རང་ལོ་བཅོ་བརྒྱད་པར་དབུས་གཙང་གི་ཕྱོགས་སུ་ཕེབས་པའི་སྐོར།
རང་ལོ་བཅོ་བརྒྱད་པར་དབུས་གཙང་གི་ཕྱོགས་སུ་རིམ་བགྲོད་ཀྱིས། དཔལ་ཨེ་ཝཾ་ཆོས་ལྡན་དུ་སླེབས། ངོར་གྱི་གདན་རབས་ང་བརྒྱད་པ་ལྕེ་བཙུན་ངག་དབང་བློ་གྲོས་སྙིང་པོའི་དྲུང་ནས། འབྱུང་འདུལ། རྣམ་རྒྱལ་མ། རི་ཁྲོད་མའི་རྗེས་གནང་གསུམ་སྔོན་དུ་འགྲོ་བའི་སྒོ་ནས། ལམ་འབྲས་ཚོགས་བཤད་ཀྱི་སྨིན་གྲོལ་ཡོངས་རྫོགས་དང་། ཀྱེ་རྡོར་བཀའ་བབས་ཕྱི་མ་གསུམ་གྱི་དབང་། པོད་སེར་པོད་དམར་གྱི་ལུང་། ཐར་རྩེ་པཎ་ཆེན་གྱིས་བསྒྲིགས་པའི་ཆོས་སྤྱོད་པོ་ཏིའི་ལུང་། དཔལ་མགོན་ཞལ་བསྙེན་དུས་ཀྱི་རྗེས་གནང་རྣམས་ཐོབ་ཅིང་། ཚིགས་གསུམ་རིམ་ནོད་ཀྱིས་བསྙེན་པར་རྫོགས་པ་དགེ་སློང་གི་སྡོམ་པ་ཐོབ། དེ་ནས་ས་སྐྱ་གོང་དུ་ཕྱིན། རབ་འབྱམས་པ་ཤེས་རབ་ཆོས་འཕེལ་གྱི་དྲུང་ནས། འདུལ་བ་མདོ་རྩ། ལྷ་ཁང་ཆེན་པོའི་མཁན་པོ་བྱམས་པ་ཆོས་བཀྲ་ཤིས་ཀྱི་མདུན་ནས་སྡོམ་གསུམ་འཇམ་དབྱངས་བླ་མའི་དགོངས་རྒྱན་གྱི་བཤད་ཁྲིད་ཐོབ། དབྱར་ཁར་ངོར་དུ་མར་ལོག་མཁན་ཆེན་གདན་ས་པའི་དྲུང་ནས། རྡོ་རྗེ་ཕྲེང་བ་ཀྲི་ཡ་ས་མུཙྪ་དང་བཅས་པའི་དབང་ཆེན་ཞེ་ལྔ། ཡིག་ཆ་ཐར་པཎ་གྱི་རྡོར་ཕྲེང་མཛེས་རྒྱན་གྱི་ལུང་བཅས་ཐོབ། དེ་དུས་ངོར་ན་སྐུ་ཡོན་མཁས་པའི་རྩེ་མོར་སོན་པ་མཆོག་སྤྲུལ་ཤེས་རབ་རྒྱ་མཚོ་ཉིད་གྲགས་ཆེ་བས་དེ་ཉིད་ཀྱི་དྲུང་ནས། ལམ་འབྲས་སྣང་རྒྱུད་མཛེས་རྒྱན། ཟླ་ཟེར་མན་ངག་རྣམ་བཤད། ཉི་ཟེར་རྣམས་ལ་ལྟ་རྟོག་དང་། མ་གོ་བ་མཁས་མཆོག་དེ་ཉིད་ཀྱི་དྲུང་ནས་དོགས་གཅོད་ཞུས། ཀྱེ་རྡོར་ལམ་དབང་། གྲུབ་རྒྱལ་ལུགས་ཀྱི་བསྐྱེད་རྫོགས་ཟུང་འཇུག་གི་ཁྲིད། ཡིག་ཆའི་སྐོར་མང་པོའི་ལུང་། ངོར་ལུགས་མགོན་པོ་ལྷ་བརྒྱད་ཀྱི་རྗེས་གནང་། སྤྱོད་འཇུག་གི་ལུང་རྣམས་ཞུས། དེའི་དགུན་རང་ཡུལ་ལ་ལོག་རྒྱུ་བྱས་པའི་ཚེ༑ཉིན་གཅིག་རྐང་པའི་རྟིང་པ་རྡོ་ལ་བརྡབ་པའི་རྐྱེན་བྱས་རྐང་པ་ཤིན་ཏུ་ཞ་བོར་འགྱུར་ལ་ཁད་བྱུང་། ཞག་ཤས་ནས་ཅུང་ཟད་བདེ་བར་སོང་ཡང་། ཕྱི་རྟིང་སྐྲངས་པ་ལས་རྣག་རྡོལ་ནས་ཟླ་བ་བཞི་ལྔ་ཙམ་གྱི་བར་དུ་ན་བ་བྱུང་བ་ནི། ངོར་པའི་ཆོས་སྐྱོང་རྣམས་ཀྱིས་ཁམས་ཕྱོགས་སུ་མི་གཏོང་བའི་རྟགས་སུ་འདུག །མར་ལམ་ལྷ་ས་རུ་ཇོ་བོ་མཇལ་བ་ལ་ཕྱིན། ལྷ་སའི་རྟེན་གསུམ་རྣམས་ལེགས་པར་མཇལ་ཞིང་སྨོན་ལམ་སྙིང་ནས་བཏབ། དེ་ནས་རིམ་བགྲོད་ཀྱིས་འོང་བ་འདམ་གཞུང་སྐོར་དུ་སླེབས་པའི་ཚེ། ཕྲན་གྱིས་དེ་སྐབས་ལམ་དུས་ཐུན་བཞི་རེ་འདོན་གྱི་ཡོད་པ་སོགས་ཁ་འདོན་གྱི་ཁུར་ལྕི་བ་དང་། གྲང་ངད་དང་དཀའ་ཚེགས་ཆེ་བའི་སྟོབས་ཀྱིས། བྲག་རྫོང་མའི་ཁ་འདོན་ཉིན་མང་པོ་ལ་ཆད་ཤོར། ནུབ་གཅིག་འགྱོད་པ་དང་བཅས། མགོན་པོའི་ཐུགས་དམ་རྒྱས་པ་དང་། མ་ཧཱ་ཀ་ལ་ཁྲི་གཅིག་བཟླས་པས་དེ་ནུབ་རྨི་ལམ་དུ། ངོར་གྱི་གསེར་སྐུ་ལྷ་ཁང་དུ་སླེབས་འདུག་པ། དེ་ན་གྲི་གུག་ཅིག་དང་། ཐོད་པ་བཞག་འདུག་པས། གྲི་གུག་དེ་ལག་པ་གཡས་པས་བཟུང་། གཡོན་པས་ཐོད་པ་བཟུང་ནས་གར་སྟབས་མང་པོ་བྱས་པ་རྨིས་པ་ངོ་མཚར་བའི་ལྟས་སུ་འདུག །བོད་ལ་ཡར་འགྲོ་དུས་སྒར་པ་རྣམས་ཀྱིས་བཤས་མང་པོ་བཤས་པ་ལ་ངེས་འབྱུང་དང་། སྐྱོ་ཤས་ཁ་ཙམ་མིན་པ་སྐྱེས། ཕྱིར་ལམ་ཡང་ལུག་འགའ་བསད་པ་མཐོང་བས། བསད་བྱའི་སེམས་ཅན་དེ་རྣམས་ལ་སྙིང་རྗེ་བཅོས་མ་མིན་པ་སྐྱེས་པ་དང་། ཕྱིན་ཆད་འདི་འདྲའི་སྡིག་ལས་བྱེད་པ་མིག་གིས་མི་མཐོང་སར་དགེ་སྦྱོར་བྱེད་པའི་དུས་ཤིག་ནམ་འོང་ན་སྙམ་པ་བྱུང་ཞིང་། དེ་རྣམས་ཀྱི་ཤ་ཁྲག་མཐོང་ཚེ་ཉིན་ཞག་མང་པོར་ཡི་ག་འགགས་ནས། ཁ་ཟས་ཆེར་ཟ་མི་མོས་པ་སོགས་བྱུང་བས། གོང་སྨོས་དགེ་སློང་གི་སྡོམ་པ་ཞུས་ནས་བཟུང་། ཤ་ཆང་གི་བཟའ་བཏུང་། ཕྱི་དྲོའི་ཁ་ཟས་རྣམས་སྤངས་ནས་རིམ་གྱིས། ཆོས་གོས་རྣམ་གསུམ་དང་གདིང་བ། ལྷུང་བཟེད་རྣམས་རྩོལ་སྒྲུབ་བགྱིས་ནས་བྱིན་གྱིས་བརླབས་ཏེ་འཆང་ཁུལ་བགྱིས། རང་ཡུལ་སླེབས་མ་ཐག་བཅུ་གཅིག་ཞལ་དཔལ་མོ་ལུགས་ཀྱི་སྨྱུང་གནས་དཀར་པོ་ཆ་བརྒྱད་གཅིག་བསྡད། ལར་ངག་བརྒྱ་བསྙེན་བརྒྱ་ཞིག་ལའང་སྟན་ཐོག་གཅིག་ཏུ་འདུག་མྱོང་། དེ་ནས་ཀྱཻ་རྡོར་བསྙེན་མཚམས་ལ་ཞུགས་པས་ཟླ་བ་བརྒྱད་ཀྱི་ཁོངས་སུ་བསྙེན་པ་ཡོངས་རྫོགས་གྲུབ། རང་ལོ་ཉེར་གཅིག་པའི་དཔྱིད་ཀ་སྡེ་དགེ་ལ་ཕྱིན། ཐུབ་དབང་གཉིས་པ་འཇམ་དབྱངས་མཁྱེན་བརྩེའི་དབང་པོའི་ཞལ་དཀྱིལ་མཇལ། མི་ལུས་ཐོབ་པ་དོན་ལྡན་དུ་གྱུར། རྗེ་ཉིད་ཀྱི་དྲུང་ནས་སྔ་ཕྱིར་དབུ་མ་ལུགས་ཀྱི་སེམས་བསྐྱེད་ལན་གཉིས། བྱམས་སྨོན་བཤད་ལུང་ལན་གཉིས། མཁའ་སྤྱོད་མའི་བྱིན་རླབས་དང་། ཁྲིད་ལུང་ཡོངས་རྫོགས་ཚར་གསུམ་དང་། ཐུགས་རྗེ་ཆེན་པོ་དང་ཕྱག་རྒྱ་ཆེན་པོ་ཟུང་འཇུག་གི་རྗེས་གནང་ཁྲིད་བཅས་ལན་གསུམ། ཐུགས་རྗེ་ཆེན་པོའི་དམར་ཁྲིད་མདོར་བསྡུས། འཇམ་དབྱངས་གང་བློ་མའི་རིག་གཏད། ཨ་ར་པ་ཙའི་རྗེས་གནང་། ས་འཇམ་སྦགས་སྒྲུབ་ཀྱི་བྱིན་རླབས་སོགས་མང་པོ་ཐོབ། མངའ་རི་ཆོས་རྗེ་ཀུན་དགའ་འཇམ་དབྱངས་ཀྱི་དྲུང་ནས། སྒྲུབ་ཐབས་ཀུན་བཏུས་པོད་བཅུ་ཙམ་གྱི་དབང་ལུང་མཐའ་དག་ཞུས། རང་ཡུལ་དུ་སླེབས། བསྙེན་སྒྲུབ་དང་དཔེ་བལྟས་སོགས་རྣམ་དཀར་གྱི་བྱ་བ་གང་འོས་བགྱིས་ཤིང་། རང་ལོ་ཉེར་ལྔ་པའི་ཐོག་སླར་ཡང་སྡེ་དགེ་ལ་ཕྱིན། ཀུན་མཁྱེན་རྡོ་རྗེ་འཆང་མཁྱེན་བརྩེའི་དབང་པོའི་མཚན་དཔེའི་དཀྱིལ་འཁོར་མཇལ། ཆོས་མང་པོ་ཐོབ་ཅིང་། མཁས་པ་གཞན་གྱི་དྲུང་ནས། སྤྱོད་འཇུག །སྡོམ་གསུམ། དབུ་མ་འཇུག་པ། དབུ་མ་རྒྱན་རྣམས་ཀྱི་བཤད་པ་ཉན་ཅིང་། ཚིག་དོན་ལ་རྟོག་དཔྱོད་བགྱི་བའི་ཁུལ་བྱས། འཇམ་མགོན་བླ་མ་བློ་གྲོས་མཐའ་ཡས་ཀྱི་དྲུང་ནས། གྲུབ་ཆེན་བརྒྱད་ཅུ་རྩ་བཞིའི་སྒོ་འབྱེད་རྡོ་རྗེ་འཆང་གི་དབང་། གྲུབ་ཐོབ་བརྒྱད་ཅུ་རྩ་བཞི་སོ་སོའི་བྱིན་རླབས། ཡི་དམ་མི་གཡོ་བ་དང་། བཀའ་སྲུང་མགོན་པོ་ཕྱག་བཞི་པའི་རྗེས་གནང་། གྲུབ་ཆེན་ཆོས་དྲུག་ཁྲིད། ཡིག་ཆའི་སྐོར་ཐམས་ཅད་ཀྱི་ལུང་། མར་མི་དྭགས་གསུམ་གྱི་བླ་སྒྲུབ་དང་། བསྲེ་འཕོ། ཆོས་དྲུག །ཕྱག་ཆེན་རྣམས་ཀྱི་ཁྲིད། འཇམ་དཀར་རྗེས་གནང་། ས་འཇམ་སྦགས་སྒྲུབ་ཀྱི་བྱིན་རླབས་སོགས་མང་པོ་ཐོབ་ནས་ཡར་རང་ཡུལ་ལ་སླེབས། མཁས་དབང་བློ་བཟང་སྦྱིན་པའི་དྲུང་ནས། སྒྲ་ཀཱ་ལཱ་པའི་མཚམས་སྦྱོར། མིང་ལེ། ཀུན་བཤད། ཀྲིཏྲ་བཅས་ལེའུ་ཉེར་ལྔའི་བཤད་པ་རི་མོ་སྙན་ངག་ལེའུ་གསུམ་ཀའི་གོ་དོན་བཤད་རྒྱུགས་རྩོམ་རྒྱུགས་འབུལ་བ་དང་། སྡེབ་སྦྱོར་རིན་ཆེན་འབྱུང་གནས་ཀྱི་བཤད་ཁྲིད་ལག་ལེན་བཅས་བསླབས། རང་ལོ་ཉེར་བདུན་ལོན་ཚེ། དོན་གླིང་ནས། ཐར་རྩེ་རྡོ་རྗེ་འཆང་འཇམ་དབྱངས་རིན་ཆེན་རྡོ་རྗེའི་ཞལ་སྔ་ནས། རི་ཁྲོད་མའི་རྗེས་གནང་སྔོན་དུ་འགྲོ་བའི་སྒོ་ནས་ལམ་འབྲས་སློབ་བཤད་སྨིན་གྲོལ་ཆ་ལག་ཡོངས་རྫོགས་ལུང་བཅས་ཞིབ་ར་ཐོབ། དེ་ནས་རེ་ཞིག་གི་བར་བསྙེན་སྒྲུབ་དང་། བླ་མ་དེ་ཉིད་ཀྱི་དྲུང་ནས་ཚུར་ཞུས་པ་དང་། ཕར་ཆོས་ཕྲན་ཚེགས་འཆད་པ་མང་དུ་བྱས། རང་ལོ་སོ་དྲུག་པའི་དུས་སུ་ཕ་རྒན་དུས་ལས་ཡོལ། དེའི་སྟོན་རྒྱབ་སྐལ་བཟང་དགོན་དུ་བླ་མ་ཆོས་ལྷ་མཇལ་བ་ལ་འཁོར་ཙམ་ཕྱིན། བླ་མའི་དྲུང་ནས་སྔ་ཕྱིར་ངོར་ལུགས་དཀྱིལ་འཁོར་བདུན་གྱི་དབང་། མཁའ་སྤྱོད་མའི་བྱིན་རླབས་ཁྲིད་མདོར་བསྡུས། ཞལ་སྒྲུབ་དུས་ཀྱི་མགོན་པོའི་རྗེས་གནང་སོགས་ཆོས་མང་དུ་ཞུས། དེ་གའི་དགོན་ཡར་མར་རྣམས་སུ་ཆོས་འཆད་སྤེལ་དུ་མ་བྱས། དགུན་རང་གནས་སུ་སླེབས། སྔ་ནས་ང་རང་གིས་ལམ་འབྲས་ཀྱི་དམིགས་རྣམ་ལོ་བཅོ་ལྔ་ལ་བསྒོམ་སྙམ་པ་ཡིད་ལ་ཡོད་པ་དང་། དེ་སྐབས་ཕ་རྒན་ཤི་བ་དང་། སྡེ་གཞུང་མཆོག་སྤྲུལ་སྙན་གྲགས་ལུང་རིགས་ཉི་མའི་མདུན་དུ་ལན་གཅིག་འགྲོ་སྙམ་པ་ལ། དེ་ཡང་ཞིང་ཁམས་གཞན་དུ་གཤེགས་པས་ངེས་འབྱུང་གི་རྐྱེན་བྱས། རང་ལོ་སོ་བདུན་པར་ཟླ་བ་དང་པོའི་ཚེས་གཅིག་གི་ཉིན་སྒྲུབ་པའི་བར་ཆད་སེལ་བའི་ཆེད་དུ། རྗེ་བླ་མ་སྒྲུབ་བརྩོན་དམ་པ་ཀུན་དགའ་ཉི་མའི་དྲུང་ནས། མགོན་པོ་ཁྲོ་བཅུའི་རྗེས་གནང་ཞིག་ཞུས། ཚེས་གསུམ་གྱི་ཉིན་སྒོ་འདག་སྦྱར་བགྱིས་ནས་མཚམས་ལ་ཞུགས།