གསུམ་པ། རྒྱལ་པོ་འདུན་པར་བྱས་པའི་ལེའུ།

དེ་ནས་རྒྱལ་པོ་ཟས་ གཙང ་མ་དང་། ཤཱཀྱ་རྣམས་རྟ་བབས་སའི་བར་དུ་བཞོན་པ་དང་དོང་སྟེ་ཕྱིན་ནས་བཞོན་པ་ལས་བབས་ཏེ། རྐང་ཐང་གི་འཁོར་གྱིས་ཡོངས་སུ་བསྐོར་ཅིང་མདུན་དུ་བདར་ཏེ་ནྱ་གྲོ་དྷའི་ཀུན་དགའ་ར་བར་དོང་ངོ་། །དེའི་ཚེ་བཅོམ་ལྡན་འདས་ཀྱིས་རྒྱལ་པོ་ཟས་ གཙང ་མ་ང་རྒྱལ་ཆེ་བར་མཁྱེན་ནས་མི་གང་ལྷག་ཙམ་གྱི་སྟེང་གི་བར་སྣང་གི་ནམ་མཁའ་ལ་རྒྱལ་པོ་ཟས་ གཙང ་མངོན་པར་དད་པར་བྱ་བའི་ཕྱིར་འཆག་ཅིང་བཞུགས་པར་གྱུར་ཏོ། །དེའི་ཚེ་བཅོམ་ལྡན་འདས་དེ་ལྟར་འཆག་པའི་གཡས་ཕྱོགས་ནས་མི་མཇེད་ཀྱི་བདག་པོ་ཚངས་པ་ཞབས་འབྲིང་དུ་འཆག་ཅིང་འགྲོའོ། །གཡོན་ཕྱོགས་ནས་ལྷའི་དབང་པོ་བརྒྱ་བྱིན་ཞབས་འབྲིང་དུ་འཆག་ཅིང་འགྲོའོ། །དེ་ལྟར་བཅོམ་ལྡན་འདས་འཆག་པའི་ཞབས་འབྲིང་དུ་ལྷའི་རྒྱལ་པོ་རབ་འཐབ་བྲལ་དང་། ཡོངས་སུ་དགའ་ལྡན་དང་། རབ་འཕྲུལ་དགའ་དང་། གཞན་འཕྲུལ་དབང་བྱེད་རྣམས་བཅོམ་ལྡན་འདས་ལ་མཆོད་པ་བྱ་བའི་ཕྱིར་གདུགས་འཛིན་བསིལ་ཡབ་གྱིས་གཡོབ་པར་གྱུར་ཏོ། །རྒྱལ་པོ་ཆེན་པོ་རྣམ་ཐོས་ཀྱི་བུ་དང་། ཡུལ་འཁོར་སྲུང་གཉིས་ཀྱང་བཅོམ་ལྡན་འདས་འཆག་པའི་ཤར་ཕྱོགས་ལོགས་ཀྱི་ཐོག་མ་ལ་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་སྨད་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་ཕྱག་འཚལ་ཞིང་ཚིག་འཁོད་པར་གྱུར་ཏོ། །རྒྱལ་པོ་ཆེན་པོ་འཕགས་སྐྱེས་པོ་དང་། མིག་མི་བཟང་གཉིས་ཀྱང་བཅོམ་ལྡན་འདས་འཆག་པའི་ནུབ་ཕྱོགས་ལོགས་ཀྱི་ཐོག་མ་ལ་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་སྨད་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་ཕྱག་འཚལ་ཞིང་འཁོད་

པར་གྱུར་ཏོ། །དེའི་ཚེ་རྒྱལ་ཆེན་བཞིའི་རིས་ཀྱི་ལྷའི་བུ་རྣམས་དང་། སུམ་བཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲལ་དབང་བྱེད་ཀྱི་ལྷའི་བུ་རྣམས་ཀྱང་བཅོམ་ལྡན་འདས་ལ་མཆོད་པ་བྱ་བའི་ཕྱིར་སྟེང་གི་བར་སྣང་ལ་གནས་ཏེ། ལྷའི་མེ་ཏོག་ཨུད་པ་ལ་དང་། པད་མ་དང་། ཀུ་མུད་དང་། པད་མ་དཀར་པོ་དང་། ལྷའི་མཱན་དཱ་ར་བ་དང་། མཱན་དཱ་ར་བ་ཆེན་པོ་དང་། ལྷའི་སྤོས་ཀྱི་ཕྱེ་བ་རབ་ཏུ་འཐོར་བར་གྱུར་ཏོ། །བཅོམ་ལྡན་འདས་ལ་མཆོད་པ་བྱ་བའི་ཕྱིར་ལྷའི་རོལ་མོས་སིལ་སྙན་དང་། གླུ་དབྱངས་དག་ཀྱང་སྟེང་གི་བར་སྣང་ལས་སྒྲ་འབྱིན་པར་གྱུར་ཏོ། །མེའི་ལས་འདས་པའི་གླུའི་ང་རོ་ཡང་སྟོང་གི་བར་སྣང་ལས་བྱུང་བར་གྱུར་ཏོ། །སྤྲིན་ལས་སྤོས་ཀྱི་ཆར་ཟམ་ཟིམ་ཡང་འབབ་པར་གྱུར་ཏོ། །ལྷའི་མེ་ཏོག་ཨུད་པ་ལ་དང་། ལྷའི་ཙན་དན་གྱི་ཕྱེ་མའི་ཆར་ཡང་བབ་པར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་རྫུ་འཕྲུལ་གྱི་རྣམ་པ་གང་མངོན་པར་མཛད་པས་ལྷ་དང་མི་རྣམས་ཀྱང་གཅིག་གིས་གཅིག་མཐོང་བར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་མཛད་དོ། དེ་ནས་རྒྱལ་པོ་ཟས་ གཙང ་མས་ལྷ་དེ་དག་བཅོམ་ལྡན་འདས་ལ་མཆོད་པ་བྱེད་པ་ཡང་མཐོང་། ལྷའི་རིན་པོ་ཆེ་སྣ་བདུན་གྱི་རྒྱུ་ལས་གྲུབ་པའི་ཁང་པ་བརྩེགས་པས་ཀྱང་བར་སྣང་གང་བར་མཐོང་ནས་དེ་འདི་སྙམ་དུ་སེམས་ཏེ། ཇི་ཙམ་དུ་བཅོམ་ལྡན་འདས་ཀྱིས་ལེགས་པར་གསུངས་པ་དེ་ནི་ངོ་མཚར་ཆེ་སྟེ། །སྔོན་བཅོམ་ལྡན་འདས་གཞོན་ནུར་གྱུར་པའི་ཚེ་འདི་སྐད་དུ་ང་ལ་ནི་གླིང་ཆེན་པོ་བཞིའི་དབང་ཕྱུག་ལ་དབང་བར་འགྱུར་བ་ངོ་མཚར་མི་ཆེ་སྟེ། ངས་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་ལྷ་དང་མིའི་ནང་དུ་ཆོས་ཀྱི་དབང་ཕྱུག་ལ་དབང་བར་བྱའོ་ཞེས་གསུངས་ན། བཅོམ་ལྡན་འདས་ཀྱི་ཆོས་ཀྱི་དབང་ཕྱུག་ལ་དབང་བ་དེ་ནི་འདི་ཡིན་པ་ལྟ་སྟེ། བདག་ནི་མིའི་འཁོར་ཅན་དུ་ཟད། བཅོམ་ལྡན་འདས་ནི་ལྷ་དང་མིའི་འཁོར་ཅན་དུ་གྱུར་ཏོ་སྙམ་མོ། །དེ་ནས་རྒྱལ་པོ་ཟས་ གཙང ་མས་བླ་གོས་ཕྱོགས་གཅིག་ཏུ་བགོས་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ་ཚིག་འདི་སྐད་ཅེས་སྨྲས་

སོ། །བཅོམ་ལྡན་འདས་བལྟམ་མ་ཐག་ཏུ་སུས་ཀྱང་མ་བརྟེན་པར་ས་ཆེན་པོ་ལ་གོམ་པ་བདུན་བཞུད་དེ། ཕྱོགས་བཞིར་གཟིགས་ནས་གསུང་བརྗོད་པ། །ང་ནི་འཇིག་རྟེན་ན་མཆོག །ང་ནི་འཇིག་རྟེན་ན་གཙོ་བོ། ང་ནི་འཇིག་རྟེན་ན་རབ་སྟེ། ངས་སྐྱེ་བ་དང་། རྒ་བ་དང་། འཆི་བ་མཐར་དབྱུང་ངོ་ཞེས་གསུངས་པ་དེའི་ཚེ་ཡང་བདག་གིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་གཏུགས་ཏེ་ཕྱག་བགྱིས་སོ། །གང་གི་ཚེ་བཅོམ་ལྡན་འདས་ཞིང་པའི་གྲོང་དུ་བཞུད་ནས་འཛམ་བུའི་གྲིབ་མ་བསིལ་བ་ལ་བཞུགས་པའི་ཚེ་ཉི་མ་ཡོལ་ཡང་འཛམ་བུའི་གྲིབ་མས་བཅོམ་ལྡན་འདས་ཀྱི་སྐུ་མ་བཏང་སྟེ། ལྷའི་བུ་གཞོན་ནུ་དྲུག་ཐལ་མོ་སྦྱར་ནས་ཕྱག་འཚལ་ཞིང་འཁོད་པར་གྱུར་བ་དེའི་ཚེ་ཡང་བདག་གིས་བཅོམ་ལྡན་འདས་ལ་ཕྱག་བགྱིས་སོ། །ང་ཡང་བཅོམ་ལྡན་འདས་ལ་འདི་དང་ལན་གསུམ་དུ་ཕྱག་འཚལ་ལོ་ཞེས་སྨྲས་ནས་དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །གང་ཚེ་རྐང་གཉིས་གཙོ་བོ་ཁྱོད་བལྟམས་ནས། །ས་ཆེན་འདི་ལ་གོམ་པ་བདུན་བཞུད་དེ། །ང་ནི་འཇིག་རྟེན་ན་ནི་མཆོག་ཅེས་གསུངས། །དེ་ཚེ་མཁས་པ་ཁྱོད་ལ་བདག་ཕྱག་འཚལ། །གང་ཚེ་ཐུབ་ཆེན་ཞིང་པའི་གྲོད་བཞུད་ཚེ། །འཛམ་བུའི་གྲིབ་མས་བཞུགས་པ་མ་བཏང་ཞིང་། །ལྷ་བུ་གཞོན་ནུ་དྲུག་གིས་བཏུད་གྱུར་པ། །དེ་ཚེ་མཆོད་འོས་ཁྱོད་ལ་བདག་ཕྱག་འཚལ། །ང་ཡང་འདི་དང་ཁྱོད་ལ་ལན་གསུམ་དུ། །ཐུབ་པ་ཁྱོད་ཀྱི་ཞབས་ལ་ཕྱག་འཚལ་ལོ། །ཐུགས་རྗེ་ཆེ་མངའ་ལྷ་མིས་མཆོད་པ་གཙོ། །ཁྱོད་འདྲ་འཇིག་རྟེན་མ་མཆིས་ལྷག་ཅི་སྨོས། །མཚན་ནི་དོན་གྲུབ་ལགས་ཤེས་སྔོན་བརྗོད་པ། །ཕ་དང་མ་ཡིས་བསམས་ཏེ་བཏགས་པ་ལགས། །ཁྱོད་ཀྱི་བསམ་རྫོགས་བདུད་རྩི་བརྙེས་པས་ན། །དོན་གྲུབ་ལགས་པར་བདག་གིས་ངག་དོང་འཚལ། །དེ་ནས་འདོད་པ་ན་སྤྱོད་པའི་ལྷ་རྣམས་ཀྱིས་དེའི་ཚེ་བཅོམ་ལྡན་འདས་ཀྱི་སེང་གེའི་ཁྲི་ལྷའི་ཡིད་བཞིན་གྱི་རས་བཅོས་བུ་བཏིང་བ་རྣམ་པ་སྣ་ཚོགས་སུ་སྤེལ་བ་བཤམས་སོ། །ཐམས་ཅད་དང་ལྡན་པའི་ནྱ་གྲོ་དྷའི་ཀུན་དགའ་ར་བ་ཡང་ལྷའི་ཡིད་བཞིན་གྱི་རས་བཅོས་བུ་ཡོག་པར་བཏིང་ངོ་། །སྟེང་དུ་ཡང་

ལྷའི་ཡིད་བཞིན་གྱི་རས་བཅོས་བུའི་བླ་རེས་བྲེས་སོ། །དེ་ནས་བཅོམ་ལྡན་འདས་བར་སྣང་གི་འཆགས་དེ་ནས་བབས་ཏེ། གང་ན་ཁྲི་བཤམས་པ་ལ་བཞུགས་སོ། །རྒྱལ་པོ་ཟས་ གཙང ་མ་ཡང་འཁོར་དང་བཅས་པས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་དུ་འདུག་གོ། །འདོད་པ་ན་སྤྱོད་པའི་ལྷ་རྣམས་དང་གཟུགས་ན་སྤྱོད་པའི་ལྷ་རྣམས་ཀྱང་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བར་སྣང་ལ་འཁོད་པར་གྱུར་ཏོ། །འདི་ལ་འདི་ནི་ཆོས་ཉིད་ཡིན་ཏེ་དེ་ལ་འདི་སྐད་ཅེས་བྱའོ། །སེར་སྐྱ་ཞེས་བྱ་གྲོང་ཁྱེར་དམ་པ་ཡི། །ནྱ་གྲོ་དྷཱ་ཡི་ར་བ་ཉམས་དགའ་བར། །རྒྱལ་པོ་ཟས་ གཙང ་དེ་དང་གང་གི་ཚེ། །འཇིག་རྟེན་མགོན་པོ་ཕྲད་པ་དེ་ཡི་ཚེ། །སྐྱེ་བོ་མང་པོ་དག་ནི་འདུས་གྱུར་ཏེ། །ལྷ་མ་ཡིན་དང་མཁའ་ལྡིང་དབང་པོ་དང་། ཀླུ་ཚོགས་རྣམས་དང་དེ་བཞིན་གྲུལ་བུམ་དང་། །དྲི་ཟའི་རྒྱལ་པོ་རྣམས་ཀྱང་འདུས་པར་གྱུར། །དེ་བཞིན་གསང་བའི་བདག་པོ་རྣམས་འདུས་ཏེ། །མིའམ་ཅིའི་ཚོགས་དང་ནི་མི་རྣམས་དང་། །དེ་བཞིན་འདོད་པ་དག་ན་སྤྱོད་པའི་ལྷ། །རབ་ཏུ་དགའ་བ་རྣམས་ཀྱང་འདུས་པར་གྱུར། །དེ་བཞིན་གཟུགས་ཀྱི་ཁམས་སུ་གཏོགས་པ་ཡི། །ཚངས་པ་རྣམས་དང་ཚངས་པའི་རིས་རྣམས་དང་། །འོད་གསལ་བ་དང་དགེ་རྒྱས་པ་དག་དང་། །འབྲས་བུ་ཆེ་བར་གཏོགས་དང་གནས་ གཙང ་འདུས། །དགེ་སྦྱོང་དག་དང་དེ་བཞིན་ཐམ་ཟེ་དང་། །སྤྱོད་པ་ཅན་དང་ཀུན་དུ་རྒྱུ་དག་དང་། །གཅེར་བུ་པ་དང་མུ་སྟེགས་གཞན་མང་པོ། །ལོག་ལམ་རྗེས་སུ་འབྲང་བ་རྣམས་ཀྱང་འདུས། །སངས་རྒྱས་ཉིད་ཀྱི་གཟི་བརྗིད་དམ་པ་ཡིས། །རྒྱལ་པོ་ཆེན་པོ་ཟས་ གཙང ་དེ་ཡིས་སེམས། །ཡོངས་སུ་སྨིན་པར་བྱ་བའི་དོན་གྱི་ཕྱིར། །དེ་ཡི་ཚེ་ན་འདུས་པ་ཆེན་པོར་གྱུར། །སྔོན་ཆད་བཅོམ་ལྡན་འདས་ཀྱིས་ལེགས་བཤད་པའི། །ཚིག་གིས་འཁོར་རྣམས་ཡོངས་སུ་ཚིམ་པར་མཛད། །ད་ནི་རྒྱལ་བ་རྒྱལ་པོ་ཟས་ གཙང ་ལ། །རྒྱལ་བའི་མཐུ་ནི་རབ་ཏུ་བསྟན་པར་བཞེད། །བཅོམ་ལྡན་འདས་ལ་རྒྱལ་པོ་ཟས་ གཙང ་གིས། །གཞོན་ནུ་ཁྱོད་ནི་ས་བདག་ཆེན་པོ་ཡི། །རྒྱལ་པོར་འགྱུར་ཞེས་མཁས་པས་

ལུང་བསྟན་གྱིས། །ཁབ་ནས་མ་བྱུང་ཤིག་ཅེས་སྔོན་གསོལ་པ། །གླིང་བཞིར་དབང་པའི་འཁོར་ལོས་སྒྱུར་བ་སྟེ། །སྲོག་ཆགས་བྱེ་བ་ཁྲག་ཁྲིག་རྣམས་ཀྱིས་མཆོད། །རིན་ཆེན་སྣ་བདུན་དག་དང་ལྡན་པར་འགྱུར། །འབྱོར་པ་བཞི་པོ་དང་ཡང་ལྡན་པར་འགྱུར། །ཆོས་ལ་གནས་ཤིང་ས་ཡང་སྐྱོང་བ་སྟེ། །གླིང་བཞི་དབང་བར་རྒྱལ་རིགས་རྒྱལ་ཆེན་འགྱུར། །མི་ཡི་བདག་དང་མི་ཡི་མཆོད་པར་འོང་། །ལྟོ་འཕྱེ་ཆེས་མཆོད་འགྱུར་ཞེས་གསོལ་བ་བཏབ། །དེ་ནས་དེ་ཚེ་བྱང་ཆུབ་སེམས་དཔའ་དེས། །བསྐལ་པ་བྱེ་བ་ཁྲག་ཁྲིག་དཔག་མེད་ནས། །བདག་ནི་རྟག་ཏུ་བདེན་པའི་ཚིག་སྨྲས་ཀྱིས། །རྒྱལ་པོ་བདག་གི་ཚིག་ལ་གསོན་ཅེས་གསུངས། །འདི་ལྟར་གླིང་བཞི་པ་ཡི་རྒྱལ་སྲིད་ཀྱིས། །བདག་ལ་སླུ་བར་མཛད་པར་བཞེད་པས་ན། །དེ་ལྟའི་ཚུལ་ལས་རྒྱལ་པོ་ཆེན་པོ་ཁྱོད། །བདག་ལ་ཅུང་ཟད་ཙམ་ཡང་ཐུགས་མི་རེ། །རྒྱལ་པོ་ཆེན་པོ་སྔོན་ཚེ་བྱུང་བ་ནི། །རྒྱ་མཚོ་རླབས་ཀྱིས་རུ་སྦལ་གཅིག་གིས་འཕངས། །རྒྱ་མཚོའི་རླབས་ནི་ཕྱིར་ལོག་གྱུར་པ་དང་། །རུ་སྦལ་དེ་ནི་ཁྲོན་པའི་ནང་དུ་ལྷུང་། །དེ་ལ་ཁྲོན་པའི་ནང་གི་རུ་སྦལ་གྱིས། །རྒྱ་མཚོའི་རུ་སྦལ་གང་ནས་འདིར་འོངས་ཀྭའི། །ང་ཡི་ཐེ་ཚོམ་སྐྱེས་པ་བཅད་པའི་ཕྱིར། །མྱུར་དུ་ང་ལ་སྨྲོས་ཤེས་དེ་སྐད་སྨྲས། །ཁྲོན་པའི་ནང་གི་རུ་སྦལ་དེ་ཉིད་ལ། །རྒྱ་མཚོའི་རུ་སྦལ་བློ་ཆེན་ངེས་སྨྲས་པ། །ང་ནི་རྒྱ་མཚོའི་རླབས་ཀྱིས་བཀུར་བཀུར་ཏེ། །ཁྲོན་པ་འདི་ནི་དེ་རིང་བོར་བར་འགྱུར། རྒྱ་མཚོའི་རླབས་ཆེན་དེ་ནི་ཕྱིར་ལོག་སོང་། །ང་ནི་སླར་ལོག་འགྲོ་བར་མ་ནུས་ཏེ། །ང་ནི་རླབས་དང་བྲལ་བར་གྱུར་པས་ན། །རུ་སྦལ་ཁྱོད་ཀྱི་ཁྲོན་པར་གནས་འཆའོ། །དེ་ལ་ཁྲོན་པའི་ནང་གི་རུ་སྦལ་གྱིས། །རྒྱ་མཚོ་དེ་ནི་ཁྲོན་པ་འདི་ཙམ་འམ། །འོན་ཏེ་ཁྲོན་པ་འདི་བས་ཆེ་བ་ཞིག །དྲིས་ལ་ནང་ལ་མྱུར་དུ་སྨྲོས་ཤེས་སྨྲས། །རྒྱ་མཚོའི་རུ་སྦལ་བློ་རྒྱ་ཆེན་པོ་དེས། །ཁྲོན་པའི་རུ་སྦལ་དེ་ལ་ཚིག་སྨྲས་པ། །ཁྲོན་པའི་རུ་སྦལ་ཁྱོད་ནི་བྱིས་པ་སྟེ། །བློ་རྒྱ་ཆུང་ཞིང་ཤེས་པ་རབ་ཏུ་ཞན། །ང་ནི་ལན་ཚྭ་ཅན་གྱི་ཆུ་དེར་བཙས། །ཡུན་རིང་དུས་ན་དེ་ན་སྐྱེ་སྐྱེ་ཡང་། །རྒྱ་མཚོའི་མཐའ་མ་ཤེས་པར་མ་ནུས་ན། །དབུས་

ལྟ་ཤེས་པ་ག་ལ་ནུས་ཤེས་སྨྲས། །དེ་ལྟར་མི་ཡི་བདག་པོ་ཁྱོད་ཀྱིས་ཀྱང་། །བདག་གི་མཐུ་ནི་ཐུགས་སུ་མ་ཆུད་དེ། །གླིང་གཞི་པ་ཡི་མཆོད་པ་རྣམས་ཀྱིས་ནི། །ཁྱོད་ཀྱིས་བདག་ལ་སླུ་བ་མཛད་པར་བཞེད། །བདག་ནི་ཆོས་ཅན་ཆོས་ཀྱི་རྒྱལ་པོར་འགྱུར། །ཆད་པས་མི་གཅད་མཚོན་ཆས་མདའ་མེད་པར། །སྟོང་གསུམ་འཇིག་རྟེན་ཁམས་འདི་བསྐྱང་བར་བྱ། །འཇིག་རྟེན་འདས་པའི་མཆོད་པ་ཐོབ་པར་འགྱུར། །རྫུ་འཕྲུལ་སྟོབས་བསྒོམས་པ་ཡི་བདག་ཉིད་ཅན། །བཅོམ་ལྡན་འདས་ཀྱིས་སྔོན་ཚིག་སྦྱང་བཞེད་ནས། །དེ་ཕྱིར་འཁོར་ཆེན་པོ་ནི་དེ་དག་དང་། །སེམས་ཅན་རྣམས་ལ་ཐུགས་ཀྱིས་དགོངས་པ་མཛད། །རྒྱལ་པོ་ཟས་ གཙང ་སེམས་ནི་མགུ་བྱའི་ཕྱིར། །ཐུགས་ཀྱིས་ཡོངས་སུ་བསྐུལ་བ་མཛད་པ་དང་། །འཇིག་རྟེན་གསུམ་པོ་མཐའ་དག་མ་ལུས་པར། །དེ་ཡི་ཚེ་ན་དེར་ནི་འདུས་པར་འགྱུར། །རྒྱལ་པོ་འདུན་པར་བྱས་པའི་ལེའུ་སྟེ་གསུམ་པའོ།། །།