གཞུང་གི་དོན་ལ་ཐོག་མར་སྣོད་ཀྱི་འཇིག་རྟེན་ཆགས་ཚུལ།
༈ དེ་ལ་ཐོག་མར་སྣོད་ཀྱི་འཇིག་རྟེན་ཆགས་ཚུལ་ནི། ཡོན་ཏན་རིན་པོ་ཆེ་སྡུད་པ་ལས། མཁའ་ལ་རླུང་བརྟེན་དེ་ལ་ཆུ་ཡི་ཕུང་པོ་བརྟེན། །དེ་ལ་ས་ཆེན་འདི་བརྟེན་དེ་ལ་འགྲོ་བ་བརྟེན། །ཞེས་གསུངས་པ་ལྟར། བཅུད་ཀྱི་སེམས་ཅན་ཡས་དང་སྣོད་ཀྱི་འཇིག་རྟེན་མས་ནས་ཆགས་ཏེ་འཇིག་རྟེན་གྱི་ཁམས་གྲུབ་བོ། །དེ་ལ་རང་ཅག་རྣམས་གནས་པའི་འཛམ་གླིང་ཆུང་ངུ་ལས་ཀྱི་ས་ཞེས་པ་འདི་ཆོས་མངོན་པ་མཛོད་ནས་ཤིང་རྟའི་དབྱིབས་དང་། དུས་འཁོར་ལ་སོགས་ནས་གྲུ་གསུམ་སོག་ཀའི་རྣམ་པར་ཡོད་པ་བཤད་པ་སྟེ། དེ་ཡང་ནང་གསེས་སུ་འཕགས་ཡུལ་དང་། བོད་དང་། ལི་དང་། རྒྱ་ནག་དང་། ཀཻ་ལཱ་ཤ་དང་། གངས་ལྡན་ཏེ་ཡུལ་དྲུག་ཏུ་ཡོད་པའོ། །དེ་ཡང་རཏྣའི་ཕུར་པ་ཡང་གསང་བླ་མེད་ཀྱི་ཆོས་སྐོར་ལས། བོད་རྣམས་སོག་པའི་ཐེར་ལ་ཡོད་པས་དྲང་ཞིང་དབུལ་ཕོངས་དྲན་པ་གསལ་བའོ། །རྒྱ་གར་ཁ་ཆེ་སྟག་གཟིག་གསུམ་སོག་པའི་ཡུ་བ་ལ་ཡོད་པས་སེམས་ཆུང་། བློ་སྲབ། འབྱོར་བ་ལྡན་པའོ། །རྒྱ་ནག་ཧོར་འཇང་གསུམ་སོག་པའི་ཁ་གདངས་ལ་ཡོད་པས་རྒྱ་ཆེ་ཁོག་ཡངས་རིག་པ་བཟོ། ལོངས་སྤྱོད་ཕུན་སུམ་ཚོགས་པའོ། །གཞན་ཡང་སོག་པའི་ཁ་སྒོར་ལ་མཐའ་འཁོབ་
སུམ་ཅུ་སོ་དྲུག་ཅེས་བྱ་བ་ལ་སོགས་པ་གསུངས་སོ། །འཛམ་གླིང་འདིའི་ལྟེ་བ་རྡོ་རྗེ་གདན་ཏེ། རྡོ་རྗེ་རྩེ་ལྔ་པ་གྱེན་དུ་ལངས་པའི་ཁོང་གསེང་ནས་བྱང་ཆུབ་ཀྱི་ཤིང་བྱུང་བ་རྭ་བཞི་ལ་རྡོ་རྗེ་ཕུར་པའི་མཆོད་རྟེན་བཞི་གནས་པ། མཆོད་རྟེན་བཞིའི་བར་གྱི་ཐང་ལ་མདའ་རྒྱང་འབྲིང་པོ་རེ་ཡོད་པའི་དབུས་ན་རྡོ་རྗེ་ཕ་ལམ་ལས་གྲུབ་པའི་གདན་ཁྲི་རྒྱར་ཕྱོགས་རེ་ལ་འདོམ་གསུམ་གསུམ་དཔངས་སུ་ཁྲུ་གསུམ་གསུམ་གྱི་དབུས་ནས་བྱང་ཆུབ་ཀྱི་ཤིང་སྐྱེས་པ། སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་ལས་གྲུབ་པ། དེའི་ཕྱོགས་མི་འགྱུར་བའི་གཟེར་ཆེན་ཤར་ཕྱོགས་རྒྱ་ནག་གི་རྒྱལ་ཁམས་ན་འཕགས་པ་འཇམ་དཔལ་གྱིས་རྩིས་ཀྱི་སྒོ་མོ་བརྒྱད་ཁྲི་བཞི་སྟོང་གསུང་བའི་གནས་རི་བོ་རྩེ་ལྔ། ལྷོ་ཕྱོགས་ན་གཉིས་མེད་དུས་འཁོར་གསུང་བའི་གནས་དཔལ་ལྡན་འབྲས་སྤུངས་ཀྱི་མཆོད་རྟེན་ན་ཡེ་ཤེས་སེམས་དཔའ་མ་བསྡུས་པར་བཞུགས་པའི་སྐུ་གསུང་ཐུགས་ཀྱི་དཀྱིལ་འཁོར་ཡོངས་རྫོགས་དང་། རྒྱ་མཚོའི་གླིང་ན་རྩེ་མོར་སྤྱན་རས་གཟིགས་ཀྱི་ཕོ་བྲང་པོ་ཏ་ལ། རྩ་བར་འཕགས་མ་སྒྲོལ་མའི་བཞུགས་གནས་ཡོད་པ། ནུབ་ཕྱོགས་ན་རྒྱུད་ཐམས་ཅད་ཀྱི་གསང་མཛོད་མཁའ་འགྲོ་སྤྲིན་ལྟར་འདུ་བའི་གནས་ཨོ་རྒྱན་རྡོ་རྗེ་འཆང་གི་ཕོ་བྲང་ཧེ་རུ་ཀ་རང་བྱུང་གི་གཙུག་ལག་ཁང་། བྱང་ཕྱོགས་ན་ཆོས་རྒྱལ་རིགས་ལྡན་རྣམས་རིམ་པར་བྱོན་ཏེ་ཆོས་ཀྱི་འཁོར་ལོ་བསྐོར་བའི་གནས་ཀ་ལཱ་པའི་གྲོང་ཁྱེར། གཞན་ཡང་མཛོད་ལས། འདི་ནས་བྱང་དུ་རི་ནག་པོ། །དགུ་འདས་གངས་རི་འོ། །ཞེས་སོགས་ཀྱི་དོན་རྡོ་རྗེ་གདན་ནས་རི་རྒྱུད་དགུ་འདས་པ་ན་གངས་རི་དཔལ་དང་ལྡན་པ་ན། ཡན་ལག་བརྒྱད་ལྡན་གྱི་ཆུས་གང་བའི་མཚོ་མ་དྲོས་པ། དེའི་ཤར་བྲག་གླང་པོའི་ཁ་འདྲ་བ་ནས་གངྒཱ་དངུལ་གྱི་བྱེ་མ། དེ་བཞིན་དུ་ལྷོར་བྲག་ཁྱུ་མཆོག་གི་ཁ་འདྲ་བ་ནས་སིནྡྷུས་བཻཌཱུརྱའི་བྱེ་མ། ནུབ་ཕྱོགས་བྲག་རྟའི་ཁ་འདྲ་བ་ནས་པཀྵུས་ཤེལ་གྱི་བྱེ་མ། བྱང་ཕྱོགས་བྲག་སེང་གེའི་ཁ་འདྲ་བ་ནས་སི་ཏཱས་གསེར་གྱི་བྱེ་མ་དྲངས་ཏེ་བཞི་ཀ་ཆུ་ཕྲན་ལྔ་བརྒྱ་དང་བཅས་མ་དྲོས་པ་ལ་གཡས་སྐོར་ལན་བདུན་བྱས་ནས་ཕྱོགས་བཞིའི་རྒྱ་མཚོར་འབབ། དེར་ཤིང་འཛམ་བུ་ཏྲི་ཤའི་འབྲས་བུ་དམར་པོ་རྫ་མ་ཙམ་པ་ཆུར་ལྷུང་བའི་སྒྲར་ཛམ་ཞེས་པའི་
སྒྲས་གླིང་གི་མིང་ཡང་དེར་ཐོགས་ཤིང་ཀླུའི་རྒྱལ་པོ་རྣམས་ཉར་སྤྲུལ་ནས་འབྲས་བུ་དེ་མྱོང་བའི་ལྷག་མ་རྣམས་མ་དྲོས་པའི་ཆུའི་ནུས་པས་གསེར་དུ་གྱུར་བར་འཛམ་བུ་ཆུ་བོའི་གསེར་དུ་གྲགས་སོ། །