མངོན་སུམ་ལེའུའི་མཐའ་དཔྱོད།

ལེའུ་སྔ་ཕྱིའི་འབྲེལ་དང་ལེའུའི་གཞུང་ཇི་ལྟར་འཆད་ཚུལ།

༄༅། །རྒྱས་པའི་བསྟན་བཅོས་ཚད་མ་རྣམ་འགྲེལ་གྱི་ལེའུ་གསུམ་པའི་མཐའ་དཔྱོད་རྗེ་རྟ་ནག་པ་དགེ་འདུན་བློ་བཟང་གི་གསུང་རྒྱུན་དྲི་མ་མེད་པའི་གླེགས་བམ་གསུམ་པ་བཞུགས་སོ། །

གཞལ་བྱ་མངོན་གྱུར་ངེས་བྱེད་ཀྱི་ཐབས་མངོན་སུམ་གྱི་ལེའུ་འཆད་པར་བྱེད་པ་ལ། ལེའུ་སྔ་ཕྱིའི་འགྲེལ་པ་བཤད་པ་དང་། ལེའུའི་གཞུང་ཇི་ལྟར་འཆད་པའི་ཚུལ་གཉིས། དང་པོ་ལ་བཤད་བྱའི་ལུང་འགོད་པ་དང་། ལུང་གི་དོན་བཤད་པ་གཉིས། དང་པོ་ནི། ལྷས། སློབ་དཔོན་གྱིས་ཚད་མའི་མཚན་ཉིད་ཀྱི་བསྟན་བཅོས་བཤད་པའི་རྒྱུ་རྗེས་སུ་དཔག་པ་སྔར་རྣམ་པར་གཞག་པ་དང་། སློབ་དཔོན་གྱིས་གསུངས་པ་བསྟན་བཅོས་ཀྱི་དང་པོར་ཕྱག་འཚལ་བའི་ཚིགས་སུ་བཅད་པའི་ཕྱེད་འོག་མ་རྟོགས་སླ་བ་ཉིད་ཀྱི་ཕྱིར་ཕྱེད་གོང་མ་ཉིད་ཀྱི་བཤད་པ་ཡོངས་སུ་རྫོགས་པར་མཛད་ནས། ད་ནི་ཚད་མའི་མཚན་ཉིད་ཀྱི་བཤད་པ་མཛད་པའི་ཕྱིར། གཞལ་བྱ་གཉིས་ཕྱིར་ཞེས་བྱ་བ་ལ་སོགས་པ་བརྩམས་པ་ཡིན་ནོ། །ཞེས་གསུངས། གཉིས་པ་ལུང་གི་དོན་བཤད་པ་ནི། དེ་ཡང་སློབ་དཔོན་གྱིས་ཚད་མའི་མཚན་ཉིད་ཀྱི་བསྟན་བཅོས་བཤད་པའི་རྒྱུ་རྗེས་སུ་དཔག་པ་སྔར་རྣམ་པར་གཞག་པ་དང་ཞེས་པས་མདོ་དོན་འཆད་བྱེད་ཀྱིས་ཐབས་རང་དོན་རྗེས་དཔག་དེ་ལེའུ་དང་པོར་བསྟན། ཞེས་བསྟན། སློབ་དཔོན་གྱིས་གསུངས་པ་བསྟན་བཅོས་ཀྱི་དང་པོར་ཞེས་པ་ནས། ཡོངས་སུ་རྫོགས་པར་མཛད་པ་ནས། །ཞེས་པའི་བར་གྱིས་ཚད་མ་མདོའི་མཆོད་བརྗོད། ཚད་མར་གྱུར་པ་འགྲོ་ལ་ཕན་བཞེད་པ། །ཞེས་སོགས་རྐང་པ་གཉིས་ཀྱི་དོན་རྟོགས་དཀའ་བས། དེའི་དོན་འཆད་པར་བྱེད་པ་ལ། ཚད་མ་གྲུབ་པའི་ལེའུ་ལོགས་སུ་མཛད། །ཅེས་བསྟན། ད་ནི་ཚད་མའི་མཚན་ཉིད་ཀྱི་བཤད་པ་མཛད་པའི་ཕྱིར། གཞལ་བྱ་གཉིས་ཕྱིར་ཞེས་བྱ་བ་ལ་སོགས་པ་བརྩམས་པ་ཡིན་ནོ། །ཞེས་པས། ཚད་མ་གྲུབ་པའི་ལེའུ་དེར་གསར་དུ་མི་བསླུ་བའི་རིག་པ་ཚད་མའི་མཚན་ཉིད་དུ་བསྟན་པ་དེ་རྟོགས་པའི་ཡན་ལག་ཏུ། གཞལ་བྱ་གཉིས་ཕྱིར་ཞེས་པ་ནས་ཚད་མ་མདོའི་མངོན་སུམ་ལེའུའི་ལུས་དངོས་འཆད་ཅེས་བསྟན། གཉིས་པ་ལེའུའི་གཞུང་ཇི་ལྟར་འཆད་ཚུལ་ལ། གཞལ་བྱ་གཉིས་ཕྱིར་ཞེས་པ་ནས། ཚད་མ་མདོའི་མངོན་སུམ་ལེའུའི་ལུས་དངོས་འཆད་ན། འཆད་ཚུལ་དེ་གང་ཞེ་ན། དེ་ཡང་ལོག་རྟོག་རྣམ་པ་བཞི་བསལ་ནས་གྲངས་སོགས་ཆོས་བཞི་བསྟན་པའི་སྒོ་ནས་དེ་ལྟར་འཆད་པ་ཡིན་ཏེ། ལྷས། ཚད་མ་དང་དེའི་མཚན་ཉིད་ཀྱི་བསྟན་བཅོས་དག་ལ་ལོག་པར་རྟོག་པ་རྣམ་པ་བཞི་སྟེ། འདི་ལྟ་སྟེ། གྲངས་ལ་ལོག་པར་རྟོག་པ་དང་། མཚན་ཉིད་ལ་ལོག་པར་རྟོག་པ་དང་། སྤྱོད་ཡུལ་ལ་ལོག་པར་རྟོག་པ་དང་། འབྲས་བུ་ལ་ལོག་པར་རྟོག་པའོ། །དེ་ལ་དང་པོ་གྲངས་ལ་ལོག་པར་རྟོག་པ་བསལ་བར་བྱ་བའི་ཕྱིར། གཞལ་བྱ་གཉིས་ཕྱིར་ཞེས་བྱ་བ་ལ་སོགས་པ་སྨོས་སོ། །ཞེས་གསུངས་པའི་ཕྱིར། འོ་ན། སྐབས་འདིར་གྲངས་སོགས་ཆོས་བཞི་པོ་དེ་བསྟན་པ་མི་འཐད་པར་ཐལ། སྐབས་འདིར་ཚད་མའི་མཚན་ཉིད་སྟོན་རིགས་པའི་ཕྱིར། ཟེར་ན། སྐྱོན་མེད་དེ། གྲངས་སོགས་ཆོས་བཞི་པོ་དེ་མ་བསྟན་པར་གསར་དུ་མི་བསླུ་བའི་རིག་པ་ཚད་མའི་མཚན་ཉིད་རྣམ་དག་ཏུ་རྟོགས་མི་ནུས་པའི་ཕྱིར། དེ་ཡང་ཚད་མའི་གྲངས་ངེས་མ་བསྟན་པར་གསར་དུ་མི་བསླུ་བའི་རིག་པ་ཚད་མའི་མཚན་ཉིད་རྣམ་དག་ཏུ་རྟོགས་མི་ནུས་ཏེ། ཚད་མའི་གྲངས་ངེས་མ་བསྟན་པར་ཚད་མའི་གྲངས་ངེས་ལ་ལོག་པར་རྟོག་པའི་ལོག་རྟོག་དེ་ཚད་མ་ཡིན་པ་མི་ཁེགས། དེ་མ་ཁེགས་ན། ཚད་མ་ཡིན་ན་གསར་དུ་མི་བསླུ་བའི་རིག་པ་ཡིན་པའི་ཁྱབ་པ་མི་འགྲུབ། དེ་མ་གྲུབ་ན། གསར་དུ་མི་བསླུ་བའི་རིག་པ་ཚད་མའི་མཚན་ཉིད་རྣམ་དག་ཏུ་རྟོགས་མི་ནུས་པའི་ཕྱིར། གསར་དུ་མི་བསླུ་བའི་རིག་པ་ཚད་མའི་མཚན་ཉིད་རྣམ་དག་ཏུ་ངེས་པ་ལ་གཞལ་བྱའི་གྲངས་ངེས་བསྟན་དགོས་པ་ཡིན་ཏེ། གཞལ་བྱའི་གྲངས་ངེས་མ་བསྟན་པར་གཞལ་བྱའི་གྲངས་ངེས་ལ་ལོག་པར་རྟོག་པའི་ལོག་རྟོག་ཚད་མ་ཡིན་པ་མི་ཁེགས། དེ་མ་ཁེགས་ན། ཚད་མ་ཡིན་ན། གསར་དུ་མི་བསླུ་བའི་རིག་པ་ཡིན་པས་ཁྱབ་པ་མི་འགྲུབ། དེ་མ་གྲུབ་ན། གསར་དུ་མི་བསླུ་བའི་རིག་པ་ཚད་མའི་མཚན་ཉིད་རྣམ་དག་ཏུ་རྟོགས་མི་ནུས་པའི་ཕྱིར། གསར་དུ་མི་བསླུ་བའི་རིག་པ་ཚད་མའི་མཚན་ཉིད་རྣམ་དག་ཏུ་རྟོགས་པ་ལ་མངོན་སུམ་ཚད་མའི་ངོ་བོ་བསྟན་དགོས་པ་ཡིན་ཏེ། མངོན་སུམ་ཚད་མའི་ངོ་བོ་མ་བསྟན་པར། མངོན་སུམ་ཚད་མའི་ངོ་བོ་ལ་ལོག་པར་རྟོག་པའི་ལོག་རྟོག་ཚད་མ་ཡིན་པ་མི་ཁེགས། དེ་མ་ཁེགས་ན། ཚད་མ་ཡིན་ན་གསར་དུ་མི་བསླུ་བའི་རིག་པ་ཡིན་པས་ཁྱབ་པ་མི་འགྲུབ། དེ་མ་གྲུབ་ན། དེ་དེའི་མཚན་ཉིད་རྣམ་དག་ཏུ་རྟོགས་མི་ནུས་པའི་ཕྱིར། གསར་དུ་མི་བསླུ་བའི་རིག་པ་ཚད་མའི་མཚན་ཉིད་རྣམ་དག་ཏུ་རྟོགས་པ་ལ། མངོན་སུམ་ཚད་མའི་འབྲས་བུ་ཡང་བསྟན་དགོས་ཏེ། དེ་མ་བསྟན་ན་ཚད་འབྲས་རྫས་གཞན་དུ་འཛིན་པའི་ལོག་རྟོག་ཚད་མ་ཡིན་པ་མི་ཁེགས། དེ་མ་ཁེགས་ན། ཚད་མ་ལ་གསར་དུ་མི་བསླུ་བའི་རིག་པས་ཁྱབ་པ་མི་འགྲུབ། དེ་མ་གྲུབ་ན། གསར་དུ་མི་བསླུ་བའི་རིག་པ་ཚད་མའི་མཚན་ཉིད་རྣམ་དག་ཏུ་རྟོགས་མི་ནུས་པའི་ཕྱིར། འོ་ན། དེ་ལྟར་ཡིན་ན། ལོག་རྟོག་རྣམ་པ་བཞི་པོ་གང་ཞེ་ན། དེ་ཡང་ཚད་མའི་གྲངས་ངེས་ལ་ལོག་པར་རྟོག་པའི་ལོག་རྟོག་གི་རིགས་དེ་ལ་དུ་མ་ཡོད་དེ། གཅེར་བུ་པས་ཚད་མ་ལ་མངོན་སུམ་གཅིག་པུར་གྲངས་ངེས་པར་འདོད་པའི་ལོག་རྟོག་གཅིག་དང་། གྲངས་ཅན་གྱིས་ཚད་མ་ལ་མངོན་སུམ་ཚད་མ། རྗེས་སུ་དཔག་པའི་ཚད་མ། སྒྲ་བྱུང་གི་ཚད་མ་གསུམ་དུ་གྲངས་ངེས་པར་འདོད་པའི་ལོག་རྟོག་གཅིག་དང་། རིགས་པ་ཅན་པས་དེའི་སྟེང་དུ་དཔེ་ཉེར་འཇལ་གྱི་ཚད་མ་དང་བཞིར་འདོད་པའི་ལོག་རྟོག་གཅིག་དང་། རྒྱལ་དཔོག་པས། དེའི་སྟེང་དུ་དོན་གྱིས་གོ་བའི་ཚད་མ། དངོས་པོར་མེད་པའི་ཚད་མ་དང་དྲུག་ཏུ་གྲངས་ངེས་པར་འདོད་པའི་ལོག་རྟོག་གཅིག་དང་། ཙ་ར་ཀ་པས། དེའི་སྟེང་དུ་རིག་པའི་ཚད་མ། དམིགས་པའི་ཚད་མ། སྲིད་པའི་ཚད་མ། ཞེས་གྲགས་པའི་ཚད་མ། སྙམ་སེམས་པའི་ཚད་མ་དང་བཅུ་གཅིག་ཏུ་གྲངས་ངེས་པར་འདོད་པའི་ལོག་རྟོག་གཅིག་སྟེ་དུ་མ་ཡོད་པའི་ཕྱིར། །

ལོག་རྟོག་བཞི་བསལ་ནས་ཚད་མའི་གྲངས་སོགས་ཆོས་བཞི་བསྟན་ཚུལ།

༈ མངོན་སུམ་ཚད་མའི་ངོ་བོ་ལ་ལོག་པར་རྟོག་པའི་ལོག་རྟོག་གི་རིགས་དེ་ལ་ཡང་དུ་མ་ཡོད་དེ། རིགས་པ་ཅན་པས། མངོན་སུམ་ཐམས་ཅད་རྟོག་པར་འདོད་པའི་ལོག་རྟོག་གཅིག །རྒྱལ་འབོག་པས་མངོན་སུམ་སྐད་ཅིག་མ་གཉིས་ཕན་ཆད་རྟོག་པར་འདོད་པའི་ལོག་རྟོག་གཅིག་དང་། གྲངས་ཅན་གྱིས་རྣ་བ་ལ་སོགས་པ་དབང་པོའི་འཇུག་པ་ཚད་མར་འདོད་པའི་ལོག་རྟོག་གཅིག་དང་། བྱེ་བྲག་པས། དབང་དོན་འཕྲད་པའི་འབྲེལ་པ་ཚད་མར་འདོད་པའི་ལོག་རྟོག་གཅིག་དང་། མུ་སྟེགས་རྣ་བ་མ་ཕུག་པའི་སྡེ་པས། ཡིད་མངོན་མེད་པར་འདོད་པའི་ལོག་རྟོག་གཅིག་དང་། རང་སྡེ་བྱེ་བྲག་སྨྲ་བས་རང་རིག་མེད་པར་འདོད་པའི་ལོག་རྟོག་གཅིག་དང་། རྒྱང་འཕེན་གྱིས་རྣལ་འབྱོར་མངོན་སུམ་མེད་པར་འདོད་པའི་ལོག་རྟོག་གཅིག་སྟེ་དུ་མ་ཡོད་པའི་ཕྱིར། སྤྱོད་ཡུལ་ལ་ལོག་པར་རྟོག་པའི་ལོག་རྟོག་གི་རིགས་དེ་ལ་ཡང་དུ་མ་ཡོད་དེ། རིགས་པ་ཅན་པས། སྤྱི་དངོས་པོ་བ་མངོན་སུམ་གྱི་སྣང་ཡུལ་དུ་འདོད་པའི་ལོག་རྟོག་དང་། གྲངས་ཅན་གྱིས་གང་ཟག་གི་བདག་རྟག་པ་བ། རྗེས་དཔག་གི་སྣང་ཡུལ་དུ་འདོད་པའི་ལོག་རྟོག་གཅིག་སྟེ་དུ་མ་ཡོད་པའི་ཕྱིར། །

༈ མངོན་སུམ་ཚད་མའི་འབྲས་བུ་ལ་ལོག་པར་རྟོག་པའི་ལོག་རྟོག་གི་རིགས་དེ་ལ་ཡང་དུ་མ་ཡོད་དེ། དཔྱོད་པ་པས་གཟུགས་སོགས་གཞལ་བྱ། དང་པོར་དོན་ལ་ལྟ་བའི་ཤེས་པ་དག་པ་བ་རྟོག་མེད་ཚད་མ། དེ་ལས་སྐྱེས་པའི་དོན་རྟོགས་འབྲས་བུར་བྱེད་པའི་ཚད་འབྲས་ཀྱི་རྣམ་བཞག་གཅིག་དང་། གྲངས་ཅན་གྱིས་གཟུགས་སོགས་གཞལ་བྱ། རྣ་བ་ལ་སོགས་པའི་དབང་པོའི་འཇུག་པ་ཚད་མ། དེ་ལས་སྐྱེས་པའི་དོན་རྟོགས་འབྲས་བུར་བྱེད་པའི་ཚད་འབྲས་ཀྱི་རྣམ་བཞག་གཅིག་དང་། རིགས་པ་ཅན་པས། གཟུགས་སོགས་གཞལ་བྱ། སྤྱི་སོགས་ཁྱད་པར་མཐོང་བའི་བློ་ཚད་མ། ཁྱད་པར་རྫས་འཛིན་གྱི་བློ་འབྲས་བུར་བྱེད་པའི་ཚད་འབྲས་ཀྱི་རྣམ་བཞག་གཅིག་དང་། བྱེ་བྲག་པས། ཤེས་བྱ་ཚིག་གི་དོན་དྲུག་གཞལ་བྱ། དབང་དོན་འཕྲད་པའི་འབྲེལ་པ་ཚད་མ། དེ་ལས་སྐྱེས་པའི་དོན་རྟོགས་འབྲས་བུར་བྱེད་པའི་ཚད་འབྲས་ཀྱི་རྣམ་བཞག་གཅིག་དང་། བྱེ་བྲག་སྨྲ་བས་གཟུགས་སོགས་གཞལ་བྱ། རྟེན་བཅས་ཀྱི་དབང་པོ་གཟུགས་ཅན་པ་ཚད་མ། དེ་ལས་སྐྱེས་པའི་དོན་རྟོགས་འབྲས་བུར་བྱེད་པའི་ཚད་འབྲས་ཀྱི་རྣམ་བཞག་དེ། ཚད་འབྲས་ཀྱི་རྣམ་བཞག་འཐད་ལྡན་དུ་འདོད་པའི་ལོག་རྟོག་དུ་མ་ཡོད་པའི་ཕྱིར། འོ་ན། ལོག་རྟོག་རྣམ་པ་བཞི་པོ་དེ་སེལ་དགོས་པའི་རྒྱུ་མཚན་གང་ཞེ་ན། དེ་ཡོད་དེ། ལོག་རྟོག་བཞི་པོ་དེ་མ་བསལ་ན། སྒྲོ་འདོགས་དང་སྐུར་འདེབས་ཀྱི་གཡང་སར་ལྟུང་བ་དེ་མི་ཁེགས། དེ་མ་ཁེགས་ན། རང་མི་འདོད་པའི་དོན་ཐོབ་ཅིང་། འདོད་པའི་དོན་མི་འགྲུབ་པར་འགྱུར་ལ། ལོག་རྟོག་བཞི་པོ་དེ་བསལ་ན་རྟོགས་བྱེད་ཀྱི་ཚད་མ་དང། དེའི་རྟོགས་བྱའི་ཡུལ་དང་། དེས་ཡུལ་རྟོགས་པའི་ཚུལ་ལ་སོགས་པ་ཁོང་དུ་ཆུད་པར་འགྱུར་ལ། དེ་ལྟར་ཁོང་དུ་ཆུད་ན། མི་འདོད་པའི་དོན་སྤོང་ཞིང། འདོད་པའི་དོན་མཐའ་དག་འགྲུབ་པར་འགྱུར་བའི་ཕྱིར།

༈ འོ་ན། དེ་ལྟར་ཡིན་ན། ལོག་རྟོག་བཞི་པོ་དེ་སེལ་བྱེད་ཀྱི་གཞུང་གང་ཞེ་ན། འདི་ལ་ལོག་རྟོག་དང་པོ་སེལ་བྱེད་ཀྱི་གཞུང་ངོས་བཟུང་བ་དང་། ལོག་རྟོག་ཕྱི་མ་གསུམ་སེལ་བྱེད་ཀྱི་གཞུང་ངོས་བཟུང་བ་གཉིས། དང་པོ་ལ་ཚད་མ་མདོ་ལས་གསུངས་ཚུལ་དང་། དེ་བསྟན་བཅོས་འདིར་འབྲེལ་ཚུལ་གཉིས། དང་པོ་ནི། ཚད་མ་མདོ་ལས། མངོན་སུམ་དང་ནི་རྗེས་སུ་དཔག །ཚད་མའོ་མཚན་ཉིད་གཉིས་གཞལ་བྱ། །དེ་ལ་རབ་སྦྱོར་ཕྱིར་ཚད་མ། །གཞན་ནི་ཡོད་པ་མ་ཡིན་ནོ། །ཞེས་གསུངས། འདིའི་དོན་ལ་དངོས་བསྟན་གྱི་དབང་དུ་བྱས་པ་དང་། ཤུགས་བསྟན་གྱི་དབང་དུ་བྱས་པ་གཉིས། དང་པོ་ནི། མངོན་སུམ་དང་ནི་རྗེས་སུ་དཔག །ཚད་མའོ། །ཞེས་པས་ཚད་མ་ལ་མངོན་སུམ་གྱི་ཚད་མ་དང་། རྗེས་སུ་དཔག་པའི་ཚད་མ་གཉིས་སུ་གྲངས་ངེས་པར་དངོས་སུ་བསྟན། མཚན་ཉིད་གཉིས་གཞལ་བྱ་ཞེས་པས་གཞལ་བྱ་ལ་རང་སྤྱི་གཉིས་སུ་གྲངས་ངེས་པར་དངོས་སུ་བསྟན། གཉིས་པ་ནི། མངོན་སུམ་དང་ནི་རྗེས་སུ་དཔག །ཚད་མའོ། །ཞེས་པས་ཤུགས་ལ་ཚད་མ་མངོན་སུམ་གཅིག་པུར་གྲངས་ངེས་པ་དང་། ཚད་མ་ལ་མངོན་སུམ་གྱི་ཚད་མ་དང་། རྗེས་སུ་དཔག་པའི་ཚད་མ་དང་། སྒྲ་བྱུང་གི་ཚད་མ་གསུམ་དུ་གྲངས་ངེས་པ་ལ་སོགས་པ་བཀག་པ་ཡིན་ཏེ། འགྲེལ་བཤད་རྒྱལ་དབང་བློས། ཚད་མ་དག་ནི་གཉིས་ཁོ་ན་སྟེ། ཚད་མ་གཅིག་དང་གསུམ་རྣམས་བསལ་ཏོ། །ཞེས་གསུངས་པའི་ཕྱིར། མཚན་ཉིད་གཉིས་གཞལ་བྱ། ཞེས་པ་འདིས་ཀྱང་ཤུགས་ལ། ཚད་མ་ལ་མངོན་སུམ་གཅིག་པུར་གྲངས་ངེས་པ་དང་། ཚད་མ་ལ་མངོན་སུམ་གྱི་ཚད་མ་དང་། རྗེས་སུ་དཔག་པའི་ཚད་མ་དང་། སྒྲ་བྱུང་གི་ཚད་མ་གསུམ་དུ་གྲངས་ངེས་པ་ལ་སོགས་པ་བཀག་པ་ཡིན་ཏེ། དེ་སྐད་དུ་ཡང་འགྲེལ་བཤད་རྒྱལ་དབང་བློས། ཡང་ན་གཞལ་བྱ་གཉིས་སུ་བསྟན་པས་གཅིག་དང་གསུམ་རྣམས་བཀག་གོ །ཞེས་གསུངས་པའི་ཕྱིར། །

༈ གཉིས་པ་དེ་བསྟན་བཅོས་འདིར་འགྲེལ་བར་བྱེད་པ་ལ། གཞལ་བྱ་གཉིས་ཕྱིར་ཚད་མ་གཉིས། །ཞེས་པ་ནས། དྲན་མིན་མ་ཡིན་འཁྲུལ་ཕྱིར་རོ། །ཞེས་པའི་བར་བྱུང་། དེ་ཡང་མངོན་སུམ་དང་ནི་ཞེས་པ་ནས། གཉིས་གཞལ་བྱ། ཞེས་པའི་བར་གྱི་དོན་མདོར་བསྟན་གྱི་ཚུལ་གྱིས་འཆད་པར་བྱེད་པ་ལ། གཞལ་བྱ་གཉིས་ཕྱིར་ཚད་མ་གཉིས། །ཞེས་པ་འདི་བྱུང་། གཞལ་བྱ་ཞེས་སོགས་འདིའི་རྟགས་བསྒྲུབ་པ་ལ། དོན་བྱེད་ནུས་དང་མི་ནུས་ཕྱིར། །ཞེས་པ་ནས། ཚད་མ་ཉིད་དུ་རྣམ་པར་བཞག །ཅེས་པའི་བར་བྱུང་། འདིའི་ཁྱབ་སྒྲུབ་དེ་འཆད་པ་ལ། གང་ལ་དོན་གྱི་ནུས་པ་ལས། །ཞེས་པ་ནས། སྒྲུབ་བྱེད་གཅིག་ཏུ་ངེས་པ་ཡིན། །ཞེས་པའི་བར་བྱུང་། དེ་གཉིས་ཀྱི་དོན་བསྡུ་འཆད་པར་བྱེད་པ་ལ། མངོན་སུམ་ལྐོག་ཏུ་གྱུར་པ་ལས། །ཞེས་སོགས་རྐང་པ་བཞི་བྱུང། གཞན་ལུགས་ཀྱི་ཚད་མའི་གྲངས་ངེས་འགོག་པར་བྱེད་པ་ལ། གཞལ་བྱ་གཉིས་ནི་མཐོང་བའི་ཕྱིར། །ཞེས་པ་ནས། དེ་ཕྱིར་དེ་ལ་རྗེས་དཔག་གཉིས། །ཞེས་པའི་བར་བྱུང་། མདོ་རང་འགྲེལ་ལས། གལ་ཏེ་མི་རྟག་ཅེས་བྱ་བ་ལ་སོགས་པའི་རྣམ་པའི་ཁ་དོག་ལ་སོགས་པ་འཛིན་པ་དང་། ལན་ཅིག་མ་ཡིན་པར་འཛིན་པ་དེ་ཇི་ལྟར་ཞེ་ན་ཞེས་པའི་དོན་འཆད་པར་བྱེད་པ་ལ། གཞལ་བྱ་ངེས་ན་ཁ་དོག་ནི། །ཞེས་པ་དང་། དྲན་མིན་མ་ཡིན་འཁྲུལ་ཕྱིར་རོ། །ཞེས་པའི་བར་བྱུང་། གཞལ་བྱ་གཉིས་ཕྱིར་ཚད་མ་གཉིས། །ཞེས་པའི་རྟགས་སྒྲུབ་པ་ལ་ཡང་། རྟགས་ཀྱི་ངོ་བོའི་སྒོ་ནས་སྒྲུབ་པའི་རིགས་པ། ཡུལ་ཅན་བློའི་སྒོ་ནས་སྒྲུབ་པའི་རིགས་པ། ཡུལ་ཅན་སྒྲའི་སྒོ་ནས་སྒྲུབ་པའི་རིགས་པ། བྱེད་ལས་ཀྱི་སྒོ་ནས་སྒྲུབ་པའི་རིགས་པ་དང་བཞི། དང་པོ་འཆད་པར་བྱེད་པ་ལ། དོན་བྱེད་ནུས་དང་མི་ནུས་ཕྱིར། །ཞེས་པ་འདི་བྱུང་། གཉིས་པ་འཆད་པར་བྱེད་པ་ལ། འདྲ་དང་མི་འདྲ་ཉིད་ཕྱིར་དང་། །ཞེས་པ་འདི་བྱུང་། གསུམ་པ་འཆད་པར་བྱེད་པ་ལ། སྒྲ་ཡི་ཡུལ་དང་ཡུལ་མིན་ཕྱིར། །ཞེས་པ་འདི་བྱུང་། བཞི་པ་འཆད་པར་བྱེད་པ་ལ། རྒྱུ་མཚན་གཞན་ནི་ཡོད་པ་ན། །ཞེས་སོགས་རྐང་པ་གཉིས་བྱུང་། རྩོད་པ་སྤོང་བ་ལ། ཁ་ཅིག་ན་རེ། གཞལ་བྱ་ལ་རང་སྤྱི་གཉིས་སུ་གྲངས་ངེས་པ་མི་འཐད་པར་ཐལ། སྐྲ་ཤད་འཛག་སྣང་གི་དབང་ཤེས་ལ་སྣང་བའི་སྐྲ་ཤད་དེ། རང་སྤྱི་གང་ཡང་མ་ཡིན་པའི་གཞལ་བྱ་ཡིན་པའི་ཕྱིར། དེ་གཞལ་བྱ་ཡིན་ཏེ། དེ་རང་འཛིན་གྱི་བློ་ལ་སྣང་བའི་ཕྱིར། དེ་རང་མཚན་མ་ཡིན་ཏེ། དོན་བྱེད་མི་ནུས་པའི་ཕྱིར། དེ་སྤྱི་མཚན་མ་ཡིན་ཏེ། བློ་ལ་གསལ་བར་སྣང་བའི་ཕྱིར་ཟེར་ན། དེ་འདྲའི་དབང་ཤེས་ལ་སྣང་བའི་སྐྲ་ཤད་ཆོས་ཅན། གཞལ་བྱ་མ་ཡིན་ཏེ། གཞལ་བྱར་ཚད་མས་མ་དམིགས་པའི་ཕྱིར། ཞེས་འཆད་པར་བྱེད་པ་ལ། སྐྲ་ཤད་ལ་སོགས་དོན་མིན་ཏེ། །ཞེས་སོགས་རྐང་པ་གཉིས་བྱུང་། དོན་བྱེད་ནུས་དང་མི་ནུས་ཕྱིར། །ཞེས་སོགས་རྐང་པ་བཞིའི་ཁྱབ་སྒྲུབ་འཆད་པར་བྱེད་པ་ལ། དོན་དམ་དོན་བྱེད་ནུས་པ་གང་། །ཞེས་སོགས་རྐང་པ་བཞི་བྱུང་། དེ་ཡང་དང་པོའི་དབང་དུ་བྱས་ནས། དོན་དམ་དོན་བྱེད་ནུས་པ་གང་། །ཞེས་པ་འདི་བྱུང་། གཉིས་པའི་དབང་དུ་བྱས་ནས། ཐུན་མོང་མ་ཡིན་སྣང་བ་གང་། དེ་འདིར་དོན་དམ་ཡོད་པ་ཡིན། །གཞན་ནི་ཀུན་རྫོབ་ཡོད་པ་སྟེ། །དེ་དག་རང་སྤྱིའི་མཚན་ཉིད་བཤད། །ཅེས་པ་འདི་བྱུང་། གསུམ་པའི་དབང་དུ་བྱས་ནས། སྒྲ་ཡི་ཡུལ་དང་ཡུལ་མིན་ཕྱིར། །ཞེས་པ་འདི་བྱུང་། བཞི་པའི་དབང་དུ་བྱས་ནས་རྒྱུ་མཚན་གཞན་ཡོད་བློ་མེད་གང་། །ཞེས་སོགས་འདོན་པ་བསྒྱུར་དགོས་པ་ཡིན་ཏེ། ཤཱཀྱའི་འགྲེལ་པ་ལས། མདོར་ན། དོན་བྱེད་ནུས་པ་སྨོས་པས་ནི་ཉེ་བར་མཚོན་པ་ཡིན་ནོ། །ཞེས་གསུངས་པའི་ཕྱིར། དེ་ཡང་ཁྱབ་སྒྲུབ་དང་པོའི་དབང་དུ་བྱས་ནས། གཞལ་བྱ་ལ་དོན་བྱེད་ནུས་པ་དང་མི་ནུས་པའི་ཆོས་གཉིས་སུ་གྲངས་ངེས་ན། གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་ཁྱབ་སྟེ། དོན་བྱེད་ནུས་པ་དེ་རྟོག་པས་སྒྲོ་མ་བཏགས་པར་རང་གི་ཐུན་མོང་མ་ཡིན་པའི་སྡོད་ལུགས་ཀྱི་ངོས་ནས་གྲུབ་པ་དང་། དོན་བྱེད་མི་ནུས་པའི་ཆོས། རྟོག་པས་སྒྲོ་བཏགས་པའི་ཆོས་གང་ཞིག །རྟོག་པས་སྒྲོ་མ་བཏགས་པར་ཞེས་སོགས་དེ། རང་མཚན་གྱི་མཚན་ཉིད་དང་། གཅིག་ཤོས་དེ་སྤྱི་མཚན་གྱི་མཚན་ཉིད་ཡིན་པའི་ཕྱིར། ཁྱབ་སྒྲུབ་གཉིས་པའི་དབང་དུ་བྱས་ན། གཞལ་བྱ་ལ་རང་སྣང་ཡུལ་དུ་བྱེད་པའི་བློ་ངོར་ཆོས་གཞན་ལ་རྗེས་འགྲོ་བྱེད་པར་སྣང་བ་དང་། དེ་ལྟར་མི་བྱེད་པར་སྣང་བའི་ཆོས་གཉིས་སུ་གྲངས་ངེས་ན། གཞལ་བྱ་ལ་རང་སྤྱི་གཉིས་སུ་གྲངས་ངེས་པས་ཁྱབ་སྟེ། རང་སྣང་ཡུལ་དུ་བྱེད་པའི་བློ་ངོར་ཆོས་གཞན་ལ་རྗེས་འགྲོ་མི་བྱེད་པར་སྣང་བ་དེ། རྟོག་པས་སྒྲོ་མ་བཏགས་པར་རང་གི་ཐུན་མོང་མ་ཡིན་པའི་སྡོད་ལུགས་ཀྱི་ངོས་ནས་གྲུབ། གཅིག་ཤོས་དེ་རྟོག་པས་སྒྲོ་བཏགས་པའི་ཆོས་ཡིན་པ་གང་ཞིག །རྟོག་པས་སྒྲོ་མ་བཏགས་པ་ཞེས་སོགས་དེ་རང་མཚན་གྱི་མཚན་ཉིད་དང་། གཉིས་པ་དེ་སྤྱི་མཚན་གྱི་མཚན་ཉིད་ཡིན་པའི་ཕྱིར། ཁྱབ་སྒྲུབ་གསུམ་པའི་དབང་དུ་བྱས་ན། གཞལ་བྱ་ལ་རྟོག་པའི་སྣང་ཡུལ་དུ་གྱུར་པའི་སྒོ་ནས་རྗོད་བྱེད་ཀྱི་སྒྲའི་བརྗོད་བྱ་དང་། དེར་གྱུར་པའི་རྗོད་བྱེད་ཀྱི་སྒྲའི་བརྗོད་བྱ་མ་ཡིན་པའི་ཆོས་གཉིས་སུ་གྲངས་ངེས་ན། གཞལ་བྱ་ལ་རང་སྤྱི་གཉིས་སུ་གྲངས་ངེས་པས་ཁྱབ་སྟེ། དང་པོ་དེ་རྟོག་པས་སྒྲོ་མ་བཏགས་པར་ཐུན་མོང་མ་ཡིན་པའི་སྡོད་ལུགས་ཀྱི་ངོས་ནས་གྲུབ། གཅིག་ཤོས་དེ་རྟོག་པས་སྒྲོ་བཏགས་པའི་ཆོས་ཡིན་པ་གང་ཞིག །དང་པོ་དེ་རང་མཚན་གྱི་མཚན་ཉིད་དང་། གཉིས་པ་དེ་སྤྱི་མཚན་གྱི་མཚན་ཉིད་ཡིན་པའི་ཕྱིར། ཁྱབ་སྒྲུབ་བཞི་པའི་དབང་དུ་བྱས་ན། གཞལ་བྱ་ལ་བཟུང་དོན་རང་མཚན་ལ་ལྟོས་པའི་རྟོག་མེད་ཀྱི་ཤེས་པའི་སྣང་ཡུལ་དང་། དེ་ལ་མི་ལྟོས་པར་རང་རྒྱུ་བརྡ་དྲན་པ་ལ་ལྟོས་པའི་རྟོག་པའི་སྣང་ཡུལ་གཉིས་སུ་གྲངས་ངེས་ན། གཞལ་བྱ་རང་མཚན་དང་སྤྱི་མཚན་གཉིས་སུ་གྲངས་ངེས་པས་ཁྱབ་སྟེ། དང་པོ་དེ་རྟོག་པས་སྒྲོ་མ་བཏགས་པར་ཞེས་སོགས་དང་། གཅིག་ཤོས་དེ་རྟོག་པས་སྒྲོ་བཏགས་པའི་ཆོས་གང་ཞིག །དང་པོ་དེ་རང་མཚན་གྱི་མཚན་ཉིད། གཅིག་ཤོས་སྤྱི་མཚན་གྱི་མཚན་ཉིད་ཡིན་པའི་ཕྱིར། །

དོན་དམ་དུ་ཡོད་པའི་མཚན་གཞི་ལ་རྩོད་པ་སྤོང་ཚུལ།

༈ རྩོད་པ་སྤོང་བ་ལ། རང་རེས་གོང་དུ། དོན་དམ་དོན་བྱེད་ནུས་པ་གང་། །ཞེས་དོན་དམ་པར་དོན་བྱེད་ནུས་པ། དོན་དམ་དུ་ཡོད་པའི་མཚན་གཞིར་བསྟན་པ་ལ། ཐལ་འགྱུར་པ་ན་རེ། དོན་དམ་པར་དོན་བྱེད་ནུས་པ་དོན་དམ་དུ་ཡོད་པའི་མཚན་གཞིར་འཛིན་པ་མི་འཐད་པར་ཐལ། དོན་དམ་པར་དོན་བྱེད་ནུས་པའི་ཆོས་མེད་པའི་ཕྱིར་ཏེ། བདེན་པར་གྲུབ་པའི་ཆོས་རྡུལ་ཙམ་ཡང་མེད་པའི་ཕྱིར། ཞེས་པའི་འདོད་པ་རྗོད་པར་བྱེད་པ་ལ། གལ་ཏེ་ཐམས་ཅད་ནུས་མེད་ན། །ཞེས་པ་འདི་བྱུང་། དོན་དམ་པར་དོན་བྱེད་ནུས་པའི་ཆོས་ཡོད་པར་ཐལ། ས་བོན་གྱིས་མྱུ་གུ་སྐྱེད་པའི་ནུས་པ་མངོན་སུམ་ཚད་མས་མཐོང་བའི་ཕྱིར། ཞེས་འཆད་པར་བྱེད་པ་ལ། ས་བོན་སོགས་ནི་མྱུག་སོགས་ལ། །ནུས་མཐོང་། ཞེས་པ་འདི་བྱུང་། དེ་ལྟར་བྱས་པ་ལ་ཁོ་ན་རེ། ས་བོན་གྱིས་མྱུ་གུ་སྐྱེད་པའི་ནུས་པ་དེ་ཀུན་རྫོབ་ཙམ་དུ་གྲུབ་པ་ཡིན་ནོ། །ཞེས་པའི་འདོད་པ་རྗོད་པར་བྱེད་པ་ལ། གལ་ཏེ་དེ་ཀུན་རྫོབ། འདོད་ན། ཞེས་པ་འདི་བྱུང་། འདོད་ན། ས་བོན་གྱིས་མྱུ་གུ་སྐྱེད་པའི་ནུས་པ་དེ་ཆོས་ཅན། ཀུན་རྫོབ་ཙམ་དུ་མ་གྲུབ་པར་ཐལ། རྟོག་པས་སྒྲོ་མ་བཏགས་པར་རང་གི་ཐུན་མོང་མ་ཡིན་པའི་སྡོད་ལུགས་ཀྱི་ངོས་ནས་གྲུབ་པའི་ཕྱིར། ཞེས་འཆད་པར་བྱེད་པ་ལ། ཅི་སྟེ་དེ་ལྟར་འགྱུར། ཞེས་པ་འདི་བྱུང་། ཡང་རང་རེས་གོང་དུ། གཞན་ནི་ཀུན་རྫོབ་ཡོད་པ་སྟེ། །ཞེས་དོན་བྱེད་མི་ནུས་པའི་ཆོས། ཀུན་རྫོབ་ཙམ་དུ་ཡོད་པར་ཁས་བླངས་པ་ལ། ཁོ་ན་རེ། དེ་མི་འཐད་པར་ཐལ། རང་མཚན་དང་སྤྱི་མཚན་ཐམས་ཅད་ཀྱིས་རང་འཛིན་ཤེས་པ་སྐྱེད་ནུས་པའི་ཕྱིར། ཞེས་འདོད་པ་རྗོད་པར་བྱེད་པ་ལ། གལ་ཏེ་ཀུན་ལ་དེ་ཡོད་ན། །ཞེས་པ་འདི་བྱུང་། འདོད་ན། སྤྱི་མཚན་ཆོས་ཅན། ཁྱོད་རང་འཛིན་ཤེས་པ་སྐྱེད་བྱེད་མ་ཡིན་པར་ཐལ། རང་འཛིན་ཤེས་པ་དེ་ཁྱོད་ལ་ཕན་འདོགས་བྱེད་དུ་ཡོད་མེད་ཀྱི་རྗེས་སུ་འགྲོ་ལྡོག་མི་བྱེད་པའི་ཕྱིར། ཞེས་འཆད་པར་བྱེད་པ་ལ། སྤྱི་ཡི་མཚན་ཉིད་རྗེས་འགྲོ་ལྡོག །ཞེས་སོགས་རྐང་པ་གཉིས་བྱུང་། དེའི་མཐུན་དཔེ་ནི། དཔེར་ན། གཟུགས་འཛིན་མིག་ཤེས་དེ་རང་གི་རྐྱེན་གསུམ་ཕན་འདོགས་བྱེད་དུ་ཡོད་མེད་ཀྱི་རྗེས་སུ་འགྲོ་ལྡོག་བྱེད་པའི་རྒྱུ་མཚན་གྱིས། དེའི་རྐྱེན་གསུམ་དེའི་རྒྱུ་ཡིན་པའི་དཔེ་འདི་བཞིན་ནོ། །ཞེས་འཆད་པར་བྱེད་པ་ལ། མིག་དང་གཟུགས་སོགས་བློ་བཞིན་ནོ། །ཞེས་པ་འདི་བྱུང་། འོ་ན། སྤྱི་མཚན་གྱིས་རང་འཛིན་ཤེས་པ་སྐྱེད་མི་ནུས་པར་བསྟན་པ་ལ་དགོས་པ་གང་ཡོད་ཅེ་ན། དེ་ལྟར་བསྟན་པ་ལ་དགོས་པ་ཡོད་དེ། བུམ་པ་འདེགས་པར་འཛིན་པའི་རྟོག་པ་དང་། བུམ་པ་འཇོག་པར་འཛིན་པའི་རྟོག་པ་དང་། བུམ་པའི་སྤྱི་འཛིན་པའི་རྟོག་པ་དང་། དེའི་གྲངས་འཛིན་པའི་རྟོག་པ་དང་། བུམ་པའི་མཚན་མ་འཛིན་པའི་རྟོག་པ་རྣམས་ཀྱི་གཟུང་དོན་མེད་དོ། །ཞེས་ཤེས་པར་བྱ་བའི་ཆེད་ཡིན་པའི་ཕྱིར། ཞེས་འཆད་པར་བྱེད་པ་ལ། བུམ་པ་འདེགས་དང་སྤྱི་དང་ནི། །ཞེས་སོགས་རྐང་པ་གཉིས་བྱུང་། དེ་ལྟར་ན་རྟོག་པ་དེ་རྣམས་རྒྱུ་མེད་དུ་འགྱུར་རོ་ཞེ་ན། མི་འགྱུར་ཏེ། རྟོག་པ་དེ་རྣམས་རང་རྒྱུ་བརྡ་དང་རྩོལ་བ་སོགས་ལ་བརྟེན་ནས་བྱུང་བའི་ཕྱིར། ཞེས་འཆད་པར་བྱེད་པ་ལ། དེས་ནི་བརྡ་དང་རྩོལ་བ་སོགས། །ཞེས་སོགས་རྐང་པ་གཉིས་བྱུང་། ཡང་རང་རེས་གོང་དུ། གཞན་ནི་ཀུན་རྫོབ་ཡོད་པ་སྟེ། །ཞེས་བཤད་པ་ལ་ཁ་ཅིག་ན་རེ། སྐྲ་ཤད་འཛག་སྣང་གི་དབང་ཤེས་ལ་སྣང་བའི་སྐྲ་ཤད་ཆོས་ཅན། སྤྱི་མཚན་དུ་ཐལ། དོན་བྱེད་མི་ནུས་པའི་ཕྱིར་ཞེ་ན། དེ་ལ་མ་ཁྱབ་པའི་ལན་འདེབས་པ་ལ། སྐྲ་ཤད་སོགས་ནི་སྤྱི་མིན་ཏེ། །ཞེས་སོགས་རྐང་པ་གཉིས་བྱུང་། དེའི་དོན་ནི། དེ་ལ་སྣང་བའི་སྐྲ་ཤད་ཆོས་ཅན། སྤྱི་མཚན་མ་ཡིན་པར་ཐལ། གཞལ་བྱར་ཚད་མས་མ་གྲུབ་པའི་ཕྱིར། བྱས་པ་ལ་ཁོ་ན་རེ། འོ་ན། ནམ་མཁའ་ཆོས་ཅན། སྤྱི་མཚན་མ་ཡིན་པར་ཐལ། གཞལ་བྱར་ཚད་མས་མ་གྲུབ་པའི་ཕྱིར་ཟེར་ན། རྟགས་མ་གྲུབ་སྟེ། ནམ་མཁའ་དེ་ཤེས་བྱར་ཚད་མས་འཛིན་པའི་ཕྱིར། ཞེས་འཆད་པར་བྱེད་པ་ལ། ཤེས་བྱར་འཛིན་པ་མེད་པ་ལ། །ཞེས་སོགས་རྐང་པ་གཉིས་བྱུང་། ཁོ་ན་རེ། སྐྲ་ཤད་འཛག་སྣང་གི་དབང་ཤེས་ལ་སྐྲ་ཤད་སྣང་བ་དེ་གཞལ་བྱ་མ་ཡིན་པར་ཐལ། དེ་ལ་སྣང་བའི་སྐྲ་ཤད་གཞལ་བྱ་མ་ཡིན་པའི་ཕྱིར་ཟེར་ན། དེ་ལ་མ་ཁྱབ་པའི་ལན་འདེབས་པར་བྱེད་པ་ལ། དེ་དག་གི་ཡང་དེ་ལྟའི་དངོས། །བཀག་མེད། ཅེས་པ་འདི་བྱུང་། ཡང་ཁོ་ན་རེ། སྐྲ་ཤད་འཛག་སྣང་གི་དབང་ཤེས་ལ་སྐྲ་ཤད་གསལ་བར་སྣང་བའི་རྣམ་པ་དེ། གཞལ་བྱ་ཡིན་པར་ཐལ། དེ་འདྲའི་དབང་ཤེས་ལ་སྐྲ་ཤད་སྣང་བ་དེ་གཞལ་བྱ་ཡིན་པའི་ཕྱིར་ཟེར་ན། དེ་ལ་འདོད་ལན་སྟོན་པར་བྱེད་པ་ལ། གསལ་བར་སྣང་བ་ཉིད། ཅེས་སོགས་རྐང་པ་ཕྱེད་དང་གཉིས་བྱུང་། ཡང་ཁོ་ན་རེ། སྐྲ་ཤད་འཛིན་པའི་རྟོག་པ་ལ་སྐྲ་ཤད་སྣང་བ་དེ་སྤྱི་མཚན་དུ་ཐལ། སྐྲ་ཤད་འཛག་སྣང་གི་དབང་ཤེས་ལ་སྐྲ་ཤད་སྣང་བ་དེ་སྤྱི་མཚན་ཡིན་པའི་ཕྱིར། འདོད་ན། སྐྲ་ཤད་འཛིན་པའི་རྟོག་པ་ལ་སྣང་བའི་སྐྲ་ཤད་དེ་སྤྱི་མཚན་དུ་ཐལ། འདོད་པའི་ཕྱིར་ན། དེ་ལ་མ་ཁྱབ་པའི་ལན་སྟོན་པ་ལ། སྐྲ་སོགས་ཞེས་བྱའི་བློ་དག་ནི། །ཞེས་སོགས་རྐང་པ་གཉིས་བྱུང་། རང་རེས། གསལ་བར་སྣང་བ་ཉིད། ཅེས་པའི་སྐབས་སུ་སྐྲ་ཤད་འཛག་སྣང་གི་དབང་ཤེས་ཀྱི་གཟུང་རྣམ་དེ་ཤེས་པའི་རྫས་སུ་ཁས་བླངས་པ་ལ། འོ་ན། སྐྲ་ཤད་འཛག་སྣང་གི་དབང་ཤེས་ཀྱི་གཟུང་དོན་ཡོད་པར་ཐལ། དེའི་གཟུང་རྣམ་དེ་ཤེས་པའི་རྫས་ཡིན་པའི་ཕྱིར་ཟེར་ན། མ་ཁྱབ་པའི་ལན་སྟོན་པར་བྱེད་པ་ལ། སྐྲར་སྣང་དོན་མེད་ཅན་ཡིན་ནོ། །ཞེས་པ་འདི་བྱུང་། ཡང་རང་རེས། གསལ་བར་སྣང་བ་ཉིད། །ཅེས་པའི་སྐབས་སུ་ཤེས་པའི་རྫས་ཡིན་ན། རང་མཚན་ཡིན་པའི་ཁྱབ་པ་ཁས་བླངས་པ་ལ། ཁོ་ན་རེ། བུམ་འཛིན་རྟོག་པའི་རྣམ་པ་ཆོས་ཅན། རང་མཚན་དུ་ཐལ། ཤེས་པའི་རྫས་ཡིན་པའི་ཕྱིར་ཟེར་ན། ཁྱོད་ཀྱི་དེ་གང་ལ་བྱེད། བུམ་འཛིན་རྟོག་པའི་གཟུང་རྣམ་ཆོས་ཅན། རང་མཚན་དུ་ཐལ། ཤེས་པའི་རྫས་ཡིན་པའི་ཕྱིར་རམ། རྟོག་པ་ལ་བུམ་པར་སྣང་བ་ཆོས་ཅན། རང་མཚན་དུ་ཐལ། ཤེས་པའི་རྫས་ཡིན་པའི་ཕྱིར། ཞེས་ཟེར་བ་གང་ཡིན། དང་པོ་ལྟར་ན། དེ་འདྲའི་ཐལ་འགྱུར་དེ་དཔལ་ལྡན་ཆོས་གྲགས་ལ་གནོད་བྱེད་ཡང་དག་ཏུ་མི་འཇུག་སྟེ། དཔལ་ལྡན་ཆོས་གྲགས་ཀྱིས་དེ་འདྲའི་ཐལ་འགྱུར་ལ་འདོད་ལན་དོན་མཐུན་ཐེབས་པའི་ཕྱིར། ཞེས་འཆད་པར་བྱེད་པ་ལ། གལ་ཏེ་སྤྱི་ནི་ཤེས་ངོ་བོའི། །ཞེས་སོགས་རྐང་པ་གསུམ་བྱུང་། གཉིས་པ་ལྟར་ཡིན་ནོ་ཟེར་ན། དེ་འདྲའི་ཐལ་འགྱུར་དཔལ་ལྡན་ཆོས་གྲགས་ལ་གནོད་བྱེད་ཡང་དག་ཏུ་མི་འཇུག་སྟེ། དེས་དེ་འདྲའི་ཐལ་འགྱུར་ལ་རྟགས་མ་གྲུབ་ཀྱི་ལན་ཐེབས་པའི་ཕྱིར་ཏེ། རྟོག་པ་ལ་བུམ་པར་སྣང་བ་དེ་གསེར་བུམ་ཟངས་བུམ་སོགས་ལ་རྗེས་སུ་འགྲོ་བའི་སྤྱི་མཚན་དངོས་མེད་པ་ཡིན་པའི་ཕྱིར། ཞེས་འཆད་པར་བྱེད་པ་ལ། དོན་གྱི་ངོ་བོ་ཉིད་ཀྱི་སྤྱི། །ཞེས་སོགས་རྐང་པ་གསུམ་བྱུང་། །

གཞལ་བྱའི་རྟགས་ལས་ཚད་མའི་གྲངས་ངེས་སྒྲུབ་ཚུལ་ལ་མཐའ་དཔྱད་པ།

༈ དེས་ན། གཞལ་བྱ་གཉིས་ཕྱིར་ཚད་མ་གཉིས། །ཞེས་པའི་སྐབས་སུ་མཐའ་དཔྱད་པ་ལ། ཁ་ཅིག་ན་རེ། དོན་བྱེད་ནུས་དང་མི་ནུས་ཕྱིར། །ཞེས་པའི་གཞུང་འདིས། གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་རྟགས་ཀྱིས་ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པར་སྒྲུབ་པའི་ཕྱོགས་ཆོས་སྒྲུབ་བྱེད་ཀྱི་རིགས་པ་ཡང་དག་བསྟན་པ་ཡིན་ནོ། །ཟེར་ན། འོ་ན། གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་རྟགས་ཀྱིས། ཚད་མ་ལ་དེ་གཉིས་སུ་གྲངས་ངེས་པར་སྒྲུབ་པའི་ཕྱོགས་ཆོས་ཡོད་པར་ཐལ། དམ་བཅའ་འཐད་པའི་ཕྱིར། འདོད་ན། གཞལ་བྱ་ལ་དེ་གཉིས་སུ་གྲངས་ངེས་པ་དེ་དེ་སྐོར་གྱི་ཕྱོགས་ཆོས་སུ་ཐལ་ལོ། །འདོད་ན། དེ་དེ་སྐོར་གྱི་རྗེས་ཁྱབ་ཏུ་ཐལ། འདོད་པ་གང་ཞིག །གཞལ་བྱ་ལ་དེ་གཉིས་སུ་གྲངས་ངེས་ན་ཚད་མ་ལ་དེ་གཉིས་སུ་གྲངས་ངེས་པས་ཁྱབ་པའི་ཕྱིར། འདོད་ན། དེ་དེ་སྐོར་གྱི་རྟགས་ཡང་དག་ཏུ་ཐལ། འདོད་པའི་ཕྱིར། འདོད་ན། དེ་སྐོར་གྱི་རྟགས་ཡང་དག་ཡོད་པར་ཐལ། འདོད་པའི་ཕྱིར། འདོད་ན། དེ་སྐོར་གྱི་ཤེས་འདོད་ཆོས་ཅན་སྐྱོན་མེད་ཡོད་པར་ཐལ་ལོ། །འདོད་ན། ཚད་མ་དེ་དེ་ཡིན་པར་ཐལ་ལོ། །འདོད་ན། དེ་ཆོས་ཅན། རང་ཉིད་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་ཏེ། རང་ཉིད་ཀྱི་གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་ཕྱིར། ཞེས་པའི་རྟགས་སྦྱོར་དེ་དེ་སྐོར་གྱི་རྟགས་སྦྱོར་རྣམ་དག་ཏུ་ཐལ་ལོ། །འདོད་ན། དེ་འདྲའི་རྟགས་སྦྱོར་གྱི་ཁྱབ་པ་གྲུབ་པར་ཐལ་ལོ། །འདོད་ན། རྣམ་མཁྱེན་ཆོས་ཅན། རང་ཉིད་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པར་ཐལ། རང་ཉིད་ཀྱི་གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་ཕྱིར། བྱས་པ་ལ་ཁོ་ན་རེ། གཞལ་བྱ་ལ་རང་སྤྱི་གཉིས་སུ་གྲངས་ངེས་པ་དེ། ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པར་སྒྲུབ་ནུས་ཀྱི་གཏན་ཚིགས་ཡིན་པར་ཐལ། དེའི་རྟགས་ཀྱིས་ཚད་མ་ལ་མངོན་རྗེས་གཉིས་སུ་གྲངས་ངེས་པར་སྒྲུབ་ནུས་པའི་ཕྱིར་ན་མ་ཁྱབ། རྟགས་གྲུབ་སྟེ། གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་རྟགས་ལས་ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པར་རྟོགས་པའི་ཚད་མ་ཡོད་པའི་ཕྱིར། ཁོ་རང་ལ། སངས་འཕགས་དེ་སྒྲ་མི་རྟག་པར་སྒྲུབ་ནུས་ཀྱི་གཏན་ཚིགས་ཡིན་པར་ཐལ། སངས་འཕགས་ཀྱིས་སྒྲ་མི་རྟག་པར་སྒྲུབ་ནུས་པ་གང་ཞིག །སངས་འཕགས་སྒྲ་མི་རྟག་པར་སྒྲུབ་པའི་གཏན་ཚིགས་ཡིན་པའི་ཕྱིར། ཁྱབ་པ་ཁས། དང་པོ་གྲུབ་སྟེ། སངས་འཕགས་དེས་སྒྲ་མི་རྟག་པར་རིགས་པ་ཡང་དག་ལ་བརྟེན་ནས་སྒྲུབ་ནུས་པའི་ཕྱིར་ཏེ། དེས་དེ་དངོས་སྟོབས་ཀྱི་རིགས་པ་ཡང་དག་ལ་བརྟེན་ནས་སྒྲུབ་ནུས་པའི་ཕྱིར། རྩ་བར་འདོད་ན། དེ་ཆོས་ཅན། དེ་མ་ཡིན་པར་ཐལ། སྒྲ་མི་རྟག་པར་སྒྲུབ་པའི་གཏན་ཚིགས་ལྟར་སྣང་ཡིན་པའི་ཕྱིར། ཁྱབ་སྟེ། གཏན་ཚིགས་ལྟར་སྣང་གཞན་དག་ལ། །རང་འདོད་ཉིད་ནི་སྒྲུབ་མེད་ཕྱིར། །ཞེས་གསུངས་པའི་ཕྱིར། བྱས་པ་ལ་ཁོ་ན་རེ། གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་རྟགས་ཀྱིས་ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པར་སྒྲུབ་པའི་ཁྱབ་པ་གྲུབ་པར་ཐལ། དེ་ལ་དེ་གཉིས་སུ་གྲངས་ངེས་པའི་རྟགས་ཀྱིས། ཚད་མ་ལ་དེ་གཉིས་སུ་གྲངས་ངེས་པར་སྒྲུབ་ནུས་པའི་ཕྱིར། འདོད་ན། དེའི་རྟགས་ལས་ཚད་མ་ལ་དེ་གཉིས་སུ་གྲངས་ངེས་པར་སྒྲུབ་པའི་རྟགས་སྦྱོར་གྱི་ཁྱབ་པ་གྲུབ་པར་ཐལ། འདོད་པའི་ཕྱིར། འདོད་ན། ཚད་མ་ཆོས་ཅན། རང་ཉིད་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་ཏེ། རང་ཉིད་ཀྱི་གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་ཕྱིར། ཞེས་པའི་རྟགས་སྦྱོར་གྱི་ཁྱབ་པ་གྲུབ་པར་ཐལ། འདོད་པ་གང་ཞིག །རྟགས་སྦྱོར་དེ་དེ་སྐོར་གྱི་རྟགས་སྦྱོར་ཡིན་པའི་ཕྱིར། རྟགས་ཕྱི་མ་གྲུབ་སྟེ། དེ་སྐོར་གྱི་རྟགས་སྦྱོར་ཡོད་པའི་ཕྱིར་ན་མ་ཁྱབ། འདོད་ན། རྣམ་མཁྱེན་ཆོས་ཅན། དེར་ཐལ། དེའི་ཕྱིར། གཞན་ཡང་། ཁོ་ན་རེ། གཞལ་བྱ་ལ་དེ་གཉིས་སུ་གྲངས་ངེས་པའི་རྟགས་ཀྱིས། ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པར་རྟོགས་པའི་རྗེས་དཔག་ཡོད་པར་ཐལ། དེ་ལྟར་རྟོགས་པའི་ཚད་མ་ཡོད་པའི་ཕྱིར། འདོད་ན། དེ་འདྲའི་རྗེས་དཔག་ཆོས་ཅན། རང་གི་རྟེན་དུ་གྱུར་པའི་རྟགས་ཡང་དག་ལ་བརྟེན་ནས་སྐྱེས་པར་ཐལ། རྗེས་དཔག་ཡིན་པའི་ཕྱིར། འདོད་ན། གཞལ་བྱ་ལ་དེ་གཉིས་སུ་གྲངས་ངེས་པའི་རྟགས་ལས། ཚད་མ་ལ་མངོན་རྗེས་ཀྱི་ཚད་མ་གཉིས་སུ་ངེས་པར་སྒྲུབ་པའི་རྟགས་ཡང་དག་ཡོད་པར་ཐལ། འདོད་པའི་ཕྱིར་ན་མ་ཁྱབ། མཁས་པ་ཉ་དཔོན་གྱི་གསུང་ནས། ཚད་མའི་དབྱེ་བ་བྱེད་པ་དེ། གཞལ་བྱ་ལ་དེ་གཉིས་སུ་གྲངས་ངེས་པའི་རྟགས་ལས་ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པར་སྒྲུབ་པའི་ཤེས་འདོད་ཆོས་ཅན་སྐྱོན་མེད་ཡིན་ཅིང་། རྟགས་སྦྱོར་བཀོད་པའི་ཚེ་ན། ཚད་མའི་དབྱེ་བ་བྱེད་པའི་ཚེ་ན་ཆོས་ཅན། ཚད་མ་ལ་དེ་གཉིས་སུ་གྲངས་ངེས་ཏེ། གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་ཕྱིར། ཞེས་པའི་རྟགས་སྦྱོར་རྣམ་དག་འགོད་པ་ཡིན་ནོ་ཟེར་ན། ཚད་མའི་དབྱེ་བ་བྱེད་པའི་ཚེ་ན་ཆོས་ཅན། ཞེས་སོགས་ཀྱི་རྟགས་སྦྱོར། རྟགས་སྦྱོར་རྣམ་དག་མ་ཡིན་པར་ཐལ། ཚད་མའི་དབྱེ་བ་བྱེད་པའི་ཚེ་ན། གཞལ་བྱ་ལ་རང་སྤྱི་གཉིས་སུ་གྲངས་ངེས་པར་ཚད་མས་ངེས་པའི་གང་ཟག་ཡིན་ན། ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པར་ཚད་མས་ངེས་པའི་གང་ཟག་ཡིན་དགོས་པའི་ཕྱིར། ཚད་མའི་གྲངས་ངེས་ཚད་མས་ངེས་པའི་གང་ཟག་ཡིན་ན། ཚད་མའི་དབྱེ་བ་ཚད་མས་ངེས་པའི་གང་ཟག་ཡིན་དགོས་པའི་ཕྱིར་ཏེ། ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པར་ཚད་མས་ངེས་པའི་གང་ཟག་ཡིན་ན། དེ་ལ་དེ་གཉིས་སུ་འབྱེད་རིགས་པར་ཚད་མས་ངེས་པའི་གང་ཟག་ཡིན་དགོས་པའི་ཕྱིར། ཁ་ཅིག་ན་རེ། གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་རྟགས་ཀྱིས། ཚད་མ་ལ་མངོན་རྗེས་གཉིས་སུ་གྲངས་ངེས་པར་སྒྲུབ་པའི་དངོས་ཁྱབ་གྲུབ་པར་ཐལ། དེའི་རྟགས་ལས། ཚད་མ་དེ་ལ་གཉིས་སུ་གྲངས་ངེས་པར་སྒྲུབ་ནུས་པའི་ཕྱིར། འདོད་ན། དེ་སྐོར་གྱི་རྟགས་སྦྱོར་གྱི་དངོས་ཁྱབ་གྲུབ་པར་ཐལ། འདོད་པའི་ཕྱིར། འདོད་ན། ཚད་མ་ཆོས་ཅན། རང་ཉིད་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་ཏེ། རང་ཉིད་ཀྱི་གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་ཕྱིར། ཞེས་པའི་རྟགས་སྦྱོར་གྱི་དངོས་ཁྱབ་གྲུབ་པར་ཐལ། འདོད་པ་གང་ཞིག །དེ་འདྲའི་རྟགས་སྦྱོར་དེ་དེ་སྐོར་གྱི་རྟགས་སྦྱོར་ཡིན་པའི་ཕྱིར་ཏེ། དེ་སྐོར་གྱི་རྟགས་སྦྱོར་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པས་གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་ཕྱིར། ཞེས་པའི་རྟགས་སྦྱོར་འདི་དེ་སྐོར་གྱི་རྟགས་སྦྱོར་ཡིན་པའི་ཕྱིར། དེ་ལྟར་མ་ཡིན་ན། ཚད་མ་ཆོས་ཅན། རང་ཉིད་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་ཏེ། རང་ཉིད་ཀྱི་གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་ཕྱིར། ཞེས་པའི་རྟགས་སྦྱོར་ཆོས་ཅན། ཁྱོད་ཀྱི་ཁྱབ་པ་ཚད་མས་གྲུབ་པར་ཐལ། ཁྱོད་གཞལ་བྱ་ལ་དེ་གཉིས་སུ་གྲངས་ངེས་པའི་རྟགས་ཀྱིས། ཚད་མ་ལ་དེ་གཉིས་སུ་གྲངས་ངེས་པར་སྒྲུབ་པའི་རྟགས་སྦྱོར་གང་ཞིག །དེ་སྐོར་གྱི་ཁྱབ་པ་ཚད་མས་གྲུབ་པའི་ཕྱིར། དེར་ཡང་མ་ཟད། ཚད་མ་ཆོས་ཅན། ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་ཏེ། གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་ཕྱིར། ཞེས་བཀོད་པའི་ཚེ་ན། ཚད་མ་དེ་ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པར་སྒྲུབ་པའི་ཤེས་འདོད་ཆོས་ཅན་སྐྱོན་མེད་དུ་ཐལ། ཚད་མ་ཆོས་ཅན། རང་ཉིད་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་ཏེ། རང་ཉིད་ཀྱི་གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་ཕྱིར། ཞེས་པའི་རྟགས་སྦྱོར་འདི་ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པར་སྒྲུབ་པའི་རྟགས་སྦྱོར་ཡིན་པའི་ཕྱིར། འདོད་ན། ཤེས་བྱ་ཆོས་ཅན། ཚད་མ་ལ་དེ་གཉིས་སུ་གྲངས་ངེས་ཏེ། གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་ཕྱིར། ཞེས་བཀོད་པའི་ཚེ། ཤེས་བྱ་དེ། གཞལ་བྱ་ལ་དེ་གཉིས་སུ་གྲངས་ངེས་པའི་རྟགས་ལས། ཚད་མ་ལ་དེ་གཉིས་སུ་གྲངས་ངེས་པར་སྒྲུབ་པའི་ཤེས་འདོད་ཆོས་ཅན་སྐྱོན་མེད་དུ་ཐལ་ལོ། །འདོད་ན། ཤེས་བྱ་དེ་དེ་སྒྲུབ་ཀྱི་ཤེས་འདོད་ཆོས་ཅན་སྐྱོན་མེད་དུ་ཐལ། འདོད་པའི་ཕྱིར། འདོད་མི་ནུས་ཏེ། ཚད་མ་དེ་དེ་ཡིན་པའི་ཕྱིར། བྱས་པ་ལ་ཁོ་ན་རེ། ཤེས་བྱ་དེ་སྒྲ་མི་རྟག་པར་སྒྲུབ་པའི་ཤེས་འདོད་ཆོས་ཅན་སྐྱོན་མེད་དུ་ཐལ། ཤེས་བྱ་ཆོས་ཅན། སྒྲ་མི་རྟག་སྟེ། སྒྲ་བྱས་པའི་ཕྱིར། ཞེས་བཀོད་པའི་ཚེ་ན། ཤེས་བྱ་སྒྲ་མི་རྟག་པར་སྒྲུབ་པའི་ཤེས་འདོད་ཆོས་ཅན་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། དེ་འདྲའི་རྟགས་སྦྱོར་དེ་སྒྲ་མི་རྟག་པར་སྒྲུབ་པའི་རྟགས་སྦྱོར་ཡིན་པའི་ཕྱིར་ཏེ། དེ་འདྲའི་རྟགས་སྦྱོར་གྱི་བསྒྲུབ་བྱ་གྲུབ་པའི་ཕྱིར་ཏེ། ཤེས་བྱ་ཆོས་ཅན། སྒྲ་མི་རྟག་པ་ཡིན་པར་ཐལ། སྒྲ་བྱས་པ་ཡིན་པའི་ཕྱིར། ཞེས་པའི་ཐལ་འགྱུར་གྱི་གསལ་བ་གྲུབ་པའི་ཕྱིར་ན་མ་ཁྱབ། ཁོ་རང་ལ། ཤེས་བྱ་ཆོས་ཅན། སྒྲ་མི་རྟག་སྟེ། སྒྲ་བྱས་པའི་ཕྱིར། ཞེས་པའི་རྟགས་སྦྱོར་དེ་སྒྲ་མི་རྟག་པར་སྒྲུབ་པའི་རྟགས་སྦྱོར་མ་ཡིན་པར་ཐལ། དེ་ཤེས་བྱ་སྒྲ་མི་རྟག་པར་སྒྲུབ་པའི་རྟགས་སྦྱོར་ཡིན་པའི་ཕྱིར་ཏེ། ཤེས་བྱ་སྒྲ་མི་རྟག་པར་སྒྲུབ་པའི་རྟགས་སྦྱོར་ཡོད་པའི་ཕྱིར། གཞན་ཡང་། སྒྲ་མི་རྟག་སྟེ། སྒྲ་བྱས་པའི་ཕྱིར་ཞེས་པའི་རྟགས་སྦྱོར་དེ། སྒྲ་མི་རྟག་པར་སྒྲུབ་པའི་རྟགས་སྦྱོར་དུ་ཐལ། ཤེས་བྱ་ཆོས་ཅན། སྒྲ་མི་རྟག་སྟེ། སྒྲ་བྱས་པའི་ཕྱིར་ཞེས་པའི་རྟགས་སྦྱོར་དེ་སྒྲ་མི་རྟག་པར་སྒྲུབ་པའི་རྟགས་སྦྱོར་ཡིན་པའི་ཕྱིར། འདོད་ན། སྒྲ་མི་རྟག་སྟེ། བྱས་པའི་ཕྱིར་ཞེས་པའི་རྟགས་སྦྱོར་དེ་སྒྲ་མི་རྟག་པར་སྒྲུབ་པའི་རྟགས་སྦྱོར་དུ་ཐལ། འདོད་པའི་ཕྱིར། འདོད་ན། དེ་བྱས་རྟགས་ཀྱིས་དེ་སྒྲུབ་ཀྱི་དེར་ཐལ་ལོ། །འདོད་ན། བུམ་པ་མི་རྟག་སྟེ། བྱས་པའི་ཕྱིར་ཞེས་པའི་རྟགས་སྦྱོར་འདི་བྱས་རྟགས་ཀྱིས་བུམ་པ་མི་རྟག་པར་སྒྲུབ་པའི་རྟགས་སྦྱོར་ཡིན་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། ཁྱོད་ཀྱི་ཁྱབ་པ་ཚད་མས་གྲུབ་པར་ཐལ། ཁྱོད་བྱས་པའི་རྟགས་ཀྱིས་བུམ་པ་མི་རྟག་པར་སྒྲུབ་པའི་རྟགས་སྦྱོར་ཡིན་པའི་ཕྱིར། འདོད་ན། བུམ་པ་ཚད་མས་མ་དམིགས་པའི་ས་ཕྱོགས་ཆོས་ཅན། དེར་ཐལ། དེའི་ཕྱིར། འདོད་མི་ནུས་སོ། །རང་རེས། མདུན་གྱི་གཞི་འདིར་ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པར་སྒྲུབ་པའི་ཤེས་འདོད་ཆོས་ཅན་ཡིན་ཞིང་། མདུན་གྱི་གཞི་འདི་ཆོས་ཅན། ཚད་མ་ལ་དེ་གཉིས་སུ་གྲངས་ངེས་ཏེ། གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་ཕྱིར། ཞེས་པའི་རྟགས་སྦྱོར་འདི་ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པར་སྒྲུབ་པའི་རྟགས་སྦྱོར་ཡིན་ནོ། །བྱས་པ་ལ་ཁོ་ན་རེ། མདུན་གྱི་གཞི་འདིར། གཞལ་བྱ་ལ་རང་སྤྱི་གཉིས་སུ་གྲངས་ངེས་པར་ཐལ། དམ་བཅའ་འཐད་པའི་ཕྱིར། འདོད་ན། རང་སྤྱི་གང་རུང་ཡིན་ན། མདུན་གྱི་གཞི་འདིར། གཞལ་བྱ་ཡིན་དགོས་པར་ཐལ། འདོད་པའི་ཕྱིར་ན་མ་ཁྱབ། འདོད་ན། རྒྱ་གར་རྡོ་རྗེ་གདན་ཆོས་ཅན། དེར་ཐལ། དེའི་ཕྱིར། ཁོ་རང་ལ། མདུན་གྱི་གཞི་འདིར་གཞལ་བྱ་མ་ཡིན་པ་དང་། རང་སྤྱི་གང་རུང་གི་གཞི་མཐུན་ཡོད་པར་ཐལ། མདུན་གྱི་གཞི་འདིར་གཞལ་བྱ་ལ་དེ་གཉིས་སུ་གྲངས་མ་ངེས་པའི་ཕྱིར། འདོད་ན། མདུན་གྱི་གཞི་འདིར་ཤ་ཟ་བསྐལ་དོན་དུ་སོང་བའི་གང་ཟག་ཀྱང་ཡིན། ཤ་ཟ་ཚད་མས་ངེས་པའི་གང་ཟག་ཀྱང་ཡིན་པའི་གཞི་མཐུན་ཡོད་པར་ཐལ་ལོ། །འདོད་མི་ནུས་ཏེ། མདུན་གྱི་གཞི་འདི་ཤ་ཟ་བསྐལ་དོན་དུ་སོང་བའི་གང་ཟག་ཀྱང་ཡིན། དེ་ཚད་མས་ངེས་པའི་གང་ཟག་ཀྱང་ཡིན་པའི་གཞི་མཐུན་པའི་དགག་གཞི་ཡིན་པའི་ཕྱིར། གཞན་ཡང་། མདུན་གྱི་གཞི་འདིར་གཞལ་བྱ་མ་ཡིན་པ་གང་ཞིག །རང་སྤྱི་གང་རུང་ཡིན་ན། དེར་གཞལ་བྱ་མ་ཡིན་པ་དང་། དེ་གང་རུང་གི་གཞི་མཐུན་ཡིན་དགོས་པར་ཐལ། མདུན་གྱི་གཞི་འདིར་དེ་འདྲའི་གཞི་མཐུན་ཡོད་པའི་ཕྱིར། འདོད་ན། དེར་ཤ་ཟ་བསྐལ་དོན་དུ་སོང་བའི་གང་ཟག་གང་ཞིག །ཤ་ཟ་ཚད་མས་ངེས་པའི་གང་ཟག་ཡིན་ན་དེ་བསྐལ་དོན་དུ་སོང་བའི་གང་ཟག་དང་། དེ་ཚད་མས་ངེས་པའི་གང་ཟག་གི་གཞི་མཐུན་ཡིན་དགོས་པར་ཐལ། འདོད་པའི་ཕྱིར། འདོད་ན། མདུན་གྱི་སྐྱེས་བུ་ལན་འདེབས་པ་པོ་ཆོས་ཅན། དེར་ཐལ། དེའི་ཕྱིར། འདོད་ན། དེ་འདྲ་བའི་གཞི་མཐུན་པ་མ་ཡིན་པར་ཐལ། དེའི་དགག་གཞི་ཡིན་པའི་ཕྱིར། ཁ་ཅིག་ན་རེ། ཚད་མ་མངོན་རྗེས་གཉིས་སུ་གྲངས་ངེས་པར་སྒྲུབ་པའི་རྟགས་ཡང་དག་ཡོད་ཟེར་ན། ཚད་མ་མངོན་རྗེས་གཉིས་སུ་ཡོད་པར་ཐལ། དེ་དེ་གཉིས་སུ་གྲངས་ངེས་པའི་ཕྱིར་ཏེ། དམ་བཅའ་འཐད་པའི་ཕྱིར་ཏེ། འདོད་ན། མངོན་རྗེས་གཉིས་ཡིན་པ་ཡོད་པར་ཐལ་ལོ། །ཁ་ཅིག་ན་རེ། ཚད་མ་ཆོས་ཅན། ཁྱོད་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་ཏེ། ཁྱོད་ཚད་མ་གང་ཞིག །ཁྱོད་ཀྱི་གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་ཕྱིར། ཞེས་པའི་སྦྱོར་བ་འདི། གཞལ་བྱ་གཉིས་ཕྱིར་ཚད་མ་གཉིས། །ཞེས་པའི་གཞུང་གི་དོན་སྦྱོར་རྣམ་དག་ཡིན་ཟེར་ན། རྣམ་མཁྱེན་ཆོས་ཅན། ཁྱབ་པ་ལ་དེར་ཐལ། དེའི་ཕྱིར། ཕྱི་མ་གྲུབ་སྟེ། རྣམ་མཁྱེན་གྱི་གཞལ་བྱ་ལ་དེ་གཉིས་སུ་གྲངས་ངེས་པའི་ཕྱིར་ཏེ། དེའི་གཞལ་བྱ་དང་རང་སྤྱི་གང་རུང་ཡིན་ཁྱབ་མཉམ་ཡིན་པའི་ཕྱིར། རྩ་བར་འདོད་ན། རྣམ་མཁྱེན་དུ་གྱུར་པའི་རྗེས་དཔག་ཡོད་པར་ཐལ་ལོ། །གཞན་ཡང་། སོ་སོ་སྐྱེ་བོའི་རྒྱུད་ཀྱི་ཚད་མ་ཆོས་ཅན། ཁྱབ་པ་ལ་དེར་ཐལ། དེའི་ཕྱིར། ཕྱི་མ་གྲུབ་སྟེ། དེའི་རྒྱུད་ཀྱི་ཚད་མའི་གཞལ་བྱ་དང་རང་སྤྱི་གང་རུང་ཡིན་ཁྱབ་མཉམ་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། ཁྱོད་མངོན་རྗེས་ཀྱི་ཚད་མ་གཉིས་ཀྱི་དབྱེ་གཞི་ཡིན་པར་ཐལ། འདོད་པའི་ཕྱིར། འདོད་ན། མངོན་རྗེས་ཀྱི་ཚད་མ་གཉིས་པོ་དེའི་རྒྱུད་ཀྱི་ཚད་མར་ཐལ་ལོ། །བྱས་པ་ལ་ཁོ་ན་རེ། སོ་སོ་སྐྱེ་བོའི་རྒྱུད་ཀྱི་ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པར་ཐལ། དེ་ལ་དེ་གཉིས་སུ་འབྱེད་རིགས་པའི་ཕྱིར་ན་མ་ཁྱབ་སྟེ། དེ་ལ་དེ་གཉིས་སུ་དབྱེ་བ་ཡོད་པའི་ཕྱིར་ཏེ། སྔོ་སེར་དཀར་དམར་སྣ་ཚོགས་པའི་སྟེང་གི་ཁྲ་བོ་དེ་ལ། སྔོན་པོ། སེར་པོ། དཀར་པོ། དམར་པོ་ལ་སོགས་པའི་དབྱེ་བ་ཡོད་པའི་ཕྱིར་ཏེ། སྔོ་སོགས་རྣམ་པར་དབྱེ་བ་ཡིས། །རྣམ་ཁྲ་ལ་སོགས་དག་ལའང་མཚུངས། །ཞེས་གསུངས་པའི་ཕྱིར། ཁ་ཅིག་ན་རེ། མངོན་རྗེས་གཉིས་ལས་དོན་གཞན་པའི་ཚད་མ་མེད་པ་དེ། ཚད་མ་ལ་མངོན་རྗེས་གཉིས་སུ་གྲངས་ངེས་པའི་དོན་ཡིན་ཟེར་ན། དེ་གཉིས་ལས་དོན་གཞན་པའི་ཚད་མ་མེད་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་གཉིས་ཀྱི་འབྲས་བུར་གྱུར་པའི་རྣམ་མཁྱེན་དེ་དེ་གཉིས་ལས་དོན་གཞན་དུ་འགྱུར་བའི་ཚད་མ་ཡིན་པའི་ཕྱིར། ཁ་ཅིག་ན་རེ། ཚད་མ་ཡིན་ན། མངོན་རྗེས་གང་རུང་ཡིན་དགོས་པ་དེ། དེ་ལ་དེ་གཉིས་སུ་གྲངས་ངེས་པའི་དོན་ཡིན་ཟེར་ན། དེ་ལ་སྐྱོན་འཕེན་པ་ཁ་ཅིག་ན་རེ། ཚད་མ་ཆོས་ཅན། ཁྱོད་ཀྱི་སྣང་ཡུལ་དེ་མངོན་སུམ་གྱི་སྣང་ཡུལ་དུ་ཐལ། ཁྱོད་མངོན་སུམ་ཡིན་པའི་ཕྱིར་ན་མ་ཁྱབ། མ་གྲུབ་ན། དེར་ཐལ། དེ་གང་རུང་གང་ཞིག །རྗེས་དཔག་མ་ཡིན་པའི་ཕྱིར། དང་པོ་གྲུབ་སྟེ། ཚད་མ་ཡིན་པའི་ཕྱིར། ཁྱབ་པ་ཁས་ཟེར། རྩ་བར་འདོད་ན། ཚད་མའི་སྣང་ཡུལ་ཆོས་ཅན། རྟོག་མེད་ཀྱི་ཤེས་པའི་སྣང་ཡུལ་དུ་ཐལ། འདོད་པའི་ཕྱིར། འདོད་ན། རང་མཚན་དུ་ཐལ། འདོད་པའི་ཕྱིར། ཁྱབ་སྟེ། གཞལ་བྱ་ལ་རྟོག་པའི་སྣང་ཡུལ་དང་རྟོག་མེད་ཀྱི་ཤེས་པའི་སྣང་ཡུལ་གཉིས་སུ་གྲངས་ངེས་པའི་རྟགས་ཀྱིས། གཞལ་བྱ་ལ་རང་སྤྱི་གཉིས་སུ་གྲངས་ངེས་པར་སྒྲུབ་ནུས་པའི་ཕྱིར་ཏེ། རྒྱུ་མཚན་གཞན་ནི་ཡོད་པ་ན། །ཞེས་སོགས་གསུངས་པའི་ཕྱིར། གཞན་ཡང་། སེམས་ཅན་གྱི་རྒྱུད་ཀྱི་ཚད་མ་མངོན་སུམ་ཡིན་པར་ཐལ། ཚད་མ་མངོན་སུམ་ཡིན་པའི་ཕྱིར་ན་མ་ཁྱབ། འདོད་ན། བྱང་འཕགས་ཀྱི་རྒྱུད་ཀྱི་དེ་དེར་ཐལ། འདོད་པའི་ཕྱིར། འདོད་ན། དེའི་རྒྱུད་ཀྱི་དེ་ཆོས་ཅན། རྣམ་མཁྱེན་རྟོགས་པའི་མངོན་སུམ་དུ་ཐལ། དེ་རྟོགས་པའི་ཚད་མ་གང་ཞིག །མངོན་སུམ་ཡིན་པའི་ཕྱིར། འདོད་ན། བྱང་འཕགས་དེ་རྣམ་མཁྱེན་མངོན་སུམ་དུ་རྟོགས་པའི་གང་ཟག་ཏུ་ཐལ། དེའི་རྒྱུད་ཀྱི་ཚད་མ་དེ་རྣམ་མཁྱེན་རྟོགས་པའི་མངོན་སུམ་ཡིན་པའི་ཕྱིར། འདོད་ན། དེ་ཆོས་ཅན། དེ་མ་ཡིན་པར་ཐལ། སེམས་ཅན་ཡིན་པའི་ཕྱིར། གཞན་ཡང་། བྱང་འཕགས་ཀྱི་རྒྱུད་ཀྱི་ཚད་མ་ཆོས་ཅན། ཁྱོད་ཀྱི་གཞལ་བྱར་གྱུར་པའི་རྣམ་མཁྱེན་དེ་བྱང་འཕགས་ཀྱི་རྒྱུད་ཀྱི་མངོན་སུམ་གྱི་གཞལ་བྱ་ཡིན་པར་ཐལ། ཁྱོད་ཀྱི་གཞལ་བྱར་གྱུར་པའི་རྣམ་མཁྱེན་ཡོད་པ་གང་ཞིག །ཁྱོད་བྱང་འཕགས་ཀྱི་རྒྱུད་ཀྱི་མངོན་སུམ་ཡིན་པའི་ཕྱིར། གཞན་ཡང་། བྱང་འཕགས་ཀྱི་རྒྱུད་ཀྱི་ཚད་མའི་གཞལ་བྱར་གྱུར་པའི་རྣམ་མཁྱེན་ཆོས་ཅན། བྱང་འཕགས་ཀྱི་རྒྱུད་ཀྱི་མངོན་སུམ་གྱི་གཞལ་བྱ་མ་ཡིན་པར་ཐལ། སངས་འཕགས་ཁོ་ནའི་མངོན་སུམ་གྱི་གཞལ་བྱ་ཡིན་པའི་ཕྱིར། བྱས་པ་ལ་ཁོ་ན་རེ། ཚད་མ་ཆོས་ཅན། གང་ཟག་གི་བདག་མེད་སྣང་ཡུལ་དུ་བྱེད་པའི་མངོན་སུམ་དུ་ཐལ། དེ་ཁྱོད་ཀྱི་སྣང་ཡུལ་གང་ཞིག །ཁྱོད་མངོན་སུམ་ཡིན་པའི་ཕྱིར། འདོད་ན། དེ་སྣང་ཡུལ་དུ་བྱེད་པའི་མངོན་སུམ་ཡོད་པར་ཐལ། འདོད་པའི་ཕྱིར། འདོད་ན། དེ་འདྲ་བའི་མངོན་སུམ་ཁོ་ཁོ་རང་ཡིན་པར་ཐལ་ལོ། །འདོད་པའི་ཕྱིར་ན་མ་ཁྱབ། འདོད་ན། དེ་འདྲའི་མངོན་སུམ་ཆོས་ཅན། གང་ཟག་གི་བདག་མེད་ཁྱོད་ཀྱི་སྣང་ཡུལ་ཡིན་པར་ཐལ། འདོད་པའི་ཕྱིར། འདོད་ན། གང་ཟག་གི་བདག་མེད་ཆོས་ཅན། མངོན་སུམ་གྱི་སྣང་ཡུལ་དུ་ཐལ། འདོད་པའི་ཕྱིར། འདོད་ན། དེ་ཆོས་ཅན། རང་མཚན་དུ་ཐལ། འདོད་པའི་ཕྱིར་ཟེར་ན། འོ་ན། ཁོ་རང་ལ། སངས་འཕགས་ཀྱི་རྒྱུད་ཀྱི་མིག་ཤེས་ཆོས་ཅན། སྒྲ་གཟུང་བྱར་བྱེད་པའི་མིག་ཤེས་ཡིན་པར་ཐལ། སྒྲ་གཟུང་བྱར་བྱེད་པ་གང་ཞིག །མིག་ཤེས་ཡིན་པའི་ཕྱིར། འདོད་ན། སྒྲ་དེ་དེར་བྱེད་པའི་མིག་ཤེས་ཡོད་པར་ཐལ། འདོད་པའི་ཕྱིར། འདོད་ན། དེ་འདྲའི་མིག་ཤེས་ཁོ་ཁོ་རང་དུ་ཐལ། ཁོ་ཡོད་པའི་ཕྱིར། ཁྱབ་པ་ཁས། འདོད་ན། དེ་ཆོས་ཅན། སྒྲ་ཁྱོད་ཀྱི་གཟུང་བྱ་ཡིན་པར་ཐལ། ཆོས་ཅན་དེའི་ཕྱིར། འདོད་ན། སྒྲ་ཆོས་ཅན། མིག་ཤེས་ཀྱི་གཟུང་བྱར་ཐལ། འདོད་པའི་ཕྱིར། གཞན་ཡང་། རང་རེས། ཚད་མ་མངོན་སུམ་ཡིན་ཀྱང་། ཚུར་མཐོང་གི་རྒྱུད་ཀྱི་ཚད་མ་མངོན་སུམ་མ་ཡིན་ནོ། །བྱས་པ་ལ་ཁོ་ན་རེ། དེའི་རྒྱུད་ཀྱི་ཚད་མ་དེ་དེ་ཡིན་པར་ཐལ། དེ་གཟུགས་མངོན་སུམ་དུ་རྟོགས་པའི་ཚད་མ་ཡིན་པའི་ཕྱིར་ཏེ། ཚུར་མཐོང་དེ་རང་གི་རྒྱུད་ཀྱི་ཚད་མས་གཟུགས་མངོན་སུམ་དུ་རྟོགས་པའི་གང་ཟག་ཡིན་པའི་ཕྱིར་ཏེ། དེ་ཚད་མས་གཟུགས་མངོན་སུམ་དུ་རྟོགས་པའི་གང་ཟག་ཡིན་པའི་ཕྱིར་ཏེ། དེ་གཟུགས་མངོན་སུམ་ཚད་མས་ངེས་པའི་གང་ཟག་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། གཟུགས་མངོན་སུམ་དུ་རྟོགས་པའི་གང་ཟག་ཡིན་ན། འཕགས་པ་ཡིན་པའི་མ་ཁྱབ་པའི་ཕྱིར། ཁོ་རང་ལ། ཚུར་མཐོང་གི་རྒྱུད་ཀྱི་ཚད་མ་དེ། ཕྲ་བའི་མི་རྟག་པ་དོན་སྤྱིའི་ཚུལ་གྱིས་རྟོགས་པའི་ཚད་མ་ཡིན་པར་ཐལ། ཚུར་མཐོང་དེ་རང་རྒྱུད་ཀྱི་ཚད་མས་ཕྲ་བའི་མི་རྟག་པ་དོན་སྤྱིའི་ཚུལ་གྱིས་རྟོགས་པའི་གང་ཟག་ཡིན་པའི་ཕྱིར། རྟགས་གྲུབ་སྟེ། ཚུར་མཐོང་དེ་ཚད་མས་དེ་འདྲ་དོན་སྤྱིའི་ཚུལ་གྱིས་རྟོགས་པའི་གང་ཟག་ཡིན་པའི་ཕྱིར་ཏེ། དེ་དོན་སྤྱིའི་ཚུལ་གྱིས་ཕྲ་བའི་མི་རྟག་པ་ཚད་མས་རྟོགས་པའི་གང་ཟག་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། དེ་ཕྲ་བའི་མི་རྟག་པ་དོན་སྤྱིའི་ཚུལ་གྱིས་ཚད་མས་རྟོགས་པའི་གང་ཟག་ཡིན་པའི་ཕྱིར་ཏེ། དེ་ཕྲ་བའི་མི་རྟག་པ་རྟོགས་པའི་གང་ཟག་གང་ཞིག །དེ་དེ་མངོན་སུམ་གྱིས་རྟོགས་པའི་གང་ཟག་མ་ཡིན་པའི་ཕྱིར། གཞན་ཡང་། ཁོ་རང་ལ་ཚུར་མཐོང་གི་རྒྱུད་ཀྱི་རང་གི་གཞལ་བྱ་རྟོགས་པའི་ཚད་མ་དེ་ཡང་མངོན་སུམ་དུ་ཐལ། དེའི་རྒྱུད་ཀྱི་ཚད་མ་དེ་ཡིན་པའི་ཕྱིར། འདོད་ན། དེའི་རྒྱུད་ཀྱི་གང་ཟག་གི་བདག་མེད་རྟོགས་པའི་ཚད་མ་ཡང་མངོན་སུམ་དུ་ཐལ། འདོད་པའི་ཕྱིར། འདོད་ན། དེའི་རྒྱུད་ལ་གང་ཟག་གི་བདག་མེད་རྟོགས་པའི་མངོན་སུམ་ཡོད་པར་ཐལ་ལོ། །འདོད་ན། ཚུར་མཐོང་དེ་གང་ཟག་གི་བདག་མེད་མངོན་སུམ་གྱིས་རྟོགས་པའི་གང་ཟག་ཏུ་ཐལ་ལོ། །རང་ལུགས་ཀྱི་སྐྱོན་ནི། ཐར་ལམ་གསལ་བྱེད་ལས། མངོན་རྗེས་གང་ཡང་མ་ཡིན་པའི་ཚད་མ་ཡིན་པ་ཡོད་པས་གཉིས་མིན་གྱི་ཕུང་གསུམ་ཡོད་པར་ག་ལ་འགྱུར། ཞེས་གསུངས་པ་མི་འཐད་པར་ཐལ། མངོན་རྗེས་གང་ཡང་མིན་པའི་ཚད་མ་མེད་པའི་ཕྱིར་ཏེ། ཚད་མ་ཡིན་ན། དེ་གང་རུང་ཡིན་དགོས་པའི་ཕྱིར། གཞན་ཡང་། མངོན་སུམ་ལ་མངོན་སུམ་བཞི་པོ་གང་རུང་གིས་ཁྱབ་པར་ཐལ། ཚད་མ་ལ་མངོན་རྗེས་གང་རུང་གིས་ཁྱབ་པའི་ཕྱིར། འདོད་ན། མངོན་སུམ་ཆོས་ཅན། དེར་ཐལ། དེའི་ཕྱིར། འདོད་ན། དེ་ཡིད་མངོན་དུ་ཐལ། འདོད་པའི་ཕྱིར། འདོད་ན། ཚད་མ་ཡིད་མངོན་ཡིན་པར་ཐལ་ལོ། །འདོད་ན། སོ་སོ་སྐྱེ་བོའི་རྒྱུད་ཀྱི་ཚད་མ་ཡང་དེར་ཐལ་ལོ། །འདོད་ན། དེའི་རྒྱུད་ཀྱི་གཟུགས་འཛིན་ཚད་མ་ཡང་དེར་ཐལ་ལོ། །འདོད་ན། དེ་ཆོས་ཅན། གཟུགས་འཛིན་ཡིད་མངོན་དུ་ཐལ། གཟུགས་འཛིན་ཚད་མ་གང་ཞིག །ཡིད་མངོན་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་གཟུགས་འཛིན་ཡིད་མངོན་ཚད་མར་ཐལ། འདོད་པ་གང་ཞིག །ཁྱོད་ཚད་མ་ཡིན་པའི་ཕྱིར། འདོད་ན། དེའི་རྒྱུད་ལ་གཟུགས་འཛིན་ཡིད་མངོན་ཚད་མ་ཡོད་པར་ཐལ། འདོད་པའི་ཕྱིར། འདོད་མི་ནུས་ཏེ། ཐར་ལམ་གསལ་བྱེད་ལས། སོ་སོ་སྐྱེ་བོའི་རྒྱུད་ལ་ཡིད་ཀྱི་མངོན་སུམ་ཡོད་ཀྱང་། ཡིད་ཀྱི་མངོན་སུམ་ཚད་མ་ནི་མེད་ལ། ཞེས་གསུངས་པ་དེ་མི་འཐད་པར་ཐལ་ལོ། །བྱས་པ་ལ་ཁོ་ན་རེ། ཚད་མ་ཡིད་མངོན་དུ་ཐལ། ཚད་མ་ཡིད་ཀྱི་ཤེས་པ་ཡིན་པའི་ཕྱིར་ཏེ། ཚད་མ་རང་གི་བདག་རྐྱེན་དུ་གྱུར་པའི་ཐུན་མོང་བའི་ཡིད་དབང་ལ་བརྟེན་ནས་སྐྱེས་པའི་ཕྱིར་ཏེ། ཚད་མའི་དེར་གྱུར་པའི་ཡིད་དབང་ཡོད་པའི་ཕྱིར་ཏེ། དེའི་དེར་གྱུར་པའི་ཤེས་པ་ཡོད་པ་གང་ཞིག །དེའི་དེར་གྱུར་པའི་བེམ་པོ་ཡང་མེད། དེའི་དེར་གྱུར་པའི་ལྡན་མིན་འདུ་བྱེད་ཀྱང་མེད་པའི་ཕྱིར། དང་པོ་མ་གྲུབ་ན། དེ་ཆོས་ཅན། ཁྱོད་ཀྱི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་ཤེས་པ་ཡོད་པར་ཐལ། ཁྱོད་ཤེས་པ་ཡིན་པའི་ཕྱིར་ན་མ་ཁྱབ། གཉིས་པ་གྲུབ་སྟེ། དེའི་དེར་གྱུར་པའི་དབང་པོ་གཟུགས་ཅན་པ་མེད་པའི་ཕྱིར་ཏེ། དེ་དབང་ཤེས་མ་ཡིན་པའི་ཕྱིར། གསུམ་པ་མ་གྲུབ་བྱས་པ་ལ་ཁོ་ན་རེ། དེ་མེད་པར་ཐལ། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་ལྡན་མིན་འདུ་བྱེད་ལས་སྐྱེས་པའི་ཤེས་པ་མེད་པའི་ཕྱིར་ཏེ། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་པའི་དེ་ལས་སྐྱེས་པའི་དབང་ཤེས་ཀྱང་མེད། དེ་ལས་སྐྱེས་པའི་ཡིད་ཤེས་ཀྱང་མེད་པའི་ཕྱིར་ན་མ་ཁྱབ་བོ། །

ཕུང་གསུམ་སེལ་བྱེད་ཀྱི་རིགས་པ་ལ་དཔྱད་པ།

༈ ཕུང་གསུམ་སེལ་བྱེད་ཀྱི་རིགས་པ་བཤད་པ་ལ། ཁ་ཅིག་ན་རེ། གཟུགས་འཛིན་མངོན་སུམ་ཆོས་ཅན། ཁྱོད་མངོན་སུམ་གྱི་ཚད་མ་ཡིན་ཏེ། ཁྱོད་ཡིན་པ་ཡོད། ཁྱོད་ཚད་མ་ཡིན། ཁྱོད་ཡིན་པར་གྱུར་པའི་རྗེས་དཔག་མེད་པའི་ཕྱིར། ཞེས་པའི་རིགས་པ་འདི་དང་། སྒྲ་མི་རྟག་རྟོགས་ཀྱི་རྗེས་དཔག་ཆོས་ཅན། རྗེས་སུ་དཔག་པའི་ཚད་མ་ཡིན་ཏེ། ཁྱོད་ཡིན་པ་ཡོད། ཁྱོད་ཚད་མ་ཡིན། ཁྱོད་ཡིན་པར་གྱུར་པའི་མངོན་སུམ་མེད་པའི་ཕྱིར། ཞེས་པའི་རིགས་པ་འདི་གཉིས་ལ་བརྟེན་ནས་མངོན་རྗེས་གཉིས་ཀྱི་བར་གྱི་གཉིས་མིན་གྱི་ཕུང་གསུམ་སེལ་ནུས་པ་ཡིན་ནོ་ཟེར་ན། མངོན་རྗེས་གཉིས་དང་གཅིག་ཏུ་གྱུར་པའི་ཚད་མ་ཆོས་ཅན། མངོན་སུམ་གྱི་ཚད་མར་ཐལ། ཁྱོད་ཡིན་པ་ཡོད། ཅེས་སོགས་དེའི་ཕྱིར། ཁྱབ་པ་ཁས། རྟགས་ཕྱི་མ་གྲུབ་སྟེ། མངོན་རྗེས་གཉིས་རྗེས་དཔག་མ་ཡིན་པའི་ཕྱིར། འདོད་མི་ནུས་ཏེ། རྗེས་སུ་དཔག་པའི་ཚད་མ་ཡིན་པའི་ཕྱིར་ཏེ། ཁྱོད་ཡིན་པ་ཡོད། ཅེས་སོགས་དེའི་ཕྱིར་ཁྱབ་པ་ཁས། རྟགས་ཕྱི་མ་གྲུབ་སྟེ། མངོན་རྗེས་གཉིས་མངོན་སུམ་མ་ཡིན་པའི་ཕྱིར། ཁ་ཅིག་ན་རེ། ཆོས་ཅན་སོགས་འདྲ་བ་ལ། རང་གི་སྣང་ཡུལ་དུ་གྱུར་པའི་རང་མཚན་གསལ་བར་སྣང་བའི་ཚད་མ་ཡིན་པའི་ཕྱིར། ཞེས་པའི་རིགས་པ་དང་། དེ་འདྲ་བ་ལ་རང་གི་སྣང་ཡུལ་དུ་གྱུར་པའི་སྤྱི་མཚན་དོན་སྤྱིའི་ཚུལ་གྱིས་རྟོགས་པའི་ཚད་མ་ཡིན་པའི་ཕྱིར། ཞེས་པའི་རིགས་པ་འདི་ལ་བརྟེན་ནས། དེ་གཉིས་ཀྱི་བར་གྱི་གཉིས་མིན་གྱི་ཕུང་གསུམ་སེལ་ནུས་པ་ཡིན་ནོ་ཟེར་ན། གཟུགས་འཛིན་མངོན་སུམ་ཆོས་ཅན། མངོན་སུམ་གྱི་ཚད་མ་ཡིན་ཏེ། རང་གི་སྣང་ཡུལ་དུ་གྱུར་པའི་རང་མཚན་གསལ་བར་སྣང་བའི་ཚད་མ་ཡིན་པའི་ཕྱིར། ཞེས་པའི་རྟགས་སྦྱོར་དེ་རྟགས་སྦྱོར་རྣམ་དག་ཏུ་ཐལ། དམ་བཅའ་འཐད་པའི་ཕྱིར། འདོད་ན། རང་གི་སྣང་ཡུལ་དུ་གྱུར་པའི་རང་མཚན་གསལ་བར་སྣང་བའི་ཚད་མ་དེ། གཟུགས་འཛིན་མངོན་སུམ་མངོན་སུམ་གྱི་ཚད་མར་སྒྲུབ་པའི་རྟགས་ཡང་དག་ཏུ་ཐལ། འདོད་པའི་ཕྱིར། འདོད་ན། དེའི་རྟགས་ཀྱིས་དེ་སྒྲུབ་ཀྱི་ཕྱི་རྒོལ་ཡང་དག་དེས་གཟུགས་འཛིན་མངོན་སུམ་གྱི་ཚད་མ་ཚད་མས་ངེས་པར་ཐལ། དེས་གཟུགས་འཛིན་མངོན་སུམ་ཚད་མར་ཚད་མས་ངེས་པའི་ཕྱིར། དེ་གཟུགས་འཛིན་མངོན་སུམ་རང་གི་སྣང་ཡུལ་དུ་གྱུར་པའི་རང་མཚན་གསལ་བར་སྣང་བའི་ཚད་མར་ཚད་མས་ངེས་པའི་ཕྱིར། རྩ་བར་འདོད་ན། དེ་འདྲའི་ཕྱི་རྒོལ་ཡང་དག་དེས་གཟུགས་འཛིན་མངོན་སུམ་མངོན་སུམ་གྱི་ཚད་མར་ཚད་མས་ངེས་པར་ཐལ། འདོད་པའི་ཕྱིར། གཞན་ཡང་། སྒྲ་མི་རྟག་རྟོགས་ཀྱི་རྗེས་དཔག་ཆོས་ཅན། རྗེས་སུ་དཔག་པའི་ཚད་མ་ཡིན་ཏེ། ཞེས་སོགས་ཀྱི་རྟགས་སྦྱོར་དེ་རྟགས་སྦྱོར་རྣམ་དག་ཏུ་ཐལ། དམ་བཅའ་འཐད་པའི་ཕྱིར། འདོད་ན། རང་གི་སྣང་ཡུལ་དུ་གྱུར་པའི་སྤྱི་མཚན་དོན་སྤྱིའི་ཚུལ་གྱིས་རྟོགས་པའི་ཚད་མ་དེ། སྒྲ་མི་རྟག་རྟོགས་ཀྱི་རྗེས་དཔག་རྗེས་སུ་དཔག་པའི་ཚད་མར་སྒྲུབ་པའི་རྟགས་ཡང་དག་ཏུ་ཐལ་ལོ། །འདོད་ན། དེའི་རྟགས་ཀྱིས་དེ་སྒྲུབ་ཀྱི་ཕྱི་རྒོལ་ཡང་དག་དེས་སྒྲ་མི་རྟག་རྟོགས་ཀྱི་རྗེས་སུ་དཔག་པའི་ཚད་མ་ཚད་མས་ངེས་པར་ཐལ། དེས་སྒྲ་མི་རྟག་རྟོགས་ཀྱི་རྗེས་དཔག་ཚད་མ་ཚད་མས་ངེས་པའི་ཕྱིར་ཏེ། དེས་དེ་འདྲའི་རྗེས་དཔག་རང་གི་སྣང་ཡུལ་དུ་གྱུར་པའི་སྤྱི་མཚན་དོན་སྤྱིའི་ཚུལ་གྱིས་རྟོགས་པའི་ཚད་མར་ཚད་མས་ངེས་པའི་ཕྱིར། རྩ་བར་འདོད་ན། དེས་དེ་འདྲའི་རྗེས་དཔག་རྗེས་སུ་དཔག་པའི་ཚད་མར་ཚད་མས་ངེས་པར་ཐལ། འདོད་པའི་ཕྱིར། གཞན་ཡང་། མངོན་རྗེས་ཀྱི་བར་ན་གཉིས་མིན་གྱི་ཕུང་གསུམ་པ་མེད་པར་ཐལ། དམ་བཅའ་འཐད་པའི་ཕྱིར་ན་མ་ཁྱབ། འདོད་མི་ནུས་ཏེ། དེ་གཉིས་ཀྱི་བར་ན། གཉིས་མིན་གྱི་ཤེས་པ་ཕུང་གསུམ་པ་ཡོད་པའི་ཕྱིར་ཏེ། མངོན་རྗེས་གང་རུང་གི་ཁོངས་སུ་མ་འདུས་པའི་ཤེས་པ་ཕུང་གསུམ་པ་ཡོད་པའི་ཕྱིར་ཏེ། ལོག་ཤེས་དེ་དེ་ཡིན་པའི་ཕྱིར། ཁ་ཅིག་ན་རེ། ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་མ་ངེས་པར་སྒྲོ་འདོགས་པའི་སྒྲོ་འདོགས་དེ་ཚད་མའི་གྲངས་ངེས་ལ་སྒྲོ་འདོགས་པའི་སྒྲོ་འདོགས་ཡིན་ཟེར་ན། ཚད་མའི་གྲངས་ངེས་ལ་སྒྲོ་འདོགས་པའི་སྒྲོ་འདོགས་ཆོད་པའི་གང་ཟག་ཡིན་ན། ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་མ་ངེས་པར་སྒྲོ་འདོགས་པའི་སྒྲོ་འདོགས་ཆོད་པའི་གང་ཟག་ཡིན་དགོས་པར་ཐལ། དམ་བཅའ་འཐད་པའི་ཕྱིར། འདོད་ན། ཚད་མའི་གྲངས་ངེས་ཚད་མས་ངེས་པའི་གང་ཟག་ཡིན་ན། ཚད་མ་ལ་དེ་གཉིས་སུ་གྲངས་ངེས་པར་ཚད་མས་ངེས་པའི་གང་ཟག་ཡིན་དགོས་པར་ཐལ། འདོད་པའི་ཕྱིར། འདོད་མི་ནུས་ཏེ། ཚད་མ་ལ་རང་ལས་ངེས་ཀྱི་ཚད་མ་དང་། གཞན་ལས་ངེས་ཀྱི་ཚད་མ་གཉིས་སུ་གྲངས་ངེས་པར་ཚད་མས་ངེས་ནས། ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པར་ཚད་མས་མ་ངེས་པའི་གང་ཟག་ཡོད་པའི་ཕྱིར། རང་ལས་ངེས་ཀྱི་ཚད་མ་དང་། གཞན་ལས་ངེས་ཀྱི་ཚད་མ་གཉིས་ཚད་མས་ངེས་ནས། མངོན་རྗེས་ཀྱི་ཚད་མ་གཉིས་ཚད་མས་མ་ངེས་པའི་གང་ཟག་ཡོད་པའི་ཕྱིར། གཞན་ཡང་། གཞལ་བྱ་ལ་རང་སྤྱི་གཉིས་སུ་གྲངས་མ་ངེས་པར་སྒྲོ་འདོགས་པའི་སྒྲོ་འདོགས་འདི། གཞལ་བྱའི་གྲངས་ངེས་ལ་སྒྲོ་འདོགས་པའི་སྒྲོ་འདོགས་ཡིན་པར་ཐལ། རྩ་བའི་དམ་བཅའ་འཐད་པའི་ཕྱིར། འདོད་ན། གཞལ་བྱའི་གྲངས་ངེས་ལ་སྒྲོ་འདོགས་པའི་སྒྲོ་འདོགས་ཆོད་པའི་གང་ཟག་ཡིན་ན། གཞལ་བྱ་ལ་རང་སྤྱི་གཉིས་སུ་གྲངས་མ་ངེས་པར་སྒྲོ་འདོགས་པའི་སྒྲོ་འདོགས་ཆོད་པའི་གང་ཟག་ཡིན་དགོས་པར་ཐལ། འདོད་པའི་ཕྱིར། འདོད་ན། གཞལ་བྱའི་གྲངས་ངེས་ཚད་མས་ངེས་པའི་གང་ཟག་ཡིན་ན། གཞལ་བྱ་ལ་དེ་གཉིས་སུ་གྲངས་ངེས་པར་ཚད་མས་ངེས་པའི་གང་ཟག་ཡིན་དགོས་པར་ཐལ། འདོད་པའི་ཕྱིར། འདོད་ན། ཐལ་འགྱུར་པ་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། གཞལ་བྱ་ལ་རྟག་མི་རྟག་གཉིས་སུ་གྲངས་ངེས་པར་ཚད་མས་ངེས་པའི་གང་ཟག་ཡིན་པའི་ཕྱིར། འདོད་ན། དེ་ཆོས་ཅན། རང་མཚན་ཚད་མས་ངེས་པའི་གང་ཟག་ཏུ་ཐལ། འདོད་པའི་ཕྱིར། འདོད་ན། རང་གི་མཚན་ཉིད་ཀྱིས་གྲུབ་པ་ཚད་མས་ངེས་པའི་གང་ཟག་ཏུ་ཐལ། འདོད་པའི་ཕྱིར། འདོད་མི་ནུས་ཏེ། རང་གི་མཚན་ཉིད་ཀྱིས་གྲུབ་པ་རྡུལ་ཙམ་ཡང་ཁས་མི་ལེན་པའི་ཕྱིར། ཁ་ཅིག་ན་རེ། མངོན་སུམ་ཚད་མ་མ་ཡིན་པར་སྒྲོ་འདོགས་པའི་སྒྲོ་འདོགས་འདི་དང་། རྗེས་དཔག་ཚད་མ་མ་ཡིན་པར་སྒྲོ་འདོགས་པའི་སྒྲོ་འདོགས་འདི་གཉིས། ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པ་ལ་སྒྲོ་འདོགས་པའི་སྒྲོ་འདོགས་ཡིན་ཟེར་ན། མངོན་སུམ་ཚད་མ་མ་ཡིན་པར་འཛིན་པའི་རྟོག་པ་དེ། ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་མ་ངེས་པར་འཛིན་པའི་རྟོག་པར་ཐལ། མངོན་སུམ་ཚད་མ་མ་ཡིན་པར་སྒྲོ་འདོགས་པའི་སྒྲོ་འདོགས་དེ། ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་མ་ངེས་པར་སྒྲོ་འདོགས་པའི་སྒྲོ་འདོགས་ཡིན་པའི་ཕྱིར་ཏེ། དེ་ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པ་དེ་ལ་སྒྲོ་འདོགས་པའི་སྒྲོ་འདོགས་ཡིན་པའི་ཕྱིར། འདོད་ན། ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་མ་ངེས་པ་དེ། དེ་འདྲ་འཛིན་པའི་རྟོག་པའི་ཞེན་ཡུལ་ཡིན་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། དེ་མ་ཡིན་པར་ཐལ། རྗེས་དཔག་ཚད་མ་མ་ཡིན་པར་འཛིན་པའི་རྟོག་པའི་ཞེན་ཡུལ་ཡིན་པའི་ཕྱིར། རྟགས་གྲུབ་སྟེ། རྗེས་དཔག་ཚད་མ་མ་ཡིན་པར་འཛིན་པའི་རྟོག་པ་དེ། ཚད་མ་ལ་དེ་གཉིས་སུ་གྲངས་མ་ངེས་པར་འཛིན་པའི་རྟོག་པ་ཡིན་པའི་ཕྱིར་ཏེ། རྗེས་དཔག་ཚད་མ་མ་ཡིན་པར་སྒྲོ་འདོགས་པའི་སྒྲོ་འདོགས་དེ། ཚད་མ་ལ་དེ་གཉིས་སུ་གྲངས་མ་ངེས་པར་སྒྲོ་འདོགས་པའི་སྒྲོ་འདོགས་ཡིན་པའི་ཕྱིར་ཏེ། དེ་ཚད་མ་ལ་དེ་གཉིས་སུ་གྲངས་ངེས་པ་དེ་ལ་སྒྲོ་འདོགས་པའི་སྒྲོ་འདོགས་ཡིན་པའི་ཕྱིར། རྟགས་ཁས། ཁ་ཅིག་ན་རེ། མངོན་སུམ་ཚད་མ་མ་ཡིན་པར་སྒྲོ་འདོགས་པའི་སྒྲོ་འདོགས་དང་། རྗེས་དཔག་ཚད་མ་མ་ཡིན་པར་སྒྲོ་འདོགས་པའི་སྒྲོ་འདོགས་གཉིས། ཚད་མ་ལ་མངོན་རྗེས་ཀྱི་ཚད་མ་གཉིས་ལས་གྲངས་ཉུང་བར་སྒྲོ་འདོགས་པའི་སྒྲོ་འདོགས་ཡིན་ཟེར་ན། མངོན་སུམ་ཚད་མ་མ་ཡིན་པར་འཛིན་པའི་རྟོག་པ་དེ། ཚད་མ་ལ་མངོན་རྗེས་ཀྱི་ཚད་མ་གཉིས་ལས་གྲངས་ཉུང་བར་འཛིན་པའི་རྟོག་པར་ཐལ། མངོན་སུམ་ཚད་མ་མ་ཡིན་པར་སྒྲོ་འདོགས་པའི་སྒྲོ་འདོགས་དེ་ཚད་མ་ལ་དེ་གཉིས་ལས་གྲངས་ཉུང་བར་སྒྲོ་འདོགས་པའི་སྒྲོ་འདོགས་ཡིན་པའི་ཕྱིར། འདོད་ན། ཚད་མ་ལ་མངོན་རྗེས་ཀྱི་ཚད་མ་གཉིས་ལས་གྲངས་ཉུང་བར་གྲུབ་པ་དེ། མངོན་སུམ་ཚད་མ་མ་ཡིན་པར་འཛིན་པའི་རྟོག་པའི་ཞེན་ཡུལ་དུ་ཐལ། འདོད་པའི་ཕྱིར། འདོད་མི་ནུས་ཏེ། དེ་རྗེས་དཔག་ཚད་མ་མ་ཡིན་པར་འཛིན་པའི་རྟོག་པའི་ཞེན་ཡུལ་ཡིན་པའི་ཕྱིར་ཏེ། དེ་འདྲའི་རྟོག་པ་དེ་ཚད་མ་ལ་དེ་གཉིས་ལས་གྲངས་ཉུང་བར་འཛིན་པའི་རྟོག་པ་ཡིན་པའི་ཕྱིར། རྗེས་དཔག་ཚད་མ་མ་ཡིན་པར་སྒྲོ་འདོགས་པའི་སྒྲོ་འདོགས་དེ། ཚད་མ་ལ་དེ་གཉིས་ལས་གྲངས་ཉུང་བར་སྒྲོ་འདོགས་པའི་སྒྲོ་འདོགས་ཡིན་པའི་ཕྱིར། ཁ་ཅིག་ན་རེ། རང་མཚན་སྣང་ཡུལ་དུ་བྱེད་པའི་ཚད་མ་ཡིན་ན། མངོན་སུམ་གྱི་ཚད་མ་ཡིན་པས་ཁྱབ། སྤྱི་མཚན་དེར་བྱེད་པའི་ཚད་མ་ཡིན་ན། རྗེས་སུ་དཔག་པའི་ཚད་མ་ཡིན་པས་ཁྱབ་ཟེར་ན། ཚད་མ་ཆོས་ཅན། དང་པོ་ལ། དེར་ཐལ། དེའི་ཕྱིར། རང་མཚན་ཁྱོད་ཀྱི་སྣང་ཡུལ་གང་ཞིག །ཁྱོད་ཚད་མ་ཡིན་པའི་ཕྱིར། རྩ་བར་འདོད་མི་ནུས་ཏེ། རྗེས་སུ་དཔག་པའི་ཚད་མ་ཡིན་པའི་ཕྱིར་ཏེ། སྤྱི་མཚན་དེར་བྱེད་པའི་ཚད་མ་ཡིན་པའི་ཕྱིར། ཁྱབ་པ་ཁས། དེར་ཐལ། སྤྱི་མཚན་ཁྱོད་ཀྱི་སྣང་ཡུལ་གང་ཞིག །ཁྱོད་ཚད་མ་ཡིན་པའི་ཕྱིར། བྱས་པ་ལ་ཁོ་ན་རེ། དམ་བཅའ་འཐད་པར་ཐལ། མདོ་རང་འགྲེལ་ལས། རང་གི་མཚན་ཉིད་ཀྱི་ཡུལ་ཅན་ནི་མངོན་སུམ་ཡིན་ལ། སྤྱིའི་མཚན་ཉིད་ཀྱི་ཡུལ་ཅན་ནི་རྗེས་སུ་དཔག་པའོ། །ཞེས་གསུངས་པའི་ཕྱིར་ན་མ་ཁྱབ་སྟེ། རང་གི་སྣང་ཡུལ་དུ་གྱུར་པའི་རང་མཚན་མངོན་སུམ་དུ་རྟོགས་པའི་ཚད་མ་ཡིན་ན། མངོན་སུམ་གྱི་ཚད་མ་ཡིན་པས་ཁྱབ། དེར་གྱུར་པའི་སྤྱི་མཚན་དོན་སྤྱིའི་ཚུལ་གྱིས་རྟོགས་པའི་ཚད་མ་ཡིན་ན། རྗེས་སུ་དཔག་པའི་ཚད་མ་ཡིན་པས་ཁྱབ་པ་དེ། ལུང་དེའི་དོན་ཡིན་པའི་ཕྱིར། ཁ་ཅིག་ན་རེ། མངོན་སུམ་གྱི་ཚད་མ་ཡིན་ན། རང་མཚན་སྣང་ཡུལ་དུ་བྱེད་པའི་ཚད་མ་ཡིན་པས་ཁྱབ། རྗེས་སུ་དཔག་པའི་ཚད་མ་ཡིན་ན། སྤྱི་མཚན་སྣང་ཡུལ་དུ་བྱེད་པའི་ཚད་མ་ཡིན་པས་ཁྱབ་ཟེར་ན། རྟོག་པ་ཡིན་ན། སྤྱི་མཚན་སྣང་ཡུལ་དུ་བྱེད་པའི་རྟོག་པ་ཡིན་པས་ཁྱབ་པར་ཐལ། དམ་བཅའ་གཉིས་པ་འཐད་པའི་ཕྱིར། འདོད་ན། རྗོད་བྱེད་ཀྱི་སྒྲ་ཡིན་ན། སྤྱི་མཚན་བརྗོད་པའི་ངག་ཡིན་དགོས་པར་ཐལ། འདོད་པའི་ཕྱིར། འདོད་ན། སྤྱི་མཚན་མ་ཡིན་པ་ཞེས་པའི་ངག་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། དེ་སྤྱི་མཚན་སེལ་བའི་ངག་ཡིན་པའི་ཕྱིར་ཏེ། དེ་སྤྱི་མཚན་མ་ཡིན་པ་ལ་སེལ་འཇུག་ཡིན་པའི་ཕྱིར། གཞན་ཡང་། རང་མཚན་འཛིན་པའི་རྗེས་དཔག་ཆོས་ཅན། ཁྱབ་པ་ཕྱི་མ་དེར་ཐལ། དེའི་ཕྱིར། ཁྱབ་པ་ཁས། འདོད་ན། དེ་ཆོས་ཅན། སྤྱི་མཚན་ཁྱོད་ཀྱི་སྣང་ཡུལ་དུ་ཐལ། འདོད་པའི་ཕྱིར། འདོད་ན། སྤྱི་མཚན་དེ་རང་མཚན་ཞེས་པའི་ངག་གི་བརྗོད་བྱ་ཡིན་པར་ཐལ་ལོ། །གཞན་ཡང་། རང་གི་སྣང་ཡུལ་དུ་གྱུར་པའི་རང་མཚན་སྣང་ཡུལ་དུ་བྱེད་པའི་ཚད་མ་ཡིན་ན། རང་མཚན་སྣང་ཡུལ་དུ་བྱེད་པའི་ཚད་མ་ཡིན་དགོས་པར་ཐལ། མངོན་སུམ་གྱི་ཚད་མ་ཡིན་ན་དེ་ཡིན་དགོས་པའི་ཕྱིར། རྟགས་ཁས། འདོད་ན། རང་གི་སྣང་ཡུལ་དུ་གྱུར་པའི་སྤྱི་མཚན་ལ་དེ་ཡིན་དགོས་པར་ཐལ། འདོད་པའི་ཕྱིར། འདོད་ན། སྔར་གྱི་སྐྱོན་སོ་ན་གནས། གཞན་ཡང་། སྤྱི་མཚན་རྟོགས་པའི་མངོན་སུམ་ཆོས་ཅན། རང་མཚན་སྣང་ཡུལ་དུ་བྱེད་པའི་ཚད་མར་ཐལ། མངོན་སུམ་ཚད་མ་ཡིན་པའི་ཕྱིར། འདོད་ན། དེ་ཡུལ་དུ་བྱེད་པའི་ཤེས་པར་ཐལ་ལོ། །འདོད་ན། དེ་བརྗོད་པའི་ངག་ཀྱང་རང་མཚན་བརྗོད་པའི་ངག་ཏུ་ཐལ་ལོ། །བྱས་པ་ལ་ཁོ་ན་རེ། དེ་རང་མཚན་སྣང་ཡུལ་དུ་བྱེད་པའི་ཚད་མ་ཡིན་པར་ཐལ། དེའི་སྣང་ཡུལ་དུ་གྱུར་པའི་རང་མཚན་ཡོད་པའི་ཕྱིར་ན་མ་ཁྱབ་བོ། །གཞན་ཡང་། ཚུར་མཐོང་གི་མིག་ཤེས་ཀྱི་གཟུང་བྱ་དང་། ཉན་ཤེས་ཀྱི་ཐོས་བྱ་གཉིས་མི་འགལ་བར་ཐལ། དེའི་རྒྱུད་ཀྱི་མིག་ཤེས་ཀྱི་གཟུང་ཡུལ་དང་། ཉན་ཤེས་ཀྱི་གཟུང་ཡུལ་གཉིས་མི་འགལ་བའི་ཕྱིར་ཏེ། དེ་གཉིས་ཀྱི་སྣང་ཡུལ་དེ་མི་འགལ་བའི་ཕྱིར་ཏེ། རང་མཚན་དེ་དེ་གཉིས་ཀའི་སྣང་ཡུལ་དུ་བྱེད་པའི་ཕྱིར་ཏེ། དང་པོ་གང་ཞིག །ཕྱི་མ་ཡིན་པའི་ཕྱིར། དང་པོ་གྲུབ་སྟེ། དེའི་རྒྱུད་ཀྱི་མིག་ཤེས་དེ་རང་མཚན་སྣང་ཡུལ་དུ་བྱེད་པའི་ཚད་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། རང་མཚན་དེར་བྱེད་པའི་ཚད་མ་ཡིན་པར་ཐལ། མངོན་སུམ་གྱི་ཚད་མ་ཡིན་པའི་ཕྱིར། ཁྱབ་པ་ཁས། བྱས་པ་ལ་ཁོ་ན་རེ། མངོན་སུམ་གྱི་ཚད་མ་ཡིན་ན། རང་མཚན་སྣང་ཡུལ་དུ་བྱེད་པའི་ཚད་མ་ཡིན་དགོས་པར་ཐལ། སྒྲ་འཛིན་དབང་མངོན་དེ་རང་མཚན་དེར་བྱེད་པའི་ཚད་མ་ཡིན་པའི་ཕྱིར་ཏེ། དེ་མི་རྟག་པ་དེར་བྱེད་པའི་ཚད་མ་ཡིན་པའི་ཕྱིར་ཏེ། དེ་སྒྲའི་སྟེང་གི་མི་རྟག་པ་དེར་བྱེད་པའི་ཚད་མ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། དེ་དེ་སྣང་ཡུལ་དུ་བྱེད་པའི་མངོན་སུམ་ཡིན་པའི་ཕྱིར། དེ་དེ་འདྲའི་མི་རྟག་པ་ལ་སྒྲུབ་པས་འཇུག་པའི་མངོན་སུམ་ཡིན་པའི་ཕྱིར། དེ་སྒྲ་ལ་སྒྲུབ་པས་འཇུག་པའི་མངོན་སུམ་གང་ཞིག །སྒྲ་དང་དེའི་སྟེང་གི་མི་རྟག་པ་གཉིས། ཡུལ་དུས་རང་བཞིན་གང་ལ་ལྟོས་ཏེ་གྲུབ་བདེ་རྫས་གཅིག་ཡིན་པའི་ཕྱིར། ཁ་ཅིག་ན་རེ། རང་སྣང་ཡུལ་དུ་བྱེད་པའི་རྗེས་དཔག་གི་སྣང་ཡུལ་ཡིན་ན། རྗེས་དཔག་གི་སྣང་ཡུལ་ཡིན་དགོས་སོ་ཟེར་ན། རེ་ཞིག་ལ་བུམ་པའི་དོན་སྤྱི་བུམ་པ་དང་གཅིག་ཡིན་པ་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། ཁོ་རང་སྣང་ཡུལ་དུ་བྱེད་པའི་རྗེས་དཔག་ཡོད་པའི་ཕྱིར་ཏེ། བུམ་པ་རྟོགས་པའི་རྗེས་དཔག་དེ་དེ་ཡིན་པའི་ཕྱིར། བྱས་པ་ལ་ཁོ་ན་རེ། རང་སྣང་ཡུལ་དུ་བྱེད་པའི་རྗེས་དཔག་གི་སྣང་ཡུལ་ཡིན་ན། རྗེས་དཔག་གི་སྣང་ཡུལ་ཡིན་དགོས་པར་ཐལ། རང་སྣང་ཡུལ་དུ་བྱེད་པའི་མངོན་སུམ་ལ་དེའི་ཕྱིར་ན་མ་ཁྱབ། འདོད་ན་ཁོ་རང་ལ། རང་ཡུལ་དུ་བྱེད་པའི་རྟོག་མེད་ཀྱི་ཤེས་པའི་སྣང་ཡུལ་ཡིན་ན། རྟོག་མེད་ཤེས་པའི་སྣང་ཡུལ་ཡིན་དགོས་པར་ཐལ། རང་སྣང་ཡུལ་དུ་བྱེད་པའི་མངོན་སུམ་ལ་དེའི་ཕྱིར། ཁྱབ་པ་ཁས། འདོད་ན། ཟླ་བ་གཉིས་སྣང་གི་དབང་ཤེས་ཀྱི་ཡུལ་ཆོས་ཅན། དེར་ཐལ། དེའི་ཕྱིར། ཟླ་བ་གཉིས་སྣང་གི་དབང་ཤེས་ཀྱི་སྣང་ཡུལ་ཡིན་པའི་ཕྱིར། མ་གྲུབ་ན་དེ་ཆོས་ཅན། དེར་ཐལ། དེའི་ཡུལ་གང་ཞིག །དེའི་ཞེན་ཡུལ་མ་ཡིན་པའི་ཕྱིར། ཕྱི་མ་གྲུབ་སྟེ། ཡོད་པའི་ཕྱིར། རྩ་བར་འདོད་ན། དེ་ཆོས་ཅན། དབང་ཤེས་ཀྱི་སྣང་ཡུལ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། ཟླ་བ་གཅིག་ཟླ་བ་གཉིས་ཡིན་པ་དེ་ཁྱོད་ཡིན་པའི་ཕྱིར། རང་རེས། མངོན་སུམ་གྱི་སྣང་ཡུལ་ཡིན་ན། རང་མཚན་ཡིན་པས་ཁྱབ། བྱས་པ་ལ་ཁོ་ན་རེ། ཤེས་བྱ་ཆོས་ཅན། དེར་ཐལ། དེའི་ཕྱིར། རྣམ་མཁྱེན་གྱི་སྣང་ཡུལ་ཡིན་པའི་ཕྱིར་ཏེ། སངས་འཕགས་ཀྱི་དངོས་ཡུལ་ཡིན་པའི་ཕྱིར། ཁྱབ་སྟེ། སངས་འཕགས་ཀྱི་དངོས་ཀྱི་གཞལ་བྱ་ཡིན་ན། རྣམ་མཁྱེན་གྱི་དེ་ཡིན་དགོས་པའི་ཕྱིར་ན་མ་ཁྱབ། རྩ་རྟགས་མ་གྲུབ་ན། སངས་འཕགས་ཀྱི་དངོས་ཡུལ་ཡིན་པར་ཐལ། དེའི་ངག་གི་དངོས་ཡུལ་ཡིན་པའི་ཕྱིར། དེའི་བཀའི་དངོས་ཡུལ་ཡིན་པའི་ཕྱིར། གཞན་ཡང་། ཤེས་བྱ་ཆོས་ཅན། སངས་འཕགས་ཀྱི་དངོས་ཡུལ་མ་ཡིན་པར་ཐལ། དེའི་ཤུགས་ཡུལ་ཡིན་པའི་ཕྱིར་ཏེ། དེའི་ཤུགས་ཀྱི་གཞལ་བྱ་ཡིན་པའི་ཕྱིར་ན་མ་ཁྱབ། གཞན་ཡང་། སོ་སོ་སྐྱེ་བོའི་དངོས་ཡུལ་དུ་གྱུར་པའི་ཆོས་ཡིན་ན། དེའི་དངོས་ཀྱི་གཞལ་བྱ་ཡིན་པས་མ་ཁྱབ་པར་ཐལ། སངས་འཕགས་ཀྱི་དངོས་ཡུལ་དུ་གྱུར་པའི་ཆོས་ཡིན་ན། སངས་འཕགས་ཀྱི་དངོས་ཀྱི་གཞལ་བྱ་ཡིན་པས་མ་ཁྱབ་པའི་ཕྱིར་ན་མ་ཁྱབ། མ་གྲུབ་ན། ཤེས་བྱ་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། གཞི་གྲུབ་ན། སོ་སོ་སྐྱེ་བོའི་དངོས་ཀྱི་གཞལ་བྱ་ཡིན་དགོས་པའི་ཕྱིར་ཏེ། གཞི་གྲུབ་ན། དེའི་རྒྱུད་ཀྱི་རྗེས་དཔག་གི་དངོས་ཀྱི་གཞལ་བྱ་ཡིན་དགོས་པའི་ཕྱིར། ཁ་ཅིག །གང་ཟག་གི་བདག་མེད་ཆོས་ཅན། དེར་ཐལ། དེའི་ཕྱིར། གང་ཟག་གི་བདག་མེད་རྟོགས་པའི་རྣལ་འབྱོར་མངོན་སུམ་གྱི་ཡུལ་ཡིན་པའི་ཕྱིར་ཏེ། དེ་ལ་གསལ་བར་སྣང་བའི་ཕྱིར། རྟགས་གྲུབ་སྟེ། གང་ཟག་གི་བདག་མེད་རྟོགས་པའི་རྗེས་དཔག་གི་རྒྱུན་གོམས་པ་ལ་བརྟེན་ནས་གོམས་བྱའི་དོན་ལ་གསལ་སྣང་འབྱུང་ཚུལ་གཅིག་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། དེ་ཕྱིར་ཡང་དག་ཡང་དག་མིན། །གང་གང་ཤིན་ཏུ་གོམས་གྱུར་པ། །ཞེས་གསུངས་པའི་ཕྱིར་རོ། །གསལ་སྣང་འབྱུང་ཚུལ་ལ། ཁ་ཅིག །སྤྱི་དོན་རིགས་རྒྱན་གྱི་དགོངས་པར་བྱས་ནས། གང་ཟག་གི་བདག་མེད་རྟོགས་པའི་རྗེས་དཔག་གི་རྒྱུན་གོམས་པ་ལ་བརྟེན་ནས། གང་ཟག་གི་བདག་གིས་དབེན་པའི་འདུ་བྱེད་ཀྱི་ཕུང་པོ་ལ་གསལ་སྣང་འབྱུང་བ་ཡིན་ནོ་ཟེར་ན། གང་ཟག་གི་བདག་གིས་སྟོང་པའི་འདུ་བྱེད་ཀྱི་ཕུང་པོ་དེ། གང་ཟག་གི་བདག་མེད་རྟོགས་པའི་རྣལ་འབྱོར་མངོན་སུམ་གྱི་སྣང་ཡུལ་དུ་ཐལ། འདོད་པའི་ཕྱིར། འདོད་ན། དེ་ཆོས་ཅན། ཕྲ་བའི་མི་རྟག་པར་ཐལ། འདོད་པའི་ཕྱིར། འདོད་ན། ཁྱོད་མངོན་སུམ་གྱིས་རྟོགས་པའི་སོ་སོ་སྐྱེ་བོ་མེད་པར་ཐལ་ལོ། །འདོད་མི་ནུས་ཏེ། གང་ཟག་གི་བདག་གིས་དབེན་པའི་བུམ་པ་མངོན་སུམ་དུ་རྟོགས་པའི་སོ་སྐྱེ་ཡོད་པའི་ཕྱིར། །

༈ རང་ལུགས་ནི། གང་ཟག་གི་བདག་མེད་རྟོགས་པའི་རྗེས་དཔག་གི་རྒྱུན་གོམས་པ་ལ་བརྟེན་ནས། གང་ཟག་མི་རྟག་པ་ལ་གསལ་སྣང་འབྱུང་བ་ཡིན་ཏེ། གང་ཟག་མི་རྟག་པ་དེ་གང་ཟག་གི་བདག་མེད་རྟོགས་པའི་རྣལ་འབྱོར་མངོན་སུམ་གྱི་སྣ་ཡུལ་དུ་གྱུར་པའི་རང་མཚན་ཡིན་པའི་ཕྱིར་ཏེ། དེ་འདྲའི་རྣལ་འབྱོར་མངོན་སུམ་དེས་གང་ཟག་མི་རྟག་པ་མངོན་སུམ་གྱིས་རྟོགས་པའི་ཤུགས་ལ་གང་ཟག་གི་བདག་མེད་རྟོགས་པའི་ཕྱིར། དེ་སྐད་དུ་ཡང་། མཁས་གྲུབ་རྗེའི་ལྟ་བའི་དོགས་གཅོད་ལས། མདོ་སྡེ་པས་འཕགས་པའི་ཡེ་ཤེས་ཀྱིས་ཕྲ་བའི་མི་རྟག་པ་དངོས་སུ་མངོན་སུམ་དུ་རྟོགས་པའི་ཤུགས་ལ་རང་སྐྱ་ཐུབ་པའི་རྫས་ཡོད་རྣམ་པར་བཅད་པ་རྟོགས་པར་འདོད་པས། དེ་ལྟར་བདག་མེད་སྒོམ་པ་ནའང་མེད་དགག་འབའ་ཞིག་ཡིད་ལ་བྱེད་པ་མ་ཡིན་ནོ། །ཞེས་གསུངས་པའི་ཕྱིར། བྱས་པ་ལ་ཁོ་ན་རེ། རྣམ་མཁྱེན་རྟག་སྟོང་ཆོས་ཅན། རང་མཚན་དུ་ཐལ། མངོན་སུམ་གྱི་སྣང་ཡུལ་ཡིན་པའི་ཕྱིར་ཏེ། རྣམ་མཁྱེན་གང་ཟག་གི་བདག་མེད་དུ་རྟོགས་པའི་སློབ་པའི་རྣལ་འབྱོར་མངོན་སུམ་གྱི་སྣང་ཡུལ་ཡིན་པའི་ཕྱིར། རྟགས་གྲུབ་སྟེ། དེའི་སྣང་ཡུལ་ཞིག་ཡོད། རྣམ་མཁྱེན་དེ་ཡང་དེ་མ་ཡིན། རྣམ་མཁྱེན་གྱི་སྟེང་གི་གང་ཟག་གི་བདག་གིས་སྟོང་པའི་དངོས་པོ་དེ་ཡང་དེ་མ་ཡིན་པའི་ཕྱིར་ན་མ་ཁྱབ། དང་པོ་མ་གྲུབ་ན། དེ་ཆོས་ཅན། ཁྱོད་ཀྱི་སྣང་ཡུལ་ཡོད་པར་ཐལ། ཁྱོད་ཤེས་པ་ཡིན་པའི་ཕྱིར། གཉིས་པ་གྲུབ་སྟེ། དེས་རྣམ་མཁྱེན་དངོས་སུ་མ་རྟོགས་པའི་ཕྱིར། གསུམ་པ་མ་གྲུབ་ན། དེས་རྣམ་མཁྱེན་གྱི་སྟེང་གི་དངོས་པོ་དངོས་སུ་རྟོགས་པར་ཐལ། འདོད་པའི་ཕྱིར། འདོད་ན། དེས་རྣམ་མཁྱེན་མི་རྟག་པ་མངོན་སུམ་གྱིས་དངོས་སུ་རྟོགས་པར་ཐལ་ལོ། །དེས་རྣམ་མཁྱེན་ཤེས་པ་ཡིན་པ་དངོས་སུ་རྟོགས་པར་ཐལ་ལོ། །འདོད་མི་ནུས་ཏེ། རྣམ་མཁྱེན་ཤེས་པ་ཡིན་པ་དེ་རྣམ་མཁྱེན་ཡིན་པའི་ཕྱིར་ཏེ། རྣམ་མཁྱེན་ཚད་མ་ཡིན་པ་དེ་རྣམ་མཁྱེན་ཡིན་པའི་ཕྱིར་ཏེ། མངོན་སུམ་ཚད་མ་ཡིན་པ་མངོན་སུམ་ཡིན་པའི་ཕྱིར། ཡང་ཁོ་ན་རེ། རྣམ་མཁྱེན་རྟག་སྟོང་ཆོས་ཅན། མངོན་སུམ་གྱི་སྣང་ཡུལ་ཏུ་ཐལ། རྣམ་མཁྱེན་རྟག་པར་འཛིན་པའི་རྟོག་པའི་དངོས་གཉེན་བར་ཆད་མེད་ལམ་གྱི་དངོས་ཀྱི་གཞལ་བྱ་ཡིན་པའི་ཕྱིར་ཏེ། དེའི་དངོས་ཀྱི་གཞལ་བྱ་ཅིག་ཡོད་པའི་ཕྱིར། དེ་འདྲའི་བར་ཆད་མེད་ལམ་ཡོད་པའི་ཕྱིར། དེ་འདྲའི་རྟོག་པ་དེ་སྒྲིབ་པ་ཡིན་པའི་ཕྱིར་ཏེ། དེ་སྤང་བྱ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། དེ་སྤངས་པའི་གང་ཟག་ཡོད་པའི་ཕྱིར་ན། ཁོ་རང་ལ་དེ་འདྲའི་བར་ཆད་མེད་ལམ་དེས་རྣམ་མཁྱེན་མི་རྟག་པ་དེ་དངོས་སུ་རྟོགས་པར་ཐལ། དེས་རྣམ་མཁྱེན་རྟག་སྟོང་དུ་དངོས་སུ་རྟོགས་པའི་ཕྱིར། འདོད་ན། དེས་རྣམ་མཁྱེན་དེ་དངོས་སུ་རྟོགས་པར་ཐལ་ལོ། །ཡང་ཁོ་ན་རེ། གང་ཟག་གི་བདག་མེད་ཆོས་ཅན། རང་མཚན་དུ་ཐལ། མངོན་སུམ་གྱི་དེའི་ཕྱིར། གང་ཟག་གི་བདག་འཛིན་གྱི་དངོས་གཉེན་བར་ཆད་མེད་ལམ་གྱི་སྣང་ཡུལ་ཡིན་པའི་ཕྱིར། རྟགས་གྲུབ་སྟེ། དེའི་སྣང་ཡུལ་ཡོད་པའི་ཕྱིར་ན་མ་ཁྱབ་སྟེ། གང་ཟག་མི་རྟག་པ་དེ་དེའི་སྣང་ཡུལ་ཡིན་པའི་ཕྱིར། ཁ་ཅིག་ན་རེ། གང་ཟག་གི་བདག་མེད་ཀྱི་ཁྱད་པར་དུ་བྱས་པའི་ཕུང་པོ་དེ། གང་ཟག་གི་བདག་འཛིན་གྱི་དངོས་གཉེན་བར་ཆད་མེད་ལམ་གྱི་གཞལ་བྱ་ཡིན་ཟེར་ན། དེ་འདྲ་བའི་ཕུང་པོ་དེ། ཕུང་པོ་གང་ཟག་གི་བདག་ཏུ་འཛིན་པའི་བདག་འཛིན་གྱི་དངོས་གཉེན་བར་ཆད་མེད་ལམ་གྱི་དངོས་ཀྱི་གཞལ་བྱར་ཐལ། དམ་བཅའ་འཐད་པའི་ཕྱིར། འདོད་ན། དེས་ཁྱད་པར་དུ་བྱས་པའི་རྣམ་མཁྱེན་དེ། རྣམ་མཁྱེན་གང་ཟག་གི་བདག་ཏུ་འཛིན་པའི་བདག་འཛིན་གྱི་དངོས་གཉེན་བར་ཆད་མེད་ལམ་གྱི་དངོས་ཀྱི་གཞལ་བྱར་ཐལ། འདོད་པའི་ཕྱིར། འདོད་མི་ནུས་ཏེ། རྣམ་མཁྱེན་དེ་སངས་འཕགས་ནང་ཕན་ཚུན་ཁོ་ནའི་མངོན་སུམ་གྱི་སྤྱོད་ཡུལ་ཡིན་པའི་ཕྱིར། འོ་ན། དེ་འདྲའི་བར་ཆད་མེད་ལམ་དེའི་དངོས་ཀྱི་གཞལ་བྱ་གང་ཞེ་ན། དེ་ཡོད་དེ། གང་ཟག་མི་རྟག་པ་དེ་དེ་ཡིན་པའི་ཕྱིར། བྱས་པ་ལ་ཁོ་ན་རེ། དེ་འདྲའི་བར་ཆད་མེད་ལམ་དེས་གང་ཟག་མི་རྟག་པ་དངོས་སུ་རྟོགས་པར་ཐལ། དམ་བཅའ་འཐད་པའི་ཕྱིར། འདོད་ན། རྣམ་མཁྱེན་གང་ཟག་གི་བདག་མེད་དུ་རྟོགས་པའི་རྣལ་འབྱོར་མངོན་སུམ་དེས་ཀྱང་གང་ཟག་མི་རྟག་པ་དངོས་སུ་རྟོགས་པར་ཐལ། འདོད་པའི་ཕྱིར། འདོད་ན། རྣམ་མཁྱེན་གང་ཟག་གི་བདག་མེད་དུ་རྟོགས་པའི་ཚད་མ་དེས་ཀྱང་གང་ཟག་མི་རྟག་པ་དངོས་སུ་རྟོགས་པར་ཐལ། འདོད་པའི་ཕྱིར་ན་མ་ཁྱབ། འདོད་ན། རྣམ་མཁྱེན་དེར་རྟོགས་པའི་བློ་དེས་ཀྱང་དེ་ལྟར་རྟོགས་པར་ཐལ་ལོ། །

རང་ལུགས་ཀྱི་ཚད་མའི་གྲངས་ངེས་སྒྲུབ་པའི་རྟགས་འགོད་ཚུལ་སོགས་བཤད་པ།

༈ རང་ལུགས་ནི། རྟགས་འགོད་པ། ཚུལ་སྒྲུབ་པ། བསལ་བྱའི་སྒྲོ་འདོགས་ངོས་བཟུང་བ། གྲངས་ངེས་ཀྱི་དོན་བཤད་པ། ཕུང་གསུམ་སེལ་བྱེད་ཀྱི་རིགས་པ་བཤད་པ་དང་ལྔ། དང་པོ་ནི། མདུན་གྱི་གཞི་འདིར་ཆོས་ཅན། ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་ཏེ། གཞལ་བྱ་ལ་རང་སྤྱི་གཉིས་སུ་གྲངས་ངེས་པའི་ཕྱིར། གཉིས་པ་ཚུལ་སྒྲུབ་པ་ལ། རྟགས་སྒྲུབ་བཞི་བཤད་པ་དང་། ཁྱབ་སྒྲུབ་བཤད་པ་གཉིས། དང་པོ་ནི། མདུན་གྱི་གཞི་འདིར་ཆོས་ཅན། གཞལ་བྱ་ལ་རང་སྤྱི་གཉིས་སུ་གྲངས་ངེས་ཏེ། གཞལ་བྱ་ལ་དོན་བྱེད་ནུས་པ་དང་། མི་ནུས་པའི་ཆོས་གཉིས་སུ་གྲངས་ངེས་པའི་ཕྱིར། ཞེས་སོགས་བཞི་འགོད་པ་ཡིན་ནོ། །གཉིས་པ་ཁྱབ་སྒྲུབ་ནི། གཞལ་བྱ་ལ་རང་སྤྱི་གཉིས་སུ་གྲངས་ངེས་ན། ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པས་ཁྱབ་སྟེ། རང་གི་གཟུང་དོན་ལ་བརྟེན་ནས་རང་མཚན་མངོན་དུ་གྱུར་པའི་ཚུལ་གྱིས་འཇལ་བའི་ཚད་མ་ཡིན་ན། མངོན་སུམ་གྱི་ཚད་མ་ཡིན་པས་ཁྱབ། རང་གི་རྟེན་དུ་གྱུར་པའི་རྟགས་ཡང་དག་ལ་བརྟེན་ནས་སྤྱི་མཚན་ལྐོག་ཏུ་གྱུར་པའི་ཚུལ་གྱིས་འཇལ་བའི་ཚད་མ་ཡིན་ན། རྗེས་སུ་དཔག་པའི་ཚད་མ་ཡིན་པས་ཁྱབ་པའི་ཕྱིར། གསུམ་པ་བསལ་བྱའི་སྒྲོ་འདོགས་ངོས་བཟུང་བ་ལ་སྒྲོ་འདོགས་དངོས་བཤད་པ་དང་། སྒྲོ་འདོགས་ཀྱི་རིགས་གནས་བཤད་པ་གཉིས། དང་པོ་ནི། ཚད་མའི་གྲངས་ངེས་ཀྱང་ཡིན། དེའི་གྲངས་ངེས་མ་ཡིན་པ་ཡང་ཡིན་པའི་གཞི་མཐུན་འཛིན་པའི་རྟོག་པ་དེ། ཚད་མའི་གྲངས་ངེས་ལ་སྒྲོ་འདོགས་པའི་སྒྲོ་འདོགས་དངོས་ཡིན། གཉིས་པ་ལ་དབྱེ་ན། གྲངས་མང་བར་སྒྲོ་འདོགས་པའི་སྒྲོ་འདོགས་དང་། གྲངས་ཉུང་བར་སྒྲོ་འདོགས་པའི་སྒྲོ་འདོགས་གཉིས། དང་པོ་ནི། ཚད་མ་ལ་གསུམ་དུ་གྲངས་ངེས་པར་སྒྲོ་འདོགས་པའི་སྒྲོ་འདོགས་ནས། དེ་ལ་བཅུ་གཅིག་ཏུ་གྲངས་ངེས་པར་སྒྲོ་འདོགས་པའི་སྒྲོ་འདོགས་ཀྱི་བར་ལ་བྱེད། གཉིས་པ་ནི། ཚད་མ་ལ་མངོན་སུམ་གཅིག་པུར་གྲངས་ངེས་པར་སྒྲོ་འདོགས་པའི་སྒྲོ་འདོགས་དང་། རྗེས་དཔག་ཚད་མ་མ་ཡིན་པར་སྒྲོ་འདོགས་པའི་སྒྲོ་འདོགས་ལྟ་བུ་ལ་བྱེད། བཞི་པ་གྲངས་ངེས་ཀྱི་དོན་བཤད་པ་ནི། ཚད་མ་ལ་མངོན་རྗེས་ཀྱི་ཚད་མ་གཉིས་སུ་དབྱེར་ཡོད། དེ་གཉིས་ལས་གྲངས་མང་མི་དགོས་ཤིང་། དེ་གཉིས་ལས་ཉུང་ན་མི་འདུ་བ་དེ། ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པའི་དོན་ཡིན། དེར་མ་ཟད། ཚད་མ་ལ་དེ་གཉིས་སུ་དབྱེར་ཡོད། དེ་གཉིས་ཀྱི་བར་ན་དགག་ཕྱོགས་ཀྱི་ཚད་མ་ཕུང་གསུམ་པ་ཡང་མེད། སྒྲུབ་ཕྱོགས་ཀྱི་དེ་ཡང་མེད་པ་དེ། ཚད་མ་ལ་དེ་གཉིས་སུ་གྲངས་ངེས་པའི་དོན་ཡིན། ལྔ་པ་ཕུང་གསུམ་སེལ་བྱེད་ཀྱི་རིགས་པ་བཤད་པ་ལ། དགག་ཕྱོགས་ཀྱི་ཕུང་གསུམ་སེལ་བྱེད་ཀྱི་རིགས་པ་བཤད་པ་དང་། སྒྲུབ་ཕྱོགས་ཀྱི་དེ་བཤད་པ་གཉིས། དང་པོ་ནི། གཟུགས་འཛིན་མ་འཁྲུལ་པའི་ཤེས་པ་ཆོས་ཅན། མངོན་སུམ་གྱི་ཚད་མ་ཡིན་ཏེ། རྟོག་པ་དང་། རྟོག་མེད་ཀྱི་ཤེས་པ་གང་རུང་དུ་གྱུར་པའི་གསར་དུ་མི་བསླུ་བའི་རིག་པ་ཡིན། ཁྱོད་ཡིན་པ་ཡོད། ཁྱོད་ཡིན་པར་གྱུར་པའི་རྗེས་དཔག་མེད་པའི་ཕྱིར། ཞེས་པའི་རིགས་པ་འདི་དང་། སྒྲ་མི་རྟག་པ་ལ་གསར་དུ་མི་བསླུ་བའི་ཞེན་རིག་ཆོས་ཅན། རྗེས་སུ་དཔག་པའི་ཚད་མ་ཡིན་ཏེ། རྟོག་པ་དང་རྟོག་མེད་ཀྱི་ཤེས་པ་གང་རུང་དུ་གྱུར་པའི་གསར་དུ་མི་བསླུ་བའི་རིག་པ་ཡིན། ཁྱོད་ཡིན་པ་ཡོད། ཁྱོད་ཡིན་པར་གྱུར་པའི་མངོན་སུམ་མེད་པའི་ཕྱིར་ཞེས་པའི་རིགས་པ་འདི་ལ་བརྟེན་ནས། མངོན་རྗེས་ཀྱི་ཚད་མ་གཉིས་ཀྱི་བར་གྱི་དགག་ཕྱོགས་ཀྱི་ཚད་མ་ཕུང་གསུམ་སེལ་ནུས་པ་ཡིན་ནོ། །གཉིས་པ་ནི། གཟུགས་འཛིན་མ་འཁྲུལ་བའི་ཤེས་པ་མངོན་སུམ་གྱི་ཚད་མར་ཡོངས་གཅོད་ལ་གྲུབ་པའི་སྟོབས་ཀྱིས་དེ་རྗེས་སུ་དཔག་པའི་ཚད་མ་ཡིན་པ་རྣམ་བཅད་ལ་ཁེགས་པའི་རིགས་པ་འདི་དང། སྒྲ་མི་རྟག་པ་ལ་གསར་དུ་མི་བསླུ་བའི་ཞེན་རིག་རྗེས་སུ་དཔག་པའི་ཚད་མ་ཡིན་པ་ཡོངས་གཅོད་ལ་གྲུབ་པའི་སྟོབས་ཀྱིས་དེ་མངོན་སུམ་གྱི་ཚད་མ་ཡིན་པ་རྣམ་བཅད་ལ་ཁེགས་པའི་རིགས་པ་འདི་ལ་བརྟེན་ནས། དེ་གཉིས་ཀྱི་བར་གྱི་སྒྲུབ་ཕྱོགས་ཀྱི་ཚད་མ་ཕུང་གསུམ་པ་སེལ་ནུས་པ་ཡིན་ནོ། །དེ་ལྟར་ན་མངོན་རྗེས་གཉིས་ཀྱི་བར་ན་དགག་ཕྱོགས་ཀྱི་ཚད་མ་ཕུང་གསུམ་མེད་པ་དང་། དེ་གཉིས་གང་རུང་གི་ཁོངས་སུ་མ་འདུས་པའི་ཚད་མ་མེད་པ་རྣམས་དོན་གཅིག །དེ་གཉིས་ཀྱི་བར་ན་སྒྲུབ་ཕྱོགས་ཀྱི་ཚད་མ་མེད་པ་དང་། དེ་གཉིས་ཀ་ཡིན་པའི་ཚད་མ་ཕུང་གསུམ་པ་མེད་པ་རྣམས་དོན་གཅིག། མངོན་སུམ་གྱི་སྣང་ཡུལ་ལ་རང་མཚན་གྱིས་ཁྱབ་པ་དང་། རང་མཚན་ལ་གཅིག་ཤོས་ཀྱི་ཁྱབ་པ་གཉིས་ཀ་ཡོད་དོ། །

༈ རྩོད་པ་སྤང་པ་ལ། ཁ་ཅིག་ན་རེ། ཚད་མ་ལ་མངོན་རྗེས་གཉིས་སུ་གྲངས་ངེས་པར་ཐལ། དེ་ལ་དེ་གཉིས་སུ་དབྱེར་ཡོད། དེ་ལ་དེ་གཉིས་ལས་གྲངས་མང་མི་དགོས་ཤིང་། གྲངས་ཉུང་ན་མི་འདུ་བ་ཡིན་པའི་ཕྱིར། དང་པོ་གྲུབ་སྟེ། ཚད་མར་གྱུར་པའི་མངོན་རྗེས་གང་རུང་ཡོད་པའི་ཕྱིར། གཉིས་པ་གྲུབ་སྟེ། ཚད་མ་ཡིན་ན་མངོན་རྗེས་གང་རུང་གི་ཁོངས་སུ་འདུས་པའི་ཁྱབ་པའི་ཕྱིར། གསུམ་པ་གྲུབ་སྟེ། ཚད་མ་ལ་མངོན་རྗེས་ཀྱི་ཚད་མ་གཉིས་ལས་གྲངས་ཉུང་ན་མི་འདུ་བ་གང་ཞིག །མངོན་རྗེས་གང་རུང་གི་ཚད་མ་ཡིན་ན། མངོན་རྗེས་གང་རུང་ཡིན་དགོས་པའི་ཕྱིན་ན་མ་ཁྱབ་སྟེ། ཁོ་རང་ལ། ཚད་མ་ལ་རྟོག་པ་དང་རྟོག་མེད་ཀྱི་ཤེས་པ་གཉིས་ལས་གྲངས་ཉུང་ན་མི་འདུ་བ་ཡིན་པར་ཐལ། ཚད་མ་ལ་མངོན་རྗེས་ཀྱི་ཚད་མ་གཉིས་ལས་གྲངས་ཉུང་ན་མི་འདུ་བ་གང་ཞིག །མངོན་རྗེས་ཀྱི་ཚད་མ་གང་རུང་ཡིན་ན། རྟོག་པ་དང་རྟོག་མེད་ཀྱི་ཤེས་པ་གང་རུང་ཡིན་དགོས་པའི་ཕྱིར། ཁྱབ་པ་ཁས། འདོད་མི་ནུས་ཏེ། ཚད་མ་ཡིན་ན། རྟོག་པ་དང་རྟོག་མེད་ཀྱི་ཤེས་པ་གང་རུང་ཡིན་པའི་མ་ཁྱབ་པའི་ཕྱིར། ཡང་ཁོ་ན་རེ། ཚད་མ་ལ་མངོན་སུམ་དང་རྗེས་དཔག་གཉིས་སུ་གྲངས་ངེས་པར་ཐལ། དེ་ལ་གཉིས་སུ་དབྱེར་ཡོད། དེ་ལས་མང་མི་དགོས་ཤིང་། ཉུང་ན་མི་འདུ་བ་ཡིན་པའི་ཕྱིར། དང་པོ་གྲུབ་སྟེ། དེ་ལ་དེ་གཉིས་ཀྱི་དབྱེ་བ་ཡོད་པའི་ཕྱིར་ན་མ་ཁྱབ། འདོད་ན། དེ་གང་རུང་ཡིན་ན། ཚད་མ་ཡིན་དགོས་པར་ཐལ་ལོ། །ཡང་ཁོ་ན་རེ། ཚུར་མཐོང་གི་རྒྱུད་ཀྱི་ཚད་མ་དེ་ལ་མངོན་རྗེས་ཀྱི་ཚད་མ་གཉིས་སུ་གྲངས་ངེས་པར་ཐལ། དེ་ལ་དེ་གཉིས་སུ་ཞེས་སོགས་དེའི་ཕྱིར། དང་པོ་གྲུབ་སྟེ། དེ་ལ་དེ་གཉིས་ཀྱི་དབྱེ་བ་ཡོད་པའི་ཕྱིར་ན་མ་ཁྱབ། ཕྱི་མ་གྲུབ་སྟེ། ཚད་མ་ལ་དེ་གཉིས་ལས་གྲངས་མང་མི་དགོས་ཤིང་། ཉུང་ན་མི་འདུ་བ་ཡིན་པ་གང་ཞིག །དེའི་རྒྱུད་ཀྱི་ཚད་མ་དེ་ཚད་མ་ལས་ཁྱབ་ཆུང་བའི་ཕྱིར་ན་མ་ཁྱབ། རྟགས་གྲུབ་སྟེ། དེ་ཚད་མའི་བྱེ་བྲག་ཡིན་པའི་ཕྱིར། ཁ་ཅིག་ན་རེ། ཚད་མ་ལ་མངོན་རྗེས་ཀྱི་ཚད་མ་གཉིས་སུ་གྲངས་མ་ངེས་པར་ཐལ། དེ་ལ་དེ་གཉིས་མ་ཡིན་པའི་ཚད་མར་གྲངས་ངེས་པའི་ཕྱིར་ན་མ་ཁྱབ། རྟགས་གྲུབ་སྟེ། ཚད་མ་ལ་རྟག་དངོས་གཉིས་མ་ཡིན་པའི་ཚད་མར་གྲངས་ངེས་པའི་ཕྱིར་ཟེར་ན། འོ་ན། ཚད་མ་དེ་མངོན་རྗེས་ཀྱི་ཚད་མ་གང་རུང་གི་ཁོངས་སུ་མ་འདུས་པར་ཐལ། དེ་དེ་གཉིས་མ་ཡིན་པའི་ཚད་མའི་ཁོངས་སུ་འདུ་བའི་ཕྱིར། ཁྱབ་པ་ཁས། རྟགས་གྲུབ་སྟེ། དེ་དེ་མ་ཡིན་པའི་ཚད་མ་ཡིན་པའི་ཕྱིར། འདོད་ན། ཚད་མ་ཆོས་ཅན། དེ་གཉིས་གང་རུང་གི་ཁོངས་སུ་འདུས་པར་ཐལ། ཚད་མ་ཡིན་པའི་ཕྱིར། ཁྱབ་སྟེ། རྣམ་ངེས་ལས། ཚད་མ་ཡིན་ན་འདི་གཉིས་ཁོ་ནར་འདུས་པའི་ཕྱིར། ཞེས་གསུངས་པའི་ཕྱིར། བྱས་པ་ལ་ཁོ་ན་རེ། མངོན་རྗེས་གཉིས་ཆོས་ཅན། མངོན་རྗེས་གང་རུང་གི་ཁོངས་སུ་འདུས་པར་ཐལ། ཚད་མ་ཡིན་པའི་ཕྱིར། འདོད་ན། དེ་ཆོས་ཅན། མངོན་སུམ་གྱི་ཁོངས་སུ་འདུས་པར་ཐལ། འདོད་པ་གང་ཞིག །རྗེས་དཔག་གི་ཁོངས་སུ་མ་འདུས་པའི་ཕྱིར་ན་མ་ཁྱབ། འོ་ན། མངོན་སུམ་ཆོས་ཅན། མངོན་སུམ་གྱི་བྱེ་བྲག་གི་ཁོངས་སུ་འདུས་པར་ཐལ། དེ་གང་རུང་གི་བྱེ་བྲག་གི་ཁོངས་སུ་འདུས་པ་གང་ཞིག །རྗེས་དཔག་གི་བྱེ་བྲག་གི་ཁོངས་སུ་མ་འདུས་པའི་ཕྱིར་ཏེ། རྗེས་དཔག་གི་བྱེ་བྲག་མ་ཡིན་པའི་ཕྱིར། རྩ་བར་འདོད་མི་ནུས་ཏེ། ཁོ་ཁོ་དང་གཅིག་ཡིན་པའི་ཕྱིར། །

གཞལ་བྱ་གཉིས་ཀྱི་ངོ་བོ་ངོས་བཟུང་བ་ལ་སྦྱོར་འགོད་དང་མཐའ་དཔྱད་པ།

༈ དོན་དམ་དོན་བྱེད་ནུས་པ་གང་། །ཞེས་སོགས་རྐང་པ་བཞིའི་སྐབས་སུ་སྦྱོར་བ་འགོད་པ་དང་། མཐའ་དཔྱད་པ་གཉིས། དང་པོ་ནི། དོན་དམ་པར་དོན་བྱེད་ནུས་པ་ཆོས་ཅན། དོན་དམ་དུ་ཡོད་པ་ཡིན་ཏེ། རྟོག་པས་སྒྲོ་མ་བཏགས་པར་རང་གི་ཐུན་མོང་མ་ཡིན་པའི་སྡོད་ལུགས་ཀྱི་ངོས་ནས་གྲུབ་པ་ཡིན་པའི་ཕྱིར། ཁྱབ་སྟེ། དེ་འདྲ་བ་དེ་རང་མཚན་གྱི་མཚན་ཉིད་ཡིན་པའི་ཕྱིར། དོན་བྱེད་མི་ནུས་པའི་ཆོས་ཆོས་ཅན། ཀུན་རྫོབ་ཏུ་ཡོད་པ་ཡིན་ཏེ། རྟོག་པས་སྒྲོ་བཏགས་པའི་ཆོས་ཡིན་པའི་ཕྱིར། ཁྱབ་སྟེ། དེ་འདྲའི་ཆོས་སྤྱི་མཚན་གྱི་མཚན་ཉིད་ཡིན་པའི་ཕྱིར། དེ་ལྟར་ན་སྦྱོར་འགོད་འདི་གཉིས་འཐད་དེ། ཐར་ལམ་གསལ་བྱེད་ལས། གཞུང་འདིས་དོན་དམ་དུ་ཡོད་པ་དང་ཀུན་རྫོབ་ཏུ་ཡོད་པའི་མཚན་གཞི་ངོས་བཟུང་ནས་སྒྲུབ་བྱེད་དོན་གྱིས་འཕངས་པའི་སྒྲུབ་བྱེད་དེ་དག་རང་མཚན་གྱི་མཚན་ཉིད་དང་། སྤྱི་མཚན་གྱི་མཚན་ཉིད་དུ་བཤད་དོ། །ཞེས་གསུངས་པའི་ཕྱིར། །

༈ མཐའ་དཔྱད་པ་ལ། ཁ་ཅིག་ན་རེ། རང་ཉིད་མངོན་སུམ་དུ་རྟོགས་པའི་བློ་དོན་དམ་པས་རྟོགས་པར་བྱ་བ་དེ། དོན་དམ་བདེན་པའི་མཚན་ཉིད་དང་། རང་ཉིད་དོན་སྤྱིའི་ཚུལ་གྱིས་རྟོགས་པའི་བློ་ཀུན་རྫོབ་པའི་རྟོགས་པར་བྱ་བ་དེ། ཀུན་རྫོབ་བདེན་པའི་མཚན་ཉིད་ཟེར་ན། དང་པོ་ལ། འགོག་བདེན་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟགས་གྲུབ་སྟེ། འགོག་བདེན་མངོན་སུམ་དུ་རྟོགས་པའི་བློ་དོན་དམ་པ་ཡོད་པའི་ཕྱིར། དེ་མངོན་སུམ་དུ་རྟོགས་པའི་རྣལ་འབྱོར་མངོན་སུམ་ཡོད་པའི་ཕྱིར་ཏེ། བདེན་བཞི་མི་རྟག་སོགས་བཅུ་དྲུག་མངོན་སུམ་དུ་རྟོགས་པའི་དེ་ཡོད་པའི་ཕྱིར། དེ་བཅུ་དྲུག་མངོན་སུམ་དུ་རྟོགས་པའི་ཡེ་ཤེས་དེ་རྣལ་འབྱོར་མངོན་སུམ་ཡིན་པའི་ཕྱིར་ཏེ། རྣལ་འབྱོར་ཤེས་པ་སྔར་བཤད་པ། །ཞེས་སོགས་རྐང་པ་གཉིས་གསུངས་པའི་ཕྱིར། བྱས་པ་ལ་ཁོ་ན་རེ། རྣམ་མཁྱེན་གྱིས་འགོག་བདེན་མངོན་སུམ་དུ་རྟོགས་པར་ཐལ། འགོག་བདེན་མངོན་སུམ་དུ་རྟོགས་པའི་རྣལ་འབྱོར་མངོན་སུམ་ཡོད་པའི་ཕྱིར། འདོད་ན། སྟོན་པས་འགོག་བདེན་མངོན་སུམ་དུ་རྟོགས་པར་ཐལ། འདོད་པའི་ཕྱིར། འདོད་ན། འཇུག་པའི་ཊཱིཀ་ཆེན་ལས། རིགས་པ་དྲུག་ཅུ་པའི་འགྲེལ་པར། རང་ལུགས་ལ་སྟོན་པས་འགོག་བདེན་མངོན་སུམ་གྱིས་ཤེས་པ་ཞལ་གྱིས་བཞེད་ལ། དངོས་སྨྲ་བ་མངོན་སུམ་ཚད་མ་དངོས་པོ་རང་མཚན་གྱི་ཡུལ་ཅན་དུ་འདོད་པ་དེ་ལ་དེ་མི་རུང་བ་དང་། ཞེས་གསུངས་པ་མི་འཐད་པར་ཐལ། འདོད་པའི་ཕྱིར་ཟེར་ན་མ་ཁྱབ་སྟེ། སྟོན་པས་འགོག་བདེན་དངོས་སུ་མ་རྟོགས་པ་དེ། ལུང་དེའི་དོན་ཡིན་པའི་ཕྱིར། དེ་ལྟར་མ་ཡིན་ན། སྟོན་པས་འགོག་བདེན་མངོན་སུམ་དུ་རྟོགས་པར་ཐལ། རྣལ་འབྱོར་མངོན་སུམ་གྱིས་དེ་མངོན་སུམ་དུ་རྟོགས་པའི་ཕྱིར་ཏེ། དེ་མངོན་སུམ་དུ་རྟོགས་པའི་རྣལ་འབྱོར་མངོན་སུམ་ཡོད་པའི་ཕྱིར་ཏེ། གང་ཟག་གི་བདག་མེད་རྟོགས་པའི་དེ་ཡོད་པའི་ཕྱིར་ཏེ། དེ་འདྲའི་རྣལ་འབྱོར་མངོན་སུམ་གྱི་གཟུང་ཡུལ་དུ་གྱུར་པའི་རང་མཚན་ཡོད་ལ། དེས་གང་ཟག་གི་བདག་མེད་གཟུང་ཡུལ་དུ་མི་བྱེད་པའི་ཁྱད་པར་འཐད་པའི་ཕྱིར། རྣམ་ངེས་ཊཱིཀ་ཆེན་ལས། རྣལ་འབྱོར་མངོན་སུམ་འདིའི་གཟུང་ངོར་དགག་གཞི་རང་མཚན་འབའ་ཞིག་སྣང་བ་ཡིན་གྱི། གང་ཟག་གི་བདག་བཀག་པའི་མེད་དགག་གཟུང་ངོར་ཁས་ལེན་པ་ནི་མ་ཡིན་ནོ། །ཞེས་གསུངས་པའི་ཕྱིར། མཚན་ཉིད་གཉིས་པ་ལ། བུམ་པ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། བུམ་འཛིན་རྟོག་པས་རྟོགས་པར་བྱ་བ་གང་ཞིག །དེ་བློ་ཀུན་རྫོབ་པ་ཡིན་པའི་ཕྱིར། ཕྱི་མ་དེར་ཐལ། ལྟོ་ལྡིར་བ་ལ་དམིགས་ནས་འདི་ནི་བུམ་པའོ་སྙམ་དུ་འཛིན་པའི་རྟོག་པ་དེ་བློ་ཀུན་རྫོབ་པ་ཡིན་པའི་ཕྱིར་ཏེ། ཚད་མ་མདོ་ལས། འཁྲུལ་དང་ཀུན་རྫོབ་ཤེས་པ་དང་། །ཞེས་གསུངས་པའི་ཕྱིར། ཁ་ཅིག་ན་རེ། དོན་དམ་པར་དོན་བྱེད་ནུས་པ་རང་མཚན་གྱི་མཚན་ཉིད་དང་། དེ་ལྟར་མི་ནུས་པའི་ཆོས་སྤྱི་མཚན་གྱི་མཚན་ཉིད་ཟེར་ན། རང་མཚན་ཚད་མས་ངེས་པའི་གང་ཟག་ཡིན་ན། རང་མཚན་དོན་དམ་པར་དོན་བྱེད་ནུས་པར་ཚད་མས་ངེས་པའི་གང་ཟག་ཡིན་དགོས་པར་ཐལ། མཚན་ཉིད་དང་པོ་དེའི་ཕྱིར། འདོད་ན། སེམས་ཙམ་པ་ཆོས་ཅན། དེར་ཐལ། དེའི་ཕྱིར། གཞན་དབང་རང་མཚན་དུ་ཚད་མས་ངེས་པའི་གང་ཟག་ཡིན་པའི་ཕྱིར་ཏེ། དེ་རང་གི་མཚན་ཉིད་ཀྱིས་གྲུབ་པར་ཚད་མས་ངེས་པའི་གང་ཟག་ཡིན་པའི་ཕྱིར། རྟགས་གྲུབ་སྟེ། མདོ་སྡེ་རྒྱན་གྱི་ཆེད་དུ་བྱ་བའི་གདུལ་བྱར་གྱུར་པའི་སེམས་ཙམ་པ་དེས། གཞན་དབང་རང་མཚན་དུ་ཚད་མས་ངེས་པའི་ཕྱིར་ཏེ། དེ་འདྲའི་སེམས་ཙམ་པ་ཡོད་པའི་ཕྱིར་ཏེ། དེ་སེམས་ཙམ་པའི་ཐུན་མོང་མ་ཡིན་པའི་བསྟན་བཅོས་ཡིན་པའི་ཕྱིར། འདོད་མི་ནུས་ཏེ། སེམས་ཙམ་པས་དོན་བྱེད་མི་ནུས་པ་དང་། རང་མཚན་གྱི་གཞི་མཐུན་ཁས་ལེན་པའི་ཕྱིར་ཏེ། དེས་སྟོང་ཉིད་དེ་འདྲ་བའི་གཞི་མཐུན་དུ་ཁས་ལེན་པའི་ཕྱིར། གཞན་ཡང་། དོན་དམ་པར་ཞེས་སོགས་ཆོས་ཅན། རང་རྒྱུད་པསཁྱོད་ཁས་ལེན་པར་ཐལ། ཁྱོད་རང་མཚན་གྱི་མཚན་ཉིད་གང་ཞིག །དེས་དེའི་མཚན་ཉིད་ཁས་ལེན་པའི་ཕྱིར། འདོད་མི་ནུས་ཏེ། རང་རྒྱུད་པས་བདེན་གྲུབ་ཁས་མི་ལེན་པའི་ཕྱིར། གཞན་ཡང་། སྤྱི་མཚན་ཚད་མས་ངེས་པའི་གང་ཟག་ཡིན་ན། སྤྱི་མཚན་མཚན་ཉིད་དེར་ཚད་མས་ངེས་པའི་གང་ཟག་ཡིན་དགོས་པར་ཐལ། མཚན་ཉིད་གཉིས་པ་འཐད་པའི་ཕྱིར། འདོད་ན། སྤྱི་མཚན་ཚད་མས་ངེས་པའི་གང་ཟག་ཡིན་ན། དེ་དོན་བྱེད་མི་ནུས་པར་ཚད་མས་ངེས་པའི་གང་ཟག་ཡིན་དགོས་པར་ཐལ། འདོད་པའི་ཕྱིར། འདོད་ན། སྤྱི་མཚན་དོན་བྱེད་མི་ནུས་པར་སྒྲུབ་པའི་རྟགས་ཡང་དག་མེད་པར་ཐལ། འདོད་པའི་ཕྱིར། འདོད་མི་ནུས་ཏེ། སྤྱི་མཚན་དངོས་མེད་དུ་སྒྲུབ་པའི་རྟགས་ཡང་དག་ཡོད་པའི་ཕྱིར་ཏེ། དེ་ལྟར་སྒྲུབ་པའི་རིགས་པ་ཡང་དག་ཡོད་པའི་ཕྱིར་ཏེ། བརྗོད་བྱ་ཉིད་ཕྱིར་དེ་དངོས་མིན། །ཞེས་པ་ནས། དེ་ནི་དངོས་མེད་མཚན་ཉིད་ཡིན། །ཞེས་པའི་བར་གྱིས་སྤྱི་མཚན་དངོས་མེད་དུ་སྒྲུབ་པའི་རིགས་པ་བརྒྱད་བསྟན་པའི་ཕྱིར། མཚན་ཉིད་དེ་ལ་སྐྱོན་འཕེན་པ་ཁ་ཅིག་ན་རེ། དོན་དམ་པར་དོན་བྱེད་ནུས་པའི་ཁྱད་ཆོས་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། དེའི་ཁྱད་ཆོས་ཡིན་པའི་ཕྱིར་ན་མ་ཁྱབ། འདོད་མི་ནུས་ཏེ། དེའི་ལྡོག་པ་ཁྱོད་ཀྱི་ཁྱད་ཆོས་ཡིན་པའི་ཕྱིར། བྱས་པ་ལ་ཁོ་ན་རེ། རང་མཚན་ཡིན་ན། དོན་བྱེད་ནུས་པའི་ཆོས་ཡིན་དགོས་པར་ཐལ། དེ་ཡིན་ན། མཚན་ཉིད་དེ་ཡིན་དགོས་པའི་ཕྱིར། འདོད་ན། དངོས་པོ་ཡིན་ན། དོན་བྱེད་ནུས་པའི་དངོས་པོ་ཡིན་དགོས་པར་ཐལ་ལོ། །འདོད་ན། དོན་བྱེད་ནུས་པའི་འབྲས་བུ་ཆོས་ཅན། དེར་ཐལ། དེའི་ཕྱིར། འདོད་ན། དེ་ཆོས་ཅན། དོན་བྱེད་ནུས་པ་དང་རྫས་གཅིག་ཏུ་ཐལ། འདོད་པའི་ཕྱིར་ན་མ་ཁྱབ། གཞན་ཡང་། ཁོ་ན་རེ། ཤེས་པ་ཡིན་ན། ཤེས་པའི་དངོས་པོ་ཡིན་དགོས་པར་ཐལ། དངོས་པོ་ལ་དེའི་ཕྱིར། འདོད་ན། ཤེས་པ་ཡིན་ན། ཤེས་པའི་རྫས་ཡིན་དགོས་པར་ཐལ། འདོད་པའི་ཕྱིར་ན་མ་ཁྱབ། འདོད་ན། ཤེས་པའི་ཉེར་ལེན་དུ་གྱུར་པའི་ཤེས་པ་ཆོས་ཅན། དེར་ཐལ། དེའི་ཕྱིར། འདོད་ན། དེ་ཆོས་ཅན། ཤེས་པའི་རྫས་ཡིན་པར་ཐལ་ལོ། །འདོད་ན། ཤེས་པ་དང་རྫས་གཅིག་ཏུ་ཐལ་ལོ། །ཁ་ཅིག་ན་རེ། མཐར་ཐུག་དཔྱོད་པའི་རིག་ཤེས་ཚད་མའི་རྙེད་དོན་གྱི་གཙོ་བོ་དེ། དོན་དམ་བདེན་པའི་མཚན་ཉིད་ཟེར་ན། བུམ་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར་ཏེ། དངོས་པོ་ཡིན་པའི་ཕྱིར། རྩ་བར་འདོད་ན། དེ་ཆོས་ཅན། གནས་ལུགས་མཐར་ཐུག་ཏུ་ཐལ་ལོ། །བྱས་པ་ལ་ཁོ་ན་རེ། བུམ་པ་དེ་མཐར་ཐུག་དཔྱོད་པའི་དེ་ཡིན་པར་ཐལ། དེ་དོན་དམ་དཔྱོད་པའི་རིག་ཤེས་ཚད་མའི་རྙེད་དོན་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། མངོན་སུམ་གྱི་ཚད་མའི་རྙེད་དོན་གང་ཞིག །མངོན་སུམ་གྱི་ཚད་མ་ཡིན་ན། དོན་དམ་དཔྱོད་བྱེད་ཀྱི་ཚད་མ་ཡིན་དགོས་པའི་ཕྱིར། ཕྱི་མ་དེར་ཐལ། དེ་ཡིན་ན་རང་གི་འཛིན་སྟངས་ཀྱི་ཡུལ་དུ་གྱུར་པའི་དོན་དམ་བདེན་པ་དཔྱོད་པའི་ཚད་མ་ཡིན་དགོས་པའི་ཕྱིར་ཟེར་ན། ཁོ་རང་ལ། ཐ་སྙད་པའི་ཚད་མ་ཡིན་ན། ཀུན་རྫོབ་དཔྱོད་བྱེད་ཀྱི་ཚད་མ་ཡིན་དགོས་པར་ཐལ། དོན་དམ་དཔྱོད་བྱེད་ཀྱི་ཚད་མ་ཡིན་ན། མཐར་ཐུག་དཔྱོད་པའི་ཚད་མ་ཡིན་དགོས་པའི་ཕྱིར། འདོད་ན། བུམ་པ་རྟོགས་པའི་རྗེས་དཔག་ཆོས་ཅན། དེར་ཐལ། དེའི་ཕྱིར། རྗེས་སུ་དཔག་པའི་ཚད་མ་ཡིན་པའི་ཕྱིར། འདོད་མི་ནུས་ཏེ། དེ་དོན་དམ་དཔྱོད་བྱེད་ཀྱི་ཚད་མ་ཡིན་པའི་ཕྱིར་ཏེ། བུམ་པ་དོན་དམ་བདེན་པ་ཡིན་པའི་ཕྱིར། ཁ་ཅིག་ན་རེ། དོན་དམ་དཔྱོད་བྱེད་ཀྱི་ཚད་མ་དང་། ཐ་སྙད་དཔྱོད་བྱེད་ཀྱི་ཚད་མ་འགལ་ཟེར་ན། དེ་མི་འཐད་དེ། རྣམ་མཁྱེན་དེ་དེ་གཉིས་ཀ་ཡིན་པའི་ཕྱིར། དེ་དེ་གཉིས་དཔྱོད་བྱེད་ཀྱི་རྣམ་མཁྱེན་ཡིན་པའི་ཕྱིར་ཏེ། དེ་ཇི་ལྟ་བ་མཁྱེན་པའི་རྣམ་མཁྱེན་དང་། ཇི་སྙེད་པ་མཁྱེན་པའི་རྣམ་མཁྱེན་གཉིས་ཀ་ཡིན་པའི་ཕྱིར། ཁ་ཅིག་ན་རེ། དོན་དམ་དཔྱོད་བྱེད་ཀྱི་ཚད་མའི་རྙེད་དོན། དོན་དམ་བདེན་པའི་མཚན་ཉིད་དང་། ཀུན་རྫོབ་དཔྱོད་བྱེད་ཀྱི་ཚད་མའི་རྙེད་དོན། ཀུན་རྫོབ་བདེན་པའི་མཚན་ཉིད་ཟེར་ན། ཤེས་བྱ་ཆོས་ཅན། མཚོན་བྱ་དང་པོ་དེར་ཐལ། མཚན་ཉིད་དེའི་ཕྱིར། མངོན་སུམ་གྱི་ཚད་མའི་རྙེད་དོན་ཡིན་པའི་ཕྱིར། ཁ་ཅིག་ན་རེ། དོན་དམ་པའི་ཚད་མའི་རྙེད་དོན། དང་པོའི་མཚན་ཉིད་དང་། ཀུན་རྫོབ་པའི་ཚད་མའི་རྙེད་དོན། གཉིས་པའི་མཚན་ཉིད་ཟེར་ན། དང་པོ་ལ་ཤེས་བྱ་ཆོས་ཅན། མཚོན་བྱ་དང་པོ་ལ་དེར་ཐལ། མཚན་ཉིད་དེའི་ཕྱིར་ཏེ། མངོན་སུམ་གྱི་ཚད་མའི་རྙེད་དོན་ཡིན་པའི་ཕྱིར། གཉིས་པ་ལ། བུམ་པ་ཆོས་ཅན། མཚོན་བྱ་གཉིས་པ་དེར་ཐལ། མཚན་ཉིད་དེའི་ཕྱིར་ཏེ། བུམ་པ་རྟོགས་པའི་རྗེས་དཔག་གི་རྙེད་དོན་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། ཁྱོད་ཁྱོད་རྟོགས་པའི་རྗེས་དཔག་གི་དེར་ཐལ། གཞི་གྲུབ་པའི་ཕྱིར། ཁ་ཅིག་ན་རེ། དོན་དམ་པའི་ཚད་མའི་སྣང་ཡུལ། དང་པོའི་མཚན་ཉིད། ཀུན་རྫོབ་པའི་ཚད་མའི་སྣང་ཡུལ་གཉིས་པའི་མཚན་ཉིད་ཟེར་ན། མངོན་སུམ་གྱི་ཚད་མའི་སྣང་ཡུལ་དེ་མཚན་ཉིད་དུ་ཐལ། དང་པོ་དེ་འཐད་པའི་ཕྱིར། འདོད་ན། ཚད་མའི་སྣང་ཡུལ་མཚན་ཉིད་དུ་ཐལ། འདོད་པའི་ཕྱིར། འདོད་ན། དེའི་ཡུལ་མཚན་ཉིད་དུ་ཐལ་ལོ། །འདོད་ན། བློའི་ཡུལ་མཚན་ཉིད་དུ་ཐལ་ལོ། །འདོད་ན། ཡུལ་མཚན་ཉིད་དུ་ཐལ་ལོ། འདོད་མི་ནུས་ཏེ། བློས་རིག་པར་བྱ་བ་ཡུལ་གྱི་མཚན་ཉིད་ཡིན་པའི་ཕྱིར་ཏེ། རིགས་གཏེར་ལས། ཡུལ་གྱི་མཚན་ཉིད་བློས་རིག་བྱ། །ཞེས་གསུངས་པའི་ཕྱིར། ཁ་ཅིག་ན་རེ། དོན་དམ་པའི་ཚད་མའི་སྣང་ཡུལ་དུ་གྱུར་པའི་སྒོ་ནས་དོན་དམ་པའི་ཚད་མའི་རྙེད་དོན། དང་པོའི་མཚན་ཉིད། ཀུན་རྫོབ་པའི་ཞེས་སོགས། གཉིས་པའི་མཚན་ཉིད་ཡིན་ཟེར་བ་དང་། དོན་དམ་པའི་ཚད་མས་སྣང་བའི་དབང་གིས་ཡོད་པར་བཞག་པ། དོན་དམ་དུ་ཡོད་པའི་མཚན་ཉིད། ཀུན་རྫོབ་པའི་མཚན་མ་ལ་ཞེས་སོགས་ཀུན་རྫོབ་ཏུ་ཡོད་པའི་མཚན་ཉིད་ཟེར་ན། བུམ་པ་ཆོས་ཅན། མཚོན་བྱ་ཕྱི་མ་དེར་ཐལ། མཚན་ཉིད་དེའི་ཕྱིར། དེར་ཐལ། རྗེས་སུ་དཔག་པའི་ཚད་མ་ལ་སྣང་བའི་དབང་གིས་ཡོད་པར་བཞག་པ་ཡིན་པའི་ཕྱིར་ཏེ། དེ་ལ་སྣང་བའི་དབང་གིས་བློའི་ཡུལ་དུ་བཞག་པ་ཡིན་པའི་ཕྱིར་ཏེ། དེ་ལ་སྣང་བའི་དབང་གིས་རྗེས་དཔག་གི་ཡུལ་དུ་བཞག་པ་ཡིན་པའི་ཕྱིར། རྩ་བར་འདོད་མི་ནུས་ཏེ། དོན་དམ་དུ་ཡོད་པ་ཡིན་པའི་ཕྱིར། གཞན་ཡང་། མངོན་སུམ་གྱི་ཚད་མ་ལ་སྣང་བའི་དབང་གིས་བཞག་པ་དང་། རྗེས་དཔག་གི་ཚད་མ་ལ་སྣང་བའི་དབང་གིས་བཞག་པ་གཉིས་འགལ་བར་ཐལ། ཀུན་རྫོབ་པའི་ཚད་མས་སྣང་བའི་དབང་གིས་བཞག་པ་སོགས་ལ་དེའི་ཕྱིར་ཏེ། མཚན་ཉིད་ཕྱི་མ་གཉིས་འཐད་པའི་ཕྱིར། འདོད་ན། རྗེས་སུ་དཔག་པའི་ཚད་མ་ལ་སྣང་བ་དང་། གཅིག་ཤོས་ལ་སྣང་བ་དེ་གཉིས་འགལ་བར་ཐལ་ལོ། །འདོད་མི་ནུས་ཏེ། གཞི་གྲུབ་ན། རྗེས་སུ་དཔག་པའི་ཚད་མ་ལ་སྣང་དགོས་པའི་ཕྱིར། བྱས་པ་ལ་ཁོ་ན་རེ། བུམ་པ་ཆོས་ཅན། རྟོག་པ་ལ་སྣང་བའི་དབང་གིས་ཡོད་པར་བཞག་པར་ཐལ། རྗེས་དཔག་ལ་དེའི་ཕྱིར། འདོད་ན། རྟོག་པའི་དབང་གིས་བཞག་པར་ཐལ། འདོད་པའི་ཕྱིར་ན་མ་ཁྱབ། འདོད་ན། རྟོག་པས་སྒྲོ་བཏགས་སུ་ཐལ་ལོ། །ཁ་ཅིག་ན་རེ། ཀུན་རྫོབ་པའི་ཚད་མའི་ཡུལ་ཡིན་ན། ཀུན་རྫོབ་ཏུ་ཡོད་པས་ཁྱབ་ཟེར་ན། བུམ་པ་ཆོས་ཅན། དེར་ཐལ། དེའི་ཕྱིར་ཏེ། རྗེས་སུ་དཔག་པའི་ཚད་མའི་ཡུལ་ཡིན་པའི་ཕྱིར། འདོད་མི་ནུས་ཏེ། དོན་དམ་དུ་ཡོད་པའི་ཕྱིར། བྱས་པ་ལ་ཁོ་ན་རེ། བུམ་པ་ཆོས་ཅན། ཀུན་རྫོབ་ཏུ་ཡོད་པར་ཐལ། ཐ་སྙད་དུ་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། འཇིག་རྟེན་གྱི་ཐ་སྙད་དུ་ཡོད་པའི་ཕྱིར་ཏེ། འཇིག་རྟེན་གྱི་ཐ་སྙད་དུ་བུམ་པ་གྲགས་པའི་ཕྱིར། སངས་འཕགས་ཀྱིས་བུམ་པ་ཀུན་རྫོབ་ཏུ་ཁས་བླངས་པར་ཐལ། དེ་དེར་ཡོད་པའི་ཕྱིར། འདོད་ན། དེ་དེས་རྫུན་པར་ཁས་བླངས་པར་ཐལ་ལོ། །གཞན་ཡང་། དེས་བུམ་པ་བདེན་རྫུན་གཉིས་ཀར་ཁས་བླངས་པར་ཐལ། དེ་དེས་བདེན་པར་ཁས་བླངས། གཅིག་ཤོས་ཀྱང་ཁས་བླངས་པའི་ཕྱིར། འདོད་ན། དེ་དེ་གཉིས་ཀ་ཡིན་པར་ཐལ་ལོ། །བྱས་པ་ལ་ཁོ་ན་རེ། སངས་འཕགས་ཀྱིས་བུམ་པ་དོན་དམ་པར་ཁས་བླངས་པར་ཐལ། དེས་དེ་བདེན་པར་ཁས་བླངས་པའི་ཕྱིར་ན་མ་ཁྱབ། འདོད་ན། དེས་བུམ་པ་དོན་དམ་པར་ཁས་བླངས་པའི་ཁས་བླངས་ཡོད་པར་ཐལ་ལོ། །འདོད་ན། དེས་དེར་བརྗོད་པའི་ངག་ཡོད་པར་ཐལ་ལོ། །འདོད་ན། དོན་དམ་པར་རྗོད་བྱེད་སྒྲའི་བརྗོད་བྱ་ཡོད་པར་ཐལ་ལོ། །གཞན་ཡང་། ཁོ་ན་རེ། དོན་དམ་བདེན་པ་ཡིན་ན། བདེན་པ་ཡིན་དགོས་པར་ཐལ། ཀུན་རྫོབ་ཏུ་ཡོད་ན། ཀུན་རྫོབ་ཙམ་དུ་ཡོད་དགོས་པའི་ཕྱིར། འདོད་ན། མེ་ལོང་ནང་གི་བྱད་བཞིན་གྱི་གཟུགས་བརྙན་ཆོས་ཅན། དེར་ཐལ། དེའི་ཕྱིར། འདོད་ན། དེ་ཆོས་ཅན། སྣང་བ་ལྟར་དུ་གྲུབ་པར་ཐལ། འདོད་པའི་ཕྱིར་ན་མ་ཁྱབ། འདོད་ན། བྱད་བཞིན་གྱི་གཟུགས་བརྙན་བྱད་བཞིན་དུ་ཐལ། འདོད་པ་གང་ཞིག །བརྡ་ལ་མ་བྱང་པའི་སྐྱེས་བུའི་མིག་ཤེས་ལ་དེའི་གཟུགས་བརྙན་དེར་སྣང་བའི་ཕྱིར་ཟེར་ན། ཁོ་རང་ལ། དེའི་གཟུགས་བརྙན་ཆོས་ཅན། བདེན་པ་ཡིན་པར་ཐལ། བདེན་པར་གྲུབ་པའི་ཕྱིར་ཏེ། གཞན་དབང་ཡིན་པའི་ཕྱིར། གཞན་ཡང་། དེ་ཆོས་ཅན། བདེན་པ་ཡིན་པར་ཐལ། བདེན་རྫུན་གང་རུང་གང་ཞིག །གཅིག་ཤོས་མ་ཡིན་པའི་ཕྱིར། དང་པོ་གྲུབ་སྟེ། བདེན་པ་གཉིས་པོ་གང་རུང་ཡིན་པའི་ཕྱིར། ཁ་ཅིག་ན་རེ། རྟོག་པས་སྒྲོ་མ་བཏགས་པར་ཡུལ་རང་ངོས་ནས་གྲུབ་པ་དེ། རང་མཚན་གྱི་མཚན་ཉིད། རང་འཛིན་རྟོག་པས་སྒྲོ་བཏགས་སྤྱི་མཚན་གྱི་མཚན་ཉིད་ཟེར་ན། དང་པོ་ལ། རི་བོང་གི་རྭ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྟོག་པས་སྒྲོ་མ་བཏགས་པར་ཚད་མའི་ཡུལ་རང་ངོས་ནས་གྲུབ་པའི་ཕྱིར་ཏེ། དེས་སྒྲོ་མ་བཏགས་པ་གང་ཞིག །དེའི་དེར་གྲུབ་པའི་ཕྱིར། གཉིས་པ་ལ་རི་བོང་གི་རྭ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར་ཏེ། རང་འཛིན་རྟོག་པའི་ཞེན་ཡུལ་ཡིན་པའི་ཕྱིར། མཚན་ཉིད་གཉིས་པ་ལ་སྐྱོན་འཕེན་པ་ཁ་ཅིག་ན་རེ། ཤེས་བྱ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། དེ་ཆོས་ཅན། རང་འཛིན་རྟོག་པ་ཁྱོད་ལ་སྒྲོ་འདོགས་ཀྱི་བློ་ཡིན་པར་ཐལ། འདོད་པའི་ཕྱིར་ན་མ་ཁྱབ། འདོད་ན། རང་འཛིན་རྟོག་པ་ལོག་ཤེས་སུ་ཐལ་ལོ། །

༈ གཞུང་འདི་གྲུབ་མཐའ་སྨྲ་བ་གང་གི་དབང་དུ་བྱས་པ་ལ། ཁོ་ན་རེ། དོན་དམ་དོན་བྱེད་ནུས་པ་ཞེས་སོགས་ཀྱི་གཞུང་འདི། མདོ་སེམས་ཐུན་མོང་པའི་གཞུང་ཡིན་ཟེར་ན། དེ་མ་ཡིན་པར་ཐལ། དེ་དེ་གཉིས་ཀྱི་ནང་ནས། མདོ་སྡེ་པའི་ཐུན་མོང་མ་ཡིན་པའི་རང་གཞུང་རྣམ་དག་ཡིན་པའི་ཕྱིར་ཏེ། འདིས་བུམ་པ་དོན་དམ་བདེན་པའི་མཚན་གཞི་དང་། བུམ་པའི་དོན་སྤྱི་ཀུན་རྫོབ་བདེན་པའི་མཚན་གཞིར་བསྟན་བྱའི་གཙོ་བོར་བྱས་ནས་བསྟན་པ་གང་ཞིག །སེམས་ཙམ་པས་བུམ་པ་དོན་དམ་བདེན་པར་ཁས་མི་ལེན་པའི་ཕྱིར། གཞན་ཡང་། གཞུང་འདིས་དོན་དམ་བདེན་པའི་མཚན་གཞི་དང་། གཅིག་ཤོས་ཀྱི་མཚན་གཞི་བསྟན་བྱའི་གཙོ་བོར་བྱས་ནས་བསྟན་པའི་ཕྱིར་ཏེ། ཐར་ལམ་གསལ་བྱེད་ལས། གཙོ་བོར་དོན་དམ་བདེན་པའི་མཚན་གཞི་ངོས་འཛིན་པ་ཡིན་ཏེ། རྒྱན་འགྲེལ་དུ། ཞར་ལ་ཐེག་པ་ཐ་ཤལ་གྱི་བདེན་པ་གཉིས་ཀྱི་རྣམ་པར་བཞག་པ་བསྟན་པའི་ཕྱིར། ཞེས་གསུངས་པ་ཡང་། བདེན་གཉིས་ཀྱི་མཚན་གཞི་ངོས་འཛིན་དུ་གསལ་ཏེ། ཞེས་གསུངས་པའི་ཕྱིར། གཞན་ཡང་། བསྟན་བཅོས་འདི་མདོ་སེམས་ཐུན་མོང་བའི་བསྟན་བཅོས་སུ་ཐལ། གཞུང་འདི་དེ་ཡིན་པའི་ཕྱིར། འདོད་ན། འདི་སེམས་ཙམ་པའི་བསྟན་བཅོས་སུ་ཐལ། འདོད་པའི་ཕྱིར། འདོད་ན། བསྟན་བཅོས་འདིའི་ལྟ་བ་མཐར་ཐུག་སེམས་ཙམ་པ་ལ་སྐྱེལ་རིགས་པར་ཐལ། འདོད་པའི་ཕྱིར། འདོད་ན། དེའི་ལྟ་བ་མཐར་ཐུག་པ་དེ། དེ་ཕྱིར་གཉིས་སྟོང་གང་ཡིན་པ། །ཞེས་སོགས་ཀྱི་གཞུང་གི་སྐབས་ནས་བསྟན་པའི་ལྟ་བ་ལ་སྐྱེལ་རིགས་པར་ཐལ་ལོ། །འདོད་ན། གཟུགས་དང་གཟུགས་འཛིན་ཚད་མ་རྫས་གཞན་གྱིས་སྟོང་པར་རྟོགས་པའི་ལྟ་བ་དེ་བསྟན་བཅོས་འདིའི་སྐབས་ནས་བསྟན་པའི་ལྟ་བ་མཐར་ཐུག་ཡིན་པར་ཐལ་ལོ། །འདོད་ན། དེ་དང་དེ་འཛིན་པའི་ཚད་མ་རྫས་གཞན་མ་ཡིན་པར་ཐལ་ལོ། །བྱས་པ་ལ་ཁོ་ན་རེ། གཞུང་འདི་མདོ་སེམས་ཐུན་མོང་བའི་གཞུང་དུ་ཐལ། དེ་དེ་ཐུན་མོང་བ་ལ་སྦྱོར་རིགས་པའི་ཕྱིར་ཏེ། ཐར་ལམ་གསལ་བྱེད་ལས། དངོས་བསྟན་གྱི་དབང་དུ་བྱས་ན། མདོ་སེམས་གཉིས་ཀའི་ཐུན་མོང་བའི་དབང་དུ་བྱས་པར་བཤད་དེ། དོན་བྱེད་ནུས་པ་དོན་དམ་དུ་ཡོད་པའི་མཚན་གཞི་དང་། དོན་བྱེད་མི་ནུས་པ་ཀུན་རྫོབ་ཏུ་ཡོད་པའི་མཚན་གཞིར་དངོས་སུ་བསྟན་ལ། ཚུལ་དེ་དེ་གཉིས་ཀས་ཐུན་མོང་དུ་བཞེད་པའི་ཕྱིར། ཞེས་གསུངས་པའི་ཕྱིར་ན་མ་ཁྱབ་སྟེ། གཞུང་འདིས་དོན་བྱེད་ནུས་པ་དོན་དམ་དུ་ཡོད་པའི་མཚན་གཞི་དང་། དོན་བྱེད་མི་ནུས་པའི་ཆོས་ཀུན་རྫོབ་ཏུ་ཡོད་པའི་མཚན་གཞིར་དངོས་སུ་བསྟན་ཅིང་། དེ་ལྟར་བསྟན་པ་དེ་མདོ་སེམས་གཉིས་ཀས་ཁས་ལེན་པ་དེའི་དོན་ཡིན་པའི་ཕྱིར། ཁ་ཅིག་ན་རེ། གཞུང་འདི་དེ་ཐུན་མོང་བའི་གཞུང་དུ་ཐལ། ཐར་ལམ་གསལ་བྱེད་ལས། གཏན་ལ་དབབ་བྱའི་གཙོ་བོ་ནི། སྔར་བཤད་པ་ལྟར་དངོས་པོ་དོན་དམ་དུ་གྲུབ་མ་གྲུབ་འབའ་ཞིག་གཏན་ལ་འབེབས་པ་ཡིན་པས་མདོ་སེམས་གཉིས་ཀའི་ཐུན་མོང་བའོ། །ཞེས་གསུངས་པའི་ཕྱིར་ན་མ་ཁྱབ་སྟེ། གཞུང་འདིས་དངོས་པོ་ལ་བདེན་གྲུབ་ཀྱི་ཁྱབ་པ་བསྟན་བྱའི་གཙོ་བོར་བྱས་ནས་བསྟན་ཅིང་། མདོ་སེམས་གཉིས་ཀས་དེ་འདྲའི་ཁྱབ་པ་ཁས་ལེན་པ་དེའི་དོན་ཡིན་པའི་ཕྱིར། དེ་ལྟར་མ་ཡིན་ན། མངོན་སུམ་རྟོག་དང་བྲལ་བ་ནི། །ཞེས་སོགས་ཀྱི་གཞུང་འདི་མདོ་སེམས་ཐུན་མོང་བའི་གཞུང་དུ་ཐལ། འདིས་མངོན་སུམ་ལ་རྟོག་བྲལ་གྱིས་ཁྱབ་པ་བསྟན་བྱའི་གཙོ་བོར་བྱས་ནས་བསྟན་པ་གང་ཞིག །དེ་གཉིས་ཀས་དེ་འདྲའི་ཁྱབ་པ་ཁས་ལེན་པའི་ཕྱིར། འདོད་ན། མངོན་སུམ་རྟོག་དང་བྲལ་བ་ནི། ཞེས་པ་ནས། བརྟེན་ནས་མིག་བློ་སྐྱེ་བར་འགྱུར། །ཞེས་པའི་བར་གྱི་གཞུང་འདི་ཡང་དེ་ཐུན་མོང་བའི་གཞུང་དུ་ཐལ། འདོད་པའི་ཕྱིར། འདོད་མི་ནུས་ཏེ། སྐབས་འདིར་གཟུང་དོན་ཅན་གྱི་དབང་མངོན་བསྟན་བྱས་གཙོ་བོ་བྱས་ནས་བསྟན་པ་གང་ཞིག །སེམས་ཙམ་པས་དེ་འདྲའི་དབང་མངོན་ཁས་མི་ལེན་པའི་ཕྱིར། ཁྱབ་སྟེ། འཐད་ལྡན་ལས། རབ་ཏུ་བྱེད་པ་ཅུང་ཟད་བཤད་པ་འདི་ཐམས་ཅད་རྣམ་པར་རིགས་པ་སྨྲ་བའི་ལུགས་ལ་སྦྱར་བར་བྱ་བ་མ་ཡིན་ཏེ། དོན་གྱི་མཐུ་ལས་ཡང་དག་སྐྱེ་བ་ཉིད་ཀྱི་ཕྱིར་རོ། །ཞེས་གསུངས་པའི་ཕྱིར། གཞན་ཡང་། གཞལ་བྱ་གཉིས་ཕྱིར་ཚད་མ་གཉིས། །ཞེས་པའི་གཞུང་འདི་ཡང་མདོ་སེམས་ཐུན་མོང་བའི་དེར་ཐལ། དོན་དམ་དོན་བྱེད་ཅེས་སོགས་དེ་ཡིན་པའི་ཕྱིར། འདོད་ན། དོན་བྱེད་ནུས་དང་མི་ནུས་ཕྱིར། །ཞེས་པའི་གཞུང་འདི་ཡང་དེར་ཐལ། འདོད་པ་གང་ཞིག །གཞུང་འདི། གཞལ་བྱ་གཉིས་ཕྱིར་ཚད་མ་གཉིས། །ཞེས་པའི་རྟགས་བསྒྲུབ་འཆད་བྱེད་ཀྱི་གཞུང་ཡིན་པའི་ཕྱིར། འདོད་ན། དེ་སེམས་ཙམ་པའི་གཞུང་དུ་ཐལ་ལོ། །འདོད་ན། སེམས་ཙམ་པས་གཞལ་བྱ་ལ་དོན་བྱེད་ནུས་པ་དང་མི་ནུས་པའི་ཆོས་གཉིས་སུ་གྲངས་ངེས་པའི་རྟགས་ལས། གཞལ་བྱ་ལ་རང་སྤྱི་གཉིས་སུ་གྲངས་ངེས་པར་སྒྲུབ་ནུས་པར་ཁས་ལེན་པར་ཐལ་ལོ། །འདོད་ན། དེས་དོན་བྱེད་མི་ནུས་པའི་ཆོས་ཡིན་ན། སྤྱི་མཚན་ཡིན་པས་ཁྱབ་པ་ཁས་ལེན་པར་ཐལ་ལོ། །འདོད་མི་ནུས་ཏེ། དེས་དོན་བྱེད་མི་ནུས་པའི་ཆོས་དང་། དོན་དམ་དུ་ཡོད་པའི་གཞི་མཐུན་ཁས་ལེན་པའི་ཕྱིར། གཞན་ཡང་། གཞན་ནི་ཀུན་རྫོབ་ཡོད་པ་སྟེ། །ཞེས་པའི་གཞུང་འདི་སེམས་ཙམ་པའི་གཞུང་དུ་ཐལ། དོན་དམ་ཞེས་སོགས་དེའི་ཕྱིར། འདོད་ན། སེམས་ཙམ་པས་དོན་བྱེད་མི་ནུས་པའི་ཆོས་ཡིན་ན། ཀུན་རྫོབ་ཏུ་ཡོད་པས་ཁྱབ་པ་ཁས་ལེན་པར་ཐལ་ལོ། །འདོད་མི་ནུས་ཏེ། དེས་དེ་ལྟར་མི་ནུས་པའི་ཆོས་དང་། དོན་དམ་དུ་ཡོད་པའི་གཞི་མཐུན་ཁས་ལེན་པའི་ཕྱིར་ཏེ། དེས་སྟོང་ཉིད་དེ་འདྲའི་གཞི་མཐུན་དུ་ཁས་ལེན་པའི་ཕྱིར། །

རང་ལུགས་གཞུང་འདི་བཀོད་པའི་དགོས་པ་དང་བདེན་གཉིས་ཀྱི་རྣམ་གཞག་སོགས་བཤད་པ།

༈ རང་ལུགས་ནི། གཞུང་འདི་བཀོད་པའི་དགོས་པ་བཤད་པ། བདེན་གཉིས་སོ་སོའི་མཚན་ཉིད་མཚན་གཞི་གང་གཙོ་བོར་སྟོན་པ། གཞུང་འདི་གྲུབ་མཐའ་སྨྲ་བ་གང་གི་དབང་དུ་བྱས་པ། བདེན་གཉིས་ཀྱི་རྣམ་བཞག་གཏན་ལ་ཕབ་པ་དང་བཞི། དང་པོ་ནི། དོན་དམ་དོན་བྱེད་ནུས་པ་གང་། །ཞེས་སོགས་ཀྱི་གཞུང་གསུངས་པ་ལ་དགོས་པ་ཡོད་དེ། དངོས་སྨྲ་བ་དང་ངོ་བོ་ཉིད་མེད་པར་སྨྲ་བ་གཉིས་རྩོད་པའི་རྩོད་གཞིར་གྱུར་པའི་དངོས་པོ་བདེན་གྲུབ་ཏུ་བསྟན་པར་བྱ་བའི་ཆེད་ཡིན་པའི་ཕྱིར། །

༈ གཉིས་པ་ནི། དོན་དམ་དོན་བྱེད་ནུས་པ་གང་། །ཞེས་པའི་གཞུང་འདིས་དོན་དམ་བདེན་པའི་མཚན་གཞི་དང་། ཀུན་རྫོབ་བདེན་པའི་མཚན་གཞི་གཉིས་བསྟན་བྱའི་གཙོ་བོར་བྱས་ནས་བསྟན་པ་ཡིན་ཏེ། ཐར་ལམ་གསལ་བྱེད་ལས། གཙོ་བོ་ནི་བདེན་པ་གཉིས་ཀྱི་མཚན་གཞི་ངོས་འཛིན་པ་ཡིན་ཏེ། ཞེས་སོགས་གསུངས་པའི་ཕྱིར། །

༈ གསུམ་པ་ནི། གཞུང་འདི་མདོ་སེམས་གཉིས་ཀྱི་ནང་ནས་མདོ་སྡེ་པའི་ཐུན་མོང་མ་ཡིན་པའི་རང་གཞུང་རྣམ་དག་ཡིན་ཏེ། གཞུང་འདི་དེ་གཉིས་ཀྱི་ནང་ནས་མདོ་སྡེ་པའི་ཐུན་མོང་མ་ཡིན་པའི་བདེན་གཉིས་ཀྱི་རྣམ་བཞག་བསྟན་བྱའི་གཙོ་བོར་བྱས་ནས་སྟོན་པའི་གཞུང་ཡིན་པའི་ཕྱིར་ཏེ། ཐར་ལམ་གསལ་བྱེད་ལས། ཚིག་ཟུར་ལ་དོན་དམ་བདེན་པ་དང་ཀུན་རྫོབ་བདེན་པའི་མཚན་གཞི་མི་གསལ་ཡང་དོན་དེ་ལྟར་སྦྱོར་ན་མདོ་སྡེ་པ་འབའ་ཞིག་གི་དབང་དུ་བྱས་ཏེ། ཞེས་གསུངས་པའི་ཕྱིར། །

༈ བཞི་པ་བདེན་གཉིས་ཀྱི་རྣམ་བཞག་གཏན་ལ་ཕབ་པ་ལ། བྱེ་བྲག་སྨྲ་བའི་ལུགས་དང་། མདོ་སྡེ་པའི་ལུགས་གཉིས། དང་པོ་ནི། བཅོམ་པའམ་བློས་བསལ་བ་ན། རང་འཛིན་གྱི་བློ་འདོར་བའི་ཆོས། ཀུན་རྫོབ་བདེན་པའི་མཚན་ཉིད། དེ་ལྟར་མི་འདོར་བའི་ཆོས། དོན་དམ་བདེན་པའི་མཚན་ཉིད། མཚན་གཞི་བུམ་པ་དང་། བུམ་ནང་གི་ཆུ་ལྟ་བུ། ཀུན་རྫོབ་བདེན་པའི་མཚན་གཞི་ཡིན། རྡུལ་ཕྲ་རབ་ཤེས་པ་ནམ་མཁའ་ལ་སོགས་པ་དོན་དམ་བདེན་པའི་མཚན་གཞི་ཡིན། བུམ་པ་དེ་བཅོམ་པའམ་བློས་བསལ་བ་ན། རང་འཛིན་གྱི་བློ་འདོར་བའི་ཆོས་ཡིན་ཏེ། བུམ་པ་ཐོ་བས་བཅོམ་པ་ན་བུམ་འཛིན་གྱི་བློ་འདོར་བའི་ཕྱིར། བུམ་ནང་གི་ཆུ་ལྟ་བུ་བློས་བསལ་བ་ན། རང་འཛིན་གྱི་བློ་འདོར་བའི་ཆོས་ཡིན་པའི་ཕྱིར་ཏེ། ཆུ་དེའི་དྲི་དང་གཟུགས་ལ་སོགས་པ་བློས་སོ་སོར་བསལ་བ་ན། དེ་འཛིན་གྱི་བློ་འདོར་བའི་ཕྱིར། དེ་སྐད་དུ་ཡང་། མཛོད་ལས། གང་ལ་བཅོམ་དང་བློ་ཡིས་གཞན། །བསལ་ན་དེ་བློ་མི་འཇུག་པ། །བུམ་ཆུ་བཞིན་དུ་ཀུན་རྫོབ་ཏུ། །ཡོད་དེ་དོན་དམ་ཡོད་གཞན་ནོ། །ཞེས་གསུངས་པའི་ཕྱིར། ཁ་ཅིག་ན་རེ། འདིའི་ཐད་ཀྱི་མཛོད་ཀྱི་རང་འགྲེལ་དུ། སེམས་ཙམ་པའི་ལུགས་ཀྱི་བདེན་གཉིས་ཀྱི་རྣམ་བཞག་ལོགས་སུ་གསུངས། མདོ་སྡེ་པའི་ལུགས་ཀྱི་དེའི་རྣམ་བཞག་ལོགས་སུ་མ་གསུངས་པས། བྱེ་བྲག་སྨྲ་བ་དང་རིགས་པའི་རྗེས་འབྲང་གི་མདོ་སྡེ་པ་གཉིས་བདེན་གཉིས་ཀྱི་རྣམ་བཞག་ལ་མཐུན་པ་ཡིན་ནོ་ཟེར་ན། མི་འཐད་པར་ཐལ། དེ་གཉིས་སོ་སོའི་མཚན་ཉིད་ལ་ཡང་མི་མཐུན། དེ་དེ་སོ་སོའི་མཚན་གཞི་ལ་ཡང་མི་མཐུན་པའི་ཕྱིར། དང་པོ་གྲུབ་སྟེ། བྱེ་བྲག་སྨྲ་བས་བདེན་གཉིས་སོ་སོའི་མཚན་ཉིད་སྔར་ལྟར་ཁས་ལེན། གཅིག་ཤོས་ཀྱིས་དེ་ལྟར་ཁས་མི་ལེན་པའི་ཕྱིར། དེ་གཉིས་མཚན་གཞི་ལ་མི་མཐུན་པ་ཡིན་པའི་ཕྱིར་ཏེ། བྱེ་བྲག་སྨྲ་བས། བུམ་པ་ཀུན་རྫོབ་བདེན་པར་ཁས་ལེན། གཅིག་ཤོས་ཀྱིས་དེ་དོན་དམ་བདེན་པར་ཁས་ལེན་པའི་ཕྱིར་དང་། བྱེ་བྲག་སྨྲ་བས་ནམ་མཁའ་དོན་དམ་བདེན་པའི་མཚན་གཞིར་ཁས་ལེན། མདོ་སྡེ་པས་དེ་ཀུན་རྫོབ་བདེན་པའི་མཚན་གཞིར་ཁས་ལེན་པའི་ཕྱིར། མདོ་སྡེ་པས་བུམ་པ་དོན་དམ་བདེན་པར་ཁས་ལེན་པ་ཡིན་ཏེ། དེས་དེ་བདེན་གྲུབ་ཏུ་ཁས་ལེན་པའི་ཕྱིར། དེས་ས་བོན་གྱིས་མྱུ་གུ་སྐྱེད་པའི་ནུས་པ་དེ་བདེན་གྲུབ་ཏུ་ཁས་ལེན་པའི་ཕྱིར་ཏེ། དེ་ལྟར་དུ་ཡང་། ས་བོན་སོགས་ནི་མྱུག་སོགས་ལ། །ཞེས་པའི་རྩོད་ལན་དུ་གསལ་བར་གསུངས་པའི་ཕྱིར། ཁ་ཅིག །མཛོད་ཀྱི་བུམ་ཆུ་བཞིན་དུ་ཀུན་རྫོབ་ཏུ། །ཞེས་པའི་དོན་ནི། བྱེ་བྲག་སྨྲ་བས་བུམ་པ་བཏགས་ཡོད་ཁས་ལེན་པ་ཡིན་གྱི། གཞན་བྱེ་བྲག་སྨྲ་བས་བུམ་པ་དོན་དམ་པར་ཁས་ལེན་པ་ཡིན་ཏེ། དེས་བུམ་པ་བདེན་གྲུབ་ཏུ་ཁས་ལེན་པའི་ཕྱིར་ཏེ། དེས་དངོས་པོ་ལ་བདེན་གྲུབ་ཀྱིས་ཁྱབ་པ་ཁས་ལེན་པའི་ཕྱིར། དེ་དངོས་སྨྲ་བ་ཡིན་པའི་ཕྱིར་ཟེར་ན། དེ་ལྟར་ཡིན་ན་བྱེ་བྲག་སྨྲ་བས། གཞི་གྲུབ་ན་བདེན་གྲུབ་ཡིན་པས་ཁྱབ་པ་ཁས་ལེན་པར་ཐལ། དེས་གཞི་གྲུབ་ན་དངོས་པོ་ཡིན་པས་ཁྱབ་པ་ཁས་ལེན་པ་གང་ཞིག། དེས་དངོས་པོ་ལ་བདེན་གྲུབ་ཀྱིས་ཁྱབ་པ་ཁས་ལེན་པའི་ཕྱིར། འདོད་ན། དེས་ཀུན་རྫོབ་བདེན་པ་ཁས་མི་ལེན་པར་ཐལ་ལོ། །གཉིས་པ་མདོ་སྡེ་པའི་ལུགས་ནི། དོན་དམ་པར་དོན་བྱེད་ནུས་པ། དོན་དམ་བདེན་པའི་མཚན་ཉིད། དེ་ལྟར་མི་ནུས་པའི་ཆོས་ཀུན་རྫོབ་བདེན་པའི་མཚན་ཉིད། རྟོག་པས་སྒྲོ་མ་བཏགས་པར་རང་གི་ཐུན་མོང་མ་ཡིན་པའི་སྡོད་ལུགས་ཀྱི་ངོས་ནས་གྲུབ་པ། རང་མཚན་གྱི་མཚན་ཉིད། རྟོག་པས་སྒྲོ་བཏགས་པའི་ཆོས་སྤྱི་མཚན་གྱི་མཚན་ཉིད། སྒྲ་བཤད་པ་ལ། བུམ་པ་ལ་དོན་དམ་བདེན་པ་ཞེས་བརྗོད་པའི་རྒྱུ་མཚན་ཡོད་དེ། དེ་བློ་དོན་དམ་པ་མ་འཁྲུལ་པའི་ཤེས་པའི་ངོར་བདེན་ཅིང་། གནས་ཚུལ་ལ་ཡང་བདེན་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། བུམ་པའི་དོན་སྤྱི་ལ་ཀུན་རྫོབ་བདེན་པ་ཞེས་བརྗོད་པའི་རྒྱུ་མཚན་ཡོད་དེ། དེ་བློ་ཀུན་རྫོབ་པ་བུམ་འཛིན་རྟོག་པའི་ངོར་བདེན་ཅིང་། གནས་ཚུལ་ལ་རྫུན་པས་དེ་ལྟར་བརྗོད་པའི་ཕྱིར། བུམ་འཛིན་རྟོག་པ་ལ་བློ་ཀུན་རྫོབ་པ་ཞེས་བརྗོད་པའི་རྒྱུ་མཚན་ཡོད་དེ། དེ་རང་མཚན་མངོན་སུམ་གྱིས་མཐོང་བ་ལ་སྒྲིབ་བྱེད་ཡིན་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར་ཏེ། དེ་སྐད་དུ་ཡང་། གང་ཞིག་རང་གི་ངོ་བོ་ཡི། །གཞན་གྱི་ངོ་བོ་སྒྲིབ་བྱེད་པ། །སྒྲིབ་བྱེད། ཅེས་གསུངས་པའི་ཕྱིར། །

༈ རྩོད་པ་སྤང་བ་ལ། དོན་དམ་པར་དོན་བྱེད་ནུས་པ་ཆོས་ཅན། སེམས་ཙམ་པས་དོན་དམ་བདེན་པའི་མཚན་ཉིད་དུ་ཁས་ལེན་པར་ཐལ། དེའི་མཚན་ཉིད་ཡིན་པའི་ཕྱིར། ཁྱབ་སྟེ། མདོ་སེམས་གཉིས་དོན་དམ་བདེན་པའི་མཚན་ཉིད་ལ་མཐུན་པའི་ཕྱིར་ཏེ། དེ་གཉིས་རང་མཚན་གྱི་མཚན་ཉིད་ལ་མཐུན་པའི་ཕྱིར་ན་མ་ཁྱབ། རྟགས་གྲུབ་སྟེ། དེ་གཉིས་ཀས་རྟོག་པས་སྒྲོ་མ་བཏགས་པར་ཞེས་སོགས། དེའི་མཚན་ཉིད་དུ་ཁས་ལེན་པའི་ཕྱིར་ཏེ། མདོ་སྡེ་པས་ཀྱང་དེའི་མཚན་ཉིད་དུ་ཁས་ལེན། སེམས་ཙམ་པས་ཀྱང་དེ་ལྟར་ཁས་ལེན་པའི་ཕྱིར། གཞན་ཡང་། མདོ་སེམས་གཉིས་རང་མཚན་གྱི་མཚན་གཞི་ལ་མཐུན་པར་ཐལ། དེ་གཉིས་དེའི་མཚན་ཉིད་ལ་མཐུན་པའི་ཕྱིར་ན་མ་ཁྱབ། འདོད་མི་ནུས་ཏེ། མདོ་སྡེ་པས་བུམ་པ་རང་མཚན་གྱི་མཚན་གཞི་དང་། བུམ་པའི་ཆོས་ཉིད་སྤྱི་མཚན་གྱི་མཚན་གཞིར་ཁས་ལེན་ཅིང་། སེམས་ཙམ་པས་དེ་ལས་ལྡོག་སྟེ་དེ་གཉིས་ཀ་རང་མཚན་དུ་ཁས་ལེན་པའི་ཕྱིར། ཁོ་རང་ལ་བྱེ་བྲག་སྨྲ་བ་དང་། མདོ་སྡེ་པ་གཉིས་དངོས་པོའི་མཚན་གཞི་ལ་མཐུན་པར་ཐལ། དེ་གཉིས་དེའི་མཚན་ཉིད་ལ་མཐུན་པའི་ཕྱིར། ཁྱབ་པ་ཁས། རྟགས་གྲུབ་སྟེ། དེ་གཉིས་ཀས་དོན་བྱེད་ནུས་པ། དངོས་པོའི་མཚན་ཉིད་དུ་ཁས་ལེན་པའི་ཕྱིར། འདོད་མི་ནུས་ཏེ། བྱེ་བྲག་སྨྲ་བས་ནམ་མཁའ་དངོས་པོའི་མཚན་གཞིར་ཁས་ལེན། མདོ་སྡེ་པས་དེ་དངོས་མེད་ཀྱི་མཚན་གཞིར་ཁས་ལེན་པའི་ཕྱིར། བྱས་པ་ལ་ཁོ་ན་རེ། དེ་གཉིས་དངོས་པོའི་མཚན་གཞི་ལ་མཐུན་པར་ཐལ། དེ་གཉིས་ཀས་བུམ་པ། དེའི་མཚན་གཞིར་ཁས་ལེན་པའི་ཕྱིར་ན་མ་ཁྱབ། ཁ་ཅིག་ན་རེ། ཤེས་བྱ་ཆོས་ཅན། ཁྱོད་དོན་དམ་ཡིན་ན། ཁྱོད་བདེན་པ་ཡིན་དགོས་པར་ཐལ། དོན་དམ་ཡིན་ན། བདེན་པ་ཡིན་དགོས་པའི་ཕྱིར་ཞེས་པའི་ཐལ་འགྱུར་ལ་ཁྱབ་པ་ཡོད་པར་ཐལ། དོན་དམ་ཡིན་ན། བདེན་པ་ཡིན་དགོས་པའི་ཕྱིར། འདོད་ན། དོན་དམ་ཆོས་ཅན། ཁྱོད་བདེན་པ་ཡིན་པར་ཐལ། ཁྱོད་དོན་དམ་ཡིན་པའི་ཕྱིར། མ་ཁྱབ་ན་དོན་དམ་ཆོས་ཅན། ཁྱོད་དོན་དམ་ཡིན་ན་ཁྱོད་དོན་དམ་བདེན་པ་ཡིན་དགོས་པར་ཐལ། དོན་དམ་ཡིན་ན། བདེན་པ་ཡིན་དགོས་པའི་ཕྱིར་ན་ཆོས་ཅན་སྐྱོན་ཅན་ཡིན་ཏེ། དེ་ལྟར་མ་ཡིན་ན། ཁྱོད་བདེན་པ་ཡིན་ན། ཁྱོད་རྫུན་པ་མ་ཡིན་དགོས་པར་ཐལ། བདེན་པ་ཡིན་ན། རྫུན་པ་མ་ཡིན་དགོས་པའི་ཕྱིར། ཞེས་པའི་ཐལ་འགྱུར་ལ་ཁྱབ་པ་ཡོད་པར་ཐལ། བདེན་པ་ཡིན་ན། གཅིག་ཤོས་དེ་མ་ཡིན་དགོས་པའི་ཕྱིར། འདོད་ན། ཤེས་བྱ་ཆོས་ཅན། ཀུན་རྫོབ་རྫུན་པ་མ་ཡིན་པར་ཐལ། དེ་བདེན་པ་ཡིན་པའི་ཕྱིར། མ་ཁྱབ་ན། ཀུན་རྫོབ་ཆོས་ཅན། ཐལ་འགྱུར་གྱི་ཁྱབ་པ་ལ་དེར་ཐལ། དེའི་ཕྱིར། འཁོར་གསུམ། བྱས་པ་ལ་ཁོ་ན་རེ། དོན་དམ་དང་གཅིག་ཡིན་ན། བདེན་པ་ཡིན་དགོས་པར་ཐལ། དེ་ལ་དངོས་སྐྱོན་མི་འཇུག་པའི་ཕྱིར་ཏེ། དེ་ལ་དོན་དམ་དངོས་སྐྱོན་དུ་བཏང་བ་དེའི་ཚེ་ན། འདོད་ལན་ཐེབས་པའི་ཕྱིར། འདོད་ན། དོན་དམ་དང་གཅིག་ཡིན་ན། དོན་དམ་མ་ཡིན་དགོས་པར་ཐལ། དེ་ཡིན་ན། བདེན་པ་མ་ཡིན་དགོས། བདེན་པ་མ་ཡིན་ན། དོན་དམ་མ་ཡིན་དགོས་པའི་ཕྱིར་ཟེར་ན་མ་ཁྱབ། འདོད་ན། དོན་དམ་ཆོས་ཅན། དེར་ཐལ། དེའི་ཕྱིར། ཟེར་ན་ཁོ་རང་ལ། ཀུན་རྫོབ་དང་གཅིག་ཡིན་ན། བདེན་པ་ཡིན་དགོས་པར་ཐལ། དེ་ལ་དངོས་སྐྱོན་མི་འཇུག་པའི་ཕྱིར་ཏེ། དེ་ལ་ཀུན་རྫོབ་དངོས་སྐྱོན་དུ་བཏང་བ་དེའི་ཚེ་ན། འདོད་ལན་ཐེབས་པའི་ཕྱིར། རྩ་བར་འདོད་ན། དེ་དང་གཅིག་ཡིན་ན། རྫུན་པ་མ་ཡིན་དགོས་པར་ཐལ། དེ་དང་གཅིག་ཡིན་ན། བདེན་པ་ཡིན་དགོས། བདེན་པ་ཡིན་ན། རྫུན་པ་མ་ཡིན་དགོས་པའི་ཕྱིར། ཁྱབ་པ་ཁས། འདོད་ན། ཀུན་རྫོབ་ཆོས་ཅན། ཐལ་ཕྱིར། འདོད་མི་ནུས་ཏེ། ཀུན་རྫོབ་ཀུན་རྫོབ་ཡིན་པའི་ཕྱིར་ཏེ། རྫུན་པ་རྫུན་པ་ཡིན་པའི་ཕྱིར་ཏེ། བདེན་པ་བདེན་པ་ཡིན་པའི་ཕྱིར་ཏེ། བདེན་གྲུབ་བདེན་གྲུབ་ཡིན་པའི་ཕྱིར་རོ། །

སྐྲ་ཤད་འཛག་སྣང་གི་དབང་ཤེས་ཀྱི་བཟུང་རྣམ་ལ་དཔྱད་པ།

༈ གསལ་བར་སྣང་བ་ཉིད། ཅེས་སོགས་ཀྱི་སྐབས་སུ། མཐའ་དཔྱད་པ་ལ། ཁ་ཅིག་ན་རེ། སྐྲ་ཤད་འཛག་སྣང་གི་དབང་ཤེས་ལ། སྐྲ་ཤད་གསལ་བར་སྣང་བ་དེ། སྐྲ་ཤད་འཛག་སྣང་གི་དབང་ཤེས་ཀྱི་གཟུང་རྣམ་ཡིན་ཟེར་ན། འོ་ན། གཟུགས་འཛིན་དབང་མངོན་ལ་གཟུགས་གསལ་བར་སྣང་བ་དེ། གཟུགས་འཛིན་དབང་མངོན་གྱི་གཟུང་རྣམ་ཡིན་པར་ཐལ། དམ་བཅའ་འཐད་པའི་ཕྱིར། འདོད་ན། གཟུགས་འཛིན་དབང་མངོན་ལ་གཟུགས་གསལ་བར་སྣང་བ་དེ། ཤེས་པ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་ལྡན་མིན་འདུ་བྱེད་ཡིན་པའི་ཕྱིར་ཏེ། གཟུགས་འཛིན་དབང་མངོན་ལ་གསལ་བར་སྣང་བ་དེ། ལྡན་མིན་འདུ་བྱེད་ཡིན་པའི་ཕྱིར། དེའི་སྣང་ཡུལ་དེ། ལྡན་མིན་འདུ་བྱེད་ཡིན་པའི་ཕྱིར་ཏེ། གཟུགས་མི་རྟག་པ་དེ། དེའི་སྣང་ཡུལ་ཡིན་པའི་ཕྱིར། བྱས་པ་ལ་ཁོ་ན་རེ། གཟུགས་འཛིན་དབང་མངོན་ལ་གཟུགས་གསལ་བར་སྣང་བ་དེ། ལྡན་མིན་འདུ་བྱེད་མ་ཡིན་པར་ཐལ། དེ་རྟག་པ་ཡིན་པའི་ཕྱིར་ཏེ། བདག་མེད་ཡིན་ན། དེ་ལ་གཟུགས་གསལ་བར་སྣང་བ་ཡིན་དགོས་པའི་ཕྱིར་ན་མ་ཁྱབ། རྟགས་གྲུབ་སྟེ། བདག་མེད་ཡིན་ན། གཟུགས་འཛིན་དབང་མངོན་དེ་གཟུགས་གསལ་བར་སྣང་བའི་ཤེས་པ་ཡིན་དགོས་པའི་ཕྱིར་ཟེར་ན། ཁོ་རང་ལ། གཟུགས་མི་རྟག་པ་རྟག་པར་ཐལ། བདག་མེད་ཡིན་ན། གཟུགས་མི་རྟག་པ་ཡིན་དགོས་པའི་ཕྱིར། ཁྱབ་པ་དངོས། གཞན་ཡང་། སྔར་གྱི་དམ་བཅའ་འཇོག་པ་པོ་ལ། སྐྲ་ཤད་འཛག་སྣང་གི་དབང་ཤེས་ལ། སྐྲ་ཤད་གསལ་བར་སྣང་བར་ཐལ། དམ་བཅའ་འཐད་པའི་ཕྱིར། འདོད་ན། དེ་ལ་སྐྲ་ཤད་སྣང་བར་ཐལ། འདོད་པའི་ཕྱིར། འདོད་ན། ཟླ་བ་གཉིས་སྣང་གི་དབང་ཤེས་ལ། ཟླ་བ་གཅིག་སྣང་བར་ཐལ། འདོད་པའི་ཕྱིར། འདོད་ན། དེ་ཟླ་བ་གཅིག་ཡུལ་དུ་བྱེད་པའི་བློ་ཡིན་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། བློ་དོན་མཐུན་ཡིན་པར་ཐལ། འདོད་པའི་ཕྱིར། ཁྱབ་སྟེ། ཟླ་བ་གཅིག་འཛིན་པའི་རྟོག་པ་ཡིན་ན། རྟོག་པ་དོན་མཐུན་ཡིན་དགོས་པའི་ཕྱིར་ཏེ། ཟླ་བ་གཅིག་བརྗོད་པའི་ངག་ཡིན་ན། དེ་ཡིན་དགོས་པའི་ཕྱིར། བྱས་པ་ལ་ཁོ་ན་རེ། གསལ་བར་སྣང་བ་ཉིད། ཅེས་སོགས་གསུངས་པ་མི་འཐད་པར་ཐལ། སྐྲ་ཤད་འཛག་སྣང་གི་དབང་ཤེས་ལ། དེ་གསལ་བར་སྣང་བ་དེ་དེའི་གཟུང་རྣམ་མ་ཡིན་པའི་ཕྱིར་ན་མ་ཁྱབ་སྟེ། སྐྲ་ཤད་འཛག་སྣང་གི་དབང་ཤེས་ལ་སྐྲ་ཤད་འཛག་པར་སྣང་བའི་རྣམ་པ་དེ། དེ་འདྲའི་དབང་ཤེས་ཀྱི་གཟུང་རྣམ་ཡིན་པ་དེ་ལུང་དེའི་དོན་ཡིན་པའི་ཕྱིར། བྱས་པ་ལ་ཁོ་ན་རེ། གཟུགས་འཛིན་དབང་མངོན་ལ་གཟུགས་སྣང་བའི་རྣམ་པ་དེ། གཟུགས་འཛིན་དབང་མངོན་གྱི་གཟུང་རྣམ་ཡིན་པར་ཐལ། ལུང་དོན་འཐད་པའི་ཕྱིར། འདོད་ན། དེ་འདྲའི་རྣམ་པ་ཆོས་ཅན། གཟུགས་འཛིན་དབང་མངོན་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་ལ་སྣང་བའི་རྣམ་པ་ཡིན་པའི་ཕྱིར་ན་མ་ཁྱབ། གཞན་ཡང་། གཟུགས་འཛིན་དབང་མངོན་ལ་སྣང་བའི་གཟུགས་ཀྱི་རྣམ་པ་དེ་ཡང་། གཟུགས་འཛིན་དབང་མངོན་གྱི་གཟུང་རྣམ་ཡིན་པར་ཐལ། གཟུགས་འཛིན་དབང་མངོན་ལ་གཟུགས་སྣང་བའི་རྣམ་པ་དེ། གཟུགས་འཛིན་དབང་མངོན་ཡིན་པའི་ཕྱིར། འདོད་ན། དེ་ཆོས་ཅན། གཟུགས་འཛིན་དབང་མངོན་ལ་མི་སྣང་བར་ཐལ། འདོད་པའི་ཕྱིར། འདོད་མི་ནུས་ཏེ། དེ་ལ་སྣང་བའི་གཟུགས་ཀྱི་རྣམ་པ་ཡིན་པའི་ཕྱིར་ན་མ་ཁྱབ། གཞན་ཡང་གཟུགས་འཛིན་རྟོག་པ་ལ་སྣང་བའི་གཟུགས་ཀྱི་རྣམ་པ་དེ། གཟུགས་འཛིན་རྟོག་པ་ཡིན་པར་ཐལ། གཟུགས་འཛིན་དབང་མངོན་ལ་དེའི་ཕྱིར། འདོད་ན། གཟུགས་ཀྱི་རྣམ་པ་ཤེས་པ་ཡིན་པར་ཐལ། འདོད་པའི་ཕྱིར། འདོད་ན། མི་རྟག་པའི་རྣམ་པ་ཤེས་པ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། ཟག་བཅས་ཉེར་ལེན་གྱི་ཕུང་པོ་ལྔ་པོ་དེ། མི་རྟག་པའི་རྣམ་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། སྡུག་བསྔལ་བདེན་པ་ཡིན་པའི་ཕྱིར་ན་མ་ཁྱབ། གཞན་ཡང་། གཟུགས་འཛིན་དབང་མངོན་ཉམས་སུ་མྱོང་བའི་རང་རིག་ལ་གཟུགས་འཛིན་དབང་མངོན་སྣང་བའི་རྣམ་པ་དེ། དེ་འདྲའི་རང་རིག་གི་གཟུང་རྣམ་ཡིན་པར་ཐལ། གཟུགས་འཛིན་དབང་མངོན་ལ་གཟུགས་སྣང་བའི་རྣམ་པ་དེ་གཟུགས་འཛིན་དབང་མངོན་གྱི་གཟུང་རྣམ་ཡིན་པའི་ཕྱིར་ན་མ་ཁྱབ། འདོད་ན། དེ་ཆོས་ཅན། གཟུང་རྣམ་དུ་ཐལ། འདོད་པའི་ཕྱིར། འདོད་མི་ནུས་ཏེ། འཛིན་རྣམ་ཡིན་པའི་ཕྱིར་ཏེ། རང་རིག་ཡིན་པའི་ཕྱིར་ཏེ། གཟུགས་འཛིན་དབང་མངོན་ཉམས་སུ་མྱོང་བའི་རང་རིག་ཡིན་པའི་ཕྱིར། རྟགས་གྲུབ་སྟེ། གཟུགས་འཛིན་དབང་མངོན་ལ་གཟུགས་སྣང་བའི་རྣམ་པ་དེ་གཟུགས་འཛིན་དབང་མངོན་ཡིན་པའི་ཕྱིར་ཟེར་ན། ཁོ་རང་ལ། དེ་འདྲའི་རང་རིག་གི་གཟུང་རྣམ་ཡོད་པར་ཐལ། གཟུགས་འཛིན་དབང་མངོན་གྱི་དེ་ཡོད་པའི་ཕྱིར། ཁྱབ་པ་ཁས། འདོད་ན། དེ་ཆོས་ཅན། ཁྱོད་ཀྱི་གཟུང་རྣམ་མེད་པར་ཐལ། ཁྱོད་འཛིན་རྣམ་ཡན་གར་བ་ཡིན་པའི་ཕྱིར་ཏེ། རང་རིག་ཡིན་པའི་ཕྱིར། བྱས་པ་ལ་ཁོ་ན་རེ། དེ་འདྲའི་རང་རིག་ཆོས་ཅན། ཤེས་པ་ཡན་གར་བ་ཡིན་པར་ཐལ། འཛིན་རྣམ་ཡན་གར་བ་ཡིན་པའི་ཕྱིར། འདོད་ན། ཟླ་མེད་ཀྱི་ཤེས་པར་ཐལ། འདོད་པའི་ཕྱིར་ན་མ་ཁྱབ། འདོད་མི་ནུས་ཏེ། ཟླ་བཅས་ཀྱི་ཤེས་པ་ཡིན་པའི་ཕྱིར་ཏེ། ཆ་བཅས་ཀྱི་ཤེས་པ་ཡིན་པའི་ཕྱིར། གཞན་ཡང་། ཁོ་ན་རེ། སངས་འཕགས་ཀྱི་རྒྱུད་ཀྱི་རང་རིག་ཆོས་ཅན། འཛིན་རྣམ་ཡན་གར་བ་ཡིན་པར་ཐལ། རང་རིག་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་ཀྱི་གཟུང་རྣམ་མེད་པར་ཐལ་ལོ། །འདོད་མི་ནུས་ཏེ། ཁྱོད་ལ་ཕྱི་རོལ་གྱི་གཟུགས་སྣང་བའི་རྣམ་པ་དེ། ཁྱོད་ཀྱི་གཟུང་རྣམ་ཡིན་པའི་ཕྱིར་ཏེ། ཁྱོད་ཤེས་པ་གང་ཞིག། ཁྱོད་ལ་ཕྱི་རོལ་གྱི་གཟུགས་སྣང་བའི་རྣམ་པ་ཡོད་པའི་ཕྱིར་ན་མ་ཁྱབ་བོ། །ཁོ་རང་གི་ལུགས་ལ། གཟུགས་ཀྱི་རྣམ་པ་གཟུགས་ཡིན་ཟེར་ན། མི་འཐད་པར་ཐལ། གཟུགས་འཛིན་དབང་མངོན་གཟུགས་ཀྱི་རྣམ་པ་ཡིན་པའི་ཕྱིར་ཏེ། བུམ་འཛིན་དབང་མངོན་བུམ་པའི་རྣམ་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། དེའི་རྣམ་པ་ཤར་བའི་བློ་ཡིན་པའི་ཕྱིར། ཁྱབ་པ་ཡོད་དེ། ཐར་ལམ་གསལ་བྱེད་ལས། བུམ་པའི་རྣམ་པར་ཤར་བ་ནི། བུམ་པའི་རྣམ་པ་ཡིན་པའི་དོན་དང་། ཤེས་པའི་རྣམ་པ་ཤར་བ་ནི། ཤེས་པའི་རྣམ་པ་ཡིན་པའི་དོན་ཏེ། ཞེས་གསུངས་པའི་ཕྱིར། གཞན་ཡང་། གཟུགས་འཛིན་དབང་མངོན་ལ་གཟུགས་ཀྱི་རྣམ་པ་སྣང་བར་ཐལ། གཟུགས་ཀྱི་རྣམ་པ་གཟུགས་ཡིན་པའི་ཕྱིར། གཟུགས་ཀྱི་རྣམ་པ་ཤར་བའི་བློ་ཡིན་ན། དེའི་རྣམ་པ་སྣང་བའི་བློ་ཡིན་དགོས་པའི་ཕྱིར། འདོད་མི་ནུས་ཏེ། ཐར་ལམ་གསལ་བྱེད་ལས། དེའི་རྣམ་པ་ཤར་ན་དེའི་རྣམ་པ་སྣང་བའི་ངེས་པ་མེད་དོ། །ཞེས་གསུངས་པའི་ཕྱིར། གཞན་ཡང་། གཟུགས་ཀྱི་རྣམ་པ་ཤེས་པ་ཡིན་པར་ཐལ། ཤེས་པའི་རྣམ་པ་ཤེས་པ་ཡིན་པའི་ཕྱིར་དང་། ཤེས་རྣམ་ཤེས་པ་ཡིན་པའི་ཕྱིར། བྱས་པ་ལ་ཁོ་ན་རེ། ཚད་མའི་རྣམ་པ་ཤེས་པ་ཡིན་པར་ཐལ། ཤེས་པའི་རྣམ་པ་ཤེས་པ་ཡིན་པའི་ཕྱིར། འདོད་མི་ནུས་ཏེ། བུམ་པ་ཚད་མའི་རྣམ་པ་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། དེར་ཐལ། དེའི་དོན་རྣམ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། དེའི་གཞལ་བྱ་ཡིན་པའི་ཕྱིར། རྣམ་པ་གཅིག་ཏུ། གཟུགས་འཛིན་དབང་མངོན་ལ་གཟུགས་གསལ་བར་སྣང་བ་དེ་གཟུགས་ཡིན་པར་ཐལ། སྐྲ་ཤད་འཛག་སྣང་གི་དབང་ཤེས་ལ་སྐྲ་ཤད་འཛག་པར་སྣང་བ་དེ་དང་། སྨིག་རྒྱུ་ཆུར་སྣང་བའི་དབང་ཤེས་ལ། སྨིག་རྒྱུ་ཆུར་སྣང་བ་དེ་དང་། བྱད་བཞིན་གྱི་གཟུགས་བརྙན་བྱད་བཞིན་དུ་སྣང་བའི་མིག་ཤེས་ལ་བྱད་བཞིན་གྱི་གཟུགས་བརྙན་བྱད་བཞིན་དུ་སྣང་བ་དེ་རྣམས་གཟུགས་ཀྱི་སྐྱེ་མཆེད་ཡིན་པའི་ཕྱིར། དེ་རྣམས་རང་འཛིན་མིག་ཤེས་ཀྱི་སྣང་ཡུལ་དུ་གྱུར་པའི་གཟུགས་ཡིན་པའི་ཕྱིར། རྟགས་གྲུབ་སྟེ། སྟོང་ཐུན་ལས། དབང་ཤེས་ལ་སྐྲ་ཤད་སྣང་བ་དང་། སྨིག་རྒྱུ་ལ་ཆུར་སྣང་བ་དང་། བྱད་བཞིན་གཟུགས་བརྙན་དུ་སྣང་བ་རྣམས་གཟུགས་ཀྱི་སྐྱེ་མཆེད་ཡིན་པའི་ཕྱིར་ཏེ། དབང་ཤེས་ཀྱི་སྣང་ཡུལ་དུ་གྱུར་པའི་གཟུགས་ཡིན་པའི་ཕྱིར། ཞེས་གསུངས་པའི་ཕྱིར། གཞན་ཡང་། གཟུགས་འཛིན་དབང་མངོན་ལ་གཟུགས་སྣང་བ་དེ། གཟུགས་སུ་ཐལ། དེ་ཕྱི་རོལ་གྱི་དོན་ཡིན་པའི་ཕྱིར་ཏེ། དེ་ཕྱི་རོལ་དོན་དུ་གྱུར་པའི་གཟུགས་འཛིན་དབང་མངོན་དང་། ལྷན་ཅིག་དམིགས་ངེས་ཡིན་པའི་ཕྱིར་ཏེ། དེ་དང་གཟུགས་འཛིན་དབང་མངོན་གཉིས་ཕྱི་རོལ་དོན་ལ་ལྟོས་པའི་ལྷན་ཅིག་དམིགས་ངེས་ཡིན་པའི་ཕྱིར་ཏེ། ཕྱི་རོལ་དོན་ལ་བརྟེན་ནས་སུ། །ཚུལ་གཉིས་བརྗོད་ཡིན་དེ་ཡང་ནི། །ལྷན་ཅིག་མྱོང་བས་ངེས་པར་འགྲུབ། །ཅེས་གསུངས་པའི་ཕྱིར། བྱས་པ་ལ་ཁོ་ན་རེ། གཟུགས་འཛིན་དབང་མངོན་ལ་གཟུགས་སྣང་བ་ཆོས་ཅན། རང་འཛིན་དབང་མངོན་གྱི་བདག་ཉིད་དུ་ཐལ། གཟུགས་འཛིན་དབང་མངོན་གྱི་བདག་ཉིད་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། དེ་དང་ལྷན་ཅིག་དམིགས་ངེས་ཡིན་པའི་ཕྱིར། ཁ་ཅིག་ན་རེ། བྱི་བའི་མིག་ཤེས་ལ། གླང་པོ་ཆེའི་གཟུགས་སྣང་བ་དེ། གླང་པོ་ཆེའི་གཟུགས་སུ་ཐལ། གཟུགས་འཛིན་དབང་མངོན་ལ་གཟུགས་སྣང་བ་དེ་གཟུགས་ཡིན་པའི་ཕྱིར། འདོད་ན། བྱི་ཁུང་ནང་གི་བྱི་བའི་མིག་ཤེས་ལ། གླང་པོ་ཆེའི་གཟུགས་སྣང་བ་དེ། གླང་པོ་ཆེའི་གཟུགས་སུ་ཐལ། འདོད་པའི་ཕྱིར། འདོད་ན། བྱི་ཁུང་ནང་དུ་གླང་པོ་ཆེའི་གཟུགས་ཤོང་བར་ཐལ། འདོད་པའི་ཕྱིར་ན་མ་ཁྱབ་བོ། །

སྤྱི་མཚན་དངོས་མེད་དུ་སྒྲུབ་པའི་རིགས་པ་བཤད་པ།

༈ བརྗོད་བྱ་ཉིད་ཕྱིར་དེ་དངོས་མིན། །ཞེས་སོགས་རྐང་པ་གཉིས་གང་ལས་འཕྲོས་ན། སྤྱི་ཡི་མཚན་ཉིད་རྗེས་འགྲོ་ལྡོག །ཅེས་པའི་སྐབས་སུ། སྤྱི་མཚན་དངོས་མེད་དུ་སྒྲུབ་པའི་རིགས་པ་མདོར་བསྟན་ནས། དེ་རྒྱས་པར་འཆད་པར་བྱེད་པ་ལ་སྤྱི་མཚན་དངོས་མེད་དུ་སྒྲུབ་པའི་རིགས་པ་བརྒྱད་ཡོད་པ་ལས། དང་པོ་འཆད་པ་ལ་གཞུང་འདི་གསུངས། ངག་དོན་ནི། གཟུགས་ཀྱི་དོན་སྤྱི་ཆོས་ཅན། དངོས་པོ་མ་ཡིན་ཏེ། རྟོག་པའི་སྣང་ཡུལ་དུ་གྱུར་པའི་སྒོ་ནས། རྗོད་བྱེད་ཀྱི་སྒྲའི་བརྗོད་བྱ་ཉིད་ཡིན་པའི་ཕྱིར། ཁྱབ་སྟེ། གཟུགས་དེའི་སྣང་ཡུལ་དུ་གྱུར་པའི་སྒོ་ནས་རྗོད་བྱེད་ཀྱི་སྒྲའི་བརྗོད་བྱ་མ་ཡིན་པའི་ཕྱིར། དེ་ལྟར་ཡིན་ན། གཟུགས་དེ་གཟུགས་འཛིན་རྟོག་པ་ལ་ཡང་གསལ་བར་སྣང་དགོས། དེ་ལྟར་ན། གཟུགས་དེ་ལོང་བའི་རྒྱུད་ཀྱི་གཟུགས་འཛིན་རྟོག་པ་ལ་ཡང་གསལ་བར་སྣང་དགོས། དེ་ལྟར་ན་གཟུགས་འཛིན་དབང་ཤེས་སྐྱེ་བ་ལ། ཁོའི་རྐྱེན་གསུམ་དོན་མེད་དུ་འགྱུར་བ་ལས། ཁོ་སྐྱེ་བ་ལ་ཁོའི་རྐྱེན་གསུམ་དགོས་པ་དང་བཅས་པ་ཡིན་པའི་ཕྱིར། །

༈ མཐའ་དཔྱད་པ་ལ། རང་རེས། དོན་དམ་པར་རྗོད་བྱེད་ཀྱི་སྒྲའི་བརྗོད་བྱ་ཡིན་ན། དངོས་མེད་ཡིན་པས་ཁྱབ། བྱས་པ་ལ་ཁོ་ན་རེ། གཟུགས་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། དེ་དོན་དམ་པར་རྗེས་དཔག་གི་ཡུལ་ཡིན་པའི་ཕྱིར་ཏེ། དེར་ཚད་མའི་ཡུལ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། དེར་ཚད་མས་དམིགས་པ་ཡིན་པའི་ཕྱིར། དེར་ཡོད་པ་ཡིན་པའི་ཕྱིར། གཞན་ཡང་། ཚད་མ་གཟུགས་ལ་དོན་དམ་པར་འཇུག་པའི་ཚད་མར་ཐལ། གཟུགས་དོན་དམ་པར་ཚད་མའི་ཡུལ་ཡིན་པའི་ཕྱིར། ཁྱབ་སྟེ། གཟུགས་དོན་དམ་པར་རྗེས་དཔག་གི་ཡུལ་ཡིན་ན། རྗེས་དཔག་དོན་དམ་པར་གཟུགས་ལ་འཇུག་པའི་ཤེས་པ་ཡིན་དགོས་པའི་ཕྱིར། རྟགས་ཁས། འདོད་ན། ཚད་མ་དོན་དམ་པར་གཟུགས་ལ་དངོས་དབང་གིས་འཇུག་པའི་ཚད་མར་ཐལ་ལོ། །འདོད་ན། ཚད་མ་མངོན་སུམ་གྱི་ཚད་མར་ཐལ་ལོ། །འདོད་ན། སོ་སྐྱེའི་རྒྱུད་ཀྱི་དེ་དེ་ཡིན་པར་ཐལ། འདོད་པའི་ཕྱིར་ན་མ་ཁྱབ། བྱས་པ་ལ་ཁོ་ན་རེ། དེའི་རྒྱུད་ཀྱི་ཚད་མ་མངོན་སུམ་གྱི་དེར་ཐལ། དེ་གཟུགས་ལ་དངོས་དབང་གིས་འཇུག་པའི་ཚད་མ་ཡིན་པའི་ཕྱིར་ཏེ། དེ་དེ་ལ་དོན་དམ་པར་འཇུག་པའི་ཚད་མ་ཡིན་པའི་ཕྱིར་ཏེ། གཟུགས་དོན་དམ་པར་དེའི་རྒྱུད་ཀྱི་ཚད་མའི་ཡུལ་ཡིན་པའི་ཕྱིར། ཁྱབ་སྟེ། གཟུགས་དེར་ཚུར་མཐོང་གི་རྒྱུད་ཀྱི་རྗེས་དཔག་གི་ཡུལ་ཡིན་ན། དེའི་རྒྱུད་ཀྱི་རྗེས་དཔག་དེ། གཟུགས་ལ་དོན་དམ་པར་འཇུག་པའི་བློ་ཡིན་དགོས་པའི་ཕྱིར་ན་མ་ཁྱབ། རྟགས་གྲུབ་སྟེ། གཟུགས་དོན་དམ་པར་དེའི་རྒྱུད་ཀྱི་གཟུགས་འཛིན་དབང་མངོན་གྱི་ཡུལ་ཡིན་པའི་ཕྱིར། དེ་དོན་དམ་པར་དེའི་རྒྱུད་ཀྱི་གཟུགས་འཛིན་མིག་ཤེས་ཀྱི་ཡུལ་ཡིན་པའི་ཕྱིར་ཏེ། དེའི་རྒྱུད་ཀྱི་གཟུགས་འཛིན་མིག་ཤེས་དེ། གཟུགས་ལ་དོན་དམ་པར་འཇུག་པའི་ཤེས་པ་ཡིན་པའི་ཕྱིར། ཁོ་ན་རེ། གཟུགས་དོན་དམ་པར་རྗོད་བྱེད་ཀྱི་སྒྲའི་བརྗོད་བྱ་ཡིན་པར་ཐལ། གཟུགས་དོན་དམ་པར་བརྗོད་པའི་ངག་ཡོད་པའི་ཕྱིར། དེ་དེར་ཁས་བླངས་པའི་ཁས་བླངས་ཡོད་པའི་ཕྱིར། མདུན་གྱི་སྐྱེས་བུ་ལན་འདེབས་པ་པོས་དེ་དེར་ཁས་བླངས་པའི་ཁས་བླངས་ཡོད་པའི་ཕྱིར། མ་གྲུབ་ན། གཟུགས་ཆོས་ཅན། དོན་དམ་པ་ཡིན་པར་ཐལ། དངོས་པོ་ཡིན་པའི་ཕྱིར། འདོད་ན། དངོས་འགལ་ཡིན་ཟེར་ན། དངོས་འགལ་མ་ཡིན་ཏེ། འོ་ན། རང་ཡུལ་གསལ་བར་བརྗོད་པའི་ངག་ཡོད་པར་ཐལ། སྤྱི་མཚན་གསལ་བར་བརྗོད་པའི་ངག་ཡོད་པའི་ཕྱིར་ཏེ། སྤྱི་མཚན་གསལ་བར་ཁས་བླངས་པའི་ཁས་བླངས་ཡོད་པའི་ཕྱིར། མདུན་གྱི་སྐྱེས་བུ་ལན་འདེབས་པ་པོས་དེ་ལྟར་ཁས་བླངས་པའི་ཁས་བླངས་ཡོད་པའི་ཕྱིར། མ་གྲུབ་ན། སྤྱི་མཚན་ཆོས་ཅན། གསལ་བ་ཡིན་པར་ཐལ། སྤྱི་གསལ་གཉིས་སུ་ཕྱེ་བའི་གསལ་བ་ཡིན་པའི་ཕྱིར། འདོད་ན། ཁྱོད་རང་ལྟར་ན་དངོས་འགལ། བྱས་པ་ལ་ཁོ་ན་རེ། གཟུགས་དོན་དམ་པར་རྗོད་བྱེད་ཀྱི་སྒྲའི་བརྗོད་བྱ་ཡིན་པར་ཐལ། དེ་དེར་རྟོག་པའི་ཡུལ་ཡིན་པའི་ཕྱིར་ཏེ། གཟུགས་དོན་དམ་པར་འཛིན་པའི་རྟོག་པ་ཡོད་པའི་ཕྱིར། གཟུགས་དོན་དམ་པར་དོན་བྱེད་ནུས་པར་འཛིན་པའི་རྟོག་པ་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། དོན་དམ་པར་དོན་བྱེད་ནུས་པར་འཛིན་པའི་རྟོག་པ་ཡོད་པ་གང་ཞིག །དོན་དམ་པར་དོན་བྱེད་ནུས་པ་དེ་དོན་དམ་བདེན་པའི་མཚན་ཉིད་ཡིན་པའི་ཕྱིར་ཟེར་ན། ཁོ་རང་ལ། ཤེས་པ་གསལ་བར་འཛིན་པའི་རྟོག་པ་ཡོད་པར་ཐལ། ཤེས་པ་གསལ་ཞིང་རིག་པར་འཛིན་པའི་རྟོག་པ་ཡོད་པའི་ཕྱིར། ཁྱབ་པ་ཁས། རྟགས་གྲུབ་སྟེ། ཤེས་པ་རིག་པར་འཛིན་པའི་རྟོག་པ་ཡོད་པའི་ཕྱིར། རྩ་བར་འདོད་ན། རང་ཡུལ་གསལ་བར་འཛིན་པའི་རྟོག་པ་ཡོད་པར་ཐལ། འདོད་པའི་ཕྱིར། ཁོ་ན་རེ། དོན་དམ་པར་གཟུགས་ཡུལ་དུ་བྱེད་པའི་ཤེས་པ་ཡིན་ན། གཟུགས་ལ་དོན་དམ་པར་འཇུག་པའི་ཤེས་པ་ཡིན་དགོས་པར་ཐལ། རྗེས་དཔག་དེ་རང་ཡུལ་ལ་དོན་དམ་པར་འཇུག་པའི་ཤེས་པ་མ་ཡིན་པའི་ཕྱིར། འདོད་ན། དོན་དམ་པར་གཟུགས་རྟོགས་པའི་ཚད་མ་ཡིན་ན། གཟུགས་དོན་དམ་པར་རྟོགས་པའི་ཚད་མ་ཡིན་དགོས་པར་ཐལ། འདོད་པའི་ཕྱིར་ན་མ་ཁྱབ། འདོད་ན། གཟུགས་འཛིན་དབང་མངོན་ཆོས་ཅན། དེར་ཐལ། དེའི་ཕྱིར། འདོད་ན། དེ་ཆོས་ཅན། གཟུགས་བདེན་པར་རྟོགས་པའི་ཚད་མ་ཡིན་པར་ཐལ། འདོད་པའི་ཕྱིར། བྱས་པ་ལ་ཁོ་ན་རེ། གཟུགས་འཛིན་དབང་མངོན་དེ། གཟུགས་དོན་དམ་པར་རྟོགས་པའི་ཚད་མ་ཡིན་ཀྱང་། གཟུགས་བདེན་པར་རྟོགས་པའི་ཚད་མ་མ་ཡིན་ཟེར་ན། དེ་ཆོས་ཅན། གཟུགས་བདེན་པར་རྟོགས་པའི་ཚད་མ་ཡིན་པར་ཐལ། བདེན་པར་གཟུགས་རྟོགས་པའི་ཚད་མ་ཡིན་པའི་ཕྱིར། ཁྱབ་སྟེ། དོན་དམ་པར་གཟུགས་རྟོགས་པའི་ཚད་མ་ཡིན་ན། གཟུགས་དེར་རྟོགས་པའི་ཚད་མ་ཡིན་དགོས་པའི་ཕྱིར། རྟགས་ཁས། ཁ་ཅིག་ན་རེ། རྗོད་བྱེད་ཀྱི་སྒྲའི་དངོས་ཀྱི་བརྗོད་བྱ་ཡིན་ན། དངོས་མེད་ཡིན་པས་ཁྱབ་ཟེར་ན། རྟེན་བཅས་ཀྱི་མིག་དབང་གཟུགས་ཅན་པ་ཆོས་ཅན། ལུང་ལ་བརྟེན་ནས་དངོས་སུ་རྟོགས་པར་བྱ་བ་མ་ཡིན་པར་ཐལ། ལུང་གི་དངོས་ཀྱི་བརྗོད་བྱ་མ་ཡིན་པའི་ཕྱིར་ཏེ། རྗོད་བྱེད་ཀྱི་སྒྲའི་དངོས་ཀྱི་བརྗོད་བྱ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། དངོས་མེད་ཡིན་པར་ཐལ། མ་གྲུབ་པ་དེའི་ཕྱིར། ཁྱབ་པ་ཁས། རྩ་བར་འདོད་མི་ནུས་ཏེ། ཤིན་ཏུ་ལྐོག་གྱུར་ཡིན་པའི་ཕྱིར། གཞན་ཡང་། རྟོག་གེའི་ཚིག་དོན་བརྒྱད་ཆོས་ཅན། དངོས་མེད་དུ་ཐལ། རྗོད་བྱེད་ཀྱི་སྒྲའི་དངོས་ཀྱི་བརྗོད་བྱ་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། བསྟན་བཅོས་རྣམ་འགྲེལ་གྱི་དངོས་ཀྱི་བརྗོད་བྱ་ཡིན་པའི་ཕྱིར། བསྟན་བཅོས་རྣམ་འགྲེལ་དེ་དེ་དངོས་བསྟན་བསྟན་བྱའི་གཙོ་བོར་བྱས་ནས་སྟོན་པའི་བསྟན་བཅོས་ཡིན་པའི་ཕྱིར་ཏེ། རྟོག་གེའི་ཚིག་དོན་བརྒྱད་དངོས་སུ་བསྟན་བྱའི་གཙོ་བོར་བྱས་ནས་སྟོན་པའི་བསྟན་བཅོས་ཤིག་ཡོད་པའི་ཕྱིར། གཞན་ཡང་། བ་ལང་ཆོས་ཅན། དངོས་མེད་དུ་ཐལ། དེའི་ཕྱིར། ཁྱབ་པ་ཁས། རྟགས་གྲུབ་སྟེ། བ་ལང་གི་དཀར་པོ་ཞེས་པའི་སྒྲའི་དངོས་ཀྱི་བརྗོད་བྱ་ཡིན་པའི་ཕྱིར། རྟགས་གྲུབ་སྟེ། བ་ལང་གི་དཀར་པོ་ཞེས་པའི་སྒྲ་དེ། བ་ལང་དངོས་སུ་བརྗོད་པས་བ་ལང་ལ་ལྟོས་ཏེ་ཆོས་བརྗོད་ཀྱི་སྒྲ་དང་། བ་ལང་དཀར་པོ་ཞེས་པའི་སྒྲ་དེ་བ་ལང་དངོས་སུ་བརྗོད་པས་བ་ལང་ལ་ལྟོས་ཏེ་ཆོས་ཅན་བརྗོད་པའི་སྒྲ་ཡིན་པའི་ཕྱིར། གཉིས་ཀས་གཅིག་གཅིག་བརྗོད་མོད་ཀྱི། །ཞེས་གསུངས་པའི་ཕྱིར། །

དུས་གསུམ་སོ་སོའི་རྣམ་གཞག་བཤད་པ།

༈ འདས་དང་མ་འོངས་བརྗོད་བྱ་མིན། །ཞེས་སོགས་འདི་གང་ལས་འཕྲོས་ན། དབང་སོགས་འབྲས་བཅས་ཉིད་ཕྱིར་རོ། །ཞེས་བཤད་པ་ལ་མང་བཀུར་བ་ན་རེ། བུམ་པ་ཞེས་པའི་སྒྲས་བུམ་པ་བརྗོད་ན། སྔར་གྱི་སྐྱོན་དེ་འཇུག་ན་ཡང་། ངེད་ཀྱི་ལུགས་ལ་བུམ་པ་ཞེས་པའི་སྒྲས་བུམ་པ་མ་བརྗོད་པས་སྔར་གྱི་སྐྱོན་དེ་ལྟར་མི་འཇུག་ཅིང་། བུམ་པ་ཞེས་པའི་སྒྲས་བུམ་པ་མ་བརྗོད་ཀྱང་ཁོའི་བརྗོད་བྱ་བཞག་ཏུ་ཡོད་དེ། བུམ་པའི་མིང་སོགས་ལྡན་མིན་འདུ་བྱེད་དེ་བུམ་པ་ཞེས་པའི་སྒྲའི་བརྗོད་བྱ་ཡིན་པའི་ཕྱིར། ཞེས་པའི་འདོད་པ་རྗོད་པར་བྱེད་པ་ལ། མིང་སོགས་བརྗོད་ན། ཞེས་པ་འདི་བྱུང་། འོ་ན། ཁྱོད་ཀྱི་དེ་གང་ལ་བྱེད། བུམ་པ་ཞེས་པའི་སྒྲས་བུམ་པ་ཞེས་པའི་སྒྲ་འཆད་པ་པོ་དང་། དེ་ཉན་པ་པོའི་བློའི་ཡུལ་དང་འབྲེལ་བའི་བུམ་པའི་མིང་སོགས་ལྡན་མིན་འདུ་བྱེད་རྗོད་པར་བྱེད་པ་ཡིན་ནམ། བུམ་པ་ཞེས་པའི་སྒྲ་འཆད་པ་པོ་དང་། ཉན་པ་པོའི་བློ་ཡུལ་གང་དང་མ་འབྲེལ་བ་དེ་བུམ་པའི་མིང་སོགས་ལྡན་མིན་འདུ་བྱེད་བརྗོད་པ་ཡིན་ནམ། དོན་བུམ་པ་རྐྱང་པ་དང་འབྲེལ་བའི་བུམ་པའི་མིང་སོགས་ལྡན་མིན་འདུ་བྱེད་བརྗོད་པར་བྱེད་པ་དག་ལས་གང་ཡིན། ཞེས་པའི་དྲི་བ་དེ་འཆད་པར་བྱེད་པ་ལ། འཆད་པོ་དང་། ཉན་པོ་བརྗོད་བྱ་རྗེས་འབྲེལ་ཅན། །ཞེས་སོགས་རྐང་པ་ཕྱེད་དང་གསུམ་བྱུང་། དྲི་བ་དང་པོ་ལྟར་རམ། ཟེར་ན། བུམ་པ་དོན་གཉེར་གྱི་སྐྱེས་བུ་དེས་བུམ་པ་ཞེས་པའི་ངག་ལ་བརྟེན་ནས་དོན་བུམ་པ་ལ་འཇུག་པར་མི་འགྱུར་བར་ཐལ། བུམ་པ་ཞེས་པའི་སྒྲ་དེས། བུམ་པ་ཞེས་པའི་སྒྲ་འཆད་པ་པོ་དང་། ཉན་པ་པོའི་བློའི་ཡུལ་དང་འབྲེལ་བའི་བུམ་པའི་མིང་སོགས་ལྡན་མིན་འདུ་བྱེད་བརྗོད་པའི་ཕྱིར། ཞེས་འཆད་པར་བྱེད་པ་ལ། དོན་ལ་འཇུག་པར་མི་འགྱུར་རོ། །ཞེས་པ་འདི་བྱུང་། དེ་ལྟར་བྱས་པ་ལ་ཁོ་ན་རེ། བུམ་པ་དོན་གཉེར་གྱི་སྐྱེས་བུ་དེས་བུམ་པ་དང་བུམ་པའི་མིང་སོགས་ལྡན་མིན་འདུ་བྱེད་གཉིས་གཅིག་ཏུ་འཁྲུལ་ནས་བུམ་པ་ཞེས་པའི་ངག་ལ་བརྟེན་ནས་དོན་བུམ་པ་ལ་འཇུག་པ་ཡིན་པས། སྐྱོན་མེད་ཅེས་འདོད་པ་རྗོད་པར་བྱེད་པ་ལ། གལ་ཏེ་དོན་ལ་ཚུལ་འདྲ་ལས། །ཞེས་སོགས་རྐང་པ་ཕྱེད་དང་གཉིས་བྱུང་། དེ་ལྟར་ཡིན་ན། བུམ་པ་དོན་གཉེར་གྱི་སྐྱེས་བུ་དེས། ཡུལ་དུས་ཀུན་ཏུ་བུམ་པ་དང་དེའི་མིང་སོགས་ལྡན་མིན་འདུ་བྱེད་གཉིས་གཅིག་ཏུ་འཁྲུལ་པ་ལ་བརྟེན་ནས་དོན་བུམ་པ་ལ་འཇུག་དགོས་པས་སྐྱོན་སྤོང་མི་ནུས་སོ། །ཞེས་འཆད་པར་བྱེད་པ་ལ། དུས་ཀུན་དང་། ཡུལ་ལ་འཁྲུལ་པ་མིན། ཞེས་པ་འདི་བྱུང་། དེ་ལྟར་བྱས་པ་ལ་ཁོ་ན་རེ། ཁྱོད་རང་ལ་ཡང་། བུམ་པ་དོན་གཉེར་གྱི་སྐྱེས་བུ་དེས། བུམ་པ་ཞེས་པའི་ངག་ལ་བརྟེན་ནས་དོན་བུམ་པ་ལ་འཇུག་པ་དེ་མ་ཡིན་པར་ཐལ། བུམ་པ་ཞེས་པའི་ངག་དེས། བུམ་འཛིན་རྟོག་པ་ལ་བུམ་པ་སྣང་བ་དེ་བརྗོད་པའི་ཕྱིར་ཟེར་ན། སྐྱོན་མེད་དེ། ངེད་ཀྱིས་བུམ་པ་ཞེས་པའི་ངག་ལ་བརྟེན་ནས་བུམ་པའི་རྣམ་པ་ཤར་བའི་བློ་སྐྱེ་བར་ཁས་ལེན། ཁྱོད་མང་བཀུར་བས། རང་ཡུལ་གྱི་རྣམ་པ་ཤར་བའི་བློ་ཁས་མི་ལེན་པའི་ཕྱིར། ཞེས་འཆད་པར་བྱེད་པ་ལ། ཤེས་པ་ལ། མཚུངས་མིན། ཞེས་སོགས་རྐང་པ་ཕྱེད་དང་ལྔ་བྱུང་། དེ་ལྟར་བྱས་པ་ལ་ཁོ་ན་རེ། ངེད་ཀྱིས་རང་ཡུལ་གྱི་རྣམ་པ་ཤར་བའི་བློ་ཁས་ལེན་པ་ཡིན་ཏེ། མིང་སོགས་འཛིན་པའི་རྟོག་པ་དེས་མིང་སོགས་གཟུང་དོན་དུ་བྱེད་པའི་སྒོ་ནས་དེ་ལ་མིང་སོགས་ཀྱི་རྣམ་པ་ཤར་བའི་ཕྱིར་ཞེ་ན། དེ་འགོག་པར་བྱེད་པ་ལ། ཁས་ལེན་ན་ཡང་རྣམ་ཤེས་ལས། །ཞེས་སོགས་རྐང་པ་གསུམ་བྱུང་། ཁོ་ན་རེ། མིང་སོགས་འཛིན་པའི་རྟོག་པའི་གཟུང་དོན་ཡོད་པ་ཡིན་ཏེ། ཤེས་པ་ཀུན་གཟུང་དོན་དང་ལྡན་པའི་ཕྱིར། ཞེས་པའི་འདོད་པ་རྗོད་པར་བྱེད་པ་ལ། ཤེས་ཀུན་དོན་ལྡན་ཕྱིར་ཞེས་ན། །ཞེས་པ་འདི་བྱུང་། འོ་ན། ཤེས་པ་ཀུན་གཟུང་དོན་དང་ལྡན་པ་མ་ཡིན་པར་ཐལ། རྨི་ལམ་གྱི་སྔོན་པོ་རྨིས་པའི་ཤེས་པ་དེའི་གཟུང་དོན་མེད་པའི་ཕྱིར། མ་གྲུབ་ན། དེར་ཐལ། དེས་རྨི་ལམ་གྱི་སྔོན་པོའི་མིང་སོགས་ལྡན་མིན་འདུ་བྱེད་དེ་ཡང་གཟུང་དོན་དུ་མི་བྱེད། དེས་རྨི་ལམ་གྱི་སྔོན་པོ་དེ་ཡང་གཟུང་དོན་དུ་མི་བྱེད་པའི་ཕྱིར། དང་པོ་གྲུབ་སྟེ། རྨི་ལམ་གྱི་སྔོན་པོ་རྨིས་པའི་ཤེས་པ་དེ་ལ་རྨི་ལམ་གྱི་སྔོན་པོ་སྣང་གི། རྨི་ལམ་གྱི་སྔོན་པོའི་མིང་སོགས་ལྡན་མིན་འདུ་བྱེད་མི་སྣང་བའི་ཕྱིར། ཞེས་འཆད་པར་བྱེད་པ་ལ། འཐད་མིན་རྨི་སོགས་རྣམ་གཞན་དུ། །ཞེས་སོགས་རྐང་པ་གསུམ་བྱུང་། གཉིས་པ་གྲུབ་སྟེ། རྨི་ལམ་གྱི་སྔོན་པོ་དེ་ཐོགས་མེད་ཡིན་པའི་ཕྱིར་དང་། རྨི་ལམ་གྱི་སྔོན་པོ་དེ་རྨི་ལམ་གྱི་སྔོན་པོ་རྨིས་པའི་ཤེས་པ་དེའི་བདག་ཉིད་ཡིན་པའི་ཕྱིར། ཞེས་འཆད་པར་བྱེད་པ་ལ། ཐོགས་མེད་ཕྱིར་ན་སྔོ་སོགས་མིན། །ཞེས་སོགས་རྐང་པ་གསུམ་བྱུང་། འོ་ན། རྨི་ལམ་གྱི་སྔོན་པོ་དེ་རྨི་ལམ་གྱི་སྔོན་པོ་རྨིས་པའི་ཤེས་པའི་བདག་ཉིད་དུ་བསྟན་པ་ལ་སོགས་པའི་དགོས་པ་གང་ཡོད་ཅེ་ན། དེ་ལྟར་བསྟན་པ་ལ་དགོས་པ་ཡོད་དེ། མིང་སོགས་འཛིན་པའི་རྟོག་པ་ལ་མིང་སོགས་སྣང་བ་དེ། མིང་སོགས་འཛིན་པའི་རྟོག་པའི་བདག་ཉིད་ཡིན་ནོ། །ཞེས་ཤེས་པར་བྱ་བའི་ཆེད་ཡིན་པའི་ཕྱིར། ཞེས་འཆད་པར་བྱེད་པ་ལ། དེས་ནི་མིང་སོགས་བརྗོད་པ་ཡིན། །ཞེས་པ་འདི་བྱུང་། དེ་ཡན་གྱིས་གཟུང་དོན་གྱི་འཛིན་པའི་སྒོ་ནས་རྟོག་པའི་གཟུང་དོན་བཀག་ནས། གཟུང་དོན་གྱི་མཚན་ཉིད་ཀྱི་སྒོ་ནས་རྟོག་པའི་གཟུང་དོན་འགོག་པར་བྱེད་པ་ལ། མིག་ལ་སོགས་པའི་བློ་འདོད་པ། །ཞེས་སོགས་བྱུང་། འོ་ན། གཟུགས་འཛིན་མིག་ཤེས་དེ་གཟུང་དོན་དང་ལྡན་ན་དེ་དེ་དང་ལྡན་པའི་རྒྱུ་མཚན་གང་ཞེ་ན། ཞེས་པའི་དྲི་བ་དེ་འགོད་པར་བྱེད་པ་ལ། མིག་ལ་སོགས་པའི་བློ་འདོད་པ། །ཞེས་སོགས་རྐང་པ་གཉིས་བྱུང་། དེ་ལྟར་བྱས་པ་ལ་ཁོ་ན་རེ། གཟུགས་འཛིན་མིག་ཤེས་ཆོས་ཅན། རང་གི་གཟུང་དོན་དང་ལྡན་པ་ཡིན་ཏེ། རང་གི་གཟུང་དོན་ཕན་འདོགས་བྱེད་དུ་ཡོད་མེད་ཀྱི་རྗེས་སུ་འགྲོ་ལྡོག་བྱེད་པའི་ཕྱིར། ཞེས་པའི་འདོད་པ་རྗོད་པར་བྱེད་པ་ལ། གལ་ཏེ་དོན་ནུས་མཐོང་ཕྱིར་ན། །ཞེས་པ་འདི་བྱུང་། དེ་ལྟར་ཟེར་ན། མིང་སོགས་འཛིན་པའི་རྟོག་པ་ཆོས་ཅན། ཁྱོད་ཀྱི་གཟུང་དོན་མེད་པར་ཐལ། ཁྱོད་རང་གི་གཟུང་དོན་ལ་ཕན་འདོགས་བྱེད་དུ་ཡོད་མེད་ཀྱི་རྗེས་སུ་འགྲོ་ལྡོག་མི་བྱེད་པའི་ཕྱིར་ཏེ། ཁྱོད་ཀྱི་གཟུང་དོན་གྱིས་ཁྱོད་སྐྱེད་པའི་ནུས་པ་མངོན་སུམ་གྱི་ཚད་མས་མ་གྲུབ་པའི་ཕྱིར། ཞེས་འཆད་པར་བྱེད་པ་ལ། གཞན་པ་དོན་མེད་ཅན་ཐོབ་འགྱུར། །ཞེས་པ་འདི་བྱུང་། སྔར་གྱི་དྲི་བ་གཉིས་པ་ལྟར་ཡིན་ནོ་ཟེར་ན། འོ་ན། བུམ་པ་དོན་གཉེར་གྱི་སྐྱེས་བུ་དེས། བུམ་པ་ཞེས་པའི་ངག་ལ་བརྟེན་ནས། དོན་བུམ་པ་ལ་འཇུག་པར་མི་འགྱུར་བར་ཐལ། བུམ་པ་ཞེས་པའི་སྒྲ་དེས། བུམ་པ་ཞེས་པའི་སྒྲ་འཆད་པ་པོ་དང་། ཉན་པ་པོའི་བློའི་ཡུལ་གང་དང་ཡང་མ་འབྲེལ་བའི་བུམ་པའི་མིང་སོགས་ལྡན་མིན་འདུ་བྱེད་བརྗོད་པའི་ཕྱིར། ཞེས་འཆད་པར་བྱེད་པ་ལ། འབྲེལ་མེད་ན་ཡང་འཇུག་མི་འགྱུར། །ཞེས་པ་འདི་བྱུང་། གལ་ཏེ་ཁོ་ན་རེ། དྲི་བ་གསུམ་པ་ལྟར་ཡིན་ཏེ། བུམ་པ་ཞེས་པའི་སྒྲས་བུམ་པ་དང་གྲུབ་བདེ་རྫས་གཅིག་པའི་བུམ་པའི་མིང་སོགས་ལྡན་མིན་འདུ་བྱེད་བརྗོད་པའི་ཕྱིར། དེར་ཐལ། དེས་བུམ་པ་བརྗོད་པ་གང་ཞིག །ཆོས་དེ་ཡོད་ཆོས་དེ་བརྗོད་པའི་ངག་ཡིན་ན། ཆོས་དེ་དང་གྲུབ་བདེ་རྫས་གཅིག་ཏུ་གྱུར་པའི་ཆོས་དེའི་མིང་སོགས་ལྡན་མིན་འདུ་བྱེད་བརྗོད་པའི་ངག་ཡིན་དགོས་པའི་ཕྱིར། ཞེས་པའི་འདོད་པ་རྗོད་པར་བྱེད་པ་ལ། གལ་ཏེ་དོན་དང་འབྲེལ་ལྡན་ན། །ཞེས་པ་འདི་བྱུང་། འོ་ན། རྗོད་བྱེད་ཀྱི་སྒྲས་བུམ་པ་འདས་པ་དང་། བུམ་པ་མ་འོངས་པ་གཉིས་མ་བརྗོད་པར་ཐལ། དེ་གཉིས་ཡོད་པ་གང་ཞིག །རྗོད་བྱེད་ཀྱི་སྒྲས་དེ་གཉིས་དང་གྲུབ་བདེ་རྫས་གཅིག་ཏུ་གྱུར་པའི་དེ་གཉིས་ཀྱི་མིང་སོགས་ལྡན་མིན་འདུ་བྱེད་མ་བརྗོད་པའི་ཕྱིར། ཁྱབ་པ་ཁས། ཕྱི་མ་གྲུབ་སྟེ། དེ་གཉིས་དང་གྲུབ་བདེ་རྫས་གཅིག་མེད་པའི་ཕྱིར། བུམ་པ་འདས་པ་དེ་བུམ་པ་ཟད་པའི་མེད་དགག་གི་ཆ་ཡིན་པས་དངོས་པོར་མེད། བུམ་པ་མ་འོངས་པ་དེ། བུམ་པ་མ་སླེབ་པའི་མེད་དགག་གི་ཆ་ཡིན་པས། དངོས་པོར་མེད་པའི་ཕྱིར་ཞེས་འཆད་པར་བྱེད་པ་ལ། འདས་དང་མ་འོངས་བརྗོད་བྱ་མིན། །དོན་དང་དེ་ནི་ཟད་ཕྱིར་རོ། །ཞེས་པ་འདི་བྱུང་། །

༈ འདིའི་སྐབས་སུ། མཐའ་དཔྱད་པ་ལ། ཁ་ཅིག་ན་རེ། དུས་དེར་སྐྱེས་ཟིན་འགག་པ་དེ། དུས་དེར་འདས་པའི་མཚན་ཉིད། དུས་དེར་རང་ཉིད་སྐྱེད་བྱེད་ཀྱི་རྒྱུ་ཡོད་ཀྱང་། རྐྱེན་འགའ་ཞིག་མ་ཚང་བའི་དབང་གིས་མ་བྱུང་བ་དེ། དུས་དེར་མ་འོངས་པའི་མཚན་ཉིད་ཟེར་ན། དང་པོ་ལ་ས་བོན་ཆོན་ཅན། མྱུ་གུའི་དུས་སུ་སྐྱེས་ཟིན་པར་ཐལ། དེའི་དུས་སུ་འདས་པ་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། དེའི་དུས་སུ་འདས་ཟིན་པའི་ཕྱིར། མ་གྲུབ་ན། དེར་ཐལ། མྱུ་གུ་མྱུ་གུའི་དུས་སུ་སྐྱེས་པ་གང་ཞིག །དེ་སྐྱེས་པ་དང་ས་བོན་འགག་པ་དུས་མཉམ་ཡིན་པའི་ཕྱིར། གཞན་ཡང་། ས་བོན་ཆོས་ཅན། མྱུ་གུའི་དུས་སུ་སྐྱེས་ཟིན་འགག་པ་མ་ཡིན་པར་ཐལ། དེའི་དུས་སུ་སྐྱེས་ཟིན་མ་འགག་པ་ཡིན་པའི་ཕྱིར། དེའི་དུས་སུ་སྐྱེས་ཟིན། ས་བོན་གྱི་དུས་སུ་མ་འགག་པ་ཡིན་པའི་ཕྱིར་ཏེ། དང་པོ་གང་ཞིག །ཕྱི་མ་ཡིན་པའི་ཕྱིར། དང་པོ་དངོས། མཚན་ཉིད་གཉིས་པ་ལ་སྐྱོན་འཕེན་པ་ཁ་ཅིག་ན་རེ། མྱུ་གུ་ཆོས་ཅན། ས་བོན་གྱི་དུས་སུ་རང་ཉིད་སྐྱེད་བྱེད་ཀྱི་རྒྱུ་ཡོད་ཀྱང་། རྐྱེན་འགའ་ཞིག་མ་ཚང་བའི་དབང་གིས་མ་བྱུང་བར་ཐལ། དེའི་དུས་སུ་མ་འོངས་པ་ཡིན་པའི་ཕྱིར། འདོད་ན། དེ་ཆོས་ཅན། མ་བྱུང་བར་ཐལ། འདོད་པའི་ཕྱིར་ན་མ་ཁྱབ། ཁོ་རང་ལ། མྱུ་གུ་ཆོས་ཅན། ས་བོན་གྱི་དུས་སུ་བྱུང་བར་ཐལ། དེའི་དུས་སུ་རང་ཉིད་སྐྱེད་བྱེད་ཀྱི་རྒྱུ་ཡོད་ཀྱང་། རྐྱེན་འགའ་ཞིག་མ་ཚང་བའི་དབང་གིས་མ་བྱུང་བ་མ་ཡིན་པའི་ཕྱིར། རྟགས་ཁས། འདོད་ན། དེའི་དུས་སུ་ཡོད་པར་ཐལ་ལོ། །ཡང་ཁོ་ན་རེ། ས་བོན་གྱི་དུས་སུ་ནས་མྱུག་གི་རྒྱུ་ཡོད་པར་ཐལ། དེའི་དུས་སུ་ནས་མྱུག་སྐྱེད་བྱེད་ཀྱི་རྒྱུ་ཡོད་པའི་ཕྱིར། འདོད་ན། དེའི་དུས་སུ་ནས་མྱུག་གི་རྒྱུ་ཚོགས་གྲངས་ཚང་བ་ཡོད་པར་ཐལ། འདོད་པའི་ཕྱིར། འདོད་ན། དེའི་དུས་སུ་ནས་མྱུག་གི་དངོས་རྒྱུ་དང་བརྒྱུད་རྒྱུ་གཉིས་ཀ་ཡོད་པར་ཐལ། འདོད་པའི་ཕྱིར། འདོད་ན། དེའི་དུས་སུ་ནས་མྱུག་གི་བརྒྱུད་རྒྱུ་མེད་པར་ཐལ། དེའི་དུས་སུ་དེའི་དངོས་རྒྱུ་ཡོད་པ་གང་ཞིག །དེའི་བརྒྱུད་རྒྱུ་དེ་དེའི་དངོས་རྒྱུའི་རྒྱུ་ཡིན་པའི་ཕྱིར་ན་མ་ཁྱབ། ཁ་ཅིག །རང་ཉིད་དུས་གང་དུ་འཇོག་པ་དངོས་པོ་གང་གི་རང་དུས་ལ་ལྟོས་ཏེ་བཞག་དགོས་པའི་ལྟོས་པར་གྱུར་པའི་དངོས་པོ་དེའི་དུས་སུ་ཐལ་ཟིན་པ་དེ་འདས་པའི་མཚན་ཉིད། རང་ཉིད་དུས་གང་དུ་འཇོག་པ་དངོས་པོ་གང་གི་རང་དུས་ལ་ལྟོས་ཏེ་བཞག་དགོས་པའི་དངོས་པོ་དེའི་དུས་སུ་མ་སླེབས་པའི་ཆོས། མ་འོངས་པའི་མཚན་ཉིད་ཟེར་ན། དང་པོ་ལ། བུམ་པ་འདས་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། མ་གྲུབ་ན། བུམ་པ་འདས་པ་འདས་པ་ཡིན་པར་ཐལ། འདས་པ་ཡིན་པ་ཡོད་པའི་ཕྱིར། འདས་པའི་མཚན་ཉིད་ཡོད་པའི་ཕྱིར། རྩ་བར་འདོད་ན། བུམ་པ་འདས་པ་དེ་བུམ་པའི་དུས་སུ་འདས་པར་ཐལ། འདོད་པ་གང་ཞིག །བུམ་པ་དེ་དེ་འདས་པར་འཇོག་པའི་ལྟོས་པར་གྱུར་པའི་དངོས་པོ་ཡིན་པའི་ཕྱིར། ཕྱི་མ་གྲུབ་སྟེ། དེའི་ལྟོས་པར་གྱུར་པའི་དངོས་པོ་ཡོད་པའི་ཕྱིར། མ་གྲུབ་ན། བུམ་པ་འདས་པ་ཆོས་ཅན། ཁྱོད་འདས་པར་འཇོག་པའི་ལྟོས་པར་གྱུར་པའི་དངོས་པོ་ཡོད་པར་ཐལ། ཁྱོད་འདས་པ་ཡིན་པའི་ཕྱིར། རྟགས་ཁས། རྩ་བར་འདོད་མི་ནུས་ཏེ། བུམ་པ་འདས་པ་དེ། བུམ་པའི་དུས་སུ་མ་འོངས་པ་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། ཁྱོད་འདས་པ་ཁྱོད་ཀྱི་དུས་སུ་དེར་ཐལ། ཁྱོད་འདུས་བྱས་ཡིན་པའི་ཕྱིར། མཚན་ཉིད་གཉིས་པ་ལ། བུམ་པ་མ་འོངས་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། མ་གྲུབ་ན། བུམ་པ་མ་འོངས་པ་མ་འོངས་པ་ཡིན་པར་ཐལ། མ་འོངས་པ་ཡིན་པ་ཡོད་པའི་ཕྱིར་ཏེ། མ་འོངས་པའི་མཚན་ཉིད་ཡོད་པའི་ཕྱིར། རྟགས་ཁས། རྩ་བར་འདོད་ན། བུམ་པ་མ་འོངས་པ་བུམ་པའི་དུས་སུ་མ་འོངས་པར་ཐལ། འདོད་པ་གང་ཞིག །བུམ་པ་དེ་བུམ་པ་མ་འོངས་པ་མ་འོངས་པར་འཇོག་པའི་ལྟོས་པར་གྱུར་པའི་དངོས་པོ་ཡིན་པའི་ཕྱིར། ཕྱི་མ་གྲུབ་སྟེ། དེ་ལྟོས་པར་གྱུར་པའི་དངོས་པོ་ཡོད་པའི་ཕྱིར། མ་གྲུབ་ན། བུམ་པ་མ་འོངས་པ་ཆོས་ཅན། ཁྱོད་མ་འོངས་པར་འཇོག་པའི་ལྟོས་པར་གྱུར་བའི་དངོས་པོ་ཡོད་པར་ཐལ། ཁྱོད་མ་འོངས་པ་ཡིན་པའི་ཕྱིར། རྟགས་ཁས། རྩ་བར་འདོད་མི་ནུས་ཏེ། བུམ་པ་མ་འོངས་པ་དེ་བུམ་པའི་སྔ་ལོགས་སུ་གྲུབ་པའི་ཕྱིར། མ་གྲུབ་ན། བུམ་པ་ཆོས་ཅན། ཁྱོད་མ་འོངས་པ་ཁྱོད་ཀྱི་སྔ་ལོགས་སུ་གྲུབ་པར་ཐལ། ཁྱོད་འདུས་བྱས་ཡིན་པའི་ཕྱིར། བྱས་པ་ལ་ཁོ་ན་རེ། བུམ་པ་འདས་པ་དེ་བུམ་པའི་དུས་སུ་འདས་པར་ཐལ། དེ་དེའི་དུས་ལས་འདས་པའི་ཕྱིར་ན་མ་ཁྱབ། རྟགས་གྲུབ་སྟེ། དེ་བུམ་པ་ད་ལྟར་བའི་དུས་ལས་འདས་པའི་ཕྱིར་ཏེ། ཕྱི་དྲོ་དེ་སྔ་དྲོའི་དུས་ལས་འདས་པའི་ཕྱིར་ཏེ། ཕྱི་དྲོ་དེ་སྔ་དྲོའི་དུས་ལས་ཡོལ་བའི་ཕྱིར། གཞན་ཡང་། སེམས་ཅན་ཤི་བ་ཤི་བ་ཡིན་པར་ཐལ། སེམས་ཅན་འདས་པ་འདས་པ་ཡིན་པའི་ཕྱིར་ཏེ། བུམ་པ་ལ་དེའི་ཕྱིར། འདོད་ན། དེ་ཆོས་ཅན། ཁྱོད་འཆི་བ་ཡོད་པར་ཐལ། ཁྱོད་ཤི་བ་ཡིན་པའི་ཕྱིར། འདོད་མི་ནུས་ཏེ། ཁྱོད་རྟག་པ་ཡིན་པའི་ཕྱིར། གཞན་ཡང་། སེམས་ཅན་ཞིག་པ་ཞིག་པ་ཡིན་པར་ཐལ། དེ་འདས་པ་འདས་པ་ཡིན་པའི་ཕྱིར། འདོད་ན། དེ་ཆོས་ཅན། ཁྱོད་འཇིག་པ་ཡོད་པར་ཐལ། འདོད་པའི་ཕྱིར། འདོད་མི་ནུས་ཏེ། ཁྱོད་མི་འཇིག་པའི་ཆོས་ཡིན་པའི་ཕྱིར། གཞན་ཡང་། ཤི་བ་ཡིན་པ་ཡོད་པར་ཐལ། ཞིག་པ་ཡིན་པ་ཡོད་པའི་ཕྱིར། རྟགས་ཁས། འདོད་ན། ཤི་བའི་སེམས་ཅན་ཡོད་པར་ཐལ། འདོད་པའི་ཕྱིར། འདོད་ན། དེ་འདྲའི་སེམས་ཅན་གྱི་ལུས་ཡོད་པར་ཐལ། འདོད་པའི་ཕྱིར། འདོད་ན། དེ་འདྲའི་ལུས་དེ་ཤི་ལུས་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་གསོན་ལུས་ཡིན་པའི་ཕྱིར་ཏེ། དེ་སྲོག་ལྡན་གྱི་ལུས་ཡིན་པའི་ཕྱིར་ཏེ། ཤི་བའི་སེམས་ཅན་གྱི་རྒྱུད་ལ་སྲོག་དབང་ཡོད་པའི་ཕྱིར་ཏེ། དེའི་རྒྱུད་ལ་ཡིད་དབང་ཡོད་པ་གང་ཞིག །སྲོག་དབང་དང་ཡིད་དབང་གཉིས་ངེས་ལྡན་ཡིན་པའི་ཕྱིར། དང་པོ་གྲུབ་སྟེ། དེའི་རྒྱུད་ལ་སེམས་ཡོད་པའི་ཕྱིར། བྱས་པ་ལ་ཁོ་ན་རེ། ཤི་བའི་སེམས་ཅན་ཡོད་པར་ཐལ། ཐོ་བས་བཅོམ་པའི་བུམ་པ་ཡོད་པའི་ཕྱིར་ཏེ། རྣམ་མཁྱེན་གྱིས་བཅོམ་པའི་སྒྲིབ་པ་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། སྒྲིབ་པ་ཡིན་ན། དེ་ཡིན་དགོས་པའི་ཕྱིར་ཟེར་ན། ཁོ་རང་ལ། བུམ་པ་ཡིན་ན། ཐོ་བས་བཅོམ་པའི་བུམ་པ་ཡིན་དགོས་པར་ཐལ། སྒྲིབ་པ་ཡིན་ན་རྣམ་མཁྱེན་གྱིས་བཅོམ་པའི་སྒྲིབ་པ་ཡིན་དགོས་པའི་ཕྱིར། ཁྱབ་པ་ཁས། རྟགས་གྲུབ་སྟེ། དེ་ཡིན་ན་རྣམ་མཁྱེན་གྱིས་སྤངས་པའི་སྒྲིབ་པ་ཡིན་དགོས་པའི་ཕྱིར། གཞན་ཡང་། ཁོ་ན་རེ། ཤི་བའི་སེམས་ཅན་ཡོད་པར་ཐལ། རྒྱལ་པོ་གླང་དར་ཤི་བ་ཡིན་པའི་ཕྱིར་ཏེ། དེ་ལྷ་ལུང་དཔལ་གྱི་རྡོ་རྗེས་བསད་པ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། དེས་དེ་བསད་པ་ལ་བརྟེན་ནས་ལྷ་ལུང་དཔལ་གྱི་རྡོ་རྗེ་ལ་སྲོག་གཅོད་ཀྱི་ཕམ་པ་བྱུང་བ། གཏམ་རྒྱུད་ཚད་ལྡན་ནས་བཤད་པའི་ཕྱིར། ཁོ་རང་ལ་སྒྲིབ་པ་མེད་པར་ཐལ། རྣམ་མཁྱེན་གྱིས་སྒྲིབ་པ་མེད་པར་བྱས་པའི་ཕྱིར། ཁྱབ་པ་ཁས། རྟགས་གྲུབ་སྟེ། རྣམ་མཁྱེན་གྱིས་སྒྲིབ་པ་མི་སྐྱེ་བའི་ཆོས་ཅན་དུ་བྱས་པའི་ཕྱིར་ཏེ། དེས་སྒྲིབ་པ་སྤངས་པའི་ཕྱིར། གཞན་ཡང་། འདས་པའི་དངོས་པོ་ཁོ་ཁོ་རང་ཡིན་པར་ཐལ། ཁོ་ཡོད་པའི་ཕྱིར། འདོད་ན། འདས་པའི་དངོས་པོ་ཆོས་ཅན། རང་རྒྱུ་ལས་འདས་པའི་དངོས་པོར་སྐྱེས་པར་ཐལ། འདོད་པའི་ཕྱིར། འདོད་མི་ནུས་ཏེ། རང་རྒྱུ་ལས་འཇིག་པའི་དངོས་པོར་སྐྱེས་པའི་ཕྱིར། གཞན་ཡང་། དེ་ཆོས་ཅན། རང་གྲུབ་ཙམ་ནས་འདས་པའི་དངོས་པོར་སྐྱེས་པར་ཐལ། འདས་པའི་དངོས་པོ་ཡིན་པའི་ཕྱིར། རྟགས་ཁས། འདོད་ན། དེ་ཆོས་ཅན། རང་གྲུབ་ཙམ་ནས་ཞིག་པའི་དངོས་པོར་སྐྱེས་པར་ཐལ། འདོད་པའི་ཕྱིར། འདོད་ན། རང་གྲུབ་ཙམ་ནས་ཞིག་པར་ཐལ། འདོད་པའི་ཕྱིར། འདོད་མི་ནུས་ཏེ། རང་གྲུབ་ཙམ་ནས་འཇིག་ངེས་ཡིན་པའི་ཕྱིར་ཏེ། དངོས་པོ་ཡིན་པའི་ཕྱིར། གཞན་ཡང། མ་འོངས་པའི་དངོས་པོ་ཁོ་ཁོ་རང་ཡིན་པར་ཐལ། ཁོ་ཡོད་པའི་ཕྱིར། འདོད་ན། མ་འོངས་པའི་དངོས་པོ་ཆོས་ཅན། རང་རྒྱུ་ལས་མ་འོངས་པའི་དངོས་པོར་སྐྱེས་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། རང་རྒྱུ་ལས་མ་འོངས་པར་ཐལ། འདོད་པའི་ཕྱིར། འདོད་མི་ནུས་ཏེ། རང་རྒྱུ་ལས་བྱུང་བའི་ཕྱིར། བྱས་པ་ལ་ཁོ་ན་རེ། འདས་པའི་དངོས་པོ་ཡོད་པར་ཐལ། འདས་པའི་སངས་རྒྱས་ཡོད་པའི་ཕྱིར་ཏེ། འདས་མ་འོངས་ད་ལྟར་གསུམ་གྱི་སངས་རྒྱས་ཡོད་པའི་ཕྱིར་ཏེ། དུས་གསུམ་གྱི་སངས་རྒྱས་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། དུས་གསུམ་མཁྱེན་པའི་སངས་འཕགས་ཡོད་པའི་ཕྱིར་ཏེ། དེ་གསུམ་མཁྱེན་པའི་ཡེ་ཤེས་ཡོད་པའི་ཕྱིར། རང་རེས། དུས་གསུམ་གྱི་སངས་འཕགས་ཁས་བླངས་པ་ལ་ཁ་ཅིག་ན་རེ། མར་མེ་མཛད་འདས་པའི་དུས་ཀྱི་སངས་འཕགས་དང་། རྗེས་བཙུན་བྱམས་པ་མགོན་པོ་དེ་མ་འོངས་པའི་དུས་ཀྱི་སངས་འཕགས་ཡིན་པར་ཐལ། འདས་པའི་དུས་ཀྱི་སངས་འཕགས་དང་། མ་འོངས་པའི་དུས་ཀྱི་སངས་འཕགས་གཉིས་ཀ་ཡོད་པའི་ཕྱིར། འདོད་ན། སྟོན་པ་འདིའི་བསྟན་པའི་དུས་ཀྱི་གྲུབ་མཐའ་སྨྲ་བའི་ཚད་མའི་སྐྱེས་བུ་དེས། སངས་རྒྱས་མར་མེ་མཛད་འདས་པའི་དུས་ཀྱི་སངས་འཕགས་དང་། གཅིག་ཤོས་མ་འོངས་པའི་དུས་ཀྱི་སངས་འཕགས་སུ་ཁས་ལེན་པར་ཐལ། འདོད་པའི་ཕྱིར། འདོད་ན། རྗེས་བཙུན་བྱམས་པ་མགོན་པོའི་བསྟན་པའི་དུས་ཀྱི་གྲུབ་མཐའ་སྨྲ་བའི་ཚད་མའི་སྐྱེས་བུ་དེས། སྟོན་པ་ཤཱཀྱ་ཐུབ་པ་དེ་འདས་པའི་སངས་འཕགས་དང་། རྗེ་བཙུན་བྱམས་མགོན་ད་ལྟར་གྱི་དུས་ཀྱི་སངས་འཕགས་སུ་ཁས་ལེན་པ་ཡིན་པར་ཐལ། འདོད་པའི་ཕྱིར་ན་མ་ཁྱབ། འདོད་ན། སྟོན་པ་ཤཱཀྱ་ཐུབ་པ་འདས་པའི་དུས་ཀྱི་སངས་འཕགས་དང་། གཅིག་ཤོས་མ་འོངས་པའི་དུས་ཀྱི་སངས་འཕགས་སུ་ཁས་ལེན་པར་ཐལ། འདོད་པ་གང་ཞིག །དེ་དུས་ཀྱི་དེ་རྣམས་ཀྱིས་ཁས་བླངས་པ་ཁས་བླངས་པ་ལྟར་དུ་གྲུབ་པའི་ཕྱིར། འདོད་ན། སྟོན་པ་ཤཱཀྱ་ཐུབ་པ་འདས་པའི་དུས་ཀྱི་སངས་འཕགས་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་ད་ལྟ་བའི་དུས་ཀྱི་སངས་འཕགས་ཡིན་པའི་ཕྱིར་ཏེ། དེའི་དུས་ཀྱི་སྟོན་པ་ཡིན་པའི་ཕྱིར། གཞན་ཡང་། ཁོ་ན་རེ། ཡང་སངས་རྒྱས་མར་མེ་མཛད་ཀྱི་བསྟན་པའི་དུས་ཕན་ཆད་ཀྱི་སངས་འཕགས་ཐམས་ཅད་འདས་པའི་དུས་ཀྱི་སངས་འཕགས་དང་། རྗེ་བཙུན་བྱམས་མགོན་གྱི་བསྟན་པའི་དུས་མན་ཆད་ཀྱི་སངས་འཕགས་ཐམས་ཅད་མ་འོངས་པའི་དུས་ཀྱི་སངས་འཕགས་ཡིན་པར་ཐལ། སངས་རྒྱས་མར་མེ་མཛད་འདས་པའི་དུས་ཀྱི་སངས་འཕགས་དང་། གཅིག་ཤོས་དེ་མ་འོངས་པའི་དུས་ཀྱི་སངས་འཕགས་ཡིན་པའི་ཕྱིར། རྟགས་ཁས་ཟེར་ན་མ་ཁྱབ། འདོད་ན། མར་མེ་མཛད་ཀྱི་བསྟན་པའི་དུས་ཡན་ཆད་ཀྱི་དངོས་པོ་ཐམས་ཅད་འདས་པའི་དུས་ཀྱི་དངོས་པོ་དང་གཅིག་ཤོས་ཀྱི་དུས་མན་ཆད་ཀྱི་དངོས་པོ་ཐམས་ཅད་མ་འོངས་པའི་དུས་ཀྱི་དངོས་པོ་ཡིན་པར་ཐལ། འདོད་པའི་ཕྱིར། འདོད་ན། ཁ་སང་ཡན་ཆད་ཀྱི་དངོས་པོ་ཐམས་ཅད་འདས་པའི་དུས་ཀྱི་དངོས་པོ་དང་། སང་ཉིན་མན་ཆད་ཀྱི་དངོས་པོ་ཐམས་ཅད་མ་འོངས་པའི་དུས་ཀྱི་དངོས་པོ་ཡིན་པར་ཐལ་ལོ། །ཁོ་རང་ལ། སངས་རྒྱས་མར་མེ་མཛད་ཀྱི་བསྟན་པའི་དུས་ཡན་ཆད་ཀྱི་དུས་ཐམས་ཅད་འདས་པའི་དུས་དང་། རྗེ་བཙུན་བྱམས་མགོན་གྱི་བསྟན་པའི་དུས་མན་ཆད་ཀྱི་དུས་ཐམས་ཅད་མ་འོངས་པའི་དུས་ཡིན་པར་ཐལ། འདས་པའི་དུས་དང་མ་འོངས་པའི་དུས་གཉིས་ཡོད་པའི་ཕྱིར། ཁྱབ་པ་ཁས། འདོད་ན། སྐྱོན་སྔར་ལྟར་འཕེན། རྟགས་གྲུབ་སྟེ། མ་ཁྱབ་ཟེར་ན། རྗེ་བཙུན་བྱམས་མགོན་གྱི་བསྟན་པའི་དུས་ཕན་ཆད་ཀྱི་དུས་ཐམས་ཅད་དུས་ཡིན་པར་ཐལ། འདས་པའི་དུས་ཡོད་པའི་ཕྱིར། ཁྱབ་པ་ཁས། གཞན་ཡང་། སྟོན་པ་འདིའི་བསྟན་པའི་དུས་ཀྱི་གྲུབ་མཐའ་སྨྲ་བའི་ཚད་མའི་སྐྱེས་བུ་རྣམས་ཀྱིས། སྟོན་པ་ཤཱཀྱ་ཐུབ་པ་མཆོག་གི་སྤྲུལ་སྐུ་དང་། རྗེ་བཙུན་བྱམས་མགོན་དེ་མ་ཡིན་པར་ཁས་ལེན་པར་ཐལ། དང་པོ་དེ་དེ་ཡིན། གཉིས་པ་དེ་དེ་མ་ཡིན་པའི་ཕྱིར། འདོད་ན། རྗེ་བཙུན་བྱམས་མགོན་གྱི་བསྟན་པའི་དུས་ཀྱི་གྲུབ་མཐའ་སྨྲ་བའི་ཚད་མའི་སྐྱེས་བུ་དེས། རྗེ་བཙུན་བྱམས་མགོན་མཆོག་གི་སྤྲུལ་སྐུ་དང་སྟོན་པ་ཤཱཀྱ་ཐུབ་པ་དེ་དེ་མ་ཡིན་པར་ཁས་ལེན་པར་ཐལ། སྟོན་པ་འདིའི་བསྟན་པའི་དུས་ཀྱི་གྲུབ་མཐའ་སྨྲ་བའི་ཚད་མའི་སྐྱེས་བུ་རྣམས་ཀྱིས་ཞེས་སོགས་འདོད་པའི་ཕྱིར། ཁྱབ་པ་ཁས། འདོད་ན། རྗེ་བཙུན་བྱམས་མགོན་མཆོག་གི་སྤྲུལ་སྐུ་ཡིན། སྟོན་པ་ཤཱཀྱ་ཐུབ་པ་དེ་མིན་དགོས་པར་ཐལ། འདོད་པ་གང་ཞིག །བྱམས་པའི་བསྟན་པའི་དུས་ཀྱི་དེ་རྣམས་ཀྱིས་ཁས་བླངས་པ་ཁས་བླངས་པ་ལྟར་དུ་གྲུབ་པའི་ཕྱིར། བྱས་པ་ལ་ཁོ་ན་རེ། བུམ་པ་འདས་པ་འདས་པ་ཡིན་པར་ཐལ། དེ་བུམ་པའི་འདས་པ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། བུམ་པའི་འདས་པ་ཡིན་པ་ཡོད་པའི་ཕྱིར། གཞན་ཡང་། དེ་འདས་པ་ཡིན་པར་ཐལ། དེ་བུམ་པ་ལ་ལྟོས་ཏེ་འདས་པ་ཡིན་པའི་ཕྱིར་ཏེ། དེ་དེ་ལ་ལྟོས་ཏེ་འདས་པར་བཞག་པའི་ཕྱིར་ཏེ། བུམ་པ་མ་འོངས་པ་དེ་བུམ་པ་ལ་ལྟོས་ཏེ་མ་འོངས་པར་བཞག་པའི་ཕྱིར་ཏེ། བུམ་པའི་འདས་མ་འོངས་ད་ལྟར་དུས་གསུམ་པོ་དེ་བུམ་པ་ལ་ལྟོས་ཏེ་བཞག་པའི་ཕྱིར་ན་མ་ཁྱབ། ཁ་ཅིག་ན་རེ། བུམ་པ་རང་རྒྱུ་ལས་སྐྱེས་བཞིན་པ་ཡིན་ཀྱང་། དེ་རང་དུས་སུ་སྐྱེ་བཞིན་པ་མ་ཡིན་ནོ་ཟེར་ན། བུམ་པ་ཆོས་ཅན། རང་དུས་སུ་སྐྱེ་བཞིན་པ་ཡིན་པར་ཐལ། རང་དུས་སུ་དེ་དང་དངོས་པོའི་གཞི་མཐུན་ཡིན་པའི་ཕྱིར་ཏེ། ཁྱོད་དེ་འདྲའི་གཞི་མཐུན་ཡིན་པའི་དུས་ཡོད་པའི་ཕྱིར་ཏེ། ཁྱོད་སྐྱེ་བཞིན་པ་དང་དངོས་པོའི་གཞི་མཐུན་ཡིན་པའི་ཕྱིར། ཁྱོད་སྐྱེ་བཞིན་པ་གང་ཞིག། དངོས་པོ་ཡིན་པའི་ཕྱིར། དང་པོ་གྲུབ་སྟེ། རང་རྒྱུ་ལས་སྐྱེ་བཞིན་པ་ཡིན་པའི་ཕྱིར། རྟགས་ཁས། ཡང་ཁོ་ན་རེ། བུམ་པ་དེ་འདྲའི་གཞི་མཐུན་པ་ཡིན་པའི་དུས་གཅིག་ཡོད་ཀྱང་། བུམ་པ་བུམ་པའི་དུས་སུ་དེ་འདྲའི་གཞི་མཐུན་པ་མ་ཡིན་ནོ་ཟེར་ན། འོ་ན། བུམ་པ་བུམ་པའི་རྒྱུའི་དུས་སུ་དེ་འདྲའི་གཞི་མཐུན་པ་ཡིན་པར་ཐལ། དེ་དེ་འདྲའི་གཞི་མཐུན་ཡིན་པ་ཞིག་ཡོད་པ་གང་ཞིག །དེ་བུམ་པའི་དུས་སུ་དེ་འདྲའི་གཞི་མཐུན་མ་ཡིན་པའི་ཕྱིར། འདོད་ན། བུམ་པ་བུམ་པའི་རྒྱུའི་དུས་སུ་དངོས་པོ་ཡིན་པར་ཐལ། འདོད་པའི་ཕྱིར། རང་རེས། བུམ་པ་སྐྱེ་བཞིན་པ་མ་ཡིན། བྱས་པ་ལ་ཁོ་ན་རེ། བུམ་པ་དེ་དེ་ཡིན་པར་ཐལ། སྐྱེ་བཞིན་པ་ཡིན་པ་ཡོད་པའི་ཕྱིར་ཏེ། མྱུ་གུ་སྐྱེ་བཞིན་པ་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། མྱུ་གུ་སྐྱེ་བཞིན་པ་དང་ས་བོན་འགག་བཞིན་པ་གཉིས་དུས་མཉམ་ཡིན་པའི་ཕྱིར་ན་ཁོ་རང་ལ། སྐྱེ་བ་ལ་མངོན་དུ་ཕྱོགས་པ་ཡོད་པར་ཐལ། མྱུ་གུ་སྐྱེ་བ་ལ་མངོན་དུ་ཕྱོགས་པ་ཡོད་པའི་ཕྱིར། ཁྱབ་པ་ཁས། རྟགས་གྲུབ་སྟེ། མྱུ་གུ་སྐྱེ་བ་ལ་མངོན་དུ་ཕྱོགས་པའི་བྱ་བ་ཡོད་པའི་ཕྱིར་ཏེ། དེ་འདྲའི་བྱ་བ་དང་ས་བོན་འགག་པ་ལ་མངོན་དུ་ཕྱོགས་པའི་བྱ་བ་གཉིས་དུས་མཉམ་ཡིན་པའི་ཕྱིར། རྩ་བར་འདོད་མི་ནུས་ཏེ། དངོས་པོ་ཡིན་ན་སྐྱེས་ཟིན་པ་ཡིན་དགོས་པའི་ཕྱིར། ཡང་ཁོ་ན་རེ། སྐྱེ་བ་ལ་མངོན་དུ་ཕྱོགས་པ་ཡོད་པར་ཐལ། ས་བོན་གྱི་དུས་སུ་སྐྱེས་པ་ལ་མངོན་དུ་ཕྱོགས་པ་ཡོད་པའི་ཕྱིར་ན་མ་ཁྱབ། རྟགས་གྲུབ་སྟེ། མྱུ་གུ་དེ་དེ་ཡིན་པའི་ཕྱིར་ན་ཁོ་རང་ལ། སྐྱེ་ཁ་མ་ཡོད་པར་ཐལ། ས་བོན་གྱི་དུས་སུ་སྐྱེ་ཁ་མ་ཡོད་པའི་ཕྱིར། ཁྱབ་པ་ཁས། རྟགས་གྲུབ་སྟེ། མྱུ་གུ་དེ་དེ་ཡིན་པའི་ཕྱིར། རྩ་བར་འདོད་མི་ནུས་ཏེ། དངོས་པོ་ཡིན་ན་སྐྱེས་ཟིན་པ་ཡིན་དགོས་པའི་ཕྱིར། བྱས་པ་ལ་ཁོ་ན་རེ། སྐྱེས་བཞིན་པ་ཡིན་ན། རང་དུས་སུ་རང་རྒྱུ་ལས་སྐྱེས་བཞིན་པ་ཡིན་དགོས་པར་ཐལ། བུམ་པ་རང་རྒྱུ་ལས་སྐྱེས་བཞིན་པ་མ་ཡིན་པའི་ཕྱིར། འདོད་ན། རང་རྒྱུ་ལས་སྐྱེ་བ་ཡིན་ན། རང་དུས་སུ་རང་རྒྱུ་ལས་སྐྱེ་བ་ཡིན་དགོས་པར་ཐལ། འདོད་པའི་ཕྱིར། འདོད་ན། བུམ་པ་ཆོས་ཅན། དེར་ཐལ། དེའི་ཕྱིར། སྐྱེ་བ་ཡིན་པའི་ཕྱིར། རེས་འགའ་སྐྱེ་བ་ཡིན་པའི་ཕྱིར། རྟགས་གྲུབ་སྟེ། ཟག་བཅས་ཉེར་ལེན་གྱི་ཕུང་པོ་ལྔ་པོ་དེ་རེས་འགའ་སྐྱེ་བ་ཡིན་པའི་ཕྱིར། རེས་འགའ་བ་ཉིད་ཡིན་པས་ན། །སྡུག་བསྔལ་འདི་རྒྱུ་ཅན་ཉིད་སྒྲུབ། །ཅེས་གསུངས་པའི་ཕྱིར། རྩ་བར་འདོད་ན། བུམ་པ་ཆོས་ཅན། རང་དུས་སུ་རང་རྒྱུ་ལ་རག་ལས་པར་ཐལ། འདོད་པའི་ཕྱིར། འདོད་མི་ནུས་ཏེ། རང་དུས་སུ་རང་རྒྱུ་ལ་རག་མ་ལས་པར་རྫོགས་པར་གྲུབ་ཟིན་པའི་ཕྱིར་ཏེ། དངོས་པོ་ཡིན་པའི་ཕྱིར། ཁྱབ་སྟེ། འབྲས་བུ་རག་ལས་མེད་པར་ཡང་། །ཞེས་གསུངས་པའི་ཕྱིར། ཟེར་ན་མ་ཁྱབ་སྟེ། དེའི་དོན་ནི། བུམ་པ་རང་གི་ཕྱི་ལོགས་སུ་རང་རྒྱུ་ལ་རག་མ་ལས་པ་དེ་དེའི་དོན་ཡིན་པའི་ཕྱིར། དེ་ལྟར་མ་ཡིན་ན། བུམ་པ་རང་དུས་སུ་རང་རྒྱུ་ལ་རག་ལས་པར་ཐལ། རང་རྒྱུ་ལ་རག་ལས་པ་ཡིན་ན། རང་དུས་སུ་རང་རྒྱུ་ལ་རག་ལས་པ་ཡིན་དགོས་པའི་ཕྱིར་ཏེ། རང་རྒྱུ་ལས་སྐྱེས་པ་ཡིན་ན། རང་དུས་སུ་རང་རྒྱུ་ལས་སྐྱེས་པ་ཡིན་དགོས་པའི་ཕྱིར་ཏེ། རང་འབྲས་སྐྱེད་བྱེད་ཡིན་ན། རང་དུས་སུ་རང་འབྲས་སྐྱེད་བྱེད་ཡིན་དགོས་པའི་ཕྱིར་ཏེ། རྒྱུ་ཡིན་ན་རང་དུས་སུ་རྒྱུ་ཡིན་དགོས་པའི་ཕྱིར། གཞན་ཡང་། གསལ་བ་དེར་ཐལ། རང་རྒྱུའི་འབྲས་བུ་ཡིན་ན་རང་དུས་སུ་དེའི་ཕྱིར་ཏེ། འབྲས་བུ་ལ་དེའི་ཕྱིར། བྱས་པ་ལ་ཁོ་ན་རེ། བུམ་པ་དེ་རང་དུས་སུ་སྐྱེས་པ་མ་ཡིན་པར་ཐལ། བུམ་པ་རང་གི་རྒྱུའི་དུས་སུ་སྐྱེ་བ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། བུམ་པ་ཡོད་པ་གང་ཞིག །གཟུགས་འཛིན་ཡིད་མངོན་དེ། གཟུགས་འཛིན་དབང་མངོན་སྐད་ཅིག་ཐ་མའི་དུས་སུ་སྐྱེ་བ་ཡིན་པའི་ཕྱིར། དེ་གཟུགས་འཛིན་དབང་མངོན་གྱི་རྒྱུན་མཐར་སྐྱེ་བ་ཡིན་པ་གང་ཞིག། གཟུགས་འཛིན་དབང་མངོན་སྐད་ཅིག་ཐ་མ་དེ་གཟུགས་འཛིན་དབང་མངོན་གྱི་རྒྱུན་གྱི་ཐ་མ་ཡིན་པའི་ཕྱིར། རང་རེས། ཆོས་དེའི་འདས་པ་ཡིན་ན། ཆོས་དེ་གྲུབ་དུས་ཀྱི་སྐད་ཅིག་གཉིས་པར་ཞིག་པའི་ཆ་ཡིན་པས་ཁྱབ། བྱས་པ་ལ་ཁོ་ན་རེ། གཟུགས་འཛིན་དབང་མངོན་འདས་པ་ཆོས་ཅན། གཟུགས་འཛིན་ཡིད་མངོན་གྲུབ་དུས་ཀྱི་སྐད་ཅིག་གཉིས་པར་ཞིག་པའི་ཆ་ཡིན་པར་ཐལ། གཟུགས་འཛིན་ཡིད་མངོན་གྱི་འདས་པ་ཡིན་པའི་ཕྱིར། འདོད་ན། གཟུགས་འཛིན་ཡིད་མངོན་གྲུབ་དུས་ཀྱི་སྐད་ཅིག་གཉིས་པར་ཞིག་པའི་ཆ་ཡོད་པར་ཐལ། འདོད་པའི་ཕྱིར། འདོད་ན། དེ་གྲུབ་དུས་ཀྱི་སྐད་ཅིག་གཉིས་པ་ཡོད་པར་ཐལ། འདོད་པའི་ཕྱིར། འདོད་ན། གཟུགས་འཛིན་ཡིད་མངོན་སྐད་ཅིག་གཉིས་པ་ཡོད་པར་ཐལ། འདོད་པའི་ཕྱིར་ན་མ་ཁྱབ། ཁོ་ན་རེ། གཟུགས་འཛིན་ཡིད་མངོན་གྲུབ་དུས་ཀྱི་སྐད་ཅིག་གཉིས་པར་ཞིག་པའི་ཆ་ཡོད་པར་ཐལ། དངོས་པོ་ཡིན་ན་རང་གྲུབ་དུས་ཀྱི་སྐད་ཅིག་གཉིས་པར་ཞིག་དགོས་པའི་ཕྱིར་ཏེ། དེ་ཡིན་ན་རང་གྲུབ་དུས་ཀྱི་སྐད་ཅིག་ཐ་མར་ཞིག་དགོས་པའི་ཕྱིར་ན་མ་ཁྱབ། གཟུགས་འཛིན་ཡིད་མངོན་ཆོས་ཅན། དེར་ཐལ། དེའི་ཕྱིར། འདོད་ན། གཟུགས་འཛིན་ཡིད་མངོན་གྲུབ་དུས་ཀྱི་སྐད་ཅིག་ཐ་མ་ཡོད་པར་ཐལ། འདོད་པའི་ཕྱིར། འདོད་ན། གཟུགས་འཛིན་ཡིད་མངོན་སྐད་ཅིག་ཐ་མ་ཡོད་པར་ཐལ། འདོད་པའི་ཕྱིར། ཁྱབ་པ་དངོས། ཁ་ཅིག་ན་རེ། ཆོས་དེའི་འདས་པ་ཡིན་ན། ཆོས་དེའི་སྐད་ཅིག་གཉིས་པར་ཞིག་པའི་ཆ་ཡིན་པས་ཁྱབ་ཟེར་ན། གཟུགས་འཛིན་ཡིད་མངོན་གྱི་འདས་པ་ཆོས་ཅན། གཟུགས་འཛིན་ཡིད་མངོན་སྐད་ཅིག་གཉིས་པར་དེར་ཐལ། དེའི་འདས་པ་ཡིན་པའི་ཕྱིར། ཁྱབ་པ་ཁས། མ་གྲུབ་ན། གཟུགས་འཛིན་ཡིད་མངོན་ཆོས་ཅན། ཁྱོད་ཀྱི་འདས་པ་ཁྱོད་ཀྱི་འདས་པ་ཡིན་པར་ཐལ། ཁྱོད་འདས་པ་ཁྱོད་འདས་པ་ཡིན་པའི་ཕྱིར་ཏེ། ཁྱོད་འདུས་བྱས་ཡིན་པའི་ཕྱིར། རྩ་བར་འདོད་ན། དེའི་སྐད་ཅིག་གཉིས་པར་ཞིག་པའི་ཆ་ཡོད་པར་ཐལ། འདོད་པའི་ཕྱིར། དེ་སྐད་ཅིག་གཉིས་པ་ཡོད་པར་ཐལ། འདོད་པའི་ཕྱིར། འདོད་ན། དེའི་དངོས་ཀྱི་ཉེ་འབྲས་དེའི་སྐད་ཅིག་གཉིས་པ་ཡིན་པར་ཐལ། འདོད་པའི་ཕྱིར། འདོད་ན། རྣམ་མཁྱེན་སྐད་ཅིག་དང་པོ་དེ་རྒྱུན་མཐའི་ཡེ་ཤེས་སྐད་ཅིག་མ་གཉིས་པ་ཡིན་པར་ཐལ། འདོད་པའི་ཕྱིར། འདོད་ན། རྒྱུན་མཐའི་ཡེ་ཤེས་དེ་རྣམ་མཁྱེན་སྐད་ཅིག་དང་པོའི་སྐད་ཅིག་དང་པོ་ཡིན་པར་ཐལ། འདོད་པའི་ཕྱིར། འདོད་ན། རྒྱུན་མཐའི་ཡེ་ཤེས་དེ་རྣམ་མཁྱེན་ཡིན་པར་ཐལ་ལོ། །བྱས་པ་ལ་ཁོ་ན་རེ། གཟུགས་འཛིན་ཡིད་མངོན་སྐད་ཅིག་གཉིས་པ་ཡོད་པར་ཐལ། དེ་གྲུབ་དུས་ཀྱི་སྐད་ཅིག་གཉིས་པ་ཡོད་པ་གང་ཞིག །གཟུགས་འཛིན་ཡིད་མངོན་དང་དེ་གྲུབ་དུས་དུས་མཉམ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། དེ་དང་དེ་གྲུབ་པ་དུས་མཉམ་ཡིན་པའི་ཕྱིར་ཏེ། དེ་དང་དེ་ཡོད་པ་གཉིས་དུས་མཉམ། དེ་དང་དེ་མི་རྟག་པ་གཉིས་དུས་མཉམ་པའི་ཕྱིར། གཞན་ཡང་། མྱུ་གུ་དང་མྱུ་གུ་སྐྱེ་བ་གཉིས་གྲུབ་བདེ་རྫས་གཅིག་ཡིན་པར་ཐལ། མྱུ་གུ་དང་མྱུ་གུ་སྐྱེ་གནས་འཇིག་གསུམ་པོ་གྲུབ་བདེ་རྫས་གཅིག་ཡིན་པའི་ཕྱིར་ཏེ། མྱུ་གུ་དང་དེ་འཇིག་པ་གྲུབ་བདེ་རྫས་གཅིག་ཡིན་པའི་ཕྱིར། རྩ་བར་འདོད་མི་ནུས་ཏེ། མྱུ་གུ་སྐྱེ་བ་དེ་མྱུ་གུའི་སྔ་ལོགས་སུ་གྲུབ་པའི་ཕྱིར་ཏེ། མྱུ་གུ་མྱུ་གུའི་སྔ་ལོགས་སུ་སྐྱེ་བ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། མྱུ་གུ་ས་བོན་གྱི་དུས་སུ་སྐྱེ་བ་ཡིན་པའི་ཕྱིར། གཞན་ཡང་། ཁོ་ན་རེ། ས་བོན་གྱི་དུས་སུ་ས་བོན་ལས་སྐྱེ་བཞིན་པ་ཡིན་ན། དེའི་དུས་སུ་དེ་ལས་སྐྱེ་བ་ཡིན་དགོས་པར་ཐལ། ས་བོན་གྱི་དུས་སུ་སྐྱེ་བཞིན་པ་ཡིན་ན། དེའི་དུས་སུ་སྐྱེ་བ་ཡིན་དགོས་པའི་ཕྱིར། འདོད་ན། མྱུ་གུ་ཆོས་ཅན། དེར་ཐལ། དེའི་ཕྱིར། འདོད་ན། ས་བོན་གྱི་དུས་སུ་མྱུ་གུ་སྐྱེ་བ་ཡོད་པར་ཐལ། འདོད་པའི་ཕྱིར་ན་མ་ཁྱབ། འདོད་མི་ནུས་ཏེ། ས་བོན་ལས་སྐྱེ་བ་དེ་ས་བོན་གྱི་འབྲས་བུ་ཡིན་པའི་ཕྱིར་ཟེར་ན། ཁོ་རང་ལ། ས་བོན་གྱི་དུས་སུ་ས་བོན་སྐྱེ་བཞིན་པ་ཡོད་པར་ཐལ། མྱུ་གུ་དེ་དེ་ཡིན་པའི་ཕྱིར། རྟགས་ཁྱབ་ཁས། འདོད་མི་ནུས་ཏེ། ས་བོན་ལས་སྐྱེ་བཞིན་པ་དེ་དེའི་འབྲས་བུ་ཡིན་པའི་ཕྱིར་ཏེ། དེ་ལས་སྐྱེ་བཞིན་པ་ཡོད་པའི་ཕྱིར། དེའི་དུས་སུ་དེ་ལས་སྐྱེ་བཞིན་པ་ཡོད་པའི་ཕྱིར། རྟགས་ཁས། ཁོ་རང་ལ། གཟུགས་འཛིན་ཡིད་མངོན་གཟུགས་འཛིན་དབང་མངོན་གྱི་རྒྱུན་མཐར་སྐྱེ་བ་མ་ཡིན་པར་ཐལ། དེ་དེའི་རྒྱུན་རྫོགས་པའི་དུས་སུ་སྐྱེ་བ་ཡིན་པའི་ཕྱིར་ཏེ། དེ་དེའི་དུས་སུ་སྐྱེ་བཞིན་པ་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། དེ་གཟུགས་འཛིན་དབང་མངོན་སྐད་ཅིག་ཐ་མའི་དུས་སུ་སྐྱེ་བཞིན་པ་ཡིན་པའི་ཕྱིར། བྱས་པ་ལ་ཁོ་ན་རེ། རང་དུས་སུ་སངས་རྒྱ་བཞིན་པ་ཡིན་ན། རང་དུས་སུ་སངས་རྒྱ་བ་ཡིན་དགོས་པར་ཐལ། ས་བོན་གྱི་དུས་སུ་སྐྱེ་བཞིན་པ་ཡིན་ན། དེའི་དུས་སུ་སྐྱེ་བ་ཡིན་དགོས་པའི་ཕྱིར། འདོད་ན། བྱང་སེམས་རྒྱུན་མཐའ་བ་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། རྣམ་མཁྱེན་ཐོབ་ཁ་མའི་གང་ཟག་ཡིན་པའི་ཕྱིར། འདོད་ན། བྱང་སེམས་རྒྱུན་མཐའ་པ་དེས། རང་དུས་སུ་རྣམ་མཁྱེན་ཐོབ་པའི་དུས་སྲིད་པར་ཐལ། འདོད་པའི་ཕྱིར་ན་མ་ཁྱབ་སྟེ། འོ་ན། ཁོ་རང་ལ། དེ་རང་དུས་སུ་སངས་རྒྱ་བ་ཡིན་པའི་ཕྱིར་ཏེ། དེ་རྒྱུན་མཐའི་གནས་སྐབས་སུ་སངས་རྒྱ་བའི་ཕྱིར་ཏེ། དེ་སངས་རྒྱས་ཀྱི་སར་སངས་མི་རྒྱ་བའི་ཕྱིར། མ་གྲུབ་ན། དེ་སངས་རྒྱས་ཀྱི་སར་སངས་རྒྱ་བར་ཐལ། མ་གྲུབ་པ་དེའི་ཕྱིར། འདོད་མི་ནུས་ཏེ། དེའི་སར་སངས་རྒྱས་ཟིན་པའི་ཕྱིར། ཁ་ཅིག་ན་རེ། ནས་མྱུག་གི་དངོས་རྒྱུའི་དུས་སུ་ནས་མྱུག་གི་རྒྱུ་ཚོགས་གྲངས་མ་ཚང་ཟེར་ན། དེ་ཚང་བར་ཐལ། དེའི་དངོས་རྒྱུའི་དུས་སུ་དེའི་དངོས་རྒྱུ་རྒྱུ་ཚོགས་གྲངས་ཚང་བའི་ཕྱིར་ཏེ། དེའི་དུས་སུ་དངོས་རྒྱུ་མཐའ་དག་ཡོད་པའི་ཕྱིར། བྱས་པ་ལ་ཁོ་ན་རེ། དེའི་དངོས་རྒྱུའི་དུས་སུ་དེའི་བརྒྱུད་རྒྱུ་ཡོད་པར་ཐལ། དེའི་དུས་སུ་ནས་མྱུག་གི་རྒྱུ་ཚོགས་གྲངས་ཚང་བའི་ཕྱིར་ན་མ་ཁྱབ། །

༈ རང་ལུགས་ལ། འདས་མ་འོངས་ད་ལྟར་དུས་གསུམ་སོ་སོའི་ངོ་བོ། མཚན་གཞི། དུས་གསུམ་གྲུབ་ཚུལ་བཤད་པ་དང་གསུམ། དང་པོ་ནི། མྱུ་གུའི་དུས་སུ་ཞིག་པ་དེ་མྱུ་གུའི་དུས་སུ་འདས་པའི་མཚན་ཉིད། དཔེར་ན་ས་བོན་ལྟ་བུ་ལ་བྱེད། མྱུ་གུའི་དུས་སུ་འདས་མ་འོངས་གང་རུང་ཡང་ཡིན། དེའི་དུས་སུ་མ་སླེབས་པ་ཡང་ཡིན་པའི་གཞི་མཐུན་པར་དམིགས་པ་དེ། དེའི་དུས་སུ་མ་འོངས་པའི་མཚན་ཉིད། དཔེར་ན། མྱུ་གུའི་དངོས་འབྲས་ལྟ་བུ་ལ་བྱེད། སྐྱེས་ལ་མ་འགག་པ་ད་ལྟར་བའི་མཚན་ཉིད། དཔེར་ན། མྱུ་གུ་ལྟ་བུ་ལ་བྱེད། སོ་སོའི་མཚན་གཞི་ནི། མྱུ་གུ་རྐྱེན་མ་ཚང་བའི་དབང་གིས་རེ་ཞིག་མ་བྱུང་བའི་ཆ་དེ་མྱུ་གུའི་མ་འོངས་པ་དང་། མྱུ་གུ་མ་འོངས་པ་གཉིས་ཀྱི་མཚན་གཞི་ཡིན། མྱུ་གུ་རང་གི་ཕྱི་ལོགས་སུ་ཞིག་པའི་ཆ་དེ་དེའི་འདས་པའི་མཚན་གཞི་དང་། མྱུ་གུ་འདས་པའི་མཚན་གཞི་ཡང་ཡིན་ནོ། །

༈ གསུམ་པ་དུས་གསུམ་གྱི་གྲུབ་ཚུལ་ནི། དང་པོར་མྱུ་གུའི་མ་འོངས་པ་གྲུབ། དེའི་རྗེས་སུ་དེའི་ད་ལྟར་བ་གྲུབ། དེའི་རྗེས་སུ་དེའི་འདས་པ་གྲུབ་སྟེ། མྱུ་གུའི་མ་འོངས་པ་དེ་དེའི་སྔ་ལོགས་སུ་གྲུབ། དེའི་འདས་པ་དེ་དེའི་ཕྱི་ལོགས་སུ་གྲུབ་པའི་ཕྱིར། དེ་ལྟར་ཡིན་ཀྱང་། མྱུ་གུའི་དུས་སུ་འདས་པ་དེ་མྱུ་གུའི་སྔ་ལོགས་སུ་གྲུབ། དེའི་དུས་སུ་མ་འོངས་པ་དེ་དེའི་ཕྱི་ལོགས་སུ་གྲུབ་པ་ཡིན་ཏེ། མྱུ་གུའི་དངོས་རྒྱུ་དེ་མྱུ་གུའི་དུས་སུ་འདས་པ་དང་། དེའི་དངོས་འབྲས་དེ་དེའི་དུས་སུ་མ་འོངས་པ་ཡིན་པའི་ཕྱིར་ཏེ། མྱུ་གུ་དེ་མྱུ་གུའི་སྔ་ལོགས་སུ་མ་འོངས་པ་དང་། མྱུ་གུའི་དུས་སུ་ད་ལྟར་བ་དང་། མྱུ་གུའི་ཕྱི་ལོགས་སུ་འདས་པ་ཡིན་ནོ། །མྱུ་གུའི་འདས་མ་འོངས་ད་ལྟར་གསུམ་གྱི་ནང་ནས། དེའི་ད་ལྟར་བ་གཙོ་ཆེ་བ་ཡིན་ཏེ། དེའི་མ་འོངས་པ་དང་འདས་པ་གཉིས། དེའི་ད་ལྟར་བ་ལ་ལྟོས་ཏེ་བཞག་དགོས་པའི་ཕྱིར། །

དངོས་མིང་དང་བཏགས་མིང་གི་དོན་བཤད་པ།

༈ བློ་ནི་འཁྲུལ་པ་མེད་འཇུག་པ། །ཞེས་སོགས་རྐང་པ་བཞི་གང་ལས་འཕྲོས་ན། རང་རེས་གོང་དུ། སྤྱི་མཚན་དངོས་མེད་དུ་ཁས་བླངས་པ་ལ། ཁོ་ན་རེ། བུམ་འཛིན་རྟོག་པ་ལ་བུམ་པ་སྣང་བ་དེ་དངོས་པོ་ཡིན་ཏེ། དེ་བུམ་པ་ཞེས་པའི་སྒྲས་བརྗོད་པའི་ཕྱིར། ཁྱབ་སྟེ། རྗོད་བྱེད་ཀྱི་སྒྲ་རྣམས་རང་ཡུལ་ལ་དངོས་དབང་གིས་འཇུག་པའི་ཕྱིར་ཟེར་ན། འོ་ན། བུམ་པ་འདས་པ་དང་བུམ་པ་མ་འོངས་པ་གཉིས་ལ། བུམ་པ་ཞེས་པའི་སྒྲ་དངོས་སུ་འཇུག་པར་ཐལ། རྗོད་བྱེད་ཀྱི་སྒྲ་རྣམས་རང་ཡུལ་ལ་དངོས་དབང་གིས་འཇུག་པའི་ཕྱིར། འདོད་མི་ནུས་ཏེ། དེ་གཉིས་དངོས་པོར་མེད་པའི་ཕྱིར། ཞེས་འཆད་པ་ལ། འདས་པ་དང་ནི་མ་འོངས་པའི། །ཞེས་སོགས་རྐང་པ་བཞི་བྱུང་། དེ་ལྟར་བྱས་པ་ལ་ཁོ་ན་རེ། བུམ་སྤྱི་དངོས་པོ་བ་དེ། འདས་པའི་དུས་ཀྱི་བུམ་པ་དང་། མ་འོངས་པའི་དུས་ཀྱི་བུམ་པ་གཉིས་ཀྱི་ཆོས་སུ་ཉེ་བར་བཏགས་ནས། བུམ་པ་ཞེས་པའི་སྒྲ་དེ། འདས་པའི་དུས་ཀྱི་བུམ་པ་དང་། མ་འོངས་པའི་དུས་ཀྱི་བུམ་པ་གཉིས་ལ་དངོས་སུ་འཇུག་པ་ཡིན་ནོ། །ཞེས་པའི་འདོད་པ་བརྗོད་པར་བྱེད་པ་ལ། གལ་ཏེ་ཉེར་བཏགས་ལས་དེ་འདོད། །ཅེས་པ་འདི་བྱུང་། འོ་ན། བུམ་པ་ཞེས་པའི་སྒྲ་དེ། འདས་པའི་དུས་ཀྱི་བུམ་པ་དང་མ་འོངས་པའི་དུས་ཀྱི་བུམ་པ་གཉིས་ལ་འཇུག་ལ། སྣམ་བུ་ལ་མི་འཇུག་པའི་ཁྱད་པར་མི་འཐད་པར་ཐལ། བུམ་པ་ཞེས་པའི་སྒྲ་དངོས་སུ་འཇུག་པ་ལ། བུམ་སྤྱི་དངོས་པོ་བ་ཁྱད་ཆོས་སུ་ཚང་དགོས། བུམ་སྤྱི་དངོས་པོ་བ་དེ་དེ་གཉིས་ལ་ཡོད་ཅིང་། སྣམ་བུ་ལ་མེད་པའི་ཁྱད་པར་མི་འཐད་པའི་ཕྱིར། ཞེས་འཆད་པར་བྱེད་པ་ལ། གང་ཞིག་སྣམ་སོགས་ལ་མེད་ལ། །ཞེས་སོགས་རྐང་པ་གསུམ་བྱུང་། དེ་ལྟར་བྱས་པ་ལ་ཁོ་ན་རེ། སྤྱི་དངོས་པོ་བ་ཡོད་པའི་དབང་གིས་དངོས་མིང་དང་། དེ་མེད་པའི་དབང་གིས་བཏགས་མིང་མི་འཇུག་ན། དངོས་མིང་དང་བཏགས་མིང་འཇུག་པའི་རྒྱུ་མཚན་གང་ཞེ་ན། དེའི་རྒྱུ་མཚན་འཆད་པར་བྱེད་པ་ལ། བློ་ནི་འཁྲུལ་པ་མེད་འཇུག་པ། །ཞེས་སོགས་རྐང་པ་བཞི་བྱུང་། དེའི་རྒྱུ་མཚན་དཔེ་དང་བཅས་ཏེ་འཆད་པར་བྱེད་པ་ལ། དོན་མེད་ན་ཡང་འགྲོ་བ་ཡིས། །ཞེས་པ་ནས། མཉན་པ་སྐྱེ་བོས་བྱས་པ་ཡིན། །ཞེས་པའི་བར་བྱུང་། དེས་ན། བློ་ནི་འཁྲུལ་པ་མེད་འཇུག་པ། །ཞེས་སོགས་ཀྱི་ངག་དོན་ནི། སེང་གེ་ཞེས་པའི་ངག་ཆོས་ཅན། རི་དྭགས་རྒྱལ་པོའི་དངོས་མིང་ཡིན་ཏེ། དེ་ལ་འདོད་རྒྱལ་དུ་ཐོག་མར་བརྡ་སྦྱར་བའི་མིང་གང་ཞིག །རང་ཉིད་ལ་བརྟེན་ནས་དེ་འཁྲུལ་མེད་དུ་གོ་ནུས་ཡིན་པའི་ཕྱིར། དེ་ཆོས་ཅན། བྲམ་ཟེ་ཁྱེའུ་ཁ་ཆེ་སྣ་ཉག་གི་བཏགས་མིང་ཡིན་ཏེ། རང་ཉིད་ལ་བརྟེན་ནས་དེ་ཐུན་མོང་མ་ཡིན་པར་གོ་མི་ནུས་པ་གང་ཞིག །དེ་ལ་རྗེས་སུ་བརྡ་སྦྱར་བའི་མིང་ཡིན་པའི་ཕྱིར། །

༈ གཉིས་པ་མཐའ་དཔྱད་པ་ལ། ཁ་ཅིག་ན་རེ། བྱས་པ་ཞེས་པའི་ངག་དེ་མི་རྟག་པའི་དངོས་མིང་དུ་ཐལ། སེང་གེ་ཞེས་པའི་ངག་དེ་རི་དྭགས་རྒྱལ་པོའི་དངོས་མིང་ཡིན་པའི་ཕྱིར་ན་མ་ཁྱབ། འདོད་ན། སྒྲ་བྱས་ཞེས་པའི་ངག་དེ་སྒྲ་མི་རྟག་པའི་དངོས་མིང་དུ་ཐལ། འདོད་པའི་ཕྱིར། འདོད་ན། སྒྲ་བྱས་ཞེས་པའི་ངག་ལས་སྒྲ་བྱས་པ་རྟོགས། སྒྲ་མི་རྟག་པ་མི་གོ་བའི་ཁྱད་པར་མི་འཐད་པར་ཐལ། འདོད་པའི་ཕྱིར། འདོད་ན། དེས་ན་ཐ་དད་རྣམ་པར་གནས། །ཞེས་གསུངས་པ་མི་འཐད་པར་ཐལ་ལོ་ཟེར་ན། འོ་ན། ཁོ་རང་ལ། བྱས་པ་ཞེས་པའི་ངག་དེ་མི་རྟག་པའི་དངོས་མིང་ཡིན་པར་ཐལ། བུམ་པ་ཞེས་པའི་ངག་དེ་ལྟོ་ལྡིར་བའི་དངོས་མིང་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། ལྟོ་ལྡིར་བ་བུམ་པའི་མཚན་ཉིད་ཡིན་པའི་ཕྱིར། ཡང་ཁོ་ན་རེ། སེང་གེ་དང་རི་དྭགས་རྒྱལ་པོ་གཉིས་དངོས་མིང་ཐ་དད་ཀྱི་གོ་བྱ་སོ་སོར་གནས་པ་མ་ཡིན་པར་ཐལ། སེང་གེ་ཞེས་པའི་ངག་དེ་རི་དྭགས་རྒྱལ་པོའི་དངོས་མིང་ཡིན་པའི་ཕྱིར་ན་མ་ཁྱབ་སྟེ། ཁོ་རང་ལ། བུམ་པ་དང་ལྟོ་ལྡིར་བ་གཉིས་དངོས་མིང་ཐ་དད་ཀྱི་གོ་བྱ་སོ་སོར་གནས་པ་མ་ཡིན་པར་ཐལ། བུམ་པ་ཞེས་པའི་ངག་དེ་ལྟོ་ལྡིར་བའི་དངོས་མིང་ཡིན་པའི་ཕྱིར། ཁྱབ་པ་ཁས། འདོད་མི་ནུས་ཏེ། དེ་གཉིས་དོན་སྤྱི་ཐ་དད་དུ་འཆར་རུང་གི་ཆོས་ཡིན་པའི་ཕྱིར། ཁོ་ན་རེ། རང་ཉིད་ལ་བརྟེན་ནས་དོན་དེ་ཐུན་མོང་མ་ཡིན་པར་གོ་ནུས་པའི་ངག་དེ། དོན་དེའི་དངོས་མིང་གི་མཚན་ཉིད་ཟེར་ན། བུམ་པ་ཞེས་པའི་ངག་ཆོས་ཅན། རང་ཉིད་ཅེས་པའི་བརྗོད་བྱའི་དངོས་མིང་ཡིན་པར་ཐལ། རང་ཉིད་ལ་བརྟེན་ནས་དེ་ཞེས་པའི་བརྗོད་བྱ་ཐུན་མོང་མ་ཡིན་པར་གོ་ནུས་པའི་ངག་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། ངག་རྣམ་དག་ཡིན་པའི་ཕྱིར། འདོད་ན། བུམ་པ་ཞེས་པའི་ངག་གི་བརྗོད་བྱ་དེ། བུམ་པ་ཞེས་པའི་ངག་དངོས་མིང་དུ་འཇུག་པའི་གཞི་ཡིན་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། བུམ་པ་ཡིན་པར་ཐལ། འདོད་པའི་ཕྱིར། ཁོ་ན་རེ། དོན་དེ་ལ་འདོད་རྒྱལ་ཐོག་མར་བརྡ་སྦྱར་བའི་མིང་དེ། དོན་དེའི་དངོས་མིང་གི་མཚན་ཉིད། རང་ཉིད་དངོས་མིང་དུ་འཇུག་པའི་གཞི་དང་། དོན་དང་མིང་འདྲ་བའམ་འབྲེལ་པ་གྲུབ་པ་གང་རུང་གཅིག་རྒྱུ་མཚན་དུ་བྱས་ནས། དོན་དེ་ལ་རྗེས་གྲུབ་ཏུ་སྦྱར་བའི་མིང་དེ། དོན་དེའི་བཏགས་མིང་གི་མཚན་ཉིད་ཡིན་ནོ་ཟེར་ན། དང་པོ་ལ་སྐྱོན་འཕེན་པ་ཁ་ཅིག་ན་རེ། བུམ་པ་ཞེས་པའི་ངག་ཆོས་ཅན། བུམ་པ་ལ་འདོད་རྒྱལ་ཐོག་མར་བརྡ་སྦྱར་བའི་མིང་ཡིན་པར་ཐལ། དེའི་དངོས་མིང་ཡིན་པའི་ཕྱིར། འདོད་མི་ནུས་ཏེ། ལྟོ་ལྡིར་བ་ལ་འདོད་རྒྱལ་ཐོག་མར་བརྡ་སྦྱར་བའི་མིང་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། ལྟོ་ལྡིར་བའི་དངོས་མིང་ཡིན་པའི་ཕྱིར་ཟེར་ན། ཁོ་རང་ལ། བུམ་པ་ཞེས་པའི་ངག་དེ་བུམ་པ་ལ་འདོད་རྒྱལ་ཐོག་མར་བརྡ་སྦྱར་བའི་མིང་ཡིན་པར་ཐལ། དེ་ལ་དེ་ལྟར་སྦྱར་བའི་མིང་ཡོད་པའི་ཕྱིར་ཏེ། ལྟོ་ལྡིར་བ་ལ་འདོད་རྒྱལ་ཐོག་མར་བརྡ་སྦྱར་བའི་མིང་ཡོད་པའི་ཕྱིར། མཚན་ཉིད་གཉིས་པ་ལ། སྤྱི་གཙོ་བོ་དང་ཡུལ་མི་རྒན་པོ་གཉིས་ལ་འདྲ་བ་འམ་འབྲེལ་པ་གང་རུང་གཅིག་གྲུབ་པར་ཐལ། སྤྱི་གཙོ་བོ་ཞེས་པའི་ངག་དེ་ཡུལ་མི་རྒན་པོའི་བཏགས་མིང་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། ནུས་ལའང་གཙོ་བོ་ལ་སོགས་པའི། །མཉན་པ་སྐྱེ་བོས་བྱས་པ་ཡིན། །ཞེས་གསུངས་པའི་ཕྱིར། འདོད་ན། སྤྱི་གཙོ་བོ་ཡོད་པར་ཐལ། འདོད་པའི་ཕྱིར། གཞན་ཡང་། སྒྲ་ལ་སྒྲ་མི་རྟག་པར་སྒྲུབ་པའི་ཕྱོགས་ཡིན་ཞེས་པའི་ངག་ཆོས་ཅན། རང་ཉིད་དངོས་མིང་དུ་འཇུག་པའི་གཞི་དང་སྒྲ་གཉིས་འདྲ་བའམ་འབྲེལ་པ་གྲུབ་པ་གང་རུང་ཞིག་ཡིན་པར་ཐལ། སྒྲའི་བཏགས་མིང་ཡིན་པའི་ཕྱིར། རྟགས་གྲུབ་སྟེ། སྒྲ་ལ་དེ་སྒྲུབ་ཀྱི་ཕྱོགས་ཞེས་པའི་མིང་བཏགས་ནས་འཇུག་པའི་ཕྱིར་ཏེ། སྒྲ་དེ་སྒྲུབ་ཀྱི་ཕྱོགས་མཚན་ཉིད་པ་དེའི་ཕྱོགས་གཅིག་ཡིན་པའི་རྒྱུ་མཚན་གྱིས་དེ་ལྟར་བཏགས་ནས་འཇུག་པའི་ཕྱིར། རིགས་གཏེར་ལས། དེ་ཡི་ཕྱོགས་གཅིག་ཡིན་པའི་ཕྱིར། །ཡ་གྱལ་གཉིས་ལ་བཏགས་ནས་འཇུག །ཅེས་གསུངས་པའི་ཕྱིར། གཞན་ཡང་། རི་བོང་གི་རྭ་ཞེས་པའི་ངག་ཆོས་ཅན། རང་ཉིད་དངོས་མིང་དུ་འཇུག་པའི་གཞི་ཡོད་པར་ཐལ། རི་བོང་གི་རྭའི་བཏགས་མིང་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། དེའི་མིང་གང་ཞིག །དེའི་དངོས་མིང་མ་ཡིན་པའི་ཕྱིར། དང་པོ་མ་གྲུབ་ན། རི་བོང་གི་རྭ་ཆོས་ཅན། ཁྱོད་ཅེས་པའི་ངག་ཁྱོད་ཀྱི་མིང་ཡིན་པར་ཐལ། ཁྱོད་བདག་མེད་ཡིན་པའི་ཕྱིར། བྱས་པ་ལ་ཁོ་ན་རེ། རི་བོང་གི་རྭ་ཞེས་པའི་ངག་དེ་དེའི་དངོས་མིང་དང་བཏགས་མིང་གང་ཡང་མ་ཡིན་ནོ་ཟེར་ན། རི་བོང་གི་རྭའི་མིང་ཡིན་ན། དེའི་དངོས་མིང་དང་བཏགས་མིང་གང་རུང་ཡིན་དགོས་པར་ཐལ། བྲམ་ཟེ་ཁྱེའུ་ཁ་ཆེ་སྣ་ཉག་གི་མིང་ཡིན་ན། དེའི་དེ་གང་རུང་ཡིན་དགོས་པའི་ཕྱིར་ཏེ། སེང་གེ་ཞེས་པའི་ངག་དེ། དེའི་བཏགས་མིང་དང་། བྲམ་ཟེ་ཁྱེའུ་ཁ་ཆེ་སྣ་ཉག་ཅེས་པའི་ངག་དེ་དེའི་དངོས་མིང་ཡིན་པའི་ཕྱིར། གཞན་ཡང་། སྒྲ་སྒྲ་མི་རྟག་པར་སྒྲུབ་པའི་ཕྱོགས་ཡིན། ཞེས་པའི་ངག་དེ་བཏགས་མིང་ཡིན་པར་ཐལ། ཉི་མའི་འབྲས་བུར་གྱུར་པའི་འོད་ཟེར་ལ་ཉི་མ་ཞེས་པའི་ངག་བཏགས་མིང་ཡིན་པའི་ཕྱིར་ཏེ། དེ་རྒྱུ་མིང་འབྲས་ལ་བཏགས་པའི་བཏགས་མིང་ཡིན་པའི་ཕྱིར་ཏེ། དེ་འདྲའི་བཏགས་མིང་ཡོད་པའི་ཕྱིར། ཁ་ཅིག་ན་རེ། རས་ཡུག་གི་ཕྱོགས་གཅིག་ཚིག་པ་ལ་རས་ཡུག་ཚིག་ཅེས་པའི་ངག་དེ་དངོས་མིང་མ་ཡིན་ཞིང་བཏགས་མིང་ཡིན་ནོ་ཟེར་ན། རས་ཡུག་གི་ཕྱོགས་གཅིག་ཚིག་པ་དེ་རས་ཡུག་ཚིག་པ་མ་ཡིན་པར་ཐལ། དེའི་ཕྱོགས་གཅིག་ཚིག་པ་ལ་དེ་ཚིག་ཅེས་པའི་ངག་དེ་དངོས་མིང་མ་ཡིན་པའི་ཕྱིར། འདོད་ན། དེའི་གཡས་ཕྱོགས་ཚིག་པ་དེ་རས་ཡུག་གི་ཕྱོགས་གཅིག་ཚིག་པ་ཡིན་པར་ཐལ། འདོད་པའི་ཕྱིར། འདོད་ན། དེའི་གཡས་ཕྱོགས་ཚིག་ཅིང་གཡོན་ཕྱོགས་མ་ཚིག་པའི་ཚེ་ན། དེའི་ཕྱོགས་གཅིག་ཚིག་པར་ཐལ། འདོད་པའི་ཕྱིར། འདོད་ན། དེའི་ཚེ་ན། རས་ཡུག་གི་ཕྱོགས་གཅིག་མེད་པར་ཐལ། འདོད་པའི་ཕྱིར། འདོད་མི་ནུས་ཏེ། དེའི་ཚེ་ན་དེའི་གཡོན་ཕྱོགས་ཡོད་པའི་ཕྱིར། གཞན་ཡང་། དེའི་ཕྱོགས་གཅིག་ཚིག་པ་དེ། དེ་ཚིག་པ་ཡིན་པར་ཐལ། རས་ཡུག་གཅིག་གི་ཕྱོགས་གཅིག་ཚིག་པ་དེ། རས་ཡུག་གཅིག་ཚིག་པ་ཡིན་པའི་ཕྱིར་ཏེ། སྐྱེས་བུ་གཅིག་གི་ལག་པ་ན་བ་དེ། སྐྱེས་བུ་གཅིག་ན་བ་ཡིན་པའི་ཕྱིར་ཏེ། སྐྱེས་བུ་གཅིག་གི་མགོ་བོ་མཐོང་བ་དེ། སྐྱེས་བུ་གཅིག་མཐོང་བ་ཡིན་པའི་ཕྱིར་ཏེ། སྐྱེས་བུ་གཅིག་མཐོང་བའི་བློ་ཡིན་ན། སྐྱེས་བུ་གཅིག་གི་ཆ་ཐམས་ཅད་མཐོང་བའི་བློ་ཡིན་པས་མ་ཁྱབ་པའི་ཕྱིར། བྱས་པ་ལ་ཁོ་ན་རེ། རས་ཡུག་གཅིག་གི་ཁ་ཚར་ཙམ་ཚིག་པ་དེ། རས་ཡུག་གཅིག་ཚིག་པ་ཡིན་པར་ཐལ། རས་ཡུག་གི་ཕྱོགས་གཅིག་ཚིག་པ་དེ། རས་ཡུག་ཚིག་པ་ཡིན་པའི་ཕྱིར་ན་མ་ཁྱབ། འདོད་ན། སྐྱེས་བུ་གཅིག་གི་སྐྲ་ཉག་གཅིག་ཚིག་པ་དེ། སྐྱེས་བུ་གཅིག་ཚིག་པ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། སྐྲ་ཉག་གཅིག་ཚིག་པའི་སྐྱེས་བུ་ཡོད་ཀྱང་། ཚིག་པའི་སྐྱེས་བུ་མེད་པའི་ཕྱིར། ཁ་ཅིག་ན་རེ། རས་ཡུག་གཅིག་གི་ཁ་ཚར་ཚིག་པ་དེ། རས་ཡུག་གཅིག་ཚིག་པ་ཡིན་པར་ཐལ། སྐྱེས་བུ་གཅིག་གི་ལག་པ་གཡས་པ་མེས་ཚིག་པ་དེ། སྐྱེས་བུ་གཅིག་གི་ལག་པ་མེས་ཚིག་པ་ཡིན་པའི་ཕྱིར་ཏེ། དེ་གཅིག་གི་ལག་པ་གཡས་པ་ན་བ་དེ། དེ་ན་བ་ཡིན་པའི་ཕྱིར་ཟེར་ན་མ་ཁྱབ་སྟེ། འོ་ན། ཁོ་རང་ལ། ལག་པ་གཡས་པ་མེས་ཚིག་པའི་སྐྱེས་བུ་ཡིན་ན། ལག་པ་མེས་ཚིག་པའི་སྐྱེས་བུ་ཡིན་དགོས་པར་ཐལ། དེ་གཅིག་གི་ལག་པ་གཡས་པ་མེས་ཚིག་པ་དེ། དེ་གཅིག་གི་ལག་པ་ཚིག་པ་ཡིན་པའི་ཕྱིར། འདོད་ན། ལག་པ་གཡས་པ་ཆད་པའི་སྐྱེས་བུ་ཡིན་ན། ལག་པ་ཆད་པའི་སྐྱེས་བུ་ཡིན་དགོས་པར་ཐལ། འདོད་པའི་ཕྱིར། འདོད་ན། ལག་པ་གཡས་པ་ཆད་ཅིང་། གཡོན་པ་མ་ཆད་པའི་སྐྱེས་བུ་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། ལག་པ་དང་ལྡན་པའི་སྐྱེས་བུ་ཡིན་པའི་ཕྱིར་ཏེ། ལག་པ་གཡོན་པ་དང་ལྡན་པའི་སྐྱེས་བུ་ཡིན་པའི་ཕྱིར། གཞན་ཡང་། མིག་གཡས་པ་ལོང་བའི་སྐྱེས་བུ་ཡིན་ན། མིག་ལོང་བའི་སྐྱེས་བུ་ཡིན་དགོས་པར་ཐལ། ལག་པ་གཡས་པ་ཆད་པའི་སྐྱེས་བུ་ཡིན་ན། ལག་པ་ཆད་པའི་སྐྱེས་བུ་ཡིན་དགོས་པའི་ཕྱིར། འདོད་ན། མིག་གཡས་པ་ལོང་ལ་གཡོན་པ་མ་ལོང་བའི་སྐྱེས་བུ་དེ་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། མིག་ལྡན་གྱི་སྐྱེས་བུ་ཡིན་པའི་ཕྱིར་ཏེ། མིག་གཡོན་པ་དང་ལྡན་པའི་སྐྱེས་བུ་ཡིན་པའི་ཕྱིར། ཁ་ཅིག་ན་རེ། ཉི་མའི་འོད་ཟེར་དེ་ལ་ཉི་མ་ཞེས་བརྗོད་པའི་ངག་དེ། རྒྱུ་མིང་འབྲས་ལ་བཏགས་པའི་བཏགས་མིང་ཡིན་ཟེར་ན། ཉི་མ་དེ་ཉི་མའི་འོད་ཟེར་གྱི་རྒྱུ་ཡིན་པར་ཐལ། དམ་བཅའ་འཐད་པའི་ཕྱིར། འདོད་ན། དེའི་རེག་བྱའི་རྒྱུ་ཡིན་པར་ཐལ། འདོད་པ་གང་ཞིག །དེའི་འོད་ཟེར་དེའི་རེག་བྱ་ཡིན་པའི་ཕྱིར། འདོད་ན། བུམ་པ་དེ་བུམ་པའི་རེག་བྱའི་རྒྱུ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་གཉིས་གྲུབ་བདེ་རྫས་གཅིག་ཡིན་པའི་ཕྱིར། ཁ་ཅིག་ན་རེ། བུམ་པ་ཞེས་པའི་ངག་དངོས་སུ་འཇུག་པའི་གཞི་ཡིན་ན། དེ་དངོས་མིང་དུ་འཇུག་པའི་གཞི་ཡིན་པས་ཁྱབ་ཟེར་ན། གསེར་བུམ་ཆོས་ཅན། ཐལ་ཕྱིར། འདོད་ན། བུམ་པ་ཞེས་པའི་ངག་དེ་གསེར་བུམ་གྱི་དངོས་མིང་ཡིན་པར་ཐལ། གསེར་བུམ་དེ་བུམ་པ་ཞེས་པའི་ངག་དངོས་མིང་དུ་འཇུག་པའི་གཞི་ཡིན་པའི་ཕྱིར། འདོད་ན། དེ་འདྲའི་ངག་ཆོས་ཅན། གསེར་བུམ་གྱི་དངོས་མིང་མ་ཡིན་པར་ཐལ། ཟངས་བུམ་གྱི་དངོས་མིང་ཡིན་པའི་ཕྱིར། རྟགས་ཁས། བྱས་པ་ལ་ཁོ་ན་རེ། བུམ་པ་ཞེས་པའི་ངག་དེ། གསེར་བུམ་གྱི་དེ་ཡིན་པར་ཐལ། མཚོ་སྐྱེས་ཞེས་པའི་ངག་དེ་སྐམ་ལས་སྐྱེས་པའི་པདྨོའི་དངོས་མིང་ཡིན་པའི་ཕྱིར། འཇུག་པའི་ཊཱིཀ་ཆེན་ལས། སྒྲ་དངོས་སུ་འཇུག་པ་ལ། དེ་དངོས་མིང་དུ་འཇུག་པའི་རྒྱུ་མཚན་བཤད་དགོས་པས་མ་ཁྱབ་པ་ནི། དཔེར་ན། སྐམ་ལས་སྐྱེས་པའི་པདྨ་ལ་མཚོ་སྐྱེས་ཀྱི་སྒྲ་དངོས་མིང་དུ་འཇུག་པ་བཞིན་ནོ། །ཞེས་གསུངས་པའི་ཕྱིར་ན་མ་ཁྱབ་སྟེ། མཚོ་སྐྱེས་ཞེས་པའི་སྒྲ་དེ་སྐམ་ལས་སྐྱེས་པའི་པདྨ་ལ་དངོས་སུ་འཇུག་པ་དེ་ལུང་དེའི་དོན་ཡིན་པའི་ཕྱིར། ཁ་ཅིག་ན་རེ། བུམ་པ་ལ་དངོས་སུ་འཇུག་པའི་མིང་ཡིན་ན། བུམ་པའི་དངོས་མིང་ཡིན་པས་ཁྱབ་ཟེར་ན། ཤེས་བྱ་ཞེས་པའི་ངག་ཆོས་ཅན། དེར་ཐལ། དེའི་ཕྱིར་ཏེ། བུམ་པ་ཤེས་བྱ་ཞེས་པའི་ངག་དེ་དངོས་སུ་འཇུག་པའི་གཞི་ཡིན་པའི་ཕྱིར། མ་གྲུབ་ན། བུམ་པ་ཆོས་ཅན། དེར་ཐལ། ཤེས་བྱ་ཡིན་པའི་ཕྱིར། །

༈ རང་ལུགས་ལ། མིང་གི་རྣམ་གཞག་ལ་སྤྱིར། མིང་ཚིག་ཡི་གེ་རྣམས་དོན་གཅིག་མིན་ཀྱང་། དེ་རྣམས་མི་འགལ་ལོ། །མིང་ལ་དབྱེ་ན། དངོས་མིང་དང་བཏགས་མིང་གཉིས། དང་པོ་ནི། དོན་དེའི་མིང་དུ་འདོད་རྒྱལ་ཐོག་མར་བརྡ་སྦྱར་བ་ཡང་ཡིན། རང་ཉིད་ལ་བརྟེན་ནས་དོན་དེ་འཁྲུལ་མེད་དུ་གོ་ནུས་པ་ཡང་ཡིན་པའི་གཞི་མཐུན་པར་གྱུར་པའི་མཉན་བྱ་དོན་མཐུན་དེ་དེའི་དངོས་མིང་གི་མཚན་ཉིད། དཔེར་ན། རི་དྭགས་རྒྱལ་པོ་ལ་སེང་གེ་ཞེས་བརྗོད་པའི་ངག་ལྟ་བུའོ། །རང་ཉིད་ལ་བརྟེན་ནས་དོན་དེ་འཁྲུལ་མེད་དུ་གོ་མི་ནུས་པ་ཡང་ཡིན། དོན་དེའི་མིང་ཕལ་པ་ཡང་ཡིན་པའི་གཞི་མཐུན་པར་གྱུར་པའི་མཉན་བྱ་དེ་དོན་དེའི་བཏགས་མིང་གི་མཚན་ཉིད། དེ་ལ་དབྱེ་ན་འདྲ་བ་རྒྱུ་མཚན་དུ་བྱས་པའི་བཏགས་མིང་དང་། འབྲེལ་པ་རྒྱུ་མཚན་དུ་བྱས་པའི་བཏགས་མིང་གཉིས། དང་པོ་ནི། བྲམ་ཟེ་ཁྱེའུ་ཁ་ཆེ་སྣ་ཉག་ལ་སེང་གེ་ཞེས་བརྗོད་པའི་ངག་ལྟ་བུ་ལ་བྱེད་པ་ཡིན་ཏེ། བྲམ་ཟེ་ཁྱེའུ་སྣ་ཉག་དང་། སེང་གེ་གཉིས་ཁ་ཆེ་བ་དང་སྣ་ཉག་པར་མཚུངས་པའི་ཕྱིར། གཉིས་པ་ལ། བདག་གཅིག་གི་འབྲེལ་པ་རྒྱུ་མཚན་དུ་བྱས་པའི་བཏགས་མིང་དང་། དེ་བྱུང་གི་འབྲེལ་པ་རྒྱུ་མཚན་དུ་བྱས་པའི་བཏགས་མིང་གཉིས། དང་པོ་ལ། ཡ་གྱལ་གྱི་མིང་ཚོགས་པ་ལ་བཏགས་པའི་བཏགས་མིང་དང་། ཚོགས་པའི་མིང་གིས་ཡ་གྱལ་ལ་བཏགས་པའི་བཏགས་མིང་གཉིས། དང་པོ་ནི། རས་ཡུག་གི་ཁ་ཚར་ཙམ་ཚིག་པ་ལ། རས་ཡུག་ཚིག་ཅེས་བརྗོད་པའི་ངག་ལྟ་བུ་ལ་བྱེད་པ་ཡིན་ཏེ། རས་ཡུག་གི་ཁ་ཚར་དེ་རས་ཡུག་གི་ཡ་གྱལ་དང་། རས་ཡུག་དེ་དེའི་ཁ་ཚར་ལ་སོགས་པ་ཚོགས་པའི་ཚོགས་པ་ཡིན་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། གཉིས་པ་ནི། སྒྲ་ལ་སྒྲ་མི་རྟག་པར་སྒྲུབ་པའི་ཕྱོགས་ཞེས་བརྗོད་པའི་ངག་ལྟ་བུ་ལ་བྱེད་པ་ཡིན་ཏེ། སྒྲ་དེ་དེ་སྒྲུབ་ཀྱི་ཕྱོགས་མཚན་ཉིད་པ་དེའི་ཡ་གྱལ་གཅིག་ཡིན་པའི་རྒྱུ་མཚན་གྱིས་དེ་ལྟར་བཏགས་པའི་ཕྱིར། གཉིས་པ་ལ། རྒྱུ་མིང་འབྲས་ལ་བཏགས་པའི་བཏགས་མིང་དང་། འབྲས་མིང་རྒྱུ་ལ་བཏགས་པའི་བཏགས་མིང་གཉིས། དང་པོ་ནི། ཉི་མའི་འབྲས་བུར་གྱུར་པའི་ཉི་མའི་འོད་ཟེར་ལ་ཉི་མ་ཞེས་བརྗོད་པའི་ངག་ལྟ་བུ་ལ་བྱེད། གཉིས་པ་ནི། སྒྲུབ་ངག་ཡང་དག་ལ། རང་འབྲས་རྗེས་དཔག་ཅེས་བརྗོད་པའི་ངག་ལྟ་བུ་ལ་བྱེད་དོ། །

༈ རྩོད་པ་སྤང་བ་ལ། ཁ་ཅིག་ན་རེ། སྒྲ་དེ་སྒྲ་རྟག་པར་སྒྲུབ་པའི་ཕྱོགས་ཀྱི་ཡ་གྱལ་གཅིག་ཡིན་པར་ཐལ། སྒྲ་རྟག་པ་དེ་སྒྲུབ་ཀྱི་ཕྱོགས་གང་ཞིག །སྒྲ་དེ་སྒྲ་མི་རྟག་པར་སྒྲུབ་པའི་ཕྱོགས་ཀྱི་ཡ་གྱལ་གཅིག་ཡིན་པའི་ཕྱིར། ཕྱི་མ་ཁྱབ་པ་ཁས་ཟེར། འདོད་ན། དེ་སྒྲུབ་ཀྱི་ཕྱོགས་ཀྱི་ཡ་གྱལ་གཅིག་ཡོད་པར་ཐལ། འདོད་པའི་ཕྱིར། འདོད་ན། དེ་སྒྲུབ་ཀྱི་ཕྱོགས་ཡོད་པར་ཐལ་ལོ་ཟེར་ན། མ་ཁྱབ་བོ། །ཁ་ཅིག །རྟོག་པ་ཞེས་པའི་ངག་ཆོས་ཅན། རང་ཉིད་ལ་བརྟེན་ནས་རྟོག་པ་འཁྲུལ་མེད་དུ་གོ་བའི་ངག་ཡིན་པར་ཐལ། དེའི་དངོས་མིང་ཡིན་པའི་ཕྱིར། ཁྱབ་པ་ཁས། འདོད་ན། རྟོག་པ་འཁྲུལ་མེད་དུ་གོ་བའི་ངག་ཡོད་པར་ཐལ་ལོ། །འདོད་ན། རྟོག་པ་འཁྲུལ་མེད་དུ་རྟོགས་པའི་བློ་ཡོད་པར་ཐལ་ལོ། །འདོད་ན། རྣམ་མཁྱེན་དེ་དེ་ཡིན་པར་ཐལ་ལོ། །འདོད་ན། རྣམ་མཁྱེན་ཆོས་ཅན། དེ་མ་ཡིན་པར་ཐལ། དེ་འཁྲུལ་བཅས་སུ་རྟོགས་པའི་བློ་ཡིན་པའི་ཕྱིར་ན་མ་ཁྱབ་སྟེ། འོ་ན། རྣམ་མཁྱེན་ཆོས་ཅན། ཆོས་ཐམས་ཅད་ཡང་དག་པར་རྟོགས་པའི་བློ་མ་ཡིན་པར་ཐལ། དེ་ཐམས་ཅད་ཡང་དག་པ་མ་ཡིན་པར་རྟོགས་པའི་བློ་ཡིན་པའི་ཕྱིར། ཁྱབ་པ་ཁས། རྟགས་གྲུབ་སྟེ། ཆོས་ཅན་དེ་གང་ཞིག །ཆོས་ཐམས་ཅད་ཡང་དག་པ་མ་ཡིན་པའི་ཕྱིར། དེ་ཐམས་ཅད་སྟོང་ཉིད་མ་ཡིན་པའི་ཕྱིར། རྩ་བར་འདོད་མི་ནུས་ཏེ། ཆོས་ཅན་དེའི་ཕྱིར། བྱས་པ་ལ་ཁོ་ན་རེ། རྟོག་པ་མ་འཁྲུལ་བར་རྣམ་མཁྱེན་གྱི་གཞལ་བྱ་ཡིན་པར་ཐལ། རྣམ་མཁྱེན་གྱིས་དེ་མ་འཁྲུལ་བར་རྟོགས་པའི་ཕྱིར་ན་མ་ཁྱབ། འདོད་ན། རྟོག་པ་མ་འཁྲུལ་བར་ཡོད་པར་ཐལ་ལོ། །འདོད་མི་ནུས་ཏེ། དེ་འཁྲུལ་ཤེས་ཡིན་པའི་ཕྱིར། ཁ་ཅིག་ན་རེ། བུམ་པ་ཞེས་པའི་ངག་ཆོས་ཅན། ལྟོ་ལྡིར་བའི་དངོས་མིང་དུ་ཐལ། དེ་ལ་འདོད་རྒྱལ་ཐོག་མར་བརྡ་སྦྱར་བའི་མིང་གང་ཞིག །རང་ཉིད་ལ་བརྟེན་ནས་དེ་ཐུན་མོང་མ་ཡིན་པར་གོ་ནུས་པའི་ཕྱིར། འདོད་ན། དེ་ཆོས་ཅན། ལྟོ་ལྡིར་བ་དངོས་སུ་བརྗོད་པའི་ངག་ཏུ་ཐལ། འདོད་པའི་ཕྱིར། འདོད་ན། དེ་ཚིག་ཟིན་ལ་བརྗོད་པའི་ངག་ཏུ་ཐལ། འདོད་པའི་ཕྱིར་ན་མ་ཁྱབ། འདོད་མི་ནུས་ཏེ། ཁྱོད་ལ་ལྟོ་ལྡིར་བ་ཞེས་པའི་ཚིག་སྒྲས་ཟིན་ལ་མ་བརྗོད་པའི་ཕྱིར། ཁ་ཅིག་ན་རེ། དངོས་པོ་ཞེས་པའི་ངག་ཆོས་ཅན། རང་ཉིད་ལ་བརྟེན་ནས་དངོས་པོ་ཐུན་མོང་མ་ཡིན་པར་གོ་ནུས་ཡིན་པར་ཐལ། དངོས་པོའི་དངོས་མིང་ཡིན་པའི་ཕྱིར། ཁྱབ་པ་ཁས་ཟེར། འདོད་ན། དེ་ཐུན་མོང་མ་ཡིན་པར་གོ་ནུས་ཀྱི་ངག་ཡོད་པར་ཐལ། འདོད་པའི་ཕྱིར། འདོད་ན། དངོས་པོ་ཁོ་ན་བརྗོད་པའི་ངག་ཡོད་པར་ཐལ་ལོ། །འདོད་ན། དེ་ཁོ་ན་འཇལ་བའི་ཚད་མ་ཡོད་པར་ཐལ་ལོ། །འདོད་ན། དེ་ཁོ་ན་ཡོད་པར་ཐལ་ལོ་ཟེར་ན། དོན་ལ་རྩ་བར་འདོད་ན་མ་ཁྱབ་བོ། །འདོད་ན། ཤེས་བྱ་དངོས་པོ་ཁོ་ན་ལ་ཡོད་པར་ཐལ་ལོ། །འདོད་ན། ཤེས་བྱ་སྒྲ་དངོས་པོར་སྒྲུབ་པའི་མཐུན་ཕྱོགས་ཁོ་ན་ལ་ཡོད་པར་ཐལ། འདོད་པའི་ཕྱིར། འདོད་མི་ནུས་ཏེ། དེ་སྒྲུབ་ཀྱི་མི་མཐུན་ཕྱོགས་ལ་ཡང་ཡོད་པའི་ཕྱིར། །