དཔལ་གསང་བའི་སྙིང་པོའི་རྒྱུད་འགྲེལ་གསེར་གྱི་ལྡེ་མིག་གི་ཟབ་མོའི་སྒོ་བརྒྱ་འབྱེད་པའི་དཀའ་བའི་གནད་ལ་བརྒལ་བརྟག་གི་རིམ་པ་སྤྲོས་པ་འོད་ཀྱི་མཚོན་ཆ། གཅུང་ངག་དབང་ཆོས་གྲགས།
དཔལ་གསང་བའི་སྙིང་པོའི་རྒྱུད་འགྲེལ་གསེར་གྱི་ལྡེ་མིག་གི་ཟབ་མོའི་སྒོ་བརྒྱ་འབྱེད་པའི་དཀའ་བའི་གནད་ལ་བརྒལ་བརྟག་གི་རིམ་པ་སྤྲོས་པ་འོད་ཀྱི་མཚོན་ཆ་ཞེས་བྱ་བ། གཅུང་ངག་དབང་ཆོས་གྲགས།
དཔལ་གསང་བའི་སྙིང་པོའི་རྒྱུད་འགྲེལ་གསེར་གྱི་ལྡེ་མིག་གི་ཟབ་མོའི་སྒོ་བརྒྱ་འབྱེད་པའི་དཀའ་བའི་གནད་ལ་བརྒལ་བརྟག་གི་རིམ་པ་སྤྲོས་པ་འོད་ཀྱི་མཚོན་ཆ་ཞེས་བྱ་བ།
འདིར་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལེའུ་སྟོང་ཕྲག་བརྒྱ་པ་ལས། མཚན་ཉིད་དང་རྒྱུད་ཐམས་ཅད་ཀྱི་ལུང་གི་སྤྱི། དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་གསང་བ་ལས་ཀྱང་ཆེས་གསང་བ་དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་རྒྱལ་པོའི་བརྒལ་ལན་གྱི་རྣམ་བཞག་ཅུང་ཟད་འགོད་པའི་དབང་དུ་བགྱིས་ན། ཁོག་གཞུང་གསལ་སྒྲོན་ལས། ཕས་ཀྱི་ལན་གདབ་འབྲུ་སྣོན་ཚིག །ཁོག་དབུབ་ས་བཅད་བཞི་རུ་གསུང་། །ཞེས་པས། དང་པོར་སྤྱི་དོན་གྱིས་ཁོག་དབུབ། བར་དུ་དཀྱུས་ཀྱིས་ས་བཅད། ཐ་མར་ཚིག་གིས་འབྲུ་གཞོམ། གནས་སྐབས་ཁྲིའུར་བརྒལ་ལན་གྱིས་གཏན་ལ་དབབ་པ་ལས། རེ་ཞིག་ཕྱི་མའི་རྗེས་སུ་འབྲངས་ཤིང་། བཤད་ཐབས་འདྲེན་པའི་ཚིག་བཅུ་ལས། གཏར་ཁ་གེགས་སེལ་གྱི་ཚིག་གིས་བསྙད་དོ། །དེའང་ཐོག་མར་དོགས་བྱུང་གི་གནས་རྣམས་ངག་དོན་དུ་དྲིལ་ན་ངེས་སྦྱིན་གེགས་སེལ་གྱི་ཚད་མ་འབྱིན་སླ་བའི་སྤྱིར་འཇུག་སྒོ་དང་པོའི་ཕྱོགས་བརྗོད་པར་བྱ་སྟེ། འདི་ལ་གཉིས། ཁུངས་ལ་ཡིད་ཆེས་བསྐྱེད་ཕྱི ར་སྔོན་བྱུང་གི་ལོ་རྒྱུས་ལ་དཔྱད་པ་དང་། ཁུངས་ལྡན་གྱི་བརྗོད་དོན་དངོས་ལ་དཔྱད་པའོ། །དང་པོ་ལ། སྟོན་པས་ཇི་ལྟར་གསུང་ཚུལ་དང་། དེ་ལས་ཇི་ལྟར་བརྒྱུད་ཚུལ་ལ་དཔྱད་པའོ། །དང་པོ་ནི། ཉི་སེང་དང་སྒེག་རྡོར་གྱི་བཞེད་ཚུལ་གཉིས་ངོས་འཛིན་གྱི་ཕྱོགས་བཟུང་ཐ་དད་ཙམ་ལས་དགོངས་པའི་གནད་གཅིག་པས་དོན་ལ་འགལ་བ་མེད་ཀྱང་། བརྒྱུད་པའི་བཀའ་སྲོལ་ཕྱི་མ་ལྟར་བཟུང་ངོ་གསུང་།
དེ་ལ་འདི་ལྟར་གདུལ་བྱའི་སྣང་ཚོད་དུ་ཆེས་འགལ་བ་ལྟར་མངོན་པ་ལ་དེ་བཞིན་གཤེགས་པའི་རྣམ་འཕྲུལ་གྱི་ཡུལ་བསམ་གྱིས་མི་ཁྱབ་པར་གྲུབ་པའི་གནད་གསང་མངོན་དུ་ཕྱུང་དགོས་པའི་ཕྱིར་འཇོག་མཚམས་གཉིས་དེར་ཡང་མ་ངེས་པ་དང་། སྤར་ཁབ་ཀྱི་བཤད་ཚུལ་བརྒྱུད་པའི་མན་ངག་ཏུ་འཛིན་པ་ལ་མི་ཡུལ་དུ་སྤྲུལ་སྐུས་ལམ་སྟེགས་ཀྱི་ཐེག་པ་ཙམ་ལས་མ་ཧཱ་ཡོ་གའི་རྒྱུད་མ་གསུངས་པར་འདོད་དམ་མི་འདོད། དང་པོ་ལྟར་ན། རྒྱུད་ཉིད་ལས། བླ་ན་མེད་པའི་ཐེག་པ་དང་ཞེས་དང་། དེའང་རྒྱུད་སྡེ་འོག་མ་རྣམས་ལ་དགོངས་པ་མིན་ཚུལ། སྤྱན་འགྲེལ་ལས། ཐབས་ཀྱི་རྒྱུད་དུ་ལམ་ཐུན་མོང་པ་རྣམས་འདུས་པ་སྟེ། ཞེས་སོགས་གསུངས་པ་དང་འགལ། གཉིས་པ་ལྟར་ན་དགོངས་འདུས་ལས། ངེས་པའི་ཐེག་པ་ཡོངས་མ་གསུངས། ཞེས་དང་། ང་ནི་འདི་ནས་མི་སྣང་ནས། །ཞེས་སོགས་གསུངས་པ་དང་འགལ་བར་དོགས་སོ། །གཉིས་པ་ལ། བརྒྱུད་པ་གསུམ་གྱི་རྣམ་བཞག་སྤྱིའི་གོ་དོན་ལ་དཔྱད་པ་དང་། དེ་སོ་སོའི་ངོས་འཛིན་ལ་དཔྱད་པའོ། །དང་པོ་ནི། སྔོན་བྱུང་གི་དབང་དུ་བྱས་ཏེ། ཁྱད་པར་ཅན་གྱི་གླེང་གཞིའི་སྒྲ་ཇི་བཞིན་པའི་ཕྱོགས་ལྟར་སྟོན་འཁོར་དགོངས་པ་གཅིག་པའི་བརྒྱུད་ཚུལ་དང་ལེའུ་གཉིས་པར་སྟོན་པས་འཁོར་ལ་ཟབ་དབང་བསྐུར་ནས་རྟོག་པའི་དྲི་མ་བསལ་བར་གསུངས་པའི་དགོངས་པ་དང་བསྒྲིགས་ཏེ་སྟོན་པ་ལས་རྒྱུད་གཞན་དུ་གྱུར་པའི་ལྷན་ཅིག་པའི་འཁོར་ལ་ཟབ་དགོངས་གཏད་པས་དགོངས་པ་དབྱེར་མེད་དུ་གྱུར་ཚུལ་གྱིས་དགོངས་བརྒྱུད་དུ་འཇོག་པ་དེའི་ཚེའི་སྟོན་པ་སྐུ་ལྔས་འཁོར་ལྔ་ལ་གསུང་ལྔའི་སྒོ་ནས་རང་བཞིན་གསང་བའི་སྙིང་པོའི་དོན་སྟོན་པའི་རྣམ་བཞག་འདོད་དུ་རུང་བ་གང་ཞིག སྤྲུལ་སྐུ་མ་གཏོགས་པའི་སྐུ་བཞིའི་འཁོར་ལའང་ཞེན་སྣང་ཕྲ་བ་ཅི་རིགས་གཅད་རྒྱུ་ཡོད་པ་རང་ལུགས་ཀྱི་བཞེད་པར་གནས་ན་བརྒྱུད་ཚུལ་ཕྱི་མའི་ཕྱོགས་དང་འགྲིགས་མོད། སྔ་མ་དང་བསྟུན་ཚེ་སྟོན་པའི་ཐུགས་རྒྱུད་ལའང་ཤེས་སྒྲིབ་ཕྲ་མོ་ཡོད་པར་ཁས་ལེན་དགོས་པ་མི་འགྱུར་རམ་སྙམ་མོ། །དེ་རྗེས་འཇུག་གི་ཚུལ་དང་སྦྱར་ན། ལམ་པའི་གང་ཟག་ཅིག་གིས་རང་བཞིན་སྙིང་པོའི་རྒྱུད་
དོན་མཐར་ཐུག་བརྙེས་པ་ན། རོ་མཉམ་རྡོ་རྗེའི་ཕུང་ཁམས་སྐྱེ་མཆེད་ཀྱི་ལྡོག་ཆ་ལས་སོ་སོར་འཕྲུལ་བའི་གཤེགས་པ་གཤེགས་མ་སེམས་དཔའ་ཡབ་ཡུམ་ལ་སོགས་པ་ཐམས་ཅད་དེ་མཐུན་བརྙེས་པར་འཇོག་ནུས་པས་དེའི་རྣམ་བཞག་ཆོག་ཀྱང་། སྤྱིར་སེམས་ཅན་ཐམས་ཅད་ལ་གཞིར་གནས་གདོད་མའི་སངས་རྒྱས་ཀྱི་གདུང་རྒྱུན་ཆགས་སུ་གྲུབ་པ་དེར་འཇོག་གམ་བརྟག་གོ །སེམས་དཔའ་རིག་བརྒྱུད་ཅེས་པ་ནི། འཆད་པ་པོའི་བརྡ་ཐབས་ཙམ་ལ་བརྟེན་ནས་འཁོར་གྱིས་རྟོགས་པ་ཞིག་ཡིན་མོད་དགོངས་པ་དོན་བརྒྱུད་ཀྱི་ཚུལ་ཕྱི་མ་དང་ཁྱད་པར་ཅི་ཞིག་བཞག ཕར་ཕྱིན་ཐེག་པའི་ལུགས་སུ་ས་བཅུའི་བྱང་སེམས་རྣམས་བྱིན་རླབས་གཉིས་ཀྱིས་ལོངས་སྐུའི་ཞལ་མཐོང་ཞིང་། རང་གི་སྒྲིབ་པ་ངོས་ཟིན་པའི་ཚུལ་ལང་ཀར་གཤེགས་པ་སོགས་ལས་གསུངས་པ་དང་མི་འདྲ་བའི་གནད་ངོས་འཛིན་པ་ན་ཐུན་མོང་བ་ལའང་བརྡ་བརྒྱུད་ཀྱི་རྣམ་བཞག་ཙམ་ཞིག་ཡོད་པར་འདོད་དམ་སྟེ་དགོངས་བརྒྱུད་ཀྱང་དེ་ལྟར་རོ། །སངས་རྒྱས་ལའང་སེམས་དཔའི་མཚན་ནས་སྨོས་པ་འབྱུང་བའི་ཕྱིར་དེ་དགོངས་རིག་གི་བརྒྱུད་ཕྱོགས་གང་དུ་བཟུང་བར་སེམས། ཡང་ལམ་པ་འགའ་ཞིག་ཡུལ་སྣང་གི་བརྡ་ཙམ་ལ་བརྟེན་ནས་སྔོན་བྱུང་གི་ཚུལ་དུ་སོང་བ་དེ་རིག་བརྒྱུད་དུ་བཞག་ཚེ། འཆད་པ་པོ་དང་པོ་ནས་རིག་སྔགས་ཀྱི་ལྷར་བཞེངས་པར་ངེས་དགོས་སམ་དཔྱད་དོ། །རྣལ་འབྱོར་རྣ་བརྒྱུད་དུ་རྒྱུད་དོན་མཐར་ཐུག་ཡོད་དམ་མེད། དང་པོ་ལྟར་ན་དྲོད་ཅི་རིགས་ཐོབ་པས་ཀྱང་རྒྱུད་དོན་མཐར་ཐུག་བརྙེས་པར་འགྱུར་བ་དང་། གཉིས་པ་ལྟར་ན་འདི་ལས་ཕྱི་རོལ་དུ་གྱུར་པ་ལའང་རྣ་རྒྱུད་ཁྱད་པར་བ་ཡོད་དགོས་ཏེ། དེ་དག་རང་རང་གི་ཐེག་པར་སྣང་ཙམ་དུ་ ཟད་པས་སྙིང་པོའི་རྒྱུད་དོན་འདི་ལས་གཞན་དུ་མ་གྱུར་པའི་ཕྱིར་རོ། །སློབ་དཔོན་པདྨ་ལྟ་བུ་ཐུན་མོང་གདུལ་བྱའི་སྣང་ཚོད་དབང་བཙན་དུ་བྱས་ནའང་མཐའ་གཅིག་ཏུ་སྙན་བརྒྱུད་དུ་མ་ངེས་པ་དང་། གཞན་ཡང་བརྗོད་མ་ཐག་པའི་རྒྱལ་བ་སེམས་དཔའ་རྣལ་འབྱོར་ཞེས་པའི་སྒྲ་ནི་བརྒྱུད་པ་གསུམ་ནང་ཕན་ཚུན་མི་འདྲེས་པའི་སྲོག་ཏུ་བཟུང་དགོས་པའི་ཕྱིར། དེ་རྣམས་སྟོན་པའམ་འཁོར་རམ་དབྱེར་མེད་ཀྱི་ཚུལ་ཇི་ལྟ་བུའི་ངོས་ནས་སྨོས་པ་དང་། དེར་
མ་ཟད་རྒྱལ་སེམས་གང་ཟག་རེ་རེར་ཡང་བརྒྱུད་པ་གསུམ་ཀའི་རྣམ་བཞག་འཇོག་ཏུ་ཡོད་ཚུལ་མདོ་རྒྱུད་དུ་མའི་དགོངས་པར་བཞེད་པས་བཞག་མཚམས་མ་གྲུབ་པར་དོགས་སོ། །གཉིས་པ་ནི། ཟུར་ཉ་རི་བའི་བཞེད་པའི་ཕྱོགས་ཞལ་ལུང་དུ་བཀོད་པ་བཞིན་དང་། གླན་ཉ་ཚལ་བ་ནི་མི་དང་མི་མ་ཡིན་གཉིས་ཀ་ལ་བརྒྱུད་པའི་འཕྲོ་ལ་གང་ཟག་རྣ་བརྒྱུད་གསུངས་ཤིང་། ཀུན་མཁྱེན་ཆོས་རྗེས་བོད་ཀྱི་རིམ་བརྒྱུད་ནས་སྙན་རྒྱུད་དུ་མཛད་དེ། དེ་དག་སོ་སོའི་དགོངས་དོན་གྱི་ཁོག་བསྒྲིགས་ཚུལ་ནི་ཞིབ་ཏུ་དཔྱད་པའི་གནས་སོ། །ཟ་ཧོར་གྱི་ཡུལ་ལམ་རྒྱལ་པོ་ཛའི་ཁང་སྟེང་དུ་གསང་སྔགས་ཀྱི་རྒྱུད་སྡེའི་གླེགས་བམ་བབས་ཞེས་པའི་གླེགས་བམ་རྣམས་གསང་བདག་གིས་རི་མ་ལ་ཡའི་རྩེར་ཆོས་འཁོར་བསྐོར་བའི་བྱིན་རླབས་དང་། རྒྱལ་པོ་ཉིད་ཀྱང་སྔོན་སྦྱངས་ལས་འཕྲོ་སད་མཐུས་སྣང་བ་དཔེ་ཆར་ཤར་ཞིང་། དེའང་ཐུན་མོང་གི་སྣང་ཚོད་དུ་དངོས་སུ་བབས་པ་ལྟ་བུར་སྣང་བ་ཞིག་གམ། སྲིན་པོ་བློ་གྲོས་ཐབས་ལྡན་གྱིས་ཡི་གེ་པར་བྱས་ནས་དབྱིངས་ལ་རྒྱས་བཏབ་པར་གསུངས་པའི་རྗེས་སུ་འབྲངས་ཏེ་དེ་དངོས་སུ་བབས་པར་འཇོག དང་པོ་ལྟར་ན་གོང་མ་དག་གི་རྣམ་བཤད་དང་འགལ་ཞིང་། ཕྱི་མ་ལྟར་ན་དེ་མཚུངས་ཕྱག་རྡོར་གྱི་སྐུའང་གང་བྱུང་བརྟག་དགོས་སོ། །འདིས་ནི་ཡི་གེ་པའི་ངོས་འཛིན་ཡང་རྟོགས་པར་མངོན་ནོ། །ཡང་འདི་ལྟར་སྒྱུ་འཕྲུལ་དབུས་ལུགས་པ་དང་ཁམས་ལུགས་པ་ཞེས་པའི་བཀའ་སྲོལ་གཉིས་སུ་བགྱིས་པ་དེ། དར་རྗེ་དཔལ་གྲགས་དབུས་གཙང་དང་ཁམས་སུ་བྱོན་ནས་སྤེལ་བ་བཀའ་ཡོངས་གྲགས་པར་གྲགས་པའི་དང་། ཞང་རྒྱལ་ཡོན་གྱིས་གཙུག་གྱེར་གཉིས་དང་ཁུའི་བཤད་བཀའ་གཙོ་བོར་བཟུང་བའི་སྒྱུ་འཕྲུལ་གདམས་ངག་ལུགས་སམ་ནོར་བུ་ལུགས་དང་། བཀའ་ཕྱོགས་སྐྱོང་མ་དང་གནས་ལས་བཏགས་པ་མཆིམས་ཕུ་མར་ཡང་གྲགས་པ་དེ་རིམ་བཞིན་སྒྲོ་ཕུག་པའི་བར་དུ་བརྒྱུད་ཅིང་། དེས་བྱང་སྟོན་རྣམ་དག་ལ་བཤད་དེ། དེ་ནས་བརྒྱུད་པ་ལ་ཁམས་ལུགས་དང་། དཀྱུས་ཀྱི་བརྒྱུད་པ་དབུས་གཙང་དུ་གནས་པ་ལ་དབུས་ལུགས་སུ་འཇོག་པའི་ཚེ་ཡོངས་གྲགས་པ་དང་ཕྱོགས་སྐྱོང་མའི་དབུས་ཁམས་ཀྱི་ལུགས་གཉིས་གཉིས་ཞེས་བཏགས་
དགོས་སམ་སྙམ་མོ། །འོན་ཀྱང་དར་རྗེ་ལས་ནི་རོང་ཀློང་པའི་ལུགས་ཀྱི་བརྒྱུད་པའང་འབྱུང་བར་སྣང་ཞིང་མཁས་པའི་གསུང་སྒྲོས་ལ་ཁམས་ལུགས་སུ་འགོད་པར་མཛད་པ་དང་བསྟུན་ན་བཀའ་ཡོངས་གྲགས་པའི་ཁམས་ལུགས་དང་ཕྱོགས་གཅིག་གམ་ཞེས་པ་དང་། ད་ལྟ་རང་ཅག་གི་བརྒྱུད་པ་འདི་ལུགས་གཉིས་སོ་སོར་ངོས་འཛིན་རུང་ངམ་དཔྱད་པར་བྱའོ། །གཉིས་པ་ལ། བཤད་བྱ་འཆད་བྱེད་གཉིས་ཀྱི་རྣམ་བཞག་ལ་དཔྱད་པ་དང་། དེ་འཆད་ཚུལ་དང་བཅས་ཏེ་རྒྱུད་དོན་དངོས་ལ་དཔྱད་པའོ། །དང་པོ་ནི། རང་ཤར་ལས། ནང་པ་ལ་ནི་གསུམ་དུ་འདོད། །མ་ཧཱ་ཨ་ནུ་ཨ་ཏིའོ། །ཞེས་པས་སྤྱིར་ནང་པ་ཐབས་ཀྱི་ཐེག་པ་ལ་རྒྱུད་མ་ཧཱ། ལུང་ཨ་ནུ། མན་ངག་ཨ་ཏི་གསུམ་ཏུ་ཡོད་པའི་ཁྱད་པར་ནི། སྤྱོད་པ་ཏིང་ངེ་འཛིན་ལྟ་བ་གསུམ་རིམ་བཞིན་གཙོ་ཆེར་སྟོན་པས་སམ། བསྐྱེད་པ་རྫོགས་པ་དེ་གཉིས་ལས་གྲོལ་བའི་རིམ་པས་མ་ཧཱ་ཨ་ནུ་ཨ་ཏིའམ། བསྐྱེད་རྫོགས་གཙོར་སྟོན་མ་ཧཱ་དང་ཨ་ནུ་དེ་གཉིས་ཀྱི་རྩོལ་བ་དང་བྲལ་བ་རྫོགས་ཆེན་ཞེས་སམ། གདུལ་བྱ་ཞེ་སྡང་ཆེ་ཞིང་རྟོག་པ་མང་བ་དང་འདོད་ཆགས་ཆེ་ཞིང་སེམས་གནས་པ་ལ་དགའ་བ་དང་གཏི་མུག་ཆེ་ཞིང་བྱ་རྩོལ་ཅན་གྱི་དོན་དུ་དང་། ཆོ་འཕྲུལ་རྩལ་དང་རང་སྣང་བའོ། །ཞེས་པའི་རྗེས་སུ་འབྲངས་ནས་མ་ཧཱ་ཨ་ནུ་ཨ་ཏིར་འཇོག་པ་སྟེ། དེ་དག་རྣམས་ལས་རང་ལུགས་སྨྱོས་སྟོན་སྐུ་མཆེད་ཀྱི་བཞེད་པ་གང་དུ་གནས་པར་བརྟག་གོ །རྒྱུད་གཞུང་འདི་ནི་མན་ངག་རྫོགས་པ་ཆེན་པོར་བཀྲལ་བ་དང་། བསྐྱེད་པ་མ་ཧཱ་ཡོ་གར་བཀྲལ་བའི་ལུགས་གཉིས་ལས། དང་པོ་ནི་རྒྱ་ཆེར་འགྲེལ་དང་མན་ངག་ལྟ་ཕྲེང་དང་ཆོས་རྗེ་ཀུན་མཁྱེན་པ་སོགས་ཀྱི་དགོངས་པར་གནས་པ་དེ་ལྟ་ནའང་། མ་ཧཱའི་ནང་གསེས་ཀྱི་གསུམ་དུ་ཕྱེ་བ་ལ་དགོངས་པའམ། ཤེར་ཕྱིན་སྔགས་ལུགས་སུ་བཀྲལ་བ་ལྟར་མ་ཧཱའི་གཞུང་ཨ་ཏིར་བཀྲལ་བ་ཞིག་གམ། རྒྱུད་ལུང་མན་ངག་གསུམ་སྤྱིའི་དབྱེ་བས་ཨ་ཏིར་འཇོག་སྙམ། གཉིས་པ་ནི་སྤར་ཁབ་ལམ་རིམ་ཆེ་ཆུང་བསམ་གཏན་མིག་སྒྲོན་དང་ཟུར་ལུགས་ཕལ་ཆེར་གྱི་དགོངས་པ་ཡིན་ཞིང་། འོན་ཀྱང་བརྟག་པར་བྱ་བ་འདི་སྣང་སྟེ། སྤྱིར་མ་ཧཱ་ཨ་ནུ་ཨ་ཏི་ལའང་ནང་གསེས་ཀྱི་ཟླས་ཕྱེ་བའི་གསུམ་གསུམ་
དུ་དབྱེར་རུང་བ་གསང་སྔགས་བཀའི་ལྡེ་མིག་སོགས་ལས་གསུངས་པས་འདིའི་མ་ཧཱ་ལའང་ཕ་མ་གཉིས་མེད་ཀྱི་རྒྱུད་གསུམ་དུ་ཕྱེ་དགོས་པ་དེའི་ཚེ་རྒྱུད་འདི་ནི་གསུམ་ཀའི་སྤྱི་རྒྱུད་དང་འགའ་ཞིག་གིས་མ་ཧཱར་བཞེད་པ་དག་ཀྱང་སྣང་ཡང་། རང་ལུགས་ལ་ངོ་བོ་གཉིས་མེད་ཀྱི་རྒྱུད་དུ་ཁས་ལེན་པ་ཡིན་མོད་རོག་གི་བཞེད་པ་ལྟར། ཐབས་ཤེས་ཟབ་པ་དང་རྒྱ་ཆེ་བ་གཉིས་སུ་མེད་པར་སྟོན་པའི་ཕྱིར་རམ། ཉང་ཊཱིག་པ་ལྟར་ལྟ་ཕྲེང་དུ་ཕྱེ་ལུགས་ཀྱི་མ་ཧཱའི་ཨ་ཏིར་འདོད་པས་སམ། སངས་རྒྱས་མཉམ་སྦྱོར་སོགས་ལྟར་ལྷ་ཡབ་ཡུམ་འགོ་མཉམ་དང་ལམ་སྟེང་འོག་ཁ་སྦྱོར་གཙོ་བོར་སྟོན་པས་ཡིན་ཞེས་བརྗོད་དོ། །དེས་བཤད་བྱའི་ཆོས་ངོས་བཟུང་ནས། གང་གིས་འཆད་ན། འགྲེལ་ཆུང་ལས། ཐུགས་ཀྱི་སྒྲོན་མ་གསང་བའི་འགྲེལ་པ་འདི། །ལུང་དང་མན་ངག་རིགས་པས་གཏན་ལ་དབབ། །ཅེས་པས་ལུང་རིགས་མན་ངག་གསུམ་གྱིས་སོ། །དེས་ན་འདི་དཔྱད་པར་བྱ་སྟེ། ལུང་ནི་བཤད་རྒྱུད་སྡེ་བཞི་སོགས་ཡིན་པ་གང་ཞིག རྩ་བཤད་གཉིས་ཀྱི་ཁྱད་པར་ནི་བརྗོད་བྱ་མི་གསལ་བ་དང་གསལ་བར་སྟོན་པའི་ཕྱིར་རམ། སྟོན་པའི་བདག་ཉིད་ཀྱིས་དང་འཆད་པའི་སྐྱེས་བུས་གསུ ངས་པ་རྩ་བཤད་ཀྱི་རྒྱུད་དུ་བཞེད་པ་དང་། གཞུང་གཞན་ལ་མ་བརྟེན་པར་དོན་གཞན་བསྐྱེད་ནུས་པ་རྩ་རྒྱུད་དང་། རྒྱུད་ཀྱིས་དོན་འགྲོལ་བར་བྱེད་པ་བཤད་རྒྱུད་ཅེས་སོགས་གསུངས་པ་མང་ཡང་འཇམ་མགོན་བླ་མའི་དགོངས་པ་ནི་ཐོག་མར་བྱུང་ཞིང་བཤད་གཞིར་གྱུར་པ་རྩ་རྒྱུད། རྗེས་ལ་བྱུང་ཞིང་འཆད་བྱེད་དུ་གྱུར་པའི་རྒྱུད་གཞན་བཤད་རྒྱུད་ཅེས་རོག་གིས་གསུངས་པ་དང་མཐུན་ནོ༑ ༑དེའང་ཞིབ་མོའི་རྣམ་བཞག་ཏུ་བགྱིས་ན་རྒྱུད་གཞན་གྱིས་བཤད་བྱའི་རྩ་བར་གྱུར་པ་དང་། རྩ་བའི་རྒྱུད་ཉིད་འཆད་བྱེད་དུ་གྱུར་པའི་རྒྱུད་ལ་དེ་ལྟར་བརྗོད་ཀྱི་རྩ་བའི་རྒྱུད་འཆད་བྱེད་དུ་བྱས་པས་རྒྱུད་དོན་གཏན་ནས་མི་ཁྲོལ་བ་དང་བཤད་པའི་རྒྱུད་རྣམས་བཤད་གཞི་ཙམ་ཡང་མི་རུང་བ་ཞིག་ཡིན་ནམ་སྙམ་དུ་དོགས་སོ། །འདིར་རྒྱུད་ཕྱི་མ། ཕྱི་མའི་ཕྱི་མ། ཁ་སྐོང་གི་རྒྱུད། དཀའ་བ་གཅོད་པ། ཀལྤོ་དུམ་བུའི་རྒྱུད་རྣམས་བཤད་རྒྱུད་དུ་བསྡུ་བར་གསུངས་སོ། །མན་ངག་ནི། རིག་འཛིན་གོང་མའི་སྙན་ནས་སྙན་དུ་བརྒྱུད་པ་བྱིན་རླབས་
ཀྱི་དྲོད་མ་ཡལ་བ་སྟོན་པ་རྡོ་རྗེའི་ཐུགས་ལ་གབ་པ་ཉིད་གཙོ་བོར་བཟུང་སྟེ། རང་བཞིན་ཆོས་ཉིད་ཀྱི་རིག་པ་རིས་སུ་མ་ཆད་པར་གནས་པ་གནད་དུ་བསྣུན་པས་རྒྱུད་དོན་རྣམ་དག་ཏུ་འཆད་ནུས་པ་གང་ཞིག གཞིའི་རྒྱུད་དོན་ཅིག་ཆར་ཆིག་རྫོགས་སུ་རྟོགས་པའི་རང་རྣོའི་རིགས་ཅན་དུ་ངེས་པ་འགའ་ཞིག་ཟབ་མོ་དོན་གྱི་མན་ངག་གཞན་ལ་མ་ལྟོས་པའང་སྲིད་པར་སྙམ་ཞིང་། གང་ཞིག་ཕྲ་བའི་སྒྲིབ་པ་མ་བཅོམ་པར་མཐར་ཐུག་གི་རྒྱུད་དོན་སྟོན་མི་ནུས་པས་འཆད་བྱེད་ཀྱི་མན་ངག་དང་རིགས་པ་རྣམ་དག་ནི་རྒྱལ་བ་དངོས་ཀྱི་སྤྱོད་ཡུལ་ཁོ་ནར་གནས་པའི་ཕྱིར། གསང་བདག་གིས་རྒྱུད་བཤད་པའི་ཚེ་རང་ཉིད་སྟོན་པ་དང་དགོངས་པ་གཉིས་སུ་མེད་པར་ཁས་བླངས་པ་ལྟ་བུ་ཞིག་རྒྱུད་སྟོན་པ་པོ་ཐམས་ཅད་མིན་ན་རྒྱུད་དོན་དཔྱིས་ཕྱིན་འབྱིན་མི་ནུས་པས་གང་ཟག་གཅིག་མཐར་ཐུག་གི་འཚང་རྒྱ་བའི་ལམ་མི་ཚང་བར་དོགས་སོ། །གཉིས་པ་ནི། རྒྱུད་གཞུང་སྤྱིའི་བཤད་ཐབས་སྤྱི་དོན་རྣམ་པ་ལྔ་དང་། བཤད་ཐབས་འདྲེན་པའི་ཚིག་བཅུ་དང་། བཤད་ཚུལ་བཞིའི་སྒོ་ནས་འཆད་པ་དང་། རྒྱུད་ཀྱི་དངོས་པོ་སོ་སོའི་བཤད་ཐབས་ལྟ་བ་བརྒལ་བརྟགས་སོགས་བཅུ་ུགཅིག་གིས་འཆད་ཅིང་། ཁྱད་པར་འདི་ཉིད་ཀྱི་དབང་དུ་སྔ་རབས་པ་རྣམས་ཀྱིས་འཆད་སྲོལ་གྱིས་མཚོན་པ་དཔེ་དང་སྦྱར་ཏེ་བཤད་ལུགས་གསུམ་དང་། བཀའ་སྡེ་ཟུར་པའི་བཤད་སྲོལ་གྱིས་གོང་གི་སྤྱི་ཆིངས་ལྔའི་སྒོ་ནས་བཤད་པ་སོགས་ཡོད་ཀྱང་། འདིར་ནི་སྒྱུ་འཕྲུལ་ཁོག་གཞུང་ལས། རབ་ལ་མཚན་བསྟན་འབྲིང་ལ་དབྱེ། །ཐ་མར་འབྲུ་གཉེར་དགྲོལ་བའོ། །ཞེས་པའི་རྗེས་སུ་འབྲངས་ཏེ་མགོ་སྨོས་པས་གོ་བའི་གདུལ་བྱ་དབང་པོ་རབ་ལ་རྒྱུད་ཀྱི་མཚན་བསྟན་པ་དང་། ཅུང་ཟད་ཕྱེ་སྟེ་གོ་བའི་དབང་འབྲིང་ལ་སྤྱི་དོན་རྣམ་པར་དབྱེ་བ་དང་། རྣམ་པར་སྤྲོས་པས་གོ་བའི་དབང་པོ་ཐ་མ་ལ་འབྲུ་རེ་གཉེར་རེའི་སྒོ་ནས་བཤད་པ་ལས་རེ་ཞིག་ཕྱི་མའི་དབང་དུ་བྱ་བ་ཡིན་ནོ། །དེ་ལ་གཉིས་ཏེ། རྒྱུད་ཀྱི་མཚན་ལ་དཔྱད་པ་དང་། མཚན་དེ་ལྡན་གྱི་རྒྱུད་དོན་ལ་དཔྱད་པའོ། །དང་པོ་ནི། རྒྱུད་ཀྱི་མཚན་དོན་དང་སྤྱི་དོན་གཉིས། དབང་པོ་རབ་འབྲིང་
གཉིས་ཁོ་ནའི་ཆེད་དུ་བསྟན་པ་མིན་པ་དེ་ལྟ་ནའང་། དབང་པོ་ཐ་མར་འབྲུ་གཉེར་དགྲོལ་བའི་སྔོན་དུའང་ལུས་རྣམ་བཞག་ཙམ་ལ་བསླབ་ན་དཀྱུས་ས་བསྟན་པའི་རྟ་ལྟར་གཞུང་གི་ཚིག་དོན་བཟུང་བདེ་བའི་དགོས་པ་ཡོད་ཀྱང་འདིར་མཚན་ཙམ་བསྟན་ཅིང་། སྤྱི་དོན་དངོས་སུ་འཆད་སྲོལ་མ་བྱུང་བས་མཚན་གྱི་དོན་ནི་དབང་ཐ་ལ་སྤྱིའི་ཆིངས་ལ་བསླབ་པའི་དགོས་པ་ལས་ལྷག་པ་ཞིག་ཡོད་པས་བསྟན་ནམ་ཞེས་དཔྱད་དོ། །མཚན་མཐོང་བའམ་ཐོས་པ་ཙམ་ལས་རྒྱུད་དོན་རྟོགས་པའི་དབང་རབ་དེ་སྔོན་བྱུང་ངམ་རྗེས་འཇུག་གི་འཁོར་ཞིག་ཡིན། དང་པོ་ལྟར་ན་ཤིན་ཏུ་དབང་རྣོན་ཁ་ཅིག་གིས་ཀྱང་དེ་ལྟར་རྟོགས་སྲིད་པའི་མཐའ་བཀག་ནུས་སམ། གཉིས་པ་ལྟར་ན་གསང་བདག་རང་གི་རྒྱུད་དོན་ཐུགས་སུ་ཆུད་ནས་འཁོར་ལ་འཆད་པའི་ཚེ་དོན་ལ་བརྟེན་ནས་མཚན་དུ་བཏགས་པའི་རྣམ་བཞག་མེད་པར་འགྱུར་ཞིང་། རྗེས་འཇུག་གི་དབང་རབ་དེས་ཀྱང་ཐ་སྙད་ལ་བརྟེན་ནས་རྟོགས་དགོས་པ་གང་ཞིག མཚན་ཙམ་དང་གཞི་ལམ་འབྲས་བུ་ཞེས་པའི་སྒྲ་ཚིག་འགལ་བར་སྣང་བ་དང་། གལ་ཏེ་འགལ་བས་ཀྱང་དོན་ཙམ་གོ་བ་ཡིན་དུ་ཆུག་མོད་མཐའ་དག་གོ་བས་ཁྱབ་ན་བུམ་པ་ཞེས་བརྗོད་པས་གསེར་བུམ་ཡིན་མིན་སོགས་ཀྱང་གོ་ནུས་པར་ཐལ་ལོ། །རྒྱུད་འདིའི་གླེགས་བམ་གྱི་ཀླད་དུ་མན་ངག་དང་མཐུན་པའི་མཚན་འབའ་ཞིག་སྨོས་པ་དེ་མ་ཧཱའི་ནང་གསེས་ཀྱིས་གསུམ་དུ་ཕྱེ་བའི་ཨ་ཏི་ཡིན་པ་ཞིག་ན་ལམ་རིམ་ཆེ་ཆུང་སོགས་ནས་མ་ཧཱའི་རྒྱུད་དུ་འཆད་ཚེ་མཚན་དེ་སྐད་མི་སྨོས་པར་འགྱུར་བའི་འགོག་བྱེད་ཅི་ཞིག་སྙམ་མོ། །འདིའི་ཀླད་དུ་བོད་སྐད་ཁོ་ན་སྨོས་པའི་དགོས་པ་ནི་སྤྱིར་གསང་སྔགས་ཀྱི་རྒྱུད་རྣམས་རྒྱ་གར་གྱི་སྐད་རིགས་བཞི་ཁོ་ནར་མ་ངེས་པའི་ཕྱིར་ལོ་ཙཱ་བས་དེ་དང་བསྟུན་པ་ཡིན་ཡང་། འདི་ནི་སཾ་སྐྲྀ་ཏའི་སྐད་དུ་ངོས་བཟུང་དགོས་པ་དང་གོང་གི་རྒྱུ་མཚན་ཡང་དེ་ལྟར་གྲུབ་པའི་ཕྱིར་སཾ་སྐྲྀ་ཏའི་སྐད་དུ་ཞེས་སྨོས་རིགས་པར་དོགས་སོ། །གཉིས་པ་ལ་གསུམ་སྟེ། ཀླད་ཀྱི་དོན་སྟོན་པར་ཕྱག་བཙལ་བ་ལ་དཔྱད་པ་དང་། གཞུང་གི་དོན་རྒྱུད་དངོས་ལ་དཔྱད་པ་དང་། མཇུག་གི་དོན་རྒྱུད་རྫོགས་པའི་བྱ་བ་བསྟན་པ་ལ་
དཔྱད་པའོ། །དང་པོ་ནི། སྡུད་པ་པོ་གསང་བདག་གིས་ཕྱག་བཙ ལ་བའི་ཡུལ་སྟོན་པ་ཀུན་ཏུ་བཟང་པོ་དེ་གཞི་ལམ་འབྲས་གསུམ་གང་གི་གནས་སྐབས་ཀྱི་ཡིན། དང་པོ་དང་གཉིས་པ་ལྟར་ན་གཉིས་དེ་ཉིད་དང་གཞན་དུ་བརྗོད་དུ་མེད་པའི་དགོངས་པ་མ་རྟོགས་པར་འགྱུར་རོ༑ ༑གལ་ཏེ་དེ་གསུམ་དབྱེར་མེད་པ་མ་ཡིན་ན་ངོ་བོའམ་ལྡོག་པའི་ངོས་ནས་ཡིན། དང་པོ་ལྟར་ན་དེ་ཙམ་དུ་གཞི་ལམ་འབྲས་གསུམ་ཕྱེ་བ་དགོས་མེད་དུ་ཐལ་ལ་ཕྱི་མ་ལྟར་ན་གོང་གི་ཉེས་པས་གནོད་དོ། །གཉིས་པ་ལ། ལེའུ་ཉི་ཤུ་རྩ་གཉིས་སུ་གནས་པ་ལས། ལེའུ་དང་པོ་ལ་གཉིས་ཏེ། གཞུང་དང་། མཚན་ནོ། །དང་པོ་ལ་ཐུན་མོང་མ་ཡིན་པའི་སྒོ་ནས་གླེང་གཞི་མདོར་བསྟན་པ་ལ་དཔྱད་པ་དང་། རྒྱུད་ཁྱད་པར་གྱི་གླེང་གཞིའི་སྒོ་ནས་དེ་རྒྱས་པར་བཤད་པ་ལ་དཔྱད་པ་དང་། གླེང་གཞིའི་དོན་བསྡུ་བ་ལ་དཔྱད་པའོ། །དང་པོ་ནི་རྒྱུད་ཀྱི་ཐོག་མར་ཕུན་སུམ་ཚོགས་པ་ལྔའི་བདག་ཉིད། ཨེ་ཝཾ་མ་ཡ་ཞེས་པའི་ཡི་གེ་བཞི་སྨོས་པས་སྟོན་ཞི ང་། དེའང་བརྒྱུད་པའི་མན་ངག་གིས་ཕྱི་ནང་གསང་གསུམ་དུ་འཆད་པ་ལས། ནང་གསང་གི་ཕུན་ཚོགས་ལྔ་ལྡན་འདི་དག་གླེང་གཞིར་འགྱུར་ཚུལ་ལེའུ་གཉིས་པར་གསུངས་པའི་སྟོན་པས་ལྷན་ཅིག་པའི་འཁོར་ལ་འབྲས་དབང་བསྐུར་ནས་དེ་རྣམས་ནང་གི་མངོན་བྱང་ལྔས་བྱང་ཆུབ་པ་ན་གོ་ཕྱེ་བའི་འཁོར་གྱི་ཆེད་དུ་ཆེད་བརྗོད་ཞུས་ལན་མཛད་པ་ལས་འཕྲོས་ཏེ་རྒྱུད་ཡོངས་རྫོགས་བྱུང་བ་དང་། དེ་ལྟ་བུའི་མངོན་བྱང་ལྔ་པོའང་སྙིང་ག་དང་གསང་བའི་འོག་མིན་དུ་འཚང་རྒྱ་ཚུལ་ཡིན་པའི་གནད་ཀྱིས་རྟོགས་པར་བཞེད། དེ་དང་ཚུལ་མཐུན་པར་རྗེས་འཇུག་ལམ་པ་ཞིག་གིས་ཐབས་ལམ་སྟེང་འོག་གི་སྒོ་ལ་བརྟེན་ནས་རྒྱུད་དོན་མཐར་ཐུག་བརྙེས་པ་ནའང་གནད་དུ་བསྣུན་བྱ་རང་ལུས་ཀྱི་དཀྱིལ་འཁོར་ཉིད་ཐུ ན་མིན་གྱི་གླེང་གཞིར་འཇོག་ཆོག་པར་མངོན་པ་དེའི་ཚེ། ཐབས་གྲོལ་གཉིས་གང་ཟག་ཐ་དད་ཀྱི་ལམ་ཆ་ཚང་རེ་ཡིན་པར་གྲུབ་པས་གོང་གི་ལྷན་ཅིག་པའི་འཁོར་རྣམས་ཐབས་ལམ་པར་བཞག་དགོས་སམ། གྲོལ་ལམ་ལ་ཐབས་ཀྱི་མན་ངག་ཟུར་པ་གཙོ་བོར་བསྟེན་པ་མིན་པས་ཐབས་ལམ་ལ་ལྟོས་ཏེ་ཐུན་མོང་
པའམ་སྤྱི་ལྟར་བཤད་པ་ཞེས་འབྱུང་བ་དེས་ན་འདིའི་སྐབས་ཀྱི་ཕྱི་གྲོལ་ལམ་ལྟར་སྦྱར་ནས་བཤད་པ་ལ་དེའི་ལྟར་གྱི་ཐུན་མིན་གྱི་གླེང་གཞི་འཇོག་ཏུ་མེད་པར་དོགས་སོ། །གླེང་གཞིའི་ཡི་གེ་བཞི་པོ་བོད་སྐད་དུ་བསྒྱུར་ཚེ། འདི་སྐད་བཤད་པའི་དུས་ན་ཞེས་སྨོས་པ་སྟོན་འཁོར་དགོངས་པ་ཐ་མི་དད་པར་སྟོན་པའི་ཚིག་ཡིན་ཚུལ་རང་ལུགས་ཀྱི་བཞེད་པར་གནས་ཀྱང་སྟོན་འཁོར་ཁྱད་མེད་དུ་མཚུངས་པས་སམ་མཚོན་པའི་ངོས་ནས་སྨོས་ཞེས་པ་དང་། སྡུད་པ་པོ་གསང་བདག་ཉིད་གདུལ་བྱ་མོས་པ་ཐ་དད་ཀྱི་སྣང་ངོར་རྣམ་པ་ཐམས་ཅད་པའི་ཕྱིར་མ་ཁྱབ་པའི་ལན་འདེབས་རྒྱུ་བྱུང་ན་དེ་ཙམ་ནི་ཁས་ལེན་དགོས་པར་སྨྲའོ། །ཡང་འདི་ལྟར་གླེང་གཞིའི་རྒྱས་བཤད་དེ་མདོར་བསྟན་གྱི་ཚུལ་ཚིག་དོན་གཉིས་ཀའི་སྒོ་ནས་སམ་ཕྱོགས་རེ་བསྟན་པས་འཇོག དང་པོ་ལྟར་ན་རྒྱས་བཤད་སྐབས་སྟོན་འཁོར་གནས་གསུམ་ལས་ཚིག་ཟིན་མ་བྱུང་བས་འགལ། གཉིས་པ་ལྟར་ན་དོན་གྱི་ཕྱོགས་བསྟན་པར་ངོས་བཟུང་བ་ལས་འོས་མེད་པས། བསྟན་པ་དང་དུས་གཉིས་གཞུང་ཚིག་དངོས་སུ་མི་བསྟན་པའི་དགོས་པར་བརྟག་གོ །གཉིས་པ་ལ། སྟོན་པ་དང་། གནས་དང་། འཁོར་ཕུན་སུམ་ཚོགས་པ་ལ་དཔྱད་པའོ། །དང་པོ་ནི། སྟོན་པའི་རང་བཞིན་ཆོས་ཅན་འཁོར་འདས་ཀྱི་བསྡུས་པའི་ཆོས་ཐམས་ཅད་དང་ཆོས་ཉིད་ཐ་མི་དད་པར་གནས་པ་ཞིག་ན་སེམས་ཅན་ཐམས་ཅད་ཀྱང་རང་བཞིན་འདི་ལས་གཞན་དུ་མ་གྱུར་པའི་ཕྱིར་ཉེར་ལེན་གྱི་ཕུང་པོ་ཕྱི་སྣོད་དང་བཅས་པའང་རང་བཞིན་ཉིད་ཀྱི་ཆོ་འཕྲུ ལ་རིས་སུ་མ་ཆད་པས་སྟོན་པའི་ངོ་བོར་འཇོག་དགོས་པ་ནི་སྔགས་ཀྱི་རྒྱུད་སྡེ་དུ་མའི་དགོངས་པར་གྲུབ་ན། གདུལ་བྱ་གཞན་སྣང་དུ་སྐུ་གསུང་ཐུགས་ཀྱི་མཚན་མ་སྣ་ཚོགས་པར་སྣང་ཡང་འདས་པར་ཞེན་པའི་འཆིང་གཞི་ལས་མ་འདས་པས་འགྲོ་དྲུག་གི་སྣང་བ་འདི་གནད་དུ་བསྣུན་བྱར་བྱས་པས་ཆོག་པར་དོགས་སོ། །སྟོན་པ་རིགས་དྲུག་པ་དང་འཆད་པའི་སྐྱེས་སུ་རིགས་ལྔའི་རང་བཞིན་གཉིས་སུ་མེད་པ་ཡིན་ན་སྟོན་པའི་ངོ་བོ་འཆད་པའི་སྐྱེས་བུའི་མཚན་ཉིད་དུ་གསུངས་པར་དཔྱད་དོ། །འདིར་གསང་སྔགས་འཆད་ཚུལ་ཉེས་པའི་སྐྱོན་བརྒྱད་ལས་གོང་འོག་གི་འཁྲུགས་པ་སྡེབ་མ་ཤེས་ན་རིན་པོ་ཆེ་རྩར་འཆོལ་
བ་ལྟ་བུའི་བཤད་པའི་སྐྱོན་གྱི་དབང་དུ་མི་གཏོང་བའི་ཕྱིར་སྟོན་པའི་རང་བཞིན་གྱི་རྗེས་སུ་ངོ་བོ་སྦྱར་བ་མཛད་སྐབས་ལོངས་སྐུའི་བདག་ཉིད་ཡིན་པའི་དོན་རྟགས་སུ་མཚན་དང་དཔེ་བྱད་ལྡན་པ་ཞེས་གསུངས་པའི་ཐུན་མིན་གྱི་ཕྱིའི་མཚན་དཔེ་བརྩི་གཞི་བསྐལ་བཟང་གི་སེམས་དཔའ་བཅུ་དྲུག་ལ་མཛད་པ་དག་སྣང་ཡང་། ཁོ་བོའི་བླ་མ་བརྡ་སྟོན་ཐམས་ཅད་མཁྱེན་པས་ནི་རིགས་ཆུང་གི་སེམས་དཔའ་བཅུ་དྲུག་ལ་ངོས་འཛིན་པར་གསུང་། དེ་ལ་འདི་ལྟར། སྟོན་པ་རིགས་དྲུག་པ་དང་མི་བསྐྱོད་པ་ལ་རང་གི་རིགས་ཀྱི་ཟླས་ཕྱེ་བའི་རིགས་ཆུང་བཞིར་མི་དབྱེ་བ་གང་ཞིག རིགས་དྲུག་པ་ནི་དཀྱིལ་འཁོར་ཐམས་ཅད་ཀྱི་སྤྲོ་གཞིར་གྱུར་པས་དབྱེ་མི་དགོས་ཀྱང་མི་བསྐྱོད་པའི་རང་རིགས་ཀྱི་རིགས་ཆུང་མི་འཇོག་པའི་རྒྱུ་མཚན་གང་ལ་ཐུགས་པར་དཔྱད་དོ། །གཞན་ཡང་སེམས་དཔའ་སོགས་ཀྱང་འདིའི་སྐབས་སྟོན་པ་དང་དགོངས་པ་ཐ་མི་དད་ནའང་ཐུན་མིན་གྱི་མཚན་དཔེ་མི་མངའ་བར་འཇོག་པ་དང་། ཡེ་ཤེས་དྲུག་ཕྱག་དང་ཕྱ ག་མཚན་གཉིས་ཀའི་དོན་དུ་བྱུང་བ་འདབས་པ་དང་། སྐུ་མདུན་དང་རྒྱབ་མེད་པ་ལ་ཞལ་ཐ ལ་ལེ་བར་འགལ་བ་དང་། སྐུ་གསུང་ཐུགས་བསམ་གྱིས་མི་ཁྱབ་པ་ལ་ཞབས་གཉིས་ཕྱག་དྲུག་དབུ་གསུམ་སོགས་སུ་སྣང་བའི་འགལ་སྤོང་བྱ་དགོས་སོ༑ ༑ གཉིས་པ་ནི། སྤྱིར་འོག་མིན་ལ་དབྱེ་བ་ལྔར་གྲགས་པ་ལས་འདིར་འཆད་པའི་གནས་ནི་དབང་ཕྱུག་ཆེན་པོའི་འོག་མིན་ཏེ། དོན་གདུལ་བྱའི་བློ་ལས་འདས་ཤིང་། རྟགས་འཇིག་རྟེན་གནས་ཀྱི་འོག་མིན་ལས་ཉིས་འགྱུར་གྱིས་སྤགས་པའི་ཕྱིར་དེ་སྐད་བྱའོ་གསུང་། དེ་ལ་ཁ་ཅིག་འདི་ནས་འཇིག་རྟེ ན་གནས་ཀྱི་འོག་མིན་དུ་ཐག་ཇི་ཙམ་ཡོད་པའི་ཉིས་འགྱུར། དེ་ནས་འོག་མིན་ཆེན་པོའི་བར་དུ་ཡོད་ཟེར་བ་སོགས་ཕ་རོལ་ཏུ་འཕགས་པ་འདོད་པ་ནི། མ་དག་པའི་འཇིག་རྟེན་སྤངས་པའི་ཕ་རོལ་ན་དག་པའི་ཞིང་བསྒྲུབ་ཏུ་མེད་པའི་ཕྱིར་མི་རིགས་ཀྱང་། གཙང་མའི་འོག་མིན་ནི་རྒྱུའི་བྱང་སེམས་ས་དང་པོའི་བདེན་མཐོང་གི་དང་། འདི་ངེས་དོན་དུ་འཚང་རྒྱ་གནས་ཡིན་པས། ཚོགས་ལམ་ནས་བདེན་པ་མཐོང་བར་ཡུན་ཇི་ཐོགས་ཉིས་འགྱུར་སངས་རྒྱས་ཀྱི་སའི་བར་དུ་དགོས་པས་ཡིན་པར་བཞེད་པ་དེའི་ཚེ།
གང་ཟག་སྒོས་ཆོས་སུ་ཟག་བཅས་ཀྱི་ལམ་ནས་བདེན་པ་མཐོང་བ་དང་སངས་རྒྱས་པ་དུས་མཉམ་དུ་གྱུར་པ་སྲིད་པའི་གནས་ལ་གོང་གི་མཚན་ཉིད་བཞག་ཏུ་མེད་པར་རྒོལ་ལོ། །འོག་མིན་ལྔ་ཀ་ངོ་བོ་གཅིག་ཀྱང་ལྡོག་པ་ཐ་དད་ཀྱིས་ཕྱེ་བར་ཟད་ན་སྣང་ཚོད་ཀྱི་འོག་མིན་གྲངས་མ་ངེས་པར་ཐལ་བ་དང་། འདིར་རྒྱ་མ་ཆད་པ་ཞེས་སྨོས་ལ་འོག་ནས། ཡང་ན་རྒྱང་གྲགས་དཔག་ཚད་དམ། ཞེས་འབྱུང་བ་གདུལ་བྱའི་བློའི་ཁྱད་པར་ཡིན་མོད་མ་འོངས་པའི་རྗེས་འཇུག་གླེང་གཞི་དང་མཐུན་པའི་དཀྱིལ་འཁོར་བསྒོམ་པ་དག་བསམ་ཡས་ལྷུན་གྲུབ་ཀྱི་དཀྱིལ་འཁོར་བསྒོམ་པའི་གང་ཟག་ཡིན་པ་ཁེགས་ནུས་སམ་དཔྱད་དོ། །གཞལ་ཡས་ཁང་གི་རྒྱན་ལ་བདུན་ལས་བདག་པོའི་རྒྱན་ལ་བད ག་པོ་ཉིད་དང་། དེའི་སྤྲུལ་པའི་འཕྲོ་འདུ་དང་། དེའི་ཡོ་བྱད་དང་གསུམ་ཡོད་པ་གང་ལྟར་བཟུང་། མཚོན་སྒོ་རྣམ་ཐར་བཞིའི་སྒོ་ནས་བྱང་ཆུབ་ཆེན་པོར་འཇུག་ཚུལ་སེམས་ལྔ་རུ་སྤྱན་འགྲེལ་སོགས་ལས་བཤད་པ་དང་འགལ། རྣམ་ཐར་གྱི་ཐེག་པ་བརྒྱད་བགྲོད་ནས་རང་སའི་འབྲས་བུ་བརྒྱད་ཐོབ་པའི་རྟགས་སུ་རྒྱུ་འབྲས་ཀྱི་རྟ་བབ་བརྒྱད་བརྒྱད་ཡོད་པ་ལས། ཨ་ནུ་མན་ཆད་ཀྱི་ཐེག་པ་བརྒྱད་ཡིན་པ་འགྲེལ་ཆུང་པིཎྜཱརྠ་སོགས་ལས་གསལ་ཞིང་། དེའི་ཚེ་སྤྱིར་རྒྱུད་ལུང་མན་ངག་གསུམ་གྱི་ཟླས་ཕྱེ་པའི་ཨ་ཏིར་འཇོག་ན་ལུང་རིགས་དུ་མས་གནོད་པར་མ་ཟད་འོག་མས་གོང་མའི་དོན་མི་མཐོང་བར་བཞེད་པའི་བསྟན་པ་སྤྱི་སྐད་ཀྱི་ཕྱག་རྒྱ་ལས་ཀྱང་འདས་པར་འགྱུར་ལ། མ་ཧཱའི་ནང་གསེས་ཀྱི་ཨ་ཏིར་འཇོག་ན་འདིའི་ལུགས་ལ་སྤྱིའི་རྒྱུད་ལུང་མན་ངག་གི་རྣམ་བཞག་མི་འདོད་པ་ཞིག་གམ་འདོད་ན་འདི་ཉིད་ཐོབ་བྱ་མཐར་ཐུག་མིན་པར་ཐལ་ལོ། །གདན་སེང་གེ་སོགས་ནི་ཡས་སྤྲུལ་གྱི་དབང་དུ་ཐུགས་རིག་པ་རང་སྣང་བའི་གདན་ཡིན་པར་ངེས་ཀྱང་། རྒྱུད་མས་སྦྱངས་ལྟར་ན་རྒྱ་མཚོ་དང་སྤར་ཁབ་ཏུ་བཤད་པ་དང་བསྟུན་ཏེ་སྨོན་ལམ་གུས་པའི་གདན་དུ་ཁས་ལེན་དགོས་ཤིང་སྐབས་འདིར་ནི་གཉིས་ཀ་གཞི་མཐུན་དུ་བཤད་པ་གང་ཞིག སྤྲུལ་སྦྱང་རྒྱུད་ཐ་དད་དུ་མ་གྱུར་པ་ཞིག་གི་ཕྱོགས་ནས་བསྙད་དམ་སྟེ་གཞན་དུ་ན་དཀའ་བར་མངོན་ནོ། །གདན་གྱི་རིམ་པའི་ཁྱད་པར་རིགས་ལྔ་སོགས་ཀྱི་གནས་ཚོད་དང་
སྣང་ཚོད་གང་དབང་བཙན་པས་འཇོག དང་པོ་ལྟར་ན་ཐམས་ཅད་ཀྱང་ལྔ་བརྩེགས་སུ་ཆོག་པར་འགྱུར་ཞིང་། གཉིས་པ་ལྟར་ན། བདེ་གཤེགས་རང་སྣང་གདུལ་བྱ་གཞན་སྣང་ཞེས་དྲིས་ཏེ་སྨྲ་དགོས་པ་ལས་གླེང་གཞིའི་སྐབས་ཕྱོགས་དང་པོ་ལྟར་བཟུང་བར་མངོན་པས་གོང་གི་ཉེས་པས་གནོད་པར་སེམས་སོ། །ཟླ་བ་སྟེང་དུ་འོང་བའི་རྒྱུ་མཚན་ཕྱི་ནང་གསང་གསུམ་དང་སྦྱར་ཏེ་འཆད་པར་མཛད་པ་ཞི་བའི་ལྷ་ཡབ་ཡུམ་མཉམ་སྦྱོར་ཀུན་ལ་ངེས་ཀྱང་ཁྲོ་བོར་ཉི་གདན་སྟེང་དུ་འོང་བར་དཔྱད་དགོས་སོ། །གསུམ་པ་ནི་རང་བཞིན་གཉིས་སུ་མེད་པའི་འཁོ ར་རིགས་ལྔ་ཡབ་ལྔ་རྟོག་པ་དང་ཆོས་མཐུན་བརྩི་བའི་སྐབས། གཞུང་གཞན་དུ་སྨོས་པའི་ཕུང་ལྔའི་གོ་རིམ་དང་མི་འགྲིག་པ་ནི་འདིར་འཛིན་པའི་གཞི་རྩ་བའི་རྣམ་པར་ཤེས་པ་གཙོ་བོར་འདོད་པའི་གནད་ཀྱིས་ཡིན་པར་རྣམ་བཤད་དག་ལས་གསུངས་པ་ན། འདི་ལས་ཕྱི་རོལ་ཏུ་གྱུར་པ་ལའང་དོན་སྨྲ་བའི་གྲུབ་མཐའ་འཛིན་པ་ལས་གཞན་ཡང་དག་མིན་པའི་རྟོག་པ་ལས་ལོགས་སུ་མ་གྲུབ་པར་འདོད་པ་སོགས་ལ་འདིའི་གོ་རིམ་ལྟར་སྨོས་རིགས་པར་དོགས་སོ། །གཞན་ཡང་དེ་ལྟར་དག་ཚུལ་དང་ལྷར་སྣང་བའི་འཐད་པ་དང་དེའི་རིགས་ཀྱི་དབྱེ་བའི་དོགས་གཅོད་ནི་རྒྱུད་འགྲེལ་གསེར་གྱི་ལྡེའུ་མིག་སོགས་ལས་རྒྱ་ཆེར་བྱུང་བས་འདིར་མ་བཀོད་དོ། །ད་ནི་འདི་དཔྱད་པར་བྱ་སྟེ། ཡན་ལག་བརྒྱད་ཅུ་དང་ལྡན་པའི་ཕུང་པོ་ལྔ་མ་དག་པའི་སྣང་བ་སོར་བཞག་འདི་ཁོ་ན་རིགས་ལྔའི་སངས་རྒྱས་མིན་པ་གང་ཞིག་དེ་རྟོགས་མི་རྟོགས་ཀྱི་ཁྱད་པར་འབྱེད་པའི་དམ་བཅའ་འ ཐད་དམ་མི་འཐད། དང་པོ་ལྟར་ན་རྟོགས་པ་དེ་རྐྱེན་ལ་རག་ལས་ན་རང་བཞིན་གྱི་སྣང་བ་མིན་པར་འགྱུར་ཞེས་ཞལ་ལུང་དུ་གསུངས་པ་དང་འགལ། གཉིས་པ་ལྟར་ན་དེ་ཉིད་ལམ་རྐྱེན་གྱིས་མངོན་དུ་གྱུར་པ་ལ་འབྲས་བུར་རྣམ་པར་བཞག་དགོས་པ་མིན་ནམ་དཔྱད་པར་ཞུའོ། །ཡང་བཙུན་མོ་དམ་པ་ཞེས་པའི་ཐད་ཀྱི་འགྲེལ་པར་སེམས་མ་ལས་ཁྱད་པར་དུ་གྱུར་པས་དམ་པའོ་གསུངས་པ་དང་ཁ་ཅིག་བཙུན་མོའི་ཚོགས་ཞེས་པས་རྒྱུད་འདི་ཤེས་རབ་ཀྱི་རྒྱུད་དུ་ངོས་བཟུང་མཛད་པ་དག་ལ། རིམ་བཞིན་འདིར་རྒྱུད་གཅིག་གིས་བསྡུས་པའི་རྟོག་པ་དང་སྦྱར་བའི་ཕྱིར་དང་
ཡབ་ཡུམ་གྲངས་མཉམ་དུ་ཡོད་པའི་ཕྱིར་དེ་ལྟར་མི་རུང་པ་ལྟ་བུར་སྣང་བས་དགོངས་པ་དཔག་དཀའོ་སྙམ་མོ། །ཕྱི་སེམས་ཀྱི་ཡུམ་ནི་དུས་བཞིའི་ལྷ་མོ་ཞེས་དུས་བཞིར་གྲངས་ངེས་པའི་རྒྱུ་མཚན་འདིའི་ལུགས་ལ་སྤྱིར་དུས་ཀྱི་དབྱེ་བ་བཞི་ལས་མི་འདོད་པའམ། ལྷ་རྟོག་ཆོས་མཐུན་བརྩི་སྐབས་ལས་གཞན་དུ་བཞིར་གྲངས་མ་ངེས་པའི་དུས་ཀྱང་ཡོད་པར་འདོད་དགོས་སམ་ཞེས་དཔྱད་པར་བྱ་ཞིང་། གཞུང་གཞན་ལས་མ་འོངས་མི་སྐྱེ་བའི་ཆོས་ཅན་ཞེས་གསུངས་པ་དེ་དང་མི་འདྲ་བའི་ཁྱད་པར་གཏན་མི་སྐྱེ་བ་དང་སྐྱེ་བར་མ་ངེས་པས་འབྱེད་དགོས་པར་སེམས་སོ། །མ་ངེས་པའི་དུས་འདི་མཉམ་ཉིད་ཀྱི་དུས་ཡིན་པར་རང་ལུགས་སུ་མི་བཞེད་པ་དེ་ལྟ་ནའང་སྤར་ཁབ་ལས་ངོ་བོ་ཉིད་འདི་འདྲ་བསྟན་དུ་མེད་པ་ཞེས་གསུངས་པའི་ལུང་དོན་ལ་འགལ་སྤོང་བྱ་དགོས། འདིར་ཞི་བའི་གླེང་གཞིའི་སྐབས་འཇོམས་བྱེད་ཁྲོ་བོའི་འཁོར་འབྱུང་བའི་རྒྱུ་མཚན་ཅི་ལ་ཐུག་ཅིང་། ཁྲོ་མོ་བཞིའི་རྟོག་པ་གཞུང་ཚིག་སྒྲ་ཇི་བཞིན་པའི་ཕྱོགས་ལྟར་མཛད་པ་དག་ལ་ཐལ་རྒྱུད་དང་གླང་ཆེན་རབ་འབོགས་སོགས་དང་འགལ་བའི་ཚུལ་འདི་ལྟར་སྣང་སྟེ། དེ་ལས། རྟག་སོགས་མཚན་མ་ལས་སྐྱེད་ཕྱིར། །བཙུན་མོ་ཞེས་སུ་བསྟན་པ་སྟེ། །ཞེས་དང་། དོན་དམ་པར་སེམས་ཅན་རྟག་པར་ལྟ་བ་གནས་སུ་དག་པ་བཛྲ་ཨངྐུ་ཤ་སྟེ། ཞེས་གསུངས་པའི་ཕྱིར། འོན་ཀྱང་རྒྱུད་གཞུང་སོ་སོའི་དགོངས་པ་ཐ་དད་གཅིག་གིས་གཅིག་སུན་འབྱིན་མི་བྱའོ་སྙམ། སྤྱིར་ལེའུ་དང་པོའི་འཁོར་འདི་ལྷན་ཅིག་པའི་འཁོར་འདི་རྣམས་སྦྱངས་སྤྲུལ་གང་ཡིན་ཞེས་དཔྱད་དགོས་ན་སྟོན་པའང་དེ་མཐུན་བརྟག་དགོས་པར་མཚུངས་པ་གོང་མ་འགའ་བཞེད་ཀྱང་། ཅུང་ཟད་སྤྲོས་པའི་དབང་དུ་བགྱིས་ན། སྔ་རབས་ཁ་ཅིག་རིགས་ལྔ་ཡན་ཆད་སྤྲུལ་པ་དང་སེམས་དཔའ་མན་ཆད་རང་རྒྱུད་པར་འཐད་གསུངས། ལྷ་རྗེ་སྒྲོ་ཕུག་པ་སོགས་ནི། སྤྱིར་འཁོར་ཆ་གཉིས་ཡོད་པར་ངེས་ཀྱང་འདིར་རྟོག་ཚོགས་སྦྱར་བའི་འཁོར་རྣམས་ཡས་སྤྲུལ་ཡིན་པར་བཞེད། རྒྱལ་བ་གཡུང་ནི་ཡིན་ཚུལ་དང་སྣང་ཚུལ་གྱི་སྒོ་ནས་སྦྱངས་སྤྲུལ་དུ་མཛད་པ་སོགས་མང་ཡང་རང་ལུགས་ལ་ཕྱི་མ་གཉིས་པོའི་ཕྱོགས་དང་མཐུན་པར་ཐུགས་རང་སྣང་གི་སྤྲུལ་པ་ཡིན་པར་ཁས་ལེན་དགོས་པ་དེའི་
ཚེ་རྒྱུད་ཉིད་ཀྱི་ལེའུ་གཉིས་པ་ལས་སྟོན་པའི་དགོངས་པ་གཟོད་དག་ཐོབ་ནས་མྱོང་བར་བཤད་པ་དང་། རྒྱ་མཚོ་ལས་སེམས་དཔའ་སོགས་པ་ལ་སྦྱངས་པས་རྒྱལ་བར་གྱུར་ཚུལ་གསུངས་པ་དང་། སྤར་ཁབ་ལས་མཐར་ལམ་པར་བཤད་པ་སོགས་དང་འགལ་བ་དང་། གདུལ་བྱ་མེད་པའི་སྤྲུལ་པ་དོན་མེད་དུ་ཐལ་བ་དེ་སྤོང་དགོས་ཤིང་། འཁོར་ཆ་གཉིས་ཡོད་ན་འདིར་གང་ཟག་གཅིག་གི་རྟོག་པ་ལས་མ་སྨོས་པ་དང་མ་མཐུན། གདུལ་བྱའི་རྟོག་པ་སྦྱང་ཚུལ་སྤྲུལ་པ་རེ་རེས་སམ་གཅིག་གིས་སྦྱོང་། དང་པོ་ལྟར་ན་སྤྲུལ་པ་རྣམས་དགོངས་པ་འདི་ཉིད་དང་གཞན་དུ་བརྗོད་དུ་མེད་པ་མིན་པར་འགྱུར་ལ། ཕྱི་མ་ལྟར་ན། ལྡོག་ཆ་སོ་སོར་དབྱེ་བ་དོན་མེད་དུ་ཐལ་ལོ་ཞེས་དཔྱད་དོ། །སྐྱེ་རྒུ་རྣམས་ཀྱི་རྟོག་ཚོགས་ལྷ་ཡི་རང་བཞིན་དུ་སྒྲུབ་ན་གཞིའི་གནས་སྐབས་སུ་འགྲོ་བ་སོ་སོའི་གྲངས་བཞིན་ནམ། ལམ་སྐབས་སུ་རྣལ་འབྱོར་པའི་གྲངས་བཞིན་ནམ། འབྲས་བུའི་སྐབས་སུ་ལམ་མཐར་ཕྱིན་པའི་གྲངས་བཞིན་ལྷར་སྒྲུབ་བམ། དེ་རྣམས་གཅིག་ཏུ་ཐལ་ལོ་སྙམ། ལེའུ་དང་པོའི་དགོངས་དོན་བཞིན་ལྷ་རྟོག་དབྱེར་མེད་ཀྱི་དོན་ལམ་པས་ཉམས་སུ་ལེན་ཚེ་དེ་དང་ཆ་འདྲ་བའི་རྒྱུད་མས་སྦྱངས་ཀྱི་ཚོགས་རྣམས་ཉམས་སུ་ལེན་བྱ་ཡིན་ནམ་བརྟག གཞན་ཡང་འོག་མིན་ཆོས་དབྱིངས་ཀྱི་ཕོ་བྲང་ན་སངས་རྒྱས་བཞི་བཅུ་རྩ་གཉིས་བཞུགས་མི་བཞུགས་སོགས་ཀྱི་དོགས་འབྱིན་ཡང་འགོད་པར་མཛད་པ་ཡོད་དེ་མང་བས་འཇིགས་སོ། །གསུམ་པ་ནི། བསྡུ་བ་འདི་རྒྱུད་དོན་ཡིན་ནམ་མིན། ཡིན་ན་སྟོན་པས་གསུངས་སམ་མ་གསུངས། གསུངས་ན་གླེང་བསླང་བའམ་མ་བསླང་བར་གསུངས། དང་པོ་ལྟར་ན་གླེང་མ་བསླང་བར་གསལ། གཉིས་པ་ལྟར་ན་ལེའུ་གཉིས་པ་དགོས་མེད་དུ་འགྱུར་རོ། །གལ་ཏེ་སྟོན་པས་མ་གསུངས་ན་གང་གིས་གསུངས། སྡུད་པ་པོས་གསུངས་ན་སྟོན་པས་གསུངས་པ་ཞིག་གམ་མ་གསུངས་པ་ཞིག་གསུངས། དང་པོ་ལྟར་ན་གོང་དང་འདྲ་བར་ཐལ་ཞིང་ཕྱི་མ་ལྟར་ན་རྒྱུད་དོན་སྡུད་པ་པོས་གསུངས་པའི་ཕྱིར་སྟོན་པ་དོན་མེད་དུ་འགྱུར་རོ། །རྒྱུད་དོན་མིན་ན་རྒྱལ་བ་ཀུན་ཏུ་བཟང་པོའི་དགོངས་པ་ལས་ཕྱུང་བར་བཤད་པ་དང་འགལ་ལོ། །ཡང་བསྡུ་བ་འདི་ཚིག་འདུས་ནས་སམ་དོན་འདུས་ནས་
སྡུད་ཅེས་པ་དང་། བསྡུས་པ་ལ་དགོས་ཆེད་ཅི་ཡོད་ཀྱང་བརྟག་གོ། །།ལེའུ་གཉིས་པ་ལ་གཉིས་ཏེ། ཐུན་མོང་མ་ཡིན་པར་གླེང་བསླང་བ་ལ་དཔྱད་པ་དང་། ཐུན་མོང་དུ་གླེང་བསླང་བ་ལ་དཔྱད་པའོ། །དང་པོ་ལ། གསང་དབང་བསྐུར་བ་ལ་དཔྱད་པ་དང་། དབང་གཉིས་ཀྱི་ལས་ཐུན་མོང་དུ་བསྟན་པ་ལ་དཔྱད་པའོ། །དང་པོ་ནི། འདིར་གླེང་གཞི་གླེང་བསླང་དབང་བསྐུར་རྒྱུད་བཤད་རྣམས་ཆིག་རྫོགས་སམ་སྔ་ཕྱིའི་རིམ་པ་ཇི་ལྟ་བར་བཞག་ཅེས་དཔྱད་དགོས་ཤིང་། ཁྱད་པར་གྱི་བྱེད་ཆོས་ཡབ་ཡུམ་གྱི་ཉི་ཟླ་གཉིས་འདྲེས་ཀྱི་རྫས་ལ་བརྟེན་པ་གང་ཞིག་ཡུམ་གྱི་ཐིག་ལེ་དཀར་དམར་གྱི་ཆ་གང་དུ་ངོས་བཟུང་། སྟོན་པ་ཡབ་ཡུམ་ཡེ་ཤེས་ཀྱི་སྐུ་ཅན་ལ་ཉི་ཟླ་བྱང་ཆུབ་ཀྱི་སེམས་ཡོད་པ་མི་འགལ་བའི་ཚུལ་དང་། འཁོར་རྣམས་ལ་ཁུ་རྡུལ་དང་འཁྲི ག་སྲེད་ཕྲ་མོ་ཡོད་པར་འདོད་དམ་ཞེས་བརྟག་གོ ། འཁོར་རྣམས་ཕྱག་རྒྱ་ལ་ངེས་པར་བརྟེན་དགོས་མིན་དང་། ཀུན་མཁྱེན་ཆོས་རྗེས་གྲོལ་བའི་ཐིག་ལེ་དྲངས་ནས་བཤད་པ་སོགས་ལྟར་ན་མཐར་ལམ་པ་མི་སློབ་ལམ་དུ་ཤེར་དབང་ནས་ཞུགས་པས་ཆོག་པར་གསུངས་པ་དགོངས་པའི་གནད་གཅིག་གམ་སྙམ་ཞིང་འདིའི་སྣོད་ཀྱི་གཙོ་བོ་ལྷན་ཅིག་པ་ཡིན་མོད་གོ་ཕྱེ་བའི་འཁོར་ཡང་སྣོད་ཙམ་དུ་རུང་ངམ་ཞེས་པ་དང་། སྟོན་པའི་དགོངས་པ་དབྱེར་མེད་ཀྱི་ཡེ་ཤེས་ཆེན་པོ་ད་དུང་མ་མྱོང་བ་ཙམ་གྱིས་གསང་དབང་གི་ངེས་ཚིག་འཇོག་ན་ཤེར་དབང་ཡང་དེར་ཐལ་ལོ་ཞེས་དོགས་སོ། །གཞན་ཡང་རྒྱུད་སྡེ་གཞན་དུ་གསང་དབང་བསྐུར་ཚུལ་གསུངས་པ་དང་མི་འདྲ་བའི་ཁྱད་པར་འབྱེད་དགོས་པར་སྣང་། གཉིས་པ་ནི། སེམས་བསྐྱེད་པའམ་དབང་བསྐུར་བ་དངོས་ལ་སྤྱན་འགྲེལ་ལྟར་རང་བཞིན་གཞིའི་དང་། སྤར་ཁབ་ལྟར་བགྲོད་པ་ལམ་གྱི་དང་། རྒྱ་ཆེར་འགྲེལ་ལྟར་མཐར་ཕྱིན་འབྲས་བུའི་སེམས་བསྐྱེད་པ་དེ་དག་གི་སྐབས་སྐྱེ་མེད་འགག་མེད་དང་དེ་གཉིས་དབྱེར་མེད་སྒྲུབ་ཚུལ་སྤྱིར་འཆད་འགྱུར་ལས་ཤེས་པས་མ་སྤྲོས་ཤིང་། འདིར་གནས་དམིགས་འགྲོ་འོང་མེད་པ་གསུམ་འོག་མ་པའི་ལྟར་ལས་ཁྱད་འཕགས་ཀྱི་མཚན་ཉིད་འདྲེན་ཏེ་དབྱེར་མེད་ཀྱི་དོན་
དུ་སྒྲུབ་བོ། །གྲོལ་ལམ་ཅིག་ཆར་བ་སེམས་ལྔ་ནས་བགྲོད་དམ་མི་བགྲོད། དང་པོ་ལྟར་ན་དམ་བཅའ་ཉམས་ཤིང་གཉིས་པ་ལྟར་ན་རྒྱུད་འགྲེལ་དག་དང་འགལ་ལོ། །ཐབས་ལམ་འོག་སྒོའི་དབང་དུ་བྱས་ཏེ་དབང་ཕྱི་མ་གཉིས་བསྐུར་བའི་ཚེ་འདོད་ཆགས་བདེ་ཆེན་ལམ་གྱིས་ཡས་བབ་དགའ་བཞིའི་འགྲོས་ལ་ཐུན་མོང་གི་ས་བཅུ་དང་ལམ་ལྔ། མས་བརྟན་དགའ་བཞིའི་འགྲོས་ཀྱི་ཁྱད་པར་གྱི་ས་བཅུ་དང་ལམ་ལྔ་རྫོགས་ནས་འཚང་རྒྱ་ཚུལ་གསུངས་པ། ཐུན་ཁྱད་ཀྱི་ས་ལམ་དེའི་གོང་དུ་ཡང་རྫོགས་ཚུལ་བྱུང་བ་ཇི་ལྟར་ཡིན། ཡས་བབ་ཟག་བཅས་དང་མས་བརྟན་ཟག་མེད་ཅེས་བཤད་པ་ན་རང་ལུགས་ཀྱི་བཞེད་པས་དབྱེར་མེད་བདེ་ཆེན་གྱི་དབང་མ་ཐོབ་པར་ཕྲ་སྒྲིབ་ཡོད་པའི་ཕྱོགས་ནས་བསྙད་རུང་ངམ་སྟེ་འོན་ཀྱང་མས་བརྟན་ཡིན་རུང་ཐིག་ལེ་རང་གནས་སུ་མ་སླེབས་པར་བདེ་ཆེན་གྱི་དབང་ཐོབ་པར་འཇོག་ཏུ་མེད་པ་དང་དབང་གསུམ་ཅིག་ཆར་ཐོབ་པ་ཞིག་ཁས་ལེན་དགོས་པས་གནོད་དོ། །ཡས་མས་ཀྱི་དགའ་བཞིའི་འགྲོས་ལ་ཟབ་དབང་གི་རིམ་པ་བརྩི་ཚུལ་ཡབ་ཀྱི་ཕྱོགས་ནས་སམ་ཡུམ་གྱི་ཕྱོགས་ནས་བཞག་ཅེས་པ་དང་། ཁུ་རྡུལ་རླུང་གསུམ་གྱི་བག་ཆགས་ཕྲ་མོ་ལྷག་མེད་དུ་འགགས་པ་ན་དཀར་ཆ་སྤྱི་བོ། དམར་ཆ་མགྲིན་པ། རླུང་སེམས་སྙིང་གར་དག་དགོས་པར་ངེས་པ་ཞིག་གམ་དེ་གསུམ་སྐུ་གསུང་ཐུགས་ཀྱི་རང་བཞིན་དུ་དག་པ་ན་གནས་དེ་དེར་དག་ཅེས་བཏགས་སམ་ཞེས་དཔྱད་དོ། །འཚང་རྒྱ་ཚུལ་ཡང་སྐུ་ལྔ་དང་སྐུ་བཞིའི་བདག་ཉིད་དུ་སངས་རྒྱས་པར་གསུངས་པ་ལ་ཁྱད་པར་ཡོད་མེད་ཇི་ལྟར་དང་། གང་དག་མདོ་སྔགས་ཀྱི་སངས་རྒྱས་ལ་ཁྱད་པར་ཡོད་པར་བཞེད་པ་དེའི་ལྟར་ན་མདོའི་སངས་རྒྱས་ལ་སྣང་གསུམ་འཕོ་བའི་བག་ཆགས་ཕྲ་མོ་ཡོད་པར་ཁས་ལེན་མི་དགོས་སམ་སྙམ་མོ། །འདིར་གྲོལ་ལམ་དང་སྟེང་སྒོའི་ལམ་ལྟར་གྱི་ཟབ་དབང་གསུམ་པོ་བསྐུར་ཚུལ་འཇོག་ཆོག་མིན་དང་། དབང་གཉིས་ཀྱི་ལས་ཐུན་མོང་དུ་འགྲོ་ཚུལ་གཞུང་གཅིག་གི་སྟེང་དུ་དབང་གཉིས་བྱུང་ཞིང་གཉིས་ཀའི་སྔོན་དུ་སེམས་བསྐྱེད་དགོས་པས་སམ། སེམས་བཞི་པོ་དེ་དབང་གཉིས་ཀའི་སྔོན་འགྲོ་ཐུན་མོང་བ་དང་། འགྲོ་འོང་བྱང་ཆུབ་ཀྱི་སེམས་དངོས་གཞི་ཐུན་མོང་པར་འདུག་པས་ཡིན་
ཞེས་བརྟག་གོ །ཡང་མཐར་ལམ་པ་ལ་དབང་གསུམ་རིམ་པས་སམ་ཅིག་ཆར་དུ་བསྐུར། དང་པོ་ལྟར་ན་མན་ངག་དག་དང་འགལ། གཉིས་པ་ལྟར་ན་དབང་གསུམ་བསྐུར་བ་མི་འཐད། ལར་རིམ་ཅིག་ཆར་གཉིས་ཀ་རུང་བ་ཞིག་ཁས་ལེན་ན་འདིའི་སྐབས་དེ་གང་ཡིན་དཔྱད་དགོས། ཟབ་དབང་གསུམ་པོ་འདི་གླེང་བསླང་ངམ་རྒྱུད་དོན་ཡིན། སྔ་མ་ལྟར་ན་ལྷན་ཅིག་པས་དབང་ཐོབ་ཚེ་རྒྱུད་གོ་བར་མི་འགྱུར། ཕྱི་མ་ལྟར་ན་མན་ངག་དང་འགལ་ཞིང་བསྟན་པ་འབྱུང་བའི་རྐྱེན་མིན་པར་ཐལ་བའི་རིགས་པས་ཀྱང་གནོད་དོ། །གཉིས་པ་ནི། དེ་ལྟ་བུའི་ཟབ་མོ་གསང་བའི་དོན་དེ་གསང་བ་བཞིས་ཆོད་པ་དག་ནི་འཁྲུ ལ་བའི་གཞན་དབང་དུ་གྱུར་ཚུལ་ལ་གཉགས་པད་འབྱུང་སོགས་འཁྲུལ་གཞི་ཡོད་པ་ལས་འཁྲུལ་བར་བཞེད། འགའ་ཞིག་མེད་པ་དང་དབྱེར་མེད་ལས་འཁྲུལ་བར་གསུངས་སོ། །འོན་ཀྱང་དོགས་པ་འདི་ལྟར་སྣང་སྟེ། དང་པོ་ལྟར་ན། འཁྲུ ལ་པ་རང་རྒྱུད་པ་རྟག་པར་དང་། གཞི་འཁོར་བའི་མཐར་ལྷུང་བ་དང་། འཁྲུ ལ་བ་མི་སེལ་བར་དང་། གཞི་གཟུང་འཛིན་ཅན་དུ་ཐལ་བའི་སྐྱོན་བཞིས་གནོད་དོ། །གཉིས་པ་ལྟར་ན། ལྷན་སྐྱེས་ཀྱི་མ་རིག་པ་མ་གྲུབ་པར་དང་། གཞི་མྱང་འདས་ཀྱི་མཐར་ལྟུང་བར་དང་། འཁོར་བ་ལ་ཐོག་མ་འབྱུང་བར་དང་། སངས་རྒྱས་ལའང་འཁྲུལ་པ་འབྱུང་རིགས་པར་ཐལ་བའི་སྐྱོན་བཞིས་གནོད་དོ། །གསུམ་པ་ལྟར་ན། གཞི་རང་བཞིན་ཡེ་ནས་རྣམ་དག་ཡིན་ལ། འཁྲུལ་བ་ནི་གློ་བུར་གྱི་དྲི་མ་ཡིན་པས་གནོད་དོ། །སྐྱོན་དུ་འགྱུར་ཚུལ་དེ་དག་ཀྱང་རྒྱས་པར་ནི་སྒྱུ་འཕྲུལ་ཐུགས་ཐིག་སོགས་དང་རྒྱུད་ཊིཀ་དུ་མ་ལས་གསལ་ལོ། །ཅིའི་ཕྱིར་འཁྲུལ་གཞི་ཞེས་བྱ་བ་དེ་བདེ་གཤེགས་སྙིང་པོ་ལ་འདོད་དམ། མ་རིག་པ་རྒྱུ་དང་བཅས་པ་ལ་འདོད། སྔ་མ་ལྟར་ན་སངས་རྒྱས་ཀྱི་དགོངས་པ་མི་རྙེད་པར་འགྱུར། ཕྱི་མ་ལྟར་ན་འཁྲུ ལ་བའི་ངོ་བོ་མི་རྙེད་པར་འགྱུར་རོ། །བརྟག་གཞིའི་མཚན་ཉིད་ནི་སྔ་རབས་པ་ལ་ཕལ་ཆེར་ལམ་པའི་བློས་བརྟགས་པས་དང་། རོག་གིས་སོ་སོར་རྟོག་པའི་ཤེས་རབ་ཀྱིས་བརྟག་དཔྱད་བྱ་བའི་གཞིར་གྱུར་པས་དེ་སྐད་སྨོས་པར་བཞེད་ཀྱང་། རང་ལུགས་ནི་གནས་ལུགས་ལ་ཡང་དག་པར་མ་གྲུབ་པ་ལས་ལོག་པར་རྟོག་པའི་ཞེན་སྣང་ངོ་གསུངས། དེ་ལ་འདི་ལྟར།
འདས་པའི་ཆོས་ཆོས་ཅན། ཁྱོད་ཀྱང་ལོག་རྟོག་ཏུ་ཐལ་ཏེ། བརྟག་གཞི་ཡིན་པའི་ཕྱིར་ཞེས་ཟེར་ན་དཔྱད་དགོས་སོ། །འདིར་ཞེན་སྣང་དང་ཞེན་པ་ལ་ཁྱད་པར་འབྱེད་པ་ནི་མི་རིགས་པར་སེམས་ཏེ། དེ་གཉིས་བློ་རྫས་ཐ་དད་ན་ཞེན་འཁྲུལ་སྤངས་ཚེ་སྣང་འཁྲུལ་མི་སྤང་བར་ཐལ་ཞིང་། ལྡོག་པ་ཐ་དད་ན་གཞལ་བྱ་གཅིག་པར་འགལ་ལོ། །གཉིས་སུ་བཟུང་བས་འཁྲུལ་པའི་སྣང་བ་ཡིན་ནམ་མིན། ཡིན་ན་འགྲོ་ལ་ཤེས་རྒྱུད་གཉིས་ཆར་དུ་ཐལ། མིན་ན་ལུང་དང་འགལ་ལོ། །གཞི་འཆི ང་གྲོལ་མེད་པར་བསྟན་པའི་ཕྱིར་རྣམ་གཅོད་དུ་ཀ་ལྷུན་སྐྱོན་ཅན་དགག་ནས་ཡོངས་གཅོད་དུ་ཀ་ལྷུན་སྐྱོན་མེད་སྒྲུབ་པར་མཛད་པ་ན། གོང་མ་ཕལ་ཆེར་ཀ་དག་ལྟར་དང་ལྷ་རྗེ་ཟུར་ཆུང་བ་ལྷུན་གྲུབ་ལྟར་འཐད་ཅེས་གསུངས་ཀྱང་། རང་ལུགས་ཀྱི་འཇོག་མཚམས་ནི་རྗེ་སྒྲོལ་གཡུང་གཉིས་སོགས་ཀྱི་བཞེད་པ་ལྟར་གཞི་འབྲས་ལ་མ་རིག་པ་མི་ལྡན་པའི་ཆ་ནས་ཀ་དག་དང་། དེ་མ་སྤངས་པའི་ཆ་ནས་ལྷུན་གྲུབ་ཏུ་བཏགས་པ་ཙམ་དུ་ཟད་ཀྱི། དོན་དུ་མ་སྤངས་ལ་མི་ལྡན་པར་ལྟ་བ་གོང་མཐུ ན་པ་རྒྱལ་བུ་དམངས་སུ་འཁྱམས་པའི་སྟོང་ཐུན་དང་སྦྱར་བ་མཛད་པ་དེ་ལྟ་ནའང་། མ་སྤངས་ཞེས་པ་དེ་ཡོད་ཆོས་ཤིག་གམ་མེད་ཆོས་ཤིག་ཡིན། དང་པོ་ལྟར་ན་ལྡན་པ་ཉིད་དུ་ཐལ། གཉིས་པ་ལྟར་ན་མ་སྤངས་པའི་དམ་བཅའ་ཉམས་སོ་སྙམ་པའི་དོགས་པ་འདི་འབྱུང་ངོ་། །འདི་དག་གི་སྐབས། རྒྱུ་ལྷན་སྐྱེས་དང་ཀུན་བཏགས་ཀྱི་མ་རིག་པ་གཉིས་གྲུབ་མཐའ་ངན་པས་བཏགས་མ་བཏགས་ལ་འཇོག་པ་དག་དང་མཐུན་ནམ་ཞེས་པ་དང་། སེམས་རང་སྣང་དང་ཡེ་ཤེས་རང་སྣང་གཉིས་ལ་ཁྱད་པར་ཡོད་དམ་མེད། དང་པོ་ལྟར་ན། སེམས་རིག་ཤན་ཕྱེ་དགོས་པའི་རྣམ་བཞག་ཁས་ལེན་ནམ། གཉིས་པ་ལྟར་ན། འཁྲུལ་བའི་སྣང་བ་སོར་བཞག་འདི་ཁོ་ན་དག་པའི་སྣང་བར་ཐལ་བར་དོགས་སོ། །ཡང་ཐུགས་རྗེས་གཟིགས་པའི་ཡུལ་དེ་ཡོད་མེད་དབྱེར་མེད་གསུམ་ལས་གང་ལྟར་ཏུ་གཟིགས། སྔ་མ་ལྟར་ན། ཡེ་ཤེས་གཟུང་འཛིན་ཅན་དུ་འགྱུར་ཞིང་། བར་པ་ལྟར་ན་ཡེ་ཤེས་རྒྱུན་ཆད་པར་འགྱུ ར་ལ། ཕྱི་མ་ལྟར་ན། གང་ལ་གང་གིས་གང་ལྟར་གཟིགས་ཏེ་གཟིགས་པའི་ཐ་སྙད་རང་མི་འཐད་དོ། །གཞན་ཡང་དམིགས་སུ་མེད་
པ་དེ་ཐུགས་རྗེར་ཅི་འགྱུར་ཡང་དཔྱད་པར་མངོན་ནོ། །རྒྱུད་དོན་འདི་ཉིད་དགྱེས་ཚུལ་དྲུག་གི་སྒོ་ནས་དངོས་དང་བརྒྱུད་ནས་བསྟན་ཅེས་གསུངས་པ་ཧ་ཅང་གུ་དོག་པའི་སྐྱོན་དུ་འགྱུར་བར་དོགས་ཏེ། གཞུང་ཉིད་ནས་སྣ་ཚོགས་མཛད་ཅེས་བཤད་པའི་ཕྱིར། ཐུན་མོང་གི་གླེང་བསླང་འདི ར་བཀའ་སྩལ་པ་དང་གསོལ་བ་མི་འདུག་པས། སྟོན་འཁོར་ཞུས་གནང་མི་རིགས་པའི་སྐྱོན་འབྱུང་མིན་དང་། ལེའུའི་མཚན་གྱི་གཞུང་: འགེགས་༼འགེབ་༽པས་ཁྱབ་པ་གང་ཞིག་ཐུན་མོང་གི་གླེང་བསླང་མཚན་གྱི་ནང་དུ་འདུས་ཚུལ་ཇི་ལྟར་ཞེས་བརྟག་དགོས་སོ།། །།ལེའུ་གསུམ་པ་ལ་གཉིས་ཏེ། རྒྱས་པར་བཤད་པ་ལ་དཔྱད་པ་དང་། དོན་བསྡུ་བ་ལ་དཔྱད་པའོ། །དང་པོ་ལའང་གཉིས་ཏེ། བསྟན་པ་འབྱུང་བ་སྤྱིའི་གླེང་གཞི་ལ་དཔྱད་པ་དང་། ཡོངས་སུ་ཤེས་པར་བྱ་བ་ལྟ་བ་ལ་དཔྱད་པའོ། །དང་པོ་ནི། འདིར་སྔགས་ལུགས་ཀྱི་རྒྱུ་གླེང་གཞི། རྐྱེན་གླེང་བསླང་། ཡོངས་སུ་ཤེས་པར་བྱ་བའི་དངོས་པོ་རྒྱུད་བྱ་བ་དེ་ཡིན་དགོས་པ་གང་ཞིག གླེང་བསླང་གི་མཇུག་ཏུ་གླེང་གཞི་འབྱུང་བའི་སྐྱོན་མི་ཞུགས་པའི་འཐད་པ་འགོད་དགོས་ཤིང་། དེའི་ཚེའང་ལེའུ་གཉིས་པར་ལྷན་ཅིག་པས་གསང་བ་བཞིས་ཆོད་པའི་ཆེད་དུ་རྒྱུད་བཤད་པར་ཞུས་པའི་ཚེ་སྟོན་པས་རྒྱུད་འདི་ཉིད་གསུང་བར་ཞལ་གྱིས་བཞེས་པས་ཐུན་མོང་གི་ཐེག་པ་གསུངས་པ་མི་འཐད་པར་སྨྲ་ན་དཔྱད་དོ། །ཕལ་ཆེན་ལས་བཤད་པ་ལྟར་གཞུང་ཚིག་འཇིག་རྟེ ན་དྲུག་གི་ཕྱོགས་བཅུ་མཐའ་ཡས་མུ་མེད་ཅེས་པ་ཉིད་སྤྲུལ་སྐུའི་ཞིང་དང་སྦྱར་ན་ཆོས་ལོངས་ཀྱི་གླེང་གཞི་སྨོས་པས་སྐབས་འཆོལ་བའི་སྐྱོན་དུ་ཐལ་བར་དོགས་མི་དགོས་ཤིང་། སྟོན་པ་ཐུབ་དྲུག་ཆགས་བྲལ་གྱི་རྣམ་པ་ཡིན་མིན་དང་། ཐུབ་པ་གཞན་ལྔ་ལ་བསྟན་པ་དང་དེ་འཛིན་གྱི་འཁོར་དང་མཛད་པ་བཅུ་གཉིས་ཡོད་མེད་བརྟག་གོ ༑འདིར་བསྟན་གྱི་མཛད་པ་བཅུ་གཉིས་པོ་འོག་མ་པའི་འཇོག་ལུགས་གཉིས་གང་རུང་དང་མཐུན་པ་ཞིག་གམ། ཐུན་མིན་གྱི་ལུགས་ཟུར་པ་ཞིག་འཇོག་ཅེས་པ་དང་ཐུན་མོང་པའི་ལུགས་ལྟར་སངས་རྒྱས་པ་ལ་འབྲས་དབང་བསྐུར་དགོས་སམ་མི་དགོས། དང་པོ་ལྟར་ན་
ཐུན་མོང་པས་ཀྱང་དབང་བསྐུར་གྱི་རྣམ་བཞག་ཁས་ལེན་ནམ། གཉིས་པ་ལྟར་ན་འོད་ཟེར་ཆེན་པོའི་དབང་བསྐུར་མི་འཐད་པར་ཐལ་ལོ། །འོན་ཀྱང་མདོ་སྔགས་ཀྱི་དབང་སྐུར་ཚུལ་ལ་ཁྱད་པར་འབྱེད་རིགས་སོ་སྙམ་ན་གོང་མ་ཕལ་ཆེར་གྱི་བཞེད་པ་དང་འགལ་བའི་སྐྱོན་སྤང་དགོས་སོ། །ཡང་མཛད་པ་བཅུ་གཉིས་དུས་གཅིག་གམ་ཐ་དད་བརྟག་སྟེ། གཅིག་ན་ལོ་ཚེས་གཟའ་སྐར་སོགས་ཐ་དད་དུ་གསུངས་པ་དང་མི་མཐུན། ཐ་དད་ན་རྒྱུད་སྡེ་དག་དང་འགལ་བར་མ་ཟད་ཐུ ན་མོང་པའི་མདོ་སྡེ་འགའ་ཞིག་ནས་དེ་བཞིན་གཤེགས་པ་རྡོ་རྗེའི་གདན་ན་ཏིང་ངེ་འཛིན་ལ་བཞུགས་པ་དང་བྱ་རྒོད་ཕུང་རིར་ཆོས་གསུང་བ་རྣམས་དུས་ཅིག་ཆར་བཤད་པ་དང་ཡང་འགལ་ལོ། །ཀླད་ནས་སྟོན་པ་ལས་སྤྲུལ་པར་བཤད་པ་དང་། འདིར་དགའ་ལྡན་ནས་བབས་པར་གསུངས་པ་མི་འགལ་བའི་ཚུལ་དང་། སྐུའི་མཛད་པ་འདི་གཙོ་བོའམ་གཞི་མའམ་ཕལ་ཆེ་བའི་སྒྲ་གང་ལས་བཏགས་པ་དང་། དུས་བཞི་ཀུན་ཏུ་མཁྱེན་ཚུལ་རེ་མོས་སམ་མཉམ་པར་མཁྱེན། སྔ་མ་ལྟར་ན་སེམས་ཅན་གྱི་རྟོག་པ་དང་མཚུངས་པར་ཐལ་ཞིང་ཕྱི་མ་ལྟར་ན་དུས་བཞི་མིན་པར་འགྱུར་རོ། །སྤྱིར་མཁྱེན་ཚུལ་གནས་ལུགས་དུས་ལས་འདས་པ་དང་བློ་དུས་ལྟར་དུ་འཁྲུ ལ་པ་དང་། ཡེ་ཤེས་དུས་ལ་དབང་བསྒྱུར་བ་གང་ལྟར་མཁྱེན་ཞེས་དཔྱད་དོ། །གཞན་ཡང་ལུས་ཀྱི་རྫུ་འཕྲུལ་འདི་དག་མངོན་ཤེས་སུ་འགྲོ་བའི་རྒྱུ་མཚན་ཐུགས་ཀྱི་རྣམ་པར་འཕྲུ ལ་བ་ཡིན་པས་བཞེད་པ་དེའི་ལྟར་ན་མཛད་པ་བཅུ་གཉིས་ཀྱང་དེར་ཐལ་བར་དོགས་ཤིང་། སྐུ་གསུང་ཐུགས་བསམ་གྱིས་མི་ཁྱབ་པ་ལ། སྟག་དང་སྤྲེའུ་ལྟར་དང་། ཅ་ཅོ་མི་མཛད་ཅིང་མཉམ་པར་མ་བཞག་པ་མེད་པས་ཐུབ་པར་བཤད་པའི་འགལ་སྤོང་དང་། སྐུ་ཞལ་བསམ་གྱིས་མི་ཁྱབ་པ་གཉིས་ལ་ཁྱད་པར་ཅི་ཡོད། སྤྲུལ་པ་ཐུག་མེད་དུ་འདོད་ན་མན་ངག་དང་འགལ་བའི་སྐྱོན་སེལ་རྣམས་རིམ་གྱིས་ཞུའོ། །གསུང་རིག་པས་འདུལ་བའི་སྐབས་འདིར། སོ་སོར་བསྟན་པ་རྒྱ་མཚོའི་རྒྱུད། །འདིར་བསྟན་འདིས་བསྟན་འདི་ཕྱིར་སྟོན། །ཞེས་པས་མཚན་ཉིད་དང་རྒྱུད་ཐམས་ཅད་ཀྱི་སོ་སོའི་རྣམ་བཞག་ཇི་ལྟ་བུ་ཞིག་བསྙད་ཀྱང་རུང་མོད་ཧ་ཅང་རྒྱས་པར་བཤད་ན་སྐབས་དོན་ལས་འཆོལ་
པར་འགྱུར་བས་རེ་ཞིག་ཉེར་མཁོ་ཙམ་བརྗོད་ན། རྒྱུ་འབྲས་ཀྱི་ཐེག་པའི་ཁྱད་པར་ཚུལ་གསུམ་སྒྲོན་མེ་ལས། དོན་གཅིག་ནའང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཞེས་འཕགས་ཚུལ་བཞི་དང་། མདོ་ཆེན་པོ་ལས། དཀར་པོའི་མཐར་ཐུག་བསོད་ནམས་ཀྱིས། །གསང་ཉིད་སྐད་ཅིག་འབུམ་ཆར་མིན། །ཞེས་དང་། ཡན་ལག་ལྟ་བུའི་དབུ་མ་ཉམས་ཀྱང་འཚོ། །སྙིང་དང་འདྲ་བའི་གསང་ཉིད་མེད་ན་བརླག །ཅེས་སོགས་ཀྱིས་ཁྱད་པར་བསྟན་ལ། གནུབས་ཀྱི་བསམ་གཏན་མིག་སྒྲོན་དུ་ཁྱད་པར་བཅུ་གཉིས་ཀྱིས་དང་། ལྷ་རྗེ་ཟུར་ཆུང་བ་དང་རོག་གིས་ལྟ་བ་གཏན་ལ་འབེབས་ཚུལ། ཕབ་པའི་གྲུབ་མཐའ། ཉམས་སུ་ལེན་ཚུལ། འབྲས་བུ་ཐོབ་དུས། འབྲས་བུ་རང་གི་ངོ་བོ་རྣམས་ལ་དང་། དཔྱལ་ལོ་ཀུན་རྡོར་ནི་གཞི་ལམ་འབྲས་གསུམ་གྱིས་དང་། འགའ་ཞིག་གིས་སྒྲ་དོན་གྱི་དང་། དོན་དམ་དངོས་སྟོང་དང་ཀུན་རྫོབ་འཁྲུལ་པར་འཛིན་མིན་དང་། ཤེས་རབ་ལ་ཁྱད་པར་མེད་ཀྱང་ཐབས་ཀྱི་ངོས་ན་འཇོག་པར་བཞེད་དོ། །ཡང་སྔགས་ཕྱི་ནང་གི་ཁྱད་པར་ལྷ་རྗེ་སྒྲོ་ཕུག་པས་ཐུགས་སྲས་ཀ་བ་བཞིའི་དགོངས་པ་དྲིལ་ཏེ་འགོད་པར་མཛད་པ་ལྟར་ན། ལྟ་བ་དངོས་གྲུབ་དབང་སྤྱོད་འབྲས་ཏེ་ལྔ་རུ་དང་། རྗེ་ཁ་རག་པ་དང་རོག་ནི། རྒྱུད་ཀྱི་དངོས་པོ་བཅུ་ཕྱི་ནང་གི་བསྒྱུར་ཁྱད་དང་། ཟབ་དབང་གསུམ་སྟོན་ནུས་མིན་དང་། རང་བྱུང་གི་ཡེ་ཤེས་སྨྲ་ནུས་མིན་དང་། ལྷ་ཞལ་སྦྱོར་བསྒོམ་ནུས་མིན་དང་། དམ་རྫས་ལྔ་ལ་སྤྱོད་ནུས་མིན་དང་། ལྷ་བདག་ཐ་མི་དད་པར་བལྟས་ནས་འཇུག་ནུས་མིན་དང་། དངོས་གྲུབ་ཕྱི་ནང་ནས་རེ་མིན་དང་། དེའི་དུས་ཉེ་རིང་གི་ཁྱད་པར་ཡོད་ཚུལ་གསུངས་པ་དང་། རྗེ་སྒྲོལ་གཡུང་རྣམ་གཉིས་ཀྱིས་ལྟ་སྤྱོད་ཏིང་ངེ་འཛིན་གསུམ་དབྱེར་མེད་དུ་འདོད་མི་འདོད་ཀྱི་ཁྱད་པར་ཡོད་པ་སོགས་ཀྱི་བཞེད་ཚུལ་དེ་དག་རྣམས་ལས་རང་ལུགས་གང་ལྟར་བཟུང་བར་དཔྱད་དོ། །ཅི་གསང་སྔགས་འབྲས་བུ་ལམ་དུ་བྱེད་པ་དེ་འབྲས་བུ་སྨིན་པ་ཞིག་གམ་མ་སྨིན་པ་ཞིག་ལམ་དུ་བྱེད། དང་པོ་ལྟར་ན་ཐུག་མེད་དུ་འགྱུར་ཏེ། སྨིན་ནས་ཀྱང་ལམ་དུ་བྱེད་པའི་ཕྱིར། རྟགས་ཁས། ཁྱབ་པ་ཚད་མས་
གྲུབ་སྟེ། ན་ནིང་གི་འབྲས་བུ་ད་གཟོད་ཀྱི་ས་བོན་དུ་འགྱུར་བ་བཞིན་ནོ། །འདོད་ན་གསང་སྔགས་ཉིད་རིང་ལམ་དུ་ཐལ་ལོ། །གཉིས་པ་ལྟར་ན་འབྲས་བུ་ལམ་བྱེད་མིན་པར་འགྱུར་ཏེ༑ མ་སྨིན་པའི་ཕྱིར། འདོད་ན། རང་ཚིག་ཉམས་ལ། གང་མ་སྨིན་པ་ལ་མཐར་ཐུག་གི་འབྲས་བུ་མིན་པས་ཁྱབ་སྟེ་མྱུ་གུ་སྔོན་པོ་བཞིན་ནོ། །གསང་སྔགས་འདི་སྡེ་སྣོད་གང་ཡིན་ལ་དཔྱད་པ་ན། རྒྱ་གར་གྱི་སློབ་དཔོན་བཱི་མ་ལ་དང་བོད་ཀྱི་མཁས་པ་༼ས་༽སྐྱ་ཉི་མ་རྡོ་རྗེ་སོགས་ནི། མངོན་པའི་སྡེ་སྣོད་ལ་ཕྱི་ནང་གཉིས་ལས་སྔགས་ནི་ནང་གི་མངོན་པར་བཞེད། དེ་དང་མཐུན་པར་རྫོགས་ཆེན་དུང་ཡིག་ཅན་ལས་ཀྱང་། སྡེ་སྣོད་རིན་པོ་ཆེ་ལས་མངོན་པ་སྟེ༑ ༑ཞེས་གསུངས་སོ། །ཡང་རྒྱ་གར་གྱི་སློབ་དཔོན་ཤཱནྟི་བ་དང་བོད་ཀྱི་ལྷ་རྗེ་སྣར་སྟོན་སེངྒེ་འོད་སོགས་ནི་ཤེར་ཕྱིན་ཚུལ་བརྒྱ་ལྔ་བཅུ་པའི་འགྲེལ་པ་ལས། ཏནྡྲ་སྡེ་བཅོ་བརྒྱད་ལ་མདོ་སྡེ་ཆེན་པོ་བཅོ་བརྒྱད་ཅེས་གསུངས་པ་ལྟར་མདོ་སྡེར་བཞེད། ཡང་རྒྱའི་སློབ་དཔོན་ཨཪྱ་དེ་བ་དང་བོད་ཀྱི་མཁས་པ་རོག་བདེ་གཤེགས་ཆེན་པོ་དང་། ཀུན་མཁྱེན་ཆོས་རྗེ་སོགས་ནི་ཡོན་ཏན་བཀོད་པའི་རྒྱུད་དང་ཀུན་བྱེད་སོགས་ཀྱི་ཁུངས་ལ་བརྟེན་ནས་རིག་འཛིན་གྱི་སྡེ་སྣོད་ཅེས་སྡེ་སྣོད་རྐང་ཐུབ་གཅིག་ཏུ་འཇོག་པར་གསུངས་པ་དེ་དག་ལས་སྤྱི་དང་མཐུན་པའི་འཐད་ཕྱོགས་འགོད་པར་རིགས་སོ། །འདིར་སྟོན་པའི་མཐར་ཐུག་གོ །ཞེས་པ་དང་། གོང་དུ་བླ་ན་མེད་པ་ཞེས་པ་གཉིས་གསང་བའི་སྙིང་པོ་འདི་ཡིན་ནམ་མིན། ཡིན་ན་འོག་ནས་རྒྱུད་དོན་གསུང་མི་དགོས་ཤིང་། མིན་ན་མཐར་ཐུག་དང་བླ་ན་མེད་པར་བཤད་པ་དང་འགལ་ལོ། །གཞན་ཡང་འདིར་བསྟན་ཐེག་རིམ་དགུའི་རྣམ་བཞག་དང་། དེ་དག་རང་གཞུང་ནས་བཤད་པ་གཉིས་འཇོག་མཚམས་ཐུན་མིན་དཔྱད་དགོས་ཤིང་། སྐབས་འདིར་རྒྱུད་ཊིཀ་གཞན་དུ་སྟོང་ཐུན་སྦྱར་ཚུལ་གསུམ་ལས་མ་བྱུང་ཡང་དཔལ་སྨན་ལུང་པ་ཆེན་པོའི་རྒྱུད་འགྲེལ་དུ་དཔེའི་སྟོང་ཐུན་བཞི་ཞེས་གསལ་ལོ། །འདིར་རྒྱུད་ཀྱི་དངོས་པོ་ལ་འཇུག་པའི་གཞུང་མཚམས་ངོས་བཟུང་བ་ལ་བཞེད་ཚུལ་མི་འདྲ་བ་གསུམ་སྟེ་སློབ་དཔོན་སྒེག་པ་ནི་ལེའུ་གསུམ་པའི་སྟོད་ཡན་ཆད་ཀྱིས་སྤྱི་དང་ཁྱད་པར་གྱི་རྒྱུ་རྐྱེན་རྫོགས་ནས། དེ་ནས་དེ་
བཞིན་གཤེགས་པ་ཐམས་ཅད་ཀྱིས་ཆེད་དུ་བརྗོད་པ་འདི་བརྗོད་དོ། །ཞེས་པ་མན་ཆད་ལེའུ་ཕྱེད་དང་བཅུ་དགུས་རྒྱུད་དངོས་བསྟན་པར་བཞེད། སློབ་དཔོན་བི་མ་ལས་ནི། ལེའུ་གཉིས་པའི་ཡབ་ཡུམ་གྱི་སླེང་བསླང་བས་རྒྱུ་རྐྱེན་རྫོགས་ནས། དེ་ནས་གཉིས་སུ་མེད་པའི་བདག་ཉིད་ཆེན་པོས་ཞེས་པ་མན་ཆད་ཀྱིས་རྒྱུད་དོན་བསྟན་པར་བཞེད། པཎྚི་ཏ་རོང་ཟོམ་ཆེན་པོ་ནི་ལེའུ་དང་པོར་གླེང་གཞི། གཉིས་པར་ཀུན་བཟང་ཡབ་ཡུམ་གྱི་གླེང་བསླང་དང་དེ་མ་རྟོགས་པའི་འགྲོ་བ་ལ་བྱང་ཆུབ་ཀྱི་སེམས་གཉིས་བསྐྱེད་པ། གསུམ་པར་དེའི་བྱིན་རླབས་ཐུབ་དྲུག་སྤྲོས་ཏེ་འདུ ལ་བ་བཞིས་འགྲོ་དོན་མཛད་ཚུལ་བསྟན་ནས་ལེའུ་བཞི་པ་མན་ཆད་ཀྱིས་རྒྱུད་ཀྱི་དངོས་པོ་བསྟན་པར་བཞེད་དོ། །ལུགས་དེ་དག་གང་ལྟར་བཤད་ཀྱང་འགལ་བ་མེད་མོད་བརྒྱུད་པའི་བཀའ་སྲོལ་དང་པོ་ཉིད་ཡིན་པས་རེ་ཞིག་སྤར་ཁབ་ལྟར་བཟུང་ངོ་གསུངས། གཉིས་པ་ལ་གསུམ་སྟེ། གང་གཞལ་བྱ་ཆོས་ཅན་ལ་དཔྱད་པ། གང་གིས་འཇལ་བྱེད་གཏན་ཚིགས་ལ་དཔྱད་པ། དེ་ལྟར་གཞལ་བའི་གྲུབ་མཐའ་ལ་དཔྱད་པའོ། །དང་པོ་ནི། སྤྱིར་སྐབས་དང་དགོས་ཆེད་ཀྱི་ཆོས་ཅན་འཇོག་ལུགས་རིགས་གསུམ་དུ་འགྱུར་ཏེ་རྒོལ་བ་གཉིས་རྩོད་ཚེ་ཤེས་ངོར་ཚད་མས་གྲུབ་པའི་དགོས་པ་ལ་བརྟེན་ནས་ཕྱོགས་གཉིས་ཀའི་མཐུན་སྣང་དུ་གྲུབ་པ་གཅིག་འཇོག་པ་དང་། གདམས་ངག་འབོགས་ཚེ་སློབ་བུའི་རྒྱུད་ཐོག་ཏུ་ཁེལ་བའི་དགོས་པ་ལ་བརྟེན་ནས་བུའི་ཚོགས་བརྒྱད་ཡུལ་བཅས་འཇོག་པ་དང་། གཞུང་འཆད་ཚེ་ཆོས་ཉིད་གཏན་ལ་འབེབས་པའི་དགོས་པ་ལ་བརྟེན་ནས་དངོས་པོ་གཉིས་བསྡུས་ཀྱི་ཆོས་ཀུན་འཇོག་པ་ལས་འདིར་གང་དུ་ངོས་བཟུང་བ་དང་གཞལ་བྱ་དེ་ཀུན་གཞིའམ་ཚོགས་དྲུག་གང་གི་ཡུལ་དུ་ཡོད་པ་དང་། རྟོག་ཤེས་དེ་ཉིད་སོ་སོར་རྟོག་པའི་ཤེས་རབ་ཏུ་གནས་འགྱུར་ཚུལ་ལ་དཔྱད་དགོས་ཤིང་། གཞལ་བྱ་དེའང་མྱང་འདས་སམ་འཁོར་བ་འཇལ། དང་པོ་ལྟར་ན་འདས་པའི་རང་མཚན་ནི་མོས་སྤྱོད་ཀྱི་རིག་ཤེས་ལ་ལྐོག་ཏུ་གྱུར་པའི་ཕྱིར་དེར་མི་རུང་ངོ་། །གཉིས་པ་ལྟར་ན་འཁོར་བའི་རང་མཚན་སྣང་ཙམ་ཉིད་ལའམ་ཞེན་པ་སྒྲོ་བཏགས་ཀྱི་ཤེས་པ་ལ་འཇལ། སྔ་མ་ལྟར་ན་མི་རིགས་ཏེ། སྣང་ཙམ་རིགས་པས་
དགག་པར་མི་ནུས་ཤིང་། བཀག་ན་སྐྱོན་དུ་ཐལ་བའི་ཕྱིར། ཕྱི་མ་ལྟར་ནའང་ཤེས་པ་སྐད་ཅིག་གསུམ་གྱི་རང་བཞིན་ཡིན་པ་ལ་འདས་མ་འོངས་གཉིས་འགགས་ཤིང་མ་སྐྱེས་པའི་ཕྱིར་འཇལ་དུ་མི་བཏུབ་ཅིང་། ད་ལྟར་གྱི་ཡིད་རྟོག་བཅས་བསམ་ཤེས་སུ་གནས་འགྱུར་བའི་ཕྱིར་གཞལ་བྱར་མ་གྲུབ་པས་གཞལ་དུ་མི་རུང་ངོ་། །གཞན་དུ་བསམ་ཤེས་རང་གིས་རང་ལ་ནི་གཞལ་དུ་མི་བཏུབ་སྟེ། རལ་གྲིའི་སོ་རང་གིས་རང་གཅོད་མི་ནུས་པ་བཞིན་ནོ། །ཡང་ད་ལྟར་གྱི་ཤེས་པ་སྐད་ཅིག་མ་རང་ཐད་རང་ཐད་ཀྱི་ཞེན་སྣང་ལ་འཇལ་ལོ་སྙམ་ན། དེའི་ཚེ་ཤེས་རྒྱུད་སྐད་ཅིག་གི་སྟེང་དུ་མངོན་གྱུར་དུས་གཅི ག་ཏུ་ཚོགས་ནས་འཇལ་བ་མིན་པ་གང་ཞིག གཅིག་མངོན་གྱུར་གྱི་ཚེ་གཅིག་བག་ཉལ་དུ་གནས་པར་ཁས་ལེན་དགོས་པ་དེ་ལྟ་ནའང་བསམ་ཤེས་དེ་ཞེན་སྣང་དག་པའི་ཤུལ་དུ་སྐྱེའམ། མ་དག་པར་སྐྱེ། དང་པོ་ལྟར་ན་བསམ་ཤེས་དོན་མེད་དུ་ཐལ་ཞིང་། གཉིས་པ་ལྟར་ན་ཤེས་རྒྱུད་གཉིས་ལྡན་དུ་ཐལ་ལོ། །ཅི་སོ་སོར་རྟོག་པའི་བསམ་ཤེས་དེ་འཁྲུལ་ཤེས་མིན་པར་འདོད་དགོས་ཀྱང་དེ་ལྟར་ན་འབད་མེད་དུ་གྲོལ་བར་ཐལ་བ་དང་། ཀུན་བཏགས་རང་མཚན་པ་དེ་ཉིད་ཡུལ་དུ་བྱེད་པའི་ཕྱིར་དེར་ཐལ་བ་ཉིད་དུ་ངེས་པར་མི་གྱུར་རམ་ཞེས་བྱ་བ་འདི་སྤོང་དགོས་སོ། །ཞེན་སྣང་གྲུབ་ཟིན་པའི་ཕྱིར་གཏན་ཚིགས་ཀྱིས་གཞལ་མི་དགོས་པར་འགྱུར་རོ་ཞེས་པ་ལ་མ་ཁྱབ་པའི་ལན་འདེབས་རྒྱུ་བྱུང་ཡང་། དེ་ལྟར་ན་ཞེན་སྣང་གཏན་ལ་ཕབ་པས་ཆོས་ཉིད་གཏན་ལ་མི་ཕེབས་པར་ཐལ་ཏེ་ཐ་དད་པའི་ཕྱིར་ཞེས་སྨྲ་ན་དཔྱད་དོ། །གཞན་ཡང་ཞེན་སྣང་བསམ་གྱིས་མི་ཁྱབ་པས་གཞལ་གྱིས་མི་ལང་བར་འགྱུར་བ་དང་། འཁོར་འདས་ཀྱི་ཞེན་སྣང་གཉིས་རེ་རེ་ནས་སམ་གཅིག་ཏུ་འཇལ་བ་གང་ཡིན་ཡང་བརྟག་པར་མངོན་ནོ། །འདིའི་སྐབས་འཁོར་བ་ཐོག་མཐའ་ཡོད་མེད་ལ་དཔྱད་པ་ན། གོང་མ་དག་སྤྱི་བཙན་ལ་ཐོག་མཐའ་མེད་ལ་སྒོས་བཙན་དུ་མཐའ་ཡོད་གསུངས་ཀྱང་། དེ་ལྟར་ན་སྤྱི་དེས་སྒོས་ལ་ཁྱབ་བམ་མ་ཁྱབ། དང་པོ་ལྟར་ན་སྒོས་བཙན་ལའང་ཐ་མ་མེད་པར་ཐལ། གཉིས་པ་ལྟར་ན་དགོས་ལ་མ་ཁྱབ་པའི་ཕྱིར་སྤྱི་མིན་པར་འགྱུར་རོ། །གཉིས་པ་ནི། གཞལ་བྱ་དེ་དག་གི་འཇལ་བྱེད་གཏན་ཚིགས་
གསུམ་དུ་མཚོན་པ་ལ་དགོས་པ་མེད་པར་འཇོག་ཏུ་མི་རུང་བ་གང་ཞིག འདིའི་ལུགས་ཀྱི་ཐུན་མོང་དང་ཐུན་མིན་གཉིས་སུ་ངེས་པའི་དང་པོ་ཐུན་མོང་པ་བདེན་པའི་གཏན་ཚིགས་ཏེ། དེ་ལ་མཉམ་པ་བཞི་ལས་ཐུན་མོང་གི་མཉམ་པ་གཉིས་འོག་མ་ཁ་དྲང་བའི་ཆེད་ཙམ་དུའམ་ལམ་འདིའི་རྣལ་འབྱོར་པས་ཚུལ་དེ་དག་གིས་ཀྱང་མཉམ་ཉིད་དུ་བལྟ་དགོས་པའི་གནད་ཀྱིས་བསྟན་པ་ཡིན་ཞེས་པ་དང་། རང་བྱུང་གི་ཡེ་ཤེས་འཁོར་ལོ་ཐ་མ་ནས་བསྟན་པར་འཆད་ཚེ་ལྷག་པའི་མཉམ་པ་ཞེས་འདོད་རུང་མིན་དཔྱད་དོ། །ཐུན་མིན་གྱི་གཏན་ཚིགས་རྟོགས་པ་བཞི་དང་དག་པ་གསུམ་ལས་སྔ་མའི་ནང་ཚན་རྒྱུ་གཅིག་པའི་ཕྱོགས་གཅིག་ནི་ཕར་ཕྱིན་ཐེག་པ་དང་ཐུན་མོང་གི་བདག་མེད་པའི་ལྟ་བ་ལའང་ཡོད་པར་བཤད་པ་དང་། ཕྱི་མ་དག་པའི་གཏན་ཚིགས་ཀྱང་འདིར་བསྟན་དངོས་ལྟར་ཡོད་པར་མ་ངེས་ནའང་དྲི་མེད་འོད་སོགས་སུ་གསུངས་པ་དང་འདྲ་བར་ཐ་མལ་པ་ལྟར་སྣང་བའི་གནས་འདི་མཐའ་གཅིག་ཏུ་མ་དག་པར་གྲུབ་པ་མིན་པ་དང་། ཡུལ་ཅན་ཤེས་པའང་གློ་བུར་པའི་འཁྲུལ་པ་བག་ཆགས་དང་བཅས་པ་ནམ་ཟད་པ་ན་ཡུལ་ཇི་ལྟ་བ་བཞིན་དུ་རྟོགས་ནུས་པའི་ངང་ཚུལ་ཅན་དུ་འགྱུར་བ་སོགས་འགའ་ཞིག་ནི་དེའི་གཞུང་ནས་ཀྱང་མ་བཤད་པ་མིན་པས་འདི་དག་ལའང་ཐུན་མིན་ཁོ་ནར་བསྙད་རུང་ངམ་སྙམ། བྱིན་གྱིས་བརླབས་པ་བསྒྲུབ་བྱར་འགོད་དམ་སྟེ། རྒྱུད་ཀྱི་ཚིག་ཟིན་བཞི་ག་གཏན་ཚིགས་སུ་འདོད་ཕྱིན་ཆད་དེའི་ནང་ཚན་ཁ་ཅིག་བསྒྲུབ་བྱ་དང་ཁ་ཅིག་རྟགས་སུ་བཀོད་མི་རིགས་པར་གསུངས་སོ། །རྒྱུད་གཞུང་གི་ཁོག་ནས་གཏན་ཚིགས་གཞན་ཡང་བསྟན་པ་གང་ཞིག འདིར་ལྟ་བ་གཏན་ལ་དབབ་པའི་དུས་སུ་དེ་དག་མི་དགོས་པ་ཞིག་གམ་སྟེ། འོན་ཀྱང་དེ་ལྟ་ན་ནི་པདྨའི་ལྟ་ཕྲེང་སོགས་སུ་ལྟ་བའི་སྐབས་རྟོགས་པ་བཞིའི་ཙམ་ལས་མ་བྱུང་བས་འདིར་བསྟན་ལྟ་བ་གཏན་འབེབས་ཀྱི་གཏན་ཚིགས་གཞན་དག་སྨོས་མི་རིགས་པར་དོགས་ཤིང་། དེ་བཞི་ཀ་ཡང་གཏན་ཚིགས་རེར་ཁས་ལེན་པ་ལས་འོས་མེད་ཡིན་མིན་དཔྱད་རྒྱུ་ཆེའོ། །གཞན་ཡང་གཏན་ཚིགས་རེ་རེ་བཞིན་གྱི་དོན་ལ་བརྟག་པར་བྱ་བ་ཡོད་ཀྱང་འདིར་མ་སྤྲོས་ཏེ་སོ་སོའི་སྐབས་སུ་འཆད་དོ། །ད་ནི་འདི་བསམ་པར་བྱ་སྟེ།
གཞལ་བྱ་ཞེན་སྣང་གཅིག་ལ་གོང་གི་གཏན་ཚིགས་ཀྱི་སྒོ་དེ་དག་གིས་དུས་གཅིག་ཏུའམ། རེ་མོས་ཀྱིས་འཇལ། སྔ་མ་ལྟར་ན་ཤེས་རྒྱུད་གཅིག་ལ་རྟོག་པ་མང་དུ་ཐལ། འདོད་མི་ནུས་ཏེ༑ འཕྲུལ་གྱི་མེ་ལོང་སོགས་ཀྱི་ལུང་དང་འགལ་ཞིང་རིགས་པས་ཀྱང་གནོད་པའི་ཕྱིར། ཕྱི་མ་ལྟར་ན། ཟློས་པར་འགྱུར་ཏེ་གཞལ་བྱ་གཅིག་ལ་འཇལ་བྱེད་དེ་དག་གིས་རེ་མོས་སུ་འཇལ་བའི་ཕྱིར་རོ། །གསུམ་པ་ནི། ཟག་བཅས་སུ་ཆོས་ཉིད་རང་མཚན་མཐོང་ངམ་མི་མཐོང་། དང་པོ་ལྟར་ན་ཟག་མེད་དུ་ཐལ་ཏེ་ཚེ་དབང་བཞིན་ནོ། །གཉིས་པ་ལྟར་ན། ལ་ཤན་ལས། སྤྱིར་མིན་རང་གི་མངོན་སུམ་དུ། །རང་རིག་མངོན་སུམ་གསལ་དུས་ན། །རང་སྣང་མཐའ་བྲལ་རྒྱུད་ལས་གྲོལ། །ཞེས་དང་། སྐབས་འགྲེལ་ལས། གསུམ་པ་བདེན་གཉིས་རང་མཚན་དུ། །འོག་མཐོང་གཉིས་མེད་བཟོད་མཐོང་བ། །ཞེས་གསུངས་པ་དང་འགལ། དེ་དང་ཚུལ་མཐུན་པར་མཁས་པ་སྣར་སྟོན་སོགས་ཀྱིས་ཀྱང་བཞེད་དེ། དེ་ལྟ་མིན་ན་མངོན་སུམ་པའི་གཏན་ཚིགས་དོན་མེད་པར་འགྱུར། འོན་ཀྱང་བསྒོམ་པས་བོགས་སུ་འགྲོ་བའི་ཕྱིར་ནུས་པ་རབ་ཏུ་རྟོགས་པ་མ་ཡིན་ཏེ། ཞེས་གསུངས་པའི་ཕྱིར་རོ། །དེར་མ་ཟད་ཤིན་ཏུ་དབང་རྣོན་ཁ་ཅིག་ཟག་བཅས་ཀྱི་ལམ་ནས་རྟོགས་གྲོལ་དུས་མཉམ་དུ་ཡོད་པར་མངོན་པས་ཀྱང་གསལ་ལོ་ཞེས་བརྟག་གོ །ཡང་འདས་པའི་ཆོས་བརྗོད་མེད་དུ་གཏན་ལ་དབབ་པའི་སྐབས། ཆོས་རྣམས་མིང་དུ་བཏགས་པ་ཙམ། །ཞེས་སོགས་གསུངས་པ་ནི་སྣང་བ་རིས་མེད་དུ་བསྒྲུབ་པའི་གྲུབ་མཐའ་དཔྱིས་ཕྱིན་ཡིན་ཡང་འཆད་འགྱུར་ལས་ཤེས་པས་འདིར་སྤྲོས་མཐའ་སྤངས་སོ། །རྒྱུད་འདི་བསྟན་པ་ཐམས་ཅད་ཀྱི་འབྲས་བུའི་མཐར་ཐུག་ཡིན་པའི་གནད་ཀྱིས་འོག་མའི་ཐེག་པ་རྣམས་འདིའི་ལམ་སྟེགས་སུ་ཁས་ལེན་དགོས་པ་གང་ཞིག འདིའི་ཆེད་དུ་ཞུགས་པ་མིན་པའི་འཇུག་པ་རྣམས་ཀྱིས་ཀྱང་ཐེག་པ་འདིའི་རྣམ་བཞག་འདོད་པས་ཁྱ བ་པར་ཐལ་ལོ། །འདིར་ཐེག་པའི་རྣམ་གྲངས་ལན་ལྔར་བྱུང་བ་མི་ཟློས་པའི་ཤེས་བྱེད་འགོད་དགོས་སོ།། །།
ལེའུ་བཞི་པ་ལ་བཞི་སྟེ། ཡི་གེ་ཇི་ལྟར་བྱུང་ཚུལ། དེ་ལྟར་བྱུང་བའི་མཐུ། ལམ་པའི་དབང་དུ་སེམས་སྦྱང་བ། ཡི་གེའི་དོན་ལ་དཔྱད་པའོ། །དང་པོ་ནི། སྤྱིར་ཆོས་ཐམས་ཅད་གདོད་ནས་རང་སྣང་རིས་མེད་ཀྱི་ལྷར་སངས་རྒྱས་ཤིང་། དེ་ཡང་མིང་ཚིག་ཡི་གེས་བཏགས་པའི་རྣམ་འཕྲུལ་ཉག་གཅིག་ཏུ་གནས་པ་ཞིག་ན། སྟོན་པའི་སྐུའི་གནས་སོ་སོར་ཨའི་འོད་ཟེར་འཁྱིལ་བ་དེ་དང་དེ་ལས་ཡི་གེ་གཞན་རྣམས་བྱུང་ཚུལ་སྨོས་མི་དགོས་སོ་སྙམ་པ་དང་། སྔོན་བྱུང་གི་ཚེའང་སྟོན་པས་གདུལ་བྱའི་བློ་དང་འཚམས་པར་མིང་ཚིག་ཏུ་སྒྲོ་བཏགས་ནས་ཆོས་བསྟན་པའི་ཕྱིར་རྗོད་བྱེད་ཀྱི་རྒྱུད་སྟོན་པ་ཉིད་དུ་འདོད་དགོས་མིན་དང་། འབྲུ་ལྔར་ཤར་བའི་ཡི་གེ་དེ་རེ་རེ་ནས་བགྲང་དུ་མེད་པའི་ངོས་འཛིན་མི་རིགས་པར་ཐལ་བར་བརྟག་གོ ༑ གཉིས་པ་ནི། སྤྱིར་ས་གཡོ་བ་ལ་དེ་བཞིན་གཤེགས་པའི་བྱི ན་རླབས་ཀྱིས་དང་། བྱང་ཆུབ་སེམས་དཔའི་མཐུ་ལས་དང་། གནོད་སྦྱིན་ལ་སོགས་པའི་གདུག་པས་དང་། ཉ་མོའི་འདྲེ་ལྡོག་གིས་གཡོ་བ་ལས་འདིར་གང་ཡིན་དཔྱད་དོ། །གསུམ་པ་ནི། སྤྱིར་རྒྱུད་སྒྲུབ་ཐབས་དང་འབྲེལ། དེ་གདམས་ངག་དང་འབྲེལ། དེ་ཆོག་ཁྲིགས་དང་འབྲེལ། དེ་བླ་མའི་ཕྱག་བཞེས་དང་འབྲེལ་བ་སྟེ། རྒྱུད་དང་ལག་ལེན་འབྲེལ་བ་བཞི་དང་ལྡན་པའི་གནད་ཀྱིས་འདིར་ཡང་མངོན་རྟོགས་ཀྱི་རིམ་པ་བསྒྲིག་མ་ཤེས་ན་བདུད་རྩི་རོ་ཉམས་ཀྱི་སྐྱོན་དུ་འགྱུར་བས་དེའི་དབང་དུ་བྱས་ནས་གང་ལྟར་དུ་ངོས་བཟུང་བ་དང་། འདི་ལྟར་མ་བཀོད་པའི་འགྲེལ་བཤད་དག་ལ་སྐྱོན་དེ་མི་འཇུག་པའི་རྒྱུ་མཚན་ལ་དཔྱད་དགོས་ཤིང་། ལམ་གྱི་རིམ་པའི་དབང་དུ་རྣལ་འབྱོར་ལྔའི་ནང་ཚན་ཕྲ་བ་ཡིག་འབྲུ་ལ་བསླབ་པ་ཡིན་པ་གང་ཞིག དེ་ལའང་ཐོས་བསམ་ལ་བརྟེན་ནས་རྒྱུད་དོན་ཤེས་བྱར་གཏན་ལ་དབབ་པ་དང་། སྒོམ་ཤེས་ལ་བརྟེན་ནས་རྒྱུད་དོན་ཉམས་སུ་བླང་བྱར་བསྟན་པ་གཉིས་ལས། ཕྱི་མ་ལྟར་ན་ལེའུ་འདི་དང་ལྔ་པའི་དོན་བསྡེབས་ཏེ་ཡི་གེའི་སྒོ་ནས་སྒྱུ་འཕྲུལ་བསྒྲུབ་དགོས་པ་ལས་དེའི་ལྟར་གྱི་བཀའ་སྲོལ་རང་ལུགས་སུ་མི་འབྱུང་བ་དང་། སྤྲོ་བསྡུས་ཀྱི་ཚད་རྒྱུད་ཉིད་ལས། ཕྱོགས་བཅུ་གང་བར་གསལ་གྱུར་པ། །བསྡུས་ཀྱང་འཕེལ་འགྲིབ་མེད་པར་བསྟན། །ཞེས་པ་དང་། མདོ་
ལས། ཚོགས་ལམ་གྱི་སྤྲོ་བསྡུ་བློ་ཆུང་ན་དབུགས་ཡུལ་དང་བློ་ཆེ་ན་སྣས་དྲི་ཚོར་ཚུན་ཆད་སྤྲོ་བསྡུ་བྱ་བར་བཤད་པ་གཉིས་ཀྱི་འ གལ་སྤོང་ལ་བརྟག་གོ །སྤྲོ་བསྡུ་ལ་འཕེལ་འགྲིབ་དངོས་སུ་གསལ་བས་དེ་མེད་པ་མི་འཐད་པར་དོགས་ཤིང་། ལམ་རིམ་དུ་བློ་ཆེ་ན་ཨ་དེ་ལ་སེམས་སྦྱངས་ནས་ལྷ་བསྐྱེད་པའམ། བློ་ཆུང་ན་ཨ་ལ་སེམས་སྦྱངས་ཚར་ནས་ཐུགས་ཡེ་ཤེས་ལྔ་མཚོན་པའི་ཡི་གེ་ཧཱུྃ་མཐིང་ནག་སྒོམ་སྟེ་དེ་ལས་སུ་རུང་བར་གོམས་པ་ལ་བསླབ་པར་གསུངས་པ་ལ་དཔག་ན་འདིའི་ལྟར་དུ་བསྒོམ་པ་དག་ནི་བློ་ཆེར་ཁས་ལེན་ནུས་པ་ཞིག་གམ་སྟེ། འོན་ཀྱང་འདིའི་སྐབས་རྣམ་བཤད་འགའ་ཞིག་ཏུ་རྣམ་པ་དེ་ཡང་བློ་ཆེ་ཆུང་གི་དབང་གིས་ཅིག་ཆར་བསྒོམ་པ་དང་ཐུན་དུ་བཅད་ཅིང་རིམ་གྱིས་བསྒོམ་པ་གཉིས་ཞེས་གསུངས་པར་དཔྱད་དོ༑ ༑ཡེ་ཤེས་ཐོབ་པའི་རྒྱུ་ཡི་གེའི་སྣང་བྱེད་ལ་གོམས་པ་འདི་ཡིན་པར་གྲུབ་པ་གང་ཞིག ས་མྱུག་ལྟར་བསྐྱེད་བྱ་སྐྱེད་བྱེད། མེ་ལོང་དང་བྱད་ལྟར་རྣམ་འཇོག་གམ། བྱས་པ་དང་མི་རྟག་ལྟར་ངོ་བོ་ཉིད་ཀྱི་རྒྱུ་འབྲས་ཡིན་ཞེས་པ་དང་། ཡི་གེ་བཞི་བཅུ་རྩ་གཉིས་སུ་གྲངས་ངེས་པ་གང་ཞིག རྒྱ་བོད་ཀྱི་ཡི་གེ་ཐམས་ཅད་གྲངས་དེར་འདུས་པས་སམ་བསྐྱེད་བྱ་ལྷ་གྲངས་དབང་བཙན་དུ་བྱས་པས་ཡིན་ཞེས་བརྟག་དགོས་སོ། །བཞི་པ་ནི། སེམས་ཀྱི་རང་བཞིན་ཡི་གེའི་རྣམ་པར་གནས་སམ་མི་གནས། དང་པོ་ལྟར་ན་དེ་མིང་ཚིག་ཡི་གེ་ལས་འདས་པའི་ཆོས་ཡིན་པ་ཉམས་ཤིང་། གཉིས་པ་ལྟར་ན་དེ་མཚོན་བྱ་སྐྱེ་མེད་ཀྱི་ངོ་བོ་ཡིན་པའི་ཕྱིར་ཨ་ཉིད་དེ་མཚོན་བྱེད་ཀྱི་ཡི་གེ་མིན་པར་ཐལ། དེར་མ་ཟད་བཞི་བཅུ་རྩ་གཉིས་སུ་སྣང་བའི་ཕྱག་རྒྱའི་ལྷ་དེ་དང་། ཡི་གེའི་ཕྱག་རྒྱར་སྣང་བའི་ལྷ་བཞི་བཅུ་རྩ་གཉིས་པོ་གཅིག་ཏུ་ཁས་ལེན་མི་རིགས་པར་ཡང་འགྱུར་རོ། །ཁྱབ་བྱའི་ཡི་གེ་བཞི་བཅུ་རྩ་གཉིས་ཀྱི་སྟེང་དུ་ཁྱབ་བྱེད་ཀྱི་ཡི་གེ་གསུམ་བསྣན་པས་བཞི་བཅུ་རྩ་ལྔར་འགྱུར་བ་དེ་དག་འགོ་བེར་ཀ་རིས་ནས་མཇུག་ཀྵ་ཡིག་ལ་རྫོགས་པ་གང་ཞིག ཀྵའི་འོག་ན་ཐུབ་པའི་ཡི་གེ་རྣམས་ཡོད་པའི་ཕྱིར་རྫོགས་པར་མི་འགྱུར་བར་དོགས་སོ། །ཡང་འདི་ལྟར་མཚོན་བྱེད་ཡི་གེའི་མགོ་ཡིས་ཡི་གེ་ཐམས་ཅད་ཀྱི་མགོ་འདྲེན་ཅིང་འཇུག་པའི་སྒོར་གྱུར་པས་མ་ཁྱབ་པར་ཐལ། ཡི་གེའི་འགོ་ལ་འདྲེན་
པ་དང་བརྟེན་པ་གཉིས་སུ་དབྱེར་རུང་བ་གང་ཞིག་ཕྱི་མ་ལ་དེའི་མཚན་ཉིད་མ་ཚང་བའི་ཕྱིར། འདོད་ན། མགོ་ནི་མ་ནོར་ལམ་ཡིན་ཏེ། །ཞེས་པའི་མཚན་ཉིད་སྤྱི་ལ་ཁྱབ་པ་འཇོག་ཏུ་མེད་པར་དོགས་ཤིང་། རྟགས་མ་གྲུབ་ན། བེར་ཀ་རིས་དང་ཐིག་གཉིས་དོན་གཅིག་མིན་པ་ཡི་གེའི་དབྱིབས་བརྗོད་སྐབས་མགོ་ནི་ཨི་གླང་པོའི་སྣ་འདྲ་བ་ཞེས་པས་གསལ་བ་གང་ཞིག དཔལ་སྦྱིན་གྱིས་ཞུས་པའི་མདོ་ལས། བེར་ཀ་རིས་ལ་མགོ་ཞེས་བྱ། །ཞེས་པ་དང་། གཟུགས་ཅན་སྙིང་པོས་ཞུས་པའི་མདོ་ལས། ཡི་གེའི་མགོ་ནི་ཐིག་ཡིན་པས། །ཞེས་གསུངས་པ་གཉིས་མི་འགལ་བའི་སྒྲུབ་བྱེད་འགོད་པར་རིགས་སོ། །ཚེག་དབྱིབས་ནི་ཨཿ རྣམ་བཅད་དབང་ཕྱུག་ཆེན་པོའི་མིག་ལྟ་བུར་བཤད་ན་ཚེག་ཡིན་ཚད་རྣམ་བཅད་དུ་མི་སྣང་བར་བརྟག་གོ ། ཡི་གེ་བཞི་བཅུ་རྩ་གཉིས་པོ་མངོན་རྟོགས་ལས་སྡེབ་ཀྱི་དབང་དུ་ལེའུ་ལྔ་པ་ལྟར་ཐབས་གསུམ་ལས་གང་ལྟར་ངོས་བཟུང་ཞིང་། ལྷའི་ས་བོན་བཏུ་བའི་རྒྱུ་མཚན་བཞི་ལས་ཇི་ལྟ་བུའི་དབང་དུ་བྱས་ཞེས་དཔྱད་པར་བྱ་སྟེ། བཞི་གང་ཞེ་ན་། མིང་གི་ཡི་གེ་དང་པོ་ཡིན་པ་དང་། གནས་ལ་བཏུ་བ་དང་། མཚན་ཉིད་མཐུན་པས་དང་། རྣམ་པར་ཐར་པ་མཐུན་པའོ། །ཨ་ཉིད་ས་བོན་གྱི་ཡི་གེ་ཀུན་གྱི་ཐོག་མར་བཞག་པའི་འཐད་པ་འགོད་པ་ན། མཚོན་བྱའམ་མཚོན་བྱེད་དབང་བཙན་དུ་བྱས་ཞེས་བརྟག་པའི་ཚེ་ཕྱི་མ་དང་བསྟུན་སྐབས་ཨ་ཉིད་འདིར་བསྟན་ས་བོན་གྱི་ཡི་གེ་ཀུན་གྱི་སྲོག་ཏུ་ངེས་པར་ཡོད་པས་སམ་སྔོན་བྱུང་སྟོན་པའི་ཐུགས་རྗེ་རང་སྣང་བའི་ཚེ་ཡི་གེ་གཞན་རྣམས་འཕྲོ་བའི་གནས་ནི་ཨའི་འོད་ཟེར་སྐུའི་གནས་སོ་སོར་འཁྱིལ་བ་དེ་དང་དེ་ལས་བྱུང་བས་ཡིན་སྙམ་དུ་དོགས་སོ། །རིགས་ལྔ་ཡབ་རྣམས་ཡི་གེ་ཁ་ཕྱིར་ལོག་ལས་དང་། ཡུམ་རྣམས་མ་ལོག་པ་ལས་བསྐྱེད་པ་ནི་རིམ་བཞིན་ཀུན་རྫོབ་དང་དོན་དམ་གྱི་ཆ་འཛིན་པའི་གནད་ཀྱིས་ཡིན་པར་གསུངས་པ་གང་ཞིག འདིར་བདེན་གཉིས་བཟང་ངན་ཅན་དུ་འཇོག་པ་མི་རིགས་པས་ལོག་མ་ལོག་གི་ཆོས་མཐུན་བརྩི་ལུགས་དང་། སེམས་དཔའ་ཡབ་ཡུམ་སོགས་ལ་ཡི་གེ་ལོག་མ་ལོག་གི་ཁྱད་པར་དང་སྒྱུ་འཕྲུལ་དྲྭ་བའི་མཚན་མི་མངོན་པའི་རྒྱུ་མཚན་ཅི་ལ་ཐུག་ཅིང་ཕྱི་ནང་གི་སེམས་དཔའ་ཡབ་ཡུམ་བཅུ་གཉིས་ལ་སྐུ་
གསུང་ཐུགས་ཀྱི་སྒྲས་བསྟན་པ་གང་ཞིག་རིགས་ཀྱིས་སམ་བྱེད་ལས་ཀྱིས་ཡིན་ཞེས་དཔྱད་དོ༑ ༑སྡེ་ཚན་དང་པོ་དང་། གཉིས་པ་དང་། བཞི་པ་དང་། ཐམས་ཅད་ཀྱི་མཐའ་ཟད་པའི་ཡི་གེ་ལས་བསྐྱེད་པའི་དཀྱིལ་འཁོར་གྱི་མཐར་གནས་སྒོ་བ་བཞི་ལ་སྐུ་གསུང་ཐུགས་འཇིག་བྱེད་དུ་བཤད་པ་ནི་ལེའུ་བཅོ་ལྔ་པ་ནས་དཔོན་ལྷ་རྗེ་ཞེས་གསུངས་པ་བཞིན་གདུལ་བྱའི་མིང་གིས་འདུལ་བྱེད་ལ་བཏགས་པའི་ཕྱོགས་ནས་བསྙད་ནའང་རུང་མོད་རྒྱུད་གཞུང་འདི་ཉིད་ཕྱི་གྲོལ་ལམ་ལྟར་བཀྲལ་བར་མཛད་པ་དག་གིས་ཀྱང་ནང་ལྟར་སྦྱར་ཏེ་བཀོད་པ་དང་། དེའང་ཐ་མལ་ཆགས་སྤྱོད་ཅིག་ལ་འཇོག་རུང་མིན་བརྟག་དགོས་སོ། །ཀུན་བཟང་ཐུབ་དྲུག་དང་བཅས་པའི་ཡི་གེ་བསྟན་པ་ན་གཡུང་ཊཱིཀ་སོགས་སུ་གོ་ཕྱེ་བའི་འཁོར་གྱི་དོན་ཡིན་པས་རྟོག་པ་མི་སྦྱོར་ཞིང་། དག་པ་སྦྱོར་བར་བཤད་ལ་རྒྱུད་འགྲེལ་ཕལ་ཆེར་དུ་དེ་དག་ལའང་རྟོག་པ་སྦྱོར་བར་མཛད་པའི་ཕྱིར་བཞེད་ཚུལ་ཐ་དད་ཀྱི་དགོངས་གཞིར་དཔྱད་ཅིང་། ཐུགས་ཉིས་བརྩེགས་འོང་བ་དང་། བདུད་རྩི་འཁྱིལ་པ་ལ་ཡི་གེ་གཉིས་འབྱུང་བ་དང་། སྒོ་བ་ཀུན་ཡུམ་དང་བཅས་ནས་མི་འོང་བར་རྐྱང་པར་འོང་བ་དང་། བདུད་རྩི་འཁྱིལ་པའི་ཡི་གེ་ཀུན་གྱི་མཇུག་ཏུ་བྱུང་བའི་འཐད་པ་འགོད་པར་རིགས་སོ། །ད་ནི་འདི་དཔྱད་པར་བྱ་སྟེ། འདིར་བསྟན་ཁྱ བ་བྱའི་ཡི་གེ་ཞེ་གཉིས་དང་ཁྱབ་བྱེད་ཀྱི་ཡི་གེ་གསུམ་པོ་རིམ་པ་ལྟར་རྒྱུ་རྐྱེན་བཟླས་པའི་སྔགས་གསུམ་གྱི་ནང་ཚན་རྒྱུ་མ་ནོར་བ་རྩ་བའི་སྔགས་ཡིན་ནམ་མིན། དང་པོ་ལྟར། འཆད་འགྱུར་དུ་ས་བོན་ཧཱུྃ་མུཾ་སོགས་བྱུང་བ་གང་ཞིག ལྷ་རྣམས་ཤེས་རྒྱུད་གཉིས་ཆར་ཅན་དུའམ་དེ་ལྟར་བསྟན་པ་དོན་མེད་དུ་ཐལ། གཉིས་པ་ལྟར་ན། འདིར་ཡང་ལྷ་རྣམས་བསྐྱེད་པའི་ས་བོན་ཞེས་སྨོས་པའི་རྒྱུ་མཚན་ལ་ཞིབ་ཏུ་བརྟག་པར་འཚལ་ལོ།། །།ལེའུ་ལྔ་པ་ལ་གསུམ་སྟེ། རྒྱུ་ཤེས་པའི་མཚན་ཉིད་ལྟ་བ་ལ་དཔྱད་པ་དང་། རྐྱེན་འཇུག་པའི་མཚན་ཉིད་ཏིང་ངེ་འཛིན་ལ་དཔྱད་པ་དང་། མངོན་དུ་གྱུར་པ་འབྲས་བུའི་མཚན་ཉིད་ལ་དཔྱད་པའོ། །དང་པོ་ནི། སྤྱིར་ལམ་གྱི་མཚན་ཉིད་འཇོག་པ་ན། ལྷ་རྗེ་གླན་གྱིས་
འཇུག་པ་ལམ་ཞེས་གསུངས་པ་ལ། ཇོ་སྲས་དང་སྨན་ལུང་པ་དང་སྨིན་ལོ་ཆེན་པོ་སོགས་ཀྱིས་ལམ་གྱི་མཚན་ཉིད་དེས་ལྟ་བ་ལ་མ་ཁྱབ་པའི་སྐྱོན་བརྗོད་མཛད་ཀྱང་། གང་དག་རྐྱེན་འཇུག་པ་དང་ལམ་སྤྱིའི་མཚན་ཉིད་ཀྱི་འཇུག་པ་ལ་ཁྱད་པར་འབྱེད་རིགས་པའི་ལན་འདེབས་རྒྱུ་བྱུང་བ་དེར་དཔྱད་དགོས་སོ། །ལྟ་བ་དེ་སྒོམ་ཐབས་ལ་ལུས་ཀྱི་འདུག་ཐབས་ཆོས་བདུན་གྱི་ཚུལ་དུ་བཅའ་བའི་དགོས་ཆེད་དང་། སེམས་ཀྱི་བཞག་ཐབས་བློ་ཆུང་གདམས་ངག་དང་བློ་ཆེ་བ་ཤེས་རབ་ཀྱི་སྟོབས་ཀྱིས་སྒོམ་པ་ཡིན་པར་གྲུབ་པ་གང་ཞིག བློ་ཆུང་བ་ལ་ཤེས་རབ་དང་བློ་ཆེ་བ་ལ་གདམས་ངག་གཏན་མི་དགོས་པ་ཞིག་གམ་ཞེས་པ་དང་། ཤེས་རབ་ཀྱི་སྟོབས་ཀྱིས་བསྒོམ་པ་ལ་རིག་པ་སྤྱི་བླུགས་སུ་དང་། རྟོགས་པའི་རྗེས་སུ་བསྒོམ་པ་གཉིས་ཡོད་པ་མན་ངག་ཨ་ཏིའི་ལུགས་ཀྱི་རྣམ་བཞག་དང་ཐ་དད་ཚུལ་ལ་བརྟག་གོ །གཏན་ལ་དབབ་བྱའི་ལྟ་བ་དངོས་ནི་རྒྱུ་ཤེས་པའི་སྐབས་སུ་རིམ་གྱིས་པའི་བློ་ལ་ལྟོས་ཏེ་བརྗོད་བྱ་སྣང་བ་སྟོང་པ་དབྱེར་མེད་གསུམ་བདེན་པ་གསུམ་དང་སྦྱར་ཏེ་ལྡོག་པ་ཐ་དད་དུ་རིམ་པར་གཏན་ལ་དབབ་པ་ནི་གཞུང་གཅིག་ལའང་། དང་པོ་སྟོང་ལྡོག་དོན་དམ་གྱི་ངོས་ནས་གཏན་ལ་དབབ་ན། སྒྲུབ་བྱེད་རྟགས་ཀྱི་མཚན་གཞིའི་ངོ་བོ་ནི་སྤྱན་འགྲེལ་ལས་གསུངས་པའི་སྐྱེ་མེད་སྒྲུབ་བྱེད་ཀྱི་གཏན་ཚིགས་བཞི་ཡིན་པ་གང་ཞིག རྟགས་དེའི་མཚན་ཉིད་ཕྱོགས་ཆོས་ཁྱབ་པ་བསྒྲུབ་པ་ན། གཞན་སྡེ་གྲངས་ཅན་པ་དག་ན་རེ། སེམས་ཉིད་ཆོས་ཅན། རྟགས་དང་པོའི་ཚུལ་དུ་མ་གྲུབ་སྟེ། རྒྱུ་རྐྱེན་ལས་སྐྱེས་པའི་ཕྱིར་ཞེས་དང་། གཞན་སྡེ་དབང་ཕྱུག་པ་དག་ན་རེ། སེམས་ཉིད་ཆོས་ཅན། རྟགས་གཉིས་པའི་ཚུལ་དུ་མ་གྲུབ་སྟེ། བྱེད་པ་པོས་བྱས་པའི་ཕྱིར། ཞེས་དང་། རང་སྡེ་སེམས་ཙམ་པ་དག་ན་རེ། སེམས་ཉིད་ཆོས་ཅན། རྟགས་གསུམ་པའི་ཚུལ་དུ་མ་གྲུབ་སྟེ། སྔར་མེད་གསར་དུ་སྐྱེས་པའི་ཕྱིར། ཞེས་དང་། གཞན་སྡེ་རྟག་པ་བ་དག་ན་རེ། སེམས་ཉིད་ཆོས་ཅན། རྟགས་བཞི་པའི་ཚུལ་དུ་མ་གྲུབ་སྟེ། རྫས་སུ་གྲུབ་ཅིང་སྐད་ཅིག་གཉིས་པ་ཕན་དུ་མི་འགྱུར་ལ་རྟག་པ་གཅིག་པུ་ཡིན་པའི་ཕྱིར། ཞེས་པ་ལ་དཔྱད་དགོས་སོ། །སྤྲོས་བྲལ་དེ་ཉིད་ཐུན་མིན་གྱི་རིགས་པས་སྣང་བ་ངོ་བོ་ཉིད་ཀྱི་རྒྱུར་
ལྷུན་གྲུབ་ཏུ་བསྒྲུབ་པ་ན་གཞན་དག་ན་རེ། ཁྱེད་ཅག་གི་འདོད་པ་དེ་བསྐྱེད་བྱ་སྐྱེད་བྱེད་དམ། རྣམ་འཇོག་གི་རྒྱུ་གང་ཡིན། དང་པོ་ལྟར་ན། སྐྱེད་བྱེད་ཀྱི་རྒྱུར་གྲུབ་པའི་ཕྱིར། དོན་དམ་དངོས་པོར་ཐལ་བས་སྤྲོས་བྲལ་ཉམས་ལ། གཉིས་པ་ལྟར་ན། དོན་དམ་གྱིས་རྣམ་པར་བཞག་པའི་འབྲས་བུ་ཡིན་པའི་ཕྱིར་ཀུན་རྫོབ་དེ་ཉིད་དོན་ལས་མི་བསླུ་ུབའི་འཇུག་ཡུལ་དུ་ཐལ་ལོ་ཞེས་དང་། གཞན་ཡང་། དོན་དམ་སྟོང་ཉིད་དེ་རང་ངོས་ནས་སྟོང་ངམ་མ་སྟོང་། སྔ་མ་ལྟར་ན་རང་གི་བསྒྲུབ་ཆོས་ཀྱིས་དོར་བའི་ཕྱིར་དངོས་པོར་ཐལ་ཞིང་། ཕྱི་མ་ལྟར་ན་སྤྲོས་པ་ཕྱོགས་གཅིག་མ་ཆོད་པའི་ཕྱིར་ཉི་ཚེ་བར་ཐལ་ལོ་ཞེས་པར་བརྟག་གོ །དབྱེ་བ་ནི། ཐུན་མོང་པ་དག་རྣམ་གྲངས་དང་རྣམ་གྲངས་མིན་པའི་དོན་དམ་གཉིས་སུ་འབྱེད་ཀྱང་འདིར་ནི་རིགས་ཀྱི་སྒོ་ནས་རང་བཞིན་ཡེ་ཤེས་འབྲས་བུ་གསུམ་དུ་ངེས་པ་གང་ཞིག དེ་དག་གི་ཁྱད་པར་རང་བཞིན་དང་འབྲས་བུ་མངོན་དུ་བྱས་མ་བྱས་དང་། འབྲས་བུ་དང་ཡེ་ཤེས་སྤྱི་བྱེ་བྲག་དང་། རང་བཞིན་དང་ཡེ་ཤེས་གཞི་འབྲས་ཀྱི་ཆ་ལས་ཕྱེ་བ་སྔ་རབས་པ་དག་གིས་བཞེད་ཀྱང་གཞི་འབྲས་གཉིས་དམིགས་འདྲེས་པའི་སྐྱོན་དུ་འགྱུར་བར་དོགས་ཤིང་། རང་ལུགས་དབྱིངས་སྤྲོས་བྲལ་དེ་ཉིད་རང་གསལ་སྒྲིབ་གཡོགས་དང་བྲལ་བའི་ཆ་ནས་ཡེ་ཤེས་དོན་དམ་དང་། དེ་ཉིད་ལ་འབྲས་ཆོས་ལྔ་པོ་ཡེ་ནས་ལྷུན་གྲུབ་ཏུ་བཞུགས་པ་ནི་འབྲས་བུའི་དོན་དམ་ཞེས་བཤད་པ་དེ་ལྟ་ནའང་མཐར་ཐུག་གི་འབྲས་བུ་དང་ཁྱད་པར་འབྱེད་དགོས་སོ། །གཉིས་པ་སྣང་ལྡོག་ཀུན་རྫོབ་ཀྱི་ངོས་ནས་གཏན་ལ་དབབ་ན། རྗེ་ཐག་པ་ནི་སྔར་གྱི་སྐྱེ་མེད་སྒྲུབ་བྱེད་ཀྱི་རིགས་པ་དེ་ཉིད་འགག་མེད་སྒྲུབ་བྱེད་དུའང་རུང་བར་བཞེད་ཀྱང་། རང་ལུགས་ནི༑ རིག་པ་ལ་སྣང་ཙམ་འགག་མེད་དུ་དང་། བདེན་སྟོངས་ཀྱི་སྣང་བ་རིས་མེད་དུ་སྒྲུབ་པར་གསུངས་ཤིང་། དང་པོ་ལ་ནང་གསེས་ཀྱི་སྣང་བ་མ་གྲུབ་ན་འཁྲུ ལ་སྣང་འབྱུང་མི་རིགས་པ་དང་། དོན་དམ་ཤེས་བྱེད་ཀྱང་མེད་པར་ཐལ་བ་དང་། སྣང་ཙམ་པ་འདི་སུས་ཀྱང་དགག་མི་ནུས་པ་དང་། རང་རིག་པ་ཐམས་ཅད་དུ་རྩལ་མ་འགག་པར་རང་སྣང་བའི་གཏན་ཚིགས་བཞིར་གྲུབ་པ་གང་ཞིག དེའི་ཚུལ་བསྒྲུབ་པ་ན་གཞན་སྡེ་ཆད་པར་སྨྲ་བའམ་རང་སྡེ་དབུ་
མ་རྒྱུན་ཆད་པ་ཁ་ཅིག་ན་རེ། སེམས་ཉིད་ཆོས་ཅན། རྟགས་དེ་དག་གི་ཚུལ་དུ་མ་གྲུབ་སྟེ། སྣང་བ་བདེན་པ་ལྟ་ཞོག་སྣང་ཙམ་དུ་ཡང་གྲུབ་པ་མེད་པའི་ཕྱིར། ཞེས་དང་། ཀུན་རྫོབ་སྤྱི་མཚན་གྱི་ལྷག་པའི་ཀུན་རྫོབ་ལ་ཁྱབ་བམ་མ་ཁྱབ། དང་པོ་ལྟར་ན་དེའང་འཁྲུལ་སྣང་ལོག་ཤེས་སུ་འགྱུར་ལ། གཉིས་པ་ལྟར་ན། ཀུན་རྫོབ་ལ་རིགས་སྤྱི་ཁེགས་པར་ཐལ། འདོད་ན་ལྷག་པའི་ཀུན་རྫོབ་དངོས་པོ་ལ་མི་གནས་པར་ཐལ་ལོ། །ཞེས་དཔྱད་དོ། །ཡང་ལྷག་ཀུན་འདི་ལྟར་སྣང་བ་ལྷའི་དལ་དུ་འདོད་པ་དེ་སྒྲོ་བཏགས་སམ་ཡོངས་གྲུབ་ཅིག་ཡིན། སྔ་མ་ལྟར་ན་ལྷའི་རྣལ་འབྱོར་བསྒོམ་པ་དོན་མེད་དུ་འགྱུར་ལ། ཕྱི་མ་ལྟར་ན་གསེར་ས་ལེ་སྦྲམ་ལྟར་རྒྱུ་རྐྱེན་{ལ་} གཞན་: མ་༼ལ་༽མ་ལྟོས་པའི་ཕྱིར། ལྷ་སྐྱེད་བྱེད་ཀྱི་ཤེས་པ་ཙམ་ལའང་མ་ལྟོས་པར་ཐལ་ལོ། །མ་ཟད་སྔ་ཕྱི་གཉིས་ཀར་ལུང་དང་མན་ངག་གིས་ཀྱང་གནོད་དོ། །གཞན་ཡང་ལྷག་ཀུན་འདི་དང་གོང་དུ་འབྲས་བུའི་དོན་དམ་གཉིས་ཀྱི་ཁྱད་པར་འབྱེད་ཚུལ་ལ་ལེགས་པར་བརྟག་དགོས་ཤིང་། མ་ཧཱའི་སྤྱི་སྐད་དུ་ཆོས་ཐམས་ཅད་རིག་པའི་ཆོ་འཕྲུལ་དུ་སྣང་བ་ཞེས་བརྗོད་པར་གསུངས་པ་ལ་དཔག་ན། རྒྱུད་འགྲེལ་དག་ཏུ་རྩལ་སྣང་ཞེས་སྨོས་པ་ལ་ཆོ་འཕྲུལ་ཞེས་བཤད་ཀྱང་རུང་མོད་དེ་ལྟར་སྨོས་པ་ལ་འཆོལ་སྐྱོན་དུ་མི་བལྟ་སྟེ། རྒྱུད་ལུང་མན་ངག་གསུམ་གྱིས་ཟླས་ཕྱེ་བའི་ལུང་ཨ་ནུས་འདོད་པ་དང་འདིར་བསྟན་གྱི་རྩལ་སྣང་གཉིས་མི་འདྲ་བའི་ཁྱད་པར་འབྱེད་རིགས་པའི་དམ་བཅའ་འཐད་པའི་ཕྱིར་སྙམ་མོ༑ ༑དབྱེ་ན་དབུ་མ་པ་དག་ཡང་ལོག་གཉིས་སུ་འབྱེད་ཀྱང་འདིར་ནི་དེའི་ཡང་དག་ཀྱང་ལོག་པ་ཉིད་དུ་བཞག་ཅིང་། ཡང་དག་པ་ནི་ཕུང་ཁམས་སྐྱེ་མཆེད་རྣམས་ཡེ་ནས་སྐུ་དང་ཡེ་ཤེས་ཀྱི་དཀྱིལ་འཁོར་དུ་རྫོགས་པར་འདོད་པ་གང་ཞིག མཚན་བཅས་ཡིག་འབྲུ་སོགས་ཀྱི་གཟུངས་སུ་སྣང་བ་ཞིག་གམ་ཞེས་བརྟག་གོ ། གསུམ་པ་བདེན་པ་དབྱེར་མེད་ཀྱི་ངོས་ནས་གཏན་ལ་དབབ་ན། སྒྲོལ་ཊཱིཀ་པ་མ་ཡིན་པ་དཔེ་ལ་བརྟེན་ནས་དགག་པ་དང་། ཡིན་པ་དཔེ་ལ་བརྟེན་ནས་བསྒྲུབ་པ་གཉིས་ཡིན་པར་གསུངས་ཤིང་ཕྱི་མ་ལ་ནང་གསེས་ཀྱི་གསེར་གཡུ་མཚོ་དང་འཇའ་ཚོན་གྱི་དཔེ་བཞིན་དབྱེ་བས་བསྒྲུབ་པར་བཞེད། རྒྱལ་བ་གཡུང་སོགས་
གོང་མ་ཕལ་ཆེར། བདེན་པ་གཉིས་པོ་དེ་རང་བཞིན་བཟང་ངན་མེད་པ་དང་། ངོ་བོ་དབྱེར་མི་ཕྱེད་པ་དང་། འདུག་ས་ཐ་མི་དད་པ་དང་། དུས་སྔ་ཕྱི་མེད་པའི་རིགས་པ་བཞིས་བསྒྲུབ་པར་མཛད་པ་གང་ཞིག དེའི་ཚུལ་བསྒྲུབ་པ་ན། གཞན་དག་ན་རེ། སེམས་ཉིད་ཆོས་ཅན། རྟགས་དེ་དག་གི་ཚུལ་དུ་མ་གྲུབ་སྟེ། སྣང་སྟོང་གང་རུང་གི་ཕྱོགས་སུ་ཆད་པའམ་དེ་གཉིས་རྫས་སུ་ཐ་དད་པར་གནས་པའི་ཕྱིར་ཞེས་དང་། གནས་ཚུལ་དེ་ལྟར་གྲུབ་པའི་ཕྱིར་རང་བཞིན་གྱི་སྣང་བ་གསུམ་དུ་ཐལ་བ་དང་། སྣང་སྟོང་གཉིས་ངོ་བོ་བདག་གཅིག་པའི་ཕྱིར་སྣང་བ་སྐྱེ་འགག་བྱེད་ཚེ་སྟོང་ཉིད་ཀྱང་དེར་ཐལ་ལོ་ཞེས་པ་ལ་བརྟག་གོ །དབྱེ་ན་སེམས་ཙམ་པས་གཅིག་ལ་གཉིས་མེད་པའི་དང་། དབུ་མ་པས་མཐའ་གཉིས་བཀག་པའི་དབྱེར་མེད་འདོད་ཀྱང་། འདིར་ནི་ངོ་བོ་དབྱེར་མེད་དུ་འདོད་པ་གང་ཞིག དེ་ཐོས་བསམ་གྱིས་གཏན་ལ་དབབ་ཏུ་ཡོད་དམ་མེད། ཡོད་ན་བློའི་སྤྱོད་ཡུལ་དང་བྲལ་བ་ཉམས་ལ། མེད་ན་གཏན་ཚིགས་རྣམས་དོན་མེད་པར་འགྱུར་རོ། །ཡང་གཞི་དེ་ཤེས་བྱ་ཙམ་དུ་རུང་བ་ལུང་རིགས་མན་ངག་གསུམ་གྱིས་གྲུབ་པ་གང་ཞིག ཤེས་བྱ་ལ་དངོས་པོ་དང་དངོས་མེད་གཉིས་སུ་ཁ་ཚོན་ཆོད་དམ་མི་ཆོད། ཆོད་ན་གནས་ལུགས་དེ། དངོས་དངོས་མེད་ཀྱི་མཐར་ཐལ་ལ། མ་ཆོད་ན་ཤེས་བྱ་ལ་ཕུང་གསུམ་སྲིད་པར་འགྱུར་རོ། །ད་ནི་འདི་དཔྱད་པར་བྱ་སྟེ་འདིར་བསྟན་བདེན་པ་གསུམ་གྱི་རྣམ་བཞག་དག་རྒྱུའི་ཐེ ག་པའི་དོན་ཀུན་དབྱེར་མེད་ལས་ངོ་བོ་མཚན་ཉིད་རང་བཞིན་གསུམ་གསུམ་གྱིས་སྤགས་ལུགས་དང་། དེ་དག་སྒྲུབ་བྱེད་ཀྱི་ཚད་མའི་རིགས་ངེས་པར་བྱ་བ་གང་ཞིག རིགས་སམ་ལྡོག་པའི་སྒོ་ནས་ཡིན། དང་པོ་ལྟར་ན་རང་བཞིན་གྱི་རིགས་ཀྱང་ཐ་དད་དུ་ཐལ་ཞིང་། ཕྱི་མ་ལྟར་ན་གཏན་ཚིགས་ཀྱི་རིགས་ཞེས་སྨོས་མི་རིགས་པར་འགྱུར་རོ། །སེམས་ཉིད་གཅིག་གི་སྟེང་དུ་གཏན་ཚིགས་ཀྱི་སྒོ་གསུམ་མམ་གཅིག་གིས་བསྒྲུབ། སྔ་མ་ལྟར་ན་ངོ་བོ་ཐ་དད་དུ་ཐལ་ཞིང་། ཕྱི་མ་ལྟར་ན་གསུམ་དུ་བསྟན་པ་དོན་མེད་དོ་ཞེས་བརྗོད་དེ་རིམ་གྱིས་པ་ལ་ལྟོས་ཏེ་བདེན་གསུམ་རིམ་པར་རྒྱུད་ལ་སྐྱེ་མིན་གྱི་དོགས་པའང་དེ་དང་མཚུངས་སོ། །གཏན་ལ་དབབ་བྱ་ལྟ་བའི་དོན་ལེའུ་གསུམ་པར་བདེན་
པ་གཉིས་སུ་དང་། བཞི་པར་བདེན་པ་བཞིར་དང་། འདིར་བདེན་པ་གསུམ་དུ་གཏན་ལ་ཕབ་པ་རྣམས་མི་ཟློས་པའི་ཤེས་བྱེད་འགོད་དགོས་ཤིང་། བརྗོད་བྱའི་མཐིལ་ལྷག་པ་ཆོས་སྐུ་ཆེན་པོའི་གོ་དོན་ལ་བརྟག་ཚེ་འགྲོ་དྲུག་གིས་བདེན་པ་མཐོང་བ་དང་སྤངས་རྟོགས་མེད་ཀྱང་སངས་རྒྱས་སུ་མི་འགལ་བ་ཞིག་ཁས་ལེན་དགོས་པར་མངོན་ཏེ་ཞིབ་ཏུ་བསྙད་པ་གཅེས་སོ༑ ༑ལྟ་བ་དེའི་རྣམ་གྲངས་རྣམ་པར་ཕྱེ་སྟེ་དམིགས་བཟུང་ན། མིང་གྲངས་ལ་ཉང་ཇོ་མདོ་དང་རྒྱ ལ་བ་གཡུང་གི་བཞེད་པས་ལམ་རིམ་གྱི་ཁུངས་ལ་བརྟེན་ནས་ཤེས་རབ་ཀྱི་ཚོགས་བརྒྱད་དུ་འདོད་པ་དང་། ཐུགས་ཐིག་ལས་གསུངས་པའི་རྗེས་སུ་འབྲངས་ནས་ལམ་རིམ་གྱི་ལུང་དོན་གཞན་དུ་འདྲེན་ཏེ་ཚོགས་དྲུག་གི་ལྟ་བར་བཤད་པ་ལས་རང་ལུགས་གང་ལྟར་བཟུང་ཞིང་། དོན་གྲངས་ལ་ཉམས་སུ་ལེན་བྱེད་ལམ་གྱི་རིམ་པའི་དང་། བླང་བྱ་རྒྱུད་དོན་གྱི་ལྟ་གྲངས་དགུ་དགུར་གསུངས་པ་གང་ཞིག གཅིག་གཏན་ལ་ཕབ་པ་ན་ཐམས་ཅད་ཀྱང་དེར་འགྱུར་མིན་དཔྱད་དོ། །གཉིས་པ་ནི། ཕལ་ཆེར་འཆད་གྱུར་དུ་སྤྲོ་ཞིང་། མཆོག་ཐུན་གྱི་དངོས་གྲུབ་གཉིས་རིམ་པ་ལྟར་རྫོགས་རིམ་དང་བསྐྱེད་རིམ་གྱིས་འགྲུབ་པ་རྒྱུད་ཕྱི་མ་སོགས་ལས་བཤད་པ་གང་ཞིག བསྐྱེད་རིམ་གྱིས་མཆོག་སྒྲུབ་དང་རྫོགས་རིམ་གྱིས་ཐུན་སྒྲུབ་འགྲུབ་པའི་སྐབས་ཤིག་མངོན་ཚེ་འགལ་སྤོང་ལ་བརྟག་གོ །ཐུན་སྒྲུབ་ཀྱི་གཙོ་བོ་རིག་འཛིན་གྱི་དངོས་གྲུབ་ཡིན་ཡང་འདིར་དེ་མི་བརྟན་པའི་གནད་དང་། ཐུན་སྒྲུབ་སྒྲུབ་བྱེད་ཀྱི་རིགས་པ་མེད་དུ་མི་རུང་བ་ནི་སྣང་བ་རིས་སུ་མ་ཆད་པའི་གནད་ལ་ཐུག་པ་གང་ཞིག སེམས་ཅན་གྱི་ལས་ཀྱི་མཐུ་དང་རྣལ་འབྱོར་པའི་ནུས་པའི་ཡུལ་བསམ་གྱིས་མི་ཁྱབ་པས་དངོས་གཅིག་ཉིད་ཚད་མེད་སྣ་ཚོགས་པའི་གོ ར་འཁྲུལ་བར་བསྒྲུབ་རུང་བའི་ཕྱིར་འདིར་བསྟན་རྣམས་ཀྱང་བསྒྱུར་གཞི་གཅིག་གི་སྟེང་དུ་བསྒྲུབ་དགོས་པ་དང་གྲངས་ཉུངས་པར་ཐལ་བར་དཔྱད་དགོས་སོ༑ ༑གཞན་ཡང་རྒྱུད་གཞུང་འདི་ཉིད་དབུ་ཞབས་དྲིལ་ནས་གང་ཟག་གཅིག་གིས་ཉམས་སུ་ལེན་ན་ཚུལ་ཇི་ལྟ་བུའི་སྒོ་ནས་དང་། འདིའི་ནང་ནས་ལེའུ་གཅིག་དང་། ཚིགས་སུ་བཅད་པ་གཅིག་དང་། ཚིག་གཅིག་དང་། ཡིག་འབྲུ་གཅིག་ཉམས་སུ་ལེན་ན་བླང་བྱ་གང་ཞིག་
ཚུལ་ཇི་ལྟར་ཉམས་སུ་ལེན་ཞེས་བརྟག་སྟེ་དེས་ནི་མན་ངག་སྙན་བརྒྱུད་ཀྱི་གནད་དང་ལྡན་པར་འགྱུར་རོ།། །།ལེའུ་དྲུག་པ་ལ་གཉིས་ཏེ། གསུངས་པ་ལོ་རྒྱུས་སུ་བརྗོད་པ་ལ་དཔྱད་པ་དང་། གཞུང་དོན་དཀྱིལ་འཁོར་གསུམ་གྱི་རྣམ་བཞག་ལ་དཔྱད་པའོ། །དང་པོ་ནི། རྒྱུད་དྲུག་གི་འགྲོ་བ་འདི་དག་སྟོན་པའི་འཁོར་ཡིན་མིན་ལ་དཔྱད་པ་ན་དངོས་བརྒྱུད་ཀྱིས་ཕྱེ་བར་མཛད་ཀྱང་དེའང་སྟོན་པ་རང་སྣང་ངམ་གདུལ་བྱ་གཞན་སྣང་གི་ངོས་ནས་ཞེས་བརྟག་དགོས་པ་ལས་མ་འདས་སྙམ་མོ། །གཉིས་པ་ནི། ཏིང་ངེ་འཛིན་གྱི་དཀྱིལ་འཁོར་ལ་རང་བཞིན་གྱི་དཀྱིལ་འཁོར་ཞེས་ཀྱང་བསྟན་འདུག་པས་དེ་གཉིས་དོན་གཅིག་གམ་ཞེས་པ་དང་། དེའི་སྐབས་རྫོགས་ཆེན་ཞེས་གསུངས་པའི་གོ་དོན་ནི་སྤྱིར་རྒྱུད་ལུང་མན་ངག་གསུམ་གྱིས་ཟླས་ཕྱེ་བའི་འམ། མ་ཧཱའི་ནང་གསེས་ཀྱི་རྫོགས་ཆེན་ཡིན་ཞེས་སྨྲས་པའི་ཤུགས་ལས་འཐོན་ཡང་དེའི་གྲུབ་མཐའི་ཐེག་པར་འཇོག་རུང་མིན་དཔྱད་པར་ཞུའོ། །ཏིང་དཀྱིལ་བསྒོམ་པར་མ་ལྕོགས་པའི་རིམ་གྱིས་པའི་བསྒོམ་བྱ་ལྷག་པ་ཏིང་དཀྱིལ་ནི་མངོན་རྟོགས་ལས་སྡེབ་ཀྱི་དབང་དུ་བཤད་དགོས་པ་གང་ཞིག དེ་ལའང་ཡོངས་གྲགས་ཞེས་བྱ་བ་རྒྱུད་གཞུང་སྤྱིའི་རྣམ་བཞག་གི་ལག་ལེན་གཙོ་བོར་འཛིན་པ་དང་། བཀའ་མ་ཞེས་བྱ་བ་རང་གི་བླ་མའི་ཕྱག་བཞེས་དང་ཞལ་གདམས་གཙོ་བོར་འཛིན་པ་གཉིས་ལས་འདིར་གང་ལྟར་བཟུང་ཞིང་། དེ་ལྟར་བཟུང་བའི་ལག་ལེན་འགོད་ཚུལ་དང་། བསྒོམ་པའི་དགོས་ཆེད་དང་ལྷག་པའི་སྒྲ་དོན་ཁྱད་འཕགས་སམ་བྱ་བ་མང་བའི་ཚིག་ཡིན་ཞེས་དཔྱད་དོ། །དེ་ལ་རྟེན་གཞལ་ཡས་ཁང་བསྐྱེད་སྐབས་རྩིག་པ་རིན་ཆེན་སྣ་ལྔ་བརྩེགས་མར་དང་སྦྲགས་མར་བྱེད་པའི་ལུགས་གཉིས་དང་། ཕ་གུ་འདོད་སྣམ་གྱི་རྩེ་ནས་དང་རྩིག་པའི་རྩེ་ནས་བསྐོར་བའི་ལུགས་གཉིས་ལས་གང་ལྟར་ངོས་འཛིན་ཅིང་མཆོད་ལྷ་རྣམས་འོད་རིམ་དང་འདི་ཉིད་ཀྱི་ལེའུ་དང་པོ་ནས་ཕྱོགས་བཅུར་འཁྲིགས་པར་གསུ ངས་པ་དང་། འགའ་ཞིག་ཏུ་འདོད་སྣམ་ལ་གནས་པར་བཤད་པ་གཉིས་ནི་རིམ་
བཞིན་རང་བཞིན་གྲུབ་པ་དང་རྣལ་འབྱོར་པ་བསྒོམ་པའི་དབང་གིས་ཡིན་པར་བཞེད་ཀྱང་། སྔ་མ་ལྟར་ན་འདོད་སྣམ་དུ་མཆོད་ལྷ་གནས་མི་རིགས་པའི་སྒྲུབ་བྱེད་འགོད་དགོས་པ་དང་། ཕྱི་མ་ལྟར་ན་རྣལ་འབྱོར་པ་རང་རང་གི་བློས་མཆོད་སྤྲི ན་གང་ལྕོགས་སྤྲོས་ན་སྐྱོན་དུ་ཐལ་བར་དོགས་སོ། །རྒྱན་གྱི་སྐབས། སྤྱིར་རྒྱན་ལ་གསུམ་དུ་གྲགས་པའི་ནང་ནས་འདིར་བདག་པོའི་རྒྱན་གདན་སར་ལྷ་བཞི་བཅུ་རྩ་གཉིས་ཀྱིས་བརྒྱན་པ་ཡིན་པར་གསུངས་པ་གང་ཞིགལྷ་བསྐྱེད་ནས་བརྒྱན་ན་དེ་ཡན་ཆད་དུ་བསྐྱེད་པར་བཤད་པ་མེད་ལ། མ་བསྐྱེད་པར་བརྒྱན་ན་ལེའུ་བདུན་པའི་བསྐྱེད་པར་སྔགས་རྣམས་མི་དགོས་པར་འགྱུར་རོ། །གདན་སེང་གེ་སོགས་ནི་ཡོན་ཏན་སོ་སོ་མཚོན་བྱེད་ཀྱི་རྟགས་སུ་གྲུབ་པ་གང་ཞིག ལྷ་དེ་དང་དེར་ཡོན་ཏན་གྱི་ཁྱད་པར་སྣ་རེ་ལས་མེད་པའི་མཚོན་བྱེད་དུ་སོང་བ་ཡིན་ནམ་ཞེས་བརྟག་སྟེ། སྐུ་མདོག་དང་ཕྱག་མཚན་གྱིས་རང་རང་གི་མཚོན་བྱ་མཚོན་ཚུལ་འདྲེན་པའི་སྐབས་ཀྱི་དོགས་པའང་དེ་ལྟར་རོ། །བརྟེན་པ་ལྷ་བསྐྱེད་པའི་སྐབས་དྲྭ་ཆུང་ལྟར་བདག་སྲས་དང་གཞན་སྲས་སུ་བསྐྱེད་པ་དང་། དྲྭ་བ་འབྲིང་པོ་ལྟར་ཆོ་ག་གསུམ་གྱིས་བསྐྱེད་པ་དང་། དྲྭ་བ་ཆེན་པོ་ལྟར་རྫོགས་ཚུལ་དུ་བསྐྱེད་པ་ལས་འདིར་གང་ལྟར་འཆད་ཅི། ཐུགས་སེམས་བཞིའི་བཞུགས་ཚུལ་བསྟན་པ་ན། སྔ་རབས་པ་ཁ་ཅིག རྔམ་གློག་ལས། སྤྱན་ལྔའི་གློ་འབུར་མཛེས་པ་ལ། །ཕྱག་ན་རྡོ་རྗེ་སྔོ་སྐྱའི་མདོག །ཅེས་པས་གློ་འབུར་ལ་འགོད་པར་མཛད་པ་ལ་ཉང་ཊིཀ་པ་སོགས་གོང་མ་ཕལ་ཆེར། དེ་ལྟར་ན་ལྷག་པའི་ཡེ་ཤེས་རིན་པོ་ཆེའི་གློ་འབུར་ཞེས་ལྷ་མེད་པས་སྟོ ང་པར་ལྷག་པར་བཤད་པ་དང་འགལ་བས་མི་རིགས་སོ་གསུངས། འོན་ཀྱང་རྡོ་རྗེ་མེ་ལོང་དང་སྤར་ཁབ་སོགས་ལུང་དང་མན་ངག་གི་ཁུངས་དང་ལྡན་ཞིང་བརྒྱུད་པའི་ཕྱག་བཞེས་སུའང་སྣང་བས་རྩིབས་མ ཆན་ལ་འགོད་པ་ལེགས་མོད། གོང་གི་ལུང་དེའི་ལུང་དོན་གཞན་དུ་འདྲེན་པའམ་རྒྱུད་གཞུང་གི་དགོངས་པ་ཐ་དད་པའི་ཕྱོགས་ལས་བརྩམས་ཏེ་སྨྲ་ན་མ་གཏོགས་སྔར་གྱི་རིགས་པ་དེ་ཙམ་གྱིས་འགོག་བྱེད་དུ་མི་རིགས་པར་དོགས་སོ། །ཡང་མཐོང་བ་ས་སྙིང་གི་རྗེས་སུ་ཐོས་པ་ཕྱག་རྡོར་མི་འོང་བར་ནམ་སྙིང་འོང་བའི་རྒྱུ་མཚན་དང་། འདིར་བསྟན་
ཀུན་བཟང་དེ་རང་བཞིན་ཀུན་བཟང་སེམས་ཀྱི་གནས་ལུགས་དང་། སྟོན་པ་ཀུན་བཟང་དེ་མངོན་དུ་བྱས་པའི་ཡེ་ཤེས་དང་། སངས་རྒྱས་ཀུན་བཟང་སྟོང་རྩ་གཉིས་ཀྱི་ཡ་གྱལ་དང་། བྱང་སེམས་ཀུན་བཟང་སེམས་དཔའི་ཡ་གྱལ་དང་། ལོངས་སྐུ་ཀུན་བཟང་སྟེ་ཀུན་ཏུ་བཟང་པོའི་བྱེ་བྲག་ལྔ་ལས་གང་ཡིན་དང་། སེམས་དཔའི་ཕྱག་མཚན་གྱི་སྐབས་ཐུགས་སེམས་དང་པོའི་ཕྱག་མཚན་ཐོག་མར་མི་སྨོས་པར་གསུང་སེམས་མཐའ་མའི་ཕྱག་མཚན་སྨོས་པ་དང་ཕྱག་མཚན་དེ་མ་བསྟན་པའི་རྒྱུ་མཚན་ལ་བརྟག་གོ །ལྷ་རྣམས་ལ་ཞི་ཚུལ་དགུ་དང་ངེས་པར་ལྡན་མིན་གཉིས་སུ་མངོན་ཏེ། ཟུར་པ་ཕལ་ཆེར། ཐབས་ཤེས་གཡུ་ལྗང་ལྟར་འཁྲིལ་བ་ཞེས་བཞེད་པས་དེ་ཐུབ་དྲུག་ལ་མ་ཚང་ཞིང་། རོང་ཟོམ་ཆེན་པོ་ནི། མཉེན་འཁྲིལ་ལྕུགས་ལྡེམ་གཞོན་ཤ་ཆགས་པ་ལྔ་ཡུམ་གྱི་ཚུལ་དང་། གསལ་འཚེར་ལྷུན་སྡུག་གཟི་བྱིན་ལྡན་པ་བཞི་ཡབ་ཀྱི་ཚུལ་དུ་གསུངས་པས་ཡབ་ལ་བཞི་དང་། ཡུམ་ལ་ལྔ་ལས་མ་ཚང་ལ། ལྷ་རྗེ་སྨན་ལུང་པ་ནི་ལྡེམ་པ་ཐུབ་པ་ལ་མ་གཏོགས་གཞན་ལ་མེད་ཅིང་འཁྲིལ་བ་དེ་ལ་མེད་པས་ལྷ་ཐམས་ཅད་ལ་ཚུལ་བརྒྱད་བརྒྱད་ཁྱབ་བྱེད་དུ་ཡོད་པར་བཞེད་དོ། །དེ་དག་གི་ལྟར་ན་ལྷ་རྣམས་ལ་ཚུལ་དགུ་དང་མི་ལྡན་པར་སྣང་ངོ་། །ཀུན་མཁྱེན་ཆོས་རྗེའི་བཞེད་པ་ལྟར་ན་ལྷ་ཐམས་ཅད་ལ་ཚུལ་དགུ་ངེས་པར་ལྡན་པ་ཞིག་སྟེ། རང་ལུགས་ངོས་འཛིན་ལ་དཔྱད་པར་བྱའོ། །རང་བཞིན་འབྲས་བུ་མཐར་ཕྱིན་སྐུའི་དཀྱིལ་འཁོར་གྱི་སྐབས་སྐུ་ལྔའི་ངོ་བོ་སོ་སོ་དང་འདྲ་བར་གདུལ་བྱ་ལ་སྣང་བའི་གོ་དོན་བརྗོད་པ་ན་ལམ་པའི་གང་ཟག་ཅིག་གིས་ཆོས་སྐུ་དང་རྡོ་རྗེ་དང་མངོན་བྱང་ནི་སྐུ་དེ་དང་ཆ་འདྲ་བའི་རྟོགས་པ་ཐོབ་པས་འཁོར་དུ་སོང་བའི་ཕྱོགས་ལས་བརྩམས་ཏེ་གླེང་ཚེ་རྒྱུད་གཅིག་པ་ལས་འཕྲོ་མི་མཐུན་པ་སྣ་ཚོགས་ཤིག་འབྱུང་ངམ་སྙ མ། འདིར་བསྟན་སྐུའི་ཕྲིན་ལས་དེ་ཞི་རྒྱས་དབང་དྲག་ལྷུན་གྲུབ་ཀྱི་ཕྲིན་ལས་ལྔ་པོ་གང་རུང་ངམ་ཐམས་ཅད་ཡིན། སྔ་མ་ལྟར་ན། དེའི་རྒྱུ་མཚན་ཅི་ལ་ཐུག་པར་བརྟག་དགོས་པ་མ་ཟད་ལྔ་ཀ་ཐ་དད་པའི་ཕྱིར་ལྷུན་གྲུབ་དོན་མེད་དུ་དང་ལས་བཞི་རིས་སུ་ཆད་པར་ཐལ་ཞིང་། ཕྱི་མ་ལྟར་ན་དེ་ལྟར་བསྟན་དགོས་པ་ལས་བསྟན་པར་མི་མངོན་ནོ། །གལ་ཏེ་ངོ་བོ་
གཅིག་པའི་ཕྱིར་སྐྱོན་མེད་པར་སེམས་ན། དེ་ལྟར་ན་ཞི་བས་མི་འདུལ་བ་ལ་དབང་དྲག་མི་དགོས་པར་ཐལ། གཅིག་པའི་ཕྱིར་སྙམ་དུ་དོགས་སོ། །བྱང་སེམས་ཀྱི་ལམ་ནས་འབྲས་བུ་ཐོབ་ཚུལ་དང་དེ་ལྟར་ཐོབ་པ་ལྟར་གྱི་ཐོབ་འབྲས་ཀྱི་ངོ་བོ་སྐུ་གསུམ་བསྟན་པ་དེ་རྒྱུ་ཐེག་གི་འདོད་པའི་རྣམ་བཞག་དང་གཅིག་གམ་ཐ་དད། གཅིག་ན་སྐབས་འདིར་ཐུན་ཐེག་བསྟན་པའི་དགོས་པ་ལ་བརྟག་ཅིང་། ཐ་དད་ན་ཁྱད་པར་འབྱེད་ཚུལ་འགོད་པར་རིགས་ཤིང་། འོག་ཏུ་སྐུའི་བཤད་པ་ལན་གསུམ་དུ་བྱུང་བ་མི་ཟློས་པའི་ཤེས་བྱེད་འགོད་པ་ན། ཆོས་སྐུ་དཔག་མེད་ཅེས་པ་སོགས་ནི་མཚན་ཉིད་ཐེག་པའི་སྐུ་གསུམ་གྱི་སྒོ་ནས་བཞག་པར་གསུངས་པས་ཀྱང་གནོད་དོ། །སྐབས་འདིར་ཡོ་གས་སྟོན་པ་རྣམ་སྣང་དུ་འདོད་པ་དང་མཐུན་པ་ལྟ་བུར་འགྲོ་བའི་རྒྱུ་མཚན་དང་གཞུང་གཞན་ལས་:ལ་༼ལས་༽དང་པོ་བ་སྤྲུལ་སྐུའི་འཁོར་དུ་བཤད་པ་དང་ལངྐའི་མདོར་ལོངས་སྐུའི་འཁོར་དུ་གསུངས་པ་འགལ་བར་སྣང་དང་ཕུན་ཚོགས་ལྔ་ཚང་བ་གླེང་གཞི་ཡིན་མིན་རྣམས་དཔྱད་དོ། །གསང་སྔགས་ཀྱི་འབྲས་བུ་ཐོབ་ཚུལ་གྱི་སྐབས་འདིར་བསྟན་ཐུན་མིན་ཀུན་ཏུ་འོད་དང་ལམ་རིམ་ཆེ་ཆུང་སོགས་སུ་བསྟན་པའི་ཡེ་ཤེས་བླ་མའི་ས་གཉིས་དོན་གཅིག་ཏུ་བཟུང་ཆོག་མིན་དང་། མ་ཧཱའི་མཐར་ཐུག་གི་ས་གསུམ་ལ་ཁྱད་པར་ཡོད་དམ་མེད། ཡོད་ན་གསུམ་ཆར་མཐར་ཐུག་མིན་པར་ཐལ། མེད་ན། མཚོན་ཚུལ། བྱེད་ལས། དགོས་ཆེད། ཡོན་ཏན་རྣམས་ལ་ཁྱད་ཡོད་པར་བཤད་པ་དང་འགལ་ལོ༑ ༑ཞེས་བརྟག ཡང་སྐུའི་བཤད་པ་ལན་གསུམ་དུ་བ་མི་ཟློས་པའི་ཤེས་བྱེད་དང་གཡུང་ཊཱིཀ་པ་མ་ཧཱའི་མཐར་ཐུག་གི་ས་པདྨ་ཅན་དང་འཁོར་ལོ་ཚོགས་ཆེན་གཉིས་ལས་མི་བཞེད་པའི་གནད་དང་། རྒྱུ་འབྲས་ཀྱི་ཐེག་པའི་སྐུ་གསུམ་ལ་ངོ་བོ་མཚན་ཉིད་བྱིན་རླབས་གསུམ་གསུམ་ཁྱད་པར་ཡོད་པར་འགོད་ལུགས་དང་། དེའང་འབྲས་བུ་རང་ལྡོག་ལ་ཁྱད་པར་དེ་དག་མེད་པར་ཆོས་རྗེ་སྨན་ལུང་བཞེད་པའི་རྗེས་སུ་འབྲངས་ཏེ་རང་ལུགས་འཇོག་པ་ཡིན་ཡང་ལམ་རིམ་སོགས་རྒྱ་བོད་ཀྱི་མཁས་གྲུབ་དམ་པས་མཛད་པའི་གཞུང་ཕལ་ཆེ་བར་ཐུན་མཆོག་གི་ཐེག་པའི་འབྲས་བུ་ངོ་བོ་ཉིད་གཅིག་ཅིང་ཁྱད་མེད་པར་སྨྲ་བའི་གང་ཟག་དག་ནི་
མ་ཧཱའི་དོན་མ་མཐོང་བའི་མུན་སྤྲུལ་གྱི་བློ་ཅན་ནོ་ཞེས་གསུངས་པ་ལ་ཞིབ་མོའི་རྣམ་བཞག་འགོད་པར་རིགས་སོ། །གཞན་ཡང་འདི་ཡི་སྐབས་སྔགས་ཀྱི་ལམ་མ་བྱུང་བར་འབྲས་བུ་བྱུང་བའི་རྒྱུ་མཚན་དང་། སྐུ་ལྔ་པོ་སྐུ་མཚན་ཉིད་པ་དང་བཏགས་པ་བ་གང་ཡིན་ཡང་དཔྱད་དོ༑ ༑ད་ནི་འདི་དཔྱད་པར་བྱ་སྟེ། རྒྱུད་འདིའི་ལེའུ་དང་པོ་དང་གསུམ་པ་དང་བཞི་པ་དང་དྲུག་པ་རྣམས་སུ་ལེའུའི་བསྡུ་བ་རེ་བྱུང་ལ་གཞན་རྣམས་སུ་མ་བྱུང་བའི་རྒྱུ་མཚན་ཅི་ལ་ཐུག་སྟེ་གསུངས་པ་ལོ་རྒྱུས་སུ་བརྗོད་པ་འགའ་ཞིག་འོང་བ་དང་འགའ་ཞིག་མི་༼ འོང་༽བ་ཇི་ལྟར་སྙམ་པའང་དེ་དང་མཚུངས་སོ།། །།ལེའུ་བདུན་པ་ལ་གཉིས་ཏེ། ལྷག་པ་ཏིང་ངེ་འཛིན་གསུང་གི་དཀྱིལ་འཁོར་ལ་དཔྱད་པ་དང་། རང་བཞིན་གསུང་གི་དཀྱིལ་འཁོར་ལ་དཔྱད་པའོ། །དང་པོ་འཆད་པའི་སྐབས་འདིར་ཞི་བའི་ཕྲིན་ལས་སྒོམ་རིམ་གྱི་སྡེབས་བརྗོད་པར་གསུངས་པའི་འགོད་ལུགས་རགས་པའི་རྣམ་བཞག་ཙམ་གོང་དུ་དཔྱད་ཟིན་ཡང་དེའི་ནང་ཚན་ལ་མི་འདྲ་བའི་ཁྱད་བག་རེ་ཡོད་པ་ཟུར་ཙམ་སྨོས་ན་གྲལ་ཕྱག་དང་ཚུལ་ཕྱག་གི་ཁྱད་པར་སྔ་རབས་པ་ཕལ་ཆེར་དབང་ཐོབ་པ་སྔ་རིམ་མམ་ཡེ་ཤེས་ཀྱིས་རྒན་པ་ལ་གྲལ་ཕྱག་དང་ཡི་དམ་ལྷ་ལ་ཚུལ་ཕྱག་མཛད་པར་བཞེད། འགའ་ཞིག་འདུ་བའི་ཐོག་མར་ལྷ་ལ་གྲལ་ཕྱག་དང་། རྣལ་འབྱོར་པ་རྒན་རིམ་གྱིས་ཚུལ་མཐུན་གྱི་ཕྱག་བྱེད་པར་གསུངས་པ་རང་ལུགས་གང་ལྟར་བཟུང་ཞིང་། ལྷ་ལ་ཕྱག་བྱ་ཚུལ་རྒྱུད་སྦྱང་གི་སྐབས་སུ་དབྱེར་མེད་འདྲེས་པ འི་ཕྱག་མཛད་པ་ལྟར་འདིར་ཡང་རིགས་པ་ལས་ཕྱག་བཞེས་སུ་མི་སྣང་བའི་དགོས་པ་ལ་བརྟག་གོ །མཚན་བཅས་ཀྱི་མཚམས་བཅད་པ་ན། སྤྱིར་བསྟན་མཚོན་ཆ་འཆོལ་བ་མཚོན་ཆ་དམ་ཚིག་སྲུང་བ་འཁོར་ལོ་ཁྲོ་བཅུ་རོལ་པའི་མཚམས་བཞི་ལས་སྐབས་འདིའི་ངོས་འཛིན་ཇི་ལྟར་ཡིན་ཞེས་ཀྱང་དཔྱད་ཅིང་ལས་རིམ་གཞན་རྣམས་གཞུང་གི་སྐབས་སོ་སོ་ནས་ཤེས་སོ། །སྤྱིར་སྔགས་ཀྱི་བྱིན་རླབས་ཀྱིས་ཡིད་ཤེས་བདེ་མྱུར་དུ་སྐྱོབ་པའི་གནད་གསང་ངོ་མཚར་བ་ནི་གྲུབ་པ་བཞི་ལྡན་གྱི་རྒྱུ་
མཚན་ལ་ཐུག་པ་གང་ཞིག་ཤེས་བྱ་གང་ལའང་དེ་ལྟར་མ་གྲུབ་པ་མི་སྲིད་ན་ངག་གཞིར་བཟུང་གི་སྔགས་གཙོ་བོར་འཛིན་པའི་དགོས་པ་དང་། རྒྱུད་འདི་ཉིད་ལས་གསུངས་པའི་རྟེན་བརྟེན་པ་ལས་རིམ་གྱི་སྔགས་གསུམ་པོ་གསང་རིག་གཟུངས་གསུམ་གྱི་ནང་ཚན་གང་ལ་འཇོག་པ་དང་། ངག་ཁོ་ནས་ཀྱང་ཁྱབ་པ་ཉིད་དུ་འདོད་དགོས་མིན་དང་གཞན་དུ་ཕྲེང་པའི་སྔགས་ལ་རྩ་སྔགས་སུ་བཤད་པ་འདིར་ཁས་ལེན་མིན་དང་བསྐྱེད་པ་རྐྱེན་གྱི་སྔགས་དེ་སྒྲུབ་ཐབས་སུ་ཧཱུྃ་སོགས་ས་བོན་དང་བཛྲ་དྷྲྀཀ྄་སོགས་གཉིས་ཆར་ཚོགས་པ་བྱུང་ཡང་། འགྲེལ་པ་ལས་བཛྲ་དྷྲྀཀ྄་སོགས་ཙམ་ལས་མ་བཤད་པས་དེ་གཉིས་ལ་ཇི་ལྟ་བུའི་གནད་ཀྱི་ཁྱད་ཞུགས་ཞེས་པ་དང་། རྟེན་གྱི་དཀྱིལ་འཁོར་བསྡུས་འབྲིང་གསལ་པའི་རྣམ་བཞག་འཇོག་ལུགས་རྣམས་ལ་བརྟག་གོ །གཞན་ཡང་ལེའུ་དྲུག་པའི་སྐབས་བསྟན་སངས་རྒྱས་ཞེ་གཉིས་ལ་མཚུངས་ཆོས་དང་ཁྱད་ཆོས་ཡོད་པ་ངོས་འཛིན་སླ་ཕྱིར་ངག་དོན་དྲིལ་ནས་དཔྱད་པ་སྣང་སྟེ་རྒྱུད་དོན་རྣམ་ངེས་ལས་ཤེས་སོ། །དབང་བསྐུར་གྱི་སྐབས་སྒྲོལ་ཊཱིཀ་པ་དབང་ལྷ་རྣམས་ཀུན་བཟང་ཡབ་ཡུམ་གྱི་རྣམ་པར་དང་ཀུན་མཁྱེན་སྨིན་ལོས་རིགས་ལྔ་ཡབ་ཡུམ་གྱི་རྣམ་པར་སྤྱན་དྲངས་པར་བཞེད་པ་གཉིས་མི་འདྲ་བར་གྱུར་ཚུལ་གྱི་དགོངས་པའི་གནད་དང་། དབུ་རྒྱན་གྱི་ལྷས་བརྒྱན་ལུགས་ལ་ཆིག་རྫོགས་མི་བསྐྱོད་པས་གཙོར་བྱས་ཤ་སྟག་དང་ཕྱེད་ཉིལ་རང་རིགས་བདག་པོར་གྱུར་པའི་ཕྱོགས་གཉིས་ལས་འདིར་གང་དུ་བཟུང་བ་དང་། རིགས་དབྱེ་བ་ན་ཉང་ཊིཀ་པ་སོགས་ཤར་དང་ཤར་ལྷོའི་ལྷ་རྣམས་མི་བསྐྱོད་པ་དང་ཞེས་ས་སྙིང་དང་བྱམས་པ་རྡོ་རྗེའི་རིགས་སུ་དང་། འགའ་ཞིག་ཐུབ་པ་དྲུག་ལ་མི་བསྐྱོད་པ་རྐྱང་པས་དབུ་བརྒྱན་པར་དང་ཁ་ཅིག་རྒྱ་སྤྲོས་ཀྱི་སྐབས་སུ་ཡང་ཐུབ་དྲུག་དབུ་རྒྱན་མེད་པར་བཞེད་ཀྱང་། རིམ་པ་ལྟར་སྒྱུ་འཕྲུ ལ་གྱི་དཔེ་རྙིང་སྐོར་དུ་མ་དང་འཆད་འགྱུར་ལེའུ་བརྒྱད་པའི་བསྟན་དོན་དང་འགལ་བ་འདི་སྤོང་རིགས་སོ་ཞེས་ཀླན་ཀའི་སྐབས་འཚོལ་བར་བྱེད་ན་དཔྱད་དགོས་སོ། །སྟོན་པ་ཀུན་བཟང་རིགས་ཐམས་ཅད་ཀྱི་བདག་པོར་གྱུར་པ་ལ་རིགས་ལྔས་དབང་བསྐུར་མི་དགོས་པར་དོགས་ཏེ་སྐུ་གསུང་ཐུགས་ཀྱི་ལྷས་བྱིན་གྱིས་བརླབས་པར་ཡང་དེ་ལྟར་རོ། །
ཐུབ་དྲུག་ནི་གང་འདུལ་གྱི་གཟུགས་སུ་སྣང་བ་དེའི་ཕྱིར་ནོར་སྐྱོང་ཀུ་ཀུ་ལྟ་བུའི་རྟེན་ལའང་དབང་བྱིན་གྱིས་ལྷའི་རྟགས་ཀྱིས་བརྒྱན་ཆོག་པར་ཐལ་བ་དང་། གཞན་ཡང་འོད་རིམ་ལས་དེར་དབང་བྱིན་མི་དགོས་པར་བཤད་པའི་ལུང་དོན་ལ་བརྟག་གོ །བྱིན་རླབས་ཀྱི་སྐབས་རྒྱུད་ཉིད་དང་ཐལ་བ་སོགས་ལས་རིགས་ལྔ་ཀས་བྱིན་གྱིས་རློབ་ཚུལ་བྱུང་ཡང་ལམ་སྒོམ་པའི་དབང་དུ་སྐུ་གསུང་ཐུགས་ཀྱི་ལྷ་གསུམ་དུ་བསྡུ་བར་མཛད་ཅིང་། དེའི་གནད་ཀྱང་ས་ཆུ་གཉིས་དང་མེ་རླུང་གཉིས་དང་སེམས་དང་ནམ་མཁའི་དྭངས་མ་རོ་གཅིག་པ་ཡིན་པར་གསུངས་པ་གང་ཞིག ཡོན་ཕྲིན་གྱི་ལྷའི་བྱིན་རླབས་ཀྱི་སྔགས་དང་གནས་སོ་སོར་རྒྱས་བཏབ་ལུང་བསྟན་པ་དགོས་མེད་དུ་མི་འགྱུར་བའི་ཚུལ་དང་དྭངས་མ་རོ་གཅིག་ཚུལ་ལ་དཔྱད་དོ། །དབང་བྱིན་གྱིས་ལྷ་གཉིས་ཀ་རིགས་ལྔ ར་འདུག་པ་ལ་ཁྱད་ཅི་ཡོད་དང་དབང་བྱིན་གྱི་སྐུའི་ལྷ་གཉིས་ཀ་སྤྱི་བོར་བསྒོམ་པའི་ཕྱིར་གནས་ཐ་མི་དད་པ་ལྟ་བུར་སྣང་བ་དང་དབང་བྱིན་གྱི་ལྷའི་རང་བཞིན་སོ་སོར་མ་གྱུར་ཀྱང་རྣམ་པ་རིམ་བཞི་སྤྲུལ་ལོངས་སུ་སྣང་བ་གང་ཞིག་དེ་གཉིས་ཀྱི་རྣམ་པ་བརྫུན་ཚུལ་མི་འདྲ་བའི་རྒྱུ་མཚན་གང་ལ་ཐུག་སྙམ་ཞིང་གང་དག་བླ་མེད་ཀྱི་ལྷའི་དབུ་རྒྱན་ཡོ་གའི་རིགས་ལྔས་བྱས་པ་དང་། དབུ་རྒྱན་གྱི་ལྷ་ཡབ་ཡུམ་འཁྲིལ་སྦྱོར་ཅན་བྱས་པ་དང་སྔར་ནང་ལུགས་ཀྱི་རིགས་ལྔ་ལ་ཡུམ་མེད་པའི་དབུ་རྒྱན་བྱས་པའང་སྣང་སྟེ། རེ་ཞིག་བརྟག་པར་འོས་པའི་གནས་སོ། །ཐུགས་ཀྱི་ལྷ་དང་ཡེ་ཤེས་སེམས་དཔའ་གནས་རྣམས་ཐ་དད་ཚུལ་དང་། དངོས་གྲུབ་བསྐུལ་བ་ལ་ཚིག་དང་སྔགས་ཀྱིས་བསྐུལ་བ་མི་ཟློས་པའི་ཤེས་བྱེད་འགོད་དགོས་སོ། །འདིའི་སྐབས་བསྟིམ་པ་ནི་ཟུར་པ་སྤྱིའི་བཞེད་སྲོལ་ལ་ས་དམིགས་ལོགས་སུ་མཛད་ཀྱང་། ཆོས་རྗེ་སྨྱོས་སྟོན་སྐུ་མཆེད་ཀྱིས་ཚིག་གིས་བསྐུལ་རྗེས་ཀྱི་སྔགས་ཚན་གསུམ་པོས་རིམ་བཞིན་དམ་ཡེ་དབྱེར་མེད་དུ་བསྲེས་ནས་བརྟན་པ་དང་དབང་དུ་བྱས་ལ། ཕྱག་རྒྱ་བཞིས་ནི་ཤིན་ཏུ་བརྟན་ཅིང་གསལ་བར་བྱས་པ་ཉིད་ཡིན་པས་ས་བཅད་བཞི་པ་ལྔ་པ་གཉིས་ཁོངས་གཅིག་ཏུ་བསྡུས་པར་བཞེད་དོ། །གཉིས་པ་ནི། གསུང་ལྔ་ལ་བཟང་ངན་གྱི་ཁྱད་པར་ཡོད་དམ་མེད། ཡོད་ན་ལྔ་ཀ་རང་བཞིན་འབྲས་བུ་
མཐར་ཕྱིན་གྱི་གསུང་ཡིན་པར་རྒྱུད་དོན་རྣམ་ངེས་ལས་བཤད་པ་མི་འཐད་པར་ཐལ། མེད་ན་དོན་གྱི་གསུང་གསུང་གཞན་ལས་མཆོག་ཏུ་གྱུར་པ་ལ་ངམ་མི་རིགས་པར་ཐལ་ལོ། །འདིར་བརྡའི་གསུང་ཆད་སྐྱོན་དང་སྤྲུལ་སྐུའི་གསུང་ཟློས་སྐྱོན་དུ་སྣང་བར་དོགས་ཤིང་། གསུང་གི་ཡན་ལག་གི་གྲངས་འདྲེན་ཚུལ་མི་འདྲ་བ་དག་ལས་གང་ལྟར་བཟུང་བ་འཐད་པ་དང་བཅས་པ་འགོད་དགོས་སོ།། །།ལེའུ་བརྒྱད་པ་ལ་ལྔ་སྟེ། རང་བཞིན་གྱི་དང་། ཏིང་ངེ་འཛིན་གྱི་དང་། ལྟ་བའི་ཕྱག་རྒྱ་དང་། རྒྱ་སྤྲོས་ཀྱི་ཏིང་ངེ་འཛིན་དང་། དེ་དག་གི་དོན་བསྡུ་བ་ལ་དཔྱད་པའོ། །དང་པོ་ནི༑ དེ་ཡང་མངོན་རྟོགས་ལས་སྡེབ་ཀྱི་དབང་དུ་མཆོད་པ་ལས་ཀྱི་རིམ་པ་ཡིན་ཞིང་དེ་ལ་ནང་གསེས་ཀྱི་སྡེ་ཚན་བཅོ་ལྔ་ལས་ཕྱག་རྒྱ་སྟེ་སྤྱིར་ཕྱག་རྒྱ་ཞེས་པ་དེ་འདའ་བར་དཀའ་བ་དང་བརྡ་སྤྲོད་པ་དང་མཛེས་པར་བྱེད་པ་སྟེ་ཆོས་གསུམ་ལྡན་ཞིག་ན་འདིར་བསྟན་གྱི་དེའི་རྣམ་གྲངས་གང་དང་གང་དུ་ངོས་བཟུང་ཞེས་ཐོག་མར་དཔྱད་དགོས་ཤིང་། དངོས་པོ་བཅུའི་ཡ་གྱལ་གྱི་སྔགས་རྒྱ་གཉིས་ཀའི་གཞི་མཐུན་ཡང་ཡོད་མོད་ཀྱི་གཉིས་སུ་ཕྱེ་བ་ནི་ངག་ཏུ་བརྗོད་པ་དང་ལག་པས་བཅའ་བ་གཙོར་གྱུར་གྱི་ཁྱད་པར་ལས་ཡིན་པ་རོང་ཟོམ་ཆེན་པོའི་བཞེད་པར་གནས་ན་རང་བཞིན་གྱི་ཕྱག་རྒྱ་འདི་སྔགས་དང་ཕྱག་རྒྱས་ཟླས་ཕྱེ་བའི་ཕྱི་:མོའི་༼མའི༽ ཕྱོགས་མིན་པར་ཐལ་བར་དོགས་སོ། །སྒྱུ་འཕྲུལ་དྲ་བ་ལ་ཕྱི་ནང་གསང་བ་དེ་ཁོ་ན་ཉིད་དང་བཞིར་བརྒྱུད་པའི་མན་ངག་གིས་འཆད་པ་ལས་འདིའི་སྐབས་གང་ལྟར་འཛིན་ཅིང་། འཁོར་འདས་ཀུན་ལ་རང་བཞིན་གྱི་ཕྱག་རྒྱས་བཏབ་ཚུལ་འདི་ཕྱག་ཆེན་སྲོལ་དང་ཁྱད་ཆེ་བར་རྟོག་གོ །གཉིས་པ་ནི། རིགས་ལྔ་སྤྱིིའི་དམ་རྒྱ་བཅའ་བ་ན་ཡན་ལག་ལྔ་དང་སོར་མོ་རྣམས་རིགས་དེ་དང་དེར་ངེས་པའི་རྒྱུ་མཚན་གང་ལ་ཐུག་ཅིང་སོར་མོ་འདི་ལྟར་བསྣོལ་བའི་རྒྱུ་མཚན་ལྷ་རྣམས་གཞན་རིགས་ལ་འཁྱུད་པར་རིགས་པའི་ཕྱོགས་ནས་བསྙད་རུང་ངམ་སྟེ་འོན་ཀྱང་སོར་མོ་རྣམས་གང་བདེར་བསྣོལ་ཆོག་པར་ཐལ་བའམ་མིན་ན་རྒྱུ་མཚན་གསར་
དུ་བརྟག་དགོས་པ་ལས་མ་འདས་སོ། །སོར་མོ་རྣམས་ལ་ཡིག་འབྲུ་འགོད་ཚུལ་ཡང་ཡེ་ཤེས་རྔམ་གློག་ལས་མཐེ་བོང་གཉིས་ལ་ཨཱཾ་པཱཾ་སྲིན་ལག་གཉིས་ལ་སྭཱ་མཱཾ་འགོད་པར་བཤད། འགྲེལ་ཆུང་ལས་སྨོས་མ་ཐག་པའི་ཡིག་འབྲུ་དེ་དག་མཐེ་བོང་དང་མཐེའུ་ཆུང་འོད་རིམ་དུ་གོང་གི་ལྟར་ལས་གོ་ལྡོག་ཏུ་བཀོད་པ་གང་གི་རྗེས་སུ་འབྲངས་ཤིང་། ལག་གཡས་གཡོན་གྱི་སོར་མོའི་བྲེ་ཁར་ཟླ་ཉིའི་གདན་འགོད་པ་ནི་ལྷ་ཡབ་ཡུམ་ཐབས་ཤེས་གཙོ་ཆེ་ཆུང་གི་གནད་ཀྱིས་ཡིན་པར་སྨྲས་ཀྱང་རུང་མོད། དེ་དང་བསྟུན་ཚེ་ཡབ་ཡུམ་སོ་སོར་ཉི་ཟླ་ཉིས་བརྩེགས་མི་ཆོག་ལྟ་བུར་སོང་བ་ལ་བརྟག་གོ །ལྷ་སོ་སོའི་ཕྱག་རྒྱ་བཅའ་བ་ནི་བདུན་སྦྲགས་སམ་བསྡུ་ན་བཞི་སྦྲགས་སུ་བྱ་བ་ཡིན་པ་གང་ཞིག རང་ཉིད་དམ་ཚིག་སེམས་དཔར་གསལ་བའི་ཐུགས་ཀར་པད་ཉི་ཟླ་བ་ལ་གནས་པའི་ཕྱག་མཚན་ཐུགས་སྲོག་སྔགས་ཕྲེང་དང་བཅས་པས་མཚན་པ་ལས་འོད་ཟེར་སྤྲོ་བསྡུ་བྱ་བ་རྣམས་ཕྱག་རྒྱ་བཞིར་འདོད་པ་དང་སྐུ་ཆོས་དམ་ལས་བཞི་དེར་འཇོག་པའི་རྣམ་བཞག་རྒྱུད་གཞུང་འདིའི་བཀའ་སྲོལ་དུ་བྱུང་མིན་དང་། ཕྱག་རྒྱ་བསྒྱུར་བ་དང་དགྲོལ་བ་ནི་བདུན་སྦྲགས་ཀྱི་སྐབས་སུ་གང་དུ་བསྡུ་བ་དང་། ད་ལྟ་རང་ཅག་གི་ཕྱག་ལེན་དུ་ཡུམ་མ་བསྐྱེད་གོང་དུ་ཡབ་ཀྱི་སྙིང་པོ་བརྗོད་པར་མཛད་ཀྱང་ཐབས་ཀྱིས་རྒྱས་གདབ་བྱ་མ་བསྐྱེད་པ་ལ་ཇི་ལྟར་གདབ་སྙམ། དེས་ན་བཅོས་མའི་ཕྱག་རྒྱས་ངེས་པར་འཆིང་མི་དགོས་པའི་ཕྱོགས་ནས་བསྙད་ན་འཆད་བདེར་མ་ཟད་འོག་ཏུ་བསྒུལ་བསྐྱོད་ཐམས་ཅད་ཀུན། ཞེས་པ་འདི་དང་མི་འགལ་བའི་ཤེས་བྱེད་ཀྱང་འགོད་མི་དགོས་སམ། གཞན་ཡང་ཕྱག་མཚན་རྣམ་པ་ཐམས་ཅད་པ་ལ་གྲངས་སུ་ངེས་པ་མི་འགལ་ལམ་ཞེས་བརྟག་སྟེ་སྐུ་གསུང་ཐུགས་བསམ་གྱིས་མི་ཁྱབ་པ་གྲངས་སུ་མཚོན་པའང་དེ་ལྟར་རོ། །གསུམ་པ་ནི། ཅི་བྱས་ལྷའི་ཕྱག་རྒྱ་ལས་མི་འདའ་བ་ལ་ལུས་བསྒུལ་བསྐྱོད་ཙམ་གྱིས་ཅི་ལྟོ་སྟེ་སྙམ། བཞི་པ་ནི། ཡན་ལག་གི་ལྷ་བཞི་བཅུ་ལ་ཐབས་ཀྱི་ལྷ་དང་། དེ་རྣམས་སོ་སོའི་སྲོག་གོར་རང་འདྲའི་ཡེ་སེམས་བཞི་བཅུ་ལ་ཤེས་རབ་ཀྱི་ལྷ་ཞེས་འཇོག་པའི་རྒྱུ་མཚན་སྤྱིར་ཐབས་དང་ཤེས་རབ་གཉིས་ཀྱིས་ཟླས་ཕྱེ་བའི་དེ་དང་དེར་འཇོག་ན་ཡུམ་རྣམས་ཤེས་རབ་ཀྱི་ལྷར་མཐའ་གཅིག་
ཏུ་ངོས་བཟུང་མི་རིགས་པར་འདོད་དགོས་ཤིང་རགས་ཕྲའི་དབང་དུ་ན་སྣང་བ་རྣམ་འབྱེད་ཀྱི་སྐབས་འདིར་སྐུ་རི་རབ་ཙམ་ལ་བཞུགས་གནས་ཀྱི་རྩའི་སྣོད་ཏིལ་འབྲུ་ཙམ་གྱི་ནང་དུའང་ཤོང་བའི་ཚུལ་ལྟ་བུ་ཞིག་ངེས་པར་སྲོག་ཏུ་བཟུང་དགོས་པའི་དམ་བཅའ་ཉམས་པར་དོགས་སོ༑ ༑ལྷ་རྣམས་གནས་སོ་སོར་འགོད་ཚུལ་ལ་གོང་མ་འགའ་ཞིག་ལྐོག་མར་སྣང་མཐའ་བཀོད་པ་སོགས་ཀྱི་ལུགས་ཤིག་ཀྱང་བཞེད་མོད། རང་ལུགས་ནི་འགྲེལ་ཆུང་པིཎྜཱརྠ་སོགས་ལས་གསུངས་༼པའི་༽རྗེས་སུ་འབྲངས་ཏེ་འཇོག་པར་མཛད་ཅིང་དེ་གཞིར་བྱས་ལའང་རྩ་ལྷ་རྣམ་སྣང་ཡིན་ཚུལ་གྱི་དབང་གིས་བཀོད་པ་ལྟ་བུ་ལ་མཚོན་སྐབས་ལག་གཡོན་གྱི་འདོམ་རྩར་ཀུན་ཏུ་བཟང་པོ་འགོད་པ་གཡུང་ཊིཀ་སོགས་ལས་གསལ་བ་གང་ཞིག་ཁོ་བོ་ནི་དེར་སྒྲུབ་བྱེད་གང་ཡང་མ་མཐོང་ཞིང་རྩ་ལྷ་མི་བསྐྱོད་པར་བཟུང་བའི་སྐབས་ཀྱི་འགོད་ཚུལ་ལ་དཔག་ན་དབུ་ལ་ཀུན་ཏུ་བཟང་པོ་བཀོད་ཅེས་སྦྱར་མི་དགོས་སམ་སྙམ་སྟེ་འོན་ཀྱང་བླུན་ཤེས་ཀྱི་ལྐོག་ཏུ་གྱུར་ཚད་འགོག་པ་ག་ལ་འཚལ་ལོ། །སངས་རྒྱས་སྟོང་གི་དཀྱིལ་འཁོར་བསླབ་ཚུལ་ལ་ཉང་རོག་རྩགས་ཚ་སོགས་ཐབས་ཤེས་སྐུ་གསུང་ཐུགས་ཀྱི་ལྷ་བཅས་ཏེ་ཉིས་བརྒྱ་གྲངས་ཀྱི་གཞིར་བཟུང་བ་ལ་དབུ་རྒྱན་གྱི་ལྷ་སྟོང་བརྩིས་ནས་ཁྱོན་བསྡོམས་པར་ལྷ་སྟོང་ཉིས་བརྒྱར་བཞེད་ཀྱང་ཡེ་ཤེས་སེམས་དཔའ་རྒྱན་དང་ལྡན་པར་ཐལ་ཞིང་ལྷ་སྟོང་གི་གྲངས་འཇིག་པར་འགྱུར་རོ། །རང་ལུགས་ལྟར་ན་སྤར་ཁབ་དང་འགལ་བར་དོགས་སོ། །ཉི་ཁྲི་བཞི་སྟོང་གི་དཀྱིལ་འཁོར་ལ་བསླབ་པ་ན་ཐུབ་དྲུག་ལ་ཡུམ་དངོས་སུ་མེད་པས་རྟགས་ཀྱི་ཡུམ་པདྨ་ལའམ་རིགས་ལྔ་དང་ཀུན་བཟང་དང་དྲུག་གི་ཡུམ་གཡར་ནས་འགོད་ཅེས་དང་། ཡང་ན་གཡོན་ཕྱོགས་སུ་འགོད་དམ་སྟེ་དེ་ཤེས་རབ་མཚོན་བྱེད་ཡིན་པའི་རྒྱུ་མཚན་ལ་བརྟག་གོ ༑དཀྱིལ་འཁོར་སྤྲོས་པའི་སྐབས་སུ་དབང་བསྐུར་བྱིན་རླབས་ཚུལ་བཞིན་དུ་བྱ་བ་རིན་ཆེན་དྲ་བ་ལས་བཤད་ཀྱང་རྣམ་གྲངས་སྤྲོས་པའི་སྐབས་འདིར་དབང་གི་གོང་དུ་བྱིན་རླབས་བྱ་དགོས་པར་ལམ་རིམ་དུ་གསུང་པའི་རྒྱུ་མཚན་ཅི་ལ་ཐུག་ཅིང་དེ་ལྟར་བསྒོམ་པ་འདི་ཐོད་རྒལ་བའམ་ཟག་བཅས་སྐབས་ཀྱི་མཐར་ཆགས་པའི་ཡང་ཡུལ་ཡིན་མིན་དཔྱད་དོ། །ལྔ་པ་
ནི༑ བདེར་གཤེགས་ཟུར་ཆུང་བའི་བཞེད་པ་ལྟར་གདུལ་བྱ་བློ་རབ་འབྲིང་ཐ་གསུམ་དང་ཡང་སློབ་པའི་རིམ་པ་ཐོག་ཐ་བར་གསུམ་དུ་ཉམས་སུ་ལེན་ཚུལ་དང་རང་ཚིག་རང་ལ་ལུང་དུ་མི་འགྱུར་བའི་ཕྱིར་སྟོན་པ་ངས་བཤད་ཅེས་པ་འདི་མི་འཐད་དོ་སྙམ་པ་ལ་བརྟག་པར་ཞུའོ།། །།ལེའུ་དགུ་པ་ལ་གཉིས་ཏེ། ལོ་རྒྱུས་དང་། གཞུང་ལ་དཔྱད་པའོ། །དང་པོ་ནི། དགྱེས་པ་ཆེན་པོ་ཞེས་པ་ལ་སྤར་ཁབ་ལས་བཤད་པའི་ཐུན་དགའ། ལོག་དགའ། དགའ་བའི་དགའ་བ༑ བསམ་མི་ཁྱབ་པའི་དགའ་བ་དང་བཞི་ལས་འདིར་གང་དུ་བཟུང་བར་དཔྱད་དོ། །གཉིས་པ་ལ་གསུམ་སྟེ། དཀྱིལ་འཁོར་དང་། དབང་དང་། སྒྲུབ་པ་ལ་དཔྱད་པའོ། །དང་པོ་ནི། བཀོད་པ་དཀྱིལ་འཁོར་ཞེས་པའི་སྒྲ་དོན་ལ་བརྟག་པ་ན་སྒྱུ་འཕྲུལ་རྒྱས་པར་འཇིག་རྟེན་ལས་འདས་པ་དཀྱིལ་དང་འཇིག་རྟེན་འཁོར་རམ། རྡོ་རྗེ་སེམས་དཔའ་དཀྱིལ་དང་། རིགས་བཞི་ལྷ་རྣམས་འཁོར་ཡིན་པར་གསུངས་ཤིང་། རྡོ་རྗེ་ལས་རིམ་ལས་རང་བཞིན་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་ལོའི་ཚུལ། །ཞེས་སམ། སྙི ང་པོ་ཐམས་ཅད་དུས་དཀྱིལ་ལ། །གང་ཡང་ཡན་ལག་འཁོར་དུ་གསུངས། །ཞེས་སོགས་བཤད། འགྲེལ་ཆུང་ལས། མཎྜ་ཞེས་བྱ་སྙིང་པོའི་དོན། །ལ་ཞེས་པ་ནི་ལེན་པའོ། །ཞེས་གསུངས། ཐུགས་ཐིག་ལས། བདུན་གྱི་གཙོ་སྙིང་གང་གང་ལ། །དེ་ཡི་འཁོར་ལྡན་ངེས་པའི་ཚིག །ཅེས་གསུངས་སོ། །རྣམ་གྲངས་ཀྱང་། ཆོས་དོན་ལས་གསུམ་དང་རྒྱུད་ཕྱི་མ་ལ་ལྔ་རུ་དབྱེ་བར་མཛད། རྒྱས་པ་ལས་བདུན་དང་འགྲེལ་ཆུང་ལས་བཅུ་གཉིས་སུ་བཞེད་དེ་དེ་དག་ལ་དགོངས་གཞིའི་ཁོག་བསྒྲིག་རྒྱུ་ལྟ་བུ་ཞིག་མེད་ན་མི་མཐུན་པར་སྣང་ངོ་། །ཡང་གོང་དུ་གང་ཟག་ཅིག་གིས་རྒྱུད་འདིའི་ལེའུ་གཅིག་ཉམས་སུ་བསྟར་བྱ་གྲུབ་པ་ལྔ་པར་ངོས་འཛིན་མཛད་མོད། འདིར་ཡང་ལམ་རིམ་ཚང་བ་ཞིག་སྟོན་པར་གསལ་བས་དཔྱད་པར་འོས་ཤིང་། གཟུགས་བརྙན་གྱི་དཀྱིལ་འཁོར་ཞེས་བྱ་བ་དེ་ཡང་ལྷ་རྗེ་མདའ་ཏིག་དོན་དམ་པའི་གཟུགས་
བརྙན་དུ་འབྱུང་བར་དང་། གླན་སྟོན་རྣམ་རྟོག་ཕྲ་རགས་ཀྱིས་ལྷ་ཡབ་ཡུམ་མཚོན་པར་དང་། ཉང་ཊཱིཀ་པ་བཞེད་པ་དེ་གཉིས་ཆར་ཡང་འོག་མིན་ན་བཞུགས་པ་དང་འདི་ལྟར་བསྒོམས་པས་གསལ་བ་གཉིས་འདྲ་བའི་ཕྱིར་གཟུགས་བརྙན་དུ་བཞེད་པ་གང་གི་རྗེས་སུ་འབྲང་། ལྷག་པ་གཟུགས་བརྙན་གྱི་དོན་ནི་ལྷག་ཏིང་གི་སྐབས་སུ་དཔྱད་པ་དང་འདྲ་ཞིང་གང་གི་རྟེན་གྱི་སྒོ་ནས་དབྱེ་ན་ཁོག་གཞུང་ལས་དབང་མཆོད་གནས་སྒྲུབ་མཐུན་ལས་དང་དྲུག་ཏུ་བཤད་པ་དབང་སྒྲུབ་ལས་གནས་བཞིར་འདུ་བ་སྤྱན་འགྲེལ་དུ་མངོན་ལ་དེ་ལས་འདིར་གང་དུ་བཟུང་བ་དང་། སྔོན་དུ་རྡོ་རྗེ་སློབ་དཔོན་གྱིས་བསྙེན་པ་བྱ་བའི་ལས་རིམ་ལ་ཕྲ་མོའི་ཏིང་ངེ་འཛིན་ཞེས་གསུངས་པའི་རྒྱུ་མཚན་དང་དེའང་སློབ་མ་ལ་དབང་བསྐུར་བ་དང་། ཚོགས་སྒྲུབ་ཀྱི་ཆེད་དུ་སྒོམ་ཚུལ་ལ་འདྲ་མིན་རྣམས་བརྟག་གོ །དཀྱིལ་འཁོར་གྱི་ལས་རིམ་དངོས་ཀྱི་སྐབས་ས་གཞི་མཉམ་པ་ཞེས་བརྗོད་པའི་རྒྱུ་མཚན་དང་དཀྱིལ་འཁོར་གྱི་རྣམ་པའི་ཚད་དང་། ལྷག་ཏིང་སྐབས་འདིར་བསྟན་པ་ལ་འཆོལ་སྐྱོན་མི་འབྱུང་བའི་ཤེས་བྱེད་དང་། སྤྱིར་ཐིག་ཅེས་པའི་དོན་དང་། སྐྱ་ཐིག་དང་ལས་ཐིག་གི་ངོས་འཛིན་དང་། རྡུལ་ཚོན་ཁ་དོག་སོ་སོར་ཕྱེ་བའི་དགོས་པ་དང་། དཀྱིལ་འཁོར་རྒྱས་འབྲིང་བསྡུས་གསུམ་འཇོག་ལུགས་རྣམས་ལ་དཔྱད་དོ། །རབ་གནས་ཀྱི་སྐབས་དེའི་ངོ་བོ་དང་སྒྲ་དོན་ལ་བརྟག་པ་གཞིར་བཟུང་ནས་དབྱེ་བ་རྣམ་གྲངས་ཀྱི་ལས་རིམ་ལ་འཇུག་པ་ན་དཀྱིལ་འཁོར་ཐམས་ཅད་སྤྱན་དྲང་ངོ་། །ཞེས་པ་དེ་རྣམ་པ་ཐམས་ཅད་དམ་གྲངས་ཐམས་ཅད་སྤྱན་འདྲེན་པ་ཡིན། སྔ་མ་ལྟར་ན་ཞི་བའི་སྐབས་སུ་ཁྲོ་བོའང་སྤྱན་འདྲེན་པར་འགྱུར་ལ། ཕྱི་མ་ལྟར་ན་བསྡུས་པ་བཅོ་བརྒྱད་པོའི་སྐབས་སུ་རྒྱས་པ་བརྒྱད་ཅུ་རྩ་གཉིས་པའང་སྤྱན་འདྲེན་པར་འགྱུར་རོ། །མཆོད་པའི་ལས་རིམ་གྱི་ནང་ཚན་ཕྱག་རྒྱ་ནི་གོང་དུ་བཤད་གྲུབ་ཅིང་། འདིར་ཕྱི་ནང་གསང་མཆོད་ཟུར་ཙམ་དང་ལྷག་ཏིང་གི་མཆོད་པ་སྒྲུབ་ཐབས་སུ་གསུངས་པ་དང་མཚུངས་པར་བསྟ ན་ཏོ། །དེའི་ཕྱིར་སྒྲུབ་ཐབས་རྣམས་སུ་བཤད་རྒྱུད་དང་ཡན་ལག་གི་རྒྱུད་ཀྱིས་ཁ་བསྐངས་ནས་བཅུ་གསུམ་མམ་བཅུ་བཞིར་གསུངས་པ་འདིར་ས་བོན་ཙམ་ཡང་མེད་པ་མིན་པར་སེམས་ཤིང་སྔགས་
ཀྱི་འདོད་ཡོན་ལམ་ཁྱེར་སྒྲ་མཐུན་ཙམ་རྒྱུའི་ཐེག་པས་འདོད་ཕྱོགས་ཁས་ལེན་མིན་ཇི་ལྟར་དང་མཆོད་པ་བཞི་བསྣོལ་གྱི་སྒྲ་དོན་དང་ལྷག་ཏིང་གི་མཆོད་པ། སྤྲུལ་བསྒྱུར་གཉིས་ལས་འདི་སྐབས་གང་དུ་གཟུང་བར་དཔྱད་དོ། །བདུད་རྩི་དང་གསང་བསྣན་གཉིས་ས་ཁོངས་ལོགས་སུ་བགྲངས་འདུག་པས་ངོས་འཛིན་ཐ་དད་ཚུལ་དང་མཆོད་པ་འདི་རྣམས་མཆོད་པ་ཙམ་དུ་མ་ཟད་ཀྱི་དགོས་པ་གཞན་ཡོད་མེད་དང་། ཀུན་བཟང་འདོད་ཡོན་རོལ་མོ་རྣམས་དམིགས་འདྲེས་སུ་འགྱུར་བ་ལྟར་སྣང་བའི་ཚུལ་ལ་བརྟག་གོ །སྦྱིན་སྲེག་གི་སྐབས་མེ་ལྷ་ལ་མེའི་ཞལ་ཞེས་གསུངས་པའི་གནད་དང་། མེ་ལྷ་འཇིག་རྟེན་པ་ཁོ་ནར་ངོས་འཛིན་མཛད་པའི་རྒྱུ་མཚན་ཅི་ལ་ཐུག་སྟེ། མེ་ལྷ་ནི་གོས་དཀར་མོ་ཞེས་པ་ཞིག་ཀྱང་ཡོད་པ་མིན་ནམ། ཞེས་དང་། དེའི་སྒོ་ནས་ལྷག་པའི་ལྷ་རྣམས་ཚིམ་པར་བྱ་ཚུལ་ལ་མེ་ལྷ་འབར་བའི་རྣམ་པར་བྱས་ཤིང་དེར་ལྷ་རྣམས་སྤྱན་དྲངས་ཏེ་མཆོད་པ་དང་འབར་བའི་དབུས་སུ་དམ་ཚིག་༼པ་༽བསྐྱེད་དེ་ཡེ་ཤེས་པ་གཞུག་པ་{དང་} བྱར་ཡོད་མེད་བརྟག་པར་འོས་ཤིང་། ཁྱད་པར་དུ་ཕྲིན་སྒྲུབ་གང་ལ་ཡང་ནང་དོན་རྟོགས་ཀྱི་སེམས་རྣམ་པ་གཉིས་དང་། ཕྱིའི་གྲོགས་ཕྱག་རྒྱ་ཁྱད་པར་ཅན་འཛོམས་པ་མཆོག་ཏུ་བསྔགས་པ་གང་ཞིག ཕྱི་མ་ནི་འཆད་འགྱུར་ལས་ཤེས་པས་སྐབས་འདིར་སྔ་མའི་ངོས་འཛིན་སྤྲོ་བར་འཚལ་ལོ། །དཀྱིལ་འཁོར་དུ་འཇུག་པའི་སྐབས་རྡོ་རྗེ་ལས་རིམ་ལས་ཆོས་བཅོ་བརྒྱད་དུ་གསུངས་པ་རིགས་བསྡུ་ན་བླ་སློབ་འཇུག་པའི་ཆོས་གཉིས་སུ་༼བསྡུ་བ་༽གང་ཞིག་དབང་སྐུར་བ་པོའི་སློབ་དཔོན་ཡིན་ན་ངེས་པར་བདག་འཇུག་ལེན་དགོས་པས་ཁྱབ་བམ་མ་ཁྱབ། ཁྱབ་ན་སྟོན་པ་ཀུན་བཟང་ཡང་དེར་ཐལ། མ་ཁྱབ་ན། ཀུན་བྱས་སློབ་དཔོན་རིག་པས་འཇུག །ཅེས་པ་དབང་བསྐུར་གྱི་སློབ་དཔོན་ཐམས་ཅད་ལ་དགོངས་པ་མིན་པ་ཞིག་ཁས་ལེན་དགོས་སོ། །ཡང་མཚན་ལྡན་གྱི་རྡོ་རྗེ་སློབ་དཔོན་ཚོགས་ལམ་པ་ཞིག་ཡིན་ན་ངེས་པར་བདག་འཇུག་ལེན་དགོས་པའི་དམ་བཅའ་འཐད་པ་གང་ཞིག སྔགས་པ་མཚན་ལྡན་ནི་སྣང་གྲགས་རིག་གསུམ་ལྷ་སྔགས་ཡེ་ཤེས་ཀྱི་རོལ་མོར་ཤེས་པ་ཞིག་ལ་ངོས་འཛིན་བྱ་བ་ཡིན་ན་དེས་དགོངས་པ་དེ་ལས་ལྷག་པའི་བདག་འཇུག་ལེན་རྒྱུ་
ཡོད་པའི་ཕྱིར་དེ་བསྐྱེད་ཏིང་ངེ་འཛིན་གྱི་ཡེ་ཤེས་ལ་གནས་པའི་གང་ཟག་མིན་པར་ཐལ་ལོ་ཞེས་བརྟག་གོ །སློབ་མ་འཇུག་ཆོས་ཀྱི་སྐབས་བཞི་པར། མ་འོངས་ཏིང་ངེ་འཛིན་སེམས་ལ་ཞེས་གསུངས་ཀྱང་། སེམས་ཅན་རྣམས་ཡེ་ནས་སངས་རྒྱས་ཀྱི་སྙིང་པོ་ཅན་དུ་གྲུབ་པས་དེར་འཇོག་ན་མ་འོངས་པ་ཁོ་ནར་ངོས་འཛིན་མི་རིགས་ཤིང་སྤངས་རྟོགས་མཐར་ཕྱིན་གྱིས་དེར་འཇོག་ན་སྤྱི་བཙན་དུའང་འཁོར་བ་མཐའ་ཅན་དུ་ཐལ་ལོ་སྙམ་དུ་དོགས་སོ། །སྐབས་བཅུ་གཉིས་པ་ལྷ་དབོག་པ་ན་ལས་འབྲེལ་གྲུབ་པ་མོས་པའི་ལྷའམ་དངོས་གྲུབ་ཉེ་བ་བབས་པའི་ལྷའམ། དཀྱིལ་འཁོར་གྱི་གཙོ་བོ་ལྷག་པའི་ལྷ་དབོག་ཅེས་པ་དང་། དཀྱིལ་འཁོར་དུ་ཞུགས་པས་ཐོབ་པའི་ཡོན་ཏན་ནི་སྔོན་བྱུང་མཐར་ལམ་པ་དང་དངོས་སུ་མཉམ་ཟེར་རམ་སྟེ་དཔྱད་དོ། །དེས་ཁྲོ་དཀྱིལ་དང་མཆོག་དཀྱིལ་མཚོན་ཚུལ་མི་འདྲ་བ་ནི་ལས་ཁྲིགས་ཀྱི་མན་ངག་ལས་ཤེས་སོ། །གཉིས་པ་ནི། སྤྱིར་གསང་བ་སྒྱུ་འཕྲུ ལ་པའི་ལུགས་ལས་དཀྱིལ་འཁོར་རྣམ་པ་བཞིར་དབང་ལྔ་བསྐུར་བར་གསུངས་པ་གང་ཞིག དཀྱིལ་འཁོར་སྔ་མ་སྔ་མར་མ་ཞུགས་པར་ཐོག་མར་ནས་ཕྱི་མ་ཕྱི་མར་འཇུག་རུང་ངམ་མི་རུང་། རུང་ན་ལམ་གྱི་དྲོད་རྟགས་སྔ་མ་མ་ཐོབ་པར་ཕྱི་མར་མོས་ཤིང་འཇུག་པ་མི་སྲིད་པ་ལ་དགོངས་ནས་དབང་གི་གལ་པོ་དང་ཁོག་གཞུང་སོགས་ལས་འཇུག་ཚུལ་རིམ་ཅན་དུ་གསུངས་པ་མི་འཐད་པར་ཐལ། མི་རུང་ན་སྐལ་ལྡན་མཆོག་གྱུར་ཁ་ཅིག་དེ་ལྟར་འཇུག་ནུས་པའི་སྲིད་མཐའ་མི་ཁེགས་པར་མ་ཟད་མཉམ་སྦྱོར་དང་སློབ་དཔོན་འཇམ་བཤེས་ཀྱི་འཇམ་དཔལ་སྒྱུ་དྲྭའི་ཁོག་དོན་སོགས་དང་འགལ་ལོ། །གང་དག་གསང་དབང་གི་མཚོན་བྱེད་རྟགས་ཀྱི་དཀྱིལ་འཁོར་གསེར་དངུལ་ལ་སོགས་པར་བཟོ་བོས་བྱས་པ་ལ་བཞེད་ཀྱང་བེམ་པོས་བདེ་བའི་ཡེ་ཤེས་མཚོན་མི་ནུས་པས་མི་རིགས་པར་གསུངས་ཏེ་བརྟག་པར་འོས་སོ། །: ཚད་༼ མཚན༽་མ་དགོད་པ་ན་དབྱིབས་རྣམ་སོགས་རྣམ་པ་ཐམས་ཅད་པའི་རང་བཞིན་ཅན་དུ་གྲུབ་པའི་ཕྱིར་ལྟ་སྣང་འགལ་ཆོས་ཀྱི་ཚུལ་ཙམ་འགོག་པར་མི་ནུས་ནའང་སྤར་ཁབ་ཏུ་བཤད་པའི་ཡིག་འབྲུ་དང་སྐུ་ཆེ་ཆུང་གི་ཚད་འདིར་བསྟན་ལས་གོ་བཟློག་ཏུ་མངོན་པའི་དགོས་པའམ་རྒྱུ་མཚན་ཅི་ལ་ཐུག་པར་དཔྱད་
དགོས་སོ། །འདིའི་རྣམ་པ་ཐམས་ཅད་པའི་གོ་དོན་ལྟ་བུ་ཞིག་ནི་འདི་ཙམ་དུ་མ་ཟད་བླ་མེད་ཀྱི་བྱ་བའི་འཇུག་སྒོ་གང་ལའང་མེད་དུ་མི་རུང་བའི་སྲོག་ཏུ་གཟུང་བར་གསུང་ངོ་། །གསུམ་པ་ནི། ཕལ་ཆེར་འཆད་འགྱུར་དུ་སྤྲོ་ཞིང་འབྲས་བུ་རིག་འཛིན་འགྲུབ་པའི་དུས་ལ་ཞི་ཁྲོ་གཉིས་མྱུར་བུལ་དུ་གྱུར་པའི་རྒྱུ་མཚན་ཇི་ལྟར་ཞེས་བརྟག་པ་ན་མཁས་པ་སྣར་སྟོན་ཁྲོ་བོ་བར་ཆད་ཉུང་ཞིང་སྤྱོད་པ་རླབས་ཆེ་བས་དུས་མྱུར་བར་བཞེད། གོང་མ་ཕལ་ཆེར་ཞི་བ་འཛབ་འཐོར་ཞིང་བར་ཆད་མང་བས་འགོར་ལ་ཁྲོ་བོ་དེ་ལས་བཟློག་པས་མྱུར་གསུངས། འགའ་ཞིག་གིས་ཅུང་ཟད་དངོས་གྲུབ་ཀྱི་ཕོ་ཉའི་ཁྱད་དུ་བཞེད་པའང་མངོན་ཏེ་གང་གི་རྗེས་སུ་འབྲང་བ་འཐད་སྒྲུབ་དང་བཅས་པ་འགོད་པར་རིགས་སོ། །ད་ནི་འདི་དཔྱད་པར་བྱ་སྟེ་ལམ་མཐར་ཆགས་པའི་དབང་དུ་བྱས་ནས་ཟག་བཅས་ཟག་མེད་ཀྱི་ལམ་དགུ་པོ་འདི་དག་ལ་རྒྱུ་ཐེག་གི་ས་ལམ་དང་གུང་སྦྱོར་དུ་རུང་བར་ཆོས་རྗེ་ཁ་རག་པ་སོགས་ཀྱིས་བཞེད་པ་ལ། ལྷ་རྗེ་ཉང་ན་རེ། དེ་ལྟར་ན་རྒྱུ་འབྲས་ཀྱི་ཐེག་པ་གཉིས་ལམ་བགྲོད་ཚུལ་ཐ་དད་པ་ཙམ་ལས་ཐུན་ཁྱད་ཀྱི་རྣམ་བཞག་འཇོག་ཏུ་མེད་པར་ཐལ་ཞིང་འདིར་སེམས་སྐྱེ་བའི་སྐྱེ་སར་བཤད་པ་དང་ཡང་འགལ་བས་རྡོ་རྗེ་ཐེག་པ་ན་བབ་ཀྱི་སྐྱོན་དུ་འགྱུར་རོ་གསུངས་ཏེ་དཔྱད་དོ། །ཐོད་རྒལ་གྱི་ལམ་གང་ནས་བྱུང་བའི་ས་ལ་བརྟག་པ་ན་དེ་ཀུན་ཚོགས་སྒྲུབ་རྣམ་ལྷུན་རྣམས་ལ་ཆོས་གསུམ་མ་ཚང་བའི་གནད་ཀྱིས་དེར་མི་འཇོག་པ་ལ་ཁ་ཅིག་ན་རེ། ཚོགས་སྒྲུབ་ནས་ཀྱང་དེ་འབྱུང་སྟེ། རྒྱུད་ལས། གཉིས་མེད་གྱུར་ནས་ཕྱག་རྒྱ་ཆེ། །རིག་འཛིན་དངོས་གྲུབ་མཆོག་ཐོབ་འགྱུར། །དངོས་གྲུབ་མཆོག་གི་སྙིང་པོ་འགྲུབ། །ཅེས་པས་ཚོམ་བུ་གཅིག་གསུམ་ལྔ་པ་ནས་རིམ་བཞིན་ཕྱག་ཆེན་དང་ལྷུན་གྲུབ་དང་སངས་རྒྱས་ཀྱི་སར་སྦྱོར་བར་བཤད་པའི་ཕྱིར་དང་དེ་དང་མཐུན་པར་ལམ་ཆུང་ལས་ཀྱང་། ཕྱག་རྒྱ་གཅིག་བརྟན་འཕོ་བ་ཡང་། །ཁྱུང་དང་སེངྒེ་ཇི་བཞིན་ནོ། །སྤྲོས་ཚོགས་སྐབས་ནས་སྨོས་ཅི་དགོས། །ཞེས་གསུངས་སོ་ཟེར་དེ་འགོག་པ་ལ་ལུང་དོན་གཞན་དུ་འདྲེས་པ་ཡིན་ཡང་། སྐབས་དེར་ཚོམ་བུ་གཅིག་སུམ་ལྔ་པ་བ སྒྲུབས་པས་ཐོབ་པའི་ཚེ་དབང་གི་འབྲས་བུ་ལ་བཟང་ངན་ཡོད་པར་ཐལ་བ་དང་། ཚོམ་
བུ་དེ་གཉིས་བསྒྲུབས་པའི་རྣམ་སྨིན་ལའང་བློ་རབ་འབྲིང་ཐ་གསུམ་ཡོད་པར་འགྱུར་བས་དེ་ནས་ཀྱང་ཐོད་རྒལ་འབྱུང་བར་ཐལ་བ་འདི་སྤོང་དགོས་སོ། །ནུས་ཐོབ་ཀྱི་མཐོང་ལམ་ཐོབ་པ་དེ་ནས་བཟུང་ལོ་སྟོང་དྲུག་བརྒྱ་ཚུན་ཆད་ཀྱིས་དངོས་སམ་བརྒྱུད་ནས་སངས་རྒྱས་ཀྱི་ས་ཐོབ་པར་གསུངས་པ་གང་ཞིག་སྐལ་པ་རབ་མཆོག་ལྡན་པའི་གང་ཟག་ཁ་ཅིག་ཐེག་པའི་སྒོ་འདི་ལ་བརྟེན་ནས་སྐད་ཅིག་གཅིག་གམ་སྙིགས་དུས་ཀྱི་ཚེ་ཐུང་གཅིག་ལ་སྐུ་ལྔ་ལྷུན་གྲུབ་ཀྱི་སར་གཤེགས་པར་འདོད་པའི་དམ་བཅའ་ཉམས་པར་དོགས་སོ། །ལམ་མཐར་ཆགས་ཀྱི་ལྷུན་གྲུབ་བམ་ཐོད་རྒལ་གྱི་ཚེ་དབང་བའི་མཉམ་བཞག་གི་དགོངས་པ་སྤྲོས་བྲལ་ནི་སངས་རྒྱས་ཀྱི་ཡེ་ཤེས་དང་བཟང་ངན་ཐ་མི་དད་པར་འཇོག་པ་གང་ཞིག ཡེ་ཤེས་ལམ་པ་མིན་པའི་ཁྱབ་གྲུབ་དང་འགལ་ལོ་སྙམ། ཐོད་རྒལ་བས་བར་ནས་བོར་བའི་ལམ་དེ་ཐོབ་བམ་མི་ཐོབ། ཐོབ་ན་དབང་ཐོབ་པར་འཇོག་གམ་མི་འཇོག འཇོག་ན་དེ་དབང་བརྒྱུད་དུ་འཇུག་དགོས་པར་ཐལ་ཞིང་། མི་འཇོག་ན་རང་ཚིག་ཉམས་པར་དོགས་ཏེ། གསང་ཤེར་དབང་གི་རིག་མ་དབང་བརྒྱུད་དུ་འཇུག་དགོས་པ་ལྟ་བུར་སྣང་བ་དང་། གསང་བའི་མཚན་དཔེའི་སྐབས་ཡུམ་གྱི་དགའ་བ་ཡབ་ལ་ལྡན་ཆོས་སུ་བགྲང་བའང་དེ་ལྟར་རོ། །གསང་དབང་ལ་ཐབས་དང་ཤེས་རབ་དང་དེ་གཉིས་གཉིས་མེད་ཀྱི་ཚུལ་དུ་བསྐུར་བ་འཇམ་དམར་གྱི་དབང་མཛོད་ལས་གསུངས་པའི་ནང་ཚན་གཉིས་མེད་ཀྱི་གསང་དབང་བྱ་དང་བྱེའུའི་ཚུལ་དུ་བསྐུར་བ་དེ་ཡབ་ཀྱི་ལྕེས་པདྨ་ལས་དངོས་སུ་བླངས་ནས་སམ་རྩ་རླུང་ཐི ག་ལེ་རྣམ་པ་ཐམས་ཅད་པའི་རང་བཞིན་ཅན་དུ་ངེས་པའི་གནད་ཀྱིས་:བཟླག་༼བཟློག་༽ཐབས་ཀྱི་སྦྱོར་བ་ལ་བརྟེན་ཏེ་རྩ་གནས་སུ་རིམ་པར་དྲངས་པ་མགྲིན་པ་ལོངས་སྤྱོད་ནས་ལྗགས་སྟེང་དུ་ཕྱུང་སྟེ་བུའི་ལྕེ་ཐོག་ཏུ་བཞག་ཅེས་དཔྱད། ཟབ་དབང་གསུམ་གྱི་ཕྱག་རྒྱ་མར་ངེས་འབྱེད་ལས་བཤད་པ་ལྟར་ཁམས་དཀར་དམར་གྱི་ཁྱད་འབྱེད་རིགས་སམ་སྟེ་དཀར་ཐབས་ཀྱི་རང་བཞིན་དུ་མ་ངེས་པ་ཞིག་འདོད་དགོས་སམ། གང་དག་ཤེར་དབང་དང་བདེ་ཆེན་གྱི་དབང་གཉིས་པོའི་བདེ་བའི་ཡེ་ཤེས་ལ་བརྟན་མི་བརྟན་གྱི་ཆ་ཙམ་ལས་ཁྱད་པར་མེད་པ་ལྟ་བུར་བཞེད་
པ་ལ་ནི་ཤེར་དབང་གི་སྐབས་ནས་མ་ཧཱའི་མཐར་ཐུག་གི་ས་གསུམ་ཐོབ་པ་ཉིད་འཇོག་དགོས་པར་དོགས་སོ། །གཡུང་ཊིཀ་པ་སོགས་གོང་མ་དག་དབང་འདི་རྣམས་དངོས་སུ་ཐོབ་པ་ཡིན་གསུངས་ཀྱང་ཁྱབ་མཐའ་བཅས་ནུས་སམ་སྙམ་སྟེ། འོན་ཀྱང་རྡོ་རྗེའི་གནས་ལ་ཁ་ཚོན་མི་ཆོད་དོ། །འདིས་ནི་དབང་ཕྱི་མ་གསུམ་ལ་བསམ་རྒྱུད་དང་བསྒྲག་ཚིག་དགོས་མིན་ཡང་ཤེས་སོ༑ ༑གཞན་ཡང་དབང་འདི་དག་རང་བཞིན་ཡེ་དཀྱིལ་དང་ཡེ་ཤེས་ཀྱི་ལྷ་མོར་བརྟེན་ནས་སམ་ལྷག་པ་ཏིང་དཀྱིལ་དང་རིག་པའི་ལྷ་མོར་བརྟེན་ནས་སམ་རིག་པ་ཉམས་དཀྱིལ་དང་:རག་༼རིག་༽རྩལ་གྱི་གཟུང་མར་བསྟེན་ནས་སམ། ལྷག་པ་གཟུགས་དཀྱིལ་དང་ལས་རྒྱ་མཚན་ལྡན་ལ་བརྟེན་ནས་བསྐུར་ཞེས་བརྟག ཕན་ནུས་ཟབ་མོའི་དབང་གི་ནུས་པ་འཇོག་ཚུལ་ལམ་རིམ་དབང་བཙན་གྱིས་ཟག་བཅས་ཀྱི་དང་བར་ཆད་མེད་པའི་དང་། ཟག་མེད་ཀྱི་ལམ་དུའམ། དབང་རིམ་དབང་བཙན་གྱིས་ཕན་ནུས་ཟབ་མོར་རིམ་བཞིན་ནུས་པ་ཙམ་དང་ཕལ་ཆེར་དང་དངོས་སུ་འཇོག་ཅེས་དཔྱད་ན་དང་པོ་ལྟར་ན། ཐལ་བའི་ལུང་དོན་སྤང་དགོས་པར་མ་ཟད་དེ་ལྟར་སྨྲ་བ་ནི་དབང་གི་རྣམ་བཞག་ལ་འཁྲུ ལ་བར་གསུངས་འཇིགས་སོ༑ ༑གཉིས་པ་ལྟར་ན་ཕན་དབང་གིས་ཀྱང་དོན་བསྒྲུབ་ཀྱི་ནུས་པ་གཞིའི་སྐབས་ལས་རགས་ཙམ་འཇོག་པ་དང་ནུས་དབང་དངོས་ནི་ཟབ་དབང་ལ་ངོས་འཛིན་རིགས་པར་འགྱུར་རོ༑ ༑དབང་རིམ་འགོད་ཚུལ་ལ་ཕྱོོགས་མི་མཐུན་པ་ནི་གོང་དུ་བཤད་པའི་ཉང་ཊིཀ་པའི་བཞེད་པ་ལ་བརྟེན་ནས་བྱུང་སྟེ། ནུས་དབང་ལྔ་གསང་དབང་གི་བྱེ་བྲག་ཏུ་བྱས་ཏེ་གསང་དབང་ཐོག་མར་སྨོས་དགོས་པས་སོ། །དེ་འཐད་མིན་ནི་སྔར་དང་འདྲའོ། །དབང་བཅོ་བརྒྱད་པོ་དེ་དག་དབང་བཞིར་འདུས་སམ་མ་འདུས། འདུས་ན་ཟོ་ལུང་པ་ཆེན་པོས། སྤྱིིའི་སྡོམ་ལྔར་མཛད་པ་དང་མ་མཐུན་ཞིང་། མ་འདུས་ན་རང་ལུགས་རྒྱུད་ཕྱི་མའི་རྗེས་སུ་འབྲང་བ་དང་འགལ་ལོ། །རང་ལུགས་གཞིར་བཟུང་ལའང་རྒྱུད་དེར་སློབ་དཔོན་གྱི་དབང་ཞེས་གསུངས་པ་དང་མི་འདྲ་བར་ཕན་ནུས་ཀྱི་དབང་རྣམས་གཅིག་ཏུ་བསྡོམས་པ་ལ་བུམ་དབང་ཞེས་བརྗོད་པ་གང་ཞིག མཐའ་རྟེན་བུམ་པའི་ཆུ་དབང་གིས་བྱས་པས་སམ་དེའི་ཡན་ལག་ཏུ་བསྡུ་བས་
ཡིན་ཞེས་བརྟག དབང་བཞིའི་རྟོགས་པ་འདི་དག་ཐོག་མར་སྐྱེ་བ་ལ་གོ་རིམ་ངེས་པ་དེ་ལྟ་ནའང་། གསང་དབང་གི་ལམ་པ་དང་བུམ་དབང་གི་ལམ་པ་སོགས་འགལ་མིན་དཔྱད་པར་ཞུ་ཞིང་། དབང་ཡིན་ན་སྨིན་བྱེད་ཡིན་པས་ཁྱབ་བམ་མ་ཁྱབ། ཁྱབ་ན་ལམ་འབྲས་ཀྱི་དབང་ཡང་དེར་ཐལ། མ་ཁྱབ་ན་སྨིན་བྱེད་ཀྱི་དབང་ཞེས་གསུངས་པ་དང་འགལ་ལོ་ཞེས་ཀྱང་སྨྲའོ། །ལར་སྔགས་བླ་མེད་ཀྱི་ལམ་ཐམས་ཅད་དབང་གི་ཁོག་ནས་འདོན་ཤེས་པ་ཞིག་བྱུང་ཚེ་བླ་མེད་ཀྱི་རྣམ་བཞག་ཆགས་པའི་རྟགས་ཡིན་པར་གསུངས་ཏེ་ངེས་པར་བྱའོ། །གཉིས་པ་ནི། འདིར་དངོས་བསྟན་ལྟར་གྱི་དབང་མ་ཐོབ་པའི་གང་ཟག་ཐམས་ཅད་འབྲས་མེད་བརླ ག་པར་འགྱུར་བས་ཁྱབ་བམ་སྟེ། དེ་ཙམ་ལའང་མི་ལྟོས་པའི་གང་ཟག་ཤིན་ཏུ་དབང་རྣོན་དག་ཀྱང་དེར་འཇོག་དགོས་པས་ཧ་ཅང་ཐལ་ཆེས་པ་མིན་ནམ་སྙམ། དབང་ཐོབ་པའི་སྐྱེས་བུ་དེ་རྒྱལ་བའི་སྲས་དངོས་སུ་ཁས་ལེན་མིན་དང་དུས་དེ་ཕྱིན་ཆད་བདག་དོན་དུ་ངན་འགྲོར་གཏན་མི་སྐྱེ་བས་ཁྱབ་བམ་ཞེས་བརྟག་གོ། །།བདག་གི་རྗེ་བླ་མའི་རྒྱུད་འགྲེལ་དུ་ལེའུ་བཅུ་གཅིག་པ་དང་བཅུ་གཉིས་པ་གཉིས་བསྡེབས་པར་མ་མཛད་ཀྱང་། སྔོན་གྱི་སློབ་དཔོན་དག་གིས་རྗེས་སུ་འབྲངས་ནས་རེ་ཞིག་བསྡེབས་པའི་དབང་དུ་བགྱིས་ན་འདི་ནས་གཉིས་ཏེ། མཚན་ཉིད་གསུམ་མདོ་ཙམ་ལ་དཔྱད་པ་དང་། རྒྱས་པར་བཤད་པ་ལ་དཔྱད་པའོ། །དང་པོ་ནི། རྒྱུ་རྐྱེན་འབྲས་བུའི་མཚན་ཉིད་གསུམ་པོ་མི་འདྲ་བའི་ཁྱད་པར་བསྒོམ་བྱ་དང་སྒོམ་བྱེད་དང་བསྒོམས་དོན་མངོན་གྱུར་གྱི་ཤེས་བྱེད་དང་འཇུག་པ་དང་འཇུག་དོན་མངོན་གྱུར་གྱིས་སམ་ཞེན་སྣང་གཅོད་བྱེད་ཀྱི་གཙོ་བོ་དང་དེ་ཉིད་ཡང་གསོས་བཏབ་ཅིང་བསྐྱེད་བསྲིང་བ་དང་། དེ་ནུས་པ་མཐུ་ཅན་དུ་གྱུར་པའི་ཆ་ནས་འཇོག་ཅེས་པ་དང་ཆོས་ལོངས་སྤྲུལ་གསུམ་གྱི་རིག་འཛིན་གྱི་ངོས་འཛིན་ལ་བརྟག་དགོས་ཤིང་། འདིར་ལྟ་བ་རྟོགས་པ་ལམ་གྱི་ཐོག་མར་བསྟན་པ་གང་ཞིག་ཤེས་རབ་སྤྱན་འབྱེད་ལས་སྒོམ་པ་སྔོན་དུ་བཤད་པ་དང་འགལ་བར་དོགས་སོ། །
གཉིས་པ་ལ་གསུམ་སྟེ། རྒྱུ་ཤེས་པའི་དང་། རྐྱེན་འཇུག་པའི་དང་། འབྲས་བུ་མཐར་ཕྱིན་པའི་མཚན་ཉིད་ལ་དཔྱད་པའོ། །མཚན་ཉིད་གསུམ་དེ་གཞིར་བཟུང་ལ་རིམ་ཅིག་ཆར་གཉིས་སུ་བྱེད་ཅིང་། དེའང་ལྷ་རྗེ་མི་ཉག་པའི་བཞེད་པ་ལྟར་སྔོན་དུ་ལྟ་བ་རྟོགས་ཏེ་ཏིང་ངེ་འཛིན་ལ་ཁ་སྤོས་ནས་སྒོམ་པ་རིམ་གྱིས་པ་དང་། མ་སྤོས་པར་སྒོམ་པ་ཅིག་ཆར་བ་ཞེས་སམ། འགའ་ཞིག་གི་ལྟར་སངས་རྒྱས་ཀྱི་སར་བགྲོད་པའི་དུས་སུ་ུདང་སེམས་ལྔ་རྒྱུད་ལ་སྐྱེ་རིམ་གྱིས་རིམ་ཅིག་ཆར་ཞེས་སམ། ལྷ་རྗེ་རོག་དང་གསང་བདག་སྒྲོ་ཕུག་པ་དང་རྗེ་སྒྲོལ་གཡུང་གཉིས་སོགས་ཀྱི་ལྟར་དབྱེར་མེད་ཆིག་ཆོད་དུ་རྟོགས་མ་རྟོགས་ཀྱིས་རིམ་ཅིག་ཆར་འཇོག་པར་དཔྱད་དོ། །དེར་མ་ཟད་མངའ་རིས་པཎ་ཆེན་སོགས་ཀྱི་བཞེད་པས་མཚན་ཉིད་གསུམ་དུས་མཉམ་ཁོ་ནར་རྫོགས་པའི་ཅིག་ཆར་བའང་བཞག་ཆོག་པར་མངོན་ནོ། །རིམ་ཅིག་ཆར་དེ་གཉིས་ཀ་ཡང་ལམ་སྐྱེ་ཚུལ་གྱི་དབང་པོ་ལ་ལྟོས་ནས་འཇོག་པས་དེའི་ཕྱོགས་ཟུར་ཙམ་བརྗོད་ན་སྤྱིར་དབང་པོ་རྣོ་རྟུལ་གཉིས་སུ་ངེས་ཤིང་། རྣོན་པོ་ཡིན་ན་སྦྱང་རྣོ་དང་རང་རྣོ་གང་རུང་ཡིན་པས་ཁྱབ་པ་གང་ཞིག ཕལ་ཆེར་རང་རྣོ་ཁས་ལེན་ཉུང་བས་འདིར་རང་རྣོའི་སྒྲུབ་བྱེད་ལ་དཔྱད་གཞི་འགོད་པར་བྱ་སྟེ། དེའང་སྔོན་བྱུང་ལོ་རྒྱུས་ཀྱི་དབང་དུ་ན། རྒྱུ་ཡང་བདེན་དང་། མཆོག་སྡེ་དང་། ཆོས་སྐྱོང་གསུམ་གྱིས་གདུལ་བྱའི་དབང་པོ་ལ་བསྒྲོ་བ་མཛད་པའི་སྐབས་དོན་ལས་རྒྱུ་ན་རེ། རང་རྣོ་གཙོ་ཆེ་སྟེ་དེར་འཐད་པ་མཐུན་པའི་དཔེ་ཞིག་ཀྱང་ཡོད་དེ་མིན་ན་གནོད་བྱེད་ཅིག་ཀྱང་ཡོད་ཅེས་གསུངས་པའི་རྗེས་སུ་འབྲང་ངོ་། །དེ་ལ་འདི་ལྟར་རང་རྣོ་དེ་རྐྱེན་ལ་རགས་ལས་སམ་མ་ལས། སྔ་མ་ལྟར་ན་དམ་བཅའ་ཉམས་ལ་ཕྱི་མ་ལྟར་ན་འབད་མེད་དུ་གྲོལ་བར་ཐལ་ལོ་ཞེས་དང་། གཞི་ལ་རྣོ་རྟུལ་གྲུབ་ན་གཞི་བཟང་ངན་ཅན་དུ་འགྱུར་རོ་ཞེས་རྒོལ་ན་བརྟག་དགོས་སོ། །གཉིས་པ་ལ། རྒྱུ་ཤེས་པའི་དང་། རྐྱེན་འཇུག་པའི་དང་། མཐར་ཕྱིན་འབྲས་བུའི་མཚན་ཉིད་ལ་དཔྱད་པའོ། །དང་པོ་ནི། ཕལ་ཆེར་གོང་དུ་བཤད་ཟིན་ཅིང་། འདིར་ནི་རྟོག་པ་བཞིའི་ནང་ཚན་རྒྱུ་གཅིག་པ་དེ་འཆིང་གྲོལ་ཀུན་གྱི་གཞིར་གྱུར་ཚུལ་གྱི་གནད་གསང་མཐར་ཐུག་ནི་དབྱིངས་ལ་སྣང་བ་མ་གྲུབ་པའི་
རྒྱུ་མཚན་ལ་ཐུག་པས་འདོད་དེ་དབྱིངས་དེ་སྣང་བ་ངོ་བོ་ཉིད་རྒྱུར་ལྷུན་གྲུབ་པའི་དམ་བཅའ་ཉམས་པར་དོགས་སོ། །ཡིག་འབྲུའི་ཚུལ་ལམ་སྣང་བ་ལྷར་སྒྲུབ་པ་ཞེས་པའི་རིས་མེད་ཀྱི་སྣང་བ་དེ། ཐ་མལ་གྱི་འདི་ཁོ་ན་མ་ཉམས་པར་རྩལ་རྫོགས་དག་པ་རབ་འབྱམས་ཀྱི་སྣང་བར་ངོས་འཛིན་ཞེས་བརྟག་སྟེ། སྔ་མ་ལྟར་ན་ཞེན་སྣང་ལྷར་སྒྲུབ་ཅེས་སྨོས་རིགས་པར་ཐལ་ཞིང་། ཕྱི་མ་ལྟར་ན་སྣང་བ་ཐམས་ཅད་ལ་རིས་མེད་ཀྱིས་མ་ཁྱབ་པར་འདོད་དགོས་སོ༑ ༑བྱིན་གྱིས་བརླབས་པ་ཞེས་པའི་གྲུབ་མཐའ་བདེན་པ་དབྱེར་མེད་འདི་ཚུལ་དེ་གཉིས་ཀྱིས་གཏན་ལ་དབབ་པའི་ཤུགས་ལས་འཐོན་པ་ཞིག་གམ་སྟེ། འདི་ལ་གཏན་ཚིགས་ཟུར་པ་མི་དགོས་པར་ཐལ་བར་དོགས་སོ། །མངོན་སུམ་པ་དེ་མངོན་སུམ་བཞི་ལས་གང་དུ་བཟུང་ཞིང་སེམས་རང་ངོར་སྣང་མིན་དང་ཡོད་མེད་ལ་དཔྱད་དོ། །དག་པ་གསུམ་གྱིས་ཡེ་ཤེས་ཀ་དག་ཏུ་གཏན་ལ་ཕབ་ནས་འཁོར་བའི་ངན་ཞེན་བཅད་པར་བཞེད་ཅིང་། ལམ་རིམ་ལས་དེའི་སྟེང་དུ་དག་པ་བཞི་བསྟན་ཏེ་དབྱིངས་ཀ་དག་གཏན་ལ་ཕབ་ནས་འདས་པའི་བཟང་ངན་བཅད་པར་གསུངས་ཏེ་བརྟག་པར་འོས་སོ། །འདི་དང་མི་འདྲ་བའི་ཚུལ་ལ་ཐུན་ཐུ ན་མིན་གྱི་མ་ཡིན་དགག་གི་ངོས་འཛིན་འཇོག་ལུགས་ལ་དཔྱད་དགོས་ཤིང་མཉམ་པ་བཞིའི་གཏན་ཚིགས་ལ་བདེན་གཉིས་ཀྱི་ཚིག་མི་མཐུན་པར་བྱུང་བས་སྒྲ་མཐུན་དོན་སྤགས་སུ་ུཐལ་ལོ་སྙམ་དུ་དོགས་སོ། །གཞན་ཡང་གཏན་ཚིགས་དབང་བཙན་དུ་བྱས་སྐབས་དེར་མི་འགྱུར་བའི་ཆོས་གང་ཡང་མེད་ཚུལ་ལམ་ཆུང་སོགས་ལས་བཤད་པས་གཏན་ཚིགས་བརྗོད་ཀྱིས་མི་ལང་བར་ཐལ་བ་དང་། ལྟ་བ་དང་གྲུབ་མཐའ་ཁྱབ་གང་ཆེར་བརྟག་གོ །གཉིས་པ་ནི། རྒྱུད་དངོས་བཅུའི་ཡ་གྱལ་གྱི་དང་འདིར་བསྟན་གྱི་ཏིང་ངེ་འཛིན་གཉིས་འདྲ་མིན་ལམ་མོས་སྒོམ་དང་ངེས་རྫོགས་གཉིས་ཀྱིས་ཟླས་ཕྱེ་བའི་མོས་སྒོམ་དུ་བཤད་པའི་ཚུལ་འདི་ཉིད་ཐུན་བཞིར་སྒོམ་པའི་སྦྱོར་བས་བསྐྱེད་རིམ་མཐར་ཕྱིན་པའི་རྣམ་བཞག་འདིའི་བཀའ་སྲོལ་ལ་ཁས་ལེན་ནམ་ཞེས་དཔྱད། ཐུན་རེར་སྒྲུབ་ཐབས་ཚང་བར་སྒོམ་པ་ལ་མོས་སྒོམ་གྱིས་ཁྱབ་མིན་དང་། སྤྱིར་མོས་སྒོམ་ལ་བསྐྱེད་རིམ་གྱིས་ཁྱབ་པ་དང་། རྣལ་འབྱོར་གྱི་རིམ་པ་ལྔ་ཀ་
ཡོད་པ་འདོད་རུང་མིན་བརྟག་གོ །ངེས་རྫོགས་ལ་བསྐྱེད་རྫོགས་ཀྱི་ཆ་གཉིས་དང་། དེ་ལ་སློབ་ཚུལ་ཡང་དང་པོ་ནས་བསྐྱེད་རྫོགས་ཟུང་འབྲེལ་དུ་དང་། བསྐྱེད་རིམ་མཐར་ཕྱིན་ནས་རྫོགས་རིམ་ལ་འཇུག་པ་གཉིས་སུ་ངེས་པ་གང་ཞིག ཕྱི་མ་ལྟར་གྱི་ཚོགས་སྒྲུབ་ལ་བར་ཆད་མེད་ལམ་གྱི་སྒྲ་དོན་འཇོག་ཏུ་མེད་པར་དོགས་སོ། །ལམ་སྒྲུབ་སྦྱོར་བའི་བསྙེན་སྒྲུབ་ཡན་ལག་བཞི་བཞིའི་ནང་ཚན་སྒྲུབ་དུས་ཀྱི་བསྙེན་སྒྲུབ་བཞིའི་དང་པོ་བསྙེན་པ་ལའང་སྔོན་དུ་བྱ་བའི་དང་བྱ་བ་ལས་ཀྱི་བསྙེན་པ་གཉིས་ལས། དང་པོའི་ངོས་འཛིན་ནི་གོང་མའི་ཊཱི་ཀ་རྣམས་སུ་ཕྱག་རྒྱ་གཅིག་པ་ལ་བཤད་ཀྱང་། རྒྱ་སྤྲོས་ལ་བརྟན་པ་ཐོབ་མི་དགོས་པར་ཐལ་བ་འདི་སྤོང་དགོས་སོ། །གཉིས་པའི་སྐབས། ཐུན་མོང་བསྲུང་བའི་འཁོར་ལོར་བྱ། ཞེས་པ་དེ་བསྙེན་སྒྲུབ་བཞིའམ་ཚོ མ་བུ་གསུམ་ཀའི་ཞི་ཁྲོ་གཉིས་ཀའི་ཐུན་མོང་ཡིན་ཞེས་དང་གསལ་བ་གསུམ་ལྡན་གྱིས་འཛབ་བཟླར་བཤད་པ་དེ། བཀའ་ཕྱོགས་སྐྱོང་བ་རྗེས་འབྲང་དང་བཅས་པའི་བཞེད་པ་ལྟར་དམ་ཡེ་སོ་སོར་ཕྱེ་ནས་སམ་ལྷ་རྗེ་འགར་དང་རོང་ཟོམ་ཆེན་པོ་སོགས་ཀྱི་ལྟར་དམ་ཡེ་མི་འབྱེད་ནས་སྤྲོ་བསྡུ་མཛད་ཅེས་བརྟག དེ་ལྟར་ནུབ་དང་པོའི་བསྙེན་པ་འཇོག་ཚུལ་འདི་ནི་ལྷ་རྗེ་རོག་སོགས་ཀྱི་བཞེད་པ་དབང་བཙན་དུ་བྱས་ཤིང་། གཞན་དུ་ཤོམ་ཡན་ལག་དང་འབྲེལ་བ་ཙམ་ལ་བསྙེན་སྒྲུབ་ཇི་ཙམ་དང་སྒྲུབ་པ་འཇོག་ཚུལ་ནི་གཞན་དུ་ཤེས་ཤིང་དེ་དག་གི་དུས་སུ་ཚོམ་དཀྱིལ་གཅིག་པ་སྒོམ་སྐབས། ཚོམ་བུའམ་དཀྱིལ་འཁོར་སྒོམ། དང་པོ་ལྟར་ན། ཚོམ་བུའི་གཙོ་བོ་རིགས་ངེས་ཅན་ཡིན་པ་གང་ཞིག སྤར་ཁབ་ལས། གཙོ་བོ་རིགས་དྲུག་པོ་གང་ཡང་རུང་བ་སྟེ་མ་ངེས་སོ། །ཞེས་སོགས་བཤད་པ་དང་འགལ་ལ༑ གཉིས་པ་ལྟར་ན་སྐབས་འཆོལ་པར་འགྱུར་བ་མ་ཟད་དཀྱིལ་འཁོར་རྒྱས་འབྲིང་བསྡུས་གསུམ་སྔ་མའི་ཁོངས་ནས་ཕྱི་མའི་ལྷ་རྣམས་བྱུང་ཚུལ་སྨྲས་པ་དང་ཡང་འགལ་ལོ། །ཚོམ་བུ་གཅིག་གསུམ་ལྔ་པ་གསུམ་ལ་བཟང་ངན་གྱི་ཁྱད་པར་ཡོད་དམ་མེད། ཡོད་ན་གསུམ་ཆར་གྱི་གཙོ་བོ་རྡོར་སེམས་སུ་ངོ་བོ་མི་གཅིག་པར་ཐལ་ཞིང་། མེད་ན་རྒྱུ་ཚོམ་བུ་གཅིག་གསུམ་ལྔ་པས་འབྲས་བུ་རིམ་བཞིན་རྒྱ་ལྷུན་སངས་རྒྱས་རྣམས་འགྲུབ་པ་འགལ་ཏེ་རྒྱུའི་
རྗེས་སུ་འབྲས་བུ་འགྲོ་ལྡོག་བྱེད་པས་ཁྱབ་པའི་ཕྱིར། ཡང་འབྲས་བུ་ཐོབ་ཚུལ་འདི་དག་ཇི་ལྟར་བཤད་པ་བཞིན་ཐོབ་བམ་མི་ཐོ བ། ཐོབ་ན་ཚོགས་སྒྲུབ་ནས་ཐོད་རྒལ་འབྱུང་བར་ཐལ། རྟགས་ཁས། ཁྱབ་པ་ཚད་མས་གྲུབ་པའི་ཕྱིར། མི་ཐོབ་ན་ཐོབ་པར་བཤད་པའི་ལུང་དང་འགལ་ལོ། །སྐ བས་འདི་དག་ཏུ་ལྔ་དང་ལྔ་ཡི་ཞེས་སོགས་དང་། རྡོ་རྗེའི་རིགས་སུ་ཞེས་སོགས་ཀྱིས་ཚོམ་བུའི་བསྟན་དོན་མི་ཟློས་པའི་ཤེས་བྱེད་འགོད་དགོས་ཤིང་། ཚོམ་དཀྱིལ་གྱི་ཁྱད་པར་ལའང་བརྟག་པར་བྱ་སྟེ། འདི་ལྟར་སྔ་རབས་པ་ཕལ་ཆེར་གྱི་བཞེད་པ་ལྟར་མི་གྲངས་ངེས་མེད་ཀྱིས་ལྷ་གྲངས་ངེས་མེད་སྒོམ་པ་དཀྱིལ་འཁོར་དེ་ལས་བཟློག་པ་ཚོམ་བུ་ཞེས་སམ། དམ་པ་ཤཱཀ་རྒྱལ་གྱི་ལྟར་རིགས་ཆུང་གིས་རྒྱས་མ་རྒྱས་གཉིས་ཀ་ཡོད་པ་དཀྱིལ་འཁོར། རང་རང་གི་རིགས་ཆུང་གིས་རྒྱས་པ་ཚོམ་བུ་ཞེས་སམ། ལྷ་རྗེ་སྐྱོའི་ལྟར་གནས་སྐབས་སུ་གཙོ་བོ་ངེས་པ་ཚོམ་བུ། མ་ངེས་པ་དཀྱིལ་འཁོར་ཞེས་སམ་རྗེ་སྒྲོ་ཕུག་པའི་ལྟར་སྒོམ་བྱེད་རྣལ་འབྱོར་པ་དང་། བསྒོམ་བྱ་ལྷའི་ཁྱད་པར་གཉིས་ཀྱི་སྒོ་ནས་སམ་ཡང་ན་རིགས་འགྱུར་ཡང་ཡེ་ཤེས་མི་འགྱུར་བ་ཚོམ་བུ། རིགས་ཡེ་གཉིས་ཀ་འགྱུར་བ་དཀྱིལ་འཁོར་ཞེས་སམ། གཉལ་གྱི་ལྟར་གཙོ་བོ་རིགས་ཆུང་དང་བཅས་པ་རང་རིགས་སུ་ངེས་པ་ཚོམ་བུ། གཙོ་བོ་རིགས་ཆུང་ཡང་སྤྱིའི་རིགས་སུ་ངེས་པ་དཀྱིལ་འཁོར་ཞེས་པས་ཏེ། དེ་དག་ལས་འཐད་ཕྱོགས་འགོད་པར་རིགས་སོ། །གཞན་ཡང་ཚོམ་དཀྱིལ་གཉིས་ཡིན་ཁྱབ་མཉམ་དུ་འདོད་མིན་དཔྱད་དོ། །ཚོགས་སྤྱོད་འདིར་ཟག་ལྡོག་ཡོད་མེད་ལ་བརྟག་ཚེ་སྤྱིར་ཟག་ལྡོག་ཡོད་མེད་ཀྱི་མུ་བཞིར་ཕྱེ་བ་ལས་རྟོགས་ནུས་པ་གཅིག་ཟག་ལྡོག་གཉིས་ཀ་ཡོད་པའི་མུ་ནི་དེ་ཀུན་གཅིག་སྤྲོས་རྣམས་ལ་ངོས་འཛིན་ཡང་ལམ་རིམ་ལས་ལྟ་བའི་སྐབས། ཟབ་པའི་དོན་རྟོགས་མི་ལྡོག་བདེ། ཞེས་པ་དང་འགལ་བར་དོགས་སོ། །མཐོང་ལམ་ཡན་ཆད་དེ་གཉིས་ཀ་མེད་པའི་མུར་འཆད་ཀྱང་རྣམ་སྨིན་ལ་ཁམ་དང་ལུས་ཀྱི་ཟག་པ་ཡོད་པར་འདོད་དགོས་སམ་སྙམ་ཞིང་ཇི་སྲིད་ཉོན་ཡིད་མཉམ་ཡེར་མ་ལོག་པ་དེ་སྲིད་དུ་ལྡོག་བཅས་སུ་ུབཤད་པའི་འགལ་སྤངས་དགོས་སོ། །སྒྲུབ་ཆེན་གྱི་སྐབས་སྦྱོར་སྒྲོལ་གྱི་སྤྱད་ཐབས་ལ་དཔྱད་པ་ན།
སྦྱོར་ཡུལ་ལྷ་ཀླུ་རིགས་ངན་མོ་གསུམ་གྱི་ཁྱད་པར་ལོ་གྲངས་དང་རྩ་དང་བྱང་སེམས་དང་སྦྱོར་ཐབས་ཀྱི་སྒོ་ནས་སྒྲོལ་ཡུལ་མཆོག་དང་མཆོག་ཕྲན་གཉིས་ཀྱི་ཁྱད་པར་བྲམ་ཟེ་སྐྱེ་བདུན་པ་དང་། བསྒྲལ་བྱའི་ཞིང་བཅུའམ་མི་དང་ངན་སོང་དང་བསྒྲལ་བྱ་དངོས་དང་ཙ་ར་སོགས་ལ་བཀུག་པའམ་གསོན་པོ་དང་བམ་གྱི་སྒོ་ནས་འབྱེད་པར་བཤད་བརྟག་པར་སེམས་སོ། །སྦྱོར་ཐབས་བསྙེན་སྒྲུབ་བཞིའི་སྒོ་ནས་ཉམས་སུ་བླང་བ་ན་ཉི་ཟླའི་སྙིང་པོ་རྡོ་རྗེའི་ལྕེ་དང་གསང་བའི་རྡོ་རྗེས་བླངས་པ་ལ་དགོས་ཁྱད་ཡོད་མེད་ཇི་ལྟར་དང་སྒྲོལ་བྱེད་ཀྱི་གང་ཟག་ནི་སློབ་དཔོན་དང་ཀིང་གཉིས་ཡིན་པ་གང་ཞིག ཕྱི་མ་ལ་ཐུགས་རྗེའི་འཛིན་ཀིང་དང་། ཁམས་གསུམ་སྒྲོལ་ཀིང་དང་། ཡེ་ཤེས་སྟོབས་ཀིང་དང་གསུམ་དུ་ཡོད་པ་གང་གིས་སྒྲོལ་བ་དཔྱད་དོ༑ ༑སྦྱོར་སྒྲོལ་འདི་དག་རང་རྒྱུད་པར་མི་འགྱུར་བའི་ཤེས་བྱེད་ནི་འཛིན་ཞེན་མེད་སྤྱོད་ཀྱི་གནས་ལ་ཐུག་པ་ཚུལ་འདི་ཙམ་དུ་མ་ཟད་བསྟན་པ་སྤྱི་སྐད་ཀྱི་ཕྱག་རྒྱར་གནས་པ་ཡིན་ནམ་སྟེ། ཞེན་སྣང་རགས་ཕྲའི་དངོས་གཉེན་ནི་རིམ་པར་མཐོང་ལམ་དང་སངས་རྒྱས་ཀྱི་ཡེ་ཤེས་ཡིན་པར་གྲུབ་པས་དེ་དང་དེ་མ་ཐོབ་པར་ལས་འདི་དག་ལ་སྤྱོད་མི་རིགས་པར་དོགས་སོ། །སྤྱིར་སྦྱོར་སྒྲོལ་ལ་རང་བཞིན་གྱི་དང་། དབང་པོ་ཡུལ་དུས་ཀྱི་དང་། ཏིང་ངེ་འཛིན་གྱི་དང་། ཐབས་ཀྱི་དང་། མངོན་ཕྱུང་གི་སྟེ་ཆ་ལྔར་དབྱེ་ཚུལ་ལེ་ལག་སོགས་ལས་བཤད་པ་སོ་སོའི་ངོས་འཛིན་དང་། སྤྱད་བྱའི་ཡོ་བྱད་གཞན་ཡང་ཡོད་པ་རྣམས་ནུས་ལྡན་དངོས་གྲུབ་ཀྱི་བྱེ་བྲག་ཙམ་ལས་ལྷག་པར་རྟེན་དང་སྒྲུབ་ཐབས་སོ་སོར་མི་ཕྱེ་བའི་རྒྱུ་མཚན་ལ་བརྟག་གོ །ཤེས་འཇུག་གི་མཚན་ཉིད་དེ་དག་ལ་ཚོགས་སྦྱོར་གྱི་ལམ་གྱི་རྣམ་བཞག་བྱ་ཚུལ་ནི་ཡོངས་གྲགས་ཀྱི་བཤད་སྒྲོས་ལྟར་བསྐྱེད་རིམ་པའི་ཚོགས་སྒྲུབ་ཀྱི་འདོད་གཟུགས་ཀྱི་རིག་འཛིན་འགྲུབ་པའི་བར་རྣམས་ཚོགས་ལམ་དང་། རྫོགས་རིམ་ལ་ཞུགས་པ་ནས་སྦྱོར་ལམ་དུ་འཇོག་གམ་སྟེ། ཚོགས་ལམ་གྱི་རྣལ་འབྱོར་བཞི་དང་། སྦྱོར་ལམ་ཚོགས་སྒྲུབ་ཅེས་གྲགས་པ་དང་འགལ་ལོ། །ཡང་གང་ཟག་གཅིག་གིས་ཚོགས་སྒྲུབ་བྱེད་པ་ཡོད་དམ་མེད་ཡོད་ན་རང་ཚིག་ཉམས་ཤིང་། མེད་ན་སྟོང་གཟུགས་ཀྱི་ལྷ་མོ་འབའ་ཞིག་ལ་བརྟེན་
ནས་མི་འགྱུར་བའི་བདེ་བ་བསྒྲུབས་ཏེ། ཟག་མེད་ཀྱི་ལམ་ལ་སྦྱོར་བའི་རྣམ་བཞག་འཇིག་གོ ༑གསུམ་པ་ནི། རིག་འཛིན་བཞིའི་ནང་ཚན་རྣམ་སྨིན་གྱི་ངོ་བོ་དེ་མཚན་ཉིད་སུམ་ལྡན་ཞིག་གམ་སྟེ། འོན་ཀྱང་ལུས་འདི་དང་བྲལ་ནས་ཕྱག་ཆེན་དུ་འགྲོ་སྐབས་ཀྱི་སྐད་ཅིག་མ་ལ་དེའི་ངོ་བོ་འཇོག་པར་བཞེད་པ་དང་འགལ་ལོ། །རྣམ་སྨིན་དེ་ཐོབ་དུས་ནི་རབ་ཚེ་འདིར། འབྲིང་བར་དོར། ཐ་མ་ལན་གྲངས་གཞན་ལ་སྦྱོར་བ་ལམ་རིམ་སོགས་ལས་བཤད་ཀྱང་། དེ་ལྟར་ན་བར་དོ་ལ་འབྱུང་ལུས་རགས་པ་ཡོད་པར་ཐལ། རྟེན་དེ་ལ་རྣམ་སྨིན་ཐོབ་པ་གང་ཞིག་རྣམ་སྨིན་ནི་སྔ་མའི་ལས་རྣམས་ལས་གྲུབ་པའི་ལྷག་ལུས་འདི་དང་མ་བྲལ་བའི་དམ་བཅའ་འཐད་པའི་ཕྱིར་ཟེར་ན་དཔྱད་དགོས་སོ། །དེའི་སྒྲ་བཤད་ཚུལ་རྣམ་སྨིན་གྱི་ལུས་རྒྱས་བཅིངས་པའི་ཆ་ནས་སམ་སེམས་ལྷ་སྐུར་རྣམ་པར་སྨིན་པའི་ཆ་ནས་བརྗོད་ཅེས་པ་གང་ལྟར་བཟུང་ཞིང་། རྣམ་སྨིན་པས་ལུས་རྒྱ་རལ་མ་ཐག་ཁོ་ནར་རྒྱ་ཆེན་འགྲུབ་དགོས་པའི་རྒྱུ་མཚན་དང་འགྲུབ་ལུགས་ལ་བརྟག་གོ །ཚེ་དབང་དེ་ཕྱག་ཆེན་ལ་སྦྱོར་ཚེ་རྡོ་རྗེའི་ལུས་དེ་བོར་རམ་མི་བོར་བོར་ན་ལྷག་བཅས་ཀྱི་ངེས་ཚིག་ཉམས་ལ་མི་བོར་ན་ཕྱག་ཆེན་ཡེ་ཤེས་སྒྱུ་མའི་ཆ་ལུགས་སུ་ཡོད་པའི་ཕྱིར། རྡོ་རྗེའི་ལུས་ཐ་མལ་གྱི་ཆ་ལུགས་དང་མཚུངས་པ་མིན་ནོ་སྙམ། དེ་མཚུངས་སྐབས་འདི་དག་ཏུ་སྤྲུལ་ལུས་འགྱེད་པ་ན་རྩ་བའི་ལུས་འདོར་མིན་གྱི་བརྟག་པ་ཞིག་ཀྱང་དགོས་པར་མངོན་ནོ། །ཕྱག་ཆེན་ལ་སྒོམ་ལམ་ས་དགུའི་དབྱེ་བས་དེ་སྙེད་དང་དགུ་པོ་དེ་ལ་རིགས་ལྔའི་གནས་སྐབས་ཀྱིས་ལྔར་མཛད་པ་ཡོད་ཚུལ་གྱི་ངོས་འཛིན་ཇི་ལྟར་སེམས་ཞིང་ཐར་ལམ་དེ་ཟུར་པ་ཕལ་ཆེར་གྱི་བཞེད་པ་ལྟར་མཉམ་པར་བཞག་འཇོག་ཡོད་པ་ཙམ་གྱིས་སངས་རྒྱས་དང་ཁྱད་པར་དུ་བྱས་སམ་སྟེ་འོན་ཀྱང་མཉམ་པར་བཞག་དུས་སུའང་ཤེས་སྒྲིབ་ཆ་ཕྲ་བ་ཡོད་པས་ཁྱད་ཞུགས་སམ་སྙམ། འདིར་རྡོར་ཏིང་གིས་ཤེས་སྒྲིབ་སྤོ ང་ཚེ་གཉེན་པོས་སྤང་བྱ་སྤོང་ངམ་སྤང་བྱ་དག་པའི་ཤུལ་དུ་གཉེན་པོ་སྐྱེ། དང་པོ་ལྟར་ན་རྡོར་ཏིང་སྐྱེས་ཙམ་ན་ཤེས་སྒྲིབ་ཐ་མ་དེ་ཡོད་དམ་མེད། ཡོད་ན་སྤང་གཉེན་དངོས་འགལ་མིན་པར་ཐལ། འདོད་ན་གཉེན་པོ་དོན་མེད་དུ་ཐལ་ལོ། །ཡང་དེ་དུས་སྤང་བྱ་མེད་པའམ་
གོང་གི་ཕྱི་མ་ལྟར་ནའང་དོན་མེད་པར་འགྱུར་ཏེ་སྤང་བྱ་མེད་པའི་ཕྱིར་མུན་པ་སངས་ཤུལ་གྱི་སྣང་བྱེད་བཞིན་ནོ། །འདིར་སྒོམ་ལམ་བར་ནས་བོར་ཏེ་མཐོང་ལམ་ནས་མི་སློབ་ལམ་དུ་འགྲོ་བའི་ལམ་ཐོད་རྒལ་བ་མི་འདོད་པར་བཤད་ཀྱང་། ཕྱག་ཆེན་དང་ལྷུན་གྲུབ་བོར་ཏེ་ཚེ་དབང་ནས་འཚང་རྒྱ་བ་ཞིག་ཡོད་པར་མི་མངོན་ནམ་སྟེ་དཔྱད་པར་ཞུའོ། །ཡང་བཀའ་སྲོལ་འདི་དག་དང་ཕྱོགས་འདྲ་བ་ཞིག་དུས་འཁོར་ལས་ཀྱང་བྱུང་བས་ཁྱད་འབྱེད་རིགས་སོ།། །།ལེའུ་བཅུ་གསུམ་པ་ལ་གསུམ་སྟེ་མན་ངག་ངོ་བོ་ལ་དང་། དེ་གཞན་ལས་འཕགས་པའི་ཆེ་བ་ལ་དང་། ཡུལ་གང་ལ་གདམས་པའི་སྣོད་ལ་དཔྱད་པའོ། །དང་པོ་ལའང་གསུམ་སྟེ་མཚོན་པར་བྱེད་པའི་སྒོ་དང་། མྱོང་བར་བྱེད་པ འི་ཐབས་དང་། མངོན་དུ་གྱུར་པ་འབྲས་བུ་ལ་དཔྱད་པའོ། །དང་པོ་ནི་འདི་ལ་འཇིག་རྟེན་ལས་འདས་མ་འདས་ཀྱི་ལྟ་བ་གཉིས་ལས། དང་པོའི་སྐབས་:ལ་༼ མ༽རྟོགས་པ་དང་ལོག་པར་རྟོག་པ་ཞེས་གསུངས་པ་སོ་སོའི་ངོས་འཛིན་ལ་དགོངས་པ་མི་མཐུན་ཏེ་སློབ་དཔོན་ཉི་སེང་ནི་མ་རྟོགས་པ་ཕྱལ་པ་རྒྱང་མུར་སྟུག་གསུམ་དང་། ལོག་རྟོག་མུ་སྟེགས་པར་བཞེད། སྒེག་རྡོར་ནི་མ་རྟོགས་ཕྱལ་བ་དང་། ལོག་རྟོག་པ་མུ་སྟེགས་རྟག་ཆད་གཉིས་ལ་བཞེད། བི་མ་ལ་ནི་མ་རྟོགས་པ་ཕྱལ་རྒྱང་གཉིས་དང་། ལོག་རྟོག་པ་མུར་སྟུག་དང་མུ་སྟེགས་གཉིས་ལ་བཞེད་ཅིང་པདྨའི་ལྟ་ཕྲེང་ལས་ཀྱང་དེ་ལྟར་བྱུང་ངོ་། །ཀུན་མཁྱེན་ཆོས་རྗེ་ནི་མ་རྟོགས་པ་སོར་བཞག་གི་ཐེག་པ་དང་། ལོག་རྟོག་པ་མུ་སྟེགས་ཀྱི་ཐེག་པར་བཞེད་དེ་རང་ལུགས་གང་ལྟར་བཟུང་། ཕྱི་རོལ་པ་འདི་དག་སྤྲུལ་པ་བའམ་རང་རྒྱུད་པ་ཡིན། དང་པོ་ལྟར་ན། ཧེ་རུ་ཀ་གལ་པོ་ལས། མུ་སྟེགས་ཐེག་པ་རབ་ངེས་ན། །མི་སྤྱོད་སྤང་ཕྱིར་ཁྱོད་ལ་བཤད། །ཅེས་གསུངས་པ་དང་འགལ་ཞིང་། གཉིས་པ་ལྟར་ན་བདེ་འདུས་གནས་ལུགས་ལས། ཕྱི་རོལ་བྱེད་པ འི་སྡེ་རྣམས་ལ། །དེ་དང་དེར་སྣང་སྟོན་པས་གསུངས། །ཞེས་བྱུང་བ་དང་འགལ་ལོ་སྙམ་དུ་བརྟག་སྟེ་ཐེག་པ་གཞན་ཡང་དེ་ལྟར་རོ། །འདིར་ཕྱི་ནང་གི་གྲུབ་མཐའི་ཁྱད་པར་འབྱེད་ཚུལ་སོགས་ཀྱི་བཤད་པ་ཡོད་ཀྱང་
མ་སྤྲོས་སོ། །དེ་ལྟའི་ཕྱི་པ་ལས་བརྒལ་བའི་ནང་པའི་ཐེག་པ་ཐམས་ཅད་ལ་འཇིག་རྟེན་ལས་འདས་ཐེག་གི་སྒྲས་བསྙད་པ་སྣང་ཡང་། སྤྱི་སྐད་དུ་འཇིག་རྟེན་ལས་འདས་པ་ཡིན་ན་ཟག་མེད་དུ་ངོས་འཛིན་རིགས་པར་མངོན་པ་དང་མི་འགལ་ལམ་སྟེ་དཔྱད་དོ། །གཉིས་པ་གཞུང་གཅིག་གི་སྟེང་དུ་སྔ་རབས་པ་རྣམས་ཀྱིས་བསྐྱེད་རྫོགས་ཀྱི་རིམ་པའི་དབང་དུ་བསྟན་པའི་བཤད་ལུགས་གཉིས་སུ་མཛད། འགྲེལ་པ་སྤར་ཁབ་ནས་ཕྱི་བསྐྱེད་རིམ་ནང་རྫོགས་པའི་བསྐྱེད་རིམ་གསང་བ་རྫོགས་པའི་རྫོགས་རིམ་དང་གསུམ་དུ་བཤད། འགྲེལ་ཆུང་པིཎྜཱརྠ་དཀྱིལ་འཁོར་བཅུ་གཉིས་དང་སྦྱར་ཏེ་གསུངས། རྗེ་སྒྲོ་ཕུག་པས་སྒྱུ་འཕྲུལ་ལམ་རིམ་དང་མན་ངག་ལྟ་ཕྲེང་གི་གཞུང་ལ་བརྟེན་ནས་རིམ་པ་ལྟར་གྲོལ་ཐབས་རིམ་གྱིས་པ་དང་ཅིག་ཆར་བ་ལྟར་ཏེ་བཤད་ལུགས་བཞིར་བཞེད་དོ། །རང་ལུགས་ནི་བཞེད་སྲོལ་ཕྱི་མའི་རྗེས་སུ་འབྲངས་ཏེ་འཆད་པར་སྣང་བས་ཐོག་མར་ཐབས་གྲོལ་གྱི་ལམ་གྱི་རྣམ་བཞག་ལ་དཔྱད་པ་མདོ་ཙམ་སྨོས་ན་སོ་སོའི་ངོས་འཛིན་འཇོག་ཚུལ་ཇོ་མདོའི་བཞེད་པ་ལྟར། དབང་དང་བདེ་བ་སྟོན་པ་ཐབས་ལམ། ཤེས་རབ་གསུམ་གྱི་སྒོ་ནས་ཉམས་སུ་ལེན་པ་གྲོལ་ལམ་ཞེས་སམ། གོང་མ་ཕལ་ཆེར་གྱི་ལྟར་ཐབས་ཀྱི་མན་ངག་དང་ལྡན་པས་ཉོན་མོངས་པ་ལ་སྤྱད་ཀྱང་མི་འཆིང་ཞིང་གྲོལ་པར་སྟོན་པས་ཐབས་ལམ། ཆོས་ཉིད་ཀྱི་དོན་ལ་ཤེས་རབ་གསུམ་གྱིས་སྦྱོར་བ་ནི་གྲོལ་ལམ་ཞེས་སམ། ཕྱིས་ཀྱི་བླ་མ་ཕལ་ཆེར་གྱི་ལྟར་གཙོ་བོར་ཤེས་རབ་གསུམ་གྱི་སྒོ་ནས་ཤེས་འཇུག་གིས་འཆི ང་བ་ལས་གྲོལ་བས་འབྲས་བུ་འགྲུབ་པར་བྱེད་པ་ནི་གྲོལ་ལམ། གཙོ་བོར་ཐབས་དང་གདམས་ངག་གི་སྒོ་ནས་འཆིང་བ་ལ་བརྟུལ་ཞུགས་ཀྱིས་སྤྱད་པས་འབྲས་བུ་མྱུར་དུ་གྲུབ་པར་བྱེད་པ་ནི་ཐབས་ལམ། ཞེས་བཞག་པ་རྣམས་ཀྱི་འཐད་མིན་གྱི་ཆ་ལ་བརྟག་དགོས་ཤིང་། ཐབས་གྲོལ་གཉིས་པོ་ལམ་རིས་སུ་མ་ཆད་པ་མདོ་འབྲེལ་ཞིག་གམ་སྟེ། གཉིས་ཀས་འབྲས་བུ་ལ་སྦྱོར་ནུས་པའི་ཕྱིར་ཇི་ལྟར་སྙམ། ལམ་དེ་གཉིས་ལས་ཐབས་ལམ་གྱི་སེམས་བསྐྱེད་ཐོག་མ་ནས་སྐྱེ་མི་སྲིད་ཕྱིར་སྔོན་དུ་གྲོལ་ལམ་འགྲོ་དགོས་པ་ཡིན་ཡང་གོང་མ་ཕལ་ཆེར་ཐབས་ལམ་སྔོན་ལ་འཆད་དེ་བརྟག་པར་འོས་
སོ༑ ༑དེ་ལྟ་བུའི་ལམ་དེ་གཏན་ལ་དབབ་པ་ལ་གཉིས་ཏེ་ཤེས་རབ་གྲོལ་ལམ་གྱི་དང་། ཐབས་ལམ་གདམས་ངག་གི་དབང་དུ་བཤད་པ་ལ་དཔྱད་པའོ། །དང་པོ་ལའང་གཉིས་ཏེ། གྲོལ་ལམ་རིམ་གྱིས་པ་ལྟར་དང་། ཅིག་ཆར་བ་ལྟར་དུ་བཤད་པ་ལ་དཔྱད་པའོ། །དང་པོ་ནི། འདི་ལ་ཤེས་འཇུག་འབྲས་བུ་གསུམ་ལས་གཉིས་པའི་སྐབས་རྣལ་འབྱོར་གྱི་རིམ་པ་ལྔར་གསུ ངས་པའི་དང་པོ་དེ་ཏིང་ནི་དབུ་མ་པས་དོན་དམ་སྟོང་ཞིང་སྤྲོས་མཐའ་བརྒྱད་དང་བྲལ་བ་དང་། ཀྲི་ཡས་སེམས་དག་པ་མཐའ་བཞིའི་དྲི་མ་དང་བྲལ་བ་དང་། ཡོ་གས་ཆོས་དབྱིངས་མཉམ་ཉིད་ལ་སྤྲོས་མཚན་མེད་པ་དང་། མ་ཧཱས་སྣང་བ་གང་ཡང་མ་སྤངས་བའི་སྟོང་ཆེན་དུ་འདོད་དེ༑ འདི་ཉིད་གཞན་ལས་སྤགས་ཚུལ་ལ་དཔྱད་དོ། །སྤྱིར་ལམ་གོང་འོག་ལ་ལམ་པའི་སེམས་བོགས་དབྱུང་བའི་ཆ་ནས་བཟང་ངན་ཡོད་པ་འདོད་དགོས་པ་གང་ཞིག རྒྱུ་ཤེས་པའི་དུས་སུ་དབྱེར་མེད་དུ་རྟོགས་ནས་འདིར་དོན་དམ་རྐྱང་པར་བསྒོམས་པའི་ཕྱིར་ངན་དུ་སོང་བར་གསལ་ལོ་སྙམ་དུ་དོགས་ཤིང་། དེ་དེས་སྲིད་ཞིའི་མཐའ་གཉིས་གང་འགོགས་ཀྱང་བརྟག་གོ ༑ཀུན་ཏིང་སྒོམ་སྐབས་འདིར་ཡང་ལམ་སྔ་མ་དོན་དམ་ལས་ཕྱི་མ་ཀུན་རྫོབ་ཏུ་ཁ་སྤོས་ན་ངན་དུ་སོང་བར་དོགས་ཤིང་སྒྱུ་མའི་ཆོས་དྲུག་ལས་ལོག་རྟོག་དང་རྟེན་འབྲེལ་སྒྱུ་མ་བསྒོམ་མམ་མི་བསྒོམ། བསྒོམས་ན་དེས་གྲོལ་ལམ་མི་གྲོལ། གྲོལ་ན་སེམས་ཅན་ཐམས་ཅད་འབད་མེད་དུ་གྲོལ་བར་འགྱུར་ཏེ། ལོག་རྟོག་དང་རྟེན་འབྲེལ་བསྒོམས་པའི་ཕྱིར། མི་གྲོལ་ན་སྒོམ་པ་དོན་མེད་དུ་འགྱུར་རོ། །གལ་ཏེ་མི་བསྒོམ་ན་སྒྱུ་མའི་ཆོས་དྲུག་བསྒོམ་པར་གསུངས་པ་དང་འགལ་ལོ། །ཡང་སྔ་མ་དེ་ཏིང་སྒོམ་པའི་སྟེང་དུ་སྙིང་རྗེ་སྒྱུ་མ་སྒོམ་པས་རྒྱུད་གཅིག་ལ་ཏིང་ངེ་འཛིན་གཉིས་ཆར་མཚུངས་པའི་ཕྱིར་དབྱེར་མེད་རྒྱ་གཅིག་དང་ཁྱད་མེད་དུ་འགྱུར་རམ་སྙམ། འདིར་ཕྱག་རྒྱ་སྒྱུ་མ་བསྒོམ་མམ་མི་བསྒོམ། བསྒོམ་ན་ཕྱག་གཅིག་དང་ཁྱད་མེད་དུ་ཐལ། མི་བསྒོམ་ན་སྒྱུ་མའི་ཆོས་དྲུག་བསྒོམ་པར་གསུངས་པ་འགལ་ཞིང་ལྷག་པའི་ཀུན་རྫོབ་འདིའི་འཇུག་ཡུལ་མིན་པར་ཐལ་ལོ། །ཕྱག་རྒྱ་གཅིག་པ་སྒོམ་སྐབས་སུ་ལྷག་པའི་ལྷ་དགུ་བསྒོམ་མ མ་མི་བསྒོམ། བསྒོམ་ན་ཕྱག་རྒྱ་གཅིག་པ་མིན་པར་འགྱུར་ཞིང་མི་བསྒོམ་ན་
ལམ་རིམ་སོགས་ལས་བསྒོམ་པར་བཤད་པ་འགལ་ལོ། །ཡང་ཆོས་གཅིག་གི་དེ་ཉིད་ཤེས་ན་ཆོས་ཐམས་ཅད་ཀྱི་མདོ་རྒྱས་ཤེས་སམ་མི་ཤེས། ཤེས་ན་རྒྱ་གཅིག་གིས་ལྷ་སྐུ་སྣང་སྟོང་དབྱེར་མེད་དུ་ཤེས་པས་ལྷ་གཞན་གྱི་སེམས་༼ཤེས་སམ་༽མི་ཤེས་ཕྱི་མ་ལྟར་ན་གོང་གི་དམ་བཅའ་ཉམས་ལ། དང་པོ་ལྟར་ན་སྤྲོས་བཅས་བསྒོམ་པ་དོན་མེད་དུ་ཐལ་ལོ། །གལ་ཏེ་མི་ཤེས་ན་ཡུམ་དང་ལམ་རིམ་སོགས་ལས་དེ་ལྟར་བཤད་པ་དང་འགལ་ལོ། །རྒྱ་གཅིག་གི་ལྷ་སྐུ་དེ་སྣང་བར་བསྒོམ་མམ་སྣང་ལ་རང་བཞིན་མེད་པར་བསྒོམ། དང་པོ་ལྟར་ན་ཀུན་རྫོབ་དང་ཁྱད་མེད་དུ་འགྱུར་ལ། གཉིས་པ་ལྟར་ན་ལྷ་སྐུ་བསྒོམ་པའི་ཅིག་ཆར་བ་དང་། ཁྱད་མེད་པར་ཐལ་ལོ། །རྒྱ་སྤྲོས་སྒོམ་སྐབས་ལྷ་ཞེ་གཉིས་བསྒོམ་པ་དཀྱིལ་འཁོར་སྤྲོས་པར་འཇོག་ཀྱང་དེ་ཏིང་ཡང་དེར་ཐལ་ཏེ། དེར་དབང་རབ་སོགས་གཞན་དོན་གྱི་ཕྲིན་ལས་སུ་དེ་ལྟར་བསྒོམ་པའི་ཕྱིར་སྙམ། གལ་ཏེ་དངོས་སུ་བསྒོམ་མི་ནུས་པས་སྤྲོས་བཅས་སུ་ཐལ་སྐྱོན་མེད་པར་སེམས་ན་དེ་ལྟར་ན་ཚོམ་དཀྱིལ་རྣམ་གྲངས་ཕྱག་སྤྲོས་པ་ཐམས་ཅད་འདིར་དངོས་སུ་བསྒོམ་ནུས་དགོས་པར་ཐལ། འདོད་ན་རིག་འཛིན་གསུམ་ལས་སྤྲོས་བཅས་བཟང་བར་འགྱུར་རོ། །ཚོགས་སྒྲུབ་ཀྱི་ངོ་བོ་ནི་རྟོགས་ཚོགས་ཐམས་ཅད་སྣང་སྟོང་གཉིས་མེད་ལྷའི་དཀྱིལ་འཁོར་དུ་དངོས་སུ་གསལ་བ་ལ་བློ་གནས་པར་གསུངས་པ་གང་ཞིག སྤྲོས་བཅས་དང་ཁྱད་མེད་དུ་མི་འགྱུར་བའི་ཚུལ་ལ་བརྟག་དགོས་ཤིང་། དེ་ལ་བར་ཆད་མེད་ལམ་ཞེས་བསྙད་པའི་སྒྲ་དོན་ནི། ལྷ་རྗེ་མདའ་ཏིག་གི་བཞེད་པ་ལྟར་ཟག་བཅས་ནས་ཟག་མེད་དུ་སྦྱོར་བ་ལ་རྟེན་དང་ལམ་གཞན་གྱིས་བར་མ་ཆོད་པའི་ཕྱིར་ཞེས་སམ། གླན་གྱི་ལྟར་ལམ་གཞན་གྱིས་བར་མ་ཆོད་པ་ཕལ་ཆེ་བ་ལ་དགོངས་ཞེས་སམ། རོག་གི་ལྟར་སྤྲོས་པ་མན་ཆད་དམ་ཚིག་ཉམས་པའི་ཉེས་པས་འཁོར་བར་ལྡོག་ཉེན་ཡོད་ལ། འདིར་དེ་མེད་པས་སྤྱི་སྒྲ་བྱེ་བྲག་ལ་ཞུགས་ཏེ་ཚོགས་སྒྲུབ་ལ་བཏགས་ཞེས་བརྗོད་དེ་རང་ལུགས་གང་ལྟར་བཟུང་ངོ་༑ ༑འདི་དག་ལམ་ངེས་རྫོགས་ཀྱི་དབང་དུ་ན་ཉམས་ལྔ་རྫོགས་རྫོགས་སུ་བསྒོམ་པར་གསུངས་པ་དེ་རེ་རེ་ཞིང་ཡང་གཡོ་བའི་ཉམས་རི་གཟར་གྱི་འབབ་ཆུ་ལྟ་བུ་སོགས་དགོས་
མིན་དཔྱད་དོ། །བཤད་ཚུལ་འདི་ལ་སྔ་རབས་པ་རྣམས་ཀྱིས་བསྐྱེད་རིམ་ཞེས་གསུངས་པ་དེ་སྤྱིར་རིམ་གཉིས་ཀྱིས་ཟླས་ཕྱེ་བའི་བསྐྱེད་རིམ་མམ། རྫོགས་རིམ་ནང་གསེས་ཀྱི་བསྐྱེད་རིམ་དུ་འཇོག་ཅེས་ཀྱང་བརྟག་གོ །གཉིས་པ་ནི། འདིའི་ཏིང་ངེ་འཛིན་གྱི་སྦྱོར་བ་ལ་སྤྱིར་རིལ་པོ་དང་། རྗེས་སུ་གཞིག་པའི་རྣལ་འབྱོར་གཉིས་སུ་བཤད་པའི་ངོས་འཛིན་དང་འདིར་ཡང་ཞི་ལྷག་གཉིས་ཀྱི་རིམ་པ་ལྟར་ཉོན་མོངས་པའི་མགོ་ནོན་པ་དང་རྩ་བ་འབྱིན་པའི་རྣམ་བཞག་འདོད་དགོས་པ་གང་ཞིག་དེ་གཉིས་སྔ་ཕྱི་མེད་པར་ཐོབ་པར་གསུངས་པས་སྤོང་ཚུལ་དེ་ལྟར་འབྱུང་རིགས་སམ་སྙམ་པ་ལ་དཔྱད་དོ། །མན་ངག་ལམ་རིམ་ལས་བཤད་པའི་སྨིག་རྒྱུ་དང་དུ་བ་སོགས་ཀྱི་ཚུལ་དང་སྦྱར་བའི་ཉམས་རིམ་རྣམས་བསྐྱེད་རིམ་པའི་ཉམས་རིམ་གྱི་དཔེར་བཞེད་པ་འདིའི་སྐབས་སུ་དང་པོ་ཡང་མི་འགལ་བ་རྟོག་པའི་དྲ་བ་བསལ་བའི་རྒྱུད་སོགས་ན་གསལ་ལོ། །གཉིས་པ་ལ་སྟེང་སྒོ་འཇུ་འདུལ་གྱི་དང་། འོག་སྒོ་ཁམས་གསུམ་རོལ་པའི་མན་ངག་ལྟར་བཤད་པ་ལ་དཔྱད་པའོ། །འདི་ལ་ཐུན་ཁྱད་གཉིས་ལས་སྔ་མ་ནི་བཤད་རྒྱུད་རྒྱ་མཚོ་ལས་གསུངས་པ་ལྟར་ཏེ་སྤྱི་དང་འདྲ་ལ་ཕྱི་མ་ནི་འཁོར་ལོ་བཞི་སྒོམ་ཐབས་ཀྱི་གནད་གསང་ངོ་མཚར་བའི་གཟེར་བུ་ཅན་འདིའོ། །དེའང་ལུས་ལས་ཡེ་ཤེས་སྐྱེ་བའི་གནད་ལ་བརྟག་པ་གཞིར་བཟུང་སྟེ་དེ་ཤེས་ནས་གནད་དུ་བསྣུན་སྐབས་སྟོང་གཟུགས་སྒྲུབ་ཚུལ་དེ་དུས་འཁོར་ནས་བཤད་པའི་རླུང་བཅུ་དབུ་མར་བཅིངས་པའི་རྟགས་སྣང་དང་རྫོགས་ཆེན་ཐོད་རྒལ་བའི་འཆར་སྣང་དག་དང་མི་འདྲ་བའི་ཁྱད་པར་འབྱེད་རིགས་སོ། །སྟེང་སྒོ་འདིའི་ཡས་བརྟན་དང་མས་བརྟན་གྱི་ངོས་འཛིན་འཇོག་ལུགས་ཇི་ལྟར་སྙམ་ཞིང་། དྭངས་མ་རྩ་འདབ་རྣམས་སུ་ཕར་འཕེལ་བ་ལ་བདེ་སྟོང་གི་ཡེ་ཤེས་སུ་འདོད་པ་དང་། དྭངས་མ་གཡོ་བྱེད་དང་བྲལ་ནས་འོད་གསལ་བར་རླུང་སེམས་ཚུར་ཐིམ་པ་ལ་ཡེ་ཤེས་ཆེན་པོར་འདོད་པ་སྟེ་ཕྱོགས་གཉིས་ལས་གང་ལྟར་བཟུང་བ་དང་འཁོར་ལོ་བཞིའི་མན་ངག་རྣམས་གནས་དེ་དང་དེའི་མན་ངག་ཏུ་འཇོག་པའི་འཐད་པ་དང་འཇུ་འདུལ་དང་ཁམས་ག སུམ་རོལ་པ་ཞེས་པའི་སྒྲ་བཤད་ཚུལ་ལ་བརྟག དོན་འདི་དག་ལ་དགོངས་ནས་ཆོས་རྗེ་སྨྱོས་སྐུ་མཆེད་སོགས་
ཀྱིས་རྫོགས་རིམ་པའི་ལྷ་སྐུ་མཐོང་ཐོབ་གཉིས་སུ་གསུངས་ཏེ་བསྔགས་པར་འོས་པའི་གནས་སོ༑ ༑ གཉིས་པ་ནི། བསྐྱེད་རིམ་དང་རྫོགས་རིམ་སྟེང་སྒོ་ལས་སུ་རུང་བའི་གང་ཟག་ཆགས་ལམ་པས་བསྙེན་པ་དང་ཉེ་བསྙེན་གྱི་བྱ་བ་སྔོན་དུ་རྫོགས་ནས། སྦྱོར་བ་གསུམ་གྱི་སྒོ་ནས་སྒྲུབ་པ་དང་། སྒྲུབ་པ་ཆེན་པོ་ཉམས་སུ་བླང་བར་གསུངས་པ་གང་ཞིག་འདི་ཉིད་ཀྱི་རྒྱུད་ཕྱི་མའི་དགོངས་དོན་ལྟར་བསྙེན་སྒྲུབ་བཞིའི་འཇོག་ཚུལ་གཞན་ཡང་ཡོད་མོད་འདི་བཀའ་སྲོལ་དུ་གྲགས་པ་ལྟར་བཟུང་བར་སེམས་ཤིང་། སྦྱོར་བ་གསུམ་གྱི་གོ་དོན་སྤྱིར་བསླབ་ཚུལ་ལ་བརྟག་དགོས་སོ། །སྟེང་འོག་གི་སྒོའི་ལམ་གཉིས་སོ་སོར་རིས་སུ་ཆད་པ་དང་གང་ཟག་གཉིས་ཀྱི་ལམ་དུ་འཇོག་མིན་ཡང་དཔྱད་དོ། །གསུམ་པ་ནི། འབྲས་བུ་ཐོབ་པའི་ཚེ་གཞི་དུས་ཀྱི་མ་རིག་པ་སྤངས་སམ་མ་སྤངས། དང་པོ་ལྟར་ན་གཞི་ཇི་ལྟ་བ་ཞིག་མངོན་དུ་བྱས་པ་མིན་པར་ཐལ། གཞིའི་དུས་ན་མ་རིག་པ་དང་དབྱེར་མེད་དུ་ཡོད་པའི་ཕྱིར། འདོད་ན་ནི་གཞི་ཇི་ལྟ་བ་བཞིན་མངོན་དུ་བྱས་པའི་དམ་བཅའ་ཉམས་སོ། །གཉིས་པ་ལྟར་ན། སེམས་ཅན་དང་ཁྱད་པར་མེད་པར་ཐལ། རྒྱུ་མཚན་དེའི་ཕྱིར། འདོད་ན། ལམ་རྒྱུད་ལ་བརྟེན་པ་དོན་མེད་དུ་ཐལ་ལོ། །ཡང་འབྲས་བུ་དེ་ལམ་གོམས་རྒྱུ་རྐྱེན་ལ་ལྟོས་པས་འདུས་བྱས་སུ་མི་འགྱུར་བའི་ཤེས་བྱེད་དང་སྐུ་དང་ཡེ་ཤེས་ཀྱི་དཀྱིལ་འཁོར་དུ་ཡེ་ནས་བཞུགས་པས་མཚན་བཅས་སུ་མི་འགྱུར་བའི་ཤེས་བྱེད་འགོད་དགོས་སོ། །གཉིས་པ་ནི། སྒྲུབ་པ་པོ་གང་ཞིག་རྒྱུད་འདི་ལ་མོས་པ་ཙམ་དུ་ཆེ་བའི་ཡོན་ཏན་དེ་དག་ལྡན་པར་འཇོག་ན་གསང་སྤྱོད་ལ་མོས་པའི་རུ་ཏྲ་ཡང་དེར་ཐལ་ཏེ་བླ་མེད་ཀྱི་ལམ་ལ་མོས་པ་ཙམ་གྱི་དམ་བཅའ་འཐད་པ་རུ་ཏྲ་ལམ་ལས་གོལ་ཚུལ་ན་གསལ་བའི་ཕྱིར་སྙམ་དུ་དོགས་སོ། །རྒྱུད་འདི་རྒྱལ་བ་ཐམས་ཅད་ཀྱི་བགྲོད་པ་གཅིག་པའི་ལམ་དུ་ངེས་པ་གང་ཞིག་ཐུན་ཐེག་གི་འབྲས་བུ་ཐོབ་ཟིན་ནས་ཀྱང་བགྲོད་དགོས་པའི་ཕྱིར་གསང་སྔགས་ཉིད་རིང་ལམ་དུ་ཐལ་ལོ་སྙམ། འབྲས་བུ་ལམ་དུ་བྱེད་པ་ནི་སྔགས་ཀྱི་ཁྱད་ཆོས་སུ་འཇོག་པར་བཤད་ཀྱང་ཐུན་ཐེག་པ་རྣམས་རང་འབྲས་དོན་དུ་གཉེར་བའི་གང་ཟག་མིན་པར་ཐལ་བ་འདི་སྤང་དགོས་སོ། །གསུམ་པ་ནི། དམན་ལམ་ཁོ་ནར་
མོས་པའི་གང་ཟག་ལའང་འདིར་བསྟན་གྱི་སློབ་མའི་མཚན་ཉིད་ལྡན་པ་སྲིད་པའི་ཕྱིར་རྒྱུད་འདིའི་སྣོད་དང་ལྡན་པ་ཐལ་ལོ་སྙམ། གོང་དུ་ཤིན་ཏུ་སྦྱངས་ལ་རབ་གནས་ཤིང་། །ཞེས་པ་དང་། འདིར། སྣོད་ལྡན་ངང་ཚུལ་བཟང་ལ་སྦྱིན། །ཞེས་པ་གཉིས་མི་ཟློས་པའི་ཤེས་བྱེད་དང་། རྒྱུད་འདི་རང་རྣོའི་ཡུལ་ཡིན་པའི་འཐད་སྒྲུབ་དང་། ལེའུ་ལྔ་པར་ཡོ་བྱད་ལྡན། །ཞེས་དང་། དགུ་ུཔར་ཆོ་ག་ལྔ་ཞེས་སོགས་དང་། བཅུ་གཅིག་པ་དང་། བཅུ་གཉིས་པར། ཡན་ལག་མ་ཉམས་ཞེས་སོགས་དང་། བཅུ་གསུམ་པ་འདིར་ཡང་སྟེ་དེ་རྣམས་སུ་ཚོགས་སྒྲུབ་རེ་བྱུང་བའི་ཟློས་སྐྱོན་སེལ་བྱེད་ཀྱང་འགོད་པར་རིགས་སོ།། །།ལེའུ་བཅུ་བཞི་པ་འཆད་པ་ནི་མངོན་རྟོགས་ལས་བསྡེབས་ཀྱི་དབང་དུ་བསྟོད་པའི་ལས་རིམ་མོ། །དེའང་ཆོས་རྗེ་རོང་ཟོམ་ནི་རྐང་པ་བཞི་པོ་རེ་རེས་སྤྱིའི་སྤྱི་དང་། སྤྱིའི་སྐུ་གསུང་ཐུགས་ལ་བསྟོད་པར་བཞེད། རང་ལུགས་ནི་ཤྭ་ལོ་ཀ་དང་པོ་ལྔ་འབྲས་ཆོས་ཉེར་ལྔ་སོ་སོར་དང་། ཕྱི་མ་གཅིག་གིས་སྤྱིར་བསྟོད་པར་གསུངས་སོ། །སྐབས་དེར་བརྟག་པར་བྱ་བ་འདི་ཡོད་དེ། བསྟོད་ཡུལ་གྱི་ཆོས་རྣམས་གཞི་ལམ་འབྲས་བུ་གང་གི་གནས་སྐབས་སུ་ངེས་པར་ངོས་འཛིན་དགོས་ཤིང་། ཆོས་སྐུའི་སྐུ་གསུང་ཐུགས་གསུམ་པོས་སྐྱེ་མེད་དུ་མཚོན་ཚུལ་གཅིག་པས་ལྡོག་པ་གཅིག་ཏུ་ཐལ་བར་དོགས་ལ། ཡོན་ཏན་ལྔའི་ནང་ཚན་གཞལ་ཡས་ཁང་ལ་ནང་གསེས་ཀྱིས་འབྲས་ཆོས་ཐམས་ཅད་རྫོགས་པའི་རིག་པ་ཉིད་རང་སྣང་བའི་རྟགས་གཞལ་ཡས་ཁང་གི་དབྱིབས་དང་ཁ་དོག་ཏུ་སྣང་བ་གཟུགས་སྐུའི་དང་གཟུང་འཛིན་རང་དང་བྲལ་བའི་རང་རིག་ཉིད་རྟེན་དང་བརྟེན་པར་ཅན་པ་སྐུ་ལྔ་ཀུན་གྱི་གཞལ་ཡས་ཁང་གཉིས་སུ་བཤད་པ་གང་ལྟར་བཟུང་བར་དཔྱད་དོ། །ཡང་སྐུ་ལྔ་པོ་རེ་རེ་ལའང་ཡོན་ཏན་ལྔ་ལྔ་ལྡན་ནམ་ཐམས་ཅད་ལ་ཡོན་ཏན་ལྔ་ལས་མེད། དང་པོ་ལྟར་ན་འབྲས་བུའི་ཆོས་ཉེར་ལྔར་མ་ངེས་པར་ཐལ། ཡོན་ཏན་ཉིད་ལའང་ཉེར་ལྔ་འདུག་པའི་ཕྱིར། མ་ཟད་ཆོས་སྐུ་ལ་ཡོན་ཏན་མེད་པར་མི་སྲིད་ཅིང་ཡོད་ན་གཞལ་ཡས་ཁང་དང་རྒྱན་དང་གདན་རྣམས་
འདུག་པའི་ཕྱིར་གཟུགས་སྐུར་ཐལ་བར་དོགས་སོ། །གཉིས་པ་ལྟར་ན་སྐུ་ལྔའང་ཡོན་ཏན་ལྔ་གྲངས་སྤྲད་པའི་འཐད་པ་མེད་པ་སོགས་ཀྱི་སྐྱོན་དུ་མ་འོང་ངོ་སྙམ། སྐུ་ལྔ་པོ་རེ་རེ་ལའང་ཕྲིན་ལས་ལྔ་ལྔ་ལྡན་ནམ། སྤྱིར་ལྔ་ལས་མེད། སྔ་མ་ལྟར་ན་ཕྲིན་ལས་ཀྱིས་གཞན་དོན་བྱེད་པའི་ཕྱིར་ཆོས་སྐུའང་གཟུགས་སྐུར་ཐལ་བ་སོགས་ཀྱི་དོགས་གནས་གོང་ལྟར་མཚུངས་ཤིང་ཕྱི་མ་ལྟར་ན་སྐུ་རེ་རེ་ལ་རེ་རེ་གྲངས་སྤྲོད་དམ། འོན་ཏེ་ལས་མེད་པའི་སྐུའང་ཡོད་དམ་ཞེས་བརྟག་དགོས་པ་ལས་མ་འདས་པས་མི་འཐད་པར་སེམས་སོ། །འབྲས་བུ་ལྔའི་སྣང་ཚུལ་གཅིག་དང་དུ་མའི་མཐའ་ལས་གྲོལ་བའི་དཔེར་མཚོ་གཅིག་ཏུ་གངས་ལྔ་འཆར་བ་དང་གངས་གཅིག་མཚོ་ལྔར་འཆར་བ་ལྟ་བུ་ཞེས་བསྟན་པའི་གངས་དང་མཚོ་ནི་རིམ་བཞིན་ཉོན་མོངས་པ་ལྔ་དང་། དེའི་དབང་གི་འཁོར་བའི་རྒྱ་མཚོར་གནས་པ་མཚོན་བྱེད་དུ་འདོད་པ་དང་ཁ་ཅིག་གངས་ཆེན་མཚོ་ནི་རྣམ་སྣང་དང་དེ་སོགས་རིགས་ལྔར་འདོད་པ་དང་། ཁ་ཅིག་འབྱུང་བ་ལྔའམ་ཉོན་མོངས་པ་ལྔ་ཡང་རིགས་ལྔའི་ངོ་བོ་ཡིན་པས་དེ་སྐད་དུ་འདོགས་པར་བཞེད་དེ་རེ་ཞིག་བརྟག་པར་འོས་སོ། །འདི་ཡན་ཆད་ནི་རྟོགས་པས་བདག་བསྒྲལ་བ་ཞེས་ཀྱང་བྱ་སྟེ་ཐུགས་རྗེ་ཞི་བའི་ཆོས་རྫོགས་སོ།། །།ད་ནི་ལེའུ་བཅོ་ལྔ་པ་འཆད་པ་ལ་གཉིས་ཏེ་ཁྲོ་དཀྱིལ་མངོན་པར་འདུ་མཛད་ཚུལ་མདོར་བསྟན་པར་དང་། དེའི་རང་བཞིན་རྒྱས་པར་བཤད་པ་ལ་དཔྱད་པའོ། །དང་པོ་ནི། དེའང་ངེས་དོན་གྱི་དབང་དུ་ན་ལེའུ་གཉིས་པ་ལྟར་ལྷན་ཅིག་པའི་འཁོར་རྣམས་འབྲས་དབང་གིས་སྣང་གསུམ་གྱི་བག་ཆགས་སམ་འཕོ་བའི་བག་ཆགས་ཕྲ་མོའི་བདུད་བཅོམ་པ་ན་དེའི་རྟགས་སྣང་ཕྱི་རོལ་དུ་ཁྲོ་བོའི་གླེང་གཞིར་སྣང་བར་བཤད་ཅིང་། ཚུལ་དེས་ནི་འདི་དང་སྤྲུལ་སྐུ་འགྲོ་འདུལ་གླེང་གཞི་གཉིས་ཞར་བྱུང་གི་གླེང་གཞིར་འགྱུར་ཚུལ་ཡང་རྟོགས་ནུས་སོ། །སྤྱིར་ཁྲོ་བོ་ལ་ཤེས་རབ་ཆེན་པོའི་དང་། ཡེ་ཤེས་ཆེན་པོའི་དང་། ཕྱག་རྒྱ་ཆེན་པོའི་ཁྲོ་བོ་སྟེ་གསུམ་དང་། ཕྱི་མ་ལ་དྲང་སྲོང་ཁྲོས་པའི་དང་། མིའུ་ཐུང་བྱིས་པའི། དཔལ་ཆེན་རྔམ་བརྗིད་
ཀྱི་ཆ་བྱད་ཅན་དང་གསུམ་ལས་འདི་གང་ལྟར་བཟུང་ཞིང་། དེའང་རྒྱུད་ཁ་ཅིག་ལས་གྲགས་པ་ལྟར་དེ་བཞིན་གཤེགས་པ་རྣམས་ཀྱི་མངགས་གཞུགས་ཀྱི་ཕོ་ཉར་ཁྲོས་པ་ལྟ་བུ་ཞིག་གམ་ཞེས་བརྟག་གོ །འདི་ལྟར་དངོས་པོའི་གནས་ལུགས་ལ་ཞི་ཁྲོ་གཉིས་ཐ་མི་དད་ཅིང་གདུལ་བྱ་འདུལ་ཐབས་ཀྱི་དགོས་ཆེད་དང་མཐུ ན་པར་སོ་སོར་སྣང་བ་གང་ཞིག་ཞི་བས་འདུལ་བའི་གང་ཟག་དེར་ཁྲོ་བོ་དགོས་མེད་ཀྱི་དམ་བཅའ་འཐད་པའི་ཕྱིར་དེ་གཉིས་རེས་མོས་སུ་བསྒོམ་པའི་རྣམ་བཞག་འཇིག་པར་དོགས་སོ། །གཉིས་པ་ལ་གསུམ་སྟེ། འདིར་ཡང་མངོན་རྟོགས་ལས་བསྡེབས་ཀྱི་དབང་དུ་དོན་བཞིས་ཉམས་སུ་བླང་བ་ལས་སྔོན་འགྲོའི་ལས་རིམ་ཞི་བ་དང་མཐུན་ཞིང་དེ་བསྒོམ་པའི་དགོས་ཆེད་ཀྱི་སྐབས་དཔྱད་པར་བྱ་བ་འདི་ཡོད་དེ། གང་གདུལ་བྱའི་ཡུལ། གང་གིས་ཇི་ལྟར་འདུལ་བའི་ཐབས། དེ་ལྟར་བཏུལ་པའི་འབྲས་བུ་ལ་དཔྱད་པའོ། །དང་པོ་ནི། སྤྱིར་རུ་ཏྲ་ལ་མ་ཏྲ་དང་ཁ་ཏྲཾ་ཀ་དང་ཨ་ཀཪྴ་རུ་ཏྲ་གསུམ་དུ་བཤད་པ་སོ་སོའི་ངོས་འཛིན་དང་འདིར་གང་ལྟར་བཟུང་བ་དཔྱད་གཞིར་འཛིན་པ་རུ་ཏྲ་དེ་རང་རྒྱུད་པའམ་སྤྲུལ་པ་ཡིན། དང་པོ་ལྟར་ན་ཡི་དྭགས་སྲིན་པོ་ཆེན་པོ་ཞེས་སུ་གྲགས་པས་འདོད་ཁམས་པར་གྲུབ་པ་གང་ཞིག དེས་གཟུགས་ཁམས་དབང་སྡུད་མི་འཐད་དེ། དེར་བགྲོད་པ་ལ་རྟེན་གྱི་ཏིང་ངེ་འཛིན་ཐོབ་དགོས་པའི་ཕྱིར། མ་ཟད་དངོས་ཀྱི་གདུལ་བྱར་གྱུར་ནས་སྣང་བྱེད་ཐོབ་པར་བཤད་པའང་མི་རིགས་སོ། །གཉིས་པ་ལྟར་ན། ངན་སོང་གི་སྡུག་བསྔལ་མྱོང་བར་བཤད་པ་སོགས་དང་འགལ་བར་མ་ཟད་སངས་རྒྱས་གང་ཞིག་རུ་ཏྲའི་རྣམ་པར་སྤྲུལ་པ་ལ་དགོས་པ་མེད་པར་ཐལ། དེས་སེམས་ཅན་རྣམས་ལས་ངན་གསོག་ཏུ་འཇུག་པའི་ཕྱིར། ཞེས་སྨྲའོ། །ཡང་རྣམ་སྨིན་ཟད་པ་ཞེས་འདི་རྣམ་སྨིན་སྤྱད་པའམ། གཉེན་པོ་བསྟེན་པས་ཟད། སྔ་མ་ལྟར་ན་ཡང་དག་པའི་ལམ་དགོས་མེད་དུ་ཐལ་ཞིང་། ཕྱི་མ་ལྟར་ན་ངན་སོང་གསུམ་མི་ཁོམ་པའི་གནས་མིན་པར་ཐལ་ལོ། །གཉིས་པ་ནི། རུ་ཏྲ་དེ་སྔོན་གྱི་འབྲེལ་སྟོབས་ཀྱིས་འདུ ལ་བའི་དུས་ལ་བབས་པ་ན་དན་ཕག་རྩལ་ཆེན་རྫོགས་པའི་སྐྱེས་བུར་གྱུར་ཚུལ་བཤད་པ་ལ་འདི་ལྟར་དོགས་ཏེ། གསང་ཐེག་འདི་ཉེ་ལམ་མིན་པར་ཐལ། ཐར་པ་
ནག་པོར་རྒྱུ་མཐུན་གྱི་འབྲས་བུ་སྨིན་པར་གྱུར་གྱི་བར་དེ་སྲིད་དུ་ཅིག་ཤོས་པ་ཐར་ལམ་ལས་ལྷག་པར་མ་བགྲོད་པའི་ཕྱིར་སྙམ། བཏུལ་ཚུལ་རྒྱས་བཤད་འདི་ནས་བརྩམས་ཏེ་གཞུང་ཐོར་བུའི་ཁོག་བསྒྲིགས་ནས་ཏིང་ངེ་འཛིན་གྱི་ལས་རིམ་དངོས་ཉིད་ངག་དོན་གསུམ་གྱིས་སྟོན་པ་ལ་དཔྱད་བྱའི་གནས་སུ་སྣང་བ་དག་ནི་སོ་སོའི་སྐབས་ནས་སྤྲོས། སྤྱིར་དེ་ཀུན་རྒྱུ་ཏིང་གསུམ་དང་རྣལ་འབྱོར་རིམ་ལྔའི་ནང་ཚན་དང་པོ་གསུམ་པོའི་རྣམ་བཞག་ཕྱོགས་གཅིག་མིན་བརྟག་པ་དགོས་ཤིང་རྒྱུ་ཏིང་གི་སྐབས་ཀྱི་རྒྱུའི་ཧེ་རུ་ཀའི་སྐུ་མདོག་ནི་ལྷ་རྗེ་སྒྲོལ་སྟག་པ་སོགས་ཀྱིས་སྔོན་པོར་བཞེད་ཀྱང་། རྟ་སྟོན་སྨུག་ནག་ཏུ་བཞེད་པའི་ཕྱོགས་ལྟར་བཟུང་བར་གསུངས། འོན་ཀྱང་རྡོ་རྗེ་མཐིང་གར་འདུག་པས་འདི་གཉིས་ཁ་དོག་མི་འདྲ་བའི་གནད་ལ་དཔྱད་དགོས་སོ། །དེ་རྒྱུའི་ཧེ་རུ་ཀ་དེའང་སྤར་ཁབ་ཀྱི་ལུགས་ལྟར་འོག་གཞི་དང་གཞལ་ཡས་ཁང་བསྐྱེད་པའི་ནང་དུ འམ་དམ་པ་རྒྱན་ལྟར་རྒྱུ་ཏིང་ཧཱུྃ་ལས་བསྐྱེད་ཅིང་། ཁྲོ་མོ་དབང་ཕྱུག་མར་སྦྱོར་སྐབས་མཁའ་གསང་བྱིན་རླབས་དང་སྦྱོར་བའི་བརྡས་བསྐུལ་བ་སོགས་མཛད་མིན་ལ་བརྟག་གོ །བྱང་སེམས་ལས་སྤྲུལ་པ་སྤྲོ་ཚུལ་ནི་རྟོགས་སླ་ཞིང་། སྲས་དཀྱིལ་བསྐྱེད་པ་ན། གཙོ་བོ་རིགས་ལྔའི་དཀྱིལ་འཁོར་བསྐྱེད་སྐབས་ཕོ་རྒྱུད་རྣམས་སྒྲོལ་ཚེ་རུ་ཏྲ་དངོས་སུ་མ་བསྒྲལ་བར་ཐལ། འདིར་བཤད་པ་ནི་སྤྲུལ་པ་བར་མིན་ཞིང་། གཞན་དུའང་དེ་དངོས་སུ་བསྒྲལ་བར་མ་བཤད་པའི་ཕྱིར་དང་། རུ་ཏྲ་དེ་ཕོ་རྒྱུད་ཉི་ཤུ་རྩ་བརྒྱད་ཀ་མ་ཡིན་པ་གང་ཞིག རྩ་བརྒྱད་པོ་གང་རུང་གཅིག་ཀྱང་མ་ཡིན་པའི་ཕྱིར། ཞེས་དང་། གལ་ཏེ་རུ་ཏྲ་གཅིག་སྒྲོལ་བའི་དབང་དུ་བྱས་ནའང་ཐམས་ཅད་མ་བསྒྲལ་བར་ཐལ། ཕྱི་རབས་སྒྲུབ་པོའི་བློ་ངོར་ཐོ་འཚ མས་བྱེད་པོ་དག་གི་སྲིད་མཐའ་མི་ཁེགས་པའི་ཕྱིར་སྙམ་དུ་དོགས་སོ། །དེ་ནས་མོ་རྒྱུད་རྣམས་དང་སྦྱོར་བ་མཛད་ཚུལ་བྱུང་བ་ལ་འདི་བརྟག་པར་བྱ་སྟེ་ཧེ་རུ་ཀ་རེ་རེ་ལ་དབང་མོ་བརྒྱད་དང་ལྔ་ལྔས་འཁྲིལ་ཚེ་རེ་མོས་སམ་དུས་གཅིག་ཏུ་རོལ་ཞིང་། དབང་མོའི་མགོ་བརྙན་ཕྲ་མེན་ནམ་ཁྲོ་མོའམ་རང་རྒྱུད་མའི་ཚུལ་ཅན་གང་དུ་བཟུང་ལ། དཔལ་ཆེན་པོས་མ་མོ་བརྒྱད་མ་གཏོགས་མོ་རྒྱུད་ཐམས་ཅད་སྦྱོར་བས་མ་བཏུལ་བར་ཐལ་བ་དང་། སྒྲུབ་ཐབས་
རྣམས་སུ་དབང་མོའི་ཚབ་ཏུ་རིགས་ཀྱི་ཡུམ་ལྔ་འབྱུང་བའི་རྒྱུ་མཚན་ལ་བརྟག་གོ །ངོ་མཚར་ཚོགས་དཀྱིལ་བསྐྱེད་སྐབས་རྒྱུད་དང་དམ་པ་རྒྱན་ལྟར་ཡབ་ཡུམ་སྦྱོར་མཚམ་ནས་སྤྲོ་བར་འདོད་དམ་སྟེ། རོག་གི་མངོན་རྟོགས་སུ་སྦྱོར་མཚམས་ནས་བྱང་སེམས་ཀྱི་ཟེགས་མ་ལས་ཧ་ཧེ་ཕཊ་ཏུ་འགྱུར་པ་སོ་སོའི་གདན་ཁར་བཀོད་ནས་བསྐྱེད་སྔགས་ཀྱིས་སྐུར་བསྐྱེད་པར་མཛད་དོ། །དབང་མོ་ཉེར་བརྒྱད་ལ་སྲས་མོ་ཉི་ཤུ་ལས་མ་བྱུང་བའི་མང་ཉུང་མི་འཚམས་པར་མི་འགྱུར་བའི་ཤེས་བྱེད་དང་། ཁྲོ་མོ་དེ་དག་གཙོ་བོ་ཁོ་ན་ལས་མ་གདོན་པས་བདག་སྲས་མིན་པར་ཐལ་བ་འདི་སྤང་དགོས་པ་ལ་དཔྱད་དོ། །གསུམ་པ་ནི། སྔོན་བྱུང་དབང་བཙན་དུ་བྱས་པའི་དབང་བསྐུར་སྐབས་ཕོ་རྒྱུད་རྣམས་ལ་དབང་མ་བསྐུར་བར་ཐལ། དབང་རྟགས་མ་བཤད་པའི་ཕྱིར་སྙམ་ཞིང་ལམ་ཉམས་ལེན་གྱི་སྐབས་རྩ་ལྷ་ཁྲོ་བོ་ལ་ཡན་ལག་གི་ལྷ་ཞི་བ་བསྒོམ་ཆོག་མིན་དང་། གཏེར་ཕྱོགས་འགའ་ཞིག་ཏུ་ཡེ་སེམས་དུད་འགྲོའི་ཚུལ་ཅན་ཡང་མངོན་ཏེ་རྒྱུ་མཚན་ལ་བརྟག་གོ །ལམ་ཞུགས་རྣལ་འབྱོར་པ་ལ་བཀའ་ཉན་དེ་དག་གིས་མཐོང་ལུགས་དང་ཁུར་ལུགས་ཀྱི་ཚུལ་ཡང་སྤྲོ་བར་ཞུའོ། །དེ་དག་ནི་བདག་སྲས་ཀྱི་ཆོ་ག་ཞེས་སུ་གྲགས་པ་དེ་ཡིན་ཏེ་འབྲས་བུའི་སངས་རྒྱས་ལམ་དུ་གང་བྱེད་གཞིར་གནས་གདོད་མའི་སངས་རྒྱས་ཀྱི་གདུང་རི གས་ལས་བསྐྱེད་དགོས་པའི་ཚུལ་ལོ། །དྲི་བཅས་གནས་ལུགས་ཀྱི་གཞི་དེ་འབྲས་བུ་ལམ་བྱེད་ཀྱི་གདུང་སྲས་སུ་བཟུང་བས་བྱང་ཆུབ་ཀྱི་འབྲས་བུ་འགྲུབ་པའི་རྒྱུ་མཚན་ལ་ལྟོས་ཏེ་གཞན་སྲས་ཀྱི་ཆོ་གར་གྲགས་པ་དེ་ནི་ལེའུ་བཅུ་དྲུག་པས་སྟོན་ཏེ་འདི་ལ་རང་ལུགས་ཀྱི་ཊཱིཀ་དག་ཏུ། དམ་ཚིག་གི་དཀྱིལ་འཁོར་བསྐྱེད་པའི་དང་། ཡེ་ཤེས་ཀྱི་དཀྱིལ་འཁོར་སྤྱན་དྲང་བ་སོགས་ལས་རིམ་གྱི་སྔགས་དང་གཉིས་སུ་འཆད་པའི་ས་ཁོངས་དང་པོ་གཞན་སྲས་ཀྱི་ཆོ་གའི་སྒོམ་རིམ་དང་སྦྱར་ཚེ་ངག་དོན་བརྒྱད་དུ་བཤད་པ་དེ་དག་གི་སྐབས་བརྟག་པར་བྱ་བ་འདི་སྣང་སྟེ་དམ་པ་རྒྱན་ལྟར་མཁའ་གསང་མ་རློབ་པའི་གོང་དེར་རམ་དྲ་ཆུང་དང་འོད་རིམ་ལྟར་ལྷ་ཚོགས་ཐམས་ཅད་བཀོད་གྲུབ་ནས་དབང་བསྐུར་དང་བྱིན་རླབས་བྱ་ཞིང་དབང་མོ་རྣམས་བསྐྱེད་ཚུལ་རོག་སོགས་ཀྱི་བཞེད་པ་ལྟར་བྷྱོ་ཉེར་བརྒྱད་
བརྗོད་པས་སམ། རྟ་སྟོན་དང་རྩི་ལུགས་པ་སོགས་ཀྱི་ལྟར་རྡོ་རྗེ་མེ་ལོང་ནས་འབྱུང་བའི་བསྐྱེད་སྔགས་ཀྱིས་སམ། གཉོས་ནང་པ་དང་སྒྲོལ་གཡུང་སོགས་ཀྱི་ལྟར་གཙོ་བོའི་ཐུགས་ཀ་ནས་བྷྱོ་ཉེར་བརྒྱད་རང་རང་གི་གནས་སུ་སྤྲོས་ཏེ་བསྐྱེད་སྔགས་ཀྱི་ལྷར་བསྒོམས་པ་གང་ལྟར་བཟུང་། དེ་ནས་ཏིང་ངེ་འཛིན་རིམ་པ་དངོས་ལ་གསུམ་དུ་བྱས་པའི་ཐ་མ་ལེའུ་འདིའི་གཞུང་དོན་གྱི་ས་ཁོངས་གཉིས་པ་ལ་བརྟག་པར་སྤྲོ་ན་ལས་རིམ་གྱི་སྔགས་འདི་དག་ཡོངས་གྲགས་ཀྱི་སྐད་ཆེན་བཞི་དང་དེར་ཡང་མ་འདུས་པའི་སྐད་རིགས་གང་ཡིན་དང་། མངོན་རྟོགས་སྦྱར་བའི་དང་། དྲངས་པའི་དང་། བསྒྱུར་བའི་སྒྲ་ལས་གང་དུ་ངོས་འཛིན་ནམ། ཞེས་སྨྲ་སྟེ་སྔགས་ཐམས་ཅད་ལ་བསྒྲེའོ། །བཟླས་སྔགས་ལ་བརྩོན་པ་ན་སྐྱོན་བཅུ་སྤངས་ཏེ་བཟླ་ཚུལ་གསུམ་གྱིས་བཟླ་བར་ལམ་རིམ་སོགས་ལས་བསྟན་པ་གང་ཞིག་སྔ་མ་བཤད་ཟིན་ཅིང་ཕྱི་ནང་གསང་གསུམ་དང་ཁྲོ་བོ་གསུམ་གྱི་བཟླ་ལུགས་ཀྱི་ངོས་འཛིན་དང་སྔགས་དོན་མ་ཤེས་པར་དང་། སྒྲར་འགྱུར་ནས་ {འགྱུར་ནས་}བཟླས་པ་ལ་དངོས་གྲུབ་འབྱུང་མིན་རྣམས་བརྟག་གོ །དེ་ལྟ་བུའི་ཚུལ་ནི་དངོས་གྲུབ་སྤྱི་དང་ཁྱད་པར་གསུང་རྡོ་རྗེ་སྒྲུབ་པའི་གཙོ་བོར་བསྔགས་པས་ཤིན་ཏུ་གཅེས་སོ། །སྤྱིར་གསང་རིག་གཟུངས་གསུམ་གྱི་སྔགས་ཀྱི་རྣམ་བཞག་འཇོག་ཚུལ་ནི། རིག་སྔགས་ཐབས་ཀྱི་ངོ་བོ་ལ། །གཟུངས་སྔགས་ཤེས་རབ་ངོ་བོ་ཡིན། །གསང་སྔགས་གཉིས་མེད་ཡེ་ཤེས་སོ། །ཞེས་སོགས་རྒྱུད་གཞུང་འགར་གྲགས་པ་གཞན་ཡང་ཡོད་མོད་འདིར་ནི་གསང་བདག་ཞལ་ལུང་ནས་བཤད་པ་ལྟར་བཟུང་ན་ལེགས་སོ།། །།རྟེན་གཞལ་ཡས་ཁང་དང་། བརྟེན་པ་ལྷ་གསལ་གདབ་པ་ལ་དཔྱད་པའོ། །དང་པོ་ནི། དེའི་སྐབས་ནང་སྒོ་ལ་རྟ་བབས་མི་བྱེད་པར་འདོད་དམ་སྟེ་གོང་མ་དག་གི་བཞེད་པ་དང་རྡོ་རྗེ་མེ་ལོང་གི་ལུང་དོན་དང་འག ལ་བ་འདི་སྤང་དགོས་སོ༑ ༑ཕྱི་ནང་གི་རྩིག་པ་གཉིས་པོ་སྔ་རབས་པ་དག་གི་ལྟར་རིན་ཆེན་དང་ཐོད་པ་ལས་སམ། རྟ་སྟོན་སོགས་ཀྱི་ལྟར་ཐོད་རྩིག་རིམ་པ་ལྔ་དང་གསུམ་ལས་གྲུབ་པར་འདོད་ཅིང་རྡོ་རྗེར་
རྩིག་པ་དེ་གཉིས་ལས་གཞན་ཐོད་སྐམ་རྩིག་པ་ཞེས་པ་ཞིག་ཀྱང་བཤད་པས། སྒོ་གསུམ་སྦྲགས་སུ་འགྱུར་བར་དོགས་སོ། །གདན་བསྐྱེད་སྐབས་དྲེགས་པ་ཅན་ཕོ་མོ་རྣམས་གདུག་པའི་གཅན་གཟན་གྱི་ཚོགས་ཀྱི་བཟུང་ཚུལ་འབྱུང་བ་དེ་སྤར་ཁབ་དང་ཉི་སེང་མ་དང་དཀོན་ཅོག་འགྲེལ་གྱི་ལུང་གང་ལྟར་བཟུང་ཞིང་། སྔར་མོ་སྦྱོར་བས་བཏུལ་ནས་རང་གནས་སུ་བཏང་བར་བཤད་ལ་འདིར་གདན་དུ་བྱས་པ་གཉིས་མི་འགལ་སྒྲུབ་བྱེད་འགོད་དགོས་པར་མངོན་ནོ། །གདན་འདི་དག་སྨོན་ལམ་གུས་པ་དང་ཐུགས་རྗེ་མཐུན་འཇུག་གི་གདན་གཉིས་ཀར་མི་འགལ་བ་བཞེད་ཀྱང་འགྲེལ་བ་མངོན་རྟོགས་ལས་ལྷ་ཆེན་པོ་རྣམས་ཀྱི་ཞོན་པ་འཕྲོག་པའོ་ཞེས་པས་ཅུང་ཟད་གནོད་པ་དང་བཅས་པ་ཞིག་གམ་སྙམ། གཉིས་པ་ནི། རྒྱན་ཆས་ཀྱི་སྐབས་སྒྱུ་འཕྲུ ལ་གྱི་ལུགས་གཞིར་བཟུང་ལའང་རྒྱལ་བྱེད་དཔའ་རྟགས་ཀྱི་རྒྱན་དུར་ཁྲོད་ཀྱི་ཆས་བརྒྱད་པོ་རྟོག་པ་ལྷ་རྒྱུད་ལས་གསུངས་པ་ཞིང་ཆེན་གཡང་གཞི་བྱང་ཆུབ་སེམས་ཀྱི་རྒྱན། ཞེས་སོགས་ལྟར་དང་། གཡུང་ཊཱིཀ་ན་གསལ་བ་ལྟར་ཐབས་མཁས་ཕྲིན་ལས་ཀྱི་གོས་ཞིང་གི་གཡང་གཞི་ཞེས་སོགས་མི་འདྲ་བའི་ཕྱོགས་གཉིས་སུ་གྲགས་ཏེ། གང་ལྟར་བཟུང་ངོ་། །དེ་བཞིན་དུ་དཔལ་ཆེན་པོའི་སྐུ་ལ་ཡེ་ནས་རང་ཆས་སུ་གནས་པའི་དཔལ་གྱི་ཆས་བཅུའང་། དབུ་སྐྲ་གྱེན་བརྫེས་འཁོར་བ་རུ་བཟློག་ཆས། །ཞེས་སོགས་དང་། གཟི་བརྗིད་འབར་བ་ཆུ་སྲིན་བརྗིད་པའི་ཆས། །ཞེས་སོགས་ལུང་གཉིས་དང་གསལ་བའི་རྒྱན་ལའང་། སྙན་གོང་གཡས་གཡོན་ཉི་ཟླས་བརྒྱན་པ་དང་། ཉི་ཟླའི་ཕྲེང་བས་སེ་རལ་ཁར་བྱས་པ་ཞེས་མི་མཐུན་པར་སྨྲ་སྟེ་སྔར་ལྟར་དཔྱད་དོ། །ཕྱག་མཚན་གྱི་ངོས་འཛིན་བརྗོད་པ་ན༑ སྒྱུ་འཕྲུལ་རྡོ་རྗེ་དང་བླ་མ་དང་བཀའ་མཆིམས་ཕུ་མའི་ཕྱག་བཞེས་སུ་གྲགས་པ་སོགས་ལ་མི་འདྲ་བའི་ཁྱད་བག་རེ་སྣང་བ་ནི་གདུལ་བྱའི་མོས་དབང་ལ་ལྟོས་ཕྱོགས་ནས་བསྙད་མོད་འོན་ཀྱང་གཅིག་ཏུ་མ་ངེས་པའི་ཕྱིར་ཉམས་སུ་བླང་མི་བཏུབ་པའི་སྐྱོན་དུ་ཐལ་བ་འདི་སྤོང་བར་རིགས་སོ། །འཁོར་གྱི་བཀོད་པ་གནས་ཡུལ་གྱི་མ་མོ་ཞེས་པའི་གནས་དང་ཡུལ་གྱི་སྒྲ་བཤད་ཚུལ་ལ་བརྟག་པ་གཞིར་བཟུང་བ་ན་ཕྱི་ལྟར་གྱི་ཡུལ་བརྒྱད་ལ༼ས༽་དགར་
བའི་དུར་ཁྲོད་བརྒྱད་མ་གྲུབ་པས་དེ་དང་དེའི་མ་མོ་རྣམས་གནས་གཅིག་ཏུ་འགྱུར་བའི་སྐྱོན་དུ་ཐལ་བར་གྲག་གོ། །།ལེའུ་བཅོ་བརྒྱད་པའི་སྐབས་བརྟག་པར་བྱ་བ་འདི་སྣང་སྟེ་ཞི་ཁྲོ་གཉིས་ཀའི་ཐུན་མོང་གི་དབང་དུ་མཆོད་པའི་ལས་རིམ་བཅུ་བཞིར་བཤད་པའི་ནང་ཚན་སྦྱོར་སྒྲོལ་གཉིས་པོ་སྔར་བསྟན་པ་དང་མི་ཟློས་པའི་ཤེས་བྱེད་ཇི་ལྟར་སྙམ་ཞིང་ཁྱད་པར་ཁྲོ་བོའི་སྐབས་སུ་སྔར་གྱི་སྟེང་དུ་རཀྟ་བསྣན་ཏེ་བཅོ་ལྔ་དང་ད མ་བཅའ་བཅུ་དྲུག་སྟེ་བཅུ་དྲུག་ཏུ་འདོད་པ་དང་དེ་དག་ལས་ཀྱང་གཞན་ཞིག་ལེགས་ལྡན་གྱི་རྒྱུད་ཀྱི་ལེའུ་ལྔ་པར་ཁྲག་འཐུང་ང་བརྒྱད་ཀྱི་དཀྱིལ་འཁོར་བསྟན་པའི་སྐབས་ལས་འབྱུང་མོད་ཀྱི་འདིར་ནི་ཞི་བ་ལྟར་བཅུ་བཞི་ལས་དགུ་པའི་གནས་སུ་རཀྟ་ཚར་གསུམ་སྦྲེང་ཚལ་གྱི་བསམ་རྒྱུད་ལ་དཔྱད་དོ། །འབྱུང་བ་ལྟར་བཟུང་བར་གསུངས། དེའི་སྐབས་སྒྲུབ་ཐབས་སུ་ཧེ་རུ་ཀའི་གནས་བཅུ་དང་། ཞེས་པའི་གནས་བཅུའི་ངོས་འཛིན་སྤྲོ་བར་རིགས་སོ། །མཆོད་པ་ཐམས་ཅད་ངེས་པར་དགོས་སམ་མི་དགོས། དགོས་ན་གླུ་ཡེ་ཤེས་ཙམ་གྱིས་ཆོག་པར་དམ་པ་རྒྱན་གྱི་རྩ་བར་བཤད་པ་དང་འགལ་ལ་མི་དགོས་ན་དེ་ལྟར་བསྟན་པ་དོན་མེད་དུ་ཐལ་ལོ།། །།དམ་ཚིག་གི་ཆེ་བ་དང་། རྣམ་གྲངས་མདོར་བསྟན་པ་དང་། མཉམ་པའི་དམ་ཚིག་སྐྱོན་ཡོན་དང་བཅས་པ་དང་། དམ་ཚིག་ཉམས་པའི་སྐྱོན་དང་། དམ་ཚིག་གི་རང་བཞིན་དང་། དམ་ཚིག་གི་རྣམ་གྲངས་རྒྱས་པར་བཤད་པ་དང་། དེ་མ་ཉམས་པའི་ཡོན་ཏན་ལ་དཔྱད་པའོ། །དང་པོ་ནི། དེ་ལ་དཀའ་བའི་གནས་སུ་སྣང་བ་ནི་འདུས་པ་དང་རྣམ་པར་དག་པ་ཞེས་གནས་གྱུར་པའོ། །དེའང་སྤྱིར་སྡོམ་པ་ཀུན་རིགས་བསྡུ་ན་སོར་བྱང་སྔགས་གསུམ་དུ་འདུ་ཚུལ་རྔམ་གློག་སོགས་སུ བཤད་པ་གང་ཞིག དེ་གསུམ་རྣམ་པ་འགལ་ལ་ངོ་བོ་ཚང་བ་དང་གནས་གྱུར་པའི་ཕྱིར་སོར་བྱང་གཉིས་ཀྱང་སྔགས་
སྡོམ་དུ་འདུ་ཞིང་རྣམ་པར་དག་པའོ། །རྣམ་པ་ཇི་ལྟར་འགལ་ན་ཇི་སྲིད་དུས་ཀྱི་དང་། གང་གི་རྗེས་སུ་བསླབ་པའི་དང་། དངོས་གཞི་གཙོ་བོའི་དབང་དུ་བྱས་པའི་དང་། ཆེད་དུ་བྱ་བའི་ཁྱད་པར་གྱིས་སོ། །ཞེས་དཔྱད་གཞི་ཙམ་མོ། །ཁྱད་པར་སྐབས་དེ་དག་ཏུ་གནད་གསང་རྨད་དུ་བྱུང་བའི་གཟེར་བུར་གྱུར་པ་ནི་འདི་ཡིན་༼པར་༽ སེམས་ཏེ། ད་ལྟ་རགས་པའི་སེམས་ཀྱིས་མ་དག་པའི་སྣང་ཞེན་བཀག་ནས་དག་པ་ལྟར་སྣང་ཡང་དེ་འདྲའི་དག་མ་དག་གཉིས་ལ་གློ་བུར་བའི་སེམས་ཀྱི་སྣང་བ་ཡིན་མིན་ཁྱད་མེད་ཅིང་། དག་པར་སྣང་བ་དེ་མ་དག་པའི་དངོས་པོའི་གནས་ཚུལ་དུ་སྒྲུབ་མི་ནུས་པས་ཉི་ཚེ་བར་ཟད་དེ་འདིའི་ཐད་ཀྱི་དགོ ངས་རྒྱན་དུ་སོ་བྱང་གཉིས་ལ་མཉམ་པ་ཆེན་པོའི་ཐབས་ཀྱིས་མ་ཟིན་པའི་ཐ་མལ་སྣང་ཞེན་གྱི་ལྡོག་ཆར་ཡོད་པ་ཞེས་གསུངས་པའི་རྒྱུ་མཚན་ཡང་དེར་ཐུག་གོ །དེ་ལྟའི་སྣང་ཞེན་ཉིད་ཕྱི་རྒྱུད་སྡེ་གསུམ་མན་ཆད་དུ་གསལ་བར་མ་བསྟན་པའི་ཡེ་ཤེས་ལམ་བྱེད་ཀྱི་གནད་ཐུན་མིན་ཞིག་ཡོད་པ་དེའི་སྟེང་ནས་གཞལ་ན་ནི་གསེར་གླིང་དུ་ས་རྡོ་ཕལ་པ་མི་རྙེད་པ་ལྟར་སྤངས་ལེན་མེད་པར་དེ་འདྲ་བའི་ལས་སྣང་དང་བཅོས་མའི་ཏིང་ངེ་འཛིན་གྱི་སྣང་བ་ཐམས་ཅད་ཡེ་ཤེས་རང་སྣང་གི་འཁོར་ལོ་འབའ་ཞིག་ཏུ་མཉམ་པར་བལྟའོ། །དེའི་ཕྱིར་སོ་ཐར་གྱི་གཞན་གནོད་གཞི་བཅས་ལས་ལྡོག་པ་དང་། བྱང་སྡོམ་གྱི་གཞན་ཕན་ལ་ཞུགས་པའི་ལྡོག་ཆ་གཉིས་པོ་དེ་སྔགས་སྡོམ་གྱི་མཉམ་པ་ཆེན་པོའི་ངང་ནས་གཞན་དོན་རྩོལ་མེད་དུ་མཛད་པ་ནི་ཐབས་མཁས་ཀྱི་ནང་དུ་ཚང་ཞིང་། རྫས་གོང་འཕེལ་གྱི་ཚུལ་གྱིས་སྔགས་ཀྱི་སྡོམ་རྫས་སུ་གནས་འགྱུར་བ་ཡིན་ནོ། །ཞེས་པ་འདི་འབྱུང་ངོ་། །དེ་སྐབས་འཕྲོས་ཀྱི་རྒོལ་བ་ནི། སུམ་ལྡན་རྡོ་རྗེ་འཛིན་པའི་རྒྱུད་ཀྱི་དགེ་སློང་གི་སྡོམ་པ་ཆོས་ཅན། དེའི་རྒྱུད་ཀྱི་བྱང་སྡོམ་དང་སྔགས་སྡོམ་དུ་ཐལ། དེ་དང་དེར་གནས་གྱུར་པའི་ཕྱིར། །ཞེས་སྨྲའོ། །ཡང་སྔགས་སྡོམ་དེ་དང་པོར་བླ་མ་ལས་ཐོབ་པ་མེད་དུ་མི་རུང་ཞིང་དེ་ལ་ཐོབ་པའི་དུས་མཚམས་ཤེས་ནས་ཐོབ་བློ་སྐྱེ་བ་གལ་ཆེ་བར་གསུངས་ནས་དེའི་མཐར་སྐྱེ་བར་བཤད་པས་དུས་མཚམས་བརྟག་པར་སྤྲོ་ན། རྡོ་རྗེ་ལས་རིམ་ལས་ནི་དཀྱིལ་འཁོར་དུ་འཇུག་པའི་སྐབས་སྐུ་གསུང་ཐུགས་ཀྱི་དམ་ཚིག་
སྦྱིན་པ་ཉིད་སྡོམ་བཟུང་དུ་བཞེད། སྔོན་གྱི་སྒྱུ་འཕྲུལ་མཁན་པོ་རྣམས་ནི་དབང་གི་སྔ་རོལ་དུ༑ དང་པོ་ཐུན་མོང་གི་སྡོམ་བཟུང་དང་། དེ་ནས་ཁྱད་པར་སྡོམ་བཟུང་ལན་གསུམ་རེ་བརྗོད་པའི་མཐའ་ལ་སྐྱེ་བར་བཞེད་དེ་གང་ལྟར་བཟུང་། དེའང་སྡོམ་བཟུང་གི་དུས་སུ་སྔགས་སྡོམ་ཐོབ་ཀྱང་སྔགས་སྡོམ་མཐའ་དག་དེར་བཟུང་བ་མིན་པ་ཞིག་གམ། སྔགས་སྡོམ་ལ་རིས་མི་འདྲ་བ་མང་པོ་མེད་པར་གཅིག་ཏུ་ཟད་པས་དེ་ཁས་བླང་གིས་བཟུང་བའི་མཐར་ཐོབ་ཀྱང་དེའི་འོག་ཏུ་དབང་རྣམས་བསྐུར་བས་སྡོམ་རྒྱུན་གོང་འཕེལ་དུ་འགྲོ་བ་ཞིག་སྟེ་སྔར་ལྟར་དཔྱད་དོ༑ ༑སྤྱིར་དམ་སྡོམ་གཉིས་ལ་ཁྱད་འབྱེད་རིགས་པའི་དམ་བཅའ་འཐད་པ་གང་ཞིག ངོ་བོའམ་ལྡོག་པའི་སྒོ་ནས་འབྱེད། དང་པོ་ལྟར་ན་ངོ་བོ་གཅིག་པར་བཤད་པ་དང་འགལ་ཞིང་། གཉིས་པ་ལྟར་ན་དམ་སྡོམ་གཉིས་ནམ་དུ་ཡང་ཁྱབ་མཉམ་མིན་པར་ཐལ་ལོ། །དེ་གཉིས་ཀྱི་མཚན་ཉིད་འཇོག་ལུགས་ཀྱང་རྟོགས་ནུས་སོ། །དེ་ལ་གཉིས་པ་ནི་སྐབས་དོན་དམ་ཚིག་གི་རྣམ་གྲངས་ནི་སྤྱིར་མཐའ་ཡས་ཀྱང་བསྡུ་ན་རྩ་བ་དང་ཡན་ལག་གཉིས་སུ་འདུ་ལ་དེའང་རྒྱུད་གཞུང་འདི་ཉིད་ལས་གྲགས་པ་ལྟར་ན་རྩ་བའི་དམ་ཚིག་ལྔ་དང་ཡན་ལག་གི་དམ་ཚིག་བཅུའོ། །དང་པོའི་སྐབས། བླ་མེད་བྱང་ཆུབ་ཀྱི་སེམས་སྐྱེད་མི་སྤོང་བའི་ཚུལ་ལ་ཐེག་ཆེན་ཐུན་མོང་གི་གཞུང་དུ་གྲགས་པའི་སེམས་བསྐྱེད་དང་། རྣམ་གཞག་དང་ཐ་དད་ལུང་དང་ཅིར་སྣང་ལྷའི་འཁོར་ལོར་བསྒོམ་ན་བླ་མེད་དོན་ཀུན་གྱི་སེམས་གཉིས་ཀ་དེར་འདུ་བར་བཤད་པའི་རྒྱུ་མཚན་དཔྱད་དོ། །བླ་མ་བཀུར་ཞེས་པའི་བླ་མ་ལ་གསང་སྔགས་སྟོན་པ་ལས་གཞན་ཡང་ཡོད་པ་འགལ་མིན་དང་། འདིར་བསྟན་བླ་མའི་དབྱེ་བ་གསལ་བཀྲ་ལས་བཤད་པ་དང་མཐུན་མིན་བརྟག་གོ །སྔགས་རྒྱ་རྒྱུན་མི་གཅོད་པ་ནི་བླ་མེད་བསྒྲུབ་བྱར་བྱས་པའི་སྒྲུབ་བྱེད་དུ་དཀོན་ཅོག་འགྲེལ་ལས་གསུངས་ཤིང་དེར་མ་བརྩོན་ན་བཅས་འགལ་གྱི་ལྟུང་བ་སྐྱེད་པ་ཡིན་པ་གང་ཞིག་དེ་སྐྱེ་མཚམས་ལ་དཔྱད་དོ། །འདིར་བསྟན་མཆེད་ལ་བྱམས་པ་དེར་གསལ་བཀྲ་ལས་བཤད་པ་ལྟར་བཟུང་ངམ་སྟེ་ལེའུ་བཅུ་གསུམ་པར་ཕར་ཕྱིན་ཐེག་པ་ལ་ཡང་དག་ཉིད་མ་རྟོགས་པ་ཞེས་གསུངས་པ་དང་ཅུང་ཟད་མ་མཐུན་ནོ། །ཞར་བྱུང་ཚུལ་
དེ་ཅི་ཙམ་གྱིས་རྩ་ལྟུང་དུ་འགྱུར་ཚུལ་ལའང་བརྟག་གོ །གསང་བ་མི་སྨྲ་བ་ལ་སྤྱི་གསང་བཞི་དང་། བར་གསང་བཞི་དང་། གསང་བར་འོས་པ་དང་གཉེར་གཏད་པ་གཉིས་ཏེ་བཅུའོ། །དེ་ལྟར་རྩ་བའི་དམ་ཚིག་གི་རྣམ་གྲངས་དེ་དག་བསྲུང་བ་དང་སྒྲུབ་པའི་དམ་ཚིག་ཏུ་དང་རྡོ་རྗེ་གསུམ་གྱི་དམ་ཚིག་ཏུ་བསྡུ་ན་གང་དུ་བསྡུའམ། ཡང་ཡན་ལག་ཏུ་གྱུར་པའི་དམ་ཚིག་གི་སྐབས་ལོག་པའི་དུག་ལྔ་མི་སྤོང་བར་བཤད་པ་འདི་གསང་བའམ་བསྒྲག་པ་ཡིན། དྲང་དོན་ནམ་ངེས་དོན་ཡིན། མི་སྤོང་བའི་རྒྱུ་མཚན་གང་ལ་ཐུག་མ་སྤངས་པ་ལ་དགོས་ཆེད་ཅི་ཡོད་ཅེས་དང་། དེ་ལམ་དུ་བྱེད་ཚུལ་ཉོན་མོངས་དྲག་པོ་སྐམ་གྱིས་སྐྱེས་པའི་རང་ལྡོག་དེའམ། གཏན་ཚིགས་ཀྱིས་གཞིག་པས་རང་བཞིན་མ་གྲུབ་པ་དེའམ་གཉེན་པོར་གྱུར་པ་དེའམ། འགགས་པའི་རྗེས་ཐོག་གི་ཤེས་པ་དེ་ལམ་དུ་བྱེད་དེ་གང་ལྟར་ཡང་རིམ་པར་བརྗོད་པའི་སྐྱོན་འདི་དག་ནི་སོ་ན་གནས་སོ། །གང་ཞེ་ན་མཚམས་མེད་བྱེད་པོར་དེའི་ལས་ཀྱིས་མི་གོས་པ་དང་། རྒྱུའི་ཐེག་པ་བ་དང་ཁྱད་མེད་པ་དང་། ཉོན་མོངས་ལམ་བྱེད་ཀྱི་རང་ཚིག་ཉམས་པ་དང་སྤང་གཉེན་ཐ་དད་དུ་ཐལ་བ་འདིའོ། །གྲུབ་པ་བཞི་ལྡན་གྱི་དམ་རྫས་ལྔ་མི་དོར་བའི་རྒྱུ་མཚན་བཞི་དང་བཅས་པ་འགོད་པར་རིགས་སོ། །ས་ཁོངས་གསུམ་པ་རྟོགས་སླ་བས་མ་སྤྲོས་ཤིང་། བཞི་པའི་སྐབས་བརྟག་པར་བྱ་བ་འདི་ཡོད་དེ་དམ་ཚིག་ཉམས་པ་ཀུན་སླར་གསོར་རུང་ངམ་སྟེ། ཐུགས་ཀྱི་དམ་ཚིག་ཉམས་ན་དངོས་སུ་བསྐང་བའི་ཐབས་མེད་པར་བཤད་པ་དང་འགལ་ལོ། །ལྔ་པ་ནི། སྤྱིར་སེམས་ལ་རྡོ་རྗེར་འཇོག་པའི་རྒྱུ་མཚན་ལྔ་ལས་འདིར་གང་ལྟར་བཟུང་། དྲུག་པ་ནི། འདི་ལ་དོན་དང་རྣམ་གྲངས་སྤྲོས་པ་གཉིས་ལས་སྔ་མ་ནི་རྒྱས་པ་ལས་བཤད་པ་ལྟར་དགུ་བཅུ་རྩ་བདུན་དུ་ངེས་སོ། །ཕྱི་མ་ནི། སྒྱུ་འཕྲུལ་ཕྲ་རྒྱས་སུ་བཤད་པ་ལྟར་གྱི་རྩི་ཚུལ་ལ་བརྟེན་ནས་སུམ་བརྒྱ་དང་དྲུག་ཅུ ར་དབྱེ་སྟེ་རྒྱུད་གཞུང་འདི་ཉིད་ཀྱི་དབང་དུ་ལས་གཞན་དུ་ངེས་པ་མེད་པར་ཤེས་པར་བྱའོ། །དེ་ལ་མཚན་ཉིད་སོ་སོའི་དབྱེ་བའི་རྣམ་གྲངས་གཞན་པ་ཡིན་མིན་གྱི་བརྟག་པ་འདི་འབྱུང་ངོ་། །བདུན་པ་ནི། འདིར་འཕགས་པས་བྱིན་གྱིས་བརླབས་པ་ཐུན་མིན་གྱི་ཡོན་ཏན་དུ་འཇོག་ཀྱང་དེ་ལྟར་ན་
ཉན་ཐོས་དང་བྱང་སེམས་རྣམས་སངས་རྒྱས་ཀྱིས་བྱིན་གྱིས་བརླབས་པའི་རྣམ་བཞག་འཇིག་པར་ཐལ་ལོ་ཞེས་སྨྲ་སྟེ་འཇིག་རྟེན་པས་གཙོ་གྱུར་ཚངས་དབང་སོགས་ཀྱིས་བཀུར་གནས་མིན་པར་ཐལ་བའང་དེ་ལྟར་རོ། །ཉམས་པ་གསོ་ཚེ་དགེ་བའི་བཤེས་གཉེན་ལ་བརྟེན་དགོས་མིན་ཡང་བརྟག་པར་བྱའོ།། །།ལེའུ་ཉི་ཤུ་པ་ལ་ལྔ་སྟེ། རྫས་ཧོམ་ལུག་རྒྱུད་ཀྱི་སྒོ་ནས་ལས་བྱ་བ་དང་། ལྷག་མའི་ལས་དང་། བྲོ་གར་གླུ་ཚིག་གི་ཡོན་ཏན་དང་། ལས་བཞིའི་གནས་གཟུངས་ཐུན་མོང་དུ་བསྟན་པ་དང་། དོན་སྟོངས་ཀྱི་སེམས་བསྟེེན་པ་ལ་དཔྱད་པའོ། །དང་པོ་ནི། འདིར་མངོན་རྟོགས་ལས་བསྡེབས་ཀྱི་དབང་དུ་རྫས་ཀྱི་རིམ་པ་སྟེ་དེ་ལ་ལྔ་ལས། གཞུང་གི་དངོས་བསྟན་གྱི་བབ་དང་བསྟུན་ནས་དཔྱད་པའི་སྒོ་ཅུང་ཟད་བཏོན་ན་ཚོགས་འཁོ ར་སྐབས་ཞི་ཁྲོ་གཉིས་ཀྱི་ཆོ་གའི་ཁྱད་པར་ལ་བརྟག་པ་གཞིར་བཟུང་ནས། ཁྲོ་བོའི་དབང་དུ་ཁྱད་པར་མཆོད་པ་ན་ཚོགས་ཕུད་ཆ་བཞིར་སྤྲོས་པའི་དང་པོས་མཆོད་ཅིང་བར་པས་བཤགས་ནས། ཐ་མ་བཏབ་ཅིང་ཕྲིན་ལས་བྱ་བ་ལ་ལུགས་གཉིས་ལས་གདུལ་བྱ་རྒྱས་པར་བྱེད་པ་ལ་ངག་དོན་བཅུ་གསུམ་གྱིས་སྟོན་པའི་སྐབས་འདི་དཔྱད་པར་བྱ་སྟེ། སྤྱིར་སྒྲུབ་པ་དང་ཕྲིན་ལས་གཉིས་ལ་ཁྱད་པར་འབྱེད་ལུགས་ཇི་ལྟར་སྙམ་ཞིང་ཕྱི་མའི་སྐབས་རྒྱུད་གཞུང་ཉིད་ཀྱི་དངོས་བསྟན་དུ་ལས་བཞིའི་གོ་རིམ་བཟློག་སྟེ་བྱུང་བའི་རྒྱུ་མཚན་དང་། བསྒྲུབ་བྱ་གང་ཡིན་གྱི་དམིགས་རྟེན་དངོས་དགོས་མིན་ལ་དཔྱད་དོ། །དཀྱིལ་འཁོར་བསྐྱེད་དུས་ཀྱི་ཡ་མ་བཾ་ཨེ་བཞི་པོ་ལས་དེ་དང་དེའི་ཡི་གེ ར་འཇོག་པ་ན། དབྱིབས་སམ་སྒྲ་དོན་གང་གིས་བཞག་ཅིང་ལས་འདི་རྣམས་གཞན་དོན་ཁོ་ནར་ངེས་སམ་སྟེ། ཐོག་མར་བདག་ཉིད་ཀྱི་རྟོགས་གོམས་བསྒྲལ་བར་བཤད་པ་སོགས་ཀྱི་རྣམ་བཞག་སྤོང་དགོས་པར་ཐལ་ལོ། །ཕུར་གདབ་ཀྱི་སྐབས་རིགས་སོ་སོའི་ཕུར་བུའི་རྒྱུ་དང་དབྱིབས་དང་ཁ་དོག་དང་གྲངས་དང་ལྷར་བསྐྱེད་ཚུལ་རྣམས་ངེས་པར་བྱས་ནས་གདབ་ཚུལ་དཀྱུས་དང་མི་འདྲ་བ་ལའང་བརྟག་གོ །འདིར་བསྟན་ལུག་རྒྱུད་ཀྱི་དང་
འོག་ནས་འབྱུང་བའི་བྲོ་གར་གླུ་ཚིག་གི་ཡོན་ཏན་གཉིས་པོ་ཁྱད་འབྱེད་རིགས་པའི་འཐད་པ་འགོད་དགོས་པར་མངོན་ཞིང་། ཚོགས་ལ་རོལ་པ་ན་རྒྱུད་ལུང་མན་ངག་གི་རོལ་ཚུལ་ལ་དཔྱད་དོ། །གཉིས་པ་ནི། འདིར་ཞི་བའི་ལྷག་ཆོག་བྱེད་ཚུལ་ཕྱག་རྒྱ་བཞི་པའི་བསམ་གཏན་ལས་བཤད་པ་དང་མཐུན་ལ་ཁྲོ་བོའི་ལྷག་ཆོག་ལ་དཀྱིལ་འཁོར་བཤམས་པ་དང་མཆོད་པ་དངོས་གཉིས་ཀྱི་དང་པོ་ནི་སྒྱུ་འཕྲུ ལ་མཁན་པོ་ཕལ་ཆེར་དཀྱིལ་འཁོར་གྱི་ཤར་ལྷོར་དྲིའི་མཎྜལ་བཤམས་པར་བཞེད། ཧེ་རུ་ཀ་གལ་པོར་ལྷག་མའི་དཀྱིལ་འཁོར་བྱང་ཤར་མཚམས། ཞིང་ལྤགས་རཀྟས་ཟླ་གམ་ཨེ། །ཞེས་འབྱུང་སྟེ་གང་ལྟར་བཟུང་ངམ ། གཉིས་པ་ནི། འདི་ཉིད་ལས། དབང་ཕྱུག་མ་ལ་བྱིན་ཏེ་ལས་བཅོལ་བ་ཙམ་ལས་མ་གསུངས་ཀྱང་། སློབ་དཔོན་རྣམས་ཀྱིས་རྒྱུད་གཞན་ནས་ཁ་བསྐ ངས་ཏེ་རྒྱས་པར་མཛད། དེ་ལའང་བཞེད་པ་མི་མཐུན་ཏེ༑ ཁ་ཅིག་ཕུད་ལྷག་གིས་ཡས་མར་གྱི་གནས་བདུན་མཆོད་གསུངས། ཕལ་ཆེར་གལ་པོར་འདོད་པའི་རྒྱལ་པོ་ལྕགས་ཀྱུས་དགུག །རྟ་མགྲིན་གྱིས་དབང་བསྡུ་བར་བྱ། །ཧེ་རུ་ཀ་ཡིས་ཟིལ་གྱིས་མནན། །ཞེས་བཤད་པ་ལྟར་མཛད་དེ་གོང་ལྟར་བརྟག་གོ །ཞར་བྱུང་ཡས་མར་གྱི་གནས་བདུན་གྱི་ངོས་འཛིན་དང་ལྷག་མའི་སྒྲ་བཤད་ཚུལ་དང་ཚོགས་འཁོར་གྱི་ཡོན་ཏན་རྣམས་ཀྱང་སྤྲོ་བར་ཞུའོ། །གསུམ་པ་ནི། འདིར་ཁྲག་འཐུང་གཞན་རྣམས་ལ་བྲོ་བྱུང་ནས་སྒོ་མ་ལ་མི་འབྱུང་བའི་རྒྱུ་མཚན་ཅི་ལ་ཐུག་ཅིང་། དེའི་སྐབས་མཛོད་ལྡན་ཆེན་མོ་ཞེས་སོགས་ཀྱི་ངེས་ཚིག་འཇོག་ཚུལ་ལ་མི་འདྲ་བའི་ཁྱད་འགའ་ཞིག་སྣང་ཡང་མང་བས་འཇིགས་ནས་འདིར་མ་བཀོད་པས་སྤྲོ་ན་རོང་ཊཱིཀ་སོགས་ནས་གསལ་ལོ། །ཕྲ་མེན་ལ་དོན་རྟགས་དཔེ་གསུམ་ལས་དོན་དབྱིངས་ཡེ་གཉིས་མེད་ལ་ངོས་འཛིན་མཛད་པ་ན་ལྷ་ཐམས་ཅད་ཀྱང་དོན་གྱི་ཕྲ་མེན་ཤ་སྟག་ཏུ་ཁས་ལེན་དགོས་པ་ཞིག་འབྱུང་སྟེ་རེ་ཞིག་བརྟག་པར་འོས་པའི་གནས་སོ། །གཞན་ཡང་དབང་མོ་རྣམས་ལ་སླས་དང་བྱི་མོ་བྲན་མོ་གསུམ་གྱི་མིང་ནས་བསྙད་རིགས་པའི་འཐད་ཕྱོགས་ཀྱང་འགོད་དགོས་པར་མངོན་ནོ། །བཞི་པ་ནི། ཕྱི་གནས་དང་། ནང་ཏིང་ངེ་འཛིན་བཞི་ལ་སྦྱར་ཞིང་། གསང་བའི་སྐབས་སུ་གཟུང་མ་ལ་ངོས་བཟུང་སྟེ། དེ་
ལ་རིགས་སོ་སོའི་མཚན་ཉིད་བརྟག་ཐབས་སོགས་ཀྱི་མན་ངག་འགའ་ཞིག་ནི་སྒྱུ་འཕྲུ ལ་རྡོ་རྗེ་ལས་གསལ་ཞིང་འདིར་དགོས་པ་ལ་ལྟོས་ཏེ་ཞིབ་ཏུ་མ་སྤྲོས་སོ། །ལྔ་པ་ནི། གོང་དུ་བཤད་ཟིན་ཏོ།། །།ལེའུ་ཉེར་གཅིག་པ་ནི་མངོན་རྟོགས་ལས་བསྡེབས་ཀྱི་དབང་དུ་ཁྲོ་བོའི་བསྟོད་རིམ་སྟེ༑ འདི་ལ་ཁ་ཅིག་སྐུ་གསུང་ཐུགས་ནང་གི་ཡོན་ཏན་གྱི་བྱེ་བྲག་མེད་དེ་སྤྱིར་བསྟོད་དོ། །གཡུང་འགའ་ཞིག་རང་བཞིན་དང་ཡོན་ཏན་དང་། མཛད་པ་སྟེ་གསུམ་གསུམ་དང་ལྡན་པར་བཞེད་དེ་གང་ལྟར་བཟུང་། །ཡི་གེ་ༀ་དང་ཧཱུྃ་གཉིས་སྐུ་ལྔ་ཡེ་ཤེས་ལྔར་མཚན་པ་འདྲ་བ་ལ་ཞི་ཁྲོའི་གླུའི་མགོ་འདྲེན་དུ་ཁྱད་འབྱེད་རིགས་པའི་རྒྱུ་མཚན་ཅི་ལ་ཐུག་ཅིང་རྟེན་བརྟེན་པ་སྤྱིར་བསྟོད་པ་འདི་ཡུམ་གྱི་ཡོན་ཏན་གྱི་ཆ་ལ་བསྟོད་པ་ཞིག་གམ། འབྱུང་བ་ཆེན་པོ་བཞི་ཉིད་རིགས་བཞི་ཧེ་རུ་ཀའི་རང་བཞིན་དང་མཛད་པ་དང་། བྱིན་རླབས་ཡིན་པར་སྟོན་ཞེས་སྨྲའོ། །བསྟོད་པ་ཡོན་ཏན་འདི་དག་གཙོ་འཁོར་ཀུན་ལ་མངའ་བར་འཇོག་སྟེ་རུ་ཏྲས་དཀྱིལ་འཁོར་གྱི་གཙོ་བོར་བྱས་པ་ལྟ་བུ་ཞིག་ཀྱང་ཁས་ལེན་རུང་བར་ཐལ་ལོ། །འོན་ཏེ་དགོས་པ་ལ་ལྟོས་པས་དེ་ཙམ་དུའང་མི་འགྱུར་ན་བསྟོད་ཡོན་ཡང་གཙོ་འཁོར་ཀུན་ལ་མེད་པར་གྲུབ་བོ༑ ༑དེ་ཡན་ཆད་ཀྱིས་རྒྱུད་དོན་དངོས་བསྟན་ཟིན་ཅིང་། དགོས་འབྲེལ་ནི་ཀུན་གྱི་ཁྱབ་བྱེད་ཡིན་པའི་ཕྱིར་བརྒྱུད་པའི་བཀའ་སྲོལ་ལས་ཤུགས་བསྟན་དུ་མཛད་དོ། །འོན་ཏེ་འཆད་པ་པོ་སྤྲོས་པ་ལ་དགའ་བས་བསྙད་ཀྱང་ཉེས་སྐྱོན་དུ་མི་འགྱུར་བས་དཔྱད་སྒོ་ཟུར་ཙམ་སྨོས་ན་སྤྱིར་ནི་དགོས་སོགས་ཆོས་བཞི་བསྟན་པ་གདུལ་བྱ་གཞུང་དེ་ལ་དང་པོར་འཇུག་པའི་ཆེད་ཡིན་པས་གཞུང་གི་སྔོན་དུ་བཤད་པར་བྱ་བ་ཡིན་ཡང་འདིར་རྒྱུད་དངོས་རྫོགས་པའི་མཐར་སྨོས་པའི་རྒྱུ་མཚན་ཅི་ལ་ཐུག་གམ། ཞེའོ།། །།ལེའུ་ཉེར་གཉིས་པ་ལ་གསུམ་སྟེ། གདམས་པ་དང་། གཏད་པ་དང་། མཛད་པ་
ཆོས་ཉིད་དུ་བཞུགས་ཚུལ་ལ་དཔྱད་པའོ། །དང་པོ་ནི། རྒྱུད་དབུ་ཞབས་ཀྱི་བརྗོད་བྱའི་མཐིལ་ནི། སྣང་བ་བཞི་ལས་གཞན་དུ་མ་གྲུབ་པས། དེ་ཉིད་འགྲོ་བའི་ཕན་བདེའི་གཞིར་མི་ནུབ་པར་བརྟན་པར་ཟུང་ཞེས་པའི་ཚུལ་ལ་འདི་ལྟར་དོགས་ཏེ། སྣང་བ་བཞིའི་གྲངས་དང་གོ་རིམ་དེ་ལྟར་ངེས་པའི་རྒྱུ་མཚན་དང་། བཞི་པོ་གཅིག་གམ་ཐ་དད་ལ་བརྟག་པ་གཞིར་བཟུང་ནས་གཞི་རང་བཞིན་གྱི་སྣང་བ་དེ། སྤར་ཁབ་ལྟར་རང་རིག་པ་ཐམས་ཅད་རྩལ་མ་འགགས་པར་སྣང་བ་ཞིག་ལ་འཇོག་པ་ན། རྩལ་མ་འགགས་པའི་ཕྱིར་དེའི་སྟེང་ན་སྣང་བ་གཞན་གསུམ་ཡང་སྣང་བར་ཁས་ལེན་དགོས་པ་ལས་མ་འདས་པས་དེ་གསུམ་དགོས་མེད་ཐལ་ལོ་སྙམ་ཞིང་རང་སྣང་དེ་གཞིའི་སྣང་བ་ཡིན་པས་མ་རྟོགས་པའི་དུས་ནའང་སྣང་བར་འདོད་དམ་སྟེ་སེམས་ཅན་རང་གྲོལ་དུ་ཐལ་བ་སེམས་སོ། །ལོག་རྟོག་འཁྲུ ལ་བའི་སྣང་བ་འདི་ཆོས་ཉིད་ལས་གཞན་དུ་མ་གྱུར་པ་ཞིག་ན། དེའང་རང་རྒྱུད་དུ་བཞག་རིགས་པར་དོགས་ཤིང་། བསྟན་པ་བློ་དང་འཚམས་པ་ཞིག་གདུལ་བྱ་ལམ་སྣང་དུ་འཇོག་རུང་བར་བྱས་པའི་རིགས་ཁྱད་དབྱེ་བ་ལས་གསལ་བ་གང་ཞིག ལམ་ཉམས་སུ་བླངས་པ་དོན་མེད་དུ་མི་འགྱུར་བ་རྒྱུ་མཚན་དུ་བྱས་པ་ན་མུ་སྟེགས་རྟག་ཆད་པ་ཡིན་ཡང་སྔགས་ཀྱི་འབྲས་བུ་མཐར་ཐུག་ཐོབ་པར་ཐལ་བ་འདི་འབྱུང་ངོ་། །རྟོག་པའི་རིག་པ་སྐུ་དང་ཡེ་ཤེས་ཀྱི་དཀྱིལ་འཁོར་དུ་སྣང་བ་ཞིག་འབྲས་བུ་བདེ་གཤེགས་ཀྱི་སྣང་བར་བཞག་ཏུ་རུང་བ་ལུང་གིས་གྲུབ་པ་ན་མཐར་ལམ་པའང་དེར་ཐལ་བ་ཀུན་ཁྱབ་ཚད་མའི་རྒྱབ་སྐྱོར་དང་བཅས་པ་འདི་སྤང་དགོས་སོ༑ ༑གཉིས་པ་ནི། སྟོན་པའི་རྒྱལ་ཚབ་ཏུ་དབང་བསྐུར་བའི་ཕྱིར་སྡུད་པ་པོ་དང་། མི་ནུབ་པར་བྱ་བའི་ཕྱིར་གང་ཟག་ཆོས་མིག་ཅན་ལ་གཏད་པ་དངོས་སུ་བསྟན་ནས་ཞོར་ལ་ཕྱོགས་བཅུར་འཕེལ་ཞིང་བྱིན་ཆེ་བར་བྱ་བའི་ཕྱིར་མ་མོ་དང་མཁའ་འགྲོ་ལ་གཏད་པ་སྒྱུ་འཕྲུལ་རྒྱས་པས་ཁ་བསྐང་བའི་ཚུལ་ལ་བརྟག་ཕྱོགས་ཀྱི་ཟུར་ཙམ་འགོད་ན། འདིར་བསྟན་གསང་བདག་ཉིད་སྡུད་པ་པོ་གསང་བའི་བདག་པོར་འདོད་དམ་སྟེ་གཞན་དུ་གནོད་སྦྱིན་གསང་བའི་བདག་པོ་དང་། ལམ་རྒྱུད་ལྔ་འཕགས་པར་སྣང་བས་གསང་བའི་བདག་པོ་དང་། ཐུགས་
རྒྱུད་ལེའུ་སྣང་བས་གསང་བའི་བདག་པོ་ཞེས་པའི་རྣམ་གཞག་ཅིག་ཀྱང་མངོན་ནོ། །སྒྲོ་དང་སྐུར་པ་ཞི་བ་ཡི། །ཞེས་སོགས་འབྱུང་བ་འདི་ག་རྒྱུད་ཀྱིའམ་གཏད་བྱའི་གང་ཟག་གི་ཡོན་ཏན་གང་ཡིན་བརྟག་ཅིང་ཕྱག་རྒྱའི་དོན་འདའ་བར་དཀའ་བ་དང་། མིང་ཚིག་ཡི་གེའི་ཚོགས་ལ་བདེ་གཤེགས་ཀྱི་ཕྱག་རྒྱས་བྱིན་གྱིས་བརླབས་པའི་རྒྱ་རྟགས་སུ་བཤད་པ་གང་ལྟར་བཟུང་བའི་ཚུལ་བརྗོད་པར་བྱའོ། །དེ་དག་ནི་སྔོན་བྱུང་དབང་བཙན་དུ་བྱས་པ་དང་བསྟུན་པ་ཙམ་དུ་ཟད་དེ་རྗེས་འཇུག་ལའང་སྦྱར་བར་འོས་པས་དེའི་ཚུལ་འགོད་རིགས་སོ། །གསུམ་པ་ནི། དེ་ཡང་རྒྱུད་དང་མདོ་སྡེ་ཁ་ཅིག་གི་ཚུལ་ལས་ནི། ཆོས་བཤད་པ་རྫོགས་ནས་འཁོར་རྣམས་རྗེས་སུ་ཡི་རང་ཞིང་མངོན་པ ར་བསྟོད་པ་ཙམ་དུ་གསུངས་ཏེ། དེ་ནས་སྤྱོད་ལམ་གཞན་གྱིས་བཞུགས་པར་མངོན། རྒྱུད་ལ་ལ་ལས་ནི་བཤད་པ་རྫོགས་ནས་དཀྱིལ་འཁོར་བསྡུས་ཏེ་མི་སྣང་བར་གསུངས་སོ། །འདིར་ནི་དུས་བཞི་མཉམ་པ་ཉིད་ཀྱི་དབྱིངས་ནས་སྐུ་གསུང་ཐུགས་ལྷུན་སྟུག་པོ་བཀོད་པའི་རྒྱན་ཉིད་དུ་བཞུགས་པར་གསུངས་ཏེ། ཇི་སྲིད་གདུལ་བྱ་གཞན་སྣང་གི་ཁམས་སུའང་ཚུལ་དེ་ལྟ་བུ་ལ་མི་འདའ་བའི་ཆོས་ཉིད་དུ་གྲུབ་ཀྱི་བར་དེ་སྲིད་དུ་སྙིང་པོའི་བསྟ ན་པ་རྒྱ་མཚོའི་བྱིན་རླབས་ཀྱིས་ད ངོས་བརྒྱུད་གང་རུང་ནས་དོན་མཛད་ཚུལ་ལ་རྒྱ་གར་དུ་སློབ་དཔོན་སེང་གེ་བཟང་པོ་དང་། བོད་ན་ཞང་ཤེས་རབ་བླ་མ་སོགས་ནི་རྟེན་ཅན་གྱིས་དོན་བྱེད་པར་བཞེད། རྒྱ་གར་དུ་སློབ་དཔོན་ཀླུ་སྒྲུབ་དང་བོད་དུ་རོང་ཟོམ་ཆོས་བཟང་སོགས་ནི་རྟེན་མེད་ཀྱིས་དོན་བྱེད་པར་བཞེད། རྒྱ་གར་དུ་སློབ་དཔོན་ཤྲཱི་སེང་ཧ་དང་བོད་ན་ཟུར་ཆུང་ཤེས་རབ་གྲགས་པ་སོགས་ནི་ངོ་བོ་ཉིད་ཀྱིས་དོན་བྱེད་པར་བཞེད་དེ། ཆོས་རྗེ་སྨྱོས་སྟོན་སྐུ་མཆེད་ཐུགས་སྲས་དང་བཅས་པའི་བཞེད་པ་གཞིར་བཟུང་ལ་འཐད་མིན་གྱི་ཆ་རྣམས་བརྟག་པར་འོས་སོ། ། གསུམ་པ་ནི། འཕགས་པ་རྟོག་པའི་རྒྱལ་པོ་ཞེས་སོགས་སྨོས་ཏེ། དེའང་སྤར་ཁབ་ལས་ནི། ངོ་བོ་ཉིད་དང་། འཁྲུལ་བ་དང་། ལོག་པ་དང་། རྣམ་པ་དང་། ཡང་དག་པའི་རྟོག་པ་ལ་སོགས་པ་འདི་དག་ནི་ཡང་དག་པ་ལ་ངེས་པར་བྱེད་པའི་ཕྱིར་ཡང་དག་པའི་རྟོག་
པའོ། །དེའི་ཕྱིར་རྒྱལ་པོ་ཞེས་བྱའོ་ཞེས་བཤད། ཟུར་བྱམས་པ་སེངྒེ་ནི་སྒྱུ་དྲྭ་རྒྱུད་ཀྱི་མཚན་གྱི་རྣམ་གྲངས་སུ་བཞེད་དོ། །སྤྱིར་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལ་རྒྱ་གར་ན་ལེའུ་འབུམ་ཕྲག་གཅིག་བཞུགས་པར་གྲགས་ཤིང་། དེའི་བཅུད་དམ་ཉིང་ཁུར་གྱུར་པའི་རྒྱུད་འདི་ལ་མཚན་ཉིད་དང་རྒྱུད་ཐམས་ཅད་ཀྱི་ལུང་གི་སྤྱི་ཞེས་སྨོས་པ་ནི་ཆེ་བའི་ངོས་ནས་བཏགས་ཏེ་ངོ་བོ་ནི་གཉིས་མེད་ཀྱི་རྒྱུད་དུ་བཞག་པར་བྱའོ། །གླེགས་བམ་ཀྱི་མཐར་རྒྱ་གར་གྱི་མཁན་པོ་ཞེས་སོགས་འབྱུང་བ་ནི་འགྱུར་བྱང་སྟེ། སྤྱིར་རྩ་རྒྱུད་འདི་ལ་བོད་དུ་ལོ་པཎ་བསྡེབས་པའི་གཞི་འགྱུར་གསུམ་དང་། པཎྜི་ཏ་མེད་པའི་རྩལ་འགྱུར་གཉིས་ཏེ་འགྱུར་ལྔ་བྱུང་བར་གྲགས་པ་ལས་འདི་ནི་བི་མ་ལ་དང་རྨ་གཉགས་ཐུན་མོང་གི་ཕྱི་འགྱུར་དེ་ཡིན་ཏེ་ཀུན་མཁྱེན་ཆོས་རྗེའི་དགོངས་པའོ། །རྒྱལ་བ་གཡུང་གིས་མངའ་བདག་རལ་པ་ཅན་གྱི་དུས་སུ་རྨས་འགྱུར་ཞེས་བཞེད་དོ། །དེ་ལྟར་མཚོན་བྱ་རང་བཞིན་གྱི་རྒྱུད་བློ་མཐའ་གང་གིས་ཀྱང་མ་རེག་པའི་དོན་འདི་ཆོས་ཉིད་རང་མཚན་གྱི་དབང་དུ་ན་མངོན་རྟོགས་ཀྱི་བརྗོད་རིམ་གང་ལྟར་འགོད་ཀྱང་མཐར་འཛིན་གྱི་བློ་མི་འདོར་བའི་ཕྱིར་བརྒལ་བརྟག་གི་ངལ་བ་དོན་མེད་ནའང་། ཐོག་མར་དོན་སྤྱི་ཙམ་བློ་ལ་བཀོད་དེ་དད་པས་དྲངས་པའི་ངེས་ཤེས་བསྐྱེད་པས་བརྒྱུད་ནས་བརྗོད་བྱ་ཟབ་མོའི་དོན་རྣམས་རིམ་གྱིས་རྟོགས་པ་གདོན་མི་ཟ་བར་གྲུབ་པ་རྒྱུ་མཚན་དུ་བྱས་ནས་བླ་མེད་ཀྱི་ཐེག་པའི་རྣམ་བཞག་ཞིབ་ལམ་དུ་འདྲེན་མི་རུང་བ་ལྟ་བུར་རློམ་པའི་བློ་ལྡན་དག་གི་ཤེས་ངོར་མཚར་ཆོས་སུ་སྤྲོ་བར་ཟད་ཀྱི་དཔྱད་པའི་སྒོ་མཐའ་དག་རྫོགས་པའི་དཔྱིས་འབྱིན་པ་ལ་ནི་ཐམས་ཅད་མཁྱེན་པའང་ཚིག་གིས་དབུལ་བར་འགྱུར་ན་འདི་ཙམ་ལ་ཡིད་རྟོན་པར་ཡང་མི་བྱའོ། །སླར་སྨྲས་པ། བརྒྱད་ལྡན་ཡན་ལག་མ་ཉམས་སྙིང་པོའི་བཅུད། །རིམ་བརྒྱུད་འོད་ཀྱི་ཤིང་རྟ་ལ་ཞུགས་ཏེ། །གསང་འཛིན་བེའུའི་སྦུབས་རྒྱ ར་འཁྱིལ་བའི་གཟུགས། །རྡོ་རྗེ་རྩེ་མོའི་སྲོག་ཏུ་བརྟན་པ་ལས། །འདི་ན་ལྷན་སྐྱེས་མོས་ཁམས་ཁྱེའུ་ཆུང་གིས། །བརྒལ་བརྟགས་འཁོར་ལོར་རྩེན་པར་བོས་པའི་ཚེ། །ཀུན་རིག་སྐྱེས་བུ་གཞོན་ནུ་རོལ་པའི་གར། །གསང་
བཅུད་སྙིང་གི་ཐིག་ལེར་མངའ་གསོལ་ཏོ། །དེ་ཕྱིར་སྒྲིབ་བྲལ་རྡོ་རྗེའི་ཕོ་ཉ་ཡིས། །ཕྱག་རྒྱའི་དབྱིངས་སུ་ཆོས་ཀུན་བསྡོམས་གྱུར་ཀྱང་། །རགས་པའི་ཀུན་རྟོག་འགྱུ་བས་གཉུག་མའི་ལྷའི། །གཟི་ཉམས་སྐལ་བ་ངན་འདི་བདག་གིས་ཉེས། །ཀྱེ་མ་འདོད་ལྷའི་གྲོང་ནས་མ་གཡོས་ཤིང་། །རྒོལ་བར་གྲགས་པའི་ལྟོ་བར་མ་འགྱིངས་པར། །ཐར་སྲོག་འཕྲོག་ལ་བརྩོན་པའི་མདའ་ལྔའི་དཔུང་། །ཁོ་བོའི་སྙིང་གི་ཁང་བུར་ཡིབས་ཏེ་འདུག །དེ་ཚེ་བརྩེ་བའི་གར་གྱི་མདུང་ཁྱིམ་ཅན། །ཐབས་མཁས་འཇུག་པས་བོད་བུམ་གཟུགས་བརྫུས་ཏེ། །རྒོལ་བའི་ཟླ་བོར་འབྱོན་ལ་མངོན་ཕྱོགས་ཀྱང་། །རྡུལ་མངས་འཁོར་ལོའི་གཟེགས་མས་འཚུབ་ཀྱིས་དོགས། །དེ་ལྟའི་མོད་ལ་སྲོད་ཀྱི་ཕྲ་མེན་མས། །ཉི་གཞོན་དྲན་པའི་སྐྱེས་བུ་མྱོས་བཅུག་སྟེ། །བོད་སྐྱོང་བརྟན་མའི་ཡལ་གམ་ཉམས་དོགས་པའི། །མཐར་འཛིན་རི་དྭགས་གཟུགས་ཅན་དེང་འདིར་ངོམ། །དེང་ནས་ཆོས་ཀུན་ཐིག་ལེར་མ་བཟླུམ་བར། །ཐོས་བསམ་པདྨོའི་གར་ལས་མྱུར་འོངས་པའི། །སྙི ང་པོའི་ཟིལ་མངར་འཛུམ་ལ་རྩེན་སླད་དུ། །རྩོམ་ཐོབ་རྣམ་དཀར་སྲིད་འདི་དམིགས་བཟུང་ངོ་། །ནམ་ཞིག་བརྟན་གཡོའི་སྒྲ་ཀུན་མི་ཤིགས་པའི། །བདེ་སྟོང་སྔགས་ཀྱི་ཐིག་ལེར་ཡོངས་བསྡོམས་ཤིང་། །སྙིང་ག་རིན་ཆེན་གསང་བའི་འཁོར་ལོའི་སྦུབས། །ཀུན་མཉམ་རྡོ་རྗེ་རྣོན་པོར་བྱང་ཆུབ་ཤོག །ཅེས་དཔལ་གསང་བའི་༼སྙིང་པོའི་༽རྒྱུད་འགྲེལ་གསེར་གྱི་ལྡེ་མ ིག་གིས་ཟབ་མོའི་སྒོ་བ རྒྱ་འབྱེད་པའི་དཀའ་བའི་གནད་ལ་བརྒལ་བརྟག་གི་རིམ་པ་སྤྲོས་པ་འོད་ཀྱི་མཚོན་ཆ་ཞེས་བྱ་འདི་ནི་སྔོན་དུས་རང་ལོ་བཅུ་གསུམ་པའི་ཐོག་རྣམ་འདྲེན་རྗེ་བཙུན་དམ་པ་ཤཱི་ལ་མ་ཎིའི་ཞལ་སྔ་ནས་ཚུལ་འདི་ནོད་པའི་སྐལ་བཟང་དུ་གྱུར་ཅིང་ཕྱིས་རང་ལོ་བཅུ་དགུ་པའི་དུས་ཁོ་བོ་ཅག་གི་འདྲེན་པ་རྒྱུད་སྡེའི་གནས་ལ་སྦྱངས་པས་མཁས་པའི་གོ་འཕང་བསྙེས་ཤིང་། འཁོར་ལོའི་ལྷ་ལ་བསྙེན་པ་ལས་སུ་རུང་བ་རིམ་གཉིས་ཀྱི་རྟོགས་པའི་དྲོད་ཐོབ་པའི་རྣལ་འབྱོར་པ་ཆེན་པོ་འཇམ་དཔལ་བདེ་བའི་ཉི་མས་སྒྱུ་འཕྲུ ལ་ཐུགས་ཀྱི་ཐེག་པ་བཅུ་ཕྲག་ཟུང་གི་བཤད་པའི་དགའ་སྟོན་གྱི་བཀའ་དྲིན་ཐོབ་པ་ན། བླ་མ་དམ་པ་དཀོན་མཆོག་དཔལ་ལྡན་དང་རྡོ་རྗེའི་མཆེད་བློ་གྲོས་དཔལ་འབྱོར་སོགས་ཀྱིས་ཡི་གེའི་གྲོགས་
དག་མཛད་པས་མཚམས་སྦྱར་ཏེ་དཀྱིལ་འཁོར་རྒྱ་མཚོའི་ཁྱབ་བདག་རྡོ་རྗེ་འཆང་དྷརྨ་བཛྲ་སོགས་ཀྱི་ཞབས་རྡུལ་སྤྱི་བོར་རེག་པའི་བཀའི་འབངས་བརྡ་སྨྱོས་ཀྱི་བཙུན་གཟུགས་ངག་དབང་ཆོས་ཀྱི་གྲགས་པ་ཞེས་འབོད་པས་མདོ་སྨད་སའི་ཐིག་ལེ་ཐུབ་བསྟན་བཤད་སྒྲུབ་ཡིད་བཞིན་མཆོག་གླིང་གི་ཆོས་གྲྭ་ཆེན་པོར་མེ་ཕོ་སྟག་གི་ལོའི་རྒྱལ་ཟླའི་ཡར་ཚེས་བཟང་པོའི་སྔ་ཆར་རྫོགས་པར་བགྱིས་པའི་ཡིག་རིས་སོར་རྩེས་འཕྲུལ་བ་པོ་ནི་ཉེར་གནས་བློ་གྲོས་ཐོགས་མེད་ཀྱིས་མཛད་པ་སྟེ། འདིས་ཀྱང་བློ་གསར་རྣམས་རྟོག་གེའི་གཡང་སར་མི་འཕྱན་པའི་རྒྱུར་གྱུར་ཅིག། །།