དང་པོ་མཚན་གྱི་དོན།
མཚན་གྱི་དོན། འགྱུར་གྱི་ཕྱག གཞུང་གི་དོན། མཇུག་གི་དོན་དང་བཞི། དང་པོ་ནི། རྒྱ༷་ག༷ར་ན་སྐད་རིགས་བཞི་ཡོད་པའི་ནང་གི་ལེགས་པར་སྦྱར་བའི་སྐ༷ད་དུ༷་བསྟན་བཅོས་འདིའི་མཚན་ལ། མདྷྱ་མ་ཀ་ཨ་བ་ཏ་ར་ནཱ་མ་ཞེས་བྱའོ། །དེ་བོད་སྐད་དུ་བསྒྱུར་ན་མ༷དྷྱཱ༷་མ༷་ཀ༷་དབུ་མ་ལ། ཨ༷་པ༷་ཏཱ༷་ར༷་འཇུག་པ། །ནཱ༷་མ༷་ཞེས་བྱ་བ་སྟེ་དབུ༷་མ༷་ལ༷་འཇུ༷ག་པ༷་ཞེ༷ས་བྱ༷་བ༷་ཞེས་པ་སྟེ། དབུ་མ་རྩ་བ་ཤེས་རབ་སོགས་ལ་ཟབ་པ་དང་རྒྱ་ཆེ་བ་གཉིས་ཀྱི་སྒོ་ནས་འཇུག་པར་བྱེད་པ་ཞེས་བྱ་བའི་བསྟན་བཅོས་ཡིན་ཞེས་པའོ། །
རྩ་བ་ཤེས་རབ་ཀྱིས་ཆོས་རྣམས་རང་མཚན་གྱིས་མ་གྲུབ་པ་དང༌། ཀུན་གཞི་དང་རང་རིག་མེད་པ་དང༌། སོ་སྐྱེས་སའི་ཆོས་གསུམ་སོགས་དངོས་སུ་བསྟན་ཀྱང་གསུང་ཚིག་ཤིན་ཏུ་ཟབ་ཕྱིར་དེ་ལྟར་བསྟན་པ་རྟོགས་དཀའ་བས་ན་དབུ་མ་འཇུག་པས་དབུ་མ་རྩ་ཤེས་ཀྱིས་ཆོས་གང་ཡང་རང་མཚན་གྱིས་གྲུབ་པ་མེད་པ་དང༌། སོ་སྐྱེས་སའི་ཆོས་གསུམ་དང་སློབ་འཕགས་ཀྱི་ས་བཅུ་དང་འབྲས་བུའི་ས་རྣམས་དང༌། ཁྱད་པར་དུ་ས་ལྔ་པར་སྟོང་ཉིད་ལ་དམིགས་པའི་ཞི་གནས་དང༌།
ས་དྲུག་པར་སྟོང་ཉིད་ལ་དཔྱོད་པའི་ལྷག་མཐོང་སྒོམ་པ་རྣམས་བསྟན་པ་ཡིན་པར་བཤད་པ་དེ་དབུ་མ་འཇུག་པས་རྩ་ཤེས་སོགས་ཀྱི་ཚིག་དང་དོན་ལ་འཇུག་པ་ཡིན་ནཽ། །འདིར་དབུ་མ་ཞེས་པ་འཇུག་བྱའི་དབུ་མ་ལ་བསྟན་བཅོས་ཡོད་དེ། དཔལ་ལྡན་ཟླ་བའི་འཇུག་པ་རང་འགྲེལ་ལས། དབུ་མའི་བསྟན་བཅོས་ལ་འཇུག་པར་བྱ་བའི་ཕྱིར། ཞེས་གསུངས་པའི་ཕྱིར་རོ། །སྤྱིར་དབུ་མ་ཞེས་པའི་ཐ་སྙད་དབུ་མའི་བསྟན་བཅོས་དང༌། དབུ་མའི་གྲུབ་མཐའ་དང༌། གྲུབ་མཐའ་དེ་སྒྲོག་པ་པོའི་གང་ཟག་གསུམ་ལ་དངོས་བཏགས་ཅི་རིགས་ཀྱིས་འཇུག་སྟེ། དབུ་མ་རིགས་ཚོགས་དྲུག་ཅེས་དང༌། དབུ་མའི་གྲུབ་མཐའ་ཞེས་དང༌། དབུ་མ་པ་ཞེས་བཤད་པའི་ཕྱིར་དང༌། ལེགས་ལྡན་གྱིས། སྐད་ཀྱི་བྱིངས་སྒྲ་ལ་བསྟན་བཅོས་བྱ་བའམ། དབུ་མ་ཞེས་པའི་མིང་གང་ལ་ཡོད་པ་དེ་ནི་དབུ་མ་སྟེ། ཡང་ན་ཀ་ཞེས་པའི་མིང་གིས་བརྗོད་པ་ཡིན་པས་དབུ་མ་ཞེས་བྱ་བ་དབུ་མའི་གྲུབ་པའི་མཐའ་འོ། ། ཞེས་གསུངས་པ་དང༌། བྱིངས་མདོ་ལས། ཀཻ་གཻ་རཻ་སྒྲ་ལའོ། །
ཞེས་གསུངས་པའི་ཕྱིར་རོ། །འགྲེལ་བཤད་མཁན་པོ་ཛ་ཡ་ཨ་ནནྟས་འཇུག་པས་བདེན་གཉིས་རྒྱས་པར་བསྟན་པའི་སྒོ་ནས་དབུ་མ་རྩ་བ་ཤེས་རབ་ལ་འཇུག་པར་བཤད་དེ། དེའི་འགྲེལ་བཤད་ལས། འདི་ལྟར་དབུ་མའི་བསྟན་བཅོས་སུ་ཀུན་རྫོབ་དང་དོན་དམ་པའི་རང་བཞིན་རྒྱས་པར་བརྗོད་ལ། དེ་འདི་རྒྱས་པར་བསྟན་པས་བསྟན་བཅོས་འདི་དེ་ལ་འཇུག་པར་འགྱུར་རོ། །
ཞེས་གསུངས་སོ། །དེ་ལ་རྗེ་བླ་མས་མི་འཐད་པར་གསུངས་པ་ལ་དཔྱད་པར་ཞུ། ཛ་ཡ་ཨ་ནནྟའི་འགྲེལ་བཤད་ལས། བསྟན་བཅོས་འདིའི་འཇུག་བྱའི་དབུ་མ་ཡོད་དེ། རྩ་བ་ཤེས་རབ་ལ་སོགས་པའི་དབུ་མའི་བསྟན་བཅོས་རྣམས་འདིའི་འཇུག་བྱའི་དབུ་མ་ཡིན་ནོ། །ཞེས་གསུངསཔ་ལྟར་རིགས་ཚོགས་དྲུག་དང་ས་བཅུ་བའི་མདོ་དང༌། ཡུམ་མདོ་སོགས་བཞག་པ་ལ་གནོད་བྱེད་མ་མཐོང་ངོ། །རྗེ་ཙོང་ཁ་བ་རྗེས་འབྲང་དང་བཅས་པས་དབུ་མ་འཇུག་པའི་འཇུག་བྱའི་དབུ་མ་ཡིན་ན་རྩ་ཤེས་ཡིན་པས་ཁྱབ་པ་བཞེད་དོ། །དབུ་མ་འཇུག་པ་རྩ་ཤེས་ལ་འཇུག་ཚེ་ཚིག་དོན་གཉིས་ལ་འཇུག་དགོས་པས་དེའི་འཇུག་བྱ་ལ་རྩ་ཤེས་ཀྱི་མ་ཁྱབ་སྙམ་མོ། །རང་འགྲེལ་དུ་རྩ་ཤེས་ཀྱི་ལུང་དྲང་ཚེ་དབུ་མ་ལས་ཞེས་གསུངས་པ་རྩ་ཤེས་ནི་རིགས་ཚོགས་ཀྱི་ནང་ནས་རྩ་བ་ལྟ་བུ་ཡིན་པ་ལས་འདིའི་འཇུག་བྱ་ལ་དེའི་ཁྱབ་པས་ནི་མ་ཡིན་ནོ། །དེར་མ་ཟད་རང་འགྲེལ་དུ་རྩ་ཤེས་ཀྱི་ལུང་དྲང་ཚེ་དབུ་མ་ཞེས་པ་ལས་གཞན་བསྟན་བཅོས་ལས་ཞེས་གསུངས་པ་མང་དུ་ཡོད་དོ། །འཇུག་ཚུལ་ཡང་དཔལ་ལྡན་ཟླ་བས་རང་མཚན་གྱིས་མ་གྲུབ་པ་བཞེད་པ་དང་ཆོསཅན་མཐུན་སྣང་བ་མ་གྲུབ་པར་བཞེད་པ་སོགས་ཀྱིས་རང་རྒྱུད་པ་དང་སེམས་ཙམ་པ་དང་འཇུགཚུལ་མི་འདྲ་བ་བཞག་ན་ཆོག་གོ། །རྩ་ཤེས་ལས་ཟབ་རྒྱས་ཀྱི་ལམ་ཙམ་བསྟན་ཀྱང་དངོས་བསྟནབསྟན་བྱའི་གཙོ་བོར་བྱས་ནས་མ་བསྟན་ལ། དབུ་མ་འཇུག་པས་དེ་ལྟར་བསྟན་པས་ཁ་སྐོངབའོ། །ཀུན་མཁྱེན་འཇམ་དབྱངས་བཞད་པས་རྩ་ཤེས་རྩོམ་དུས་ད་དུང་སེམས་ཙམ་པ་འཕགསཡུལ་དུ་མ་བྱུང་བར་བཤད་མོད། ཇོ་ནང་རང་ལུགས་བྱུང་བར་སྔར་བདག་གིས་དྲང་ངེས་སུ་བཤདཟིན་ཏོ། །