དམ་པའི་ཆོས་ཇི་ལྟར་འཆད་ཉན་བྱེད་ཚུལ་གྱི་ཡི་གེ་མདོར་བསྡུས། ལོ་ཆེན་དྷརྨ་ཤྲཱི།
དམ་པའི་ཆོས་ཇི་ལྟར་འཆད་ཉན་བྱེད་ཚུལ་གྱི་ཡི་གེ་མདོར་བསྡུས་པ་བཞུགས་སོ། །ལོ་ཆེན་དྷརྨ་ཤྲཱི།
དམ་པའི་ཆོས་ཇི་ལྟར་འཆད་ཉན་བྱེད་ཚུལ་གྱི་ཡི་གེ་མདོར་བསྡུས་པ་བཞུགས་སོ། །ༀ་སྭ་སྟི་སིདྡྷཾ། བླ་མ་དམ་པ་རྣམས་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདིར་དམ་པའི་ཆོས་ལ་འཆད་ཉན་བྱེད་ཚུལ་མདོ་ཙམ་ཞིག་བརྗོད་པར་བྱའོ། །འདི་ལ་བཞི་སྟེ། འཆད་པར་བྱེད་པ་པོ་སློབ་དཔོན། བཤད་བྱའི་ཡུལ་སློབ་མ། བཤད་བྱའི་ཆོས་ལ་འཆད་ཉན་བྱ་ཚུལ། དེ་ལྟར་བྱས་པའི་ཕན་ཡོན་ནོ། །དང་པོ་ནི། སྤྱིར་མདོ་སྡེ་རྒྱན་ལས། བཤེས་གཉེན་དུལ་བ་ཞི་བ་ཉེར་ཞི་བ། །ཡོན་ཏན་བརྩོན་བྱས་ལྷག་པར་ལུང་གིས་ཕྱུག །དེ་ཉིད་རབ་ཏུ་རྟོགས་པ་སྨྲ་མཁས་ལྡན། །བརྩེ་བའི་བདག་ཉིད་སྐྱོ་བ་སྤངས་ལ་བསྟེན། །ཅེས་གསུངས་པ་ལྟར། ཚུལ་ཁྲིམས་དག་པས་ལུས་ངག་དུལ་བ། ཐུགས་ཏིང་ངེ་འཛིན་གྱིས་ཞི་ཞིང་། ཤེས་རབ་དག་པས་ཉེ་བར་ཞི་བ། ཡོན་ཏན་གཞན་ལས་འཕགས་པས་ལྷག་པ། ཕྲིན་ལས་གཞན་དོན་ལ་ལེ་ལོ་མེད་པའི་བརྩོན་འགྲུས་དང་བཅས་པ། ཁྱད་པར་ཐོས་པ་ཆེ་བས་ལུང་གིས་ཕྱུག་ཅིང་། བཤད་བྱའི་དོན་དེ་ཉིད་རབ་ཏུ་རྟོགས་པ་དང་། འཆད་བྱེད་ཚིག་ལ་མཁས་པས་གང་ལ་གང་མོས་ཀྱི་ཆོས་འཆད་པ་ལ་ཐོགས་པ་མེད་པའི་མཁྱེན་རབ་དང་ལྡན་ཞིང་། གདུལ་བྱ་ལ་བརྩེ་བས་ཟང་ཟིང་མེད་པར་སྟོན་པ་ལ་སྐྱོ་ངལ་མེད་པ་སྟེ་ཆོས་བཅུ་ལྡན་ཞིག་གོ །དེ་ལྟར་ཡང་། བྱང་ཆུབ་སེམས་དཔའ་ཆོས་མང་དང་། །བདེན་མཐོང་སྨྲ་མཁས་བརྩེ་བ་ཅན། །སྐྱོ་མེད་སྐྱེས་བུ་དམ་པ་ནི། །ཆེན་པོ་ཡིན་པར་ཤེས་པར་བྱ། །ཞེས་དང་། ཀུན་མཁྱེན་ཆོས་རྗེས། ཞི་སྐུ་ཀུན་སྤྱོད་གཙང་ཞིང་སྐྱོན་མེད་པ། །ཐེ་ཚོམ་གཅོད་མཁས་གསུང་སྙན་དྲི་མ་མེད། །ཐུགས་ནི་ཟབ་ཅིང་ཀུན་མཁྱེན་ཡེ་ཤེས་མཛོད། །ཡོན་ཏན་མཐའ་ཡས་
ཐོས་དང་སྙིང་རྗེ་ཆེ། །ཤེས་རབ་རྒྱ་ཆེ་དགོངས་སྤྱོད་ནམ་མཁའ་འདྲ། །ཕྲིན་ལས་ཚད་མེད་འབྲེལ་ཚད་དོན་དང་ལྡན། །བྱམས་ལྡན་སྐྱོ་ངལ་སྤངས་ཤིང་རྟག་ཏུ་བརྩོན། །འགྲོ་བའི་ཁ་ལོ་གྱེན་དུ་སྒྱུར་ལ་བརྟེན། །ཅེས་སོ། །ཁྱད་པར་གསང་སྔགས་བླ་མའི་མཚན་ཉིད་ནི། སངས་རྒྱས་གསང་བའི་ལམ་རིམ་ལས། སྟོན་པ་མཛོད་ལྡན་ཆུ་བོ་རྫོགས། །གཉེར་ལྡན་རྒྱུད་དང་ལས་ལ་མཁས། །མན་ངག་དྲོད་འཆང་བརྒྱད་འཆང་བ། །ཞེས་པས་བརྒྱད་ལྡན་ཏེ། བསྐྱེད་རྫོགས་གསུམ་གྱི་དོན་ལ་མཁས་པས་གསང་བའི་མཛོད་གསུམ་དང་ལྡན་པ། དབང་བཞིའི་ཆུ་བོ་རྫོགས་པ། གསང་གཉེར་ཐུབ་པའི་སྣོད་ལྡན་ཡལ་བར་མི་འདོར་བའི་གཉེར་དང་ལྡན་པ། རྒྱུད་དོན་མཁས་པས་སློབ་བུའི་ཤེས་རྒྱུད་འགྲོལ་ནུས་པ། དཀྱིལ་འཁོར་དབང་བསྐུར་ཞི་རྒྱས་ཀྱི་ལས་སོགས་སྒྲུབ་པ་ལ་མཁས་པ། སྙན་བརྒྱུད་ཉམས་མྱོང་དང་ལྡན་པས་མན་ངག་གི་དྲོད་འཆང་བའོ། །དེ་ལྟར་ཡང་རྡོ་རྗེ་བཀོད་པ་ལས། སྟོན་པ་མཛོད་ལྡན་ཆུ་བོ་རྫོགས། །དམ་ཚིག་སྡོམ་པ་སྙིང་བརྩེར་བཅས། །མཁས་ཤིང་གཞན་ལ་ཕན་བརྩོན་པ། །རྡོ་རྗེ་གསང་བའི་སློབ་དཔོན་ལ། །རྣམ་པ་ཀུན་ཏུ་བརྟེན་པར་བྱ། །ཞེས་དང་། ཨ་ཏི་བཀོད་པ་ཆེན་པོ་ལས། མཁས་ཤིང་བྱ་བ་བྲལ་བ་དང་། །ཆོས་ཉིད་དོན་ལ་ཚད་ཕེབས་དང་། །འདོད་པའི་དོན་ལ་རྨོངས་པ་མེད། །གསང་སྔགས་བླ་མའི་མཚན་ཉིད་དོ། །ཞེས་གསུངས་སོ། །དེ་དག་ཀྱང་མདོར་བསྡུ་ན། མཁས་པའི་ཤེས་རབ། བརྩེ་བའི་བསམ་པ། སྦྱོར་བ་བཟོད་པ་གསུམ་མམ། ཚུལ་ཁྲིམས་དག་པས་ལུས་ངག་གཙང་བ། ཤེས་རབ་དག་པས་ལུང་རིགས་མཁས་པ། ལྷག་བསམ་དག་པས་གཞན་ལ་ཕན་པའོ། །ཁྱད་པར་སྙིང་པོའི་ལམ་སྟོན་པའི་བླ་མ་ནི། ཚིག་གི་གདམས་པས་སྒྲོ་འདོགས་གཅོད་ནུས་པ། དོན་གྱི་ངོ་སྤྲོད་ཀྱིས་རྟོགས་པ་བསྐྱེད་ནུས་པ། བྱིན་རླབས་ཀྱི་ཟིལ་གྱིས་སྣང་བ་བསྒྱུར་ནུས་པ། མྱོང་བའི་ཐབས་མཁས་ཀྱིས་གེགས་སེལ་ནུས་པ་སྟེ་བཞི་ལྡན་ནོ། །འདི་ལྟ་བུའི་བླ་མའི་མཚན་ཐོས་པའམ། ཞལ་མཐོང་བའམ། གསུང་ཐོས་པ་ཙམ་གྱིས་རང་རྒྱུད་ཀྱི་སྒྲིབ་པ་ཅི་རིགས་འདག་ནས་བསམ་གྱིས་མི་ཁྱབ་པའི་ཡེ་ཤེས་ལ་སྦྱོར་ནུས་པ་ཡིན་ཏེ། དགྱེས་རྡོར་ལས། གཞན་གྱིས་བརྗོད་མིན་ལྷན་
ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མའི་དུས་ཐབས་བསྟན་པ་དང་། །བདག་གི་བསོད་ནམས་ལས་ཤེས་བྱ། །ཞེས་གསུངས་པའི་ཕྱིར། གལ་ཏེ་མཚན་ཉིད་ཀུན་ཚང་བ་མ་རྙེད་ན། ཡོན་ཏན་ཤས་ཆེ་བ་ལ་བརྟེན་པར་བྱ་སྟེ། དོན་དམ་བསྙེན་པ་ལས། རྩོད་ལྡན་དབང་གིས་བླ་མ་སྐྱོན་དང་ཡོན་ཏན་འདྲེས། །རྣམ་པ་ཀུན་ཏུ་སྡིག་པ་མེད་པ་ཡོད་མ་ཡིན། །གང་ཞིག་ཡོན་ཏན་ལྷག་པ་ཡང་ནི་ལེགས་དཔྱད་ནས། །བུ་རྣམས་ཀྱིས་ནི་དེ་ལ་བརྟེེན་པར་འགྱུར་བའོ། །ཞེས་སོ། །དེ་ཡང་སློབ་མས་བླ་མ་བསྟེན་པ་ན། དང་པོར་བརྟགས་ཐབས་གསུམ་གྱིས་བརྟག །བར་དུ་བཙལ་ཐབས་གསུམ་གྱིས་འཚོལ། ཐ་མར་བསྟེན་ཐབས་གསུམ་གྱིས་བསྟེན་པར་བྱའོ། །དང་པོ་ནི། རྒྱང་ནས་གཞན་ལ་དྲིས་ཏེ་བརྟག་པ། དྲུང་ནས་རང་གིས་བརྟག་པ། འདོད་ལྷ་དང་པྲ་སེ་ན་ལ་བརྟེན་ནས་བརྟག་པའོ། །གཉིས་པ་ནི། དེ་ལྟར་བརྟགས་པས་མཚན་ཉིད་ལྡན་པར་མཐོང་ན། ཐག་ཉེ་རིང་། ལུས་ངལ་དུབ། ནོར་ཟད་ཕོངས་ལ་མི་བལྟ་བར་བཙལ་བར་བྱ་སྟེ། རོག་བདེ་གཤེགས་ཆེན་པོའི་ཞལ་ནས། མཚན་ཉིད་ལྡན་པའི་བླ་མ་དེ། །སྟོང་གསུམ་འདས་པའི་ཕ་རོལ་ན། །ཡོད་པར་ངེས་ཤེས་རྙེད་གྱུར་ན། །སྲོག་ལ་བསྡོས་ཏེ་བཙལ་བར་བྱ། །ཞེས་སོ། །གསུམ་པ་ནི། དེ་ལྟར་བཙལ་བས་རྙེད་པའི་བླ་མ་དེ། འཆི་གསོས་ཀྱི་སྨན་ལྟར་འབྲལ་མེད་དུ་བསྟེན། ཁོང་གི་སྙིང་ལྟར་གཟུ་ལུམས་དང་རས་གཅོད་མི་བྱ་བར་བསྟེན། ཡིད་བཞིན་གྱི་ནོར་བུ་ལྟར་བསྙེན་བཀུར་ལ་ཚད་བཟུང་མི་བྱ་བར་བསྟེན་པར་བྱ་སྟེ། སྡུད་པ་ལས། བླ་མ་མཁས་པ་རྣམས་ལ་རྟག་ཏུ་བརྟེན་བྱ་སྟེ། །ཅིའི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང་། །ཞེས་གསུངས་ཤིང་། བླ་མ་མཁས་བཙུན་བཟང་གསུམ་གྱི་ཡོན་ཏན་དང་ལྡན་པ་བསྟེན་པས་སློབ་མའི་རྒྱུད་གྲོལ་བར་ནུས་ཏེ། མཁས་པས་ཤེས་བྱའི་སྒྲོ་འདོགས་ཆོད། བཙུན་པས་སྤྱོད་པ་ཆུད་མི་འཛའ། བཟང་བས་རྗེས་སུ་གདམས་པའི་སྒོ་ནས་ཕན་བདེ་ལ་སྦྱོར་བར་མཛད་པ་ཡིན་ནོ། །གཞན་ཡང་ཐལ་འགྱུར་ལས། འཁོར་དང་ལོངས་སྤྱོད་རྣམས་ཀྱིས་བསྟེན། །ལུས་ངག་ཡིད་ཀྱིས་མཉེས་པ་ཡི། །བླ་མ་སངས་རྒྱས་མཉམ་པ་སྟེ། །སྟོན་པ་དེ་ལས་ཡོན་ཏན་ནི། །དཔག་བསམ་ཤིང་
དང་ཡིད་བཞིན་ནོར། །འདོད་འཇོའི་བ་དང་འདྲ་བ་ཡིན། །ཡོན་ཏན་དཔག་ཏུ་མེད་པ་ཐོབ། །དེ་ལ་དམིགས་ཏེ་བླ་མ་བསྟེན། །འཁོར་བའི་གཡུལ་ལས་བཟློག་ཕྱིར་རོ། །ཞེས་སོ། །གཉིས་པ་བཤད་བྱའི་ཡུལ་སློབ་མ་ནི། བཞི་བརྒྱ་པ་ལས། གཟུར་གནས་བློ་ལྡན་དོན་གཉེར་བ། །ཉན་པོ་སྣོད་ཅེས་བྱ་བར་བཤད། །ཅེས་དང་། མཁས་འཇུག་ལས། བློ་གསལ་ཤེས་འདོད་བླ་མར་གུས། །ཞེས་པ་ལྟར། ང་རྒྱལ་མེད་པའི་དད་པས་བླ་མ་ལ་གུས་པ། རང་བཞིན་གྱིས་བློ་གྲོས་གསལ་བས་བརྗོད་དོན་རྟོགས་པར་ནུས་པ། རྩོལ་བར་ཤེས་པས་འདོད་པའི་འདུན་པ་དང་ལྡན་པ་ལ་འདུས་མོད་ཀྱི། རྒྱས་པར་ན་སྤྱིར་ལུང་ལས། བླ་མ་ལ་གུས་ཚུལ་ཁྲིམས་ཡོངས་དག་དང་། །བསམ་གཏན་དང་ནི་འདོན་ལ་རབ་བརྩོན་པ། །གྲིམས་ཤིང་དུལ་ལ་བཟོད་དང་ལྡན་པ་སྟེ། །སྡོམ་བརྩོན་གནས་པའི་ཆོས་ལྡན་ལེགས་པར་གནས། །ཞེས་གསུངས་ཤིང་། ཁྱད་པར་དགག་ཕྱོགས་ནས་སྣོད་ཀྱི་སྐྱོན་གསུམ་མམ་བཞི་དང་བྲལ་ཞིང་དྲི་མ་དྲུག་སྤངས་པ་སྟེ། སྐྱོན་ནི། ཐོས་པའི་སྣོད་སྐྱོན་ཁ་སྦུབ་ལྟ་བུ། བསམ་པའི་སྣོད་སྐྱོན་ཞབས་བརྡོལ་དང་གཞོགས་རལ་བ་ལྟ་བུ། སྒོམ་པའི་སྣོད་སྐྱོན་དུག་ཅན་ལྟ་བུ་སྟེ། ཡུམ་བར་མ་ལས། ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་ཁྱོད་ལ་བཤད་དོ། །ཞེས་དང་། སྒྱུ་འཕྲུལ་ལམ་རིམ་ལས། སྣོད་ངན་བཅུད་ཆེན་འཛག་དང་འབོ། །མི་ཆགས་མ་རུངས་བྱེད་པ་དང་། །ཞེས་གསུངས་ཤིང་། གཞན་ལས་ཀྱང་། རྟོག་པ་ཐམས་ཅད་རབ་ཏུ་བསྡུས་ནས་ཀྱང་། །ཤིན་ཏུ་བསམ་པ་བཟང་པོ་ལྡན་པས་ཉོན། །བརྗེད་ངས་བློ་ལ་རྡོ་རྗེ་སེམས་དཔའ་སོགས། །བདེ་བར་གཤེགས་པ་རྣམས་ཀྱིས་བྱིན་མི་བརླབ། །ཅེས་སོ། །དྲི་མ་དྲུག་ནི། རྣམ་བཤད་རིག་པ་ལས། ང་རྒྱལ་དང་ནི་མ་དད་དང་། །དོན་དུ་གཉེར་བ་མེད་ཉིད་དང་། །ཕྱི་རོལ་རྣམ་གཡེང་ནང་དུ་སྡུད། །སྐྱོ་བས་ཉན་པ་དྲི་མ་ཡིན། །ཞེས་གསུངས། སྒྲུབ་ཕྱོགས་ལ་ཡོན་ཏན་ལྔ་ལྡན་ནམ་བརྒྱད་ལྡན་ཏེ། གསང་སྙིང་ལས། སྣོད་ལྡན་ངང་ཚུལ་བཟང་ལ་བརྟན། །ལུས་དང་ལོངས་སྤྱོད་གཏོང་ལ་སྦྱིན། །ཞེས་པས། ངང་ཆུ་རྒྱུན་ལྟར་རིང་བ། ཚུལ་དགེ་སྦྱོང་ལྟར་ཞི་བ། བསམ་པ་གསེར་ལྟར་བཟང་བ། བློ་རི་རྒྱལ་ལྟར་བརྟན་
པ། ལུས་དང་ལོངས་སྤྱོད་ཆོས་ཕྱིར་གཏོང་ཕོད་པ་སྟེ་ལྔའམ། དེའི་སྟེང་དུ་འགྲེལ་པ་སྤར་ཁབ་ལས། ཤེས་རབ་དང་། སྙིང་རྗེ་དང་། ནོགས་ཐུབ་པ་ནི་སྣོད་དང་ལྡན་པའོ། །ཞེས་པས། དོན་གོ་ཞིང་རྟོགས་པའི་ཤེས་རབ། གཞན་དོན་ལ་སྤྲོ་བའི་སྙིང་རྗེ། བསྟན་པའི་དོན་འཛིན་ནུས་པས་ནོགས་ཐུབ་པ་སྟེ་གསུམ་པོ་བསྣན་པས་བརྒྱད་དོ། །གཞན་ཡང་རྡོ་རྗེ་བཀོད་པ་ལས། སྐལ་ལྡན་གུས་དང་གཏོང་ཕོད་ཆེ། །བློ་བརྟན་ཡངས་ཤིང་སྒྲུབ་ལ་བརྩོན། །ཆོས་མཆོག་སྙིང་རྗེ་དམ་ཚིག་ལྡན། །རྡོ་རྗེ་སློབ་མར་ཤེས་པར་བྱ། །ཞེས་དང་། རང་ཤར་ལས། དད་པའི་སྟོབས་དང་བརྩོན་འགྲུས་ཆེ། །ཤེས་རབ་ཆེ་ཞིང་འཛིན་ཆགས་མེད། །བློ་བརྟན་ཡངས་ཤིང་སྒྲུབ་ལ་བརྩོན། །སློབ་དཔོན་ཇི་སྐད་གསུང་བཞིན་བྱེད། །ཅེས་སོ། །དེ་ལས་ཀྱང་གསང་ཆེན་སྙིང་པོའི་རྒྱུད་དང་མན་ངག་རྣམས་ནི་དབང་རྣོན་ཁོ་ནའི་སྤྱོད་ཡུལ་ཡིན་ཏེ། རྒྱས་པ་ལས། དེ་བཞིན་གཤེགས་པའི་སྤྱོད་ཡུལ་དེ། །སྐྱེས་བུ་བློ་རྩལ་རབ་ཀྱིས་རྟོགས། །ཞེས་གསུངས་ཤིང་། དེ་ལའང་གཉིས་ལས། རང་བཞིན་གྱི་དབང་རྣོན་ནི། དེ་ལས། ཡངས་ལ་རྒྱ་ཆེ་གཏིང་ཟབ་པ། །ཤེས་རབ་ཟབ་པས་རྟོགས་པར་འགྱུར། །ཞེས་དང་། སྦྱངས་པའི་དབང་རྣོན་ནི། རྩ་རྒྱུད་ལས། ཐོས་བསམ་སྒོམ་ལ་རབ་སྦྱངས་པའི། །ཤེས་རབ་མིག་ལྡན་རྣམས་ཀྱིས་བཟུང་། །ཞེས་སོ། །དེ་ཡང་ཐོག་མར་བླ་མས་སློབ་མའི་འབྲེལ་བརྟག་པའི་ཚེ། རིགས་རྒྱུད་བཟང་ངན་དང་རྒྱུད་འཇམ་རྩུབ་དང་དད་པ་དང་གཏོང་ཕོད་ཆེ་ཆུང་སོགས་རྒྱང་ནས་གཞན་ལ་དྲིས་ཏེ་བརྟག་པ། དྲུང་ནས་རང་གིས་བརྟག་པ། པྲ་སེ་ན་དང་མོ་ལ་སོགས་པས་བརྟག་པ། ཆོས་སྟོན་དུ་རུང་མི་རུང་མཁའ་འགྲོ་ཆོས་སྐྱོང་ལ་དམོད་བཙུགས་ཏེ་བརྟག་པ། ཁྱད་པར་ལས་ལ་བཀོལ་ཞིང་ངག་གིས་འཐབ་པ་སོགས་སྤྱོ་བའི་སྒོ་ནས་བརྟགས་པས་མི་ལྡོག་ཅིང་བརྟན་ན་གཟུང་བར་བྱ་སྟེ། ལམ་རིམ་ལས། དེ་བས་རྡོ་རྗེ་གཉེར་ལྡན་པས། །རྒྱང་དྲུང་སེན་པྲ་མཁའ་འགྲོ་ཡིས། །གསང་སྔགས་བལྟས་སྟོན་སྤྱོ་བ་ཡིས། །ཅི་ནས་བརྟགས་ཏེ་བཟང་ལྡན་ན། །མི་ལྡོག་བརྟན་བྱ་བལྟས་པ་ཡིས། །སློབ་མ་གང་ཡིན་ལག་ཏུ་གཏད། །ཅེས་གསུངས་པའི་ཕྱིར། གལ་ཏེ་ཤེས་རློམ་གྱིས་ཁེངས་པའི་སྐྱེ་བོ་དག་ཆོས་མཉན་པའི་
ཕྱིར་ལྷགས་ན། ཐོག་མར་འདི་སྐད་ཅེས་བརྗོད་པར་བྱ་སྟེ། བདག་ཉིད་ཆེན་པོ་ཁྱོད་ལྟ་བུའི། །མདུན་དུ་བདག་གིས་ག་ལ་སྤོབས། །ཁྱོད་ནི་ཤེས་རབ་ཆེན་པོ་སྟེ། །ཞེས་ཁེངས་བསྐྱུངས་ཀྱི་ཚིག་གིས་བཟློག་ཅིང་། ཅི་ནས་ཀྱང་ཉན་པར་འདོད་ན་གཟུང་བར་བྱའོ། །མདོར་ན་ཆོས་ཀྱི་ཚིག་དོན་ལ་ཡིད་རྟོན་པ་སྦྱོར་བརྩོན་གྱིས་འབད་ནུས་པ། ཆོས་མ་ཤེས་ན་གཞན་གྱིས་ཁྲེལ་ཞིང་བརྙས་པའི་གནས་སུ་འགྱུར་རོ་སྙམ་དུ་གྲགས་པ་ངན་པས་འཇིགས་པ་ཞིག་ཀྱང་དགོས་པ་ཡིན་ནོ། །གསུམ་པ་བཤད་བྱའི་ཆོས་ལ་འཆད་ཉན་བྱ་ཚུལ་ལའང་། བཤད་བྱ་ངོས་བཟུང་བ་དང་། དེ་ཇི་ལྟར་འཆད་ཚུལ་ལོ། །དང་པོ་བཤད་བྱའི་ཆོས་གང་ཞེ་ན། རྒྱལ་བའི་བཀའ་དྲི་མ་མེད་པའི་ལུང་། མཁས་པས་བཀྲལ་བའི་དགོངས་འགྲེལ་གྱི་མན་ངག །དེ་གཉིས་དང་རྗེས་སུ་མཐུན་པར་སྐྱེས་པའི་རིགས་པ་སྟེ། སྒྱུ་འཕྲུལ་བཤད་རྒྱུད་རྡོ་རྗེ་མེ་ལོང་ལས། ལུང་དང་རིགས་པ་མན་ངག་གི །ཚད་མ་དག་གིས་གང་གཞལ་བས། །ཤེས་བྱ་ཁོང་དུ་ཆུད་པར་འགྱུར། །ཞེས་དང་། སློབ་དཔོན་ཆེན་པོ་བི་མ་ལས། ཐུགས་ཀྱི་སྒྲོན་མ་གསང་བའི་འགྲེལ་པ་འདི། །ལུང་དང་མན་ངག་རིགས་པས་གཏན་ལ་ཕབ། །ཅེས་སོ། །དེ་ཡང་ཤེས་རབ་རྣམ་པ་གསུམ་གྱི་ཡུལ་ཏེ། ཐོས་བྱུང་གི་ཤེས་རབ་ཀྱིས་སྡེ་སྣོད་རྣམ་པ་གསུམ་གྱི་དང་རྒྱུད་སྡེ་བཞིའམ་དྲུག་གིས་བསྡུས་པའི་གསུང་རབ་དགོངས་འགྲེལ་དང་བཅས་པ་ནང་རིག་པ་དང་། དེའི་གདུལ་བྱ་རྗེས་སུ་འཛིན་པའི་ཡན་ལག་ཏུ། རྒྱལ་སྲས་རྣམས་ཀྱིས་མི་སློབ་པའི། །དངོས་དེ་གང་ཡང་ཡོད་མ་ཡིན། །ཞེས་པ་ལྟར་གཞན་དག་ཚར་གཅོད་ཀྱི་རིག་པ་སྒྲ་ཚད། རྗེས་འཛིན་གྱི་རིག་པ་བཟོ་གསོ་སྟེ་ཐུན་མོང་གི་རིག་གནས་བཞི་ལའང་འཆད་ཉན་གྱིས་མཁས་པར་སྦྱོང་ཞིང་། དེ་ཡང་བསམ་བྱུང་གི་ཤེས་རབ་ཀྱིས་ཐོས་དོན་ལེགས་པར་བསྐྱངས་ཏེ་ངེས་ཤེས་བསྐྱེད་པ་དང་། ཇི་ལྟར་ཤེས་པའི་དོན་དེ་སྒོམ་བྱུང་གི་ཤེས་རབ་ཀྱིས་སྒྲུབ་ཅིང་ཉམས་སུ་ལེན་པའོ། །དེ་རྣམས་ཀྱིས་ཕྱོགས་རེ་ཙམ་གྱིས་ཆོག་པར་མི་འཛིན་པར་ཐམས་ཅད་དུ་འབྲེལ་བར་བསླབ་ན་དམ་པའི་ཆོས་ལ་གནས་པ་ཞེས་བྱ་སྟེ། མངོན་པ་ཀུན་ལས་བཏུས་ལས། ཇི་
ལྟར་ན་ཆོས་རྣམས་ལ་ཆོས་ལ་གནས་པ་ཡིན་ཞེ་ན། ཐོས་པ་བསམ་པ་ལ་མ་བརྟེན་པར་སྒོམ་པའི་སྦྱོར་བ་འབའ་ཞིག་གིས་ཆོས་ལ་གནས་པ་མ་ཡིན་གྱི། སྒོམ་པ་ལ་མ་བརྟེན་པར་ཐོས་པ་དང་བསམ་པའི་སྦྱོར་བ་འབའ་ཞིག་གིས་ཀྱང་ཆོས་ལ་གནས་པ་མ་ཡིན་གྱི། གཉིས་ཀ་ལ་བརྟེན་ཅིང་གཉིས་ཀ་ལ་གནས་ན་ཆོས་ལ་གནས་པ་ཡིན་ནོ། །ཞེས་དང་། ཀླུ་སྒྲུབ་ཀྱིས། ཤེས་རབ་རྒྱས་བྱེད་པ་ནི་ཐོས་པ་སྟེ། །བསམ་པ་དང་ནི་གཉིས་པོ་ཡོད་གྱུར་ན། །དེ་ལས་སྒོམ་པ་ཡང་ནི་རབ་ཏུ་འབྱུང་། །ཞེས་གསུངས། མདོར་ན་བཤད་བྱའི་ཆོས་དེའང་སྟོན་པ་སངས་རྒྱས་ཀྱིས་གསུངས། དེ་མཁས་པས་བཤད་ཅིང་། གྲུབ་ཐོབ་ཀྱིས་ཉམས་སུ་མྱོང་བས་གཏན་ལ་ཕབ་པའི་ཆོས་ལ་ཉན་བཤད་བྱ་དགོས་པ་ཡིན་ནོ། །གཉིས་པ་ཇི་ལྟར་འཆད་པའི་ཚུལ་ནི། འཆད་པ་པོས་བློ་གྲོས་རྒྱ་མཚོས་ཞུས་པའི་མདོ་ལས་གསུངས་པ་ལྟར་བདུད་ཚར་གཅོད་པའི་གཟུངས་ཁ་ཏོན་དུ་བྱེད་བཞིན་དུ། པད་མ་དཀར་པོ་ལས། གཙང་ཞིང་ཡིད་དུ་འོང་བའི་ས་ཕྱོགས་སུ། །ཡངས་པའི་སྟན་ནི་རབ་ཏུ་བཤམས་བཏིང་ནས། །སེམས་ཅན་ལྷགས་པ་རྩེ་གཅིག་གྱུར་རྣམས་ལ། །གཏམ་མང་རྣམ་པ་སྣ་ཚོགས་ཉེ་བར་སྟོན། །ཅེས་པ་ལྟར་ས་ཕྱོགས་ཡངས་པར་སེང་ཁྲི་རྒྱན་གྱིས་སྤྲས་པ་ལ་འདུག་ནས། མཁས་འཇུག་ལས། སྒོ་གསུམ་སྤྱོད་པ་རྣམ་དག་པས། །བསྟན་པ་བསྲུང་ཕྱིར་གུས་པས་སྒྲུབ། །ཅེས་གསུངས་པས་ལུས་ཀྱི་སྐྱོན་ཉལ་བ་དང་། རྐང་པ་རྐྱོང་བ་སོགས་སྤངས་ཏེ་སྟོན་པ་ཤཱཀྱའི་རྒྱལ་པོས་ཆོས་ཀྱི་འཁོར་ལོ་བསྐོར་བའི་ཚུལ་ལྟར་སྐྱིལ་ཀྲུང་དྲང་པོར་ཞི་ཞིང་འཛུམ་པའི་མདངས་ཀྱིས་འདུག་པར་བྱའོ། །ངག་གི་སྒྲ་ཡང་སྐད་གདངས་ཧ་ཅང་ཞན་པ་དང་། ཧ་ཅང་མཐོ་བ་དང་། སྒྲ་གསང་མཐོ་དམན་སྣ་ཚོགས་དང་། ཟློས་པ་སོགས་སྤངས་ཏེ་དབྱངས་ཀྱི་ཡན་ལག་ཕུན་སུམ་ཚོགས་པས་གསལ་དག་སྙན་པའི་སྒོ་ནས། འཆད་པ་པོས་བརྗོད་བདེ། ཉན་པ་པོས་བཟུང་སླ། ཇི་ལྟར་བཤད་ཀྱང་འཐད། ཇི་ཙམ་བཤད་ཀྱང་རན་པ་སོགས་སྨྲ་བའི་རྒྱན་དང་ལྡན་པར་བཤད་དོ། །ཡིད་ཆགས་སྡང་དང་འགྲན་སེམས་སོགས་རང་འདོད་ཀྱི་འཁྲི་བ་སྤངས་ཏེ། འོག་ཏུ་འཆད་པ་ལྟར་གྱིས་ཏིང་ངེ་འཛིན་ལ་གནས་པས།
སེམས་ཅན་ཐམས་ཅད་ཕན་བདེ་ལ་འགོད་པའི་ལྷག་བསམ་རྣམ་པར་དག་པས་འཆད་དོ། །ཉན་པ་པོས་ཀྱང་། མ་གུས་པ་ལ་ཆོས་མི་འཆད། །མི་ན་བཞིན་དུ་མགོ་གཡོགས་དང་། །གདུགས་དང་འཁར་བ་མཚོན་ཐོགས་དང་། །མགོ་བོ་དཀྲིས་པ་དག་ལ་མིན། །ཞེས་གསུངས་པ་ལྟར་མ་གུས་པའི་སྤྱོད་ལམ་སྤངས་ནས། རབ་ཏུ་དམའ་བའི་སྟན་ལ་འདུག །དུལ་བའི་དཔལ་ནི་རྣམ་པར་བསྐྱེད། །དགའ་དང་ལྡན་པའི་མིག་གིས་བལྟ། ཚིག་གི་བདུད་རྩི་འཐུང་བ་བཞིན། །ཞེས་གསུངས་པའི་སྤྱོད་ལམ་དང་ལྡན་པས་ཆོས་ཉན་པའི་མཐུན་རྐྱེན་སྣ་ཚོགས་ཚང་བ་ལ་དགའ་ཞིང་སྤྲོ་བས་མཉན་དགོས་ཏེ། གསང་བ་བསམ་གྱིས་མི་ཁྱབ་པ་ལས། འཇིག་རྟེན་སངས་རྒྱས་འབྱུང་བ་བརྒྱ་ལམ་སྟེ། །མི་ཡི་ལུས་ནི་ཚོགས་ཀྱི་སྙིང་པོ་ཡིན། །ཀྱེ་མ་དད་པ་དང་ནི་ཆོས་ཉན་པ། །འདི་འདྲ་བསྐལ་པ་བརྒྱར་ཡང་རྙེད་པར་དཀའ། །ཞེས་སོ། །དེ་ཡང་ཐོག་མར་སློབ་མས་བླ་མ་ལ་ཕྱག་སྔོན་དུ་འགྲོ་བས་ཡོན་དང་མཎྜལ་ཕུལ་ལ། བླ་མ་ལྔ་བཅུ་པར། པུས་བཙུགས་ཐལ་མོ་སྦྱར་བ་ཡི། །ཉན་སོགས་འདོད་པས་གསོལ་གསུམ་གདབ། །ཅེས་པས་གསོལ་བ་ལན་གསུམ་བཏབ་ནས། སྦྱོར་བ་བྱང་ཆུབ་ཏུ་སེམས་བསྐྱེད། དངོས་གཞི་ཐོས་པའི་ཚིག་དོན་འཛིན། རྗེས་བཀའ་དྲིན་དྲན་པ་དང་དགེ་བ་བླ་ན་མེད་པའི་བྱང་ཆུབ་ཏུ་བསྔོ་བ་རྣམས་བྱའོ། །དེ་ལ་ཆོས་འཆད་པའི་ཏིང་ངེ་འཛིན་ནི། བཤད་བྱའི་ཆོས་མདོ་ཡིན་ན་སྣང་བ་ཐམས་ཅད་སྒྱུ་མ་ལྟ་བུར་ལྟ་བའི་ངང་ནས་འཆད་ཅིང་ཉན་ལ། སྔགས་རྒྱུད་ཡིན་ན། སྲུང་འཁོར་བསྒོམ་པ་དང་རྒྱུད་གཏོར་འབུལ་བ་སོགས་སྔོན་དུ་བཏང་ནས། དཔོན་སློབ་གཉིས་ཀས་སྔོན་བྱུང་ཇི་ལྟ་བར་བསྒོམ་པའམ། ཡང་ན་གསང་འདུས་ལས། མདོ་དོན་ཆོ་གའི་བྱ་བ་ལ། །རྟག་པར་རྡོ་རྗེ་ཆོས་སུ་བྱ། །ཞེས་དང་། སྒྱུ་འཕྲུལ་རྩ་རྒྱུད་ལས། སྨྲ་བྱེད་འཁོར་ལོའི་གཞལ་ཡས་སུ། །ཞེས་སོགས་གསུངས་པ་ལྟར་འཆད་པ་པོས་གསུང་རྡོ་རྗེ་སྣང་བ་མཐའ་ཡས་དང་། ཉན་པ་པོས་རིན་འབྱུང་དུ་བསྒོམ་པའང་རུང་ཞིང་། སྤྱི་ཙམ་དུ་ཀུན་མཁྱེན་ཆེན་པོས། དེ་ཡང་བདག་ཉིད་འཇམ་དཔལ་བསམ་པ་ཡིས། །སྙིང་ནང་ཆོས་ཀྱི་འོད་ཟེར་ཕོག་པར་བསམ། །ཞེས་པས་འཆད་པ་པོ་འཇམ་དཔལ་དུ་གསལ་བཏབ་པའི་ཞལ་ནས་
ཆོས་ཀྱི་འོད་ཟེར་བྱུང་བ། སློབ་མའི་སྙིང་ནང་དུ་ཕོག་པས་མི་ཤེས་པའི་མུན་པ་བསལ་ནས་བློ་གྲོས་ཀྱི་པདྨོ་རྒྱས་པར་བསམ་ལ་འཆད་ཅིང་མཉན་ནོ། །དེ་ཡང་འཆད་ཐབས་ཀྱི་མན་ངག་ནི། མདོ་ཡིན་ན་ཕུན་སུམ་ཚོགས་པ་ལྔ་དང་། བསྟན་བཅོས་ཡིན་ན་རྩིས་འགོ་རྣམ་པ་ལྔ་དང་། མདོ་བསྟན་ཐུན་མོང་དུ། དགོས་པ་བསྡུ་བའི་དོན་བཅས་དང་། །ཚིག་དོན་བཅས་དང་བརྒལ་ལན་བཅས། །མཚམས་སྦྱར་བསྙད་དེ་བཤད་པར་བྱ། །ཞེས་པ་ལྟར་མན་ངག་ལྔའི་སྒོ་ནས་འཆད་ཅིང་། ཁྱད་པར་ཟབ་མོའི་མདོ་སྡེ་རྣམས་དགོངས་ལྡེམ་དགོངས་དང་དྲང་ངེས་ལ་སོགས་པའི་སྒོ་ནས་འཆད་དོ། །གསང་སྔགས་ཀྱི་རྒྱུད་རྣམས་ཀྱིས་ནི་སྤྱིར་སྨིན་གྲོལ་གཉིས་སམ་བདེན་པ་གཉིས་དང་། མ་ཧཱ་མཱ་ཡ་ལས། སྔགས་དང་སྦྱིབས་དང་ཆོས་བདག་ཉིད། །སྦྱོར་བ་རྣམ་གསུམ་ཤེས་བྱ་སྟེ། །ཞེས་རྣལ་འབྱོར་གསུམ་དང་། དགྱེས་རྡོར་དུ་དག་པ་གསུམ་དང་། ཕྱི་ནང་གསང་བ་དེ་བཞིན་ནང་། །དེ་བཞིན་ཉིད་དོན་རྣམ་པ་བཞི། །ཞེས་པའམ། མངོན་བྱང་ལས། ལས་ཀྱི་ཕྱག་རྒྱ་ལེགས་སྦྱངས་ཏེ། །ཆོས་ཀྱི་ཕྱག་རྒྱ་བསྒོམ་པར་བྱ། །ཕྱག་རྒྱ་ཆེན་པོ་དེ་ཡི་སྟེང་། །དེ་ལས་དམ་ཚིག་ཡང་དག་འབྱུང་། །ཞེས་ཕྱག་རྒྱ་བཞི་དང་། ཕྱི་ནང་གཞན་དང་། རྟོན་པ་བཞིར་བཤད་པ་སོགས་མང་མོད། གསང་ཆེན་སྔ་འགྱུར་གྱི་ལུགས་ལ། ཧེ་རུ་ཀ་གལ་པོ་ལས། མ་ཧཱ་ཡོ་གའི་རྒྱན་བདུན་དང་། །གླེང་བསླང་བ་དང་སངས་རྒྱས་ཚུལ། །རྒྱས་བཤད་མཐའ་དང་བཤད་པའི་ཚུལ། །དབྱེ་བའི་རྣམ་པ་གང་ཟག་སྣོད། །བདེན་པའི་དགོངས་པ་ཤེས་པར་བྱ། །ཞེས་པ་ལྟར་མ་ཧཱ་ཡོ་ག་རྣམས་རྒྱན་བདུན་དང་། དེ་བཞིན་ཨ་ནུ་རྣམས་ལུང་བདུན་དང་། ཨ་ཏི་རྣམས་ཀྱིས་སྤྱི་དོན་དྲུག་གི་སྒོ་ནས་བློ་ཁ་དབྱེ་བར་བཤད་ཅིང་། སྒྲུབ་སྡེ་རྣམས་ནི། བདེ་འདུས་རྒྱུད་ཀྱི་སྤྱི་ཆིངས་ལས། བཤད་ཐབས་མན་ངག་ཉི་ཤུ་ལ། །སྤྱི་སྡོམ་ལྔ་དང་རྒྱུད་ཆིངས་ལྔ། །ལུང་སྡེབ་ལྔ་དང་སྒྲུབ་ཐབས་ཀྱི། །སྦྱོར་ལུགས་ལྔ་ཡིས་གཏན་ལ་དབབ། །ཅེས་བཤད་ཐབས་ཉི་ཤུར་གསུངས་ཤིང་། བྱེ་བྲག་བསྐྱེད་རྫོགས་གསུམ་ཀའི་ཐུན་མོང་དུ་སྤྱི་དོན་ལྔ་དང་། སྒྱུ་འཕྲུལ་བ་ལ་རྒྱུད་གསུམ་མམ་བཞིར་འཆད་པ་སོགས་སྣང་ལ། གསར་རྙིང་ཐུན་མོང་དུ་མཐའ་དྲུག་ཚུལ་བཞིའི་སྒོ་
ནས་བཤད་པ་ལ་སོགས་པ་རྣམས་སོ། །དེ་ཡང་འཆད་ཅིང་ཉན་པའི་ཚེ་ཆོས་ཀྱི་ཚིག་དོན་ལས་གཞན་དུ་མ་ཡེངས་པར་བློ་གནས་པ་ནི་ཞི་གནས། ཚིག་དོན་གྱི་རྣམ་དབྱེ་མ་འདྲེས་པར་གསལ་ཞིང་དོན་གོ་བ་ནི་ལྷག་མཐོང་སྟེ། ཡོན་ཏན་བཀོད་པའི་མདོ་ལས། འཇམ་དཔལ་འདི་ལྟར་ཐོས་པ་ཉིད་ལ་རྩེ་གཅིག་ཏུ་མ་ཡེངས་པ་སེམས་རབ་ཏུ་འཛིན་པ་ལ་ནི་སྒྲའི་རྗེས་སུ་མཐུན་པའི་ཞི་གནས་ཀྱི་ཏིང་ངེ་འཛིན་ལ། སོ་སོར་འབྱེད་ཅིང་གསལ་བར་དཔྱོད་པ་ནི་དོན་རབ་ཏུ་འབྱེད་པའི་ལྷག་མཐོང་ངོ་། །ཞེས་སོ། །མདོར་ན་ཇི་ལྟར་འཆད་པའི་ཆོས་ཀྱི་སྒོ་ཡང་། དྲང་དོན་གྱི་གདམས་པས་ཚེ་འདིའི་ཞེན་འཁྲིས་གཅོད་པ། ངེས་དོན་གྱི་གདམས་པས་འཁོར་བའི་མཚོ་ལས་སྒྲོལ་བ། སྙིང་པོ་དོན་གྱི་གདམས་པས་སྲིད་ཞི་མཉམ་ཉིད་དུ་གྲོལ་བར་བྱེད་པ་ལ་འདུས་པ་ཡིན་ནོ། །བཞི་པ་ཉན་བཤད་བྱས་པའི་ཕན་ཡོན་ལ་གཉིས་ལས། དང་པོ་གཙོ་བོར་ཉན་པ་པོས་ཐོབ་པའི་ཕན་ཡོན་ནི། གཎྜཱིའི་མདོ་ལས། དམ་ཆོས་བཤད་པའི་དུས་བསྟན་ཕྱིར། །རྔའམ་གཎྜཱི་བརྡུང་བའི་སྒྲ། །ཐོས་པས་བྱང་ཆུབ་འཐོབ་འགྱུར་ན། །ཉན་ཕྱིར་ལྷགས་པ་སྨོས་ཅི་དགོས། །ཞེས་དང་། འཕགས་པ་བྱང་ཆུབ་སེམས་དཔའི་སྡེ་སྣོད་ལས། མིག་ལྡན་མར་མེ་ཡོད་གྱུར་ན། །གཟུགས་རྣམས་མཐོང་བ་ཇི་ལྟ་བར། །དེ་བཞིན་དགེ་དང་མི་དགེའི་ཆོས། །ཐོས་པས་རྣམ་པར་ཤེས་པར་འགྱུར། །ཞེས་དང་། མྱ་ངན་མེད་ཀྱིས་སྦྱིན་པ་ལུང་བསྟན་པའི་མདོ་ལས། ཀུན་དགའ་བོ། གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་པོ་ཆེ་སྣ་ཚོགས་ཀྱིས་ཡོངས་སུ་བཀང་སྟེ་སྦྱིན་པ་བྱིན་པ་བས་གང་གི་ཚེ་ཆོས་ཀྱི་རྣམ་གྲངས་འདི་ཐ་ན་རྣ་ལམ་དུ་ཐོས་ན། དེ་ནི་དེ་བས་བསོད་ནམས་མང་དུ་བསྐྱེད། ཅེས་དང་། རྒྱུད་བླ་མར། ཤེས་རབ་མཆོག་ཡིན་དེའི་གཞི་ནི། །ཐོས་པ་དེ་ཕྱིར་ཐོས་པ་མཆོག །ཅེས་དང་། སྐྱེས་རབས་ལས། ཐོས་པ་གཏི་མུག་མུན་སེལ་སྒྲོན་མེ་ཡིན། །རྐུན་པོ་ལ་སོགས་མི་ཁྱེར་ནོར་གྱི་མཆོག །ཀུན་ཏུ་རྨོངས་པའི་དགྲ་འཇོམས་མཚོན་ཆ་ཡིན། །ཐབས་ཚུལ་མན་ངག་སྟོན་པ་གྲོགས་ཀྱི་མཆོག །ཅེས་གསུངས་སོ། །གཉིས་པ་འཆད་པ་པོས་ཐོབ་པའི་ཕན་ཡོན་
ནི། མདོ་ལས། གང་ལ་ཕན་ཕྱིར་ང་ཡི་ཆོས། །ཚུལ་བཞིན་བསྟན་པས་མཆོད་འགྱུར་གྱིས། །མེ་ཏོག་བྱུག་པ་མར་མེ་ཡིས། །རྒྱལ་བ་ཡང་དག་མཆོད་མ་ཡིན། །ཞེས་དང་། གང་གིས་གང་ཞིག་ཇི་སྙེད་སངས་རྒྱས་ཞིང་། །རིན་ཆེན་བདུན་གྱིས་ཡོངས་སུ་བཀང་བྱས་ནས། །དགའ་རབ་སེམས་ཀྱིས་རྒྱལ་ལ་ཕུལ་བ་བས། །གང་ཞིག་སེམས་ཅན་གཅིག་ལ་ཚིགས་བཅད་སྦྱིན། །རིན་ཆེན་སྦྱིན་པ་ཤིན་ཏུ་རྒྱ་ཆེ་དེས། །ཚིགས་བཅད་སྦྱིན་པ་སྙིང་རྗེས་བསྒྲུབ་དེ་ལ། །ཆར་ཡང་མི་ཕོད་གྲངས་སུའང་མ་ཡིན་ན། །གཉིས་དང་གསུམ་དུ་བསམ་དུ་ག་ལ་ཡོད། །ཅེས་དང་། རྩ་རྒྱུད་གསང་བ་སྙིང་པོ་ལས། དེ་བཞིན་གཤེགས་པ་ཐམས་ཅད་ཀྱི། །ཕྱག་རྒྱ་གསང་ཆེན་སྙིང་པོ་འདི། །རྟོགས་ནས་སྨྲ་བར་གང་བྱེད་པ། །དེ་ཉིད་ང་ཡིན་དབང་ཡང་རྫོགས། །ཞེས་དང་། རིན་ཆེན་ཕྲེང་བར། ཆོས་ཀྱི་ཆེད་དང་དེ་བཞིན་དུ། །གཞུང་གི་དོན་རྣམས་སྟོན་པ་དང་། །ཆོས་ཀྱི་སྦྱིན་པ་ཇི་སྙེད་པས། །ཚེ་རབས་དྲན་པ་ཐོབ་པར་འགྱུར། །ཞེས་སོགས་ཕན་ཡོན་དཔག་ཏུ་མེད་པ་གསུངས་མོད། འདིར་མདོ་ཙམ་མོ། །ཞེས་ཆོས་འཆད་ཉན་བྱེད་ཚུལ་གྱི་གཏམ་ཅུང་ཟད་སྨྲས་པ་འདི་ཡང་ཁམས་ས་ངན་པ་དད་བརྩོན་ཐོས་པའི་ནོར་གྱིས་ཕྱུག་པའི་བླ་མ་གསང་སྔགས་བསྟན་འཛིན་དང་ཀུན་བཟང་རྣམ་རྒྱལ་གཉིས་ཀྱིས་བསྐུལ་ངོར། གཏེར་ཆེན་བླ་མའི་བཀའ་དྲིན་གྱིས་འཚོ་བའི་སྨྱོས་ཀྱི་དགེ་སློང་རྨོངས་པ་དྷརྨ་ཤྲཱིས་ཧོར་ཟླ་དགུ་པའི་ཚེས་ཉེར་བརྒྱད་ཀྱི་ཕྱི་དྲོ་ཐུན་ཆེན་གཅིག་ལ་རྫོགས་པར་སྤེལ་བས་དགེ་ལེགས་སུ་གྱུར་ཅིག། །།