ལེའུ་དང་བོ། སྔགས་ཆས་ཀྱི་སྐོར།

དང་བོ། འབུད་པའི་རོལ་མོ།

དུང་དཀར།

སྤྱིར་དུང་ལ་རིགས་བཞི་ཕྱེས་ཡོད་དེ། དུང་དཀར་གཡས་འཁྱིལ། གཟི་དུང་། དུང་དཀར། དུང་དམར་རོ། །དེ་རྣམས་ལས་སྔ་མ་སྔ་མ་མཆོག་ལ། ཕྱི་མ་ཕྱི་མ་ཞན་པའོ། །དུང་འདི་འོག་ཕྱོགས་ཀླུ་ཡི་ཕོ་བྲང་ནས་བྱུང་བར་བཤད་དེ། དུང་གི་སྲིད་པ་བཤད་པ་ལ། ཕ་ནི་གཡུ་འབྲུག་སྔོན་པོ་ལ། །མ་ནི་གསེར་ཉ་གཡུ་གཤོག་ཡིན། །བུ་ནི་དུང་བོ་ཨ་གྲགས་ཡིན། །མཚོ་སྨན་རྒྱལ་མོའི་མིང་བོ་ཡིན། །གདེངས་ཅན་ཀླུ་ཡི་མཆེད་ཟླ་ཡིན། །ཆུ་སྲིན་གདུག་པའི་གཤེད་མ་ཡིན། །ཞེས་གསུངས་ལ། དུང་དཀར་འདི་ཕ་གཡུ་འབྲུག་སྔོན་མོ་དང་། མ་གསེར་ཉ་ལས་འཁྲུངས་པར་བཤད་པ་ནི། ལས་ཚུལ་དང་རྟེན་འབྲེལ་གྱི་རང་བཞིན་སྨྲ་བསམ་བརྗོད་ལས་འདས་པ་སྟེ། དཔེར་ན། ཐང་དཀར་ལ་དུང་ཤྭ་དང་། སྲེ་མོང་མཚེར་མོ་ལ་གཡུ། གླག་མེར་མོ་ལ་སྒྲོག་དང་། ཨབ་ཤ་མཚེར་མོ་ལ་སྦུག་དང་། རྒོ་བ་ཁྱིའུ། ངུར་བ་མཚེར་མོ་ལ་ངུར་ཕྲུག་སྐྱེ་བ་སོགས་འཇིག་རྟེན་གྱི་སྣང་ཚུལ་ཡ་མཚན་མང་དུ་ཡོད་པ་བཞིན་ནོ། །

དུང་དཀར་གྱི་སྒྲ་གྲག་པས་ཕ་རོལ་བོ་ཟིལ་གྱིས་མནོན་པ་སྟེ། བྱང་ཆུབ་སེམས་དཔའ་དམ་པ་ཏོག་དཀར་དགའ་ལྡན་ནས་འཛམ་གླིང་དུ་འཕོ་བར་གཟིགས་ཙ་ན། ལྷའི་བུ་འགའ་ཞིག་གིས། མུ་སྟེགས་པའི་སྟོན་པ་དྲུག་གསུམ་བཅོ་བརྒྱད་ཀྱིས། ཡུལ་མ་རུངས་པར་བྱས་པས། དེ་བཞིན་གཤེགས་པ་འབྱོན་པའི་དུས་མིན་ཞེས། གཤོལ་བཏབ་སྐབས། ལྷའི་བུ་རྣམས་ཀྱིས་རོལ་མོ་ཐམས་ཅད་དུས་གཅིག་ལ་དཀྲོལ་ཡང་། བྱང་ཆུབ་སེམས་དཔའ་ཉིད་ཀྱིས་དུང་དཀར་བུས་པའི་སྒྲ་ཡིས་ཐམས་ཅད་ཟིལ་གྱིས་མནན་པ་དང་། སངས་རྒྱས་ཀྱིས་ཆོས་གསུངས་པའི་ཚེ། བརྒྱ་བྱིན་གྱིས་དུང་དཀར་ཕུལ་བར་གསུངས་པས། ལྷ་ཡུལ་ནའང་དར་སྲོལ་ཆེ་ལ། མི་ཡུལ་ལ་མཚོན་ནའང་། རྡོ་རྗེ་གདན། ན་ལེནྡྲ། བི་ཀྲ་མ་ཤཱི་ལ་སོགས་ཆོས་འཁོར་ཆེན་པོ་རྣམས་སུ་ཆོས་དུང་མཛད་པ་དང་། རང་ཅག་བོད་ལ་ཡང། དཔལ་ལྡན་ས་སྐྱ་བའི་ཆོས་དུང་དཀར་བོ་རྒྱང་གྲགས་ཞེས་ཧ་ཅང་སྔ། ཆོས་དུང་འདི་སངས་རྒྱས་ཀྱིས་ཆོས་འཁོར་བསྐོར་བའི་དུས། བརྒྱ་བྱིན་བྲམ་ཟེ་སྐར་རྒྱལ་དུ་སྤྲུལ་ནས། བཅོམ་ལྡན་འདས་ལ་ཕུལ་བའི་ཆོས་དུང་འཁྲུལ་མེད་ཡིན། དེ་ཡང་སྔོན་རྒྱ་གར་གྱི་རྒྱལ་བོ་དྷི་རྨ་པ་ལའི་སྐུ་རིང་ལ། མུ་སྟེགས་པས་ན་ལེནྡྲ་བཅོམ་པས། རྒྱ་ནག་རྒྱལ་བོ་དེ་བ་ར་ཛཱས་གྲོགས་བྱས་པས། སྐྱེས་ལན་དུ་སངས་རྒྱས་ཀྱི་ཆོས་དུང་འདི་ཕུལ། རྒྱ་ནག་ནས་ས་སྐྱར་ཇི་ལྟར་འབྱོར་ཞེ་ན། རྒྱལ་བོ་གོ་དན་གྱིས་ས་པཎ་ལ་ཕུལ་ཞིང་། དེས་འགྲོ་མགོན་འཕགས་པ་ལ་གནང་བར་བཤད་དོ། །དུང་དཀར་དེ་ལ་རྣམ་བཅུ་དབང་ལྡན་དང་། མཁའ་སྤྱོད་མ་དང་སྤྱན་རས་གཟིགས། བདེ་མཆོག་རྩ་སྔགས། མཁའ་འགྲོའི་བརྡ་ཡིག་སོགས་རང་བྱོན་མང་། འདིའི་གསུང་ཐོས་པས་བསྐལ་བ་མང་བོའི་སྡིག་སྒྲིབ་དག་ཅིང་། ངན་སོང་གི་སྐྱེ་སྒོ་ཆོད་ལ། ཐར་བར་འགོད་པར་མ་ཟད། ས་བཅུད་འཕེལ་བ་དང་། སད་སེར་གནོད་པ་སེལ། འབུད་མཁན་མེད་ཀྱང་རང་སྐད་འདོན་པ་དང་། ཕྱག་མཆོད་བྱས་ཏེ་སྨོན་ལམ་བཏབ་ན་འགྲུབ་པར་གསུངས་སོ། །

ཡང་འབྲས་སྤུངས་ཆོས་དུང་གི་བྱུང་བ་ཡང་། ལང་ཀར་གཤེགས་པའི་མདོ﹙རྒྱ་ནག་འགྱུར﹚ལས། བཅོམ་ལྡན་འདས་ལ་ཀླུའི་རྒྱལ་བོ་མ་དྲོས་པས་དུང་དཀར་བོ་ཞིག་ཕུལ་བ། མོའུ་གལ་གྱི་བུ་ལ་གནང་ནས། འདི་ཁྱོད་ཀྱིས་འགོག་པ་རིར་སྦོས་ཤིག མ་འོངས་པ་ན་དགེ་སློང་པདྨའི་ངད་ལྡན་འདིས་གཏེར་ནས་འདོན་པས། དེའི་ཆོས་དུང་དུ་འགྱུར་གྱི། གཏེར་བདག་སྤྲེའུ་གཟུགས་ཀྱིས་གནས་བྱེད་དོ། །ཞེས་པ་ལྟར། དགའ་ལྡན་ཆོས་འབྱུང་བཻཌཱུ་རྱ་སེར་བོ་ལས། སྟོན་པ་འཁོར་བཅས་ཁ་ཆེར་ཕེབས་དུས། ད་ལྟའི་སློབ་མ་དགེ་སློང་པདྨའི་ངད་ལྡན་འདི་བོད་གདོང་དམར་གྱི་ཡུལ་དུ། བློ་བཟང་གྲགས་པ་ཞེས་བྱ་བའི་དགེ་སློང་དུ་གྱུར། ཞེས་པ་ལྟར། རྗེ་ཙོང་ཁ་པ་བློ་བཟང་གྲགས་པའི་དཔལ་གྱིས། དགའ་ལྡན་འགོག་པ་རི་ནས་གཏེར་ནས་བཏོན། རྗེས་སོར་རྗེ་ཙོང་ཁ་པས་འཇམ་དབྱངས་ཆོས་རྗེ་ལ། ཁྱེད་ཀྱིས་ཆོས་སྡེ་ཞིག་འཐོབ་དང་། མ་དགོན་ལས་བུ་དགོན་དར་རྒྱས་ཆེན་པོ་འབྱུང་ཞེས་ལུང་བསྟན་ཏེ། གཏེར་ནས་བཞེས་པའི་དུང་དཀར་འདི་རྟེན་སྐལ་དུ་བསྩལ། དེ་བཞིན་དགོན་སྡེ་ཁག་ན། དགེ་འདུན་འདུས་པ་རྒྱ་མཚོ། ཚོགས་ལ་ཚོགས་དུས་ཉིས་དུང་འབུད་པ་དང་། ཆོས་ལུགས་ཀྱི་བྱེད་སྒོ་ཕལ་ཆེར་ལའང་འབུད་སྲོལ་ཡོད། ཁྱད་པར་དུ་དུང་དཀར་གཡས་འཁྱིལ་འདི། བྱང་ཆུབ་སེམས་དཔའ་ཞིག་དུང་གི་སྐྱེས་པ་ལྔ་བཞེས་པ་སྟེ། ཀློང་རྡོལ་བླ་མའི་རིན་པོ་ཆེ་བརྟག་ཐབས་ལས། དུང་ནི་སྲོག་ཆགས་དུང་རྣམས་རྗེས་བཟུང་ཕྱིར། །སྐྱེ་བ་ལྔ་བར་བྱང་སེམས་དུང་ལ་སྐྱེས། །ཞེས་དང་། དུང་སྐད་ཐོས་པའི་ཕན་ཡོན་ཡང་། དེ་ཉིད་ལས། གཡས་འཁྱིལ་གསུང་སྐད་ཐོས་པས་ནད་རིགས་སེལ། །ཁྱིམ་དུ་བཅང་ན་འཐབ་རྩོད་མེད་ཅིང་མཐུན། །ཞེས་དང་། ཁྱད་པར་དུ་དུང་སྒྲ་འདི་གོ་བ་ཐམས་ཅད་ངན་སོང་དུ་མི་ལྟུང་ཞིང་། ཐར་བའི་ལམ་སྣ་ཟིན་པར་སྨོན་ལམ་བཏབ་ཡོད་པས། སེར་སྦྲེང་དང་གཙུག་ལག་ཁང་གི་མདུན་ལས། ཉིས་དུང་བྱས་ནས་འབུད་སྲོལ་ཡོད།

ཡང་བོན་གྱི་ལུགས་ལ། དུང་དཀར་འདི་སྟོན་པ་གཤེན་རབ་མི་བོ་ཆེའི་དུས་སུ་རོལ་མོའི་རྣམ་གྲངས་སུ་བྱས་ནས་འབུད་སྲོལ་ཡང་ཡོད་པར་བཤད་དེ། བོན་གཞུང་ལས། དེ་ནས་འཁོར་དུ་གཏོགས་པ་རྣམས་ཀྱིས། སྟོན་པ་ལ་བླ་ན་མེད་པའི་མཆོད་པ་སྤྲིན་གྱི་རྒྱན་ཞེས་བྱ་བ་བཤམས་ནས་ཕུལ་ཏེ། དེ་ཡང་ལ་ལ་ཞིག་ནི་དར་ཕྱར་རོ། །ལ་ལ་ཞིག་ནི་དུང་འབུད་དོ། །ཞེས་དང་། གཡུ་རྔ་དིང་བ་དང་། དུང་བོ་ཨང་གྲགས་དང་། ཞེས་འབྱུང་བ་དང་། མདོ་གཟེར་མིག་ལས་ཀྱང་། རི་མོ། གཉེར་རིས། གཟུང་ཚུལ། སྙན་ཤལ་བཅས་ལ་དཔེ་མཚོན་གྱི་འགྲེལ་བཤད་རྒྱག་སྲོལ་ཡོད་དེ། སྔ་འགྱུར་རྡོ་རྗེ་ཐེག་པའི་རིག་འཛིན་རྒྱ་མཚོས། ལོངས་སྤྱོད་ཆས་གོས་རྒྱན་དང་རོལ་མོའི་རྣམ་བཤད་སྔགས་འཆང་རྒྱན་གྱི་མེ་ཏོག་ལས། ཁ་དོག་དྲི་མེད་དཀར་བ་ནི། །དཀར་ཕྱོགས་དབུ་འཕང་བསྟོད་པའི་བརྡ། །གཡོན་སྐོར་རི་མོའི་མུ་ཁྱུད་ཅན། །ས་ལམ་རིམ་གྱིས་བགྲོད་པའི་བརྡ། །གལ་ཏེ་རི་མོ་གཡས་འཁྱིལ་ན། །བསམ་དགུའི་རེ་སྐོང་རིན་ཆེན་བརྡ། །སྦུབས་སྟོང་ཆོས་སྐུ་འགྱུར་མེད་ལ། །དུང་སྒྲ་འགག་མེད་ལོངས་སྤྱོད་རྫོགས། །ནང་གི་རྐན་གཉེར་རི་མོ་ནི། །སྣ་ཚོགས་སྤྲུལ་བའི་དོན་བྱེད་བརྡ། །རྐན་དབུགས་རྩོལ་བའི་སྒྲ་སྐད་ནི། །ཆོས་རྣམས་རྟེན་ཅིང་འབྲེལ་འབྱུང་བརྡ། །ལྔ་ལྡན་དར་གྱི་སྙན་ཤལ་ནི། །ལམ་ལྔ་མཐའ་རུ་ཕྱིན་པའི་བརྡ། །ཐལ་མོ་པདྨ་རྒྱས་འཛིན་པ། །ཐབས་ཤེས་ཟུང་དུ་འཇུག་པའི་བརྡ། །སྒྲ་སྐད་ཐམས་ཅད་མནོན་པ་ནི། །ནག་པོའི་ཕྱོགས་ལས་རྒྱལ་བའི་བརྡ། །ཡང་། དུང་སྐད་བསྒྲགས་པའི་དགོས་པ་ཡང་། དེ་ཉིད་ལས། དུང་སྐད་ལན་གཅིག་སྟེང་དུ་བསྒྲགས། །ལྷ་ཁམས་མ་ལུས་དབང་དུ་བསྡུས། །ཚངས་པ་བརྒྱ་བྱིན་ལས་ལ་བཀོལ། །དུང་སྐད་གཉིས་པ་བར་དུ་བསྒྲགས། །མི་དང་མི་མིན་དབང་དུ་བསྡུ། །དུང་སྐད་གསུམ་པའི་ང་རོ་ཡིས། །དཀོན་མཆོག་གསུམ་དང་རྩ་བ་གསུམ། །གོང་མ་སྲི་ཞུའི་ཡུལ་ཀུན་མཆོད། །བཞི་བ་ཚངས་པ་བརྒྱ་བྱིན་སོགས། །མགོན་པོ་ཡོན་ཏན་མགྲོན་ཀུན་མཉེས། །ལྔ་བས་ཁམས་གསུམ་འགྲོ་བ་དྲུག། སྙིང་རྗེས་མགྲོན་ཀུན་བདེ་དང་ལྡན། །དྲུག་པས་བགེགས་རྒྱལ་བི་ན་ཡ་ག་སོགས། །བགེགས་རིགས་ལན་ཆགས་དང་བོ་ཚིམ། །དུང་སྐད་བདུན་པའི་སྒྲ་དབྱངས་ཀྱིས། །ཉན་རང་བྱང་སེམས་གནས་ནས་སྤོར། །ཐེག་ཆེན་བླ་མེད་འབྲས་བུར་སྦྱོར། །ཞེས་གསུངས་སོ། །

དུང་ཆེན།

དུང་ཆེན་ནི་བོད་ཀྱི་རོལ་མོའི་བྱེ་བྲག་ཞིག་སྟེ། ལོ་ངོ་སྟོང་ཕྲག་མང་བོའི་ལོ་རྒྱུས་ལྡན་ཞིང་། དགོན་སྡེའི་རོལ་མོའི་ཁྲོད་བྱིན་ཆགས་རྔམ་ཟིལ་ཆེ་ཤོས་ཡིན། དཔྱད་གཞིའི་ཡིག་ཆ་ལྟར་ན་དུང་ཆེན་འདི། ཆོས་རྒྱལ་ཁྲི་སྲོང་ལྡེ་བཙན་གྱི་དུས་སུ་ཡང་ཡོད་པ་སྟེ། ཁྲི་སྲོང་གིས་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་བཞེངས་གྲུབ་བྱུང་ནས། མཁན་ཆེན་ཞི་བ་འཚོ་དང་། སློབ་དཔོན་པདྨ་འབྱུང་གནས་ཟུང་སྤྱན་འདྲེན་སྐབས། ཟངས་ལས་བྱུང་བའི་དུང་ཡོད་པར་གསུངས་ཏེ། རྒྱལ་བོ་བཀའ་ཐང་ལས། ཟངས་དུང་ཆ་ལང་མཁར་རྔ་གླིང་བུ་དང་། །རྫ་རྔ་པི་ཝང་ཕེག་རྡེབ་རོལ་མོའི་ཚོགས། །ཞེས་གསུངས་པ་ལྟར། ཁྲི་སྲོང་གི་སྐབས་ནས་བོད་ལ་ཟངས་དུང་ཡོད་པར་གསུངས་ལ། བསྟན་པ་ཕྱི་དར་གྱི་སྐབས། ཟངས་དུང་ལ་དཔེ་བྱས་ནས་རག་དུང་བྱུང་བ་ཡིན་ཏེ། ཆོས་འབྱུང་མཁས་པའི་དགའ་སྟོན་ལས། རག་དུང་ཡང་སྔར་མེད་པ་ལ། ཇོ་བོ་སྤྱན་འདྲེན་པའི་ཕྱིར་བཅོས་པ་ཡིན་ཏེ། ལོ་པཎ་སྤྱན་འདྲེན་གྱི་དུང་དུ་གྲགས། དུང་ཆེན་འདི་བུས་ན་བྱང་གི་རྟ་ཁྱུ་འདྲོགས། ཕྱུགས་ཐམས་ཅད་ཐག་པ་བཅད་ནས་བྲོས། ཞེས་བཀའ་གདམས་ལྒིགས་བམ་ལས་གསུངས་པ་དེ་ག་རང་དུ་འདུག་པ་ད་ལྟ་མཐོང་གསལ་ལོ། །

དུང་ཆེན་གྱི་དབྱིབས་ནི། རྩེ་མོ་ནས་སྨད་དུ་ཇེ་སྦོམ་དུ་གྱུར་ལ། ཚིགས་བཞི་ཡོད་ཅིང་། ཕྱེད་སྨད་ཀྱི་དུང་སྦུབས་སུ་དྲངས་ཆོག་ལ། རྩེ་མོ་ཐུར་མ་ཙམ་དུ་ཕྲ་ལ། ཁ་ཀ་ཏོ་ར་ཙམ་དུ་གཡེལ་བ། ཆེ་ཚད་མིས་ཐེག་ཚད་ཙམ་དང་། ཆུང་ཚད་འཁྱེར་བདེའི་འདོམ་ཕྱེད་ཙམ་མོ། །དུང་སྐད་ཡང་འབུད་པ་པོའི་དབུགས་ཀྱི་དམ་ལྷོད་ཀྱིས། ཏིར། འདོར། བསུ་མ། བརྒྱངས། རྦད་བཅད། ཏིར་ཆེན། བརྒྱངས་ཕྲུག་སོགས་སུ་ཡོད་ལ། དེ་ཡང་གཞི་རྩ་གསུམ་དུ་འདུ་སྟེ། རྔ་སྟེང་དུ་སྲན་མ་གཏོར་བ་ལྟ་བུའི་འདོར། བྱ་རྒོད་ཀྱིས་ནམ་འཕང་གཅོད་པ་ལྟ་བུའི་བརྒྱངས། གླང་ཆེན་ངུར་བ་ལྟ་བུའི་ཏིར་རོ། །དེ་ལྟར་སྤྱིའི་འབུད་སྟངས་དེ་འདྲ་ཞིག་ཡིན་མཆི་ཡང་། དགོན་སྡེ་སོ་སོའི་ཕྱག་ལེན་མི་འདྲ་བའི་དབང་གིས་སྣ་མང་ཡོད་མཆི། ཞིབ་ཏུ་དགོན་སྡེ་སོ་སོའི་དུང་ཚིག་དབྱངས་རིས་སུ་གསལ་བ་ལྟར་རོ། །

དུང་ཆེན་འབུད་དུས་ནི། བཀྲ་ཤིས་ཀྱི་ལྷ་བསང་གཏོང་བ་དང་། སེར་སྦྲེང། གར་འཆམ། བསྐང་གསོ། གཟིམ་བརྡ། བསྒྲལ་ལས་སོགས་ཀྱི་ཆོ་གར་འབུད་སྲོལ་ཡོད་ཅིང་། དུང་སྐད་ཐོས་པ་ཙམ་གྱིས་བསྟན་དགྲ་དང་། ལོག་ལམ་དུ་འཕྱན་པ་རྣམས་དོན་སྣོད་ཁར་འབྱིན་པ་ལྟ་བུའི་སྐྲག་སྣང་དང་། དད་ལྡན་སྐྱེ་བོ་དང་བ་འདྲེན་པའི་དགེ་མཚན་ཡོད་པར་མ་ཟད། མི་རིགས་གཞན་དུ་འང་དར་ཁྱབ་ཆེ་ལ། ཁྱད་པར་དུ་བསྐང་གསོའི་སྐབས་སུ། བྱམས་པ་གླིང་བ་དང་། སྤྱན་འདྲེན་དུང་ཚིགས་ཆུ་ཚོད་གཅིག་དང་གཉིས་ཙམ་ལ་འབུད་སྲོལ་ཡོད། དུང་ཆེན་འདི་ཞི་དྲག་གཉིས་ལས། དྲག་ལས་ཀྱི་སྐབས་སུ་གཏོང་བའོ། །ཁ་ཅིག བལ་བོའི་སྡེ་རྙིང་རྣམས་སུ་བག་མ་བསུ་སྐྱེལ་དུ་འབུད་པར་བཤད་པའང་ཡོད་དོ། །

རྒྱ་གླིང་།

བོད་ཀྱི་ཆོས་སྤྱོད་རྒྱ་གླིང་འདི། ལ་དྭགས་རྒྱལ་རབས་ལས། བཙན་པོ་འདུས་སྲོང་མང་བོ་རྗེའི་སྐུ་དུས་སུ། ཇ་དང་རྒྱ་གླིང་བྱུང་བར་འཁོད་ཡོད། དབྱིབས་ནི་ཁ་ཆེ་ཞིང་གཡེལ་ལ། མདའ་ཁྲི། རྐེད། ཕུ་སྟེགས། པི་ཟངས། འདམ་བུ་བཅས་ཆ་ཤས་དྲུག་ལས་གྲུབ་པའོ། །མདུན་དུ་འཐེབ་མིག་བདུན་དང་། ལྟག་པར་མཐེབ་མིག་གཅིག་གོ། རྒྱ་གླིང་འདི་དགོན་སྡེའི་རོལ་མོའི་ཁྲོད་དྲག་ཤོས་ཡིན་ཞིང་། བེད་སྤྱོད་ཀྱི་བྱེད་སྒོ་ཡང་། སེར་སྦྲེང། གར་འཆམ། བླ་མ་ཕེབས་བསུ། སྙན་གསན་འབེབས་པ་སོགས་ནང་བསྟན་གྱི་གྲུབ་མཐའ་རིས་མེད་ཀྱིས་འབུད་སྲོལ་ཡོད། རྒྱ་གླིང་གཏོང་བ་ཡང་། གྲུབ་མཐའ་སོ་སོ་དང་། དགོན་སྡེ་སོ་སོ་ལ་ཕྱག་བཞེས་སྣ་ཚོགས་ཡོད་ཀྱང་། དགེ་ལུགས་པའི་ཆོས་སྡེ་ཞིག་ལ་ཆ་བཞག་ནས་བཤད་ན། ལྷ་མོ་རྒྱས་བསྡུས། རྩ་འཆམ་སིལ་ཆ། ཧོར་གླུ། རྣམ་སྲས། མཛུབ་མོ་བཞི་བ། མགོན་པོ། ཆོས་རྒྱལ། སྒྲ་དབྱངས་མཚོ་འཁོར། ཀ་ལ་པིང་ཀ ཚེ་སྨོན་གླིང་། བཀྲ་ཤིས་ལྷ་མོ། བསྟན་སྐྱོང་མ། ཚལ་བ། མེ་ཏོག་ཆར་འབེབས། གྲུ་འཛིན་ཕོ་བྲང་། བཙུན་མོའི་དབྱངས། བདེ་ཆེན་གླིང་བུ་འམ་ཤན་པའི་ངར་གླུ། སྤྱན་འདྲེན་ལྔ་བཀག ཆོས་འཁོར་རྫ་རི་སོགས་སོ་གཉིས་ཡོད་པ་དང་། རྙིང་མར་མཚོན་ན། རྒྱལ་སྲས་བསྟན་པའི་ཉི་མ་ལ་ཌཱ་ཀིས་བསྩལ་བའི་ལྷ་མོ་ཆེ་ཆུང་། ཁྲ་ཆེན་ཁྲ་ཆུང་། རྒྱ་འབུད། བོད་འབུད། བླ་མ་རྒྱང་འབོད་སོགས་དང་། བསམ་ཡས་དགོན་པར་མཚོན་ན། རྒྱལ་བོ་སྤྱན་འདྲེན། གཡུ་སྒྲོན་སྤྱན་འདྲེན། བཀྲ་ཤིས་མཚོ་མོ། ཨོ་རྒྱན་མཚོ་མོ། ཕེབས་གླུ། ཁམས་གླུ། མེ་ཏོག་ཆར་འབེབས། གར་བ། སྨོན་ལམ་གྱི་གླུ་སོགས་དང་། འབྲུག་པ་བཀའ་བརྒྱུད་པའི་གདན་ས་སྡིངས་བོ་ཆེ་མཚོན་ན། ས་ཟླ་སྤྱན་འདྲེན། གྲུ་འཛིན་ཕོ་བྲང་། འབྲུག་གླུ་ཀུན་བཟང་ཆོས་སྒྲོལ། བྱང་གླུ། བསྟན་འཕེལ་དྲུག་བཀག སྟོད་གྲོང་། སྦྲང་ཚང་འཁོར། ཀརྨ་པ། བསམ་ཡས་ལྕོག་གསོལ། ངང་འཁྱིལ་མ། མགོན་སྐྱབས་མེ་ཏོག་མཆོད་པ། སུར་ཎ། བདུན་བདུན། ཚོང་འདུས་གྲྭ་ཚང་། བཀྲ་ཤིས་ཐུགས་སྨོན། མཐོང་སྨོན་གྲྭ་ཚང་། གཉན་སྦྱོར། མེ་ཏོག་ཆུ་ལེན་སོགས་བརྒྱད་ཅུ་ཡོད་དོ། །

རྐང་གླིང་།

༡ རྐང་གླིང་གི་ཁུངས། རྐང་གླིང་འདི་ལའང་རྒྱུད་ཀྱི་ཁུངས་ཚད་ལྡན་ཡོད་དེ། རྡོ་རྗེ་གཞོན་ནུ་ཐུགས་རྗེ་ཁྲོས་པའི་རྩ་རྒྱུད་ལས། བརླ་ཡི་རྐང་ལ་འབུད་པའི་དུང་། །ལྕང་ལོ་མཚན་དང་ལྡན་པ་ལ། །མ་མོ་མཁའ་འགྲོའི་རྟེན་དུ་བཅང་། །ཞེས་དང་། བདུད་རྩི་བམ་བརྒྱད་ལས། རྐང་བུ་འབུད་ཅིང་ཀུ་ཤའི་གླུ་བླངས། །ཞེས་དང་། རོ་ལངས་གསང་བའི་དཀའ་འགྲེལ་ལས། རྐང་ཆེན་ལ་སོགས་གླིང་བུ་འབུད་པར་བྱ། །ཞེས་སོ། །བོན་གྱི་དབང་དུ་བཏང་ནའང་སྔ་མོ་ནས་ཡོད་དེ། བོན་གྱི་ཡིག་ཆ་འགར། ཞང་ཞུང་དབལ་གྱི་བྲག་ཕུག་རོང་ཆེན་དུ། །དབལ་བོན་ཆེན་པོ་སྟག་ལ་མེ་འབར་གྱིས། །སྲིན་པོ་ཕོ་མོ་བསྒྲལ་བའི་བརླ་རྐང་ལ། །བསྟན་པའི་དགྲ་དཔུང་བཤིག་པའི་རྐང་གླིང་བཟོ། །ཞེས་བཤད་དོ། །

༢ རྐང་གླིང་དར་ཚུལ་དང་རྒྱུ་མཚན། རྐང་གླིང་ནི། དཔའ་བོ་དམག་ཐོག་ཏུ་ཤི་བ་འམ། སྐྱེས་པའམ་བུད་མེད་གཙང་མ་རང་བཞིན་གྱིས་ཤི་བའི་རུས་རྐང་ལས་བཟོས་པའི་གླིང་བུ་སྟེ། རྐང་གླིང་གི་ཆེད་དུ་མི་གསད་ནས་རྐང་གླིང་བཟོ་བ་ནི། ནང་བསྟན་ལས་ཕྱིན་ཅི་ལོག་ཏུ་སོང་བའོ། །བཅུ་དྲུག་མཆོག་རྐང་ནི་ཁྱད་དུ་འཕགས་པར་བཤད་དེ། དེ་ཡང་བུ་མོ་ལོ་བཅུ་དྲུག་ལོན་པའི་ཚེ། བུ་འདོད་ཅིང་བཙས་མ་ཐག་ཏུ་འཆི་བའི་བམ་རྐང་ཞེས་པ་དེ་ཡིན་ཞིང་། རྒྱུ་མཚན་ནི་འཆི་དུས། བུ་དེ་ཉིད་ཡིད་ལ་བྱེད་ཅིང་སྙིང་རྗེ་ཚད་མེད་སྐྱེས་ནས་འཆི་བས། དེའི་བརླ་རྐང་ལས་བྱས་པའི་སྐད་ཐོས་པ་ཙམ་གྱིས། ལྷ་སྲིན་འདྲེ་གསུམ་གང་ཡིན་ཡང་སྙིང་རྗེའི་སེམས་སྐྱེས་པར་གྲགས། ཕྱིས་སུ་འང་ཁ་ཅིག བླ་མ་བྱང་སེམས་ཅན་དང་། གྲུབ་ཐོབ་དང་། མཁའ་འགྲོ་མ། བུད་མེད་སྙིང་རྗེ་ཅན་གྱི་རྐང་གླིང་བཟང་བར་ཡང་བཤད་དོ། །རྐང་གླིང་འདི་རྒྱ་གར་ན་ཡོད་མཆི་སྟེ། ལོ་ཙཱ་བ་རིན་བཟང་གི་རྣམ་ཐར་ལས། ཁོང་རྒྱ་གར་ལ་ཕྱིན་སྐབས། རྣལ་འབྱོར་བ་གཅེར་བུ་ཞིག་གིས་མི་རྐང་གི་གླིང་བུ་འབུད་པ་མཇལ་ཚུལ་དང་། རྣལ་འབྱོར་བས་བླ་མའི་དབུ་ལ་མི་རྐང་གི་གླིང་བུ་དེ་ལན་གསུམ་དུ་བསྐོར་ཚུལ། རྐང་གླིང་གི་སྒྲ་ཐོས་པ་ཙམ་གྱིས་སྟག་ཡང་ལམ་གཟིར་ཚུལ་སོགས་བྲིས་ཡོད། རང་རེའི་ཡུལ་དུ་ཕལ་ཆེར་དུས་རབས་བཅུ་གཅིག་པའམ་བཅུ་གཉིས་པའི་ནང་ཕ་དམ་པ་སངས་རྒྱས་དང་། མ་ཅིག་ལབ་སྒྲོན་སོགས་ལས་ཞི་བྱེད་གཅོད་ཀྱི་ལུགས་དར་བ་སྟེ། གཅོད་དེ་ལ་ཕྱི་ནང་དོན་གསུམ་དུ་དབྱེ་ཡོད་ལ། གཉན་ས་རི་ཁྲོད་འགྲིམས་པ་ཕྱི་ཡི་གཅོད། ཕུང་བོ་གཟན་དུ་བསྒྱུར་བ་ནང་གི་གཅོད། ཉག་གཅིག་རྩད་ནས་གཅོད་པ་དོན་གྱི་གཅོད། ཅེས་གསུངས་པ་ལྟར། རྣལ་འབྱོར་བའི་གཅོད་སྐྱོང་སྐབས། གཅོད་རྐང་དར་བ་ནས་རིམ་བཞིན་ཆོས་ལུགས་ཀྱི་ཆོ་ག་མང་བོར་བེད་སྤྱོད་བཏང་བ་ཡིན། དཔེར་ན། རྐང་གསོ། གཏོར་རྒྱག སྦྱིན་སྲེག གར་འཆམ། སེར་སྲུང་སོགས་སུ་འབུད་སྲོལ་ཡོད་ལ། སེར་སྲུང་སྔགས་པས་སེར་བའི་གནོད་འཚེ་འགོག་སྐབས། རྐང་གླིང་བུས་ཏེ་སྲུང་མ་ཐུབ་ན། དེ་ལ་འཕྱ་སྨོད་བྱེད་པ། དམངས་གཞས་ཚུན་ནའང་ཡོད་དེ། སེར་བ་བྱ་གསར་སྒོ་ངས། །འབྲས་བུའི་ཡ་ཟམ་བཅག་སོང་། །ཐུན་རྭ་རྒྱ་གར་རྐང་གླིང་། །གདང་བུའི་རྒྱན་ཆ་ཡིན་འགྲོ། །གསུངས་ལ། ཁྱད་པར་དུ། རྐང་གླིང་མཆོག་ཏུ་གྱུར་བ་ནི། ཨ་ཙཱ་རའི་རྐང་ལ་རྐང་གླིང་བྱས་པ་འདི་དང་། བཅུ་དྲུག་མཆོག་རྐང་གཉིས་ཡིན་པར་སྨྲ། དེ་ཡང་གོང་གསལ་དམངས་གཞས་ལས། ཐུན་རྭ་རྒྱ་གར་རྐང་གླིང་། །ཞེས་པ་ལས་ཀྱང་རྟོགས་ལ། རྒྱ་གར་རྐང་གླིང་ཞེས་པ་ཨ་ཙཱ་རའི་རྐང་གླིང་ལ་ཟེར། ཨ་ཙཱ་ར་གྲོངས་པའི་རྐང་གླིང་ཕྲ་ལ་རིང་ཞིང་། གསུང་སྐད་ལེགས་རབ་བཤད་པས། རྟོགས་ལྡན་པ་ཚོས་ཕྱག་ཏུ་ཐོགས་པ་མང་། མྱང་སྨད་དགའ་སྡོང་དགོན་དུ་ཨ་ཙཱ་རའི་རྐང་གླིང་ཆ་གཅིག་ཡོད་པར་བཤད་པ་དང་། ས་སྐྱ་དགོན་དུའང་མོན་པའི་ཨ་ཙཱ་ར་ཞེས་ལྷ་མ་ཡིན་ལྟ་བུ་ཞིག་ཡོད་པ་དེའི་རྐང་གླིང་མགོན་ཁང་དུ་ཉར་ཚགས་བྱས་ཡོད་ཟེར། གཞན་སྐྱེས་པ་དར་མ་གྲི་ཤིར་ཐེབས་པའི་བརླ་རྐང་གཡོན་པ་ལ། གསང་གླིང་ཞེས་བྱ་སྟེ། མཁའ་འགྲོ་འབོད་པའི་རྟེན་དང་། བུད་མེད་དར་མ་གྲི་ཤིར་ཐེབས་པའི་རྐང་གླིང་ནི། དཔའ་བོ་འབོད་པའི་རྟེན་དུ་གྲགས་སོ། །

༣ རྐང་གླིང་གི་མདོག་དང་དབྱིབས། རྐང་གླིང་དཀར་བོ་རབ། སྨུག་པོ་འབྲིང་། ཁྲ་བོ་ཐ་མ། ཐལ་སྐྱ་ལ་སོགས་པ་ཕལ་བ་སྐྱོན་དུ་འགྱུར་བས་འཆང་མི་རུང་ངོ་། །དབྱིབས་སུ་མི་རུང་བ་ནི། དུམ་བུར་འཁྱོག་པ་དང་། གས་པ། སིལ་མང་བ། སངས་པ། ཤད་ཤད་བོ་དང་། སྦོམ་པ། སྐད་འདོར་འདོར་རོ། །ཟུར་མང་བ། ལེབ་ལེབ་བོ་སོགས་མིག་ལམ་དུ་མི་སྡུག་པ་འཆང་དུ་མི་གཏུབ་ལ། དབྱིབས་སུ་རུང་བ་ནི། གདོང་གྲིང་གྲིང་བོ་ནང་ངོས་སུ་གུག་པ་དང་། ཁ་བོ་ཆེ་དངུལ་དང་རག་ཏུང་ལས་བྱས་པ། རྐང་གཞུ་རྭ་ལྟར་གུག་པ། མི་སྣ་ལྟ་བུའི་ཁ་བོ་ཆེ་ཆུ་སྲིན་དང་ཉ་མོའི་ཁ་བཞིན་གཡེལ་བའོ། །

༤ རྐང་གླིང་འབུད་སྟངས་ནི། རྐང་གླིང་འབུད་དུས། ལྕགས་དང་ཟངས། ཤིང་དང་རྭ་ཅོ་ལ་གླན་ཏེ་འབུད་དུ་མི་རུང་བ་ལ། ལྷག་པར་དུ་གཡག་ནག་གི་རྭ་ནི་མནན་པ་བྱེད་པའི་སྣོད་ཡིན་ཅིང་། རྫས་ངན་མ་རུངས་པ་ཡིན་པས། དེ་ལ་རྐང་གླིང་སྤྲད་ནས་བུས་ན། ཐོས་པ་པོ་ཡིད་མི་བདེ་ཞིང་། གནོད་པའི་སེམས་སྐྱེས་ལ། གང་དུ་སྒྲོགས་པའི་སར་བཀྲ་མི་ཤིས་པ་སྣ་ཚོགས་འབྱུང་བར་བཤད་དོ། །ཕུང་བོ་གཟན་བསྒྱུར་གྱི་སྐབས་སུ། རྐང་གླིང་བུས་ཏེ་ལྷ་འདྲེ་བསྡུ་བའི་བརྡ་སྒྲོན་པ་ལ། སྐྱབས་འགྲོ་སེམས་བསྐྱེད་ཀྱིས་རྩིས་ཟིན་པའི་སྒོ་ནས། ཐོག་མར། ཕཊཿདྲག་པོ་གསུམ་བརྗོད་ཅིང་། དུང་སྐད་གསུམ་གཏོང་བ་སྟེ། དུང་སྐད་དང་བོའི་སྐབས་སུ་དམིགས་པ་དང་བཅས། ཀྱེ། ཐམས་ཅད་ཉོན་ཅིག ཅེས་པའི་སྒྲ་ཕྲ་ལ་གྲིམ་ཅིང་སྙན་པ་དེ། ཁམས་གསུམ་སེམས་ཅན་ཐམས་ཅད་ཀྱིས་སང་ངེ་ཐོས་པས། ཐམས་ཅད་སོ་སོའི་ལས་སྤྱོད་པ་ལ། མི་ཁོམ་པ་ཅི་ཡོད་ཀྱང་ལས་འཕྲོ་བཅད་དེ། ཐམས་ཅད་གྲོང་ངེར་ཉན་ནས། འདིར་འོང་བའི་སྤྲོ་བློ་བུན་གྱིས་སྐྱེས་པར་བསམ། དུང་གཉིས་པའི་སྐབས། ཀྱེ། ཐམས་ཅད་འདིར་འདུས་ཤིག ཅེས་པའི་སྒྲར་ཐོས་པར་བསམ་ལ། དེ་དག་ཐམས་ཅད་ཟིང་སྟེ་རང་རང་ཕྱོགས་ནས་བྱུང་བར་བསམ། དུང་གསུམ་པའི་སྐབས། ཐམས་ཅད་འུར་གྱིས་འདུས་ནས། ཀུན་གྱིས་རང་ལ་དད་པ་དང་། ཕཊཿགདབ་པ་ཡང་དམིགས་པ་དུང་དང་མཚུངས་པའོ། །གཞན་ཡང་། གཅོད་ཀྱི་སྐབས་སོགས་ལ་རྐང་དུང་གི་མཚན་ཉིད་ཞིབ་ཕྲ་སྒོས་མ་ཅིག་ལབ་སྒྲོན་གྱི་གཅོད་གཞུང་ཆེན་མོ་ལས་འབྱུང་བ་བཞིན། གནས་སྐབས་དང་རྒྱུན་གྱི་ཐུན་ཚོད་འཛིན་པ་སོགས་འདིའི་རིགས་ལའང་འབུད་ལུགས་ཀྱི་སྐད་འགྱུར་ཚད་དང་ལྡན་དགོས་ཕྱིར། དེང་སང་བཀའ་བརྒྱུད་པ་དག་གི་དགུ་འབུད་ཟེར་བ་འདི་ལ་ནི་བདེ་མཆོག་གི་རྩ་སྔགས་ཡི་གེ་བདུན་པ་ཉིད་ཀྱི་བརྡ་སྐད་ཡིན་པར་གསུངས་པ་ནི། ཡི་གེ་བདུན་པ་ལ་ཨོཾ་གཅིག་ལས་མེད་ཀྱང་སྐབས་འདིར་ཕག་མོའི་ཨོཾ་གསུམ་མ་དང་བསྟུན་པའི་བརྡ་སྐད་བྱ་བ་ཡིན་པས། ཐོག་མར་ཨོཾ་་་ཨོཾ་་་་་ཨོཾ་་་་་ཞེས་འབྱུང་བ་གསུམ་འབུད་ལ། དེ་ནས་ཧྲཱྀཿཞེས་བྱ་བ་རིང་བ་གཅིག དེ་ནས་ཧ་ཞེས་བྱ་བ་རིང་བ་གཅིག དེ་ནས་ཧ་འ་འ་འ་འ་འ་ཞེས་བྱ་བ་རྒྱང་རིང་ལ་ལྡེམ་འགྱུར་ཡོད་པ་གཅིག དེ་ནས་ཧཱུཾ་ཧཱུཾ་ཞེས་ཐུང་བ་གཉིས། དེ་རྗེས་ཕཊཿཞེས་ཅུང་རིང་བ་བྱས་པ་སྟེ། དགུ་འབུད་ཅེས་པའི་ཐ་སྙད་བཏགས་པ་ནི། དེང་སང་ཀརྨ་བཀའ་བརྒྱུད་དང་འབྲུག་པ་བཀའ་བརྒྱུད་དག་གི་འབུད་སྲོལ་ལོ། །ཡང་གསང་སྔགས་རྙིང་མའི་ལུགས་ལྟར་ན། སྔོན་ཚེ་མདོ་ཁམས་ཀ་ཐོགས་ཀྱི་གྲུབ་ཐོབ་དམ་གཙང་བྱམས་གསུམ་སོགས་ཀྱི་ཞལ་བཀོད་ལ་རྐང་གླིང་བདུན་འབུད་འདི། བླ་མ་གསོལ་བ་འདེབས་པའི་བརྡ་སྐད་ཡིན་ཚུལ་ནི། དང་ཐོག་མཆོད་མཆོད་ཅེས་པ་འདི་གཉིས་ཀྱི་སྔ་མ་རིང་ཙམ་དང་ཕྱི་མ་ཐུང་བར་བྱ་ལ། དེ་ནས་བླ་མ་བླ་མ་ཞེས། བླ་མའི་རྒྱང་འབོད་ཀྱི་ཚིག་འདི་གཉིས་ཀ་རིང་བོར་བྱ་ཞིང་། དེ་ནས་བླ་མ་མཁྱེན་མཁྱེན་ཞེས་པའི་ཚིག་འདི་གཉིས་རྒྱང་རིང་ཞིང་། ལྡེམ་འགྱུར་དང་བཅས་བྱ་ལ། དེའི་རྗེས་ཕཊཿཕཊཿཞེས་པའི་ཚིག་འདི་གཉིས་སྔ་མ་ཅུང་ཟད་རིང་བ་ཙམ་དང་། ཕྱི་མ་ཐུང་བ་རྦད་ཀྱིས་བཅད་དེ་བཞག་པ་ཡིན་ལ། དེ་ལྟར་རང་རྩ་བའི་བླ་མ་འབོད་པའི་རྒྱང་འབོད་གསུམ་པོ་དེ་ལའང་། མགོ་མ་ཤེད་ཆེ་བ་ལ། མཇུག་ཏུ་རིམ་པར་ཆུང་བར་ནར་གྱིས་བཞག་པ་འདི་ནི་བླ་མ་དྲན་པའི་མོས་གུས་གདུང་ཤུགས་རང་རྒྱུད་ལ་སྐྱེ་བའི་ཕྱིར་ཡིན་པ་དང་། བརྡ་སྐད་འདི་འབོད་ལུགས་ལ་མཁས་པ་ཞིག་བྱུང་ཚེ་སྣང་བ་འགྱུར་ཏེ། སྐྱོ་ལྷང་ལྷང་གིས་རྐང་གླིང་གཏོང་ནུས་ཞིག་ཡོང་བར་གསུངས་ལ། དེ་ལྟའི་རྐང་དུང་འབུད་ལུགས་ལའང་བརྡ་སྐད་ཚད་ལྡན་ཐུན་མོང་མ་ཡིན་པ་རེ་ཡོད་དོ། །དགེ་ལུགས་པའི་དགོན་པ་འགའ་ཞིག བསྐང་གསོའི་སྐབས་ཛག་རིང་ཛག་ཐུང་དང་། གུར་མགོན་ལྕམ་སྲིང་གི་བསྐང་གསོར་རྟ་སྐད། བསྒྲལ་ཆོག་དང་གཏོར་རྒྱག་སྐབས་བསྣོལ་རྐང་སོགས་དང་། ས་སྐྱ་དགོན་ལ་མཚོནའང་བསུ་རིང་བསུ་ཐུང་། རཀྟ་དམར་ཆེམསམ། རྐང་གླིང་སྙན་པའི་རོལ་མོ། སྤྱང་ཀིའི་ངུར་སྐད་སོགས་ཡོད་དོ། །

ཡང་། སྨིན་གྲོལ་གླིང་ལ་མཚོན་ན། ཟླ་རེའི་ཚེས་གསུམ་དང་། བརྒྱད། བཅོ་ལྔ་བཅས་ལ་ལྷ་བསང་གཏོང་སྐབས་སྙན་གསན་ལ། ལྷ་རྒྱལ། ཐུགས་རྗེ་ཆེན་པོ། རྡོ་རྗེ་སྒྲ་དབྱངས། དཔལ་མགོན་ལྕམ་དྲལ། རྒྱལ་བའི་བསྟན་སྲུང་། དམ་ཆེན་མགོ་ཐོག བཀྲ་ཤིས་འཁྱིལ་བ་བཅས་དང་། ས་སྐྱ་བར་མཚོན་ནའང་། སྙན་གསན་ཆེན་མོ། དམ་ཅན་མ། གསོལ་ཇ་རྒྱས་བསྡུས། དམ་ཅན་མ་ལྔ་ཚིག སྙན་གསན་ཆེན་མོ་ལྔ་ཚིག ལྷ་རྒྱལ་རྒྱས་བསྡུས། སྤྱན་འདྲེན། མཆོད་རོལ། དྷི་ཎ་མེ་ཀེ སྐུ་གསུང་ཐུགས། ཚིག་རོལ། ནས་འདྲ་མ་སོགས་སོ། །

རྐང་གླིང་འདི་སྟོང་ཉིད་ཀྱི་མཚོན་དོན་དང་། སྐབས་འགར་སྤྱན་འདྲེན་དང་། བཟློག་པ། ཐུགས་དམ་བསྐང་བ། འཕྲིན་བཅོལ་སོགས་ལ་འབུད་ཅིང་། གཞན་ཕུང་བོ་ལ་ཆགས་ཞེན་བཟློག་པ་དང་། མི་རྟག་པར་དྲན་སྐུལ་གྱི་ཆེད་དུ་འང་ཡིན་ནོ། །

༥ རྐང་གླིང་གི་མཚོན་དོན། ཁ་དོག་དཀར་ལ་སྣུམ་པས་གཟུང་འཛིན་གྱི་མཚན་མ་རང་ཞིར་སོང་བ། སོར་བཅུ་གཉིས་ཀྱིས་རྟེན་འབྲེལ་བཅུ་གཉིས། བུ་ག་དང་བོ་ཅ་ཡི་དབྱིབས་ཅན་གྱིས་ཆོས་ཉིད་མི་འགྱུར་བ། ངར་གདོང་རྣོ་བས་འཁོར་རྩ་གཅོད་པར་མྱུར་བ། རྐང་མཚམས་ལེབ་ཙམ་གཞོང་བས་མ་མོའི་བྲོ་ར། སྦུབས་སྟོང་གཉིས་ཡོད་པས་ཐབས་ཤེས་ཟུང་འཇུག་མཚོན་ནོ། །

རྭ་དུང།

རྭ་དུང་འདི་ལའང་རྒྱུད་ཀྱི་ཁུངས་ཡོད་དེ། རྒྱུད་མངོན་བརྗོད་བླ་མ་ལས། དུང་དང་རྭ་དུང་པ་ཊ་ཧ། །ཞེས་དང་། མཁའ་འགྲོ་རྒྱ་མཚོ་ལས། ཟངས་དུང་མ་དང་རྭ་དུང་མ། །ཞེས་སོ། །རྭ་དུང་ནི་རྐང་གླིང་ལ་དཔེ་བྱས་ཏེ་དར་བར་བཤད་ལ། རྭ་དུང་གི་རྒྱུ་ཆ་རྭ་ཅོ་ཡིན་ལ། དེ་ཡང་མ་ཧེ་དང་གླང་རྭ་ཡང་རུང་ལ། ཁྱད་དུ་འཕགས་པ་ནི། རི་དྭགས་ཁྲི་གཉན་གྱི་རྭ་ཡིན་པར་བཤད། རྒྱུ་མཚན་ནི་རི་དྭགས་འདི། སྔོན་བྱང་ཆུབ་སེམས་དཔའ་ཞིག སྟོང་ཉིད་ཀྱི་རྩིས་མ་ཟིན་པར་སྙིང་རྗེ་ཁ་རྐྱང་དུ་གོལ་བས། ཕྱི་མ་ཁྲི་སྙན་དུ་སྐྱེས་པར་བཤད་ལ། རི་དྭགས་དེའི་རྭ་ཡིན་ན་སེམས་ཅན་ལ་ཕན་ཐོགས་པའི་རྟེན་འབྲེལ་གྱི་གནད་ཆེ་བར་བཤད། རྭ་དུང་འདི་དགེ་བཤེས་པོ་ཏོ་བ་སོགས་ཀྱིས་བསྣམས་པར་གྲགས་ལ། འདིའི་སྒྲ་ཐོས་པས། རྔོན་པའི་ཁྱི་ཡིས་རི་དྭགས་མི་གསོད་པ་དང་། ཉ་བས་ཉ་མི་གསོད་པ་སོགས་ཀྱི་ཡོན་ཏན་ཡོད་པར་བཤད་དོ། །ཡང་། རྭ་དུང་འདི་རྙིང་མའི་དགོན་སྡེ་མང་བོར་བསྙེན་སྒྲུབ་ཀྱི་ཐུན་གཅོད་དང་གྲོལ་དུས་ཀྱི་ཚད་འཛིན་བྱེད་དུའང་བཀོལ་སྲོལ་ཡོད། འབུད་ཚུལ་མི་འདྲ་བ་གྲུབ་མཐའི་མཁན་པོ་དག་གི་ཞལ་ཤེས་ལས་རྟོགས་པར་བྱའོ། །

གླིང་བུ།

༡ གླིང་བུའི་ཁུངས་ནི། རྒྱུད་ལས་མཆོད་པ་དང་། དཀྱིལ་འཁོར་སྒྲུབ་པ། རིག་མ་མཆོད་པ། ཚོགས་འཁོར་སོགས་དང་། ད་ལྟ་བླ་མ་བསུ་ཕེབས་དང་། སེར་སྦྲེང། ཐ་ན་གླུའི་རམ་འདེགས་དང་། འཇིག་རྟེན་གྱི་དགའ་སྤྲོ་སོགས་མཚོན་པའི་དབྱངས་སྣ་ཚོགས་ལའང་བཀོལ་བའོ། །གླིང་བུ་འདི་ཡང་རྒྱུད་ལས་བསྟན་པའི་ཁུངས་ཡོད་དེ། ཁྲག་འཐུང་མངོན་འབྱུང་ལས། གླུ་དང་གླིང་བུ་གར་ལ་སོགས། །ཞེས་དང་། དཔུང་བཟང་ལས། གླིང་བུ་པི་ཝང་རྫ་རྔ་ཆེན་པོའི་སྒྲ། །ཞེས་སོགས་ནང་བསྟན་གྱི་གཞུང་ལས་མང་དུ་འབྱུང་ངོ་། །

བོན་ལུགས་ལ་མདོ་དྲི་མེད་གཟི་བརྗིད་སོགས་སུ། ལ་ལ་ནི་གླིང་བུ་འབུད་དོ། ཞེས་གསལ་བར་གསུངས་པ་དང་། ཡང་ཆོས་འབྱུང་མཁས་དགའ་ལས། བཞི་བ་ཐོག་རྗེ་ཐོག་བཙན་སྐུ་རིང་ལ། །ལྷ་ཡི་རོལ་མོ་གླིང་བུ་ཅག་པར་བྱུང་། །ཞེས་སོ། །

༢ གླིང་བུའི་རྒྱུ་ནི། གསེར་དང་དངུལ། སྟོང་། ལྗོན་དམར། ར་གན་ལས་གཞན། སྨྱུག་གླིང་། ཤིང་གླིང་། ལྕགས་གླིང་། རྫ་གླིང་། རྒོད་གླིང་སོགས་སོ། །

༣ གླིང་བུའི་དབྱིབས་ནི། སྨྱུག་མ་འམ་ཙན་དན་ལས་བྱས་པ་དེ་ལ་བུ་ག་མང་དུ་དོད་པ་དུང་ཆེན་དང་འདྲ་ཞིང་། དེ་ལས་ཆུང་བ་ཞིག་ཡོད་པ་དེ་ལ་རྒྱ་གླིང་དང་། གཞན་སྙུག་སྦུག་ལ་བུ་ག་མང་དུ་ཡོད་པ། ཁ་དང་མཛུབ་གུའི་དམ་ལྷོད་བར་ན་འབུད་པའི་འཕྲེད་གླིང་དང་། གཞན་རྫ་དང་། རྭ་ཅོ། རྒོད་ཀྱི་དང་རི། རྐང་རུས་སོགས་ཀྱིས་བཟོས་པའང་ཡོད་དོ། །

༤ འབུད་ཚུལ་ནི། ཆོས་ལུགས་ཀྱི་དབང་དུ་བཏང་ན། སྨིན་གླིང་ལུགས་ལ་ལྷ་མོ་ཆེ་ཆུང་དང་། ཁྲ་ཆེ་ཁྲ་ཆུང་། རྒྱ་འབུད། བལ་འབུད། བླ་མ་རྒྱང་འབོད་སོགས་ཡོད་པ་ལས་གཞན་གྲུབ་མཐའ་སོ་སོར་མི་འདྲ་བ་ཡོད་ལ། ད་ལྟ་འཕྲེད་གླིང་ནི་འཇིག་རྟེན་ལུགས་སུ་དར་སོ་ཆེ་སྟེ། དེ་ནི་བཟོ་བདེ། འཁྱེར་བདེ། གཏོང་བདེའི་རོལ་མོ་ཁྱད་པར་ཅན་ཞིག་གོ། སྤྱིར་ན། གླིང་བུ་ལྟ་བུ་སྒྲ་སྙན་གྱིས་སྒྲ་དམའ་སར་འཁོར་བ་ཆུ་ནང་དུ་ཉ་འཁྱུག་པ་ལྟ་བུ་དང་། སྒྲ་བར་མའི་རོལ་མོ་རི་ལྡེབས་ལ་རི་དྭགས་རྒྱུག་པ་ལྟ་བུ། སྒྲ་མཐོ་བའི་རོལ་མོ་གངས་སེང་གནམ་དུ་མཆོངས་པ་ལྟ་བུ། སྒྲ་མཐོ་དམའ་བར་གསུམ་རམ་འདེགས་བྱེད་པ་ནམ་མཁར་བྱ་འཕུར་བ་ལྟ་བུ་ཡིན་པར་བཤད་དོ། །

བཤུག་པ།

བཤུག་པ་འདི། སྔགས་ཚིག་བཤུག་པ་བརྡ་ཡིས་མཚོན་ནས་ཀྱང་། །མ་ལུས་འཁོར་དང་བཅས་ཏེ་གཤེགས་སུ་གསོལ། །ཞེས་སྒྲུབ་པའི་སྤྱན་འདྲེན་དང་། བྱིན་འབེབས་དགུག་གཞུག་སོགས་ལ་འབུད་སྲོལ་ཡོད་ལ། དེ་ལའང་རྒྱུད་ཀྱི་ཁུངས་ཚད་ལྡན་ཡོད་དེ། ཕུར་བ་གསང་རྒྱུད་ལས། རང་བཞིན་ཡེ་ཤེས་ཁྲོ་ཚོགས་རྣམས། །རྡོ་རྗེ་བཤུག་པའི་སྤྱན་དྲངས་ནས། །ཤེས་རབ་མ་ལ་བསྟིམ་མཆོད་སྒྲུབ། །ཅེས་དང་། རོ་ལངས་གསང་བའི་དཀའ་འགྲེལ་ལས། བཤུག་གླུ་ལེན་པའི་ལས་རྣམས་དང་། །འཁོར་རྣམས་སྐུལ་བའི་ཐབས་མཆོག་ཡིན། །ཞེས་སོ། །བཤུག་པའི་མིང་གི་རྣམ་གྲངས་ལ་སི་འམ་ཤུ་ཞེས་སྒྲའི་འབྱིན་ཚུལ་གྱིས་འབོད་པའང་ཡོད། དེ་ཡང་རྒོད་རྐང་དང་། རྭ་རྩེ། སྙུག་ཚིགས། རྫ་སོགས་ཀྱིས་བཟོས་སོ། །དེ་ཡང་ཀྲེ་ཅང་ཞིང་ཆེན་ཀྱི་ཧཱ་མུའུ་ཏུའི་གནའ་ཤུལ་དུ་འདབ་ཆགས་ཀྱི་རྐང་རུས་ལས་བཟོས་པའི་བཤུག་པ་དང་། རྨ་ཆུའི་སྟོད་རྒྱུད་ཀྱི་ཁཱ་ཡའི་གནའ་ཤུལ་ལས་བུད་པའི་བཤུག་པའི་རིགས་ལ་བརྟགས་ན། ལོ་ངོ་བདུན་སྟོང་ཡས་མས་ཀྱི་ལོ་རྒྱུས་ཡོད་པར་བཤད་དོ། །

འབུད་ཚུལ་ནི། བཤུག་པ་དགོས་པའི་གཞུང་ཚིག་དང་བསྟུན་ཏེ། མཐེབ་མཛུབ་ཁ་ལ་སྦྱར་ནས་འབུད་པ་དང་། ཡང་སྲི་མནོན་གྱི་སྐབས་སུ་འགུགས་ཐབས་སུ་སྲོད་ལ་ཤུ་དྲག་པོ་བུས་ཏེ། བརྗོད་ཚིག་ལ། སི་ལས་སྣ་འདྲེན་ཆེ་བ་མད་དོ། །དེ་དགོང་ཙམ་ལས་སྐྱིད་པ་མེད་དོ། །ཞེས་བརྗོད་དེ་ལག་གཡས་སུ་གཡབ་དར་ནག་པོ་ཐོགས་ནས་གནོད་འདྲེ་དགུག་གཞུག་བྱེད་སྲོལ་ཡོད་དོ། །དགེ་ལུགས་པའི་ལྕགས་མཁར་རྫོགས་སྐབས་སུ་འབུད་སྲོལ་ཡོད་པ་ལྟར། གྲུབ་མཐའ་རང་རང་གི་ཞལ་ཤེས་ལས་རྟོགས་པར་བྱའོ། །ཡང་སྔོན་དུས་སུ་རྔོན་རྒྱག་སྐབས་འདབ་ཆགས་རྣམས་འགུགས་ཐབས་སུའང་ཤུ་འབུད་སྲོལ་ཡོད་དོ། །

གཉིས་པ། རྡུང་བའི་རོལ་མོ།

རྔ།

༡ རྔའི་དབྱེ་བ། དཔལ་ནག་པོ་ཆེན་པོའི་རྒྱུད་ལས། འདུས་མ་བྱས་རང་བྱུང་དབྱིངས་ཀྱི་རྔ་དང་། འདུས་བྱས་རྟགས་ཀྱི་རྔ་གཉིས་གསུངས་པ་ལས། དང་བོ་ནི། གནམ་མཐའི་རི་རྩེ་ཟླུམ་པོར་བཀུགས་པ་ལ། །སྤྲིན་དང་ན་བུན་བགོ་བའི་རྒྱན་གྱིས་གཡོགས། །གཡུ་འབྲུག་རོལ་བའི་སྒྲ་སྐད་དྲག་པོ་ནི། །གྲགས་སྟོང་དབྱིངས་སུ་ཤར་བའི་རྔ་བོ་ཆེ། །གསུངས་པ་ལྟར་དང་། གཉིས་པ་ནི་མཚན་མ་རྫས་ཀྱི་རྔ་སྟེ། དེ་ལ་རྔ་བོ་ཆེ། རྔ་ཆུང་། རྔ་རིང་། རྔ་པ་ཏྲ་ཧ། པ་ཏྲ་ཧ་ཆེན་པོ། བཀྲ་ཤིས་རྔ། རྔ་ཕྲན། ཐོད་རྔ། ཅང་ཏེའུ་སོགས་དབྱིབས་དང་རྒྱུ་མི་འདྲ་བ་དུ་མ་ཡོད་པ་དང་། རྔ་འདི་དག་ནི་མཆོད་པ་དང་སྤྱན་འདྲེན། སྐུལ་བ། བགེགས་བསྐྲོད། དགྲ་བཟློག མནན་པ་སོགས་ལ་རྡུང་བ་ཡིན་ནོ། །

༢ རྔའི་རྒྱུ། ཙན་དན། སེང་ལྡེང་། ཤུག་པ། ཨ་གར། སྦ་སྙུག ཚེར་ནག རུས་པ་སོགས་དང་། རྔ་གཡོག་བྱེད་ནི། མི། སེང་གེ རི་དྭགས་ཀྲི་ཀྲིཤྣཱ་ར། ར་རྒོད། ར་རྒྱ་མོ། འབྲོང་། བ་ལང་སོགས་ཀྱི་ཀོ་བ་གང་རུང་ངོ་། །རྔ་ལྕགས་ཀྱང་སྦ་སྙུག ལྕགས། རྭ་ཅོ། མི་ལག མིའི་རྩིབས་རུས། དོམ་དང་དྲེད་མོའི་ལག་པ། ཤིང་ཚེར་མ་ཅན་སོགས་སྲ་ཤིང་གི་རིགས་ལ་བྱ་རུང་ངོ་། །

༣ རྔའི་ཚད་དབྱིབས། ཟླུམ་པོ་ཁྱབ་ཆེ་ལ། ཚད་ངེས་གཏན་མེད་པའོ། །

༤ རྔ་བརྡུང་ཚུལ། སློབ་དཔོན་ཙནྡྲ་གོ་མིས། རྔ་གཡོག་རྔ་ལ་རེག་མ་ཐག །ཕྲལ་ནས་ཐ་དད་ཉིད་དུ་བྱ། །སྐད་ཅིག་ཙམ་ལ་མི་སྦྱོར་བ། །སོ་སོར་འབྱེད་པ་མཁས་པའི་ལུགས། །ཞེས་པ་ལྟར་རྡུང་པ་ལས། རྒྱ་མཚོ་ཆེན་པོའི་ཀློང་མི་དཀྲུགས། །རི་རབ་གླིང་བཞིའི་མཐའ་མི་བསྐོར། །རི་ཐང་མཚམས་ཀྱི་བྲག་མི་བཤག། རི་དྭགས་རྒྱལ་བོའི་གཉའ་མི་བསྣུན། །ཞེས་པ་ལྟར། མཐའ་དང་དཀྱིལ་གཉིས་སུ་མ་ཡིན་པར། སུམ་གཉིས་ཡར་ཕུད་པའི་སར་བསྣུན་ཚེ་སྐད་ལེགས་པར་ཐོན་ལ། གདངས་ཀྱི་ཆ་ནས་སྒྲའི་དབྱེ་བ་བདུན་ཡང་གསུངས་ཏེ། ཕོ་སྒྲ་དིང་ཟིལ་ལྡན་པར་བརྡུང་། །མོ་སྒྲ་སྙན་ཅིང་མཛེས་པར་བརྡུང་། །ཕྱེད་མ་དྭངས་ཁྲོལ་ཆགས་པར་བརྡུང་། །ཞི་ལ་སྦྲང་ཆར་སིལ་བུ་ལྟར། །རྒྱས་ལ་རྫི་ཆར་གཡོས་པ་ལྟར། །དབང་ལ་དྲག་ཆར་འབབ་པ་ལྟར། །དྲག་ལ་ཐོག་སེར་འབྱིན་ལྟར་རོ། །ཞེས་དང་། ཙནྡྲ་ཤྲཱིས། ཐོག་མར་རྔ་སྒྲ་དལ་བུས་བསྐུལ། །དེ་རྗེས་བྱེ་བྲག་བྱེ་བྲག་ཏུ། །སྐུལ་བའི་གནས་ཀྱང་འདི་ལྟ་སྟེ། །རྔ་ཡུ་ཐད་ནས་ཡར་འཇལ་བའི། །མཁྱིད་གང་ས་རུ་དབྱུག་གུ་གནས། །དེ་ཡང་ལག་པའི་སོར་ཚིགས་ལ། །འཕྲུལ་ཙམ་རྔ་གཡོགས་རང་ལྗིད་ཀྱིས། །གདོང་གསུམ་བསྟན་ལ་སློད་གསུམ་བརྡུང་། །རྔ་གཡོག་རྔ་ལ་རེག་མ་ཐག། ཕྲལ་ནས་ཐ་དད་ཉིད་དུ་བྱ། །སྐད་ཅིག་ཙམ་ཡང་མི་སྦྱོར་ལ། །སོ་སོར་བཤད་པ་མཁས་པའི་ལུགས། །ཞེས་དང་། དེ་ཡང་། ཞི་རྒྱས་སོགས་ལ་རྡུང་ཚུལ་མི་འདྲ་བར་ཡང་བཤད་དེ། ཞ་ལུ་ཙནྡྲ་ཤྲཱི་རིའི་རྔ་སྦུག་རྣམ་བཞག་ལས། ཞི་བའི་རྔ་བརྡུང་བྱེད་པ་ན། །དེ་ཡི་ཉམས་དང་ལྡན་པར་བྱ། །རྔ་ཐབས་དག་ལ་སློད་པར་བྱ། །རྒྱས་པའི་རྔ་བརྡུང་བྱེད་པ་ན། །སྒེག་ཅིང་དཔའ་བའི་ཉམས་ཀྱིས་བྱེད། །རྔ་ཐབས་གསལ་ལ་འཁྲོལ་བར་བརྡུང་། །དབང་གི་རྔ་བརྡུང་བྱེད་པ་ན། །ཆགས་ཤིང་མཛེས་པའི་ཉམས་ཀྱིས་བཤད། །རྔ་ཐབས་དྲག་ལ་བརྗེད་པར་བརྡུང་། །དྲག་པོའི་རྔ་བརྡུང་བྱེད་པ་ལ། །རྩུབ་ཅིང་ཁྲོས་པའི་ཉམས་ཀྱིས་བཤད། །རྔ་བས་དྲག་ལ་མྱུར་བར་བརྡུང་། །དྲག་བརྡུང་རྒྱུན་ཆ་བྱེད་པ་ན། །ཐོག་སེར་ལྟར་ཡང་དབབ་པར་བྱ། །ཞེས་དང་། རྙིང་རྒྱུད་སྒྱུ་འཕྲུལ་བླ་མ་ལས། ཨེ་ཡི་ཚོགས་ཆེན་འབྱམས་པ་རུ། །སྟི་རིའི་རྔ་ཆེན་སྒྲ་བསྒྲགས་པས། །ཧཱུཾ་ཧ་ཧེ་ཕཊ་སྒྲ་འབྱིན་ཅིང་། །ཞེས་ཀྱང་གསུངས་སོ། །

༡༢ རྔ་སྒྲའི་ཕན་ནུས། རྒྱུད་སྒྱུ་འཕྲུལ་བླ་མ་ལས། སྟི་ར་རྔ་ཆེན་འདི་བརྡུང་བས། །གནོད་སྦྱིན་སྲིན་པོ་ཀུན་བསྒྲལ་ཏེ། །མུ་སྟེགས་ཀུན་ཀྱི་སྙིང་ཡང་འབྱིན། །སྟི་ར་རྔ་ཆེན་འདི་བསྒྲགས་པས། །སྟོང་གསུམ་ཁྲོ་བོའི་ཚོགས་ཀྱིས་བཀང་། །ཀུན་ཀྱང་རྔ་བརྡུང་དི་རི་རི། །རྔ་སྒྲ་ཆེན་པོའི་སྟོང་གསུམ་བཤིག། རྔ་སྒྲ་ཆེན་པོས་བདུད་དཔུང་བསྒྲལ། །རྔ་སྒྲ་ཆེན་པོས་སྲིད་གསུམ་སྦྱངས། །རྔ་སྒྲ་ཆེན་པོས་དགྲ་བགེགས་འདུལ། །རྔ་སྒྲ་ཆེན་པོས་ངན་སོང་སྦྱངས། །རྔ་སྒྲ་འབྲུག་གི་སྒྲ་བསྒྲགས་པས། །ན་རག་དམྱལ་ཁམས་སྟོང་བར་བྱེད། །རྔ་སྒྲ་ཏུག་ཆེམ་རི་རབ་བསྙིལ། །སྟི་ར་རྔ་ཆེན་སྒྲ་བྱུང་བས། །ཕྱིན་ཅི་ལོག་རྣམས་སྙིང་ཡང་འབྱིན། །རྔ་ཆེན་འབྲུག་གི་སྒྲ་སྒྲོགས་ཅིང་། །རྔ་ཐབས་གློག་སྟོང་འགྱུ་བ་བཞིན། །དེ་བཞིན་གཤེགས་པའི་ཐུགས་དམ་བསྐང་། །མ་མོ་མཁའ་འགྲོ་དམ་ཚིག་བསྐང་། །རྣལ་འབྱོར་རྣམ་ལྔའི་དམ་ཚིག་བསྐུལ། །སྟི་ར་རྔ་ཆེན་འདི་བརྡུང་བས། །ཉན་ཐོས་མདོ་སྡེ་གནས་ནས་སྤར། །རང་རྒྱལ་ལྟ་བ་དབྱིངས་སུ་སྒྲོལ། །སྟི་ར་རྔ་ཆེན་འདི་བསྒྲགས་པས། །ལྷ་དང་མི་ཡི་ཐེག་པ་ཡང་། །བླ་མེད་ཐེག་པའི་དབྱིངས་སུ་བཙུད། །སྟི་ར་རྔ་ཆེན་འདི་བསྒྲགས་པས། །སྟོང་གསུམ་སྟི་རའི་རྔ་སྒྲའི་བཀང་། །ཀུན་ཀྱང་རྔ་བརྡུང་དི་རི་རི། །རྔ་ཐབས་གློག་སྟོང་ལྕེ་འབྱིན་ཅིང་། །རྔ་སྐད་འབྲུག་སྟོང་སྒྲ་སྒྲོགས་པས། །བྱིན་རླབས་ལྕགས་ཀྱི་སེར་ཆེན་འབེབས། །སྟོང་གསུམ་འཁྲུགས་ཞིང་སྲིད་གསུམ་འཐོར། །ཞེས་དང་། རྔ་སྒྲ་རིན་ཆེན་ཁང་བ་བརྩེགས། །བསམ་རྫོགས་ཆེ་ལ་དབང་ཡང་འཐོབ། །རྔ་སྒྲས་གཡོ་བ་མེད་པར་བཤད། །ཆོས་ལ་འཛུད་པའི་སྒྲ་ཡང་འབྱིན། །རྔ་སྒྲའི་ཅི་འདོད་དགོངས་པ་རྫོགས། །ཞེས་དང་། གཞན་ཡང་། ཕན་ཡོན་བརྗོད་ལས་འདས་པ་གསེར་འོད་རྔ་སྒྲ་ལས་ཀྱང་གསུངས་སོ། །དེ་ལས་གཞན། རྫ་རྔ་དང་འཁར་རྔ་སོགས་ཀྱང་ཡོད་ལ། སྙིང་རྗེ་པད་དཀར་ལས། དམ་ཆོས་བསྟན་པའི་དུས་སྟོན་ཕྱིར། །རྔ་འམ་གནྡི་བརྡུང་བའི་སྒྲ། །ཞེས་པ་ལྟར། དམ་ཆོས་སྟོན་པའི་དུས་སྟོན་དང་། གཞན་ཡང་གྲྭ་ཚོགས་བསྡུ་བའི་བརྡ་དང་། མཆོད་ཆོག་སྒྲུབ་མཆོད་ཀུན་ལ་བཀོལ་བ་དང་། ཡང་། དགེ་འདུན་བསྡུ་བའི་འཁར་རྔ་བརྡུང་སྐབས། བཟང་སྤྱོད་ལས་འབྱུང་བ་ལྟར། ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་གྱི་སྒྲ་རྣམས་ཇི་ཙམ་པར། །ཐམས་ཅད་སྐད་དུ་བདག་གིས་ཆོས་བསྟན་ཏོ། །ཞེས་དང་། བྱམས་སྨོན་ལས། ཆོས་རྔ་ཆེན་པོའི་སྒྲ་ཡིས་ནི། །སེམས་ཅན་སྡུག་བསྔལ་མཐར་བགྱིད་ཤོག། བསྐལ་བ་བྱེ་བ་བསམ་ཡས་སུ། །ཆོས་སྟོན་མཛད་ཅིང་བཞུགས་གྱུར་ཅིག །ཅེས་དང་། ཀུན་མཁྱེན་ཀློང་ཆེན་པས། ཆོས་རྔ་སྒྲོག་པའི་སྒྲ་ཐོས་སེམས་ཅན་ཡང་། །ངན་སོང་རྣམ་གྲོལ་ཉན་རྣམས་སྨོས་ཅི་དགོས། །ཞེས་གསུངས་པའི་ཕྱག་ལེན་ཡང་ཡོད་དོ། །

ཆ་ལང་ངམ་སྦུབ།

༡ སྦུབ་ཀྱི་ཁུངས་དང་རྣམ་གྲངས། ཁྲག་འཐུང་མངོན་འབྱུང་ལས། ཆ་ལང་སྒྲ་ནི་ཆེན་པོ་དང་། །ཞེས་དང་། སམྦུ་ཊ་ལས། ཆ་ལང་ལྟ་བུའི་སྒྲ་གྲག་པ་དང་། ཞེས་སོགས་རྒྱུད་མང་བོར་ཆ་ལང་ཞེས་འབྱུང་ལ། ད་ལྟ་སྦུབ་བམ་སྦུག་ཆལ་བྱ་བ་དེ་ཡིན་ལ། དེ་ནི་སྒྲ་གདངས་ཀྱི་ཁྱད་པར་གྱིས་བཏགས་པའི་མིང་ངོ་། །འདི་ལ་འབྲི་ཚུལ་མང་སྟེ། སྦུག་ཆོལ་ལམ་སྦུག་ཆོལ། སྦུབ་ཆོལ་ལམ་སྦུབ་ཆོལ། སྦུག་གམ་སྦུབ། ཆ་ལང་ངོ་། །

རྒྱུ་ནི་འཁར་དང་ལི་སོགས་ཀྱིས་བྱས་པ། ཆེ་ཆུང་མ་ངེས་པ། དབུས་སུ་འབུར་དུ་དོད་པའི་ནང་སྦུབ་ཅན། འདབ་མ་ཟླུམ་པོར་བྱས་པའོ། །ཕྱིས་སུ་བོད་དུ་དར་བའི་བཟོ་བཀོད་དང་མདོག སྒྲའི་འབྱིན་ཚུལ་སོགས་ཀྱི་དབྱེ་བ་བཞི་ཡོད་དེ། ཧོར་སྦུབ། རྒྱ་སྦུབ། བལ་སྦུབ། བོད་སྦུབ་བོ། །དེ་ཡང་འཇིགས་མེད་གླིང་བས། དེ་ཉིད་ལའང་ཧོར་རྒྱ་བལ་བོད་བཞི། །ཧོར་རིགས་གསུམ་ལས་མཆོག་ཏུ་གྱུར་བ་ནི། །ཛ་ལན་དྷ་ར་ཐོད་ཁྱིམ་ཆེ་ལ་ཕྱུར། །འཁོར་རྒྱ་ཆུང་ལ་ཐོ་རྗེས་ཤིན་ཏུ་གསལ། །གཡའ་མདངས་སེར་ནག་སྐད་སྙན་རྒྱང་གྲགས་ཆེ། །ངོ་བོ་ཆུང་ལ་རྒྱུ་ཚོགས་སྟུག་པ་དང་། །ཁ་སྒོར་ཟ་ར་ཚགས་སུ་མངོན་པ་ཡིན། །ཤིན་ཀུན་མ་ནི་ཐོད་པ་ཟླུམ་པ་ལ། །ལོ་ཐོད་བར་སྙེག་འཁོར་རྒྱ་སྔོན་བས་ཆེ། །རྒྱུ་ཚོགས་ཆེ་ལ་ངར་བས་གཞན་དག་གནོན། །སྤྱི་བོ་མཁར་བ་ཐོད་པ་ཆུང་བ་ལ། །ལོ་མ་རན་ཞིང་སྔོན་པོའི་ཁ་དོག་སྔོ། །མཚན་ཉིད་གཞན་རྣམས་མཚུངས་ཤིང་རྒྱ་གསར་ཀྲིག། བལ་བོ་ཧོར་དུ་བརྫུས་དང་མ་འཛོལ་ན། །ཧོར་གྱི་མཇུག་དང་རྒྱ་ཡི་ཐོག་མ་རུ། །བྱུང་བའི་རོལ་མོ་ཁྱད་གཞིས་འཕགས་པ་སྟེ། །སྐྱེ་མཆེད་དོད་ལ་ཐོད་ལོ་མཆུ་ཞེང་གབ། །ཐོད་མཚམས་ཟད་མཚམས་རྩ་རིས་བྱེ་ཁ་མངོན། །གཡའ་མདངས་སེར་ཞག་ཅན་དང་སྔོ་ནག་སོགས། །སྣུམ་བག་གཞན་བས་ལྟ་ན་སྡུག་པ་ལ། །སྐད་སྙན་འཁྲོལ་ཞིང་རྒྱང་གྲགས་ཆེ་བ་ཡོད། །ཅེས་ཧོར་སྦུབ་ལ་ཛ་ལན་དྷ་ར་དང་། ཤིན་ཀུན་མ། སྤྱི་བོ་མཁར་བ་བཅས་གསུམ་དང་། རྒྱ་སྦུབ་ལ་ཡང་དེ་ཉིད་ལས། རྒྱ་སིལ་ལེགས་དང་དྲིལ་བུ་ཁྱད་འཕགས་དུས། །སྦུབ་ཆོལ་ཉུང་བས་ཕལ་རྣམས་ཕྱི་ནས་བྱུང་། །ཤིན་ཏུ་གསར་བ་ཁ་དོག་སྐྱ་འམ་གནག། རྒྱུ་ཚོགས་ལྡན་ཞིང་སྐད་སིང་སྙན་ཆ་ལྡན། །ཞེས་དང། བལ་སྦུབ་ཡང་དེ་ཉིད་ལས། བལ་ཆོལ་སྦལ་མགོ་མ་དང་སྤྲེལ་ཐོད་མང་། །ཐོད་པ་ཅུང་ཆུང་དེ་ཡང་གཅིག་ཤོས་སུ། །ཅིག་ཤོས་ཤོང་ཞེས་ཟེར་ཡང་ཆེ་ཆུང་དུ། །མངོན་པ་གང་ལ་ཡོད་པས་མ་ངེས་ལ། །སྲུབས་རིས་གསལ་ཞིང་ལི་མདངས་སེར་སྐྱར་སྣང་། །ཞེས་སྦལ་མགོ་མ་དང་སྤྲེལ་མགོ་མ་དང་། བོད་སྦུབ་ལ་ཡང་དེ་ཉིད་ལས། བོད་ནི་གྲ་སྦུག་ཉིད་དང་དེ་བཞིན་དུ། །ལྷོ་མོན་དག་ནས་གསར་བྱུང་བལ་རྒྱུད་བཟོ། །རྒྱ་གསར་དག་དང་འཁྲུལ་བ་བསྐྱེད་པ་དང་། །སྔོན་རབས་འཇང་སྦུག་སོགས་ནི་རྟོགས་པར་སླ། །གང་བྱུང་རྒྱུ་ལ་རྒོད་གཡུང་བྱེ་བྲག་གིས། །ཡབ་སྦུབ་མས་སྦུབ་ཁྱད་པར་ཆེ་བ་ཡིན། །ཞེས་བོད་སྦུབ་ལ་གྲ་སྦུབ་དང་མོན་སྦུབ། འཇང་སྦུབ་སོགས་བཤད་དོ། །

༢ སྦུབ་རྡུང་ཚུལ། རྡུང་ཚེ་ལུང་ཐག་སྲིན་ལག་ལ་བསྐོན་ནས། ཡབ་སྦུབ་མཐེབ་སོར་བཀྱེད་པས་བཟུང་ཞིང་། ཡུམ་སྦུབ་གཡོན་ལག་གི་མཐིལ་དུ་རླུང་དང་སྒྲ་མི་འགོག་པའི་ཆེད་དུ་བཞག་ཅིང་། ཕན་ཚུན་ཅུང་ཟད་བསྣོལ་ཏེ་རྡུང་ཚུལ་ནི། ཞ་ལུའི་མཁས་པ་ཙནྡྲ་ཤྲཱི་རིས། རང་ལྗིད་ཁོ་ནས་དྲག་ཙམ་བསྐུལ། །དཔྲལ་བའི་ཐད་བཀྱག་རིམ་བཞིན་ཕབ། །ཁ་གང་ཙམ་ནས་ཚིགས་ཁྲོལ་ལྷོད། །མས་ཀྱང་ཅུད་ཟད་ཙམ་འཁྲོལ་བྱ། །ཆེ་ཆུང་ལ་སོགས་སྐབས་བསྟུན་བྱ། །ཞེས་དང་། བར་སྣང་མི་གཡུག་གདོང་མི་དགག། བྲང་དང་པུས་མོ་ལ་མི་བརྡབ། །འཕྱག་དུས་ལྷོད་ལ་དལ་བུས་བསྐྱོད། །བདེ་བླང་སྒྲ་ཆེར་འཐབ་ཅིང་གསིལ། །འཁྲོལ་ནས་མགྲིན་པའི་ཐད་ཙམ་སྟེ། །ཆེ་འབྲིང་ཆུང་སྐད་སྐབས་དང་སྦྱར། །སྒྲ་གདངས་ཁྱད་པར་ཡང་དེ་ཉིད་ཀྱིས། བཞི་འཕར་འུར་དིང་སྙན་རྩུབ་དང་། །ཕྲ་སྦོམ་དྭངས་འཁྲོལ་ལ་སོགས་པའི། །སྒྲ་ཐབས་རྣམ་དབྱེ་རྟོགས་པར་བྱ། །ཞེས་གསུངས་པ་དང་། གཞན་ཡང་། ས་དགེ་ཀར་རྙིང་ཀུན་གྱིས་རང་རང་གི་ཐུན་མིན་གྱི་རྡུང་ཚུལ་ཡོད་པས། ཞིབ་ཏུ་མཐོང་བ་བརྒྱུད་པའི་ཕྱག་ལེན་ལས་རྟོགས་པར་བྱའོ། །

༣ སྦུབ་ཀྱི་མཚོན་དོན། སྟེང་འོག་གཉིས་ཀྱིས་ཐབས་ཤེས་ཟུང་འཇུག ལྟོ་བ་ལྡིར་བས་གནས་སྐབས་དང་མཐར་ཐུག་གི་བྱང་ཆུབ། ཁོར་ཡུག་གི་ཞེང་ཁ་གྱེན་དུ་ཕྱོགས་པས་སྔགས་ཀྱི་སྤྱོད་པ། འཆང་བཟུང་གིས་བདེན་གཉིས་ཟུང་འཇུག སྒྲ་དལ་མྱུར་འཇམ་ལྷོད་དང་། དྲག་པས་གྲགས་སྟོང་འགག་པ་མེད་པ་མཚོན་པའོ། །

༤ སྦུབ་ཀྱི་དགོས་པ། རྔ་སྦུབ་སོགས་ཆོ་གའི་ཚིག་རིས་དང་མཐུན་པར་འཇུག་པས། རྣལ་འབྱོར་བའི་ལྟ་དགོངས་ལ་འབོགས་ཐོན། གདོན་བགེགས་ལོག་འདྲེན་གྱི་དགྲ་བགེགས་སྐྲོད་པ། སྣང་སྲིད་མ་མོ་རྣམས་སྙིང་ཉེ་བ། རྩ་གསུམ་ལྷ་ཚོགས་མ་ལུས་ཐུགས་དགྱེས་ཤིང་བསྐྱེད་རྫོགས་ཀྱི་ཡོན་ཏན་གོང་དུ་སྤེལ་བའི་རྐྱེན་དུ་འགྲོའོ། །

ཏིང་ཤག

༡ ཏིང་ཤག་གི་ཁུངས། ཏིང་ཤག་ལ། ཏིང་ཏིང་ཅག་དང་། ཏིང་ཏིང་ཤག་ཅེས་འབྲི་བའང་ཡོད་ལ། དེ་ནི་དགེ་འདུན་པ་སོགས་ཀྱིས་སྦྱིན་སོགས་ཕར་ཕྱིན་གྱི་ཆོས་ལ་ཉམས་ལེན་མཛད་ཆེད་ཟས་སྦྱིན་གཏོང་སྐབས་འཁོར་གསུམ་མི་དམིགས་པའི་ཏིང་ངེ་འཛིན་ལ་མཉམ་བཞག་གི་སྒོ་ནས་གཏོང་བའི་ཐབས་ཁྱད་པར་བ་ཞིག་ཡིན་ལ། ཏིང་ཤག་ཅེས་པ་དེ་ཡང་། ཏིང་ངེ་འཛིན་ཞེས་སུམ་བརྡུང་གི་སྒྲས་བླངས་པའི་སྒྲ་ཡིན་པས་དེ་སྐད་ཐོགས་པར་བཤད། བོད་དུ་ཏིང་ཤག་འདི་འབྲོག་མི་ལོ་ཙཱ་བ་ནས་དར་བར་བཤད། འགའ་ཞིག་གིས་ཏིང་ཤག་འདི་གཡེར་ཁ་ལ་དཔེ་བྱས་ཏེ་བཟོས་པར་བཤད་མོད། དེ་ལྟར་ག་ལ་ཡིན་ཏེ། ནག་པོ་ཆེན་པོའི་རྒྱུད་ལས། གླིང་བུ་དང་། ཏིང་ཏིང་ཤག་དང་། ཞེས་དང་། གསང་རྒྱན་བཀོད་པའི་རྒྱན་ལས། ཏིང་ཏིང་ཤག་དང་དུང་སྒྲ་དང་། །ཞེས་རྒྱུད་སྡེ་མང་བོ་ལས་གསུངས་པས་སོ། །ཏིང་ཤག་གི་རྒྱུ་ནི། འཁར་བ་དང་། ལི་སོགས་ལས་བྱས་པ། བོད་དུ་ཆོས་རྒྱལ་སྲོང་བཙན་གྱི་དུས་སུ་ཟ་ཧོར་ནས་དར་བར་བཤད་དོ། །

༢ ཏིང་ཤག་གི་དབྱེ་བ། ཏིང་ཤག་ལ་རྭ་ཏིང་ཞེས་ཏིང་ཤག་ཡ་གཅིག་ལ་རྡུང་བྱེད་ཀྱི་རྭ་ཅོ་ཆུང་ངུ་ཞིག་ཡོད་པ་དེ་ནི་གསུར་གཏོང་སྐབས་སྤྱོད་པ་དང་། སྦུབ་ཆུང་ཀྱི་དབྱིབས་ལྟར་ཆ་གཅིག་ཡོད་པ་དེ་ལ། བསྟན་པ་སྔ་དར་གྱི་དུས་སུ་ཁ་ཆེ་མ་དང་། འཇའ་ལན་ར་མ་ཞེས་དབྱེ་བ་གཉིས་བྱུང་བ་སྟེ། ཇི་སྐད་དུ། ཏིང་ཤག་མགོ་འཕང་དམའ་ཞིང་གྲག་འདི་ནི། །སྦུབ་སྙམ་བྱེད་ཅིང་སྐད་སངས་ཁྲོལ་ཆེ་བ། །མགོ་དང་འདབ་མའི་མཚམས་སུ་པུས་མོ་གསལ། །ཁ་ཆེ་མ་ཞེས་གྲགས་པ་འདི་ཉིད་ཡིན། །ཏིང་ཤག་ཁྱོན་ཆུན་མགོན་པོ་ནས་བཟུང་སྟེ། །རིམ་གྱིས་ཕབ་པ་ཁ་གཡེལ་ཤས་མཐུག་པས། །རྡོ་སྐད་འཕར་རིམ་སྙན་ཆ་ཆེ་བ་ལ། །འཇའ་ལན་ར་མ་ཞེས་བྱ་ཡོངས་སུ་གྲགས། །ཞེས་གསུངས་ལ། བསྟན་པ་ཕྱི་དར་ནས་ཧོར་ཏིང་དང་རྒྱ་ཏིང་། བལ་ཏིང་དང་བོད་ཏིང་སྟེ། སོ་སོར་དབྱིབས་དང་། ཁ་དོག་སྒྲ་གདངས་ཀྱི་སྙན་ཆ་སོགས་ཁྱད་ཆོས་ལྡན་པའི་ཏིང་ཤག་སྣ་ཚོགས་དར་བ་སྟེ། ཀུན་མཁྱེན་འཇིགས་མེད་གླིང་བས། ཏིང་ཏིང་ཤག་ལ་ཧོར་དང་རྒྱ་བལ་བོད། །ཧོར་ལ་རིགས་གསུམ་ཛ་ལན་དྷ་ར་མཆོག། ཤིང་ཀུན་འབྲིང་ལ་ཕལ་བ་ཐ་མ་སྟེ། །ཛ་ལན་དྷ་ར་གླིང་ཕྲན་ལས་འོངས་པའི། །ཤང་ཤང་ལས་བྱུང་ཐོད་པ་སྦུབ་ལ་ཟླུམ། །ལོ་མ་ཆུང་ཤོས་མཐེའུ་ཆུང་གི་རྒྱ། །ཁ་སྐོར་མཐུག་ཅིང་གཞན་ལས་ཆུང་བ་ལ། །སྐད་སྙན་རྒྱང་གྲགས་མཆོག་ཏུ་གྱུར་བ་ཡིན། །ཤིང་ཀུན་ཐོད་པ་དཔངས་མཐོ་རྩེ་མོ་ཕྱུར། །མཐའ་སྐོར་ཁ་སྦུབ་མཐུག་ལ་བར་སྐབས་སྲབ། །རྒྱང་གྲགས་ཆེ་ལ་དབུགས་ཐག་རིང་བ་ཡིན། །ཕལ་བ་བརྡར་གད་ཅུང་དོད་ཐོད་པ་དམའ། །ལི་ལ་ཁྲོ་ཉམས་ཡོད་པས་གྲུམས་པའང་སྲིད། །ཅེས་ཧོར་ཏིང་ལ་རབ་འབྲིང་ཐ་གསུམ་དུ་བཤད་པ་དང་། རྒྱ་ཏིང་ཡང་དེ་ཉིད་ཀྱིས། རྒྱ་ཏིང་ཐོད་པ་ཟླུམ་ལ་ཁ་ཕྱིར་ཐེག །ལོ་ཐོད་མཚམས་སུ་དཀྲི་ཁ་འཁོར་མོ་ལ། །ནག་གམ་སེར་མདངས་གཡའ་སྟུག་སྐད་གཤིས་འབོལ། །ཞེས་དང་། བལ་ཏིང་ནི། བལ་བོ་ཧོར་ཕལ་ལས་ཆེ་ཐོད་པ་ཕྱུར། །སེར་སྐྱ་སྲབ་ཞིང་སྙན་ཆ་ཆུང་བ་ཡིན། །ཞེས་དང་། བོད་ཏིང་ནི། དེ་ཉིད་ལས། སྙེ་ཤང﹙སྟོད་བལ་ཡུལ་དུ་ཡོད་པའི་ས་ཆ་ཞིག﹚ལ་སོགས་བོད་རྙིང་ཁ་དོག་ནག །སྐད་གཟེངས་མཐོ་ལ་སྙན་ཆ་ཆེ་བའོ། །ཟལ་མོ་སྒང་བ་ཐོད་པ་ཆུང་ལ་འདལ། །ལོ་མ་ཆེས་ཆེ་མཚམས་སུ་དཀྲི་ཁ་ཅན། །རྒྱུ་ཚོགས་ཆེ་ལ་སྐད་འབོལ་རྒྱང་གྲགས་ཆེ། །ཞེས་སོ། །

༣ ཏིང་ཤག་རྡུང་ལུགས། ཏིང་ཤག་ནི་སྦུབ་ལྟར་ཆ་གཅིག་ཡོད་ཀྱང་རྡུང་ལུགས་ནི་ཁ་བཀན་དུ་བསྟན་ཏེ་གཡས་གཡོན་ཟུར་རྡུང་བྱེད་པ་ལས། སྦུབ་ལྟར་ཁ་སྦྱོར་ནས་རྡུང་བ་མིན། ཁྱད་པར་དུ་སྔ་དྲོ་མགྲོན་གོང་མ་རྣམས་ལ་སྙན་སེང་ཞུ་ཆེད། ལི་ཏིང་ཆ་གཅིག་རྡུང་བ་དང་། དགུང་དྲོ་མགྲོན་འོག་མ་རྣམས་ལ་བརྡ་གཏོང་བྱེད་དུ་རྭ་ཏིང་བེད་སྤྱོད་པའི་ཕྱག་སྲོལ་ཡང་ཡོད་དོ། །

༤ ཏིང་ཤག་གི་མཚོན་དོན། ཁ་འཁྱེར་ཆུང་ཞིང་བརྗིད་ཆེ་བས་སྦྱིན་སོགས་དགེ་རྩ་ཆུང་ངུས་འབྲས་བུ་རྒྱ་ཆེན་འཐོབ་པ། ཕྱི་ནང་མཐུག་པོར་གནས་པས་ཆོས་ནོར་གྱི་སྦྱིན་པས་འགྲོ་བ་རྣམས་ཚིམ་ཞིང་དགེ་ཚོགས་ཟད་པ་མེད་པ། ལྟོ་བ་ཅུང་ཟད་ལྡིར་བས་ཐེག་ཆེན་གྱི་ནུས་པ་སད་པ། བུ་ག་གཅིག་པས་ཞི་སྒོ་གཉིས་སུ་མེད་པའི་དབུ་མའི་ལམ་མཚོན་པ་སོགས་སོ། །

༥ ཏིང་ཤག་རྡུང་བའི་དགོས་པ། ད་ལྟ་ཏིང་ཤག་འདི། བསུར་བསྔོ་དང་ཆུ་གཏོར། མཆོད་པ་དང་། བརྒྱ་རྩ་སོགས་འདོན་དུས་བཀོལ་ལ། དེ་ཡང་། རྟོགས་ལྡན་རྣལ་འབྱོར་བ་རྣམས་ཀྱིས་ཆུ་སྦྱིན་དང་གསུར་མཆོད་སོགས་ཀྱི་སྐབས། དཀོན་མཆོག་སྲི་ཞུའི་མགྲོན། མགོན་པོ་ཡོན་ཏན་གྱི་མགྲོན། བགེགས་རིགས་ལན་ཆགས་ཀྱི་མགྲོན། རིགས་དྲུག་སྙིང་རྗེའི་མགྲོན་དུ་གྱུར་བ་རྣམས་ལ་སྙན་གསན་བཏང་སྟེ། མཆོད་རྫས་ཟག་མེད་ལོངས་སྤྱོད་ཀྱི་མཛོད་དུ་དམིགས་ཏེ་བསྔོ་ཞིང་། ཏིང་ཤག་གི་སྒྲ་སྔགས་ཚིག་དང་བསྟུན་ནས། མཆོད་མགྲོན་མཉེས་ཤིང་ཚོགས་རྫོགས་པ། ལན་ཆགས་དང་ཤ་འཁོན་སྦྱངས། ཏིང་ཤག་གི་སྒྲ་དྭངས་ཞིང་སྙན་ལ་ཕྲ་ཞིང་ཡུན་རིང་བ་དེ་ཐོས་པ་རྣམས་ཀྱི་རྒྱུད་ལ་ངེས་འབྱུང་གི་བློ་སྐྱེས་པ་སོགས་ཕན་ཡོན་ཡོད་དོ། །

གསུམ་པ། དཀྲོལ་བའི་རོལ་མོ།

རྡོ་དྲིལ།

རྡོ་དྲིལ་ལ། མཚོན་བྱ་དོན་གྱི་རྡོ་དྲིལ་དང་། མཚོན་བྱེད་དཔེས་རྡོ་དྲིལ་གཉིས་དང། ཐབས་བདེ་བ་ཆེན་པོ་ནི་མཚོན་བྱ་དོན་གྱི་རྡོ་རྗེ་ཡིན། སྟོང་ཉིད་རྟོགས་པའི་ཤེས་རབ་ནི་མཚོན་བྱ་དོན་གྱི་དྲིལ་བུ་ཡིན། ང་ཚོས་ལག་ལེན་བྱེད་པའི་རྡོ་དྲིལ་ནི་མཚོན་བྱེད་རྟགས་ཀྱི་རྡོ་དྲིལ་ཡིན་ལ། རྣལ་འབྱོར་རོལ་བའི་དགའ་སྟོན་ལས། དབང་བླངས་པའི་ཚེ་རང་གི་མེ་ཏོག་གང་ལ་ཕོག་པའི་རིགས་ཀྱི་དབང་དུ་བྱས་པའི་རྡོ་རྗེ་དང་། རྡོ་རྗེ་དེས་ཡུ་བ་བྱས་པའི་དྲིལ་བུའི་དབང་བླང་ཞིང་། དེ་ལྟ་བུའི་རྡོར་དྲིལ་བཟུང་བར་བྱ་སྟེ། གསུངས་པ་ལྟར། དེའི་ཁུངས་ནི། རུ་ཏྲའི་སྨེ་སྔགས་སོགས་ལས། སྔོན་རི་རབ་གྱི་ཁོང་གསེང་ལས། བདེན་སྟོབས་བརྙེས་པའི་དྲང་སྲོང་ཞོ་འཐུང་གི་རུས་པ་ལ། བརྒྱ་བྱིན་གྱི་ཕྱག་མཚན་རྡོ་རྗེ་འཆོས་པས། རྡོ་རྗེའི་མཚོན་ཆ་དེས་བརྡེག་ཚད་ཕོག་པ་དང་། ཕོག་ཚད་འཆི་བ། ཤི་ཚད་འདྲེན་པ་སྟེ། དམ་བཅའ་བཞི་ལྡན་དུ་བཤད་དོ། །དེ་ཡང་རྡོ་རྗེ་བཤད་པ་དང་། དྲིལ་བུ་བཤད་པ་གཉིས་ལས། རྡོ་རྗེ་བཤད་པ་ལ།

༡ རྡོ་རྗེའི་རྒྱུ་ལ། གསེར། དངུལ། ཟངས། རག ལི། ལྕགས། རྡོ། ཤིང་སོགས་རུང་བར་རྡོ་རྗེ་མཁའ་འགྲོ་སོགས་ལས་གསུངས་སོ། །

༢ རྡོ་རྗེའི་དབྱིབས་ནི། ལྟེ་ཟུར་བརྒྱད་པ་ཟླུམ་པོ། མཐའ་གཉིས་ཕྲེང་བ། དེའི་སྟེང་པདྨ། དེའི་སྟེང་ཟླ་བའི་དཀྱིལ་འཁོར། དེའི་སྟེང་མཐར་ཕྲེང་བསྐོར། དེའི་སྟེང་རྭ་དབུས་ཕྱིར་གྱེས་ལ་རྩེ་ནང་དུ་གུག་པ། རྩེ་མོ་ལས་རྩ་བ་ཕྲ་བ། དབུས་སྦོམ་ལ་རི་མོ་གསུམ་ལྡན་དབུས་མཐོ་ལ་མཐའ་དམའ་བ། རྭ་ཟུར་བཞི་འོག་ངོས་ཅུང་ཟད་ཟླུམ་པ། ཕྱོགས་རྭ་ཆུ་སྲིན་གྱི་ཁ་ནས་ཐོན་པ། གློ་གཉིས་སུ་ཕྲེང་བ་ཡོད་པ། ཕལ་ཆེར་རྩེ་དབུས་རྭ་ལ་ཟུག་པར་རྒྱུད་རྡོ་རྗེ་མཁའ་འགྲོ་དང་། སམ་བྷ་ཏྲ་ནས་གསུངས་ལ། མཚོན་བྱེད་རྟགས་ཀྱི་རྡོ་རྗེ་འདི་ལ། རྩེ་གཅིག་པ་དང་རྩེ་གསུམ་པ། ལྔ་བ་དང་དགུ་བ། སྣ་ཚོགས་རྡོ་རྗེ་སོགས་རྩེ་མོ་སྟོང་གི་བར་དུ་ཡོད་པར་མཁའ་འགྲོ་རྒྱ་མཚོ་ལས་གསུངས།

༣ རྡོ་རྗེའི་མཚོན་དོན་ནི། ལྟེ་བས་རྡོ་རྗེ་སེམས་དཔའ་དང་། སྟེང་གི་རྭ་ལྔས་རྒྱལ་བ་རིགས་ལྔ། པད་འདབ་བརྒྱད་ཀྱིས་འཕགས་ལམ་ཡན་ལག་བརྒྱད་ཀྱི་རང་བཞིན་ནམ་ཉེ་བའི་སྲས་ཆེན་བརྒྱད་མཚོན་པར་སམྦུ་ཊ་ལས་གསུངས། འོག་གི་རྭ་ལྔས་མཁའ་འགྲོ་སྡེ་ལྔ། པད་འདབ་བརྒྱད་ཀྱིས་སྒོམ་བཞི་དང་སྐུལ་བྱེད་མ་སོགས་བཞི་མཚོན་པར་བྱེད་དོ། །གཞན་ཡང་། རྡོ་རྗེ་ཐབས་ཡིན་པས་ཉིན་མོའི་ཆོས་དང་། དྲིལ་བུ་ཤེས་རབ་ཡིན་པས་མཚན་མོའི་ཆོས་སུ་འཇོག་ལ། ཉིན་མོ་གསལ་བྱེད་ཀྱི་ཆོས་དང་། མཚན་མོ་དབྱངས་ཀྱི་ཆོས་ཡིན་ཞིང་། དབྱངས་སྲོག་ཏུ་ཞུགས་པ་མེད་པའི་གསལ་བྱེད་ཀྱི་དོན་བརྗོད་པ་མེད་པའི་ཕྱིར། རྡོ་རྗེ་ལ་བརྗོད་པའི་སྒོར་གྱུར་བའི་ཞལ་མི་བྱེད་ལ། དབྱངས་ནི་བརྗོད་པའི་ཆོས་ཀྱི་རྒྱུའི་གཙོ་བོ་ཡིན་པའི་ཕྱིར། དྲིལ་བུ་ལ་བརྗོད་པའི་སྒོར་གྱུར་བའི་ཤེས་རབ་མའི་ཞལ་གྱི་རྣམ་པ་བྱ་བར་གསུངས་སོ། །

གཉིས་པ་དྲིལ་བུ་བཤད་པ་ལ། ༡ དྲིལ་བུའི་དབྱིབས་ནི། སྟེང་གི་རྡོ་རྗེ་གོང་ལྟར་དང་། རྡོ་རྗེའི་འོག་ཏུ་ཤེས་རབ་མའི་ཞལ་དབུ་སྐྲ་དང་། རིན་ཆེན་དབུ་རྒྱན་ཅན་ཟླ་དཀྱིལ་ལས་ཕྱིར་མི་འཕགས་པ། ཞལ་འོག་བུམ་པ་དང་བུམ་གདན། དེའི་འོག་ཕྲེང་བ་སུམ་བརྩེགས་དང་དབྱུག་པ། དེའི་འོག་ཤེས་རབ་མའི་དྲང་ཐད་ཤར་དུ་བྱས་ནས། པདྨ་འདབ་བརྒྱད་ལ། ཤར་ཏུ་སྒྲོལ་མའི་ས་བོན་ཏཱཾ། བྱང་དུ་གོས་དཀར་མོའི་ས་བོན་བམ། ནུབ་ཏུ་མ་མ་ཀིའི་མཾ། ལྷོ་སྤྱན་མའི་ལཾ། ལྷོ་ནུབ་ཏུ་སྐུལ་བྱེད་མ་སྟེ་ཙུན་དའི་ཙུཾ། འདི་ལ་སྦྲང་རྩི་མ་དང་། མངར་བ་མ། དབྱངས་སྙན་མ་ཞེས་ཀྱང་གསུངས། ནུབ་བྱང་དུ་ཁྲོ་གཉེར་ཅན་མའི་བྷཾ། འདི་ལ་གཟི་བརྗིད་ཅན་མ། ཡིད་འོང་མ། མཛེས་མ་ཞེས་ཀྱང་གསུངས། བྱང་ཤར་དུ་ཕྲེང་བ་མའི་མཾ། འདི་ལ་རིན་ཆེན་འཁྱིལ་བ་མོ་ཞེས་ཀྱང་གསུངས། ཤར་ལྷོ་ནོར་རྒྱུན་མ་བཾ། འདི་ལ་གསེར་ཅན་མ། མདོག་བཟང་མ་ཞེས་ཀྱང་གསུངས། ལོགས་སུ་པདྨ་རེའི་ཐད་དྲ་བ་དྲ་ཕྱེད་སོགས་ཀྱིས་བརྒྱན་པའོ། །དེའི་འོག་དྲིལ་ཁོག་གཡེལ་ལ་མཐའ་ཟུམ་པ། དྲིལ་ལྕེ་ཟུར་བརྒྱད་པ། དྲིལ་བུའི་ཚད་དང་འཚམ་པའོ། །བྷ་བ་བྷ་དྲས་ས་བོན་དང་ལྷ་མོའི་སྐུ་འགོད་པ་གདམ་ང་ཅན་དུ་གསུངས། དེ་ལྟ་བུའི་པདྨའི་འོག་ཏུ་མུ་ཏིག་གི་འཕྲེང་བ་ལྟ་བུའི་སྐ་རགས་གཉིས་ཀྱི་དབུས་སུ་རྡོ་རྗེ་ཕྲེང་བ་བྱ་བར། རྡོ་རྗེ་མཁའ་འགྲོ་དང་མན་སྙེར་གསུངས་ཤིང་། རྗེ་བསྟན་རྒྱན་གྱིས་དྲ་ཕྱེད་ཀྱང་རེ་རེ་བརྒྱད་ཅེས་གསུངས། དྲ་ཕྱེད་བརྒྱད་ཀྱི་ནང་དུ་ཤར་ལ་འཁོར་ལོ། ལྷོར་རིན་པོ་ཆེ། ནུབ་ཏུ་པདྨ། བྱང་དུ་རལ་གྲི ཤར་ལྷོ་སྤྱན། ལྷོ་ནུབ་ཏུ་རྡོ་རྗེ། ནུབ་བྱང་དུ་པདྨ། བྱང་ཤར་དུ་ཨུཏྤལ་བྱ་ཞིང་། དྲ་ཕྱེད་ལ་སོགས་པའི་གནས་གཞན་དུ་ཀུ་མུ་ད་དང་། ཨུཏྤལ། པདྨ། རིན་པོ་ཆེ་དང་། པ་ཏྲ། མྱུ་གུ་ལ་སོགས་པ་འཕྱང་བ་བྱ་བར་མན་སྙེར་གསུངས་སོ། །

དྲིལ་བུ་ལ་རྒྱལ་བ་རིགས་ལྔ་གའི་ས་བོན་དང་ཕྱག་མཚན། རི་མོ་འབུར་དོད་དུ་ཡོད་པའི་དམ་ཚིག་གི་དྲིལ་བུ་དང་། རིགས་ལྔ་སོ་སོའི་དྲིལ་བུ་བཅས་མི་འདྲ་བ་ཡོད།

༢ དྲིལ་བུའི་དབྱུག་གུ་ནི། རྒྱུ་ལྕགས་བཟང་བོ་ལས་བྱས་པ་ཟུར་བརྒྱད་པར་རྡོ་རྗེ་མཁའ་འགྲོ་དང་། མན་སྙེར་བཤད་ལ། དེ་ཡང་ཟུར་བརྒྱད་པའི་རྣམ་པར་རྩེ་མོ་ནི་ཟུར་བརྒྱད་ཀྱི་དབུས་ནས་ཅུང་ཟད་མཐོ་བར་བྱས་པའི་ཟླུམ་པོ་བྱ་བར་གསུངས་སོ། །

༣ དྲིལ་བུའི་མཚོན་དོན་ནི། དྲིལ་བུ་ཆ་གསུམ་དུ་ཡོད་པས་ཁམས་གསུམ། ནང་ཁོག་སྟོང་དུ་ཡོད་པས་ཆོས་ཐམས་ཅད་རང་བཞིན་གྱིས་སྟོང་བ་མཚོན། ཡང་དྲིལ་བུའི་དབྱུག་གུས་འབྲས་དུས་ཀྱི་ལྷན་སྐྱེས་བདེ་བ་ཆེན་པོའི་ཡེ་ཤེས་དང་། བུམ་པའི་བདེ་སྟོང་དབྱེར་མེད་དང་། ཞལ་གྱིས་བདེ་སྟོང་དབྱེར་མེད་ཀྱི་ཡེ་ཤེས་ཤེར་ཕྱིན་མའི་རྣམ་པར་ཤར་བ་དང་། པདྨའི་ཡི་གེ་བརྒྱད་ཀྱིས་ཡུམ་བཞི་དང་། ནོར་རྒྱལ་མ་བཞི་མཚོན་ནོ། །གཞན་ཡང་། རྡོ་དྲིལ་ཕན་ཚུན་འཁྱུད་པས། ཁ་སྦྱོར་ཡན་ལག་བདུན་ལྡན་གྱི་ལོངས་སྐུ་དང་། དྲིལ་བུའི་སྒྲས་ཆོས་འཁོར་རྒྱུན་མི་ཆད་དུ་བསྐོར་བ་མཚོན་ནོ། །མན་སྙེ་ལས། རྡོ་རྗེའི་ཐུགས་དང་དྲིལ་བུའི་སྐུ། དེའི་སྒྲས་གསུང་ངོ་། །ཞེས་པ་ལྟར། སྐུ་གསུང་ཐུགས་ཀྱང་མཚོན་ནོ། །

༤ དྲིལ་བུའི་དབྱེ་བ་ནི། དྲིལ་བུ་འདི་བོད་ཡུལ་དུ་བོན་ལུགས་ཀྱིས་གནའ་སྔ་མོ་ནས་ཆོས་སྲིད་ཀྱི་སྤྱོད་སྒོ་ཁག་ལ་བེད་སྤྱོད་བྱེད་ལ། ཁྱད་པར་དུ་སྲོང་བཙན་གྱི་སྐུ་དུས་སུ་ནང་བསྟན་དར་བས་རྒྱ་གར་གྱི་སྔགས་ཆོས་ལ་ཁུངས་བཅོལ་ཏེ་ཁྲོ་ལྕགས་ལས་གྲུབ་པའི་དྲིལ་ཆེན་དང་། གཙུག་ལག་ཁང་གི་བར་སྒོར་དྲིལ་གདང་དུ་འདོགས་སྲོལ་བྱུང་ཡོད། ཕྱིས་སུ་བསྟན་པ་ཕྱི་དར་གྱི་དུས་སུ་དྲིལ་བུའི་བཟོ་བཀོད་ལ་འཕེལ་རྒྱས་ཆེན་པོ་བྱུང་བ་སྟེ། འགྲོ་མགོན་འཕགས་པའི་སྐུ་དུས་སུ་ཁོང་གི་བཀས་བསྐུལ་ཏེ་དྲིལ་བུ་རྩེ་ལྔ་དང་རྩེ་དགུ། ཚངས་རྡོར་སོགས་རྒྱུ་ཆ་དང་བཟོ་དབྱིབས། རྣམ་པ་མི་འདྲ་བྱུང་ཚུལ། རྒྱ་བོད་ནོར་རྫས་ཀྱི་རིས་བརྟགས་ཤིང་དཔྱད་པའི་དཔྱད་དོན་ཡིད་ཀྱི་འདོད་འཇོ་ཞེས་པ་ལས་གསུངས་ཡོད་ལ། ཁྱད་པར་དུ་གསུང་རྟེན་རྡོ་དྲིལ་སྐོར་རབ་འབྲིང་ཐ་གསུམ་དུ་བྱུང་ཚུལ་འཇིགས་མེད་གླིང་བས། གསུང་རྟེན་དྲིལ་བུ་ཧོར་དང་རྒྱ་དཀར་ནག། བོད་ཆེན་རིགས་བཞི་ལས་ནི་རྒྱུའི་སྒོ་ནས། །ཧོར་དྲིལ་གཉིས་ལས་ཤིན་ཀུན་མཆོག་ཏུ་གྲགས། །རྒྱུ་ནི་ལི་དཀར་དངུལ་མདངས་བཀྲག་ཞག་ཆེ། །དྲིལ་བུའི་སྟོད་ཞུམ་བ་ལང་ཁ་ཁེབས་ལ། །ལུགས་གཙང་བརྡར་གད་མ་བྱས་ལི་རྒྱུ་འཇམ། །ནང་ནི་ཞོ་ཁ་ཞེས་པ་འོ་སྤྲིས་འདྲ། །དྲྭ་ཕྱེད་འབུར་ལ་བར་སྟོང་འཇམ་སང་མང་། །དཔུང་བའི་པད་འདབ་རིགས་ཀྱི་ཕྱག་མཚན་སྤྲས། །དྲིལ་བུའི་དཔུང་ཟུར་པད་མཐའ་གཅིག་ཏུ་འདྲེས། །སྐད་སྙན་སྦོམ་ལ་རྒྱང་གྲགས་ལྷག་པར་ཆེ། །དབུ་རྡོར་ཅོང་ལི་མང་ན་དངུལ་དཀར་དང་། །ཛཻཀྵཱཾ་དག་ཀྱང་ཉུང་བར་སྲིད་པ་ཡིན། །རྩེ་ལྔ་བ་མང་ཆུ་སྲིན་ནང་ལ་བལྟ། །འཁོར་ལོའི་རྒྱན་ལྡན་རྩེ་དགུ་ཉུང་བ་ཡིན། །རྒྱུ་དང་གསུང་ལ་དོ་ཟླ་མེད་ན་ཡང་། །བཟོ་སྒྲོས་བྱིལ་བས་ཉམས་མེད་ཕལ་གྱིས་དོར། །དངོས་བསྟན་ཉུང་ལ་འདྲ་ཅོག་མང་བ་ཡིན། །ཕལ་བ་ལུགས་ཁ་དམ་ལ་གཙང་ཤ་ཆུང་། །ནང་ལ་བྲད་བརྡར་སོང་བས་ཞོ་ཁ་མེད། །རབ་འབྲིང་ཐ་མའི་ཁྱད་པར་ཆེ་བ་སྣང་། །ཞེས་ཧོར་དྲིལ་ལ་ཤིན་ཀུན་མ་དང་ཕལ་བ་གཉིས་སུ་བྱུང་བར་བསྟན་པ་དང་། དེ་བཞིན་རྒྱ་གར་དྲིལ་བུ་ལའང་། རྒྱ་གར་དྲིལ་བུ་ཆེ་ཚད་ཁྲུ་ལ་ཉེ། །ཆུང་བ་དག་ཀྱང་གཞན་ལས་ཆེ་བ་དང་། །པད་སྤུངས་དབྱིབས་ཅན་བྲད་བརྡར་གཙང་ཤ་མེད། །ཉུང་ཟད་སྣང་བ་ལི་དཀར་ཁོ་ནར་མཐོང་། །དྲིལ་བུའི་རྣམ་བཞག་རྒྱུད་སྡེ་ལས་གསུངས་པའི། །ཐ་སྙད་དང་མཚུངས་མཚུངས་པར་མ་ངེས་པ། །འཕགས་ཡུལ་དམ་ཚིག་སྲུང་ལ་སྒམ་པའི་ཕྱིར། །ཁྱབ་གདལ་མ་དར་བཟོ་ལ་འདྲིས་པ་ཆུང་། །ཞེས་དང་། རྒྱ་ནག་ནས་ཐོན་པའི་དྲིལ་བུ་ལའང་། རྒྱ་ནག་ཁྱད་དྲིལ་ཕལ་བ་ཏཱ་མིང་གསུམ། །ཁྱད་དྲིལ་སྐྱེ་མཆེད་བྲད་བརྡར་འགྲན་ཟླ་མེད། །དཀྱུས་ལས་ཅུང་ཆེ་བ་ལང་ཁ་སྦུབ་མཐུག། རི་མོ་དོད་ཀྱང་ཧྲོབ་ཉམས་གཏན་ནས་མེད། །རྩེ་ལྔ་བ་རྣམས་ཆུ་སྲིན་ནང་ལ་བལྟ། །འཁོར་ལོའི་རྒྱན་དང་རྩེ་དགུ་ཡིན་ནོ་ཅོག། རྩི་བར་དྲྭ་ཕྱེད་ཁོང་ནས་ཕྱག་མཚན་ཅན། །མུ་ཏིག་སྐེ་རགས་ཞིབ་ལ་སྐད་སྙན་འཁྲོལ། །མགོ་རྡོར་གསེར་དང་གསེར་དམར་ལས་གྲུབ་སྲིད། །རྒྱ་རག་ཚ་གསེར་མཐུག་པ་ཀུན་ལ་ཡོད། །ཕལ་བ་སྐྱེ་མཆེད་ཅུང་ཟད་གཙང་ཤ་ཆུང་། །དབྱིབས་ཀྱང་ཙོང་ལ་སྐད་ངར་གཉིས་སུ་འཚེར། །དྲྭ་ཕྱེད་སོགས་དང་པད་འདབ་ལྷོངས་ལ་འཇམ། །ས་བོན་ལཉྫར་ཡོད་པ་ཏཱ་མིང་མང་། །ཐེག་ཆེན་གན་དྲིལ་ལྷག་པར་ཆེ་བ་དང་། །ཁྱད་དྲིལ་མིང་དུ་གྲགས་པ་མེད་ན་ཡང་། །བཟང་ངན་ཁྱད་པར་ཆེ་བ་ཡོད་པའོ། །དགའ་ལྡན་གན་དྲིལ་དེ་བས་ཅུང་ཟད་ཞེར། །དྲིལ་བུའི་སྟོད་ཞུམ་མགོ་རྡོར་རྩེ་དགུ་མང་། །ཞེས་རྒྱ་ནག་ནས་ཐོན་པའི་དྲིལ་བུ་ལ་འང་ཁྱད་དྲིལ་དང་། ཕལ་བ། ཏཱ་མིང་བཅས་དབྱེ་བ་གསུམ་དུ་བྱུང་བར་བསྟན་པ་དང་། །བོད་དྲིལ་ལ་ཡང་། བོད་དྲིལ་རྙིང་མ་མདོ་ཁམས་རྩི་ཡུལ་དུ། །ཆེ་ཆུང་གཉིས་བཟོས་བྱི་བྱད་རྒྱ་འདྲ་བ། །ཉམས་མེད་རྣམས་ཀྱིས་རྒྱ་རུ་ངོས་འཛིན་ཡང་། །རི་མོ་མི་གཙང་དཔུང་མགོ་ཧོར་འདྲ་བ། །བ་ལང་ཁ་ནི་རྒྱ་ཧོར་གཉིས་ཀ་དང་། །འགལ་ཞིང་ནང་ལ་སུལ་གྱི་རྣམ་པ་མང་། །བོད་དྲིལ་གསར་མ་ཟལ་མོ་སྒང་དུ་དར། །རི་མོ་ཧྲོབ་ལ་སྐད་ངར་རིང་དུ་བསྲིངས། །ཁྱད་དྲིལ་རྣམས་ནི་སྐྱེ་མཆེད་གཙང་ཤ་ཆེ། །དེ་ལས་གཞན་པ་འཇང་འབའ་ལོ་གྲོ་སོགས། །དྲིལ་བུའི་གཟུགས་བརྙན་བརྟགས་པར་སླ་བས་སོ། །ཞེས་བོད་དྲིལ་ལའང་གསར་རྙིང་གི་དབྱེ་བ་ཡོད་ཚུལ་དང་ཁྱད་ཆོས་སོགས་བསྟན་ཡོད་དོ། །

༥ རྡོ་དྲིལ་གྱི་དགོས་པ་ནི། ཡི་དམ་གྱི་ལྷ་སྒྲུབ་སྐབས་དཀྱིལ་འཁོར་གྱི་སྒྲུབ་རྟེན་དང་། སྒྲུབ་བྱེད་ཀྱི་རྫས་དང་། དམ་ཚིག་གི་སྐབས་སུ་དབང་གི་དམ་ཚིག་དང་། ལས་རབ་འབྱམས་སྒྲུབ་པ་དང་། གསང་སྔགས་ཀྱི་གླུ་གར་སོགས་རྡོ་རྗེ་ཐེག་པའི་སྤྲོས་བཅས་ཀྱི་ཉམས་སོགས་ལ་དགོས་པར་གསུངས་སོ། །

༦ འཆང་ཚུལ་ནི། རང་ཉིད་ཀྱིས་གང་བསྒྲུབ་བྱའི་ལྷ་བསྒོམ་ཏེ་ལག་གཡས་ཉི་མ་དང་། ལག་གཡོན་ཟླ་བའི་དཀྱིལ་འཁོར་དུ་བསམ་ནས། ལག་པས་པད་བསྐོར་གྱི་ཕྱག་རྒྱ་དང་བཅས་ཏེ། གཡས་རྡོ་རྗེ་དང་། གཡོན་དྲིལ་བུ་འཛིན་པར་སམྦུ་ཊ་སོགས་ལས་བཤད་དོ། །

༧ རྡོ་དྲིལ་གཉིས་གསོར་བཀྲོལ་ཇི་ལྟར་བྱ་བ་ནི། དེ་ཡང་ཐབས་ཀྱི་མཚོན་བྱེད་རྡོ་རྗེ་ཕྱག་ཏུ་ཐོགས་ནས། ཐུགས་ཀྱི་དམ་ཚིག་དྲན་པའི་སྒོ་ནས། ཧཱུཾཿ མི་འགྱུར་ཐུགས་ཀྱི་རྡོ་རྗེ་ནི། །ཐུགས་ཀར་རྟག་ཏུ་བརྟེན་བྱ་བའི། །ཐུགས་ཉིད་ཡེ་ཤེས་རྡོ་རྗེ་ཡིན། །གསོར་བས་གདོན་བགེགས་ཐམས་ཅད་འཇོམས། །ཞེས་སོགས་ཀྱིས་གསོར་ཞིང་། གསོར་ལུགས་ལའང་རྐེད་གསོར་དང་རྩེ་གསོར་སོགས་མཆིས་པ་ལས། འདི་རྩེ་གསོར་རོ། །དྲིལ་བུ་ཡང་མཐེབ་སྲིན་གཉིས་ཀྱི་བར་དུ་ཐོགས་ལ། ཨཿ ཤེས་རབ་དབྱིངས་ཀྱི་སྒྲ་སྒྲོག་པ། །མཚན་མའི་དངོས་བོ་སྒྲ་མཐར་སྟོང་། །སྲིད་གསུམ་རང་བཞིན་ཉིད་ཀྱིས་དག། དངོས་བོ་ཐམས་ཅད་སྟོང་ཉིད་ངང་། །ཞེས་པས་དཀྲོལ་ཞིང་། དཀྲོལ་ལུགས་ཡང་སྣ་ཚོགས་ཡོད་པ་ཞལ་ཤེས་ལས་དང་། དེ་ཡང་ཐེངས་གཅིག་འཁྲོལ་ནས་དཀུར་བརྟེན་པས་གསུང་གི་དམ་ཚིག་དང་། ཐུགས་ཀར་བསྣོལ་བས་སྐུའི་དམ་ཚིག་དྲན་པར་བྱ་སྟེ། ཟུང་འཇུག་གི་ལམ་ཡང་དག་པར་འཇུག་པའི་བརྡ་མཚོན་ནོ། །

༨ ཕན་ཡོན་ལ། རྡོ་རྗེ་འཆང་བའི་ཕན་ཡོན་ནི། རྣལ་འབྱོར་བའི་རྟོགས་པའི་ཡེ་ཤེས་འཕེལ་བར་བཤད་པ་དང་། འགྲོ་བ་རྣམས་སྡུག་བསྔལ་ལས་སྒྲོལ་བ་དང་རྨོངས་ལས་ལྡོག་པ། བགེགས་སོགས་གནོད་པ་ཐམས་ཅད་འཇོམས་པ་དང་། དྲིལ་བུ་འཆང་བའི་ཕན་ཡོན་ཡང་། ཚེ་རིང་ནད་མེད་དང་། སྟོབས་དང་རྫུ་འཕྲུལ་སྟེར་བ། ནོར་འབྲུ་འཕེལ་ཞིང་སྡུག་བསྔལ་འཇོམས་པར་རྡོ་རྗེ་མཁའ་འགྲོ་སོགས་ལས་གསུངས་སོ། །དེ་ལྟར་འདིར་མགོ་འབུས་ཙམ་བརྗོད་པ་སྟེ། རྡོར་དྲིལ་གྱི་རྒྱུ་དང་དབྱིབས། ཚད་དང་དབྱེ་བ། མཚོན་དོན་དང་དགོས་པ། འཆང་ཚུལ་དང་རབ་གནས། ཕན་ཡོན་སོགས་ཞིབ་ཏུ་ཤེས་འདོད་པ་དག་གིས་གཤིན་རྗེ་གསང་རྒྱུད་དང་། རྡོ་རྗེ་མཁའ་འགྲོ། བྱ་རྒྱུད་ལེགས་གྲུབ། སམྦུ་ཊ ། དཔུང་བཟང་དང་དངོས་གྲུབ་འབྱུང་རྒྱུད། རྡོ་རྗེ་ཕུར་བ་གསང་རྒྱུད། དངོས་གྲུབ་འབྱུང་རྒྱུད། རྙིང་རྒྱུད་རྟ་མཆོག་རོལ་བ། གསང་འདུས་སྒྱུ་འཕྲུལ་དྲ་བ། གདན་བཞི། མན་སྙེ། རྙིང་རྒྱུད་ཧེ་རུ་ཀ རྙིང་རྒྱུད་ཡེ་ཤེས་རྔམ་གློག དགོངས་པ་ལུང་བསྟན། དཔལ་མཆོག་དང་བོའི་རྒྱུད། རྡོར་དྲིལ་བཤད་པ་རྒྱུད་ལུང་དཔང་བཞག རྣལ་འབྱོར་རོལ་བའི་དགའ་སྟོན། སྔགས་འཆང་རྒྱན་གྱི་མེ་ཏོག་སོགས་ལ་བལྟ་བར་བྱོས་ལ། ཧ་ཅང་རྒྱས་པར་ཁལ་ཁ་དམ་རྡོར་གྱི་དམ་ཚིག་གི་རྫས་དང་ཡོ་བྱད་ཀྱི་རྣམ་བཞག་དངོས་གྲུབ་གཏེར་མཛོད་ལས་སྔགས་ཀྱི་ཆ་ལག་འགའ་ཞིག་ཟུར་དུ་བཀོད་པ་ཟབ་དོན་གསལ་བྱེད་ཅེས་པར་བཞུགས་པས་དེར་བལྟ་བར་བྱའོ། །

ཅང་ཏེའུ།

ཅང་ཏེའུ་ནི། བླ་མེད་ཀྱི་རྒྱུད་སྡེ་རྣམས་མ་གཏོགས། རྒྱུད་སྡེ་འོག་མ་རྣམས་ལས་དཀྲོལ་བར་མ་བཤད་ལ། མིང་གཞན་དུ་ཌཱ་མ་རུ། གསང་བའི་རྔེའུ་ཆུང་ཀྱང་ཟེར།

༡ ཅང་ཏེའུ་གྱི་རྒྱུ། རྒྱུ་ནི་ཙན་དན་དང་སེང་ལྡེང་། མིའི་ཐོད་པ་དང་བ་སོ་སོགས་སྟེ། སམྦུ་ཊའི་རྒྱུད་ལས། དེ་ནས་ཅང་ཏེའི་མཚན་ཉིད་བཤད། །བཛྲ་ཤིར་ཤ་རྩ་བ་དང་། །ཙན་དན་དམར་བོ་ལས་བྱུང་དང་། །གཞན་རྣམས་གང་རྣམས་དེ་རྣམས་ནི། །ཡིད་ལ་འདོད་པ་རྣམས་ལ་བྱ། །ཞེས་པ་ལྟར། བཛྲ་ཞེས་པ་རྡོ་རྗེ་ཅན་གྱི་ཤིང་དང་། ཤིར་ཥ་ནི་ཙན་དན་བ་ལང་མགོའི་རྩ་བར་མཁས་གྲུབ་རྗེས་གསུངས་པ་དང་། ཡང་རྒྱུད་དེ་ཉིད་ལས། གཞན་པ་ཡི་ཡང་རྔེའུ་ཆུང་ནི། །ཐོད་པ་ལས་ནི་བསྐོར་བ་ཉིད། །ཅེས་དང་། རྒྱུ་འཕྲུལ་དྲ་བ་ལས། མི་ཐོད་ལས་བྱས་ཅང་ཏེའུ་ལ། །ཞེས་སོ། །

༢ དབྱིབས་དང་བཟོ་ཚུལ། དབྱིབས་སྣ་ཚོགས་འབྱུང་། ཀ་པ་ལའི་ཌཱ་མ་རུ་ནི། སམྦུ་ཊ་ལས། ཐོད་པ་ལས་ནི་བསྐོར་བ་ཉིད། །སྤྲེའུ་པགས་པས་གཡོགས་པའོ། །དེ་བཞིན་ཁ་སྦྱོར་གཉིས་ལ་ནི། །པདྨ་དག་ནི་འབྲི་བར་བྱ། །བུད་མེད་ཁྲག་གིས་མཛེས་པ་དང་། །དུར་ཁྲོད་སྐྱེས་པའི་སྐྲ་ལས་ནི། །བཀལ་བའི་རུས་པ་གཉིས་ནི་བཅིང་། །ཁྱིམ་གྱི་མེ་ཏོག་གཉིས﹙ཕོ་ལོ་བཅུ་དྲུག་གི་ཁུ་བ་དང་མོ་ལོ་བཅུ་གཉིས་ཀྱི་ཟླ་མཚན་འབབ་པ་ཡིན་པས། དེ་ཡང་གྲོང་ཆོས་ཀྱིས་མ་གོས་པ་ལ་བྱའོ། །﹚ཀྱིས་ནི། །པདྨ་ཟེའུ་འབྲུ་གཉིས་པ་ལ། །དཀྱིལ་འཁོར་ཉིད་ནི་བྲི་བར་བྱ། །ཞེས་པ་ལྟར། སྐྱེས་པ་ལོ་བཅུ་དྲུག་དང་། བུད་མེད་ལོ་བཅུ་གཉིས་ཀྱི་ཐོད་པ་ལྟག་སྤྲོད་བྱས་ཏེ། སྤྲེའུ་པགས་པས་གཡོགས། པགས་པའི་ནང་དུ་ཤེས་རབ་མའི་ཟླ་མཚན་དང་བོ་བྱུང་བའི་པདྨ་འདབ་བརྒྱད། དེའི་ལྟེ་བར་རང་རང་གི་ཡི་དམ་གྱི་སྐུ ཕྱག་མཚན། ཡི་དམ་གྱི་རྩ་སྔགས། སྙིང་བོ། ཉེ་སྙིང་སོགས་འགོད་ལ། པགས་པའི་ངོས་གཅིག་ལ་ཡི་དམ་གྱི་ལྷ་དེའི་ཡུམ་གྱི་སྐུ་དང་། ཕྱག་མཚན་སྔགས་སོགས་འབྲི། རྒྱུ་ཐོད་པ་ཡིན་ན། ཕོ་ཐོད་ལ་ཡབ་ཀྱི་ལྷ་སྐུ་དང་། མོ་ཐོད་ལ་ཡུམ་གྱི་སྐུ་བྲིས་ཏེ། སྟེང་འོག་མི་ནོར་བར་བྱས། དེའི་སྟེང་དུ་སྐྲའི་སྐུད་པའི་རེའུ་མིག་ཆོས་འབྱུང་ལྟ་བུའི་སྟེང་འོག་ཏུ་བཅུ་དྲུག་རེ་བྱས་ཏེ། དེ་དག་གིས་རང་གི་འདོད་ལྷ་ཡབ་ཡུམ་རྟེན་བརྟེན་པའི་དཀྱིལ་འཁོར་དང་། དགའ་བ་བཅུ་དྲུག་སོགས་མཚོན། ཅང་ཏེའུ་ཟུར་ལ་བསླངས་ཏེ་འཇོག་ནའང་། སྟེང་གཡས་དང་འོག་གཡོན་དུ་འོང་བ་བྱ། སྟེང་འོག་མི་ནོར་བའི་ཆེད་དུ་སྟེང་གི་ཁ་གཡོགས་ཀྱི་ཕྱིའི་དབུས་སུ་ཧཱུཾ་བྲི་བ་ཁ་ཅིག་ཕྱག་ལེན་ལ་ཡོད་དོ། །སྔ་མ་ཁ་ཅིག་སྟེང་གི་པདྨ་ལ་ཡི་དམ་གྱི་ས་བོན་ནམ་ཕྱག་མཚན། འོག་གི་པདྨའི་ལྟེ་བར་ནག་པོ་ཆེན་པོ་ལ་སོགས་པའི་ཕྱག་མཚན། འདབ་མ་བརྒྱད་ལ་ཤར་ནས་གཡས་བསྐོར་དུ་རྡོ་རྗེ། ཐོད་པ། དགྲ་སྟ། མཆེ་བ། འཁོར་ལོ། རྒྱལ་མཚན། རལ་གྲི། དུང་རྣམས་བྲི་བ་མན་ངག་ཏུ་བཤད་དོ། །སྐ་རགས་ལ། སམྦུ་ཊ་ལས། དུར་ཁྲོད་སྐྱེས་པའི་སྐྲ་ལས་ནི། །ཞེས་དང་། བརྟག་གཉིས་ལས། རྐུན་མའི་སྐྲ་ལས་སྐ་རགས་བྱ་བར་གསུངས་སོ། །

༣ རྡུང་བྱེད་ནི། ཆུ་སྐྱར་དང་མཐིང་རིལ་གྱི་རྐང་རུས་གཡོགས་ཀྱིས་དྲིལ་ནས་སྐྲའི་སྐུད་པས་བཏེགས་ཏེ། རིན་པོ་ཆེའི་ཕྲ་ཚོམ་གྱིས་སྐ་རགས་སྤུད། ཕྱག་བཟུང་དར་སྐུད་སོགས་བྱ་སྟེ། སམྦུ་ཊ་ལས། མི་ཡི་སྐྲ་ཡིས་བཏགས་ནས་ནི། །མཐིལ་རིལ་གྱི་ནི་རྐང་རུས་ཀྱིས། །ཕེ་ཧཱུཾ་མིང་ནས་བརྗོད་ཅིང་བརྡུང་། །ཞེས་དང་། ཁ་སྦྱོར་ལས། ཆུ་སྐྱར་རྐང་བའི་རུས་པས་གདབ། །ཅེས་པ་མན་སྙེར། ཆུ་སྐྱར་རྐང་བའི་གནས་སུ་གདབ། །ཅེས་པ་དང་མཐུན་ནོ། །ཡང་སྔ་མ་ཁ་ཅིག བུད་མེད་ཀྱི་སྐྲ་དང་མེ་ལོང་དང་ཁ་དོག་སྣ་ལྔའི་དར་ལ་སོགས་པར་འདོགས་པ་དང་། བུད་མེད་ཀྱི་སེན་མོས་རྡུང་བྱེད་བྱེད་པ། གཞན་ཡང་བུད་མེད་ཀྱི་བརླའི་དཔྱི་གཉིས་དང་ཚིགས་རུས་འབྲེལ་བ་བྲེགས་ནས་འཇམ་པོར་བྱས་ཏེ། བྷ་གའི་པགས་པས་གཡོགས་ཤིང་། སྐྱེས་པའི་རྡོ་རྗེས་རྡུང་བྱེད་བྱས་པ་མཁའ་འགྲོ་མ་འབོད་པའི་གསང་བའི་རྔེའུ་ཆུང་སོགས་གསུངས་པ་ནི་སྔགས་གསར་མའི་གཞུང་ཁུངས་ཐུབ་ལས་མི་འབྱུང་བར་ཁལ་ཁ་དམ་རྡོར་གྱིས་གསུངས་སོ། །

༤ ཚད་ནི། སམྦུ་ཊ་ལས། དེ་ཡི་ཚད་ནི་བཀའ་བསྩལ་བ། །བཅུ་གཉིས་པ་དང་བཅུ་བ་ཉིད། །ཁ་ལ་དེ་ཡི་ཕྱེད་ཉིད་དོ། །གསུངས་སོ། །བྱིན་རླབས་དང་རབ་གནས་ལེགས་པར་སོང་བའི་ཌཱ་མ་རུ་དེ། འོ་བརྒྱལ་ས་དང་ས་སྒྲེ་བོ་འཇོག་པ་སོགས་མ་གུས་པ་སྤངས་ཤིང་། འཇོག་ཚེ་ཕོ་ཐོད་གཡས་དང་མོ་ཐོད་གཡོན་དུ་བསྟན་ཏེ་བསླངས་ནས་འཇོག་དགོས།

༥ མཚོན་དོན་ནི། ཀྱེ་རྡོར་ལས། ཁ་ཊཱཾ་ཀ་གཟུགས་ཤེས་རབ་སྟེ། །ཐབས་ཀྱི་གཟུགས་ཀྱི་ཅང་ཏེའུ་ཉིད། །ཅེས་དང་། རྣལ་འབྱོར་མ་ཀུན་སྤྱོད་ཀྱི་རྒྱུད་ལས། ཁ་ཊཱཾ་ཀ་ནི་ལྷ་ཡི་སྐུ། །ཤེས་རབ་ཌཱ་མ་རུ་རུ་བརྟག། ཞེས་དང་། རྒྱུད་མངོན་བརྗོད་བླ་མ་ལས། ཅང་ཏེའུ་གཞི་ཐབས་བདེ་བ་ཆེན་པོ་དང་། སྒྲ་ཤེས་རབ་སྟོང་བ་ཉིད་མཚོན་བྱེད་དུ་གསུངས་སོ། །གཞན་ཡང་། ཅང་ཏེའུ་གྱི་ཁོག་པ་དང་པགས་གཡོགས་དང་རྡུང་བྱེད་དང་ལག་པའི་རྩོལ་བ་སོགས་གཅིག་ལ་གཅིག་བརྟེན་ནས་སྒྲ་འབྱུང་བ་ནི། ཆོས་ཐམས་ཅད་རྟེན་ཅིང་འབྲེལ་བར་འབྱུང་བ་དང་། སྒྲ་ནི་གྲགས་སྟོང་སྐྱེ་འགགས་མེད་པ་ཆོས་ཉིད་ཀྱི་སྒྲ་མཚོན་བྱེད་དུ་འང་གསུངས་སོ། །གཞན་ཡང་། ཁལ་ཁ་དམ་རྡོར་གྱི་དམ་ཚིག་གི་རྫས་དང་ཡོ་བྱད་ཀྱི་རྣམ་བཞག་དངོས་གྲུབ་གཏེར་མཛོད་ལས། ཅང་ཏེའུའི་དག་པ་དྲན་པའི་སྒོ་ནས་དཀྲོལ་བར་བྱ་སྟེ། དེ་ཡང་ཐོད་པའི་སྐད་དོད་ཀམ་པཱ་ལའི་ཀམ་བདེ་བ་དང་། པཱ་ལ་སྐྱོང་བ་ལ་འཇུག་པས་བདེ་བ་སྐྱོང་བའི་གནས་ཕྱག་རྒྱའི་པདྨ་མཚོན་ལ། ནང་དུ་བཀོད་པའི་འདོད་པའི་ལྷའི་མཚན་མས་ནི། གནས་དེར་མངོན་དུ་བྱས་པའི་ལྷན་ཅིག་སྐྱེས་པའི་བདེ་བ་མཚོན་ཞིང་། བདེ་ཆེན་ལ་དགའ་བ་བཅུ་དྲུག་ཡོད་པ་ནི་དྲ་བའི་རེའུ་མིག་གིས་མཚོན་ལ། ཌཱ་མ་རུའི་སྒྲས་ནི་ཟབ་མོ་སྟོང་བ་ཉིད་སྒྲོགས་པར་སེམས་པར་བཤད་པས། ཐོད་པ་སོགས་ཀྱིས་མཚོན་པའི་བདེ་བ་ཆེན་པོ་དང་སྒྲས་བརྗོད་པའི་དོན་སྟོང་བ་ཉིད་དང་དབྱེར་མི་བྱེད་པར་སྦྱར་བའི་ཐབས་ཤེས་གཉིས་སུ་མེད་པ་མཚོན་པར་བྱེད་དོ། །

༦ བཀྲོལ་ཚུལ་ཡང་། ལག་གཡས་ཀྱི་མཐེ་བོང་དང་གུང་མཛུབ་ཀྱིས་སྐེ་དཀྲིས་ནས་འཆང་སྟེ། ཐང་ལྷོད་མེད་པར་བརྡུང་། བགེགས་བསྐྲད་ལ་མཐེ་བོང་ཕྱིར་བསྟན་དང་། བྱིན་རླབས་དང་དབང་བསྐུར་ལ་མཛུབ་མོ་ནང་བསྟན་གྱིས་བརྡུང་དགོས་པར་སྔགས་འཆང་རྒྱན་གྱི་མེ་ཏོག་ཏུ་གསུངས་སོ། །

༧ བརྡུང་བྱའི་དགོས་ནི། དམ་ཚིག་གི་རྫས་དང་ཡོ་བྱད་ཀྱི་རྣམ་བཞག་དངོས་གྲུབ་གཏེར་མཛོད་ལས། དེ་ཉིད་དེ་ཁོ་ན་ཉིད་དྲན་པའི་སྒོ་ནས་དཀྲོལ་བས། བདེ་སྟོང་གཉིས་སུ་མེད་པའི་ཡེ་ཤེས་ཉིད་སྒྲའི་རྣམ་རོལ་ཏུ་ཤར་བས་བླ་མ་དང་དཀྱིལ་འཁོར་གྱི་ལྷ་ལ་སོགས་པ་མཉེས་པར་བྱེད་པའི་མཆོད་པའི་དོན་དང་། དེ་ལས་བྱིན་གྱིས་རློབ་ཅིང་དངོས་གྲུབ་སྩོལ་བར་འགྱུར་བ་དང་། དཔའ་བོ་དང་རྣལ་འབྱོར་མ་ཐམས་ཅད། སྒྲ་དེས་ཐུགས་རྒྱུད་བསྐུལ་ནས་མྱུར་དུ་འདུ་ཞིང་། བྱིན་གྱིས་རློབ་པ་དང་། དབང་དུ་འགྱུར་བ་དང་། མཁའ་འགྲོ་ཆོས་སྐྱོང་རྣམས་སྒྲ་དེས་ཐུགས་རྒྱུད་བསྐུལ་ནས་འཕྲིན་ལས་ལ་སྦྱོར་བར་བྱེད་པ་ཡིན་ལ། རང་ལྷའི་ང་རྒྱལ་དང་རྣལ་འབྱོར་བརྟན་པ་དམ་ཚིག་དང་། སྡོམ་པ་ལ་གནས་པའི་སྔགས་པ་ཡིན་ན་གོང་དུ་བཤད་པའི་མཚན་ཉིད་དང་ལྡན་པའི་ཅང་ཏེའུ་ལ་བརྟེན་ནས་ཞིང་སྐྱོང་གི་མཁའ་འགྲོ་མ་དགུག་པའི་ལས་སྦྱོར་ཁྱད་པར་བ་ཞིག་ཀྱང་གསུངས་སོ། །

༨ ཕན་ཡོན་ནི། སངས་རྒྱས་མཉམ་སྦྱོར་ལས། ཅང་ཏེའུ་ཚུལ་སྟོན་རྣལ་འབྱོར་བ། །ཇི་ལྟར་བབས་པའི་གར་བྱེད་པས། །རིམས་དང་གདོན་དང་དུག་ཞེན་པའི། །སྡུག་བསྔལ་ཐམས་ཅད་མྱུར་དུ་སེལ། །ཞེས་དང་། མངོན་བརྗོད་བླ་མ་ལས། དཔའ་བོ་རྣལ་འབྱོར་མ་རྣམས་ཀྱི། །ཡིད་ནི་དགའ་བར་གྱུར་ནས་སུ། །དགའ་བ་ཡི་ནི་བསམ་པ་ཡིས། །ཅང་ཏེའུ་སྒྲ་ཡིས་བསྐུལ་ན་ནི། །མཉམ་ཉིད་དགའ་ལས་བཞེངས་པར་གྱུར། །ཞེས་དང་། རྙིང་རྒྱུད་ཀརྨ་མཱ་ལེ་ལས། ཅང་ཏེའུ་ཚུལ་སྟོན་རྣལ་འབྱོར་བ། །ཇི་ལྟར་བསམ་པའི་གར་བྱེད་པ། །འགྲོ་བ་གསུམ་དག་དབང་དུ་བྱེད། །དངོས་གྲུབ་མ་ལུས་མྱུར་དུ་འགྲུབ། །རིམས་གདོན་དུག་སེལ་སྡུག་བསྔལ་སེལ། །གནས་གསུམ་དག་ནི་སྐད་ཅིག་འབེབས། །ཞེས་སོ། །

གཞན་ཡང་། སངས་རྒྱས་བྱང་སེམས་ལ་མཆོད་པར་འགྱུར་བ་དང་། བསོད་ནམས་ཀྱི་ཚོགས་གསོག་པ། ཆོས་སྲུང་གི་ཐུགས་རྒྱུད་བསྐུལ་བ། བགེགས་བསྐྲད་དང་། རིག་པ་བརྟུལ་ཞུགས་ཀྱི་ཉམས་བསྐྱེད་པ། ཐབས་ཤེས་ཀྱི་མདོ་དྲན་པ། མཁའ་འགྲོ་མ་དབང་དུ་འདུ་བར་ཡང་འགྱུར་ཏེ། སྒྱུ་འཕྲུལ་དྲ་བ་ལས། ལམ་གྱི་བཞི་མདོར་དཀྱིལ་འཁོར་ནི། །རྐང་བ་གཡོན་པས་མཐེ་བོས་བྲིས། །གྲྭར་ནི་བུ་མོ་ཟས་བྱིན་ལ། །འགུགས་པར་བརྩོན་པའི་ལྕགས་ཀྱུ་བྱ། །གཙོ་བོ་ཁྲག་འཐུང་ཆ་ལུགས་ཀྱི། །གཟུགས་ཅན་གྱི་ནི་རྟིང་བས་བརྡུང་། །འདིས་ནི་ཁམས་གསུམ་རྣམ་གནས་པའི། །བུ་མོ་ཟས་བྱིན་འགུགས་པར་འགྱུར། །ཞེས་སོ། །

སིལ་སྙན།

༡ སིལ་སྙན་གྱི་སྒྲ་བཤད་དང་ཁུངས། གསང་བ་རྒྱན་གྱི་བཀོད་པ་ལས། ཇི་ལྟའི་སིལ་སྙན་རྡུང་སྤྱོད་ནི། །བརྡུང་བའི་བདག་ཉིད་ཅན་གྱིས་དཀྲོལ། །དེ་ལས་བྱུང་བའི་སིལ་སྙན་ལན། །གསིལ་བའི་སིལ་སྙན་ཉིད་དུ་བརྗོད། །ཅེས་གསུངས་པའོ། །སངས་རྒྱས་མཉམ་སྦྱོར་ལས། གླུ་དང་སིལ་སྙན་ལ་སོགས་པ། །ཞེས་དང་། ཟླ་གསང་ཐིག་ལེ་ལས། སིལ་སྙན་ཕྲེང་བ་རོ་ཆེན་དང་། །ཞེས་སོགས་རྒྱུད་མང་བོ་ལས། སིལ་སྙན་ཞེས་འབྱུང་ལ། མིང་གཞན་དུ་ཙིན་དང་རྔ་གཤང་ཞེས་ཀྱང་ཟེར། སིལ་སྙན་དང་ཆ་ལང་ནི། ཞི་དྲག་གི་ཁྱད་པར་དུ་གསུངས་ལ།

༢ སིལ་སྙན་གྱི་རྒྱུ་དང་དབྱིབས། རྒྱུ་ནི་ལི་དང་འཁར་བ་ལས་བྱས་ལ། དབྱིབས་ནི་འདབ་ཁ་གཤོག་པ་བརྐྱངས་འདྲ་ལ། ཁ་ཅུང་ཟད་གཡེལ་བ། ནང་དུ་སྦུབ་སྟོང་ཆུང་ཙམ། ཕྱི་ནས་ལག་པས་བཟུང་དུ་རུང་བ། སྐད་ཤིན་ཏུ་སྙན་པའོ། །

༣ སིལ་སྙན་གྱི་དབྱེ་བ། སིལ་སྙན་གྱི་རོལ་ཆ་འདི་ལ་ཕྱིས་སུ་དབྱེ་བ་མི་འདྲ་བ་བཞི་བྱུང་ཡོད་དེ། ཧོར་སིལ། རྒྱ་སིལ། བལ་སིལ། བོད་སིལ་ལོ། །དེ་དག་སོ་སོའི་ཁྱད་ཆོས་མི་འདྲ་བ་ནི། འཇིགས་མེད་གླིང་བའི་གཏམ་ཚོགས་ལས། སིལ་སྙན་ལའང་ཧོར་རྒྱ་བལ་བོད་བཞི། །ཧོར་ལ་རིགས་གསུམ་ཛ་ལན་དྷ་ར་དང་། །ཤིན་ཀུན་མ་དང་སྤྱི་བོ་མཁར་བ་ལས། །ཛ་ལན་དྷ་ར་ཐོད་ཆེ་འཁོར་རྒྱ་ཆུང་། །རྒྱུ་ཚོགས་ཆེ་ལ་སྐད་སྙན་རྒྱང་གྲགས་ཆེ། །སྤྲེལ་ཐོད་སྦལ་ཐོད་ཇི་ལྟའང་གཞན་པས་ཆུང་། །ཤང་ཤང་ཏེའུ་རེག་པའི་དུག་ཅན་ཕྱིར། །ཡི་གེ་བརྡ་ལས་རིན་ཐང་གཞལ་ཞེས་ཟེར། །དཀོན་པའི་ཕྱིར་ན་ནོར་སྣར་གྲགས་པ་ཡིན། །ཤིང་ཀུན་འཁོར་རྒྱར་དཔག་པའི་ཐོད་པ་ཆུང་། །ཐོད་དབྱིབས་གོང་འདྲ་སྐད་འབོལ་སེར་མདངས་ཆེ། །སྤྱི་བོ་མཁར་ལ་ཐོད་དབྱིབས་གསུམ་དུ་ཡོད། །ར་ཐོད་ཙོང་ལ་སྦལ་ཐོད་ཐོད་ཟུར་ཆག། སྤྲེལ་ཐོད་ཟླུམ་ལ་རྩ་བ་ཉག་པ་སྟེ། །འཁོར་རྒྱ་ཆེ་ཆུང་རན་ལ་འཁྲོལ་ཆ་ཆུང་། །གསེར་ངམས་ཟིལ་བ་ཆགས་པ་ཚེ་འབྲུམ་ཅན། །ནང་ལ་ཐོ་རིས་གསལ་ཞིང་སྲུབས་རིས་མེད། །ཐོད་པའི་རྩ་ནས་ལོ་མཐུར་སེ་གས་བསུ། །ཨོལ་མ་སོང་མཚམས་ཤང་ཁ་གྱེན་ལངས་ཀྱི། །ཁ་སྦྱར་བར་མཐའ་མ་རེག་ཙམ་དུ་ཡོད། །རྒྱ་ནག་ཆེ་ཆུང་འཚམ་ལ་ཆུ་ཞེང་གབ། །ཤང་ཁ་བཙན་ཚུགས་ཡོད་པས་འཁྲོལ་བ་དཀའ། །མཐའ་ལ་ཆ་ག་ནང་ལ་ཐོ་རྗེས་གསལ། །སེར་ནག་སྐད་སིལ་ཧོར་ལས་སྙན་ཆ་ཆུང་། །སྦལ་ཐོད་མ་ཎི་ལཉྫར་ཡོང་བ་ཡིན། །བལ་སིལ་སྲབ་དང་བོད་སིལ་རྒྱུ་ཚོགས་ཅན། །རྒྱ་ཧོར་གཉིས་དང་འགལ་བས་རྟོགས་པར་སླ། །དེ་ལས་བོད་སིལ་སྙན་ཆ་ཆེ་བ་ཡིན། །ཞེས་གསུངས་པ་ལྟར་རོ། །

༤ ཆེ་ཆུང་གི་ཚད། གཤང་རབས་ལས། གཤང་ངམ་ཁྲི་ལོ་སིལ་སྙན་ནི། །ཆེ་བ་གསེར་ཉིའི་ནུ་འབུར་ལས། །བྱུང་བའི་གླང་རེ་གཤང་ཆེན་དང་། །འབྲིང་བ་སངས་བོའི་ནུ་འབུར་ལས། །བྱུང་བའི་ཁྲི་ལོ་གནམ་གྲགས་དང་། །ཆུ་ལྕམ་རྒྱལ་མོའི་ནུ་འབུར་ལས། །བྱུང་བའི་ཁོལ་མོ་སིལ་སྙན་གྲགས། །ཞེས་སོ། །

༥ དཀྲོལ་ཚུལ། རོལ་མོའི་བསྟན་བཅོས་གཅིག་ཤེས་ཀུན་གྲོལ་ལས། སིལ་སྙན་འཁྲོལ་བ་ལྟ་བུ་ཞིག། ཡིན་ན་སིལ་སྙན་ཆེ་ཆུང་ལ། །ལྟོས་པའི་དཀྲོལ་ལུགས་འབྱུང་འགྱུར་ཏེ། །ཆེ་ལ་མཐོ་དང་ཆུང་ལ་དམའ། །ཡང་དོག་ཀྱང་ནི་གོ་རིམ་བཞིན། །དེས་ན་ཆེ་ཆུང་གང་ཡིན་ཡང་། །སིལ་སྙན་ཡིན་ན་ཐད་ཀར་དཀྲོལ། །སྦུག་ཆལ་ཡིན་ན་སྟེང་འོག་བྱ། །ཞེས་སྤྱིའི་དཀྲོལ་ཚུལ་དང་། བྱེ་བྲག་ཏུ་ལྷ་སའི་རྒྱུད་སྨད་གྲྭ་ཚང་ལ་ཆ་བཞག་ན་འཇིགས་བྱེད་ཀྱི་བདག་བསྐྱེད་སྐབས། སིལ་སྙན་ནམ་མཁའ་བྱ་འཛིང་དང་། རྒྱུད་སྟོད་ཀྱིས་བྱང་ཆུབ་ཕྱག་རྒྱ་མ། མཚུར་ཕུའི་དབྱར་འཆམ་གྱི་སྐབས་སུ་ཟླ་བ་ཡར་ཚེས་དང་། གཞན་ཡང་པདྨ་འདབ་བསྐོར་དང་། མེ་ཏོག་སིལ་མ་སོགས་དཀྲོལ་ཚུལ་ཡོད་དོ། །

༦ མཚོན་དོན། འཆང་བཟུང་གཉིས་ཀྱིས་ཐབས་ཤེས་གཉིས། དབྱིབས་གོར་མོ་དང་སྒྲ་སྙན་པས་མཆོད་ཡུལ་དག་དགྱེས་ཤིང་སོ་སྐྱེས་རྣམས་མ་རིག་པའི་གཉིད་ལས་སློང་བ། ཁ་ཞེང་ཆེ་བས་དབྱངས་ཀྱི་ཡན་ལག་ཕུན་སུམ་ཚོགས་པ། ཁ་ཁྱེར་ཅུང་ཟད་ནང་དུ་ཟུམ་པས་རྒྱལ་བ་རྣམས་ཐུགས་རྒྱུད་བསྐུལ་ཞིང་གདུལ་བྱ་རྗེས་སུ་འཛིན་པའི་བརྡ་མཚོན་ནོ། །

༧ སིལ་སྙན་གྱི་དགོས་པ་དང་ཕན་ཡོན། མཆོད་རྫས་འདི་རོལ་མོའི་བྱེ་བྲག་ཏུ་མདོ་སྔགས་གཉིས་ཀར་བསྟན་ཅིང་། མཆོད་པ་དང་། སྒྲུབ་མཆོད། ཚོགས་མཆོད། རབ་གནས་སོགས་སུ་དཀྲོལ་ཅིང་། སྤྱིར་ན་སྒྲ་སྙན་གྱི་རིགས་ཀུན་གང་ལ་གང་མཁོར་ལོངས་སྤྱད་ཀྱང་རུང་ལ། ནང་བསྟན་ལས་བསྟན་པའི་སྒྲ་སྙན་ཕལ་མོ་ཆེ་བླ་མ་ལྷ་ཚོགས་ལ་མཆོད་དེ་དགེ་སྒྲུབ་ཀྱི་ཆ་རྐྱེན་ཞིག་སྟེ། ཇི་སྐད་དུ། ཕྱོགས་དུས་ཀུན་ན་ཟིན་དང་མ་ཟིན་པའི། །ཡོན་ཏན་ཡིད་འོང་སྒྲ་སྙན་ཅི་མཆིས་པ། །མོས་བློས་དཀྱིལ་འཁོར་ལྷ་ལ་བདག་འབུལ་ན། །བཞེས་ནས་བླ་མེད་གྲུབ་མཆོག་སྩལ་དུ་གསོལ། །ཞེས་པ་ལྟར། ལས་རྣམ་པར་འབྱེད་པའི་མདོ་ལས། དེ་བཞིན་གཤེགས་པའི་མཆོད་རྟེན་ལ་རོལ་མོ་སིལ་སྙན་ཕུལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། གཟུགས་བཟང་ཞིང་ལྟ་ན་སྡུག་པར་འགྱུར་བ། སྐད་སྙན་པར་འགྱུར་བ་དང་། ཡིད་དུ་འོང་བའི་སྨྲ་བ་དང་ལྡན་པར་འགྱུར་བ་དང་། གྲགས་པ་དང་ལྡན་པར་འགྱུར་བ་དང་། གཟུང་བའི་ཚིག་ཏུ་འགྱུར་བ་དང་། རྟག་ཏུ་དགའ་བར་འགྱུར་བ་དང་། ཐམས་ཅད་དགའ་བར་འགྱུར་བ་དང་། ཐམས་ཅད་དགའ་བའི་སྒྲ་རྒྱ་ཆེན་པོ་ཐོབ་པར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བར་འགྱུར་བ་སྟེ། བཅུ་བོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་རོལ་མོ་སིལ་སྙན་ཕུལ་བའི་ཕན་ཡོན་ཡིན་ནོ། །ཞེས་དང་། སྒྱུ་མ་བདེ་མཆོག་ལས། སིལ་སྙན་ཕྱག་རྒྱ་བཤད་པ་རྣམས། །ལས་རྣམས་ཐམས་ཅད་རབ་བསྒྲུབ་པའི། །ཆ་ལུགས་བཞིན་དུ་གར་བྱེད་པས། །མ་རུངས་པ་ཡང་རབ་ཏུ་འགྲུབ། །ལས་རྣམས་ཀུན་ལ་མཆོག་ཏུ་ནི། །བརྡུང་ན་དཔལ་ནི་བཞི་འགྱུར་འགྲུབ། །ཅེས་གསུངས་སོ། །

པི་ཝང་།

པི་ཝང་ནི་ད་ལྟ་གླུ་བ་གླུ་མ་དག་གི་ཕྱག་མཚན་ལྟ་བུར་སྣང་མོད་ཀྱང་། འདི་ལ་རྒྱུད་སྡེ་དག་གི་ཁུངས་ཡོད་དེ། མངོན་བརྗོད་བླ་མ་ལས། པི་ཝང་གླིང་བུ་རྫ་རྔ་ཆེ། །ཞེས་དང་། བདེ་མཆོག་སྡོམ་འབྱུང་ལས། པི་ཝང་རྒྱུད་མངས་རྫ་རྔ་ཆེ། །ཞེས་དང་། ཁྱད་པར་དུ་སྟོན་པ་བཅོམ་ལྡན་འདས་ཀྱིས་དྲི་ཟའི་རྒྱལ་བོ་རབ་དགའ་པི་ཝང་གི་སྒྲ་སྙན་གྱིས་བཀུགས་ཏེ་བཏུལ་བ་དང་། རྒྱུད་སྡེ་རྣམས་སུ་རྡོ་རྗེ་པི་ཝང་མ་ཞེས་མཆོད་པའི་ལྷ་མོ་དང་། རྒྱལ་ཆེན་ཡུལ་འཁོར་སྲུང་དང་། དབྱངས་ཅན་མའི་ཕྱག་མཚན་ཡིན་པས་རྟོགས་ནུས་སོ། །པི་ཝང་འདི་མཆོད་པ་དང་ཚོགས་འཁོར། དཀྱིལ་འཁོར་སྒྲུབ་པ། རིག་མ་མཆོད་པ། རབ་གནས་སོགས་ལ་སྦྲེང་བའི་རོལ་མོའི་བྱེ་བྲག་གོ། མིང་གི་རྣམ་གྲངས་ལ། འཕང་འགྲོ། ཏམ་བུ་ར། རྒྱུད་མངས་སོ། །པི་ཝང་དེ་ལ་ཡང་། རྒྱུད་གཅིག་པ་ནས་མང་བོའི་བར་དུ་ཡོད་ལ། སོར་མོའི་འདེགས་འཇོག་ལ་བརྟེན་ནས་རྒྱུད་རེ་རེ་ལ་སྒྲ་གདངས་མི་འདྲ་བའི་སྒྱུ་རྩལ་འདོན་རྒྱུ་ཡོད་དོ། །

པི་ཝང་སྦྲེངས་པའི་ཕན་ཡོན་ནི། སངས་རྒྱས་མཉམ་སྦྱོར་ལས། པི་ཝང་ལེན་པའི་ཚུལ་སྟོན་ཅིང་། །ཇི་ལྟར་བབས་པའི་གར་བྱེད་པས། །ལས་རྣམས་གྲུབ་པ་རབ་འབྱམས་དང་། །དངོས་གྲུབ་མ་ལུས་མྱུར་དུ་འགྲུབ། །ཅེས་དང་། ཀརྨ་མཱ་ལེ་ལས། པི་ཝང་ལེན་པའི་ཚུལ་སྟོན་ཅིང་། །ཇི་ལྟར་བསམ་པའི་གར་བྱེད་དང་། །འགྲོ་བ་གསུམ་དག་དབང་དུ་བྱེད། །ཅེས་དང་། རྒྱ་བཟའ་ཀོང་ཇོ་བོད་དུ་ཕེབས་དུས་ཀྱང་། རྒྱན་གོས་འཕྱོར་བའི་བུ་མོ་ཉེར་ལྔས་པི་ཝང་དཀྲོལ་ནས་སྔུན་བསུས་ཚུལ་དེབ་ཐེར་རྣམས་སུ་བཀོད་ཡོད་པ་དང་། དེང་གི་དུས་འདིར། འབྲོང་རུའི་སྒྲ་སྙན་དང་། རྟ་ནག་སྒྲོགས་འགྲོས་སོགས་འཇིག་རྟེན་ཕྱོགས་སུ་དར་སོ་ཆེ་ལ། རྒྱུ་ཆ་ཡང་། དམངས་ཁྲོད་ཀྱི་བཤད་རྒྱུན་ལ། པི་ཝང་ཁྱོད་དང་ང་གཉིས། །མི་དགོས་རྒྱུ་ཞིག་མེད་ཀི ། གཡག་རྒན་གྲོད་པུ་དགོས་ཀི ། འབྲོང་རྒན་རྭ་ཅོ་དགོས་ཀི ། རྟ་རྒན་རྔ་མ་དགོས་ཀི ། སྡོང་རྒན་ཐང་ཆུ་དགོས་ཀི ། ང་ལ་རྩམ་པ་དགོས་ཀི ། འབྲུ་མར་ཕྱུར་བ་དགོས་ཀི ། ཞེས་པས་ཤེས་སོ། །གཞན་སྒྲ་སྙན་གྱི་སྐོར་ལ་གན་ཆག རེ་མ། ཡང་ཆིན་སོགས་དགྲ་ལྷ་ཟླ་བཟང་གི་ཆེད་རྩོམ་ཤོག་ངོས༡༤༧ ནས༡༦༥བར་གསལ་བས། ཤེས་འདོད་པ་རྣམས་ཀྱིས་དེར་བལྟ་བར་བྱའོ། །འབུད་རྡུང་དཀྲོལ་གསུམ་གྱི་རོལ་མོ་འདི་དག་ནི་ཆོས་འཇིག་རྟེན་གཉིས་ཆར་ནས་མཆོག་ཏུ་གྱུར་ཞིག་སྟེ། འཕགས་པ་རིན་པོ་ཆེས། དད་ལྡན་རྣམས་ཀྱིས་མཆོད་པ་དང་། །བཀྲེན་པ་རྣམས་ནི་འཚོ་བ་དང་། །ཆགས་ཅན་རྣམས་ནི་ཡིད་གཡོ་བ། །དེ་ཀུན་རོལ་མོ་མཁན་ལས་བྱུང་། །བློ་ངན་གཟུགས་ཀྱིས་འཕོང་ཡང་རུང་། །རིགས་ངན་ནོར་དང་བྲལ་ཡང་བླ། །རོལ་མོའི་ཆ་ལ་མཁས་གྱུར་ན། །ཚོགས་ཀྱི་ནང་ནས་རྒྱན་ལྟར་མཛེས། །ཞེས་སོགས་རོལ་མོ་ལ་བསྔགས་པ་མང་དུ་མཛད་དོ། །

གཡེར་ཁ།

རྒྱུད་ལས་གཡེར་ཁའི་དྲིལ་བུ་བྱེ་བྲག་ཏུ་གསུངས་ལ། དེ་ཡང་དབྱིབས་མི་འདྲ་བ་གཉིས་འབྱུང་། གཅིག་ནི་རྩེ་མེད་པའི་དྲིལ་བུ་ཁ་འདབ་ཕྱིར་གཡེར་བ། དཀྱིལ་འཁོར་གྱི་དྲ་ཆས་དང་། འདུ་ཁང་གི་བྱ་འདབ། མཆོད་རྟེན་གྱི་གདེངས་ཁ་སོགས་སུ་བཀོལ་བ་དེ་ཡིན། སྒྲ་བཤད་ལ་ཁ་འདབ་ཕྱིར་གཡེར་བས་གཡེར་ཁ་དང་། ཅིག་ཤོས་ནི། འཆམ་གོས་སོགས་སུ་བརྒྱན་པའི་གཡེར་རྡོག་དང་ཧ་ཅང་འདྲ་ཆེ་བ་དེ་ཡིན་ལ། མིང་ཡང་འདྲ་བ་རྒྱུ་མཚན་དུ་བྱས་ནས་བཏགས་པའོ། །

འདི་ལ་རྒྱུད་ཀྱི་ཁུངས་ཚད་ལྡན་ཡོད་དེ། མངོན་བརྗོད་བླ་མ་ལས། གཡེར་ཁ་སྒྲ་སྒྲོགས་སྐ་རགས་ཅན། །ཞེས་དང་། མཁའ་འགྲོ་རྒྱ་མཚོ་ལས། གཡེར་ཁའི་ཕྲེང་དང་ལྕགས་ཐག་དང་། །ཞེས་དང་། རྡོ་རྗེ་རྩེ་མོ་ལས། གཡེར་ཁའི་དྲ་བ་ཀུན་ཏུ་ཁེབས། །དྲིལ་བུའི་མཆོག་ནི་ཀུན་ཏུ་འཕྱང་། །ཞེས་སོགས་རྒྱུད་མང་བོ་ལས་གསུངས་སོ། །གཡེར་ཁ་འདི། དཀྱིལ་འཁོར་དང་གོས་སོགས་ཀྱི་རྒྱན་དུ་བཀོད་པ་དང་། ད་ལྟ་སྟོད་གཞས་ནང་མ་དང་། མཆོད་སྤྲིན་རོལ་གར། བྲོ་བ། གཞས་མ། ཀོང་བྲོ་སོགས་ཀྱི་ནང་གལ་ཆེའི་གནས་བབ་བཟུང་ཡོད་ལས་གཞན། རྟའི་མགྲིན་པ་དང་། བྱིས་པའི་ལྭ་བ། རྒྱ་གར་སོགས་སུ་རྐང་ལག་གི་གདུབ་བུར་ཡང་བཏགས་ཡོད་དོ། །

བཞི་བ། ཕྱག་མཚན་གྱི་སྐོར།

ཁ་ཊཱཾ་ཀ

༡ ཁ་ཊཱཾ་ཀའི་ཁུངས་ནི། མཁའ་འགྲོ་རྒྱ་མཚོ་ལས། ཐོད་པ་དང་ནི་ཁ་ཊཱཾ་འཛིན། །ཞེས་དང་། གདན་བཞི་ལས། ཁ་ཊཱཾ་ཀ་དང་རྣལ་འབྱོར་སྣོད། །རྒྱན་རྣམས་ཀུན་གྱིས་རྣམ་པར་བཀླུབས། །ཞེས་སོགས་རྒྱུད་སྡེ་མང་བོར་གསུངས་སོ། །སྒྲ་བཤད་ལ་སྔགས་འཆང་རྒྱན་མེ་ལས། ཁ་ཞེས་པ་ནམ་མཁའ་དང་། ཊཱཾ་ཞེས་པ་ཀེང་རུས་སམ་དབྱུག་པ་སྟེ། ནམ་མཁའི་ཀེང་རུས་སམ་ནམ་མཁའི་དབྱུག་པ་ཞེས་གསུངས་སོ། །

༢ ཁ་ཊཱཾ་ཀའི་ཡུ་བ་ནི། ཙན་དན་དང་ཆུ་ཤིང་ནག་པོ་སོགས་ཀྱིས་བྱས་ཤིང་། ཡར་སྣེ་རྡོ་རྗེ་རྩེ་གཅིག་པའི་དབྱིབས། དབྱུག་པའི་སྟེང་བུམ་པ་དམར་སེར་གང་རུང་། དེའི་སྟེང་སྣ་ཚོགས་རྡོ་རྗེ། དེའི་སྟེང་མི་མགོ་རློན་པ་དམར་བོ། རྙིད་པ་ནག་པོ། སྐམ་པོ་དཀར་བོ་སྟེ་སུམ་བརྩེགས། དེའི་སྟེང་རྡོ་རྗེ་རྩེ་ལྔ་སྔོན་པོ་ཡོངས་རྫོགས་གྱེན་དུ་བགྲེང་བ། འདི་ལ་རྡོ་རྗེ་ཕྱེད་པ་དང་། ཁ་དོག་ནག་པོ་བཞེད་པའང་ཡོད། བུམ་འོག་ཏུ་སྐྲའི་ཚངས་སྐུད། དྲིལ་ཆུང་དར་འཕན་སོགས་བུམ་པ་ལས་འཕྱང་བ། རྣོ་དབལ་དང་ལྡན་པའི་རྩེ་མོ་གསུམ་དང་ལྡན་པའོ། །ཡུ་བའི་རིང་ཚད་ལ། རང་གི་ལུས་ཚད་དང་། ཐུང་ཚད་ལ་ཁྲི་གང་སོགས་རུང་བར་བཤད་པ་དང་། དེ་ཡང་ཅུང་ཟད་མི་འདྲ་བ་གཞན་ཡང་ཡོད་དོ། །ཡང་མཁས་གྲུབ་རྗེས། ཁ་ཊཱཾ་ཀའི་ཚད་བཤད་པ་རྒྱུད་ན་མེད་པའི་རྟོག་བཟོའོ། །ཞེས་ཀྱང་གསུངས།

༣ མཚོན་དོན་ནི། དང་བོ་དབྱིབས་ཀྱི་མཚོན་དོན་ནི། རྩེ་མོའི་རྡོ་རྗེ་རྩེ་ལྔ་ནི་ལམ་དུས་སུ་མ་དག་པའི་ཕུང་ལྔ་སྦྱངས་ནས་འབྲས་བུ་སྐུ་དང་ཡེ་ཤེས་རིགས་སོགས་ལྔ་གྲུབ་པ་དང་། འོག་རྭ་ཐོད་སྐམ་གྱི་སྟེང་དུ་ཟུག་པ་ལྔ་ནི་སྦྱང་བྱ་ཁམས་གསུམ་གྱི་ཕུང་ལྔ་དང་། སྟེང་རྭ་ལྔ་སྦྱང་འབྲས་ཡེ་ཤེས་ལྔ་དང་། མར་སྣེའི་རྩེ་ལྔས་བྱང་ཆུབ་སེམས་དང་། ཡུ་བས་ཆོས་ཐམས་ཅད་བདག་མེད་པ། སྣ་ཚོགས་རྡོ་རྗེས་སྐུ་གསུམ་དང་། དེ་ལ་དྲིལ་བུ་དང་བ་དན་དར་དཔྱངས་སྣ་ཚོགས་ཀྱིས་བརྒྱན་པས། སེམས་ཅན་དོན་བྱེད་ཀྱི་འཕྲིན་ལས། བུམ་པ་བདུད་རྩིས་བཀང་བས་ལོངས་སྐུ ཐོད་གསུམ་བརྩེགས་པས་ཆོས་སྐུ་དང་རྣམ་ཐར་སྒོ་གསུམ་མཚོན་ནོ། །

ཡང་། བདེ་མཆོག་གི་བསྐྱེད་རིམ་ཚད་ལྡན་དག་ལས། ཁ་ཊཱཾ་ཀའི་ཡུ་བ་དཀར་བོར་ཡོད་པས་ནི་བྱང་ཆུབ་ཀྱི་སེམས་རྒྱས་པ། དེའི་སྟེང་གི་བུམ་པས་རྒྱུད་བདེ་བ་ཆེན་པོའི་བཅུད་ཀྱིས་བཀང་བ། སྣ་ཚོགས་རྡོ་རྗེས་འཕྲིན་ལས་བཞི་འགྲུབ་པ། མི་མགོ་རློན་པ་ནག་པོས་སྤྲུལ་བའི་སྐུ་དང་། རྙིད་པ་དམར་བོས་ལོངས་སྤྱོད་རྫོགས་པའི་སྐུ་དང་། སྐམ་པོ་དཀར་བོས་ཆོས་སྐུ་དང་། སྟེང་གི་རྡོ་རྗེ་སྔོན་པོ་རྩེ་ལྔ་བས་ཆོས་དབྱིངས་ཡེ་ཤེས་གཙོ་བོར་གྱུར་བའི་ཡེ་ཤེས་ལྔ་མཚོན་པར་ཡང་གསུངས་སོ། །

གཉིས་པ་ཚད་ཀྱི་མཚོན་དོན་ལ། སྣེ་རྡོར་ལ་སོར་ལྔ་ཡོད་པས་ཡེ་ཤེས་ལྔར་འདྲེན་པ་དང་། བསྐྱེད་རིམ་གྱི་སྦྱང་བྱ་རྐང་བའི་སོར་མོ་ལྔ་དང་། ཡུ་བ་སོར་བཞིས། ནང་གི་དབང་བོ་ཉི་ཤུ་རྩ་གཉིས་དང་། ཆོས་ཅན་དང་ཆོས་ཉིད་གཉིས་བསྣན་པས་ཉེར་བཞི་དང་། ཁྲུ་གསུམ་བྱས་ཚེ་རྣམ་ཐར་སྒོ་གསུམ་དང་། དྲིལ་བུ་དང་བ་དན་གྱིས་ལག་པ་གཉིས་མཚོན་པ་དང་། སྣ་ཚོགས་རྡོ་རྗེ་སོར་གཉིས་པས་སྤྲུལ་སྐུའི་འཇིག་རྟེན་དང་། འཇིག་རྟེན་ལས་འདས་པའི་དོན་མཛད་པ་དང་། བུམ་པ་སོར་བཞིས་ལོངས་སྐུས་དགའ་བཞི་ལོངས་སུ་སྤྱོད་པ་དང་། སོར་དྲུག་པོ་ཐུན་མོང་དུ་མགྲིན་པའི་གནས་དང་། མགོ་བོ་དང་བོའི་སོར་གསུམ་པོ་མགོ་བོ་དང་རྣམ་ཐར་སྒོ་གསུམ་གྱི་རྣམ་པར་ཐར་བའི་སྒོ་སྟོང་བ་ཉིད་དང་། དེ་མན་གྱི་ཚད། སྤྱིར་འདོད་ཁམས་མཚོན་བྱེད་དང་། སོར་བཅུ་གཉིས་པོ་རྟེན་འབྲེལ་ཡན་ལག་བཅུ་གཉིས་དང་། མགོ་བར་བའི་ཚད་དེ་གཟུགས་ཁམས་དང་། རྒྱུ་མཚན་མ་མེད་པ་དང་། མགོ་བོ་སྟེང་མའི་ཚད་དེ་གཟུགས་མེད་ཀྱི་ཁམས་དང་། འབྲས་བུ་སྨོན་པ་མེད་པ་དང་། རྩེ་གསུམ་པོ་དུག་གསུམ་རྩད་ནས་གཅོད་བྱེད་ཀྱི་གཉེན་པོ་ཡེ་ཤེས་དང་། འབྲས་བུ་སྐུ་གསུམ་དང་གཞི་ལམ་འབྲས་གསུམ་མཚོན་པར་བྱེད་དོ། །ཡང་སྤྱིར་བཏང་། བརྟག་གཉིས་ལས། ཁ་ཊཱཾ་ཀ་སྒོམ་ཤེས་རབ་ཉིད། །ཞེས་དང་། རྣལ་འབྱོར་མ་ཀུན་སྤྱོད་ལས། ཁ་ཊཱཾ་ཀ་ནི་ལྷ་ཡི་སྐུ། །ཞེས་དང་། ཁ་ཅིག ཁ་ཊཱཾ་ཀ་བདེ་བ་ཆེན་པོའི་ལྷ་སྐུ་དང་། མགོ་གསུམ་གྱིས་སྐུ་གསུང་ཐུགས་མཚོན་པར་བཤད་ལ། གཞན་སློབ་དཔོན་པདྨའི་ཁ་ཊཱཾ་ཀར་རྭ་ལ་ཨ་ལོང་དགུས་མཚོན་ལ། དེས་ཐེག་རིམ་དགུས་འཇུག་སྒོ་མཚོན། དེ་ལས་གཞན་བརྡ་སྣ་ཚོགས་མཚོན་པའི་དྲིལ་བུ་དང་། ཉི་ཟླས་བརྒྱན་པ་སོགས་ཀྱང་འབྱུང་ངོ་། །

ཡང་སློབ་དཔོན་པདྨ་འབྱུང་གནས་ཀྱི་ཁ་ཊཱཾ་ཀའི་མཚོན་དོན་དུ་འདི་ལྟར་འབྱུང་སྟེ། མཆན་ཁུང་གཡོན་ན་ཡུམ་ལྷ་ལྕམ་མཁའ་འགྲོའི་དབང་ཕྱུག་སྦས་པའི་ཚུལ་གྱི་ཁ་ཊཱཾ་ཀ་འཛིན་པ། ཁ་ཊཱཾ་ཀ་དེ་ཡང་ངོ་བོ་རང་བཞིན་ཐུགས་རྗེ་གསུམ་མཚོན་པའི་ཡར་རྩེ་གསུམ། ཆོས་ལོངས་སྤྲུལ་གསུམ་གྱི་སྐུ་མཚོན་པའི་ཐོད་པ་སྐམ་རློན་རྙིང་གསུམ། ཐེག་པ་རིམ་པ་དགུ་མཚོན་པའི་རྭ་དང་ལྕགས་ལུང་དགུ། ཡེ་ཤེས་ལྔ་མཚོན་ཕྱིར་དར་ཚོན་སྣ་ལྔ། དུར་ཁྲོད་ཆེན་པོ་བརྒྱད་དུ་བརྟུལ་ཞུགས་ཀྱི་སྤྱོད་པ་མཛད་དེ་མ་མོ་དང་མཁའ་འགྲོ་དབང་དུ་བསྡུས་པའི་བརྡར་ཤི་སྐྲ་དང་གསོན་སྐྲ་ལ་སོགས་པས་བརྒྱན་པར་བཤད་དོ། །

༤ དགོས་ཆེད་ནི། ཁ་ཊཱཾ་ཀ་འདི་ཤེས་རབ་ཡུམ་གྱི་ཚུལ་དུ་བསྟེན་པས་ཐབས་ཤེས་ཀྱི་དོན་དང་། ལྷན་སྐྱེས་བདེ་བ་ཆེན་པོའི་དོན་མི་བརྗེད་པར་དྲན་པ་དང་། སྐུ་ལ་གཟི་བརྗིད་བསྐྱེད་པ། དམ་ཚིག་ཚང་བ། མཁའ་འགྲོ་དབང་དུ་འདུ་བ་སོགས་ཀྱི་ཕན་ཡོན་ཡོད་དོ། །སྔགས་འཆང་རྒྱན་མེ་ལས། ཁ་ཊཱཾ་ཀ་འདིས་འཁོར་བ་དང་མྱ་ངན་ལས་འདས་པའི་ཆོས་སམ། ལུས་ཀྱི་རྐང་མཐིལ་ནས་སྤྱི་བོའི་བར་རམ། ལམ་དང་འབྲས་བུའི་ཆོས་ཐམས་ཅད་མཚོན་པས་ན་དེ་ཡང་ཇི་བཞིན་ཤེས་ཤིང་འཛིན་པར་བྱེད་པ་ནི་དགོས་པའོ། །ཞེས་སོ། །

དགང་གཟར་བླུགས།

༡ དགང་བླུགས་ཀྱི་རྒྱུ། རྡོ་རྗེ་མཁའ་འགྲོའི་རྒྱུད་ལས། གསེར་རམ་དངུལ་ལམ་ཟངས་མ་འམ། །མཆོད་སྦྱིན་གྱི་ནི་ཤིང་ཡང་རུང་། །ཞེས་པ་ལྟར། གསེར་དངུལ་ཟངས་ལྕགས་དང་། ར་གན། རུས་པ། སྲ་ཤིང་། སྦྱིན་སྲེག་གི་ཤིང་སོགས་སོ། །

༢ དགང་གཟར་གྱི་དབྱིབས་ཚད། རྡོ་རྗེ་མཁའ་འགྲོ་ལས། དགང་གཟར་རྒྱུ་དང་བླུགས་པ་སོགས། །ཚད་དང་དབྱིབས་ལ་སོགས་པ་བཤད། །སྟེང་དུ་སོར་བཞི་དང་ལྡན་པ། །དཀྱུས་ནི་གྲུ་བཞི་བྱ་བ་སྟེ། །ཟབས་སུ་སོར་གཉིས་བརྐོ་བར་བྱ། །དཀྱིལ་དུ་ཡེ་ཤེས་རྡོ་རྗེས་བརྒྱན། །དེ་ཡི་སྟེང་དུ་ཆུ་སོར་བཞི། །པདྨའི་འདབ་མ་ལྟ་བུར་བྱ། །དེ་དབུས་བཅུད་ནི་འཛག་པ་ཡི། །བུ་ག་མཐེའུ་ཆུང་ཚད་དུ་བྱ། །དེ་ནས་འོག་ཏུ་དབྱུག་པ་སྟེ། །རྡོ་རྗེ་རིན་ཆེན་སོར་དྲུག་བརྒྱན། །ཞེས་དང་།

༣ བླུགས་གཟར་གྱི་དབྱིབས་ཚད། རྡོ་རྗེ་མཁའ་འགྲོ་ལས། རྒྱ་རུ་སོར་གཉིས་ཟབས་སོར་གཅིག། ཁ་ནི་པདྨའི་འདབ་མ་འདྲ། །དབུས་སུ་རྡོ་རྗེ་མཛེས་པ་སྟེ། །ལྷག་མ་སྔོན་བཞིན་མཚོན་པར་བྱ། །ཞེས་སོགས་དགང་གཟར་བླུགས་ཀྱི་ཚད་དབྱིབས་མཁའ་འགྲོ་རྒྱ་མཚོ་དང་། གཤེད་དམར། རྡོ་རྗེ་འབར་བ། དགྲ་ནག་གི་རྒྱུད་སོགས་ལས་ཀྱང་གསུངས་ལ། གཞུང་ཁ་ཅིག་ཏུ་ཕྱི་ནང་གསང་གསུམ་གྱི་ཚད་དབྱིབས་མི་འདྲ་བར་ཡང་བཤད་དོ། །

༤ དགང་གཟར་བླུགས་འཆང་ཚུལ། རྡོ་རྗེ་མཁའ་འགྲོ་ལས། ཞི་བ་བྱང་ཆུབ་མཆོག་གིས་བཟུང་། །ནོར་བུའི་ཁུ་ཚུར་རྒྱས་པ་ལ། །དབང་དང་འགུགས་པ་དག་ལ་ནི། །དེ་བཞིན་པདྨའི་ཁུ་ཚུར་བཟུང་། །དྲག་པོའི་ལས་ལ་འབད་པ་ཡིས། །དེ་བཞིན་ཁྲོ་བོའི་ཁུ་ཚུར་བྱ། །དགང་གཟར་བླུགས་གཟར་ཆོ་གའོ། །དགང་བླུགས་ཞེས་སུ་བྱ་བ་ནི། །གང་བའི་སྦྱིན་སྲེག་ལ་སོགས་པའོ། །དེ་ཡི་ཆོ་ག་གཞན་བཤད་བྱ། །ཞི་བ་དང་ནི་རྒྱས་དང་དབང་། །དགེ་བ་ཡི་ནི་ལས་རྣམས་ལ། །གདོང་གི་འཛུམ་དང་བཅས་པར་བྱ། །དྲག་པོའི་ལས་ལ་ཁྲོ་གདོང་གིས། །ཡམ་ཤིང་ལ་སོགས་སྲེག་པར་བྱ། །ཞེས་དང་། བདེ་མཆོག་སྡོམ་འབྱུང་ལས། ལག་གཉིས་པུས་མོའི་ནང་བཞག་སྟེ། །དགང་གཟར་དང་ནི་བླུགས་གཟར་བཟུང་། །ཞེས་གསུངས་སོ། །

༥ དགང་བླུགས་བསང་སྦྱངས་བྱ་ཚུལ། རང་གི་སྙིང་ག་ནས་འོད་ཟེར་འཕྲོས་ཡེ་ཤེས་ལྷའི་ཐུགས་རྒྱུད་སྐུལ། ཐབས་དང་ཤེས་རབ་ཀྱི་རང་བཞིན་ཡེ་ཤེས་སེམས་དཔའ་འོད་ཟེར་གྱི་ཚུལ་དུ་བཀུག དགང་བླུགས་ལ་ཐིམ་པས་དངོས་གྲུབ་ཐམས་ཅད་འབྱུང་བའི་དམ་ཚིག་ཡོ་བྱད་དུ་གྱུར་བར་བསམ་མོ། །

༦ དགང་བླུགས་གཉིས་ཀྱི་མཚོན་དོན། དགང་གཟར་གྱིས་ཤེས་རབ་སྟོང་ཉིད་ཀྱི་ཆ་དང་། བླུགས་གཟར་གྱིས་ཐབས་བདེ་བ་ཆེན་པོ་སྟེ། རྡོ་རྗེ་མཁའ་འགྲོའི་རྒྱུད་ལས། དགང་གཟར་ཆོས་ནི་སྟེར་བའི་མ། །བླུགས་གཟར་རོ་ལྡན་ཐབས་ཡིན་ནོ། །སེམས་ཅན་ཀུན་ལ་ཕན་བྱེད་པ། །ཞེས་སོ། །

བགྲང་ཕྲེང་།

བོད་མི་ཕྲེང་བཟུང་གི་ལུང་བ་ཞེས། བགྲང་ཕྲེང་འདི་རང་ཅག་གི་མཐོ་བ་བླ་དཔོན་དང་། དམའ་བ་སྤྲང་ནག་ཚུན་ལ་མ་ཁྱབ་པ་མེད་པས། ད་ལྟ་བོད་ཀྱི་དམངས་སྲོལ་ལྟ་བུར་གྱུར་བའམ། ཡང་ན་གྲངས་ཀ་བགྲང་བྱེད་ཁོ་ན་ཙམ་དུ་བཟུང་སྟེ། སྐྱེ་བོ་ཕལ་མོ་ཆེས་སྣང་ཆུང་དུ་འཛིན་མོད་ཀྱང། འདི་ལ་རྒྱུད་ཀྱི་ཁུངས་དང་དཔྱད་པ་ཧ་ལས་པ་ཡོད་པས། འདིར་དེའི་སྐོར་ཅུང་ཟད་བརྗོད་པར་བྱའོ། །

༡ ཕྲེང་བའི་ངོ་བོ་དང་ངེས་ཚིག སྔགས་འཆང་རྒྱན་གྱི་མེ་ཏོག་ལས། རྩར་ལས་རྒྱུས་དང་གྲངས་ཅན་དང་། །རྒྱན་དུ་བྱས་དང་ཁྲིགས་ལ་འབེབས། །ཚོད་འཛིན་བསྙེན་པའི་སླད་དུ་སྟེ། །དེ་སོགས་ཕྲེང་བའི་ངོ་བོར་བཤད། །ཅེས་དང་། ངེས་ཚིག་ནི། དད་ལྡན་གྱི་སློབ་མ་བླ་མ་ལ་སེམས་འཕྲེང་ནས་གསོལ་བ་ཕུར་ཚུགས་སུ་བཏབ་པས་བརྩེ་བ་ཆེན་པོས་བྱིན་གྱིས་བརླབས་པ། ཡི་དམ་ལ་སེམས་འཕྲེང་ནས་བསྙེན་སྒྲུབ་ལ་ནན་ཏན་བྱས་པས་མཆོག་ཐུན་གྱི་དངོས་གྲུབ་གནང་བ། མཁའ་འགྲོའི་ཚོགས་ལ་སེམས་འཕྲེང་ནས་འཕྲིན་ལས་དྲག་ཏུ་བསྐུལ་བས་ཅི་འདོད་ཀྱི་འཕྲིན་ལས་བསྒྲུབ་པ། དེ་བཞིན་ལྕམ་དྲལ་དང་རྡོ་རྗེ་སྤུན་གྲོགས་ལ་སོགས་གཅིག་སེམས་གཅིག་ལ་འཕྲེང་ནས་དམ་ཚིག་ལས་མི་འདའ་ཞིང་། དཀྱིལ་འཁོར་གཅིག་ཏུ་འགྲུབ་པ་སོགས་སྔགས་འཆང་རྒྱན་མེ་ལས་རྒྱ་ཆེར་བཤད་དོ། །

༢ ཕྲེང་བའི་རྒྱུ། ཕྲེང་བའི་རྒྱུ་ལ་རབ་འབྲིང་ཐ་གསུམ་དུ་བཤད་དེ། པདྨའི་ཕྲེང་བཤད་ལས། རྒྱུ་ནི་རབ་ལ་རིན་པོ་ཆེ། །འབྲིང་ནི་ཤིང་གི་འབྲས་བུ་སྟེ། །ཐ་མ་ཤིང་དང་ས་རྡོ་དང་། །སྨན་གྱི་ལྡེ་གུའི་ཕྲེང་བའོ། །ཞེས་སོ། །ཕྲེང་བའི་རྒྱུ་སྤྱི་ལ། ཤེལ། ཉ་ཕྱིས། མུ་ཏིག མུ་མིན། བྱི་རུ། ལུང་ཏང་། དུང་། གསེར། དངུལ། ཟངས། ཞ་ཉེ། འཁར་བ། པདྨའི་སྙིང་བོ། བ་སོ། ཙན་དན། རུཀྵ། མིའི་ཐོད་རུས། རྔ་མོང་དང་བོང་བུ་མ་ཧེའི་རུས་པ། འབྲས་བུ་དང་རིན་པོ་ཆེའི་རིགས་གང་འཛོམས་བྱ་རུང་བ་དུས་འཁོར་བསྡུས་རྒྱུད་དང་། རྡོ་རྗེ་མཁའ་འགྲོ། བདེ་མཆོག་སྡོམ་འབྱུང་། རྡོ་རྗེ་གདན་བཞི། སམྦུ་ཊ། གཤིན་རྗེ་གཤེད་དམར། དངོས་གྲུབ་འབྱུང་རྒྱུད། ཁྲག་འཐུང་མངོན་འབྱུང་གི་རྒྱུད། བྱ་རྒྱུད་དཔུང་བཟང་སོགས་ལས་གསུངས་སོ། །སྤྱིར་བསོད་ནམས་འཕེལ་བའི་ཕྱིར་རིན་པོ་ཆེའི་ཕྲེང་བ་བཟུང་ན་འོས་ཀྱང་། རློམ་སེམས་སྐྱེས་པ་དང་། ཡང་གཞན་གྱིས་རིན་ཐང་བཅད་ན་དམ་སེལ་ཞུགས་པ་སོགས་སུ་འགྱུར་ན་དམ་དུ་སྦ་བ་དང་། ཡང་ཤིན་ཏུ་དམན་པའི་ཕྲེང་བ་ཡིན་ན་རང་ཉིད་ཀྱིས་འདྲེན་མི་སྤྲོ་ཞིང་། གཞན་ཀྱིས་ཀྱང་བརྙས་པར་འགྱུར་ན་སྦ་བར་བྱའོ། །

བྱེ་བྲག་ཞི་རྒྱས་དབང་དྲག་གི་ཕྲེང་བའི་རྒྱུ་ལ། ཞི་བའི་ཕྲེང་རྒྱུ་ནི། པདྨའི་ཕྲེང་བཤད་ལས། དུང་ནི་ཞི་བའི་ཕྲེང་བ་སྟེ། །ཞི་བའི་ལས་ཀྱི་སྔགས་པའོ། །ཞེས་པ་ལྟར། དུང་། ཤེལ། ཉ་ཕྱིས། མུ་ཏིག བཻཌཱུ་རྱ་དཀར་བོ། བྱང་ཆུབ་ཤིང་གི་ཐོག་གུ། རིན་པོ་ཆེའི་རིགས་དཀར་བོའོ། །

རྒྱས་པའི་ཕྲེང་རྒྱུ་ནི། པདྨའི་ཕྲེང་བཤད་ལས། གསེར་གྱི་ཕྲེང་བ་རྒྱས་པའི་ལས། །ཞེས་དང་། འོ་སེ་ལ་སོགས་འབྲས་བུ་ཅན། །རྒྱས་པའི་ལས་འགྲུབ་ཕྲེང་བའོ། །ཞེས་པ་ལྟར། གསེར། དངུལ། ཟངས་མ། མུ་ཏིག པདྨའི་སྙིང་བོ། ལུང་ཏང་། ཨ་རུ་ར་སོགས་ཕན་ནུས་ཅན་གྱི་ཤིང་འབྲས་དང་། མདོག་སེར་བོ་ཟད་ཁ་སྲ་བའི་རིགས་དགོས་པར་བཤད་དོ། །

དབང་གི་ཕྲེང་རྒྱུ་ལ། པདྨའི་ཕྲེང་བཤད་ལས། བྱི་རུའི་ཕྲེང་བས་དབང་ལས་འགྲུབ། །ཅེས་དང་། མཛོ་མོ་ཤིང་དང་འོམ་བུའི་ཕྲེང་། །དབང་གི་ལས་འགྲུབ་ཕྲེང་བར་བསྔགས། །ཞེས་པ་ལྟར། བྱི་རུ། པད་རག ཙན་དན། ཟངས། སེང་ལྡེང་། མཛོ་མོའི་ཤིང་མདོག་དམར་བོའི་རིགས་དང་། དྲི་ཞིམ་ཤིང་ལ་བྱ་དགོས་པར་བཤད་དོ། །

དྲག་པོའི་ཕྲེང་རྒྱུ་ནི། པདྨའི་ཕྲེང་བཤད་ལས། ལྕགས་དང་གཡུ་ཕྲེང་དྲག་པོའི་ལས། །ཞེས་དང་། ནཱ་ག་ཁྱུང་མཆུ་རཀྵ་ནི། །དྲག་པོའི་ལས་ཀྱི་ཕྲེང་བར་བསྔགས། །ཞེས་པ་ལྟར། དྲག་སྔགས་བཟླ་བྱེད་ལ། ལྕགས། གཡུ། རུ་དྲ་ཀྵ། ལུང་ཏང། མི་རུས། ཐོད་རུས། དྲེད་དང་བོང་བུ་རྔ་མོང་གི་སོ་དང་། ཡང་ན། རྔ་མོང་དང་བོང་བུ། མ་ཧེའི་རུས་པ། ཚེར་ནག་གི་ཤིང་དང་ཐོག་གུ་སོགས་ནག་རྩུབ་ཀྱི་རིགས་བསྔགས་པའོ། །

གཞན་ཡང་། ས་རིལ་ཞི་བའི་ཕྲེང་བ་དང་། །རྡོ་ཡི་ཕྲེང་བ་རྒྱས་པར་ཤེས། །སྨན་གྱི་ཕྲེང་བ་དབང་ལ་ཤེས། །ཐོད་པ་ལ་སོགས་རུས་ཆེན་རྣམས། །དྲག་པོའི་ལས་ལ་ཤེས་པར་བྱ། །ཞེས་པདྨའི་ཕྲེང་བཤད་ལས་རྒྱུའི་ཁྱད་པར་གྱིས་དབྱེ་བ་དང་། ཡང་། ཞི་ལ་ཁ་དོག་དཀར་བོ་དང་། །ཁ་དོག་སེར་བོ་རྒྱས་པ་ལ། །དམར་བོ་དབང་ལ་རྟག་ཏུ་བསྒོམ། །ནག་པོ་ཤིན་ཏུ་གསད་ལ་འདོད། །ཅེས་གཤིན་རྗེ་གཤེད་དམར་ལས་ཁ་དོག་གིས་དབྱེ་བ་དང་། དགོངས་འདུས་པདྨའི་ཕྲེང་བཤད་ལས་ཀྱང་། ཁ་དོག་དག་ཀྱང་འདི་ལྟ་སྟེ། །དཀར་བོར་ཞི་བའི་ལས་ལ་བསྔགས། །ཁ་དོག་སེར་བོ་རྒྱས་པའི་ཕྲེང་། །དབང་ལ་ཁ་དོག་དམར་བའི་ཕྲེང་། །ནག་པོ་དྲག་པོའི་ཕྲེང་བར་བསྔགས། །ལས་རྣམས་ཀུན་ལ་ཁྲ་བོར་བཤད། །ཅེས་སོ། །ཡང་། རྒྱལ་བའི་རིགས་ལ་བོ་དེ་ཙེ། །སྔགས་ཀྱི་ནོར་བུར་རབ་ཏུ་བསྒྲགས། །པདྨའི་རིགས་ལ་པདྨའི་སྙིང་། །རྡོ་རྗེའི་རིགས་ལ་རུ་དྲ་ཀྵ། །རིགས་གསུམ་དག་ནི་ཐམས་ཅད་ལ། །ནོར་བུ་དེ་དག་རབ་ཏུ་བསྒྲགས། །བཟླས་བརྗོད་བྱེད་པའི་ལས་ཀུན་ལ། །དེ་དག་དགེ་ཞིང་མཆོག་ཏུ་བཤད། །ཅེས་ལེགས་གྲུབ་ལས་རིགས་ཀྱི་དབྱེ་བ་དང་། རྒྱུད་རྡོ་རྗེ་རྩེ་མོ་ལས་ཀྱང་། སངས་རྒྱས་རྣལ་འབྱོར་བོ་དེ་ཙེ། །རྡོ་རྗེ་ཅན་ལ་རུ་དྲཱ་ཀྵ། །ཕྱི་རོལ་ནོར་རིགས་དབང་བོ་དེ། །མུ་ཏིག་ནོར་བུའི་རྣལ་འབྱོར་ཅན། །པདྨའི་སྙིང་བོའི་ཕྲེང་བ་ནི། །པདྨའི་རིགས་རྣམས་ཀུན་ལ་བསྔགས། །ཞེས་སོ། །དེ་ལྟར་ལས་བཞི་སྒྲུབ་པའི་ཕྲེང་རྒྱུ་གཙོ་ཆེར་དགོངས་པ་མ་གཏོགས། གཏན་མི་རུང་བ་མ་ཡིན་ཏེ། སམྦུ་ཊ་ལས། ཞི་རྒྱས་དབང་དང་མངོན་སྤྱོད་ལ། །པུ་ཏྲ་ཛཱི་ཝ་ལས་ཀུན་བྱེད། །ཅེས་དང་། གདན་བཞི་ལས། ཞི་དང་རྒྱས་དང་དབང་དྲག་ལ། །པུ་ཏྲ་ཛཱི་ནི་ལས་ཀུན་བྱ། །ཞེས་དང་། པདྨའི་ཕྲེང་བཤད་ལས། གཟི་མཆོང་སྣ་ཚོགས་ལས་ལ་ཤིས། །ཞེས་སོགས་རྒྱུད་མང་བོ་ལས་གསུངས་སོ། །ཡང་། ཁལ་ཁ་དམ་རྡོར་གྱི་དམ་ཚིག་གི་རྫས་དང་ཡོ་བྱད་ཀྱི་རྣམ་བཞག་དངོས་གྲུབ་གཏེར་མཛོད་ལས། ཞི་བ་ལ་གསེར་དངུལ་ཟངས་དང་མུ་མིན། རྒྱས་པ་ལ་པདྨའི་ས་བོན། དབང་ལ་དྲི་བཟང་བོའི་རིལ་བུ། བྱི་རུ། ཙན་དན་དམར་བོ། དམར་བོ་བཙོས་པ། དྲག་པོ་ལ་རུ་རཀྵ། ལུང་ཐང་། སྐྱེས་པའི་རུས་པ། ལས་བཞི་ཀ་ལ་བོ་དེ་ཙེ་བསྔགས་ཤིང་། དྲག་པོ་ལས་སོ་སོའི་ཁྱད་པར་ཡང་། སྡོམ་འབྱུང་ལས། རུ་རཀྵ་དང་ལུང་ཐང་འབྲས། །དེ་བཞིན་མི་རུས་ཉིད་ཀྱང་སྟེ། །རྔ་མོང་བོང་བུ་མ་ཧེ་ཡི། །རུས་པ་མངོན་སྤྱོད་ལྐུགས་དང་རེངས། །བསད་དང་བསྐྲད་དང་དབྱེ་བ་དང་། །དགྲ་བོ་ཚར་བཅད་རྣམས་ལ་སྦྱར། །ཞེས་དང་། དུས་འཁོར་དབང་ལེའི་རྩ་འགྲེལ་ལས། ཞི་བ་ལ་ཤེལ། རྒྱས་པ་ལ་མུ་ཏིག་གི་འབྲས་བུ། བསད་པ་ལ་མིའི་སོ། བསྐྲད་པ་ལ་བོང་བུའི་སོ་རུས། དབང་ལ་བོ་དེ་ཙེ། འགུག་པ་ལ་པདྨ་འམ་ཙན་དན་དམར་བོའི་ས་བོན། རྨོངས་པ་ལ་ལུང་ཐང་། རེངས་པ་ལ་དབང་བོའི་མིག་ཅེས་རུ་རཀྵར་གསུངས་སོ། །

༣ ཕྲེང་བའི་རྒྱུན་ཐག ལང་ཚོ་དང་ལྡན་པའི་བུ་མོ་གཞོན་ནུ་མ། བློ་ལྡན་ངག་འཇམ་གྱིས་གསེར་སྐུད་དང་བལ་སྐུད་སོགས་བརྒྱུ་དགོས་པ་རྡོ་རྗེ་མཁའ་འགྲོ་སོགས་ལས་གསུངས་ལ། རས་བལ་གྱི་སྐུད་པ་ཡང་ཁ་སྦྱོར་དགུ་སྒྲིལ་ལས་བྱ་ལ། དེའང་ཁ་སྦྱོར་ལས་ཕྱོགས་མཚམས་བརྒྱད་དང་དབུས་ཀྱི་སྐུད་པ་ལྷ་དགུར་བྱིན་རླབས་བྱ་བར་གསུངས་པས། དགུ་སྒྲིལ་བྱ་ཚུལ་ཁྱད་པར་བ་ལས། སོ་སོའི་དབང་དུ་བྱས་ན་དེ་ཡང་ཞི་ཕྲེང་ལ་བལ་སྐུད་དཀར་བོ། རྒྱས་ཕྲེང་ལ་རས་སྐུད་སེར་བོ། དབང་ཕྲེང་ལ་དར་སྐུད་དམར་བོ། དྲག་ཕྲེང་ལ་གྲི་ཤིར་ཐེབས་པའི་རྒྱུས་པ་དང་། རྒྱུ་མ། པགས་རིགས་ཀྱི་རྒྱུན་བུ་དགུ་སྒྲིལ། ལས་སྣ་ཚོགས་ཀྱི་ཕྲེང་བ་ལ་ཚོན་སྣ་ལྔ་སྒྲིལ་གྱི་སྲད་པུ་དགོས་པར་པདྨའི་ཕྲེང་བཤད་ལས་གསུངས་པ་དང། གཞན་ཡང་། མནན་བསྐྲད་ལས་སྔགས་བཟླ་བྱེད་ཀྱི་ཕྲེང་ཐག བོང་བུ་དང་རྔ་མོང་གི་སྤུ་ལ་ཁྭ་ཏའི་སྒྲོ་བསྲེས་པའི་སྲད་པུ་དང་། ཕན་ཚུན་སྡང་བའི་ལས་ལ་རྟ་དང་མ་ཧེའི་སྤུ་དང་། གསོད་མནོག་དབྱེ་བའི་ལས་སོགས་དྲག་པོ་མངོན་སྤྱོད་ཀྱི་ལས་ལ། དུར་ཁྲོད་ཀྱི་སྐྲ་དང་ཁྱི་སྤུ་བསྲེས་ཏེ་ཕྲེང་ཐག་བྱ་དགོས་པར་བདེ་མཆོག་སྡོམ་འབྱུང་ལས་གསུངས་པ་དང་། ཁྲག་འཐུང་མངོན་འབྱུང་ལས་དེ་དང་ཅུང་མི་མཐུན་པར་བཤད་དོ། །ཕྲེང་ཐག་གི་ཕྲ་སྦོམ་དང་ཡངས་དོག་ནི། སློབ་དཔོན་པདྨའི་དགོངས་འདུས་ཕྲེང་བཤད་ལས། དེ་དག་ཀུན་ཀྱང་ཕྲེང་བ་ཡི། །མིག་དང་བསྟུན་ལ་རན་པར་བྱ། །ཡངས་པ་མ་ཡིན་དོག་པ་མིན། །རིང་བ་མ་ཡིན་ཐུང་བ་མིན། །ཧ་ཅང་དོག་པ་ལས་མི་འགྲུབ། །ཡངས་ན་གསེབ་འཚང་བར་ཆད་འཇུག། རིང་ན་ལྷ་འགྱང་སྒྲུབ་པ་གཡེལ། །ཧ་ཅང་ཐུང་ན་ཚེ་ལ་གཟན། །མདུད་པ་ཅན་དང་མདུད་པ་ཆགས། །ཕྲ་སྦོམ་མ་སྙོམས་གོད་ཁ་འབྱུང་། །དེ་སོགས་རྣམ་དབྱེ་ཤེས་པར་བྱ། །ཞེས་སོ། །

༤ ཕྲེང་བའི་གྲངས་ཚད། སམྦུ་ཊ་ལས། སྔགས་ཀྱི་སྒྲུབ་པ་ལྔ་བཅུ་སྟེ། །དབང་ལ་དེ་ཡི་ཕྱེད་ཉིད་དོ། །བརྒྱ་ཕྲག་གཅིག་ནི་ཞི་བ་ལ། །དེ་བཞིན་རྒྱས་ལ་ལྷག་པར་བརྒྱད། །མངོན་སྤྱོད་ལ་ནི་དྲུག་ཅུ་ཉིད། །ཁྱད་པར་དུ་ནི་ལས་ལ་སྦྱར། །ཇི་ལྟར་ལས་ཀྱི་བྱེ་བྲག་གིས། །ཕྲེང་བ་ལ་སོགས་བྱ་བའོ། །ཞེས་རྡོ་རྗེ་མཁའ་འགྲོ་དང་། གདན་བཞི་སོགས་མཐུན་པར་སྣང་ལ། གཤེད་དམར་ལས། མངོན་སྤྱོད་དྲུག་ཅུ་རྩ་བཞིའོ། །ཞེས་དྲག་པོ་ལ་རེ་བཞི་དགོས་པར་བཤད་དོ། །

༥ ཆེ་ཆུང་གི་ཚད། ཆེ་ཆུང་གི་ཚད་ལ། ཞི་བ་ལ་རང་གི་འགྲམ་སོ་ཙམ། རྒྱས་པར་མཐེབ་ཆུང་གི་རྩེ་མོ་ཙམ། དབང་ལ་ནོར་བུའི་ཏོག་ཙམ། དྲག་པོར་རྐང་བའི་མཐེབ་ཆེན་གྱི་ཚད་ཙམ་དགོས་པར་པདྨའི་ཕྲེང་བཤད་ལས་གསུངས་ལ། འདི་ནི་བཟོས་ཕྲེང་གི་དབང་དུ་བཏང་བ་ཡིན་གྱི། ནོར་བུ་དང་ཤིང་འབྲས་ལ་ཚད་དེ་དག་འོང་བའི་ངེས་པ་མེད་དོ། །

༦ ཕྲེང་བའི་མདོ་འཛིན། མདོ་འཛིན་ནི། པདྨའི་ཕྲེང་བཤད་ལས། ཕྲེང་བའི་མདོ་འཛིན་འདི་ལྟ་སྟེ། །ཞི་བ་དཀར་ཞིང་ཟླུམ་ལ་འགྲིལ། །རྒྱས་ལ་སེར་བོ་རྒྱ་མདུད་ཅན། །ཡང་ན་ལྕམ་གཞོག་མཆོད་རྟེན་རིས། །དབང་ལ་ཁ་དོག་དམར་བོ་དང་། །དབྱིབས་ནི་ལེབ་ལ་ཟླ་གམ་དང་། །ནར་མོ་ཉིད་ཀྱང་ཤེས་པར་བྱ། །དྲག་པོ་ཁ་དོག་ནག་པོའི་ཆ། །དབྱིབས་ནི་ཟུར་གསུམ་སེན་ཐག་རིས། །ཟུར་ཅན་བུ་ག་ཚག་ཚག་རིས། །མདོར་ན་རྩུབ་ལ་རྣོ་བའོ། །སྣ་ཚོགས་ལས་ཀྱི་ཕྲེང་བ་ལ། །མདོ་འཛིན་སྐུ་གསུང་ཐུགས་ཀྱི་རྒྱ། །དཀར་དམར་སྔོན་པོའི་རིགས་ཀྱིས་སྤྲས། །དེ་སོགས་མཚན་མཐུན་རིགས་པས་དཔྱད། །ཅེས་སོ། །

༧ སྤང་བྱའི་ཕྲེང་བ། པདྨའི་ཕྲེང་བཤད་ལས། རྭ་ཕྲེང་མི་བཅིང་བགྲང་མི་བྱ། །མཚམས་མེད་ལས་བགྱིས་འགྲོ་བ་ཡི། །བགྲང་དང་བཅིང་བའི་ཕྲེང་བ་དང་། །དེ་བཞིན་དམ་ཚིག་ཉམས་པ་དང་། །བཤན་པ་ལ་སོགས་རིགས་ངན་དང་། །དམེ་བོ་ཁྲིམས་ཉམས་དམ་སེལ་ཞུགས། །ཡུགས་ས་སྡིག་ཅན་རྐུན་མ་ཡིས། །བགྲང་བའི་ཕྲེང་བ་མི་བསྟེན་སྤང་། །གཞན་གྱིས་དོར་ཞིང་སྟོར་བ་ཡི། །རྙེད་པའི་ཕྲེང་བ་མི་བསྟེན་སྤང་། །ལྷ་ལ་ཕུལ་དང་རྒྱན་བྱས་ལ། །དབང་མེད་འཕྲོག་པའི་ཕྲེང་བ་སྤང་། །ཐག་པ་ཆད་དང་གྲངས་མ་ཚང་། །དུད་འགྲོས་འགོངས་དང་བྱ་བྱིས་ཟས། །མེས་ཚིག་ལ་སོགས་ཉམས་པ་སྤང་། །སྔགས་ལ་དམ་སེལ་ཞུགས་པས་སྤང་། །ལུང་མ་བསྟན་གྱི་ཕྲེང་བ་དང་། །རྣལ་འབྱོར་ཡིད་དང་མི་མཐུན་པའི། །ཕྲེང་བ་གང་ཡིན་མི་འཆང་སྤང་། །ཞེས་སོ། །

༨ ཕྱི་ནང་གསང་བ་དང་དེ་ཁོ་ན་ཉིད་ཀྱི་ཕྲེང་བའི་དབྱེ་བ། ཡང་། ཕྲེང་བ་ལ། ཕྱི་ནང་གསང་བ་དང་། དེ་ཁོ་ན་ཉིད་ཀྱི་དབྱེ་བ་བཞི་ཡང་ཡོད་དེ། པདྨའི་ཕྲེང་བཤད་ལས། ཕྱི་ཕྲེང་རྫས་ལ་བརྟེན་རྣམས་སོ། །ནང་གི་ཕྲེང་བ་མཆུ་སྦྱོར་རོ། །གསང་བ་རླུང་གི་རྒྱུ་རྔུབས་ཏེ། །དེ་ཉིད་སྟོང་བའི་ཕྲེང་བ་ཡིས། །ཕྱི་ནང་གཞན་སོགས་གང་དང་གང་། །གནས་ལུགས་ཀ་དག་དབྱིངས་སུ་བསྐྱལ། །ཀུན་བཟང་དགོངས་པའི་ངང་ལ་བཞག །ཅེས་སོ། །

༩ ཕྲེང་བའི་རབ་གནས་ནི། མདོར་བསྡུས་ན། ཕྲེང་བ་གསུང་རྡོ་རྗེ་སྒོམ་ནས། ཡེ་ཤེས་སེམས་དཔའ་དང་གཅིག་བྱས་ཏེ། གཟུགས་དེ་ཡོངས་སུ་གྱུར་བ་ལས། ཕྲེང་བའི་རྣམ་པར་བསམས་ལ། བུམ་པའི་ཆུས་གཏོར་ཏེ་མཆོད་ནས་གསུང་རྡོ་རྗེའི་སྙིང་བོ་བརྒྱ་རྩ་བརྒྱད་བཟླས་སོ། །རྒྱས་པར་གཞན་དུ་ཤེས་པར་བྱའོ། །

༡༠ ཕྲེང་བ་འཆང་ཚུལ། ཕྲེང་བ་རང་གི་ལུས་དྲོད་དང་མ་བྲལ་བའི་སྟེང་ནས་གཞན་ལག་ཏུ་མི་འཇོག་ཅིང་། ཁྱད་པར་དུ་དམ་ཉམས་ཀྱི་ལག་ཏུ་མི་འགྲིམ། ཕྲེང་བ་སྟོང་འདྲེན་མ་ཡིན་པར། བཟླས་པ་བྱེད་དུས་བགྲང་བ། མོ་རྩིས་ལ་མི་བཀོལ་བ། རབ་གནས་དང་ལྡན་པའི་ཕྲེང་བ་དེ། ས་སྒྲེ་བོར་མི་འཇོག ཁྱི་སོགས་བརྡེག་བྱེད་མི་བྱ། ཕྲེང་ཐག་ཞག་དང་མ་ལོན་པར་བརྗེ་བ། རླན་དང་གྲིབ་ལ་འཛེམ་པ། ཁྱད་པར་དུ་གསང་ཕྲེང་ཡིན་ན་ལས་སྦྱོར་གྱི་དུས་མ་གཏོགས་སྦ་བར་བྱ་བ་སོགས་པདྨའི་ཕྲེང་བཤད་ལས་གསུངས་སོ། །ཡང་ཕྱི་ཡི་ཕྲེང་བ་ནི་གྲངས་སོགས་བཤར་བའི་ལས་ལ་བཀོལ། ནང་གི་ཕྲེང་བ་ནི་དུས་རྒྱུན་ཁ་ཡན་དུ་གང་བསྙེན་པའི་ལས་ལ་བཀོལ། གསང་བའི་ཕྲེང་བ་ནི་སྒྲུབ་པ་དང་ལས་སྦྱོར་དུས་སུ་མ་གཏོགས་གོས་དང་ལུས་ཀྱི་བར་དུ་བཟུང་སྟེ་མི་མཐོང་བར་བྱེད་དགོས་སོ། །

༡༡ ཕྲེང་བ་འདྲེན་ཚུལ། འདྲེན་ཚུལ་ལ། ཁ་སྦྱོར་གྱི་འགྲེལ་པར། ལག་པ་རྡོ་རྗེ་པདྨར་བསྒོམས་པ། སྟོང་བ་ཉིད་དང་སྙིང་རྗེ་དབྱེར་མེད་པར་བསྒོམས་ནས། ལག་པ་གཡས་པས་བགྲང་བ་དང་། ལྷའི་སྐུ་རང་བཞིན་མེད་པར་ཤེས་པའི་དེ་ཉིད་དང་ལྡན་པས་སྔགས་བཟླ་བར་གསུངས་ཤིང་། དེ་ལ་རྡོ་རྗེ་མཁའ་འགྲོ་ལས། ཞི་བ་ལ་ནི་མཛུབ་མོ་བཞག །རྒྱས་ལ་གུང་མོ་འགལ་བར་བྱ། །དབང་དུ་བྱ་བ་སྲིན་ལག་གསུངས། །མཐའ་མ་ལ་ནི་མངོན་སྤྱོད་བྱ། །མཐེ་བོང་ལྕགས་ཀྱུར་བྱས་ནས་ནི། །ལྷ་རྣམས་ཐམས་ཅད་འགུགས་པར་བསམ། །ཤིན་ཏུ་མཉམ་བཞག་སྔགས་བཟླས་ན། །འགྲུབ་འགྱུར་འདི་ལ་ཐེ་ཚོམ་མེད། །ཅེས་སོགས་སྡོམ་འབྱུང་དང་། སམྦུ་ཊ། གདན་བཞི་སོགས་སུ་འང་གསུངས་སོ། །

ཡང་། ཕྲེང་བ་འདྲེན་སྐབས་གནས་མི་འདྲ་བར་འདྲེན་ཚུལ་ཡང་བཤད་དེ། པདྨའི་ཕྲེང་བཤད་ལས། ཞི་བ་ལ་ནི་སྙིང་ཁར་བགྲང་། །རྒྱས་པ་ལྟེ་བའི་ཐད་དུ་སྟེ། །དབང་ལ་ཕྲེང་བ་གསང་གནས་ཐད། །འགུག་པའི་འདུན་པས་བགྲང་བར་བྱ། །དྲག་པོ་སྐྱིལ་ཀྲུང་བསྣོལ་མཚམས་སུ། །པུས་མོའི་སྟེང་དུ་བགྲང་བར་བྱ། །སྣ་ཚོགས་ལས་ལ་གང་བདེར་བྱ། །ཞེས་དང་། ཡང་། ཡོ་གའི་ལུགས་ལ། རྡོ་རྗེའི་རིགས་ལ་གུང་མོ། རིན་ཆེན་རིགས་ལ་སྲིན་ལག པདྨའི་རིགས་ལ་མཐེའུ་ཆུང་། ལས་ཀྱི་རིགས་ལ་སོར་མོ་ཀུན་གྱིས་བགྲང་དགོས་པར་ཡང་གསུངས་སོ། །

༡༢ ཕྲེང་བའི་དག་པའམ་མཚོན་དོན། མཚོན་དོན་ལ། སམྦུ་ཊ་ལས། ཕྲེང་བ་ཀུན་ནི་དགྲ་བཅོམ་པ། །མཆོད་རྟེན་སྟེང་དུ་རབ་ཏུ་བརྟག། མཆོད་རྟེན་ཆོས་ཀྱི་དབང་བོའི་ཕྱིར། །སྟེང་དུ་ཡང་ནི་ཆོས་ཀྱི་དབྱིངས། །ལག་མཐིལ་ཉི་མ་བསམ་བྱས་ནས། །དབྱངས་ཡིག་དང་བོ་ལ་སོགས་པ། །ལག་པའི་དབུས་སུ་རྣལ་འབྱོར་བས། །བསྒོམ་ཞིང་བདུད་རྩི་ཡི་གེ་ནང་། །འོད་ཟེར་འཕྲོ་བ་དུ་མ་དང་། །ཁ་དོག་དཀར་བོ་བསམ་ནས་ནི། །སོར་མོ་རྡོ་རྗེ་རྩེ་མོ་སྟེ། །གཡོན་པ་པདྨ་འདབ་མར་བསྒོམ། །པདྨ་རྡོ་རྗེ་སྙོམས་འཇུག་པའི། །ཁ་སྦྱར་དབུས་སུ་ཕྲེང་བཞག་ལ། །ཀུན་གྱིས་དེ་ཉིད་བསྒོམ་བྱ་ཞིང་། །ཞེས་སོགས་གདན་བཞི་དང་། རྡོ་རྗེ་མཁའ་འགྲོ་སོགས་ལས་ཀྱང་གསུངས་སོ། །

གཞན་ཡང་། ཁ་སྦྱོར་གྱི་དོན་མན་སྙེར་བཀྲལ་བ་ལྟར། སྲད་པུའི་དག་པ་ནི། སྐུད་པ་དབུས་མ་རྡོ་རྗེ་སེམས་དཔའ་དང་། ཕྱོགས་མཚམས་ཀྱི་སྐུད་པ་བརྒྱད་ཕྱག་ན་པད་མ་ལ་སོགས་པ་བརྒྱད་རྣམ་པར་དག་པ་དང་། ཕྲེང་རྡོག་རྣམས་ཀྱི་དག་པ་ནི། རྒྱལ་བའི་གཟུགས་སྐུ་མཐའ་ཡས་པ་རྣམ་པར་དག་པ་དང་། མདོ་འཛིན་གཉིས་བརྩེགས་པ་ནི་མན་སྙེར་སྟོབས་དང་མི་འཇིགས་པ་སོགས་ཀྱི་ངོ་བོར་གསུངས་པའི་དོན། རཏྣ་རཀྴི་ཏས་འོག་མ་རི་ལུ་ནི་ཆོས་སྐུ་ཟག་མེད་ཡེ་ཤེས་ཀྱི་རང་བཞིན་དུ་རྣམ་པར་དག་པ་དང་། དེའི་སྟེང་མ་མཆོད་རྟེན་ལྟར་སྟེང་དུ་བསྒྲེང་བ་ནི། དག་པ་གཉིས་ལྡན་གྱི་ཆོས་ཉིད་ངོ་བོ་ཉིད་སྐུའི་ངོ་བོར་རྣམ་པར་དག་ཅིང་མཚོན་པར་བྱེད་པའི་དོན་དུ་གསུངས་སོ། །

༡༣ ཕྲེང་བའི་དགོས་ཆེད། རབ་གནས་དང་བྱིན་གྱིས་བརླབས་པའི་ཕྲེང་བ་དེ་ཉིད། ལྷའི་ཕྱག་མཚན་མི་བརྗེད་པ་དང་། ཡེ་ཤེས་ལ་སེམས་འཕྲེང་བ། ཤེས་རབ་ཡུམ་གྱི་རྟེན་དུ་རུང་བ། སྔགས་ཀྱི་དམ་ཚིག་གི་རྫས་སུ་འགྱུར་བ། ཞི་སོགས་ལས་འགྲུབ་པ་སོགས་དགོས་པ་སྤྱི་དང་། བྱེ་བྲག་སྔགས་ཀྱི་ཚད་འཛིན་བྱེད་དོ། །

༡༤ ཕྲེང་བའི་ཕན་ཡོན། ཕྲེང་བ་མཚན་ཉིད་ལྡན་པ་འཆང་ན། འཁོར་བསྒྱུར་དང་མཆོག་ཐུན་གྱི་དངོས་གྲུབ་འཐོབ་པ། གཟུགས་མཛེས་ཤིང་ཚེ་རིང་བ། ལོངས་སྤྱོད་འབྱུང་བ། ནད་གདོན་ཞི་བ། མཁའ་འགྲོ་འདུ་བ། སངས་རྒྱས་བྱང་སེམས་ཀྱི་བྱིན་གྱིས་བརླབས་པ་སོགས་ཕན་ཡོན་མང་དུ་འབྱུང་བ་སམྦུ་ཊ་དང་། སྡོམ་འབྱུང་། ཁྲག་འཐུང་མངོན་འབྱུང་། གཤེད་དམར། ཡོ་ག་རྡོ་རྗེ་རྩེ་མོ། གདན་བཞི། སྔགས་འཆང་རྒྱན་མེ་སོགས་ལས་གསུངས་པས། ཞིབ་ཏུ་ཤེས་འདོད་པ་དག་གིས་དེ་དག་ལ་གཟིགས་པར་བྱའོ། །

ཕུར་བ།

༡ ཕུར་བའི་ངོ་བོ་དང་སྒྲ་བཤད། ཕུར་བ་རྡོ་རྗེ་འཕྲོས་པ་ལས། ཁྱབ་གདལ་ཆོས་ཉིད་མི་འགྱུར་བ། །སྣང་སྲིད་འཁོར་འདས་ཀུན་ལ་ཁྱབ། །དབྱིངས་དང་ཡེ་ཤེས་དབྱེར་མེད་པའི། །རྒྱས་འདེབས་བཛྲ་ཀི་ལ་ཡ། །ཞེས་ངོ་བོ་དང་། ལོ་པཎ་བཀའི་ཐང་ཡིག་ལས། ཕྱི་ནང་གི་ཆོས་ཐམས་ཅད་ཕུར་བའི་ངང་དུ་གནས་ལ། ཞེས་པ་དང་ཡང་མཐུན་ནོ། །ཡཀྵ་ཟ་བྱེད་འབར་བའི་རྒྱུད་ལས། ཕུར་ནི་རིག་པ་ཡེ་ཤེས་ཏེ། །བ་ནི་སྣ་ཚོགས་དངོས་བོའོ། །སྣ་ཚོགས་སེམས་ཀྱི་ཆོ་འཕྲུལ་དུ། །རྟོགས་ན་ཕུར་བ་ཞེས་སུ་གྲགས། །ཞེས་ངེས་ཚིག་བསྟན་ནོ། །

༢ ཕུར་བའི་རྒྱུ། ཕུར་བའི་རྒྱུ་སྤྱི་ལ་རྒྱུད་མང་བོར། གསེར་དང་། དངུལ། ཤེལ་དང་བྱུ་རུ། ཟངས་དང་ར་གན། ཙན་དན་དཀར་དམར་དང་སེང་ལྡེང་། འོ་མ་ཅན་གྱི་ཤིང་། འོ་སེ་དང་རྒྱ་ཤུག གླ་བ་དང་མཛོ་མོ་དམར་མོ། ཤུག་པ་དང་ཚེར་ནག སྐྱེར་བ་དང་མི་རུས། མིའི་རྗེ་ངར་གྱི་རུས་པ། སྤྲེའུའི་རུས་པ་སོགས་དང་། ལྕགས་ལྔ་སྟེ། ཐོག་ལྕགས་དང་ས་ལྕགས། ཁྲོ་ལྕགས་དང་མི་རྟ་བསད་པའི་གྲི་ལྕགས། ལྕགས་ཕལ་སོགས་རུང་བར་རྒྱུད་སྡེ་དག་ལས་གསུངས་ལ།

བྱེ་བྲག་གི་རྒྱུ་ནི། སྲོག་ཆགས་ཀྱི་རྐང་རུས་མི་འདྲ་བའི། ཞི་རྒྱས་དབང་དྲག་གི་ལས་བཞི་སྒྲུབ་པར་ཡང་བཤད་དེ། ཕུར་བ་གསང་རྒྱུད་ལས། རྨིག་ཟླུམ་རྐང་ལ་ཞི་བ་བྱ། །འདབ་ཆགས་རྐང་ལ་རྒྱས་པ་བྱ། །རྐང་ལེབ་རྐང་ལ་དབང་ཡང་བྱ། །སྡེར་ཆགས་རྐང་ལ་དྲག་པོ་བྱ། །ཞེས་དང་། ཡང་ཕུར་བ་མྱང་འདས་ཀྱི་རྒྱུད་ལས། ལྕགས་སམ་ནག་པའི་ཤིང་རྣམས་ནི། །དྲག་པོའི་ལས་ཀྱི་ཕུར་བའི་རྒྱུ། །གསེར་རམ་སེར་བའི་ཤིང་རྣམས་ནི། །ཡོན་ཏན་རྒྱས་པའི་ཕུར་བའི་རྒྱུ། །ཟངས་སམ་དམར་བའི་ཤིང་རྣམས་ནི། །གསུང་མཆོག་དབང་གི་ཕུར་བུའི་རྒྱུ། །དངུལ་ལམ་དཀར་བའི་ཤིང་རྣམས་ནི། །ཞི་བ་ཆོས་ཉིད་ཕུར་བུའི་རྒྱུ། །ཞེས་དང་། གཞན་ཡང་ཤིང་གི་སྦ་མཆོག་རྐང་། །གདུག་པ་ཅན་དང་བཀྲ་མི་ཤིས། །ཁྱོ་དགུ་ཤི་བའི་ཡུགས་མའི་འཕང། །དེ་ལ་དྲག་པོའི་ཕུར་བུ་བྱའོ། །སྐྱེར་བ་གཡེར་བ་སྲིན་ཤིང་དང་། །སྐྲིག་ཤིང་ལ་སོགས་ཤིང་བུ་ལ། །དེ་ལ་རྒྱས་པའི་ཕུར་བུ་བྱ། །འཁར་བ་ལྗོན་དམར་སེང་ལྡིང་དང་། །མཛོ་མོའི་གླ་དཀར་ཚེར་མ་ཅན། །དེ་ལ་དབང་གི་ཕུར་བ་བྱ། །ཙན་དན་དཀར་བོ་ཤུག་པ་འཇག། གླ་བ་སྟར་བུའི་ཤིང་རྣམས་ལ། །དེ་ལ་ཞི་བའི་ཕུར་བ་བྱའོ། །ཞེས་དང་། ཡང་རྒྱུའི་བྱེད་ལས་དང་སྦྱར་ཏེ་གསུངས་ཚུལ་ནི། རྙིང་རྒྱུད་ཕུར་བ་རྡོ་རྗེ་ཁྲོས་པ་རྩ་རྒྱུད་ལས། སེང་ལྡེང་ཕུར་བ་སོར་བརྒྱད་ནི། །མཐུ་འཕྲོག་བྱིན་རླབས་ཡོད་པ་ཡིན། །དེ་བཞིན་བྱ་རྒོད་གཤོག་ཕུར་ཡང་། །འགུགས་པར་བྱ་བའི་ནུས་པ་ཡོད། །སེར་བོ་གསེར་རམ་ཡང་ན་ནི། །སྐྱེར་བ་དག་ལ་བྱས་པ་ནི། །ཟིལ་གྱིས་མནོན་པའི་ཕུར་བ་ཡིན། །སྐྱེས་པ་དར་མ་རིགས་ཅན་གྱི། །སྦོམ་པོ་མ་ཡིན་ཐུར་མ་ཕྲ་མོ་ཙམ། །ཟངས་སམ་མཛོ་མོའི་ཤིང་དག་གིས། །དམར་བོ་དག་ལ་བྱས་པ་ནི། །དབང་དུ་འདུས་པའི་ཕུར་བུར་བསྟན། །ཙན་དན་དག་གམ་རྒྱ་ཤུག་ནི། །གཟི་བྱིན་འཕྲོག་པར་ཡང་དག་བསྟན། །ལྕགས་སམ་ཤིང་ནི་ནག་པོ་ནི། །དྲག་པོར་འགྱུར་བ་མཐའ་དག་ལ། །རྡུལ་དུ་བརླག་པར་རབ་ཏུ་བསྟན། །ཞེས་དང་། གཞན་ཕུར་བ་བཅུ་གཉིས་ཀྱི་རྒྱུད་ལས། རྒྱུ་མི་འདྲ་བ་དང་། ཁ་དོག་མི་འདྲ་བའི་ཡོན་ཏན་དང་བྱེད་ལས་མི་འདྲ་བར་ཡང་བཤད་དོ། །

༣ ཕུར་བུའི་དབྱིབས། ཕུར་བ་སྤྱིའི་དབྱིབས་ནི། ཕུར་བ་ཁྲོས་པའི་རྩ་རྒྱུད་ལས། ལྕགས་སྣ་ལྔ་འམ་བདུན་ཡང་རུང། །མགོ་བོ་རྒྱ་མདུད་རྩེ་ཟུར་གསུམ། །སྐེད་པ་རྒྱ་མདུད་གཞལ་ཡང་ཁང་། །ལྕམ་གཞོག་ལ་ནི་སོར་བཅུ་གཉིས། །ཞེས་དང་། གཞན་ཟ་བྱེད་འབར་བ་དང་ཕུར་བ་མྱང་འདས་ཀྱི་རྒྱུད་སོགས་ལས། དེ་དང་མི་འདྲ་བར་ཡང་གསུངས་སོ། །

བྱེ་བྲག་དབང་བཞིའི་ཕུར་བའི་དབྱིབས་ནི། ཞི་ལ་ཁ་དོག་དཀར་བོ། མགོ་བོ་རྒྱ་མདུད། རྩེར་ཟླུམ་པོ། ལོགས་སུ་ཞི་བའི་ལྷ་རྣམས་བཀོད་པའི་ཕུར་བ་དང་། རྒྱས་པ་ལ། ཁ་དོག་སེར་བོ། མགོ་དང་རྒྱ་མདུད་རྩེ་གྲུ་བཞི་ཅན་དང་། དབང་ལ། ཁ་དོག་དམར་བོ། མགོ་དང་རྒྱ་མདུད་རྩེ་མོ་ཟླ་གམ་ཅན་དང་། དྲག་པོ་ནི། ཁ་དོག་ནག་པོ། མགོ་དང་རྒྱ་མདུད་རྩེ་གསུམ་ཟུར་གསུམ་ཅན་ནོ། །ཤིང་གི་ཕུར་བ་ཡིན་ན་རྩ་རྩེ་མ་ནོར་བར་བྱ་དགོས་ཏེ། ཀརྨ་ལས་ཀྱི་རྒྱུད་ལས། ཤིང་གི་རྩ་བ་རྒྱ་མདུད་བྱ། །མྱུ་གུའི་ངོས་སུ་སོ་སོའི་དབལ། །རི་རམ་ལྕམ་གཞོག་བརྒྱད་ལྡན་བརྗིད། །ཅེས་སོ། །

༤ ཕུར་བུའི་ཚད། སྤྱིར་ཕུར་བུ་ལ་རིང་ཐུང་གི་ཚད་ནི། ཕུར་བུ་ལ་ཆ་ཚད་ལྡན་ན་བྱིན་རླབས་ཆགས་ཤིང་། ལས་འགྲུབ་པ་མྱུར་ཏེ། ཐུགས་རྗེ་ཁྲོས་རྒྱུད་ལས། ཆ་ཚད་ལྡན་པའི་རྟགས་མྱུར་རོ། །ཞེས་པ་ལྟར། ཕུར་བུ་མྱང་འདས་ཀྱི་རྒྱུད་ལས། སོར་ཡང་བཅོ་བརྒྱད་བཅུ་གཉིས་དང་། །བརྒྱད་དང་ལྔ་དང་བཞི་དང་གཅིག། ནས་གང་ཚད་དང་གང་རུང་བར། །མཁས་པས་དཀྱིལ་འཁོར་རིམ་པར་འགོད། །བྱེ་བྲག་ཕུར་བུ་རང་རང་གི་ཚད་ཀྱང་། ཧེ་རུ་ཀ་སྙིང་རྗེ་རོལ་བ་ལས། སོར་བརྒྱད་དམ་བཅུ་གཉིས་པར་བྱས་པ་མགོ་མཇུག་མ་ནོར་བར་ཤིང་རྩ་བ་ཕྱོགས་སུ་མགོ་བྱས་ལ། སོར་བརྒྱད་ལ། སོར་གཅིག་ལ་རྒྱ་མདུད། སྐེད་པར་སོར་གཅིག་ལ་རྒྱ་མདུད། སྟོད་ཟུར་བརྒྱད། སྨད་ཟུར་གསུམ་དུ་བྱས་ལ་རི་རབ་ལྟར་བརྗིད་པ་ནི་གཟུགས་སོ། །ཞེས་དང་། གཞན་ཡང་། སོར་བཅུ་གཉིས་དང་། བཅུ་དྲུག་གི་ཚད་ཀྱང་ཕུར་བ་ཐུགས་རྗེ་ཁྲོས་པ་རྩ་རྒྱུད་སོགས་སུ་གསུངས་ཡོད་པས། རིགས་པས་དཔག་སྟེ་ཚད་བགོ་དགོས་སོ། །ཚད་ངེས་ཅན་གྱི་རྒྱུ་མཚན་ཡང་། ཡཀྵ་ཟ་བྱེད་འབར་བ་ལས། སྐྱེས་པ་རྣམ་བཞིའི་སྒོ་བཀག་པ། །ཚད་ནི་སོར་བཞི་བསྟན་པ་ཡིན། །རྣམ་ཤེས་བརྒྱད་ཀྱི་སྒོ་བཀག་པས། །ཆུང་ཚད་སོར་ནི་བརྒྱད་པ་བསྟན། །རྟེན་འབྲེལ་བཅུ་གཉིས་རྒྱུན་བཅད་ཕྱིར། །འབྲིང་ཚད་སོར་ནི་བཅུ་གཉིས་བསྟན། །ཁམས་ཆེན་བཅོ་བརྒྱད་རྩད་བཅད་ཕྱིར། །སོར་ནི་བཅོ་བརྒྱད་རིང་ཚད་བསྟན། །ཞེས་སོ། །

༥ ཕུར་བུའི་དབྱེ་བ། ཕུར་བུའི་དབྱེ་བ་ལ། ཐུགས་རྗེ་ཁྲོས་པ་རྩ་རྒྱུད་ལས། ཆོས་ཉིད་དོན་གྱི་ཕུར་བུ། རིག་པ་ཡེ་ཤེས་ཀྱི་ཕུར་བུ། འདུས་བྱས་རྫས་ཀྱི་ཕུར་བུ། རྟེན་པ་ལུས་ཀྱི་ཕུར་བུ་སྟེ་བཞིར་གསུངས་ལ། ཡཀྵ་ཟ་བྱེད་འབར་བ་ལས། དེ་དང་ཅུང་མི་མཐུན་པར། རིག་པ་ཡེ་ཤེས། ཚད་མེད་སྙིང་རྗེ། བྱང་ཆུབ་སེམས་དང་། འདུས་བྱས་རྫས་ཀྱི་ཕུར་བུ་སྟེ་བཞིའོ། །གོང་གསལ་འདུས་བྱས་རྫས་ཀྱི་ཕུར་བུ་ལ། ནང་གསེས་བསྙེན་ཕུར་དང་། སྒྲུབ་ཕུར་དང་། གདབ་ཕུར་དང་། མངགས་ཕུར་བཞིར་དབྱེའོ། །

༦ ཕུར་བུ་བྱིན་གྱིས་བརླབས་ཚུལ། ཕུར་བུ་བྱིན་གྱིས་བརླབས་ཚུལ་ནི། ཀརྨ་ལས་ཀྱི་རྒྱུད་དང་། ཕུར་བ་བཅུ་གཉིས་ཀྱི་མདོ། ཧེ་རུ་ཀ་སྙིང་རྗེ་རོལ་བ་སོགས་སུ་གསལ་ལ། བྱིན་གྱིས་བརླབས་རྗེས། རབ་གནས་ལེགས་པར་བྱས་ཏེ། ཚོན་སྐུད་སྣ་ལྔ་འམ་བ་སུ་ཏའི་གཟུངས་ཐག་བཏགས་ཏེ་རྣལ་མར་གྲུབ་ནས་བསྙེན་པ་བྱེ་བ་གཅིག་ལ་སོགས་གྲུབ་པ་ན། ཕུར་བུ་ལྡིང་བ་དང་། གར་འཆམ་པ། མེ་སྟག་དང་འོད་འབར་བ་སོགས་གྲུབ་པའི་ལྟས་ཐོན་པ་ཡིན་ནོ། །

༧ ཕུར་བུའི་མཚོན་དོན། དེ་དག་གི་མཚོན་དོན་ཡང་ཕུར་བ་ཐུགས་རྗེ་ཁྲོས་པ་རྩ་རྒྱུད་ལས། དབུ་ཡི་རྒྱ་མདུད་སོར་གཅིག་དེ། །ཟུར་གསུམ་བརྒྱད་དང་གྲུ་བཞི་ལྔ། །ཧཱུཾ་མཛད་ཁྲག་འཐུང་ལྔ་རྫོགས་ཏེ། །སོར་གཉིས་ལྟེ་བ་ཡན་ཆད་ལ། །ལྕམ་གཞོག་བརྒྱད་དུ་ཡང་དག་ཤེས། །ཁྲོ་བརྒྱད་མགོ་བརྙན་བཅུ་དྲུག་རྫོགས། །སོར་གཅིག་གཙོས་སོ་མཚན་མ་སྟེ། །ཆུ་སྲིན་ཁ་རུ་ཡང་དག་རྫོགས། །དྲག་པོ་ཁྲོས་པའི་དཀྱིལ་འཁོར་ཡིན། །སོར་གསུམ་དབལ་དང་ལྡན་པ་སྟེ། །ཡུམ་ཆེན་ལྔ་ཡི་དཀྱིལ་འཁོར་ཡིན། །ཞེས་དང་། ཕུར་བུའི་རྒྱུད་ལས། ཁྲོ་རྒྱལ་འཇིགས་བྱེད་བཛྲ་ཀཱི་ལ་ཡ། །སྡུག་བསྔལ་འཇོམས་མཛད་སྤྱི་བོའི་རྒྱ་མདུད་ནི། །སྲིད་གསུམ་མ་ལུས་དབྱིངས་སུ་འདྲེན་པའི་བརྡ། །མ་སྐྱེས་ལྷུན་གྱིས་གྲུབ་པའི་གཟི་བྱིན་བསྐྱེད། །རྐེད་པ་རྒྱ་མདུད་ཟུར་དྲུག་ཡེ་ཤེས་དྲུག །ཆུ་སྲིན་ཁ་ནས་སྦྲུལ་གྱི་ཆུན་པས་བརྒྱན། །མ་བཅོས་ལྷུན་གྱིས་གྲུབ་པའི་གཞལ་ཡས་ཁང་། །འབྱུང་བ་ཡུམ་གྱི་ལྷུམས་སུ་གཟི་བྱིན་བསྐྱེད། །ཟུར་བཞི་ལོགས་བཞི་ཁྲོ་མོ་བརྒྱད་ཀྱི་ངང་། །རྣམ་ཤེས་ཚོགས་བརྒྱད་དུར་ཁྲོད་བརྒྱད་དུ་རོལ། །སྡུག་བསྔལ་བརྒྱད་པོ་གནས་སུ་བསྒྲལ་ནས་ཀྱང་། །བཅུ་དྲུག་རོལ་བ་ཆེན་པོར་གཟི་བྱིན་བསྐྱེད། །རྩེ་མོ་ཟུར་གསུམ་སྐུ་གསུང་ཐུགས་ཀྱི་ངང་། །དུག་གསུམ་འཁོར་བའི་བཙོན་ར་རྒྱ་བཀྲལ་ནས། །ལུས་ངག་ཡིད་གསུམ་བག་ཆགས་གཏན་སྦྱངས་ཏེ། །ས་གསུམ་ཟིལ་གྱིས་མནོན་པའི་གཟི་བྱིན་བསྐྱེད། །ཅེས་སོ། །

༨ དམིགས་པར་བྱ་བའི་ཡུལ་བཞི། ཆོས་ཀྱི་དབྱིངས། ཡུམ་གྱི་མཁའ། འགྲོ་བ་རིགས་དྲུག གང་ལ་དམིགས་པ་དང་བཞིའོ། །

༩ ཕུར་བུ་གདབ་ཚུལ། སྔགས་འཆང་རྒྱན་མེར། རིག་པ་ཡེ་ཤེས་ཀྱི་ཕུར་བ་ཆོས་ཀྱི་དབྱིངས་ལ་གདབ། བྱང་སེམས་ཡེ་ཤེས་ཀྱི་ཕུར་བ་ཡུམ་གྱི་མཁའ་ལ་གདབ། ཐུགས་རྗེ་སྤྲུལ་བའི་ཕུར་བ་རིགས་དྲུག་སེམས་ཅན་ལ་གདབ། འདུས་བྱས་རྫས་ཀྱི་ཕུར་བ་དམིགས་པའི་ཡུལ་ལ་གདབ་པ་དང་། ཡང་འཕྲིན་ལས་རྣམ་བཞིའི་དབང་དུ་བཏང་ནའང་། གདབ་པར་བྱ་བ་བཞི་སྟེ། ཞི་བའི་ཕུར་བ་ཡུལ་འཇིགས་པ་བརྒྱད་ལ་གདབ། རྒྱས་པའི་ཕུར་བ་འབྱོར་བ་དྲུག་ལ་གདབ། དབང་གི་ཕུར་བ་ཉོན་མོངས་པ་བཞི་ལ་གདབ། དྲག་པོའི་ཕུར་བ་དགྲ་བགེགས་གཉིས་ལ་གདབ། ཅེས་གསུངས་པ་ལྟར། རང་ཉིད་ལྷའི་ང་རྒྱལ་བརྟན་པོ་ལ་གནས་བཞིན་དུ། ཕུར་བ་ལས་བྱེད་ཀྱི་ཀཱི་ལ་ཡ་དངོས་སུ་གསལ་ཏེ། བསྒྲུབ་བྱ་དེའི་སྙིང་མགྲིན་སྤྱི་བོ་དང་། ལྟེ་བ་གསང་གནས་སོགས་སུ་གདབ་སྟེ། རྡུལ་དུ་བརླག་ལ། དོན་དུ་ཟག་བཅས་ཉེར་ལེན་གྱི་ཕུང་ལྔ་ཟག་མེད་ཡེ་ཤེས་ཀྱི་ཕུང་ལྔར་རྒྱས་བཏབ་པ་ནི་ཕུར་བུ་གདབ་ཚུལ་ཡིན་ཏེ། འཕྲིན་ལས་འབྱུང་བ་སྒྲོལ་མ་འདུས་པའི་རྒྱུད་ལས། གདུག་པ་ཐམས་ཅད་བཀུགས་ནས་ཀྱང་། །ནམ་མཁའི་དབྱིངས་སུ་བསྐྱེད་ནས་ནི། །རྡོ་རྗེ་ཕུར་བུའི་ཚོགས་སྤྲོས་ནས། །གནས་ལྔ་དག་ཏུ་ཕུར་བུ་གདབ། །ཅེས་དང་། ཡང་སྒྱུ་འཕྲུལ་དྲྭ་བ་ལས། རྡོ་རྗེ་ཡི་ནི་ཕུར་བུ་ཡིས། །གཟུགས་བརྙན་གྱི་ནི་གནས་ལྔ་བོ། །དཔྲལ་བ་མགྲིན་པ་སྙིང་ག་དང་། །དེ་བཞིན་དཔུང་བ་གཉིས་སུ་གདབ། །རྡོ་རྗེ་ཐོ་བས་བརྡུང་བར་བྱ། །ཞེས་སོགས་རྒྱུད་སྡེ་མང་བོ་ལས་གསུངས་ལ། གཞན་ཡང་། ཕུར་བུ་ནི་སྒྲུབ་རྟེན་དང། མཚམས་གཅོད་བཟློག་པ། ཐིག་འདེབས་སོགས་ལ་བཀོལ་ཡུལ་མང་ངོ་། །

༡༠ འདེབས་པར་བྱ་བའི་གྲོགས་བཞི། ཤེས་རབ། ཏིང་འཛིན། སྙིང་རྗེ། ཚད་མེད་དང་བཞིའོ། །

༡༡ ཐེབས་པའི་རྟགས་བཞི། ཆོས་དབྱིངས་སུ་ཐེབས་པས་ཡེ་ཤེས་འཆར། ཡུམ་གྱི་མཁའ་ལ་ཐེབས་པས་གཉིས་མེད་སྦྱོར། འགྲོ་བ་རིགས་དྲུག་ལ་ཐེབས་པས་ཐུགས་རྗེས་ཟིན། གང་ལ་དམིགས་པ་ལ་ཐེབས་པས་བསྟན་པ་ཚུགས་པ་དང་བཞིའོ། །ཡང་ལོ་པཎ་བཀའི་ཐང་ཡིག་ལས། ཕུར་བ་ལ་ཐེབས་པ་གསུམ་ཡོད། འདོད་ཁམས་གཟུགས་ཁམས་གཟུགས་མེད་ཁམས་ལ་ཐེབས་པ་དང་གསུམ་མོ། །ཏིང་འཛིན་རྣམ་པ་གསུམ་བསྒོམས་པས་ནི་གཟུགས་ཁམས་ལ་ཐེབས། དཀྱིལ་འཁོར་གསུམ་བསྒོམས་པས་ནི་འདོད་ཁམས་ལ་ཐེབས། དཀྱིལ་འཁོར་རྣམ་པ་གསུམ་སྟོང་ཉིད་དུ་བསྒོམས་པས་ནི་གཟུགས་མེད་ཁམས་ལ་ཐེབས་པའོ། །ཤ་ལ་ཐེབས་པ་དང་། རུས་པ་ལ་ཐེབས་པ་དང་། ཁྲག་ལ་ཐེབས་དང་། དབུགས་ལ་ཐེབས་པ་དང་བཞི་ལས། དེ་བཞིན་ཉིད་ཀྱི་ཏིང་ངེ་འཛིན་བསྒོམས་པས་ནི་དབུགས་ལ་ཐེབས་པའོ། །ཡེ་ཤེས་སེམས་དཔའ་བསྒོམས་པས་ནི་རུས་པ་ལ་ཐེབས་པའོ། །ཁྲོ་བོ་བཅུ་བསྒོམས་པས་ནི་ཁྲག་ལ་ཐེབས་པའོ། །དམ་ཚིག་སེམས་དཔའ་བསྒོམས་པས་ནི་ཤ་ལ་ཐེབས་པའོ། །གསུངས་སོ། །

༡༢ ཕུར་བ་མ་ཐེབས་པའི་ཉེས་སྐྱོན། རིག་པ་ཡེ་ཤེས་ཀྱི་ཕུར་བ་ཆོས་ཀྱི་དབྱིངས་ལ་མ་ཐེབས་ན་འཁོར་བ་ལས་མི་སྒྲོལ་བ་དང་། བྱང་ཆུབ་སེམས་ཀྱི་ཕུར་བ་ཡུམ་གྱི་མཁའ་ལ་མ་ཐེབས་ན་དམ་ཚིག་སེམས་དཔའི་དཀྱིལ་འཁོར་རྒྱུན་ཆད་པ་དང་། ཐུགས་རྗེ་སྤྲུལ་བའི་ཕུར་བ་རིགས་དྲུག་ལ་མ་ཐེབས་ན་གཞན་དོན་འཕྲིན་ལས་རྒྱུན་ཆད་པ་དང་། འདུས་བྱས་རྫས་ཀྱི་ཕུར་བ་ཞིང་བཅུ་ལ་མ་ཐེབས་ན་ལས་ངན་རྒྱུན་ཆད་མེད་པ་དང་བཞིའོ། །ལོ་པཎ་བཀའི་ཐང་ཡིག་ལས། སྔ་མ་གཉིས་འདྲ་ལ། ཐུགས་རྗེ་སྤྲུལ་བའི་ཕུར་བ་རིགས་དྲུག་ལ་མ་ཐེབས་ན་འཁོར་བར་གཏན་དུ་འཁྱམས། འདུས་བྱས་རྫས་ཀྱི་ཕུར་བ་གང་ལ་དམིགས་པ་ལ་མ་ཐེབས་ན་བསྟན་པའི་སྙིང་བོ་མི་ཚུགས་ཞེས་ཕྱི་མ་གཉིས་མི་འདྲ་བར་གསུངས་སོ། །

༡༣ ཕུར་བུའི་ནུས་པ། གང་དམིགས་པ་ལ་ཕུར་བུ་གདབ་ན། དགྲ་རྒྱུད་རྩ་ནས་བརླག་པ་དང་། སྐྱེ་རྒྱུན་ངན་པ་གཅོད་པ། ཞིང་བཅུ་ཚང་བའི་དགྲ་བགེགས་འཇོམས་པ། རྣལ་འབྱོར་བའི་རྟོགས་པ་འཕེལ་ཞིང་། སྙན་གྲགས་དང་བསྟན་པ་རྒྱས་པ། མདོར་ན། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་གནས་ལུགས་ཁྱབ་གདལ་ཀ་དག་ཆེན་པོས་རང་བཞིན་དུ་རྟོགས་པ་ནི་ཕུར་བུ་ཐེབས་ཚུལ་མཐར་ཐུག་ཡིན་ནོ། །

བྱེ་བྲག་ཏུ་གསང་རྒྱུད་ལས། ཙན་དན་དཀར་བོའི་ཕུར་བུ་ཡིས། །ནད་རྣམས་མ་ལུས་ཞི་བར་བྱེད། །སྐྱེར་བའི་ཕུར་བ་ཟུར་བཞི་ཡིས། །ཚེ་དང་ལོངས་སྤྱོད་རྒྱས་པར་བཤད། །སེང་ལྡེང་ཕུར་བ་ཟླ་གམ་གྱིས། །ཐམས་ཅད་དབང་དུ་སྡུད་པར་བྱེད། །ཅེས་དང་། གསེར་གྱིས་བྱང་ཆུབ་སེམས་རྒྱས་བྱེད། །ཙན་དན་དམར་བོའི་ཕུར་བ་ཡིས། །ཕོ་མོ་དབང་དུ་འདུ་བར་བྱེད། །ཟངས་ཀྱིས་རྒྱལ་བོ་དབང་དུ་སྡུད། །ཤིང་གིས་གདོན་རྣམས་དབང་དུ་སྡུད། །ཅེས་དང་། གཞན་ཡང་། ཞི་བའི་ཕུར་བུས་ནད་གདོན་འཇིགས་བརྒྱད་ལས་སྐྱོབ། རྒྱས་པའི་ཕུར་བུས་ཚེ་བསོད་འབྱོར་དྲུག་སྤེལ། དབང་གི་ཕུར་བུས་སྲིད་གསུམ་དབང་དུ་སྡུད། དྲག་པོའི་ཕུར་བུས་དགྲ་བགེགས་གདུག་པ་ཅན་ཚར་གཅོད་དོ། །

༡༤ ཕུར་བུའི་འབྲས་བུ། འབྲས་བུ་ཡང་རིག་པ་ཡེ་ཤེས་ཀྱི་ཕུར་བས་ཆོས་སྐུ། བྱང་ཆུབ་སེམས་ཀྱི་ཕུར་བས་ལོངས་སྐུ། ཐུགས་རྗེའི་ཕུར་བས་སྤྲུལ་སྐུ། རྫས་ཀྱི་ཕུར་བས་རྡོ་རྗེའི་སྐུ་མངོན་དུ་བྱེད་ནུས་སོ། །

༡༥ ཕུར་བའི་དགོས་ཆེད། ཡེ་ཤེས་ཀྱི་ཕུར་བས་བྱང་ཆུབ་མངོན་དུ་བྱེད་པ་དང་། བྱང་སེམས་ཀྱི་ཕུར་བས་རྒྱུད་བྱིན་གྱིས་བརླབས་པ། སྤྲུལ་བའི་ཕུར་བུས་རིགས་དྲུག་འདྲེན་པ། རྫས་ཀྱི་ཕུར་བས་ཞིང་བཅུ་ཚང་བའི་དགྲ་བགེགས་སྒྲོལ་བའི་དགོས་པ་ཡོད་དོ། །

གྲི་གུག

༡ གྲི་གུག་གི་རྒྱུ་དང་ཚད། རྒྱུད་ལས། གྲི་ལྕགས་ལས་བྱས་གྲི་གུག་ནི། །རྣོ་ཞིང་སོར་བཅུའི་ཚད་དང་ལྡན། །ཡུ་བ་རྡོ་རྗེ་ཕྱེད་པོ་ཡི། །ལྟེ་བ་ཧཱུཾ་གིས་མཚན་པར་བྱ། །ཞེས་པ་ལྟར། ཟངས་དང་ལྕགས། མི་གསོད་ཀྱི་ལྕགས་གྲི་གང་རུང་རོ་སོལ་གྱི་མེས་བསྲེགས་པ་སྟེ། དངོས་གྲུབ་ཀུན་འབྱུང་ལས། ཟངས་དང་ལྕགས་ཀྱི་གྲི་གུག་གིས། །བླ་དང་ཚེ་སྲོག་དོན་སྙིང་ལ། །མྱུར་དུ་འཁོར་བས་གཅོད་པར་བྱེད། །ཅེས་དང་། གཞན་ཡང་། མཁའ་འགྲོ་སྡེ་ལྔ་སོགས་ལ་ནི་རིན་ཆེན་སྣ་ལྔ་སོགས་ཀྱི་རྒྱུ་ལས། གྲི་གུག་ཀྱང་རྡོ་རྗེ་གྲི་གུག རིན་ཆེན་གྲི་གུག པདྨ་གྲི་གུག རྒྱ་གྲམ་སོགས་ཀྱང་ཡོད་པར་བཤད་དོ། །

༢ གྲི་གུག་གི་དབྱིབས། དུར་ཁྲོད་ནག་པོའི་རྒྱུད་ལས། གྲི་གུག་མཚན་ཉིད་ཇི་ལྟར་ལགས། །བཅོམ་ལྡན་འདས་ཀྱིས་བཀའ་བསྩལ་བ། །སོ་བཅུ་རྡོ་རྗེ་ཡུ་བ་ཅན། །ཡུ་བའི་རྩ་བར་ཧཱུཾ་གནས་པར། །སོ་ནི་ཟླ་ཕྱེད་ལྟ་བུར་བྱ། །ཞེས་དང་། ཡང་མཁའ་འགྲོའི་སྡེ་ལྔའི་གྲི་གུག་ལ་རྡོ་རྗེ་རིན་ཆེན་པདྨ་རྒྱ་གྲམ་སོགས་ཀྱིས་བརྒྱན་པར་ཡང་བཤད་དོ། །

༣ གྲི་གུག་གི་དགོས་པ། ལྷའི་ཕྱག་མཚན་དང་། ལས་སྒྲུབ་ཀྱི་རྟེན། དམ་ཚིག་གི་རྫས་སུའོ། །

༤ གྲི་གུག་གི་མཚོན་དོན། ཀྱེ་རྡོར་ལས། ང་རྒྱལ་ལ་སོགས་སྐྱོན་དྲུག་རྣམས། །གཅོད་ཕྱིར་གྲི་གུག་རྣམ་པར་གནས། །ཞེས་གསུངས་སོ། །

རལ་གྲི།

རལ་གྲི་འདི་ལྷའི་ཕྱག་མཚན་དང་། ཆོས་སྲུང་གི་བླ་རྡོ་བཅའ་ཐབས་སུ་དགོས་པར་བཤད་ལ། རྒྱུ་ནི་རྣོ་ཁབ་ལེན། ལྕགས། ཡང་ན། ཤིང་ལས་བྱས་པའི་ཚད་སོར་བཞི་དང་། བརྒྱད། བཅུ་གཉིས། ཁྲུ་གང་བ་དྲང་ཞིང་རྣོ་བ། གས་ཆག་མེད་པ་དགོས་པར། གཤེད་དམར་དང་། གཤེད་ནག རྡོར་སེམས་སྒྱུ་འཕྲུལ་མེ་ལོང་སོགས་སུ་བཤད་དོ། །

རལ་གྲི་གྲུབ་པའི་རྟགས་ལ། གཤིན་རྗེ་གཤེད་ནག་ལས། གྲུབ་ན་རལ་གྲི་རབ་ཏུ་འབར། །འོད་ཟེར་ལྔ་ཡི་གློག་ཆེན་འཁྲུག །གྲུབ་པ་དེ་ནི་བཟུང་གྱུར་བས། མི་རྣམས་ཁམས་གསུམ་ལས་རྒྱལ་འགྱུར། །ཞེས་སོ། །ཡང་ཐུན་མོང་བའི་དངོས་གྲུབ་བརྒྱད་ཀྱི་ནང་གསེས་རལ་གྲིའི་དངོས་གྲུབ་ནི། ཕྱི་ནང་གཉིས་ཀས་བསྒྲུབ་རུང་བ་ཞིག་སྟེ། རོ་ལངས་བསྒྲུབས་ནས། གྲུབ་ན་ཐོག་མར་རོ་ལ་ཁ་རླངས་བྱུང་། དེ་ནས་འགུལ། དེ་ནས་རོ་ལངས་གར་བྱེད་ཅིང་། ལྕེ་ཡུག་ཡུག་པ་ལན་གསུམ་རྐྱོང་བས། དེ་དང་བོར་ཆོད་ན་རབ། བར་དུ་ཆོད་ན་འབྲིང་། ཐ་མར་ཆོད་ན་ཐ་མ་ཡིན་པས། དེའི་ལྕེ་རལ་གྲིར་གྱུར་ཏེ། རི་རབ་གྱི་རྩེ་མོ་སོགས་སུ་སྐད་ཅིག་ལ་བགྲོད་ཐུབ་པའི་ཁྱད་ཆོས་ལྡན་པ་ཞིག་དང་། རོ་གསེར་དུ་འགྱུར་ལ། མ་ཆོད་ན་སེམས་ཅན་མང་བོ་རོ་ལངས་ཀྱི་ཁ་ཟས་སུ་འགྲོ་བ་ཡིན། ཞིབ་ཏུ་སྦ་བཞེད་ལས། བསམ་ཡས་བཞེངས་པ་ཨོ་ཏན་ཏ་པུ་རིར་དཔེ་བླངས་པ་ལས་འཕྲོས་ཏེ། སྔོན་རྣལ་འབྱོར་བ་ཞིག་གིས་རོ་ལངས་སྒྲུབ་ཏེ་རལ་གྲིའི་དངོས་གྲུབ་བརྙེས་པའི་ཚུལ་འཁོད་པས་དེར་གཟིགས་པར་བྱའོ། །

བེང་།

བེང་འདི་གཙོ་བོ་དཔལ་ལྡན་མགོན་པོའི་ཕྱག་མཚན་སྟེ། མགོན་ནག་དངོས་གྲུབ་འབྱུང་རྒྱུད་ལས། གསང་བ་བེང་འཛིན་མགོན་པོ་ཡིས། །ལྷ་མ་ཡིན་གྱི་གྲོང་ཁྱེར་ནི། །སུམ་བརྩེགས་ལ་སོགས་ཁང་བཟང་རྣམས། །ཁྲོ་བོ་ཙན་དན་བེང་བསྣམས་ཀྱིས། །ཞེས་དང་། མེ་ལྕེ་ཕྲེང་རྒྱུད་ལས། ཙན་དན་བེང་གི་བར་ཤེད་ནས། །སྤྲུལ་བའི་ཕོ་ཉ་འབུམ་བཀྱེ་བས། །ཞེས་སོ། །

༡ བེང་གི་རྒྱུ་ནི། རྙིང་རྒྱུད་མེ་ལྕེ་ཕྲེང་རྒྱུད་ལས། དེ་ནས་བེང་གི་བཅས་དག་ནི། །ཙན་དན་སེང་ལྡེང་ཤེར་ཤིང་དང་། །སྐྱེར་ལྡེང་མཛོ་མོ་གླ་བ་དང་། །རྒྱ་ཤུག་དག་ལ། ཞེས་གསུངས་པ་དང་།

༢ དབྱིབས་ནི། རྒྱུད་དེ་ཉིད་ལས། རྒྱ་ཤུག་དག་ལ་འདོམ་གང་ངམ། །མདའ་ཚད་གང་དུ་བྱས་པ་ལ། །ལོགས་བརྒྱད་རྒྱ་མདུད་གཉིས་ལྡན་པ། །མགོ་བོར་ནོར་བུ་མེ་འབར་བ། །རྡོ་རྗེ་རྩེ་མོ་ཕུར་བུའི་དབལ། །ཁ་དོག་སྨུག་པོ་ཡང་ན་གནག །ཕྱོགས་བརྒྱད་ལྷ་སྲིན་སྡེ་བརྒྱད་ཀྱི། །སྲོག་སྙིང་དྲག་སྔགས་བཅས་པ་གཞུག །ཅེས་དང་། ཡང་ཁ་ཅིག སྟོད་ལ་ཁྱུང་སོགས་འདབ་ཆགས་དང་། སྐེད་པར་འབྲུག སྨད་ལ་སྟག་གཟིག་གི་རི་མོ་འབྲི་བར་ཡང་བཤད་དོ། །

སྦ་འཁར།

སྦ་འཁར་འདི། རྣལ་འབྱོར་བ་སྤྱི་དང་། བྱེ་བྲག་བྱ་བྲལ་བ་དག་གི་ཕྱག་རྟེན་ཡིན་ལ། འདི་རྒྱ་བོད་གཉིས་ཀྱི་མཁས་གྲུབ་དག་ལ་དར་སོ་ཆེ་བ་ཡིན། ཕྱག་འཁར་དེ་ཨ་ཀ་རུ་སོགས་ལས་བྱས་པའང་ཡོད་དེ། སློབ་དཔོན་པད་འབྱུང་རྒྱ་གར་ནས་ཕེབས་དུས་སུ་ཕྱག་མཁར་ཞིག་བསྣམས་ཡོད་པར་བཤད་པ་དང་། ད་དུང་པད་འབྱུང་གིས་ཆུ་ཤིང་ནག་པོའི་ཕྱག་འཁར་དེ་གྲུ་མོ་གཡོན་དུ་འཆང་བ་ནི་ཆོས་རྣམས་ཐེག་པ་གཅིག་ཏུ་རྫོགས་པའི་བརྡར་གོ་བར་བཤད་པ་དང་། རས་ཆུང་བ་རྒྱ་གར་ལས་ཕྱིར་ལོག་དུས། ཏི་ཕུ་བ་ཡང་རྗེ་བཙུན་ལ་དད་ནས་སྐྱེས་སུ་ཨ་ཀ་རའི་ཕྱག་འཁར་ཞིག་བསྐུར་བར་བཤད་པ་དང་། རྒྱལ་བ་ལོ་རས་པ་དང་འབྲུག་པ་རྒྱལ་དབང་རྗེ་སོགས་གནས་བསྐོར་ལ་ཕེབས་སྐབས། སྦ་སྙུག་བསྣམས་པའི་ལོ་རྒྱུས་ཡོད་པ་དང་། ཆོས་རྗེ་དོན་འགྲུབ་རིན་ཆེན་གྱིས་ཀྱང་ཕྱག་མཁར་བསྣམས་ཏེ་གནས་བསྐོར་ལ་ཕེབས་པས། ད་ལྟ་འང་ཨ་མདོ་རྡོ་འབུམ་སྔོ་རིས་ཀྱི་རྟེན་གཙོ་ཁོང་གི་ཕྱག་མཁར་ཡིན་པ་དང་། ཡང་། དགེ་སློང་སོགས་ཀྱིས་དུག་སྦྲུལ་དང་དུག་སྦྲང་སོགས་ཀྱི་གནོད་པ་བཟློག་ཕྱིར་ཕྱག་འཁར་འཆང་བའང་ཡོད་དེ། དེ་ནི་ཡར་རྩེ་ཏོག་དང་ལྡན་པ་དང། མར་སྣེར་ལྕགས་སོགས་ཀྱི་སྦུ་གུ་བསྐོན་ནས་སིལ་སིལ་གྱི་སྒྲ་འབྱིན་པ་ཞིག་ཡིན་ཏེ། མདོ་རྩ་ལས། དུག་སྦྲུལ་ལ་སོགས་པའི་གཉེན་པོའི་ཕྱིར་འཁར་བ་སྒྲ་དང་བཅས་པ་བཅང་ངོ་། །ཡུ་བའི་རྩ་བ་ནས་གས་ན་སྦུ་གུ་བསྐོན་ནོ། །ཡ་ཏོག་ནི་དཀྲི་བས་སོ། །ཞེས་དང་། འདིར་བྱ་བྲལ་སྤྱི་དང་། མི་ལའི་འཆང་བའི་སྦ་འཁར་གྱི་དབྱིབས་དང་མདོག མཚོན་དོན་སོགས། མི་ལ་རས་པ་ལ་ངན་རྫོང་རས་པས། འོ་ན། རྣལ་འབྱོར་བ་ཁྱེད་རང་གི་ཕྱག་ཏུ་བསྣམས་པའི་སྦ་ལྕག་དེའི་བརྡ་ཅི་ལགས། བྱིས་པའི་རྩེ་མོ་འམ་སྨྱོན་པའི་ལག་ཆ་ལྟ་བུ་འདི་ལ་དོན་ཞིག་ཡོད་ངེས་པས། འདི་ཡི་དོན་འགྲེལ་བར་ཞུ་ཞུས་པས་ལན་དུ། མི་ལའི་རྣམ་མགུར་ལས། འོ་ན། ཡོན་བདག་འདྲི་རྟོགས་མཁན། །ཁྱོད་སྦྱིན་ཤུགས་ཅན་དེ་ཚུར་ཉོན་དང་། །མི་ང་ངོ་ཁྱོད་ཀྱིས་ཤེས་མ་ཤེས། །ང་ངོ་ཁྱོད་ཀྱིས་མ་ཤེས་ན། །ཁོ་བོ་མི་ལ་རས་པ་ཡིན། །ང་དཀའ་བ་སྤྱད་པའི་གང་ཟག་ཡིན། །སྙིང་རུས་བྱས་པའི་སྒོམ་ཆེན་ཡིན། །ཕྱོགས་མེད་སྦྱངས་པའི་རྣལ་འབྱོར་ཡིན། །ངའི་ལག་ན་བཟུང་བའི་སྦ་འཁར་འདི། །དང་བོ་རྒྱ་བྲག་ལོགས་ལ་སྐྱེས། །བར་དུ་རྒྱ་ཟོར་གུག་པས་བརྔས། །ཐ་མ་ཤ་འབྲེང་མཉེན་ལ་དྲགས། །འོང་ནི་ལྷོ་ཁ་མོན་ནས་འོང་། །བཀལ་ནི་ཐེག་ཆེན་མཛོ་ལ་བཀལ། །འགྲིམས་ནི་ཚོང་འདུས་རྣམས་སུ་འགྲིམས། །ཕུལ་ནི་དད་པ་ཅན་གྱིས་ཕུལ། །ད་ལྟ་ང་ཡི་བེར་མ་ལྕག། འདི་དོན་ཁྱོད་ཀྱིས་གོ་མ་གོ། །འདི་དོན་ཁྱོད་ཀྱིས་མ་གོ་ན། །འདི་དོན་བཤད་ཀྱིས་ལེགས་པར་ཉོན། །སྦ་མ་ཐོག་རྩ་བ་བཅད་པ་དེ། །འཁོར་བའི་གཞི་རྩ་བཅད་པའི་རྟགས། །སྦ་ཡ་ཐོག་རྩེ་མོ་བཅད་པ་དེ། །ཐེ་ཚོམ་གོལ་ས་བཅད་པའི་རྟགས། །ཁྲུ་དོ་ཚད་ལ་བོར་བ་དེ། །ཆོས་པའི་ཚད་དོར་བོར་བའི་རྟགས། །སྦ་རྒྱུ་ནས་བཟང་ཞིང་མཉེན་པ་དེ། །གཞི་སེམས་ཉིད་ཡེ་ནས་བཟང་བའི་རྟགས། །སྦ་རྩི་འཇམ་ཁ་དོག་ལེགས་པ་དེ། །སེམས་གཉུག་མའི་དོན་ལ་སྦྱངས་པའི་རྟགས། །སྦ་དྲང་ལ་ལྡེམ་པར་འདུག་པ་དེ། །དོན་མ་ནོར་ཉམས་སུ་ལེན་པའི་རྟགས། །སྦ་ལ་ལུང་སུལ་འདུག་པ་དེ། །བྱང་ཆུབ་རྒྱུན་ལམ་འབྱོངས་པའི་རྟགས། །སྦ་དུམ་བུ་བཞི་རུ་འདུག་པ་དེ། །ཚད་མེད་བཞི་དང་ལྡན་པའི་རྟགས། །སྦ་ལ་ཚིགས་གསུམ་འདུག་པ་དེ། །གཞི་ལ་སྐུ་གསུམ་ཚང་བའི་རྟགས། །སྦ་ཁ་དོག་བསྒྱུར་དུ་མེད་པ་དེ། །གཞི་ཆོས་ཉིད་འགྱུར་བ་མེད་པའི་རྟགས། །སྦ་ཟླུམ་ལ་འགྲིལ་བར་འདུག་པ་དེ། །ཆོས་ཉིད་སྤྲོས་དང་བྲལ་བའི་རྟགས། །སྦ་ཡེ་ནས་དཀར་ཞིང་འཚེར་པ་དེར། །ཆོས་སྐུ་དྲི་མ་མེད་པའི་རྟགས། །སྦ་ལ་སྦུ་གུ་འདུག་པ་དེ། །ཆོས་རྣམས་ཐམས་ཅད་སྟོང་བའི་རྟགས། །སྦ་ལ་སྨེ་བ་འདུག་པ་དེ་། །ཆོས་ཐིག་ལེ་ཉག་ཅིག་གོ་བའི་རྟགས། །ནག་པོ་ཚག་ཚིག་འདུག་པ་དེ། །བོད་ཀྱི་རྣལ་འབྱོར་རས་པ་ལ། །རྣམ་རྟོག་ཕྲ་མོ་ཡོང་བའི་རྟགས། །སྦ་ཆོ་རིས་ཡེ་ནས་བཙུན་པ་དེ། །ཆོས་ཚུལ་བཞིན་ཉམས་སུ་བླངས་པའི་རྟགས། །སྦ་མཛེས་ཤིང་ཡིད་དུ་འོང་བ་དེ། །འགྲོ་བ་དལ་ཅིང་འཛིན་པའི་རྟགས། །སྦ་ཞབས་ལྕགས་ཀྱིས་བསྐོར་བ་དེ། །རྣལ་འབྱོར་རི་ཁྲོད་འགྲིམས་པའི་རྟགས། །འཆང་བཟུང་ཟངས་ཀྱི་དྲིལ་བ་དེ། །ཌཱ་ཀི་དབང་དུ་འདུས་པའི་རྟགས། །སྦ་ལ་ལྕགས་གཟེར་བཏབ་པ་དེ། །རྣལ་འབྱོར་སྙིང་རུས་ཆེ་བའི་རྟགས། །ར་གན་ཨ་ལོང་བཏགས་པ་དེ། །ནང་གི་ཡོན་ཏན་རྒྱས་པའི་རྟགས། །དེ་ལ་ཤ་འབྲེང་བཏགས་པ་དེ། །རྣལ་འབྱོར་ཤེས་པ་མཉེན་པའི་རྟགས། །ལྕག་འབྲས་གཉིས་སུ་སྒྲིལ་བ་དེ། །ཟུང་འཇུག་ལམ་དུ་འཁྱེར་བའི་རྟགས། །ལྕག་འབྲས་མ་བུ་འཛོམས་པ་དེ། །སྐུ་གསུམ་མ་དང་མཇལ་བའི་རྟགས། །རུས་པའི་བློང་མོར་བཏགས་པ་དེ། །རྣལ་འབྱོར་རྒྱལ་ཁམས་བསྐོར་བའི་རྟགས། །མེ་ལྕགས་ཁུག་མ་བཏགས་པ་དེ། །ཅི་སྣང་གྲོགས་སུ་འཁྱེར་བའི་རྟགས། །དུང་ལོང་དཀར་བོ་བཏགས་པ་དེ། །ཆོས་ཀྱི་འཁོར་ལོ་བསྐོར་བའི་རྟགས། །གཅན་གཟན་རས་མ་བཏགས་པ་དེ། །ཉམ་ང་བག་ཚ་མེད་པའི་རྟགས། །དེ་ལ་མེ་ལོང་བཏགས་པ་དེ། །རྟོགས་ཚད་ནང་ནས་ཤར་བའི་རྟགས། །སྤུ་གྲི་རྣོན་པོ་བཏགས་པ་དེ། །ཉོན་མོངས་ཟུག་རྔུ་གཅོད་པའི་རྟགས། །ཤེལ་སྒོང་རྡོག་གཅིག་བཏགས་པ་དེ། །བག་ཆགས་དྲི་མ་སྤངས་པའི་རྟགས། །བ་སོའི་ཕྲེང་བ་བཏགས་པ་དེ། །བླ་མ་ཡིད་ལ་འཕྲེང་བའི་རྟགས། །དྲིལ་བུ་གཡེར་ཁ་བཏགས་པ་དེ། །སྙན་པ་ཕྱོགས་བཅུར་སྒྲོགས་པའི་རྟགས། །སྣམ་རས་དཀར་དམར་བཏགས་པ་དེ། །བུ་སློབ་མང་བོ་འཁོར་བའི་རྟགས། །རྣལ་འབྱོར་ལག་ན་མཛེས་པ་དེ། །མི་ནག་ཐབས་ཀྱིས་འདུལ་བའི་རྟགས། །དེ་དོན་གང་ལགས་འདྲི་བ་དེ། །མོས་གུས་བག་ཆགས་ཡོད་པའི་རྟགས། །མི་ཁྱོད་ང་དང་འཕྲད་པ་དེ། །སྔོན་ཆད་སྨོན་ལམ་བཏབ་པའི་རྟགས། །དེ་སྦ་ལྕག་དཀར་བོ་རྟགས་ཀྱི་གླུ། །བརྡ་གོ་བར་གདའ་འམ་ལྷ་མི་ཀུན། །དོན་ཆོས་སུ་བདོག་གོ་དད་གུས་ཀྱིས། །ཁྱེད་ཡུན་དུ་སྐྱིད་ཀྱིས་དམ་ཆོས་མཛོད། །ཅེས་སྦ་ལྕག་དཀར་བོ་ལ་ཆོས་དང་མཐུན་པའི་མཚོན་དོན་སྦྱར་ཏེ་མགུར་གསུངས་པ་འདིས་རྟོགས་ནུས་སོ། །

གཙོད་རྭ།

གཙོད་རྭ་ནི། བྱ་བྲལ་གྱི་རྣལ་འབྱོར་བས་འཆང་སྲོལ་ཡོད་ལ། རྒྱ་གར་དུའང་གྲུབ་ཐོབ་མང་བོའི་བསྣམས་ཡོད་པར་བཤད། འདི་ལ་མིང་གཞན་དུ་ར་རྒྱུག་ཀྱང་ཟེར། དགོས་པ་ནི། དཀྱིལ་འཁོར་དང་། སྒྲུབ་ཁང་། བུམ་པ་འཇོག་པ། ས་འདུལ་རྒྱག་པ་སོགས་ལ་རྭ་འདིས་ཐོག་མར་ས་སློག་ན། གནོད་བྱེད་ཞི་ལ། དཔེར་ན། བཻ་དཀར་ལས་བཤད་པའི་ཕྱིའི་ས་དགྲ་སོ་བདུན། ནང་གི་ས་དགྲ་བཅུ་གཅིག ཕྱི་ནང་འབྲེལ་བའི་ས་དགྲ་བཅུ་བདུན་སོགས་ཟློག་ཅིང་། སླད་ཆད་བཀྲ་ཤིས་པར་བཤད། མི་ལ་རས་པས་ཀྱང་། ར་རྒྱུག་འདི་ཕྱག་ཏུ་བསྣམས་ཡོད་དེ། ཁོང་གི་མགུར་གླུ་ལས། ར་རྒྱུག་མདའ་གང་སོར་བཅུ་བ། །དང་བོ་གང་དང་གང་ནས་ཡོང། །བྱང་ཕྱོགས་ནོར་ལྷའི་ཕྱོགས་ནས་འོང་། །ནོར་ལྷའི་ཕྱོགས་ནས་འོང་བ་དེ། །ང་ཆོག་ཤེས་ནོར་དང་ལྡན་པའི་བརྡ། །སེམས་ཅན་གཙོད་ཀྱི་མགོ་ལ་སྐྱེས། །ཞེས་སོགས་མཚོན་དོན་མང་དུ་གསུངས་ཡོད་དོ། །

ལྔ་བ། ཡོ་བྱད་ཕྲན་ཚེགས་ཀྱི་སྐོར།

ཀཱ་པ་ལ།

༡ ཐོད་པ་ངན་པར་བརྟག་ཚུལ། རྒྱུད་ཡེ་ཤེས་རྔམ་གློག་ལས། ཡང་ན་བུམ་པའི་སྐྱིན་པ་རུ། །ཟླ་བ་ཉི་མ་དྲི་ཆུ་དང་། །བརྡུང་བ་རབ་ཏུ་སྣུམ་པོ་དང་། །དབང་བོ་ཀུན་ནས་འབྱུང་བ་རྣམས། །ཤ་སྲང་གཅིག་གིས་རབ་བསྲེས་པའི། །གང་བའི་བྷན་དྷ་དེ་བཞིན་བཞག། ཅེས་པ་ནི་ཐོད་པ་སྟེ། ཀཱ་པ་ལ་ཞེས་པ་ལེགས་སྦྱར་སྐད་དང་། བོད་སྐད་དུ་བདེ་བ་སྐྱོང་བ་ཟེར། དེ་ཡང་ཧེ་རུ་ཀ་གལ་བོ་ལས། བླང་བར་བྱ་བའི་སྣོད་ནི་གང་། །སྤང་བར་བྱ་བ་ཇི་བཞིན་དུ། །མཚན་ཉིད་རྣམ་པ་དུ་ཞིག་མཆིས། །སྤྱད་པར་བྱ་བ་དུ་ཞིག་མཆིས། །ཞེས་པ་ལྟར། ཀཱ་པ་ལར་བརྟག་པར་བྱ་བ་མང་ཞིག་མཆིས་ལ།

ཐོད་པ་ངན་པ་ནི་འདི་ལྟ་སྟེ། ཡ་ཡོ་གྱ་གྱོག་མང་བ། འཇོང་ནར་དང་། ཕྱོགས་གཅིག་གཞོམ་པ། སྟོད་སྨད་ཆེ་ཆུང་ཡོད་ལ་རྟོལ་ལ་ཁད་པ། སྲུབས་ཀ་རྩེག་ཅིང་དུམ་བུ་མང་བ། བྱ་དང་ཁྱི། སྲིན་བུའི་རྗེས་མང་བ། ཧོམ་ཁུང་བྲུས་པ་དང་བྱི་བ་དང་འབུ་སྲིན་གྱིས་ཟོས་པ་འདྲ་བ། སྦྲུལ་དང་སྦལ་ལྕོང་། སྡོམ་སྡིག ཝ་དང་ཅེ་སྤྱང་སོགས་མི་ཤིས་པའི་སྲོག་ཆགས་ཀྱི་གཟུགས་རིས། ལྗོན་ཤིང་ཧ་ཅང་བསྐམས་པ། མཐོང་བ་ཙམ་གྱིས་ཡིད་མི་དགའ་བ་སོགས་ནི་ཐོད་པ་ངན་པ་ཡིན་ལ། དེ་ལ་དམ་སྲི་མནན་པའི་རྫས་ཟེར། ཐོད་པ་འདི་དག་འཆང་ན། ནད་དང་གོད་ཁ་སྨྲས་དང་འཐབ་རྩོད་འོང་ལ། ལྷག་པར་ནོར་ལ་གནོད་པའི་འཆང་མི་རུང་ངོ་། གཞན་ཡང་། ལྕགས་ཀྱུ་དང་ཞགས་པ་ལྕགས་སྒྲོག་དབྱུག་ཐོ་རལ་གྲི་དགྲ་སྟ་སྟེ་སྐྱོན་ཅན་གྱི་རི་མོ་དྲུག་དང་། རྩེ་གསུམ་དང་ཁྲོ་བོའི་དབྱིབས་འདྲ་བ། ཡ་མ་རཱ་ཛའི་ཡི་གེ་དོད་པ་སོགས་ཐོད་ངན་གྱི་རིགས་སུས་འཆང་ན་འཆི་བདག་གི་དྲུང་དུ་ཉེ་བར་གནས་ལ། ཡང་། གཤིན་རྗེ་གཤེད་ཀྱི་འཕྲུལ་འཁོར་བཞག་པའམ། འཆི་བདག་ཞལ་དབྱེ་སོགས་ཀྱི་དྲག་རྫས་ལ་མཁོའོ། །

ཡང་། བུད་མེད་ཀྱི་ཐོད་པ་ནི། སྲབ་ཞིང་ཚངས་བུག་མེད་པ། སྲུབས་ལྷོད་ལ་རྣ་བའི་ངོས་གཉིས་སྲབ་པ། སྔོ་དཀར་དམར་གསུམ་གྱིས་མདོག་འདྲེས་པ། ལྗོན་ཤིང་དང་དཔག་བསམ་ཤིང་གཉིས་རུས་པའི་ནང་དུ་ཐིམ་པ་དང་། སྐྱེས་བུའི་དྲི་ཆུས་བཀང་ལ་རེག་པ་སོགས་ནི་བུད་མེད་ཀྱི་ཐོད་པ﹙སྐབས་འདིར་བསྟན་བུད་མེད་ཀྱི་ཐོད་པ་ཞེས་པ་ཐོད་པ་རིགས་ཕྱེ་བའི་ཚེ་ཕོ་མོ་གང་ཡིན་ཡང་ཐོད་པ་བོངས་ཆེ་ཆུང་སྲབ་ལ་མདོག་ངན་པ་དེ་ལ་བྱའོ། །﹚ཡིན་པས། ཡོན་ཏན་མང་བོ་ལྡན་ཡང་། ཤིས་པའི་སྣོད་དུ་མི་འགྱུར་ཞིང་། མཁའ་འགྲོ་དགའ་བར་བྱེད་པ་མ་ཡིན་པས། སྔགས་པས་འཆང་བར་མི་བྱའོ། །འཇུ་མི་ཕམ་གྱི་ཐོད་བརྟག་ནོར་བུ་ལག་སྟེར་ལས་ཐོད་པའི་མཚན་མ་ངན་པ་བཅུ་དྲུག་ཀྱང་གསུངས﹙མི་ཕམ་གསུང་འབུམ་ལྕགས་པར་པོད་བཅུ་དགུ་བའི་ཤོག་གྲངས༣༠༠﹚ལ་དེར་བལྟ་བར་བྱའོ། །

བུ་གའི་དབང་དུ་བཏང་ན། བུ་ག་མེད་དང་མང་བ་ནི། །མཁས་པས་ཤིན་ཏུ་སྤང་བར་བྱ། །ཞེས་པ་ལྟར། ཚངས་བུག་མེད་པ་ལ་ཐོད་ལྐུགས་ཟེར་ཏེ་བདུད་རིགས་ཀྱི་ཐོད་པ་ཡིན་པས། བཟང་བརྒྱ་ངན་གཅིག་གིས་འཇོམས་པ་ཟེར་ལ། འཆང་མི་རུང་། དབང་སྡུད་ཀྱི་སྐབས་སུ་མཁོ་བ་ཡོད། ཚངས་བུག་ཞོ་འཛག་ནུས་པ་ཧ་རེ་ཡོད་ན། སུས་འཆང་རུང་མཁའ་སྤྱོད་འགྲུབ། མདུན་དུ་ཚངས་བུག་གཉིས་དང་རྒྱབ་ཏུ་གསུམ་བྱུང་ནའང་དངོས་གྲུབ་འགྲུབ།

རུས་པའི་སྲབ་མཐུག་ནི། རུས་པའི་རྒྱུ་སྲ་མཁྲེགས་དང་ལྗིད་ལྡན་བཟང་། སྤྱིར་སྲབ་མཐུག་ཁོད་སྙོམས་ལས། མདུན་ངོས་རང་ས་མཐུག་ཅིང་ལྟག་པ་དགྲ་ས་སྲབ་ན་ཧ་ཅང་ལེགས། དེ་ལས་ལྡོག་ན་ངན། བར་གྱི་ལྷ་བ་ཆུང་ཞིང་རུས་པ་ཆེ་ན་བཟང་། ལྡོག་ན་ངན། ལྷ་བའི་ཟམ་པ་བརྒྱུད་མར་འཁོར་ན་མཆོག་ཏུ་ལེགས་སོ། །

རྣལ་ཐོད་ནི། ཕ་དང་བུ་མོ་འམ་མིང་སྲིང་འགྲོགས་ཏེ་སྐྱེས་པའི་རྣལ་ཕྲུག་གི་ཐོད་པ་ཡིན་ལ། རྟགས་ནི། ལྟག་མགོ་ནས་དཔྲལ་བའི་བར་སྲུབ་མ་ཆད་པར་ཡོད་པ་ཡིན། དེ་ནི་གྲིབ་རྫས་ཡིན་པས། དངོས་གྲུབ་སྒྲུབ་པའི་གེགས་ཏེ། ཤིས་པའི་སྣོད་དུ་མི་འགྱུར་བས་སྤང་བྱའོ། །འོན་ཀྱང་མ་མོའི་དམ་རྫས་ཁྱད་པར་ཅན་ནོ། །

༢ ཐོད་པ་བཟང་བོར་བརྟག་ཚུལ། དཀར་ན་དུང་འཚེར་བ་འདྲ་བ། སེར་ན་གསེར་དང་འདྲ་བ། ཟླུམ་ཞིང་སྣུམ་ལ་མཆོད་ཀོང་འདྲ་བ། ཡ་ཡོ་མེད་པ་ནོར་བུ་འདྲ་བ། སྲབ་མཐུག་སྙོམས་ལ་ལྟོ་བ་ཆུང་བ། མཚོག་མ་རིང་ལ་རྣོ་བ་མཁའ་ལྡིང་གི་མཆུ་དང་སྟག་སེན་འདྲ་བ། མཁྲེགས་ཤིང་ལྕི་ལ་རྡོ་བ་འདྲ་བ། འཇམ་ཞིང་འོད་འཚེར་བ། ཚངས་བུག་གཉིས་ལྷག་མིན་ལ་གསལ་བ། འདོད་འཇོའི་བ་དང་གང་གཱའི་ཀླུང་གསལ་ཞིང་རིང་ལ་ཟབ་པ། ལྗོན་ཤིང་གཞོན་ལ་ལོ་འདབ་རྒྱས་པ། མེ་ཏོག་དང་འབྲས་བུ་གང་བུ་ཆགས་པ། ཨཱཿསོགས་ཡིག་འབྲུ་དང་། རལ་གྲི་སོགས་མཚོན་ཆ། བཀྲ་ཤིས་རྟགས་བརྒྱད་སོགས་ཀྱི་རི་མོ་ཡོད་ན། མཆོག་ཏུ་བཟང་བའི་ཐོད་པ་ཡིན། པད་དཀར་ཆུན་པོ་ལས། རྡོ་ལྟར་མཁྲེགས་ཤིང་གསེར་ལྟར་བརྗིད་པ། མཐོང་བ་ཙམ་གྱིས་ཡིད་སྤྲོ་བའི་ཁྱད་ཆོས་གསུམ་དང་ལྡན་ན། མཐོང་མ་ཐག་བླང་ཆོག་པར་གསུངས་པ་དང། མཁས་གྲུབ་རྗེས། དཔྲལ་བའི་དབུས་སུ་ཉི་མའི་གཟུགས་བརྙན་ཡོད་ན། བདེ་སྐྱིད་ཀྱི་ཉི་མ་འཆར་བར་བཤད་ལ། གཞན་ཡང་སྲུབ་ཀ་གཏན་ནས་མེད་པའམ། སྲུབ་སོར་གང་ཙམ་ལས་མེད་པ་ནི་ཐོད་ཕོར་མཆོག་སྟེ། རྣལ་འབྱོར་བ་ཡིས་རྟག་ཏུ་འཆང་ཞིང་། བཞེད་དོན་འགྲུབ་པར་ཐེ་ཚོམ་མེད་དོ། །དེ་ལས་གཞན། ཐོད་པ་འཇམ་ན་མི་ཁ་བྱམས། ལྗིད་ན་བསོད་ནམས་འཕེལ། དབྱིབས་ལེགས་ན་ནོར་འདུ། གཏིང་ཟབ་ན་ཟས་འདུ། མཐུག་ཅིང་ཁོད་སྙོམས་ན་ལོངས་སྤྱོད་བརྟན། དྭངས་ཤིང་མཁྲེགས་ན་ཆོས་འཕེལ། ནང་གི་རི་མོ་རྒྱས་ན་ཆོས་སྲིད་འཕེལ། ཚངས་བུག་དྲང་ན་མི་བརྒྱུད་དང་ཤེས་རབ་འཕེལ། འབུར་ཕྱི་དང་ཀོང་ནང་ན་ཡོད་པ། རྒྱང་བཀྱེད་ན་རྩུབ་ལ་ངར་ཆེ་བ། བཏུད་ཏེ་བལྟས་ན་སྲ་འཇམ་འོད་ཆེ་བ་དེ་བཟང་། མཚན་ལྡན་ཐོད་པ་རྣམས་ནི་རང་གི་བསོད་ནམས་འཕེལ་འགྲིབ་དང་བསྟུན་ཏེ། མདོག་དང་རི་མོ་འགྱུར་ལྡོག་ཡོད་པར་བཤད་ལ། གཞན་ཐོད་པ་མཆོག་རྣམས་ས་སྤར་ཏེ་འགྲོ་བ། ཏོག་ཏོག་གི་སྒྲ་གྲག་པ། མཚན་མོ་མེ་འོད་འཕྲོ་བ་སོགས་འབྱུང་བར་ཡང་གསུངས་སོ། །སྤྱིར་ན་སྔགས་རྫས་གྲུབ་རྟགས་སུ། ར་ག་ཨ་སེའི་འགྲུབ་རྟགས་ཚོད་འཛིན་ལས། རྔ་དང་རྔ་ལྕག་ཕྲེང་བ་ལུས་གོས་ལ། །མེ་འབར་སིར་སྒྲ་དང་བཅས་ཚ་ཚ་འཕྲོ། །ནང་མཆོད་ཁོལ་ཞིང་འཕྱུར་དང་རླངས་པ་འབྱུང་། །དམ་རྫས་རིལ་བུ་ཁོལ་དང་འཕེལ་བ་དང་། །སྒྲུབ་ཁང་ཉེ་ལོགས་འཇའ་ཚོན་ཡང་ཡང་ཟུག །སྒྲུབ་ཁང་ནང་དུ་འཇའ་འམ་འཇའ་གུར་ཕུབ། །རོལ་མོའི་སྒྲ་དང་སྔགས་སྒྲ་ཡང་ཡང་ཐོས། །སྔར་དུ་ཡོད་པའི་སྲོ་ཤིག་ཐམས་ཅད་མེད། །ལྕེ་རུ་ཟ་མ་མྱོང་བའི་རོ་མཆོག་མྱོང་། །རྒས་པར་སེའུ་སྐྱེ་དང་སོ་ལ་ནི། །རིང་བསྲེལ་འཕེལ་སོགས་དངོས་སུ་འབྱུང་བ་དང་། །གཏོར་མ་ཞུ་དང་བདུད་རྩི་འབབ་པ་དང་། །གཏོར་མ་བདུད་རྩི་ཞུ་བ་འགྲུབ་པའི་རྟགས། །གསུངས་སོ། །

༣ གསོན་པའི་ཚེ་ཐོད་པ་བརྟག་ཚུལ། རིགས་མཐོ་ཞིང་ཆོས་ལྡན་གྱི་ཐོད་པ་བཟང་། རིགས་ངན་ལ་སྡིག་ཅན། བུད་མེད་ཀྱི་ཐོད་པ་ངན། སྐྲ་འཇམ་ཞིང་སྙི་ལ། དཔྲལ་བའི་གདོང་ཆེ་ཞིང་སྨེ་བ་ཡོད་པ། སྨིན་མ་མཐུག་ཅིང་ཡ་རྐན་དཀྱིལ་ན་སོ་ལྷག་ཡོད་པ། ལྕེ་རྩེ་སྣ་ལ་རེག་ཅིང་སྐད་ཕྲ་བ། འགྲོ་ཚེ་རྐང་ལག་གཡོན་སྔོན་དོར་བ་སོགས་བཟང་བར་བཤད་དོ། །

གཞན་ཡང་། ཕོ་མོ་གང་ཡིན་ཡང་གསོན་དུས་སུ་མདོག་སྔོ་ནག་དང་། མིག་ཕུག་ཟབ་པ། སོ་སྐྱ་བ། སྐྲ་སེན་ཆེ་ལ་རྩུབ་པ། སྣ་ཆེ་ཞིང་རྩེ་རྣོ་བ། མཆོག་མ་འབུར་བ། སྨིན་མ་འབྲེལ་ཞིང་རིང་བ། མིག་དཀར་ལ་མཁུར་བ་མཐོ་བ། སོ་ཟོར་བ། མཆེ་བ་རིང་བ། མཆུ་གཡོར་བ་སོགས་ཀྱང་བཟང་བར་བཤད་དོ། །

༤ རོ་ཐོད་ལ་བརྟག་ཚུལ། རྒྱ་མོ་ཐུགས་ཀྱི་གཟར་བུའི་རྒྱུད་ལས། ས་གཞི་ལེགས་པར་མཉམ་ཡུལ་ནི། །ཐམས་ཅད་བྱེ་མའི་གཤོང་དག་ཏུ། །སྔགས་པས་བསྒྲུབ་པ་བྱའོ་དེར། །རོ་དེ་འགྱེལ་བ་ལ་ནི་བརྟག །གསུངས་པ་ལྟར། དང་ཐོག་རོ་སྤྱི་བོར་བསྟན་པ་དུམ་བུ་གཅིག་པ་ཡོང་། དེ་བཞིན་དུ་མདུན་བསྟན་པ་དུམ་བུ་གསུམ་པ། གཡས་གཡོན་བསྟན་པ་དུམ་བུ་གཉིས་པའམ་བཞི་བ། ལྟག་པ་བསྟན་པ་ལ་ཐོད་ངན་དུམ་བུ་དྲུག་པ་སོགས་མང་དུ་འབྱུང་བས་སྤང་བྱའོ། །

༥ ཐོད་པ་རྙེད་དུས་ཀྱི་འབྲས་བཤད། དཔྱིད་གསུམ་དང་ཟླ་སྟོད། སྔ་དྲོར་ཐོད་པ་རྙེད་ན། ནད་དང་སྡུག་བསྔལ་ཁ་སྨྲས་ཞི། དབྱར་གསུམ་དང་ཟླ་སྟོད་ཉིན་ཕྱེད་རྙེད་ན་ཟས་ནོར་ལོངས་སྤྱོད་འཕེལ། སྟོན་གསུམ་དང་ཟླ་སྨད་ཕྱི་དྲོར་རྙེད་ན། མི་ནོར་ཟས་གསུམ་དབང་དུ་སྡུད། དགུན་གསུམ་མམ་སྲོད་དང་ནམ་སྟོད་རྙེད་ན་མཐུ་ནུས་དབང་ཐང་རྒྱས་སོ། །

༦ རྙེད་ཡུལ་ལ་བརྟེན་པའི་འབྲས་བཤད། ནགས་ཁྲོད་ནས་རྙེད་ན། རིགས་རྒྱུད་འཕེལ། གྲོང་ཡུལ་ནས་རྙེད་ན་གྲོགས་མང་འབྱུང་། རི་རྩེ་ནས་རྙེད་ན་དབང་ཕྱུག་ལྡན། དུར་ཁྲོད་ནས་རྙེད་ན་ནུས་པ་འཐོབ། བྱ་དང་གཅན་གཟན་གྱི་ཁ་ནས་ལྷུང་ན་རྟག་ཏུ་ཟས་ནོར་ལོངས་སྤྱོད་འཕེལ། ཆུ་ཀླུང་ནས་རྙེད་ན་ཡོན་ཏན་འཕེལ་ལོ། །

༧ ཁ་དོག་དང་དབྱིབས་ཀྱི་འབྲས་བཤད། ཐོད་པ་དཀར་བོ་དང་ཟླུམ་པོས་ནད་དང་སྡུག་བསྔལ་ཞི། སེར་བོ་དང་གྲུ་བཞིས་འཁོར་དང་ལོངས་སྤྱོད་རྒྱས། དམར་བོ་དང་ཟླ་གམ་གྱིས་མི་ནོར་དབང་དུ་སྡུད། ལྗང་དང་ནག་པོ་ཟུར་གསུམ་གྱིས་མངོན་སྤྱོད་འགྲུབ་བོ། །སྡོམ་འབྱུང་ལས། སེར་དང་དེ་བཞིན་སེར་སྐྱ་སྟེ། །ཐལ་བའི་མདོག་དང་མདོག་ངན་དང་། །སྣ་ཚོགས་མདོག་ཏུ་རབ་ཏུ་གྲགས། །ལྷག་པ་དམན་དང་ཐ་མ་སྟེ། །ཞེས་སོ། །

གཞན་ཡང་། ཀུན་འདུས་རིག་པ་ལས། དཀར་བོར་རི་ལྕང་ལོ་ཅན་དང་། །འདི་དག་རྟག་ཏུ་སུས་འཆང་བ། །འདོད་དོན་ཐམས་ཅད་འགྲུབ་པ་སྟེ། །རྒོལ་བ་ཐམས་ཅད་འཇོམས་པར་ནུས། །ཡིད་བཞིན་ནོར་བུ་ཇི་འདྲ་བར། །དེ་ཡི་ཡོན་ཏན་འདི་ལས་བྱུང་། །ཞེས་དང་། ཧེ་རུ་ཀ་སྙིང་རྗེ་རོལ་བ་ལས། དུང་དང་ཀུན་ཟླ་འདྲ་བའི་མདོག། སྣུམ་ལ་མཉམ་དུ་སྡུག་པ་ནི། །སྔགས་རྣམས་ཐམས་ཅད་འགྲུབ་སྟེར་ཡིན། །དབང་ཕྱུག་ཆེན་པོ་ཤེས་པར་བྱ། །ཞེས་དང་། སྦྲང་རྩི་སེར་སྐྱའི་མདོག་འདྲ་བའི། །ཞི་བའི་ཐིག་ལེའི་རྣམ་པར་བརྒྱན། །ཁྱབ་འཇུག་པ་ཡི་སྣོད་ཡིན་ཏེ། །ཟུག་རྔུ་དགྲ་རྣམས་འཇོམས་པར་བྱེད། །ཅེས་དང་། ཡང་ཁལ་ཁ་དམ་རྡོར་གྱིས། བྲམ་ཟེ་ཁ་དོག་དམར། རྒྱལ་རིགས་དཀར་ཞེས་སོགས་ཀྱི་ཐ་སྙད་ཡོད་པ་དང་མཐུན་པར་མཛད་དེ། ཐོད་པ་དཀར་བོ་བྲམ་ཟེའི་རིགས་ཀྱི་ཐོད་པ། དཀར་བོ་དམར་མདངས་ཅན་རྒྱལ་རིགས། སེར་བོ་དང་དམར་སེར་གཉིས་རྗེ་རིགས། ལྗང་ཁུ་དམངས་རིགས། ཐལ་མདོག་སོགས་ནི་གདོལ་བའི་རིགས་ཀྱི་ཐོད་པར་གསུངས་ཤིང་། བྲམ་ཟེ་དང་རྒྱལ་རིགས་རབ། རྗེ་རིགས་འབྲིང་། ལྷག་གཉིས་ཐ་མ་ཡིན་པས་སྤང་བྱའོ། །ལས་སོ་སོ་ལ་བསྔགས་པའི་ཁ་དོག་ཀྱང་། ཁ་དོག་དཀར་བོས་སྔགས་ཀྱི་དངོས་གྲུབ་འགྲུབ། སེར་བོ་དབྱིབས་ཟླུམ་པོས་ནོར་སོགས་རྒྱས་པའི་ལས་འགྲུབ། དམར་བོ་འམ་ཐིག་ལེ་དམར་བོས་མཚན་པ་ནི། དབང་དང་འགུག་པའི་ལས་འགྲུབ། དེ་དག་ཀྱང་མདོག་སྣུམ་ཞིང་ཡིད་དུ་འོང་བ་མཁྲེགས་ཤིང་ལྗིད་པ་ལེགས། བ་ལང་ཁའི་རྣམ་པ་དང་འདྲ་ལ་ཤིན་ཏུ་ཕྲ་ཞིང་ཐིག་ལེ་དཀར་བོས་མཚན་པ་ནི་བསད་ཚད་དབྱེ་བ་སོགས་ལ་བསྔགས་པ་དང་། གཏོར་སྣོད་ལ་ཡང་ལས་དང་མཐུན་པའི་ཐོད་པ་མཆོག་ཏུ་བསྔགས་པར་གསུངས་སོ། །དེ་ཡང་མཁྲིས་ནད་ཅན་གྱི་མདོག་སེར་བོ་དང་གསེར་མདོག དུག་སོགས་ཀྱིས་སྔོན་པོ་དང་གཡུ་མདོག མཛེ་ཐོད་སྨུག་པོ་དང་མཆོང་མདོག་ངན། དེ་དག་མ་ནོར་བར་གཅེས་སོ། །སྐྱ་གོག དམར་གོག སེར་གོག་སོགས་སྣུམ་མདངས་མེད་པ་དང་། སྔོ་སྐྱ། ས་འོག་ཏུ་སོང་བ། མི་སྡུག་པའི་ར་རི་ཡོད་པ། རྩུབ་ལ་མདངས་མེད་པ། གསོབ་ཞིང་ཡང་བ་སོགས་སྤང་བྱའོ། །

དབྱིབས་ཀྱི་དབང་དུ་བཏང་ན། ཧེ་རུ་ཀ་སྙིང་རོལ་ལས། དུང་སྔོ་བ་དག་སྡུག་བསྔལ་ཏེ། །བྱ་རོག་རྗེས་ནི་འཐབ་རྩོད་འགྱུར། །ཉིས་རིམ་གྱིས་ནི་གསོད་པར་འགྱུར། །གླང་བོའི་རྒྱབ་ནི་ནད་དུ་འགྱུར། །ཞེས་དང་། སྡོམ་འབྱུང་ལས། ཁྭ་ཡི་རྐང་འདྲས་རྩོད་པར་འགྱུར། །གཤོང་བུ་གཉིས་པས་རྒུད་པར་འགྱུར། །ཞེས་སོ། །དེ་ལས་གཞན་ཟླུམ་པོ་ཞི་བ། གྲུ་བཞི་རྒྱས་པ། ཟླ་གམ་དབང་། ཟུར་གསུམ་དྲག་པོ། ཟུར་བརྒྱད་པ་མཆོག་གི་ལས་ཀྱི་ཐོད་པ་སྟེ། རིམ་བཞིན་སངས་རྒྱས་སྤྱན་ལ་སོགས་པའི་ཕྱག་མཚན་ནོ། །དབྱིབས་ངན་པ་ནི། ཡོན་པོ་དང་གྲོག་སྐེད་ཁྱུང་མཆུ་དང་ཟ་ལུང་མེད་པ། ཆ་མི་མཉམ་པ་དང་། ཡང་། ཟ་ར་ཚག་འདྲ་ན་བསོད་ནམས་ཀྱི་རྐང་ཚུགས། རང་སའི་ཕྱོགས་སུ་ཁ་གྱེད་ན་བསོད་ནམས་རྒྱ་ཆེ། རིགས་རྒྱུད་ལ་བྱང་ཆུབ་སེམས་དཔའ་སྐྱེ། ནང་དུ་རུབ་ན་བསོད་ནམས་བུལ། གཞན་དོན་མི་འགྲུབ། ཐམས་ཅད་གྱེད་ན་བསོད་ནམས་འབྲིང་། ཁ་ཁྱེར་ཕྱིར་གྱེད་ཅིང་མཐུག་པ། དགྲ་ས་སྲབ་ཅིང་ནང་དུ་རུབ་པ་བཟང་། རྣ་ལྟག་ཏུ་རུས་ལྷན་བྱུང་ན་གཞན་གྱིས་མགོ་འདོགས། དེ་ཡང་རང་སར་རང་འདོགས། དགྲ་སར་དགྲ་འདོགས། མཚམས་སུ་ཡོད་ན་གཉིས་ཀ་ལ་འདོགས། རང་སའི་ཁ་ཁྱེར་ལ་བུག་པ་མང་ན་འཁོར་གྱི་ནང་ནས་དགྲ་ལྡང་ཞིང་བོར་སྟོར་འོང་། བུ་ཚ་བུད་མེད་འཁོར་འདབ་ཀྱི་སར་བྱུང་ནའང་དེ་དག་ངན། དགྲ་སར་དགྲ་ལ་འོང་། ཁ་ཁྱེར་གྱི་སྟེང་རི་མོ་གཞུ་བརྡུང་བ་འདྲ་ན་རླུང་འདུ་བའོ། །གཞན་ཡང་། བདེ་མཆོག་སྡོམ་འབྱུང་སོགས་ལས་ཀྱང་། མདོག་དབྱིབས་དང་ཁྱད་ནུས་སོགས་མང་དུ་གསུངས་ཡོད་ཀྱང་འདིར་མ་སྤྲོས་སོ། །

༨ ཐོད་པར་གྱི་མགོ་གང་བསྟན་གྱི་འབྲས་བཤད། ཤར་སོགས་ཕྱོགས་བཞི་ལ་བལྟས་ན་རིམ་བཞིན་ལས་བཞིའི་དངོས་གྲུབ་འགྲུབ། མཚམས་བཞིར་བལྟས་ན་དྲག་པོ་འགྲུབ། གན་རྐྱལ་གྱིས་དབང་ཐང་ལྡན། ཁ་བུབ་ཀྱིས་ནད་མེད་ལོངས་སྤྱོད་འབྱུང་། ལུས་མེད་མགོ་བོ་གཅིག་པུ་རྙེད་ན། དགྲ་མེད་ཆོས་ཀྱིས་བདེ་བར་འཚོའོ། །

༩ དུམ་བུའི་གྲངས་ཀྱི་འབྲས་བཤད། ཐོད་པ་གླིང་གཅིག་ཅན་ས་ལ་དབང་། གཉིས་ཅན་འདོད་ཁམས་ལ་དབང་། གསུམ་ཅན་ནོར་ལ་དབང་། བཞི་ཅན་ཆོས་ལ་དབང་། ལྔ་ཅན་རིགས་རྒྱུད་འཕེལ་ལ། ཡོན་ཏན་མེད་ཀྱང་སློབ་དཔོན་བྱེད། དུམ་བུ་དྲུག་ལས་མང་བ་སོགས་རང་གཞན་འཕུང་བྱེད་དུ་གསུངས་པ་དང་། ཧེ་རུ་ཀ་སྙིང་རྗེ་རོལ་བ་ལས། དུམ་བུ་གཅིག་པ་ས་ལ་དབང་། །གཉིས་པ་དེ་ནི་རྒྱལ་ཕྲན་གྱུར། །གསུམ་པ་དེ་ཡང་ནོར་ལ་དབང་། །བཞི་བ་དེ་ཡང་སྔགས་འགྲུབ་འགྱུར། །ལྔ་བ་དེ་ཡང་ཆོས་ཀྱང་འགྲུབ། །དྲུག་པ་དེ་ནི་སློང་བ་ཡིན། །བདུན་པ་དེ་ནི་བརྟུལ་ཞུགས་སོ། །བརྒྱད་པ་ཡོངས་སུ་སྤང་བར་བྱ། །ཞེས་དང་། བདེ་མཆོག་སྡོམ་འབྱུང་ལས། དུམ་བུ་གཅིག་པ་གནས་ལ་དབང་། །དུམ་བུ་གཉིས་པ་དཀྱིལ་འཁོར་དབང་། །དུམ་གསུམ་སྒྲུབ་པོའི་དངོས་གྲུབ་འགྱུར། །དུམ་བུ་བཞི་བས་སྔགས་དངོས་འགྲུབ། །ལྔ་བ་ཡིས་ནི་ཞི་དང་རྒྱས། །དུམ་དྲུག་སློང་མོ་རྙེད་པར་ཤེས། །དུམ་བུ་བདུན་པས་དབང་དུ་བྱེད། །དངོས་གྲུབ་འགྲུབ་པ་འབྲས་མེད་ཕྱིར། །དེ་བཞིན་དུམ་བུ་བརྒྱད་པ་སྤང་། །ཞེས་ཀྱང་གསུངས་སོ། །

ཡང་། ཁལ་ཁ་དམ་རྡོར་གྱིས། དུམ་བུ་གཅིག་པས་ཡུལ་ཉེར་བཞིར་འགྲོ་བ་ལ་དབང་བ་དང་། ཡང་། འགྲེལ་བར་གནས་ལ་སོགས་པར་འགྲོ་བ་ལ་མི་སྐྱོ་བར་བཤད་པ་དང་། སྨོན་འགྲོ་མར་བ་ལ་སོགས་པའི་ལོ་ཙཱ་བ་ཁ་ཅིག དངོས་གྲུབ་སྒྲུབ་པའི་གནས་སུ་གྱུར་བ་དང་། དུམ་བུ་གཉིས་པས་འགྲེལ་བར་མང་བོ་མཆོད་པར་འགྱུར་བ་དང་། ལོ་ཙཱ་བ་དེ་དག་དཀྱིལ་འཁོར་གྱི་བདག་པོ་ལ་དབང་བར་བཤད། གསུམ་པས་གང་འདོད་གྱི་དངོས་གྲུབ་ཕུན་སུམ་ཚོགས་པར་བྱེད། བཞི་བས་སྔགས་ཀྱི་དངོས་གྲུབ་འགྲུབ། ལྔ་བས་ཞི་རྒྱས་ཀྱི་ལས་འགྲུབ། དྲུག་པས་སློང་མོ་རྙེད་པར་འགྱུར། བདུན་པས་དབང་གི་ལས་འགྲུབ། བརྒྱད་པས་ཞི་སོགས་ཀྱི་ལས་གཞན་མི་འགྲུབ་ཅིང་། དྲག་པོའི་ལས་ལ་བླང་བར་བྱ་ལ། དེ་ལས་མང་བ་རྣམས་ནི་ངན་པར་གསུངས་ཤིང་། དུམ་གྲངས་སུ་མ་ཟད་དབྱིབས་དང་ཁ་དོག་གི་མཚན་མ་ངན་པ་ཐམས་ཅད་དྲག་པོའི་ལས་ལ་ཅི་རིགས་པར་སྦྱར་བར་གསུངས་སོ། །

ཡང་། འཇུ་མི་ཕམ་གྱི་ཐོད་བརྟག་ནོར་བུ་ལག་སྟེར་ལས། དུམ་གཅིག་ཆོས་ཐོད། གཉིས་པ་ནོར། གསུམ་པ་མི། བཞི་བ་འབྲུ། ལྔ་བ་ཕྱུགས་འཕེལ་བའི་ཐོད་པར་བཤད། དེ་ཡང་དུམ་བུ་གཅིག་པ་ལ། སྲུབ་གཏན་ནས་མེད་པ་བྱ་མོའི་སྒོ་ང་ལྟ་བུ་དེ་ནི་ཐོད་པ་ཇ་རིལ་ཞེས་ཤིན་ཏུ་བཟང་། སྲུབ་མངོན་ཀྱང་དུམ་བུ་རྣམས་གཅིག་ཏུ་འབྲེལ་བ་ལས་སོ་སོར་མ་ཆད་པ་དེ་ཡང་བཟང་། དུམ་བུ་གཉིས་པ་ལ་བཟང་ངན་གཉིས་ཏེ། གླིང་ལ་ཆེ་ཆུང་བྱུང་ནས་མདུན་ངོས་ཆེ་བ་བྱུང་ན་བཟང་། མཉམ་པར་གཞུང་དུ་སྲུབ་བྱུང་ན་གོང་ལས་གཞན་པ་སྟེ་ངན་ནོ། །དུམ་གསུམ་ལ་རིགས་གསུམ་སྟེ། ལྟག་པ་དང་མཆོག་མ་གཡས་གཡོན་དག་ཏུ་སྲུབ་བྱུང་ན་བཟང་། གླིང་དཀྱིལ་དང་མཚོག་མ་ལྟག་པ་དང་གསུམ་དུ་སྲུབ་བྱུང་ཡང་བཟང་། རྣ་ལྷན་གཉིས་དང་དཀྱིལ་དུ་བྱུང་བའང་བཟང་ངོ་། །གླིང་བཞི་བ་ལ་རིགས་བཞི་སྟེ། །མཐའ་བཞི་བཞི་ཆོད་སྤྲ་ཆོད་བཟང་། །གླིང་ལྔ་བ་ལ་རིགས་ལྔ་སྟེ། །ལྔ་ཚོམ་ལྔ་འདུས་ལྔ་གཤིབ་བཟང་། །སུམ་གཉིས་དང་ནི་ཕྱོགས་ཆོད་ངན། །དུམ་གྲངས་ཕྱེ་ཚུལ་ནི། ལྟག་པ་དང་རྣ་ལྷན་གཉིས་པོའི་དུམ་བུ་མི་བརྩི་བར་ལྷག་མའི་རུས་པ་ལ་ཐོད་པའི་སྲུབ་ཀྱིས་བཅད་ནས་རུས་པ་ཕན་ཚུན་འབྲེལ་མེད་དུམ་གྲངས་དུ་རུ་མངོན་པར་བརྩི་དགོས་ཏེ། ཡུངས་འབྲུ་ཙམ་སོ་སོར་ཆད་པའམ། འཇག་མ་ཙམ་གྱིས་འབྲེལ་ཀྱང་གཅིག་ཏུ་བརྩིའོ། །

༡༠ ཐོད་པའི་རི་མོ་ལ་བརྟག་པ། ཧེ་རུ་ཀ་སྙིང་རྗེ་རོལ་བ་ལས། རི་མོ་རྡོ་རྗེ་འཁོར་ལོ་དང་། །མཆོད་རྟེན་དང་ནི་རིན་པོ་ཆེ། །པདྨ་དང་ནི་ལྗོན་ཤིང་དང་། །དབུས་སུ་བུ་ག་གཉིས་ཡོད་པ། །མདུན་ན་གཤོང་བུ་གསུམ་དང་གཉིས། །གང་དག་རྡོ་རྗེ་མཚན་ཡོད་པ། །དཔལ་དང་ལྡན་པའི་སྣོད་གནས་སོ། །ཞེས་དང་། བདེ་མཆོག་སྡོམ་འབྱུང་ལས། དེ་བཞིན་གླང་བོའི་རྒྱབ་ཀྱི་ནང་། །དབུས་ཀྱི་གནས་སུ་གཞོང་བུ་བཞི། །འདོད་འཇོའི་བར་ནི་བལྟ་བར་བྱ། །མདུན་ཕྱོགས་སུ་ནི་གཤོང་བུ་གཉིས། །ཡིད་བཞིན་ནོར་བུ་ཞེས་བྱར་བཤད། །ཅེས་དང་། གསང་བ་སྒྲུབ་ཐབས་མཚན་ཉིད་ནི། །ཡན་ལག་ཆེས་ཕྲ་མང་བའི་བདག། དཔག་བསམ་ཤིང་ནི་ཡོད་གྱུར་ན། །འདོད་པའི་འབྲས་བུ་འཐོབ་འགྱུར་ཏེ། །སྔགས་པ་དེ་ལ་ཐེ་ཚོམ་མེད། །ཅེས་སོ། །དཔག་བསམ་ཤིང་མིན་ཀྱང་ཡལ་ག་ལོ་མ་རྒྱས་པ་དབྱར་ཤིང་ཞེས་བཟང་། དེ་ལས་ལྡོག་ན་དགུན་ཤིང་ཟེར་ཏེ་ཞན། ཡལ་ག་ལོ་མ་སོགས་ཀྱི་རྩེ་མོ་རང་སར་སྤུངས་པའི་རི་མོ་ཡོད་ན་དཔལ་འབྱོར་འཕེལ་ལོ། །གཞན་ཡང་། ཟ་ལུང་དང་སོག་སྣ་བརྟག་པ་སོགས་ཀྱང་ཡོད་དོ། །

༡༡ གནས་མལ་དགུ་ལ་བརྟག་པ། རང་ས། ལྷ་ས། རྡོ་རྗེ་སློབ་དཔོན་གྱི་ས། སློབ་མའི་ས། ཡོན་བདག་གི་ས། གཟུངས་མའི་ས། ཚེ་འདས་ཀྱི་ས། དུར་ས། དགྲ་ས་སྟེ་དགུ་ལ་གནས་མལ་དགུ་ཟེར་ཞིང་། ཐོད་པའི་ཕྱི་ནང་རུས་འབུར་བྱུང་བ་ལ་རུས་ཁྲ་ཟེར་ལ། རང་སར་བྱུང་ན་ཤིན་ཏུ་བཟང་། ཐོད་ནང་གི་དབུས་སུ་མཛུབ་རྗེས་ལྟ་བུ་བཞི་བྱུང་ན་འདོད་འཇོ་བ་ཡི་ནུ་རྗེས་ཟེར་ཏེ་ཤིན་ཏུ་བཟང་། མདུན་ངོས་སུ་གཤོང་བུ་གཉིས་བྱུང་ན་ཡིད་བཞིན་ནོར་བུ་ཡིན་ཏེ་བཟང་། ཐོད་དབུས་སུ་གཤོང་ནར་གཅིག་གམ་གཉིས་མདུན་ཕྱོགས་སུ་དོད་ན་རྣལ་འབྱོར་བའི་ཟ་ལམ་ཡིན་ཏེ་བཟང་། འདི་རྣམས་འཆང་བས་ཟས་ནོར་ལོངས་སྤྱོད་འཕེལ། མདུན་དང་དཔྲལ་བའི་ནང་གི་རུས་འབུར་དེ་ལ་ཁྱུང་མཆུ་ཟེར། དེ་འབུར་ལ་སྣ་རིང་བོར་དོད་ན་རྣལ་འབྱོར་སྲོག་གི་ཀ་བ་ཡིན་ཏེ་བཟང་། ཡང་། མཛུབ་མོ་བཀལ་གཏུབ་ཙམ་བྱུང་ན་ངན་པ་དགུ་ཐུབ་ཟེར་ལ། སྐྱོན་བརྒྱ་ཡོན་ཏན་གཅིག་གིས་ཆོམ་ཞེས་ཤིན་ཏུ་བཟང་། ཁྱུང་མཆུ་མཐུག་ན་བསོད་ནམས་ཆེ། རྣོ་ན་ཤེས་རབ་རྣོ། རྒྱུན་རིང་ན་བསོད་ནམས་རྒྱུན་རིང་། རང་སར་ཐིག་ལེ་ཟླུམ་པོས་བསྐོར་ན་སྐྱིད་ཀྱི་ཉི་མ་ཟེར་ཏེ་བཟང་། ཉི་མ་འཁྱིམ་པ་ལྟ་བུ་བྱུང་ན་ཞག་གི་ཆུ་མིག་ཡིན་ཏེ་བཟང་། གཞན་བཀྲ་ཤིས་ཀྱི་རྫས་དང་། ནས་འབྲུ་དང་། ཁབ་མགོ་ལྟ་བུ་གཤུང་འབུར་གང་རུང་བྱུང་ན་ལེགས། རྡོ་རྗེ་སློབ་དཔོན་གྱི་སར་རིགས་ལྔའི་ཕྱག་མཚན་དང་། སློབ་མའི་སར་མཆོད་པ་རྣམ་ལྔ། ཚེ་འདས་སར་རིགས་དྲུག་གི་ས་བོན། ཡོན་བདག་གི་སར་གླིང་བཞིའི་རི་མོ། གཟུངས་མའི་སར་བཀྲ་ཤིས་རྟགས་བརྒྱད། དུར་སར་རི་མོ་དཀར་བོ་ཁབ་མགོ་ཙམ་འབུར་དོད་དེ་ཚེ་ལམ་བྱུང་ན་བཟང་། དགྲ་སར་ཁུང་སོགས་ངན་པ་བྱུང་ཡང་བཟང་། རང་སར་འཇམ་པ་དང་དགྲ་སར་རྩུབ་ན་ལེགས་སོ། །

༡༢ བུ་ག་བརྟག་ཚུལ། བདེ་མཆོག་སྡོམ་འབྱུང་ལས། བུ་ག་གཅིག་པ་བྲམ་ཟེ་འགྱུར། །བུ་ག་གཉིས་པ་རྒྱལ་རིགས་འགྱུར། །བུ་ག་གསུམ་པ་རྗེའུ་རིགས་ཤེས། །བུ་ག་བཞི་བ་དམངས་རིགས་རྣམས། །ཞེས་དང་། བདུད་རྩི་བམ་པོ་བརྒྱད་པ་ལས། ཡང་ན་བྷཎྡ་དཔལ་ལྡན་རྫོགས། །ཟླུམ་ཞིང་འཁྱིལ་བ་པདྨ་འདྲ། །དབུས་ན་བུ་ག་གཅིག་ཡོད་པ། །ཞེས་པ་ལྟར། བུག་གཅིག་ཅན་ནི་རྒྱུད་དུ་མར་ཤིན་ཏུ་ལེགས་པར་གསུངས་སོ། །

དེ་ཡང་བུག་པ་གཅིག་པ་ནི་ཚངས་བུག་ཡིན་ལ། དེ་ལས་མང་བའི་བུ་ག་ནི་རྩའི་སྣེ་མོས་ཐོད་པ་ཕུག་ནས་ཕྱིར་འཐོན་པ་འམ་ཐོན་ལ་ཁད་པའི་བུག་པ་ཡོད་པ་དང་། བུད་མེད་ཀྱི་ཐོད་པ་ལ་ཚངས་བུག་མེད་ཅིང་། ནལ་བུའི་ཐོད་པ་ནི་ཐོད་སྲུབས་སོག་སྣའི་ཐད་ནས་དཔྲལ་བའི་གཞུང་ན་ཡོད་པའོ། །བུ་སྟོན་གྱིས་སམ་ཊིཀ་ལས། རིགས་ངན་རྣ་ལྟག་ཏུ། མ་ནིང་ལ་ལྟག་པར་བུ་ག་ཡོད་ཅིང་། དཔྲལ་བ་དང་རྣ་རྩར་མུ་ཏིག་གི་ཕྲེང་བ་འདྲ་བ་ནི་སྔགས་པའི་ཐོད་པར་གསུངས། བུད་མེད་ཀྱི་ཐོད་པ་སོགས་རང་གི་དངོས་གྲུབ་སྒྲུབ་པ་ལ་སྤང་བྱར་གསུངས་ཀྱི། ལས་སྦྱོར་ལ་ངེས་པར་དགོས་པ་རྒྱུད་སྡེ་རྣམས་ལས་གསུངས་སོ། །

༡༣ སོ་ལ་བརྟག་ཚུལ། སོ་ལྗང་ཁུ་དང་། སེར་བོ་དང་། སྔོ་བ་དང་། ལོགས་སུ་སྐྱེས་པ་དང་། སོ་མེད་པའམ་ཉམས་པ་རྣམས་ངན་ལ། དེ་ཡང་མགོ་བོ་ཚང་བ་ལ་རྟོག་པའི་དབང་དུ་བྱས་པའོ། །

༡༤ ལ་ཉེ་ལ་བརྟག་པ་ནི། བདེ་མཆོག་སྡོམ་འབྱུང་ལས། ས་གཞི་མཉམ་པའི་ཡུལ་རྣམས་སམ། །ཐང་ངམ་བྱེ་མའི་གཤོང་དག་ཏུ། །སྔགས་པས་དེ་ནི་བསྒྲུབས་བྱས་ལ། །དེ་ཡི་ལྷུང་བ་བརྟག་པར་བྱ། །ལྷོ་བལྟས་བྲམ་ཟེ་འཇིགས་པར་འགྱུར། །བདེན་བྲལ་ལྷུང་བའི་བ་ལང་དང་། །རིགས་མེད་པ་དང་རིགས་ངན་འཇིགས། །རླུང་བལྟས་སྔགས་ནི་འཇིགས་པ་སྟེ། །བྱང་དུ་བལྟས་ན་ཕྱུག་པོར་འགྱུར། །དབང་ལྡན་སྔགས་ཀྱི་དངོས་གྲུབ་སྟེ། །བརྟུལ་ཞུགས་རྒྱུན་ནི་ཉམས་པ་མེད། །མེར་བལྟས་ཉེ་བར་འཕྲོག་པ་སྟེ། །དེ་བཞིན་འོག་བལྟས་ཆོམ་རྐུན་མའོ། །སྟེང་བལྟས་གནས་པས་བུད་མེད་འཇོམས། །ལོགས་སུ་ལྷུང་བའི་གཏུམ་མོ་སྟེ། །སྣོད་ཀྱི་མཚན་ཉིད་རྣམ་ཤེས་བྱ། །ཞེས་དང་། ཧེ་རུ་ཀ་སྙིང་རྗེ་རོལ་བ་ལས། ཤིན་ཏུ་མཉམ་པའི་ས་ཕྱོགས་སམ། །སྙི་བ་འམ་ཡང་ན་དུལ་བའི་སར། །སྔགས་ཀྱིས་བཏབ་སྟེ་གནམ་དུ་བསྐྱུར། །ལྷུང་བའི་མཚན་ཉིད་འདི་རིག་བྱ། །ལྷོ་ཕྱོགས་ཁ་བལྟས་བྲམ་ཟེ་མེད། །སྲིན་པོའི་ཕྱོགས་བལྟས་གླང་བོ་སྙོལ། །ནུབ་ཀྱི་ཕྱོགས་བལྟས་རིགས་ངན་ཏེ། །རླུང་གི་ཕྱོགས་བལྟས་གསང་མི་ཐུབ། །བྱང་གི་ཕྱོགས་བལྟས་ཕྱུག་པོར་འགྱུར། །དབང་ལྡན་ཕྱོགས་བལྟས་སྔགས་འགྲུབ་སྟེར། །ཤར་དུ་བལྟས་ན་བདག་ཉིད་གསོད། །མེ་ཡི་ཕྱོགས་བལྟས་ཤེའུ་ཤིང་མེད། །འོག་ཏུ་བལྟས་ན་རྐུན་པོ་སྤྱོད། །སྟེང་དུ་བལྟས་ན་བུད་མེད་གསོད། །གློར་བལྟས་དེ་ནི་རིགས་ངན་ཏེ། །སྣོད་ཀྱི་མཚན་ཉིད་འདི་རྣམས་སོ། །ཞེས་སོ། །

༡༥ ཐོད་པ་ཆེ་ཆུང་གི་ཚད། མཐོ་གང་ལས་ཆེ་བའི་ཐོད་པ་བྱུང་ན་ཚད་ལས་འདས་ཏེ་དཀོན། མཐོ་གང་རབ། མཛུབ་གང་འབྲིང་། མཁྱིད་གང་ཐ་མ་ཡིན། དེ་གསུམ་གང་ཡིན་རུང་མཚན་ཉིད་ལྡན་ན་དངོས་གྲུབ་འབྱུང་། མཚན་ལྡན་ཐོད་པར་ཆུར་སོར་བཅུ་བཞི། ཞེང་སོར་བདུན་ཡིན་ནོ། །

༡༦ ཐོད་པའི་མཚོན་དོན། རྗེ་བཙུན་མི་ལ་རས་པས། ང་རྣལ་འབྱོར་ལག་ན་ཡོད་པ་ཡི། །ཟས་སྣོད་མཚན་ལྡན་ཐོད་པ་འདི། །རིགས་དྲུག་སྐྱེས་བུའི་ཡ་ཐོད་ཡིན། །ལྟ་བ་ཡས་འབུབ་མཚོན་པའི་ཕྱིར། །གླང་ཆེན་དར་གྱི་ཐོག་ནས་ཕུབས། །སྤྱོད་པ་མས་ཡར་འཛེག་པའི་ཕྱིར། །མ་ཐོད་ཁྱོགས་ཀྱིས་གྱེན་ལ་བཏེགས། །སྒོམ་པ་ཉམས་སུ་ལེན་པའི་ཕྱིར། །བར་ན་ཀླད་དཀར་གཡོ་མེད་འཁྱིལ། །དེ་ལྟར་ལྟ་སྤྱོད་སྒོམ་གསུམ་གྱིས། །འཁོར་བའི་གཞི་རྩ་གཅོད་པའི་ཕྱིར། །སྐྲ་མཚམས་ཚད་ལྡན་མཚམས་ནས་བཅད། །སྒྲིབ་གཉིས་བག་ཆགས་སྦྱངས་པའི་ཕྱིར། །ཤ་ལྤགས་རུས་པའི་མཚམས་ནས་བཤུས། །ཉེས་ལྟུང་དྲི་མས་མ་གོས་ཕྱིར། །རུས་པ་དཀར་བོ་དུང་གི་མདོག། གསང་སྔགས་ཟབ་དོན་བདུད་རྩིའི་རྒྱུན། །འཛེད་ཕྱིར་ཁ་ནི་གྱེན་དུ་བསྟན། །དམ་ཚིག་སྡོམ་གསུམ་ཤོར་དོགས་ནས། །རྣལ་འབྱོར་ལག་པས་དམ་དུ་བཟུང་། །ད་དུང་ཉོན་དང་དྲི་རྟོགས་མཁན། །ཐོད་པ་དུམ་བུ་གཅིག་ཡིན་ན། །ཆོས་སྐུ་རོ་གཅིག་མཚོན་པའི་བརྡ། །གལ་ཏེ་དུམ་བུ་གསུམ་ཡིན་ན། །སྐུ་གསུམ་དབྱེར་མེད་མཚོན་པའི་བརྡ། །ཚངས་པའི་བུ་ག་ཡོད་པ་འདི། །ཆོས་སྐུའི་ངང་དུ་འགྲོ་བའི་བརྡ། །ལྗོན་ཤིང་རྒྱས་པའི་རི་མོ་འདི། །སྟུག་པོ་བཀོད་པའི་ཞིང་ཁམས་སུ། །ལོངས་སྤྱོད་སྐུ་རུ་བཞེངས་པའི་བརྡ། །རྒྱ་སྲུབ་རི་མོ་འདྲ་བ་འདི། །སྣ་ཚོགས་སྤྲུལ་སྐུར་འགྱུར་བའི་བརྡ། །རང་སར་ཟུར་བུ་བྱུང་བ་འདི། །ཉོན་མོངས་དགྲ་ལས་རྒྱལ་བའི་བརྡ། །དགྲ་སར་ཟུར་བུ་མེད་པ་དེ། །བདག་འཛིན་དགྲ་བོ་ཐུལ་བའི་བརྡ། །མར་ལ་མཐེབ་མོས་མནན་འདྲ་བའི། །མཐིལ་ན་འདོད་འཇོའི་ནུ་མ་བཞི། །དགོས་འདོད་ཆོས་ཀུན་འབྱུང་བའི་བརྡ། །རྩ་རོ་སྲིན་ཁུང་མེད་པ་འདི། །བར་ཆད་བདུད་ལས་རྒྱལ་བའི་བརྡ། །ཕྱི་ཡི་རྣ་ལྟག་གཉིས་ཀྱི་སྟེང་། །གླང་ཆེན་སྒང་རྒྱབ་འདུག་པ་དེ། །ཐེག་ཆེན་ཁུར་དུ་འཁུར་བའི་བརྡ། །ལྷ་བ་ཅུང་ཟད་འདུག་པ་དེ། །རྣམ་རྟོག་ཕྲ་མོ་འཕྲོ་བའི་བརྡ། །དབྱིབས་ནི་པད་འདབ་འདྲ་བ་འདི། །འཁོར་བ་ཆགས་པ་མེད་པའི་བརྡ། །ཁ་དོག་སྣུམ་ཞིང་འཚེར་བ་འདི། །ཏིང་འཛིན་དྲོད་རྟགས་ལྡན་པའི་བརྡ། །རྣལ་འབྱོར་ལག་ན་བཟུང་བ་འདི། །ཕྱི་རུ་བསོད་སྙོམས་ཟས་ལ་སྤྱོད། །ནང་དུ་བསམ་གཏན་ཟས་ལ་སྤྱོད། །རྣམ་པ་ཀུན་ཏུ་ཟག་མེད་ཀྱི། །བདུད་རྩིས་རྟག་ཏུ་འཚོ་བའི་རྟགས། །དེ་རྣམས་ཕྱི་ཡི་བརྡ་མཚོན་ཙམ། །ཞེས་སོ། །

༡༧ ནང་མཆོད་ཀྱི་རཀྟའི་ཡན་ལག་སོ་ལྔ། ༡ མཚལ། ༢ ལི་ཁྲི། ༣ བཙག ༤ སྡོང་རོས། ༥ རྡོ་དྲེག་སྟེ་སའི་རཀྟ་ལྔ། ༦ ཙན་དན་དམར་བོ། ༧ སེང་ལྡེང་། ༨ མཛོ་མོ་ཤིང་། ༩ གོ་ཤིར་ཥ། ༡༠ བཤེར་ཤིང་དམར་བོ་སྟེ་ཤིང་གི་རཀྟ་ལྔ། གོ་ཤི་ཥ་དང་བཤེར་ཤིང་མ་རྙེད་ན། སྟར་བུ་དང་ཀནྟ་རི་དམར་བོ་རུང་བར་བཤད། ༡༡ པདྨ་རཱ་ག ༡༢ བྱུ་རུ། ༡༣ མཚུར་དམར། ༡༤ མེ་ཤེལ། ༡༥ རྡོ་རྒྱུས་དམར་བོ་འམ་སྦལ་རྒྱབ་གང་རུང་སྟེ་རྡོའི་རཀྟ་ལྔ། ༡༦ ཧ་ལོ། ༡༧ ཁུག་ཆུང་། ༡༨ གླང་སྣ། ༡༩ སེ་རྒོད། ༢༠ ལུག་རུ་དམར་བོ་སྟེ་མེ་ཏོག་གི་རཀྟ་ལྔ། ༢༡ ར་མོ་ཤག ༢༢ ཉེ་ཤིང་། ༢༣ སྙ་ལོ། ༢༤ གྲོ་མ། ༢༥ སྙུག་མ་དམར་བོ་སྟེ་རྩྭའི་རཀྟ་ལྔ། ཕྱི་མ་དེ་མདོ་ཁམས་ཀློང་ཐང་སོགས་སུ་སྐྱེས་པའི་ཁྲག་སྙུག་ཟེར་བ་དེའོ། །༢༦ རྒུན་འབྲུམ། ༢༧ རམ་བུ། ༢༨ ཁ་སུར། ༢༩ བ་མཁལ་སྨུག་པོ། ༣༠ སྐྱུ་རུ་ར་སྟེ་འབྲུའི་རཀྟ་ལྔ། ༣༡ རྒྱ་སྐྱེགས། ༣༢ སིན་དྷུ་ར། ༣༣ འབྲི་མོག ༣༤ བུ་རམ། ༣༥ བྲག་ཞུན་སྟེ་རྩིའི་རཀྟ་ལྔ་རྣམས་བསྡོམས་པས་རཀྟ་སོ་ལྔ་བོ་འདི་ནི་རྩ་བ་ཡིན། དེའི་ཡན་ལག་ཏུ་རྫས་སོགས་གང་དམར་གྱི་རིགས་སུ་གྱུར་བ་ཐམས་ཅད་དང་། རིན་པོ་ཆེ་ཟངས་སོགས་རྡོའི་རིགས་དམར་བོ་མང་བོ། ཨུཏླལ་དམར་བོ་དང་ཤང་དྲིལ་དམར་བོ་སོགས་མེ་ཏོག་དམར་བོ་མང་བོ། གཙང་དམར་དང་ས་འདྲེས་དམར་བོའི་རིགས། སྣ་མའི་འབྲས་བུ་དང་འོལ་མོ་སེ་སོགས་འབྲས་བུ་དམར་བོའི་རིགས། འབྲས་དམར་དང་ཁྲེ་དམར་སོགས་འབྲུའི་རིགས། གཞན་ཡང་། སྲོག་ཆགས་ལས་བྱུང་བའི་རཀྟའི་རིགས་མཐའ་དག་གོ།

༡༨ ནང་གི་དཔྱད་པ། མདུན་རང་ས། གཡས་མི་ས། གཡོན་ནོར་ས། རྒྱབ་ཕྱི་ས་སྟེ། ནང་ངོས་འཇམ་པ་འམ། མར་ལ་མཐེབ་བཅགས་བྱས་པ་ལྟ་བུ་བཟང་། ཤིང་ལོ་རབ་ཏུ་རྒྱས་ཤིང་ཡན་ལག་རགས་པ་ཡལ་ག་རང་སར་འཁྱིལ་ཞིང་། འབྲས་ལྟ་བུ་ཕྲུམ་ཕྲུམ་མེ་ཏོག་ལྟ་བུ་ཤར་ན་བཟང་། ཐོད་སྤྲི་མ་རལ་བ་སོགས་བཟང་ངོ་། །

༡༩ ཐོད་པའི་དཔྱད་འབྲས། མདོར་ན་ཐོད་པ་འཇམ་ན་མི་ཁ་བྱམས། བརྗིད་ཆེ་ན་བསོད་ནམས་འཕེལ། དབྱིབས་ལེགས་ན་ནོར་འདུ། གཏིང་ཟབས་ན་ཟས་འདུ། མཐུག་ཅིང་ཁོད་སྙོམས་ན་ལོངས་སྤྱོད་བརྟན། སྲབ་ལ་དྭངས་ཞིང་མཁྲེགས་ན་ཆོས་འཕེལ། ནང་གི་རི་མོ་དྭངས་ཤིང་རྒྱས་ན་འབངས་སྲིད་འཕེལ། ཚངས་བུག་གསང་ན་མི་རྒྱུད་སྐད་ཐོན་པ་འོང་། བལྟས་པ་ཙམ་གྱིས་ཡིད་འོང་དགའ་བ་སོགས་འབྱུང་ན་ཐོད་པ་དེ་ལ་ཡོན་ཏན་མེད་པ་མི་སྲིད་པས་བཅིང་བར་བྱའོ། །

༢༠ ཀཱ་པ་ལའི་དགོས་པ་དང་རྒྱུ་ཆ། ཁལ་ཁ་དམ་རྡོར་གྱི་དམ་ཚིག་གི་རྫས་དང་ཡོ་བྱད་ཀྱི་རྣམ་བཞག་དངོས་གྲུབ་གཏེར་མཛོད་ལས། བླ་མ་ལྷ་དང་དཔའ་བོ་དང་རྣལ་འབྱོར་མ་རྣམས་ལ་ཚོགས་ཀྱི་འཁོར་ལོ་དང་། དཔའ་བོའི་སྟོན་མོ། དཀྱིལ་འཁོར་སྒྲུབ་མཆོད་སོགས་དུས་ཁྱད་པར་ཅན་དང་། དུས་ནར་མའི་ཚེ་ཡང་བདག་དང་ལྷ་ལ་སོགས་པ་བདུད་རྩིའི་མཆོད་པས་ཚིམ་པར་བྱེད་པའི་བཏུང་བའི་སྣོད་དང་། ལྷ་དང་མཁའ་འགྲོ་ཆོས་སྐྱོང་འབྱུང་བོ་ལ་སོགས་པ་གཏོར་མས་མཆོད་པའི་སྣོད་རྣལ་འབྱོར་བའི་ལྷུང་བཟེད་ཅེས་གསུངས་པ་ནི་ཐོད་པ་ཡིན་ལ། དེ་ལ་བྱང་སེམས་དཀར་དམར་གྱི་བདུད་རྩི་གང་དུ་འདུ་འཕྲོད་བྱས་པས་བདེ་སྐྱོང་བའི་གནས་ནི་ཕྱག་རྒྱའི་པདྨ་ཡིན་པས་པདྨའི་སྣོད་ཅེས་ཀྱང་བྱ་ལ། ཐོད་པ་མེད་ན་སྡོམ་འབྱུང་བཅོ་ལྔ་བ་ལྟར། མཁར་བ་ཟངས་ལྕགས་གསེར་དངུལ་རྭ་དང་ཤིང་དང་འཇིམ་པ་སོགས་ལས་ཀྱང་ཐོད་པའི་དབྱིབས་ཀྱི་རྣམ་པར་བྱས་ཀྱང་རུང་ལ། ན་རི་ཀེ་ལ་དང་ཉ་ཕྱིས་དང་རུས་སྦལ་གྱི་ཁོག་པས་ཀྱང་རུང་ཞིང་། དེ་རྣམས་ནི་རང་བཞིན་གྱིས་ཐོད་པའི་དབྱིབས་མཐུན་དུ་ཡོད་པས་དེ་ག་རང་གིས་ཆོག་པར་གསུངས་སོ། །

༢༡ ཀ་པཱ་ལ་བཅང་ཚུལ། རྒྱུད་དང་རྒྱ་གཞུང་ཁུངས་མ་རྣམས་ལས་བདུད་རྩི་དང་གཏོར་མ་བྱིན་གྱིས་བརླབས་པའི་སྐབས་སོགས་སུ་རང་རང་གི་ཐོད་པའི་བསྐྱེད་ཆོག་གསུངས་པ་རྣམས་དང་། མ་རྒྱུད་ཀྱི་སྤྱོད་པའི་བརྟུལ་ཞུགས་སྦྱིན་པའི་ཚེ་ཡབ་ཡུམ་གྱི་སྔགས་ལན་གསུམ་གསུམ་བཟླས་ནས་སྦྱིན་པ་དང་། དེའི་ཚེ་ཐོད་པ་བདུད་རྩི་བཀང་བས་བདེ་སྟོང་དབྱེར་མེད་དུ་སྦྱོར་བ་མཚོན་པར་གསུངས་པ་ལྟར་དྲན་པར་བྱས་ཏེ་འཆང་བ་ཙམ་ཞིག་གསུངས་ཀྱི། དེ་ལས་གཞན་པའི་བཅང་ཚུལ་རྒྱས་པར་མ་གསུངས་པས། བཟང་བོ་ལ་དངོས་གྲུབ་འབྱུང་བའི་བཅང་ཐབས། འབྲིང་བོ་འཕྲིན་ལས་སྒྲུབ་པའི་བཅང་ཐབས། ངན་པ་ལ་ཉེས་པ་མི་འབྱུང་བའི་བཅང་ཐབས་སོགས་མང་དུ་སྨྲ་རྒྱུ་ཡོད་དོ། །

༢༢ ཀ་པཱ་ལར་མཆོད་ཚུལ། ཐོད་ནག་གི་རྒྱུད་ལས། ཀ་པཱ་ལ་ནི་མཆོད་ཤེས་ན། །ལོངས་སྤྱོད་ཕུན་སུམ་ཚོགས་པར་འགྱུར། །ཀ་པཱ་ལ་ནི་མ་མཆོད་ན། །ས་འོག་གནས་པའི་གཏེར་དང་འདྲ། །ཞེས་དང་། གཞན་ཡང་། ཐོད་པ་དར་ཚོན་སྣ་ལྔས་དྲིལ། །མཛོད་ཁང་སོགས་ལ་སྦ་བར་བྱ། །དེ་ལྟར་རྒྱུན་ཏུ་མཆོད་པ་ལ། །བརྩོན་པར་བྱས་ན་རྣལ་འབྱོར་བས། །དམ་ཆོས་སྒྲུབ་པའི་བར་ཆད་ཞི། །མཐུན་རྐྱེན་ལེགས་པར་ཚང་བ་དང་། །མཁའ་འགྲོ་མཉེས་ན་མཆོག་ཐུན་གྱི། །དངོས་གྲུབ་མྱུར་དུ་སྩོལ་བར་འགྱུར། །ཞེས་གསུངས་ལ།

མཆོད་པའི་དུས་ནི། ཟླ་བ་གང་ཡིན་གྱི་ཚེས་བརྒྱད་ལ་རབ། དེ་མིན་གཟའ་སྐར་འཕྲོད་སྦྱོར་ཕུན་ཚོགས་ཀྱི་ཉིན། དབེན་གནས་སོགས་བྱིན་ཅན་དང་། གཙང་ཞིང་བཀྲ་ཤིས་པའི་རི་སོགས་ནས། བུ་མོ་གཙང་མས་བླངས་པའི་སས། མནྡལ་པདྨ་བྲིས་ཏེ། སྟེགས་བུ་མཐོ་དམན་ཇི་ལྟར་འཚམས་པའི་སྟེང་། སྣ་ཚོགས་པདྨ་ནི་རྡུལ་ཚོན་སོགས་ཀྱིས་བྲིས། ཐོད་པའི་ནང་དུ་ཤར་དུ་ཨཱཿ ལྷོར་ཧཱུཾ་དང་། ནུབ་ཏུ་སྭཱ བྱང་དུ་ཧཱ། དབུས་སུ་ཨོཾ། ཕྱི་རོལ་གྱི་ཁ་ནས་གཡོན་བསྐོར་དུ་ཨོཾ་དཱེ་ན་རཏྣ་སི་དྡྷི་ས་མ་ཡ་ཨ་ཡུ་ཿཕ་ལ་ཧཱུཾ། ཞེས་པ་འབྲི་བར་བཤད་པའང་ཡོད། ནང་དུ་ཅི་འདོད་སྤེལ་ཚིག་བྲིས། རིན་ཆེན་སྣ་ཚོགས་འབྱོར་ཚད་དང་། དྲི་སྣ་དང་། སྨན་སྣ། འབྲུ་སྣ། ས་སྣ། རྡོ་སྣ། ཤིང་ཐོག གོས་དང་རྟ་ཕྱུགས་སོགས་གཡང་ཅན་གྱི་སྤུ། གཞན་བཀྲ་ཤིས་རྟགས་བརྒྱད་དང་རྒྱལ་སྲིད་སྣ་བདུན། འདོད་ཡོན་ལྔ་སོགས་བྲིས་མ་དང་བླུགས་མ་ཇི་སྙེད་ཀྱིས་བཀང་ལ། མནྡལ་དབུས། མཉྫིའི་སྟེང་དུ་ལེགས་པར་བཞག ཤར་དུ་འོ་ཞོ་དང་། ལྷོར་མར་ཁུ། ནུབ་ཏུ་མངར་གསུམ། བྱང་དུ་ཆང་ཕུད། མཚམས་བཞིར་འབྲུ་སྣ་མེ་ཏོག་བཀྲམས། མཐའ་འཁོར་དུ་ཉེར་སྤྱོད་ཞལ་ཟས་སོགས་མཆོད་པའི་ཡོ་བྱད་ཅི་འབྱོར་དང་། འབྱོར་ན། རྒྱལ་མཚན་བ་དན་བླ་རེ་ཡོད་ན་རབ། དེ་ནས་ཐོད་པའི་དབུས་སུ་གཟུངས་རྡོར་བཞག རང་ཉིད་ཁ་ཤར་བལྟས་ཏེ། སྐྱབས་སེམས་དང་། ཚད་མེད་བཞི། ཡི་དམ་བདག་བསྐྱེད་ཅི་རིགས་བསྒོམ་ནས། མདུན་གྱི་དཀྱིལ་འཁོར་ཐོད་པ་དང་བཅས་སྒྲུབ་ཚུལ་ཆོ་ག་ལྟར་ཉམས་བཞེས་མཛད་ན། ཚེ་དང་ནོར་སྟོབས་དང་དབང་ཕྱུག་སོགས་འགྲུབ་པར་གསུངས་སོ། །གཞན་ཡང་། མི་ཐོད་འདི་བཟའ་བཏུང་གི་སྣོད་དུ་སྤྱོད་པ་ནི། འདི་ཉིད་ཕྱག་ཏུ་འཆང་རེས་ཀྱིས་མི་རྟག་པར་སྐུལ་ཆེད་དང་། ཕུང་བོ་བདག་མེད་སྒོམ་པ་སོགས་ཀྱི་གནད་ཆེ་བར་གསུངས་སོ། །ཀ་པཱ་ལའི་སྐོར་རྒྱས་པར་ཤེས་འདོད་པ་དག་གིས། སངས་གླིང་བླ་མ་དགོངས་འདུས་དང་། མཁས་གྲུབ་ཐམས་ཅད་མཁྱེན་པའི་རྣལ་འབྱོར་རོལ་བའི་དགའ་སྟོན། པད་དཀར་ཆུན་པོ། ཆོས་རྗེ་མི་ཕམ་པའི་གསུང་འདོད་དགུ་འབྱུང་གནས་སོགས་ལས་ཤེས་པར་བྱའོ། །

གཡབ་དར།

གཡབ་དར་གྱི་ཁུངས་ནི། ཀུན་འདུས་རིག་པ་ལས། ཁ་དོག་ལྔ་ཡི་དར་གཡབ་ཀྱིས། །གཡབ་ཞིང་རིག་འཛིན་མང་བོ་འབོད། །རོལ་མོ་ཆ་བྱད་མང་བོ་དག། རྡོ་རྗེ་གར་དང་སྙན་པའི་གླུ། །སྲིད་པའི་མ་མོ་ཀུན་བསྟེན་ཅིང་། །བྱིན་རླབས་ཆེན་པོ་དབབ་པར་བྱ། །ཞེས་པ་ལྟར། ཆོས་སྐྱོང་དང་མ་མོ་སོགས་སྤྱན་འདྲེན་དང་། བྱིན་འབེབས་ལ་མཁོ་བའི་སྔགས་ཆས་ཤིག་ཡིན། །དེ་ཡང་རྡོ་རྗེ་རྩེ་ལྔ་བར་ཁ་དོག་ལྔ་ལྡན་གྱི་དར་བཏགས་པ་དང་། ཆོས་སྐྱོང་དང་མ་མོ་འབོད་བྱེད་ལ། རས་གཞི་ནག་པོ་ལ་གསེར་མཚལ་གང་རུང་གིས། མ་མགོན་སོགས་ཀྱི་འབོད་སྔགས་བྲིས་པ་རྡོ་རྗེ་རྩེ་དགུར་བཏགས་པ་དང་། ཡང་། མི་ལག་གཡས་པའི་སོར་ལྔ་ལ་དར་ཚོན་སྣ་ལྔ་བཏགས་པ་དང། རྡོ་རྗེ་ལ་མི་ལྤགས་ཀྱི་གཡང་གཞི་བཏགས་པ། དྲེད་མོའི་ལག་པ་ལ་གཡང་གཞི་བཏགས་པ་སོགས་སོ། །ཡང་ཆོས་འགའ་ཟུང་ལ་བཟློག་དར་ཞེས་པ་དར་ནག་ཟུར་གསུམ་མཐའ་ཤན་ཅན་དང་། དར་ལྕེ་དམར་བོའི་ངོས་ལ་མཚལ་གྱིས་བྷྱོ་བཟློག་གི་ཡི་གེ་བྲིས་པ་ཞིག་ཀྱང་སྣང་། གཞན་ཡང་། ལྷ་མོ་རེ་མ་ཏི་སྤྱན་འདྲེན་གྱི་གཡབ་དར་ལ། ན་ཆུང་མ་ཆུ་གྲིར་ཤི་བའི་སྲིན་ལག་གཡས་པ་དར་མཐིང་ནག་ལ་བཏགས་ཏེ། དཔའ་བོ་གཡུལ་དུ་དབུགས་ཆད་ཁ་མའི་སྙིང་ཁྲག་གིས་འབོད་སྔགས་བྲིས་པ་དང་། ཁོལ་མོ་རེ་མ་ཏི་འབོད་པ་ལ། དྲེད་མོའི་རལ་བ་དགོས་པར་ཡང་བཤད་དོ། །

ཧོམ་ཁུང་།

ཧོམ་ཁུང་ཟུར་གསུམ་ནི། རྒྱུ་ལྕགས་དང་ས། རྫ་དང་རྡོ་ཤིང་ལས་བཟོས་པ་དང་། ཚད་དང་དབྱིབས་ནི། ཕུར་བ་གསང་རྒྱུད་ལས། གྲུབ་ཁུང་ལས་ཀྱི་དཀྱིལ་འཁོར་ནི། །དཀྱིལ་འཁོར་ཁྲུ་གང་ཙམ་དུ་བྱ། །གྲུ་གསུམ་སུ་བརྩེགས་ཁ་ཁྱེར་ལ། །ཟ་བྱེད་ཞལ་དང་མདའ་གཞུ་བཅས། །མཚོན་ཆ་ལྔ་དང་རྩང་གིས་བསྐོར། །མཐིང་ནག་དར་གྱིས་ཞལ་བཀབ་པའི། །ཞེས་པ་སྟེ། མཚོན་ཆ་ལྔ་ནི། རྡོ་རྗེ། འཁོར་ལོ། རལ་གྲི དབྱུག་ཏོ། རྒྱ་གྲམ་མོ། །ཡང་། རྙིང་རྒྱུད་མགོན་པོ་མཚོན་ཆ་འཁོར་ལོའི་རྒྱུད་ལས། དབུས་ནས་ཁྲུ་གང་གྲུ་གསུམ་ལ། །ཆང་རིས་གསུམ་ལྡན་ཐུར་དུ་བྲུ། །ཐ་མ་ཐོད་པའི་ཕྲེང་བས་བརྒྱན། །དུག་ཤིང་རྩང་དམར་ཉི་ཤུ་བརྒྱད། །རྡོ་རྗེ་འཁོར་ལོ་རལ་གྲི་དང་། །དབྱུག་ཐོ་རྒྱ་གྲམ་རྣམ་པ་ལྔས། །འོག་མ་དག་ལ་བསྐོར་བར་བྱ། །ཞེས་དང་། འགའ་ཞིག་ཧོམ་ཁུང་རིམ་པ་དང་བོའི་ཁ་འཁྱེར་ལ་བྱ་རིགས་དང་། བར་བ་ལ་གཅན་གཟན་ཁྱུང་འབྲུག འོག་མར་མི་རོ་རྟ་རོ། ནང་དམར་ལ་ཕྱི་ནག་པ་མེ་རིས་རི་མོ་དག་བྱེད་དོ། །

བུམ་པ།

༡ བུམ་པའི་རྒྱུ། སྤྱིར་བུམ་པ་ལ་གསུམ་སྟེ། དོན་དམ་ཆོས་ཉིད་ཀྱི་བུམ་པ། འདུས་བྱས་རྟགས་ཀྱི་བུམ་པ། མཚོན་བྱེད་རྫས་ཀྱི་བུམ་པའོ། །དོན་དམ་ཆོས་ཀྱི་བུམ་པ་ནི། ཆོས་ཀྱི་དབྱིངས་དང་རང་རིག་པའི་ཡེ་ཤེས་དབྱེར་མེད་པ་དང་། འདུས་བྱས་རྟགས་ཀྱི་བུམ་པ་ནི་ཕྱིའི་སྣོད་ཀྱི་འཇིག་རྟེན་དང་། ནང་བཅུད་ཀྱི་སྐྱེ་འགྲོའི་གཟུགས་ཕུང་སོགས་ཡིན། འདིར་བཤད་བྱ་ནི་མཚོན་བྱེད་རྫས་ཀྱི་བུམ་པའོ། །དེ་ལ་ཡང་རྒྱུ་སོགས་མང་བོ་ཞིག་ཡོད་པ་ལས། རྒྱུ་ནི། དུར་ཁྲོད་ཁུ་བྱུག་རོལ་བའི་རྒྱུད་ལས། དང་བོ་གསེར་གྱི་བུམ་པར་བཤད། །གཉིས་པ་ཤེལ་དང་དངུལ་གྱི་སྟེ། །གསུམ་པ་བཻཌཱུ་རྱ་ཡིའོ། །བཞི་བ་ཟངས་ཀྱི་བུམ་པར་བཤད། །ལྔ་བ་ལྕགས་ཀྱི་བུམ་པར་བཤད། །དྲུག་པ་ལ་ནི་སྣ་ཚོགས་པའི། །བུམ་པ་གང་བ་བཞག་པར་བྱ། །ཞེས་དང་། ཡེ་ཤེས་རྔམ་གློག་ལས། བུམ་པ་རྣམ་པ་སྣ་ཚོགས་ཀྱི། །གསེར་དང་དངུལ་ལས་བྱས་པའོ། །ཞེས་པ་ལྟར། གསེར་དངུལ་ཟངས་ལྕགས། ར་གན། ལི། ཤེལ། བཻཌཱུ་རྱ། བྱུ་རུ། ཨིནྡྲ་ནི་ལ། པདྨ་རཱ་ག མཆོང་། རྡོ། རྫ། ཤིང་། ཐོད་པ། ས། རིན་པོ་ཆེ་སོགས་གང་ཡང་རུང་བ་དུས་འཁོར་བསྡུས་རྒྱུད། ཟླ་གསང་ཐིག་ལེ། གཙུག་དགུ་སོགས་ལས་བཤད་དོ། །བྱེ་བྲག་ཏུ། དུས་འཁོར་གྱི་དབང་ལེར། ཞི་བ་ལ་ཤེལ། རྒྱས་པར་དངུལ། བསད་པ་ལ་མི་ཐོད། བསྐྲད་དབྱེ་ལ་ལྕགས། དབང་ལ་གསེར། འགུགས་པ་ལ་ཟངས། རངས་པ་ལ་ས། རྨོངས་པ་ལ་ཤིང་གི་བུམ་པའོ། །

༢ བུམ་པའི་དབྱིབས། གཤིན་རྗེ་དགྲ་ནག་གི་རྒྱུད་ལས། ནག་པོ་ར་རི་མེད་པ་ཡི། །བུམ་པ་ལྟོ་ཆེ་བྲེ་ཚད་པ། །མཆུ་འཕྱང་མགྲིན་རིང་གདན་ལྡན་པར། །སྙིང་བོ་ལྡན་པའི་སྨན་སོགས་གཞུག། ཅེས་རྟ་མཆོག་རོལ་བ་སོགས་ལས་འབྱུང་ལ། མདོར་ན་བུམ་པ་ལ། མགྲིན་རིང་ཞིང་ཕྲ་བ། ལྟོ་ལྡིར་བ། མཆུ་འཕྱང་བ། ཞབས་ཞུམ་པ﹙ཁ་ཅིག་འདི་ལ་ཞབས་སྟེགས་མེད་པ་བརྩི་བའང་ཡོད། ﹚དང་། ཁ་འཁྱེར་གཡེར་བ་སྟེ། ཁྱད་པར་དྲུག་ཚང་བ་ཡིན་ནོ། །རྡོ་རྗེ་མཁའ་འགྲོ་ལས། བུམ་པ་དག་ནི་བྱ་བ་སྟེ། །རྩ་བ་ནག་པོ་ལ་སོགས་སྤང་། །ཞེས་པའི་རྩ་བ་ནི་ཞབས་སྟེགས་མེད་པ་དང་། ནག་པོ་ནི་དྲི་མའི་ར་རི་སྤང་དགོས་པ་ལ་བཤད་དོ། །

༣ བུམ་པའི་ཁ་དོག མི་གསལ་བ་དང་། ར་རིའི་དྲི་མ་མེད་པ། ཞི་བ་ལ་དཀར་བོ། རྒྱས་པར་སེར་བོ། དབང་ལ་དམར་བོ། མངོན་སྤྱོད་ལ་སྔོན་པོ་བྱ་དགོས་པར། ཁུངས་རིམ་བཞིན་དུས་འཁོར་བསྡུས་རྒྱུད། གཤེད་དམར། དཔུང་བཟང་། བཤད་རྒྱུད་དྲག་པོ་གསུམ་འདུལ་སོགས་སུ་གསུངས་སོ། །

༤ བུམ་པའི་ཚད། སྤྱིར་བཏང་ལ་ལྟོ་བའི་རྒྱར་མཐོ་ལྔ། མགྲིན་པའི་སྲིད་དུ་སོར་བརྒྱད། མགྲིན་པའི་རྡོ་རྗེ་ཁུ་ཚུར་ཤོང་བ། ཁ་འཁྱེར་སོར་བཞི། མཆུ་འཕྱང་ལ་སོར་གཉིས། མཆུ་ཕྱེད་ལ་སོར་བརྒྱད་དུ་གསུངས་ལ། དུས་འཁོར་ལས་ཞི་རྒྱས་གཉིས་ཀྱི་བུམ་ཚད་བྱེ་བྲག་ཏུ་བརྗོད་དེ། བསྡུས་རྒྱུད་ལས། ཟླུམ་པོ་བརྒྱད་གཉིས་སོར་དུ་བརྗོད་དེ་གཉིས་ཀྱིས་བསྒྱུར་བའི་བཅུ་ཡིས་དཔངས་དང་སོར་གཉིས་དག་གི་མཆུ། །དྲུག་ནི་མགྲིན་པ་སོར་བརྒྱད་ཁ་སྟེ་རི་བོང་འཛིན་པ་ལྟར་དཀར་ཞི་རྒྱས་དག་ལའོ་གཞན་ལ་མིན། །ཞེས་དང་། ཀུན་རིག་ཊིཀ་ཆེན་ལས། བུམ་པའི་ཚད་ནི་རྣམ་རྒྱལ་ལ་ལྟོ་བའི་ཐད་ཀའི་རྒྱར་སོར་ཉི་ཤུ། མཐའ་བསྐོར་དུ་མཐོ་ལྔ། མགྲིན་པའི་དཔངས་སོར་བརྒྱད། མཆུའི་འཕྱང་ལ་སོར་གཉིས་པའི་ཚད་ལྡན་མེད་ན་སྦྱིན་བདག་ལ་མི་ཤིས་པས་ཚད་དང་ལྡན་པ་བྱ། གཞན་རྣམས་མ་ངེས་པར་བཤད་དེ། ཀུན་ཀྱང་ནག་པོ་མེད་པ། རྩ་བ་དོར་ཞིང་མ་འབྱར་བ། བུག་པ་དང་། གས་པ་མེད་པ། མཆུ་འཕྱང་ཞིང་། མགྲིན་པ་རིང་བ། གསུས་པ་ཆེ་བ། ཞེས་འདི་སོར་བཞག་འབྱུང་། ཞེས་གསུངས་སོ། །ཞི་བ་ལ་ཤེལ། རྒྱས་པ་ལ་དངུལ། བསད་པ་ལ་མི་ཐོད། བསྐྲད་དབྱེ་ལ་ལྕགས། དབང་ལ་གསེར། འགུགས་པ་ལ་ཟངས། རེངས་པ་ལ་ས། རྨོངས་པ་ལ་ཤིང་གི་བུམ་པ་དང་། དེ་དག་གི་ཚད་ནི་ཞི་རྒྱས་གཉིས་ལྟེ་བའི་རྒྱར་སློབ་དཔོན་གྱི་མཐེབ་སོར་བཅུ་དྲུག ལྟེ་བའི་འོག་ནས་ཁའི་བར་དུ་སོར་ཉི་ཤུ། ཁའི་མཚམས་ནས་འཆང་བའི་མཆུ་ལ་སོར་གཉིས། མགྲིན་པའི་དཔངས་སུ་སོར་དྲུག མཆུའི་མཐའ་ནས་མཆུའི་མཐའི་བར་གྱི་ཁ་ལ་སོར་བརྒྱད་ཡོད་པའི་ཆ་གཉིས་མགུལ་བའི་སྦུབས་སྟོང་དང་། ཆ་གཅིག་གི་ཚད་དུ་གསུངས་ལ། གཞན་ཡང་རྡོ་རྗེ་ཕྲེང་བ་ལས། དབྱེ་བ་དང་བསྐྲད་པ་དག་གི་ལྟོ་བ་ནི་ཟླུམ་པོར་སོར་བཅུ་གཉིས་སོ། །དཔངས་སུ་སོར་ཉི་ཤུ་རྩ་བཞིའོ། །སྐེ་བ་ཡོན་པོ་སྟེ་སོར་བརྒྱད་པའོ། །ཁ་ནི་སོར་དྲུག་གོ། མཆུ་གཉིས་ནི་སོར་རེ་རེའོ། །དབང་དང་འགུག་པ་དག་གི་བུམ་པ་ནི་བཟོ་བོས་ཇི་ལྟར་བྱས་པའོ། །རེངས་པ་ལ་ནི་ཐུང་ཞིང་ཟླུམ་པ་དང་། དཔངས་སུ་སོར་བཅུ་དྲུག་གོ། མགྲིན་པ་ནི་སོར་བཞིའོ། །ཁ་ནི་སོར་དྲུག་གོ། མཆུ་ནི་སྦོམ་ཞིང་སོར་གཉིས་པའོ། །ལས་ཐམས་ཅད་པ་ལ་ཞི་བ་ལ་སོགས་པའི་ལས་ལ་བརྗོད་པའི་བུམ་པ་རྣམས་གཟུང་བར་བྱའོ། །འདི་ནི་དུས་ཀྱི་འཁོར་ལོ་ལས་གསུངས་པའི་ཚད་དོ། །བུམ་པའི་ཚད་མི་འདྲ་བ་མང་བོ་ཁལ་ཁ་དམ་རྡོར་གྱི་དམ་ཚིག་གི་རྫས་དང་ཡོ་བྱད་ཀྱི་རྣམ་བཞག་དངོས་གྲུབ་གཏེར་མཛོད་དང་། རྗེ་ཤེས་རབ་རྒྱ་མཚོའི་ཐིག་བཤད་ལག་ལེན་དུ་མའི་སྐོར་གྱི་བརྗེད་བྱང་སོགས་ལས་ཤེས་པར་བྱའོ། །

༥ བུམ་པའི་དབྱེ་བ། རྟེན་གྱི་བུམ་པ་དང་། རྣམ་རྒྱལ་བུམ་པ་དང་། ལས་བུམ་མོ། །ཕྱི་མ་གཉིས་ཀྱི་ཁུངས་ནི། རྡོ་རྗེ་གདེང་བའི་རྒྱུད་ལས། རྣམ་པར་རྒྱལ་བའི་བུམ་པར་ནི། །སྨན་ལ་སོགས་པའི་ལེགས་བཀང་ནས། །རས་ཀྱིས་དཀྲིས་ལ་བཞག་པར་བྱ། །ཞེས་བུམ་རྫས་ཀྱིས་བཀང་ནས་རས་ཀྱིས་དཀྲིས་ཏེ་ཡི་དམ་ལྷའི་དཀྱིལ་འཁོར་སྒོམ་ནས་སློབ་མ་ལ་དབང་བསྐུར་བྱེད་ཡིན་པས། དཀྱིལ་འཁོར་གྱི་དབུས་སུ་འཇོག་དགོས་པ་དང་། ཡང་སྒྱུ་འཕྲུལ་དྲ་བ་ལས། སྒོ་ཡི་ཕྱོགས་ཀྱི་བུམ་པ་ནི། །ལས་ཀུན་བྱེད་པའི་བཟླས་བརྗོད་དོ། །སེམས་ཅན་ཀུན་གྱིས་བསང་གཏོར་བྱ། །ཞེས་ལས་བུམ་ཁྲོ་བོ་སོགས་བསྐྱེད་ནས་གཏོར་མ་དང་། མཆོད་རྫས་སོགས་ལ་བསང་སྦྱངས་ཀྱི་ལས་སྒྲུབ་བྱེད་ཡིན་པས། ལས་བུམ་དཀྱིལ་འཁོར་གྱི་སྒོར་འཇོག་དགོས། གྲངས་ནི་རབ་ལྷ་གྲངས། འབྲིང་དགུ་འམ་ལྔ། ཐ་མ་གཙོ་ལས་གཉིས་སུ་བསྡུས་ཡང་རུང་ངོ་། །ཡང་ལོ་པཎ་བཀའི་ཐང་ཡིག་ལས། དབྱེ་བ་དབང་བསྐུར་རྩ་རྒྱུད་ལས། རྟེན་བྱེད་བུམ་པ་མཚོན་བྱེད་བུམ་པ་དང་། །རང་བཞིན་བུམ་པ་རྣམ་རྒྱལ་བུམ་པ་དང་། །ལས་ཀྱི་བུམ་པ་དང་ནི་ལྔ་རུ་བཤད། །ཅེས་གསུངས་སོ། །

༦ བུམ་པའི་མཚོན་དོན། ཀུན་འདུས་རིག་པ་ལས། བཀྲ་ཤིས་ཆེན་པོའི་བུམ་པ་ནི། །བདེ་གཤེགས་བཞུགས་པའི་ཕོ་བྲང་སྟེ། །དཀྱིལ་འཁོར་རྫོགས་པར་གྱུར་བ་ཡི། །དབང་ཆེན་དེ་ལ་སྦྱིན་པར་བྱ། །ཞེས་པ་ལྟར། ཕྱི་ཚད་གཞལ་ཡས་ཁང་སྟེ་ཕོ་བྲང་དང་། ནང་བཅུད་ཀྱི་བདུད་རྩི་ལྷ་དང་ལྷ་མོའི་རང་བཞིན་དུ་བལྟ་བ་དང་། བྱེ་བྲག་གིས་དབྱེ་ན། ལྟོ་ལྡིར་བས་ཆོས་དབྱིངས་རྒྱ་ཆེ་བ། མཆུ་འཕྱང་བས་གཞན་དོན་མཛད་པ། མགྲིན་པ་ཕྲ་བས། བྱང་ཆུབ་ཀྱི་སེམས་དཔོག་དཀའ་བ། དེ་རིང་བས་ཆོས་ཀྱི་དོན་རྟོགས་དཀའ་བ། ཁ་གཡེར་བས་སྙིང་རྗེས་ཀུན་ལ་ཁྱབ་པ། རྩ་བ་མེད་པས་ཉོན་མོངས་མེད་པ། ཡང་ལྟོ་བ་ཟླུམ་པས་ཆོས་སྐུ། མགྲིན་པས་ལོངས་སྐུ། ཁ་འཁྱེར་གྱིས་སྤྲུལ་སྐུ། མགྲིན་སྦུབས་ནས་བཅུད་འགྲོ་འོང་བྱེད་པས། སངས་རྒྱས་ཀྱིས་འགྲོ་དོན་རྒྱུན་མི་ཆད་པ་མཚོན་ལ། དེ་ལས་གཞན། ཁ་རྒྱན་དཔག་བསམ་ཤིང་གིས་རེ་འདོད་ཡིད་བཞིན་དུ་སྐོང་བ། ཀུ་ཤས་སྡིག་སྒྲིབ་དང་མཚན་རྟོག་འདག་པ། རྨ་སྒྲོས་བླ་མེད་དུ་དུག་ལྔ་མི་སྤང་ལམ་དུ་འཁྱེར་བ། མགུལ་ཆིངས་ཀྱིས་སྐུ་ལྔ་མཚོན་པར་བཤད་དོ། །

ཡང་བུམ་པས་གཞལ་ཡས་ཁང་། ཁ་རྒྱན་དང་མགུལ་ཆིངས་ཀྱིས་རྟ་བབས། གཟུངས་ཐག་གིས་བརྩེ་བ་སྙིང་རྗེ་ཆེན་པོ། སྨན་ལྔས་བྱང་ཆུབ་ཀྱི་སེམས། འབྲུ་ལྔས་ལྷ་ཚོགས་ཀྱི་ཡོན་ཏན་མཚོན་པར་སློབ་དཔོན་ཀུ་ཀུ་རཱ་ཛས་གསུངས་པ་དང་།

ཡང་ཁ་ཅིག བུམ་པ་དང་མགུལ་ཆིངས། གཟུངས་ཐག རྡོ་རྗེ་ཁ་རྒྱན། དུང་ཆོས་བཅས་པ་སྤྲུལ་སྐུ་དང་། བུམ་རྫས་དང་དྲི་ཆུས་བུམ་ཆ་གསུམ་དགོས་པའི་ཆ་གཉིས་གང་བ་ལོངས་སྐུ་དང་། སུམ་ཆའི་ཆ་གཅིག་སྟོང་བར་བཞག་པས་ཆོས་སྐུ། དུང་ཆོས་ཀྱི་སྟེང་གི་རྡོ་རྗེ་ལ་ལྷའི་གཟུགས་བརྙན་སྣང་བ་ངོ་བོ་ཉིད་སྐུ་མཚོན་པར་གསུངས་ལ།

སྔགས་འཆང་རྒྱན་མེ་ལས། མདོར་བསྡུ་ན་སྐུ་གསུམ་མཚོན་བྱེད་བུམ་པ་དེ་ལ་སྐུ་ལྔ་མཚོན་བྱེད་མགུལ་ཆིངས། གསུང་ལྔ་མཚོན་བྱེད་གཟུངས་ཐག ཐུགས་ལྔ་མཚོན་བྱེད་རྡོ་རྗེ། ཡོན་ཏན་ལྔ་མཚོན་བྱེད་དཔག་བསམ་གྱི་ཤིང་། འཕྲིན་ལས་ལྔ་མཚོན་བྱེད་རྨ་བྱའི་མདངས་ཀྱིས་བརྒྱན་པ་སྟེ། འབྲས་བུ་ཆོས་ཉེར་ལྔའང་ཤུགས་ལ་ཚང་བའོ་གསུངས་སོ། །

ཡང་། ཐུན་མིན་བླ་མེད་ཀྱི་རྫས་ཀྱི་མཚོན་དོན་ནི། སངས་རྒྱས་ཐོད་པ་ལས། དྲི་ཆུ་ཡེ་ཤེས་རྡོ་རྗེ་སྟེ། །དྲི་ཆེན་རྡོ་རྗེ་བཟང་བོ་ཉིད། །ཁྲག་ནི་མར་མེ་རྡོ་རྗེ་ཡིན། །ཁུ་བ་རྡོ་རྗེ་ཐབས་བྱུང་ཉིད། །ཤ་ནི་ཆོས་ཀྱི་རྡོ་རྗེ་ཡིན། །དེ་ལྔ་རྣལ་འབྱོར་མ་ཡི་མཆོག །ཅེས་དང་། རྡོ་རྗེ་ཕྲེང་བ་ལས། ཁྲག་ནི་རིན་ཆེན་དབང་ཕྱུག་དང་། །བྱང་ཆུབ་སེམས་ནི་འོད་དཔག་མེད། །དེ་བཞིན་དོན་ཡོད་གྲུབ་པ་ཤ ། མི་བསྐྱོད་དེ་བཞིན་རྡོ་རྗེ་ཆུ། །དྲི་ཆེན་རྣམ་སྣང་མཛད་དུ་བཤད། །དེ་དག་བདུད་རྩི་ལྔ་ནི་མཆོག། ཞེས་གསུངས་སོ། །

ཡང་། ཚེ་བུམ་ལྟ་བུར་མཚོན་ན། ཁ་རྒྱན་སྒོ་ཁྱིམ་དང་བཅས་པས་འཆི་མེད་ཚེའི་ལྷ་ཚོགས་སྐུ་མི་འགྱུར་བ་རྡོ་རྗེ་ལྟ་བུ་མཚན་དཔེ་གསལ་རྫོགས་ཀྱི་ངོ་བོར་ཡེ་ནས་དག་པ་དང་། མགྲིན་པ་རྒྱན་འཆང་དང་བཅས་པས་གསུང་འགག་མེད་ཀྱིས་ཆོས་འཁོར་བསྐོར་བ། ལྟོ་བས་ཐུགས་གཡོ་མེད་ཀྱིས་སྟོབས་བཅུ་དང་མི་འཇིགས་པ་བཞི། མ་འདྲེས་པའི་ཆོས་བཅོ་བརྒྱད་སོགས་ཡེ་ནས་རྫོགས་པ། ཞབས་པད་ཀྱིས་འཁོར་མཐའ་ལས་འདས་ཤིང་པདྨ་ཅན་ནམ་བདེ་བ་ཅན་གྱི་ཞིང་ཁམས་མཚོན་པ་ཡིན་ལ།

དེ་ལྟར་བུམ་ཆུ་ལ་ལོངས་སྤྱད་པས། གནས་སྐབས་སེང་གེ གླང་ཆེན། མེ་དཔུང་འབར་བ། དུག་སྦྲུལ། ཆོམ་རྐུན། ལྕགས་སྒྲོག རྒྱ་མཚོའི་རྦ་རླབས། ཤ་ཟ་ཁྲོས་པ་སོགས་འཇིགས་ཆེན་བརྒྱད་དམ། སྔ་འགྱུར་གྱི་གཞུང་འགའ་ཞིག་ལས། ནད། མུ་གེ མེ། ཆུ་ཆེན། དམག མཚོན་ཆ། རྒྱལ་བོའི་ཆད་པ། དུས་མིན་གྱི་འཆི་བ་སྟེ་འཇིགས་ཆེན་བརྒྱད་ལས་སྒྲོལ་བ་དང་། མཐར་ཐུག་འགྲོ་དོན་རྒྱུན་མི་ཆད་པར་འབྱུང་བའི་ཕན་ཡོན་ཡོད་པར་བཤད་དོ། །

༧ བུམ་པའི་རྒྱན། བུམ་པའི་དགོས་པ་ནི། དཀྱིལ་འཁོར་གྱི་ནང་གི་རྒྱན་དང་སྐུའི་སྒྲུབ་རྟེན་དང་། བྱིན་རླབས་ཀྱི་སྣོད་སོགས་ཀྱི་དགོས་པའོ། །རྒྱན་ནི། རྟ་མཆོག་རོལ་བ་ལས། མགུལ་ཆིངས་གཟུངས་ཐག་ཁ་རྒྱན་སོགས། །ཞེས་པ་ལྟར། མགུལ་ཆིངས་ནི། བསྒྲུབ་བྱའི་ལྷ་རང་རང་གི་མདོག་ལྟར་བུམ་པ་ཕྱི་དོར་དང་། ས་རྡོ་ཤིང་སོགས་ཀྱི་བུམ་པ་ཡིན་ན་དྲི་ཞིམ་བྱུགས་ནས། ཛྙ་ཙ་ལི་ཀ་དང་། དཱུ་གུ་ལ་དང་། ཀ་ཤི་དར་སོགས་ཀྱི་ཁ་དོག་སྣ་ལྔའི་དར་རས་འཇམ་གཙང་གསོལ་བའམ། ཡང་ན། ལྷ་རང་རང་གི་མདོག་མཐུན་གྱིས་བརྒྱན་པ་དང་། རང་མདོག་གི་ཚོན་གྱིས་རིགས་ལྔའི་ཕྱག་མཚན་དང་། ས་བོན། ལྷ་སོ་སོའི་ས་བོན་གྱི་ཡི་གེ་པདྨ་སོགས་ཀྱི་རི་མོ་འབྲི་དགོས་པར། རྟ་མཆོག་རོལ་བ། ཀརྨ་ལས་ཀྱི་རྒྱུད། ཕུར་བ་གསང་རྒྱུད་སོགས་ལས་འབྱུང་ངོ་། །

༨ གཟུངས་ཐག འདོམ་གསུམ་ལས་མི་ཐུང་བ་སྲད་པུ་དཀར་བོ་ལ་དར་སྐུད་སྔོ་སེར་དཀར་དམར་ལྗང་ལྔ་བསྒྲིལ་བའི་སྣེ་ལ་རྡོ་རྗེ་རྩེ་ལྔ་སོར་བཞི་བཏགས་པར་མེ་ཏོག་གི་ཕྲེང་བས་བརྒྱན་པར་རྒྱུད་མང་བོ་ལས་གསུངས་སོ། །གཞན་བུམ་སྟེང་དུ་དུང་ཆུང་ངུའི་ཆུས་བཀང་བའི་དུང་ཆོས་དང་གཟུངས་ཐག་རྡོ་རྗེ་བཅས་འཇོག རྡོ་རྗེ་དེ་ཡང་རྣམ་སྣང་ལ་རྡོ་རྗེ་མགོར་འཁོར་ལོ་དང་། གཞན་རིགས་བཞི་སོ་སོར་རྡོ་རྗེ་དང་། རིན་ཆེན། པདྨ། རྒྱ་གྲམ་བཅས་མཚན་པའོ། །དེ་ཡང་། གཟུངས་ཐག་སློབ་དཔོན་གྱིས་ཐུགས་ཀར་འཛིན་པ་ནི། མདུན་བསྐྱེད་ཀྱི་ལྷ་དང་གཞི་རྒྱུད་གཅིག་པ་དང་། སྔགས་ཕྲེང་ལས་འོད་ཟེར་སྤྲོ་བསྡུ་བྱ་བའི་ལམ་གྱི་རྒྱུ་དང་། སྣེ་གཅིག་པོ་རྡོ་རྗེ་ལ་བཏགས་ནས་བུམ་ཁར་བཞག་པའང་འབྲས་བུ་སྐུ་གསུམ་དབྱེར་མེད་རྡོ་རྗེ་སྐུ་གསུམ་འགྲུབ་པའི་དགོས་པ་ཡོད་དོ། །

༩ བུམ་པའི་ཁ་རྒྱན། དཔག་བསམ་ཤིང་སོགས་འབྲས་བུ་ཅན་གྱི་ཤིང་། འོ་མ་ཅན་གྱི་ཤིང་། ལྡུམ་བུའི་ལོ་མ་དང་། ཀུ་ཤ མེ་ཏོག རྨ་བྱའི་སྒྲོ། ཨ་སྨྲའི་ལྕུག་མ། ཤིང་ལོ་གསར་བ་སོགས་གཟུགས་དགོས་པ་རྒྱུད་མང་བོའི་དགོངས་པའོ། །གཞན་བཀྲ་ཤིས་པའི་སིལ་ཏོག་བླུགས་ནས། ཀུ་ཤའི་གདན་དང་། མནྜལ་གྱི་སྟེང་ལ་འཇོག་དགོས། གསང་བ་སྤྱི་རྒྱུད་ལས། ཤིང་བཀྲ་ཤིས་ཁར་བླུགས་ནས། ཞེས་དང་། རྡོ་རྗེ་མཁའ་འགྲོ་ལས། ཀུ་ཤའི་ཆུན་པོ་འོག་ཏུ་གདིང་། །ཞེས་དང་། ཕྱག་རྡོར་གཏུམ་པོ་གསང་རྒྱུད་ཕྱི་མ་ལས། མནྜལ་གཙང་མའི་སྟེང་དུ་བཞག། ཅེས་སོ། །དེ་ཡང་ཁ་རྒྱན་དཔག་བསམ་ཤིང་ལས་བྱས་པ་ནི། རེ་འདོད་ཡིད་བཞིན་དུ་འགྲུབ་པའི་ཆེད་དུའོ། །རྒྱུད་སྡེ་འོག་མ་རྣམས་ལས་རྩྭ་ཀུ་ཤས་བརྒྱན་པ་ནི། ཀུ་ཤ་དག་བྱེད་ཀྱི་རྫས་ལགས་པས་སྡིག་སྒྲིབ་འདག་པའི་བརྡའོ། །ཐིག་ལེ་ལྔ་ཅན་གྱི་རྨ་སྒྲོས་བརྒྱན་པས། རྨ་བྱས་དུག་ཟོས་ཀྱང་བཀྲག་མདངས་འཚེར་བ་ལྟར། དུག་ལྔ་ལམ་འཁྱེར་བྱེད་པའི་བརྡའོ། །

༡༠ བུམ་རྫས་ལ། རྒྱུད་སྡེ་འོག་མ་གསུམ་ལ་གྲགས་པའི་བུམ་རྫས་ལ། མི་གཡོ་བའི་རྟོག་པ་ལས། རིན་ཆེན་སྣ་ལྔ་འབྲུ་སྣ་ལྔ། །སྨན་ཆེན་པོ་ནི་ཡང་དག་ལྡན། །དྲི་ཆུ་ཡིས་ནི་རབ་ཏུ་བཀང་། །ཞེས་རྡོ་རྗེ་རྙིང་རྒྱན་དང་། བྱ་རྒྱུད་ཆོ་ག་གསང་རྒྱུད་སོགས་ལས། དྲི་དང་འབྲུ། སྨན་དང་རིན་ཆེན་ཞེས་ལྔ་ལྔ་སྟེ་ཉི་ཤུ་གསུངས་མེད། ཕུར་བ་གསང་རྒྱུད་ལས ལྔ་ཚན་ཉི་ཤུ་རྩ་ལྔ་ཉིད། །སྔགས་དང་ཏིང་འཛིན་གསལ་རྫོགས་ནས། །ཞེས་དང་། སྨན་བླའི་སྟོང་མཆོད་ལས། ལྔ་ཕྲག་ལྔ་ལྡན་སྙིང་བོ་དམ་པ་འབུལ། །ཞེས་པ་ལྟར། གསེར། དངུལ། བྱི་རུ། མུ་ཏིག ཟངས་སྟེ་རིན་པོ་ཆེ་ལྔ། དབང་ལག ཀན་ཊ་ཀཱ་རི། སླེ་ཏྲེས། ཅུ་གང་། ཤུ་དག་དཀར་བོ་སྟེ་སྨན་ལྔ། ག་བུར། གླ་རྩི། ཛཱ་ཏི། ཀུར་གུམ། ཙན་དན་ཏེ་དྲི་ལྔ། ནས། གྲོ། ཏིལ། སྲན་མ། འབྲས་ཏེ་འབྲུ་ལྔ། ལན་ཚྭ། ཏིལ་མར། མར། བུ་རམ། སྦྲང་རྩི་སྟེ་སྙིང་བོ་ལྔ་བཅས་ཉེར་ལྔའོ། །

དེ་ཡང་། བུམ་རྫས་ཉེར་ལྔ་བོ་འདི་དག་ཀྱང་། ལྷ་མོ་བསྟན་མས་རིན་ཆེན་ལྔ། ལྷ་ཆེན་བུ་མོས་སྨན་ལྔ། དྲི་ཟའི་བུ་མོས་དྲི་ལྔ། འཇིག་རྟེན་བུ་མོས་འབྲུ་ལྔ། གནོད་སྦྱིན་བུ་མོས་སྙིང་བོ་ལྔ་སྟེ་ཉེར་ལྔ་ཕུལ་བར་བཤད་ལ། དེ་ལྟར་བུམ་རྫས་ཉེར་ལྔ་བོ་དེས་མ་དག་པའི་སྲིད་པ་ཉེར་ལྔ་སྦྱོངས། སྒྲིབ་པ་ཉེར་ལྔ་འདག ཚད་མེད་ཉེར་ལྔ་རྒྱུད་ལ་སྐྱེས། དག་ཞིང་ཉེར་ལྔ་མཐོང་བར་གསུངས་སོ། །

བུམ་རྫས་ཉེར་ལྔ་བོ་འདི་དག་ལ་རྒྱུད་སོ་སོར་ངོས་འཛིན་ཚུལ་མི་འདྲ་བ་སྣང་མོད། མཐའ་དག་འདིར་མ་བཀོད་དོ། །ཡང་བླ་མེད་ཀྱི་བུམ་རྫས་ལ། རྒྱུད་ལས་ཅུང་ཟད་མི་འདྲ་བ་སྣང་ཡང་། བུམ་རྫས་ཉེར་ལྔའི་སྟེང་ལ། དྲི་ཆེན་དང་དྲི་ཆུ། རཀྟ། བྱང་སེམས་ཤ་འམ་མང་ས་སྟེ་བདུད་རྩི་ལྔ་དང་། བ་ལང་། རྟ། ཁྱི། གླང་བོ་ཆེའི་ཤ་དང་ཤ་ཆེན་ཏེ་ཤ་ལྔ་བསྣན་པའི་སོ་ལྔ་བོ་དེ་ལ་བླ་མེད་བུམ་རྫས་སོ། །རྒྱུད་སྡེ་གོང་འོག་ཐུན་མོང་དུ་ཆུ་གཙང་དང་དྲི་བཟང་གཉིས་བསྣན་པས། བླ་མེད་ལ་སོ་བདུན་དང་། འོག་མ་རྣམས་ལ་ཉེར་བདུན་དུ་འགྱུར་རོ། །བུམ་ཆུ་ལའང་། འཁྱིལ་ཆུ་དང་རྫིང་ཆུ་སོགས་ཆུ་ཤི་བདུན་སྤངས་ཏེ། རབ་ཡན་ལག་བརྒྱད་ལྡན་གྱི་ཆུ། འབྲིང་འབབ་ཆུ། ཐ་མ་འོ་མ་དགོས་པར་རྒྱུད་ལས་གསུངས་སོ། །བུམ་ཆུའི་ཚད་ནི་རྗེ་ཡབ་སྲས་ཀྱི་གསུང་ལས་མི་འབྱུང་ཡང་། འགྲོ་མགོན་འཕགས་པས་བུམ་པ་ཆ་གསུམ་དུ་ཕྱེ་བའི་ཆ་གཉིས་ཆུས་དགང་བ་དང་། ཆ་གཅིག་སྟོང་བར་འཇོག་ཅིང་། ཆ་གཉིས་བཀང་བས་གཟུགས་སྐུ་གཉིས་དང་། སྟོང་བའི་ཆ་གཅིག་གིས་ཆོས་སྐུ་མཚོན་པ་ཡིན་པར་གསུངས་སོ། །

༡༡ བུམ་རྫས་ཀྱི་ཕན་ནུས། ཕྱག་རྡོར་གསང་བ་མངོན་བསྟན་ལས། བྱཱ་གྷྲི(སླེ་ཏྲེས)སེང་གྷྲི(ཀན་ཏ་ཀཱ་རི)དབྱུག་པ་དང་། །ཨུཏྤལ་གཞན་གྱིས་མི་ཐུབ་པ། །ཧ་ས(རྒྱ་མཚོའི་ཝུ་བ)དེ་བས་ནད་རྣམས་སྦྱོངས། །དངུལ་དང་མུ་ཏིག་མུ་མིན་དང་། །བྱུ་རུ་གསེར་གྱིས་ཡེ་ཤེས་འཕེལ། །ནས་གྲོ་ཏིལ་དང་སྲན་མ་དང་། །མུ་ད་ག་ཡིས་ལམ་ལྔ་དག། ག་བུར་ཀུར་གུམ་ཛཱ་ཏི་དང་། །ཙན་དན་ཨ་ཀ་རུ་ཡི་ནི། །གཞན་དོན་འཕྲིན་ལས་ལྔ་འགྲུབ་བོ། །ཆུ་དང་སྙིང་བོ་ལྔ་ཡིས་ནི། །རྣལ་འབྱོར་ཕུན་སུམ་ཚོགས་གྱུར་བས། །ཞེས་དང་། གཞན་ཡང་། སློབ་དཔོན་སངས་རྒྱས་གསང་བའི་དཔུང་བཟང་འགྲེལ་བ་ལས་ཀྱང་མང་དུ་གསུངས་སོ། །

༡༢ བུམ་པ་སྒྲུབ་ཚུལ། དཀྱིལ་འཁོར་གྱི་ཁར། རབ་བསྒྲུབ་བྱའི་ལྷ་གྲངས་ཀྱི་བུམ་པ་དང་། འབྲིང་བུམ་པ་བཞི་འམ་ལྔ། བརྒྱད་དང་བཅུ་སོགས་ཅི་འབྱོར། མ་མཐའ་ཡང་རྣམ་རྒྱལ་བུམ་པ་དང་། ལས་བུམ། གཙོ་བོའི་ལྷར་མཐུན་གྱི་བུམ་པ་ངེས་པར་དགོས་པ་རྒྱུད་དག་ལས་གསུངས་སོ། །སྒྲུབ་ཚུལ་དངོས་ནི། སློབ་དཔོན་དཱ་རི་ཀ་བས། བསངས་སྦྱངས་བགེགས་བསྐྲད་སྔོན་འགྲོ་བས། །བུམ་པ་དྲི་ཡི་ཆུས་བཀང་སྟེ། །ཞེས་དང་། རྟ་མཆོག་རོལ་བ་ལས། དམ་ཚིག་ལྷ་རྣམས་གསལ་བྱས་ནས། །ཡེ་ཤེས་སྐུ་དང་གཉིས་མེད་པར། །མཆོད་བསྟོད་སྔགས་ཀྱི་བཟླས་པ་བྱ། །སྔགས་བཅས་ཆུ་དང་གཉིས་མེད་གནས། །དཀྱིལ་འཁོར་གྲུབ་པའི་དུས་དག་ཏུ། །རང་རང་གནས་ཀྱི་ཕྱོགས་སུ་དགྲམ། །ཞེས་པ་ལྟར་རོ། །

མགུ་ཙེ།

མགུ་ཙེ་ནི། ཟངས་ལ་དངུལ་གྱི་ཕྲ་ཤན་བཏབ་པ་སོགས་ཡིན། ཚད་ནི་ཆེ་ཚད་ཁྱོར་བཅུ་དང་། ཆུང་ཚད་སོར་བདུན་ཤོང་བ། ཆུང་ཚད་ཁྱོར་བདུན་ཤོང་ལ། གཏོར་གཞུང་ཁྱོར་ཉི་ཤུ་ཤོང་བའི་མཉྫུའི་ཁར་འཐེབ་ཙེ་བཀོད་དེ། ཆོ་ག་ལ་བརྟེན་ནས་ཛམ་ལྷར་ཆུ་གཏོར་དང་། ལན་ཆགས་ཤ་འཁོན་སྦྱངས་པའི་དགེ་སྒྲུབ་ལ་ལོངས་སྤྱོད་པའི་ཡོ་བྱད་ཅིག་ཡིན།

མཚོན་དོན་ནི། ལྟོ་བ་ཟླུམ་ཞིང་རྒྱ་ཆེ་བས། སེམས་ཅན་གྱི་ཁམས་ཟད་མི་ཤེས་པ་དང་འདོད་རྒུ་ཡིད་བཞིན་དུ་སྐོང་བ་དང་། མཆུ་མཚམས་ནས་དྲས་ཁ་ཅུང་ཟད་བསྐུམས་པས། འགྲོ་བ་རྣམས་ཞི་སྒོ་གཉིས་སུ་མེད་པའི་དོན་ལ་སྦྱོར་བ། མཆུའི་མགྲིན་པ་ཡར་བགྲེང་བས་ཐར་ལམ་དུ་འདྲེན་པ། སྦུ་གུས་གཉིས་སུ་མེད་པའི་བྱང་ཆུབ་ཀྱི་སེམས། ཁ་གཅོད་ལེབ་མོས་གཟུང་འཛིན་གྱི་འཕྲུལ་སྣང་ཁེགས་པ། གཞོང་པ་ཡངས་ཞིང་ནས་འབྲུ་ཞིབ་པ་ལྟ་བུས་ཕྲ་བཀོད་པས། ལུས་ཅན་རྣམས་མགྲོན་དུ་གཉེར་ཞིང་ལོངས་སྤྱོད་འཛད་མེད་དུ་སྟེར་བ། ཞབས་རྭ་མེད་པས་སྙིང་རྗེས་གཞན་དབང་དུ་གྱུར་བ། མཉྫུའི་འོག་ཏུ་ཚིགས་རྭ་བརྒྱད་དང་ལྡན་པས། ཚད་མེད་བཞིས་འགྲོ་དོན་མཛད་ཅིང་མཐར་ཐུག་སྐུ་བཞིའི་གོ་འཕང་ལ་འགོད་པར་གསུངས་སོ། །

པོག་ཕོར།

པོག་ཕོར་གྱི་སྣོད་ནི། གསེར་དངུལ་ཟངས་ལྕགས་དང་། དུང་དང་ཙན་དན་རྫ་ཕོར་སོགས་ལས་བྱས་ལ། ལྟོ་ལྡིར་ལ་རྐང་བ་གསུམ་ཅན། པ་ཏྲས་བརྒྱན་ཅིང་། ལུང་ཐག་གསུམ་ལྡན་ཞིག་གོ ། བདུག་སྤོས་ཀྱི་རྫས་ནི། ལེགས་གྲུབ་ལས། ག་བུར་དུ་ཏུས་ཨ་ཀ་རུ། །གསུམ་ནི་དྲི་ཞིམ་མཆོག་ཅེས་བྱ། །དྲི་ཞིམ་ལྔ་ནི་དེ་རྣམས་ལ། །ཙན་དན་དང་ནི་བུ་རམ་མོ། །ར་ས་དང་ནི་ཞོས་བསྣན་ན། །དྲི་ཞིམ་རྣམ་པ་བདུན་ཞེས་བྱ། །བདུག་སྤོས་དམ་པ་དེ་གསུམ་ནི། །ལས་རྣམས་ཀུན་ལ་གཙོ་བོར་གསུངས། །ཞེས་དང་། གཞན་ཡང་མདོ་རྒྱུད་དག་ནས་གསུངས་པ་ལྟར། སྤོས་སྦྱོར་དག་མཁས་གྲུབ་དམ་པའི་ཚད་ལྡན་ཕྱག་ལེན་ལྟར་བྱའོ། །

ཡང་ལེགས་གྲུབ་ལས། རིལ་བུ་གོང་བུ་ཕྱི་མ་དང་། །རེང་བུ་དང་ནི་རྣམ་པ་བཞི། །སྡིག་སྤོས་རིགས་སུ་ཤེས་བྱས་ནས། །ལས་རྣམས་སོ་སོར་སྦྱར་བར་བྱ། །ཞེས་པ་ལྟར་ལས་སོ་སོར་སྦྱོར་ཚུལ་ཡང་། དེ་ཉིད་ལས། ཞི་བ་ལ་ནི་རིལ་བུ་མཆོག། རྒྱས་པ་ལ་ནི་གོང་བུ་མཆོག། དྲག་ཤུལ་སྤྱོད་ལ་ཕྱི་མ་ཤིས། །ཐམས་ཅད་ལ་ནི་རེང་བུ་ཤིས། །ཞེས་དང་། གཞན་ཡང་། གནོད་སྦྱིན་དང་ཕོ་ཉ་མོ་སོགས་བདུག་ཡུལ་གྱི་ཁྱད་པར་ལ་བརྟེན་ཏེ་སྤོས་སྦྱོར་མཐའ་ཡས་པ་ཞིག་ཡོད་དོ། །ད་ལྟ་སེར་སྦྲེང་སོགས་སུ་འང་པོག་ཕོར་གྱི་ནང་དུ་བདུག་སྤོས་བཏུད་ནས་ཕེབས་པའི་ཕྱག་སྲོལ་ཡོད་པ་དང་། ཡང་བགེགས་བསྐྲད་སོགས་ལ་གུ་གུལ་བདུག་པ་འང་རྒྱུད་ཀྱི་དགོངས་པའོ། །བདུག་སྤོས་ཀྱི་སྦྱར་རྫས་སུ་མི་རུང་བའང་། ལེགས་གྲུབ་ལས། བློ་ལྡན་རྣམས་ཀྱི་ངན་པ་དང་། །སེན་མོ་རྒྱ་སྐྱེགས་ཐམས་ཅད་དང་། །དགུ་བ་དང་ནི་ཆང་སོགས་ཀྱིས། །བདུག་སྤོས་སྦྱར་བར་མི་བྱའོ། །ཞེས་སོ། །

སོ་ཤིང་།

སོ་ཤིང་གི་རྒྱུ་ནི། ཨུ་དམ་ཝ་ར། ཤུག་པ། འོ་མ་ཅན་དང་། མེ་ཏོག་དང་། འབྲས་བུ་ཅན་གྱི་ཤིང་དྲང་ཞིང་འཛེར་བུ་མེད་པ། རྨ་མེད་པ་དག་གོ། སྔགས་རིམ་ལས། སོ་ཤིང་ནི། ཨ་ཤྭད་ཐ་ལ་སོགས་འདིར་མི་རྙེད་པས་ཀླུ་བྱང་གིས་གསུངས་ལྟར། འོ་མ་ཅན་གྱི་ཤིང་ཧ་ཅང་སྦོམ་པ་དང་ཕྲ་བ་མིན་པ་དྲང་ཞིང་སྲོག་ཆགས་མེད་པ། མ་གས་པ་རྨ་མེད་པ། མགོ་མཇུག་མཉམ་པ། དྲི་བཟང་གི་ཆུས་བཀྲུས་པ་བདུག་པས་བདུགས་པ་སོར་བཅུ་གཉིས་པ་རྩེ་མོར་མེ་ཏོག་བཅིངས་པ་བྱའོ། །གསུངས་སོ། །

ཚད་ནི་སོར་བརྒྱད་དམ། བཅུ་གཉིས། དྲི་བཟང་བྱུགས་ཤིང་། རྩེ་མོ་དར་དང་མེ་ཏོག་གི་ཕྲེང་བ་འདོགས་པར། རྟ་མཆོག་རོལ་བ་དང་། རྡོར་ཕྲེང་མངོན་བྱང་། སྒྲོལ་མ་རལ་བ་གྱེན་བརྫེས་ཀྱི་རྒྱུད་སོགས་ལས་གསུངས་སོ། །

སོ་ཤིང་དོར་བའི་གནས་ནི། སྔགས་རིམ་ལས། ཁྲུ་བཞི་བ་གྲུ་བཞི་བའི་དཀྱིལ་འཁོར་བའི་ལྕི་བ་ལ་སོགས་པས་བྱུགས་པར་ཕྲེང་བ་ལས་གསུངས་ཤིང་། བའི་ཀོ་བ་ཙམ་དུ་ཞེས་གསུངས་པ་ནི་སྲབ་མཐུག་གི་ཚད་དུ་བི་རྱ་བའི་བཤད་དོ། །

དེ་ཡང་འདོར་ཚུལ་ནི། མགོ་ཞབས་རིང་ཐུང་སྙོམས་པ། ལྷ་གང་ཡིན་གྱི་སྙིང་བོའི་སྔགས་ཀྱིས་བཏབ་ནས། སློབ་མར་བཀྲམས་ཏེ་དཀྱིལ་འཁོར་དུ་འདོར་བའམ། སྔགས་རིམ་ལས། སོ་ཤིང་ལ་སློབ་དཔོན་གྱིས་བཟླ་བའི་སྔགས་ཕྲེང་བར་མ་བྱུང་ཡང་དོན་ཡོད་ཞབས་ཀྱིས་བགེགས་མཐར་བྱེད་ཀྱི་སྔགས་བཟླ་བར་གསུངས་པ་ལྟར་རམ། མི་ཐུབ་པས། ཨོཾ་ཨཱཿཛི་ཧ་སཾ་བ་རྟི་ནི་ཧཱུཾ་ཕཊ། ཅེས་ལན་བདུན་བཟླས་ཏེ། དེ་ནས་སློབ་དཔོན་བྱང་དུ་ཕྱོགས་ཏེ་སློབ་མ་ལ་སྦྱིན་ནས་སློབ་མ་ཤར་རམ་བྱང་དུ་ཕྱོགས་པས། ཨོཾ་བཛྲ་ཧཱ་ས་རྔྷི། ཞེས་བརྗོད་ནས་རྩེ་མོ་ནས་འཆོས་ཏེ་མིག་སྟེང་དུ་བལྟ་ཞིང་བལྟོས་པ་མེད་པར་མདུན་དུ་འདོར་རོ། །སྤྱི་རྒྱུད་ལས་སློབ་མ་ཁ་བྱང་དུ་ཕྱོགས་པ་ལ་སྦྱིན་ཞིང་སློབ་མས་ཤར་དུ་བལྟས་ཏེ་འདོར་བར་བཤད་དོ། །

དོར་བའི་ལྟས་ལ་ཤར་བྱང་ནུབ་ལྷོ་སྟེང་འོག་ཏུ་ཕྱོགས་པར་ལྟུང་ན་རིམ་པ་བཞིན་དུ་ཞི་རྒྱས་དབང་དྲག་རིག་འཛིན་ས་འོག་གི་དངོས་གྲུབ་འགྲུབ་ཅིང་། ཕྱི་རོལ་དུ་ལྷུང་ན་དངོས་གྲུབ་མེད་དོ། །

བྲིས་སྐུ།

གསང་སྔགས་ཀྱི་དངོས་གྲུབ་ལ་འཇུག་ཅིང་མྱུར་ཕྱིར། སྔགས་པ་ལས་དང་བོ་བས་བསྐྱེད་རིམ་གྱི་རྟོགས་པ་འཆར་བའི་རྟེན་དུ། གང་སྒྲུབ་པའི་ཡི་དམ་དེའི་སྐུ་བརྙན་བྲིས་འཆང་དགོས་པ་ཡིན།

ཇི་ལྟར་འབྲི་བའི་ཚུལ་ནི། ཡི་དམ་ཀྱི་ཆོ་ག་སྔོན་དུ་བཏང་སྟེ། དུར་ཁྲོད་དམ་དབེན་གནས་སུ་གད་བདར་བྱས་ཏེ། བླ་བྲེ་སྔོན་པོས་གུར་འོག་ནས་རུས་པའི་བརྒྱངས་ཤིང་ལ། རས་སོགས་ཀྱི་ཐང་ག དྲི་ཞིམ་བྱུགས་པའི་ཐོད་སྣོད་དུ། ཚོན་རྩི་ལྔ་འམ་རོ་བསྲེགས་ཀྱི་སོལ་བས་བཟོས་པའི་སྣག་ཚས། རོ་སྐྲ་པིར་དུ་བྱས་ནས་འབྲི་དགོས་པར། ཀྱེ་རྡོར་དང། སམྦུ་ཊ། གཤེད་དམར་སོགས་ལས་གསུངས་སོ། །

བཞེངས་ཚུལ་ནི། བྲིས་སྐུའི་རྣམ་པ་ཡང་བདེ་མཆོག་སྡོམ་འབྱུང་ལས། ཞི་ལ་ཞི་བའི་ཚུལ་གྱིས་སྐུ། །དྲག་ལ་དྲག་ཅིང་འཇིགས་བྱེད་པ། །དཔའ་ལ་དཔའ་ཞིང་ང་རྒྱལ་སྐུ། །སྒེག་པ་ལ་ནི་བཞད་པའི་ཞལ། །མཚན་ཉིད་འདི་ལྟར་མཚོན་ནུས་ནི། །སྔགས་པ་རྣམས་ཀྱིས་བྲིས་སྐུ་བྲི། །སྔགས་པ་ལས་ནི་དང་བོ་བས། །གཟུགས་བརྙན་ལ་སོགས་བྱ་བ་སྟེ། །བྲིས་སྐུ་སྒྲུབ་ན་མྱུར་བར་ནི། །དངོས་གྲུབ་རྒྱ་ཆེན་འཐོབ་པར་འགྱུར། །ཞེས་སོ། །

ལྒིགས་བམ།

འདིར་བསྟན་ལྒིགས་བམ་ནི་ཁྲོམ་བསྒྲགས་མི་རུང་བའི་གསང་བ་སྔགས་ཀྱི་ལྒིགས་བམ་སྟེ། དེ་འབྲི་བའི་ཚུལ་ནི། དུར་ཁྲོད་དམ་དབེན་གནས་སུ་གྲོ་ཤུན་དང་། ཏ་ལའི་ལོ་མ་གང་རུང་། སྲིད་དུ་སོར་བཅུ་གཉིས་དང་། །ཞེང་དུ་སོར་བཞིར་རྒྱུད་ཁུངས་མ་ལས་གསུངས་ལ། དགེ་ཆོས་ཀྱི་གསེར་ཐང་ལས་ཀྱང་། རྒྱ་དཔེ་ཕལ་ཆེར་ཏ་ལའི་ལོ་མར་བྲིས་པས། ཏ་ལའི་ལོ་མ་དེ་ཞེང་སོར་གསུམ་བཞི་ལས་ལྷག་པ་མི་ཡོང་བས། སྣེ་གང་རིང་བྱེད་ནུས་པ་ཙམ་ལས། ཞེང་ཆེན་པོ་གང་ལ་འོང་། ཞེས་པ་དང་མཐུན་ལ། དེ་ཡང་འབྲི་བྱེད་ནི། རོ་སོལ་ལ་སྣག་ཚ་བསྲེས་ཏེ། མི་རུས་དང་ལྕགས་སྨྱུག་གིས་འབྲི་དགོས་པར། ཀྱེ་རྡོར། རྡོ་རྗེ་མེ་ལྕེ་སོགས་ལས་གསུངས་སོ། །འབྲི་དུས་ཀྱང་ཕུར་བ་བཅུ་གཉིས་ཀྱི་རྒྱུད་ལས། བརྒྱད་དམ་བཅོ་བརྒྱད་ཉི་ཤུ་བརྒྱད། །ཉིན་མཚན་གུང་ལ་བྲིས་བྱས་ཏེ། །ཞེས་སོ། །ལྒིགས་ཤིང་དང་ལྒིགས་ཐག་ཡང་། རྡོ་རྗེ་མེ་ལྕེ་རྒྱུད་ལས། ལྒིགས་ཤིང་རུས་པ་འམ་གླང་ཆེན་གྱི། །བ་སོ་དག་ལ་ངེས་པར་བྱ། །ཐག་པ་བྲམ་ཟེ་མོ་ཡི་ནི། །སྐྲ་ཡིས་ཡོངས་སུ་བསྡམས་པར་བྱ། །ཡང་ན་ཡིད་ཆེས་པགས་པ་ལ། །མཉེན་པར་བྱ་བས་ཡོངས་སུ་བསྡམས། །ཞེས་སོ། །ཡང་ལྒིགས་བམ་འཆང་ཚུལ་ནི། དཔེ་ཀློག་གི་ཚེ་མ་གཏོགས། སྤྱི་བོའི་ཐོར་ཅོག་གི་གསེབ་དང་། ཡང་མཆན་ཁུང་དུ་སྦ་དགོས་པར་གསུངས་སོ། །སྤྱིར་ན། དགེ་འདུན་སྤྲུལ་བའི་ལྒིགས་བམ་ནི། སྣོད་མིན་གྱིས་མིག་ལ་ཤོག་སྟོང་ཡིན་པར་གསུངས་པ་སོགས་ཀྱི་ནུས་པ་ཡོད་ན་མ་གཏོགས། སྔགས་ཆས་འདི་དག་ཁྲོམ་གཟིགས་བྱེད་པ་གཏན་མི་རུང་ལ། དེང་སང་། རང་ཉིད་བླ་མ་ཆེ་ཁག་ཏུ་ཞལ་འཆེས་པ་འགའ་ཞིག་གིས་སྔགས་ཆས་དང་ཁྱད་པར་དུ། གསང་སྔགས་ཟབ་མོ་ཆོས་ཀྱི་ཁེ་ཚོང་ལ་བཀོལ་བ་ནི། རང་ཉིད་རང་གིས་དམྱལ་བའི་གཏིང་རྡོ་འཕེན་པ་ཡིན་ཏེ། གུང་ཐང་གིས། གསང་སྔགས་དེ་ཡང་འཕྲལ་གྱི་རྐྱེན་སེལ་ལམ། །ཚེ་དང་ནོར་སྒྲུབ་དབང་ཐང་མངོན་སྤྱོད་སོགས། །ཚེ་འདིའི་ལག་ཆ་ཁོ་ན་བྱེད་པ་ནི། །ས་མཆོག་ཙན་དན་སོལ་བར་བྱས་འདྲ་བས། །ཆོས་ཀྱིས་ངན་སོང་སྒྲུབ་པར་མ་བྱེད་ཨང་། །གསུངས་པ་དང་། ཞིབ་ཏུ་སྔགས་གཞུང་དག་ལས་ཤེས་པར་བྱོས་ལ། འདིར་མགོ་འབུས་ཙམ་བརྗོད་ན། དུར་ཁྲོད་ནག་པོའི་རྒྱུད་ལས། གྲི་གུག་དང་ནི་ཐོད་པ་དང་། །ཕུར་བུ་དང་ནི་ཐང་ག་དང་། །སུ་ལ་བསྟན་པར་མི་བྱ་སྟེ། །ཞེས་དང་། རྡོ་རྗེ་ཕྲེང་རྒྱུད་ལས། སྣོད་དང་ཅང་ཏེའུ་གྲི་གུག་དང་། །ལྒིགས་བམ་དང་ནི་བགྲང་ཕྲེང་དང་། །དམ་ཚིག་མེད་པ་གཞན་དག་ལ། །གང་དུ་འང་བསྟན་པར་མི་བྱའོ། །ཞེས་དང། རྣལ་འབྱོར་དམ་པ་རྡོ་རྗེ་ཅན། །བགྲང་ཕྲེང་དང་ནི་དབུ་རྒྱན་དང་། །རུས་པའི་རང་བཞིན་ཕྱག་རྒྱ་དང་། །ལྒིགས་བམ་བསམ་གཏན་རས་རིས་དང་། །ཐོད་པ་ལ་སོགས་རྣལ་འབྱོར་མ། །ཐམས་ཅད་དུ་ནི་དངོས་གྲུབ་ཕྱིར། །བླ་མ་ལ་ཡང་སྦ་བར་བྱ། །སྔགས་ནི་ཚིག་ཏུ་བརྗོད་མི་བྱ། །མཆུ་འགུལ་བར་ཡང་མི་མངོན་ཞིང་། །ཅུང་ཟད་མགྲིན་པར་བརྗོད་བྱ་ཡིས། །སྔགས་ཀྱི་རྒྱལ་བོ་དེ་ལྟར་བཟླས། །གསང་ལས་དངོས་གྲུབ་མཚུངས་པ་མེད། །དེ་ཕྱིར་དེ་ནི་སྡོམ་པར་བྱ། །སྣོད་མིན་ནོར་ནི་ཆེན་པོ་དང་། །ལྡན་ཡང་རྒྱུད་ལས་སྐྱོན་དུ་གསུངས། །བླ་མས་བླ་མེད་དངོས་གྲུབ་ཕྱིར། །འབད་པ་ཡིས་ནི་སྤང་བར་བྱ། །བཟའ་བཏུང་གོས་ལ་སོགས་པ་དང་། །ནོར་ནི་ཆེན་པོ་ལ་ཆགས་ཤིང་། །སྣོད་མིན་སློབ་མར་མན་ངག་མཆོག །སྨད་དུ་བྱུང་བ་གང་སྨྲ་བ། །རྣལ་འབྱོར་ཤེས་པ་ཚེ་འདི་ལ། །དེ་ནི་དམྱལ་བ་ངུ་འབོད་སྐྱེས། །ཞེས་དང་། མདོར་ན། དབང་འཐོབ་ཅིང་དམ་ཚིག་ལ་གནས་པའི་སྔགས་པས། སྤྱི་གསང་བཞི། བར་གསང་བཞི། གསང་བར་འོས་པ། གསང་བར་གཉེར་གཏད་པ་སྟེ། ལམ་ཉམས་ལེན་གྱི་ཚེ་གསང་བ་བཅུ་ཡི་སྒོ་ནས་གསང་བར་བཤད་དེ། གསལ་བཀྲ་ལས། ལྟ་ཟབ་སྤྱོད་པ་བརླིང་བོ་དང་། །ལྷའི་མིང་གཟུངས་དང་གྲུབ་རྟགས་གསང་། །སྤྱི་གསང་བཞི་དང་། བསྒྲུབས་པའི་གནས་དུས་ཡོ་བྱད་གྲོགས། །བར་དུ་གསང་ལ་བསྒྲུབ་པར་པར་བྱ། །བར་གསང་བཞི་དང་། བླ་མ་དང་རྡོ་རྗེ་སྤུན་གྲོགས་ཀྱི་སྐྱོན་ཕྲ་མོ་ཙམ་ཡང་གསང་བར་འོས་པ་དང་། བླ་མའི་དམ་ཆུ་ངག་ཏུ་བླུད། རྡོ་རྗེ་མགོར་བཞག་ནས་གསང་བ་འདི་གཞན་ལ་མ་སྨྲ་ཞེས་བཀའ་བསྒོས་གཉེར་གཏད་གནང་བ་དང་། དབང་ཆོག་རྣམས་ལས་ཀྱང་། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་ཉམས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་སྟེ། །རྡོ་རྗེ་བདུད་རྩིའི་ཆུ་འཐུངས་ཤིག། ཞེས་རྡོ་རྗེ་མནའ་ཆུ་བླུད་ནས་དམ་བཞག་མཛད་པ་དང་། དམ་ཚིག་ལས་འདས་ན། ཉེས་དམིགས་ཀྱང་། ཁྱོད་ཀྱི་དམ་ཚིག་རྡོ་རྗེ་འདི། །གལ་ཏེ་ཁྱོད་ཀྱིས་འགའ་ཞིག་ལ། །འདི་སྨྲས་ན་ནི་མགོ་བོ་འགེམས། །ཞེས་དང་། ཨོཾ། དེ་རིང་རྡོ་རྗེ་སེམས་དཔའ་རང་། །ཁྱོད་ཀྱི་སྙིང་ལ་ཡང་དག་ཞུགས། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཞེས་སོ། །

དེ་བས་སྔགས་ཆས་དེ་དག་ལ་མ་གུས་པ་སྤང་བར་བྱ་དགོས་ཏེ། རྡོ་རྗེ་རྩེ་མོ་ལས། རྟགས་དང་ཕྱག་རྒྱ་རྣམས་ལ་ཡང་། །ནམ་ཡང་བརྙས་པར་མི་བྱའོ། །འཁོར་ལོ་རྡོ་རྗེ་པདྨ་སོགས། །མཚན་མའི་ཕྱག་རྒྱ་གང་ཡིན་པ། །འགོམ་པ་ཉིད་དུ་མི་བྱ་ཞིང་། །བཟའ་བར་ཡང་ནི་མི་བྱའོ། །རྐང་བ་དག་གིས་བརྫི་མི་བྱ། །དེ་ཡི་སྟེང་དུ་འདུག་མི་བྱ། །སླར་ཡང་བཞག་པར་མི་བྱའོ། །ལྷ་ཡི་ཕྱག་མཚན་བཟང་བོ་དང་། །ལྷ་ཡི་བཞོན་པའི་མཚན་མ་རྣམས། །འགོམ་ཞིང་བརྙས་པར་མི་བྱ་སྟེ། །ཞེས་གསུངས་སོ། །

འདིར་སྔགས་ཆས་ལས་འཕྲོས་ཏེ་པོ་ཏིའི་སྐོར་ཅུང་ཟད་བརྗོད་ན། ད་ལྟ་རང་ཅག་གིས་གནའ་དཔེ་ཕྲ་ལ་རིང་བ་འདི་དག་ཀྱང་རྒྱ་གར་གྱི་ཏ་ལའི་ལོ་མའི་བྲིས་རྒྱུན་དར་བ་མང་དུ་བརྡ་སྤྲོད་མི་དགོས་ལ། འོན་ཀྱང་། སྔོན་གྱི་སྲོལ་ལ་བག་ཆགས་མཐུག་པའི་དམ་པ་རེ་གཉིས་ཀྱིས་སྣ་རིང་ལ་ཆོས་ཆེན་ཞེས་བརྩི་མཐོང་ཆེ་ཞིང་། ལྕགས་པར་ལ་མགོ་བཙེམ་ཞེས་བཏང་སྙོམས་སུ་འཇོག་པ་ནི། ཆོས་ཀྱི་གནད་གོ་བ་ཞིག་ཡིན་ཕྱིན། བརྗོད་བྱའི་ནང་དོན་ལ་བལྟ་བ་མ་གཏོགས། དཔེ་དབྱིབས་གྲུ་བཞི་མ་ཟད། ཟུར་གསུམ་ཞིག་ཡིན་ནའང་སྤྱི་ཚོགས་འཕེལ་འགྱུར་གྱི་དབང་གིས་སྟབས་བདེ་ཁྱད་ཀྱིས་བྱུང་བ་མ་གཏོགས། བལྟ་ཚུལ་གཅིག་ཏུ་བཟུང་ན་ལེགས་སོ། །

རྒྱ་གར་དུ་མ་ཟད། བོད་དུའང་ཏ་ལའི་ལོ་མའི་ལྒིགས་བམ་མང་དུ་དར་ཡོད་པ་སྟེ། རྒྱལ་བོ་བཀའི་ཐང་ཡིག་ལས། མ་འོངས་རྒྱལ་བརྒྱུད་ནོར་སྐལ་ཇི་ལྟར་སྦས་ཚུལ་གསུངས་དུས། དཀོར་མཛོད་དབུས་མའི་ཀེའུ་ཚང་ནང་། །ཏཱ་ལའི་ལོ་མའི་བཀའ་པོ་ཏི། །ལྒིགས་བམ་བདུན་ཅུ་རྩ་དྲུག་ནི། །རྒྱ་བོད་ལོ་པཎ་རྒྱ་དཔེ་བཞུགས། །ཞེས་གསུངས་ལ། བག་ཆགས་དང་རྙིང་ཞེན་གྱིས་དབང་གིས། ཏ་ལའི་ལོ་མའི་ཚད་དབྱིབས་ཀྱི་དཔེ་ཆ་རང་ཅག་ལ་དར་སྲོལ་བྱུང་བ། དགེ་ཆོས་ཀྱིས། རྒྱ་གར་ལྷོ་ཕྱོགས་ཀྱི་ཏ་ལའི་འདབ་མར་ལྕགས་ཁབ་ཀྱི་རྩེ་མོས་ཡི་གེ་བྲི་བར་འདུག་སྟེ་ཀློག་བདེ་བ་མི་སྣང་མོད། ཡི་གེ་ནམ་ཡང་ཆུད་མི་ཟ། སིང་ག་ལར་ཡང་སྡེ་སྣོད་ཀྱི་ལྒིགས་བམ་རྣམས་ལྕགས་ཁབ་ཀྱིས་འབྲི་ཡིན་འདུག གཞན་ཡུལ་དབུས་དང་བལ་ཡུལ་ནས་བྱུང་བ་རྣམས་ནི་སྣག་ཚའི་ཡི་གེ་ཤ་སྟག་ཏུ་སྣང་། སྤྱིར་དཔེ་ལྡེབས་མ་རིང་བོ་བྲི་བའི་སྲོལ་འདི་དང་བོ་ཏ་ལའི་ལོ་མར་བྲིས་པ་ལ་བརྟེན་ཏེ། རྒྱ་གར་དང་བོད་ཡུལ་སོགས་སུ་དར་བར་འདུག་ཅིང་། རྒྱ་གར་བ་རྣམས་ཤོག་བུའི་མིང་ལ་ད་དུང་ཡང་ལོ་མ་ཟེར། ཞེས་དང་། མི་ལ་རས་པས། ཕྱུགས་རྫི་ལ་མར་བ་དྲིས་སྐབས་ཀྱང་། སྲས་དར་མ་མདོ་སྡེས། འོ་ངེད་ཀྱི་ཕ་ཇོ་ལ་ཟེར་བ་ཡིན་པ་འདྲ། དེ་ཡིན་ན་རྒྱ་གར་ནས་པོ་ཏི་ཕྲ་ལ་རིང་བ་མང་བོ་འཁྱོས་མ་ལ་བཀལ་ནས་འོང་བ་ཞིག ཅེས་དང་། སྟེང་དུ་ཡི་གེ་ནུས་པའི་ཏ་ལའི་ལོ་མ་དེ། ཏ་ལ་ཁྱད་པར་བ་ཤིན་ཏུ་མཐོ་ལ་སྦོམ་པ་ཞིག་སྣང་། ཏ་ལ་དཀྱུས་མའི་ལོ་མ་ནི་སོར་གང་དོ་ལས་མེད་པས། ཡི་གེ་འབྲི་ས་མེད། དེ་ཡང་ལོ་མའི་ཕྱོགས་གཡས་གཡོན་གཉིས་ནས། ལྡེབས་མ་རེ་རེ་འོང་། དང་བོ་ལོ་མ་དེ་ཆུས་ནང་དུ་བཙོས། དེ་ནས་མཇུག་ཏུ་རྡོ་བཏགས་ཏེ། ཤིང་ཞིག་ལ་བཀལ་ནས་ཀོ་བ་བཞིན་དུ་མཉེད། ལག་པར་འཐུལ་བ་ན་དཔེ་རང་གི་ཚད་དུ་བཅད། ལྡེབས་རེ་རེ་བཞིན། སུམ་ཆའི་མཚམས་ནས་ཁུང་བུ་གཉིས་ཤིག་ཕུག དེ་བཞིན་ལྒིགས་ཤིང་ལ་ཡང་ཕུག་ནས་ནང་དུ་སྐུད་པ་རིང་བོ་ཞིག་དྲངས་ཏེ་མདུན་དུ་མདུད་པ་བོར་ནས། སྐེད་པ་ལ་བཅིངས་ཏེ་འགྲོ། བཀའ་པོད་སྐེ་རགས་སུ་བཅངས་བྱ་བ་དེ་འདྲ་ནས་བྱུང་བ་མིན་ནམ་སྙམ། ཀློག་རན་ཚེ་ཐག་པ་རན་པར་ལྷོད་ནས་ལྡེབས་རྣམས་དལ་བུའི་བསྒྱུར་ཏེ་འདོན། དེའི་ཕྱིར་ལྡེབས་འཁྲུག་དོགས་མེད་པས་རྒྱ་དཔེ་ཕལ་ཆེར་ལ་ཁ་ཡིག་གམ་ལྡེབས་གྲངས་མ་བཀོད་པ་དེ་ཡིན། ལྡེབས་རེ་བཞིན་ཨི་ཁུང་ཕུག་པ་སྟེ། རང་རེའི་བོད་ཀྱི་དཔེ་རྙིང་རྣམས་ལ་ཡང་འདུག་ཅིང་། དུས་ཕྱིས་བར་དུ་མཚལ་གྱི་སྐོར་ཐིག་ཆེན་པོ་གཉིས་ཨི་ཁུང་གི་ཐད་དུ་བྲིས་ནས་སྣང་། དེ་ནས་སྐོར་ཐིག་དེ་སྟོང་བར་སྣང་བའི་ནང་དུ་སྐུ་བརྙན་རེ་བྲི་བའི་སྲོལ་ད་ལྟའི་བར་རེབ་གོང་གི་དོར་རྡོ་རྣམས་ཀྱི་བརྒྱད་སྟོང་པར་མ་སོགས་ལ་འདུག་པ་དེ་ཡིན། དེ་ལས་ཀྱང་ས་སྐྱ་གོང་མ་རྣམས་ཀྱི་ཕྱག་དཔེ་ཕལ་ཆེར་ཤོག་བུ་ལ་བྲིས་པ་ཡང་ཕྲ་ལ་རིང་བ་ཏ་ལའི་ལོ་མའི་དབྱིབས་སུ་བྱས་ནས་སྣང་ཞིང་། དེ་བཞིན་ཞ་ལུ་ལོ་ཆེན། བུ་སྟོན། ངོར་ཆེན་སོགས་ཀྱི་ཕྱག་དཔེ་རྣམས་ཀྱང་འདྲ་བར་གནས་པས། ལྒིགས་བམ་ཁ་མ་ཕྱེས་བར་དུ་ཏ་ལའི་ལྒིགས་བམ་དང་ནོར་འགྲོ་བ་འདུག དཔེ་ཕྲ་ལ་རིང་བ་དེ་འདྲ་བྱེད་པའི་སྲོལ་ད་དུང་ཡང་ཁམས་ན་ཡོད་ཟེར། ཏ་ལའི་ལོ་མ་དེ་རྩ་རྒྱུས་གསལ་བས། ཐིག་ཀྱང་འདེབས་མི་དགོས། དབུ་ཤོག་གི་དང་བོ་ལ་ཨོཾ་ཞིག་བྲིས་པ་མ་གཏོགས། གཞན་ལྡེབས་རེ་རེའི་མགོ་ལ་དང་ཀྱོག་སོགས་བྲིས་པའང་མི་སྣང་བས། ཁ་འཐོར་ཚེ་ལྡེབས་ཀྱི་ཉིན་སྲིབ་གང་ཡིན་ཀྱང་མི་ཤེས། ཤོག་བུ་ལ་བྲིས་པའི་རྒྱ་དཔེ་རྣམས་ནི་ཤོག་བུའི་ཉིན་ལ་གུར་ཀུམ་གྱི་ཁ་བསྒྱུར་ཏེ། སེར་བོ་དང་། སྲིབ་ཕྱོགས་རང་མདོག་བཞག་པ་ཤ་སྟག་ཏུ་སྣང་། གཏེར་ཡིག་རྣམས་ཀྱང་ཤོག་སེར་སྟེང་ན་ཡོད་པ་དེ་འདྲའི་སྲོལ་ཡིན་མཆིས། སྡེ་སྣོད་གསུམ་ངོས་འཛིན་གྱི་འགྱུར་ཕྱག་དགོས་པ་འདི་ཆོས་རྒྱལ་གྱི་བཀའ་བཅད་ཡིན་ཟེར་མོད། རྒྱ་དཔེ་ཐམས་ཅད་ཀྱི་མགོ་ལ་ཡང་སངས་རྒྱས་དང་བྱང་སེམས་དཔའ་ཐམས་ཅད་ལ་ཕྱག་འཚལ་ལོ་དང་། འཇམ་དཔལ་གཞོན་ནུར་གྱུར་བ་ལ་ཕྱག་འཚལ་ལོ་སོགས་རྒྱ་ཡིག་རང་ལ་བྲིས་སྣང་ཞིང་། གཤེད་དམར་སོགས་ཀྱི་རྒྱུད་དང་། གཞན་ཡང་། བོད་དུ་བསྒྱུར་ཟིན་པ་ཇི་སྙེད་ཅིག་གི་ཕྱི་མའི་རྒྱ་དཔེ་ངོར་སོགས་ན་བཞུགས་པ་ལ་ཡང་། རྡོ་རྗེ་མཁའ་འགྲོ་ལ་ཕྱག་འཚལ་ལོ། །སོགས་བོད་སྐད་ལ་གང་ཡོད་རྒྱ་དཔེ་ལ་ཡང་སྣང་། འོ་ན། རྒྱ་དཔེ་དེ་དག་ལོ་ཙཱ་བ་རང་གི་ཕྱག་བྲིས་ཡིན་ནམ་སྙམ་ན། དེ་ཡང་མིན་ཏེ། བལ་ཡུལ་དང་རྒྱ་གར་ན་ནང་བའི་དཔེ་ཉུང་ཟད་ཙམ་བཞུགས་པ་དེ་ཀུན་གྱི་དབུ་ལ་ཡང་ཕྱག་འཚལ་ལོ་དེ་ཁོ་ན་ལྟར་སྣང་། ད་དུང་ཨུ་ཚུགས་དགོས་ནས་རྒྱ་གར་དང་མཚུངས་པར་ཆོས་རྒྱལ་གྱི་བཀས་བཅད་དོ་སྨྲས་པ་ཙམ་འབད། ཅེས་སོ། །

ཕྱིས་སུ་བོད་ཀྱི་གསུང་རབ་ཀྱི་དཔེ་ཆ་རྣམས་ཕྱོགས་བསྒྲིགས་བྱེད་སྐབས་ཚེག་བར་སོ་གཉིས་དང་སོ་དྲུག་གང་རུང་ལ་ཤོ་ལོ་ཀ་རེ་དང་། ཤོ་ལོ་ཀ་སུམ་བརྒྱ་ལ་བམ་གྲངས་སམ་བམ་པོ་རེ་བྱས་ཏེ། ལྒིགས་ཤིང་གི་བར་དུ་བསྡམས་ནས་འཇོག་པ་ལ་ལྒིགས་བམ་གཅིག་ཏུ་བརྩིས་པ་དང་། རྗེས་སུ་ལྒིགས་བམ་ཆེ་བར་ཤོག་གྲངས་ལྔ་བརྒྱ་ཡས་མས་དང་། འབྲིང་སུམ་བརྒྱ་ནས་བཞི་བརྒྱ་ཙམ། ཆུང་བར་ཉིས་བརྒྱ་ལྷག་ཡོད། ལྒིགས་བམ་རྣམས་ལ་ཁྱད་ཆོས་བདུན་ལྡན་པ་སྟེ། ཡིག་འབྲུའི་མཐའ་སྣེ་མི་འཆོལ་བའི་ཆེད་དུ་མཐའ་ཐིག ཤོག་ངོས་སོ་སོའི་རྒྱབ་མདུན་མི་ནོར་བའི་ཆེད་དུ་ཡིག་མགོ ཤོག་ངོས་སྔ་ཕྱིའི་གོ་རིམ་མི་འཛོལ་བའི་ཆེད་དུ་ཤོག་གྲངས། ལེ་ཚན་ཕན་ཚུན་མི་འཁྲུགས་པའི་ཆེད་དུ་མཚན་བྱང་། ལྒིགས་བམ་ཧྲིལ་བོར་སྲུང་སྐྱོབ་བྱ་བའི་ཆེད་དུ་ལྒིགས་ཤིང་། ལྒིགས་བམ་ཕན་ཚུན་མི་འདྲེས་པའི་ཆེད་དུ་ལྒིགས་བམ། དད་གུས་དང་མཆོད་པའི་ཆེད་དུ་ན་བཟའ་དཔེ་སྒྲིལ། དེ་དག་ཀྱང་བོད་རང་གི་སྒྱུ་རྩལ་གྱི་བཟོ་ཁྱད་ལས་བྱུང་བ་དང། ཡང་། གཞུང་ཆེན་གྱི་ཚིག་དོན་བམ་པོ་སོགས་ཀྱི་གོ་རིམ་མི་འཁྲུགས་པར་བྱེད་པའི་རྟགས་སུ། རྒྱ་རིམ་པ་བདུན་གྱིས་བཏབ་པ་ཞེས་འབྱུང་སྟེ། དེ་ནི། ཚིག་གི་རྒྱ། ཤད་ཀྱི་རྒྱ། ལེའུ་རྒྱ། བམ་པོའི་རྒྱ། བམ་གྲངས་ཀྱི་རྒྱ། སྣེ་ཐིག་གི་རྒྱ། གདོང་ཡིག་གི་རྒྱ་འམ་སྤྱན་འཁྱེར་གྱི་རྒྱ་སྟེ་བདུན་ནོ། །

སྲུང་མདུད།

༡ སྲུང་མདུད་ཀྱི་ཁུངས། ཕྱག་མདུད་དམ་སྲུང་མདུད་ནི་རྡོ་རྗེ་ཐེག་པ་ལ་འཇུག་པའི་ཚེ་སྟ་གོན་གྱི་སྐབས་སུ་དབང་གནང་ཡུལ་སློབ་མའི་ལུས་ཚད་ཀྱི་སུམ་སྒྲིལ་བྱས་ཏེ། མདུད་མཚམས་ལ་དབང་ལྷ་དང་སྔགས་བརྒྱ་རྩ་བཟླས་ནས་ཕུ་བཏབ་སྟེ་དཔུང་བ་གཡོན་པར་བཅིངས་པ་དེ་སྲུང་མདུད་ཀྱི་ཁུངས་ཡིན་ཏེ། རྟ་མཆོག་རོལ་བ་ལས། གཙང་བའི་རས་ལ་ལེགས་བཀལ་བའི། །སྲུང་སྐུད་མདུད་པ་གསུམ་ལྡན་པ། །ཡི་གེ་གསུམ་གྱི་སྔགས་བཟླས་ནས། །དེ་ཡི་དཔུང་བ་གཡོན་པར་བཅིངས། །ཞེས་དང་། རྡོ་རྗེ་ཕྲེང་པ་ལས། སྐུད་པ་ལན་གསུམ་དཀྲིས་པ་ནི། །རྡོ་རྗེ་གསུམ་ནི་མདུད་པར་ལྡན། །དཔུང་བ་གཡོན་པར་བཅིངས་པ་ནི། །ཞེས་སོ། །ཡང་གསེར་འོད་དམ་པའི་མདོ་ལས། བཅོམ་ལྡན་འདས་གཟུངས་སྔགས་འདི་སྒྲུབ་པའི་ཚེ་ཚོན་སྐུད་སྣ་ལྔ་ལ་སྔགས་ལན་རེ་གདབ་ཅིང་མདུད་པ་རེ་རེ་བཅིང་ངོ་། །དེ་འདྲ་བར་ལན་ཉི་ཤུ་རྩ་གཅིག་སྔགས་ཏེ་དཔུང་བ་གཡོན་པ་ལ་བཏགས་ན་འཇིགས་པ་ཐམས་ཅད་བསལ་ཏེ་ལུས་བསྲུང་བར་འགྱུར་རོ། །ཞེས་པ་འདི་ཡང་སྲུང་མདུད་ཀྱི་ཁུངས་སུ་འགྲོ་སྙམ་མོ། །

སྤྱིར་སྲུང་མདུད་ལ་ཡང་། ལས་སྒྲུབ་གྱི་དབང་གིས་རྣམ་གྲངས་མང་བོ་ཡོད་དེ། ཞི་རྒྱས་དབང་དྲག་གི་ལས་སོ་སོར་སྲད་པུ་ཁ་དོག་སྔོ་སེར་དཀར་དམར་དང་། ནག་པོ་ཁྲ་བོ་སོགས་དང་། མདུད་པ་ཡང་གཅིག་ལྡན་གསུམ་ལྡན་བར་མདུད་ཚུལ་མི་འདྲ་བ་མང་ངོ་། །

དེ་ཡང་སྲུང་མདུད་འདི་ལ་མྱ་ངན་ལས་འདས་པའི་ས་ལ་མ་བཞག་གི་བར་དུ། བར་དུ་གཅོད་པའི་ཕྱི་ནང་གསང་གསུམ་གྱི་བདུད་ཀྱིས་མི་ཚུགས་པར་སྲུང་བས་ཡིན། རྒྱུད་འགྲེལ་ལས་ཀྱང་། དཔུང་སྐུད་སློབ་མའི་ལུས་ཚད་སུམ་སྒྲིལ་གྱི་མདུད་མཚམས་སུ་བླ་མས་བུམ་ཆུས་རྡོ་རྗེ་རྒྱ་གྲམ་དུ་རེག་ཅིང་། དེར་སྣ་ཚོགས་རྡོ་རྗེ་གདན་ལ་རྒྱལ་བ་བྱམས་པ་མགོན་པོ་བཞུགས་སྟངས་ཅན་གྱི་སྐུ་ལས་འོད་ཟེར་འཕྲོས་ཏེ། སངས་རྒྱས་བྱམས་པ་མ་འབྱོན་བར་དུ་བདུད་ཀྱི་གཡོ་བ་མེད་པར། གསུངས་པ་ལས་ཀྱང་ཤེས་པར་ནུས་སོ། །དེ་ལྟར་དབང་གི་སྐབས་ཀྱི་དཔུང་སྐུད་འདི་ཁུངས་སུ་བཅོས་ནས། མི་རྣམས་ཆག་ཆེ་ཉམ་ང་དང་བར་དུ་གཅོད་པ་བཟློག་ཆེད་ཕྱག་ཡུལ་དུ་གྱུར་བའི་བླ་མ་དང་རྣལ་འབྱོར་བས། ལྷ་གང་རུང་ལ་དད་གུས་རྩེ་གཅིག་གིས་གསོལ་བ་བཏབ་སྟེ། གཟུངས་སྔགས་བཟླས་ནས་མདུད་མཚམས་སུ་ཕུ་བཏབ་སྟེ་ལུས་ལ་འཆང་བའམ་མགྲིན་པར་བཏགས་ན་གནོད་པས་མི་ཚུགས་པར་གདམས་པ་ཡིན་ཏེ། ཆོས་རྒྱལ་ཁྲི་སྲོང་ལྡེ་བཙན་ལ་སྐུ་ཁམས་མ་བདེ་བ་དང་། བོད་ཡུལ་དུ་བཙའ་སད་སེར་གསུམ་དང་། ནད་ཡམས་མུ་གེ་སོགས་བྱུང་བས། ཨོ་རྒྱན་རིན་པོ་ཆེས་རྒྱལ་བོ་ལ་ཕྱག་མདུད་དང་ཡི་གེ་བཅས་བསྐུར་བར། མནོལ་བསང་ལྷ་ཆབ་སྔོན་མོ་ལས་བཤད་དོ། །ཕྱིས་སུ་སྲུང་མདུད་ལ་དགུ་མདུད་དང་དྲུག་མདུད་སོགས་མང་དུ་དར་ཁྱབ་བྱུང་། ཁ་དོག་ནི་གྲྭ་བཙུན་ལ་སེར་བོ་དང་མི་སྐྱ་ཕོ་མོ་ལ་དམར་སྔོ་ལྗང་སོགས་གནང་བའི་ཕྱག་ལེན་བྱུང་ངོ་། །

༢ སྲུང་མདུད་ཇི་ལྟར་དར་ཚུལ། རྒྱས་པར་བྱས་ན། སྒྲུབ་པ་པོའི་གང་ཟག་རྣལ་འབྱོར་བ་ཆེ་གེ་མོས་རང་གིས་བསྲུང་བྱའམ་བསྒྲུབ་བྱའི་སློབ་མ་ལ་སྐབས་བབ་དོན་བྱ་གང་གི་ཆེད་སྲུང་མདུད་གྱི་སྒོ་ནས་བསྲུང་བ་བྱེད་པར། ཐོག་མར་སྲུང་མདུད་ཀྱི་རྒྱུ་ཆ་དར་སྐུད་དང་བལ་སྐུད་སོགས་གང་ཡིན་གཙང་སྦྲ་ལེགས་པོ་བྱས། དེ་ནས་རྩ་བརྒྱུད་ཀྱི་བླ་མ་རྣམས་མདུན་གྱི་ནམ་མཁར་སྤྱན་དྲངས། རང་ཉིད་ཡི་དམ་དུ་གསལ་བའི་ཕྱག་གཡོན་པདྨ་འདབ་མ་ལྔ་བའི་སྟེང་དུ་ཨཱ་གཅིག་ལ་དབྱངས་ཡིག་བཅུ་དྲུག་གཡོན་བསྐོར། ལག་གཡས་སོར་མོ་རྡོ་རྗེ་རྩེ་ལྔ་བའི་ལྟེ་བའི་མཐར་གསལ་བྱེད་སོ་བཞི་བསམ། སྲུང་མདུད་མདུན་དུ་བཞག་ནས་གང་བསྟེན་པའི་ཡི་དམ་གྱི་སྔགས་ཀྱིས་བགེགས་བསྐྲད། སྟོང་སྦྱངས་དང་བཅས་སྲུང་མདུད་རྣམས་ཨོཾ་ཨཱཿཧཱུཾ་གི་རང་བཞིན་དུ་གྱུར་པ་ལག་པ་པད་སྐོར་གྱིས་བླངས་ནས་སྙིམ་པར་བཟུང་ལ། ལག་གཉིས་རྡོ་རྗེ་པདྨ་སྙོམས་ཞུགས་ཀྱི་ཚུལ་ལས་འོད་ཟེར་རྣམས་བྱང་སེམས་ཀྱི་ཚུལ་གྱིས་སྲུང་མདུད་ལ་ཐིམ་པར་བསམ་ཞིང་། སྲུང་མདུད་ཡི་དམ་གྱི་ལྷའི་ངོ་བོ་འོད་ཟེར་སྣ་ལྔའི་རང་བཞིན་ཅན་གྱི་མི་ཤིགས་པའི་རྡོ་རྗེ་སྲུང་བའི་མདུད་པར་བསྐྱེད་ལ་རྩ་སྔགས་དང﹙ཉུང་མཐར་བརྒྱ་རྩ་བརྒྱད﹚བཅས་སྔགས་ཀྱི་འབྲུ་དོན་རྣམས་བསམ་སྟེ་མདུད་པ་མདུད། མདུད་པར་དགུ་མདུད་དང་། བཞི་མདུད། ལྔ་མདུད། སུམ་མདུད་ཆིག་མདུད་སོགས་ཅི་རིགས་ལས། དགུ་མདུད་ལྟ་བུ་ནི་ཡི་དམ་རྒྱལ་བ་ཞི་ཁྲོ་རྣམས་ཀྱི་ཕྱི་ནང་གསང་བའི་སྐུ་གསུང་ཐུགས་ཀྱི་ཡོན་ཏན་འོད་ཀྱི་རྣམ་པར་བསྡུས་ནས་བྱིན་གྱིས་བརླབས་པ་དང་། དེ་བཞིན་གཞན་རྣམས་ཀྱང་རྒྱལ་བ་རིགས་ལྔ་དང་རིགས་གསུམ་མགོན་པོ། སྐབས་འབྲེལ་ཡི་དམ་སོགས་ཅི་རིགས་ཀྱི་སྒོ་ནས་བྱིན་གྱིས་བརླབས་ཏེ་བསྒྲུབ་བྱ་སློབ་མའི་ནད་གདོན་འགལ་རྐྱེན་བར་གཅོད་ཐམས་ཅད་ཞི་ཞིང་ཕྱི་ནང་གསང་བའི་བར་གཅོད་ཐམས་ཅད་བཟློག་ཅིང་དེ་ལས་བསྲུང་བར་བསམ། མཐར་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས། ཨཱ་ལི་ཀཱ་ལི་དཔག་ཏུ་མེད་པ་བྱུང་ནས་སྲུང་མདུད་ལ་ཐིམ་པས་འོད་དུ་ཞུ་ནས་མདུད་པའི་ངོ་བོར་གྱུར་པར་བསམ་ལ། ཡེ་དྷ་རྨའི་ཤིས་བརྗོད་དང་བཅས་མཇུག་བསྡུ་བྱ། བསྡུས་པ་བྱས་ན། གཟུངས་སྔགས་བཟླས་ནས་དར་སྐུད་ཀྱི་མདུད་པར་ཞལ་ཕུ་དམིགས་སྒོམ་དང་བཅས་བྱིན་རླབས་བྱེད་ཀྱང་རུང་བར་གསུངས།

༣ སྲུང་མདུད་ཀྱི་ཁྱད་པར་དང་དབྱེ་བ། སྲུང་མདུད་ལ་ནང་གསེས་བསྒྲུབ་བྱ་རྣམས་འགལ་རྐྱེན་དང་བར་ཆད་ལས་སྲུང་བ། མཚོན་ཆ་དང་གཟའ་གདོན་ལས་སྲུང་བ། ཇག་རྐུན་དང་ཁྱི་སྤྱང་ལས་སྲུང་བ། གཅན་གཟན་དང་སྦྲུལ་བདུག་ལས་སྲུང་བ། ཐོག་སེར་དང་ས་ཆུ་མེ་རླུང་གི་འཇིགས་པ་ལས་སྲུང་བ། ཉམས་གྲིབ་དང་སྲི་ངན་ལས་སྲུང་བ། མི་ཕྱུགས་ཀྱི་འགོས་ནད་དང་འགོང་པོ་ལས་སྲུང་བ། དམག་འཁྲུག་དང་གཡུལ་ས་ལས་སྲུང་བ། ཐ་ན་ཐིག་ལེ་དང་མངལ། བུད་མེད་སྲུང་བའི་མདུད་པ་སོགས་ཅི་རིགས་ཡོད་ལ། དེ་རེ་རེ་ཡང་ཐུན་མིན་གྱི་སྒྲུབ་ཐབས་དང་དམིགས་སྒོམ་ཆོ་ག་མི་འདྲ་བ་རེ་རེ་ཡོད།

དཔེར་ན། ལས་སྣ་ཚོགས་ཀྱི་བེའུ་བམ་ལས། གུ་རུ་པདྨ་ལ་ཕྱག་འཚལ་ལོ། །ཚོན་སྐུད་སྣ་ལྔའི་སྐུད་པ་ལ་མདུད་པ་གསུམ་བྱས། སྔགས་བདུན་སྟོང་ངམ་ཁྲི་གསུམ་བཟླས་ལ་བཏབ་སྟེ་བཏགས། ཨོཾ་པདྨ་བིནྟུ་མུ་ནེ་ཛ་ལི་སྭཱ་ཧཱ། སྔགས་མདུད་དེ་ཕྱུགས་སོགས་གང་ལ་བཏགས་ཀྱང་བུ་མི་འཆོར། སྲིའུ་ལ་བཏགས་ན་ཤི་ཁ་ཆོད། སྐྱེས་པར་བཏགས་ན་ཕྱོགས་ངན་ཐུབ། བུད་མེད་ལ་བཏགས་ན་བུ་མི་འཆོར། ར་ལུག་ལ་བཏགས་ན་གཅན་གཟན་ཐུབ། སུ་ལ་བཏགས་ཀྱང་ནད་རིམ་ཐུབ། སྒོ་གོང་དུ་བཏགས་ན་དེ་ཡི་འོག་ཏུ་འཛུལ་ཚད་དལ་ཡམས་དང་རིམས་ཡམས་ལས་ཐར། ལུས་ལ་བཅངས་ན་མཚོན་གྱིས་མི་ཚུགས། སྲུང་སྐུད་དཀར་བོ་ལ་སྔགས་ནས་རྐེད་པར་བཏགས་ན་ཐིག་ལེ་འཛག་པ་ཟབ། ནག་པོར་སྔགས་ཏེ་བུད་མེད་ཀྱི་རྐེད་པར་བཏགས་ན་ལྟེ་བ་བསྒྱུར་བའི་མཆོག སྒྲུབ་པར་འཇུག་དུས་ཚོན་སྣ་ལྔའི་སྐུད་པར་ཐུབ་ཆོད་ཆེན་པོའི་སྔགས་འདིས་བསྣུན་ཏེ་ཁབ་མིག་ལ་དྲངས་ནས་སྒོ་གོང་དུ་འཛེར་ན་བར་ཆད་ཐམས་ཅད་ཐུབ་པར་འགྱུར་རོ། །ཚོན་སྐུད་སྣ་ལྔའི་གདམས་པ་ཟབ་བོ། །

སྡིག་མདུད་ཀྱིས་སྲུང་བ་ཐེའུ་རྟ་སྡུད་མ་ནི། སྔགས་དང་ཏིང་འཛིན་བཟླས་པ་ཅན་གྱིས་སྲུང་སྐུད་འདི་བཏགས་པས་ཐུབ། འདི་གང་ལ་བཏགས་པའི་འཆང་བ་བོ་དེ་ཉིད་གཟའ་བདུད་ཀྱི་རྒྱལ་བོས་ཕྱག་ན་རྡོ་རྗེར་མཐོང་། དེ་བཞིན་དུ་ས་བདག་ཀླུ་གཉན་ཁྱུང་རིགས་ལྔ། རྒྱལ་བོ་བེ་ཧར་གྱིས་རྟ་མགྲིན། ཐེའུ་རང་ཡུལ་འདྲེ་གདུག་པ་ཅན་གྱིས་གནམ་ལྕགས་ཕུར་བ་མེ་འབར། བདུད་དང་གཤིན་རྗེས་ཞགས་པ་མེ་དཔུང་འཕྲོ་བ། སྣང་སྲིད་ལྷ་འདྲེ་རྣམས་ཀྱིས་ཐོག་དང་མཚོན་ཆའི་འཁོར་ལོ། དེ་བཞིན་ལ་ལས་དུག་གི་སྡོང་བོ། ལ་ལས་ཁྲོ་ཆུའི་ཕ་ཝཾ། ལ་ལས་ས་སྲིན་ཕོ་མོ། ལ་ལས་ཀླུ་བདུད་མགོ་དགུ། ལ་ལས་ནམ་མཁའ་སྟོང་བ་སོགས་གདུག་པ་ཅན་དེ་དག་གིས་མི་ཚུགས་པའི་མཐོང་སྣང་སྣ་ཚོགས་སུ་འཆར། འདི་ལ་བདུད་འདུལ་རྡོ་རྗེའི་ཞགས་པ། ནམ་མཁའི་ཐོག་རྒོད་མཚོན་ཆ་ལས་ཀྱི་འཁོར་ལོ་སོགས་སུ་གྲགས། གང་གིས་ཐོགས་པ་དེ་བདུད་རིགས་བར་ཆད་གང་གིས་མི་ཚུགས་ཤིང་ཚེ་ཡི་དམུ་ཐག་དང་། འདྲེ་འཇོམས་བྱད་གྲོལ་གྱི་སྲུང་བ་ཟས་ནོར་འགུགས་ཅིང་དབང་བྱེད་ཀུན་གྱིས་བཀུར་བའི་དོན་ཡོད་ཞགས་པ། ཕྱོགས་ངན་ནད་ཡམས་ཞོ་ལད་ཆང་ལད་སྨྱོན་པ་འདྲེ་ཅན་སོགས་ཀུན་ཐུབ་རྡོ་རྗེའི་ཐོ་བ། སྲིའུ་ཡ་མ་ནག་པོ་དང་། སྐེག་ཅན་སོགས་བསྐྱབ་པའི་ཚེ་འཛིན་རྡོ་རྗེའི་ཞགས་པ་ཡོན་ཏན་བརྒྱ་ལྡན་འདི་ཡི་བྱ་ཐབས་ལ། དང་བོར་བྱང་ཆུབ་མཆོག་ཏུ་སེམས་བསྐྱེད་དེ། རང་ཡི་དམ་བསྒོམ། སྲུང་སྐུད་ནག་པོ་དེ་ལྕགས་སྡིག་མགོ་ལུས་གཉེར་མས་གང་བ་འོད་ཟེར་མེ་མཚོན་གྱི་ཚ་ཚ་འཕྲོ་བར་བསམ་ལ། སྔགས་བརྒྱ་བཟླས་ལ་མདུད་པ་དགུ་བརྒྱབ་མདུད་པ་རེ་སྡིག་པའི་མགོ་རེ་རེ་གྱུར་བར་བསམ། མདུད་པ་དགུ་བརྒྱབ་ཚར་བ་དང་། སྔགས་བརྒྱ་སྟོང་གང་འགྲུབ་བཟླས་ལ། སྲུང་སྐུད་དེ་སྡིག་པ་ནག་པོ་མགོ་དགུ་ཁ་དགུ་མིག་དགུ་ཡོད་པ། མིག་ཉི་ཟླ་ལྟ་བུ། སྡེར་མོ་ལྕགས་ཀྱུ་ལྟ་བུ། མཆེ་བ་དང་ཟེ་བ་སོག་ལེ་ལྟ་བུ། དེ་མཐོང་བ་ཙམ་གྱིས་གནོད་བྱེད་རྣམས་བརྒྱལ་བར་བྱེད་པ། དེ་ལས་འོད་ཟེར་འཕྲོས་པས་གནོད་བྱེད་ཐམས་ཅད་བཀུགས་ནས་སྡིག་པ་ལ་རེག་པ་ཙམ་གྱིས་ལྕགས་བསྲེག་ལ་རྩར་སྦུར་ཕོག་པ་ལྟར་བསྲེགས་པར་བསམ། སྔགས་ནི། ཨོཾ་ཏྲི་ཙེ་ཤང་ཀུ་རུ་འཆང་བ་བོ་ལ་སྲུངས་ཤིག ཨོཾ་གྷི་པ་ར་ཙ་འཆང་བ་བོ་ལ་སྲུངས་ཤིག ཅེས་བཟླས། མདུད་པར་སྔགས་བཏབ། དེ་ནས་གང་ལ་བཏགས་པའི་མི་ཕྱུགས་དེ་ཉིད་སྡིག་པའི་ཁོག་པའི་ནང་དུ་ཚུད་ཅིང་། ཐུགས་རྗེ་ཆེན་པོའི་རྣམ་ཐར་སྡིག་པའི་སྙིང་གི་དཀྱིལ་དུ་བཞུགས་པར་བསམ། ལྕགས་སྡིག་དེ་མཐོང་བ་ཙམ་གྱིས་གནོད་བྱེད་གདོན་བགེགས་རྣམས་རྔུབས་ཤིང་བསྲེགས་པར་བསམ། རང་ཡི་དམ་བསྒོམ་པའི་ཐུགས་ཀའི་འོད་ཟེར་གྱིས་དབྱིངས་ནས་ཁྲོ་བོ་དང་བྱ་ཁྱུང་ཚོན་གང་བ་ཁ་བ་བུ་ཡུག་འཚུབ་པ་ལྟ་བུ་བྱོན་ནས་སྲུང་སྐུད་ལ་ཐིམ་པར་བསམ་ལ། ཨོཾ་ཧེ་རི་གདུག་པ་ཅན། ལྕགས་ཀྱི་མཆེ་བ་ཅན། གནོད་བྱེད་གདུག་པ་ཅན་གྱི་སྙིང་ནས་དྲོངས་ཤིག་སྭཱ་ཧཱ། ཞེས་སྨྲ་བཅད་བྱས་ལ་ཁྲི་ཕྲག་གཅིག་གིས་སྲུང་སྐུད་སྔགས་པར་བྱའོ། །འདི་སྲིའུ་ཡ་མ་ནག་པོ་གསོ་བ་དང་། སྨྱོ་འབོག་དང་གོད་ཁ་ཆེ་བ་གཅོད། ཞོ་ཆང་ལད་པ་དང་། འབྲི་མཛོ་བཞོ་མ་ཐུབ་པ་སོགས་ཐུབ། སེམས་ཅན་ལ་སྤྱང་ཀིས་འཚེ་བ་དང་། མི་ལ་གདོན་གྱིས་གནོད་པ་སོགས་ལ་སྲུང་སྐུད་འདི་བཏགས་པས་ཐེ་ཚོམ་མེད་དེ་བདེན་རྫུན་ལག་ཏུ་ལོངས་དང་གསལ། ཟབ་མོ་གཏེར་གྱི་མན་ངག་གོ།

གཞན་ཡང་། སྲུང་སྐུད་སོགས་ལ་ཡི་དམ་གྱི་སྔགས་བསྲུང་ཤམ་ཅན་ཟབ་མོ་ཅི་རིགས་བཟླས་ཏེ་དམིགས་པ་ཁ་བསྒྱུར་ལ་བཏགས་པས་གནོད་བྱེད་ཐམས་ཅད་སྲུང་བར་འགྱུར་རོ། །

དབང་ཕྱུག་ཆེན་པོའི་སྲུང་མདུད་ནི། སྤྱན་རས་གཟིགས་ཀྱི་སྤྲུལ་བ། ལྷ་འདྲེ་འབྱུང་བོ་ཀུན་གྱི་གཙོ་བོ། དབང་ཕྱུག་ཆེན་པོའི་སྒོ་ནས་གཞན་སྲུང་ན། རང་ཉིད་མུ་སྟེགས་རྣམས་ཀྱི་ལྷའི་གཙོ་བོ་དབང་ཕྱུག་མཐིང་མདོག་དབུ་ལ་རིན་པོ་ཆེ་ཡོད་པ་གཡས་ཏྲི་ཤུལ་རྩེ་གསུམ། གཡོན་སྡིགས་མཛུབ་ཅན་ནམ། ཡང་ན། སྐུ་མདོག་ནག་པོ་གཅེར་བུ་རྒྱན་མེད་ལིང་ག་གྱེན་དུ་སྒྲེང་བ། ཕྱག་གཉིས་རྭ་ཡི་མདའ་གཞུ་འགེངས་པར་བསྒོམ་ལ། སྲུང་སྐུད་ནག་པོ་གཅིག་ལ་མདུད་དགུ་བརྒྱབ། མདུད་པ་རེ་རེ་བཞིན་ལྕགས་སྡིག་མགོ་དགུ་ཁ་གདངས་པ་མེ་ཡི་ཚ་ཚ་འཕྲོ་བ་དྲི་མ་མི་ཞིམ་པས་དཔག་ཚད་ཁྱབ་པ་གནོད་བྱེད་ཀུན་ཟ་བར་བྱེད་པར་བསམ་ལ། ཨོཾ་མ་ཧཱ་དྷི་ཝ་ཧཱུཾ་ཕཊ། ཨོཾ་ཧ་ས་དྷི་ཝ་ཧཱུཾ་ཕཊ། ཨོཾ་དེ་བ་དྷི་ཝ་ཧཱུཾ་ཕཊ། ཞེས་བརྒྱ་སོགས་བཟླས་པ་སྲུང་སྐུད་ལ་བཏབ་སྟེ་གང་ལ་བཏགས་པས། ནོར་འོ་མ་མི་སྟེར་བ། སྐམ་འགོང་། ཞོ་ལད། ཆང་ལད། རྒྱུན་དུ་འོ་མ་རུལ་བ། ནད་པའི་འགྲུལ་སྣ། བྱིས་པ་མཚན་ངུས་བྱེད་པ། ཡམས་ནད་འདྲེ་འདར། སྲོག་རླུང་། ཆང་སྨྱོན་བྱེད་པ། གཟའ་ནད། རྟ་ནད། ནོར་ནད། རྟ་ནོར་གདོན་བཏབ་བརྡུང་བ་ལ་སོགས་དེ་དག་རྣམས་ལ་ཤིན་ཏུ་ཕན་ནོ། །

ཕ་དམ་པའི་མན་ངག ཨོཾ་སུ་དུ་ར་རྦད་སྭཱ་ཧཱ། སྲུང་སྐུད་དཀར་བོ་ཆ་གཅིག་ནག་པོ་ཆ་གཉིས་ཕྱི་བསྒྲིལ་སུམ་ཁུག་བྱས་པའི་ཁྲོ་བོ་ལ་མདུད་པ་གསུམ་བྱས་ལ་སྔགས་འདི་བརྒྱ་རྩ་བཏབ། ཆང་ཉེས་ན་སྦང་མ་དང་བླུག་སྣོད་ལ་བཏགས། རྫ་མ་ཉེས་ན་རྫ་མའི་ལུང་ལ་བཏགས། ཞོ་ཉེས་ན་ཞོ་སྣོད། མི་རྣམས་འཁྲུ་ན་སྐེད་པ། སྐྱུག་ན་སྐེ། ཐིག་ལེ་འཛག་ན་སྐེད་པ། མཚོན་སྲུང་ན་སྐེ། སེམས་ཅན་འཕྱིས་སྲུང་བྱེད་ན་མཇུག་མར་བཏགས། དམ་པའི་མན་ངག་ནག་པོ་དགུ་བསྒྲིལ་འདི་ཅི་ལ་ཡང་འགྲོའོ། །

ཡང་དབང་ཕྱུག་ཆེན་པོའི་སྲུང་སྐུད་ནི། ལུག་ནག་སོགས་བལ་ལ་སྲུང་མདུད་ཉེར་གཅིག་བྱ། དེ་རེ་རེ་བཞིན་ལྷེན་སྔོན་པོ་གཡས་ཌཱ་མ་རུ་དང། གཡོན་ཁ་ཊཱཾ་བཟུང་བ་རེ་སྟེ་ཉེར་གཅིག་ཏུ་བསྒོམ། མདུད་པ་རེ་ལ་སྔགས་བརྒྱ་འདེབས། ཨོཾ་ཨ་ཧི་ནག་པོ་ནན། དུར་ཏི་ནག་པོ་སོད། ཅེས་བཟླས་འདི་ནི་ཕྱུགས་བཞོ་མ་བཏུབ་ན་རྭ་ལ་བཏགས། འོ་མ་མི་སྟེར་ན་རྣ་བ་གཡོན། འཁྲབ་ན་མཇུག་མ། ཞོ་ཉེས་ཞོ་ཟོ། ཆང་ཉེས་ཆང་སྣོད། ཐིག་ལེ་འཛག་ན་སྐེད་པ། བྱིས་པ་མཚན་ངུས་བྱེད་ན་སྐེ་ལ་བཏགས། འཁྲུ་ན་རྐང་བ་ལ་བཏགས། གྲང་བ་ལ་མར་བསྔགས་ནས་སྐེད་པར་བྱུག་པ་སོགས་ཀྱིས་ཉེས་པ་རྣམས་སྲུང་ངོ་གཏེར་མའོ། །

ཨང་རག

ཨང་རག་འདི་རྩ་རླུང་འཕྲུལ་འཁོར་དང་གཏུམ་མོ་སོགས་སྒོམ་དུས་ཀྱི་དོར་ཐུང་ཞིག་ཡིན། རྫོགས་ཆེན་ལུགས་ལ་སྔགས་གོས་བརྒྱད་ཀྱི་ནང་ཚན་རྡོ་རྗེ་གསང་གོས་ཟེར། དེ་ཡང་། པདྨ་བཀའ་ཐང་ལས། ཨ་ཏི་ཡོ་ག་བྱ་བ་ཁས་ལེན་པའི། །བྱིས་དཀར་རས་སྔོན་ཨང་རག་གྱོན་པ་ཞིག། ཞེས་དང་། རས་ཀྱི་ཨང་རག་སྔོན་པོ་སྨད་ལ་དཀྲིས། །ཞེས་པར་མདོག་སྔོན་པོར་བཤད་ལ། སྔགས་འཆང་རྒྱན་མེར་རྐང་བ་གཉིས་རྐེད་པ་གསུམ་འགྲོ་བས་ཁ་གསུམ་པ་དང་། དྲ་ཕྱི་ནང་བསྒྲགས་པའི་དོར་མ་ལྟ་བུ། རིང་ཐུང་ཁྲུ་གང་དང་། གཞི་མ་དམར་བོ་ལ་རྐང་བ་གཉིས་ལ་མུ་འདྲིལ་ལྗང་ཁུ་བྱས་པ། འདི་གསང་གོས་ཡིན་པས་གཞན་གྱི་མི་མཐོང་བར་བྱ་དགོས་པར་གསུངས་སོ། །དེ་ལྟར་རིང་ཚད་ཁྲུ་གང་བ། རས་སྣ་ཚོགས་འཇའ་སྒྲིག་དང་། དུང་ཕྲེང་ངམ་ཐོད་ཕྲེང་གི་རི་མོ་ཡོད་པ། ཁ་འདབས་སུ་དར་སྔོན་སོགས་ཀྱི་གདུགས་ཕུར་གྱིས་བརྒྱན་པ་ཞིག་གོ །

སྒོམ་ཐག

སྒོམ་ཐག་འདི་མདོ་སྔགས་གཉིས་ཀ་ལས་འབྱུང་སྟེ། མདོ་ལས་དགེ་སློང་རྣམས་མཚན་མོ་མལ་ནང་དུ་ལུས་ཚུགས་མི་ཞིག་པའི་ཆེད་དུ། པུས་འཁྱུད་དགོས་པར་གསུངས་པ་དེ་ཡིན། སྔགས་ལས་རྣལ་འབྱོར་བས་རྩ་རླུང་ཐིག་ལེའི་སོགས་ཀྱི་ཉམས་ལེན་སྐབས་ཤིན་ཏུ་གལ་ཆེ་ལ། སྒོམ་ཐག་འདི་གྲུབ་མཐའ་རིས་མེད་ཀྱིས་སྤྱོད་སྲོལ་ཡོད་པ་དང་། ཁྱད་པར་དུ་རྗེ་མི་ལའི་ཡན་ཆད་ཀྱི་གྲུབ་འཐོབ་པ་རྣམས་ཀྱིས་སྒོམ་ཐག་ཁུག་པའི་མགོ་བོར་འཁོར་ཚད་དང་། ཆོས་དྲུག་སྡུད་པའི་ཟིན་བྲིས་རྣམས་ལས་ཀྱང་དེ་ལྟར་དང་། མི་ལའི་མདུན་དུ་དྭགས་པོས་ཐབས་ལམ་བསྒོམས་པའི་སྐབས་སུ། དམྱལ་བ་ཐིག་ནག་གི་བཀོད་པ་མཐོང་ཞིང་སྐུ་ཁམས་མ་བདེ་བ་བྱུང་སྐབས། རྗེ་བཙུན་གྱིས་ཁྱེད་ཀྱི་སྒོམ་ཐག་ཐུང་བའི་རྐྱེན་གྱིས་རྩ་འཐམ་པར་འདུག་པས། སྒོམ་ཐག་རིང་དུ་ཐོངས་གསུངས་པ་ལྟར། ཆང་བ་གང་རིང་དུ་བཏང་བ་ནས་ད་ལྟ་དེ་ལྟར་བྱེད་པ་མང་སྟེ། གཅིག་རྐྱང་ལ་སོར་བདུན། ཞེང་ལེབ་ལ་སོར་གསུམ་མམ་བཞིའོ། །རྙིང་ལུགས་ལ་སྒོམ་ཐག་བཅིང་བ་ལ་བརྟེན་ཏེ་འཇའ་ལུས་གྲུབ་པའི་རྟེན་འབྲེལ་གྱི་བྱིན་རླབས་ལ་དམིགས་ནས། སྒོམ་ཐག་དང་སྒོམ་ཤིང་གི་ངོས་ལ་རྡོ་རྗེ་ཟམ་པའི་རྩ་ཚིག་བྲིས་པས་དབང་བསྐུར་བའི་ཕྱག་བཞེས་མཛད་དོ། །

སྤྱིར་སྒོམ་ཐག་ནི། སྒོམ་ཆེན་དག་ལུས་ཚུགས་དྲང་བོར་བསྲིངས་ཆེད། ཕྲག་སྟེང་ནས་པུས་འཁྱུད་ཀྱི་སྡོམ་ཐག་སྟེ། དེ་ཡང་སྒོམ་ཆེན་མཉམ་བཞག་གི་ཚེ། རས་ལེབ་མོ་ཞེང་ཚད་སོར་བཞི་ཙམ་པ་ལ། རྩ་དབུ་སྐྱོ་རོ་གསུམ་མཚོན་ཕྱིར། གཞུང་སྐུད་གསུམ་གཤིབས་པ། གཏུམ་མོའི་མེ་མཚོན་ཕྱིར་ཁ་དོག་དམར་བོ། དགའ་བ་བཅུ་དྲུག་མཚོན་ཕྱིར་དྲ་མིག་བཅུ་དྲུག་ཡོད་པའོ། །

རྒྱབ་ཤིང།

རྒྱབ་ཤིང་ནི། སྒོམ་དུས་སུ་རྒྱབ་རྟེན་ས་ཞིག་སྟེ། ཚད་འོག་མཁར་དང་འདྲ་ལ། ཕྲེད་ཤིང་མཐོ་གང་བ་རེ་གླ་རྒྱུན་སོགས་ཐི་གུ་འཇམ་པོས་སྦྲེལ་བ་ཞིག་གོ། སྒོམ་མཁར་དང་འདི་གཉིས་བཻ་རོ་ཙཱ་ན་ནས་སྤང་མི་ཕམ་མགོན་པོ་བར་སྒོམ་ཐག་དང་སྒོམ་རྟེན་ལུས་ལ་བཙུགས་ནས་རྫོགས་པ་ཆེན་པོའི་མན་ངག་གནང་བས་འཇའ་ལུས་བརྙེས་པའི་ལོ་རྒྱུས་ཡོད་ལ། ད་ལྟ་ཡང་གྲུབ་མཐའ་ཁ་ཅིག་གིས་ཕྱག་ལེན་དུ་འདེབས་པའི་གསང་ཆས་ཡིན་པར་བཤད་དོ། །

སྒོམ་རྟེན་གྱི་མདུན་ཤིང་ངམ་འོག་མཁར།

འོག་མཁར་ནི་སྒོམ་ཆེན་པ་དག་ལུས་གནད་མི་འཆུག་པ་དང་། ཐིག་ལེ་ལུག་བརྒྱུད་བལྟ་ཕྱིར། མདུན་དུ་བསླངས་ནས་སྣེ་མོ་མ་ནེའི་ཀོས་ཀོ་བརྟེན་པ་ཞིག་སྟེ། རྒྱུ་ཚེར་མ་མེད་པའི་ཤིང་རིགས་ཤུག་པ་སོགས་ཀྱིས་བཟོས་པའི་དབྱུག་པ། རིང་ཚད་ཁྲུ་ཕྱེད་དོ་ཡོད་པ་ཞིག་གོ། རྒྱ་གར་གྱི་གྲུབ་ཆེན་དག་དང་། རྫོགས་ཆེན་པ་དང་བཀའ་གདམས་པར་དར་སོ་ཆེའོ། །

འབོལ་གདན།

འབོལ་གདན་ནི། ཀུ་ཤ་སྔོན་པོའི་འབོལ་གདན། འཕང་དུ་སོར་བཞི་དང་། སྲིད་ཞེང་མཐོ་གང་སོར་བཅུ་དྲུག་ཡོད་པ་ལེགས་གྲུབ་ལས་གསུངས་ལ། མ་འབྱོར་ན་འཇག་མ་དང་སྤ་ཡང་རུང་སྟེ། མི་ལས། འོག་ན་སྤ་ཡི་འབོལ་ཆུང་བདེ། ཞེས་པ་ལྟར། ཡང་ལས་ཀྱི་ཁྱད་པར་གྱིས་ཤིང་གི་སྟན་དང་། ཁྲིའུ། ལས་ཀུན་ལ་ལོ་མའི་སྟན་ཡང་རུང་བར་ལེགས་གྲུབ་ལས་གསུངས་པ་དང་། ཡང་བླ་མེད་ཀྱི་རྒྱུད་ལས་ནི། ཞིང་ལྤགས་དང་གླང་ཆེན་ཀོ་རློན། སྟག་གཟིག་སེང་གེའི་པགས་པ། སྡེར་བཞི་མ་ཉམས་པ་དང་། དུར་ཁྲོད་ཀྱི་རས་དག་ཀྱང་བཤད་དོ། །

ཡང་། བརྟག་གཉིས་ལས་ཚོགས་ཀྱི་འཁོར་ལོའི་དུས་སུ་རྣལ་འབྱོར་ཕོ་མོ་རྣམས་གདན་ཇི་ལྟ་བུ་ལ་གནས་པ་འཆད་པའི་ཚེ། རོ་གདན་དང་། སྟག་ལྤགས་དང་། དུར་ཁྲོད་རས་ཀྱི་གདན་གསུམ་གསུངས་པ་ལས། རོ་གདན་ནི་རོ་དངོས་མ་ཉམས་པ་སྨན་ལ་སོགས་པས་བྱུགས་པས་པགས་པ་མ་དུལ་བར་བྱས་ནས་ལེགས་པར་བསྐམས་ཏེ། དེ་ཉིད་སླར་ཡང་བྱེ་མ་རློན་པ་སོགས་ལ་ཅུང་ཟད་སྦངས་ནས། དབྱུག་པའམ་ཐོ་བ་འཇམ་པོས་རུས་མགོ་རྣམས་ཀྱི་ཐད་ནས་རིམ་པ་བཞིན་བརྡུངས་པས། ནང་གི་རུས་པ་སོགས་ཕྱེ་མར་གྱུར་བ་འོག་གི་ལམ་ནས་འཐོན་པར་འགྱུར་ལ། ཐམས་ཅད་འཐོན་ཟིན་ནས་ལེགས་པར་འཇམ་པོར་གྱུར་གྱི་བར་དུ་བྱི་དོར་བྱས་པ་དེ་ཉིད་གདན་དུ་བྱའོ། །ཞེས་འཆད་དོ། །དེ་བཞིན་དུ་སྟག་ལྤགས་ཡན་ལག་མ་ཉམས་པ་མཉེན་པོར་བྱས་པ་དང་། རོ་རས་ལ་ནི་མི་རོ་བྲིས་པའོ་ཞེས་བླ་མ་དག་འཆད་དོ། །

ཡང་ཞི་ཁྲོའི་ཁྱད་པར་གྱི་གདན་དུ་བཞུགས་ཚུལ་ལ། རང་བྱུང་གི་ཡེ་ཤེས་རྟོགས་པའི་ཡོན་ཏན་གྱིས། ཞི་བའི་ལྷ་ཚོགས་ཀྱི་གདན་ལ། དབང་བསྐུར་རྒྱལ་བོའི་རྒྱུད་ལས། ཐུགས་ནི་མི་འཇིགས་བཞི་ཡིས་བདུད་བཞི་བཅོམ། །དེ་གྲུབ་རྟགས་སུ་སེང་གེའི་ཁྲི་ལ་བཞུགས། །སྐུ་ནི་སྟོབས་བཅུའི་མི་དགེ་བཅུ་རྣམས་འདུལ། །དེ་གྲུབ་རྟགས་སུ་གླང་ཆེན་ཁྲི་ལ་བཞུགས། །ཡོན་ཏན་རྫུ་འཕྲུལ་རྐང་བཞིས་ཆགས་མེད་སྒྲོལ། །དེ་གྲུབ་རྟགས་སུ་རྟ་མཆོག་ཁྲི་ལ་བཞུགས། །གསུང་ནི་དབང་བཅུ་མཐར་ཕྱིན་རྒྱལ་བོའི་གསུང། །དེ་གྲུབ་རྟགས་སུ་རྨ་བྱའི་ཁྲི་ལ་བཞུགས། །ལས་ནི་འཕྲིན་ལས་རྣམ་བཞིས་ཐོགས་མེད་སྒྲོལ། །དེ་གྲུབ་རྟགས་སུ་ཤང་ཤང་ཁྲི་ལ་བཞུགས། །ཞེས་སོ། །ཆེ་བའི་ཡོན་ཏན་དེ་རྣམས་ཀྱི་ཉེས་ཚོགས་བཅོམ་པའི་གདན་ནི། ཐབས་དང་ཤེས་རབ་དབྱེར་མེད་པ་ཉི་མ་དང་ཟླ་བའི་གདན། དོན་དམ་དཀོར་བདུན་ལྷུན་གྱིས་གྲུབ་པའི་རྟགས་སུ་རིན་པོ་ཆེའི་ཁྲི་རྐང་མཛོད་མིག་བདུན་ལྡན་དུ་ཤར་བ་རྣམས་ཡིན་ལ། གདན་དེ་དག་བརྩེགས་ལུགས་ནི། སྐྱེས་བུ་ལྔ་ལ་ལྔ་བརྩེགས། སེམས་དཔའ་ལ་ནི་སུམ་བརྩེགས། ཀུན་བཟང་ཡབ་ཡུམ་ལ་བཞི་བརྩེགས་སོ། །གཞན་ཡང་རྣམ་གྲངས་ལ། སྟོབས་གླང་ཆེན། སྙིང་རྗེ་རི་དྭགས། ཆོས་མ་འདྲེས་པ་ཆུ་སྲིན་སོགས་ཀྱང་བཤད་དོ། །

ཁྲོ་བོའི་ཚོགས་ཀྱི་གདན་ནི། ཉི་ཟླ་པད་གསུམ་ནི་ཞི་ཁྲོ་གཉིས་ལ་ཐུན་མོང་དུ་རུང་བ་སྤྱིར་བཏང་ཡིན་ལ། ཁྲོ་གདན་གྱི་ཁྱད་པར་ནི། སྔ་འགྱུར་རྙིང་མའི་ལུགས་ཀྱི་ཆེ་མཆོག་ཧེ་རུ་ཀ་ལྟ་བུར་མཚོན་ན། འོག་གཞི་རྡོ་རྗེ་བྲག་གདན་ལ། འགྲོ་བ་རིགས་དྲུག་རང་གཟུགས་ཀྱིས་བཏེགས་པའི་གདན། སྣ་ཚོགས་པདྨ་གེ་སེར་དང་བཅས་པ། རྩ་ཉོན་དྲུག་དང་ཉེ་ཉོན་ཉི་ཤུ་བསྲེགས་པའི་འོད་ཟེར་སྟོང་དུ་འབར་བའི་ཉི་མ། འཁོར་བའི་གདུང་བ་སེལ་བའི་ཟླ་བའི་དཀྱིལ་འཁོར། དེའི་སྟེང་དུ་ད་དུང་དབང་བོ་བརྒྱ་བྱིན་དང་། ཚངས་པ། ཁྱབ་འཇུག དབང་ཕྱུག གདོང་དྲུག སྦྲིང་གི་རི་ཏི། ཚོགས་ཀྱི་བདག་པོ་བཅས་ལྷ་ཆེན་བརྒྱད། མཐའ་ཡས། འཇོག་པོ། དུང་སྐྱོང་། སྟོབས་རྒྱུ། པདྨ། དབང་ཆེན། ནོར་རྒྱས། རིགས་ལྡན་བཅས་ཀླུ་ཆེན་པོ་བརྒྱད་དེ། ལྷ་ཀླུ་སྤེལ་མར་ཁ་སྦུབ་དུ་བསྣོལ་བའི་གདན་གྱི་སྟེང་ལ། མི་འཇིགས་པ་སེང་གེ དཔའ་བ་སྟག གཏུམ་པ་གཟིག བརྗིད་པ་དོམ། སྟོབས་གླང་ཆེན། འཛིན་པ་མ་ཧེ། གདུག་པ་ཆུ་སྲིན། ཞེ་སྡང་སྦྲུལ་ཏེ་བྱོལ་སོང་གཙོ་བོ་བརྒྱད་ཀྱི་གདན་གྱི་ཁར། གསེར་གྱི་འཁོར་ལོ་རྩིབས་མ་བཅུ་གཉིས་དང་ལྡན་པ་དེའི་ལྟེ་བ་ལྷ་ཆེན་པོ་མ་ཧཱ་དེ་བ་དང་། ཨུ་མ་དེ་བ་ཁ་སྦུབ་དང་ཕྱི་ཆིངས་སུ་བསྣོལ་བའི་གདན་རྣམས་ཡིན་ནོ། །

དྲུག་པ། རྒྱན་གོས་ཀྱི་སྐོར།

ལོངས་སྐུའི་ཆ་བྱད་དང་དེའི་མཚོན་དོན།

འདིར་ལོངས་སྐུ་མཛེས་པར་བྱེད་པའི་རིན་པོ་ཆེའི་རྒྱན་བརྒྱད་དང་གོས་ལྔ་སྟེ་གོས་རྒྱན་བཅུ་གསུམ་བཤད་པ་ལ། དང་བོ། རྒྱན་བརྒྱད་ནི། སྙན་རྒྱན། མགུལ་རྒྱན། དཔུང་རྒྱན། དོ་ཤལ་ལམ་སེ་མོ་དོ། ཕྱག་གདུབ། སོར་གདུབ། ཞབས་གདུབ། དབུ་རྒྱན་བཅས་རིན་པོ་ཆེའི་རྒྱན་བརྒྱད་དང། གོས་ལྔ་ནི། དར་གྱི་ཅོད་པན། སྟོད་གཡོགས། དར་དཔྱངས། སྐ་རགས། སྨད་དཀྲིས་བཅས་ལྔའོ། །དེ་དག་གི་མཚོན་དོན་ནི། སྨོན་ལམ་ཕ་རོལ་ཕྱིན་པས་ན། །དབུ་རྒྱན་རིན་ཆེན་པྲོག་ཞུ་ལ། །རྩེ་ཕྲན་དག་གིས་རྣམ་པར་སྤྲས། །ཐབས་ཀྱི་ཕ་རོལ་ཕྱིན་པས་ན། །ལེ་བརྒན་དར་གྱི་ཅོད་པན་ཅན། །འཕྱངས་དང་བསྐྱོད་པས་རྣམ་པར་མཛེས། །བཟོད་པས་ཕ་རོལ་ཕྱིན་པས་ན། །སྙན་ཤལ་རིན་ཆེན་པ་ཏྲ་ལ། །ཁོང་གསེང་སྔོན་པོའི་ཕྲ་དང་བཅས། །བསམ་གཏན་ཕ་རོལ་ཕྱིན་པས་ན། །ཐུགས་ཀའི་ཟེའུ་རྒྱན་མཛེས་པ་ལ། །དཔལ་གྱི་བེའུ་རྣམ་པར་བརྒྱན། །བརྩོན་འགྲུས་ཕ་རོལ་ཕྱིན་པས་ན། །སྐུ་སྨད་དར་གྱི་ཤམ་ཐབས་དང་། །ཞབས་གདུབ་རིན་ཆེན་པ་ཏྲ་ཅན། །ཚུལ་ཁྲིམས་ཕ་རོལ་ཕྱིན་པས་ན། །སྐེད་རྒྱན་རིན་ཆེན་པ་ཏྲ་ལ། །དྲ་བ་དྲ་ཕྱེད་ཟ་ར་ཚགས། །སྦྱིན་པའི་ཕ་རོལ་ཕྱིན་པས་ན། །རིན་ཆེན་པ་ཏྲའི་སོར་གདུབ་དང་། །ཕྱག་གདུབ་རིམ་པ་ལྔ་དང་ལྡན། །ཤེས་རབ་ཕ་རོལ་ཕྱིན་པས་ན། །སེ་མོ་དོ་དང་དོ་ཤལ་ལ། །རིན་ཆེན་པ་ཏྲའི་སྤྲས་པ་ཅན། །སྟོབས་ཀྱི་ཕ་རོལ་ཕྱིན་པས་ན། །དབུ་རྒྱན་རིན་ཆེན་པ་ཏྲ་ལ། །དྲ་བ་དྲ་ཕྱེད་ཟ་ར་ཚགས། །ཡེ་ཤེས་ཕ་རོལ་ཕྱིན་པས་ན། །དར་གྱི་སྟོད་གཡོགས་དར་དཔྱངས་དང་། །སྐ་རགས་ལྷབ་ལྷུབ་མཛེས་པ་བཅས། །བཅུ་གསུམ་རྒྱན་དང་ལྡན་པ་ནི། །ངེས་པ་ཅན་གྱི་གཞུང་ལས་གསུངས། །ཞེས་སོ། །

དབུ་སྐྲ་ལྕང་ལོ།

སྔགས་འཆང་རྣམས་ཀྱི་དབུ་སྐྲ་ལྕང་ལོ་འཇོག་པའི་ཁུངས་ནི། འཇམ་དཔལ་མཚན་བརྗོད་ལས། གཙུག་ཕུད་ཕུད་བུ་ལྕང་ལོ་ཅན། །རལ་བ་མུ་ཉྫ་ཅོད་པན་ཐོགས། །གདོང་ལྔ་གཙུག་ཕུད་ལྔ་དང་ལྡན། །ཟུར་ཕུད་ལྔ་བ་མེ་ཏོག་ཐོད། །ཅེས་དང་། ཀུན་འདུས་རིག་པ་དང་། དཔལ་ཡེ་ཤེས་ཐིག་ལེ། རྡོ་རྗེ་མེ་ལྕེ་རྒྱུད་སོགས་ལས་ཀྱང་གསུངས་སོ། །དེ་ཡང་ཆོས་རྒྱལ་ཨིནྡྲ་བྷུ་དྷི་དང་ཁ་ཆེ་ཟླ་བ་བཟང་བོ་སོགས་ཁྱིམ་སྔགས་རིག་པ་འཛིན་པ་མང་དུ་བྱུང་ཕྱིར། དེ་དག་གི་ངོ་སྐལ་དང་དགོས་པ་དུ་མ་ཞིག་གི་ཕྱིར། གསར་རྙིང་གི་རྒྱུད་སྡེ་དུ་མ་ནས་དཔའ་བོའི་ལྕང་ལོ་མི་བྲེག་པར་རྒྱན་དུ་བསྔགས་པ་ཡིན།

སྐྲ་བཅིངས་ཚུལ་ལའང་། ཐོར་ཅོག ཕྱེད་བཅིངས། ཟུར་ཕུད་གྱེན་བརྫེས་དང་གསུམ་ཡོད། ཐོར་ཅོག་ནི་དབུ་སྐྲ་ཀུན་སྤྱི་བོར་བཅིངས་ནས། སྐྲ་སྣེ་ཕྱིར་མི་མངོན་པར་རྡོག་པོ་ཏོག་ལྟར་བཅིངས་པའོ། །ཕྱེད་བཅིངས་ནི། སྐྲ་ཕྱེད་སྤྱི་བོ་དང་། ཕྱེད་ཀ་ཐུར་དུ་ཉིལ་བའོ། །ཟུར་ཕུད་གྱེན་བརྫེས་ནི། སྐྲ་ཐུར་དུ་ཉིལ་བ་ལ་སྤྱི་བོར་སྐྲའི་ཟུར་ཕུད་ལྔ་འམ་གསུམ་བཅིངས་པའོ། །གཞན་སྐྲ་བཅིངས་རུས་པའི་འཁོར་ལོ་དེ་བསྐོན་ན་མཆོག་གྱུར་ཞིག་ཏུ་བཤད་དེ། དཔལ་སྤྲུལ་གྱིས། ལྟོ་སྟོང་རུས་པའི་འཁོར་ལོ་ཟླུམ་པོ་དེ་ཡོད་ན། །དཔའ་བོའི་ལྕང་ལོ་མི་འབྲེག་གཙུག་ཕུད་དེ་བསམ་ཡང་། །རྒྱན་མེད་རལ་རྫོང་སྟུག་པོའི་འཕྱང་སྡེབས་དེས་སུན་ནས། །སོར་གསུམ་གཙུག་སྐྲའི་མཆོད་པ་མཁན་སློབ་ལ་ཕུལ་བཏང་། །ཞེས་སོ། །

དེར་མ་ཟད་སྐྲ་ཐོད་དུ་བཅིངས་པ་ལ་གསེར་དངུལ་སོགས་ཀྱི་ཟླ་ཕྱེད་དང་། སྣ་ཚོགས་རྡོ་རྗེ་སོགས་ཀྱིས་ཀྱང་བརྒྱན་པར་བཤད་དེ། མངོན་བརྗོད་བླ་མ་ལས། ཐོད་པའི་ཕྲེང་བས་དབུ་ལ་བརྒྱན། །རལ་བའི་ཅོད་པན་རྒྱན་དུ་ཐོགས། །ཟླ་བ་ཕྱེད་པས་སྤྱི་གཙུག་ལ། །སྣ་ཚོགས་རྡོ་རྗེས་དབུ་ལ་མནན། །ཞེས་སོ། །

དེ་ལས་གཞན། རྒྱུད་ཀྱི་ལྒིགས་བམ་ཡང་རལ་བའི་དཀྱིལ་དུ་བཅིངས་དགོས་པ་སྟེ། ཕྱག་རྡོར་གསང་བ་མངོན་བསྟན་ལས། ལྒིགས་བམ་སོར་ནི་བཅུ་དྲུག་ལ། །རིམ་བདུན་རྒྱ་ཡིས་བཏབ་ནས་ཀྱང་། །རྟག་ཏུ་སྤྱི་བོའི་གཙུག་ཏུ་བཟུང་། །འདི་དང་བྲལ་བར་མ་གྱུར་ན། །བསྙེན་པ་དེ་ཡིས་བསྒྲུབ་པ་དེ། །སྒྲུབ་པ་ཆེན་པོའང་དེ་ཡིན་ཏེ། །སྔགས་ཀྱང་དེ་ཡིན་ལྷ་ཡང་དེ། །བླ་མ་དེ་ཡིན་སློབ་དཔོན་ཡང་། །སངས་རྒྱས་ཆོས་དང་དགེ་འདུན་ཡང་། །དེ་ཡིན་བསྐྱེད་དང་རྫོགས་པ་དེ། །མ་ལུས་དབང་ཡང་དེ་ཡིན་ཏེ། །འཇིག་རྟེན་བྱ་བ་ཀུན་སྤངས་ནས། །འདི་ལ་མཆོད་པར་གྱུར་བ་ནི། །ཚོགས་གཞན་ཅི་ཡོད་རྨོངས་པའི་རྒྱུ། །ཅི་ཕྱིར་འདི་ལ་འབད་མི་བྱེད། །ཅེས་ཕན་ཡོན་དང་བཅས་ཏེ་གསལ་བར་གསུངས་སོ། །

མཚོན་དོན་ནི། སྐྲ་སྤྱི་བོར་བཅིངས་པས་རིགས་བདག་འབྲལ་བ་མེད་པ་དང་། ལྕང་ལོ་གཡས་སུ་འཁྱིལ་བས་དཔའ་མོ་མཚོན་པའོ། །ཡང་སྔགས་ལུགས་ལ་ལྕང་ལོ་འཇོག་དགོས་པའི་ཁྱབ་པ་མེད་དེ། གཏུམ་པོ་དཔའ་གཅིག་གི་རྒྱུད་ལས། སངས་རྒྱས་ལྔ་ནི་རབ་སྦྱོར་བས། །མགོ་བོ་དབུ་རྒྱན་ཕྱག་རྒྱ་བྱ། །ཟུར་ཕུད་ལྔ་ཡིས་བརྒྱན་བྱས་ནས། །སྐྲ་དང་ཁ་སྤུ་བྲེག་པར་བྱ། །ཞེས་སོ། །

ཉེ་ཆར། སྔགས་རལ་གྱི་བཤད་པ་ཤོག་འཁྱར་ཞིག་ལག་སོན་བྱུང་བ། སྐབས་འདིར་འབྲེལ་ཆེ་བས། ཚེགས་ལ་མ་བལྟས་པར་ཆ་ཚང་བཀོད་ན། རལ་བ་ཞེས་འཁྲུལ་སྣང་གི་རྒྱ་ཆོས་ཉིད་ཀྱི་རོལ་བ་རལ་བའི་དོན་ནི། ཕྱོགས་བཅུ་དུས་བཞིའི་རྒྱལ་བ་རབ་འབྱམས་ཐུགས་ཀྱི་ཟེའུ་འབྲུ་ཨོ་ཏྲིའི་ཨོ་རྒྱན་ལ། ཉོན་མོངས་མེ་ཡིས་གདུང་བའི་གྱི་ན་བས། །གསོལ་བ་འདེབས་སོ་བྱིན་རླབས་ཆར་ཆེན་ཕོབས། །སྔོན་བསགས་དཀར་བོའི་འབྲས་བུ་ལེགས་སྨིན་པས། །མཆེད་ཀྱི་མཆོག་གྱུར་པདྨ་རྡོ་རྗེ་ཉོན། །ཨེ་མ། སྐལ་ལྡན་གྲུབ་པའི་དབང་ཕྱུག་གོང་མ་འགས། །དབུ་ལོ་མ་བྲེགས་བརྡ་རྟགས་རྟེན་འབྲེལ་ནི། །རང་བྱུང་རྡོ་རྗེ་འཇིགས་མེད་གླིང་བ་ཡིས། །རལ་བ་ཡི་ཐོར་ཚུགས་ལན་བུ་ཅན། །གསང་སྔགས་ཀྱི་བསྟན་པ་དར་བ་དང་། །སྣང་བ་ཀུན་ཟིལ་གནོན་རྟེན་འབྲེལ་ཡིན། །ལེགས་འདོད་དང་ཚུལ་འཆོས་བྱས་སྙམ་མེད། །ཅེས་གསུངས་པའི་དོན་དེ་སེམས་ལ་རྨད། །གཞན་གདོད་མའི་ས་ལ་ལེགས་བྱོན་པའི། །དོན་འབྲས་གྲུབ་བརྡའ་འགས་ལུང་བཤད་ན། །སྐྲ་ལན་བུ་ལྔ་བཅུ་རྩ་བརྒྱད་ནི། །དཔལ་ཁྲག་འཐུང་ལྔ་བཅུ་རྩ་བརྒྱད་མཚོན། །སྤུ་ཉག་མ་བྱེ་བ་གྲངས་མང་ནི། །མ་ཌཱ་ཀྐི་བྱེ་བ་གྲངས་མང་མཚོན། །དུས་རྟག་ཏུ་སྤྱི་བོར་བཅིངས་པ་ནི། །ཕ་བླ་མ་མི་བརྗེད་དྲན་གསོར་བཞག། དུས་དབྱར་དགུན་ཚ་གྲང་གིས་དུབ་ཚེ། །བསིལ་དྲོད་ཀྱི་བདེ་བ་སྟེར་ཕྱིར་བཞག། རང་མ་ཉེས་བཞིན་དུ་གླགས་ལྟ་བས། །དགྲ་བགེགས་རྩད་ནས་བརླག་ཕྱིར་བཞག། ཁོང་བཀའ་གདམས་རྣམ་ཐར་སྐྱོང་བའི་ཕྱིར། །མི་གྲལ་ལ་མི་ཚུད་གྱིར་དུ་བཞག། དུས་མ་འོངས་གཙུག་ཏོར་ལྟར་མི་མངོན། །དེ་འཐོབ་པའི་དགོས་པ་ཡོད་ཕྱིར་བཞག། དབུར་སྐྱེས་པའི་ལྕང་ལོའི་ཐོར་ཅོག་འདི། །ཆོས་སྐུ་ཐིག་ལེ་ཉག་གཅིག་བརྡ། །མ་བྲེགས་མགོ་ལ་དཀྲིས་པ་འདི། །འཁོར་འདས་སྤང་བླང་དག་པའི་བརྡ། །དེ་འདྲའི་དོན་ཅན་རལ་བ་འདི། །ལྷ་རྩ་གསུམ་སྲུང་མའི་བླ་རྡོ་ཡིན། །རྫོགས་ཆེན་མཁྱེན་བརྩེ་འོད་ཟེར་གྱིས། །མཐོན་མཐིང་རལ་བའི་ལྒིགས་བམ་མན་ཆད་ནས། །བདོག་པའི་ཉེར་སྤྱོད་ཕྲ་མོ་ཡན་ཆོད་དུ། །མདོར་ན་རྣལ་འབྱོར་ཡིད་ལ་མཛའ་བའི་རྫས། །རྩ་གསུམ་དམ་ཅན་ཌཱ་ཀྐིའི་བླ་རྡོར་འབུལ། །ཞེས་གསུངས་པ་དེ་ན་རལ་བའི་དོན་རེ་ཆེ། །ངུར་སྨྲིག་བཙུན་ཚུགས་ལེན་ཀྱང་འདི་རང་དགའ། །རྡོ་རྗེ་ལུང་གིས་འདི་ལྟར་བསྔགས་ནས་ཡོད། །ཞྭ་མོས་ཅི་བྱེད་རལ་བའི་ཟུར་ཕུད་ཐོགས། །ཟ་ར་ཟི་རེ་བཙུན་པ་ཙམ་བཞག་ནས། །ངེད་ཅག་གྲུབ་དབང་ས་ར་ཧ་བ་ལྟར། །ཡ་ང་མེད་པའི་བརྟུལ་ཞུགས་སྤྱོད་པ་སྐྱོངས། །ཞེས་གསུངས་དོན་ལ་ཐུགས་དགོངས་ལེགས་པར་གཏོད། །གཞན་ཡང་དམ་པ་དུ་མའི་ལུང་མང་ཡང་། །རེ་ཞིག་དེ་ཙམ་ཞིག་གིས་ཆོག་ཤེས་མཛོད། །ཅེས་གསུངས་སོ། །

གཙུག་ཏོར།

གསང་སྔགས་ཀྱི་སྐབས་འདིར། སྲིད་པ་སྒྱུ་མའི་ཆོས་ཀུན་དག་པ་ཡེ་ཤེས་ཀྱི་རྣམ་རོལ་གཞི་དབྱིངས་ཆེན་པོར་ལྷུན་གྱིས་གྲུབ་པའི་བརྡ་རྟགས་སུ། ཕྱི་སྣོད་གཞལ་ཡས་ཁང་། ནང་བཅུད་ལྷ་དང་ལྷ་མོར་ལྟ་བ། བྱ་བྱེད་ཐམས་ཅད་རྡོ་རྗེ་གསང་བའི་ལམ་འཁྱེར་འབའ་ཞིག་དང་། རྫས་དང་ཡོ་བྱད་ཐམས་ཅད་ཀྱང་ངེས་པར་དགོས་པའི་བརྡ་རྟགས་ཀྱི་སྒོ་ནས་རྟེན་འབྲེལ་གྱི་གནད་ཟབ་མོ་འགའ་ཞིག་རྟོགས་པའི་ཐབས་སུ་གྱུར་བ་ཡིན་ལ། དེ་བས་ས་ཆོག་དང་། རང་ཉིད་ལྷའི་དཀྱིལ་འཁོར་ལ་འཇུག་སྐབས་དང་། ཚོགས་ཀྱི་འཁོར་ལོ་ཆེན་པོ་བྱེད་པའི་དུས་དང་། སྤྲོས་བཅས་དང་སྤྲོས་མེད་ཀྱི་སྤྱོད་པ་བྱེད་པ་རྣམས་ཀྱི་ཚེ་དང་། གླུ་གར་སོགས་ཀྱི་མཆོད་པ་དང་། སྦྱིན་སྲེག་སོགས་ཀྱི་ཚེ་ལྷའི་ཆ་བྱད་ཀྱིས་འཇུག་དགོས་པས། སྔགས་གོས་གསོལ་ཚེ་ཡང་། སྔགས་པའི་དགེ་སློང་དང་དགེ་ཚུལ་ལ་སོགས་པ་འདུལ་བའི་བརྟུལ་ཞུགས་ལ་གནས་པ་ཡིན་ན། ཆོས་གོས་ཁ་དོག་དཀར་བོ་དང་ནག་པོ་སོགས་དང་། སྐྲའི་ཐོར་ཅོག་དང་། རུས་པ་དང་རིན་པོ་ཆེའི་རྒྱན་ལ་སོགས་པ་ལུས་ལ་བགོ་བ་དང་བརྒྱན་པའི་སྔོན་དུ་དུས་དྲན་བྱས་ནས། རྒྱགས་པ་དང་། འཕྱར་གཡེང་གི་བསམ་པ་དང་། རྒོད་བག་སོགས་ཀྱིས་མིན་པར་ཀུན་སློང་དག་པ་དང་། ལྷའི་ང་རྒྱལ་འཆང་བར་བཤད་ལ།

ལོངས་སྤྱོད་རྫོགས་པའི་ལྷ་ཐུན་མོང་གི་དབང་དུ་བཏང་ན། ཆགས་བཅས་ཀྱི་ཆ་ལུགས་སུ་གཙུག་ཏོར་དང་བཅས་པའི་དབུ་སྐྲ་བཅིངས་པ་སྟེ། སྟོད་བཅིངས་ཤིང་སྨད་དཔྱངས་པ་སོགས་ཡོད་པ་དང་། དགོས་པ་ཡང་སྔགས་ཀྱི་དམ་ཚིག་བཟུང་བ་དང་རིམ་གཉིས་ཀྱི་རྣལ་འབྱོར་ལ་གནས་པའི་གང་ཟག་གིས། རང་ཉིད་ལྷའི་གཙུག་ཏོར་དང་ལྡན་པར་དྲན་གསོ་བའམ། ལྷའི་རྣལ་འབྱོར་དང་མི་འབྲལ་བའི་དམ་ཚིག་དྲན་པའི་རྟེན་དུ་འཆང་བའོ། །

དབུ་རྒྱན།

ལྷ་སོ་སོའི་འཕྲིན་ལས་ཀྱི་དབང་གིས། རིགས་ལྔའི་དབུ་རྒྱན། རིན་ཆེན་དབུ་རྒྱན། དར་དང་མེ་ཏོག་གི་དབུ་རྒྱན་སོགས་མང་མོད། བླ་མེད་ཀྱི་ལྷ་ཕལ་ཆེར་རིན་ཆེན་དང་ཐོད་སྐམ་ཀྱི་དབུ་རྒྱན་ཏེ། དེ་ཡང་ཐོད་སྐམ་ལྔས་བདེ་སྟོང་ཡེ་ཤེས་ལྔ་དང་། དེ་བཞིན་ལག་གི་ལྷར་ཤར་བ་རྒྱལ་བ་རིགས་ལྔ་མཚོན་ལ། དགོས་པ་ཡང་གསང་སྔགས་རིག་པ་འཛིན་པ་རྣམས་ཀྱིས། རང་གི་དབུར་རིགས་ཀྱི་བདག་པོ་རྣམས་དང་མི་འབྲལ་བའི་དམ་ཚིག་གི་རྟེན་དུ་བྱེད་པ་ཡིན་ནོ། །

བྲོག་ཞུ།

བྲོག་ཞུ་ནི་རལ་བའི་ཐོར་ཅོག་ལ་བརྟེན་པ་རིན་པོ་ཆེའི་ཁྱུད་མོ་སུམ་རིམ་ལ་རིན་པོ་ཆེའི་རྩེ་ཕྲན་རྣམས་ཀྱིས་མཛེས་པར་བྱས་ཤིང་། སྤྱི་བོར་རིན་པོ་ཆེ་ལ་གནས་པའི་རྡོ་རྗེ་ཕྱེད་པས་མཚན་པ་སྟེ། རལ་བའི་ཐོར་ཅོག་དངོས་མེད་ན་སྐྲ་ལས་བྱས་པའོ། །རྗེ་བསྟན་རྒྱན་གྱིས། བྲོག་ཞུ་དེ་གཙུག་ཏོར་གྱི་སྟེང་ནས་ཞྭ་ལྟར་གྱོན་པར་བྱེད་པ་ཞིག་ཡིན་པར་གསུངས་སོ། །

ཁྱིམ་སྔགས་ཀྱི་གོས་དཀར།

ཁྱིམ་སྔགས་ཀྱིས་གོས་དཀར་གྱོན་པ་ནི་སྔགས་ཆས་ཞིག་ཡིན་པར་མ་ཟད། དེའི་རྒྱུ་སྐུད་པ་འཁལ་དང་རས་ཡུག་འཐག་པ་སོགས་ཀྱང་དམ་ཚིག་ཏུ་བརྩིས་ཡོད་དེ། དགྱེས་རྡོར་གྱི་བརྟག་པ་ཕྱི་མ་ལེའུ་དྲུག་པའི་ནང་། གང་གང་སྐུད་པ་འཁལ་བ་དང་། །གང་གང་རས་ཡུག་ཐགས་པ་དང་། །དེ་ཡང་དམ་ཚིག་ཅན་ངེས་པས། །དམ་ཚིག་བྱིན་རླབས་རྣལ་འབྱོར་བས། །ཞེས་གསུངས་ལ།

ཁྱིམ་སྔགས་རྣམས་ཀྱིས་གོས་དཀར་བགོ་བའི་ཁུངས་ནི། དཔུང་བཟང་ལས། གོས་དཀར་དག་གམ་ཤིང་ལོ་འམ་གསོ་མ་འམ། ཟར་མ་འམ་ཤིང་ཤུན་རྣམས་ཀྱི་གོས་བགོའོ། །ཞེས་པ་ལྟར། གསང་བ་སྤྱི་རྒྱུད་དང་། རྡོ་རྗེ་མེ་ལྕེ་རྒྱུད་སོགས་ལས་ཀྱང་གསུངས་ལ། གོས་མ་བཅོས་དཀར་བོ། སྐྲ་མ་བཅོས་ལྕང་ལོ། སེམས་མ་བཅོས་གཉུག་མ་སྟེ། མ་བཅོས་གསུམ་ལྡན་གྱི་སྔགས་པ་ཞེས། གོས་དཀར་གཙང་ལ་ནག་ནོག་གི་དྲི་མ་མེད་པ་ཞིག་བགོ་བ་ཡིན་ནོ། །ཁྱད་པར་དུ་སྨད་གོས་དེ་ཉལ་བའམ་ཁྲུས་ཀྱི་ཚེ་མ་གཏོགས་མི་འབྲལ་བ་སྟེ། ལེགས་གྲུབ་ལས། ཉལ་དང་ཁྲུས་བྱེད་མ་གཏོགས་པར། །སྔགས་པས་མཐང་གོས་མི་སྤང་ཞིང་། །དཀར་ལ་ཤིན་ཏུ་འཇམ་པ་དེ། །ཉིན་རེ་བཞིན་དུ་བཀྲུ་བར་བྱ། །ཞེས་སོ། །

གཞན་ཡང་། ལས་བཞིའི་སྦྱིན་སྲེག་སོགས་ཞི་རྒྱས་དབང་དྲག་ལ། གོས་རྒྱན་དང་ཡོ་བྱད་ཡང་དཀར་སེར་དམར་ནག་བསྔགས་པ་ཡིན་ཏེ། མི་གཡོ་བའི་རྟོག་པའི་རྒྱུད་ལས། གོས་དཀར་རྒྱན་ཡང་དཀར་བོ་སྟེ། །ཡོ་བྱད་ཀུན་ཀྱང་དཀར་བྱས་ནས། །བསམ་པ་བཟང་བོས་ཤར་བལྟས་པ། །འདིས་ནི་ཞི་བའི་ལས་རྣམས་འགྲུབ། །ཅེས་སོ། །

སྟོད་སྨད་ཀྱི་གོས་སོགས།

སྟོད་སྨད་ཀྱི་གོས་ལའང་ལྷ་རང་རང་གི་རྣམ་འགྱུར་གྱིས་མཚོན་པས། གང་འཚམ་ཞིག་ཡོད་མོད་ཀྱང་། འདིར་ལྷ་དང་ཆ་ལུགས་མཐུན་པར་བྱ་བའི་ཕྱིར་ལྷ་རྫས་ལས་གྲུབ་པའི་སྟོད་གོས་དང་སྨད་གཡོགས་རིན་པོ་ཆེའི་རྒྱན་ཅན། དམ་ཚིག་དྲན་པ་གསོ་བའི་རྟེན་དུ། དེ་ཡང་ཞི་བའི་ལྷ་རྣམས་ལ་ལྷ་རྫས་གོས་ཀྱི་ན་བཟའ་དང་། དར་དཔྱངས་སྟོད་ཁེབས་སོགས་ཏེ། སྔགས་འཆང་རྒྱན་མེ་ལས། དུག་ལྔ་མ་སྤངས་པའི་བརྡར། དར་དཀར་བོ་གསེར་གྱི་ངང་རིས་ཅན་གྱི་སྟོད་གཡོགས་དང་། ཚི་གུས་སྨད་དཀྲིས་དང་། ཅོད་པན་ཟི་ལྡིར་གར་གྱི་ཕུ་དུང་ཅན་ཏེ། དར་གྱི་ཆས་གོས་ལྔ་དང་། བཏགས་པའི་རྒྱན་ལའང་ལོངས་སྤྲུལ་གཉིས་ལས། དང་བོ་ནི། འདོད་ཡོན་མ་སྤངས་གནས་སུ་དག་པའི་བརྡར། རིན་ཆེན་དབུ་རྒྱན། སྙན་ཆ། མགུལ་རྒྱན། སེ་མོ་དོ། ཕྱག་གདུབ། ཞབས་གདུབ། སྐ་རགས། དོ་ཤལ་སྟེ་རིན་ཆེན་རྒྱན་བརྒྱད་དོ། །ཐུབ་པའི་རྒྱན་དྲུག་ནི། ཕར་ཕྱིན་དྲུག་མཐར་ཕྱིན་པའི་བརྡར། ནམ་མཁའི་ཁྱུང་གི་རྒྱན། བུ་ཆུང་ལྷ་ཡི་རྒྱན། རི་དྭགས་སྙིང་རྗེའི་རྒྱན། ཆུ་སྲིན་པ་ཊའི་རྒྱན། སེང་གེ་བརྗིད་ཀྱི་རྒྱན། གླང་ཆེན་སྟོབས་ཀྱི་རྒྱན་དྲུག་གོ ། མཚོན་དོན་ཡང་། གླང་ཆེན་གྱིས་སྟོབས། སེང་གེས་མི་འཇིགས་པ། རི་དྭགས་གིས་སྙིང་རྗེ། ཤང་ཤང་གིས་དགེ་སྡིག ངང་བས་བྱམས་པ། ཆུ་སྲིན་གྱིས་ཐུགས། ཀླུ་འབྲུག་གིས་ཡེ་ཤེས། བྱ་ཁྱུང་གིས་ལྟ་བའོ། །

ཁྲོ་བོའི་རིགས་ལ་དུག་གསུམ་དབྱིངས་སུ་བཅོམ་པའི་བརྡར། མི་ལྤགས་ཀྱི་སྟོད་གཡོགས་དང་། གླང་ཆེན་ཀོ་བའི་སྐེ་དཀྲིས། སྟག་ལྤགས་ཀྱི་ཤམ་ཐབས་བགོ་བ་སྟེ། དེ་ཡང་ཞིང་ལྤགས་ནི། སྐྱེས་པ་དར་མ་གཡུལ་དུ་བསད་པའི་པགས་རློན་ཁྲག་ཤམ་ཅན། ཡན་ལག་མགོ་དང་བཅས་པའོ། །གླང་གོས་ནི། མིས་བདག་ཏུ་མ་བཟུང་བའི་ནགས་ཀྱི་གླང་རྒོད་ཕན་ཚུན་སྟོབས་བཀྱེ་ཏེ་ཤི་བའི་མགོ་སུག་དང་བཅས་པའོ། །སྟག་པགས་ནི། མོ་སྟག་དར་མ་བཀྲག་མདངས་ཅན་སྐྱོན་མ་ཞུགས་པ་སྡེར་བཞི་མགོ་དང་བཅས་པ་ཁྲག་གི་ར་རིས་སྦགས་པའོ། །དག་པ་ཡང་། ང་རྒྱལ་དབྱིངས་སུ་དག་པའི་ཞིང་ལྤགས། གཏི་མུག་དག་པས་གླང་ཀོ འདོད་ཆགས་དག་པས་སྟག་ཤམ་མོ། །གཞན་ཡང་། དཔའ་བོ་དང་ལྷ་མོའི་རྒྱུད་ལ་གཟིག་ཤམ་དང་། སྒྱུ་འཕྲུལ་དྲ་བ་ལས། སྨད་གཡོགས་སེང་གེའི་པགས་པས་གཡོགས། །ཞེས་སེང་ལྤགས་སོགས་གྱོན་ཞིང་། ཁྲོ་རྒྱན་ལའང་། མ་རུངས་གདུག་ཅན་འདུལ་ཕྱིར་སྦྲུལ་ཆུན་དང་། དེ་དག་འཁོར་བ་ལས་སྒྲོལ་ཕྱིར་མགོ་ཕྲེང་ངོ་། །དེ་ཡང་སྦྲུལ་ཆུན་ནི། ཀླུ་རིགས་དཀར་སེར་སྔོ་ལྗང་གི་སྦྲུལ་བཞི་ཀ ཡན་ལག་གི་ཉྭ་བཞིར་བཅིངས་པའོ། །ཐོད་ཕྲེང་ནི། སྦྲུལ་ནག་ཟུང་ལ་མགོ་རློན་ལྔ་བཅུ་བརྒྱུས་ཏེ་ཕྲེང་བ་མགུལ་ནས་བྲང་གི་བར་དཔྱངས་པའོ། །དག་པ་ལ། སྦྲུལ་ཆུན་གྱིས་ཀླུ་རིགས། མགོ་རློན་གྱིས་ཚངས་པ་འདུལ་བའམ། ཡང་ན། སྦྲུལ་ཆུན་གྱིས་ཞེ་སྡང་། ཐོད་ཕྲེང་གིས་ཕྲག་དོག་དབྱིངས་སུ་ཞི་བའོ། །

བྱུགས་རྫས་ལའང་། ཐལ་ཆེན་གྱི་ཚོམ་བུ། ཁྲག་གི་ཐིག་ལེ། ཞག་གི་ཟོ་རིས་བཅས་བྱུག་པའི་རྫས་གསུམ་སྟེ། ཐལ་ཆེན་ནི། དཔའ་བོ་གྲི་ཤིར་ཐེབས་པའི་རོ་བསྲེགས་པའི་ཐལ་བ་བྱུགས་པའི་སྟེང་། རུས་པའི་ཕྱེ་མ་དཀར་བོ་སོར་གསུམ་བཅུག་ནས་དཔྲལ་བར་འབྲུ་ཡི་ཚོམ་བུ་ལྟར་བཀོད་པ་དང་། ཁྲག་གི་ཐིག་ལེ་ནི། དཔའ་བོ་གཡུལ་དུ་རྨས་ཏེ་དབུགས་མ་ཆད་གོང་དུ་སྙིང་ཁྲག་དྲོན་མོ་མཁུར་ཚོས་གཉིས་སུ་ཐིག་ལེ་སུམ་ཚུགས་སུ་ནོར་བུའི་དབྱིབས་སུ་བྲིས་པ་དང་། ཞག་གི་ཟོ་རིས་ནི། རུ་ཏྲའི་ལེའུ་ལས། དེ་ནས་ཁ་ལ་ཞག་གི་ཟོ་རིས་ཆགས། །གསུངས་པ་ལྟར། ཞག་དེས་སོར་མོ་གསུམ་གྱི་རིས་སམ། ཟོར་བ་རིས་འཁྱོག་གསུམ་དུ་བྲིས་པའོ། །དག་པ་ལའང་། ཐལ་ཆེན་གྱིས་བརྒྱ་བྱིན། རཀྟས་དབང་ཕྱུག ཞག་གིས་ཁྱབ་འཇུག་སྟེ་ལྷ་ཆེན་གསུམ་འདུལ་བའམ། དུག་གསུམ་འཇོམས་པར་སྦྱར་བའང་ཡོད་དོ། །

དེ་གསུམ་ཡང་དུག་གསུམ་བཅོམ་པའི་བརྡ་རྟགས་སུ་གསུངས་ཤིང་། བརྡ་དོན་ཡང་སྔོན་རུ་ཊ་ཐར་བ་ནག་པོ་བཏུལ་བའི་ཆས་རྣམས་ཏེ། དེ་ཡང་ཡེ་ཤེས་ཀྱི་ཆས་སུ་བྱིན་གྱིས་བརླབས་པ་ཡིན་ནོ། །ཡང་རིག་པ་རང་བྱུང་གི་ཡེ་ཤེས་ལ་ཡོན་ཏན་རང་ཆས་སུ་ཡོད་པའི་བརྡ་རྟགས་སུ་དཔལ་གྱི་ཆས་བཅུ་ནི། རྔམ་གློག་ལས། གཟི་བརྗིད་འབར་བ་ཆུ་སྲིན་བརྗིད་པའི་ཆས། །ཐབས་དང་ཤེས་རབ་ཉི་ཟླ་ཟུང་འབྲེལ་ཆས། །བདུག་པ་བསྲེགས་པ་ཡེ་ཤེས་མེ་ཡི་ཆས། །སྐྱེ་ཤི་རྩར་གཅོད་མཆེ་བ་ཟླ་ཚེས་ཆས། །ཁྱབ་མཛད་རེ་སྐོང་རྡོ་རྗེའི་གཤོག་པའི་ཆས། །མངའ་ཐང་ཡོངས་རྫོགས་རྡོ་རྗེ་སློག་པའི་ཆས། །སངས་རྒྱས་སར་འགྲོ་དབང་གི་བསེ་ཁྲབ་ཆས། །གནོད་གདུག་བཟློག་བྱེད་རྒྱ་བྱེའུ་ལྕགས་ཀྱི་ཆས། །ཞེས་དང་། ཡང་། རྣམ་གྲངས་ལ། རྡོ་རྗེ་ཁྱུང་གཤོག་ཐབས་དང་ཤེས་རབ་ཆས། །མཐིང་ག་ཅོད་པན་དཔའ་རྟགས་ཟིལ་གནོན་ཆས། །སྤྱི་གཙུག་རྡོ་རྗེ་ལྷག་པ་རིག་པའི་ཆས། །དབང་གི་བསེ་ཁྲབ་གཟི་འབར་བགྲོད་པའི་ཆས། །གཉིས་མེད་སྦྱོར་བ་ཤེས་རབ་ཡུམ་གྱི་ཆས། །གནོད་གདུག་བཟློག་བྱེད་རྒྱ་བྱེའུ་ལྕགས་ཀྱི་ཆས། །ཉོན་མོངས་སྲེག་བྱེད་རྡོ་རྗེ་མེ་རིས་ཆས། །དབུ་སྐྲ་གྱེན་བརྫེས་འཁོར་བ་རྒྱུ་བཟློག་ཆས། །ཞེས་དང་། བཀའ་བརྒྱད་སོགས་ལས། རྒྱ་བྱེའུ་ལྕགས་ཀྱི་ཆས། བསེ་ཁྲབ་དབང་གི་ཆས། གཅན་གཟན་གཟིག་གི་ཆས། སྤྲུལ་བ་རྡོ་རྗེ་ཆས། གདུག་པ་སྦྲུལ་གྱི་ཆས། དཔའ་བོ་སྟག་གི་ཆས། གཟི་མདངས་ཞིང་ལྤགས་ཀྱི་ཆས། དམར་གསར་ཁྲག་གི་ཆས། རྩལ་ཆེན་སེང་གེའི་ཆས། གདུག་པ་དོམ་གྱི་ཆས་སོགས་ཀྱང་བཤད་དོ། །ཀླུ་རིགས་ལྔ་འདུལ་བའི་བརྡར། རྒྱལ་རིགས་ལ་དཀར་བོ། བྲམ་ཟེའི་རིགས་དམར་བོ། རྗེ་རིགས་སེར་བོ། དམངས་རིགས་ལྗང་གུ གདོལ་རིགས་ནག་པོ་སྟེ། སྦྲུལ་རིགས་ལྔའི་རྒྱན་ནོ། །ཡང་རྡོ་རྗེ་སློབ་དཔོན་གྱི་ཆས་སུ་ཞུགས་པར་བྱ་བ་ནི། རིན་ཆེན་དབུ་རྒྱན། ཐོར་ཚུགས། ཅོད་པན། སྙན་ཆ། མགུར་ཆུ། དཔུང་རྒྱན། ཕྱག་གདུབ། ཞབས་གདུབ། དོ་ཤལ་རུས་པའི་རྒྱན་དྲུག་དང་། དར་ཟབ་ཀྱི་སྟོད་གཡོགས། སྨད་གཡོགས། དྲི་བཟང་གི་བྱུགས་པ། རིན་ཆེན་ཕྲེང་བ་རྣམས་འདོད་ཡོན་མ་སྤངས་པའི་རྒྱན་དུ་རོལ་ཕྱིར་གསོལ་ལ། གཉིས་པ་གང་གི་ཆས་ནི། སྟག་ཤམ། རུས་རྒྱན། སྙིང་ཕྲེང་། གྲི་རྣམས་སྟེ་རིགས་དྲུག་ཡེ་ཤེས་དྲུག་ཏུ་སྦྱོར་བའི་བརྡའོ། །གཞན་ཡང་། དབང་བསྐུར་རྒྱལ་བོའི་རྒྱུད་ལས། བུམ་དབང་ཆོས་བཅུ་མ་འཛོམས་ན། །ཡེ་ཤེས་སེམས་དཔའ་འཕེལ་མི་འགྱུར། །ཞེས་པ་ལྟར། ཆོས་བཅུ་ནི། ༡ གྲུབ་པར་བྱེད་པ་ཚོགས་ཀྱི་ཆས། ༢ བཀོལ་ཉན་དུས་བཏབ་འཁོར་གྱི་ཆས། ༣ བར་ཆད་སྲུང་བ་མོས་པའི་ཆས། ༤ ལ་ཉེས་བརྟགས་པ་སྟ་གོན་ཆས། ༥ དམིགས་རྟེན་བཅའ་བ་དཀྱིལ་འཁོར་ཆས། ༦ ཞུ་གསོལ་ལྡན་པ་ལས་ཀྱི་ཆས། ༧ ཡོན་ཏན་ལྡན་པ་ཡུམ་གྱི་ཆས། ༨ ཕྱག་རྒྱ་བསྒྱུར་བ་གར་གྱི་ཆས། ༩ སྟངས་སྟབས་འགྱིང་བག་གིང་གི་ཆས། ༡༠ བྱེ་བྲག་འབྱེད་པ་རོལ་མོའི་ཆས། ཞེས་ཀྱང་གསུངས་སོ། །ཁྱད་པར་དུ་གོས་རྒྱན་སོགས་ཀྱི་ཆས་འདི་དག་ཡེ་ཤེས་ཀྱི་ཆས་སུ་བྱིན་གྱིས་བརླབས་པ་ཡིན་ཏེ། རུ་ཏྲའི་ཆས་ནི་མང་ལ་ཡང་བ་ཡང་། །དེ་དག་ཡེ་ཤེས་ཆས་སུ་བྱིན་གྱིས་བརླབས། །ཞེས་སོ། །

དེ་ལྟར་ཞི་མ་ཁྲོའི་རིགས་དང་། ཆགས་ཤིང་ཁྲོ་བའི་རིགས་དང་། ཁྲོས་ཤིང་ཆགས་པའི་རིགས་སོགས་ཀྱང་། ལྷ་རང་རང་གི་རྒྱུད་ནས་བདེ་སྟོང་གི་ལམ་ཇི་ལྟར་མངོན་པར་གསལ་མི་གསལ་སོགས་ཀྱི་གནད་ཀ་ལྡན་ལ། དེ་ཕྱིར་ན་བཟའ་བཞེས་ཚུལ་སོགས་ལའང་དེ་མཚུངས་སུ་མཛད་པ་ཤེས་དགོས་སོ། །

བེར།

བེར་གྱི་ཁུངས་ནི། སྒྲུབ་པ་རྩ་རྒྱུད་ལས། ན་བཟའ་དར་ནག་བེར་ཆེན་གསོལ། །ཞེས་གདན་གཞི་དང་དངོས་གྲུབ་འབྱུང་རྒྱུད་སོགས་ལས་ཀྱང་གསུངས་ལ། བེར་གྱི་ཁ་དོག་སྔོན་པོ་དང་། ལྗང་ཁུ། ནག་པོ། དམར་བོ་སོགས་རྒྱུད་ལས་གསུངས་མོད། གཙོ་བོ་ཁ་དོག་ནག་པོའི་སྟེང་ལ་སྐུད་པ་དམར་བོའི་མེ་རིའི་རི་མོ་ཅན། སྐེད་པ་ནས་སྡུད་ཆིངས་ཡོད་པ། བེར་འདབ་ཤིན་ཏུ་ཡངས་པ་དེའོ། །ད་ལྟ་ཐུལ་བ་འམ་ཟླ་གམ། བླ་མ་ཚོས་གསོལ་བའི་སྐུ་བེར་འདི་ལ་འདྲ་དཔེ་བླངས་པ་ཡིན།

ཡང་། སྔགས་ཆས་ཀྱི་བེར་འདི་ལ་མི་ལྤགས་ཀྱིས་གཡོགས་པའམ། སུམ་རིམ་དུ་བྱེད་པའང་ཡོད་དེ། གདན་བཞི་ལས། སྙིང་བོའི་ཚེམ་བེར་དམར་བོ་ནི། །མི་ཡི་པགས་པས་གཡོགས་པར་བྱ། །ཞེས་དང་། དངོས་གྲུབ་འབྱུང་རྒྱུད་ལས། སྐུ་ལ་དར་བེར་སུམ་རིམ་ལ། །སྣ་ཚོགས་ཅོད་པན་དར་གྱིས་སྤྲས། །ཞེས་སོ། །

ལྷ་མོའི་ཕྱག་རྒྱ་ལྔ།

སམྦུ་ཊ་ལས། འཁོར་ལོ་རྣ་ཆ་མགུལ་རྒྱན་དང་། །ལག་པར་གདུ་བུ་སྐ་རགས་ཉིད། །སངས་རྒྱས་ལྔ་ནི་རྣམ་དག་པས། །འདི་ལྔ་ཕྱག་རྒྱ་དག་པར་གསུངས། །ཞེས་པ་ལྟར། དག་པ་ཡང་། འཁོར་ལོས་མི་བསྐྱོད་པ། རྣ་ཆས་འོད་དཔག་མེད། མགུལ་ཕྲེང་གིས་རིན་ཆེན་འབྱུང་ལྡན། ལག་གདུབ་ཀྱིས་རྣམ་སྣང་། སྐ་རགས་ཀྱིས་དོན་འགྲུབ་མཚོན་པར་ཀྱེ་རྡོར་ལས་ཀྱང་བཤད་དོ། །

ཡང་། རྣལ་འབྱོར་མ་ཀུན་སྤྱོད་ལས་རྒྱན་དགུ་དང་། སངས་རྒྱས་ཐོད་པ་ལས་བརྒྱད། ཀྱེ་རྡོར་ལས་བདུན། མངོན་བརྗོད་བླ་མ་ལས་དྲུག་ཀྱང་བཤད་དོ། །ཡི་དམ་ལྷའི་རྒྱན་ཆ་འདི་དག སྤྱིར་གསང་སྔགས་འབྲས་བུ་ལམ་འཁྱེར་གྱི་ལམ་ཡིན་པ་དང་། སྔགས་ལམ་དུ་འདོད་ཡོན་མི་སྤངས་པར་ལམ་འཁྱེར་གྱིས་ཉམས་སུ་བླངས་དགོས་པ་དང་། གདུལ་བྱ་ཆགས་ཅན་གྱི་གང་ཟག་ལ་བསྟན་པའི་ལམ་ཡིན་ཕྱིར། དེ་སྒོམ་པའི་རྣལ་འབྱོར་བས་ཀྱང་། རྒྱན་ཆ་དག་འཇིག་རྟེན་ན་རིན་པོ་ཆེ་སོགས་རིན་ཐང་ཆེ་བ་དང་། མཛེས་པར་གྲགས་པ་ལྟར། ཁྲོ་ཆས་སོགས་ལྷའི་ཆ་ལུགས་དང་མཐུན་པར་རྒྱན་གོས་ཀྱིས་བརྒྱན་དགོས་པ་ཡིན། ཁྱད་པར་དུ་དབང་བསྐུར། རབ་གནས། སྒྲུབ་པ། སྦྱིན་སྲེག ཚོགས་འཁོར། གསང་སྤྱོད། ཚོགས་སྤྱོད་སོགས་ཀྱི་སྐབས་སུ་བརྒྱན་དགོས་པ་ཡིན་ནོ། །གསང་སྔགས་ཀྱི་ཚེ། ལུས་རྒྱན་སྤྲས་པ་འདི་ཡང་སྔགས་པ་དགེ་ཚུལ་སློང་ཡིན་ན་དུས་དྲན་བསྟེན་ཏེ་གསོལ་བ་དང་། ཁྱིམ་པ་ཡིན་ནའང་མཛེས་ཆོས་དང་། རྒྱགས་འཕྱར། རྒོད་གཡེང་སོགས་ཀྱི་བསམ་པས་ལྷའི་རྣལ་འབྱོར་དང་བྲལ་བར་བྱེད་ན་ནི། རབ་བྱུང་གི་བསླབ་པས་མ་བསྡམས་པ་ཁྱིམ་པའི་སྔགས་པ་ཡིན་ཡང་། ངན་སོང་གི་སྒོ་དབྱེ་བས་མི་རུང་བས་ན་རབ་ཏུ་བྱུང་བ་ལྟ་ཅི་སྨོས། དེ་ལྟ་མིན་པར་བསམ་པ་ཁྱད་པར་ཅན་གྱིས་ལྷའི་རྣལ་འབྱོར་ལ་གནས་པས་ཆས་སུ་ཞུགས་པ་ལ་བསོད་ནམས་ཁྱད་པར་ཅན་འཐོབ་ཀྱི། གཞན་དུ་ན་མཆོད་པ་འབུལ་བའི་སྐད་ཀྱི་གདངས་དང་། སྦྱིན་སྲེག་གི་ཚེ། འབྲུ་མེ་ལ་སྲེག་པ་དང་། མཆོད་པའི་སླད་དུ་རོལ་མོ་བྱ་བ་སོགས་ལའང་དུས་དྲན་མི་འཆགས་ཤིང་བྱར་མི་རུང་བར་འགྱུར་བས། མདོ་སྔགས་འགལ་བར་འཛིན་པའི་ཕྱོགས་སུ་བརླན་པར་འགྱུར་བ་དང་། རབ་བྱུང་གཟུགས་ཀྱིས་ལྷའི་ཆས་སུ་ཞུགས་ནས་གསང་རྫས་དུ་མ་ཐོགས་ནས་ལུས་ཀྱིས་ཕྱག་རྒྱ་དང་། ངག་གི་སྔགས་ལ་སོགས་གསང་བ་སྒྲོགས་ཤིང་། དབང་མ་འཐོབ་པའི་སྐྱེ་བོ་མང་བོའི་དབུས་སུ་རྒོད་བག་གི་བསམ་པས་ཀུན་ཏུ་རྩེ་བ་དག་ནི། མདོ་སྔགས་ཀྱི་བསྟན་པ་གཉིས་ཀ་དུས་གཅིག་ཏུ་ཉམས་པར་བྱས་ཏེ་དམྱལ་བ་མི་བཟད་པའི་སྒོ་ཕྱེས་པ་ཡིན་ལ། དེ་བས་མཐའ་གཉིས་སུ་མ་ལྷུང་བའི་སྒོ་ནས་བསྟན་པ་ཐམས་ཅད་འགལ་མེད་དུ་འཁྱེར་ཤེས་པར་བྱའོ། །

རིན་པོ་ཆེའི་རྒྱན་དྲུག

རིན་པོ་ཆེ་རྒྱན་དྲུག་འདི་ལ་འདྲེན་ཚུལ་མི་འདྲ་བ་མང་ཡང་། བདེ་དགྱེས་དུས་འཁོར་སོགས་དུ་མ་དང་། ཀུན་སྤྱོད་དང་ལུ་ཨི་བའི་བདེ་མཆོག་གི་མངོན་པར་རྟོགས་པ་གཉིས་ལས། མགུལ་རྒྱན། གདུ་བུ། རྣ་ཆ། སྤྱི་གཙུག་གི་ནོར་བུ། མཆོད་ཕྱིར་ཐོགས། ཐལ་ཆེན་ཏེ་དྲུག་གོ།

མགུལ་རྒྱན་ནི། དབུས་ཀྱི་གཞུང་དང་མཐའ་རྟེན་གཉིས་ཀྱི་བར་རུས་པའི་ཕྲེང་བ་བརྒྱད་ཀྱིས་བསྣོལ་མར་བསྡམས་ཤིང་། དེ་ལས་དོ་ཤལ་གྱི་ཚུལ་དུ་འཆང་བ་རུས་པའི་ཤར་བུ་དུ་མས་མཛེས་པར་བྱས་པ་བརྒྱད་བྱའོ། །

གདུ་བུ་ནི། མཐའ་གཉིས་དབུས་དང་གསུམ་དུ་རུས་པའི་གཞུང་བར་སྐབས་དང་མཐའ་རྟེན་བྱས་པའི་དབུས་ཀྱི་གཞུང་གི་གཡས་གཡོན་གཉིས་ཀ་དང་། མཐའ་རྟེན་གཉིས་ཀྱི་ནང་ཟུར་ལ་བུག་པ་ལྔ་ལྔ་བྱས་པ་ལས་སྐུད་པ་དྲངས་ཏེ། དེ་ལ་བརྒྱུས་པའི་རུས་པའི་ཕྲེང་བ་ལྔས་བསྣོལ་མར་བསྡམས་པའི་སྨད་ངོས་ལ་ཤར་བུ་དང་གཡེར་ཆུང་ངུ་དུ་མས་མཛེས་བྱས་པའོ། །

རྣ་རྒྱན་ནི། དབུས་སུ་རྡོ་རྗེ་རྩེ་གསུམ་པས་མཚན་པའི་རུས་པའི་འཁོར་ལོ་རེ་རེ་ལའང་དྲ་བ་གསུམ་དང་དྲ་ཕྱེད་གཉིས་གཉིས་ཏེ་ལྔ་ལྔས་བརྒྱན་པའོ། །རྒྱལ་དབང་གིས་དྲ་ཕྱེད་ལྔ་ཞེས་གསུངས་སོ། །

སྤྱི་གཙུག་གི་ནོར་བུ་ནི། ནོར་བུ་རིན་པོ་ཆེ་ཆ་བརྒྱད་པའམ་དགུ་བ་རྩེ་མོར་རྡོ་རྗེ་རྩེ་ལྔ་བ་རྫོགས་པ་སོར་ལྔའམ་ཅི་ལྟར་མཛེས་པས་མཚན་པའི་རྩ་བ་མི་རུས་ཀྱི་འཁོར་ལོ་རྩིབས་བརྒྱད་པའི་ལྟེ་བར་བཅུག་ནས། མི་འགུལ་བར་བྱས་པའི་རྩིབས་ཀྱི་མཚམས་རྣམས་ནས་ཕུག་པའི་བུག་པ་བརྒྱད་ནས་བརྒྱུས་པའི་རུས་པའི་ཕྲེང་བ་འཁོར་ལོའི་རྩིབས་ལྟ་བུར་གྱུར་བ་བརྒྱད་བྱ་ཞིང་། ཕྲག་གོང་གཡོན་གྱི་ཕྲེང་ཐག་ཀྱང་དེ་བཞིན་དུ་སྟེང་གི་གཡོན་ཟུར་ནས་འོག་གི་གཡས་ཟུར་དུ་ཐལ་བྱུང་དུ་ཐོན་པའི་ཚུལ་གྱིས་བསྣོལ་མར་སྦྲེལ་བའོ། །

མཆོད་ཕྱིར་ཐོགས་ནི། འདོད་འཇོ་དང་ཀུན་སྤྱོད་ལས་མཆོད་ཕྱིར་ཐོགས་ལ་ཚངས་སྐུད་ཅེས་ཀྱང་ཟེར་ལ། རུས་པའི་མཆོད་ཕྱིར་ཐོགས་མེད་ན་རྐུན་མའི་སྐྲ་འམ་མིའི་རྒྱུས་པ་ལས་བྱས་པའི་སྐུད་པ་ཉག་མ་གཅིག་ལ་སུམ་སྒྲིལ་བྱས་པ། རིང་བོ་གཅིག་གིས་ཕྲག་པ་ནས་མཆན་འོག་ལ་སྐོར་གསུམ་དུ་འཁོར་བའི་སྐོར་གསུམ་གའང་རྡོ་རྗེའི་མདུད་པས་བར་བར་དུ་བསྡམས་པའི་རྡོ་རྗེའི་མདུད་པ་གསུམ་དང་ལྡན་པ་དེ་ལྟ་བུ་སྔར་ལྟར་རྒྱ་གྲམ་དུ་འཆིང་བའམ། པང་ནས་ཕྲག་པ་གཡོན་པ་ནས་མཆན་ཁུང་གཡས་ལ་བྱས་ཏེ། ག་ཤལ་ལྟར་བཅིངས་པའོ། །

ཐལ་ཆེན་ནི། མི་རུས་ཀྱི་ཐལ་བས་ལུས་ཐམས་ཅད་ལ་བྱུགས་པར་བདེ་དགྱེས་དུས་འཁོར་སོགས་དུ་མ་ལས་གསུངས་ཤིང་། ཆས་འཇུག་གི་ཚེ་དེ་ལྟར་མ་གྲུབ་ན། དཔྲལ་བ་ལུས་ཀྱི་གནས་ཡིན་པས་ལུས་ཐམས་ཅད་ལ་དགོད་པའི་ལྷ་དཔྲལ་བར་འགོད་པའི་རིགས་པས་ལུས་ཐམས་ཅད་ལ་བྱུགས་པར་མོས་ཏེ། དཔྲལ་མཚམས་སུ་ཐལ་ཆེན་གྱི་ཐིག་ལེའམ། སོར་རིས་གསུམ་བྱའོ། །ཡང་ཁ་ཅིག་ལུས་ལ་ཐལ་ཆེན་བྱུགས་ཤིང་མཉེས་པའི་སྟེང་དུ་རུས་ཆེན་བསྲེགས་ནས་དཀར་བོར་གྱུར་བ་ཞིབ་ཏུ་བཏགས་པ་ལ་སོར་མོ་ལྔའི་རྩེ་མོ་ཉུག་ནས། སོར་མོ་ལྔ་བསྡོམས་ཏེ། དཔྲལ་བ་དང་མཁུར་ཚོས་སོགས་གནས་རྣམས་སུ་རེག་པ་ན། གཞིའི་ཐལ་ཆེན་ལས་དཀར་བའི་མཚན་མ་ལྔ་ཚོམ་རེ་འབྱུང་སྟེ། དེ་དག་ལ་ཐལ་ཆེན་གྱི་ཚོམ་བུ་ཞེས་བྱའོ། །ཡང་ཕྱིན་དྲུག་མཚོན་ཕྱིར་མགུལ་རྒྱན་སོགས་དྲུག་བཤད་དོ། །

རྒྱན་དྲུག་གི་རྣམ་པ་ཅུང་ཟད་མི་འདྲ་བ་ཁལ་ཁ་དམ་རྡོར་གྱི་དམ་ཚིག་གི་རྫས་དང་ཡོ་བྱད་ཀྱི་རྣམ་བཞག་དངོས་གྲུབ་གཏེར་མཛོད་ལས་ཀུན་མཁྱེན་འཇམ་བཞད་དང་ཐང་སག་པའི་བཤད་ཚུལ་དྲངས་ནས་གསུངས་ཡོད་པས་དེར་བལྟ་བར་བྱའོ། །