གསུམ་པ་ཕྱོགས་མཐུན་གྱི་མདོ།
གསུམ་པ་ཕྱོགས་མཐུན་གྱི་མདོ་ནི།
སྦྱངས་བའི་ཡོན་ཏན་སྟོན་པའི་མདོ་དང༌། དགེ་སློང་ལ་རབ་ཏུ་གཅེས་པའི་མདོ་དང༌། ཚུལ་ཁྲིམས་ཡང་དག་པར་སྟོན་པའི་མདོ་སོགས་ཡིན་ནོ། ། བཞི་བ་དགོངས་འགྲེལ་གྱི་བསྟན་བཅོས་ལ། མདོའི་དགོངས་འགྲེལ་དང༌། བསྟན་བཅོས་ཀྱི་དགོངས་འགྲེལ་གཉིས། དང་པོ་མདོའི་དགོངས་འགྲེལ་ལ་སྤྱིའི་དགོངས་འགྲེལ་དང་བྱེ་བྲག་གི་དགོངས་འགྲེལ་གཉིས། དང་པོ་ནི། བྱེ་བྲག་བཤད་མཛོད་ནང་གི་འདུལ་བ་བྱེ་བྲག་ཏུ་བཤད་པ་དགྲ་བཅོམ་པ་ཉེ་སྦས་ཀྱིས་མཛད་པ་དང༌། འཕགས་པ་ཐོགས་མེད་ཀྱི་བསྡུ་བ་དང༌། འདུལ་ལུང་བཞི་དང་རུང་མཐུན་དང་བཅས་པའི་དོན་ཞིབ་པར་འཆད་པ་འདུལ་བ་མདོ་རྩ་བམ་པོ་དགུ་ཡོན་ཏན་འོད་ཀྱིས་མཛད་པ་དེ་དང༌། ཡོན་ཏན་འོད་ཀྱིས་མཛད་པའི་ཆོ་ག་བརྒྱ་རྩ་གཅིག་སྟོན་པའི་ཀརྨ་ཤ་ཏམ་བམ་པོ་དགུ་བ་དང༌། རྣམ་འབྱེད་ཀྱི་དོན་བསྡུ་དགྲ་བཅོམ་པ་ས་ག་ལྷས་མཛད་པའི་མེ་ཏོག་ཕྲེང་རྒྱུད་དང༌། ཤཱཀྱ་འོད་ཀྱིས་མཛད་པའི་སུམ་བརྒྱ་བ་དང༌། ཁ་ཆེ་འདུས་བཟང་གིས་མཛད་པའི་དགེ་ཚུལ་གྱི་བསླབ་བྱ་སྟོན་པ་ཀཱ་རི་ཀཱ་ལྔ་བཅུ་བ་སོགས་ཡིན་པར་གསུངས་སོ། །