དང་པོ་སྐྱབས་སུ་འགྲོ་དགོས་པའི་རྒྱུ་མཚན།
དང་པོ་སྐྱབས་སུ་འགྲོ་དགོས་པའི་རྒྱུ་མཚན།
དང་པོ་ནི། རང་ཅག་རྣམས་འཁོར་བའི་གནས་འདིར་སྐྱེ་བ་སྔ་ཕྱི་བར་དོ་ཐམས་ཅད་དུ་འཇིགས་པའི་རྣམ་གྲངས་དཔག་ཏུ་མེད་པ་ཞིག་ཡོད་ལ། འཇིགས་པ་རང་སྟོབས་ཀྱིས་ཟློག་མི་ནུས་པས་ན། དེ་ལས་སྐྱོབ་པའི་སྐྱབས་ཞིག་ངེས་པར་འཚོལ་དགོས། དེ་ཡང་འཇིག་རྟེན་འདིའི་ཕ་མ་ལ་སོགས་པའི་ཉེ་དུ་དང༌། ཡར་གྱི་དཔོན། མར་གྱི་གཡོག ཐད་ཀར་རང་དང་མཉམ་པའི་གྲོགས་པོ་སོགས་སུ་ལའང་སྐྱོབ་པའི་ནུས་པ་མི་འདུག་སྟེ། ཇི་སྐད་དུ། བདག་ནི་མལ་ན་འདུག་བཞིན་དུ། །གཉེན་བཤེས་ཀུན་གྱིས་མཐའ་བསྐོར་ཀྱང༌། །སྲོག་འཆད་པ་ཡི་ཚོར་བ་ནི། །བདག་ཉིད་གཅིག་པུས་མྱོང་བར་འགྱུར། །ཞེས་གསུངས་པ་བཞིན་དེ་དག་གིས་ཤི་བ་ཕན་ཆད་མཐོང་ཐོས་ཙམ་ཡང་མེད་ན། ཕན་ཐོགས་པ་ག་ལ་ཡོད། ཚེ་འདིར་ཡང་སྐྱོབ་ནུས་པ་ཙམ་མེད་པར་མ་ཟད་གནོད་ཚབ་ཆེན་པོ་ཁོ་ན་ཡིན། དེར་མ་ཟད་ཁྱབ་འཇུག་དབང་ཕྱུག་ལ་སོགས་པ་ལྷ་དབང་མཐུ་བོ་ཆེ་གྲགས་པ་རྣམས་དང༌། འཁོར་ལོས་བསྒྱུར་རྒྱལ་ལ་སོགས་པ་མི་རྫུ་འཕྲུལ་ཆེ་བ་རྣམས་ཀྱིས་ཀྱང༌། ཚེ་འདིའི་གནོད་པ་ཅུང་ཟད་ལས་སྐྱོབ་ནུས་པ་སྲིད་མོད། མི་སྐྱོབ་པ་ཆེས་མང་ཞིང༌། སྒོས་སུ་རང་ཉིད་འཁོར་བའི་སྡུག་བསྔལ་གྱི་མནར་བཞིན་དུ་གཞན་འཁོར་བ་ལས་འདྲེན་པའི་ནུས་པ་ནམ་ཡང་མེད་དེ། དེ་རྣམས་ཁོ་རང་འཁོར་བར་འཁྱམས། ཉོན་མོངས་ཀྱིས་སེམས་དཀྲུག་པས་རང་དབང་མ་ཐོབ་པའི་ཕྱིར་རོ། །དེས་ན་དཀོན་མཆོག་རིན་པོ་ཆེ་རྣམ་པ་གསུམ་གྱིས་འདི་ཕྱི་བར་དོ་གསུམ་འཁོར་བའི་སྡུག་བསྔལ་ཐམས་ཅད་ལས་སྐྱོབ་ནུས། དཀོན་མཆོག་གསུམ་མ་གཏོགས་གཞན་སུས་ཀྱང་འཁོར་བའི་སྡུག་བསྔལ་ལས་སྐྱོབ་ནུས་པ་མེད་པས་དཀོན་མཆོག་གསུམ་ལ་སྐྱབས་སུ་འགྲོ་དགོས་པ་ཡིན་ནོ། །གཞན་ཡང་མ་རྒན་སེམས་ཅན་དེ་དག་ཐམས་ཅད་དུས་ཐོག་མ་མེད་པ་ཞིག་ནས་ད་ལྟའི་བར་དུ་སྤྱིར་འཁོར་བ་དང༌། བྱེ་བྲག་ཏུ་ངན་སོང་གི་གནས་སྡོད་གནས་སུ་བྱས་ཏེ་དུས་རིང་ལ་སྡུག་བསྔལ་ཤུགས་དྲག་པ་བསམ་ཡུལ་ལས་འདས་པ་ཞིག་མྱངས་དང་མྱོང་བཞིན་པ་ཡིན་ལ། སླད་ནས་ཀྱང་གཉེན་པོས་བཙན་ཆོད་ཅིག་མ་བྱུང་ན། སྡུག་བསྔལ་གྱི་གཏིང་མཐར་ཐོན་པ་ཞིག་མི་སྲིད་པ་ཡིན། ད་རེས་ཆོས་སྒྲུབ་པའི་རྟེན་འབྲེལ་ ཕུན་སུམ་ཚོགས་པའི་དུས་འདིར་རང་གིས་རང་མ་བསླུས་པ་བྱས་ཏེ། འཁོར་བའི་སྡུག་བསྔལ་ཐམས་ཅད་སྤངས་པའི་ཐར་བ་མཆོག་བླ་མ་སངས་རྒྱས་ཀྱི་གོ་འཕང་ཐོབ་པར་མ་བྱས་ན། ད་འདི་ནས་རྡོག་སྣ་ཞིག་འགྲེད་དེ་སླར་ངན་སོང་གི་གཏིང་དུ་ལྷུང་ཕྱིན་ཆད་དེ་ནས་ཐར་བ་དང་ཐམས་ཅད་མཁྱེན་པ་མི་ཐོབ་པ་མ་ཟད་བདེ་འགྲོའི་སྒྲ་ཙམ་ཡང་བསྐལ་བ་མུ་མཐའ་ཡས་པར་ཐོས་དཀའ་བའི་སྡུག་བསྔལ་གྱི་གཡང་ས་བརྒྱུད་མར་ལྟུང་བར་ངེས་སོ། །རང་ཅག་རྣམས་ཀྱིས་དགེ་བ་བྱས་པ་ཤུགས་ཆུང་ལ། སྡིག་པ་བྱས་པ་ཤུགས་ཆེ་བ་ཡན་ལག་མ་ཚང་བ་མེད་པ་དང༌། གྲངས་ཀྱང་ཤིན་ཏུ་མང་བ་ཡིན་པས། རྒྱུ་དེ་དག་ལ་གཞིག་ན་ཕྱི་མའི་འགྲོ་ས་ངན་སོང་ལས་མ་འདས་པ་ཡིན་ཏེ། འཕགས་པ་ལྷས། ཇི་སྐད་དུ། ཕལ་མོ་ཆེར་ན་མི་རྣམས་ནི། །དམ་པ་མ་ཡིན་ཕྱོགས་ཡོངས་འཛིན། །དེས་ན་སོ་སོ་སྐྱེ་བོ་རྣམས། །ཕལ་ཆེར་ངེས་པར་ངན་འགྲོར་འགྲོ །ཞེས་གསུངས་པ་ལྟར་རོ། །ངན་སོང་དུ་སོང་ཟིན་པ་དེའི་ཚེ་སངས་རྒྱས་བྱང་སེམས་རྣམས་ཀྱི་ཐུགས་བརྩེ་བས་གཟིགས་ཀྱང་རང་གི་ལས་བསྒྲིབས་ཀྱི་དབང་གིས་སྐྱོབ་ཐབས་དང་བྲལ་བ་ཡིན་པའོ། །དེས་ན་ད་ལྟ་བདེ་འགྲོ་ངན་འགྲོ་གཉིས་ཀྱི་ས་མཚམས། ཁེ་ཉེན་སྐྱིད་སྡུག་ཀུན་གྱི་འདམ་ཁ་རང་གི་ལག་ན་ཡོད་པའི་སྐབས་འདིར་བློ་བདེ་བའི་གདེང་ཐོབ་པ་ཞིག་བྱེད་དགོས། དེའང་རང་སྟོབས་ཀྱིས་མི་ནུས་པས་ལྷ་དཀོན་མཆོག་གསུམ་གྱི་ཞབས་ལ་འཇུས་ནས་སྐྱིད་སྡུག་ལེགས་ཉེས་ཅི་བྱུང་ཡང་ཁྱེད་མཁྱེན་སྙམ་དུ་བློ་འགེལ་ཏེ་སྐྱབས་སུ་འགྲོ་དགོས་སོ། །