ཀླད་ཀྱི་དོན།
ཆོས་འབྱུང་བསྟན་པའི་ཉི་མ་ཞེས་བྱ་བ་བཞུགས་སོ། །ༀ་སྭ་སྟི། ཆོས་འབྱུང་བསྟན་པའི་ཉི་མ་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །གདོད་མའི་དབྱིངས་སུ་ཞི་བ་ཆོས་ཀྱི་སྐུ། །མི་མཇེད་ཁམས་འདིར་རྣམ་འདྲེན་སྟོང་རྩ་གཉིས། །བསྟན་དང་འགྲོ་བའི་གཉེན་གྱུར་ལྷ་ཡི་ལྷ། །ཐུབ་དབང་ཞབས་ཀྱི་པདྨོར་གུས་པས་འདུད། །རྒྱལ་ཀུན་ཐུགས་རྗེའི་ཆུ་མཚོ་བསྲུབས་པ་ལས། །ལེགས་ཐོན་པདྨ་འབྱུང་གནས་འོད་སྣང་གིས། །སྐྱེ་དགུའི་པད་ཚལ་མ་ལུས་རྒྱས་མཛད་པ། །ཕན་བདེའི་ཉི་མ་མཚོ་སྐྱེས་རྡོ་རྗེར་འདུད། །སྙིགས་དུས་རྒྱལ་བ་གཞན་གྱིས་མི་ཐུལ་བའི། །རྨད་བྱུང་མཛད་པས་ཞིང་འདིའི་མགོན་པོ་གང་། །བཀའ་གཏེར་བསྟན་པའི་བདག་པོ་གཏེར་བདག་གླིང་། །ཐ་མར་བསྐལ་བཟང་མོས་པར་སྟོན་དེར་འདུད། །སངས་རྒྱས་གཉིས་པ་པདྨ་འབྱུང་གནས་ཀྱིས། །མི་འགྱུར་རྡོ་རྗེའི་ལུང་གིས་གསལ་བསྟན་པ། །འཇིགས་མེད་ཆོས་སྒྲ་རྒྱ་མཚོའི་གོས་ཅན་གཞིར། །སྒྲོག་མཛད་བཤེས་གཉེན་མགོན་དེར་གུས་པས་འདུད། །ཕྱི་ནང་ཆོས་ཀྱི་དེ་ཉིད་ཡོངས་གཟིགས་ནས། །ཐེག་པ་རྒྱ་མཚོའི་ཆུ་ཀླུང་འབུམ་ཕྲག་གིས། །འགྲོ་བློའི་དྲི་མ་འཁྲུད་མཁས་ལོ་ཙཱ་བ། །ཆོས་དཔལ་རྒྱ་མཚོའི་ཞབས་ལ་གུས་པས་འདུད། །ཟབ་གསང་ཆོས་ཚུལ་རྒྱ་མཚོའི་བུམ་བཟང་གིས། །སྐལ་བཟང་འགྲོ་བའི་རེ་སྐོང་རིན་ཆེན་དབང་། །ཐུབ་བསྟན་ཕྱོགས་ལས་རྣམ་པར་རྒྱལ་བ་ཡིས། །རྣམ་གྲོལ་ཐར་ལམ་སྟོན་དེར་གུས་ཕྱག་འཚལ། །བགྲང་ཡས་ཆོས་སྒོའི་རྣམ་གྲངས་ཐ་དད་ཀྱང་། །རྣམ་གྲོལ་ལམ་མཚོན་རྒྱལ་བསྟན་ངོ་བོར་གཅིག། དེ་ཕྱིར་རིས་མེད་བསྟན་དང་བསྟན་འཛིན་ལ། །དད་པའི་ལྷག་བསམ་བཟང་པོས་ཕྱག་བྱས་ནས། །ཞིང་འདིའི་རྣམ་འདྲེན་བཞི་པ་
ཤཱཀྱའི་ཏོག། གང་གི་མཛད་ཚུལ་བསྟན་དང་དེ་འཛིན་སོགས། །རྒྱ་བོད་ཡོངས་ཀྱི་བཤེས་གཉེན་མ་ལུས་པའི། །ཆོས་འབྱུང་བསྟན་པའི་ཉི་མ་འདིར་གསལ་བྱ། །དེ་ཡང་སེམས་ཅན་ཐམས་ཅད་ཡེ་ནས་བདེ་བར་གཤེགས་པའི་སྙིང་པོ་ཅན་ཡིན་པར་མདོ་རྒྱུད་ཐམས་ཅད་ནས་གསུངས་པ་བཞིན། སེམས་ཉིད་ཡེ་ནས་རང་བཞིན་གྱིས་རྣམ་པར་དག་པ་ཡིན་ཡང་། རིག་པའི་རང་བཞིན་འོད་གསལ་སྙིང་པོ་དེ་བཞིན་ཉིད་དེ་མ་རིག་ཀུན་བཏགས་ཀྱིས་སྒྲིབ་པའི་སྤྲིན་གཟུང་འཛིན་འཁྲུལ་པའི་བག་ལ་ཉལ་ལངས་པས། ཡུལ་དང་དོན་དང་ལུས་སུ་ཆགས་ཏེ་ཡོན་ཏན་མི་མངོན་པར་འཁྲུལ་སྣང་བདེ་སྡུག་གི་སྣང་བ། དཔེར་ན་སྤྲིན་ལས་ཆར་འབེབས་པ་ལྟར། མ་རིག་གཟུང་འཛིན་གྱི་སེམས་སྤྲིན་ལས་དགེ་སྡིག་ལས་ཀྱི་ཆར་བབས་ཏེ། དེས་བསྐྱེད་པའི་འབྲས་བུ་ཁམས་གསུམ་པའི་གནས་གྲུབ་བོ། །