དཔལ་ལྡན་ཀརྨ་བཀའ་བརྒྱུད་ཀྱི་རྗེས་སུ་འབྲང་བའི་དགེ་འདུན་རྣམས་ཀྱི་ཐུན་མོང་ཚོགས་སུ་ཞལ་འདོན་དུ་བྱ་བའི་ཆོས་སྤྱོད་ཀྱི་རིམ་པ་ལེགས་ལམ་རབ་གསལ།
ཤོག་ལྷེབ་ ༡ ནས་ ༡༠༠ བར།
དཔལ་ལྡན་ཀརྨ་བཀའ་བརྒྱུད་ཀྱི་རྗེས་སུ་འབྲང་བའི་དགེ་འདུན་རྣམས་ཀྱི་ཐུན་མོང་ཚོགས་སུ་ཞལ་འདོན་དུ་བྱ་བའི་ཆོས་སྤྱོད་ཀྱི་རིམ་པ་ལེགས་ལམ་རབ་གསལ་ཞེས་བྱ་བ་བཞུགས་སོ། །
ན་མཿཤྲཱི་གུ་ར་ཝེ། གང་ལ་བཏུད་པས་སྲིད་ཞིའི་མཚོ། །ངེས་པར་སྒྲོལ་མཛད་ཐུགས་རྗེའི་གཏེར། །དཔལ་ལྡན་བླ་མ་སྙིང་དབུས་སུ། །ལན་བརྒྱར་མཆོད་ནས་འདི་བརྩམ་མོ། །དེ་ལ་འདིར་ཡོངས་རྫོགས་རྒྱལ་བསྟན་འཛིན་པའི་དམ་པར་གྱུར་པ་སྒྲུབ་བརྒྱུད་ཀརྨ་ཀཾ་ཚང་གི་རིང་ལུགས་ཆེན་པོའི་དགེ་འདུན་རྣམས་ཀྱི་ཡོངས་གྲགས་ཚོགས་སུ་བྱ་བའི་ཆོས་སྤྱོད་འཕྲལ་དགོས་ཀྱི་རིམ་པ་ལ། ཐོག་མར་སྐྱབས་སུ་འགྲོ་བ་ནི། མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་སངས་རྒྱས་རིན་པོ་ཆེ་ལ་སྐྱབས་སུ་མཆིའོ། །མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་ཀུན་ཁྱབ་ཆོས་ཀྱི་སྐུ་ལ་སྐྱབས་སུ་མཆིའོ། །མ་ནམ་
མཁའ་དང་མཉམ་པའི་སེམས་ཅན་ཐམས་ཅད་བླ་མ་བདེ་ཆེན་ལོངས་སྤྱོད་རྫོགས་པའི་སྐུ་ལ་སྐྱབས་སུ་མཆིའོ། །མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་ཐུགས་རྗེ་སྤྲུལ་པའི་སྐུ་ལ་སྐྱབས་སུ་མཆིའོ། །ཞེས་ལན་བདུན་ནམ་ཉེར་གཅིག་སོགས་སྐབས་དང་བསྟུན་པར་བྱ་ཞིང་། སྤྲོ་ན། རྒྱུ་སྦྱོར་བ་སྦྱིན་པའི་བདག་པོས་ཐོག་དྲངས་ནམ་མཁའ་དང་མཉམ་པའི་
སེམས་ཅན་ཐམས་ཅད་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་གཅིག་ཏུ་བསྡུས་པའི་བདག་ཉིད་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག །དྲིན་ཅན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ཞེས་སམ། དེའི་མཐར་སྔོན་གྱི་ཕྱག་བཞེས་སུ་བྱུང་བ་བཞིན། རྗེ་བཙུན་མ་འཕགས་མ་སྒྲོལ་མའི་ལྷ་ཚོགས་འཁོར་དང་བཅས་པ་རྣམས་ལ་སྐྱབས་སུ་མཆིའོ། །ཞེས་པ་སྦྱར་ཏེ་སྐྱབས་སུ་སོང་ནས། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་ལན་
གསུམ་གྱིས་སེམས་བསྐྱེད་པ་གསལ་གདབ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དམ་པ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ཆེན་པོ་ལ་གནས་པར་གྱུར་ཅིག །ཅེས་པ་ལན་གསུམ་གྱིས་ཚད་མེད་བཞི་བསྒོམ། དེ་ནས་ཚོགས་རྟེན་སྤྲུལ་ཞིང་ཚོགས་བསག་པའི་སྐོར་རྗེ་བདུན་པས་སྨོན་ལམ་གྱི་ཆོ་ག་ཡན་ལག་ཉི་ཤུ་པར་བཀའ་སྩལ་བ་ལྟར་ལས་ཅུང་ཟད་བསྡུས་ཏེ། དེང་སང་ཕྱག་བཞེས་སུ་མཛད་པ་ནི་ཐོག་མར། དཀོན་མཆོག་གསུམ་གྱི་བདེན་པ་དང་། བྱིན་རླབས་དང་། ཚོགས་གཉིས་ཡོངས་སུ་རྫོགས་པའི་མཐུ་དང་། ཆོས་ཀྱི་དབྱིངས་ཀྱི་རང་བཞིན་གྱི་ཡོན་ཏན་དང་། བྱང་ཆུབ་སེམས་དཔའ་རྣམས་ཀྱི་ཞིང་དག་པའི་སྦྱོར་བ་ལ་སོགས་པ་སངས་རྒྱས་ཀྱི་ཞིང་ཡོངས་སུ་སྦྱངས་པའི་མཐུ་དང་། བདག་ཅག་རྣམས་ཀྱི་མོས་པའི་མཐུ་ལས་གནས་འདི་སངས་རྒྱས་
ཀྱི་ཞིང་ཐམས་ཅད་ཀྱི་རྒྱན་དང་བཀོད་པ་དང་ཡོན་ཏན་ཕུན་སུམ་ཚོགས་པ་ཐམས་ཅད་དང་ལྡན་པར་གྱུར་ཅིག །ཅེས་ལན་གསུམ་དང་། སྤྲོ་ན་མདོ་སྡེ་དགོངས་འགྲེལ་ལས་གསུངས་པའི། དེའི་དབུས་སུ་གཞལ་མེད་ཁང་ཆེན་པོ་རིན་པོ་ཆེ་སྣ་བདུན་མཆོག་ཏུ་འབར་བ་བཀོད་པ། འཇིག་རྟེན་གྱི་ཁམས་དཔག་ཏུ་མེད་པ་རྒྱས་པར་འགེངས་པའི་འོད་ཟེར་ཆེན་པོ་རབ་ཏུ་འབྱུང་བ། གནས་ཐ་དད་པ་ཤིན་ཏུ་རྣམ་པར་ཕྱེ་བ་མཐའ་ཡས་པ་རྣམ་པར་གནས་པ། རྒྱ་ཡོངས་སུ་མ་ཆད་པ། ཁམས་གསུམ་ལས་ཡང་དག་པར་འདས་པའི་སྤྱོད་ཡུལ། འཇིག་རྟེན་ལས་ཡང་དག་པར་འདས་པ་དེའི་བླ་མའི་དགེ་བའི་རྩ་བ་ལས་བྱུང་བ། ཤིན་ཏུ་རྣམ་པར་དག་ཅིང་དབང་བསྒྱུར་བའི་རྣམ་པར་རིག་པའི་མཚན་ཉིད། དེ་བཞིན་གཤེགས་པའི་གནས། བྱང་ཆུབ་སེམས་དཔའི་དགེ་འདུན་དང་ལྡན་པ། ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་མི་འམ་ཅི་དང་ལྟོ་འཕྱེ་
ཆེན་པོ་དང་མི་དང་མི་མ་ཡིན་པ་མཐའ་ཡས་པ་རྣམ་པར་རྒྱུ་བ། ཆོས་ཀྱི་རོའི་དགའ་བ་དང་བདེ་བ་ཆེན་པོས་བརྟན་པ། སེམས་ཅན་ཐམས་ཅད་ཀྱི་དོན་ཐམས་ཅད་ཡང་དག་པར་ཐོབ་པར་བྱེད་པས་ཉེ་བར་གནས་པ། ཉོན་མོངས་པའི་གནོད་པའི་དྲི་མ་ཐམས་ཅད་དང་བྲལ་བ། བདུད་ཐམས་ཅད་ཡོངས་སུ་སྤངས་པ། ཐམས་ཅད་ཀྱི་བཀོད་པ་ལས་ལྷག་པའི་དེ་བཞིན་གཤེགས་པའི་བཀོད་པའི་གནས། དྲན་པ་དང་བློ་གྲོས་དང་རྟོགས་པ་ཆེན་པོས་ངེས་པར་འབྱུང་བ། ཞི་གནས་དང་ལྷག་མཐོང་གི་བཞོན་པ་ཡིན་པ། རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མེད་པ་ཉིད་དང་། སྨོན་པ་མེད་པ་ནས་འཇུག་པ། རིན་པོ་ཆེ་པདྨའི་རྒྱལ་པོ་ཡོན་ཏན་མཐའ་ཡས་པས་བརྒྱན་པའི་བཀོད་པ་ལ་བརྟེན་པའི་གཞལ་མེད་ཁང་ཆེན་པོར་གྱུར། དེའི་དབུས་སུ་ལྷ་དང་ཀླུ་དང་མི་ལ་སོགས་པའི་རིན་པོ་ཆེ་སྣ་ཚོགས་པའི་ཁྲིའི་སྟེང་དུ་ལྷ་མིའི་གོས་རིན་ཐང་
མེད་པ་བཏིང་པའི་སྟེང་དུ། གཙང་ཞིང་དྲི་མ་མེད་པའི་པདྨའི་གདན་སྣ་ཚོགས་པ་བཤམས་པ་སོ་སོར་གསལ་བར་གྱུར། ཅེས་པ་ནི་གཞལ་མེད་ཁང་པ་གདན་དང་བཅས་པ་གསལ་གདབ་པའི་ཡན་ལག་གོ །དེ་ནས་མཆོད་པ་གསལ་གདབ་པའི་ཡན་ལག་ནི། ཁྲི་དེ་དག་གི་སྟེང་དུ་རིན་པོ་ཆེ་སྣ་ཚོགས་དང་ལྷ་དང་མིའི་གོས་སྣ་ཚོགས་ལས་གྲུབ་པའི་གདུགས་དང་བླ་རེས་དང་འཕན་དང་ལྔ་ལྡི་དང་ལྷའི་མེ་ཏོག་མན་དཱ་ར་བ་ལ་སོགས་པ་རྣམས་ཀྱི་ཆར་དང་། བླ་རེས་དང་གདུགས་དང་འཕན་དང་། ལྡ་ལྡི་ལ་སོགས་པ་མཛེས་པར་བྲིས་ཤིང་། ལོགས་རྣམས་ཀྱང་རིན་པོ་ཆེ་དང་། དར་དང་མེ་ཏོག་ལ་སོགས་པའི་དྲྭ་བ་དང་དྲྭ་ཕྱེད་དང་འཕན་དང་ལྡ་ལྡི་ལ་སོགས་པས་མཛེས་པ་དང་། ས་གཞིར་ལྷ་དང་མིའི་མེ་ཏོག་སིལ་མ་བཀྲམ་ཞིང་། མཆོད་ཡོན་མེ་ཏོག་བདུག་སྤོས་མར་མེ་དྲི་ཆབ་ཞལ་ཟས་རོལ་མོ་ལ་སོགས་པ་ཕུང་པོ་གསུམ་པའི་མདོ་དང་། བཟང་པོ་སྤྱོད་པའི་སྨོན་ལམ་ལས་འབྱུང་བ་ལྟ་བུའི་མཆོད་པའི་
སྤྲིན་གྱི་རྒྱ་མཚོ་ཕུལ་དུ་བྱུང་ཞིང་སྣ་ཚོགས་པ་བསམ་གྱིས་མི་ཁྱབ་པ་ནམ་མཁའི་ཁམས་ཀྱི་མཐའ་ཀླས་པར་རྒྱས་པར་གང་ཞིང་ཟད་མི་ཤེས་པ་དང་ལྡན་པར་གྱུར། དེ་ནས་སྤྱན་འདྲེན་པའི་ཡན་ལག་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱའི ་དབང་པོ་ལ་སོགས་པ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཉན་ཐོས་ཀྱི་དགེ་འདུན་དང་བཅས་པ་ཐམས་ཅད། བདག་སོགས་སེམས་ཅན་ཐམས་ཅད་ཀྱི་ཉེས་ལྟུང་གི་དྲི་མ་སྦྱང་ཞིང་བསོད་ནམས་ཀྱི་ཚོགས་སྤེེལ་བའི་སླད་དུ་སྤྱན་འདྲེན་ཞིང་མཆིས་ན། ཐུགས་རྗེ་ཆེན་པོས་བསྐུལ་ཏེ། དེང་དུས་ལ་བབ་ཀྱིས་དགོངས་པར་མཛད་དུ་གསོལ། ཞེས་དང་། རྒྱ་ཆེ་རོལ་པ་ནས་འབྱུང་བ་ལྟར། ཀྱེ་དོན་ཐམས་ཅད་གྲུབ་པ་འདིར་གཤེགས་སུ་གསོལ། ཀྱེ་ལྷའི་ལྷ། ཀྱེ་ཁ་ལོ་བསྒྱུར་བ། ཀྱེ་དགའ་ཞིང་བདེ་བ་དང་མཆོག་ཏུ་དགའ་བར་མཛད་པ། ཀྱེ་སྨན་པ་བླ་
ན་མེད་པའི་གྲགས་པ་མངའ་བ། ཀྱེ་ཀུན་ནས་སྤྱན་མངའ་བ། ཀྱེ་མི་མཉམ་པ་དང་མཉམ་ཞིང་འགྲན་ཟླ་མེད་པའི་ཡོན་ཏན་དང་གཟི་བརྗིད་མངའ་བ། མཚན་དང་དཔེ་བྱད་བཟང་པོས་ཡང་དག་པར་བརྒྱན་པའི་སྐུ་མངའ་བ་འདིར་གཤེགས་སུ་གསོལ། ཞེས་དང་། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །བཅོམ་ལྡན་བསྐལ་པ་གྲངས་མེད་དུ་མ་རུ། །འགྲོ་ལ་བརྩེ་ཕྱིར་ཐུགས་རྗེ་རྣམས་སྦྱངས་ཤིང་། །སྨོན་ལམ་རྒྱ་ཆེན་དགོངས་པ་ཡོངས་རྫོགས་པའི། །ཁྱེད་བཞེད་འགྲོ་དོན་མཛད་དུས་འདི་ལགས་ན། །དེ་ཕྱིར་ཆོས་དབྱིངས་ཕོ་བྲང་ལྷུན་གྲུབ་ནས། །རྫུ་འཕྲུལ་བྱིན་རླབས་སྣ་ཚོགས་སྟོན་མཛད་ཅིང་། །མཐའ་ཡས་སེམས་ཅན་ཚོགས་རྣམས་བསྒྲལ་བའི་ཕྱིར། །ཡོངས་བདག་འཁོར་དང་
བཅས་ཏེ་གཤེགས་སུ་གསོལ། །ཆོས་རྣམས་ཀུན་ཀྱི་དབང་ཕྱུག་གཙོ། །བཙོ་མ་གསེར་གྱི་མདོག་འདྲ་ཞིང་། །ཉི་མ་ལས་ལྷག་གཟི་བརྗིད་ཆེ། །དད་པས་སྤྱན་ནི་དྲང་བར་བགྱི། །ཞི་ཞིང་ཐུགས་རྗེ་ཆེ་ལྡན་པ། །དུལ་ཞིང་བསམ་གཏན་ས་ལ་བཞུགས། །ཆོས་དང་ཡེ་ཤེས་ཆགས་བྲལ་བ། །ཀུན་ཏུ་མི་ཟད་ནུས་པར་ལྡན། །ཚུར་སྤྱོན་ཚུར་སྤྱོན་ཞི་དག་ལྷ། །ཐུབ་པ་སྐྱེས་མཆོག་ཐམས་ཅད་མཁྱེན། །ཤིན་ཏུ་ལེགས་བྱས་གཟུགས་བརྙན་ནི། །མཆོད་པའི་གནས་འདིར་གཤེགས་སུ་གསོལ། །ཞེས་དང་། མ་ག་དྷ་བཟང་མོའི་རྟོགས་བརྗོད་ལས། ཚུལ་ཁྲིམས་རྣམ་དག་ཤེས་རབ་ཤིན་ཏུ་དག །དད་ལྡན་སྙིང་པོ་ཉན་ཐོས་ཆེ་རྣམས་ཀྱིས། །མགོན་མེད་གྱུར་པ་བདག་ལ་རྗེས་གཟུང་བའི། །དོན་མཛད་ཐུགས་རྗེས་དགོངས་པར་མཛད་དུ་གསོལ། །ཞེས་སྤྱན་འདྲེན་རྒྱས་བསྡུས་སྐབས་དང་བསྟུན་པ་དང་། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་
སྲིད་མཆོད་པ་བདག་བགྱིད་པ། །དེ་སྲིད་བཅོམ་ལྡན་བཞུགས་སུ་གསོལ། །བྱོན་ལེགས་ཀྱི་ཡན་ལག་ནི། བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །བདག་གི་མཆོད་ཡོན་བཞེས་སླད་དུ། །འདི་ཉིད་དུ་ནི་བཞུགས་སུ་གསོལ། །ཁྲུས་གསོལ་གྱི་ཡན་ལག་ནི། ཁྲུས་ཀྱི་ཁང་པ་ཤིན་ཏུ་དྲི་ཞིམ་པ། །ཤེལ་གྱི་ས་གཞི་གསལ་ཞིང་འཚེར་བ་བསྟར། །རིན་ཆེན་འབར་བའི་ཀ་བ་ཡིད་འོང་ལྡན། །མུ་ཏིག་འོད་ཆགས་བླ་རེས་བྲེས་པ་དེར། །ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀུན་གྱིས་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །རྒྱལ་བའི་སྐུ་གསུང་ཐུགས་ལ་ཉོན་མོངས་མི་མངའ་ཡང་། །སེམས་ཅན་ལུས་ངག་ཡིད་གསུམ་སྒྲིབ་པ་སྦྱང་སླད་དུ། །རྒྱལ་བའི་སྐུ་གསུང་ཐུགས་ལ་ཁྲུས་ཆབ་འདི་གསོལ་བས། །སེམས་ཅན་ལུས་ངག་ཡིད་གསུམ་སྒྲིབ་པ་དག་གྱུར་ཅིག །དེ་བཞིན་གཤེགས་དང་
དེ་ཡིས་སྲས་རྣམས་ལ། །རིན་ཆེན་བུམ་པ་མང་པོ་སྤོས་ཀྱི་ཆུ། །ཡིད་འོང་ལེགས་པར་བཀང་བ་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །དེ་ནས་སྐུ་ཕྱི་བའི་ཡན་ལག་ནི། དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བསྒོས་པས་སྐུ་ཕྱིའོ། །དེ་ནས་དེ་ལ་ཁ་དོག་ལེགས་བསྒྱུར་བའི། །ན་བཟའ་ཤིན་ཏུ་དྲི་ཞིམ་དམ་པ་འབུལ། །གོས་བཟང་སྲབ་ལ་འཇམ་པ་སྣ་ཚོགས་དང་། །རྒྱན་མཆོག་བརྒྱ་ཕྲག་དེ་དང་དེ་དག་གིས། །འཕགས་པ་ཀུན་ཏུ་བཟང་དང་འཇམ་དབྱངས་དང་། །འཇིག་རྟེན་དབང་ཕྱུག་སོགས་ལ་བརྒྱན་པར་བགྱི། །སྲབ་འཇམ་ཡང་པ་ལྷ་ཡི་གོས། །མི་བསྐྱོད་རྡོ་རྗེའི་སྐུ་བརྙེས་ལ། །མི་ཕྱེད་དད་པས་བདག་འབུལ་ན། །བདག་ཀྱང་རྡོ་རྗེའི་སྐུ་ཐོབ་ཤོག །ལྷག་བསམ་དག་པའི་ན་བཟའ་འདི་ཕུལ་བས། །ལུས་ལ་ངུར་སྨྲིག་གོས་གྱོན་སེམས་ལ་ནི། །ངོ་ཚ་ཁྲེལ་ཡོད་བཟོད་པའི་གོས་གྱོན་ནས། །རྒྱལ་བ་བསྐྱེད་པའི་
ཡུམ་ལ་མཆོད་པར་བགྱི། །སྣ་ཚོགས་དབང་པོའི་གཞུ་ལྟར་རབ་བཀྲ་ཞིང་། །གང་ལ་རེག་ན་བདེ་བའི་རྒྱུར་གྱུར་པ། །གོས་བཟང་རིན་ཆེན་བདག་བློ་སྦྱང་ཕྱིར་འབུལ། །བཟོད་པ་དམ་པའི་གོས་ཀྱིས་བརྒྱན་པར་ཤོག །དེ་ནས་ཚོགས་བསག་པའི་དངོས་གཞི་ ཡན་ལག་བདུན་ཡོད་པ་ལས། དང་པོ་ཕྱག་འཚལ་བའི་ཡན་ལག་ནི། གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་མཛད་པ་བླ་མ་ཡིན། །བླ་མ་རྣམས་ལ་ཕྱག་འཚལ་ལོ། །བླ་མའི་སྐུ་ནི་རྡོ་རྗེའི་སྐུ། །མཛེས་ཤིང་ལྟ་བས་ཆོག་མི་ཤེས། །བསམ་གྱིས་མི་ཁྱབ་ཡོན་ཏན་ལྡན། །བླ་མའི་སྐུ་ལ་ཕྱག་འཚལ་ལོ། །བླ་མའི་གསུང་ནི་ཚངས་པའི་དབྱངས། །བདག་མེད་སེང་གེའི་སྒྲ་དང་ལྡན། །མུ་སྟེགས་ལོག་ལྟ་འཇོམས་མཛད་པའི། །བླ་མའི་གསུང་ལ་ཕྱག་འཚལ་ལོ། །བླ་མའི་ཐུགས་ནི་
ནམ་མཁའ་འདྲ། །བདེ་གསལ་མི་རྟོག་ངང་ཚུལ་ཅན། །རྣམ་ཐར་གསུམ་ལ་ལེགས་གནས་པའི། །བླ་མའི་ཐུགས་ལ་ཕྱག་འཚལ་ལོ། །ཤེས་བྱའི་མཁའ་ལ་མཁྱེན་རབ་དཀྱིལ་འཁོར་རྒྱས། །མཛད་པའི་འོད་སྟོང་གདུལ་བྱའི་གླིང་ལ་ཕོག །རྒྱལ་བའི་བསྟན་པ་ཀུན་ནས་གསལ་མཛད་པའི། །བཀའ་བརྒྱུད་རིན་པོ་ཆེ་ལ་ཕྱག་འཚལ་ལོ། །མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པ་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་ཞིང་། །དེ་བཞིན་གཤེགས་ལ་ཕྱག་འཚལ་ལོ། །དག་པ་འདོད་ཆགས་བྲལ་བའི་རྒྱུ། །དགེ་བས་ངན་སོང་ལས་སྒྲོལ་ཞིང་། །གཅིག་ཏུ་དོན་དམ་མཆོག་གྱུར་པའི། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གུས། །ཞིང་གི་དམ་པ་ཡོན་ཏན་ཞིང་། །དགེ་འདུན་ལ་ཡང་ཕྱག་འཚལ་ལོ། །སྟོན་པ་བླ་མེད་སངས་རྒྱས་རིན་པོ་ཆེ། །སྐྱོབ་པ་བླ་མེད་དམ་ཆོས་རིན་
པོ་ཆེ། །འདྲེན་པ་བླ་མེད་དགེ་འདུན་རིན་པོ་ཆེ། །བླ་མེད་དཀོན་མཆོག་གསུམ་ལ་ཕྱག་འཚལ་ལོ། །མཚན་མཆོག་ལྡན་པ་དྲི་མེད་ཟླ་བའི་ཞལ། །གསེར་མདོག་འདྲ་བ་ཁྱོད་ལ་ཕྱག་འཚལ་ལོ། །རྡུལ་བྲལ་ཁྱོད་འདྲ་སྲིད་པ་གསུམ་མ་མཆིས། །མཉམ་མེད་མཁྱེན་ཆེན་ཁྱོད་ལ་ཕྱག་འཚལ་ལོ། །མི་མཆོག་འདུལ་བ་ཁ་ལོ་སྒྱུར་མཛད་ཅིང་། །ཀུན་སྦྱོར་འཆིང་བ་གཅོད་མཛད་དེ་བཞིན་གཤེགས། །དབང་པོ་ཞི་ཞིང་ཉེར་ཞི་ཞི་ལ་མཁས། །མཉན་ཡོད་བཞུགས་པ་དེ་ལ་ཕྱག་འཚལ་ལོ། །རྣམ་དག་སྐུ་མངའ་མཆོག་ཏུ་གཟུགས་བཟང་བ། །ཡེ་ཤེས་རྒྱ་མཚོ་གསེར་གྱི་ལྷུན་པོ་འདྲ། །གྲགས་པ་འཇིག་རྟེན་གསུམ་ན་ལྷང་ངེ་བ། །མགོན་པོ་མཆོག་བརྙེས་ཁྱོད་ལ་ཕྱག་འཚལ་ལོ། །ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེང་གེ་ཀུན། །བདག་གིས་མ་ལུས་དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱིའོ། །བཟང་པོ་སྤྱོད་
པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་ཡིད་ཀྱིས་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པ། །ཐམས་ཅད་རྒྱལ་བ་དག་གིས་གང་བར་མོས། །དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང་། །བདེ་བར་གཤེགས་པ་ཐམས་ཅད་བདག་གིས་བསྟོད། །ཐབས་མཁས་ཐུགས་རྗེས་ཤཱཀྱའི་རིགས་འཁྲུངས་ཤིང་། །གཞན་གྱིས་མི་ཐུབ་བདུད་ཀྱི་དཔུང་འཇོམས་པ། །གསེར་གྱི་ལྷུན་པོ་ལྟ་བུར་བརྗིད་པའི་སྐུ། །ཤཱཀྱའི་རྒྱལ་པོ་ཁྱོད་ལ་ཕྱག་འཚལ་ལོ། །གང་ཚེ་རྐང་གཉིས་གཙོ་བོ་ཁྱོད་བལྟམས་ཚེ། །ས་ཆེན་འདི་ལ་གོམ་པ་བདུན་བོར་ནས། །ང་ནི་
འཇིག་རྟེན་འདི་ན་མཆོག་ཅེས་གསུངས། །དེ་ཚེ་མཁས་པ་ཁྱོད་ལ་ཕྱག་འཚལ་ལོ། །གང་ཚེ་ཁྱོད་བལྟམས་དོག་ས་རབ་གཡོས་དང་། །ཛམྦུའི་གྲིབ་མས་ཁྱོད་སྐུ་མ་བཏང་དང་། །འདི་དང་ལན་གསུམ་ཀུན་གཟིགས་མཁྱེན་ལྡན་པ། །སངས་རྒྱས་ཁྱོད་ཀྱི་ཞབས་ལ་ཕྱག་འཚལ་ལོ། །མཐུན་པའི་སྨོན་ལམ་དགེ་ཚོགས་རྨད་བྱུང་ཞིང་། །སྤྱད་པ་སྤྱོད་བྱེད་ཚེ་ནའང་མཆེད་གྱུར་ཅིང་། །བསྐལ་བཟང་གཅིག་ལ་མཛད་པ་མཐར་ཕྱིན་པའི། །རྫོགས་པའི་སངས་རྒྱས་སྟོང་ལ་ཕྱག་འཚལ་ལོ། །སངས་རྒྱས་རྣམ་གཟིགས་གཙུག་ཏོར་ཐམས་ཅད་སྐྱོབ། །འཁོར་བ་འཇིག་དང་གསེར་ཐུབ་འོད་སྲུངས་དང་། །ཤཱཀྱ་ཐུབ་པ་གཽ་ཏམ་ལྷ་ཡི་ལྷ། །སངས་རྒྱས་དཔའ་བོ་བདུན་ལ་ཕྱག་འཚལ་ལོ། །ཐུགས་རྗེས་ཀུན་ལ་སྙོམས་པའི་བཅོམ་ལྡན་འདས། །མཚན་ཙམ་ཐོས་པས་ངན་འགྲོའི་སྡུག་བསྔལ་སེལ། །དུག་གསུམ་ནད་སེལ་སངས་རྒྱས་སྨན་གྱི་བླ། །བཻ་ཌཱུརྱ་ཡི་འོད་ལ་ཕྱག་
འཚལ་ལོ། །འགྲོ་བ་ཉོན་མོངས་དུག་གིས་གཟིར་བ་ལ། །ཐུགས་རྗེས་དུག་སེལ་སྨན་མཆོག་བདུད་རྩི་ཡིས། །སྨོན་ལམ་ཆེན་པོ་གྲུབ་པར་གྱུར་པ་ཡི། །བདེ་བར་གཤེགས་པ་བདུན་ལ་ཕྱག་འཚལ་ལོ། །འཇིག་རྟེན་འདྲེན་པའི་གཙོ་བོ་ཚེ་དཔག་མེད། །དུས་མིན་འཆི་བ་མ་ལུས་འཇོམས་པའི་དཔལ། །མགོན་མེད་སྡུག་བསྔལ་གྱུར་པ་རྣམས་ཀྱི་སྐྱབས། །སངས་རྒྱས་ཚེ་དཔག་མེད་ལ་ཕྱག་འཚལ་ལོ། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་ལ་ཕྱག་འཚལ་ལོ། །སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །མ་རིག་མུན་སེལ་སྒྲོན་མེའི་མཆོག །སྡུག་བསྔལ་ནད་སེལ་
སྨན་གྱི་ཕུལ། །དམ་ཆོས་དཀོན་མཆོག་ཐམས་ཅད་ལ། །ཕྱག་འཚལ་མཆོད་ཅིང་སྐྱབས་སུ་མཆི། །བྱམས་ཆེན་མེ་ཡིས་ཞེ་སྡང་བུད་ཤིང་བསྲེགས། །ཡེ་ཤེས་འོད་ཀྱིས་མ་རིག་མུན་པ་སེལ། །ཆོས་ཀྱི་རྒྱལ་ཚབ་འགྲོ་བའི་མགོན་གྱུར་པའི། །དགའ་ལྡན་བཞུགས་པ་དེ་ལ་ཕྱག་འཚལ་ལོ། །འཇམ་དབྱངས་ཕྱག་ན་རྡོ་རྗེ་སྤྱན་རས་གཟིགས། །ས་ཡི་སྙིང་པོ་སྒྲིབ་པ་རྣམ་པར་སེལ། །ནམ་མཁའི་སྙིང་པོ་བྱམས་པ་ཀུན་ཏུ་བཟང་། །ཉེ་བའི་སྲས་ཆེན་བརྒྱད་ལ་ཕྱག་འཚལ་ལོ། །ཡེ་ཤེས་བླ་མ་འོད་ཀྱི་ཏོག །དེ་བཞིན་སྨོན་ལམ་བློ་གྲོས་དང་། །དབང་པོ་ཞི་དང་འཇམ་དབྱངས་ལ། །བདག་ནི་གུས་པས་ཕྱག་འཚལ་ལོ། །ལྷ་དང་ལྷ་མིན་ཅོད་པན་གྱིས། །ཞབས་ཀྱི་པདྨོ་ལ་བཏུད་ཅིང་། །ཕོངས་པ་ཀུན་ལས་སྒྲོལ་མཛད་མ། །སྒྲོལ་མ་ཡུམ་ལ་ཕྱག་འཚལ་ལོ། །འགྲོ་བའི་མགོན་པོ་ཤཱཀྱ ་སེང་གེ་ཡིས། །སངས་རྒྱས་བསྟན་པ་གང་གི་ཕྱག་ཏུ་བཞག །གསུང་རབ་རིན་ཆེན་སྒྲོམ་གྱི་
ཁ་འབྱེད་པའི། །དགྲ་བཅོམ་གནས་བརྟན་རྣམས་ལ་ཕྱག་འཚལ་ལོ། །བསོད་ནམས་ཞིང་རབ་མཆོག་གྱུར་པ། །ལྷ་དང་མི་ཡི་མཆོད་པའི་གནས། །རྒྱལ་སྲས་རང་རྒྱལ་དགྲ་བཅོམ་པ། །ཚོགས་མཆོག་དགེ་འདུན་ལ་ཕྱག་འཚལ། །ཚུལ་གནས་ཐོས་དང་བསམ་ལྡན་པའི། །ཏིང་ངེ་འཛིན་ལ་མཉམ་པར་གནས། །བདེ་གཤེགས་བསྟན་པ་ལེགས་འཛིན་པའི། །བཤེས་གཉེན་ཀུན་ལ་ཕྱག་འཚལ་ལོ། །ཕྱོགས་བཅུར་བཞུགས་པའི་རྒྱལ་བ་མ་ལུས་དང་། །བྱང་ཆུབ་སེམས་དང་རྒྱལ་སྲས་མ་ལུས་ཚོགས། །རྡུལ་གཅིག་སྟེང་ན་རྡུལ་སྙེད་བཞུགས་པ་ཡི། །བླ་མེད་འཕགས་པའི་ཚོགས་ལ་ཕྱག་འཚལ་ལོ། །བྱ་སྤྱོད་རྣལ་འབྱོར་རྒྱུད་སྡེ་བཞིར། །སྟོན་པ་ཉིད་ཀྱིས་གང་གསུངས་པ། །ཕྱི་དང་ནང་དང་གསང་བ་ཡི། །ཡི་དམ་རྣམས་ལ་ཕྱག་འཚལ་ལོ། །བཅོམ་ལྡན་འདས་ཀྱི་སྤྱན་སྔ་རུ། །སྒྲུབ་པ་མཛད་པའི་གང་ཟག་ལ། །བུ་བཞིན་སྐྱོང་བར་ཞལ་བཞེས་པའི། །
ཆོས་སྐྱོང་རྣམས་ལ་ཕྱག་འཚལ་ལོ། །རྫོགས་སངས་གང་དུ་བལྟམས་པ་དང་། །གང་དུ་བྱང་ཆུབ་ལ་རེག་དང་། །ཞི་བའི་འཁོར་ལོ་བསྐོར་བ་དང་། །ཟག་མེད་མྱ་ངན་འདས་པ་དང་། །བདེ་གཤེགས་གང་དུ་བཞུགས་པ་དང་། །འཆག་པ་དང་ནི་བཞེངས་པ་དང་། །སེང་གེ་ལྟ་བུར་གཟིམས་པ་ཡི། །གནས་དེ་ལ་ཡང་ཕྱག་འཚལ་ལོ། །སྟེང་དང་འོག་དང་བར་དག་དང་། །ཕྱོགས་དང་ཕྱོགས་མཚམས་རྣམས་སུ་ཡང་། །སྐུར་བཅས་སྐུ་ནི་མེད་པ་ཡི། །མཆོད་རྟེན་རྣམས་ལ་ཕྱག་འཚལ་ལོ། །ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡིས་རྣམ་ཀུན་དུ། །མཆོག་ཏུ་དད་པས་ཕྱག་འཚལ་ལོ། །ཞེས་པ་རྣམས་དང་སྤྲོ་ན་འོག་ནས་འབྱུང་བའི་ཕྱག་འཚལ་གྱི་ཚིགས་བཅད་ཅི་རིགས་འདོན་བཞིན་ཚོགས་པ་རྣམས་སྤྱོད་ལམ་སྒོ་བསྟུན་ནས་ཕྱག་བྱའོ། །གཉིས་པ་མཆོད་པ་འབུལ་བའི་ཡན་ལག་ནི། མེ་ཏོག་དམ་པ་ཕྲེང་བ་དམ་པ་དང་། །སིལ་སྙན་རྣམས་དང་བྱུག་པའི་གདུགས་མཆོག་དང་། །མར་
མེ་མཆོག་དང་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང་། །ཕྱེ་མའི་ཕུར་མ་རི་རབ་མཉམ་པ་དང་། །བཀོད་པ་ཁྱད་པར་འཕགས་པའི་མཆོག་ཀུན་གྱིས། །རྒྱལ་བ་དེ་དག་ལ་ཡང་མཆོད་པར་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །ཞེས་དང་སྤྱོད་འཇུག་ནས་འབྱུང་བའི། རིན་ཆེན་སེམས་དེ་གཟུང་བར་བྱ་བའི་ཕྱིར། །དེ་བཞིན་གཤེགས་པ་རྣམས་དང་དམ་པའི་ཆོས། །དཀོན་མཆོག་དྲི་མ་མེད་དང་སངས་རྒྱས་སྲས། །ཡོན་ཏན་རྒྱ་མཚོ་རྣམས་ལ་ལེགས་པར་མཆོད། །མེ་ཏོག་འབྲས་བུ་ཇི་སྙེད་ཡོད་པ་དང་། །སྨན་གྱི་རྣམ་པ་གང་དག་ཡོད་པ་དང་། །འཇིག་རྟེན་རིན་ཆེན་ཇི་སྙེད་ཡོད་པ་དང་། །ཆུ་གཙང་ཡིད་དུ་འོང་བ་ཅི་ཡོད་དང་། །རིན་ཆེན་
རི་བོ་དང་ནི་དེ་བཞིན་དུ། །ནགས་ཚལ་ས་ཕྱོགས་དབེན་ཞིང་ཉམས་དགའ་དང་། །ལྗོན་ཤིང་མེ་ཏོག་རྒྱན་སྤྲས་སྤུད་པ་དང་། །ཤིང་གང་འབྲས་བཟང་ཡལ་ག་དུད་པ་དང་། །ལྷ་སོགས་འཇིག་རྟེན་ན་ཡང་དྲི་དང་ནི། །སྤོས་དང་དཔག་བསམ་ཤིང་དང་རིན་ཆེན་ཤིང་། །མ་རྨོས་འཁྲུངས་པའི་ལོ་ཏོག་རྣམ་པ་དང་། །གཞན་ཡང་མཆོད་པར་འོས་པའི་རྒྱན་རྣམས་ནི། །མཚོ་དང་རྫིང་བུ་པདྨས་བརྒྱན་པ་དང་། །ངང་པ་ཤིན་ཏུ་སྐད་སྙན་ཡིད་འོང་ལྡན། །ནམ་མཁའ་རབ་འབྱམས་ཁམས་ཀྱི་མཐས་གཏུགས་པ། །ཡོངས་སུ་བཟུང་བ་མེད་པ་དེ་དག་ཀུན། །བློ་ཡིས་བླངས་ནས་ཐུབ་པ་སྐྱེས་ཀྱི་མཆོག །སྲས་དང་བཅས་པ་རྣམས་ལ་ལེགས་འབུལ་ན། །ཡོན་གནས་དམ་པ་ཐུགས་རྗེ་ཆེ་རྣམས་ཀྱིས། །བདག་ལ་བརྩེར་དགོངས་བདག་གི་འདི་དག་བཞེས། །བདག་ནི་བསོད་ནམས་མི་ལྡན་བཀྲེན་ཆེན་ཏེ། །མཆོད་པའི་ནོར་གཞན་བདག་ལ་ཅང་མ་མཆིས། །དེས་ན་གཞན་
དོན་དགོངས་པའི་མགོན་གྱིས་ནི། །བདག་གི་དོན་སླད་ཉིད་ཀྱི་མཐུས་བཞེས་ཤིག །རྒྱལ་དང་དེ་སྲས་རྣམས་ལ་བདག་གིས་ནི། །བདག་གི་ལུས་ཀུན་གཏན་དུ་དབུལ་བར་བགྱི། །སེམས་དཔའ་མཆོག་རྣམས་བདག་ནི་ཡོངས་བཞེས་ཤིག །གུས་པས་ཁྱེད་ཀྱི་འབངས་སུ་མཆི་བར་བགྱི། །བདག་ནི་ཁྱེད་ཀྱིས་ཡོངས་སུ་བཟུང་བས་ན། །སྲིད་ལ་མི་འཇིགས་སེམས་ཅན་ཕན་པར་བགྱིད། །སྔོན་གྱི་སྡིག་ལས་ཡང་དག་འདའ་བགྱིད་ཅིང་། །སྡིག་པ་གཞན་ཡང་སླན་ཆད་མི་བགྱིད་དོ། ༈ །སྟོང་གསུམ་ཀུན་དུ་དྲི་ངད་ལྡང་བ་ཡི། །དྲི་མཆོག་རྣམས་ཀྱིས་ཐུབ་དབང་རྣམས་ཀྱི་སྐུ། །གསེར་སྦྱངས་བཙོ་མ་བྱི་དོར་བྱས་པ་ལྟར། །འོད་ཆགས་འབར་བ་དེ་དག་བྱུག་པར་བགྱི། །ཐུབ་དབང་མཆོད་གནས་མཆོག་ལ་ཡིད་འོང་བའི། །མེ་ཏོག་མནྡཱ་ར་དང་པདྨ་དང་། །ཨུཏྤ་ལ་སོགས་དྲི་ཞིམ་ཐམས་ཅད་དང་། །ཕྲེང་བ་སྤེལ་ལེགས་ཡིད་འོང་རྣམས་ཀྱིས་མཆོད། །
སྤོས་མཆོག་ཡིད་འཕྲོག་དྲི་ངད་ཁྱབ་པ་ཡི། །བདུག་པའི་སྤྲིན་ཚོགས་རྣམས་ཀྱང་དེ་ལ་དབུལ། །ཞལ་ཟས་བཟའ་བཏུང་སྣ་ཚོགས་བཅས་པ་ཡི། །ལྷ་བཤོས་རྣམས་ཀྱང་དེ་ལ་དབུལ་བར་བགྱི། །གསེར་གྱི་པདྨ་ཚར་དུ་དངར་བ་ཡི། །རིན་ཆེན་སྒྲོན་མ་རྣམས་ཀྱང་དབུལ་བར་བགྱི། །ས་གཞི་བསྟར་བ་སྤོས་ཀྱིས་བྱུགས་པ་དེར། །མེ་ཏོག་ཡིད་འོང་སིལ་མ་དགྲམ་བར་བྱ། །གཞལ་མེད་ཕོ་བྲང་བསྟོད་དབྱངས་ཡིད་འོང་ལྡན། །མུ་ཏིག་རིན་ཆེན་རྒྱན་འཕྱང་མཛེས་འབར་བ། །དཔག་གཡས་ནམ་མཁའི་རྒྱན་གྱུར་དེ་དག་ཀྱང་། །ཐུགས་རྗེའི་རང་བཞིན་ཅན་ལ་དབུལ་བར་བགྱི། །རིན་ཆེན་གདུགས་མཛེས་གསེར་གྱི་ཡུ་བ་ཅན། །འཁོར་ཡུག་རྒྱན་གྱི་རྣམ་པ་ཡིད་འོང་ལྡན། །དབྱིབས་ལེགས་བལྟ་ན་སྡུག་པ་བསྒྲེང་བ་ཡང་། །རྟག་ཏུ་ཐུབ་དབང་རྣམས་ལ་དབུལ་བར་བགྱི། །དེ་ལས་གཞན་ཡང་མཆོད་པའི་ཚོགས། །རོལ་མོ་དབྱངས་སྙན་ཡིད་འོང་ལྡན། །སེམས་ཅན་
སྡུག་བསྔལ་སིམ་བྱེད་པའི། །སྤྲིན་རྣམས་སོ་སོར་གནས་གྱུར་ཅིག །དམ་ཆོས་དཀོན་མཆོག་ཐམས་ཅད་དང་། །མཆོད་རྟེན་རྣམས་དང་སྐུ་གཟུགས་ལ། །རིན་ཆེན་མེ་ཏོག་ལ་སོགས་ཆར། །རྒྱུན་མི་འཆད་པར་འབབ་བར་ཤོག །ཇི་ལྟར་འཇམ་དབྱངས་ལ་སོགས་པས། །རྒྱལ་བ་རྣམས་ལ་མཆོད་མཛད་པ། །དེ་བཞིན་བདག་གིས་དེ་བཞིན་གཤེགས། །མགོན་པོ་སྲས་དང་བཅས་རྣམས་མཆོད། །ཡོན་ཏན་རྒྱ་མཚོ་རྣམས་ལ་བདག །བསྟོད་དབྱངས་ཡན་ལག་རྒྱ་མཚོས་བསྟོད། །བསྟོད་དབྱངས་སྙན་སྤྲིན་དེ་དག་ལ། །ངེས་པར་ཀུན་ཏུ་འབྱུང་གྱུར་ཅིག །ཅེས་དང་མཎྜལ་ནི། ༀ་བཛྲ་ས་ཏྭ་ས་མ་ཡ། མ་ནུ་པཱ་ལ་ཡ། བཛྲ་ས་ཏྭ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་ཝ། སུ་ཏོཥྱོ་མེ་བྷ་ཝ། སུ་ཏོཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿཀུ་རུ་ཧཱུྃ་ཧ་ཧ་ཧ་ཧ་ཧོཿབྷ་ག་ཝན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་ཝ་མ་ཧཱ་ས་མ་ཡ་ས་
ཏྭ་ཨཱཿ ཞེས་ཡི་གེ་བརྒྱ་པ་བརྗོད་བཞིན་མཎྜལ་གྱི་རྡུལ་གཡས་སྐོར་དུ་ཕྱི། མེ་ཏོག་གི་ཚོམ་བུ་ཕྱག་བཞེས་ལྟར་འགོད་བཞིན། ༀ་བཛྲ་བྷཱུ་མི་ཨཱཿཧཱུྃ། གཞི་རྣམ་པར་དག་པ་དབང་ཆེན་གསེར་གྱི་ས་གཞི། ༀ་བཛྲ་རེ་ཁེ་ཨཱཿཧཱུྃ། ཕྱི་ལྕགས་རིའི་འཁོར་ཡུག་གི་ར་བས་ཡོངས་སུ་བསྐོར་བའི་དབུས་སུ་རིའི་རྒྱལ་པོ་རི་བོ་མཆོག་རབ། ཤར་ལུས་འཕགས་པོ། ལྷོ་ཛམྦུ་གླིང་། ནུབ་བ་ལང་སྤྱོད། བྱང་སྒྲ་མི་སྙན། ལུས་དང་ལུས་འཕགས། རྔ་ཡབ་དང་རྔ་ཡབ་གཞན། གཡོ་ལྡན་དང་ལམ་མཆོག་འགྲོ། སྒྲ་མི་སྙན་དང་སྒྲ་མི་སྙན་གྱི་ཟླ། རིན་པོ་ཆེའི་རི་བོ། དཔག་བསམ་གྱི་ཤིང་། འདོད་འཇོའི་བ། མ་རྨོས་པའི་ལོ་ཏོག །འཁོར་ལོ་རིན་པོ་ཆེ། ནོར་བུ་རིན་པོ་ཆེ། བཙུན་མོ་རིན་པོ་ཆེ། བློན་པོ་རིན་པོ་ཆེ། གླང་པོ་རིན་པོ་ཆེ། རྟ་མཆོག་རིན་པོ་ཆེ། དམག་དཔོན་རིན་པོ་ཆེ། གཏེར་ཆེན་པོའི་བུམ་པ། སྒེག་མོ་མ། ཕྲེང་བ་མ། གླུ་མ། གར་མ། མེ་ཏོག་མ། བདུག་སྤོས་མ། སྣང་གསལ་མ། དྲི་ཆབ་མ། ཉི་མ། ཟླ་བ།
རིན་པོ་ཆེའི་གདུགས། ཕྱོགས་ལས་རྣམ་པར་རྒྱལ་བའི་རྒྱལ་མཚན། དབུས་སུ་ལྷ་དང་མིའི་དཔལ་འབྱོར་ཕུན་སུམ་ཚོགས་པ་མ་ཚང་བ་མེད་པ། རབ་འབྱམས་རྒྱ་མཚོའི་རྡུལ་གྱི་གྲངས་ལས་འདས་པ་མངོན་པར་བཀོད་དེ། བླ་མ་ཡི་དམ་སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པ་རྣམས་ལ་དབུལ་བར་བགྱིའོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །བཞེས་ནས་བྱིན་གྱིས་བརླབ་ཏུ་གསོལ། །ཞེས་དང་། ས་གཞི་སྤོས་ཆུས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །ཞེས་དང་། ཕྱོགས་བཅུ་དུས་གསུམ་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་དང་། །བླ་མ་རྡོ་རྗེ་སློབ་དཔོན་དང་། །ཡི་དམ་ལྷ་ཚོགས་འཁོར་དང་བཅས། །དུས་གསུམ་བདེ་གཤེགས་མ་
ལུས་ལ། །གླིང་བཞི་རི་རབ་བཅས་པ་དང་། གླིང་བཞི་བྱེ་བ་ཕྲག་བརྒྱ་དང་། །བྱེ་བ་འབུམ་དང་དུང་ཕྱུར་ཏེ། །མཎྜལ་གཅིག་ཏུ་བསྡུས་ནས་ནི། །མོས་བློས་གོང་མ་རྣམས་ལ་འབུལ། །ཐུགས་རྗེས་བརྩེར་དགོངས་བཞེས་སུ་གསོལ། །བཞེས་ནས་བྱིན་གྱིས་བརླབ་ཏུ་གསོལ། །ༀ་མཎྜལ་པཱུ་ཛ་མི་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། མཉེས་བྱེད་མཎྜལ་བཟང་པོ་འདི་ཕུལ་བས། །བྱང་ཆུབ་ལམ་ལ་བར་ཆད་མི་འབྱུང་ཞིང་། དུས་གསུམ་བདེར་གཤེགས་དགོངས་པ་རྟོགས་པ་དང་། །སྲིད་པར་མི་འཁྲུལ་ཞི་བར་མི་གནས་ཤིང་། །ནམ་མཁའ་མཉམ་པའི་འགྲོ་བ་སྒྲོལ་བར་ཤོག །ཅེས་པའི་བར་ཐམས་ཅད་སྦྲེལ་བའམ་ཚིགས་བཅད་རྣམས་ཁོ་ན་བརྗོད་པས་ཀྱང་འཐུས་སོ། ༈ །གསུམ་པ་སྡིག་པ་བཤགས་པའི་ཡན་ལག་ནི་མཚམས་མེད་སྤྱད་པའི་སྡིག་པའང་སྦྱང་ནུས་པར་གསུངས་པས་གཙོ་བོར་ཕུང་པོ་གསུམ་པའི་མདོ་འདོན་པ་འདི་ཉིད་གལ་ཆེ་སྟེ། ཐོག་མར་མདུན་དུ་སངས་རྒྱས་སུམ་ཅུ་རྩ་ལྔ་གསལ་བར་དམིགས་པའི་དྲུང་དུ་སྙིང་ཐག་པ་ནས་སྡིག་པ་བཤགས་བའི་བློས། སེམས་
ཅན་ཐམས་ཅད་རྟག་པར་བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ། །རྡོ་རྗེ་སྙིང་པོས་རབ་ཏུ་འཇོམས་པ་ལ་ཕྱག་འཚལ་ལོ། །རིན་ཆེན་འོད་འཕྲོ་ལ་ཕྱག་འཚལ་ལོ། །ཀླུ་དབང་གི་རྒྱལ་པོ་ལ་ཕྱག་ཚལ་ལོ། །དཔའ་བོའི་སྡེ་ལ་ཕྱག་འཚལ་ལོ། །དཔལ་དགྱེས་ལ་ཕྱག་འཚལ་ལོ། །རིན་ཆེན་མེ་ལ་ཕྱག་འཚལ་ལོ། །རིན་ཆེན་ཟླ་འོད་ལ་ཕྱག་འཚལ་ལོ། །མཐོང་བ་དོན་ཡོད་ལ་ཕྱག་འཚལ་ལོ། །རིན་ཆེན་ཟླ་བ་ལ་ཕྱག་འཚལ་ལོ། །དྲི་མ་མེད་པ་ལ་ཕྱག་འཚལ་ལོ། །དཔལ་བྱིན་ལ་ཕྱག་འཚལ་ལོ། །ཚངས་པ་ལ་ཕྱག་འཚལ་ལོ། །ཚངས་པས་བྱིན་ལ་ཕྱག་འཚལ་ལོ། །ཆུ་ལྷ་ལ་ཕྱག་འཚལ་ལོ། །ཆུ་ལྷའི་ལྷ་ལ་ཕྱག་འཚལ་ལོ། །དཔལ་བཟང་
ལ་ཕྱག་འཚལ་ལོ། །ཙན་དན་དཔལ་ལ་ཕྱག་འཚལ་ལོ། །གཟི་བརྗིད་མཐའ་ཡས་ལ་ཕྱག་འཚལ་ལོ། །འོད་དཔལ་ལ་ཕྱག་འཚལ་ལོ། །མྱ་ངན་མེད་པའི་དཔལ་ལ་ཕྱག་འཚལ་ལོ། །སྲེད་མེད་ཀྱི་བུ་ལ་ཕྱག་འཚལ་ལོ། །མེ་ཏོག་དཔལ་ལ་ཕྱག་འཚལ་ལོ། །དེ་བཞིན་གཤེགས་པ་ཚངས་པའི་འོད་ཟེར་རྣམ་པར་རོལ་པ་མངོན་པར་མཁྱེན་པ་ལ་ཕྱག་འཚལ་ལོ། །དེ་བཞིན་གཤེགས་པ་པདྨའི་འོད་ཟེར་རྣམ་པར་རོལ་པ་མངོན་པར་མཁྱེན་པ་ལ་ཕྱག་འཚལ་ལོ། །ནོར་དཔལ་ལ་ཕྱག་འཚལ་ལོ། །དྲན་པའི་དཔལ་ལ་ཕྱག་འཚལ་ལོ། །མཚན་དཔལ་ཤིན་ཏུ་ཡོངས་གྲགས་ལ་ཕྱག་འཚལ་ལོ། །དབང་པོའི་ཏོག་གི་རྒྱལ་མཚན་གྱི་རྒྱལ་པོ་ལ་ཕྱག་འཚལ་ལོ། །ཤིན་ཏུ་རྣམ་པར་གནོན་པའི་དཔལ་ལ་ཕྱག་འཚལ་ལོ། །གཡུལ་ལས་ཤིན་ཏུ་རྣམ་པར་རྒྱལ་བ་ལ་ཕྱག་འཚལ་ལོ། །རྣམ་པར་གནོན་པས་གཤེགས་པ་ལ་ཕྱག་འཚལ་ལོ། །ཀུན་ནས་སྣང་བ་བཀོད་པའི་དཔལ་ལ་
ཕྱག་འཚལ་ལོ། །རིན་ཆེན་པདྨ་རྣམ་པར་གནོན་པ་ལ་ཕྱག་འཚལ་ལོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་པདྨ་ལ་རབ་ཏུ་བཞུགས་པ་རི་དབང་གི་རྒྱལ་པོ་ལ་ཕྱག་འཚལ་ལོ། །དེ་དག་ལ་སོགས་པ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་གང་ཇི་སྙེད་ཅིག་བཞུགས་ཏེ་འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་དེ་དག་ཐམས་ཅད་བདག་ལ་དགོངས་སུ་གསོལ། བདག་གིས་སྐྱེ་བ་འདི་དང་། སྐྱེ་བ་ཐོག་མ་དང་མཐའ་མ་མ་མཆིས་པ་ནས། འཁོར་བ་ན་འཁོར་བའི་སྐྱེ་གནས་ཐམས་ཅད་དུ་སྡིག་པའི་ལས་བགྱིས་པ་དང་། བགྱིད་དུ་སྩལ་བ་དང་། བགྱིས་པ་ལ་རྗེས་སུ་ཡི་རང་བའམ། མཆོད་རྟེན་གྱི་དཀོར་རམ། དགེ་འདུན་གྱི་དཀོར་རམ། ཕྱོགས་བཅུའི་དགེ་འདུན་གྱི་དཀོར་
ཕྲོགས་པ་དང་། འཕྲོག་ཏུ་སྩལ་བ་དང་། འཕྲོག་པ་ལ་རྗེས་སུ་ཡི་རང་བའམ། མཚམས་མ་མཆིས་པ་ལྔའི་ལས་བགྱིས་པ་དང་། བགྱིད་དུ་སྩལ་བ་དང་། བགྱིས་པ་ལ་རྗེས་སུ་ཡི་རང་བའམ། མི་དགེ་བ་བཅུའི་ལས་ཀྱི་ལམ་ཡང་དག་པར་བླངས་པ་ལ་ཞུགས་པ་དང་། འཇུག་ཏུ་སྩལ་བ་དང་། འཇུག་པ་ལ་རྗེས་སུ་ཡི་རང་བའམ། ལས་ཀྱི་སྒྲིབ་པ་གང་གིས་བསྒྲིབས་ནས། བདག་སེམས་ཅན་དམྱལ་བར་མཆི་བའམ། དུད་འགྲོའི་སྐྱེ་གནས་སུ་མཆི་བའམ། ཡི་དྭགས་ཀྱི་ཡུལ་དུ་མཆི་བའམ། ཡུལ་མཐའ་ཁོབ་ཏུ་སྐྱེ་བའམ། ཀླ་ཀློར་སྐྱེ་བའམ། ལྷ་ཚེ་རིང་པོ་རྣམས་སུ་སྐྱེ་བའམ། །དབང་པོ་མ་ཚང་བར་འགྱུར་བའམ། ལྟ་བ་ལོག་པར་འཛིན་པར་འགྱུར་བའམ། སངས་རྒྱས་འབྱུང་བ་ལ་མཉེས་པར་མི་བགྱིད་པར་འགྱུར་བའི་ལས་ཀྱི་སྒྲིབ་པ་གང་ལགས་པ་དེ་དག་ཐམས་ཅད་སངས་རྒྱས་བཅོམ་ལྡན་འདས་ཡེ་ཤེས་སུ་གྱུར་པ། སྤྱན་དུ་གྱུར་པ། དབང་དུ་གྱུར་
པ། ཚད་མར་གྱུར་པ། མཁྱེན་པ། གཟིགས་པ། དེ་དག་གི་སྤྱན་སྔར་མཐོལ་ལོ་འཆགས་སོ། མི་འཆབ་བོ། མི་སྦེད་དོ། སླན་ཆད་ཀྱང་གཅོད་ཅིང་སྡོམ་པར་བགྱིད་ལགས་སོ། །སངས་རྒྱས་བཅོམ་ལྡན་འདས་དེ་དག་ཐམས་ཅད་བདག་ལ་དགོངས་སུ་གསོལ། བདག་གིས་སྐྱེ་བ་འདི་དང་སྐྱེ་བ་ཐོག་མ་དང་མཐའ་མ་མ་མཆིས་པ་ནས། འཁོར་བ་ན་འཁོར་བའི་སྐྱེ་བ་གཞན་དག་ཏུ་སྦྱིན་པ་ཐ་ན་དུད་འགྲོའི་སྐྱེ་གནས་སུ་སྐྱེས་པ་ལ་ཟས་ཁམ་གཅིག་ཙམ་བསྩལ་བའི་དགེ་བའི་རྩ་བ་གང་ལགས་པ་དང་། བདག་གིས་ཚུལ་ཁྲིམས་བསྲུངས་བའི་དགེ་བའི་རྩ་བ་གང་ལགས་པ་དང་། བདག་གིས་ཚངས་པར་སྤྱོད་པ་ལ་གནས་པའི་དགེ་བའི་རྩ་བ་གང་ལགས་པ་དང་། བདག་གིས་སེམས་ཅན་ཡོངས་སུ་སྨིན་པར་བགྱིས་པའི་དགེ་བའི་རྩ་བ་གང་ལགས་པ་དང་། བདག་གིས་བྱང་ཆུབ་མཆོག་ཏུ་སེམས་བསྐྱེད་པའི་དགེ་བའི་རྩ་བ་གང་ལགས་པ་དང་།
བདག་གིས་བླ་ན་མེད་པའི་ཡེ་ཤེས་ཀྱི་དགེ་བའི་རྩ་བ་གང་ལགས་པ་དེ་དག་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ། བསྡོམས་ནས་བླ་ན་མ་མཆིས་པ་དང་། གོང་ན་མ་མཆིས་པ་དང་། གོང་མའི་ཡང་གོང་མ་བླ་མའི་ཡང་བླ་མར་ཡོངས་སུ་བསྔོ་བས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །ཇི་ལྟར་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོས་པ་དང་། ཇི་ལྟར་མ་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོ་བར་འགྱུར་བ་དང་། ཇི་ལྟར་ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོ་བར་མཛད་པ་བཞིན་དུ་བདག་གིས་ཀྱང་ཡོངས་སུ་བསྔོ་བར་བགྱིའོ། །སྡིག་པ་ཐམས་ཅད་ནི་སོ་སོར་བཤགས་སོ། བསོད་ནམས་ཐམས་ཅད་ལ་རྗེས་སུ་ཡི་རང་ངོ་། །སངས་རྒྱས་ཐམས་ཅད་ལ་བསྐུལ་ཞིང་གསོལ་བ་འདེབས་སོ། །བདག་གིས་བླ་ན་
མེད་པ་ཡེ་ཤེས་ཀྱི་མཆོག་དམ་པ་ཐོབ་པར་གྱུར་ཅིག །མི་མཆོག་རྒྱལ་བ་གང་དག་ད་ལྟར་བཞུགས་པ་དང་། །གང་དག་འདས་པ་དག་དང་དེ་བཞིན་གང་མ་བྱོན། ཡོན་ཏན་བསྔགས་པ་མཐའ་ཡས་རྒྱ་མཚོ་འདྲ་ཀུན་ལ། །ཐལ་མོ་སྦྱར་བར་བགྱིས་ཏེ་སྐྱབས་སུ་ཉེ་བར་མཆིའོ། ཞེས་དང་། ལུས་ཀྱི་ལས་ནི་རྣམ་པ་གསུམ། །ངག་གི་རྣམ་པ་བཞི་དག་དང་། །གང་ཡང་ཡིད་ཀྱི་རྣམ་གསུམ་པོ། །མི་དགེ་བཅུ་པོ་སོ་སོར་བཤགས། །ཐོག་མ་མེད་ནས་ད་ལྟའི་བར། མི་དགེ་བཅུ་དང་མཚམས་མེད་ལྔ། །སེམས་ནི་ཉོན་མོངས་དབང་གྱུར་པའི། །སྡིག་པ་ཐམས་ཅད་བཤགས་པར་བགྱི། །བདག་དང་སེམས་ཅན་ཀུན་གྱི་སྡིག་པའི་ལས། །ཉེས་པར་གྱུར་གང་མཐོལ་ཞིང་བཤགས་པར་བགྱི། །སླན་ཅད་ནམ་ཡང་བགྱིད་པར་མ་གྱུར་ཅིག །ལས་ཀྱི་སྒྲིབ་པའང་གཏན་དུ་ཟད་བྱེད་ཤོག །འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་
བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །མཚམས་མེད་ལྔ་པོ་དག་གི་སྡིག་པ་རྣམས། །གང་གིས་མི་ཤེས་དབང་གིས་བྱས་པ་དག །དེ་ཡིས་ལྟུང་བ་བཤགས་པ་འདི་བཏོན་པས། །དེ་དག་མ་ལུས་ཡོངས་སུ་བྱང་བར་གྱུར། །ཞེས་བརྗོད་པར་བྱའོ། །གཞན་ཡང་གསེར་འོད་དམ་པའི་མདོ་ལས་གསུངས་པའི་བཤགས་པ་ནི། སངས་རྒྱས་རྐང་གཉིས་དམ་པ་དག །ཐུགས་བརྩེ་ཐུགས་རྗེ་ལྡན་པའི་ཐུགས། །གང་དག་ཕྱོགས་བཅུའི་འཇིག་རྟེན་ན། །བཞུགས་པ་བདག་ལ་དགོངས་སུ་གསོལ། །བདག་གིས་སྔོན་ཆད་སྡིག་པའི་ལས། །ཤིན་ཏུ་མི་བཟད་གང་བགྱིས་པ། །སྟོབས་བཅུའི་སྤྱན་སྔར་མཆིས་ནས་ནི། །དེ་དག་ཐམས་ཅད་བཤགས་པར་བགྱི། །ཕ་མ་དག་ཏུ་མི་འཛིན་དང་། །སངས་རྒྱས་རྣམས་སུ་མི་འཛིན་དང་། །དགེ་བ་དག་ཏུ་མི་འཛིན་པས། །སྡིག་པ་བདག་གིས་གང་བགྱིས་དང་། །ཕྱུག་པའི་རྒྱགས་པས་
དྲེགས་པ་དང་། །རིགས་དང་ལོངས་སྤྱོད་རྒྱགས་པ་དང་། །གཞོན་པའི་རྒྱགས་པས་དྲེགས་པ་ཡིས། །བདག་གིས་སྡིག་པ་གང་བགྱིས་དང་། །ཉེས་པའི་དམིགས་སུ་མ་མཐོང་བས། །ཉེས་པར་བགྱིས་པའི་ལས་དང་ནི། །ཉེས་པར་བསམ་ཤིང་ཉེས་སྨྲ་བའི། །སྡིག་ལས་བདག་གིས་གང་བགྱིས་དང་། །བྱིས་པའི་བློ་ཡིས་འཇུག་པ་དང་། །མི་ཤེས་མུན་པའི་སེམས་དང་ནི། །སྡིག་པའི་གྲོགས་པོའི་དབང་གྱུར་དང་། །ཉོན་མོངས་རྣམ་པར་འཁྲུགས་སེམས་དང་། །རྩེད་མོར་དགའ་བའི་དབང་ཉིད་དང་། །མྱ་ངན་དང་ནི་ནད་དབང་དང་། །ནོར་གྱིས་མ་ཆོག་ཉེས་པ་ཡིས། །བདག་གིས་སྡིག་པ་གང་བགྱིས་དང་། །འཕགས་མིན་སྐྱེ་བོ་འདྲེ་བ་དང་། །ཕྲག་དོག་སེར་སྣ་སྒྱུ་དང་ནི། །གཡོ་དང་དབུལ་བའི་ཉེས་པ་ཡིས། །བདག་གིས་སྡིག་པ་གང་བགྱིས་དང་། །ཕོངས་དང་རྒུད་པའི་དུས་ཀྱི་ཚེ། །འདོད་པ་རྣམས་ཀྱི་འཇིགས་བརྒྱུད་དང་། །ཕྱུག་པོ་མ་ཡིན་
གྱུར་པ་ཡིས། །བདག་གིས་སྡིག་པ་གང་བགྱིས་དང་། །གཡོ་བའི་སེམས་ཀྱི་དབང་ཉིད་དང་། །འདོད་དང་ཁྲོ་བའི་དབང་ཉིད་དང་། །བཀྲེས་དང་སྐོམ་པས་ཉེན་པ་ཡིས། །བདག་གིས་སྡིག་པ་གང་བགྱིས་དང་། །བཟའ་བ་དག་དང་བཏུང་བ་དང་། །བུད་མེད་སྒྱུ་དང་གོས་ཀྱི་ཕྱིར། །ཉོན་མོངས་གདུང་བ་སྣ་ཚོགས་ཀྱིས། །བདག་གིས་སྡིག་པ་གང་བགྱིས་དང་། །ལུས་དང་ངག་དང་ཡིད་ཀྱི་སྡིག །ཉེས་སྤྱད་རྣམ་པ་གསུམ་བསགས་ན། །འདི་འདྲའི་ཚུལ་གྱིས་གང་བགྱིས་པ། །དེ་དག་ཐམས་ཅད་བདག་འཆགས་སོ། །སངས་རྒྱས་རྣམས་དང་ཆོས་རྣམས་དང་། །དེ་བཞིན་ཉན་ཐོས་རྣམས་ལ་ཡང་། །གུས་པ་མ་ལགས་གང་བགྱིས་པ། །དེ་དག་ཐམས་ཅད་བདག་འཆགས་སོ། །གང་ཡང་རང་སངས་རྒྱས་རྣམས་དང་། །བྱང་ཆུབ་སེམས་དཔའ་རྣམས་ལ་ཡང་། །གུས་པ་མ་ལགས་བགྱིས་པ་རྣམས། །དེ་དག་ཐམས་ཅད་བདག་འཆགས་སོ། །དམ་ཆོས་སྨྲ་བ་རྣམས་
ལ་ཡང་། །གུས་པ་མ་ལགས་བགྱིས་པ་དང་། །ཆོས་ལའང་གུས་པར་མ་བགྱིས་པ། །དེ་དག་ཐམས་ཅད་བདག་འཆགས་སོ། །བདག་གིས་རྟག་ཏུ་མི་ཤེས་པས། །དམ་པའི་ཆོས་ནི་སྤངས་བ་དང་། །ཕ་མ་རྣམས་ལ་མ་གུས་དང་། །དེ་དག་ཐམས་ཅད་བདག་འཆགས་སོ། །བླུན་པ་དང་ནི་བྱིས་པ་དང་། །འདོད་ཆགས་ཞེ་སྡང་གཏི་མུག་དང་། །ང་རྒྱལ་དྲེགས་པས་བསྒྲིབས་བགྱིས་པ། །དེ་དག་ཐམས་ཅད་བདག་འཆགས་སོ། །བདག་གིས་ཕྱོགས་བཅུའི་འཇིག་རྟེན་དུ། །སྟོབས་བཅུ་རྣམས་ལ་མཆོད་པར་བགྱི། །བདག་གིས་ཕྱོགས་བཅུའི་སེམས་ཅན་རྣམས། །སྡུག་བསྔལ་ཀུན་ལས་གདོན་པར་བགྱི། །སེམས་ཅན་བསམ་གྱིས་མི་ཁྱབ་ཀུན། །ས་བཅུ་ལ་ནི་དགོད་པར་བགྱི། །ས་བཅུ་ལ་ནི་གནས་ནས་ཀྱང་། །ཐམས་ཅད་དེ་བཞིན་གཤེགས་གྱུར་ཅིག །ཇི་སྲིད་སྡུག་བསྔལ་རྒྱ་མཚོ་ལས། །དེ་ཀུན་མཐར་གྱིས་ནུབ་སྲིད་དུ། །སེམས་ཅན་རེ་རེའི་ཕྱིར་
ཡང་ནི། །བསྐལ་པ་བྱེ་བར་སྤྱད་པར་བགྱི། །གསེར་འོད་དམ་པ་ཞེས་བགྱི་བ། །ལས་རྣམས་ཐམས་ཅད་བྱང་བགྱིད་པ། །ཟབ་མོ་དག་ནི་སྟོན་པ་འདི། །སེམས་ཅན་དེ་དག་སྟོན་པ་བགྱི། །གང་གིས་བསྐལ་པ་སྟོང་རྣམས་སུ། །སྡིག་པ་ཤིན་ཏུ་མི་བཟད་བགྱིས། །ལན་ཅིག་རབ་ཏུ་བཤགས་པ་ཡིས། །དེ་དག་ཐམས་ཅད་བྱང་བར་འགྱུར། །གང་གིས་ལས་ཀྱི་སྒྲིབ་པ་རྣམས། །མྱུར་དུ་ཡང་དག་ཟད་འགྱུར་བ། །གསེར་འོད་དམ་པ་དགེ་བ་ཡིས། །བཤགས་པ་འདི་དག་བཤགས་ནས་ནི། །དགོངས་པའི་ཐུགས་ཀྱིས་སངས་རྒྱས་རྣམས། །བདག་ལ་རྣམ་པར་གཟིགས་སུ་གསོལ། །ཐུགས་རྗེ་ལྡན་པའི་ཐུགས་ཀྱིས་ནི། །ནོངས་པ་རབ་ཏུ་གཟུང་དུ་གསོལ། །བདག་གིས་བསྐལ་པ་བརྒྱ་རྣམས་སུ། །སྔོན་ཅད་སྡིག་པ་གང་བགྱིས་པ། །དེ་ཕྱིར་བདག་ནི་མྱ་ངན་སེམས། །ཕོངས་དང་མྱ་ངན་འཇིགས་པས་གཟིར། །སྡིག་པའི་ལས་ལ་འཇིགས་པར་བགྱིད། །ཡིད་ནི་
རྟག་ཏུ་དམན་པར་གྱུར། །གང་དང་གང་དུ་སྤྱོད་བགྱིད་པ། །བདག་ནི་གང་དུའང་དགའ་མ་མཆིས། །སངས་རྒྱས་ཐམས་ཅད་ཐུགས་རྗེ་ལྡན། །འགྲོ་བ་ཀུན་གྱི་འཇིགས་སེལ་བས། །ནོངས་པ་རབ་ཏུ་གཟུང་བར་གསོལ། །འཇིགས་པ་དག་ལས་བདག་ཐར་མཛོད། །བདག་ཉིད་ཉོན་མོངས་ལས་རྣམས་ཀྱི། །དྲི་མ་དེ་བཞིན་གཤེགས་པས་སོལ། །སངས་རྒྱས་རྣམས་ཀྱིས་བདག་ལ་ནི། །སྙིང་རྗེའི་ཆུ་ཡིས་བཀྲུ་བར་གསོལ། །སྡིག་པ་ཐམས་ཅད་བཤགས་པར་བགྱི། །སྔོན་ཆད་བདག་གིས་གང་བགྱིས་དང་། །ད་ལྟར་བདག་གི་སྡིག་པ་གང་། །དེ་དག་ཐམས་ཅད་བདག་འཆགས་སོ། །ནོངས་པར་བགྱིས་པའི་ལས་རྣམས་ཀུན། །སླན་ཅད་མི་བགྱིད་བསྡམ་པར་བགྱི། །བདག་གིས་ནོངས་པར་བགྱིས་པ་གང་། །སྡིག་དེ་འཆབ་པར་མི་བགྱིའོ། །ལུས་ཀྱི་ལས་ནི་རྣམ་གསུམ་དང་། །ངག་གི་རྣམ་པ་བཞི་དག་དང་། །ཡིད་ཀྱི་རྣམ་པ་གསུམ་པོ་
རྣམས། །དེ་དག་ཐམས་ཅད་བདག་འཆགས་སོ། །ལུས་ཀྱིས་བགྱིས་དང་ངག་གི་ལས། །ཡིད་ཀྱིས་རྣམ་པར་བསམས་པ་དང་། །ལས་རྣམས་བཅུ་པོ་བགྱིས་པ་དག །དེ་དག་ཐམས་ཅད་བདག་འཆགས་སོ། །བདག་གིས་སྡིག་པའི་ལས་གང་དག །མི་འདོད་འབྲས་བུ་ཐོབ་བགྱིད་པ། །སངས་རྒྱས་སྤྱན་སྔར་མཆིས་ནས་ནི། །དེ་དག་ཐམས་ཅད་བཤགས་པར་བགྱི། །ཞེས་དང་། བསྡུས་པར་ན། མདོ་དེ་ཉིད་ལས་འབྱུང་བའི། སྲིད་འགྲོ་ཉམ་ངར་བྱིས་པའི་བློ་ཡིས་ནི། །ཤིན་ཏུ་མི་བཟང་སྡིག་པ་གང་བགྱིས་པ། །སྟོབས་བཅུ་མངའ་བའི་སྤྱན་སྔར་མཆིས་ནས་ནི། །སྡིག་པ་དེ་ཀུན་སོ་སོར་བཤགས་པར་བགྱི། །སྐྱེ་བ་ཉམ་ང་སྲིད་པ་ཉམ་ང་དང་། །འཇིག་རྟེན་ཉམ་ང་གཡོ་སེམས་ཉམ་ང་བར། །ལུས་ཀྱི་སྤྱོད་པ་ཉམ་ང་སྣ་ཚོགས་ཀྱིས། །བདག་གིས་སྡིག་པ་གང་བསགས་དེ་འཆགས་སོ། །བྱིས་པ་བླུན་བྱས་ཉོན་མོངས་ཉམ་ང་དང་། །སྡིག་པའི་གྲོགས་དང་ཕྲད་པ་ཉམ་ང་དང་། །སྲིད་
པ་ཉམ་ང་འདོད་ཆགས་ཉམ་ང་དང་། །ཞེ་སྡང་གཏི་མུག་མུན་པ་ཉམ་ང་དང་། །ངལ་བའི་ཉམ་ང་དུས་ཀྱི་ཉམ་ང་དང་། །བསོད་ནམས་བསྒྲུབ་པ་ཉམ་ང་དག་གིས་ཀྱང་། །རྒྱལ་བ་ཡང་དག་མངོན་སུམ་མཆིས་ནས་ནི། །སྡིག་པ་དེ་ཀུན་སོ་སོར་བཤགས་པར་བགྱི། །ཞེས་དང་། སྤྱོད་འཇུག་ལས་བཤགས་པའི་སྐབས་སུ་འབྱུང་བ། དེ་བས་རྒྱལ་བ་འགྲོ་བའི་མགོན། །འགྲོ་བ་སྐྱོབ་པའི་དོན་བརྩོན་པ། །སྟོབས་ཆེན་འཇིགས་པ་ཀུན་སེལ་བ། །དེ་རིང་ཉིད་ནས་སྐྱབས་སུ་མཆི། །དེ་ཡིས་ཐུགས་སུ་ཆུད་པའི་ཆོས། །འཁོར་བའི་འཇིགས་པ་སེལ་བ་དང་། །བྱང་ཆུབ་སེམས་དཔའི་ཚོགས་ལ་ཡང་། །དེ་བཞིན་ཡང་དག་སྐྱབས་སུ་མཆི། །བདག་ནི་འཇིགས་པས་རྣམ་སྐྲག་ནས། །ཀུན་ཏུ་བཟང་ལ་བདག་ཉིད་འབུལ། །འཇམ་པའི་དབྱངས་ལའང་བདག་ཉིད་ཀྱིས། །བདག་གི་ལུས་འདི་དབུལ་བར་བགྱི། །ཐུགས་རྗེའི་སྤྱོད་པ་མ་འཁྲུལ་བ། །སྤྱན་རས་གཟིགས་མགོན་དེ་ལ་
ཡང་། །ཉམ་ཐག་ང་རོས་འོ་དོད་འབོད། །སྡིག་ལྡན་བདག་ལ་བསྐྱབས་ཏུ་གསོལ། །འཕགས་པ་ནམ་མཁའི་སྙིང་པོ་དང་། །ས་ཡི་སྙིང་པོ་དག་དང་ནི། །ཐུགས་རྗེ་ཆེ་མགོན་ཐམས་ཅད་ལ། །སྐྱབས་ཚོལ་སྙིང་ནས་འོ་དོད་འབོད། །གང་ཞིག་མཐོང་ན་གཤིན་རྗེ་ཡི། །ཕོ་ཉ་ལ་སོགས་སྡང་བ་རྣམས། །སྐྲག་ནས་ཕྱོགས་བཅུར་འབྱེར་བྱེད་པ། །རྡོ་རྗེ་ཅན་ལ་སྐྱབས་སུ་མཆི། །སྔོན་ཆད་ཁྱོད་ཀྱི་བཀའ་ལས་འདས། །ད་ནི་འཇིགས་པ་ཆེ་མཐོང་ནས། །ཁྱོད་ལ་སྐྱབས་སུ་མཆི་ལགས་ཀྱིས། །འཇིགས་པ་མྱུར་དུ་གསལ་དུ་གསོལ། ཞེས་དང་། འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །ཞེས་པ་རྣམས་སོ། །སྤྱི་བཤགས་བྱེད་པར་སྤྲོ་ན། བླ་མ་རྡོ་རྗེ་འཛིན་པ་ཆེན་པོ་ལ་སོགས་པ་ཕྱོགས་བཅུ་ན་བཞུགས་པའི་སངས་རྒྱས་དང་བྱང་
ཆུབ་སེམས་དཔའ་ཐམས་ཅད་དང་། དགེ་འདུན་བཙུན་པ་རྣམས་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་ཚེ་འཁོར་བ་ཐོག་མ་མེད་པ་ནས་ཐ་མ་ད་ལྟ་ལ་ཐུག་གི་བར་དུ་ཉོན་མོངས་པ་འདོད་ཆགས་དང་། ཞེ་སྡང་དང་། གཏི་མུག་གི་དབང་གིས་ལུས་དང་ངག་དང་ཡིད་ཀྱི་སྒོ་ནས་སྡིག་པ་མི་དགེ་བ་བཅུ་བགྱིས་པ་དང་། མཚམས་མ་མཆིས་པ་ལྔ་བགྱིས་པ་དང་། དེ་དག་ཉེ་བ་ལྔ་བགྱིས་པ་དང་། སོ་སོར་ཐར་པའི་སྡོམ་པ་དང་འགལ་བ་བགྱིས་པ་དང་། བྱང་ཆུབ་སེམས་དཔའི་བསླབ་པ་དང་འགལ་བ་བགྱིས་པ་དང་། གསང་སྔགས་ཀྱི་དམ་ཚིག་དང་འགལ་བ་བགྱིས་པ་དང་། དཀོན་མཆོག་གསུམ་ལ་གནོད་པ་བགྱིས་པ་དང་། དམ་པའི་ཆོས་སྤངས་པ་དང་། འཕགས་པའི་དགེ་འདུན་ལ་སྐུར་བ་བཏབ་པ་དང་། ཕ་དང་མ་ལ་མ་གུས་པ་བགྱིས་པ་དང་། མཁན་པོ་དང་སློབ་དཔོན་ལ་མ་གུས་པ་བགྱིས་པ་དང་། གྲོགས་ཚངས་
པ་མཚུངས་པར་སྤྱོད་པ་རྣམས་ལ་མ་གུས་པ་བགྱིས་པ་ལ་སོགས་མདོར་ན་མཐོ་རིས་དང་ཐར་པའི་གེགས་སུ་གྱུར་ཅིང་། འཁོར་བ་དང་ངན་སོང་གི་རྒྱུར་གྱུར་པ་ཉེས་པ་དང་། ལྟུང་བའི་ཚོགས་ཅི་མཆིས་པ་དེ་དག་ཐམས་ཅད་བླ་མ་རྡོ་རྗེ་འཛིན་པ་ཆེན་པོ་ལ་སོགས་པ་ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། དགེ་འདུན་བཙུན་པ་རྣམས་ཀྱི་སྤྱན་སྔར་མཐོལ་ལོ་བཤགས་སོ། མི་འཆབ་བོ། མི་སྦེད་དོ། དེ་ལྟར་མཐོལ་ཞིང་བཤགས་ན་བདག་བདེ་བ་ལ་རེག་པར་གནས་པར་འགྱུར་གྱིས། མ་མཐོལ་མ་བཤགས་ན་དེ་ལྟར་མི་འགྱུར་བ་ལགས་སོ། །ཞེས་པ་ལན་གསུམ་བརྗོད་དོ། །བཞི་པ་རྗེས་སུ་ཡི་རང་བའི་ཡན་ལག་ནི། སྤྱོད་འཇུག་ལས་འབྱུང་བའི། སེམས་ཅན་ཀུན་གྱི་ངན་སོང་གི །སྡུག་བསྔལ་ངལ་བསོའི་དགེ་བ་དང་། །སྡུག་བསྔལ་ཅན་དག་བདེར་གནས་ལ། །དགའ་བས་རྗེས་སུ་ཡི་རང་ངོ་། །བྱང་ཆུབ་རྒྱུར་གྱུར་དགེ་བསགས་པ། །དེ་ལ་
རྗེས་སུ་ཡི་རང་ངོ་། །ལུས་ཅན་འཁོར་བའི་སྡུག་བསྔལ་ལས། །ངེས་པར་ཐར་ལ་ཡི་རང་ངོ་། །སྐྱོབ་པ་རྣམས་ཀྱི་བྱང་ཆུབ་དང་། །རྒྱལ་སྲས་ས་ལའང་ཡི་རང་ངོ་། །སེམས་ཅན་ཐམས་ཅད་བདེ་མཛད་པའི། །ཐུགས་བསྐྱེད་དགེ་བ་རྒྱ་མཚོ་དང་། །སེམས་ཅན་ཕན་པར་མཛད་པ་ལ། །དགའ་བས་རྗེས་སུ་ཡི་རང་ངོ་། །ཞེས་དང་། ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང་། །འགྲོ་བ་ཀུན་གྱི་བསོད་ནམས་གང་ལ་ཡང་། །དེ་དག་ཀུན་གྱི་རྗེས་སུ་བདག་ཡི་རང་། །ཞེས་པའོ། །ལྔ་པ་ཆོས་འཁོར་བསྐོར་བར་སྐུལ་བའི་ཡན་ལག་ནི། སྤྱོད་འཇུག་ལས་འབྱུང་བའི། ཕྱོགས་རྣམས་ཀུན་གྱི་སངས་རྒྱས་ལ། །ཐལ་མོ་སྦྱར་ཏེ་གསོལ་བ་ནི། །སེམས་ཅན་སྡུག་བསྔལ་མུན་འཐོམས་ལ། །ཆོས་ཀྱི་སྒྲོན་མེ་སྦར་དུ་གསོལ། །ཞེས་དང་། གང་རྣམས་ཕྱོགས་བཅུའི་འཇིག་རྟེན་སྒྲོན་མ་དག །བྱང་ཆུབ་རིམ་པར་སངས་རྒྱས་མ་ཆགས་
བརྙེས། །མགོན་པོ་དེ་དག་བདག་གིས་ཐམས་ཅད་ལ། །འཁོར་ལོ་བླ་ན་མེད་པ་བསྐོར་བར་བསྐུལ། །ཞེས་སོ། དྲུག་པ་མྱ་ངན་ལས་མི་འདའ་བར་གསོལ་བ་གདབ་བའི་ཡན་ལག་ནི། སྤྱོད་འཇུག་ལས་འབྱུང་བའི། རྒྱལ་བ་མྱ་ངན་འདའ་བཞེད་ལ། །ཐལ་མོ་སྦྱར་ཏེ་གསོལ་བ་ནི། །འགྲོ་འདི་ལྡོངས་པར་མི་འགོད་ཅིང་། །བསྐལ་བ་གྲངས་མེད་བཞུགས་པར་གསོལ། །ཞེས་དང་། མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་བའི་ཕྱིར། །བསྐལ་པ་ཞིང་གི་རྡུལ་སྙེད་བཞུགས་པར་ཡང་། །བདག་གིས་ཐལ་མོ་རབ་སྦྱར་གསོལ་བར་བགྱི། །ཞེས་སོ། །བདུན་པ་དགེ་རྩ་བྱང་ཆེན་དུ་བསྔོ་བའི་ཡན་ལག་ནི། སྤྱོད་འཇུག་ལས་ འབྱུང་བའི། དེ་ལྟར་འདི་དག་ཀུན་བྱས་ཏེ། །དགེ་བ་བདག་གིས་གང་བསགས་པ། །དེས་ནི་སེམས་ཅན་ཐམས་ཅད་ཀྱི། །སྡུག་བསྔལ་ཐམས་ཅད་སེལ་བར་ཤོག །འགྲོ་བ་ནད་པ་ཇི་སྲིད་དུ། །ནད་སོས་གྱུར་གྱི་བར་དུ་ནི། །སྨན་དང་སྨན་པ་ཉིད་དག་དང་། །དེ་ཡི་ནད་གཡོག་
བྱེད་པར་ཤོག །ཟས་དང་སྐོམ་གྱི་ཆར་ཕབ་སྟེ། །བཀྲེས་དང་སྐོམ་པའི་གནོད་པ་གསལ། །མུ་གེའི་བསྐལ་པ་བར་མའི་ཚེ། །བདག་ནི་ཟས་དང་སྐོམ་དུ་གྱུར། །སེམས་ཅན་ཕོངས་ཤིང་དབུལ་བ་ལ། །བདག་ནི་མི་ཟད་གཏེར་གྱུར་ཏེ། །ཡོ་བྱད་མཁོ་དགུ་སྣ་ཚོགས་སུ། །མདུན་ན་ཉེ་བར་གནས་གྱུར་ཅིག །ལུས་དང་དེ་བཞིན་ལོངས་སྤྱོད་དང་། །དུས་གསུམ་དགེ་བ་ཐམས་ཅད་ཀྱང་། །སེམས་ཅན་ཀུན་གྱི་དོན་གྱི་ཕྱིར། །ཕོངས་པ་མེད་པར་གཏང་བར་བྱ། །ཐམས་ཅད་བཏང་བས་མྱ་ངན་འདའ། །བདག་བློ་མྱ་ངན་འདས་པ་སྒྲུབ། །ཐམས་ཅད་གཏོང་བར་ཆབས་ཅིག་ལ། །སེམས་ཅན་རྣམས་ལ་བཏང་བ་མཆོག །བདག་གིས་ལུས་ཅན་ཐམས་ཅད་ལ། །ལུས་འདི་ཅི་བདེར་བྱིན་ཟིན་གྱིས། །རྟག་ཏུ་གསོད་དང་སྨོད་པའམ། །བརྡེག་སོགས་ཅི་དགར་བྱེད་ལ་རག །བདག་གི་ལུས་ལ་རྩེ་བྱེད་དམ། །ཅོ་འདྲི་ག་ཞའི་རྒྱུ་བྱེད་ཀྱང་། །བདག་གི་ལུས་འདི་བྱིན་
ཟིན་གྱིས། །འདི་ཡི་ཁ་ཏས་ཅི་ཞིག་བྱ། །དེ་ལ་གནོད་པར་མི་འགྱུར་བའི། །ལས་གང་ཡིན་པའང་བྱེད་དུ་ཆུགས། །བདག་ལ་དམིགས་ནས་ནམ་དུ་ཡང་། །འགའ་ཡང་དོན་མེད་མ་གྱུར་ཅིག །བདག་ལ་དམིགས་ནས་གང་དག་གིས། །ཁྲོའམ་དད་པའི་སེམས་བྱུང་ན། །དེ་ཉིད་རྟག་ཏུ་དེ་དག་གི །དོན་ཆེན་འགྲུབ་པའི་རྒྱུར་གྱུར་ཅིག །གང་དག་བདག་ལ་ཁ་ཟེར་རམ། །གཞན་དག་གནོད་པ་བྱེད་པའམ། །དེ་བཞིན་ཕྱར་ཀ་གཏོང་ཡང་རུང་། །ཐམས་ཅད་བྱང་ཆུབ་སྐལ་ལྡན་གྱུར། །བདག་ནི་མགོན་མེད་རྣམས་ཀྱི་མགོན། །ལམ་ཞུགས་རྣམས་ཀྱི་དེད་དཔོན་དང་། །རྒལ་འདོད་རྣམས་ཀྱི་གྲུ་དང་ནི། །གཟིངས་དང་ཟམ་པ་ཉིད་དུ་གྱུར། །གླིང་དོན་གཉེར་ལ་གླིང་དང་ནི། །གནས་མལ་འདོད་ལ་གནས་མལ་དང་། །བདག་ནི་ལུས་ཅན་བྲན་འདོད་པ། །ཀུན་གྱི་བྲན་དུ་འགྱུར་བར་ཤོག །ཡིད་བཞིན་ནོར་དང་བུམ་པ་བཟང་། །རིག་སྔགས་གྲུབ་དང་སྨན་ཆེན་
དང་། །དཔག་བསམ་གྱི་ནི་ཤིང་དག་དང་། །ལུས་ཅན་རྣམས་ཀྱི་འདོད་འཇོར་གྱུར། །ས་སོགས་འབྱུང་བ་ཆེན་པོ་དང་། །ནམ་མཁའ་བཞིན་དུ་རྟག་པར་ཡང་། །སེམས་ཅན་དཔག་ཏུ་མེད་པ་ཡི། །རྣམ་མང་ཉེར་འཚོའི་གཞིར་ཡང་ཤོག །དེ་བཞིན་ནམ་མཁའི་མཐས་གཏུགས་པའི། །སེམས་ཅན་ཀུན་ལ་རྣམ་ཀུན་དུ། །ཐམས་ཅད་མྱ་ངན་འདས་བར་དུ། །བདག་ནི་ཉེར་འཚོའི་གཞིར་ཡང་ཤོག །ཞེས་དང་། བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་དུ་ནི་མྱུར་དུ་འཚང་རྒྱ་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བགྱིད་ཅིང་། །སེམས་ཅན་སྡུག་བསྔལ་མང་པོས་གཟིར་ལས་སྒྲོལ། །ཞེས་དང་། ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་བདག་གིས་བྱང་ཆུབ་ཕྱིར་བསྔོའོ། །ཞེས་པ་རྣམས་སོ། །དེ་ནས་སྡོམ་པ་གཟུང་བའི་ཡན་ལག་ལ།
ཟབ་མོ་ལྟ་རྒྱུད་ཀྱི་ལུགས་ཀྱི་སེམས་བསྐྱེད་དང་སྡོམ་པ་སྟབས་ཅིག་ཏུ་ལེན་པའི་ཚུལ་ནི། སྤྱོད་འཇུག་ལས་བཏུས་པ། བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི། །ཞེས་ལན་གསུམ། དེའི་རྗེས་སུ་རང་དབུགས་དབྱུང་བ་ནི། དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་བདག་དེང་གྱུར། །ད་ནི་བདག་གིས་ཅི་ནས་ཀྱང་། །རིགས་དང་མཐུན་པའི་ལས་བརྩམས་ཏེ། །སྐྱོན་མེད་བཙུན་པའི་རིགས་འདི་ལ། །རྙོག་པར་མི་
འགྱུར་དེ་ལྟར་བྱ། །ཞེས་དང་། གཞན་གཟེངས་བསྟོད་པ་ནི། བདག་གིས་དེ་རིང་སྐྱོབ་པ་ཐམས་ཅད་ཀྱི། །སྤྱན་སྔར་འགྲོ་བ་བདེ་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱིས། །ལྷ་དང་ལྷ་མིན་ལ་སོགས་དགའ་བར་གྱིས། །ཞེས་དང་། སྨོན་ལམ་གདབ་པ་ནི། བྱང་ཆུབ་སེམས་ནི་རིན་པོ་ཆེ། །མ་སྐྱེས་པ་རྣམས་སྐྱེས་གྱུར་ཅིག །སྐྱེས་པ་ཉམས་པ་མེད་པ་དང་། །གོང་ནས་གོང་དུ་འཕེལ་བར་ཤོག །བྱང་ཆུབ་སེམས་དང་མི་འབྲལ་ཞིང་། །བྱང་ཆུབ་སྤྱོད་ལ་གཞོལ་བ་དང་། །སངས་རྒྱས་རྣམས་ཀྱིས་ཡོངས་བཟུང་ཞིང་། །བདུད་ཀྱི་ལས་རྣམས་སྤོང་བར་ཤོག །བྱང་ཆུབ་སེམས་དཔའ་རྣམས་ཀྱིས་ནི། །འགྲོ་དོན་ཐུགས་ལ་དགོངས་འགྲུབ་ཤོག །མགོན་པོ་ཡིས་ནི་གང་དགོངས་པ། །སེམས་ཅན་རྣམས་ལ་དེ་འབྱོར་ཤོག །སེམས་ཅན་ཐམས་ཅད་བདེ་དང་ལྡན་གྱུར་ཅིག །ངན་འགྲོ་ཐམས་ཅད་རྟག་ཏུ་སྟོངས་པར་ཤོག །བྱང་ཆུབ་སེམས་དཔའ་གང་
དག་སར་བཞུགས་པ། །དེ་དག་ཀུན་གྱི་སྨོན་ལམ་འགྲུབ་པར་ཤོག །ཅེས་སོ། །འདི་སྐབས་ཚོགས་རྟེན་བསྐྱེད་པ་དང་ཚོགས་བསགས་པའི་ཚུལ་བསྡུས་པ་བྱེད་ན། ཐམས་ཅད་དུ་ཡང་ས་གཞི་དག །གསེག་མ་ལ་སོགས་མེད་པ་དང་། །ལག་མཐིལ་ལྟར་མཉམ་བཻ་ཌཱུརྱའི། །རང་བཞིན་འཇམ་པོར་གནས་གྱུར་ཅིག །མ་ལུས་སེམས་ཅན་ཀུན་གྱི་མགོན་གྱུར་ཅིག །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །བདག་གི་མཆོད་ཡོན་བཞེས་སླད་དུ། །འདི་ཉིད་དུ་ནི་བཞུགས་སུ་གསོལ། །ཞེས་པ་རྣམས་ཀྱི་མཇུག་ཏུ་ཇི་སྙེད་སུ་དག་ མ་འདོན་པ་ཡིན་ནོ། །ཡང་སྔགས་ལུགས་ཀྱི་དབང་གིས་ཡན་ལག་བདུན་པའི་སྒོ་ནས་ཚོགས་བསགས་པར་འདོད་ན་རྗེ་བརྒྱད་པས་སྩལ་བ་འདི་བྱ་སྟེ། མཁའ་མཉམ་ཞིང་མཆོག་འོག་མིན་ཆོས་ཀྱི་དབྱིངས། །བྱང་
ཆུབ་ཕྱོགས་ཆོས་རྣམ་ཐར་སྒོ་བཞི་ཡི། །བདེར་གཤེགས་ཡོན་ཏན་ཕུན་ཚོགས་འབྱུང་བའི་གནས། །མི་འགྱུར་རྡོ་རྗེ་གདན་གྱི་ཕོ་བྲང་དབུས། །མི་འཇིགས་བཞི་ཡི་སེང་ཁྲིར་སྲིད་ཞི་ལ། །མི་གནས་པདྨ་ཉི་མ་ཟླ་བའི་སྟེང་། །དཔལ་ལྡན་བླ་མ་རིགས་ཀྱི་བདག་པོ་མཆོག །རྡོ་རྗེ་འཆང་ཆེན་གསང་སྔགས་སྡོམ་པའི་བདག །དེ་ལ་རྩ་བ་བརྒྱུད་པར་བཅས་པ་ཡི། །དཔལ་ལྡན་བླ་མའི་ཚོགས་བཅས་མཁའ་ལ་རོལ། །དེ་ཡི་གཡས་སུ་དུར་ཁྲོད་ཆེན་པོའི་དབུས། །ཡེ་ཤེས་མེ་དཔུང་འབར་པའི་ནང་རོལ་ན། །ཧེ་རུ་ཀ་དཔལ་རྣལ་འབྱོར་མར་བཅས་རོལ། །དེ་ལ་རྒྱུད་སྡེའི་ལྷ་ཚོགས་འོད་དུ་འབར། །རྒྱབ་ཏུ་སྐུ་གསུམ་ཞིང་ཁམས་མཐའ་ཡས་དབུས། །བྱང་ཆུབ་སྙིང་པོའི་ལྡིང་ཁང་མཛེས་པ་ན། །སྟོན་པ་ཤཱཀྱ་སེང་གེ་བདུད་ལས་རྒྱལ། །ཇོ་བོ་དཀོན་མཆོག་གསུམ་པོ་འོད་དུ་འབར། །གཡོན་ཕྱོགས་འགྲོ་སེམས་དག་པའི་མེ་ལོང་དབུས། །སྣ་ཚོགས་སྐལ་
བར་ཚམས་པའི་དཀྱིལ་འཁོར་དུ། །མཆོག་གི་སྤྲུལ་སྐུ་དཔལ་ལྡན་དུས་གསུམ་མཁྱེན། །ཞྭ་ནག་ཅོད་པན་འཛིན་པ་འོད་དུ་འབར། །མདུན་ཕྱོགས་མ་རུངས་བསྒྲལ་བའི་ཞིང་ཁམས་ན། །བདུད་བཞིའི་དཔུང་ཚོགས་འཇོམས་པའི་གཡུལ་ས་དེར། །དཔལ་ལྡན་མ་ཧཱ་ཀཱ་ལ་འཇིགས་པའི་ཞལ། །མི་འགྱུར་དམ་ཚིག་གཉན་པོ་འོད་དུ་འབར། །བདག་སོགས་སེམས་ཅན་མགོན་མེད་རྟེན་འབྲེལ་ལས། །དད་པ་དམ་ཚིག་བསླུ་བ་མེད་པ་ཡིས། །མིག་དང་ཡིད་ལ་མངོན་སུམ་ཉིད་དུ་ཤར། །བསམ་བརྗོད་ཡིད་ལས་འདས་པའི་དགའ་བ་ཐོབ། །མི་བཟོད་སྐུ་ལ་ལྟ་བའི་མཆོད་པ་འབུལ། །ལུས་ཀྱིས་ཕྱག་འཚལ་ངག་གིས་བསྟོད་པར་བགྱི། །ཁྱོད་ལས་སྐྱབས་གཞན་མ་མཆིས་ཡིད་ཕྱག་འཚལ། །མཐོང་ན་ཟག་མེད་བདེ་བ་སྐྱེད་བྱེད་ཅིང་། །གང་གི་ཡི་གེར་བྱང་ཆུབ་འབྲས་སྩོལ་བའི། །ནམ་མཁས་ཁྱབ་པའི་མེ་ཏོག་ཅི་ཡང་འབུལ། །གང་གིས་ཚོར་ན་སྒྲིབ་གསུམ་ཞི་ནུས་ལ། །
ལེགས་པར་བདུག་ན་དམ་ཆོས་ངད་ལྡང་བའི། །སྤོས་བཟང་སྤྲིན་གྱིས་ནམ་མཁའ་རྒྱས་པར་འགེངས། །མི་ཤེས་མུན་པའི་ཚོགས་རྣམས་འབྲོས་བྱེད་ཅིང་། །ཡང་དག་སྣང་བའི་འོད་ཟེར་འབྱུང་གནས་ཅིག །མཆོག་གི་སྒྲོན་མེ་བར་མཚམས་མ་གྱུར་ཅིག །མི་བསྲུན་མེ་ལྕེའི་རྣམ་འགྱུར་དུ་བའི་ཟིལ། །བྱམས་པ་ཆེན་པོའི་དྲི་དང་ཆབ་ཀྱི་རྒྱུན། །གཅིག་ཏུ་འདྲེས་ཏེ་ནམ་མཁའི་མཐལ་ལ་ཀླས། །བཀྲེས་ཤིང་ཕོངས་པ་རྣམས་ཀྱི་འཚོ་བའི་མཆོག །འཆི་མེད་རྟག་པའི་ཞལ་ཟས་དྲི་རོ་ཅན། །མཚུངས་མེད་ཁ་དོག་ཅན་དེས་ཞིང་ཀུན་ཁྱབ། །གང་ན་མྱ་ངན་མ་ལུས་མཆིས་པ་དག །ཡིད་འོང་སྒྲ་སྙན་ངག་གིས་འཕྲོག་བྱེད་པའི། །སྣ་ཚོགས་རོལ་མོའི་སྒྲ་འདིས་ནམ་མཁའ་སྤྲུག །ཀུན་རྟོག་ཚ་ཟེར་མ་ལུས་འགོག་བྱེད་པའི། །མཆོག་གི་གྲིབ་བསིལ་ལྟ་ན་སྡུག་པ་ལ། །ལྡ་ལྡི་དྲྭ་བ་དྲྭ་ཕྱེད་གཡེར་ཁར་བཅས། །བ་དན་ཕུར་མའི་བྱེ་བྲག་མི་དམན་པས། །རྫུ་
འཕྲུལ་མཆོག་གི་མཁའ་ལ་མངོན་པར་གར། །བདུད་སྡེའི་དཔུང་ཚོགས་དཔའ་བའི་གད་མོ་རྣམས། །ནམ་མཁའི་ཕྱི་རོལ་ལ་ཡང་མི་གནས་ཕྱིར། །རྣམ་པར་རྒྱལ་བའི་མཚན་མས་དགེ་བར་གྱུར། །ཡིད་བཞིན་སྙིང་པོ་སྦྱིན་པའི་ནོར་བུ་མཆོག །དགོས་འདོད་མ་ལུས་སྩོལ་བས་མཛེས་པར་བགྱི། །རིམས་ནད་མ་ལུས་གསོལ་བའི་སྨན་ཆེན་དང་། །བག་ཡོད་ཚུལ་བཟང་གདུང་མེད་ན་བཟའ་ནི། །ཟད་མེད་ནམ་མཁའི་བླ་ལ་དཀྱིལ་འཁོར་གྱུར། །འཕགས་རྣམས་དགྱེས་པའི་བཀྲ་ཤིས་མཚན་མ་དང་། །ཐུན་མོང་མཆོག་གི་དངོས་གྲུབ་འབེབས་པའི་རྫས། །ལུས་ཅན་ཀུན་ལ་དགོས་འདོད་ཉེར་མཁོའི་གཞི། །རྨད་བྱུང་གྲགས་པའི་དྲི་བསུང་ཅན་འདི་འབུལ། །བསམ་མི་ཁྱབ་པའི་བདེ་གཤེགས་ཕོ་བྲང་མཆོག །གཞལ་ཡས་རྣམ་དག་ནོར་བུའི་ས་གཞི་ལ། །རིན་ཆེན་རིན་ཐང་མེད་པའི་མིག་མང་རིས། །རྒོལ་བ་མཐའ་དག་འཇིགས་པ་སེང་གེའི་ཁྲི། །བཅོས་བུ་མུན་པའི་
དར་ཟབ་རྣམ་པར་ཀླུབས། །ཡེ་ཤེས་དྲི་མེད་འདྲེན་པའི་ཞིང་ཁམས་མཆོག །ས་ཆུ་མེ་རླུང་མཁའ་སྣང་རྣམ་དག་པ། །དཀྱིལ་འཁོར་མུ་མཐའ་མེད་པ་རབ་ཏུ་འབྱམས། །མདོར་ན་བདག་སོགས་མཁའ་མཉམ་སེམས་ཅན་གྱིས། །དགེ་རྩ་བགྱིས་དང་བགྱིད་སྩལ་བགྱིད་པ་ལ། །རྗེས་སུ་ཡི་རང་ཚོགས་གཉིས་དགེ་རྩ་འབུལ། །ཕྱོགས་བཅུའི་ཞིང་ན་བདེ་གཤེགས་ཇི་སྙེད་ཀྱི། །དགེ་འབྲས་གང་མཆིས་དེ་ཡང་མཆོད་པར་འབུལ། །རྨད་བྱུང་མཆོད་པའི་ཡུལ་སྣང་དེ་དག་ཀུན། །རྣམ་ཀུན་མཆོག་ཏུ་མི་འགྱུར་སྟོང་ཉིད་དང་། །འགྱུར་མེད་བདེ་བ་ཆེན་པོའི་རོས་བཏབ་ནས། །གཟུགས་སྒྲ་དྲི་རོ་རེག་པ་རྣམ་དག་པ། །རྡོ་རྗེ་བདེ་བ་དམ་པའི་ངོ་བོར་འབུལ། །མདོར་ན་སྐུ་ལ་ཕྲིན་ལས་ཕྱག་རྒྱ་འབུལ། །གསུང་ལ་དམ་ཚིག་ཡེ་ཤེས་ཕྱག་རྒྱ་འབུལ། །ཐུགས་ལ་བདུད་འཇོམས་ཕྱག་རྒྱ་ཆེན་པོ་འབུལ། །མཆོད་ཡུལ་མཆོད་བྱེད་མཆོད་པ་ཐམས་ཅད་པ། །
རང་གི་ངོ་བོས་མ་གྲུབ་སྒྱུ་མ་ཙམ། །སྒྱུ་མ་ཙམ་དུ་མཆོད་པ་ཕུལ་བའི་དགེས། །སྒྱུ་མ་ཙམ་དུ་སེམས་ཅན་ཐམས་ཅད་ཀྱི། །བདེ་སྐྱིད་ཟད་མེད་འབྱུང་འདིའང་འབུལ་བར་བགྱི། །བདེ་གཤེགས་དགྱེས་པའི་ལྟ་སྤྱོད་རྣམ་དག་གི །མཆོད་པ་གང་དེས་མཁའ་མཉམ་སེམས་ཅན་གྱིས། །ཐོག་མེད་དུས་ནས་བསགས་པའི་རང་བཞིན་དང་། །བཅས་པ་ལས་གྱུར་ཁ་ན་མ་ཐོའི་སྡིག །གང་བསགས་དེ་དག་ཉེས་གྱུར་ཉེས་པ་ལ། །ཉེས་པར་མཐོང་ནས་མི་བཟོད་འགྱོད་པ་སྐྱེས། །དེ་ཕྱིར་སྒོ་གསུམ་ནོངས་པ་མཐོལ་ཞིང་བཤགས། །ཕྱིན་ཆད་སྲོག་ལ་བབ་ཀྱང་མི་བགྱིད་ན། །སྔར་བྱས་ལས་ངན་འབྲས་མྱོང་མ་གྱུར་ཅིག །སྡུག་བསྔལ་སྣ་ཚོགས་སྐྱེད་པའི་སྡིག་རྒྱུན་ནི། །དྲུངས་ནས་འབྱིན་བྱེད་བྱང་ཆུབ་སྤྱོད་མཆོག་གི །གཉེན་པོ་ཀུན་ཏུ་སྤྱོད་པ་དགེ་བའི་སྟོབས། །མཁའ་མཉམ་སེམས་ཅན་རྒྱུད་ལ་རྫོགས་གྱུར་ཅིག །གང་ལ་བཤགས་དང་གང་གིས་བཤགས་པ་
དང་། །བཤགས་པ་ཐམས་ཅད་རང་བཞིན་མ་གྲུབ་པས། །རྟེན་འབྲེལ་ཙམ་དུ་བཤགས་པའི་ཆོས་ཉིད་ཀྱིས། །རང་གཞན་སྡུག་བསྔལ་གནས་པར་མ་གྱུར་ཅིག །མཆོག་གི་བླ་མ་དཀོན་མཆོག་རྣམ་པ་གསུམ། །ཡི་དམ་རྒྱུད་སྡེ་བཞི་ཡི་ངོ་བོར་ཤར། །དེ་ལ་དཔའ་བོ་མཁའ་འགྲོ་སྤྲིན་ལྟར་གཏིབས། །བཀའ་སྡོད་དམ་ཅན་ཚོགས་བཅས་མུ་མཐའ་མེད། །ཐུགས་རྗེ་ཆེ་མགོན་རྣམས་ཀྱི་ཐུགས་རྗེ་དང་། །མཁྱེན་རབ་ནུས་པ་ཕྲིན་ལས་ཟབ་མོ་ལ། །བསམ་གྱིས་མི་ཁྱབ་མོས་པས་རྗེས་ཡི་རང་། །དེ་བཞིན་ཉན་ཐོས་རང་སངས་རྒྱས་པ་དང་། །འཁོར་བའི་ཆེན་པོ་ཚངས་པ་ལ་སོགས་ཀྱི། །ཟག་བཅས་ཟག་མེད་དགེ་ལ་རྗེས་ཡི་རང་། །ལྷག་པར་སྙིགས་མར་སྤྱོད་ཅིང་མི་བསྲུན་དུས། །རང་བཞིན་དགེ་ཞིང་ཕ་མ་རྒན་རབས་ལ། །སྲིད་ཞུར་བརྩོན་ཞིང་དཀོན་མཆོག་མཆོད་པ་དང་། །འདོད་ཆུང་ཆོག་ཤེས་དབེན་ལ་དགའ་བ་ཡིས། །རང་གི་ཉེས་པ་
ཉེས་པར་གཟུང་པ་ནས། །བག་ཡོད་དྲན་ཤེས་འཛིན་ལ་རྗེས་ཡི་རང་། །ཇི་སྲིད་མངོན་འཚང་མ་རྒྱས་དེ་སྲིད་དུ། །འཆལ་ཚུལ་རྒྱང་བསྲིང་སྐྱེས་བུ་ཆེན་པོ་ཡི། །སྤྱོད་པས་བཟོད་ལ་རྟག་ཏུ་རྗེས་ཡི་རང་། །ཀུན་ཀྱང་ཡི་རང་སྒྱུ་མའི་ཚུལ་རྟོགས་ནས། །སྒྱུ་མ་ཙམ་གྱི་ཡི་རང་འབྲས་གང་དཔག །གང་ཞིག་རྫོགས་པའི་སངས་རྒྱས་སྤྲུལ་པའི་སྐུ། །ཞིང་ཁམས་དམ་པ་ཆོས་སྣོད་མ་གྱུར་བར། །འགྲོ་བློ་རྙོག་པར་ཐུབ་དབང་གཟུགས་འཆར་ཚེ། །བདག་གིས་མ་དག་གདུལ་བྱའི་ཁམས་སྦྱངས་ནས། །རྣམ་དག་མངོན་རྟོགས་བསྐྱེད་པར་སྨིན་བྱས་ཏེ། །རྫོགས་སངས་རྒྱས་དང་དེ་སྲས་སློབ་མར་བཅས། །སྣ་ཚོགས་ཆོས་ཀྱི་འཁོར་ལོ་བསྐོར་བར་བསྐུལ། །གང་གི་རྣམ་པར་དཀར་བའི་འཁོར་ལོ་ཡིས། །སྲིད་ཞིང་ལྟུང་བའི་མཐའ་གཉིས་གཅད་དུ་གསོལ། །གང་ན་རྫོགས་སངས་རྒྱས་དང་དབང་ཐོབ་ཀྱི། །སེམས་དཔའ་ཆེ་ཡི་མཐུ་དང་ནུས་པ་ལས། །སོ་སོ་སྐྱེ་བོའི་
དགེ་བའི་བཤེས་གཉེན་དང་། །རྟེན་མེད་ནམ་མཁའ་ལ་སོགས་འབྱུང་བ་ལས། །རྣམ་པར་ལོངས་པའི་དམ་ཆོས་སྒྲ་རྣམས་ཀྱང་། །ཐར་འདོད་སྐྱེ་དགུའི་ཡིད་བཞིན་འབབ་གྱུར་ཅིག །དེ་བཞིན་གཤེགས་ལ་ཆོས་འཁོར་རྟག་ཏུ་གནས། །མི་གསུང་བཞུགས་པ་གདུལ་བྱའི་མཚན་འཛིན་ཡིན། །མཚན་མ་གདོད་ནས་མ་གྲུབ་བརྗོད་པ་བྲལ། །བརྗོད་མེད་འདི་ནི་ཆོས་ཀྱི་འཁོར་ལོའི་རྒྱུ། །བསམ་བརྗོད་བྲལ་བའི་ཡེ་ཤེས་མངའ་བརྙེས་ནས། །གང་ལ་གང་འཚམ་སྣ་ཚོགས་སྤྲུལ་པའི་སྐུ། །སེམས་ཅན་མཐའ་ཡས་ཁམས་དང་དབང་པོའི་ཚོགས། །ཇི་སྲིད་སྦྱང་བའི་བྱ་བ་མ་རྫོགས་པར། །གདུལ་བྱ་དུས་ལས་མི་ཡོལ་ཕྲིན་ལས་ཀྱིས། །མྱ་ངན་འདའ་ཚུལ་མི་བསྟན་བཞུགས་སུ་གསོལ། །ཁྱད་པར་དམ་ཆོས་སྤོང་ཞིང་དཀོན་མཆོག་ལ། །ཁོན་དུ་འཛིན་པའི་འགྲོ་བ་ལོང་བ་ཀུན། །སླར་ཡང་ཕྲིན་ལས་ནུས་པས་མི་འདུལ་བ། །མི་སྲིད་ཕྱིར་ན་མགོན་
མེད་སྐྱབས་མེད་ཀྱི། །མགོན་ཁྱོད་རྟག་ཏུ་སྐྱབས་སུ་བཞུགས་པར་གསོལ། །གཞན་ཡང་སེམས་ཅན་ཀུན་ལ་ཕན་བདེའི་གཏེར། །གང་ན་སྩོལ་ནུས་སྐྱེ་དང་འཕགས་པའི་ཚོགས། །སྣ་ཚོགས་གཟུགས་ཀྱིས་སྐྱེ་དགུ་སྲུང་མཛད་པ། །སྙིང་རྗེའི་དབང་ཕྱུག་དེ་དག་དེར་བཞུགས་ཤིག །འགྲོ་འོང་གཤེགས་བཞུད་མི་མངའི་རྒྱལ་བ་ལ། །སྐྱེ་འགག་སྣ་ཚོགས་འཛིན་པའི་བྱིས་བློ་ཡང་། །གདོད་ནས་སྐྱེ་འགག་གནས་གསུམ་ག་ལ་ཡོད། །སྐྱེ་མེད་དོན་ལ་རྟག་ཏུ་འཚོ་གྱུར་ཅིག །བདག་དང་མཁའ་མཉམ་སེམས་ཅན་ཐམས་ཅད་ཀྱི། །ཆོས་དབྱིངས་བྱང་ཆུབ་གསུམ་གྱི་དགེ་རྩར་བཅས། །དུས་གསུམ་སྲིད་པའི་ལེགས་སྤྱད་ཇི་སྙེད་ཀུན། །མ་རྒན་སེམས་ཅན་མགོན་མེད་གཏོལ་བྲལ་རྣམས། །ཡང་དག་རྫོགས་སངས་རྒྱས་ཀྱི་གོ་འཕང་ཉིད། །ད་ལྟ་ཉིད་དུ་ཐོབ་ཕྱིར་བསྔོ་བར་བགྱི། །མདོར་ན་བཟང་པོ་སྤྱོད་པའི་སྨོན་ལམ་དག །བྱང་ཆུབ་ཆེན་པོ་སྤྱོད་པའི་སྨོན་ལམ་དག །
བདག་སོགས་མཁའ་མཉམ་ཀུན་གྱིས་གཟུང་བྱས་ཏེ། །སྨོན་ལམ་ཡོངས་སུ་འགྲུབ་པར་བྱིན་གྱིས་རློབས། །བདག་གིས་བྱང་ཆུབ་སྤྱོད་པའི་ཡན་ལག་བདུན། །བུ་རམ་ཤིང་པའི་ཕྲིན་ལས་ཇི་བཞིན་དུ། །གསོལ་བ་བཏབ་ལས་དགེ་བ་གང་ཐོབ་པས། །བགྲང་ཡས་མར་གྱུར་འགྲོ་བ་ཐམས་ཅད་ཀྱིས། །བྱང་ཆུབ་ཆེན་པོའི་ལྟ་སྤྱོད་འཁྲུལ་མེད་ཤོག །ཅེས་བྱ་བ་འདི་ནི། །རྗེ་བཙུན་ཀརྨ་པའི་མཚན་གྱི་མཐའ་ཅན་དགེ་སློང་མི་བསྐྱོད་བཟང་བློ་དད་པའི་སེམས་ཀྱིས། མཚུར་ཕུ་བསྐུངས་ཀྱི་རི་ཁྲོད་དུ་སྦྱར་བའོ།། །།དེ་ནས་རང་གཞན་གྱི་དོན་རླབས་པོ་ཆེ་བསྒྲུབ་པའི་སླད་དུ་སངས་རྒྱས་བྱང་སེམས་དང་བླ་མ་བརྒྱུད་པ་རྣམས་ལ་བསྟོད་ཅིང་གསོལ་བ་གདབ་པའི་ཡན་ལག་ལ་ཐོག་མར་དེ་བཞིན་གཤེགས་པ་སྤྱི་ལ་བསྟོད་ཅིང་ཕྱག་འཚལ་བ་མདོ་སྡེ་རྒྱན་ལས་འབྱུང་བ་ནི། སེམས་ཅན་རྣམས་ལ་བརྩེ་བ་ཅན། །ཕྲད་དང་བྲལ་བའི་དགོངས་པ་ཅན། །མི་འབྲལ་བ་ཡི་དགོངས་པ་ཅན། །ཕན་བདེ་དགོངས་ཁྱོད་ལ་ཕྱག་འཚལ། །ཐུབ་པ་སྒྲིབ་ཀུན་ངེས་པར་གྲོལ། །འཇིག་རྟེན་ཐམས་ཅད་
ཟིལ་གྱིས་གནོན། །ཁྱོད་ཀྱི་མཁྱེན་པས་ཤེས་བྱ་ཁྱབ། །ཐུགས་གྲོལ་ཁྱོད་ལ་ཕྱག་འཚལ་ལོ། །སེམས་ཅན་དག་ནི་ཐམས་ཅད་ཀྱི། །ཉོན་མོངས་མ་ལུས་ཐམས་ཅད་འདུལ། །ཉོན་མོངས་འཇོམས་མཛད་ཉོན་མོངས་ལ། །བརྩེ་བཅས་ཁྱོད་ལ་ཕྱག་འཚལ་ལོ། །ལྷུན་གྱིས་གྲུབ་ཅིང་ཆགས་མི་མངའ། །ཐོགས་པ་མི་མངའ་རྟག་པར་ནི། །མཉམ་པར་གཞག་ཅིང་འདྲི་ཀུན་གྱི། །ལན་ལྡོན་ཁྱོད་ལ་ཕྱག་འཚལ་ལོ། །རྟེན་དང་བརྟེན་པ་བཤད་བྱ་དང་། །གསུང་དང་མཁྱེན་པ་འཆད་བྱེད་ལ། །བློ་གྲོས་རྟག་ཐོགས་མི་མངའ་བ། །ལེགས་སྟོན་ཁྱོད་ལ་ཕྱག་འཚལ་ལོ། །གཤེགས་ནས་སྤྱོད་པ་མཁྱེན་མཛད་དེ། །དེ་དག་སྐད་ཀྱིས་སེམས་ཅན་གྱི། །འོང་དང་འགྲོ་དང་ངེས་འབྱུང་ལ། །ལེགས་འདོམས་ཁྱོད་ལ་ཕྱག་འཚལ་ལོ། །ལུས་ཅན་ཀུན་གྱིས་ཁྱོད་མཐོང་ན། །སྐྱེས་བུ་དམ་པ་ལགས་པར་འཚལ། །མཐོང་བ་ཙམ་གྱིས་རབ་དང་བར། །མཛད་པ་ཁྱོད་ལ་ཕྱག་འཚལ་ལོ། །ལེན་
དང་གནས་དང་གཏོང་བ་དང་། །སྤྲུལ་དང་ཡོངས་སུ་སྒྱུར་བ་དང་། །ཏིང་ངེ་འཛིན་དང་ཡེ་ཤེས་ལ། །མངའ་བརྙེས་ཁྱོད་ལ་ཕྱག་འཚལ་ལོ། །ཐབས་དང་སྐྱོབས་དང་དག་པ་དང་། །ཐེག་ཆེན་ངེས་པར་འབྱུང་བ་ལ། །སེམས་ཅན་རྣམས་ལ་རབ་སླུ་བའི། །བདུད་འཇོམས་ཁྱོད་ལ་ཕྱག་འཚལ་ལོ། །རང་གཞན་དོན་དུ་ཡེ་ཤེས་དང་། །སྤངས་དང་ངེས་འབྱུང་བགེགས་མཛད་པར། །སྟོན་མཛད་མུ་སྟེགས་གཞན་དག་གིས། །མི་བརྫི་ཁྱོད་ལ་ཕྱག་འཚལ་ལོ། །བསྲུང་མེད་བསྙེལ་བ་མི་མངའ་བ། །འཁོར་གྱི་ནང་ན་བག་བརྐྱང་གསུང་། །ཀུན་ནས་ཉོན་མོངས་གཉིས་སྤངས་པ། །འཁོར་སྡུད་ཁྱོད་ལ་ཕྱག་འཚལ་ལོ། །ཀུན་མཁྱེན་ཁྱོད་ལ་རྒྱུ་བ་དང་། །གནས་པ་ཀུན་ལ་རྟག་པར་ནི། །ཀུན་མཁྱེན་མིན་སྤྱོད་མི་མངའ་སྟེ། །ཡང་དག་དོན་ལྡན་ཁྱོད་ཕྱག་འཚལ། །སེམས་ཅན་ཀུན་གྱི་བྱ་བ་ལ། །ཁྱོད་ནི་དུས་ལས་མི་འདའ་བས། །མཛད་པ་རྟག་
ཏུ་དོན་མངའ་བ། །མི་བསྙེལ་ཁྱོད་ལ་ཕྱག་འཚལ་ལོ། །འཇིག་རྟེན་ཀུན་ལ་ཉིན་མཚན་དུ། །ལན་དྲུག་ཏུ་ནི་སོ་སོར་གཟིགས། །ཐུགས་རྗེ་ཆེན་པོ་དང་ལྡན་པ། །ཕན་དགོངས་ཁྱོད་ལ་ཕྱག་འཚལ་ལོ། །སྤྱོད་པ་དང་ནི་རྟོགས་པ་དང་། །ཡེ་ཤེས་དང་ནི་ཕྲིན་ལས་ཀྱིས། །ཉན་ཐོས་རང་སངས་རྒྱས་ཀུན་གྱི། །བླ་མ་ཁྱོད་ལ་ཕྱག་འཚལ་ལོ། །སྐུ་གསུམ་དག་གི་བྱང་ཆུབ་ཆེ། །རྣམ་པ་ཀུན་བརྙེས་ཐམས་ཅད་དུ། །སེམས་ཅན་ཀུན་གྱི་ཐེ་ཚོམ་དག །གཅོད་པ་ཁྱོད་ལ་ཕྱག་འཚལ་ལོ། །འཛིན་པ་མི་མངའ་ཉེས་མི་མངའ་། །རྙོག་པ་མི་མངའ་མི་གནས་པ། །མི་གཡོ་ཆོས་རྣམས་ཐམས་ཅད་ལ། །སྤྲོས་མེད་ཁྱོད་ལ་ཕྱག་འཚལ་ལོ།། །།དེ་ནས་བྱེ་བྲག་ཏུ་བདག་ཅག་གི་སྟོན་པར་བསྟོད་པའི་རིམ་པ་ལ། རྗེ་རང་བྱུང་རྡོ་རྗེས་མཛད་པའི་སངས་རྒྱས་ཀྱི་སྐྱེས་རབས་བརྒྱ་རྩའི་སྡོམ་གྱི་ཚིགས་བཅད་ནི། ན་མོ་ཤཱཀྱ་མུ་ན་ཡེ། སྟག་མོ་ཤི་བི་ཀོ་ས་ལ། །ཚོང་དཔོན་གཉིས་དང་རི་བོང་དང་། །ཨ་ཀ་ཏ་དང་ཤ་སྦྱིན་དང་། །ཐམས་ཅད་
སྒྲོལ་དང་མཆོད་སྦྱིན་བྱེད། །བརྒྱ་བྱིན་བྲམ་ཟེ་མྱོས་བྱེད་མ། །ལེགས་པར་ཕ་རོལ་ཕྱིན་དང་ཉ། །བྱ་དང་བུམ་པ་ཕྱུག་པོའི་བུ། །དཀའ་ཐུབ་ཅན་དང་ཚོང་དཔོན་ནོ། །བྱང་ཆུབ་ངང་པ་བྱང་ཆུབ་ཆེ། །སྤྲེའུ་རི་དྭགས་ཤ་ར་བྷ། །རུ་རུ་སྤྲེ་རྒྱལ་བཟོད་པ་སྨྲ། །ཚངས་དང་གླང་ཆེན་དེ་དག་བཅུ། །ཟླ་བ་ལྕགས་ཀྱི་ཁྱིམ་དུ་སྐྱེས། །མ་ཧེ་ཤིང་རྟ་ཡི་དམ་བརྟན། །དེད་དཔོན་གསེར་མདོག་ཀུན་དྷ་དང་། །རིགས་ངན་གྲགས་པའི་འོད་དང་བཅུ། །ཁྱིམ་བདག་སྒྲོན་སྣང་རི་བོང་དང་། །ཀུན་ཏུ་གོ་བྱེད་ཁྱེའུ་གཉིས། །བརྟན་བྱིན་བདེ་བྱིན་སྙན་པའི་འོད། །ཆུ་སྐྱེས་འཇིག་རྟེན་དགའ་དང་བཅུ། །ཚངས་སྦྱིན་ཆོས་ཚོལ་ཡེ་ཤེས་ལྡན། །ཆུ་འབེབས་དང་ནི་མེ་ལོང་གདོང་། །གནག་ལྷས་སྐྱེས་དང་གཞོན་ནུ་དང་། །རྔ་དང་ཆུ་སྲེག་དྲང་སྲོང་བཅུ། །སྙིང་རྗེ་ཅན་གཉིས་སྐར་མ་དང་། །བརྒྱ་བྱིན་བྲམ་ཟེ་གར་མཁན་མེ། །ང་ལས་ནུ་དང་ཀླུ་ཡི་རྒྱལ། །སེང་གེ་ཁྱེའུ་སྤྲིན་དང་
བཅུ། །འོད་ལྡན་བྲམ་ཟེ་རྒྱན་པོ་པ། །དེས་པ་དང་ནི་གླང་པོ་ཆེ། །འཆར་ཀ་ནོར་ཅན་ཟླ་དགའ་དང་། །ནམ་མཁའ་དཔལ་གྱི་སྡེ་དང་བཅུ། །སྙིང་སྟོབས་ཆེན་པོ་ཟླ་འོད་དང་། །ཤི་བི་བྲམ་ཟེ་རྟག་ཏུ་བརྙས། །སེང་གེ་དེད་དཔོན་ནོར་བཟང་དང་། །སུ་ཤ་དྷེ་བ་བསོད་ནམས་སྟོབས། །འོད་བཟང་དྲང་སྲོང་ཏོག་གི་བློ། །སྔོ་བསངས་དང་ནི་ཉི་འཕྲེང་སྤོང་། །རྔ་བོང་མུ་ཁྱུད་ཨུཏྤ་ལ། །བྱང་ཆུབ་སེམས་དཔའ་གཉིས་ཏེ་བཅུ། །འཕོ་དང་ལྷུམས་ཞུགས་བལྟམས་པ་དང་། །བཟོ་དང་རོལ་རྩེད་ངེས་འབྱུང་དང་། །དཀའ་སྤྱད་དྲུང་གཤེགས་བདུད་སྡེ་བཅོམ། །བྱང་ཆུབ་ཆོས་འཁོར་མྱ་ངན་འདས། །མཛད་པའི་ཡོན་ཏན་མཐར་ཕྱིན་པའི། །རྒྱལ་བ་ཁྱོད་ལ་ཕྱག་འཚལ་ལོ། །བདག་ཀྱང་ཁྱོད་ལྟར་གཞན་དོན་དུ། །མཛད་པའི་ཡོན་ཏན་མཐར་ཕྱིན་ཤོག །དམ་པ་ཏོག་དཀར་འོད་སྲུངས་རྒྱལ་ཚབ་མཛད། །ལྷ་རྣམས་སྨིན་གཟིགས་བྱམས་པར་ཅོད་པན་བཅིངས། །སྣང་
བའི་ཆོས་སྒོ་བརྒྱ་རྩ་བསྟན་ནས་ནི། །འཛམ་གླིང་གཤེགས་པར་དགོངས་ལ་གུས་ཕྱག་འཚལ། །རྩོད་པའི་དུས་དང་རྒྱལ་རིགས་གཽ་ཏམ་གདུང་། །ཡབ་དང་ཡུམ་སྟེ་རྣམ་པ་ལྔ་ལ་གཟིགས། །གླང་ཆེན་ཐལ་དཀར་རྣམ་པས་དགའ་ལྡན་ནས། །ཡུམ་གྱི་ལྷུམས་ཞུགས་བདེ་བར་མཛད་དེར་འདུད། །ལྷུམས་སུ་འགྲོ་བ་དཔག་མེད་འདུལ་མཛད་ནས། །དབོ་ཟླའི་ཚེས་བརྒྱད་རྒྱལ་དང་ལྡན་པ་ལ། །ལུམྦིའི་ཚལ་དུ་དཀུ་གཡས་བརྟོལ་ཏེ་བལྟམས། །ལྷ་དང་ཀླུས་མཆོད་གོམ་བདུན་བོར་ལ་འདུད། །སྔོན་མེད་རྩིས་དང་ཡི་གེ་རྒྱ་ཆེན་བསྟན། །འདེགས་དང་འཛིང་སྟབས་གཅོད་དང་འཕང་བ་དང་། །སྒྱུ་རྩལ་ཟླ་མེད་ཕུལ་བྱུང་བསྟན་པ་ཡིས། །ང་རྒྱལ་ཅན་རྣམས་དུལ་བར་མཛད་དེར་འདུད། །སྔོན་ཚེ་སྨོན་ལམ་བཏབ་པའི་བུད་མེད་མཆོག །གྲགས་འཛིན་ས་འཚོ་རི་དྭགས་སྐྱེས་ལ་སོགས། །བརྒྱད་ཁྲི་བཙུན་མོར་བསྡུ་བས་སྨིན་མཛད་ནས། །བྱང་ཆུབ་
མཆོག་གི་ལམ་ལ་བཀོད་དེར་འདུད། །རྒ་ན་ཤི་དང་སྤྲུལ་པའི་དགེ་སློང་གཟིགས། །སྐྱོ་བའི་ཚུལ་གྱིས་ནམ་མཁའི་ལམ་ལ་གཤེགས། །གཙུག་ཕུད་ཉིད་ཀྱིས་དོར་ཏེ་ངུར་སྨྲིག་མནབས། །ཁྱིམ་ལས་རབ་ཏུ་བྱུང་ལ་གུས་ཕྱག་འཚལ། །དཀའ་ཐུབ་ཙམ་གྱིས་གྲོལ་འཛིན་དགག་པའི་ཕྱིར། །ཆུ་ཀླུང་ནཻ་རཉྫ་ནའི་འགྲམ་བཞུགས་ནས། །ལོ་དྲུག་བར་དུ་དཀའ་བ་ཕུལ་བྱུང་སྤྱད། །མཁའ་ཁྱབ་ཏིང་འཛིན་མཛད་ལ་གུས་ཕྱག་འཚལ། །ལུས་ངག་དཀའ་ཐུབ་སྙིང་པོ་མེད་གཟིགས་ནས། །བཞེངས་ཏེ་བདུད་རྩི་ལྟ་བུའི་འོ་ཐུག་བཞེས། །ཕྱག་དར་ཁྲོད་པའི་གོས་དང་རྩྭ་ཡི་སྟན། །བསྣམས་ནས་བྱང་ཆུབ་ཤིང་དྲུང་བཞུགས་དེར་འདུད། །འོད་ཟེར་བཀྱེ་བས་བདུད་ཀྱི་བདག་པོ་སྤྲན། །བདུད་དམག་མི་འཁྲུག་ཕྲག་གཅིག་བྱམས་པས་བཏུལ། །ས་ལྷས་འགྲོ་ཀུན་དཔང་པོ་ཁྱོད་ཅེས་གསོལ། །སྡིག་ཅན་ཕམ་པར་མཛད་ལ་གུས་ཕྱག་འཚལ། །སྤྱན་དང་མངོན་པར་ཤེས་པ་སྔོན་
དུ་མཛད། །བདེན་པ་བཞི་དང་རྟེན་འབྲེལ་མཁྱེན་ནས་ནི། །སྐད་ཅིག་ཤེས་པས་མངོན་པར་རྫོགས་པ་ཡི། །བྱང་ཆུབ་ཟླ་མེད་བརྙེས་ལ་གུས་ཕྱག་འཚལ། །ཚངས་པས་གསོལ་བཏབ་ཉན་ཐོས་ཐེག་ཆེན་དང་། །ཐེག་པ་ཀུན་ལ་ཞུགས་པའི་རྒྱལ་སྲས་ཆེ། །རིགས་གསུམ་ལ་དགོངས་ཆོས་ཀྱི་འཁོར་ལོ་ནི། །སྔོན་མེད་ལན་གསུམ་བསྐོར་ལ་གུས་ཕྱག་འཚལ། །རྒྱལ་བས་གདུལ་བའི་བྱ་བ་ཀུན་རྫོགས་ནས། །སཱ་ལའི་ཚལ་དུ་མཐའ་མའི་གཟིམས་ཁྲི་ལ། །རྟག་འཛིན་བཟློག་ཕྱིར་མྱ་ངན་འདའ་བར་བསྟན། །སྐུ་གདུང་རིང་བསྲེལ་རྒྱས་ལ་གུས་ཕྱག་འཚལ། །དེ་ལྟར་ཁྱོད་ཀྱི་མཛད་པ་བཅུ་གཉིས་ལ། །ཅུང་ཟད་བསྟོད་པས་རྒྱལ་དང་རྒྱལ་སྲས་ཀྱི། །ཕྲིན་ལས་མ་ལུས་བདག་གིས་སྒྲུབ་པ་ཡིས། །འགྲོ་ཀུན་ཁྱོད་ཀྱི་གོ་འཕང་ལ་འགོད་ཤོག །ཅེས་གཙུག་ལག་ཕྲེང་བས་སོ། །མོས་པ་དུ་མའི་སེམས་ཅན་རྣམས། །བདེ་འགྲོ་མཐོ་རིས་འགྲོ་བ་ཡི། །གྲོང་
ཁྱེར་གྱི་ནི་ལམ་གྱི་མཆོག །བྱང་ཆུབ་སེམས་ལ་ཕྱག་འཚལ་ལོ། །མོས་པ་དུ་མའི་སེམས་ཅན་གྱི། །དྲིན་ལ་བསམས་ནས་འཇིག་རྟེན་ན། །ཞི་བའི་ཆོས་རབ་སྟོན་བཞེད་པ། །མི་མཆོག་ཁྱོད་ལ་ཕྱག་འཚལ་ལོ། །ལྷ་ལས་བབས་ནས་ཤཱཀྱའི་རིགས། །ཡོན་ཏན་ཀུན་ལྡན་ཟས་གཙང་གི །ལྷ་མོ་སྒྱུ་འཕྲུལ་དམ་པ་ཡི། །ལྷུམས་སུ་གླང་པོའི་ཚུལ་དུ་ཞུགས། །ཚུལ་མཛེས་ཁྱོད་ལ་ཕྱག་འཚལ་ལོ། །ཟླ་བ་བཅུ་ལོན་སེར་སྐྱའི་གནས། །གྲོང་ཁྱེར་དཔལ་གྱིས་གང་བཞིན་དུ། །ལུམྦི་ནི་ཡི་དགའ་ཚལ་ན། །དགེ་བའི་སྙིང་པོ་ཁྱོད་ཀྱི་སྐུ། །ལེགས་བལྟམས་ཁྱོད་ལ་ཕྱག་འཚལ་ལོ། །བལྟམས་ནས་གོམ་པ་བདུན་བོར་ཏེ། །འཇིག་རྟེན་གསུམ་གྱི་མཆོད་འོས་པས། །བདུད་ཀྱི་རྙི་ལས་འཁོར་བ་པ། །ངེས་པར་ཐར་བར་བྱའོ་ཞེས། །ལེགས་གསུང་ཁྱོད་ལ་ཕྱག་འཚལ་ལོ། །གཞལ་ཡས་ཁང་དུ་གུས་པ་ཡི། །ཟས་མཆོག་ཀུན་གྱིས་བསྙེན་བཀུར་ཏེ། །མ་མ་བརྒྱད་ཀྱིས་ཡང་
དག་མཆོད། །མཆོད་འོས་ཁྱོད་ལ་ཕྱག་འཚལ་ལོ། །གང་ཚེ་ཞིང་པའི་གྲོང་བལྟ་བར། །ཛམྦུའི་གྲིབ་མ་བསྟེན་པ་ན། །ཁྱོད་ཀྱི་སྐུ་ལས་ཛམྦུ་ཡི། །གྲིབ་མ་ཡོལ་བ་མེད་མཐོང་བ། །དེ་ཚེ་ལྷ་ཡིས་ཕྱག་བྱས་པ། །ཕྱག་འོས་ཁྱོད་ལ་ཕྱག་འཚལ་ལོ། །རིགས་དང་སྟོབས་ཀྱི་ང་རྒྱལ་ཅན། །ལྷས་བྱིན་དགའ་བོ་ཤཱཀྱ ་གཞན། །སྒྱུ་རྩལ་ཕ་རོལ་གནོན་པ་ཡི། །ཐུབ་པ་ཁྱོད་ལ་ཕྱག་འཚལ་ལོ། །འཁོར་བའི་རང་བཞིན་མཁྱེན་བཞིན་དུ། །ཡབ་ཀྱི་རེ་བ་རྫོགས་པའི་སླད། །གླུ་གར་པི་ཝང་རོལ་མོ་སྒྲས། །བཙུན་མོའི་འཁོར་གྱིས་མཆོད་པ་ཐོབ། །ཐབས་མཁས་ཁྱོད་ལ་ཕྱག་འཚལ་ལོ། །གྲོང་ཁྱེར་མཛེས་པ་བལྟ་བའི་སླད། །ཡབ་ཀྱི་ཚིག་གིས་འགྲོ་བ་དེས། །ན་རྒ་འཆི་བའི་སྡུག་བསྔལ་མཐའ། །འདུན་པ་ལས་ཐོས་སླར་ལྡོག་སྟེ། །ངེས་ནི་འཁོར་བའི་སྡུག་བསྔལ་འདི། །ངེས་པར་ཐར་བར་བྱའོ་སྙམ། །ངེས་འབྱུང་ཁྱོད་ལ་ཕྱག་འཚལ་ལོ། །མཁའ་ལས་
དཀའ་ཐུབ་ནགས་སོང་སྟེ། །འདུན་པ་ཉེ་དུའི་སྐྱེ་བོ་བཏང་། །ནགས་ཚལ་རི་དྭགས་ཁྱུ་ནང་དུ། །ཉོན་མོངས་མི་བཟོད་ཁྱོད་སླར་ལྡོག །བསྐལ་པ་བྱེ་བར་འབད་པ་གང་། །ལུས་འདིས་སྙིང་པོ་མ་ལོན་པར། །གྲོང་ཁྱེར་དུ་ནི་ང་མི་འོང་། །ངེས་བྱས་ཁྱོད་ལ་ཕྱག་འཚལ་ལོ། །ངེས་པ་འདི་ལས་མི་འདའ་བ། །འདུན་པས་ཤེས་ནས་གྲོང་ཁྱེར་སོང་། །རྒྱལ་སྲས་བསེ་རུ་ལྟ་བུ་དེ། །གཙུག་ཕུད་རང་ཉིད་ཀྱིས་བླངས་ཏེ། །སྐྱེ་བོ་ལས་ལ་ཡིད་ཆེས་སླད། །ཆུ་ཀླུང་ནཻ་རཉྫ་ནའི་ངོགས། །ལོ་དྲུག་ཚང་པར་དཀའ་བ་སྤྱད། །དཀའ་ཐུབ་མཐར་ཕྱིན་ཕྱག་འཚལ་ལོ། །དཀའ་ཐུབ་གདུང་བས་ལུས་ཉམ་ཆུང་། །བྱང་ཆུབ་སེམས་དཔའ་ཆུ་ཀླུང་དུ། །དག་པར་འདོད་པ་དེ་མཐོང་ནས། །ལྷ་མོས་ལྗོན་པའི་ཡན་ལག་བཏུད། །ཁྲུས་བྱས་ཁྱོད་ལ་ཕྱག་འཚལ་ལོ། །བ་ཡི་འོ་མའི་སྙིང་པོ་གསོལ། །སྐུ་ལུས་གསེར་གྱི་མདོག་འདྲ་བ། །འོད་ཀྱིས་ཀུན་འཁོར་སྣང་བ་ནི། །ལྷ་ཡི་གནས་ཀུན་
སྣང་བྱས་པ། །འགྲོ་བའི་མར་མེ་ཕྱག་འཚལ་ལོ། །བྱང་ཆུབ་སེམས་དཔའ་མཁས་པ་དེ། །ངང་པའི་གོམས་པས་འགྲོ་བ་ན། །ས་གཞི་འཁར་བའི་སྣོད་བཞིན་དུ། །སྒྲ་དང་ལྡན་པ་དེ་ཐོས་ནས། །ནག་པོ་བྱ་བ་ཀླུ་ལོང་བ། །སངས་རྒྱས་བྱུང་དུས་མིག་ཐོབ་པ། །བྱང་ཆུབ་སེམས་དཔའ་དེ་ལ་འདུད། །ཙ་ཤའི་ཁྱུ་ཡིས་སྙན་སྒྲོག་ཅིང་། །མཁའ་ལས་གཡས་སྐོར་བསྐོར་བ་བྱས། །དགེ་བའི་ལྟས་ནི་མངོན་མཐོང་བ། །བྱང་ཆུབ་སྙིང་པོར་སྡོད་པའི་ལྷས། །ཕྱག་བྱས་ཁྱོད་ལ་ཕྱག་འཚལ་ལོ། །བྱང་ཆུབ་ཤིང་དྲུང་རྡོ་བའི་གཞིར། །དཱུར་ཝ་སྔོ་བསངས་འཇམ་པའི་རྩྭ། །བྱང་ཆུབ་སེམས་དཔའི་འདོད་པ་བཞིན། །རྩེ་མོ་གཡས་བསྟན་ལྷུང་བར་གྱུར། །རྩྭ་ཡི་མལ་སྟན་ལ་འདུག་སྟེ། །དྲན་པ་མངོན་དུ་གཞག་བྱས་ནས། །མི་གཡོ་གསེར་གྱི་ལྷུན་པོ་བཞིན། །ནམ་མཁའི་གོ་སྐབས་འགོག་བྱེད་པ། །མི་འཁྲུགས་ཕྲག་གཅིག་དཔུང་གི་ཚོགས། །བདུད་ཀྱི་མིག་རས་
བཙའ་བཞིན་དུ། །སྐད་ཅིག་གཅིག་གིས་ཏིང་འཛིན་གྱིས། །ཐོ་རངས་མངོན་པར་བྱང་ཆུབ་པ། །དཔའ་པོ་གཅིག་པུ་གཡུལ་ངོ་ལས། །རྒྱལ་བ་ཁྱོད་ལ་ཕྱག་འཚལ་ལོ། །མི་མཆོག་བཏང་སྙོམས་འདུག་རིག་ནས། །འཇིག་རྟེན་མཆོད་པའི་གནས་ཐོབ་པ། །ཚངས་པས་ཆོས་འཁོར་བསྐོར་བར་བསྐུལ། །འཇིག་རྟེན་ཀུན་ལས་ཁྱད་པར་དུ། །འཕགས་པའི་ཆོས་རབ་བསྟན་པ་ཡང་། །སེམས་ཅན་མོས་པ་ཐ་དད་ཕྱིར། །ཐེག་པ་གསུམ་གྱི་ཐབས་ཚུལ་ཡང་། །ཐེག་པ་མཆོག་གི་ངེས་པ་བསྟན། །ཆོས་སྟོན་ཁྱོད་ལ་ཕྱག་འཚལ་ལོ། །འཁོར་བ་སྤྲེའུའི་ལུས་མཐའ་མ། །འདོར་བ་ལ་ནི་མངོན་ཕྱོགས་ཏེ། །མཆོད་པའི་ལག་བརྐྱང་སྦྲང་རྩི་ཕུལ། །དེ་ཡི་སྦྱིན་འབྲས་གཙང་བྱས་པ། །བསོད་ནམས་ཞིང་ཁྱོད་ཕྱག་འཚལ་ལོ། །ཝཱ་རཱ་ཎ་སཱི་རི་དྭགས་ནགས། །གཡའི་རི་དང་སྦོས་ངད་ལྡང་། །རྒྱལ་པོའི་ཁབ་དང་གངྒཱའི་ངོགས། །རི་བོ་འབིགས་བྱེད་མ་ལ་ཡ། །གངས་ཅན་རི་
བོ་རྡོ་བའི་ཕུག །གྲོང་ཁྱེར་ཡངས་པ་ཅན་དག་ཏུ། །ལྷ་མི་མང་པོའི་དོན་བྱས་ནས། །ལྷ་དང་བདུད་དང་ཚངས་པར་བཅས། །དགེ་སྦྱོང་བྲམ་ཟེ་ཁྱིམ་བདག་གིས། །ཕྱག་བྱས་དམ་པ་མཆོད་པའི་གནས། །ཆོས་ཀྱི་སྐུ་འདི་བཞག་བྱས་ནས། །གདུལ་བྱ་མཐའ་མ་གྱད་ཀྱི་ཡུལ། །རྩྭ་ཅན་གྲོང་གི་སཱ་ལ་ཟུང་། །མཐའ་མའི་གདན་ལ་བཞུགས་པའི་ཚེ། །ལྷ་མི་བྱེ་བ་གྲངས་མེད་ཀྱིས། །མེ་ཏོག་སྤོས་རབ་གདུགས་ཡངས་པ། །ཞིང་རྣམས་གང་བས་མཆོད་བཞིན་དུ། །སེང་གེའི་ཉལ་སྟབས་བཟང་པོ་ཡིས། །ཡོངས་སུ་མྱ་ངན་འདས་པར་གྱུར། །གཟུགས་ཀྱི་སྐུ་ཡི་ཞིང་འདི་ན། །མཛད་པ་ཐམས་ཅད་མཐར་ཕྱིན་པ། །མྱང་འདས་ཁྱོད་ལ་ཕྱག་འཚལ་ལོ། །ཁྱོད་ཀྱི་བྱང་ཆུབ་སྤྱོད་པ་དང་། །བྱང་ཆུབ་དམ་པ་འཚང་རྒྱ་བའི། །མཛད་པ་བླ་མེད་ཐམས་ཅད་ལ། །བདག་ནི་གུས་པས་ཕྱག་བགྱིའོ། །བཅོམ་ལྡན་མཛད་པ་འདིར་བརྗོད་པ། །འཇིག་རྟེན་སྨྲ་བ་
ཐམས་ཅད་ཀུན། །ཀུན་ནས་སངས་རྒྱས་བསྔགས་པ་ཡི། །ཕྱག་འོས་ཕྱག་འཚལ་བསྟོད་པས་བསྟོད། །དེ་ཡིས་འགྲོ་བ་མ་ལུས་པ། །བླ་མེད་བྱང་ཆུབ་མྱུར་ཐོབ་ཤོག །ཇི་ཞིག་ན། འཇིག་རྟེན་རྣམ་པར་འདྲེན་པ་རང་ཡུལ་དུ་འོངས་ནས་མེ་ཏོག་ཨུཏྤལ་སྔོན་པོའི་ཚལ་ན་འདུག་ཅིང་། །སྔ་དྲོ་ཆུ་ཀླུང་གི་ངོགས་སུ་ཟན་ཟོས་ཏེ་བསེ་རུ་ལྟ་བུར་གཅིག་པུར་ངང་པའི་གོམ་པས་འགྲོ་བ་དེའི་ཚེ། སྔོན་རིམ་གྲོ་པ་ཀུན་ཏུ་བཟང་པོས་སྨྲས་པ། མེ་ཏོག་ལྟ་བུའི་སྙན་ངག་གིས་བདེ་བར་གཤེགས་པའི་མཛད་པའི་ཚུལ་ལ་བསྟོད་ཅིང་རི་མོར་བྲིས་པ་ཡང་བྱོས་ཞེས་བསྐུལ་བ་ཡིད་ལ་དྲན་ནས། མཛད་པ་བཅུ་གཉིས་ལ་བསྟོད་ཕྱག་ཀུན་ཏུ་བཟང་པོའི་དགའ་སྟོན་འདི་སྦྱར་བའོ། །ཐབས་མཁས་ཐུགས་རྗེས་ཤཱཀྱའི་རིགས་སུ་འཁྲུངས། །གཞན་གྱིས་མི་ཐུབ་བདུད་ཀྱི་དཔུང་འཇོམས་པ། །གསེར་གྱི་ལྷུན་པོ་ལྟ་བུར་བརྗིད་པའི་སྐུ། །ཤཱཀྱའི་རྒྱལ་པོ་ཁྱོད་ལ་ཕྱག་འཚལ་ལོ། །གང་གིས་དང་པོར་བྱང་ཆུབ་ཐུགས་བསྐྱེད་ནས། །བསོད་ནམས་ཡེ་ཤེས་ཚོགས་གཉིས་རྫོགས་མཛད་ཅིང་། །དུས་འདིར་མཛད་པ་རྒྱ་ཆེན་འགྲོ་བ་ཡི། །མགོན་གྱུར་
ཁྱོད་ལ་བདག་གིས་བསྟོད་པར་བགྱི། །ལྷ་རྣམས་དོན་མཛད་འདུལ་བའི་དུས་མཁྱེན་ནས། །ལྷ་ལས་བབས་ནས་གླང་ཆེན་ལྟར་གཤེགས་ཤིང་། །རིགས་ལ་གཟིགས་ནས་ལྷ་མོ་སྒྱུ་འཕྲུལ་གྱི། །ལྷུམས་སུ་ཞུགས་པར་མཛད་ལ་ཕྱག་འཚལ་ལོ། །ཟླ་བ་བཅུ་རྫོགས་ཤཱཀྱའི་སྲས་པོ་ནི། །བཀྲ་ཤིས་ལུམྦིའི་ཚལ་དུ་བལྟམས་པའི་ཚེ། །ཚངས་དང་བརྒྱ་བྱིན་གྱིས་བསྟོད་མཚན་མཆོག་ནི། །བྱང་ཆུབ་རིགས་སུ་ངེས་མཛད་ཕྱག་འཚལ་ལོ། །གཞོན་ནུ་སྟོབས་ལྡན་མི་ཡི་སེང་གེ་དེས། །ཨཾ་ག་མ་ག་དྷར་ནི་སྒྱུ་རྩལ་བསྟན། །སྐྱེ་བོ་དྲེགས་པ་ཅན་རྣམས་ཚར་བཅད་ནས། །འགྲན་ཟླ་མེད་པར་མཛད་ལ་ཕྱག་འཚལ་ལོ། །འཇིག་རྟེན་ཆོས་དང་མཐུན་པར་བྱ་བ་དང་། །ཁ་ན་མ་ཐོ་སྤང་ཕྱིར་བཙུན་མོ་ཡི། །འཁོར་དང་ལྡན་མཛད་ཐབས་ལ་མཁས་པ་ཡིས། །རྒྱལ་སྲིད་སྐྱོང་བར་མཛད་ལ་ཕྱག་འཚལ་ལོ། །འཁོར་བའི་བྱ་བ་སྙིང་པོ་མེད་གཟིགས་ནས། །ཁྱིམ་ནས་
བྱུང་སྟེ་མཁའ་ལ་གཤེགས་ནས་ཀྱང་། །མཆོད་རྟེན་རྣམ་དག་དྲུང་དུ་ཉིད་ལ་ཉིད། །རབ་ཏུ་བྱུང་བར་མཛད་ལ་ཕྱག་འཚལ་ལོ། །བརྩོན་པས་བྱང་ཆུབ་བསྒྲུབ་པར་དགོངས་ནས་ནི། །ནཻ་རཉྫ་ནའི་འགྲམ་དུ་ལོ་དྲུག་ཏུ། །དཀའ་བ་སྤྱད་མཛད་བརྩོན་འགྲུས་མཐར་ཕྱིན་པས། །བསམ་གཏན་མཆོག་བརྙེས་མཛད་ལ་ཕྱག་འཚལ་ལོ། །ཐོག་མ་མེད་ནས་འབད་པ་དོན་ཡོད་ཕྱིར། །མ་ག་དྷ་ཡི་བྱང་ཆུབ་ཤིང་དྲུང་དུ། །སྐྱིལ་ཀྲུང་མི་གཡོ་མངོན་པར་སངས་རྒྱས་ནས། །བྱང་ཆུབ་རྫོགས་པར་མཛད་ལ་ཕྱག་འཚལ་ལོ། །ཐུགས་རྗེས་འགྲོ་ལ་མྱུར་དུ་གཟིགས་ནས་ནི། །ཝཱ་རཱ་ཎ་སཱི་ལ་སོགས་གནས་མཆོག་ཏུ། །ཆོས་ཀྱི་འཁོར་ལོ་བསྐོར་ནས་གདུལ་བྱ་རྣམས། །ཐེག་པ་གསུམ་ལ་འགོད་མཛད་ཕྱག་འཚལ་ལོ། །གཞན་གྱི་རྒོལ་བ་ངན་པ་ཚར་གཅད་ཕྱིར། །མུ་སྟེགས་སྟོན་པ་དྲུག་དང་ལྷ་སྦྱིན་སོགས། །འཁོར་མོ་འཇིག་གི་ཡུལ་དུ་བདུད་རྣམས་བཏུལ། །ཐུབ་པ་གཡུལ་
ལས་རྒྱལ་ལ་ཕྱག་འཚལ་ལོ། །སྲིད་པ་གསུམ་ན་དཔེ་མེད་ཡོན་ཏན་གྱིས། །མཉན་དུ་ཡོད་པར་ཆོ་འཕྲུལ་ཆེན་པོ་བསྟན། །ལྷ་མི་འགྲོ་བ་ཀུན་གྱིས་རབ་མཆོད་པ། །བསྟན་པ་རྒྱས་པར་མཛད་ལ་ཕྱག་འཚལ་ལོ། །ལེ་ལོ་ཅན་རྣམས་མྱུར་དུ་བསྐུལ་བྱའི་ཕྱིར། །རྩྭ་མཆོག་གྲོང་གི་ས་གཞི་གཙང་མ་རུ། །འཆི་མེད་རྡོ་རྗེ་ལྟ་བུའི་སྐུ་གཤེགས་ནས། །མྱ་ངན་འདའ་བར་མཛད་ལ་ཕྱག་འཚལ་ལོ། །ཡང་དག་ཉིད་དུ་འཇིགས་པ་མེད་ཕྱིར་དང་། །མ་འོངས་སེམས་ཅན་བསོད་ནམས་ཐོབ་བྱའི་ཕྱིར། །དེ་ཉིད་དུ་ནི་རིང་བསྲེལ་མང་སྤྲུལ་ནས། །སྐུ་གདུང་ཆ་བརྒྱད་མཛད་ལ་ཕྱག་འཚལ་ལོ། །ཞེས་པ་འདིའི་ཐོག་མའི་ཤློ་ཀ་གཅིག་པུ་རྗེ་འབྲི་ཁུང་པས་མཛད་པར་གྲགས་ཤིང་དེ་ཕྱིན་སློབ་དཔོན་ཀླུ་སྒྲུབ་ཀྱིས་མཛད་པའོ། །གང་ཚེ་རྐང་གཉིས་གཙོ་བོ་ཁྱོད་བལྟམས་ཚེ། །ས་ཆེན་འདི་ལ་གོམ་པ་བདུན་བོར་ནས། །ང་ནི་འཇིག་རྟེན་འདི་ན་མཆོག་ཅེས་གསུངས། །དེ་ཚེ་མཁས་པ་ཁྱོད་ལ་ཕྱག་འཚལ་
ལོ། །དང་པོར་དགའ་ལྡན་ལྷ་ཡི་ཡུལ་ནས་བྱོན། །རྒྱལ་པོའི་ཁབ་ཏུ་ཡུམ་གྱི་ལྷུམས་སུ་ཞུགས། །ལུམྦི་ནི་ཡི་ཚལ་དུ་ཐུབ་པ་བལྟམས། །བཅོམ་ལྡན་ལྷ་ཡི་ལྷ་ལ་ཕྱག་འཚལ་ལོ། །གཞལ་ཡས་ཁང་དུ་མ་མ་བརྒྱད་ཀྱིས་མཆོད། །ཤཱཀྱའི་དྲུང་དུ་གཞོན་ནུས་རོལ་རྩེད་མཛད། །སེར་སྐྱའི་གནས་སུ་ས་འཚོ་ཁབ་ཏུ་བཞེས། །སྲིད་གསུམ་མཚུངས་མེད་སྐུ་ལ་ཕྱག་འཚལ་ལོ། །གྲོང་ཁྱེར་སྒོ་བཞིར་སྐྱོ་བའི་ཚུལ་བསྟན་ནས། །མཆོད་རྟེན་རྣམ་དག་དྲུང་དུ་དབུ་སྐྲ་གསིལ། །ནཻ་རཉྫ་ནའི་འགྲམ་དུ་དཀའ་ཐུབ་མཛད། །སྒྲིབ་གཉིས་སྐྱོན་དང་བྲལ་ལ་ཕྱག་འཚལ་ལོ། །རྒྱལ་པོའི་ཁབ་ཏུ་གླང་ཆེན་སྨྱོན་པ་བཏུལ། །ཡངས་པ་ཅན་དུ་སྤྲེའུས་སྦྲང་རྩི་ཕུལ། །མ་ག་དྷ་རུ་ཐུབ་པ་མངོན་སངས་རྒྱས། །མཁྱེན་པའི་ཡེ་ཤེས་འབར་ལ་ཕྱག་འཚལ་ལོ། །ཝཱ་རཱ་ཎ་སཱི་ཆོས་ཀྱི་འཁོར་ལོ་བསྐོར། །ཛེ་ཏའི་ཚལ་དུ་ཆོ་འཕྲུལ་ཆེན་པོ་བསྟན། །རྩྭ་མཆོག་གྲོང་དུ་དགོངས་པ་མྱ་ངན་འདས། །ཐུགས་ནི་
ནམ་མཁའ་འདྲ་ལ་ཕྱག་འཚལ་ལོ། །འདི་ལྟར་བསྟན་པའི་བདག་པོ་བཅོམ་ལྡན་གྱི། །མཛད་པའི་ཚུལ་ལ་མདོ་ཙམ་བསྟོད་པ་ཡི། །དགེ་བས་འགྲོ་བ་ཀུན་གྱི་སྤྱོད་པ་ཡང་། །བདེ་གཤེགས་ཁྱོད་ཀྱི་མཛད་དང་མཚུངས་པར་ཤོག །དེ་བཞིན་གཤེགས་པ་ཁྱེད་སྐུ་སོགས། སྟོན་པ་འཇིག་རྟེན་ སོགས། ཆོ་འཕྲུལ་གྱི་བསྟོད་པ་ནི། དང་པོར་བྱང་ཆུབ་མཆོག་ཏུ་སེམས་བསྐྱེད་ནས། །བསྐལ་པ་གྲངས་མེད་གསུམ་དུ་ཚོགས་བསགས་ཤིང་། །བར་དུ་གཅོད་པའི་བདུད་བཞི་འཇོམས་མཛད་པ། །བཅོམ་ལྡན་སེང་གེ་དེ་ལ་ཕྱག་འཚལ་ལོ། །རྩོད་པའི་དུས་མཛད་ཐུབ་པའི་དབང་པོ་ཡི། །རྒྱལ་པོའི་ཁབ་ནས་ཡངས་ཅན་ཀཽ་ཤཱམ་བཱི། །ཝར་ཁྱིམ་དང་ནི་ཐེག་ཆེན་ཤྲི་རི་དང་། །མཉན་ཡོད་གནས་སུ་རིམ་པར་གཤེགས་ལ་འདུད། །མཉན་ཡོད་གནས་སུ་སྟོན་པར་མུ་སྟེགས་ཀྱི། །སྟོན་པ་དྲུག་གིས་ཆོ་འཕྲུལ་འགྲན་པའི་ཚེ། །སྐྱེ་བོ་དུ་མ་ཚོགས་པའི་མངོན་སུམ་དུ། །རྨད་བྱུང་ཆོ་
འཕྲུལ་སྟོན་ལ་ཕྱག་འཚལ་ལོ། །ཚེས་གཅིག་གསལ་རྒྱལ་གྱིས་ནི་མཆོད་པའི་ཚེ། །ཚེམས་ཤིང་ས་ལ་བཙུགས་པས་ལྗོན་ཤིང་སྐྱེས། །དཔག་ཚད་ལྔ་བརྒྱར་ཁྱབ་པའི་ལོ་འདབ་རྒྱས། །དྲི་རོས་སྐྱེ་བོ་ཚིམ་ལ་ཕྱག་འཚལ་ལོ། །ཚེས་གཉིས་ཨུ་དྲཱ་ཡ་ཎས་མཆོད་པའི་ཚེ། །ཞལ་བསིལ་ཆུ་ལས་རིན་ཆེན་རྫིང་བུར་སྤྲུལ། ཁ་དོག་སྣ་ཚོགས་པདྨའི་འོད་ཟེར་གྱི། །དྲི་ཡིས་ཚིམ་པར་མཛད་ལ་ཕྱག་འཚལ་ལོ། །ཚེས་གསུམ་ཤུན་ཙ་དྷ་ནས་མཆོད་པའི་ཚེ། །གཡས་གཡོན་གཉིས་སུ་རིན་ཆེན་རི་གཉིས་སྤྲུལ། །རི་རྩེ་ལས་སྐྱེས་འབྲས་དང་རྩྭ་ལ་སོགས། །མི་དང་དུད་འགྲོ་ཚིམ་ལ་ཕྱག་འཚལ་ལོ། །ཚེས་བཞི་ཨིནྡྲ་བྷྲ་མས་མཆོད་པའི་ཚེ། །ཕྱོགས་བཞིར་ཡུར་བ་བརྒྱད་ལྡན་རྫིང་བུར་སྤྲུལ། །ཆུ་ཡི་སྒྲ་ལས་ཚད་མེད་བཞི་ལ་སོགས། །ཆོས་ཀྱི་སྒྲ་སྙན་བྱུང་ལ་ཕྱག་འཚལ་ལོ། །ཚེས་ལྔ་ཚངས་སྦྱིན་གྱིས་ནི་མཆོད་པའི་ཚེ། །ཞལ་གྱི་སྒོ་ནས་འོད་ཟེར་སྣ་ཚོགས་ཀྱི། །འོད་དེས་
རེག་པའི་སེམས་ཅན་ཐམས་ཅད་ཀྱི། །ལུས་སེམས་བདེ་བས་ཁྱབ་ལ་ཕྱག་འཚལ་ལོ། །ཚེས་དྲུག་ལིང་ཙ་རྣམས་ཀྱིས་མཆོད་པའི་ཚེ། །སྟོན་པའི་མཐུ་ཡིས་འཁོར་གྱི་སེམས་ཅན་རྣམས། །རབ་ཏུ་དགྱེས་ཤིང་སོ་སོར་སྨོན་ལམ་འདེབས། །སྟོན་པའི་ཡོན་ཏན་བརྗོད་ལ་ཕྱག་འཚལ་ལོ། །ཚེས་བདུན་ཤཱཀྱ་རྣམས་ཀྱིས་མཆོད་པའི་ཚེ། །སྟོན་པའི་མཐུ་ཡིས་འཁོར་གྱི་སེམས་ཅན་རྣམས། །རྒྱལ་པོར་གྱུར་ཅིང་རིན་ཆེན་སྣ་བདུན་ལྡན། །ཀུན་ཀྱང་སྤྲོ་བ་སྐྱེད་ལ་ཕྱག་འཚལ་ལོ། །ཚེས་བརྒྱད་བརྒྱ་བྱིན་གྱིས་ནི་མཆོད་པའི་ཚེ། །སེང་གེའི་ཁྲི་ལ་གླང་ཆེན་སྒྲ་སྐད་བཏོན། །སྲིན་པོ་ལྔ་དང་ཕྱག་ན་རྡོ་རྗེར་སྤྲུལ། །མུ་སྟེགས་སྐྲག་མཛད་ཁྱོད་ལ་ཕྱག་འཚལ་ལོ། །སླར་སྐུ་ཆེ་བའི་ཆོ་འཕྲུལ་བསྟན་པ་ནི། ཚེས་དགུ་ཚངས་པའི་རྒྱལ་པོས་མཆོད་པའི་ཚེ། །ཚངས་པའི་བར་དུ་ཁྱབ་པའི་སྐུ་སྤྲུལ་ནས། །སྐུ་ལས་འོད་ཟེར་ཆེན་པོ་བྱུང་གྱུར་པ། །ཀུན་གྱིས་མཐོང་བར་མཛད་ལ་
ཕྱག་འཚལ་ལོ། །ཚེས་བཅུ་རྒྱལ་ཆེན་བཞི་ཡིས་མཆོད་པའི་ཚེ། །སྲིད་རྩེའི་བར་དུ་ཁྱབ་པའི་སྐུར་སྤྲུལ་ནས། །སྐུ་ལས་འོད་ཟེར་སྣ་ཚོགས་བྱུང་གྱུར་པ། །ཀུན་གྱིས་མཐོང་ཞིང་གསུང་ཐོས་ཕྱག་འཚལ་ལོ། །བཅུ་གཅིག་མགོན་མེད་ཟས་སྦྱིན་གྱིས་མཆོད་ཚེ། །སྟོན་པ་སེང་གེའི་ཁྲི་ལ་བཞུགས་བཞིན་དུ། །སྐུ་ནི་མི་སྣང་འོད་ཀྱི་ཕུང་པོར་གྱུར། །གསུང་གིས་ཆོས་སྟོན་མཛད་ལ་ཕྱག་འཚལ་ལོ། །བཅུ་གཉིས་ཁྱིམ་བདག་ཙེ་རས་མཆོད་པའི་ཚེ། །སྐུ་ཡི་འོད་ཀྱིས་སྟོང་གསུམ་བར་དུ་ཁྱབ། །པདྨའི་གདན་ལ་སངས་རྒྱས་བཞུགས་པར་སྤྲུལ། །ཀུན་ཀྱང་དེ་འདྲར་སྤྲུལ་ལ་ཕྱག་འཚལ་ལོ། །བཅུ་གསུམ་རྒྱལ་པོ་ཤུན་ཙས་མཆོད་པའི་ཚེ། །ལྟེ་བའི་འོད་ཀྱིས་སྟོང་གསུམ་བར་དུ་ཁྱབ། །འོད་དེས་རེག་ཚད་སྒྲིབ་པ་རྣམས་དང་བྲལ། །རྩི་སོགས་འབྲས་བུ་ཐོབ་ལ་ཕྱག་འཚལ་ལོ། །བཅུ་བཞི་རྒྱལ་པོ་ཨིན་དྲས་མཆོད་པའི་ཚེ། །རྒྱལ་པོས་གཏོར་བའི་མེ་ཏོག་ཐམས་ཅད་
ཀྱང་། །རིན་ཆེན་ཤིང་རྟའི་ཚོགས་ཀྱིས་སྟོང་གསུམ་ཁྱབ། །ཀུན་གྱིས་གསལ་བར་མཐོང་ལ་ཕྱག་འཚལ་ལོ། །བཅོ་ལྔ་གཟུགས་ཅན་སྙིང་པོས་མཆོད་པའི་ཚེ། །རོ་རྒྱ་ལྡན་པས་ཟས་ཀྱིས་སྣོད་བཀང་ནས། །ཕྱག་མཐིལ་ས་ལ་བརྡབས་པས་དམྱལ་བ་ཡི། །སེམས་ཅན་ཚད་མེད་བསྒྲལ་ལ་ཕྱག་འཚལ་ལོ། །མཚུངས་མེད་སྟོན་པའི་ཆོ་འཕྲུལ་སྣ་ཚོགས་ལ། །ཅུང་ཟད་ཙམ་ཞིག་བདག་གིས་བསྟོད་པ་ཡི། །དགེ་བས་འགྲོ་བ་སེམས་ཅན་ཐམས་ཅད་ཀྱིས། །ཆོ་འཕྲུལ་ཆེ་ལྡན་རྒྱལ་བའི་སྐུ་ཐོབ་ཤོག །པཎ་ཆེན་ཤཱཀཱ་ཤྲཱིས་སོ།། །།དེ་ནས་བྱང་འཕགས་ཀྱི་ཚུལ་བསྟན་པ་རྣམས་ལ་བསྟོད་ཕྱག་བྱེད་རིགས་པས་རེ་ཞིག་འཕགས་པ་འཇམ་དཔལ་ལ་བསྟོད་བ་ནི། རྒྱ་གར་སྐད་དུ། བྷ་ག་བཱ་ན་ཨཱརྱ ་མཉྫུ་ཤྲཱི་སཱ་དྷི་ཥྛ་ན་སྟུ་ཏི། བོད་སྐད་དུ། བཅོམ་ལྡན་འདས་འཕགས་པ་འཇམ་དཔལ་གྱི་བསྟོད་པ་བྱིན་རླབས་དང་བཅས་པ། །བཅོམ་ལྡན་འདས་འཇམ་པའི་དབྱངས་ལ་ཕྱག་འཚལ་ལོ། །འཇམ་དབྱངས་ཕྱོགས་
བཅུའི་དེ་བཞིན་གཤེགས་པ་བྱེ་བ་རྣམས་ཀྱིས་བསྟོད་པར་གྱུར་མོད་དེ་ལྟ་ནའང་། །བསམ་པ་བླུན་པོ་བླ་མ་ལ་གུས་དབང་གིས་ཀྱང་ནི་ཁྱོད་ཀྱི་ཡོན་ཏན་བསྟོད་བགྱི་སྟེ། །རབ་ཏུ་དྲེགས་བཅས་ངང་པའི་རྒྱལ་པོ་སྡེ་དག་གིས་བརྟེན་ཆུ་དང་བཅས་འདི་ཡིད་བཞིན་མཚོར། །བཞད་རྣམས་ཀྱང་ནི་ཡིད་ལ་རབ་ཏུ་དགའ་བ་བཞག་ནས་རྒྱུ་ཞིང་རྣམ་པར་གནས་པར་བགྱིད། །ཟུར་ཕུད་གསལ་ལྡན་གསེར་གྱི་སྙན་ཆ་གདུབ་ཀོར་གྱིས་བརྒྱན་མགུལ་ནི་རབ་ཏུ་སྒེག་བཅས་ཤིང་། །སྙན་གྱི་གོད་རྒྱན་ཨུཏྤལ་མངའ་སླད་ཁྱོད་ནི་གཞོན་ནུར་ཀུན་ལ་གྲགས་པ་དེ་ལྟ་ནའང་། །ཀུན་ཏུ་བཟང་པོ་འཇིག་རྟེན་དབང་ཕྱུག་རྡོ་རྗེ་འཛིན་པ་ལ་སོགས་རྔ་ཡབ་མཛེས་འཛིན་པའི། །མཁས་པ་རྣམས་ཀྱིས་བླ་མ་ལྟ་བུར་འཁོར་གྱི་ནང་དུ་ཁྱོད་ནི་བསྟན་པར་གྱུར་པ་ལགས། །དོ་ཤལ་ཕྲེང་བ་སིལ་སིལ་སྒྲོགས་ཤིང་མཆོག་ཏུ་ཉམས་དགའ་སྙན་གདུབ་མངའ་བ་སྤྱི་གཙུག་གི །རིན་ཆེན་འོད་
མཛེས་འཕྲོ་བ་དང་ལྡན་གཞོན་ནུ་ན་ཚོད་འབྱུང་བ་མངའ་བ་གང་ནའང་། །བཅོམ་ལྡན་ཁྱོད་ནི་གནས་གསུམ་དག་ན་གུས་པས་ཕྱག་བགྱིར་འོས་པ་གཅིག་པུ་ཉིད་ལགས་ཏེ། །ཉེར་ཞི་བཀོད་གྱུར་མཆོད་པ་འོས་འདི་གང་ནའང་དེ་སླད་སུ་ཞིག་ངོ་མཚར་སྐྱེ་མི་འགྱུར། །ཤིན་ཏུ་རྣམ་པར་འགྱུར་བའི་བཞིན་ལྡན་སྦྲུལ་སྟོང་དག་གིས་གདུ་བུར་བྱས་པ་འཛིན་མཛད་ཅིང་། །རྣོ་བའི་མཚོན་བསྣམས་གཡུལ་ངོར་དཔའ་བ་དང་ལྡན་གཤིན་རྗེ་རྣམས་ནི་འཇིགས་པར་མཛད་པ་ཡི། །མི་བཟད་པ་ཡི་འཕགས་པ་གཤིན་རྗེའི་གཤེད་དང་བཅས་ཀྱང་ཁྱོད་ནི་ཞི་བའི་དཀྱིལ་འཁོར་ཏེ། །ཆ་ཡིས་ཚོགས་ཀུན་ཡོངས་སུ་རྫོགས་པའི་ལུས་ལྡན་སྟོན་ཀའི་ཟླ་བ་ལྟ་བུར་གྱུར་པ་ལགས། །ཁྱོད་ནི་ཆོས་ལམ་ཉེ་བར་སྟོན་ལ་མཁས་ཀྱང་ཆོས་འདི་འགའ་ཡང་གཟིགས་པ་ཡོད་མ་ཡིན། །ཁྱོད་ནི་སེམས་ཅན་ཕན་ལ་དགྱེས་ཀྱང་སེམས་ཅན་ཉིད་ནི་འགའ་ཡང་དམིགས་པར་གྱུར་
མ་ལགས། །བདེ་གཤེགས་དགྱེས་པ་ཕན་ཚུན་མི་འགྲིག་པ་ཡི་མཛད་སྤྱོད་མང་པོ་འདི་དག་འགལ་བས་ན། །ཁྱོད་ནི་ས་གསུམ་ངོ་མཚར་རྒྱུ་གཅིག་གྱུར་པ་དེ་སླད་ཁྱོད་འདིར་མཉེས་པར་གྱུར་པ་ལགས། །གཞན་ཕན་འབྲས་བུར་ལྡན་པས་ཤིང་དང་མཚུངས་ཤིང་རྣམ་པར་གནས་པ་གངས་ཆེན་ལྟ་བུ་སྟེ། །བརྟན་པ་ཡིས་ནི་ལྷུན་པོ་དང་འདྲ་གྲུབ་པས་བསྟེན་པས་རི་རྒྱལ་མ་ལ་ཡ་དང་མཚུངས། །གཏི་མུག་རབ་རིབ་ཞི་བར་མཛད་པས་ཉི་མ་བཞིན་ཏེ་ཕུན་སུམ་ཚོགས་གཟུགས་ཟླ་བ་དང་འདྲ་བའི། །མགོན་པོ་གཞན་གྱི་བྱ་བ་མཛད་པ་བྱིས་པའི་རོལ་པ་མཛད་པས་འགྲོ་ན་རྣམ་པར་རྒྱུ། །མཆོག་ཏུ་དགྱེས་པའི་ཨུཏྤལ་སྔོན་པོ་བསྣམས་པས་དྲི་ཞིམ་གྱིས་གོས་མཚོ་བྲན་ལྟ་བུ་སྟེ། །ཤིན་ཏུ་རོལ་པའི་སྤྱོད་ཚུལ་དང་ལྡན་ཡུལ་གྱི་བྱིས་པ་ལོ་བརྒྱད་ལོན་པ་དང་འདྲ་ཞིང་། །ཆོས་ཀྱི་ཆར་པ་དྲི་མ་མེད་པ་འབེབས་པས་ཆར་སྤྲིན་དག་ཏུ་སྒྲ་སྒྲོགས་ལྟ་བུ་དང་། །ངང་པའི་རྒྱལ་པོ་
ཡིད་འོང་སྒྲ་སྐད་ཟིལ་མནན་གསུང་མངའ་ཁྱོད་ལ་སུ་ཞིག་རྟེན་མི་བྱེད། །སྐད་ཅིག་ཉིད་ལ་ཡོངས་སུ་འབར་ཞིང་རབ་རིབ་སྒྲིབ་གཡོགས་སྐད་ཅིག་ཉིད་ལ་ཟད་གྱུར་པ། །ཐམས་ཅད་དུ་ནི་ལེགས་པའི་ལམ་སྟོན་བདེ་གཤེགས་སྡིག་མེད་མྱ་ངན་འདས་པར་གྱུར་པ་ན། །གཞོན་ནུའི་ཚུལ་འཛིན་འོད་ཟེར་སྟོང་ཕྲག་འབར་བའི་རྒྱན་གྱིས་ལེགས་པར་སྤྲས་པར་གྱུར་པ་ཡི། །ཁྱོད་ཉིད་གཅིག་པུ་འབའ་ཞིག་ཕྱོགས་བཅུ་རྣམས་ན་ང་ལྟར་སྣང་བ་ཉིད་ནི་མ་ལགས་སམ། །མགོན་པོ་ཀྱེ་མ་ཁྱོད་གཟུགས་འདི་ན་རས་བྲིས་བྱས་པས་ཀྱང་ནི་ཇི་ལྟར་སིམ་བྱེད་པ། །སྟོན་ཀའི་མཚན་མོ་དཀར་ཞིང་རབ་ཏུ་མཛེས་པའི་ཟླ་བའི་དཀྱིལ་འཁོར་མ་ལགས་ཏེ། །ཨུཏྤལ་སྔོན་པོ་མཛེས་པའི་དྲི་ངད་ཞིམ་པོས་གོས་པའི་སེར་བུའི་ངད་ཀྱང་མ་ལགས་ཤིང་། །ལྷ་ཡི་བུ་མོ་ལག་པས་གཏད་པའི་ཧ་རི་ཙནྡན་དྲི་ཞིམ་ལྡན་པའང་དེ་ལྟ་མིན། །གཞོན་ནུ་ཁྱོད་ཞུགས་སེན་མོའི་འོད་ཟེར་
ཕྲེང་བ་རྒྱ་ཆེན་མཚམས་སུ་ཤར་བའི་ཟླ་འོད་བཞིན། །རབ་སྡུག་དཀར་དམར་མདོག་ཅན་རབ་སྡུད་ལྷ་དང་ལྷ་མིན་གཙུག་གི་ནོར་བུའི་འོད་འདྲེས་པས། །རལ་པ་ཅན་གྱི་མི་གང་ལ་རེག་དེ་དག་ཀྱང་ནི་སྐྱེ་བོ་ཀུན་གྱི་ཕྱག་བྱར་འོས། །མགོན་པོ་ཁྱོད་ཀྱི་སྔགས་འཛིན་ཁ་ཅིག་གྲུབ་པ་ཐོབ་ནས་རབ་ཆགས་སྒེག་པ་ལས་བྱུང་བའི། །གོམ་ཚུགས་ཀྱིས་འགྲོ་རྒྱན་ཕྲེང་རྐང་གདུབ་ཡིད་འོང་དང་ལྡན་མཛེས་མ་བརྒྱ་དང་ལྷན་ཅིག་ཏུ། །ས་སྟེང་ན་རོལ་གཞན་དག་ཀྱང་ནི་ལྷ་ཡི་གླང་པོ་ཙནྡན་རྟུལ་བ་དང་། །ལི་ཤིའི་མེ་ཏོག་མཛེས་པས་སྟུག་ལྡན་སྦྲང་མས་དཀྲིགས་པ་དགའ་བའི་ནགས་ཚལ་དག་ན་ལྷགས། །ན་ཚོད་གཞོན་ཞིང་དྲེགས་དང་བཅས་པས་སྒེག་ཅིང་རྣམ་པར་འཕྲུལ་པ་གསལ་བར་གྱུར་པ་ཡི། །དྲི་ཞིམ་པོ་ལ་ཆགས་ཤིང་སྐྱོང་བར་བྱེད་པའི་སྦྲང་མའི་ཚོགས་ཀྱིས་དཀྲིགས་པར་བྱས་གྱུར་ཅིང་། །པི་ཝང་གླིང་བུ་དང་རྒྱལ་སྒྲ་འདྲ་ཤིན་ཏུ་སྙན་པའི་དབྱངས་དང་ལྡན་
གྱུར་པའི། །གནོད་སྦྱིན་བུ་མོའི་ཚོགས་ཀྱང་ཁྱོད་ཀྱི་གསང་སྔགས་བཟླས་པ་ཡིས་ནི་རབ་ཏུ་འགུགས་པར་བྱེད། །འགྲོ་བ་གསུམ་གྱི་མགོན་པོ་འབྲས་བུ་མེད་པའི་མང་དུ་བརྗོད་པ་དག་གིས་ཅི་བགྱིར་མཆི། །ཁྱོད་ཀྱི་ཡོན་ཏན་རྒྱ་མཚོ་བརྗོད་པར་རྣམ་ཀུན་ཐུབ་པས་ཀྱང་ནི་ནུས་མ་ལགས། །ཀུན་ནས་དཔག་ཏུ་མེད་པའི་ཆུ་དང་ལྡན་པར་གྱུར་པའི་རྒྱ་མཚོ་ཕན་ཚུན་བརྒལ་བའི་ཕྱིར། །མགོན་པོ་སེམས་དང་བཅས་པའི་མི་རྣམས་དག་ལས་སུ་ཞིག་འདི་རུ་འཇུག་པར་འཚལ་བར་བགྱིད། །དེ་ལྟར་བཅོམ་ལྡན་འདས་ནི་འཕགས་པ་འཇམ་དཔལ་ལ་ཡང་མངོན་པར་བསྟོད་པ་བགྱིས་པ་ལས། །བདག་གིས་དགེ་བ་གང་ཞིག་བསགས་པ་དེ་ཡིས་འགྲོ་བ་ཀུན་གྱི་རྙོག་པ་ཞི་གྱུར་ཅིག །དེ་ཡིས་བདག་ཀྱང་སྐྱེ་བ་འདི་དང་སྐྱེ་བར་བརྟན་ཞིང་མཚུངས་པ་མེད་པའི་སྙན་དངགས་དང་། །རིགས་དང་ལྡན་ཞིང་ཚེ་རབས་དྲན་དང་སྙིང་རྗེ་རྒྱ་ཆེ་བ་དང་མཁས་རྣམས་ཡིད་
འཕྲོག་པར་གྱུར་ཅིག །བཅོམ་ལྡན་འདས་འཕགས་པ་འཇམ་དཔལ་གྱི་བསྟོད་པ་བྱིན་རླབས་དང་བཅས་པ། །སྙན་དངགས་མཁན་རྣམས་ཀྱི་གཙུག་གི་ནོར་བུ་མཁས་པ་ཆེན་པོ་སློབ དཔོན་ཙནྡྲ་གོ་མིས་མཛད་པ་རྫོགས་སོ།། །།རྒྱ་གར་གྱི་མཁན་པོ་སུ་མ་ཏི་ཀཱི་རྟི་དང་། བོད་ཀྱི་ལོ་ཙཱ་བ་མཁས་པ་ཆེན་པོ་མར་པ་ཆོས་ཀྱི་དབང་ཕྱུག་གིས་ལེགས་པར་བསྒྱུར་བ་ལས། སླད་ཀྱི་ལྷོ་བྲག་པ་འོ་རུ་ལོ་ཙཱ་བ་དྷརྨ་སེང་གེས་ལེགས་པར་གཏན་ལ་ཕབ་པ།། །།རྒྱ་གར་སྐད་དུ། ཤྲཱི་ཛྙཱ་ན་གུ་ཎ་ཕ་ལ་ནཱ་མ་སྟུ་ཏི། བོད་སྐད་དུ། དཔལ་ཡེ་ཤེས་ཡོན་ཏན་བཟང་པོ་ཞེས་བྱ་བའི་བསྟོད་པ། བཅོམ་ལྡན་འདས་འཇམ་པའི་དབྱངས་ལ་ཕྱག་འཚལ་ལོ། །གང་གི་བློ་གྲོས་སྒྲིབ་གཉིས་སྤྲིན་བྲལ་ཉི་ལྟར་རྣམ་དག་རབ་གསལ་བ། །ཇི་སྙེད་དོན་ཀུན་ཇི་བཞིན་གཟིགས་ཕྱིར་ཉིད་ཀྱི་ཐུགས་ཀར་གླེགས་བམ་འཛིན། །གང་དག་སྲིད་པའི་བཙོན་རར་མ་རིག་མུན་འཐུམས་སྡུག་བསྔལ་གྱིས་གཟིར་བའི། །འགྲོ་ཚོགས་ཀུན་ལ་བུ་གཅིག་ལྟར་བརྩེ་ཡན་ལག་དྲུག་ཅུའི་དབྱངས་ལྡན་གསུང་། །འབྲུག་ལྟར་
ཆེར་སྒྲོགས་ཉོན་མོངས་གཉིད་སློང་ལས་ཀྱི་ལྕགས་སྒྲོག་འགྲོལ་མཛད་ཅིང་། །མ་རིག་མུན་སེལ་སྡུག་བསྔལ་མྱུ་གུ་ཇི་སྙེད་གཅོད་མཛད་རལ་གྲི་བསྣམས། །གདོད་ནས་དག་ཅིང་ས་བཅུའི་མཐར་སོན་ཡོན་ཏན་ལུས་རྫོགས་རྒྱལ་སྲས་ཐུ་བོའི་སྐུ། །བཅུ་ཕྲག་བཅུ་དང་བཅུ་གཉིས་རྒྱན་སྤྲས་བདག་བློའི་མུན་སེལ་འཇམ་པའི་དབྱངས་ལ་འདུད། །གང་ཞིག་ལྷག་པའི་བསམ་པ་རྣམ་པར་དག་པས་གཅིག་དང་བདུན་དང་ཉི་ཤུ་རྩ་གཅིག་དང་བརྒྱ་དང་སྟོང་ལ་སོགས་པ་དག་ཉིན་རེ་བཞིན་དུ་སྒྲོགས་པ་དེ་ནི་གོ་རིམས་ཇི་ལྟ་བ་བཞིན་དུ་སྒྲིབ་པ་འདག་པ་དང་ཐོས་པ་འཛིན་པ་དང་སྤོབས་པ་དང་མི་བརྗེད་པའི་གཟུངས་དང་ཕྱིར་རྒོལ་བ་ཐམས་ཅད་འཇོམས་པའི་ཤེས་རབ་ཀྱི་དབང་པོ་དང་སྟོབས་ལ་སོགས་པའི་ཡོན་ཏན་དཔག་ཏུ་མེད་པ་དང་ལྡན་པར་འགྱུར་རོ། །གང་ཞིག་ཉིན་རེ་བཞིན་དུ་ལན་གསུམ་དུ་བསྟོད་པ་བྱེད་པ་དེ་ནི་ཇི་སྐད་བཤད་པའི་ཡོན་ཏན་དེ་དག་དང་ལྡན་པས་ཤེས་རབ་དང་སྙིང་རྗེ་དང་ལམ་དང་ས་རྣམས་རིམ་གྱིས་བགྲོད་དེ་གོང་ནས་གོང་དུ་ཆེར་ཆེར་འཕགས་ནས་མྱུར་དུ་རྣམ་པ་ཐམས་ཅད་མཁྱེན་པའི་གྲོང་ཁྱེར་དུ་ཕྱིན་ནས་འགྲོ་བ་མ་ལུས་པ་འཁོར་བ་ལས་
སྒྲོལ་བའི་དེད་དཔོན་ཆེན་པོར་འགྱུར་རོ། །དཔལ་ཡེ་ཤེས་ཡོན་ཏན་བཟང་པོ་ཞེས་བྱ་བའི་བསྟོད་པ་སློབ་དཔོན་རྡོ་རྗེ་མཚོན་ཆས་མཛད་པ་རྫོགས་སོ། །རྔོག་ལོའི་འགྱུར་རོ།། །།དེ་ནས་འཕགས་པ་འཇམ་དཔལ་ལ་གདུང་ཤུགས་ཀྱིས་གསོལ་བ་འདེབས་བ་ནི། ན་མོ་མཉྫུ་ཤྲཱི་ཡེ། ཤེས་བྱའི་མཁའ་དབྱིངས་ཟབ་ཅིང་ཡངས་པ་ལ། །བློ་གྲོས་དཀྱིལ་འཁོར་རྒྱས་པའི་འོད་ཟེར་གྱིས། །སྐྱེ་དགུའི་མི་ཤེས་མུན་པའི་ཚོགས་རྣམས་ཀུན། །བསལ་བྱེད་དབང་པོ་འཇམ་པའི་དབྱངས་ལ་འདུད། །དེང་ནས་བཟུང་སྟེ་བྱང་ཆུབ་སྙིང་པོའི་བར། །ཁྱོད་མིན་བདག་ལ་སྐྱབས་གཞན་མ་མཆིས་པས། །ལས་ཀྱི་དབང་གིས་རིགས་དྲུག་གར་སྐྱེས་ཀྱང་། །འཁོར་བའི་འཇིགས་ལས་སྐྱོབས་ཤིག་འཇམ་པའི་དབྱངས། །བདག་ནི་ཚེ་འདིའི་འདུ་བྱེད་གཏོང་བ་ན། །བརྩེ་ཞིང་བྱམས་པའི་གཉེན་བཤེས་ཀུན་དང་བྲལ། །རྔམ་ཞིང་འཇིགས་པའི་གཤིན་རྗེས་ཟིན་པའི་ཚེ། །གཤིན་རྗེའི་འཇིགས་ལས་སྐྱོབས་ཤིག་འཇམ་པའི་དབྱངས། །ཐོག་མེད་དུས་ནས་ལས་
ཤོག་ལྷེབ་ ༡༠༡ ནས་ ༢༠༠ བར།
ངན་བསགས་པའི་མཐུས། །སྲིད་པ་བར་དོར་ཉོན་མོངས་རླུང་ཤུགས་ཀྱིས། །བཟོད་དཀའ་ངན་འགྲོའི་གཡང་སར་འཁྱེར་སྲིད་པས། །ཉོན་མོངས་རླུངས་སྒོ་ཆོད་ཅིག་འཇམ་པའི་དབྱངས། །བར་དོའི་རྣམ་ཤེས་ཉིང་མཚམས་སྦྱོར་བའི་ཚེ། །མི་ཁོམ་བརྒྱད་པོ་དག་ལས་རབ་འདས་ཤིང་། །ཐུབ་བསྟན་རྒྱལ་མཚན་འཛིན་པའི་རིགས་དག་ཏུ། །སྐྱེ་བའི་རྟེན་འབྲེལ་སྒྲིགས་ཤིག་འཇམ་པའི་དབྱངས། །སྐྱེ་བ་ཕྱི་མར་མཐོ་རིས་ཡོན་ཏན་མཆོག །བདུན་གྱིས་མཛེས་པའི་དལ་འབྱོར་ལུས་ཐོབ་ནས། །བསྟན་པ་ཚུལ་བཞིན་འཛིན་པའི་བཤེས་གཉེན་དང་། །མཇལ་བའི་རྟེན་འབྲེལ་སྒྲིགས་ཤིག་འཇམ་པའི་དབྱངས། །ཐབས་མཁས་ཐུགས་རྗེ་ལྡན་པའི་བཤེས་གཉེན་དེས། །ལེགས་པར་གསུངས་པའི་གསུང་རབ་རྒྱ་མཚོའི་ཚོགས། །ཚུལ་བཞིན་རྟོགས་ནས་གཞན་ལ་སྟོན་ནུས་པའི། །རྣམ་དཔྱོད་བློ་གྲོས་སྩོལ་ཅིག་འཇམ་པའི་དབྱངས། །ཚེ་རབས་ཀུན་ཏུ་
གཞན་དོན་ཁོ་ནའི་ཕྱིར། །སེར་སྣ་མེད་པར་བདོག་པ་ཀུན་གཏོང་ཞིང་། །རྣམ་གཡེང་སྤངས་པའི་བསམ་གཏན་སྒོམ་པ་སོགས། །ཕར་ཕྱིན་དྲུག་ལྡན་སྩོལ་ཅིག་འཇམ་པའི་དབྱངས། །འཁོར་བའི་ཚ་གདུང་སིལ་བའི་བསིལ་བྱེད་མཆོག །གསུང་རབ་གངས་རིའི་ངོས་ལ་བལྟ་འདོད་ཀྱང་། །རྣམ་གཡེང་ལེ་ལོའི་འདམ་དུ་བྱིང་ལགས་པས། །མྱུར་མགྱོགས་ཐུགས་རྗེས་ཟུང་ཤིག་འཇམ་པའི་དབྱངས། །ཟབ་ལམ་ལྟ་བའི་ལམ་ལ་རབ་ཞུགས་ནས། །རྣམ་གྲོལ་ཐར་པའི་གླིང་དུ་འགྲོ་འདོད་ཀྱང་། །སྐལ་དམན་བདག་ནི་འཁོར་བའི་ཞགས་པས་བཅིངས། །འཁོར་བའི་ཞེན་ཐག་ཆོད་ཅིག་འཇམ་པའི་དབྱངས། །རང་དོན་ཉེར་ཞི་ཀུནྡའི་ཚལ་སྤངས་ནས། །རླབས་ཆེན་རྒྱལ་བའི་པད་ཚལ་བལྟ་འདོད་ཀྱང་། །བདག་གི་བློ་འདི་མ་རིག་འཐིབས་པོས་བསྒྲིབས། །མ་རིག་འཐིབས་པོ་སོལ་ཅིག་འཇམ་པའི་དབྱངས། །མདོར་ན་བདག་སོགས་སྐྱེ་བ་ཐམས་ཅད་དུ། །
གསུང་རབ་རྒྱ་མཚོའི་ཚོགས་ལ་རྟེན་བྱེད་ཅིང་། །འགྲོ་ལ་འདོད་དགུ་མ་ལུས་འབྱུང་བའི་གནས། །ཡིད་བཞིན་ནོར་བུར་གྱུར་ཅིག་འཇམ་པའི་དབྱངས། །འཇམ་དབྱངས་ཁྱོད་ལ་གསོལ་བ་བཏབ་པའི་མཐུས། །ཚོགས་གཉིས་རྣམ་པར་དག་པའི་གྲུ་ཆེན་གྱིས། །འགྲོ་རྣམས་སྲིད་པའི་མཚོ་ལས་སྒྲོལ་བ་ལ། །བདག་ཀྱང་ཁྱོད་བཞིན་གྱུར་ཅིག་འཇམ་པའི་དབྱངས། །དུས་འདི་ནས་ནི་བཟུང་ནས་སུ། །ཕྱི་མ་བྱང་ཆུབ་མ་ཐོབ་བར། །རྗེ་བཙུན་འཇམ་པའི་དབྱངས་ཀྱིས་ནི། །བདག་གི་བླ་མ་མཛད་དུ་གསོལ། །གང་ཚེ་བལྟ་བར་འདོད་པའམ། །ཅུང་ཟད་དྲི་བར་འདོད་ན་ཡང་། །མགོན་པོ་འཇམ་དབྱངས་ཁྱོད་ཉིད་ནི། །གེགས་མེད་པར་ནི་མཐོང་བར་ཤོག །ཕྱོགས་བཅུ་ནམ་མཁའི་མཐས་གཏུགས་པའི། །སེམས་ཅན་ཀུན་དོན་བསྒྲུབ་བྱའི་ཕྱིར། །ཇི་ལྟར་འཇམ་དབྱངས་སྤྱོད་མཛད་པ། །བདག་སོགས་སྤྱོད་པའང་དེ་འདྲར་ཤོག །བདག་ཀྱང་
འཇམ་དབྱངས་བཀའ་དྲིན་གྱིས། །ས་རབ་དགའ་བ་ཐོབ་བར་དུ། །རྟག་ཏུ་ཚེ་རབས་དྲན་པ་དང་། །རབ་ཏུ་བྱུང་བ་ཐོབ་པར་ཤོག །བརྩེ་ལྡན་ཁྱོད་ཀྱི་མཁྱེན་རབ་འོད་ཟེར་གྱིས། །བདག་བློའི་གཏི་མུག་མུན་པ་རབ་བསལ་ནས། །བཀའ་དང་བསྟན་བཅོས་གཞུང་ལུགས་རྟོགས་པ་ཡི། །བློ་གྲོས་སྤོབས་པའི་སྣང་བ་སྩལ་དུ་གསོལ། །ཅེས་སོ།། །།འཇིག་རྟེན་དབང་ཕྱུག་ལ་བསྟོད་པ་ནི། རྒྱ་གར་སྐད་དུ། མ་ཧཱ་ཀཱ་རུ་ཎི་ཀ་ཀུ་བཱ་ཀྱ་སྟོ་ཏྲཱ་དྷིཥྛ ་ན་ནཱ་མ། བོད་སྐད་དུ། ཐུགས་རྗེ་ཆེན་པོ་ལ་སྨྲེ་སྔགས་ཀྱིས་བསྟོད་པ་བྱིན་རླབས་ཅན་ཞེས་བྱ་བ། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ཐུགས་རྗེ་ཆེན་པོ་འཕགས་པ་སྤྱན་རས་གཟིགས། །དྲི་མེད་དུང་མདོག་མཆོག་ཏུ་གཟུགས་བཟང་བ། །རྣམ་དག་འོད་གསལ་ཟླ་འོད་དཀྱིལ་ན་མཛེས། །ཇི་ལྟར་མཁའ་ལ་ཉི་འོད་སྟོང་འབར་བཞིན། །དཔའ་བོ་འོད་ཟེར་སྟོང་འབར་ལྷམ་མེ་བ། །སྲིད་པ་གསུམ་གྱི་ས་མཁན་སྟོན་པར་གྲགས། །ཁམས་གསུམ་འགྲོ་བ་ཀུན་གྱི་གཉེན་
གཅིག་པུ། །བྱམས་མགོན་ཐུགས་རྗེའི་ལྷ་ཁྱོད་བདག་ལ་དགོངས། །བདག་ནི་ཐོག་མཐའ་མེད་པའི་དུས་མཐའ་ནས། །ལམ་ལོག་ལམ་སྟོར་སྲིད་པའི་འཁོར་བར་འཁྱམས། །སྔོན་ཚེ་ལས་ལོག་སྡིག་པ་བྱས་པས་ནོངས། །སྡིག་པའི་ལས་རྣམས་ཅི་བྱས་རབ་གནོང་འགྱོད། །དར་ཞིང་དྲག་པའི་ལས་དེ་དབང་བཙུན་པས། །འཁོར་བའི་སྡུག་བསྔལ་རྒྱ་མཚོར་བྱིང་གྱུར་ཏེ། །ཞེ་སྡང་འབར་བའི་མེས་ནི་རང་རྒྱུད་བསྲེགས། །གཏི་མུག་མུན་པའི་ཚོགས་ཀྱིས་ཤེས་རབ་རྨོངས། །འདོད་ཆགས་རྒྱ་མཚོའི་ནང་དུ་རྣམ་ཤེས་བྱིང་། །ང་རྒྱལ་ཆེན་པོའི་རི་བོས་ངན་འགྲོར་མནན། །ཕྲག་དོག་རླུང་དམར་འཚུབ་མས་འཁོར་བར་གཡེངས། །བདག་ཏུ་ལྟ་བའི་མདུད་པ་དམ་པོས་བཅིངས། །འདོད་པའི་མེ་མདག་དོང་འདྲའི་འོབས་སུ་ལྷུང་། །སྡུག་བསྔལ་དྲག་པོའི་འདམ་རྫབ་ཆར་ལྟར་འབབ། །མེ་ཁམས་ཉི་མའི་དུག་ནི་སྟེང་ནས་ཚ། །ཆུ་ཁམས་ས་ཡི་བརླན་ནི་
འོག་ནས་གྲང་། །ཕྱི་ཡི་སེར་བུའི་ངད་ནི་ཐད་ནས་ཚ། །ཀུན་ནས་འཁྲུགས་པའི་རླུང་ནི་ཁོང་ནས་ལྡང་། །དེ་ལྟའི་སྡུག་བསྔལ་ཤིན་ཏུ་བཟོད་དཀའ་ཡང་། །སྡོམ་པའི་ཡི་དམ་གཞིག་ཏུ་ག་ལ་རུང་། ༈ །སྡུག་བསྔལ་ཀུན་དང་བསྡོས་ནས་སྡོམ་བསྲུང་ཞིང་། །མོས་པའི་དད་པས་འཕགས་མཆོག་མི་གཏོང་ན། །འཕགས་མགོན་འགྲོ་དོན་མི་མཛད་ཅི་ལ་དགོངས། །བྱམས་མགོན་ཅི་སླད་བདག་ལ་ཐུགས་མི་བརྩེ། །བདག་འདྲ་བླུན་རྨོངས་ལས་ངན་སྡིག་པོ་ཆེ། །ལས་ཀྱི་དབང་གིས་སྙིགས་མའི་དུས་འདིར་སྐྱེས། །སྐྱེས་པས་འགྱོད་དོ་ལས་ལ་ཡི་རེ་ཆད། །ཡི་ཆད་འགྱོད་ཀྱང་ལས་དབང་འཆོས་སུ་མེད། །ལས་ཀྱི་ཤུགས་ནི་ཆུ་བོའི་རྒྱུན་དང་འདྲ། །ལས་དབང་ཆུ་ཀླུང་འཕྲལ་དུ་ག་ལ་ཟློག །བཀའ་ལ་ཞུགས་ཀྱང་བཀའ་བཞིན་རྔོ་མ་ཐོགས། །ལུས་ངག་ཡིད་གསུམ་སྡིག་པའི་དབང་དུ་གྱུར། །སྡིག་པའི་ལས་དབང་དྲག་པོ་མེ་འབར་བས། །རྣམ་ཤེས་དབང་པོའི་མྱུ་གུ་
གདུངས་གྱུར་ཏེ། །ཕུང་པོ་སྒྱུ་མའི་ལུས་འདིས་མི་བཟོད་ན། །བྱམས་མགོན་ཐུགས་རྗེ་ཅན་གྱིས་བཟོད་ལགས་སམ། །ཉི་ལྟར་འོད་འབར་ཟླ་ལྟར་མདངས་གསལ་བའི། །ཐུགས་རྗེའི་ཞལ་ཉིད་མཐོང་བར་འཚལ་ལགས་ན། །ཐོག་མ་མེད་ནས་མ་རིག་ལིང་ཏོག་གིས། །ལྡོངས་པའི་ཆུ་བུར་མིག་གིས་མ་མཐོང་ན། །འགྲོ་བའི་མགོན་ཁྱོད་ད་ལྟ་གང་ན་བཞུགས། །ཤིན་ཏུ་སྐྲག་ཅིང་སྐྱི་གཡའ་རབ་འཇིགས་ནས། །དུང་དུང་གདུང་བའི་སྨྲེ་སྔགས་འདི་འདོན་ཞིང་། །ཉམ་ཐག་ཕོངས་པའི་ང་རོས་འོ་དོད་འབོད། །བྱམས་མགོན་ཐུགས་རྗེ་ཅན་གྱིས་གསན་ལགས་སམ། །ནམ་ཞིག་འཆི་འཕོ་ལུས་སེམས་བརྗེས་པའི་ཚེ། །དགེ་བཤེས་གྲོགས་དང་བྲལ་ཏེ་གཤིན་རྗེས་ཁྲིད། །དེ་ཚེ་འཇིག་རྟེན་ཉེ་དུས་མི་གཏོང་སྟེ། །ལས་ཀྱི་དབང་གིས་བདག་འདྲ་གཅིག་པུར་འཁྱམས། །དུས་དེར་བདག་ལ་མགོན་སྐྱབས་མ་མཆིས་ན། །བྱམས་མགོན་ཁྱོད་ཀྱི་འཁོར་
བར་བདག་གཏོང་ངམ། ༈ །ན་མ་ཨཱཪྻ ་པ་ལོ། །ལས་ཀྱིས་མནར་བའི་སྐྱེ་བོ་བདག་འདྲ་བ། །ཐོག་མ་མེད་པའི་དུས་ནས་ལོག་བརྟགས་པས། ཁམས་གསུམ་འཁོར་བའི་གནས་ལས་མ་ཐར་ཏེ། །བསྐལ་པ་དཔག་མེད་སྐྱེ་བ་ཇི་སྙེད་དུ། །གདོས་བཅས་ལུས་བླངས་གྲངས་མེད་ཞིག་གྱུར་ཏེ། །ཤ་རུས་བསགས་ན་འཇིག་རྟེན་གཏོས་དང་མཉམ། །རྣག་ཁྲག་བསགས་ན་རྒྱ་མཚོ་ཆེན་པོ་ཙམ། །ལས་འཕྲོ་བསགས་ན་བསམ་འདས་བརྗོད་མི་ལང་། །ཁམས་གསུམ་བགྲང་ཤིང་སྐྱེ་ཤི་ཁ་བརྒྱུད་ཀྱང་། །བྱས་པའི་ལས་རྣམས་དོན་མེད་ཆུད་རེ་ཟོས། །སྐྱེ་བ་གྲངས་མེད་ཇི་སྙེད་དེ་ཙམ་ལ། །སྐྱེ་བ་གཅིག་ཅིག་ཁོ་ན་ཙམ་གྱི་ལས། །བླ་མེད་དོན་དུ་རབ་ཏུ་སྦྱངས་གྱུར་ན། །དེ་ཙམ་བྱས་པའི་ལས་ལ་དོན་རབ་ཡོད། །ལས་ནི་དབང་བཙན་ཉོན་མོངས་སྟོབས་ཆེ་བས། །ཤ་ཁྲག་འདུས་པའི་ལུས་བླངས་འཁོར་བར་འཁྱམས། །སྡུག་བསྔལ་དྲག་པོའི་སྲིད་པའི་བཙོན་རར་ཆུད། །མི་
བཟད་སྡུག་བསྔལ་དྲག་པོ་འདི་འདྲ་ན། །ཉེས་བྱས་ཐམས་ཅད་རང་གི་ལས་ལས་བྱུང་། །ཐུགས་རྗེ་ཆེན་པོས་ལས་རྣམས་རྒྱུན་བཅད་དེ། །ཉོན་མོངས་ལས་ཀྱི་རླུང་འདི་བཟློག་ཏུ་གསོལ། །ཉོན་མོངས་ལས་ཀྱི་རླུང་འདི་དབང་བཙན་པས། །མ་རིག་མུན་པའི་ནང་དུ་གཏན་འཁྱམས་ན། །ཡེ་ཤེས་སྒྲོན་མེའི་ཟེར་གྱིས་མི་གཟིགས་སམ། །ཉེས་བྱས་ལས་ཀྱི་འབྲས་བུ་མི་བཟོད་ན། །ཐུགས་རྗེ་ཆེན་པོས་ཕྲིན་ལས་མི་མཛད་དམ། །དུག་གསུམ་བཟོད་དཀའི་ནད་ཀྱིས་གདུངས་ལགས་ན། །ཐུགས་རྗེ་ཐབས་མཁས་སྨན་གྱིས་མི་གསོ་འམ། །ཕྱིན་ཅི་ལོག་གི་གཡང་སར་ལྷུང་ལགས་ན། །ཐུགས་རྗེ་མྱུར་མགྱོགས་ཕྱག་གིས་མི་འཛིན་ནམ། །སྡུག་བསྔལ་དྲག་པོའི་ལས་དབང་མེ་འབར་ན། །ཐུགས་རྗེ་བསིལ་བའི་ཆར་རྒྱུན་མི་འབེབས་སམ། ཁམས་གསུམ་འཁོར་བའི་གནས་སུ་སྦྱངས་སྦྱངས་ནས། །ནམ་ཞིག་རང་གིས་འབྲས་བུ་ཐོབ་པའི་ཚེ། །
འཕགས་པའི་ཐུགས་རྗེ་མི་འཚལ་དོན་མ་མཆིས། །སེམས་ཅན་ལས་འཕྲོ་བཙན་པར་བཞག་ན་དག །འཕགས་པའི་ཐུགས་རྗེས་སུ་ལ་ཅི་ཞིག་བགྱི། །འཕགས་མཆོག་ཁྱོད་ལ་ཐུགས་རྗེའི་སྟོབས་མངའ་ན། །ཡལ་ཡོལ་བཏང་སྙོམས་ལེ་ལོ་མ་མཛད་པར། །སྙིང་ནས་ད་གཟིགས་ཐུགས་རྗེ་རྒྱལ་བའི་ལྷ། །ཞེས་ཐུགས་རྗེ་ཆེན་པོ་ལ་སྨྲེ་སྔགས་ཀྱིས་བསྟོད་པ་གནས་ལྔ་རིག་པའི་སློབ་དཔོན་ཟླ་གྲགས་ཀྱིས་མཛད་པ་བྱིན་རླབས་ཅན་རྫོགས་སོ། །ཀྱེ་ལགས་འཕགས་པ་འཇིག་རྟེན་དབང་ཕྱུག་དགོངས། །ཐོག་མེད་དུས་ནས་ངན་སོང་གནས་སུ་བསྡད། །མི་དགེ་བཅུ་ལ་ངོམས་པ་མེད་པར་སྤྱད། །ཡིད་དུ་མི་འོང་འབྲས་བུ་ཁོ་ན་མྱོང་། །བརྩེ་བས་གཟིགས་ཀྱང་བདག་ལ་ཕྲིན་ལས་རྡུགས། །བྱམས་མགོན་བཅོས་མེད་བདག་པས་གཞན་འགའ་མང་། །ཐུགས་རྗེའི་ནུས་པ་སྟོན་ཅིག་སྤྱན་རས་གཟིགས། །ད་ལན་མི་ལུས་ཙམ་པོ་ཐོབ་དུས་འདིར། །རང་བཞིན་བླུན་པས་ཚེ་རབས་ཕྱི་མ་ལ། །བདེན་སྙམ་མི་
བགྱིད་གཏི་མུག་འཐུག་པོས་བསྒྲིབས། །ལས་འབྲས་བསླུ་བ་མེད་པའི་དོན་ཅན་ལ། །ཇི་བཞིན་བླང་དོར་མ་ཤེས་སྡིག་པ་འཕེལ། །གཏན་དུ་ཐར་དུས་མེད་པའི་ལས་ངན་བསགས། །སྒོ་གསུམ་སྤྱོད་པ་ལེགས་སྤྱད་རློམ་ཀུན་ཀྱང་། །མུན་ནང་མདའ་ལྟར་དགྲ་གཉེན་གང་ལ་ཕོག །ཆ་མ་འཚལ་བས་ཉེས་པར་སོང་སྲིད་པས། །འཕགས་མཆོག་བརྩེ་བས་མི་བཟོད་དྲུང་དུ་བཤགས། །བདག་ནི་བྱིས་པའི་རང་བཞིན་གཏོལ་མེད་པས། །ཞིང་མཆོག་གཉེན་པོ་རྣམས་ལ་སྡིག་པའི་ལས། །གང་བསགས་འབྲས་བུ་ཇི་སྙེད་མཆིས་པ་ཀུན། །མཐོང་བའི་ཆོས་ལ་དར་དྲག་རབ་སྨིན་ནས། །འབྲས་བུ་མྱུར་དུ་ཕྱུང་བར་བྱིན་གྱིས་རློབས། །ལྷག་པར་མཁའ་མཉམ་འགྲོ་བ་ཐམས་ཅད་ཀྱིས། །ངག་གི་སྒོ་ནས་ཉེས་པ་ཅི་བསགས་པའི། །འབྲས་བུ་ཐམས་ཅད་བདག་ལ་སྨིན་པར་ཤོག །བདག་གི་ངག་ལ་མི་བཟད་སྡིག་པའི་ལས། །འབྲས་བུ་མི་བཟད་མྱོང་
བས་ཡིད་བྱུང་སྟེ། །མ་རྒན་ངག་གི་སྡུག་བསྔལ་མི་བཟད་པ། །རང་གི་ངག་ལས་འབུམ་འགྱུར་གཅེས་འཛིན་པའི། །བཅོས་མིན་སེམས་ཅན་ཀུན་གྱི་སེམས་ཁྲལ་ཀུན། །བདག་གི་རྒྱུད་ལ་ལེགས་པར་འཆར་བ་ནས། །བདག་གི་ཕན་སེམས་བཟང་པོའི་བདེན་སྟོབས་ཀྱིས། །བདག་གི་ངག་གིས་མཁའ་ཁྱབ་སེམས་ཅན་གྱི། །སྒྲིབ་ཀུན་བསལ་བའི་ཆོས་འཁོར་ཐོགས་མེད་དུ། །བསྐོར་ལ་ནུས་པ་ཐོབ་པར་ཐུགས་རྗེས་ཟུང་། །བདག་གི་ངག་ལ་ངག་གི་དབང་ཕྱུག་ཤོག །བདག་གི་དག་གིས་སྐལ་ལྡན་རེ་སྐོང་ཤོག །ཅིས་ཀྱང་འཕགས་པའི་ཐུགས་རྗེའི་སྟོབས་ཀྱིས་ཤོག །དཔལ་ལྡན་བླ་མ་དམ་པའི་རྡོ་རྗེའི་གསུང་། །སྒྲིབ་བྲལ་གནས་བརྒྱད་དག་པའི་སྒྲ་དབྱངས་ཅན། །གདུལ་བྱའི་བློ་ལ་གསལ་པོར་འཆར་བ་ཡིས། །སྨིན་ཅིང་གྲོལ་བའི་རོ་མཆོག་མྱོང་གྱུར་ཅིག །ཅེས་འཕགས་མཆོག་སྤྱན་རས་གཟིགས་དབང་ཕྱུག་ལ་སྨྲེ་སྔགས་ཀྱིས་བསྟོད་པ་རྒྱལ་དབང་མི་བསྐྱོད་ཞབས་ཀྱིས་མཛད་པའོ།། །།དེ་ནས་
སྒྲོལ་མ་ཉེར་གཅིག་ལ་བསྟོད་པ་ནི། པོ་ཊ་ལ་ཡི་གནས་མཆོག་ནས། །ཏཱཾ་ཡིག་ལྗང་ཁུ་ལས་འཁྲུངས་ཤིང་། །ཏཱཾ་ཡིག་འོད་ཀྱིས་འགྲོ་བ་སྒྲོལ། །སྒྲོལ་མ་འཁོར་བཅས་གཤེགས་སུ་གསོལ། །ལྷ་དང་ལྷ་མིན་ཅོད་པན་གྱིས། །ཞབས་ཀྱི་པདྨ་ལ་བཏུད་དེ། །ཕོངས་པ་ཀུན་ལས་སྒྲོལ་མཛད་མ། །སྒྲོལ་མ་ཡུལ་ལ་ཕྱག་འཚལ་ལོ། །རྗེ་བཙུན་འཕགས་མ་སྒྲོལ་མ་དང་། །ཕྱོགས་བཅུ་དུས་གསུམ་བཞུགས་པ་ཡི། །རྒྱལ་བ་སྲས་བཅས་ཐམས་ཅད་ལ། །ཀུན་ནས་དང་བས་ཕྱག་འཚལ་ལོ། །མེ་ཏོག་བདུག་སྤོས་མར་མེ་དྲི། །ཞལ་ཟས་རོལ་མོ་ལ་སོགས་པ། །དངོས་འབྱོར་ཡིད་ཀྱིས་སྤྲུལ་ནས་འབུལ། འཕགས་མའི་ཚོགས་ཀྱིས་བཞེས་སུ་གསོལ། །ཐོག་མ་མེད་ནས་ད་ལྟའི་བར། །མི་དགེ་བཅུ་དང་མཚམས་མེད་ལྔ། །སེམས་ནི་ཉོན་མོངས་དབང་གྱུར་པའི། །སྡིག་པ་ཐམས་ཅད་བཤགས་པར་བགྱི། །ཉན་ཐོས་རང་རྒྱལ་བྱང་ཆུབ་སེམས། །སོ་སོ་
སྐྱེ་བོ་ལ་སོགས་པས། །དུས་གསུམ་དགེ་བ་ཅི་བསགས་པའི། །བསོད་ནམས་ལ་ནི་བདག་ཡི་རང་། །སེམས་ཅན་རྣམས་ཀྱི་བསམ་པ་དང་། །བློ་ཡི་བྱེ་བྲག་ཇི་ལྟ་བར། །ཆེ་ཆུང་ཐུན་མོང་ཐེག་པ་ཡི། །ཆོས་ཀྱི་འཁོར་ལོ་བསྐོར་དུ་གསོལ། །འཁོར་བ་ཇི་སྲིད་མ་སྟོངས་བར། །མྱ་ངན་མི་འདའ་ཐུགས་རྗེ་ཡིས། །སྡུག་བསྔལ་རྒྱ་མཚོར་བྱིང་བ་ཡི། །སེམས་ཅན་རྣམས་ལ་གཟིགས་སུ་གསོལ། །བདག་གིས་བསོད་ནམས་ཅི་བསགས་པ། །ཐམས་ཅད་བྱང་ཆུབ་རྒྱུར་གྱུར་ནས། །རིང་པོར་མི་ཐོགས་འགྲོ་བ་ཡི། །འདྲེན་པའི་དཔལ་དུ་བདག་གྱུར་ཅིག །།ༀ་རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །ཕྱག་འཚལ་སྒྲོལ་མ་མྱུར་མ་དཔའ་མོ། །སྤྱན་ནི་སྐད་ཅིག་གློག་དང་འདྲ་མ། །འཇིག་རྟེན་གསུམ་མགོན་ཆུ་སྐྱེས་ཞལ་གྱི། །གེ་སར་བྱེ་བ་ལས་ནི་བྱུང་མ། །ཕྱག་འཚལ་སྟོན་ཀའི་ཟླ་བ་ཀུན་ཏུ། །གང་བ་བརྒྱ་ནི་བརྩེགས་པའི་ཞལ་མ། །སྐར་མ་སྟོང་ཕྲག་ཚོགས་པ་
རྣམས་ཀྱིས། །རབ་ཏུ་ཕྱེ་བའི་འོད་རབ་འབར་མ། །ཕྱག་འཚལ་གསེར་སྔོ་ཆུ་ནས་སྐྱེས་ཀྱི། །པདྨས་ཕྱག་ནི་རྣམ་པར་བརྒྱན་མ། །སྦྱིན་པ་བརྩོན་འགྲུས་དཀའ་ཐུབ་ཞི་བ། །བཟོད་པ་བསམ་གཏན་སྤྱོད་ཡུལ་ཉིད་མ། །ཕྱག་འཚལ་དེ་བཞིན་གཤེགས་པའི་གཙུག་ཏོར། །མཐའ་ཡས་རྣམ་པར་རྒྱལ་བར་སྤྱོད་མ། །མ་ལུས་ཕ་རོལ་ཕྱིན་པ་ཐོབ་པའི། །རྒྱལ་བའི་སྲས་ཀྱིས་ཤིན་ཏུ་བསྟེན་མ། །ཕྱག་འཚལ་ཏུཏྟཱ་ར་ཧཱུྃ་ཡི་གེས། །འདོད་དང་ཕྱོགས་དང་ནམ་མཁའ་གང་མ། །འཇིག་རྟེན་བདུན་པོ་ཞབས་ཀྱིས་མནན་ཏེ། །ལུས་པ་མེད་པར་འགུགས་པར་ནུས་མ། །ཕྱག་འཚལ་བརྒྱ་བྱིན་མེ་ལྷ་ཚངས་པ། །རླུང་ལྷ་སྣ་ཚོགས་དབང་ཕྱུག་མཆོད་མ། །འབྱུང་པོ་རོ་ལངས་དྲི་ཟ་རྣམས་དང་། །གནོད་སྦྱིན་ཚོགས་ཀྱིས་མདུན་ནས་བསྟོད་མ། །ཕྱག་འཚལ་ཏྲད་ཅེས་བྱ་དང་ཕཊ་ཀྱིས། །ཕ་རོལ་འཁྲུལ་འཁོར་རབ་ཏུ་འཇོམས་མ། །གཡས་བསྐུམ་གཡོན་བརྐྱང་ཞབས་
ཀྱིས་མནན་ཏེ། །མེ་འབར་འཁྲུག་པ་ཤིན་ཏུ་འབར་མ། །ཕྱག་འཚལ་ཏུ་རེའི་འཇིགས་པ་ཆེན་མོས། །བདུད་ཀྱི་དཔའ་བོ་རྣམ་པར་འཇོམས་མ། །ཆུ་སྐྱེས་ཞལ་ནི་ཁྲོ་གཉེར་ལྡན་མཛད། །དགྲ་བོ་ཐམས་ཅད་མ་ལུས་གསོད་མ། །ཕྱག་འཚལ་དཀོན་མཆོག་གསུམ་མཚོན་ཕྱག་རྒྱའི། །སོར་མོས་ཐུགས་ཀར་རྣམ་པར་བརྒྱན་མ། །མ་ལུས་ཕྱོགས་ཀྱི་འཁོར་ལོ་བརྒྱན་པའི། །རང་གི་འོད་ཀྱི་ཚོགས་རྣམས་འཁྲུག་མ། །ཕྱག་འཚལ་རབ་ཏུ་དགའ་བས་བརྗིད་པའི། །དབུ་རྒྱན་འོད་ཀྱི་ཕྲེང་བས་སྤེལ་མ། །བཞད་པ་རབ་བཞད་ཏུཏྟཱ་ར་ཡིས། །བདུད་དང་འཇིག་རྟེན་དབང་དུ་མཛད་མ། །ཕྱག་འཚལ་ས་གཞི་སྐྱོང་བའི་ཚོགས་རྣམས། །ཐམས་ཅད་འགུགས་པར་ནུས་པ་ཉིད་མ། །ཁྲོ་གཉེར་གཡོ་བའི་ཡི་གེ་ཧཱུྃ་གིས། །ཕོངས་པ་ཐམས་ཅད་རྣམ་པར་སྒྲོལ་མ། །ཕྱག་འཚལ་ཟླ་བའི་དུམ་བུས་དབུ་བརྒྱན། །བརྒྱན་པ་ཐམས་ཅད་ཤིན་ཏུ་འབར་མ། །རལ་པའི་ཁྲོད་ན་འོད་དཔག་
མེད་ལས། །རྟག་པར་ཤིན་ཏུ་འོད་ནི་མཛད་མ། །ཕྱག་འཚལ་བསྐལ་པའི་མཐའ་མའི་མེ་ལྟར། །འབར་བའི་ཕྲེང་བའི་དབུས་ན་གནས་མ། །གཡས་བརྐྱང་གཡོན་བསྐུམ་ཀུན་ནས་བསྐོར་དགའ། །དགྲ་ཡི་དཔུང་ནི་རྣམ་པར་འཇོམས་མ། །ཕྱག་འཚལ་ས་གཞིའི་ངོས་ལ་ཕྱག་གི། །མཐིལ་གྱིས་བསྣུན་ཅིང་ཞབས་ཀྱིས་བརྡུང་མ། །ཁྲོ་གཉེར་ཅན་མཛད་ཡི་གེ་ཧཱུྃ་གིས། །རིམ་པ་བདུན་པོ་རྣམས་ནི་འགེམས་མ། །ཕྱག་འཚལ་བདེ་མ་དགེ་མ་ཞི་མ། །མྱ་ངན་འདས་ཞི་སྤྱོད་ཡུལ་ཉིད་མ། །སྭཱ་ཧཱ་ༀ་དང་ཡང་དག་ལྡན་པས། །སྡིག་པ་ཆེན་པོ་འཇོམས་པ་ཉིད་མ། །ཕྱག་འཚལ་ཀུན་ནས་བསྐོར་རབ་དགའ་བའི། །དགྲ་ཡི་ལུས་ནི་རབ་ཏུ་འགེམས་མ། །ཡི་གེ་བཅུ་པའི་ངག་ནི་བཀོད་པའི། །རིག་པ་ཧཱུྃ་ལས་སྒྲོལ་མ་ཉིད་མ། །ཕྱག་འཚལ་ཏུ་རེའི་ཞབས་ནི་བརྡབས་པས། །ཧཱུྃ་གི་རྣམ་པའི་ས་བོན་ཉིད་མ། །རི་རབ་མན་དཱ་ར་དང་འབིགས་བྱེད། །འཇིག་རྟེན་
གསུམ་རྣམས་གཡོ་བ་ཉིད་མ། །ཕྱག་འཚལ་ལྷ་ཡི་མཚོ་ཡི་རྣམ་པའི། །རི་དྭགས་རྟགས་ཅན་ཕྱག་ན་བསྣམས་མ། །ཏཱ་ར་གཉིས་བརྗོད་ཕཊ་ཀྱི་ཡི་གེས། །དུག་རྣམས་མ་ལུས་པ་ནི་སེལ་མ། །ཕྱག་འཚལ་ལྷ་ཡི་ཚོགས་རྣམས་རྒྱལ་པོ། །ལྷ་དང་མིའམ་ཅི་ཡིས་བསྟེན་མ། །ཀུན་ནས་གོ་ཆ་དགའ་བའི་བརྗིད་ཀྱིས། །རྩོད་དང་རྨི་ལམ་ངན་པ་སེལ་མ། །ཕྱག་འཚལ་ཉི་མ་ཟླ་བ་རྒྱས་པའི། །སྤྱན་གཉིས་པོ་ལ་འོད་རབ་གསལ་མ། །ཧ་ར་གཉིས་བརྗོད་ཏུཏྟཱ་རེ་ཡིས། །ཤིན་ཏུ་དྲག་པོའི་རིམས་ནད་སེལ་མ། །ཕྱག་འཚལ་དེ་ཉིད་གསུམ་རྣམས་བཀོད་པས། །ཞི་བའི་མཐུ་དང་ཡང་དག་ལྡན་མ། །གདོན་དང་རོ་ལངས་གནོད་སྦྱིན་ཚོགས་རྣམས། །འཇོམས་པ་ཏུ་རེ་རབ་མཆོག་ཉིད་མ། །རྩ་བའི་སྔགས་ཀྱི་བསྟོད་པ་འདི་དང་། །ཕྱག་འཚལ་བ་ནི་ཉི་ཤུ་རྩ་གཅིག །ལྷ་མོ་ལ་གུས་ཡང་དག་ལྡན་པའི། །བློ་ལྡན་གང་གིས་རབ་དང་བརྗོད་པས། །སྲོད་དང་ཐོ་རངས་ལངས་པར་
བྱས་ཏེ། །དྲན་པས་མི་འཇིགས་ཐམས་ཅད་རབ་སྟེར། །སྡིག་པ་ཐམས་ཅད་རབ་ཏུ་ཞི་བ། །ངན་འགྲོ་ཐམས་ཅད་འཇོམས་པ་ཉིད་དོ། །རྒྱལ་བ་བྱེ་བ་ཕྲག་བདུན་རྣམས་ཀྱིས། །མྱུར་དུ་དབང་ནི་བསྐུར་བར་འགྱུར་ལ། །འདི་ལས་ཆེ་བ་ཉིད་ནི་འཐོབ་ཅིང་། །སངས་རྒྱས་གོ་འཕང་མཐར་ཐུགས་དེར་འགྲོ། །དེ་ཡི་དུག་ནི་དྲག་པོ་ཆེན་པོ། །སྟན་ལ་གནས་པའམ་གཞན་ཡང་འགྲོ་བ། །ཟོས་པ་དང་ནི་འཐུངས་པ་ཉིད་ཀྱང་། །དྲན་པས་རབ་ཏུ་སེལ་བ་ཉིད་འཐོབ། །གདོན་དང་རིམས་དང་དུག་གིས་གཟིར་བའི། །སྡུག་བསྔལ་ཚོགས་ནི་རྣམ་པར་སྤོང་སྟེ། །སེམས་ཅན་གཞན་པ་རྣམས་ལ་ཡང་ངོ་། །གཉིས་གསུམ་བདུན་དུ་མངོན་པར་བརྗོད་ན། །བུ་འདོད་པས་ནི་བུ་ཐོབ་འགྱུར་ཞིང་། །ནོར་འདོད་པས་ནི་ནོར་རྣམས་ཉིད་འཐོབ། །འདོད་པ་ཐམས་ཅད་ཐོབ་པར་འགྱུར་ཏེ། །བགེགས་རྣམས་མེད་ཅིང་སོ་སོར་འཇོམས་འགྱུར། །ཕྱག་འཚལ་ཉེར་གཅིག་གིས་
བསྟོད་པ་འདི་ནི་རྣམ་པར་སྣང་མཛད་ཆེན་པོས་གསུངས་པ་སྟེ་རྒྱུད་ལས་བྱུང་བའོ།། །།སྒྲོལ་དཀར་ཡིད་བཞིན་འཁོར་ལོ་ལ་བསྟོད་པ་ནི། ༀ་རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །འཁོར་བ་ལས་སྒྲོལ་ཏཱ་རེ་མ། །ཏུཏྟ་རེ་ཡིས་འཇིགས་བརྒྱད་སྒྲོལ། །ཏུ་རེས་ན་བ་རྣམས་ལས་སྒྲོལ། །སྒྲོལ་མ་ལ་ཡང་ཕྱག་འཚལ་བསྟོད། །པདྨ་དཀར་པོའི་དབུས་གནས་པའི། །ཟླ་བའི་གཟུགས་ཀྱི་གདན་སྟེངས་སུ། །རྡོ་རྗེ་སྐྱིལ་ཀྲུང་བཅས་མཛད་མ། །མཆོག་སྦྱིན་མ་ལ་ཕྱག་འཚལ་བསྟོད། །སྟོན་ཀའི་ཟླ་བའི་མདོག་འདྲ་ཞིང་། །ཟླ་བ་ལ་ནི་རྒྱབ་བརྟེན་མ། །རྒྱན་རྣམས་ཐམས་ཅད་ཡོངས་སུ་རྫོགས། །ཨུཏྤལ་བསྣམས་ལ་ཕྱག་འཚལ་བསྟོད། །བཅུ་དྲུག་ལོ་ལོན་ལུས་དང་ལྡན། །རྫོགས་སངས་རྒྱས་ཀུན་དེ་ཡི་སྲས། །འདོད་སྦྱིན་སྐུ་ནི་འཆང་བའི་ཡུམ། །འཕགས་མ་སྒྲོལ་མ་ལ་ཕྱག་འཚལ། །འཁོར་ལོ་དཀར་མོ་འོད་ཟེར་དཀར། །རྩིབས་བརྒྱད་ལ་ནི་ཡི་གེ་བརྒྱད། །ཡོངས་སུ་འཁོར་བའི་རྣམ་པ་ཅན། །
འཁོར་ལོ་ཅན་ལ་ཕྱག་འཚལ་ལོ། །ཞེས་པ་ནི་ངག་དབང་གྲགས་པའི་རྒྱ་གཞུང་ངོ་། །ཞིང་ཁམས་ཐམས་ཅད་ཡོངས་སུ་དག་པ་ལ། །རིན་ཆེན་མེ་ཏོག་མང་པོ་གཅལ་དུ་བཀྲམ། །དུས་གསུམ་སངས་རྒྱས་ཐམས་ཅད་སྐྱེད་པའི་ཡུམ། །ཡུམ་གྱུར་སྒྲོལ་མ་ཁྱོད་ལ་ཕྱག་འཚལ་ལོ། །ཚིགས་བཅད་འདི་སྒྲོལ་མ་ལས་སྣ་ཚོགས་འབྱུང་བའི་རྒྱུད་ལས་གསུངས་སོ། །འཕགས་མ་སྒྲོལ་མ་སྒྲོལ་མཛད་ཡུམ། །ཡིད་བཞིན་འཁོར་ལོ་ཚེ་འཕེལ་མ། །ལྷ་མོ་ཁྱོད་ལ་གསོལ་བ་ནི། །བདག་གི་ཚེ་ཡི་བར་ཆད་དང་། །ནད་དང་སྡུག་བསྔལ་ཐམས་ཅད་ལས། །ནུས་ལྡན་ཁྱོད་ཀྱིས་བསྐྱབ་ཏུ་གསོལ། །མཆོག་དང་ཐུན་མོང་དངོས་གྲུབ་ཀུན། །མ་ལུས་བདག་ལ་གནང་བར་མཛོད། །འཕགས་མ་ཁྱོད་ལ་དད་བྱེད་པ། །དེ་ལ་རྟག་ཏུ་བུ་བཞིན་དགོངས། །བདག་ཀྱང་ཁྱོད་ལ་གསོལ་འདེབས་ཀྱིས། །ཐུགས་རྗེའི་ལྕགས་ཀྱུས་གཟུང་དུ་གསོལ། །ལྷ་མོའི་སྐུ་མདོག་ཟླ་འདྲའི་མདོག །སྒེག་ཅིང་དུལ་བའི་ཆ་བྱད་
ཅན། །གཟུགས་བཟང་རིན་ཆེན་རྒྱན་གྱིས་སྤྲས། །མཛེས་པའི་དར་གྱིས་སྨད་གཡོགས་ཅན། །པདྨ་ཟླ་བའི་གདན་དབུས་སུ། །ཞབས་གཉིས་རྡོ་རྗེ་སྐྱིལ་ཀྲུང་བཞུགས། །ཞལ་གཅིག་ཕྱག་གཉིས་འཛུམ་བག་ཅན། །དུས་གསུམ་སངས་རྒྱས་སྐྱེད་པའི་ཡུམ། །ལྷ་མོ་ཁྱོད་ལ་རྟག་ཏུ་འདུད། །ཁྱོད་ལ་བག་ཙམ་བསྟོད་པ་ནི། །བདག་ཅག་བྱང་ཆུབ་སྒྲུབ་པ་ལ། །དུས་འདི་ནས་བཟུང་བྱང་ཆུབ་བར། །མི་མཐུན་ཕྱོགས་རྣམས་ཞི་གྱུར་ཅིག །མཐུན་རྐྱེན་ཕུན་སུམ་ཚོགས་པར་ཤོག། །།རིན་ཆེན་རི་བོའི་དབུས་ན་ལྷུན་པོ་དང་། །རབ་མཛེས་པདྨའི་ཚལ་ན་འདབ་སྟོང་ཅན། །རྣམ་དག་རྒྱུ་སྐར་མཁའ་ལ་ཟླ་བ་བཞིན། །རྨད་བྱུང་སེམས་དཔའི་དབུས་ན་འཕགས་མའི་སྐུ། །ཐ་སྙད་བརྗོད་པའི་སྤྲོས་པས་གོས་མིན་ཀྱང་། །སྣ་ཚོགས་གདུལ་བྱའི་སྐད་དུ་ཅིག་ཅར་དུ། །དག་གསལ་དྲི་མེད་སོ་སོར་ངེས་པའི་དོན། །ལེགས་སྟོན་རྩོལ་མེད་ཀུན་འགྲོ་འཕགས་མའི་གསུང་། །ཆོས་རྣམས་ཀུན་ལ་མི་གནས་ཆོས་ཀྱི་དབྱིངས། །རྣམ་དག་མངོན་སུམ་རྟོགས་ནས་སྣ་ཚོགས་དོན། །ཇི་བཞིན་གཟིགས་པ་དམིགས་པ་མེད་པའི་བདག །དུས་གསུམ་རྒྱལ་བ་ཀུན་
དང་དབྱེར་མེད་ཐུགས། །རྣམ་འཕྲུལ་དཔག་མེད་མཁའ་མཉམ་འགྲོ་བ་ཀུན། །རྗེས་སུ་འཛིན་མཛད་ཐུགས་རྗེའི་ཁྱོན་ཡངས་ཁྱོད། །གླིང་བཞིའི་མུན་སེལ་ཉི་མའི་དཀྱིལ་འཁོར་བཞིན། །ཚད་མེད་འགྲོ་བའི་དོན་ལ་ངལ་མ་གྱུར། །ནམ་མཁའི་ལམ་ལ་ཉིན་མོར་བྱེད་པ་དང་། །ཆུ་གཏེར་དབུས་ན་ལྷུན་པོའི་དཔལ་བཞིན་ཏུ། །འཕགས་མའི་ནང་ན་འཕགས་མའི་ལྷ་མོ་ཁྱོད། །བདག་གི་ཡིད་ལ་ཉེ་བ་ཉིད་རུ་མཛོད། །རྗེ་བཙུན་བཅོམ་ལྡན་འདས་མ་ཐུགས་རྗེ་ཅན། །བདག་དང་མཐའ་ཡས་སེམས་ཅན་ཐམས་ཅད་ཀྱི། །སྒྲིབ་གཉིས་བྱང་ཞིང་ཚོགས་གཉིས་མྱུར་རྫོགས་ཏེ། །རྫོགས་པའི་སངས་རྒྱས་ཐོབ་པར་མཛད་དུ་གསོལ། །དེ་མ་ཐོབ་ཀྱི་ཚེ་རབས་ཀུན་ཏུ་ཡང་། །ལྷ་དང་མི་ཡི་བདེ་བའི་མཆོག་ཐོབ་ནས། །ཐམས་ཅད་མཁྱེན་པ་སྒྲུབ་པར་བྱེད་པ་ལ། །བར་ཆད་གདོན་བགེགས་རིམས་དང་ནད་ལ་སོགས། །དུས་མིན་འཆི་བར་གྱུར་པ་སྣ་ཚོགས་དང་། །རྨི་ལམ་ངན་དང་མཚན་མ་ངན་པ་དང་། །འཇིག་པ་བརྒྱད་སོགས་ཉེ་བར་འཚེ་བ་རྣམས། །མྱུར་དུ་ཞི་ཞིང་མེད་པར་མཛད་དུ་
གསོལ། །འཇིག་རྟེན་འཇིག་རྟེན་ལས་ནི་འདས་པ་ཡི། །བཀྲ་ཤིས་བདེ་ལེགས་ཕུན་སུམ་ཚོགས་པ་རྣམས། །འཕེལ་ཞིང་རྒྱས་པའི་དོན་རྣམས་མ་ལུས་པ། །འབད་མེད་ལྷུན་གྱིས་གྲུབ་བར་མཛད་དུ་གསོལ། །སྒྲུབ་ལ་བརྩོན་ཞིང་དམ་ཆོས་འཕེལ་བ་དང་། །རྟག་ཏུ་ཁྱོད་སྒྲུབ་ཞལ་མཆོག་མཐོང་བ་དང་། །སྟོང་ཉིད་དོན་རྟོག་བྱང་སེམས་རིན་པོ་ཆེ། །ཡར་ངོའི་ཟླ་ལྟར་འཕེལ་ཞིང་རྒྱས་པར་མཛོད། །རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །པདྨོ་དམ་པ་ཤིན་ཏུ་མཛེས་ལས་སྐྱེས། །སྣང་བ་མཐའ་ཡས་རྒྱལ་བས་མངོན་སུམ་དུ། །ལུང་བསྟན་པ་ཡང་བདག་གིས་དེར་ཐོབ་ཤོག །བདག་གིས་ཚེ་རབས་ཀུན་ཏུ་བསྒྲུབས་པའི་ལྷ། །དུས་གསུམ་སངས་རྒྱས་ཀུན་གྱི་ཕྲིན་ལས་མ། །སྔོ་ལྗང་ཞལ་གཅིག་ཕྱག་གཉིས་མྱུར་ཞིང་དཔའ། །ཡུམ་གྱུར་ཨུཏྤལ་བསྣམས་པའི་བཀྲ་ཤིས་ཤོག། །།དེ་ནས་ཐུབ་དབང་གནས་བརྟན་འཁོར་བཅས་ལ་གསོལ་བ་གདབ་པའི་ཚུལ་ནི། ལག་མཐིལ་
ལྟར་མཉམ་རིན་ཆེན་རྒྱན་གྱིས་སྤྲས། །ལྗོན་ཤིང་ཆུ་མཚོས་བརྒྱན་པའི་ས་གཞིའི་དབུས། །རིན་ཆེན་ལས་གྲུབ་གྲུ་བཞི་སྒོ་བཞི་པ། །པདྨ་ཉི་ཟླས་བརྒྱན་པའི་གདན་སྟེང་དུ། །ཐུགས་རྗེས་རྩོད་པའི་དུས་ཀྱི་གདུལ་བྱ་རྣམས། །རྣམ་གྲོལ་ལམ་ལ་འགོད་མཛད་འགྲོ་བའི་མགོན། །ཐུབ་པ་མཆོག་དང་གནས་བརྟན་ཆེན་པོ་རྣམས། །འཁོར་དང་བཅས་པ་གནས་འདིར་གཤེགས་སུ་གསོལ། །ཕྱོགས་བཅུའི་རྒྱལ་བ་སྲས་བཅས་ཐམས་ཅད་དང་། །ཤེས་རབ་མེ་འབར་ཉོན་མོངས་མཚོ་སྐེམ་ཞིང་། །རྣམ་གྲོལ་བསོད་ནམས་ཞིང་དུ་བཀའ་སྡོད་པའི། །ཕྱོགས་བཅུའི་ཉན་ཐོས་དགེ་འདུན་བཞུགས་སོ་འཚལ། །ཡོན་སྦྱོང་མཆོད་པའི་གནས་སུ་སྤྱན་འདྲེན་གྱིས། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །འགྲོ་བའི་མགོན་པོ་ཤཱཀྱ་སེང་གེ་ཡི། །སངས་རྒྱས་བསྟན་པ་གང་གི་ཕྱག་ཏུ་བཞུགས། །གསུང་རབ་རིན་ཆེན་སྒྲོམ་གྱི་ཁ་འབྱེད་པའི། །
དགྲ་བཅོམ་གནས་བརྟན་ཆེན་པོ་བཞུགས་སོ་འཚལ། །དམ་ཆོས་སྤེལ་བའི་སླད་དུ་སྤྱན་འདྲེན་ན། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །ཐུབ་པས་བཀའ་བསྒོས་བསྟན་པའི་རྒྱལ་མཚན་འཛིན། །ཡན་ལག་འབྱུང་དང་མ་ཕམ་ནགས་ན་གནས། །དུས་ལྡན་རྡོ་རྗེ་མོའི་བུ་བཟང་པོ་དང་། །གསེར་བེའུ་བྷ་ར་དྷཱ་ཛ་གསེར་ཆེན་མཆོག །འཕགས་པ་བ་ཀུ་ལ་དང་སྒྲ་གཅན་འཛིན། །ལམ་ཕྲན་བྷ་ར་དྷྭ་ཛ་བསོད་སྙོམས་ལེན། །ལམ་བརྟན་ཀླུའི་སྡེ་སྦེད་བྱེད་མི་ཕྱེད་པ། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །སྤངས་དང་ཡེ་ཤེས་ཕུན་ཚོགས་སངས་རྒྱས་ཀྱང་། །གདུལ་བྱའི་དབང་གིས་ཉན་ཐོས་ཚུལ་འཛིན་ཅིང་། ཁྱད་པར་ཅན་གྱི་ཕྲིན་ལས་ཆོས་སྐྱོང་བའི། །གནས་བརྟན་བཅུ་དྲུག་འདིར་སྤྱོན་གདན་ལ་བཞུགས། །བདེ་གཤེགས་བཀའ་ལུང་གཙོར་མཛད་བསྟན་པ་སྲུང་། །རང་དོན་དོར་ནས་འཁོར་བའི་ནགས་ཚལ་དུ། །གཞན་དོན་ལྷུར་
མཛད་གནས་བརྟན་བཅུ་དྲུག་པོ། །དམ་བཅས་ཐུགས་རྗེའི་དབང་གིས་གནས་འདིར་གཤེགས། །དགེ་བསྙེན་སྐྱབས་གསོལ་བདེན་པའི་ཚིགས་ཉན་པ། །དཀོན་མཆོག་གསུམ་གྱི་ཞབས་འབྲིང་མཆིས་སོ་འཚལ། །བསོད་ནམས་རིན་ཆེན་གླིང་དུ་སྤྱན་འདྲེན་ན། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། ༈ །མཚུངས་མེད་བལྟ་བས་མི་ངོམས་པ། །གསེར་གྱི་མདོག་ཅན་མཛེས་པའི་སྐུ། །ཞལ་གཅིག་ཕྱག་གཉིས་སྐྱིལ་ཀྲུང་བཞུགས། །ས་གནོན་མཉམ་གཞག་མཛད་ཕྱག་འཚལ། །བསྟན་པ་རྒྱས་པར་བྱིན་གྱིས་རློབས། །ཞེས་པ་ཀུན་ལ་འགྲེའོ། །གངས་རི་ཆེན་པོ་ཏི་སེ་ན། །འཕགས་པ་གནས་བརྟན་ཡན་ལག་འབྱུང་། །དགྲ་བཅོམ་སྟོང་དང་སུམ་བརྒྱས་བསྐོར། །སྤོས་ཕོར་རྔ་གཡབ་འཛིན༴ དྲང་སྲོང་རི་ཡི་ཤེལ་ནགས་ལ། །འཕགས་པ་གནས་བརྟན་མ་ཕམ་པ། །དགྲ་བཅོམ་བརྒྱ་ཕྲག་གཅིག་གིས་བསྐོར། །ཕྱག་གཉིས་མཉམ་གཞག་
མཛད༴ ལོ་མ་བདུན་པའི་རི་ཕུག་ན། །འཕགས་པ་གནས་བརྟན་ནགས་ན་གནས། །དགྲ་བཅོམ་སྟོང་དང་བཞི་བརྒྱས་བསྐོར། །སྡིགས་མཛུབ་རྔ་གཡབ་འཛིན༴ ཛམྦུ་གླིང་གིས་ཟངས་གླིང་ན། །འཕགས་པ་གནས་བརྟན་དུས་ལྡན་ཏེ། །དགྲ་བཅོམ་སྟོང་དང་ཆིག་བརྒྱས་བསྐོར། །གསེར་གྱི་རྣ་ཀོར་འཛིན༴ སིངྒ་ལ་ཡི་གླིང་ན་ནི། །གནས་བརྟན་རྡོ་རྗེ་མོ་ཡི་བུ། །དགྲ་བཅོམ་སྟོང་ཕྲག་གཅིག་གིས་བསྐོར། །སྡིགས་མཛུབ་རྔ་གཡབ་འཛིན༴ ཆུ་བོ་ཡ་མུ་ནའི་གླིང་ན། །འཕགས་པ་གནས་བརྟན་བཟང་པོ་ནི། །དགྲ་བཅོམ་སྟོང་དང་ཉིས་བརྒྱས་བསྐོར། །ཆོས་འཆད་མཉམ་གཞག་མཛད༴ གནས་མཆོག་དམ་པ་ཁ་ཆེ་ན། །འཕགས་པ་གནས་བརྟན་གསེར་བེའུ། །དགྲ་བཅོམ་ཆེན་པོ་ལྔ་བརྒྱས་བསྐོར། །རིན་ཆེན་ཞགས་པ་འཛིན༴ ནུབ་ཀྱི་བ་ལང་སྤྱོད་ན་ནི། །བྷ་ར་དྷཱ་ཛ་གསེར་ཆེན་མཆོག །དགྲ་བཅོམ་ཆེན་པོ་བདུན་བརྒྱས་བསྐོར། །ཕྱག་གཉིས་མཉམ་གཞག་
མཛད༴ བྱང་གི་སྒྲ་མི་སྙན་ན་ནི། །འཕགས་པ་གནས་བརྟན་བ་ཀུ་ལ། །དགྲ་བཅོམ་ཆེན་པོ་དགུ་བརྒྱས་བསྐོར། །ཕྱག་གཡོན་ནེའུ་ལེ་འཛིན༴ པྲི་ཡང་ཀུ་ཡི་གླིང་ན་ནི། །འཕགས་པ་གནས་བརྟན་སྒྲ་གཅན་འཛིན། །དགྲ་བཅོམ་སྟོང་དང་ཆིག་བརྒྱས་བསྐོར། །རིན་ཆེན་པྲོག་ཞུ་འཛིན༴ བྱ་རྒོད་ཕུང་པོའི་རི་བོ་ལ། །འཕགས་པ་གནས་བརྟན་ལམ་ཕྲན་བརྟན། །དགྲ་བཅོམ་སྟོང་དང་དྲུག་བརྒྱས་བསྐོར། །ཕྱག་གཉིས་མཉམ་གཞག་མཛད༴ ཤར་གྱི་ལུས་འཕགས་གླིང་ན་ནི། །བྷ་ར་དྷྭ་ཛ་བསོད་སྙོམས་ལེན། །དགྲ་བཅོམ་སྟོང་ཕྲག་གཅིག་གིས་བསྐོར། །གླེགས་བམ་ལྷུང་བཟེད་འཛིན༴ ལྷ་གནས་སུམ་ཅུ་རྩ་གསུམ་ན། །འཕགས་པ་གནས་བརྟན་ལམ་བརྟན་ནི། །དགྲ་བཅོམ་ཆེན་པོ་དགུ་བརྒྱས་བསྐོར། །གླེགས་བམ་ཆོས་འཆད་མཛད༴ རི་ཡི་རྒྱལ་པོ་ངོས་ཡང་ལ། །འཕགས་པ་གནས་བརྟན་ཀླུ་ཡི་སྡེ། །དགྲ་བཅོམ་སྟོང་དང་ཉིས་བརྒྱས་
བསྐོར། །བུམ་པ་འཁར་གསིལ་འཛིན༴ རི་ཡི་རྒྱལ་པོ་བྷེ་ཧུ་ལ། །འཕགས་པ་གནས་བརྟན་སྦེད་བྱེད་ནི། །དགྲ་བཅོམ་སྟོང་དང་བཞི་བརྒྱས་བསྐོར། །ཕྱག་གཉིས་གླེགས་བམ་འཛིན༴ རི་ཡི་རྒྱལ་པོ་གངས་ཅན་ལ། །འཕགས་པ་གནས་བརྟན་མི་བྱེད་པ། །དགྲ་བཅོམ་སྟོང་ཕྲག་གཅིག་གིས་བསྐོར། །བྱང་ཆེན་མཆོད་རྟེན་འཛིན༴ འཕགས་པའི་དགེ་བསྙེན་དྷརྨ་ཏཱ། །རལ་པའི་ཐོད་བཅིངས་གླེགས་བམ་ཁུར། །སྣང་བ་མཐའ་ཡས་མདུན་ན་བཞུགས། །རྔ་གཡབ་བུམ་པ་འཛིན་ཕྱག་འཚལ། །བསྟན་པ་རྒྱས་པར་བྱིན་གྱིས་རློབས། །བརྩོན་པས་གོ་བགོས་མཐུ་སྟོབས་ཅན། །སངས་རྒྱས་བསྟན་པ་ལེགས་སྐྱོང་བའི། །ཤར་ལྷོ་ནུབ་བྱང་ཕྱོགས་བཞི་ཡི། །རྒྱལ་ཆེན་བཞི་ལ་ཕྱག་འཚལ་ལོ། །བསྟན་པ་རྒྱས་པར་བྱིན་གྱིས་རློབས། ༈ །སངས་རྒྱས་སྤྲུལ་པ་དགྲ་བཅོམ་འཕགས་པའི་ཚོགས། །འགྲོ་བའི་དོན་དུ་བསྟན་པ་སྐྱོང་མཛད་པའི། །དཀོན་མཆོག་གསུམ་དངོས་
གནས་བརྟན་བཅུ་དྲུག་གིས། །བསྟན་པ་ཡུན་རིང་གནས་པར་བྱིན་གྱིས་རློབས། །ཐུགས་རྗེའི་བདག་ཉིད་གནས་བརྟན་བཅུ་དྲུག་གི། །འཁོར་ཚོགས་སྲིད་མཚོ་ལས་བརྒལ་ཉོན་མོངས་མེད། །ཁྲི་དང་དྲུག་སྟོང་བཞི་བརྒྱའི་ཚོགས་རྣམས་ཀྱིས། །བསྟན་པ་ཡུན་རིང་གནས་པར་བྱིན་གྱིས་རློབས། །བསོད་ནམས་རྒྱ་མཚོ་ཡོངས་སུ་རྫོགས་བྱེད་ཅིང་། །ཡེ་ཤེས་རྒྱ་མཚོ་རྣམ་པར་དག་གྱུར་ཏེ། །ཡོན་ཏན་རྒྱ་མཚོ་མ་ལུས་ཀུན་རྫོགས་ནས། །འཇིག་རྟེན་ཀུན་ལས་ཁྱད་པར་འཕགས་པར་ཤོག །དུས་གསུམ་རྒྱལ་བ་རྒྱལ་སྲས་ཐུགས་རྗེ་ཡིས། །ཉན་ཐོས་ཚུལ་བཟུང་སྲིད་པ་ཇི་སྲིད་པར། །བསྟན་པ་སྐྱོང་ཞིང་འགྲོ་བའི་དོན་མཛད་པ། །གནས་བརྟན་ཆེན་པོ་རྣམས་ཀྱི་བཀྲ་ཤིས་ཤོག །ཞེས་པཎ་ཆེན་ཤཱཀ་ཤྲཱིས་སོ། །དེ་ནས་བཀའ་བརྒྱུད་ཀྱི་བླ་མ་སོ་སོའི་སྐུ་བསྟོད་དང་གསོལ་འདེབས་གྱི་སྐོར་ལ། ཐོག་མར་ཇོ་བོ་ཡབ་སྲས་ཀྱི་སྐུ་བསྟོད་ནི། ༀ་བདེ་ལེགས་སུ་གྱུར་ཅིག །ཕུན་སུམ་ཚོགས་པ་བྷཾ་ག་
ལ་ཡི་ཡུལ། །ཆོ་རིགས་བཙུན་པ་ཟ་ཧོར་རྒྱལ་པོའི་རིགས། །བྱང་ཆུབ་སེམས་དཔའ་ཞི་འཚོ་འཁྲུངས་པའི་རྒྱུད། །མར་མེ་མཛད་པའི་ཞབས་ལ་གསོལ་བ་འདེབས། །ཡབ་དང་ཡུམ་ལ་སྲི་ཞུ་མཁས་ཤིང་གུས། །གཟུགས་མཛེས་ཡིད་འོང་ཤེས་རབ་སྙིང་བརྩེར་ལྡན། །དུལ་ཞིང་རྒྱུད་འཇམ་ཐབས་མཁས་སྙིང་སྟོབས་ཆེ། །མར་མེ་མཛད་པའི་ཞབས་ལ་གསོལ་བ་འདེབས། །འཇིག་རྟེན་ལུགས་ཀྱི་བསྟན་བཅོས་མང་པོ་དང་། །བཟོ་དང་གསོ་བ་སྒྱུ་རྩལ་སྣ་ཚོགས་དང་། །རིག་བྱེད་ཀུན་ལ་མཁས་ཤིང་གོམས་པ་ཡི། །མར་མེ་མཛད་པའི་ཞབས་ལ་གསོལ་བ་འདེབས། །འདོད་པའི་ཡོན་ཏན་རྣམས་ལ་མ་ཆགས་ཤིང་། །རྒྱལ་སྲིད་འབྱོར་པ་ཕུན་ཚོགས་སྤངས་ནས་ཀྱང་། །དགེ་འདུན་ཕལ་ཆེར་སྡེ་པའི་དགེ་སློང་མཛད། །མར་མེ་མཛད་པའི་ཞབས་ལ་གསོལ་བ་འདེབས། །འདུལ་བའི་སྡེ་སྣོད་སྡེ་བཞི་ལས་གསུངས་པའི། །བདེ་བར་གཤེགས་པའི་བསླབ་པ་
བཅས་པ་ལ། །ཉེས་པའི་སྐྱོན་གྱིས་མ་གོས་རྣམ་པར་དག །དཔལ་ལྡན་ཨ་ཏི་ཤ་ལ་གསོལ་བ་འདེབས། ༈ །ཡོངས་སུ་འཛིན་པའི་མཁས་པ་མང་བསྟེན་ནས། །སྡེ་སྣོད་གསུམ་དང་སྒྲ་དང་ཚད་མ་དང་། །མན་ངག་ཀུན་ལ་མཁས་ཤིང་མཁྱེན་པ་རྒྱས། །དཔལ་ལྡན་ཨ་ཏི་ཤ་ལ་གསོལ་བ་འདེབས། །གསེར་གླིང་རྒྱལ་པོ་ས་སྐྱོང་བླ་མ་ལས། །བྱང་ཆུབ་སེམས་ཀྱི་བདུད་རྩི་སྨན་བླངས་ནས། །འགྲོ་བ་ཀུན་ལ་ཕན་པར་མཛད་པ་ཡི། །དཔལ་ལྡན་ཨ་ཏི་ཤ་ལ་གསོལ་བ་འདེབས། །ཞེས་ཀུན་ལ་འགྲེ། སེམས་ཅན་ཕོངས་ཤིང་ཤིན་ཏུ་སྡུག་བསྔལ་བ། །རབ་ཏུ་མང་ལ་སྙིང་ནས་བརྩེ་བ་ཡིས། །འཇིག་རྟེན་ལྷ་དང་ལྷ་མིན་མིར་བཅས་པའི། །སྐྱོབ་པ་ཡབ་གཅིག་པུ་ལ༴ གྲུབ་པ་བརྙེས་པའི་བླ་མ་དམ་པ་ལ། །ཡི་དམ་ལྷ་ཡི་མངོན་རྟོགས་ལུང་མནོས་ནས། །བསྒྲུབ་པ་རྩེ་གཅིག་སྙིང་པོར་མཛད་པ་ཡིས། །ལུང་བསྟན་ཐོབ་པར་གྱུར་ལ༴ གདུལ་བྱ་བོད་དུ་ཡོད་
པར་དགོངས་ནས་ནི། །ཁ་བ་ཅན་གྱི་ལྗོངས་སུ་བྱོན་ནས་ཀྱང་། །སྡེ་པ་མི་ཆེན་རྣམས་ཀྱི་བླ་མ་མཛད། །མཆོད་ཅིང་བཀུར་འོས་ཁྱོད་ལ༴ མཁས་མཆོག་ཁྱོད་འདྲ་བོད་དུ་མ་བྱོན་ན། །སངས་རྒྱས་བསྟན་པ་ཡོད་པར་གྱུར་ཀྱང་ནི། །ཕལ་ཆེར་ཟབ་མོའི་དོན་ལ་རྨོངས་གྱུར་པས། །ལེགས་པར་སྟོན་མཛད་ཁྱོད་ལ༴ བསྟན་བཅོས་སྒྱུར་དང་བསྒྱུར་ཟིན་འཆོས་པ་དང་། །དེ་ཉིད་འཆད་དང་རང་གིས་རྩོམ་པ་དང་། །ཡང་དག་ལམ་ལ་སློབ་མ་འཁྲིད་མཛད་པའི། །བསྟན་པ་རྒྱས་པར་མཛད་ལ༴ ལྟ་ངན་ལ་ཞེན་ལོག་པའི་ལམ་ལ་ཞུགས། །བདུད་དང་དབང་ཕྱུག་མུ་སྟེགས་གྲུབ་མཐའ་ངན། །རིགས་པས་ཚར་བཅད་ཐར་པའི་ལམ་ལ་བཀོད། །ཐར་འདོད་དེད་དཔོན་མཆོག་ལ༴ ༈ སྦྱིན་དང་ཚུལ་ཁྲིམས་བཟོད་དང་བརྩོན་འགྲུས་དང་། །བསམ་གཏན་ཤེས་རབ་ཕ་རོལ་ཕྱིན་པ་དྲུག །སྐྱེ་བ་དུ་མར་ཡང་ཡང་གོམས་པ་ཡི། །ཚོགས་གཉིས་ཡོངས་སུ་རྫོགས་ལ༴ མཁོ་བ་
སྦྱིན་དང་སྙན་པར་སྨྲ་བ་དང་། །འཇིག་རྟེན་དོན་མཐུན་གདུལ་བྱའི་དོན་སྤྱོད་པ། །བསྡུ་བའི་དངོས་པོ་བཞི་ཡི་དཔལ་འབྱོར་གྱིས། །གཞན་དོན་ལྷུན་མཛད་ཁྱོད་ལ༴ དད་དང་ཚུལ་ཁྲིམས་ཐོས་དང་གཏོང་བ་དང་། །ཤེས་རབ་ཁྲེལ་ཡོད་ངོ་ཚ་ཤེས་པ་སྟེ། །ནོར་བདུན་དག་གིས་ཕྱུག་པར་གྱུར་པ་ཡི། །ཡོན་ཏན་འབྱུང་གནས་ཁྱོད་ལ༴ སྔོན་ཚེ་སྨོན་ལམ་བཏབ་པའི་སློབ་མ་མཆོག །རྒྱལ་བའི་འབྱུང་གནས་རིང་ནས་འོངས་བའི་ཚེ། །ཨུ་བཱ་སི་ཀས་ད་རིང་སླེབ་པོ་ཞེས། །ལྷ་མིག་མངོན་ཤེས་མངའ་ལ༴ མ་ག་དྷ་ནས་སློབ་མ་གུས་པ་ཡིས། །སིལ་སྙན་དཀྲོལ་ཞིང་གསོལ་བ་བཏབ་པའི་སྐད། །བོད་དུ་གསན་ནས་འབྲོམ་པ་སྦྲན་པ་ལས། །རྣ་བའི་མངོན་ཤེས་མངའ་ལ༴ ལྷ་སར་ལྷ་ཡི་རོལ་མོ་གྲག་པ་ལས། །མྱུར་དུ་བྱོན་ནས་བར་སྣང་ལྷ་ཚོགས་ལ། །ཕྱག་རྟེན་ཕུལ་ནས་མཁའ་ལ་བསྐོར་བ་མཛད། །རྫུ་འཕྲུལ་མངོན་ཤེས་མངའ་ལ༴ གང་དུ་རྒྱལ་པོའི་
བཀའ་ཆེམས་གཏེར་དུ་སྦས། །མཁའ་འགྲོས་གཏེར་ཁ་ཕྱེ་ནས་ཁྱོད་ལ་གཏད། །ཤཱཀྱ་མུ་ནིའི་འཇའ་ས་ཁྱོད་ཀྱི་དྲིན། །ཇོ་བོ་བཀའ་དྲིན་ཅན་ལ༴ ས་བདག་ནད་ཀྱིས་ཟིན་པའི་མི་རྣམས་ལ། །རྟག་པར་ཚེ་འཛིན་བསྲུང་བའི་སྐོར་རྣམས་ཀྱང་། །ཁྱོད་ལས་བྱུང་སྟེ་འགྲོ་བའི་ནད་གསོ་མཛད། །ཀླུ་སྒྲུབ་གཉིས་པར་གྲགས་ལ༴ སྙེ་ཐང་འོར་དུ་བྱེ་མའི་སྟེང་བཞུགས་ཚེ། །བརྒྱ་བྱིན་ལ་སོགས་བར་སྣང་ལྷ་ཚོགས་ཀྱིས། །རིན་ཆེན་སྣ་ལྔའི་མེ་ཏོག་ཆར་པ་ཕབ། །བླ་མ་ལྷ་ཡི་ལྷ་ལ༴ གཡོར་པོ་འཆིང་རུར་བུ་མོས་མགུལ་རྒྱན་ཕུལ། །ཤི་བ་གསན་ནས་དེ་ཡི་སྒྲིབ་སྦྱོང་མཛད། །རིགས་ཀྱི་བུ་མོ་ལྷ་རུ་སྐྱེ་ཞེས་གསུངས། །འགྲོ་བ་འདྲེན་མཛད་ཁྱོད་ལ༴ ཁོ་བོ་འདི་ནས་དགའ་ལྡན་གནས་སུ་འགྲོ། །ང་ལ་དད་ཅིང་གུས་པར་བྱེད་པ་རྣམས། །དགའ་ལྡན་གནས་སུ་མཇལ་བར་འགྱུར་ཞེས་གསུངས། །མ་འོངས་མངོན་སུམ་གཟིགས་ལ༴ དགའ་ལྡན་གནས་ན་ནམ་མཁའ་དྲི་མ་
མེད། །འཕགས་པའི་ཡུལ་ན་དཱི་པཾ་ཀ་ར་ཞེས། །ཁ་བ་ཅན་འདིར་དཔལ་ལྡན་ཨ་ཏི་ཤ །ས་སྟེངས་གྲགས་པས་ཁྱབ་ལ༴ འབྲོམ་སྟོན་བདག་གིས་ར་སྒྲེང་ལྷ་ཁང་བཞེངས། །འགྲོ་བ་འདྲེན་ཕྱིར་གསོལ་བ་བཏབ་པ་ལས། །དགའ་ལྡན་གནས་ནས་རབ་གནས་མེ་ཏོག་འཐོར། །བྱིན་རླབས་མངོན་སུམ་འབེབས་ལ་གསོལ་བ་འདེབས། །ཁྱོད་ཀྱི་ཡོན་ཏན་མཐོང་དང་ཐོས་པ་ལས། །དང་བའི་ཡིད་ཀྱིས་ལྷང་ལྷང་གསོལ་འདེབས་ན། །དགའ་ལྡན་གནས་ནས་ཐུགས་རྗེས་གཟིགས་མཛོད་ལ། །གསོལ་བ་བཏབ་ལ་བྱིན་གྱིས་བརླབ་ཏུ་གསོལ། །ད་དུང་ཁ་བ་ཅན་ན་ཁྱོད་ཉིད་ལ། །དད་ཅིང་རྗེས་སུ་སློབ་མ་མང་ཡོད་ཀྱི། །ཐུགས་རྗེ་མངའ་བས་བུ་ལ་མ་བཞིན་དུ། །བརྩེ་བས་བདག་གིས་གཤེས་གཉེན་མཛད་དུ་གསོལ། །སྙིགས་དུས་སྐྱེ་བོ་དམུས་ལོང་ལྟ་བུ་རྣམས། །དམ་མིན་དགེ་བའི་བཤེས་འདྲས་རྗེས་བཟུང་ནས། །འཁོར་བའི་གཅོང་རོང་
གནས་ནས་འདྲེན་མེད་རྣམས། །ཐུགས་རྗེའི་ལྕགས་ཀྱུས་མྱུར་བར་དྲང་དུ་གསོལ། །དུས་དང་གནས་སྐབས་དག་ནི་ཐམས་ཅད་དུ། །དམ་པ་ཁྱོད་ནི་བདག་གི་མགོན་ལགས་ཀྱི། །མངོན་པར་རྫོགས་པར་སངས་རྒྱས་ཚེ་ན་ཡང་། །ཐོག་མར་ཆོས་སྦྱིན་བདག་ལ་སྩལ་དུ་གསོལ། ༈ ཡོངས་ཀྱི་དགེ་བའི་བཤེས་གཉེན་ཡོངས་ཀྱི་མགོན། །རྒྱལ་བའི་གདུང་ཚབ་གྱུར་པ་རྒྱལ་བའི་སྲས། །རང་གཞན་དོན་གཉིས་འབྱུང་གནས་རིན་པོ་ཆེ། །བཤེས་གཉེན་སྟོན་པའི་ཞབས་ལ་གསོལ་བ་འདེབས། །བསྐལ་པ་དུ་མར་ཚོགས་གཉིས་གོམས་པའི་མཐུས། །གནས་གསུམ་དོན་ལ་མཁྱེན་པའི་དཀྱིལ་འཁོར་རྒྱས། །ཨ་ཏི་ཤ་ཡི་སྲས་ཀྱི་ཐུ་བོ་པ། །ལེགས་པའི་ཤེས་རབ་ཞབས་ལ་གསོལ་བ་འདེབས། །མར་མེ་མཛད་དཔལ་རྒྱལ་བ་ཀུན་གྱི་ཡབ། །རྒྱལ་བའི་འབྱུང་གནས་རྒྱལ་བ་རྒྱ་མཚོ་ལས། །གདམས་པའི་ཁུ་བ་བཏོན་ནས་ཚིམ་མཛད་པའི། །བརྩོན་འགྲུས་གཡུང་དྲུང་
ཞབས་ལ་གསོལ་བ་འདེབས། །ལོང་མེད་ཐུགས་ལ་འཁྲུངས་པའི་སྤོ་ཏོ་བ། །བདག་པས་གཞན་གཅེས་སྒོམ་པའི་སྤྱན་སྔ་བ། །བསྒྲུབ་པ་སྙིང་པོར་མཛད་པའི་ཕུ་ཆུང་བ། །རྒྱལ་སྲས་སྐུ་མཆེད་གསུམ་ལ་གསོལ་བ་འདེབས། །སྐྱེ་བ་ཀུན་ཏུ་ཇོ་བོ་ཡབ་སྲས་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། །ས་དང་ལམ་གྱི་ཡོན་ཏན་རབ་རྫོགས་ནས། །ཇོ་བོ་ཡབ་སྲས་གོ་འཕང་མྱུར་ཐོབ་ཤོག །ཅེས་འབྲོམ་སྟོན་གྱི་གསོལ་བ་བཏབ་པའོ། །རྔོག་ལོ་ཆེན་པོའི་བསྟོད་པ་ནི། སྭ་སྟི། དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྙིང་གར་པདྨའི་གདན་བཞུགས་ལ། །བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །རྒྱལ་བའི་མདུན་ན་རྒྱལ་སྲས་བཟང་པོ་སྐྱོང་། །ཁ་བ་ཅན་ན་དཔལ་ལྡན་མར་མེ་མཛད། །དགའ་ལྡན་གནས་ན་ནམ་མཁའ་དྲི་མ་མེད། །ཡིད་བཞིན་ནོར་བུ་ལྟ་བུར་གཞན་དོན་མཛད། །དཔལ་ལྡན་ཨ་ཏི་
ཤ་ལ་ཕྱག་འཚལ་ལོ། །འགྲེའོ། །བསྐལ་པ་དུ་མར་ཚོགས་གཉིས་གོམས་པའི་མཐུས། །གནས་གསུམ་དོན་ལ་མཁྱེན་པའི་དཀྱིལ་འཁོར་རྒྱས། ཁ་བ་ཅན་དུ་བསྟན་པའི་སྒྲོན་མེ་སྦར། ཨ་ཏི་ཤ་ཡི་སྲས་ཀྱི་ཐུ་བོ་པ། །ལེགས་པའི་ཤེས་རབ་ཞབས་ལ༴ རྒྱ་གར་ཤར་ནུབ་ལི་དང་བལ་པོའི་ཡུལ། །མཁས་གྲུབ་དུ་མའི་ལེགས་བཤད་བདུད་རྩིའི་རྒྱུན། །རྣམ་དཔྱོད་བློ་ཡི་བུམ་པར་ལེགས་བསྡུས་ནས། །བོད་ཡུལ་རྨོངས་པའི་དྲི་མ་སེལ་མཛད་པ། །བློ་ལྡན་ཤེས་རབ་ཞབས་ལ༴ བློ་གྲོས་མཚུངས་མེད་འཇིག་རྟེན་ཀུན་གྱི་མིག །ཕྱོགས་ལས་རྣམ་རྒྱལ་རིགས་པའི་དབང་ཕྱུག་གཙོ། །སྨྲ་བའི་སེང་གེ་བློ་ལྡན་ཤེས་རབ་ཅེས། །གྲགས་པ་བསམ་ཡས་ནམ་མཁའི་མཐར་སོན་པ། །བློ་ལྡན་ཤེས་རབ་ཞབས༴ བསྐལ་པ་བྱེ་བ་སྟོང་དུ་ལེགས་སྦྱངས་པས། །དྲི་མེད་ཡོངས་སུ་དག་པའི་ཐུགས་མངའ་ཞིང་། །ངལ་བརྒྱས་རིགས་པའི་འབྱུང་གནས་དུ་མར་ནི། །དམ་པ་ཉེར་བསྟེན་དཀའ་
བ་ཀུན་རྫོགས་པ། །བློ་ལྡན༴ རྣམ་འགྲེལ་མཛད་གཞུང་རིགས་པའི་ཐུར་མ་ཡིས། །ལེགས་པར་བྱེ་བའི་བློ་མིག་དག་པ་ལ། །ཐུབ་པའི་གསུངས་རབ་འོད་ཀྱིས་རབ་གསལ་བའི། །ཤེས་བྱ་མཐའ་མེད་ཇི་བཞིན་སྣང་བ་ཅན། །བློ་ལྡན༴ གྲགས་པའི་སྤོ་ལ་སྤོབས་པའི་གཟི་འབར་བའི། །ཤེས་རབ་དཀྱིལ་འཁོར་གསུང་གི་ཟེར་འགྱེད་པས། །སྐལ་ལྡན་བློ་ཡི་པདྨོ་ཁ་འབྱེད་ཅིང་། །མི་ཤེས་མུན་ནག་དཔྱིས་འབྱིན་མཛད་པ་པོ། །བློ་ལྡན༴ གངས་ཁྲོད་སྡེ་སྣོད་འཛིན་པའི་ཅོད་པན་གྱིས། །ཁྱོད་ཀྱི་ཞབས་ཀྱི་པདྨོ་རྣམ་མཛེས་ཤིང་། །རིགས་པར་སྨྲ་བའི་སེང་གེའི་སྒྲ་དབྱངས་ཀྱིས། །གཞུང་ལུགས་སྨྲ་བའི་ཝ་ཚོགས་སྐྲག་མཛད་པ། །བློ་ལྡན༴ བརྩེ་བས་སྐལ་ལྡན་འགྲོ་བ་རྗེས་འཛིན་ཅིང་། །ཐུབ་པའི་བསྟན་པ་ཕྱོགས་བཅུར་རྒྱས་མཛད་པས། །ལྷར་བཅས་འཇིག་རྟེན་ཀུན་གྱི་མཆོད་པའི་གནས། །མི་ཡི་དབང་པོ་མཆོག་ལ་མགོས་ཕྱག་འཚལ། །
སྙིགས་མའི་དུས་འདིར་ཐུབ་པའི་བསྟན་པ་ལ། །སྟོན་པ་གཉིས་གྱུར་བློ་གྲོས་ཡོངས་སུ་གསལ། །རྒྱལ་སྲས་བརྩེ་ལྡན་བསྟན་པའི་ཁུར་འཛིན་པ། །ཀུན་ལས་རྣམ་མཛེས་ཁྱོད་ལ༴ དཀའ་བ་ལྷུར་ལེན་སྲོག་ལའང་མི་འཛེམ་པར། །རྒྱ་གར་ཡུལ་དུ་གཤེགས་ནས་ལུང་རིགས་གཉིས། །ལེགས་བསྒྱུར་མུན་རུམ་གནས་པའི་ས་ཕྱོགས་འདིར། །བསྟན་པ་གསལ་མཛད་ཁྱོད་ལ༴ བྱང་ཕྱོགས་གངས་རིའི་ཁྲོད་འདིར་གཞན་དག་དང་། །མཚུངས་བྲལ་ཤེས་རབ་མཆོག་གི་རྩལ་ལྡན་པས། །མངོན་རློམ་རི་དྭགས་ཚོགས་རྣམས་སྐྲག་མཛད་པ། །མི་ཡི་སེང་གེ་ཁྱོད་ལ༴ ཁ་བ་ཅན་ལྗོངས་སངས་རྒྱས་བསྟན་པའི་བདག །སྲིད་པ་གསུམ་གྱི་ས་མཁན་སྟོན་པར་གྲགས། །རྒྱལ་བས་ལུང་བསྟན་བརྙེས་པའི་ལོ་ཙཱ་བ། །བློ་ལྡན་ཤེས་རབ་ཞབས་ལ༴ དང་བའི་སེམས་ཀྱིས་འབད་པ་ལྷུར་བླངས་ནས། །བརྩེ་ལྡན་ཁྱོད་ལ་གསོལ་བ་བཏབ་པ་ལས། །བསོད་ནམས་རྙེད་དང་སྨོན་ལམ་རྣམ་
དག་མཐུས། །བདག་དང་མཐའ་ཡས་སེམས་ཅན་མ་ལུས་པ། །བསྟན་པའི་ཁུར་འཛིན་བློ་ལྡན་ཤེས་རབ་ཁྱེད། །ནམ་ཞིག་འགྲོ་བའི་བླ་མར་གྱུར་པའི་ཚེ། །འདྲེན་པ་ཁྱོད་ཀྱི་གདུལ་བྱར་རབ་གྱུར་ནས། །ཉོན་མོངས་གཡུལ་ལས་རྣམ་པར་རྒྱལ་བར་ཤོག །སྤྱད་པས་མི་ངོམས་བདེ་བ་མནོག་ཆུང་བའི། །འདོད་ཡོན་ལྔ་ལ་ཆགས་པ་རྣམ་སྤངས་ནས། །སྐྱེ་དང་སྐྱེ་བར་ཁྱོད་ཀྱི་ཞབས་དྲུང་དུ། །སྤོང་བ་ལྷུར་ལེན་ཐོས་ལ་འདུན་པར་ཤོག །སྐྱེས་ཆེན་ཁྱོད་ཀྱི་ཐུགས་རྗེའི་ལྕགས་ཀྱུ་ཡིས། །ལྷག་པར་མོས་པ་བདག་སོགས་རྗེས་བཟུང་ནས། །བཞུགས་གནས་ཕོ་བྲང་འདི་དག་ལོངས་སྤྱོད་དང་། །ཆོས་ཀྱིས་རྒྱས་པར་བྱིན་གྱིས་བརླབ་ཏུ་གསོལ། །སྐྱེ་བ་ཀུན་ཏུ་ཡང་དག་བླ་མ་དང་། །སོགས་དང་། དཔལ་ལྡན་བླ་མ་ཁྱེད་སྐུ་ཅི་འདྲ་དང་། །སོགས་བྱ། ཚོགས་གཉིས་མཐར་ཕྱིན་དུས་གསུམ་རྒྱལ་བ་ཡི། །ཕྲིན་ལས་སྒྲུབ་ཅིང་ཡོན་ཏན་རྣམ་དབྱེར་མེད། །སྐལ་པ་
མཉམ་པའི་གདུལ་བྱ་སྨིན་མཛད་པ། །མཉམ་མེད་བླ་མ་མཆོག་གི་བཀྲ་ཤིས་ཤོག །།གོང་མ་རྣམ་གསུམ་གྱི་སྐུ་བསྟོད་ནི། ལ་ལཱ་ར་སཱ་དྷཱུ་ཏཱིར་དག་པའི་མཐུས། །དབེན་གསུམ་བདུད་རྩིས་བརླན་པའི་པདྨ་ཅན། །མི་ཤིགས་སྙིང་པོའི་ཆར་ཡང་རྡོ་རྗེའི་སྲོག །ལོ་ཙཱ་ཆེན་པོའི་ཞབས་ལ་གསོལ་བ་འདེབས། །སྒྱུ་འཕྲུལ་དྲ་བའི་ཆ་ཤས་བཅུ་དྲུག་རྫོགས། །ཉིན་བྱེད་ཉི་ཤུའི་འོད་ཟེར་རྣམ་པར་འཕྲོ། །ཆགས་སྡང་རྨོངས་པ་ཆེན་པོའི་ཕ་རོལ་སོན། །ལོ་ཙཱ་ཱཆེན་པོ་ཞབས་ལ་གསོལ་བ་འདེབས། །དངོས་ཀུན་བྱང་ཆུབ་ཉེ་བར་ཐོབ་པས་སྡུད། །སྐད་ཅིག་མཁའ་སྣང་རྡུལ་མུན་མཆོག་ཏུ་རྫོགས། །ཐིག་རླུང་འགྱུར་མེད་སྣ་ཚོགས་རོ་ཡིས་མྱོས། །ལོ་ཙཱ་ཱཆེན་པོ་ཞབས་ལ་གསོལ་བ་འདེབས། །དགྱེས་མཛད་སྡོམ་པ་དཔལ་ལྡན་འདུས་པ་སྟེ། །ཁྱབ་བདག་དུས་འཁོར་བཅོམ་ལྡན་རྡོ་རྗེ་སེམས། །རྡོ་རྗེ་སློབ་དཔོན་གཟུགས་ཀྱིས་མངོན་སྤྲུལ་པ། །ལོ་ཙཱ་ཆེན་པོའི་ཞབས་ལ་གསོལ་བ་
འདེབས། །བདག་ཀྱང་ཤེས་རབ་བཅོམ་ལྡན་འདས་མ་དང་། །ཧེ་རུ་ཀ་དཔལ་སྙོམས་པར་འཇུག་པ་ལ། །སྤྱི་བོར་རིགས་བདག་མཆོག་གིས་སྦ་བ་ཡི། །ལོ་ཙཱ་ཆེན་པོའི་དངོས་གྲུབ་སྩལ་དུ་གསོལ།། །།བྱང་ཕྱོགས་མུན་པའི་སྨག་རུམ་ན། །གངས་ལ་ཉི་མ་ཤར་འདྲ་བའི། །ཐོས་པ་དགའ་ཞེས་བྱ་བ་ཡི། །སྐྱེས་བུ་དེ་ལ་གུས་ཕྱག་འཚལ། །བྱང་ཕྱོགས་རྒྱུད་དུ་སྐུ་འཁྲུངས་ཤིང་། །འཇིག་རྟེན་སྐྱོན་གྱིས་མ་གོས་པར། །དཀའ་བ་སྤྱད་པའི་ངོ་མཚར་ཅན། །མི་ལ་མཆོག་ལ་གསོལ་བ་འདེབས། །བདེ་ཆེན་བརྗོད་མེད་རོ་ཡིས་མྱོས། །སྲིད་གསུམ་དག་པའི་ཕྱག་རྒྱས་བཅིངས། །བསྲེག་བཞུའི་ལམ་ནས་ལྷན་ཅིག་སྐྱེས། །མི་ལ་མཆོག་ལ་གསོལ་བ་འདེབས། །རགས་སྣང་ཕྲ་ཐིག་ཟབ་མོར་བསྟེན། །ཕྲ་མྱོང་བདག་བྱིན་བརླབ་པར་མཛད། །གསང་བའི་དཀྱིལ་འཁོར་རིགས་ཀྱི་བདག །མི་ལ་མཆོག་ལ་གསོལ་བ་འདེབས། །འཛག་མེད་གཙོ་མོར་ས་བོན་
བཀྲོལ། །སྲིད་བདག་ལམ་དུ་སྙིང་རྗེས་ལེན། །ནུས་པ་དྲག་པོའི་སྐུར་བཞེངས་པ། །མི་ལ་མཆོག་ལ་གསོལ་བ་འདེབས། །བདག་ཀྱང་འཁོར་བ་མི་སྤོང་ཞིང་། །མྱང་འདས་ཞི་བར་མི་འཇུག་སྟེ། །མཁའ་སྤྱོད་དབང་ཕྱུག་མི་ལ་ཡི། །མཆོག་གི་དངོས་གྲུབ་འགྲུབ་གྱུར་ཅིག །།ཞིང་མཆོག་དཔལ་ལྡན་སྟུག་པོ་བཀོད་པ་ན། །མཉམ་མེད་མི་གཡོ་ཆོས་སྐུ་མངོན་དུ་མཛད། །ཞི་སྐུ་དཔག་བསམ་ཤིང་ལྟར་འགྲོ་སྒྲོལ་རྟག །རྗེ་བཙུན་སྒམ་པོ་པ་ལ་གསོལ་བ་འདེབས། །ཤེས་བྱ་མི་སྣང་ཤེས་པ་མི་འཇུག་ཅིང་། །སྐད་ཅིག་གཅིག་ལ་ཤེས་དང་ཤེས་བྱ་ཀུན། །དུས་གསུམ་ཇི་ལྟ་ཇི་སྙེད་མཁྱེན་པ་པོ། །རྗེ་བཙུན་སྒམ་པོ་པ་ལ་གསོལ་བ་འདེབས། །སྐུ་བཞིའི་ས་བོན་གསལ་བར་སྨིན་མཛད་ནས། །ཕྱག་རྒྱ་གསུམ་གྱིས་ཐིག་རླུང་སེམས་གསུམ་སྦྱངས། །བསྐྱེད་དང་རྫོགས་པའི་བྱང་ཆུབ་རིམ་པར་བསྟེན། །རྗེ་བཙུན་སྒམ་པོ་པ་ལ་གསོལ་བ་འདེབས། །འཕགས་ཆེན་རྣམས་ལ་
ལོངས་སྤྱོད་རྫོགས་སྐུ་དང་། །རིགས་གསུམ་གདུལ་བྱར་མཆོག་གི་སྤྲུལ་སྐུ་སྟེ། །ཡོངས་གྲགས་ཟླ་འོད་གཞོན་ནུ་ས་བཅུའི་མགོན། །རྗེ་བཙུན་སྒམ་པོ་པ་ལ་གསོལ་བ་འདེབས། །བདག་ཀྱང་གདུལ་བྱའི་ཁམས་དང་དབང་པོ་བཞིན། །མི་རྟོག་ཡེ་ཤེས་ཕྲིན་ལས་འཇུག་བྱེད་ཅིང་། །ཕྲིན་ལས་སྲིད་མཐའི་བར་དུ་གནས་བྱེད་པ། །རྗེ་བཙུན་སྒམ་པོ་པ་ལྟར་འགྲུབ་གྱུར་ཅིག །རྗེ་བཙུན་གོང་མ་རྣམ་གསུམ་ལ་རྗེ་བཙུན་ཐམས་ཅད་མཁྱེན་པ་རྡོ་རྗེ་དགའ་བའི་དབྱངས་ཅན་གྱིས་བསྟོད་པར་མཛད་པའོ།། །།སྒམ་པོ་པའི་རྣམ་ཐར་གསོལ་འདེབས་ནི། ཤེས་བྱའི་མཁའ་ལ་མཁྱེན་རབ་དཀྱིལ་འཁོར་རྒྱས། །མཛད་པའི་འོད་སྟོང་གདུལ་བྱའི་གླིང་ལ་ཕོག །རྒྱལ་བའི་བསྟན་པ་ཀུན་ནས་གསལ་མཛད་པའི། །བཀའ་བརྒྱུད་རིན་པོ་ཆེ་ལ་ཕྱག་འཚལ་ལོ། །མི་ཁོམས་བརྒྱད་སྤངས་དལ་འབྱོར་ཕུན་ཚོགས་ཐོབ། །གྲུབ་པའི་མཆོག་བརྙེས་དགེ་སྦྱོང་ཀུན་གྱི་གཙོ། །ཐུབ་པའི་རྒྱལ་ཚབ་གངས་ཅན་གཙུག་གི་རྒྱན། །
མཉམ་མེད་སྒམ་པོ་པ་ལ་ཕྱག་འཚལ་ལོ། །མཚན་ལྡན་བླ་མ་རིན་ཆེན་འགྲོ་བའི་མགོན། །གདུལ་བྱའི་དོན་དུ་རི་བོ་ཤཱནྟིར་བྱོན། །ལུང་དང་རྟོགས་པའི་ཆོས་ཀྱིས་གཞན་དོན་མཛད། །བསྟན་པའི་རྒྱལ་མཚན་ཁྱོད་ལ་ཕྱག་འཚལ་ལོ། །ས་མོ་ལུག་ལ་བལྟམས་པ་ནས་བཟུང་སྟེ། །སྤྲུལ་པའི་གནས་སུ་གཤེགས་པར་གྱུར་གྱི་བར། །རབ་ཏུ་ངོ་མཚར་རྣམ་པ་དཔག་མེད་རྣམས། །མདོར་བསྡུས་བརྗོད་ལ་གུས་པས་མཉན་པར་གྱིས། །མེ་ཏོག་ཟླ་མཛེས་པདྨའི་བླ་མ་ནི། །ཐུབ་པའི་སྤྱན་སྔར་ཟླ་འོད་གཞོན་ནུར་གྱུར། །གངས་རིའི་ཁྲོད་དུ་དགེ་སློང་འཚོ་བྱེད་དུ། །རྒྱལ་བས་ལུང་བསྟན་ཁྱོད་ལ་ཕྱག་འཚལ་ལོ། །སྨོན་ལམ་འབྲེལ་པས་བསྙལ་གྱི་ཕྱོགས་སུ་འཁྲུངས། །འཇིག་རྟེན་ཆོས་མཐུན་བཙུན་མོ་ཁབ་ཏུ་བཞེས། །གཞན་ལ་ཕན་ཕྱིར་གསོ་དཔྱད་མཐར་ཕྱིན་མཛད། །སྐྱེ་བོ་བྱང་སེམས་ཁྱོད་ལ་ཕྱག་འཚལ་ལོ། །འཁོར་བའི་བྱ་བ་སྙིང་པོ་མེད་གཟིགས་ནས། །ཁྱིམ་ནས་
བྱུང་སྟེ་བསྟན་ལ་རབ་ཏུ་བྱུང་། །བསླབ་གསུམ་དྲི་མེད་མིག་འབྲས་བཞིན་དུ་བསྲུངས། །དགེ་སློང་འཚོ་བྱེད་ཁྱོད་ལ་ཕྱག་འཚལ་ལོ། །བཤེས་གཉེན་དམ་པའི་ཞབས་རྡུལ་སྤྱི་བོས་བླངས། །འདུལ་བ་སྔགས་སོགས་གསན་པ་རྒྱ་ཆེར་མཛད། །རྨི་ལམ་ས་ཐོབ་ཏིང་འཛིན་དུ་མ་འཕེལ། །བསོད་ནམས་རིན་ཆེན་ཁྱོད་ལ་ཕྱག་འཚལ་ལོ། །སྨོན་སེམས་དད་པའི་བླ་མའི་མཚན་ཐོས་ཏེ། །བ་སྤུ་གཡོས་ཤིང་དགའ་བ་མཆོག་ཏུ་སྐྱེས། །རྨི་ལམ་ལྟས་དང་མཚན་མ་བཟང་དུ་བྱུང་། །སྐྱེས་བུ་ལས་ཅན་ཁྱོད་ལ་ཕྱག་འཚལ་ལོ། །རྗེ་བཙུན་མི་ལའི་དྲུང་དུ་བྱོན་པའི་ཚེ། །ཁྱོད་ནི་སེམས་ཅན་ཀུན་གྱི་རིན་པོ་ཆེ། །གསུངས་ནས་ཐུགས་སྲས་རྒྱུད་འཛིན་ཡིན་པར་དགོངས། །དབུས་པ་སྟོན་པ་ཁྱོད་ལ་ཕྱག་འཚལ་ལོ། །མཆོག་ཏུ་ཟབ་པའི་ཐབས་ལམ་གདམས་པ་གནང་། །ཡེངས་པ་མེད་པར་བསྒྲུབ་ལ་ནན་ཏན་མཛད། །བླ་མའི་དྲིན་གྱིས་རྟོགས་པ་ཐུགས་ལ་
འཁྲུངས། །སྐྱེས་བུ་བརྩོན་ལྡན་ཁྱོད་ལ་ཕྱག་འཚལ་ལོ། །ཞེས་པ་འགྲེ། གསང་སྔགས་བླ་མེད་མཆོག་གི་ལམ་ལ་ཞུགས། །རྟགས་བཅུ་ཡོན་ཏན་བརྒྱད་སོགས་མཐར་ཕྱིན་མཛད། །རྩ་རླུང་ཐིག་ལེའི་བྱེད་པ་ལས་སུ་རུང་། །རྣལ་འབྱོར་དབང་ཕྱུག་ཁྱོད་ལ༴ རིམ་གཉིས་ཐུན་བཞིའི་རྣལ་འབྱོར་བསྒོམས་པའི་ཚེ། །སྨན་བླ་མཆེད་བདུན་ལོངས་སྐུའི་ཞིང་ཁམས་དང་། །ཐུབ་དབང་ལ་སོགས་སངས་རྒྱས་སྟོང་དང་མཇལ། །མི་དབང་ལྷུན་པོ་ཁྱོད་ལ༴ རྗེ་བཙུན་ཉིད་ཀྱིས་ཆེད་དུ་བསྔགས་པ་བརྗོད། །སྐུ་གསུམ་མངོན་གྱུར་དངོས་གྲུབ་རྣམ་གཉིས་ཐོབ། །ཁྱོད་ནི་དགེ་སློང་རྡོ་རྗེ་འཛིན་པ་ཞེས། །འཛམ་གླིང་གྲགས་པའི་ཞབས་ལ༴ དབང་དང་ཆོས་རྣམས་མ་ལུས་རྫོགས་པར་གནང་། །སྡིག་གྲོགས་སྤངས་ནས་དབེན་པ་སྟེན་པ་དང་། །གཞན་དོན་སྒྲུབ་པའི་ཚོགས་པ་སྐྱོངས་ཤིག་གསུང་། །སྐྱེས་བུ་ཆེན་པོ་ཁྱོད་ལ༴ འོལ་ཁར་བཞུགས་ཚེ་ཆོས་རྣམས་རྨི་ལམ་
བཞིན། །བདེན་མེད་རྟོགས་ནས་སྤྲོས་བྲལ་མངོན་དུ་གྱུར། །ང་ཡི་སྐྱེ་བའི་ཐ་མ་འདི་ཡིན་གསུང་། །ས་བཅུའི་དབང་ཕྱུག་ཁྱོད་ལ༴ དྭགས་ལྷ་སྒམ་པོའི་གནས་སུ་བྱོན་པའི་ཚེ། །བླ་མའི་གསུང་བཞིན་བསྒྲུབ་པ་ཐུགས་ལ་དགོངས། །མཁའ་འགྲོས་ལུང་བསྟན་གཞན་དོན་གྱིས་ཤིག་གསུང་། །ཆོས་རྗེ་སྒམ་པོ་པ་ལ༴ སྣོད་དང་ལྡན་པའི་ལས་ཅན་དུ་མ་འདུས། །བླ་མའི་མན་ངག་གདམས་པ་ཟབ་མོ་བསྟན། །སྨིན་ཅིང་གྲོལ་བའི་སྐྱེས་བུ་དཔག་མེད་བྱུང་། །མཉམ་མེད་བླ་མ་ཁྱོད་ལ༴ རེ་ཞིག་སྐུ་ཡི་སྤྲུལ་པ་རྣམ་བཞིར་བསྟན། །རབ་ཏུ་གནས་དང་གཞན་ལ་ཆོས་སྟོན་དང་། །མཁའ་ལ་འཕུར་དང་གཅིག་ནི་འདག་སྦྱར་བཞུགས། །སྣང་བ་དབང་སྒྱུར་ཁྱོད་ལ༴ སེམས་སྤྱོད་ཟབ་མོའི་ཏིང་འཛིན་བསྒོམས་པའི་ཚེ། །ཟད་པར་ཟིལ་གནོན་སྤྲུལ་ཅིང་བསྒྱུར་བ་དང་། །སྐུ་ལ་གྲིབ་མེད་འཇིག་རྟེན་དབང་པོར་སྤྲུལ། །སྤྲུལ་པའི་སྐྱེས་མཆོག་ཁྱོད་ལ༴ མཁས་གྲུབ་
དུ་མའི་དབུས་སུ་བཞུགས་པའི་ཚེ། །ཆོས་ཀྱི་སྤོབས་པས་གཞན་སྣང་ཟིལ་གྱིས་མནན། །ང་ནི་བསྟན་པའི་བདག་པོ་ཡིན་ནོ་གསུང་། །མི་ཡི་སེང་གེ་ཁྱོད་ལ༴ མིག་འཕྲུལ་ལྟ་བུའི་ཏིང་འཛིན་བསྒོམས་པའི་ཚེ། །ནམ་མཁའ་ཁེངས་པའི་བྱང་ཆུབ་ཆེན་པོར་སྤྲུལ། །སྐུ་ཡི་རྫུ་འཕྲུལ་བསམ་ལས་འདས་པར་བསྟན། །སྣང་སྟོང་དབྱེར་མེད་ཁྱོད་ལ༴ དད་ལྡན་རྣམས་ཀྱིས་འཁོར་ལོ་སྡོམ་པར་མཐོང་། །རབ་གནས་མཛད་ཚེ་བྱང་ཆུབ་ཆེན་པོར་བསྒྱུར། །ཡེ་ཤེས་སེམས་དཔའ་རྟེན་ལ་དངོས་སུ་བསྟིམ། །གྲུབ་པའི་མཆོག་བརྙེས་ཁྱོད་ལ༴ དད་དང་ལྡན་པའི་སྐྱེ་བོ་གང་ཞིག་གིས། །ཁྱོད་ནི་མཐོང་ཐོས་དྲན་པ་ཙམ་གྱིས་ཀྱང་། །སྡུག་བསྔལ་སྤངས་ནས་ཐར་པའི་ལམ་སྣ་ཟིན། །སྨན་པའི་རྒྱལ་པོ་ཁྱོད་ལ༴ བདུད་རྩི་ཐལ་སྦྱོར་ཕྱག་རྒྱ་མཛད་པའི་ཚེ། །ལུས་སྣང་སེམས་གསུམ་གཅིག་ཏུ་འདྲེས་པའི་བརྡར། །སྐུ་ཡི་སྤྲུལ་པ་སྐད་ཅིག་གྲངས་མེད་སྤྲུལ། །དྲན་མཆོག་རྒྱལ་པོ་ཁྱོད་ལ༴
གཞན་དོན་གཤེགས་པ་ཐུགས་ལ་འཁྲུངས་པའི་ཚེ། །ཆུ་མོ་བྱ་ཡི་ཟླ་དྲུག་བཅོ་ལྔའི་ཉིན། །བདག་ཉིད་ཆེན་པོ་ཆོས་ཀྱི་དབྱིངས་སུ་གཤེགས། །མྱ་ངན་འདའ་བཞེད་ཁྱོད་ལ༴ འཇའ་འོད་རྣམ་མང་གདུགས་དང་རྒྱལ་མཚན་སོགས། །མེ་ཏོག་ཆར་བབ་རོལ་མོའི་སྒྲ་རྣམས་བྱུང་། །ས་རྣམས་གཡོས་ཤིང་བྱ་རྣམས་ཅ་ཅོ་སྒྲོགས། །ངོ་མཚར་རྨད་བྱུང་ཁྱོད་ལ༴ དད་དང་ལྡན་པའི་སྐྱེ་བོ་དཔག་མེད་འདུས། །བླ་མེད་མཆོད་པ་ཕུལ་དུ་བྱུང་བས་མཆོད། །ཐུགས་ལྗགས་རིང་བསྲེལ་དད་ལྡན་རྟེན་དུ་བཞག །ཕན་དགོངས་མཛད་པ་ཁྱོད་ལ༴ རང་བཞིན་སྤྲོས་བྲལ་འོད་གསལ་ཆོས་ཀྱི་སྐུ། །བདེ་ཆེན་སྣང་བ་ལྷུན་གྲུབ་ལོངས་སྤྱོད་རྫོགས། །སྤྲུལ་པའི་གཟུགས་ཀྱིས་འགྲོ་རྣམས་སྨིན་གྲོལ་མཛད། །འདྲེན་མཆོག་བླ་མ་བརྒྱུད་པར་བཅས་རྣམས་ལ། །ཀུན་བཟང་མཆོད་སྤྲིན་ནམ་མཁའ་མཉམ་པས་མཆོད། །ལུས་ངག་ཡིད་ཀྱི་མི་དགེ་སོ་སོར་བཤགས། །རང་
གཞན་ཀུན་གྱི་དགེ་ལ་རྗེས་ཡི་རང་། །ཆོས་འཁོར་བསྐོར་ཞིང་རྟག་ཏུ་བཞུགས་པར་གསོལ། །མགོན་པོ་ཁྱོད་ཀྱིས་བྱང་ཆུབ་ཚུལ་བསྟན་ཆེ། །ཐུགས་རྗེའི་སྤྱན་གྱིས་འགྲོ་ལ་གཟིགས་ནས་ཀྱང་། །བདག་སོགས་གདུལ་བྱ་ཡལ་བར་མི་འདོར་ཞིང་། །ཐེག་མཆོག་བདུད་རྩིས་ཚིམ་པར་མཛད་དུ་གསོལ། །སྲིད་པ་ཀུན་ཏུ་བླ་མའི་ཞབས་བསྟེན་ནས། །རྙེད་དང་བཀུར་སྟི་སྒྲུབ་པས་མཆོད་བྱེད་ཅིང་། །སྟོན་པའི་འདུ་ཤེས་ནམ་ཡང་མི་འབྲལ་བར། །སྐྱོན་གྱི་རྟོག་པས་གོས་པར་མ་གྱུར་ཅིག །བླ་མའི་མཛད་པ་ཇི་ལྟར་བསྟན་ན་ཡང་། །ངོ་མཚར་མོས་པས་རྟག་ཏུ་མཆོད་བྱེད་ཅིང་། །བྱ་བ་ཀུན་ལ་གཞན་སྐྱོན་མི་རྟོག་པར། །ཕན་པའི་འདུ་ཤེས་རྟག་ཏུ་རྙེད་གྱུར་ཅིག །བདག་ཀྱང་ཁྱོད་བཞིན་མངོན་པར་བྱང་ཆུབ་ནས། །གདུལ་བྱར་གྱུར་པའི་མཁའ་མཉམ་སེམས་ཅན་ལ། །གཟུངས་དང་སྤོབས་པའི་ཆོས་ཀྱི་དགའ་སྟོན་འགྱེད། །ཐེག་མཆོག་ཆོས་ཀྱི་སྒྲ་དབྱངས་སྒྲོག་པར་
ཤོག །ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཡོད་མེད་ལ་སོགས་མཐའ་ལ་མི་གནས་པར། །སྐུ་བཞི་ཡེ་ཤེས་ལྔ་ཡི་བདག་ཉིད་ཅན། །བླ་མེད་རྫོགས་པའི་བྱང་ཆུབ་ཆེན་པོར་བསྔོ། །ཞེས་སོ། །དེ་བཞིན་གཤེགས་པས་ལུང་བསྟན་ཅིང་། །སྙིགས་མའི་དུས་སུ་འགྲོ་དོན་མཛད། །ཕྱག་རྒྱ་ཆེ་ལ་མངའ་བརྙེས་པའི། །ཟླ་འོད་གཞོན་ནུ་ལ་ཕྱག་འཚལ། །དཔལ་ལྡན་ཕག་མོ་གྲུ་ཡི་ནག་ཁྲོད་ན། །སྐལ་ལྡན་གདུལ་བྱ་མང་པོ་སྨིན་མཛད་ཅིང་། །བསམ་གྱིས་མི་ཁྱབ་ཆོ་འཕྲུལ་སྣ་ཚོགས་སྟོན། །འགྲོ་མགོན་རིན་པོ་ཆེ་ལ་གསོལ་བ་འདེབས། །འོག་མིན་ཆོས་ཀྱི་དབྱིངས་ཀྱི་ཕོ་བྲང་ན། །དུས་གསུམ་སངས་རྒྱས་ཀུན་གྱི་ངོ་བོ་ཉིད། །རང་སེམས་ཆོས་སྐུ་མངོན་སུམ་སྟོན་མཛད་པའི། །དཔལ་ལྡན་བླ་མའི་ཞབས་ལ་གསོལ་བ་འདེབས། །སྐྱིད་ན་བདེ་བ་
ཚོགས་སུ་བསྔོ། །ཕན་བདེས་ནམ་མཁའ་གང་བར་ཤོག །སྡུག་ན་ཀུན་གྱི་སྡུག་བསྔལ་འཁུར། །སྡུག་བསྔལ་རྒྱ་མཚོ་སྐེམས་པར་ཤོག །བྱམས་དང་སྙིང་རྗེ་ཕྱོགས་མེད་འབྱོངས་པ་དང་། །དོན་དམ་ལྷན་ཅིག་སྐྱེས་པའི་ཡེ་ཤེས་དེ། །རྒྱལ་བ་སྲས་བཅས་རྣམས་ཀྱིས་རྟོགས་པ་ལྟར། །བདག་སོགས་མངོན་སུམ་རྟོགས་པར་བྱིན་གྱིས་རློབས།། །།དེ་ནས་རྒྱལ་བ་འཇིག་རྟེན་དབང་ཕྱུག་དཔལ་ཀརྨ་པ་རིམ་པར་བྱོན་པ་རྣམས་ ལ་འདུད་ཅིང་གསོལ་བ་གདབ་པའི་རིམ་པ་ལ། ཐོག་མར་དུས་མཁྱེན་གྱི་སྐུ་བསྟོད་རྗེ་བདུན་པས་མཛད་པ་ནི། དུས་གསུམ་ཤེས་བྱ་མ་ལུས་སྒྲིབ་བྲལ་དུ། །མངོན་སུམ་མཁྱེན་ནས་མ་ནོར་ལམ་སྟོན་པ། །ཟླ་མེད་ཐུགས་རྗེ་ཆེ་མངའ་དུས་གསུམ་གྱི། །སྟོན་པ་མཚུངས་མེད་འགྲོ་བའི་མགོན་ལ་འདུད། །ཁྱོད་ནི་ཐོག་མཐའ་སྤངས་ཤིང་རབ་ཞི་ཡང་། །ཆོས་རྣམས་ཀུན་གྱི་ཐོག་མཐའི་རྗེས་འགྲོ་བས། །གཞན་ཕན་རྣམ་རོལ་ལ་སོགས་དུས་གསུམ་གྱི། །རྒྱལ་བ་ཀུན་གྱི་ཚུལ་ཡང་སྟོན་ལ་འདུད། །གང་ཡང་
བདེ་གཤེགས་ཚུལ་གྱི་གདུལ་དཀའ་བའི། །ཞིང་དང་དུས་དེར་རྒྱལ་སྲས་རང་རྒྱལ་དང་། །ཉན་ཐོས་ཚུལ་དང་ལྷ་དང་དྲང་སྲོང་སོགས། །སྣ་ཚོགས་ཚུལ་གྱིས་འགྲོ་དོན་མཛད་ལ་འདུད། །དབུལ་ལ་ནོར་དང་བཀྲེས་ལ་ཟས་སྐོམ་དང་། །གྲོགས་མེད་གྲོགས་དང་ནད་པ་རྣམས་ལ་སྨན། །སྨན་པའི་གཟུགས་སོགས་རྣམ་པ་སྣ་ཚོགས་ཀྱིས། །སྐྱེ་དགུའི་ཉེར་འཚོའི་གཞིར་གྱུར་དེ་ལ་འདུད། །གང་གིས་ཁྱོད་མཐོང་ཁྱོད་མཚན་ཐོས་པ་དང་། །རིགས་གམ་གཏམ་དུ་བརྗོད་པར་བྱེད་རྣམས་ཀྱང་། །རིམ་གྱིས་རྫོགས་སངས་གོ་འཕང་མཐར་འགྲོ་བའི། །ཡོན་ཏན་ཀུན་གྱི་འབྱུང་གནས་དེ་ལ་འདུད། །གངས་ཅན་འདིར་ཡང་མཁས་གྲུབ་ས་སྐྱོང་དང་། །མང་ཐོས་ཚུལ་ཁྲིམས་རྒྱན་གྱིས་མཛེས་རྣམས་ཀྱིས། །ངོ་མཚར་གནས་ཞེས་བསྔགས་པའི་ཡུལ་གྱུར་པའི། །ཀུན་གྱི་གཙུག་རྒྱན་གྱུར་པ་དེ་ལ་འདུད། །གང་ཞིག་ཕྱོགས་དུས་ཀུན་དུ་རྒྱལ་རྣམས་དང་། །རྒྱལ་
སྲས་ཀུན་གྱི་ཕྲིན་ལས་མ་ལུས་པའི། །མངའ་བདག་འགྲོ་བ་ཇི་སྙེད་ཐམས་ཅད་ཀྱི། །འབྲལ་མེད་ཕན་བདེའི་གཞིར་གྱུར་དེ་ལ་འདུད། །མཐའ་ཡས་མཆོད་པའི་སྤྲིན་གྱིས་མཆོད་བགྱིད་ཅིང་། །ལུས་ངག་ཡིད་ཀྱི་སྡིག་པ་མ་ལུས་བཤགས། །དགེ་བ་ཀུན་ལ་རྗེས་སུ་བདག་ཡི་རང་། །རྟག་ཏུ་ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་ཡུན་རིང་བཞུགས་གསོལ་འདེབས། །བདག་གིས་དུས་གསུམ་བསགས་པའི་དགེ་བ་རྣམས། །མ་ལུས་རྫོགས་སངས་རྒྱས་ཀྱི་ཕྱིར་བསྔོ་བས། །གེགས་མེད་མྱུར་དུ་རྒྱལ་བ་ཉིད་ཐོབ་ཤོག །སྐྱེ་བ་འདི་དང་ཚེ་རབས་ཐམས་ཅད་དུ། །དུས་གསུམ་རྒྱལ་བ་ཀུན་གྱི་ཕྲིན་ལས་པ། །ཀརྨ་པ་ཡིས་རྟག་ཏུ་རྗེས་བཟུང་ནས། །བྱང་ཆུབ་སྤྱོད་མཆོག་ཡིད་འོང་སྤྱོད་པར་ཤོག །ཐུབ་མཆོག་རྣམས་ཀྱི་བསྟན་པ་དྲི་མ་མེད། །མཐའ་ཡས་ཡོན་ཏན་སྒྲུབ་པའི་ཐབས་སྟོན་ཅིང་། །བཤད་དང་སྒྲུབ་པ་རྣམ་དག་སྤེལ་བྱེད་པའི། །ཀརྨ་
པ་ཡི་དགོངས་པ་རྫོགས་བྱེད་ཤོག། །།དུས་མཁྱེན་གྱི་རྣམ་ཐར་བསྟོད་པ་ནི། ཨེ་མ་ཧོ། །བསམ་པ་ཐམས་ཅད་འགྲུབ་མཛད་པ། །མཐའ་དབུས་མེད་པ་ནམ་མཁའི་བདག །འོད་གསལ་ཐུགས་རྗེའི་འོད་འཕྲོ་བ། །མཚུར་ཕུ་པ་ལ་གསོལ་བ་འདེབས། །རྫོགས་སངས་གོ་འཕང་སྩོལ་མཛད་པ། །རྗེ་བཙུན་མཆོག་ལ་ཕྱག་འཚལ་ཏེ། །སྤྲུལ་པའི་གནས་ཆེན་ཀྲེ་ཤོད་དུ། །ཡེ་ཤེས་མཁའ་འགྲོའི་ལྷུམས་སུ་བཟུང་། །ས་བཅུ་རྫོགས་ནས་སྐུ་འཁྲུངས་ཚེ། །མཆོག་གི་སྤྲུལ་སྐུར་སྐྱེ་དགུ་དང་། །སེམས་ཅན་ཀུན་གྱིས་དངོས་གྲུབ་ཞུས། །སྤྲུལ་པའི་ཚུལ་བསྟན་ཁྱོད་ལ་འདུད། །ལོ་བརྒྱད་ལོན་ནས་གནོད་སྦྱིན་བཀུག །བཅུ་གཅིག་ལོ་ལ་གཡུལ་ཆེན་བཟློག །བཅོ་ལྔའི་ལོ་ལ་བསྟན་དགྲ་བསྒྲལ། །བདུད་ཚོགས་འདུལ་བ་ཁྱོད་ལ་འདུད། །བཅུ་དྲུག་ལོ་ལ་རབ་ཏུ་བྱུང་། །དགེ་སྦྱོང་ཆེན་པོའི་རྣམ་ཐར་བསྟན། །སངས་རྒྱས་བསྟན་པའི་གཙུག་ལག་བསྐྱངས། །
ཆོས་འཁོར་ཆེན་པོ་སྐྱོང་ལ་འདུད། །ཉི་ཤུའི་ལོ་ལ་དབུས་སུ་བྱོན། །རིགས་པའི་གནས་ལ་མ་རྨོངས་པས། །ཤེས་བྱའི་ཐོག་ནས་མཁྱེན་པ་སད། །ཐམས་ཅད་མཁྱེན་པ་ཁྱོད་ལ་འདུད། །དཔལ་ཆེན་རྒྭ་ལོ་བཻ་རོ་དང་། །ཇོ་མོ་བཀྲ་ཤིས་ཚེ་རིང་མ། །གླིང་ཀ་བ་དང་མཚུར་སྟོན་སོགས། །སྒྲུབ་བརྒྱུད་ཀུན་གྱི་བཅུད་ལ་འདུད། །རྗེ་བཙུན་རས་ཆུང་བྱོན་པའི་ཚེ། །མོས་པ་འཁྲུངས་ནས་སྤྱན་སྔར་བྱོན། །སྨིན་གྲོལ་གཉིས་ཀྱི་རྩལ་ཆེན་རྫོགས། །གདམས་ངག་མཐར་ཕྱིན་ཁྱོད་ལ་འདུད། །དྭགས་པོ་ཁུ་དབོན་མཇལ་བའི་ཚེ། །ཆོས་སྐུ་སྤྲོས་བྲལ་རྗེན་པར་བུད། །བདེ་ཆེན་ཁ་སྦྱོར་ཡན་ལག་རྫོགས། །རྣམ་པར་རྟོག་པའི་གནས་པ་མེད། །གང་ཤར་ཕྱག་རྒྱ་ཆེན་པོར་རོལ། །མ་རྟོགས་འགྲོ་ལ་ཐུགས་རྗེ་འཁྲུངས། །ཀུན་མཁྱེན་རྒྱལ་པོ་ཁྱོད་ལ་འདུད། །གྲ་མ་གྲུ་བཞི་ལ་སོགས་སུ། །ལུས་སྲོག་ལྟོས་མེད་བསྒྲུབ་པ་མཛད། །མཆོག་དང་ཐུན་མོང་དངོས་གྲུབ་བརྙེས། །དབེན་པ་
མཐར་ཕྱིན་ཁྱོད་ལ་འདུད། །བསྟན་པའི་གཞི་མ་མཚུར་ཕུ་དང་། །ཀརྨ་ཀཾ་པོ་གངས་ར་དང་། །ཀཾ་ཁྱིམ་ལ་སོགས་གཙུག་ལག་བཀོད། །བཀའ་བརྒྱུད་གདན་ས་བཞེངས་ལ་འདུད། །དྭགས་ལྷ་སྒམ་པོའི་གདན་ས་གསོས། །འཚལ་པའི་འཁྲུགས་པ་མ་ལུས་བསྡུམས། །འགྲོ་བ་རིགས་དྲུག་དབང་དུ་བསྡུས། །རྫུ་འཕྲུལ་རྒྱལ་པོ་ཁྱོད་ལ་འདུད། །རང་གི་སྐུ་ཚབ་སྤྲུལ་སྐུར་བརྒྱུད། །ཞྭ་ནག་ཅན་གྱི་སྐྱེ་བ་ཡིས། །སངས་རྒྱས་ཀུན་གྱི་ཕྲིན་ལས་མཛད། །ཀརྨ་བཀའ་བརྒྱུད་ཁྱོད་ལ་འདུད། །འགྲོ་མགོན་སངས་རྒྱས་རས་པ་དང་། །ལྷོ་པ་རྟ་སྒོམ་ལ་སོགས་པ། །གྲུབ་ཐོབ་ཀུན་གྱི་གཏེར་གཅིག་པུ། །རྟོགས་ལྡན་རྒྱལ་པོ་ཁྱོད་ལ་འདུད། །ཐམས་ཅད་ཁྱོད་ཀྱི་རང་བཞིན་ཏེ། །ཁྱོད་ལ་རང་བཞིན་ཅུང་ཟད་མེད། །ཀྱེ་མ་སྙིགས་མའི་གདུལ་བྱ་རྣམས། །ཁྱོད་དང་མ་མཇལ་སྙིང་རྗེའི་གནས། །ཆེ་ཆུང་གང་འབགས་མཚེངས་པ་ཡིས། །ཁྱོད་དང་མཇལ་རྣམས་
དོན་ཆེན་གྲུབ། །ཁྱོད་ཀྱི་བྱིན་རླབས་ནུས་པ་ཡིས། །ཅི་མཛད་ལེགས་པར་མཐོང་བ་དང་། །ཅི་གསུང་ཚད་མར་འཛིན་པ་དང་། །ཐུགས་ཡིད་གཅིག་ཏུ་འདྲེས་པ་དང་། །རྣམ་ཐར་ཕྲིན་ལས་འགྲུབ་པར་ཤོག །ཅེས་རྒྱལ་དབང་མི་བསྐྱོད་རྡོ་རྗེས་མཛད་པའོ།། །།ཀརྨ་པཀྴིའི་སྐུ་བསྟོད་ནི། དུས་གསུམ་རྒྱལ་བ་ཀུན་གྱི་སྐུ་གསུང་ཐུགས། །མི་ཕྱེད་ཡེ་ཤེས་རྡོ་རྗེ་ལས་བྱུང་ཞིང་། །ཡོན་ཏན་ཕྲིན་ལས་ཀུན་གྱི་བདག་ཉིད་ཅན། །ཀརྨ་པར་གྲགས་དེ་ལ་སྤྱི་བོས་འདུད། །ཁྱོད་ནི་སྐྱེ་སོགས་ཀུན་ལས་རབ་འདས་ཀྱང་། །གདུལ་བྱའི་དོན་སླད་བྱང་ཆུབ་ཐུགས་བསྐྱེད་དང་། །བྱང་ཆུབ་སྤྱོད་མཆོག་རྨད་བྱུང་སྤྱོད་པར་སྟོན། །ཞིང་འགར་ལོངས་སྤྱོད་རྫོགས་དང་སྤྲུལ་སྐུ་ཡི། །རྫོགས་སངས་རྒྱས་ཚུལ་ཡང་ཡང་བསྟན་མཛད་ནས། །མཐའ་ཡས་འགྲོ་བ་མངོན་མཐོ་ངེས་ལེགས་ཀྱི། །རྨད་བྱུང་ཆོས་ཀྱི་འཁོར་ལོ་བསྐོར་མཛད་ཅིང་། །སྐྱེ་བོ་འགའ་ལ་ལྷ་དང་དྲང་སྲོང་དང་། །ཉན་ཐོས་དག་དང་རང་སངས་
རྒྱས་ཚུལ་སོགས། །རྣམ་འཕྲུལ་དུ་མས་གནས་སྐབས་མཐར་ཐུག་གི །དོན་རྣམས་མ་ལུས་ཡོངས་སུ་རྫོགས་མཛད་ལ། །གངས་ཅན་འདིར་ཡང་དུས་གསུམ་མཁྱེན་པ་ཉིད། །བསམས་བཞིན་སྐྱེ་བ་བཞེས་ནས་རྒྱ་བོད་དང་། །ཧོར་དང་སོག་པོ་ལ་སོགས་གདུལ་དཀའ་བའི། །འགྲོ་བ་རྣམས་ལ་ཕྲིན་ལས་སྣ་ཚོགས་ཀྱིས། །བཏུལ་ནས་རྣམ་མཁྱེན་གོ་འཕང་སྦྱིན་མཛད་པའི། །གྲུབ་པའི་དབང་པོ་མཆོག་ལ་ཕྱག་འཚལ་ལོ། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །བདག་སོགས་ཁྱོད་ཀྱི་གདུལ་བྱར་གྱུར་པ་རྣམས། །ཉིད་ཀྱི་གོ་འཕང་མཆོག་ལ་རེག་གྱུར་ཅིག །ཅེས་ཀརྨ་པ་མི་བསྐྱོད་རྡོ་རྗེས་སོ། །དེའི་རྣམ་ཐར་ལ་བསྟོད་པ་ནི། ན་མོ་གུ་རུ་མ་ཧཱ་བཛྲ་དྷ་ར་སརྦ་བུདྡྷ་བོདྷི་ས་ཏྭཱ་ཡ། དགེ་ལེགས་ཀུན་གྱི་འབྱུང་གནས་ཀུན་མཁྱེན་རྒྱལ་བ་ཀུན་གྱི་མཁྱེན་པའི་ཡེ་ཤེས་བརྩེ་བའི་ཐུགས་རྗེ་མཛད་པའི་ཕྲིན་ལས་མ་ལུས་པ་གཅིག་ཏུ་བསྡུས་པའི་བདག་ཉིད་ཁམས་
གསུམ་ཆོས་ཀྱི་རྒྱལ་པོ་དཔལ་ཀརྨ་པ་ཆེན་པོའི་ཞབས་ལ་སྒོ་གསུམ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ། །དུས་དང་གནས་སྐབས་ཐམས་ཅད་དུ་ཐུགས་བརྩེ་བ་ཆེན་པོས་རྗེས་སུ་གཟུངས་བར་མཛད་དུ་གསོལ། །ཀུན་མཁྱེན་ཡེ་ཤེས་ཐུགས་རྗེའི་བདག །རྒྱལ་བའི་སྐུ་གསུང་ཐུགས་རྡོ་རྗེ། །མ་ལུས་གཅིག་ཏུ་བསྡུས་པའི་སྐུ། །ཀརྨ་པར་གྲགས་དེ་ལ་འདུད། །སྔོན་ཚེ་གཞན་དོན་ལ་དགོངས་ནས། །རྒྱལ་བ་ང་རོ་སྙན་པ་ལ། །ཕྱག་དར་ཁྲོད་ཀྱི་གོས་ཕུལ་ནས། །དང་པོར་ཐུགས་བསྐྱེད་མཛད་ལ་འདུད། །གང་ཁྱོད་མཐའ་ཡས་འགྲོ་བའི་མགོན། །མཆོག་གི་བློ་གྲོས་གྱུར་པའི་ཚེ། །རྒྱལ་བ་ཀུན་དང་ལྷན་ཅིག་ཏུ། །ཞིང་མཆོག་སྦྱོང་བར་མཛད་ལ་འདུད། །དེ་ནས་ཤཱཀྱའི་བསྟན་པ་ལ། །སྤྱན་རས་གཟིགས་དབང་ཐུགས་རྗེའི་བདག །མཚན་དཔེའི་དབུས་སུ་རབ་བཞུགས་ནས། །སྤྲུལ་སྐུས་འགྲོ་དོན་མཛད་ལ་འདུད། །ལ་ལར་ཁྲོ་རྒྱལ་རྟ་མགྲིན་
སོགས། །ཧེ་རུ་ཀ་དང་མཁའ་འགྲོའི་གཟུགས། །དུ་མར་སྤྲུལ་ནས་དུས་གསུམ་གྱི། །དབང་སྒྱུར་འགྲོ་བ་འདུལ་ལ་འདུད། །གང་ཚེ་ཞིང་གཞན་འདུལ་བ་ན། །འཁོར་ལོས་སྒྱུར་བའི་རྒྱལ་པོ་དང་། །པདྨ་རྣམ་རོལ་པདྨའི་རྒྱལ། །དྲི་མེད་རྒྱལ་སྲས་གྱུར་ལ་འདུད། །ཞིང་འདིར་བློ་གྲོས་རིན་ཆེན་དང་། །དྲང་སྲོང་ཆེན་པོ་ལེགས་པར་སྐྱེས། །འགྲོ་བ་འདྲེན་མཛད་པདྨ་འབྱུང་། །རྒྱལ་བ་མཆོག་དབྱངས་གྱུར་ལ་འདུད། །ཁྱོད་ནི་སྨོན་ལམ་མཐུ་ལྡན་པས། །རྒོལ་བ་ཚར་གཅོད་རྗེས་གཟུང་ཕྱིར། །མ་ཁོལ་རྒྱལ་སྲས་དཔའ་བོའི་ཚུལ། །དུ་མས་འགྲོ་བ་འདུལ་ལ་འདུད། །བསྟན་ལ་ལྷག་པར་ཞུགས་པའི་ཚེ། །མདའ་བསྣུན་ཀླུ་ཡི་བྱང་ཆུབ་དང་། །ཀཱ་མ་དྷེ་ནུ་ཀ་མ་ལ། །འབར་བའི་རྒྱལ་མཚན་འཛིན་ལ་འདུད། །ལྷག་པར་གངས་རིའི་ཁྲོད་འདིར་ཡང་། །རྒྱལ་བའི་གདུང་གསོབ་རིན་ཆེན་གསལ། །ཤ་ར་བ་དང་སྒོམ་ཆུང་སོགས། །བཤེས་གཉེན་དུ་མར་
གྱུར་ལ་འདུད། །ཁྱད་པར་དུས་གསུམ་ཐོགས་མེད་དུ། །མཁྱེན་པའི་དཔའ་མངའ་ཆོས་ཀྱི་རྗེ། །གྲུབ་པའི་དབང་ཕྱུག་པཀྴིའི་མཚན། །བརྟུལ་ཞུགས་མཐར་ཕྱིན་ཞབས་ལ་འདུད། །གང་གང་འདུལ་བའི་དུས་མཁྱེན་ཅིང་། །གཞན་གྱི་དྲེགས་པ་གཞོམ་སླད་དུ། །སྤོས་ལྡན་གྲོང་ཁྱེར་ཆེན་པོར་བཤིགས། །མངའ་བདག་སྨིན་པར་མཛད་ལ་འདུད། །དེར་ཡང་སོག་པོ་མུ་སྟེགས་དང་། །དྲང་སྲོང་ཞི་བདེས་མྱོས་ལ་སོགས། །ཀུན་གྱི་དྲེགས་པ་ཕྲོགས་བྱས་ནས། །འགྲན་ཟླ་ཀུན་དང་བྲལ་ལ་འདུད། །མ་འོངས་བསྟན་པའི་རྒྱུར་གཟིགས་ནས། །སྡེ་སྣོད་གསུམ་གྱི་རྒྱ་མཚོ་དང་། །དེ་སོགས་འབུམ་ཕྲག་དུ་མ་ཡི། །ཆོས་ཀྱི་སྒོ་ཆེན་འབྱེད་ལ་འདུད། །གཞན་ཡང་བཤད་དང་སྒྲུབ་པའི་སྡེ། །ཕྱོགས་ཕྱོགས་ཡུལ་ཁམས་དུ་མར་ནི། །མཆོད་པའི་རྟེན་གྱུར་དུ་མ་དང་། །བཅས་ཏེ་སྤྲུལ་པར་མཛད་ལ་འདུད། །མགོན་ཁྱོད་མ་འོངས་དུས་དག་ཏུ། །རང་བྱུང་རོལ་པའི་རྡོ་རྗེ་
དང་། །དེ་བཞིན་གཤེགས་དང་དོན་ལྡན་མཚན། །ཆོས་གྲགས་རྒྱ་མཚོར་གྱུར་ལ་འདུད། །ཁྱོད་ནི་རྒྱལ་བ་ཐམས་ཅད་དང་། །ཚོགས་རྫོགས་ཆོས་སྐུ་མངོན་གྱུར་ཅིང་། །འགྲོ་དོན་མཛད་པ་མཉམ་གྱུར་ཀྱང་། །རྒྱལ་སྲས་ཚུལ་འཛིན་དེ་ལ་འདུད། །མགོན་ཁྱོད་མེ་ཕོ་སྟག་ལོ་ལ། །འགྲོ་བའི་དོན་དུ་སྐུ་སྤྲུལ་ནས། །བཅུ་ཕྲག་བདུན་དང་ཀླུ་ཡི་བར། །འགྲོ་དོན་དཔག་མེད་མཛད་ལ་འདུད། །དེ་ལྟར་མཛད་པ་མཐར་ཕྱིན་ནས། །གདུལ་བྱ་རྟག་འཛིན་ཅན་རྣམས་ཀྱི། །རྟག་པར་འཛིན་པ་བཟློག་པའི་ཕྱིར། །མྱང་འདས་མངོན་དུ་གྱུར་ལ་འདུད། །ལུག་ལོ་ཟླ་བ་དགུ་པ་ཡི། །སྟོང་པ་དང་པོའི་ཉི་མ་ལ། །བརྟུལ་ཞུགས་ཆོ་འཕྲུལ་མང་བསྟན་ནས། །འོད་གསལ་མངོན་དུ་མཛད་ལ་འདུད། །དེའི་ཚེ་རྒྱལ་བ་མཁའ་རྡོ་རྗེ། །ཆོས་སྐུའི་གཟུགས་ཀྱིས་གང་བ་དང་། །མཆོད་རྫས་རོལ་མོ་སྣ་ཚོགས་བཅས། །མཁའ་སྤྱོད་བྱོན་པར་མཛད་ལ་འདུད། །ཞིང་འདིར་
དད་ལྡན་རྟེན་དུ་ནི། །ཐུགས་ལྗག་རིང་བསྲེལ་ཡི་གེའི་ཚོགས། །འཇིག་རྟེན་མགོན་དང་མཆོད་རྟེན་གཟུགས། །དཔག་མེད་སྤྲུལ་པར་མཛད་ལ་འདུད། །ནམ་ཞིག་མ་འོངས་དུས་དག་ཏུ། །སྔོན་གྱི་དམ་བཅའ་མ་བསྙེལ་བར། །ལྷ་ཡི་དྲང་སྲོང་ལེགས་པར་སྐྱེས། །གཟིགས་པ་རྣམ་བཞིས་འཛམ་གླིང་དུ། །མེ་ཏོག་ལྷ་ཡི་གྲོང་ཁྱེར་ན། །རྒྱལ་རིགས་སེང་གེ་སྟག་དང་ནི། །ལྷ་མོ་དགའ་བའི་ང་རོ་ཡི། །སྟོབས་ཆེན་སྲས་སུ་གྱུར་ལ་འདུད། །ཁྱོད་ནི་རྒྱལ་སྲིད་ཐམས་ཅད་ལ། །མ་ཆགས་ཁབ་ནས་མངོན་བྱུང་སྟེ། །དཀའ་སྤྱད་བྱང་ཆུབ་དྲུང་གཤེགས་ནས། །བདུད་སྡེ་བཅོམ་པར་མཛད་ལ་འདུད། །བདུད་རྩི་མངོན་མཛད་སེང་གེའི་སྒྲ། །ཞབས་འབྲིང་རྟག་མཛད་ངེས་པ་དང་། །རྫུ་འཕྲུལ་དང་ནི་ཤེས་རབ་ཅན། །ཡེ་བརྩེགས་སྤྲིན་ལྡན་གྱུར་ལ་འདུད། །དཔག་ཚད་འོད་ཅན་རྒྱལ་བ་ཡི། །འདུས་པ་ཐོག་མཐའ་བར་གསུམ་དུ། །ཐེར་འབུམ་དུང་ཕྱུར་དགུ་བརྒྱའི་བར། །
ལོ་ནི་བདུན་ཁྲིར་བཞུགས་ལ་འདུད། །ཁྱོད་ཀྱི་དམ་ཆོས་འཇིག་རྟེན་དུ། །ལོ་གྲངས་བྱེ་བའི་བར་གནས་ཤིང་། །སྐུ་གདུང་ཕྱོགས་བརྒྱར་གྱེས་པའི་ཚེ། །ལྷ་ཚོགས་དགའ་བར་མཛད་ལ་འདུད། །བདག་ནི་སྐྱེ་བ་ཐམས་ཅད་དུ། །དམ་པ་ཁྱོད་ཀྱིས་རྗེས་བཟུང་ནས། །ཆོས་ཀྱི་བདུད་རྩི་འགྱེད་པའི་ཚེ། །འདུས་པའི་འཁོར་དུ་འགྱུར་བར་ཤོག །དུས་དེར་དག་ཀྱང་བྱང་ཆུབ་ཏུ། །འཁོད་ནས་དུས་སོགས་ངེས་པ་ཡི། །རྒྱལ་བ་ཉིད་དུ་ལུང་བསྟན་ནས། །སེམས་ཅན་ཀུན་གྱི་མགོན་གྱུར་ཅིག །ཕྲིན་ལས་མངའ་བདག་ཀརྨ་པར། །སྒྲོ་སྐུར་མེད་པར་བསྟོད་པའི་མཐུས། །འགྲོ་ཀུན་རྒྱལ་བ་ཉིད་གྱུར་ཏེ། །ཆོས་ཀྱི་འཁོར་ལོ་བསྐོར་བར་ཤོག །ཅེས་ཆོས་རྗེ་ཀརྨ་པ་ཆེན་པོའི་རྣམ་ཐར་མདོར་བསྡུས་ཀྱི་བསྟོད་པ་འདི་ནི་རབ་འབྱམས་སྨྲ་བའི་ཉི་མས་མཛད་པའོ། །རྗེ་བདུན་པས་མཛད་པའི་རང་བྱུང་རྡོ་རྗེའི་རྣམ་ཐར་བསྟོད་པ་ནི། བདེ་གཤེགས་ཀུན་གྱི་ཡེ་ཤེས་རྡོ་རྗེ་ལས། །རང་བྱུང་སྐུ་གསུང་ཐུགས་ཀྱི་རྣམ་རོལ་
གྱིས། །ནམ་མཁའི་མཐའ་ཁྱབ་དུས་རྣམས་ཐམས་ཅད་དུ། །འགྲོ་བ་ཀུན་གྱི་མགོན་དུ་གྱུར་ལ་འདུད། །ཁྱོད་ནི་ཐོག་མཐའ་སྤངས་ཤིང་རབ་ཞི་བ། །གདོད་ནས་འགྱུར་བ་མེད་ཅིང་རྣམ་དག་ཀྱང་། །སེམས་ཅན་དོན་སླད་བྱང་ཆུབ་ཐུགས་བསྐྱེད་པར། །ཡང་ཡང་ཀུན་ཏུ་སྟོན་པ་དེ་ལ་འདུད། །ཁྱོད་སྔོན་རྒྱལ་བས་འདུལ་བའི་འགྲོ་རྣམས་ལ། །གཞན་ཕན་རྣམ་རོལ་སྤོས་འོད་སེང་གེ་སོགས། །གཟུགས་སྐུའི་སྣང་བརྙན་གདུལ་བྱའི་ཡིད་མཚོ་ནི། །དག་པ་རྣམས་ལ་སྣང་མཛད་དེ་ལ་འདུད། །ཐུབ་ཆེན་དུས་སུ་ས་སྐྱོང་ཆེན་པོ་དང་། །སྤྱན་རས་གཟིགས་སོགས་རྒྱལ་སྲས་རྣམ་འཕྲུལ་གྱིས། །སྐད་ཅིག་གཅིག་ལ་ཞིང་རྡུལ་གྲངས་སྙེད་ཀྱི། །འགྲོ་བའི་དོན་སྒྲུབ་མཛད་པ་དེ་ལ་འདུད། །འཕགས་ཡུལ་སྔགས་སྤྱོད་གདུལ་བྱའི་སྣང་བའི་ངོར། །ས་ར་ཧ་དང་ཀླུ་ཡི་བྱང་ཆུབ་དང་། །འབར་བའི་རྒྱལ་མཚན་ལ་སོགས་རྣམ་པར་འཕྲུལ། །ཀུན་ཏུ་སྟོན་པར་མཛད་པ་དེ་ལ་
འདུད། །གངས་རིའི་ཁྲོད་འདིར་རྒྱལ་བ་མཆོག་དབྱངས་དང་། །རིན་ཆེན་གསལ་སོགས་རྣམ་འཕྲུལ་མཐའ་ཡས་ཤིང་། །ཁྱད་པར་འགྲོ་བའི་སྐྱབས་གཅིག་ཀརྨ་པ། །བསམས་བཞིན་སྐྱེ་བ་བཞེས་པ་དེ་ལ་འདུད། །ཁྱོད་ནི་ཆོས་ཀྱི་སྐུ་ལས་མ་གཡོས་པར། །ལོངས་སྤྱོད་རྫོགས་སྐུ་བར་དོའི་ཚུལ་འཛིན་ཚེ། །འཁོར་ལོ་སྡོམ་པས་མངོན་པར་དབང་བསྐུར་ཞིང་། །མཁའ་འགྲོ་རྣམས་ཀྱིས་བཀྲ་ཤིས་བརྗོད་ལ་འདུད། །དེ་ནས་འོད་ལྔའི་ལམ་ལ་གཤེགས་ནས་ཀྱང་། །ཤེལ་གྱི་ཁང་བཟང་རིན་ཆེན་ཐེམ་སྐས་ཅན། །གང་དུ་དྲན་དང་ཤེས་བཞིན་མ་ཉམས་པར། །སྤྲུལ་སྐུ་འཛིན་པར་མཛད་པ་དེ་ལ་འདུད། །སྤྲེའུ་ལོ་ཟླ་བ་དང་པོའི་ཚེས་བརྒྱད་ལ། །མགོན་ཁྱོད་བལྟམས་ཚེ་བརྒྱད་ཀྱི་ཟླ་བ་ཞེས། །གསལ་བར་བཀའ་སྩལ་བལྟམས་མ་ཐག་པ་ནས། །ཐུབ་ཆེན་ཚུལ་དང་མཐུན་པ་དེ་ལ་འདུད། །ལོ་ལྔའི་བར་དུ་བྱིས་པའི་རྣམ་རོལ་གྱིས། །འགྲོ་མང་
དོན་མཛད་ཡི་གེ་འདྲི་ཀློག་དང་། །མ་སྦྱངས་པར་ཡང་རབ་འབྱམས་གསུང་རབ་སོགས། །རིག་གནས་ཀུན་གྱི་ཕ་རོལ་སོན་ལ་འདུད། །དེ་ལྟ་ན་ཡང་ཐུབ་པའི་རིང་ལུགས་དང་། །མཚུངས་པར་གངས་རིའི་ཁྲོད་འདིར་བྱུང་བ་ཡི། །གསུང་རབ་གཞུང་ལུགས་རིག་གནས་མ་ལུས་དང་། །མན་ངག་རྫོགས་པར་གསན་པ་མཛད་ལ་འདུད། །ཕྱོགས་བཅུའི་རྒྱལ་དང་དེ་སྲས་སློབ་མ་དང་། །གྲུབ་པའི་གཙོ་བོ་རྣམས་དང་ལྷག་པའི་ལྷ། །མཁའ་འགྲོ་ཆོས་སྐྱོང་ཚོགས་རྣམས་ཞལ་གཟིགས་ཤིང་། །ལུང་བསྟན་རྗེས་སུ་གནང་བ་དེ་ལ་འདུད། །འཛམ་གླིང་ཡུལ་ཁམས་དུ་མར་ངོ་མཚར་བའི། །རྣམ་འཕྲུལ་དུ་མའི་རྫུ་འཕྲུལ་སྣ་ཚོགས་ཀྱིས། །སྐལ་ལྡན་མཆོག་གི་དགོངས་པ་རྫོགས་པར་མཛད། །འཛམ་གླིང་རྒྱན་གྱུར་ཁྱོད་ལ་སྤྱི་བོས་འདུད། །ལྷ་དང་དྲང་སྲོང་གྲུབ་པ་མང་ཐོས་དང་། །སྡོམ་བརྩོན་ས་སྐྱོང་ལ་སོགས་འཇིག་རྟེན་གྱི། །དྲེགས་ལྡན་རྣམས་ཀྱི་ཁེངས་པ་ཟིལ་གནོན་
ཞིང་། །ལྷ་མིའི་ཡོན་གནས་དམ་པར་གྱུར་ལ་འདུད། །ཡོས་ལོ་ཟླ་བ་དྲུག་པའི་བཅུ་བཞིའི་ཉིན། །གདུལ་བྱའི་དོན་སླད་སྤྲུལ་སྐུའི་སྣང་བ་བསྡུས། །བཅོ་ལྔའི་མཚན་མོ་ཟླ་བའི་དཀྱིལ་འཁོར་སྟེང་། །མངོན་སུམ་ཞལ་བསྟན་དེ་ལ་སྤྱི་བོས་འདུད། །མགོན་པོ་ཁྱོད་ཀྱི་རྣམ་པར་ཐར་པ་ནི། །མ་ལུས་བརྗོད་པར་སུས་ཀྱང་མི་ནུས་ཀྱིས། །མདོར་བསྡུས་ཙམ་ལ་བསྟོད་པའི་དགེ་བ་ཡིས། །འགྲོ་ཀུན་ཁྱོད་དང་མཚུངས་པ་ཉིད་གྱུར་ཅིག། །།རྗེ་རོལ་པའི་རྡོ་རྗེའི་སྐུ་བསྟོད་རྗེ་བརྒྱད་པས་མཛད་པ་ནི། བླ་མེད་ཡེ་ཤེས་མཆོག་གི་རོལ་པའི་མཐུས། །རྡོ་རྗེ་ལྟ་བུའི་སྐུ་གསུང་ཐུགས་མཆོག་ལྡན། །སྲིད་དང་ཞི་ལས་སྒྲོལ་མཛད་ཐུགས་རྗེའི་གཏེར། །ཟླ་མེད་ཁྱོད་ལ་གུས་པས་ཕྱག་འཚལ་ལོ། །རྣམ་དག་ཚུལ་ཁྲིམས་གསེར་གྱི་ལྷུན་པོ་བརྗིད། །ཏིང་འཛིན་དཔག་མེད་སྐར་ཚོགས་ཤིན་ཏུ་བཀྲ། །དེ་བཞིན་ཉིད་གཟིགས་མཁྱེན་པའི་ཉི་འོད་རྒྱས། །ལོག་ལྟའི་སྨག་རུམ་མ་ལུས་འབྱིན་
ཕྱག་འཚལ། །སྙན་དངགས་དཔའ་བོའི་སྤོབས་པ་ཟིལ་གནོན་ཞིང་། །བརྗོད་པ་རྣམ་དག་ཙནྡྲས་འགྲན་དུ་མེད། །ཚད་མའི་གཞུང་ལ་ཆོས་ཀྱི་གྲགས་པ་སྟེ། །འདུལ་བ་ཡོན་ཏན་འོད་ནི་སླར་ཡང་བཞིན། །དབུ་མའི་ལྟ་བ་འཕགས་པ་ཡབ་སྲས་ཀྱིས། །བཀྲལ་བའི་དོན་རྣམས་མཐའ་དག་གསལ་བར་མཛད། །གསུང་རབ་གཞུང་ལུགས་རིག་གནས་མ་ལུས་ལ། །དབྱིག་གི་གཉེན་གྱིས་ཅུང་ཟད་འགྲན་ནས་ཀྱི། །གཞན་གྱི་འགྲན་ཟླ་འཇིག་རྟེན་ན་ཡོད་མིན། །དེ་ལྟར་ཡོན་ཏན་བསམ་མི་ཁྱབ་པ་ཡི། །ངོ་མཚར་སྟོན་པར་མཛད་ལ་གུས་ཕྱག་འཚལ། །ཡང་ན། སྲིད་མཚོ་མ་སྐེམ་བར་དུ་གནས་པ་ཡི། །སྙིང་རྗེ་ཆེན་པོ་གཟུགས་སུ་གྲུབ་པ་ན། །ཇི་སྲིད་ནམ་མཁའི་ཁམས་སུ་མི་ཤོང་བའི། །བཟོད་མེད་སྙིང་རྗེའི་དབང་ཕྱུག་དེ་ལ་འདུད། །ཆོས་རྣམས་ཀུན་གྱི་ཆོས་ཉིད་གང་ཡིན་པ། །ཇི་བཞིན་གཟིགས་ནས་ཆགས་ཐོགས་སྒྲིབ་བྲལ་བ། །བདེ་གཤེགས་ཀུན་གྱི་མཁྱེན་པ་
མཚུངས་བྲལ་དང་། །རོ་གཅིག་མཁྱེན་པའི་དཔལ་མངའ་དེ་ལ་འདུད། ༈ །མ་རུངས་སྐྱེ་བོ་དྲེགས་ལྡན་འདུལ་སླད་དུ། །སར་གནས་སེམས་དཔའ་ཆེན་པོའི་ཚུལ་བཟུང་ནས། །ཚངས་དང་བརྒྱ་བྱིན་ལ་སོགས་རྫུ་འཕྲུལ་གྱིས། །ཟིལ་གྱིས་གནོན་པའི་ངོ་མཚར་དེ་ལ་འདུད། །གདུལ་བྱའི་ཁམས་དང་འཚམས་པའི་མཁས་པ་དང་། །བཙུན་དང་བཟང་པོའི་ཕ་མཐར་སོན་པའི་ཚུལ། །སྙིགས་མའི་བློ་ལ་བསྟན་པ་དྲང་དོན་ཅན། །འགྲོ་བའི་བསམ་པ་སྐོང་མཛད་དེ་ལ་འདུད། །ཀུན་ནས་དུས་གསུམ་མཁྱེན་པའི་མངོན་ཤེས་དང་། །གྲུབ་པ་ཀརྨ་པཀྴིའི་ནུས་པ་མཆོག །ཀུན་མཁྱེན་རང་བྱུང་རྡོ་རྗེའི་རྣམ་ཐར་ནི། །ཞིང་འདིར་སླར་ཡང་འཛིན་པ་དེ་ལ་འདུད། །ལྷོ་ཕྱོགས་འཛམ་གླིང་འདི་ན་ཀརྨ་པ། །རོལ་པའི་རྡོ་རྗེ་ཞེས་གྲགས་ཆོས་ཀྱི་རྗེ། །བཅོམ་ལྡན་ཤཱཀྱ་ཐུབ་པ་གཉིས་པ་ཞིག །བྱོན་པ་དེ་ལ་སྙིང་ནས་གུས་པས་འདུད། །ཐོས་པས་རིག་པའི་གནས་
རྣམས་ཀུན་ལ་བྱང་། །བསམ་པས་མདོ་རྒྱུད་དྲང་ངེས་དགོངས་པ་རྟོགས། །སྒོམ་པས་ཞི་ལྷག་གཟུང་འབྲེལ་བདེན་པ་མཐོང་། །རིམ་གཉིས་ལམ་བསླབས་རྡོ་རྗེའི་སྐུ་ཐོབ་ཤོག །ཅེས་པ་འདི་ཡང་རྒྱལ་དབང་མི་བསྐྱོད་རྡོ་རྗེས་མཛད་པའོ།། །།རྗེ་དེ་བཞིན་གཤེགས་པའི་རྣམ་ཐར་ལ་བསྟོད་པ་ནི། ལྷག་བསམ་ཆུ་གཏེར་མཁྱེན་རབ་ནོར་བུས་གང་། །དམིགས་མེད་ཐུགས་རྗེའི་གཏིང་མཐའ་རབ་ཏུ་ཟབ། །ཕྲིན་ལས་རླབས་ཕྲེང་ཕྱོགས་བཅུར་གཡོ་བ་ཅན། །ཡོན་ཏན་རྒྱ་མཚོ་བླ་མ་རྣམས་ལ་འདུད། །དཔལ་ལྡན་དཔའ་བོ་ས་ར་ཧ་པ་ཉིད། །གདུལ་བྱའི་དོན་སླད་བསམས་བཞིན་སྐྱེ་བ་བཞེས། །དེ་ཉིད་ཀརྨ་པ་ཞེས་ཆེར་གྲགས་པའི། །འཛམ་གླིང་རྒྱན་གྱུར་རྣམས་ལ་གུས་ཕྱག་འཚལ། ༈ །བསྐལ་བཟང་འདི་ལ་སངས་རྒྱས་སྟོང་འབྱུང་བའི། །དྲུག་པ་སེང་གེ་ཞེས་བྱར་འཚང་རྒྱ་ཞེས། །དམ་བཅས་འཇིགས་མེད་སེང་གེའི་སྒྲ་སྒྲོགས་པ། །དུས་གསུམ་མཁྱེན་པའི་ཞབས་ལ་གུས་ཕྱག་འཚལ། །
དེ་ཉིད་ཕྱི་མར་མཐུ་དང་རྫུ་འཕྲུལ་གྱིས། །གདུལ་བྱ་དཔག་མེད་འདུལ་བའི་དུས་མཁྱེན་ནས། །བསམས་བཞིན་སྐྱེ་བ་བཞེས་པའི་ཀརྨ་པ། །གྲུབ་ཆེན་པཀྴིར་གྲགས་ལ་གུས་ཕྱག་འཚལ། ༈ །དེ་ཉིད་ཕྱི་མར་མཁྱེན་རབ་རྒྱ་མཚོ་ཡིས། །ཐུབ་བསྟན་རྒྱས་པར་མཛད་པའི་དུས་མཁྱེན་ནས། །བསམས་བཞིན་སྐྱེ་བ་བཞེས་པའི་ཀརྨ་པ། །རང་བྱུང་རྡོ་རྗེའི་ཞབས་ལ་གུས་ཕྱག་འཚལ། །དེ་ཉིད་ཕྱི་མར་ཐབས་མཁས་ཐུགས་རྗེ་ཡིས། །འགྲོ་མང་སྨིན་གྲོལ་མཛད་པའི་དུས་མཁྱེན་ནས། །བསམས་བཞིན་སྐྱེ་བ་བཞེས་པའི་ཀརྨ་པ། །རོལ་པའི་རྡོ་རྗེའི་ཞབས་ལ་གུས་ཕྱག་འཚལ། །དེ་ཉིད་ཕྱི་མར་སྐྱེ་འགྲོ་དཔག་མེད་ཀྱི། །འཇིགས་སྐྱོབ་དགེ་ལེགས་འགྲུབ་པའི་དུས་མཁྱེན་ནས། །བསམས་བཞིན་སྐྱེ་བ་བཞེས་པའི་ཀརྨ་པ། །དེ་བཞིན་གཤེགས་པའི་ཞབས་ལ་གུས་ཕྱག་འཚལ། ༈ །ཁྱོད་སྔོན་རོལ་པའི་རྡོ་རྗེར་གྱུར་པའི་ཚེ། །གྲགས་ལྡན་སྐྱེས་བུའི་
མཆོག་ཅིག་འདིར་འབྱོན་ཞེས། །རང་གི་ཕྱི་མའི་གནས་བསྟན་ཡུལ་ཁམས་དེར། །ཉིང་མཚམས་སྦྱོར་ཚུལ་བསྟན་ལ་གུས་ཕྱག་འཚལ། །ཕག་གི་ལོ་ལ་ཁོ་བོས་འཆི་ཚུལ་བསྟན། །བྱི་བའི་ལོ་ལ་ཉང་འདམ་ཕྱོགས་སུ་སྐྱེ། །འབྲུག་གི་ལོ་ལ་གཞན་དོན་བྱེད་དོ་ཞེས། །ཇི་སྐད་གསུངས་བཞིན་བྱོན་ལ་གུས་ཕྱག་འཚལ། །ཁྱོད་ཉིད་སྐྱེ་ནས་སྐྱེ་བ་འཕོ་བའི་ཚེ། །དགའ་ལྡན་མི་ཕམ་དྲུང་དུ་བྱོན་ལ་སོགས། །སྣོད་ལྡན་གདུལ་བྱ་དག་པ་དུ་མའི་ངོར། །སྤྲུལ་མང་སོ་སོར་བསྟན་ལ་གུས་ཕྱག་འཚལ། །ལྷུམས་སུ་ཞུགས་ཚེ་ཡུམ་གྱི་མནལ་ལམ་དུ། །དུང་དཀར་གཡས་འཁྱིལ་གོས་ཀྱི་ཐུ་བར་གཏུམས། །སྐྱེས་བུ་དཔའ་བོས་གནས་མལ་གཡར་ལ་སོགས། །ལྟས་བཟང་བྱིན་གྱིས་བརླབས་ལ་གུས་ཕྱག་འཚལ། །མགོན་ཁྱོད་ཡུམ་གྱི་ལྷུམས་སུ་ཞུགས་ཚེ་ཡང་། །ཡི་གེ་དྲུག་པ་རྡོ་རྗེའི་སྒྲ་སྒྲོགས་པ། །ཉེ་འཁོར་གནས་པའི་སྐྱེ་བོས་གསལ་བར་ཐོས། །ངོ་མཚར་རྨད་དུ་བྱུང་
ལ་གུས་ཕྱག་འཚལ། །བལྟམས་པའི་ཚེ་ན་ངོ་མཚར་ལྟས་མཐོང་ནས། །དད་ལྡན་སྐྱེ་བོའི་ཚོགས་རྣམས་དེར་འདུས་ཏེ། །ཕྱག་འཚལ་མཆོད་ཅིང་གུས་པར་གསོལ་བཏབ་པས། གདོད་ནས་ཡོན་གནས་གྱུར་ལ་གུས་ཕྱག་འཚལ། །བལྟམས་པ་ནས་བཟུང་གཉིས་པའི་ཟླ་བ་ལ། །རོལ་པའི་རྡོ་རྗེའི་སྐུས་སྐྱེ་ཡིན་མིན་ཞེས། །བརྟག་པ་རྣམས་ཀྱི་ཐེ་ཚོམ་དྲ་བ་བཅད། །སྤྲུལ་སྐུ་བྱོན་པར་ངེས་ལ་གུས་ཕྱག་འཚལ། །བལྟམས་ནས་བསིལ་ཟེར་བྱེད་པ་བཞི་པ་ལ། །དུས་གསུམ་མཁྱེན་པ་ཀརྨ་པཀྴི་བ། །རང་བྱུང་རྡོ་རྗེ་རོལ་པའི་རྡོ་རྗེ་ཞེས། །གསལ་བར་ཞལ་གྱིས་བཞེས་ལ་གུས་ཕྱག་འཚལ། །བྱིས་པའི་ཚུལ་བསྟན་རོལ་རྩེད་མཛད་པའི་ཚེ། །འདས་དང་མ་འོངས་ལྐོག་གྱུར་ལུང་བསྟན་པ། །དེ་དང་དེ་དག་ཇི་བཞིན་མངོན་དུ་གྱུར། །ཐོགས་མེད་མངོན་ཤེས་མངའ་ལ་གུས་ཕྱག་འཚལ། །གཞོན་ནུ་ཉིད་ནས་གཞན་སྣང་ཟིལ་གྱིས་མནན། །མ་བསྡུས་སྐྱེ་
བོའི་ཚོགས་རྣམས་དབང་དུ་འདུས། །དེ་དག་མངོན་མཐོ་ལེགས་པའི་ལམ་ལ་བཀོད། །འབྲེལ་ཚད་དོན་ལྡན་ཁྱོད་ལ་གུས་ཕྱག་འཚལ། །མི་ཟད་ནམ་མཁའི་མཛོད་ལ་མངའ་བརྙེས་པས། །མ་འབད་ལྷ་མིའི་ལོངས་སྤྱོད་ཆར་བཞིན་འབབ། །དེ་དག་གང་ལའང་མ་ཆགས་ལྷུག་པར་གཏོང་། །སྦྱིན་འབྲས་ཡོངས་སུ་རྫོགས་ལ་གུས་ཕྱག་འཚལ། ༈ །ལྷག་པའི་ཚུལ་ཁྲིམས་བསླབ་པའི་ན་བཟས་བཀླུབས། །ལྷག་པའི་སེམས་ཀྱིས་བསླབ་པའི་ནོར་གྱིས་འབྱོར། །ལྷག་པའི་ཤེས་རབ་བསླབ་པའི་རྒྱན་གྱིས་སྤྲས། །འཕགས་ལམ་མངའ་བརྙེས་ཁྱོད་ལ་གུས་ཕྱག་འཚལ། །ཁྲོ་མེད་བཟོད་པའི་གོ་ཆ་སྲ་ཞིང་བརྟན། །བརྩོན་འགྲུས་མྱུར་བའི་རྟ་མཆོག་བཞོན་པ་ཅན། །འཁོར་བའི་གཡུལ་ལས་རྒྱལ་བའི་དཔའ་བོ་ཆེ། །མཐུ་སྟོབས་དབང་ཕྱུག་ཁྱོད་ལ་གུས་ཕྱག་འཚལ། །ནང་དུ་ཡང་དག་འཇོག་ལས་མི་གཡོ་བར། །གདུལ་བྱའི་ཁམས་དང་དབང་པོའི་རིམ་པ་བཞིན། །
སྨིན་གྲོལ་ལམ་ལ་འགོད་པའི་སེམས་དཔའ་ཆེ། །སེམས་ལ་དབང་ཐོབ་ཞབས་ལ་གུས་ཕྱག་འཚལ། །ཐུབ་ཆེན་འཇམ་དབྱངས་བྱམས་མགོན་སྤྱན་རས་གཟིགས། །འཕགས་པའི་གནས་བརྟན་རྗེ་བཙུན་སྒྲོལ་མ་སོགས། །ལྷག་པའི་ལྷ་རྣམས་ཡང་ཡང་ཞལ་སྟོན་ཞིང་། །ལུང་བསྟན་བྱིན་གྱིས་བརླབས་ལ་གུས་ཕྱག་འཚལ། །མཁའ་སྤྱོད་ས་སྤྱོད་བསྟན་སྐྱོང་སྲུང་མའི་ཚོགས། །མ་བསྒོས་པར་ཡང་ཕྲིན་ལས་ཚུལ་བཞིན་སྒྲུབ། །སྣང་བ་དབང་དུ་འདུས་པའི་རྣལ་འབྱོར་པ། །གྲུབ་པའི་དབང་པོ་ཁྱོད་ལ་གུས་ཕྱག་འཚལ། །སྡོམ་བརྩོན་མང་ཐོས་གྲུབ་པ་ས་སྐྱོང་སོགས། །ཆེར་འོས་འཇིག་རྟེན་སྤྱི་བོར་གྱུར་རྣམས་ཀྱི། །ཁེངས་པ་ཟིལ་གནོན་ཞབས་པད་སྤྱི་བོས་མཆོད། །ཆེ་བའི་ཆེ་མཆོག་ཁྱོད་ལ་གུས་ཕྱག་འཚལ། །ལྷ་ཡིས་ལུང་བསྟན་བཞིན་དུ་ཁྱོད་མཆོད་པས། །མི་དབང་སྟོབས་ཀྱི་འཁོར་ལོས་སྒྱུར་རྒྱལ་གྱུར། །དེ་ལྟར་རྩེ་གཅིག་གུས་པས་ཁྱོད་
བསྟེན་ན། །འདོད་དོན་དངོས་གྲུབ་སྩོལ་ལ་གུས་ཕྱག་འཚལ། །རྒྱ་བོད་ཡུལ་ཁམས་དུ་མ་ངོ་མཚར་བའི། །སྒྱུ་འཕྲུལ་དྲ་བའི་རྣམ་འཕྲུལ་སྣ་ཚོགས་ཀྱིས། །སྐལ་ལྡན་མཆོག་གི་དགོངས་པ་ཡོངས་རྫོགས་མཛད། །དབང་བཅུ་མངའ་བ་ཁྱོད་ལ་གུས་ཕྱག་འཚལ། །རི་བོ་རྩེ་ལྔའི་རྩེ་རེར་འཇམ་དབྱངས་རེ། །དངོས་སུ་གཟིགས་ནས་བསྟོད་ཅིང་གསོལ་བཏབ་པས། །འཇམ་པའི་དབྱངས་ཀྱིས་དངོས་སུ་རྗེས་སུ་བཟུང་། །བློ་ལྡན་རྒྱལ་སྲས་མཆོག་ལ་གུས་ཕྱག་འཚལ། །ཉན་ཐོས་ཚུལ་གྱིས་ཐུབ་བསྟན་རྒྱས་པར་མཛད། །བྱང་ཆུབ་སེམས་ཀྱིས་མཐའ་ཡས་འགྲོ་རྣམས་སྒྲོལ། །གསང་སྔགས་མཆོག་འཛིན་དཔལ་ལྡན་དྷརྨ་ཤྲཱི། །བྷ་དྲའི་ཞབས་ལ་སྤྱི་བོས་གུས་ཕྱག་འཚལ། །དམ་པ་ཁྱོད་ཀྱི་ཡོན་ཏན་ནམ་མཁའི་མཐའ། །ཚད་གཟུང་བརྗོད་པར་ནུས་པ་མ་མཆིས་ཀྱང་། །ཆ་ཤས་ཙམ་ལ་བདག་གིས་གསོལ་བཏབ་པས། །ཐུན་མོང་ཐུན་མོང་མིན་པའི་མཆོག་ཐོབ་གྱུར། །དེ་
ལྟར་ཕྱག་འཚལ་མཆོད་ཅིང་ཉེས་ཀུན་བཤགས། །དགེ་ལ་ཡི་རང་ཆོས་འཁོར་བསྐོར་བར་བསྐུལ། །མྱ་ངན་མི་འདའ་བསྐལ་པར་བཞུགས་གསོལ་འདེབས། །དགེ་དེས་འགྲོ་ཀུན་ཀུན་མཁྱེན་ཐོབ་པར་ཤོག །དཔལ་ལྡན་བླ་མ་ཁྱོད་སྐུ་ཅི་འདྲ་དང་། །འཁོར་དང་སྐུ་ཚེའི་ཚད་དང་ཞིང་ཁམས་དང་། །ཁྱོད་ཀྱི་མཚན་མཆོག་བཟང་པོ་ཅི་འདྲ་བ། །དེ་འདྲ་ཁོ་ནར་བདག་སོགས་འགྱུར་བར་ཤོག །ཁྱོད་ལ་བསྟོད་ཅིང་གསོལ་བ་བཏབ་པའི་མཐུས། །བདག་སོགས་གང་དུ་གནས་པའི་ས་ཕྱོགས་དེར། །ནད་དང་དབུལ་ཕོངས་འཐབ་བརྩོད་ཞི་བ་དང་། ཆོས་དང་བཀྲ་ཤིས་འཕེལ་བར་མཛད་དུ་གསོལ། །རྒྱལ་མཚན་རྩེ་མོ་སོགས་བྱའོ། །ཞེས་ཀརྨ་པ་དེ་བཞིན་གཤེགས་པ་ལ་བསྟོད་པ་མཁན་ཆེན་བསོད་ནམས་བཟང་པོས་མཛད་པའོ།། །།རྗེ་མཐོང་བ་དོན་ལྡན་གྱི་སྐུ་བསྟོད་ནི། ཆོས་དབྱིངས་མཁའ་ལ་སྣ་ཚོགས་གདུལ་བྱའི་ངོར། །གཟུགས་སྐུའི་དཀྱིལ་འཁོར་ཡོངས་སུ་སྟོན་མཛད་ཅིང་། །མཐའ་ཡས་འགྲོ་བ་
རྗེས་སུ་འཛིན་གྱུར་པའི། །དཔལ་ལྡན་བླ་མའི་ཞབས་པད་སྤྱི་བོས་མཆོད། །སྨོན་ལམ་རྟ་བདུན་རླུང་གི་བཞོན་པ་ཅན། །གདུལ་བྱ་གླིང་བཞིའི་དབུས་ན་རྣམ་པར་རྒྱུ། །ཚད་མེད་ཕྲིན་ལས་འོད་སྟོང་འགྱེད་པར་མཛད། །སྐལ་ལྡན་འགྲོ་བའི་མགོན་དུ་གྱུར་ལ་འདུད། །མི་རྟོག་ཏིང་འཛིན་ལྷ་དབང་རྡོ་རྗེ་ཡིས། །ལོག་ལྟའི་ལྷ་མིན་དཔུང་ཚོགས་འཇོམས་མཛད་ཅིང་། །དམ་ཆོས་བདུད་རྩིའི་དཔལ་ལ་དབང་འབྱོར་བ། །ལྷར་བཅས་འགྲོ་བའི་བླ་མར་གྱུར་ལ་འདུད། །བསླབ་གསུམ་གསེར་གྱི་དྲྭ་བས་གདོང་གཡོགས་ཤིང་། །བསྡུ་དངོས་བཞི་ཡི་ཡན་ལག་ཕུན་ཚོགས་ལྡན། །བསྟན་པའི་ཁུར་འཛིན་སྤོས་ཀྱི་གླང་པོ་ཆེ། །ཕས་རྒོལ་གཡུལ་ལས་རྒྱལ་ལ་ཕྱག་འཚལ་ལོ། །རིམ་གཉིས་ཟབ་མོའི་དོན་ལ་བརྟན་པ་ཐོབ། །གཞན་ལ་ལྐོག་ཏུ་གྱུར་པ་གཞན་གྱི་སེམས། །མངོན་སུམ་མཁྱེན་པའི་མངོན་ཤེས་ཕུལ་དུ་བྱུང་། །མཐོང་བ་དོན་ལྡན་ཞབས་ལ་ཕྱག་འཚལ་ལོ། །
སྐུ་ཡི་དཀྱིལ་འཁོར་གཟི་བརྗིད་ཕུང་པོ་ཅན། །གསུང་གི་དཀྱིལ་འཁོར་དམ་ཆོས་འོད་སྟོང་འགྱེད། །ཐུགས་ཀྱི་དཀྱིལ་འཁོར་ཟབ་ཅིང་རྒྱ་ཆེའི་གཏེར། །རྨད་བྱུང་གསུམ་ལྡན་ཁྱོད་ལ་ཕྱག་འཚལ་ལོ། །འཛམ་གླིང་ས་ཡི་དཀྱིལ་འཁོར་ཁྱོན་ཡངས་པར། །གྲགས་པའི་རྔ་སྒྲ་ཕྱོགས་ཀྱི་མཐའ་ཁྱབ་ཅིང་། །ལེགས་བཤད་དག་གི་ཟློས་གར་སྒྱུར་མཛད་པ། །མཐའ་ཡས་ཕྲིན་ལས་ལྡན་ལ་ཕྱག་འཚལ་ལོ། ༈ །སྟེང་ན་ལྷ་ཡིས་གདུགས་དཀར་ལེགས་བཟུང་ཞིང་། །འོག་ནས་ཀླུ་ཡིས་མཆོད་སྤྲིན་རྒྱ་མཚོས་མཆོད། །མདུན་ནས་མི་ཡིས་བསྟོད་དབྱངས་རྒྱ་མཚོས་བསྟོད། །ལྷ་མིའི་ཡོན་གནས་དམ་པར་གྱུར་ལ་འདུད། །མཁྱེན་པ་མཐའ་ཡས་འགྲོ་ལ་རབ་དགོངས་ནས། །ཐུགས་རྗེའི་འོད་དཀར་ཕྱོགས་བཅུར་འགྱེད་མཛད་ཅིང་། །ཕུལ་བྱུང་བྱིན་རླབས་མི་ཟད་འབྱུང་བའི་གནས། །འགྲོ་བའི་བླ་མ་མཆོག་ལ་ཕྱག་འཚལ་ལོ། །སྙན་དངགས་བསྟན་
བཅོས་ཐོགས་མེད་རྩོམ་ནུས་ཤིང་། །རྨད་བྱུང་སྤོབས་པའི་གློག་འོད་རབ་འཁྱུག་པ། །ཟབ་ལམ་བདུད་རྩིའི་ཆར་རྒྱུན་འབེབས་མཛད་པའི། །དཔལ་ལྡན་བླ་མའི་ཞབས་ལ་ཕྱག་འཚལ་ལོ། །གྲུབ་པ་རིག་འཛིན་ས་ལ་གནས་གྱུར་པ། །མཚུངས་མེད་བླ་མའི་ཡོན་ཏན་ཆུ་གཏེར་ལས། །ཅུང་ཟད་བརྗོད་པའི་དགེ་ཚོགས་གང་ཐོབ་དེས། །ཐམས་ཅད་མཁྱེན་པའི་གོ་འཕང་ཐོབ་གྱུར་ཅིག །ཅེས་ཀུན་མཁྱེན་རོང་སྟོན་ཆོས་རྗེ་ཉིད་ཀྱི་གཟིགས་སྣང་དང་མཐུན་པར་བསྟོད་པ་མཛད་པའོ།། །།རྗེ་བཙུན་ཆོས་གྲགས་རྒྱ་མཚོའི་ཞབས་ལ་གསོལ་བ་འདེབས་པ་ནི། ཁྱབ་བདག་དང་པོའི་མགོན་པོ་རྡོ་རྗེ་འཆང་། །དྲི་མེད་རྣམ་དག་འོད་གསལ་ཆོས་ཀྱི་སྐུ། །མཆོག་ཏུ་མི་འགྱུར་བདེ་བ་ཆེན་པོའི་དབྱིངས། །མཚུངས་མེད་ཆོས་རྗེའི་ཞབས་ལ་གསོལ་བ་འདེབས། །མཁྱེན་པའི་ཡེ་ཤེས་ནམ་མཁའི་ཁྱོན་ལྟར་ཡངས། །བརྩེ་བའི་ཐུགས་རྗེས་འགྲོ་བ་ཀུན་ལ་ཁྱབ། །མཛད་པའི་ཕྲིན་ལས་སྲིད་མཐའི་བར་དུ་གནས། །མཚུངས་
མེད་ཆོས་རྗེའི་ཞབས་ལ་གསོལ་བ་འདེབས། །དུས་གསུམ་རྒྱལ་བ་ཀུན་གྱི་མཁྱེན་པའི་གཏེར། །རྒྱ་ཆེན་ཆོས་ཀྱི་སྤྱན་གྱིས་རབ་གཟིགས་ནས། །འགྲོ་བའི་བླ་མའི་གོ་འཕང་བརྙེས་གྱུར་པའི། །མཚུངས་མེད་ཆོས་རྗེའི་གསོལ་བ་འདེབས། །རང་བྱུང་བདེ་སྟོང་ལྷུན་གྲུབ་རོལ་པའི་མཐུས། །དེ་བཞིན་གཤེགས་ཞེས་སྐྱེ་དགུའི་གཙུག་རྒྱན་དུ། །མཐོང་ཐོས་དོན་དང་ལྡན་པར་གང་གྱུར་པ། །མཚུངས་མེད་ཆོས་རྗེའི་ཞབས་ལ་གསོལ་བ་འདེབས། །དགེ་ལེགས་ཡོན་ཏན་མང་པོས་གང་བའི་མཚོ། །སྐྱེས་བུ་མི་འགྱུར་རྡོ་རྗེའི་ཐུགས་དང་ལྡན། །ཀུན་མཁྱེན་ཆོས་ཀྱི་རྒྱལ་པོ་ཞེས་གྲགས་པའི། །མཚུངས་མེད་ཆོས་རྗེའི་ཞབས་ལ་གསོལ་བ་འདེབས། ༈ །ཚོགས་གཉིས་རྒྱ་མཚོའི་དབུས་ནས་འཁྲུངས་པའི་སྐུ། །མཚན་དཔེའི་དཔལ་གྱིས་མངོན་པར་མཐོ་བ་ཅན། །གདུལ་བྱ་གླིང་བཞིའི་དབུས་ན་རྣམ་པར་མཛེས། །མཚུངས་མེད་ཆོས་རྗེའི་ཞབས་ལ་གསོལ་བ་
འདེབས། །དུས་གསུམ་སངས་རྒྱས་ཀུན་གྱི་གསུང་གི་མཛོད། །ཟབ་མོའི་ངག་གིས་འགྲོ་ལ་ཡུན་རིང་ནས། །རྣམ་དག་ཆོས་ཀྱི་དགའ་སྟོན་འགྱེད་མཛད་པ། །མཚུངས་མེད་ཆོས་རྗེའི་ཞབས་ལ་གསོལ་བ་འདེབས། །ཟབ་གསལ་གཉིས་མེད་ནམ་མཁའ་ལྟ་བུའི་ཐུགས། །ཤེས་བྱའི་གནས་རྣམས་གཟིགས་པའི་མཁྱེན་པ་དང་། །རྣམ་པར་མི་རྟོག་ཡེ་ཤེས་དབྱེར་མེད་པའི། །མཚུངས་མེད་ཆོས་རྗེའི་ཞབས་ལ་གསོལ་བ་འདེབས། །ཁྱོད་སྐུ་ཟླ་བ་གངས་ཅན་རི་བོའི་རྩེར། །འཐོན་པའི་ཚེ་ན་སྲིད་ཞིའི་ཕུན་ཚོགས་དང་། །གྲགས་པའི་འོད་དཀར་ཕྱོགས་བཅུ་ཀུན་ཁྱབ་པ། །མཚུངས་མེད་ཆོས་རྗེའི་ཞབས་ལ་གསོལ་བ་འདེབས། །ཕྱོགས་ལས་རྣམ་པར་རྒྱལ་བའི་མགོན་པོ་ཁྱོད། །མི་འཇིགས་སེང་གེའི་ཁྲི་ལ་འཁོད་པའི་ཚེ། །སྐྱེ་བོ་དྲེགས་པ་མཐའ་དག་མེད་པར་བྱས། །མཚུངས་མེད༴ ཐེག་པ་གསུམ་དང་བསླབ་པ་གསུམ་ལ་སོགས། །རྒྱལ་བའི་བསྟན་པ་ལུང་དང་
རྟོགས་པའི་ཆོས། །ནམ་མཁའི་ཁྱོན་བཞིན་ཡོངས་སུ་རྒྱས་པར་མཛད། །མཚུངས་མེད༴ འདྲེན་པ་ཁྱོད་ཀྱི་གསུང་གི་ཟེར་ཙམ་གྱིས། །འགྲོ་ལ་མངོན་མཐོའི་གོ་འཕང་སྦྱིན་པ་དང་། །ཐར་པའི་ལམ་མཆོག་སྟོན་པ་ཅིག་ཅར་གྱུར། །མཚུངས་མེད༴ ཕུན་ཚོགས་བཀྲ་ཤིས་རྟགས་ཀྱི་རི་མོ་ཅན། །ཞབས་སེན་རྩེ་མོས་རེག་པའི་རྡུལ་ཕྲན་ཡང་། །འགྲོ་བའི་མཆོད་རྟེན་མཆོག་ཏུ་གྱུར་པ་ཡི། །མཚུངས་མེད༴ མདོར་ན་སྐྱབས་མཆོག་གསུམ་པོ་ཁྱོད་ཉིད་དེ། །ཁྱོད་ཉིད་ཁོ་ན་སྐྱབས་མཆོག་གསུམ་པོ་ཉིད། །དེ་ཕྱིར་སྐྱོབ་པ་འགྲན་གྱི་ཟླ་བྲལ་བ། །མཚུངས་མེད་ཆོས་རྗེའི་ཞབས་ལ་གསོལ་བ་འདེབས། །དེ་ལྟར་རྩེ་གཅིག་གུས་པས་གསོལ་བཏབ་པས། །བདག་སོགས་སྐྱེ་བ་ཐ་མར་གྱུར་གྱི་བར། །རྒྱལ་བ་ཀུན་དངོས་བླ་མས་རྗེས་བཟུང་ནས། །གསུང་གི་བདུད་རྩི་ཅིར་ཡང་འཐུང་བར་ཤོག །ཅེས་བན་སྒར་འཇམ་དཔལ་བཟང་པོས་སོ། །དེའི་མཐར། འདས་པའི་སངས་རྒྱས་
གཞན་ཕན་རྣམ་རོལ་སོགས། །ད་ལྟ་མཁས་གྲུབ་ཀུན་གྱི་གཙུག་གི་རྒྱན། །མ་འོངས་སངས་རྒྱས་དྲུག་པ་སེང་གེའི་མཚན། །ཞིང་རྣམས་ཀུན་ཏུ་རྣམ་འཕྲུལ་སྣ་ཚོགས་ཀྱིས། །དུས་གསུམ་རྒྱལ་བ་ཀུན་གྱི་ཕྲིན་ལས་པ། །ཀརྨ་པ་ཞེས་ཉི་ཟླ་ལྟར་གསལ་བའི། །ཞབས་ལ་ཕྱག་འཚལ་གསོལ་འདེབས་བྱིན་གྱིས་རློབས། །ཚེ་རབས་ཀུན་ཏུ་རྗེས་སུ་འཛིན་གྱུར་ཅིག །རྒྱལ་བ་ཀུན་གྱི་མཁྱེན་བརྩེ་གཅིག་བསྡུས་པ། །རི་བོ་གྲུ་འཛིན་རྩེ་ན་སྤྱན་རས་གཟིགས། ཁ་བ་ཅན་ན་དཔལ་ལྡན་ཀརྨ་པར། །གྲགས་པའི་གདུགས་དཀར་འཛིན་པ་དེ་ལ་འདུད། །ཕྱོགས་བཅུའི་རྒྱལ་བ་ཀུན་གྱི་ངོ་བོ་ཉིད། །སྲིད་ཞིའི་བདེ་ལེགས་མཐའ་དག་འབྱུང་བའི་གནས། ཁམས་གསུམ་མགོན་པོ་མཚུངས་མེད་ཀརྨ་པ། །ཆོས་གྲགས་རྒྱ་མཚོའི་ཞབས་ལ་གསོལ་བ་འདེབས། །རྒྱལ་བ་བྱམས་པ་དང་ནི་སེང་གེ་ཡིས། །མ་འོངས་སངས་རྒྱས་མཛད་པ་བསྟན་པའི་ཚེ། །བདག་ཀྱང་བྱང་ཆུབ་མཆོག་
ལ་གནས་གྱུར་ཏེ། །བླ་ན་མེད་པའི་ལུང་ཡང་སྟོན་པར་ཤོག །ཅེས་པའང་སྦྲེལ་ལོ།། །།རྗེ་བརྒྱད་པའི་སྐུ་བསྟོད་ནི། ཟླ་མེད་སྟོན་པའི་བསྟན་པ་གང་ཡིན་པ། །འཆུག་མེད་དངོས་ཉིད་ལེགས་པར་བཙལ་བྱས་ནས། །ཡང་དག་ཚུལ་ལ་བསྙེན་པའི་བརྟུལ་ཞུགས་ཅན། །བསྟན་ལ་ངེས་པར་རྫོགས་དེར་གསོལ་བ་འདེབས། ༈ །བཅས་དང་རང་བཞིན་ཁ་ན་མ་ཐོའི་ཆོས། །ལྟར་སྣང་དམ་པའི་ཆོས་སུ་བཅོས་པ་རྣམས། །སྤུན་ལྟར་ཕྱི་རོལ་གྱུར་པ་ཉིད་གཟིགས་ནས། །དོན་བཟང་ལེགས་བཤད་འདོམས་དེར་གསོལ་བ་འདེབས། །འདི་དང་གཏན་གྱི་འདུན་མ་ཐམས་ཅད་པ། །ཡོངས་འཛིན་དགེ་བའི་བཤེས་ལས་འབྱུང་སེམས་ནས། །ཟློག་མེད་མོས་པ་གོང་འཕེལ་ཕུལ་བྱུང་བ། །དད་པའི་ཕ་རོལ་སོན་དེར་གསོལ་བ་འདེབས། །ཚེ་འདིའི་གྲགས་འབྱོར་སྙིང་པོས་དབེན་པའི་ཚུལ། །ཚིག་ཙམ་མིན་པར་སྙིང་ནས་རབ་རྟོགས་ཏེ། །ཞེན་ལོག་སྲེད་པ་བྲལ་བའི་རྣམ་
ཐར་ཅན། །དགོས་མེད་དྲན་པ་བསྟེན་དེར་གསོལ་བ་འདེབས། །བྱམས་པའི་བློ་ཅན་སྙིང་རྗེའི་གདུང་ཤུགས་དང་། །འབྲལ་བ་མེད་པར་ངེས་འབྱུང་རྣམ་པར་དག །སྡུག་བསྔལ་རྒྱུ་དང་བཅས་ལ་རྟག་སྐྱོ་ཞིང་། །མི་རྟག་ངེས་པར་སེམས་དེར་གསོལ་བ་འདེབས། །ཉོན་མོངས་ངན་བློར་སྐད་ཅིག་མི་གཏོང་ཞིང་། །གལ་ཏེ་ཤར་ཡང་གཉེན་པོའི་ཆུ་ལོན་ཅན། །དགེ་བའི་ངང་ཚུལ་བཟང་པོ་མི་གཏོང་བའི། །བཤེས་གཉེན་ཕན་མཛད་གང་དེར་གསོལ་བ་འདེབས། །གཟུ་བོར་གསུང་རབ་དོན་ལ་མཉམ་གཞག་ནས། །དྲང་ངེས་སོ་སོར་འབྱེད་པའི་ཤེས་རབ་ཀྱིས། །ཅལ་སྒྲོགས་རྗེས་སུ་རྒྱུག་པར་མི་བྱེད་པར། །ངེས་དོན་དམ་པ་འཆད་དེར་གསོལ་བ་འདེབས། །ཆེན་པོར་གྲགས་ལ་བརྩེ་ཞིང་རྗེ་བྱེད་བློ། །སྨོན་ལམ་དག་པ་རྣམས་ཀྱིས་མཚམས་སྦྱར་ནས། །དགེ་ལ་སྦྱོར་བའི་བློ་གྲོས་སྐྱེད་པའི་རྟེན། །ཡོངས་སུ་བསྔོ་བར་མཛད་དེར་གསོལ་བ་འདེབས། །དེ་ལྟར་ཡོན་
ཏན་བརྗོད་ལས་དགེ་གང་ཐོབ། །ཡོན་ཏན་དེ་ལྡན་ཡོན་ཏན་བརྗོད་པའི་དག །བྱང་ཞིང་ཆུབ་པའི་ལུས་སེམས་དོན་ལྡན་པ། །ཀརྨ་པ་ཡི་དགོངས་པ་རྫོགས་བྱེད་ཤོག །ཅེས་པ་འདི་ནི་རྗེ་བཙུན་མི་བསྐྱོད་རྡོ་རྗེ་ཉིད་ལ་ཉིད་ཀྱིས་བསྟོད་པར་མཛད་པའོ། །དེའི་མཐར། བདུད་བཞིའི་དཔུང་གིས་མི་བསྐྱོད་ཅིང་། །རྡོ་རྗེ་ལྟ་བུའི་ཏིང་འཛིན་ལྡན། །བྱང་ཆུབ་སེམས་དཔའི་ཚུལ་འཛིན་པ། །མི་བསྐྱོད་རྡོ་རྗེའི་ཞབས་ལ་འདུད། །བདག་ནི་སྐྱེ་བ་ཐམས་ཅད་དུ། །མཉམ་མེད་དྭགས་པོ་བཀའ་བརྒྱུད་དང་། །ཁྱད་པར་དཔལ་ལྡན་ཀརྨ་པ། །སྤྱི་གཙུག་རྒྱན་དུ་མི་འབྲལ་ཤོག །སྐྱེ་བ་འདི་ནས་ཚེ་རབས་ཐམས་ཅད་དུ། །དཔལ་ལྡན་ཀརྨ་པ་ཡི་བསྟན་པ་ལ། །འཆད་རྩོམ་ཐོས་བསམ་སྒོམ་པ་བྱེད་པ་ལ། །ཞྭ་ནག་ཅན་གྱི་བྱིན་རླབས་འཇུག་གྱུར་ཅིག །སྐྱེ་བ་འདི་ནས་ཚེ་རབས་ཐམས་ཅད་དུ། །དཔལ་ལྡན་ཀརྨ་པ་ཡི་བསྟན་པ་ལ། །འཆད་རྩོམ་ཐོས་བསམ་སྒོམ་པ་བྱེད་པ་ལ། །ཞྭ་ཁྲ་ཅན་གྱི་
སྒྲུབ་བརྒྱུད་དར་བར་ཤོག །དཔལ་ལྡན་བླ་མ་དམ་པའི་སོགས། །ཅེས་ཀྱང་སྦྲེལ་བར་སྣང་ངོ་། །སྟེང་དག་པ་འོག་མིན་གྱི་ཕོ་བྲང་ན། །སངས་རྒྱས་མི་བསྐྱོད་རྡོ་རྗེ་རྡོ་རྗེ་སེམས། །སྐྱབས་གནས་མཐར་ཐུག་མཆོག་ལ་གསོལ་བ་འདེབས། །ཕྱག་རྒྱ་ཆེན་པོའི་དངོས་གྲུབ་བྱིན་གྱིས་རློབས། །ཤར་ཟ་ཧོར་ནོར་བུའི་དགོན་པ་ན། །མི་བསྐྱོད་རྡོ་རྗེ་སངས་རྒྱས་ཏཻ་ལོ་པ། །རྣལ་འབྱོར་མཐར་ཐུག་མཆོག་ལ་གསོལ་བ་འདེབས། །ཕྱག་རྒྱ་ཆེན་པོའི་དངོས་གྲུབ་བྱིན་གྱིས་རློབས། །བྱང་པུཥྤ་ཧ་རིའི་དགོན་པ་ན། །མི་བསྐྱོད་རྡོ་རྗེ་པཎ་ཆེན་ནཱ་རོ་པ། །དངོས་གྲུབ་མཐར་ཐུག་མཆོག་ལ་གསོལ་བ་འདེབས། །ཕྱག་རྒྱ་ཆེན་པོའི་དངོས་གྲུབ་བྱིན་གྱིས་རློབས། ༈ །ལྷོ་དྲོ་བོ་ལུང་གི་སྨན་ལྗོངས་ན། །མི་བསྐྱོད་རྡོ་རྗེ་མར་པ་ལྷོ་བྲག་པ། །བྱིན་རླབས་མཐར་ཐུག་མཆོག་ལ་གསོལ་བ་འདེབས། །ཕྱག་རྒྱ་ཆེན་པོའི་དངོས་གྲུབ་བྱིན་གྱིས་རློབས། །ནུབ་གངས་དཀར་གྱི་རྒྱལ་པོ་ཏི་སེ་ན། །མི་བསྐྱོད་རྡོ་
རྗེ་རྣལ་འབྱོར་མི་ལ་རས། །དོན་རྒྱུད་མཐར་ཐུག་མཆོག་ལ་གསོལ་བ་འདེབས། །ཕྱག་རྒྱ་ཆེན་པོའི་དངོས་གྲུབ་བྱིན་གྱིས་རློབས། །ཤར་དྭགས་ལྷ་དཔལ་གྱི་སྒམ་པོ་ན། །མི་བསྐྱོད་རྡོ་རྗེ་རྗེ་བཙུན་སྒམ་པོ་པ། །བཀའ་བརྒྱུད་མཐར་ཐུག་མཆོག་ལ༴ ཕྱག་རྒྱ་ཆེན་པོའི༴ གནས་སྟོང་ལུང་མཚུར་ཕུའི་དགོན་པ་ན། །མི་བསྐྱོད་རྡོ་རྗེ་དཔལ་ལྡན་དུས་གསུམ་མཁྱེན། །སྒྲུབ་བརྒྱུད་མཐར་ཐུག་མཆོག་ལ༴ ཕྱག་རྒྱ་ཆེན་པོའི༴ གནས་གསང་བ་མཆོག་གི་དགྱེས་པ་ན། །མི་བསྐྱོད་རྡོ་རྗེ་དཔལ་ལྡན་གསང་བ་འདུས། །སྒྱུ་འཕྲུལ་མཐར་ཐུག་མཆོག་ལ༴ ཕྱག་རྒྱ་ཆེན་པོའི༴ མཆོག་རྡོ་རྗེ་བཙུན་མོའི་བྷ་ག་ན། །མི་བསྐྱོད་རྡོ་རྗེ་དཔལ་ལྡན་འཁོར་ལོ་སྡོམ། །བདེ་མཆོག་མཐར་ཐུག་མཆོག་ལ༴ ཕྱག་རྒྱ་ཆེན་པོའི༴ མཚམས་བོ་ལ་ཀཀྐོ་འདུས་པ་ན། །མི་བསྐྱོད་རྡོ་རྗེ་བཅོམ་ལྡན་ཀྱེ་རྡོ་རྗེ། །དགྱེས་བྱེད་མཐར་ཐུག་མཆོག་ལ༴ ཕྱག་རྒྱ་ཆེན་པོའི༴ བསགས་
སྦྱངས་རབ་ཏུ་འབར་བའི་བདེ་བ་ན། །མི་བསྐྱོད་རྡོ་རྗེ་ནག་པོ་ལྕམ་དྲལ་ཚོགས། །བསྟན་སྲུང་མཐར་ཐུག་མཆོག་ལ་གསོལ་བ་འདེབས། །ཕྱག་རྒྱ་ཆེན་པོའི་དངོས་གྲུབ་བྱིན་གྱིས་རློབས། །ཁྱོད་ལ་གསོལ་བ་བཏབ་པའི་བྱིན་རླབས་ཀྱིས། །འགྲོ་རྣམས་མ་རིག་མུན་པ་རབ་བསལ་ནས། །ཐར་པ་ཆེན་པོའི་ལམ་མཆོག་རབ་བགྲོད་དེ། །རྣམ་མཁྱེན་སངས་རྒྱས་གོ་འཕང་མྱུར་ཐོབ་ཤོག །ཅེས་པ་འདི་རྩེ་ཐང་སྒོམ་ཆེན་གྱིས་བསྐུལ་བའི་ངོར་ཀརྨ་པ་མི་བསྐྱོད་རྡོ་རྗེ་དགའ་བའི་དབྱངས་ཀྱིས་བགྱིས་པའོ།། །།རྗེ་བཙུན་དབང་ཕྱུག་རྡོ་རྗེ་ལ་གསོལ་བ་འདེབས་པ་ནི། དཔལ་ལྡན་ཁྱབ་བདག་རིགས་རྣམས་ཀུན་གྱི་གཙོ། །མི་ཕམ་སྲིད་ཞིའི་གཡུལ་ལས་རྣམ་པར་རྒྱལ། །ཆོས་ཀྱི་འཁོར་ལོས་སྒྱུར་བ་བླ་ན་མེད། །མཁྱེན་བརྩེའི་དབང་ཕྱུག་ཉིད་ལ་གསོལ་བ་འདེབས། །རྒྱ་ཆེན་གནས་སྣང་ཆོས་ལ་ཆགས་ཐོགས་བྲལ། །ཟབ་གསལ་གཉིས་མེད་མཁྱེན་པའི་ཡེ་ཤེས་རྒྱས། །སྲིད་པ་ཇི་སྲིད་དགེ་ལེགས་ལམ་སྟོན་པ། །དབང་ཕྱུག་
རྡོ་རྗེའི་ཞབས་ལ་གསོལ་བ་འདེབས། །ཞིང་ཁམས་རྒྱ་མཚོར་སྤྲུལ་པ་རྒྱ་མཚོ་ཡིས། །ཅིག་ཅར་དམ་ཆོས་སྒོ་བརྒྱ་འབྱེད་པར་མཛད། །ཀུན་ཀྱང་རིགས་བདག་མཆོག་གི་ཅོད་པན་ཅན། །དབང་ཕྱུག་རྡོ་རྗེའི་ཞབས་ལ་གསོལ་བ་འདེབས། །འཇིག་རྟེན་དབང་ཕྱུག་མཆོག་གི་ཞིང་ཁམས་འདིར། །རྒྱལ་ཀུན་ཐུགས་རྗེའི་དབང་ཕྱུག་རྡོ་རྗེའི་སྐུ། །འབྲེལ་ཚད་དོན་ལྡན་མངོན་སུམ་ཞལ་སྟོན་པ། །དབང་ཕྱུག་རྡོ་རྗེའི་གསོལ་བ་འདེབས། ༈ །ཉེ་བའི་སྲས་ཆེན་རྣམས་ཀྱི་ཅོད་པན་རྩེར། །བཀྲ་ཤིས་འཁོར་ལོས་མཚན་པའི་ཞབས་བཀོད་ནས། །ལྷར་བཅས་འགྲོ་ལ་འཇིགས་མེད་དབུགས་དབྱུང་བའི། །དབང་ཕྱུག་རྡོ་རྗེའི་ཞབས་ལ་གསོལ་བ་འདེབས། །སྐུ་ཡི་དཀྱིལ་འཁོར་མཐོང་བས་རབ་དང་ཞིང་། །ཡང་དག་གསུང་གིས་ཐེ་ཚོམ་དྲི་མ་སེལ། །བསམ་གྱིས་མི་ཁྱབ་ཐུགས་རྗེའི་རོལ་གར་སྟོན། །དབང་ཕྱུག་རྡོ་རྗེའི་ཞབས་ལ་གསོལ་བ་འདེབས། །
མཁའ་ཁྱབ་འགྲོ་ལ་ཉེ་རིང་མི་མངའ་ཞིང་། །གདུལ་བྱ་དུས་ཡོལ་བཏང་སྙོམས་མ་མཆིས་པར། །མ་ལུས་བདེ་ཆེན་ས་ལ་འགོད་མཛད་པ། །དབང་ཕྱུག་རྡོ་རྗེའི་ཞབས་ལ་གསོལ་བ་འདེབས། །བདག་སོགས་སྐྱེ་བ་འདི་དང་ཚེ་རབས་ཀུན། །མགོན་པོ་ཁྱོད་དང་རྟག་ཏུ་འབྲལ་མེད་ཅིང་། །བསྒྲུབ་པའི་མཆོད་པས་ཚོགས་གཉིས་མྱུར་རྫོགས་ཏེ། །སྐུ་གསུང་ཐུགས་ཀྱི་གསང་བ་འཛིན་པར་ཤོག །ཞྭ་དམར་པ་ལྔ་པས་གསོལ་བ་བཏབ་པའོ། །ཁམས་གསུམ་དབང་ཕྱུག་ཆོས་ཀྱི་རྗེ། །རྡོ་རྗེ་སྲིད་པ་གསུམ་གྱི་བདག །སངས་རྒྱས་ཀུན་འདུས་ཀརྨ་པ། །དབང་ཕྱུག་རྡོ་རྗེའི་ཞབས་ལ་འདུད། །སྔོན་ཚེ་རྒྱལ་བའི་ཞལ་བཞེས་ལྟར། །ཞིང་འདིའི་འདྲེན་པར་མྱུར་བྱོན་ཏེ། །ཐེ་ཚོམ་དྲ་བ་གཅོད་མཛད་པ། །དབང་ཕྱུག་རྡོ་རྗེའི་ཞབས་ལ་འདུད། །ཉི་མའི་དཀྱིལ་འཁོར་ཤར་བ་ལྟར། །མཆོག་དམན་སྐྱེ་དགུ་མཐའ་དག་གི །ཡིད་ཀྱི་པདྨོ་འབྱེད་མཛད་པ། །དབང་ཕྱུག་རྡོ་རྗེའི་ཞབས་ལ་
འདུད། །གཞོན་ནུའི་རོལ་རྩེད་འདི་ཉིད་དུ། །གཞན་སེམས་མཁྱེན་པའི་མངོན་ཤེས་ཀྱིས། །གདུལ་བྱ་རྗེས་སུ་འཛིན་མཛད་པ། །དབང་ཕྱུག་རྡོ་རྗེའི་ཞབས༴ ༈ ཆགས་ཐོགས་མེད་པའི་ཡེ་ཤེས་ཀྱིས། །དུས་གསུམ་བྱ་བ་ལུང་སྟོན་ཞིང་། །ཇི་སྲིད་བསྙེལ་བ་མི་མངའ་བ། །དབང་ཕྱུག་རྡོ་རྗེའི་ཞབས༴ ཇི་ཙམ་རྟོག་དཔྱོད་མང་བ་དང་། །ཇི་ཙམ་བློ་གྲོས་ཆེ་བས་ཀྱང་། །ཁྱོད་ཀྱི་མཛད་པ་བསམ་མི་ཁྱབ། །དབང་ཕྱུག་རྡོ་རྗེའི་ཞབས༴ ཚུ་རོལ་མཐོང་བའི་སྐྱེ་བོ་ཡིས། །མོས་བློས་ཡར་གཞལ་མ་ཡིན་པར། །ལྷུན་གྱིས་གྲུབ་པའི་མཛད་པ་ཅན། །དབང་ཕྱུག་རྡོ་རྗེའི་ཞབས༴ ཡར་ངོའི་ཟླ་བ་ཇི་བཞིན་དུ། །སྐུ་གསུང་ཐུགས་ཀྱི་དཀྱིལ་འཁོར་ནི། །དྲི་མ་མེད་པར་གསལ་གྱུར་པ། །དབང་ཕྱུག་རྡོ་རྗེའི་ཞབས༴ ༈ དྲི་མེད་བཻ་ཌཱུརྱ ་ལྟ་བུར། །དགོས་འདོད་ལྷུན་གྱིས་གྲུབ་གྱུར་ཅིང་། །བརྟག་དང་ཞིག་པའི་ཡུལ་མིན་པ། །དབང་ཕྱུག་རྡོ་རྗེའི༴ ས་ཡི་
སྙིང་པོ་ཇི་བཞིན་དུ། །གལ་ཏེ་བརྟགས་ཤིང་གཞིགས་པ་ན། །སྐྱོན་རྣམས་བྲི་ཞིང་ཡོན་ཏན་འཕེལ། །དབང་ཕྱུག་རྡོ་རྗེའི༴ གང་གི་ཞབས་སེན་རྡུལ་ཕྲན་ལ། །ཚངས་དབང་གིས་ཀྱང་ཕྱག་བགྱིད་པ། །དེ་ལ་དངོས་པོ་ཐམས་ཅད་ཀྱིས། །རྣམ་པ་ཀུན་དུ་བདག་འདུད་དོ། །བདག་སོགས་འགྲོ་བ་ལོང་བ་ཀུན། །འབྲོག་དགོན་འཇིགས་པར་འཕྱན་པ་ལ། །ཁྱོད་ལས་དམིགས་བུ་མ་འཚལ་བས། །འབྲལ་བ་མེད་པར་བསྟེན་པར་བགྱི། ༈ །བདག་དང་བདག་གི་དགྲ་གཉེན་དང་། །དེ་བཞིན་མཐོང་ཐོས་དྲན་རེག་གི། །སྐྱེ་བོ་ཀུན་དང་སྲོག་ཆགས་ཀུན། །ཁྱོད་ཀྱིས་རྗེས་སུ་འཛིན་པར་ཤོག །རྡོ་རྗེ་ལྟ་བུའི་སྐུ་གསུང་ཐུགས། །འཕོ་འགྱུར་བྲི་གང་མ་མཆིས་ཀྱང་། །འགྲོ་བློ་མི་རྟག་རབ་རིབ་ཀྱིས། །ཀུན་ཏུ་སྒྲིབ་པར་མ་གྱུར་ཅིག །བསྐལ་པ་ཇི་སྲིད་བར་དུ་ནི། །ལུང་རྟོགས་བསྟན་པའི་སྙིང་པོ་འདི། །འཇིག་རྟེན་ཀུན་ཏུ་ཁྱབ་པ་དང་། །ནུབ་པ་མེད་པར་བྱིན་གྱིས་རློབས། །
ཤོག་ལྷེབ་ ༢༠༡ ནས་ ༣༠༠ བར།
བདག་ནི་སྐྱེ་བ་ཐམས་ཅད་དུ། །མཉམ་མེད་དྭགས་པོ་བཀའ་བརྒྱུད་དང་། །ཁྱད་པར་དཔལ་ལྡན་ཀརྨ་པ། །སྤྱི་གཙུག་རྒྱན་དུ་མི་འབྲལ་ཤོག །ཅེས་པ་འདི་ནི་དཔལ་འཛམ་ཐང་གི་ཆོས་སྡེ་ཆེན་པོར་བཞུགས་དུས་རྗེ་བཙུན་དབང་ཕྱུག་རྡོ་རྗེ་ཉིད་ཀྱིས་རྗེ་ཞྭ་དམར་པ་ལྔ་པའི་ཕྱག་ཏུ་ཤོག་བུ་ཕུལ་ཏེ་ཕྱག་བྲིས་ཤིག་གནང་དགོས་གསུངས་པ་ལ་རྣམ་ཐར་བསྟོད་པར་མཛད་པའོ།། །།རྗེ་དགུ་པའི་མཚན་དོན་འགྲེལ་བའི་སྒོ་ནས་བསྟོད་པ་ནི། རྟོགས་དང་སྤངས་པ་ཕུན་ཚོགས་རྒྱུའི་སངས་རྒྱས། །ཚོགས་གསུམ་འཁོར་ལོ་བསྐོར་བའི་རྡོ་རྗེ་འཆང་། །མདོ་སྔགས་བསྟན་པའི་བདག་པོར་བསྟོད་པའི་ཕྱིར། །དཔལ་ལྡན་བླ་མའི་མཚན་རབ་བརྗོད་པར་འདོད། །གཉིས་སུ་མེད་པའི་ཡེ་ཤེས་དཔལ་དང་ལྡན། །ཇི་ལྟ་ཇི་སྙེད་མཁྱེན་པའི་དཔལ་དང་ལྡན། །མཐའ་གཉིས་ལས་འདས་མྱང་འདས་དཔལ་དང་ལྡན། །དེ་ཕྱིར་རྟོགས་པ་ཕུན་ཚོགས་དཔལ་དང་ལྡན། །ལེགས་པར་སྤངས་ཕྱིར་སྐྱོན་གྱིས་ཁྱོད་མི་ཕམ། །མ་ལུས་སྤངས་ཕྱིར་ཉེས་པས་ཁྱོད་མི་ཕམ། །
མི་ལྡོག་སྤངས་ཕྱིར་དྲི་མས་ཁྱོད་མི་ཕམ། །སྤངས་པ་ཕུན་སུམ་ཚོགས་ཕྱིར་ཁྱོད་མི་ཕམ། །རང་དོན་སྤྲོས་བྲལ་ཆོས་ཀྱི་དབང་ཕྱུག་ཉིད། །གཞན་དོན་ལྷུན་གྲུབ་ཆོས་ཀྱི་དབང་ཕྱུག་ཉིད། །བྲལ་སྨིན་ཡོན་ཏན་ཆོས་ཀྱི་དབང་ཕྱུག་ཉིད། །རྒྱུ་ཡི་སངས་རྒྱས་ཆོས་ཀྱི་དབང་ཕྱུག་ཉིད། །ཐབས་མཁས་ཡོངས་སུ་རྫོགས་པའི་རྡོ་རྗེ་ཉིད། །མི་བྱེད་གཞོམ་དུ་མེད་པའི་རྡོ་རྗེ་ཉིད། །བདེ་ཆེན་གཅིག་པུའི་རང་བཞིན་རྡོ་རྗེ་ཉིད། །བསོད་ནམས་ཚོགས་རབ་བསགས་པའི་རྡོ་རྗེ་ཉིད། །ཆོས་ཀུན་ཆོས་ཀྱི་ཕྱག་རྒྱར་གར་གྱི་དབང་། །ཙཎྜི་དམ་ཚིག་ཕྱག་རྒྱར་གར་གྱི་དབང་། །སྟོང་ཉིད་ཕྱག་རྒྱ་ཆེན་མོར་གར་གྱི་དབང་། །ཡེ་ཤེས་ཚོགས་རབ་བསགས་པ་གར་གྱི་དབང་། །ཟག་པའི་ཕྱོགས་ལས་རྣམ་པར་རྒྱལ་བའི་སྙིང་། །སྒྲིབ་གཉིས་ཕྱོགས་ལས་རྣམ་པར་རྒྱལ་བའི་སྙིང་། །འཕོ་འཛག་ཕྱོགས་ལས་རྣམ་པར་རྒྱལ་བའི་སྙིང་། །ཕྱོགས་ལས་རྣམ་པར་རྒྱལ་བའི་སྙིང་པོ་ཉིད། །རིགས་
ཀུན་གཅིག་ཏུ་བསྡོམས་པའི་ཁྱབ་བདག་མཆོག །ཁྱབ་བྱེད་རྡོ་རྗེ་འཆང་བའི་ཁྱབ་བདག་མཆོག ། ཁ་སྦྱོར་རྡོ་རྗེ་སེམས་དཔའི་ཁྱབ་བདག་མཆོག །དེ་ཕྱིར་འབྲས་རྒྱུད་ཁྱབ་བདག་རྡོ་རྗེ་འཛིན། །སྡེ་སྣོད་བསྟན་པའི་གསལ་བྱེད་ཉི་མ་མཆོག །རྒྱུད་སྡེ་བསྟན་པའི་སྣང་བྱེད་ཉི་མ་མཆོག །གདུལ་བྱ་སྨིན་བྱེད་བསྟན་པའི་ཉི་མ་མཆོག །དེ་ཕྱིར་བསྟན་པའི་ཉི་མ་ཡོངས་སུ་གསལ། །དཔལ་ལྡན་བླ་མའི་མཚན་ཙམ་འཛིན་པ་ལས། །གཞན་དུ་བསྒྲུབ་པའི་མཆོད་པ་མེད་པ་ཡི། །བདག་དང་བདག་འདྲའི་གདུལ་བྱ་མ་ལུས་པ། །མཚན་མཆོག་ཐོས་གྲོལ་ཆེན་པོས་གྲོལ་གྱུར་ཅིག །ཅེས་ཞྭ་དམར་པ་དྲུག་པས་སྦྱར་བའོ།། །།རྗེ་ཆོས་དབྱིངས་རྡོ་རྗེའི་སྐུ་བསྟོད་ནི། ཕྱོགས་བཅུའི་རྒྱལ་བ་ཀུན་དང་མཉམ་པ་ལས། །ལྷག་པའི་ཐུགས་རྗེ་ཆེན་པོ་མངའ་བརྙེས་པ། །འཕགས་མཆོག་སྤྱན་རས་གཟིགས་དབང་དགེ་སློང་གཟུགས། །རྣམ་རོལ་ནམ་ཡང་འགྱུར་མེད་བརྟན་ལ་འདུད། །རྒྱལ་སྲས་
གཞན་གྱིས་བཟུང་བའི་ཞིང་ཁམས་དང་། །གདུལ་བྱ་སྙིགས་མ་ལས་ཀྱང་ཆེས་སྙིགས་མ། །འཕགས་མཆོག་ཁྱོད་ཀྱིས་ཡོངས་སུ་བཟུང་ལགས་ན། །ཐུགས་རྗེ་ཆེན་པོས་སྐྱོང་བར་མཛད་ལ་འདུད། །སེམས་ཅན་ཁམས་ལ་ཉིན་མཚན་ལན་དྲུག་ཏུ། །གཟིགས་ནས་བྱམས་པར་མཛད་པ་དེ་ལྟ་བུ། །ཕ་དང་མ་དང་གཉེན་བཤེས་སུས་ཀྱང་མིན། །བྱམས་ཆེན་བྱམས་པས་སྐྱོང་བར་མཛད་ལ་འདུད། །མཐོ་རིས་ཐར་པའི་བདེ་མཆོག་སྦྱིན་པ་དང་། །སྲིད་ཞིའི་གདུང་སེལ་པདྨ་མཆོག་འཆང་བ། །ཐུགས་རྗེའི་ཕྱག་གིས་འགྲོ་འདི་མི་གཏོང་བར། །ཐབས་མཁས་འགྲོ་རྣམས་སྐྱོང་བར་མཛད་ལ་འདུད། །དུས་འདི་ནས་བཟུང་བསྐལ་པ་དུ་མའི་བར། །རྣམ་པར་གྲོལ་བའི་ཕྲིན་ལས་རྒྱ་མཚོ་ཡིས། །ཐར་འདོད་ཐར་པའི་ལམ་སྟོན་ཁྱོད་ཁོ་ན། །བདག་སོགས་གདུལ་བྱ་རྗེས་སུ་འཛིན་མཛད་གསོལ། །ཞེས་གར་དབང་དྲུག་པས་མཛད་པ་དང་། ཚུལ་ཁྲིམས་ཡོན་ཏན་ཞིང་གི་དཔལ་ལྡན་
ལ། །ཏིང་འཛིན་རྫུ་འཕྲུལ་དཔལ་དང་ལྡན་པས་སྤྲས། །ཤེས་རབ་སྟོབས་བཅུ་མངའ་བའི་དཔལ་ལྡན་གསལ། །དཔལ་ལྡན་ཆོས་དབྱིངས་མཆོག་གི་རྡོ་རྗེར་འདུད། །མཁྱེན་པ་འཇིག་རྟེན་གསུམ་གྱི་འདྲེན་པར་འཁྲུངས། །བརྩེ་བ་འཇིག་རྟེན་གསུམ་གྱི་འདྲེན་པར་རྟག །ནུས་པ་འཇིག་རྟེན་གསུམ་གྱི་འདྲེན་པར་རྒྱལ། །མཁྱེན་བརྩེ་ནུས་ལྡན་ཆོས་དབྱིངས་རྡོ་རྗེར་འདུད། །ངོ་བོ་ཉིད་སྐུ་སྐུ་བཞི་ལྷུན་གྲུབ་སྐུ། །ལོངས་སྤྱོད་རྫོགས་སྐུ་སྐུ་བཞི་ལྷུན་གྲུབ་གསུང་། །སྤྲོས་བྲལ་ཆོས་སྐུ་སྐུ་བཞི་ལྷུན་གྲུབ་ཐུགས། །སྐུ་བཞི་ལྷུན་གྲུབ་ཆོས་དབྱིངས་རྡོ་རྗེར་འདུད། །གཞི་དུས་འོད་གསལ་ཆོས་དབྱིངས་མི་འགྱུར་བ། །ལམ་དུས་ཆོས་དབྱིངས་མི་འགྱུར་ངོ་བོར་འཕྲོད། །འབྲས་དུས་ཆོས་དབྱིངས་མི་འགྱུར་མངོན་དུ་གྱུར། །ཆོས་དབྱིངས་འགྱུར་བ་མེད་པའི་རྡོ་རྗེར་འདུད། །ཞིང་ཁམས་ཀུན་ཏུ་ཁྱབ་པ་སྐུ་ཡི་གསང་། །ཁམས་དབང་ཀུན་ཏུ་ཁྱབ་པ་
གསུང་གི་གསང་། །ཐུགས་རྗེས་ཀུན་ཏུ་ཁྱབ་པ་ཐུགས་ཀྱི་གསང་། །གསང་གསུམ་ཀུན་ཁྱབ་ཆོས་དབྱིངས་རྡོ་རྗེར་འདུད། །སྐྱེ་མེད་རྟག་པའི་རྡོ་རྗེ་སྤྲུལ་པའི་སྐུ། །འགག་མེད་རྟག་པའི་རྡོ་རྗེ་ལོངས་སྤྱོད་རྫོགས། །གནས་མེད་རྟག་པའི་རྡོ་རྗེ་ཆོས་ཀྱི་སྐུ། །མི་འཇིག་རྟག་པའི་ཆོས་དབྱིངས་རྡོ་རྗེར་འདུད། །དགོས་འདོད་འབད་མེད་སྩོལ་བ་ཡིད་བཞིན་གྱི། །ནོར་བུ་དཔག་བསམ་ཤིང་གི་སྙིང་པོ་ལས། །བདེ་ལེགས་ཕྱོགས་བཅུར་རྒྱས་པ་ཟླ་མེད་པ། །ཕྲིན་ལས་མངོན་པར་མཐོ་བའི་དཔལ་དེར་འདུད། །བླ་མ་རྒྱལ་བ་མཆོག་གི་མཚན་དོན་ལས། །བརྩམས་པའི་རྣམ་དཀར་དགེ་བ་གང་མཆིས་དེས། །སངས་རྒྱས་བྱང་ཆུབ་སེམས་དཔའི་བཤེས་གཉེན་རྣམས། །མི་འབྲལ་བསྟེན་པའི་སྐལ་བ་ལྡན་ཕྱིར་བསྔོ། །ཞེས་པ་རྒྱལ་ཚབ་གྲགས་པ་མཆོག་དབྱངས་ཀྱིས་སྦྱར་བའོ།། །།རྗེ་ཡེ་ཤེས་རྡོ་རྗེ་ལ་གསོལ་བ་འདེབས་པ་ནི། མཁྱེན་བརྩེའི་རང་བཞིན་མཆོག་གི་བདག་ཉིད་ཅན། །རྒྱལ་བ་ཀུན་དང་ཕྲིན་
ལས་མཉམ་པ་ལས། །ལྷག་པའི་ཐུགས་རྗེ་མངའ་བའི་ཀརྨ་པ། །ཡེ་ཤེས་རྡོ་རྗེའི་ཞབས་ལ་གསོལ་བ་འདེབས། །ཚོགས་གཉིས་རྫོགས་པའི་མཚན་དཔེའི་སྐུ་མངའ་བ། །མཐོང་བ་ཙམ་གྱིས་མངོན་མཐོ་ངེས་ལེགས་ཀྱི། །རྣམ་པར་གྲོལ་བའི་བདེ་བ་མཆོག་སྟེར་བ། །ཡེ་ཤེས་རྡོ་རྗེའི་ཞབས་ལ༴ ཆོས་རྣམས་ཀུན་ལ་ཡེ་ཤེས་སྔོན་འགྲོ་ཞིང་། །ཡན་ལག་དྲུག་ཅུའི་ཆོས་སྒོ་མཐའ་ཡས་པ། །ཅིག་ཅར་སྟོན་ལ་འཇིགས་མེད་བསྙེམས་བྲལ་བ། །ཡེ་ཤེས་རྡོ་རྗེའི་ཞབས་ལ༴ ཟག་མེད་ཆོས་དབྱིངས་ཟབ་ཅིང་ཡངས་པ་ལ། །བདེ་ཆེན་འགྱུར་བ་མེད་པ་སྤྲོས་དང་བྲལ། །མཁྱེན་པའི་ཡེ་ཤེས་ཆགས་ཐོགས་མི་མངའ་བ། །ཡེ་ཤེས་རྡོ་རྗེའི་ཞབས་ལ༴ བྲལ་སྨིན་ཡོན་ཏན་བྱེ་བའི་རང་བཞིན་ལ། །ལེགས་བྱས་དུ་མ་འབྱུང་བའི་དབང་གི་རྒྱལ། །འགྲོ་བ་ཡོངས་ཀྱི་རེ་བ་སྐོང་མཛད་པ། །ཡེ་ཤེས་རྡོ་རྗེའི་ཞབས་ལ༴ ཕན་བདེ་མ་ལུས་འབྱུང་བའི་གནས་གཅིག་
པུ། །གང་འདུལ་ཐབས་ཀྱིས་རྣམ་འཕྲུལ་ཅིར་ཡང་སྟོན། །འབད་མེད་ལྷུན་གྱིས་གྲུབ་པའི་ཐུགས་རྗེ་ཅན། །ཡེ་ཤེས་རྡོ་རྗེའི་ཞབས་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །འགྲོ་བའི་བླ་མ་ཡེ་ཤེས་རྡོ་རྗེ་ཡི། །བྱིན་རླབས་གདུལ་བྱའི་རྒྱུད་ལ་འཇུག་པ་དང་། །ཚེ་རབས་ཀུན་ཏུ་འབྲལ་བ་མེད་པར་ཤོག །ཅེས་པ་གར་དབང་བདུན་པས་མཛད་པའོ།། །།རྗེ་བྱང་ཆུབ་རྡོ་རྗེ་ལ་གསོལ་བ་འདེབས་པ་ནི། དུས་གསུམ་སངས་རྒྱས་འདུས་པའི་ངོ་བོ་ཉིད། །ཉོན་མོངས་བྱང་ཞིང་ཡེ་ཤེས་ཆུབ་པ་ཡི། །མི་འགྱུར་རྡོ་རྗེའི་ལམ་ལ་འགོད་མཛད་པ། །སྐུ་བཞིའི་དབང་ཕྱུག་ཞབས་ལ་གསོལ་བ་འདེབས། །ཚོགས་གཉིས་རིན་ཆེན་རྒྱ་མཚོར་འཁྲུངས་པའི་སྐུ། །མཚན་དཔེའི་དཔལ་གྱི་གཟི་བརྗིད་མངོན་མཐོ་བས། །བདུད་སྡེའི་དཔུང་ཚོགས་མ་ལུས་ཞི་མཛད་པ། །དཔལ་ལྡན་བླ་མའི་ཞབས་ལ་གསོལ་བ་འདེབས། །གསུང་གཅིག་སྒྲ་དབྱངས་ཀུན་གྱི་རྗེས་འཇུག་ཅིང་། །ཡན་
ལག་དྲུག་ཅུའི་དབྱངས་ལྡན་འགག་མེད་པར། །རྨད་བྱུང་ཆོས་ཀྱི་འཁོར་ལོ་བསྐོར་བའི་དཔལ། །ཆོས་ཀྱི་རྒྱལ་པོའི་ཞབས་ལ་གསོལ་བ་འདེབས། །ཇི་ལྟ་ཇི་སྙེད་མཁྱེན་པའི་ཡེ་ཤེས་ཐུགས། །སྙིགས་དུས་འགྲོ་ལ་བྱམས་པའི་འོད་སྣང་ཅན། །བློ་གྲོས་དཀྱིལ་འཁོར་མཆོག་ཏུ་རྒྱས་མཛད་པ། །མཁྱེན་བརྩེའི་བདག་ཉིད་ཞབས་ལ་གསོལ་བ་འདེབས། །གསང་གསུམ་ཡོན་ཏན་འཁོར་ལོའི་མཛོད་འཛིན་ཅིང་། །དགོས་འདོད་མ་ལུས་སྩོལ་བའི་རིན་ཆེན་མཆོག །རྗེ་བཙུན་བླ་མ་བྱང་ཆུབ་རྡོ་རྗེ་ཡི། །བྱིན་རླབས་གདུལ་བྱའི་རྒྱུད་ལ་འཇུག་གྱུར་ཅིག །ཅེས་པ་གར་དབང་བརྒྱད་པས་སྩལ་བ་ལ། །ཕྱི་ནས་བཀའ་འབངས་སི་ཏུ་པས་གསོལ་འདེབས་སུ་བསྒྱུར་བ་ལགས། །མཐོན་མཐིང་ཅོད་པན་འཆང་བ་བཅུ་གསུམ་པ་རྗེ་བཙུན་བདུད་འདུལ་རྡོ་རྗེའི་རྣམ་ཐར་གསོལ་འདེབས་ནི། རྒྱལ་ཀུན་ཐུགས་རྗེའི་རང་གཟུགས་སྤྱན་རས་གཟིགས། །བསམ་མི་ཁྱབ་པའི་སྒྱུ་འཕྲུལ་གར་རོལ་བ། །རྡོ་རྗེ་ཅན་དངོས་སྐུར་བསྟན་སེམས་
དཔའ་ཆེ། །བདུད་འདུལ་རྡོ་རྗེའི་ཞབས་ལ་གསོལ་བ་འདེབས། །དཔལ་ལྡན་བསྟན་པའི་སྙིང་པོ་སྒྲུབ་བརྒྱུད་ཀྱིས། །ཉིན་བྱེད་འགྲོ་ལ་འཆི་མེད་དཔལ་སྟེར་བ། །མཁས་དང་གྲུབ་པའི་ཁྱུ་མཆོག་ཡོངས་ཀྱི་གཉེན། །རྣམ་བཞིའི་ཕྲིན་ལས་རྒྱས་པའི་སྡེ་ལ་འདུད། །ཟླ་བྲལ་མཉམ་མེད་ཐུབ་པའི་དབང་པོ་ཡི། །རིང་ལུགས་རྒྱལ་མཚན་འཛིན་པའི་མངའ་བདག་མཆོག །འཁོར་བ་ཇི་སྲིད་གནས་དང་དེ་སྲིད་བར། །རྣམ་འཕྲུལ་རྒྱུན་མི་འཆད་པར་སྟོན་ལ་འདུད། །རིགས་གསུམ་གདུལ་བྱའི་དོན་སླད་སྤྲུལ་སྐུའི་ཚུལ། །གཟིགས་པ་རྣམ་ལྔས་བསྙལ་དྭགས་ལ་དགོངས་ཏེ། །པད་འབྱུང་རྡོ་རྗེའི་བཀའ་ཡི་ལུང་ཇི་བཞིན། །ཛྙཱན་ཌཱཀིའི་བརྡའ་ཡི་བསྐུལ་ལ་འདུད། །འཐུང་གཅོད་རྗེས་མཐུན་བསིལ་རི་ན་བུན་ཅན། །ཆུ་ཀླུང་མེ་ཡི་ཕྱོགས་རྒྱུ་རིགས་དང་རུས། །རྣམ་པར་དག་པའི་གནས་དེར་ཀརྨ་པ། །གསལ་བར་ལུང་བསྟན་རྗེས་སུ་གནང་ལ་འདུད། །གླང་ལོ་
ཁྲུམས་ཀྱི་ཟླ་བའི་ཡར་ཚེས་ལ། །ཕུན་ཚོགས་ལྟས་བཟང་དང་བཅས་སྐུ་འཁྲུངས་ནས། །ལུས་ཅན་སྐྱེ་དགུའི་མགོན་དུ་ཕྱོགས་བཅུ་ཡི། །སངས་རྒྱས་བྱང་སེམས་དབུགས་དབྱུང་སྩོལ་ལ་འདུད། །སྐབས་དེར་བྱིས་པ་དར་དཀར་རལ་ག་ཅན། །ཤེལ་སྣོད་ཀ་མ་ལ་ཐོགས་འཇའ་འོད་ཀློང་། །གླུ་གར་རོལ་རྩེད་སྣ་ཚོགས་ཅིར་ཡང་བསྒྱུར། །རྡོ་རྗེ་བེར་ཅན་མེ་ཏོག་འཐོར་ལ་འདུད། །ཡེ་ཤེས་དབྱིངས་ནས་སྐུར་བཞེངས་ལས་བཞིར་སྟོན། །དོན་དམ་ཉིད་ལས་གཞན་སྣང་གུད་དུ་མེད། །དེ་སྐད་སྨྲ་ཞིང་ཧ་ཧའི་གད་རྒྱང་སྒྲོགས། །བླ་མ་མགོན་པོ་དབྱེར་མེད་ཞབས་ལ་འདུད། །གང་སྐུ་མཚན་དང་དཔེ་བྱད་ཡོངས་སུ་རྫོགས། །ངོ་མཚར་དུ་མས་སྤྲས་པའི་རྒྱལ་སྲས་ཀྱི། །སྤྱོད་པའི་གྲགས་སྙན་ས་གསུམ་ཀུན་ཁྱབ་ནས། །གྲུབ་པའི་གནས་མཆོག་མཚུར་ཕུར་བྱོན་ལ་འདུད། །རྒྱལ་བ་དང་པོར་མི་འཇིགས་སེང་གེའི་ཁྲིར། །མངའ་གསོལ་མགོན་ཁྱོད་ཉིན་
བྱེད་འོད་སྟོང་བཞིན། །མུན་པར་འཐོམས་པའི་སྐྱེ་བོ་ཇི་སྙེད་པར། །ཡང་དག་ལམ་སྟོན་རྣམ་འདྲེན་ཁྱོད་ལ་འདུད། །སྡེ་སྣོད་གསུམ་དང་ཤེས་བྱའི་གནས་རྣམས་ཀུན། །མ་ལུས་ཐུགས་སུ་ཆུད་ནས་རྒྱལ་བའི་བསྟན། །ཡོངས་རྫོགས་འཛིན་པའི་ཞབས་སེན་ནོར་བུའི་འོད། །ཚངས་དབང་གཙུག་གིས་མངོན་པར་བཏུད་ལ་འདུད། །གནམ་ལྷ་ཤེལ་གིང་དཀར་སོགས་མཐུ་ཆེན་གྱི། །རྩལ་ལྡན་ཚོགས་ཀྱང་གུས་པས་རབ་བསྙེན་ཅིང་། །མཐའ་བཞིའི་དྲེགས་ལྡན་ཁེངས་པ་ཡོངས་སྐྱངས་ནས། །ཐུགས་རྗེའི་ཆར་གྱིས་སྨིན་གྲོལ་བཀོད་ལ་འདུད། །གཞན་ཡང་རིགས་དྲུག་བག་ཉལ་རྣམས་ཀྱི་རྒྱུད། །བྱིན་རླབས་འོད་ཀྱིས་རང་སྐད་ཆོས་སྒྲ་སྟོན། །བདེན་པ་མཐོང་བའི་ལས་ཅན་བསམ་ལས་འདས། །སངས་རྒྱས་གཉིས་པ་དངོས་སུ་བྱོན་ལ་འདུད། །དུས་གསུམ་རྒྱལ་དང་ཉན་ཐོས་གནས་བརྟན་སོགས། །འཕགས་ཡུལ་གྲུབ་བརྙེས་ཡི་དམ་ལྷ་ཆོས་སྐྱོང་། །ཞལ་
བསྟན་ཟབ་དོན་སྙིང་པོའི་བཅུད་མཐའ་དག །གང་སྐུའི་བུམ་པ་བཟང་དེར་གཏམས་ལ་འདུད། །ཡིད་བཞིན་བསམ་འཕེལ་ཇོ་ཤཱཀ་མཆོག་གཉིས་དྲུང་། །གདེངས་ཅན་སུན་བཟློག་སྨོན་ལམ་བདེན་སྟོབས་དང་། །འཕགས་པ་ཝ་ཏིར་མཆོད་པའི་སྤྲིན་སྤྲོ་བས། །ངོ་མཚར་མངོན་སུམ་སྙན་ཤལ་འཛིན་དེར་འདུད། །འཛམ་གླིང་སྤྱི་དང་བྱེ་བྲག་གངས་ལྗོངས་འདིར། །འགྲོ་བའི་དཔལ་མགོན་ཁྱོད་ཉིད་ལས་གཞན་སུ། །ས་ཟླའི་རི་དབང་ཇི་བཞིན་ལྷམ་མེར་གསལ། །ཁམས་གསུམ་ཆོས་ཀྱི་རྒྱལ་པོ་ཁྱོད་ལ་འདུད། །ལྔ་བདོའི་ལང་ཚོ་ཆེས་ཆེར་ངོམས་པའི་དུས། །དམུ་རྒོད་རང་རྒྱུད་ཞུགས་ལྕེས་གཞོམ་རྣམས་ལ། །ཚད་མེད་སྙིང་རྗེའི་ཆུ་ཡིས་བརླན་པར་མཛད། །སར་གནས་བྱང་ཆུབ་སེམས་དཔའ་ཆེན་པོར་འདུད། །མེ་སྤྲུལ་ཆོ་འཕྲུལ་ཅན་གྱི་ཉེར་བཞི་ལ། །དགོངས་པ་ཆོས་དབྱིངས་ཐིམ་པའི་སྣང་བ་བསྟན། །མེ་ཏོག་ཆར་འབབ་ལྷ་ཡི་རོལ་མོ་ལྡིར། །
སྐལ་ལྡན་རྒྱུད་སྨིན་བྱིན་རླབས་སྩོལ་ལ་འདུད། །རྒྱལ་བའི་རྣམ་ཐར་རྒྱ་མཚོའི་ཕ་རོལ་སོན། །གཞལ་བར་དཀའ་ཡང་ཟེགས་མ་འཐོར་བའི་དགེས། །མ་འོངས་བསྐལ་བཟང་དྲུག་པ་སེང་གེ་ཡིས། །རྗེས་གཟུང་བླ་མེད་བྱང་ཆུབ་སྤྱོད་པར་ཤོག །རྣམ་དག་ངེས་གསང་ཀར་བརྒྱུད་རིན་ཆེན་བསྟན། །མཐའ་ཀླས་སྲིད་མཐར་ཁྱབ་པའི་ལེགས་བྱས་ཀྱིས། །ཐོས་བསམ་སྒྲུབ་པ་སྙིང་པོར་སྤེལ་བྱེད་པའི། །རྒྱལ་བ་མཆོག་དེའི་དགོངས་པ་རྫོགས་བྱེད་ཤོག །ཅེས་པའང་རྒྱལ་བའི་ཕྲིན་ལས་པ་དགེ་སློང་ནོར་བུ་གང་ནས་དཀའ་གནང་བཞིན་སི་ཏུ་སྤྲུལ་སྐུ་པདྨ་ཉིན་བྱེད་དབང་པོས་གསོལ་བ་བཏབ་པའོ། །རྒྱལ་དབང་ཐམས་ཅད་མཁྱེན་པ་བཅུ་བཞི་པ་ལ་གསོལ་བ་འདེབས་པ་ནི། མཆོག་གི་ཡེ་ཤེས་རྟག་བརྟན་ལྷུན་གྲུབ་ཏུ། །གདོད་ནས་བཞུགས་པ་རྒྱལ་ཀུན་ངོ་བོ་ཉིད། །མ་འགག་སྙིང་རྗེའི་རོལ་པ་ཧེ་རུ་ཀ །དཀྱིལ་འཁོར་གཙོ་བོར་བཞེངས་ལ་གསོལ་བ་འདེབས། །དཔལ་ལྡན་ལྷུན་རྫོགས་འོད་གསལ་སྙིང་པོའི་དོན། །སྤྲོས་པས་
བརྟགས་མིན་ཀུན་བཟང་དགོངས་ཀློང་ཆེར། །མ་བཅོས་རང་གསལ་བདེན་པས་ལྟ་ངན་འཇོམས། །ཐེག་པ་མཆོག་གི་རྡོ་རྗེར་གསོལ་བ་འདེབས། །ཀུན་རྫོབ་ཕྱོགས་ཀྱིས་ནམ་ཡང་བསླད་མིན་ཅིང་། །དོན་དམ་རྒྱལ་བའི་གཟིགས་པར་དབང་འབྱོར་བས། །ངེས་དོན་བསྟན་འགྲོའི་མིག་ལྟར་འགྱུར་བའི་ཕྱིར། །མཆོག་གི་ཉི་མ་ཆེན་པོར་གསོལ་བ་འདེབས། །རྒྱ་ཆེན་དོན་ཟབ་ཆུ་རླུང་མ་ལུས་པ། །ཀུན་དགའི་ཐུགས་ཀྱི་ཆུ་གཏེར་ལ་འཇུག་ནས། །དོན་བཟང་ཡིད་བཞིན་ནོར་བུ་སྤེལ་མཛད་པ། །ལྷར་བཅས་འགྲོ་བའི་བླ་མར་གསོལ་བ་འདེབས། །རྡོ་རྗེ་གསུམ་གྱི་བྱིན་རླབས་བདག་སོགས་ཀྱི། །རྒྱུད་ལ་རབ་ཞུགས་དོན་གཉིས་ལྷུན་གྱིས་གྲུབ། །སྒྲུབ་བརྒྱུད་སྙིང་པོའི་རིང་ལུགས་རྒྱས་པ་དང་། །དགེ་ལེགས་སྣང་བས་ས་གསུམ་ཀུན་ཁྱབ་ཤོག །ཞེས་ཐམས་ཅད་མཁྱེན་པ་རྒྱལ་དབང་བཅུ་བཞི་པའི་ཞབས་བརྟན་ཀུན་མཁྱེན་འབྲུག་པ་རིན་པོ་ཆེའི་རྡོ་རྗེའི་གསུང་ཉིད་གསོལ་འདེབས་སུ་ཞབས་
བསྒྱུར་བའོ།། །།རྒྱལ་དབང་ཀརྨ་པ་ཐེག་མཆོག་རྡོ་རྗེའི་རྣམ་ཐར་གསོལ་འདེབས་ནི། ས་གསུམ་ཀུན་ཁྱབ་མཚན་སྙན་ལྷ་ཡི་རྔ། །བསྒྲགས་པས་མ་རིག་གཉིད་སློང་སྙིང་རྗེའི་གཏེར། །རྒྱལ་ཀུན་འཕྲིན་ལས་དབང་ཕྱུག་ཀརྨ་པ། །ཐེག་མཆོག་རྡོ་རྗེའི་ཞབས་ལ་གསོལ་བ་འདེབས། །བསྐལ་མང་གོང་ནས་སྲིད་མཚོར་བྱིང་བའི་འགྲོ། །བྱམས་བརྩེའི་ཕྱག་གིས་འདྲེན་པར་དམ་བཅས་ནས། །བསིལ་ལྡན་ལྗོངས་འདིར་སྐྱེས་རབས་མུ་ཏིག་ཕྲེང་། །བརྒྱུད་མར་སྤྲུལ་པའི་རོལ་གར་སྟོན་ལ་འདུད། །གང་ཁྱོད་བདུད་ཚོགས་འདུལ་བའི་རྡོ་རྗེ་ཡིས། །འབྱུང་འགྱུར་རྡོ་རྗེའི་ལུང་གིས་བསྐུལ་བ་ལྟར། །གཟིགས་པ་རྣམ་ལྔས་ཟླ་ནང་ཡིད་ལྷུང་དུ། །རྗེ་རིགས་ཆེན་པོར་ལྷུམས་སུ་ཞུགས་ལ་འདུད། །མེ་སྤྲུལ་རྒྱལ་ཟླའི་དབང་ཕྱོགས་ཚེས་བཅུའི་ཉིན། །བལྟམས་མ་ཐག་ཏུ་དྲན་པ་མངོན་བཞག་ནས། །སྐྱིལ་ཀྲུང་དང་བཅས་དབྱངས་གསལ་བཟླ་བ་སོགས། །འགྲོ་བའི་ཡོན་གནས་དམ་པར་སྟོན་ལ་
འདུད། །རིང་མིན་ཉིད་དུ་རྣམ་འདྲེན་མཆོག་རྣམས་ཀྱི། །རྡོ་རྗེའི་ལུང་དང་མཚན་གྱི་དྲིལ་བསྒྲགས་ཤིང་། །དུས་གསུམ་མཁྱེན་དྲུང་གཙུག་ཕུད་བསིལ་བ་དང་། །རིགས་ཀྱི་ཅོད་པན་སྤྱི་བོར་བཅིངས་ལ་འདུད། །གདན་ས་ཆེན་པོ་མཚུར་ཕུར་སྤྱན་དྲངས་ཤིང་། །སྡོམ་པ་གསུམ་ལྡན་ཕྱི་ནང་རིགས་པའི་གནས། །རྡོ་རྗེ་ཐེག་པའི་སྨིན་གྲོལ་གསན་བཞེས་སོགས། །ཡོངས་རྫོགས་བསྟན་པའི་བདག་པོར་གྱུར་ལ་འདུད། །སྣང་བརྙན་གསར་བསྐྲུན་ས་ཟླའི་དུས་སྟོན་དང་། །གཙུག་ལག་ཉམས་གསོ་སློབ་ཚོགས་སྨིན་གྲོལ་བཀོད། །སྲོག་གིས་ཕོངས་རྣམས་མི་འཇིགས་སྐྱབས་སྦྱིན་སོགས། །འཕྲིན་ལས་དཔེ་ཟླས་བསྐྲུན་དུ་མེད་ལ་འདུད། །རྒྱ་བོད་ཧོར་སོགས་ཡུལ་གྲུ་མཐའ་དག་གི །རྒྱལ་བློན་འབངས་འཁོར་ཁྱིམ་བདག་བགྲང་ཡས་ཀྱིས། །གཙུག་ན་ཞབས་སེན་ཟླ་བ་རབ་བཀོད་ནས། །བྱང་གྲོལ་དམ་པར་དབུགས་དབྱུང་མཛད་ལ་འདུད། །
ཐུན་མིན་ཡུལ་དུས་མངོན་པར་མཁྱེན་པ་དང་། །སྣ་ཚོགས་སྤྲུལ་བསྒྱུར་རྡོ་བར་ཞབས་ཀྱི་རྗེས། །གཞན་སེམས་མཁྱེན་སོགས་གང་གི་ཡོན་ཏན་མཐའ། །སྲིད་པའི་མཐའ་ཡང་བརྗོད་དཀའ་སྟོན་ལ་འདུད། །སློབ་མའི་ཐུ་བོ་རྒྱལ་མཆོག་དབྱར་རྔ་པ། །ཏཱའི་སི་ཏུ་དཔའ་བོའི་དབང་ཕྱུག་དང་། །མཆོག་གྱུར་གླིང་པ་ལ་སོགས་མཁས་གྲུབ་ཀྱི། །སྐྱེས་མཆོག་དམ་པར་བསྟན་པ་གཏད་ལ་འདུད། །ས་འབྲུག་ཆོ་འཕྲུལ་ཟླ་བའི་དོན་གཅིག་ལོར། །གཟུགས་སྐུའི་དཀྱིལ་འཁོར་ཆོས་ཀྱི་དབྱིངས་སུ་བརྟུལ། །འཇའ་འོད་གུར་ཁྱིམ་ལྷ་མིའི་མཆོད་སྤྲིན་སོགས། །ངོ་མཚར་དུ་མའི་དཔལ་དུ་འབར་ལ་འདུད། །སྐུ་གདུང་རིང་བསྲེལ་འགྲོ་བའི་མཆོད་འོས་སླད། །རྡོ་རྗེའི་རང་བཞིན་མཉེན་ལྕུག་དང་བཅས་པར། །བྱིན་རླབས་སླར་ཡང་གདུལ་བྱའི་མགོན་ཉིད་དུ། །ལུང་བསྟན་དབུགས་དབྱུང་རྩོལ་བར་མཛད་ལ་འདུད། །དེ་ལྟར་ཁྱོད་ཀྱི་རྣམ་པར་ཐར་པའི་ཚུལ། །ཅུང་ཟད་
བསྟོད་པས་བདག་ཅག་སྐྱེ་ཀུན་ཏུ། །འབྲལ་མེད་རྗེས་བཟུང་མ་འོངས་སེངྒེའི་སྒྲས། །ཆོས་ཀྱི་བདུད་རྩི་མཆོག་ལ་སྤྱོད་པར་ཤོག །ཅེས་འཕགས་མཆོག་འཇིག་རྟེན་དབང་ཕྱུག་རྫོགས་པའི་སངས་རྒྱས་དཔལ་ཀརྨ་པ་ཐེག་ པ་མཆོག་གི་རྡོ་རྗེའི་རྣམ་ཐར་གསོལ་འདེབས་འདི་ལྟར་དགོས་ཞེས། དབུ་ཀརྨ་ཚེ་དབང་འབུམ་ནས་ལྷ་རེག་བཅས་བསྐུལ་བ་དང་། ཁྱད་པར་བཀའ་དྲིན་མཚུངས་མེད་སྐྱབས་མགོན་འབྲུག་ཆེན་ཐམས་ཅད་གཟིགས་པ་སྐུ་འཕྲེང་དགུ་པ་དཔལ་ལྡན་མི་ཕམ་ངེས་དོན་ཆོས་ཀྱི་རྒྱ་མཚོ་འཕྲིན་ལས་དོན་ཀུན་གྲུབ་པ་ཕྱོགས་ཐམས་ཅད་ལས་རྣམ་པར་རྒྱལ་བའི་སྡེས་གསེར་ས་ལ་སྒྲམ་གྱི་མེ་ཏོག་དང་། ལྷ་རྫས་རབ་དཀར་བཅས་བཀའ་སྩལ་སྤྱི་བོར་ཕེབས་པ་གུས་པས་མཆོད་དེ་གང་གི་རྗེ་དབོན་དུ་གཏོགས་པ་ཤཱཀྱའི་བཙུན་པ་ཀརྨ་ཚེས་དབང་ཀུན་བཟང་ངེས་དོན་བསྟན་འཛིན་སྨྲ་བའི་དབང་ཕྱུག་ཞེས་བགྱི་བས་སྦྱར་བ་ཚེ་རབས་ཀུན་ཏུ་རྗེ་བཙུན་ཀརྨ་པས་རྗེས་སུ་འཛིན་ཅིང་བྱིན་གྱིས་བརླབ་ཏུ་གསོལ། །རྒྱལ་དབང་བཅོ་ལྔ་པའི་གསོལ་འདེབས་བྱིན་རླབས་སྤྲིན་ཆེན་ནི། ཚེ་འོད་དཔག་མེད་རིགས་དང་དཀྱིལ་འཁོར་བདག །ངེས་པ་ལྔ་ལྡན་གར་དབང་ནམ་མཁའི་རྒྱལ། །གངས་ཅན་འདྲེན་
མཆོག་སངས་རྒྱས་སྤྲུལ་པའི་སྐུ། །མཁའ་ཁྱབ་བདེ་བའི་རྡོ་རྗེར་གསོལ་བ་འདེབས། །ཆོས་ཀུན་དབྱིངས་སུ་གདོད་ནས་བྱང་ཆུབ་སྟེ། །མཐའ་ཡས་སྐུ་དང་ཞིང་གི་རྣམ་འཕྲུལ་གྱིས། །རབ་འབྱམས་རྒྱལ་བ་སྲས་བཅས་ཕྲིན་ལས་མཛད། །འཇིག་རྟེན་གསུམ་གྱི་མགོན་པོར་གསོལ་བ་འདེབས། །སངས་རྒྱས་ཀུན་དང་སྤངས་རྟོགས་དབྱེར་མེད་ཀྱང་། །འཁོར་བའི་ཕ་མཐའ་ཐུགས་རྗེ་ཆེན་པོས་བཟུང་། །སྙིགས་དུས་སྐྱེ་རྒུའི་སྐྱབས་གཅིག་ཀརྨ་པ། །རྒྱལ་དབང་མཁའ་ཁྱབ་རྡོ་རྗེར་གསོལ་བ་འདེབས། །ཐུབ་བསྟན་ཡོངས་སུ་རྫོགས་པའི་མངའ་བདག་མཆོག །ཆོས་སྒོ་དུ་མས་རིས་མེད་འགྲོ་བ་འདུལ། །མཐོང་ཐོས་དྲན་རེག་ཐར་པའི་ལམ་ལ་སྦྱོར། །ཀུན་མཁྱེན་ཆོས་ཀྱི་རྒྱལ་པོར་གསོལ་བ་འདེབས། །མཁྱེན་བརྩེ་ནུས་པའི་གཟི་བརྗིད་རབ་འབར་བས། །ས་གསུམ་མུན་པ་ཀུན་སེལ་དགེ་ལེགས་ཀྱི། །ཕན་བདེའི་དགའ་ཚལ་ཡོངས་སུ་བཞད་མཛད་པ། །
བསྟན་འགྲོའི་ཉི་མ་ཆེན་པོར་གསོལ་བ་འདེབས། །ཐུགས་བསྐྱེད་སྨོན་ལམ་རྣམ་ཐར་བསམ་ཡས་མཐུས། །སངས་རྒྱས་གཉིས་པའི་ཕྲིན་ལས་སྣང་བ་ཡིས། །བདག་སོགས་རྗེས་འཇུག་གདུལ་བྱར་གྱུར་པ་ཀུན། །སྒོ་གསུམ་སྨིན་ཅིང་གྲོལ་བར་མཛད་དུ་གསོལ། །རྟག་བརྟན་ཡོངས་གྲུབ་དངོས་ཀུན་དེ་བཞིན་ཉིད། །འོད་གསལ་སེམས་ཀྱི་རྡོ་རྗེ་བདེ་བ་ཆེ། །སྐྱེ་འགགས་འཕོ་འགྱུར་གྲལ་བ་གཉུག་མའི་གཤིས། །ཚེ་གཅིག་མངོན་སངས་རྒྱས་པར་བྱིན་གྱིས་རློབས། །བཀའ་བརྒྱུད་བླ་མ་རྣམས་ཀྱི་བྱིན་རླབས་དང་། །ཡི་དམ་ལྷ་ཡི་དངོས་གྲུབ་གཅིག་འདུས་པ། །འགྲོ་བའི་བླ་མ་མཁའ་ཁྱབ་རྡོ་རྗེ་ཡིས། །སྐྱེ་བ་ཀུན་ཏུ་རྗེས་སུ་འཛིན་གྱུར་ཅིག །ཅེས་པའང་རྒྱལ་དབང་ཐམས་ཅད་མཁྱེན་གཟིགས་གང་དེའི་ཞབས་བརྟན་གསོལ་འདེབས་འཇམ་མགོན་བློ་གྲོས་མཐའ་ཡས་ཀྱིས་མཛད་པའི་རྡོ་རྗེའི་གསུང་བྱིན་རླབས་ཅན་དེ་ཉིད་ཕྱིས་གསོལ་འདེབས་སུ་ཞལ་སྒྱུར་བ་པོ་ནི་སི་ཏུའི་མིང་འཛིན་པདྨ་དབང་མཆོག་རྒྱལ་པོའོ།། །།རྒྱལ་མཆོག་བཅོ་
ལྔ་པ་ཆེན་པོའི་རྣམ་ཐར་གསོལ་འདེབས་བཞུགས་སོ། །སྲིད་ཞིའི་ཞིང་དུ་དུས་གསུམ་རྒྱལ་རྣམས་དང་། །རྒྱལ་སྲས་དཔའ་བོ་ཆེན་པོ་མ་ལུས་པའི། །ཕྲིན་ལས་བདག་ཉིད་མི་བསྐྱོད་ཅོད་པན་ཅན། །མཁའ་ཁྱབ་རྡོ་རྗེ་བླ་མའི་ཞབས་ལ་འདུད། །ཁྱོད་ནི་གདོད་ནས་ཞི་བར་སངས་རྒྱས་སར། །གཤེགས་ཤིང་ད་ལྟར་བདེ་ལྡན་མངོན་དགའི་ཞིང་། །སྤྱན་རས་གཟིགས་དབང་མི་འཁྲུགས་རྒྱལ་པོ་དང་། །གངས་ཅན་མགོན་པོ་བླ་མའི་ཞབས་ལ་འདུད། །གཅིག་ཉིད་དུ་མར་འཆར་བ་ཆུ་ཟླའི་གར། །གཅིག་ཏུ་བཟུང་བ་བྱིས་པའི་བློ་ཉིད་ཀྱང་། །བསྐལ་བཟང་འདི་ལ་མཆོག་གི་སྤྲུལ་པའི་སྐུ། །ཚར་དུ་དངར་བ་བླ་མའི་ཞབས་ལ་འདུད། །ཟླ་མེད་ཐེག་པ་མཆོག་གི་རྡོ་རྗེ་ཉིད། །བསམ་བཞིན་ཉང་སྟོད་ཤེལ་དཀར་རྒྱལ་རྩེའི་ཆར། །ཡབ་ཡུམ་ལྷ་གཟིགས་རིགས་ལ་ལྕགས་ལུག་ལོར། །མཚན་དཔེའི་དཔལ་འབར་བླ་མའི་ཞབས་ལ་འདུད། །དེ་ཚེ་ལྷ་རྣམས་འཇའ་གུར་མེ་ཏོག་ཆར། །ཀུན་ཏུ་
བྲེས་པས་ཤིས་པའི་སྣང་བ་སྤེལ། །སྐྱེས་བུ་ཆེན་པོས་ལྟ་སྟངས་གཟི་བྱིན་གྱིས། །སྣང་སྲིད་ཟིལ་གནོན་བླ་མའི་ཞབས་ལ་འདུད། །སྔོན་གནས་རྗེས་དྲན་ལྐོག་གྱུར་གཟིགས་པ་དང་། །བྱིན་རླབས་ཙམ་གྱིས་བགེགས་དཔུང་བཞི་ལ་སོགས། །ངོ་མཚར་སྣང་བས་དཔལ་ལྡན་ཀརྨ་པའི། །ཡང་སྲིད་འཁྲུལ་བྲལ་བླ་མའི་ཞབས་ལ་འདུད། །ཀུན་གཟིགས་མི་འགྱུར་དབང་གི་རྒྱལ་པོ་སོགས། །ཡབ་སྲས་དགོངས་པས་ངོས་འཛིན་མེ་གླང་ལོར། །མཁའ་ཁྱབ་རྡོ་རྗེར་མཚན་གསོལ་འོག་མིན་གནས། །མངའ་གསོལ་ཁྲིར་འདོན་བླ་མའི་ཞབས་ལ་འདུད། །ལྷ་ཆེན་སྤྱན་སྔར་ཀུན་གཟིགས་དབྱར་རྔ་བས། །དབུ་སྐྲ་གཙུག་ཕུད་བཞེས་ཤིང་ཡིག་རིགས་སོགས། །སྐྱེས་སྦྱང་སྟོབས་ཀྱིས་ཚེགས་མེད་ཐུགས་སུ་ཆུད། །ཡོན་ཏན་ཡར་འཕེལ་བླ་མའི་ཞབས་ལ་འདུད། །རྗེ་དབོན་མཆོག་ཟུང་འཇམ་མགོན་རྣམ་གཉིས་སོགས། །ཡོངས་འཛིན་དུ་མ་བསྟེན་ལས་
གསན་བསམ་དང་། །བསླབ་གསུམ་ཚུལ་ཁྲིམས་རིམ་གཉིས་རྣལ་འབྱོར་སོགས། །ཉམས་བཞེས་གཡེལ་མེད་བླ་མའི་ཞབས་ལ་འདུད། །དགུང་ལོ་བདུན་ནས་ཚིག་དོན་ཕུན་ཚོགས་པའི། །འཆད་བརྩམ་བཀའ་བབ་སྔོན་འདས་སྐྱེས་རབས་དང་། །མ་འོངས་འབྱུང་འགྱུར་སྟོན་ལ་ཟླ་བྲལ་བ། །དུས་གསུམ་ཀུན་མཁྱེན་བླ་མའི༴ སྤང་ཕུག་ལ་སོགས་གསོལ་འདེབས་གདུལ་བྱའི་ངོར། །རབ་གནས་ཟངས་ཐལ་གསོད་པ་བསོ་ནུས་དང་། །ཙཱ་རུ་ཏྲ་སོགས་སྐུ་དང་མཛད་ཕྲིན་གྱིས། །རྫུ་འཕྲུལ་དབང་བསྒྱུར་བླ་མའི༴ ཁྱད་པར་འཇམ་མགོན་རྗེ་བཙུན་བླ་མ་ཡིས། །ཕྱག་རྫོགས་དོན་བརྒྱུད་ཕ་ནོར་བུ་ལ་གཏད། །ཟུང་འཇུག་གསེར་རིའི་ཕྲེང་བར་བཞུགས་པ་ཡི། །སྒྲུབ་བརྒྱུད་གཙུག་བརྒྱན་བླ་མའི༴ བསྙེན་སྒྲུབ་ཐུགས་དམ་འཁོར་ཡུག་ལ་གཞོལ་བས། །ལྗགས་བཟླས་དུང་ཕྱུར་ལངས་དང་ལྷག་པའི་ལྷས། །ཞལ་གཟིགས་ལུང་བསྟན་དག་སྣང་འབྱམས་ཀླས་པ། །གྲུབ་
པའི་དབང་ཕྱུག་བླ་མའི༴ མཚོ་སྐྱེས་མ་ཧཱ་གུ་རུ་ཡབ་ཡུམ་གྱི། །ཡེ་ཤེས་སྐུ་ཡིས་རྗེས་བཟུང་རྟེན་བྱིན་རླབས། །གསང་མཛོད་ཆོས་ནོར་གཏེར་ལ་དབང་འབྱོར་བ། །པདྨའི་རྒྱལ་ཚབ་བླ་མའི༴ བཀའ་བསྟན་མཛོད་ལྔ་ལ་སོགས་སྨིན་གྲོལ་གྱིས། །ཡབ་སྲས་རིས་མེད་སློབ་ཚོགས་སྐྱོང་བ་དང་། །དགོན་གནས་ཉམས་གསོ་གསར་འདེབས་ལ་སོགས་པས། །བསྟན་འཛིན་དབང་པོ་བླ་མའི༴ དེ་ལྟར་འགྲོ་དོན་མཛད་ནས་ཆུ་ཁྱིའི་ལོ། །དགུང་ལོ་ང་གཉིས་ཕེབས་ནས་མ་འོངས་པའི། །སྤྲུལ་སྐུ་འབྱུང་འགྱུར་ལ་སོགས་ཞལ་ཆེམས་ཀྱིས། །བསྟན་པ་སྐྱོང་མཛད་བླ་མའི༴ རྟག་འཛིན་ཅན་ངོར་ནག་ཟླའི་ཉེར་དྲུག་ལ། །མཁའ་སྤྱོད་ཆེན་པོར་ཚོམ་བུ་འབུམ་གྱི་གཙོར། །གཤེགས་ནས་གཟུགས་སྐུ་བསྡུས་ཚེ་སྒྲ་འོད་བཅས། །ས་ལམ་ཡོངས་རྫོགས་བླ་མའི༴ སྐུ་གདུང་རིན་ཆེན་མཉེན་ལྕུག་ཞུན་ཐིག་ལས། །དད་ལྡན་རྣམས་ལ་རིང་བསྲེལ་ཕུང་པོར་བབ། །ལྷ་
མིའི་མཆོད་སྡོང་ཆེན་པོར་བཞུགས་སུ་གསོལ། །བསོད་ནམས་ཞིང་གྱུར་བླ༴ བདག་སོགས་སྐྱེ་ཀུན་བླ་མས་རྗེས་བཟུང་ཞིང་། །མ་འོངས་འདྲེན་པ་སེངྒེར་འཚང་རྒྱ་བའི། །འཁོར་གྱི་ཐོག་མར་ལུང་བསྟན་དབུགས་དབྱུང་བཅས། །ཆོས་ཀྱི་རྒྱལ་པོ་མཆོག་དང་དབྱེར་མེད་ཤོག །ཅེས་པའང་སྒྲུབ་བརྩོན་བླ་མ་ཀརྨ་ཐར་མཆོག་དང་ཀརྨ་ཆོས་དབྱིངས་ཀུན་ཁྱབ་ཟུང་ནས་བཀྲ་ཤིས་པའི་ལྷ་རྫས་རིན་ཆེན་གཉིས་པའི་རྟེན་བཅས་བསྐུལ་བ་ལ་སླར་ཡངས་གདན་ས་ཆེན་པོ་མཚུར་མདོའི་བྱང་འདྲེན་པ་ཀརྨ་འོད་ཟེར་དབང་དྲག་ནས་ལྷ་རེག་རྟེན་བཅས་ནན་བསྐུལ་མཛད་པར་རྟེན་སྐྱབས་མཆོག་རྡོ་རྗེ་འཆང་གི་བཀའ་འབངས་ཐ་ཤལ་པ་ཀརྨ་མཁྱེན་བརྩེའི་འོད་ཟེར་འབོད་པས་སྐུ་གདུང་རིན་པོ་ཆེའི་སྲི་ཞུ་བགྱིས་པའི་སྐབས་སེང་སུ་ཤར་མར་བྲིས་ཏེ་གསོལ་བ་བཏབ་པ་དགེ་ཞིང་བཀྲ་ཤིས།། །།རྒྱལ་བའི་དབང་པོ་བཅུ་དྲུག་པ་ཆེན་པོ་རང་བྱུང་རིག་པའི་རྡོ་རྗེའི་སྐུ་བསྟོད་བཞུགས་སོ། །ༀ་སྭསྟི་ན་མོ་གུ་རུ། བླ་མེད་བླ་མ་དུས་གསུམ་རྒྱལ་ཀུན་གྱི། །འཕྲིན་ལས་མ་ལུས་གཅིག་བསྡུས་ཆོས་ཀྱི་རྗེ། །དཔལ་ལྡན་བླ་མ་ཀུན་མཁྱེན་ཀརྨ་པ། །རིག་པའི་རྡོ་རྗེའི་
ཞབས་ལ་ཕྱག་འཚལ་བསྟོད། །གྲངས་མེད་དུ་མར་གོམས་པའི་ཐུགས་བསྐྱེད་དང་། །གདུལ་བྱའི་ཚོགས་གཉིས་བསགས་པའི་ཉེར་ལེན་གྱིས། །མཚན་དཔེའི་སྐུ་མཆོག་མཐོང་གྲོལ་རིན་པོ་ཆེ། །རིག་པའི་རྡོ་རྗེའི་ཞབས་ལ་ཕྱག་འཚལ་བསྟོད། །ཟབ་ཞི་སྤྲོས་བྲལ་ཐེག་པ་གསུམ་གྱི་ཆོས། །གང་འདུལ་དེར་སྟོན་གསུང་གི་གསང་བའི་གནད། །གནས་ལུགས་ཇི་བཞིན་ཐོས་གྲོལ་རིན་པོ་ཆེ། །རིག་པའི་རྡོ་རྗེའི་ཞབས་ལ་ཕྱག་འཚལ་བསྟོད། །ཇི་ལྟ་ཇི་སྙེད་མཁྱེན་པའི་ཡེ་ཤེས་ཀྱི། །བསམ་བརྗོད་ལས་འདས་བརྡ་དང་རྟགས་ཀྱི་དོན། །མ་རིག་མུན་སེལ་དྲན་གྲོལ་རིན་པོ་ཆེ། །རིག་པའི་རྡོ་རྗེའི་ཞབས་ལ་ཕྱག་འཚལ་བསྟོད། །སྐྱེ་བ་མེད་པ་དོན་གྱི་དེ་བཞིན་ཉིད། །རིག་རྩལ་འགགས་པ་མེད་པའི་སྒྱུ་འཕྲུལ་ལས། །འབྲེལ་ཚད་དོན་ལྡན་རེག་གྲོལ་རིན་པོ་ཆེ། །རིག་པའི་རྡོ་རྗེའི་ཞབས་ལ་ཕྱག་འཚལ་བསྟོད། །ཀུན་རྫོབ་དང་ནི་དོན་དམ་བདེན་པ་
ཡི། །མཐའ་བྲལ་ཟབ་ཅིང་རྒྱ་ཆེ་སྙིང་པོའི་དོན། །མཁྱེན་པའི་ཡེ་ཤེས་མཚུངས་མེད་འགྲོ་བའི་མགོན། །རིག་པའི་རྡོ་རྗེའི་ཞབས་ལ་ཕྱག་འཚལ་བསྟོད། །མཁའ་ཁྱབ་ཞིང་གི་ཡིད་ཅན་མ་ལུས་པ། །ཉེ་རིང་མེད་པར་དམིགས་མེད་སྙིང་རྗེ་ཡི། །བརྩེ་བ་ཆེན་པོས་རྟག་སྐྱོངས་འགྲོ་བའི་མགོན། །རིག་པའི་རྡོ་རྗེའི་ཞབས་ལ་ཕྱག་འཚལ་བསྟོད། །རྨད་བྱུང་སྟོང་དང་སྙིང་རྗེ་ཟུང་འཇུག་གིས། །རིགས་ཅན་བདུད་བཞིའི་གཡུལ་ངོ་ལས་རྒྱལ་བའི། །ནུས་པའི་དབང་ཕྱུག་གང་འདུལ་འགྲོ་བའི་མགོན། །རིག་པའི་རྡོ་རྗེའི་ཞབས་ལ་ཕྱག་འཚལ་བསྟོད། །རྒྱལ་བ་ཉིད་ལ་གདོད་ནས་གཤེགས་བཞུགས་སོགས། །སྒྲིབ་པ་ཕྲ་མོའི་ཆ་ཙམ་མི་མངའ་བའི། །སྤངས་པ་ཕུན་ཚོགས་བླ་མ་རྡོ་རྗེ་འཆང་། །རིག་པའི་རྡོ་རྗེའི་ཞབས་ལ་ཕྱག་འཚལ་བསྟོད། །བསྐལ་མང་གོང་ནས་སྲིད་དང་ཞི་བ་ཡི། །འགྱུར་མེད་རྩེ་མོའི་རྒྱལ་ཐབས་མངའ་བརྙེས་པ། །རྟོགས་པའི་བདག་ཉིད་བླ་མ་རྡོ་རྗེ་
འཆང་། །རིག་པའི་རྡོ་རྗེའི་ཞབས་ལ་ཕྱག་འཚལ་བསྟོད། །ཁྱོད་ཀྱི་གསང་བ་གསུམ་གྱི་ཡོན་ཏན་ལས། །ཅུང་ཟད་ཞིག་ཀྱང་དཔག་པའི་ཡུལ་མིན་མོད། །འོན་ཀྱང་མོས་གུས་གདུང་བའི་དབང་བཙན་པོས། །ཆ་ཤས་ཙམ་གྱིས་བསྟོད་ཅིང་གསོལ་འདེབས་ན། །རྣམ་དག་རྩེ་གཅིག་ཡིད་ཀྱི་བདེན་སྟོབས་དང་། །རྒྱལ་བ་སྲས་བཅས་རྣམས་ཀྱིས་ཐུགས་རྗེའི་མཐུས། །བླ་མའི་ཐུགས་དང་རང་སེམས་དབྱེར་མེད་པར། །སྲིད་འདིར་སྐལ་བཟང་དགའ་སྟོན་བཞད་པར་ཤོག །ཅེས་པ་འདི་ནི་ཀུན་གཟིགས་རྒྱལ་ཚབ་རིན་པོ་ཆེ་མཆོག་གི་མདུན་ནས། ལྷ་རེག་ཉིན་མོ་བདེ་ལེགས་དང་། རིན་ཆེན་དང་པོའི་མཎྜལ་རྒྱན་བཀོད་རྨད་དུ་བྱུང་བ་སྩལ་ཏེ། ཆོས་སྤྱོད་ཆེན་པོའི་ཁ་སྐོང་གསོལ་འདེབས་འདི་བཞིན་དགོས་ཞེས་བཀས་བསྐུལ་གནང་དོན་ལྟར་བདག་གི་བླ་མ་བཀའ་དྲིན་མཉམ་མེད། ཁྱབ་བདག་ཀརྨ་པ་རིག་པའི་རྡོ་རྗེ་མཆོག་ལ་རྩེ་གཅིག་ཏུ་གསོལ་བ་འདེབས་པ། སྐལ་ལྡན་ཡིད་ཀྱི་གདུང་བ་སེལ་བའི་སྒྲ་དབྱངས་ཚིགས་སུ་བཅད་པ་རྣམ་འདྲེན་མིའི་སེང་གེའི་ཚུལ་མཐོང་མཛད་པའི་གྲངས་ལྡན་འདི་ནི། ཀརྨ་པའི་གདན་ས་
འབྲས་མོ་ལྗོངས་དཔལ་བཤད་སྒྲུབ་ཆོས་འཁོར་གླིང་གི་གཙུག་ལག་ཁང་གི་དབུ་རྩེར། རྗེ་ཉིད་ཀྱི་ཞལ་སློབ་ཏཱ་ཡི་སི་ཏུ་པས་བྲིས་པ་བདག་དང་། ཕྱི་རབས་གདུལ་བྱ་རྣམས་ཀྱི་སེམས་ལ་བླ་མའི་བྱིན་རླབས་འཇུག་པའི་རྒྱུར་གྱུར་ཅིག། ༈ །།རྒྱལ་བའི་དབང་པོ་རིམ་པར་བྱོན་པ་ལ་བསྡུས་པའི་ཚུལ་གྱིས་གསོལ་བ་གདབ་པ་ནི། མ་འོངས་སངས་རྒྱས་དྲུག་པ་སེང་གེའི་མཚན། །ད་ལྟ་རྣམ་འཕྲུལ་དུ་མས་ཞིང་ཀུན་སྐྱོང་། །སྒྲུབ་བརྒྱུད་བསྟན་པའི་མངའ་བདག་ཆོས་ཀྱི་རྗེ། །དུས་གསུམ་མཁྱེན་པའི་ཞབས་ལ་གསོལ་བ་འདེབས། །ཡི་དམ་དབང་གྱུར་སྣང་སྲིད་དབང་དུ་འདུས། །སོག་པོ་མུ་སྟེགས་རྒྱལ་པོའི་དྲེགས་པ་བརྟུལ། །མེ་ཆུ་དུག་མཚོན་འབྱུང་པོའི་ནུས་པ་བཅོམ། །ཀརྨ་པཀྴིའི་ཞབས་ལ་གསོལ་བ་འདེབས། །མདོ་རྒྱུད་གཞུང་མང་འགྲེལ་མཛད་རྫུ་འཕྲུལ་གྱིས། །སྣ་ཚོགས་འགྲོ་ལ་སྙིང་པོའི་དོན་སྟོན་ཅིང་། །གྲུབ་ཆེན་བསྟན་པ་ཆེས་ཆེར་སྤེལ་མཛད་པ། །རང་བྱུང་རྡོ་རྗེའི་ཞབས་ལ༴ སྣ་ཚོགས་སྐད་ཀྱིས་རྣམ་མང་འགྲོ་བ་འདུལ། །མཐའ་བྲལ་རིག་པས་
སྨྲ་ངན་མཐའ་དག་སེལ། །ཡང་དག་ངག་གིས་བདེན་པའི་གནས་ལུགས་སྟོན། །རོལ་པའི་རྡོ་རྗེའི་ཞབས་ལ༴ མཚན་དང་དཔེ་བྱད་མཐོང་བས་རབ་དང་མཛད། །ཁམས་གསུམ་འགྲོ་བའི་བླ་མ་དེ་བཞིན་གཤེགས། །སྐལ་ལྡན་དགོས་པ་དངོས་གྲུབ་མཆོག་གིས་སྐོང་། །དེ་བཞིན་གཤེགས་པའི་ཞབས་ལ༴ གྲུབ་ཆེན་ཡི་དམ་མཁའ་འགྲོའི་ལུང་འདོམས་ཤིང་། །བརྟུལ་ཞུགས་རྫུ་འཕྲུལ་སྣ་ཚོགས་བཀོད་པ་ཅན། །མཐུ་སྟོབས་དྲེགས་པ་ཟིལ་གནོན་ལྷ་མིའི་མགོན། །མཐོང་བ་དོན་ལྡན་ཞབས་ལ༴ བསླུ་ཆོས་མཁན་དང་ནག་པོའི་རྩ་ལག་བཏུལ། །དཀོན་མཆོག་གསུམ་གྱི་མཆོད་རྟེན་རྒྱ་ཆེན་མཛད། །རང་སྲས་གྲུབ་པ་ཐོབ་པས་ས་ཆེན་ཁྱབ། །ཆོས་གྲགས་རྒྱ་མཚོའི་ཞབས་ལ༴ ཤེས་བྱའི་ཚུལ་འདིར་རྣམ་དཔྱོད་ཐོགས་མེད་ཀྱིས། །གསུང་རབ་དགོངས་དོན་འཆད་ལ་བསྙེངས་པ་བྲལ། །དེ་ཚུལ་སྤྱོད་ལ་རྣམ་གཡེང་གོ་སྐབས་མེད། །མི་
བསྐྱོད་རྡོ་རྗེའི༴ སླར་ཡང་ཚད་མེད་ཐུགས་རྗེའི་དབང་ཕྱུག་གིས། །འགྱུར་མེད་རྡོ་རྗེའི་སྐུ་གསུང་ཐུགས་སྤྲུལ་ནས། །ཞིང་འདིའི་འདྲེན་པར་བྱོན་པ་ཆོས་ཀྱི་རྗེ། །དབང་ཕྱུག་རྡོ་རྗེའི་ཞབས་ལ༴ དེ་ཉིད་མཆོག་དམན་བར་མའི་གདུལ་བྱའི་ངོར། །སྤྲུལ་སྐུ་ཆེན་པོའི་བཀོད་པ་བསྟན་ནས་ཀྱང་། །མཐོང་ཐོས་འབྲེལ་ཚད་དོན་ལྡན་མཛད་པ་ཡི། །ཆོས་དབྱིངས་རྡོ་རྗེ་ཞབས་ལ༴ དེ་ཉིད་བདག་སོགས་གདུལ་བྱར་གྱུར་པ་ཡི། །བསྐལ་པ་ཇི་བཞིན་ཐུགས་རྗེའི་རྣམ་རོལ་སྐུ། །སྐད་ཅིག་དྲན་པས་བདེ་ཆེན་མཆོག་སྩོལ་བ། །ཡེ་ཤེས་རྡོ་རྗེའི་ཞབས་ལ༴ བདེ་ཆེན་ཆོས་དབྱིངས་རྣམ་པར་མི་རྟོག་སྐུ། །ཟབ་གསལ་གཉིས་མེད་མཁྱེན་པའི་ཡེ་ཤེས་རྒྱས། །མ་རིག་མུན་སེལ་སྐྱེ་དགུའི་གཉེན་གཅིག་པུ། །བྱང་ཆུབ་རྡོ་རྗེའི་ཞབས་ལ༴ སྙིགས་མའི་རྣམ་འགྱུར་ཡིད་བསྲུབས་ལྟ་བུའི་དཔུང་། །མུན་པ་ལྟ་བུ་རྡོ་རྗེ་ཡེ་ཤེས་ཀྱི། །ཉི་མ་ཆེན་པོས་རྨེག་མེད་འཇོམས་མཛད་པ། །བདུད་
འདུལ་རྡོ་རྗེའི་ཞབས་ལ༴ མཁྱེན་རབ་མཛད་པ་ཐབས་མཁས་བསམ་མི་ཁྱབ། །མི་ཤིགས་རྡོ་རྗེ་ལྟ་བུའི་ཏིང་འཛིན་མངའ། །རྩོལ་མེད་ཐུགས་རྗེའི་བདག་ཉིད་འཇིག་རྟེན་མགོན། །ཐེག་མཆོག་རྡོ་རྗེའི་ཞབས་ལ༴ རབ་འབྱམས་རྒྱལ་ཀུན་འདུས་པའི་རྣམ་ཐར་དང་། །ཕྲིན་ལས་ཡོན་ཏན་མ་ལུས་གཅིག་བསྡུས་པ། །གངས་ཅན་མགོན་པོ་རྒྱལ་དབང་ཀརྨ་པ། །མཁའ་ཁྱབ་བདེ་བའི་རྡོ་རྗེར་གསོལ་བ་འདེབས། །ཆོས་དང་ཆོས་ཅན་གནས་ལུགས་མ་ནོར་བར། །ཇི་བཞིན་གཟིགས་ནས་མཁྱེན་པའི་ཡེ་ཤེས་རྒྱས། །འགྲོ་ཚོགས་ཡིད་ལ་ཀུན་དགའི་དཔལ་སྟེར་བ། །རིག་པའི་རྡོ་རྗེའི་ཞབས་ལ་གསོལ་བ་འདེབས། །ཐུབ་མཆོག་རྣམས་ཀྱི་བསྟན་པ་དྲི་མ་མེད། །མཐའ་ཡས་ཡོན་ཏན་བསྒྲུབ་པའི་ཐབས་སྟོན་ཅིང་། །བཤད་དང་སྒྲུབ་པ་རྣམ་དག་སྤེལ་བྱེད་པས། །ཀརྨ་པ་ཡི་དགོངས་པ་རྫོགས་བྱེད་ཤོག །སྐྱེ་བ་འདི་ནས་ཚེ་རབས་ཐམས་ཅད་དུ། །དུས་
གསུམ་རྒྱལ་བ་ཀུན་གྱི་ཕྲིན་ལས་པ། །ཀརྨ་པ་ཡིས་རྟག་ཏུ་རྗེས་བཟུང་ནས། །བྱང་ཆུབ་སྤྱོད་མཆོག་ཡིད་འོང་སྤྱོད་པར་ཤོག །སྐྱེ་བ་ཀུན་ཏུ་ཡོངས་འཛིན་དམ་པ་མཆོག །ཞྭ་ནག་ཅོད་པན་འཛིན་པ་ཁོ་ན་དང་། །ཡི་དམ་སྙིང་པོ་དཔལ་ལྡན་བདེ་བ་མཆོག །འཁོར་ལོ་སྡོམ་པས་རྗེས་སུ་འཛིན་གྱུར་ཅིག །སྐྱེ་བ་འདི་ནས་རིགས་བདག་མི་འཆོལ་ཞིང་། །བཅོམ་ལྡན་དྲག་པོའི་དཀྱིལ་འཁོར་འཛིན་བཞིན་དུ། །ཤེས་རབ་པདྨའི་བདུད་རྩི་འཐུང་བྱེད་ཅིང་། །བྱང་ཆུབ་སྙིང་པོར་སྲིད་པ་དག་བགྱིད་ཤོག །ཅེས་པ་འདིའི་རྩ་བ་མི་བསྐྱོད་ཞབས་ཀྱིས་མཛད་པ་ལ་ཕྱི་ནས་ན་རིམ་སོ་སོའི་སྐབས་སུ་ཁ་བསྐང་བའོ།། །།དེ་ནས་ཞྭ་དམར་ཅོད་པན་འཛིན་པ་ན་རིམ་ལ་གསོལ་བ་འདེབས་པ་ནི། མཁའ་ཁྱབ་ནམ་མཁའི་རྡོ་རྗེ་ཆོས་ཀྱི་སྐུ། །ལོངས་སྤྱོད་རྫོགས་སྐུ་གར་དབང་རྡོ་རྗེ་འཆང་། །རྒྱལ་བ་དཀོན་མཆོག་ཡན་ལག་སྤྲུལ་པའི་སྐུ། །སྐུ་གསུམ་མངོན་དུ་མཛད་ལ་གསོལ་བ་འདེབས། །ཏཻ་ལོས་རྗེས་བཟུང་རྗེ་བཙུན་ཁོལ་པོ་
དགའ། །ནཱ་རོས་རྗེས་བཟུང་བྲམ་ཟེ་ཀུན་རིག་མཆོག །མི་ལས་རྗེས་བཟུང་གཞོན་ནུ་གསང་ཚོལ་ཞབས། །གྲུབ་པའི་དབང་པོ་གསུམ་ལ་གསོལ་བ་འདེབས། །ཟླ་འོད་གཞོན་ནུས་རྗེས་བཟུང་ཚུལ་ཁྲིམས་དཔལ། །དུས་གསུམ་མཁྱེན་པས་རྗེས་བཟུང་ནམ་མཁའ་འོད། །ཀརྨ་པཀྴིས་རྗེས་བཟུང་བཀྲ་ཤིས་གྲགས། །རྣལ་འབྱོར་དབང་ཕྱུག་གསུམ་ལ་གསོལ་བ་འདེབས། །རང་བྱུང་རྡོ་རྗེས་རྗེས་བཟུང་གྲགས་སེང་བ། །རོལ་པའི་རྡོ་རྗེས་རྗེས་བཟུང་མཁའ་སྤྱོད་དབང་། །དེ་བཞིན་གཤེགས་པས་རྗེས་བཟུང་ཆོས་ཡེས་པ། །ཞྭ་དམར་ཅོད་པན་ཅན་ལ་གསོལ་བ་འདེབས། །ཆོས་གྲགས་རྒྱ་མཚོས་རྗེས་བཟུང་ཆོས་ཀྱི་གྲགས། །མི་བསྐྱོད་རྡོ་རྗེས་རྗེས་བཟུང་དཀོན་མཆོག་འབངས། །དབང་ཕྱུག་རྡོ་རྗེས་རྗེས་བཟུང་ཆོས་ཀྱི་དབང་། །བསྟན་པའི་ཁུར་ཆེན་འདེགས་ལ༴ ཆོས་དབྱིངས་རྡོ་རྗེས་རྗེས་བཟུང་གར་གྱི་དབང་། །ཡོངས་འཛིན་དམ་པ་ཞྭ་
ནག་ཅོད་པན་གྱིས། །རྒྱལ་བའི་ཕྲིན་ལས་མཆོག་ཏུ་དབང་བསྐུར་བ། །ཆོས་ཀྱི་དོན་གྲུབ་ཞབས་ལ༴ རྗེ་བཙུན་བདུད་ཚོགས་འདུལ་བའི་རྡོ་རྗེ་ཡིས། །རྗེས་བཟུང་མཁྱེན་བརྩེ་ནུས་པའི་དཔལ་མངའ་བ། །ཁྱབ་བདག་དཀྱིལ་འཁོར་ཀུན་གྱི་དབང་ཕྱུག་མཆོག །མི་ཕམ་ཆོས་གྲུབ་རྒྱ་མཚོར་གསོལ་བ་འདེབས། །དེ་ལྟར་དྲུག་པ་སེང་གེ་ཀརྨ་པའི། །སྒྲུབ་བརྒྱུད་ནམ་མཁའི་མཐའ་ཀླས་སྤེལ་བའི་ཕྱིར། །ཕྲིན་ལས་རྒྱུན་མི་འཆད་པའི་སྤྲུལ་སྐུ་ལ། །གསོལ་བ་འདེབས་སོ་བྱིན་གྱིས་རློབ་ཏུ་གསོལ། །རིང་ནས་ཆོས་ཀུན་གཟིགས་པའི་སྤྱན་ཡངས་པ། །ཐུབ་བསྟན་གསལ་བར་མཛད་པའི་ཐུགས་རྗེ་ཅན། །གངས་ཅན་མཁས་དང་གྲུབ་པའི་རྒྱན་གཅིག་པུ། །དཀོན་མཆོག་ཡན་ལག་ཞབས་ལ་གསོལ་བ་འདེབས། །རྡོ་རྗེ་ཐེག་པའི་གྲུ་གཟིངས་ལ་བརྟེན་ནས། །དཔག་ཡས་སྲིད་པའི་མཚོ་ལས་ལེགས་བསྒྲལ་ཏེ། །ཟུང་འཇུག་ཡིད་བཞིན་ནོར་བུའི་དགའ་སྟོན་གྱིས། །
འགྲོ་ཀུན་ཡིད་ཀྱི་རེ་བ་སྐོང་བར་ཤོག །ཅེས་ཀརྨ་པ་བརྒྱད་པས་སོ། །ཡང་ན། ཀརྨ་པ་ཡི་བསྟན་པའི་ཁུར་ཆེན་འདེགས། །རྩ་དང་རླུང་དང་བྱང་ཆུབ་སེམས་འབྱོངས་ནས། །རྡོ་རྗེ་ཐེག་པའི་ལམ་བཟང་བདེར་བགྲོད་པ། །མཁས་གྲུབ་གྲགས་པ་སེང་གེའི་ཞབས་ལ་འདུད། །དེ་ཉིད་ཕྱི་མར་སྐྱེ་བའི་ཕྲེང་བ་ལ། །དབེན་པ་གསུམ་གྱི་བགྱི་བ་མི་གཡེལ་བར། །སྣང་བ་བདེ་བར་ཤར་བའི་ངང་ཚུལ་ཅན། རྟོགས་ལྡན་མཁའ་སྤྱོད་དབང་པོའི༴ དང་པོར་སྤྲོས་བྲལ་མངོན་སུམ་རྗེན་པར་མཐོང་། །བར་དུ་དེ་ལ་ཤིན་ཏུ་གོམས་ཤིང་འདྲིས། །མཐའ་མར་རེ་དོགས་འཕྲང་ལས་ངེས་གྲོལ་བའི། །རྣལ་འབྱོར་ཆོས་དཔལ་ཡེ་ཤེས༴ ཕུང་པོ་ལྔ་དང་ཉོན་མོངས་ལྔ་ལ་སོགས། །སྐུ་ལྔ་ཡེ་ཤེས་ལྔ་རུ་རྣམ་དག་ཅིང་། །ཀུན་རྫོབ་འཁྲུལ་པའི་དབང་དུ་མ་སོང་བའི། །སྤྱན་སྔ་ཆོས་ཀྱི་གྲགས་པའི༴ སྡོམ་པ་གསུམ་གྱིས་རང་རྒྱུད་ལེགས་སྨིན་ནས། །སྡེ་སྣོད་གསུམ་གྱི་ཚིག་དོན་
གཞན་ལ་འཆད། །འཁོར་བའི་བག་ཆགས་འཇོམས་པའི་སྙིང་སྟོབས་ཅན། །སྤྲུལ་སྐུ་དཀོན་མཆོག་ཡན་ལག༴ དཔག་པར་དཀའ་བའི་མཛད་ཕྲིན་རྨད་བྱུང་བ། །མཐོང་བ་ཙམ་གྱིས་གཞན་རྒྱུད་གྲོལ་ནུས་ཤིང་། །རྣམ་མང་འགྲོ་བའི་ཡིད་མུན་དྲུངས་འབྱིན་པ། །གར་དབང་ཆོས་ཀྱི་དབང་ཕྱུག༴ དེ་ཉིད་སྲིད་ཞིའི་དཔལ་དང་ལྡན་པའི་སྐུ། །ཡེ་ཤེས་རྡོ་རྗེ་སྤྲུལ་པའི་སྐུར་བཞེངས་པ། །གཞི་ལམ་འབྲས་བུ་སྙིང་པོ་རྡོ་རྗེ་འཆང་། །དཔལ་ལྡན་ཡེ་ཤེས་སྙིང་པོའི་ཞབས་ལ་འདུད། །ཐུབ་དབང་གསུང་གི་ལེགས་བཤད་བདུད་རྩིའི་མཚོ། །བློ་གྲོས་ཡངས་པའི་འཇུག་ངོགས་ལ་དྲངས་ནས། །ལུས་ཅན་ཕན་བདེའི་སྐྱེད་ཚལ་རྒྱས་མཛད་པ། །དཔལ་ཆེན་ཆོས་ཀྱི་དོན་གྲུབ་ཞབས་ལ་འདུད། །བདེ་གཤེགས་ཀུན་གྱི་གསང་གསུམ་རྡུལ་བརྩེགས་ཀྱི། །ཡོན་ཏན་དུ་མའི་དཔལ་གྱིས་མངོན་པར་མཐོ། །སྲིད་ཞིའི་གདུང་བ་སེལ་བའི་གཉེན་གཅིག་པུ། །མི་ཕམ་ཆོས་གྲུབ་རྒྱ་མཚོའི་
ཞབས་ལ་འདུད། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །ཚེ་འདི་ཉིད་ལ་གནས་ལུགས་དོན་རྟོགས་ནས། །ས་དང་ལམ་རྣམས་རིམ་པར་བགྲོད་ནས་ནི། །གཉིས་སུ་མེད་པའི་ཡེ་ཤེས་མཆོག་ཐོབ་ཤོག །དེ་ནས་བྱེ་བྲག་ཏུ་གར་དབང་ལྔ་པའི་ཞབས་ལ་བསྟོད་པ་ནི། བསྐལ་མང་གོང་ནས་ཚོགས་གཉིས་རྫོགས་མཛད་ཅིང་། །མཐའ་ཡས་སེམས་ཅན་ཚོགས་རྣམས་སྒྲོལ་བ་ལ། །ཕྲིན་ལས་འདོད་དགུར་སྒྱུར་ལ་མངའ་བརྙེས་པའི། །ཞྭ་དམར་ཅོད་པན་འཛིན་པ་རྣམས་ལ་འདུད། །རིགས་ཀྱི་བདག་པོ་པདྨ་གར་དབང་པོ། །དཀྱིལ་འཁོར་ཀུན་གྱི་རྒྱས་གདབ་ཆེན་པོ་པ། །རྡོ་རྗེའི་བརྟུལ་ཞུགས་གྲུབ་པ་ཆོས་ཀྱི་རྗེ། །དཀོན་མཆོག་ཡན་ལག་ཞབས་པད་སྤྱི་བོར་ལེན། །དཀོན་མཆོག་འགྲོ་བའི་མགོན་པོར་ལེགས་གྲུབ་ཅིང་། །ཡན་ལག་འབུམ་སྡེའི་ཆོས་སྒོ་དབྱེ་བ་ལ། །མི་འཇིགས་སྤོབས་པ་བརྙེས་པ་ཆོས་ཀྱི་རྗེ། །དཀོན་མཆོག་ཡན་ལག་ཞབས་ལ་
གསོལ་བ་འདེབས། །ལ་ལར་དགའ་ལྡན་ཆོས་ཀྱི་གཞལ་ཡས་སུ། །རྗེ་བཙུན་བྱམས་པའི་དཔལ་གྱི་ཚུལ་བཟུང་ནས། །ས་བཅུའི་སྤོ་ལ་གནས་པ་ཆོས་ཀྱི་རྗེ། །དཀོན་མཆོག་ཡན་ལག༴ གཞན་དུ་འཇིག་རྟེན་དབང་པོ་ཀརྨ་པའི། །བསྟན་པའི་ཁུར་ཆེན་འདེགས་པའི་ཐེག་པ་པ། །ཞྭ་དམར་ཅོད་པན་འཛིན་པ་ཆོས་ཀྱི་རྗེ། །དཀོན་མཆོག་ཡན་ལག་ཞབས་ལ་གསོལ་བ་འདེབས། །སླད་མའང་རྒྱལ་བ་ཀུན་གྱི་ཐུགས་རྗེའི་སྐུ། །ཀརྨ་པ་ཞེས་གྲགས་པ་གསལ་ལྡན་དེའི། །ཕྲིན་ལས་ཐ་གྲུ་རྒྱས་པའི་འཇུག་ངོགས་སུ། །བསྟན་པ་འཛིན་ལ་འཛམ་གླིང་རྒྱན་གྱུར་ཅིག །བཀའ་བརྒྱུད་བླ་མ་རྣམས་ཀྱི་སོགས་བྱའོ། །ཞེས་པའང་མི་བསྐྱོད་རྡོ་རྗེས་སོ།། །།རྒྱལ་མཆོག་དམར་ནག་གི་ཅོད་པན་འཆང་བཟུང་ཉིད་སྟོན་འཁོར་ཐ་མི་དད་དུ་ཞལ་གྱིས་བཞེས་པའི་སྒོ་ནས་བསྟོད་པ་ནི། དཀོན་མཆོག་དྭགས་བརྒྱུད་གྲལ་ན་འགྱུར་མེད་སྐུ། །སྒྲུབ་བརྒྱུད་མཐར་ཐུག་ཀརྨ་ཀཾ་ཚང་ལ། །གནས་ལུགས་རང་ཞལ་འཕྲོད་པའི་རྗེ་བཙུན་མཆོག །
དཀོན་མཆོག་ཡན་ལག་ཞབས་ལ་གསོལ་བ་འདེབས། །རྒྱལ་མཆོག་མཁྱེན་བརྩེའི་བདག་ཉིད་ཀརྨ་པ། །དེ་ཡི་སྐུ་གསུང་ཐུགས་གསང་འཛིན་པ་པོ། །སྟོན་འཁོར་ཐ་མི་དད་པ་ཆོས་ཀྱི་རྗེ། །དཀོན་མཆོག་ཡན་ལག༴ འདས་དང་མ་འོངས་ད་ལྟའི་སངས་རྒྱས་རྣམས། །འགྲོ་ལ་གང་འདུལ་སྤྲུལ་པའི་སྐུར་སྟོན་པས། །གངས་ཅན་ཞིང་འདིར་འདྲེན་མཆོག་ཀརྨ་པ། །དཀོན་མཆོག་ཡན་ལག༴ སྤྲུལ་པ་ཡང་སྤྲུལ་ཇི་ཙམ་ཅིར་བསྟན་ཀྱང་། །སྒྱུ་མའི་སྤྲུལ་པས་སླར་ཡང་སྒྱུ་འཕྲུལ་བཞིན། །དབྱེར་མེད་གཅིག་ཏུ་འདུས་པའི་ཀརྨ་པ། །དཀོན་མཆོག་ཡན་ལག༴ ཁྱད་པར་གངས་ཅན་ལྗོངས་འདིར་སྤྱན་རས་གཟིགས། །མི་བསྐྱོད་རྒྱས་གདབ་སྲས་ཀྱི་ཚུལ་བཟུང་ནས། །འགྲོ་བའི་རེ་འདོད་སྐོང་བའི་ཀརྨ་པ། །དཀོན་མཆོག་ཡན་ལག༴ འོད་དཔག་མེད་པའི་མཚན་མ་ཅོད་པན་ནི། །ཐོད་དུ་བཅིངས་ནས་འཁོར་བ་དོང་ནས་སྤྲུག །འགྲོ་དོན་བསམ་མི་ཁྱབ་
པའི་ཀརྨ་པ། །དཀོན་མཆོག་ཡན་ལག༴ ལ་ལར་སློབ་མ་ལ་ལར་བླ་མ་དང་། །ལ་ལར་ཡབ་སྲས་སྐུ་མཆེད་ལ་སོགས་པ། །དཔོན་སློབ་སྒྱུ་འཕྲུལ་སྟོན་པའི་ཀརྨ་པ། །དཀོན་མཆོག་ཡན་ལག༴ དཔོན་སློབ་ཚད་མའི་རྟེན་འབྲེལ་མཐར་ཕྱིན་པས། །རྟོགས་པ་དོན་གྱི་ཐུགས་རྒྱུད་གཅིག་ཏུ་གྱུར། །དཔོན་སློབ་དབྱེ་བ་མེད་པའི་ཀརྨ་པ། །དཀོན་མཆོག་ཡན་ལག༴ གྲུབ་ཐོབ་ཆེན་པོ་ཀརྨ་པཀྴི་ཡིས། །མ་འོངས་སྤྲུལ་སྐུ་ཟུང་གཅིག་ལུང་བསྟན་ཅིང་། །དེ་གཉིས་ཐུགས་རྒྱུད་གཅིག་ཏུ་ཞལ་བཞེས་པ། །དཀོན་མཆོག་ཡན་ལག༴ སེམས་དཔའ་རང་བྱུང་རྡོ་རྗེའི་ཞལ་སྔ་ནས། །ང་དང་མཉམ་པ་གྲགས་སེང་ཞེས་གསུངས་ནས། །དཔོན་སློབ་ཁྱད་པར་མེད་པའི་བཀའ་སྩལ་མཛད། །དཀོན་མཆོག་ཡན་ལག༴ སྣང་ཚུལ་བཀོད་པ་ཇི་ལྟར་བསྟན་ན་ཡང་། །ཀུན་རྫོབ་འཁྲུལ་ངོའི་རྟེན་འབྲེལ་མ་གཏོགས་པ། །དོན་དམ་དབྱིངས་ལ་ཁྱད་པར་ཅུང་ཟད་མེད། །དཀོན་མཆོག་ཡན་
ལག༴ ཀུན་རྫོབ་འཁྲུལ་པའི་ངོར་ཡང་དཔོན་སློབ་ཀྱི། །སྣང་ཚུལ་ལུ་གུ་བརྒྱུད་ལ་རྒྱུན་ཆད་མེད། །འཁོར་བ་སྲིད་དུ་མཛད་པ་མི་ཟད་པ། །དཀོན་མཆོག་ཡན་ལག་ཞབས་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །བདག་སོགས་གདུལ་བྱ་གཉིས་སྣང་ཅན་མཐའ་དག །གཉིས་མེད་ཡེ་ཤེས་རང་ངོ་འཕྲོད་གྱུར་ཏེ། །དཔོན་སློབ་གཉིས་ལྟར་འགྲོ་དོན་ལྷུན་གྲུབ་ཤོག །སྐྱེ་བ་འདི་དང་ཚེ་རབས་ཐམས་ཅད་དུ། །རྒྱལ་བ་ཡབ་སྲས་འབྲལ་མེད་སྟེན་པ་དང་། །བསམ་པའི་དོན་ཀུན་ཆོས་བཞིན་འགྲུབ་གྱུར་ནས། །མཐར་ཐུག་ཐུགས་ཡིད་གཅིག་ཏུ་འདྲེས་པར་ཤོག །ཅེས་པ་འདི་ནི་དད་པའི་ནོར་ཅན་ཆོས་མཛད་མ་ཀརྨ་རྣལ་འབྱོར་གྱིས་དོན་དུ་གཉེར་བའི་ངོར། ཞྭ་དམར་པ་ལྔ་པས་སྒྲུབ་གནས་པདྨ་ཁྱུང་རྫོང་དུ་བྲིས་པའོ།། །།གར་དབང་དྲུག་པའི་ཞབས་ལ་བསྟོད་ཅིང་གསོལ་བ་འདེབས་པ་ནི། རྒྱལ་བ་ཀུན་དངོས་དཔལ་ལྡན་བླ་མ་མཆོག །བདག་སོགས་གདུལ་བྱའི་ཚོགས་ལ་ཉེར་དགོངས་
ཏེ། །ཞིང་འདིར་སླར་ཡང་སྤྲུལ་པའི་སྐུར་བཞེངས་པ། །ཆོས་ཀྱི་དབང་ཕྱུག་ཞབས་ལ་གསོལ་བ་འདེབས། །སྲིད་ཞིའི་དཔལ་གྱུར་རྡོ་རྗེ་གསུམ་གྱི་བདག །རིགས་ཀུན་གཙོ་བོ་གར་དབང་སྤྲུལ་པའི་སྐུ། །འཇིགས་མེད་ཆོས་ཀྱི་དབང་ཕྱུག་འགྲོ་བའི་མགོན། །གསོལ་བ་འདེབས་སོ་བྱིན་གྱིས་བརླབ་ཏུ་གསོལ། །རྒྱ་ཆེན་མཁྱེན་པའི་སྤྱན་ལྡན་ཆོས་ཀྱི་མཛོད། །མངོན་མཐོ་ངེས་ལེགས་མ་ནོར་ལམ་སྟོན་པ། །ཕན་བདེའི་འབྱུང་གནས་རྗེ་བཙུན་སྤྲུལ་པའི་སྐུ། །ཆོས་ཀྱི་དབང་ཕྱུག་ཞབས་ལ་གསོལ་བ་འདེབས། །འདྲེན་པ་མཆོག་དེའི་མཛད་ཕྲིན་ཇི་ལྟ་བ། །རབ་འབྱམས་རྒྱ་མཚོའི་མཐའ་ཀླས་ཀུན་ཁྱབ་པ། །བསྟན་པའི་སྙིང་པོ་རྒྱ་ཆེར་སྤེལ་མཛད་པའི། །ཆོས་ཀྱི་དབང་ཕྱུག་ཞབས་ལ་གསོལ་བ་འདེབས། །གང་གི་ཞབས་སེན་རིན་ཆེན་འོད་འབར་བ། །དྲེགས་ལྡན་རྣམས་ཀྱི་སྤྱི་བོས་གུས་མཆོད་ཅིང་། །ཀུན་ཀྱང་སྨིན་གྲོལ་ལམ་ལ་འགོད་མཛད་པའི། །ཆོས་ཀྱི་དབང་
ཕྱུག་ཞབས་ལ་གསོལ་བ་འདེབས། །བསླུ་མེད་དཀོན་མཆོག་གསུམ་དང་ཡི་དམ་ལྷ། །བུ་བཞིན་སྐྱོང་བའི་བཀའ་སྲུང་རྒྱ་མཚོ་དངོས། །མཚུངས་མེད་བླ་མ་མཆོག་གི་སྤྲུལ་སྐུ་ལ། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །བདག་སོགས་གདུལ་བྱར་གྱུར་པའི་འགྲོ་བ་རྣམས། །མགོན་པོ་ཁྱོད་ཀྱིས་རྟག་པར་རྗེས་བཟུང་སྟེ། །ཚོགས་གཉིས་རྒྱ་མཚོའི་དཔལ་ལ་སྤྱོད་པ་དང་། །རྗེ་བཙུན་བླ་མའི་གོ་འཕང་འགྲུབ་གྱུར་ཅིག །ཅེས་གར་དབང་ཆོས་ཀྱི་དབང་ཕྱུག་གི་གསོལ་འདེབས་སུ་འབྲི་ཁུང་གྲོག་སྣར་བཛྲེ་ཤྭ་རས་སོ། །ན་མོ་གུ་རུ་མཉྫུ་ནཱ་ཐཱ་ཡ། གཞོན་ནུའི་མཛེས་སྐུ་མཚན་དཔེའི་དཔལ་དང་ལྡན། །འཇམ་པའི་གསུང་དབྱངས་དྲུག་ཅུའི་དཔལ་དང་ལྡན། །ཡེ་ཤེས་ཐུགས་ནི་མཁྱེན་བརྩེའི་དཔལ་དང་ལྡན། །བླ་མ་འཇམ་དཔལ་དབྱངས་ལ་གསོལ་བ་འདེབས། །པད་སྟེང་སྒེག་པའི་གར་གྱི་དབང་སྒྱུར་སྐུ། །འཆད་རྩོད་རྩོམ་པའི་གར་གྱི་དབང་ཕྱུག་གསུང་། །སྙིང་
རྗེའི་གར་གྱིས་འགྲོ་བ་དབང་སྡུད་ཐུགས། །བླ་མ་འཇམ་དཔལ་དབྱངས་ལ་གསོལ་བ་འདེབས། །ཆོས་ལ་རྟོག་བྲལ་ཉིད་ཀྱི་ཡེ་ཤེས་ནི། །ཆོས་ཀྱི་ཡུལ་ལ་མཚན་མར་མི་དམིགས་པར། །ཆོས་ཀུན་གསལ་བར་མཁྱེན་ནས་སྟོན་མཛད་པ། །བླ་མ་འཇམ་དཔལ་དབྱངས་ལ་གསོལ་བ་འདེབས། །འདོད་བདེ་ཆགས་བྲལ་ལམ་དུ་དབང་ཕྱུག་གྲུབ། །བསམ་གཏན་རོ་མྱོང་བྲལ་བར་དབང་ཕྱུག་གོམས། །གཟུགས་མེད་མ་འདྲེས་ཤེས་རབ་དབང་ཕྱུག་བརྙེས། །བླ་མ་འཇམ་དཔལ་དབྱངས་ལ་གསོལ་བ་འདེབས། །སེམས་ཀྱི་རྡོ་རྗེ་གཉུག་མའི་ཡིད་ལ་ཞུགས། །འཇམ་པའི་རྡོ་རྗེ་སྨྲ་མཁས་ངག་ལ་ཞུགས། །འཆི་མེད་རྡོ་རྗེ་བདེ་བའི་ལུས་ལ་ཞུགས། །བླ་མ་འཇམ་དཔལ་དབྱངས་ལ་གསོལ་བ་འདེབས། །ཤིན་ཏུ་སྦྱངས་པའི་བདག་ཉིད་དགའ་བའི་ལུས། །འབྱུང་འཇུག་གནས་པའི་རྡོར་བཟླས་དགའ་བའི་ངག །འོད་གསལ་ལྷན་ཅིག་སྐྱེས་པ་དགའ་བའི་ཡིད། །བླ་
མ་འཇམ་དཔལ་དབྱངས་ལ་གསོལ་བ་འདེབས། །ངལ་བའི་དོན་ཀུན་ཡོངས་སུ་གྲུབ་པ་དང་། །སྨིན་གྲོལ་དོན་ཀུན་ཡོངས་སུ་གྲུབ་པ་དང་། །གཞན་ཕན་དོན་ཀུན་ཡོངས་སུ་གྲུབ་གྱུར་པ། །བླ་མ་འཇམ་དཔལ་དབྱངས་ལ་གསོལ་བ་འདེབས། །སྲིད་པའི་གཡུལ་ངོ་ཤེས་པས་ཕམ་བྱས་ཤིང་། །ཞི་བའི་དཔུང་ནི་སྙིང་རྗེས་དེས་བཅོམ་ཕྱིར། །ཕྱོགས་རྣམས་ཐམས་ཅད་ལས་ཀྱང་རྣམ་པར་རྒྱལ། །རྒྱལ་སའི་གཞིར་གྱུར་ཁྱོད་ལ་གསོལ་བ་འདེབས། །བདག་དང་མཁའ་མཉམ་འགྲོ་བ་ཐམས་ཅད་ཀྱི། །མ་རིག་རྨོངས་པའི་དྲི་མ་ཀུན་བསལ་ནས། །ལྕེ་ལ་འཇམ་པའི་དབྱངས་ཀྱི་སྒྲ་སྐད་གྲུབ། །སྲིད་པའི་རྨོངས་པ་མཐར་བྱེད་ཉིད་དུ་ཤོག །ཅེས་ཞྭ་དམར་པ་དྲུག་པས་ཉིད་ཀྱི་མཚན་ལེགས་པར་བརྗོད་པ་སྟག་ལུང་མ་ཐང་ཆོས་ཀྱི་རྗེ་རིན་པོ་ཆེའི་ངོར་མཛད་པའོ།། །།ཞྭ་དམར་བདུན་པའི་གསོལ་འདེབས་ནི། རྒྱལ་བ་ཡེ་ཤེས་སྣང་བ་ཡི། །མཐའ་ཡས་རྒྱལ་བའི་ཞིང་ཀུན་དུ། །ཐར་པའི་ཕྱོགས་ནི་སྣང་བྱེད་པ། །
རྒྱལ་བ་མཆོག་ལ་གསོལ་བ་འདེབས། །གསོལ་བ་བཏབ་ན་དངོས་གྲུབ་གཉིས། །ཀུན་ཏུ་སྦྱིན་པར་བྱེད་པ་པོ། །རྒྱལ་ཀུན་ཁྱོད་ཀྱི་སྤྲུལ་པར་སྣང་། །རྒྱལ་བ་མཆོག་ལ་གསོལ་བ་འདེབས། །རྒྱལ་ཀུན་ངོ་བོ་ཁྱོད་གཅིག་པུ། །མོས་པ་དུ་མའི་སེམས་ཅན་ལ། །རྡོ་རྗེའི་སྐུ་གང་མཐོང་གྲོལ་བ། །རྒྱལ་བ་མཆོག་ལ་གསོལ་བ་འདེབས། །གང་གིས་ཐོས་ན་འཁོར་བ་ཡི། །སྒྲིབ་པ་ཀུན་ལས་ངེས་གྲོལ་བ། །གསུང་ཀུན་ངེས་དོན་ཆོས་རབ་སྟོན། །རྒྱལ་བ་མཆོག་ལ་གསོལ་བ་འདེབས། །མོས་པ་དུ་མའི་གདུལ་བྱ་ལ། །ཐུགས་རྗེའི་རོལ་པ་སྣ་ཚོགས་སུ། །སྟོན་མཛད་བདག་གི་སྐྱབས་གྱུར་པ། །རྒྱལ་བ་མཆོག་ལ་གསོལ་བ་འདེབས། །མོས་པའི་དད་པས་སྐྱབས་ཁྱོད་ལ། །ལན་མང་གསོལ་བ་འདི་བཏབ་ན། །ཐུགས་ཡིད་གཅིག་ཏུ་འདྲེས་པ་དང་། །མཉེས་པ་ཁོ་ན་སྒྲུབ་བཞིན་དུ། །བདག་ནི་རྗེས་སུ་འཛིན་པར་ཤོག །ཅེས་པ་རྗེ་བཙུན་ཆོས་དབྱིངས་རྡོ་རྗེས་མཛད་པའོ།། །།གར་དབང་
བརྒྱད་པའི་གསོལ་འདེབས་ནི། དཔལ་འབྱོར་སྲིད་ཞིའི་ཕུན་ཚོགས་ཀུན་གྱི་གཏེར། །ཟླ་མེད་ཐུགས་རྗེ་ཆེན་པོའི་སྤྱན་ཡངས་པ། །ཆོས་ཀྱི་ཆར་ཆེན་འབེབས་པའི་སྟོན་པ་པོ། །བདག་གཞན་དོན་གཉིས་གྲུབ་དེར་གསོལ་བ་འདེབས། །མཐའ་ཡས་རབ་འབྱམས་རྒྱུད་སྡེ་ཇི་སྙེད་ཀྱི། །དཀྱིལ་འཁོར་རྒྱ་མཚོའི་གཙོ་བོར་གར་གྱིས་རོལ། །དབང་ཕྱུག་ཡོན་ཏན་བརྒྱད་ཀྱིས་མངོན་མཐོ་བ། །ཁྱབ་བདག་རྡོ་རྗེ་འཛིན་དེར་གསོལ་བ་འདེབས། །རིགས་ཅན་སྐྱེ་དགུའི་སྐྱབས་དང་ཕྱག་གི་ཡུལ། །འགྲོ་བ་ཐམས་ཅད་སྒྲོལ་བའི་དེད་དཔོན་མཆོག །གང་འདུལ་ཐབས་ཀྱི་མཁྱེན་པས་མཁའ་ལྟར་ཁྱབ། །ཆོས་རྣམས་བདག་མེད་སྟོན་དེར་གསོལ་བ་འདེབས། །རྨད་བྱུང་སྤོབས་པའི་མཐུ་སྟོབས་ཉི་མའི་དབང་། །གང་གི་བློ་གྲོས་སྒྲིབ་བྲལ་དཀོན་མཆོག་ཉིད། །ཕྱོགས་ལས་རྣམ་པར་རྒྱལ་བའི་དགའ་སྟོན་གྱིས། །སྡེ་བཞིའི་པད་ཚལ་རྒྱས་མཛད་དེ་ལ་འདུད། །འདྲེན་པ་
མཉམ་མེད་ཆོས་ཀྱི་རྔ་ཆེན་སྒྲས། །ལྷར་བཅས་སྐྱེ་དགུའི་གདུང་བར་རབ་སེལ་ཞིང་། །ཇི་སྲིད་བསྐལ་པ་བྱེ་བ་དཔག་མེད་པར། །གང་གི་བསྟན་པ་ཕྱོགས་ཀུན་གསལ་གྱུར་ཅིག །ཅེས་པ་རྗེ་ཡེ་ཤེས་རྡོ་རྗེས་སྩལ་བའི་བརྟན་བཞུགས་ལ་བཀའ་འབངས་སི་ཏུ་པས་གསོལ་འདེབས་སུ་བཅོས་པ་ལགས།། །།དེ་ནས་གར་གྱི་དབང་པོ་བཅུ་པའི་གསོལ་འདེབས་ནི། བསྐལ་མང་སྔོན་ནས་དཀོན་མཆོག་ཡན་ལག་ཏུ། །མངོན་པར་རྫོགས་པའི་སངས་རྒྱས་ཉིད་གྱུར་ཀྱང་། །འཁོར་བ་སྲིད་དུ་སྤྲུལ་པའི་རོལ་རྩེད་ཀྱིས། །གདུལ་དཀའ་འདུལ་བར་མཛད་ལ་གསོལ་བ་འདེབས། །ཁྱད་པར་འཕགས་པའི་ཡུལ་དང་བོད་ཀྱི་ཆར། །ལ་ལར་ཉན་ཐོས་ལ་ལར་རྣལ་འབྱོར་པ། །ལ་ལར་རྒྱལ་པོ་ལ་ལར་ཐ་མལ་ཚུལ། །སྣ་ཚོགས་བཀོད་པ་འཛིན་ལ་གསོལ་བ་འདེབས། །ལྷག་པར་གངས་ཅན་འདི་ན་ཀརྨ་པའི། །བསྟན་པ་ཉི་འོད་ལྟ་བུར་བསལ་བའི་སླད། །སྟོན་འཁོར་ཐ་མི་དད་པའི་ཕྲིན་ལས་ཅན། །ཞྭ་དམར་ཅོད་པན་ཅན་ལ་
གསོལ་བ་འདེབས། །དུས་གསུམ་རྒྱལ་བའི་དགོངས་པ་རོ་གཅིག་ཏུ། །གྱུར་པ་མཐའ་ཡས་མཁྱེན་པའི་མངའ་བདག་མཆོག །རྡོ་རྗེ་སློབ་དཔོན་ཆེན་པོའི་སྐུར་བཞེངས་པ། །ཆོས་གྲུབ་རྒྱ་མཚོའི་ཞབས་ལ་གསོལ་བ་འདེབས། །བདག་སོགས་སྐྱེ་བ་འདི་དང་ཚེ་རབས་ཀུན། །མགོན་པོ་ཁྱོད་ཀྱིས་རྟག་པར་རྗེས་བཟུང་ནས། །བྱང་ཆུབ་ལམ་གྱི་སྒྲུབ་པར་ནན་ཏན་དུ། །བསླབ་པས་རྒྱལ་བའི་དགོངས་པ་རྫོགས་བྱེད་ཤོག །ཅེས་ཆེ་ཚང་པའི་དབོན་པོ་སྒྲུབ་བརྒྱུད་ཀྱི་ངོར་སི་ཏུ་བསྟན་པའི་ཉིན་བྱེད་ཀྱིས་སྤེལ་བ་ཛ་ཡནྟུ།། །།དེ་ནས་རྒྱལ་ཚབ་དམ་པ་རིམ་པར་བྱོན་པའི་གསོལ་འདེབས་ནི། ཚངས་སྤྱོད་དཔལ་དང་ལྡན་པ་རྒྱལ་བའི་སྲས། །ཞིང་འདིར་བཤེས་གཉེན་སྟོན་པར་གྲགས་པ་ལས། །སླར་ཡང་ཐེག་མཆོག་དམ་པའི་ཆོས་ཀྱི་དབྱངས། །འདོམས་མཛད་སྙིང་རྗེའི་སྐུ་ལ་ཕྱག་འཚལ་ལོ། །འགྲོ་བའི་དོན་དུ་ཕན་བདེ་སྒྲུབ་པ་ལ། །ལས་འབྲས་བསླུ་བ་མེད་པའི་བླང་དོར་སྟོན། །སྡུག་བསྔལ་མེ་རབ་ཞི་
བའི་པདྨོའི་མཚོར། །ཁྱུ་མཆོག་ལམ་སྟོན་མཁན་ལ་ཕྱག་འཚལ་ལོ། །ལོངས་སྐུའི་ཞིང་དུ་བྱང་ཆུབ་སེམས་དཔའ་ཆེ། །ཀུན་ཏུ་བཟང་པོའི་རྣམ་པར་རོལ་པའི་དཔལ། །ཐུབ་པའི་འཁོར་དུ་འཕགས་པ་ཀུན་དགའ་བོ། །སྤྲུལ་པས་ཞིང་ཁམས་ཁྱབ་ལ་ཕྱག་འཚལ་ལོ། །ཁྱད་པར་ལྷ་ལྡན་ལྗོངས་འདིར་མི་ཡི་ལྷ། །སྲོང་བཙན་དུས་སུ་ཆོས་བློན་ཆེན་པོ་མགར། །རིག་འཛིན་པདྨའི་དྲུང་དུ་སྔགས་འཆང་ཆེ། །མཁར་ཆེན་དཔལ་གྱི་དབང་ཕྱུག་ལ་ཕྱག་འཚལ། །གྲུབ་ཆེན་མི་ལའི་ཐུགས་སྲས་ཞི་བ་འོད། །འཇའ་ལུས་རྡོ་རྗེའི་སྐུར་གྱུར་སླར་ཡང་ནི། །བསམ་བཞིན་དྲུག་པ་སེང་གེ་ཀརྨ་པའི། །རྒྱལ་ཚབ་རིམ་པར་བྱོན་ལ་གུས་ཕྱག་འཚལ། །དེ་ལྟར་ཕྱག་འཚལ་དད་ཅིང་ཡི་རང་དགེས། །འཁོར་བ་དོང་སྤྲུག་ཚེ་འདི་བློས་བཏང་གི །བསམ་སྦྱོར་གདུང་ཤུགས་སངས་རྒྱས་མཉན་པ་ལྟར། །མ་རྒན་དོན་དུ་རྡོ་རྗེ་འཆང་ཐོབ་ཤོག །བཙུན་པ་གྲགས་པ་མཆོག་དབྱངས་ཀྱིས་སོ།། །།དེ་ནས་བྱེ་བྲག་
ཏུ་རྒྱལ་ཚབ་གྲགས་པ་དཔལ་འབྱོར་ལ་བསྟོད་པ་ནི། ཁྱོད་སྔོན་པདྨ་སམྦྷས་བྱིན་བརླབས་ཤིང་། །གྲུབ་པའི་རྟགས་མཐོང་མཆོག་གི་དངོས་གྲུབ་བརྙེས། །ལུང་བསྟན་མཆོག་ཐོབ་རིག་པ་འཛིན་པ་པོ། །དཔལ་གྱི་དབང་ཕྱུག་གང་དེར་གསོལ་བ་འདེབས། །མཁའ་འགྲོའི་དབང་ཕྱུག་ཆེན་པོས་རྗེས་བཟུང་ཞིང་། །རླུང་སེམས་དབང་ཐོབ་གྲུབ་པ་མཐའ་རུ་ཕྱིན། །བདེ་སྟོང་དབྱེར་མེད་ཕྱག་རྒྱ་ཆེན་པོར་གྲོལ། །རྗེ་བཙུན་ཞི་བ་མཆོག་ལ་གསོལ་བ་འདེབས། །ཕྱོགས་བཅུ་དུས་གསུམ་སངས་རྒྱས་ཐམས་ཅད་ཀྱི། །ཕྲིན་ལས་གྲུབ་བའི་དབང་ཕྱུག་ཀརྨ་པའི། །སྲས་ཀྱི་ཐུ་བོར་བྱིན་གྱིས་བརླབས་པ་ཡི། །སྨོན་ལམ་མཐར་ཕྱིན་གང་དེར༴ རྒྱལ་བའི་རྒྱལ་ཚབ་ཉིད་དུ་དབང་བསྐུར་ཞིང་། །སྤྲུལ་པ་དུ་མས་འགྲོ་བའི་དོན་མཛད་པ། །གང་ལ་གང་འདུལ་ཐབས་ལ་མ་རྨོངས་པའི། །སྤྲུལ་པའི་སྐུ་མཆོག་གང་དེར༴ དཀྱིལ་འཁོར་བཞི་རུ་དབང་བཞི་ཡོངས་རྫོགས་ཤིང་། །དགའ་
བཞིའི་ཉམས་མྱོང་ཡེ་ཤེས་མངོན་དུ་གྱུར། །རྡོ་རྗེ་འཛིན་པའི་ས་ལ་ལེགས་གནས་པ། །སྔགས་འཆང་ཆེན་པོ་གང་དེར༴ ལས་ཀྱི་རྩ་རླུང་ཐིག་ལེ་རྣམ་པར་དག །ཡེ་ཤེས་བདེ་བའི་རྡོ་རྗེ་ངོ་བོར་གྲུབ། །སྣང་སྲིད་འཁོར་འདས་ཁྱབ་གདལ་ཆེན་པོར་གྲོལ། །གྲུབ་པའི་རྣལ་འབྱོར་གང་དེར༴ གཟུང་འཛིན་མཚན་མའི་རྟོག་པ་ཀུན་དང་བྲལ། །ཀུན་ལ་མ་ཆགས་ཀུན་ཏུ་སྤྱོད་པའི་མཆོག །ཀུན་བྲལ་ཀུན་རྟོགས་ཀུན་མིན་ཀུན་ལས་འདས། །ཀུན་གྱི་དབང་ཕྱུག་གྲུབ་དེར་གསོལ༴ གནས་སྐབས་སྣ་ཚོགས་ཚུལ་གྱིས་འགྲོ་བ་འདུལ། །བཟང་ངན་ལུང་མ་བསྟན་དང་བཏང་སྙོམས་པ། །འབྲེལ་བ་ཐོགས་ཚད་འདྲེན་པའི་སྨོན་ལམ་ཅན། །སྙིང་རྗེ་སྟོབས་ཅན་གང་དེར་གསོལ་བ་འདེབས། །བདག་གིས་སྒོ་གསུམ་གུས་པས་བསྟོད་པ་ཡི། །བསོད་ནམས་གང་དེས་དེང་ནས་བྱང་ཆུབ་བར། །བདེ་ཆེན་གར་གྱི་རོལ་པ་ཁྱོད་ཉིད་དང་། །ནམ་ཡང་འབྲལ་མེད་བརྩེ་བས་རྗེས་
འཛིན་ཤོག །ཅེས་པ་འདི་ནི་ཨ་ཝ་དྷཱུ་ཏཱི་པའི་རྣལ་འབྱོར་གྱི་དབང་ཕྱུག་ཆེན་པོ་གྲགས་པ་དཔལ་འབྱོར་ཉིད་ལ་ཉིད་ཀྱིས་བསྟོད་པའོ།། །།དེ་ནས་ཏཱའི་སི་ཏུ་རིམ་པར་བྱོན་པ་རྣམས་ཀྱི་གསོལ་འདེབས་ནི། དགེ་ལེགས་དུ་མའི་རྫུ་འཕྲུལ་མི་ཟད་པ། །ཞིང་ཁམས་རྒྱ་མཚོར་རྨད་བྱུང་རོལ་པ་ཅན། །རྒྱལ་ཀུན་ངོ་བོ་ཐུགས་རྗེའི་གཏེར་གཅིག་པུ། །དབང་ཕྱུག་རྡོ་རྗེའི་ཞབས་ལ་གསོལ་བ་འདེབས། །གང་གི་རང་བཞིན་ཆོས་དབྱིངས་ཁྱབ་པའི་གཟུགས། །འགྲོ་བློ་མོས་པའི་ཤེས་གཞིར་རྟག་འཆར་བ། །རྡོ་རྗེ་གསུམ་དངོས་ཀུན་ཁྱབ་འགྱུར་བ་མེད། །ཆོས་དབྱིངས་རྡོ་རྗེའི་ཞབས་ལ་གསོལ་བ་འདེབས། །དུས་གསུམ་རྒྱལ་བའི་སྤྱི་གཟུགས་ཀརྨ་པའི། །རབ་འབྱམས་ཕྲིན་ལས་སྒྲུབ་ལ་དབང་སྒྱུར་བ། །ཏཱ་ཡི་སི་ཏུར་རབ་གྲགས་སྐྱེས་རབས་ཕྲེང་། །རིམ་པར་བྱོན་པ་རྣམས་ལ་གསོལ་བ་འདེབས། །རྒྱལ་ཚབ་བྱམས་མགོན་ཌོམྦི་ཧེ་རུ་ཀ །གཟུགས་ཅན་སྙིང་པོས་རྗེས་བཟུང་འབངས་སྟོབས་ཆེན། །ས་
ར་ཧ་པས་རྗེས་བཟུང་དཱ་རི་ཀ །རྡོ་རྗེའི་ས་ནོན་གསུམ་ལ་གསོལ་བ་འདེབས། །པདྨ་འབྱུང་གནས་རྗེས་བཟུང་གྱིམ་ཤང་ཞབས། །རྩོད་མེད་ནཱ་རོས་རྗེས་བཟུང་དགྱེས་མཛད་དངོས། །མཉམ་མེད་དྭགས་པོས་རྗེས་བཟུང་དབོན་སྒོམ་པ། །ཧེ་རུ་ཀ་དཔལ་གསུམ་ལ༴ དུས་གསུམ་མཁྱེན་པས་རྗེས་བཟུང་རས་ཆེན་ཞབས། །ཀརྨ་པཀྵིས་རྗེས་བཟུང་ཡེ་ཤེས་དབང་། །རང་བྱུང་རྡོ་རྗེས་རྗེས་བཟུང་རི་མགོ་བ། །ཕྲིན་ལས་དབང་སྒྱུར་གསུམ་ལ༴ རོལ་པའི་རྡོ་རྗེས་རྗེས་བཟུང་ཏའི་ཞིང་ཆེ། །དེ་བཞིན་གཤེགས་པས་རྗེས་བཟུང་ཆོས་རྒྱལ་མཚན། །དོན་ལྡན་རྗེས་བཟུང་བཀྲ་ཤིས་རྣམ་རྒྱལ་ཞབས། །འབྲེལ་ཚད་དོན་ལྡན་གསུམ་ལ༴ རང་བྱུང་ཀུན་མཁྱེན་རྗེས་བཟུང་བཀྲ་ཤིས་མཚན། །མི་བསྐྱོད་རྗེས་བཟུང་ཆོས་ཀྱི་གོ་ཆ་དང་། །དབང་ཕྱུག་རྡོ་རྗེས་རྗེས་བཟུང་ཆོས་ཀྱི་རྒྱལ། །བསྟན་པའི་སྲོལ་འཛིན་གསུམ་ལ༴ ཆོས་དབྱིངས་རྡོ་རྗེས་རྗེས་བཟུང་མི་ཕམ་པ། །ཡེ་
ཤེས་རྡོ་རྗེས་རྗེས་བཟུང་ལེགས་བཤད་སྨྲ། །བྱང་ཆུབ་རྡོ་རྗེས་རྗེས་བཟུང་ཆོས་ཀྱི་འབྱུང་། །བྱང་ཆུབ་སེམས་དཔའ་གསུམ་ལ་གསོལ་བ་འདེབས། །བདུད་འདུལ་རྡོ་རྗེས་རྗེས་བཟུང་ཉིན་བྱེད་དབང་། །ཐེག་མཆོག་རྡོ་རྗེས་རྗེས་བཟུང་ཀུན་ཏུ་བཟང་། །མཁའ་ཁྱབ་རྡོ་རྗེས་རྗེས་བཟུང་དབང་མཆོག་རྒྱལ། །པདྨའི་ལྗགས་ལྡན་གསུལ་ལ་གསོལ་བ་འདེབས། །གསོལ་བཏབ་མཐུ་ལས་བདག་སོགས་འགྲོ་བ་རྣམས། །ཚོགས་གསུམ་རྡོ་རྗེའི་ས་ནོན་ཀརྨ་པའི། །ཕྲིན་ལས་འདོད་དགུར་སྒྱུར་བའི་མངའ་བརྙེས་ཏེ། །གསང་གསུམ་རྡོ་རྗེ་འཛིན་པའི་གོ་འཕང་ཤོག །ཅེས་རྒྱལ་མཆོག་བཅུ་པའི་ཞབས་འབྲིང་པ་བསྒོམ་ཆེན་ཀརྨ་ཤེས་རབ་ཀྱིས་གསོལ་འདེབས་མཁའ་ཁྱབ་ཅི་འདྲ་བའི་སྐྱེས་རབས་གསོལ་འདེབས་ཤིག་དགོས་ཞེས་ནན་ཆེར་བསྐུལ་བར་བརྟེན་སི་ཏུ་ ཆོས་ཀྱི་རྒྱལ་མཚན་གྱིས་བསམ་གཏན་ཡིད་འོང་གླིང་གི་དབང་ཕྱུག་ཕུག ་ཏུ་སྦྱར་བའོ།། །།བྱེ་བྲག་ཏུ་སི་ཏུ་ཆོས་ཀྱི་རྒྱལ་མཚན་ལ་བསྟོད་པ་ནི། ཆོས་ཀྱི་རྒྱལ་པོ་ཀུན་མཁྱེན་ཀརྨ་པའི། །བསྟན་
པའི་རྒྱལ་མཚན་ཕྱོགས་བརྒྱར་སྤེལ་བ་ལ། །དགེ་ལེགས་འདོད་དགུའི་འབྱུང་གནས་རིན་པོ་ཆེ། །དཔལ་ལྡན་བཟང་པོའི་ཞབས་ལ་གསོལ་བ་འདེབས། །རྒྱུ་དང་འབྲས་བུའི་ཆོས་ཚུལ་ཇི་སྙེད་པ། །བློ་གྲོས་སྤོབས་པས་ཇི་བཞིན་ལེགས་རྟོགས་ཏེ། །འཆད་རྩོད་རྩོམ་ལ་འགྲན་པའི་ཟླ་བྲལ་བ། །ཆོས་ཀྱི་འབྱུང་གནས་ཞབས༴ མཁྱེན་བརྩེའི་དབང་ཕྱུག་རྒྱལ་བ་ཀརྨ་པས། །མངོན་པར་དབང་བསྐུར་ཆོས་ཀྱི་ཕྱག་རྒྱ་ཡིས། །རྒྱ་མཚོའི་མཐའ་ཀླས་ཀུན་ལ་ཁྱབ་མཛད་པ། །ལེགས་པའི་ལམ་སྟོན་ཞབས་ལ༴ སྟོན་པ་མཚུངས་མེད་རྗེ་བཙུན་ཀརྨ་པའི། །ཕྲིན་ལས་རབ་འབྱམས་སྒོ་བརྒྱ་འབྱེད་པ་ལ། །འདོད་དགུར་སྒྱུར་བའི་དབང་ཕྱུག་དམ་པ་མཆོག །བསྟན་པའི་ཁུར་འཛིན་ཞབས་ལ༴ ཀུན་གྱི་གདུང་སེལ་བཙུན་པའི་མཆོག་གྱུར་ཅིང་། །རྒྱ་ཆེན་བྱང་ཆུབ་སེམས་ཀྱི་བསམ་སྦྱོར་གྱིས། །ཀརྨ་པ་ཡི་བསྟན་པ་རྒྱས་མཛད་པ། །ཕན་བདེའི་འབྱུང་གནས་ཞབས་ལ༴ གང་
གི་བཀའ་ཡི་ཅོད་པན་རབ་བཅིངས་ནས། །ཕྱོགས་ལས་རྣམ་པར་རྒྱལ་བའི་ལེགས་བྱས་ཀྱིས། །མ་ལུས་དབང་དུ་མཛད་པའི་ཕྲིན་ལས་ཅན། །རྗེ་བཙུན་ཁྱེད་ཀྱི་བཞེད་དོན་གྲུབ་གྱུར་ཅིག །རྒྱལ་བ་སྲས་བཅས་རྣམས་ཀྱི་ཐུགས་རྗེ་དང་། །བཀའ་སྲུང་དམ་ཅན་རྒྱ་མཚོའི་ནུས་མཐུ་དང་། །བདག་སོགས་རྣམས་ཀྱིས་མོས་པའི་བདེན་སྟོབ་ཀྱིས། །འགྲོ་མགོན་ཁྱོད་བཞིན་བདག་སོགས་འགྲུབ་གྱུར་ཅིག །ཅེས་སི་ཏུ་ཆོས་ཀྱི་རྒྱལ་མཚན་ལ་ཞོ་ཁ་འོར་གྱི་ཁང་བརྩེགས་ནས་བཛྲེ་ཤྭ་རས་སོ།། །།གར་དབང་བརྒྱད་པས་སྩལ་བའི་ཆོས་ཀྱི་སྤྱན་ཅན་དྲུག་པའི་ཞབས་བརྟན་ཕྱིས་གསོལ་འདེབས་སུ་བསྒྱུར་བ་ནི། སྟོན་པ་མཚུངས་མེད་རྒྱལ་དབང་ཀརྨ་པའི། །ཕྲིན་ལས་རབ་འབྱམས་འཛིན་ལ་མཆོག་མངའ་བའི། །གྲུབ་པའི་དབང་ཕྱུག་འགྲོ་མགོན་སྤྲུལ་པའི་སྐུ། །བསྟན་པའི་ཉིན་བྱེད་ཞབས་ལ་གསོལ་བ་འདེབས། །གང་གིས་ཟབ་གསང་གསུང་གི་མཛོད་འཛིན་ཅིང་། །གདུལ་བྱ་མོས་ལྡན་ཁམས་དབང་ཇི་བཞིན་དུ། །
ཐབས་མཁས་ཟབ་མོའི་ཆོས་ཚུལ་སྟོན་མཛད་པ། །གཙུག་ལག་ཆོས་ཀྱི་སྣང་བར་གསོལ་བ་འདེབས། །ཀུན་གྱི་གདུང་སེལ་ལྷག་བསམ་རིན་ཆེན་མཆོག །རྒྱ་ཆེན་བྱང་ཆུབ་སེམས་ཀྱི་བསམ་སྦྱོར་གྱིས། །བསྟན་པའི་ཁུར་ཆེན་འདེགས་ལ་མི་ངལ་བ། །ཆོས་ཀྱི་འབྱུང་གནས་ཞབས་ལ་གསོལ་བ་འདེབས། །རབ་འབྱམས་རྒྱལ་བ་རྒྱ་མཚོའི་རིགས་ཀྱི་བདག །དཔལ་ལྡན་བླ་མ་རྗེ་བཙུན་བརྩེ་བའི་གཏེར། །རྒྱལ་མཆོག་ཆོས་ཀྱི་འབྱུང་གནས་དམ་པ་ཡིས། །སྐྱེ་བ་ཀུན་ཏུ་རྗེས་སུ་འཛིན་གྱུར་ཅིག །ཅེས་སོ།། །།སླར་ཡང་འཇམ་མགོན་དེ་ཉིད་ཀྱི་ཞབས་ལ་གསོལ་བ་འདེབས་པ་ནི། མཁའ་ཁྱབ་འགྲོ་བའི་མ་འདྲིས་མཛའ་བཤེས་མཆོག །རྒྱལ་ཀུན་ཡོངས་ཀྱི་གསང་གསུམ་འདུས་པའི་སྐུ། །རྡོ་རྗེ་སློབ་དཔོན་ཆོས་ཀྱི་འབྱུང་གནས་ལ། །རྣམ་ཀུན་མི་ཕྱེད་དད་པས་གསོལ་བ་འདེབས། །དྲུག་པ་སེང་གེ་དཔལ་ལྡན་ཀརྨ་པའི། །རྨད་བྱུང་ལྟ་བ་ཇི་བཞིན་སྤེལ་བ་ལ། །ཇི་ལྟ་ཇི་སྙེད་གཟིགས་
པའི་ཡེ་ཤེས་མངའ། །བསྟན་པའི་ཉིན་བྱེད་མཆོག་ལ་གསོལ་བ་འདེབས། །སྒྲུབ་བརྒྱུད་བསྟན་པ་འཛིན་སྐྱོང་མཐའ་ཡས་པའི། །མཆོག་ཏུ་གྱུར་པའི་བྱེད་པོ་བླ་ན་མེད། །ཏཱའི་སི་ཏུར་གྲགས་པ་དབྱར་གྱི་རྔ། །ཡོངས་སུ་ཁྱབ་དེར་སྙིང་ནས་གསོལ་བ་འདེབས། །གང་སྐུ་སྣང་སྟོང་གྲགས་སྟོང་བདེ་སྟོང་གི །བྱིན་རླབས་བདུད་རྩིས་རང་རྒྱུད་ལེགས་སྨིན་པས། །མ་རིག་འཁྲུལ་པའི་སྣང་བ་ཀུན་བྲལ་ནས། །བླ་མེད་སྐུ་བཞིའི་རྒྱལ་ས་འཛིན་པར་ཤོག །དེ་ལྟར་གསོལ་བཏབ་བགྱིད་པའི་དགེ་བའི་འབྲས། །ཕྱོགས་དུས་ཀུན་ཏུ་རྒྱལ་བསྟན་འཕེལ་ཞིང་རྒྱས། །འགྲོ་ཀུན་བདེ་སྐྱིད་དཔལ་གྱིས་ཡུན་དུ་འཚོ། །བཀྲ་ཤིས་དགེ་བའི་དཔལ་དང་ལྡན་པར་ཤོག །ཅེས་རྗེ་དེ་ཉིད་དང་མཆོག་གི་སྤྲུལ་སྐུའི་སྐུ་ཡི་རིམ་གྲོ་བ་ཆེན་པོ་ཀརྨ་དམ་ཆོས་ལྷུན་གྲུབ་ཀྱིས་བསྐུལ་བའི་ངོར་ཀརྨ་པ་བཅུ་གསུམ་པས་སྤེལ་བ་དགེ །པདྨའི་ལུང་ཟིན་ཉིན་བྱེད་དབང་པོ་ལྟར། །ཆེ་དགུའི་གཙུག་ན་མངོན་པར་རབ་མཛེས་པ། །དེ་
ཕྱིར་པདྨ་ཉིན་བྱེད་དབང་པོ་ཞེས། །མཚུངས་མེད་བླ་མའི་ཞབས་ལ་གསོལ་བ་འདེབས། །རྒྱལ་ཀུན་གསང་གསུམ་མཛོད་འཆང་སྤྲུལ་པའི་སྐུ། །དྭགས་བརྒྱུད་བསྟན་པའི་དཔལ་དང་མགོན་པོ་མཆོག །ཡེ་ནས་ཡིན་བཞིན་བསྟན་པའི་རྩ་ལག་མཆོག །ཁམས་གསུམ་ཆོས་ཀྱི་རྒྱལ་པོར་གསོལ་བ་འདེབས། །འཕགས་མཆོག་རབ་འབྱམས་འདུས་སྐུ་མཚན་དཔེའི་བདག །ཡང་དག་སྙིང་པོའི་ཆོས་སྒོ་འབུམ་སྡེ་ཡིས། །སྐལ་ལྡན་སྨིན་གྲོལ་ལམ་བཟང་སྟོན་མཁས་པའི། །རིགས་ཀུན་ཁྱབ་བདག་བླ་མར་གསོལ་བ་འདེབས། །གདུལ་བྱ་མཆོག་དམན་བར་མའི་སྐྱེ་བོ་ཀུན། །མཐོང་ཐོས་དྲན་རེག་མངོན་མཐོ་ངེས་ལེགས་ཀྱིས། །ལམ་ལ་འགོད་མཛད་ཡིད་བཞིན་ནོར་བུའི་དཔལ། །བདག་སོགས་སྙིང་དབུས་ཐིག་ལེ་རྟག་པར་རོལ། །དཔལ་ལྡན་བླ་མར་གསོལ་བཏབ་དགེ་དེའི་མཐུས། །འཇིག་རྟེན་ཁམས་སུ་སྡུག་བསྔལ་མིང་མི་གྲགས། །རྫོགས་ལྡན་
ལང་ཚོ་གསར་དུ་རབ་བཞད་ནས། །ཀཾ་ཚང་བསྟན་པ་རྒྱས་པའི་བཀྲ་ཤིས་ཤོག །ཅེས་ཀུན་མཁྱེན་བླ་མ་སི་ཏུ་རིན་པོ་ཆེ་པདྨ་ཉིན་བྱེད་དབང་པོའི་ཞབས་བརྟན་བདེན་ཚིག་སླར་ཀརྨ་པ་བཅུ་བཞི་པས་སྒྱུར་བ་དགེ། ༀ་སྭ་སྟི། །རྒྱལ་བ་ཡོངས་ཀྱི་ཐུགས་རྗེའི་རང་གཟུགས་ཉིད། །འཕགས་མཆོག་སྤྱན་རས་གཟིགས་དབང་ཀརྨ་པའི། །ཕྲིན་ལས་མ་ལུས་སྒྲུབ་པ་སྤྲུལ་པའི་སྐུ། །ཏཱའི་སི་ཏུའི་ཞབས་ལ་གསོལ་བ་འདེབས། །ཆོས་འཁོར་རིམ་གསུམ་མཐར་ཐུག་དཔལ་ལྡན་པ། །བདེ་གཤེགས་སྙིང་པོ་འགྱུར་མེད་འོད་གསལ་ཆེ། །བསྟན་པ་ཇི་བཞིན་འཛིན་སྐྱོང་སྤེལ་མཛད་པ། །དཔལ་ལྡན་བླ་མའི་ཞབས་ལ་གསོལ་བ་འདེབས། །ཡང་དག་རླབས་ཆེན་དོན་གཉིས་སྒྲུབ་པ་ལ། །བར་དུ་གཅོད་པ་མཆེས་ཚད་ཕྱོགས་ཀུན་ལས། །ཡོངས་སུ་རྣམ་པར་གྲོལ་བའི་རབ་གྱུར་སྡེ། །ཕྱོགས་ལས་རྣམ་རྒྱལ་བླ་མར་གསོལ་བ་འདེབས། །རྡོ་རྗེ་ཐེག་པའི་རིང་ལུགས་བཀའ་བརྒྱུད་དང་། །པདྨའི་ངེས་
གསང་རྨ་མེད་ཟུང་འཇུག་ཆེའི། །ཉིན་ལྟར་བྱེད་པའི་དབང་པོའི་སྡེ་ཤར་ཕྱིར། །པདྨ་ཉིན་བྱེད་དབང་པོར་གསོལ༴ །བསླུ་མེད་དཀོན་མཆོག་ཀུན་འདུས་བླ་མ་ལ། །རྩེ་གཅིག་ཡིད་ཀྱིས་གསོལ་བ་བཏབ་པའི་མཐུས། །བདག་སོགས་འདི་ནས་སྐྱེ་ཚེ་ཐམས་ཅད་དུ། །མགོན་པོ་ཁྱོད་ཀྱིས་རྗེས་སུ་འཛིན་པར་ཤོག །ཅེས་སི་ཏུ་རིན་པོ་ཆེའི་ཞབས་བརྟན་བདེན་ཚིག་དཔའ་བོ་རྡོ་རྗེ་གཙུག་ལག་དགའ་བའི་མཛད་པ་སླར་གསོལ་འདེབས་སུ་ཀརྨ་པ་བཅུ་བཞི་པས་བསྒྱུར་བ་དགེའོ།། །།ཀུན་མཁྱེན་རྡོ་རྗེ་འཆང་བྱམས་མགོན་པདྨ་དབང་མཆོག་རྒྱལ་པོའི་སྐུ་བསྟོད་གསོལ་འདེབས་ནི། པདྨའི་རྒྱལ་ཚབ་མཆོག་གཏེར་འགྲོ་བའི་མགོན། །རྣམ་འདྲེན་སྐྱེ་རྒུའི་གཙུག་ན་རབ་མཛེས་པ། །བྱམས་མགོན་ཆོས་ཀྱི་རྒྱལ་པོ་རྡོ་རྗེ་འཆང་། །དཔལ་ལྡན་བླ་མའི་ཞབས་ལ་གསོལ་བ་འདེབས། །སྡོམ་གསུམ་རྣམ་དག་ཁྱད་འཛིན་སྤྲུལ་པའི་སྐུ། །སྒྲུབ་བརྒྱུད་བསྟན་པའི་རྩ་ལག་ཉི་མའི་གཉེན། །སྔོན་བསྐྱེད་དམ་བཅའ་བཙན་པོ་བསྟན་པའི་དཔལ། །འཕགས་མཆོག་
ཐུགས་རྗེའི་འདྲེན་པར་གསོལ་བ་འདེབས། །ཡོངས་ཀྱི་སྤྲུལ་པའི་ཕ་རོལ་ཀུན་སོན་པས། །མཁྱེན་གཉིས་སྟོབས་བཅུ་མངའ་ལྡན་སྨིན་གྲོལ་གྱིས། །ལམ་བཟང་འདྲེན་པའི་དེད་དཔོན་ཆོས་ཀྱི་རྗེ། །མངོན་སྣང་འདྲེན་མཛད་བླ་མར་གསོལ་བ་འདེབས། །རྡུལ་གཅིག་ཞིང་མཆོག་རྡུལ་སྙེད་འགྲོ་བའི་མགོན། །མཐོང་ཐོས་དྲན་རེག་མངོན་ལེགས་འཕགས་པའི་ལམ། །ཐོས་བསམ་སྒོམ་པའི་གཞི་ཐོག་འབྲས་བུའི་ས། །བསླུ་མེད་དཀོན་མཆོག་ཀུན་འདུས་བླ་མ་ལ། །རྩེ་གཅིག་གདུང་ཤུགས་འབར་བའི་གསོལ་བཏབ་མཐུས། །རྫོགས་ལྡན་ལང་ཚོ་རབ་དགའི་དཔལ་ལ་སྤྱོད། །མགོན་པོ་ཁྱོད་ཀྱི་རྗེས་སུ་རབ་འཛིན་ནས། །སྐྱེ་བ་ཀུན་ཏུ་འབྲལ་མེད་བྱིན་གྱིས་རློབས། །དེ་ནས་དཔལ་ལྡན་དཔའ་བོ་ན་རིམ་གྱི་གསོལ་འདེབས་ཞྭ་དམར་བརྒྱད་པས་མཛད་པ་ནི། ངག་གི་དབང་ཕྱུག་གྲུབ་པ་ཤེས་འབྱུང་བློ། །རྡོ་རྗེ་རྣལ་འབྱོར་མ་དངོས་བདེ་སྐྱོང་བཟང་། །ཧེ་རུ་ཀ་དཔལ་རོལ་པ་
ཡེ་ཤེས་ཞབས། །མཆོག་དངོས་གྲུབ་པ་གསུམ་ལ་གསོལ་བ་འདེབས། །སྤྱན་རས་གཟིགས་དངོས་སངས་རྒྱས་རོང་སྟོན་རྗེ། །ཆོས་ཀྱི་རྒྱལ་པོ་རིན་ཆེན་གླིང་པའི་ཞབས། །རྩོད་མེད་སྤྲུལ་སྐུ་ཀློང་ཡངས་བདེ་བ་རྗེ། །མཆོག་གི་སྤྲུལ་སྐུ་གསུམ་ལ༴ ཡེ་ཤེས་སྐུ་བརྙེས་རྒྱལ་མཚན་དཔལ་བཟང་པོ། །བདེ་ཆེན་མཐར་ཐུག་བརྙེས་པ་དཔའ་བོ་རྗེ། །དམ་ཆོས་འཁྲུལ་མེད་སྨྲ་བའི་གཙུག་ལག་ཕྲེང་། །མཆོག་གི་ལམ་སྟོན་གསུམ་ལ༴ གཙུག་ལག་གཞུང་ལུགས་རྒྱ་མཚོ་སྨྲ་བའི་དབྱངས། །ཀུན་ཏུ་བཟང་པོ་ཕྲིན་ལས་རྒྱ་མཚོའི་དཔལ། །རྗེ་བཙུན་བླ་མ་གཙུག་ལག་དོན་ཀུན་གྲུབ། །མཆོག་གི་བདག་ཉིད་རྣམས་ལ་གསོལ་བ་འདེབས། །སངས་རྒྱས་གཉིས་པ་མཚོ་སྐྱེས་པད་འབྱུང་གི། །སྒྱུ་འཕྲུལ་རོལ་པས་སྙིང་པོའི་བསྟན་སྤེལ་བ། །རྡོ་རྗེ་གཙུག་ལག་དགའ་བའི་དབང་པོའི་སྡེ། །མཆོག་གི་གྲུབ་པ་གང་དེར༴ ཡང་སྲིད་ལེན་པའི་ལས་ཉོན་མ་མཆིས་ཀྱང་། །གང་འདུལ་
སྐྱེས་རབས་རྒྱ་མཚོ་སྟོན་མཛད་པའི། །རྩ་བ་བརྒྱུད་པར་བཅས་ལ་གསོལ་བཏབ་པས། །འགྲོ་ཀུན་ཚེ་འདིར་ཧེ་རུ་ཀ་འགྲུབ་ཤོག །འདི་དང་མ་འོངས་སྐྱེ་བ་ཐམས་ཅད་དུ། །ཡོངས་འཛིན་ཁྱོད་ཀྱི་བདག་སོགས་མགོན་མཛོད་ལ། །ཟབ་དང་རྒྱ་ཆེའི་ཆོས་ཀྱི་བདུད་རྩི་ནི། །ནམ་ཡང་འབྲལ་བ་མེད་པར་སྩལ་དུ་གསོལ།། །།བྱེ་བྲག་ཏུ་སྐྱེས་ཆེན་གཙུག་ལག་ཕྲེང་བར་བསྔགས་པ་ནི། ཕུན་ཚོགས་འདོད་དགུའི་འབྱུང་གནས་ཆོས་ཀྱི་མཛོད། །ལེགས་བཤད་གཞུང་ལུགས་རྒྱ་མཚོའི་རྒྱལ་མཚན་ཅན། །དོན་གཉིས་ལྷུན་གྱིས་གྲུབ་པ་ཆོས་ཀྱི་རྗེ། །ཆོས་རྒྱལ་དོན་གྲུབ་ཞབས་ལ་གསོལ་བ་འདེབས །སྐྱེ་བར་དམ་པའི་མགོན་གྱིས་རྗེས་གཟུང་བའི། །རླབས་ཆེན་ཚོགས་གཉིས་བགྱི་བ་སྔོན་སོང་སྟེ། །དེང་སང་འཁྲུལ་མེད་བསྟན་ལ་རབ་ཞུགས་པ། །དགེ་སློང་གཙུག་ལག་ཕྲེང་བ་དེ་ལ་འདུད། །སྡེ་སྣོད་རྒྱུད་སྡེའི་ཚིག་དོན་ཤིན་ཏུ་བྱང་། །འཆད་རྩོད་རྩོམ་ལ་བློ་གྲོས་ཐོགས་པ་
མེད། །བདེན་གཉིས་དབྱེར་མེད་དོན་ལ་ངེས་པ་རྙེད། །སྐྱེས་ཆེན་གཙུག་ལག་ཕྲེང་བ་དེ་ལ་འདུད། །ལྷག་པའི་ལྷ་དང་མཁའ་འགྲོས་རྗེས་སུ་བཟུང་། །རྩ་རླུང་ཐིག་ལེའི་གནད་གསང་བདེ་བར་གྱུར། །སྒོ་གསུམ་རྡོ་རྗེ་གསུམ་གྱི་རྟེན་འབྲེལ་འགྲིགས། །རྟོགས་ལྡན་གཙུག་ལག་ཕྲེང་བ་དེ་ལ་འདུད། །བཀའ་བརྒྱུད་བླ་མ་རྣམས་ཀྱི་བྱིན་རླབས་དང་། །རྒྱལ་བ་སྲས་བཅས་རྣམས་ཀྱི་བདེན་སྟོབས་དང་། །དཔལ་ལྡན་ཀརྨ་པ་ཡི་བྱིན་རླབས་ཀྱིས། །གཙུག་ལག་ཕྲེང་བའི་བཞེད་དོན་འགྲུབ་གྱུར་ཅིག །ཅེས་པ་འདི་ཀརྨ་པ་མི་བསྐྱོད་རྡོ་རྗེས་གཙུག་ལག་ཕྲེང་བ་ལ་བསྔགས་པར་མཛད་པའོ།། །།དེ་ནས་ཏྲེ་ཧོ་སྤྲུལ་པའི་སྐུ་རིམ་པར་བྱོན་པའི་གསོལ་འདེབས་ནི། རྒྱལ་མཆོག་ཚེ་དཔག་མེད་པའི་ཕྲིན་ལས་ཀྱི། །ཟློས་གར་སྤྲུལ་སྐུ་ཚར་དུ་དངར་བ་ཡི། །དཔལ་ལྡན་བླ་མ་རིམ་པར་བྱོན་རྣམས་ལ། །རྩེ་གཅིག་གུས་པ་ཆེན་པོས་གསོལ་བ་འདེབས། །ཨིནྡྲ་བྷཱུ་ཏི་ནཱ་ག་ཨ་རྫུ་ན། །ཤེས་རབ་བཟང་པོ་པཎ་ཆེན་ཕྱོགས་ཀྱི་
གླང་། །གསང་སྔགས་སྡོང་པོ་སྤྱན་སྔ་ཚུལ་ཁྲིམས་འབར། །རྣལ་འབྱོར་མཁས་མཆོག་རྣམས་ལ་གསོལ་བ་འདེབས། །མཉམ་མེད་འཇིག་རྟེན་གསུམ་གྱི་མགོན་པོ་དང་། །བསོད་ནམས་རྡོ་རྗེ་གྲུབ་ཆེན་རཏྣ་ཤྲཱི། །དོན་གྲུབ་འོད་ཟེར་ལ་སོགས་སྒྲུབ་བརྒྱུད་ཀྱི། །བསྟན་པའི་རྒྱལ་མཚན་འཛིན་ལ་གསོལ་བ་འདེབས། །མཁས་གྲུབ་ཆོས་ཀྱི་རྒྱ་མཚོ་དཔག་བསམ་དབང་། །བསྟན་འཛིན་དར་རྒྱས་སྤྲུལ་པའི་སྐུ་མཆོག་ནི། །བྱང་ཆུབ་ཆོས་ཀྱི་སྙིང་པོ་འགྲོ་བའི་མགོན། །རྗེ་བཙུན་བླ་མ་མཆོག་ལ་གསོལ་བ་འདེབས། །དེ་ལྟར་གསོལ་བཏབ་དགེ་བའི་བྱིན་རླབས་ཀྱིས། །སྒྲུབ་བརྒྱུད་བསྟན་པ་དར་ཞིང་རྒྱས་པ་དང་། །བདག་སོགས་ཚོགས་གཉིས་མ་ལུས་རྫོགས་པ་ནས། །ཟུང་འཇུག་ཕྱག་ཆེན་རྡོ་རྗེ་འཆང་འགྲུབ་ཤོག །ཅེས་རྗེ་བཙུན་བླ་མ་ཏྲེ་ཧོ་སྤྲུལ་སྐུ་ན་རིམ་གྱི་གསོལ་འདེབས་ཤིག་དགོས་ཞེས་བསམ་གཏན་ཡིད་འོང་གླིང་གི་བླ་མ་ཀརྨ་རབ་བརྟན་གྱིས་བསྐུལ་བའི་ངོར། གར་དབང་དཀོན་མཆོག་ཆོས་གྲུབ་
ཀྱིས་བྲིས་པ། མངྒ་ལཾ།། །།དེ་ནས་རྗེ་བཙུན་འདན་མ་གྲུབ་ཐོབ་ལ་གསོལ་བ་འདེབས་པ་ནི། རྙེད་བཀུར་ཆོས་བརྒྱད་གྲགས་པའི་རོ་རྣམས་ལ། །རི་དྭགས་དགྲ་ལ་འཇིགས་བཞིན་རབ་ཏུ་འབྲོས། །མནོག་ཆུང་ཚེ་འདིས་བསླུ་བར་མ་ནུས་པའི། །སངས་རྒྱས་མཉན་པའི་ཞབས་ལ་གསོལ་བ་འདེབས། །ལས་དང་ཉོན་མོངས་འཁོར་བའི་རྒྱུ་རྣམས་ལ། །སྦྲུལ་ཆེན་དུག་བཞིན་མྱུར་དུ་སྤོང་བར་མཛད། །སྡུག་བསྔལ་རྩ་བ་བདེ་བར་མ་འཁྲུལ་བའི། །སངས་རྒྱས་མཉན་པའི་ཞབས་ལ་གསོལ་བ་འདེབས། །ཁམས་གསུམ་འཁོར་བའི་བདེ་འབྱོར་ཐམས་ཅད་ལ། །ཚབས་ཆེན་ནད་ཀྱིས་གདུང་བཞིན་ངེས་པར་འབྱུང་། །ལྟར་སྣང་བདེ་བས་འདྲིད་པར་མ་ནུས་པའི། །སངས་རྒྱས་མཉན་པའི་ཞབས་ལ་གསོལ་བ་འདེབས། །ལྷག་པར་སྐྱེ་རྒ་ན་འཆིའི་སྡུག་བསྔལ་ལ། །རི་དྭགས་ཐུམ་ཕྲལ་ལྟ་བུར་རབ་ཏུ་སྔངས། །སྣང་ཙམ་རྟག་འཛིན་དབང་དུ་མ་སོང་བའི། །སངས་རྒྱས་མཉན་པའི་
ཞབས་ལ་གསོལ་བ་འདེབས། །ཡོངས་འཛིན་དམ་ཆོས་བཅས་པའི་བསྒྲུབ་པ་ལ། །སྐོམ་པ་ཆུ་ལ་སྙེག་བཞིན་ལེགས་པར་བསྟེན། །བྱ་བ་ཕལ་པས་ཐུགས་ཡིད་མ་ཕྲོགས་པའི། །སངས་རྒྱས་མཉན་པའི་ཞབས་ལ་གསོལ་བ་འདེབས། །རང་གི་དོན་དང་ལེ་ལོའི་རྣམ་རྟོག་ལ། །ཕྱིར་རྒོལ་གཤེད་མ་ལྟ་བུར་ལེགས་པར་གཟིགས། །ཆོས་ལྟར་བཅོས་པའི་དབང་དུ་མ་སོང་བའི། །སངས་རྒྱས་མཉན་པའི་ཞབས་ལ་གསོལ་བ་འདེབས། །དཔལ་ལྡན་བླ་མ་ཁྱོད་སྐུ་ཅི་འདྲ་དང་སོགས་བརྗོད། འདིའང་ཀརྨ་པ་བརྒྱད་པས་སོ།། །།དེ་ནས་བརྒྱུད་འདེབས་ཀྱི་སྐོར་ལ་ཆོས་མཐའ་དག་གི་ཟུང་འཇུག་སྙིང་པོའི་དོན་གཅིག་ཏུ་རྟོགས་པའི་མཐར་ཐུག་དོན་གྱི་བརྒྱུད་པ་ལ་གསོལ་བ་འདེབས་པ་ནི། ན་མོ་གུ་རུ་བྷྱཿ ཟུང་འཇུག་བདེ་བ་ཆེན་པོའི་ཕོ་བྲང་ནས། །བདེ་གཤེགས་རྡོ་རྗེ་འཆང་ལ་གསོལ་བ་འདེབས། །རང་སེམས་ཆོས་སྐུར་རྟོགས་པར་བྱིན་གྱིས་རློབས། །བླ་མ་མཁྱེན་པས་གཟིགས་ལ་ཐུགས་རྗེས་ཟུང་། །གཉིས་
མེད་མཁའ་དབྱིངས་དག་པའི་ཕོ་བྲང་ནས། །རྒྱལ་སྲས་ཏཻ་ལོ་པ་ལ་གསོལ་བ་འདེབས། །རང་སེམས་ཆོས་སྐུར་རྟོགས་པར་བྱིན་གྱིས་རློབས། །བླ་མ་མཁྱེན་པས་གཟིགས་ལ་ཐུགས་རྗེས་ཟུང་། །གསལ་སྟོང་འཇའ་ཚོན་ལྟ་བུའི་ཕོ་བྲང་ནས། །མཁས་མཆོག་ནཱ་རོ་པ་ལ་གསོལ་བ་འདེབས། །རང་སེམས་ཆོས་སྐུར་རྟོགས་པར་བྱིན་གྱིས་རློབས། །བླ་མ་མཁྱེན་པས་གཟིགས་ལ་ཐུགས་རྗེས་ཟུང་། །སྤྲོས་བྲལ་མཚན་མ་མེད་པའི་ཕོ་བྲང་ནས། །མར་པ་ལྷོ་བྲག་པ་ལ་གསོལ་བ་འདེབས། །རང་སེམས་ཆོས་སྐུར་རྟོགས་པར་བྱིན་གྱིས་རློབས། །བླ་མ་མཁྱེན་པས་གཟིགས་ལ་ཐུགས་རྗེས་ཟུང་། །སྣང་སྟོང་སྒྱུ་མ་ལྟ་བུའི་ཕོ་བྲང་ནས། །དབང་ཕྱུག་མི་ལའི་སྐུ་ལ་གསོལ་བ་འདེབས། །རང་སེམས་ཆོས་སྐུར་རྟོགས་པར་བྱིན་གྱིས་རློབས། །བླ་མ་མཁྱེན་པས་གཟིགས་ལ་ཐུགས་རྗེས་ཟུང་། །སྐྱེ་འགག་གནས་དང་བྲལ་བའི་ཕོ་བྲང་ནས། །མཉམ་མེད་སྒམ་པོ་པ་ལ་གསོལ་བ་
འདེབས། །རང་སེམས་ཆོས་སྐུར་རྟོགས་པར་བྱིན་གྱིས་རློབས། །བླ་མ་མཁྱེན་པས་གཟིགས་ལ་ཐུགས་རྗེས་ཟུང་། །ཟག་མེད་ཤེས་བྱ་ཀུན་མཁྱེན་ཕོ་བྲང་ནས། །དཔལ་ལྡན་དུས་གསུམ་མཁྱེན་ལ་གསོལ་བ་འདེབས། །རང་སེམས་ཆོས་སྐུར་རྟོགས་པར་བྱིན་གྱིས་རློབས། །བླ་མ་མཁྱེན་པས་གཟིགས་ལ་ཐུགས་རྗེས་ཟུང་། །དྲི་མེད་ཡོན་ཏན་ཕུན་ཚོགས་ཕོ་བྲང་ནས། །འགྲོ་མགོན་རས་ཆེན་པ་ལ་གསོལ་བ་འདེབས། །རང་སེམས་ཆོས་སྐུར་རྟོགས་པར་བྱིན་གྱིས་རློབས། །བླ་མ་མཁྱེན་པས་གཟིགས་ལ་ཐུགས་རྗེས་ཟུང་། འགྲེའོ། །བསྐྱེད་རྫོགས་བརྟན་པ་ཐོབ་པའི་ཕོ་བྲང་ནས། །རྒྱལ་སྲས་སྤོམ་བྲག་པ་ལ༴ རང་༴ བླ༴ སྣང་སྲིད་དབང་དུ་འདུས་པའི་ཕོ་བྲང་ནས། །གྲུབ་ཆེན་ཀརྨ་པ་ལ༴ རང་༴ བླ༴ ཤེས་དང་ཤེས་བྱ་ཀུན་མཁྱེན་ཕོ་བྲང་ནས། །མཁས་གྲུབ་ཨུ་རྒྱན་པ་ལ༴ རང་༴ བླ༴ རང་གཞན་དོན་གཉིས་གྲུབ་པའི་ཕོ་བྲང་ནས། །ཆོས་
རྗེ་རིན་པོ་ཆེ་ལ༴ རང་༴ བླ༴ སྣང་བ་ཆུ་ཟླ་ལྟ་བུའི་ཕོ་བྲང་ནས། །རྒྱལ་བ་གཡུང་སྟོན་པ་ལ༴ རང་༴ བླ༴ སྐུ་གསུམ་དབྱེར་མེད་ལྷུན་གྲུབ་ཕོ་བྲང་ནས། །རང་བྱུང་སྤྲུལ་པའི་སྐུ་ལ༴ རང་༴ བླ༴ སྟོང་ཉིད་སྙིང་རྗེ་དབྱེར་མེད་ཕོ་བྲང་ནས། །མཚུངས་མེད་མཁའ་སྤྱོད་དབང་ལ༴ རང་༴ བླ༴ མཁྱེན་བརྩེ་ནུས་མཐུ་རྨད་བྱུང་ཕོ་བྲང་ནས། ཐུབ་ཆེན་ཆོས་ཀྱི་རྗེ་ལ༴ རང་༴ བླ༴ ཀུན་གཟིགས་དབང་འབྱོར་ལྷུན་གྲུབ་ཕོ་བྲང་ནས། །རིག་པའི་རལ་གྲིའི་ཞབས་ལ༴ རང་༴ བླ༴ ཟབ་ཡངས་རྣམ་ཐར་རྒྱ་མཚོའི་ཕོ་བྲང་ནས། །མཐོང་བ་དོན་ལྡན་ཞབས་ལ༴ རང་༴ བླ༴ ཆོས་རྣམས་མཁའ་ལྟར་དག་པའི་ཕོ་བྲང་ནས། །འཇམ་དཔལ་བཟང་པོའི་ཞབས་ལ༴ རང་༴ བླ༴ རྣམ་དག་ཕྲིན་ལས་རྒྱ་མཚོའི་ཕོ་བྲང་ནས། །དཔལ་འབྱོར་དོན་གྲུབ་ཞབས་ལ༴ རང་༴ བླ༴ ལྷུན་གྲུབ་རྒྱུན་མི་འཆད་པའི་ཕོ་བྲང་ནས། རང་བྱུང་མཚོ་སྐྱེས་ཞབས༴ རང་༴ བླ༴ ཆོས་དབྱིངས་རབ་འབྱམས་
ཡངས་པའི་ཕོ་བྲང་ནས། །བཀྲ་ཤིས་དཔལ་འབྱོར་ཞབས་ལ༴ རང་༴ བླ༴ ཟབ་ཞི་སྤྲོས་དང་བྲལ་བའི་ཕོ་བྲང་ནས། །མི་བསྐྱོད་རྡོ་རྗེའི་ཞབས་ལ༴ རང་༴ བླ༴ དབྱིངས་དང་ཡེ་ཤེས་དབྱེར་མེད་ཕོ་བྲང་ནས། །དཀོན་མཆོག་ཡན་ལག་ཞབས་ལ༴ རང་༴ བླ༴ ཀུན་ཁྱབ་ཐུགས་རྗེ་ཆེན་པོའི་ཕོ་བྲང་ནས། །དབང་ཕྱུག་རྡོ་རྗེའི་ཞབས་ལ༴ རང་༴ བླ༴ འགྲོ་བའི་རེ་འདོད་སྐོང་བའི་ཕོ་བྲང་ནས། །ཆོས་ཀྱི་དབང་ཕྱུག་ཞབས་ལ༴ རང་༴ བླ༴ ཕྲིན་ལས་ལྷུན་གྱིས་གྲུབ་པའི་ཕོ་བྲང་ནས། །ཆོས་དབྱིངས་རྡོ་རྗེའི་ཞབས་ལ༴ རང་༴ བླ༴ མཁའ་ཁྱབ་རྡོ་རྗེ་འཛིན་པའི་ཕོ་བྲང་ནས། །ཡེ་ཤེས་སྙིང་པོའི་ཞབས་ལ༴ རང་༴ བླ༴ ཟབ་གསལ་གཉིས་མེད་ཆོས་དབྱིངས་ཕོ་བྲང་ནས། །ཡེ་ཤེས་རྡོ་རྗེའི་ཞབས་ལ༴ རང་༴ བླ༴ དོན་གཉིས་ལྷུན་གྱིས་གྲུབ་པའི་ཕོ་བྲང་ནས། །ཆོས་ཀྱི་དོན་གྲུབ་ཞབས་ལ༴ རང་༴ བླ༴ མཐའ་ཡས་འགྲོ་རྣམས་སྒྲོལ་བའི་ཕོ་བྲང་ནས། །
བྱང་ཆུབ་རྡོ་རྗེའི་ཞབས་ལ༴ རང་༴ བླ༴ དྲི་མེད་ཟབ་གསལ་གར་གྱི་ཕོ་བྲང་ནས། །ཆོས་ཀྱི་འབྱུང་གནས་ཞབས་ལ༴ རང་༴ བླ༴ ཕྱོགས་ལས་རྣམ་རྒྱལ་ཆོས་ཀྱི་ཕོ་བྲང་ནས། །བདུད་འདུལ་རྡོ་རྗེའི་ཞབས་ལ༴ རང་༴ བླ༴ རིགས་དང་དཀྱིལ་འཁོར་རྒྱ་མཚོའི་ཕོ་བྲང་ནས། །ཆོས་གྲུབ་རྒྱ་མཚོའི་ཞབས་ལ༴ རང་༴ བླ༴ བདེ་སྟོང་ཆོས་དབྱིངས་འགྱུར་མེད་ཕོ་བྲང་ནས། །པདྨ་ཉིན་བྱེད་དབང་པོར་གསོལ་བ་འདེབས། རང་སེམས༴ བླ་མ༴ བྲལ་སྨིན་ཡོན་ཏན་ལྷུན་རྫོགས་ཕོ་བྲང་ནས། །ཐེག་མཆོག་རྡོ་རྗེའི་ཞབས༴ རང་༴ བླ་མ༴ རླུང་སེམས་དྷཱུ་ཏིར་དག་པའི་ཕོ་བྲང་ནས། །བློ་གྲོས་མཐའ་ཡས་ཞབས༴ རང་༴ བླ་མ༴ སྣང་སྲིད་རྣམ་དག་ལྷུན་གྲུབ་ཕོ་བྲང་ནས། །མཁའ་ཁྱབ་རྡོ་རྗེའི༴ རང་༴ བླ་མ༴ བདེ་ཆེན་འགྱུར་བ་མེད་པའི༴ པདྨ་དབང་མཆོག་ཞབས༴ རང་༴ བླ་མ༴ སྣང་སྟོང་སྤྲོས་པ་བྲལ་བའི་དབྱིངས་རོལ་ནས། །དཔལ་ལྡན་མཁྱེན་བརྩེའི་
ཞབས་ལ༴ རང་སེམས༴ བླ་མ༴ འགྱུར་མེད་ལྷན་སྐྱེས་རྒྱལ་བའི་ཕོ་བྲང་ནས། །རིག་པའི་རྡོ་རྗེའི་ཞབས་ལ༴ རང་སེམས༴ བླ་མ༴ སྤྱི་གཙུག་བདེ་བ་ཆེན་པོའི་ཕོ་བྲང་ནས། །རྩ་བའི་བླ་མའི་ཞབས༴ རང་༴ བླ༴ བདུད་བཞིའི་གཡུལ་ལས་རྒྱལ་བའི་ཕོ་བྲང་ནས། །རྡོ་རྗེ་རྣལ་འབྱོར་མ་ལ༴ རང་༴ ཡི་དམ་མཁྱེན་པས་གཟིགས་ལ་དངོས་གྲུབ་སྩོལ། །བགེགས་དང་ལོག་འདྲེན་འཇོམས་མཛད་ཕོ་བྲང་ནས། །ཆོས་སྐྱོང་མ་མགོན་གཉིས་ལ་གསོལ་བ་འདེབས། །རང་སེམས་ཆོས་སྐུར་རྟོགས་པར་བྱིན་གྱིས་རློབས། །ཆོས་སྐྱོང་མཁྱེན་པས་གཟིགས་ལ་བར་ཆད་སོལ། །ཁྱེད་ལ་གསོལ་བ་བཏབ་པའི་བྱིན་རླབས་ཀྱིས། །འགྲོ་རྣམས་མ་རིག་མུན་པ་རབ་བསལ་ནས། །ཐར་པ་ཆེན་པོའི་ལམ་མཆོག་རབ་བགྲོད་དེ། །རྣམ་མཁྱེན་སངས་རྒྱས་གོ་འཕང་ཐོབ་པར་ཤོག །ཅེས་བཟུང་འཇུག་བརྒྱུད་པའི་གསོལ་འདེབས་སུ་རྗེ་ཀརྨ་པ་རོལ་པའི་རྡོ་རྗེས་ཙཱ་རིར་མཛད་པའོ།། །།དེ་ནས་ཕྱག་ཆེན་བརྒྱུད་
པའི་བླ་མ་ལ་གསོལ་བ་འདེབས་པ་ནི། དངོས་ཀུན་ཁྱབ་བདག་དཔལ་ལྡན་རྡོ་རྗེ་འཆང་། །ས་བཅུའི་དབང་ཕྱུག་བློ་གྲོས་རིན་ཆེན་ཞབས། །འཕགས་ཡུལ་གྲུབ་པའི་གཙོ་བོ་ས་ར་ཧ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །ཆོས་ཉིད་དོན་གཟིགས་འཕགས་པ་ཀླུ་སྒྲུབ་དང་། །ཕྱག་རྒྱ་ཆེ་བརྙེས་དཔལ་ལྡན་ཤ་བ་རི། །སྙིང་པོའི་དོན་གཟིགས་ཇོ་བོ་མི་ཏྲཱི་པ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །རྒྱུད་སྡེ་རྒྱ་མཚོའི་མངའ་བདག་ལྷོ་བྲག་པ། །གངས་ཅན་གྲུབ་པའི་གཙོ་བོ་མི་ལ་རྗེ། །རྒྱལ་བས་ལུང་བསྟན་དཔལ་ལྡན་སྒམ་པོ་པ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །རྒྱལ་བའི་ཕྲིན་ལས་མངའ་བདག་དུས་གསུམ་མཁྱེན། །མཐུ་སྟོབས་དབང་ཕྱུག་འགྲོ་མགོན་རས་ཆེན་ཞབས། །བསྐྱེད་རྫོགས་མཐར་ཕྱིན་རྒྱལ་སྲས་སྤོམ་བྲག་པ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །གདུལ་དཀའ་འདུལ་མཛད་དཔལ་ལྡན་ཀརྨ་པ། །དངོས་
གྲུབ་གཉིས་བརྙེས་གྲུབ་ཆེན་ཨུ་རྒྱན་པ། །འཛམ་གླིང་བསྟན་པའི་མངའ་བདག་རང་བྱུང་བ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །སྔགས་རིགས་གྲུབ་བའི་རྒྱལ་བ་གཡུང་སྟོན་པ། །འཛམ་གླིང་རྒྱན་གྱུར་རོལ་པའི་རྡོ་རྗེའི་ཞབས། །གནས་ལུགས་དོན་རྟོགས་རྟོགས་ལྡན་མཁའ་སྤྱོད་དབང་། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །ས་སྐྱོང་གཙུག་རྒྱན་ཆོས་རྗེ་དེ་བཞིན་གཤེགས། །མཁས་པའི་དབང་པོ་རཏྣ་བྷ་དྲའི་ཞབས། །སྲིད་ཞིའི་དཔལ་གྱུར་མཐོང་བ་དོན་ལྡན་ལ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །རྡོ་རྗེ་འཆང་དངོས་འཇམ་དཔལ་བཟང་པོ་དང་། །ཐུགས་རྗེའི་བདག་ཉིད་དཔལ་འབྱོར་དོན་གྲུབ་ཞབས། །བྱིན་རླབས་འབྱུང་གནས་ཆོས་གྲགས་རྒྱ་མཚོ་ལ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །མཚུངས་མེད་བླ་མ་གྲུབ་ཆེན་ཆོས་ཀྱི་རྗེ། །བཀྲ་ཤིས་དཔལ་འབྱོར་ཞེས་བྱར་རབ་གྲགས་པ། །
བསམ་བཞིན་སྐུ་སྤྲུལ་ཆོས་གྲགས་དཔལ་བཟང་ལ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །འོད་དཔག་མེད་མགོན་ཞྭ་དམར་ཅོད་པན་འཛིན། །རིགས་དྲུག་ཁྱབ་བདག་རྒྱལ་མཆོག་ཀརྨ་པ། དཀྱིལ་འཁོར་ཀུན་བདག་དབང་ཕྱུག་རྡོ་རྗེའི་ཞབས། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །དཔག་མེད་འོད་མཚན་བྱིན་རླབས་འཆང་དེ་དང་། །ཨེ་ཡིག་ཕྱག་རྒྱ་ཆེན་པོ་སེང་གེའི་ཁྲིར། །ཝཾ་ཡིག་འགྱུར་མེད་ཆོས་དབྱིངས་རྡོ་རྗེ་ལ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། སྒྱུ་འཕྲུལ་དྲྭ་བའི་ཁ་སྦྱོར་རྡོ་རྗེ་སེམས། །འབྲས་རྒྱུད་ཁྱབ་བདག་གར་དབང་རྡོ་རྗེ་འཆང་། །མཆོག་གི་སྤྲུལ་སྐུ་ཡེ་ཤེས་སྙིང་པོའི་ཞབས། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །བདེ་སྟོང་དབྱེར་མེད་ལྷན་སྐྱེས་ཡེ་ཤེས་སྐུ། །གཞོམ་མེད་རྡོ་རྗེའི་གར་གྱིས་རྣམ་རོལ་བ། །རྒྱལ་ཀུན་ངོ་བོ་ཡེ་ཤེས་རྡོ་རྗེ་ལ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །
ཟབ་དང་རྒྱ་ཆེའི་ཆོས་ཚུལ་ཇི་སྙེད་པར། །རྣམ་དཔྱོད་བློ་གྲོས་རྒྱས་པའི་ནུས་སྤོབས་ཅན། །ཚུལ་བཞིན་རྟོགས་པའི་དོན་གཉིས་ལྷུན་གྲུབ་ལ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། ཁྱབ་བདག་གདོད་མའི་མགོན་པོ་ཆོས་ཀྱི་དབྱིངས། །མི་ཕྱེད་རྡོ་རྗེ་བཞི་ཡི་གར་རོལ་བ། །ཀུན་མཁྱེན་བླ་མ་བྱང་ཆུབ་རྡོ་རྗེ་ལ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། སྟོང་ཉིད་མཛེས་མས་མངོན་འཁྱུད་རྡོ་རྗེ་འཆང་། །འཕོ་འགྱུར་བདེ་བ་འཛག་མེད་ལམ་བཅིངས་པ། །རྣལ་འབྱོར་བསྟན་པའི་ཉིན་བྱེད་གང་དེ་ལ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །མི་ཤིག་སྙིང་པོའི་རང་བཞིན་མངོན་གཟིགས་ནས། །འགྱུར་མེད་ཡེ་ཤེས་མཆོག་ལ་དབང་བསྒྱུར་བ། །འཇིགས་མེད་བདུད་ཚོགས་འདུལ་བའི་རྡོ་རྗེ་ལ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །གདུལ་བྱའི་ཁམས་དབང་མོས་པ་དུ་མའི་ངོར། །དེ་སྙེད་ཐུགས་རྗེའི་རོལ་
པ་ཅིར་ཡང་སྟོན། །དཔལ་ལྡན་མི་ཕམ་ཆོས་གྲུབ་རྒྱ་མཚོ་ལ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །འཁོར་འདས་མཉམ་ཉིད་བདེ་ཆེན་འདུས་མ་བྱས། །དོན་དམ་ཆོས་སྐུའི་རང་ཞལ་ལེགས་སྟོན་པའི། །རིགས་ཀུན་ཁྱབ་བདག་པདྨ་ཉིན་བྱེད་ལ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །ཡོངས་གྲུབ་ཡེ་ཤེས་དགོངས་པ་མཁའ་ལྟར་དག །ཚད་མེད་ཐུགས་རྗེའི་སྣང་བ་ཀུན་ལ་ཁྱབ། །འགྲོ་བའི་ཉི་མ་ཐེག་མཆོག་རྡོ་རྗེ་ལ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །ཁྱབ་བདག་སྟོན་པ་སྐུ་ལྔའི་རྡོ་རྗེ་འཆང་། །བདེ་སྟོང་དབྱེར་མེད་ཕྱག་རྒྱ་ཆེན་པོའི་དོན། །མངོན་གྱུར་སངས་རྒྱས་ཡོན་ཏན་རྒྱ་མཚོ་ལ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །ཁྱབ་བདག་གདོད་མའི་ཀློང་གྲོལ་རྡོ་རྗེ་འཆང་། །དུས་གསུམ་རྒྱལ་བའི་སྤྱི་གཟུགས་ཀརྨ་ཀ །ཐུགས་རྗེ་ཚད་མེད་མཁའ་ཁྱབ་རྡོ་རྗེ་ལ། །གསོལ་བ་འདེབས་སོ་ལྷན་སྐྱེས་ཡེ་ཤེས་
སྩོལ། །བྱམས་མགོན་ཐུགས་ཀློང་རོལ་པ་ཁྱབ་བརྡལ་དབྱིངས། །པདྨའི་རྒྱལ་ཚབ་རྒྱལ་བསྟན་འགྲོ་བའི་མགོན། །ཟབ་གསལ་མཚུངས་མེད་པདྨ་དབང་མཆོག་ལ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །རིག་སྟོང་ཟག་མེད་ཆོས་དབྱིངས་རབ་འབྱམས་དང་། །བཻ་རོའི་རྣམ་འཕྲུལ་སྒྲུབ་བརྒྱུད་བསྟན་པའི་མགོན། །མཚུངས་མེད་འཇམ་མགོན་མཁྱེན་བརྩེའི་འོད་ཟེར་མཆོག །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །དུས་གསུམ་རྒྱལ་ཀུན་འདུས་ཞལ་ཆོས་ཀྱི་རྗེ། །རབ་འབྱམས་དཀྱིལ་འཁོར་གཙོ་བོ་རྡོ་རྗེ་འཆང་། །རང་བྱུང་ཁྱབ་བདག་རིག་པའི་རྡོ་རྗེ་ལ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །གཞི་ལམ་འབྲས་བུའི་གནས་ལུགས་ཕྱག་རྒྱ་ཆེ། །གཉུག་མའི་རང་ངོ་སྤྲོད་མཛད་བཀའ་དྲིན་ཅན། །སངས་རྒྱས་ཀུན་དངོས་རྩ་བའི་བླ་མ་ལ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །དངོས་གྲུབ་གཉིས་སྩོལ་
ཡི་དམ་ལྷ་ཚོགས་དང་། །ཕྲིན་ལས་ཀུན་བདག་ཆོས་སྲུང་མའི་ཚོགས། །བཀའ་སྡོད་དམ་ཅན་རྒྱ་མཚོའི་ཚོགས་བཅས་ལ། །གསོལ་བ་འདེབས་སོ་ལྷན་སྐྱེས་ཡེ་ཤེས་སྩོལ། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །འཁོར་འདས་དངོས་ཀུན་བསལ་གཞག་སྤང་བླང་དང་། །ཡོད་མེད་ལ་སོགས་ཀུན་བྲལ་ཀུན་གྱི་གཞི། །གནས་ལུགས་གཞི་ཡི་ཕྱག་རྒྱ་ཆེ་རྟོགས་ཤོག །རྟོགས་བྱ་རྟོགས་བྱེད་རྟོགས་པ་མི་དམིགས་ཤིང་། །བསྒྲིབ་བྱ་སྒྲིབ་བྱེད་སྒྲིབ་པ་སྤངས་མེད་པར། །བགྲོད་བྱ་བགྲོད་བྱེད་ལམ་ལས་རབ་འདས་པའི། །ལམ་གྱི་ཕྱག་རྒྱ་ཆེན་པོ་མངོན་འགྱུར་ཤོག །ཐོབ་བྱ་ཐོབ་བྱེད་ཐོབ་པ་མ་དམིགས་ཤིང་། །སྤངས་ཐོབ་གཉིས་མེད་གཞི་འབྲས་དབྱེར་མེད་པ། །དངོས་བྲལ་དངོས་པོ་ཀུན་གྱི་རང་བཞིན་ཅན། །འབྲས་བུའི་ཕྱག་རྒྱ་ཆེན་པོ་མངོན་གྱུར་ཤོག །ཅེས་ཕྱག་ཆེན་ལྷན་ཅིག་སྐྱེས་སྦྱོར་གྱི་བརྒྱུད་པའི་གསོལ་འདེབས་ཀརྨ་པ་ཆོས་གྲགས་རྒྱ་མཚོས་མཛད་པའོ།། །།ཟབ་ལམ་ནཱ་རོའི་ཆོས་དྲུག་གི་
བླ་མ་བརྒྱུད་པ་ལ་གསོལ་བ་འདེབས་པ་ནི། རྡོ་རྗེ་འཆང་ཆེན་ཡེ་ཤེས་མཁའ་འགྲོ་མ། །གསང་བའི་བདག་པོ་དཔལ་ལྡན་ས་ར་ཧ། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །གསོལ་འདེབས་བྱིན་རླབས་ཆར་རྒྱུན་དབབ་ཏུ་གསོལ། །བདག་ཉིད་ཆེན་པོ་ཀླུ་སྒྲུབ་འཕགས་པ་ལྷ། །དཔལ་ལྡན་ཟླ་བ་གྲགས་པ་མ་ཏངྒི། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །གསོལ་འདེབས་བྱིན་རླབས་ཆར་རྒྱུན་དབབ་ཏུ་གསོལ། །དཔལ་མཆོག་ལཱུ་ཡི་པ་དང་ཌེཾ་གི་པ། །དཱ་རི་ཀ་པ་སུ་ཁ་དྷཱ་རཱིའི་ཞབས། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །གསོལ་འདེབས་བྱིན་རླབས་ཆར་རྒྱུན་དབབ་ཏུ་གསོལ། །དཔའ་བོ་ཌོམྦི་པ་དང་བི་ན་ས། །ལ་བ་པ་དང་ཨིནྡྲ་བྷཱུ་ཏིའི་ཞབས། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །གསོལ་འདེབས་བྱིན་རླབས་ཆར་རྒྱུན་དབབ་ཏུ་གསོལ། །མཁའ་འགྲོ་སྐལ་པ་བཟང་མོ་ཐང་
ལོ་པ། །ཤིང་ལོ་པ་དང་ཀརྞ་རི་པའི་ཞབས། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །གསོལ་འདེབས་བྱིན་རླབས་ཆར་རྒྱུན་དབབ་ཏུ་གསོལ། །པྲ་ཛྙཱ་བྷ་དྲ་བདེ་ཆེན་རོལ་པའི་ཞབས། །ཐར་པའི་ལམ་སྟོན་ཇོ་བོ་མཻ་ཏྲཱི་པ། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །གསོལ་འདེབས་བྱིན་རླབས་ཆར་རྒྱུན་དབབ་ཏུ་གསོལ། །ཛྙཱ་ན་གརྦྷ་བལ་པོ་བྱིན་རླབས་ཅན། །པནྡ་པ་སོགས་མན་ངག་རིག་པ་རྣམས། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །གསོལ་འདེབས་བྱིན་རླབས་ཆར་རྒྱུན་དབབ་ཏུ་གསོལ། །དྷརྨ་མ་ཏི་དྲི་མེད་བཤེས་གཉེན་མཚན། །བཞད་པ་རྡོ་རྗེ་དཔལ་ལྡན་སྒམ་པོ་པ། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །གསོལ་འདེབས་བྱིན་རླབས་ཆར་རྒྱུན་དབབ་ཏུ་གསོལ། །བཛྲ་ཀཱིརྟི ་དཔལ་ལྡན་དུས་གསུམ་མཁྱེན། །འགྲོ་མགོན་རས་ཆེན་རྒྱལ་སྲས་སྤོམ་བྲག་པ། །གསོལ་བ་
འདེབས་སོ་ཐུགས་རྗེའི་སྤྱན་གྱིས་གཟིགས། །གསོལ་འདེབས་བྱིན་རླབས་ཆར་རྒྱུན་དབབ་ཏུ་གསོལ། །དཔལ་ལྡན་ཀརྨ་པ་དང་གཉན་རས་ཞབས། །མཚུངས་མེད་རང་བྱུང་བ་དང་བཛྲ་ཤྲཱི། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །གསོལ་འདེབས་བྱིན་རླབས་ཆར་རྒྱུན་དབབ་ཏུ་གསོལ། །བླ་མེད་ཆོས་རྗེ་རྒྱལ་བ་ཀུན་གྱི་དངོས། །ཉམས་རྟོགས་དབང་ཕྱུག་དྲི་མེད་དཔལ་ཡེ་ཤེས། །གསོལ་བ༴ གསོལ༴ འགྲེའོ། །མཁྱེན་རབ་ཐུགས་རྗེའི་དབང་ཕྱུག་དེ་བཞིན་གཤེགས། །རྒྱལ་བ་ཀུན་དངོས་བླ་མ་རིན་པོ་ཆེ། །གསོལ་བ༴ གསོལ༴ སངས་རྒྱས་ཐམས་ཅད་འདུས་པའི་རིན་པོ་ཆེ། །ཐུགས་རྗེའི་བདག་ཉིད་མཐོང་བ་དོན་ལྡན་ལ། །གསོལ་བ༴ གསོལ༴ བླ་མེད་མཁྱེན་པའི་མངའ་བདག་འཇམ་དཔལ་བཟང་། །དཔལ་འབྱོར་དོན་གྲུབ་ཆོས་གྲགས་རྒྱ་མཚོ་ལ། །གསོལ་བ༴ གསོལ༴ མཆོག་གི་དངོས་གྲུབ་བརྙེས་པ་གྲུབ་པའི་
དཔལ། །ཡེ་ཤེས་མཁའ་ལ་སྤྱོད་པ་མི་བསྐྱོད་བཟང་། །གསོལ་བ༴ གསོལ༴ གར་གི་དབང་ཕྱུག་མཆོག་གི་སྤྲུལ་པའི་སྐུ། །ས་གསུམ་ཀུན་ལ་དབང་སྒྱུར་ཆོས་ཀྱི་རྗེ། །གསོལ་བ༴ གསོལ༴ བདེ་ཆེན་ལ་རོལ་དགའ་བའི་རྡོ་རྗེ་དང་། །རྡོ་རྗེ་འཆང་དངོས་ཆོས་དབྱིངས་རྡོ་རྗེ་ལ། །གསོལ་བ༴ གསོལ༴ མི་ཕྱེད་དོན་གྱི་ཡེ་ཤེས་རྡོ་རྗེ་མངའ། །མཉམ་ཉིད་དཔལ་ལྡན་ཡེ་ཤེས་སྙིང་པོའི་ཞབས། །གསོལ་བ༴ གསོལ༴ རྒྱལ་བ་ཀུན་གྱི་ཐུགས་རྗེའི་རང་གཟུགས་མཆོག །འགྲོ་བའི་འདྲེན་པ་ཡེ་ཤེས་རྡོ་རྗེ་ལ། །གསོལ་བ༴ གསོལ༴ བདེ་སྟོང་ལྷན་སྐྱེས་ཡེ་ཤེས་གཞོམ་མེད་སྐུ། །རྣམ་རོལ་ཀུན་མཁྱེན་ཆོས་ཀྱི་དོན་གྲུབ་ལ། །གསོལ་བ༴ གསོལ༴ རྣམ་ཀུན་མཆོག་ལྡན་ཕྱག་རྒྱ་ཆེན་མོ་ཡིས། །དགྱེས་དགུར་རོལ་པའི་བྱང་ཆུབ་རྡོ་རྗེ་ལ། །གསོལ་བ༴ གསོལ༴ བཀའ་བརྒྱུད་རྣམ་ཐར་དྲི་མེད་ལམ་པོ་ཆེའི། །སྲོལ་འཛིན་ཆོས་ཀྱི་འབྱུང་གནས་ཞབས་དེ་ལ། །གསོལ་བ༴
གསོལ༴ འགྱུར་མེད་བདེ་བ་ཆེན་པོའི་ཆོས་ཀུན་ལ། །ཕྱག་རྒྱས་འདེབས་པ་བདུད་འདུལ་རྡོ་རྗེ་ལ། །གསོལ་བ༴ གསོལ༴ དུས་གསུམ་རྒྱལ་ཀུན་ཕྲིན་ལས་དབང་བསྒྱུར་བ། །མི་ཕམ་ཆོས་གྲུབ་རྒྱ་མཚོའི་ཞབས་དེ་ལ། །གསོལ་བ༴ གསོལ༴ རྒྱལ་ཀུན་གསང་གསུམ་བྱིན་རླབས་གཅིག་འདུས་པ། །མཚུངས་བྲལ་པདྨ་ཉིན་བྱེད་ཞབས་དེ་ལ། །གསོལ་བ༴ གསོལ༴ གསང་བའི་དགྱེས་པ་ཐམས་ཅད་བདག་ཉིད་དུ། །རྟག་བཞུགས་སངས་རྒྱས་ཐེག་མཆོག་རྡོ་རྗེ་ལ། །གསོལ་བ༴ གསོལ༴ དཀྱིལ་འཁོར་ཀུན་གཙོ་མཚུངས་མེད་རྡོ་རྗེ་འཆང་། །བདེ་སྟོང་འགྱུར་མེད་པདྨ་གར་དབང་ལ། །གསོལ་བ༴ གསོལ༴ ཟབ་གསལ་སྤྲོས་བྲལ་ཡེ་ཤེས་ཆེན་པོའི་དང་། །རྟག་བཞུགས་སངས་རྒྱས་མཁའ་ཁྱབ་རྡོ་རྗེ་ལ། །གསོལ་བ༴ གསོལ༴ སྐུ་བཞིའི་ངོ་བོ་མི་འགྱུར་དག་པའི་དཔལ། །གཟུགས་སྐུ་ཆགས་བྲལ་པདྨ་དབང་མཆོག་ལ། །གསོལ་བ༴
གསོལ༴ ཁྱབ་བདག་སྟོན་པ་སྐུ་བཞིའི་རྡོ་རྗེའི་འཆང་། །རྒྱལ་ཀུན་སྤྱི་གཟུགས་རིག་པའི་རྡོ་རྗེ་ལ། །གསོལ་བ་འདེབས་སོ༴ གསོལ་འདེབས་བྱིན་རླབས༴ མི་འགྱུར་རྟག་པ་དམ་པ་བདེ་བའི་གཤིས། །འགགས་མེད་གར་རོལ་དཀྱིལ་འཁོར་རྒྱ་མཚོའི་བདག །གསོལ་བ༴ གསོལ༴ དཔལ་ལྡན་འདུས་པ་སྡོམ་པ་ཡི་དམ་ལྷ། །རྒྱལ་བ་རྒྱལ་སྲས་དཔའ་བོ་ཌཱ་ཀིའི་ཚོགས། །གསོལ་བ༴ གསོལ༴ མ་ཧཱ་ཀཱ་ལ་གཉན་གྱི་རེ་མ་ཏི། །བཀའ་སྡོད་དམ་ཅན་སྲུང་མ་རྒྱ་མཚོའི་ཚོགས། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །གསོལ་འདེབས་བྱིན་རླབས་ཆར་རྒྱུན་དབབ་ཏུ་གསོལ། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །གློ་བུར་རྐྱེན་སྣང་ཅི་བྱུང་ཅི་ཤར་ཡང་། །ཡིན་ལུགས་ཇི་བཞིན་རྟོགས་པའི་རྐྱེན་གྱུར་ཏེ། །གནས་ལུགས་ནང་ནས་འཆར་བར་བྱིན་གྱིས་རློབས། །སྣང་བ་བདེན་འཛིན་མེད་པར་བྱིན་གྱིས་རློབས། །ཡུལ་ལ་ཆེད་འཛིན་
མེད་པར་བྱིན་གྱིས་རློབས། །དགྲ་ལ་སྡང་བ་མེད་པར་བྱིན་གྱིས་རློབས། །གཉེན་ལ་ཞེན་པ་མེད་པར་བྱིན་གྱིས་རློབས། །འགྲེའོ། །ནོར་ལ་བསག་བློ་མེད་པར༴ ཚེ་ལ་རྟག་འཛིན་མེད་པར༴ འཁོར་ལ་བདེན་འཛིན་མེད་པར༴ དོན་ལ་ཡེངས་པ་མེད་པར༴ ཉམས་ལ་མཐོ་དམན་མེད་པར༴ སེམས་ལ་གསལ་འགྲིབ་མེད་པར༴ རང་ལ་ངར་འཛིན་མེད་པར༴ གང་ལའང་འཆིང་བ་མེད་པར༴ ཅིར་སྣང་ཆོས་སྐུར་མཐོང་བར༴ རང་སེམས་ངོ་བོ་རྟོགས་པར༴ སྒོམ་མེད་ཡེངས་སུ་མེད་པར༴ གཅེར་མཐོང་རང་ངོ་ཤེས་པར༴ གཏུམ་མོ་སྒྱུ་ལུས་འབྱོངས་པར༴ རྨི་ལམ་འོད་གསལ་ཟིན་པར༴ བར་དོ་འཕོ་བ་འབྱོངས་པར༴ ཚེ་གཅིག་འཇའ་ལུས་འགྲུབ་པར༴ རྟག་ཏུ་བླ་མས་སྐྱོབ་པར༴ གེགས་སྐྱོན་ལམ་དུ་འགྱུར་བར༴ ཉོན་མོངས་རང་སར་གྲོལ་བར༴ བདེ་སྟོང་དབྱེར་མེད་རྟོགས་པར༴ བློ་ཆོས་སུ་འགྲོ་བར༴ ཆོས་ལམ་དུ་ལོངས་པར༴ ལམ་འཁྲུལ་པ་སེལ་
བར༴ འཁྲུལ་པ་ཡེ་ཤེས་སུ་འཆར་བར་བྱིན་གྱིས་རློབས། བཀའ་བབས་ཆུ་བོ་བཞིའི་བླ་མ་བརྒྱུད་པའི་གསོལ་འདེབས་ཀརྨ་པ་དེ་བཞིན་གཤེགས་པས་མཛད་པའོ།། །།ཆོས་དྲུག་གི་ཉེ་བརྒྱུད་ཟུང་འཇུག་བརྒྱུད་པའི་གསོལ་འདེབས་སྨོན་ལམ་དང་བཅས་པ་ནི། བདེ་སྟོང་དབྱེར་མེད་སྲིད་དང་ཞི་བའི་དཔལ། །ཐབས་ཤེས་རང་བཞིན་རྡོ་རྗེ་དྲིལ་བུ་འཆང་། །སྒྱུ་མའི་གར་གྱིས་རྣམ་རོལ་བཅོམ་ལྡན་འདས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཤེས་རབ་ཆེན་པོས་གཉུག་མའི་གནས་ལུགས་རྟོགས། །ཕྲིན་ལས་བཟང་པོས་གདུལ་བྱ་ཐར་ལམ་འདྲེན། །འཁོར་ལོ་སྡོམ་པའི་རྣལ་འབྱོར་ཏཻ་ལོ་པ། གསོལ་བ་འདེབས་སོ་བདག་རྒྱུད་བྱིན་གྱིས་རློབས། །གཉིས་སུ་མེད་པའི་ཡེ་ཤེས་མཆོག་དང་ལྡན། །བཅུ་གཉིས་བཀའ་སྤྱད་དངོས་གྲུབ་རྣམ་གཉིས་བརྙེས། །གནས་ལྔ་རིག་པའི་པཎ་ཆེན་ནཱ་རོ་པ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཆོས་ཀྱི་སྙིང་པོ་རྡོ་རྗེ་ཐེག་པའི་བཅུད། །གང་གི་བློ་གྲོས་
མཆོག་གིས་ཡོངས་སུ་འཛིན། །བསྟན་པའི་མངའ་བདག་ལྷོ་བྲག་མར་པའི་ཞབས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །བདེ་སྟོང་ཏིང་འཛིན་གར་གྱིས་རྣམ་བཞད་པའི། །ཟབ་ལམ་རྡོ་རྗེ་ཐེག་པའི་མངའ་བདག་མཆོག །སྒྲུབ་བརྒྱུད་བསྟན་པའི་སྲོག་ཤིང་མི་ལ་རྗེ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །བསོད་ནམས་ཡེ་ཤེས་གྲངས་མེད་དུ་མར་བསགས། །གངས་ཅན་སྒྲུབ་བརྒྱུད་གཙུག་གི་རིན་པོ་ཆེ། །ཟླ་འོད་གཞོན་ནུ་དྭགས་པོ་ལྷ་རྗེ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཐུབ་དབང་བསྟན་པའི་གསལ་བྱེད་ཆོས་ཀྱི་མཛོད། །སྙན་གྲགས་ཐུགས་རྗེའི་འོད་ཀྱིས་འཛམ་གླིང་ཁྱབ། །ས་ར་ཧ་ཡི་རྣམ་འཕྲུལ་ཀརྨ་པ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །གསོལ་བ་བཏབ་ན་དངོས་གྲུབ་རྣམ་གཉིས་སྩོལ། །སྒྲུབ་བརྒྱུད་བསྟན་པའི་རྒྱལ་མཚན་ཡོངས་ཀྱི་ཏོག །ཡིད་བཞིན་
ནོར་བུ་དྭགས་པོ་བཀའ་བརྒྱུད་ལ། །གསོལ༴ བྱམས་དང་སྙིང་རྗེའི་རྩ་བ་རབ་ཏུ་བརྟན། །བདེ་སྟོང་ཡལ་གའི་ཁྱོན་ནི་ཤིན་ཏུ་ཡངས། །དཔག་བསམ་ལྗོན་ཤིང་དྭགས་པོ་བཀའ་བརྒྱུད་ལ། །གསོལ༴ མཁྱེན་པའི་མཁའ་ལ་ཐུགས་རྗེའི་ཉི་འོད་ཤར། །སངས་རྒྱས་བསྟན་པའི་པད་ཚལ་མཐའ་དག་འབྱེད། །མ་རིག་མུན་སེལ་དྭགས་པོ་བཀའ་བརྒྱུད་ལ། །གསོལ༴ སྐྱེ་མེད་སྤྲུལ་སྐུ་འགག་མེད་ལོངས་སྤྱོད་རྫོགས། །གནས་མེད་ཆོས་སྐུ་དབྱེར་མེད་ངོ་བོ་ཉིད། །སྐུ་བཞིའི་དབང་ཕྱུག་དྭགས་པོ་བཀའ་བརྒྱུད་ལ། །གསོལ༴ གང་ལ་བརྟེན་ན་ཉེས་པའི་ཚོགས་ཀྱིས་དབེན། །ཡོན་ཏན་ཡར་ངོའི་ཟླ་ལྟར་འཕེལ་བ་ཡི། །དགོས་འདོད་ཀུན་འབྱུང་དྭགས་པོ་བཀའ་བརྒྱུད་ལ། །གསོལ༴ གནས་ལུགས་གཉུག་མའི་དོན་གྱི་ལྡེ་མིག་དང་། །ཞི་ལྷག་སྒྲོན་མེས་རྒྱལ་བའི་དགོངས་པ་མཆོག །ཐར་པའི་ལམ་སྟོན་དྭགས་པོ་བཀའ་བརྒྱུད་ལ། །གསོལ༴ ཐབས་ཤེས་སྐྱ་བས་
བརྩོན་པའི་ཤུགས་བསྐྱེད་ནས། །ཕྲིན་ལས་གྲུ་ཡིས་འགྲོ་ཀུན་སྒྲོལ་བ་ཡི། །འགྲོ་བའི་དེད་དཔོན་དྭགས་པོ་བཀའ་བརྒྱུད་ལ། །གསོལ༴ སྤྲུལ་པའི་གནས་སུ་འབར་བའི་ཙཎྜ་ལིས། །བདེ་ཆེན་ཟླ་བའི་དཀྱིལ་འཁོར་ཡོངས་སུ་བཞུས། །ཕུང་ཁམས་རབ་བསྲེགས་ཆོས་ཀྱི་འཁོར་ལོར་ནི། །ལྷན་སྐྱེས་བདེ་བ་མྱོང་བར་བྱིན་གྱིས་རློབས། །བཅུ་གཉིས་དཔེ་ཡིས་ཁྱད་པར་བྱས་པ་ཡི། །ཕྱི་ནང་ཆོས་ཀུན་བདེན་པས་རྣམ་པར་དབེན། །རང་ལུས་རྡོར་སེམས་མེ་ལོང་གཟུགས་བརྙེན་བཞིན། །གདོད་ནས་ལྷ་སྐུར་འཆར་བར་བྱིན་གྱིས་རློབས། །ཉིན་སྣང་སྒྱུ་མའི་འདུན་པ་རབ་བརྟན་ནས། །མགྲིན་པར་རླུང་སེམས་བརྟན་པ་ཐོབ་པའི་མཐུས། །རྨི་ལམ་ན་ཡང་ཆོས་ཀུན་རྨི་ལམ་ལྟར། །མཐོང་ནས་ངེས་པ་རྙེད་པར་བྱིན་གྱིས་རློབས། །ཀུན་རྟོག་རླུང་སེམས་དྷཱུ་ཏཱིར་དྭངས་པའི་མཐུས། །ཆོས་ཀུན་ནམ་མཁའི་དཀྱིལ་ལྟར་ཡོངས་སུ་དག །གཏི་མུག་མ་
སྤངས་ཆོས་དབྱིངས་ངོ་བོར་གྲོལ། །འོད་གསལ་ཕྱག་ཆེན་རྟོགས་པར་བྱིན་གྱིས་རློབས། །གང་དུ་འཕོ་བའི་ཡུལ་སོགས་མ་དམིགས་ཀྱང་། །སྲོག་རྩོལ་རླུང་གི་རྒྱུ་བ་བརྟན་ཐོབ་ནས། །ནམ་ཞིག་འཁྲུལ་པའི་སྣང་བ་འཆར་བའི་ཚེ། །ཚངས་ནས་མདའ་ལྟར་འཕོ་བར་བྱིན་གྱིས་རློབས། །འཆི་བའི་རང་བཞིན་དོན་དམ་བདེན་པར་རྟོགས། །ཆོས་སྐུའི་ངང་དུ་འོད་གསལ་མ་བུ་ཕྲད། །དེ་ཡི་ངང་ནས་བར་དོ་སྒྱུ་མའི་གཟུགས། །མཚན་དཔེའི་རྒྱན་ལྡན་ཐོབ་པར་བྱིན་གྱིས་རློབས། །མདོར་ན་བདག་སོགས་སྐྱེ་བ་ཐམས་ཅད་དུ། །དལ་འབྱོར་མཆོག་ཐོབ་ཐེག་ཆེན་ལམ་ལ་ཞུགས། །རྡོ་རྗེ་ཐེག་པ་སྟོན་པའི་བླ་མ་དང་། །ནམ་ཡང་འབྲལ་བ་མེད་པར༴ ཐོག་མར་སྨིན་བྱེད་དབང་གིས་རྒྱུད་སྦྱངས་ནས། །གྲོལ་བྱེད་རིམ་གཉིས་ཟབ་མོའི་ལམ་མཆོག་གིས། །སྐུ་བཞིའི་དབང་ཕྱུག་ཁྱབ་བདག་རྡོ་རྗེ་འཆང་། །གོ་འཕང་བདེ་བླག་བརྙེས་པར༴ གནས་སྐབས་སུ་ཡང་འགལ་
རྐྱེན་མཐའ་དག་ཞི། །མཐུན་རྐྱེན་ཚེ་དང་དཔལ་འབྱོར་རྒྱས་པ་དང་། །ཆོས་བཞིན་སྤྱོད་པའི་གྲོགས་དང་ལྷན་ཅིག་ཏུ། །བསམ་པའི་དོན་ཀུན་འགྲུབ་པར༴ འཁྲུལ་པའི་དེ་ཉིད་ཤེས་པའི་རྣམ་དཔྱོད་ཀྱིས། །ཐ་ལམ་ཤེས་པ་རང་ངོ་མཐོང་བའི་ཚེ། །གསལ་སྟོང་འཛིན་མེད་སེམས་སུ་ཐག་ཆོད་ནས། །ཅིར་སྣང་ཆོས་སྐུར་འཆར་བར་བྱིན་གྱིས་རློབས། །ཞེས་པའི་འདི་ནི་རང་བྱུང་མཚོ་སྐྱེས་རྡོ་རྗེའི་རིགས་བདག་ཆེན་པོ་འཇམ་དཔལ་བཟང་པོས་མཛད་པའོ། །སྐྱེ་བ་ཀུན་དུ་སོགས་བྱའོ།། །།དེ་ནས་དྭགས་པོའི་བཀའ་བརྒྱུད་སྤྱི་ལ་གསོལ་བ་འདེབས་པ་ནི། རྡོ་རྗེ་འཆང་ཆེན་ཏཻ་ལོ་ནཱ་རོ་དང་། །མར་པ་མི་ལ་ཆོས་རྗེ་སྒམ་པོ་པ། །དུས་གསུམ་ཤེས་བྱ་ཀུན་མཁྱེན་ཀརྨ་པ། །ཆེ་བཞི་ཆུང་བརྒྱད་བརྒྱུད་པ་འཛིན་རྣམས་དང་། །འབྲི་སྟག་ཚལ་གསུམ་དཔལ་ལྡན་འབྲུག་པ་སོགས། །ཟབ་ལམ་ཕྱག་རྒྱ་ཆེ་ལ་མངའ་བརྙེས་པའི། །མཉམ་མེད་འགྲོ་མགོན་དྭགས་པོ་བཀའ་བརྒྱུད་ལ། །གསོལ་བ་འདེབས་སོ་བཀའ་
བརྒྱུད་བླ་མ་རྣམས། །བརྒྱུད་པ་འཛིན་ནོ་རྣམ་ཐར་བྱིན་གྱིས་རློབས། །ཞེན་ལོག་སྒོམ་གྱི་རྐང་པར་གསུངས་པ་བཞིན། །ཟས་ནོར་ཀུན་ལ་ཆགས་ཞེན་མེད་པ་དང་། །ཚེ་འདིའི་གདོས་ཐག་ཆོད་པའི་སྒོམ་ཆེན་ལ། །རྙེད་བཀུར་ཞེན་པ་མེད་པར་བྱིན་གྱིས་རློབས། །མོས་གུས་སྒོམ་གྱི་འགོ་བོར་གསུངས་པ་བཞིན། །མན་ངག་གཏེར་སྒོ་འབྱེད་པའི་བླ་མ་ལ། །རྒྱུན་ཏུ་གསོལ་བ་འདེབས་པའི་སྒོམ་ཆེན་ལ། །བཅོས་མིན་མོས་གུས་སྐྱེ་བར་བྱིན་གྱིས་རློབས། །ཡེངས་མེད་སྒོམ་གྱི་དངོས་གཞིར་གསུངས་པ་བཞིན། །གང་ཤར་རྟོགས་པའི་ངོ་བོ་སོ་མ་དེ། །མ་བཅོས་དེ་ཀར་འཇོག་པའི་སྒོམ་ཆེན་ལ། །བསྒོམ་བྱ་བློ་དང་བྲལ་བར་བྱིན་གྱིས་རློབས། །རྣམ་རྟོག་ངོ་བོ་ཆོས་སྐུར་གསུངས་པ་བཞིན། །ཅི་ཡང་མ་ཡིན་ཅིར་ཡང་འཆར་བ་ལ། །མ་འགགས་རོལ་པར་འཆར་བའི་སྒོམ་ཆེན་ལ། །འཁོར་འདས་དབྱེར་མེད་རྟོགས་པར་བྱིན་གྱིས་རློབས། །སྐྱེ་བ་ཀུན་ཏུ་སོགས། ཞེས་
པའང་བན་སྒར་བ་འཇམ་དཔལ་བཟང་པོས་མཛད་པའོ།། །།བྱེ་བྲག་ཏུ་དཔལ་ལྡན་འབྲུག་པ་སྐུ་ཕྲེང་བརྒྱད་པ་མི་ཕམ་ཆོས་ཀྱི་སྣང་བ་པད་དཀར་བཞད་པའི་དགེ་མཚན་འགྱུར་མེད་རྡོ་རྗེ་སྙིང་པོ་མཆོག་ཏུ་གྲུབ་པའི་སྡེ་གང་གི་གསོལ་འདེབས་གསུང་བྱིན་བརླབ་ཆེད་དུ་བཀོད་པ་ནི། རྣམ་ཀུན་སྟོང་ཉིད་བདུད་རྩིའི་འོད་རླབས་དང་། །བདེ་བ་ཆེན་པོ་ཟླ་སྣང་རྒྱས་པའི་ཆ། །ནམ་ཡང་མི་འགྱུར་ཟུང་འཇུག་ཁ་སྦྱོར་སྐུ། །རྡོ་རྗེ་སེམས་དངོས་བླ་མར་གསོལ་བ་འདེབས། །རབ་དཀར་རྟོགས་པ་དོན་གྱི་བརྒྱུད་པའི་དུང་། །མ་སྨད་གཡས་སུ་འཁྱིལ་བའི་སྒྲ་དབྱངས་ཀྱིས། །བཤད་སྒྲུབ་བསྟན་པའི་སྙན་པ་ཆེར་སྒྲོག་པ། །རྒྱལ་བའི་དགེ་མཚན་བཟང་པོར་གསོལ་བ་འདེབས། །སྐལ་ལྡན་བློ་ཡི་ཞིང་སར་སྨིན་གྲོལ་གྱི། །ངེས་གསང་བདུད་རྩིའི་ཆར་རྒྱུན་འབེབས་མཁས་པའི། །ཐུགས་རྗེའི་སྤྲིན་དཔུང་དཔལ་ལྡན་འབྲུག་གི་དབྱངས། །འཇིག་རྟེན་གསུམ་དུ་གསལ་དེར་གསོལ་བ་འདེབས། །བདག་ཀྱང་སྐྱེ་ཀུན་ཁྱེད་ཞབས་ཡིད་བཞིན་ནོར། །རབ་
གུས་བདེ་ཆེན་འཁོར་ལོར་བཅིང་པ་དང་། །ཟབ་རྒྱས་ཆོས་ལ་སྤྱོད་པའི་ལེགས་བྱས་ཀྱིས། །རིང་མིན་ཧེ་རུ་ཀ་དཔལ་འགྲུབ་པར་ཤོག །ཅེས་སོ།། །།དེ་ནས་འཕགས་ཡུལ་གྱི་རྒྱན་དྲུག་མཆོག་གཉིས་དང་གངས་ཅན་བསྟན་པའི་རྒྱན་བཞི་ལ་བསྟོད་པ་ནི། ཚོགས་གཉིས་ཆུ་གཏེར་གཏིང་མཐའ་ཡས། །རྣམ་དག་ཡོན་ཏན་ནོར་བུས་གང་། །རྨད་བྱུང་ཕྲིན་ལས་ཕྱོགས་བཅུར་འཕྲོ། །ཀུན་མཁྱེན་ཐུབ་པའི་ཞབས་ལ་འདུད། །མཐའ་བྲལ་ཟབ་མོའི་མཚོ་ལ་གནས། །གཞན་སྡེ་འདབ་བཟང་བྱེ་བ་ཡིས། །ལྟ་ཟེར་འགོག་པར་མ་ནུས་པའི། །འཕགས་མཆོག་ཀླུ་སྒྲུབ་ཞབས་ལ་འདུད། །མངལ་གྱི་དྲི་མ་རིང་དུ་སྤངས། །མདོ་རྒྱུད་ཀུན་གྱི་ཕ་རོལ་སོན། །མུ་སྟེགས་རྒོལ་བ་བཟློག་མཛད་པ། །ཨཱརྱ་དེ་བའི་ཞབས་ལ་འདུད། །རྒྱལ་བ་ཉིད་ལ་གསུང་རབ་ཀུན། །གསན་ནས་རྒྱལ་བ་ཇི་བཞིན་དུ། །རྒྱལ་བའི་བསྟན་པ་རྒྱས་མཛད་པ། །འཕགས་པ་ཐོགས་མེད་ཞབས་ལ་འདུད། །སོ་སོར་སྐྱེ་བོའི་ཚུལ་བཟུང་ནས། །
ཤོག་ལྷེབ་ ༣༠༡ ནས་ ༤༠༠ བར།
དགུ་བཅུ་གོ་དགུ་འབུམ་སྡེ་ཡི། །གསུང་རབ་རྣམས་ལ་གཟུང་སྤོབས་ཅན། །མཁས་མཆོག་དབྱིག་གཉེན༴ རྨད་བྱུང་སྤོབས་པའི་ཚིག་གཅིག་གིས། །ས་ཆེན་རྣམ་པ་དྲུག་གཡོས་ནས། །རྒོལ་ངན་སྤོབས་པ་རྒྱུན་བཅད་པ། །ཕྱོགས་ཀྱི་གླང་པོའི་ཞབས་ལ་འདུད། །ཕྱོགས་ལས་རྣམ་པར་རྒྱལ་བ་ཡི། །འོད་ཀྱིས་འཛམ་གླིང་གང་བ་དང་། །མཉམ་དུ་གྲགས་པའི་པད་དཀར་བྱེ། །ཆོས་ཀྱི་གྲགས་པའི་ཞབས་ལ་འདུད། །ལུགས་བཟང་གསེར་གྱི་རི་བོ་ལ། །ཐུབ་པའི་བརྟུལ་ཞུགས་ཉི་མ་ཤར། །ངུར་སྨྲིག་འཛིན་པའི་པད་ཚལ་རྒྱས། །ཡོན་ཏན་འོད་ཀྱི་ཞབས་ལ་འདུད། །ལེགས་པར་གསུང་པའི་ནམ་མཁའ་ལ། །བློ་གྲོས་ཟླ་བ་ཤར་བ་ཡིས། །གདུལ་བྱའི་ཀུ་མུད་འཛུམ་བྱེད་པ། །ཤཱཀྱ་འོད་ཀྱི་ཞབས་ལ་ཞབས་ལ་འདུད། །རྒྱན་དྲུག་ལེགས་བཤད་བདུད་རྩིའི་རྒྱུན། །གང་གི་མགྲིན་པར་ལེགས་བཟུང་ནས། །གངས་ཅན་དབུལ་བ་སེལ་མཛད་པ། །
དྭགས་པོ་ལྷ་རྗེའི་ཞབས་ལ་འདུད། །དེ་ལས་བརྒྱུད་པའི་བཤད་བསྒྲུབ་ཀྱི། །ངེས་དོན་ས་ཆེན་གསུམ་བཟུང་ནས། །ལོག་ཕྱོགས་ལྷ་མིན་ཕམ་མཛད་པའི། །རང་བྱུང་རྡོ་རྗེའི་ཞབས་ལ་འདུད། །བསྐལ་པ་དུ་མར་ལེགས་སྦྱངས་པས། །ལྷག་པའི་ལྷ་ཡིས་རྗེས་བཟུང་ཞིང་། །མདོ་རྒྱུད་ཀུན་གྱི་དགོངས་དོན་གཟིགས། །འཇམ་དབྱངས་ཆེན་པོའི་ཞབས་ལ་འདུད། །མ་འོངས་སངས་རྒྱས་དྲུག་པའི་མཚན། །ངོ་མཚར་སྤྲུལ་པ་བགྲང་ཡས་ཀྱིས། །ཐུབ་བསྟན་རྒྱས་མཛད་ཀརྨ་པ། །ཆོས་གྲགས་རྒྱ་མཚོའི་ཞབས་ལ་འདུད། །དེ་ལྟར་ཐུབ་པའི་རིང་ལུགས་པ། །འཛམ་གླིང་རྒྱན་དྲུག་མཆོག་གཉིས་དང་། །གངས་ཅན་བསྟན་པའི་རྒྱན་བཞི་ལ། །གུས་པས་གསོལ་བ་བཏབ་པའི་མཐུས། །བདག་ནི་སྐྱེ་བ་ཐམས་ཅད་དུ། །ཐུབ་བསྟན་མཛེས་པའི་རྒྱན་གྱུར་ཏེ། །བསླབ་སྦྱངས་ཡོན་ཏན་ཀུན་ལྡན་པའི། །མཆོག་ཏུ་གྱུར་པ་ཐོབ་པར་ཤོག །འཛམ་གླིང་གསལ་བྱེད་རྒྱན་དྲུག་
ཡོངས་གྲགས་དྲུག །ཁྱད་པར་རྒྱལ་བས་ཡང་ཡང་ལུང་བསྟན་པའི། །ཤིང་རྟ་ཆེན་པོ་ཀླུ་སྒྲུབ་ཐོགས་མེད་ནས། །བརྒྱུད་པའི་གསུང་རབ་ཆུ་བོ་ཀུན་འདུས་ཏེ། །གཅིག་ཏུ་འབབ་པ་བཀའ་བརྒྱུད་ཅེས་གྲགས་པ། །སྐྱེ་དགུའི་མགོན་དུ་གྱུར་པ་ཐམས་ཅད་ལ། །ལུས་ངག་ཡིད་གསུམ་རྟག་ཏུ་གུས་ཕྱག་འཚལ། །ཚེ་རབས་ཀུན་ཏུ་རྗེས་སུ་འཛིན་གྱུར་ཅིག །ཕྱོགས་བཅུའི་ཞིང་དུ་དུས་གསུམ་སངས་རྒྱས་ཀྱི། །ཕྲིན་ལས་མ་ལུས་སྒྲུབ་པའི་ཀརྨ་པ། །ཆོས་གྲགས་རྒྱ་མཚོ་ཞེས་བྱར་གྲགས་དེ་ཡི། །དེང་འདིར་བཀྲ་ཤིས་བདེ་ལེགས་འབྱུང་གྱུར་ཅིག །།དེ་ནས་བྱང་སྡོམ་བརྒྱུད་པའི་བླ་མ་ལ་གསོལ་བ་འདེབས་པ་ནི། སྟོན་པ་མཚུངས་མེད་བཅོམ་ལྡན་ཤཱཀྱ་ཐུབ། །རྒྱལ་ཚབ་དམ་པ་འཕགས་པ་ཐོགས་མེད་སྐྱོབ། །མཁས་པའི་གཙུག་རྒྱན་དབྱིག་གཉེན་རྣམ་གྲོལ་སྡེ། །དད་པའི་སར་གནས་གྲོལ་སྡེ་མཆོག་གི་སྡེ། །གསོལ་བ་འདེབས་སོ༴ མཁས་མཆོག་འདུལ་བའི་སྡེ་དང་རྣམ་
སྣང་མཛད། །བྱམས་པ་མགོན་པོས་རྗེས་བཟུང་སེང་གེ་བཟང་། །ཀུ་སུ་ལུ་གཉིས་བྱང་སེམས་གསེར་གླིང་པ། །རྒྱ་ཆེན་སྤྱོད་པའི་ཤིང་རྟ་ཆེ་རྣམས་ལ། །གསོལ་བ་འདེབས་སོ༴ རྒྱལ་སྲས་ཐུ་བོ་འཇམ་དབྱངས་དཔལ་ལྡན་མཚན། །འཕགས་པ་ལྷ་དང་དཔལ་ལྡན་ཟླ་བ་གྲགས། །རིག་པའི་ཁུ་བྱུག་གཉིས་ལ་སོགས་པ་ཡི། །ཐེག་ཆེན་ལམ་སྲོལ་གཉིས་འཛིན་མར་མེ་མཛད། །གསོལ་བ་འདེབས་སོ༴ བཤེས་གཉེན་ཆེན་པོ་སྟོན་པ་ཚུལ་ཁྲིམས་འབར། །དེ་སྲས་བྱ་ཡུལ་བ་དང་ཡེ་ཤེས་འབར། །ལྕགས་རི་བ་དང་སྣེ་ཟུར་པ་ལ་སོགས། །དགེ་བའི་བཤེས་གཉེན་ཆེན་པོ་དུ་མ་ལ། །གསོལ་བ་འདེབས་སོ༴ ཤིང་རྟ་གཉིས་ཀྱི་ལམ་སྲོལ་ལས་བྱུང་བའི། །གསུང་རབ་ཆུ་བོ་ཀུན་གྱི་འཇུག་པའི་ངོགས། །བདག་ཉིད་ཆེན་པོ་ཟླ་འོད་གཞོན་ནུ་དང་། །རྒྱལ་བའི་ཕྲིན་ལས་མངའ་བདག་དུས་གསུམ་མཁྱེན། །གསོལ་བ་འདེབས་སོ༴ འགྲོ་མགོན་རས་ཆེན་རྒྱལ་སྲས་སྤོམ་
བྲག་པ། །ཀརྨ་པ་དང་གྲུབ་ཆེན་དགེ་འདུན་འབུམ། །རང་བྱུང་རྡོ་རྗེ་རྒྱལ་བ་གཡུང་སྟོན་པ། །མགོན་པོ་རྒྱལ་མཚན་འཛམ་གླིང་ཆོས་ཀྱི་གྲགས། །གསོལ་བ་འདེབས་སོ༴ མཁའ་སྤྱོད་དབང་པོ་ཆོས་རྗེ་དེ་བཞིན་གཤེགས། །ཆོས་དཔལ་ཡེ་ཤེས་མཐོང་བ་དོན་ལྡན་ཞབས། །མཁྱེན་རབ་ཐུགས་རྗེའི་བདག་ཉིད་འཇམ་དཔལ་བཟང་། །དཔལ་འབྱོར་དོན་གྲུབ་ཆོས་གྲགས་རྒྱ་མཚོ་ལ། །གསོལ་བ་འདེབས་སོ༴ ལྷན་སྐྱེས་ཡེ་ཤེས་འོད་གསལ་བདེ་བའི་སྐུ། །གྲུབ་པའི་དབང་པོ་བཀྲ་ཤིས་དཔལ་འབྱོར་དང་། །འཇིགས་མེད་ཆོས་ཚུལ་རྒྱ་མཚོའི་གཏིང་དཔོག་ནས། །རྒྱ་ཆེན་མཁྱེན་པའི་སྤྱན་ལྡན་དབྱངས་ཅན་བཟང་། །གསོལ་བ་འདེབས་སོ༴ ཟབ་དང་རྒྱ་ཆེའི་སྐུ་མངའ་དཀོན་མཆོག་འབངས། །རྒྱལ་ཀུན་ངོ་བོ་དབང་ཕྱུག་རྡོ་རྗེའི་ཞབས། །སྨྲ་བའི་ཉི་མ་ཆོས་ཀྱི་དབང་ཕྱུག་དང་། །བསྟན་པའི་མངའ་བདག་ཆོས་དབྱིངས་རྡོ་རྗེ་ལ། །
གསོལ་བ་འདེབས་སོ༴ བྱིན་རླབས་འབྱུང་གནས་ཡེ་ཤེས་སྙིང་པོ་དང་། །གདུལ་བཀའ་འདུལ་མཛད་ཡེ་ཤེས་རྡོ་རྗེའི་ཞབས། །གཟིགས་པ་ཟླ་མེད་ཆོས་ཀྱི་དོན་གྲུབ་དང་། །ཐུགས་རྗེའི་བདག་ཉིད་བྱང་ཆུབ་རྡོ་རྗེ་ལ། །གསོལ་བ་འདེབས་སོ༴ ཐམས་ཅད་མཁྱེན་པ་ཆོས་ཀྱི་འབྱུང་གནས་དང་། །རྒྱལ་དང་རྒྱལ་བའི་མི་ཟད་རྒྱན་འཁོར་ལྔ། །གཅིག་གྱུར་རྗེ་བཙུན་བདུད་འདུལ་རྡོ་རྗེའི་ཞབས། །གར་གྱི་དབང་པོ་ཆོས་གྲུབ་རྒྱ་མཚོ་ལ། །གསོལ་བ་འདེབས་སོ༴ གྲོལ་བ་བཞི་ལྡན་མཚུངས་མེད་ཆོས་ཀྱི་རྗེ། །བྱམས་མགོན་དངོས་སྣང་པདྨ་ཉིན་བྱེད་ཞབས། །ཐུགས་རྗེ་ཆེན་པོས་མཁའ་ཁྱབ་གདུལ་བྱ་འདུལ། །འཇིག་རྟེན་དབང་ཕྱུག་ཐེག་མཆོག་རྡོ་རྗེ་ལ། །གསོལ་བ་འདེབས་སོ༴ འགྲོ་བའི་སྐྱབས་གཅིག་ས་བཅུའི་སེམས་དཔའ་ཆེ། །མཁྱེན་བརྩེའི་དཔལ་ལྡན་བློ་གྲོས་མཐའ་ཡས་ཞབས། །ཐབ་མཁས་འགྲོ་འདུལ་ཐུགས་རྗེའི་གཏེར་ཆེན་པོ། །སངས་རྒྱས་དངོས་
སྣང་མཁའ་ཁྱབ་རྡོ་རྗེ་ལ། །གསོལ་བ་འདེབས་སོ༴ འགྲོ་བ་སྐྱེ་རྒུའི་དཔུང་གཉེན་སེམས་དཔའ་ཆེ། །ཉི་མའི་གཉེན་གྱི་རྒྱལ་ཚབ་མི་ཕམ་མགོན། །ཐུགས་རྗེ་ཚད་མེད་ཉོན་མོངས་གཡུལ་འཇོམས་པ། །བྱམས་ཆེན་དངོས་སྣང་པདྨ་དབང་མཆོག་རྒྱལ། །ཚད་མེད་སྙིང་རྗེའི་གཏེར་ཆེན་འགྲོ་བའི་མགོན། །སྤྱན་རས་གཟིགས་དབང་རིག་པའི་རྡོ་རྗེ་ལ། །གསོལ་བ་འདེབས་སོ༴ གྲངས་མེད་གོང་ནས་མངོན་པར་སངས་རྒྱས་ཏེ། །མ་དག་གདུལ་བྱའི་སྣང་ངོར་སྤྲུལ་པའི་སྐུ། །གང་ལ་གང་འདུལ་ཚུལ་གྱིས་སྟོན་མཛད་པ། །ཡབ་སྲས་བརྒྱུད་པར་བཅས་པ་ཐམས་ཅད་ལ། །གསོལ་བ་འདེབས་སོ་བྱིན་གྱིས་རློབ་ཏུ་གསོལ། །ཐུབ་དབང་མ་དྲོས་ལས་བྱུང་གསུང་རབ་ཀྱི། །ཆུ་བོ་དགེ་ལེགས་པད་ཚལ་སྐྱེད་བྱེད་པ། །གང་ལ་བརྒྱུད་པའི་རིམ་པ་ཐམས་ཅད་ལ། །དེ་ལྟར་གསོལ་བ་བཏབ་པའི་བྱིན་བརླབས་ཀྱི། །མི་བཟད་ངན་འགྲོའི་སྡུག་བསྔལ་
འཇིགས་རུང་གིས། །ཤིན་ཏུ་སྡངས་ཏེ་མཐོ་རིས་བསྟེན་སླད་དུ། །སྲོག་ལ་བབ་ཀྱང་ཉེས་པ་མི་སྤྱོད་ཅིང་། །སྔར་བསགས་ལས་རྣམས་བྱང་བར་བྱིན་གྱིས་རློབས། །རབ་དཀར་དགེ་བའི་ཚོགས་རྣམས་བསྒྲུབ་བརྩོན་ཏེ། །དལ་བ་བརྒྱད་དང་འབྱོར་པ་བཅུ་ལྡན་པའི། །མི་ཡི་རྟེན་མཆོག་ཚེ་རབས་ཀུན་ཏུ་ཡང་། །ཡང་ནས་ཡང་དུ་ཐོབ་པར་བྱིན་གྱིས་རློབས། །སྡུག་བསྔལ་མེ་ལྕེའི་ཕྲེང་བས་བསྐོར་བའི་འོབས། །སྲིད་པའི་བཙོན་ར་ཐར་བར་དཀའ་བ་ལས། །ཐར་བར་འདོད་པའི་དྲི་མེད་བསླབ་པ་གསུམ། །དོན་གཉེར་ཆེན་པོ་སྐྱེ་བར་བྱིན་གྱིས་རློབས། །གང་ཞིག་ཞི་བ་དམན་པ་དོན་གཉེར་བ། །དེ་དག་ཉེར་ཞི་གཉིས་ལ་ངལ་བསོས་ནས། །རིམ་གྱིས་བྱང་ཆུབ་མཆོག་ལ་འཇུག་པ་ཡི། །སྙིང་སྟོབས་ཆེན་པོ་སྐྱེ་བར་བྱིན་བྱིན་གྱིས་རློབས། །ཐེག་མཆོག་རིགས་ཀྱི་ནུས་པ་མི་དམན་པས། །དེ་དག་རྣམས་ཀྱི་སྡུག་བསྔལ་མེ་འབར་བའི། །འགྲོ་ལ་སྙིང་
བརྩེས་བྱང་ཆུབ་སེམས་བསྐྱེད་ནས། །གང་དེ་ཉམས་པ་མེད་པར་བྱིན་གྱིས་རློབས། །བྱང་ཆུབ་སེམས་བསྐྱེད་གྱུར་ནས་འགྲོ་རྣམས་ཀྱི། །དོན་རྣམས་བསྒྲུབ་སླད་རྨད་བྱུང་བྱང་ཆུབ་སྤྱོད། །ཕྱོགས་བཅུའི་ཞིང་དུ་དུས་རྣམས་ཀུན་ཏུ་ཡང་། །སེམས་ཅན་རྣམས་ལ་རྒྱ་ཆེར་སྟོན་གྱུར་ཅིག །ཟབ་དང་རྒྱ་ཆེའི་ལམ་གཉིས་རབ་བགྲོད་ནས། །སྒྲིབ་གཉིས་བྲལ་བའི་ཡེ་ཤེས་བླ་མེད་ཀྱིས། །གང་ལ་གང་འདུལ་དེ་ལ་མ་ནོར་ལམ། །གསལ་བྱེད་འཇིག་རྟེན་སྒྲོན་མ་ཉིད་གྱུར་ཅིག །ཅེས་རྗེ་ཟླ་འོད་གཞོན་ནུ་ལ་བཀའ་བབས་པའི་ཤིང་རྟ་གཉིས་ཀྱི་བླ་མ་བརྒྱུད་པ་ལ་གསོལ་བ་འདེབས་པ་འདི་ནི་རང་བྱུང་མཚོ་སྐྱེས་རྡོ་རྗེས་མཛད་པའོ།། །།དེ་ནས་སོ་ཐར་སྡོམ་རྒྱུན་གྱི་གསོལ་འདེབས་ནི། ཟླ་བྲལ་ཐུབ་དབང་གནས་བརྟན་ཤཱ་རིའི་བུ། །སྒྲ་གཅན་ཟིན་གཉིས་འཕགས་མཆོག་ཀླུ་སྒྲུབ་ཞབས། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །སྡོམ་པའི་ཚུལ་ཁྲིམས་ཉམས་མེད་དངོས་གྲུབ་སྩོལ། །ཡོན་ཏན་བློ་གྲོས་
རིན་ཆེན་བཤེས་གཉེན་དང་། །ཆོས་ཀྱི་བཟང་པོ་ཡོན་ཏན་རྒྱ་མཚོའི་ཞབས། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །སྡོམ་པའི་ཚུལ་ཁྲིམས་ཉམས་མེད་དངོས་གྲུབ་སྩོལ། །ཆོས་ཀྱི་ཕྲེང་བ་བློ་གྲོས་འབྱུང་གནས་སྦས། །ས་སྟེང་འགྲན་ཟླ་བྲལ་བ་ཤཱཀྱ་ཤྲཱི། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །སྡོམ་པའི་ཚུལ་ཁྲིམས་ཉམས་མེད་དངོས་གྲུབ་སྩོལ། །བྱང་ཆུབ་དཔལ་བ་དབང་ཕྱུག་གྲགས་པ་དང་། །གཞོན་ནུ་བྱང་ཆུབ་གནས་བརྟན་ཡོན་རྒྱལ་ཞབས། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །སྡོམ་པའི་ཚུལ་ཁྲིམས་ཉམས་མེད་དངོས་གྲུབ་སྩོལ། །ཡོན་ཏན་བློ་གྲོས་འདུལ་འཛིན་སེང་གེ་དཔལ། །རབ་འབྱོར་སེང་གེ་ཆོས་གྲུབ་སེང་གེའི་ཞབས། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །སྡོམ་པའི་ཚུལ་ཁྲིམས་ཉམས་མེད་དངོས་གྲུབ་སྩོལ། །མི་བསྐྱོད་རྒྱལ་བ་མཚུངས་མེད་དཀོན་མཆོག་འབངས། །རྗེ་
བཙུན་མི་ཕམ་ཆོས་ཀྱི་དབང་ཕྱུག་ཞབས། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །སྡོམ་པའི་ཚུལ་ཁྲིམས་ཉམས་མེད་དངོས་གྲུབ་སྩོལ། །དཔལ་ལྡན་གར་དབང་དྷརྨེ་ཤྭ་ར་དང་། །གྲུབ་དབང་བདུད་རྩི་ཀརྨ་རྣམ་རོལ་ཞབས། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །སྡོམ་པའི་ཚུལ་ཁྲིམས་ཉམས་མེད་དངོས་གྲུབ་སྩོལ། །སྐྱབས་གནས་མཚུངས་མེད་ཐུགས་རྗེའི་གཏེར་གཅིག་པུ། །ཆོས་ཀྱི་དོན་གྲུབ་བསྟན་པའི་ཉིན་བྱེད་ལ། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །སྡོམ་པའི་ཚུལ་ཁྲིམས་ཉམས་མེད་དངོས་གྲུབ་སྩོལ། །རླབས་ཆེན་ཕྲིན་ལས་ཟབ་མོས་འགྲོ་སྒྲོལ་བ། །བདུད་ལས་རྣམ་རྒྱལ་བསྟན་འཛིན་ཉིན་བྱེད་ཞབས། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །སྡོམ་པའི་ཚུལ་ཁྲིམས་ཉམས་མེད་དངོས་གྲུབ་སྩོལ། །མཁྱེན་བརྩེ་རྨད་བྱུང་ལྷར་བཅས་འགྲོ་བའི་མགོན། །རྒྱལ་དབང་
ཐེག་པ་མཆོག་གི་རྡོ་རྗེ་ལ། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །སྡོམ་པའི་ཚུལ་ཁྲིམས་ཉམས་མེད་དངོས་གྲུབ་སྩོལ། བསྟན་འགྲོའི་གཙུག་རྒྱན་མཚུངས་མེད་འགྲོ་བའི་སྐྱབས། །ཟླ་བ་བཟང་དང་བཀྲ་ཤིས་འོད་ཟེར་ཞབས། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །སྡོམ་པའི་ཚུལ་ཁྲིམས་ཉམས་མེད་དངོས་གྲུབ་སྩོལ། །དགེ་སྦྱོང་ཚུལ་བཟུང་རྣམ་འདྲེན་འགྲོ་བའི་མགོན། །བསླབ་གསུམ་མཛོད་འཛིན་པདྨ་དབང་མཆོག་ལ། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །སྡོམ་པའི་ཚུལ་ཁྲིམས་ཉམས་མེད་དངོས་གྲུབ་སྩོལ། །དུས་གསུམ་རྒྱལ་བ་ཀུན་གྱི་ཕྲིན་ལས་པ། །རྣམ་འདྲེན་མཚུངས་མེད་རིག་པའི་རྡོ་རྗེ་ལ། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །སྡོམ་པའི་ཚུལ་ཁྲིམས་ཉམས་མེད་དངོས་གྲུབ་སྩོལ། །དེ་ལྟར་གསོལ་བ་བཏབ་པའི་བྱིན་བརླབས་ཀྱིས། །ཉིས་བརྒྱ་ལྔ་བཅུ་རྩ་གསུམ་ཁྲིམས་ཀྱི་གཞི། །
འཇུག་པའི་ཚུལ་ཁྲིམས་དང་བཅས་སོ་སོར་ཐར། །ཉམས་མེད་ཉེ་བ་འཁོར་ལྟར་བག་ཡོད་ཤོག །ཅེས་ཞྭ་དམར་པས་སོ།། །།དེས་གསོལ་བ་གདབ་པའི་རིམ་པ་རྣམས་སོང་ནས་རྟེན་ཁྱད་པར་ཅན་དེ་དག་གི་དྲུང་། སྙིང་ཐག་པ་ནས་སྨོན་ལམ་གདབ་པར་བྱ་དགོས་པས་གཤམ་དུ་འབྱུང་བ་ལྟར་སྨོན་ལམ་གྱི་རིམ་པ་རྣམས་མཐར་ཆགས་སུ་འདོན་པར་བྱ་སྟེ་དེ་ནི་སྨོན་ལམ་འདེབས་པའི་ཡན་ལག་གོ། །།དེ་ནས་བཟོད་པར་གསོལ་བའི་ཡན་ལག་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྲས་དང་སློབ་མར་བཅས་པ་གདན་འཛོམ་པའི་སྤྱན་སྔར། འགྲོ་བ་མང་པོའི་དོན་མཛད་པར་གསོལ་བའི་སྐབས་འདིར་བདག་ཅག་དུས་ངན་པའི་སེམས་ཅན་སྤྱོད་པ་དམན་ཞིང་མ་དག་པས་མ་འཚལ་བ་དང་། བག་མ་མཆིས་པའི་དབང་གིས་ལུས་ངག་ཡིད་གསུམ་གྱི་སྤྱོད་པ་ཉོན་མོངས་པ་དང་འབྲེལ་པ་དང་། མཆོད་པའི་དངོས་པོ་ཆུང་ཞིང་ངན་པ་དང་། གཙང་སྦྲས་མ་ཕྱེད་པ་དང་། མདོ་ལས་བྱུང་བའི་ཆོ་ག་
བཞིན་དུ་མ་ལྕོགས་པ་ལ་སོགས་པ་འཁྲུལ་ཞིང་ནོངས་པ་ཐམས་ཅད་འཕགས་པ་ཐུགས་རྗེ་ཆེན་པོ་དང་ལྡན་པ་རྣམས་ལ་བཟོད་པར་གསོལ་ཞིང་མཆིས་ན་ཐུགས་བརྩེ་བར་དགོངས་ཏེ་བཟོད་པར་བཞེས་ཤིང་། འཕྲལ་དང་ཡུན་དུ་བདག་གིས་སྒྲིབ་པར་མི་འགྱུར་བར་བྱིན་གྱིས་བརླབ་པར་ཅི་གནང་། གཤེགས་སུ་གསོལ་བའི་ཡན་ལག་ནི། ཁྱེད་ཀྱིས་སེམས་ཅན་དོན་ཀུན་མཛོད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །ཞེས་སྨན་བླའི་མདོ་ཆོག་ནས་འབྱུང་བ་ལྟར་རམ། རྟེན་ཡོད་ན། མགོན་པོ་ཐུགས་རྗེ་ཆེན་པོ་དང་ལྡན་པ་རྣམས་ཀྱིས་བདག་ཅག་དང་སེམས་ཅན་ཐམས་ཅད་ཀྱི་དོན་མཛད་པ་འདི་ལགས་ཀྱི། ཡུན་དང་ཡུན་དུ་སྐུ་གསུང་ཐུགས་ཀྱི་རྟེན་འདི་རྣམས་ལ་རྫུ་འཕྲུལ་གྱིས་འཁོར་དང་བཅས་པ་བརྟན་པར་བཞུགས་སུ་གསོལ། བརྟན་པར་བཞུགས་ནས་ཀྱང་བདག་ཅག་ལ་སོགས་པའི་སེམས་
ཅན་ཐམས་ཅད་ལ་ཉེ་བར་དགོངས་ཏེ་བསྒྲལ་ཞིང་དབུགས་དབྱུང་བར་མཛད་དུ་གསོལ། ཞེས་འདོན་པ་བསྒྱུར་ནས་རྟེན་བཞུགས་བྱེད་པ་ཉིད་ལེགས་པ་ཡིན་ནོ། །དེ་ནས་བཀྲ་ཤིས་ཀྱི་ཡན་ལག་ནི་འོག་ནས་རྒྱས་པར་འབྱུང་བ་ལྟར་བྱའོ། །དེ་ལྟར་བཀོད་པའི་རིམ་པ་ནི་དུས་ཆེན་བཞི་ལ་སོགས་པའི་ཚེ་བསག་སྦྱང་སྨོན་ལམ་བྱ་བའི་ཚུལ་གཙོ་བོར་བྱས་པའོ།། །།དེ་ནས་སྔ་དྲོའི་ཆ་ལ་བྱ་བའི་གཏོར་མའི་རིམ་པ་ནི། ཐོག་མར་ཆབ་གཏོར་འཇམ་དཔལ་མར་གྲགས་པ་ནི། འདི་ལྟ་སྟེ། བླ་མ་དང་འཇམ་དཔའི་དབྱངས་ལ་ཕྱག་འཚལ་ལོ། །འདིར་རེ་ཞིག་ཆུ་གཏོར་འཇམ་དཔལ་མར་གྲགས་པ་བགྱིད་པར་འདོད་པའི་གང་ཟག་གིས། མདུན་དུ་སྟེགས་ཀྱི་ཁར་གཙང་སྦྲ་དང་བཅས་རིན་པོ་ཆེའི་སྣོད་དུ་ཆུ་དང་། གཞན་ཡང་ཟན་དང་མེ་ཏོག་དང་། འབྲུ་དང་སྨན་དང་རིན་པོ་ཆེ་བདར་བའི་ཕྱེ་མ་ལ་སོགས་པ་ཅི་འབྱོར་པ་བླུགས་ལ། །སྙིང་རྗེ་ཆེན་པོས་སེམས་ཅན་ལ་ཁྱབ་པར་བལྟས་ཏེ། བདག་གིས་དེ་དག་གི་དོན་བྱའོ་སྙམ་པས། དུས་གསུམ་གྱི་རྒྱལ་བ་སྲས་དང་བཅས་པ་མདུན་གྱི་ནམ་མཁར་དམིགས་པའི་སྤྱན་སྔར། དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །དགེ་བ་ཀུན་གྱི་རྗེས་སུ་
སྨོན། །སངས་རྒྱས་བྱང་ཆུབ་ཡིད་ཀྱིས་གཟུང་། །བྱང་ཆུབ་མཆོག་གི་སེམས་ནི་བསྐྱེད་པར་བགྱི། །སེམས་ཅན་མ་ལུས་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་ལྔ་རྣམ་དག་བྱས་ནས། སེམས་ཅན་ཐམས་ཅད་བདེ་བ་དང་སོགས་ཀྱིས་ཚད་མེད་བཞི་བསྒོམ། ༀ་སྭ་བྷཱ་ཝ་ཤུདྡྷ་སརྦ་དྷརྨཿསྭ་བྷཱ་ཝ་ཤུདྡྷོ྅ཧཾ། ཆོས་ཐམས་ཅད་དོན་དམ་པ་སྟོང་པ་ཉིད་དོ། སྟོང་པའི་ངང་ལས་ༀ་ཝཱ་གཱི་ཤྭ་རི་མུཾ། ཞེས་པའི་སྒྲ་ཙམ་གྲགས་པའི་རྐྱེན་གྱིས་ཟླ་བའི་དཀྱིལ་འཁོར་ཉ་གང་བའི་སྟེང་དུ། ཝཱ་གཱི་ཤྭ་རི་མུཾ་ཞེས་བྱ་བའི་ཡིག་འབྲུ་དངུལ་གྱི་ཤོག་བུ་ལ་གསར་ཆུ་ཞན་པ་ལྟ་བུ་ཡོངས་སུ་གསལ་བར་གྱུར། ཟླ་བ་ཡིག་འབྲུ་དང་བཅས་པ་ལས་འོད་ཟེར་འཕྲོས། ཚུར་འདུས་ཡོངས་སུ་གྱུར་པ་ལས། བདག་ཉིད་འཕགས་པ་འཇམ་དཔལ་སྐུ་མདོག་དམར་སེར་ཕྱག་གཡས་ན་རལ་གྲི། གཡོན་ན་ཨུཏྤ་ལའི་མེ་ཏོག་
བསྣམས་པ། རྒྱན་ཐམས་ཅད་ཀྱིས་བརྒྱན་པ། གདན་པདྨ་ལ་བཞུགས་པ་གཅིག་ཏུ་གྱུར། ཞེས་སམ། ཡང་ན་སྐད་ཅིག་གིས་བསྐྱེད་པའང་རུང་ངོ་། །དེ་ནས་ལག་པ་གཉིས་སོར་མོ་ཕན་ཚུན་བསྣོལ་ཏེ། གུང་མོ་གཉིས་བསྒྲེངས་ནས་རྩེ་སྤྲད། མཛུབ་མོ་གཉིས་གུང་མོའི་རྒྱབ་ཏུ་སྦྱར་བ་རྡོ་རྗེའི་ཕྱག་རྒྱ་བྱས་ཏེ་སྤྱི་བོར་བཞག་ལ། ན་མཿས་མནྟ་བུདྡྷཱ་ནཱཾ་ཧཱུྃ་ཧཱུྃ། ཞེས་བརྗོད་པས་དབུ་གཙུག་ཏོར་དང་བཅས་པར་བསམ། ཡང་ལག་གཉིས་ཁུ་ཚུར་བཅངས་ལ། གུང་སྲིན་བསྒྲིངས་ཏེ་མཐེ་བོའི་དྲུང་དུ་སྦྱར་བ་སྤྱན་གྱི་ཕྱག་རྒྱ་བཅས་ནས། ན་མཿས་མནྟ་བུདྡྷ་ནཱཾ་ག་ག་ན་སྥར་ལཀྵ་ཎ་ཀཱ་རུ་ཎ་མ་ཧཱ་ཏ་ཐཱ་ག་ཏ་ཙཀྵུཿསྭཱ་ཧཱ། ཞེས་བརྗོད་པས་ཡེ་ཤེས་ཀྱི་སྤྱན་དང་ལྡན་པར་བསམ། ལུས་བསྲུང་བ་ནི། སྔར་བཤད་པའི་རྡོ་རྗེའི་ཕྱག་རྒྱ་བདེ་བཅིངས་ནས། ན་མཿས་མནྟ་བཛྲཱ་ཎཱཾ་བཛྲ་ཀ་ཝ་ཙ་ཧཱུྃ། ཞེས་བརྗོད་པས་རྡོ་རྗེའི་གོ་ཞུ་ལུབ་ཏུ་གྱོན་པར་བསམ། ཡང་ལག་པ་གཉིས་སྦྱར་ལ། གུང་མཐེབ་རྩེ་སྤྲད་ཅིང་མཛུབ་མོ་ནང་དུ་བཅུག །སྲིན་ལག་གཉིས་བརྐྱང་། མཐེའུ་ཆུང་གཉིས་བཀུག་ལ། ན་མཿསརྦ་ཏ་ཐཱ་ག་ཏེ་བྷྱཿ སརྦ་བི་ཀ་ཊེ་བྷྱོ། བི་ཤྭ་མུ་ཁེ་བྷྱཿ སརྦ་ཏཏྑཾ་རཀྵ་མ་ཧཱ་བ་ལེ། སརྦ་ཏ་ཐཱ་ག་ཏ་པུ་ན་
ནི་རྫ་ཏེ་ཧཱུྃ་ཧཱུྃ། ཏྲ་ཐ་ཏྲ་ཐ་ཨ་པྲ་ཏི་ཧ་ཏེ་སྭཱ་ཧཱ། ཞེས་བརྗོད་པས་བར་དུ་གཅོད་པའི་བགེགས་ཐམས་ཅད་ཀྱིས་མི་ཚུགས་པར་བསམ། དེ་ནས་གཏོར་མ་བྱིན་གྱིས་བརླབ་པའི་ཕྱིར། ལག་པ་ཐལ་མོ་སྦྱར་བའི་སོར་མོ་ཕན་ཚུན་བསྣོལ་བའམ། ཐལ་མོ་ཁོང་སྟོང་དུ་སྦྱར་ཏེ། སོར་མོ་རྣམས་ལ་རཾ་དམར་པོ་དང་། གཏོར་མའི་སྟེང་དུ་རཾ་དམར་པོ་བསམ། ལག་པའི་རཾ་ལས་འོད་འཕྲོས། གཏོར་མའི་རཾ་ལ་ཕོག །དེའི་འོད་ཀྱིས་གཏོར་མའི་ཉེས་སྐྱོན་སྦྱང་བར་བསྒོམས་ཏེ། ༀ་སྭ་བྷཱ་ཝ་ཤུདྡྷཿསརྦ་དྷརྨ ཿསྭ་བྷཱ་ཝ་ཤུདྡྷོ྅ཧཾ། ཞེས་ལན་བདུན་དང་། ཆོས་ཉིད་རྣམ་དག་སྔགས་རྒྱ་ཏིང་འཛིན་གྱི། །བདེན་པས་གཏོར་རྫས་འབགས་དང་ཉམས་པ་དང་། །སྨེ་བས་དྲི་མ་ཅན་དུ་གྱུར་པ་དང་། །མི་མཐུན་མཚན་འཛིན་ཉེས་སྐྱོན་དག་གྱུར་ཅིག །ཅེས་བརྗོད་དོ། །དེ་བཞིན་དུ་ཐལ་མོ་ཁོང་སྟོང་དུ་སྦྱར་ཞིང་། སོར་མོ་རྣམས་རྩེ་སྤྲད་དེ། ཚིགས་རྣམས་ཟུར་ཅན་རིན་པོ་ཆེ་ལྟར་བྱས་ལ། ཚིགས་བར་དང་གཏོར་མའི་སྟེང་དུ་སྭ་ཁ་དོག་སེར་པོ་བསྒོམས་ནས། འོད་སྤྲོ་བ་སྔོན་མ་བཞིན་བྱས་པས། གཏོར་མའི་རྫས་དེ་ཉིད་མཆོད་རྫས་ཀྱི་ཁྱད་པར་བསམ་གྱིས་མི་ཁྱབ་པ་དང་། སེམས་ཅན་རྣམས་ཀྱི་མོས་པ་ཇི་ལྟ་བ་བཞིན་གྱི་འདོད་ཡོན་ལྔས་ནམ་མཁའི་
ཁམས་གང་བར་བསམ། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུངྒ་ཏེ་སྥ་ར་ཎ་ཨེ་མཾ་ག་ག་ན་ཁཾ་སྭཱ་ཧཱ། ལན་བདུན། ནམ་མཁའ་མཛོད་ཀྱི་སྔགས་རྒྱ་ཏིང་འཛིན་གྱི། །བདེན་པས་གཏོར་རྫས་ཟད་མི་ཤེས་པའི་མཛོད། །འཇིག་རྟེན་འཇིག་རྟེན་འདས་པའི་མཆོད་པའི་སྤྲིན། །འདོད་ཡོན་ལྔ་ལྡན་ནམ་མཁའ་གང་གྱུར་ཅིག །དེ་ནས་ལག་པ་མཐེ་བོ་གཉིས་བསྣོལ་ཞིང་། ཐལ་མོ་སྦྱར་བ་ཕྱིར་བཀྱེད་ནས་གཤོག་པ་གདེངས་པ་ལྟར་བྱས་ལ། ལག་སོར་དང་གཏོར་མར་གནས་པའི་ཨ་དཀར་པོའི་འོད་ཀྱིས། རྫས་རྣམས་ཡེ་ཤེས་ཀྱི་བདུད་རྩིར་བསྒྱུར་བར་བསམ། ༀ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། ལན་བདུན། བདུད་རྩི་ཐབ་སྦྱོར་སྔགས་རྒྱ་ཏིང་འཛིན་གྱི། །བདེན་པས་དུག་ལྔའི་གསོས་གྱུར་ལོངས་སྤྱོད་རྣམས། །ཡེ་ཤེས་ལྔ་ཡི་རང་བཞིན་བདུད་རྩི་དངོས། །སོ་སོའི་བཞེད་པ་བཞིན་དུ་སྣང་གྱུར་ཅིག །དེ་ནས་ལག་གཡས་རྡོ་རྗེ་ཁུ་ཚུར་བཅངས། མཛུབ་མོ་བསྒྲེང་བའི་རྩེ་ལ་ཧཱུྃ་དཀར་པོ་གནས་པའི་འོད་ཀྱིས། ཕྱོགས་བཅུའི་ཞིང་རབ་འབྱམས་རྣམས་སུ་བཞུགས་ཤིང་འཁོད་པའི་མགྲོན་བཞི་
ཐམས་ཅད་ལ་མཉེས་རྫས་སྣ་ཚོགས་དཔག་ཏུ་མེད་པར་སྤྲུལ་པ་དེ་ཉིད་མཆོད་ཅིང་བྱིན་པས་སོ་སོས་བཞེས་ཤིང་ལོངས་སྤྱོད་པར་བསྒོམ་པ་སྟེ་དེ་ཡང་དཀོན་མཆོག་རྣམས་ལ་གཞལ་མེད་ཁང་རྒྱ་མཚོ་ཀུན་ཏུ་བཟང་པོའི་མཆོད་སྤྲིན་གྱིས་གཏམས་པའི་ཚུལ་གྱིས་འབུལ་བ་དང་། སེམས་ཅན་ རྣམས་ཀྱི་མདུན་དུ་རང་རང་མོས་པའི་འདོད་ཡོན་ཆར་བཞིན་དུ་བབས་པར་བསམ་པ་དང་། ཁྱད་པར་ཡི་དྭགས་རྣམས་ཀྱི་བསམ་པ་བསྐང་བར་བསམས་ལ། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ༀ་སམྦྷ་ར་སམྦྷ་ར་ཧཱུྃ། ལན་བདུན། རྒྱལ་ཆེན་ཤུགས་ལྡན་ཏིང་འཛིན་སྔགས་རྒྱ་ཡི། །བདེན་པས་འདོད་ཡོན་མཆོད་སྤྲིན་དཔག་མེད་ཚོགས། །དཀོན་མཆོག་སྤྱན་སྔར་ཟད་མེད་འབྱུང་བ་དང་། འགྲོ་རྣམས་མོས་པ་བཞིན་དུ་ལོངས་སྤྱོད་ཤོག ། འདི་སྐབས་མགྲོན་བཞི་ནི། དཀོན་མཆོག་སྲི་ཞུའི་མགྲོན། བླ་མ་ཡི་དམ་སངས་རྒྱས་བྱང་སེམས་ཉན་རང་། ཡེ་ཤེས་ཀྱི་ཆོས་སྐྱོང་སོགས་ཡིན་ཞིང་། མགོན་པོ་ཡོན་ཏན་མགྲོན་ཕྱོགས་སྐྱོང་རྒྱལ་ཆེན་ལྷ་སྲིན་སྡེ་བརྒྱད་ཀྱི་གཙོ་བོ། གཙུག་ལག་གི་སྲུང་མ། གཙང་རིས་ཀྱི་མགོན་པོ་བདུན་ཅུ་རྩ་ལྔ་སོགས་དམ་ཚིག་དང་ལྡན་ཞིང་བསྟན་པ་སྐྱོང་བའི་འབྱུང་པོ་མཐུ་བོ་ཆེ་རྣམས་སོ། །རིགས་དྲུག་སྙིང་རྗེའི་མགྲོན་ནི་
འགྲོ་བ་རིགས་དྲུག་གི་སེམས་ཅན་ཐམས་ཅད་དོ། །བགེགས་རིགས་ལན་ཆགས་ཀྱི་མགྲོན་ནི་རང་ལ་གནོད་ཅིང་འཚེ་བའི་བགེགས་རྣམས་ཏེ། བགེགས་རིགས་སྟོང་ཕྲག་བརྒྱད་ཅུ་ལ་སོགས་པའོ། །ཚུལ་འདི་ལ་བླ་མ་འགའ་ཞིག་གིས་མགྲོན་བཞི་རང་གི་མདུན་དུ་སྤྱན་དྲངས་ནས་གཏོར་མ་འབུལ་བ་མཛད་པར་འདུག་ཀྱང་འདིར་རྒྱ་གཞུང་གི་དགོངས་པ་སོར་བཞག་གིས་རང་གནས་སུ་མཆོད་སྤྲིན་སྤྲོ་བ་ཉིད་ལེགས་པར་མཐོང་ཞིང་། ཤཱཀྱ་མི་ཏྲའི་གཞུང་ལས་ཀྱང་འདི་ལྟར་འབྱུང་ངོ་། །དེ་ནས་ལག་གཡས་རྡོ་རྗེ་ཁུ་ཚུར་སྙིང་གར་བཅངས་ལ། གཡོན་པ་མཆོད་སྦྱིན་གྱིས་སྣོད་འདེགས་པའི་ཚུལ་དུ་བྱས་པའི་སོར་མོའི་རྩེ་ལྔ་ལ་ཧཱུྃ་དཀར་པོ་རེ་བསམ། དེ་ལས་རང་དང་ཐ་མི་དད་པའི་མཆོད་པའི་ལྷ་མོ་ཞིང་གི་རྡུལ་སྙེད་སྐར་མདའ་བཞིན་སྤྲོས་ཏེ་འཕགས་པ་རྣམས་མཆོད་པས་མཉེས། སེམས་ཅན་རྣམས་ལ་སྙོམས་པར་བྱིན་པས་སོ་སོའི་མོས་པ་བཞིན་འཐབ་རྩོད་དང་ཕམ་རྒྱལ་མེད་པར་ཐོབ་ཅིང་ཚིམ་པར་བསམ་ལ། ༀ་ཛྙཱ་ནཱ་ཝ་ལོ་ཀི་ཏེ་ས་མནྟ་སྥ་ར་ཎ་རསྨི་བྷ་ཝ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲྀ་ད་ཡ་ཛྭ་ལ་ནི་ཧཱུྃ། ལན་བདུན། ཡེ་ཤེས་སྐར་མདའི་སྔགས་རྒྱ་ཏིང་འཛིན་གྱི། །བདེན་པས་མཆོད་སྦྱིན་རྒྱ་ཆེན་བགྱིས་པ་འདིས། །འཕགས་ཚོགས་
མཉེས་ཤིང་འགྲོ་རྣམས་རེ་བ་གང་། །འཐབ་རྩོད་རྒྱལ་ཕམ་མེད་པར་ཐོབ་གྱུར་ཅིག །དེ་ནས་ལག་པ་ཐལ་མོ་ཁོང་སྟོང་དུ་སྦྱར། སོར་མོ་རྣམས་བསྣོལ་ནས་ནང་དུ་བཅུག །མཐེ་བོང་གཉིས་གཤིབས་ཏེ་བརྐྱང་བའི་མཐེ་བོའི་ལྟོ་གཉིས་ལ་ཡི་གེ་ཛ་དམར་པོ་རེ་བསྒོམས་པ་ལས་འོད་ལྕགས་ཀྱུ་ལྟ་བུ་འཕྲོས། མགྲོན་རྣམས་ལ་ཕོག་པས་མགྲོན་བཞི་ཀ་བདག་གི་དབང་དུ་གྱུར་ཏེ། གོང་མ་རྣམས་ཀྱི་ཐུགས་དམ་གྱི་དབང་གིས་ཐུགས་ཀྱིས་དགོངས་ཤིང་། སེམས་ཅན་གྱི་དོན་སོགས་དགེ་བའི་ལས་འགྲུབ་པར་བྱིན་གྱིས་རློབ་པ་དང་། འོག་མ་རྣམས་ཀྱིས་ཀྱང་དམ་ཚིག་གི་དབང་གིས་འགོ་ཞིང་སྟོང་གྲོགས་བྱེད་པར་དམིགས་ལ། ཕྱག་རྒྱ་དེའང་ཕྱོགས་བཅུར་བསྟན་ཏེ། ན་མཿས་མནྟ་བུདྡྷ་ནཱཾ། གྲ་ཧེ་ཤྭ་ར་པྲ་བྷ་ཛྱོ་ཏི་ནི་མ་ཧཱ་ས་མ་ཡ་སྭཱ་ཧཱ། ལན་བདུན། དབང་སྒྱུར་འཁོར་ལོའི་སྔགས་རྒྱ་ཏིང་འཛིན་གྱི། །བདེན་པས་མགྲོན་བཞི་མཐའ་དག་ཐུགས་དམ་དང་། །དམ་ཚིག་དབང་གིས་དགོངས་ཤིང་འགོ་བ་དང་། །ལས་རྣམས་འགྲུབ་པའི་སྟོང་གྲོགས་ཉིད་གྱུར་ཅིག །དེ་ནས་སླར་ཡང་ཚིགས་སུ་བཅད་པ་འདིས་བསྔོ་བར་བྱ་སྟེ། གཏན་པ་མེད་པའི་མཆོད་སྦྱིན་རྒྱལ་པོ་འདི། །
ཆོས་ཉིད་རྣམ་པར་དག་པའི་བྱིན་རླབས་དང་། །དཀོན་མཆོག་ཡོན་ཏན་དཔག་མེད་ཆེ་བ་དང་། །སྙིང་པོ་ཕྱག་རྒྱ་ངེས་པའི་དམ་ཚིག་དང་། །རྒྱུ་རྐྱེན་རྟེན་འབྲེལ་ཚོགས་པའི་ནུས་མཐུ་དང་། །དྲང་སྲོང་རིག་འཛིན་རྣམས་ཀྱི་གྲུབ་པ་དང་། །བདག་གི་སྨོན་ལམ་ཏིང་འཛིན་ཤེས་རབ་ཀྱིས། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །དབང་པོ་ལྔ་ཡི་ལོངས་སྤྱོད་མཁོ་དགུར་ལྡན། །ནམ་མཁའི་མཐའ་ཀླས་གཏེར་ཆེན་གྱུར་པ་འདི། །མཆོད་གནས་བླ་མ་ཁྱེད་ཀྱི་ཕོ་བྲང་དུ། །མཆོད་པའི་སྤྲིན་གྱིས་རྒྱས་ཤིང་འཕེལ་བར་བསྔོ། །སེམས་ཅན་ཐམས་ཅད་བདེ་གྱུར་ཅིག །ཀུན་ཀྱང་གནོད་པ་རྣམས་དང་བྲལ། །ཡང་ནི་དེ་བཞིན་གཤེགས་བསྔགས་པའི། །འདོད་པ་ཕུན་སུམ་ཚོགས་གྱུར་ཅིག །ཡང་ནི་སེམས་ཅན་ཐམས་ཅད་ཀྱང་། །བསམ་པ་ཡིད་བཞིན་འགྲུབ་གྱུར་ཅིག །བྱོལ་སོང་གཅིག་ལ་གཅིག་ཟ་བའི། །གནོད་པ་དེ་དང་ཡོང་མི་འབྱུང་། །ཡི་དྭགས་རྣམས་ལ་
ཟས་སྐོམ་སོགས། །ཐོགས་པ་མེད་པར་འབྱུང་གྱུར་ཅིག །སེམས་ཅན་དམྱལ་བའི་སྡུག་བསྔལ་གང་། །མི་བཟང་རྣམ་པ་སྣ་ཚོགས་པ། །བསོད་ནམས་བྱིན་པའི་བྱིན་རླབས་ཀྱིས། །དེ་དག་མྱུར་དུ་ཞི་གྱུར་ཅིག །སའམ་མཁའ་ལ་འཁོད་པ་ཡི། །ལྷ་ཀླུ་གནོད་སྦྱིན་དྲི་ཟ་དང་། །འབྱུང་པོ་མང་པོ་གང་འཁོད་པ། །དགེ་བའི་བསམ་པ་རྫོགས་གྱུར་ཅིག །དེ་ནས་ཆོས་ཀྱི་སྦྱིན་པ་ནི། །ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །དེ་ལ་འགོགས་པ་གང་ཡིན་པ། །དགེ་སྦྱོང་ཆེན་པོས་དེ་སྐད་གསུངས། །སྡིག་པ་ཅི་ཡང་མི་བྱ་སྟེ། དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །ཞེས་སོགས་ཞལ་ནས་གསུངས་པའི་ཚིགས་བཅད་ཅི་ལྟར་རིགས་པ་བརྗོད་ནས། དེ་ལྟར་ཆོས་དང་ཟང་ཟིང་གི་སྦྱིན་པ་རྣམ་པ་གཉིས་བྱིན་པ་ལ་བརྟེན་ནས་བདག་སོགས་སེམས་ཅན་ཐམས་ཅད་ཀྱི་སྒྲིབ་པ་རྣམ་པ་གཉིས་
བྱང་ཞིང་ཚོགས་གཉིས་རྫོགས་ཏེ་བླ་ན་མེད་པའི་བྱང་ཆུབ་ཀྱི་གོ་འཕང་འགྲུབ་པར་གྱུར་ཅིག །ཅེས་དང་། ནོངས་པ་བཤགས་པའི་ཕྱིར། ༀ་བཛྲ་ས་ཏྭ་སོགས་ཡི་གེ་བརྒྱ་པ་ཚར་གཅིག་བཀླག་ཅིང་གནས་ལུགས་ཀྱི་དོན་དྲན་བཞིན་པས། བསོད་ནམས་འདི་ཡིས་སོགས་སྨོན་ལམ་གཞན་ཡང་གདབ་པར་བྱའོ། །དེ་ལྟར་འཇམ་དཔལ་ཁྲི་དྲུག་སྟོང་པའི་རྒྱུད་ཀྱི་ཞི་བའི་རྟོག་པ་རྣམས་ལས་བཏུས་པར་གཏོར་མའི་ལས་རིམ་གྱིས་འགྲེལ་བར། མཆན། བཤད་པའི་གཏོར་མ་གཏོང་བའི་ཚུལ་འདི་ནི། བླ་མ་རྣམས་ཀྱི་ཕྱག་བཞེས་མི་འདྲ་བ་འགའ་ཞིག་སྣང་ནའང་། ཛ་ཡ་སེ་ནས་མཛད་པའི་ཆུ་གཏོར་གྱི་གཞུང་གཙོ་བོར་བྱས་ཤིང་། ཤཱཀྱ་མི་ཏྲ་དང་། བིནྡ་ཛྙཱ་ནས་མཛད་པའི་འགྲེལ་པ་གཉིས་དང་། མི་བསྐྱོད་རྡོ་རྗེས་མཛད་པའི་གཏོར་མ་ཆེན་པོའི་ལས་རིམ་གྱི་འགྲེལ་པ་རྣམས་དང་ཡང་གོ་བསྟུན་ནས་སྙོམ་ལས་པ་བསྟན་པའི་ཉིན་བྱེད་ཀྱི་སྦྱར་བའོ།། །།གཏོར་མ་བརྒྱ་བརྩའི་རིམ་པ་ནི། སངས་རྒྱས་ཆོས་ ཚོགས་ཀྱི་སྐྱབས་འགྲོ་སེམས་བསྐྱེད་བྱས་ནས། ཆོས་རྣམས་ཐམས་ཅད་སྟོང་པར་གྱུར། །དེ་ཡི་ངང་ལས་སྐད་ཅིག་གིས། །པད་ཟླའི་སྟེང་དུ་རང་ཉིད་ནི། །ཐུགས་རྗེ་ཆེན་པོ་སྐུ་མདོག་དཀར། །
ཞལ་གཅིག་ཕྱག་གཉིས་གཡས་པ་ཡིས། །མཆོག་སྦྱིན་གཡོན་པས་ཨུཏྤལ་འཛིན། །རྡོ་རྗེ་སྐྱིལ་ཀྲུང་གིས་བཞུགས་པ། །ཡིད་འོང་རྒྱན་དང་ལྡན་པར་གྱུར། །ༀ་བཛྲ་ཨ་མྲཱྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། ༀ་སྭ་བྷཱ་ཝ་ཤུདྡྷཱཿསརྦ་དྷརྨཿསྭ་བྷཱ་ཝ་ཤུདྡྷོ྅ཧཾ། རིན་ཆེན་སྣོད་ཀྱི་ནང་དུ་ནི། །གཏོར་མ་དམ་ཚིག་བདུད་རྩིར་གྱུར། །ༀ་ཨཱཿཧཱུྃ། རང་གི་ལག་མཐིལ་ཟླ་བའི་སྟེང་། །འབྲུ་གསུམ་ཞུ་བའི་བདུད་རྩིར་གྱུར། །ༀ་ཨཱཿཧཱུྃ། ཟླ་བ་ཡིག་འབྲུ་ཞུ་བའི་རྒྱུན། །གཏོར་མའི་ནང་དུ་བབས་པ་ལས། གཏོར་མ་ཡེ་ཤེས་བདུད་རྩིར་གྱུར། །བླ་མ་བརྒྱུད་པར་བཅས་རྣམས་དང་། །ཡི་དམ་དཀྱིལ་འཁོར་ལྷ་ཚོགས་དང་། །སངས་རྒྱས་བྱང་སེམས་མ་ལུས་ལ། །བདུད་རྩི་གཏོར་མ་འདི་འབུལ་ལོ། །ༀ་གུ་རུ་སརྦ་ཏ་ཐཱ་ག་ཏ་ཨཱརྒྷཾ་པྲ་ཏཱིཙྪ ་པཱུ་ཛ་མེ་གྷ་ས་མུ་དྲ་སྥར་ཎ་ས་མ་ཡེ་ཨཱཿཧཱུྃ། པུཥྤཾ། དྷཱུ་པཾ། ཨཱ་ལོ་ཀཾ། གནྡྷཾ། ནཻ་ཝི་དྱ། ཤབྡ་སོགས། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ༀ་སམྦྷ་ར་སམྦྷ་ར་ཧཱུྃ།
མཉེས་ཤིང་ཚིམ་ནས་བྱིན་གྱིས་རློབས། །ཞེས་སམ། མཉེས་ཤིང་ཚིམ་ནས་སེམས་ཅན་ཀུན། །སྡིག་སྤང་དགེ་སྒྲུབ་བདེ་དང་ལྡན། །སྡུག་བསྔལ་དང་བྲལ་སྒྲིབ་གཉིས་བྱང་། །བྱང་ཆུབ་ཐོབ་པར་བྱིན་གྱིས་རློབས། །སྐུ་གསུང་ཐུགས་དང་ཡོན་ཏན་དང་། །ཕྲིན་ལས་མགོན་པོ་མ་ལུས་དང་། །རང་བྱུང་རྒྱལ་མོ་འཁོར་བཅས་ལ། །བདུད་རྩི་གཏོར་མ་འདི་འབུལ་ལོ། །ༀ་མ་ཧཱ་ཀཱ་ལ་རེ་མ་ཏི་ཨཱརྒྷཾ་སོགས། ན་མཿསརྦ་ཏ་ཐཱ་ག་ཏ་སོགས། མཉེས་ཤིང་ཚིམ་ནས་བསྟན་པ་སྲུངས། ཞེས་སམ། མཉེས་ཤིང་ཚིམ་ནས་བསྟན་པ་སྲུངས། །བསྟན་འཛིན་སྐུ་ཚེ་ཕྲིན་ལས་སྤེལ། །རྣལ་འབྱོར་བདག་ཅག་འཁོར་བཅས་ཀྱི། །བར་ཆད་སོལ་ལ་ཕྲིན་ལས་སྒྲུབས། །དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །གཟུགས་དམ་པ་ལ་ཕྱག་འཚལ་ལོ། །སྐུ་འབྱམས་ཀླས་ལ་ཕྱག་འཚལ་ལོ། །འཇིགས་པ་ཐམས་ཅད་དང་བྲལ་བ་ལ་ཕྱག་འཚལ་ལོ། །ཚངས་དང་བརྒྱ་བྱིན་
རྒྱལ་ཆེན་བཞི། །ཕྱོགས་སྐྱོང་བཅུ་དང་གཙང་རིས་ཀྱི། །མགོན་པོ་བདུན་ཅུ་རྩ་ལྔ་ལ། བདུད་རྩི་སོགས། ན་མཿསརྦ་སོགས། མཉེས་ཤིང་ཚིམ་ནས་དངོས་གྲུབ་སྩོལ། །ཞེས་སམ། མཉེས་ཤིང་ཚིམ་ནས་འཇིག་རྟེན་བདེ། །དམ་ཆོས་བསྲུང་ཞིང་སྐྱོང་བ་དང་། །ཕྱོགས་བཅུ་ཡུལ་དུས་གནས་སྐབས་ཀུན། །དགེ་ཞིང་བདེ་བའི་དངོས་གྲུབ་སྩོལ། །ལྷ་ཡི་རིག་འཛིན་དྲང་སྲོང་དང་། །གྲུབ་པ་ཕོ་མོ་བྲམ་ཟེ་སོགས། །བདེན་པ་གྲུབ་པ་མ་ལུས་ལ། །བདུད་རྩི་སོགས། ན་མཿསརྦ་སོགས། མཉེས་ཤིང་ཚིམ་ནས་སྨོན་ལམ་མཛོད། ཅེས་སམ། མཉེས་ཤིང་ཚིམ་ནས་མི་དགྱེས་དང་། །དམོད་པ་སྤོངས་ལ་ལུས་ཅན་ཀུན། །བདེ་སྐྱིད་བདག་ཅག་ཆོས་ལྡན་གྱི། །བསམ་པ་འགྲུབ་པའི་སྨོན་ལམ་མཛོད། །རང་ལ་རིགས་ཀྱི་འགོ་བ་ཡི། །ལྷན་ཅིག་སྐྱེས་པའི་ལྷ་རྣམས་དང་། །མཉམ་པར་འོངས་པའི་བདུད་རྣམས་ལ། །བདུད་རྩི་སོགས། ན་མཿསརྦ་སོགས། མཉེས་ཤིང་ཚིམས་ནས་འགལ་རྐྱེན་
སོལ། །ཞེས་སམ། མཉེས་ཤིང་ཚིམ་ནས་ལྷན་སྐྱེས་ཀྱི། ལྷ་ཡིས་སྲུང་སྐྱོབ་སྟོང་གྲོགས་མཛོད། །བདུད་ཀྱི་བར་ཆད་མ་བྱེད་པར། །ཐམས་ཅད་བདེ་ལ་སྤྱོད་གྱུར་ཅིག །འགྲོ་བ་རིགས་དྲུག་ལམ་རྒྱུད་ལྔ། །སྐྱེ་གནས་རྣམ་པ་བཞིས་བསྡུས་པའི། །མཁའ་མཉམ་སེམས་ཅན་མ་ལུས་ལ། །བདུད་རྩི་སོགས། ན་མཿསརྦ་སོགས། མཉེས་ཤིང་ཚིམ་ནས་སྡུག་བསྔལ་ལས། །རྣམ་པ་ཀུན་ཏུ་ཐར་གྱུར་ཅིག །ཅེས་སམ། མཉེས་ཤིང་ཚིམ་ནས་རིགས་དྲུག་པོ། །སོ་སོའི་སྡུག་བསྔལ་མ་ལུས་ཞི། །དགེ་ལ་སྤྱོད་ཅིང་བདེ་ལྡན་ནས། །འཁོར་བའི་མཚོ་ལས་ཐར་གྱུར་ཅིག །ཀླུ་རྒྱལ་དགའ་བོ་ཉེར་དགའ་སོགས། །ཀླུ་ཆེན་བརྒྱད་ཀྱིས་གཙོ་བྱས་པའི། །ཀླུ་དང་ས་བདག་ཐམས་ཅད་ལ། །བདུད་རྩི་སོགས། ན་མཿསརྦ་སོགས། མཉེས་ཤིང་ཚིམ་ནས་གནོད་སེམས་ཞི། །བྱེ་ཚན་ཆར་ཡང་མེད་པར་ཤོག །ཅེས་སམ། མཉེས་ཤིང་ཚིམ་ནས་གནོད་འཚེ་ཞི། །མཁའ་ལྡིང་བྱེ་ཚན་ཆར་
ལ་སོགས། །འཚེ་བ་མེད་ཅིང་འཇིག་རྟེན་ཁམས། །ཆར་ཆུ་འབྲུ་འཕེལ་བདེ་ལེགས་མཛོད། །ཕྱི་དང་ནང་གི་སྒྲིབ་པ་ཅན། །མཁའ་ལ་རྒྱུ་བ་འབྱུང་པོའི་རིགས། །ཡི་དྭགས་རྣམས་ནི་མ་ལུས་ལ། །བདུད་རྩི་སོགས། ན་མཿསརྦ་སོགས། མཉེས་ཤིང་ཚིམ་ནས་གནོད་སེམས་ཞི། །བཀྲེས་དང་སྐོམ་པ་མེད་པར་ཤོག །ཅེས་སམ། མཉེས་ཤིང་ཚིམ་ནས་གནོད་སེམས་ཞི། །ཕྱི་ནང་བཀྲེས་སྐོམ་སྡུག་བསྔལ་བྲལ། །སེར་སྣ་ལ་སོགས་སྤངས་ནས་ཀྱང་། །མཐོ་རིས་ཐར་པའི་བདེ་ཐོབ་ཤོག །ཚེ་རབས་ཐོག་མ་མེད་པ་ནས། །ཟས་ནོར་སྲོག་གི་ལན་ཆགས་དང་། །བུ་ལོན་ཤ་ཁོན་ཐམས་ཅད་ལ། །བདུད་རྩི་སོགས། །ན་མཿསརྦ་སོགས། མཉེས་ཤིང་ཚིམ་ནས་བུ་ལོན་དང་། །ཤ་ཁོན་ཐམས་ཅད་ཞི་གྱུར་ཅིག །ཅེས་སམ། མཉེས་ཤིང་ཚིམ་ནས་བུ་ལོན་དང་། །ཤ་ཁོན་གནོད་པའི་བསམ་སྦྱོར་ཞི། །ལན་ཆགས་ཐམས་ཅད་འཁོར་གྱུར་ནས། །ཐམས་ཅད་བདེ་དགེ་ལྡན་གྱུར་ཅིག །བརྟན་
མ་བཅུ་གཉིས་གནོད་སྦྱིན་ལྔ། །རི་རབ་རི་བདུན་རོལ་མཚོ་སོགས། །འཇིག་རྟེན་འདིར་གནས་བཞི་བདག་ལ། །བདུད་རྩི་སོགས། ན་མཿསརྦ་སོགས། མཉེས་ཤིང་ཚིམ་ནས་ཡུལ་ཕྱོགས་ཀུན། །བདེ་ལེགས་ཕུན་སུམ་ཚོགས་པར་མཛོད། །ཅེས་སམ། མཉེས་ཤིང་ཚིམ་ནས་འཇིག་རྟེན་ཁམས། །དགྲ་འཁྲུག་ལོ་ཉེས་ནད་ཡམས་ཞི། །ཆར་ཆུ་དུས་འབེབས་ལོ་འབྲས་ལེགས། །ཐམས་ཅད་བདེ་བའི་ཕྲིན་ལས་མཛོད། །ཁྱད་པར་ཡུལ་དང་གྲོང་འདིའི་ལྷ། །ང་ཆེ་སྙམ་པའི་ང་རྒྱལ་ཅན། །གཉུག་མར་གནས་པ་མ་ལུས་ལ། །བདུད་རྩི་སོགས། ན་མཿསརྦ་སོགས། འགལ་རྐྱེན་བར་ཆད་ཞི་བ་དང་། །མཐུན་རྐྱེན་བསམ་པ་འགྲུབ་པར་མཛོད། །ཅེས་སམ། མཉེས་ཤིང་ཚིམ་ནས་གནས་འདི་དགེ །བདག་ཅག་སྤྱོད་ལམ་གནས་སྐབས་ཀུན། །འཚེ་བ་མེད་ཅིང་བདེ་ལེགས་ཚོགས། །འབྱུང་བའི་ཕྲིན་ལས་སྟོང་གྲོགས་མཛོད། །གློ་བུར་དུ་ནི་ལྷགས་གྱུར་པ། །གཏོར་
མ་འདོད་ལ་མ་ཐོབ་པའི། ཁས་ཉེན་དབང་ཆུང་ཐམས་ཅད་ལ། །བདུད་རྩི་སོགས། ན་མཿསརྦ་སོགས། རང་རང་སྡུག་བསྔལ་ལས་གྲོལ་ནས། །མྱུར་དུ་སངས་རྒྱས་ཐོབ་པར་ཤོག །ཅེས་སམ། མཉེས་ཤིང་ཚིམ་ནས་དུས་ཀུན་ཏུ། །སྐལ་པ་ཕུན་ཚོགས་ཐོབ་པ་དང་། །དགེ་སྡིག་སྤང་བླང་བསྒྲུབས་ནས་ཀྱང་། །མངོན་མཐོ་ངེས་ལེགས་ཐོབ་པར་ཤོག །ཅེས་པ་འདོད་གསོལ་ཕྱི་མ་ཚིག་རྐང་བཞི་པོ་འདི་རྣམས་ཆོས་མཛད་བསྐུར་བའི་ངོར་ཤཱཀྱའི ་དགེ་སློང་ཆོས་ཀྱི་དབང་ཕྱུག་གིས་བྲིས། བདག་གི་བསམ་པའི་སྟོབས་དག་དང་། །དེ་བཞིན་གཤེགས་པའི་བྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །འཕགས་པ་རྣམས་ལ་མཆོད་པ་དང་། །སེམས་ཅན་ཀུན་ལ་ཕན་གདགས་ཕྱིར། །དོན་རྣམས་གང་དག་བསམས་པ་ཀུན། །དེ་དག་ཐམས་ཅད་ཅི་རིགས་པ། །འཇིག་རྟེན་ཁམས་ནི་མ་ལུས་པར། །ཐོགས་པ་མེད་པར་འབྱུང་བར་ཤོག །ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་
གཤེགས་པས་གསུངས། །དེ་ལ་འགོག་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུང་། །སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་བསགས་ཏེ། །བསོད་ནམས་ཡེ་ཤེས་ལས་བྱུང་བ། །དམ་པ་གཉིས་ནི་ཐོབ་པར་ཤོག །ཅེས་སོ། །བྱིན་རླབས་དང་དེ་བཞིན་གཤེགས་པའི་མཚན་བར་བར་དུ་བརྗོད་པ་མཐོང་བ་བརྒྱུད་པ་ལས་ཤེས་པར་བྱའོ། །ཞེས་ཤཱཀྱ ་དགེ་སློང་དཀོན་མཆོག་འབངས་ཀྱིས་སྦྱར་བའོ།། །།གཏོར་མ་ཆ་བཅུའི་ལྷན་ཐབས་ལ། སྐྱབས་འགྲོ་སེམས་བསྐྱེད་རྒྱས་པའམ། བསྡུ་ན་སངས་རྒྱས་ཆོས་ཚོགས་མས་ཆོག །དེའི་རྗེས་སུ་དོན་བཞི་སྟེ། བདག་བསྒྲུབ་པ། རྫས་བསྒྲུབ་པ། མགྲོན་བསྒྲུབ་པ། མགྲོན་ལ་འབུལ་བའི་རིམ་པའོ། །བདག་བསྒྲུབ་པ་ནི་ཐུགས་རྗེ་ཆེན་པོར་བསྒོམ་པའོ། །རྫས་བསྒྲུབ་པ་ནི་མངར་གསུམ་དཀར་གསུམ་ལ་སོགས་པ་ཤ་ཆང་སྒོག་གསུམ་མ་འདྲེས་པ་དང་། གཏོར་མའི་རྒྱུ་རྩམ་པ་ལ་སོགས་པ་རིན་པོ་ཆེའི་སྣོད་དམ། གང་ཡང་རུང་བའི་སྣོད་དུ་
བཅའ་ཞིང་སྟེགས་ཀྱི་ཁར་བཞག་ནས་གཞུང་བཞིན་བསྒོམ་པའོ། །མགྲོན་བསྒྲུབ་པ་ནི། བསྡུས་པར་ན། བླ་མ་བརྒྱུད་པར་བཅས་རྣམས་དང་། །ཞེས་སོགས་མཆོད་སྦྱིན་གྱི་ཡུལ་བརྗོད་པའི་སྐབས་སུ་སོ་སོར་མདུན་གྱི་ནམ་མཁའ་དང་ས་གཞིར་བྱོན་པར་བསམ་པ་ཉིད་དོ། །རྒྱས་པར་ན། གཏོར་མ་ཡེ་ཤེས་བདུད་རྩིར་གྱུར། ཅེས་པའི་རྗེས་སུ། ཧཱུྃ་བཞེངས་ཤིག་བཞེངས་ཤིག་སྟོབས་བཅུ་མངའ་བའི་ལྷ། །ཞེས་སོགས་ཤློ་ཀ་གཅིག་གི་མཐར། བཛྲ་ས་མཱ་ཛཿ ཞེས་པས་སྤྱན་དྲངས། བཅོམ་ལྡན་འདིར་ནི་བྱོན་པ་ལེགས། །ཞེས་ཤློ་ཀ་གཉིས་ཀྱི་མཐར། ༀ་སརྦ་ཏ་ཐཱ་ག་ཏ་པདྨ་ཀ་མ་ལཱ་ཡ་སྟྭཾ་ཞེས་བཞུགས་སུ་གསོལ། དེ་ནས་ཡན་ལག་བདུན་པ་རྒྱས་བསྡུས་གང་རུང་ཞིག་བྱ། བཞི་པ་མགྲོན་ལ་འབུལ་བའི་རིམ་པ་ནི། བླ་མ་བརྒྱུད་པར་བཅས་རྣམས་དང་། །ཞེས་སོགས་སོ། །ཆ་གཉིས་པ་ཆོས་སྐྱོང་སྲུང་མ་མན་ཆད་ལ་སྤྱན་འདྲེན་བཞུགས་གསོལ་སོགས་སྦྱར་མི་དགོས་ཤིང་། སོ་སོའི་མཚན་ནས་བརྗོད་པའི་ཚེ། སྐད་ཅིག་གིས་མདུན་དུ་བྱོན་པར་བསམ་པ་ཉིད་དོ། །དེ་ནས་མཐར་གཤེགས་གསོལ་སྤྲོ་ན། དམ་པ་གཉིས་ནི་ཐོབ་པར་ཤོག །ཅེས་པའི་རྗེས་སུ། ༀ་ཁྱེད་ཀྱིས་སེམས་ཅན་དོན་ཀུན་
མཛད། ཅེས་པ་ནས། བཛྲ་མུཿཞེས་པས་ཡེ་ཤེས་པ་དང་། མཆོད་སྦྱིན་གནས་འདིར་གང་ལྷགས་པ། ཞེས་པ་ནས། སརྦ་བྷཱུ་ཏ་གཙྪས་འཇིག་རྟེན་པ་རྣམས་གཤེགས་སུ་གསོལ། ཞེས་པ་ཞྭ་དམར་པ་ལྔ་པས་སོ།། །།དཀར་ཆ་ལྔའི་རིམ་པ་ནི། ༀ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། ༀ་སྭ་བྷཱ་ཝ་ཤུདྡྷཱཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ༀ་ཨཱཿཧཱུྃ། རང་གི་སྙིང་གའི་འོད་ཟེར་གྱིས། །བཅོམ་ལྡན་མི་གཡོ་སྐུ་མདོག་སྔོ། །ཞལ་གཅིག་ཕྱག་གཉིས་གཡས་རལ་གྲི། །གཡོན་གྱིས་ཞགས་པ་པད་ཉི་ཡི། །གདན་ལ་བཞུགས་པ་སྤྱན་དྲངས་ཤིང་། །དེ་ཡིས་གཏོར་མ་གསོལ་བར་གྱུར། ༀ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། ཅེས་པ་བདུན་གྱི་མཐར། ཨཪྻ་ཨ་ཙ་ལ་ས་པ་རི་ཝཱ་ར་ཨི་དཾ་བ་ལིཾ་ཁ་ཁ་ཁཱ་ཧི་ཁཱ་ཧི། ཨཱརྒྷཾ་སོགས། ཀྱེ་ཀྱེ་མཐའ་གཉིས་རྣམ་པར་མ་གཡོས་ཀྱང་། །མཐའ་བྲལ་བདེ་ཆེན་ཁྲོ་བོའི་རྒྱལ་པོ་ནི། །སྤྲུལ་པའི་གཟུགས་ཀྱིས་འགྲོ་དོན་དཔག་མེད་མཛད། །འཇིགས་བྱེད་ཆེན་པོས་འགྲོ་བ་ཀུན་
སྒྲོལ་ཞིང་། །སྲིད་པ་གསུམ་ན་དགྱེས་པའི་གར་མཛད་པ། །སྲིད་པའི་ཆུ་བོ་སྐེམ་ཞིང་བདུད་རྣམས་འཇོམས། །སྲིད་པའི་རླུང་གིས་མི་གཡོ་ཐུགས་རྗེའི་མགོན། །རབ་བརྗིད་མི་གཡོ་མགོན་ལ་ཕྱག་འཚལ་ལོ། །བཅོམ་ལྡན་མགོན་པོ་མི་གཡོ་བས། །བདག་སོགས་སེམས་ཅན་ཐམས་ཅད་ཀྱི། །བདུད་བཞིའི་བར་གཅོད་བསལ་དུ་གསོལ། །དངོས་གྲུབ་མ་ལུས་སྩལ་དུ་གསོལ། །རང་གི་སྙིང་གའི་འོད་ཟེར་གྱིས། །བཅོམ་ལྡན་སྒྲོལ་མ་སྐུ་མདོག་སྔོ། །ཞལ་གཅིག་ཕྱག་གཉིས་གཡས་མཆོག་སྦྱིན། །གཡོན་གྱིས་ཨུཏྤལ་པད་ཟླ་ལ། །བརྐྱང་བསྐུམ་གྱིས་བཞུགས་སྤྱན་དྲངས་ཤིང་། །དེ་ཡིས་གཏོར་མ་གསོལ་བར་གྱུར། །ན་མཿསརྦ་བུདྡྷ་བོ་དྷི་ས་ཏྭཱ་ནཱཾ་ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཧེ་ཧེ་བྷ་ག་ཝ་ཏི་མ་ཧཱ་ས་ཏྭ་སརྦ་བུདྡྷ་ཨ་ཝ་ལོ་ཀི་ཏེ། མཱ་བི་ལཾ་བ་མཱ་བི་ལཾ་བ། ཨི་དཾ་བ་ལིཾ། གྲྀ་ཧྞཱ་པ་ཡ་གྲྀ་ཧྞཱ་པ་ཡ། སརྦ་བི་སཉྩ་རི་སྭཱ་ཧཱ། ཨཱརྒྷཾ་སོགས། ལྷ་དང་ལྷ་མིན་ཅོད་པན་གྱིས། །ཞབས་ཀྱི་
པདྨོ་ལ་བཏུད་དེ། །ཕོངས་པ་ཀུན་ལས་སྒྲོལ་མཛད་མ། །སྒྲོལ་མ་ཡུམ་ལ་ཕྱག་འཚལ་ལོ། །བཅོམ་ལྡན་འཕགས་མ་སྒྲོལ་མ་ཡིས། །བདག་སོགས་འགྲོ་རྣམས་འཇིགས་པ་ཆེ། །བརྒྱད་དང་བཅུ་དྲུག་དག་ལས་སྐྱོབས། །སྲིད་པའི་མཚོ་ལས་བསྒྲལ་དུ་གསོལ། །ༀ་བཛྲ་ཡཀྵ་ཧཱུྃ། ༀ་བཛྲ་ཛྭ་ལ་ཨ་ན་ལ་ཧ་ན་ད་ཧ་པ་ཙ་མ་ཐ་བྷ་ཉྫ་ར་ཎ་ཧཱུྃ་ཕཊ། །མི་གཙང་བ་རྣམས་རབ་བསྲེགས་ནས། །སྣོད་ནི་བདུད་རྩིས་གང་བར་གྱུར། །ༀ་ཨ་ཀཱ་རོ་མུ་ཁཾ་སརྦ་དྷརྨ ་ཎཱཾ་ཨརྱ་ནུཏྤནྣ་ནུ་ཏྭཱ་ཏ་ༀ་ཨཱཿཧཱུྃ་ཕཊ་སྭཱ་ཧཱ། འདོད་ཡོན་དུ་མས་གང་བར་གྱུར། །སྙིང་གའི་འོད་ཀྱིས་སྤྱན་འདྲེན་པ། །འདོད་རྒྱལ་གྱི་ཕྱག་རྒྱས། ༀ་བ་ཏ་ལི་བ་ཏ་ལི་མ་ཧཱ་བ་ཏ་ལི་ཧཱུྃ་ཧཱུྃ་ཛཿཛཿསྭཱ་ཧཱ། ༀ་ཀླུ་རྒྱལ་མཐའ་ཡས་ནོར་རྒྱས་བུ། །འཇོག་པོ་དང་ནི་སྟོབས་ཀྱི་རྒྱུ། །པདྨ་པདྨ་ཆེན་པོ་དང་། །དུང་སྐྱོང་དང་ནི་རིགས་ལྡན་ནོ། །ལྷ་མོ་ལྷ་མོ་ཆེན་པོ་དང་། །ཟླ་བའི་སྤྱི་གཙུག་སྤྱི་གཙུག་ཆེ། །དབྱུག་འཛིན་དབྱུག་
འཛིན་ཆེན་པོ་དང་། །སོག་མ་མེད་དང་ཧུ་ལུནྟ། །དགའ་བོ་དང་ནི་ཉེར་དགའ་བོ། །རྒྱ་མཚོ་རྒྱ་མཚོ་ཆེན་པོ་དང་། །ཚ་བ་ཚ་བ་ཆེན་པོ་དང་། །དཔལ་གྱི་འོད་དང་འོད་པོ་ཆེ། །རིན་ཆེན་འོད་དང་གཟུགས་མཛེས་དང་། །གཟུགས་མཛེས་ཆེན་པོ་སྤྲུལ་བཟང་དང་། །ལྟོ་འཕྱེ་ཆེན་པོ་ཚི་ལི་དང་། །ཚི་ལི་ཆེན་པོ་རྣམས་ལ་སོགས། །མཆོད་པའི་གནས་འདིར་གཤེགས་སུ་གསོལ། །ༀ་ཨཱ་གཙྪ་ཨ་གཙྪ། མ་ཧཱ་ནཱ་ག་ཨཱངྷི་པ་ཏ་ཡེ་བྷུརྦྷུ་ཝ། ཕྲུཾ་ཕྲུཾ་སྭཱ་ཧཱ། པདྨ་ཀ་མ་ལཱ་ཡ་སྟཾ། མ་ཧཱ་ནཱ་ག་ཨ་དྷི་པ་ཏ་ཡེ་གྲྀཧྞེ་དཾ་ཨཱརྒྷཾ་སོགས། ༀ་ཧི་ལི་ཧི་ལི་མ་ཧཱ་ཧི་ལི་ཕྲུཾ་ཕུཿསྭཱ་ཧཱ། སེ་གོལ་གཏོགས། ༀ་བྷཀྵ་ཡ་བྷ ཀྵ་ཡ་ས་མ་ཡ་ཏིཥྛ་ཕྲུཾ་ཕུ་ཧཱུྃ་སྭཱ་ཧཱ། སྡིག་པ་ཅི་ཡང་མི་བྱ་ཞིང་། སོགས་བརྗོད། སྤྱིར་དུ་ཀླུ་རྣམས་མ་ལུས་དང་། །ཁྱད་པར་བདག་སོགས་ལ་གནོད་པའི། །སེམས་ལྡན་ཐམས་ཅད་ཚིམ་གྱུར་ནས། །ཕན་པའི་སེམས་དང་ལྡན་གྱུར་ཅིག །ༀ་ནཱ་ག་ཨ་དྷི་པ་ཏི་ས་པ་རི་ཝཱ་ར་གཙྪ། བྱ་ཁྱུང་གི་ཕྱག་རྒྱས། ༀ་
ག་རུ་ཌ་ཧཾ་ས་ཧེ་ཙ་ལེ་ཙ་ལེ་སྭཱ་ཧཱ། །རང་ཉིད་རིན་ཆེན་གཟུགས་མཛེས་ནི། །མཆོག་གི་སྤྲུལ་སྐུའི་རྣམ་པར་གྱུར། ༀ་ཨཱཿཧཱུྃ། གཏོར་མ་བདུད་རྩིའི་རྒྱ་མཚོ་འདི། །ཡི་དྭགས་རྣམས་ལ་སྦྱིན་པར་བྱ། །ན་མཿསཱུ་རཱུ་པཱ་ཡ། ཏ་ཐཱ་ག་ཏཱ་ཡ། ཨཱརྷ་ཏེ། སམྱ ཀྶཾ་བུདྡྷ་ཡ། ཏདྱ་ཐཱ། ༀ་སུ་རུ་སུ་རུ། པྲ་སུ་རུ་པྲ་སུ་རུ། ཏ་ར་ཏ་ར། བྷ་ར་བྷ་ར། སཾ་བྷ་ར་སཾ་བྷ་ར། སྨ་ར་སྨ་ར། སནྟ་ར་པ་ཡ་སནྟ་ར་པ་ཡ། སརྦ་པྲེ་ཏཱ་ནཱཾ་སྭཱ་ཧཱ། ཞེས་བདུན་དང་སེ་གོལ་ལན་གསུམ་བྱའོ། །ཨ་པ་ས་རཏྟུ་ཨ་ཝ་ཏ་ར། པྲེ ཀྵི་ཎོ་ད་དཱ་མྱ་ཧཾ་སརྦ་ལོ་ཀ་དྷཱ་ཏུ་པཱ་སི་ནཱཾ། པྲེ་ཏཱ་ནཱ་མ་ཧཱ་རཾ། ཡི་དྭགས་ཐམས་ཅད་བཟའ་བཏུང་གིས། །ཚིམ་ནས་བཀྲེས་དང་སྐོམ་པ་དང་། །དབུལ་ཕོངས་སྡུག་བསྔལ་ལས་གྲོལ་ནས། །རྣམ་མཁྱེན་སངས་རྒྱས་ཐོབ་གྱུར་ཅིག །དཀར་ཆ་བཞི་བྱེད་ན་འདི་ཡན་བྱ། ལྔ་བྱེད་ན་གཞི་བདག་ལ་བརྒྱ་རྩ་ནས་འབྱུང་བ་ལྟར་བསྔོའོ།། །།མི་གཡོ་བ་དྲུག་ཅུ་རྩ་བཞི་པ་གཏོང་ན། ཟན་བཅུ་དྲུག་བཞི་བཞིར་བྱས་ནས་མི་གཡོ་བའི་ལྟར་རོ།། །།སྒྲོལ་མ་ཉི་ཤུ་རྩ་
གཅིག་པ་གཏོང་ན། ཟན་བདུན་གསུམ་གསུམ་བྱས་ནས་སྒྲོལ་མའི་ལྟར་རོ། །ཞེས་པ་འདི་ཞྭ་དམར་པ་ལྔ་པས་སྦྱར་བའོ།། །།འབྲུལ་གཏོར་ཆ་ལྔའི་རིམ་པ་ནི། གཏོར་ཐེབ་ལྔའི་དང་པོ་དང་གཉིས་པར་རིལ་བུ་ཉེར་གཅིག་རེ། གཞན་གསུམ་ལ་བདུན་རེ་བླུགས་པའི་དང་པོ་བླ་མ་ཡི་དམ་ལོངས་སྤྱོད་རྫོགས་སྐུའི་ཆ་ལུགས་ཅན་རྣམས་ལ་འབུལ་བ་ནི། ༀ་བཛྲ་ཨ་མྲྀ་ཏ་དང་། སྭ་བྷཱ་ཝས་བསངས་སྦྱངས། རང་བཞིན་སྟོང་པའི་ངང་ཉིད་ལས། །ཨ་ཡིག་ལས་བྱུང་པད་སྣོད་དུ། །རང་ལུས་སྟོད་ཀྱི་ཆ་ཤས་རྣམས། །འཕར་ནས་ལྷུང་བ་ཤ་ལྔ་དང་། །བདུད་རྩི་ལྔ་ཡི་རང་བཞིན་གྱུར། །ༀ་ཨཱཿཧཱུྃ། མདུན་གྱི་ནམ་མཁར་བླ་མ་དང་། །ཡི་དམ་ལྷ་ཚོགས་ཐམས་ཅད་ནི། །ལོངས་སྤྱོད་རྫོགས་དང་ཧེ་རུ་ཀའི། །རྣམ་པས་ཆར་སྤྲིན་འཁྲིགས་ལྟར་བཞུགས། ན་མཿསརྦ་ཏ་ཐཱ་ག་ཏ་ཛྙཱ་ན་ཨ་ཝ་ལོ་ཀི་ཏེ། ༀ་སམྦྷ་ར་སམྦྷ་ར་ཧཱུྃ། ༀ་མ་ཎི་པདྨེ་ཧཱུྃ། ཞེས་སྔགས་རེ་ཆུ་ཐིགས་རེ་སེ་གོལ་དེ་སྦྲག་པའི་ཉེར་གཅིག་གི་མཐར། ཨཱརྒྷཾ་སོགས་ཀྱིས་མཆོད། དེ་ལྟར་ཕུལ་བའི་དགེ་བ་འདིས། །བླ་མའི་དཀོར་འབགས་ཐུགས་དཀྲུགས་དང་།
གསུང་བཅག་ལ་སོགས་རྩ་བ་དང་། །ཡན་ལག་ཉེས་ལྟུང་དག་པར་ཤོག །གཉིས་པ་སངས་རྒྱས་བྱང་སེམས་སྤྲུལ་སྐུའི་ཆ་ལུགས་ཅན་རྣམས་ལ་འབུལ་བ་ནི། བསངས་སྦྱངས། རང་བཞིན་སྟོང་པའི་ངང་ཉིད་ལས། །བཾ་ལས་ཆུ་སྐྱེས་སྣོད་ནང་དུ། །རང་ལུས་བར་གྱི་ཆ་ཤས་རྣམས། །འཕར་ནས་ལྷུང་བ་དཀར་གསུམ་དང་། །མངར་གསུམ་འདྲེས་པའི་བདུད་རྩིར་གྱུར། །ༀ་ཨཱཿཧཱུྃ། མདུན་གྱི་ནམ་མཁར་སངས་རྒྱས་དང་། །བྱང་ཆུབ་སེམས་དཔའ་ཐམས་ཅད་ནི། །སྤྲུལ་སྐུ་རབ་བྱུང་ཆ་ལུགས་ཅན། །མཁའ་ལ་སྤྲིན་འཁྲིགས་ལྟ་བུར་བཞུགས། །སྔགས་ཆུ་ཐིགས་སེ་གོལ་མཆོད་པ་སྔར་ལྟར། དེ་ལྟར་ཕུལ་བའི་དགེ་བ་འདིས། །ཕ་མ་མཁན་སློབ་མཆེད་གྲོགས་ལ། མ་གུས་པ་དང་དམ་ཆོས་སྤངས། །དཀོར་ཟོས་སྡིག་སྒྲིབ་དག་པར་ཤོག །གསུམ་པ་བགེགས་རིགས་ལན་ཆགས་ལ་སྦྱིན་པ་ནི། བསངས་སྦྱངས། རང་བཞིན་སྟོང་པའི་ངང་ཉིད་ལས། །ༀ་ལས་རིན་ཆེན་སྣོད་ནང་དུ། །རང་ལུས་སྨད་ཀྱི་ཆ་ཤས་
རྣམས། །འཕར་ནས་ལྷུང་བ་ལས་བྱུང་བའི། །སོ་སོའི་ཡིད་མཐུན་ལོངས་སྤྱོད་གྱུར། །ༀ་ཨཱཿཧཱུྃ། མདུན་གྱི་ས་གཞིར་གདོན་བགེགས་རྣམས། །ཉི་ཟེར་རྡུལ་ལྟར་འཁོད་པར་གྱུར། །སྔགས་ཆུ་ཐིགས་སེ་གོལ་བདུན་དང་། །དེ་བཞིན་གཤེགས་པ་བཞིའི་མཚན་བརྗོད། དེ་ལྟར་བྱིན་པའི་དགེ་བ་འདིས། །ནད་གདོན་ནོར་དང་སྲོག་རྣམས་ཀྱི། །ལན་ཆགས་བུ་ལོན་ཤ་ཁོན་ཞི། །རྫོགས་སངས་གོ་འཕང་མྱུར་ཐོབ་ཤོག །བཞི་པ་ཆུ་བདག་ཝ་རུ་ཎ་ལ་སྦྱིན་པ་ནི། །བསངས་སྦྱངས་བྱིན་རླབས་གོང་ལྟར། མདུན་གྱི་ས་གཞི་ཀླུ་ཡི་རྒྱལ། །ཝ་རུ་ཎ་ནི་སྐུ་མདོག་དཀར། །ཞལ་གཅིག་ཕྱག་བཞི་འཛུམ་མདངས་ཅན། །དང་པོའི་ཕྱག་གཉིས་ཐལ་མོ་སྦྱར། །གཡས་འོག་རིན་ཆེན་སྙེ་མ་དང་། །གཡོན་འོག་སྦྲུལ་ཞགས་དབྱུག་ཏོ་འཛིན། །འོད་ཟེར་དཀར་པོ་རབ་འཕྲོ་བའི། །ཆུ་བདག་འཁོར་བཅས་འཁོད་པར་གྱུར། །སྔགས་སོགས་གོང་ལྟར། མཆོད་སྦྱིན་གཏོར་མ་འདི་སྣོམས་ལ། །སྤྱན་རས་གཟིགས་སྔར་ཁས་བླངས་བཞིན། །སངས་རྒྱས་
བསྟན་པ་དར་བ་དང་། །སེམས་ཅན་ཐམས་ཅད་སྐྱོབ་པར་མཛོད། །ལྔ་པ་བར་དོའི་སེམས་ཅན་ལ་སྦྱིན་པ་ནི། །བསངས་སྦྱངས་སོགས་གོང་ལྟར། ལུས་ནི་རྙིང་པ་དོར་ནས་སུ། །ལུས་གཞན་གསར་པ་མ་བླངས་པའི། །དབང་མེད་བར་དོའི་སེམས་ཅན་རྣམས། །མདུན་དུ་བུ་ཡུག་འཚུབས་ལྟར་གྱུར། །སྔགས་སོགས་སྔར་ལྟར། ཁ་ཟས་བསྟབས་པ་འདི་ཡིས་མཐུས། །འཁྲུལ་སྣང་འཇིགས་སྐྲག་ཐམས་ཅད་ཞི། །བར་དོར་རང་ངོ་འཕྲོད་གྱུར་ནས། །དག་པའི་ཞིང་དུ་སྐྱེ་བར་ཤོག །བདག་གི་བསམ་པའི་སྟོབས་དག་དང་། །སོགས་བརྗོད།། །།ཆུ་གཏོར་གྱི་རིམ་པ་ནི། ཛམ་དཀར་ལ། ༀ་སྭ་བྷཱ་ཝ་ཤུདྡྷཱཿསརྦ་དྷརྨཿསྭ་བྷཱ་ཝ་ཤུདྡྷོ྅ཧཾ། རིན་ཆེན་ལྔ་ལས་གྲུབ་པ་ཡི། །གཞལ་མེད་ཁང་པའི་དབུས་སུ་ནི། །ཛམ་ལ་སྐུ་མདོག་དཀར་པོ་སྟེ། །ཞལ་གཅིག་ཕྱག་གཉིས་གཡས་བེ་ཅོན། །ཕྱག་གཡོན་ནེའུ་ལེ་བསྣམས་པ་སྟེ། །གྲུ་མོར་ཁ་ཊྭཱཾ་ག་ལྡན་པ། །དབུ་སྐྲ་དཀར་སེར་གྱེན་དུ་བརྫེས། །སྤྱན་གསུམ་
ཞལ་གདངས་རིན་ཆེན་གྱི། །རྒྱན་ལྡན་འབྲུག་ལ་ཆིབས་པའོ། །ཤར་དུ་རྡོ་རྗེ་ཌཱ་ཀི་མ། །མཐིང་ནག་གཡས་ན་རྡོ་རྗེ་དང་། །གཡོན་པས་རྟེན་འབྲེལ་ནོར་རྫས་འཛིན། །ལྷོ་རུ་རིན་ཆེན་ཌཱ་ཀི་མ། །སེར་མོ་གཡས་ན་ནོར་བུ་དང་། །གཡོན་པས་རིན་ཆེན་བུམ་པ་འཛིན། །ནུབ་ཏུ་པདྨ་ཌཱ་ཀི་མ། །དམར་མོ་གཡས་ན་པདྨ་དང་། །གཡོན་པས་འགུགས་བྱེད་ལྕགས་ཀྱུ་འཛིན། །བྱང་དུ་ལས་ཀྱི་ཌཱ་ཀི་མ། །ལྗང་གུ་རྡོ་རྗེ་རྒྱ་གྲམ་གཡས། །གཡོན་པ་ནེའུ་ལེའི་རྐྱལ་པ་འཛིན། །ཀུན་ཀྱང་རིན་ཆེན་རྒྱན་ལྡན་ཞིང་། །ཕྱེད་བསྐུམ་ཚུལ་གྱིས་བཞུགས་པར་གྱུར། །རང་ཉིད་སྤྱན་རས་གཟིགས་གྱུར་པའི། །ཕྱག་གི་བུམ་པའི་ཆུ་བླུག་གྱུར། །ༀ་པདྨ་ཀྲོ་དྷ་ཨཪྻ་ཛམྦྷཱ ་ལ་ཧྲི་ད་ཡ་ཧཱུྃ་ཕཊ། བརྒྱ་རྩ་བརྗོད། དེ་ནས་གཏོར་མ་དཀར་གསུམ་ཅི་འབྱོར་བཤམས་ནས། ༀ་ཨཱཿཧཱུྃ། བདུད་རྩིའི་རྒྱ་མཚོ་ཆེན་པོར་གྱུར། ༀ་པདྨ་ཀྲོ་དྷ་སོགས་ཀྱི་མཐར། བ་ལིཾ་ཏ་ཁ་ཁ་ཁཱ་ཧི་ཁཱ་ཧི། འགྲོ་བ་དབུལ་བའི་སྡུག་བསྔལ་གཟིགས་གྱུར་
ནས། །འཇིག་རྟེན་མགོན་པོའི་སྤྱན་ཆབ་ལས་འཁྲུངས་པའི། །གངས་རི་ལྟར་དཀར་ནོར་འཆང་ཀུན་གྱི་རྗེ། །མཁའ་འགྲོ་བཞི་ཡིས་བསྐོར་ལ་ཕྱག་འཚལ་ལོ། །སེར་སྣའི་ལས་ཀྱི་མེ་ཡིས་གདུངས་བ་བདག །སྐྱེ་དང་སྐྱེ་བར་ཁྱེད་ལ་གསོལ་འདེབས་ཀྱི། །རིན་ཆེན་བདུད་རྩིའི་གཏེར་གྱི་ཆུ་རྒྱུན་གྱིས། །སེམས་ཅན་དབུལ་བའི་སྡུག་བསྔལ་ཞི་བར་མཛོད། །ལྷ་ལྔ་རང་གི་ཐུགས་ཀར་ཐིམ། །ལོངས་སྤྱོད་སྤྲིན་བཞིན་འདུས་པར་གྱུར། །ཆུ་མྱང་བ་དང་། ཕྱོགས་བཞིར་གཏོར་མ་ཡིག་བརྒྱ་ཡང་བརྗོད། མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་བ། །དེ་ཀུན་མགོན་པོས་བཟོད་པར་མཛོད། །རང་ཉིད་ཐུགས་རྗེ་ཆེན་པོ་ནི། །ཞལ་གཅིག་ཕྱག་གཉིས་རྣམ་པར་གྱུར། །མདུན་དུ་རིན་ཆེན་སྣོད་དུ་ནི། །པདྨ་ཟླ་བའི་དཀྱིལ་འཁོར་སྟེང་། །ཛཾ་ལས་ཛམྦྷ་ལ་སེར་པོ། །ཞལ་གཅིག་ཕྱག་གཉིས་གཡས་པ་ཡིས། །
བཱི་ཛ་པཱུ་ར་ཀ་དང་ནི། གཡོན་གྱིས་ནེའུ་ལེ་རབ་ཏུ་འཛིན། །དུང་དང་པདྨའི་གདོང་དག་གིས། །གཏེར་བདག་མནན་ཞིང་སྐྱིལ་ཀྲུང་བཞུགས། །རིན་ཆེན་མེ་ཏོག་རྒྱན་ལྡན་པའི། །གནས་གསུམ་ༀ་ཨཱཿཧཱུྃ་རྣམས་ལས། འོད་འཕྲོས་ཡེ་ཤེས་པ་ཡི་ཚོགས། །སྤྱན་དྲངས་གཉིས་སུ་མེད་པར་གྱུར། །ཛཿཧཱུྃ་བཾ་ཧོཿ སླར་ཡང་ཧཱུྃ་གི་འོད་ཟེར་གྱིས། །དབང་གི་ལྷ་རྣམས་སྤྱན་དྲངས་གྱུར། །ཨཱརྒྷཾ་སོགས། དེ་བཞིན་གཤེགས་རྣམས་དབང་བསྐུར་གསོལ། །དེ་ལྟར་གསོལ་བས་བདུད་རྩི་ཡིས། །དབང་བསྐུར་ཆུ་ལྷག་ཡར་ལུད་པས། །རིན་ཆེན་འབྱུང་ལྡན་དབུ་རྒྱན་གྱུར། །ཨཱརྒྷཾ་སོགས། རང་གི་ལག་མཐིལ་ཟླ་བའི་སྟེང་། བྲཱུཾ་ཨཱཾ་ཛྲིཾ་ཁཱཾ་ཧཱུྃ་ཡིག་ལས། །བྱུང་བའི་དེ་བཞིན་གཤེགས་པ་ལྔ། །ཞུ་བའི་ཡེ་ཤེས་བདུད་རྩིར་གྱུར། །ཆུ་རྒྱུན་དབུལ་ཞིང་། ༀ་ཛམྦྷ་ལ་ཛ་ལེནྡྲཱ་ཡེ་སྭཱ་ཧཱ། བརྒྱ་རྩ་བརྗོད། ༀ་ཨཱརྱ ་ཛམྦྷ་ལ་ས་པ་རི་ཝཱ་ར་ཨཱརྒྷཾ་སོགས། ནོར་གྱི་དབང་ཕྱུག་རིན་ཆེན་གཏེར་མངའ་ཞིང་། །
གནོད་སྦྱིན་ནོར་འཆང་མང་པོ་ཀུན་གྱི་རྗེ། །བྱང་ཕྱོགས་སྐྱོང་བའི་མགོན་པོ་ཛམྦྷ་ལ། །དངོས་གྲུབ་མཆོག་སྩོལ་མཛད་ལ་ཕྱག་འཚལ་ལོ། །སེར་སྣའི་ལས་ཀྱི་མེ་ཡིས་གདུངས་བ་རྣམས། །སྐྱེ་དང་སྐྱེ་བར་ཁྱོད་ལ་སྐྱབས་སུ་མཆི། །རིན་ཆེན་བདུད་རྩིའི་གཏེར་གྱི་ཆུ་རྒྱུན་གྱིས། །སེམས་ཅན་དབུལ་བའི་སྡུག་བསྔལ་ཞི་བར་མཛོད། །མདུན་དུ་རིན་ཆེན་སྣོད་དུ་ནི། །པདྨ་ཉི་མའི་དཀྱིལ་འཁོར་སྟེང་། །ཧཱུྃ་ལས་ཛམྦྷ་ལ་ནག་པོ། །ཞལ་གཅིག་ཕྱག་གཉིས་གཡས་པ་ཡིས། །ཁྲག་གིས་གང་བའི་ཐོད་པ་དང་། །གཡོན་གྱིས་ནེའུ་ལེ་རབ་ཏུ་འཛིན། །གཡོན་བརྐྱང་ནོར་བདག་སེར་པོ་མནན། །ཀླུ་ཆེན་བརྒྱད་ཀྱིས་བརྒྱན་ལྡན་པའི། །གནས་གསུམ་སོགས། མི་བསྐྱོད་པ་ཡིས་དབུ་བརྒྱན་གྱུར། །རང་གི་ལག་མཐིལ་སོགས། །ཆུ་དབུལ་ཞིང་། ༀ་ཨིནྡྲ་ནི་མུ་ཁཾ་བྷྲ་མ་རི་སྭཱ་ཧཱ། ༀ་ཛམླུཾཾ་སྭཱ་ཧཱ། བརྒྱ་རྩ་བརྗོད། ན་མོ་རནྟ་ཏྲ་ཡཱ་ཡ། ན་མོ་མ་ཎྀ་བྷ་དྲཱ་ཡ། མ་ཧཱ་ཡཀྵ་སེ་ནཱ་པ་ཏ་ཡེ།
ཏདྱ་ཐཱ། ༀ་ཛམྦྷ་ལ་ཛ་ལེནྡྲཱ་ཡེ་སྭཱ་ཧཱ། ཨཱརྒྷཾ་སོགས། མགོན་པོ་ནམ་མཁའི་མདོག་ཅན་རིན་ཆེན་ཆར་འབེབས་པ། །མ་སྐྱེས་རང་བཞིན་དག་པས་སྐུ་མདོག་སྔོན་པོར་བཞུགས། །ཁྱོད་ནི་རྡོ་རྗེ་སེམས་དཔའ་ཉིད་དེ་བདག་དྲན་ན། །རྟག་ཏུ་ཡིད་ལ་རེ་བའི་འབྲས་བུ་མཆིས་པར་མཛོད། །སེར་སྣའི་ལས་ཀྱི་སོགས། རང་གི་ཕྱག་ནས་བདུད་རྩིའི་རྒྱུན། །བབས་པས་ཡི་དྭགས་ཀུན་ཚིམ་གྱུར། །ༀ་མ་ཎི་པདྨེ་ཧཱུྃ། ༀ་ཨཱཿཧྲཱིཿཧཱུྃ། ཆུ་སྦྱིན་ཞིང་སེ་གོལ་དང་བཅས། ༀ་ཛ་ལ་མི་དཾ་སརྦ་པྲ་ཏེ་བྷྱཿསྭཱ་ཧཱ། འཕགས་པ་སྤྱན་རས་གཟིགས་དབང་གི །ཕྱག་ནས་འབབ་པའི་འོ་རྒྱུན་གྱིས། །ཡི་དྭགས་རྣམས་ནི་ཚིམ་བྱས་ནས། །ཁྲུས་བྱས་རྟག་ཏུ་བསིལ་བར་ཤོག །མགོན་པོ་མི་འཁྲུགས་པ་ལ་ཕྱག་འཚལ་ལོ། །ན་མོ་རཏྣ་ཏྲ་ཡཱ་ཡ། །ༀ་ཀཾ་ཀ་ནི་ཀཾ་ཀ་ནི། རོ་ཙ་ནི་རོ་ཙ་ནི། ཏྲོ་ཊ་ནི་ཏྲོ་ཊ་ནི། ཏྲཱ་ས་ནི་ཏྲཱ་ས་ནི། པྲ་ཏི་ཧ་ན་པྲ་ཏི་ཧ་ན། སརྦ་ཀརྨ་པ་རཾ་པ་རཱ་ཎི་མེ་སརྦ་ས་ཏྭཱ་ནཱཙྩ་སྭཱ་ཧཱ། བར་དོའི་སེམས་
ཅན་ཀུན་ཚིམ་ནས། །བཀྲེས་སྐོམ་འཇིགས་སྐྲག་ཞི་གྱུར་ཅིག །བདག་བསྐྱེད་ཀྱི་ཚིག་གཉིས་པོ་སོ་སོའི་མགོར་སྦྱར་ཞིང་། མཇུག་ཏུ། དེ་ལྟར་ཆུ་ཡི་སྦྱིན་པ་འདི། །ཀླུ་རྒྱལ་དགའ་བོ་ལ་སོགས་པ། །ཆུ་ཀླུང་བདག་པོ་མ་ལུས་པའི། །སྦྱིན་པ་དམ་པར་འགྱུར་བར་ཤོག །ཆུ་གཏོར་གྱི་སྐོར་འདི་རྣམས་ཞྭ་དམར་པ་ལྔ་པས་སོ།། །།བླ་མ་དང་མགོན་པོ་སྤྱན་རས་གཟིགས་ལ་ཕྱག་འཚལ་ལོ། །དཔལ་རྒ་ལོ་ལ་ཇོ་བོ་ཐུགས་རྗེ་ཆེན་པོས་ཁ་བ་ཅན་པའི་འགྲོ་དོན་དུ་རྗེས་སུ་གནང་བའི་ཀླུ་གཏོར་གྱི་རིམ་པ་ནི། དགོས་ཆའི་རྫས་རྣམས་ཕྱེ་མའམ་རིལ་བུར་བྱས་པ་འོ་འམ་ཆུ་ལ་སྦྱར་ནས་སྦྲེང་བའི་དོན་དུ་གཡས་ཕྱོགས་སུ་བཞག །མདུན་དུ་ཟངས་གཞོང་བཞག །རང་ཁ་བྱང་ཤར་དུ་བལྟ་བར་འདུག་ནས་ངག་ཏུ། བླ་མ་དཀོན་མཆོག་རྣམ་གསུམ་ལ། །སྒོ་གསུམ་གུས་པས་སྐྱབས་སུ་མཆི། །ཁམས་གསུམ་འགྲོ་བའི་སྡུག་བསྔལ་དང་། །ཁྱད་པར་ཀླུ་ཡི་བྱེ་ཚན་ཆར། །མཁའ་ལྡིང་གནོད་པ་ཞི་བྱའི་ཕྱིར། །བདག་གིས་མཆོད་སྦྱིན་བརྩམ་པར་བྱ། །རིན་ཆེན་བྲག་རི་བྱ་སྐྱིབས་ཅན། །བྱང་ཤར་བལྟ་
བའི་མདུན་ངོས་སུ། །པདྨ་དཀར་པོའི་སྡོང་པོ་ནི། །རྒྱ་ཁྱོན་སྟོང་གསུམ་དང་མཉམ་པ། །ལྟེ་བར་མཚོ་དང་རྫིང་བུ་དང་། །ལྗོན་ཤིང་ནེའུ་གསིང་ཆུ་མིག་སོགས། །ཀླུ་ཡི་ཕོ་བྲང་ཉམས་དགའ་བ། །བལྟ་ན་སྡུག་པ་རྣམས་སུ་གྱུར། །དེ་ཡི་དབུས་སུ་ཉི་ཟླའི་སྟེང་། །ཧྲཱིཿཡིག་དཀར་པོ་ཡོངས་གྱུར་པས། །ཇོ་བོ་ཁ་སཪྤ་ཎི་ནི། །དཀར་པོ་གངས་ལ་ཉི་ཤར་འདྲ། །ཕྱག་གཡས་མཆོག་སྦྱིན་པདྨ་དང་། །གཡོན་པས་ཐུགས་ཀར་པདྨ་བསྣམས། །ཞལ་རས་འཛུམ་ཞིང་སྤྱན་གསུམ་ལྡན། །རིན་པོ་ཆེ་ཡི་རྒྱན་གྱིས་བརྒྱན། །གཡས་བརྐྱང་གཡོན་བསྐུམ་གྱིས་གཞུགས་པའི། །སྤྱི་བོར་འོད་དཔག་མེད་པ་བཞུགས། །གནས་གསུམ་ༀ་དཀར་ཨཱཿདམར་པོ། །ཧྲཱིཿཡིག་དཀར་པོ་སོ་སོ་ལ། །ཧྲཱིཿཡིག་དམར་པོས་བསྐོར་བའོ། །འཇིག་རྟེན་མགོན་པོའི་མཐའ་སྐོར་དུ། །ཀླུ་ཆེན་བརྒྱད་ཀྱིས་གཙོ་བྱས་པའི། །ཀླུ་དང་ས་བདག་དུ་མས་གང་། །ཐུགས་ཀའི་ཧྲཱིཿཡི་འོད་ཟེར་གྱིས། །ལག་གཉིས་
ལྕགས་ཀྱུའི་ཕྱག་རྒྱ་བཅས་ལ་ངག་ཏུ། གདེང་ཀ་ནོར་བུ་འབར་བའི་འོད་ཀྱིས་ནི། །ས་འོག་མུན་པ་མ་ལུས་སེལ་མཛད་པའི། །བསྟན་ལ་རབ་དགའ་མཐུ་སྟོབས་བསམ་མི་ཁྱབ། །ཀླུ་རྒྱལ་འཁོར་བཅས་མ་ལུས་གཤེགས་སུ་གསོལ། །ༀ་ནཱ་ག་ས་པ་རི་ཝཱ་ར་ས་མ་ཡེ་ཧཱུྃ་ཛཿཛཿཞེས་པ་ལན་བདུན་གྱིས་སྤྱན་དྲངས། འཇིག་རྟེན་ན་བཞུགས་ཀླུ་རྣམས་ཀུན། །སྤྱན་དྲངས་མདུན་བསྐྱེད་རྣམས་ལ་ཐིམ། ༀ་ཨཱཿཧཱུྃ། བདུད་རྩིའི་རྒྱ་མཚོ་ཆེན་པོར་གྱུར། ཟངས་གཞོང་དུ་ཆུ་སྦྲེང་ཞིང་། ལག་མཐིལ་ཧྲཱིཿཡིག་དཀར་པོ་ལས། །གང་འདོད་བདུད་རྩི་བབས་པ་ལ། །ཀླུ་དང་ས་བདག་ལ་ལས་འཐུང་། །ལ་ལས་ཁྲུས་བྱེད་ལ་ལ་ཡིས། །རྩེད་མོ་བྱེད་ཅིང་སྐོར་བ་བྱེད། །གུས་པས་འདུད་པ་བྱེད་པར་གྱུར། །ༀ་བཱ་སུ་ཀི་མཱཾ་སྭཱ་ཧཱ། ཞེས་པའི་སྔགས་བརྒྱ་རྩ་བརྒྱད་བརྗོད། ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་ཏུ་འབྱུང་། །
ངོ་བོ་ཉིད་མེད་གནས་མེད་པར། །དེ་ལྟར་ཆོས་རྣམས་ཤེས་གྱིས་ལ། །སེམས་ཅན་དོན་ནི་བླ་མེད་བྱོས། །འོན་ཀྱང་སྐྱོབ་པའི་སྲས་སུ་སྐྱེ། །ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །རྒྱུ་ལ་འགོག་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུངས། །སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །ན་མོ་རཏྣ་ཏྲ་ཡཱ་ཡ། ༀ་ཀཾ་ཀ་ནི་ཀཾ་ཀ་ནི། རོ་ཙ་ནི་རོ་ཙ་ནི། ཏྲོ་ཊ་ནི་ཏྲོ་ཊ་ནི། ཏྲཱ་ས་ནི་ཏྲཱ་ས་ནི། པྲ་ཏི་ཧ་ན་པྲ་ཏི་ཧ་ན། སརྦ་ཀརྨ་པཱ་ར་པ་རཱ་ཎི་མེ་སརྦ་ས་ཏྭཱ་ནཱཉྩ ་སྭཱ་ཧཱ། ཞེས་གཟུངས་འདི་ལན་གསུམ་བརྗོད། ཆོས་ཀྱི་དབྱིངས་ན་སྐྱེས་བུ་གཅིག་པུ་པ། ཁམས་གསུམ་དག་ན་བཙུན་པ་སྤྱན་རས་གཟིགས། །ཟླ་ཞལ་པད་མདོག་དྲི་མ་མེད་པའི་སྐུ། །སྐྱོན་བྲལ་ཐུགས་རྗེ་ཅན་ལ་ཕྱག་འཚལ་ལོ། །ནོར་རྒྱས་དང་ནི་དུང་སྐྱོང་དང་། །དགའ་བོ་དང་
ནི་ཉེར་དགའ་བོ། །པདྨ་དང་ནི་ཆུ་ལྷ་དང་། །དཔལ་གྱི་འོད་དང་འོད་པོ་ཆེ། །རིགས་བཟང་དང་ནི་སྟོབས་ལྡན་ཏེ། །ཀླུ་རིགས་བཞི་ལ་སོགས་པ་ཡང་། །སྐུ་སྟོད་སྐྱེས་བུའི་ཆ་བྱད་ལ། །སྦྲུལ་མགོ་བདུན་གྱི་གདེངས་ཀ་ཅན། །སྐུ་སྨད་གདུག་པ་སྦྲུལ་དུ་འཁྱིལ། །ཀླུ་བྲན་མང་པོའི་འཁོར་གྱིས་བསྐོར། །མཆོད་སྦྱིན་གཏོར་མ་འདི་བཞེས་ལ། །མཉེས་ཤིང་དགྱེས་པའི་ལས་རྣམས་མཛོད། །མཐོང་བའི་དུག་དང་རག་པའི་དུག །ཁ་རླངས་དུག་དང་མཆེ་བའི་དུག །བསམ་ངན་དུག་ལ་སོགས་པ་ཡི། །ཀླུ་ཡི་དུག་རྣམས་ཞི་བར་མཛོད། །རླུང་མཁྲིས་བད་ཀན་ནད་ལ་སོགས། །ཀླུ་ཡི་ནད་རྣམས་ཞི་བར་མཛོད། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །ཛཱ་ཏི་ཕ་ལའི་རྫས་འདི་ཡིས། །ཀླུ་ཡི་མགོ་ཉམས་སོས་གྱུར་ཅིག །གཟི་དང་རྒྱ་མཚོ་ལྦུ་བ་ཡིས། །མིག་དང་ཀླད་ཉམས་སོས་གྱུར་ཅིག །ཨུཏྤ་ལ་དང་ཉ་ལྕིབས་ཀྱིས། །སྣ་དང་
འགྲམ་པ་ཉམས་པ་སོས། །ལི་ཁྲི་དང་ནི་མཚལ་དག་གིས། །ཤ་ཁྲག་ཉམས་པ་སོས་གྱུར་ཅིག །ལེ་བརྒན་དར་དང་འགྲོན་བུ་ཡིས། །ལྗགས་དང་སོ་ཉམས་སོས་གྱུར་ཅིག །དུང་དང་གུར་གུམ་རྫས་དག་གིས། །རུས་པ་ཉམས་དང་དྲི་ཉམས་སོས། །ཙནྡན་དཀར་པོས་ཚད་ནད་དང་། །རྨ་བྱའི་མདོངས་ཀྱིས་མདངས་ཉམས་ཞི། །དར་ཚོན་ལྔ་དང་སྙིང་ཞོ་ཤས། །པགས་པ་དང་ནི་སྙིང་ཉམས་སོས། །མཁལ་མ་ཞོ་ཤས་མཁལ་མ་དང་། །གླ་གོར་ཞོ་ཤས་གློ་བ་སོས། །ཆུ་སྲིན་སྡེར་མོ་དབང་ལག་གིས། །སྡེར་མོ་ལག་པ་ཉམས་པ་སོས། །ཆག་ཚང་ཀུ་བས་གྲོད་པ་དང་། །སྤང་སྤོས་ཚུལ་ཁྲིམས་ཉམས་པ་སོས། །སྤུ་ཤེལ་རྩེ་དང་རྡོ་རྒྱུས་ཀྱིས། །རྩ་རྒྱུས་ཆུ་རྒྱུས་སོས་གྱུར་ཅིག །སླེ་ཏྲེས་དང་ནི་བྱི་ཏང་ཀས། །རྒྱུ་མ་རེག་བྱ་ཉམས་པ་སོས། །ཨ་རུ་ར་ཡིས་ནང་ཁྲོལ་དང་། །འདམ་བུ་ཀ་རའི་རྫས་འདི་ཡིས། །གནས་ཁང་ཉམས་པ་སོས་གྱུར་ཅིག །རིན་ཆེན་སྣ་ལྔས་བང་
མཛོད་དང་། །དཀར་གསུམ་མངར་གསུམ་ཁ་ཟས་ཀྱིས། །ཁ་ཟས་ཉམས་པ་སོས་གྱུར་ནས། །འཇིག་རྟེན་ཁམས་སུ་ཆར་ཆུ་དང་། །ལོ་ཕྱུགས་རྟག་ཏུ་ལེགས་པར་མཛོད། །ༀ་ནཱ་ག་ས་པ་རི་ཝཱ་ར་ས་མ་ཡེ་ཧཱུྃ་ཛཿཛཿ ༀ་ནཱ་ག་ཤིག་ཅིག །ཕྱིར་ཞིག །དེངས་ཤིག །ནཱ་ག་ཤིག །ནཱ་ག་ཁྲོལ། ནཱ་ག་དེངས། རྒྱལ་རིགས་བྲམ་ཟེ་རྗེ་རིགས་དང་། །དམངས་རིགས་ཤར་ལྷོ་ནུབ་བྱང་དུ། །སོ་སོར་གཤེགས་ཤིང་གདོལ་པ་རྣམས། །མཚམས་རྣམས་སུ་ནི་གཤེགས་སུ་གསོལ། །གཞན་ཡང་ས་བདག་ཕྲ་མོ་རྣམས། །ཆུ་ཤིང་དྲག་སོགས་རང་གནས་གཤེགས། །རང་གི་ལུས་ལ་དཔེ་ལོང་ལ། །གཞན་ལ་གནོད་པ་མ་བྱེད་ཅིག །ཁྱེད་ཅག་མཆོད་པས་ཚིམ་གྱུར་ཏེ། །བླ་མེད་བྱང་ཆུབ་མྱུར་ཐོབ་ཤོག །ཅེས་པ་འདི་མཚུངས་མེད་བླ་མ་དམ་པས་དགོངས་པ་རྗེས་སུ་གནང་བ་ལྟར། དཀོན་མཆོག་འབངས་ཀྱིས་ཙཱ་རི་མཚོ་དཀར་དུ་བཀོད་པའོ། །འདིའི་ལོ་རྒྱུས་ནི། དཔལ་རྒ་ལོས་རྒྱ་གར་དུ་ཡུན་རིང་པོར་བསྒྲུབས་པ་བྱས་པས་ལུང་བསྟན་བྱུང་སྟེ།
དུར་ཁྲོད་ཆེན་པོ་བསིལ་བ་ཚལ་དུ་སྤྱོད་པ་མཛད་དུས། ཀླུའི་རྒྱལ་པོ་བཱ་སུ་ཀི་དེ་སྐྱེས་པ་ཡིད་དུ་འོང་བ་རྒྱལ་པོའི་ཆ་བྱད་ཅན་མགོ་ལ་སྦྲུལ་མགོ་ཡོད་པ་ཞིག་བྱུང་སྟེ། ཡང་ཡང་ཡོང་ནས་ཆོས་ཞུས། དེ་ནས་ལོངས་སྤྱོད་མང་པོ་ཕུལ་ནས་ཡོན་བདག་བྱས། ཁྱོད་ལ་ཇི་ལྟར་ཕན་འདོགས་བྱས་པས། བཱ་སུ་ཀིའི་ཆུ་གཏོར་དང་སྒྲུབ་ཐབས་ཁོ་རང་གིས་ཕུལ་བའོ།། །།དབྱུག་གུ་དྲུག་ཅུ་རྩ་བཞིའི་གཏོར་མ་ནི། བསངས་སྦྱངས། སྟོང་ཉིད་ངང་ལས་གཏོར་མའི་སྣོད། །རིན་ཆེན་ལས་གྲུབ་ཡངས་པའི་ནང་། །ཁ་དོག་དྲི་རོ་ནུས་པ་རྣམས། །ཕུན་ཚོགས་ལྷ་ཡི་བདུད་རྩིར་གྱུར། །ༀ་ཨཱཿཧཱུྃ། ཞེས་བྱིན་གྱིས་བརླབས། ༀ་ཨ་ཀཱ་རོ་དང་། ༀ་ཨཱཿཧཱུྃ་ཧོཿཨཥྚ་ཨཥྚ་ཀེ་ན་ཙ་ཧུ་ཥྵ་ཥྛི་བཛྲ་ཡོ་གི་ནཱི་བྷྱཿས་པ་རི་ཝཱ་ར་བྷྱཿཨི་དཾ་བ་ལིཾ། གནྡྷཾ། པུཥྤེ། དྷཱུ་པཾ། དཱི་པཾ། ཨཱཀྵ་ཏཾ། ད་དཱ་མ་ཧེ། ཏེ་ཛཱ་ག་ཏྱ། ས་པ་རི་ཝཱ་ར། ཤཱི་གྷྲཾ། ཨི་དཾ་བ་ལིཾ། གྲི་ཧྞནྷུ། ཁཱ་དནྟུ། པི་ཝནྟུ། ཛཿཧཱུྃ་བྃ་ཧོཿ སཾ་ཏྲིཔྷཿ སརྦྦ་ས་ཏྭཱ་ནཱཾ། ཤནྟིཾ། པུཥྚིཾ། རཀྵ་པ་ར་ཎ་གུཔྟིཾ། ཀུརྦྦནྷུ། ཧཱུྃ་ཧཱུྃ་ཕཊ། བཛྲ་དྷ་ར་ཨཱ་ཛྙཱ་པ་ཡ་ཏི་སྭཱ་ཧཱ། འཕགས་པའི་ཚོགས་རྣམས་མཉེས་གྱུར་ཅིག །
དམ་ཅན་ཐུགས་དམ་སྐོངས་གྱུར་ཅིག །རིགས་དྲུག་འདོད་པ་ཚིམ་གྱུར་ཅིག །ལན་ཆགས་བུ་ལོན་འཁོར་གྱུར་ཅིག །དབྱུག་གུ་དྲུག་ཅུ་རྩ་བཞི་ཡིས། །དུས་ཀྱི་བར་གཅོད་ཞི་གྱུར་ཅིག །ནམ་མཁའ་མཉམ་པའི་སེམས་ཅན་རྣམས། །བླ་མེད་བྱང་ཆུབ་མྱུར་ཐོབ་ཤོག །ཅེས་སོ།། །།འབྱུང་བཞི་གཏོར་མ་ནི། གཏོར་སྣོད་རྣམས་སུ་རླུང་མེ་ཆུ་སའི་དབྱིབས་ཀྱི་གཏོར་མ་ཟླ་གམ་གྲུ་གསུམ་ཟླུམ་པོ་གྲུ་བཞིའི་ཟན་དང་གླུད་ཆང་བུ་དང་བཅས་པ་ཆུས་བྲན། བསངས་སྦྱངས། སྟོང་པའི་ངང་ལས་རིན་ཆེན་སྣོད། །ཡངས་ཤིང་རྒྱ་ཆེ་རྣམས་ཀྱི་ནང་། །ༀ་ཨཱཿཧཱུྃ་ལས་བྱུང་བ་ཡི། །གཏོར་མ་ལྷ་རྫས་ཐོགས་མེད་ནི། །ངོ་བོ་ཡེ་ཤེས་བདུད་རྩི་ལ། །རྣམ་པ་འབྱུང་བ་བཞི་ཡི་དངོས། །བྱེད་ལས་དབང་པོ་དྲུག་གི་ཡུལ། །ཟག་མེད་བདེ་བ་བསྐྱེད་པར་གྱུར། །ༀ་ཨཱཿཧཱུྃ། །ལན་གསུམ། རང་ཉིད་དམ་པ་སངས་རྒྱས་སྐུ། །སྨུག་ནག་སེང་ལྡེང་ཌ་རུ་འཁྲོལ། །དངུལ་དཀར་དྲིལ་བུ་དཀུར་བརྟེན་ཞིང་། །རྟེན་འབྲེལ་གལ་ཏེ་ཕྲག་ལ་གཟར། །
མདོ་རྒྱུད་བསྟན་བཅོས་དགོངས་པ་རྟོགས། །ཨཱ་ལི་ཀཱ་ལིའི་སྒྲ་སྒྲོགས་གྱུར། །ཡཾ་ཨི་ཨཱི་ཙ་ཚ་ཛ་ཛྷ་ཉ་ཞེས་པ་ལན་བདུན་གྱིས་དབུལ། ཨཱརྒྷཾ་སོགས་ཀྱིས་མཆོད། རླུང་རྫས་སྔོན་པོ་ཡང་ཞིང་གཡོ་བ་འདི་དག་རྣམས། །དཔལ་ལྡན་བླ་མ་རྡོ་རྗེ་སེམས་དཔའ་འཁོར་བཅས་དང་། །ཤར་ཕྱོགས་རྡོ་རྗེ་རིགས་ཀྱི་ལྷ་ཚོགས་རྣམས་ལ་འབུལ། །ཉོན་མོངས་ཞེ་སྔང་རླུང་ནད་ལྷ་དང་དྲི་ཟའི་གདོན། །ཐམས་ཅད་སྲུངས་ཤིག་ཟློག་ཅིག་སྒྱུར་བར་མཛད་དུ་གསོལ། །སྣང་བ་སྣ་ཚོགས་རྟེན་ཅིང་འབྲེལ་འབྱུང་དུ་རྟོགས་ནས། །འགྲོ་དོན་ཕྱོགས་མེད་རྟེན་འབྲེལ་སྒོ་ནས་འགྲུབ་པར་ཤོག །དེ་བཞིན་དུ། རཾ་རྀ་རཱྀ་ཊ་ཋ་ཌ་ཌྷ་ཎ། ལན་བདུན་དང་། ཨཱརྒྷཾ་སོགས། མེ་རྫས་དམར་པོ་ཚ་ཞིང་སྲེག་པ་འདི་དག་རྣམས། །དཔལ་ལྡན་བླ་མ་རིན་ཆེན་འབྱུང་ལྡན་འཁོར་བཅས་དང་། །ལྷོ་ཕྱོགས་རིན་ཆེན་རིགས་ཀྱི་ལྷ་ཚོགས་རྣམས་ལ་འབུལ། །ཉོན་མོངས་ང་རྒྱལ་ཚད་ནད་ཕོ་གདོན་གཤིན་རྗེའི་གདོན། །ཐམས་ཅད་སྲུངས་
ཤིག་སོགས། བཾ་ཨུ་ཨཱུ་པ་ཕ་བ་བྷ་མ། ལན་བདུན་དང་། ཨཱརྒྷཾ་སོགས། ཆུ་རྫས་དཀར་པོ་བརླན་ཞིང་གཤེར་བ་འདི་དག་རྣམས། །དཔལ་ལྡན་བླ་མ་སྣང་བ་མཐའ་ཡས་འཁོར་བཅས་དང་། །ནུབ་ཕྱོགས་པདྨ་རིགས་ཀྱི་ལྷ་ཚོགས་རྣམས་ལ་འབུལ། །ཉོན་མོངས་འདོད་ཆགས་གྲང་ནད་མོ་གདོན་ཀླུ་ཡི་གདོན། །ཐམས་ཅད་སྲུངས་ཤིག་སོགས། ལཾ་ལྀ་ལཱྀ་ཏ་ཐ་ད་དྷ་ན་ལན་བདུན་དང་། ཨཱརྒྷཾ་སོགས། ས་རྫས་སེར་པོ་སྲ་ཞིང་བརྟན་པ་འདི་དག་རྣམས། །དཔལ་ལྡན་བླ་མ་དོན་ཡོད་གྲུབ་པ་འཁོར་བཅས་དང་། །བྱང་ཕྱོགས་ལས་ཀྱི་རིགས་ཀྱི་ལྷ་ཚོགས་རྣམས་ལ་འབུལ། །ཉོན་མོངས་ཕྲག་དོག་བད་ཀན་འགོང་པོ་གནོད་སྦྱིན་གདོན། ཐམས་ཅད་སྲུངས་ཤིག་སོགས། །གླུད་ནི། སམྦྷ་ར་དང་དེ་བཞིན་གཤེགས་པ་བཞིའི་མཚན་བརྗོད་པས་བསྔོས་ལ། སྔོན་ཚེ་ལྷ་དབང་བརྒྱ་བྱིན་གླུད། །ད་ལྟ་རྒྱུ་སྦྱོར་སྦྱིན་བདག་གླུད། །ཤ་ཡི་གླུད་འདི་ས་ལ་གཏོང་། །ས་ལ་གནས་པའི་ལྷ་འདྲེ་རྣམས། །གླུད་དང་ཆང་བུ་
འདི་ཁྱེར་ལ། །འཁོར་འདིར་གནོད་པ་མ་བྱེད་ཅིག །ཁྲག་གི་གླུད་འདི་ཆུ་ལ་གཏོང་། །ཆུ་ལ་གནས་པའི་ལྷ་འདྲེ་རྣམས། །གླུད་དང་ཆང་བུ་འདི་ཁྱེར་ལ། །འཁོར་འདིར་གནོད་པ་མ་བྱེད་ཅིག །དྲོད་ཀྱི་གླུད་འདི་མེ་ལ་གཏོང་། །མེ་ལ་གནས་པའི་ལྷ་འདྲེ་རྣམས། །གླུད་དང་ཆང་བུ་འདི་ཁྱེར་ལ། །འཁོར་འདིར་གནོད་པ་མ་བྱེད་ཅིག །དབུགས་ཀྱི་གླུད་འདི་རླུང་ལ་གཏོང་། །རླུང་ལ་གནས་པའི་ལྷ་འདྲེ་རྣམས། །གླུད་དང་ཆང་བུ་འདི་ཁྱེར་ལ། །འཁོར་འདིར་གནོད་པ་མ་བྱེད་ཅིག །རུས་པའི་གླུད་འདི་བྲག་ལ་གཏོང་། །བྲག་ལ་གནས་པའི་ལྷ་འདྲེ་རྣམས། །གླུད་དང་ཆང་བུ་འདི་ཁྱེར་ལ། །འཁོར་འདིར་གནོད་པ་མ་བྱེད་ཅིག །རྩ་རྒྱུས་གླུད་འདི་ཤིང་ལ་གཏོང་། །ཤིང་ལ་གནས་པའི་ལྷ་འདྲེ་རྣམས། །གླུད་དང་ཆང་བུ་འདི་ཁྱེར་ལ། །འཁོར་འདིར་གནོད་པ་མ་བྱེད་ཅིག །པགས་པའི་གླུད་འདི་ཐང་ལ་གཏོང་། །ཐང་ལ་གནས་པའི་ལྷ་འདྲེ་རྣམས། །གླུད་དང་ཆང་བུ་འདི་ཁྱེར་
ལ། །འཁོར་འདིར་གནོད་པ་མ་བྱེད་ཅིག །སེམས་ཉིད་གླུད་འདི་མཁའ་ལ་གཏོང་། །མཁའ་ལ་གནས་པའི་ལྷ་འདྲེ་རྣམས། །གླུད་དང་ཆང་བུ་འདི་ཁྱེར་ལ། །འཁོར་འདིར་གནོད་པ་མ་བྱེད་ཅིག །གཞན་གྱི་བྱད་ཀ་ཕུར་ཀ་དང་། །ཟོར་ཀ་མནན་པ་ལ་སོགས་བཟློག །ཀག་དང་སྲི་ངན་ཐམས་ཅད་དང་། །གནོད་བྱེད་ཐམས་ཅད་ཟློག་ཏུ་གསོལ། །བགེགས་རིགས་སྟོང་ཕྲག་བརྒྱད་ཅུ་ཞི་བ་དང་། །སོགས་བརྗོད། ཅེས་པ་འདི་དགེ་སློང་ཀརྨ་བཟང་གིས་བསྐུལ་བ་ལྟར། ཞྭ་དམར་པ་ལྔ་པས་མདོར་བསྡུས་སུ་བཀོད་པའོ།། །།གཏོར་མའི་རིམ་པ་མདོར་བསྡུས་ནི། བརྒྱ་རྩ་ལ་སངས་རྒྱས་ཆོས་ཚོགས་ཀྱི་སྐྱབས་འགྲོ་སེམས་བསྐྱེད་སྔོན་དུ་བཏང་ནས། ཆོས་རྣམས་ཐམས་ཅད་སྟོང་པར་གྱུར། །སྟོང་པའི་ངང་ལས་སྐད་ཅིག་གིས། །པད་ཟླའི་སྟེང་དུ་རང་ཉིད་ནི། །ཐུགས་རྗེ་ཆེན་པོ་སྐུ་མདོག་དཀར། །ཞལ་གཅིག་ཕྱག་གཉིས་གཡས་པ་ཡིས། །མཆོག་སྦྱིན་གཡོན་པས་ཨུཏྤལ་འཛིན། །རྡོ་རྗེ་སྐྱིལ་ཀྲུང་གིས་བཞུགས་པ། །ཡིད་འོང་རྒྱན་
དང་ལྡན་པར་གྱུར། །ཨ་མྲྀ་ཏས་བསངས། སྭ་བྷཱ་ཝས་སྦྱངས། རིན་ཆེན་སྣོད་ཀྱི་ནང་དུ་ནི། །གཏོར་མ་དམ་ཚིག་བདུད་རྩིར་གྱུར། ༀ་ཨཱཿཧཱུྃ། རང་གི་ལག་མཐིལ་ཟླ་བ་དང་། །འབྲུ་གསུམ་ཞུ་བའི་བདུད་རྩིའི་རྒྱུན། །བབས་པས་ཡེ་ཤེས་བདུད་རྩིར་གྱུར། ༀ་ཨཱཿཧཱུྃ། བླ་མ་ཡི་དམ་སངས་རྒྱས་དང་། །བྱང་ཆུབ་སེམས་དཔའ་ཆོས་སྐྱོང་བཅས། །རང་བྱུང་རྒྱལ་མོ་འཁོར་བཅས་ལ། །བདུད་རྩི་གཏོར་མ་འདི་དག་འབུལ། ༀ་གུ་རུ་སརྦ་ཏ་ཐཱ་ག་ཏ་མ་ཧཱ་ཀཱ་ལ་རེ་མ་ཏི་ཨཱརྒྷཾ་སོགས། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ༀ་སམྦྷ་ར་སམྦྷ་ར་ཧཱུྃ། ལན་བདུན་གྱིས་ཐུན་མོང་དུ་བྱིན་གྱིས་བརླབས། བྱིན་རླབས་དངོས་གྲུབ་སྩོལ་བ་དང་། །ཕྲིན་ལས་རྣམ་བཞི་བསྒྲུབ་ཏུ་གསོལ། །ཞེས་པ་དང་པོ་དང་གཉིས་པ་བླ་མ་ཡི་དམ་སོགས་དང་ཆོས་སྐྱོང་ལ་འབུལ། དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །གཟུགས་མཛེས་དམ་པ་ལ། སྐུ་འབྱམས་ཀླས་ལ། འཇིགས་པ་ཐམས་ཅད་དང་བྲལ་བ་ལ། ཚངས་སོགས་
འཇིག་རྟེན་སྐྱོང་རྣམས་དང་། །བདེན་པ་གྲུབ་པ་མ་ལུས་དང་། །རང་ལ་འགོ་བའི་ལྷ་དང་བདུད། །རིགས་དྲུག་མགྲོན་དང་ཀླུ་རྣམས་དང་། །ཡི་དྭགས་ལན་ཆགས་བུ་ལོན་དང་། །འཇིག་རྟེན་འདིར་གནས་གཞི་ཡི་བདག །ཁྱད་པར་གཉུག་མར་གནས་རྣམས་དང་། །ཁས་ཞན་དབང་ཆུང་ཐམས་ཅད་ལ། །བདུད་རྩི་གཏོར་མ་སོ་སོར་འབུལ། །ན་མཿསརྦ་སོགས། བདུན་ནམ་ཉེར་གཅིག་གིས་བྱིན་གྱིས་བརླབས། མཉེས་ཤིང་ཚིམ་པར་གྱུར་ནས་ཀྱང་། །འཇིག་རྟེན་སྐྱོང་བས་དངོས་གྲུབ་སྩོལ། །གྲུབ་པ་རྣམས་ཀྱིས་སྨོན་ལམ་མཛོད། །མཉམ་པར་འོང་བས་བར་ཆད་སོལ། །མཁའ་མཉམ་སེམས་ཅན་སྡུག་བསྔལ་ཞི། །ཀླུ་རྣམས་བྱེ་ཚན་ཆར་སོགས་མེད། །ཡི་དྭགས་བཀྲེས་དང་སྐོམ་པ་བྲལ། །བུ་ལོན་ཤ་ཁོན་ཐམས་ཅད་བྱང་། །ཡུལ་ཕྱོགས་བདེ་ལེགས་ཕུན་སུམ་ཚོགས། །ཁྱད་པར་རྣལ་འབྱོར་མཐུན་རྐྱེན་སྒྲུབས། །རང་རང་སྡུག་བསྔལ་ལས་གྲོལ་ནས། །
མྱུར་དུ་སངས་རྒྱས་ཐོབ་པར་ཤོག །བདག་གི་བསོད་ནམས་སྟོབས་དག་དང་། །སོགས་བསྔོ་བ་དང་ཆོས་སྦྱིན་བྱ་ཞིང་སྨོན་ལམ་གདབ་བོ།། །།དཀར་ཆ་བཞི་ནི། ཨ་མྲྀ་ཏས་བསངས། སྭ་བྷཱ་ཝས་སྦྱངས། ༀ་ཨཱཿཧཱུྃ། རང་གི་ཐུགས་ཀའི་འོད་ཟེར་གྱིས། །བཅོམ་ལྡན་མི་གཡོ་སྐུ་མདོག་སྔོ། །ཞལ་གཅིག་ཕྱག་གཉིས་པད་ཉིར་བཞུགས། །རལ་གྲི་ཞགས་པ་འཛིན་པ་དང་། །བཅོམ་ལྡན་སྒྲོལ་མ་སྐུ་མདོག་སྔོ། །ཞལ་གཅིག་ཕྱག་གཉིས་གཡས་མཆོག་སྦྱིན། །གཡོན་གྱིས་ཨུཏྤལ་པད་ཟླ་ལ། །བརྐྱང་བསྐུམ་གྱིས་བཞུགས་སྤྱན་དྲངས་ཤིག །དེ་ཡིས་གཏོར་མ་གསོལ་བར་གྱུར། །ༀ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། ༀ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཨཱརྒྷཾ་སོགས། རབ་བརྗིད་མི་གཡོ་མགོན་པོ་དང་། །སྒྲོལ་མ་ཡུམ་ལ་ཕྱག་འཚལ་ལོ། །བདུད་བཞིའི་བར་ཆད་བསལ་དུ་གསོལ། །བརྒྱད་དང་བཅུ་དྲུག་འཇིག་ལས་སྐྱོབས། །སྲིད་པའི་མཚོ་ལས་བསྒྲལ་དུ་གསོལ། །ༀ་བཛྲ་ཡཀྵ་ཧཱུྃ། ཨོཾ་བཛྲ་ཛྭ་ལ་སོགས། མི་གཙང་བ་
རྣམས་རབ་བསྲེག་ཅིང་། །སྣོད་ནི་བདུད་རྩིས་གང་བར་གྱུར། ༀ་ཨ་ཀཱ་རོ་སོགས། འདོད་ཡོན་དུ་མས་གང་བར་གྱུར། །སྙིང་གའི་འོད་ཀྱིས་སྤྱན་འདྲེན་པ། །འདོད་རྒྱལ་གྱི་ཕྱག་རྒྱས། ༀ་པ་ཏ་ལི་པ་ཏ་ལི་མ་ཧཱ་པ་ཏ་ལི་ཧཱུྃ་ཧཱུྃ་ཛཿཛཿསྭཱ་ཧཱ། ༀ་ཀླུ་རྒྱལ་མཐའ་ཡས་ལ་སོགས་པའི། །རྒྱ་མཚོ་ཆུ་ཀླུང་སོགས་གནས་པའི། ཀླུ་རྒྱལ་འཁོར་དང་བཅས་པ་རྣམས། །མཆོད་པའི་གནས་འདིར་གཤེགས་སུ་གསོལ། ༀ་ཨཱ་གཙྪ་ཨཱ་གཙྪ་མ་ཧཱ་ནཱ་ག་ཨ་དྷི་པ་ཏ་ཡེ་བྷུ་རྦྷུ་བ་ཕྲུཾ་ཕྲུཾ་སྭཱ་ཧཱ། པདྨ་ཀ་མ་ལ་ཡ་སྟྭཾ། མ་ཧཱ་ནཱ་ག་ཨ་དྷི་པ་ཏ་ཡེ་གྲྀ་ཧྞེ་དཾ་ཨཱརྒྷཾ་སོགས། ༀ་ཧི་ལི་ཧི་ལི་མ་ཧཱ་ཧི་ལི་ཕྲུཾ་ཕུཿསྭཱ་ཧཱ། སེ་གོལ་གཏོགས། ༀ་བྷཀྵ ་ཡ་བྷཀྵ་ཡ་ས་མ་ཡ་ཏིཥྛ་ཛུཾ་ཕྲུཾ་ཕུཿསྭཱ་ཧཱ། སྡིག་པ་ཅི་ཡང་མི་བྱ་ཞིང་། སོགས་བརྗོད། ཀླུ་རྣམས་ཐམས་ཅད་ཚིམ་གྱུར་ནས། ཕན་པའི་སེམས་དང་ལྡན་གྱུར་ཅིག །ༀ་ནཱ་ག་ས་པ་རི་ཝཱ་ར་གཙྪ། རང་ཉིད་རིན་ཆེན་གཟུགས་མཛེས་ནི། །མཆོག་གི་སྤྲུལ་སྐུའི་རྣམ་པར་
གྱུར། ༀ་ཨཱཿཧཱུྃ། གཏོར་མ་བདུད་རྩིའི་རྒྱ་མཚོ་འདི། །ཡི་དྭགས་རྣམས་ལ་སྦྱིན་པར་བྱ། །ན་མཿསུ་རཱུ་པཱ་ཡ། ཏ་ཐཱ་ག་ཏ་ཡ། ཨཱརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ༀ་སུ་རུ་སུ་རུ། པྲ་སུ་རུ་པྲ་སུ་རུ། ཏ་ར་ཏ་ར། བྷ་ར་བྷ་ར། སམྦྷ་ར་སམྦྷ་ར། སྨ་ར་སྨར། སནྟ་ར་པ་ཡ་སནྟར་པ་ཡ། སརྦ་པྲེ་ཏཱ་ནཱཾ་སྭཱ་ཧཱ། ཞེས་བདུན་དང་སེ་གོལ་བདུན་བྱའོ། །ཨ་པ་ས་རདྟུ་ཨ་ཝ་ཏ་ར་པྲེ་ཀྵི་ཎོ་ད་དཱ་མྱ་ཧཾ་སརྦ་ལོ་ཀ་དྷཱ་ཏུ་བྷ་སི་ནཱཾ་པྲེ་ཏཱ་ནཱ་མ་ཧཱ་རཾ། ཡི་དྭགས་ཐམས་ཅད་ཚིམ་གྱུར་ནས། རྣམ་མཁྱེན་སངས་རྒྱས་ཐོབ་པར་ཤོག །ཅེས་སོ།། །།འབྲུ་གཏོར་ཆ་ལྔའི་རིམ་པ་ནི། གཏོར་ཐེབ་ལྔའི་དང་པོ་དང་གཉིས་པར་རིལ་བུ་ཉེར་གཅིག་རེ་གཞན་གསུམ་ལ་བདུན་རེ་བླུགས་ཆུས་བཀང་། ཨ་མྲྀ་ཏས་བསངས། སྭ་བྷཱ་ཝས་སྦྱངས། རང་བཞིན་སྟོང་པའི་ངང་ཉིད་ལས། །པད་སྣོད་ལ་སོགས་སོ་སོའི་ནང་། །དང་པོ་རང་ལུས་སྟོད་ཀྱི་ཆ། །འཕར་ནས་ལྷུང་བའི་བདུད་རྩི་དང་། །གཉིས་པ་རང་ལུས་བར་ཀྱི་ཆ། །འཕར་ནས་ལྷུང་བའི་དཀར་གསུམ་སོགས། །དེ་རྗེས་རང་
ལུས་སྨད་ཀྱི་ཆ། །འཕར་ནས་ལྷུང་བ་ལས་བྱུང་བའི། །སོ་སོའི་ཡིད་མཐུན་ལོངས་སྤྱོད་གྱུར། །ༀ་ཨཱཿཧཱུྃ། མདུན་གྱི་ནམ་མཁར་སྟེང་གི་ཆ། །བླ་མ་ཡི་དམ་ལོངས་སྐུའི་ཚོགས། །དེ་འོག་སྤྲུལ་སྐུ་སྲས་དང་བཅས། །ས་གཞིར་གདོན་བགེགས་ཐམས་ཅད་དང་། །ཀླུ་རྒྱལ་ཕྱག་བཞི་འཛུམ་མདངས་ཅན། །ཐལ་སྦྱར་སྙེ་མ་ཞགས་པ་འཛིན། །ཆུ་བདག་འཁོར་དང་བཅས་རྣམས་དང་། །དབང་མེད་བར་དོའི་སེམས་ཅན་རྣམས། །བུ་ཡུག་འཚུབ་པ་ལྟ་བུར་གྱུར། ན་མཿསརྦ་ཏ་ཐཱ་ག་ཏ་ཛྙཱ་ན་ཨ་བ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ། ཐུན་མོང་དུ་སྔགས་སེ་གོལ་སྦྲག་པ་ལན་བདུན་གྱིས་འབུལ། ཨཱརྒྷཾ་སོགས་ཀྱིས་མཆོད། དེ་ལྟར་ཕུལ་བའི་དགེ་བ་འདིས། །བླ་མའི་དམ་ཚིག་ཆག་ཉམས་དང་། །མཆོད་འོས་ཆོས་སྤངས་དཀོར་གླུད་ཟོས། །སྡིག་སྒྲིབ་ཉེས་ལྷུང་དག་པར་ཤོག །གདོན་བགེགས་རྣམས་ཀྱི་ལན་ཆགས་འཁོར། །གནོད་སེམས་ཞི་ནས་སངས་རྒྱས་ཤོག །སྤྱན་རས་གཟིགས་
སྔར་ཁས་བླངས་བཞིན། །ཀླུ་རྒྱལ་སངས་རྒྱས་བསྟན་པ་སྲུངས། །བར་དོའི་འཁྲུལ་སྣང་འཇིགས་སྐྲག་ཞི། །དག་པའི་ཞིང་དུ་སྐྱེ་བར་ཤོག །ཅེས་སོ། །ཆུ་གཏོར་ནི། རང་ཉིད་ཐུགས་རྗེ་ཆེན་པོ་ནི། །ཞལ་གཅིག་ཕྱག་གཉིས་རྣམ་པར་གྱུར། །མདུན་དུ་རིན་ཆེན་སྣོད་ཟུང་དུ། །པད་ཟླ་པད་ཉིའི་དཀྱིལ་འཁོར་སྟེང་། །ཛཾ་ལས་ཛམྦྷ་ལ་སེར་པོ། །རྒྱན་ལྡན་འབྲས་བུ་ནེའུ་ལེ་འཛིན། །སྐྱིལ་ཀྲུང་དུང་དང་གཏེར་བདག་མནན། །ཧཱུྃ་ལས་ཛམྦྷ་ལ་ནག་པོ། །ཀླུས་བརྒྱན་ཐོད་ཁྲག་ནེའུ་ལེ་འཛིན། །གཡོན་བརྐྱང་ནོར་བདག་སེར་པོ་མནན། །གནས་གསུམ་ༀ་ཨཱཿཧཱུྃ་འོད་ཀྱིས། །ཡེ་ཤེས་སྤྱན་དྲངས་གཉིས་མེད་ཅིང་། །དབང་ལྷས་དབང་བསྐུར་ཆུ་ཡི་ལྷག །སོ་སོར་ལུད་པས་རིན་འབྱུང་དང་། །མི་བསྐྱོད་པ་ཡིས་དབུ་བརྒྱན་གྱུར། ཨཱརྒྷཾ་སོགས། ལག་མཐིལ་ཟླ་སྟེང་ས་བོན་ལྔ། །ཡོངས་གྱུར་དེ་བཞིན་གཤེགས་པ་ལྔ། །ཞུ་བའི་ཡེ་ཤེས་བདུད་རྩིར་གྱུར། །ཆུ་རྒྱུན་དབུལ་ཞིང་། ༀ་ཛམྦྷ་ལ་
ཛ་ལེནྡྲཱ་ཡེ་སྭཱ་ཧཱ། ཞེས་དང་། ༀ་ཨིནྡྲ་ནི་མུ་ཁ་བྷྲ་མ་ནི་སྭཱ་ཧཱ། ༀ་ཛམླུཾ་སྭཱ་ཧཱ། གང་ནུས་བརྗོད། ཨཱརྒྷཾ་ སོགས། ནོར་གྱི་དབང་ཕྱུག་རིན་ཆེན་གཏེར་མངའ་ཞིང་། །གནོད་སྦྱིན་རྗེ་བོ་མགོན་པོ་ཛམྦྷ་ལ། །གཅིག་ནི་གསེར་མདོག་ཅིག་ཤོས་ནམ་མཁའ་འདྲ། །ཕྱག་འཚལ་མཆོད་འབུལ་འབྲས་བུ་མཆིས་པར་མཛོད། །སེར་སྣའི་ལས་ཀྱི་མེ་ཡིས་གདུངས་བ་རྣམས། །སྐྱེ་དང་སྐྱེ་བར་ཁྱེད་ལ་སྐྱབས་སུ་མཆི། །རིན་ཆེན་བདུད་རྩིའི་གཏེར་གྱི་ཆར་རྒྱུན་གྱིས། །སེམས་ཅན་དབུལ་བའི་སྡུག་བསྔལ་ཞི་བར་མཛོད། །ཅེས་སོ། །རང་གི་ཕྱག་ནས་བདུད་རྩིའི་རྒྱུན། །བབས་པས་ཡི་དྭགས་ཀུན་ཚིམ་གྱུར། །ༀ་མ་ཎྀ་པདྨེ་ཧཱུྃ། ༀ་ཨཱཿཧྲཱིཿཧཱུྃ། ཆུ་སྦྱིན་ཞིང་སེ་གོལ་དང་བཅས་ནས། ༀ་ཛ་ལ་མི་དཾ་སརྦ་པྲེ་ཏེ་བྷྱཿསྭཱ་ཧཱ། འཕགས་པ་སྤྱན་རས་གཟིགས་དབང་གི །སོགས། མགོན་པོ་མི་འཁྲུགས་པ་ལ་ཕྱག་འཚལ་ལོ། །ན་མོ་རཏྣ་ཏྲཱ་ཡཱ་ལ། ༀ་ཀཾ་ཀ་ནི་སོགས། བར་དོའི་སེམས་ཅན་ཀུན་ཚིམ་ནས། །
བཀྲེས་སྐོམ་འཇིགས་སྐྲག་ཞི་གྱུར་ཅིག །དེ་ལྟར་ཆུ་ཡི་སྦྱིན་པ་འདིས། །ཀླུ་རྒྱལ་དགའ་བོ་ལ་སོགས་པ། །ཆུ་ཀླུང་བདག་པོ་མ་ལུས་པའི། །སྦྱིན་པ་དམ་པར་འགྱུར་བར་ཤོག །ཅེས་སོ།། །།འབྱུང་བཞི་གཏོར་མ་ནི། གཏོར་སྣོད་རྣམས་སུ་རླུང་མེ་ཆུ་སའི་དབྱིབས་ཀྱི་གཏོར་མ་ཟླ་གམ་གྲུ་གསུམ་ ཟླུམ་པོ་གྲུ་བཞིའི་ཟན་དང་ཀླུད་ཆང་བུ་བཅས་པ་ལ་ཆུས་བྲན། བསངས་སྦྱངས། སྟོང་ལས་རིན་ཆེན་སྣོད་ཀྱི་ནང་། །འབྲུ་གསུམ་ལས་བྱུང་གཏོར་མ་ནི། འབྱུང་བཞིའི་རྣམ་པ་བདུད་རྩི་དངོས། །བྱེད་ལས་ཟག་མེད་བདེ་བསྐྱེད་གྱུར། །རང་ཉིད་དམ་པ་སངས་རྒྱས་སྐུ། །སྨུག་ནག་སེང་ལྡེང་ཌ་རུ་འཁྲོལ། །དངུལ་དཀར་དྲིལ་བུ་བཀུར་བརྟེན་ཞིང་། །རྟེན་འབྲེལ་གལ་ཏ་ཕྲག་ལ་གཟར། །མདོ་རྒྱུད་བསྟན་བཅོས་དགོངས་པ་རྟོགས། །ཨཱ་ལི་ཀཱ་ལིའི་སྒྲ་སྒྲོགས་གྱུར། །ཡཾ་ཨི་ཨཱི་ཙ་ཚ་ཛ་ཛྙ་ཉ། རཾ་རྀ་རཱྀ་ཊ་ཋ་ཌ་ཌྷ་ཎ། བཾ་ཨུ་ཨཱུ་པ་ཕ་བ་བྷ་མ། ལཾ་ལྀ་ལཱྀ་ཏ་ཐ་ད་དྷ་ན། ཞེས་འབུལ་ཞིང་། ཨཱརྒྷཾ་སོགས། སྲ་གཤེར་དྲོ་དང་གཡོ་བའི་ལྷ་རྫས་
འདི་དག་རྣམས། །བླ་མ་རྡོར་སེམས་རིན་འབྱུང་སྣང་མཐའ་དོན་གྲུབ་སོགས། །ཤར་ལྷོ་ནུབ་བྱང་རིགས་བཞིའི་ལྷ་ཚོགས་རྣམས་ལ་འབུལ། །ཉོན་མོངས་རྒྱུ་དང་འབྲས་བུ་ནད་གདོན་སྣང་བ་རྣམས། །ཐམས་ཅད་སྲུངས་ཤིག་ཟློག་ཅིག་བསྒྱུར་བར་མཛད་དུ་གསོལ། །སྣང་བ་སྣ་ཚོགས་རྟེན་ཅིང་འབྲེལ་འབྱུང་དུ་རྟོགས་ནས། །འགྲོ་དོན་ཕྱོགས་མེད་རྟེན་འབྲེལ་སྒོ་ནས་འགྲུབ་པར་ཤོག །།གླུད་ནི། སམྦྷ་ར་དང་། དེ་བཞིན་གཤེགས་པ་བཞིའི་མཚན་བརྗོད་པས་བསྔོས་ལ། ཤ་སོགས་ཐོགས་བཅས་ལུས་ཀྱི་གླུད། །ས་སོགས་ཐོགས་བཅས་ཁམས་ལ་གཏོང་། །སེམས་ཉིད་གླུད་འདི་མཁའ་ལ་གཏོང་། །ཐོགས་བཅས་ཐོགས་མེད་ལྷ་འདྲེ་རྣམས། །གླུད་དང་ཆང་བུ་འདི་ཁྱེར་ལ། །སུ་ལ་གནོད་པ་མ་བྱེད་ཅིག །གཞན་གྱི་བྱད་ཀ་ཕུར་ཁ་སོགས། །གནོད་པ་ཐམས་ཅད་བཟློག་ཏུ་གསོལ། །ཅེས་སོ། །ཞེས་སྤྲུལ་པའི་སྐུ་ཆོས་ཀྱི་རྒྱལ་མཚན་གྱིས་བསྐུལ་བ་ལྟར་དགེ་སློང་ཆོས་ཀྱི་དབང་ཕྱུག་གིས་མདོ་སྨད་འབུམ་
ཉག་གི་ཕྱོགས་སུ་བསྡུས་ཏེ་བཀོད་པའོ།། །།གཏོར་མ་བརྒྱ་རྩ་ཤིན་ཏུ་བསྡུས་པ་ནི། སངས་རྒྱས་ཆོས་ཚོགས་མ་བྱ། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ༀ་སམྦྷ་ར་སམྦྷ་ར་ཧཱུྃ། ལན་བདུན། དེ་བཞིན་གཤེགས་པ་བཞིའི་མཚན་བརྗོད། བླ་མ་ཡི་དམ་དཀོན་མཆོག་སྲི་ཞུའི་མགྲོན། །ཆོས་སྐྱོང་སྲུང་མ་ཕྲིན་ལས་བསྒྲུབ་པའི་མགྲོན། །རིགས་དྲུག་འགྲོ་བ་བྱམས་དང་སྙིང་རྗེའི་མགྲོན། །གདོན་བགེགས་ཤ་ཁོན་ལན་ཆགས་བུ་ལོན་མགྲོན། །དེ་དག་སོ་སོར་མཆོད་པས་མཉེས་གྱུར་ཅིག །སྦྱིན་པས་ཚིམ་ཞིང་སྡུག་བསྔལ་ཞི་གྱུར་ཅིག །དཀོར་སྒྲིབ་ལན་ཆགས་ཐམས་ཅད་བསལ་གྱུར་ཅིག །ཀུན་ཀྱང་རྣམ་མཁྱེན་སངས་རྒྱས་ཐོབ་པར་ཤོག །ༀ་ཛ་ལ་མི་ད་སརྦ་པྲེ་ཏེ་བྷྱཿསྭཱ་ཧཱ། ཡི་དྭགས་རྣམས་དང་བར་སྲིད་རྣམས། །ཆུ་སྦྱིན་འདིས་ཚིམ་བླ་མེད་སངས་རྒྱས་ཤོག །ཅེས་ཞྭ་དམར་པ་དྲུག་པས་མཛད་པའོ།། །།དེ་ནས་ཟས་ཀྱི་བྱ་བ་ལ་འཇུག་པའི་གོང་དུ་དགོས་པའི་དཀོན་མཆོག་གསུམ་རྗེས་སུ་དྲན་པའི་མདོ་ནི། རྒྱ་གར་སྐད་དུ། ཏྲི་རཏྣཱ་ནུ་སྨྲྀ་ཏི་ནཱ་མ་སཱུ་ཏྲ། བོད་སྐད་དུ། འཕགས་པ་
དཀོན་མཆོག་གསུམ་རྗེས་སུ་དྲན་པ་ཞེས་བྱ་བའི་མདོ། །ཐམས་ཅད་མཁྱེན་པ་ལ་ཕྱག་འཚལ་ལོ། །འདི་ལྟར་སངས་རྒྱས་བཅོམ་ལྡན་འདས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སོ། །དེ་བཞིན་གཤེགས་པ་དེ་ནི་བསོད་ནམས་དག་གི་རྒྱུ་མཐུན་པ། དགེ་བའི་རྩ་བ་རྣམས་ཆུད་མི་ཟ་བ། བཟོད་པ་དག་གིས་རབ་ཏུ་བརྒྱན་པ། བསོད་ནམས་ཀྱི་གཏེར་རྣམས་ཀྱི་གཞི། དཔེ་བྱད་བཟང་པོ་རྣམས་ཀྱིས་སྤྲས་པ། མཚན་རྣམས་ཀྱི་མེ་ཏོག་རྒྱས་པ། སྤྱོད་ཡུལ་རན་པར་མཐུན་པ། མཐོང་ན་མི་མཐུན་པ་མེད་པ། དད་པས་མོས་པ་རྣམས་ལ་མངོན་པར་དགའ་བ། ཤེས་རབ་ཟིལ་གྱིས་མི་གནོན་པ། སྟོབས་རྣམས་ལ་བརྫི་བ་མེད་པ། སེམས་
ཅན་ཐམས་ཅད་ཀྱི་སྟོན་པ། བྱང་ཆུབ་སེམས་དཔའ་རྣམས་ཀྱི་ཡབ། འཕགས་པའི་གང་ཟག་རྣམས་ཀྱི་རྒྱལ་པོ། མྱ་ངན་ལས་འདས་པའི་གྲོང་ཁྱེར་དུ་འགྲོ་བ་རྣམས་ཀྱི་དེད་དཔོན། ཡེ་ཤེས་དཔག་ཏུ་མེད་པ། སྤོབས་པ་བསམ་གྱི་མི་ཁྱབ་པ། གསུང་རྣམ་པར་དག་པ། དབྱངས་སྙན་པ། སྐུ་བྱད་བལྟ་བས་ཆོག་མི་ཤེས་པ། སྐུ་མཚུངས་པ་མེད་པ། འདོད་པ་དག་གིས་མ་གོས་པ། །གཟུགས་དག་གིས་ཉེ་བར་མ་གོས་པ། གཟུགས་མེད་པ་དག་དང་མ་འདྲེས་པ། སྡུག་བསྔལ་དག་ལས་རྣམ་པར་གྲོལ་བ། ཕུང་པོ་དག་ལས་རབ་ཏུ་རྣམ་པར་གྲོལ་བ། ཁམས་རྣམས་དང་མི་ལྡན་པ། སྐྱེ་མཆེད་རྣམས་བསྡམས་པ། མདུད་པ་རྣམས་ཤིན་ཏུ་བཅད་པ། ཡོངས་སུ་གདུང་བ་དག་ལས་རྣམ་པར་གྲོལ་བ། སྲེད་པ་ལས་གྲོལ་བ། ཆུ་བོ་ལས་བརྒལ་བ། ཡེ་ཤེས་ཡོངས་སུ་རྫོགས་པ། འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཡེ་
ཤེས་ལ་གནས་པ། མྱ་ངན་ལས་འདས་པ་ལ་མི་གནས་པ། ཡང་དག་པ་ཉིད་ཀྱི་མཐའ་ལ་གནས་པ། སེམས་ཅན་ཐམས་ཅད་ལ་གཟིགས་པའི་ས་ལ་བཞུགས་པ་སྟེ། འདི་དག་ནི་སངས་རྒྱས་བཅོམ་ལྡན་འདས་ཀྱི་སྐུ་ཆེ་བའི་ཡོན་ཏན་ཡང་དག་པ་རྣམས་སོ། །དམ་པའི་ཆོས་ནི་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། བཅོམ་ལྡན་འདས་ཀྱིས་ཆོས་ལེགས་པར་གསུངས་པ་ཡང་དག་པར་མཐོང་བ། ནད་མེད་པ། དུས་ཆད་པ་མེད་པ། ཉེ་བར་གཏོང་བ། འདི་མཐོང་བ་ལ་དོན་ཡོད་པ། མཁས་པ་རྣམས་ཀྱིས་སོ་སོ་རང་གིས་རིག་པར་བྱ་བ། བཅོམ་ལྡན་འདས་ཀྱིས་གསུངས་པའི་ཆོས་འདུལ་བ་ལེགས་པར་སྟོན་པ། ངེས་པར་འབྱུང་བ། རྫོགས་པའི་བྱང་ཆུབ་ཏུ་འགྲོ་བར་བྱེད་པ་མི་མཐུན་པ་མེད་ཅིང་འདུས་པ་དང་ལྡན་པ་
བརྟེན་པ་ཡོད་པ། རྒྱུ་བ་བཅད་པའོ། །ཐེག་པ་ཆེན་པོའི་དགེ་འདུན་ནི་ལེགས་པར་ཞུགས་པ། རིགས་པར་ཞུགས་པ། དྲང་པོར་ཞུགས་པ། མཐུན་པར་ཞུགས་པ། ཐལ་མོ་སྦྱར་བའི་འོས་སུ་གྱུར་པ། ཕྱག་བྱ་བའི་འོས་སུ་གྱུར་པ། བསོད་ནམས་ཀྱི་དཔལ་གྱི་ཞིང་ཡོན་ཡོངས་སུ་སྦྱོང་བ་ཆེན་པོ་སྦྱིན་པའི་གནས་སུ་གྱུར་པ། ཀུན་ཏུ་ཡང་སྦྱིན་པའི་གནས་སུ་གྱུར་པ་ཆེན་པོའོ། །འཕགས་པ་དཀོན་མཆོག་གསུམ་རྗེས་སུ་དྲན་པ་ཞེས་བྱ་བའི་མདོ་རྫོགས་སོ།། །།སངས་རྒྱས་གཙོ་ལ་ཕྱག་འཚལ་ལོ། །སྐྱོབས་པའི་ཆོས་ལ་ཕྱག་འཚལ་ལོ། །དགེ་འདུན་སྡེ་ལ་ཕྱག་འཚལ་ལོ། །གསུམ་ལ་རྟག་ཏུ་གུས་ཕྱག་འཚལ། །ཞེས་དང་། ཕྱག་འཚལ་བ་དང་སོགས་ཀྱང་བྱའོ། །བསྡུ་ན། སངས་རྒྱས་ཡོན་ཏན་བསམ་མི་ཁྱབ། །དམ་པའི་ཆོས་ཀྱང་བསམ་མི་ཁྱབ། །འཕགས་པའི་དགེ་འདུན་བསམ་མི་ཁྱབ། །བསམ་མི་ཁྱབ་ལ་དད་བྱས་པའི། །རྣམ་པར་སྨིན་པའང་བསམ་མི་ཁྱབ། །རྣམ་དག་ཞིང་དུ་སྐྱེ་བར་ཤོག །
ཅེས་དང་། ཞལ་ཟས་རོ་བརྒྱ་ལྡན་ཞིང་ཡིད་འཕྲོག་པ། སོགས་བརྗོད་དོ།། །།དེ་ནས་བཟའ་བཏུང་གི་ཕུད་བླ་མ་དང་དཀོན་མཆོག་ལ་འབུལ་བ་ནི། ༀ་གུ་རུ་བཛྲ་ནཻ་ཝིདྱ་ཨཱཿཧཱུྃ། ༀ་སརྦ་བུདྡྷ་བོ་དྷི་ས་ཏྭེ་བྷྱོ་བཛྲ་ནི་ཝིདྱ་ཨཱཿཧཱུྃ། ༀ་ཀཱ་མ་དེ་ཝ་མཎྜལ་བཛྲ་ནཻ་ཝིདྱ་ཨཱཿཧཱུྃ། ༀ་མཉྫུ་ཤྲཱི་བཛྲ་ནཻ་ཝིདྱ་ཨཱཿཧཱུྃ། ༀ་ཤྲཱི་དྷརྨ་པཱ་ལ་བཛྲ་ནཻ་ཝིདྱ་ཨཱཿཧཱུྃ། ཞེས་ཕུལ་ནས། ༀ་ཧ་རི་ཏེ་སྭཱ་ཧཱ། ༀ་ཧ་རི་ཏེ་མ་ཧཱ་བཛྲ་ཡཀྵི་ཎི་ཧ་ར་ཧ་ར་སརྦ་པཱ་པཾ་ཡཀྵི་སྭཱ་ཧཱ། ༀ་ཨ་གྲ་པིཎྜ་ཨ་ཤི་བྷྱཿསྭཱ་ཧཱ། ཞེས་ཆངས་བུ་གསུམ་སྦྱིན། དེ་ནས་དྲན་ཤེས་བཞིན་བག་ཡོད་དང་ལྡན་པས་ལོངས་སྤྱད་ལ། ༀ་ཨཱུ་ཙྪིཥྟ་པིཎྜ་ཨ་ཤི་བྷྱཿསྭཱ་ཧཱ། ཞེས་ལྷག་མའི་ཆངས་བུ་བྱིན་ལ། ཡོན་སྦྱོང་བ་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ནས་འོད་ཀྱི་རྒྱལ་པོ་མེ་འོད་རབ་ཏུ་གསལ་བ་ལ་ཕྱག་འཚལ་ལོ། །ན་མཿས་མནྟ་པྲ་བྷ་རཱ་ཛཱ་ཡ། ཏ་ཐཱ་ག་ཏཱ་ཡ། ཨཱརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ན་མོ་མཉྫུ་ཤྲི་ཡེ་ཀུ་མཱར་བྷཱུ་ཏཱ་ཡ། བྷོ་དྷི་ས་ཏྭཱ་ཡ། མ་
ཧཱ་ས་ཏྭཱ་ཡ། མ་ཧཱ་ཀཱ་རུ་ཎྀ་ཀཱ་ཡ། ཏདྱ་ཐཱ། ༀ་ནི་རཱ་ལཾ་བྷི་ནི་རཱ་བྷཱ་སེ། ཛ་ཡེ་ཛ་ཡ་ལབྡྷེ། མ་ཧཱ་མ་ཏེ། དཀྵེ་དཀྵེ། ཎི་མེ་བ་རི་ཤོ་དྷ་ཡ་སྭཱ་ཧཱ། རང་ལུས་རྒྱལ་བའི་དཀྱིལ་འཁོར་སོགས་དང་། བཏུང་བ་ཕུལ་བའི་སོགས་དང་། གང་གི་སྦྱིན་པ་གང་ལ་སྦྱིན། །སྦྱིན་པ་ཇི་ལྟར་མི་རྟོགས་པ། །སྦྱིན་པ་མཉམ་པ་དེ་ཉིད་ཀྱིས། །སྦྱིན་བདག་འདི་ལ་ཡོངས་རྫོགས་ཤོག །རྒྱལ་པོ་སྦྱིན་གཏོང་ཉིད་དང་ནི། །སེམས་ཅན་ཕུང་པོ་གཞན་དག་ལ། །ཚེ་རིང་ནད་མེད་ཕུན་སུམ་ཚོགས། །རྟག་ཏུ་བདེ་དང་ལྡན་གྱུར་ཅིག །སྦྱིན་པ་རྒྱ་ཆེན་གྱུར་པ་སོགས་དང་། བསོད་ནམས་སྟོབས་ཆེན་སོགས་བྱའོ།། །།དེ་ནས་ཟས་ཀྱི་རྗེས་སུ་མདོ་སྒྲོག་པ་ནི་ཟབ་མདོ་ལྟ་བུ་མདོ་གང་རུང་འདོན་ཞིང་། བསྡུ་ན། གང་གིས་རྟེན་ཅིང་འབྲེལ་བར་འབྱུང་སོགས་དང་། བསོད་ནམས་འདི་ཡིས་ སོགས་བརྗོད་དོ།། །།དེ་ནས་ཇ་གོང་གི་གསོལ་འདེབས་དང་ཇ་མཆོད་སོགས་ཀྱི་སྐོར་ནི། དྲུག་པ་སེང་གེའི་རྣམ་འཕྲུལ་དུས་གསུམ་མཁྱེན། །འཛམ་གླིང་བསྟན་པའི་མངའ་བདག་
ཀརྨ་པ། །རང་བྱུང་ཆོས་ཀྱི་སྤྱན་ལྡན་རྡོ་རྗེའི་ཐུགས། །འགགས་མེད་རྣམ་རོལ་ཚངས་དབྱངས་རྡོ་རྗེའི་གསུང་། །མཚན་དཔེའི་དཔལ་འབར་དེ་བཞིན་གཤེགས་པའི་སྐུ། །ཀུན་གྱི་རྣམ་འཕྲུལ་དྲུག་པ་ཆོས་ཀྱི་རྗེ། །མཐོང་ཐོས་དྲན་རེག་འགྲོ་རྣམས་དོན་ལྡན་མཛད། །མཐོང་བ་དོན་ལྡན་ཞབས་ལ་གསོལ་བ་འདེབས། ཞེས་འགྲེའོ། །རང་བྱུང་མཚོ་སྐྱེས་ཞབས་ལ༴ མི་བསྐྱོད་རྡོ་རྗེའི་ཞབས་ལ༴ དབང་ཕྱུག་རྡོ་རྗེ་ཞབས་ལ༴ ཆོས་དབྱིངས་རྡོ་རྗེའི་ཞབས་ལ༴ ཡེ་ཤེས་རྡོ་རྗེའི་ཞབས་ལ༴ བྱང་ཆུབ་རྡོ་རྗེའི་ཞབས་ལ༴ བདུད་འདུལ་རྡོ་རྗེའི་ཞབས་ལ༴ ཐེག་མཆོག་རྡོ་རྗེའི་ཞབས་ལ༴ མཁའ་ཁྱབ་རྡོ་རྗེའི་ཞབས་ལ༴ རིག་པའི་རྡོ་རྗེའི་ཞབས་ལ༴ ཨོ་རྒྱན་ཕྲིན་ལས་ཞབས་པད་བརྟན་གྱུར་ཅིག །མྱ་ངན་མི་འདའ་བཞུགས་པར་གསོལ་བ་འདེབས། །ཆོས་ཀྱི་འཁོར་ལོ་བསྐོར་བར༴ འགྲོ་དོན་ཕྱོགས་མེད་མཛད་པར་གསོལ་བ་འདེབས། ༈ །དེ་ལྟར་གསོལ་བ་
བཏབ་པའི་བྱིན་རླབས་ཀྱིས། །བཻ་ཌཱུར་ས་གཞིར་ལྷ་དབང་གཟུགས་བརྙན་ལྟར། འགྲོ་སེམས་སྣང་ངོར་ཐུབ་སྐུའི་གཟུགས་བརྙན་འཆར། །དེ་བཞིན་བདག་ཅག་གསོལ་འདེབས་ཞིང་འདི་རུ། །བསམ་བཞིན་སྲིད་པར་སྐྱེ་བ་བཞེས་ནས་ཀྱང་། །བྱམས་ཆེན་ཐུགས་རྗེའི་ལྕགས་ཀྱུས་རབ་བཟུང་ནས། །ཐེག་མཆོག་བདུད་རྩིའི་དགའ་སྟོན་འགྱེད་དུ་གསོལ། །འདས་པའི་སངས་རྒྱས་གཞན་ཕ ན་རྣམ་རོལ་སོགས། །ད་ལྟ་མཁས་གྲུབ་ཀུན་གྱི་གཙུག་གི་རྒྱན། །མ་འོངས་སངས་རྒྱས་དྲུག་པ་སེང་གེའི་མཚན། །ཞིང་རྣམས་ཀུན་ཏུ་རྣམ་འཕྲུལ་སྣ་ཚོགས་ཀྱིས། །དུས་གསུམ་རྒྱལ་བ་ཀུན་གྱི་ཕྲིན་ལས་པ། །ཀརྨ་པ་ཞེས་ཉི་ཟླ་ལྟར་གསལ་བའི། །ཞབས་ལ་ཕྱག་འཚལ་གསོལ་འདེབས་བྱིན་གྱིས་རློབས། །ཚེ་རབས་ཀུན་ཏུ་རྗེས་སུ་འཛིན་གྱུར་ཅིག །བདུད་བཞི་ལས་རྒྱལ་རྒྱལ་བའི་ཕྲིན་ལས་པ། །ཀརྨ་པ་བསྟན་བསྟན་པའི་སྙིང་པོ་ནི། །ཕྱོགས་མཐར་ཀུན་ཁྱབ་ཁྱབ་
ཅིང་རྒྱུན་མི་འཆད། །རྟག་པར་རབ་འཕེལ་འཕེལ་བའི་བཀྲ་ཤིས་ཤོག །།གར་དབང་རྡོ་རྗེ་འཆང་གི་སྤྲུལ་པའི་སྐུ། །ཞིང་འདིར་འགྲོ་བའི་དོན་དུ་ཡང་ནས་ཡང་། །མཐའ་ཡས་སེམས་ཅན་སྒྲོལ་བའི་ཕྲིན་ལས་ཅན། །ཞྭ་དམར་ཅོད་པན་འཛིན་པ་རྣམས་ལ་འདུད། །སྟོང་ཉིད་སྙིང་རྗེའི་དབང་ཕྱུག་གཞོན་ནུ་བ། །བསླབ་གསུམ་རྒྱན་གྱིས་སྤྲས་པའི་ཚུལ་ཁྲིམས་དཔལ། །རྫུ་འཕྲུལ་ཐོགས་མེད་སྟོན་པའི་ནམ་མཁའ་འོད། །རྩེ་གཅིག་སྒྲུབ་ལ་བརྩོན་པའི་བཀྲ་ཤིས་གྲགས། །འོད་གསལ་རྒྱུན་ཆད་མེད་པའི་གྲགས་སེང་བ། །མཁའ་འགྲོའི་དབང་ཕྱུག་རྒྱལ་སྲས་མཁའ་སྤྱོད་དབང་། ༈ །གདུལ་དཀའ་འདུལ་མཛད་ཆོས་ཀྱི་དཔལ་ཡེ་ཤེས། །འཆད་རྩོད་རྩོམ་པའི་མངའ་བདག་ཆོས་ཀྱི་གྲགས། །མདོ་སྔགས་བསྟན་པའི་བདག་པོ་དཀོན་མཆོག་འབངས། །མཁྱེན་བརྩེའི་བདག་ཉིད་ཆོས་ཀྱི་དབང་ཕྱུག་ཞབས། །ངེས་དོན་རྒྱ་ཆེན་མངའ་བརྙེས་ཡེ་ཤེས་
མཚན། །ལྷར་བཅས་འདྲེན་པ་དཀོན་མཆོག་ཆོས་གྲུབ་དང་། །དཔལ་ལྡན་མི་ཕམ་ཆོས་གྲུབ་རྒྱ་མཚོ་ལ། །གསོལ་བ་འདེབས་སོ་བྱིན་གྱིས་བརླབ་པ་དང་། །བདག་སོགས་གདུལ་བྱ་ཡལ་བར་མི་འདོར་བར། །ཐེག་མཆོག་བདུད་རྩིའི་དགའ་སྟོན་འགྱེད་བཞིན་དུ། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ཅེས་དང་། ལུས་དང་ལོངས་སྤྱོད་དགེ་བའི་རྩ་བར་བཅས། །རང་གཞན་རྒྱུད་ཀྱིས་བསྡུས་པའི་གོ་ས་ནས། །ཀུན་བཟང་མཆོད་པའི་སྤྲིན་དང་བདེ་ཆེན་རོས། །ཟག་མེད་བླ་མའི་དགོངས་པ་རྫོགས་ཕྱིར་མཆོད། །དུས་གསུམ་མཁྱེན་པའི་བླ་མ་ལ། །དུས་གསུམ་ཀུན་ཏུ་སྐྱབས་ཞུའི་ཕྱིར། །དུས་གསུམ་རྒྱས་པར་འགེངས་བྱེད་པའི། །དུས་གསུམ་མཆོད་སྤྲིན་རྒྱ་མཚོས་མཆོད། །ཅེས་པའང་། ཀརྨ་པ་བརྒྱད་པས་སོ། །ཐོས་པའི་མཆོད་ཡོན་རྒྱ་མཚོ་ལེགས་གཏམས་ཤིང་། །རྣམ་བཀྲ་རིག་པའི་མེ་ཏོག་ཀུན་ཏུ་བཀྲམ། །ཚུལ་ཁྲིམས་རྣམ་དག་དྲི་ཡི་བདུག་སྤོས་
འཐུལ། །འཆད་པ་ཉིན་མོར་བྱེད་པའི་སྒྲོན་མེ་སྦར། །རྩོད་པ་ཉེས་པ་རྣམ་སྦྱོང་དྲི་ཆབ་གཏམས། །བསམ་གཏན་རོ་བརྒྱ་ལྡན་པའི་ཞལ་ཟས་བཤམས། །རྩོམ་པ་སྡེབ་ལེགས་སྙན་པའི་རོལ་མོ་སོགས། །འཕགས་རྣམས་དགྱེས་བྱེད་མཆོད་པ་འདི་དག་གིས། །བླ་མེད་བླ་མ་རྒྱལ་བ་སྲས་དང་བཅས། །མཆོད་པར་འོས་པའི་སྐྱབས་ཀུན་མཆོད་པར་བགྱི། །སྟོན་པ་མཆོག་གིས་ཇི་ལྟར་བསྟན་པ་བཞིན། །རྒྱུ་དང་འབྲས་བུའི་ཐེག་པ་རབ་བསལ་བར། །ཞིང་རྣམས་ཀུན་ཏུ་ནུབ་མེད་འབར་མཛད་པ། །བཀའ་བརྒྱུད་རིམ་པར་བྱོན་རྣམས་མཆོད་པར་བགྱི། །རྒྱལ་དབང་ཆོས་གྲགས་རྒྱ་མཚོ། །མཚུངས་མེད་དབྱངས་ཅན་བཟང་པོ། །སྤྲུལ་སྐུ་དཀོན་མཆོག་ཡན་ལག །རྗེ་བཙུན་དབང་ཕྱུག་རྡོ་རྗེ། །གར་དབང་ཆོས་ཀྱི་དབང་ཕྱུག །རྒྱལ་མཆོག་ཆོས་དབྱིངས་རྡོ་རྗེ། །དཔལ་ལྡན་ཡེ་ཤེས་སྙིང་པོ། །མཚུངས་མེད་ཡེ་ཤེས་རྡོ་རྗེ། །དཔལ་ཆེན་ཆོས་ཀྱི་དོན་གྲུབ། །
རྒྱལ་དབང་བྱང་ཆུབ་རྡོ་རྗེ། །འཇམ་མགོན་ཆོས་ཀྱི་འབྱུང་གནས། །རྗེ་བཙུན་བདུད་འདུལ་རྡོ་རྗེ། །མི་ཕམ་ཆོས་གྲུབ་རྒྱ་མཚོ། །པདྨ་ཉིན་བྱེད་དབང་པོ་མཆོད་པར་བགྱི། །རྗེ་བཙུན་རིགས་ཀུན་རྡོ་རྗེ། །འཇམ་མགོན་བློ་གྲོས་མཐའ་ཡས། །ཀུན་བཟང་མཁའ་ཁྱབ་རྡོ་རྗེ། །མཁྱེན་ཀུན་པདྨ་དབང་མཆོག །དཔལ་ལྡན་མཁྱེན་བརྩེ་འོད་ཟེར། །རང་བྱུང་རིག་པའི་རྡོ་རྗེ། །དྲིན་ཆེན་རྩ་བའི་བླ་མ། །ཡི་དམ་རྡོ་རྗེ་ཕག་མོ། །ཆོས་སྐྱོང་མ་མགོན་ལྕམ་དྲལ་མཆོད་པར་བགྱི། །མཆོག་དང་ཐུན་མོང་དངོས་གྲུབ་སྩལ་དུ་གསོལ། ༈ །ངེས་པར་འབྱུང་བའི་མཆོད་ཡོན་རྒྱ་མཚོ་ལས། །ཚུལ་ཁྲིམས་རྣམ་དག་མེ་ཏོག་རབ་ཏུ་བཞད། །མོས་པ་གཞལ་མེད་དྲི་བསུང་ཅི་ཡང་འཕྲོ། །རྟོགས་པའི་སྣང་གསལ་འོད་ཟེར་རབ་ཏུ་འབར། །གཟུངས་དང་རྫུ་འཕྲུལ་དྲི་ཆབ་ཀུན་ཏུ་རྩེན། །ཉམས་སྣང་ཁོར་ཡུག་བདུད་རྩིའི་རོ་མཆོག་ལྡན། །གདུང་ཤུགས་སྒྲ་དབྱངས་སྙན་གྲགས་ཀུན་ཏུ་
གསང་། །བྱང་ཆུབ་སེམས་ཀྱིས་བཟོད་མེད་འགྲོ་བའི་དོན། །ལྷ་རྫས་ཁང་བཟང་ལ་སོགས་རབ་འཕྲུལ་བའི། །རྡོ་རྗེའི་ལུས་མཆོག་དཀྱིལ་འཁོར་དག་པའི་དབུས། །བདུད་རྩི་སྒྲ་གཅན་རྒྱས་པའི་སྙིང་ག་དེར། །མི་ཤིགས་གནས་པའི་དཔལ་ལྡན་ཀརྨ་པ། །འཆི་བ་མེད་པར་བཞུགས་དེར་ལེགས་བསམས་ཏེ། །སྐྱབས་གནས་ཕྱོགས་གར་བཙལ་ཡང་མ་རྙེད་པས། །རྫོགས་སངས་རྒྱས་ཁྱོད་རྟག་ཏུ་མཉེས་བྱེད་ན། །བདག་མིན་ཁྱོད་ལ་དགོངས་རྒྱུ་མེད་པའི་ཕྱིར། །སྲིད་ཞིའི་མགོན་པོས་འབྲལ་མེད་སྐྱོང་བར་མཛོད། །ཅེས་མི་བསྐྱོད་རྡོ་རྗེས་སོ། །མཁྱེན་བཟང་བསིལ་ཟེར་དཀར་པོའི་ཚར་དངར་ལས། །རྣམ་གྲོལ་ཀུ་མུད་བཞད་པའི་དཔལ་འཛིན་པར། །སྐལ་ལྡན་བུང་བ་གཞོན་ནུའི་སྤྲིན་སྡུད་པ། །སྨྲ་བའི་ཟླ་བ་གང་དེ་རྒྱལ་གྱུར་ཅིག །དཔལ་འབྱོར་ཆུ་བོ་འདུས་པའི་ཆུ་གཏེར་ཆེ། །རང་གཞན་དོན་གཉིས་གྲུབ་པའི་ནོར་བུས་གང་། །ཕྲིན་ལས་རླབས་
ཕྲེང་ཕྱོགས་ཀྱི་མཐར་ཁྱབ་པ། །དཔལ་ལྡན་བླ་མ་གང་དེ་རྒྱལ་གྱུར་ཅིག །ཆོས་ཀྱི་གྲགས་པའི་བ་དན་དཀར་པོ་ནི། །རྒྱ་མཚོའི་གོས་ཅན་ཀུན་ལ་བྲིས་པ་བཞིན། །དཔལ་ལྡན་སྲིད་ཞིའི་མགོན་དུ་གང་གྱུར་པ། །སྐལ་བཟང་ཆོས་རྗེའི་ཕྲིན་ལས་རྒྱས་གྱུར་ཅིག །དུས་གསུམ་སངས་རྒྱས་ཐམས་ཅད་ཁྱོད་ལས་འཁྲུངས། །སངས་རྒྱས་ཀུན་ལས་ཁྱོད་ཉིད་གཅིག་པུ་འཁྲུངས། །གཅིག་ཆོག་རྒྱལ་པོ་བླ་མ་རིན་པོ་ཆེ། །སྐུ་ཁམས་བཟང་ཞིང་ཕྲིན་ལས་རྒྱས་གྱུར་ཅིག །སྲིད་ཞིའི་སྐྱབས་གནས་མགོན་པོ་བླ་མ་རྗེ། །འཁོར་འདས་ཀུན་གྱི་བདེ་སྐྱིད་འབྱུང་བའི་གཞི། །གསོལ་བ་གང་བཏབ་རྗེས་སུ་འཛིན་མཛད་པ། །གསོལ་བ་འདེབས་སོ་བྱིན་གྱིས་བརླབས་པ་དང་། །བླ་མ་ཁྱོད་ཀྱིས་ཅི་གསུང་ཚད་མར་འཛིན། །ཅི་མཛད་ལེགས་བལྟ་ཐུགས་ཡིད་གཅིག་ཏུ་བསྲེས། །གང་བཅོལ་ཕྲིན་ལས་ཐམས་ཅད་བསྒྲུབ་ལགས་པས། །སྐུ་ཚེ་རིང་བར་བྱིན་གྱིས་བརླབ་ཏུ་གསོལ།
༈ །དང་པོ་འཇམ་དབྱངས་སྤྲུལ་པའི་ཞིང་དུ་སྐྱེས། །བར་དུ་བློ་ལྡན་དུ་མས་འབད་པས་བཙལ། །ཐ་མར་གཏི་མུག་གཉིད་ལས་སློང་བྱེད་པའི། །ཤེས་རབ་བདུད་རྩིའི་དགའ་སྟོན་དམ་པས་མཆོད། །ལོངས་སྤྱོད་འཁོར་ལོར་མཆོག་ཏུ་ཚིམ་པ་སྐྱེ། །ཆོས་ཀྱི་འཁོར་ལོ་སྔོན་མེད་བློ་གྲོས་འཆར། །བདེ་ཆེན་འཁོར་ལོ་སྒོ་གསུམ་ཁྱབ་བྱེད་པའི། །ཇ་བཟང་བདུད་རྩིས་བླ་མ་སངས་རྒྱས་མཆོད། ཁ་དོག་དྲི་རོ་ནུས་པ་ཕུན་ཚོགས་ལྡན། །རང་གི་ཕུང་ཁམས་རྒྱལ་བའི་དཀྱིལ་འཁོར་སྤྲོ། །དད་པ་དམ་ཚིག་ལྡན་པའི་རང་གཟུགས་ཀྱིས། །བླ་མ་དམ་པ་རང་དང་འབྲལ་མེད་ཤོག །ཞྭ་དམར་པ་དྲུག་པས་མཛད་པའོ། །ཨོ་རྒྱན་ཡུལ་དུ་སྐུ་འཁྲུངས་པའི། །སློབ་དཔོན་པདྨ་བཛྲ་ཉིད། །མཐིང་ནག་རྡོར་དྲིལ་འཛིན་སྤྲུལ་པའི། །པད་འབྱུང་ཡབ་ཡུམ་ཞལ་དུ་མཆོད། །དེ་ཉིད་བསིལ་ཚལ་དུར་ཁྲོད་དུ། །ཡོན་ཏན་སྣ་ཚོགས་དངོས་གྲུབ་བརྙེས། །རབ་བྱུང་མཆོག་སྦྱིན་ཐོད་པ་
འཛིན། །པདྨ་སམྦྷའི་ཞལ་དུ་མཆོད། །དེ་ཉིད་རཱ་ག་རཀྟ་ཡི། །གནས་སུ་རིག་པ་འཛིན་པའི་སྐུ། །ཕྱག་གཉིས་ཟས་གཞོང་ཅང་ཏེའུ་འཛིན། །བློ་ལྡན་མཆོག་སྲེད་ཞལ་དུ་མཆོད། །དེ་ཉིད་དགའ་ཚལ་དུར་ཁྲོད་དུ། །རྒྱལ་པོའི་ཚུལ་གྱི་ཕྱག་གཉིས་པ། །ལྕགས་སྒྲོག་བཅུད་ལེན་གཞོང་པ་འཛིན། །པདྨ་རྒྱལ་པོའི་ཞལ་དུ་མཆོད། །དེ་ཉིད་སོ་སའི་དུར་ཁྲོད་དུ། །ཧེ་རུ་ཀ་དཔལ་དམར་སེར་མདོག །རྩེ་གསུམ་ཞག་པ་འཛིན་སྤྲུལ་པའི། །ཉི་མ་འོད་ཟེར་ཞལ་དུ་མཆོད། །དེ་ཉིད་ཟ་ཧོར་ཡུལ་དབུས་སུ། །ཐུབ་པའི་ཚུལ་གྱི་འགྱིངས་བག་ཅན། །ཕྱག་གཉིས་ས་གནོན་མཉམ་གཞག་མཛད། །ཤཱཀྱ་སེང་གེའི་ཞལ་དུ་མཆོད། །དེ་ཉིད་མ་ག་དྷ་གྲོང་དུ། །མཐིང་ནག་རྡོ་རྗེ་སྡིགས་མཛུབ་མཛད། །ཁྲོ་བོ་སེང་གེའི་པགས་པ་གསོལ། །སེང་གེ་སྒྲ་སྒྲོགས་ཞལ༴ དེ་ཉིད་སྤ་གྲོ་སྟག་ཚང་དུ། ཁྲོ་བོ་ཆོལ་པ་སྟག་ལ་ཆིབས། །སྨུག་ནག་རྡོ་རྗེ་ཕུར་པ་བསྣམས། །རྡོ་རྗེ་གྲོ་ལོད་ཞལ༴ དེ་
ཉིད་ཁ་བ་ཅན་ལྗོང་སུ། རྒྱལ་བ་འགྲོ་བའི་དོན་མཛད་པ། །སྤྲུལ་སྐུ་ཞྭ་ནག་ཅོད་པན་ཅན། །རིམ་པར་བྱོན་རྣམས་ཞལ་དུ་མཆོད། །ཞི་རྒྱས་དབང་དང་དྲག་པོ་ཡི། །ཕྲིན་ལས་མྱུར་དུ་འགྲུབ་པ་དང་། །ནད་གདོན་བར་ཆད་ཀུན་སེལ་ཞིང་། །མཆོག་ཐུན་དངོས་གྲུབ་མྱུར་དུ་སྩོལ། །ཅེས་དཔའ་བོ་གཙུག་ལག་རྒྱ་མཚོས་མཛད་པའོ།། །།དེ་ནས་དུས་ཐམས་ཅད་དང་ཁྱད་པར་ཐུན་ཆེན་པོ་བཞིར་བྱ་བའི་བླ་མའི་རྣལ་འབྱོར་ནི། ད་ནི་ཁོ་བོ་མི་བསྐྱོད་རྡོ་རྗེ་ཁོ་ན་མིན་པ་བསམ་རྒྱུ་མེད་པ་ཀུན་རང་གི་ལུས་ཡེ་ཤེས་ཀྱི་ མཁའ་འགྲོ་གཅེར་བུ་ལང་ཚོ་ཕུན་སུམ་ཚོགས་པ། དབུ་སྐྲ་སིལ་མས་རྒྱབ་ནོན་པ། འོད་ཕུང་གི་དབུས་ན་འཆི་མེད་བདུད་རྩིས་གང་བའི་ཀ་པཱ་ལ་ཐོགས་པ། མེ་ཏོག་དམར་པོའི་རྒྱན་ཅན། གཞན་རྒྱན་སྤངས་པ། དེའི་མདུན་དུ་རྗེ་བཙུན་མི་བསྐྱོད་རྡོ་རྗེ་སྟག་ལྤགས་ཀྱི་ཤམ་ཐབས། གླང་ཆེན་གྱི་པགས་པའི་བླ་གོས་ཅན། ཕྱག་རྒྱ་དྲུག་གིས་སྤྲས་པ། དབུ་སྐྲ་ཐོར་ཚུགས་སྣ་ཚོགས་རྡོ་རྗེ་ཟླ་བས་བརྒྱན་པ། ཕྱག་གཉིས་ཆོས་འབྱུང་གི་ཕྱག་རྒྱ་སྤྱི་བོར་བཀོད་པ། ཞབས་གཡོན་སྐྱིལ་ཀྲུང་ཕྱེད་པ་དང་། གཡས་བརྐྱང་བས་ཡེ་ཤེས་ཀྱི་མེ་དཔུང་གི་དབུས་ན་བཞུགས་པ། དེ་ལ་ཡུམ་ཡེ་ཤེས་ཀྱི་མཁའ་འགྲོས་
བདུད་རྩི་བསྟབས་པ་ཙམ་གྱིས་ཡེ་ཤེས་ཀྱི་མེ་དམར་འུར་གྱིས་འབར་བ། རང་ཉིད་ཡེ་ཤེས་ཀྱི་མཁའ་འགྲོའི་བྷ་ག་ནས་སྤྱན་དྲངས། ཐུགས་ཀར་ཞུགས་པར་མོས་ལ། རླུང་དྲག་སྦྱོར་གྱི་ངང་ནས་གསོལ་བ་ཐོབ་ཅིག་དང་། ཁོ་བོ་མི་བསྐྱོད་རྡོ་རྗེས་བྱིན་གྱིས་རློབ་པ་ཡིན་ནོ་ཞེས་བྱིན་དབབ་པར་བྱའོ། །ན་མོ་གུ་རུ། སྤྱི་བོའི་གཙུག་ན་ཡེ་ཤེས་མཁའ་འགྲོ་མ། །གཅེར་བུ་བྷ་ག་ནུ་མ་རབ་ཏུ་རྒྱས། །སྐྲ་གྲོལ་སྤྱན་གསུམ་ནམ་མཁའི་མཐོངས་ལ་གཟིགས། །བདེ་བ་མི་བཟོད་འགྱུར་བའི་གར་སྟབས་སྟོན། །དེ་འདྲ་གྲངས་མེད་གཞལ་མེད་བུན་ལོང་ནང་། །རྩ་བའི་བླ་མ་མི་བསྐྱོད་རྡོ་རྗེ་ནི། །དགེ་སློང་ཆ་ལུགས་ཞྭ་ནག་གསེར་མདངས་ཅན། །ཐབས་ཤེས་དབྱེར་མེད་རྡོ་རྗེ་དྲིལ་བུ་འཛིན། །བདེ་སྟོང་དབྱེ་བ་མེད་པའི་ལྟ་སྟངས་མཛད། །གསོལ་བ་བཏབ་པ་ཙམ་གྱིས་མོས་གུས་འབར། །མོས་གུས་འབར་བ་ཙམ་གྱིས་བྱིན་རླབས་འུར། །བྱིན་རླབས་འུར་བ་ཙམ་གྱིས་ཐུན་མོང་དང་། །མཆོག་གི་དངོས་གྲུབ་ནོར་བུ་འབར་བ་བསྣམས། །གནམ་ས་བླ་འོག་མེད་པར་
ཆར་ལྟར་འབབ། །ད་ནི་སྙིང་ནས་གསོལ་བ་འདེབས་པའི་དུས། །ཀྱེ། སྣང་ཞིང་སྟོང་ལ་སྟོང་ཞིང་སྣང་། །སྣང་སྟོང་དབྱེར་མེད་བླ་མའི་སྐུ། །བླ་མའི་སྐུ་ལ་གསོལ་བ་འདེབས། །བླ་མའི་སྐུ་ཡིས་བྱིན་གྱིས་རློབས། །གྲག་ཅིང་སྟོང་ལ་སྟོང་ཞིང་གྲག །གྲག་སྟོང་དབྱེར་མེད་བླ་མའི་གསུང་། །བླ་མའི་གསུང་ལ་གསོལ་བ་འདེབས། །བླ་མའི་གསུང་གིས་བྱིན་གྱིས་རློབས། །བདེ་ཞིང་སྟོང་ལ་སྟོང་ཞིང་བདེ། །བདེ་སྟོང་དབྱེར་མེད་བླ་མའི་ཐུགས། །བླ་མའི་ཐུགས་ལ་གསོལ་བ་འདེབས། །བླ་མའི་ཐུགས་ཀྱིས་བྱིན་གྱིས་རློབས། །ཀྱཻ། གུ་རུ་རཏྣ་བྱོན་པའི་ཚེ། །ནམ་མཁའ་འཇའ་དང་འོད་ཀྱིས་གང་། །སྤྲུལ་པའི་ཕོ་ཉ་འགྱེད་མཛད་ཅིང་། །བྱིན་རླབས་མེ་དཔུང་འུ་རུ་རུ། །ཉམས་དང་རྟོགས་པ་ཤ་ར་ར། །ཀྱེ། བླ་མ་ཆེན་པོ་ཁྱེད་ཀྱི་རྗེས་སུ་བདག་བསྒྲུབ་ཕྱིར། །བྱིན་གྱིས་རློབ་ཕྱིར་གཤེགས་སུ་གསོལ། །གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་
བདག་ལ་དབང་བཞི་སྐུར། །མཆོག་དང་ཐུན་མོང་དངོས་གྲུབ་སྩོལ། །མི་མཐུན་རྐྱེན་དང་བར་ཆད་སོལ། །དགྲ་བགེགས་མ་ལུས་ཞི་བར་མཛོད། །ཡེ་ཤེས་མཁའ་འགྲོ་ལྗང་གུ་མཁའ་ལ་ཤར། །ནད་གདོན་དྲི་མའི་ཚོགས་རྣམས་འོད་ཀྱིས་བསལ། །སྡིག་སྒྲིབ་ཉེས་པ་རྒྱུད་དུ་འཁྲིས་པ་རྣམས། །རྣལ་འབྱོར་མ་དཔལ་མདུན་དུ་མཐོལ་ལོ་བཤགས། །ཡེ་ཤེས་མཁའ་འགྲོ་སེར་མོ་མཁའ་ལ་ཤར། །ནད་གདོན་དྲི་མའི་ཚོགས་རྣམས་འོད་ཀྱིས་བསལ། །སྡིག་སྒྲིབ་ཉེས་པ་རྒྱུད་དུ་འཁྲིས་པ་རྣམས། །རྣལ་འབྱོར་མ་དཔལ་མདུན་དུ་མཐོལ་ལོ་བཤགས། །ཡེ་ཤེས་མཁའ་འགྲོ་དམར་མོ་མཁའ་ལ་ཤར། །ནད་གདོན་དྲི་མའི་ཚོགས་རྣམས་འོད་ཀྱིས་བསལ། །སྡིག་སྒྲིབ་ཉེས་པ་རྒྱུད་དུ་འཁྲིས་པ་རྣམས། །རྣལ་འབྱོར་མ་དཔལ་མདུན་དུ་མཐོལ་ལོ་བཤགས། །ཡེ་ཤེས་མཁའ་འགྲོ་དཀར་མོ་མཁའ་ལ་ཤར། །ནད་གདོན་དྲི་མའི་ཚོགས་རྣམས་འོད་ཀྱིས་བསལ། །སྡིག་སྒྲིབ་ཉེས་པ་
རྒྱུད་དུ་འཁྲིས་པ་རྣམས། །རྣལ་འབྱོར་མ་དཔལ་མདུན་དུ་མཐོལ་ལོ་བཤགས། །ཡེ་ཤེས་མཁའ་འགྲོ་ནག་མོ་མཁའ་ལ་ཤར། །ནད་གདོན་དྲི་མའི་ཚོགས་རྣམས་འོད་ཀྱིས་བསལ། །སྡིག་སྒྲིབ་ཉེས་པ་རྒྱུད་དུ་འཁྲིས་པ་རྣམས། །རྣལ་འབྱོར་མ་དཔལ་མདུན་དུ་མཐོལ་ལོ་བཤགས། །ཡེ་ཤེས་མཁའ་འགྲོ་སྔོན་མོ་མཁའ་ལ་ཤར། །ནད་གདོན་དྲི་མའི་ཚོགས་རྣམས་འོད་ཀྱིས་བསལ། །སྡིག་སྒྲིབ་ཉེས་པ་རྒྱུད་དུ་འཁྲིས་པ་རྣམས། །རྣལ་འབྱོར་མ་དཔལ་མདུན་དུ་མཐོལ་ལོ་བཤགས། །ཡེ་ཤེས་མཁའ་འགྲོ་ཁྲ་མོ་མཁའ་ལ་ཤར། །ནད་གདོན་དྲི་མའི་ཚོགས་རྣམས་འོད་ཀྱིས་བསལ། །སྡིག་སྒྲིབ་ཉེས་པ་རྒྱུད་དུ་འཁྲིས་པ་རྣམས། །རྣལ་འབྱོར་མ་དཔལ་མདུན་དུ་མཐོལ་ལོ་བཤགས། །ནམ་མཁའ་གང་བའི་མི་བསྐྱོད་རྡོ་རྗེ་ཨཱཿ །འོད་ཟེར་འགྱེད་པའི་རྡོ་རྗེ་དགའ་བ་ཧོཿ །ཕོ་ཉ་འབར་བའི་དབྱངས་ཅན་ནུས་པ་ཧཱུྃ། །དྲི་མ་སེལ་བའི་ཕྲིན་ལས་དྲག་
པོ་ༀ། །རྗེ་བཙུན་དམ་པ་སྐུ་བཞིའི་དབང་ཕྱུག །ཅི་མཛད་ཡེ་ཤེས་ཀྱི་རོལ་པར་འཆར་བ། །ཁྱབ་བདག་རྒྱལ་དབང་ཀརྨ་པ་ཆེན་པོ། །སངས་རྒྱས་བྱིན་རླབས་ཀྱི་རྒྱ་མཚོ་མཁྱེན་ནོ། །ཡོན་ཏན་གྱི་ཕུང་པོ་ཉེས་པ་ཀུན་ཟད། །སངས་རྒྱས་ཀྱི་སྙིང་པོ་བླ་མར་སྣང་བ། །ཐུགས་རྗེའི་དབང་པོ་མཆོག་གི་སྤྲུལ་སྐུ། །རྗེ་བཙུན་རྡོ་རྗེའི་དབྱངས་ཅན་མཁྱེན་ནོ། །ནམ་གཞག་གཏན་གྱི་འདུན་མའི་རེ་ས། །སྐུ་བཞིའི་བདག་ཉིད་དྭགས་པོ་བཀའ་བརྒྱུད། །སྐལ་ལྡན་གྱི་སེམས་རྒྱུད་བྱིན་གྱིས་རློབ་པ། །འགྲན་ཟླ་དང་བྲལ་བའི་བརྒྱུད་པ་མཁྱེན་ནོ། །ཐ་མལ་གྱི་འཁྲུལ་པ་རང་གར་ཞིག་སྟེ། །ཆོས་དབྱིངས་དྲི་མེད་ཀྱི་རང་གཟུགས་གསལ་བ། །ཕྲིན་ལས་ཀྱི་མངའ་བདག་དུས་གསུམ་མཁྱེན་པ། །བརྩེ་བ་ཆེན་པོའི་བདག་ཉིད་མཁྱེན་ནོ། །སྙིགས་མའི་དུས་འདིར་སྣ་ཚོགས་ཚུལ་གྱིས། །སེམས་ཅན་འདུལ་མཛད་རྒྱལ་བའི་དབང་པོ། །རེ་ས་ལྟོས་ས་དང་བཅས་པ་ཡིན་པས། །
དངོས་གྲུབ་ཀྱི་འབྱུང་ཁུངས་དམ་པ་མཁྱེན་ནོ། །རྗེ་རྒྱལ་བ་ཐམས་ཅད་གཅིག་ཏུ་བསྡུས་ནས། །སྐལ་ལྡན་སྨིན་པར་མཛད་པའི་ནུས་ཅན། །བདེ་བར་གཤེགས་པ་ཀརྨ་པའི་ཀཾ་ཚང་། །སྒྲིབ་གཉིས་རྙོག་པ་དང་བྲལ་བ་མཁྱེན་ནོ། །རྗེ་ཕྲིན་ལས་བཞི་ལ་རང་དབང་ཐོབ་ནས། །ཡེ་ཤེས་གཏད་ཙམ་གྱིས་བྱིན་རླབས་འཕོ་བ། །སྒྲུབ་བརྒྱུད་གཅིག་བསྡུས་རྡོ་རྗེའི་དབྱངས་ཅན། །དཔལ་ལྡན་ཀརྨ་པ་ཆེན་པོ་མཁྱེན་ནོ། །རྡོ་རྗེ་འཆང་ཆེན་ཡོན་ཏན་བརྒྱད་ལྡན། །ཧེ་རུ་ཀ་དཔལ་ནི་ཡན་ལག་བདུན་ལྡན། །རྒྱལ་བའི་དབང་པོ་སངས་རྒྱས་འདུས་པའི་སྐུ། །རྗེ་རྒྱལ་དབང་མི་བསྐྱོད་རྡོ་རྗེ་མཁྱེན་ནོ། །རྒྱལ་བ་གཅིག་བསྡུས་ཀརྨ་པ་མཁྱེན་ནོ། །སངས་རྒྱས་གཅིག་བསྡུས་ཀརྨ་པ་མཁྱེན་ནོ། །བདེ་གཤེགས་གཅིག་བསྡུས་ཀརྨ་པ་མཁྱེན་ནོ། །ཐམས་ཅད་མཁྱེན་པ་ཀརྨ་པ་མཁྱེན་ནོ། །ཀརྨ་པ་མཁྱེན་ནོ། །ཞེས་གྲངས་མེད་བརྗོད། ཐུགས་རྗེ་གཅིག་བསྡུས་མཁྱེན་ནོ། །
སངས་རྒྱས་གཅིག་བསྡུས་མཁྱེན་ནོ། །ཀུན་འདུས་ཆོས་རྗེ་མཁྱེན་ནོ། །མི་བསྐྱོད་རྡོ་རྗེ་ལ་གསོལ་བ་འདེབས་སོ། །ཆོས་གྲགས་རྒྱ་མཚོ་ལ་གསོལ་བ་འདེབས་སོ། །དྭགས་པོ་བཀའ་རྒྱུད་ལ་གསོལ་བ་འདེབས་སོ། །ཀརྨ་ཀཾ་ཚང་ལ་གསོལ་བ་འདེབས་སོ། །རྗེ་བཙུན་ཁྱེད་རང་ལྟ་བུར་ཤོག་ཅིག །ཆོས་རྗེ་ཁྱེད་རང་ལྟ་བུར་ཤོག་ཅིག །བླ་མ་ཁྱེད་རང་ལྟ་བུར་ཤོག་ཅིག །འགྲོ་མགོན་ཁྱེད་རང་ལྟ་བུར་ཤོག་ཅིག །ཕ་ཅིག་ཐམས་ཅད་མཁྱེན་པ། སངས་རྒྱས་མཉན་པ་གྲུབ་ཐོབ། རྒྱལ་དབང་མི་བསྐྱོད་རྡོ་རྗེ། །གསོལ་བ་ང་ཡིས་མི་འདེབས་ན་སུ་ཡིས་འདེབས། །ཐུགས་རྗེས་ཁྱོད་ཀྱིས་མི་གཟིགས་ན་སུ་ཡིས་གཟིགས། །གསོལ་བ་འདེབས་སོ་བྱིན་གྱིས་རློབས་ཤིག །སྤྱིར་དུ་སེམས་ཅན་ཐམས་ཅད། །སྒོས་སུ་སྙིགས་མའི་གདུལ་བྱ། ལྷག་པར་རེ་ལྟོས་གཅིག་ཆོག་ཏུ་བཅས་པའི། །བློ་གཏད་འགྱུར་བ་མེད་པ། ཕྱག་རྒྱ་ཆེན་པོའི་དངོས་གྲུབ་སྩོལ་ཅིག །བྱིན་རླབས་
ཁྱོད་ལ་མེད་ན་སུ་ལ་ཡོད། བྱམས་པས་བདག་ལ་མི་སྐྱོང་ན་སུ་ལ་སྐྱོང་། །སྐུ་དྲིན་ང་ཡིས་མི་གཞལ་ན་སུ་ཡིས་གཞལ། གདུལ་བྱ་ཁྱོད་ཀྱིས་མི་འདུལ་ན་སུ་ཡིས་འདུལ། ལས་ངན་ང་རྗེ་ལ་མི་རེ་ན་སུ་ལ་རེ། མཐུ་སྟོབས་ཅན་ཁྱོད་བདག་མི་སྐྱོབ་ན་སུ་ལ་སྐྱོབ། བདག་གི་གཏན་འདུན་སྐྱེ་བ་ཀུན་གྱི་སྐྱེལ་མ། ཐེ་ཚོམ་རྩད་ནས་ཟད་པའི་གཏན་ནོར། བློ་གཏད་ལིངས་སྐྱུར་ཐུབ་པའི་མགོན་པོ། སྲིད་མཚོ་གཏན་སྐེམས་སུ་གནས་པའི་སངས་རྒྱས། ཡོན་ཏན་གཞལ་བར་མི་ནུས་པའི་རྒྱ་མཚོ། །མཁའ་མཉམ་སེམས་ཅན་ཐམས་ཅད་ཀྱི་མ་གཅིག །ཐུགས་རྗེ་གཏུགས་པ་མེད་པའི་གཏེར་ཆེན། སྙིགས་དུས་འགྲོ་བ་མི་དགོངས་ན་སུ་དགོངས། བརྩེ་བས་ད་ལྟ་མི་སྐྱོང་ན་ནམ་སྐྱོང་། དངོས་གྲུབ་དིང་སང་མི་སྩོལ་ན་ནམ་སྩོལ། ཐུགས་ཡིད་གཅིག་འདྲེས་སུ་ཐོང་ལ། འཁྲུལ་གྲོལ་མདུད་པ་ཤིག་དང་། མཁའ་ཁྱབ་སྨིག་རྒྱུའི་འགྲོ་བ། ད་ལྟ་གཏན་གྲོལ་དུ་
མཛོད་ཅིག །བླ་མ་དམ་པ། མཐའ་མེད་སེམས་ཅན་ལ་གཟིགས་དང་། གསོལ་བ་འདེབས་པོ་ལ་སྐྱོབས་དང་། མི་བཟད་གདུངས་བའི་ དུས་འདིར། ཅི་བྱ་ཚང་རླག་སྐབས་ན། མྱ་ངན་འཇིགས་སྔངས་ཀྱི་དུས་སུ་གཟིགས་ཤིག །བླ་མ་རིན་པོ་ཆེ། དོན་གྱི་བརྒྱུད་པ་ཅན། བྱིན་རླབས་ཀྱི་འཕོ་བ་མཁན། རྟོགས་པའི་གདེང་ཚད་ཅན། མངོན་ཤེས་སྤྱན་དང་ལྡན་པ། རྫུ་འཕྲུལ་བཀོད་པ་བསྟན་ཏེ། བཟོད་མེད་བཀའ་དྲིན་སྩོལ་བ། སངས་རྒྱས་ལག་བཅངས་སུ་གཏོད་པ། ཐ་མལ་སྣང་བ་བསྒྱུར་ཏེ། དག་པ་རབ་འབྱམས་སྟོན་པ། འཕགས་པ་འཇིག་རྟེན་དབང་ཕྱུག །སྙིང་ཁོང་རུས་པའི་གཏིང་ནས། གཅིག་ཐུབ་གསོལ་བ་འདེབས་སོ། །ཐུགས་རྗེས་འཛིན་པར་ཞུ་དང་། །དངོས་གྲུབ་ཀྱི་ཚན་ཁ་ཅན། བཀའ་བརྒྱུད་རྩོད་པ་མེད་པ། དམུ་རྒོད་འདུལ་བར་ནུས་པའི། འཕྲིན་ལས་འགྲན་ཟླ་བྲལ་བ། རྫོགས་པའི་སངས་རྒྱས་དམ་པ། སྒོ་གསུམ་དགེ་རྩ་དང་བཅས་པ།
མཐའ་མེད་སེམས་ཅན་དོན་དུ། ད་ལྟ་ཉིད་དུ་འབུལ་ལོ། །བརྩེ་བ་ཆེན་པོས་བཞེས་ཤིག །བཞེས་ནས་འགྲོ་བ་ཀུན་གྱི། གཏན་སྐྱབས་ཐུབ་པའི་བླ་མ། རྗེ་བཙུན་ཁྱེད་རང་ལྟ་བུར། སྙིང་ནས་བྱིན་གྱིས་རློབས་ཤིག །དཔལ་ལྡན་བླ་མ་དམ་པ་ལ་གསོལ་བ་འདེབས་སོ། །ཅི་མཛད་ལེགས་པར་མཐོང་བར་བྱིན་གྱིས་རློབས་ཤིག །ཅི་གསུང་ཚད་མར་འཛིན་པར་བྱིན་གྱིས་རློབས་ཤིག །ཐུགས་ཡིད་གཅིག་ཏུ་འདྲེ་བར་བྱིན་གྱིས་རློབས་ཤིག །སྐྱེ་བ་ནས་སྐྱེ་བ་ཚེ་རབས་ནས་ཚེ་རབས་ཐམས་ཅད་དུ་དཔལ་ལྡན་བླ་མ་དམ་པ་དགྱེས་པའི་བྱ་བ་དང་མི་འབྲལ་བར་བྱིན་གྱིས་རློབས་ཤིག །མི་དགྱེས་པའི་བྱ་བ་རྣམ་པ་ཐམས་ཅད་དུ་མི་འབྱུང་བར་བྱིན་གྱིས་རློབས་ཤིག །སྐྱེ་བ་ནས་སྐྱེ་བ་ཚེ་རབས་ནས་ཚེ་རབས་ཐམས་ཅད་དུ་བློ་གཏད་བླ་མ་ལ་བཅས་ནས་ཆོས་བཞིན་གྱི་བཀའ་སྩལ་གང་གནང་བ་དེ་ལག་ཐོག་ཏུ་ལེན་ནུས་པར་བྱིན་གྱིས་རློབས་ཤིག །ལྟོ་
གོས་ཀྱི་ངོ་བསྲུང་དང་ཆོས་བརྒྱད་ཀྱི་འབྲེལ་ཐག་ཆོད་པར་བྱིན་གྱིས་རློབས་ཤིག །སྙིང་ལ་རུས་པ་དུམ་བུ་རེ་ཡོད་པར་བྱིན་གྱིས་རློབས་ཤིག །ངེས་པར་འཆི་བ་སྙིང་ནས་དྲན་པ་དང་། །མོས་གུས་རྣལ་མ་རྒྱུད་ལ་སྐྱེ་བ་ནས། །ཞེན་ལོག་མཐའ་རུ་ཕྱིན་པའི་ངེས་འབྱུང་གིས། །མི་བསྐྱོད་དགའ་བའི་བྱིན་རླབས་འཇུག་གྱུར་ཅིག །སྐྱེ་བ་ཀུན་ཏུ་དཔལ་ལྡན་ཀརྨ་པ། །མི་བསྐྱོད་རྡོ་རྗེ་བླ་མར་བསྟེན་བྱས་ནས། །གསང་སྔགས་རྡོ་རྗེ་ཐེག་པ་བླ་མེད་ཀྱི། །བསྐྱེད་རྫོགས་ལམ་གྱི་ཟུང་འཇུག་སྐུ་འགྲུབ་ཤོག །སྐྱེ་བ་ཀུན་ཏུ་ཡོངས་འཛིན་དམ་པ་མཆོག །ཞྭ་ནག་ཅོད་པན་འཛིན་པ་ཁོ་ན་དང་། །ཡི་དམ་སྙིང་པོ་དཔལ་ལྡན་བདེ་བ་མཆོག །འཁོར་ལོ་སྡོམ་པས་རྗེས་སུ་འཛིན་གྱུར་ཅིག །ལམ་གྱི་སྙིང་པོ་མོས་གུས་ཕྱག་རྒྱ་ཆེ། །ཞེན་ལོག་ངོ་བོ་དཔལ་ལྡན་བླ་མའི་སྐུ། །ཟུང་འཇུག་རྡོ་རྗེ་འཆང་གི་གོ་འཕང་ཉིད། །རྣལ་འབྱོར་འདན་མ་གྲུབ་ཐོབ་སངས་རྒྱས་རྗེའི། །གོ་འཕང་བདེ་
ཤོག་ལྷེབ་ ༤༠༡ ནས་ ༥༠༠ བར།
བླག་སེམས་ཅན་ཐམས་ཅད་ཀྱིས། །འགྲུབ་ཕྱིར་བདག་སོགས་སེམས་ཅན་ཐམས་ཅད་ཀྱིས། །དགེ་ཚོགས་འབད་པ་དེ་ཡི་ཕྱིར་དུ་བསྔོ། །དཔལ་ལྡན་སངས་རྒྱས་མཉན་པ་ཡབ་སྲས་དང་། །སྐྱེ་དང་ཚེ་རབས་ཀུན་ཏུ་མི་འབྲལ་ཤོག །མཉམ་མེད་དྭགས་པོ་བཀའ་བརྒྱུད་ལ་གསོལ་བ་འདེབས་སོ། །མི་མཆོག་དུས་གསུམ་མཁྱེན་པ་ལ་གསོལ་བ་འདེབས་སོ། །སྒྲུབ་བརྒྱུད་ཀརྨ་ཀཾ་ཚང་ལ་གསོལ་བ་འདེབས་སོ། །ཐུགས་རྗེ་ཅན་རང་བྱུང་ཀུན་མཁྱེན་ལ་གསོལ་བ་འདེབས་སོ། །ནུས་པ་ཅན་སངས་རྒྱས་མཉན་པ་ལ་གསོལ་བ་འདེབས་སོ། །བྱིན་རླབས་ཅན་དགའ་བའི་དབྱངས་ཅན་ལ་གསོལ་བ་འདེབས་སོ། །རྗེ་བཙུན་རྡོ་རྗེ་དབྱངས་ཅན་ལ་གསོལ་བ་འདེབས་སོ། །མཚུངས་མེད་རྡོ་རྗེ་དགའ་བ་ལ་གསོལ་བ་འདེབས་སོ། །ཟླ་མེད་དབྱངས་ཅན་བཟང་པོ་ལ་གསོལ་བ་འདེབས་སོ། །འགྲན་མེད་མི་བསྐྱོད་བཟང་པོ་ལ་གསོལ་བ་འདེབས་སོ། །མཁྱེན་
རབ་མཚུངས་མེད་ལ༴ ཐུགས་རྗེ་མཚུངས་མེད་ལ༴ ནུས་པ་མཚུངས་མེད་ལ༴ འཆི་བ་སྙིང་ནས་གཟེར་བར་བྱིན༴ ཞེན་པ་གཏིང་ནས་ལོག་པར༴ ཅིས་ཀྱང་དགོས་མེད་རྟོགས་པར༴ མི་རྟག་ངེས་ཤེས་སྐྱེ་བར་བྱིན༴ ཉེ་རིང་མེད་པའི་ཐུགས་རྗེ་ཅན་ལ་གསོལ༴ ཕྱོགས་ལྷུང་མེད་པའི་ཕྲིན་ལས་ཅན་ལ༴ སྔ་ཕྱི་མེད་པའི་བྱིན་རླབས་ཅན་ལ༴ མཐོང་ཐོས་དོན་ལྡན་གྱི་མཛད་པ་ཅན་ལ༴ རྒྱལ་དབང་ཆོས་གྲགས་རྒྱ་མཚོ་ལ༴ ཀུན་མཁྱེན་མི་བསྐྱོད་རྡོ་རྗེ་ལ༴ རྒྱལ་བ་དཀོན་མཆོག་ཡན་ལག་ལ༴ རྗེ་བཙུན་དབང་ཕྱུག་རྡོ་རྗེ་ལ༴ གར་དབང་ཆོས་ཀྱི་དབང་ཕྱུག་ལ༴ རྒྱལ་མཆོག་ཆོས་དབྱིངས་རྡོ་རྗེ་ལ༴ དཔལ་ལྡན་ཡེ་ཤེས་སྙིང་པོ་ལ༴ མཚུངས་མེད་ཡེ་ཤེས་རྡོ་རྗེ་ལ༴ དཔལ་ཆེན་ཆོས་ཀྱི་དོན་གྲུབ་ལ༴ རྒྱལ་དབང་བྱང་ཆུབ་རྡོ་རྗེ་ལ༴ སི་ཏུ་ཆོས་ཀྱི་འབྱུང་གནས་ལ༴ རྗེ་བཙུན་བདུད་འདུལ་རྡོ་རྗེ་ལ༴ མི་ཕམ་ཆོས་གྲུབ་རྒྱ་མཚོ་ལ༴ པདྨ་ཉིན་བྱེད་དབང་པོ་ལ༴ རྒྱལ་
དབང་ཐེག་མཆོག་རྡོ་རྗེ་ལ༴ རྗེ་བཙུན་བློ་གྲོས་མཐའ་ཡས་ལ༴ ཀུན་བཟང་མཁའ་ཁྱབ་རྡོ་རྗེ་ལ༴ པདྨ་དབང་མཆོག་རྒྱལ་པོ་ལ༴ དཔལ་ལྡན་མཁྱེན་བརྩེ་འོད་ཟེར་ལ༴ རང་བྱུང་རིག་པའི་རྡོ་རྗེ་ལ༴ དྲིན་ཆེན་རྩ་བའི་བླ་མ་ལ༴ ཞིང་ཁམས་སྤྲུལ་པས་ཁྱབ་པ་ལ༴ རབ་འབྱམས་ཞིང་གི་བདག་པོ་ལ༴ བསམ་བརྗོད་རེ་བ་ལས་འདས་པ་ལ་གསོལ་བ་འདེབས་སོ། །ཞེས་བྱ་བ་འདི་ནི་འབྲེལ་བ་ཐོགས་ཆོག་མའི་གསོལ་འདེབས་སུ་གྲགས་པ་ཐ་ན་དུད་འགྲོའི་སྐྱེ་གནས་སུ་ཆུད་པའི་རྣ་ལམ་དུ་ལན་ཅིག་བསྒྲགས་ཀྱང་ངན་སོང་གི་སྐྱེ་སྒོ་དུ་མ་ཆོད་ནས། མཐར་ནུབ་ཕྱོགས་བདེ་བ་ཅན་གྱི་ཞིང་ཁམས་ན་རྗེ་བཙུན་རྡོ་རྗེའི་དབྱངས་ཅན་དེ་ཉིད་འཕགས་པ་སྤྱན་རས་གཟིགས་དབང་ཕྱུག་ཤིན་ཏུ་དཀར་བའི་འོད་ཟེར་གྱི་ཕྱག་རིང་པོ་བརྐྱང་ནས། སྐད་ཅིག་ལག་པ་བརྐྱང་བསྐུམ་ཙམ་ལ་འདྲེན་པར་ཞལ་གྱིས་བཞེས་པ་ཡིན་ནོ། །མི་འཇིགས་པའི་དབུགས་ཆེན་པོ་
འབྱིན་པའི་ཆོས་རྗེ་སྟོབས་པོ་ཆེ་ལ་གསོལ་བ་འདེབས་སོ། །སྐྱེ་ཞིང་སྐྱེ་བ་དག་ནི་ཐམས་ཅད་དུ། །རིགས་བཟང་བློ་གསལ་ང་རྒྱལ་མེད་པ་དང་། །སྙིང་རྗེ་ཆེ་ཞིང་བླ་མ་ལ་གུས་པའི། །དཔལ་ལྡན་བླ་མའི་དམ་ཚིག་ལ་གནས་ཤོག །དཔལ་ལྡན་བླ་མའི་རྣམ་པར་ཐར་པ་ལ། །སྐད་ཅིག་ཙམ་ཡང་ལོག་ལྟ་མི་སྐྱེ་ཞིང་། །ཅི་མཛད་ལེགས་པར་མཐོང་བའི་མོས་གུས་ཀྱིས། །བླ་མའི་བྱིན་བརླབས་སེམས་ལ་འཇུག་པར་ཤོག །སྐྱེ་བ་ཀུན་ཏུ་ཡང་དག་བླ་མ་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། །ས་དང་ལམ་གྱི་ཡོན་ཏན་རབ་རྫོགས་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག། །།དེ་ནས་རྒྱལ་བ་རྒྱ་མཚོ་ལྷ་ལྔའི་གསོལ་འདེབས་ནི། གནས་སྤྱི་གཙུག་པད་ཟླའི་གདན་སྟེང་ན། །སེམས་དཔའ་རང་བྱུང་རྡོ་རྗེ་ལ། །བཀའ་བརྒྱུད་བླ་མའི་ཚོགས་ཀྱིས་བསྐོར། །བདག་མོས་གུས་གདུང་བས་གསོལ་བ་འདེབས། །སྣང་སྲིད་བྱིན་གྱིས་རློབ་ཏུ་གསོལ། །དབུས་མི་འགྱུར་རྡོ་
རྗེའི་གདན་སྟེང་ན། །བཅོམ་ལྡན་ཐུགས་རྗེ་ཆེན་པོ་ལ། །རྒྱལ་བ་རྒྱ་མཚོའི་ཚོགས་ཀྱིས་བསྐོར། །བདག་མོས་གུས༴ སྣང་སྲིད༴ གཡས་མེ་དཔུང་འབར་བའི་ཀློང་དཀྱིལ་ན། །ཁྲོ་བོའི་རྒྱལ་པོ་རྟ་མཆོག་ལ། །དཔའ་བོ་རྒྱ་མཚོའི་ཚོགས་ཀྱིས་བསྐོར། །བདག་མོས༴ སྣང་སྲིད༴ གཡོན་མཁའ་སྤྱོད་དག་པའི་གཞལ་ཡས་ན། ཡུམ་གསང་བ་ཡེ་ཤེས་ཌཱ་ཀི་ལ། །མཁའ་འགྲོ་རྒྱ་མཚོའི་ཚོགས་ཀྱིས་བསྐོར། །བདག༴ སྣང་༴ སྟེང་དག་པ་ལྷའི་གཞལ་ཡས་ན། །སློབ་དཔོན་པདྨ་འབྱུང་གནས་ལ། །གྲུབ་ཐོབ་རྒྱ་མཚོའི་ཚོགས་ཀྱིས་བསྐོར། །བདག༴ སྣང་༴ འོག་དམ་ཚིག་ཆེན་པོའི་གཞལ་ཡས་ན། །ཆོས་སྐྱོང་མ་མགོན་ལྕམ་དྲལ་ལ། །དམ་ཅན་རྒྱ་མཚོའི་ཚོགས་ཀྱིས་བསྐོར། །བདག་མོས་གུས་གདུང་བས་གསོལ་བ་འདེབས། །སྣང་སྲིད་བྱིན་གྱིས་རློབ་ཏུ་གསོལ། །རྩ་བ་བརྒྱུད་པར་བཅས་རྣམས་ལ། །དད་ཅིང་གུས་པར་གསོལ་བཏབ་པས། །
བདག་དང་འགྲོ་དྲུག་སེམས་ཅན་རྣམས། །རྣམ་པ་ཀུན་མཁྱེན་ཐོབ་བར་ཤོག །སེམས་དཔའ་རང་བྱུང་རྡོ་རྗེ་ནི། །ཡིད་བཞིན་ནོར་བུ་རྙེད་པ་ལྟར། །བདག་གཞན་ཡོངས་ཀྱི་དབུལ་བ་སེལ། །དགོས་འདོད་འབྱུང་བའི་བཀྲ་ཤིས་ཤོག །བྱང་ཆུབ་སེམས་ཀྱི་ཕྲིན་ལས་ཀྱིས། །ཐུགས་རྗེའི་འོད་ཟེར་ཕྱོགས་བཅུར་འཕྲོ། །བཅོ་ལྔའི་ཟླ་བ་ཉ་རྒྱས་ལྟར། །འཛམ་གླིང་བདེ་བའི་བཀྲ་ཤིས་ཤོག །འཛམ་གླིང་བདེ་བར་མཛད་དུ་གསོལ། །ཅེས་གྲུབ་ཆེན་ཀརྨ་པས་མཛད་པའོ།། །།དེ་ནས་ཕྱི་དྲོའི་དུས་སུ་བྱ་བའི་གཏོར་མའི་རིམ་པ་ལ་གསང་སྔགས་ནང་གཏོར་ནི། རང་ཡི་དམ་དུ་གསལ་བས་གཏོར་མའི་རྫས་བདུད་རྩིའི་ཆུས་གསང་ཞིང་། ༀ་ཨཱཿབིགྷྣནྟ་ཀྲི་ཏ་ཧཱུྃ་ཕཊ། ༀ་སྭ་བྷཱ་ཝ་ཤུདྡྷཿསརྦ་དྷརྨ ཿསྭ་བྷཱ་ཝ་ཤུདྡྷོ྅ཧཾ། སྟོང་པ་ཉིད་དུ་གྱུར། སྟོང་པའི་དང་ལས་ཡཾ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན་ཆང་ཟུང་ལ་ཡཾ་དང་། མཆོག་མ་གཉིས་ལ་གཡོ་བའི་བ་དན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་གྲུ་
གསུམ་དམར་པོ་རཾ་གྱིས་མཚན་པ། དེའི་སྟེང་དུ་ཀཾ་གསུམ་ལས་ཐོད་པ་བུམ་རིལ་གྱི་སྒྱེད་པུ་ལྟག་པ་ནང་དུ་བསྟན་པ་གསུམ་གྱི་སྟེང་དུ། ཡི་གེ་ཨ་ཡོངས་སུ་གྱུར་པ་ལས་ཀ་པཱ་ལ་ཕྱི་དཀར་ལ་ནང་དམར་བ། དུམ་བུ་གཅིག་པ་དཔྲལ་བ་རང་ལ་བསྟན་པ། རྒྱ་ཁྱོན་ཆོས་ཀྱི་དབྱིངས་དང་མཉམ་པ། དེའི་དབུས་སུ་མུ་ལས་དྲི་ཆུ་བཻ་ཌཱུརྱ་ལྟ་བུ། ཤར་དུ་བི་ལས་དྲི་ཆེན་ཤེལ་ལྟ་བུ། ལྷོར་ར་ལས་རཀྟ་གསེར་བཙོ་མ་ལྟ་བུ། ནུབ་ཏུ་ཤུ་ལས་བྱང་སེམས་དཀར་པོ། བྱང་དུ་མ་ལས་ཀླད་པ། སླར་ཡང་དབུས་སུ་ན་ལས་མིའི་ཤ །ཤར་ལྷོར་གོ་ལས་བ་ལང་གི་ཤ །ལྷོ་ནུབ་ཏུ་ཀུ་ལས་ཁྱིའི་ཤ །ནུབ་བྱང་དུ་ད་ལས་གླང་པོ་ཆེའི་ཤ །བྱང་ཤར་དུ་ཧ་ལས་རྟའི་ཤ །དེ་རྣམས་སླར་ཡང་ཡི་གེ་དེ་དག་གིས་མཚན་པའོ། །རང་གི་སྣ་བུག་གཡོན་པ་ནས་རླུང་ཧཱུྃ་གི་དབྱིབས་ཅན་འཕྲོས། རླུང་གི་དཀྱིལ་འཁོར་ལ་ཕོག །བ་དན་བསྐྱོད་པས་རླུང་གཡོས་མེ་སྦར་ཐོད་པ་དྲོས།
རྫས་རྣམས་ཁོལ། ཉེས་པའི་སྐྱོན་རྣམས་ཕྱིར་ལུད། དེའི་སྟེང་དུ་ༀ་ཨཱཿཧཱུྃ་ལས་འོད་ཟེར་འཕྲོས། དེ་བཞིན་གཤེགས་པ་རྣམས་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་བཀུག །དམ་ཚིག་གི་བདུད་རྩི་དང་གཉིས་སུ་མེད་པར་འདྲེས། ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ༀ་ཨཱཿཧཱུྃ། ལན་གསུམ་བརྗོད་པས་བྱིན་གྱིས་བརླབས། འབར་བའི་ཕྱག་རྒྱ་དཔྲལ་བར་བསྐོར་ཞིང་། ཕེཾ་ཕེཾ་ཕེཾ། ཞེས་གཏོར་མགྲོན་སྤྱན་དྲངས། པད་སྐོར་རྡོ་རྗེ་ཐལ་མོ་ཁ་ཕྱེ་བས། ༀ་བཛྲ་ཨཱ་ར་ལི་ཧོཿཛཿཧཱུྃ་བཾ་ཧོཿ བཛྲ་ཌཱ་ཀི་ནི་ས་མ་ཡ་སྟྭཾ། དྲྀ་ཤྱ་ཧོཿ ལན་གསུམ། ན་མོ་རཏྣ་གུ་རུ་ཨི་དཾ་བ་ལིཾ་ཁ་ཁ་ཁཱ་ཧི་ཁཱ་ཧི། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་གཅིག་ཏུ་བསྡུས་པའི་ངོ་བོར་གྱུར་པ་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག །དྲིན་ཆེན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་
པ་རྣམས་ཀྱི་ཞལ་དུ་ཨི་དཾ་བ་ལིཾ་ཁ་ཁ་ཁཱ་ཧི་ཁཱ་ཧི། ལན་གསུམ་བརྗོད། ཆོས་སྐུ་དྲུག་པ་རྡོ་རྗེ་འཆང་ཆེན་པོ། །ཏཻ་ལོ་ཤེས་རབ་བཟང་པོ། ནཱ་རོ་ཛྙཱ་ན་སིདྡྷི། མར་པ་ཆོས་ཀྱི་བློ་གྲོས། མི་ལ་བཞད་པ་རྡོ་རྗེ། དྭགས་པོ་ཟླ་འོད་གཞོན་ནུ། དཔལ་ལྡན་དུས་གསུམ་མཁྱེན་པ། འགྲོ་མགོན་རས་པ་ཆེན་པོ། རྒྱལ་སྲས་སྤོམ་བྲག་པ། གྲུབ་ཆེན་ཀརྨ་པཀྴི། མཁས་གྲུབ་ཨོ་རྒྱན་པ། སེམས་དཔའ་རང་བྱུང་རྡོ་རྗེ། རྒྱལ་བ་གཡུང་སྟོན་ཆེན་པོ། འཛམ་གླིང་ཆོས་ཀྱི་གྲགས་པ། རྟོགས་ལྡན་མཁའ་སྤྱོད་དབང་པོ། ཆོས་རྗེ་དེ་བཞིན་གཤེགས་པ། རྗེ་བཙུན་རཏྣ་བྷ་དྲ། སྤྲུལ་སྐུ་མཐོང་བ་དོན་ལྡན། ཀུན་མཁྱེན་འཇམ་དཔལ་བཟང་པོ། བྱང་སེམས་དཔལ་འབྱོར་དོན་གྲུབ། རྒྱལ་དབང་ཆོས་གྲགས་རྒྱ་མཚོ། གྲུབ་ཆེན་བཀྲ་ཤིས་དཔལ་འབྱོར། མཚུངས་མེད་མི་བསྐྱོད་རྡོ་རྗེ། རྒྱལ་བ་དཀོན་མཆོག་ཡན་ལག །རྗེ་བཙུན་དབང་ཕྱུག་རྡོ་རྗེ། གར་དབང་ཆོས་ཀྱི་དབང་ཕྱུག །
རྒྱལ་མཆོག་ཆོས་དབྱིངས་རྡོ་རྗེ། དཔལ་ལྡན་ཡེ་ཤེས་སྙིང་པོ། མཚུངས་མེད་ཡེ་ཤེས་རྡོ་རྗེ། དཔལ་ཆེན་ཆོས་ཀྱི་དོན་གྲུབ། རྒྱལ་དབང་བྱང་ཆུབ་རྡོ་རྗེ། སི་ཏུ་ཆོས་ཀྱི་འབྱུང་གནས། རྗེ་བཙུན་བདུད་འདུལ་རྡོ་རྗེ། མི་ཕམ་ཆོས་གྲུབ་རྒྱ་མཚོ། པདྨ་ཉིན་བྱེད་དབང་པོ་ལ། རྒྱལ་དབང་ཐེག་མཆོག་རྡོ་རྗེ། །རྗེ་བཙུན་བློ་གྲོས་མཐའ་ཡས། ཀུན་བཟང་མཁའ་ཁྱབ་རྡོ་རྗེ། པདྨ་དབང་མཆོག་རྒྱལ་པོ། དཔལ་ལྡན་མཁྱེན་བརྩེའི་འོད་ཟེར། རང་བྱུང་རིག་པའི་རྡོ་རྗེ་ ལ་སོགས་པ་དྲིན་ཅན༴ སློབ་དཔོན་ཆེན་པོ་ཌོམྦི་པ། མལ་གྱོ་ལོ་ཙ་བ། གཉལ་པ་ཉི་མ་འབར། གཉལ་པ་ཇོ་སྲས། འགྲོ་མགོན་རས་ཆེན། རྒྱལ་སྲས་སྤོམ་བྲག་པ། ཆོས་རྗེ་ཀརྨ་པ། བླ་མ་གཉན་རས། ཆོས་རྗེ་རང་བྱུང་རྡོ་རྗེ། མགོན་པོ་རྒྱལ་མཚན། ཆོས་རྗེ་རོལ་པའི་རྡོ་རྗེ། རྟོགས་ལྡན་གྲགས་པ་སེང་གེ །དར་མ་རྒྱལ་མཚན། རྟོགས་ལྡན་མཁའ་སྤྱོད་དབང་པོ། ཀུན་དགའ་བློ་གྲོས། བླ་མ་རིན་པོ་ཆེ་རཏྣ་
བྷ་དྲ། ཆོས་ཀྱི་བཟང་པོ། སྤྲུལ་པའི་སྐུ་དྷརྨ་ཤྲཱི་ཛྙཱ་ན་ལ་སོགས་པ་དྲིན་ཅན༴ སློབ་དཔོན་ཆེན་པོ་པདྨ་སམྦྷ་བ། པུ་རངས་པ་ཞང་བཙུན་དར་མ་རིན་ཆེན། གཙང་ལ་སྟོད་ཀྱི་ཁྱུང་པོ་སྟག་ཤམ་ཅན། ཀྱུ་ར་རྒྱལ་བའི་ཡེ་ཤེས། ཕྱག་བླ་ཆེན་མགོན་པོ། སྟོང་དཔོན་ཤེས་རབ་མགོན་པོ། ཆོས་ཀྱི་རྗེ་དཔལ་ལྡན་དུས་གསུམ་མཁྱེན་པ་ལ་སོགས་པ་དྲིན་ཅན༴ ༀ་ཧྲཱིཿཧ་ཧ་ཧཱུྃ་ཧཱུྃ་ཕཊ། ༀ་ཤྲཱི་བཛྲ་ཧེ་རུ་རུ་ཀཾ་ཧཱུྃ་ཧཱུྃ་ཕཊ། ཌཱ་ཀི་ནི་ཛཱ་ལ་སམྦ་རཾ་སྭཱ་ཧཱ། ཨི་དཾ༴ ༀ་བཛྲ་བཻ་རོ་ཙ་ནཱི་ཡེ་ཧ་རི་ནི་ས་ཧཱུྃ་ཧཱུྃ་ཕཊ་སྭཱ་ཧཱ། ཨི་དཾ༴ ༀ་ༀ་ༀ་སརྦ་བུདྡྷ་ཌཱ་ཀི་ནཱི་ཡེ་བཛྲ་པརྞ་ནཱི་ཡེ་བཛྲ་བཻ་རོ་ཙ་ནཱི་ཡེ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། ཨི་དཾ༴ སོགས་ཀྱིས་བདེ་མཆོག་ཡབ་ཡུམ་འཁོར་དང་བཅས་པའོ། ། ༀ་དེ་ཝ་པི་ཙུ་བཛྲ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཨི་དཾ༴ སོགས་ཀྱིས་ཀྱཻ་རྡོར་དང་། ༀ་ཨཱཿཧཱུྃ་ཧྲཱིཿ ༀ་མ་ཎྀ་པདྨེ་ཧཱུྃ། དྷུ་མ་གྷ་ཡེ་ན་མཿསྭཱ་ཧཱ། ཧ་རི་ནི་ས་ར་ཙ་ཧྲི་ཡ་ཧཱུྃ་ཛཿ ཨི་དཾ༴ སོགས་ཀྱིས་རྒྱལ་བ་རྒྱ་མཚོ་དང་། ༀ་ཨཱཿབཛྲ་དྷྲྀ་ཀ་
ཧཱུྃ་ཕཊ་སྭཱ་ཧཱ། ཨི་དཾ༴ སོགས་ཀྱིས་གསང་འདུས་དང་། ༀ་ཧཱུྃ་སྭཱ་ཧཱ། ཨི་དཾ༴ སོགས་ཀྱིས་ གདན་བཞི་དང་། ༀ་ཨཱཿཧཱུྃ་ཧོཿ ཤྲཱི་ཀཱ་ལ་ཙཀྲ་ཧཱུྃ་ཕཊ་སྭཱ་ཧཱ། ཨི་དཾ༴ སོགས་ཀྱིས་དུས་འཁོར་དང་། ༀ་ཧྲཱིཿཥྟཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཨི་དཾ༴ སོགས་ཀྱིས་གཤེད་དམར་དང་། ༀ་ཧྲཱིཿཥྚཱི་ཝི་ཀྲྀ་ཏཱེ་ན་ན་ཧཱུྃ་ཕཊ། ཨི་དཾ༴ སོགས་ཀྱིས་དགྲ་ནག་འཇིགས་བྱེད་དང་། ༀ་ཧྱ་གྲཱི་ཝ་པདྨ་ཀྲོ་དྷཱི་ཤྭ་རི་བཛྲ་པཱ་ཎྀ་བཛྲ་ཀི་ལི་ཀི་ལཱ་ཡ། མ་ཧཱ་ཀཱ་ལ་ཡཀྵ་ཡ་མཱནྟ ་ཀྲིཏྐཱ་ལ་རཱུ་པ་ཀརྨ་རཾ་རཾ་ཛྭ་ལ་རཾ་རཾ་ཧཱུྃ་ཕཊ་སྭཱ་ཧཱ། ༀ་ཁྲོཾ་ག་རུ་ཌ་ཙ་ལེ་ཙ་ལེ་ཧཱུྃ་ཕཊ་སྭཱ་ཧཱ། ཨི་དཾ༴ ཧཱུྃ་བདེ་གཤེགས་འདུས་པའི་ལྷ་ཚོགས་དང་། །འཁོར་གྱི་དྲེགས་པ་ཕོ་མོའི་ཚོགས། །འཁོར་དང་གཡོག་ཏུ་བཅས་པ་ལ། །བདག་ཅག་དད་པས་འབུལ་ལགས་ན། །འདོད་དོན་མ་ལུས་སྒྲུབ་ཏུ་གསོལ། །ཨི་དཾ་བ་ལིཾ་ཏེ་ཛོ་བ་ལིཾ་བ་ལ་བ་ཏི་ས་མ་ཡེ་ཧཱུྃ། ཧཱུྃ། ཁོར་ཡུག་བཅས་པའི་བྷཎྡྷ་ཆེན་པོ་རུ། །རྒྱུ་དྲུག་རྟོག་པའི་རང་བཞིན་རྣམ་པར་དག །དུས་གསུམ་རྒྱལ་བའི་
དཀྱིལ་འཁོར་མ་ལུས་པའི། །སྐུ་གསུང་ཐུགས་ཀྱི་རྒྱུད་རྣམས་ཚིམ་གྱུར་ཅིག །ཨ་ལ་ལ་ཧོཿབཞེས་ཏེ་དགྱེས་པར་རོལ། །གྱིས་རྟ་མགྲིན་བདེར་འདུས་དང་། ༀ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། བཛྲ་ག་རུ་ཌ་ཧཱུྃ་ཕཊ། ག་རུ་ཙ་ལེ་ཙ་ལེ་ཧཱུྃ་ཕཊ། དུཥྚན་མཱ་ར་ཡ་ཧཱུྃ་ཕཊ། ཨི་དཾ་བ་ལིཾ༴ སོགས་ཀྱིས་ཕྱག་རྡོར་གཏུམ་པོ་དང་། ཡི་དམ་བྱ་བའི་རྒྱུད། སྤྱོད་པའི་རྒྱུད། རྣལ་འབྱོར་རྒྱུད། རྣལ་འབྱོར་ཆེན་པོ་བླ་ན་མེད་པའི་རྒྱུད། རྒྱུད་སྡེ་ཆེན་པོ་བཞི་དང་འབྲེལ་བའི་སངས་རྒྱས་དང་བྱང་ཆུབ་སེམས་དཔའ་དུས་གསུམ་གྱི་རྒྱལ་བ་སྲས་དང་བཅས་པ་རྣམས་ཀྱི་ཞལ་དུ༴ སོགས་ཀྱིས་ཡི་དམ་སྤྱི་ལ་ཕུལ་ནས། སྐུ་གསུང་ཐུགས་ཤིན་ཏུ་མཉེས་ནས་བདག་ལ་མཆོག་ཐུན་མོང་གི་དངོས་གྲུབ་མ་ལུས་པ་མྱུར་དུ་སྩོལ་བར་མཛད་དུ་གསོལ། ཞེས་འདོད་དོན་གསོལ། འཁོར་གྱི་མཁའ་འགྲོ་མ་དང་ཕྱོགས་སྐྱོང་སོགས་ལ། བཛྲ་ཌཱ་ཀི་ནི། བུདྡྷ་ཌཱ་ཀི་ནི། རཏྣ་ཌཱ་ཀི་ནི། པདྨ་ཌཱ་ཀི་ནི། ཀརྨ་ཌཱ་ཀི་ནི། བི་ཤྭ་ཌཱ་ཀི་ནི། ལོ་ཀ་ཌཱ་ཀི་ནི་ས་
མ་ཡ་སྟྭཾ། དྲྀ་ཤྱ་ཧོཿ ཕེཾ་ཕེཾ་ཕེཾ། ༀ་བཛྲ་ཨཱ་རྒྷཾ། པཱདྱཾ། ནས། ཤབྡ་པྲ་ཏཱིཙྪ ་སྭཱ་ཧཱ། ༀ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ་རཀྵ་ས་བྷཱུ་ཏ་པྲེ་ཏ་བི་ཤཱ་ཙ་ཨུན་མཱ་ད་ཨ་པ་སྨཱ་ར་ཌཱ་ཀ་ཌཱ་ཀི་ནྱཱ་ད་ཡཿ ཨི་དཾ་བ་ལིཾ་གྲྀཧྣནྟུ་ས་མ་ཡ་རཀྵ་མ་མ་སརྦ་སིདྡྷི་མྨེ ་པྲ་ཡཱཙྪནྟུ ་ཡ་ཐཻ་བཾ་ཡ་ཐེཥྚཾ་བྷུཉྫ་ཐ་ཛི་གྷྲ་ཐ་པི་བ་ཐ་མཱ་ཏི་ཀྲ་མ་ཐ། མ་མ་སརྦ་ཀཱ་ར་ཏ་ཡ་སདྶུ་ཁཾ་བི་ཤུད་དྷ་ཡེ། ས་ཧཱ་ཡི་ཀ་བྷ་ཝནྟུ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ༀ་ཧྲཱིཾ་ཧྲཱིཾ་ཧཾ་ཧཾ་ཧེ་ཧེ་ཧི་ཧི་ཕེཾ་ཕེཾ། ཞེས་པས་གཏོར་མ་ཕུལ་ཏེ། ཞིང་སྐྱོང་ཆེན་པོ་བརྒྱད་རྣམས་དང་། །མཁའ་འགྲོ་སུམ་ཅུ་སོ་གཉིས་སོགས། །མ་ལུས་འཁོར་བཅས་འདིར་བྱོན་ཞིང་། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་བསྐལ་པ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །
དངོས་གྲུབ་ཀུན་གྱིས་སྟོང་གྲོགས་མཛོད། །དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་མེད་པར་མཛད། །རྨི་ལམ་ངན་དང་མཚན་མ་ངན་། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཆོས་འཕེལ་དང་། །བདེ་ལེགས་ཕུན་སུམ་ཚོགས་པ་དང་། །ཡིད་ལ་འདོད་པ་ཀུན་འགྲུབ་མཛོད། །ཅེས་འདོད་དོན་གསོལ་ལོ། །མ་མགོན་འཁོར་བཅས་ཀྱི་གཏོར་བསྔོས་ནི། ༀ་མ་དག་སྣོད་བཅུད་སྟོང་པར་སྦྱངས། །སྟོང་པའི་ངང་ལས་ཡེ་ཤེས་ཀྱི། །རླུང་མེ་ཐོད་སྒྱེད་སྟེང་ཉིད་དུ། །ཐོད་པར་ཤ་ལྔ་བདུད་རྩི་ལྔ། །རླུང་མེས་བསྐོལ་བས་དམ་ཚིག་པའི། །བདུད་རྩི་རབ་འབར་འོད་ཉིད་དེས། །ཡེ་ཤེས་བདུད་རྩི་སྤྱན་དྲངས་ནས། །དབྱེར་མེད་ༀ་དང་ཨཱཿཧཱུྃ་གིས། །བྱིན་བརླབས་དྲི་རོ་མཚུངས་མེད་གྱུར། །རྩ་བརྒྱུད་བླ་མ་ཡི་དམ་ལྷ་ཚོགས་དང་། །དཔའ་བོ་མཁའ་འགྲོ་ཆོས་སྐྱོང་ཚོགས་སྤྱན་དྲངས། །
མདུན་གྱི་ནམ་མཁར་སྤྲིན་བཞིན་གཏིབས་པར་གྱུར། །ཡི་དམ་ཀུན་འདུས་རྩ་བའི་བླ་མ་མཆོད། །དཀོན་མཆོག་ཀུན་འདུས་རྩ་བའི་བླ་མ་མཆོད། །ཆོས་སྐྱོང་ཀུན་འདུས་རྩ་བའི་བླ་མ་མཆོད། །ཁྱད་པར་ཆོས་སྐྱོང་བེར་གྱི་ན་བཟའ་ཅན། །དཔལ་ལྡན་ལྷ་མོ་རང་བྱུང་རྒྱལ་མོ་ནི། །མཆེད་ལྕམ་འཁོར་དང་བཅས་པ་མཆོད་པར་བགྱི། །རྒྱལ་པོ་རྣམ་མང་ཐོས་སྲས་སྔགས་ཀྱི་བདག །རྡོ་རྗེ་ལེགས་པ་སྲིན་མགོན་ཞིང་སྐྱོང་དང་། །མཁར་ནག་རྡོ་རྗེ་རྒྱལ་པོ་ལ་སོགས་པའི། །ཀརྨ་པ་ཡི་བསྟན་པ་སྐྱོང་རྣམས་ལ། །ཟག་མེད་ཤ་ལྔ་བདུད་རྩི་ལྔ་མཆོག་གི །གཏོར་མ་རྩ་བརྒྱད་པཉྩ་ཨ་མྲྀ་ཏ། ཛ་གད་རཀྟའི་ཡོན་ཆབ་མཆོད་པར་བཞེས། །འདོད་ཡོན་ལྔ་དང་གསང་བའི་མཆོད་པ་དང་། །དེ་ཁོ་ན་ཡི་ཀུན་བཟང་མཆོད་པས་མཆོད། །ཁྱོད་ཀྱི་སྐྱོན་དག་ཡོན་ཏན་རྫོགས་པ་དེའི། །གནས་ཚུལ་ཇི་བཞིན་རྟོགས་པའི་སྒོ་གསུམ་གྱིས། །བསྟོད་པ་མ་ལུས་པ་ཡིས་བསྟོད་པར་བགྱི། །
ཁྱོད་ལ་འདོད་དོན་གསོལ་བ་གདབ་པ་ནི། །བདག་སོགས་ཀུན་ལ་མཆོག་དང་ཐུན་མོང་གི །དངོས་གྲུབ་སྟན་ཐོག་འདི་ལ་སྩོལ་བ་དང་། །ཁྱད་པར་ཚེ་རིང་ནད་མེད་དཔལ་འབྱོར་རྒྱས། །ཡིད་ལ་བསམས་ཚད་སྐད་ཅིག་ཙམ་ཉིད་ལ། །གྲུབ་ནས་ཀརྨ་པ་ཡི་བཞེད་པ་ཀུན། །བདག་གིས་མ་ལུས་མྱུར་དུ་འགྲུབ་པ་དང་། །ཀརྨ་པ་ཡི་བསྟན་ལ་གནོད་བྱེད་རྣམས། །བདག་གིས་ཐལ་བ་བཞིན་དུ་རློག་པ་ཡི། །ནུས་པ་ད་ལྟ་ཉིད་དུ་སྩལ་དུ་གསོལ། །དེ་ལྟར་མཆོད་བསྟོད་དད་པའི་དགེ་བ་དེས། །མ་གྱུར་འགྲོ་བ་སེམས་ཅན་ཐམས་ཅད་ཀུན། །རྫོགས་པའི་སངས་རྒྱས་གོ་འཕང་ཐོབ་ཕྱིར་བསྔོ། །ཞེས་པ་འདི་དད་པའི་ནོར་ཅན་རིན་ཆེན་དཔལ་མོས་བསྐུལ་བའི་ངོར་ཀརྨ་པ་མི་བསྐྱོད་རྡོ་རྗེས་སྩལ་བའོ།། །།མཁའ་འགྲོ་སྤྱི་གཏོར་ནི། བསངས་སྦྱངས། སྟོང་པ་ཉིད་དུ་གྱུར། སྟོང་པའི་ངང་ལས། ཡཾ་ལས་རླུང་། རཾ་ལས་མེ། ཀཾ་ལས་ཐོད་པའི་སྒྱེད་པུ་གསུམ་གྱི་སྟེང་དུ། ཨ་ལས་ཐོད་པ་ཕྱི་དཀར་ལ་ནང་
དམར་བ་ཡངས་ཤིང་རྒྱ་ཆེ་བའི་ནང་དུ། གོ་ཀུ་ད་ཧ་ན་ལས་ཤ་ལྔ། བི་མུ་མ་ར་ཤུ་ལས་བདུད་རྩི་ལྔ་སོ་སོར་ཡི་གེ་དེ་དག་གིས་མཚན་པའོ། །རང་གི་སྣ་བུག་གཡོན་པ་ནས་རླུང་ཧཱུྃ་གི་དབྱིབས་ཅན་འཕྲོས། རླུང་གིས་མེ་སྦར། མེས་ཐོད་པ་དྲོས་པས་རྫས་རྣམས་ཞུ། ཉེས་པའི་སྐྱོན་རྣམས་ཕྱིར་ལུད། དེའི་སྟེང་དུ་ༀ་ཨཱཿཧཱུྃ་ལས་འོད་ཟེར་འཕྲོས་པས་དེ་བཞིན་གཤེགས་པ་རྣམས་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་བཀུག །དམ་ཚིག་གི་བདུད་རྩི་དང་གཉིས་སུ་མེད་པར་འདྲེས། ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ༀ་ཨཱཿཧཱུྃ། ལན་གསུམ། སངས་རྒྱས་མཁའ་འགྲོ། རྡོ་རྗེ་མཁའ་འགྲོ། རིན་ཆེན་མཁའ་འགྲོ། པདྨ་མཁའ་འགྲོ། ལས་ཀྱི་མཁའ་འགྲོ། སྣ་ཚོགས་མཁའ་འགྲོ། འཇིག་རྟེན་མཁའ་འགྲོ། གནས་ལས་སྐྱེས་པ། རིགས་ལས་སྐྱེས་པ། ཞིང་ལས་སྐྱེས་པ། སྔགས་ལས་སྐྱེས་པ། ལས་ལས་སྐྱེས་པ། ལྷན་ཅིག་སྐྱེས་པའི་ལྷ་རྣམས་ཀྱི་ཞལ་དུ་ༀ་
ཨཱཿཧཱུྃ། གནས་དང་ཉེ་བའི་གནས། ཞིང་དང་ཉེ་བའི་ཞིང་། ཚན་དྷོ་དང་ཉེ་བའི་ཚན་དྷོ། འདུ་བ་དང་ཉེ་བའི་འདུ་བ། འཐུང་གཅོད་དང་ཉེ་བའི་འཐུང་གཅོད། དུར་ཁྲོད་དང་ཉེ་བའི་དུར་ཁྲོད། གནས་ཉི་ཤུ་རྩ་བཞི། ཡུལ་སུམ་ཅུ་སོ་གཉིས། དུར་ཁྲོད་ཆེན་པོ་བརྒྱད་ལ་སོགས་པའི་དཔའ་བོ་མཁའ་འགྲོ་སྲུང་མ་རྣམས་ཀྱི་ཞལ་དུ་ༀ་ཨཱཿཧཱུྃ། ཕྱོགས་སྐྱོང་བཅུ་ལ་སོགས་པ་འཇིག་རྟེན་སྐྱོང་བ་རྣམས་ཀྱི་ཞལ་དུ་ༀ་ཨཱཿཧཱུྃ། རྒྱ་གར་རྡོ་རྗེ་གདན། རྒྱ་ནག་རི་བོ་རྩེ་ལྔ། ནུབ་ཕྱོགས་ཨུ་རྒྱན། བྱང་ཤམ་བྷ་ལ། དཔལ་ལྡན་འབྲས་སྤུངས་ཀྱི་མཆོད་རྟེན། ལྷོ་ཕྱོགས་དཔལ་གྱི་རི་བོ། ཤྲཱི་ན་ལནྡ། བི་ཀྲ་མ་ལ་ཤཱི་ལའི་གཙུག་ལག་ཁང་ལ་སོགས་པ་གྲུབ་ཆེན་རྣམས་ཀྱི་བྱིན་གྱིས་བརླབས་པའི་གནས་རྣམས་སུ་གནས་པའི་དཔའ་བོ་མཁའ་འགྲོ་སྲུང་མ་རྣམས་ཀྱི་ཞལ་དུ་ༀ་ཨཱཿཧཱུྃ། ལྷོ་དྲོ་བོ་ལུང་། འབྲོག་ལ་ཕྱི་ཆུ་བར། ཇོ་མོ་བཀྲ་ཤིས་ཚེ་རིང་མ་མཆེད་ལྔ། ཤར་
དྭགས་ལྷ་དཔལ་གྱི་སྒམ་པོ། སྟོད་ལུང་མཚུར་ཕུ། ཀཾ་པོ་གནས་ནང་། ཀརྨ་རི་གླིང་། ཤར་ཕྱོགས་སྤུངས་རི། ལྷོ་གནས་མཆོག་དཔལ་གྱི་ཙཱ་རི་ཏྲ། གངས་དཀར་གྱི་རྒྱལ་པོ་ཏི་སེ། མཚོ་མ་ཕམ། བལ་ཡུལ་འཕགས་པ་ཤིང་ཀུན། ཤིང་ཀི་རིའི་མཆོད་རྟེན། རོང་བཙན་ཁ་བ་དཀར་པོ། ཆོས་འཁོར་ལྷ་ས། དཔལ་གྱི་བསམ་ཡས་ལ་སོགས་པ། གངས་རིའི་ཁྲོད་ཀྱི་སྒྲུབ་གནས་བྱིན་རླབས་ཅན་རྣམས་སུ་གནས་པའི་དཔའ་བོ་མཁའ་འགྲོ་སྲུང་མ་རྣམས་ཀྱི་ཞལ་དུ་ༀ་ཨཱཿཧཱུྃ། སྐུ་གསུང་ཐུགས་ཤིན་ཏུ་མཉེས་ནས་སངས་རྒྱས་ཀྱི་བསྟན་པ་དར་བ་དང་། བདག་ཅག་སྒྲུབ་པ་པོ་རྣམས་ཀྱི་མཐུན་རྐྱེན་སྒྲུབས། འགལ་རྐྱེན་སོལ། འཇིག་རྟེན་གྱི་ཁམས་སུ་ཆར་ཆུ་དུས་སུ་འབབ་པ་དང་། ལོ་ཕྱུགས་རྟག་ཏུ་ལེགས་པ་དང་། མི་ནད་དང་ཕྱུག་ནད་དང་ཡམས་ནད་དང་། འཁྲུག་རྩོད་ཐམས་ཅད་ཉེ་བར་ཞི་བའི་ཕྲིན་ལས་མཛད་དུ་གསོལ། །གཞི་བདག་དཀར་གཏོར་ནི། ༀ་སྭ་བྷཱ་ཝ་
སོགས། སྟོང་པའི་ངང་ལས་བྷྲཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ༀ་ཨཱཿཧཱུྃ་ཞུ་བ་ལས་བྱུང་བའི་གཏོར་མ་དཀར་གསུམ་མངར་གསུམ་ཁ་དོག་དྲི་རོ་རེག་བྱ་ནུས་པ་ཕུན་སུམ་ཚོགས་པ་འདོད་པའི་ཡོན་ཏན་ལྔ་དང་ལྡན་པར་གྱུར། ༀ་ཨཱཿཧཱུྃ། གསུམ། སྟོང་གཅིག་པ། སྟོང་གཉིས་པ། སྟོང་གསུམ་པ། མཐོ་བ་ནམ་མཁའ། དམའ་བ་ས་གཞི། རི་རབ་ཆེན་པོའི་ས་བདག །གསེར་གྱི་རི་བདུན། རོལ་བའི་མཚོ་བདུན། གླིང་བཞི་གླིང་ཕྲན་ལ་གནས་པའི་གཞི་བདག །འཛམ་བུ་གླིང་གི་ཟོ་དོར་། རྒྱལ་པོ་ཆེན་པོ་སྡེ་བཞི། བོད་ཀྱི་མགུར་ལྷ་བཅུ་གསུམ། སྲིད་པ་ཆགས་པའི་ལྷ་དགུ། བོད་ཁམས་སྐྱོང་བའི་བརྟན་མ་བཅུ་གཉིས། སྟོད་མངའ་རིས་སྐོར་གསུམ། བར་དབུས་གཙང་རུ་བཞི། སྨད་མདོ་ཁམས་སྒང་དྲུག །སྒང་ལྔར་གནས་པའི་གཞིའི་བདག་པོ། གནས་ཀྱི་བདག་པོ། ཡུལ་གྱི་བདག་པོ། གྲོང་གི་བདག་པོ། གཉུག་མར་གནས་པ་
རྣམས་ཀྱི་ཞལ་དུ་ༀ་ཨཱཿཧཱུྃ། གཞན་ཡང་ས་བདག་སའི་ལྷ་མོ་བརྟན་མ། ས་འཛིན་ལག་པ་ཆེན་པོ། སྤར་ཁ་བརྒྱད། སྨེ་བ་དགུ། ལོ་སྐོར་བཅུ་གཉིས། ས་བདག་གི་རྒྱལ་པོ་ཐེ་སེ་ལ་སོགས་པ་དེ་རིང་གི་ཉི་མ། གཟའ། རྒྱུ་སྐར། དུས་ཚོད་ཚེས་གྲངས་ལ་དབང་བའི་གཞི་བདག་རྣམས་ཀྱི་ཞལ་དུ་ༀ་ཨཱཿཧཱུྃ། རྣལ་འབྱོར་པ་བདག་ཅག་སྔོན་ཆད་གང་དུ་སོང་ཞིང་ཕྱིན་ཆད་གང་དུ་འགྲོ་བ། ད་ལྟ་གང་དུ་འདུག་པའི་གཞི་བདག་རྣམས་ཀྱི་ཞལ་དུ་ༀ་ཨཱཿཧཱུྃ། ཕ་རི་གཡས། ཚུ་རི་གཡོན། འགྲོ་བ་ལམ། སྐྱེ་བ་ཤིང་། འབབ་པ་ཆུ། སྲ་བ་བྲག །གཡོ་བ་རླུང་། བརྟན་པ་མཁར་ལ་སོགས་པ་ས་ཕྱོགས། ཡུལ་ཕྱོགས་དབེན་གནས། སྒྲུབ་གནས་འདི་ཉིད་དུ་གནས་པའི་གཞི་བདག་དཀར་པོའི་ཕྱོགས་ལ་མངོན་པར་དགའ་ཞིང་བྱང་ཆུབ་ཀྱི་སེམས་དང་ལྡན་པ་རྣམས་ཀྱི་ཞལ་དུ་ༀ་ཨཱཿཧཱུྃ། སྐུ་གསུང་ཐུགས་མཉེས་ནས་རྣལ་འབྱོར་པ་བདག་ཅག་དཔོན་སློབ་འཁོར་དང་བཅས་པ་
འགྲོ་ན་མ་བཀག །སྡོད་ན་མ་བསྐྲད། བསམ་པ་མ་ངན་། སྦྱོར་བ་མ་རྩུབ། འཚོ་བ་སྦྱོར། ཡོན་བདག་གི །མཐུན་རྐྱེན་སྒྲུབས། འགལ་རྐྱེན་སོལ། རྐྱེན་ཕྱི་ནང་གི་བར་དུ་གཅོད་པ་ཐམས་ཅད་ཉེ་བར་ཞི་བའི་ཕྲིན་ལས་མཛོད་ཅིག །ཐུན་མོང་མིན་པའི་གཏོར་མ་ནི། ཕྱི་སྣོད་ཀྱི་འཇིག་རྟེན་གཏོར་གཞོང་དུ། །ནང་འབྱུང་བཞིའི་དངོས་པོ་བ་ལིཾ་ཏ། །དེ་རྒྱལ་བ་ཞི་ཁྲོའི་ཚོགས་ལ་འབུལ། །ལས་རབ་འབྱམས་འགྲུབ་པར་བྱིན་གྱིས་རློབས། །ལུས་དབང་ཆེན་པགས་པའི་གཏོར་གཞོང་དུ། །ནང་ཤ་ཁྲག་རུས་པ་བ་ལིཾ་ཏ། །དེ་བསྟན་སྲུང་རྒྱ་མཚོའི་ཚོགས་ལ་འབུལ། །ཚེ་ཉི་ཟླ་དང་མཉམ་པར་བྱིན་གྱིས་རློབས། །སེམས་སྣང་བ་སྣ་ཚོགས་ཀྱི་གཏོར་གཞོང་དུ། །ནང་དྲན་རིག་གསལ་བའི་བ་ལིཾ་ཏ། །དེ་མཁའ་ཁྱབ་ཆོས་ཀྱི་སྐུ་ལ་འབུལ། །རྒྱུད་ཡེ་ཤེས་ལྔ་རུ་བྱིན་གྱིས་རློབས། ཁ་ཁ་ཁཱ་ཧི་ཁཱ་ཧི། ཞེས་ཞྭ་དམར་པ་ལྔ་པས་སོ།། །།དེ་ནས་སྐུ་རིམ་གྱི་སྐོར་ནི། འཇིག་རྟེན་འདྲེན་པའི་
གཙོ་བོ་ཚེ་དཔག་མེད། །དུས་མིན་འཆི་བ་མ་ལུས་འཇོམས་པའི་དཔལ། །མགོན་མེད་སྡུག་བསྔལ་གྱུར་པ་རྣམས་ཀྱི་སྐྱབས། །སངས་རྒྱས་ཚེ་དཔག་མེད་ལ་ཕྱག་འཚལ་ལོ། །ༀ་ན་མོ་བྷ་ག་ཝ་ཏེ་ཨ་པ་རི་མི་ཏཱ་ཡུ་ཛྙཱ་ན་སུ་བི་ནི་ཥྩི་ཏ་ཏེ་ཛོ་རཱ་ཛཱ་ཡ། ཏ་ཐཱ་ག་ཡརྷ ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ༀ་པུཎྱེ་པུཎྱེ་མ་ཧཱ་པུཎྱེ་ཨ་པ་རི་མི་ཏ་པུཎྱེ་ཨ་པ་རི་མི་ཏ་པུཎྱ་ཛྙཱ་ན་སཾ་བྷཱ་རོ་བ་ཙི་ཏི། ༀ་སརྦ་སཾ་སྐཱ་ར་པ་རི་ཤུདྡྷེ་དྷརྨ ་ཏེ་ག་ག་ན་ས་མུངྒ་ཏེ་སྭ་བྷཱ་ཝ་བི་ཤུདྡྷེ་མ་ཧཱ་ན་ཡ་པ་རི་ཝཱ་རེ་སྭཱ་ཧཱ། སྦྱིན་པའི་སྟོབས་ཀྱིས་སངས་རྒྱས་ཡང་དག་འཕགས། །མི་ཡི་སེང་གེ་སྦྱིན་པའི་སྟོབས་རྟོགས་ཏེ། །སྙིང་རྗེ་ཅན་གྱི་གྲོང་ཁྱེར་འཇུག་པ་ན། །སྦྱིན་པ་མཐར་ཕྱིར་ཚེ་ཡང་འཕེལ་བར་ཤོག །ཚུལ་ཁྲིམས་སྟོབས་ཀྱིས་སངས་རྒྱས་ཡང་དག་འཕགས། །མི་ཡི་སེང་གེ་ཚུལ་ཁྲིམས་སྟོབས་རྟོགས་ཏེ། །སྙིང་རྗེ་ཅན་གྱི་གྲོང་ཁྱེར་འཇུག་པ་ན། །ཚུལ་ཁྲིམས་མཐར་ཕྱིར་ཚེ་ཡང་འཕེལ་བར་ཤོག །བཟོད་པ༴ བརྩོན་
འགྲུས༴ བསམ་གཏན༴ ཤེས་རབ་ རྣམས་ལའང་སྦྱར་བར་བྱའོ།། །།དེ་ནས། དཔལ་ལྡན་ལྷ་མོ་སྟོན་ཀའི་ཟླ་བའི་མདོག །ཞལ་གསུམ་ཕྱག་བརྒྱད་རབ་མཛེས་ཞི་བའི་སྐུ། །ཡེ་ཤེས་དཔག་ཡས་ཚེ་ཡི་མཆོག་སྩོལ་མ། །རྣམ་པར་རྒྱལ་མའི་ཞབས་ལ་ཕྱག་འཚལ་ལོ། །ༀ་ན་མོ་བྷ་ག་ཝ་ཏེ་སརྦ་ཏྲཻ་ལོ་ཀྱ་པྲ་ཏི་བི་ཤིཥྛཱ་ཡ། བུདྡྷ་ཡ་ཏེ་ན་མཿ ཏདྱ་ཐཱ། ༀ་བྷྲཱུཾ་བྷྲཱུཾ་བྷྲཱུཾ་ཤོ་དྷ་ཡ་ཤོ་དྷ་ཡ། བི་ཤོ་དྷ་ཡ་བི་ཤོ་དྷ་ཡ། ཨ་ས་མ་ས་མནྟ་ཨ་བ་བྷཱ་ས་སྥ་ར་ཎ་ག་ཏི། ག་ག་ན་སྭ་བྷཱ་ཝ་བི་ཤུདྡྷེ། ཨ་བྷི་ཥཉྫཏྟུ་མཱཾ། སརྦ་ཏ་ཐཱ་ག་ཏཱཿ སུ་ག་ཏ་བ་ར་བ་ཙ་ན་ཨ་མྲྀ་ཏ་ཨ་བྷི་ཥེ་ཀཻ་ར། མ་ཧཱ་མུ་དྲཱ་མནྟུ་པ་དཻཿ ཨཱ་ཧ་ར་ཨཱ་ཧ་ར། མ་མ་ཨཱ་ཡུསྶཾ་དྷཱ་ར་ཎི། ཤོ་དྷ་ཡ་ཤོ་དྷ་ཡ། བི་ཤོ་དྷ་ཡ་བི་ཤོ་དྷ་ཡ། ག་ག་ན་སྭ་བྷཱ་བ་བི་ཤུདྡྷེ། ཨུ ཥྞཱི་ཥ་བི་ཛ་ཡ་པ་རི་ཤུདྡྷེ། ས་ཧ་སྲ་རསྨི་སཉྩོ་དི་ཏེ། སརྦ་ཏ་ཐཱ་ག་ཏ་ཨ་བ་ལོ་ཀི་ནི། ཥཏྤཱ་ར་མི་ཏཱ་པ་རི་པཱུ་ར་ཎྀ། སརྦ་ཏ་ཐཱ་ག་ཡ་མཱ་ཏེ། ད་ཤ་བྷཱུ་མི་པྲ་ཏིཥྛ་ཏེ། སརྦ་ཏ་ཐཱ་ག་
ཏ་ཧྲྀ་ད་ཡ། ཨ་དྷིཥྛཱ་ན་ཨ་དྷིཥྛིཏེ། མུ་དྲེ་མུ་དྲེ་མ་ཧཱ་མུ་དྲེ། བཛྲ་ཀ་ཡ་སཾ་ཧ་ཏ་ན་པ་རི་ཤུདྡྷ། སརྦ་ཀརྨ་ཨཱ་བ་ར་ཎ་བི་ཤུདྡྷེ། པྲ་ཏི་ནི་ཝརྟ་ཡ་མ་མ་ཨཱ་ཡུར། བི་ཤུདྡྷེ་སརྦ་ཏ་ཐཱ་ག་ཏ། ས་མ་ཡ་ཨ་དྷིཥྛཱ་ན་ཨ་དྷིཥྛཱི ་ན་ཏེ། ༀ་མུ་ནི་མུ་ནི་མ་ཧཱ་མུ་ནི། བི་མུ་ནི་བི་མུ་ནི་མ་ཧཱ་བི་མུ་ནི། མ་ཏི་མ་ཏི་མ་ཧཱ་མ་ཏི། མ་མ་ཏི་སུ་མ་ཏི་ཏ་ཐཱ་ཏ། བྷཱུ་ཏ་ཀོ་ཊི་པ་རི་ཤུདྡྷེ། བི་སྥུ་ཊ། བུདྡྷ་ཤུདྡྷེ། ཧེ་ཧེ་ཛ་ཡ་ཛ་ཡ། བི་ཛ་ཡ་བི་ཛ་ཡ། སྨ་ར་སྨ་ར། སྥ་ར་སྥ་ར། སྥཱ་ར་ཡ་སྥཱ་ར་ཡ། སརྦ་བུདྡྷ་ཨ་དྷིཥྛཱ་ན་ཨ་དྷི ཥྛཱི་ཏེ། ཤུདྡྷེ་ཤུདྡྷེ། བུདྡྷེ་བུདྡྷེ། བཛྲེ་བཛྲེ་མ་ཧཱ་བཛྲེ། སུ་བཛྲེ་བཛྲེ་གརྦྷེ་ཛ་ཡ་གརྦྷེ། བི་ཛ་ཡ་གརྦྷེ། བཛྲ་ཛྲཱ་ལ་གརྦྷེ། བཛྲོདྦྷ་བེ། བཛྲ་སཾ་བྷ་བེ། བཛྲེ་བཛྲི་ཎི། བཛྲི་བྷ་བ་ཏུ་མ་མ་ཤ་རཱི་རཾ། སརྦ་ས་ཏྭཱ་ནཱཉྩ ་ཀཱ་ཡ་པ་རི་ཤུདྡྷེ་རྦྷ་བ་ཏུ། མེ་ས་དཱ་སརྦ་ག་ཏི་པ་རི་ཤུདྡྷི་ཥྩ། སརྦ་ཏ་ཐཱ་ག་ཏཱ་ཥྩ། མཱཾ་ས་མཱ་ཤྭཱ་ས་ཡནྟུ། བུ་དྷྱ་བུ་དྷྱ། སི་དྷྱ་སི་དྷྱ། བོ་དྷ་ཡ་བོ་དྷ་ཡ། བི་བོ་དྷ་ཡ་བི་བོ་དྷ་ཡ། མོ་ཙ་ཡ་མོ་ཙ་ཡ། བི་མོ་
ཙ་ཡ་བི་མོ་ཙ་ཡ། ཤོ་དྷ་ཡ་ཤོ་དྷ་ཡ། བི་ཤོ་དྷ་ཡ་བི་ཤོ་དྷ་ཡ། ས་མནྟ་མོ་ཙ་ཡ་མོ་ཙ་ཡ། ས་མནྟ་རསྨེ་པ་རི་ཤུདྡྷ། སརྦ་ཏ་ཐཱ་ག་ཏ་ཧྲྀ་ད་ཡ། ཨ་དྷིཥྛཱི་ན་ཨ་དྷིཥྛཱི་ཏེ། མུ་དྲེ་མུ་དྲེ་མ་ཧཱ་མུ་དྲེ། མ་ཧཱ་མུ་དྲཱ་མནྟྲ་བཱ་དཻཿསྭཱ་ཧཱ། ༀ་བྷྲཱུཾ་སྭཱ་ཧཱ། ༀ་ཨ་མྲྀ་ཏ་ཨཱ་ཡུརྡ་དཻ་སྭཱ་ཧཱ། གང་ཞིག་བདེ་བར་གཤེགས་རྣམས་ཀྱི། །གཙུག་ཏོར་རབ་ཏུ་རྣམ་པར་རྒྱལ། །མཆོག་ཏུ་ཤེས་པར་མཛད་པ་ལ། །རྣམ་པ་ཀུན་ཏུ་བདག་ཕྱག་འཚལ། །ལྷ་གཅིག་ཁྱོད་ལ་གསོལ་བཏབ་མཐུས། །སངས་རྒྱས་བསྟན་པའི་མངའ་བདག་མཆོག །དཔལ་ལྡན་ཀརྨ་པ་ཆེན་པོའི། །ཕྲིན་ལས་ཕྱོགས་མཐར་ཁྱབ་གྱུར་ཅིག །རྒྱལ་དབང་མཆོག་གི་སྤྲུལ་པའི་སྐུ། །ནོངས་མེད་བརྟན་པའི་གནས་སྐབས་འདིར། །གདུལ་བྱའི་རྒྱུད་ཚོགས་དམ་ཆོས་ཀྱི། །སྣོད་བཟང་ལྡན་པ་ཁོ་ནར་ཤོག །གཤམ་གྱི་ཚིགས་བཅད་གཉིས་པོ་འདི་ཞྭ་དམར་བ་ལྔ་པས་མཛད་པའོ། །བདག་སོགས་རྣལ་འབྱོར་ཆོས་དང་མཐུན་པའི་ཚེ། །ཇི་ལྟར་བསམ་པ་
ཡིད་བཞིན་འགྲུབ་པ་དང་། །ནད་གདོན་འགེགས་ཚོགས་བར་དུ་གཅོད་པའི་ཚེ། །ཉེ་བར་ཞི་བར་བྱིན་གྱིས་བརླབ་ཏུ་གསོལ། །ༀ་པི་ཤཱ་ཙི་པརྞ་ཤ་བ་རི་སརྦ་ཛྭ་ར་པྲ་ཤ་མ་ཎྀ་སྭཱ་ཧཱ། །དེ་བཞིན་གཤེགས་པ་ཐམས་ཅད་ཀྱི། །མཐུ་སྟོབས་གཅིག་ཏུ་བསྡུས་པ་ཡི། །རྡོ་རྗེ་ཁྲོ་བོའི་སྐུར་སྟོན་པ། །རྣམ་པར་འཇོམས་ལ་ཕྱག་འཚལ་ལོ། །རྒྱ་གར་སྐད་དུ། །བཛྲ་བི་ད་ར་ཎ་ནཱ་མ་དྷཱ་ར་ཎཱི། བོད་སྐད་དུ། རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། །བཅོམ་ལྡན་འདས་རྡོ་རྗེ་ལ་བཞུགས་ཏེ། སངས་རྒྱས་ཀྱི་མཐུས་ལག་ན་རྡོ་རྗེའི་ལུས་ཐམས་ཅད་རྡོ་རྗེར་བྱིན་གྱིས་བརླབས་ནས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ལག་ན་རྡོ་རྗེས་སངས་རྒྱས་ཀྱི་མཐུ་དང་། །སངས་རྒྱས་ཀྱི་བྱིན་གྱིས་རླབས་དང་། །བྱང་ཆུབ་སེམས་དཔའ་ཐམས་ཅད་
ཀྱི་བྱིན་གྱིས་རླབས་ཀྱིས། རྡོ་རྗེ་ཁྲོ་བོ་ལས་བྱུང་བ། རྡོ་རྗེ་སྙིང་པོ་རབ་ཏུ་སྨྲས་ཏེ། མི་ཆོད་པ། མི་ཤིགས་པ། བདེན་པ། སྲ་བ། བརྟན་པ། ཐམས་ཅད་དུ་ཐོགས་པ་མེད་པ། ཐམས་ཅད་དུ་མ་ཕམ་པ། སེམས་ཅན་ཐམས་ཅད་སྐྲག་པར་བྱེད་པ། སེམས་ཅན་ཐམས་ཅད་འཇིལ་བར་བྱེད་པ། རིག་སྔགས་ཐམས་ཅད་གཅོད་པར་བྱེད་པ། རིག་སྔགས་ཐམས་ཅད་གནོན་པར་བྱེད་པ། ལས་ཐམས་ཅད་འཇོམས་པར་བྱེད་པ། གཞན་གྱི་ལས་ཐམས་ཅད་འཇིག་པར་བྱེད་པ། གདོན་ཐམས་ཅད་རླག་པར་བྱེད་པ། གདོན་ཐམས་ཅད་ལས་ཐར་པར་བྱེད་པ། འབྱུང་པོ་ཐམས་ཅད་འགུགས་པར་བྱེད་པ། རིག་སྔགས་ཀྱི་ལས་ཐམས་ཅད་བྱེད་དུ་འཇུག་པ། མ་གྲུབ་པ་རྣམས་གྲུབ་པར་བྱེད་པ། །གྲུབ་པ་རྣམས་ཆུད་མི་ཟ་བར་བྱེད་པ། འདོད་པ་ཐམས་ཅད་རབ་ཏུ་སྦྱིན་པ། སེམས་ཅན་ཐམས་ཅད་བསྲུང་བ། ཞི་བ། རྒྱས་པ། སེམས་ཅན་ཐམས་ཅད་
རེངས་པར་བྱེད་པ། རྨུགས་པར་བྱེད་པའི་གསང་སྔགས་ཀྱི་མཐུ་ཆེན་པོ་འདི། སངས་རྒྱས་ཀྱི་མཐུས་ལག་ན་རྡོ་རྗེས་རབ་ཏུ་སྨྲས་སོ། །ན་མོ་རཏྣ་ཏྲ་ཡཱ་ཡ། ན་མ་ཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཏདྱ་ཐཱ། ༀ་ཏྲུ་ཊ་ཏྲུ་ཊ། ཏྲོ་ཊ་ཡ་ཏྲོ་ཊ་ཡ། སྥུ་ཊ་སྥུ་ཊ། སྥོ་ཊ་ཡ་སྥོ་ཊ་ཡ། གྷཱུརྣ་གྷཱུརྣ། གྷཱུརྣ་པ་ཡ་གྷཱུརྣ་པ་ཡ། སརྦ་ས་ཏྭཱ་ནི། བོ་དྷ་ཡ་བོ་དྷ་ཡ། སཾ་བོ་དྷ་ཡ་སཾ་བོ་དྷ་ཡ། བྷྲ་མ་བྷྲ་མ། སཾ་བྷྲཱ་མ་ཡ་སཾ་བྷྲཱ་མ་ཡ། སརྦ་བྷཱུ་ཏཱ་ནི། ཀུཊྚ་ཀུཊྚ། སཾ་ཀུཊྚ་ཡ་སཾ་ཀུཊྚ་ཡ། སརྦ་ཤིཏཱུ་ན། གྷ་ཊ་གྷ་ཊ། སཾ་གྷ་ཊ་ཡ། སཾ་གྷ་ཊ་ཡ། སརྦ་བི་དྱི་བཛྲ་བཛྲ། སྥོ་ཊ་ཡ་བཛྲ་བཛྲ། ཀ་ཊ་བཛྲ་བཛྲ། མ་ཊ་བཛྲ་བཛྲ། མ་ཐ་བཛྲ་བཛྲ། ཨཱཊྚ་ཧཱ་ས་ནཱི་ལ་བཛྲ་སུ་བཛྲཱ་ཡ་སྭཱ་ཧཱ། ཧེ་ཕུ་ལུ་ནི་རུ་ཕུལླུ། གྲྀཧྞ་ཀུལླུ། མི་ལི་ཙུལླུ། ཀུ་རུ་ཀུལླུ། བཛྲ་བི་ཛཱ་ཡཱ་ཡ་སྭཱ་ཧཱ། ཀི་ལི་ཀི་ལཱ་ཡ་སྭཱ་ཧཱ། ཀ་ཊ་ཀ་ཊ། མ་ཊ་མ་ཊ། ར་ཊ་ར་ཊ། མོ་ཊ་ན་པྲ་མོ་ཊ་ནཱ་ཡ་སྭཱ་ཧཱ། ཙ་ར་ཎི་ཙ་ར། ཧ་ར་ཧ་ར། ས་ར་ས་ར། མཱ་ར་
ཡ། བཛྲ་བི་དཱ་ར་ཎཱ་ཡ་སྭཱ་ཧཱ། ཙྪིནྡ་ཙྪིཎྡ། བྷིཎྡ་བྷིཎྡ། མ་ཧཱ་ཀི་ལི་ཀི་ལཱ་ཡ་སྭཱ་ཧཱ། བནྡྷ་བནྡྷ། ཀྲོ་དྷ་བཛྲ་ཀི་ལི་ཀི་ལཱ་ཡ་སྭཱ་ཧཱ། ཙུ་རུ་ཙུ་རུ་ཙཎྜ་ཀི་ལི་ཀི་ལཱ་ཡ་སྭཱ་ཧཱ། ཏྲཱ་ས་ཡ་ཏྲཱ་ས་ཡ། བཛྲ་ཀི་ལི་ཀི་ལཱ་ཡ་སྭཱ་ཧཱ། ཧ་ར་ཧ་ར། བཛྲ་དྷ་རཱ་ཡ་སྭཱ་ཧཱ། པྲ་ཧ་ར་པྲ་ཧ་ར། བཛྲ་པྲ་བྷཉྫ་ནཱ་ཡ་སྭཱ་ཧཱ། མ་ཏིསྠི་ར་བཛྲ། ཤྲུ་ཏིསྠིི་ར་བཛྲ། པྲ་ཏིསྠི་ར་བཛྲ། མ་ཧཱ་བཛྲ། ཨ་པྲ་ཏི་ཧ་ཏ་བཛྲ། ཨ་མོ་གྷ་བཛྲ། ཨེ་ཧྱེ་ཧི་བཛྲ། ཤཱི་གྷྲཾ་བཛྲ་དྷ་རཱ་ཡ་སྭཱ་ཧཱ། དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། སརྦ་བཛྲ་ཀུ་ལ་མཱ་བརྟ་ཡ་སྭཱ་ཧཱ། གནོད་བྱེད་འབྱུང་པོ་མཱ་ར་ཡ་ཕཊ། ན་མཿས་མནྟ་བཛྲཱ་ཎཱཾ། སརྦ་བཛྲ་ཀུ་ལ་མཱ་བརྟ་ཡ། མ་ཧཱ་བ་ལ། ཀ་ཏ་བེ། ཏ་ཏ་ལེ། ཨ་ཙ་ལེ། མཎྜལ་མཱ་ལེ། ཨ་ཏི་བཛྲ་མ་ཧཱ་བ་ལེ། བེ་ག་ར་ཎ་ར་ཎ། ཨ་ཛི་ཏེ། ཛྭ་ལ་ཛྭ་ལ། ཏི་ཊྀ་ཏི་ཊྀ། ཏིང་ག་ལེ། ད་ཧ་ད་ཧ། ཏེ་ཛོ་བ་ཏི། ཏི་ལི་ཏི་ལི། བནྡྷ་བནྡྷ། མ་ཧཱ་བ་ལེ། བཛྲ་ཨཾ་ཀུ་ཤ་ཛྭ་ལཱ་སྭཱ་ཧཱ། ན་མོ་རཏྣ་ཏྲ་ཡ། ན་མཤྩཎྜ་
བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡ། ཏདྱ་ཐཱ། ༀ་ཧ་ར་ཧ་ར་བཛྲ། མ་ཐ་མ་ཐ་བཛྲ། དྷུ་ན་དྷུ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། དྷ་ར་དྷ་ར་བཛྲ། དྷཱ་ར་ཡ་དྷཱ་ར་ཡ་བཛྲ། དཱ་རུ་ཎ་དཱ་རུ་ཎ་བཛྲ། ཙྪཎྡ་ཙྪཎྡ་བཛྲ། བྷིནྡ་བྷིནྡ་བཛྲ་ཧཱུྃ་ཕཊ། ན་མཤྩཎྜ་བཛྲ་ཀྲོ་དྷཱ་ཡ། ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུྃ་ཕཊ། བདག་དང་སེམས་ཅན་ཐམས་ཅད་ཀྱི། སྡིག་པ་ཐམས་ཅད་བྱང་བྱས་ནས། །སྡུག་བསྔལ་ཐམས་ཅད་མེད་པར་བྱེད། །རྒྱུད་དོ་ཅོག་གི་རྩ་བ་སྟེ། །དཔལ་ཀུན་གྱིས་ནི་ལེགས་པར་བརྒྱན། །སེམས་ཅན་དབང་པོ་ཉམས་པ་དང་། །ཚེ་ཟད་པ་དང་ཚེ་ཉམས་དང་། །ཕུན་སུམ་ཚོགས་མིན་གང་ཆགས་དང་། །ལྷ་རྣམས་རྒྱབ་ཀྱིས་ཕྱོགས་པ་དང་། །མཛའ་སྡུག་སྐྱེ་བོ་སྡང་བ་དང་། །བྲན་བཟའ་ལ་སོགས་གཙེས་པ་དང་། །ཕན་ཚུན་མཐུན་པ་མ་ཡིན་དང་། ནོར་འགྲིབ་པས་ནི་གནོད་པ་དང་། །མྱ་ངན་ངལ་དང་གནོད་པ་དང་། །
འཇིགས་པ་དང་ནི་ཕོངས་པ་དང་། །གཟའ་དང་རྒྱུ་སྐར་བྱད་སྟེམས་དང་། །མི་བཟད་གདོན་གྱིས་ཉེན་པ་དང་། །མྱ་ངན་ངལ་ལས་བྱུང་བ་ཡི། །རྨི་ལམ་སྡིག་པ་མཐོང་ན་ཡང་། །དེས་ནི་རབ་བཀྲུས་གཙང་མ་ཡིན། །མདོ་སྡེ་དམ་པ་ཉན་པར་གྱིས། །གང་དག་ཡིད་དགེ་སེམས་དང་ཞིང་། །གཙང་མའི་གོས་ཀྱིས་རབ་བརྒྱན་ཏེ། །ཟབ་མོས་སངས་རྒྱས་སྤྱོད་ཡུལ་བ། །མདོ་སྡེ་འདི་ནི་ཉན་བྱེད་ན། །མདོ་སྡེ་འདི་ཡི་གཟི་བརྗིད་ཀྱིས། །སྲོག་ཆགས་དག་ནི་ཐམས་ཅད་ཀྱིས། །མི་བཟད་པ་ཡི་ནད་རྣམས་ཀྱང་། །དེ་དག་ཐམས་ཅད་ཞི་བར་ལྟ། །ཚེ་དང་བསོད་ནམས་འཕེལ་བར་འགྱུར། །སྡིག་པ་ཀུན་ལས་རྣམ་པར་ཐར། །ནོར་བུ་ཉུངས་ཀར་དུར་བ་དང་། །རིན་ཆེན་རྨ་མེད་ཙན་དན་བཅས། །ཤེལ་དང་རྡོ་རྗེ་མེ་ཏོག་དང་། །ཆུ་ཡིས་གསེར་རབ་ཡང་ན་ནི། །དངུལ་གྱི་བུམ་པ་དག་ཀྱང་རུང་། །གཙང་མའི་གོས་ཀྱིས་དཀྲི་ཞིང་དགང་། །ལན་གྲངས་ཉི་ཤུ་རྩ་
གཅིག་གམ། །ཡང་ན་ལན་གྲངས་བརྒྱ་རྩ་བརྒྱད། །རྡོ་རྗེ་རྣམ་འཇོམས་བཟླས་ནས་ནི། །རྒྱལ་པོ་རྟག་ཏུ་ཁྲུས་གྱིས་ཤིག །རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་རྫོགས་སོ།། །།རྒྱ་གར་གྱི་མཁན་པོ་ཤྲཱི་ལཀྵྨཱི་ཀ་ར་དང་། བོད་ཀྱི་ལོ་ཙཱ་བ་དགེ་སློང་ཤོང་སྟོན་རྡོ་རྗེ་རྒྱལ་མཚན་གྱིས་བསྒྱུར་བའོ། །དུས་ཕྱིས་དཔང་ལོ་ཙཱ་བ་བློ་གྲོས་བརྟན་པས་རྒྱ་དཔེ་དག་པ་རྣམས་དང་། རྒྱ་འགྲེལ་བཟང་པོ་རྣམས་ཀྱི་འབྲུ་སྦྱོར་དང་མཐུན་པར་བཅོས་ཏེ་ཤིན་ཏུ་དག་པར་བགྱིས་པའོ།། །།སླར་ཡང་ལྷུན་པོ་སྒང་གི་ཕོ་བྲང་དུ་མི་ཟད་པར་གྱི་ཆོས་སྦྱིན་བསྒྲུབ་དུས་ཞ་ལུ་ལོ་ཙཱ་བ་དགེ་སློང་ཆོས་སྐྱོང་བཟང་པོས་སྐད་གཉིས་ཀྱི་ཚུལ་སྒྲའི་གཞུང་དང་། རྒྱ་དཔེ་དང་། སྐད་གསར་བཅད་ཀྱི་བརྡ་རྣམས་དང་བསྟུན་ནས་ཞུས་དག་ལེགས་པར་བགྱིས་པའོ།། །།དེ་ནས། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགགས་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་པོའི་རི་ལ་དགེ་སློང་གི་དགེ་འདུན་
ཆེན་པོ་དང་། བྱང་ཆུབ་སེམས་དཔའི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ། དེའི་ཚེ་བཅོམ་ལྡན་འདས་ཟབ་མོ་སྣང་བ་ཞེས་བྱ་བའི་ཆོས་ཀྱི་རྣམ་གྲངས་ཀྱི་ཏིང་ངེ་འཛིན་ལ་སྙོམས་པར་ཞུགས་སོ། །ཡང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོའི་སྤྱོད་པ་ཉིད་ལ་རྣམ་པར་བལྟ་ཞིང་། ཕུང་པོ་ལྔ་པོ་དེ་དག་ལ་ཡང་རང་བཞིན་གྱིས་སྟོང་པར་རྣམ་པར་བལྟའོ། །དེ་ནས་སངས་རྒྱས་ཀྱི་མཐུས་ཚེ་དང་ལྡན་པ་ཤཱ་རིའི་བུས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་སྨྲས་སོ། །རིགས་ཀྱི་བུ། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོའི་སྤྱོད་པ་སྤྱད་པར་འདོད་པ་དེས་ཇི་ལྟར་བསླབ་པར་བྱ། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་
དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །ཤཱ་རིའི་བུ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོའི་སྤྱོད་པ་སྤྱད་པར་འདོད་པ་དེས་འདི་ལྟར་རྣམ་པར་བལྟ་བར་བྱ་སྟེ། ཕུང་པོ་ལྔ་པོ་དེ་དག་ཀྱང་རང་བཞིན་གྱིས་སྟོང་པར་ཡང་དག་པར་རྗེས་སུ་བལྟའོ། །གཟུགས་སྟོང་པའོ། །སྟོང་པ་ཉིད་གཟུགས་སོ། །གཟུགས་ལས་སྟོང་པ་ཉིད་གཞན་མ་ཡིན། སྟོང་པ་ལས་ཀྱང་གཟུགས་གཞན་མ་ཡིན་ནོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་རྣམས་སྟོང་པའོ། །ཤཱ་རིའི་བུ་དེ་ལྟར་ཆོས་ཐམས་ཅད་སྟོང་པ་ཉིད་དེ། མཚན་ཉིད་མེད་པ། མ་སྐྱེས་པ། མ་འགགས་པ། དྲི་མ་མེད་པ། དྲི་མ་དང་བྲལ་བ་མེད་པ། བྲི་བ་མེད་པ། གང་བ་མེད་པའོ། །ཤཱ་རིའི་བུ་དེ་ལྟ་བས་ན་སྟོང་པ་ཉིད་ལ་གཟུགས་མེད། ཚོར་བ་མེད།
འདུ་ཤེས་མེད། འདུ་བྱེད་རྣམས་མེད། རྣམ་པར་ཤེས་པ་མེད། མིག་མེད། རྣ་བ་མེད། སྣ་མེད། ལྕེ་མེད། ལུས་མེད། ཡིད་མེད། གཟུགས་མེད། སྒྲ་མེད། དྲི་མེད། རོ་མེད། རེག་བྱ་མེད། ཆོས་མེད་དོ། །མིག་གི་ཁམས་མེད་པ་ནས་ཡིད་ཀྱི་ཁམས་མེད། ཡིད་ཀྱི་རྣམས་པར་ཤེས་པའི་ཁམས་ཀྱི་བར་དུ་ཡང་མེད་དོ། །མ་རིག་པ་མེད། མ་རིག་པ་ཟད་པ་མེད་པ་ནས་རྒ་ཤི་མེད། རྒ་ཤི་ཟད་པའི་བར་དུ་ཡང་མེད་དོ། །དེ་བཞིན་དུ་སྡུག་བསྔལ་བ་དང་། ཀུན་འབྱུང་བ་དང་། འགོག་པ་དང་ལམ་མེད། ཡེ་ཤེས་མེད། ཐོབ་པ་མེད། མ་ཐོབ་པ་ཡང་མེད་དོ། །ཤཱ་རིའི་བུ་དེ་ལྟ་བས་ན་བྱང་ཆུབ་སེམས་དཔའ་རྣམས་ཐོབ་པ་མེད་པའི་ཕྱིར། ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྟེན་ཅིང་གནས་ཏེ། སེམས་ལ་སྒྲིབ་པ་མེད་པས་སྐྲག་པ་མེད་དེ། ཕྱིན་ཅི་ལོག་ལས་ཤིན་ཏུ་འདས་ནས་མྱ་ངན་ལས་འདས་པའི་མཐར་ཕྱིན་ཏོ། །དུས་གསུམ་དུ་རྣམ་པར་
བཞུགས་པའི་སངས་རྒྱས་ཐམས་ཅད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །དེ་ལྟ་བས་ན་ཤེས་རབ་ཀྱི་ཕ་རོལ་ཏུ་ཕྱིན་པའི་སྔགས། རིག་པ་ཆེན་པོའི་སྔགས། བླ་ན་མེད་པའི་སྔགས། མི་མཉམ་པ་དང་མཉམ་པའི་སྔགས། སྡུག་བསྔལ་ཐམས་ཅད་རབ་ཏུ་ཞི་བར་བྱེད་པའི་སྔགས། མི་རྫུན་པས་ན་བདེན་པར་ཤེས་པར་བྱ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་སྔགས་སྨྲས་པ། ཏདྱ་ཐཱ། ༀ་ག་ཏེ་ག་ཏེ་པཱ་ར་ག་ཏེ་པཱ་ར་སཾ་ག་ཏེ་བྷོ་དྷི་སྭཱ་ཧཱ། ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ལ་བསླབ་པར་བྱའོ། །དེ་ནས་བཅོམ་ལྡན་འདས་ཏིང་ངེ་འཛིན་ལས་བཞེངས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ལེགས་སོ་ཞེས་བྱ་བ་བྱིན་ཏེ།
ལེགས་སོ་ལེགས་སོ། །རིགས་ཀྱི་བུ་དེ་དེ་བཞིན་ནོ། །དེ་དེ་བཞིན་ཏེ། ཇི་ལྟར་ཁྱོད་ཀྱིས་བསྟན་པ་བཞིན་དུ་ཤེས་རབ་ཕ་རོལ་ཏུ་ཕྱིན་པ་ཟབ་མོ་ལ་སྤྱད་པར་བྱ་སྟེ། དེ་བཞིན་གཤེགས་པ་རྣམས་ཀྱང་རྗེས་སུ་ཡི་རང་ངོ་། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཤ་ར་དྭ་ཏིའི་བུ་དང་། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང་། ཐམས་ཅད་དང་ལྡན་པའི་འཁོར་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། ཏདྱ་ཐཱ། ༀ་ག་ཏེ་ག་ཏེ་པཱ་ར་ག་ཏེ་པཱ་ར་སཾ་ག་ཏེ་བྷོ་དྷི་སྭཱ་ཧཱ། ཅི་འགྲུབ་བཟླས་མཐར། ན་མོ་བླ་མ་ལ་ཕྱག་འཚལ་ལོ། །སངས་རྒྱས་ལ། ཆོས་ལ། དགེ་འདུན་ལ། ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་ལོ། །བདག་གི་བདེན་པའི་ཚིག་རྣམས་འགྲུབ་པར་གྱུར་ཅིག །ཇི་ལྟར་
སྔོན་ལྷའི་དབང་པོ་བརྒྱ་བྱིན་གྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ཟབ་མོ་ཡིད་ལ་བསམས་ཤིང་། ཚིག་ཁ་ཏོན་དུ་བྱས་པ་ལ་བརྟེན་ནས་བདུད་སྡིག་ཅན་ལ་སོགས་པ་མི་མཐུན་པའི་ཕྱོགས་ཐམས་ཅད་ཕྱིར་བཟློག་པ་དེ་བཞིན་དུ། བདག་གིས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ཟབ་མོ་ཡིད་ལ་བསམས་ཤིང་ཚིག་ཁ་ཏོན་དུ་བྱས་པ་ལ་བརྟེན་ནས་བདུད་སྡིག་ཅན་ལ་སོགས་པ་མི་མཐུན་པའི་ཕྱོགས་ཐམས་ཅད་ཕྱིར་བཟློག་པར་གྱུར་ཅིག །མེད་པར་གྱུར་ཅིག །ཞི་བར་གྱུར་ཅིག །རབ་ཏུ་ཞི་བར་གྱུར་ཅིག །གང་གིས་རྟེན་ཅིང་འབྲེལ་བར་འབྱུང་། །འགག་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞི་བསྟན་པ། །རྫོགས་པའི་སངས་རྒྱས་སྨྲ་རྣམས་ཀྱི། །དམ་པ་དེ་ལ་ཕྱག་འཚལ་ལོ། །བགེགས་རིགས་སྟོང་ཕྲག་བརྒྱད་ཅུ་ཞི་བ་དང་སོགས་བྱའོ།། །།དེ་ནས། དཔལ་
ལྡན་རྡོ་རྗེའི་ལྷ་མོ་ནི། །དྲག་མོ་སེང་གེའི་གདོང་པ་ཅན། །ཡེ་ཤེས་མེ་ཡི་འོད་ཟེར་འཕྲོ། །སེང་གེའི་གདོང་ཅན་ལྷ་མོར་འདུད། །ཨཿཀཿསཿམཿརཿཙཿཤཿདཿརཿསཿམཿརཿཡཿཕཊཿ མཁའ་འགྲོ་མ་སེང་གེའི་གདོང་པ་ཅན་ཁྱོད་ཀྱི་རིག་སྔགས་བཟླས་པའི་མཐུ་དང་ནུས་པ་ལ་བརྟེན་ནས་བདག་ཅག་དཔོན་སློབ་འཁོར་དང་བཅས་པ་རྣམས་ལ་སྡང་བར་བྱེད་པའི་དགྲ། གནོད་པར་བྱེད་པའི་བགེགས། བར་དུ་གཅོད་པའི་རྐྱེན། མདོར་ན་བཀྲ་མི་ཤིས་པའི་ཕྱོགས་རིས་ངན་པ་ཐམས་ཅད་ཕྱིར་བཟློག་པར་གྱུར་ཅིག །ཁྲོ་མོ་འབར་བའི་ཚོགས་རྣམས་ཀྱིས། །དགྲ་བགེགས་དག་ནི་ཐམས་ཅད་ཀྱི། །ལུས་ངག་ཐལ་བའི་རྡུལ་དུ་རློག །རྣམ་ཤེས་ཆོས་ཀྱི་དབྱིངས་སུ་སྒྲོལ། །ཁྱོད་ཀྱི་རིག་སྔགས་བཟླས་པའི་མཐུས། །གནོད་བྱེད་མ་ལུས་ཞི་བ་དང་། །ཅི་བསམ་ཡིད་བཞིན་འགྲུབ་པ་དང་། །བཤད་སྒྲུབ་བསྟན་པ་རྒྱས་པར་མཛོད། །ཅེས་པ་འདི་རྗེ་བཙུན་མི་བསྐྱོད་རྡོ་
རྗེས་སོ། །རྡོ་རྗེ་འཆང་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །ཏཻ་ལོ་པ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །ནཱ་རོ་པ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །ལྷོ་བྲག་པ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །མི་ལ་རྗེ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །སྒམ་པོ་པ་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་
ཤོག །དུས་གསུམ་མཁྱེན་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །རས་ཆེན་པ་ལ༴ དུས༴ བསམ༴ ཡེ༴ སྤོམ་བྲག་པ་ལ༴ དུས༴ བསམ༴ ཡེ༴ ཀརྨ་པ་ལ༴ དུས༴ བསམ༴ ཡེ༴ ཨུ་རྒྱན་པ་ལ༴ དུས༴ བསམ༴ ཡེ༴ རང་བྱུང་པ་ལ༴ དུས༴ བསམ༴ ཡེ༴ གཡུང་སྟོན་པ་ལ༴ དུས༴ བསམ། ཡེ༴ རོལ་པའི་རྡོ་རྗེ་ལ༴ དུས༴ བསམ༴ ཡེ༴ མཁའ་སྤྱོད་དབང་ལ༴ དུས༴ བསམ༴ ཡེ༴ དེ་བཞིན་གཤེགས་ལ༴ དུས༴ བསམ༴ ཡེ༴ གནས་ལུགས་མཆོག་གི་དོན་རྟོགས་ཤིང་། །ཉོན་མོངས་གཡུལ་ལས་རྒྱལ་བ་ཡི། །རཏྣ་བྷ་དྲ་ལ༴ དུས༴ བསམ༴ ཡེ༴ མཐོང་བ་དོན་ལྡན་ལ༴ དུས༴ བསམ༴ ཡེ༴ འཇམ་དཔལ་བཟང་པོ་ལ༴ དུས༴ བསམ༴ ཡེ༴ དཔལ་འབྱོར་དོན་གྲུབ་ལ༴ དུས༴ བསམ༴ ཡེ༴ ཆོས་གྲགས་རྒྱ་མཚོ་ལ༴ དུས༴ བསམ༴
ཡེ༴ བཀྲ་ཤིས་དཔལ་འབྱོར་ལ༴ དུས༴ བསམ༴ ཡེ༴ མི་བསྐྱོད་རྡོ་རྗེ་ལ༴ དུས༴ བསམ༴ ཡེ༴ དཀོན་མཆོག་འབང་ལ༴ དུས༴ བསམ༴ ཡེ༴ དབང་ཕྱུག་རྡོ་རྗེ་ལ༴ དུས༴ བསམ༴ ཡེ༴ ཆོས་ཀྱི་དབང་ཕྱུག་ལ༴ དུས༴ བསམ༴ ཡེ༴ ཆོས་དབྱིངས་རྡོ་རྗེ་ལ༴ དུས༴ བསམ༴ ཡེ༴ ཡེ་ཤེས་སྙིང་པོ་ལ༴ དུས༴ བསམ༴ ཡེ༴ ཡེ་ཤེས་རྡོ་རྗེ་ལ༴ དུས༴ བསམ༴ ཡེ༴ ཆོས་ཀྱི་དོན་གྲུབ་ལ༴ དུས༴ བསམ༴ ཡེ༴ བྱང་ཆུབ་རྡོ་རྗེ་ལ༴ དུས༴ བསམ༴ ཡེ༴ ཆོས་ཀྱི་འབྱུང་གནས་ལ༴ དུས༴ བསམ༴ ཡེ༴ བདུད་འདུལ་རྡོ་རྗེ་ལ༴ དུས༴ བསམ༴ ཡེ༴ ཆོས་གྲུབ་རྒྱ་མཚོ་ལ༴ དུས༴ བསམ༴ ཡེ༴ པདྨ་ཉིན་བྱེད་ལ༴ དུས༴ བསམ༴ ཡེ༴ ཐེག་མཆོག་རྡོ་རྗེ་ལ༴ དུས༴ བསམ༴ ཡེ༴ བློ་གྲོས་མཐའ་ཡས་ལ༴ དུས༴ བསམ༴ ཡེ༴ མཁའ་ཁྱབ་རྡོ་རྗེ་ལ༴ དུས༴ བསམ༴ ཡེ༴ པདྨ་དབང་མཆོག་ལ༴ དུས༴ བསམ༴ ཡེ༴ དཔལ་ལྡན་མཁྱེན་བརྩེ་ལ༴ དུས༴ བསམ༴
ཡེ༴ རིག་པའི་རྡོ་རྗེ་ལ༴ དུས༴ བསམ༴ ཡེ༴ རྩ་བའི་བླ་མ་ལ༴ དུས༴ བསམ༴ ཡེ༴ རྡོ་རྗེ་ཕག་མོ་ལ༴ དུས༴ བསམ༴ ཡེ༴ མ་མགོན་གཉིས་ལ་གསོལ་བ་འདེབས། །དུས་མིན་འཆི་བ་བཟློག་ཏུ་གསོལ། །བསམ་པ་བཞིན་དུ་འགྲུབ་པ་དང་། །ཡེ་ཤེས་ལྔ་ལྡན་ཐོབ་པར་ཤོག །སེམས་དཔའ་རང་བྱུང་རྡོ་རྗེ་ནི། །ཞེས་སོགས་དང་བྱང་ཆུབ་སེམས་ཀྱི་སོགས་སྦྲེལ་བར་བྱའོ།། །།དེ་ནས་བསག་སྦྱང་བགྱིས་པའི་དགེ་བའི་རྩ་བ་མཐའ་དག་རྫོགས་བྱང་དུ་བསྔོ་ཞིང་སྨོན་ལམ་གདབ་པའི་རིམ་པ་ལ། །མདོ་སྡེ་ཕལ་པོ་ཆེ་ལས་བྱུང་བའི་བཟང་པོ་སྤྱོད་པའི་སྨོན་ལམ་ནི། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་བསྐལ་པ་དང་། བསྐལ་པ་འབྱམ་ཀླས་པ་དང་། འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་པོ་དེ་དག་བརྣན་ཏེ་མངོན་པར་མཛད་པའི་ཕྱིར་ཚིགས་སུ་བཅད་པའི་དབྱངས་ཀྱིས་སྨོན་ལམ་བཏབ་པ། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེང་གེ་ཀུན། །བདག་གིས་མ་ལུས་
དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱིའོ། །བཟང་པོ་སྤྱོད་པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་ཡིད་ཀྱི་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པར། །ཐམས་ཅད་རྒྱལ་བ་དག་གིས་གང་བར་མོས། །དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང་། །བདེ་བར་གཤེགས་པ་ཐམས་ཅད་བདག་གིས་བསྟོད། །མེ་ཏོག་དམ་པ་ཕྲེང་བ་དམ་པ་དང་། །སིལ་སྙན་རྣམས་དང་བྱུག་པའི་གདུགས་མཆོག་དང་། །མར་མེ་མཆོག་དང་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་
དང་། །ཕྱེ་མའི་ཕུར་མ་རི་རབ་མཉམ་པ་དང་། །བཀོད་པ་ཁྱད་པར་འཕགས་པའི་མཆོག་ཀུན་གྱིས། །རྒྱལ་བ་དེ་དག་ལ་ཡང་མཆོད་པར་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང་། །འགྲོ་བ་ཀུན་གྱི་བསོད་ནམས་གང་ལ་ཡང་། །དེ་དག་ཀུན་གྱི་རྗེས་སུ་བདག་ཡི་རང་། །གང་རྣམས་ཕྱོགས་བཅུའི་འཇིག་རྟེན་སྒྲོན་མ་དག །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་
ཅད་ལ། །འཁོར་ལོ་བླ་ན་མེད་པར་བསྐོར་བར་བསྐུལ། །མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་བའི་ཕྱིར། །བསྐལ་པ་ཞིང་གི་རྡུལ་སྙེད་བཞུགས་པར་ཡང་། །བདག་གིས་ཐལ་མོ་རབ་སྦྱར་གསོལ་བར་བགྱི། །ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་བདག་གིས་བྱང་ཆུབ་ཕྱིར་བསྔོའོ། །འདས་པའི་སངས་རྒྱས་རྣམས་དང་ཕྱོགས་བཅུ་ཡི། །འཇིག་རྟེན་དག་ན་གང་བཞུགས་མཆོད་པར་གྱུར། །གང་ཡང་མ་བྱོན་དེ་དག་རབ་མྱུར་བར། །བསམ་རྫོགས་བྱང་ཆུབ་རིམ་པར་སངས་རྒྱས་སྤྱོན། །ཕྱོགས་བཅུ་ག་ལའི་ཞིང་རྣམས་ཇི་སྙེད་པ། །དེ་དག་རྒྱ་ཆེར་ཡོངས་སུ་དག་པར་གྱུར། །བྱང་ཆུབ་ཤིང་དབང་དྲུང་གཤེགས་རྒྱལ་བ་དང་། །སངས་རྒྱས་སྲས་ཀྱིས་རབ་ཏུ་གང་བར་ཤོག །ཕྱོགས་བཅུའི་སེམས་ཅན་གང་
རྣམས་ཇི་སྙེད་པ། །དེ་དག་རྟག་ཏུ་ནད་མེད་བདེ་བར་གྱུར། །འགྲོ་བ་ཀུན་གྱི་ཆོས་ཀྱི་དོན་རྣམས་ནི། །མཐུན་པར་གྱུར་ཅིང་རེ་བའང་འགྲུབ་པར་ཤོག །བྱང་ཆུབ་སྤྱོད་པ་དག་ནི་བདག་སྤྱོད་ཅིང་། །འགྲོ་བ་ཀུན་ཏུ་སྐྱེ་བ་དྲན་པར་གྱུར། །ཚེ་རབས་ཀུན་ཏུ་འཆི་འཕོ་སྐྱེ་བ་ན། །རྟག་ཏུ་བདག་ནི་རབ་ཏུ་འབྱུང་བར་ཤོག །རྒྱལ་བ་ཀུན་གྱི་རྗེས་སུ་སློབ་གྱུར་ཏེ། །བཟང་པོ་སྤྱོད་པ་ཡོངས་སུ་རྫོགས་བྱེད་ཅིང་། །ཚུལ་ཁྲིམས་སྤྱོད་པ་དྲི་མེད་ཡོངས་དག་པར། །རྟག་ཏུ་མ་ཉམས་སྐྱོན་མེད་སྤྱོད་པར་ཤོག །ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་གྱི་སྒྲ་སྐད་ཇི་ཙམ་པར། །ཐམས་ཅད་སྐད་དུ་བདག་གིས་ཆོས་བསྟན་ཏོ། །དེས་ཤིང་ཕ་རོལ་ཕྱིན་ལ་རབ་བརྩོན་ཏེ། །བྱང་ཆུབ་སེམས་ནི་ནམ་ཡང་བརྗེད་མ་གྱུར། །སྡིག་པ་གང་རྣམས་སྒྲིབ་པར་འགྱུར་བ་དག །དེ་དག་མ་ལུས་ཡོངས་སུ་བྱང་བར་ཤོག །
ལས་དང་ཉོན་མོངས་བདུད་ཀྱི་ལས་རྣམས་ལས། །གྲོལ་ཞིང་འཇིག་རྟེན་འགྲོ་བ་རྣམས་སུ་ཡང་། །ཇི་ལྟར་པདྨོ་ཆུས་མི་ཆགས་པ་བཞིན། །ཉི་ཟླ་ནམ་མཁར་ཐོག་པ་མེད་ལྟར་སྤྱད། །ཞིང་གི་ཁྱོན་དང་ཕྱོགས་རྣམས་ཇི་ཙམ་པར། །ངན་སོང་སྡུག་བསྔལ་རབ་ཏུ་ཞི་བར་བྱེད། །བདེ་བ་དག་ལ་འགྲོ་བ་ཀུན་འགོད་ཅིང་། །འགྲོ་བ་ཐམས་ཅད་ལ་ནི་ཕན་པར་སྤྱད། །བྱང་ཆུབ་སྤྱོད་པ་ཡོངས་སུ་རྫོགས་བྱེད་ཅིང་། །སེམས་ཅན་དག་གི་སྤྱོད་དང་མཐུན་པར་འཇུག །བཟང་པོ་སྤྱོད་པ་དག་ནི་རབ་སྟོན་ཅིང་། །མ་འོངས་བསྐལ་པ་ཀུན་ཏུ་སྤྱོད་པར་གྱུར། །བདག་གི་སྤྱོད་དང་མཚུངས་པར་གང་སྤྱོད་པ། །དེ་དག་དང་ནི་རྟག་ཏུ་འགྲོགས་པར་ཤོག །ལུས་དང་ངག་རྣམས་དང་ནི་སེམས་ཀྱིས་ཀྱང་། །སྤྱོད་པ་དག་དང་སྨོན་ལམ་གཅིག་ཏུ་སྤྱད། །བདག་ལ་ཕན་པར་འདོད་པའི་གྲོགས་པོ་དག །བཟང་པོའི་སྤྱོད་པ་རབ་ཏུ་སྟོན་པ་རྣམས། །དེ་དག་དང་ཡང་རྟག་ཏུ་ཕྲད་པར་ཤོག །
དེ་དག་བདག་གིས་ནམ་ཡང་ཡིད་མི་དབྱུང་། །སངས་རྒྱས་སྲས་ཀྱིས་བསྐོར་བའི་མགོན་པོ་རྣམས། །མངོན་སུམ་རྟག་ཏུ་བདག་གིས་རྒྱལ་བ་བལྟ། །མ་འོངས་བསྐལ་པ་ཀུན་ཏུ་མི་སྐྱོ་བར། །དེ་དག་ལ་ཡང་མཆོད་པ་རྒྱ་ཆེར་བགྱི། །རྒྱལ་བ་རྣམས་ཀྱི་དམ་པའི་ཆོས་འཛིན་ཅིང་། །བྱང་ཆུབ་སྤྱོད་པ་ཀུན་ཏུ་སྣང་བར་བྱེད། །བཟང་པོ་སྤྱོད་པ་རྣམ་པར་སྦྱང་བ་ཡང་། །མ་འོངས་བསྐལ་པ་ཀུན་ཏུ་སྤྱད་པར་བགྱི། །སྲིད་པ་ཐམས་ཅད་དུ་ཡང་འཁོར་བ་ན། །བསོད་ནམས་ཡེ་ཤེས་དག་ནི་མི་ཟད་རྙེད། །ཐབས་དང་ཤེས་རབ་ཏིང་འཛིན་རྣམ་ཐར་དང་། །ཡོན་ཏན་ཀུན་གྱི་མི་ཟད་མཛོད་དུ་གྱུར། །རྡུལ་གཅིག་སྟེང་ན་རྡུལ་སྙེད་ཞིང་རྣམས་ཏེ། །ཞིང་དེར་བསམ་གྱིས་མི་ཁྱབ་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་ལ། །བྱང་ཆུབ་སྤྱད་པ་སྤྱོད་ཅིང་བལྟ་བར་བགྱི། །དེ་ལྟར་མ་ལུས་ཐམས་ཅད་ཕྱོགས་སུ་ཡང་། །སྐྲ་ཙམ་ཁྱོན་ལ་དུས་
གསུམ་ཚད་སྙེད་ཀྱི། །སངས་རྒྱས་རྒྱ་མཚོ་ཞིང་རྣམས་རྒྱ་མཚོ་དང་། །བསྐལ་པ་རྒྱ་མཚོར་སྤྱོད་ཅིང་རབ་ཏུ་འཇུག །གསུང་གཅིག་ཡན་ལག་རྒྱ་མཚོའི་སྒྲ་སྐད་ཀྱིས། །རྒྱལ་བ་ཀུན་དབྱངས་ཡན་ལག་རྣམ་དག་པ། །འགྲོ་བ་ཀུན་གྱི་བསམ་པ་ཇི་བཞིན་དབྱངས། །སངས་རྒྱས་གསུང་ལ་རྟག་ཏུ་འཇུག་པར་བགྱི། །དུས་གསུམ་གཤེགས་པ་རྒྱལ་བ་ཐམས་ཅད་དག །འཁོར་ལོའི་ཚུལ་རྣམས་རབ་ཏུ་བསྐོར་བ་ཡིས། །དེ་དག་གི་ཡང་གསུང་དབྱངས་མི་ཟད་ལ། །བློ་ཡི་སྟོབས་ཀྱིས་བདག་ཀྱང་རབ་ཏུ་འཇུག །མ་འོངས་བསྐལ་པ་ཐམས་ཅད་འཇུག་པར་ཡང་། །སྐད་ཅིག་གཅིག་གིས་བདག་ཀྱང་འཇུག་པར་བགྱི། །གང་ཡང་བསྐལ་པ་དུས་གསུམ་ཚད་དེ་དག །སྐད་ཅིག་ཆ་ཤས་ཀྱིས་ནི་ཞུགས་པར་སྤྱད། །དུས་གསུམ་གཤེགས་པ་མི་ཡི་སེང་གེ་གང་། །དེ་དག་སྐད་ཅིག་གཅིག་ལ་བདག་གིས་བལྟ། །རྟག་ཏུ་དེ་དག་གི་ནི་སྤྱོད་ཡུལ་ལ། །སྒྱུ་མར་གྱུར་པའི་རྣམ་
ཐར་སྟོབས་ཀྱིས་འཇུག །གང་ཡང་དུས་གསུམ་དག་གི་ཞིང་བཀོད་པ། །དེ་དག་རྡུལ་གཅིག་སྟེང་དུ་མངོན་པར་བསྒྲུབ། །དེ་ལྟར་མ་ལུས་ཕྱོགས་རྣམས་ཐམས་ཅད་དུ། །རྒྱལ་བ་རྣམས་ཀྱི་ཞིང་གི་བཀོད་ལ་འཇུག །གང་ཡང་མ་བྱོན་འཇིག་རྟེན་སྒྲོན་མ་རྣམས། །དེ་དག་རིམ་པར་འཚང་རྒྱ་འཁོར་ལོ་སྐོར། །མྱ་ངན་འདས་པ་རབ་ཏུ་ཞི་མཐའ་སྟོན། །མགོན་པོ་ཀུན་གྱི་དྲུང་དུ་བདག་མཆིའོ། །ཀུན་ནས་མྱུར་བའི་ རྫུ་འཕྲུལ་སྟོབས་རྣམས་དང་། །ཀུན་ནས་སྒོ་ཡི་ཐེག་པའི་སྟོབས་དག་དང་། །ཀུན་ཏུ་ཡོན་ཏན་སྤྱོད་པའི་སྟོབས་རྣམས་དང་། །ཀུན་ཏུ་ཁྱབ་པ་བྱམས་པ་དག་གི་སྟོབས། །ཀུན་ཏུ་དགེ་བའི་བསོད་ནམས་སྟོབས་རྣམས་དང་། །ཆགས་པ་མེད་པར་གྱུར་པའི་ཡེ་ཤེས་སྟོབས། །ཤེས་རབ་ཐབས་དང་ཏིང་འཛིན་སྟོབས་དག་གིས། །བྱང་ཆུབ་སྟོབས་རྣམས་ཡང་དག་སྒྲུབ་པར་བྱེད། །ལས་ཀྱི་སྟོབས་རྣམས་ཡོངས་སུ་དག་བྱེད་ཅིང་། །ཉོན་
མོངས་སྟོབས་རྣམས་ཀུན་ཏུ་འཇོམས་པར་བྱེད། །བདུད་ཀྱི་སྟོབས་རྣམས་སྟོབས་མེད་རབ་བྱེད་ཅིང་། །བཟང་པོ་སྤྱོད་པའི་སྟོབས་ནི་རྫོགས་པར་བགྱི། །ཞིང་རྣམས་རྒྱ་མཚོ་རྣམ་པར་དག་བྱེད་ཅིང་། །སེམས་ཅན་རྒྱ་མཚོ་དག་ནི་རྣམ་པར་འགྲོལ། །ཆོས་རྣམས་རྒྱ་མཚོ་རབ་ཏུ་མཐོང་བྱེད་ཅིང་། །ཡེ་ཤེས་རྒྱ་མཚོ་རབ་ཏུ་གོམས་པར་བྱེད། །སྤྱོད་པ་རྒྱ་མཚོ་རྣམ་པར་དག་བྱེད་ཅིང་། །སྨོན་ལམ་རྒྱ་མཚོ་རབ་ཏུ་རྫོགས་པར་བྱེད། །སངས་རྒྱས་རྒྱ་མཚོ་རབ་ཏུ་མཆོད་བྱེད་ཅིང་། །བསྐལ་པ་རྒྱ་མཚོར་མི་སྐྱོ་སྤྱད་པར་བགྱི། །གང་ཡང་དུས་གསུམ་གཤེགས་པའི་རྒྱལ་བ་ཡི། །བྱང་ཆུབ་སྤྱོད་པའི་སྨོན་ལམ་བྱེ་བྲག་རྣམས། །བཟང་པོ་སྤྱོད་པས་བྱང་ཆུབ་སངས་རྒྱས་ནས། །དེ་ཀུན་བདག་གིས་མ་ལུས་རྫོགས་པར་བགྱི། །རྒྱལ་བ་ཀུན་གྱི་སྲས་ཀྱི་ཐུ་བོ་པ། །གང་གི་མིང་ནི་ཀུན་ཏུ་བཟང་ཞེས་བྱ། །མཁས་པ་དེ་དང་མཚུངས་པར་སྤྱད་པའི་ཕྱིར། །དགེ་བ་འདི་དག་ཐམས་ཅད་
རབ་ཏུ་བསྔོ། །ལུས་དང་ངག་དང་ཡིད་ཀྱང་རྣམ་དག་ཅིང་། །སྤྱོད་པ་རྣམ་དག་ཞིང་རྣམས་ཡོངས་དག་དང་། །བསྔོ་བའང་བཟང་པོ་མཁས་པ་ཅི་འདྲ་བ། །དེ་འདྲར་བདག་ཀྱང་དེ་དང་མཚུངས་པར་ཤོག །ཀུན་ནས་དགེ་བ་བཟང་པོ་སྤྱོད་པའི་ཕྱིར། །འཇམ་དཔལ་གྱི་ནི་སྨོན་ལམ་སྤྱད་པར་བགྱི། །མ་འོངས་བསྐལ་པ་ཀུན་ཏུ་མི་སྐྱོ་བར། །དེ་ཡི་བྱ་བ་མ་ལུས་རྫོགས་པར་བགྱི། །སྤྱོད་པ་དག་ནི་ཚད་ཡོད་མ་གྱུར་ཅིག །ཡོན་ཏན་རྣམས་ཀྱང་ཚད་གཟུང་མེད་པར་ཤོག །སྤྱོད་པ་ཚད་མེད་པ་ལ་གནས་ནས་ཀྱང་། །དེ་དག་འཕྲུལ་པ་ཐམས་ཅད་འཚལ་བར་བགྱི། །ནམ་མཁའི་མཐར་ཐུག་གྱུར་པ་ཇི་ཙམ་པར། །སེམས་ཅན་མ་ལུས་མཐའ་ཡས་དེ་བཞིན་ཏེ། །ཇི་ཙམ་ལས་དང་ཉོན་མོངས་མཐར་གྱུར་པ། །བདག་གི་སྨོན་ལམ་མཐའ་ཡང་དེ་ཙམ་མོ། །གང་ཡང་ཕྱོགས་བཅུའི་ཞིང་རྣམས་མཐའ་ཡས་པ། །རིན་ཆེན་བརྒྱན་ཏེ་རྒྱལ་བ་རྣམས་ལ་ཕུལ། །
ལྷ་དང་མི་ཡི་བདེ་བའི་མཆོག་རྣམས་ཀྱང་། །ཞིང་གི་རྡུལ་སྙེད་བསྐལ་པར་ཕུལ་བ་བས། །གང་གིས་བསྔོ་བའི་རྒྱལ་པོ་འདི་ཐོས་ནས། །བྱང་ཆུབ་མཆོག་གི་རྗེས་སུ་རབ་མོས་ཤིང་། །ལན་ཅིག་ཙམ་ཡང་དད་པ་སྐྱེད་པ་ནི། །བསོད་ནམས་དམ་པའི་མཆོག་ཏུ་འདི་འགྱུར་རོ། །གང་གིས་བཟང་སྤྱོད་སྨོན་ལམ་འདི་བཏབ་པས། །དེས་ནི་ངན་སོང་ཐམས་ཅད་སྤངས་པར་འགྱུར། །དེས་ནི་གྲོགས་པོ་ངན་པ་སྤངས་པ་ཡིན། །སྣང་བ་མཐའ་ཡས་དེ་ཡང་དེས་མྱུར་མཐོང་། །དེ་དག་རྙེད་པ་རབ་རྙེད་བདེ་བར་འཚོ། །མི་ཚེ་འདིར་ཡང་དེ་དག་ལེགས་པར་འོང་། །ཀུན་ཏུ་བཟང་པོ་དེ་ཡང་ཅི་འདྲ་བར། །དེ་དག་རིང་པོར་མི་ཐོགས་དེ་བཞིན་འགྱུར། །མཚམས་མེད་ལྔ་པོ་དག་གི་སྡིག་པ་རྣམས། །གང་གིས་མི་ཤེས་དབང་གིས་བྱས་པ་དག །དེ་ཡིས་བཟང་པོ་སྤྱོད་པ་འདི་བརྗོད་ན། །མྱུར་དུ་མ་ལུས་ཡོངས་སུ་བྱང་བར་འགྱུར། །ཡེ་ཤེས་དང་ནི་གཟུགས་དང་མཚན་
རྣམས་དང་། །རིགས་དང་ཁ་དོག་རྣམས་དང་ལྡན་པར་འགྱུར། །བདུད་དང་མུ་སྟེགས་མང་པོས་དེ་མི་ཐུབ། །འཇིག་རྟེན་གསུམ་པོ་ཀུན་ནའང་མཆོད་པར་འགྱུར། །བྱང་ཆུབ་ཤིང་དབང་དྲུང་དུ་དེ་མྱུར་འགྲོ། །སོང་ནས་སེམས་ཅན་ཕན་ཕྱིར་དེར་འདུག་སྟེ། །བྱང་ཆུབ་སངས་རྒྱས་འཁོར་ལོ་རབ་ཏུ་སྐོར། །བདུད་རྣམས་སྡེ་དང་བཅས་པ་ཐམས་ཅད་བཏུལ། །གང་ཡང་བཟང་པོ་སྤྱོད་པའི་སྨོན་ལམ་འདི། །འཆང་བ་དང་ནི་སྟོན་ཏམ་ཀློག་པ་ཡི། །དེ་ཡི་རྣམ་པར་སྨིན་པ་སངས་རྒྱས་མཁྱེན། །བྱང་ཆུབ་མཆོག་ལ་སོམ་ཉི་མ་བྱེད་ཅིག །འཇམ་དཔལ་ཇི་ལྟར་མཁྱེན་ཅིང་དཔའ་བ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཅིང་། །དགེ་བ་འདི་དག་ཐམས་ཅད་རབ་ཏུ་བསྔོ། །དུས་གསུམ་གཤེགས་པ་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ཀུན་
ཀྱང་། །བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི། །བདག་ནི་འཆི་བའི་དུས་བྱེད་གྱུར་པ་ན། །སྒྲིབ་པ་ཐམས་ཅད་དག་ནི་ཕྱིར་བསལ་ཏེ། །མངོན་སུམ་སྣང་བ་མཐའ་ཡས་དེ་མཐོང་ནས། །བདེ་བ་ཅན་གྱི་ཞིང་དེར་རབ་ཏུ་འགྲོ། །དེར་སོང་ནས་ནི་སྨོན་ལམ་འདི་དག་ཀྱང་། །ཐམས་ཅད་མ་ལུས་མངོན་དུ་འགྱུར་བར་ཤོག །དེ་དག་མ་ལུས་བདག་གིས་ཡོངས་སུ་བཀང་། །འཇིག་རྟེན་ཇི་སྲིད་སེམས་ཅན་ཕན་པར་བགྱི། །རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །པདྨོ་དམ་པ་ཤིན་ཏུ་མཛེས་ལས་སྐྱེས། །སྣང་བ་མཐའ་ཡས་རྒྱལ་བས་མངོན་སུམ་དུ། །ལུང་བསྟན་པ་ཡང་བདག་གིས་དེར་ཐོབ་ཤོག །དེར་ནི་བདག་གིས་ལུང་བསྟན་རབ་ཐོབ་ནས། །སྤྲུལ་པ་མང་པོ་བྱེ་བ་ཕྲག་བརྒྱ་ཡིས། །བློ་ཡི་སྟོབས་ཀྱིས་ཕྱོགས་བཅུ་རྣམས་སུ་ཡང་། །སེམས་ཅན་རྣམས་ལ་ཕན་པ་མང་པོ་བགྱི། །བཟང་པོ་སྤྱོད་པའི་སྨོན་ལམ་བཏབ་པ་ཡི། །དགེ་བ་ཅུང་ཟད་བདག་
གིས་ཅི་བསགས་པ། །དེས་ནི་འགྲོ་བའི་སྨོན་ལམ་དགེ་བ་རྣམས། །སྐད་ཅིག་གཅིག་གིས་ཐམས་ཅད་འབྱོར་བར་ཤོག །བཟང་པོ་སྤྱོད་པ་ཡོངས་སུ་བསྔོས་པ་ལས། །བསོད་ནམས་མཐའ་ཡས་དམ་པ་གང་ཐོབ་དེས། །འགྲོ་བ་སྡུག་བསྔལ་ཆུ་བོར་བྱིང་བ་རྣམས། །འོད་དཔག་མེད་པའི་གནས་རབ་ཐོབ་པར་ཤོག །སྨོན་ལམ་རྒྱལ་པོ་འདི་དག་མཆོག་གི་གཙོ། །མཐའ་ཡས་འགྲོ་བ་ཀུན་ལ་ཕན་བྱེད་ཅིང་། །ཀུན་ཏུ་བཟང་པོས་བརྒྱན་པའི་གཞུང་གྲུབ་སྟེ། །ངན་སོང་གནས་རྣམས་མ་ལུས་སྟོངས་པར་ཤོག །རྒྱ་གར་གྱི་མཁན་པོ་ཛི་ན་མི་ཏྲ་དང་། སུ་རེནྡྲ་བོ་དྷི་དང་། ཞུ་ཆེན་ཀྱི་ལོ་ཙཱ་བ་བནྡེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།དཀོན་བརྩེགས་ལེའུ་ཞེ་གཅིག་པ་བྱམས་པས་ཞུས་པ་ལས་བྱུང་བའི་བྱམས་པའི་སྨོན་ལམ་ནི། སངས་རྒྱས་ཀུན་ལ་ཕྱག་འཚལ་ལོ། །དྲང་སྲོང་ལྷ་མིག་ལྡན་པ་ཡི། །བྱང་ཆུབ་སེམས་དཔའ་རྣམས་དང་ཡང་། །ཉན་ཐོས་རྣམས་ལ་ཕྱག་འཚལ་ལོ། །ངན་འགྲོ་ཐམས་ཅད་
ཟློག་བྱེད་ཅིང་། །མཐོ་རིས་ལམ་ནི་རབ་སྟོན་ལ། །རྒ་ཤི་མེད་པར་འདྲེན་བགྱིད་པ། །བྱང་ཆུབ་སེམས་ལ་ཕྱག་འཚལ་ལོ། །སེམས་ཀྱི་དབང་དུ་གྱུར་པས་ན། །བདག་གིས་སྡིག་པ་ཅི་བགྱིས་པ། །སངས་རྒྱས་སྤྱན་སྔར་མཆིས་ནས་སུ། །བདག་གིས་དེ་དག་བཤགས་པར་བགྱི། །བདག་ལས་རྣམ་པ་གསུམ་གང་གི །བསོད་ནམས་ཚོགས་ནི་བསྐྱེད་པ་སྟེ། །བདག་གི་ཀུན་མཁྱེན་ས་བོན་ཏེ། །བདག་གིས་བྱང་ཆུབ་མི་ཟད་ཤོག །ཕྱོགས་བཅུ་དག་གི་ཞིང་རྣམས་སུ། །སངས་རྒྱས་མཆོད་པ་གང་བྱུང་བ། །སངས་རྒྱས་མཁྱེན་པས་ཡི་རང་པ། །དེ་ལ་བདག་ནི་ཡི་རང་ངོ་། །སྡིག་པ་ཐམས་ཅད་བཤགས་པར་བགྱི། །བསོད་ནམས་ཀུན་ལ་ཡི་རང་ངོ་། །སངས་རྒྱས་ཀུན་ལ་ཕྱག་འཚལ་ལོ། །བདག་ནི་ཡེ་ཤེས་མཆོག་ཐོབ་ཤོག །ཕྱོགས་བཅུ་དག་གི་ཕྱོགས་རྣམས་སུ། །ས་བཅུ་དག་ལ་གནས་པ་ཡི། །བྱང་ཆུབ་སེམས་དཔའ་བྱང་ཆུབ་མཆོག །འཚང་རྒྱ་བགྱིད་པར་བསྐུལ་མ་
འདེབས། །བྱང་ཆུབ་དམ་པར་སངས་རྒྱས་ཤིང་། །སྡེ་དང་བཅས་པའི་བདུད་བཏུལ་ནས། །སྲོག་ཆགས་ཀུན་ལ་སྨན་སླད་དུ། །ཆོས་ཀྱི་འཁོར་ལོ་བསྐོར་གྱུར་ཅིག །ཆོས་རྔ་ཆེན་པོ་སྒྲ་ཡིས་ནི། །སྡུག་བསྔལ་སེམས་ཅན་ཐར་བགྱིད་ཤོག །བསྐལ་པ་བྱེ་བ་བསམ་ཡས་སུ། །ཆོས་སྟོན་མཛད་ཅིང་བཞུགས་གྱུར་ཅིག །འདོད་པའི་འདམ་དུ་བྱིང་གྱུར་ཅིང་། །སྲེད་པའི་སྲད་བུས་དམ་བཅིངས་པ། །འཆིང་བ་ཀུན་གྱིས་བཅིངས་བདག་ལ། །རྐང་གཉིས་མཆོག་རྣམས་གཟིགས་སུ་གསོལ། །སེམས་ཀྱིས་དྲི་མར་བགྱིས་པ་ལ། །སངས་རྒྱས་རྣམས་ནི་སྨོད་མི་མཛད། །སེམས་ཅན་རྣམས་ལ་བྱམས་ཐུགས་ལྡན། །སྲིད་པའི་མཚོ་ལས་སྒྲོལ་བར་ཤོག །རྫོགས་པའི་སངས་རྒྱས་གང་བཞུགས་དང་། །གང་དག་འདས་དང་མ་བྱོན་པ། །དེ་དག་རྗེས་སུ་བདག་སློབ་ཅིང་། །བྱང་ཆུབ་སྤྱད་པ་སྤྱོད་གྱུར་ཅིག །ཕ་རོལ་ཕྱིན་དྲུག་རྫོགས་བགྱིས་ནས། །འགྲོ་དྲུག་
སེམས་ཅན་ཐར་བགྱིད་ཤོག །མངོན་ཤེས་དྲུག་པོ་མངོན་བགྱིས་ནས། །བླ་མེད་བྱང་ཆུབ་རེག་གྱུར་ཅིག །མ་སྐྱེས་པ་དང་མི་འབྱུང་དང་། །རང་བཞིན་མ་མཆིས་གནས་མ་མཆིས། །རྣམ་རིག་མ་མཆིས་དངོས་མ་མཆིས། །སྟོང་པའི་ཆོས་ནི་རྟོགས་པར་ཤོག །སངས་རྒྱས་དྲང་སྲོང་ཆེན་པོ་ལྟར། །སེམས་ཅན་མ་མཆིས་སྲོག་མ་མཆིས། །གང་ཟག་མ་མཆིས་གསོ་མ་མཆིས། །བདག་མ་མཆིས་པའི་ཆོས་རྟོགས་ཤོག །བདག་འཛིན་བདག་གིར་འཛིན་པ་ཡི། །དངོས་པོ་ཀུན་ལ་མི་གནས་པར། །སེམས་ཅན་ཀུན་ལ་སྨན་སླད་དུ། །སེར་སྣ་མ་མཆིས་སྦྱིན་གཏོང་ཤོག །དངོས་པོ་དངོས་པོར་མ་མཆིས་པས། །བདག་གི་ལོངས་སྤྱོད་ལྷུན་གྲུབ་ཤོག །དངོས་པོ་ཐམས་ཅད་རྣམ་འཇིག་པས། །སྦྱིན་པའི་ཕ་རོལ་ཕྱིན་རྫོགས་ཤོག །ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། །ཚུལ་ཁྲིམས་རྣམ་པར་དག་དང་ལྡན། །རློམ་སེམས་མེད་པའི་ཚུལ་ཁྲིམས་ཀྱིས། །ཚུལ་ཁྲིམས་ཕ་
རོལ་ཕྱིན་རྫོགས་ཤོག །ས་འམ་ཡང་ན་ཆུ་འམ་མེ། །རླུང་གི་ཁམས་ལྟར་མི་གནས་ཤིང་། །བཟོད་པ་ཁྲོ་བ་མ་མཆིས་པར། །བཟོད་པའི་ཕ་རོལ་ཕྱིན་རྫོགས་ཤོག །བརྩོན་འགྲུས་བརྩམས་པའི་བརྩོན་འགྲུས་ཀྱིས། །གཏན་སྤྲོ་ལེ་ལོ་མ་མཆིས་ཤིང་། །སྟོབས་དང་ལྡན་པའི་ལུས་སེམས་ཀྱིས། །བརྩོན་འགྲུས་ཕ་རོལ་ཕྱིན་རྫོགས་ཤོག །སྒྱུ་མ་ལྟ་བུའི་ཏིང་འཛིན་དང་། །དཔའ་བར་འགྲོ་བའི་ཏིང་འཛིན་དང་། །རྡོ་རྗེ་ལྟ་བུའི་ཏིང་འཛིན་གྱིས། །བསམ་གཏན་ཕ་རོལ་ཕྱིན་རྫོགས་ཤོག །རྣམ་པར་ཐར་པའི་སྒོ་གསུམ་དང་། །དུས་གསུམ་མཉམ་པ་ཉིད་དང་ཡང་། །རིགས་གསུམ་མངོན་སུམ་བགྱིས་པ་ཡིས། །ཤེས་རབ་ཕ་རོལ་ཕྱིན་རྫོགས་ཤོག །སངས་རྒྱས་ཀུན་གྱིས་བསྔགས་པ་དང་། །འོད་དང་གཟི་བརྗིད་འབར་བ་དང་། །བྱང་ཆུབ་སེམས་དཔའི་བརྩོན་འགྲུས་ཀྱིས། །བདག་གི་བསམ་པ་རྫོགས་གྱུར་ཅིག །དེ་ལྟར་སྤྱད་པ་སྤྱོད་བྱེད་ཅིང་། །
བྱམས་པ་གྲགས་དང་ལྡན་པ་ཡིས། །ཕ་རོལ་ཕྱིན་དྲུག་རྫོགས་བགྱིས་ནས། །ས་བཅུའི་སྤོ་ལ་རབ་གནས་ཤོག །རྒྱ་གར་གྱི་མཁན་པོ་ཛི་ན་མི་ཏྲ་དང་། སུ་རེནྡྲ་བོ་དྷི་དང་། ཞུ་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ། འདི་ལྟར་བགྱིས་པའི་བསོད་ནམས་དཔག་མེད་ཀྱིས། །དམྱལ་བ་ཡི་དྭགས་དུད་འགྲོ་ལྷ་མ་ཡིན། །གནས་ངན་ལེན་རྣམས་རྟག་ཏུ་སྤངས་བྱས་ནས། །རྒྱལ་བ་བྱམས་པའི་གོ་འཕང་བརྙེས་གྱུར་ཅིག །རྒྱལ་བ་བྱམས་པ་དང་ནི་སེང་གེ་ཡིས། །མ་འོངས་སངས་རྒྱས་མཛད་པ་སྟོན་པའི་ཚེ། །བདག་ཀྱང་བྱང་ཆུབ་མཆོག་ལ་གནས་གྱུར་ཏེ། །བླ་ན་མེད་པའི་ལུང་ཡང་སྟོན་པར་ཤོག །དགེ་བ་འདི་ཡིས་ཚེ་རབས་ཐམས་ཅད་དུ། །དལ་ཐོབ་བཤེས་གཉེན་བཟང་ལ་བརྟེན་པ་དང་། །སེམས་ཅན་ཀུན་གྱི་སྡུག་བསྔལ་ཁུར་ཁྱེར་ནས། །བྱམས་པའི་བསྟན་ལ་བྱ་བ་བྱེད་པར་ཤོག །སྤྱོད་འཇུག་ལས་བྱུང་བའི་བྱང་ཆུབ་སྤྱོད་པའི་སྨོན་ལམ་ནི། བདག་གིས་བྱང་ཆུབ་སྤྱོད་པ་ལ། །འཇུག་
པ་རྣམ་པར་བརྩམས་པ་ཡི། །དགེ་བ་གང་དེས་འགྲོ་བ་ཀུན། །བྱང་ཆུབ་སྤྱོད་ལ་འཇུག་པར་ཤོག །ཕྱོགས་རྣམས་ཀུན་ན་ལུས་དང་སེམས། །སྡུག་བསྔལ་ནད་པ་ཇི་སྙེད་པ། །དེ་དག་བདག་གི་བསོད་ནམས་ཀྱིས། །བདེ་དགའ་རྒྱ་མཚོ་ཐོབ་པར་ཤོག །དེ་དག་འཁོར་བ་ཇི་སྲིད་དུ། །ནམ་ཡང་བདེ་ལས་ཉམས་མ་གྱུར། །འགྲོ་བས་བྱང་ཆུབ་སེམས་དཔའ་ཡི། །བདེ་བ་རྒྱུན་མི་འཆད་ཐོབ་ཤོག །འཇིག་རྟེན་ཁམས་ན་དམྱལ་བ་དག །གང་དག་ཇི་སྙེད་ཡོད་པ་རྣམས། །དེ་དག་ཏུ་ནི་ལུས་ཅན་རྣམས། །བདེ་ཅན་བདེ་བས་དགའ་བར་ཤོག །གྲང་བས་ཉམས་ཐག་དྲོ་ཐོབ་ཤོག །བྱང་ཆུབ་སེམས་དཔའི་སྤྲིན་ཆེན་ལས། །བྱུང་བའི་ཆུ་བོ་མཐའ་ཡས་ཀྱིས། །ཚ་བས་ཉམ་ཐག་བསིལ་བར་ཤོག །རལ་གྲི་ལོ་མའི་ནགས་ཚལ་ཡང་། །དེ་ལ་ཙན་དན་ནགས་སྟུག་ཤོག །ཤལ་མ་ལི་ཡི་སྡོང་པོ་ཡང་། །དཔག་བསམ་ཤིང་དུ་འཁྲུངས་པར་ཤོག །མཐིང་རིལ་ངུར་
པ་དག་དང་ངང་པ་དང་། །བཞད་སོགས་སྐད་སྙན་འབྱིན་པས་མཛེས་གྱུར་ཅིག །པདྨ་དྲི་བསུང་ཆེ་ལྡན་མཚོ་དག་གིས། །དམྱལ་བའི་ས་ཕྱོགས་དག་ནི་ཉམས་དགར་ཤོག །སོལ་ཕུང་དེ་ཡང་རིན་ཆེན་ཕུང་པོར་གྱུར། །ས་བསྲེགས་ཤེལ་གྱི་ས་གཞི་བསྟར་བར་ཤོག །བསྡུས་འཇོམས་རི་བོ་རྣམས་ཀྱང་མཆོད་པ་ཡི། །གཞལ་མེད་ཁང་གྱུར་བདེ་གཤེགས་གང་བར་ཤོག །མདག་མ་རྡོ་བསྲེགས་མཚོན་གྱི་ཆར་པ་དག །དེང་ནས་བཟུང་སྟེ་མེ་ཏོག་ཆར་པར་གྱུར། །ཕན་ཚུན་མཚོན་གྱིས་འདེབས་པ་དེ་ཡང་ནི། །དེང་ནས་རྩེ་ཕྱིར་མེ་ཏོག་འཕེན་པར་ཤོག །ཆུ་བོ་རབ་མེད་མེ་དང་འདྲ་ནང་བྱིང་བ་དག །ཤ་ཀུན་ཞིག་གྱུར་རུས་གོང་མེ་ཏོག་ཀུནྡའི་མདོག །བདག་གི་དགེ་བའི་སྟོབས་ཀྱིས་ལྷ་ཡི་ལུས་ཐོབ་ནས། །ལྷ་མོ་རྣམས་དང་ལྷན་ཅིག་དལ་གྱིས་འབབ་གནས་ཤོག །ཅི་ཕྱིར་འདིར་ནི་གཤིན་རྗེའི་མི་དང་ཁྭ་དང་བྱ་རྒོད་མི་བཟད་རྣམས་སྐྲག་བྱེད། །ཀུན་ནས་མུན་
བསལ་བདེ་དགའ་བསྐྱེད་པའི་མཐུ་བཟང་འདི་ཀོ་སུ་ཡི་མཐུ་སྙམ་སྟེ། །གྱེན་དུ་བལྟས་ན་ནམ་མཁའི་དཀྱིལ་ན་ཕྱག་ན་རྡོ་རྗེ་འབར་བ་བཞུགས་མཐོང་ནས། །རབ་ཏུ་དགའ་བའི་ཤུགས་ཀྱིས་སྡིག་དང་བྲལ་ནས་དེ་དང་ལྷན་ཅིག་འགྲོགས་པར་ཤོག །མེ་ཏོག་ཆར་པ་སྤོས་ཆུ་དང་འདྲེས་འབབ་པ་ཡིས། །དམྱལ་བའི་མེ་མདག་ཆིལ་ཆིལ་གསོད་པ་མཐོང་གྱུར་ནས། །གློ་བུར་བདེ་བས་ཚིམ་པ་འདི་ཅི་བསམ་པ་དང་། །སེམས་དམྱལ་རྣམས་ཀྱིས་ཕྱག་ན་པདྨ་མཐོང་བར་ཤོག །གྲོགས་དག་འཇིགས་པ་བོར་ལ་རིངས་པར་ཚུར་ཤོག་འུ་བུའི་ཐད་དུ་ནི། །གང་གི་མཐུ་ཡིས་སྡུག་བསྔལ་ཀུན་བྲལ་དགའ་བའི་ཤུགས་ཕྱིན་ལ། །འགྲོ་བ་ཀུན་ནས་ཡོངས་སྐྱོབ་བྱང་ཆུབ་སེམས་དང་བརྩེ་བ་སྐྱེས་གྱུར་པ། །གཞོན་ནུ་ཟུར་ཕུད་ཅན་འབར་འཇིགས་པ་མེད་པར་བྱེད་པ་ཅི་ཞིག་ཕྱིན། །ཁྱོད་ཀྱི་ལྷ་བརྒྱའི་ཅོད་པན་དག་གིས་ཞབས་ཀྱི་པདྨ་ལ་མཆོད་ཅིང་། །ཐུགས་རྗེས་
བརླན་ཅན་དབུ་ལ་མེ་ཏོག་དུ་མའི་ཚོགས་ཀྱི་ཆར་འབབ་པ། ཁང་བརྩེགས་ཡིད་འོང་ལྷ་མོ་སྟོང་ཕྲག་བསྟོད་དབྱངས་སྒྲོགས་ལྡན་འདི་ལྟོས་ཞེས། །འཇམ་དབྱངས་དེ་འདྲ་མཐོང་ནས་ད་ནི་སེམས་དམྱལ་ཅ་ཅོ་འདོན་པར་ཤོག །དེ་ལྟར་བདག་གི་དགེ་རྩས་ཀུན་ཏུ་བཟང་ལ་སོགས། །བྱང་ཆུབ་སེམས་དཔའ་སྒྲིབས་པ་མེད་སྤྲིན་བདེ་བ་དང་། །བསིལ་ཞིང་དྲི་ཞིམ་ངད་ལྡན་ཆར་པ་འབེབས་མཐོང་ནས། །སེམས་ཅན་དམྱལ་བ་དེ་དག་མངོན་པར་དགའ་གྱུར་ཅིག །དུད་འགྲོ་རྣམས་ནི་གཅིག་ལ་གཅིག །ཟ་བའི་འཇིགས་དང་བྲལ་བར་ཤོག །སྒྲ་མི་སྙན་པའི་མི་བཞིན་དུ། །ཡི་དྭགས་རྣམས་ནི་བདེ་བར་གྱུར། །འཕགས་པ་སྤྱན་རས་གཟིགས་དབང་གི །ཕྱག་ནས་འབབ་པའི་འོ་རྒྱུན་གྱིས། །ཡི་དྭགས་རྣམས་ནི་ཚིམ་བྱས་ཤིང་། །ཁྲུས་བྱས་རྟག་ཏུ་བསིལ་བར་ཤོག །ལོང་བ་རྣམས་ཀྱིས་གཟུགས་མཐོང་ཞིང་། །འོན་པས་རྟག་ཏུ་སྒྲ་ཐོས་ཤོག །ལྷ་མོ་སྒྱུ་
འཕྲུལ་ཇི་བཞིན་དུ། །སྦྲུམ་མའང་གནོད་མེད་བཙའ་བར་ཤོག །གཅེར་བུ་རྣམས་ཀྱིས་གོས་དག་དང་། །བཀྲེས་པ་རྣམས་ཀྱིས་ཟས་དག་དང་། །སྐོམ་པ་རྣམས་ཀྱི་ཆུ་དག་དང་། །བཏུང་བ་ཞིམ་པོ་ཐོབ་པར་ཤོག །བཀྲེན་པ་རྣམས་ཀྱིས་ནོར་ཐོབ་ཤོག །མྱ་ངན་ཉམ་ཐག་དགའ་ཐོབ་ཤོག །ཡི་ཆད་རྣམས་ཀྱང་ཡིད་གསོས་ཤིང་། །བརྟན་པ་ཕུན་སུམ་ཚོགས་པར་ཤོག །སེམས་ཅན་ནད་པ་ཇི་སྙེད་པ། །མྱུར་དུ་ནད་ལས་ཐར་གྱུར་ཅིག །འགྲོ་བའི་ནད་ནི་མ་ལུས་པ། །རྟག་ཏུ་འབྱུང་བ་མེད་པར་ཤོག །སྐྲག་པ་རྣམས་ནི་འཇིགས་མེད་ཤོག །བཅིངས་པ་རྣམས་ནི་གྲོལ་བར་འགྱུར། །མཐུ་མེད་རྣམས་ནི་མཐུ་ལྡན་ཞིང་། །ཕན་ཚུན་སེམས་ནི་བསྙེན་གྱུར་ཅིག །འགྲོན་པ་དག་ནི་ཐམས་ཅད་ལ། །ཕྱོགས་རྣམས་ཐམས་ཅད་བདེ་བར་ཤོག །གང་གི་དོན་དུ་འགྲོ་བྱེད་པ། །དེ་འབད་མི་དགོས་འགྲུབ་གྱུར་ཅིག །གྲུ་དང་གྲུ་ཆེན་ཞུགས་པ་རྣམས། །ཡིད་ལ་
བསམས་པ་གྲུབ་གྱུར་ཏེ། །ཆུ་ཡི་ངོགས་སུ་བདེར་ཕྱིན་ནས། །གཉེན་དང་ལྷན་ཅིག་དགའ་བར་ཤོག །མྱ་ངམ་ལམ་གོལ་འཁྱམས་པ་རྣམས། །འགྲོན་པ་དག་དང་ཕྲད་གྱུར་ནས། །ཆོམ་རྐུན་སྟག་སོགས་འཇིགས་མེད་པར། །མི་ངལ་བདེ་བླག་འདོད་པར་ཤོག །དགོན་སོགས་ལམ་མེད་ཉམ་ང་བར། །བྱིས་པ་རྒན་པོ་མགོན་མེད་ཅིང་། །གཉིད་ལོག་མྱོས་ཤིང་རབ་མྱོས་རྣམས། །ལྷ་དག་སྲུང་བ་བྱེད་པར་ཤོག །མི་དལ་ཀུན་ལས་ཐར་བ་དང་། །དད་དང་ཤེས་རབ་བརྩེ་ལྡན་ཞིང་། །ཟས་དང་སྤྱོད་པ་ཕུན་ཚོགས་ནས། །རྟག་ཏུ་ཚེ་རབས་དྲན་པར་ཤོག །ཐམས་ཅད་ནམ་མཁའ་མཛོད་བཞིན་དུ། །ལོངས་སྤྱོད་ཆད་པ་མེད་པར་ཤོག །རྩོད་པ་མེད་ཅིང་འཚེ་མེད་པར། །རང་དབང་དུ་ནི་སྤྱོད་པར་ཤོག །སེམས་ཅན་གཟི་བརྗིད་ཆུང་ངུ་གང་། །དེ་དག་གཟི་བརྗིད་ཆེན་པོར་ཤོག །དཀའ་ཐུབ་ཅན་གང་གཟུགས་ངན་པ། གཟུགས་བཟང་ཕུན་སུམ་ཚོགས་པར་ཤོག །
འཇིག་རྟེན་བུད་མེད་ཇི་སྙེད་པ། །དེ་དག་སྐྱེས་པ་ཉིད་གྱུར་ཅིག །མ་རབས་རྣམས་ནི་མཐོ་ཐོབ་ཅིང་། །ང་རྒྱལ་དག་ཀྱང་བཅོམ་པར་ཤོག །བདག་གི་བསོད་ནམས་འདི་ཡིས་ནི། །སེམས་ཅན་ཐམས་ཅད་མ་ལུས་པ། །སྡིག་པ་ཐམས་ཅད་སྤངས་ནས་ནི། །རྟག་ཏུ་དགེ་བ་བྱེད་པར་ཤོག །བྱང་ཆུབ་སེམས་དང་མི་འབྲལ་ཞིང་། །བྱང་ཆུབ་སྤྱོད་ལ་གཞོལ་བ་དང་། །སངས་རྒྱས་རྣམས་ཀྱིས་ཡོངས་གཟུང་ཞིང་། །བདུད་ཀྱི་ལས་ཀྱང་སྤོང་བར་ཤོག །སེམས་ཅན་དེ་དག་ཐམས་ཅད་ནི། །ཚེ་ཡང་དཔག་མེད་རིང་བར་ཤོག །རྟག་ཏུ་བདེ་བར་འཚོ་འགྱུར་ཞིང་། །འཆི་བའི་སྒྲ་ཡང་གྲག་མ་གྱུར། །དཔག་བསམ་ཤིང་གི་སྐྱེད་མོས་ཚལ། །སངས་རྒྱས་དང་ནི་སངས་རྒྱས་སྲས། །ཆོས་སྙན་སྒྲོགས་པས་གང་བ་ཡིས། །ཕྱོགས་རྣམས་ཐམས་ཅད་གང་བར་ཤོག །ཐམས་ཅད་དུ་ནི་ས་གཞི་དག །གསེག་མ་ལ་སོགས་མེད་པ་དང་། །ལག་མཐིལ་ལྟར་མཉམ་བཻ་
ཌཱུརྱའི ། །རང་བཞིན་འཇམ་པོར་གནས་གྱུར་ཅིག །འཁོར་གྱི་དཀྱིལ་འཁོར་ཡོད་དགུར་ཡང་། །བྱང་ཆུབ་སེམས་དཔའ་མང་པོ་དག །རང་གི་ལེགས་པས་ས་སྟེང་དག །བརྒྱན་པར་མཛད་པས་བཞུགས་གྱུར་ཅིག །ལུས་ཅན་ཀུན་གྱིས་བྱ་དང་ནི། །ཤིང་དང་འོད་ཟེར་ཐམས་ཅད་དང་། །ནམ་མཁའ་ལས་ཀྱང་ཆོས་ཀྱི་སྒྲ། །རྒྱུན་མི་འཆད་པར་ཐོས་པར་ཤོག །དེ་དག་རྟག་ཏུ་སངས་རྒྱས་དང་། །སངས་རྒྱས་སྲས་དང་ཕྲད་གྱུར་ཅིག །མཆོད་པའི་སྤྲིན་ཕུང་མཐའ་ཡས་པས། །འགྲོ་བའི་བླ་མ་མཆོད་པར་ཤོག །ལྷ་ཡང་དུས་སུ་ཆར་འབེབས་ཤིང་། །ལོ་ཏོག་ཕུན་སུམ་ཚོགས་གྱུར་ཅིག །རྒྱལ་པོ་ཆོས་བཞིན་བྱེད་པ་དང་། །འཇིག་རྟེན་དག་ཀྱང་དར་བར་ཤོག །སྨན་རྣམས་མཐུ་དང་ལྡན་པ་དང་། །གསང་སྔགས་བཟླས་བརྗོད་འགྲུབ་པར་ཤོག །མཁའ་འགྲོ་སྲིན་པོ་ལ་སོགས་པ། །སྙིང་རྗེའི་སེམས་དང་ལྡན་གྱུར་ཅིག །སེམས་ཅན་འགའ་ཡང་སྡུག་མ་གྱུར། །
སྡིག་པར་མ་གྱུར་ན་མ་གྱུར། །འཇིགས་དང་བརྙས་པར་མི་འགྱུར་ཞིང་། །འགའ་ཡང་ཡིད་མི་བདེ་མ་གྱུར། །གཙུག་ལག་ཁང་རྣམས་ཀློག་པ་དང་། །ཁ་ཏོན་གྱིས་རྒྱས་ལེགས་གནས་ཤོག །རྟག་པར་དགེ་འདུན་མཐུན་པ་དང་། །དགེ་འདུན་དོན་ཡང་འགྲུབ་པར་ཤོག །བསླབ་པ་འདོད་པའི་དགེ་སློང་དག །དབེན་པ་དག་ཀྱང་ཐོབ་པར་ཤོག །གཡེང་བ་ཐམས་ཅད་སྤངས་ནས་ནི། །སེམས་ནི་ལས་རུང་སྒོམ་གྱུར་ཅིག །དགེ་སློང་མ་རྣམས་རྙེད་ལྡན་ཞིང་། །འཐབ་དང་གནོད་པ་སྤོང་བར་ཤོག །དེ་བཞིན་རབ་ཏུ་བྱུང་བ་ཀུན། །ཚུལ་ཁྲིམས་ཉམས་པ་མེད་གྱུར་ཅིག །ཚུལ་ཁྲིམས་འཆལ་བས་ཡིད་བྱུང་ནས། །རྟག་ཏུ་སྡིག་པ་ཟད་བྱེད་ཤོག །བདེ་འགྲོ་དག་ནི་ཐོབ་གྱུར་ནས། །དེར་ཡང་བརྟུལ་ཞུགས་མི་ཉམས་ཤོག །མཁས་པ་རྣམས་ནི་བཀུར་བ་དང་། །བསོད་སྙོམས་དག་ཀྱང་རྙེད་པར་ཤོག །རྒྱུད་ནི་ཡོངས་སུ་དག་པ་དང་། །ཕྱོགས་རྣམས་ཀུན་ཏུ་
གྲགས་པར་ཤོག །ངན་སོང་སྡུག་བསྔལ་མི་མྱོང་ཞིང་། །དཀའ་བ་སྤྱད་པ་མེད་པར་ཡང་། །ལྷ་བས་ལྷག་པའི་ལུས་ཐོབ་ནས། །དེ་དག་སངས་རྒྱས་མྱུར་ཐོབ་ཤོག །སེམས་ཅན་ཀུན་གྱིས་ལན་མང་དུ། །སངས་རྒྱས་ཐམས་ཅད་མཆོད་བྱེད་ཅིང་། །སངས་རྒྱས་བདེ་བ་བསམ་ཡས་ཀྱིས། །རྟག་ཏུ་བདེ་དང་ལྡན་གྱུར་ཅིག །བྱང་ཆུབ་སེམས་དཔའ་རྣམས་ཀྱིས་ནི། །འགྲོ་དོན་ཐུགས་ལ་དགོངས་འགྲུབ་ཤོག །མགོན་པོ་ཡིས་ནི་གང་དགོངས་པ། །སེམས་ཅན་རྣམས་ལ་དེ་འབྱོར་ཤོག །དེ་བཞིན་རང་སངས་རྒྱས་རྣམས་དང་། །ཉན་ཐོས་རྣམས་ཀྱང་བདེ་གྱུར་ཅིག །བདག་ཀྱང་འཇམ་དབྱངས་བཀའ་དྲིན་གྱིས། །ས་རབ་དགའ་བ་ཐོབ་བར་དུ། །རྟག་ཏུ་ཚེ་རབས་དྲན་པ་དང་། །རབ་ཏུ་བྱུང་བ་བྱེད་པར་ཤོག །བདག་ནི་ཁ་ཟས་གྱི་ནས་ཀྱང་། །ཉམ་དང་ལྡན་ཞིང་འཚོ་བར་ཤོག །ཚེ་རབས་ཀུན་ཏུ་དབེན་གནས་པ། །ཕུན་སུམ་ལྡན་པ་ཐོབ་པར་ཤོག །གང་ཚེ་བལྟ་
བར་འདོད་པའམ། །ཅུང་ཟད་དྲི་བར་འདོད་ན་ཡང་། །མགོན་པོ་འཇམ་དབྱངས་དེ་ཉིད་ནི། །གེགས་མེད་པར་ཡང་མཐོང་བར་ཤོག །ཕྱོགས་བཅུ་ནམ་མཁའི་མཐས་གཏུགས་པའི། །སེམས་ཅན་ཀུན་དོན་བསྒྲུབ་བྱའི་ཕྱིར། །ཇི་ལྟར་འཇམ་དབྱངས་སྤྱོད་མཛད་པ། །བདག་གི་སྤྱོད་པའང་དེ་འདྲར་ཤོག །ཇི་སྲིད་ནམ་མཁའ་གནས་པ་དང་། །འགྲོ་བ་ཇི་སྲིད་གནས་གྱུར་པ། །དེ་སྲིད་བདག་ནི་གནས་གྱུར་ནས། །འགྲོ་བའི་སྡུག་བསྔལ་སེལ་བར་ཤོག །འགྲོ་བའི་སྡུག་བསྔལ་གང་ཅིའང་རུང་། །དེ་ཀུན་བདག་ལ་སྨིན་གྱུར་ཅིག །བྱང་ཆུབ་སེམས་དཔའི་དགེ་འདུན་གྱིས། །འགྲོ་བ་བདེ་ལ་སྤྱོད་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །གང་གི་དྲིན་གྱིས་དགེ་བློ་བྱུང་། །འཇམ་པའི་དབྱངས་ལ་ཕྱག་འཚལ་ལོ། །གང་གི་དྲིན་
གྱིས་བདག་དར་བ། །དགེ་བའི་བཤེས་ལའང་བདག་ཕྱག་འཚལ། །བདེ་བ་ཅན་དུ་བགྲོད་པའི་སྨོན་ལམ་ནི། མངྒ་ལཾ་སྭ་སྟི་བྷ་ཝནྟུ། ཤེས་བྱ་ཐམས་ཅད་མངོན་སུམ་གཟིགས་པ་པོ། །མཆོག་གི་ཡོན་ཏན་མ་ལུས་མཐར་ཕྱིན་པའི། །ཟླ་མེད་བརྙེས་པ་དེ་དང་དམ་པའི་ཆོས། །བྱང་ཆུབ་སེམས་དཔའི་ཚོགས་ལ་གུས་ཕྱག་འཚལ། །མཐའ་ཡས་ནམ་མཁའི་མཐའ་ཀླས་ཞིང་རྒྱ་མཚོ། །མཐའ་དག་སྐུ་ཡི་སྤྲུལ་པས་སྣང་བར་མཛད། །མཐའ་ཡས་འོད་མངའ་ཐུབ་ཆེན་ཚེ་དཔག་མེད། །མཐའ་མེད་འཁོར་བའི་འགྲོ་བ་ཀུན་ལ་ཁྱབ། །ཀུན་མཁྱེན་རྒྱལ་བ་རྣམས་ཀྱི་ཐུགས་རྗེའི་འོད། །ཀུན་ནས་རབ་རྫོགས་ཡེ་ཤེས་འོད་འཕྲོ་བའི། །ཀུན་རྟོག་སྲིད་པའི་མུན་སྟུག་སྣ་ཚོགས་པ། །ཀུན་སེལ་རྣམ་འདྲེན་གཙོ་ལ་ཕྱག་འཚལ་ལོ། །འོད་ཕྲེང་གསལ་བས་ཞིང་ཀུན་ཁྱབ་མཛད་དེ། །ཡེ་ཤེས་སྤྱན་གྱིས་ཅུང་ཟད་གཟིགས་པས་ཀྱང་། །བདུད་སྡེའི་དཔུང་ཚོགས་མ་ལུས་ཞི་མཛད་པ། །དཔག་
མེད་སྐུ་ཡི་འོད་ལ་ཕྱག་འཚལ་ལོ། །སྲིད་དང་བཞི་བ་རབ་སྤངས་རྣམ་གྲོལ་སྐུ། །ངོ་བོ་ཉིད་ཀྱི་དབྱིངས་ལས་མ་གཡོས་ཀྱང་། །གང་གང་འདུལ་བ་དེ་ལ་དེར་སྟོན་པའི། །མཚན་དང་དཔེ་བྱད་ཀྱིས་འབར་ཕྱག་འཚལ་ལོ། །ཆོས་ཀུན་རྣམ་འབྱེད་ཡན་ལག་དྲུག་ཅུ་ཡི། །གསུང་གཅིག་གིས་ཀྱང་ཕྱོགས་དུས་ཐམས་ཅད་དུ། །སེམས་ཅན་དབང་པོའི་རིམ་པ་ཇི་བཞིན་འཇུག །དཔག་མེད་གསུང་གི་འོད་ལ་ཕྱག་འཚལ་ལོ། །སྨྲ་བསམ་བརྗོད་པའི་ཡུལ་ལས་རབ་འདས་ཀྱང་། །འབད་མེད་ལྷུན་གྱིས་གྲུབ་པའི་ཡང་དག་ཚིག །གསུང་གི་གསང་བ་བསམ་གྱིས་མི་ཁྱབ་པའི། །ལེགས་པའི་ལམ་མཆོག་སྟོན་ལ་ཕྱག་འཚལ་ལོ། །རང་བཞིན་འོད་གསལ་མཁའ་ལྟར་མི་དམིགས་ཀྱང་། །རྣམ་པ་ཀུན་ལྡན་ཡེ་ཤེས་རོལ་པ་ཡིས། །ཤེས་བྱ་ཇི་སྙེད་མཁྱེན་པའི་དཀྱིལ་འཁོར་རྒྱས། །དཔག་མེད་ཐུགས་ཀྱི་འོད་ལ་ཕྱག་འཚལ་ལོ། །ཆོས་ཀུན་ངོ་བོ་ཉིད་ཀྱིས་ཉེར་ཞི་
ཞིང་། །མ་འགགས་སྣང་བ་རབ་ཏུ་བཀྲ་བ་གང་། །ཁྱོད་ཀྱི་གཟིགས་པའང་རྣམ་དག་ཞི་བ་དང་། །དེ་བཞིན་ཀུན་ཏུ་གཟིགས་ལ་ཕྱག་འཚལ་ལོ། །གང་ཞིག་འགྲོ་བའི་ཡིད་བཞིན་ཉེར་འཚོའི་གནས། །སྐུ་གསུང་ཐུགས་དང་ཡེ་ཤེས་དཔག་མེད་སྟོབས། །ཐུགས་རྗེའི་ཕྲིན་ལས་དཔག་ཏུ་མེད་པ་ཡི། །འོད་དཔག་མེད་ལ་རྟག་པར་ཕྱག་འཚལ་ལོ། །དངོས་དང་ཡིད་ཀྱི་སྤྲུལ་པས་ལུས་ལོངས་སྤྱོད། །ཡོངས་སུ་མ་བཟུང་ནམ་མཁའི་མཐར་ཐུག་པ། །བློ་ཡིས་བླངས་ཏེ་བདེ་བར་གཤེགས་རྣམས་མཆོད། །དམན་ལ་བརྩེར་དགོངས་བདག་གི་འདི་དག་བཞེས། །བདག་དང་སེམས་ཅན་ཀུན་གྱི་སྡིག་པའི་ལས། །ཉེས་པར་གྱུར་གང་མཐོལ་ཞིང་བཤགས་པར་བགྱི། །སླན་ཆད་ནམ་ཡང་བགྱིད་པར་མ་གྱུར་ཅིག །ལས་ཀྱི་སྒྲིབ་པའང་གཏན་དུ་ཟད་བྱེད་ཤོག །རྒྱལ་དང་རྒྱལ་སྲས་ཉན་ཐོས་རང་རྒྱལ་དང་། །འགྲོ་བ་ཀུན་གྱི་དགེ་ལ་རྗེས་ཡི་རང་། །གང་ཡང་ཕྱོགས་བཅུའི་
བདེ་གཤེགས་ཐམས་ཅད་ལ། །ཐེག་མཆོག་ཆོས་ཀྱི་འཁོར་ལོ་བསྐོར་བར་བསྐུལ། །བསྐལ་པ་རྒྱ་མཚོ་དཔག་ཏུ་མེད་པར་ཡང་། །མྱ་ངན་མི་འདའ་བཞུགས་པར་གསོལ་བ་འདེབས། །དུས་གསུམ་བསགས་པའི་དགེ་བ་ཅི་ཡོད་པ། །གཞན་ཕན་དོན་ཕྱིར་བྱང་ཆུབ་ཆེན་པོར་བསྔོ། །ཇི་སྲིད་བྱང་ཆུབ་སྙིང་པོ་མ་ཐོབ་པར། །སྐྱེ་བ་འདི་དང་མ་འོངས་ཐམས་ཅད་དུ། །བླ་མ་དམ་པས་རྗེས་སུ་འཛིན་གྱུར་ཅིག །བྱང་ཆུབ་སེམས་ནི་ནམ་དུའང་ཉམས་མ་གྱུར། །རིགས་གཟུགས་ལོངས་སྤྱོད་ཕུན་སུམ་ཚོགས་པ་ཡི། །དལ་འབྱོར་མཆོག་ཐོབ་ཆོས་ལྡན་གྲོགས་དང་བཅས། །སངས་རྒྱས་བསྟན་ལ་རིམ་བཞིན་སློབ་པ་དང་། །འདུན་དང་བརྩོན་འགྲུས་བག་ཡོད་ལྡན་གྱུར་ཅིག །ངན་སོང་གསུམ་སོགས་མི་བཟད་འཁོར་བ་ཡི། །མི་ཁོམ་འཇིག་རྟེན་རྣམས་སུ་སྐྱེ་འགྱུར་ལས། །གང་དེ་ཚེ་འདི་ཉིད་ལ་རབ་སྨིན་ནས། །ལན་གྲངས་གཞན་དུ་མྱོང་བར་མ་གྱུར་ཅིག །
སྦྱིན་དང་ཚུལ་ཁྲིམས་བཟོད་དང་བརྩོན་འགྲུས་དང་། །བསམ་གཏན་ཤེས་རབ་ཐབས་མཁས་རྨད་བྱུང་དང་། །སྨོན་ལམ་སྟོབས་དང་ཡེ་ཤེས་རྒྱ་མཚོ་ཡི། །སྤྱོད་པ་ཐམས་ཅད་ཡོངས་སུ་རྫོགས་གྱུར་ཅིག །ལུས་དང་དེ་བཞིན་སྲོག་ལའང་ལྟོས་མེད་པར། །སེམས་ལས་རུང་ཞིང་དབེན་པར་རང་རྒྱུད་དུལ། །ལུང་དང་མངོན་པར་རྟོགས་པའི་ཆོས་ཀྱིས་འབྱོར། །བརྩེ་ལྡན་རྟག་ཏུ་ཤེས་བཞིན་ལྡན་གྱུར་ཅིག །འཁོར་བའི་དེ་བཞིན་ཉིད་གང་མྱ་ངན་འདས། །ཀུན་རྟོག་དེ་བཞིན་ཉིད་གང་ཡེ་ཤེས་ཏེ། །གཅིག་དང་དུ་མའི་བདག་ཉིད་ལས་འདས་པའི། །ཆོས་ཉིད་རྟོགས་པའི་བློ་གྲོས་ལྡན་གྱུར་ཅིག །གང་ཡང་རྟེན་འབྱུང་ཟབ་མོའི་ཚུལ་གནས་པ། །ངེས་དོན་མཐར་ཐུག་སྤྲོས་བྲལ་ཆོས་ཀྱི་སྐུ། །སྟོབས་སོགས་ཡོན་ཏན་ཡེ་ཤེས་ཕྲིན་ལས་སོགས། །བདེ་གཤེགས་ཆོས་ལ་ཐོགས་མེད་འཇུག་གྱུར་ཅིག །གང་དུ་འགྲོ་བློ་མངོན་པར་དགའ་གྱུར་པའི། །ཡིད་ལུས་སྤྱོད་པ་རྣམ་པར་
དག་པ་དང་། །དབྱངས་སྙན་ངག་གིས་ཆོས་ཚུལ་རྒྱ་མཚོ་སྟོན། །རྒྱལ་སྲས་རྣམས་ཀྱི་སྤྱོད་དང་མཚུངས་པར་ཤོག །ཇི་སྲིད་དེ་ལྟའི་ཡོན་ཏན་མ་ཐོབ་པར། །མི་མཐུན་ཕྱོགས་ལས་རྣམ་པར་རྒྱལ་བ་ཡི། །འཆི་མེད་ཚེ་དང་དཔལ་འབྱོར་རྒྱས་པ་དང་། །བསམ་པའི་དོན་ཀུན་ཡིད་བཞིན་འགྲུབ་གྱུར་ཅིག །ཚེ་འདིའི་སྣང་བ་ནུབ་པར་ཉེ་བ་ན། །བདེ་གཤེགས་སྲས་དང་བཅས་པས་བྱིན་བརླབས་ཏེ། །འོད་གསལ་ལྷན་ཅིག་སྐྱེས་པའི་དོན་རྟོགས་ནས། །ལྷ་དང་ལྷ་མོ་དཔག་ཏུ་མེད་པ་ཡིས། །སྣ་ཚོགས་མཆོད་པས་བདག་གི་སྔུན་བསུ་ཞིང་། །རང་སྣང་དྲི་མེད་ཆོས་ཀྱི་དབྱིངས་རང་བཞིན། །རྣམ་དག་བདེ་བ་ཅན་གྱི་ཞིང་ཁམས་དེར། །བདེ་ཆེན་སེམས་ཀྱིས་བདེ་བླག་བགྲོད་གྱུར་ཅིག །ཞིང་དེར་དམར་སེར་འོད་ཀྱི་ཕུང་པོའི་དབུས། །རབ་མང་རིན་ཆེན་པདྨའི་ཟེའུ་འབྲུ་ལ། །དགེ་སློང་བྱེ་བ་འབུམ་དང་ཐབས་ཅིག་པའི། །ཆོས་རྗེ་འོད་དཔག་མེད་པ་
མཐོང་གྱུར་ཅིག །རྒྱལ་སྲས་ཚོགས་ཀྱིས་ཡོངས་བསྐོར་བཅོམ་ལྡན་འདས། །ཐུན་མཚམས་འཆར་ཀའི་ཉིན་བྱེད་ལྟར་དམར་བ། །འོད་འབར་བལྟ་བས་མི་ངོམས་དེ་མཐོང་ནས། །བྱང་ཆུབ་ཆེན་པོའི་ལུང་བསྟན་ཐོབ་གྱུར་ཅིག །དགེ་ཚོགས་ལེགས་བྱས་རྣམ་པར་དཀར་བའི་འབྲས། །ངོ་མཚར་ཡོངས་རྫོགས་དཔལ་དང་ལྡན་པའི་ལུས། །དཔག་མེད་སྤྲུལ་ནས་བཅོམ་ལྡན་འདས་དེ་ལ། །བསྟོད་དབྱངས་རྒྱ་མཚོས་ཤིས་པ་བརྗོད་གྱུར་ཅིག །བྱམས་ཆེན་འཇམ་པའི་དབྱངས་དང་ཀུན་ཏུ་བཟང་། །སྤྱན་རས་གཟིགས་དབང་མཐུ་ཆེན་ཐོབ་ལ་སོགས། །རྒྱལ་སྲས་རྣམས་དང་རྟག་ཏུ་མི་འབྲལ་ཞིང་། །རྣམ་ཐར་ཚུལ་ལ་མཉམ་པར་འཇུག་གྱུར་ཅིག །རྣམ་ཐར་རྒྱ་མཚོ་སྒྱུ་མ་ལྟར་སྤྱོད་པས། །ཐེག་མཆོག་རྒྱ་མཚོའི་ཐབས་རྣམས་ཀུན་བཟུང་སྟེ། །ཡེ་ཤེས་རྒྱ་མཚོའི་རྟོགས་པ་རབ་ཐོབ་ནས། །སྲིད་པའི་མཚོ་ལས་འགྲོ་ཀུན་སྒྲོལ་གྱུར་ཅིག །ཞིང་ཁམས་རྒྱ་མཚོ་རྟག་ཏུ་
སྦྱོང་བ་དང་། །ཚོགས་གཉིས་རྒྱ་མཚོ་དག་ནི་སྤེལ་བར་བྱེད། །སེམས་ཅན་རྒྱ་མཚོ་རབ་ཏུ་སྨིན་བྱས་ཏེ། །སྨོན་ལམ་རྒྱ་མཚོ་རྣམས་ནི་འགྲུབ་གྱུར་ཅིག །ཇི་ལྟར་སྔོན་གྱི་བདེ་བར་གཤེགས་རྣམས་ཀྱིས། །ཐུགས་བསྐྱེད་སྨོན་ལམ་མཛད་སྟོབས་ཅི་འདྲ་བ། །དེ་ལྟར་བདག་གིས་སེམས་ཅན་མ་ལུས་ཚོགས། །མྱུར་དུ་སངས་རྒྱས་ས་ལ་འགོད་པར་ཤོག །ཅེས་འོད་དཔག་ཏུ་མེད་པ་ལ་བསྟོད་པ་ཡན་ལག་བདུན་པ་སྨོན་ལམ་དང་བཅས་པ་འདི། ཀརྨ་པ་དེ་བཞིན་གཤེགས་པས་མདོ་སྨད་ཀྱི་སའི་ཆ་རྨ་ཆུ་འགྲམ་དུ་སྦྱར་བའོ།། །།རྗེ་རང་བྱུང་ཞབས་ཀྱིས་མཛད་པའི་ངེས་དོན་ཕྱག་རྒྱ་ཆེན་པོའི་སྨོན་ལམ་ནི། ན་མོ་གུ་རུ། བླ་མ་རྣམས་དང་ཡི་དམ་དཀྱིལ་འཁོར་ལྷ། །ཕྱོགས་བཅུ་དུས་གསུམ་རྒྱལ་བ་སྲས་དང་བཅས། །བདག་ལ་བརྩེར་དགོངས་བདག་གི་སྨོན་ལམ་རྣམས། །ཇི་བཞིན་འགྲུབ་པའི་མཐུན་འགྱུར་བྱིན་བརླབས་མཛོད། །བདག་དང་མཐའ་ཡས་སེམས་ཅན་ཐམས་ཅད་ཀྱི། །བསམ་སྦྱོར་རྣམ་དག་གངས་རི་ལས་
སྐྱེས་པའི། །འཁོར་གསུམ་རྙོག་མེད་དགེ་ཚོགས་ཆུ་རྒྱུན་རྣམས། །རྒྱལ་བ་སྐུ་བཞིའི་རྒྱ་མཚོར་འཇུག་གྱུར་ཅིག །ཇི་སྲིད་དེ་མ་ཐོབ་པ་དེ་སྲིད་དུ། །སྐྱེ་དང་སྐྱེ་བ་ཚེ་རབས་ཀུན་ཏུ་ཡང་། །སྡིག་དང་སྡུག་བསྔལ་སྒྲ་ཡང་མི་གྲག་ཅིང་། །བདེ་དགེ་རྒྱ་མཚོའི་དཔལ་ལ་སྤྱོད་པར་ཤོག །དལ་འབྱོར་མཆོག་ཐོབ་དད་བརྩོན་ཤེས་རབ་ལྡན། །བཤེས་གཉེན་བཟང་བསྟེན་གདམས་པའི་བཅུད་ཐོབ་ནས། །ཚུལ་བཞིན་བསྒྲུབ་ལ་བར་ཆད་མ་མཆིས་པར། །ཚེ་རབས་ཀུན་ཏུ་དམ་ཆོས་སྤྱོད་པར་ཤོག །ལུང་རིག་ཐོས་པས་མི་ཤེས་སྒྲིབ་ལས་གྲོལ། །མན་ངག་བསམ་པས་ཐེ་ཚོམ་མུན་ནག་བཅོམ། །སྒོམ་བྱུང་འོད་ཀྱིས་གནས་ལུགས་ཇི་བཞིན་གསལ། །ཤེས་རབ་གསུམ་གྱི་སྣང་བ་རྒྱས་པར་ཤོག །རྟག་ཆད་མཐའ་བྲལ་བདེན་གཉིས་གཞི་ཡི་དོན། །སྒྲོ་སྐུར་མཐའ་བྲལ་ཚོགས་གཉིས་ལམ་མཆོག་གིས། །སྲིད་ཞིའི་མཐའ་བྲལ་དོན་གཉིས་འབྲས་ཐོབ་པའི། །གོལ་འཆུག་མེད་པའི་
ཆོས་དང་ཕྲད་པར་ཤོག །སྦྱང་གཞི་སེམས་ཉིད་གསལ་སྟོང་ཟུང་འཇུག་ལ། །སྦྱོང་བྱེད་ཕྱག་ཆེན་རྡོ་རྗེའི་རྣལ་འབྱོར་ཆེས། །སྦྱང་བྱ་གློ་བུར་འཁྲུལ་པའི་དྲི་མ་རྣམས། །སྦྱངས་འབྲས་དྲི་བྲལ་ཆོས་སྐུ་མངོན་གྱུར་ཤོག །གཞི་ལ་སྒྲོ་འདོགས་ཆོད་པ་ལྟ་བའི་གདེངས། །དེ་ལ་མ་ཡེངས་སྐྱོང་བ་སྒོམ་པའི་གནད། །སྒོམ་དོན་ཀུན་ལ་རྩལ་སྦྱོང་སྤྱོད་པའི་མཆོག །ལྟ་སྒོམ་སྤྱོད་པའི་གདེངས་དང་ལྡན་པར་ཤོག །ཆོས་རྣམས་ཐམས་ཅད་སེམས་ཀྱི་རྣམ་འཕྲུལ་ཏེ། །སེམས་ནི་སེམས་མེད་སེམས་ཀྱི་ངོ་བོས་སྟོང་། །སྟོང་ཞིང་མ་འགགས་ཅིར་ཡང་སྣང་བ་སྟེ། །ལེགས་པར་བརྟགས་ནས་གཞི་རྩ་ཆོད་པར་ཤོག །ཡོད་མ་མྱོང་བའི་རང་སྣང་ཡུལ་དུ་འཁྲུལ། །མ་རིག་དབང་གིས་རང་རིག་བདག་ཏུ་འཁྲུལ། །གཉིས་འཛིན་དབང་གིས་སྲིད་པའི་ཀློང་དུ་འཁྱམ། །མ་རིག་འཁྲུལ་པའི་རྩད་དར་ཆོད་པར་ཤོག །ཡོད་པ་མ་ཡིན་རྒྱལ་བས་ཀྱང་མ་གཟིགས། །མེད་པ་
མ་ཡིན་འཁོར་འདས་ཀུན་གྱི་གཞི། །འགལ་འདུ་མ་ཡིན་ཟུང་འཇུག་དབུ་མའི་ལམ། །མཐའ་བྲལ་སེམས་ཀྱི་ཆོས་ཉིད་རྟོགས་པར་ཤོག །འདི་ཡིན་ཞེས་པ་གང་གིས་མཚོན་པ་མེད། །འདི་མིན་ཞེས་བྱ་གང་གིས་བཀག་པ་མེད། །བློ་ལས་འདས་པའི་ཆོས་ཉིད་འདུས་མ་བྱས། །ཡང་དག་དོན་གྱི་མཐའ་ནི་ངེས་པར་ཤོག །འདི་ཉིད་མ་རྟོགས་འཁོར་བའི་རྒྱ་མཚོར་འཁོར། །འདི་ཉིད་རྟོགས་ན་སངས་རྒྱས་གཞན་ན་མེད། །ཐམས་ཅད་འདི་ཡིན་འདི་མིན་གང་ཡང་མེད། །ཆོས་ཉིད་ཀུན་གཞིའི་མཚང་ནི་རིག་པར་ཤོག །སྣང་ཡང་སེམས་ལ་སྟོང་ཡང་སེམས་ཡིན་ཏེ། རྟོགས་ཀྱང་སེམས་ལ་འཁྲུལ་ཡང་རང་གི་སེམས། །སྐྱེས་ཀྱང་སེམས་ལ་འགགས་ཀྱང་སེམས་ཡིན་པས། །སྒྲོ་འདོགས་ཐམས་ཅད་སེམས་ལ་ཆོད་པར་ཤོག །བློས་བྱས་རྩོལ་བའི་སྒོམ་གྱིས་མ་བསླད་ཅིང་། །ཐ་མལ་འདུ་འཛིའི་རླུང་གིས་མ་བསྐྱོད་པར། །མ་བཅོས་གཉུག་མ་རང་བབ་འཇོག་ཤེས་
པའི། །སེམས་དོན་ཉམས་ལེན་མཁས་ཤིང་སྐྱོང་བར་ཤོག །ཕྲ་རགས་རྟོག་པའི་དབའ་རླབས་རང་སར་ཞི། །གཡོ་མེད་སེམས་ཀྱི་ཆུ་བོ་ངང་གིས་གནས། །བྱིང་རྨུགས་རྙོག་པའི་དྲི་མ་དང་བྲལ་བའི། །ཞི་གནས་རྒྱ་མཚོ་མི་གཡོ་བརྟན་པར་ཤོག །བལྟར་མེད་སེམས་ལ་ཡང་ཡང་བལྟས་པའི་ཚེ། །མཐོང་མེད་དོན་ནི་ཇི་བཞིན་ལྷག་གེར་མཐོང་། །ཡིན་མིན་དོན་ལ་ཐེ་ཚོམ་ཆོད་པ་ཉིད། །འཁྲུལ་མེད་རང་ངོ་རང་གིས་ཤེས་པར་ཤོག །ཡུལ་ལ་བལྟས་པས་ཡུལ་མེད་སེམས་སུ་མཐོང་། །སེམས་ལ་བལྟས་པས་སེམས་མེད་ངོ་བོས་སྟོང་། །གཉིས་ལ་བལྟས་པས་གཉིས་འཛིན་རང་སར་གྲོལ། །འོད་གསལ་སེམས་ཀྱི་གནས་ལུགས་རྟོགས་པར་ཤོག །ཡིད་བྱེད་བྲལ་བ་འདི་ནི་ཕྱག་རྒྱ་ཆེ། །མཐའ་དང་བྲལ་བ་དབུ་མ་ཆེན་པོ་ཡིན། །འདི་ནི་ཀུན་འདུས་རྫོགས་ཆེན་ཞེས་ཀྱང་བྱ། །གཅིག་ཤེས་ཀུན་དོན་རྟོགས་པའི་གདེངས་ཐོབ་ཤོག །ཞེན་པ་མེད་
པའི་བདེ་ཆེན་རྒྱུན་ཆད་མེད། །མཚན་འཛིན་མེད་པའི་འོད་གསལ་སྒྲིབ་གཡོགས་བྲལ། །བློ་ལས་འདས་པའི་མི་རྟོག་ལྷུན་གྱིས་གྲུབ། །རྩོལ་མེད་ཉམས་མྱོང་རྒྱུན་ཆད་མེད་པར་ཤོག །བཟང་ཞེན་ཉམས་ཀྱི་འཛིན་པ་རང་སར་གྲོལ། །ངན་རྟོག་འཁྲུལ་པ་རང་བཞིན་དབྱིངས་སུ་དག །ཐ་མལ་ཤེས་པ་སྤང་བླང་བྲལ་ཐོབ་མེད། །སྤྲོས་བྲལ་ཆོས་ཉིད་བདེན་པ་རྟོགས་པར་ཤོག །འགྲོ་བའི་རང་བཞིན་རྟག་ཏུ་སངས་རྒྱས་ཀྱང་། །མ་རྟོགས་དབང་གིས་མཐའ་མེད་འཁོར་བར་འཁྱམ། །སྡུག་བསྔལ་མུ་མཐའ་མེད་པའི་སེམས་ཅན་ལ། །བཟོད་མེད་སྙིང་རྗེ་རྒྱུད་ལ་སྐྱེ་བར་ཤོག །བཟོད་མེད་སྙིང་རྗེའི་རྩལ་ཡང་མ་འགགས་པའི། །བརྩེ་དུས་ངོ་བོ་སྟོང་དོན་རྗེན་པར་ཤར། །ཟུང་འཇུག་གོལ་ས་བྲལ་བའི་ལམ་མཆོག་འདི། །འབྲལ་མེད་ཉིན་མཚན་ཀུན་ཏུ་བསྒོམ་པར་ཤོག །སྒོམ་སྟོབས་ལས་བྱུང་སྤྱན་དང་མངོན་ཤེས་དང་། །སེམས་ཅན་སྨིན་བྱས་སངས་རྒྱས་ཞིང་རབ་
སྦྱངས། །སངས་རྒྱས་ཆོས་རྣམས་འགྲུབ་པའི་སྨོན་ལམ་རྫོགས། །རྫོགས་སྨིན་སྦྱངས་གསུམ་མཐར་ཕྱིན་སངས་རྒྱས་ཤོག །ཕྱོགས་བཅུའི་རྒྱལ་བ་སྲས་བཅས་ཐུགས་རྗེ་དང་། །རྣམ་དཀར་དགེ་བ་ཇི་སྙེད་ཡོད་པའི་མཐུས། །དེ་ལྟར་བདག་དང་སེམས་ཅན་ཐམས་ཅད་ཀྱི། །སྨོན་ལམ་རྣམ་དག་ཇི་བཞིན་འགྲུབ་གྱུར་ཅིག །ངེས་དོན་ཕྱག་རྒྱ་ཆེན་པོའི་སྨོན་ལམ་ཞེས་བྱ་བ་རྗེ་རང་བྱུང་རྡོ་རྗེས་མཛད་པའོ།། །།བར་དོའི་སྨོན་ལམ་ནི། འདི་ཕྱི་བར་དོར་ལྟོས་པ་ཞུ་བའི་སྐྱབས། །ཡོངས་འཛིན་བླ་མའི་ཚོགས་ལ་གསོལ་བ་འདེབས། །འཁྲུལ་སྣང་བདེན་པར་འཛིན་པའི་ལས་དོན་གྱིས། །འགྲོ་དྲུག་འཁོར་བར་འཁྱམས་པ་དྲང་དུ་གསོལ། །འགྲོ་བའི་གནས་སུ་མ་ཕྱིན་བར་མའི་སྲིད། །རང་དབང་བྲལ་ཏེ་ཤུགས་དྲག་ལས་ཀྱིས་ཡེངས། །དེ་དུས་ལྷག་པར་དམིགས་པའི་གདམས་ངག་གིས། །ལམ་ཁྱེར་མཐའ་དག་ལག་ཏུ་ལོངས་པར་ཤོག །དཔྱད་ན་ཐོག་མཐའ་མི་དམིགས་
བར་དོ་བྲལ། །འཁྲུལ་ངོར་ལྟོས་འཇོག་རྟེན་འབྲེལ་ཙམ་དུ་ན། །འཁོར་འདས་མ་ལུས་བར་དོར་བསྡུས་པ་ཡི། །རྒྱལ་བའི་བཀའ་ལ་ཡིད་ཆེས་རྙེད་པར་ཤོག །དམ་པའི་དོན་དུ་མཐའ་བྲལ་དབུ་མའི་གཤིས། །གཉིས་འཛིན་གཉིས་ཆོས་ཀུན་གྱི་བར་ན་གནས། །ཐམས་ཅད་དེ་ཉིད་དེ་ཉིད་ཐམས་ཅད་དེ། །གནས་ལུགས་བར་དོའི་རང་ཞལ་མཇལ་བར་ཤོག །ཀུན་རྫོབ་འཁྲུལ་སྣང་བརྒྱུད་མར་འབྲེལ་བའི་མཐུས། །སྒྱུ་མའི་སྔགས་ཀྱིས་ཐེབས་པའི་ལྟད་མོ་བཞིན། །མི་སྲིད་བྱ་བ་ཅི་ཡང་སྲིད་པ་ཡི། །སྣང་ཚུལ་བར་དོར་ངེས་ཤེས་བརྟན་པར་ཤོག །སྐྱེ་ཤི་བར་དོའི་ལུས་ཀྱི་འགྱུར་བ་དང་། །སྙན་དང་མི་སྙན་བར་མའི་བརྗོད་པ་དང་། །བཟང་ངན་སྣ་ཚོགས་ཡིད་བརྟན་མི་རུང་བ། །འདི་དག་ཐམས་ཅད་བར་དོར་ཤེས་པར་ཤེས། །དོན་ལ་མེད་ཀྱང་གཉིད་ཀྱིས་བསླད་པའི་མཐུས། །རྨི་ལམ་སྐྱེས་བུའི་སྤྱོད་འགྲོས་སྣ་ཚོགས་དང་། །སད་ཀྱང་ལེགས་ཉེས་ལྟས་སུ་ཨ་
འཐས་པ། །རྨི་ལམ་བར་དོའི་འཁྲུལ་པ་སངས་པར་ཤོག །སྲིད་པ་བར་དོ་རྣམ་པ་གསུམ་ཡིན་ཏེ། །དང་པོ་བར་མ་མཐའ་མ་རིམ་བཞིན་དུ། །འོད་གསལ་ཆོས་སྐུ་སྒྱུ་ལུས་ལོངས་སྐུ་དང་། །སྐྱེ་བ་སྤྲུལ་སྐུའི་ལམ་གྱིས་བགྲོད་པར་ཤོག །བར་དོ་དང་པོ་འཆི་སྲིད་འོད་གསལ་ནི། །ས་ཁམས་ཐིམས་པས་ལུས་ཀྱིས་ཟུངས་མི་ཐུབ། །ཆུ་ཁམས་ཐིམ་པས་དབང་པོའི་སྒོ་རྣམས་སྐམ། །མེ་ཁམས་ཐིམ་པས་དྲོད་རྣམ་མཐའ་ནས་སྡུད། །རླུང་ཁམས་ཐིམ་པས་ཕྱི་དབུགས་རྒྱུ་བ་བྲལ། །སྣང་བ་ཐིབ་པས་ཕྱི་རྟགས་དཀར་ལམ་པ། །ནང་གི་རིག་པ་བན་བུན་དུ་བ་འདྲ། །ཞེ་སྡང་ལས་གྱུར་རྟོག་པ་སོ་གསུམ་འགག །མཆེད་པ་ཐིམ་པས་ཕྱི་རྟགས་དམར་ལམ་བ། །རིག་པ་རེས་འགའ་གསལ་ཙམ་མེ་ཁྱེར་འདྲ། །འདོད་ཆགས་ལས་གྱུར་རྟོག་པ་བཞི་བཅུ་འགག །དེ་ཡི་ཚེ་ན་འཆི་འཕོ་ཕལ་ཆེར་གྱིས། །རང་ཉིད་འཆི་བར་ཤེས་ཤིང་སྔར་བྱས་དྲན། །སྐྱེ་བ་ཕྱི་
མའི་ཡུལ་དང་ཕ་མ་དང་། །རང་གི་ཚུལ་སོགས་ཡང་ཡང་སྣང་འགྱུར་ཞིང་། །ལས་ཀྱི་ས་བོན་མཐུ་ལྡན་འཇོག་པས་ན། །འདི་ཡི་དུས་སུ་རྒྱལ་བ་ཡབ་སྲས་ཀྱི། །མཚན་དང་གཟུངས་སྔགས་ཟབ་མོ་སྒྲོགས་པ་དང་། །སྔོན་གྱི་དགེ་སྦྱོར་གསོལ་བདེབས་ལ་སོགས་པ། །འཕོ་བའི་མཚམས་སྦྱོར་ཤིན་ཏུ་གལ་ཆེར་གསུངས། །ཐོབ་པ་ཐིམ་པས་ཕྱི་རྟགས་ནག་ལམ་པ། །ནང་གི་རིག་པ་བུམ་ནང་མར་མེ་འདྲ། །གཏི་མུག་ལས་གྱུར་རྟོག་པ་བདུན་འགག་ཅིང་། །གཞན་ཡང་གཟུགས་སྒྲ་དྲི་རོ་རེག་ཆོས་རྣམས། །འཛིན་པའི་རྣམ་ཤེས་དྲུག་པོ་ཐིམ་པ་ཡི། །དེ་དང་དེ་ཡི་ཡུལ་སྣང་ཐིམ་པར་འགྱུར། །དེ་ལྟར་ཕུང་ཁམས་སྐྱེ་མཆེད་མ་ལུས་པ། །དོན་དམ་དཀྱིལ་འཁོར་ཉིད་དུ་འཇུག་པའི་ཚེ། །སྡིག་ཅན་རྣམས་ལ་གཤིན་རྗེའི་འཇིགས་པ་འཆར། །དགེ་གོམས་རྣམས་ལ་བདེ་འགྲོའི་སྣང་བ་འཆར། །ཐིམ་རིམ་དེ་དག་ཡོངས་སུ་རྫོགས་པའི་མཐར། །མ་ལས་ཐོབ་པའི་
དམར་ཆ་གྱེན་དུ་གཤེགས། །ཕ་ལས་ཐོབ་པའི་དཀར་ཆ་ཐུར་དུ་ལྷུངས། །ཀུན་གཞིའི་རྣམ་ཤེས་སྲོག་རླུང་དང་བཅས་པ། །སྙིང་གར་དབུ་མའི་ནང་དུ་འཛོམ་པ་ཡི། །དྭངས་མ་ལྔ་འདུས་རྟེན་འབྲེལ་ཚོགས་པ་ལས། །སྤྲིན་མེད་ནམ་མཁའ་ལྟ་བུའི་འོད་གསལ་འཆར། །བྱིས་པ་ཆུང་ངུས་ལྷ་ཁང་མཐོང་བ་བཞིན། །ཤར་ཡང་རང་ངོ་མ་ཤེས་སྐད་ཅིག་འཕོ། །དེ་དག་སོ་སོའི་གནས་སྐབས་མ་འཁྲུལ་བར། །དྲན་དང་ཤེས་བཞིན་ཟབ་མོས་མཚམས་སྦྱོར་ཞིང་། །ལམ་གྱི་འོད་གསལ་སྔོན་ནས་གོམས་པའི་མཐུས། །གཞི་ཡི་འོད་གསལ་སྔར་འདྲིས་མི་ལྟར་ཤེས། །བདེ་གསལ་མི་རྟོག་ཁྱད་ཆོས་གསུམ་ལྡན་པའི། །རྩེ་གཅིག་ཏིང་འཛིན་བུ་ཡི་འོད་གསལ་དེ། །རང་བཞིན་གཟོད་ནས་རྣམ་པར་དག་པ་ཡི། །འོད་གསལ་མ་དང་མ་བུ་མཇལ་བར་ཤོག །དེ་ཕྱིར་ཚེ་འདིའི་རྣམ་གཡེང་ཀུན་སྤངས་ནས། །དབེན་པའི་གནས་སུ་མི་གཡོ་གསུམ་ལྡན་པས། །
གསལ་སྟོང་འཛིན་མེད་མཉམ་གཞག་ཆེན་པོའི་ངང་། །ཤིན་ཏུ་སྤྲོས་མེད་སྤྱོད་པ་མཐར་ཕྱིན་ཤོག །གལ་ཏེ་བར་དོ་དང་པོ་མ་ཆོད་ན། །རྣམ་ཤེས་སྲོག་གི་རླུང་དང་ལྷན་ཅིག་ཏུ། །ལྟེ་བ་སྨིན་མཚམས་ཚངས་བུག་སྣ་རྣ་བ། ཁ་མིག་བཤང་གཅི་སྒོ་དགུ་གང་རུང་ནས། །ཐལ་བྱུང་ཐོན་ཏེ་བར་སྲིད་སྣང་བ་འཆར། །དེ་ནི་ཕྱི་མ་གར་སྐྱེའི་ཤ་ཚུགས་ཅན། །སྒྱུ་མའི་སྐྱེས་བུ་ལྟ་བུ་ལྟོས་བྲལ་ལུས། །དབང་པོ་ཀུན་ཚང་ལས་ཀྱིས་རྫུ་འཕྲུལ་ལྡན། །ཇི་ལྟར་སྦྲང་བུས་ཉི་ཟེར་འབུགས་པ་བཞིན། །རྡོ་རྗེའི་བྲག་ལ་ཐོགས་པ་མེད་པར་རྒྱུ། །གང་དུ་འདོད་པའི་གནས་སུ་ཡུད་ཀྱིས་ཕྱིན། །ཟས་སུ་དྲི་ཟ་བར་དོ་ཕན་ཚུན་དང་། །བསམ་གཏན་ལས་བྱུང་ལྷ་མིག་དག་པས་མཐོང་། །མཐོ་རིས་འགྲོ་རྣམས་མགོ་བོ་གྱེན་དུ་བལྟ། །ངན་འགྲོར་འགྲོ་རྣམས་ཐུར་དུ་ཕྱོགས་པ་དང་། །ཉི་ཟླ་མེད་ཅིང་ལུས་ལ་གྲིབ་མ་མེད། །ལྷ་མི་དུད་འགྲོ་ཡི་དྭགས་དམྱལ་བའི་ལམ། །དཀར་དམར་
སེར་སྔོ་ཤིན་ཏུ་གནག་པ་ཡི། །རྣམ་བྱང་འོད་ལྔའི་ལམ་ན་སོ་སོར་འཇུག །སྔོན་མེད་སྒྲ་གཟུགས་འཆར་བ་བར་དོའི་རྟགས། །ཉོན་མོངས་བསྲན་པས་མི་བཟང་མེ་ལྟར་འབར། །རླུང་ཉིད་སྟོབས་སུ་གྱུར་པས་སྡོད་དབང་མེད། །སྐྱོ་ཤས་མྱ་ངན་སྐྲག་སྣང་དུ་མས་གཟིར། །རང་དབང་མེ་འདུས་ཅི་བྱའི་ལྟོས་དང་བྲལ། །ལས་རླུང་དྲག་པོས་ཀུན་ཏུ་འདྲེན་ཞིང་འཕེན། །དེ་ཡི་ཚེ་ཚད་སྤྱིར་ནི་མ་ངེས་ཀྱང་། །ཕལ་ཆེར་བདུན་ཕྲག་བདུན་དང་ལྡན་པ་ལས། །ཉིན་ཞག་ཕྱེད་བཞིའི་བར་དུ་དྲན་པ་ནི། །རེས་གསལ་རེས་མི་གསལ་བ་མྱོས་པ་བཞིན། །རང་ཉིད་ཤིའམ་གསོན་པ་ཐག་མི་ཆོད། །ཟང་ཟིང་ལང་ལོང་སྣང་བས་སེམས་རྒྱུད་འཁྲུག །གཉེན་བཤེས་རྩ་ལག་སྙིང་ཉིའི་གྲོགས་པོ་དང་། །འགྲོགས་པར་འདོད་ཀྱང་དེ་དག་གིས་མི་ཤེས། །སྨྲ་ལ་ལན་མེད་རང་ཉིད་ཆོ་ངེས་འདེབས། །དེ་ནས་སྐབས་ཤིག་ཤི་བར་ངེས་པ་ན། །ཕུང་པོ་རྙིང་པ་ཉེ་དུའི་མྱ་ངན་
དང་། །རང་གི་ཡོ་བྱད་བགོ་བ་ལ་སོགས་མཐོང་། །ཕུང་པོ་ལ་ཡང་དང་པོར་དགའ་ཞིང་ཆགས། །ཕྱིས་ནས་མེད་པར་དགའ་བའི་འདུན་པ་འཆར། །དེ་ཉིད་མེར་བསྲེག་ཆུར་དོར་ལ་སོགས་དང་། དེ་ལ་བརྙས་པ་བྱེད་ལའང་ཞེ་སྡང་འཁྲུགས། །ཉེ་དུས་མྱ་ངན་བྱས་པ་མཐོང་བའི་ཚེ། །བོས་ཤིང་ཟློག་ཀྱང་བཟློག་པར་མ་ནུས་ནས། །རང་ཡང་ངུ་ཞིང་བརྒྱལ་ལ་ཐུག་པར་འགྱུར། །གཞན་དག་དགོད་ཅིང་རྩེ་བ་མཐོང་བའི་ཚེ། །ཁོ་བོ་འདི་ལྟར་ཉམ་ཉེས་གྱུར་པ་ལ། །འདི་རྣམས་དགོད་ཅེས་དགྲར་འཛིན་དྲག་པོ་འཆར། །རང་གིས་གཅེས་པ་བསགས་པའི་ནོར་ནས་རྣམས། །གཞན་གྱིས་ལང་ལོང་སྤྱད་པ་མཐོང་བའི་ཚེ། །ཤིན་ཏུ་ཆགས་པས་ནོར་གྱི་ཕྱི་བཞིན་འབྲང་། །བདག་གི་ཤིན་ཏུ་འཕོངས་པའི་དངོས་པོ་འདི། །འདི་ཡིས་མེད་པར་བྱས་ཞེས་ཁོང་ནས་འཁྲུག །དེ་ལྟར་སྲིད་པ་བར་མའི་སྣང་བ་རྣམས། །མན་ངག་མེད་པས་རྨི་ལམ་འབྱམས་པ་བཞིན། །མི་ཤེས་མི་
དྲན་འཁྲུལ་བར་ལ་བཟླ་བས། །ལམ་གྱི་ཚོད་འཛིན་རྨི་ལམ་འབྱོངས་པར་ཤོག །ཉིན་གྱི་སྣང་བ་མ་ལུས་སྒྱུ་མ་ལྟར། །རང་བཞིན་སྟོང་པ་ཉིད་དུ་ཝལ་ཝལ་འཆར། །དྲན་འཛིན་མི་དགོས་ངེས་ཤེས་རྒྱུན་བརྟན་པ། །ཡེ་ཤེས་སླེབ་པའི་ཚད་དུ་ཕྱིན་པར་ཤོག །ཐེ་ཚོམ་ཟ་ན་འཁོར་བར་ལྡོག་པའི་དུས། །བདེན་འཛིན་སྐྱེས་ན་བག་ཆགས་ལྡང་བའི་རོ། །དྲན་པས་མི་ཟིན་འབྱམས་པ་གོལ་བའི་ས། །འཁོར་བའི་ཆོམ་རྐུན་གསུམ་ལས་ཐར་བར་ཤོག །གཟུགས་སྣང་ཐམས་ཅད་འཇའ་ལུས་རྡོ་རྗེའི་སྐུ། །སྒྲ་སྐད་ཐམས་ཅད་གྲག་སྟོང་རྡོ་རྗེའི་སྔགས། །སེམས་ཉིད་བདེ་སྟོང་ཟུང་འཇུག་རྡོ་རྗེའི་ཐུགས། །ཟབ་ལམ་སྔགས་ཀྱི་ཐབས་མཁས་ལྡན་པར་ཤོག །རླུང་སེམས་རྩལ་ལས་གྲུབ་པ་སྒྱུ་མའི་ལུས། །འོད་གསལ་ཟག་པ་མེད་པའི་མེས་སྦྱངས་པས། །རྣམ་ཀུན་མཆོག་ལྡན་ཟུང་འཇུག་སྒྱུ་འཕྲུལ་སྐུ། །བར་དོ་ལོངས་སྤྱོད་རྫོགས་པའི་གནས་ཐོབ་ཤོག །
བར་དོ་གཉིས་པའང་ཆོད་པར་མ་གྱུར་ན། །བར་དོ་གསུམ་པ་སྐྱེ་གནས་བདམ་པ་ནི། །སྔོན་མའི་ལུས་དོར་ཕྱི་མ་མ་ཐོབ་པས། །ཕྱོགས་སླེབ་འགྲོན་པོ་གནས་ལ་སྡོད་པའམ། །གཡུལ་ངོར་རྟ་ལས་ལྷུང་བ་མ་འཇོགས་ལྟར། །སླར་ཡང་སྐྱེ་བ་ལེན་ལ་མངོན་པར་ཕྱོགས། །རང་ཉིད་གང་དུ་སྐྱེ་ཞེས་བརྟག་པ་ན། །ལྷ་ཡི་རིས་སུ་སྐྱེ་བར་འགྱུར་བ་ཡིས། །ལྷ་གནས་ལོངས་སྤྱོད་ཕུན་སུམ་ཚོགས་པ་སོགས། །མཐོང་ནས་དགའ་སྤྲོའི་སེམས་དང་ལྡན་པར་འགྱུར། །རྒྱུ་དེས་འདིར་ཡང་ཕུང་པོ་མདངས་གསལ་ཞིང་། །གཉེན་མཛེས་མིག་ཀྱང་ཟིམ་བུར་གནས་པ་དང་། །དྲི་བཟང་ལྡན་ཞིང་ནམ་མཁར་ལྷ་ཡི་མཐུས། །འཇའ་ཚོན་བཀྲ་དང་མེ་ཏོག་ཆར་སོགས་འབྱུང་། །ལྷ་ཡི་བུ་དང་བུ་མོ་ལ་སོགས་པའི། །གླུ་གར་རྩེད་འཇོ་སྣ་ཚོགས་མཐོང་བ་ལས། །བདག་ཀྱང་འགྲོ་སྙམ་ཆགས་པས་ཉིང་མཚམས་སྦྱོར། །ལྷ་མིན་རྣམས་ནི་ལྷ་དང་ཕྱོགས་མཐུན་ཀྱང་། །ཅུང་ཟད་
ང་རྒྱལ་དག་དང་བཅས་པ་དང་། །ལྷ་མིན་དཔའ་བོ་གོ་ཆ་སྲ་བ་བགོས། །མཚོན་རྣོན་རྣམ་པ་སྣ་ཚོགས་འདེབས་པ་ཡིས། །གློག་ཕྲན་བར་མེད་ལྟ་བུར་འཁྲུག་པ་མཐོང་། །བདག་ཀྱང་འདིར་འགྲོ་སྙམ་དུ་ཆགས་པ་སྐྱེས། །མི་ཡི་འགྲོ་བ་རྣམས་སུ་སྐྱེ་བ་ན། །དེ་དང་དེ་ཡི་འབྱོར་པ་བདེ་སྐྱིད་དང་། །ཕྱི་མའི་ཕ་མ་འདུ་འཕྲོད་མཐོང་བ་ལ། །ཆགས་སྡང་མིག་སེར་དབང་གིས་ཉིང་མཚམས་སྦྱོར། །ཕ་ཡི་དབང་པོའི་སྒོ་རྣམས་གང་རུང་ནས། །ཞུགས་ཏེ་མ་ཡི་མངལ་དུ་གནས་པར་འགྱུར། །དུད་འགྲོ་ཕལ་ཆེར་རྨོངས་པ་ཤས་ཆེ་བས། །ཆགས་སྡང་དྲག་པོའི་དབང་གིས་སྐྱེ་བ་དང་། །ཡི་དྭགས་རྣམས་དང་དུད་འགྲོ་དམན་པ་རྣམས། །རང་གནས་མཐོང་ལ་ཆགས་པའི་བློ་མེད་ཀྱང་། །རྒྱ་མཚོ་འཆོལ་དང་ནགས་ཚལ་བསྲེགས་པ་དང་། །རི་བོ་ཉིལ་དང་དུས་མཐའི་རླུང་གི་སྒྲ། །འཇིགས་རུང་སྐྱེས་བུའི་སྒྲ་སྐད་དྲག་པོ་དང་། །གནོད་སྦྱིན་གཅན་གཟན་སོགས་
ལ་སྐྲག་པ་དང་། ཁ་ཆར་བུ་ཡུག་སོགས་ཀྱིས་དེད་པ་ལས། །རིང་བར་བྲོས་ཏེ་ས་ཕུག་བྲག་ཕུག་དང་། །སྡོང་དུམ་རྩ་བ་བརྩིག་པའི་བུ་ག་དང་། །ལོ་མའི་གསེབ་སོགས་མུན་ནག་ཁང་བུ་རུ། །ཡིབ་པར་འདོད་པའི་བློ་ཡིས་སྐྱེ་བ་ལེན། །དམྱལ་བའི་ཁམས་སུ་སྐྱེ་བའི་ལས་ཅན་ནི། །ཤོང་ཤོང་རི་དང་ནགས་ཚལ་ལ་སོགས་པར། །དུད་འགྲོ་རི་དྭགས་གསོད་པའི་ལས་མཐོང་ནས ། །བདག་ཀྱང་འགྲོ་བར་སེམས་ཏེ་སོང་བ་ན། །དེ་དག་གཤིན་རྗེའི་སྐྱེས་བུར་གྱུར་པ་ཡིས། །དམྱལ་བའི་གནས་སུ་ཁྲིད་དེ་གསོད་པར་བྱེད། །ཁ་ཅིག་འཆི་ཁར་གཤིན་རྗེའི་ཕོ་ཉ་དག །མཐོང་སྟེ་ཤིན་ཏུ་སྐྲག་པའི་སྣང་བ་འཆར། །རྒྱུ་དེས་ཕུང་པོ་མི་སྡུག་རྣམ་པར་གྱུར། །འཆི་བའི་དུས་སུ་གནར་གཅོད་དྲག་པོ་ཡིས། །རེ་ཞིག་བར་ལ་བརྒྱལ་ཐབས་གྱུར་པ་ལས། །སད་ནས་བདག་ལུས་གང་ཞེས་འཚོལ་བ་ན། །དེ་ཡི་བར་དོའི་ལུས་ནི་གོང་གོང་པོ། །མིག་ནི་སྤྱི་བོའི་གཙུག་ཏུ་ཡོད་སྙམ་པ། །
ཤོག་ལྷེབ་ ༥༠༡ ནས་ ༥༦༩ བར།
དྲག་པོའི་རླུང་གིས་མཐོ་བའི་མཁར་བཏེག་ནས། །ལྕགས་བསྲེགས་ས་གཞིར་བརྡབས་ཉེ་ཞུ་བའི་མོད། །འཇིགས་རུང་སེམས་ཅན་དམྱལ་བའི་ལུས་གྲུབ་ཅིང་། །དེ་ལ་དམྱལ་སྲུང་རྣམས་ཀྱིས་གསོད་པའི་ཚུལ། །རྣམ་པ་དུ་མས་ཉམ་ཐག་བྱེད་པར་འགྱུར། །དམྱལ་བ་ཡི་དྭགས་ཕལ་ཆེར་དག་ལ་ནི། །གཤིན་རྗེའི་སྐྱེས་བུས་གཤིན་རྗེའི་རྒྱལ་པོ་ཡི། །དྲུང་དུ་ཁྲིད་ནས་ལས་རྣམས་ལུང་བསྟན་ཏེ། །ཉམ་ཐག་ངང་ནས་ཉིང་མཚམས་སྦྱོར་བར་བཤད། །གཞན་ཡང་གྲང་བས་ཉེན་ཏེ་ཚ་བ་དང་། །ཚ་བས་ཉེན་ཏེ་གྲང་བར་གནས་ལ་སོགས། །བླང་དོར་སྲེད་པའི་དབང་གིས་སྐྱེ་བ་ལེན། །དེ་བཞིན་རྫུས་སྐྱེས་ཕལ་ཆེར་གནས་ལ་ཆགས། །དྲོད་གཤེར་སྐྱེས་ནི་དྲི་དང་རོ་ལ་ཆགས། །མངལ་དང་སྒོ་ང་དག་ལས་སྐྱེས་པའི་རིགས། །ཕོ་མོ་འདོད་པ་བསྟེན་ལ་ཆགས་པ་སྟེ། །དེ་ལྟར་འཁྲུལ་པའི་ལས་སྣང་སྣ་ཚོགས་པ། །སྐྱེ་བའི་འཁོར་ལོ་བར་མེད་
འཁོར་བར་འགྱུར། །དེ་ཚེ་ཡུལ་རྐྱེན་བཟང་ངན་གང་མཐོང་ཡང་། །ནང་དུ་རང་རྒྱུད་འདུལ་བའི་གཉེན་པོ་བསྟེན། །གང་ལ་གོམས་པའི་ཉམས་ལེན་རྣལ་འབྱོར་རྣམས། །དེ་ཡི་དུས་སུ་འབྲལ་བ་མེད་པར་ཤོག །ཁྱད་པར་གཏུམ་མོ་བདེ་དྲོད་རང་འབར་དང་། །སྣང་སྲིད་སྒྱུ་ལུས་ཆོས་བརྒྱད་རང་གྲོལ་དང་། །རྨི་ལམ་གདམས་ངག་འཁྲུལ་པ་རང་སངས་དང་། །འོད་གསལ་མ་རིག་མུན་སེལ་འཆར་བར་ཤོག །བསྐྱེད་རིམ་བརྟན་པོས་ལྷ་སྔགས་ཕྱག་མཚན་དང་། །བླ་མར་མོས་པས་བླ་མའི་རྣལ་འབྱོར་དང་། །ཚུལ་ཁྲིམས་བསྲུང་བའི་དྲན་ཤེས་དྲག་པོ་སོགས། །མན་ངག་དུ་མས་སྐྱེ་སྒོ་གེགས་པར་ཤོག །གལ་ཏེ་ལས་དབང་དྲག་པོ་མི་ལྡོག་ན། །རྡོ་རྗེ་ཐེག་པའི་ལམ་མཆོག་སྒྲུབ་ནུས་པའི། ཁམས་དྲུག་ལྡན་པའི་ལུས་སུ་སྐྱེ་བ་ཡི། །རྟེན་འབྲེལ་ཕུན་སུམ་ཚོགས་པ་འགྲིག་པར་ཤོག །སྐྱེ་བའི་གནས་ཚུལ་སྤྲུལ་སྐུར་སྐྱེས་པ་ཡིས། །སྣང་ཚུལ་གང་ལ་གང་འདུལ་སྟོན་
པར་མོས། །འཇུག་གནས་འབྱུང་བའི་གནས་སྐབས་མ་འཁྲུལ་བར། །དྲན་བཞིན་ཤེས་བཞིན་སྐྱེ་བ་ལེན་པར་ཤོག །བདེ་ནས་བདེ་བའི་གནས་སུ་འགྲོ་བ་དང་། །དག་པའི་ཞིང་ནས་དག་པའི་ཞིང་དུ་རྒྱུ། །མ་དག་ཞིང་དུའང་སྙིང་རྗེས་རྣམ་རོལ་པས། །སངས་རྒྱས་ཀུན་གྱི་ཕྲིན་ལས་སྒྲུབ་པར་ཤོག །མདོར་ན་ཕྱིན་ཆད་འདི་བྱ་འདི་བྱེད་ཅེས། །ད་ལྟ་ཡིད་ལ་བྱང་ཞིང་ཆུབ་པ་ན། །ཕྱི་མའི་དམིགས་རྐྱེན་མཐོང་ཚེ་ཐོག་ཏུ་ཁེལ། །དེ་བཞིན་བར་དོ་འཕོ་བ་འབྱོངས་པར་ཤོག །ཅེས་པ་བཙུན་པ་དཀོན་མཆོག་འབངས་ཀྱིས་སྦྱར།། །།སྨོན་ལམ་ཆེན་མོ་ནི། ཕྱོགས་བཅུའི་ཞིང་རབ་འབྱམས་མཐའ་དང་དབུས་མེད་པ་ཇི་སྙེད་པ་རྣམས་ན། དུས་གསུམ་ན་གཤེགས་ཤིང་གཤེགས་པ་དང་གཤེགས་པར་འགྱུར་བའི་སངས་རྒྱས་དང་བྱང་ཆུབ་སེམས་དཔའ་དང་། ཉན་ཐོས་དང་རང་སངས་རྒྱས་དང་། ལྷ་དང་། དྲང་སྲོང་དང་། རིག་སྔགས་འཆང་བ་ལ་སོགས་པ་བདེན་པ་གྲུབ་
པ་མ་ལུས་ཤིང་ལུས་པ་མེད་པ་ཐམས་ཅད་བདག་ལ་དགོངས་སུ་གསོལ། བདག་གིས་ཐོག་མ་མ་མཆིས་པ་ནས་མཐའ་མ་མ་མཆིས་པའི་བར་དུ་དགེ་བའི་རྩ་བ་བགྱིས་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བ་ཐམས་ཅད་དང་། ཁྱད་པར་དུ་འཛམ་བུ་གླིང་གི་རྒྱན་ཕུན་སུམ་ཚོགས་པའི་གནས་སྒར་ཆེན་འདི་ཉིད་དུ་ཡིད་ཀྱིས་རྣམ་པར་འཕྲུལ་པའི་གཞལ་མེད་ཁང་པ་བཀོད་པ་ངོ་མཚར་ཕུན་སུམ་ཚོགས་པ་འདི་ཉིད་དུ་རྒྱལ་བ་ཉིད་ཀྱིས་ཆོ་འཕྲུལ་ཆེན་པོ་བསྟན་པའི་བྱིན་གྱིས་བརླབས་པའི་དུས་ཁྱད་པར་ཅན་ལ། རྒྱལ་བ་སྐུ་བལྟམས་པའམ། མངོན་པར་བྱང་ཆུབ་པའི་དང་། མྱ་ངན་ལས་འདས་པའི་དང་། ཆོས་ཀྱི་འཁོར་ལོ་བསྐོར་བའི་དང་། རྒྱལ་བ་ལྷ་ལས་བབས་པའི་བྱིན་གྱིས་བརླབས་པའི་དུས་ཁྱད་པར་ཅན་ལ། ཞེས་སོགས་འདོན་པ་བསྒྱུར། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དང་། ཉན་ཐོས་ཀྱི་འཁོར་དང་བཅས་པ་
ཐམས་ཅད་སྤྱན་དྲངས་ནས་བྱང་ཆུབ་སེམས་དཔའ་རྣམས་ཀྱི་སྤྱོད་པ་དང་རྗེས་སུ་མཐུན་པར་འཇིག་རྟེན་གྱི་ཁམས་ཐམས་ཅད་ལ་སྨན་པ་དང་། ཕན་བདེ་ཕུན་སུམ་ཚོགས་པ་འབྱུང་བའི་སླད་དུ། ཕྱག་འཚལ་བ་དང་། མཆོད་པ་དང་། སྡིག་པ་བཤགས་པ་དང་། དགེ་བ་ལ་རྗེས་སུ་ཡི་རང་བ་དང་། ཆོས་འཁོར་བསྐོར་བར་བསྐུལ་བ་དང་མྱ་ངན་ལས་མི་འདའ་བར་གསོལ་བ་འདེབས་པ་དང་། དགེ་བ་རྫོགས་པའི་བྱང་ཆུབ་ཆེན་པོར་བསྔོ་བ་ལ་སོགས་པའི་དགེ་བའི་རྩ་བ་དང་། གཞན་ཡང་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་དང་བྱང་ཆུབ་སེམས་དཔའ་དང་། ཉན་ཐོས་དང་རང་སངས་རྒྱས་ཐམས་ཅད་དང་། བདག་ཅག་སེམས་ཅན་ཇི་སྙེད་པ་རྣམས་ཀྱིས་དགེ་བའི་རྩ་བ་བགྱིས་པ་དང་། བགྱིད་པར་འགྱུར་བ་དང་། བགྱིད་བཞིན་པ་དང་། གཞན་ལ་བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བའི་དགེ་
བའི་རྩ་བ་ཅི་ཡོད་པ་རྣམས་ཀྱི་མཐུ་དང་སྟོབས་ལས། སྣོད་ཀྱི་འཇིག་རྟེན་ཐམས་ཅད་ཀྱི་མ་དག་པ་ཐམས་ཅད་དང་བྲལ་ཞིང་རྣམ་པར་དག་པའི་ཡོན་ཏན་ཕུན་སུམ་ཚོགས་པ་རྣམ་པ་སྣ་ཚོགས་དང་ལྡན་པར་གྱུར་ཅིག །དམྱལ་བའི་འཇིག་རྟེན་གྱི་ཁམས་དང་། གཤིན་རྗེའི་འཇིག་རྟེན་གྱི་ཁམས་དང་། དུད་འགྲོའི་འཇིག་རྟེན་གྱི་ཁམས་སྔར་ཆགས་པ་ཐམས་ཅད་ཞིག་ཅིང་སྟོངས་པར་གྱུར་ཅིག །ཕྱིན་ཆད་ཆགས་པར་མ་གྱུར་ཅིག །གལ་ཏེ་ལས་ཀྱི་དབང་གིས་ཞིག་པར་མ་གྱུར་ན་ཡང་། ལྕགས་བསྲེགས་ཀྱི་ས་གཞི་དང་། ཁང་པ་དང་། རྭ་བ་ལ་སོགས་པ་རྣམས་ཡིད་དུ་འོང་ཞིང་བསིལ་དྲོད་སྙོམས་ལ་བདེ་བ་སྐྱེད་ནུས་པའི་རང་བཞིན་དུ་གྱུར་ཅིག །ཆུ་ཚན་ཁོལ་མ་ཐམས་ཅད་ནི་ཁྲུས་ཀྱི་རྫིང་ཡན་ལག་བརྒྱད་དང་ལྡན་པ་པདྨོ་སྣ་ཚོགས་ཀྱིས་ཁེབས་ཤིང་ངང་པ་ལ་སོགས་སྒྲ་སྙན་པར་སྒྲོགས་པར་གྱུར་ཅིག །ལྕགས་བསྲེགས་ཀྱི་གཏུན་དང་། རི་བོ་འཐབ་པ་ལ་
སོགས་པ་ཐམས་ཅད་ནི་མེ་ཏོག་གི་ཆར་དུ་གྱུར་ཅིག །ཐལ་ཚན་ཆུ་བོ་རབ་མེད་དང་རོ་མྱགས་ཀྱི་འདམ་དང་། སྤུ་གྲིའི་ཚལ་ལ་སོགས་པ་རྣམས་ནི་ལྗོན་ཤིང་དང་། མེ་ཏོག་དང་། འབྲས་བུ་དང་། སྨན་གྱི་རིགས་ལ་སོགས་པས་མཛེས་པའི་སྐྱེད་མོས་ཚལ་དུ་གྱུར་ཅིག །ཤལ་མ་ལི་ཡང་རིན་པོ་ཆེའི་རི་བོ་ལྗོན་ཤིང་ཡིད་དུ་འོང་བ་དུ་མ་དང་། ས་གཞི་ཤིན་ཏུ་འཇམ་པའི་རྩྭ་སྔོན་པོ་དང་མེ་ཏོག་ལ་སོགས་པས་ཁེབས་པ་དག་ཏུ་གྱུར་ཅིག །དམྱལ་སྲུང་འཇིགས་སུ་རུང་བ་དང་། སེང་གེ་དང་ཁྱི་ལ་སོགས་པ་ཐམས་ཅད་ལྷའི་བུ་དང་བུ་མོ་ལ་སོགས་པ་དང་། རྟ་མཆོག་རིན་པོ་ཆེ་དང་། གླང་པོ་རིན་པོ་ཆེ་ལྟ་བུ་ཤ་སྟག་ཏུ་གྱུར་ཅིག །དམྱལ་བའི་སེམས་ཅན་རྣམས་སྐྱེས་མ་ཐག་ཏུ་སེ་གོལ་གཏོགས་པའི་ཡུད་ཙམ་དུའང་དེར་མི་གནས་པར་ཚེ་འཕོས་ནས་བདེ་འགྲོ་མཐོ་རིས་ཀྱི་མཆོག་ཏུ་སྐྱེ་བར་གྱུར་ཅིག །གཤིན་རྗེའི་འཇིག་རྟེན་ཏུ་སྐྱེ་བར་འགྱུར་བའི་ལས་
གང་གིས་བྱས་པ་ཐམས་ཅད་ཟད་ནས་དེར་མི་སྐྱེ་བར་གྱུར་ཅིག །གལ་ཏེ་སྐྱེས་པར་གྱུར་ན་ཡང་དེ་མ་ཐག་ཏུ་དེ་ནས་ཚེ་འཕོས་ནས་བདེ་འགྲོ་མཐོ་རིས་ཀྱི་མཆོག་ཏུ་སྐྱེ་བར་གྱུར་ཅིག །སྐྱེས་མ་ཐག་ཏུ་ཚེ་འཕོ་བར་མ་གྱུར་ནའང་། གཤིན་རྗེའི་འཇིག་རྟེན་གྱི་ཁམས་ཐམས་ཅད་ས་གཞི་རིན་པོ་ཆེ་སྣ་ཚོགས་ལས་གྲུབ་ཅིང་མནན་ན་ནེམ་བྱེད་པ། བཏེག་ན་སྤར་བྱེད་པ། ཡིད་དུ་འོང་བའི་ཡོ་བྱད་དུ་མས་གང་བར་གྱུར་ཅིག །གཞན་ཡང་ས་གཞི་ལ་བཟར་རུང་བའི་འབྲས་བུ་ལོ་མ་ལ་སོགས་པ་སྣ་ཚོགས་པའི་བཟའ་བཏུང་སྣ་ཚོགས་པས་གང་བར་འགྱུར་ཞིང་། ནམ་མཁའ་ནས་ཀྱང་བཟའ་བཏུང་སྣ་ཚོགས་ཀྱི་ཆར་འབབ་པར་གྱུར་ཅིག །ཉི་མ་དང་ཟླ་བའི་འོད་རྟག་ཏུ་འབྱུང་ཞིང་། །སོས་ཀའི་དུས་བསིལ་ཞིང་དགུན་གྱི་ཚེ་དྲོ་བར་གྱུར་ཅིག །ས་ཕྱོགས་ཐམས་ཅད་དུ་ཆུ་གཙང་བ་ཡན་ལག་བརྒྱད་དང་ལྡན་པ་གྱ་གྱུར་འབབ་ཅིང་། ལྗོན་ཤིང་ཡིད་དུ་འོང་བའི་གྲིབ་
བསིལ་དག་བསྐམས་པ་མེད་པར་སྣང་བར་གྱུར་ཅིག །བྱོལ་སོང་གི་འཇིག་རྟེན་གྱི་ཁམས་སུ་སྐྱེ་བར་འགྱུར་བའི་ལས་གང་གིས་བྱས་པ་ཐམས་ཅད་ཟད་ནས་དེར་མི་སྐྱེ་བར་གྱུར་ཅིག །གལ་ཏེ་སྐྱེས་པར་གྱུར་ནའང་དེ་མ་ཐག་ཏུ་ཚེ་འཕོས་ནས། བདེ་འགྲོ་མཐོ་རིས་ཀྱི་མཆོག་ཏུ་སྐྱེ་བར་གྱུར་ཅིག །སྐྱེས་མ་ཐག་ཏུ་ཚེ་འཕོ་བར་མ་གྱུར་ནའང་གླེན་ཞིང་རྨུགས་པ་མ་ཡིན་པར་མིའི་མཆོག་ལྟར་བློ་གསལ་ཞིང་རྨོངས་པ་ཐམས་ཅད་དང་བྲལ་བར་གྱུར་ཅིག །གཞན་གྱི་དབང་དུ་མི་འགྱུར་བར་ཐམས་ཅད་དུ་རང་དབང་ཐོབ་པར་གྱུར་ཅིག །བལ་ལ་སོགས་པ་འདྲེག་པ་དང་། འདེད་པ་དང་། བཀལ་བ་དང་། གསོད་པ་དང་། གཅིག་གིས་གཅིག་ལ་གནོད་པ་སྐྱེལ་བ་སོགས་ཀྱི་སྡུག་བསྔལ་དང་བྲལ་ཞིང་། ཐམས་ཅད་བག་ཡངས་སུ་རྒྱུ་བ་དང་། བཟའ་བ་དང་བཏུང་བ་ལ་སོགས་པ་ཇི་ལྟར་འདོད་པ་རྙེད་པ་སོགས་མཐོ་རིས་ཀྱི་མཆོག་བདེ་བ་དང་ལྡན་པར་
གྱུར་ཅིག །ཀླུ་རྣམས་ཀྱང་ནམ་མཁའ་ལྡིང་གི་གནོད་པ་མེད་ཅིང་། བྱེ་ཚན་གྱི་ཆར་རྣམས་ཀྱང་རིན་པོ་ཆེ་དང་མེ་ཏོག་གི་ཆར་དུ་གྱུར་ཅིག །མི་ཡི་འཇིག་རྟེན་གྱི་ཁམས་རྣམས་སུ་གླིང་བཞི་ལ་དབང་བའི་འཁོར་ལོས་སྒྱུར་རྒྱལ་ཡང་དང་ཡང་དུ་འབྱུང་བར་གྱུར་ཅིག །དུས་ཐམས་ཅད་དུ་རྫོགས་ལྡན་གྱི་དུས་དང་མཚུངས་པར་གྱུར་ཅིག །སྣོད་ཀྱི་འཇིག་རྟེན་དུ་ཡང་གཅོང་རོང་དང་རི་བྲག་ཚང་ཚིང་མི་གཙང་བའི་ཁྲོན་པ་དང་། ཚེར་མ་ཅན་གྱི་ཤིང་ལ་སོགས་པ་མེད་ཅིང་ལག་མཐིལ་ལྟར་མཉམ་པ་དང་། མཐའ་གྲུ་ཆེ་ཞིང་མནན་ན་ནེམ་བཏེག་ན་སྤར་བྱེད་པ། ཐམས་ཅད་དུ་ནེའུ་གསིང་དང་མེ་ཏོག་སྣ་ཚོགས་ཀྱིས་གང་ཞིང་། བཟར་རུང་བའི་ལོ་ཏོག་མ་རྨོས་པར་འཁྲུངས་པ་དང་། ལོ་ཏོག་ཐམས་ཅད་མི་མཐུན་པའི་ཕྱོགས་ཐམས་ཅད་དང་བྲལ་ཞིང་། འབྲས་བུ་ཅན་གྱི་ཤིང་དང་སྨན་གྱི་རིགས་རྣམ་པ་སྣ་ཚོགས་པ་ཅི་ལྟར་འདོད་པ་བཞིན་དུ་སྐྱེ་བར་གྱུར་ཅིག །
དུག་གི་རིགས་ལ་སོགས་པ་ལུས་ལ་ནད་སྐྱེད་པར་བྱེད་པ་གང་ཡང་འབྱུང་བར་མ་གྱུར་ཅིག །གཞན་ཡང་རིན་པོ་ཆེ་དང་གོས་ལ་སོགས་པ་མཁོ་བའི་ཡོ་བྱད་ཐམས་ཅད་བསམས་པ་ཙམ་གྱིས་ཐོགས་པ་མེད་པར་འབྱུང་བར་གྱུར་ཅིག །ནམ་མཁའ་ལས་ཀྱང་རིན་པོ་ཆེ་དང་། འབྲས་བུ་ལ་སོགས་པ་མཁོ་བའི་ཡོ་བྱད་ཐམས་ཅད་རྫོགས་ལྡན་གྱི་དུས་ལྟར་ཆར་དུ་འབབ་པར་གྱུར་ཅིག །མི་ཐམས་ཅད་ཀྱང་མངལ་དུ་བདེ་བར་གནས་ཤིང་བདེ་བར་བཙའ་བ་དང་ལུས་ལ་ནད་ཀྱི་རིགས་གང་ཡང་མི་འབྱུང་བར་གྱུར་ཅིག །གལ་ཏེ་ན་ན་ཡང་སྨན་པ་དང་སྨན་གྱིས་འབྱོར་ཞིང་མྱུར་དུ་སོས་པར་གྱུར་ཅིག །འཇིག་རྟེན་གྱི་ཁམས་ཐམས་ཅད་དུ་འོན་པ་རྣམས་ཀྱིས་ལྷའི་རྣ་བ་ཐོབ་པར་གྱུར་ཅིག །ལོང་བ་རྣམས་ཀྱིས་ལྷའི་མིག་རྣམ་པར་དག་པ་ཐོབ་པར་གྱུར་ཅིག །ལྐུགས་པ་རྣམས་ཀྱིས་སྨྲ་མཁས་པ་ཐོབ་པར་གྱུར་ཅིག །སྨྱོན་པ་རྣམས་ཀྱིས་དྲན་པ་རྙེད་པར་
གྱུར་ཅིག །མི་ཐམས་ཅད་ཀྱང་གཟུགས་བཟང་ཞིང་སྨྲ་མཁས་པ་དང་། ཡིད་གཞུངས་ཤིང་བློ་གྲོས་དང་ལྡན་པ་སོགས་བསྔགས་པར་འོས་པའི་ཡོན་ཏན་ཐམས་ཅད་ཀྱིས་འབྱོར་བར་གྱུར་ཅིག །བཙོན་དུ་གནས་པ་དང་། གསད་པར་བྱ་བ་རྣམས་བདེ་བར་ཐར་བར་གྱུར་ཅིག །འཇིགས་པ་ཆེན་པོ་བརྒྱད་དང་བཅུ་དྲུག་དང་བྲལ་བར་གྱུར་ཅིག །སྡུག་པ་ཡིད་དུ་འོང་བ་རྣམས་དང་མི་འབྲལ་བར་གྱུར་ཅིག །མི་སྡུག་པ་ཡིད་དུ་མི་འོང་བ་རྣམས་དང་ཕྲད་པར་མ་གྱུར་ཅིག །ཐམས་ཅད་ཀྱང་ཕན་ཚུན་འཐབ་པ་དང་རྩོད་པ་མེད་པར་གཅིག་ལ་གཅིག་བརྩེ་བ་རྟག་ཏུ་གནས་པར་གྱུར་ཅིག །ཐམས་ཅད་དུ་དུས་མ་ཡིན་པར་འཆི་བ་མེད་པར་ཚེ་རིང་བར་གྱུར་ཅིག །བསམས་པའི་དོན་ཐམས་ཅད་དམ་པའི་ཆོས་དང་མཐུན་པར་ཡིད་བཞིན་དུ་འགྲུབ་པར་གྱུར་ཅིག །ཐམས་ཅད་དུ་མཐའ་འཁོབ་དང་ཀླ་ཀློ་མེད་པར་དལ་བ་དང་འབྱོར་པ་ཕུན་སུམ་ཚོགས་པ་དང་ལྡན་པར་གྱུར་
ཅིག །དལ་འབྱོར་དང་ལྡན་པའི་ལུས་ཐོབ་ནས་འཁོར་བ་མེ་འབར་བའི་ཀློང་ལྟ་བུར་མཐོང་སྟེ་དེ་ལས་ཐར་བར་འདོད་པའི་བློ་སྐྱེ་བར་གྱུར་ཅིག །ཐར་པ་དོན་གཉེར་གྱི་བློ་སྐྱེས་ནས་ཅི་སྐད་བཤད་པའི་མཚན་ཉིད་དང་ལྡན་པའི་དགེ་བའི་བཤེས་གཉེན་རྙེད་ཅིང་གུས་པ་ཆེན་པོས་ཚུལ་བཞིན་དུ་བསྟེན་པར་གྱུར་ཅིག །མ་གུས་པ་སོགས་དགེ་བའི་བཤེས་གཉེན་ལ་བརྟེན་པའི་ཁ་ན་མ་ཐོ་བ་རྣམ་པ་ཐམས་ཅད་དུ་འབྱུང་བར་མ་གྱུར་ཅིག །དགེ་བའི་བཤེས་གཉེན་ལས་མཐོ་རིས་དང་ཐར་པ་དང་ཐམས་ཅད་མཁྱེན་པའི་ལམ་ཚང་ལ་མ་ནོར་བ་ཉོན་ཅིག །གསུང་རབ་ཀྱི་དོན་ཕྱིན་ཅི་མ་ལོག་པར་མྱུར་དུ་རྟོགས་པར་ནུས་པའི་བློ་གྲོས་དང་ལྡན་པར་གྱུར་ཅིག །ཇི་ལྟར་ཐོས་པའི་དོན་རྣམས་ཚུལ་བཞིན་དུ་ཉམས་སུ་ལེན་པ་ལ་བརྩོན་པ་དང་ལྡན་པར་གྱུར་ཅིག །འཇིག་རྟེན་གྱི་ཕན་བདེ་ཕུན་སུམ་ཚོགས་པ་ཐམས་ཅད་ཀྱི་འབྱུང་གནས། རྒྱལ་བའི་བསྟན་
པ་ཕྱོགས་ཐམས་ཅད་དུ་ནུབ་པ་མེད་པར་དར་ཞིང་རྒྱས་པར་གྱུར་ཅིག །དགེ་འདུན་ཐམས་ཅད་ཀྱང་ཆོས་སྤྱོད་བཅུ་དང་འཁོར་ལོ་གཉིས་ལ་སོགས་པ་སྒོ་གསུམ་དགེ་བའི་བྱ་བ་ཁོ་ན་ལ་ཉིན་མཚན་ཐམས་ཅད་དུ་བརྩོན་པར་གྱུར་ཅིག །དགེ་འདུན་མཐུན་ཞིང་དགེ་འདུན་གྱི་དོན་ཐམས་ཅད་འགྲུབ་པར་གྱུར་ཅིག །རྒྱལ་པོ་དང་། བློན་པོ་དང་། འབངས་དང་། ཁྱིམ་བདག་ལ་སོགས་པ་ཐམས་ཅད་དཀོན་མཆོག་ལ་ཤིན་ཏུ་དད་ཅིང་གུས་པའི་སེམས་དང་ལྡན་པར་གྱུར་ཅིག །སྐྱེ་བོ་ཐམས་ཅད་ཀྱང་དགེ་བའི་བྱ་བ་ལ་དགའ་ཞིང་བརྩོན་པར་གྱུར་ཅིག །ལྷ་མ་ཡིན་རྣམས་ཀྱི་ལྷའི་དཔལ་ལ་ཕྲག་དོག་གི་སེམས་ཉེ་བར་ཞི་བར་གྱུར་ཅིག །གལ་ཏེ་འཐབ་པའི་ཚེ་ཡང་ལུས་རྨས་པ་དང་འཆི་བ་ལ་སོགས་པའི་སྡུག་བསྔལ་མྱོང་བར་མ་གྱུར་ཅིག །ཐམས་ཅད་ཀྱང་དཀོན་མཆོག་གསུམ་གྱི་སྒྲ་ཐོས་ཤིང་གུས་པ་དང་དགེ་བ་ལ་གཅིག་ཏུ་དགའ་ཞིང་བརྩོན་པར་གྱུར་ཅིག །ལྷ་
རྣམས་ཀྱང་ལྷ་མ་ཡིན་དང་འཐབ་པ་དང་། རྨས་པ་དང་། འཆི་བ་ལ་སོགས་པའི་སྡུག་བསྔལ་དང་བྲལ་བར་གྱུར་ཅིག །གཞན་ཡང་སྤྱུགས་པ་དང་། ཆེ་བས་ཆུང་བ་ཟིལ་གྱིས་གནོན་པ་དང་། འཆི་འཕོ་བའི་ལྟས་མི་འབྱུང་ཞིང་སྡུག་བསྔལ་ཐམས་ཅད་དང་བྲལ་ནས་རྟག་ཏུ་བདེ་བ་དང་ལྡན་པར་གྱུར་ཅིག །བག་མེད་པ་ལས་བསྐུལ་བའི་ཆོས་ཀྱི་རྔ་བོ་ཆེ་ལྷ་ཐམས་ཅད་གྱིས་ཐོས་པར་རྟག་ཏུ་གྲག་ཅིང་། རོལ་མོ་གཞན་ལས་དམ་པའི་ཆོས་ཀྱི་སྒྲ་འབྱུང་བར་གྱུར་ཅིག །ཐམས་ཅད་ཀྱང་དཀོན་མཆོག་གི་སྒྲ་ཐོས་ཤིང་གུས་པ་དང་དགེ་བ་ལ་གཅིག་ཏུ་བརྩོན་པ་དང་ལྡན་པར་གྱུར་ཅིག །སེམས་ཅན་ཐམས་ཅད་ཀྱང་རྫོགས་པའི་བྱང་ཆུབ་ཀྱི་སེམས་རིན་པོ་ཆེ་བསྐྱེད་ཅིང་ཉམས་པར་མ་གྱུར་ཅིག །ཉན་ཐོས་དང་རང་སངས་རྒྱས་ཀྱི་རིགས་ཅན་རྣམས་རང་གི་མྱང་འདས་ཀྱི་བྱང་ཆུབ་མངོན་དུ་བྱེད་ཅིང་རིང་པོར་མི་ཐོགས་པར་བྱང་ཆུབ་ཆེན་པོར་སེམས་
བསྐྱེད་ནས་ཐེག་པ་ཆེན་པོར་འཇུག་པར་གྱུར་ཅིག །བྱང་ཆུབ་སེམས་དཔའ་རྣམས་ཀྱང་འགྲོ་བའི་དོན་ཇི་ལྟར་དགོངས་པ་བཞིན་དུ་འགྲུབ་པར་གྱུར་ཅིག །བྱང་ཆུབ་ཀྱི་སྤྱོད་པ་རླབས་པོ་ཆེ་དང་། བྱང་ཆུབ་སེམས་དཔའ་རྣམས་ཀྱི་སྨོན་ལམ་ཐམས་ཅད་མྱུར་དུ་འགྲུབ་ཅིང་རྫོགས་པར་གྱུར་ཅིག །རང་རང་གི་གདུལ་བྱ་དཔག་ཏུ་མེད་པ་མྱུར་དུ་སྨིན་པར་བྱེད་ཅིང་། རང་གི་སངས་རྒྱས་ཀྱི་ཞིང་རྣམ་པར་དག་པར་སྦྱངས་ནས་མྱུར་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་མངོན་དུ་མཛད་པར་གྱུར་ཅིག །སངས་རྒྱས་ནས་སེམས་ཅན་གྱི་ཁམས་ཐམས་ཅད་དུ་ཁྱབ་ཅིང་རྒྱུན་མི་འཆད་པའི་སྤྲུལ་པའི་སྐུས་ཆོས་ཀྱི་འཁོར་ལོ་མྱུར་དུ་བསྐོར་ནས། གདུལ་བྱ་རིགས་ཅན་གསུམ་གྱི་ཉན་ཐོས་དང་རང་སངས་རྒྱས་གྱི་རིགས་ཅན་རྣམས་གནས་སྐབས་དང་། རང་གི་བྱང་ཆུབ་དང་། ཐམས་ཅད་ཀྱང་མཐར་ཐུག་བྱང་ཆུབ་ཆེན་པོའི་ས་ལ་འགོད་པར་གྱུར་ཅིག །རྒྱལ་
བའི་བསྟན་པ་དྲི་མ་མེད་པར་འཇིག་རྟེན་གྱི་ཁམས་ཐམས་ཅད་དུ་ཁྱབ་པར་དར་ཞིང་རྒྱས་པ་དང་ནམ་ཡང་ནུབ་པར་མ་གྱུར་ཅིག །དེ་ལྟ་བུ་ལ་བདུད་ཀྱི་རིགས་ཐམས་ཅད་ཀྱིས་གླགས་ཚོལ་བར་མི་བྱེད་ཅིང་། གལ་ཏེ་བྱས་ཀྱང་དེའི་དབང་དུ་མི་འགྲོ་བར་གྱུར་ཅིག །མདོར་ན་འདས་པའི་བྱང་ཆུབ་སེམས་དཔའ་ཐམས་ཅད་ཀྱིས་སྨོན་ལམ་བཏབ་པ་དང་། ད་ལྟར་གྱི་བྱང་ཆུབ་སེམས་དཔའ་ཐམས་ཅད་ཀྱིས་སྨོན་ལམ་འདེབས་བཞིན་པ་དང་། །མ་འོངས་པའི་བྱང་ཆུབ་སེམས་དཔའ་ཐམས་ཅད་ཀྱིས་སྨོན་ལམ་འདེབས་པར་འགྱུར་བ་ཇི་སྙེད་པ་དེ་སྙེད་དུ་བདག་གིས་ཀྱང་སྨོན་ལམ་འདེབས་སོ། །སེམས་ཅན་རེ་རེའི་དྲུང་དུ་ཡང་གང་ལ་གང་འདུལ་གྱི་སྤྲུལ་པ་སྣ་ཚོགས་བསྟན་ཏེ་དེ་དག་ལ་ཕན་པ་དང་། བདེ་བ་དང་། ལེགས་པ་ཐམས་ཅད་སྒྲུབ་ཅིང་། སྐྱོན་དང་། སྡུག་བསྔལ་དང་། མྱ་ངན་དང་འཇིགས་པ་ཐམས་ཅད་བསལ་ནས། ཐར་པ་དང་ཐམས་
ཅད་མཁྱེན་པའི་གོ་འཕང་ལ་བདག་གིས་འཇོག་པར་གྱུར་ཅིག །སེམས་ཅན་གཅིག་ཅི་ལྟ་བར་སེམས་ཅན་མ་ལུས་པ་ལ་དེ་ལྟ་བུར་བགྱིད་པར་གྱུར་ཅིག །བདག་སེམས་ཅན་ཐམས་ཅད་ཀྱི་ཕ་དང་། མ་དང་། མཛའ་བོ་དང་། གཉེན་དང་རྒྱལ་པོ་ལྟ་བུར་གྱུར་ཅིག །སྨན་དང་། ཟས་དང་། གོས་ལ་སོགས་པ་དང་། ས་དང་། ཆུ་དང་། མེ་དང་། རླུང་དང་། ནམ་མཁའ་ལྟ་བུར་བདག་དང་སེམས་ཅན་ཐམས་ཅད་ཀྱི་ཉེར་འཚོའི་གཞིར་གྱུར་ཅིག །མདོར་ན་བདག་གིས་སེམས་ཅན་ཐམས་ཅད་ལ་གང་ལ་གང་ཕན་པ་དང་། ཇི་ལྟར་འདོད་པའི་རེ་བ་ཐམས་ཅད་ཡིད་དང་མཐུན་པར་སྐོང་བར་གྱུར་ཅིག །བདག་གིས་ཡེ་ཤེས་ཀྱི་ལུས་ཐོབ་ནའང་སེམས་ཅན་སྡིག་པོ་ཆེ་སྒྲིབ་པ་ཤིན་ཏུ་འཐུག་པོ་དག་གིས་སྒྲིབ་པ་ཅུང་ཟད་ཀྱང་བསྲབས་པར་མ་བྱས་ཀྱང་མཐོང་བར་གྱུར་ཅིག །ཁྱད་པར་དུ་དཔལ་ལྡན་དུས་གསུམ་མཁྱེན་པས་འདས་པའི་དུས་དཔག་ཏུ་མེད་པ་ནས་དུས་གསུམ་
གྱི་སངས་རྒྱས་ཐམས་ཅད་ཀྱི་ཕྲིན་ལས་བར་སྨོན་ལམ་བཏབ་པར་མཛད་པ་དེ་བཞིན་དུ། བདག་མིང་ཆོས་གྲགས་རྒྱ་མཚོ་ཞེས་བགྱི་བས། ཕྱོགས་བཅུའི་མཐའ་ཀླས་པར་དུས་གསུམ་གྱི་སངས་རྒྱས་ཐམས་ཅད་ཀྱི་ཕྲིན་ལས་མ་ལུས་པ་མཐའ་དག་ལ་དབང་བསྒྱུར་ཞིང་སྒྲུབ་པ་པོར་གྱུར་ཅིག །རྒྱལ་བ་ཐམས་ཅད་ཀྱི་བསྟན་པ་མ་ལུས་པ་ཡང་བདག་གིས་འཛིན་ཅིང་། ནམ་མཁའ་གནས་ཀྱི་བར་དུ་ནུབ་པ་མེད་པར་ནམ་མཁའི་མཐའ་ཀླས་པར་སྤེལ་ནུས་པར་གྱུར་ཅིག །ཁྱད་པར་ཁམས་གསུམ་ཆོས་ཀྱི་རྒྱལ་པོ་ཀརྨ་པ་ཆེན་པོའི་གནས་མཆོག་ཆོས་ཀྱི་ཕོ་བྲང་ཆེན་པོ་འོག་མིན་རབ་འབྱམས་རྡོ་རྗེ་གདན་གྱི་བདག་ཉིད། འཁོར་འདས་ཐམས་ཅད་ཡོངས་སུ་འདུ་བའི་སྒར་ཆེན་ཤེས་བྱ་ཡོངས་ཀྱི་རྒྱན་འདི་དང་། གཞན་ཡང་ཤེས་བྱའི་དཀྱིལ་འཁོར་རྒྱ་ཡོངས་སུ་མ་ཆད་པའི་ཁོངས་འདིར་སངས་རྒྱས་ཀྱི་བསྟན་པ་མཐའ་དག་གི་སྙིང་པོ་དྭགས་པོ་བཀའ་
བརྒྱུད་ཀྱི་བསྟན་པས་ཡོངས་སུ་ཁྱབ་པར་གྱུར་ཅིག །བསྟན་པ་དེ་དག་གི་སྟོན་པ་དམ་པ་རྒྱལ་བ་ཀརྨ་པའི་སྐུའི་སྣང་བརྙན་འདི་ཉིད་གདུལ་བྱ་མ་དག་པའི་ངོར་བསྐལ་པ་ཁྲི་ཚོར་ཞབས་བརྟན་པར་གྱུར་ཅིག །དེ་ལྟར་ཞབས་བརྟན་པའི་ཕྲིན་ལས་ཀྱིས་རིགས་ཅན་གསུམ་གྱི་གདུལ་བྱ་དག་རང་རང་གི་ཐེག་པའི་ས་བཅུ་ལམ་ལྔའི་རྟོགས་པ་ཁྱད་པར་ཅན་སྐད་ཅིག་སྐད་ཅིག་ལ་མངོན་དུ་བྱེད་ནུས་པར་གྱུར་ཅིག །དེ་ལ་བདུད་སྡིག་ཏོ་ཅན་གྱིས་གླགས་མི་རྙེད་པར་བདུད་ཐམས་ཅད་ཀྱང་སངས་རྒྱས་ཀྱི་བསྟན་པ་བསྲུང་ཞིང་སྐྱོང་བར་བྱེད་པར་གྱུར་ཅིག །ཕྱོགས་བཅུ་དུས་གསུམ་གྱིས་སངས་རྒྱས་དང་བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་དང་། ལྷ་དང་། དྲང་སྲོང་དང་། གྲུབ་པ་ལ་སོགས་པ་བདེན་པ་གྲུབ་པ་ཐམས་ཅད་ཀྱི་བདེན་ཚིག་གི་མཐུ་དང་། ཆོས་ཀྱི་དབྱིངས་རང་བཞིན་གྱིས་རྣམ་པར་དག་པའི་བདེན་པ་དང་། ཆོས་ཐམས་ཅད་ཀྱི་རྒྱུ་
འབྲས་བསླུ་བ་མེད་པའི་བདེན་པ་དང་། སྔགས་དང་། སྨན་དང་། རྫས་རྣམས་ཀྱི་མཐུ་དང་། དཀོན་མཆོག་གསུམ་གྱི་བདེན་པ་ཆེན་པོའི་མཐུ་ལས། བདག་ཅག་དཔོན་སློབ་འཁོར་དང་བཅས་པ་ཐམས་ཅད་ཀྱིས་ཡིད་ལ་བསམས་པའི་དོན་ཐམས་ཅད་དང་སྨོན་ལམ་ཇི་ལྟར་བཏབ་པ་ཐམས་ཅད་ཡིད་བཞིན་དུ་འགྲུབ་པར་གྱུར་ཅིག །མི་མཐུན་པའི་ཕྱོགས་ཐམས་ཅད་ལས་རྒྱལ་ཞིང་རྣམ་པར་རྒྱལ་ནས། བཀྲ་ཤིས་ཕུན་སུམ་ཚོགས་པ་ཐམས་ཅད་མ་ཚང་བ་མེད་པས་དུས་ཐམས་ཅད་དུ་ཁྱབ་ཅིང་འབྱོར་པར་གྱུར་ཅིག །ཁྱད་པར་དུ་འཛམ་བུའི་གླིང་འདི་ཉིད་དུ་སྟོབས་ཀྱི་འཁོར་ལོས་སྒྱུར་བ་མེ་ཉག་འགའི་རྒྱལ་པོ། ཇིང་གིར་ཧོར་གྱི་རྒྱལ་བརྒྱུད་དང་། རྒྱ་ནག་རྒྱལ་པོ་ཆེན་པོའི་བརྒྱུད་པ་ལ་སོགས་པས་རྒྱལ་བ་ཀརྨ་པ་སོགས་སངས་རྒྱས་ཀྱི་བསྟན་པ་འཛིན་པ་ཐམས་ཅད་ཀྱི་སྦྱིན་པའི་བདག་པོ་མཛད་དེ། མཁའ་ཁྱབ་ཀྱི་སེམས་ཅན་ཐམས་
ཅད་སྒྲོལ་བའི་ཐུགས་ཀྱི་དགོངས་པ་དེ་ཐམས་ཅད་ཀྱང་མྱུར་དུ་འགྲུབ་པའི་ཕྱིར་དུ་བསྔོ་བས་མྱུར་དུ་ཐོབ་པར་གྱུར་ཅིག །ཆོས་ཀྱི་རྒྱལ་པོ་ཆེན་པོ་དེ་དག་གིས་བསམ་སྦྱོར་ཇི་ལྟ་བུ་མཛད་པ་དེ་ལྟར་སེམས་ཅན་ཐམས་ཅད་ཀྱིས་ཀྱང་དེ་ལྟའི་བསམ་སྦྱོར་རྨ་མེད་པར་བྱེད་པར་གྱུར་ཅིག །ཁྱད་པར་དུ་ཡང་སྙིགས་མའི་དུས་འདིར་སངས་རྒྱས་དང་བྱང་ཆུབ་སེམས་དཔའ་གཞན་གང་གིས་ཀྱང་སྐུ་གསུང་ཐུགས་ཀྱི་སྣང་བ་འཆར་མི་རུང་བའི་གདུལ་བྱའི་ངོར། མཁྱེན་བརྩེ་ནུས་གསུམ་ཐོགས་པ་མེད་པར་སྟོན་ནུས་པའི་འཕགས་པ་སྤྱན་རས་གཟིགས་དབང་ཕྱུག་ཀརྨ་པ་དང་། འཕགས་པ་འཇམ་པའི་དཔལ་དང་། གསང་བའི་བདག་པོ་སོགས་སྟོབས་ཀྱི་འཁོར་ལོས་སྒྱུར་བའི་རྒྱལ་པོ་ཡོན་མཆོད་དུ་སྤྲུལ་ཏེ། སྟོན་འཁོར་ཐ་མི་དད་ཀྱི་ཕྲིན་ལས་ཀྱིས་འཛམ་བུའི་གླིང་འདི་ལ་སོགས་ཏེ་ནམ་མཁའི་མཐའ་ཀླས་པར་འཁོར་བ་དང་ངན་སོང་གི་རྒྱུན་སྟོངས་ཤིང་ཐར་པ་དང་
ཐམས་ཅད་མཁྱེན་པའི་ཕྲིན་ལས་རབ་ཏུ་རྒྱས་ཤིང་འབྱོར་པར་གྱུར་ཅིག །དེ་ལྟ་བུའི་སྨོན་ལམ་ལ་སོགས་པའི་འཁོར་འདས་ཀྱི་དུས་གསུམ་བསགས་ཡོད་ཀྱི་དགེ་བ་ཐམས་ཅད་རྫོགས་པའི་བྱང་ཆུབ་ཆེན་པོ་ཐོབ་པའི་ཕྱིར་དུ་བསྔོ་བས་མྱུར་དུ་འགྲུབ་པར་གྱུར་ཅིག །དཀོན་མཆོག་གསུམ་ལ་ཕྱག་འཚལ་ལོ། །ཏ དྱ་ཐཱ། པཉྩེཎྡྲི་ཡ། ཨ་བ་བོ་དྷ་ནེ་སྭཱ་ཧཱ། སྨོན་ལམ་འགྲུབ་པའི་གཟུངས་སོ། །ཏ ཏྱ་ཐཱ། ནཀྵ་ཏྲ། སརྦ་ཏི་ཐཱ་ན། ཤ་ཏྲི་ན། མེ་ས་མེ་ཏ་དྷ་ནི་བྱ་བནྟུ་སྭཱ་ཧཱ། དོན་ཐམས་ཅད་གྲུབ་བོ། །དཀོན་མཆོག་གསུམ་ལ་ཕྱག་འཚལ་ལོ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་ལ་ཕྱག་འཚལ་ལོ། །འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཐུགས་རྗེ་ཆེན་པོ་དང་ལྡན་པ་ནམ་མཁའི་སྙིང་པོ་ལ་ཕྱག་འཚལ་ལོ། །ཏདྱ་ཐཱ། པཉྩེཎྡྲི་ཡ། ཨ་བ་བོ་དྷ་ནེ་སྭཱ་ཧཱ། སྨོན་ལམ་ཆེན་མོ་འདི་ཉིད་རྗེ་ཆོས་གྲགས་རྒྱ་མཚོས་མཛད་པ་ལ་
རྗེ་བརྒྱད་པས་རྒྱས་བསྡུས་ལ་སྣོན་འབྲི་དང་བླང་དོར་གསལ་བར་ཕྱེ་སྟེ་ཡིད་ཆེས་ཤིང་ཁུངས་བཙུན་པའི་གནས་ཁོ་ནའོ།། །།དེ་ནས་སྨོན་ལམ་ཐོར་བུའི་སྐོར་ནི། རྟག་པར་ཐེག་ཆེན་བཤེས་ཀྱི་མགོན་གྱུར་ཅིང་། །རྙེད་དང་བཀུར་སྟི་རིམ་གྲོ་བསྒྲུབ་པ་ཡིས། །དཀོན་མཆོག་བླ་མའི་བཀའ་ལ་ནན་ཏན་དུ། །གུས་པ་ཆེན་པོས་བསྟན་པ་འཕེལ་གྱུར་ཅིག །བླ་མེད་རྫོགས་སངས་མཆོག་གི་རྒྱུར་གྱུར་པ། །མཐའ་ཡས་འགྲོ་བ་མ་ལུས་སྒྲོལ་བའི་གྲུ། །བྱང་ཆུབ་སེམས་ཀྱི་ཐེག་པ་མི་དམན་པ། །ཟབ་དང་རྒྱ་ཆེ་རྟག་པར་གླེང་གྱུར་ཅིག །བྱང་ཆུབ་དམ་པ་གང་གི་སྤྱོད་པའི་རབ། རྨད་བྱུང་སྦྱིན་པ་ལ་སོགས་ཕ་རོལ་ཕྱིན། །ཐོག་མེད་དུས་ནས་རྙེད་དཀའི་རིན་པོ་ཆེ། །ཕུན་ཚོགས་མ་ལུས་བདེ་བར་འབྱོར་གྱུར་ཅིག །སྒྲིབ་པའི་མུན་པ་འཐུག་པོ་གར་གནས་པར། །ཡེ་ཤེས་འོད་ཟེར་གསལ་བའི་དཔལ་འགྲོ་བ། །ཡེ་ཤེས་རྡོ་རྗེ་རྣོན་པོའི་བཙུན་མོ་མཆོག །ཤེས་རབ་ཕ་རོལ་ཕྱིན་མས་དགེ་གྱུར་ཅིག །ཐེག་མཆོག་ལམ་གྱི་རྩེ་
མོ་རྡོ་རྗེའི་ས། །གྲུབ་པའི་དབང་ཕྱུག་རྣམས་ཀྱི་དཀྱིལ་འཁོར་ཆེ། །ཕྱག་རྒྱ་ཕྱེད་པར་བཀའ་བའི་བདུད་རྩི་ལ། །བློ་བཟང་དབང་པོའི་རྟོགས་པ་རྒྱས་གྱུར་ཅིག །འཆི་མེད་རབ་དགའ་གྲུབ་པའི་བདེ་བ་ན། །འགྲོ་ཀུན་མཐའ་གཉིས་ལམ་ནས་ལྡང་བའི་སྒྲ། །གསང་བ་རྡོ་རྗེའི་དམ་ཆོས་འབྱུང་བའི་རྔ་། །སྐལ་པ་མཆོག་གི་རྣ་བར་བརྡུང་གྱུར་ཅིག །ཇི་སྲིད་དེ་ལྟའི་དབང་ཕྱུག་མ་ཐོབ་པར། །བཀའ་བརྒྱུད་རྣམས་ལས་དྭགས་པོ་བཀའ་བརྒྱུད་དང་། །སྒྲུབ་བརྒྱུད་རྣམས་ལས་ཀརྨ་བཀའ་བརྒྱུད་ཀྱི། །གདམས་ངག་མ་ལུས་རྫོགས་པའི་སྣོད་གྱུར་ཅིག །ཅེས་པ་འདི་དད་པའི་ནོར་ཅན་རིན་ཆེན་དཔལ་མོས་བསྐུལ་བའི་ངོར། ཀརྨ་པ་མི་བསྐྱོད་བཟང་པོ་རྡོ་རྗེ་དགའ་བའི་དབྱངས་ཀྱིས་སྦྱར་བའོ། ། ན་མོ་གུ་རུ་ཀརྨ་ཀ་ཨཱཀྵོ་བྷྱ་བཛྲཱ་ཡ། གང་ཞིག་ཚངས་སོགས་དྲེགས་པ་ཅན་རྣམས་ཀྱང་། །དཀར་པོའི་ཕྱོགས་ལ་རབ་དད་དམ་པར་བསྔགས། །གཞན་འཕྲུལ་རྒྱལ་སོགས་ལོག་པར་སྒྲུབ་ལ་ཞུགས། །ལོག་
བྱེད་རྗེས་སུ་འཇུག་པར་མ་གྱུར་ཅིག །རྒྱལ་བའི་བསྟན་པ་འཛིན་དང་དེར་ཞུགས་པའི། །དལ་འབྱོར་སྐྱོན་མེད་ཐོབ་པའི་དུས་འདི་རུ། །དོན་ཆེན་ཡང་དག་གྲུབ་པར་མ་གྱུར་པར། །དུས་མིན་འཆི་སོགས་ནམ་ཡང་མ་གྱུར་ཅིག །རྒྱ་ཆེན་སྨོན་ལམ་སྟོབས་དང་བསོད་ནམས་ཚོགས། །ལྷུན་འགྲུབ་ཕྲིན་ལས་མཐའ་མེད་བསྒྲུབ་པའི་ཕྱིར། །དགེ་འདུན་སྡེ་སྐྱོང་རྒྱལ་བས་བསོད་ནམས་གཞི། །དུ་མ་གསུང་པ་བདག་གིས་འགྲུབ་གྱུར་ཅིག །ཚུལ་ཁྲིམས་མ་སྤགས་ཏིང་འཛིན་རྙོག་པ་བྲལ། །ཤེས་རབ་དྲི་མེད་ཆོས་མིག་ཀུན་འབྱེད་ཅིང་། །བློ་གྲོས་སངས་རྒྱས་ཆོས་རྣམས་སྐྱེད་བྱེད་པའི། །བསླབ་པ་གསུམ་ལ་ནན་ཏན་བྱེད་གྱུར་ཅིག །མ་ཆགས་གཏོང་དང་སེམས་ནི་ཚུལ་ཁྲིམས་ལྡན། །སྐྱེ་མེད་ཆོས་ལ་བཟོད་ཐོབ་ཡང་དག་བརྩོན། །ཟབ་མོ་མཉམ་གཞག་རྗེས་ཐོབ་ཤེས་རབ་ཀྱིས། །ཟུང་འཇུག་ཐབས་སྟོབས་མ་ལུས་འགྲུབ་གྱུར་ཅིག །ཡེ་ཤེས་སྤྱོད་ཡུལ་རྡུལ་དྲལ་
འགྱུར་བ་མེད། །ཐོགས་མེད་ཀུན་ཁྱབ་རང་གསལ་ཀུན་གྱི་གཤིས། །འགྲོ་བ་ཀུན་ལ་བརྗོད་མེད་ཆོས་འཁོར་ལོ། །ནམ་མཁའི་མཐར་ཐུག་གྱུར་པའི་འགྲོ་རྣམས་ལ། །ཟད་མེད་འཕེལ་བ་མེད་པར་བསྟན་གྱུར་ནས། །ཀུན་ཀྱང་ཀ་དག་རང་སར་གྲོལ་གྱུར་ཅིག །ཅེས་ཀརྨ་པ་བརྒྱད་པས་སོ། ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། དུས་གསུམ་གྱི་སངས་རྒྱས་བྱང་སེམས་རྣམ་ཐར་སྒོ་གསུམ་གྱི་ཐུགས་ཅན་རྣམས་ཀྱིས་རང་གཞན་གྱི་ཟག་བཅས་ཟག་མེད་ཀྱི་དགེ་རྩ་ཐམས་ཅད་བྱང་ཆུབ་ཏུ་བསྔོས་པ་ཇི་ལྟ་བ་བཞིན་དུ་བདག་ཅག་ལ་སོགས་ཏེ་མཁའ་མཉམ་སེམས་ཅན་ཐམས་ཅད་ཀྱིས་ཀྱང་དེ་ལྟར་བསྔོ་བར་བགྱིའོ། །སངས་རྒྱས་བྱང་སེམས་དེ་དག་གིས་ཐུགས་བསྐྱེད་པ་དང་། སྨོན་ལམ་ཇི་ཙམ་དུ་སྨོན་པར་མཛད་པ་དེ་བཞིན་དུ་བདག་སོགས་སེམས་ཅན་ཐམས་ཅད་ཀྱི་ཀྱང་དེ་
ལྟར་དུ་སེམས་བསྐྱེད་པ་དང་སྨོན་པར་བགྱིའོ། །དེ་བཞིན་དུ་བདག་སོགས་སེམས་ཅན་གྱིས། བླ་མ་ལ་ཞབས་ཏོག །དགེ་འདུན་ལ་བསྙེན་བཀུར། སྐྱེ་བོ་ལ་སྦྱིན་གཏོང་འབྱུང་པོ་ལ་གཏོར་མ། སྐུ་གསུང་ཐུགས་ཀྱི་རྟེན་བཞེངས་པ། བསླབ་པ་གསུམ། ཐོས་བསམ་སྒོམ་གསུམ། ཕ་རོལ་ཏུ་ཕྱིན་པ་བཅུའི་དགེ་རྩ། མདོ་རྒྱུད་མན་ངག་དང་བཅས་པ་ཉམས་སུ་བླངས་པའི་དགེ་རྩ་རྒྱ་མཚོ་དེས་སེམས་ཅན་རྒྱ་མཚོས་སངས་རྒྱས་རྒྱ་མཚོའི་གོ་འཕང་བརྙེས་ནས། བྱང་ཆུབ་རྒྱ་མཚོ་མངོན་དུ་བྱས་ཏེ་ཡེ་ཤེས་རྒྱ་མཚོ་དང་སྐུ་རྒྱ་མཚོས་འཁོར་བའི་རྒྱ་མཚོ་སྐྱེམ་པའི་རྒྱུར་བསྔོའོ། །དགེ་སློང་མི་བསྐྱོད་པས་སོ། །བདག་གི་དུས་གསུམ་གྱི་དགེ་བའི་རྩ་བ་འདི་ལ་བརྟེན་ནས། བདག་གིས་སྐྱེ་བ་ཐམས་ཅད་དུ་བླ་མ་ཆོས་རྗེ་ཀརྨ་པའི་གསུང་མ་ལུས་པ་བསྡུས་ནས་འཛིན་པར་གྱུར་ཅིག །དེས་རང་གཞན་གྱི་ཤེས་རྒྱུད་མྱུར་དུ་སྨིན་པར་གྱུར་ཅིག །སྐྱེ་བ་ཐམས་ཅད་དུ་སྐུ་གསུང་ཐུགས་ཀྱི་
གསང་བའི་གནད་ཐམས་ཅད་ལ་ལྐོག་ཏུ་མ་གྱུར་པ་དཔལ་ཕྱག་ན་རྡོ་རྗེ་ལྟ་བུར་གྱུར་ཅིག །སྐུ་གསུང་ཐུགས་ཀྱི་གསང་བའི་རྣམ་པར་ཐར་པ་ཐམས་ཅད་ཐོས་པ་དང་མཐོང་ཞིང་རྟོགས་པའི་སྣོད་དུ་རུང་བར་གྱུར་ཅིག །སྐྱེ་བ་ཐམས་ཅད་དུ་ལུས་དང་གྲིབ་མ་བཞིན་དུ་སྐད་ཅིག་ཀྱང་མི་འབྲལ་བར་འགྲོགས་པར་གྱུར་ཅིག །མཉེས་པ་རྣམ་པ་ལྔའི་སྒོ་ནས་མཉེས་པ་སྒྲུབ་པར་གྱུར་ཅིག །ཚོགས་གཉིས་ཀྱི་སྤྱོད་པ་རླབས་པོ་ཆེ་ལ་བསླབས་ནས་དགོངས་པ་ཇི་ལྟ་བ་བཞིན་དུ་སྐོང་ནུས་པར་གྱུར་ཅིག །ཞི་རྒྱས་དབང་དྲག་བཞིའི་སྒོ་ནས་བླ་མའི་ཕྲིན་ལས་སྒྲུབ་པ་ལ་སྐད་ཅིག་ཀྱང་མི་གཡེལ་བར་གྱུར་ཅིག །སྒོ་གསུམ་གྱི་སྤྱོད་པ་ཅི་བགྱིད་པ་ཐམས་ཅད་ཀྱིས་བླ་མའི་བཞེད་པ་མཐར་ཕྱིན་པར་གྱུར་ཅིག །ཞབས་ཏོག་དགུ་ཕྲུགས་ཀྱི་སྒོ་ནས་མཉེས་པ་སྒྲུབ་པར་གྱུར་ཅིག །དགེ་སྡིག་ལུང་མ་བསྟན་གྱི་བྱ་བ་ཅི་བྱས་ཀྱང་མཉེས་པ་ཁོ་ན་སྒྲུབ་པར་གྱུར་ཅིག །མི་མཉེས་
པའི་བྱ་བ་སྐད་ཅིག་ཀྱང་མི་སྒྲུབ་པར་གྱུར་ཅིག །ཆོས་རྗེ་བླ་མའི་ཕྲིན་ལས་ཀྱི་གཙོ་བོ་བྱེད་པར་གྱུར་ཅིག །ཆོས་རྗེ་བླ་མའི་བསྟན་པའི་བདག་པོ་བྱེད་པར་གྱུར་ཅིག །ཕྱོགས་བཅུའི་ནད་འཁྲུགས་མུ་གེ་ཐམས་ཅད་ཞི་བར་བྱེད་པར་གྱུར་ཅིག །ནམ་འཆི་བའི་ཚེ་འོད་གསལ་ཕྱག་རྒྱ་ཆེན་པོ་མངོན་དུ་འགྱུར་བར་གྱུར་ཅིག །བར་དོའི་སྣང་བ་མེད་པར་དཔལ་ལྡན་རྡོ་རྗེ་སེམས་དཔའི་དཀྱིལ་འཁོར་དུ་འཇུག་པར་གྱུར་ཅིག །དེར་ཞུགས་ནས་རྡོ་རྗེ་ཐེག་པའི་རྣམ་རོལ་གྱིས་སེམས་ཅན་ཐམས་ཅད་རྡོ་རྗེ་འཆང་ཆེན་པོའི་གོ་འཕང་ལ་འགོད་པར་གྱུར་ཅིག །མདོར་ན་བདག་ཆོས་རྗེ་བླ་མ་ལྟར་མཐོང་གྲོལ་ཐོས་གྲོལ་དྲན་གྲོལ་རིག་གྲོལ་ཆེན་པོར་གྱུར་ཅིག །ངེས་པར་འཆི་བ་སྙིང་ནས་དྲན་པ་དང་། །མོས་གུས་རྣལ་མ་རྒྱུད་ལ་སྐྱེ་བ་ནས། །ཞེན་ལོག་མཐའ་རུ་ཕྱིན་པའི་ངེས་འབྱུང་གིས། །མི་བསྐྱོད་དགའ་བའི་བྱིན་རླབས་འཇུག་གྱུར་ཅིག །རྟག་ཏུ་རང་གིས་ཕེར་ཤ་སྒྲོགས་པ་
དང་། །གཞན་གྱི་མི་ཤེས་མཚང་ནས་འདྲུ་བ་དང་། །བུབ་ཁ་བྱུང་ན་དགའ་བ་སྒོམ་པ་སོགས། །རང་གཞན་སུ་ཡི་རྒྱུད་ལའང་མ་གྱུར་ཅིག །སྐྱེ་བ་ཀུན་ཏུ་ཡོངས་འཛིན་དམ་པ་མཆོག །ཞྭ་ནག་ཅོད་པན་འཛིན་པ་ཁོ་ན་དང་། །ཡི་དམ་སྙིང་པོ་དཔལ་ལྡན་བདེ་བ་མཆོག །འཁོར་ལོ་སྡོམ་པས་རྗེས་སུ་འཛིན་གྱུར་ཅིག །བདག་ནི་སྐྱེ་བ་ཐམས་ཅད་དུ། །བླ་མ་མི་བསྐྱོད་རྡོ་རྗེ་དང་། །ཡི་དམ་རྡོ་རྗེ་རྣལ་འབྱོར་མ། །ཆོས་སྐྱོང་རྡོ་རྗེ་བེར་ཅན་སོགས། །ནམ་ཡང་དབྱེར་མེད་གོ་འཕང་ཤོག །དགེ་འདིས་འགྲོ་བ་མ་ལུས་རྡོ་རྗེ་སེམས། །རྟག་བདེའི་ཐབས་ཤེས་སྦྱོར་བས་འཆི་མེད་ཅིང་། །ནང་གི་ལམ་ནས་རྡོ་རྗེས་འགྲོ་བ་ཡི། །སངས་རྒྱས་ཉིད་ཀྱི་གོ་འཕང་སྩོལ་ཕྱིར་བསྔོ། །ཞེས་པ་འདི་ནི་དགེ་སློང་རྡོ་རྗེ་འཛིན་པ་ཆེན་པོ་མི་བསྐྱོད་རྡོ་རྗེས་སྩལ་བའོ།། །།བདེན་པ་གྲུབ་ཅིང་བདེན་པར་གསུངས་པ་གང་། །མཚུངས་མེད་སྟོན་པ་ཉིད་ཀྱིས་རང་གི་བསྟན། །འཇིག་རྟེན་ཁམས་འདིར་
ཡུན་རིང་འབར་གྱུར་པར། །སྨོན་ལམ་མཛད་པ་དེ་བཞིན་ཆེར་འབར་ཤོག །འོག་མིན་གནས་སུ་སྐུ་ནི་རབ་གྲུབ་ནས། །དགའ་ལྡན་དུ་ནི་རྒྱལ་ཚབ་ས་བཅུའི་མགོན། །མ་འོངས་འཛམ་གླིང་འདི་རུ་སྤྲུལ་པའི་སྐུར། །སྣང་མཛད་དེ་ཡི་སྨོན་ལམ་བདག་འགྲུབ་ཤོག །རྒྱལ་བ་བྱམས་པས་རྒྱལ་ཚབ་ཉིད་མཛད་ནས། །བསྐལ་བཟང་སངས་རྒྱས་དྲུག་པ་ནས་བཟུང་སྟེ། །སྣང་མཛད་བར་གྱི་སྤྲུལ་པའི་རྫུ་འཕྲུལ་སྟོན། །ཀརྨ་པ་ཡི་སྨོན་ལམ་བདག་འགྲུབ་ཤོག །ཅེས་པ་འདི་རྒྱལ་དབང་ཆོས་གྲགས་རྒྱ་མཚོས་ཆོས་གྲྭ་རྩེས་ཐང་དུ་སྩལ་བའོ།། །།དགེ་འདུན་སྡེ་རྒྱས་འཆད་རྩོད་རྩོམ་པ་དང་། །ཐོས་བསམ་སྒོམ་པའི་བྱ་བ་ཀུན་འཕེལ་ཞིང་། །འདུས་པ་མཐུན་དང་ཚེ་རིང་ནད་མེད་སོགས། །འདོད་དགུ་དུ་མས་ཕོངས་པར་མ་གྱུར་ཅིག །འབྱོར་པ་རྣམ་ཐོས་བུས་ཀྱང་འགྲན་མེད་ཅིང་། །བཙུན་ཚུལ་ཉེ་བ་འཁོར་ལྟར་བག་ཡོད་པར། །གཞན་དོན་སྤྱན་རས་གཟིགས་ཀྱི་ཕྲིན་ལས་བཞིན། །ཀརྨ་པ་ཡི་
བསྟན་པ་རྒྱས་བྱེད་ཤོག །ཅེས་པ་འདི་མི་བསྐྱོད་པས་སོ།། །།ཕྱོགས་བཅུའི་ཞིང་དུ་དུས་གསུམ་སངས་རྒྱས་ཀྱི། །ཕྲིན་ལས་མ་ལུས་སྒྲུབ་པའི་ཀརྨ་པ། །ཆོས་གྲགས་རྒྱ་མཚོ་ཞེས་བྱར་གྲགས་དེ་ཡི། །དིང་འདིར་བཀྲ་ཤིས་བདེ་ལེགས་འབྱུང་གྱུར་ཅིག །བདུད་བཞི་ལས་རྒྱལ་རྒྱལ་བའི་ཕྲིན་ལས་པ། །ཀརྨ་པ་བསྟན་བསྟན་པའི་སྙིང་པོ་ནི། །ཕྱོགས་མཐར་ཀུན་ཁྱབ་ཁྱབ་ཅིང་རྒྱུན་མི་འཆད། །རྟག་པར་རབ་འཕེལ་འཕེལ་བའི་བཀྲ་ཤིས་ཤོག །དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམས་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་དེ་བཞིན་དུ་འགྲུབ་པར་གྱུར་ཅིག། །།བཀྲ་ཤིས་དཔལ་འབར་འཛམ་གླིང་རྒྱན། །མངའ་རིས་རྒྱལ་ཁམས་བོད་ཀྱི་ཡུལ། ཁ་བ་ཅན་གྱི་བྱང་ཕྱོགས་སུ། །
ཆོས་སྒྲུབ་བརྒྱུད་ཀྱི་བསྟན་པ་དར་བ་དང་། །འཛམ་གླིང་བདེ་བའི་བཀྲ་ཤིས་ཤོག །འཛམ་བུ་གླིང་བདེ་བར་མཛད་དུ་གསོལ། །དེ་ནས་ཤིས་བརྗོད་ཀྱི་རིམ་པ་ལ་ཆོ་འཕྲུལ་སྨོན་ལམ་སོགས་ཀྱི་དུས་སམ་གཞན་དུའང་རུང་སྟེ། །རྒྱས་པར་བྱེད་ན་བཀྲ་ཤིས་རྫས་བརྒྱད་འབུལ་བ་ནི། མངྒ་ལཾ་སྭ་སྟི་བྷ་ཝནྟུ། དེང་འདིར་འཛམ་བུ་གླིང་ཐམས་ཅད་ཀྱི་རྒྱན། འགྲོ་བ་ཐམས་ཅད་ཀྱི་ཕན་བདེ་ཕུན་སུམ་ཚོགས་པ་ཐམས་ཅད་འབྱུང་བའི་གནས། རྒྱ་བོད་ཧོར་གསུམ་ལ་སོགས་ཐམས་ཅད་ཀྱི་ལུགས་གཉིས་ཀྱི་འདུན་ས། སྐྱེ་བོ་མཆོག་དམན་བར་མ་ཐམས་ཅད་ཀྱི་ཞིང་ས་གཅིག་པུ། མཁས་པ་དང་། གྲུབ་པ་བརྙེས་པ་དང་། ས་སྐྱོང་བའི་རྒྱལ་པོ་རྣམས་ཀྱི་ཡང་སྤྱི་བོའི་རྒྱན་དུ་གྱུར་པའི་སྒར་ཆེན་འདི་ཉིད་དུ། ཡང་དག་པར་རྫོགས་པའི་སངས་རྒྱས་ཀྱིས་ཆོ་འཕྲུལ་ཆེན་པོ་བསྟན་པའི་དུས་ཕུན་སུམ་ཚོགས་པར། ཞེས་སམ་དུས་གང་ཡིན་གྱི་འདོན་པ་སྤོ། རྒྱལ་བ་ཉིད་ཀྱིས་བཀྲ་ཤིས་པའི་རྫས་སུ་བྱིན་གྱིས་བརླབས་པ་རྣམས་ཀྱི་མཐུས་བཀྲ་ཤིས་བརྗོད་པར་བྱ་སྟེ།
སྔོན་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་གསང་བའི་བདག་པོ་ཕྱག་ན་རྡོ་རྗེས་ཡུངས་ཀར་ཕུལ་ནས་བཀྲ་ཤིས་པའི་རྫས་སུ་བྱིན་གྱིས་བརླབ་པར་མཛད་པའི་མཐུ་ལས། དེང་འདིར་སྒར་ཆེན་འདི་ཉིད་དུ་ཡུངས་ཀར་གྱི་རྫས་ཀྱིས་བཀྲ་ཤིས་པར་གྱུར་ཅིག །ཡུངས་ཀར་རྡོ་རྗེའི་རིགས་ཏེ་ཐམས་ཅད་དུ། །བགེགས་རྣམས་མ་ལུས་རབ་ཏུ་འཇོམས་བྱེད་ཅིང་། །མཐུ་སྟོབས་ཡོན་ཏན་ཕུན་སུམ་ཚོགས་གྱུར་པ། །བཀྲ་ཤིས་དེས་ཀྱང་བགེགས་རྣམས་ཞི་བར་ཤོག །སྔོན་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་རྩྭ་འཚོང་གི་བུ་མོ་བཀྲ་ཤིས་ཀྱིས་རྩྭ་དུར་བཱ་ཕུལ་ནས་བཀྲ་ཤིས་པའི་རྫས་སུ་བྱིན་གྱིས་བརླབ་པར་མཛད་པའི་མཐུ་ལས། དེང་འདིར་སྒར་ཆེན་འདི་ཉིད་དུ་དུར་བཱའི་རྫས་ཀྱི་བཀྲ་ཤིས་པར་གྱུར་ཅིག །དུར་བཱས་ཚེ་ནི་འཕེལ་བར་བྱེད་པ་སྟེ། །རྡོ་རྗེ་སེམས་དཔའི་ཚེ་ནི་རབ་བསྒྲུབས་ནས། ཉོན་མོངས་སྐྱེ་འཆི་རྒྱུན་
ཆད་གྱུར་པ་ཡི། །བཀྲ་ཤིས་དེས་ཀྱང་ཚེ་ནི་འཕེལ་གྱུར་ཅིག །སྔོན་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་སའི་ལྷ་མོ་བརྟན་མས་ལི་ཁྲི་ཕུལ་ནས་བཀྲ་ཤིས་པའི་རྫས་སུ་བྱིན་གྱིས་བརླབ་པར་མཛད་པའི་མཐུ་ལས། དེང་འདིར་སྒར་ཆེན་འདི་ཉིད་དུ་ལི་ཁྲིའི་རྫས་ཀྱིས་བཀྲ་ཤིས་པར་གྱུར་ཅིག་ལི་ཁྲི་དམར་པོ་དབང་གི་རང་བཞིན་ཏེ། ཆོས་རྣམས་མ་ལུས་དབང་དུ་འདུས་ནས་ཀྱང་། །ཆོས་ཀྱི་རྒྱལ་སྲིད་རབ་ཏུ་བརྟན་གྱུར་པའི། །བཀྲ་ཤིས་དེས་ཀྱང་རྒྱལ་སྲིད་བརྟན་གྱུར་ཅིག །སྔོན་ཡང་དག་པར་རྫོགས་པའི་སངས་རྒྱས་ཤཱཀྱ ་ཐུབ་པ་ལ་གླང་པོ་ཆེ་ས་སྲུང་གིས་གིའུ་ཝང་ཕུལ་ནས་བཀྲ་ཤིས་པའི་རྫས་སུ་བྱིན་གྱིས་བརླབ་པར་མཛད་པའི་མཐུ་ལས། དེང་འདིར་སྒར་ཆེན་འདི་ཉིད་དུ་གིའུ་ཝང་གི་རྫས་ཀྱི་བཀྲ་ཤིས་པར་གྱུར་ཅིག །གིའུ་ཝང་དུག་གསུམ་འཇོམས་པ་ནད་ཀྱི་སྨན། །སྨན་མཆོག་ཆོས་ཉིད་རབ་ཏུ་རྟོགས་གྱུར་ནས། །ཉོན་མོངས་
ཟུག་རྔུ་མེད་པར་གྱུར་པ་ཡི། །བཀྲ་ཤིས་དེས་ཀྱང་སྡུག་བསྔལ་ཞི་གྱུར་ཅིག །སྔོན་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་གྲོང་པའི་བུ་མོ་ལེགས་སྐྱེས་མས་བ་ཉིས་སྟོང་བཞོས་པའི་ཞོ་ཕུལ་ནས་བཀྲ་ཤིས་པའི་རྫས་སུ་བྱིན་གྱིས་བརླབ་པར་མཛད་པའི་མཐུ་ལས ། དེང་འདིར་སྒར་ཆེན་འདི་ཉིད་དུ་ཡང་ཞོའི་རྫས་ཀྱིས་བཀྲ་ཤིས་པར་གྱུར་ཅིག །ཞོ་ནི་ཀུན་གྱི་སྙིང་པོར་གྱུར་པ་སྟེ། །སྙིང་པོ་རྣམ་དག་ཡེ་ཤེས་མཆོག་རྟོགས་ནས། །ཡོན་ཏན་ཀུན་གྱི་དབྱིངས་སུ་གྱུར་པ་ཡི། །བཀྲ་ཤིས་དེས་ཀྱང་དུག་གསུམ་ཞི་བར་ཤོག །སྔོན་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་གཟུགས་ཀྱི་ལྷ་མོ་འོད་འཆང་མས་མེ་ལོང་ཕུལ་ནས་བཀྲ་ཤིས་པའི་རྫས་སུ་བྱིན་གྱིས་བརླབ་པར་མཛད་པའི་མཐུ་ལས། དེང་འདིར་སྒར་ཆེན་འདི་ཉིད་དུ་ཡང་མེ་ལོང་གི་རྫས་ཀྱིས་བཀྲ་ཤིས་པར་གྱུར་ཅིག །མེ་ལོང་ཡེ་ཤེས་རྒྱ་མཚོ་ཆེན་པོ་ཡིས། །ཡེ་ཤེས་
རྒྱ་མཚོ་མཆོག་ཏུ་དག་གྱུར་ཏེ། །རྣམ་དག་ཆོས་ལ་ཐོགས་མེད་ལོངས་སྤྱོད་པའི། །བཀྲ་ཤིས་དེས་ཀྱང་སྒྲིབ་པ་དག་གྱུར་ཅིག །སྔོན་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཤིང་གི་ལྷ་མོས་ཤིང་ཐོག་བིལ་བ་ཕུལ་ནས། བཀྲ་ཤིས་པའི་རྫས་སུ་བྱིན་གྱིས་བརླབ་པར་མཛད་པའི་མཐུ་ལས། དེང་འདིར་སྒར་ཆེན་འདི་ཉིད་དུ་བིལ་བའི་རྫས་ཀྱིས་བཀྲ་ཤིས་པར་གྱུར་ཅིག །བིལ་བ་རྒྱུ་རྐྱེན་འབྲས་བུར་བཅས་པའི་ཆོས། །འཇིག་རྟེན་འཇིག་རྟེན་འདས་པའི་སྤྱོད་པ་ཀུན། །བྱང་ཆུབ་སྙིང་པོ་མཆོག་ཏུ་གྱུར་པ་ཡི། །བཀྲ་ཤིས་དེས་ཀྱང་དོན་ཀུན་འགྲུབ་གྱུར་ཅིག །སྔོན་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ལྷའི་དབང་པོ་བརྒྱ་བྱིན་གྱིས་དུང་དཀར་པོ་གཡས་སུ་འཁྱིལ་བ་ཕུལ་ནས་བཀྲ་ཤིས་པའི་རྫས་སུ་བྱིན་གྱིས་བརླབ་པར་མཛད་པའི་མཐུ་ལས། དེང་འདིར་སྒར་ཆེན་འདི་ཉིད་དུ་དུང་དཀར་གྱི་རྫས་ཀྱིས་བཀྲ་ཤིས་པར་གྱུར་ཅིག །
དུང་ནི་ཆོས་ཀྱི་སྒྲ་རྣམས་སྒྲོག་པའི་ཚུལ། །ཡེ་ཤེས་རྒྱ་མཚོ་ཉིད་དུ་དག་གྱུར་ཏེ། །ཆོས་རྣམས་མ་ལུས་ཡོངས་སུ་སྟོན་པ་ཡི། །བཀྲ་ཤིས་དེས་ཀྱང་ཚིག་དབང་ཐོབ་པར་ཤོག །བཀྲ་ཤིས་རྟགས་བརྒྱད་འབུལ་བ་ནི། གདུགས་ཐོགས་ལ། བཀྲ་ཤིས་གང་ཞིག་མཆོད་པའི་ལྷ་མོ་ནི། །ཕྱག་ན་གདུགས་བཟང་གསེར་གྱི་ཡུ་བ་ཅན། །ཐོགས་ནས་རྒྱལ་བའི་དབུ་ལ་མཆོད་པ་ལྟར། །དབུ་ལ་གདུགས་གྱི་བཀྲ་ཤིས་ཐོབ་པར་ཤོག །གསེར་ཉ་ཐོགས་ལ། །བཀྲ་ཤིས་གང་ཞིག་མཆོད་པའི་ལྷ་མོ་ནི། །ཕྱག་ན་གསེར་གྱི་ཉ་མོ་འོད་འབར་བ། །ཐོགས་ནས་རྒྱལ་བའི་སྤྱན་ལ་མཆོད་པ་ལྟར། །སྤྱན་ལ་གསེར་ཉའི་བཀྲ་ཤིས་ཐོབ་པར་ཤོག །པདྨ་ཐོགས་ལ། བཀྲ་ཤིས་གང་ཞིག་མཆོད་པའི་ལྷ་མོ་ནི། ཕྱག་ན་པདྨོ་དམར་པོ་འདབ་བརྒྱད་པ། །ཐོགས་ནས་རྒྱལ་བའི་ལྗགས་ལ་མཆོད་པ་ལྟར། །ལྗགས་ལ་པདྨའི་བཀྲ་ཤིས་ཐོབ་པར་ཤོག །བུམ་པ་ཐོགས་ལ། བཀྲ་ཤིས་གང་ཞིག་མཆོད་པའི་ལྷ་མོ་ནི། །
ཕྱག་ན་རིན་ཆེན་བུམ་པ་རབ་མཛེས་པ། །ཐོགས་ནས་རྒྱལ་བའི་མགུལ་ལ་མཆོད་པ་ལྟར། །མགུལ་ལ་བུམ་པའི་བཀྲ་ཤིས་ཐོབ་པར་ཤོག །དཔལ་བེའུ་ཐོགས་ལ། བཀྲ་ཤིས་གང་ཞིག་མཆོད་པའི་ལྷ་མོ་ནི། །ཕྱག་ན་དཔལ་གྱི་བེའུ་རབ་འབར་བ། །ཐོགས་ནས་རྒྱལ་བའི་ཐུགས་ལ་མཆོད་པ་ལྟར། །ཐུགས་ལ་དཔལ་བེའུའི་བཀྲ་ཤིས་ཐོབ་པར་ཤོག །རྒྱལ་མཚན་ཐོགས་ལ། བཀྲ་ཤིས་གང་ཞིག་མཆོད་པའི་ལྷ་མོ་ནི། །ཕྱག་ན་རིན་ཆེན་རྒྱལ་མཚན་རབ་མཛེས་པ། །ཐོགས་ནས་རྒྱལ་བའི་སྐུ་ལ་མཆོད་པ་ལྟར། །སྐུ་ལ་རྒྱལ་མཚན་བཀྲ་ཤིས་ཐོབ་པར་ཤོག །དུང་དཀར་ཐོགས་ལ། བཀྲ་ཤིས་གང་ཞིག་མཆོད་པའི་ལྷ་མོ་ནི། །ཕྱག་ན་ཆོས་ཀྱི་དུང་སྒྲ་སྒྲོག་མཛད་པ། །ཐོགས་ནས་རྒྱལ་བའི་གསུང་ལ་མཆོད་པ་ལྟར། །གསུང་ལ་དུང་གི་བཀྲ་ཤིས་ཐོབ་པར་ཤོག །འཁོར་ལོ་ཐོགས་ལ། བཀྲ་ཤིས་གང་ཞིག་མཆོད་པའི་ལྷ་མོ་ནི། །ཕྱག་ན་གསེར་གྱི་འཁོར་ལོ་རྩིབས་བརྒྱད་པ། །ཐོགས་ནས་རྒྱལ་བའི་
ཞབས་ལ་མཆོད་པ་ལྟར། །ཞབས་ལ་འཁོར་ལོའི་བཀྲ་ཤིས་ཐོབ་པར་ཤོག །རྒྱལ་སྲིད་སྣ་བདུན་འབུལ་བ་ནི། འཁོར་ལོ་ལག་ཏུ་ཐོགས་ལ། ལྷ་རྫས་ལས་བྱས་ལྟེ་བ་ཤིན་ཏུ་ཟླུམ། །རྩིབས་སྟོང་ལྡན་ཞིང་མུ་ཁྱུད་རབ་མཉམ་བཟང་། །སྡང་བའི་དགྲ་ལས་རྣམ་པར་རྒྱལ་གྱུར་པའི། །འཁོར་ལོ་རིན་ཆེན་དེང་འདིར་བཀྲ་ཤིས་ཤོག །བདུད་ཐམས་ཅད་ལས་རྒྱལ་བའི་ཆོས་ཀྱི་འཁོར་ལོ་ནམ་མཁའི་མཐས་གཏུགས་པར་བསྐོར་ནུས་པའི་དབང་དང་ལྡན་པར་གྱུར་ཅིག །ནོར་བུ་རིན་ཆེན་ཐོགས་ཏེ། རིན་ཆེན་ངོ་བོ་ལྷ་རྫས་བཻ་ཌཱུརྱ། །ཀུན་ཏུ་དཔག་ཚད་ཙམ་དུ་སྣང་བྱེད་ཅིང་། །དྲི་མེད་ཉིན་མོ་ཇི་བཞིན་མཚན་དེ་བཞིན། །ནོར་བུ་རིན་ཆེན་དེང་འདིར་བཀྲ་ཤིས་ཤོག །ཚེ་དཔག་ཏུ་མེད་པའི་འོད་དང་ལྡན་ཞིང་ལྷ་དང་བཅས་པའི་འཇིག་རྟེན་པ་ཐམས་ཅད་རང་རང་གི་གཟི་བརྗིད་ཀྱིས་ཟིལ་གྱིས་ནོན་པའི་དབང་དང་ལྡན་པར་གྱུར་ཅིག །བཙུན་མོ་རིན་ཆེན་ཐོགས་ཏེ། གཟུགས་མཛེས་བསྟ་ན་
སྡུག་ཅིང་ཚུལ་བཟང་བ། །པགས་པའི་མདོག་ལེགས་འཇམ་ཞིང་དྲི་མཆོག་ལྡན། །ཡིད་འོང་འདོད་དགུའི་རེག་བྱ་དང་ལྡན་པ། །བཙུན་མོ་རིན་ཆེན་དེང་འདིར་བཀྲ་ཤིས་ཤོག །སེམས་ཅན་ཐམས་ཅད་ཏིང་ངེ་འཛིན་ཞི་བའི་ཚུལ་གྱིས་འཇིག་རྟེན་ལས་འདས་པའི་བདག་དང་གཞན་གྱི་དོན་བདེ་བས་སྒྲུབ་པ་ལ་ཡིད་བཞིན་དུ་འབྱོར་བའི་དབང་དང་ལྡན་པར་གྱུར་ཅིག །བློན་པོ་རིན་ཆེན་ཐོགས་ཏེ། གང་ཡང་རྒྱལ་བའི་མུ་ཏིག་མདངས་ལྡན་པ། །གསེར་སོགས་མང་པོ་ཐུབ་ལ་ཕུལ་བ་ལྟར་། །བཟོད་ལྡན་མཚུངས་པའི་ཁྱིམ་བདག་ནོར་ལྡན་ཏེ། །བློན་པོ་རིན་ཆེན་དེང་འདིར་བཀྲ་ཤིས་ཤོག །ལྷའི་མིག་རྣམ་པར་དག་པ་ཐོབ་སྟེ། འཕགས་པའི་ནོར་བདུན་དང་ལྡན་ཞིང་རང་དང་གཞན་གྱི་དོན་དགོངས་པ་མ་ལུས་པ་མཐར་ཕྱིན་ནས་ཤེས་བྱ་ཐམས་ཅད་ལ་ཐོགས་པ་མེད་པའི་དབང་དང་ལྡན་པར་གྱུར་ཅིག །གླང་པོ་རིན་ཆེན་ཐོགས་ཏེ། ཡན་ལག་ཐམས་ཅད་ལེགས་སྐྱེས་ས་ལ་ནི། །རབ་
གནས་རི་འདྲ་གངས་ཆེན་གླང་པོ་ཆེ། །རྒྱལ་པོ་ལ་འོས་མཁའ་ལ་རབ་འགྲོ་བའི། །གླང་པོ་རིན་ཆེན་དེང་འདིར་བཀྲ་ཤིས་ཤོག །སྟོབས་བཅུ་དང་ལྡན་ཞིང་བདུད་བཞིའི་སྟོབས་ཚར་བཅད་ནས་སེམས་ཅན་ཐམས་ཅད་ཐེག་པ་ཆེན་པོ་ལ་འཇུག་ནུས་པའི་དབང་དང་ལྡན་པར་གྱུར་ཅིག །རྟ་མཆོག་རིན་ཆེན་ཐོགས་ཏེ། ཐོ་རངས་དུས་སུ་ཕྱོགས་རྣམས་མ་ལུས་པའི། །ས་རྣམས་བསྐོར་ཏེ་སླར་ཡང་བཟློག་གྱུར་པ། །རྨ་བྱའི་མགྲིན་པའི་སྤུ་ལྟར་ཡིད་འོང་བའི། །རྟ་མཆོག་རིན་ཆེན་དེང་འདིར་བཀྲ་ཤིས་ཤོག །སོ་སོ་ཡང་དག་པར་རིག་པ་བཞིས་འགྲོ་བ་རྣམས་མི་གནས་པའི་མྱ་ངན་ལས་འདས་པའི་དབྱིངས་སུ་ཐོགས་པ་མེད་པར་སྐྱལ་ནུས་པའི་དབང་དང་ལྡན་པར་གྱུར་ཅིག །དམག་དཔོན་རིན་ཆེན་ཐོགས་ཏེ། འགྲོ་དང་ལྡོག་དང་ཀུན་ནས་འོང་གྱུར་པ། །མ་ལུས་བདུད་དཔུང་འཇོམས་པར་བྱེད་པ་ཡི། །དཔལ་ལྡན་འབྱོར་བའི་དཔུང་ཚོགས་དང་བཅས་པ། །
དམག་དཔོན་རིན་ཆེན་དེང་འདིར་བཀྲ་ཤིས་ཤོག །ཐབས་དང་ཤེས་རབ་གཉིས་སུ་མེད་པའི་དགོངས་པ་མཐར་ཕྱིན་ནས། འཇིག་ཚོགས་ལ་ལྟ་བའི་རི་བོ་མཐོན་པོ་ཉི་ཤུ་འཇོམས་ཤིང་ཡེ་ཤེས་ཕུན་སུམ་ཚོགས་པའི་དབང་དང་ལྡན་པར་གྱུར་ཅིག །།བཀྲ་ཤིས་ཀྱི་དང་པོ་བཀྲ་ཤིས་པ། །སངས་རྒྱས་འཇིག་རྟེན་དུ་བྱོན་པ་ཡིན། །བཀྲ་ཤིས་དེ་ཡིས་བཀྲ་ཤིས་ཤོག །བདེ་སྐྱིད་ཕུན་སུམ་ཚོགས་པར་ཤོག །བཀྲ་ཤིས་ཀྱི་གཉིས་པ་བཀྲ་ཤིས་པ། །དམ་ཆོས་འཁོར་ལོ་བསྐོར་བ་ཡིན། །བཀྲ་ཤིས་དེ་ཡིས་བཀྲ་ཤིས་ཤོག །བདེ་སྐྱིད་ཕུན་སུམ་ཚོགས་པར་ཤོག །བཀྲ་ཤིས་ཀྱི་གསུམ་པ་བཀྲ་ཤིས་པ། །ཞིང་མཆོག་དགེ་འདུན་ཚོགས་རྣམས་ཡིན། །བཀྲ་ཤིས་དེ་ཡིས་བཀྲ་ཤིས་ཤོག །བདེ་སྐྱིད་ཕུན་སུམ་ཚོགས་པར་ཤོག །བཀྲ་ཤིས་ཀུན་གྱི་བཀྲ་ཤིས་པ། །བཀའ་རྒྱུད་ངོ་མཚར་ཅན་རྣམས་ཡིན། །བཀྲ་ཤིས་དེ་ཡིས་བཀྲ་ཤིས་ཤོག །བདེ་སྐྱིད་ཕུན་སུམ་ཚོགས་པར་ཤོག །
གཟུགས་མེད་གཟུགས་ཀྱི་ཁམས་ཀྱི་ལྷ། །བསམ་གཏན་ནང་གི་དགའ་བདེར་ལྡན། །དེ་བཞིན་བདག་ཅག་བདེ་སྐྱིད་ཤོག །བཀྲ་ཤིས་དེ་ཡིས་བཀྲ་ཤིས་ཤོག །བདེ་སྐྱིད་ཕུན་སུམ་ཚོགས་པར་ཤོག །འདོད་ཁམས་འདོད་ལྷ་རིགས་དྲུག་རྣམས། །འདོད་ཡོན་སྣ་ཚོགས་རྣམས་ཀྱིས་རྩེ། །རྟག་ཏུ་དགའ་དང་བདེ་བར་ལྡན། །དེ་བཞིན་བདག་ཅག་བདེ་སྐྱིད་ཤོག །མེ་མཆོག་འཁོར་ལོས་སྒྱུར་རྒྱལ་ནི། །རྒྱལ་སྲིད་བདུན་ལ་སོགས་པ་ཡིས། གླིང་བཞིར་ཕུན་སུམ་ཚོགས་པ་ལ། །རྟག་ཏུ་བདེ་ཞིང་སྐྱིད་པར་ཤོག །དེ་བཞིན་བདག་ཅག་བདེ་སྐྱིད་ཤོག །བཀྲ་ཤིས་དེ་ཡིས་བཀྲ་ཤིས་ཤོག །བདེ་སྐྱིད་ཕུན་སུམ་ཚོགས་པར་ཤོག །སྒར་ཆེན་འཛམ་གླིང་རྒྱན་འདིར་ནི། །ཆོས་རྒྱལ་སྐུ་ཚེ་བརྟན་པར་ཤོག །བསྟན་པ་ཕྱོགས་བཅུར་ཁྱབ་པར་ཤོག །ཕྲིན་ལས་ཐམས་ཅད་འགྲུབ་པར་ཤོག །མང་པོས་བཀུར་བ་ཤཱཀྱའི་རྒྱལ་པོའི་རིགས། །རྒྱལ་བས་ལུང་བསྟན་
བོད་ཀྱི་ཆོས་ཀྱི་རྒྱལ། །མེས་དབོན་རྣམ་གསུམ་སོགས་ཀྱིས་རྒྱལ་བའི་བསྟན། །བོད་དུ་སྤྱན་དྲངས་རྒྱལ་སྲིད་གཉིས་བསྐྱངས་པའི། །བདེན་པ་ཆེན་པོས་དེང་འདིར་བཀྲ་ཤིས་ཤོག །རྒྱ་གར་རྒྱལ་པོའི་རྒྱལ་སྲིད་དང་། རྒྱ་ནག་རྒྱལ་པོའི་དཔལ་འབྱོར་དང་། །ཧོར་གྱི་རྒྱལ་པོའི་མཐུ་སྟོབས་སོགས། །འཛམ་གླིང་ཀུན་གྱི་ཕུན་ཚོགས་བཅུད། །ཐམས་ཅད་སྒར་འདིར་འདུ་བར་ཤོག །བདེ་སྐྱིད་ཕུན་སུམ་ཚོགས་པར་ཤོག །བཀྲ་ཤིས་དེ་ཡིས་བཀྲ་ཤིས་ཤོག །སྒར་ཆེན་འཛམ་གླིང་ཀུན་གྱི་རྒྱན་འདིར་ནི། །བདག་ཅག་བསམ་པ་ཡིད་བཞིན་འགྲུབ་པར་ཤོག །བདེ་སྐྱིད་ཕུན་སུམ་ཚོགས་པར་ཤོག །བཀྲ་ཤིས་དེ་ཡིས་བཀྲ་ཤིས་ཤོག །བདེ་སྐྱིད་ཕུན་སུམ་ཚོགས་པར་ཤོག །ཡུལ་དང་སྐད་རིགས་མི་གཅིག་པ། །མི་རིགས་རྣམ་པ་སྣ་ཚོགས་པ། །བདེ་སྐྱིད་ཡང་ཡང་འདིར་འཚོག་ཤོག །བཀྲ་ཤིས་དེ་ཡིས་བཀྲ་ཤིས་ཤོག །བདེ་སྐྱིད་ཕུན་སུམ་ཚོགས་པར་ཤོག །
འཕྲལ་སྐྱིད་པ་འཇིག་རྟེན་མི་ཡི་ཆོས། །དགའ་བདེ་སྨོན་བཞིན་ཐོབ་པར་ཤོག །ཕུགས་སྐྱིད་པ་དམ་པའི་ལྷ་ཆོས་ལ། །དུས་རྟག་ཏུ་འབྲལ་མེད་འབྱོར་པར་ཤོག །བཀྲ་ཤིས་ཀྱི་རབ་མ་འཛམ་གླིང་རྒྱན། །འཛམ་གླིང་རྒྱན་གྱི་བཀྲ་ཤིས་ཤོག །བསམ་པ་ཡིད་བཞིན་འགྲུབ་པར་ཤོག །བདེ་སྐྱིད་ཕུན་སུམ་ཚོགས་པར་ཤོག །ཅེས་བྱང་ཆུབ་ཀྱི་སེམས་རིན་པོ་ཆེ་སྙིང་གི་དཀྱིལ་དུ་མི་འབྲལ་བར་འཛིན་པ་ཀརྨ་པ་ཆོས་གྲགས་རྒྱ་མཚོས་སྦྱར་བའོ།། །། རྡོ་རྗེ་འཆང་ཆེན་ཏཻ་ལོ་ནཱ་རོ་དང་། །མར་པ་མི་ལ་རྗེ་བཙུན་སྒམ་པོ་པ། །དུས་གསུམ་མཁྱེན་པ་སངས་རྒྱས་རས་ཆེན་དང་། །རྒྱལ་བ་སྤོམ་བྲག་གྲུབ་ཆེན་ཀརྨ་པ། །ཨུ་རྒྱན་པ་དང་རང་བྱུང་རྒྱལ་བ་གཡུང་། །རོལ་པའི་རྡོ་རྗེ་རྟོགས་ལྡན་མཁའ་སྤྱོད་དབང་། །དེ་བཞིན་གཤེགས་པ་རིན་ཆེན་བཟང་པོ་དང་། །མཐོང་བ་དོན་ལྡན་ཀུན་མཁྱེན་འཇམ་དཔལ་བཟང་། །དཔལ་འབྱོར་དོན་གྲུབ་མི་ཕམ་མགོན་པོ་དང་། །སངས་རྒྱས་མཉན་པ་མི་
བསྐྱོད་དགའ་བའི་དབྱངས། །དཀོན་མཆོག་ཡན་ལག་དབང་ཕྱུག་རྡོ་རྗེ་དང་། །ཆོས་ཀྱི་དབང་ཕྱུག་ཆོས་དབྱིངས་རྡོ་རྗེ་དང་། །ཡེ་ཤེས་སྙིང་པོ་ཡེ་ཤེས་རྡོ་རྗེའི་ཞབས། །ཆོས་ཀྱི་དོན་གྲུབ་བྱང་ཆུབ་རྡོ་རྗེ་དང་། །ཆོས་ཀྱི་འབྱུང་གནས་བདུད་འདུལ་རྡོ་རྗེའི་ཞབས། །དཔལ་ལྡན་མི་ཕམ་ཆོས་གྲུབ་རྒྱ་མཚོ་དང་། །པདྨ་ཉིན་བྱེད་ཐེག་མཆོག་རྡོ་རྗེ་དང་། །བློ་གྲོས་མཐའ་ཡས་མཁའ་ཁྱབ་རྡོ་རྗེའི་ཞབས། །པདྨ་དབང་མཆོག་མཁྱེན་བརྩེའི་འོད་ཟེར་ཞབས། །ཁྱབ་བདག་རང་བྱུང་རིག་པའི་རྡོ་རྗེ་སོགས། །རྗེ་བཙུན་བླ་མ་རྣམས་ཀྱི་བཀྲ་ཤིས་ཤོག །འཁོར་ལོ་བདེ་མཆོག་དགྱེས་པ་རྡོ་རྗེ་དང་། །བདག་མེད་མ་དང་རྡོ་རྗེ་རྣལ་འབྱོར་མ། །ཡི་དམ་ལྷ་ཚོགས་རྣམས་ཀྱི་བཀྲ་ཤིས་ཤོག །བེར་ནག་ཅན་དང་མགོན་པོ་ཕྱག་བཞི་པ། །རང་བྱུང་རྒྱལ་མོ་དུད་སོལ་ལྷ་མོ་སོགས། །ཆོས་སྐྱོང་སྲུང་མ་རྣམས་ཀྱི་བཀྲ་ཤིས་ཤོག །ཅེས་དབྱངས་ཅན་བཟང་པོས་སོ། །དུས་གསུམ་སངས་རྒྱས་སྐུ་གསུང་
ཐུགས། །དཔའ་བོ་དགྱེས་མཛད་བདུད་དཔུང་འཇོམས། །སྒེག་པའི་ཉམས་ལྡན་ཅོད་པན་འཛིན། །རྡོ་རྗེ་འཆང་གི་བཀྲ་ཤིས་ཤོག །བཀའ་བཞི་བརྒྱུད་པས་བྱིན་བརླབས་ཤིང་། །དག་སྣང་རྡོ་རྗེ་འཆང་དང་མཇལ། །འཁོར་ལོ་བདེ་མཆོག་རྣལ་འབྱོར་པ། །ཏཻ་ལོ་པ་ཡི༴ གནས་ལྔ་མཐར་ཕྱིན་པཎྜི་ཏ། །ཕག་མོས་ལུང་བསྟན་རྗེ་དང་མཇལ། །བཅུ་གཉིས་དཀའ་སྤྱད་དངོས་གྲུབ་བརྙེས། །ནཱ་རོ་པ་ཡི༴ ཟབ་མོ་སྔགས་ཀྱི་ཆར་རྒྱུན་འབབས། །འཇམ་དབྱངས་སྤྲུལ་པས་འགྲོ་བ་འདྲེན། །སྐྱེས་མཆོག་འཕོ་བ་གྲོང་འཇུག་མཛད། །ལྷོ་བྲག་པ་ཡི༴ སྙན་རྒྱུད་བདུད་རྩིའི་བཅུད་འཐུང་ཞིང་། །རི་དྭགས་རྒྱལ་པོ་སེང་གེ་ལྟར། །གངས་དཀར་རྩེ་ལ་འགྲན་ཟླ་མེད། །མི་ལ་མཆོག་གི༴ གསེར་མདོག་ཅན་གྱིས་ལུང་བསྟན་ཞིང་། །རྒྱལ་སྲས་མཆོག་ཏུ་དབང་བསྐུར་བ། །སྙིང་པོ་དོན་གྱི་རྗེ་བཙུན་མཆོག །སྒམ་པོ་པ་ཡི༴ སྦྱངས་སྟོབས་དཔག་ཏུ་མེད་པ་ཡིས། །
རླུང་སེམས་དབང་ཐོབ་རྫུ་འཕྲུལ་ཅན། །དགོངས་པ་རྒྱལ་བ་རྣམས་དང་མཉམ། །དུས་གསུམ་མཁྱེན་པའི༴ རང་བྱུང་ཡེ་ཤེས་ཐམས་ཅད་མཁྱེན། །རྒྱལ་བས་གསུངས་པའི་མདོ་རྒྱུད་ལ། །མཁྱེན་པ་གཉིས་ལྡན་ཆོས་ཀྱི་རྗེ། རས་ཆེན་པ་ཡི༴ གནས་ལུགས་རྒྱ་མཚོ་ལྷུན་གྱིས་གྲུབ། །དངོས་གྲུབ་རྣམ་གཉིས་རིན་ཆེན་མཛོད། །བདག་གཞན་ཡོངས་ཀྱི་དབུལ་བ་སེལ། །རྒྱལ་སྲས་མཆོག་གི༴ དག་པ་ལྷ་ཡིས་ལུང་བསྟན་ཅིང་། །རྩོད་ལྡན་བསྟན་པའི་སྙིགས་མ་འདིར། །འགྲོ་བ་འདྲེན་མཛད་བཀའ་དྲིན་ཅན། །ཀརྨ་པ་ཡི༴ ཨོ་རྒྱན་གནས་སུ་རབ་གཤེགས་ཤིང་། །བརྟུལ་ཞུགས་སྤྱོད་པའི་རྣལ་འབྱོར་མཆོག །ཟབ་མོ་སྔགས་ཀྱིས་འགྲོ་དོན་མཛད། ཨོ་རྒྱན་པ་ཡི༴ ཡོན་ཏན་ཀུན་གྱི་གཏེར་གྱུར་པའི། །བྱང་ཕྱོགས་ཁ་བ་ཅན་ལྗོངས་སུ། །རྒྱལ་བའི་མཛད་པ་སྟོན་མཛད་པ། །རང་བྱུང་པ་ཡི༴ སྦྱངས་པའི་ཡོན་ཏན་དཔག་མེད་ཅིང་། །རྫུ་འཕྲུལ་དབང་ཐོབ་འགྲན་ཟླ་
མེད། །དངོས་གྲུབ་དཔག་ཏུ་མེད་པ་བརྙེས། །གཡུང་སྟོན་པ་ཡི༴ སྙིགས་དུས་འགྲོ་ལ་ཐུགས་རྗེ་ཡི། །མཐུ་སྟོབས་རྣམ་ཐར་དཔག་མེད་ཅིང་། །མཁྱེན་གཉིས་མཐར་ཕྱིན་ཆོས་ཀྱི་རྗེ། །འཛམ་གླིང་པ་ཡི༴ སྔོན་གྱི་སྐྱེ་བ་དཔག་མེད་གྱི། །དོན་གཉིས་མཛད་པ་རབ་རྫོགས་ཤིང་། །སྒྲུབ་རྒྱུད་བསྟན་པའི་དཔལ་གྱུར་པ། །མཁའ་སྤྱོད་པ་ཡི༴ སྟོང་ཉིད་སྙིང་རྗེ་དབྱེར་མེད་ཅིང་། །ལྷར་བཅས་འཇིག་རྟེན་གསུམ་གྱི་མགོན། །ཐུགས་རྗེ་ཆེན་པོའི་སྤྱན་ཡངས་པ། །དེ་བཞིན་གཤེགས་པའི༴ རྒྱལ་བའི་གསུང་རབ་མཐའ་ཡས་ལ། །མཁྱེན་པའི་དཀྱིལ་འཁོར་རབ་རྒྱས་ཤིང་། །གདུལ་བྱའི་བློ་མུན་སེལ་མཛད་པ། །རཏྣ་བྷ་དྲའི༴ ཡེ་ཤེས་དབྱིངས་ཀྱི་དཀྱིལ་འཁོར་དུ། །མཐོང་ཐོས་དྲན་རེག་བདེ་ལ་བཀོད། །འགྲོ་བ་འདྲེན་མཛད་ཆོས་ཀྱི་རྗེ། །མཐོང་བ་དོན་ལྡན༴ ཟག་མེད་བདེ་བ་ཆེན་པོའི་སྐུ། །སྐུ་བཞིའི་ངོ་བོ་རྡོ་རྗེ་འཆང་། །སྲིད་ཞིའི་དབང་ཕྱུག་རྗེ་བཙུན་
མཆོག །འཇམ་དཔལ་བཟང་པོའི༴ དུས་གསུམ་སངས་རྒྱས་ཀུན་གྱི་དངོས། །ཐམས་ཅད་མཁྱེན་པའི་སྤྱན་སྟོང་མངའ། །རྩོད་ལྡན་འགྲོ་ལ་ལྷག་བརྩེ་བའི། །རྗེ་བཙུན་མཆོག་གི༴ སྣ་ཚོགས་གདུལ་བྱ་དང་འཚམ་པར། །སྐུ་གསུང་ཐུགས་ཀྱི་རྫུ་འཕྲུལ་གྱིས། །དངོས་འཛིན་འཆིང་བ་ཀུན་སེལ་བ། །ཆོས་གྲགས་རྒྱ་མཚོའི༴ བཀའ་བརྒྱུད་རྣམ་ཐར་རྨ་མེད་པ། །བརྩོན་པ་ཆེན་པོས་ལེགས་བཟུང་སྟེ། །ཟབ་དོན་རྟོགས་པའི་རྣལ་འབྱོར་པ། །སངས་རྒྱས་མཉན་པའི༴ གསུང་རབ་རིག་གནས་ཚིག་དོན་རྣམས། །བསྒྲིབས་མེད་གསལ་བར་ཐུགས་ཆུད་དེ། །དྲང་ངེས་སོ་སོར་འབྱེད་མཁས་པ། །མི་བསྐྱོད་རྡོ་རྗེའི༴ འདས་དང་མ་བྱོན་ད་ལྟར་དུ། །འཇིག་རྟེན་སྤྱོད་པའི་ཚུལ་འདས་ཤིང་། །བྱང་ཆེན་སྤྱོད་པས་འགྲོ་དོན་མཛད། །དཀོན་མཆོག་ཡན་ལག༴ རྒྱལ་བའི་ཕྲིན་ལས་རབ་འབྱམས་རྣམས། །བསྒྲུབ་པར་མངོན་པར་དབང་བསྐུར་ཏེ། །འགྲོ་དོན་བསམ་གྱིས་
མི་ཁྱབ་པའི། །དབང་ཕྱུག་རྡོ་རྗེའི༴ རྡོ་རྗེ་འཛིན་པའི་ས་བརྙེས་ཤིང་། །བསམས་བཞིན་སྲིད་པར་སྐུ་སྤྲུལ་ནས། །སྒྲུབ་བརྒྱུད་བསྟན་པ་སྤེལ་མཛད་པའི། །ཆོས་ཀྱི་དབང་ཕྱུག༴ འདས་དང་མ་བྱོན་ད་ལྟར་གྱི། །སངས་རྒྱས་ཀུན་གྱི་སྐུ་གསུང་ཐུགས། །དབྱེར་མེད་གཅིག་བསྡུས་རྡོ་རྗེ་འཛིན། །ཆོས་དབྱིངས་རྡོ་རྗེའི༴ རིགས་ཀུན་ཁྱབ་བདག་གར་གྱི་དབང་། །འཁོར་བ་ཇི་སྲིད་གནས་ཀྱི་བར། །དེ་སྲིད་ཕན་བདེའི་ཕྲིན་ལས་ཅན། །ཡེ་ཤེས་སྙིང་པོའི༴ སྒྲིབ་མེད་ཐུགས་རྗེའི་སྤྱན་ཡངས་པ། །འགྲོ་མ་དུས་དྲུག་གཟིགས་པ་ཡི། །འཁོར་བའི་འཇིགས་ལས་ངེས་གྲོལ་བ། །ཡེ་ཤེས་རྡོ་རྗེའི༴ རྒྱལ་བ་མཆོག་གི་བསྟན་པ་མཆོག །ཞིང་འདིར་སྤེལ་མཁས་ཆོས་ཀྱི་རྗེ། །གར་གྱི་དབང་ཕྱུག་བརྒྱད་པ་མཆོག །ཆོས་ཀྱི་དོན་གྲུབ༴ དཔག་མེད་རྒྱལ་བ་སྲས་བཅས་ཀྱི། །མཁྱེན་བརྩེ་ནུས་པ་གཅིག་བསྡུས་པ། །རྣམ་རོལ་རྡོ་རྗེའི་ལམ་མཁན་མཆོག །བྱང་
ཆུབ་རྡོ་རྗེའི༴ མཁྱེན་རབ་སྣང་བྱེད་ཆེན་པོ་ཡིས། །ཤེས་བྱའི་ཀུན་གསལ་རབ་བགྲོད་ནས། །འགྲོ་བའི་མ་རིག་མུན་སེལ་བ། །ཆོས་ཀྱི་འབྱུང་གནས༴ བཀའ་བརྒྱུད་ནོར་བུའི་ཕྲེང་མཛེས་ཀྱི། །མཆོད་སྡོང་རྩེ་མོར་བདུད་ཚོགས་ཀུན། །འདུལ་བའི་རྡོ་རྗེའི་ཏོག་ཆེན་པོ། །འགྱུར་བ་མེད་པའི༴ ཐབས་མཁས་ཕྲིན་ལས་རྒྱུན་བཟང་པོས། །འགྲོ་ཀུན་རྣམ་གྲོལ་རྒྱ་མཚོ་ཆེར། །ལམ་སྟོན་ཐུགས་རྗེའི་བདག་ཉིད་ཅན། །ཆོས་གྲུབ་རྒྱ་མཚོའི༴ མཚོ་སྐྱེས་མ་ཧཱ་གུ་རུ་ཡིས། །པདྨའི་མཚན་ཏུ་ལུང་བསྟན་ཅིང་། །ངེས་དོན་སྙིང་པོའི་སྲོག་འཛིན་པ། །པདྨ་ཉིན་བྱེད་བཀྲ་ཤིས་ཤོག །རྟག་བརྟན་ཞི་བ་གཡུང་དྲུང་དོན། །མངོན་གྱུར་རྡོ་རྗེའི་སྙིང་པོར་བཞུགས། །རྟག་ཅིང་ཁྱབ་པའི་ཕྲིན་ལས་ཅན། །ཐེག་མཆོག་རྡོ་རྗེའི༴ ཤཀྱ་སེང་གེས་ལུང་བསྟན་ཅིང་། །ཐེག་དགུའི་བསྟན་པའི་སྲོག་འཛིན་མགོན། །འགྲོ་བའི་ཉི་མ་འཛམ་གླིང་རྒྱན། །ཡོན་ཏན་རྒྱ་མཚོའི༴ གདོད་ནས་ཡོངས་
གྲུབ་ཆོས་ཀྱི་དབྱིངས། །ངེས་པ་ལྔ་ལྡན་ལོངས་སྤྱོད་རྫོགས། །ཐུགས་རྗེའི་ཐབས་ཀྱིས་འགྲོ་མང་སྒྲོལ། །མཁའ་ཁྱབ་རྡོ་རྗེའི༴ དཔལ་ལྡན་འགྱུར་མེད་སྙིང་པོའི་རྩལ། །ཀུན་བརྟག་ཕྱོགས་ལས་རྣམ་པར་གྲོལ། །རྒྱལ་བསྟན་གསལ་བའི་ཉི་མ་ཆེ། །པདྨ་དབང་མཆོག༴ འགྱུར་མེད་རྟག་པ་སྙིང་པོའི་རྩལ། །གཉུག་སེམས་ཕྱོགས་ལས་རྣམ་པར་གྲོལ། །ཉིན་གཉེན་བསྟན་པའི་མེས་པོ་ཆེ། །མཁྱེན་བརྩེའི་འོད་ཟེར༴ ཆོས་སྐུ་སྐྱེ་འགགས་མེད་པའི་དབྱིངས། །ལོངས་སྐུ་དཀྱིལ་འཁོར་ཀུན་གྱི་གཙོ། །སྤྲུལ་སྐུ་ཁམས་གསུམ་ཆོས་ཀྱི་རྗེ། །རིག་པའི་རྡོ་རྗེའི་བཀྲ་ཤིས་ཤོག །བཀྲ་ཤིས་བྱིན་རླབས་དཔག་མེད་ཅིང་། །དངོས་གྲུབ་སྟེར་མཛད་བཀའ་བརྒྱུད་རྣམས། །མཁའ་ལ་ཁྲི་གདུགས་ཤར་བ་ལྟར། །ཕྱོགས་རིས་མེད་པའི༴ ངོ་བོ་ཉིད་ཀྱི་དཀྱིལ་འཁོར་དུ། །མ་འགགས་སྣ་ཚོགས་ལྷ་ཡི་སྐུ། །མཐའ་ཡས་སྣ་ཚོགས་རྒྱུད་སྡེ་བཞི། །ཡི་དམ་རྣམས་ཀྱི༴
ཡེ་ཤེས་དབྱིངས་ལས་མ་གཡོས་པར། །ཐུགས་རྗེའི་ཐབས་ཀྱིས་ཁྲོ་བོའི་སྐུ། །བསྐལ་པའི་མེ་ལྟར་འབར་བ་ཡི། །ཆོས་སྐྱོང་རྣམས་ཀྱི་བཀྲ་ཤིས་ཤོག །ཅེས་གྲུབ་ཆེན་ཀརྨ་པས་མཛད་པའི་བཀྲ་ཤིས་བཀའ་རྒྱ་མར་གྲགས་པ་ལ་ཕྱི་ནས་ན་རིམ་སོ་སོའི་དུས་སུ་ཁ་བསྐང་བ་དང་བཅས་པའོ།། །།རྡོ་རྗེ་འཆང་ལ་གསོལ་བ་འདེབས། །ཐུགས་རྗེའི་བྱིན་རླབས་བཀྲ་ཤིས་ཀྱི། །བསྟན་པ་ཡུན་རིང་གནས་པ་དང་། །སྒྲུབ་བརྒྱུད་བསྟན་པ་འབར་གྱུར་ཅིག །ཏཻ་ལོ་པ་ལ་གསོལ་བ་འདེབས། །ཐུགས་རྗེའི་བྱིན་རླབས་བཀྲ་ཤིས་ཀྱི། །བསྟན་པ་ཡུན་རིང་གནས་པ་དང་། །སྒྲུབ་བརྒྱུད་བསྟན་པ་འབར་གྱུར་ཅིག །ནཱ་རོ་པ་ལ་གསོལ་བ་འདེབས། །ཐུགས་རྗེའི་བྱིན་རླབས་བཀྲ་ཤིས་ཀྱི། །བསྟན་པ་ཡུན་རིང་གནས་པ་དང་། །སྒྲུབ་བརྒྱུད་བསྟན་པ་འབར་གྱུར་ཅིག །ལྷོ་བྲག་པ་ལ་གསོལ་བ་འདེབས། །ཐུགས་རྗེའི་བྱིན་རླབས་བཀྲ་ཤིས་ཀྱི། །བསྟན་པ་ཡུན་རིང་གནས་པ་དང་། །སྒྲུབ་བརྒྱུད་བསྟན་པ་འབར་གྱུར་ཅིག །
མི་ལ་རྗེ་ལ་གསོལ་བ་འདེབས། །ཐུགས་རྗེའི་བྱིན་རླབས་བཀྲ་ཤིས་ཀྱི། །བསྟན་པ་ཡུན་རིང་གནས་པ་དང་། །སྒྲུབ་བརྒྱུད་བསྟན་པ་འབར་གྱུར་ཅིག །སྒམ་པོ་པ་ལ་གསོལ་བ་འདེབས། །ཐུགས་རྗེའི་བྱིན་རླབས་བཀྲ་ཤིས་ཀྱི། །བསྟན་པ་ཡུན་རིང་གནས་པ་དང་། །སྒྲུབ་བརྒྱུད་བསྟན་པ་འབར་གྱུར་ཅིག །དུས་གསུམ་མཁྱེན་ལ་གསོལ་བ་འདེབས། །ཐུགས་རྗེའི་བྱིན་རླབས་བཀྲ་ཤིས་ཀྱི། །བསྟན་པ་ཡུན་རིང་གནས་པ་དང་། །སྒྲུབ་བརྒྱུད་བསྟན་པ་འབར་གྱུར་ཅིག །རས་ཆེན་པ་ལ་གསོལ་བ་འདེབས། །ཐུགས་རྗེའི་བྱིན་རླབས་བཀྲ་ཤིས་ཀྱི། །བསྟན་པ་ཡུན་རིང་གནས་པ་དང་། །སྒྲུབ་བརྒྱུད་བསྟན་པ་འབར་གྱུར་ཅིག །སྦོམ་བྲག་པ་ལ༴ ཐུགས༴ བསྟན༴ སྒྲུབ༴ ཀརྨ་པ་ལ༴ ཐུགས༴ བསྟན༴ སྒྲུབ༴ ཨུ་རྒྱན་པ་ལ༴ ཐུགས༴ བསྟན༴ སྒྲུབ༴ རང་བྱུང་པ་ལ༴ ཐུགས༴ བསྟན༴ སྒྲུབ༴ གཡུང་སྟོན་པ་ལ༴ ཐུགས༴ བསྟན༴ སྒྲུབ༴ རོལ་
པའི་རྡོ་རྗེ་ལ༴ ཐུགས༴ བསྟན༴ སྒྲུབ༴ མཁའ་སྤྱོད་དབང་ལ༴ ཐུགས༴ བསྟན༴ སྒྲུབ༴ དེ་བཞིན་གཤེགས་ལ༴ ཐུགས༴ བསྟན༴ སྒྲུབ༴ རཏྣ་བྷ་ལ༴ ཐུགས༴ བསྟན༴ སྒྲུབ༴ མཐོང་བ་དོན་ལྡན་ལ༴ ཐུགས༴ བསྟན༴ སྒྲུབ༴ འཇམ་དཔལ་བཟང་པོ་ལ༴ ཐུགས༴ བསྟན༴ སྒྲུབ༴ དཔལ་འབྱོར་དོན་གྲུབ་ལ༴ ཐུགས༴ བསྟན༴ སྒྲུབ༴ ཆོས་གྲགས་རྒྱ་མཚོ་ལ༴ ཐུགས༴ བསྟན༴ སྒྲུབ༴ བཀྲ་ཤིས་དཔལ་འབྱོར་ལ༴ ཐུགས༴ བསྟན༴ སྒྲུབ༴ མི་བསྐྱོད་རྡོ་རྗེ་ལ༴ ཐུགས༴ བསྟན༴ སྒྲུབ༴ དཀོན་མཆོག་འབངས་ལ༴ ཐུགས༴ བསྟན༴ སྒྲུབ༴ དབང་ཕྱུག་རྡོ་རྗེ་ལ༴ ཐུགས༴ བསྟན༴ སྒྲུབ༴ ཆོས་ཀྱི་དབང་ཕྱུག་ལ༴ ཐུགས༴ བསྟན༴ སྒྲུབ༴ ཆོས་དབྱིངས་རྡོ་རྗེ་ལ༴ ཐུགས༴ བསྟན༴ སྒྲུབ༴ ཡེ་ཤེས་སྙིང་པོ་ལ༴ ཐུགས༴ བསྟན༴ སྒྲུབ༴ ཡེ་ཤེས་རྡོ་རྗེ་ལ༴ ཐུགས༴ བསྟན༴ སྒྲུབ༴ ཆོས་ཀྱི་དོན་གྲུབ་ལ༴ ཐུགས༴ བསྟན༴ སྒྲུབ༴ བྱང་ཆུབ་རྡོ་རྗེ་ལ༴
ཐུགས༴ བསྟན༴ སྒྲུབ༴ བསྟན་པའི་ཉིན་བྱེད་ལ༴ ཐུགས༴ བསྟན༴ སྒྲུབ༴ བདུད་འདུལ་རྡོ་རྗེ་ལ༴ ཐུགས༴ བསྟན༴ སྒྲུབ༴ ཆོས་གྲུབ་རྒྱ་མཚོ་ལ༴ ཐུགས༴ བསྟན༴ སྒྲུབ༴ པདྨ་ཉིན་བྱེད་ལ༴ ཐུགས༴ བསྟན༴ སྒྲུབ༴ ཐེག་མཆོག་རྡོ་རྗེ་ལ༴ ཐུགས༴ བསྟན༴ སྒྲུབ༴ བློ་གྲོས་མཐའ་ཡས་ལ༴ ཐུགས༴ བསྟན༴ སྒྲུབ༴ མཁའ་ཁྱབ་རྡོ་རྗེ་ལ༴ ཐུགས༴ བསྟན༴ སྒྲུབ༴ པདྨ་དབང་མཆོག་ལ༴ ཐུགས༴ བསྟན༴ སྒྲུབ༴ མཁྱེན་བརྩེ་འོད་ཟེར་ལ༴ ཐུགས༴ བསྟན༴ སྒྲུབ༴ རིག་པའི་རྡོ་རྗེ་ལ༴ ཐུགས༴ བསྟན༴ སྒྲུབ༴ རྩ་བའི་བླ་མ་ལ༴ ཐུགས༴ བསྟན༴ སྒྲུབ༴ རྡོ་རྗེ་ཕག་མོ་ལ༴ ཐུགས༴ བསྟན༴ སྒྲུབ༴ མ་མགོན་གཉིས་ལ་གསོལ་བ་འདེབས། ཐུགས་རྗེའི་བྱིན་རླབས་བཀྲ་ཤིས་གྱིས། །བསྟན་པ་ཡུན་རིང་གནས་པ་དང་། སྒྲུབ་བརྒྱུད་བསྟན་པ་འབར་གྱུར་ཅིག །སེམས་དཔའ་རང་བྱུང་རྡོ་རྗེ་སོགས་དང་། བྱང་ཆུབ་སེམས་ཀྱི་ཕྲིན་ལས་སོགས་བརྗོད་
དོ།། །།ཆོས་དབྱིངས་ལྷུན་གྱིས་གྲུབ་པ་ལ། དབྱེར་མེད་འཁོར་འདས་ཡོངས་སུ་རྫོགས། །དུས་གསུམ་སངས་རྒྱས་སྐྱེད་པའི་ཡུམ། །ཆོས་སྐུ་མཆོག་གི་བཀྲ་ཤིས་ཤོག །རྣམ་སྣང་ཡེ་ཤེས་གང་ཆེན་མཚོ། །མི་འཁྲུགས་རྒྱལ་པོ་ལ་སོགས་པའི། །རྒྱལ་བ་སྲས་བཅས་འཁོར་གྱིས་བསྐོར། །ལོངས་སྤྱོད་རྫོགས་སྐུའི་བཀྲ་ཤིས་ཤོག །ཐུབ་ཆེན་རྒྱལ་བ་གསེར་མདོག་ཅན། །བསྐལ་བཟང་སངས་རྒྱས་སྟོང་གི་དབུས། །རྣམ་འཕྲུལ་བསམ་གྱིས་མི་ཁྱབ་པའི། །སྤྲུལ་སྐུ་མཆོག་གི་བཀྲ་ཤིས་ཤོག །སྐུ་གསུམ་ལྷུན་འགྲུབ་ཡོངས་རྫོགས་ཤིང་། །ཡེ་ཤེས་དབྱིངས་ཀྱི་དཀྱིལ་འཁོར་དུ། །ངོ་བོ་ཉིད་ཀྱིས་ཐམས་ཅད་མཁྱེན། །སྐུ་བཞི་ཡོངས་རྫོགས་བཀྲ་ཤིས་ཤོག །སེམས་དཔའ་རང་བྱུང་རྡོ་རྗེ་ནི། །ཡིད་བཞིན་ནོར་བུ་རྙེད་པ་ལྟར། །བདག་གཞན་ཡོངས་ཀྱི་དབུལ་བ་སེལ། །དགོས་འདོད་འབྱུང་བའི་བཀྲ་ཤིས་ཤོག །བྱང་ཆུབ་སེམས་ཀྱི་ཕྲིན་ལས་ཀྱིས། །ཐུགས་རྗེའི་འོད་
ཟེར་ཕྱོགས་མེད་འཕྲོ། །བཅོ་ལྔའི་ཟླ་བ་ཉ་རྒྱས་ལྟར། །འཛམ་གླིང་བདེ་བའི་བཀྲ་ཤིས་ཤོག །འཛམ་གླིང་བདེ་བར་མཛད་དུ་གསོལ། །ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་གསུམ་སྤངས་པ། །སངས་རྒྱས་པདྨ་རྒྱས་པ་འདབ་འདྲའི་སྤྱན་མངའ་བ། །འདི་ནི་འཇིག་རྟེན་དགེ་བའི་བཀྲ་ཤིས་དང་པོའོ། །དེ་ཡིས་ཉེ་བར་བསྟན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་པ། །ཆོས་ཀྱི་དམ་པ་སྐྱེ་དགུ་རྣམས་ལ་ཞི་བྱེད་པ། །འདི་ནི་འཇིག་རྟེན་དགེ་བའི་བཀྲ་ཤིས་གཉིས་པའོ། །དགེ་འདུན་དམ་པ་ཆོས་ལྡན་ཐོས་པའི་བཀྲ་ཤིས་ཕྱུག །ལྷ་དང་མི་དང་ལྷ་མ་ཡིན་གྱིས་མཆོད་པའི་གནས། །ཚོགས་ཀྱི་མཆོག་རབ་ངོ་ཚ་ཤེས་དང་དཔལ་གྱི་གཞི། །འདི་ནི་འཇིག་རྟེན་དགེ་བའི་བཀྲ་ཤིས་གསུམ་པའོ།། །།རྒྱ་གར་སྐད་དུ། རཏྣ་ཏྲཻ་མཾ་ག་ལ་གཱ་ཐཱ། བོད་སྐད་དུ། དཀོན་མཆོག་གསུམ་གྱི་བཀྲ་ཤིས་
ཀྱི་ཚིགས་སུ་བཅད་པ། དཀོན་མཆོག་གསུམ་ལ་ཕྱག་འཚལ་ལོ། །ཆེ་བའི་ཆེ་མཆོག་སྟོན་མཆོག་བླ་ན་མེད། །ཆོས་རྗེ་ཉི་མ་རྒྱལ་བའི་བྱིན་བརླབས་ཀྱི། །བདུད་དང་བགེགས་རིགས་གནོད་པའི་དགྲ་ཞི་སྟེ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །ཆོས་ཉིད་བདེན་པའི་ཆོས་མཆོག་བླ་ན་མེད། །དམ་ཆོས་བདུད་རྩི་བདེན་པའི་བྱིན་བརླབས་ཀྱིས། །ཉོན་མོངས་སྡུག་བསྔལ་གདུང་བའི་དགྲ་ཞི་སྟེ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །དགེ་འདུན་ཡོན་ཏན་རིན་ཆེན་དཔལ་འབར་བ། །རྒྱལ་སྲས་ཕན་མཛད་བདེན་པའི་བྱིན་བརླབས་ཀྱིས། །ཉེས་པའི་སྐྱོན་བྲལ་དགེ་ཚོགས་རྣམ་པར་འཕེལ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །ཚངས་དང་ལྷ་དབང་སྲུང་མའི་བྱིན་བརླབས་ཀྱིས། །ཕན་མཛད་ལྷ་ཡི་བཀྲ་ཤིས་གནས་གྱུར་ཏེ། །བདེ་ལེགས་བསམས་པ་ཡིད་བཞིན་འགྲུབ་པ་དང་། །ཚེ་རིང་ནད་མེད་བདེ་སྐྱིད་ལྡན་པར་ཤོག །དཀོན་མཆོག་གསུམ་གྱི་བཀྲ་
ཤིས་ཀྱི་ཚིག་སུ་བཅད་པ། །བཅོམ་ལྡན་འདས་ཀྱི་ཁྱིམ་བདག་ངེས་པ་ལ་གསུངས་པ་རྫོགས་སོ། །རྒྱ་གར་སྐད་དུ། པཉྩ་ཏ་ཐཱ་ག་ཏ་མངྒ་ལ་གཱ་ཐ། བོད་སྐད་དུ། དེ་བཞིན་གཤེགས་པ་ལྔའི་བཀྲ་ཤིས་ཀྱི་ཚིགས་སུ་བཅད་པ། དཀོན་མཆོག་གསུམ་ལ་ཕྱག་འཚལ་ལོ། །རྣམ་པར་སྣང་མཛད་ཡེ་ཤེས་དམ་པ་མཚོ་ཆེན་ལྡན། །ཟླ་བ་ཉ་འདྲའི་སྐུ་མངའ་སྲིད་པའི་མཐར་ཕྱིན་པ། །དགོངས་པ་མཐའ་དག་རྫོགས་པའི་བཀྲ་ཤིས་གང་ཡིན་པ། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །མི་འཁྲུགས་རྒྱལ་པོ་སྲིད་དང་གཏི་མུག་རྣམ་སྦྱོང་བ། །མགོན་པོ་ཡོན་ཏན་ཐམས་ཅད་རྫོགས་པའི་བཀྲ་ཤིས་པ། །དགེ་མཉམ་བསམ་སེམས་ལྡན་པའི་བཀྲ་ཤིས་གང་ཡིན་པ། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །སངས་རྒྱས་ཡོན་ཏན་ཀུན་གྱི་རྒྱན་གྱིས་བརྒྱན་མཛད་པ། །ཡང་དག་བདེན་པའི་འབྱོར་པ་སྦྱིན་མཛད་མི་བསླུ་བ། །རིན་ཆེན་འབྱུང་གནས་ཞེས་བྱའི་བཀྲ་ཤིས་གང་ཡིན་པ། །
བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །བསམ་གཏན་ཏིང་འཛིན་དམ་པ་ཕ་རོལ་ཕྱིན་པའི་གནས། །ཡེ་ཤེས་པདྨའི་སྟེང་བཞུགས་དཔག་མེད་ཚེ་ལྡན་ཞིང་། །ཚེ་གྲངས་མེད་པར་བྱིན་གྱིས་བརླབས་པའི་བཀྲ་ཤིས་གང་། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །སེམས་ཅན་དོན་གྱི་ལས་ལ་ཐུགས་ནི་སྦྱོར་མཛད་ཅིང་། །འགྲོ་བ་ཀུན་གྱི་འཆིང་བའི་ཅིངས་ལས་གྲོལ་མཛད་པ། །ཐུགས་མཆོག་དོན་ཡོད་གྲུབ་ཀྱི་བཀྲ་ཤིས་གང་ཡིན་པ། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །དེ་བཞིན་གཤེགས་པ་ལྔའི་བཀྲ་ཤིས་ཀྱི་ཚིགས་སུ་བཅད་པ་རྫོགས་སོ།། །།དེ་ལྟར་འཇིག་རྟེན་དབང་ཕྱུག་དཔལ་ཀརྨ་པའི་གསུང་ལས་སྐྱེས་པའི་དགེ་འདུན་གྱི་སྡེ་རྣམས་སུ་ཞལ་འདོན་དུ་བྱ་བའི་འཕྲལ་དགོས་ཆོས་སྤྱོད་ཀྱི་རིམ་པ་འདི་ནི་སྐྱབས་མཆོག་འཁོར་ལོའི་མགོན་པོ་མཐིང་དབང་ཅོད་པན་འཛིན་པ་གོང་མ་ལྷན་རྒྱས་ཀྱི་ཞལ་སྔ་ནས། རང་རེའི་ཆོས་སྤྱོད་རབ་གསལ་འདི་ལ་སྔར་པར་དུ་འཁོད་པའི་འདྲ་མིན་མང་དག་ཅིག་སྣང་ནའང་། གཙོ་བོར་དྭགས་པོ་བཤད་སྒྲུབ་གླིང་གི་པར་མ་ཉིད་གཞིར་བཟུང་ནས་ཚིག་
དོན་གྱི་ཞུས་དག་དང་སྒྲིགས་རིམ་དང་སྣོན་འབྲིད་གྱི་འོས་རྣམས་གསར་དུ་བགྱིས་ཐོག །པར་དུ་འཁོད་པའི་ཁུར་ལེན་དགོས་ཚུལ་གྱི་བཀའ་སྩལ་བཞིན་སི་ཏུ་བསྟན་པའི་ཉིན་བྱེད་ཀྱིས་ལེགས་པར་བསྒྲིགས་པའི་དུས་ཆེན་བཞི་སོགས་ཚོགས་སོགས་སྨོན་ལམ་གྱི་སྐབས་སུ་སྟབས་གཅིག་ཏུ་འདོན་པའི་རྣམ་གཞག་ཀྱང་གསལ་ལ་སོ་སོའི་སྡེ་ཚན་ཡང་མི་འཁྲུགས་ཅིང་། གཟུངས་སྔགས་ཀྱི་ཟུར་ཅུང་ཟད་མ་དག་པ་རྣམས་ལེགས་སྦྱར་དང་མཐུན་པར་བཅོས་ཤིང་། བོད་སྐད་རྣམས་ལའང་སྔར་འཐེམ་ལུས་སུ་ཤོར་བའི་རིགས་ཕྲན་བུ་སྣང་བ་སྡེབས་སྦྱོར་དང་དོན་འཐོབ་ཀྱི་དབང་གིས་ལེགས་པར་གཏན་ལ་ཕབ། ཆོས་སྡེ་དང་གྲྭ་ཚང་སོ་སོའི་བཞེད་པའི་ཆོས་སྤྱོད་མཐའ་དག་བསྡུས་ན་ཧ་ཅང་ཡི་གེ་མངས་བར་འགྱུར་བས་གལ་ཆེ་བ་རྣམས་དང་ཡོངས་སུ་གྲགས་པའི་བསྒྲིགས་འདོན་གྱི་སྐོར་རྣམས་འདུས་ཆེ་བའི་ཁུལ་བྱས་ཏེ། མཚུངས་མེད་སྐྱབས་མཆོག་དམ་པ་ཟུང་གི་དགོངས་པ་ཆོས་དབྱིངས་སུ་རྫོགས་ཤིང་། བདག་སོགས་གདུལ་བྱ་རྣམས་ཀྱི་འདྲེན་པར་མཆོག་གི་སྤྲུལ་པའི་སྐུ་མྱུར་དུ་སྟོན་པར་གསོལ་བ་གདབ་པའི་ཕྱིར། རྗེ་དེ་དག་གི་བཀའ་འབངས་ཀྱི་ཐ་ཤལ་སི་ཏུ་པ་བསྟན་པའི་ཉིན་བྱེད་ཀྱིས་མངོན་པར་འདུ་བགྱིས་ནས་མདོ་སྨད་སྡེ་དགེའི་མངའ་རིས་དཔལ་སྤུངས་ཐུབ་བསྟན་ཆོས་འཁོར་གླིང་དུ་ཀུན་དགའ་ཞེས་པ་ཤིང་ཕོ་སྟག་གི་ལོར་པར་དུ་
བསྒྲུབས་པའོ།། །།ཞེས་པ་འདི་བསྟན་འགྲོའི་གསོས་སུ་སླར་ཡང་ཀརྨ་པ་བཅུ་བཞི་པས་གསོལ་འདེབས་ཁ་འགེངས་བཅས་འོག་མིན་མཚུར་གྱི་གདན་སར་པར་དུ་འདུ་བགྱིས་པའོ།། །།དེ་ལྟར་བསྒྲུབས་པའི་ལེགས་བྱས་ནམ་མཁའི་མཐའ། །ཀུན་ནས་འགེངས་པར་བརྩོན་དེས་ས་གསུམ་དུ། །དགེ་བའི་སྤྲིང་ཡིག་གསར་པ་བྱིན་པ་ལས། །སྙིང་པོའི་ཆོས་ཀྱི་དོན་རབ་གསལ་གྱུར་ཅིག །སརྦ་ཀཱ་ལྱ་ཎོ་མ་ནོ་ར་ཐེ་པཱུརྣཾ་བྷ་བ་ཏུ། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨ། ཀ་ཁ་ག་གྷ་ང་། ཙ་ཚ་ཛ་ཛྙ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ ཡེ་དྷརྨ ་ཧེ་ཏུ་པྲ་བྷ་ཝཱ་ཏེ་ཏུནྟེ་ཥནྟ་ཐཱ་ག་ཏོ་ཧྱ་བ་ད་ཏེ། ཏེ་ཥིཉྩ་ཡོ་ནི་རོ་དྷ་ཨེ་ཝཾ་ཝཱ་དི་མ་ཧཱ་ཤྲ་མ་ཎཿ །ཁྱབ་བདལ་གདོད་མའི་གནས་ལུགས་འོག་མིན་མགོན། །སྔོན་བསྐལ་ཐུགས་བསྐྱེད་བཟང་པོ་སྒོ་དབྱེ་ཞིང་། །མཐའ་ཡས་མ་གྱུར་ཡེ་གྲོལ་སར་འགོད་ཕྱིར། །ཀུན་བརྟག་བློ་གྲོས་བྱེ་བའི་དཔལ་མངའ་འགྱེད། །གྲོལ་བ་དྲུག་ལྡན་སྒྱུ་སྐར་ཕྲེང་ཚོགས་འདིར། །ཐོས་མྱོང་བཀླག་གསུམ་འཁོར་བ་མཐའ་ཅན་གྱི། །དྭགས་བརྒྱུད་ཀརྨས་རྗེས་བཟུང་སྨིན་གྲོལ་ལམ། །མཐར་ཐུགས་སེངྒེའི་སྒྲ་ལ་མྱང་འདས་ཀྱི། །ཕྱིར་མི་
ལྡོག་པའི་དོན་ཆེན་འགྲུབ་གྱུར་ནས། །ལྷག་བསམ་ཀེ་ལའི་མདངས་ཀྱིས་མདུན་བསུས་ཤིང་། །སྨོན་པའི་གོ་ཆ་རྟག་པ་བསྒྲེངས་བྱས་ཏེ། །འཇུག་པའི་རྟག་འཛིན་བདུད་དགྲ་བཅོད་བྱེད་ཅིང་། །ཀུན་བཟང་ས་ཆེན་མ་ལུས་མྱུར་འགྲོ་དེ། །བདེ་ལྡན་སྨོན་པའི་ཚིག་གིས་དབུགས་འབྱིན་ཞིང་། །དེ་བཞིན་ངན་སོང་མ་ལུས་སྟོངས་པར་ཤོག །ཅེས་པའང་། །དུས་ངན་སྙིགས་ལྔའི་རྒུད་པའི་རང་མཚང་བདོ་བའི་དུས་འདིར། རྒྱལ་བསྟན་སྤྱི་བྱེར་ཕན་པའི་ལྷག་བསམ་ལྕི་བ་ཁུར་དུ་འཛིན་པ་པོ། ཀརྨའི་མཚན་གྱི་ཆ་ཕྲར་གཏོགས་པ་ཤཱཀྱའི་དགེ་སྦྱོང་བཅུ་དྲུག་པའི། དྭགས་བརྒྱུད་བསྟན་པའི་འབྱུང་གནས་རྗེ་བཙུན་བླ་མ་རྣམས་གྱི་གསོལ་འདེབས་ཆོས་སྤྱོད་རབ་གསལ་ཆེན་མོ། སྒར་ཆེན་གསུང་རབ་གསར་བསྐྲུན་ཁོངས་སུ་བཞུགས་རྒྱུར་པར་བརྐོས་ཟིན་པ་དང་ཆབས་ཅིག་སྨོན་པའི་ཚིགས་སུ་བཅད་པ་འདི། རྒྱལ་བ་ལྷ་ལས་བབས་པའི་དུས་ཆེན་དགེ་བའི་ཉིན་བགྱིས་པ་དགེ་ལེགས་འཕེལ། སརྦ་མངྒ་ལཾ། དགེའོ།། །།བདེ་ཆེན་ཚོགས་ཀྱི་འཁོར་ལོར་རྟག་རོལ་བ། །དུས་གསུམ་རྒྱལ་བའི་གཏེར་ཆེན་ཀརྨ་པ། །ཡབ་སྲས་བརྒྱུད་པར་བཅས་པ་སྲིད་མཚོ་འདིར། །བསྐལ་པ་བསྐལ་པའི་བར་དུ་ཞབས་བརྟན་གསོལ། །གང་གིས་ཟབ་གསང་
གསུང་གི་གསང་བ་ཡི། །ཐོས་བསམ་སྒྲུབ་པ་སྙིང་པོར་བྱེད་པ་ཡི། །སྤོང་དང་ཀློག་པའི་སྡེ་རྣམས་ཐམས་ཅད་ནི། །དབྱར་གྱི་ཆུ་བོ་ལྟ་བུ་རྒྱས་གྱུར་ཅིག །སྲིད་ཞིའི་དཔལ་འབྱོར་མ་ལུས་འབྱུང་བའི་གཞི། །ཐུབ་པའི་བསྟན་པ་ཡུན་རིང་གནས་པ་དང་། །དེ་འཛིན་བྱེད་པའི་སྐྱེས་བུ་དམ་པ་རྣམས། །དཔལ་འབྱོར་གྱིས་བརྒྱན་ཡུན་རིང་ཞབས་བརྟན་ཤོག །ཕན་བདེ་འབྱུང་བའི་གནས་གཅིག་པུ། །བསྟན་པ་ཡུན་རིང་གནས་པ་དང་། །བསྟན་པ་འཛིན་པའི་སྐྱེས་བུ་རྣམས། །སྐུ་ཚེ་རྒྱལ་མཚན་བརྟན་གྱུར་ཅིག །དཔལ་ལྡན་བླ་མ་ཞབས་པད་བརྟན་པ་དང་། །མཁའ་མཉམ་ཡོངས་ལ་བདེ་སྐྱིད་འབྱུང་བ་དང་། །བདག་གཞན་མ་ལུས་ཚོགས་བསགས་སྒྲིབ་སྦྱངས་ནས། །མྱུར་དུ་སངས་རྒྱས་ས་ལ་འགོད་པར་ཤོག། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་
འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །