གཉིས་པ་རང་ལུགས་བཤད་པ།
གཉིས་པ་རང་ལུགས་བཤད་པ་ལ།
གཟུགས་ཀྱི་མཚན་ཉིད་ཡོད་དེ། གཟུགས་རུང་དེ་ཡིན་པའི་ཕྱིར། གཟུགས་དང་རྡུལ་གྲུབ་ཀྱི་བེམ་པོ་གཉིས་དོན་གཅིགསྤྱིར་གཞི་གྲུབ་ན་བེམ་ཤེས་གང་རུང་ཡིན་པས་ཁྱབ་པོ། །འཆད་འགྱུར་གྱི་སྐབས་དུ་མར་མངོན་ཚད་ཀྱི་ཆོས་སྐད་ཀྱི་དབང་དུ་བྱས་ནས་བཤད་ཡོད་པ་ཤེས་པར་བྱའོ། །གཟུགས་ལ་དབྱེ་ན་གཉིས་ཡོད་དེ། ཕྱིའི་གཟུགས་དང་ནང་གི་གཟུགས་གཉིས་ཡོད་པའི་ཕྱིར། ཕྱིའི་གཟུགས་ཀྱི་མཚན་ཉིད་ཡོད་དེ། སྐྱེས་བུའི་ཤེས་རྒྱུད་ཀྱིས་མ་བསྡུས་པའི་གཟུགས་དེ་ཡིན་པའི་ཕྱིར། ཕྱིའི་གཟུགས་ལ་དབྱེ་ན་ལྔ་ཡོད་དེ། གཟུགས་ཀྱི་སྐྱེ་མཆེད་དང༌། སྒྲའི་སྐྱེ་མཆེད་དང༌། དྲིའི་སྐྱེ་མཆེད་དང༌། རོའི་སྐྱེ་མཆེད་དང༌། རེག་བྱའི་སྐྱེ་མཆེད་དང་ལྔ་ཡོད་པའི་ཕྱིར། གཟུགས་ཀྱི་སྐྱེ་མཆེད་ཀྱི་མཚན་ཉིད་ཡོད་དེ། མིག་ཤེས་ཀྱི་གཟུང་བྱ་དེ་ཡིན་པའི་ཕྱིར། གཟུགས་ཀྱི་སྐྱེ་མཆེད་ལ་དབྱེ་ན་གཉིས་ཡོད་དེ། དབྱིབས་དང་ཁ་དོག་གཉིས་ཡོད་པའི་ཕྱིར། དབྱིབས་ཀྱི་མཚན་ཉིད་ཡོད་དེ། དབྱིབས་སུ་རུང་བ་དེ་ཡིན་པའི་ཕྱིར། དབྱེ་ན་བརྒྱད་ཡོད་དེ། རིང་བོ་དང་ཐུང་ངུ༌། མཐོ་བ་དང་དམའ་བ། ལྷམ་པ་དང་ཟླུམ་པོ། ཕྱ་ལེ་བ་དང་ཕྱ་ལེ་བ་མ་ཡིན་པ་དང་བརྒྱད་ཡོད་པའི་ཕྱིར། མཐོ་བ་ནི་རི་རབ་ཀྱི་དབྱིབས་ལྟ་བུའོ། །དམའ་བ་ནི་ས་གཞིའི་དབྱིབས་ལྟ་བུའོ། །ལྷམ་པ་བཞག་དུ་ཡོད་དེ། གྲུ་བཞི་ལྟ་བུའི་དབྱིབས་དེ་ཡིན་པའི་ཕྱིར། ཟླུམ་པོ་བཞག་དུ་ཡོད་དེ། གོར་གོར་རམ་སྒོ་ང་ལྟ་བུའི་དབྱིབས་དེ་ཡིན་པའི་ཕྱིར། ཕྱ་ལེ་བ་བཞག་དུ་ཡོད་དེ། ངོས་མཉམ་པའི་དབྱིབས་དེ་ཡིན་པའི་ཕྱིར། ཕྱ་ལེ་བ་མ་ཡིན་པ་བཞག་དུ་ཡོད་དེ། ངོས་མི་མཉམ་པའི་དབྱིབས་དེ་ཡིན་པའི་ཕྱིར།དབྱིབས་བརྒྱད་དུ་མ་འདུས་པའི་དབྱིབས་མེད་དོ། །ཁ་དོག་གི་མཚན་ཉིད་ཡོད་དེ། མདོག་དུ་རུང་བ་དེ་ཡིན་པའི་ཕྱིར། དབྱེ་ན་གཉིས་ཡོད་དེ། རྩ་བའི་ཁ་དོག་དང་ཡན་ལག་གི་ཁ་དོག་གཉིས་ཡོད་པའི་ཕྱིར། རྩ་བའི་ཁ་དོག་ལ་དབྱེ་ན་བཞི་ཡོད་དེ། སྔོན་པོ་དང་སེར་པོ། དཀར་པོ་དང་དམར་པོ་བཞི་ཡོད་པའི་ཕྱིར། ཡན་ལག་གི་ཁ་དོག་ལ་དབྱེ་ན་བརྒྱད་ཡོད་དེ། སྤྲིན་དང་དུ་བ། རྡུལ་དང་ཁུག་སྣ། སྣང་བ་དང་མུན་པ། གྲིབ་མ་དང་ཉི་མའི་འོད་ཟེར་བརྒྱད་ཡོད་པའི་ཕྱིར། རྡུལ་ནི་རྡུལ་སྤྱི་མ་ཡིན་པར་རླུང་ཚུབ་ཀྱི་རྡུལ་ལྟ་བུའོ། །ཁུག་སྣ་ནི། ལྷོ་འུར་མའམ་ཐལ་ཆར་ལྟ་བུའོ། །གྲིབ་མ་ནི། རང་འགྲེལ་ལས། གྲིབ་མ་ནི་གང་ན་གཟུགས་རྣམས་སྣང་བའོ། །ཞེས་སོ། །ཉི་མ་ནི། ཉི་འོད་དོ། །སྣང་བ་ནི། ཟླ་བ་དང་སྐར་མ་དང་ནོར་བུའི་འོད་ལྟ་བུའོ། །མུན་པ་ནི་གཟུགས་མི་སྣང་བར་བྱེད་པ་ཁ་དོག་ནག་པོ་དཔེར་ན་མཚན་མོའི་མུན་པ་ལྟ་བུའོ། །དེ་བཅུ་གཉིས་སུ་མ་འདུས་པའི་ཁ་དོག་དུ་མ་ཡོད་དེ། ནག་པོ་དང༌། ལྗང་ཁུ་དང༌། དུར་ཁ་དང༌། སྐྱ་བོ་སོགས་དུ་མ་ཡོད་དོ། །
གཟུགས་ཀྱི་སྐྱེ་མཆེད་ལ་དབྱེ་བ་འཇོག་ཚུལ་དེ་ལྟར་འཐད་དེ། མཛོད་ལས། གཟུགས་རྣམ་གཉིས་དང་རྣམ་ཉི་ཤུ། །ཞེས་དང༌། རྣམ་གྲངས་མདོ་སློབ་ལས། སྔོ་སེར་དཀར་དམར་རིང་ཐུང་དང༌། །ལྷམ་པ་ཟླུམ་པོ་མཐོ་དམའ་དང༌། །ཕྱ་ལེ་ཕྱ་ལེ་མ་ཡིན་དང༌། །སྤྲིན་དང་དུ་བ་རྡུལ་སྣ་དང༌། །གྲིབ་མ་ཉི་མ་སྣང་མུན་ནོ། །ཞེས་གསུངས་སོ། །མངོན་པ་ཀུན་བཏུས་ལྟར་ན། གཟུགས་ཀྱི་སྐྱེ་མཆེད་ལ་དབྱེ་བ་ཉི་ཤུ་རྩ་ལྔ་ཡོད་དེ། དེ་ཉིད་ལས། འདི་ལྟ་སྟེ། སྔོན་པོ་དང་སེར་པོ་དང་དམར་པོ་དང་དཀར་པོ་དང་རིང་པོ་དང་ཐུང་ངུ་དང་ལྷམ་པ་དང་ཟླུམ་པོ་དང་རྡུལ་ཕྲ་མོ་དང་རགས་པ་དང་ཕྱ་ལེ་བ་དང་ཕྱེ་ལེ་བ་མ་ཡིན་པ་དང་མཐོན་པོ་དང་དམའ་བ་དང་གྲིབ་མ་དང་ཉི་མ་དང་སྣང་བ་དང་མུན་པ་དང༌། སྤྲིན་དང་དུ་བ་དང་རྡུལ་དང་ཁུག་སྣ་དང་མངོན་པར་སྐབས་ཡོད་པ་དང༌། རྣམ་པར་རིག་བྱེད་དང་ནམ་མཁའ་ཁ་དོག་གཅིག་པའོ། །ཞེས་གསུངས་སོ། །ཁ་དོག་དང་དབྱིབས་གཉིས་ལ་ཡིན་མིན་གྱི་མུ་བཞི་ཡོད་དེ། མུ་དང་པོ་ནི། མཛོད་རང་འགྲེལ་ལས། གཟུགས་ཀྱི་སྐྱེ་མཆེད་དང་ཁ་དོག་ཏུ་ཡོད་ལ། དབྱིབས་སུ་མེད་པ་ཡང་ཡོད་དེ། སྔོན་པོ་དང་སེར་པོ་དང་དམར་པོ་དང་དཀར་པོ་དང་གྲིབ་མ་དང་ཉི་མ་དང་སྣང་བ་དང་མུན་པ་ཞེས་བྱའོ། །ཞེས་གསུངས་སོ། །མུ་གཉིས་པ་ནི། རང་འགྲེལ་ལས། དབྱིབས་སུ་ཡོད་ལ་ཁ་དོག་མེད་པ་ཡང་ཡོད་དེ། རིང་པོ་ལ་སོགས་པའི་ཕྱོགས་ལུས་ཀྱི་རྣམ་པ་རིག་བྱེད་ཀྱི་ངོ་བོ་ཉིད་དོ། །ཞེས་གསུངས་སོ། མུ་གསུམ་པ་ཡོད་དེ། རང་འགྲེལ་ལས། གཉིས་ཀར་ཡོད་པ་ཡང་ཡོད་དེ། གཟུགས་ཀྱི་སྐྱེ་མཆེད་ལྷག་མའོ། །ཞེས་དང༌། རྒྱལ་སྲས་མ་ལས། གཟུགས་ཀྱི་སྐྱེ་མཆེད་ལྷག་མའོ་ཞེས་བྱ་བ་ནི་རིང་པོ་ལ་སོགས་པ་བསལ་བ་གང་ཡིན་པ་དང་སྤྲིན་དང་དུ་བ་དང་རྡུལ་དང་ཁུག་སྣ་དག་གོ །ཞེས་གསུངས་པའི་ཕྱིར་རོ། །མུ་བཞི་བ་ནི། འབྱུང་བཞི་ལྟ་བུའོ། །གཟུགས་ཀྱི་སྐྱེ་མཆེད་དང༌། གཟུགས་ཀྱི་ཁམས་དང༌། བསྟན་ཡོད་ཀྱི་གཟུགས་གསུམ་དོན་གཅིག དབྱིབས་དང་ཁ་དོག་གཉིས་ལ་བསྟན་ཡོད་ཀྱི་གཟུགས་ཞེས་བརྗོད་པའི་རྒྱུ་མཚན་ཡོད་དེ། མིག་གི་ཡུལ་དུ་བསྟན་དུ་ཡོད་པས་ན་དེ་ལྟར་བརྗོད་པའི་ཕྱིར། མཛོད་རྩ་ལས། བསྟན་ཡོད་འདིར་ནི་གཟུགས་གཅིག་པུ། །ཞེས་སོ། །སྒྲའི་སྐྱེ་མཆེད་ཀྱི་མཚན་ཉིད་ཡོད་དེ། རྣ་ཤེས་ཀྱི་གཟུང་བྱ་དེ་ཡིན་པའི་ཕྱིར། དེ་ལ་རྩ་བའི་སྒོ་ནས་དབྱེ་ན་གཉིས་ཡོད་དེ། ཟིན་པའི་འབྱུང་བ་ལས་གྱུར་བའི་སྒྲ་དང་མ་ཟིན་པའི་འབྱུང་བ་ལས་གྱུར་བའི་སྒྲ་གཉིས་ཡོད་པའི་ཕྱིར། དང་པོ་ཡོད་དེ། སྐྱེས་བུས་ཐལ་མོ་བརྡབ་པའི་སྒྲ་ལྟ་བུའོ། །གཉིས་པ་ཡོད་དེ། ཆུ་སྒྲ་ལྟ་བུའོ། །ཡན་ལག་གི་སྒོས་དབྱེ་ན་བཞི་ཡོད་དེ། དེ་རེ་རེ་ལ་སེམས་ཅན་དུ་སྟོན་མི་སྟོན་གཉིས་ཏེ་བཞི་ཡོད་པའི་ཕྱིར། སེམས་ཅན་དུ་སྟོན་པའི་སྒྲ་དང་རྗོད་བྱེད་ཀྱི་སྒྲ་གཉིས་དོན་གཅིག མཚན་གཞི་ནི་ཡོད་དེ། བདེ་གཤེགས་སྙིང་པོ་ཞེས་བརྗོད་པའི་སྒྲ་ལྟ་བུའོ། །སེམས་ཅན་དུ་མི་སྟོན་པའི་སྒྲ་དང་རྗོད་བྱེད་ཀྱི་སྒྲ་མ་ཡིན་པའི་སྒྲ་གཉིས་དོན་གཅིག མཚན་གཞི་ནི། རྔ་སྒྲ་དང་དུང་སྒྲ་ལྟ་བུའོ། །ཉིང་ལག་གི་སྒོ་ནས་བརྒྱད་ཡོད་དེ། སྔ་མ་བཞི་པོ་རེ་རེ་ལ་སྙན་མི་སྙན་གཉིས་རེ་ཡོད་པའི་ཕྱིར་རོ། །སྙན་པའི་སྒྲ་ནི། སྐྱེས་བུས་ཆོས་འཆད་པའི་སྒྲ་ལྟ་བུའོ། །མི་སྙན་པའི་སྒྲ་ནི་སྐྱེས་བུའི་ཚིག་རྩུབ་སྨྲ་བའི་སྒྲ་ལྟ་བུའོ། །སྒྲའི་སྐྱེ་མཆེད་ལ་དབྱེ་བ་འཇོག་ཚུལ་དེ་ལྟར་འཐད་དེ། མཛོད་རྩ་ལས། སྒྲ་ནི་རྣམ་པ་བརྒྱད་ཡོད་དེ། །ཞེས་དང༌། རྣམ་གྲངས་མདོ་སློབ་ལས། ཟིན་དང་མ་ཟིན་དེ་གཉིས་ལ། །སྟོན་དང་མི་སྟོན་གཉིས་གཉིས་བཞི། །དེ་ཡང་སྙན་དང་མི་སྙན་བརྒྱད། །ཅེས་གསུངས་སོ། ། རྗོད་བྱེད་ཀྱི་སྒྲའི་དབྱེ་བ་མིང་ཚིག་སོགས་འཆད་པར་འགྱུར་རོ། །དྲིའི་སྐྱེ་མཆེད་ཀྱི་མཚན་ཉིད་ཡོད་དེ། སྣ་ཤེས་ཀྱི་མྱོང་བྱ་དེ་ཡིན་པའི་ཕྱིར། དེ་ལ་རྩ་བའི་དབྱེ་བ་གཉིས་ཡོད་དེ། དྲི་ཞིམ་པ་དང་མི་ཞིམ་པ་གཉིས་ཡོད་པའི་ཕྱིར། ཡན་ལག་གི་དབྱེ་ན་དེ་རེ་རེ་ལ་མཉམ་མི་མཉམ་གཉིས་ཏེ་བཞི་ཡོད་པའི་ཕྱིར། ཡང་ན་དྲི་ཞིམ་མི་ཞིམ་རེ་རེ་ལ་ལྷན་སྐྱེས་དང་སྦྱར་བྱུང་གི་དྲི་གཉིས་རེ་སྟེ་བཞི་ཡོད་པའི་ཕྱིར། །ཞིམ་པའི་ལྷན་སྐྱེས་ཀྱི་དྲི་བཞག་ཏུ་ཡོད་དེ། ཙནྡན་གྱི་དྲི་ལྟ་བུའོ། །མི་ཞིམ་པའི་ལྷན་སྐྱེས་ཀྱི་དྲི་བཞག་དུ་ཡོད་དེ། མུ་ཟིའི་དྲི་ལྟ་བུའོ། །ཞིམ་པའི་སྦྱར་བྱུང་གི་དྲི་བཞག་དུ་ཡོད་དེ། སྦྱར་སྤོས་ཀྱི་དྲི་ལྟ་བུའོ། །མཛོད་ལས། དྲི་རྣམ་བཞི། །ཞེས་དང༌། རྣམ་གྲངས་མདོ་སློབ་ལས། དྲི་ཞིམ་མི་ཞིམ་མཉམ་མི་མཉམ། །ཡང་ན་ལྷན་སྐྱེས་སྦྱར་བྱུང་བཞི། །ཞེས་གསུངས་སོ། །རོའི་སྐྱེ་མཆེད་ཀྱི་མཚན་ཉིད་ཡོད་དེ། ལྕེ་ཤེས་ཀྱི་མྱོང་བྱ་དེ་ཡིན་པའི་ཕྱིར། རོ་ལ་དབྱེ་ན་དྲུག་ཡོད་དེ། མངར་བ་དང་སྐྱུར་བ། ཁ་བ་དང་བསྐ་བ། ཚྭ་བ་དང་ལན་ཚྭ་བ་དང་དྲུག་ཡོད་པའི་ཕྱིར། བུ་རམ་གྱི་རོ་དང༌། འོ་མའི་རོ་ལྟ་བུ་མངར་བ་དང༌། སྟར་བུ་ལྟ་བུུ་སྐྱུར་བ་དང༌། ཏིག་ཏ་ལྟ་བུ་ཁ་བ་དང༌། ཨ་རུ་རའི་རོ་ལྟ་བུ་བསྐ་བ་དང༌། པི་པི་ལང་ལྟ་བུ་ཚ་བ་དང༌། ཚྭ་ལྟ་བུ་ལན་ཚྭ་བའོ། །རོ་ལ་དབྱེ་བ་འཇོག་ཚུལ་དེ་ལྟར་འཐད་དེ། མཛོད་ལས། རོ་ནི་རྣམ་དྲུག །ཅེས་དང༌། རྣམ་གྲངས་མདོ་སློབ་ལས། མངར་སྐྱུར་ལན་ཚྭ་ཁ་ཚ་བསྐ །རོ་དྲུག ཅེས་གསུངས་སོ། །རེག་བྱའི་སྐྱེ་མཆེད་ཀྱི་མཚན་ཉིད་ཡོད་དེ། ལུས་ཤེས་ཀྱི་མྱོང་བྱ་དེ་ཡིན་པའི་ཕྱིར། རེག་བྱ་ལ་དབྱེ་ན་གཉིས་ཡོད་དེ། འབྱུང་བར་གྱུར་བའི་རེག་བྱ་དང༌། །འབྱུང་འགྱུར་དུ་གྱུར་བའི་རེག་བྱ་གཉིས་ཡོད་པའི་ཕྱིར། འབྱུང་བར་གྱུར་བའི་རེག་བྱ་ལ་དབྱེ་ན་བཞི་ཡོད་དེ། ས་ཆུ་མེ་རླུང་བཞི་ཡོད་པའི་ཕྱིར། སའི་མཚན་ཉིད་ཡོད་དེ། སྲ་ཞིང་འཐས་པའི་འབྱུང་བ་དེ་ཡིན་པའི་ཕྱིར། ཆུའི་མཚན་ཉིད་ཡོད་དེ། རླན་ཞིང་གཤེར་བའི་འབྱུང་བ་དེ་ཡིན་པའི་ཕྱིར། མེའི་མཚན་ཉིད་ཡོད་དེ། ཚ་ཞིང་སྲེག་པའི་འབྱུང་བ་དེ་ཡིན་པའི་ཕྱིར། རླུང་གི་མཚན་ཉིད་ཡོད་དེ། ཡང་ཞིང་གཡོ་བའི་འབྱུང་བ་དེ་ཡིན་པའི་ཕྱིར། འབྱུང་བཞིའི་མཚན་ཉིད་འཇོག་ཚུལ་དེ་ལྟར་འཐད་དེ། རྒྱུད་བླའི་འགྲེལ་བ་ལེགས་བཤད་ཉི་མའི་འོད་ཟེར་ལས། སའི་མཚན་ཉིད་སྲ་བ་དང༌། ཆུའི་མཚན་ཉིད་གཤེར་བ་དང༌། མེའི་མཚན་ཉིད་དྲོ་བ་དང༌། རླུང་གི་མཚན་ཉིད་གཡོ་བ་གང་ཡིན་པ། ཞེས་གསུངས་སོ། །འབྱུང་འགྱུར་གྱི་རེག་བྱ་ལ་དབྱེ་ན་བདུན་ཡོད་དེ། འཇམ་པ་དང་རྩུབ་པ། ལྕི་བ་དང་ཡང་བ། གྲང་བ་དང་བཀྲེས་པ། སྐོམ་པ་དང་བདུན་པོ་དེ་ཡིན་པའི་ཕྱིར། དེ་ལྟར་རེག་བྱ་ལ་དབྱེ་ན་བཅུ་གཅིག་ཡོད་དེ། མཛོད་ལས། རེག་བྱ་བཅུ་གཅིག་བདག་ཉིད་དོ། །ཞེས་དང༌། རྣམ་གྲངས་མདོ་སློབ་ལས། འབྱུང་བཞི་འཇམ་རྩུབ་དང༌། ལྕི་ཡང་གྲང་བཀྲེས་སྐོམ་རེག་བྱ། །བཅུ་གཅིག་ཏུ་ནི་བརྗོད་པ་ཡིན། །ཞེས་གསུངས་སོ། །གཉིས་པ་ནང་གི་གཟུགས་ཀྱི་མཚན་ཉིད་ཡོད་དེ། སྐྱེས་བུའི་ཤེས་རྒྱུད་ཀྱིས་བསྡུས་པའི་གཟུགས་དེ་ཡིན་པའི་ཕྱིར། ནང་གི་གཟུགས་ལ་དབྱེ་ན་ལྔ་ཡོད་དེ། མིག་གི་དབང་པོ་དང༌། རྣ་བའི་དབང་པོ་དང༌། སྣའི་དབང་པོ་དང༌། ལྕེའི་དབང་པོ་དང༌། ལུས་ཀྱི་དབང་པོ་དང་ལྔ་ཡོད་པའི་ཕྱིར་རོ། །མིག་གི་དབང་པོའི་མཚན་ཉིད་ཡོད་དེ། རང་འབྲས་མིག་ཤེས་ཀྱི་ཐུན་མོང་མ་ཡིན་པའི་བདག་རྐྱེན་བྱེད་པའི་རིགས་སུ་གནས་པའི་ནང་གི་གཟུགས་ཅན་དྭངས་བ་དེ་ཡིན་པའི་ཕྱིར། མིག་གི་དབང་པོ་དང་མིག་གི་ཁམས་གཉིས་དོན་གཅིག དབྱེ་ན་རྟེན་བཅས་དེ་མཚུངས་གཉིས་རེ་ཡོད། རྟེན་བཅས་ཀྱི་མིག་དབང་བཞག་དུ་ཡོད་དེ། དཀར་པོ་འཛིན་བཞིན་པའི་མིག་དབང་ལྟ་བུའོ། །དེ་མཚུངས་ཀྱི་མིག་དབང་བཞག་དུ་ཡོད་དེ། གཉིད་ལོག་པའི་རྒྱུད་ཀྱི་མིག་དབང་ལྟ་བུའོ། །རྣ་བའི་དབང་པོའི་མཚན་ཉིད་ཡོད་དེ། རང་འབྲས་རྣ་ཤེས་ཀྱི་ཐུན་མོང་མ་ཡིན་པའི་བདག་རྐྱེན་བྱེད་པའི་རིགས་སུ་གནས་པའི་ནང་གི་གཟུགས་ཅན་དྭངས་བ་དེ་ཡིན་པའི་ཕྱིར། དབྱེ་ན་རྟེན་བཅས་དེ་མཚུངས་གཉིས། སྣའི་དབང་པོའི་མཚན་ཉིད་ཡོད་དེ། རང་འབྲས་སྣ་ཤེས་ཀྱི་ཐུན་མོང་མ་ཡིན་པའི་བདག་རྐྱེན་བྱེད་པའི་རིགས་སུ་གནས་པའི་ནང་གི་གཟུགས་ཅན་དྭངས་བ་དེ་ཡིན་པའི་ཕྱིར། དབྱེ་ན་རྟེན་བཅས་དེ་མཚུངས་གཉིས། ལྕེའི་དབང་པོའི་མཚན་ཉིད་ཡོད་དེ། རང་འབྲས་ལྕེ་ཤེས་ཀྱི་ཐུན་མོང་མ་ཡིན་པའི་བདག་རྐྱེན་བྱེད་པའི་རིགས་སུ་གནས་པའི་ནང་གི་གཟུགས་ཅན་དྭངས་བ་དེ་ཡིན་པའི་ཕྱིར། དབྱེ་ན་རྟེན་བཅས་དེ་མཚུངས་གཉིས། ལུས་ཀྱི་དབང་པོའི་མཚན་ཉིད་ཡོད་དེ། རང་འབྲས་ལུས་ཤེས་ཀྱི་ཐུན་མོང་མ་ཡིན་པའི་བདག་སྐྱེན་བྱེད་པའི་རིགས་སུ་གནས་པའི་ནང་གི་གཟུགས་ཅན་དྭངས་བ་དེ་ཡིན་པའི་ཕྱིར། དབྱེ་ན་རྟེན་བཅས་དེ་མཚུངས་གཉིས་ཡོད་པའི་ཕྱིར་རོ། །གཏན་ཚིགས་རིགས་པའི་བསྡུས་དོན་དུ་དབང་པོ་དེ་དག་གི་མཚན་ཉིད་ལ་རིགས་གནས་མ་སྦྱར་བས་དཔྱད་པར་བྱའོ། །དབང་པོ་ལྔའི་མཚན་ཉིད་འཇོག་ཚུལ་དེ་ལྟར་འཐད་དེ། མཛོད་ལས། དེ་དག་རྣམས་ཀྱི་རྣམ་ཤེས་རྟེན། །མིག་ལ་སོགས་གཟུགས་དང་བ་རྣམས། །ཞེས་གསུངས་སོ། །