སྔོན་གླེང་།
མདོ་ཁམས་གཡུ་ཁོག་གི་ཡུལ་འདིར་ཡང་ས་གནས་གཞན་དག་དང་འདྲ་བར། སྲིད་པའི་གངས་རི་ཆགས་ནས་ད་ལྟའི་བར་དུ་བྱུང་བའི་ལོ་རྒྱུས་ཀྱི་གཏམ་རྒྱུད་རིང་མོ་ཇི་སྙེད་ཅིག་མཆིས་པ་དེ་དག་ཕྱོགས་གཅིག་ཏུ་བཀོད་པའི་དེབ་ཐེར་དེ་སྔོན་མ་བྱུང་བའམ། བྱུང་ཡང་དུས་འགྱུར་གྱི་འཚུབ་མས་མི་མངོན་པའི་དབྱིངས་སུ་བསྟིམ་པ་གང་ལྟར་དེང་སྐབས་མཐོང་ཐོས་གྱི་ཡུལ་དུ་མི་སྣང་།
དེས་ན་གསར་སྐྱེས་གཞོན་ནུ་རྣམས་ཀྱིས་སོ་སོའི་ཡུལ་དགོན་གྱི་ལོ་རྒྱུས་དང་། རང་གི་རིགས་རུས་བདུན་རྒྱུད་ཚུན་ཆད་མ་ཤེས་ན། རླངས་དཔལ་གྱི་སེང་གེས། མི་རང་གི་རིགས་རྒྱུད་མ་ཤེས་ན། ནགས་ཁུང་གི་སྤྲེའུ་དང་འདྲ། ཕ་མེས་ཀྱི་ཆོ་འབྲང་མ་ཤེས་ན། གཡུ་འབྲུག་ཟོལ་མ་དང་འདྲ། ཡབ་མེས་ཀྱི་ཡིག་ཚང་མ་ཤེས་ན། མོན་ཕྲུག་ཡལ་བོར་དང་འདྲ། །ཞེས་གསུངས་པ་ལྟར་སྤྱིར་ལོ་རྒྱུས་མ་ཤེས་པའི་སྐྱོན་དང་། ཁྱད་པར་ས་གནས་འདིར་བྱུང་བའི་དངོས་བྱུང་མེས་པོའི་ལོ་རྒྱུས་མི་ཉམས་སྲུང་སྐྱོབས་ཀྱི་ཆེད་དུ་དམིགས་ནས་མཁན་ཤེས་བྱ་ཀུན་གཟིགས་ལ་རིང་མོའི་དུས་ནས་ལན་གྲངས་དུ་མར་གཡུ་ཁོག་ལོ་རྒྱུས་ཤིག་འབྲི་བར་བསྐུལ་མ་བྱས་མོད། ཁོང་ཉིད་ལ་ཆོས་མཐུན་གྱི་མཛད་པ་དུ་མའི་ཕྱག་ལས་མང་བ་སོགས་གང་ཐད་ནས་ཐུགས་ཁོམ་མ་བྱུང་བར་ལོ་གྲངས་དུ་མ་འགྱང་མཐར་བྱ་བ་འདི་ཉིད་བསྒྲུབ་པའི་འོས་འགན་དེ་ཁོ་བོའི་ཕྲག་ཏུ་བབས།
དེ་ཡང་ཕྱོགས་གཅིག་ནས་བསམ་བློ་བཏང་ན། མཁས་དབང་དགེ་འདུན་ཆོས་འཕེལ་གྱིས། མཐོ་རིས་ཐར་བའི་དངོས་རྒྱུ་མི་བྱེད་ཅིང་། །གསེར་དང་དངུལ་གྱི་ཡོང་སྒོ་མི་འདུ་བའི། །བར་མ་དོ་རུ་གནས་པའི་གནད་འདི་དག །ཀུན་གྱིས་བོར་ཀྱང་ཁོ་བོས་ཞིབ་ཏུ་དཔྱད། །གསུངས་པ་ལྟར་ལས་མ་འདས་མོད། ཡང་ཕྱོགས་གཞན་ནས་བསམ་ན། བྲག་དགོན་དཀོན་མཆོག་བསྟན་པ་རབ་རྒྱས་ཀྱིས། བོངས་ཚོད་རགས་པ་སྤྲང་པོའི་འབོག་ཁྲེས་བཞིན། །ནོར་ཉན་དངོས་པོ་མེད་སྙམ་འདོར་མི་རིགས། །གོ་མཐའི་ས་ལས་གོམ་གཅིག་མ་བརྒལ་བར། །འཇིག་རྟེན་དེ་ཉིད་མཐོང་བའི་ལྟད་མོ་འབྱུང་། །ཞེས་གསུངས་པ་ལྟ་བུའི་དགེ་མཚན་དང་། མི་ཐོག་གསར་རྙིང་བརྗེ་བའི་དུས་རབས་ཀྱི་དཀྱོག་མཚམས་ཤིག་ནས་ཡུལ་ལུང་ཞིག་གི་བྱུང་རིམ་རྗེས་མེད་དུ་འགྲོ་བར་ཕངས་སེམས་དང་། ལོ་རྒྱུས་ཀྱི་སྟོང་ཆ་ཅུང་ཟད་ཅིག་རང་ས་ནས་བསྐང་སྟེ་མི་རབས་རྗེས་མ་དག་གི་སྐལ་བར་འཇོག་ཐུབ་ན་གོང་དུ་བཤད་པའི་ནགས་ཀྱི་སྤྲེའུ་དང་། གཡུ་འབྲུག་ཟོལ་མ། མོན་ཕྲུག་ཡལ་བོར་ལྟ་བུའི་སྐྱོན་དེ་དག་འཇུག་མི་ནུས་པར་མཐོང་ནས་རྒན་རབས་པ་དང་། མཁྱེན་ལྡན་དག་གི་སར་ཆེད་བསྐྱོད་ཀྱིས་ལོ་རྒྱུས་འདྲི་གཅོད་ཞིབ་བསྡུར་བྱས་ནས་བྱ་བ་འདི་ཉིད་བསྒྲུབ་པའི་ཁུར་བླངས་པ་ཡིན།
དེ་ཡང་དེབ་འདིའི་བརྗོད་བྱ་གཙོ་བོ་ཐོག་མར་གཡུ་ཁོག་ཡུལ་གྱི་སྣོད་བཅུད་ཀྱི་བཀོད་པ་སྤྱི་དང་། བྱིན་ལྡན་གྱི་གནས་རི་དང་། ཡུལ་ལྷ་ཟོ་དོར་གྱི་རིགས་ཇི་ལྟར་གནས་ཚུལ། དམ་པའི་སྐྱེས་བུ་དུ་མས་ཞབས་ཀྱིས་བཅགས་ཚུལ་བཅས་རགས་བསྡུས་སུ་བཀོད། དེ་ནས་ཆོས་རྒྱལ་སྲོང་བཙན་སྒམ་པོའི་སྐུ་དུས་སོགས་སྔོན་བྱུང་དུས་སྐབས་འགའི་ལོ་རྒྱུས་ཡིག་ཆ་གཞན་དུ་གསལ་བ་རྣམས་ཐོར་བུར་བཀོད། བྱེ་བྲག་ཀརྨ་པ་སྐུ་ཕྲེང་བཅུ་པའི་དུས་ནས་བཟུང་གཡུ་ཁོག་དཔོན་རབས་བཅུ་གཉིས་ཀྱིས་སྲིད་དབང་བཟུང་ཚུལ་དང་། དགོན་པའི་ལོ་རྒྱུས་ཀྱང་དང་པོ་བོན་ནས་བན་དུ་འགྱུར་བ་ཇི་ལྟར་བྱུང་ཚུལ་དང་། དེ་ནས་སྔ་འགྱུར་རྫོགས་ཆེན་པའི་ཆོས་བརྒྱུད་འཛིན་པའི་ཆོས་སྡེ་རུ་གྱུར་ཚུན་ཆད་ཀྱི་གདན་རབས་བཅུ་གཅིག་དང་། མཁན་རབས་བཅུ་གཉིས། གཞན་ཡང་གདན་ས་འདིར་བྱོན་པའི་བསྟན་འཛིན་གྱི་སྐྱེས་བུ་བཞི་བཅུ་ལྷག་སྟེ་ཁྱོན་དམ་པའི་སྐྱེས་བུ་བདུན་ཅུ་ཙམ་གྱི་རྣམ་ཐར་དང་། དེ་དག་གི་སྐུ་དུས་སུ་བཤད་སྒྲུབ་འཁོར་ལོ་གསུམ་གྱི་རིང་ལུགས་ཇི་ལྟར་བཟུང་བ་དང་། ཆོས་བརྒྱུད་འཛིན་པའི་ཆོས་སྡེ་ཇི་ལྟར་འཕེལ་རྒྱས་བྱུང་ཚུལ་སོགས་ཅུང་ཟད་གསལ་བར་བཀོད་པ་ཡིན། རྣམ་ཐར་དེ་དག་ཀྱང་གཡུང་སྟོན་རྡོ་རྗེ་དཔལ་གྱིས། སློབ་མས་བརྩམས་པའི་རྣམ་ཐར་ཕལ་ཆེར་ནི། །ཆེ་བརྗོད་དྲག་པས་བླ་མ་ཟོག་པོར་གཏོང་། ཞེས་པའི་ཚུལ་ལ་བསམ་ནས་རང་རྣམ་སོགས་སུ་གསལ་བ་ལས་གཞན་ཞེན་གོག་གི་ཆེ་བསྟོད་དང་། རང་བཟོ་སྤངས་ཅི་ཐུབ་བྱས་པ་དང་། གོ་རིམ་ཀྱང་གདན་ཐོབ་དང་། མཛད་པ་སོགས་ལ་མ་ལྟོས་པར་སྐུ་ན་བགྲེས་གཞོན་གྱི་གོ་རིམ་ལྟར་གཙོ་ཆེར་བཀོད་པ་ཡིན། དེ་མིན་ད་རུང་གཡུ་ཁོག་གི་ཡུལ་འདིར་བྱོན་པའི་བླ་སྤྲུལ་འགའ་རེ་དང་། ཡན་ལག་གི་ཆོས་སྡེ་སོ་སོའི་བླ་སྤྲུལ་རྣམས་སོགས་དམ་པའི་སྐྱེས་བུ་དུ་མ་ཞིག་གི་རྣམ་ཐར་ཡོངས་རྫོགས་ཐེངས་འདིར་འབྲི་བར་མ་ནུས་པ་དང་། ཁྱད་པར་དུས་རབས་གསར་པའི་ནང་དུ་སྐུ་འཁྲུངས་པའི་མཁན་སྤྲུལ་རྣམས་ཀྱི་ཐུན་མོང་དང་ཐུན་མིན་གྱི་མཛད་པ་རྣམས་ནི་འབྱུང་འགྱུར་མི་རབས་ཕྱི་མ་རྣམས་ཀྱི་སྐལ་བར་འཇོག་པ་ལས་ཐེངས་འདིར་དམིགས་བསལ་དུ་རྒྱ་སྤྲུལ་གསུམ་པའི་རྣམ་ཐར་མཚོན་ཙམ་ལས་གཞན་རྣམས་འབྲི་བའི་ངལ་བ་གནས་སྐབས་སུ་བསྟུང་བར་བྱས་ནས་རྟེན་འབྲེལ་འཕྲོ་ཅན་དུ་བཞག་གོ །མདོར་ན་ཁོ་བོས་གོ་ཐོས་ཀྱི་ལོ་རྒྱུས་རྣམས་ཕྱོགས་གཅིག་ཏུ་བསྡུ་སྒྲིག་བྱས་ཤིང་ཐོག་མཐའ་བར་གསུམ་དུ་རང་དགོན་གྱི་མཁན་ཆེན་ཤེས་བྱ་ཀུན་གཟིགས་དང་། ནོར་བུ་བཟང་པོ་རྣམ་གཉིས་སོགས་ལ་བཀའ་འདྲི་དགོངས་བསྟུན་སྤྱན་འབུལ་བགྱིས་པ་དང་། ཁྱད་པར་རྟའུ་རྫོང་རིག་གནས་ཡུལ་སྐོར་ལས་ཁང་གིས་པར་སྐྲུན་མཐུན་རྐྱེན་སྦྱར་བའི་བཀའ་དྲིན་སོགས་ལ་བརྟེན་ནས་ལོ་རྒྱུས་ཀྱི་ས་བོན་ཙམ་མི་རབས་རྗེས་མའི་ལག་ཏུ་འཇོག་རྒྱུ་བྱུང་བས་བློ་བདེ་བ་ཡིན། འོན་ཀྱང་ད་རུང་འདིར་མ་འཁོད་པའི་རིན་ཐང་ལྡན་པའི་ལོ་རྒྱུས་དང་། རླབས་ཆེན་གྱི་མི་སྣ་དུ་མ་ཞིག་ཡོད་པར་མ་ཟད་འདིར་འཁོད་པ་དག་ལ་ཡང་ནོར་འཁྲུལ་དང་། ཆད་ལྷག་གང་མང་ཞིག་ཤོར་ཡོད་པར་ངེས་པས་དེ་དག་གཟུར་གནས་མཁྱེན་སྤྱན་ཡངས་པ་དག་གི་མདུན་སར་སྙིང་ནས་བཟོད་གསོལ་ཞུ་བ་དང་། འདི་ལ་ཆགས་སྡང་དང་ཕྱོགས་ཞེན་གྱིས་ཀླན་ག་མི་འཚོལ་བར་མ་ཚང་ཁ་སྐོང་དང་། ནོར་བ་དག་བཅོས་བྱེད་པའི་རེ་བསྐུལ་ལན་བརྒྱར་ཞུ་བ་ལགས་སོ།། རྩོམ་པ་པོས།