མཆོད་བརྗོད་དང་ཕྱག་འཚལ།
ན་མོ་རཏྣ་ཏྲ་ཡཱ་ཡ། ལོ་ཀི་ཤྭ་ར་ཡ་ན་མོ་ན་མཿ
བཀའ་བསྡུ་ལྔ་བ་མཐའ་བྲལ་དབུ་མ་ཆེན་པོའི་གྲུབ་མཐའ་རབ་གསལ་ཞེས་བྱ་བ།
ལྷག་པའི་ལྷར་གྱུར་སྤྱན་རས་གཟིགས་ལ་ཕྱག་འཚལ་ལོ། །
མཁྱེན་པ་མཐའ་ཡས་མི་འཇིགས་སྤོབས་པ་བརྙེས། །
མ་འདྲེས་ཆོས་མངའ་མཁའ་ལྟར་སྐྱེ་འཇིག་བྲལ། །
གདོད་ནས་ལྷུན་གྲུབ་མཐར་ཐུག་མི་བསླུ་བ། །
དོན་དམ་ཆོས་ཀྱི་སྐུ་ལ་སྐྱབས་སུ་མཆི། །
སྒྲ་བརྙན་ལྟ་བུའི་དྲུག་ཅུའི་དབྱངས་སྙན་སྒྲོགས། །
སྒྱུ་མ་ལྟ་བུའི་མཛད་པ་དཔག་ཡས་སྟོན། །
རྨི་ལམ་ལྟ་བུའི་སེམས་ཅན་སྒྲོལ་མཛད་པའི། །
གནས་སྐབས་བསླུ་མེད་གཟུགས་ཀྱི་སྐུ་ལའང་སྐྱབས། །
ཆོས་ཀྱི་དབང་ཕྱུག་རྒྱལ་ཚབ་བྱམས་པ་མགོན། །
མཁྱེན་རབ་དབང་ཕྱུག་རྗེ་བཙུན་འཇམ་པའི་དབྱངས། །
ཐུགས་རྗེའི་དབང་ཕྱུག་མགོན་པོ་སྤྱན་རས་གཟིགས། །
མཐུ་སྟོབས་དབང་ཕྱུག་རྣམས་ལ་ཕྱག་འཚལ་ལོ། །
དྲང་དོན་ངེས་དོན་འབྱེད་མཁས་ཐོགས་མེད་མཆེད། །
བདེན་གཉིས་རྣམ་དབྱེ་འབྱེད་མཁས་ཀླུ་སྒྲུབ་སྲས། །
ཚུལ་དང་ཚུལ་མིན་འབྱེད་མཁས་ཕྱོགས་གླང་གྲགས། །
ཤིང་རྟའི་སྲོལ་འབྱེད་རྣམས་ལ་ཕྱག་འཚལ་ལོ། །
རྒྱལ་བའི་བཀའ་དང་བསྟན་བཅོས་དྲི་མེད་རྣམས། །
བོད་འདིར་བསྒྱུར་བའི་དཀའ་སྤྱད་ཁུར་བཞེས་པའི། །
སྔོན་གྱི་རྒྱལ་བློན་ལོ་པཎ་བཀའ་དྲིན་ཅན། །
སྤྲུལ་པའི་སྐྱེས་མཆོག་རྣམས་ལ་ཕྱག་འཚལ་ལོ། །
འཆད་རྩོད་རྩོམ་ལ་མཁས་པའི་ས་པཎ་སོགས། །
ཇི་ལྟའི་ཆོས་ཉིད་གཟིགས་པའི་དོལ་པོ་སོགས། །
ཇི་སྙེད་ཆོས་ཀུན་མཁྱེན་པའི་བུ་སྟོན་སོགས། །
སྙིགས་དུས་འགྲོ་བའི་འདྲེན་པ་རྣམས་ལ་འདུད། །