མ་མགོན་སྒབ་འདྲེ་མནན་ཐབས་རྡོ་རྗེའི་གོ་མཚོན་གྱི་གེགས་སེལ།
མ་མགོན་སྒབ་འདྲེ་མནན་ཐབས་རྡོ་རྗེའི་གོ་མཚོན་གྱི་གེགས་སེལ་བཞུགས་སོ།།
ན་མོ་གུ་རུ་ནཱ་ཐ་མ་ཧཱ་བ་ལ་ཡེ། སྟོབས་བཅུའི་མངའ་བདག་གྲུབ་ཆེན་ཀརྨ་པ། །སྣང་སྲིད་ཟིལ་གྱིས་གནོན་ལ་ཕྱག་འཚལ་ནས། །མ་མགོན་འཁོར་ལྔ་འདོན་མཁན་ཐམས་ཅད་ལ། །ཕན་པའི་སྒབ་འདྲེ་མནན་ཐབས་མདོར་བསྡུས་བྲི། །དཔེར་ན་ཐུབ་པ་ལ་ཡང་ལྷ་སྦྱིན་ལྟར། །ལྷ་རྣམས་ཕལ་ཆེར་ལ་ནི་སྒབ་འདྲེ་ཡོད། །སྒབ་འདྲེ་ཕལ་ཆེར་ངན་པ་ཡིན་ངེས་མེད། །སྒབ་འདྲེ་དེ་ཡང་ལྷ་རེ་ཡིན་པ་སྟེ། །སྔོན་གྱི་སྨོན་ལམ་སྟོབས་ཀྱིས་གནོད་པ་ཡོད། །དཔེར་ན་ནོར་རྒྱུན་མ་དང་དབྱངས་ཅན་མ། །གཅིག་བསྒྲུབས་པ་ལ་གཅིག་གིས་གནོད་པ་ལྟར། །དེ་འདྲའི་མིང་ལ་ལྷ་རུ་
ཞེས་སུ་གྲགས། །།ཕྱག་རྡོར་སྒྲུབ་དུས་ཕྱག་རྡོར་ཉིད་ཀྱི་སྲས། །ཨཱརྱ་མུ་ད་ཀ་ཡིས་གནོད་པར་བཤད། །སངས་རྒྱས་རེ་ལ་སྒབ་འདྲེ་རེ་ཡོད་དེ། །འབྲལ་མེད་བཟོད་པ་བསྒོམ་རྟེན་སེམས་པར་གསུངས། །སྔོན་གྱི་བུ་མོ་སྤུན་གསུམ་སྨོན་ལམ་གྱིས། །དམ་སྲི་ལྕགས་ཕག་ནག་པོ་ཞེས་བྱ་བ། །རྒྱལ་བའི་དབང་པོ་ན་རིམ་ཀུན་ལ་གནོད། །དེ་འདྲའི་ངན་པའི་རིགས་ཀྱི་དམ་སྲི་ཡང་། །དམྱལ་བར་སྐྱེས་རྗེས་ཉིད་ཀྱི་འདྲེན་དགོས་སྐད། །དེ་བཞིན་ལྷ་རྣམས་ཀུན་གྱི་སྒབ་འདྲེ་ཡང་། །སྲས་དང་སྲས་མོ་མཆེད་དང་འཁོར་གཡོག་ཡིན། །དེ་དག་མེད་པར་བྱ་རྒྱུ་མ་མཆིས་ཀྱང་།
མནན་དང་བསྲེགས་པ་ལ་སོགས་རྟེན་འབྲེལ་གྱིས། །དེ་ཕྱིར་སྒྲུབ་པ་པོ་ལ་མི་གནོད་གསུངས། །སློབ་དཔོན་ནུས་པ་ཆེན་པོས་མནན་ན་ནི། །མི་བརྒྱུད་སློབ་བརྒྱུད་རབ་ལ་བཅུ་གསུམ་ཙམ་། །འབྲིང་ལ་བདུན་དང་ཐ་མ་གསུམ་རེ་བརྟེན། །ཁོ་བོས་རྒྱས་པར་སོ་སོར་རྟགས་ཐོན་དང་། །བསྡུས་པ་ལན་གཉིས་དང་ནི་གསུམ་མནན་པས། །སློབ་བརྒྱུད་གསུམ་ཚུན་ཕན་ཐོགས་ཨེ་མ་ཧོ། །ལེགས་ལྡན་དང་ནི་སྲས་མཆོག་ནག་པོ་ལ། །སྒབ་འདྲེ་ཡོད་པའི་ལོ་རྒྱུས་མ་མཆིས་ཀྱང་། །འཇིག་རྟེན་མགོན་པོ་དྲེགས་བྱེད་བེར་ནག་ཅན། །བདུད་ཀྱི་མགོན་པོ་ཏྲཀཱད་ཡིན་གསུངས་པས། །དེ་ཡི་འཁོར་ལ་དམ་སྲི་བསེ་རིག་ཡོད། །རང་དང་འཁོར་ལ་གནོད་ཅིང་བརླག་པ་དང་། །སྲིད་སྒབ་མི་འཕེལ་འཕྲལ་ཕུག་བཀྲ་མི་ཤིས། །དཔལ་ལྡན་ལྷ་མོ་རི་རབ་ཁར་བྱོན་དུས། །སྲིན་པོ་དྷ་ཤ་དྷེ་བས་ཆགས་པ་སྤྱད། །ལྷ་མོའི་ལྟོ་བར་མི་བཟོད་གཟེར་ཅིག་བྱུང་། །བུ་མོ་ནག་མོ་ཁོག་སྨད་ཕུར་པ་ཅན། །ཕུར་པ་ལྷ་མོའི་ལྟེ་བར་ཟུག་པ་སྐྱེས། །དེ་ནི་དམ་སྲི་ལྟེ་ཕུར་ནག་མོ་སྟེ། །གཞན་ཡང་བྱ་མཆུ་མ་དང་ཕག་སྣ་མ། །འབྲོག་སྲིན་མགོ་དགུ་དང་ནི་དམ་སྲི་བཞིས། །ལྷ་མོ་སྒྲུབ་ལ་བར་ཆད་སྣ་ཚོགས་བྱེད། །
སྔོན་ཚེ་འཁོར་ལོ་སྒྱུར་བའི་རྒྱལ་པོའི་སྲས། །བསྐལ་མང་ཚོགས་བསགས་ནོར་བུ་སྦྱིན་པ་བཏང་། །ཤཱཀ་ཐུབ་བསྟན་པར་རྣམ་མང་ཐོས་ཀྱི་སྲས། །འགྲོ་བའི་དབུལ་ཕོངས་སེལ་བར་སྨོན་ལམ་བཏབ། །ནུ་བོ་མི་སྡུག་སྦྱིན་གྱི་ཕྲག་དོག་སྐྱེས། །དེ་ཚེ་གནོད་སྦྱིན་སྲོག་གི་བདག་པོར་གྱུར། །རྣམ་སྲས་སྒྲུབ་མཁན་ཡིད་དཀྲུག་བསམ་པ་བསྒྱུར། །སྲོག་འཕྲོག་མི་ནོར་ཀུན་ལ་གནོད་པར་སྨོན། །།དེ་ནི་གནོད་སྦྱིན་ཤེས་པ་དཀར་པོ་ཟེར། །ད་ལྟ་རྒྱལ་པོ་བེ་ཀར་ཡིན་པར་བཤད། །རྣམ་ཐོས་སྲས་འདི་དངོས་གྲུབ་ཆེ་ན་ཡང་། །སྒབ་འདྲེ་རྒོད་དྲག་བར་ཆད་དེ་བས་ཆེ། །རྡོ་རྗེ་ལེགས་པ་མཆེད་འཁོར་སུམ་བརྒྱ་དང་། །དྲུག་ཅུ་རེ་གསུམ་ཡོད་པ་སྐུ་མཆེད་དེ། །སུམ་བརྒྱ་དྲུག་ཅུ་ཕྱག་རྡོར་ཞལ་མཐོང་བས། །གནོད་པ་མི་བྱེད་བསྟན་པ་སྲུང་བ་ཡིན། །གསུམ་གྱིས་ཕྱག་རྡོར་མ་མཇལ་གནོད་པ་བྱེད། །སྐུ་མཆེད་ཡིན་ཕྱིར་འབྲལ་མེད་མཉམ་དུ་འགྲོགས། །དམ་ཅན་གསོལ་ཁོར་ཡམ་ཤུད་མཉམ་མཆོད་དགོས། །ཡམ་ཤུད་བཙན་གྱི་མགོན་པོ་བེག་རྩེ་ཡིན། །སྙབ་པ་ལག་རིང་རྣལ་འབྱོར་སྲོག་ལ་རྒོལ། །ཡམ་ཤུད་དམར་པོས་གོད་ཁ་མང་བར་བྱེད། །ཐེའུ་རང་སྟོང་འཁྲུག་ནང་འཁྲུག་
མི་ཁ་ལྡང་། །ཞིང་སྐྱོང་སྒབ་འདྲེ་ཡང་ནི་འདི་གསུམ་ཡིན། །འདི་དག་མནན་བསྲེགས་ལ་སོགས་མ་ཤེས་ན། །ལོ་བརྒྱར་བསྒྲུབ་ཀྱང་མི་འགྲུབ་དམ་སྲིའི་དཀྲུག །ཚེ་ཐུང་འཁོར་ལ་གཟན་ཅིང་གོད་ཁ་མང་། །དགྲ་ལ་རྦད་ན་མི་རྒྱུག་ཟུན་ལ་རྒྱུག །དགྲ་དང་ཁ་མཆུ་མི་ཁ་གཏམ་ངན་མང་། །སྲིན་མགོན་དང་ནི་སྔགས་བདག་གཉིས་པོ་ལ། །མིང་དུ་ཐོགས་པའི་སྒབ་འདྲེ་མ་མཆིས་ཀྱང་། །ཆོས་པ་ལས་ལོག་སྔགས་པ་དམ་ལོག་དང་། །བཙུན་པ་སྡོམ་ཁྲིམས་ཉམས་པའི་དཀོར་སྲེད་ཅན། །དེ་དག་དམ་སྲི་རྣམས་ཀྱི་འཁོར་དུ་སྐྱེས། །དེ་དག་སྒྲུབ་པ་བྱེད་མཁན་ཀུན་ལ་གནོད། །གཞན་ཡང་རིག་སྔགས་སྒྲུབ་པ་བྱེད་ཚད་ལ། །ཉིན་དྲུག་མཚན་དྲུག་ལན་གྲངས་བཅུ་གཉིས་སུ། །ཉུལ་ནས་སྒྲུབ་ལ་བར་ཆད་བྱེད་པའི་བགེགས། །དཔག་མེད་ཡོད་པའི་མིང་དང་གྲངས་ཀ་སོགས། །གསར་མའི་ཕྱག་རྡོར་རིག་པ་མཆོག་གི་རྒྱུད། །རྙིང་མའི་སྒྲུབ་ཆེན་རྣམས་ལས་རྒྱ་ཆེར་གསུངས། །སྟན་ལ་འདུག་མི་འདོད་པར་ལངས་འདུག་མང་། །རང་གི་སྒྲུབ་རྒྱུའི་ཆོས་ལ་ཐེ་ཚོམ་མང་། །ལྷ་དང་བླ་མ་རྣམས་ལ་ལོག་ལྟ་སྐྱེ། །དམིགས་པ་མི་གསལ་སྔགས་ལ་ལྷག་ཆད་མང་། །སྒྲུབ་པ་སྐྱུར་ནས་
བྱ་བ་གཞན་སྒྲུབ་འདོད། །དུས་མིན་ལྷ་ཡི་ཞལ་མཐོང་ལུང་སྟོན་ཏེ། །ཁྱོད་ཀྱི་ཆོས་དང་སྒྲུབ་པ་འདི་བྱས་ན། །ལམ་ལོག་ནོར་འཁྲུལ་ཡིན་པས་བཀྲ་མི་ཤིས། །ངན་འགྲོར་སྐྱེ་སོགས་ལུང་ཡང་ལོག་པར་སྟོན། །མཚམས་སྒྲུབ་བསྐང་གསོ་ལ་སོགས་གཟབ་པའི་དུས། །མི་འཕྲག་ན་ཚ་གོད་ཁ་ལ་སོགས་ལྡང་། །ཆོས་ཕྱོགས་གཡེལ་ཞིང་འཇིག་རྟེན་སྒྲུབ་པའི་ཚེ། །བར་ཆད་མེད་ཅིང་བསམ་པ་འགྲུབ་འགྲུབ་འདྲ། །མཚམས་དང་སྒྲུབ་པ་ཅི་བཞིན་བྱས་པའི་ཚེ། །དམ་སྲི་རྣམས་ནི་བུ་ཤའི་མ་ལྟར་སྡུག །དེ་ཕྱིར་དམ་སྲི་རྣམས་ཀྱི་ཆོ་འཕྲུལ་སྟོན། །དེ་དག་སོ་སོར་མནན་ཐབས་མང་ན་ཡང་། །རྫས་ཀྱང་འཛོམས་དཀའི་སྒྲུབ་པ་རྟགས་ཐོན་དགོས། །དེང་སང་ལྷ་གཅིག་སྒྲུབ་པའི་རྟགས་ཐོན་དཀའ། །དེ་དག་སོ་སོར་རྟགས་ཐོན་སྒྲུབ་མི་ནུས། །དམ་སྲི་འདྲེ་ཡི་རིགས་གྱུར་ཐམས་ཅད་ཀུན། །སྒྲུབ་མི་དགོས་པར་བཙན་ཐབས་གནོན་པའི་ཐབས། །བྲམ་གཟུགས་མགོན་པོའི་ཆོས་སྐོར་གཉན་ལོའི་ལུགས། །ཤོག་གུ་གཅིག་ལ་མ་ཧཱ་བ་ལའི་གཟུགས། །གླང་མགོ་དམར་པོ་རྭ་ནི་གདེངས་བའི་བར། །ཁྲོ་ཞལ་དམར་པོ་ཞལ་དུ་སྦྲུལ་ཟ་བ། །དེ་སྟེང་མི་མགོ་སྔོན་པོ་མིག་གཅིག་
པ། །དབུ་སྐྲ་དར་སྔོན་གྱིས་བཅིངས་དར་དཔྱངས་འཕུར། །འོག་མའི་མགོ་ལ་སྦྲུལ་གྱི་གདེངས་ཀ་བདུན། །ལྟེ་བ་ཟུར་གསུམ་ཧོ་ཁུང་ཐུར་བསྟན་ནང་། །དགྲ་བགེགས་ས་བོན་ནི་ཏྲི་མགོ་ཐུར་བསྟན། །སྐུ་མདོག་དུད་ཁ་ཕྱག་གཉིས་ཐུགས་ཀར་སྦྱར། །ཕྱག་བར་ཕུར་པ་ནི་ཏྲི་མ་ཚད་བྲི། །སྐུ་སྨད་སྦྲུལ་མཇུག་ལྗང་གུ་གཡས་འཁྱིལ་ལོ། །དེ་ཡི་རྒྱབ་ཏུ་སྔགས་འདི་ཐུར་དུ་བརྩེགས། །སྔགས་ཕྲེང་གཅིག་ལ་བྲི་བར་ཤོང་བར་བྱ། །ཨོ་ཤ་མ་ར་ན་པྲ་མ་ཤག་དུན་ཧཱུྃ༔ ཧཱུྃ་ནན་དུལ་དུལ་ནན་ཆད་སོད༔ སྙིང་ལ་མཱ་ར་ཡ་ཕཊ། ཅེས་བྲི་གཏོར་མི་གཅིག་ཀྱང་བཤམས་བྱས་ལ། །བ་གླང་སྤྱོད་ནས་བསྒོམ་འདྲ་སྤྱན་དྲངས་བསྟིམ། །ཨོཾ་མ་ཧཱ་བ་ལ་ཧཱུཾ། ཞེས་པ་བརྒྱ་རྩ་རྟེན་འབྲེལ་རབ་གནས་བྱ། །རྩ་སྔགས་ཁཱ་ཧི་བཏགས་པས་གཏོར་མ་བྱིན། །ཨརྒྷཾ་ལ་སོགས་སྔགས་ཀྱིས་མཆོད་བྱས་ནས། །ཧཱུྃ། འཇིག་རྟེན་ལྷ་འདྲེ་ཀུན་གྱི་གཤེད་པོ་སྟེ། །ལས་ཀྱི་མཐུ་ལས་སྒྲུབ་པ་བདུད་ཀྱི་བུ། །བ་ལང་སྤྱོད་ཀྱི་གླིང་ལ་དབང་བསྒྱུར་བ། །སྟོབས་ཆེན་མ་ཧཱ་བ་ལ་ཁྱོད་ལ་བསྟོད། །སྐུ་གཟུགས་འདི་དང་དབྱེར་མེད་བརྟན་བཞུགས་ལ། །ཁྱོད་ཀྱི་འདུལ་སྐལ་ཡིན་པས་འདྲེ་འདི་ནོན། །སྟོབས་ཆེན་ཁྱོད་ཀྱི་དམ་ཚིག་དུས་ལ་བབ། །ཅེས་བརྗོད་སྐུ་གཟུགས་དེ་
དང་དབྱེར་མེད་བསྟིམ། །ཤོག་གུ་གཙང་མར་ལིངྒ་སྤྱི་འཚམས་བྲི། །ཡན་ལག་འབྲུ་བཞི་ཕྱི་རོལ་ཛ་ཁྲམ་བསྐོར། །སྙིང་ཀར་ཛ་ཡིག་ཁ་སྤྲོད་གཉིས་ཀྱི་བར། །ནཱི་ཏྲི་ཁུག་གསུམ་བརྩེགས་མར་བྲི་བར་བྱ། །ལྟོ་བའི་ནང་དུ་སྒྲུབ་ལ་བར་གཅོད་པའི། །དམ་ཉམས་ལྕགས་ཕག་དམ་སྲི་ངུར་འཛིན་དང་། །བདུད་ཀྱི་འཁོར་ན་དམ་སྲི་བསེ་རག་དང་། །ལྟེ་ཕུར་ནག་མོ་དང་ནི་བྱ་མཆུ་མ། །འབྲོག་སྲིན་མགོ་དགུ་དང་ནི་ཕག་སྣ་མ། །སྲོག་བདག་ཤེས་པ་དཀར་པོ་བསེ་གདོང་ཅན། །འབི་ཙི་ཏྲིའུ་གནོད་སྦྱིན་བྲེལ་ཕོངས་ཅན། །སྙབ་པ་ལག་རིང་ཡམ་ཤུད་དམར་པོ་དང་། །ཐེའུ་རང་སྟོང་འཁྲུགས་ལ་སོགས་དམ་སྲིའི་རིགས། །སྒབ་འདྲེ་ཐམས་ཅད་ལིངྒ་འདི་ལ་ཁུག །བཛྲ་ཨཾ་ཀུ་ཤ་ཛཞེས་པ་བྲི། །རང་མིང་ལྷ་མིང་དེ་རུ་བྲི་མི་རུང་། །དྲི་མ་སོང་དོག་མེ་དང་རླུང་ལ་གཡུགས། །ལྕགས་སྡེར་ནང་བཞག་མགོན་པོའི་ཐུན་གཏོར་གྱི། །ན་མོ་རྗེ་བཙུན་རྩ་བ་ཞེས་པ་ནས། །བདེན་པའི་མཐུས་ཞེས་བྱ་བའི་ཚིག་མཇུག་ཏུ། བླ་མེད་སྒྲུབ་པ་ལ་བར་དུ་གཅོད་པའི། དམ་ཉམས་ལྕགས་ཕག་ནག་པོ་སྤྱན་གསུམ། དམ་སྲི་ངུར་འཛིན། འཇིག་རྟེན་མགོན་པོ་སྒྲུབ་པ་ལ་བར་དུ་གཅོད་པའི་བདུད་དམ་སྲི་བསེ་རག །དཔལ་ལྡན་ལྷ་མོ་སྒྲུབ་པ་ལ་བར་དུ་གཅོད་པའི་ལྟེ་ཕུར་ནག་མོ་ཏྲ་
ལི་ཏའི་ཆུང་མ། བྱ་མཆུ་ནག་མོ་ཏཱ་ལི་ཏའི་བུ་མོ། ཁ་ནག་མོ་ཏྲ་ལི་ཏའི་ཁོལ་མོ། འབྲོག་སྲིན་མགོ་དགུ། རྒྱལ་པོ་རྣམ་ཐོས་སྲས་སྒྲུབ་པ་ལ་བར་དུ་གཅོད་པར་བྱེད་པའི་སྲོག་བདག་ཤེས་པ་དཀར་པོ། གནོད་སྦྱིན་བསེ་གདོང་ཅན་བི་ཏྲི་ཏྲིའུ། འཛམ་སེར་ནག་སྒྲུབ་པ་ལ་བར་དུ་གཅོད་པའི་གནོད་སྦྱིན་བྲེལ་ཕོངས་ཅན། མི་ནག་བྱ་མགོ་ཅན། ཞིང་སྐྱོང་དང་དམ་ཅན་སྒྲུབ་པ་ལ་བར་དུ་གཅོད་པར་བྱེད་པའི་བདུད་སྙབ་པ་ལག་རིང་། བཙན་ཡམ་ཤུད་དམར་པོ། ཐེའུ་རང་སྟོང་འཁྲུག་ལ་སོགས་པ་བདག་ཅག་དཔོན་སློབ་མི་ནོར་བརྒྱུད་པ་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་དམ་སྲི་སྒབ་འདྲེ་གང་ཡིན་པ་ཐམས་ཅད་གཟུགས་ལིངྒ་འདི་ལ་ཁུག་ཅིག །བཛྲ་ཨངྐུ་ཤ་ཛནས་བཟུང་གནེ་ཧོ། ཞེས་བར་བཀུག་གཞུག་བརྒྱའམ་ཉེར་གཅིག་བྱ། རང་ཉིད་ཡི་དམ་ལེགས་ལྡན་ཐུགས་ཀ་ཡི། །འོད་ཟེར་ལྕགས་ཀྱུས་ཡང་ཡང་བཀུག་ལ་བསྟིམ། །ཕྱི་སྒོའི་ཐེམ་འོག་གྲུ་གསུམ་དོང་བྲུས་ལ། །དེ་ནང་ལིངྒ་གན་རྐྱལ་མགོ་ཕྱིར་བསྟན། །དེ་སྟེང་མ་ཧཱ་བ་ལའི་སྐུ་དེ་སྒྲུབ། །དབུ་ནི་ཕྱིར་བསྟན་ཁ་སྦྱོར་བྱས་ལ་མནན། །ཤུགས་ཆེན་མི་ཡིས་བྱིས་པ་མནན་པ་ལྟར། །མ་ཧཱ་བ་ལས་ནམ་ཡང་མི་བཏང་བསམ། །
ས་ཁོད་རིམ་གཅིག་མནན་པའི་སྟེང་དུ་ནི། །རོ་གཡམ་གཅིག་གི་ངོས་ནི་གཉིས་པོ་ལ། །རྡོ་རྗེ་རྒྱ་གྲམ་རི་རབ་གླིང་བཞི་བྲི། །དམྱལ་ཡུལ་ཙམ་དུ་ཐུག་པར་ཐུར་མནན་སྟེང་། །རླུང་གི་རྡོ་རྗེ་རྒྱ་གྲམ་འབྱུང་རིམ་བརྩེགས། །དེ་སྟེང་རི་རབ་གླིང་བཞིས་མནན་པར་དམིགས། །བྱམས་པ་མ་བྱོན་བར་དུ་མ་ལྡང་ཞིག །དེ་ནས་ལོངས་ལ་བྱང་ཆུབ་སེམས་བསྐྱེད་ཞུས། །དེ་བར་མ་ཧཱ་བ་ལས་མ་བཏང་ཞིག །ཅེས་བརྗོད་ས་རིམ་དགུ་ལ་རྒྱ་གྲམ་རེ། །དེ་སྟེང་མེ་ཁྲོལ་དེ་སྟེང་ཆུ་ཡང་བླུག །ས་ཡིས་བཀབ་ལ་བཅག་རྡུང་མི་མངོན་བྱ། །ཧཱུཾ། རྡོ་རྗེ་འབར་བའི་དཀྱིལ་འཁོར་ཞེས་སོགས་ནས། །མཱ་ར་ཡ་ཕཊ་བར་གྱི་རྟ་བྲོ་བརྡུང་། །འདི་ནི་ཡེ་ཤེས་པ་དང་འཇིག་རྟེན་པ། །ཀུན་གྱི་སྒབ་འདྲེ་མནན་ཐབས་ཐུན་མོང་སྟེ། །ཤི་སྲི་ཆུང་སྲི་གོད་འདྲེ་མནན་པ་དང་། །རྒྱལ་འགོང་འདྲེ་མོ་མནན་ཀྱང་མིང་ཁ་བསྒྱུར། །འདྲེ་མནན་གཅིག་ཆོག་ཟབ་མོ་སྤྱི་རྒྱ། །སྒར་པ་འམ་ནི་འབྲོག་པ་ཡིན་ན་ནི། །ལམ་ཆེན་རྒྱ་གྲམ་འོག་གམ་རི་ཆེན་སྣ། །ལྷ་ཁང་མཆོད་རྟེན་མ་ཎི་བརྒྱ་མཁར་འོག །མི་གཞན་སུས་ཀྱང་མ་མཐོང་གསང་སྟེ་མནན། །ཡང་ན་ཚ་ཚ་དཀར་ནག་བརྒྱ་རེ་བྱེད། །རི་ཆེན་འོག་གམ་ས་ནོན་ཆེ་ས་རུ། །
དོང་བྲུས་ནང་དུ་ལིངྒ་དཔེའུ་རིས་མནན། །དེ་སྟེང་སཙྪ་ནག་པོ་མགོ་ཐུར་བསྟན། །དེ་སྟེང་དཀར་པོ་བརྒྱ་ནི་མགོ་གྱེན་བསྟན། །དེ་ནས་གོང་ལྟར་བཅག་བརྡུང་རྟ་བྲོ་བརྡུང་། །དེ་ནི་གོད་གཅོད་སོག་ཁ་ག་བཏགས་བྱ། །དེ་མིན་དམ་སྲིའི་རིགས་འདི་ཐབས་མཁས་ཁ་དུག་ཆེ། །རང་ལ་ཉེས་པ་ཏིལ་ཙམ་མེད་ན་ཡང་། །ཕ་རོལ་དོན་མེད་མི་ཡིས་སེམས་བསྒྲལ་ནས། །ཁོ་ལ་ངན་བྱས་བསམས་ནས་ཡར་ཀློག་དང་། །གཏད་མནན་ཟེར་བའི་མི་ཁ་གླེང་བརྗོད་བྱུང་། །དེ་འདྲ་བྱུང་བའི་ལོ་རྒྱུས་མང་དུ་ཐོས། །།ཡར་ལ་བཏོན་ན་མི་འཕྲོག་གནོད་པ་ཆེ། །དེ་ཕྱིར་མནན་པའི་སྟབས་དེ་མ་བདེ་ན། །གོང་ལྟར་བཀུག་གཞུག་བྱས་པའི་ལིངྒ་དེ། །མགོན་པོའི་གཞུང་གིས་ཕུར་འདེབས་བྱས་པའི་རྗེས། །ཐོ་བས་བརྡུང་ཅིང་མི་བསད་མཚོན་གྱིས་གཏུབ། །ཤོག་དུམ་ཟན་ལིང་ཤ་དུམ་བརྒྱ་རྩ་སྦག །མ་མགོན་ལ་སོགས་ཁྲོ་བོ་གང་རུང་གི །དྲག་པོའི་སྦྱིན་སྲེག་སྤྱི་དང་མཐུན་པར་བྱས། །ཐལ་བ་ལམ་ཆེན་རྒྱ་གྲམ་དཀྱིལ་དུ་བླུག །དེ་ཡིས་མནན་པའི་དོན་ཡང་ཚང་བ་ཡིན། །སྦྱིན་སྲེག་འདི་ནི་ལོ་གྲངས་འགའ་ཟུར་སོར། །ལན་རེ་གྲུབ་ན་སྐུ་རིམ་མཆོག་ཏུ་འགྱུར། །དེ་ལྟར་དམ་སྲི་བསྲེགས་
མནན་ལེགས་ཚར་ནས། །ལྷ་རྣམས་གང་སྒྲུབ་ལམ་དུ་འགྲོ་བ་སྟེ། །བདག་ཀྱང་ཚེ་རིང་ནད་ཉུང་བསམ་པ་འགྲུབ། །འཁོར་དང་རྟ་ཕྱུགས་རྣམས་ལ་གོད་ཀ་མེད། །དགྲ་ལ་རྦད་ན་སྐྱེན་པོའི་མདའ་བཞིན་འགྲོ། །བསོད་ནམས་ནོར་རྫས་ཆུ་བོའི་རྒྱུན་བཞིན་འབབས། །བར་ཆད་མེད་ཅིང་བཀྲ་ཤིས་ཅི་བསམ་འགྲུབ། །ནོར་བུ་རིན་ཆེན་བྱི་དོར་བྱས་དང་མཚུངས། །དེ་ཕྱིར་ཆོས་ལུགས་འདི་ལ་གདམས་ངག་འདི། །མེད་ཐབས་མེད་ཕྱིར་གབ་སྦས་མེད་པར་བཀོད། །ལྕགས་ཕག་ཆོ་འཕྲུལ་ཆེན་པོའི་ཚེས་གཉིས་ཀྱི། །འཕྲལ་དུ་བདུད་མོ་བླ་མས་ཞུས་པའི་ངོར། །ཕྱི་དྲོ་རཱ་ག་ཨ་སྱས་སྨྲས་པ་ལྟར། །དགེ་སློང་ཆོས་དགེ་ཞེས་བྱས་ཡི་གེར་བྲིས། །ཉེས་འགལ་མེད་ཕྱིར་བཤགས་བྱ་མ་མཆིས་ཤིང་། །དགེ་བས་སྒྲུབ་བརྒྱུད་བསྟན་པ་དར་བར་ཤོག ། ཨོཾ༔ ན་ཡ་ཨེ་ཨེ་ར་ལི་རི་ཨུ་ཧཾ༔ ལིངྒ་ནང་དུ་བཏུམ་ནས་མནན་ན་བསྟན་པ་ལ་ཕན་པར་གཏེར་སྟོན་ནམ་མཁའ་འཇིགས་མེད་ལུང་བསྟན་ལ་ཡོད། ཡང་རི་དྲུང་པའི་སྲོག་སྔགས་རེད། འདི་ཡིན། །མངྒ་ལཾ།། །།དའ་ཨ་ལེ་ཨེ་ར་ལི་རི་ཨུ་ཧཾ༔