རྣམ་དབྱེ་སོགས། །གཞུང་ལུགས་ཀུན་ལ་མཁྱེན་རབ་ཕུལ་དུ་གྱུར། །སྲས་བཅས་རྒྱལ་བ་དགྱེས་པར་བྱེད་པ་ཡི། །འཆད་པ་ངག་གི་འོད་སྟོང་རབ་སྤྲོས་པས། །ཁྱོད་ཀྱིས་རྣམ་གྲོལ་དོན་གཉེར་སྐྱེ་བོ་ཡི། །རྣམ་དཔྱོད་བློ་ཡི་པདྨོ་བཞད་པར་མཛད། །མུ་སྟེགས་བྱེད་དང་ཁ་བ་ཅན་ལྗོངས་ཀྱི། །སྐྱེ་བོ་དེ་རྗེས་འབྲང་བའི་ལོག་རྟོག་རྣམས། །ཁྱོད་ཀྱིས་ལུང་རིགས་མཚོན་ཆའི་ཆར་ཕབ་ནས། །བསྟན་པའི་ཚེར་མ་མཐའ་དག་འཇོམས་པར་བྱས། །དངོས་སྟོབས་རིག་པའི་ལམ་གྱིས་ལེགས་བསྒྲུབས་ནས། །ཟབ་དང་རྒྱ་ཆེའི་དེ་ཉིད་གསལ་བྱེད་ཅིང་། །བློ་ལྡན་སྐྱེ་བོའི་བློ་མུན་རབ་འཇོམས་པའི། །བསྟན་བཅོས་བདུད་རྩི་ལྟ་བུའི་དགའ་སྟོན་བསྩལ། །ཇི་སྙེད་ཆོས་ཀུན་རྨི་ལམ་སྒྱུ་མ་དང་། །སྨིག་རྒྱུ་ཆུ་ཟླ་ལྟ་བུར་ལེགས་རྟོགས་ནས། །གཉིས་འཛིན་འཁྲུལ་པའི་དྲི་མས་མ་བསླད་པར། །སྐྱེ་མེད་ཆོས་ཉིད་སྤྲོས་དང་བྲལ་བར་གཟིགས། །བཟོད་མེད་སྡུག་བསྔལ་ཁུར་གྱིས་མནར་བ་ཡི། །ཉམ་ཐག་འགྲོ་བ་ཁྱོད་ཀྱིས་གཟིགས་གྱུར་ན། །གཅེས་པའི་སྐུ་སྲོག་དག་ཀྱང་སྟེར་ནུས་པའི། །རྨད་བྱུང་ཐུགས་རྗེ་ཆེན་པོ་ཁྱོད་ལ་མངའ། །དཔག་མེད་འགྲོ་བ་སྲིད་པའི་རྒྱ་མཚོ་ལས། །གང་གི་མཐུ་ཡིས་ལེགས་པར་བསྒྲལ་བྱས་ནས། །རྣམ་གྲོལ་བདེ་བ་སྦྱིན་པའི་སྟོབས་མངའ་བ། །ཁྱོད་ཀྱི་མཛད་པ་སངས་རྒྱས་དག་དང་མཉམ། །ཞིང་འདིར་བསྟན་འགྲོའི་མཛད་པ་མཐར་ཕྱིན་ནས། །རེ་ཞིག་མྱ་ངན་འདའ་བའི་ཚུལ་བསྟན་ཀྱང་། །ཤར་ཕྱོགས་མངོན་པར་དགའ་བའི་འཇིག་རྟེན་ན། །མགོན་ཁྱོད་ས་བཅུའི་དཔལ་ལ་རོལ་ཞེས་ཐོས། །དེ་ཕྱིར་མི་བྱེད་དད་པས་གསོལ་འདེབས་ན། །རྡུལ་བྲལ་ཡེ་ཤེས་སྤྱན་གྱིས་ལེགས་གཟིགས་ནས། །མི་ཤེས་རྨོངས་པའི་ཞགས་པས་དམ་བཅིངས་པའི། །དམན་པ་བདག་ལ་རྣམ་དཔྱོད་བློ་གྲོས་སྩོལ། །འཇམ་དབྱངས་ངུར་སྨྲིག་འཆང་བའི་ཚུལ་འཛིན་པ། །མགོན་ཁྱོད་ལྷག་པའི་ལྷ་ཡིས་རྗེས་བཟུང་ནས། །མངོན་སུམ་ལུང་བསྟན་དབུགས་དབྱུང་བསྩལ་བ་སོགས། །གསང་བ་བླ་ན་མེད་པའི་རྣམ་ཐར་ནི། །རབ་དགའི་སར་གནས་རྒྱལ་སྲས་མཆོག་གིས་ཀྱང་། །གཞལ་བར་དཀའ་ན་བདག་འདྲའི་བློ་ལས་འདས། །འོན་ཀྱང་ཅུང་ཟད་བརྗོད་པའི་བསོད་ནམས་ཀྱིས། །འདི་ནས་བྱང་ཆུབ་སྙིང་པོ་མ་ཐོབ་པར། །དལ་འབྱོར་རྟེན་ཐོབ་སངས་རྒྱས་བསྟན་དང་མཇལ། །དམ་པས་རྗེས་བཟུང་ཕྱི་ནང་ཤེས་བྱའི་ཆོས། །མ་ལུས་རྟོགས་ཤིང་གཞན་ལ་སྟོན་ནུས་པའི། །བློ་གྲོས་གསལ་པོའི་མིག་དང་ལྡན་གྱུར་ཅིག །མགོན་ཁྱོད་རྗེ་བཙུན་མཆོག་གིས་ལུང་བསྟན་ལྟར། །དྲི་མ་མེད་དཔལ་ཞེས་བྱར་སངས་རྒྱས་ཚེ། །འདུས་པ་དང་པོའི་འཁོར་དུ་བདག་གྱུར་ནས། །འགྲོ་བའི་འདྲེན་པ་ལུང་བསྟན་ཐོབ་པར་ཤོག །ཅེས་པ་འདི་ནི་ཤཱཀྱའི་དགེ་ཚུལ་ཀུན་དགའ་རྒྱལ་མཚན་གྱིས་སུག་བྲིས་སུ་བགྱིས་པ་མངྒ་ལཾ། དགེའོ།། །།
འགྲོ་མགོན་ཆོས་རྒྱལ་འཕགས་པ་ལ་བསྟོད་པ།
བླ་མ་དང་ལྷག་པའི་ལྷ་ལ་གུས་པས་ཕྱག་འཚལ་ལོ། །ཇིང་གིར་གནམ་གྱི་རྒྱལ་པོ་ལ་སོགས་ཆེ་རྒུའི་གཙུག་ཏོར་མཐོན་པོའི་རྩེར། །ལེགས་པར་བཀོད་པའི་ཞབས་ཀྱི་རྡུལ་དཀར་ཆ་ཤས་རེས་ཀྱང་ས་གསུམ་མུན། །དག་པར་བྱེད་ཅིང་ཐུབ་བསྟན་ཀུན་དའི་འཛུམ་དཀར་བསུ་བའི་ཕྲིན་ལས་ཅན། །ཐུབ་དབང་གཉིས་པ་ཆོས་ཀྱི་རྒྱལ་པོ་བློ་གྲོས་རྒྱལ་མཚན་ཞབས་ལ་འདུད། །གང་གི་ཐུགས་སུ་རིང་ནས་ཆུད་པའི་གསང་གསུམ་ཡོན་ཏན་རྒྱལ་རྣམས་དང་། །གཉིས་སུ་མེད་ཀྱང་མཐས་ཡས་འགྲོ་ལ་བརྩེ་ཆེན་ཐུགས་རྗེ་བདག་རྐྱེན་གྱིས། །སྤྲུལ་པའི་སྒྱུ་འཕྲུལ་ནམ་ཡང་མ་འགགས་འོད་གསལ་འཁོན་རིགས་མཁའ་དབྱིངས་ལས། །ངོ་མཚར་གཟུགས་སྐུའི་ཉིན་མོར་བྱེད་པ་གངས་ལྗོངས་སྐྱེ་དགུའི་དཔལ་དུ་ཤར། །ཆུང་ངུའི་དུས་ནས་ཡོན་ཏན་ཀུན་རྫོགས་དུས་གསུམ་སྒྲིབ་མེད་ས་ལེར་གཟིགས། །རིང་དུ་སྦྱངས་པའི་བློ་ཆེན་རྣམས་ཀྱང་ཡིད་ལ་ཞུམ་པ་བསྐྱེད་པར་གྱུར། །བྱིས་པའི་ངང་ཚུལ་ཀུན་ལས་འདས་པའི་གཞོན་ནུ་འདི་ནི་འགྲོ་བའི་མགོན། །འཕགས་པ་ཡིན་ཞེས་མཚན་གྱི་ཅོད་པན་དེ་ཡི་ཚེ་ན་ཁྱོད་ཀྱིས་བརྙེས། །རྒྱ་མཚོ་ཆུ་ཡི་གཏེར་དུ་གྱུར་ཀྱང་ཆུ་ཡིས་ངོམས་པ་མེད་པ་ལྟར། །མཁས་པའི་ཡོན་ཏན་ལྷུན་གྱིས་གྲུབ་ཀྱང་མགོན་ཁྱོད་མཁས་པའི་ཚུལ་ལ་སློབ། །འཇམ་པའི་དབྱངས་དང་གཉིས་སུ་མེད་ཀྱང་འཇམ་དབྱངས་བླ་མ་གུས་པས་བསྟེན། །མི་སློབ་ལམ་མཆོག་མངོན་དུ་གྱུར་ཀྱང་ད་དུང་སློབ་པའི་བརྟུལ་ཞུགས་འཛིན། །སྟོབས་བཅུའི་ཡེ་ཤེས་མངོན་དུ་བྱས་ཤིང་དབང་བཅུའི་དབང་གིས་ཕྱུག་པའི་མཐུས། །སྟོབས་འབྱོར་ཁེངས་དྲེགས་ཆང་གིས་མྱོས་པའི་རྒྱལ་ཕྲན་འབུམ་ལ་དབང་བསྒྱུར་བའི། །ཚེ་རིང་གནམ་གྱི་ཤེ་མོང་ཐོབ་པ་རྒྱ་ནག་རྒྱལ་པོས་གུས་བཏུདདེ། །ཁམས་གསུམ་ཆོས་ཀྱི་རྒྱལ་པོར་མངའ་གསོལ་འཛམ་གླིང་བསྟན་པའི་བདག་པོར་བསྐོས། །དེ་ཚེ་གང་ཐུགས་མཁའ་དབྱིངས་མཐོན་པོར་བརྩེ་བའི་ཆུ་འཛིན་དཀྲིགས་པ་ལས། །ཟབ་རྒྱས་ཆོས་ཀྱི་ཆར་བཟང་ཕབ་སྟེ་འགྲོ་བའི་དགེ་བའི་ལོ་ཏོག་བསྐྲུན། །ཆོས་ཀུན་སྒྱུ་མ་ལྟ་བུར་གཟིགས་པ་ཆོས་བརྒྱད་རྟོག་པ་མི་མངའ་ཞིང་། །རྫུ་འཕྲུལ་ཏིང་འཛིན་སྣ་ཚོགས་བརྙེས་ཀྱང་རེ་ཞིག་མངོན་པར་འདུ་མ་མཛད། །རྟོགས་ལྡན་འགའ་ཞིག་བྱིས་པའི་སྐྱེ་བོ་ཕལ་པ་དབང་དུ་བསྡུ་བའི་ཕྱིར། །འཇིག་རྟེན་པ་དང་ཐུན་མོང་གྱུར་པའི་རྫུ་འཕྲུལ་འགྱེད་ལ་བརྩོན་པར་གྱུར། །རྨོངས་པ་ཕལ་ཆེར་དེ་ལ་གུས་ཤིང་གཞན་དག་ཆོས་ནི་འདི་ཉིད་ལ། །གདུལ་བྱའི་དད་པའི་མྱུ་གུ་སྤེལ་སླད་ཆོ་འཕྲུལ་སྟོན་པར་བཛོད་ཅེས་བསྐུལ། །དེ་ཚེ་རལ་གྲི་རྣོན་པོས་བཅད་པའི་རང་གི་ཡན་ལག་རྣམ་པ་ལྔ། །རིགས་ལྔའི་རྒྱལ་བའི་ཞིང་དུ་སྤྲུལ་ནས་རྒྱལ་པོ་འཁོར་དང་བཅས་ལ་བསྟན། །དེ་དག་ཀུན་ཀྱང་དེ་ལ་དད་ནས་མཆོད་ཅིང་གསོལ་བ་བཏབ་པའི་མཐར། །སྐུ་ཡི་བུམ་པ་ཉམ་ཉེས་གྱུར་པའི་སྣང་ཚུལ་དེ་ཡང་མཐོང་བར་མཛད། །དེ་དག་འཇིགས་ཤིང་སྐྲག་པའི་ངང་ནས་ཀྱེ་མ་འཇམ་མགོན་སྤྲུལ་པའི་སྐུ། །རྣམ་འཕྲུལ་འདི་དག་བསྡུ་བར་མཛོད་ཅེས་གདུང་པའི་དབྱངས་ཀྱིས་གསོལ་བ་བཏབ། །སླར་ཡང་ཏིང་འཛིན་དེ་ལས་བཞེངས་ནས་དེ་དག་དབུགས་དབྱུང་མཛད་པ་ལས། །གནམ་སའི་དབང་ཕྱུག་འཁོར་དང་བཅས་པ་ཤིན་ཏུ་དགའ་བའི་སྒྲ་འབྱིན་ཅིང་། །འདི་ན་ལ་ལ་མཁས་པར་གྱུར་ཀྱང་གྲུབ་པའི་གོ་འཕང་ཐོབ་པ་མེད། །འགའ་ཞིག་གྲུབ་པའི་བརྟུལ་ཞུགས་འཆང་ཡང་མཁྱེན་པའི་སྤྱན་རས་གསལ་མ་གྱུར། །མཁས་དང་གྲུབ་པ་གཉིས་ཀར་གྱུར་པའི་སྐྱེས་ཆེན་དམ་པ་འདི་འདྲ་བ། །ཨེ་མ་སྐྱབས་ཀྱི་ཡུལ་དུ་ཐོབ་པ་བདག་ཅག་སྐལ་བ་བཟང་ཞེས་གླེང་། །ལྗོངས་དེའི་མཛད་པ་རེ་ཞིག་རྫོགས་ནས་སླར་ཡང་བོད་དུ་གཤེགས་པའི་ཚེ། །ཁྱོད་སྐུའི་པདྨོ་ཡོན་ཏན་བསུང་ལྡན་གདམས་པའི་སྦྲང་རྩི་བསྒོས་པ་དང་། །བསྟོད་དབྱངས་དར་དིར་སྙན་པར་སྒྲོག་པའི་ས་ཆེན་མངའ་བ་འཁོར་དང་བཅས། །དད་ལྡན་བློ་གསལ་བུང་བའི་ཚོགས་རྣམས་འབྲལ་བར་མ་ཕོད་རྗེས་སུ་འབྲངས། །ཉི་ཟླ་ལྟ་བུའི་མཆོད་ཡོན་གཉིས་པོ་སོ་སོར་གྱེས་པའི་དུས་ཀྱི་ཚེ། །ཤར་ནུབ་གཉིས་ནས་ནམ་མཁའི་གླང་པོ་དར་དཀར་བརྐྱང་འདྲའི་རྩེ་མོ་རུ། །གྲུབ་བརྒྱའི་གཙོ་བོ་བིཪྺ་པ་དང་རྣལ་འབྱོར་དབང་ཕྱུག་བརྩེ་བ་ཆེ། །རྒྱལ་དང་དེ་སྲས་ཚོགས་ཀྱིས་བསྐོར་བ་མངོན་སུམ་སྐྱེས་ཀྱི་ཚུལ་དུ་བསྟན། །གཞན་ཡང་རྣམ་འཕྲུལ་སྣ་ཚོགས་བསྟན་ནས་བསོད་ནམས་སྟོབས་ཀྱིས་འཁོར་ལོས་བསྒྱུར། །དད་པའི་དབང་གིས་མཆི་མའི་རི་མོས་གདོང་བ་སྐྱ་བོར་གྱུར་པ་ཡི། །སློབ་མའི་གཙོ་བོ་མི་ཡི་བདག་པོ་གྲངས་མེད་འཁོར་གྱི་ཚོགས་དང་བཅས། །རྗེས་སུ་འཛིན་པའི་ལུང་བསྟན་མཛད་ནས་རང་གི་ཡུལ་དུ་བཀྱེས་ཞེས་གྲགས། །གཙང་ཕྱོགས་ཆོས་ཀྱི་འབྱུང་གནས་ཆེན་པོར་ཞབས་ཀྱི་པདྨོ་ལེགས་བཀོད་དེ། །གནས་བརྟན་མཆིམས་སྟོན་ཆེན་པོ་ལ་སོགས་ཆོས་སྨྲ་ཁྲི་འཛིན་དགུ་བརྒྱ་དང་། །སྟོང་ཕྲག་བརྒྱ་དང་བརྒྱད་ཅུའི་གྲངས་འཛིན་དགེ་འདུན་འདུས་པའི་ཚོགས་དང་བཅས། །དཔག་ཡས་གདུལ་བྱའི་འཁོར་གྱི་དབུས་སུ་ཟབ་རྒྱས་ཆོས་འཁོར་བསྐོར་བའི་ཚེ། །ལྷ་མིའི་སྟོན་པའི་བསྟན་ལ་དགའ་བའི་ལྷ་ཚོགས་གང་ན་འཁོད་པ་རྣམས། །ཡིད་འོང་སྤྲིན་དཀར་འཛུམ་པའི་ཁྲོད་ནས་ཡིད་འཕྲོག་ལུས་བྱེད་ཐོན་པ་ཡི། །མཆོད་སྤྲིན་རྒྱ་མཚོ་རྣམ་པར་སྤྲུལ་ནས་མགོན་ཁྱོད་མཆོད་པའི་ལྟད་མོ་འདི། །དད་ལྡན་སྐྱེ་བོ་ཀུན་གྱིས་མཐོང་བས་ཕལ་ཆེར་དད་པའི་ས་ལ་བཀོད། །ཡིད་འོང་བསུང་ལྡན་མེ་ཏོག་ཆར་འབེབས་འཇའ་སྤྲིན་མཛེས་པའི་གུར་ཁྱིམ་དུ། །ཕྱོགས་བཅུའི་རྒྱལ་བ་དེ་སྲས་བཅས་པ་མངོན་སུམ་བཞུགས་ནས་མགོན་ཁྱོད་དང་། །ཟབ་མོའི་ཆོས་ཀྱི་བཀའ་མཆིད་མཛད་པ་དམ་པའི་ཡོངས་འཛིན་བཅུ་གཅིག་སོགས། །དད་པའི་འདྲེན་བྱེད་རྣམ་པར་དག་པའི་སྐལ་ལྡན་སྐྱེ་བོ་ཀུན་གྱིས་མཐོང་། །རིགས་པའི་རལ་གྲིས་ཁྱོད་ཀྱི་རྣམ་ཐར་རིགས་དང་མི་རིགས་དཔྱད་པ་ན། །བ་བསྟན་སྐྱོང་བའི་ཁུར་ཆེན་བསྣམས་པ་ཐུབ་པ་གནས་བསྟན་བཅུ་དྲུག་གིས། །རྒྱལ་བའི་བསྟན་པ་ཚུལ་བཞིན་འཛིན་པ་རྒྱལ་སྲས་འདི་ཡིན་གཞན་མིན་ཞེས། །ཀུན་གྱི་ཡིད་ལ་ངེས་པ་སྐྱེད་སླད་ཀུན་ཀྱང་ཁྱོད་ཀྱི་དྲུང་དུ་བྱོན། །ཡོན་ཁྲི་ཆངས་སང་ཆེན་པོ་ལ་སོགས་དག་པའི་འཁོར་གྱིས་བསྐོར་བའི་ཚེ། །སྔ་མ་མྱོང་བའི་དྲི་བསུང་འཐུལ་ཞིང་གནས་ཡུལ་མཁའ་འགྲོའི་ཚོགས་རྣམས་ཀྱིས། །མཆོད་པའི་དྲི་འདི་ཁྱོད་ཀྱིས་མི་བཟོད་བྱིན་རླབས་བདུད་རྩི་འདི་མྱོང་ལ། །གུས་པའི་ཡིད་ཀྱིས་གསོལ་བ་ཐོབ་དང་རྗེས་སུ་འཛིན་པར་འགྱུར་ཞེས་གསུངས། །དེའི་ཚེ་མདུན་མཁར་འཕགས་པའི་ཡུལ་གྱི་རིག་འཛིན་གྲུབ་ཐོབ་བརྒྱད་ཅུའི་ཚོགས། །དཔའ་བོ་མཁའ་འགྲོའི་འཁོར་གྱིས་བསྐོར་བ་མངོན་སུམ་བྱོན་ནས་གདམས་པ་དང་། །ལུང་བསྟན་མངའ་གསོལ་ལེགས་པར་མཛད་དེ་སླར་ཡང་མི་སྣང་གྱུར་པ་འདི། །རིག་འཛིན་རྒྱ་མཚོའི་དེད་དཔོན་ཉིད་དུ་མགོན་ཁྱོད་གཞན་ལ་སྒྲོག་པ་འདྲ། །མདོར་ན་སྔོན་ཆད་རྒྱལ་བ་མང་པོའི་ཕྲིན་ལས་སྣོད་དུ་མ་གྱུར་པའི། །ཆེར་སྙིགས་རྒུད་པའི་དུས་ཀྱི་སྐྱེ་བོ་ཤིན་ཏུ་གཏུམ་པའི་ངང་ཚུལ་ཅན། །མི་སྲུན་གདུལ་དཀའི་འགྲོ་བ་ཕལ་ཆེར་སྣ་ཚོགས་ཐུགས་རྗེའི་ཐབས་མཁས་ཀྱིས། །རྣམ་གྲོལ་ཐར་བའི་ལམ་ལ་བཀོད་འདི་རྒྱལ་སྲས་ཁྱོད་ཀྱི་རྣམ་ཐར་ལགས། །འགྲོ་ཁམས་རྒྱ་མཚོའི་ལས་ཉོན་ཆུ་མཚོ་བསྐམས་པར་མ་གྱུར་དེ་སྲིད་དུ། །ཐུགས་རྗེ་དབང་ཕྱུག་རྒྱལ་སྲས་ཉི་མའི་ཕྲིན་ལས་སྣང་བ་མི་འགག་མོད། །བསིལ་ལྡན་ལྗོངས་ཀྱི་བསྟན་འགྲོའི་མཛད་པ་རེ་ཞིག་རྫོགས་པའི་དུས་ཀྱི་ཚེ། །ཆོས་ཀྱི་རྒྱལ་པོའི་གཟུགས་སྐུའི་བཀོད་པ་ཆོས་ཀྱི་དབྱིངས་སུ་བསྡུ་བར་མཛད། །རྒྱལ་ཀུན་ཡེ་ཤེས་སྒྱུ་མའི་རྣམ་རོལ་འཇམ་དཔལ་རྣོན་པོ་མི་གཟུགས་ཅན། །ངོ་མཚར་རྟོགས་བརྗོད་ནམ་མཁའི་མཐའ་བརྒལ་སྲིད་གསུམ་མཚུངས་མེད་ས་སྐྱ་པ། །རྒྱལ་སྲས་བྱེ་བའི་ཕྲིན་ལས་ཤུགས་འཆང་འཇམ་མགོན་གོང་མའི་རྣམ་ཐར་འདི། །གང་ཚེ་ཡིད་ལ་དྲན་པའི་མོད་ལ་སྙིམ་པའི་ཆུ་སྐྱེས་སྤྱི་བོར་ཟུམ། །རྒྱལ་བ་གཉིས་པ་འཕགས་པ་མཆོག་གི་རྣམ་ཐར་ནམ་མཁའི་མུ་ཁྱུད་ཅན། །ཇི་བཞིན་གཞལ་བའི་བློ་ཡི་ནུས་པ་རྨོངས་པ་བདག་ལ་མ་མཆིས་པས། །མདོ་ཙམ་བརྗོད་པའི་ལེགས་བྱས་འདི་ཡིས་ནམ་མཁའི་རྗེས་འགྲོ་ལུས་ཅན་གྱི། །སྲིད་ཞིའི་རྒུད་པ་མཐའ་དག་ཞི་ནས་ཐུབ་དབང་གོ་འཕང་ཐོབ་པར་ཤོག །བརྟན་པའི་འཁོར་ལོ་མི་གཟུགས་ཅན། །འཇམ་དབྱངས་ཆོས་ཀྱི་བློ་གྲོས་ཀྱི། །བཀའ་ལུང་གསེར་གྱི་ཅོད་པན་ནི། །གུས་པས་སྤྱི་བོར་བླངས་ནས་ནི། །ལས་ངན་དུས་སུ་སྨིན་པའི་མཐུས། །མི་འདོད་སྣ་དགུས་གདུང་བ་ཡི། །རྨོངས་པ་ཀུན་དགའི་མིང་ཅན་གྱིས། །གང་དྲན་ཡི་གེའི་ལམ་དུ་སྤེལ། །
འཕགས་མ་དབྱངས་ཅན་དམར་མོའི་བསྟོད་པ་དང་གསོལ་འདེབས།
ཡིད་འོང་ལང་ཚོའི་དཔལ་ཀུན་ལེགས་བསྡུས་ནས། །མཚར་སྡུག་རྫོགས་པར་ལྷ་མོའི་སྐུར་སྣང་བ། །བྱི་རུའི་མདངས་འཛིན་མཚན་དཔེའི་གཟི་འབར་བ། །དབྱངས་ཅན་འཕགས་མའི་སྐུ་ལ་ཕྱག་འཚལ་ལོ། །རྒྱལ་ཀུན་གསུང་གི་ཕྲིན་ལས་མ་ལུས་པ། །ལོངས་སྤྱོད་འཁོར་ལོར་འདུས་པའི་རྟེན་འབྲེལ་གྱིས། །དྲུག་ཅུའི་ཉམས་འགྱུར་རྫོགས་པའི་དབྱངས་ལྡན་པ། །ངག་དབང་ལྷ་མོའི་གསུང་ལ་ཕྱག་འཚལ་ལོ། །ཇི་སྙེད་ཤེས་བྱའི་ཆུ་ཀླུང་མ་ལུས་པ། །ཟབ་ཡངས་མཁྱེན་པའི་སྣོད་དུ་འཁྱིལ་བ་ཡི། །ཡེ་ཤེས་རྒྱ་མཚོ་གཏིང་མཐའ་མི་མངོན་པའི། །རྒྱ་མཚོའི་ལྷ་མོའི་ཐུགས་ལ་ཕྱག་འཚལ་ལོ། །སྟོབས་བཅུའི་ཆུ་གཏེར་མཁའ་མཐའི་རྗེས་འགྲོ་བ། །མ་འདྲེས་རིན་ཆེན་བྱེ་བས་ཡོངས་སུ་གཏམས། །མི་འཇིགས་རྣམ་བཞིའི་རྦ་རླབས་གཡོ་བ་ཡི། །འཕགས་མའི་ཡོན་ཏན་རྒྱ་མཚོ་ལ་ཕྱག་འཚལ། །མཐའ་ཡས་གདུལ་བྱའི་མཁའ་ལ་ཟེར་འཕྲོབའི། །ཕྲིན་ལས་འོད་སྟོང་བདག་པོའི་གཟི་བྱིན་གྱིས། །སྐལ་བཟང་སྙིང་གི་ཆུ་སྐྱེས་རྒྱས་མཛད་པ། །རྒྱལ་ཡུམ་འཕགས་མའི་མཛད་པ་ལ་ཕྱག་འཚལ། །སྲིད་པར་བཞུགས་ཀྱང་སྐྱོན་གྱིས་མ་གོས་ཤིང་། །ཞི་བ་བརྙེས་ཀྱང་དེ་ལ་མ་ཆགས་པའི། །མགོན་མེད་བདག་གི་མགོན་གཅིག་རྗེ་བཙུན་མའི། །རབ་མཛེས་ཞབས་ཀྱི་པདྨ་ལ་ཕྱག་འཚལ། །སྐུ་མཆོག་མཐོང་ན་ཡིད་ཀྱི་མུན་པ་སེལ། །གསུང་དབྱངས་ཐོས་ན་མ་རིག་གཉིད་ལས་སློང་། །ཁྱོད་ཐུགས་དྲན་པས་སྲིད་ཞིའི་འཇིགས་འཕྲོག་པ། །བྱིན་རླབས་གཏེར་མཛོད་འཕགས་མ་ལ་ཕྱག་འཚལ། །ལག་པའི་ཨུཏྤལ་སྙིང་གི་ཐད་དུ་ཟུམ། །མཆི་མི་རྒྱུན་གྱིས་གདོང་བ་འཁྲུད་བཞིན་དུ། །བྱམས་པའི་མ་ཁྱོད་རྗེས་སུ་དྲན་ལགས་ན། །མངོན་སུམ་རྗེས་སུ་ཟུངས་ཤིག་དབྱངས་ཅན་མ། །མཛེས་པའི་སྐུ་མཆོག་མིག་གིས་མཐོང་བཞིན་དུ། །སྙན་པའི་གསུང་གིས་དབུགས་དབྱུང་ཐོབ་པ་དང་། །ཡིད་འོང་ཕྱག་གིས་མགོ་ལ་ཕྱུག་ནས་ནི། །མ་ཡིས་བུ་བཞིན་སྐྱོངས་ཤིག་དབྱངས་ཅན་མ། །རང་སྡུག་དྲན་པའི་ངུ་ངག་འབྱིན་པ་ལས། །བྱིས་པ་བདག་གིས་དེ་སྤོང་མ་ནུས་པས། །དགེ་ལེགས་སྤེལ་ཞིང་ཉེས་ལས་སྐྱོབ་པ་ཡི། །བྱམས་པའི་མ་མ་མཛོད་ཅིག་དབྱངས་ཅན་མ། །ཐོག་མེད་དུས་ནས་ཉོན་མོངས་དབང་གྱུར་པས། །ཇི་བྱས་སྡིག་ཏུ་སོང་བས་འགྱོད་ལགས་ན། །ཐར་པའི་གེགས་གྱུར་སྡུག་བསྔལ་ཀུན་གྱི་རྒྱུ། །ནོངས་པའི་དྲི་མ་ཁྲུས་ཤིག་དབྱངས་ཅན་མ། །སྔོན་བྱས་ལས་ངན་དུས་སུ་སྨིན་པའི་མཐུས། །མི་འདོད་སྣ་དགུའི་གདུང་བ་བསྐྱེད་ལགས་ན། །འཁྲུལ་སྣང་སྡུག་བསྔལ་སྤྲིན་བཞིན་དྭངས་པ་ཡི། །དགོངས་པའི་བྱིན་ཆེན་ཕོབ་ཅིག་དབྱངས་ཅན་མ། །དད་བརྩོན་བློ་ཡི་ལུས་སྟོབས་ཉམས་ཆུང་བས་། །གློ་བུར་རྐྱེན་ངན་རླུང་གིས་དེད་པའི་ཚེ། །ལམ་གོལ་བདུད་ཀྱི་གཡང་སར་མི་གཏོང་པར། །ཐུགས་རྗེའི་ཕྱག་གིས་ཟུངས་ཤིག་དབྱངས་ཅན་མ། །ཆུ་བུར་སྒྱུ་མའི་ལུས་འདི་འཇིག་སླ་བས། །དུས་མིན་འཆི་བའི་རྐྱེན་ངན་ལྷགས་པ་ན། །འཆི་མེད་ཡེ་ཤེས་བདུད་རྩིའི་ཆུ་རྒྱུན་གྱིས། །རིང་འཚོའི་དབུགས་དབྱུང་སྩོལ་ཅིག་དབྱངས་ཅན་མ། །འཁོར་བའི་གྲོང་དུ་ཁྱིམ་པའི་གཡོག་བྱེད་པ། །སྟོན་པ་མཆོག་དེས་རྗེས་སུ་མ་གནང་བས། །དབེན་པའི་གནས་སུ་མི་ཚེ་སྒྲུབ་པ་དང་། །སྙོམས་པའི་རྟེན་འབྲེལ་སྒྲིགས་ཤིག་དབྱངས་ཅན་མ། །མི་སྲུན་སྲིན་མོའི་གླིང་ན་གནས་འདྲ་བའི། །དུས་ངན་མཛའ་བོའི་ངང་ཚུལ་མཐོང་ལགས་པས། །གྲོགས་ངན་དབང་གིས་ཆོས་ལས་ཉམས་བྱེད་པས། །འདུ་འཛིའི་འབྲེལ་ཐག་ཆོད་ཅིག་དབྱངས་ཅན་མ། །ལོངས་སྤྱོད་ཚེ་འདི་དཔལ་འབྱོར་སྤངས་ནས་ནི། །རི་དྭགས་བཞིན་དུ་བས་མཐའ་ཉུལ་བའི་དུས། །ལུས་སྲོག་འཚོ་བ་འཇོམས་པའི་གནོད་བྱེད་ཀྱི། །འཇིག་པ་ཀུན་ལས་སྲུངས་ཤིག་དབྱངས་ཅན་མ། །བླ་མ་མཆོག་གསུམ་སྐྱབས་སུ་རྙེད་ན་ཡང་། །ཡིད་ཆེ་དད་པ་རྒྱུ་ལ་མ་སྐྱེས་པས། །ཁྱེད་ཤེས་བླ་ོགཏད་ནམ་ཡང་མི་འགྱུར་བའི། །དཀོན་མཆོག་སྐྱབས་འོག་ཆུག་ཅིག་དབྱངས་ཅན་མ། །སྡུག་བསྔལ་ལོངས་སྤྱོད་བདེ་བར་རློམས་ནས་ནི། །འཕྲལ་སྣང་ཉམས་དགའི་ཞེན་པ་མ་ཆོད་པས། །སྲིད་པའི་བདེ་ལ་ནམ་ཡང་མི་ཆགས་པའི། །ངེས་འབྱུང་སྡོམ་པ་སྩོལ་ཅིག་དབྱངས་ཅན་མ། །འགྲོ་ཀུན་རང་གི་ཕ་མ་ཡིན་ན་ཡང་། །མ་རིག་དབང་གིས་གཉེན་ངོ་མ་ཤེས་པས། །ཀུན་ལ་སྙོམས་པའི་བྱམས་བརྩེའི་ཆུ་འཛིན་གྱིས། །བདག་རྒྱུད་བརླན་པར་མཛོད་ཅིག་དབྱངས་ཅན་མ། །བདག་ཉིད་གཅེས་པར་འཛིན་པའི་བློ་ངན་གྱིས། །གཞན་དོན་སྒྲུབ་པའི་ཁུར་ཁྱེར་མ་ནུས་པས། །རང་ཉིད་ཞི་བ་དོན་དུ་མི་གཉེར་བར། །བྱང་ཆུབ་སེམས་མཆོག་བསྐྱེད་ཅིག་དབྱངས་ཅན་མ། །སྡིག་པས་ཉོས་པའི་ལོག་འཚོའི་དུག་གི་ཆུ། །འཐུང་ན་ཐར་བའི་སྲོག་ལ་རྒོལ་བས་ན། །ཟས་གོས་གྱི་ན་ཙམ་གྱིས་ཆོག་ཤེས་པའི། །དཀའ་ཐུབ་བཟོད་པར་མཛོད་ཅིག་དབྱངས་ཅན་མ། །ཡོད་པའི་རང་སྐྱོན་ནམ་ཡང་མི་མཐོང་ཞིང་། །མེད་ཀྱང་གཞན་སྐྱོན་ཚོལ་བའི་ལས་ངན་བདག །དམན་ས་བཟུང་ནས་ཀུན་ལ་གུས་པ་ཡི། །དག་སྣང་རྒྱས་པར་མཛོད་ཅིག་དབྱངས་ཅན་མ། །འདོད་ཡོན་ཡིད་བྱེད་ཆགས་པའི་ལྕགས་སྒྲོག་གིས། །སྲིད་པའི་བཙོན་རར་བདག་ནི་བཅིང་ལགས་ན། །ཆོས་ཀུན་སྒྱུ་མར་རྟོགས་པའི་ཤེས་རབ་ཀྱིས། །ཞེན་པའི་སྒྲོག་ལས་ཁྲོལ་ཅིག་དབྱངས་ཅན་མ། །ཡིད་ལ་རླན་སྟེར་བྱམས་དང་སྙིང་རྗེའི་ཆབ། །ཞེ་སྡང་ཚ་དབལ་སྣོན་པོས་ཉམས་གྱུར་པས། །ཐུགས་རྗེའི་ཟླ་ཤེལ་འཛུམ་པའི་བསིལ་ཟེར་གྱིས། །ཀུན་འཁྲུག་གདུང་བ་སྐྱོབས་ཤིག་དབྱངས་ཅན་མ། །རྨོངས་ཆེན་མུན་པས་ཁེབས་པའི་བློ་མིག་འདིས། །གནས་ལྔ་ཤེས་བྱའི་ལྟད་མོ་མ་མཐོང་བས། །མཁྱེན་གཉིས་འོད་སྟོང་འབར་བའི་ཉིན་བྱེད་ཀྱིས། །མ་རིག་མུན་པ་སོལ་ཅིག་དབྱངས་ཅན་མ། །བག་མེད་འཆལ་གཏམ་སྒྲོག་པའི་རོ་འཛིན་འདི། །མི་བཟད་སྡིག་པའི་ཕྱགས་མར་སོང་ལགས་པས། །མཁས་ཚུལ་གསུམ་ལ་ཐོགས་མེད་སྤོབས་པ་ཡི། །ངག་གི་སྒྲིབ་པ་སྦྱོངས་ཤིག་དབྱངས་ཅན་མ། །ཚུལ་མིན་ཡིད་བྱེད་རྟོག་པའི་ཆོམ་རྐུན་གྱིས། །དགེ་བའི་ལོངས་སྤྱོད་ཉམས་པར་བྱེད་འདུག་པས། །ཐོས་བསམ་བསྒོམ་གསུམ་ཡིད་བཞིན་ནོར་བུ་ཡིས། །བདག་བློའི་རྒུད་པ་སོལ་ཅིག་དབྱངས་ཅན་མ། །དྲན་འཛིན་ཞབས་རྡོལ་བློ་ཡི་བུམ་པ་ཡིས། །རྣམ་མང་ཐོས་པའི་བཅུད་འདི་མ་བཟུང་བས། །བློ་གྲོས་ཁང་བཟང་གཟུངས་ཀྱི་སྒོ་གླེགས་ཅན། །ཤེས་བྱའི་ནོར་གྱིས་ཕྱུག་མཛོད་དབྱངས་ཅན་མ། །ཆོས་བརྒྱད་རྟོག་པའི་འཁོར་ལོ་བསྐོར་ནས་ནི། །ཆོས་དང་རང་སེམས་འདྲེས་པར་མ་ནུས་པས། །སྐྱིད་སྡུག་བཟང་ངན་སེམས་ཀྱི་འཁྲུལ་སྣང་ཀུན། །རོ་སྙོམས་རྟོགས་པ་བསྐྱེད་ཅིག་དབྱངས་ཅན་མ། །སྙིང་པོ་མེད་པའི་སྒྱུ་མའི་ལོངས་སྤྱོད་ལ། །འཛིན་ཞེན་སེར་སྣའི་འཁྲི་བ་མ་ཆོད་པས། །ཆགས་མེད་ལུས་ཀྱང་མཆོད་སྦྱིན་ནུས་པ་ཡི། །གཏོང་བའི་སྒོ་འཕར་ཕྱེ་ཤིག་དབྱངས་ཅན་མ། །རྣམ་དག་བསླབ་གསུམ་ཡིད་ཀྱི་རྫིང་དྭངས་པ། །བག་མེད་སྤྱོད་པའི་རྡུལ་གྱིས་བསླད་པའི་ཚེ། །བྱིན་རླབས་ཆུ་དྭངས་ནོར་བུའི་དག་བྱེད་ཀྱིས། །སྡིག་ལྟུང་རྙོག་མ་སྒྲུངས་ཤིག་དབྱངས་ཅན་མ། །ཉོན་མོངས་ཤུགས་དྲག་གཉེན་པོ་ཉམས་སྟོབས་ཆུང་། །རྐྱེན་དང་འཕྲད་ཚེ་སྤང་བླང་མ་ནུས་པས། །སྲོག་གི་ཕྱིར་ཡང་ཆོས་ལས་མི་འདའ་བའི། །དྲན་ཤེས་བརྟན་པར་མཛོད་ཅིག་དབྱངས་ཅན་མ། །བཟོད་པ་སྲན་ཆུང་བཟེ་རེའི་ནད་ཀྱིས་ཐེབ། །ཆོས་ཕྱིར་དཀའ་བ་དང་ལེན་མ་ནུས་པས། །སྡུག་བསྔལ་རྐྱེན་ངན་གྲོགས་སུ་འཆར་བ་ཡི། །ཞུན་མེད་སྙིང་སྟོབས་བསྐྱེད་ཅིག་དབྱངས་ཅན་མ། །སྒྱིད་ལུག་སྙོམས་ལས་མལ་དུ་ཉལ་ནས་ནི། །ལེ་ལོའི་ངང་དུ་མི་ཚེ་ཟད་འདུག་པས། །ལོང་མེད་འཆི་བ་དྲན་པའི་བསྐུལ་མ་ཡིས། །ཤུགས་དྲག་བརྩོན་འགྲུས་བསྐྱེད་ཅིག་དབྱངས་ཅན་མ། །སྐད་ཅིག་མི་གནས་ཡུལ་གྱི་རྗེས་འབྲང་བའི། །འཕྲོ་རྒོད་སེམས་ཀྱི་སྤྲོས་པས་དུབ་ལགས་ན། །རྟོག་པའི་ཟུག་རྔུས་དབེན་པའི་ཏིང་འཛིན་གྱིས། །དགའ་བདེས་སིམ་པར་མཛོད་ཅིག་དབྱངས་ཅན་མ། །མ་རིག་སྒྱུ་མའི་རྫས་སྔགས་ལས་བྱུང་བའི། །འཁྲུལ་སྣང་ཡུལ་ལ་བདེན་ཞེན་མ་ཞིག་པས། །རྟེན་འབྱུང་སྟོང་པར་ཤེས་པའི་ལྷག་མཐོང་གིས། །སྲིད་རྩ་དྲུང་ནས་ཕྱུངས་ཤིག་དབྱངས་ཅན་མ། །གཞི་མེད་རེ་དོགས་རྟོག་པའི་བྲེལ་ཚུལ་གྱིས། །སེམས་ཉིད་རིག་པ་རྣལ་དུ་མ་ཕེབས་པས། །འཁྲུལ་སྣང་བློ་ཡི་རི་མོའི་བཟང་ངན་ལ། །ངོས་འཛིན་འཁྲི་བ་ཆོད་ཅིག་དབྱངས་ཅན་མ། །གཉིས་འཛིན་འདྲེ་རྒོད་གཉེན་པོས་མ་ཐུལ་བས། །འཁྲུལ་སྣང་ཐམས་ཅད་དགྲ་རུ་ལང་པས་ན། །གང་ཤར་རྐྱེན་ངན་ཐོག་བརྫིས་ནུས་པ་ཡི། །བརྟུལ་ཞུགས་གྲུབ་པར་མཛོད་ཅིག་དབྱངས་ཅན་མ། །རྒྱ་ཆེན་སྤྱོད་ལ་གོམས་འདྲིས་ཆུང་བའི་ཕྱིར། །རྒྱལ་བའི་ཡོངས་བསྔོ་དྲན་པར་མ་ནུས་པས། །འཇམ་དཔལ་གཞོན་ནུའི་མཁྱེན་པའི་རྗེས་འགྲོ་བའི། །ཀུན་བཟང་སྤྱོད་པ་སློབས་ཤིག་དབྱངས་ཅན་མ། །རྒྱལ་དང་དེ་སྲས་རྣམ་ཐར་རྨད་བྱུང་བ། །ཀུན་རྨོངས་བདག་གི་བློ་བོར་མ་ཤོངས་བས། །ཏིང་འཛིན་རྣམ་འཕྲུལ་སྟོང་གི་སྒོ་ཕྱེ་ནས། །སྙིང་ལ་རབ་དགའ་བྱིན་ཅིག་དབྱངས་ཅན་མ། །རྒྱུ་དོན་མཐར་ཐུག་ནང་གི་རྟེན་འབྲེལ་གྱི། །དོན་འདི་བདག་གི་གློ་བུར་མ་ཆུད་པས། །གང་ཞིག་ཤེས་ན་ཀུན་མཁྱེན་འགྱུར་བ་ཡི། །ཟབ་གནད་རྟོགས་པར་མཛོད་ཅིག་དབྱངས་ཅན་མ། །རྒྱུ་འབྲས་ཐ་དད་ལྟ་བའི་རྨོངས་པ་ཡིས། །སངས་རྒྱས་གཞན་དུ་འཚོལ་བས་ངལ་བ་ལ། །སྐུ་བཞི་རང་ལ་ཡོད་པར་ཡིད་ཆེས་པའི། །སྨིན་བྱེད་དབང་བསྐུར་སྩོལ་ཅིག་དབྱངས་ཅན་མ། །མཚན་འཛིན་མ་རིག་རྟོག་པའི་དབང་གྱུར་ནས། །ལྷ་དང་ཡེ་ཤེས་རང་ངོ་མ་ཟིན་པས། །གང་ཤར་བདེ་སྟོང་རོལ་པས་དུས་འདའ་བའི། །གྲོལ་བྱེད་ལམ་བཟང་སྟོན་ཅིག་དབྱངས་ཅན་མ། །རང་བཞིན་ཤེས་ན་སངས་རྒྱས་རང་ཡིན་ཀྱང་། །གློ་བུར་དྲི་མས་འཁོར་བར་འཁྱམ་པ་ལ། །ལྷུན་གྲུབ་གནས་འགྱུར་འགལ་མེད་དོན་རྟོགས་ནས། །འབྲས་བུའི་དབུགས་དབྱུང་སྩོལ་ཅིག་དབྱངས་ཅན་མ། །རྒྱལ་བའི་ཡོན་ཏན་རྒྱ་མཚོ་སྒྲོག་པའི་གཏམ། །ཐོས་ཀྱང་མཐོང་བའི་སྐལ་བས་དབུལ་ལགས་ན། །མྱུར་དུ་ཡོན་ཏན་རྒྱ་མཚོའི་ཕ་རོལ་ཏུ། །ཕྱིན་པའི་དེད་དཔོན་མཛོད་ཅིག་དབྱངས་ཅན་མ། །ཐོག་མར་རང་རྒྱུད་ཆོས་ཀྱི་མ་ཐུལ་བར། །གཞན་གྱི་འཆང་བ་བཀྲོལ་བར་མི་ནུས་པས། །རང་ཡང་མི་འཆིང་གཞན་ལ་ཕན་པའི་ཚེ། །ཕྲིན་ལས་རྒྱས་པར་མཛོད་ཅིག་དབྱངས་ཅན་མ། །གཉིད་ཀྱི་བདུད་པོས་ཚེ་ཐུང་འདི་ཡི་ཕྱེད། །བཅོམ་ནས་བདག་གིས་ཉམས་སུ་མ་མྱོང་བས། །འོད་གསལ་རྨི་ལམ་སྒྱུ་མའི་རྣལ་འབྱོར་གྱིས། །མཚན་མོའི་འཁྲུལ་བ་སྦྱོངས་ཤིག་དབྱངས་ཅན་མ། །ཁམས་གསུམ་སེམས་ཅན་གང་གིས་ཟ་བ་ཡིས། །མི་རྟག་གཤིན་རྗེའི་འཇིག་པ་དྲན་ལགས་ན། །འཆི་བ་བྱུང་ཡང་ཡ་ང་མི་དགོས་པའི། །གདེང་དྲོད་བདག་ལ་བྱིན་ཅིག་དབྱངས་ཅན་མ། །གདོས་བཅས་སྒྱུ་མའི་ལུས་འདི་ཞིག་ནས་ནི། །ཡིད་ལུས་བར་དོའི་སྣང་བ་ཤར་བ་ན། །མངོན་སུམ་སྐུ་ཡི་སྣང་བ་བསྟན་ནས་ནི། །ལམ་སྣ་ཁྱོད་ཀྱིས་དྲོངས་ཤིག་དབྱངས་ཅན་མ། །འབྱོར་ན་དེ་ལ་ཞེན་པའི་འཁྲི་བ་ཆོད། །རྒུད་ན་སྡུག་བསྔལ་མྱོང་བའི་སྐྱོ་གྲོགས་མཛོད། །བར་ཆད་བྱུང་ན་ལམ་གྱི་གེགས་སེལ་ཞིང་། །ཉམས་རྟོགས་བོགས་འདོན་མཛོད་ཅིག་དབྱངས་ཅན་མ། །མཐོང་བར་འདོད་ཚེ་སྐུ་ཡི་སྣང་བ་སྟོན། །འདྲི་བར་འདོད་ན་གསུང་གི་དབུག་དབྱུངས་མཛོད། །མོས་གུས་སྐྱེ་ཚེ་སྙིང་ལ་བྱིན་རླབས་ཀྱི། །བདེ་བས་ཚིམ་པར་མཛོད་ཅིག་དབྱངས་ཅན་མ། །བླ་མ་བསྒོམས་ཀྱང་ངོ་བོ་ཁྱོད་ཉིད་ཡིན། །ལྷ་ཁྱོད་བསྟེན་ཀྱང་དོན་དུ་བླ་མ་ཡིན། །འཁྲུལ་བ་ཟད་ན་ཐམས་ཅད་རང་ཡིན་པའི། །དགོངས་པ་མངོན་དུ་གྱུར་མཛོད་དབྱངས་ཅན་མ། །མདོར་ན་གཉིས་སྣང་འཁྲུལ་བའི་སྤྲོས་པ་ཀུན། །གཉིས་མེད་ཆོས་ཀྱི་དབྱིངས་སུ་མ་བསྡུས་པར། །སྐད་ཅིག་ཙམ་ཡང་འབྲལ་བ་མེད་པར་ནི། །བདག་གི་བླ་མ་མཛོད་ཅིག་དབྱངས་ཅན་མ། །ཚེ་རབས་ལས་ཀྱིས་འབྲེལ་བའི་ཡི་དམ་ལ། །སྙིང་ནས་དད་པས་གསོལ་བ་བཏབ་པའི་མཐུས། །འདི་ཕྱི་བར་དོའི་གནས་སྐབས་ཐམས་ཅད་དུ། །མགོན་པོ་ཁྱོད་ཀྱིས་རྗེས་སུ་འཛིན་པར་ཤོག །དེ་ལྟར་གང་གི་ཐུགས་རྗེ་བསྐུལ་བའི་ངག །ཚིགས་སུ་བཅད་པ་ལྔ་བཅུ་རྩ་ལྔ་འདི། །སྔོ་ལྗང་ལྕུག་ཕྲན་ལོ་མའི་སྨད་གཡོག་དང་། །ཡིད་འོང་ན་བུན་མཐིང་གའི་རྐེད་ཆིང་ཅན། །རབ་དཀར་བྲག་རིའི་སྟོད་གཡོག་བགོས་པ་ཡི། །རབ་མཛེས་ས་འཛིན་བུ་མོའི་པང་པ་རུ། །རི་དྭགས་གཞོན་ནུའི་གྲོགས་པོ་འགྲོགས་ན་བདེ། །ཕུ་ཆུའི་བུ་མོའི་གླུ་སྒྲ་རྣ་བར་སྙན། །ཆུ་སྐྱེས་སྐེད་མེད་ལང་ཚོའི་དགའ་སྟོན་གྱིས། །མིག་གི་བུང་བ་མགྲོན་དུ་འགུག་པའི་ས། །བྲག་དཀར་ཁྱུང་ཆེན་ཞེས་བྱའི་རི་སུལ་དུ། །གནས་བཅས་སྒྲུབ་ལ་བརྩོན་པའི་ཀུ་ས་ལི། །ངུར་སྨྲིག་བླ་གོས་གསར་པའི་དམར་འོད་དང་། །འགྲོགས་པའི་ཚངས་སྤྱོད་སྡོམ་པའི་སྐལ་པ་ཅན། །ཀུན་དགའ་བསྟན་པའི་རྒྱལ་མཚན་ཞེས་བྱ་བས། །རང་གཤིས་ངན་པའི་རང་མཚང་མཐོང་བའི་ཚེ། །ཡིད་ཀྱི་ཟུག་རྔུ་སེམས་ཀྱིས་མ་བཟོད་ནས། །གང་ལ་གསོལ་བ་བཏབ་ན་མི་བསླུ་བ། །དབང་གི་མདངས་ལྡན་དུས་གསུམ་རྒྱལ་བའི་ཡུམ། །སྐྱབས་དེ་རྗེས་སུ་དྲན་ནས་འདི་བྲིས་སོ། །དགེ་བ་དེ་ཡིས་ཡིད་ལ་རེ་བའི་དོན། །གེགས་མེད་མྱུར་དུ་འགྲུབ་པའི་རྒྱུ་རུ་བསྔོ། །
ལྷ་མོ་དབྱངས་ཅན་མ་ལ་རྗེས་སུ་འཛིན་པར་བསྐུལ་བ།
ༀ་སྭ་སྟི། ཐུགས་རྗེ་ཆེན་པོ་སྤྱན་རས་གཟིགས་དབང་གི། །རབ་མཛེས་ཚེམས་ཀྱི་མྱུ་གུ་ལས་འཁྲུངས་པའི། །བློ་གཏེར་རྒྱ་མཚོའི་ལྷ་མོ་དབྱངས་ཅན་མ། །དེ་རིང་བདག་གི་སྙིང་ལ་གནས་པར་མཛོད། ༡ །ལྟ་བས་མི་ངོམས་ཡེ་ཤེས་སྒྱུ་མའི་སྐུ། །བཅུ་དྲུག་ལང་ཚོས་ལྷར་བཅས་ཡིད་འཕྲོག་མ། །དྲན་པས་ཟག་མེད་བདེ་སྟེར་ངག་གི་ལྷའི། །མཛུམ་པའི་ཞལ་རས་དེ་རིང་བདག་ལ་སྟོན། ༢ །བཅུ་ཕྲག་དྲུག་གི་ཡན་ལག་དང་འགྲོགས་པའི། །ཚངས་དབྱངས་བདུད་རྩིའི་ཟེགས་མ་གཅིག་གིས་ཀྱང་། །མ་རིག་སྲིད་པའི་གཉིད་ལས་སློང་བྱེད་པའི། །གསུང་གི་དབུགས་དབྱུང་དེ་རིང་བདག་ལ་སྩོལ། ༣ །མཁྱེན་པས་རྒྱལ་ཀུན་ཡེ་ཤེས་བསྡུས་པ་བཞིན། །བརྩེ་བས་རིས་བྲལ་འགྲོ་བའི་ཁམས་ཀུན་ཁྱབ། །ནུས་པས་དཔག་དཀའི་འཁོར་བའི་མཐའ་བསྙིལ་བའི། །ཐུགས་ཀྱི་དགོངས་པས་དེ་རིང་བྱིན་གྱིས་རློབས། ༤ །ཏིང་འཛིན་སྙན་ལ་ཉེ་རིང་མི་མངའ་བས། །གདུང་བའི་དབྱངས་ཀྱིས་བོས་པའི་སྐད་ཅིག་ལ། །མྱུར་མགྱོགས་ཐུགས་རྗེས་བྱིན་གྱིས་བརླབས་ནས་ནི། །སྙིང་ལ་སིམ་པའི་དགའ་སྟོན་དེ་རིང་སྩོལ། ༥ །ཕུན་ཚོགས་བཀོད་པ་རྒྱ་མཚོས་མཛེས་གྱུར་པའི། །ལྷོ་ཕྱོགས་ཡིད་བཞིན་རོལ་མཚོའི་དགའ་ཚལ་ནས། །སྨྲ་མཁས་འདོད་པ་རྣམས་ཀྱི་ལྷག་པའི་ལྷ། །མགོན་ཁྱོད་མངོན་སུམ་བཞུགས་ཞེས་བདག་གིས་ཐོས། ༦ །ཉམ་ཆུང་ལུས་ཀྱིས་བགྲོད་པར་མ་ནུས་པས། །ཆུ་བུར་མིག་གིས་ཕྱོགས་དེར་ཁ་བལྟས་ནས། །ཟུམ་བུའི་ཐལ་མོ་སྦྱར་བའི་གདུང་དབྱངས་ཀྱིས། །ཐུགས་རྗེ་ཐུགས་དམ་བསྐུལ་ལོ་རྗེ་བཙུན་མ། ༧ །ཡིད་འོང་ལྷ་མོའི་སྙན་པའི་གསུང་དབྱངས་ཀྱིས། །གྲུབ་གཉིས་བདུད་རྩིའི་བགོ་སྐལ་འདི་ལོངས་ཞེས། །མཆོད་སྦྱིན་དབུགས་དབྱུང་སྩོལ་བའི་སྐལ་བཟང་ལ། །རེ་བའི་མིག་འདི་ཟུམ་པའི་སྐབས་མ་རྙེད། ༨ །མྱུར་མགྱོགས་རྫུ་འཕྲུལ་མཆོག་གི་ཞབས་ལྡན་ཞིང་། །སྒྲིབ་མེད་ཡེ་ཤེས་གཟིགས་པའི་སྤྱན་མངའ་བ། །མགོན་མེད་བདག་གི་མགོན་གཅིག་རྗེ་བཙུན་མས། །ད་ནི་རྗེས་སུ་འཛིན་པར་མཛད་དུ་གསོལ། ༩ །སྲས་བཅས་རྒྱལ་བ་སྐྱེེད་པའི་ཡུམ་གྱུར་མས། །མཁྱེན་བརྩེ་ནུས་པའི་ནུ་ཞོས་ལེགས་བསྐྱངས་པས། །བློ་གྲོས་ནུས་སྟོབས་རྫོགས་པའི་མཁས་གྲུབ་ཀྱིས། །འཕགས་བོད་འཛིན་མའི་ཐ་གྲུ་ཁྱབ་པར་བྱས། ༡༠ །བདག་ཀྱང་དེ་འདྲའི་སྐལ་བཟང་ལ་ཆགས་ནས། །བྱིན་རླབས་རོ་མངར་འདོད་པའི་དད་གསུམ་གྱི། །མཆུ་སྒྲོས་རྒྱུན་དུ་གཡོ་བའི་ངང་ཚུལ་འདིས། །ཨ་མ་འབོད་པ་ཁྱེད་ཀྱིས་གསན་ལགས་སམ། ༡༡ །གང་གི་བྱིན་རླབས་སྐྱ་རེངས་དང་པོ་གཟིས། །སྙིང་ལ་རབ་དགའ་བྱིན་པ་འདིས་བསྐུལ་ནས། །མཁྱེན་བརྩེའི་ཉིན་བྱེད་སྣང་བ་ཅི་འདྲ་ཞེས། །བལྟ་འདོད་བློ་ཡི་འདྲེན་བྱེད་སྙིང་གར་འཁོར། ༡༢ །ལོང་བ་འཁྲུལ་བའི་སྨྲེ་སྔགས་འདོན་དྲུང་དུ། །བརྩེ་ལྡན་བཤེས་ཀྱི་བྱམས་པས་ལྟ་བ་བཞིན། །རྨོངས་པའི་མུན་པར་རེ་ཞིག་ཉམ་ཐག་ཀྱང་། །མགོན་ཁྱོད་བདག་གི་དྲུང་ན་བཞུགས་སྙམ་བགྱིད། ༡༣ །དེ་སླད་བདག་ནི་ལས་ངན་ཁུར་ལྕི་ཡང་། །ཐབས་མཁས་ཐུགས་རྗེ་ལྡན་པ་ཁྱེད་ལགས་པས། །ཀུན་རྨོངས་བློ་ཡི་པིར་གྱིས་བྲིས་པ་ཡི། །སྡུག་བསྔལ་རི་མོ་བསུབ་པར་མཛད་དུ་གསོལ། ༡༤ །ཚེ་རབས་གཞན་དུ་རྗེས་སུ་འཛིན་འགྱུར་མོད། །སྡིག་ལྡན་བདག་ནི་མི་ཁོམས་གནས་སུ་འགྲོ། །དེའི་ཚེ་ཕྱིར་ཞིང་སྐལ་བ་དམན་འགྱུར་པས། །ལུས་རྟེན་འདི་ལ་རྗེས་སུ་བཟུང་དུ་གསོལ། ༡༥ །རེ་ཞིག་ཐུགས་རྗེ་དུས་ལ་འཇོག་ན་ནི། །རྨོངས་པ་བདག་ནི་རྐྱེན་ངན་དབང་གྱུར་ནས། །ཕྱིར་ཞིང་ཉོན་མོངས་སྡུག་བསྔལ་འཕེལ་འགྱུར་བས། །དེ་བས་ད་ལྟ་འོ་བརྒྱལ་མི་སླའམ། ༡༦ །གལ་དེ་སྔོན་བྱས་ལས་ཀྱིས་བསྒྲིབས་གྱུར་ན། །དབང་བཅུའི་རྩལ་ལྡན་ཁྱེད་ཀྱིས་མཐུ་སྟོབས་ཀྱིས། །སེན་རྩེའི་རྡུལ་ལ་དུས་མཐའི་རླུང་བཞིན་དུ། །ད་ལྟ་ཉིད་དུ་སེལ་བར་མཛད་དུ་གསོལ། ༡༧ །བདག་བློ་འཁྲུལ་བས་ནོངས་པར་གྱུར་ན་ནི། །རྨོངས་པའི་དགྲ་འཇོམས་ཁྱེད་ཀྱིས་བྱིན་རླབས་གཟིས། །གང་ལ་ཕོག་པ་དེ་ཡི་མ་རིག་པའི། །མུན་པ་སེལ་ལ་དཀའ་བ་ཅི་ཞིག་ཡོད། ༡༨ །བགྲང་ཡས་སྐྱེ་རྒུའི་རྒུད་པ་མ་ལུས་པ། །གཅིག་ཏུ་བསྡུས་ནས་བདག་ལ་བྱིན་འདྲ་བའི། །བླུན་པོ་རང་གི་སྡུག་བསྔལ་མ་བཟོད་ནས། །གདུང་བའི་དབྱངས་འདི་ཡུས་པའི་ཚུལ་གྱིས་ཡིན། ༡༩ །སྲིན་བུའི་ཁ་ཆུས་རང་ལུས་ཇི་བཞིན་དུ། །རང་གི་འཁྲུལ་པས་རང་ཉིད་བསླུས་གྱུར་པས། །ཤིན་ཏུ་ཉམ་ཐག་སྡུག་གི་མཆི་མ་འདི། །ཐུགས་རྗེའི་ཕྱག་གིས་ཕྱི་བར་མཛད་དུ་གསོལ། ༢༠ །དོན་མེད་ཚེ་འདིའི་ལས་ལ་ཞེན་ཅིང་ཆགས། །དོན་ཆེན་གཏམ་གྱི་འདུན་མ་ཡལ་བར་བོར། །ཅོལ་ཆུང་སེམས་འདི་ཡུལ་ལྔའི་བདུད་ཀྱིས་བསླུས། །འཁྲུལ་བ་འདི་ལས་ཁྱེད་ཀྱིས་བསྐྱབ་ཏུ་གསོལ། །གཏན་བདེའི་ཐར་པ་སྒྲུབ་ལ་སྡུག་གིས་དོགས། །འཁྲུལ་སྣང་འཁོར་བའི་ཆོས་ལ་བདེ་བར་ཞེན། །སྐྱིད་འདོད་སེམས་ཀྱིས་སྡུག་བསྔལ་རྒྱ་མཚོར་འཕང་། །རྨོངས་པ་འདི་ལས་ཁྱེད་ཀྱིས་བསྐྱབ་ཏུ་གསོལ། ༢༢ །རང་ཉིད་གཅེས་འཛིན་འགོང་པོ་སྙིང་ལ་བཞག །འདོད་འབྱུང་གཞན་ཕན་སེམས་བསྐྱེད་ཁ་ལ་ཁྱེར། །ཆོས་གཟུགས་ཙམ་གྱིས་སངས་རྒྱས་ཐོབ་ཏུ་རེ། །བློ་ངན་འདི་ལས་ཁྱེད་ཀྱིས་བསྐྱང་དུ་གསོལ། ༢༣ །རྣམ་གཡེང་ལེ་ལོ་ལན་ཚྭའི་རོ་བཞིན་བླང་། །བསླབ་གསུམ་བསྲུང་སྡོམ་བཞི་མདོ་རྩྭ་བཞིན་བོར། །བསམ་བཞིན་རང་གིས་རང་ཉིད་དམྱལ་བར་བསྐྱུར། །ལས་ངན་འདི་ལས་ཁྱེད་ཀྱིས་བསྐྱབ་ཏུ་གསོལ། ༢༤ །རེ་བས་བཅིངས་པས་དངོས་གྲུབ་དགའ་སྟོན་ཉམས། །དོགས་པས་བསླད་པས་འཁྲུལ་སྣང་སྒྲ་རུ་ལང་། །རྟོག་ངན་འདྲེ་ཡིས་རང་སེམས་སྡུག་ལ་སྦྱར། །ཕུང་ཁྲོལ་འདི་ལས་ཁྱེད་ཀྱིས་བསྐྱབ་ཏུ་གསོལ། ༢༥ །རང་གནས་ལྷན་སྐྱེས་ཡེ་ཤེས་མེད་པར་བཟུང་། །སྣ་ཚོགས་འཁྲུལ་སྣང་མེད་ལ་ཡོད་པར་ཞེན། །རང་སེམས་སངས་རྒྱས་རང་གི་རྟོག་པས་སྒྲིབ། །མ་རིག་འདི་ལས་ཁྱེད་ཀྱིས་བསྐྱབ་ཏུ་གསོལ། ༢༦ །ཀྱེ་མ་ཡོད་པ་མི་མཐོང་མེད་མཐོང་བ། །ཀུན་རྨོངས་བྱིས་པའི་ངང་ཚུལ་འདི་ལགས་པས། །སྲིད་རྩ་བདེ་ཞེན་འཁྲུལ་བའི་དྲྭ་བ་འདི། །ད་ནི་ཁྱོད་ཀྱིས་གཅོད་པར་མཛད་དུ་གསོལ། ༢༧ །སྡུག་བསྔལ་རྐྱེན་ངན་བདུད་ལས་གང་གིས་ཀྱང་། །ནམ་ཡང་བདག་བློ་གཡོ་བར་མི་ནུས་པའི། །ཐབས་ཤེས་ཟུང་འཇུག་རྒྱལ་བའི་ལམ་བཟང་ལ། །མི་འཕྲོག་ཡིད་ཆེས་སྐྱེ་བར་མཛད་དུ་གསོལ། ༢༨ །གང་གི་བྱིན་རླབས་ཟླ་བའི་ཐིག་འཕྲེང་གིས། །བདག་བློའི་ཆུ་སྐྱེས་བྲན་པའི་སྐད་ཅིག་ལ། །མི་ཟད་སྤོབས་པའི་གཏེར་བརྒྱད་གྲོལ་བ་ཡི། །སྙིང་གི་ཀུ་མུད་རྒྱས་པར་མཛད་དུ་གསོལ། ༢༩ །རབ་འབྱམས་ཤེས་བྱའི་མཁའ་ལ་ཟེར་འཕྲོ་བའི། །བདག་བློ་ཉིན་མོར་བྱེད་པའི་དཀྱིལ་འཁོར་ལས། །ལེགས་བཤད་ངག་གི་འོད་སྟོང་གཡོ་བ་ཡིས། །ཐུབ་བསྟན་པད་ཚལ་རྒྱས་པར་མཛད་དུ་གསོལ། ༣༠ །འཁོར་བའི་གནས་ཀུན་མེ་འོབས་ལྟར་མཐོང་ནས། །སྲིད་པའི་ཕུན་ཚོགས་གང་ལའང་མི་ཆགས་པར། །བདག་འཛིན་ཞེན་པ་རྩད་ནས་གཅོད་ནུས་པའི། །ཤེས་རབ་སྣང་བ་རྒྱས་པར་མཛད་དུ་གསོལ། ༣༡ །རང་གི་བདེ་ལ་ནམ་ཡང་མི་ཆགས་ཤིང་། །གཞན་ལ་ཕན་ན་སྲོག་ཀྱང་གཏོང་ནུས་པའི། །སྙིང་རྗེས་དྲངས་པའི་གཞན་ཕན་བྱང་ཆུབ་སེམས། །བཅོས་མིན་རྒྱུད་ལ་སྐྱེ་བར་མཛད་དུ་གསོལ། ༣༢ །ཉོན་མོང་རང་གཟུགས་ཡུལ་སྣང་སེམས་སུ་ཤེས། །སེམས་སྣང་དག་པ་ལྷ་ཡི་ངོ་བོར་མཐོང་། །གང་སྣང་རྟོགས་པའི་ཡེ་ཤེས་གྲོགས་སུ་ཤར། །ཚེ་འདིར་གྲུབ་མཐའ་སྙོགས་པར་མཛད་དུ་གསོལ། ༣༣ །ལྷག་བསམ་མ་དྲོས་ཆུ་གཏེར་ལས་འོང་བའི། །ཐོས་བསམ་བསྒོམ་པའི་ཤེས་རབ་གངྒཱའི་རྒྱུན། །འཕགས་པའི་ཡེ་ཤེས་རྒྱ་མཚོར་འདྲེས་གྱུར་ནས། །འགྲོ་བའི་ཉེར་འཚོར་འགྱུར་བར་མཛད་དུ་གསོལ། ༣༤ །ཇི་སྲིད་ཆོས་སྐུ་གཅིག་ཏུ་མ་གྱུར་བར། །སྐད་ཅིག་ཙམ་ཡང་འབྲལ་བ་མེད་པར་ནི། །བདག་གི་ཡི་དམ་ལྷ་མོ་དབྱངས་ཅན་མས། །ཐུགས་རྗེ་ཆེན་པོས་སྐྱོང་བར་མཛད་དུ་གསོལ། ༣༥ །ལྷ་དང་བླ་མའི་ཐུགས་རྗེའི་བྱིན་རླབས་དང་། །རྟེན་འབྱུང་བསླུ་བ་མེད་པའི་བདེན་སྟོབས་ཀྱིས། །ཁྱེད་ལ་བསྟོད་ཅིང་གསོལ་བ་བཏབ་པའི་དོན། །གེགས་མེད་ད་ལྟ་ཉིད་དུ་འགྲུབ་གྱུར་ཅིག༣༦ །ཚུལ་འདི་ངག་གི་ལྷ་དང་དབྱེར་མེད་པའི། །གསུང་གི་དབང་ཕྱུག་བླ་མའི་བཀའ་དྲིན་གྱིས། །བཅུ་ཕྲག་གཞུང་བཟང་ཨུཏྤལ་ཕྲེང་མཛེས་ཀྱིས། །གང་གི་བློ་གྲོས་མགྲིན་པ་མཛེས་གྱུར་པ། ༣༧ །བློ་གྲོས་གཞན་ཕན་ཟླ་བ་ཞེས་བྱ་བས། །ས་བཟང་རྣམ་རྒྱལ་གླིང་གི་དགོན་པར་སྦྱར། །དགེ་འདིས་ཕ་རྒོད་བླ་མའི་ལུང་རྟོགས་ཀྱི། །བསྟན་པ་བདག་གིས་འཛིན་ཅིང་སྤེལ་བར་ཤོག། །།དགེའོ། །དགེའོ། །
དབྱངས་ཅན་མའི་བསྟོད་པ་ཀ་ཕྲེང་ཅན།
ཀ་མ་ལ་དང་རབ་རྒྱས་ཟླ་བའི་སྟེང་། །ཁ་ཏོག་བྱེ་རུའི་མདངས་འཛིན་ལྷག་པའི་ལྷ། །ག་ནས་བསམས་ཀྱང་སྐུ་དྲིན་མཚུངས་མེད་པ། །ང་ཡི་སྐྱབས་གཅིག་རྒྱ་མཚོའི་ལྷ་མོར་འདུད། །ཅ་ག་དར་དང་རིན་ཆེན་རྒྱན་གྱིས་མཛེས། །ཆ་ཤས་ཡོན་ཏན་རྫོགས་པའི་ངག་གི་ལྷ། །ཇ་ཆང་མ་ཡིན་བདག་བློའི་ཆུ་གཏེར་ལ། །ཉ་གང་ཕྲིན་ལས་འོད་དཀར་རྩེན་པར་མཛོད། །ཏ་ཐཱ་ག་ཏའི་ལེགས་གསུང་སྡེ་སྣོད་གསུམ། །ཐ་ན་ཚིག་ཟུར་ཙམ་ཡང་མ་ཉམས་པར། །ད་ལྟ་ཉིད་དུ་ཁོང་དུ་ཆུད་ནས་ནི། །ན་ཟླ་གཞན་གྱིས་འགྲན་ཟླ་མེད་པར་མཛོད། །པ་སངས་ལྟར་གསར་དྲི་མེད་བློ་གྲོས་ཀྱིས། །ཕ་མཐའ་བྲལ་བའི་ཤེས་བྱའི་གནས་ཚུལ་ལ། །བ་ལྟར་རྨོངས་པའི་བརྟུལ་ཞུགས་མི་འཛིན་པར། །མ་ལུས་ཇི་བཞིན་རྟོགས་པའི་སྤོབས་པ་སྩོལ། །ཙ་ཏུར་རྒྱུད་སྡེའི་དགོངས་དོན་མ་ལུས་པ། །ཚ་ཟེར་འོད་ཀྱིས་སྣང་བ་བསྐྱེད་པ་བཞིན། །ཛ་བའི་མདངས་འཛིན་ལྷ་མོའི་བྱིན་རླབས་ཀྱིས། །ཝ་ལེར་ཡིད་ལ་འཆར་བར་མཛད་དུ་གསོལ། །ཞྭ་ལྟར་བཀུར་བར་འོས་པའི་མཁས་པ་ནས། །ཟ་བ་སློང་བའི་སྤྲང་པོ་ཡན་ཆད་ཀྱིས། ། འ་འུར 
་བསྟོད་པའི་རྣ་ལུང་སྦྱིན་བྱེད་པའི། །ཡ་མཚན་བསྔགས་འོས་འབུམ་གྱིས་ཕྱུག་པར་མཛོད། །ར་ག་ལྟར་དམར་དབྱངས་ཀྱི་རྒྱལ་མོའི་སྐུ། །ལ་འུར་མཐོང་བའི་སྐལ་བཟང་ལ་བརྟེན་ནས། །ཤ་དང་ཤེས་རབ་ཆོས་ཀྱི་སྤྱན་ལ་སོགས། །ས་ལམ་རྟོགས་པའི་ཡོན་ཏན་རྒྱས་པར་མཛོད། །ཧ་ལ་དང་མཚུངས་ལས་ཉོན་འཇོམས་པའི་ཕྱིར། །ཨ་ཏི་དང་པའི་ཡིད་ཀྱིས་གསོལ་འདེབས་ན། །ཧ་ཅང་མྱུར་བའི་ཐུགས་རྗེ་ཆེན་པོ་ཡིས། །ཨ་མ་ངག་དབང་ལྷ་མོས་བྱིན་གྱིས་རློབས། །རྣམ་དཔྱོད་སྤོབས་པ་བསྐྱེད་མཛད་ལྷག་པའི་ལྷ། །རྣམ་འདྲེན་བླ་མ་མཆོག་དང་དབྱེར་མེད་པས། །རྣམ་ཀུན་འབྲལ་མེད་ཐུགས་བརྩེས་ལེགས་བསྐྱངས་ནས། །རྣམ་མཁྱེན་ཡེ་ཤེས་ཐོབ་པར་མཛད་དུ་གསོལ།། །།ཞེས་པ་འདི་ནི་བློ་གྲོས་གཞན་ཕན་ཟླ་བས་སྨྲས་པའོ། །
སྒྲ་དབྱངས་ལྷ་མོའི་བསྟོད་པ།
ན་མཿཤྲཱི་མ་ཧཱ་གུ་རུ་སར་སྭཏྱ། རྒྱལ་ཀུན་ཡེ་ཤེས་གཅིག་ཏུ་བསྡུས་པའི་སྐུ། །རབ་འབྱམས་རྒྱལ་བ་སྲས་བཅས་སྐྱེད་པའི་ཡུམ། །སྐྱབས་གནས་རྒྱ་མཚོ་སྤྲོ་དང་བསྡུ་བའི་བདག །དབྱངས་ཅན་ལྷ་མོ་དྲན་ནོ་ཐུགས་རྗེས་དགོངས། །རྨད་བྱུང་ཚོགས་གཉིས་ཤིང་རྟས་ལེགས་དྲངས་ཤིང་། །བྲལ་སྨིན་ཡོན་ཏན་རྒྱ་མཚོ་འོད་སྟོང་འབར། །བློ་གསར་བློ་ཡི་པདྨོའི་གཉེན་གྱུར་པ། །སྨྲ་བའི་ཉི་མ་ལྷ་མོ་ཁྱོད་དྲན་ནོ། །རྣམ་ཀུན་མཁྱེན་པའི་ཆ་ཤས་ཡོངས་སུ་རྫོགས། །དམིགས་མེད་བརྩེ་ཆེན་རི་བོང་གཟུགས་ཀྱིས་བཀྲ། །ཕྲིན་ལས་འོད་དཀར་ཕྲེང་བའི་འཁོར་ཡུག་ཅན། །སྙིང་གི་མུན་སེལ་ལྷ་མོ་ཁྱོད་དྲན་ནོ། །རབ་མཛེས་སྐུ་མཆོད་མཚན་དཔེའི་རྒྱན་གྱིས་བཀླུབས། །ཡིད་འོང་གསུང་སྙན་ཡན་ལག་དྲུག་ཅུའི་སྤྲས། །ཟབ་ཡངས་མཁྱེན་པས་ཤེས་བྱ་ཐམས་ཅད་ཁྱབ། །ང་ཡི་སྐྱབས་གཅིག་ལྷ་མོ་ཁྱོད་དྲན་ནོ། །ཡེ་ཤེས་སྤྱན་གྱིས་རྟག་ཏུ་འཚོ་མཛད་པའི། །བྱམས་པའི་མ་ཁྱོད་ད་ལྟ་གང་ན་བཞུགས། །ཐུགས་རྗེའི་ཕྱག་གཡས་རིང་ནས་བརྐྱངས་ནས་ནི། །བདག་གི་མགོར་བཞག་བྱིན་གྱིས་བརླབ་པར་མཛོད། །ཡིད་འཕྲོག་སྐུ་ཡི་མཛེས་པ་མཐོང་བཞིན་དུ། །གསུང་གི་དབུགས་དབྱུང་ནམ་ཞིག་ཐོབ་སྙམས་ནས། །བདག་གི་མིག་གཉིས་ཟུམ་པའི་སྐབས་བྲལ་བས། །ད་ནི་མྱུར་ཏུ་བྱིན་གྱིས་བརླབ་ཏུ་གསོལ། །བརྩེ་ལྡན་མ་ཁྱོད་དྲུང་དུ་བཞུགས་ན་ཡང་། །རང་གི་ཉེས་པས་བདག་གིས་མི་མཐོང་བས། །ཐོག་མེད་དུས་ནས་བསགས་པའི་སྒོ་གསུམ་གྱི། །སྡིག་སྒྲིབ་མྱུར་དུ་འདག་པར་བྱིན་གྱིས་རློབས། །ལས་ངན་རྐྱེན་གྱིས་འབྱུང་བ་འཁྲུགས་པ་དང་། །མི་དང་མི་མིན་གདོན་གྱིས་བསྐྱེད་པ་ཡི། །ལུང་རྟོགས་ཡོན་ཏན་རྒྱུད་ལ་སྐྱེ་བའི་གེགས། །ལུས་སེམས་སྡུག་བསྔལ་ཞི་བར་བྱིན་གྱིས་རློབས། །རིང་ནས་གོམས་པའི་བག་ཆགས་ཤུགས་བརྟས་པས། །ཡོན་ཏན་འཇོམས་ཤིང་ཕུང་ཁྲོལ་ཀུན་གྱིས་རྒྱུ། །རང་དབང་མེད་པར་སྡིག་ལ་སྦྱོར་བ་ཡི། །ཆོས་མིན་རྣམ་རྟོག་འགག་པར་བྱིན་གྱིས་རློབས། །གང་ན་འཇིག་པ་མེད་པའི་བརྟུལ་ཞུགས་ཅན། །རི་དྭགས་དབང་པོ་གནས་པའི་ངང་ཚུལ་བཞིན། །ཞུམ་ཞིང་བག་ཚའི་རྣམ་པ་མི་འབྱུང་བར། །འཁོར་གྱི་འཇིགས་པ་ཞི་བར་བྱིན་གྱིས་རློབས། །མ་རིག་སྦུབས་ཆུད་བདག་བློའི་ཆུ་སྐྱེས་ལ། །ཐུགས་བརྩེའི་འོད་ཀྱི་ཕྲེང་བས་རེག་ཙམ་གྱིས། །ཕུལ་བྱུང་བློ་ཡི་འདབ་མ་རབ་རྒྱས་པའི། །སྤོབས་པའི་གཏེར་ཆེན་གྲོལ་བར་བྱིན་གྱིས་རློབས། །སྲིད་ལ་མ་ཞེན་ངེས་འབྱུང་ཚུལ་ཁྲིམས་དག །རང་ལ་མ་ཞེན་གཞན་ཕན་སེམས་མཆོག་འབྱོངས། །ཐ་མལ་མ་ཞེན་དག་མཉམ་ཆེན་པོར་རྟོགས། །རྣམ་དག་སྡོམ་གསུམ་ལྡན་པར་བྱིན་གྱིས་རློབས། །རྣམ་མང་ཐོས་པའི་ཡིད་བཞིན་དབང་གི་རྒྱལ། །ཡང་དག་བསམ་པས་བྱི་དོར་ལེགས་པར་བསྒྲུབས། །ཇི་བཞིན་བསྒོམ་པའི་རྒྱལ་མཚན་རྩེར་མཆོད་ནས། །སྲིད་ཞིའི་རྒུད་པ་ཞི་བར་བྱིན་གྱིས་རློབས། །འཆད་ལ་འགྲན་མེད་སྨྲ་བའི་སེང་གེར་གྱུར། །རྩོམ་པ་ཐོགས་མེད་ངག་གི་དབང་ཕྱུག་གྲུབ། །རྩོད་ལ་འཇིགས་མེད་སྤོབས་པའི་གདེངས་ཐོབས་ནས། །ཐུབ་བསྟན་ཡུན་དུ་འཛིན་པར་བྱིན་གྱིས་རློབས། །ཁྱད་པར་གྲུབ་པའི་དབང་ཕྱུག་ས་སྐྱ་པའི། །དྲི་མེད་གསུང་གི་གསང་མཛོད་ལེགས་བཟུང་ནས། །ལེགས་བཤད་བདུད་རྩིའི་དགའ་སྟོན་སྤྲོས་པ་ཡིས། །དོན་གཉེར་རེ་བ་འགེངས་བར་བྱིན་གྱིས་རློབས། །སྲིད་པའི་ཕུན་ཚོགས་གནོད་པའི་དུག་ལྟར་སྤང་། །ཡེངས་མེད་བསྒོམ་པ་ཆུ་བོའི་རྒྱུན་བཞིན་བསྐྱངས། །ཉམས་རྟོགས་ཡོན་ཏན་དབྱར་གྱི་མཚོ་བཞིན་འཕེལ། །མྱུར་དུ་གྲུབ་མཐའ་སྙོགས་པར་བྱིན་གྱིས་རློབས། །དོན་ཡོན་རྣམ་བཞིས་བླ་མ་མཉེས་པར་བྱས། །སྒོ་གསུམ་སྤྱོད་པ་བླ་མའི་བཀའ་བཞིན་བསྒྲུབས། །སྣང་སྲིད་ཆོས་ཀུན་བླ་མའི་ངོ་བོར་ཤར། །བླ་མའི་ལམ་གྱིས་གྲོལ་བར་བྱིན་གྱིས་རློབས། །སྡིག་ཅན་བདུད་ཀྱང་དགེ་བའི་བཤེས་སུ་མཐོང་། །སྡུག་བསྔལ་གདུང་བ་བརྩོན་པའི་གྲོགས་སུ་གྱུར། །མ་དག་དུག་ལྔ་གཉེན་པོའི་ལམ་དུ་ཤར། །སྤང་ཐོབ་དབྱེར་མེད་རྟོགས་པར་བྱིན་གྱིས་རློབས། །དད་པའི་དབང་གིས་ཡོན་ཏན་ཅན་ལ་གུས། །སྙིང་རྗེའི་དབང་གིས་དམན་ལ་ལྷག་པར་བྱམས། །བརྩོན་པའི་དབང་གིས་སྤང་རྟོགས་མཐར་ཕྱིན་ནས། །དོན་གཉིས་ལྷུན་གྱིས་འགྲུབ་པར་བྱིན་གྱིས་རློབས། །ཤེས་རབ་ཆེན་པོས་སྲིད་ལ་ཆགས་པ་སྤངས། །སྙིང་རྗེ་ཆེན་པོས་འཁོར་བ་དང་དུ་བླང་། །ཐབས་མཁས་སྤྱོད་པས་དུས་གསུམ་རྒྱལ་བ་ཡི། །ཕྲིན་ལས་བདག་གིས་སྐྱོང་བར་བྱིན་གྱིས་རློབས། །དེང་ནས་བཟུང་སྟེ་གནས་སྐབས་ཐམས་ཅད་དུ། །ལས་ཀྱི་དབང་གིས་སྐྱིད་སྡུག་ཅི་བྱུང་ཡང་། །སྙིང་གི་ཉི་མ་ལྷ་མོ་ཁྱོད་ཉིད་ལ། །རྒྱུན་དུ་གསོལ་བ་འདེབས་པར་བྱིན་གྱིས་རློབས། །གསོལ་བ་འདེབས་སོ་བློ་གཏེར་ལྷག་པའི་ལྷ། །བྱིན་གྱིས་རློབས་ཤིག་འཕགས་མ་དབྱངས་ཅན་མ། །འདི་ཕྱི་བར་དོའི་གནས་སྐབས་ཐམས་ཅད་དུ། །འབྲལ་མེད་རྗེས་སུ་འཛིད་པར་མཛད་དུ་གསོལ། །བླ་མ་ཁྱོད་ཡིན་ངོ་བོ་ཐ་དད་མེད། །ཡི་དམ་ཁྱོད་ཡིན་དངོས་གྲུབ་རྒྱ་མཚོའི་གཏེར། །མཁའ་འགྲོ་ཁྱོད་ཡིན་འཇིགས་པ་ཀུན་ལས་སྐྱོབ། །ཁྱོད་ལས་སྐྱབས་གཞན་མེད་དོ་རྗེ་བཙུན་མ། །སྤང་རྟོགས་མཐར་ཐུག་ཐུབ་པའི་ཆོས་སྐུ་ལས། །བདེན་གཉིས་མཐར་ཐུག་ཆོས་ཀྱང་མི་དམིགས་ཤིང་། །དེ་ཉིད་མངོན་བྱེད་ཚོགས་ཀྱི་མཐར་ཐུག་སྟེ། །དེ་བས་དཀོན་མཆོག་གསུམ་པོའང་ཁྱོད་ལགས་སོ། །ཆོས་སྲུང་ནོར་ལྷ་ཁྱོད་ཀྱིས་ཕྲིན་ལས་ཏེ། །མདོར་ན་རབ་འབྱམས་སྐྱབས་གནས་རྒྱ་མཚོའི་ཚོགས། །འཕགས་མ་ཁྱོད་ལས་གཞན་དུ་མ་མཐོང་བས། །ཁྱོད་ལས་སྐྱབས་གཞན་བདག་གིས་གང་དུ་བཙལ། །ལྷ་དང་བླ་མའི་བྱིན་རླབས་སེམས་ལ་ཞུགས། །ལས་ངན་རྐྱེན་གྱི་འཇིགས་པ་ཀུན་ལས་ཐར། །ལུང་དང་རྟོགས་པའི་ཡོན་ཏན་ལྷུན་གྱིས་གྲུབ། །འདི་དང་གཏན་དུ་དགེ་བའི་བཀྲ་ཤིས་ཤོག །དེ་ལྟར་འཕགས་མའི་ཐུགས་རྗེ་བསྐུལ་བའི་ངག །བྱིན་རླབས་ཉིད་བྱེད་འདྲེན་པའི་ཤིང་ལྟ་འདི། །ཤཱཀྱའི་དགེ་སློང་ཀུན་དགའ་རྒྱལ་མཚན་གྱིས། །བཀྲ་ཤིས་ལྷ་རྩེ་ཞེས་བྱའི་དགོན་པར་སྦྱར། །དགེའོ།། །།
ལྷ་མོ་རིག་བྱེད་མའི་བསྟོད་པ་སྲིད་ཞིའི་ལེགས་ཚོགས་འགུགས་པའི་ལྕག་ཀྱུ།
བླ་མ་ལ་ཕྱག་འཚལ་ལོ། །གསུང་གི་རྡོ་རྗེའི་དམིགས་མེད་སྙིང་རྗེའི་མདངས། །ངོ་མཚར་ཉམས་བརྒྱས་སྒེག་པ་ལྷ་མོའི་སྐུར། །ཡོངས་ཤར་བྱེ་རུའི་མདངས་འཛིན་ལྷག་པའི་ལྷ། །རྗེ་བཙུན་རིག་བྱེད་མ་ལ་ཕྱག་འཚལ་ལོ། །ཉེས་པས་མ་གོས་ཐབས་ཀྱི་པདྨའི་སྟེང་། །ཉོན་མོངས་མུན་སེལ་ཤེས་རབ་འོད་སྟོང་བདག །བདག་འཛིན་བདུད་བཅོམ་མི་རོའི་གདན་སྟེང་ན། །རབ་མཛེས་གར་གྱིས་རོལ་བ་ཁྱོད་ལ་བསྟོད། །རྟོག་པའི་གྲྭ་ཟུར་སྤངས་པའི་ཆོས་ཉིད་ཀྱི། །གནས་ལས་མངོན་སུམ་རྟོགས་པའི་འཛུམ་པའི་ཞལ། །དཀར་གསལ་ཡིད་འོང་ཚེམས་ཀྱིས་ཕྲེང་བ་དང་། །བདུད་འཇོམས་མཆེ་བའི་མྱུ་གུའི་མཛེས་ལ་བསྟོད། །སྟོང་ཉིད་བཅུ་ཅུག་ལང་ཚོ་དང་བའི་གཟིས། །ལྷར་བཅས་ཡིད་ཀྱི་བརྟན་པ་འཕྲོག་བྱེད་ཅིང་། །འགྲོ་ལ་རྗེས་ཆགས་ཚངས་པའི་གནས་པ་བཞིའི། །ཕྱག་གིས་འགྲོ་བ་རྗེས་སུ་འཛིན་ལ་བསྟོད། །དུས་གསུམ་སྒྲིབ་མེད་གཟིགས་པའི་ཡེ་ཤེས་ཀྱི། །སྤྱན་གསུམ་རྣམ་པར་བཀྲ་བའི་ཟུར་མིག་གིས། །ཁམས་གསུམ་འགྲོ་ལ་རྟག་པར་ཉེར་དགོངས་པ། །ཐུགས་རྗེའི་དབང་ཕྱུག་འཕགས་མ་ཁྱོད་ལ་བསྟོད། །དམར་སྣུམ་གྱེན་དུ་བསྐྱོད་པའི་དབུ་སྐྲ་ཡིས། །མཁའ་དབྱིངས་མཛེས་པར་བྱེད་པའི་སྣང་ཚུལ་འདིས། །རྒྱལ་བ་རྒྱལ་མཚོའི་རྗེས་འགྲོའི་ཡོན་ཏན་གྱི། །མངོན་རྟོགས་འགྲོ་ལ་ངོམས་པ་ཁྱོད་ལ་བསྟོད། །མཚན་རྟོག་འཁྲུལ་པ་གཅིག་ཅར་ཟ་བ་ལ། །རིངས་པའིི་སྟབས་ཀྱིས་ཡུན་ཙམ་ཁྲོས་ན་ཡང་། །བརྩེ་བས་རྗེས་ཆགས་ནམ་ཡང་མི་འདོར་བའི། །མཐོང་བས་ཡིད་འཕྲོག་ལྷ་མོ་ཁྱོད་ལ་བསྟོད། །ཉོན་མོངས་མ་སྤངས་རང་ངོ་ཡེ་ཤེས་སུ། །མཐོང་བའི་རང་མདངས་ཐོད་པའི་ཅོད་པན་དང་། །ཕུང་པོའི་དག་པ་བདེ་གཤེགས་རིགས་ལྔའི་ལྷར། །མཚོན་བྱེད་ཕྱག་རྒྱས་སྤྲས་པ་ཁྱོད་ལ་བསྟོད། །རྟེན་འབྲེལ་གཙོ་བོ་ནང་གི་རྩ་ཡིག་གི། །ཐ་མལ་སྣང་བ་དབྱིངས་སུ་དག་པའི་བརྡར། །མགོ་རློན་ལྔ་བཅུའི་ཕྲེང་བ་དོ་ཤལ་གྱིས། །བརྒྱན་པའི་བདུད་འཇོམས་ལྷ་མོ་ཁྱོད་ལ་བསྟོད། །རྣམ་ཀུན་མཆོག་ལྡན་སྟོང་པའི་གཞུ་བདུངས་ཏེ། །ཀུན་ཁྱབ་རིས་བྲལ་སྙིང་རྗེའི་མདའ་དང་བཅས། །ཟུང་འཇུག་ཐབས་མཁས་ཕྱག་གིས་ལེགས་བསྐུལ་བས། །ཁམས་གསུམ་དབང་སྡུད་ལྷ་མོ་ཁྱོད་ལ་བསྟོད། །ཤེས་རབ་ལྕགས་ཀྱུས་ཞི་བའི་ཡོན་ཏན་འགུགས། །སྙིང་རྗེའི་ཞགས་པས་འགྲོ་བ་རྗེས་སུ་འཛིན། །ཐབས་ཤེས་ཟུང་འཇུག་ཞབས་ཀྱི་སྟངས་སྟབས་ཀྱིས། །སྲིད་ཞིའི་རྒུད་སེལ་ལྷ་མོ་ཁྱོད་ལ་བསྟོད། །དད་ལྡན་སྒྲུབ་ལ་དངོས་གྲུབ་སྟེར་བའི་ཕྱིར། །སིལ་ཁྲོལ་སྒྲ་འབྱིན་རཏྣའི་རྒྱན་གྱིས་ཀླུབས། །གདུག་ཅན་དྲེགས་པ་ཟིལ་གྱིས་གནོན་པའི་ཕྱིར། །སྣམ་དཀྲིས་སྟག་གི་པགས་པས་མཛེས་ལ་བསྟོད། །སྲིད་པའི་མུན་པས་གཞར་ཡང་མ་གོས་ཤིང་། །མཁྱེན་བརྩེ་ནུས་པའི་གཟི་བྱིན་སྟོང་འབར་བས། །རྣམ་གསལ་ཉི་མའི་རྒྱབ་ཡོལ་མཛད་པ་ཡི། །ཡེ་ཤེས་སྐུ་ཅན་ཁྱོད་ལ་ཕྱག་འཚལ་ལོ། །དུས་གསུམ་རྒྱལ་བ་ཐམས་ཅད་བསྐྱེད་པའི་ཡུམ། །གནས་གསུམ་མཁའ་འགྲོའི་གཙོ་མོ་རྗེ་བཙུན་མའི། །གསང་གསུམ་ཡོན་ཏན་ཡིད་ལ་དྲན་པའི་བློས། །སྒོ་གསུམ་གུས་པས་ཁྱོད་ལ་སྐྱབས་སུ་མཆི། །སྐུ་གསུང་ཐུགས་ཀྱི་བྱིན་རླབས་བདུད་རྩིའི་ཆུས། །ལུས་ངག་ཡིད་ཀྱི་དྲི་མ་ཀུན་སྦྱངས་ནས། །ལྷ་སྔགས་ཡེ་ཤེས་ངང་ལས་མི་གཡོ་བའི། །ཉམས་རྟོགས་རྒྱུད་ལ་སྐྱེ་བར་བྱིན་གྱིས་རློབས། །དེང་ནས་བཟུང་སྟེ་ཚེ་རབས་ཐམས་ཅད་དུ། །རྗེ་བཙུན་འཕགས་མ་ཐུགས་རྗེའི་དབང་ཕྱུག་གིས། །སྒྲིབ་བྲལ་ཡེ་ཤེས་གཟིགས་པས་འཚོ་བཞིན་དུ། །དུས་ཀུན་བདག་ནི་སྐྱོང་བར་བྱིན་གྱིས་རློབས། །མ་རིག་དབང་གིས་སྲིད་པའི་འཚོར་ལྷུང་སྟེ། །ལས་དབང་བཙན་པོའི་ཆད་པས་མནར་བ་བདག །རྣམ་རྟོག་འཁྲུལ་བའི་དབང་དུ་མི་འགྲོ་བར། །རང་སེམས་དབང་དུ་འདུ་བར་བྱིན་གྱིས་རློབས། །གཞན་དབང་བདུད་བཞིའི་འཆིང་བ་ལས་གྲོལ་ནས། །རང་སྣང་དབང་དུ་འདུས་པའི་རྟེན་འབྲེལ་གྱིས། །ལྷ་དང་ལྷ་མིན་མི་དབང་མཐུ་ཆེན་སོགས། །མ་ལུས་དབང་དུ་འདུ་བར་བྱིན་གྱིས་རློབས། །གསོག་འཇོག་རྩོལ་གྲུབ་དྲི་མས་མ་གོས་པའི། །ཏིང་འཛིན་ནམ་མཁའ་མཛོད་ལ་དབང་འབྱོར་བས། །བརྩེ་བའི་ལག་བརྐྱངས་སྦྱིན་པའི་དགའ་སྟོན་གྱིས། །ཕོངས་པའི་རེ་བ་སྐོང་བར་བྱིན་གྱིས་རློབས། །རྨོངས་པའི་དབང་གིས་ཉམ་ཐག་གྱུར་པ་ལ། །བརྩེ་བའི་དབང་གིས་ཆོས་སྦྱིན་ལེགས་སྤེལ་བས། །རྟེན་འབྲེལ་དབང་གིས་ཐེག་མཆོག་སྣོད་གྱུར་ཏེ། །ཐུབ་དབང་བསྟན་པ་རྒྱས་པར་བྱིན་གྱིས་རློབས། །ཁྱད་པར་གྲུབ་པའི་དབང་ཕྱུག་ས་སྐྱ་བའི། །ཟབ་རྒྱས་ཆོས་ཀྱི་གསང་མཛོད་ལེགས་བཟུང་ནས། །བཤད་དང་སྒྲུབ་པའི་འཕྲིན་ལས་འོད་ཟེར་གྱིས། །གདུལ་བྱའི་པད་ཚལ་སྐྱོང་བར་བྱིན་གྱིས་རློབས། །གང་དུ་བདག་ཉིད་གནས་པའི་ས་ཕྱོགས་སུ། །མི་དང་མི་མིན་འབྱུང་པོའི་ཚོགས་རྣམས་ཀྱི། །ཕན་ཚུན་གནོད་པའི་བསམ་སྦྱོར་རབ་སྤངས་ཏེ། །སྡེ་འཁྲུགས་འཐབ་རྩོད་ཞི་བར་བྱིན་གྱིས་རློབས། །མདོར་ན་བདག་ཉིད་མཐོང་ཐོས་དྲན་རེག་གིས། །འགྲོ་བའི་བློ་སྣ་ཆོས་ལ་བསྒྱུར་ནས་ནི། །རྣམ་གྲོལ་ཐར་བའི་ས་བོན་འདེབས་ནུས་པའི། །ལྷུན་གྲུབ་ཕྲིན་ལས་རྒྱས་པར་བྱིན་རློབས། །དབང་བཅུའི་རྩལ་ལྡན་ལྷ་མོའི་བྱིན་རླབས་ཀྱིས། །དབང་གི་ཆུ་བོ་སྙིང་ལ་ལེགས་ཞུགས་པས། །དབང་ལས་བྱུང་བའི་ཉམས་མྱོང་ཡེ་ཤེས་ཀྱི། །དབང་དུ་ཆོས་ཀུན་འདུ་བར་བྱིན་གྱིས་རློབས། །དབང་གི་མདངས་ལྡན་རྒྱལ་ཡུམ་རིག་བྱེད་མའི། །དབང་བཞིའི་ལམ་བཟང་ཚུལ་བཞིན་བསྒོམ་པའི་མཐུས། །དབང་ཕྱུག་བརྒྱད་ལྡན་ཆོས་ཀྱི་རྒྱ་སྲིད་ལ། །དབང་བསྐུར་མྱུར་དུ་ཐོབས་པར་བྱིན་གྱིས་རློབས། །ཞེས་ལྷ་མོ་རིག་བྱེད་མའི་བསྟོད་པ་སྲིད་ཞིའི་ལེགས་ཚོགས་འགུགས་པའི་ལྕག་ཀྱུ་ཞེས་བྱབ་འདི་ནི། མང་དུ་ཐོས་པའི་རྣམ་འབྱོར་པ་ཀུན་དགའ་རྒྱལ་མཚན་གྱིས་བཀྲ་ཤིས་ཆོས་ལུང་རི་ཁྲོད་དུ་སྦྱར་བ་དགེ་ཞིང་བཀྲ་ཤིས།། །།
རྗེ་བཙུན་རིག་བྱེད་དབང་མོ་ལ་བསྟོད་པ་ཡིད་འཕྲོག་མ།
ན་མོ་གུ་རུ་བྷྱཿཡིད་འཕྲོག་སྐུ་ཡིས་སྲིད་གསུམ་དབང་དུ་བྱེད། །རབ་སྙན་གསུང་གིས་འགྲོ་བ་རྗེས་སུ་འཛིན། །ཟབ་ཡངས་ཐུགས་ནི་དུས་གསུམ་འཕགས་མའི་ཚོགས། །སྐྱེད་མི་ཡུམ་གྱུར་མ་ལ་ཕྱག་འཚལ་ལོ། །དཔག་ཡས་མཁྱེན་པའི་ལང་ཚོ་དར་བབས་ཤིང་། །བརྩེ་ཆེན་པདྨ་རཱ་གའི་མདངས་འཛིན་མ། །ཕྲིན་ལས་ཨུཏྤལ་གཞོན་ནུའི་ཕྱག་མཚན་གྱིས། །སྲིད་ཞིའི་ལེགས་ཚོགས་འགུགས་པ་ཁྱོད་ལ་བསྟོད། །འཛུམ་མའི་སྤྱན་ཟུང་པདྨོའི་མཚར་སྡུག་གིས། །སྐལ་བཟང་བུང་བའི་ཚོགས་ཀྱིས་ཡིད་འགུགས་ཤིང་། །གྲུབ་གཉིས་སྦྲང་རྩིའི་བཅུད་ཀྱིས་ཚིམ་མཛད་མ། །བཅོམ་ལྡན་འདས་མ་ཁྱོད་ལ་སྐྱབས་སུ་མཆི། །ཉོན་མོངས་ཤུགས་དྲག་ལས་ཀྱི་ཆད་པས་མནར། །རྐྱེན་ངན་ཡུལ་གྱི་འཇིགས་པ་ཆེར་མཐོང་ནས། །སྙིང་ནས་ཁྱོད་ལ་སྐྱབས་སུ་མཆི་ལགས་ན། །མྱུར་མགྱོགས་ཐུགས་རྗེའི་ཟུངས་ཤིག་རྗེ་བཙུན་མ། །དུག་ལྔ་སྐྱེས་ཀྱང་ལས་ངན་མི་གསོག་ཅིང་། །འགལ་རྐྱེན་བྱུང་ཡང་རང་ཚུགས་མི་འཆོར་བར། །རྐྱེན་ངན་བྱང་ཆུབ་ལམ་དུ་སློང་ནུས་པའི། །དྲན་ཤེས་བརྟན་པར་མཛོད་ཅིག་རྗེ་བཙུན་མ། །ཕྱི་ནང་གསང་བའི་རྐྱེན་ངན་བར་ཆད་སོལ། །འདི་ཕྱི་བར་དོའི་འཇིགས་པ་ཀུན་ལས་སྐྱོབས། །སྐུ་གསུང་ཐུགས་ཀྱི་བྱིན་རླབས་བདག་རྒྱུད་ལ། །མྱུར་དུ་འཇུག་པར་མཛོད་ཅིག་རྗེ་བཙུན་མ། །ལས་ངན་སྡིག་པའི་མུན་པ་དབྱིངས་སུ་སངས། །རྐྱེན་ངན་འཁྲུལ་བའི་སྣང་བ་སྤྲིན་བཞིན་ཡལ། །ཉམས་མྱོང་རྟོགས་པའི་ཡོན་ཏན་དབྱར་མཚོ་བཞིན། །འཕེལ་ཞིང་རྒྱས་པར་མཛོད་ཅིག་རྗེ་བཙུན་མ། །རང་སྣང་འཁྲུལ་བའི་རྟོག་པ་དབང་དུ་འདུས། །གཞན་སྣང་འགྲོ་བའི་བློ་སྣ་ཆོས་ལ་བསྒྱུར། །གཉིས་མེད་ཡེ་ཤེས་ལྷ་མོའི་རང་ཞལ་མཇལ། །དོན་གཉིས་མཐར་ཕྱིན་མཛོད་ཅིག་རྗེ་བཙུན་མ། །སྐྱབས་གནས་ཀུན་འདུས་བླ་མ་རྗེ་བཙུན་མས། །ཐུགས་རྗེའི་ལྕགས་ཀྱུས་ནམ་ཡང་མི་གཏོང་བར། །སྲིད་ཞིའི་འཇིག་པ་ཀུན་ལས་བསྐྱངས་ནས་ནི། །མྱུར་དུ་ཁྱོད་རང་ལྟ་བུར་བྱིན་གྱིས་རློབས། །ཞེས་པ་འདིའང་རྩང་ཆེན་གོས་ཀྱི་དབེན་གནས་སུ་བློ་གྲོས་གཞན་ཕན་ཟླ་བས་སྦྱར་བ་དགེའོ།། །།
རིག་བྱེད་དབང་མོའི་བསྟོད་པ་ཀ་ཕྲེང་མ།
ཕ་གཅིག་ལྷ་དང་བླ་མ་དབྱེར་མེད་ལ། །རྩེ་གཅིག་དད་པའི་ཡིད་ཀྱིས་གསོལ་བ་འདེབས། །ཀ་མ་ལ་དང་ཉིན་བྱེད་དཀྱིལ་འཁོར་སྟེང་། །ཁ་དོག་ཡིད་འོང་ལི་ཁྲིའི་མདངས་འཛིན་མ། །ག་ཤལ་ཐོད་སྐམ་ཕྲེང་བས་བརྒྱན་པ་ཡི། །ང་ཡི་སྐྱབས་གཅིག་རྣལ་འབྱོར་མ་ལ་འདུད། །ཅ་ག་རབ་མཛེས་རུས་པའི་རྒྱན་གྱིས་བཀླུབས། །ཆ་ཤས་ཡོན་ཏན་རྫོགས་པའི་རྣལ་འབྱོར་མས། །ཇ་ཆང་ལས་མངར་བདེ་ཆེན་བསྐྱེད་སླད་དུ། །ཉ་རྒྱས་ཟླ་ལྟའི་འཛུམ་ཞལ་བདག་ལ་སྟོན། །ཏ་ཐཱ་ག་ཏ་བསྐྱེད་པའི་ཡུམ་མཆོག་མས། །ཐ་བ་སེམས་ཀྱི་སྒྲིབ་པ་ཀུན་བཅོམ་ནས། །ད་ནས་བཟུང་སྟེ་བྱང་ཆུབ་མ་ཐོབ་པར། །ན་མར་འཕགས་མས་ཐུགས་རྗེ་བསྐྱང་དུ་གསོལ། །པ་སངས་ལྟར་དཀར་ཡིད་ཆེས་དད་པ་ཡིས། །ཕ་གཅིག་བླ་མའི་ངོ་བོར་ཁྱོད་བསྟེན་ན། །བ་མཆོག་འདོད་འཇོའི་ངང་ཚུལ་ཇི་བཞིན་དུ། །མ་ལུས་དངོས་གྲུབ་བདག་ལ་བསྩལ་དུ་གསོལ། །ཙ་ཏུར་སྐུ་ཡི་དབང་ཕྱུག་རྗེ་བཙུན་མས། །ཚ་ཟེར་འོད་ཀྱི་པད་ཚལ་ཇི་བཞིན་དུ། །ཛ་ཡའི་དགོངས་པ་ལུང་རྟོགས་དམ་པའི་ཆོས། །ཝ་ལེར་ཡིད་ལ་འཆར་བར་མཛད་དུ་གསོལ། །ཞྭ་ཐོད་བཞིན་དུ་མ་ཁྱོད་རིགས་བདག་ཏུ། །ཟ་ཉལ་ལ་སོགས་དུས་ཀུན་དྲན་བྱས་ནས། །
འ་འུར ་སྔགས་ཀྱི་ང་རོས་ཁྱོད་འབོད་ན། །ཡ་མཚན་བསམ་འདས་དངོས་གྲུབ་བདག་ལ་སྩོལ། །ར་གའི་མདོག་མཚུངས་རྡོ་རྗེ་བཙུན་མོའི་སྐུ། །ལ་ལ་མ་ཡིན་དུས་ཀུན་མཐོང་བའི་མཐུས། །ཤ་ཤ་དྷ་རའི་ཆུ་གཏེར་ཇི་བཞིན་དུ། །ས་ལམ་རྟོགས་པ་སྐྱེད་ཅིག་བཅོམ་ལྡན་མ། །ཧ་ཅང་མི་འགྱངས་མྱུར་བའི་ཐུགས་རྗེ་ཡིས། །ཨ་མ་རྗེ་བཙུན་རྡོ་རྗེ་རྣལ་འབྱོར་མས། །ཧ་ཧའི་དབྱངས་ཀྱི་གད་མོ་དང་འགྲོགས་པའི། །ཨ་ལ་ལ་ཞེས་གསུང་གིས་དབུགས་དབྱུང་མཛོད། །མི་བྱེད་སྙིང་ནས་དད་པའི་གདུང་ཤུགས་ཀྱིས། །ཚེ་རབས་ལས་ཀྱིས་འབྲེལ་བའི་ཡི་དམ་ལྷར། །རྒྱུན་ཆད་མེད་པར་གསོལ་བ་འདེབས་ལེགས་ན། །འདུ་འབྲལ་མེད་པར་བྱིན་གྱིས་བརླབ་ཏུ་གསོལ། །ཞེས་པའམ་སྡེ་གཞུང་མཆོག་སྤྲུལ་རིན་པོ་ཆེ་ཀུན་དགའ་རྒྱལ་མཚན་གྱིས་མཛད་པ་དགེ་ཞིང་བཀྲ་ཤིས།། །།
གསོལ་འདེབས་དང་སྨོན་ལམ་སྐྱབས་གནས་ཀུན་འདུས་མ།
བླ་མ་ལ་ཕྱག་འཚལ་ལོ། །སྐྱབས་གནས་ཀུན་འདུས་དྲིན་ཆེན་བླ་མ་དང་། །དབྱེར་མེད་བདག་གི་སྐྱབས་མགོན་རྗེ་བཙུན་མས། །ད་ལྟ་ཉིད་དུ་བྱིན་གྱིས་བརླབས་ནས་ནི། །དགོངས་པ་དབྱེར་མེད་འགྱུར་བར་མཛད་དུ་གསོལ། །རྣམ་མང་སྲིད་ཞིའི་ཉམས་འགྱུར་མ་ལུས་པ། །རང་རིག་དོན་གྱི་ལྷ་མོའི་རང་རྩལ་དུ། །ཤེས་པའི་མོད་ལ་རང་སྣང་འཁྲུལ་བའི་ཚོགས། །ལྷག་པའི་ལྷ་རུ་འཆར་བར་བྱིན་གྱིས་རློབས། །ཡུལ་སྣང་དགའ་སྡུག་ཆགས་སྡང་རེ་དོགས་བློ། །གང་ཤར་བདེ་བ་ཆེན་པོའི་ཡེ་ཤེས་སུ། །མཐོང་བའི་མོད་ལ་འཁྲུལ་སྣང་འཁོར་བའི་མཚང་། །ད་ལྟ་ཉིད་དུ་ཞིག་པར་བྱིན་གྱིས་རློབས། །སྐུ་གསུམ་དབྱེར་མེད་བླ་མ་རྗེ་བཙུན་མ། །མ་ལུས་རིགས་ཀྱི་བདག་པོ་ཡིད་ཆེས་ནས། །ལྷ་གཅིག་སྐྱབས་ཀུན་འདུས་པའི་ངོ་བོ་རུ། །མཐོང་བའི་མོས་གུས་སྐྱེ་བར་བྱིན་གྱིས་རློབས། །རང་སྣང་རྒྱལ་བ་སྐུ་གསུམ་ལྷ་ཚོགས་རྣམས། །རང་རིག་སེམས་ལས་ཕྱི་རོལ་མ་གྱུར་བས། །རང་བཞིན་འོད་གསལ་འདུ་འབྲལ་མེད་པའི་ལྷའི། །རང་ཞལ་མངོན་སུམ་མཐོང་བར་བྱིན་གྱིས་རློབས། །རང་ངོ་མ་འཕྲོད་རྟོག་པའི་འཁྲུལ་འཁོལ་གྱིས། །རང་སེམས་སྒྱུ་མའི་སྐྱེས་བུ་དུབ་གྱུར་པས། །རང་གནས་བདེ་ཆེན་བརྗོད་བྲལ་ཁང་བཟང་དུ། །རང་བབ་ལྷོད་ཀྱིས་འདུག་པར་བྱིན་གྱིས་རློབས། །འཛིན་པས་མ་བཅོས་དམིགས་པའི་གཏད་སོ་ཞིག །ཡེངས་བས་མ་ཁྱེར་སྒྲུབ་པའི་ཞེ་འདོད་ཟད། །ཞེན་པས་མ་བཅིངས་དགག་སྒྲུབ་འཁྲུལ་པ་ཡལ། །མཉམ་ཉིད་ལམ་དུ་ལོངས་པར་བྱིན་གྱིས་རློབས། །རེ་བས་མ་བཅིངས་རྒྱལ་བའི་བྱིན་རླབས་ཞུགས། །དོགས་པས་མ་བསླད་བདུད་སྡེ་བར་ཆད་ཞི། །ཆོས་ལ་ཡིད་ཆེས་སོམས་ཉི་མདུད་པ་གྲོལ། །བག་ཡངས་དགེ་སྦྱོར་འཕེལ་བར་བྱིན་གྱིས་རློབས། །ནམ་ཡང་མི་ཞུམ་སྙིང་སྟོབས་སེམས་ལ་ཞུགས། །ཉམས་པ་མེད་པའི་དྲན་ཤེས་རྒྱུད་ལ་འབྱོར། །རྐྱེན་ངན་ལམ་ཁྱེར་གདམས་པའི་ཉམས་ལེན་གྱིས། །གང་སྣང་གྲོགས་སུ་འཆར་བར་བྱིན་གྱིས་རློབས། །མེད་སྣང་བདག་འཛིན་འགོང་བོ་རྡུལ་དུ་བརླགས། །འཁྲུལ་སྣང་གཞན་གྱི་སྡུག་བསྔལ་དང་དུ་བླངས། །ཚོགས་གཉིས་སྒྱུ་མའི་མེ་ཡི་ལས་ཉོན་གྱི། །སྨིག་རྒྱུའི་ཆུ་བོ་སྐེམ་པར་བྱིན་གྱིས་རློབས། །ཞེན་མེད་བརྟུལ་ཞུགས་སྤྱོད་པའི་རྣལ་འབྱོར་གྱིས། །སྒྱུ་ལུས་ཕུང་པོ་མཆོད་སྦྱིན་མགྲོན་དུ་བསྔོས། །སྙེམ་བྱེད་བདུད་ཀྱི་འཁྲི་བ་རྩད་ནས་བཅད། །གཅོད་ཡུལ་ལམ་དུ་ལོངས་པར་བྱིན་གྱིས་རློབས། །ཀུན་འབྱུང་བདེན་པ་འཕགས་པའི་ལམ་དུ་རིག །སྡུག་བསྔལ་ཕུང་པོ་ལྷག་པའི་ལྷ་རུ་མཐོང་། །གཞན་དུ་མ་བཙལ་སངས་རྒྱས་རང་ལས་རྙེད། །འཁོར་འདས་དབྱེར་མེད་རྟོགས་པར་བྱིན་གྱིས་རློབས། །ཚེ་འདིའི་ཞེན་པ་གནོད་པའི་དུག་བཞིན་སྤངས། །ཆོས་བརྒྱད་རྟོག་པ་ལམ་ཁའི་རོ་བཞིན་བོར། །རང་ཉིད་ཡིད་བྱེད་གཤེད་མ་ལྟར་མཐོང་ནས། །ཚེ་དང་སྒྲུབ་པ་སྙོམས་པར་བྱིན་གྱིས་རློབས། །འདུ་འཛིས་དབེན་པའི་བས་མཐའི་རི་སུལ་བཟུང་། །ཟད་པ་མེད་པའི་ཆོག་ཤེས་ནོར་གྱིས་ཕྱུག །ཡེངས་པ་མེད་པའི་རྩེ་གཅིག་ཏིང་འཛིན་གྱིས། །བླ་མའི་ཐུགས་དགོངས་རྫོགས་པར་བྱིན་གྱིས་རློབས། །འབྲེལ་བ་མེད་པའི་ང་བདག་ཁྱད་དུ་བསད། །ཐོག་མེད་གཉེན་གྱུར་འགྲོ་བ་བདག་ཏུ་བཟུང་། །བྱས་ཡུལ་མེད་པའི་དགེ་བ་འགྲོ་ལ་བསྔོ། །ཕ་མ་དྲིན་ལན་འཁོལ་བར་བྱིན་གྱིས་རློབས། །མཆོག་འཛིན་ཞིག་པས་ཀུན་གྱིས་སྤྱི་བོར་བཀུར། །རང་སེམས་ཐུལ་བས་གཞན་སྣང་དབང་དུ་འདུས། །ལྷག་བསམ་འབྱོངས་པས་ཕྲིན་ལས་དར་ཞིང་རྒྱས། །ཉམ་ཐག་མགོན་སྐྱབས་བྱེད་པརབྱིན་གྱིས་རློབས། །དོན་དམ་དབྱིངས་སུ་ལས་འབྲས་མ་གྲུབ་ཀྱང་། །རྟེན་འབྱུང་རྒྱུ་འབྲས་འཆར་ཚུལ་མི་འགོག་པའི། །ཟུང་འཇུག་རྒྱལ་བ་དགྱེས་པའི་ལམ་བཟང་ལ། །ཡིད་ཆེས་སྙིང་ནས་སྐྱེ་བར་བྱིན་གྱིས་རློབས། །འཛིན་མེད་ཚུལ་གྱིས་རྒྱལ་བའི་ཆོས་མཛོད་བཟུང་། །དམིགས་མེད་ངང་ནས་འགྲོ་ལ་སྙིང་རྗེ་བསྐྱེད། །བདེན་མེད་རྟོགས་བཞིན་འཁྲུལ་སྣང་འགྲོ་བའི་དོན། །ལྷུན་གྲུབ་རྒྱུན་མི་ཆད་པར་བྱིན་གྱིས་རློབས། །བརྩོན་པས་སྒྲུབ་པའི་དུས་གསུམ་དགེ་བའི་ཚོགས། །མ་ཉམས་མ་གོད་འཇམ་དཔལ་དཔའ་བོ་ཡི། །མཁྱེན་པའི་ཡོངས་བསྔོ་སྨོན་པ་མེད་དབྱིངས་སུ། །སྙེག་པའི་ཡོངས་བསྔོ་དྲན་པར་བྱིན་གྱིས་རློབས། །འཆི་ཁའི་སྣང་བ་ལྷ་དང་བླ་མར་ཤར། །བར་དོ་མེད་པར་དག་པའི་ཞིང་ཁམས་སུ། །དཔའ་བོ་མཁའ་འགྲོའི་ཚོགས་ཀྱིས་མདུན་བསུས་ཏེ། །ངོ་མཚར་ལྟས་བཅས་འགྲོ་བར་བྱིན་གྱིས་རློབས། །དགོངས་པ་ཆོས་ཀྱི་སྐུ་ལས་མ་གཡོས་པར། །ཕྲིན་ལས་རྒྱལ་བ་རྒྱ་མཚོའི་རྗེས་འགྲོ་བས། །འཁྲུལ་སྣང་འཁོར་བའི་སྡུག་བསྔལ་མ་ཟད་པར། །མ་ལུས་འགྲོ་བའི་མགོན་སྐྱབས་བྱེད་པར་ཤོག །ཅེས་པ་འདི་ནི་རྗེ་བླ་མ་རྫོགས་པའི་སངས་རྒྱས་འཇམ་པའི་དབྱངས་བློ་གཏེར་དབང་པོའི་ཞལ་སྔ་ནས་དང་། འཁོར་ལོའི་མགོན་པོ་འཇམ་མགོན་ངག་དབང་ལེགས་པའི་འབྱུང་གནས་ཡེ་ཤེས་རྒྱལ་མཚན་དཔལ་བཟང་པོ་ཞལ་སྔ་ནས་ལ་སོགས་པ་དམ་པ་དུ་མའི་བཀའ་དྲིན་གྱིས་བསྐྱངས་པའི་རི་སུལ་ཉུལ་བའི་རྣམ་འབྱོར་པ་ཀུན་དགའ་རྒྱལ་མཚན་གྱིས་གཙང་ཆེན་གོས་ཀྱི་དབེན་གནས་སུ་བྲིས་པའོ།། །།
རྗེ་བཙུན་བླ་མའི་བསྟོད་པ་བྱིན་རླབས་མྱུར་འཇུག
ན་མོ་གུ་རུ་བྷྱཿངག་གི་དབང་ཕྱུག་འཁོན་རིགས་ས་སྐྱ་པའི། །དྲི་མེད་གསུང་གི་གསང་བའི་མཛོད་བཟུང་ནས། །ལེགས་བཤད་བདུད་རྩིས་སྐལ་ལྡན་སྐྱོང་མཛད་པ། །ཆོས་ཀྱི་རྒྱལ་པོ་བླ་མའི་ཞབས་ལ་འདུད། །ཚུལ་ཁྲིམས་དག་པས་སྲིད་པ་རྒྱབ་ཀྱིས་ཕྱོགས། །ལྷག་བསམ་འབྱོངས་བས་འགྲོ་ལ་བུ་ལྟར་བརྩེ། །ཐབས་ལ་མཁས་པས་འཁོར་འདས་མཉམ་ཉིད་གཟིགས། །བདག་ཉིད་ཆེན་པོ་བླ་མའི་ཞབས་ལ་འདུད། །ཡུན་རིང་བརྩོན་པས་ཟབ་མོའི་དམ་ཆོས་བཙལ། །དེ་དོན་བསམས་པས་སྒྲོ་འདོགས་ནང་ནས་བཅད། །ཇི་བཞིན་བསྒོམས་པས་ཉོན་མོང་གཡུལ་ངོ་བཅོམ། །སྤངས་རྟོགས་མཐར་བྱིན་བླ་མའི་ཞབས་ལ་འདུད། །དཀའ་སྤྱད་དྲག་པོས་སྒྲུབ་པའི་རྒྱལ་མཚན་བཙུགས། །ཟབ་དོན་བསྒོམས་པས་ཉམས་རྟོགས་ནང་ནས་ཤར། །ལྷ་དང་བླ་མས་མངོན་སུམ་བྱིན་གྱིས་བརླབས། །གྲུབ་པའི་དབང་ཕྱུག་བླ་མའི་ཞབས་ལ་འདུད། །དམན་ས་བཟུང་ནས་གོང་མའི་རྣམ་ཐར་སྐྱོང་། །ཆོས་བརྒྱད་སྤངས་ནས་སྙིང་པོའི་སྒྲུབ་པ་མཛད། །བདག་བདེ་བོར་ནས་གཞན་དོན་ཁུར་དུ་བཞེས། །དོན་གཉིས་མཐར་ཕྱིན་བླ་མའི་ཞབས་ལ་འདུད། །སྙིང་སྟོབས་ཆེན་པོས་རྒྱལ་སྲས་སྤྱོད་ལ་འཇུག །མྱུར་ལམ་ཟབ་མོས་ཚོགས་གཉིས་མྱུར་ཏུ་རྫོགས། །ངེས་གསེང་ལམ་གྱིས་དྲོད་རྟགས་མངོན་དུ་གྱུར། །ས་ལམ་མཐར་ཕྱིན་བླ་མའི་ཞབས་ལ་འདུད། །རྣམ་དག་སྡོམ་གསུམ་ཉེས་པའི་དྲི་མས་དབེན། །གསང་གསུམ་སྤྱོད་པ་བཅོས་མའི་ཁྱུ་ལས་རིང་། །རྒྱུ་གསུམ་དབྱེར་མེད་དགོངས་པ་མངོན་དུ་གྱུར། །སྐྱབས་གསུམ་ཀུན་འདུས་བླ་མའི་ཞབས་ལ་འདུད། །སྔོན་བྱུང་རྟོགས་བརྗོད་སྒྲིབ་མེད་མངོན་སུམ་གཟིགས། །ད་ལྟའི་ཤེས་བྱ་ལྐོག་ཏུ་མ་གྱུར་ཅིང་། །འབྱུང་འགྱུར་ལུང་བསྟན་ཇི་བཞིན་ཐོག་ཏུ་བབས། །དུས་གསུམ་ཀུན་མཁྱེན་བླ་མའི་ཞབས་ལ་འདུད། །ཐུགས་རྗེ་ཕྱག་གིས་ལོག་པའི་ལམ་ནས་དྲངས། །ཟབ་དགུའི་གདམས་པས་བློ་ཡི་དབུལ་བ་བསལ། །བྱིན་རླབས་མཐུ་ཡིས་བར་ཆད་འཇིགས་ལས་བསྐྱངས། །སྐུ་དྲིན་མཚུངས་མེད་བླ་མའི་ཞབས་ལ་འདུད། །སྲིད་ཞིའི་འཇིགས་པ་ཀུན་སེལ་སྐྱབས་ཀྱི་མཆོག །རྣམ་གྲོལ་བདེ་བའི་དབུགས་འབྱིན་ཆོས་ཀྱི་རྗེ། །རང་ངོ་སངས་རྒྱས་ཀུན་ལས་ལྷག་པའི་མགོན། །བླ་མའི་བཀའ་དྲིན་དྲན་པར་བྱིན་གྱིས་རློབས། །ཆོས་བརྒྱད་ཚེ་འདིའི་རྟོག་པ་སྤངས་ནས་ནི། །རྟག་ཏུ་དབེན་པའི་རི་ལ་གནས་བཅས་ཏེ། །ལྷག་བསམ་བྱང་ཆུབ་སེམས་ལ་བློ་སྦྱངས་ནས། །ཚེ་དང་སྒྲུབ་པ་སྙོམས་པར་བྱིན་གྱིས་རློབས། །འཁོར་བའི་ཆོས་ལ་ཞེན་པ་གཏིང་ནས་ལོག །ཉམས་ཀྱི་ཆོས་ལ་གསལ་སྣང་རབ་ཏུ་བརྟན། །དག་པའི་ཆོས་ལ་སྤྲོ་བ་རང་ཏུ་བརྟས། །ཐུན་མོང་ལམ་རྟགས་འབྱོངས་བར་བྱིན་གྱིས་རློབས། །ཚད་མ་བཞི་ལྡན་གསུང་ངག་ལྡན་པའི་བཅུད། །དབང་བཞིའི་ལམ་ལ་གོམས་པ་མཐར་ཕྱིན་ནས། །སྙན་བརྒྱུད་བཞི་ཡི་རྟེན་འབྲེལ་འགྲིགས་པ་ལས། །གྲུབ་མཐའ་རྣམ་བཞི་སྙོགས་པར་བྱིན་གྱིས་རློབས། །མདོར་ན་དེང་ནས་བྱང་ཆུབ་མ་ཐོབ་བར། །རྗེ་བཙུན་ཁྱེད་དང་ནམ་ཡང་མི་འབྲལ་ཞིང་། །མཉེས་པ་གསུམ་གྱི་མཆོད་པའི་སྤྲིན་ཕུང་གིས། །དཔལ་ལྡན་བླ་མའི་ཐུགས་དགོངས་རྫོགས་པར་ཤོག །བླ་མའི་ཞབས་པད་ནམ་མཁའི་ཁམས་ལྟར་བརྟན། །མཆོག་གི་བསྟན་པ་ཉིན་མོའི་འོད་བཞིན་གསལ། །སློབ་མའི་ཕྲིན་ལས་ནོར་འཛིན་ཕྱོགས་ཀུན་ཁྱབ། །ཕུན་ཚོགས་དགེ་ལེགས་རྒྱས་པའི་བཀྲ་ཤིས་ཤོག །ཅེས་པ་འདི་ནི་ཆོས་རྗེ་བླ་མ་མཆོག་གི་རྣམ་ཐར་ལ་སྙིང་ནས་དད་པ་ཐོབ་པའི་སྐལ་བ་ཅན་འདི་ཕྱིའི་བདེ་སྐྱིད་བླ་མའི་བྱིན་རླབས་ལ་རེ་བ་འཇམ་དབྱངས་ཀུན་དགའ་བསྟན་པའི་རྒྱལ་མཚན་གྱིས་བྲིས་པ་དགེའོ། །སརྦ་མངྒ་ལཾ།། །།