མཆོག་དམན་སྤྱི་ཙམ་གྱི་མདུན་སར་འབེལ་གཏམ་གླེང་བའི་དཔེར་བརྗོད་རྒྱ་འབག་གི་མིག་ལྟ་བུ། ལོ་ཆེན་དྷརྨ་ཤྲཱི།
མཆོག་དམན་སྤྱི་ཙམ་གྱི་མདུན་སར་འབེལ་གཏམ་གླེང་བའི་དཔེར་བརྗོད་རྒྱ་འབག་གི་མིག་ལྟ་བུ་ཞེས་བྱ་བ་ལགས་སོ། །ལོ་ཆེན་དྷརྨ་ཤྲཱི།
མཆོག་དམན་སྤྱི་ཙམ་གྱི་མདུན་སར་འབེལ་གཏམ་གླེང་བའི་དཔེར་བརྗོད་རྒྱ་འབག་གི་མིག་ལྟ་བུ་ཞེས་བྱ་བ་ལགས་སོ། །དེ་ཡང་སྙན་ངག་གི་བསྟན་བཅོས་ཆེན་པོ་དཔག་བསམ་འཁྲི་ཤིང་ལས། ལེགས་བཤད་རྣམས་དང་མཐུ་རྣམས་དང་། །དོག་པ་རྣམས་ཀྱང་རྒྱས་པ་ནི། །གསར་པ་ཁོ་ནས་ཡིད་འཕྲོག་སྟེ། །བུད་མེད་རྣམས་ཀྱི་ལང་ཚོ་བཞིན། །ཞེས་གསུངས་པ་ལྟར། རྣམ་པར་དཔྱོད་པའི་བློ་གྲོས་དང་ལྡན་པའི་སྐྱེས་བུ་དམ་པ་རྣམས་ནི་ཟང་ཟིང་གི་ནོར་ཙམ་གྱིས་མགུ་བ་མ་ཡིན་གྱི། སྔར་མ་གྲགས་པའི་ལེགས་བཤད་ཀྱི་གཏམ་གསར་པ་ཁོ་ནས་ཡིད་འཕྲོག་པར་བྱེད་པ་ཞིག་ཡིན་ལ། རྒྱུ་མཚན་དེས་གང་དུ་གླེང་བའི་ཡུལ་ཡང་། གཞུང་ལུགས་ལ་ལེགས་པར་སྦྱངས་ཤིང་མཁས་པའི་མཁྱེན་པ་ཅན་ཚོགས་པའི་མདུན་སར་སྨྲ་བར་རིགས་པ་ཡིན་ཏེ། མང་པོའི་དབུས་སུ་མང་པོ་ཡི་ནི་གཏམ་གྱིས་ཏེ། །མཁས་པའི་དབུས་སུ་མཁས་པའི་གཏམ་གྱིས་དགའ་བ་བསྐྱེད། །ཅེས་དང་། སློབ་དཔོན་ཆེན་པོ་དཔའ་བོའི་ཞལ་སྔ་ནས་ཀྱང་། དམ་པ་རྣམས་དང་འཕྲད་ན་སྐྱེས་ཀྱི་མཆོག །ཚོགས་ཀྱི་ནང་ན་མཁས་པ་མགུ་བ་བསྐྱེད། །ཅེས་གསུངས་པ་དེ་ཡིན། གང་ལས་གླེང་ན། སྙིང་རྗེ་པདྨ་དཀར་པོའི་མདོའི་རྗེས་སུ་འབྲངས་ནས་སངས་རྒྱས་བྱོན་ཚུལ་དང་། གསང་བ་བསམ་གྱིས་མི་ཁྱབ་པའི་མདོའི་རྗེས་སུ་འབྲངས་ནས་སངས་རྒྱས་སྟོང་བྱོན་ཚུལ། དེའི་ནང་ནས་ཀྱང་རྒྱ་ཆེ་རོལ་པའི་མདོ་ལྟ་བུ་ལ་བརྟེན་ནས། དཔལ་མགོན་འཕགས་པ་ཀླུ་སྒྲུབ་ཀྱིས་མཆོད་རྟེན་བརྒྱད་བསྟོད་དུ། དང་པོར་བྱང་ཆུབ་མཆོག་ཏུ་སེམས་བསྐྱེད་དེ། །བསྐལ་པ་གྲངས་མེད་གསུམ་དུ་ཚོགས་བསགས་ཤིང་། །བར་དུ་གཅོད་པའི་བདུད་བཞི་འཇོམས་མཛད་པ། །བཅོམ་ལྡན་སེང་གེ་དེ་ལ་ཕྱག་འཚལ་ལོ། །ཞེས་གསུངས་
པ་ལྟར། འོ་སྐོལ་གྱི་སྟོན་པ་ཐུབ་པའི་དབང་པོ་ཉིད་ཀྱིས། དང་པོར་ཐུགས་བསྐྱེད་ཚུལ། བར་དུ་ཚོག་བསགས་ཚུལ། མཐར་མངོན་པར་རྫོགས་པ་སངས་རྒྱས་ནས་ཆོས་ཀྱི་འཁོར་ལོ་བསྐོར་ཚུལ་སོགས་མཛད་པ་བཅུ་གཉིས་ལས་འཕྲོས་ཏེ་ཞུས་ཀྱང་རུང་ལ། ཡང་མདོ་སྡེ་རྒྱན་ལས། ཇི་ལྟར་མནམ་ན་རབ་དཀུ་ཞིང་། །མྱངས་ན་ཞིམ་པའི་སྨན་བཞིན་དུ། །དེ་བཞིན་ཆོས་ཀྱང་རྣམ་གཉིས་ཏེ། །དོན་དང་ཡི་གེར་ཤེས་པར་བྱ། །ཞེས་གསུངས་པ་ལྟར། བརྗོད་བྱ་དོན་གྱི་ཆོས་སྤངས་རྟོགས་གང་རུང་གིས་བསྡུས་པའི་རྣམ་དཀར་གྱི་ཡོན་ཏན་རྟོགས་པའི་དམ་ཆོས་དང་། དེ་བརྗོད་བྱར་སྟོན་པའི་རིགས་སུ་གནས་པའི་ལེགས་བཤད་རྗོད་བྱེད་ལུང་གི་ཆོས་ཏེ། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །ཞེས་གསུངས། ལུང་གི་ཆོས་དེ་ལའང་། ལེགས་པར་གསུངས་པ་བཀའི་རྣམ་བཞག་དང་། དགོངས་འགྲེལ་བསྟན་བཅོས་ཀྱི་རྣམ་པར་བཞག་པ་གཉིས་སུ་བཤད་ཀྱང་ཆོག་སྟེ། ལྷའི་བུས་ཞུས་པའི་མདོ་ལས། ཆོས་རྣམས་ཐམས་ཅད་བཀའ་དང་བསྟན་བཅོས་གཉིས་སུ་འདུས། ལེགས་པར་གསུངས་དང་དེ་ཡི་དགོངས་འགྲེལ་བ། །དེ་ཡི་དབང་གིས་ཤཱཀྱའི་བསྟན་པ་ནི། །འཇིག་རྟེན་ཁམས་འདིར་ཡུན་རིང་གནས་པར་འགྱུར། །ཞེས་པ་ལྟ་བུ་ལས་བརྩམས་ཏེ་གླེང་བའམ། ཡང་རྡོ་རྗེ་གཅོད་པའི་འགྲེལ་པ་དང་། ཐུབ་པ་དགོངས་གསལ་དང་། འབུམ་ཊཱིཀ་ལ་སོགས་པའི་རྗེས་སུ་འབྲངས་ནས་ཐུབ་པའི་བསྟན་པ་རིན་པོ་ཆེ་འདིའི་གནས་ཚད་ལས་འཕྲོས་ཏེ་འཆད་པའམ། ཡང་གཞུང་ལུགས་རྣམས་ལ་མཁས་པར་བྱ་བའི་ཕྱིར། སྤྱོད་འཇུག་ལས། འཇིག་རྟེན་པ་ཡིས་དངོས་མཐོང་ཞིང་། །ཡང་དག་ཉིད་དུའང་རྟོགས་བྱེད་ཀྱི། །སྒྱུ་མ་ལྟ་བུ་མིན་པས་འདིར། །རྣལ་འབྱོར་པ་དང་འཇིག་རྟེན་རྩོད། །ཅེས་པ་ལྟར། ཉེར་ལེན་གྱི་ཕུང་པོ་ནི་བདེན་པ་དང་། ཆུ་ཟླ་ལ་སོགས་པ་རྫུན་པའོ། །ཞེས་གྲུབ་མཐས་བློ་མ་བསྒྱུར་བ་རྣམས་འདོད་ལ། གྲུབ་མཐས་བློ་བསྒྱུར་བ་རྣམས་ནི། རིགས་པས་མི་གནོད་པ་ནི་བདེན་པ་དང་། ཉེར་ལེན་གྱི་ཕུང་སོགས་རྫུན་པ་སྒྱུ་མ་ལྟ་བུའོ། །ཞེས་འདོད་ཅིང་དེ་ལས་འཇིག་རྟེན་པའི་ལུགས་ནི། ཉེར་ལེན་གྱི་ཕུང་པོ་ལ་གཙང་བ་ལ་སོགས་པར་འཛིན་ཅིང་། ངོ་ཚ་ཁྲེལ་ཡོད་
ཀྱིས་ཀུན་ནས་བསླངས་ཏེ་ལུས་ངག་གི་བྱ་བ་ཚུལ་དང་མཐུན་པར་སྒྲུབ་པ་ནི་སྐྱེ་བོ་དམ་པའམ་ཡ་རབས་དང་། དེ་ལས་ལྡོག་པ་ནི་སྐྱེ་བོ་ངན་པའམ་མ་རབས་ཞེས་བྱ་སྟེ། ལུགས་ཀྱི་བསྟན་བཅོས་དམ་པའི་རྒྱན་ལས། བཀུར་བར་འོས་པ་ལེགས་འཁུར་ཞིང་། །མགོན་མེད་རྣམས་ལ་ལྷག་པར་བྱམས། །བྱས་ལ་དྲིན་ལན་མི་བརྗེད་པ། །དམ་པ་རྣམས་ཀྱི་མཛད་སྤྱོད་ཡིན། །ངོ་ཚ་དོར་བའི་འཚོ་བ་དང་། །སྡིག་དང་འབྲེལ་བའི་ལོངས་སྤྱོད་དང་། །མཛའ་བོ་བསླུས་པའི་མངའ་ཐང་བས། །དམ་པ་རང་ཉིད་འཆི་བ་འདམ། །ཞེས་དང་། སྐྱེ་བོ་ངན་པ་སྡིག་ལ་དགའ། །བྱས་ལ་དྲིན་དུ་མི་བཟོ་བ། །ངོ་ཚ་དགྲ་བོ་བཞིན་དུ་འདོར། །རང་དོན་གྲུབ་ན་ཅི་ཡང་བྱེད། །ཅེས་སོགས་འཇིག་རྟེན་པའི་གཞུང་ལུགས་སྐྱེ་བོ་གསོ་བའི་ཐིགས་པ་དང་། ཙ་ར་ཀ་རྒྱལ་པོ་ལུགས་ཀྱི་བསྟན་བཅོས་སོགས་ལས་ཤེས་པར་བྱ་ཞིང་། གྲུབ་མཐས་བློ་བསྒྱུར་བའི་ལུགས་ལའང་ལོག་པའི་གྲུབ་མཐས་བློ་བསྒྱུར་བ་ཕྱི་རོལ་མུ་སྟེགས་པའི་ལུགས་ཏརྐ་སྡེ་ལྔས་བསྡུས་པ་དང་། ཡང་དག་པའི་གྲུབ་མཐས་བློ་བསྒྱུར་བ་གང་བསླབ་པ་གསུམ་ལ་སློབ་པའམ། བསླབ་པ་མཐར་ཕྱིན་པ་ནང་པ་སངས་རྒྱས་པའི་གཞུང་ལུགས་གཉིས་ལས་འཕྲོས་ཏེ་བཤད་ཀྱང་ཡོང་ལ། ཡང་། འཆད་དང་རྩོད་དང་རྩོམ་པ་གསུམ། །མཁས་པའི་བྱ་བ་རྣམ་གསུམ་ཡིན། །ཞེས་གསུངས་པ་ལྟར། བསྟན་པ་གསལ་བར་བྱ་བའི་ཕྱིར་འཆད་པ། བསྟན་པ་ཡུན་རིང་དུ་གནས་པར་བྱ་བའི་ཕྱིར་རྩོམ་པ། བསྟན་པ་ལ་ལོག་པར་རྟོག་པ་ཚར་གཅོད་པའི་ཕྱིར་རྩོད་པ་སྟེ། མཁས་པ་རྣམས་ཀྱི་འཇུག་པའི་སྒོ་རྣམ་པ་གསུམ་པོ་གང་ཡང་རུང་བ་ལས་འཕྲོས་ཏེ་གླེང་ནའང་འབྲེལ་ཆགས་པར་འགྱུར་མོད། འོན་ཀྱང་ད་རེས་འདིར་ནི། དྲིན་ལན་བསབ་པའི་མདོ་ལས། གལ་ཏེ་བྱང་ཆུབ་སེམས་དཔའ་རིག་པའི་དངོས་པོ་ལྔ་སྔར་མ་བསླབས་ན། ནམ་དུའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐམས་ཅད་མཁྱེན་པའི་ཡེ་ཤེས་ཐོབ་པར་མི་ནུས་སོ། །དེ་བས་ན། བླ་ན་མེད་པའི་བྱང་ཆུབ་ཐོབ་པའི་ཕྱིར། རིག་པའི་དངོས་པོ་ལྔ་བསླབ་པར་བྱའོ། །བྱང་ཆུབ་སེམས་དཔའ་ནི་དྲིན་ཤེས་པ་དང་། དྲིན་བསབ་པ་ནི་སེམས་ཅན་ལ་བཤད་པའི་དངོས་པོ་བཤད་ཅིང་བསྟན་པར་
བྱའོ། །ཇི་ལྟར་བཤད་ཅེ་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་པར་བྱ་བའི་ཕྱིར་རིག་པ་ལྔ་དང་ལྡན་པ་བཤད་པར་བྱའོ། །ཞེས་དང་། འཕགས་པ་ཐོགས་མེད་ཀྱི་རྣལ་འབྱོར་སྤྱོད་པའི་ས་ལས། རིག་པའི་གནས་ལྔ་གང་ཞེ་ན། འདི་ལྟ་སྟེ། ནང་རིག་པ་དང་། གསོ་བའི་རིག་པ་དང་། གཏན་ཚིགས་ཀྱི་རིག་པ་དང་། སྒྲའི་རིག་པ་དང་། བཟོའི་ལས་ཀྱི་གནས་ཀྱི་རིག་པའོ། །ཞེས་པས་ཐམས་ཅད་མཁྱེན་པའི་གོ་འཕང་དོན་དུ་གཉེར་བ་རྣམས་ཀྱིས་བསླབ་པར་བྱ་བའི་གནས་ནི། ཤེས་བྱ་རིག་པའི་གནས་རྣམ་པ་ལྔ་ཡིན་པས། དེ་དག་ལས་བརྩམས་ཏེ་ཞུས་ན་སྐབས་སུ་འབབ་པ་ལགས། དེ་ལ་སྤྱིར་མདོ་ལས། རིག་པའི་གནས་བཅོ་བརྒྱད་ལ་སོགས་པའི་དབྱེ་སྒོ་མང་དུ་བཤད་པ་རྣམས་ཀྱང་། རིག་པའི་གནས་ལྔའི་ནང་དུ་འདུས་པར་བཤད་དེ། མཁས་པ་འཇུག་པའི་སྒོ་ལས། དེ་ཡུལ་བརྡ་སྤྲོད་རྟོག་གེ་དང་། །འཚོ་བ་ཕྱི་ནང་རིག་ཅེས་གསུངས། །གཞན་ལས་གཞན་དག་རྣམ་བཤད་པ། །འདི་ཡི་ནང་དུ་འདུས་ཞེས་གྲགས། །ཞེས་གསུངས་པ་དེ་ཡིན། དེ་དག་ལ་ལེགས་པར་སྦྱངས་པའི་དགོས་པ་ཡང་། རྒྱལ་ཚབ་མི་ཕམ་མགོན་པོས། རིག་པའི་གནས་ལྔ་དག་ལ་མཁས་པར་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་མི་འགྱུར་ཏེ། །དེ་ལྟ་བས་ན་གཞན་དག་ཚར་བཅད་རྗེས་བཟུང་དང་། །བདག་ཉིད་ཀུན་ཤེས་བྱ་ཕྱིར་དེ་ལ་དེ་བརྩོན་བྱ། །ཞེས་པས། གཙོ་བོར་ཚིག་གི་ཆ་ལ་འཁྲུལ་བ་སེལ་བར་བྱེད་པ་སྒྲ་རིག་པ། དོན་གྱི་ཆ་ལ་འཁྲུལ་བ་སེལ་བར་བྱེད་པ་ཚད་མ་རིག་པ་སྟེ། འདི་གཉིས་ནི་གཞན་དག་ཚིག་དོན་ལ་ལོག་པར་རྟོག་པ་རྣམས་ཚར་གཅོད་པར་བྱེད་པའི་རིག་པ་ཡིན་ལ། ཡང་བཟོ་རིག་པས་ནི་དགོས་དགུ་སྤྱི་དང་། གསོ་བ་རིག་པས་བྱེ་བྲག་ནད་མེད་པ་དོན་དུ་གཉེར་བ་རྣམས་རྗེས་སུ་འཛིན་པར་བྱེད་པས་དེ་གཉིས་ལ་གཞན་རྗེས་སུ་འཛིན་པའི་རིག་པ་ཞེས་བྱ། ནང་རིག་པ་ནི་བདག་ཉིད་ཀྱིས་ཡང་དག་པའི་དོན་ཟབ་པ་དང་རྒྱ་ཆེ་བའི་གནད་མ་ལུས་པ་ཤེས་པར་བྱེད་པ་ཡིན་པས། དམ་པའི་ཆོས་དང་དོན་གཅིག་མིང་གི་རྣམ་གྲངས་ཏེ། གང་ལ་དམིགས་ན་ལུས་ཅན་རྣམས་ཀྱི་སྒྲིབ་པ་ཟད་པའི་ཐབས་སུ་གྱུར་པའི་རྣམ་དཀར་
གྱི་ཡོན་ཏན་ཡིན་པའི་ཕྱིར། དེ་ལྟར་ཡང་། སྡུག་བསྔལ་དག་ནི་ཐམས་ཅད་དང་། །སྒྲིབ་ཀུན་སེལ་བྱེད་དམ་པའི་ཆོས། །ཞེས་གསུངས་པ་ལྟར་ཡིན་པ་སོ་སོའི་དགོངས་པར་མངའ་བ་དེ་ལགས། ཡང་བཟོའམ་སྒྲ་རིག་པའི་ཡན་ལག་ཏུ་གཏོགས་པ་རིག་གནས་ཆུང་བ་ལྔའི་འདྲེན་ལུགས་ལ། མཁས་པ་ཁ་ཅིག་གསུང་ཙ་ན། སྙན་ངག །མངོན་བརྗོད། སྡེབ་སྦྱོར། ཟློས་གར་བཞིའི་སྟེང་དུ་སྒྲ་རིག་པ་འདྲེན་པར་མཛད་ཀྱང་། འདིར། སྐར་རྩིས་སྙན་ངག་སྡེབ་སྦྱོར་དང་། །མངོན་བརྗོད་ཟློས་གར་འདི་ལྔ་ལ། །རིག་གནས་ལྔ་ཞེས་འཕགས་ཡུལ་ན། །གྲགས་པའི་བ་དན་རླུང་ལྟར་སྒྲོག །ཅེས་འབྱུང་བ་ལྟར་སྒྲའི་ཚབ་ཏུ་སྐར་རྩིས་བགྲངས་པ་འཐད་པ་འདྲ་སྟེ། སྒྲ་རིག་པ་ནི་རིག་གནས་ཆེ་བ་ལྔའི་ནང་ཚན་དུ་བགྲངས་ཟིན་པའི་ཕྱིར་སྙམ་པའི་གོ་ཕྱོགས་འཆར་བ་སྣང་བས་ཇི་ལྟར་འཐད་མཁྱེན་པའི་སྤྱན་ལྡན་རྣམས་ཀྱིས་དཔྱད་པ་མཛད་དགོས་རྒྱུར་འདུག །དེ་ལྔ་ལ་སྦྱངས་པའི་དགོས་པ་གང་ཞེ་ན། སྐར་རྩིས་ཤེས་ན་དུས་ཀྱི་སྦྱོར་བའི་བླང་དོར་གྱི་གནས་སྟོན་པ་ལ་མི་རྨོངས། སྙན་ངག་ཤེས་ན་ཚིག་རྒྱན་ལ་མི་རྨོངས། སྡེབ་སྦྱོར་ཤེས་ན་ཚིགས་བཅད་ལ་མི་རྨོངས། མངོན་བརྗོད་ཤེས་ན་མིང་གི་བྱེ་བྲག་ལ་མི་རྨོངས། ཟློས་གར་ཤེས་ན་སྐད་རིགས་ལ་མི་རྨོངས་པ་ཡིན་ནོ། །ཞེས་གྲགས། དེ་ལྟ་བས་ན། འཕགས་པ་བྱང་ཆུབ་སེམས་དཔའི་སྡེ་སྣོད་ལས། མིག་ལྡན་མར་མེ་ཡོད་གྱུར་ན། །གཟུགས་རྣམས་མཐོང་བ་ཇི་ལྟ་བར། །དེ་བཞིན་དགེ་དང་མི་དགེའི་ཆོས། །ཐོས་པས་རྣམ་པར་ཤེས་པར་འགྱུར། །ཞེས་ཐོས་པ་ལ་བརྟེན་ནས་དགེ་མི་དགེའི་བླང་དོར་གྱི་ཆོས་ཐམས་ཅད་ཤེས་པར་འགྱུར་ཞིང་། དེ་ལ་ཐོས་པས་གཏན་ལ་དབབ་པར་བྱ་བའི་ཡུལ་ནི། སྔར་སྨོས་པ་ལྟར་གྱི་རིག་པའི་གནས་རྣམ་པ་ལྔ་པོ་དེ་ཡིན་པར་འདུག །དེ་ཡང་ཐོག་མར་ནི་བཟོ་རིག་པ་འཆད་པ་སྐབས་སུ་བབས་ཏེ། མཁས་པ་ཐམས་ཅད་ཞལ་མཐུན་པར་བཟོ་རིག་པའི་ནང་དུ་རིག་གནས་གཞན་ཐམས་ཅད་འདུ་བར་བཞེད་པའི་ཕྱིར་རོ། །ཇི་ལྟར་འདུ་སྙམ་ན། ཡིད་དང་འབྲེལ་བའི་ལུས་ཀྱི་གཡོ་བ་དང་། ངག་གི་བརྗོད་པ་གཙོ་བོར་གྱུར་པ་ལ་ལུས་བཟོ་དང་། ངག་གི་བཟོ། ཞེས་དང་། དེ་གཉིས་གང་རུང་དང་མ་འབྲེལ་བར་ཡིད་
ཀྱི་བསམ་པ་ཙམ་གྱི་དབང་དུ་བྱས་པ་ལ་ཡིད་བཟོར་གྲགས་ཤིང་། རྒྱུ་མཚན་དེས་རྒྱ་ཆེ་རོལ་པ་དང་ལུང་ཕྲན་ཚེགས་ཀྱི་འགྲེལ་པ་ལ་སོགས་པར་གསུངས་པའི་སྒྱུ་རྩལ་དྲུག་ཅུ་རྩ་བཞི། བྱེ་བྲག་རྟོགས་བྱེད་ལས་འབྱུང་བའི་ཡི་གེ་དང་ལག་རྩིས་ལ་སོགས་པ་བཟོར་གཏོགས་པ་སུམ་ཅུ། གར་མཁན་དང་བྲོ་སོགས་རོལ་མོའི་བྱེ་བྲག་བཅོ་བརྒྱད། བར་མ་དང་དྲང་སྲོང་སོགས་གླུ་དབྱངས་ཀྱི་ངེས་པ་བདུན། སྒེག་པའི་ཉམས་སོགས་གར་གྱི་ཆ་བྱད་དགུ། མདོ་སྡེ་ལས་བཤད་པའི་ཚོང་པ་སོགས་བཟོ་སྦྱངས་བཅོ་བརྒྱད། རིན་པོ་ཆེ་བརྟག་པ་སོགས་བརྟག་པ་རྣམ་པ་བརྒྱད་སོགས་དགོས་དགུ་སྒྲུབ་པའི་ཐབས་ཐམས་ཅད་བཟོ་རིག་གི་ཁོངས་སུ་འདུ་བའི་ཕྱིར་མཐའ་ཡས་པར་གྱུར་མོད། ད་ལྟ་སྤྱི་མིང་བྱེ་བྲག་ལ་བཏགས་ནས་བྲིས་འབུར་ལ་བཟོ་ཞེས་གྲགས་ཤིང་། དེ་ལ་བྲིས་ཀྱི་རྒྱུན་འཇིག་རྟེན་དུ་ཇི་ལྟར་བྱུང་བའི་ཚུལ་ནི། སྔོན་མིའི་རྒྱལ་པོ་འཇིགས་ཐུལ་གྱིས་རྒྱལ་སྲིད་ཆོས་བཞིན་བསྐྱངས་པས་མི་རྣམས་ཚེ་ལོ་འབུམ་དུ་འཕེལ་བའི་དུས་སུ་བྲམ་ཟེ་ཞིག་གི་བུ་དུས་མིན་དུ་ཤི་བས། རྒྱལ་པོས་བྲམ་ཟེ་གཤིན་རྗེའི་རྒྱལ་པོའི་དྲུང་དུ་ཁྲིད་དེ་འདིའི་བུ་ཕྱིར་གཏོད་པར་གསོལ་བས། གཤིན་རྗེ་ན་རེ། རང་གི་ལས་སུ་ཟད་པས་སྟེར་བར་མི་ནུས་ཞེས་སྨྲས་པའི་མཐར་ཕན་ཚུན་གཡུལ་བཤམས་ཏེ་འཐབས་པས་འཇིག་རྟེན་ཐམས་ཅད་སྐྲག་པར་གྱུར་པ་ན། ཚངས་པས་བར་བྱས་ཏེ་བྲམ་ཟེའི་བུ་རི་མོར་བྲིས་པ་གསོན་པོ་ཇི་ལྟ་བ་བཞིན་བསླངས་ནས་བྲམ་ཟེ་ལ་གཏད་དེ་འཐབ་མོ་བཟླུམས་པར་བྱས། སླར་རྒྱལ་པོས་ཚངས་པའི་གན་དུ་སོང་ནས་རི་མོ་འབྲི་ཚུལ་ཞུས་པས། རི་ཡི་མཆོག་ནི་རི་རབ་ཡིན། །སྒོ་ང་ལས་སྐྱེས་རྣམས་ཀྱི་ནི། །གཙོ་བོ་ནམ་མཁའ་ལྡིང་ཡིན་ནོ། །མི་ཡི་གཙོ་བོ་ས་བདག་སྟེ། །དེ་བཞིན་རི་མོ་སྒྱུ་རྩལ་གཙོ། །ཞེས་བསྔགས་ནས་ལྷའི་བཟོ་བོ་བི་ཤྭ་ཀརྨ་ལུང་བསྟན་ཅིང་། དེས་བཟོའི་གནས་ཁྱད་པར་ཅན་བྱས་ཞེས་གྲགས་ལ། སྤྱིར་སྟོན་པ་ཞལ་བཞུགས་དུས་བྲིས་ཀྱི་རྒྱུན་སྟོན་པའི་སྐུ་བརྙན་གཟུགས་ཅན་སྙིང་པོས་ཨུ་དྲ་ཡ་ཎ་ལ་སྐྱེས་སུ་བསྐུར་བ་དང་། བུ་མོ་མུ་ཏིག་འཁྲི་ཤིང་གི་སྐྱེས་ལན་དུ། རས་ཀྱི་གཞིར་རི་མོ་ཅི་ཐོབ་པའི་ཐད་དུ་སྟོན་པའི་སྐུ་ལས་འོད་ཟེར་བཀྱེ་བའི་སྟེང་རི་མོས་
མནན་པའི་བྲིས་རྒྱུན་ཁ་ཆེ་དང་ཡུལ་དབུས་སུ་དར་བར་བཤད་པ་དང་། བྱམས་པས་སྦྱིན་བདག་མཛད་དེ་ལྷའི་བཟོ་བོས་ཇོ་བོ་རིན་པོ་ཆེའི་སྐུ་འདི་བཞེངས་པ་དང་། ཐུགས་རྟེན་ལུམྦིའི་ཚལ་དུ་སྐུ་བལྟམས་པའི་ཚེ་ཟས་གཙང་གིས་མཆོད་རྟེན་བརྩིགས་པ་སོགས་བདེ་བར་གཤེགས་པའི་མཆོད་རྟེན་བརྒྱད་ལ་སོགས་པ་བྱུང་ཞིང་། སྟོན་པ་མྱ་ངན་ལས་འདས་ནས་ལོ་བརྒྱ་ཙམ་གྱི་བར་དུའང་མིའི་བཟོ་བོ་ལས་ཀྱི་འཕྲུལ་དང་ལྡན་པས་སྐུ་གཟུགས་སོགས་ཀྱིས་དངོས་སུ་འཕྲུལ་པ་སྐྱེ་ནུས་པའི་བཟོ་གནས་ངོ་མཚར་བ་དག་བྱེད་པ་བྱུང་ལ། དེ་རྣམས་རིམ་གྱིས་ནུབ་ནས་ལྷའི་བཟོ་བོ་མང་པོ་མིར་སྤྲུལ་ནས་བྱང་ཆུབ་ཆེན་པོ་སོགས་མ་གྷ་དྷའི་རྟེན་ངོ་མཚར་ཅན་བརྒྱད་སོགས་བྱུང་བར་གྲགས། ཕྱིས་རྒྱལ་པོ་སངས་རྒྱས་ཕྱོགས་ཀྱི་དུས་བིམྦ་པ་ར་ཞེས་པས་འབུར་དང་རི་མོའི་བཀོད་པ་ལྷའི་བཟོ་དང་མཐུན་པར་བྱས་པའི་ལག་རྒྱུན་ལ་དབུས་ཀྱི་བཟོར་གྲགས་ལ། རྒྱལ་པོ་ངང་ཚུལ་གྱི་དུས་བྲྀག་དྷཱ་རི་ཞེས་པའི་བཟོ་བོས་གནོད་སྦྱིན་གྱིས་བཞེངས་པ་དང་མཐུན་པའི་བྲིས་འབུར་གྱི་བཀོད་པ་བྱས་པའི་བཟོ་རྒྱུན་ལ་ནུབ་རྙིང་མར་གྲགས་པ་དང་། རྒྱལ་པོ་དཔལ་ལྡན་ཆོས་སྐྱོང་གི་དུས་དྷི་མཱན་ཞེས་པ་དང་། དེའི་བུ་བིཏྤཱ་ལོ་ཞེས་པ་གཉིས་ཀྱིས་ཀླུའི་བཟོ་བོ་དང་མཐུན་པར་བྱས་པའི་བུའི་ལག་རྒྱུན་གྱི་ལུགས་མ་རྣམས་ལ་ཤར་གྱི་ལྷ་དང་། རི་མོ་ནི་ཕའི་ལག་རྒྱུན་ལ་ཤར་རིས་དང་། བུའི་ལག་རྒྱུན་ལ་དབུས་ཀྱི་རི་མོར་ངོས་འཛིན། ཀསྨཱི་རའི་ཡུལ་དུ་ཕྱིས་ཧ་སུ་རཱ་ཛ་ཞེས་པས་བྲིས་འབུར་གཉིས་ཀའི་སྲོལ་གཏོད་པ་ལ་དིང་སང་ཁ་ཆེ་མ་ཞེས་ཟེར་རོ། །བོད་ཀྱི་ཡུལ་འདིར་ནི་སྔོན་བྲིས་འབུར་གཉིས་ཀ་རྒྱ་བལ་གྱི་ལག་རྒྱུན་ཤས་ཆེ་ལ། ཕྱིས་འབུར་བལ་ལྷ་དང་། བྲིས་རྒྱ་ནག་གི་རི་མོ་དང་མཐུན་ཤས་ཆེ་བ་བྱུང་ཞེས་ཟེར་བ་ལྟར་དེ་དང་དེའི་ལུགས་སྲོལ་དང་འདྲ་རུང་དུ་སྣང་མོད། ལར་བཟོ་བོ་སོ་སོའི་ལག་རྩལ་གྱིས་ལག་རྒྱུན་མི་འདྲ་བ་རེ་ཡོང་བ་གཞིར་བཅས། ཡང་རིག་གནས་གཉིས་པ་གསོ་བ་རིག་པ་ནི། ཇི་སྐད་དུ། འདོད་ཆགས་ལ་སོགས་མ་ལུས་པ་ཡི་ནད། །རྗེས་སུ་འབྲེལ་བས་ལུས་ཀུན་ཁྱབ་གྱུར་པ། །ཞེས་འབྱུང་བ་ལྟར། ཉོན་
མོངས་པའི་ལས་ཀྱིས་འཕངས་པའི་རྣམ་སྨིན་གྱི་ལུས་འདི་འབྱུང་བཞི་འདུས་པ་ལས་གྲུབ་པའི་དབང་གིས། འབྱུང་བཞི་ཚ་གྲང་མ་མཐུན་པ་ལ་བརྟེན་ནས་རླུང་མཁྲིས་བད་ཀན་འདུས་པའི་ནད་བཞི་ཟས་དང་སྤྱོད་ལམ་མི་མཐུན་པས་བསྐྱེད་དེ་ཟུག་རྔུའི་ཚོར་བས་གཟིར་བར་བྱེད་ལ། དེ་གསོ་བའི་ཐབས་ནི་གསོ་བའི་རིག་པ་སྟེ། དཔལ་ལྡན་པ་ཁོལ་གྱིས། ཚེ་ནི་རིང་བར་འདོད་པ་ཡིས། །ཆོས་དང་ནོར་དང་བདེ་བ་སྒྲུབ། །ཚེ་ཡི་རིག་བྱེད་ལུང་བཤད་པར། །རབ་ཏུ་གུས་པར་བྱ་བ་གྱིས། །ཞེས་གསུངས། དེ་ལ་གསོ་བྱ་ནད་དང་ནད་པ། གསོ་ཐབས་སྨན་དང་དཔྱད། གསོ་བ་པོ་ནད་གཡོག་དང་སྨན་པ་ཞེས་དོན་གསུམ་དུ་བསྡུ་བའམ། ཡང་ན་སྨན་དང་ནད་པ་ནད་གཡོག་དང་། སྨན་པ་སྟེ་བཞི་ལ་སྐྱོན་བཞི་བཞི་སྤངས་པའི་ཡོན་ཏན་བཞི་བཞི་ལྡན་པ་སྟེ། ཡན་ལག་བརྒྱད་པ་ལས། གསོ་བ་དག་ཏུ་བསྟན་པ་ནི། །སྨན་པ་སྨན་དང་ནད་གཡོག་དང་། །ནད་པ་ཡན་ལག་རྣམ་བཞི་སྟེ། །རེ་རེའང་རྣམ་པ་བཞི་བཞི་ཡིན། །ཞེས་གསུངས་པའི་ཕྱིར་རོ། །དེ་ལ་གསོ་བའི་རིག་པ་འདི་ཇི་ལྟར་བྱུང་བའི་ཁུངས་ལ་བཞི་ལས། སངས་རྒྱས་ཀྱིས་གསུངས་ཚུལ་ནི། འདུལ་བ་ལུང་གི་སྨན་གཞི་ལས། སྨན་རྣམ་པ་བཞིར་ཕྱེ་ནས་བསྟན་ཚུལ་གསུངས་པ་དང་། གསེར་འོད་དམ་པ་ལས། ཟླ་གསུམ་དབྱར་ཏེ་ཟླ་གསུམ་སྟོན་དུ་ཤེས། །ཞེས་སོགས་ཀྱིས་གསུངས་པ་དང་། གསང་སྔགས་ཀྱི་རྒྱུད་སྡེ་རྣམས་སུ། ལུས་ཆགས་ཚུལ་དང་། དེའི་ཁམས་འཁྲུགས་པས་ནད་བསྐྱེད་ཚུལ། དེ་ལ་ཕན་པའི་ཕྱི་དང་ནང་གི་སྨན་དཔྱད་རྒྱས་པར་གསུངས་པ་རྣམས་སོ། །གཉིས་པ་ཚངས་པ་ནས་བརྒྱུད་ཚུལ་ནི། ལྷ་མིན་སྟོབས་ལྡན་གྱིས། རི་རབ་ཀྱིས་སྲུབ་ཤིང་། ཀླུའི་རྒྱལ་པོ་གཉིས་ཀྱིས་སྲུབ་ཐག་བྱས་ནས་ཕྱིའི་རྒྱ་མཚོ་བསྲུབས་པས་ཟླ་ཉི་དང་དུག་དང་བདུད་རྩི་སོགས་བྱུང་བའི་དུག་དབང་ཕྱུག་གིས་འཐུངས་པས་མགྲིན་སྔོན་དུ་སོང་། ཚངས་པས་བདུད་རྩི་ཁྱེར་བ་ལ་སྒྲ་གཅན་གྱིས་འཁོར་ལོ་བསྣུན་པ་དཔྲལ་བའམ་མཁུར་ཚོས་སྣད་ནས་ཡུན་རིང་དུ་བརྒྱལ། དེ་ལས་སོས་ཏེ་དྲན་པ་རྙེད་ནས་ཕན་པའི་ཐབས་བསམས་པས་སྔོན་སངས་རྒྱས་ལས་སྨན་གྱི་རྒྱུད་ཐོས་པ་རྣམས་དྲན་ཞིང་། རྨ་ནང་ནས་ཚེའི་རིག་བྱེད་ཀྱི་ཐོག་མར།
ༀ་ཨ་ཐ། ཞེས་ཐོན་པ་ལ་བརྟེན་ནས་ཚེའི་རིག་བྱེད་ཡན་ལག་དང་བཅས་པ་བྱུང་སྟེ། ཟླ་ཟེར་ལས། ཡི་གེ་ༀ་དང་ཨ་ཐའི་སྒྲས། །གཉིས་པོ་འདི་དག་སྔོན་ཚངས་པའི། །མཁུར་ཚོས་བརྡོལ་ནས་བྱུང་བ་སྟེ། །དེས་ན་འདི་དག་བཀྲ་ཤིས་ཡིན། །ཞེས་སོ། །དེ་ལྟར་ཚངས་པས་རང་གི་ནད་གསོས་ཤིང་སྐྱེ་དགུའི་བདག་པོ་ལ་བསྟན། དེས་སྐར་མ་ཐ་སྐར་གྱི་བུ་རིས་མེད་དང་ལྷར་བཅས་གཉིས་ལ་བཤད། དེ་གཉིས་ཀྱིས་ལྷའི་དབང་པོ་བརྒྱ་བྱིན་ལ་བསྟན་ཏེ་ལྷའི་དྲང་སྲོང་དུ་མ་ལ་བརྒྱུད་དོ། །གསུམ་པ་རྒྱ་གར་དུ་དར་ཚུལ་ནི། སྟོན་པ་བཞུགས་པའི་ཚེ་རྒྱལ་པོ་གཟུགས་ཅན་སྙིང་པོའི་ཟུར་བུ་ཆུང་བ་རང་གི་ཕུ་བོ་གཞོན་ནུ་འཇིགས་མེད་ཀྱིས་གསོས་པས་སྨན་པའི་རྒྱལ་པོ་འཚོ་བྱེད་གཞོན་ནུས་གསོས་ཞེས་བྱ་བ་མིའི་དྲང་སྲོང་རྒྱུན་ཤེས་ཀྱི་སློབ་མ་སྟེ་འདུལ་བ་ལུང་གི་གོས་གཞིའི་སྐབས་ལས། ཐུབ་པ་བསྙུན་གསོའི་སྨན་པའི་རྒྱལ་པོར་དབང་བསྐུར་བ་ལ་སོགས་པའི་ལོ་རྒྱུས་རྒྱས་པར་འབྱུང་ཞིང་། ཁྱད་པར་འཕགས་པའི་ཡུལ་དུ་ཤིང་རྟའི་སྲོལ་འབྱེད་སློབ་དཔོན་དཔའ་བོས་ཡན་ལག་བརྒྱད་པ་ཆེན་པོ་དང་དེའི་སྙིང་པོ་བསྡུས་པ་སོགས་མཛད། དེ་ལ་ཁ་ཆེ་ཟླ་དགས་འགྲེལ་པ་ཟླ་ཟེར་མཛད་ཅིང་དར་རོ། །བཞི་པ་བོད་དུ་ཇི་ལྟར་དར་ཚུལ་ནི། སངས་རྒྱས་བྱང་སེམས་དང་ལྷ་མིའི་དྲང་སྲོང་རྣམས་ཀྱིས་མཛད་པའི་སྨན་གཞུང་རྒྱ་གར་རྒྱ་ནག་ཧོར་གེ་སར་ཡུལ་རྣམས་ནས་ལོ་ཆེན་བཻ་རོ་ལ་སོགས་པས་བོད་དུ་བསྒྱུར་བ་དང་། ཡན་ལག་བརྒྱད་པ་རྩ་འགྲེལ་རིན་ཆེན་བཟང་པོས་བསྒྱུར་བཤད་ཀྱིས་གཏན་ལ་ཕབ་ཅིང་། དེ་ལ་བརྟེན་ནས་སྟོན་པ་སྨན་གྱི་བླ་མ་དང་དབྱེར་མ་མཆིས་པ་གཡུ་ཐོག་པ་ཆེན་པོ་ཡོན་ཏན་མགོན་པོས་ཉི་ཟླ་ལྟར་ཡོངས་སུ་གྲགས་པའི་རྒྱུད་བཞི་སྤེལ་ཏེ་སྐྱེ་དགུའི་བསོད་ནམས་ཀྱི་ཉེར་འཚོར་གསལ་བ་འདིའོ། །རིག་གནས་གསུམ་པ་སྒྲ་རིག་པ་ནི། སྤྱིར་སྨྲ་བ་ཀུན་ལ་འཇུག་པར། ཟིན་པ་དང་ནི་མ་ཟིན་དང་། །གཉིས་ཀ་དག་ལས་བྱུང་བའི་སྒྲ། །སེམས་ཅན་སྟོན་དང་མི་སྟོན་དག །ལུང་དུ་སྟོན་དང་མི་སྟོན་པའོ། །ཞེས་པས་སྤྱི་སྒྲ་ནི། ཟིན་པ་དང་། མ་ཟིན་པ་དང་། གཉིས་ཀ་ལས་བྱུང་བའམ། ཡང་ན་སེམས་ཅན་དུ་སྟོན་པ་དང་མི་སྟོན་པ་གཉིས་ཏེ། སྟོན་པ་ལའང་ཚིག་
ཏུ་ལྷུང་བ་དང་མ་ལྷུང་བའི་སྒོ་ནས་རིམ་པ་ཇི་ལྟ་བར་ལུང་དུ་སྟོན་པ་དང་མི་སྟོན་པ་རྣམས་ལས། འདིར་ནི་ཟིན་པ་སེམས་ཅན་དུ་སྟོན་ཅིང་། ཚིག་ཏུ་ལྷུང་བའི་སྒོ་ནས་ལུང་སྟོན་པས་ན། བྱཱ་ཀ་ར་ཎ་ཞེས་ལུང་དུ་སྟོན་པའམ། བརྡ་སྤྲོད་པ་ཞེས་གྲགས་པ། དེའི་བརྗོད་བྱ་ཐུན་མོང་པ་ནི་ཚོགས་པ་གསུམ་སྟེ། སྨྲ་བ་རྒྱན་གྱི་མེ་ཏོག་ལས། ངོ་བོ་ཙམ་དང་ཁྱད་པར་སྟོན། །དེ་གཉིས་རྟེན་དུ་གྱུར་པ་ནི། །མིང་དང་ཚིག་དང་ཡི་གེ་ཡིན། །ཞེས་པས་ཡི་གེ་དང་། མིང་དང་། ཚིག་གི་ཚོགས་པའོ། །འདི་གསུམ་མངོན་པའི་ལུགས་ལྟར་ན་ཕན་ཚུན་འགལ་བ་ཅན་ཏེ། སློབ་དཔོན་བློ་གྲོས་བརྟན་པས་མངོན་པ་ཕུང་པོ་ལྔའི་བཤད་པར། དོན་གྱི་ངོ་བོ་བརྗོད་པ་མིང་། །དེ་ཡི་ཁྱད་པར་སྟོན་པ་ཚིག །གང་ཡང་མི་སྟོན་ཡི་གེའོ། །ཞེས་གསུངས་པས་དོན་གྱི་ངོ་བོ་ཙམ་སྟོན་པ་མིང་། དེའི་ཁྱད་པར་བ་སྟོན་པ་ཚིག །གང་ཡང་མི་སྟོན་པའི་འབྲུ་ནི་ཡི་གེའོ། །སྒྲ་པའི་ལུགས་ལ་དེ་གསུམ་མི་འགལ་བའི་སྐབས་སྲིད་དེ། ནི་པཱ་ཧའི་སྐབས་སུ། ཨ་ཨི་ཨུ་རྣམས་ཡི་གེ་ཡིན་ཏེ། དབྱངས་ཡིན་པའི་ཕྱིར། མིང་ཡིན་ཏེ། ཨ་ཁྱབ་འཇུག །ཨི་བདུད། ཨུ་དབང་ཕྱུག་རྣམས་ཀྱི་མིང་ཡིན་པའི་ཕྱིར། ཚིག་ཡིན་ཏེ། མིང་རྣམ་དབྱེའི་མཐའ་ཅན་ཡིན་པའི་ཕྱིར་རོ། །དེ་ལ་ཡི་གེ་ནི་བརྗོད་འདོད་ཀྱིས་ཀུན་ནས་བསླངས་པས་གནས་དང་བྱེད་པ་དང་། རྩོལ་བ་རྣམས་འཕྲད་པ་ལས་སྐྱེས་པའི་སྐད་གདངས་འབའ་ཞིག་པ་སྟེ། དཔང་ལོ་ཆེན་པོས། བརྗོད་འདོད་དབང་གིས་རླུང་གཡོས་ཤིང་། །དེ་ཡིས་གནས་དང་བྱེད་པ་དང་། །རྩོལ་བ་བསྐྱེད་དང་དབུགས་དབྱུང་དང་། །ལྷན་ཅིག་ཡི་གེའི་གདངས་རྣམས་སྐྱེ། །ཞེས་པ་སྟེ། མཚན་གཞི་ནི་ཨཱ་ལི་དང་། ཀཱ་ལིའི་ཡི་གེ་ཡིན་ལ། དེ་ཡང་རྒྱ་ནག་གི་ཡུལ་དང་མི་ཉག་པ་སོགས་ལ་ཡི་གེའི་ཚོགས་པ་མེད་པས་ཡིག་གཟུགས་ལ་ཐུག་པ་མེད་ཅིང་། རྒྱ་བལ་དང་བོད་ཡུལ་སོགས་སུ་ཡི་གེ་དབྱངས་གསལ་གཉིས་སུ་བསྡུས་ཏེ་བཤད་པས་མིང་ཚིག་གསར་དུ་བྱུང་ཡང་ཡི་གེ་སྦྱོར་བ་ལ་དཀའ་བ་མེད་དོ། །མིང་ནི། ཡི་གེ་འདུས་པ་ལས་བྱུང་བའི་བརྗོད་བྱའི་དོན་གྱི་ངོ་བོ་ཙམ་རྗོད་པར་བྱེད་པའི་སྒྲ་སྤྱི་སྣང་བ་སྟེ། ཀ་བ་དང་བུམ་པ་ཞེས་པ་ལྟ་བུའོ། །དེ་ལྟར་ཡང་། ཡི་གེ་གཉིས་སམ་མང་འདུས་པས། །དོན་གྱི་ངོ་བོ་རྗོད་
བྱེད་པ། །མིང་ཡིན་དོན་ལ་བློ་གཞོལ་ཕྱིར། །ཞེས་སོ། །དབྱེ་ན་དང་པོར་བརྡ་སྦྱར་བ་དངོས་མིང་དང་། འདྲ་འབྲེལ་གང་རུང་རྒྱུ་མཚན་དུ་བྱས་ནས་ཕྱིས་བརྡ་སྦྱར་བ་བཏགས་མིང་ངོ་། །ཚིག་ནི། མིང་དུ་མ་འདུས་པ་ལས་བྱུང་བ་དོན་གྱི་ཁྱད་པར་སྟོན་པའི་སྒྲ་སྤྱི་སྣང་བ་སྟེ། ཙནྡན་གྱི་ཀ་བའམ། གསེར་གྱི་བུམ་པ་ཞེས་པ་ལྟ་བུའོ། །ཁྱད་པར་སྒྲ་པའི་ལུགས་ལ། ཨ་མ་ར་ཀོ་ཥ་ལས། རྗོད་བྱེད་བསྟན་བཅོས་སྒྲ་ལ་ནི། །པུས་དང་ཏིང་གི་མཐའ་ཅན་ཚིག །ཅེས་སོ། །ཡང་བརྡ་སྤྲོད་པའི་ལུགས་ཀྱི་བརྗོད་བྱ་ཐུན་མོང་མ་ཡིན་པ་ནི། རང་བཞིན་དང་། རྐྱེན་དང་། རྣམ་འགྱུར་གསུམ་གྱིས་བསྡུས་ཏེ། བརྡའ་སྤྲོད་སྙིང་པོ་གསལ་བ་ལས། རང་བཞིན་རྐྱེན་དང་རྣམ་འགྱུར་རྣམས། །བརྡ་སྤྲོད་གཞུང་གི་བརྗོད་བྱ་ཡིན། །ཞེས་སོ། །དེ་ལ་རང་བཞིན་ནི། རྐྱེན་གྱི་དབང་གིས་རྣམ་འགྱུར་སྣ་ཚོགས་སུ་བསྒྲུབ་པར་བྱ་བའི་གཞིར་གྱུར་པ་སྟེ། རང་བཞིན་བྱིངས་དང་མིང་དེ་ལའང་། །ཐོག་མའི་རང་བཞིན་བྱ་བའི་དོན། །རྟགས་གསུམ་དབྱངས་དང་གསལ་བྱེད་མཐའ། །ཞེས་པས། ཐོག་མའི་རང་བཞིན་ནི་བྱིངས་ཏེ། བྱ་བའི་དོན་ཞེས་ཀྱང་བྱ་ཞིང་། དབྱེ་ན་གསུམ་སྟེ། བྷུ་ཡོད་པ་ལའོ། །ཞེས་སོགས་བྱིངས་མདོ་ལེའུ་དགུ་ནས་བཤད་པ་རྣམས་ནི་གླེགས་བམ་ལས་བྱུང་བའི་བྱིངས་དང་། ཀུན་བཤད་ལེའུ་གཉིས་པ་ནས་བཤད་པའི་སན་སོགས་བདུན་གྱི་མཐའ་ཅན་ནི་རྐྱེན་གྱིས་བཅོས་པའི་བྱིངས་དང་། ཛུ་མདོའི་བྱིངས་སོགས་སྒྲ་མདོའི་ཟུར་ནས་རྙེད་པ་རྣམས་ལ་མདོའི་བྱིངས་ཞེས་ཟེར་རོ། །རང་བཞིན་གཉིས་པ་མིང་ནི་སྒྲ་པའི་ལུགས་འདིར་རྟགས་སུ་གྲགས་ཏེ། བྱིངས་དང་རྣམ་དབྱེ་བོར་བའི་དོན་དང་ལྡན་པ་ནི་རྟགས་སོ། །ཞེས་པས་བྱིངས་ལ་ཀྲྀཏ་རྐྱེན་བྱིན་ཞིང་རྣམ་དབྱེ་མ་བྱིན་པའི་བར་སྐབས་ཀྱི་སྒྲའི་ཡན་ལག་ཅིག་ལ་ངོས་འཛིན་ཅིང་། དབྱེ་ན་ཕོ་མོ་མ་ནིང་གི་རྟགས་གསུམ་སོ་སོ་བ་དང་། ཐུན་མོང་བ་སྟེ་མིང་ཞི་ཞེས་བྱ་སྟེ། བྲྀཀྵ་ལྟ་བུ་དབྱངས་ཀྱི་མཐའ་དང་། བིདྷུ་ཏ་ལྟ་བུ་གསལ་བྱེད་ཀྱི་མཐའ་ཅན་གཉིས་སུ་ངེས་སོ། །གཉིས་པ་རྐྱེན་ནི་སྒྲའི་རང་བཞིན་གཉིས་མིང་ཚིག་བྱིངས་གསུམ་གང་རུང་དུ་སྒྲུབ་པར་བྱེད་པའི་སྒྲའི་ཡན་ལག་ལ་རྐྱེན་ཞེས་བྱ་སྟེ། ཀུན་ཤེས་ལས། རྐྱེན་ལ་མཚན་ཉིད་རང་བཞིན་རྣམ་འགྱུར་དུ། །སྒྲུབ་པར་བྱེད་པ་སྒྲ་ཡི་ཡན་
ལག་ཟེར། །ཞེས་སོ། །དབྱེ་ན། ཀྲྀཏ་རྐྱེན་དང་ཨུཎ་སོགས་བྱིངས་རྟགས་སུ་སྒྲུབ་པའི་རྐྱེན། ཏི་སོགས་བྱིངས་ཚིག་ཏུ་སྒྲུབ་པའི་རྐྱེན། ཡིན་དང་ཨཱ་ཡི་མ་གཏོགས་པའི་སན་སོགས་བྱིངས་བྱིངས་སུ་སྒྲུབ་པའི་རྐྱེན། བུད་མེད་ལ་ཨ་ལས་ཨཱ་པ྄འོ་ཞེས་སོགས་རྟགས་རྟགས་སུ་སྒྲུབ་པའི་རྐྱེན། མིང་ལས་རང་དང་འབྲེལ་བ་ཡི། །མིང་གཞན་སྒྲུབ་པ་དེ་ཕན་ཏེ། །ཞེས་མིང་མིང་དུ་སྒྲུབ་པར་བྱེད་པ་དེ་ཕན། ཡིན་དང་ཨཱ་ཨི་སོགས་རྟགས་བྱིངས་སུ་སྒྲུབ་པའི་རྐྱེན། སི་སོགས་རྟགས་ཚིག་ཏུ་སྒྲུབ་པའི་རྐྱེན་དང་བདུན་ཡོད་ལ། དེ་ལས་ཀྱང་སི་སོགས་དང་ཏི་སོགས་ནི་རྐྱེན་དང་རྣམ་དབྱེའི་གཞི་མཐུན་ཏེ། སྔ་མས་མིང་ཚིག་ཏུ་སྒྲུབ་པའི་སྒོ་ནས་དོན་རྣམ་པར་འབྱེད་པའི་ཕྱིར་དང་། ཕྱི་མས་བྱིངས་ཚིག་ཏུ་སྒྲུབ་པའི་སྒོ་ནས་དུས་དང་དོན་རྣམ་པར་འབྱེད་པའི་ཕྱིར་རོ། །གསུམ་པ་རྣམ་འགྱུར་ནི། རང་བཞིན་རྐྱེན་དང་འབྲེལ་བའམ། །ཡི་གེ་ཙམ་དང་འབྲེལ་བ་ཡི། །བསྒྱུར་དང་དབྱི་བ་རྣམ་འགྱུར་ཏེ། །ཞེས་པས་མིང་ལེ། ཀུན་བཤད། ཀྲྀཏ་རྣམས་སུ་བཤད་པའི་བསྒྱུར་བ་དང་དབྱེ་བ་རྣམས་ནི་རང་བཞིན་རྐྱེན་དང་འབྲེལ་བའི་རྣམ་འགྱུར་ཡིན་ལ། མཚམས་སྦྱོར་ལས་བཤད་པའི་བསྒྱུར་དབྱི་རྣམས་ནི་ཡི་གེ་ཙམ་དང་འབྲེལ་བའི་རྣམ་འགྱུར་རོ། །དེ་དག་སྟོན་པའི་གཞུང་ལུགས་ཀྱང་། ཨིནྡྲ་བྱཱ་ཀ་ར་ཎ། སི་ཤ་ལི་བྱཱ་ཀ་ར་ཎ། ཤ་ཀཽ་ཊ་ཡ་ན་བྱཱ་ཀ་ར་ཎ། པཱ་ཎི་བྱཱ་ཀ་ར་ཎ། སུ་མནྟ་བྷ་དྲ་བྱཱ་ཀ་ར་ཎ། པ་ཏཉྫ་ལི་བྱཱ་ཀ་ར་ཎ། མ་ནུ་ཛེནྡྲ་བྱཱ་ཀ་ར་ཎ་ཞེས་པཱ་ཎི་པའི་འགྲེལ་པར་དྲངས་ལ། རྒྱ་བོད་ཀྱི་མཁས་པ་སྤྱི་ལ་གྲགས་པར། པཱ་ཎི་བྱཱ་ཀ་ར་ཎ། འཇམ་དཔལ་གྱི་བྱཱ་ཀ་ར་ཎ། ཨིནྡྲ་བྱཱ་ཀ་ར་ཎ། ཀ་ལཱ་པ་དང་། ཙནྡྲ་པ། དབྱངས་ཅན་བྱཱ་ཀ་ར་རྣམས་ལས་ཨིནྡྲ་བྱཱ་ཀ་ར་ཎ་མ་གཏོགས་བོད་དུ་འགྱུར་ཞིང་། ཁྱད་པར་ཀ་ཙན་གཉིས་ནི་གངས་ཅན་གྱི་རྨོངས་མུན་སེལ་བ་ལ་ཉི་ཟླ་ཟུང་འབྲེལ་ལྟ་བུར་གྱུར་པ་ཡིན་ནོ། །སྒྲ་རིག་པ་ཇི་ལྟར་བྱུང་བའི་ཁུངས་ལ་བཞི་ལས། དང་པོ་འཕགས་པས་གསུངས་ཚུལ་ནི། སྟོན་པ་སངས་རྒྱས་ཀྱིས་སོ་སོ་ཡང་དག་རིག་པ་བཞིའི་ནང་ནས། གསུམ་པ་ངེས་ཚིག་འཆད་པའི་དུས་དང་། རྔ་བོ་ཆེའི་མདོར་རང་བཞིན་རྐྱེན་རྣམ་འགྱུར་རྣམས་དང་། དེ་དག་གི་ཉེར་མཁོའི་མིང་དང་ཆ་ལག་ཀྱང་མཚོན་ཏེ་གསུངས་ཤིང་།
བྱང་སེམས་འཕགས་པས་གསུངས་པ་ནི། དུས་འཁོར་འགྲེལ་ཆེན་ལས། འཇམ་དཔལ་གྱིས་རང་གི་ལུང་སྟོན་པ་ལས་བྲིས་པ། ཞེས་འཇམ་དཔལ་བྱཱ་ཀ་ར་ཎ་བསྟན་པ་དང་། པཱ་ཎི་པ་དང་དབྱངས་ཅན་མ་གཉིས་ཀྱང་བྱང་འཕགས་ཀྱིས་གསུངས་པར་བགྲངས་ན་འབྲེལ་ཏེ། སྔ་མ་ནི་འཕགས་པ་སྤྱན་རས་གཟིགས་ཀྱིས་བྲམ་ཟེ་པཱ་ཎི་པ་ལ་གསུངས་པ་ཡིན་ལ། ཕྱི་མ་ནི་འཕགས་མ་དབྱངས་ཅན་མས་ཨ་ནུ་བྷཱུ་ཏི་ལ་དངོས་སུ་གསུངས་པའི་ཕྱིར་རོ། །གཉིས་པ་ལྷའི་ཡུལ་དུ་དར་ཚུལ་ནི། སུམ་ཅུ་རྩ་གསུམ་དུ་སརྦ་ཛྙཱ་ཞེས་པའི་སྒྲ་མཁན་མཁས་པ་ཞིག་བྱུང་སྟེ། དེས་སྒྲའི་བསྟན་བཅོས་ཆེན་པོ་བྱས་པ་ལྷའི་ཡུལ་དུ་དར་ཞེས་གྲགས། དེ་ལ་བརྒྱ་བྱིན་གྱིས་བསླབས། དེས་སྒྲ་མཁན་ཕུར་བུ་ལ་བཤད་ནས། ཕུར་བུ་ལྷ་རྣམས་ཀྱིས་སློབ་དཔོན་དུ་བསྐོས། དེའི་ཚེ་ཕུར་བུ་ང་རྒྱལ་ཆེ་བས་ལྷ་རྣམས་ཀྱིས་བསྟེན་དཀའ་བ་ན། བརྒྱ་བྱིན་གྱིས་ཆུ་བུམ་ལས་ཀུ་ཤའི་རྩེས་ཐིགས་པ་བླངས་ཏེ། སྒྲ་ཡི་བསྟན་བཅོས་རྒྱ་མཚོ་ཙམ། །ཁོ་བོས་ཤེས་པ་བུམ་གང་ཙམ། །ཁྱོད་ཀྱིས་ཤེས་པ་ཆུ་ཐིགས་ཙམ། །ཞེས་སྨྲས་པས་ཕུར་བུ་ཡི་ཆད་དེ་སྒྲ་མི་སྟོན་པར་དམ་བཅས་པ་ན། དབང་པོས་རང་གིས་ཇི་ཙམ་ཤེས་པ་སྟོན་ཅིག །ཅེས་བསྒོས་པས་རང་སྦྱོང་བའི་ཆེད་དུ་དུས་གཉན་བཞི་བསྲུངས་ནས་ལྷ་གཞན་ལ་བསྟན་པས་སྒྲ་མཁན་ནམ་ལྷའི་བླ་མ་ཞེས་གྲགས་སོ། །གསུམ་པ་རྒྱ་གར་དུ་བྱོན་ཚུལ་ནི། པཱ་ཎི་བྱཱ་ཀ་ར་ཎ་འཇིག་རྟེན་དུ་མ་ཕེབས་གོང་དུ་སྒྲ་སྦྱོར་དུམ་ཀ་བསགས་ནས་སྦྱོང་བ་ལས་གཅིག་ཏུ་བསྡེབས་པའི་བསྟན་བཅོས་མེད་པར་གྲགས། དེ་ནས་བྲམ་ཟེ་པཱ་ཎི་ནས་ས་སྟེང་གི་སྒྲ་མཁན་ཐམས་ཅད་ལས་རིག་པ་བསླབས། ཁྱད་པར་འཕགས་པ་སྤྱན་རས་གཟིགས་བསྒྲུབས་པས་གྲུབ་སྟེ། འཕགས་པས་ཡི་གེའི་བསྡུ་བ་གསུངས་པ་ཙམ་གྱིས་འཇིག་རྟེན་གསུམ་ན་ཡོད་པའི་སྒྲའི་གནས་ཐམས་ཅད་ཁོང་དུ་ཆུད་དེ། པཱ་ཎི་བྱཱ་ཀ་ར་ཎ་ཞེས་ཤླཽ་ཀ་ཉིས་སྟོང་ཡོད་པ་ཞིག་མཛད་དོ། །དེ་རྗེས་རྒྱལ་པོ་ཙནྡྲ་སྐྱོང་གི་དུས་བྲམ་ཟེ་ཨིནྡྲ་དྷུ་ཝ་ཞེས་བྱ་བས་བརྒྱ་བྱིན་བསྒྲུབས་ཏེ། དབང་པོས་ཇི་ལྟར་བཤད་པ་བཞིན་བྲིས་པ་ལྷས་བསྟན་པའི་བརྡ་སྤྲོད་དམ་ཨིནྡྲ་བྱཱ་ཀ་ར་ཎ་ཞེས་ཤློ་ཀ་ཉིས་སྟོང་ལྔ་བརྒྱ་ཡོད་པར་གྲགས། དེའི་འོག་ཏུ་
གཞོན་ནུ་ཀཱརྟི་ཀས་བྲམ་ཟེ་སཔྟ་ཝརྨ་ལ་བསྟན་པ་ཀ་ལཱ་པ་དང་། སློབ་དཔོན་ཙནྡྲ་གོ་མིས་པཱ་ཎིའི་དོན་འགྲེལ་དུ་ཙནྡྲ་བྱཱ་ཀ་ར་ཎ་མཛད། དེ་རྗེས་མཁས་པ་སྒོ་དྲུག་དང་དུས་མཚུངས་པར་སྒྲ་དབྱངས་ལྷ་མོས་ཨ་ནུ་བྷཱུ་ཏི་ལ་དབྱངས་ཅན་བྱཱ་ཀ་ར་ཎ་གསུངས་པ་ཡིན་ནོ། །བཞི་པ་བོད་དུ་བསྒྱུར་ཚུལ་ནི། ཤོང་དཔང་གཉིས་ཀྱིས་ཀ་ཙན་དང་ཆོས་སྐྱོང་བཟང་པོས་འཇམ་དཔལ་གྱི་བྱཱ་ཀ་ར་ཎ། ཇོ་ནང་ལོ་ཙ་བ་ཕྱི་མས་དབྱངས་ཅན་མ། འདར་ལོས་དེ་ལ་འགྱུར་བཅོས་དང་པཱ་ཎི་པ་གཞི་འགྱུར་དུ་མཛད་པ་ཡིན་ནོ། །རིག་གནས་བཞི་པ་ཚད་མ་རིག་པ་ནི། ཀུན་བཏུས་ལས། མངོན་སུམ་དང་ནི་རྗེས་སུ་དཔག །ལྟར་སྣང་བཅས་པ་བདག་རིག་བྱེད། །སྒྲུབ་པ་དང་ནི་སུན་འབྱིན་དག །ལྟར་སྣང་བཅས་པ་གཞན་རྟོགས་བྱེད། །ཅེས་གསུངས་པ་ལྟར། རྟོག་གེའི་ཚིག་དོན་བརྒྱད་དེ། མངོན་སུམ། རྗེས་དཔག །སྒྲུབ་ངག །ཐལ་འགྱུར་བཞི་པོ་རེ་རེ་ལ་ཡང་། ཡང་དག་དང་ལྟར་སྣང་གཉིས་གཉིས་སུ་ཕྱེ་བའི་ཕྱིར་རོ། །དེའང་བསྡུ་ན། རང་གི་གཞལ་བྱ་རྟོགས་པའི་ཐབས་དང་། རྟོགས་ནས་གཞན་རྗེས་སུ་འཛིན་པའི་ཐབས་ཏེ་གཉིས་སུ་འདུ་ཞིང་། དེ་ཡང་། ཚད་མ་བསླུ་མེད་ཅན་ཤེས་པ། །ཞེས་པས་ཚད་མའི་དོན་མི་བསླུ་བ་སྟེ། རང་གི་གཞལ་བྱ་ལ་མ་འཁྲུལ་བའི་འཇལ་བྱེད་ཅིག་ལ་འཇོག་པ་ཡིན་པའི་ཕྱིར། དཔེར་ན་བྲེ་ཚད་དང་སྲང་ཚད་བཞིན་ནོ། །གཞལ་བྱ་ལ་གསུམ་སྟེ། མངོན་གྱུར། ལྐོག་གྱུར། ཤིན་ཏུ་ལྐོག་གྱུར་རོ། །དེ་དག་འཇལ་བྱེད་ནི། གཞལ་བྱ་མངོན་གྱུར་འཇལ་བྱེད་ལ་མངོན་སུམ་བཞི་སྟེ། དབང་པོ། ཡིད། རང་རིག །རྣལ་འབྱོར་མངོན་སུམ་མོ། །ལྐོག་གྱུར་གྱི་འཇལ་བྱེད་དང་སྒྲུབ་བྱེད་ནི། དངོས་སྟོབས་རྗེས་དཔག་གི་གཏན་ཚིགས་གསུམ་སྟེ། ཆོས་བཅུ་པའི་མདོར། དུ་བ་ལས་ནི་མེར་ཤེས་དང་། །ཆུ་སྐྱར་ལས་ནི་ཆུ་ཤེས་ལྟར། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །ཞེས་གསུངས་པ་ལྟར་འབྲས་བུའི་གཏན་ཚིགས་དང་། རྣམ་འགྲེལ་དུ། ཅུང་ཟད་སྐྱེ་བའི་མཚན་ཉིད་ཅན། །གང་དེ་ཐམས་ཅད་འགག་ཆོས་ཅན། །ཞེས་པ་ལྟ་བུ་རང་བཞིན་གྱི་གཏན་ཚིགས་དང་། ཚད་མ་རྣམས་ནི་མི་འཇུག་པར། །མེད་ལ་མི་
འཇུག་འབྲས་བུ་ཅན། །གཏན་ཚིགས་བྱེ་བྲག་ལ་ལྟོས་ནས། །འགའ་ཞིག་ཡེ་ཤེས་འབྲས་བུ་ཅན། །ཞེས་པ་ལྟ་བུ་མི་དམིགས་པའི་གཏན་ཚིགས་རྣམས་སོ། །གཞལ་བྱ་ཤིན་ཏུ་ལྐོག་གྱུར་གྱི་གཏན་ཚིགས་ནི། མངོན་སུམ་དང་། དངོས་སྟོབས་ཀྱི་གཏན་ཚིགས་གཉིས་ཀས་མི་འགྲུབ་པའི་ཕྱིར། དཔྱད་གསུམ་དག་པའི་ལུང་ཉིད་ལ་བརྟེན་ནས་རྟོགས་དགོས་པ་ཡིན་ནོ། །ཚད་མ་རིག་པ་ཇི་ལྟར་བྱུང་བའི་ལོ་རྒྱུས་ལ་གསུམ་ལས། དང་པོ་སངས་རྒྱས་ཀྱིས་གསུངས་ཚུལ་ནི། དགེ་སློང་དག །མིག་གི་རྣམ་པར་ཤེས་པས་སྔོན་པོ་ཤེས་ཀྱི་སྔོན་པོའོ་སྙམ་དུ་མ་ཡིན་ནོ། །ཞེས་པའི་སྔོན་པོ་ཤེས་ཀྱི་ཞེས་པ་ཡན་གྱིས་མ་འཁྲུལ་བའི་རིག་པ་དེ་བསྟན། སྔོན་པོའོ་སྙམ་དུ་ནི་མ་ཡིན་ནོ་ཞེས་པས། རྟོག་བྲལ་དེ་བསྟན་པས་མངོན་སུམ་མཚན་ཉིད་གསལ་བར་གསུངས། ཡང་། དགེ །་སློང་དག་གཟུགས་ཤེས་པ་ནི་རྣམ་པ་གཉིས་ཏེ། མིག་དང་ཡིད་ལ་བརྟེན་པའོ། །ཞེས་པའི་མིག་དང་ཞེས་པས་དབང་མངོན་དང་། ཡིད་ལ་བརྟེན་པའོ་ཞེས་པས་ཡིད་མངོན་བསྟན། སེམས་ལ་སེམས་མ་མཆིས་ཏེ། སེམས་ཀྱི་རང་བཞིན་འོད་གསལ་བའོ། །ཞེས་པས་རང་རིག་མངོན་སུམ་བསྟན། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག །ཅེས་པས་རྣལ་འབྱོར་མངོན་སུམ་བསྟན། དེ་ལྟར་མངོན་སུམ་བཞི་ག་དང་། རྗེས་དཔག་ཐམས་ཅད་ཀྱི་རྟེན་གཏན་ཚིགས་གསུམ་ཀ་མདོ་ལས་གསུངས་ཚུལ་སྔར་བཤད་པ་ལྟར་རོ། །གཉིས་པ་ལ་མཁས་པས་བཀྲལ་ཚུལ་ནི། སྟོན་པ་ནས་བརྒྱུད་དེ། དགྲ་བཅོམ་པ་ཆོས་སྐྱོབ། །དེས་པཎ་ཆེན་མེ་ཝ་མ་ག །དེས་མཁས་མཆོག་དབྱིག་གཉེན་ལ་གསུངས་ཤིང་། དེས་གཞོན་ནུའི་དུས་སུ་རྩོད་སྒྲུབ་ཏུ་གྲགས་པའི་ཚད་མའི་བསྟན་བཅོས་ཀྱང་མཛད། དབྱིག་གཉེན་ལ་རང་མཁས་ཀྱི་སློབ་མ་བཞི་བྱུང་བའི། ཚད་མ་རང་ལས་མཁས་པ་ནི་ཕྱོགས་ཀྱི་གླང་པོ་སྟེ། དེས་འཇམ་དབྱངས་ཀྱིས་དངོས་སུ་དབུགས་ཕྱུང་ནས་བརྩམས་པ་ཚད་མ་མདོ་དང་། དེའི་དགོངས་འགྲེལ་དུ། ཕྱོགས་གླང་གི་སློབ་མ་དབང་ཕྱུག་སྡེ་ལས་དཔལ་ལྡན་ཆོས་ཀྱི་གྲགས་པས་གསན་ནས། ཚད་མ་སྡེ་བདུན་མཛད་དེ། རྒྱས་པ་རྣམ་འགྲེལ། འབྲིང་རྣམ་ངེས། བསྡུས་པ་རིག་ཐིག་སྟེ་གཙོ་བོ་ལུས་ལྟ་བུའི་
བསྟན་བཅོས་གསུམ་དང་། དེ་ལས་འཕྲོས་པ་བཞི་ནི། རང་དོན་རྗེས་དཔག་ལས་འཕྲོས་པ་གཏན་ཚིགས་ཐིགས་པ་དང་། འབྲེལ་བ་བརྟག་པ། གཞན་དོན་རྗེས་དཔག་ལས་འཕྲོས་ཏེ། རྒྱུད་གཞན་གྲུབ་པ་དང་། རྩོད་པའི་རིགས་པ་སྟེ་ཡན་ལག་གི་བསྟན་བཅོས་བཞིའོ། །གསུམ་པ་བོད་དུ་འགྱུར་ཚུལ་ནི། བསྟན་པ་སྔ་དར་གྱི་དུས་སུ་སྡེ་བདུན་ཕྱི་མ་འགའ་དང་། དུལ་ལྷའི་འགྲེལ་པ་སོགས་འགྱུར། ཕྱི་དར་ལ་རྨ་དགེ་བློས་མདོ་དང་རྣམ་འགྲེལ་རྣམ་ངེས་འགྲེལ་ཆེན་དང་བཅས་པ་བསྒྱུར་ཅིང་། ཁྱད་པར་རྔོག་ལོ་ཆེན་པོས་གསར་འགྱུར་དང་འགྱུར་བཅོས་དུ་མ་མཛད་ནས་འཆད་ཉན་གྱིས་གཏན་ལ་ཕབ། རྣམ་འགྲེལ་ནི་རྣམ་ངེས་ལ་ལྟོས་ནས་བཤད་རྒྱུན་མ་ནུབ་ཙམ་དུ་གནས་པ་ལས། ཕྱིས་ཆོས་རྗེ་ས་པཎ་གྱིས་རྩལ་དུ་བཏོན་ནས་བསྒྱུར་བཤད་གཏན་ལ་ཕབ། འཕགས་པ་རིན་པོ་ཆེས་གསང་ཕུར་རྣམ་འགྲེལ་གྱི་ཚད་རྒྱགས་སྦྱར་བ་སོགས་ཀྱིས་ཤིན་ཏུ་རྒྱས་པར་གྱུར་པ་ཡིན་ནོ། །རིག་གནས་ལྔ་པ་ནང་རིག་པ་ནི། བརྗོད་བྱའི་དབང་དུ་བྱས་ན་ཐེག་པ་གསུམ་མམ་དགུ་སྟེ། དེ་ལ་ཐེག་པ་གསུམ་ནི། ཉན་ཐོས། རང་རྒྱལ། བྱང་སེམས་ཐེག་པ་གསུམ་མམ། ཡང་ན། དགོངས་འདུས་ལས། དོན་དམ་ངེས་པའི་ཐེག་པ་ནི། །གསུམ་དུ་ངེས་པར་བསྟན་པ་སྟེ། །ཀུན་འབྱུང་འདྲེན་དང་དཀའ་ཐུབ་རིག །དབང་བསྒྱུར་ཐབས་ཀྱི་ཐེག་པའོ། །ཞེས་གསུངས། ཐེག་པ་དགུ་ནི། གསུམ་པོ་དེ་རེ་རེ་ལའང་གསུམ་གསུམ་དུ་ཕྱེ་བ་སྟེ། ཉན་རང་བྱང་སེམས་གསུམ་ལ་མཚན་ཉིད་སྡེ་གསུམ་མམ་ཀུན་འབྱུང་འདྲེན་པའི་ཐེག་པ་དང་། ཀྲྀ་ཡ། ཨུ་པ་ཡ། ཡོ་ག་གསུམ་ལ་དཀའ་ཐུབ་རིག་བྱེད་ཀྱི་ཐེག་པ་ཞེས་ཕྱི་རྒྱུད་གསུམ་དང་། མ་ཧཱ་ཡོ་ག །ཨ་ནུ་ཡོ་ག །ཨ་ཏི་ཡོ་ག་གསུམ་ལ་དབང་བསྒྱུར་ཐབས་ཀྱི་ཐེག་པ་ཞེས་ནང་རྒྱུད་གསུམ་མོ། །དེ་ཐམས་ཅད་ཀྱང་གཞི་ཆོས་ཉིད་རིས་མེད་ལ། སོ་སོའི་དབང་པོས་རྟོགས་ཚུལ་གྱི་ལྟ་བ་ལ་དམིགས་ནས་ཐོས་བསམ་སྒོམ་པའི་ཤེས་རབ་གསུམ་ལ་བརྩོན་པས། རང་རང་གི་འདོད་པའི་གྲུབ་འབྲས་རྣམ་གྲོལ་གྱི་རིམ་པ་མི་བསླུ་བར་ཐོབ་པ་ཞིག་ཡིན་ནོ། །རྗོད་བྱེད་ཀྱི་དབང་དུ་བྱས་ན། ཐེག་དམན་དང་ཐེག་ཆེན་གྱི་དབྱེ་བས་གཉིས་སམ། བསླབ་པ་
གསུམ་ལ་ལྟོས་ནས་གསུམ་སྟེ། ལྷག་པ་ཚུལ་ཁྲིམས་ཀྱི་བསླབ་པ་གཙོ་བོར་སྟོན་པ་འདུལ་བའི་སྡེ་སྣོད། ལྷག་པ་ཏིང་ངེ་འཛིན་གྱི་བསླབ་པ་གཙོ་བོར་སྟོན་པ་མདོ་སྡེའི་སྡེ་སྣོད། ལྷག་པ་ཤེས་རབ་ཀྱི་བསླབ་པ་གཙོ་བོར་སྟོན་པ་མངོན་པའི་སྡེ་སྣོད་དང་གསུམ་སྟེ། མདོ་སྡེ་རྒྱན་ལས། སྡེ་སྣོད་དག་ནི་གསུམ་མམ་གཉིས་ཀྱང་རུང་། །ཞེས་གསུངས་པའི་ཕྱིར་རོ། །འོ་ན་གསང་སྔགས་ཀྱི་རྒྱུད་རྣམས་སྡེ་སྣོད་གང་དུ་བསྡུ་ཞེ་ན། པཎྜི་ཏ་ཆེན་པོ་བི་མ་ལ་ལ་སོགས་མངོན་པའི་སྡེ་སྣོད་དུ་བཞེད་པ་དང་། ཤཱནྟི་པ་སོགས་ཟབ་མོའི་དོན་མདོར་བསྡུས་ཏེ་སྟོན་པས་མདོ་སྡེའོ་ཞེས་མདོ་སྡེར་བསྡུ་བ་སོགས་ལའང་འགལ་བ་མ་མཆིས་འདྲ། འོན་ཀྱང་མཁས་པ་སྤྱིའི་བཞེད་པ་ལྟར་ན། སྡེ་སྣོད་བཞི་པའམ་རིག་པ་འཛིན་པའི་སྡེ་སྣོད་རྐང་ཐུབ་གཅིག་ཏུ་འདྲེན་པ་མཛད་དེ། ཀུན་བྱེད་ལས། ཐམས་ཅད་འདུལ་བའི་གཉེན་པོར་གསུངས་པ་ནི། །སྡེ་སྣོད་བཞི་པ་ཉི་ཁྲི་ཆིག་སྟོང་གསུངས། །ཞེས་པ་དང་དགོངས་པ་མཐུན་ནོ། །ནང་རིག་པ་ཇི་ལྟར་བྱུང་བའི་ཁུངས་ལ་གསུམ་ལས། དང་པོ་སྟོན་པས་གསུངས་ཚུལ་ནི། སྟོན་པ་ཡང་དག་པར་རྫོགས་པའི་སངས་རྒྱས་ཀྱིས་རང་སྣང་དག་པའི་ཞིང་དང་། གཞན་སྣང་དག་མ་དག་འདྲེས་པའི་ཞིང་དང་། མ་དག་པའི་ཞིང་ལྷ་དང་མིའི་གནས་ལ་སོགས་པར་མདོ་དང་རྒྱུད་སྡེ་གསུངས་པ་མཐའ་ཡས་ཤིང་བརྗོད་དུ་མ་མཆིས་མོད། ཞིང་འདིར་སྟོན་པ་འཚང་རྒྱ་བའི་ཚུལ་བསྟན་ནས། དངོས་པོར་ཞེན་པའི་སེམས་ཅན་ལས་དང་པོ་པ་རྣམས་དྲང་བའི་དོན་དུ་སྤང་གཉེན་ལ་བླང་དོར་བྱེད་པ་གཙོ་བོར་སྟོན་པ་བདེན་བཞིའི་ཆོས་འཁོར་དང་། གཉེན་པོ་ལ་མངོན་པར་ཞེན་པ་དགག་པའི་ཕྱིར་ཆོས་ཐམས་ཅད་རང་བཞིན་མེད་པར་སྟོན་པ་མཚན་ཉིད་མེད་པའི་ཆོས་འཁོར་དང་། ཆོས་ཐམས་ཅད་ཀྱི་གཤིས་ལུགས་ཇི་ལྟ་བ་བཞིན་གཏན་ལ་ཕབ་སྟེ་སྟོན་པ་དོན་དམ་རྣམ་པར་ངེས་པའི་ཆོས་འཁོར་ཏེ། དེ་ལྟར་ཆོས་ཀྱི་འཁོར་ལོ་གསུམ་བསྐོར་བར་མཛད་དོ། །གཉིས་པ་སྡུད་བྱེད་རྣམས་ཀྱིས་ཇི་ལྟར་བསྡུས་ཚུལ་ནི། ཐུན་མོང་བ་ཉེ་བ་འཁོར། ཀུན་དགའ་བོ། འོད་སྲུངས་ཆེན་པོ་རྣམས་ཀྱིས་སྡེ་སྣོད་གསུམ་བསྡུས་པ་དང་པོ་དང་། ཡངས་པ་ཅན་གྱི་དགེ་སློང་རྣམས་ཀྱིས་མི་རུང་བའི་གཞི་བཅུ་བྱས་པ་དགྲ་
བཅོམ་པ་གྲགས་པ་སོགས་ཀྱིས་སུན་ཕྱུང་ནས་བཀའ་བསྡུ་གཉིས་པ་མཛད། དགེ་སློང་ལྷ་ཆེན་པོ་རྗེས་འབྲང་དང་བཅས་པས་བསྟན་པ་དཀྲུགས་པས་དགེ་འདུན་ཐམས་ཅད་རྩོད་པར་གྱུར་པས་རིམ་གྱིས་སྡེ་པ་བཞི་དང་། དེ་ཡང་བཅོ་བརྒྱད་དུ་གྱེས་པའི་རྗེས་སུ་རྒྱལ་པོ་ཀ་ནིཥྐས་སྦྱིན་བདག་བྱས་ཏེ། བྱང་ཆུབ་སེམས་དཔའ་ལྔ་བརྒྱ། དགྲ་བཅོམ་པ་ལྔ་བརྒྱ། བཙུན་པ་ཆེན་པོ་ཁྲི་དྲུག་སྟོང་འདུས་ཏེ། རྒྱལ་པོ་ཀྲི་ཀྲིའི་རྨི་ལམ་ལུང་བསྟན་པའི་མདོ་དྲངས་ནས་གྱེས་པ་བཅོ་བརྒྱད་པོ་བསྟན་པ་རྣམ་དག་ཏུ་བསྒྲུབས་ཤིང་འདུལ་བ་ཡི་གེར་བཀོད། མདོ་སྡེ་དང་མངོན་པ་སྔར་ཡི་གེར་མ་འཁོད་པ་དག་ཀྱང་སྐབས་འདིར་ཡི་གེར་བཀོད་པ་ནི་བཀའ་བསྡུ་གསུམ་པའོ། །ཐུན་མོང་མ་ཡིན་པ་ནི། རྒྱལ་སྲས་འབུམ་ཕྲག་བཅུ་འདུས་ནས་སྡེ་སྣོད་གསུམ་བྱམས་པ་འཇམ་དབྱངས་ཕྱག་རྡོར་གསུམ་གྱིས་བསྡུས་པ་དང་། སངས་རྒྱས་སྟོང་གི་བཀའི་སྡུད་པ་པོ་ཕྱག་ན་རྡོ་རྗེ་ཡིན་པར་གསུངས་པ་སོགས་མཐའ་ཡས་སོ། །གསུམ་པ་བསྡུས་པའི་དོན་བཤད་སྒྲུབ་ཀྱི་སྒོ་ནས་ཇི་ལྟར་བཟུང་ཚུལ་ནི། འཕགས་ཡུལ་དུ་རྒྱན་དྲུག་མཆོག་གཉིས་དང་། རྨད་བྱུང་གི་སློབ་དཔོན་གཉིས་དང་། རྣམ་གནོན་ཚུལ་གྱིས་བསྔགས་པའི་སློབ་དཔོན་བཅུ་གཉིས་དང་། གྲུབ་ཐོབ་བརྒྱད་ཅུ་དང་། རིག་འཛིན་བརྒྱད་སོགས་པཎ་གྲུབ་རྣམས་ཀྱིས་བཤད་སྒྲུབ་ཀྱི་སྒོ་ནས་ལེགས་པར་བཟུང་ཞིང་། གངས་ཅན་གྱི་ལྗོངས་འདིར་བསྟན་པ་སྔ་དར་གྱི་དུས་སུ། སློབ་དཔོན་ཆེན་པོ་པདྨ་འབྱུང་གནས། མཁན་པོ་བོ་དྷི་སཏྭ། སློབ་དཔོན་བི་མ་ལ་མི་ཏྲ། ཀ་མ་ལ་ཤཱི་ལ། ཛི་ན་མི་ཏྲ་སོགས་པཎ་གྲུབ་དང་། ལོ་ཆེན་བཻ་རོ་ཙ་ན། རྨ་གཉགས་སྐ་ཅོག་ཞང་གསུམ་སོགས་ཀྱིས་ལོ་ཙཱ་བྱས་ཏེ་རྒྱལ་བློན་བྱང་ཆུབ་སེམས་དཔའ་རྣམས་ཀྱི་བདག་རྐྱེན་ལ་བརྟེན་ནས་མདོ་སྔགས་ཀྱི་ཆོས་ཚུལ་དཔག་ཏུ་མེད་པ་ཞིག་བསྒྱུར་བཤད་ཀྱིས་གཏན་ལ་ཕབ། བར་དུ་བླ་ཆེན་པོའི་མཁན་བརྒྱུད་ཀྱིས་བསྟན་པ་ཉམས་པ་གསོས། ཐ་མར་ཇོ་བོ་རྗེ་དཔལ་ལྡན་ཨ་ཏི་ཤ་སོགས་པཎྜི་ཏ་མང་པོ་དང་། སྐྱེས་མཆོག་རིན་ཆེན་བཟང་པོ། ས་རྔོག་མར་མལ་འགོས་སོགས་ལོ་ཙཱ་བ་མང་པོས་འགྱུར་བཅོས་དང་གཞི་འགྱུར་ཉན་བཤད་ཀྱིས་གཏན་ལ་ཕབ་ཅིང་། དེ་དག་གི་དོན། ས་ཞལ་བུ་གསུམ།
རྗེ་རིན་པོ་ཆེ་ཡབ་སྲས། ཁྱད་པར་གངས་ཅན་གྱི་ལྷ་གཅིག་ཐམས་ཅད་མཁྱེན་པ་ཆེན་པོ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེ་ཞེས་སྲིད་པ་གསུམ་ན་འགྲན་ཟླ་དང་བྲལ་བ་དེ་ཉིད་ཀྱི་སྐུ་དྲིན་ལས། གངས་ཅན་གྱི་ལྗོངས་འདིར་མདོ་སྔགས་གསར་རྙིང་གི་བསྟན་པ་རིས་མེད་པ་མི་ནུབ་པའི་ཉི་མ་དང་། མི་འགྲིབ་པའི་ཟླ་བ་ལྟར་གསལ་ཞིང་རྒྱས་པར་གྱུར་པ་ཐམས་ཅད་ཀྱི་དགོངས་པ་རིན་པོ་ཆེར་མངའ་བ་ལྟར་ལགས་ཤིང་། སླད་དུའང་བསྟན་པའི་དཔལ་གྱུར་བླ་མ་དམ་པ་རྣམས་ཞབས་ཀྱི་པདྨོ་བརྟན་ཅིང་། བསྟན་འཛིན་གྱི་སྐྱེས་བུས་ནོར་འཛིན་གྱི་ཁྱོན་མ་ལུས་པ་ཡོངས་སུ་གང་བ་དང་། བསྟན་པ་བླ་ནས་བླར་མཆོད་པར་མཛད་པའི་བསྟན་པའི་སྦྱིན་བདག་ཆེན་པོ་སྐུ་འཁོར་དང་བཅས་པའང་ཆབ་སྲིད་བརྟན་ཅིང་མངའ་ཐང་དང་འབྱོར་པ་དབྱར་གྱི་མཚོ་བཞིན་དུ་རྒྱས་པས་གངས་ཅན་གྱི་འགྲོ་བ་ཐམས་ཅད་བདེ་སྐྱིད་ཀྱི་དཔལ་བསྐལ་པ་རྫོགས་ལྡན་གྱི་དུས་བཞིན་དུ་སྤྱོད་པ་དང་། དེ་དག་གི་མཐུ་ལས་འདི་ལྟ་བུའི་བཀྲ་ཤིས་དགེ་མཚན་མངོན་པར་འཛོམ་པའི་དུས་དགེ་བ་ལ་ཞལ་མངོན་པར་འཛོམ་པའི་སྟོན་འཁོར་ཐམས་ཅད་ཡང་ནས་ཡང་དུ་ཕུན་སུམ་ཚོགས་པའི་དགའ་སྟོན་ལ་གཅིག་ཏུ་འདུས་ནས། ལེགས་བཤད་ཀྱི་འབེལ་གཏམ་འབོལ་ཆིལ་ལེ་བ་ཞུས་ཆོག་པའི་བཀྲ་ཤིས་ཀྱི་ཉི་མ་གུང་ནས་འཆར་བར་གྱུར་ཅིག་ཅེས་ཆེད་དུ་བརྗོད་པ་ནི། བསྟན་པའི་དཔལ་གྱུར་བླ་མའི་ཞབས་པད་བརྟན། །སོགས་བརྗོད་དོ།། །།