པར་སྐྲུན་གསལ་བཤད།
༄༅། །༧མཁན་ཆེན་རྡོ་རྗེ་འཛིན་པ་ཀུན་བཟང་གང་ཤར་རང་གྲོལ་དབང་པོའི་གསུང་འབུམ་ཐར་པའི་ལམ་སྟོན་ཞེས་བྱ་བ་བཞུགས་སོ། །
༄༅། །སྤྱིར་སྔ་འགྱུར་རྙིང་མ་ལ་གདན་ས་ཆེན་པོ་དྲུག་ཡོད་པའི་ནང་ཚན། དཔལ་ཞེ་ཆེན་བསྟན་གཉིས་དར་རྒྱས་གླིང་གི་གདན་སར་མཁས་གྲུབ་གཉིས་ལྡན་གྱི་སྐྱེས་བུ་ཆེན་པོ་བསམ་གྱིས་མི་ཁྱབ་པ་བྱོན་པའི་ནང་ཚན། ཕྱིས་ཀྱི་དུས་སུ་མཁན་རིན་པོ་ཆེ་གང་ཤར་དབང་པོ་བྱོན་ཅིང་། དུས་སྐབས་དེར་ཁམས་བོད་ཀྱི་ཡུལ་གྲུ་ཀུན་ཏུ་ཉམས་ཆག་དང་། རྐྱེན་ངན་སྣ་ཚོགས་ཤིག་བྱུང་སྟེ་མི་རྣམས་གཡུལ་དུ་ཤི་བ་དང་། བཙོན་དུ་ཚུད་པ། བྲོས་བྱོལ་དུ་འགྲོ་དགོས་པ། ཟས་གོས་ཀྱིས་ཕོངས་པ། འཇིགས་སྐྲག་གིས་མནར་བ་སོགས་ཀྱིས་སྐྱབས་མེད་མགོན་མེད་ལྟ་བུར་གྱུར་པའི་སྐབས། མགོན་པོ་གང་ལ་ཟབ་དོན་གྱི་གདམས་ངག་ཁྱད་པར་ཅན་རྣམས་ཐུགས་ཀྱི་ཀློང་ནས་བརྡོལ་ཏེ། རིས་མེད་ཀྱི་སློབ་ཚོགས་ལ་བསྩལ་བས་ལོ་ཤས་ཟླ་ཤས་རྗེས། སྡུག་བསྔལ་དང་དཀའ་ངལ་བྱུང་སྐབས་གདམས་ངག་རྣམས་གནད་ལ་
སྨིན་ཏེ། གནས་སྐབས་སྡུག་བསྔལ་སོགས་ཀྱིས་མི་གནོད་པ་དང་། ལྷག་པར་རྐྱེན་ངན་གྲོགས་སུ་ཤར་ནས་ཉམས་ལེན་ཁྱད་པར་ཅན་འཕེལ་ཏེ། རང་དོན་ཕུན་སུམ་ཚོགས་པ་བྱུང་བར་མ་ཟད། ཕྱིས་སུ་དུས་ཀྱི་འགྱུར་བ་བཟང་ཕྱོགས་སུ་འཁོར་བའི་སྐབས། འཁོར་དང་སློབ་མ་མང་པོ་ལ་ཆོས་ཀྱི་འཁོར་ལོ་བསྐོར་ནས་བསྟན་པ་དང་། འགྲོ་བའི་དོན་རྒྱ་ཆེན་པོ་བྱུང་བ་སོགས་བཀའ་དྲིན་ཤིན་ཏུ་ཆེ་བས། སྐབས་འདིར་ནུབ་ཕྱོགས་པའི་དགེ་སློང་ཤོན་(SEAN) ཞེས་ཆོས་མིང་དུ་བསྟན་འཛིན་བྱམས་ཆེན་བྱ་བ་དང་། དོལ་པོ་བ་ཁྲ་འགུའི་གྲྭ་ཀརྨ་དགེ་འདུན་གཉིས་ནས། དད་གུས་ཆེན་པོས་གསུང་མགུར་སོགས་འཐོར་བ་རྣམས་བསྡུས། གཞན་དང་འདྲེས་པ་རྣམས་སོ་སོར་བསལ་ནས། མཁན་རིན་པོ་ཆེའི་མན་ངག་རྣམས་ཕྱོགས་བསྒྲིགས་དང་། སྤར་བསྐྲུན་གནང་བ་འདིས། མན་ངག་རྣམས་ཁྱབ་བརྡལ་དུ་འཕེལ་ཞིང་རྒྱས་ནས།
བསྟན་པ་དང་འགྲོ་བའི་དོན་རྒྱ་ཆེན་པོར་འབྱུང་བར་སྨོན་པ་དང་། ཕྱག་དཔེ་འདི་སུས་ཐོབ་ན་ཡང་གལ་ཆུང་དུ་མ་དགོངས་པར་ལུང་ཁྲིད་ཞུ་བ་དང་། ཉམས་ལེན་གནང་ན་དལ་འབྱོར་དོན་ཡོད་འདི་ཕྱི་གཉིས་སྨན་ཞིག་བྱུང་ངེས་ལ་བརྟེན། ཀུན་གྱིས་གཅེས་སྤྲས་དང་། དད་གུས། ཉམས་ལེན་གང་གཟབ་གནང་རོགས་ཞུ། ཞེས་ཁྲ་འགུ་སྤྲུལ་མིང་པས་རང་གནས་སྟག་མོ་ལུས་སྦྱིན་གྱི་རི་ཁྲོད་དུ་(14/11/2008) བྲིས་པ་དགེ་ལེགས་འཕེལ།།