གཉིས་པ་མཐའ་རགས་ཙམ་དཔྱད་པ།

གཉིས་པ་མཐའ་རགས་ཙམ་དཔྱད་པ་ལ།

གསེར་ཕྲེང་ལས་བཅུ་སྡོམ་པ་ལ་གཅིག་ཏུ་བྱས་ནས་བགྲངས་གསུངས་པའི་ཡུམ་གསུམ་གནོད་འཇོམས་ཀྱི་ལུང་ནི། ཇི་སྐད་དུ། ༡༢༤ སུམ་ཅུ་རྩ་བདུན་པ་དག་ནི། ཕྱོགས་བཅུའི་སེམས་ཅན་ཡོངས་སུ་སྨིན་པར་བྱས་ནས་ཕྱོགས་བཅུའི་སངས་རྒྱས་རྣམས་ལ་བསྙེན་བཀུར་བྱས་ཏེ། དེ་ན་མཐོང་བའི་སངས་རྒྱས་ཀྱི་ཞིང་གི་ཡོན་ཏན་གྱི་ཁྱད་པར་བཟུང་ནས་བདག་གི་སངས་རྒྱས་ཀྱི་ཞིང་དུ་བསྒྲུབས་ཏེ།དེ་ནི་སྐྱེ་བ་གཅིག་གིས་ཐོགས་པར་གནས་སོ། །ཞེས་པའོ། །ཡང་དེ་ལས་ཉན་ཐོས་ཀྱི་སྐྱེས་བུ་ཆེན་པོའི་རྣམ་རྟོག་བརྒྱད་རྣམ་འགྲེལ་དུ་ཁ་འཕངས་གསུངས་པ་ནི། ཡུམ་གསུམ་གནོད་འཇོམས་༧༣ལས། སྐྱེས་བུ་ཆེན་པོའི་རྣམ་པར་རྟོག་པ་བརྒྱད་ཅེས་བྱ་བ་ལ། ཉན་ཐོས་ཀྱི་རྣམ་པར་རྟོག་པ་རྣམས་ནི། ཇི་སྐད་དུ་རྣམ་འགྲེལ་ལས་བཤད་པ་བཞིན་ནོ། །བྱང་ཆུབ་སེམས་དཔའི་རྣམ་པར་རྟོག་པ་ནི་ནམ་ཞིག་དབུལ་བས་ཉེན་པའི་སེམས་ཅན་འབྱོར་བ་ཆེན་པོ་ལ་འཇོག་ནུས་སྙམ་དུ་རྣམ་པར་རྟོག་པ་དང༌། ཞེས་པ་ནས། འདི་དག་ནི་སྐྱེས་བུ་ཆེན་པོའི་རྣམ་པར་རྟོག་པ་བརྒྱད་དོ། །ཞེས་པའོ། །ཡང་དེ་ལས། ཞི་འཚོའི་བཤད་ཡམས་མཛད་ཅེས་པ་ནི། ཡུམ་གསུམ་གནོད་འཇོམས་༣༢༠ལས། ལྔ་བརྒྱ་པ་ཐ་མ་ཞེས་བྱ་བ་ནི། བརྒྱ་ཕྲག་ལྔ་བསྡུས་པ་ལ་ལྔ་བརྒྱ་ཞེས་བྱའོ། །དེ་བཞིན་གཤེགས་པའི་དམ་པའི་ཆོས་གནས་པའི་དུས་ནི་ལོ་ལྔ་སྟོང་ངོ་ཞེས་གསུངས་སོ། །ལོ་ལྔ་སྟོང་ལ་ཕྱེད་ཕྱེད་དུ་བཅད་དེ་ལོ་ལྔ་བརྒྱ་ལྔ་བརྒྱའི་དབང་དུ་བྱས་ལ་ལྔ་བརྒྱ་ཕྲག་བཅུ་འགྱུར་རོ། །དེ་ལ་ལེའུ་བཅུ་སྟེ། ཐོག་མར་ཁོང་དུ་ཆུད་པའི་ལེའུ་དང༌། སྒྲུབ་པའི་ལེའུ་དང༌། ལུང་གི་ལེའུ་སྟེ་ལེའུ་གསུམ་མོ། །དེ་ལ་ཁོང་དུ་ཆུད་པའི་ལེའུ་ལ་ཡང་རྣམ་པ་གསུམ་དུ་དབྱེ་སྟེ་དགྲ་བཅོམ་པའི་ལེའུ་དང༌། ཕྱིར་མི་འོང་བའི་ལེའུ་དང༌། རྒྱུན་དུ་ཞུགས་པའི་ལེའུའོ། །སྒྲུབ་པའི་ལེའུ་ལ་ཡང་རྣམ་པ་གསུམ་དུ་དབྱེ་སྟེ་ལྷག་མཐོང་གི་ལེའུ་དང༌། ཏིང་ངེ་འཛིན་གྱི་ལེའུ་དང༌། ཚུལ་ཁྲིམས་ཀྱི་ལེའུའོ། །ལུང་གི་ལེའུ་ལ་ཡང་རྣམ་པ་གསུམ་དུ་དབྱེ་སྟེ། ཆོས་མངོན་པའི་སྡེ་སྣོད་དང༌། མདོ་སྡེའི་སྡེ་སྣོད་དང༌།འདུལ་བའི་སྡེ་སྣོད་དེ་ལེའུ་དགུ་བོ་དེ་དག་དང༌། རྟགས་ཙམ་གྱི་ལེའུ་དང་བཅུར་འགྱུར་རོ། །དེ་ལ་ལེའུ་རེ་རེ་ཡང་ལོ་ལྔ་བརྒྱ་ལྔ་བརྒྱ་ཐོགས་ཏེ། དེ་ལྟར་ལེའུ་བཅུ་པོ་པ་དག་གིས་ལོ་ལྔ་བརྒྱ་ཕྲག་བཅུ་ལ་ལོ་ལྔ་སྟོང་དུ་འགྱུར་རོ། །དེ་ལ་ལྔ་བརྒྱ་ཐམས་ཅད་ཀྱི་དང་པོ་ལ་དགྲ་བཅོམ་པ་ལྔ་བརྒྱ། གཉིས་པ་ལ་ཕྱིར་མི་འོང་བ། ཞེས་པ་ནས། དགུ་བ་ལ་འདུལ་བ། ལྔ་བརྒྱ་བཅུ་པ་ལ་རྟགས་ཙམ་སྟེ། འདི་ཉིད་ལ་ལྔ་བརྒྱ་པ་ཐ་མ་ཞེས་བྱའོ། །ཁ་ཅིག་ན་རེ་མི་རྣམས་ཀྱི་ཚེའི་ཚད་ནི་ལོ་བརྒྱ་ཐུབ་སྟེ་དེ་ལ་ལོ་ལྔ་བཅུ་པ་སྔ་མ་ལ་ནི་མི་རྣམས་ཁ་དོག་དང་གཟུགས་དང་སྟོབས་དང་ཤེས་རབ་ལ་སོགས་པ་ལ་མངོན་པར་འཕེལ་བ་ཡིན་ལ། ལྔ་བཅུ་ཕྱི་མ་ལ་ནི་འགྲིབ་པ་ཡིན་ནོ། །དེ་བཞིན་དུ་དུས་ཀྱི་མཐའ་བསྟན་པ་འགྲིབ་པའི་དུས་ཀྱང་ལྔ་བཅུ་པ་ཕྱི་མ་དང་འདྲ་བས་ལྔ་བརྒྱ་པ་ཐ་མ་ཞེས་གདགས་སོ། །ཞེས་ཟེར་རོ། །འདི་མན་ཆོས་གྲགས་དཔལ་སོགས་ཀྱིས་བསྒྱུར་བཅོས་མཛད་པའི་གནོད་འཇོམས་དང་ཅོ་ནེའི་ཤིང་པར་གཉིས་ན་མེད་པས་མཆན་ཡིན་པ་འདྲའོ། །དེ་དེ་ལྟར་བྱས་ན་དེ་བཞིན་གཤེགས་པའི་བསྟན་པ་གནས་པའི་དུས་ལོ་ཉིས་སྟོང་ལྔ་བརྒྱར་འགྱུར་ཏེ། ཊཱི་ཀ་འདི་དང་འགལ་བར་སྣང་བ་ཤཱནྟི་རཀྵི་ཏའི་བསམ་པ་ནི་དགྲ་བཅོམ་པའི་ལེའུ་དང༌། ཏིང་ངེ་འཛིན་གྱི་ལེའུ་བར་ལ་དམ་པའི་ཆོས་གནས་སོ་ཞེས་བྱ་བར་བསམ་པ་ཡིན་ཏེ་འཆད་པའི་ལུགས་ལ་ཇི་སྐད་འཆད། ལ་ལ་ཇི་སྐད་དུ་འཆད་དེ། སྤྱིར་ལོ་ལྔ་སྟོང་དུ་མཐུན་ནོ། །ཞེས་གསུངས་སོ། །ཡུམ་གསུམ་གནོད་འཇོམས་དབྱིག་གཉེན་གྱིས་མཛད་ཟེར་བ་ལ་གཞན་གྱིས་གནོད་བྱེད་བརྗོད་པ་དེ་དག་གིས་མི་གནོད་ཚུལ་ཤེས་པར་བྱེད་དགོས་ལ་འདིར་མང་དུ་དོགས་ནས་མ་སྤྲོས་སོ། ། ཡུམ་གསུམ་གནོད་འཇོམས་སུ་ཤཱནྟི་རཀྵི་ཏའི་བཤད་ཚུལ་བཀོད་པར་འདོད་པ་ལྟར་ན་ཤཱནྟི་རཀྵི་ཏ་དབྱིག་གཉེན་གྱི་རྗེས་སུ་བྱུང་ན་ཡུམ་གསུམ་གནོད་འཇོམས་མཛད་པ་པོ་དབྱིག་གཉེན་མ་ཡིན་པར་འགྱུར་ལ། དུས་མཉམ་དུ་བྱུང་ན་རྒྱ་གར་ཆོས་འབྱུང་དུ། ཐོགས་མེད་སྐུ་མཆེད་ཀྱི་ཞབས་ཟིན་པ་ཙམ་དུ་བྱེད་དགོས་ཏེ། ཇི་བཞིན་ཡིན་པར་དཀའ་འོ། །ཞེས་གསུངས་པ་སོགས་ཀྱིས་ལོ་ཚིགས་ལ་དཔྱད་དགོས་སོ། །འཇམ་པའི་དབྱངས་དངོས་ཐུབ་བསྟན་དགེ་ལེགས་རྒྱ་མཚོའི་ཕར་ཕྱིན་སྣང་བའི་རྒྱན་ལས། ཞི་འཚོ་ནི་དབྱིག་གཉེན་སྐུ་གཤེགས་པའི་རྗེས་སུ་བྱུང་བ་གང་ཞིག གནོད་འཇོམས་སུ་བསྟན་པ་ལྔ་བརྒྱ་ཐ་མ་རྣམས་ཀྱི་འགྲེལ་བྱེད་པའི་སྐབས་སུ་ཞི་འཚོའི་བཤད་ཚུལ་བཀོད་པའི་ཕྱིར། ཞེས་གསུངས་སོ། །རྗེ་རིན་པོ་ཆེས་འབུམ་གྱི་གནོད་འཇོམས་མཛད་པ་པོ་ཁྲི་སྲོང་ལྡེ་བཙན་ཡིན་པ་དང༌། བུ་སྟོན་གྱིས་དཾཥྟ་སེ་ནས་བྱས་པར་འདོད་ལ། རང་ལུགས་ལ་སློབ་དཔོན་དཔའ་བོ་ཡིན་པ་འདྲ་སྟེ། བདེན་གཉིས་གསལ་བའི་ཉི་མ་ལས། སློབ་དཔོན་དཔའ་བོའི་འབུམ་ཊཱིཀ་ཏུ། ཞེས་གསུངས་པས་དེ་འབུམ་གྱི་གནོད་འཇོམས་ལས་གཞན་མ་ཡིན་པར་སྣང་བས་སོ། །དེ་ལྟར་སྟག་ཚང་ལོ་ཙཱ་བའི་གྲུབ་མཐའ་ཀུན་ཤེས་ཀྱི་རང་འགྲེལ་ལས། སྒོ་གསུམ་རྣམ་གྲངས་བཅུ་གཅིག་ཏུ་བསྡུ་བ་དཔའ་བོའི་འབུམ་ཊཱིཀ་སྟེ། ཞེས་གསུངས་སོ། །དེ་ལྟར་ན་བདེན་གཉིས་གསལ་བའི་ཉི་མར་སློབ་དཔོན་དཔའ་བོ་ཞེས་པ་མཆན་ཡིན་མིན་དང༌། ཀུན་མཁྱེན་གྱི་སྟོང་ཕྲག་ཉི་ཤུ་ལྔ་པའི་བཤད་པ་ལས། ཆོས་ཀྱི་འཁོར་ལོ་ལན་གཉིས་པ་བསྐོར་བ་མཐོང་ངོ༌། །ཞེས་བྱ་བའི་དོན་ཏོ། །ཞེས་དབུ་མ་པ་དཾཥྟ་སེ་ན་གསུངས། ཞེས་དཾཥྟ་སེ་ནས་གསུངས་སའི་གཞུང་འབུམ་གྱི་གནོད་འཇོམས་མིན་ན་དེ་གང་ཡིན་དང༌། བསྟན་འགྱུར་དཀར་ཆག་ལས། སློབ་དཔོན་དཾ་ཥྟ་སེ་ནས་མཛད་པར་གྲགས་པའི་འབུམ་གྱི་ཊཱི་ཀ་ལེའུ་ལྔ་བཅུ་ང་གཉིས་པའི་འཕྲོ་ལ་ལུས་པ་བཞུགས། འདི་དཀར་ཆག་འཕང་ཐང་མར་རྒྱལ་པོ་ཁྲི་སྲོང་ལྡེ་བཙན་གྱིས་མཛད་ཟེར་རོ། །ཞེས་གསུངས་པས་དཔྱད་དགོས་སོ། །ཡང་རྒྱ་གར་ཆོས་འབྱུང་ལས། ཤེས་རབ་ཀྱི་ཕ་རོལ་ཏུ་ཕྱིན་པ་ཉི་ཁྲི་ལྔ་སྟོང་པ་དང་བློ་གྲོས་མི་ཟད་པས་བསྟན་པ་དང༌། ས་བཅུ་པ་དང༌། ཞེས་པ་ནས། གཞན་འགྲེལ་དུ་བརྩམས་པ་ལྔ་བཅུ་ཙམ་དང༌། ཞེས་པའི་ཉི་ཁྲི་ལྔ་སྟོང་པའི་འགྲེལ་བ་དང་ཡུམ་གསུམ་གནོད་འཇོམས་འདྲ་བ་ཡིན་ནམ་དཔྱད་དགོས་ཏེ། མན་ངག་རྗེས་འབྲང་ལས། ཤེས་རབ་ཀྱི་ཕ་རོལ་ཏུ་ཕྱིན་པའི་བསྟན་པའི་སྒོ་གསུམ་དང་རྣམ་གྲངས་བཅུས་རབ་ཏུ་འཇུག་པ་བཅོམ་ལྡན་འདས་ཀྱིས་ཞེས་བྱ་བ་རྣམ་པར་བཞག་པ་ཡིན་ནོ། །ཞེས་དང༌། དེ་ལས། དེ་ལ་རྣམ་གྲངས་བཅུ་ནི།རབ་འབྱོར་ལ་བཀའ་སྩལ་ནས་བསྟན་པ་བསྡུས་པ་ཞེས་བྱ་བ་ནི་རྣམ་གྲངས་གཅིག་གོ །ཞེས་པ་ནས། དེ་ལྟར་རེ་ཞིག་ཉི་ཁྲིའི་གཞུང་འགྲེལ་གྱི་རྗེས་སུ་འབྲངས་ནས་མདོའི་རིམ་པ་རྗོད་པར་བྱེད་པ་ན་ཐམས་ཅད་ལ་ལྟོས་ནས་བྱས་པ་ཡིན་ནོ། །ཞེས་རྣམ་གྲངས་བཅུ་ལས་བཅུ་གཅིག་མ་གསུངས་པ་དང༌། དང་པོ་རབ་འབྱོར་ལ་བཀའ་བསྩལ་བ་བསྡུས་པ་ཞེས་བྱ་བའི་རྣམ་གྲངས་ཡིན་པར་གསུངས་པས་སོ། །འོན་ཀྱང་དེ་ལས། གནས་བརྟན་རབ་འབྱོར་འདི་ནི་བྱང་ཆུབ་སེམས་དཔའ་ཆེན་པོ་ཡིན་ལ། བསྐལ་བ་གྲངས་མེད་པར་བརྩམས་པའི་བསོད་ནམས་དང་ཡེ་ཤེས་ཀྱི་ཚོགས་ཟབ་མོ་ལ་བཟོད་པ་ཅན་ཞེས་བྱ་བའི་གྲགས་པ་བསྒྲགས་པ་ཞེས་བྱ་བ་ནི་ཉི་ཁྲིའི་གཞུང་འགྲེལ་ལས་སོ། །ཞེས་གསུངས་པ་ནི་ཡུམ་གསུམ་གནོད་འཇོམས་སུུ་ཚིག་ཇི་ལྟ་བ་བཞིན་ཡོད་དོ། །ཡུམ་གསུམ་གནོད་འཇོམས་མཛད་པ་པོ་ནི། སློབ་དཔོན་དབྱིག་གཉེན་ཡིན་ཏེ། ལོ་ཙཱ་བ་ཆོས་གྲགས་དཔལ་སོགས་ཀྱིས་བོད་དཔེ་བཞི་དང་རྒྱ་གར་ཡུལ་དབུས་ཀྱི་དཔེ་གཉིས་ལ་གཏུགས་ནས་བསྒྱུར་བཅོས་བྱས་པའི་ཡུམ་གསུམ་གནོད་འཇོམས་འགྱུར་བྱང་ལས། འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་དང་ཁྲི་བརྒྱད་སྟོང་བའི་ཡོངས་སུ་བཤད་པ་རྫོགས་པ་ཁྱད་པར་དུ་འཕགས་པ་དང༌། ཉི་ཁྲི་ལྔ་སྟོང་པ་ཅུང་ཟད་བཤད་པ་འདི་ནི་མདོ་སྡེ་མཐའ་དག་གི་དེ་ཁོ་ན་ཉིད་རིག་ཅིང་འཕགས་པ་བྱམས་པ་མགོན་པོའི་ཞབས་རང་ཉིད་ཀྱིས་རྗེས་སུ་བཟུང་བའི་སློབ་དཔོན་དབྱིག་གཉེན་ཞབས་ཀྱིས་མཛད་པ་རྫོགས་སོ། །ཞེས་དང༌། མདོ་ལུགས་མ་ལས། རྒྱལ་བ་བྱམས་པའི་དངོས་སློབ་ཤིང་རྟ་ཆེན་པོ་སློབ་དཔོན་དབུ་མ་པ་དབྱིག་གཉེན་གྱི་ཞལ་སྔ་ནས་ཀྱང༌། འབུམ་པ་དང་ཉི་ཁྲི་ལྔ་སྟོང་པ་དང༌། ཁྲི་བརྒྱད་སྟོང་པ་སྟེ། ཡུམ་རྒྱས་འབྲིང་བསྡུས་པ་གསུམ་གྱི་གཞུང་འགྲེལ་གནོད་འཇོམས། ཞེས་གསུངས་སོ། །དེ་དང་གསུངས་ཟིན་ཅུང་ཟད་མི་འདྲ་བ་བཀའ་བཞི་བ་བསོད་ནམས་བཟང་པོས་མཛད་པའི་ཆོས་འབྱུང་རིན་པོ་ཆེའི་གཏེར་ལས།སྒོ་གསུམ་རྣམ་གྲངས་བཅུ་གཅིག་ཏུ་སྟོན་པ་འབུམ་ཊཱིཀ་སྟེ། འདི་བུ་དོལ་གཉིས་དབྱིག་གཉེན་གྱི་གཞུང་འགྲེལ་དུ་བཞེད་ཅིང་མཁས་པ་གནས་དྲུག་པ་དང་མཁན་ཆེན་ཀུན་དགའ་དཔལ་ལ་སོགས་པ་རྒྱུ་མཚན་དུ་མའི་སྒོ་ནས་དབྱིག་གཉེན་གྱི་མིན་པར་བཞེད་དོ་ཕྱི་མ་འཐད་པར་སེམས་སོ། །ཞེས་སོ། །འོན་ཀྱང་ཉ་ཊཱིཀ་ལས། འདི་དབྱིག་གཉེན་གྱི་གཞུང་འགྲེལ་ཡིན་ཞེས་བཅོམ་རལ་དང་ཆོས་རྗེ་ཀུན་མཁྱེན་པ་གསུངས་ཤིང་བུ་སྟོན་རིན་པོ་ཆེའང་ཕུགས་ཀྱིས་དེར་བཞེད་མོད་ཀྱི། འོན་ཀྱང་འབུམ་འགྲེལ་གནོད་འཇོམས་དང་ཡུམ་གསུམ་གཞུང་འགྲེལ་གནོད་འཇོམས་མ་ཕྱེད་སྣང་ངོ༌། །ཁ་ཅིག་ཡུམ་གསུམ་འགྲེལ་བ་གནོད་འཇོམས་འདི་དཾཥྟ་སེ་ནས་མཛད་ཅིང༌། འབུམ་འགྲེལ་རྒྱལ་པོ་ཁྲི་སྲོང་ལྡེ་བཙན་གྱིས་མཛད་པར་གསལ་ཟེར་རོ། །ཞེས་གསུངས་སོ། །འདིར་བུ་སྟོན་རིན་པོ་ཆེས་འབུམ་འགྲེལ་གནོད་འཇོམས་དང་ཡུམ་གསུམ་གཞུང་འགྲེལ་གནོད་འཇོམས་ཁྱད་མ་ཕྱེད་པ་ལྟ་བུ་གསུངས་པ་ལ་དཔྱད་པར་བྱ་བ་འདི་ཡོད་དེ། བུ་སྟོན་ཆོས་འབྱུང་ལས། རྒྱལ་བའི་ཡུམ་སྟོང་ཕྲག་བརྒྱ་བའི་འགྲེལ་ཆེན་བམ་པོ་བདུན་ཅུ་རྩ་བརྒྱད་ཅུང་ཟད་མ་འགྱུར་བ་འདི་འཕང་ཐང་མར་བཙན་པོ་ཁྲི་སྲོང་ལྡེ་བཙན་གྱིས་བྱས་པར་བྲིས་མོད་ཀྱི་དཀར་ཆག་གོང་མ་གཉིས་སུ་རྒྱ་གར་མར་བཤད་པས་དཾཥྟ་སེ་ནས་བྱས་པ་དེ་ཡིན་ནོ། །རྒྱལ་བའི་ཡུམ་སྟོང་ཕྲག་བརྒྱ་པ་དང༌། ཉི་ཁྲི་ལྔ་སྟོང་པ་དང༌། ཁྲི་བརྒྱད་སྟོང་བ་རྣམས་ཀྱི་གཞུང་འགྲེལ་བམ་པོ་ཉི་ཤུ་རྩ་བདུན་པ་བསྒྱུར་འཕྲོ་དཾཥྟ་སེ་ནས་བྱས་ཟེར་བ་མང་མོད་ཀྱི་འདི་ནི་དབྱིག་གཉེན་གྱི་གཞུང་འགྲེལ་ཡིན་ཏེ། ཐུབ་པ་དགོངས་རྒྱན་ལ་སོགས་པར་ཉི་ཁྲི་གཞུང་འགྲེལ་ལས་དྲངས་པའི་ཚིག་རྣམས་དེར་ཇི་ལྟ་བ་བཞིན་སྣང་བའི་ཕྱིར་དང༌། དབུར་ཡང༌། འདི་ཡི་གཞུང་འགྲེལ་གནོད་འཇོམས་བྱ་བར་འདོད། །ཅེས་སོགས་གསུངས་པས་དེ་གཉིས་ཁྱད་ཕྱེད་པར་སྣང་བས་མ་ཕྱེད་གསུངས་པ་ལ་དཔྱད་པར་བྱའོ། ། ཡང་དོན་བསྡུས་སྒྲོན་མ་བོད་འགྲེལ་ཡིན་པར་ཐལ། ཉ་ཊཱིཀ་གི་ལུང་གོང་དུ་བཀོད་པ་དེའི་ཕྱིར། འདོད་མི་ནུས་ཏེ། བསྟན་འགྱུར་དཀར་ཆག་ལས། ཤཱནྟི་པའི་སློབ་མ་ཇོ་བོ་རྗེས་མཛད་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་བསྡུས་སྒྲོན་མ། པཎྜི་ཏ་དེ་ཉིད་དང་ལོ་ཙཱ་བ་ཚུལ་ཁྲིམས་རྒྱལ་བའི་འགྱུར། ཞེས་གསུངས་པའི་ཕྱིར་ཟེར་ན་བརྟག་གོ །མངོན་རྒྱན་གྱི་རྒྱ་འགྲེལ་བཅུ་དགུ་པོ་ཉེར་གཅིག་ལས་གསུམ་བླངས་བའི་ལྷག་མ་བཅོ་བརྒྱད་ཡིན་ལ་དེའི་སྟེང་གང་འཇོག་བསྟན་འགྱུར་དཀར་ཆག་ཏུ་མི་གསལ་བས་བརྟག་པར་བྱའོ། །བསྟན་འགྱུར་དཀར་ཆག་ལས། ཁ་ག་ང་ཅ་༽བཞི་ལ་མངོན་རྟོགས་རྒྱན་ཉི་ཁྲི་དང་སྦྱར་བ་སློབ་དཔོན་སེང་གེ་བཟང་པོས་མཛད་པའི་ཉི་ཁྲི་ལེ་བརྒྱད་མར་གྲགས་པ་བམ་པོ་བདུན་ཅུ་རྩ་བཞི་བ་པཎྜི་ཏ་ཞི་བ་བཟང་པོ་དང་ལོ་ཙཱ་བ་ཚུལ་ཁྲིམས་རྒྱལ་བའི་འགྱུར་བཞུགས་སོ། །ཞེས་གསུངས་པས་དེ་དང་ཉི་ཁྲི་ལེ་བརྒྱད་མའི་བསྡུས་དོན་གྱི་འགྲེལ་བ་གཉིས་འདྲ་བ་ཡིན་མིན་བརྟག བསྟན་འགྱུར་དཀར་ཆག་ལས། ཕར་ཕྱིན་འགྲེལ་ཆུང་གི་དོན་བསྡུས་པ་པཎྜི་ཏ་ཀུ་མཱ་ར་ཤྲཱི་བྷ་དྲས་མཛད་པ། ཞེས་གསུངས་ལ། དེ་གསེར་ཕྲེང་དུ་རྩ་བའི་བསྡུས་དོན་ཡིན་པར་གསུངས་སོ། །