གནས་ཀྱི་ལུང་ཕྲན་བཅུ་དྲུག བི་མ་ལ།

སྠཱ ནཱ ག མ ཀ ལ ཥོ ཌ ཤཱཾ ནཱ མཱ སྶུ བི ཧ ར ཏི སྨ། །
གནས་ཀྱི་ལུང་ཕྲན་བཅུ་དྲུག་ཅེས་བྱ་བ་རྣམས་ལེགས་པར་བཞུགས་སོ། །
ༀ་སྭ་སྟི་སིདྡྷི། གནས་ཀྱི་གཞུང་དལ་བསྟན་པའི་ལུང་ཕྲན་དང་། །གཟུགས་བརྙན་དཀྱིལ་འཁོར་རྒྱན་གྱི་ལུང་ཕྲན་དང་། །དཀྱིལ་འཁོར་ཕོ་བྲང་བུམ་པའི་ལུང་ཕྲན་དང་། །ཚེ་འདས་རྣམ་ཤེས་དགུག་པའི་ལུང་ཕྲན་དང་། །རྣམ་ཤེས་དགུག་པའི་གཏན་ཚིགས་ལུང་ཕྲན་དང་། །གཤིན་བླ་འགུགས་པ་མན་ངག་ལུང་ཕྲན་དང་། །ཐུགས་རྗེ་ཆེན་པོས་སྦྱང་བའི་ལུང་ཕྲན་དང་། །ཐབས་དང་ཤེས་རབ་མདའ་གཞུའི་ལུང་ཕྲན་དང་། །གནས་ཀྱི་ས་དང་ལམ་གྱི་ལུང་ཕྲན་དང་། །ཧཱུྃ་ཉིད་རིང་པོར་སྤར་བའི་ལུང་ཕྲན་དང་། །བཅོལ་དང་བསྐང་བར་བྱ་བའི་ལུང་ཕྲན་དང་། །དགེ་བའི་བཤེས་གཉེན་མངའ་དབུལ་ལུང་ཕྲན་དང་། །ཚེ་འདས་རྣམ་རྟོག་གྲི་འདུལ་ལུང་ཕྲན་དང་། །སྦུབ་འཇུག་བཤིག་པ་སྲི་འདུལ་ལུང་ཕྲན་དང་། །གདོས་བཅས་བསྲེག་སྦྱང་མི་ཡི་ལུང་ཕྲན་དང་། །མཆོད་རྟེན་གདབ་པའི་རུས་ཆོག་ལུང་ཕྲན་དང་། །སྒྱུ་ལུས་རང་སར་གྲོལ་བའི་ལུང་ཕྲན་དང་། །གཟུངས་མ་རང་བཞིན་ཁུག་པའི་ལུང་ཕྲན་དང་། །བཅོ་བརྒྱད་ཡོད་པ་ལས། གཞུག་མ་གཉིས་བོད་ལ་བསྟན་པའི་སྣོད་མེད་པར་སླར་རྒྱ་གར་དུ་བསྣམས་སོ། །ལུང་ཕྲན་ཞེས་བྱ་བ་ནི། བཀའི་དོན་སྒྲོ་སྐུར་དང་བྲལ་བའི་ལུང་ཆ་ཤས་སྟོན་པས་ན་ཕྲན་ཞེས་བྱའོ། །ལུང་ཕྲན་བཅོ་བརྒྱད་པའི་སྡོམ་ཚིག་རྫོགས་སོ།། ༈ །།གནས་ཀྱི་གཞུང་དཀྱིལ་བསྟན་པའི་ལུང་ཕྲན། རྒྱ་གར་སྐད་དུ། བྷྲཱུཾ་ཨ་ནུ་ཏནྟྲ་ཧྲྀ་ཏ་པཉྩ་ནཱ་མ། བོད་སྐད་དུ། གནས་ལུང་རྒྱུད་ཀྱི་སྙིང་པོ་བསྡུས་པ་ཞེས་བྱ་བ། སངས་རྒྱས་བཅོམ་ལྡན་འདས་ཞི་ཁྲོའི་ཚོགས་ལ་ཕྱག་འཚལ་ལོ། །འདི་སྐད་ལུང་དུ་བསྟན་པའི་དུས་གཅིག་ན། བཅོམ་ལྡན་འདས་སྟེང་གི་ཕྱོགས་ན་ཐམས་ཅད་སྒྲོལ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དཀྱིལ་འཁོར་དྲུག་མ་འོངས་པའི་དོན་ཕྱི་མ་དང་བདུན། ཐུགས་ཀྱི་དཀྱིལ་འཁོར་ནས་ཕྱུངས་ཏེ། །མ་ལུས་པར་བྱིན་གྱིས་བརླབས་པར་མཛད་དོ། །དང་པོ་བརྟག་པའི་གནས་ཆེན་དུ། །སྔགས་མཁན་བྱ་བ་ཀུན་བྱས་ཏེ། །ཁྲོ་བོ་མང་པོ་བཀྲམ་ནས་ནི། །བགེགས་རྣམས་རྡུལ་དུ་རློག་བཞིན་བྱེར། །དཀྱིལ་འཁོར་བརྒྱད་པ་ཚུལ་བཞིན་བཞག །བུམ་པ་བྱིན་རླབས་བཟང་མོས་བརྒྱན། །མ་ནོར་ལྷ་ནི་བསྙེན་བྱས་ཏེ། །ཆ་མེད་སངས་རྒྱས་ཀུན་ལ་ཞུ། །བྱིན་དབབ་གསལ་བར་རྫོགས་ནས་ནི། །ཕྱོགས་སྐྱོད་ལན་ཆགས་གཏང་བར་བྱ། །རྒྱུད་ལྔའི་ལམ་ནས་དྲག་པོས་བསྒྲལ། །གསལ་བའི་ཐུགས་རྗེ་སེམས་ལ་གཟུང་། །ཙིཏྟ་ལ་ནི་ལྷན་ནེ་བོས། །ཐབས་དང་ཤེས་རབ་མ་གཡོས་པའི། །གྲུ་གསུམ་པར་ནི་བསྒྲལ་བར་བྱ། །བཅས་ཏེ་སྔགས་དང་ཕྱག་རྒྱ་ཡིས། །ཡབ་ཡུམ་གནས་སུ་ཕཊ་ཀྱིས་འཕང་། །བོ་དེ་ཙིཏྟས་དབང་བསྐུར་ཏེ། །ལྷག་མ་བཤགས་སྦྱངས་སྨན་བཅོས་བསྐང་། །ཧཱུྃ་མཛད་ཀྱི་རྒྱུད་ཆེན་པོ་ལས། མ་ཧཱ་རཀྟ་ག་ན་ཡི་ལེའུ་རྣོ་ངར་གྱི་གནས་ཀྱི་ལུང་ཉི་ཚེ་ཞིག །ཨ་ཙརྨ་གུ་རུ་རྡོ་རྗེ་གྲོ་བོ་ལོད་དང་ལོཙྪ་བ་རྡོ་རྗེ་ཞང་དྲུང་གིས་བསྒྱུར་ཏེ་གཏན་ལ་ཕབ་པའོ།། ༈ །།གཟུགས་བརྙན་དཀྱིལ་འཁོར་རྒྱན་གྱི་ལུང་ཕྲན། རྒྱ་གར་སྐད་དུ། རུ་པ་མཎྜལ་ལ་ཨ་ལཾ་ཀ་ར་ཨ་ཏི་ཀ་རཀྵ་ཌ་ཀ་ནཱ་དྲི་མེད་ཟླ་ནན་མ། བོད་སྐད་དུ། གཟུགས་བརྙན་དཀྱིལ་འཁོར་རྒྱན་གྱི་ལུང་ཕྲན་ཞེས་བྱ་བ། བཅོམ་ལྡན་སྒྲོལ་བྱེད་རྒྱལ་པོ་ལ་ཕྱག་འཚལ་ལོ། །འཁོར་བའི་སྡུག་བསྔལ་སེལ་བྱེད་ཅིང་། །ཐར་པའི་ལམ་མཆོག་མངོན་འཐོབ་བྱེད། །དཀྱིལ་འཁོར་ཆོ་ག་གསུངས་པ་ལས། །རྒྱན་དགོད་ཡོ་ག་གཉིས་དགོད་བསྟན། །དཀྱིལ་འཁོར་ལ་སོགས་གཟུགས་བརྙན་གྱི། །རྒྱན་ལ་དོན་རྟགས་གཉིས་སུ་ཤེས། །དོན་ནི་གཉིས་མེད་སྣང་སྟོང་ལ། །དཀོར་བདུན་ལྷུན་གྲུབ་རང་སྣང་བརྒྱན། །གོས་ལ་གནས་དང་གང་ཟག་དང་། །དཀྱིལ་འཁོར་མཆོད་པ་འདིར་ཤེས་བྱ། །དང་པོ་ཁང་བཟང་བྱི་དོར་བྱ། །སྟེང་རྒྱན་འཕན་གདུགས་བླ་རེ་བྲེས། །བ་དན་ལྷབ་ལྷུབ་ཕྱེ་ཕུར་དང་། །རིན་ཆེན་ལྷ་མོས་བར་སྣང་བརྒྱན། །ལོགས་རྒྱན་རྒྱབ་ཡོལ་ཟ་ར་ཚགས། །ཁྲི་གདན་མཆོད་ཆ་འོག་གི་རྒྱན། །བྱིན་ཅན་སྐུ་གཟུགས་ཐང་སྐུ་དགྲམ། །གང་ཟག་སྒྲུབ་པ་པོ་ཡི་རྒྱན། །སྟོད་གཡོགས་སྨད་དཀྲིས་ཐུགས་ཁེབས་སོགས། །རྒྱན་ཆ་བཅུ་གསུམ་གྱིས་བརྒྱན་བྱ། །ཐམས་ཅད་དངོས་པོ་བཟང་ཞིང་མཛེས། །གསང་ཞིང་བྱིན་གྱིས་བརླབ་པར་བྱ། །ཡང་ན་ཁྲོ་བོའི་ཆ་བྱད་དགོད། །མཎྜལ་ལས་རྣམས་བྱ་བ་ནི། །བརྩེགས་སྟེང་ཞལ་ཞལ་ཆག་ཆག་གདབ། །ཐིག་ཚོན་གཞུང་བཞིན་ལེགས་བྲིས་ལ། །རྣམ་པ་འཆོད་དང་རྒྱན་དགོད་པའོ། །ཁྲོ་བོ་ཡོངས་རྫོགས་སྐུ་རྣམས་དང་། །ཡང་ན་ཐུགས་ཀྱི་ཕྱག་མཚན་དགོད། །བསྡུ་ན་ཡིག་འབྲུ་བྲི་བར་བྱ། །མ་ནོར་རང་དང་གནས་སུའོ། །རྒྱན་ལ་སྟེང་རྒྱན་ལྡིང་བུ་ནི། །ཡེ་ཤེས་བླ་མ་མཚོན་མའི་ཕྱིར། །མཐིང་ག་ཨ་མཚོན་སྟེང་ནས་དགབ། །འཁོར་ལོ་ཚོགས་ཆེན་ས་མཚོན་པའི། །ཞི་བ་ཐུགས་རྗེའི་དཀྱིལ་འཁོར་བཞུགས། །མ་ཆགས་པད་སྤྱན་དམར་པོ་ཡིས། །གཟུགས་བརྙན་དཀྱིལ་དཀྱིལ་འགེབས་པའི་ཚུལ། །དཀྱིལ་འཁོར་རྣམས་གཉིས་དབྱེར་མེད་ཕྱིར། །བུམ་པ་རྒྱན་རྣམས་རབ་གནས་རྫོགས། །ཞི་ཁྲོ་བྱིན་ཅན་དབུས་སུའོ། །མཐའ་སྐོར་ལོགས་ཀྱི་རྒྱན་པ་ནི། །རང་བཞིན་དངོས་གྲུབ་ཐོབ་བྱའི་ཕྱིར། །མཚན་ལྡན་བྷནྡྷ་བཟང་པོ་བརྒྱད། །སྨན་འབྲུ་རཏྣས་བཀང་ལ་བཞག །བར་ཆད་མི་ཚུགས་མཚམས་གཅོད་རྒྱན། །ཁྲོ་བཅུ་བསྐྱེད་པའི་ཕུར་པ་བཅུ། །ཕྱོགས་མཚམས་སྟེང་འོག་བཅུ་རུ་གདབ། །འཇིག་རྟེན་གཙོ་བོ་གུས་པའི་རྒྱན། །མདའ་བརྒྱད་ལྷ་ཆེན་བརྒྱད་དུ་བསྐྱེད། །ཕྱོགས་མཚམས་བརྒྱད་དུ་དྲང་པོར་གཟུགས། །ཡེ་ཤེས་ལྔ་ཡིས་ཀུན་ཁྱབ་རྒྱན། །རིགས་ལྔ་མཚོན་པའི་སྐུད་པ་ཡིས། །སྟེང་འོག་ཁ་ཁྱེར་རིས་སུ་བྲེས། །མཆོད་སྤྲིན་རྒྱུན་མི་འཆད་པའི་རྒྱན། །གཟུགས་སོགས་ལྷ་མོར་བསྒོམས་པ་ཡིས། །དར་སྣ་བརྒྱད་ཀྱང་གདབ་པར་བྱ། །དོན་གསལ་བདེ་བ་བསྐྱེད་པའི་རྒྱན། །ནང་གསལ་ལྷ་མོར་གསལ་བ་ཡི། །མེ་ལོང་བརྒྱད་ཀྱང་གོང་བཞིན་ནོ། །འདོད་ཡོན་ལྷུན་གྱིས་གྲུབ་པའི་རྒྱན། །རིན་ཆེན་སྣ་བདུན་གཏེར་བུམ་པ། །བརྒྱད་ཀྱིས་མཐའ་མ་བསྐོར་བ་ཡིན། །ཐུན་མོང་ཡོན་ཏན་ཀུན་རྫོགས་རྒྱན། །སྔོན་ཚེ་རྒྱལ་བ་ལས་བྱུང་བའི། །བཀྲ་ཤིས་རྟགས་བརྒྱད་དགྲམ་པར་བྱ། །མི་ནུབ་འགྲོ་དོན་མཛད་པའི་རྒྱན། །དོམ་དང་སེང་གེ་སྟག་དང་གཟིག །རྒྱལ་མཚན་བཞི་ནི་ཕྱོགས་བཞིར་བསླང་། །ཆོས་སྐྱོང་མཁའ་འགྲོ་དགྱེས་པའི་རྒྱན། །དཀར་ཁྲ་སེར་ཁྲ་དམར་ཁྲ་དང་། །སྔོ་ཁྲ་དར་བཞི་མཚམས་བཞིར་ཕྱར། །སྲིད་པའི་དྲྭ་བ་གཅོད་པའི་རྒྱན། །སྒོ་བཞིར་ཁྲོ་བོ་བསྐྱེད་པ་ཡི། །རལ་གྲི་བཞི་ཡང་ཕྱོགས་བཞི་སྟེ། །མ་རིག་མུན་པ་སེལ་བའི་རྒྱན། །ཀུན་སྣང་གསལ་བའི་མར་མེ་བརྒྱད། །དཀྱིལ་འཁོར་མཐའ་ནས་བཀོད་པར་བྱ། །ཁམས་གསུམ་དབང་དུ་སྡུད་པའི་རྒྱན། །ཕྱོགས་སྐྱོང་རྒྱལ་ཆེན་བཅུ་བཞི་ཡང་། །མཐའ་ནས་བསྐོར་ཞིང་གུས་པར་གསལ། །དེ་དག་ཐུན་མོང་རྒྱན་ཞེས་བྱ། །ཁྱད་པར་དུར་ཁྲོད་བརྒྱད་ཀྱི་རྒྱན། །གནས་བརྒྱད་ཤིང་དང་ཞིང་སྐྱོང་དང་། །ཕྱོགས་སྐྱོང་རྣལ་འབྱོར་མཚོ་དང་སྤྲིན། །ཀླུ་བརྒྱད་དེ་དག་ལ་སོགས་སུ། །ཤ་ཟ་སྲིན་པོ་གཤིན་རྗེ་དང་། །མཁའ་འགྲོ་བྱ་ཁྱི་རོ་ལངས་སོགས། །ཅེ་སྤྱང་ཁྲོས་པའི་སྒྲ་འབྱིན་ཅིང་། །རོ་ཡི་ཚོགས་ལ་ལོངས་སྤྱོད་མཛད། །རང་བྱུང་མཚོ་ཆེན་དང་བཅས་པ། །ཕྲེང་བ་རིམ་གསུམ་ཕྱི་རོལ་གནས། །ཀུན་འབྱུང་བརྒྱད་ཀྱིས་མཚམས་སྤྲས་ཏེ། །དཔག་བསམ་རིན་ཆེན་ལྗོན་ཤིང་དང་། །ཉི་ཟླ་འདོད་འཇོ་བ་མོ་དང་། །རིན་ཆེན་ས་གཞི་ཁྲུས་ཀྱི་རྫིང་། །ཡིད་བཞིན་བསམ་འཕེལ་ནོར་བུ་དང་། །འབྲུ་ཚོགས་ཞིང་ཀུན་མཛེས་པར་བརྒྱན། །བླ་མེད་རྒྱན་ནི་ཞིང་ཆེན་བླ་རེ་དང་། །ཞིང་གི་རྒྱལ་མཚན་ཞིང་ཕྲན་འཕན་གདུགས་དང་། །དཀྱིལ་འཁོར་ལེགས་རྣམས་ཀེང་རུས་རི་རབ་དང་། །རཀྟའི་མཚོ་དང་ཞིང་ཆེན་ལང་ལིང་དང་། །རྒྱུ་མའི་དྲྭ་ཕྱེད་ཙིཏྟའི་ཕྲེང་བའོ། །ཐོད་པ་སྐམ་རློན་ལ་སོགས་བསམ་ཡས་པ། །རྒྱུད་ནས་བཤད་པ་བཞིན་དུ་འདིར་བསྒྲུབ་བྱ། །མཆོད་པའི་རྒྱན་ལ་ཕྱི་ནང་གསང་གསུམ་སྟེ། །རང་བཞིན་དག་པའི་པུ་ཙ་རྣམ་པ་བདུན། །ཞབས་བསིལ་ཆུ་གཙང་ཙནྡན་སྦྱར་བ་དང་། །ཆུ་སྐྱེས་ཐང་སྐྱེས་ཡིད་འོང་མེ་ཏོག་དང་། །ལྷན་སྐྱེས་སྦྱར་བྱུང་བདུག་སྤོས་དུ་མ་དང་། །བྱུག་པ་ཆུ་གཙང་དཀར་གསུམ་སྨན་སྣས་བྲན། །ཞལ་ཟས་ལྷ་བཤོས་རོ་མཆོག་ཕུན་སུམ་ཚོགས། །སྣང་གསལ་འབྲུ་མར་ཞུན་མར་ཁུ་བའི་མེ། །ཆ་ལང་གླིང་བུ་སྒྲ་སྙན་སྣ་ཚོགས་བཤམས། །ནང་གི་པུ་ཙ་འདོད་ཡོན་རྣམ་ལྔས་ཏེ། །གཟུགས་མཛེས་མེ་ལོང་ལ་སོགས་མང་པོ་དང་། །སྒྲ་སྙན་ཟིན་དང་མ་ཟིན་མང་པོ་དང་། །དྲི་ཞིམ་ཚིམ་བྱེད་སྤོས་མཆོག་སྣ་ཚོགས་དང་། །རོ་བཅུད་ལྡན་པའི་ཞལ་ཟས་བསམ་ཡས་དང་། །རེག་བྱ་འཇམ་ཞིང་བདེ་བ་མ་ལུས་བཤམས། །གསང་བའི་མཆོད་པ་མ་ལུས་ཐམས་ཅད་ཀུན། །ཁྱད་པར་རྨད་དུ་བྱུང་བའི་མཆོད་པ་སྟེ། །དམ་རྫས་ལྡན་པའི་དཔལ་གཏོར་ཆེན་པོ་དང་། །འབྲུ་བཅུད་བཞི་བཅས་རྩ་བརྒྱད་སྟོང་སྦྱར་སྨན། །མཱཾ་སར་བཅས་པའི་རཀྟ་ཆེན་པོ་དང་། །སྲུང་མ་མཆོད་པའི་དཀར་གཏོར་དམར་གཏོར་དང་། །མཚན་ལྡན་གཟུངས་མ་ཁྲུས་དབྱུང་རྒྱན་ཆ་བསྟར། །བསྐང་བའི་རྫས་ལ་བྱ་ལུག་ཤེལ་སྒོང་དང་། །འཇིག་རྟེན་ལོངས་སྤྱོད་རུ་ཚད་འདིར་བསྡུའོ། བདག་དོན་དངོས་གྲུབ་སྒྲུབ་པའི་ཆོ་ག་དང་། །གཞན་དོན་དབང་དང་རབ་གནས་ཀུན་ལ་གཅེས། །མི་སྣང་གཤིན་པོའི་ཆོ་ག་འདིར་བསྟན་ཡིན། །ཕྲིན་ལས་གང་སྒྲུབ་རྫས་རྣམས་རང་གཞུང་ལྟོས། །འདི་ནི་སྤྱི་ཡི་གདམས་པ་ཐོབ་ཙམ་ཡིན། །བསྟན་པའི་དོན་འདི་རྒྱུན་དུ་བཀོད་ཙམ་གྱིས། །བདེ་གཤེགས་རྒྱལ་བ་ཀུན་ཀྱང་མཉེས་གྱུར་ཏེ། །རིག་འཛིན་བྱང་སེམས་རྣམས་ཀྱིས་བྱིན་རློབ་འགྱུར། །མཁའ་འགྲོ་ཆོས་སྐྱོང་ཕྲིན་ལས་མྱུར་འགྲུབ་ལ། །འཇིག་རྟེན་གཙོ་དང་འཁོར་གྱིས་བསྐོར་བར་བྱེད། །དབང་སྒྲུབ་དབང་བྱེད་རྡོ་རྗེ་འཆང་པར་སྒྲོལ། །དགེ་བས་སྣང་དང་མི་སྣང་དོན་ཡོད་ཤོག །གཟུགས་བརྙན་དཀྱིལ་འཁོར་རྒྱན་གྱི་ལུང་ཕྲན་ཞེས་བྱ་བ་རྫོགས་སོ། །རྒྱ་གར་གྱི་མཁན་པོ་བི་མ་ལ་མི་ཏྲ་དང་། །བོད་ཀྱི་ལོ་ཙཱ་བ་ཛྙཱ་ན་ཀུ་མཱ་རས་བསྒྱུར་བའོ།། ༈ །།དཀྱིལ་འཁོར་ཕོ་བྲང་བུམ་པའི་ལུང་ཕྲན། ཡེ་ཤེས་རང་གནས་ལ་ཕྱག་འཚལ་ལོ། །གནས་ལུང་རྒྱུད་དུ་གསུངས་པ་ཡིས། །བུམ་པ་བྱིན་རླབས་བཟང་མོས་བརྒྱན། །མདོ་ཙམ་བསྡུས་ཏེ་བསྟན་པར་བྱ། །ངེས་ཚིག་བཤམ་ལུགས་བྱིན་རླབས་ཏེ། །རབ་གནས་གཞུགས་སུ་གསོལ་བ་ཡིས། །བུམ་པའི་ཆོ་ག་ཤེས་པར་བྱ། །དང་པོ་ཕྱི་ནང་རྣམ་པ་གཉིས། །ཕྱི་ཡང་ཤེས་རབ་ཡུམ་གྱི་དབྱིངས། །ལམ་ལྔ་བགྲོད་ཅིང་དབྱིངས་སུ་ཕྱིན། །བྱང་ཆུབ་ཆོས་རྣམས་ཡོངས་སུ་རྫོགས། །རང་ཉིད་ལྷ་དང་ཡབ་ཀྱི་ཚུལ། །ཐབས་དང་ཤེས་རབ་གཉིས་མེད་པས། །བྱང་ཆུབ་སེམས་ཀྱི་ཆུ་རྒྱུན་གྱིས། །གཟུང་འཛིན་དག་ཅིང་སངས་རྒྱས་རྒྱུ། །བྱང་སེམས་དབང་གི་ད་ལ་ཡང་། །ཕྱི་ནང་གསང་བ་གསུམ་དུ་རྫོགས། །རིན་ཆེན་ལྔའམ་ཁམ་ས་ལ། །ལྟོ་དང་མགྲིན་པ་ཚད་ལྡན་ཞིང་། །གུར་གུམ་རྒྱ་སྤོས་དྲི་ཞིམ་པས། །སྔགས་བཟླས་ཤིན་ཏུ་དག་པར་བཀྲུ། །བདུད་འཁྱིལ་ཡབ་ལྔའི་སྔགས་བཟླས་ཤིང་། །གུ་གུལ་ལ་སོགས་དུད་པས་བདུག །དཀར་ཞལ་བཏང་སྟེ་ཡུམ་བཞི་ཡི། །ཕྱག་རྒྱའམ་སྙིང་པོའི་སྔགས་རྣམས་བྲི། །ཆ་རྐྱེན་ཆུ་དང་འོ་མ་དང་། །དྲི་ལྔ་སྨན་ལྔ་སྤོས་ལྔ་དང་། །རིན་ཆེན་ལྔ་དང་འབྲུ་ལྔ་དང་། །སྙིང་པོ་ལྔ་དང་ཁ་རྒྱན་བཅས། །དར་རས་ལ་སོགས་མགུལ་ཆིངས་དང་། །རིན་ཆེན་བརྒྱུས་པའི་གཟུངས་ཐག་བཤམས། །དྲི་མ་བཟུང་ཞིང་བརྐྱང་ཕྱག་དང་། །ལྷ་བསྐྱེད་གསང་བརླབ་བདེན་པ་བདར། །སྤྲུལ་བཀྱེ་བར་དུ་གཅོད་པ་སྲུངས། །བདུད་འཁྱིལ་སྔགས་བཟླས་དུད་པས་བདུག །ཕྱག་གཡོན་འཁྱུད་ཅིང་གཡས་པ་ཡིས། །གུས་པས་བུམ་པའི་ཁ་བཀག་སྟེ། །ཡུམ་གྱི་སྔགས་བཟླས་ཟབ་མོའི་མཁའ། །ཐུགས་ནས་བྷྲཱུྃ་བཏོན་སྔགས་བཟླས་པས། །འཁོར་ལོ་ཟླུམ་པོ་རིན་ཆེན་དང་། །པདྨ་རྒྱ་གྲམ་ལ་སོགས་བཞི། །གཞལ་ཡས་གདན་དང་བཅས་པ་བསྐྱེད། །ཉུངས་དཀར་བླུགས་ཤིང་སྔགས་བརྗོད་པས། །དབུས་སུ་མི་བསྐྱོད་ཤར་ལྷོ་ལ། །ཀུན་བཟང་ཡབ་ཡུམ་སྟེང་འོག་གི། །ཐུབ་པ་ནུབ་དང་བྱང་དུའོ། །ཤར་དུ་རྣམ་སྣང་ཡབ་ཡུམ་ལ། །ས་སྙིང་བྱམས་པ་ཡབ་ཡུམ་ལྷོ། །གཤིན་རྗེ་ཡབ་ཡུམ་མི་ཐུབ་བྱང་། །ལྷོར་ནི་འབྱུང་ལྡན་ཡབ་ཡུམ་ལ། །ནམ་སྙིང་སྒྲིབ་སེལ་ཡབ་ཡུམ་གཉིས། །ཤར་དང་ལྷོ་བསྐྱེད་སྟོབས་ཆེན་ནུབ། །བྱོལ་སོང་ཐུབ་པ་བྱང་དུའོ། །ནུབ་ཏུ་མཐའ་ཡས་སྤྱན་རས་དང་། །ཀུན་བཟང་ཡབ་ཡུམ་ཤར་དང་ལྷོ། །རྟ་མགྲིན་ནུབ་ལ་ཡི་དྭགས་བྱང་། །བྱང་དུ་དོན་གྲུབ་ཕྱག་རྡོ་རྗེ། །འཇམ་དཔལ་ཡབ་ཡུམ་ཤར་ལྷོ་དང་། །ནུབ་ཏུ་བདུད་འཁྱིལ་ལྷ་མིན་བྱང་། །དབུས་ཀྱི་སྔགས་བཟླས་སྙིང་པོ་ལྔ། །ཕྱི་ནང་དྲང་ཞིང་ནུབ་ཏུ་བླུགས། །རྣམ་སྣང་སྤོས་ལ་སྤོང་བ་སྐུ། །འབྱུང་ལྡན་རིན་ཆེན་རྫུ་འཕྲུལ་ཡོན། །འབྲུ་ལྔ་མཐའ་ཡས་གསུང་ལྔ་དབང་། །དོན་གྲུབ་སྨན་ལྔ་ཕྲིན་ལས་སྟོབས། །ཆུ་བླུགས་ཐིམ་ཞིང་བྱིན་གྱིས་བརླབ། །ཁ་རྒྱན་ཏྲཱྃ་གིས་བྱིན་བརླབས་ཏེ། །སྒོ་སྔགས་བྱང་ཆུབ་ཡན་ལག་བདུན། །མགུལ་ཆིངས་ཧཱུྃ་བཀོད་སེམས་དཔའ་ཡི། །སྔགས་བཟླས་དྲན་པའི་གཟུངས་སུ་གྱུར། །གཟུགས་ཐག་ༀ་ལྡན་ཡེ་ཤེས་ལྔ། །འཕགས་པའི་ལམ་དང་ཡན་ལག་བརྒྱད། །ཐུམ་པའི་སྔགས་བཟླས་གཟུངས་དང་ལྡན། །ཕྱག་བཞེས་སྤྱི་བཏེགས་སྔགས་བཟླས་པས། །མཐུ་བྱིན་རབ་ཏུ་བསྐྱེད་པའོ། །མདུན་བཞག་གཞལ་ཡས་ལྷ་གསལ་གདབ། །བྱིན་བརླབས་དབང་བསྐུར་སྤྱན་དྲངས་བསྟིམས། །ཕྱག་དང་མཆོད་པ་ལ་སོགས་བྱ། །སྨོན་ལམ་གདབ་ཅིང་སྦྱོར་བཟླས་བསྐུལ། །རྒྱལ་མཚན་རོལ་མོས་སྣ་དྲངས་ལ། །བསྐོར་ཞིང་བསྟོད་བྱས་དབུས་སུ་བཞུགས། །དེས་ནི་དགོངས་པ་རྫོགས་པ་ཡིན། །སློབ་དཔོན་ཆེན་པོ་དུར་ཁྲོད་བདེ་བའི་བུམ་ལུང་ནས་བསྐོལ་ནས། བི་མ་ལས་མཛད་པ། ཞུང་དྲུང་གིས་བསྒྱུར་བའོ།། ༈ །།ཚེ་འདས་རྣམ་ཤེས་འགུགས་པའི་ལུང་ཕྲན། རྒྱ་གར་སྐད་དུ། ཨ་ཡུ་ག་ཏ་བི་ཛྙཱ་ན་ཨ་ཏྲི་ཀྲ། ཨ་ཏི་ཀ་རཀྵ་ཌ་ཀ་ནཱ་མ། བོད་སྐད་དུ། ཚེ་འདས་ཀྱི་རྣམ་པར་ཤེས་པ་འགུགས་པའི་ལུང་ཕྲན་ཞེས་བྱ་བ། ཡེ་ཤེས་ཐུགས་རྗེས་འདྲེན་པ་ཆེན་པོ་ལ་ཕྱག་འཚལ་ལོ། །རྒྱུད་ཆེན་གཉིས་ལས་གཞན་དོན་དུ། །གནས་ཀྱི་ཆོ་ག་གསུངས་པ་ཡི། །ཞི་བས་སྒྲོལ་དང་དྲག་པོས་བསྐྲད། །དངོས་གཞི་དགུག་དང་གསུམ་དུ་བསྟན། །མྱང་འདས་མཆོད་ལ་ཚོགས་བསག་ཅིང་། །ཆོས་སྐྱོང་མཆོད་ལ་ཕྲིན་ལས་ཞུ། །རིགས་དྲུག་རྣམས་ལ་མཆོད་སྦྱིན་བྱ། །བགེགས་རིགས་རྣམས་ལ་གླུད་གཏོར་བཏང་། །གསུང་རབ་རྒྱས་འབྲིང་འབུམ་ལྔ་གདོན། །ཕྱི་ནང་སྤང་སྐོང་ཐམས་ཅད་བསྒྲགས། །ཁྱད་པར་གསེར་སྐྱེམས་གླུད་གཏོར་གྱིས། །གཤེད་མའི་རྒྱབ་རྟེན་མ་བྱེད་བྱ། །ཟ་འདྲེའི་གླུད་དུ་བཏང་ལ་བསླུ། །ཤེས་པ་རང་ཐོང་ཅིག་ཅེས་བསྒོ། །ཡུལ་ལྷ་རྣམས་ལ་སྟོང་གྱིས་བྱ། །ཆུ་གཏོར་གླུད་གཏོར་བདེན་པ་བསྒྲགས། །གཉིས་པ་བསྐྲད་པ་གང་ཡིན་པ། །བཀའ་མི་ཉན་ཅིང་བགེགས་བྱེད་པའི། །ལྷན་སྐྱེས་འདྲེ་དང་ཡི་དྭགས་ཁོག་བསྲུང་དང་། །གཤིན་རྗེ་ཁྲམ་འཛིན་ཆོས་རྒྱལ་རྩིས་ལ་སོགས། །གསོན་བདུད་གཤིན་ལྕགས་བྱེད་པ་ཐམས་ཅད་ལ། །གཉེན་པོ་ལྷ་དང་འདུལ་བྱེད་བཏང་བ་དང་། །སྤྲུལ་པ་ཁྲོ་ཆུ་འགུགས་པའི་མཚོན་ཆ་དང་། །རྟོག་འཇོམས་ཁྲོ་བོ་དྲག་པོའི་ལས་དང་ནི། །སྒྲོལ་བྱེད་ཁྲོ་བོ་གཏུབ་པའི་མཚོན་ཆ་དང་། །བརྡུང་བ་མཚོན་དྲུག་བཏབ་པ་ལ་སོགས་ཀྱིས། །བདུད་གཅོད་སྲོག་ལེན་བྱེད་པ་ཐམས་ཅད་འདུལ། །རྣོ་ལ་གུལ་གུལ་ཡུངས་ཀར་དྲག་པོའི་སྔགས། །གསུམ་པ་དངོས་གཞི་ཐབས་དང་རྟེན་ཡིན་ཏེ། །དྲི་མ་ཡིད་འཐད་ཤེས་ཆགས་གོ་ལོག་ལ། །ཕོ་མོའི་རྟགས་དང་བཅས་པའི་ཙོག་པུ་བྱ། །མཚན་བྱང་མིང་རུས་ནྲི་དང་བཅས་པ་བྲི། །ཞི་ཁྲོ་གསང་བའི་དཀྱིལ་འཁོར་ལྷ་ཚོགས་ལ། །ཕྱག་འཚལ་སྐྱབས་གསོལ་མཐུས་བཏང་དང་། །བྱིན་རླབས་གནས་སྤར་སྒྲིབ་སྦྱོང་དང་། །དབང་བསྐུར་པ་རྣམས་སྒྲོལ་གསོལ་འདེབས། །སྐྱོབ་པའི་གདུགས་དང་ལུས་ཚད་འཕན། །པད་གདན་སྨྱུག་མ་མེ་ལོང་ལ། །བགེགས་ཀྱིས་མི་ཚུགས་སྤོས་ཆེན་དང་། །དྲི་ཞིམ་བླ་ཚགས་སྤོས་ཀྱིས་བདུག །རྣམ་ཤེས་མི་འཁྱམས་རྟེན་དུ་བྱ། །ཐབས་ལ་རྣམ་པ་བཞི་ཡིན་ཏེ། །ཐུགས་རྗེ་སྟོབས་ཀྱིས་དགུག་པ་ནི། །དཀོན་མཆོག་གསུམ་གྱི་བདེན་པ་དང་། །རང་རྒྱུད་དག་པའི་བདེན་པ་ཡིས། །རིགས་དྲུག་བར་དོ་གཤེགས་ལ་སོགས། །གར་སྐྱེས་གང་ན་གནས་གྱུར་ཀྱང་། །ངན་སོང་སྒོ་གཅོད་མཐོ་རིས་ཀྱི། །གསང་བའི་དཀྱིལ་འཁོར་གཉན་དྲུང་དུ། སྐད་ཅིག་ཡུད་ཀྱིས་དགུག་པར་བྱ། །སྔགས་དང་ཕྱག་རྒྱས་དགུག་པ་ནི། །འགུག་བྱེད་ལྕགས་ཀྱུའི་ཕྱག་རྒྱ་བཅས། །ཨ་སུ་ནྲྀ་ཏྲི་པྲེ་དུ་དང་། །ནྲྀ་ཡཾ་བཛྲ་ཨཾ་ཀུ་ཤ་ཛཿ བདུན་ནམ་ཉི་ཤུ་རྩ་གཅིག་བརྗོད། །ཤོག་སྐྱ་རླུང་གིས་བསྐྱོད་པ་བཞིན། །དེ་ཉིད་ལ་ཡང་ཁུག་པར་འགྱུར། །རིག་པ་རྩལ་གྱིས་དགུག་པ་ནི། །བདག་གི་ཐུགས་ཀའི་ཛཿའཕྲོས་ཏེ། །དེ་ལས་སྤྲུལ་པ་གྲངས་མེད་སྤྲོས། ། འོད་ཟེར་ལྕགས་ཀྱུ་འདྲ་བྱུང་ནས། །གཤིན་གྱི་ཐང་ཁ་ནས་བཟུང་སྟེ། །བདག་གི་མདུན་དུ་འོངས་པར་བསམ། །རྣོ་མྱུར་འདི་ཡིས་ཁུག་པར་འགྱུར། །ཚད་ལ་ཕེབས་རྟགས་གཞན་དུ་ཤེས། །དེ་ནས་རྟེན་ལ་བསྟིམས་བྱས་ཏེ། །ཁོག་པ་དབྲལ་ཞིང་གཉིས་མེད་བསྟིམ། །ལྕགས་ཀྱུས་བཟུང་ནས་ཞགས་པས་བཅིངས། །ལྕགས་སྒྲོག་གིས་བསྡོམས་དྲིལ་དགྱེས་བསྐྱེད། །སྐྱོ་བས་བར་དོའི་འདུ་ཤེས་བསྒྱུར། །སྔོན་དུ་སྲིད་པའི་ཤ་གཟུགས་ཅན། །བར་དོའི་ཤེས་པ་བསྒྱུར་སླ་བས། །དེ་ཉིད་དུ་ནི་ཤེས་པར་བྱ། །ཆོ་ག་འདི་དག་མི་ལྡན་ན། །ཚེ་འདས་ཕན་བྱས་དོན་མེད་འགྱུར། །སེམས་ཅན་མ་ལུས་ཐམས་ཅད་ཀྱིས། །བླ་མེད་རང་གནས་ཐོབ་པར་ཤོག །རྒྱ་གར་གྱི་སློབ་དཔོན་བི་མ་ལ་མི་ཏྲིའི་ཞལ་སྔ་ནས་གསུངས་ཤིང་ཞང་དྲུང་ཛྙཱ་ཀུ་མཱ་རས་བསྒྱུར་བའོ།། ༈ །།རྣམ་ཤེས་འགུགས་པའི་གཏན་ཚིགས་ལུང་ཕྲན། རྒྱ་གར་སྐད་དུ། ཨ་ཡུ་ག་ཏ་བི་ཛྙཱ་ན་ཧེ་ཏུ་ཨ་བྲི་ཏ་ཨ་ཏི་ཀ་རཀྵ་ཌ་ཀ་ན་མ། བོད་སྐད་དུ། ཚེ་འདས་ཀྱི་རྣམ་པར་ཤེས་པ་དགུག་པའི་གཏན་ཚིགས་ཀྱི་ལུང་ཕྲན་ཞེས་བྱ་བ། ཡི་དམ་གྱི་ལྷ་ལ་ཕྱག་འཚལ་ལོ། །གཤིན་པོའི་དོན་དུ་ལས་བྱ་བ། །བསོད་ནམས་རྒྱལ་པོ་མ་སྐྱེས་དགྲས། །སུམ་ཅུ་རྩ་གསུམ་ལྷ་གནས་ནས། །ལྷ་བུ་ནོར་བུ་དྲི་མ་མེད། །སྔོན་གྱི་ཕ་བསད་ལས་སྙེགས་ཀྱིས། །ངན་སོང་གནས་སུ་ལྟུང་བ་ལས། །རྟེན་བཅས་ཤེས་པ་བཀུག་པ་ཡིས། །ངན་སོང་གནས་ནས་འདྲོངས་པ་བཞིན། །དེ་བས་གང་ཡིན་རྟེན་བཅས་ནས། །ཏིང་འཛིན་ཡིད་ཀྱིས་བཀུག་ནས་ཀྱང་། །རྟེན་སྦྱངས་ཤེས་པ་འབྲས་ཐོབ་ཅེས། །སྟོན་པའི་བཀའ་ལས་གསུངས་པ་ཡིན། །ཤེས་དགུག་ཐབས་ཆེན་གཞན་ནས་འབྱུང་། །རྟགས་ལ་རྣམ་པ་གསུམ་ཡིན་ཏེ། །རབ་ལ་དངོས་དང་འབྲིང་ལ་ཉམས། །ཐ་མ་རྨི་ལམ་པྲ་སྒྲུབ་བྱ། །དང་པོ་སྟོབས་ནུས་ཆེ་ལྡན་ལ། །བག་ཆགས་ལུས་དེ་དག་པར་སྣང་། །དྲི་མ་ལྡོག་དང་སྨྱུག་མ་འགུལ། །མེ་ལོང་མཚན་བྱང་འདར་བ་སྲིད། །ཉམས་ལ་ཉམས་སྣང་གོང་དང་འདྲ། །ཆ་མཐུན་སྣང་ཉམས་ཡིད་ཡུལ་དུ ། །རྟེན་དེ་མི་སྙམས་ཡིད་ཡུལ་དུ། །དེ་འདྲ་རྨི་ལམ་གཞན་མཐོང་འགྱུར། །བྱང་ཆུབ་སེམས་དང་རབ་ལྡན་པའི། །སྐྱེས་བུ་གཞན་དོན་ཆོ་ག་མཁས། །གནས་ཁང་རྟེན་མཆོད་ཡིག་འབྲུ་ལྷ། །ༀ་བུདྡྷ་ཙུ་རུ་ཙུ་རུ་མ་ཧཱ་ཙུ་རུ་ཀེ་སྭཱ་ཧཱ། འབུམ་ཚོ་བཅུ་གསུམ་སྨྲ་བཅད་བཟླས། །དངོས་གཞི་ཡར་ངོའི་དུས་བཟང་ལ། །སྐུ་ཁྲུས་གསོལ་ཞིང་གསོལ་བ་གདབ། །དཀར་གསུམ་བཟའ་ཞིང་ན་བཟའ་གསོལ། །བྱང་ཆུབ་ཆེན་པོར་ཁ་བལྟས་ལ། །བྱང་དུ་ཉལ་ལ་རྨི་ལམ་བརྟག །གར་སྐྱེ་བལྟ་ཞིང་གཞན་དོན་བྱ། །འབུམ་ཕྲག་བདུན་དུ་བྱ་བ་རྣམས། །གཞུང་དང་མཐུན་པར་མཁས་པས་བྱ། །ཡང་ན་མཁའ་འགྲོའི་པྲ་ཕབ་སྟེ། །གཙང་ཞིང་དྲི་མེད་གནས་དག་ཏུ། །རྟེན་བཤམས་མཆོད་དང་ཚོགས་འཁོར་བསྐོར། །མེ་ལོང་དག་བཀྲུ་དྲི་ཐིག་བྱ། །ཌ་ཀི་ལྔ་ཡི་རང་བཞིན་བསམ། །ཌ་མ་རུ་དང་མེ་ལོང་འཛིན། །མཐོ་བོང་རྒྱ་སྐྱེགས་ཐིག་ལེ་བྱ། །མིག་ལ་ལྟས་སྟོན་བྱུག་པས་གསལ། །རང་གིས་ཁྲི་ཚོ་གསུམ་དུ་བཟླས། །ༀ་དྷི་རི་དྷི་རི། དྷུ་རུ་དྷུ་རུ་ཤག་ཤག །ཚལ་པ་ཚལ་པ། པྲ་མོ་ཤག་ཚལ་པ། ཡ་ཤུག་རི་ནིར་ཏི་ཕོབ་ཕོབ་ཡ་ཡ། དེ་ནས་བུ་མོ་གཙང་མ་ལྔ། །ཁྲུས་བྱས་ཌཱ་ཱཀི་ལྔ་རུ་བསམ། །ཉུངས་དཀར་སྔགས་བཅས་དྲག་ཏུ་དབབ། །ལེགས་ཉེས་ལྟས་སྟོན་སྨྲ་བར་འགྱུར། །དོམ་དྲེད་སྟག་བྱུང་རྒྱལ་པོ་བསྐྲད། །མཁས་པས་མྱུར་དུ་འདྲི་ཞིང་བརྟག །ཤིན་ཏུ་མངོན་ཤེས་གསལ་བར་འབྱུང་། །རྟགས་མཚན་ངན་ན་བཟློག་པར་བྱ། །དགེ་བྱས་རང་སྣང་མངོན་ཐོབ་འགྱུར། །མི་སྣང་རྐྱེན་གསལ་བླ་མེད་ཤོག །རྣམ་པར་ཤེས་པ་ཁུགས་རྟགས་དང་། །རང་གར་སྐྱེ་བ་བརྟག་པའི་ལུང་ཕྲན། གནོད་སྦྱིན་མོ་བྱང་ཆུབ་ཀྱིས་མཛད་པ་རྫོགས་སོ།། ༈ །།གཤིན་བླ་འགུགས་པ་མན་ངག་ལུང་ཕྲན། རྒྱ་གར་སྐད་དུ། ཡ་མ་བི་ཛྙཱ་ན་ཀ་རཀྵ་ཨུ་པན་ཏེ་ཤ་ཌ་ཀ་ན་མ། བོད་སྐད་དུ། གཤིན་བླ་འགུགས་པའི་ལུང་ཕྲན་ཞེས་བྱ་བ། ཞི་ཁྲོ་རབ་འབྱམས་ཀྱི་ལྷ་ཚོགས་ལ་ཕྱག་འཚལ་ལོ། །དུས་ཐ་མ་ལ་རྣལ་འབྱོར་པ་དགོངས་པ་མི་དྲན་པར། ཁེང་དྲེགས་དང་ཡིན་ལོ་འགྲན་པའི་དུས་སོ། །དེའི་དུས་གཤིན་པོའི་བླ་དབབ་པ་ནི། གནས་ལུགས་གཞུང་བསྲངས། རྫས་སུ་ཕུར་པ་ཁོང་གསེང་ཅན་གཅིག་ལ། །དར་སྣ་ལྔ་ཚང་བར་བཏགས་ལ། །ཕུར་པ་གཤིན་པོའི་སེམས་ཡིན་པར་བསྒོམ། དར་སྣ་ལྔ་ཡིད་ཡིན་པར་བསྒོམ། །ཁོང་གསེང་དུ་བླ་འཁོར་བར་བསྒོམ། །སྔགས་པའི་ལུས་རི་རབ་ཙམ་དུ་བསྒོམ། །ཕུར་པའི་རྩེ་མོ་གནམ་དུ་བསྟན་ལ། །སྟེང་ཚངས་པའི་གནས་ནས་བླ་ཁུགས་པར་བསམ། །ཕྱོགས་མཚམས་ཐམས་ཅད་དུ་དེ་ལྟར་བསམ། ཕུར་པ་རྐེད་པ་ལ་བསྐོར་ལ་གཤེད་མའི་ལག་ནས་བླ་ཕྲལ་བར་བསྒོམ། བླ་གཤེད་དང་བྲལ་བའི་སྔགས་ནི། ༀ་ཨཱཿཧཱུྃ། ཕར་ནན། ཟིན་ཏི་ནན། སན་ཙེ་དུན་དུན། ཞབ་ནི་ཞུབ་ནི་ཐུལ་ཅན། ཞེས་ལན་བདུན་བརྗོད་ལ། ཞོ་ཕུད་ཞིག་འོག་ཏུ་གཞུག་ཆང་ཕུད་འཁུར་བས་ཁ་བཅད་ལ་བཞག །ཁྱེའུ་གཙང་མའམ་ཉེ་དུ་ལ་སོགས་པ་བདུན་ཁྲུས་བྱས་ལ། མགོ་བོ་ཕུར། མིག་བཙུམ་ལ་བཞག །སྤྲེའུའི་འཇུག་མ་དང་རྣ་བ། །ཕག་བློ་སྐྱེག་གི་རྔ་མ། །བདག་སྔགས་པའི་ལུས་ལ་བཅངས། །དབབ་པ་ཁྲུས་གསོལ། བདུན་པོ་ལ་དམ་བཅའ། ༀ་བཛྲ་ཤག་ནི་ལི་བྷྱོ། ཨ་པར་ཨ་ཡུར་ནན། །པྲོ་མོར་དུན་ཤག་ཏ་དུལ་བྱིལ་ནན། །ཨ་པར་ཨ་ལོན་འུར་ཏེ། དུན་ཙེ་དུན་ཙེ་སད། མ་བན་ཡ་ནེ་ཤག །ཅེས་བརྗོད་ཅིང་། ནས་དཀར་དང་། ཤག་པོའི་ཐོད་རས་གཏོར་བས། །གཤིན་ངག་གསོལ་སྨྲའོ། །གསོན་ཚེ་གང་བྱས་སྨྲ། གྲོགས་མཚང་བྱ། བུ་ལོན་སྨྲ་ངོ་བོ་དང་གསོན་ལ་འདུག་གི་སྨྲ། ཐམས་ཅད་ཀྱིས་དེར་མི་དྲི། །བླ་མའི་ཉེ་དྲུང་སྙིང་རེག་མས་དྲི་ཐམས་ཅད་དུ་མི་བྱ། དགེ་སྦྱོར་བུང་ཆེ་བའམ་དམ་ཚིག་འབྲེལ་པ་བྱའོ། །སློབ་དཔོན་པདྨ་འབྱུང་གནས་ཀྱིས། བློན་པོ་འགོས་རྒན་དོན་དུ་མཛད་པའོ། །གཤིན་བླ་འགུགས་པའི་ལུང་ཕྲན་ཞེས་བྱ་བ་རྫོགས་སོ།། ༈ །།ཐུགས་རྗེ་ཆེན་པོ་སྦྱང་བའི་ལུང་ཕྲན། རྒྱ་གར་སྐད་དུ། མ་ཧཱ་ཀ་རུ་ཨ་ཧཱ་ཨ་ཀ་རཀྵ་ཌ་ཀ་ནཱ་མ། བོད་སྐད་དུ། ཐུགས་རྗེ་ཆེན་པོས་སྦྱང་བའི་ལུང་ཕྲན་ཞེས་བྱ་བ། བཅོམ་ལྡན་འདས་སྦྱོང་བྱེད་ཐུགས་རྗེའི་རྒྱལ་པོ་ལ་ཕྱག་འཚལ་ལོ། །ཡེ་ཤེས་རང་གནས་འདུས་མ་བྱས། །ཅིར་ཡང་སྣང་བས་གཞན་དུ་འགྱུར། །གཉིས་ལ་དྲུག་སྣང་བཞི་ཉིད་དུ། །བར་མ་སྲིད་པའི་མཚམས་སྦྱོར་ཞིང་། །འཁོར་བར་སྲིད་པའི་རྒྱུ་རྣམས་ནི། །རིན་ཆེན་ཙིཏྟའི་ཕོ་བྲང་ནང་། །རྩ་བ་ས་བོན་དབྱིབས་དང་འོད། །སོ་སོར་སྲིད་པའི་ཉོན་མོངས་དྲུག །རང་དང་གཞན་གྱིས་བསགས་ཤིང་གནས། །ཐུགས་རྗེ་ཆེན་པོའི་དཀྱིལ་འཁོར་དུ། །ཟབ་མོའི་ལུང་གིས་སྦྱངས་བྱས་ཏེ། །སྔོན་དུ་བུམ་པར་བསྙེན་བྱས་ན། །སྐད་ཅིག་དྲག་པོའི་ལྷ་གསལ་ནས། །རྣམ་ཤེས་བསྡུ་ཞིང་བར་ཆད་བསལ། །ཕྱི་ནང་སྔགས་ཀྱི་སྦྱོར་བ་ཡིས། །རྒྱུད་དྲུག་འདུས་པའི་དུག་སྦྱངས་ནས། །ཏིང་འཛིན་སྐབས་བསྒྱུར་ལུང་ཚིག་བསྐུལ། །མཐར་ཕྱིན་པ་ནས་གཞན་དོན་དབང་། །ལས་ཀྱི་མཇུག་སྡུད་རྫོགས་པར་བྱ། །བི་མ་ལའི་བདུན་ཚིགས་གནས་བུ་ཆུང་། །ཞེས་བྱ་བ། ཨ་ཙ་ར་ཛྙཱ་ནས་ཞུས་ཏེ་བསྒྱུར་ཅིང་གཏན་ལ་ཕབ་པའོ། །བི་མ་ལ་ཡིས་འབྲེལ་བ་ཕྱི་མའི་དོན་དུ་བདུན་ཚིགས་རྩ་བ་མཛད། ཨཐྎ།། ༈ །།ཐབས་དང་ཤེས་རབ་མདའ་གཞུའི་ལུང་ཕྲ ན། ཡེ་ཤེས་རང་སྣང་ལ་ཕྱག་འཚལ་ལོ། །ས་ཡི་འོག་ཏུ་མདའ་འཕངས་པས། །སྟེང་གི་ལྷ་བྲན་ཐམས་ཅད་འཆི། །དེ་ཡང་ཕྱི་ནང་གསང་བ་སྟེ། །ཕྱི་ནི་དངོས་སུ་སྣང་བ་ལབ། །རྒྱུད་དང་བྱིན་རླབས་ཡོན་ཏན་གསུམ། །རྒྱུ་ནི་འོད་མ་ལས་བྱས་པ། །མཆོག་མ་རྟེན་ཅིང་འབྲེལ་བར་བྱས། །བྱིན་རླབས་ཡོན་ཏན་བསམ་མི་ཁྱབ། །ཡི་གེ་ཨ་བཅུའི་འཕྲོ་འདུ་ལས། །སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་དང་ནི་ཤེས་རབ་ཐབས། །སྨོན་ལམ་སྟོབས་དང་ཡེ་ཤེས་སོ། །དབུས་སུ་ཤེས་རབ་ཕ་རོལ་ཕྱིན། །གཞན་ནི་གོ་རིམ་བཞིན་དུའོ། །ཀུན་ཀྱང་ཁ་དོག་སེར་མོ་སྟེ། །གཡས་པ་ཆོས་འཆད་ཕྱག་རྒྱ་ལ། །གཡོན་པ་པོ་ཏི་བསྣམས་པའོ། །གཡས་པ་ས་ནུ་ཧེ་རུ་ཀ །གཡས་གསུམ་རྡོ་རྗེ་རྔེའུ་ཆུང་མདའ། །གཡོན་གསུམ་དྲིལ་བུ་རལ་གྲི་གཞུ། །གཡོན་དུ་ཡུམ་ཆེན་ནམ་མཁའ་སྤྱན། །ཆ་ལུགས་ཡབ་དང་འདྲ་བའོ། །དམ་རྒྱན་མཆོག་མ་གཡས་པ་ལ། །ཁྲོ་ཆེན་རཏྣ་ཧེ་རུ་ཀ །སེར་ནག་ཞལ་གསུམ་ཕྱག་དྲུག་པ། །རིན་ཆེན་ཏྲི་ཤུལ་དང་པོ་གཉིས། །བར་གཉིས་རྡོ་རྗེ་དུང་དམར་འཁྲུག །ཐ་མ་གཉིས་ན་ཏི་ར་རྔ། །མཆོག་མ་གཡོན་ན་རྩི་རི་ཏེ། །སེར་མོ་ལག་ན་མདའ་གཞུའོ། །རྒྱུད་གཡས་པདྨ་ཧེ་རུ་ཀ །གཡོན་ན་རྡོ་རྗེ་སྒྲ་སྒྲོགས་ལ། །གཉིས་ཀ་དབུ་སྟོང་ཕྱག་སྟོང་སྟེ། །ཕྱག་ན་པོ་ཏི་བསྣམས་པའོ། །གཡས་པ་མཐེབ་ཀྱི་འབྱེད་ཚུལ་ལ། །ཞལ་ནས་ཆོས་ཀྱི་སྒྲ་སྒྲོགས་པས། །ཐེག་པ་སྣ་ཚོགས་སྟོན་པའོ། །མདའ་ཡང་དོན་གསུམ་གོང་དང་འདྲ། །ལྟོང་ནས་མདེའུའི་བར་དུ་ནི། །ཧཱུྃ་མཛད་ལ་སོགས་ཁྲོ་བཅུ་བསམ། །བདག་པོ་བཞི་དང་དོན་མཛད་བཞི། །ཐབས་དང་ཤེས་རབ་ཁྲོ་བོ་གཉིས། །ཕ་རོལ་ཕྱིན་པ་བཅུ་པོ་དང་། །ཡབ་ཡུམ་ཚུལ་དུ་སྦྱོར་བ་སྟེ། །ལྟོང་རྒྱུད་སྦྱོར་བར་བྱས་པ་ཡིས། །ཡབ་ཡུམ་ཀུན་ཀྱང་སྦྱོར་བ་མཛད། །བྱང་ཆུབ་སེམས་ཀྱི་རང་བཞིན་ནི། །སྨྱུག་མའི་སྦུབས་ན་ཡར་ལ་དྲངས། །ཤེས་པ་མདེའུའི་རྩེ་ལ་བླངས། །དེས་ཀྱང་སྤོར་བའི་ལས་རྣམས་བྱེད། །མི་དགེ་བཅུ་པོ་ཚར་བཅད་ནས། །དགེ་བ་བཅུ་ལ་བཀོད་ནས་ནི། །དབང་བཅུ་མཐར་ཕྱིན་ས་བཅུ་རྫོགས། །གདེངས་དང་མི་ལྡན་ཐུན་མོང་སྟེ། །སྲིན་པོ་ལག་ནས་མཚོན་ཐོགས་འདྲ། །བི་མ་ལ་མི་ཏྲས་པ་ཧཱུྃ་མཛད་རྟོག་པ་ཕྱི་མ་ལས་བཏུས་ནས་མཛད་པ་རྫོགས་སོ།། ༈ །།གནས་ཀྱི་ས་དང་ལམ་གྱི་ལུང་ཕྲན། རྒྱ་གར་སྐད་དུ། བྷུ་མ་མ་ར་ག་བ་ད་ཨ་ཏི་ཀ་རཀྵ་ཌ་ཀ་ནཱ་མ། བོད་སྐད་དུ། གནས་ཀྱི་ས་དང་ལམ་གྱི་ལུང་ཕྲན་ཞེས་བྱ་བ། ཡེ་ཤེས་རང་གནས་ཀྱི་རྒྱལ་པོ་ལ་ཕྱག་འཚལ་ལོ། །ཚེ་འདས་གནས་བསྟོད་ཆོ་ག་ལས། །སྤྱིར་དུ་ལུང་ལས་བྱུང་བ་ཡི། །ཐུགས་རྗེ་གཏོར་སྦྱིན་དཀྱིལ་འཁོར་དང་། །འབར་བ་མཚམས་ཀྱི་དཀྱིལ་འཁོར་དང་། །འཁོར་ལོ་བསྒྱུར་བའི་དཀྱིལ་འཁོར་དང་། །རྡོ་རྗེ་དབྱིངས་ཀྱི་དཀྱིལ་འཁོར་དང་། །རྒྱུད་དྲུག་སྒྲོལ་བའི་དཀྱིལ་འཁོར་དང་། །གུ་ཡ་དབང་གི་ད་ལ་དྲུག །རེ་རེའང་ལྔ་ལྔར་ཤེས་བྱས་ཏེ། །སྒྲིབ་ལམ་ས་དབང་གནས་བཞིར་བསྟོད། །ལས་སྒྲིབ་དག་ཅིང་ཚོགས་ལམ་ཞུགས། །དང་པོའི་ས་ནོན་རྟེན་དབང་ཐོབ། །སྒྲིབ་སྦྱང་ཚོགས་ཀྱི་གནས་བཞིར་བསྟོད། །སྐྱེ་གནས་སྒྲིབ་དག་སྦྱོར་ལམ་ཞུགས། །མོས་སྤྱོད་ས་ནོན་རྟོག་འཇོམས་དབང་། །སྟོང་པ་ཆོས་ཉིད་གནས་བཞིར་བསྟོད། །དང་པོ་ལས་དག་མཐོང་ལམ་ཞུགས། །རབ་དགའི་ས་ནོན་ལྷ་དབང་ཐོབ། །རྟོག་འཇོམས་ཁྲོ་བོའི་གནས་བཞིར་བསྟོད། །ཤེས་བྱའི་སྒྲིབ་དག་སྒོམས་ལམ་ཞུགས། །མི་རྟོགས་ས་ནོན་གསང་དབང་ཐོབ། །བྱིན་རླབས་ཐུགས་རྗེའི་གནས་བཞིར་བསྟོད། །ཤེས་སྒྲིབ་འབྲིང་དག་ཐར་ལམ་ཞུགས། །ས་བཅུ་ཉིད་ནོན་ཤེས་དབང་ཐོབ། །བསྒྲལ་བ་རིགས་མེ་གནས་བཞིར་བསྟོད། །ཤེས་བྱའི་སྒྲིབ་དག་ཕྱིར་ལམ་ཞུགས། །སངས་རྒྱས་ས་ནོན་བདེ་བ་ཐོབ། །རང་གནས་གདལ་བའི་གནས་བཞིར་བསྟོད། །ཁྱད་པར་རྒྱུད་དྲུག་སྒྲོལ་བ་ནི། །ལུང་གི་ཚད་མས་སྦྱངས་པ་ལས། །ལྷ་མིའི་ཐེག་པ་ཚོགས་གནས་བཞི། །སྦྱིན་པའི་དལ་འབྲེལ་སྐྱེ་སྒྲིབ་དག །དགྲ་བཅོམ་ས་ནོན་གཞན་ཐོབ་མིན། །ནང་པ་ཕར་དགོངས་རྣམ་པ་ལྔ། །ཀུན་ཏུ་འོད་ཀྱི་ས་བསྒྲལ་བས། །ཚོགས་ལམ་བྱང་སེམས་ཐེག་པ་སྟེ། །ཆོས་ཉིད་གནས་བསྟོད་བར་མཚམས་འབྲེལ། །ཡོངས་རྫོགས་དབང་ཐོབ་ཉོན་རང་དག །ཀུན་ས་ཆོས་སྐུ་སྟོང་ཡེ་ཤེས། །སྟུག་པོ་བཀོད་པར་བསྒྲལ་སྐབས་སུ། །སྦྱོར་ལམ་ཕྱི་རྒྱུད་རིང་ངེས་བསྟོད། །སྒྲོལ་བྱེད་ཆུས་དབང་ཉོན་སྒྲིབ་དག །སྟུག་པོ་ལོངས་སྐུ་མེ་ལོང་གསལ། །པདྨ་ཅན་དུ་བསྒྲལ་སྐབས་སུ། །མཐོང་ལམ་མ་ཡོག་ཁྲོ་ནས་བསྟོད། །རྒྱུར་འགྲེལ་གསང་བདག་ཀུན་འགྲོ་དག །པདྨ་མངོན་བྱང་མཉམ་པ་ཉིད། །འཁོར་ལོ་ཚོགས་ཆེན་བསྒྲལ་སྐབས་སུ། །སྒོམ་ལམ་ཨ་ནུ་ཕྱིན་ཐུགས་རྗེ། །རྡོ་རྗེ་དབྱིངས་ཤེར་ལྷན་སྐྱེས་དག །འཁོར་ལོ་སྤྲུལ་སྐུ་བྱ་གྲུབ་གསལ། །ཡེ་ཤེས་བླ་མར་བསྒྲལ་སྐབས་སུ། །མཐར་ལམ་ཨ་ཏིར་རང་གནས་བསྟོད། །ལྷུན་གྲུབ་བདེ་ཆེན་རང་གནས་དག །ཀུན་བཟང་རྡོ་རྗེ་ཀུན་རྟོག་གསལ། །མདོར་ན་ལམ་ཐོག་གནས་བཞི་དལ། །དབང་སྒྲིབ་ས་ནོན་སྐུ་དང་ནི། །ཡེ་ཤེས་དང་ནི་དགུ་ཞེས་བྱ། །གདུལ་བྱ་རང་མཚན་མངོན་ཐོབ་ཤོག །རྒྱ་གར་གྱི་མཁན་པོ་བི་མ་ལ་མི་ཏྲའི་དགོངས་པ་ལས། དྲི་མེད་ཟླ་ཤར་ཉིད་ཀྱིས་གགས་སེལ་བཅོ་བརྒྱད་པའི་རྗེས་ཐོགས་སུ་གསུང་པ་རྫོགས་སོ།། ༈ །།ཧཱུྃ་ཉིད་རིང་པོར་སྤར་བའི་ལུང་ཕྲན། འཁོར་དང་མྱ་ངན་འདས་པའི་བཅུད་འདུས་ཤིང་། །བག་ཆགས་ཚོགས་འཇོམས་ཡོན་ཏན་རྫོགས་པར་ལྡན། །བརྗོད་མེད་ཧཱུྃ་ལ་གུས་པས་ཕྱག་འཚལ་ནས། །རང་གནས་མ་མཐོང་ལོག་འཁྱམས་དོན་ཕྱིར་དུ། །ཡི་གེ་ཧཱུྃ་གི་མཚན་ཉིད་བསྟན་པར་བྱ། །ཁོང་ནས་གབ་པའི་དོན་འབྱིན་བྱ་བའི་ཕྱིར། །ཧཱུྃ་ཉིད་རྣམ་གསུམ་ཚུལ་དུ་ཤེས་བྱས་ཏེ། །གནས་དང་མངོན་བྱེད་མཐར་ཕྱིན་གྱིས། །རིམ་འདི་ཡོངས་སུ་རྫོགས་པར་འགྱུར། །གནས་པ་དབྱིངས་སྒྲ་དོན་ཉིད་དོ། །འབྱི་མ་འདུ་མ་ང་ཚེས་དང་། །དབྱུག་པ་ཧ་གཉིས་དབང་སྡུད་རིང་པོ་དག །རིན་ཆེན་སྨུག་པོའི་ནང་ནས་སྲོག་ཤིང་ཚུལ། །འབྱི་མ་ཡབ་ཀྱི་བྱང་ཆུབ་སེམས། །འདུ་མ་ཡུམ་གྱི་བྱང་ཆུབ་སེམས། །ང་ཚེས་གཉིས་མེད་བྱང་ཆུབ་སེམས། །དབྱུག་པ་གཉིས་ནི་རྟོག་པའི་མཆོག །ཧ་ཡིས་དོན་བྱེད་རིན་ཆེན་གསལ་བར་བྱེད། །ཧུ་ཡིས་ཐམས་ཅད་སྡུད་པར་བྱེད། །ཞབས་ཀྱུ་ཡིས་ནི་གཉིས་མེད་འགྱུར། །རིང་པོ་དེ་ཉིད་ཀུན་མཁས་པ། །ཐོག་མ་དབུ་མ་རྣམ་གཉིས་ཏེ། །སྒྲ་དང་སྒྲ་ཚུལ་རྣམ་གཉིས་པོ། །གང་དང་གང་དུ་བརྗོད་པའི་སྒྲ། །རིང་པོར་འཁྱམས་པས་རིང་པོ་ཉིད། །སྒྲ་རྣམས་མཐའ་སྟོང་ཇི་བཞིན་དུ། །ཐིག་ལེ་རྩོལ་བར་བཅས་པ་དག །གདོད་ནས་སྙིང་པོ་བྱང་ཆུབ་བོ། །ཀུན་གཞི་ལས་འདས་སྙིང་པོ་མཆོག །ཡེ་ཤེས་ཆེན་པོ་བདེ་བའི་མཆོག །དོན་གྱི་སེམས་ཉིད་འདུས་མ་བྱས། །ཡི་གེ་ཡིད་འོང་དུ་སྣང་བའོ། །དབུ་མ་རྣམ་གཉིས་ཤེས་བྱས་ཏེ། །བདག་གཞན་དོན་དུ་ཉམས་སུ་བླངས། །བདག་གི་ཉམས་སུ་བླངས་པའི་དོན། །ཕྱི་ནང་གསང་བ་གསུམ་དུ་གསུངས། །རང་ལུས་ཡི་གེ་ཧཱུྃ་དུ་བསྡུ། །ཧཱུྃ་ཉིད་ཨ་ཡིས་མཚམས་སྦྱར་ནས། །རྡོ་རྗེ་འཛིན་པའི་རྒྱུར་གྱུར་ཏེ། །དམིགས་སུ་མེད་པའི་ངང་དུ་གནས། །རིན་ཆེན་སྨུག་པོའི་གཞལ་གཡས་སུ། །ཨ་བ་དྷུ་ཏིའི་རྩ་གནས་སུ། །རྣམ་གཉིས་ཆོས་ཀུན་ཧཱུྃ་དུ་བསྡུ། །བདུད་བཞིའི་སྲས་སུ་བསྐྱེད་ནས་ཀྱང་། །བདེ་བ་ཆེན་པོའི་ངང་དུ་གནས། །ཐབས་དང་ཤེས་རབ་གཉིས་མེད་པའི། །བདག་བདེ་བ་ཡི་ཀློང་ཡོངས་སུ། །ཧཱུྃ་ཉིད་ཟླ་བའི་ངོ་འབྱོར་ཚེ། །རྩོལ་བ་རྔུབ་སྡོམ་སྦྱོར་བ་ཡིས། །བུདྷཱའི་ས་གསུམ་རྫོགས་པའོ། །རྣམ་ཤེས་འཕོ་བར་གྱུར་པའི་ཚེ། །རྣམ་ཤེས་གསུམ་པོ་ཧཱུྃ་དུ་བསྡུ། །ཧཱུྃ་ཉིད་ན་བཟའ་ལམ་བྱུང་ནས། །བདེ་གཤེགས་ཐུགས་ཀར་ཐིམ་ནས་ཀྱང་། །རྣམ་ཤེས་བ་གར་ཤུལ་བྱུང་སྟེ། །རྒྱལ་བའི་སྲས་སུ་རང་ཉིད་བསྐྱེད། །བདེ་བ་ཆེན་པོའི་ངང་དུ་གནས། །སངས་རྒྱས་ས་ལ་གདོན་མི་ཟ། །དངོས་པོ་གཞན་གྱི་དོན་དུ་ནི། །འཁོར་རྒྱུད་རྩད་ནས་བཅད་པའི་ཕྱིར། །རྣམ་པར་ཤེས་པ་བསྡུས་པ་ཡི། །རྣམ་ཤེས་ཧཱུྃ་གི་རྟག་པ་སྟེ། །སྐུར་གྱུར་ཡེ་ཤེས་སེམས་དཔའ་ལ། །བདེ་ཆེན་འོད་ཟེར་འཕྲོ་བས་བརྗིད། །རྡོ་རྗེ་སྔོན་པོ་རྩེ་ལྔ་པ། །ལེབ་རྒན་ཧཱུྃ་གིས་མཚམས་སྦྱར་ནས། །སྲས་སུ་གྱུར་པ་བདེ་བའི་མཆོག །ཧཱུྃ་འདོད་མཁར་ནུབ་གྲུབ་པར་འགྱུར། །ཐ་མ་འབྲས་བུ་མཐར་ཐུག་དོན། །ཡེ་ཤེས་དགུ་ཡི་བདག་ཉིད་ལ། །ཡི་གེ་ཧཱུྃ་དང་མཚོན་པར་སྣང་། །ཀུན་གསལ་རང་བཞིན་མེད་དང་དངོས་པོ་བྲལ། །འཁོར་བའི་སྐྱོན་རྣམས་མ་སྤངས་དབྱིངས་སུ་དག །ཐམས་ཅད་གསལ་དང་མ་རྨོངས་ཡོན་ཏན་ལྷུན་གྱིས་རྫོགས། །དངོས་པོ་མཐར་མི་གནས་དང་སྡུག་བསྔལ་ངང་གིས་བྲལ། །ཆོས་རྣམས་མ་ལུས་ཡེ་ནས་དབྱེར་མེད་ལ། །འཛིན་མེད་རྡོ་རྗེ་སྔོན་པོ་ཡེ་ཤེས་སྐུ། །མ་བསྒྲུབས་ཐོས་པ་བསྒྲུབ་བྱ་དམ་པའོ། །བདག་འདྲ་དམན་པས་བསྡུ་བར་མི་འོས་ཀྱང་། །ཁུངས་དང་མན་ངག་རྗེས་སུ་ལེགས་འབྲངས་ནས། །གསུམ་ཤེས་གཉིས་བླངས་བསྒྲུབ་པར་བྱ་བའི་ཐབས། །ཚིག་བསྡུས་དོན་རྒྱས་བློ་མཆོག་དོན་བསྡུས་པས། །ཕྱི་རབས་སེམས་ཅན་བདེ་མཆོག་མངོན་ཐོབ་ཤོག །ཕངས་མེད་སེར་སྣ་སྤངས་དང་རྟོགས་པ་གསལ། །གསང་ཐུབ་སྤྱོད་པ་དམ་དང་དམ་ཚིག་བསྲུང་། །དེ་འདྲའི་རྣལ་འབྱོར་གཅིག་དང་འཕྲད་པར་ཤོག །ཧཱུྃ་ཉིད་རིང་པོར་སྤར་བའི་ལུང་ཕྲན་ཞེས་བྱ་བ། རྒྱ་གར་གྱི་མཁན་པོ་བི་མ་ལ་མི་ཏྲས་མཛད་པ་རྫོགས་སོ།། ༈ །།བཅོལ་དང་བསྐང་བའི་ལུང་ཕྲན། བཅོམ་ལྡན་སྒྲོལ་བྱེད་ཐུགས་རྗེའི་རྒྱལ་པོ་ལ་ཕྱག་འཚལ་ལོ། །གནས་ལུང་རྒྱུད་ཀྱི་གཤེགས་གསོལ་དང་། །བཅོལ་དང་བསྐང་བའི་ལུང་ཕྲན་ནི། །ༀ་པྲི་པ་མན་ཏྲ་པ་ཏྲ་བུདྡྷ་སྥ་ར་ན་ཡ་མ། ཞེས་པ་དྲི་མ་དང་མཚན་བྱང་གི་རྡོ་རྗེ་སེམས་དཔའ་ཕྱེ་ལ་ཆོས་ཀྱི་དབྱིངས་སུ་གཤེགས་སུ་གསོལ། དེ་ནས་ཉོན་མོངས་བའི་སེམས་ཅན་འཁོར་བ་གནས་པ་རྣམས་སྙིང་པོ་བྱང་ཆུབ་ལ་དགོད་པར་ཐུགས་རྗེས་བཟུང་ཞིང་ལས་བཅོལ་བ་ནི། ཧཱུྃ། ཁ་དོག་སྣ་ལྔའི་དངོས་པོ་ཅིར་སྣང་ཡང་། །གཟུགས་བརྙན་ད་ལ་དངོས་སུ་བྲིས་པའི་མཐུས། །རང་བཞིན་ད་ལ་ཆེན་པོའི་དོན་རྟོགས་ནས། །ཏིང་འཛིན་ད་ལ་ལྷུན་གྱིས་གྲུབ་པར་བཅོལ། །སྣོད་ཀྱི་འཇིག་རྟེན་དངོས་པོ་ཅིར་སྣང་ཡང་། །དབང་ཆེན་གཞལ་ཡས་ཁང་དུ་བསྒོམས་པའི་མཐུས། །ཆོས་ཉིད་མཐའ་དབུས་མེད་པའི་དོན་རྟོགས་ནས། །འོག་མིན་གནས་སུ་ལྷུན་གྱིས་གྲུབ་པར་བཅོལ། །ཕུང་པོ་ལྔ་དང་འབྱུང་ལྔ་ཅིར་སྣང་ཡང་། །རིགས་ལྔ་ཡབ་ཡུམ་བསྒོམས་པའི་བྱིན་རླབས་ཀྱིས། །ཡབ་ཡུམ་གཉིས་སུ་མེད་པའི་དོན་རྟོགས་ནས། །ཐབས་དང་ཤེས་རབ་གཉིས་སུ་མེད་པར་བཅོལ། །རྣམ་ཤེས་དབང་པོའི་ཡུལ་དུ་ཅིར་སྣང་ཡང་། །སེམས་དཔའ་ཡབ་ཡུམ་བསྒོམས་པའི་བྱིན་རླབས་ཀྱིས། །ཐམས་ཅད་ལྷ་དང་ལྷ་མོའི་དོན་རྟོགས་ནས། །རྒྱལ་བའི་སྲས་སུ་ལྷུན་གྱིས་གྲུབ་པར་བཅོལ། །ཕྱིན་ཅི་ལོག་རྟོག་དངོས་པོ་ཅིར་སྣང་ཡང་། །སྒོ་བ་ཡབ་ཡུམ་བསྒོམས་པའི་བྱིན་རླབས་ཀྱིས། །རྣམ་པར་ཐར་པ་བརྒྱད་ཀྱི་དོན་རྟོགས་ནས། །ཕྲིན་ལས་རྣམ་བཞི་ལྷུན་གྱིས་གྲུབ་པར་བཅོལ། །འགྲོ་བ་རིགས་དྲུག་དངོས་པོ་ཅི་སྣང་ཡང་། །ཐུབ་པ་དྲུག་ཏུ་བསྒོམ་པའི་བྱིན་རླབས་ཀྱིས། །ལོངས་སྤྱོད་རྫོགས་དང་སྤྲུལ་སྐུའི་དོན་རྟོགས་ནས། །སངས་རྒྱས་མཛད་པ་ལྷུན་གྱིས་གྲུབ་པར་བཅོལ། །ཡུལ་དང་སེམས་ཀྱི་རྣམ་པ་ཅིར་སྣང་ཡང་། །ཀུན་བཟང་ཡབ་ཡུམ་བསྒོམས་པའི་བྱིན་རླབས་ཀྱིས། །དབྱིངས་དང་ཡེ་ཤེས་གཉིས་མེད་དོན་རྟོགས་ནས། །ཆོས་སྐུ་འགྱུར་མེད་ལྷུན་གྱིས་གྲུབ་པར་བཅོལ། །ལྷ་དང་བདག་དང་གཞན་དུ་ཅིར་སྣང་ཡང་། །བདེ་གཤེགས་སྤྱན་དྲངས་ཕྱག་འཚལ་མཆོད་པའི་མཐུས། །ཡེ་ནས་སངས་རྒྱས་ཡིན་པའི་དོན་རྟོགས་ནས། །རིག་འཛིན་རྣམ་བཞི་ལྷུན་གྱིས་གྲུབ་པར་བཅོལ། །ཧཱུྃ། བྱང་སེམས་བདེ་བ་ཆེན་པོའི་ད་ལ་ནས། །བཅོམ་ལྡན་ཀུན་ཏུ་བཟང་པོ་ལ། །ཚེ་འདས་ཡིད་ཀྱིས་ཐུགས་དམ་བསྐང་། །བདེ་བ་ཆེན་པོའི་དངོས་གྲུབ་རྩོལ། །མཁའ་མཉམ་ཀློང་གི་ད་ལ་ནས། །ཡུམ་ཆེན་ཀུན་ཏུ་བཟང་མོ་ལ། །ཚེ་འདས་ཆོས་ཀྱི་ཐུགས་དམ་བསྐང་། །གཉིས་སུ་མེད་པའི་དངོས་གྲུབ་རྩོལ། །སྤྲོས་མེད་ཐིག་ལེ་ཡངས་པ་ཆེན་པོ་ནས། །བཅོམ་ལྡན་རྣམ་པར་སྣང་མཛད་ལ། །གཟུགས་ཀྱི་ཕུང་པོས་ཐུགས་དམ་བསྐང་། །སྟོང་པ་ཉིད་ཀྱི་ཡེ་ཤེས་ལ། །དེ་བཞིན་རིགས་ཀྱི་དངོས་གྲུབ་སྩོལ། །བཅོམ་ལྡན་རྡོ་རྗེ་མི་བསྐྱོད་ལ། །རྣམ་ཤེས་ཕུང་པོས་ཐུགས་དམ་བསྐང་། །མེ་ལོང་ལྟ་བུའི་ཡེ་ཤེས་ལ། །རྡོ་རྗེ་རིགས་ཀྱི་དངོས་གྲུབ་རྩོལ། །བཅོམ་ལྡན་རིན་ཆེན་འབྱུང་ལྡན་ལ། །ཚོར་བའི་ཕུང་པོས་ཐུགས་དམ་བསྐང་། །མཉམ་པ་ཉིད་ཀྱི་ཡེ་ཤེས་ལས། །རིན་ཆེན་རིགས་ཀྱི་དངོས་གྲུབ་སྩོལ། །བཅོམ་ལྡན་སྣང་བ་མཐའ་ཡས་ལ། །འདུ་ཤེས་ཕུང་པོས་ཐུགས་དམ་བསྐང་། །སོ་སོར་རྟོག་པའི་ཡེ་ཤེས་ལ། །པདྨ་རིགས་ཀྱི་དངོས་གྲུབ་སྩོལ། །བཅོམ་ལྡན་དོན་ཡོད་གྲུབ་པ་ལ། །འདུ་བྱེད་ཕུང་པོས་ཐུགས་དམ་བསྐང་། །བྱ་བ་གྲུབ་པའི་ཡེ་ཤེས་ལས། །ལས་ཀྱི་རིགས་ཀྱི་དངོས་གྲུབ་སྩོལ། །ཀུན་ཏུ་བཟང་མོ་ལ་སོགས་ཡུམ་ལྔ་ལ། །འབྱུང་བ་ལྔ་ཡིས་ཐུགས་དམ་བསྐང་། །སྐྱེ་བ་མེད་པའི་དབྱིངས་ཉིད་ལས། །རིགས་ཀྱི་ཡུམ་ལྔའི་དངོས་གྲུབ་སྩོལ། །ཆོས་ཉིད་རིགས་པས་རྟོགས་པའི་དཀྱིལ་འཁོར་ནས། །ས་སྙིང་ལ་སོགས་སེམས་དཔའ་བརྒྱད་རྣམས་ལ། །རྣམ་ཤེས་ཡུལ་དང་བཅས་པས་ཐུགས་དམ་བསྐང་། །ཡེ་ཤེས་བརྒྱད་ཀྱི་དངོས་གྲུབ་སྩོལ། །ཚད་མེད་བཞི་ཡི་ད་ལ་ནས། །འཇོམས་པ་ཆེན་པོ་བཞི་རྣམས་ཀྱང་། །ཚད་མེད་ལྷ་མོ་བཞི་རྣམས་ལ། །ཕྱིན་ཅི་ལོག་བཞིས་ཐུགས་དམ་བསྐང་། །འཕྲིན་ལས་བཞི་ཡི་དངོས་གྲུབ་སྩོལ། །འཇིག་རྟེན་དྲུག་གི་ཕྱོགས་བཅུ་ནས། །འགྲོ་བ་དྲུག་གི་སྒྲིབ་སྦྱང་བའི། །བཅོམ་ལྡན་ཐུབ་པ་དྲུག་རྣམས་ལ། །ཉོན་མོངས་དྲུག་གིས་ཐུགས་དམ་བསྐང་། །ཡེ་ཤེས་དྲུག་གི་དངོས་གྲུབ་སྩོལ། །བཅོལ་དང་བསྐང་བའི་ལུང་ཕྲན། ཧཱུྃ་མཛད་ཕྱི་མའི་ལུང་ཉི་ཚེ་ཞིག་རྫོགས་སོ།། ༈ །།དགེ་བའི་བཤེས་གཉེན་ལ་མངའ་དབུལ་གི་ལུང་ཕྲན། རྒྱལ་བ་ཞི་ཁྲོའི་ཚོགས་ལ་ཕྱག་འཚལ་ལོ། །དགེ་བའི་བཤེས་གཉེན་ལ་མངའ་དབུལ་བའི་ལུང་ཕྲན་ནི། སྤྱིའི་གཞུང་དང་མཐུན་པར་བྱས་ལ། དབང་རྣམས་ཡོངས་སུ་རྫོགས་པའི་རྗེས་ལ། རིག་འཛིན་གྱི་གྲལ་དུ་མངའ་དབུལ་བ། ཞི་བའི་ཚོགས་ཀྱི་བར་དུ། རྒྱུད་བཞིན་དུ། བྲོ་གར་རྩེ་འཇོའི་ཚིག་ལྕོགས་ན་ལེགས། མ་ལྕོགས་ན། ཨ་ཐབས་དང་ཤེས་རབ་ཅེས་པས། འདོད་པའི་ཡོན་ཏན་ལྔའི་ལྷ་མོས། །རྐང་པའི་སྟབས་བྱེད་ལག་གར་བསྒྱུར། །ཅེས་པའི་ཚིག་གི་ཞབས་སུ། རིག་འཛིན་ཁྱེད་ལ་མཆོད་པར་འབུལ། །ཅེས་པ་བཏགས་ལ་འབུལ་ལོ། །པུ་ཙའི་ལྷ་མོ་བཅུ་གཉིས་དང་། སུ་ར་ཏོ་བཅུ་དྲུག་གི་གར་བྱ། བྲོ་གར་འདུ་འཕྲོའི་མཆོད་པ་དབུལ་བ་ནི། ཧཱུྃ། རྣལ་འབྱོར་ཆེན་པོ་ཆྒཻ་ཁྱོད། རིག་འཛིན་རྡོ་རྗེའི་གྲལ་དུ་གཤེགས་པ་ལ། །བྲོ་གར་འདུ་འཕྲོའི་ཕྱག་རྒྱས་མངའ་དབུལ་བས། །འཛུམ་ལམ་ནམ་མཁར་འགྲོ་བ་ཐོབ་པར་ཤོག །ༀ་སྥ་ར་ན་མ་ཧཱ་པུ་ཙ་ཧཱུྃ། ཏ་ཐཱ་ཐམས་ཀྱི་ཐུགས་རྗེ་ཆེན་པོའི་བྱིན་གྱིས་བརླབས་ཀྱིས། རིག་འཛིན་རྡོ་རྗེ་ཆྒཻ་ཁྱོད་ལ་བྲོ་གར་འདུ་འཕྲོའི་མངའ་དབུལ་བས། རིག་འཛིན་གྲལ་ནས་ཐོགས་པ་མེད་པར་བྱ་བཞིན་མཁའ་ལ་འཕུར་བ་དང་། ས་ལ་བྱི་བཞིན་འཛུལ་བ་དང་། རྫུ་འཕྲུལ་གྱིས་འགྲོ་བའི་དོན་བྱེད་པའི་སྐལ་བ་དང་ལྡན་པར་གྱུར་ཅིག །དེ་ནས་གླུ་ཚིག་སྒྲ་ཡི་མངའ་དབུལ་ཏེ། སྒྲ་བསྒྱུར་མཉམ་ཉིད་མི་གཡོ་ཞེས་པ་ནས། དམ་ཚིག་མཆོག་གི་དངོས་གྲུབ་སྩོལ་ཅེས་པའི་བར་བརྗོད་དོ། གླུ་ཡེ་ཤེས་དང་། རོལ་མོ་ཡེ་ཤེས་ཀྱི་མཆོད་པ་ཕུལ་བས་མཉེས་ཏེ། ཧཱུྃ། རྣལ་འབྱོར་ཆེན་པོ་ཆྒཻ་ཁྱོད། །རིག་འཛིན་རྡོ་རྗེའི་གྲལ་དུ་གཤེགས་པ་ལ། །སྒྲ་ཚིག་ཕྱག་རྒྱས་མངའ་དབུལ་བས། །གསུང་ལྔ་ཆོས་ཀྱི་དངོས་གྲུབ་ཐོབ་པར་ཤོག །ༀ་པྲ་ན་ན་མ་ཧཱུྃ་སུ་ཀ་ཧཱུྃ༔ ཧཱུྃ། རྣལ་འབྱོར་ཆེན་པོ་ཆྒཻ་ཁྱེད། རིག་འཛིན་རྡོ་རྗེའི་གྲལ་དུ་གཤེགས་པ་ལ། །གླུ་ཚིག་སྒྲ་ཡི་མཆོད་པས་མངའ་དབུལ་བས། །སྣང་མཐའ་གསུང་གི་དངོས་གྲུབ་ཐོབ་པར་ཤོག །ༀ་པྲ་མ་ན་མ་ཧཱ་སུ་ཀ་ཧཱུྃ། དེ་བཞིན་གཤེགས་པ་ཐམས་ཅད་ཀྱི་ཐུགས་རྗེ་ཆེན་པོས་བྱིན་གྱིས་བརླབས་ཀྱིས། རིག་འཛིན་རྡོ་རྗེ་ཆྒཻ་ཁྱོད་ལ། གླུ་ཚིག་གི་སྒྲ་དང་ཕྱག་རྒྱས་མངའ་དབུལ་བས། རིག་འཛིན་རྡོ་རྗེ་འཆང་གི་གྲལ་ནས་ཆོས་ཀྱི་འཁོར་ལོ་བསྐོར་བ་དང་། འགྲོ་བ་ཐ་དག་གི་ཤེས་པའི་རྒྱུད་ཁྲོལ་བའི་སྐལ་པ་དང་ལྡན་པར་གྱུར་ཅིག །དེ་ནས་རྒྱན་དང་བགོ་བའི་ཕྱག་རྒྱས་མངའ་དབུལ་ཏེ། ཧཱུྃ། རྣལ་འབྱོར་རྡོ་རྗེ་ཆྒཻ་ཁྱོད། རིག་འཛིན་གྲལ་དུ་གཤེགས་པ་ལ། །རྒྱན་དང་བགོ་བའི་མངའ་དབུལ་བས། །ཕས་ཀྱི་རྒོལ་བས་མི་ཚུགས་ཐོབ་པར་ཤོག །དེ་བཞིན་གཤེགས་པ་ཐམས་ཅད་ཀྱི་ཐུགས་རྗེ་ཆེན་པོས་བྱིན་གྱིས་རླབས་ཀྱིས། རིག་འཛིན་རྡོ་རྗེ་ཆྒཻ་ཁྱོད་ལ། རྒྱན་དང་བགོ་བ་ལ་སོགས་པའི་མངའ་དབུལ་བས། ཕས་ཀྱི་རྒོལ་བས་མི་ཚུགས་པའི་སྐལ་བ་དང་ལྡན་པར་གྱུར་ཅིག །དེ་ནས་བཟའ་བ་དང་བཏུང་བའི་མངའ་དབུལ་ཏེ། མཉམ་པའི་གྲུབ་རྫས་ཆེན་པོ་དག །ཅེས་པས་འདོད་ཡོན་དང་། དགྱེས་མཆོག་གི་ཞལ་ཟས་བསྟབ་ལ་མངའ་དབུལ་བ་ནི། ཧཱུྃ། རྣལ་འབྱོར་ཆེན་པོ་ཆྒཻ་ཁྱོད། །རིག་འཛིན་གྲལ་དུ་གཤེགས་པ་ལ། །བཟའ་དང་བཏུང་བའི་མངའ་དབུལ་བས། །ཕྱག་རྒྱ་ཆེན་པོའི་ལྷུན་གྱིས་གྲུབ་པ་ཡི། །ལས་དང་འབྲས་བུའི་དངོས་གྲུབ་ཐོབ་པར་ཤོག །དེ་བཞིན་གཤེགས་པ་ཐམས་ཅད་ཀྱི་ཐུགས་རྗེ་ཆེན་པོས་བྱིན་གྱིས་རླབས་ཀྱིས། རིག་འཛིན་རྡོ་རྗེ་ཆྒཻ་ཁྱོད་ལ། བཟའ་དང་བཏུང་བའི་མངའ་དབུལ་བས། རིག་འཛིན་རྡོ་རྗེ་འཆང་གྱི་གྲལ་དུ། ལོངས་སྤྱོད་རྫོགས་པའི་སྐུ་ཐོབ་ནས། བདུད་རྩིའི་ཞལ་ཟས་ལ། ལོངས་སྤྱོད་ཅིང་འགྲོ་བའི་དོན་མཛད་པའི་སྐལ་བ་དང་ལྡན་པར་གྱུར་ཅིག ༈ །དེ་ནས་ཨཱ་ལི་ཀཱ་ལིའི་ཕྱག་རྒྱས་མངའ་དབུལ་བ་ནི། སྦྱོར་བའི་པུ་ཙ་དབུལ། བོ་དྷི་ཡོད་ན་ལེགས་སོ། །མེད་ན་མེ་ལོང་ཁུད་དུ་བདུད་རྩི་བླུགས་ལ་བདག་གཙོ་བོ་ཡབ་ཡུམ་གྱིས་བྱང་སེམས་སུ་བསམས་ལ། དབྱིངས་དང་ཡེ་ཤེས་གཉིས་མེད་སྦྱར། །ཐབས་དང་ཤེས་རབ་འཁྱིལ་པ་ལ། །འབྱུང་བ་ར་སཱ་ཡ་ན་འདི། །རིག་འཛིན་ཁྱོད་ལ་མཆོད་པར་འབུལ། །ཅེས་བདུད་བརྩི་གཏོར་ཞིང་དབུལ་བ་ནི། ཧཱུྃ། རྣལ་འབྱོར་རྡོ་རྗེ་ཆྒཻ་ཁྱོད། རིག་འཛིན་རྡོ་རྗེའི་གྲལ་དུ་གཤེགས་པ་ལ། །ཨཱ་ལི་ཀཱ་ལིའི་ཕྱག་རྒྱས་མངའ་དབུལ་བས། །ཕྱག་རྒྱ་ཆེན་པོའི་རིག་འཛིན་མཛད་པ་དང་། །ལྷུན་གྱིས་གྲུབ་པའི་དངོས་གྲུབ་ཐོབ་ནས་ཀྱང་། །ལས་དང་འབྲས་བུ་ཐམས་ཅད་རྫོགས་པར་ཤོག །དེ་བཞིན་གཤེགས་པ་ཐམས་ཅད་ཀྱི་ཐུགས་རྗེ་ཆེན་པོས་བྱིན་གྱིས་རླབས་ཀྱིས། རིག་འཛིན་རྡོ་རྗེ་ཆྒཻ་ཁྱོད་ལ་ཨ་ལི་ཀཱ་ལིའི་ཕྱག་རྒྱས་མངའ་དབུལ་བས། རིག་འཛིན་མཛད་པ་སྤྱོད་ལམ་མཐར་ཕྱིན་པར་གྱུར་ཅིག །རིག་འཛིན་མངའ་དབུལ་བའི་ལུང་ཕྲན་ཞེས་བྱ་བ་རྫོགས་སོ།། ༈ །།ཚེ་འདས་རྣམ་རྟོག་གྲི་འདུལ་ལུང་ཕྲན། རྒྱ་གར་སྐད་དུ། ཨ་ཡུ་ག་ཏ་བི་ཀལ྄ས྅྅྅་མ་རི་གྷ་རི་ཨ་ཏི་ཀ་རཀྵ་ཌ་ཀ་ནཱ་མ། བོད་སྐད་དུ། ཚེ་འདས་པའི་རྣམ་པར་རྟོག་གྲི་འདུལ་བའི་ལུང་ཕྲན་ཞེས་བྱ་བ། དཔལ་གྲོལ་བྱེད་རྒྱལ་པོ་ལ་ཕྱག་འཚལ་ལོ། །གནས་ནི་ས་བདག་གི་གླིང་། བཙན་གྱི་འགྲུལ་ས། བགེགས་ཀྱི་འདུན་ས་མ་ཡིན་པར། །ས་ཆོག་དང་ཆ་གསུམ་གསེར་སྐྱེམས་བཏང་། གླུད་གཏོར་ཡང་བཏང་། ཧོམ་གྱི་ཐབ་རྩིག་པ་དང་། བསྲེག་རྫས་གཞུང་བཞིན་དུ་བསོག །ཁྱད་པར་ར་སོག་ལ་གཤེད་མ་བགེགས་ཀྱི་མིང་རུས་བྲི། ཤོག་བུ་གྲུ་གསུམ་ལ་གཤེད་ཀྱི་ལིངྒ་བྲི། དེ་འབྲུབ་ཁུངས་དུ་བཞག་གོ། །མཚོན་གམ་དུང་བཞག་ཞི་ཁྲོའི་ཕྲིན་ལས་གཞུང་བསྲང་། ཚོགས་ཟིན་ནས་ཕོ་ཉའི་སྐབས་སུ་གྲི་ཐབས་བཅུ་གསུམ་དང་། དགྲ་བགེགས་དགུག་ཅིང་བསྒྲལ་ཏེ། ཧཱུྃ། མདའ་གི་གཟེར་བ་མེ་གྲི་ཚིག་འབར་དང་། །རྟ་གྲི་ཞུན་མར་དལ་གྲི་དུབ་པ་དང་། །ཆུ་གྲི་འདར་ཤང་གད་གྲི་འཕྱམ་པ་དང་། །པུ་གྲི་འགབ་དམར་གྲི་གྲི་སྨུག་པོ་དང་། །ཐོག་གྲི་ཚིག་པ་འགགས་གྲི་མིག་འབུར་དང་། །ནིབས་གྲི་སུབས་པ་རྡོ་གྲི་གདན་དམར་དང་། །དུག་གྲི་སྤོས་པ་ལ་སོགས་རྐྱེན་རྣམས་དང་། །ཕུང་པའི་སྲི་དང་ཟ་བའི་འདྲེ་ལ་སོགས། །གཟུགས་ཅན་དགྲ་དང་གཟུགས་མེད་བགེགས་རྣམས་དང་། །རྒན་རྒོན་གྲི་སྲི་གཞོན་བདུད་མ་ལུས་པ། །གནོད་བྱེད་དམིགས་པ་གནས་ནས་ཁུག་ལ་ཤོག །ཅེས་པ་ལ་སོགས་པ་ཕུར་བསྐོར་དང་གཏོར་ཐུན་དང་། མཚོན་ཆའི་ཆར་བས་བཏུལ་ལོ། །བསྲེག་རྫས་བྱིན་གྱིས་བརླབས་རྣམས་ནི། །མེ་ལྷའི་ཚོགས་ལ་རྒྱས་པར་དབུལ་ལོ། །མེ་ལྷའི་ལྟོ་བར་ལྷ་བསྐྱེད་ལ། དལ་གྱི་ལྷ་འགོད་ཅིང་གྲི་འདུལ་སྟེ། བསྟོད་པའི་གཞུག་ཏུ། ཧཱུྃ། ཉོན་མོངས་འཁོར་བའི་རྒྱུན་གཅོད་ཅིང་། །ཚེ་འདས་གྲི་ཡི་བག་ཆགས་བསྲེག་ཏུ་གསོལ། །དམ་ཉམས་དམ་སྐོང་དབང་དང་དངོས་གྲུབ་རྣམས། །ཚེ་འདས་འདི་ལ་འགྲུབ་པར་སྩལ་དུ་གསོལ། །ཅེས་པ་དང་། རྒྱས་པར་ལྷ་རེའི་བསྟོད་པའི་གཞུག་ཏུ་གྲི་ཐབས་བཅུ་གསུམ་གྱི་ཚིག་ཀྱང་གཞུག་ཅིང་། གཤེད་ཀྱི་ལིངྒ་དང་མིང་བྱང་བསྲེག་གོ། །འགྲོ་བ་རིགས་དྲུག་གི་ས་བོན་ཨ་ཎྀ་སུ་ཏྲི་པྲེ་དུ་དྲུག་བྲིས་ལ་བསྲེག་ཅིང་། ཧཱུྃ། ཞེ་སྡང་རྒྱུ་བྱས་མི་དགེ་བཅུ་ཡི་ལས། །དམྱལ་བ་ཚ་གྲང་ལ་སོགས་རང་བསད་དང་། །དམྱལ་བའི་ལས་ཉོན་བག་ཆགས་གྲི་འདུལ་ལོ། །ཚེ་འདས་འཁོར་བའི་སྡུག་བསྔལ་ཐར་གྱུར་ཅིག །ཧཱུྃ། སེར་སྣས་རྒྱུ་བྱས་མི་དགེ་བཅུ་ཡི་ལས། །ཡི་དྭགས་བཀྲེས་སྐོམ་ལ་སོགས་ངལ་དུབ་དང་། །ཡི་དྭགས་ལས་ཉོན་བག་ཆགས་གྲི་འདུལ་ལོ། །ཚེ་འདས་འཁོར་བའི་སྡུག་བསྔལ་ཐར་གྱུར་ཅིག །ཧཱུྃ། གཏི་མུག་རྒྱུ་བྱས་མི་དགེ་བཅུ་ཡི་ལས། །དུད་འགྲོ་གླེན་ལྐུགས་ལ་སོགས་བཀོལ་སྤྱད་དང་། །དུད་འགྲོའི་ལས་ཉོན་བག་ཆགས་གྲི་འདུལ་ལོ། །ཚེ་འདས་འཁོར་བའི་སྡུག་བསྔལ་ཐར་གྱུར་ཅིག །ཧཱུྃ། འདོད་ཆགས་རྒྱུ་བྱས་མི་དགེ་བཅུ་ཡི་ལས། །མི་ཡི་ཆགས་སྡང་ལ་སོགས་རྒྱུད་ཉམས་དང་། །མི་ཡི་ལས་ཉོན་བག་ཆགས་གྲི་འདུལ་ལོ། །ཚེ་འདས་འཁོར་བའི་སྡུག་བསྔལ་ཐར་གྱུར་ཅིག །ཧཱུྃ། ང་རྒྱལ་རྒྱུ་བྱས་མི་དགེ་བཅུ་ཡི་ལས། །ལྷ་མིན་འཐབ་རྩོད་ལ་སོགས་ཁྲོ་འཁྲུག་དང་། །ལྷ་མིན་ལས་ཉོན་བག་ཆགས་གྲི་འདུལ་ལོ། །ཚེ་འདས་འཁོར་བའི་སྡུག་བསྔལ་ཐར་གྱུར་ཅིག །ཧཱུྃ། ཕྲག་དོག་རྒྱུ་བྱས་མི་དགེ་བཅུ་ཡི་ལས། །ལྷ་ཡི་འཆི་འཕོ་ལ་སོགས་ལྟུང་འཇིགས་དང་། །ལྷ་ཡི་ལས་ཉོན་བག་ཆགས་གྲི་འདུལ་ལོ། །ཚེ་འདས་འཁོར་བའི་སྡུག་བསྔལ་ཐར་གྱུར་ཅིག །དེ་ནས་སྨན་གྱིས་གསོ་བ་ནི། མཚན་བྱང་དང་བར་སྣང་ལ་གཏོར་ཞིང་། ཧཱུྃ། ཚེ་འདས་གྲི་ཡི་སྐྱོན་གྱིས་ཕོག་པ་ཡི། །རྨ་རྣམས་བདུད་རྩི་སྨན་གྱི་སོས་གྱུར་ཅིག །གཉན་རིགས་ལྷ་ཀླུ་སྨན་བཙན་བདུད་སྡེ་བརྒྱད། །མི་མཐུན་གྲི་དང་མེ་ལྕེས་རྨས་པ་སྨན་གྱིས་གསོ། །ༀ་ཨ་མྲི་ཏ་ཧཱུྃ༔ དེ་ནས་ལུང་ལས་བྱུང་བའི་སྤར་ཆོག་ཀུན་རྫོགས་པར་བྱའོ། །དེ་ནས་གྲི་མནན་ཏེ། ཐེམ་འོག་གམ། ལམ་རྒྱ་གྲམ་མམ། དགྲའི་སོ་མཚམས་སམ། གང་ཡང་རུང་བར་དོང་གྲུ་གསུམ་བྲུས་ལ། གོང་གི་ར་སོག་ལ་གཤེད་མའི་མིང་རུས་བྲིས་པ་དེ། སྔགས་ཀྱིས་བསྡུས་ལ་གཞུག་རྡོ་རྗེ་རྒྱ་གྲམ་གྱིས་ཁར་བཅད་ཅིང་། ཧཱུྃ། མནན་ཅིང་གཟེར་བའི་དུས་ལ་བབས། ནམ་ཡང་ཐོན་པར་མ་གྱུར་ཅིག །ཅེས་ལས་བཞིའི་བྲོ་བརྡུང་ངོ་། །དེ་ནས་གྲི་བཟློག་མཚོན་བསྒྱུར་བྱས་ཏེ། གཏོར་མ་དང་མེ་དང་གོ་མཚོན་མང་པོས་དགྲ་ཕྱོགས་སུ་བསྡིགས་ཤིང་། དབྱུག་མའི་སྔགས་དང་། བཀའ་བསྒྱུར་གྱི་གཤམ་དུ་གོང་གི་ཚིག་རྣམས་ཀྱང་བརྗོད་དོ། །ལས་འདིར་གྲི་ཐབས་ཐམས་ཅད་མ་བཏུལ་ནས། །མི་རབས་བདུན་དུ་མི་བརྒྱུད་གྲིར་འཆི་བས། །དེ་ཕྱིར་བཏུལ་བའི་ཡོན་ཏན་བསམ་མི་ཁྱབ། །རིགས་དྲུག་གནས་སུ་སྐྱེས་ཀྱང་གྲི་ལས་ཐར། །ཚེ་འཕོས་ལུས་བརྗེས་བདེ་བའི་གནས་སུ་འགྲོ། །ཚེ་འདས་ཀྱི་རྣམ་རྟོག་གྲི་འདུལ་བའི་ལུང་ཕྲན་ཞེས་བྱ་བ་ཨུ་རྒྱན་པདྨས་སེམས་ཅན་གྱི་དོན་དུ་མཛད་པ་རྫོགས་སོ།། ༈ །།སྦུབས་འཇུག་བཤིག་པ་སྲི་འདུལ་ལུང་ཕྲན། སངས་རྒྱས་བཅོམ་ལྡན་འདས་ཞི་ཁྲོའི་ཚོགས་ལ་ཕྱག་འཚལ་ལོ། །སྦུབས་འཇུག་བཤིག་པར་འདོད་པས། སྲི་ཅན་ལ་གཏོར་མ་གཏོང་ན། སྲི་ཅན་དེ་གང་ཉེ་བའི་ཁ་ཕོར་ཁ་ཆགས་ཏུ་འབྲུ་སྣ་ལྔའམ། འགུགས་གཞུག་ཚད་ལ་ཆང་བུ་ལྔའམ། བདུན་ནམ་ཉེར་གཅིག་བྱ་བ། སྦང་མ། ལོ་མ། སྒོག་སྐྱ། ལ་ཕུག །འབྲས། ཚོད་མ། ཉ་ཤ་ཆང་། བུ་རམ། འོ་མ། ཞོ་བླུགས་ལ། དེའི་ཁར་ཐལ་བ་བག་ཙམ་བླུག་ལ། དེ་ནས་བདག་ཉིད་ཡི་དམ་གྱི་ང་རྒྱལ་དང་ལྡན་པར་བྱས་ལ། སྔགས་ཀྱི་གཞུག་ཏུ། སྲི་ཅན་ཆྒཻ་མོ་བཛྲ་ཨངྐུ་ཤ་ཛཿ ཞེས་བརྒྱ་རྩ་དང་། ལྕགས་ཀྱུའི་ཕྱག་རྒྱ་བཅས་ལ། སྙིང་ག་ནས་ལྕགས་ཀྱུ་དྲངས་ལ། བདག་གི་དྲུང་དུ་བཀའ་སྡོད་པར་བསམས་ལ། དེ་ནས་གཏོར་མ་འབྲུ་གསུམ་གྱིས་བྱིན་གྱིས་བརླབས་ལ། ༀ་ཨ་ཆེ་གེ་མོ་པྲ་ཏི་བྷ་ལིངྟ། པྲི་བྷ་ལིངྟ་ཁ་ཁ་ཁཱ་ཧི་སྭཱ་ཧཱ། ཞེས་ཉེར་གཅིག་བརྗོད་ལ། སྲི་ཅན་གྱི་སྦུབས་འཇུག་གི་གཟུགས་གང་ཡིན་པ་དེས་ཟོས་པས་ཚིམ་ཞིང་དགའ་བ་དང་། བདག་གི་བཀའ་ཉན་པར་བསམས་ལ། བཀའ་བསྒོ་བ་ནི། སྲི་ཅན་ཁྱོད་རྣམས་རྣལ་འབྱོར་བཀའ་ཉོན་ཅིག །དེང་ཕྱིན་ཆད་སྦུབས་འཇུག་གི་སྤྲུལ་པ་དོར་ཅིག་བསམ་པ་ངན་དང་སྦྱོར་བ་རྩུབ་མོ་ཐམས་ཅད་དོར་ཞིག །བསམ་པ་བྱང་ཆུབ་ཀྱི་སེམས་བསྐྱེད་ཅིག །དེ་ལྟར་མ་བྱས་ན་རྡོ་རྗེ་འཆང་གི་བཀའ་ཁྱེད་ཀྱི་མགོ་དང་སྙིང་འགས་པར་འགྱུར་རོ། །དེ་བས་ཁྱེད་ལས་ངན་པ་འདི་རྣམས་དྲན་པར་གྱིས་ལ་སྦུབས་འཇུག་གི་སྤྲུལ་པའི་སེམས་དོར་ཅིག །དེ་རིང་ཕན་ཆད་གནས་འདིར་ལས་ངན་པའི་བསམ་པ་མ་བྱེད་ཅིག །དེ་ལྟར་ཉན་ན་གཏོར་མ་འདི་ཁྱོད་ཀྱིས་འདོད་ཡོན་ལྔར་གྱུར་ནས་མཐོ་རིས་ཐར་པའི་གྲོགས་སུ་འགྱུར་རོ། །ༀ་ཀརྨ་ཤན་ཏིང་ཀུ་རུ་ཡེ་སྭཱ་ཧཱ། ཞེས་བརྗོད་དེ། དེའི་རྗེས་ལ། དྲག་སྔགས་བཟླས་པས། ཁྲོ་བོ་དཔག་ཏུ་མེད་པ་འཕྲོས་ཏེ་གླིང་གཞན་དུ་བསྐྱལ་ལོ། །ཇི་ལྟར་སྲི་ཅན་ཡུན་རིང་ཆགས་པ་ཡིན་ཡང་། ལན་གསུམ་བྱས་ན་ངེས་པར་འདོར་བར་འགྱུར་རོ། །ཤིན་ཏུ་གལ་ཆེ་གསུངས། སློབ་དཔོན་པདྨས་བསམ་ཡས་སུ་ངམ་རྟ་ར་ཀླུང་གོང་ནག་པོའི་སྦུབས་བཤིག་པ་ལ་མཛད་པ་རྫོགས་སོ།། ༈ །།མཆོད་རྟེན་གདབ་པ་རུས་ཆོག་གི་ལུང་ཕྲན། རྒྱ་གར་སྐད་དུ། ཨ་ཡུ་ག་ཏཱ་ར་ཏེ་ཧེ་རུ་ཙ་ཏི་ཀ་ཨ་ཏི་ཀ་རཀྵ་ཏྲ་ཀ་ནཱ་མ། བོད་སྐད་དུ། ཚེ་འདས་ཀྱི་དོན་དུ་མཆོད་རྟེན་གདབ་པའི་རུས་ཆོག་ལུང་ཕྲན་ཞེས་བྱ་བ། བཅོམ་ལྡན་འདས་སྒྲོལ་བྱེད་རྒྱལ་པོ་ལ་ཕྱག་འཚལ་ལོ། །གཞུང་ལས། གང་ཞིག་ཚེ་འཕོས་དོན་བྱའི་ཕྱིར། །རྣལ་འབྱོར་ཐུགས་རྗེའི་སེམས་ལྡན་པས། །སྔོན་དུ་བྱ་བ་ཀུན་བྱས་ཏེ། །བདག་ཉིད་ལས་ཀྱི་ལྷར་བསྐྱེད་ནས། །གཤེད་དབྲལ་ཤེས་པ་བཀུག་ནས་ནི། །ཁྲུས་བྱ་རྟོག་སྦྱང་སྒྲིབ་པ་དྲལ། །ལྷར་བསྐྱེད་དབང་སྐུར་གནས་ངན་བསྒྲལ། །ཆོས་སྐུར་བཞེངས་ལ་མཆོད་སོགས་སྦྱར། །ལོག་ནོན་ཕན་ཡོན་ཤེས་པར་བྱ། །སྙིང་རྗེ་ལྡན་པས་སེམས་བསྐྱེད་ནས། །ཞེས་འབྱུང་བས། ཚེ་འཕོས་གང་ཡིན་པ་བསྲེགས་སྦྱངས་པའི་རུས་པ་དང་ཐལ་བ་ལ། ཆོ་ག་དང་མཆོད་རྟེན་བྱ་སྟེ། རུས་ཐལ། ས་ཞག །ཉུངས་དཀར། བུམ་ཆུ། མཆོད་གཏོར། པདྨ་འདབ་བརྒྱད་ཀྱི་གདན་བཤམ། དེ་ནས་མི་རྟོག་པའི་ངང་ལས་ལྷར་བསྐྱེད། དེ་ནས་བདེན་པ་བདར་ཞིང་། དྲག་པོའི་རྫས་དང་སྔགས་ཕོ་ཉས་ཁྲོ་བོའི་སྤྲུལ་པ་བསམ་གྱིས་མི་ཁྱབ་པས། ཕྱོགས་བཅུའི་བདུད་བགེགས་དྲེགས་པ་ཐམས་ཅད་བཏུལ་ཞིང་། ཚེ་འདས་ཀྱི་ཤེས་པ་སྲོག་གཅོད་ཀྱི་བདུད་ལྷ་སྲིན་སྡེ་བརྒྱད་ལ་སོགས་པ་གང་གི་ལག་ན་གནས་པ་དེ་ནས་རང་དབང་མེད་པར་བཀུག་པར་བསམ་ཞིང་། ཨ་སུ་ནྲི་ཏྲི་པྲེ་དུ་ཛཿ ཪྣྲི་བཛྲ་ཨཾ་གུ་ཤ་ཛ་ཛ༔ ཞེས་པས་བསྟིམས་ལ། གསོན་པོའི་ལུས་བཞིན་གནས་པ་བསྒོམས། དེ་ནས་བུམ་ཆུས་ཚིག་དང་ལྡན་པས་བཀྲུ་ཞིང་། ལས་ཀྱི་སྒྲིབ་པ་རྣལ་འབྱོར་སྦྱང་བ་དང་། ངན་སོང་སྦྱོང་རྒྱུད་དང་། དཔལ་ན་རག་ནས་གསུངས་པའི་སྔགས་ཀྱིས་བྲབས་པས། ལས་དང་ཉོན་མོངས་པའི་དྲི་མ་ཐམས་ཅད་དག་པར་བསམ། སྡིག་སྒྲིབ་དང་ཉེས་ལྟུང་ཉམས་ཆགས་ཐམས་ཅད་ཡོངས་སུ་དག་པར་གྱུར་ཅིག །ཅེས་བརྗོད། དེ་ནས་ཡུངས་དཀར་དང་བྱེ་མ་ལ། ངན་སོང་སྒོ་གཅོད་ཀྱི་སྔགས་བཟླས་པས། ལས་དང་ཉོན་མོངས་པ་དྲུག་གི་རྟོགས་པ་ངན་པ་སྦྱངས་ཤིང་། འགྲོ་དྲུག་གི་གནས་ངན་པར་སྐྱེ་བའི་སྒོ་དགག་གོ། །དེ་ནས་རིང་ལྔར་བསྐྱེད་པའི་འཕྲོ་འདུས། བདེན་པའི་སྟོབས་བརྗོད་དེ། བཛྲ་བྷནྡྷ་ཊ་ཋ་ས་སྒྲིབ་པ་དབྲལ་ལོ། །དེ་ནས་ཡི་དམ་ལྷར། གསུང་ཡིག་འབྲུ། ཐུགས་ཕྱག་མཚན་སྐུ་ཡོངས་སུ་རྫོགས་པར་བསྐྱེད། སྐུ་གསུང་ཐུགས་ཀྱི་ལྷ་དང་། དབུ་རྒྱན་གྱི་ལྷ་བསྒོམ། བཛྲ་ཀ་བ་ཙ་རཀྵ་ཧཱུྃ་གིས་རྡོ་རྗེ་ཆོ་ག་དང་ལྡན་པར་བྱའོ། །དེ་ནས་ངན་སོང་ལས་རྒྱལ་བ་དང་། ཁམས་གསུམ་དུ་ཕྱིར་མི་ལྡོག་པར་དབང་བསྐུར་རོ། །དེ་ནས་ཨ་ལས་ཟླ་བའི་གདན་ཐོག་ཏུ་བཞག་ཡཾ་ལས་རླུང་གི་བཏེག་སྟེ་བར་སྣང་ལ་བཞག་གོ། །དེ་ནས་ཡི་དམ་གྱི་ལྷ་ཡི་སྙིང་པོ་དང་། ངན་སོང་སྦྱོང་བའི་སྔགས་ཀྱིས་བཏུལ་ཐལ་བརྡུངས་ལ། ཡང་དག་པའི་ས་ལ་བསྒྲལ་ཞིང་སྡིག་སྒྲིབ་ཐམས་ཅད་བྱང་ཞིང་བཅོམ་པར་བསྒོམ་མོ། །རུས་ཆོག་རྫོགས་སོ།། ༈ །།དེ་ནས་མཆོད་རྟེན་གདབ་པ་ནི། རུས་ཐལ་དང་འཇིམ་པ་བསྲེག་ཏེ། བྱིན་རླབས་གཞན་དང་མཐུན་པར་བྱ། འབི་འབི་བྱེད་པ་ནས་འདེབས་པའི་དུས་སུ་ཚེ་འདས་གོང་དུ་ལྷར་བསྐྱེད་ནས་བར་སྣང་གི་ཟླ་དལ་བཞུགས་པ་དེ་མཆོད་རྟེན་གྱི་ནང་གི་ལྷར་བསྐྱེད་དེ། ནང་རིན་པོ་ཆེའི་གཞལ་ཡས་ཁང་ལ་ཕྱི་མཆོད་རྟེན་ཆོས་ཀྱི་སྐུ་ཡི་གཟུགས་བརྙན་ལ་འཇིག་རྟེན་ལྷ་ཆེན་བརྒྱད་ཀྱིས་བསྐོར་ནས་མཆོད་པ་བྱེད་པར་བསམ་ཞིང་གདབ། ཡི་དམ་གྱི་སྙིང་པོ་དང་། ངན་སོང་སྦྱོང་བའི་སྒོ་གཅོད་ཀྱི་སྔགས་བརྗོད་ཅིང་བཏབ་པས། ནང་གི་ལྷ་ལ་འོད་འཕྲོས་ཏེ། ཁམས་གསུམ་གྱི་སེམས་ཅན་དང་ཚེ་འདས་པའི་སྙིང་ལ་རིགས་དྲུག་གི་ས་བོན་ཡོད་པ་བསྲེགས་ནས་བསྒྲིབས་པ་དང་། སེམས་ཀྱི་ཆོས་ཉིད་མངོན་དུ་བྱས་ཏེ། ཡི་དམ་གྱི་ལྷའི་སྐུ་ཕྱག་རྒྱ་ཆེན་པོ་ཐོབ་པར་བསྒོམ་མོ། །དེ་ནས་ཆོས་སྐུར་བྱིན་གྱིས་བརླབས་པ་དང་། རབ་གནས་བྱ་བ་དང་། དེ་ལ་པུ་ཙ་དབུལ་བའི་རིམ་པ་རྣམས་གཞུང་གཞན་དང་མཐུན་པར་ཤེས་སོ། །དེ་ནས་གཉིས་པ་ལོག་ནོན་ནི། །གཤིན་གྱི་སྐེགས་དབུད་པ་ཞེས་བྱ་སྟེ། དེས་ཀྱང་མ་ཕན་ན་གོང་གི་དེ་གཤེགས་གསོལ་བྱས་ལ། མགོ་དང་བརླའི་རུས་པ་ལ་སཱཙྪ་རེ་བཏབ་ལ། ཚོན་དཀར་པོ་དང་ནག་པོ་སྟེང་འོག་ཏུ་ཞབས་སྤྲད་དེ། མ་ཐེམ་འོག་ཏུ་གྲུ་གསུམ་བྲུས་ལ་དེར་བཞག་གོ། །དེས་ཤི་ཁ་ཆོད་ཅིང་འདྲེ་རྒྱུན་ཆད་དོ། །དེ་ནས་སྤྱི་ཡི་ཕན་ཡོན་ནི། རྒྱུད་སྡེ་ལས་བསམ་གྱིས་མི་ཁྱབ་པ་བཤད་པས་དེར་བལྟ་བར་བྱའོ། །མཆོད་རྟེན་གདབ་པ་རུས་ཆོག་ལུང་ཕྲན་ཞེས་བྱ་བ། སློབ་དཔོན་བི་མ་ལ་མི་ཏྲའི་ཞལ་སྔ་ནས་གསུངས་པ་ཞང་དྲུང་གཉགས་ཛྙཱ་ནས་དཀར་ཆག་ཏུ་བཏབ་པ་རྫོགས་སོ།། ༈ །།རོ་སྲེག་ལས་ཀྱི་ཕྲེང་བ་ཞེས་བྱ་བ་བཞུགས་སོ། །བཅོམ་ལྡན་འདས་ཐུགས་རྗེས་འདྲེན་པར་བྱེད་པ་ལ་ཕྱག་འཚལ་ལོ། །སྒྱུ་འཕྲུལ་ཆེན་པོའི་རྒྱུད་སྡེ་ལས། །རྟོག་པའི་དྲྭ་བ་བསྲེག་པ་དང་། །གདོས་བཅས་ཐུགས་རྗེས་སྦྱོང་བའི་ཕྱིར། །རོ་བསྲེག་ལས་ཀྱི་ཕྲེང་བ་བརྩམས། །རྟག་པའི་དྲྭ་བ་བསལ་ནས་ནི། །སྐུ་ལྔ་ལྷུན་གྱིས་གྲུབ་པར་ཤོག །དང་པོར་དེ་ཉིད་ལུས་གཞག་ལ། །བགེགས་བསྐྲད་པ་དང་བཅའ་བ་དང་། །གདགས་དང་སྦྱང་དང་དབང་བསྐུར་དང་། །ཐབ་ཁུང་བསྲེག་ཁང་སློབ་དཔོན་དང་། །ལས་གཞུང་སྦྱིན་སྲེག་བསྡུ་བ་སྟེ། །ལྔ་གཉིས་གཅིག་གིས་དོན་རྫོགས་པས། །མདོར་བསྡུས་སྤྱི་ཡི་སྡོམ་དུ་འདོད། ༈ །དེ་དག་རྒྱས་པར་བཤད་པ་ནི། །ཅི་ནུས་ས་ཡིས་རྣམ་པར་དབྱེ། །ཨེ་རཾ་ཁཾ་གསུམ་མ་ལུས་ཀུན། །ཟ་བྱེད་འབར་བའི་དཀྱིལ་འཁོར་གྱིས། །ཁོག་བསྲུང་ལྷན་ཅིག་སྐྱེས་སོགས་ལ། །བརྡེག་དང་བསྣུན་དང་གཞོམ་པ་དང་། །ཕྲོགས་ཏེ་བརྟེན་པ་གཉིས་མེད་བྱ། །བསྲུང་བའི་འཁོར་ལོའི་ཆོ་ག་ཡིས། །དམ་ཚིག་སེམས་དཔའ་བསྲུངས་ཏེ་བཞག །དེ་ལྟར་གྲངས་དང་ཞག་དུས་སུ། །ཡང་ནས་ཡང་དུ་བཟླ་སྟེ་བྱ། །ཁྲུས་དང་རྒྱན་དང་བྱུག་པ་དང་། །ཕྱི་དང་ནང་གི་ལྔ་གཉིས་ལ། །བརྒྱ་པ་གཉིས་དང་དག་པ་ཡིས། །ཆུ་ལ་ལན་གྲངས་མང་བཟླས་ཏེ། །རྟེན་མཆོག་དེ་ལ་བཀྲུ་བར་བྱ། །མི་འཆིང་བཅུ་ཕྱེད་སྤོས་མར་དང་། །དྲི་ཡིས་དེ་ལ་ཡང་དག་བྱུག །ཞུ་ཆེན་ཁུ་བས་བཙོས་པ་ཡི། །རས་ཀྱིས་རྟེན་ལ་ཡང་དག་དཀྲི། །སྤོས་མར་ཐོར་ཅོག་དེ་ལ་བསྐོན། །མགུལ་དེར་རྒྱན་ཡང་གདགས་པར་བྱ། །ཕུང་པོ་ལྔ་ཡི་གནས་དག་ཏུ། །རྒྱལ་བ་ལྔ་ཡི་ཕྱག་རྒྱ་དགོད། །རྩ་རུ་ཡུམ་གྱི་ཕྱག་རྒྱ་དགོད། །དབང་པོ་རྣམ་ཤེས་ཡུལ་རྣམས་སུ། །སེམས་དཔའ་སེམས་མ་འཇོམས་པ་དང་། །འཇོམས་མ་རིམ་པར་དགོད་དོ་ཞེས། །རྔམ་པའི་རྒྱུད་ལས་གསུངས་པ་ཡིན། །རྒྱུད་དྲུག་འཁོར་བའི་གནས་རྣམས་སུ། །ཐུབ་དྲུག་ས་བོན་དགོད་པ་ཡིན། །ཀུན་བཟང་ཡབ་ཡུམ་དེ་བཞིན་ཏེ། །སྡོང་བུ་རེ་ལ་ལྷ་རྣམས་ཀྱི། །མ་ནོར་རྩ་བའི་སྙིང་པོ་དག །རས་ཆེན་རྒྱུ་ལས་བྱས་ཏེ་གདགས། །མྱ་ངན་འདས་པར་གསུངས་པ་ཡིན། །རོ་ཡི་ཕྱི་རོལ་ཤུན་པ་ལ། །འགྲོ་དྲུག་ས་བོན་བཀོད་ནས་ནི། །འོད་ཟེར་འཕྲོ་འདུའི་སྦྱོར་བ་ཡི། །རིམ་གྱིས་སྦྱང་བའི་ལས་སུ་བྱ། །དབུ་རྒྱན་ཅོད་པན་ཕྲེང་བ་དང་། །རྡོ་རྗེ་དྲིལ་བུ་ལ་སོགས་པ། །དབང་མཆོག་བྱིན་ལ་སྟེགས་ལ་བཞག །དེ་ནས་མེ་ཐབ་བརྩམ་བྱ་བ། །ཁྲུ་བཞི་དེ་ཡི་ཚད་བྱས་ལ། །ཐུར་དུ་བྲུས་ཏེ་དཀྱིལ་འཁོར་གྱི། །ཟ་བྱེད་དཀྱིལ་འཁོར་ཕྱག་རྒྱ་དགོད། །རྡོ་རྗེ་མེ་ཡིས་མཚན་པ་དེ། །ཐབ་ཁུང་ཡིན་པར་གསལ་བར་གསུངས། །ཕྱི་རོལ་ཀ་བ་བཞི་བཙུགས་ལ། །འོག་མ་བགྲངས་སབ་སུམ་བརྩེག་བྱ། །བར་པ་ཤིག་གིས་བརྫང་དབུས་སུ། །པདྨ་འདབ་མ་བརྒྱད་པ་ལ། །ཁྲོ་བ་བརྒྱད་ཀྱི་སྙིང་པོ་དགོད། །དབུས་སུ་མེ་ཡི་ས་བོན་དགོད། །བཞིན་ཕྱོགས་ཤར་དུ་བསྟན་ཏེ་བཞག །རོ་ལ་གཟུངས་ཐག་བཏགས་ནས་ནི། །གློ་སྐར་བཞི་ནས་དྲངས་བྱས་ལ། །བླ་མ་བཞི་ཡི་ཕྱག་ཏུ་ཕུལ། །སུམ་བརྩེགས་ཡང་ཐོག་ཆེན་པོ་དེ། །རས་སམ་གྲོ་ག་ཤིང་ཤུན་ལ། །ཐུགས་རྗེའི་དཀྱིལ་འཁོར་བཞི་བཅུ་གཉིས། །ལྡིང་བུ་བཅས་ཏེ་གདགས་པར་བྱ། །དེ་ནས་རྡོ་རྗེ་རྒྱལ་པོ་ཡིས། །རང་བཞིན་མེ་ཡི་འཕྲོ་འདུ་བྱ། །རྡོ་རྗེ་ཀརྨ་ལས་མཁན་གྱིས། །བསྲུང་དང་བསྐྲད་པའི་ལས་བརྩམས་ཏེ། །ལས་ཀྱི་ཕྲེང་བ་རྫོགས་པར་བྱ། །རྡོ་རྗེ་རྒྱལ་ཐེབས་བླ་མ་ཡིས། །མཚམས་མེད་ལྔ་དང་ཉེ་བ་ལྔ། །ལྕི་བཞི་ལོག་བརྒྱད་ལ་སོགས་པ། །རོ་ཡི་ཉེས་པ་བགྲང་ཞིང་བཤགས། །རྡོ་རྗེ་སྐབས་སྦྱོར་བླ་མ་ཡིས། །སྐབས་སྐབས་ཀུན་ཏུ་མཆོད་པ་དབུལ། །བཀྲ་ཤིས་གནས་ཀྱི་སྨོན་ལམ་གདབ། །སྐབས་སམ་ཀུན་གྱི་མཇུག་ཏུ་གདབ། །རྡོ་རྗེ་གྲངས་ཀྱི་ལྟངས་འཛིན་པས། །གྲངས་བཟུག་དཀར་བྱང་བླ་མར་དབུལ། །སྡིག་པའི་གནག་བྱང་བཤགས་ཤིང་བསྲེག །བཟླས་བརྗོད་འཕྲོ་འདུས་རྟོག་ཚོགས་རྣམས། །སྦྱང་ཏེ་རང་རང་ལྷ་རུ་བརླབ། །ཚོགས་དང་པོ་བྱེད་མཆོད་པ་ཀུན། །རིམ་པར་མདུན་དུ་བརླབས་བྱས་ལ། །དེ་ལས་ར་སྐྱེས་རྃ་ལས་མེ། །བསྐྱེད་དེ་རང་བཞིན་སྤྱན་དྲངས་བསྟིམ། །ཨ་ལི་ཨུ་ལི་ཏ་པ་ཡིས། །ཚོགས་ཀྱི་མཆོད་པ་སྐབས་སུ་བྱ། །མཆོད་དང་བསྟོད་པའི་རིམ་པ་བཞིན། །མེ་ལྷའི་ལྟོ་བར་གཞལ་ཡས་ཁང་། །ལྷ་དང་བཅས་པ་རིམ་པར་བསྐྱེད། །གོང་གི་དཀྱིལ་འཁོར་གསལ་བཏབ་ལ། །ཡེ་ཤེས་འཁོར་ལོ་སྤྱན་དྲངས་ཏེ། །གཉིས་སུ་མེད་པར་བསྟིམ་པར་བྱ། །མཆོད་པའི་རིམ་པ་གོང་བཞིན་ཕུལ། །བསྟོད་པ་ལ་སོགས་དེ་དང་མཚུངས། །མེ་ཡི་ལྟས་དང་བཟང་དང་ངན། །རིམ་པ་བཞིན་དུ་བརྟག་པར་བྱ། །དེ་ནས་རྡོ་རྗེ་བསྡུ་བ་ཡིས། །རིམ་པ་བཞིན་དུ་བསྡུས་བྱས་ལ། །དམ་པ་ཡིན་ན་སྐུ་གདུང་ཡང་། །ལྷག་མ་བསྡུས་ཏེ་མཆོད་རྟེན་ནམ། །སྐུའམ་གཙུག་ལག་ཞལ་ཞལ་ལམ། །ཐང་ཀའི་རི་མོ་བྱ་བ་འམ། །རྫས་དང་བསྲེས་ལ་རིལ་བུ་བྱ། །སྦྱིན་སྲེག་བྱ་བར་མཁས་པས་བཤད། །དེ་ནས་བསྡུ་དང་བཤགས་པ་དང་། །གཤེགས་སུ་གསོལ་བ་རིམ་བཞིན་བྱ། །ཚོན་རྩི་བསྡུས་ཏེ་རོལ་མོ་ཡིས། །རྒྱ་མཚོ་ཆེན་པོར་བསྐྱལ་ཏེ་བཏང་། །འཁོར་བའི་སེམས་ཅན་ལོག་པར་འཁྲུལ་བ་ཤིན་ཏུ་ཉོན་མོངས་དང་བཅས་པ། དྲལ་ཞིང་བསྲེག་ཕྱིར་གདོས་བཅས་སྦྱང་ཕྱིར་དྲི་མེད་བཤེས་གཉེན་གདུང་བ་བདག་གིས་ཀྱང་། སྒྱུ་འཕྲུལ་རྒྱུ་མཚོ་རྟོགས་དཀའ་རྔམ་པ་མཐའ་ཡས་རྒྱུད་ཆེན་ལས་བཏུས་པའི། རྒྱ་མཚོ་སེམས་ཅན་རྟོག་བཅས་འདི་ཀུན་ཟག་མེད་ཤོག །སྒྱུ་འཕྲུལ་དྲྭ་བའི་རོ་སྲེག་ལས་ཀྱི་ཕྲེང་བ་ཞེས་བྱ་བ་བི་མ་ལས་མཛད་པ་རྫོགས་སོ།། །།