ཆོས་འཆད་ཉན་ལ་འཇུག་པའི་ཚུལ་དང་ཕན་ཡོན།
འདིར་བདག་ཅག་གི་བླ་མ་ཤཱཀྱའི་རྒྱལ་པོ་རྫུ་འཕྲུལ་གྱི་རྐང་པའི་དཔུང་ཚོགས་ཡན་ལག་བཞི་དང་ལྡན་པས། ཆུ་སྲིན་རྒྱལ་མཚན་ཅན་གྱི་གཡུལ་ངོ་ཕམ་པར་མཛད་ནས། བསྡུ་བ་བཞིས་གདུལ་བྱ་སྨིན་གྲོལ་གྱི་ཞིང་དུ་བསྡུས་ནས། ཆོས་ཀྱི་འཁོར་ལོ་མ་ལུས་པ་རྣམ་པ་ཐམས་ཅད་དུ་བསྐོར་བའི་ཆོས་ཀྱི་རྒྱལ་པོ་ཆེན་པོ་དེའི་ཆོས་སྲིད་ཁྱད་པར་དུ་འཕགས་པའི་རྒྱལ་ཚབ་ཆེན་པོ་རྣམས་ཀྱིས་ཡང་དག་པར་ལེགས་པར་བསྐྱངས་པའི་སྲོལ་བཟང་པོ་འདི། ལྷ་དང་བཅས་པའི་འགྲོ་བ་མཐའ་དག་ལ་ཕན་པ་དང་བདེ་བའི་གཞིར་གྱུར་པ་ཡིན་པས། དེའི་ཚུལ་གཅེས་པར་འཛིན་པར་རིགས་ཤིང་། དེ་ཡང་བཤད་སྒྲུབ་གཉིས་ལས་གཞན་པའི་ཐབས་ཀྱིས་མ་ཡིན་པའི་ཕྱིར་དང་། སྒྲུབ་པའང་འཆད་ཉན་སྔོན་དུ་འགྲོ་བ་ཅན་ཡིན་པས། འཆད་ཉན་ལ་འཇུག་པའི་ཚུལ་ངེས་པར་བྱའོ། །འདི་ལ་བཞི་སྟེ། དམ་པའི་ཆོས་མཉན་པ་དང་བཤད་པའི་ཕན་ཡོན་རིག་པར་བྱ་བ་དང་། གང་མཉན་པ་དང་བཤད་པར་བྱ་བའི་ཆོས་ངོས་གཟུང་བ་དང་། དེ་ལ་ཉན་བཤད་ཚུལ་ཇི་ལྟར་སྒྲུབ་ཅིང་ཉམས་སུ་བླང་བ་དང་། བསྒྲུབ་བྱའི་ཆོས་ཇི་ལྟར་བྱུང་བའི་ཚུལ་ལོ། །