འཇིག་རྟེན་དབང་ཕྱུག་ཐམས་ཅད་མཁྱེན་པ་ཡོན་ཏན་རྒྱ་མཚོ་དཔལ་བཟང་པོའི་རྣམ་པར་ཐར་པ་ནོར་བུའི་འཕྲེང་བ།
འཇིག་རྟེན་དབང་ཕྱུག་ཐམས་ཅད་མཁྱེན་པ་ཡོན་ཏན་རྒྱ་མཚོ་དཔལ་བཟང་པོའི་རྣམ་པར་ཐར་པ་ནོར་བུའི་འཕྲེང་བ་ཞེས་བྱ་བ་བཞུགས་སོ། །
རིང་ནས་མི་ཕྱེད་མཛའ་གཅུགས་ཀྱིས་བཅིངས་ལྷག་བསམ་དཔྱིད་ཀྱི་ཕོ་ཉ་ཡིས། །མགྲོན་དུ་བསུས་པའི་རླབས་ཆེན་སྤྱོད་པའི་དབྱར་གྱི་དཔལ་མོ་བཞད་པའི་བཞིན། །
ལུས་ཅན་ཀུན་གྱི་ཕན་བདེའི་མྱུ་གུ་གཡུར་དུ་ཟ་བའི་པད་དཀར་འཆང་། །གྲངས་མེད་ཡོན་ཏན་ཁུར་གྱིས་དུད་པའི་ཐུབ་བསྟན་རྒྱ་མཚོའི་མགོན་དེར་འདུད། །
ཕྱག་ན་པདྨས་འདུལ་ཞིང་བོད་ཡུལ་འདིར། །རིགས་གསུམ་མགོན་པོའི་སྒྱུ་འཕྲུལ་དྲ་བའི་གར། །ཆོས་རྒྱལ་མེས་དབོན་རྒྱལ་བའི་འབྱུང་གནས་སོགས། །སྤྲུལ་པའི་འཕྲེང་བ་མི་འཛད་ཤིན་ཏུ་རིང་། །མ་རྨད་ཐུགས་རྗེ་ཆེན་པོའི་འོད་དཀར་གྱིས། །མིག་སྨན་ལྟ་བུར་གནག་པའི་འཁོར་བའི་མུན། །མཐར་བྱེད་སྐྱེས་རབས་ཟླ་བའི་དཀྱིལ་འཁོར་དང་། །སྲིད་པའི་དཀར་ཆ་རྫོགས་མིན་དེ་སྲིད་འཕེལ། །སོས་དུས་མཁའ་དབྱིངས་བཻ་ཌཱུར་ལྟར་དྭངས་པར། །སྤྲིན་དཀར་དལ་བུར་གཡོ་ལས་ཆར་གྱི་རྒྱུན། །བབས་ཚེ་རྨ་བྱ་དགའ་བའི་གར་བསྒྱུར་ན། །དམ་པའི་རྟོགས་པ་བརྗོད་ལ་སུ་མི་དད། །དེ་ཕྱིར་ཡོན་ཏན་གདེངས་ཀ་རབ་གཡོ་ཞིང་། །ཐུབ་བསྟན་རྒྱ་མཚོའི་འཇིངས་ན་ལེགས་གནས་པ། །སྔོན་མེད་ཀླུ་དབང་ཕྱག་ན་པད་དཀར་ཅན། །བདེ་ཆེན་ཆོས་ཀྱི་རྒྱལ་པོར་གྲགས་མིན་ནམ། །ཁྱོད་ཀྱི་གསང་བ་གསུམ་གྱི་ཕ་རོལ་མཐའ། །ཚད་མར་འཇལ་ལ་ཀུན་མཁྱེན་རྒྱལ་བའི་ཐུགས། །ཐེ་ཚོམ་ཁྱོགས་ལ་འཕྱང་ན་བདག་འདྲ་ཡིས། །སྨྲ་བའི་བརྟུལ་ཞུགས་འཛིན་པ་ངལ་བའི་རྒྱུ། །འོན་ཀྱང་རྒྱ་མཚོ་ཆེ་ལས་ཀུ་ཤའི་རྩེས། །བླངས་པའི་ཆུ་ཐིགས་ཇི་བཞིན་ཐུན་མོང་གི །གདུལ་བྱའི་སྣང་ངོར་འཚམ་པའི་རྣམ་ཐར་གཟུགས། །རབ་དཀར་ཤོག་བུའི་མེ་ལོང་ངོས་སུ་ཤར། །དེ་ཡང་དུས་གསུམ་གྱི་རྒྱལ་བ་ཐམས་ཅད་ནི་ལུས་ཅན་མཐའ་དག་ལ་ལྷག་པར་རྗེས་སུ་བརྩེ་བས་དངོས་དང་བརྒྱུད་པའི་སྒོ་ནས་སྤྲུལ་པ་མཐའ་ཡས་པས་སེམས་ཅན་གྱི་དོན་རླབས་པོ་ཆེ་མཛད་ཅིང་། ཁྱད་པར་བསྐལ་བ་བཟང་པོ་འདི་ལ་གྲགས་ཆེན་གྱི་སངས་རྒྱས་སྟོང་འབྱོན་པའི་ནང་ཚན། རྒྱལ་བ་ཟས་གཙང་གི་སྲས་པོ་འཕགས་པའི་ཡུལ་དུ་ཆོས་ཀྱི་
འཁོར་ལོ་རྒྱ་ཆེན་པོ་བསྐོར་ནས། སྐུ་དངོས་ཀྱིས་གདུལ་བར་བྱ་བའི་གནས་མ་ཡིན་ལ། རྒྱ་ནག་གི་གནས་ནི་འཕགས་པ་འཇམ་དཔལ་གྱིས་འདུལ་བའི་ཞིང་དང་། གངས་ཅན་གྱི་ལྗོངས་འདི་ཐུགས་རྗེ་ཆེན་པོ་སྤྱན་རས་གཟིགས་ཀྱིས་འདུལ་བའི་ཞིང་དང་། ཨྱོན་གྱི་ཡུལ་ནི་དཔལ་ཕྱག་ན་རྡོ་རྗེས་འདུལ་བའི་ཞིང་དུ་བྱིན་གྱིས་བརླབས་པར་བརྟེན། བོད་གངས་ཀྱི་ར་བས་བསྐོར་པའི་རྒྱལ་ཁམས་འདིར། ཐུགས་རྗེ་ཆེན་པོའི་སྤྲུལ་པ་སྤྲེའུ་བྱང་ཆུབ་སེམས་དཔའ་ལས་མིའི་འགྲོ་བ་འཕེལ་ཞིང་། བོད་སྤྱི་ལ་དབང་བསྒྱུར་བའི་རྒྱལ་པོ་གཉའ་ཁྲི་བཙན་པོ་སོགས། ཆོས་སྐྱོང་པའི་རྒྱལ་པོ་རྣམས་ཀྱང་ཐུགས་རྗེ་ཆེན་པོའི་སྤྲུལ་པ་ཤ་སྟག་ཡིན་ལ། དེ་དག་གི་རྗེས་སུ་འབྲོམ་ཆོས་ཀྱི་རྒྱལ་པོ་སོགས་གོས་དཀར་ལྕང་ལོའི་འཕྲེང་བ་འཛིན་པ་དང་། འབྲོམ་ཀུ་མཱ་ར་མ་ཏི་སོགས་ཁྲིམས་ལྡན་ངུར་སྨྲིག་འཛིན་པའི་རྣམ་པར་རོལ་བ་སྟེ། མདོར་ན་སྤྲུལ་པ་སྣ་ཚོགས་པའི་སྒོ་ནས་འགྲོ་བ་སྤྱི་དང་། བྱེ་བྲག་གངས་ཅན་པ་རྣམས་ཀྱི་དོན་རྒྱུན་མི་འཆད་པར་མཛད་པ་ནི། གླེགས་བམ་རིན་པོ་ཆེ་ལས། སྤྱིར་སེམས་ཅན་རྣམས་ཀྱི་མགོན་པོ་ཡིན། །སྒོས་གངས་རིའི་ཁྲོད་དུ་རྒྱལ་སྲིད་སྐྱོང་། །ཞེས་པ་དང་། མཁར་ནག་ལོ་ཙཱ་བས། སྟོན་པ་ཞིང་འདིར་བྱོན་པའི་ཚེ། །མགོན་ཁྱོད་ཁྱེའུར་སྣང་བ་ལ། །རྒྱལ་དབང་དོན་ཀུན་གྲུབ་པ་དེའི། །ལེགས་བཤད་འདོམས་ལ་ལྷག་པར་དད། །དེ་ནས་དཀོན་ཅོག་གསོལ་བ་སོགས། །འཕགས་པའི་ཡུལ་གྱི་འཛིན་མའི་གཞིར། །འཁྲུལ་མེད་སྐྱེས་རབས་ཚར་དངར་བས། །ཐུབ་པའི་བསྟན་པ་ཡང་དག་སྤེལ། །ཁྱད་པར་ཁ་བ་ཅན་ལྗོངས་འདིར། །ཆོས་རྒྱལ་སྲོང་བཙན་སྒམ་པོ་
ཞེས། །སྙན་པར་གྲགས་དེས་ཇོ་ཤཱཀ་གཉིས། །སྤྱན་དྲངས་བཀའ་དྲིན་མཚུངས་མེད་སྩལ། །འགྲོ་བའི་མགོན་ཁྱོད་བར་སྐབས་སུ། །ཆོས་རྒྱལ་འཕགས་པར་གྱུར་བའི་ཚེ། །སེ་ཆེན་གན་གྱིས་སྤྱན་དྲངས་ནས། །རྡོ་རྗེ་འཆང་གི་ལས་མཚན་ཕུལ། །འདི་ནས་མི་རབས་བདུན་པ་ན། །གསེར་དང་རྒྱ་མཚོའི་མཚན་ལྡན་གྱིས། །སླར་ཡང་མཆོད་ཡོན་བྱེད་དོ་ཞེས། །ལུང་བསྟན་ཐོག་ཏུ་བབས་པར་མཛད། །རྒྱལ་བས་ཤེར་ཕྱིན་བྱང་ཕྱོགས་ནས། །བྱང་དུ་རྒྱས་པར་འགྱུར་གསུངས་པ། །ཨལ་ཐན་གན་དང་སརྦ་ཛྙས། །འགྲོ་དོན་དཔག་མེད་མཛད་ལ་དགོངས། །ཞེས་པ་ལྟར་རོ། དེ་ཡང་བོད་ཡུལ་དུ་འགྲོ་བའི་དོན་མཐའ་ཡས་པར་མཛད་པའི་ནང་ཚན་ལ། རྭ་སྒྲེང་རྒྱལ་བའི་དབེན་གནས་ཀྱི་ཤུག་པ་རྣམས་ལ་ཤུན་པ་རིམ་པ་བདུན་འབྱུང་བ་ནི། བཞུ་ཁང་རབ་འབྱམས་པ་དགེ་ལེགས་ལྷུན་གྲུབ་ཀྱིས་མཛད་པའི་རྣམ་ཐར་དད་པའི་སྒོ་འབྱེད་ལས། མཆོག་གི་སྤྲུལ་སྐུ་ཇི་ལྟར་ཕེབས་པ་ནི། །རྭ་སྒྲེང་ཤུག་པའི་མཚོན་དོན་འཆད་པ་ན། །ཤུན་པ་བདུན་ནི་གངས་རིའི་ཁྲོད་འདི་ཉིད། །རྒྱལ་བ་བདུན་གྱིས་བར་མཚམས་མེད་པར་སྐྱོང་། །ཞེས་པ་ལྟར། ཐམས་ཅད་མཁྱེན་པའི་མཚན་དང་ལྡན་པའི་སྤྲུལ་པ་བདུན་རྒྱུན་མི་འཆད་པར་འབྱུང་བའི་མཚོན་དོན་དུ་བཤད་ཅིང་། ཐམས་ཅད་མཁྱེན་པ་དགེ་འདུན་རྒྱ་མཚོའི་གསུང་མགུར་དུ། སྐྱེ་བ་བདུན་དུ་འགྲོ་དོན་ལེགས་བྱས་ནས། །ཟག་མེད་ཆོས་ཀྱི་དབྱིངས་སུ་སྡུད་པར་བྱེད། །ཅེས་ཞལ་གྱིས་བཞེས་པ་ཡིན་ནོ། །དེ་ལྟར་སྤྲུལ་པ་བདུན་དུ་འབྱུང་བའི། །མཆོག་གི་སྤྲུལ་སྐུ་བཞི་པ་འདི་ཉིད་ནི། མཁར་ནག་ལོ་ཙཱ་བས། དཀོན་ཅོག་འབངས་ཀྱི་རྣམ་
ཐར་ལས། །ཨ་ཏི་ཤའི་སྲས་འབྲོམ་རྗེ་དང་། །ཐམས་ཅད་མཁྱེན་པའི་མཚན་ཅན་རེ། །བོད་དུ་རིམ་པར་འབྱོན་པར་གསུངས། །དེ་ཡང་པཎ་ཆེན་དགེ་འདུན་གྲུབ། །སླར་ཡང་སཾ་གྷ་ས་མུ་དྲ། །རྗེ་བཙུན་བསོད་ནམས་རྒྱ་མཚོའི་ཞབས། །ད་ལྟ་བདེ་ཆེན་ཆོས་རྒྱལ་ལགས། །ཞེས་པ་སྟེ། ཐོག་མར་ངོས་འཛིན་གྱི་ཚེ། སྣང་ཚུལ་མི་འདྲ་བ་གཉིས་སུ་གྱུར་པས། ལ་ལ་དག་འབྲི་ཁུང་ཞབས་དྲུང་ཆོས་རྒྱལ་ཕུན་ཚོགས་ཀྱི་ཐུགས་སྲས་གསུམ་པ། ཞབས་དྲུང་དཀོན་ཅོག་རིན་ཅེན་ཡིན་ནམ་ཞེས་དཔྱད་གཞི་ཤར། དེ་ལ་བརྟེན་ཕྱག་མཛོད་གུ་ཤྲཱི་དཔལ་ལྡན་རྒྱ་མཚོས་འབྲི་ཁུང་དུ་གཟིགས་པར་བྱོན་པར། སེང་གེ་སླེབས་བྱུང་གསུངས་པས། རྗེ་གོང་མས་ནི་ངེད་ལ་སེང་གེ་གསུང་གི་མེད་སྙམ་སྟེ་སྐུ་སྐྱེ་མིན་པ་འདྲ་བསམ་པ་ཅིག་ཤར། འོན་ཀྱང་དེ་སྐབས་ཡིན་མིན་གཉིས་ཀའི་ཁ་ཚོན་མ་ཆོད་པར། རེ་ཞིག་སྤམ་མེ་བཞག་སྟེ་ཕྱིར་བྱོན། གནས་ཆུང་ལྕོག་ནས་སྤྲུལ་པའི་ཆོས་སྐྱོང་ཆེན་པོས་མཆོག་གི་སྤྲུལ་སྐུ་སོག་ཡུལ་རང་དུ་འཁྲུངས་པར་ལུང་བསྟན། ཚངས་པ་དུང་གི་ཐོར་ཚུགས་ཅན་ཚེར་གསེབ་ཆོས་རྒྱལ་གྱིས་ཀྱང་དེ་དང་མཐུན་པ་ཞིག་གསུངས་པ་ལ་ཡིད་ཆེས་ཀྱི་གནས་སུ་མཛད་དགོས་རྒྱུར་འདུག་ཀྱང་། ཟོས་བདེའི་སྐབས་ཆོས་སྐྱོང་གི་རིགས་ཀྱི་ལུང་བསྟན་ལ་ཡང་རས་སུ་བོར་རེ་བ་བྱེད་ཅིང་། འགག་ལ་ཐུག་པའི་དུས། རྒྱུ་མཚན་ཅི་ཡང་མེད་པ་ཞིག་གི་ཚིག་ལའང་སངས་རྒྱས་ཀྱི་གསུང་ལྟར་གཅེས་སྤྲས་སུ་བྱེད་པ་འདི་ཀུན་གྱི་སྲོལ་ལ་སྣང་ངོ་། །སོག་ཡུལ་གྱི་སྒར་པ་རྣམས་ཀྱི་མགོ་མིར་གསོལ་དཔོན་ཚུལ་ཁྲིམས་རྒྱ་མཚོ་ཡོད་འདུག་པས། ཁོང་པ་དང་
ནང་སོ་མཛོ་མོ་མཁར་པ་གཉིས་ཀྱིས་དབུས་སུ་མི་ཆེད་གཉེར་མངགས་པའི་ཡི་གེ་འདི་ལྟ་སྟེ། ཕྱག་མཛོད་རིན་པོ་ཆེས་དབུ་མཛད། ཆོས་རྗེ་ཞལ་ངོ་རྣམས་དང་། དྲུང་འཁོར་བགྲེས་གཞོན་རྣམས་ཀྱི་ཞབས་དྲུང་དུ། ཐག་རིང་གི་སའི་ཆ་ནས་གུས་པ་ཆེན་པོས་ཞུ་བ། དེང་སང་གི་དུས་དཔོན་སློབ་ཐམས་ཅད་སྐུ་སྙོམས་ཤིང་། ལུགས་གཉིས་ཀྱི་འགྲོ་དོན་རྒྱ་ཆེན་པོའི་ངང་དུ་བཞུགས་པ་གནང་ལགས་སམ། སྤྲང་ཆུང་སྙིང་རུལ་བདག་ཀྱང་། ཞབས་དྲུང་ཐམས་ཅད་མཁྱེན་པའི་ཐུགས་རྗེ་ལ་བརྟེན་ནས། ལུས་ལ་ནད་འཚེ་མེད་ཅིང་སྒར་ཆེན་གཞིས་ཀྱི་དབུ་སྡུད་དང་། འགྲོ་ཕན་འཕེལ་བའི་ཁུལ་དུ་གནས་ལགས། འཚམས་ཞུས། འདིར་སེ་ཆེན་ཆོས་ཁུར་གྱི་བཱི་ཇི་ཆུང་བ་ལ། ལོ་སྔོན་མའི་ཟླ་བ་བཅུ་གཉིས་པའི་གནམ་གང་གི་ཉིན་བུ་ཞིག་སྐྱེས་འདུག །དེ་ལ་རྟགས་རྟེན་འབྲེལ་ལེགས་པ་འགའ་འབྱུང་འདུག་ཀྱང་། དཔོན་མོས་གསངས་ནས་བསྡད་ལེ་རེད། དེ་རྗེས་བཱི་ཇི་ཟླ་བ་གསུམ་ཙམ་དབང་པོ་ཤོར་ནས་སེམས་མི་ཟིན་པ་ལྟ་བུ་བྱུང་འདུག །དང་པོ་ཁོག་ལ་ཞུགས་དུས། བཱི་ཇིའི་རྨི་ལམ་དུ། ཞབས་དྲུང་རིན་པོ་ཆེ་ན་བཟའ་དཀར་པོ་བཞེས་ནས་བཞུགས་པ་ལ། ཕྱག་བཙལ་བ་དང་། ལྷ་དཀར་པོ་ཞིག་དང་མཇལ་བ་བྱུང་འདུག །ཁོག་པར་ཡོད་དུས་ཁོག་སྟོད་ལ་བསྡད་པ་དང་སྔར་དང་མི་འདྲ་བའི་ལུས་སེམས་བདེ་བ་སོགས་རྟགས་མང་པོ་བྱུང་འདུག་སྟེ་སྔ་སོར་མ་བཤད་ལེ་རེད། དེ་རྗེས་ཟླ་བ་བརྒྱད་པའི་ནང་དུ། བཱ་ཇི་ཁ་ལྷ་དཀར་པོ་ཞིག་གིས། འདི་ཏ་ལའི་བླ་མའི་སྐུ་སྐྱེ་ཡིན། ཁྲི་ཐོག་ལ་ཕུད་ལ་སྡེ་ཚོ་ལ་མཇལ་ཁ་ཐོང་ཟེར་བའི་ལུང་བསྟན་བྱུང་གསུངས་
འདུག་པས། ནང་སོ་མཛོ་མོ་མཁར་པ་དང་ཁོང་རྣམས་ཀྱིས་སྤྲུལ་སྐུ་ཡིན་ན་རྟེན་འབྲེལ་ཀྱང་འཕྱུགས་དྭོགས་ཁྲི་ཐོགས་ཏུ་གདན་དྲངས་འདུག་ལགས། དེ་སྐབས་ཀྱང་མེ་ཏོག་གི་ཆར་བབས་པ་སོགས་རྟགས་ཁྱད་པར་ཅན་བྱུང་ཟེར། དེ་རྗེས་སྡེ་ཆེན་ཀུན་ལ་གྲགས་བྱུང་བས། བདག་གིས་ཆ་དཀར་ཕྱོགས་ལ་འགྲོ་ཞོར་ལ་མཇལ་བས། འཁྲུངས་ནས་ཟླ་བ་བཅུ་ལས་མི་འགྲོ་བ་འདུག་སྟེ། རང་ག་བའི་ཕྲུག་གུ་དང་མི་འདྲ་བར། བཞུགས་ཚུལ་དང་གཟིགས་སྟངས་ཟ་མ་བཞེས་ཚུལ་རྣམས་ནི་ཁྱད་དུ་འཕགས་པ་ཞིག་འདུག་ལགས། ཞབས་དྲུང་ཐམས་ཅད་མཁྱེན་པའི་སྐུ་སྐྱེ་ཡིན་མིན་ཅི་ཡིན་རུང་ཐ་མལ་གྱི་ཉམས་ནི་མི་འདུག །ངེད་འདིར་ཡོད་རྣམས་ཀྱིས་གསུང་མ་བྱོན་བར་ལ་ཡིན་མིན་གཉིས་ཀའི་ཐག་མ་ཆོད། རྟགས་རྟེན་འབྲེལ་དེ་བཞིན་རེད་པས། གཡས་ཕྱོགས་སུ་ངེས་ཤེས་འགྲོངས་པ་བཞིན་ཨེ་བྱུང་། མ་བྱུང་ན་ཁྱེདདཔོན་སློབ་རྣམས་ཀྱིས། ཆོས་སྐྱོང་ལ་ལུང་བསྟན་ཞུ་བ་དང་། ཐུགས་དམ་བརྟག་པ། གཟན་སྒྲིལ་སོགས་མཛད་ནས་ཐུགས་ཡིད་ཆེས་པ་ཨེ་འོང་གཟིགས་པ་ཞུ་པས། སྡེ་ཆེན་ཀུན་ལ་སྐད་འདི་གྲགས་སོང་བས། མཐོང་ཚོད། ཚོར་ཚོད་ཀྱི་གནས་ཚུལ་ཞུས་པ་ཡིན་ལགས། ཡང་གསུང་བྱོན་ནས་ཡིད་ཆེས་བྱུང་ན་མྱུར་དུ་འཕྲོས་འབུལ་ལགས། གཞན་མ་བཱི་ཇིས་ལུང་བསྟན་འདྲ་མང་པོ་གསུངས་འདུག་སྟེ། འདིར་མ་ཞུས། ས་གླང་ཧོར་ཟླ་བཅུ་པའི་ཚེས་བཅོ་ལྔ་ལ་ཆོས་ཁུར་དབོན་པོའི་སྡེ་ཐོག་ནས་ཕུལ་བའི་ཞུ་ཡིག །ཅེས་སོ། །གནས་ཚུལ་དེ་ལ་བརྟེན་ནས། འབྲི་ཁུང་ཕྱོགས་ཀྱི་རེ་བ་བསྐྱུངས་ཏེ། ཕྱག་མཛོད་གུ་ཤྲི་ཆེན་པོ་ཉིད་ཀྱིས་གཙོས་པའི་སྒར་
དམངས་རྣམས་སོག་ཡུལ་དུ་གདན་འདྲེན་པ་ལ་འདེགས་པའི་བདུན་པ་དང་ལྡན་པར་གྱུར། དིང་སང་གི་དུས་ནི་བླ་ཆེན་རྣམས་ཀྱི་སྟོབས་འབྱོར་ལ་ཧམས་པས་སྐུ་སྐྱེ་ལ་ཧབ་ཐོབ་བྱེད་པར་སྣང་། དེ་སྐབས་བསྐལ་དུས་བཟང་བས་སྲོལ་ངན་དེ་འདྲ་མ་དར་བ་དང་། ལྷག་ཏུ་འབྲི་ཁུང་དུ་སྐུ་སྐྱེ་ཡིན་ནམ་དགོངས་པའི་ཐུགས་རྟོག་བྱུང་བ་ལས་སྤྲོས་པའི་སྤྱན་ཉེའི་རྣམ་པ་ནི། ཞབས་དྲུང་ཆོས་རྒྱལ་ཕུན་ཚོགས་དེ་སྐྱེས་བུ་དམ་པར་སོང་བས་ག་ལ་མཛད། ཕྱག་མཛོད་ནི་བོད་སོག་གང་དུ་སྐུ་སྐྱེ་བྱུང་ཡང་བརྟག་པ་ལུང་བསྟན་སོགས་ངེས་ཤེས་འགྲོངས་པ་ཞིག་དོན་དུ་གཉེར་བ་ལས། སོག་པོའི་རྒྱལ་རིགས་ལྟ་བུ་ཞིག་ལ་བྱུང་ན་ཁ་དྲག་དང་རྒྱུ་ཆེན་པོ་ཡོད། བོད་ཀྱི་བླ་ཆེན་མི་ཆེན་གྱི་རིགས་སུ་བྱུང་ན་དེ་དག་གི་ས་ཆའི་སྟེང་ནས་ལོངས་སྤྱོད་རྒྱུ་འོང་སྙམ་པའི་དིང་དུས་ཀྱི་སྐུ་སྐྱེ་ངོས་འཛིན་རྟོག་པ་འོག་འགྱུའི་འཁོར་ལོ་བསྐོར་པ་རྣམས་དང་འདྲ་བ་མིན་ནོ། །རྗེ་དྲུང་རིན་པོ་ཆེ་བསྟན་པ་རྒྱ་མཚོས། རྗེ་གོང་མའི་ཞལ་ཐང་རྒྱབ་ལ་ཕྱག་བྲིས་འབྱར་བ་ཞིག །འབྲི་ཁུང་དུ་བསྣམས་བྱོན་དུས་ངོ་མཁྱེན་པ་སོགས་ཡིད་ཆེས་ཚུལ་གསུངས་པ། སྤྱིར་སྤྲུལ་པ་ལ། སྐྱེ་བ་སྔ་ཕྱི་སྟར་ཆགས་སུ་འབྲེལ་བའི་སྤྲུལ་པ་དང་། དུས་གཅིག་ཏུ་སྤྲུལ་པའི་སྤྲུལ་པ་དང་། བྱིན་གྱིས་བརླབས་པའི་སྤྲུལ་པ་སོགས་འབྱུང་ཞིང་། དེ་དག་ཀྱང་མཐའ་གཅིག་ཏུ་མ་ངེས་པ་ཟླ་བའི་དཀྱིལ་འཁོར་གཅིག་ལ་གཟུགས་འབུམ་ཕྲག་འཆར་བ་ལྟར་ཕ་མཐའ་ཚད་བཟུང་བྲལ་བས་ན། བདག་ལྟ་བུའི་བློ་གྲོས་ཀྱི་རྩལ་དམན་པས་ཁ་ཚོན་གཅོད་པར་ག་ལ་ནུས། འཇམ་པའི་དབྱངས་དཀོན་ཅོག་ཆོས་འཕེལ་གྱི་གསུང་ལས། ག་ཇག་ཆོས་མཛད་སྡོམ་བརྩོན་བློ་གྲོས་
རྒྱལ་མཚན་དེ། ཆོས་མཐུན་ཐུགས་དམ་པ་ཞིག་ཡོད་འདུག་པས། རྗེ་གོང་མའི་དགོངས་པར་བདེ་ཞིང་ཞམ་འབྲིང་དུ་བཅར་བ་ནས། ཁོང་གི་སྐུའི་སྐྱེ་བ་ཞབས་དྲུང་དཀོན་ཅོག་རིན་ཅེན་ཡིན་འདུག་པས། རྣམ་པར་དཀར་བའི་ལས་ཀྱི་འབྲེལ་པས་རྗེས་སུ་བཟུང་བ་ཞིག་གོ་ཞེས་བཀའ་གནང་བ་ཐོས་སོ། །དེ་ཡང་འཁྲུལ་མེད་ཀྱི་ངེས་པནི། སོག་པོའི་ཡུལ་དུ་འཁྲུངས་པའི་རྒྱུ་མཚན། བཀའ་ཆེམས་ལས། སྔོན་དགེ་ལེགས་ཀྱི་འབྲེལ་པ་མི་དམན་པས། །དུས་དིང་སང་རྟེན་འབྲེལ་ཕུན་སུམ་ཚོགས། །སླར་སྨོན་ལམ་མཐུ་ལས་ཕྱི་མར་ཡང་། །ཚུལ་འདི་ལྟར་ཐེག་ཆེན་ལམ་བཟང་ནས། ཁྱོད་སྐལ་ལྡན་འདྲེན་པའི་དཔལ་དུ་འགྱུར། ཞེས་པ། ཞབས་དྲུང་རིན་པོ་ཆེ་འགྲོ་བའི་མགོན་པོ་ཆོས་རྒྱལ་འཕགས་པ་དང་ཐུགས་རྒྱུད་གཅིག་ལ། ཨ་ལན་ཐ་རྒྱལ་པོ་དེ་གོང་མ་སེ་ཆེན་གན་གྱི་སྐྱེ་བ་ཡིན་པར་སྣང་བས། དུས་དེར་མཆོད་ཡོན་གཉིས་སྨོན་ལམ་ལེགས་པར་བཏབ་པའི་མཐུས། དིང་སང་སོག་ཡུལ་དུ་དམ་པའི་ཆོས་དར་བ་སོགས་རྟེན་འབྲེལ་འགྲིག་པ་འདི་བཞིན་བྱུང་ལ་སླར་ཡང་སྨོན་ལམ་གྱི་མཐུས་སྐྱེ་བ་ཕྱི་མར་ཇི་གིར་གྱི་རིགས་སུ་འཁྲུངས་ཏེ། ཆོས་སྲིད་གཉིས་ལྡན་ཟུང་དུ་འབྲེལ་བའི་ཚུལ་གྱིས་སྐལ་ལྡན་རྣམས་ཐེག་པ་ཆེན་པོའི་ལམ་དུ་འདྲེན་པའི་དཔལ་དུ་འགྱུར་ཞེས་ཞལ་གྱིས་འཆེས་པའི་རྡོ་རྗེའི་གསུང་འགྱུར་བ་མེད་པའོ། །གླེགས་བམ་རིན་པོ་ཆེར། བོད་ནི་རྒྱལ་པོ་དག་ལ་ཚད་མར་བྱེད། །མི་དབང་མཛོད་ལ་བོད་ཁམས་བདེ་བར་སྐྱོང་། །ཞེས་པ་ལྟར། བོད་ཁ་བ་ཅན་ལྟ་བུའང་། ཐོག་མར་ཆོས་ཁོ་ནས་འདུལ་བར་མ་ནུས་པར་སྲིད་ཀྱི་སྒོ་ནས་འདུལ་
དགོས་པ་བྱུང་བ་དང་མཚུངས་པར་འདིར་ཡང་ཧོར་གྱི་རྒྱལ་རིགས་སུ་སྐུ་བལྟམས་པས། རྗེ་གོང་མའི་དུས་སུ་ཧོར་སོག་རྣམས་རྗེ་བཙུན་བཙོང་ཁ་པ་ཆེན་པོའི་བསྟན་པ་ལ་མི་ཕྱེད་པའི་དད་པ་ཐོབ་སྟེ། དམ་པའི་ཆོས་ཀྱི་འབྲེལ་ལམ་བཟང་པོ་བྱུང་པའི་སྟེང་དུ། སྐུ་སྐྱེ་རྟིང་མའི་དུས་ངེད་ཀྱི་རིགས་སུ་འཁྲུངས་ཞེས། འཇིག་རྟེན་དང་སྒོ་བསྟུན་པའི་སྲིད་ཀྱི་ཆ་ནས་ཀྱང་མངོན་པར་ཞེན་པས་བསྟན་པ་ལ་འགྱུར་མེད་ཀྱི་གུས་པ་མི་ལྷོད་པ་ལ་གཟིགས་པ་ནི་གོངས་གཞི་ཤིན་ཏུ་ཆེ་ཞིང་། འབྲུག་པ་རྒྱལ་དབང་ཆོས་རྗེས་འབྲུག་བསྟན་ལ་དགོངས་ནས་བསམ་བཞིན་བྱ་ཁྲི་དཔོན་གྱི་རིགས་སུ་སྐྱེ་བ་བཞེས་པའི་བསྔགས་བརྗོད་ཐམས་ཅད་མཁྱེན་པ་པདྨ་དཀར་པོའི་རྣམ་ཐར་དུ་གསལ་བ་དོན་འདི་དང་མཚུངས་མོད་ཀྱང་། གཞན་ཕན་གྱི་གདུལ་བྱ་སྐྱོང་བ་ལ། །ཐུགས་བསྐྱེད་རྒྱ་ཆེ་ཆུང་གིས་ཤར་ཕྱོགས་རྒྱ་མཚོའི་མཐའ་ཚུན་གྱི་ཆེན་པོ་ཧོར་གྱི་རྒྱལ་ཁམས་མཐའ་དག་ཞྭ་སེར་པོ་གཅིག་གི་འོག་ཏུ་ཆོས་སྲིད་གཉིས་ལྡན་གྱིས་ཁྱབ་པར་གྱུར་ཚེ། གཉལ་བྱར་ལོ་གསུམ་འབྲུག་བསྟན་གྱིས་ཁྱབ་པ་ཙམ་ལ་ཞལ་ཕོ་མཛད་པའང་ནམ་མཁའ་དང་ལག་མཐིལ་གྱི་དཔེར་མངོན་ནོ། །གཞན་ཡང་བཀའ་ཆེམས་ལས། མི་གནམ་སྐོས་ཀྱི་དགའ་བ་སྐྱེད་བྱེད་རྒྱལ། །མཚན་ཀུན་ཏུ་རྒྱལ་བའི་ཡོན་ཏན་དེ། དཔལ་ཡར་གྱི་ངོ་བཞིན་གོང་དུ་འཕེལ། །ཞེས་པའི་དོན་གནམ་བསྐོས་ནི་ཇིང་གིར་གྱི་རྒྱལ་བརྒྱུད་དེའི་རིགས་སུ་འཁྲུངས་པས་ཡབ་ཡུམ་སོགས་ཕྱོགས་དེའི་སྐྱེ་བོ་རྣམས་ཀྱི་དགའ་བ་སྐྱེད་པར་བྱེད་པ་དང་། ཡོན་ཏན་ཞེས་པའི་མཚན་ཟུར་དངོས་སུ་ཐོན་པ་དང་། གོང་དུ་འཕེལ་ཞེས་པས་རྒྱ་མཚོ་ལ་ཆུ་བོ་མཐའ་དག་འདུ་ཞིང་འཕེལ་བས་དོན་གྱིས་ཐོན་
པའོ། །ཨེ་མ་སྲིད་པའི་མེ་ལོང་དུ། །ལས་ཉོན་གྱིས་འཕངས་བདེ་སྡུག་གི །བཟང་ངན་སྣ་ཚོགས་འཆར་བ་ལ། །བྱིས་པའི་སྐྱེ་བོ་ངོ་མཚར་བྱེད། །གཏན་བདེའི་ཟླ་བའི་དཀྱིལ་འཁོར་ལ། །འགྱུར་མེད་སྤྲུལ་པའི་རི་དྭགས་གཟུགས། །ནམ་ཡང་འགོག་མེད་གསལ་བ་འདིས། །འཁོར་བའི་མུན་པ་ཕ་མཐར་བསྐྲད། །རྒྱལ་བ་རྒྱ་མཚོའི་སྨོན་ལམ་མཐུས། །གྲངས་མེད་འགྲོ་འདྲེན་དམ་བཅའི་ཁུར། །ཆད་མེད་རི་གཟར་ལས་བབས་ཆུ། །ཞི་བདེའི་རགས་ཀྱིས་བཟློག་ནུས་ཅི། །དམ་པ་འདི་ནི་རྒྱ་དང་མི་ཉག་གི་དྲེགས་པ་ཅན་ཐམས་ཅད་བསོད་ནམས་ཆེན་པོའ་ིདཔུང་གིས་དབང་དུ་བསྡུས་ཏེ། ཚེ་རིང་གནམ་གྱི་ཤེ་མོང་ལ་བརྟེན་ནས་ཡངས་པའི་རྒྱལ་ཁམས་ཀུན་ལ་མངའ་སྒྱུར་བའི་ཇིང་གིར་རྒྱལ་པོ་ནས་བཟུང་ཐོ་གན་ཐེ་མུར་གྱི་བར་དུ། འཇམ་དབྱངས་གོང་མའི་ཁྲི་ལ་ཞབས་ཟུང་བཀོད་དེ་རྩོད་དུས་ཀྱི་འཁོར་ལོས་སྒྱུར་བའི་རྒྱལ་པོ་ཤ་སྟག་ཏུ་བྱུང་བ་ཡིན་ལ། ཐོ་གན་ཐེ་མུར་གྱི་དུས། གྲུ་ཐལ་གྲུས་རྒྱ་ནག་གི་རྒྱལ་ས་ཕྲོགས་ཏེ། རྒྱལ་རབས་མང་བའི་བར་ཀླ་ཀློ་སྡིག་སྤྱོད་ཀྱི་རྒྱལ་པོ་མི་དགེ་བའི་གླིང་དུ་འཁྱམས་པ་ལས། དུས་རིང་མོ་ཞིག་ནས་གྲངས་མེད་པའི་རྒྱལ་བའི་ཐུགས་རྗེ་ཆེན་པོའི་བྱེད་པོས། མཐའ་འཁོབ་མུན་པའི་གླིང་དུ་དམ་པའི་ཆོས་ཀྱི་སྲོལ་བཏོད་པའི་ཤིང་རྟ་ཆེན་པོར། ཨལ་ཐན་རྒྱལ་པོ་ཞེས་ཡངས་པའི་རྒྱལ་ཁམས་ཀུན་ཏུ་ཉི་ཟླ་ལྟར་གྲགས་པའི་རིགས་ཡིན་ནོ། །དེ་ཡང་ཞབས་དྲུང་ཐམས་ཅད་མཁྱེན་པ་བསོད་ནམས་རྒྱ་མཚོ་དཔལ་བཟང་པོ། ས་བྱི་ནག་པ་ཟླ་བའི་ཉེར་དྲུག་གི་ཐོ་རངས་གཟུགས་སྐུའི་བཀོད་པ་ཆོས་དབྱིངས་སུ་བསྡུས་ཏེ།
རླུང་སེམས་ཙམ་ལས་གྲུབ་པའི་ཡེ་ཤེས་ཀྱི་སྐུ་དེས། ཐོག་མར་དག་པ་མཁའ་སྤྱོད་ཀྱི་གནས་སུ་ཕེབས། དེའི་རྒྱུ་མཚན་ཡང་ཐུགས་དམ་གྱི་སྙིང་པོ་ཐུན་མོང་མ་ཡིན་པ་རྣམས་གསང་བའི་ཚུལ་མཛད་པ་ཞིག་ཡོད་འདུག་པས། མཁས་གྲུབ་ཁྱུང་པོ་དང་མཉམ་མེད་རི་བོ་དགའ་ལྡན་པའི་ཟབ་ཆོས་མགོན་པོ་སྙིང་ཞུགས་ཀྱི་འཕོ་བ། དཀྱིལ་འཁོར་རྒྱ་མཚོ་ཁྱབ་བདག་སྔགས་རམ་པ་དགེ་འདུན་བཀྲ་ཤིས་ཀྱི་ཞལ་གྱི་བདུད་རྩི་ལ་ཐུགས་དམ་ནར་མར་མཛད་པས། བཀའ་ཆེམས་ལས། དཔལ་མཁའ་འགྲོ་བཅུ་གསུམ་བླ་མ་དང་། །དབྱེར་མེད་ཀྱི་མགོན་ལ་འཕྲིན་ལས་ཞུ། །ཞེས་གསུངས་པ་དང་། དེ་དང་ཆབས་གཅིག་པར། ནཱ་རོ་པའི་གསང་ཆེན་སློབ་བཤད། རྡོ་རྗེ་འཆང་འཚར་པ་ཆོས་རྗེ་ཡབ་སྲས་ཀྱི་མན་ངག་ཐུན་མོང་མ་ཡིན་པའི་གདམས་པ་ཐུགས་སུ་བསྟན་པས། རྩ་དབུ་མ་ལ་བརྟེན་པའི་ཟབ་མོ་རྡོ་རྗེ་རྣལ་འབྱོར་གྱི་ཉེ་བའི་ལམ་ཁྱད་པར་ཅན་ཐུགས་རྒྱུད་ལ་འཁྲུངས་པའི་བརྡར། བཀའ་ཆེམས་ལས། ཉམས་བདེ་སྟོང་རོལ་པའི་རྒྱ་མཚོ་ཆེ། །དབྱར་ཆུ་བོའི་ངང་ཚུལ་དག་ལ་འགྲན། །དེ་ལམ་བཟང་རྡོ་རྗེ་ཐེག་པའི་དྲིན། །དྲིན་ཆེ་བར་ངེས་སོ་བླ་མ་རྗེ། །བདག་ཚེ་རབས་ནས་ཚེ་རབས་ཐམས་ཅད་དུ། །ལམ་བཟང་པོ་འདི་དང་མི་འབྲལ་ཤོག །ཅེས་གསུངས་ལ། ཡབ་བཀའི་ཡི་དམ་གྱི་གཙོ་བོ་ཡང་བདེ་མཆོག་དྲིལ་བུ་པ་དང་། རྡོ་རྗེ་གདན་བཞི་གཉིས་ཡིན་པར་སྣང་བས། དྲིན་ཆེན་བར་ངེས་སོ་བླ་མ་རྗེ། །ཞེས་པའི་བླ་མ་ནི་རྡོ་རྗེ་འཆང་སྔགས་རམ་པ་དགེ་འདུན་བཀྲ་ཤིས་དང་། རྗེ་བཙུན་བོད་མཁར་པ་མཻ་ཏྲི་དོན་གྲུབ་རྒྱལ་མཚན་གཉིས་ཡིན་པར་ངེས་སོ། །མཁའ་སྤྱོད་ཀྱི་གནས་ནས་
སྐར་མདའ་འཕངས་པ་བཞིན་དུ་སེ་ཆེན་ཆོས་ཁུར་མཚན་གཞན་སུ་མི་ཐའི་ཇིའི་བཱི་ཇི་བཱ་ཁེན་སྦྱུ་ལའི་ལྷུམས་སུ། ས་བྱི་ནག་པ་ཟླ་བའི་གནམ་གང་གི་ཉིན། ཁྱེའུ་དཀར་པོ་ཤེལ་འཕྲེང་ཐོགས་པའི་རྣམ་པ་ཅན་གྱི་ཚུལ་དུ་བཞུགས་སོ། །དེའི་ཚེ་ཡུམ་གྱི་གུར་ལ་འཇའ་ཁ་དོག་ལྔ་པ་ལན་མང་པོའི་བར་དུ་ཟུག་པ་དང་། མེ་ཏོག་གི་ཆར་བབས་པ་ཀུན་གྱིས་མངོན་སུམ་དུ་མཐོང་། ཡུམ་གྱི་མནལ་ལམ་དུ་གུར་གྱི་ཐོག་ནའི་སྟེང་དུ་མི་དཀར་པོ་རྟ་དཀར་ཞོན་པ་ཞིག་དང་། ཡང་རྗེ་གོང་མ་ཕྱིང་དཀར་བཞེས་ནས་ངེད་འདིར་གནས་ཤིག་གཡར་བ་ལ་འོངས་པ་ཡིན་གསུང་བ་དང་། པོ་ཏ་ལ་ཡིན་ཟེར་བའི་རི་མཐོན་པོ་ཞིག་གི་རྩེར་ཁང་བཟང་ཉམས་དགའ་བ་ཞིག་ནས་འོད་ཟེར་དཀར་པོ་འཕྲོས་པའི་སྣ་ལ། ཁྱེའུ་དཀར་པོ་ཤེལ་དཀར་གྱི་འཕྲེང་བ་ཐོགས་པ་ཞིག་འོངས་ཏེ། རང་གི་ལུས་ལ་ཐིམ། མནལ་སད་པ་ན། ལུས་ལ་བདེ་བའི་ཉམས་ཁྱད་པར་ཅན་སྐྱེས། དེ་ལ་བརྟེན་ནས་ཏིང་ངེ་འཛིན་གྱི་ཟས་ཀྱི་འཚོ་བས་ཉིན་ཞག་བདུན་ཙམ་གྱི་བར་ཟས་རགས་པ་གསོལ་མ་དགོས་པ་དང་། སྔོན་མེད་པའི་ཡིད་ལ་དགའ་བའི་ཉམས་ལྷང་ལྷང་བ་ཤར་བ་བྱུང་འདུག །ཡང་ནུབ་གཅིག་མནལ་ལམ་དུ། ནེའུ་གསིང་ཡིད་དུ་འོང་བ་ཞིག་གི་ཁར་བཞུགས་པ་ལ། ནམ་མཁའ་གཡའ་དག་པ་ནས་ཉི་ཟླ་གཉིས་ཟུང་འབྲེལ་དུ་ཤར་བ། ཅིག་ཅར་རང་གི་ཁོང་པར་ཞུགས་པ་དང་། རི་བོ་མཐོན་པོ་ཞིག་གི་རྩེར་འབད་མེད་དུ་འཛེགས་པས། ཆུ་ཆེན་པོ་གཏིང་དང་ཁ་ཞེང་ཐམས་ཅད་གཞལ་བར་དཀའ་བ་ཞིག་གི་འགྲམ་ནས་ཕ་རོལ་ཏུ་འགྲོ་མི་ཐུབ་བམ་སྙམ་ཙ་ན། གོས་དཀར་པོ་གྱོན་པའི་ཁྱེའུ་ཞིག་གིས་གྲོགས་བྱས་
ཏེ་འབད་མེད་དུ་བགྲོད། ཕ་རོལ་ཏུ་སླེབས་པ་ཙམ་གྱི་ནམ་མཁའ་ལ་བྱ་ལྟར་འཕུར་བས། ཡུལ་དང་གྲོང་ཁྱེར་མང་པོ་མཐོང་། དེ་ནས་སྔར་མཐོང་མ་མྱོང་བའི་ཡུལ་ཉམས་དགའ་བ་ཞིག་ཏུ་བབས་པ་ན། ལྷ་དང་ཀླུ་ལ་སོགས་པའི་འགྲོ་བ་རིགས་མི་གཅིག་པ་ཡིན་ཟེར་བའི་རྒྱན་ཆ་ལུགས་གཟུགས་བརྙན་སྣ་ཚོགས་པ་མང་པོས་འདུད་པ་དང་མཆོད་པ་བྱས་པ་དང་། ཡང་ཅུང་ཟད་ཕྱིན་པ་ན། ལུང་པ་ཕུ་ན་གངས་རི་མཐོན་པོ་ཡོད་པ། བར་ན་རྩི་ཤིང་ནགས་ཚལ་མེ་ཏོག་སོགས་ཡིད་དུ་འོང་བའི་ཚལ་ཆེན་པོ། གཙུག་ལག་ཁང་དགེ་འདུན་གྱི་ཀུན་དཀའ་ར་བ་དང་ཟུང་དུ་འབྲེལ་བ་ཞིག་གི་ནང་དུ་སླེབས་མ་ཐག་སྔོན་མེད་པའི་རང་གི་ལུས་ལ། ཨུ་དུམ་ཝ་ར་དང་པདྨ་དཀར་པོའི་ཐོད་དང་ག་ཤ་སོགས་རྒྱན་དུ་མས་རང་ཤུགས་ཀྱིས་བརྒྱན་པ་བྱུང་བ་ལ། དེའི་ཚེ་གསང་རིའི་རྩེ་ནས་དུང་དཀར་ཞིག་བུས་བྱུང་བས། གཙུག་ལག་ཁང་གི་ཕྱི་རོལ་ཏུ་འོངས་པ་ན། མི་ཉམ་ཐག་པའི་རྣམ་པ་ཅན་མང་པོ་ཚོགས་པ་ཆུ་ཆེན་པོ་ཕ་རོལ་ཏུ་བགྲོད་དཀའ་བ་ཞིག་ལ་རང་གིས་སྣ་དྲངས་ཏེ་བདེ་བར་ཁྲིད་དེ། ཁྲི་མཐོན་པོ་སེང་གེའི་གཟུགས་ཀྱིས་བཏེག་པ་ཞིག་འདུག་པའི་འཁྲིས་སུ་སླེབས་ཙ་ན། སེང་གེ་དེ་སེང་གེ་དངོས་ཡིན་ནམ་སྙམ་པའི་སྣང་བ་ཞིག་ཤར་བའི་མོད་ལ། སེང་གེ་དེ་གཉིས་ཀྱིས་ང་རོ་ཆེན་པོ་ཕྱོགས་ཀུན་ཏུ་ཁྱབ་པ་ཞིག་བསྒྲགས། དེ་དང་ཐག་ཉེ་སར་ཡུལ་ལུགས་མི་གཅིག་པའི་བུད་མེད་མང་པོ་རྒྱན་གོས་བཟང་པོས་སྤྲས་ཏེ་གླུ་ལེན་ཞིང་བྲོ་འཁྲབ་པ་གཟིགས་པ་སོགས་ངོ་མཚར་བ་མང་དུ་བྱུང་བར་སྣང་། གཞན་ཡང་སྔོན་མེད་པའི་དྲི་བཟང་པོ་འཐུལ་བ་དང་། སྒྲ་སྙན་པོ་སྒྲོག་པ་སོགས་ཉེ་འཁོར་བ་ཕལ་ཆེར་
གྱིས་སྤྱོད་ཡུལ་དུ་གྱུར་པས། འདི་འདྲ་བའི་ལྟས་ཇི་ལྟ་བུ་ཞིག་ཡིན་ནམ་ཞེས་ཀུན་སོམ་ཉིར་གྱུར་ཀྱང་། མཐའ་འཁོབ་ཀྱི་ཡུལ་གྲུར་སོང་བས་ལེགས་ཉེས་དང་དེ་དག་གི་རྒྱུ་མཚན་ཞིབ་མོར་དཔྱོད་པ་ནི་མ་བྱུང་ངོ་། །ཟླ་བ་ཁ་ཡར་སོང་བ་ན། ཡུམ་གྱི་མངལ་དུ་སྲས་ཆགས་པར་མངོན་པའི་ཚེ། ཡུམ་གྱི་ཁོག་སྟོད་དུ་ཡོད་ཉམས་བྱེད་ཅིང་། ཁོང་པའི་ནང་ནས་ཡི་གེ་དྲུག་པ་དང་ཧྲཱིཿནང་དྷཱི་ལ་སོགས་པའི་སྒྲ་དིར་དིར་སྒྲོག་པ་འཁྲིས་ན་ཡོད་པ་རྣམས་ཀྱིས་ཀྱང་ཐོས་ཟེར། འཁྲུངས་པ་ལ་ཉེ་བ་ཙམ་གྱི་དུས་ནུབ་གཅིག་མནལ་ལམ་དུ། རང་གི་སྙིང་གར་བོད་ཡིག་གི་ཧྲཱི༔ དཀར་པོ་ཞིག་ལམ་མེ་སྣང་བ་ལས། འོད་ཟེར་འཕྲོས་ནས་སེམས་ཅན་མང་པོའི་དོན་བྱས་ཏེ། སླར་རང་ལ་ཐིམ་པ་དང་། མར་མེ་ཆེན་པོ་ཞིག་སྤར་བས་འཇིག་རྟེན་ཐམས་ཅད་གསལ་བར་བྱས་པ་བྱུང་ངོ་། །སྒོ་མང་སློབ་དཔོན་བཞུ་ཁང་རབ་འབྱམས་པ་དགེ་ལེགས་ལྷུན་གྲུབ་ཀྱིས། སྤྲུལ་པའི་སྐུ་མཆོག་བཞི་པ་འདི་ཉིད་ནི། །བསམ་བཞིན་ཨལ་ཐན་ཉིད་ཀྱི་རྒྱལ་རིགས་ཀྱི། །སུ་མིར་ཐའི་ཇི་བཱ་ཁེན་སྦྱུ་ལ་ཡི། །སྲས་སུ་བསམ་བཞིན་འཁྲུངས་ཚུལ་འདི་ལྟ་སྟེ། །རྟ་དཀར་ཞེན་པའི་ཁྱེའུ་མཛེས་པ་ཞིག །སྐྲ་ཡི་སྟེང་དུ་བྱོན་པ་ཡུམ་གྱིས་མཐོང་། །ལྷུམས་སུ་ཞུགས་ནས་ཁོག་སྟོད་ཉིད་བཞུགས་ཤིང་། །ཡིག་དྲུག་སྒྲ་ཞིག་གསལ་པོར་ཐོས་པ་བྱུང་། །དེ་དང་མཚུངས་པར་སྐྲ་ལ་འཇའ་ཟུག་ཅིང་། །མེ་ཏོག་ཆར་སོགས་དགེ་མཚན་དུ་མ་བྱུང་། །ཞེས་དང་། མཁར་ནག་ལོ་ཙཱ་བས། མཐོང་བ་དོན་ལྡན་ཐུགས་རྗེའི་འོད། །ནམ་ཡང་འགྲིབ་པར་མི་འགྱུར་མོད། །རེ་ཞིག་གཟུགས་སྐུའི་དཀྱིལ་འཁོར་ནི། །ཆོས་དབྱིངས་ཆུ་ལྷའི་ཕྱོགས་སུ་ཡོལ། །
སླར་ཡང་མཁྱེན་བརྩེའི་རླུང་ཤུགས་ཀྱིས། །ཞིང་འདིར་འབྱོན་པའི་སྔ་ལྟས་སུ། །གུར་ལ་འཇའ་ཟུག་དེ་སྟེང་དུ། །ལྷ་མཆོད་རྟ་དཀར་ཆིབས་པ་ཞིག །ཡུམ་ཆེན་མནལ་བའི་ལམ་ནས་གཟིགས། །རང་ལ་ཐིམ་པས་ལུས་སེམས་བདེ། །སད་ཚེ་ཡིད་དགའ་འཇའ་ཚོན་འཁྲིགས། །མེ་ཏོག་ཆར་གྱིས་ཆུ་མཐོངས་ཁེངས། །སྔོན་མེད་སྤོས་ཀྱི་དྲི་ཞིམ་འཐུལ། །ཡ་མཚན་ལྟས་བཟང་དབང་པོ་ཚིམ། །ཞེས་སོ། །འབྱམས་ཀླས་དག་པའི་ཞིང་གི་མགོན་རྣམས་དང་། །གསང་གསུམ་བཀོད་པ་རྒྱ་མཚོས་དུས་འདའ་ཡང་། །མ་དག་འགྲོ་བ་འདྲེན་པའི་ཟློས་གར་ནི། །དམིགས་མེད་སྙིང་རྗེ་ཆེན་པོའི་འཁྲུལ་གྱིས་བསྒྱུར། །གཟོད་མ་ཉིད་ནས་སྤངས་རྟོགས་ཡོན་ཏན་ཀུན། །རྫོགས་པའི་རྒྱལ་སྲས་ཚུལ་འཛིན་སྙིང་རྗེའི་ལྷ། །སྤྲུལ་པའི་རྣམ་པར་རོལ་ལ་ཡ་མཚན་ལྟས། །བྱུང་བར་མཚར་དུ་འཛིན་རྣམས་བྱིས་པའི་བློ། །མགོན་ཁྱོད་རེ་ཞིག་ཆོས་དབྱིངས་བདེ་བ་ཆེར། །བཞུགས་ལ་འགྲོ་རྣམས་འདུད་པའི་ངལ་གསོའི་སླད། །མེ་ཏོག་ཆར་དང་འཇའ་ཚོན་གུར་ཁྱིམ་སོགས། །བློ་ཁྲིད་འཇིག་རྟེན་མེས་པོས་ཅི་ཡང་བསྐྲུན། ། དེ་ནས་ཟླ་བ་དགུ་ངོ་བཅུ་ལ་ལྟ་བའི་འཕགས་པའི་ཡུལ་དུ་ཙི་ཏྲ་དྷི་ཞེས་པ་གངས་ཅན་གྱི་ལྗོངས་འདིར་འགལ་བར་འབོད་ཅིང་། རྒྱ་ནག་གི་སྐད་དུ་གྱི་ཚེའུ་ཕྱོགས་འདིར་དབང་ཐང་དང་བསྟུན་པ་ས་མོ་གླང་གི་ལོ། ས་ཧོར་མཆོད་ཡོན་ལུགས་ཀྱི་ཟླ་བ་དང་པོ། རྒྱལ་བས་ཆོ་འཕྲུལ་བསྟན་པའི་དུས་ཆེན། ཆུ་ཤེལ་གྱི་དབང་པོ་རྟ་ཆེན་གྱིས་ཉ་བའི་ཕྱོགས་སྔོན་མའི་དགའ་བ་དང་པོའི་ཉི་ཤར་གྱི་དུས་སུ། པདྨ་དཀར་པོ་འདམ་གྱི་སྐྱོན་གྱིས་མ་གོས་པ་ལྟར། མངལ་གྱི་ཉེས་པའི་རྒྱ་ལས་རྣམ་པར་གྲོལ་ཏེ། དགུང་ལོ་གསུམ་ཙམ་ལོན་པའི་བོང་ཚོད་ཙམ། །
གསེར་གྱི་མཆོད་སྡོང་ཉི་མའི་འོད་ཀྱིས་ཁྱབ་པ་ལྟ་བུའི་གཟི་མདངས་དང་ལྡན་པའི་ཚུལ་གྱིས་བལྟམས་སོ། །སྒོ་མང་སློབ་དཔོན་བཞུ་ཁང་རབ་འབྱམས་པ་དགེ་ལེགས་ལྷུན་གྲུབ་ཀྱིས། །ས་གླང་ཧོར་ཟླ་དང་པོའི་ཚེས་གཅིག་གི་ཉི་མ་ཤར་དང་བལྟམས་པ་ལྷན་ཅིག་བྱུང་། །ཞེས་དང་། མཁར་ནག་ལོ་ཙཱ་བས། འཆི་མེད་སྲས་པོ་སྤོར་ཐའི་ཇི་ཡིའི། །རིགས་བརྒྱུད་སུ་མེར་ཐའི་ཇི་ཡབ། །རྒྱལ་ཁབ་ཀུན་གསལ་མཛེས་ཕྱིར་དུ། །ཡུམ་མཆོག་བཱ་ཁྱེན་སྦྱུ་ལ་ཡི། །མངལ་སྤྲན་ནས་འཐོན་རབ་མཛེས་སྐུ། །རྒྱལ་སྲས་ཉི་མའི་དཀྱིལ་འཁོར་ཤར། །ས་གླང་མཆུ་ཟླའི་ཚེས་གཅིག་ལ། །སོག་ཡུལ་དབང་པོའི་ས་འཛིན་རྩེར། །དཀར་ཕྱོགས་པདྨའི་གཉེན་དེ་བྱོན། །ནག་པོའི་རྩ་ལག་མུན་པ་སངས། ཞེས་སོ། །དེའི་ཚེ་འཇའ་འོད་ཀྱི་གུར་དང་མེ་ཏོག་གི་ཆར་ཆེན་པོ་འབབ་ཅིང་། དུས་མ་ཡིན་པའི་འབྲུག་གི་སྒྲ་དལ་བུར་སྒྲོག་པ་དང་། སྔོན་ཆད་སྣའི་ཡུལ་དུ་མ་མྱོང་བའི་དྲི་ཞིམ་པོ་བྲོ་བ་དང་། སྒྲ་འཛིན་གྱི་ཡུལ་དུ་ཐོས་མ་མྱོང་བའི་རོལ་མོ་སྣ་ཚོགས་རང་འཁྲོལ་བ། ས་ཆེན་པོ་གཡོ་བ་སོགས་ཡ་མཚན་པའི་ལྟས་མང་དུ་བྱུང་ངོ། །ཟླ་བ་དེ་ཀའི་ནང་དུ་ཡབ་ཀྱི་མཚན་ནས་འབོད་པ་དང་གཞན་ཡང་གསུང་གླེང་དུ་མ་གནང་བས། ཤེས་ལྡན་རྣམས་འདི་ནི་གང་ཟག་ཕལ་པ་དང་མ་འདྲ་བའི་ཡ་མཚན་པ་ཞིག་གོ །ཞེས་བསྔགས་རྗོད་བྱེད་པར་གྱུར་ཏོ། །སྐུ་གཟི་བྱིན་ཆེ་བས། ན་ཚོད་ཕྲ་ཡང་ཀུན་གྱི་མིག་ཅེར་རྒྱག་ཏུ་བལྟ་བར་མི་བཟོད་ཅིང་། མཐོང་ན་མི་མཐུན་པ་མེད་པའི་ངང་ཚུལ་ཅན་ནོ། །ཉིན་གཅིག་ཡུམ་ལ་ལྷ་ཁང་ནས་བཀའ་འགྱུར་གྱི་མ་དུམ་སྤྱན་དྲོངས་ཤིག་གསུངས་པ་ལྟར་བླངས་པས། གླེགས་བམ་ལ་གཟིགས་ཏེ་འདི་ནི་ངའི་རྣམ་པར་ཐར་པའོ་ཞེས་གསུངས།
གླེགས་བམ་ཁ་ཕྱེ་བས། དམ་ཆོས་པད་དཀར་གྱི་ནང་གི་དོན་ཡོད་ཞགས་པའི་རྣམ་ཐར་བྱུང་བས། སྤྱན་རས་གཟིགས་ཀྱི་སྤྲུལ་པ་ཡིན་པར་གོར་མ་ཆག་ཅེས་ཀུན་མགྲིན་གཅིག་ཏུ་གླེང་། མཆོད་གནས་ཀྱི་དགེ་འདུན་རྣམས་གསུང་རབ་སྒྲོག་ཏུ་འཇུག་པ་དང་། རང་དང་ན་མཉམ་གྱི་ཁྱིའུ་མང་པོ་དང་ལྷན་ཅིག་ཏུ། སྤོས་དང་མེ་ཏོག་སོགས་ཀྱིས་སྐུ་གསུང་ཐུགས་རྟེན་ལ་མཆོད་པའི་རིམ་པ་མཛད་པར། གཞན་རྣམས་བྱིས་པའི་རོལ་རྩེད་ལ། དམ་པ་འདི་ཉིད་ནི་ཡུན་རིང་པོའི་བར་དུ་སྐུ་ལུས་གནད་དྲང་པོར་བསྲངས་ཏེ་ཡན་ལག་བདུན་པའི་རྣམ་པར་མཛད། འདི་དག་གི་དུས་སྔ་ཕྱི་རྣམས་སུ་ཆོས་ཀྱི་ཁྲི་རྩིག་པ་དང་། ཆོས་འཆད་པའི་རྣམ་པ་དང་རྡོ་ཆུང་ངུ་མང་པོ་བསགས་ཏེ་གྲལ་དུ་བསྒྲིགས་ནས། འདི་རྣམས་བླ་མ་ཡི་དམ་སངས་རྒྱས་བྱང་སེམས་ཀྱི་སྐུ་འདི་དང་འདི་འདྲ་ཡིན་ནོ་ཞེས་གསུང་བ་དང་། སྐབས་འགར་གསུང་ཆོག་བསྐང་གསོ་གཏོར་ཟོར་འཕེན་པ་དང་གར་དབྱངས་ཀྱི་རྣམ་པར་མང་པོ་མཛད། ཉིན་གཅིག་ཡེ་ཤེས་མགོན་པོ་ཕྱག་དྲུག་པ། ལས་གཤིན། རྣམ་སྲས། ཕྱག་བཞི་པ། གུར་ཞལ་སོགས་ཆོས་སྐྱོང་མང་པོ་ཞལ་གཟིགས་ནས་རྣམ་འགྱུར་འདི་ལྟ་བུ་དང་བཅས་ཏེ་བྱོན་བྱུང་གསུང་དེ་དག་གི་ལད་མོ་མང་པོ་མཛད། ཟླ་བ་གསུམ་ཙམ་གྱི་རིང་ཡུམ་རིག་པ་རྣལ་དུ་མི་གནས་པའི་སྨྱོ་བ་ལྟ་བུ་བྱུང་བ་སྐུ་སྐྱེ་ཕེབས་པའི་སྔུར་ཡིན་ཞེས་གླེང་། ནག་པ་ཟླ་བ་ཤར་བའི་ཉིན་གཅིག་དེ་རིང་གཟའ་སྐར་དང་དུས་ཚོད་བཟང་པོ་ཡིན་པས། ལྷ་ཁང་གི་ནང་དུ་སྟན་བཟང་པོ་ཤོམས། སྐུ་གསུང་ཐུགས་ཀྱི་རྟེན་རྣམས་ལ་མཆོད་པ་རྒྱ་ཆེན་པོ་ཕུལ། ཕྱོགས་བཞིར་སཱཙྪ་བཞི་དང་། རིན་པོ་ཆེས་གང་བའི་བུམ་པ་བཞི་ཞོག །ངེད་བཙས་
པའི་སར་མཆོད་རྟེན་རྩིགས། གདན་ཁྲིའི་ཕྱོགས་མཚམས་སུ་རྒྱལ་སྲིད་སྣ་བདུན་བཀྲ་ཤིས་རྟགས་བརྒྱད་རྣམས་སྒྲིགས། དགེ་འདུན་རྣམས་བསྡུས་ལ་ཆོས་ཀྱི་འབེལ་གཏམ་མཛད་དུ་ཆུག །སོག་པོ་ཚོ་ཆེན་དྲུག་སོགས་རྒྱ་བོད་ཧོར་གསུམ་གྱི་མི་སྣ་ཚོགས་པ་རྣམས་ལ་སྟོན་མོ་གྱ་ནོམ་པ་ཐོང་། མཐོང་བ་དོན་ལྡན་ཕྱོགས་འདིར་བསམ་བཞིན་དུ་ཕེབས་པ་ལ་གསོལ་བ་འདེབས་སུ་ཆུག་ཅིག་ཅེས་གསུངས། དེ་བཞིན་དུ་ཡབ་ཡུམ་རྣམས་ཀྱིས་མཛད་པའི་ཚེ། བཀའ་ལས། རིན་པོ་ཆེས་གང་བའི་བུམ་པ་བཞི། །ནོར་བུས་གང་བའི་རྫ་མ་བདུན། རིན་པོ་ཆེ་སྣ་ཚོགས་ཀྱིས་གང་བའི་ཟངས་མཁར་ལྔ་བཅུ་རྣམས་ལྷ་དང་ཀླུའི་འཇིག་རྟེན་སྐྱོང་བ་རྣམས་ཀྱིས་སྦས་པ་ཞིག་ཀྱང་ཡོད་ཅེས་གསུངས། དེ་ནས་ཁྲུམས་ཀྱི་ཟླ་བའི་ནང་དུ། ཉིན་ཞག་གསུམ་གྱི་བར་དུ་མནལ་ཐུན་གཅིག་ལ་སོང་བའི་མཐར། མནལ་སད་དེ་རྗེས་ཐོབ་ལས་བཞེངས་པའི་དུས། ཡུམ་གྱི་དྲི་བ་ཞུས་པར། ཞག་དང་པོ་ལ་མཆོད་ཤོམས་ཀྱི་དཀར་མེ་གཉིས་ངའི་ལག་ན་འདུག་པ་དེ་ཆེས་ཆེར་འབར་ཏེ་འཇིག་རྟེན་གྱི་ཁམས་ཐམས་ཅད་འོད་ཀྱིས་གསལ་བར་བྱས་པ་ཞིག་རྨིས། ཞག་གཉིས་པ་ལ་ནམ་མཁའ་འཇའ་སྤྲིན་འཁྲིགས་པའི་དབུས་ན་སངས་རྒྱས་བྱང་སེམས་གྲངས་མེད་པ་བཞུགས་འདུག་པ་མཐོང་། ཞག་གསུམ་པ་ལ། རིན་པོ་ཆེའི་ཁྲི་ལས་ལངས་ཏེ་བོད་ཀྱི་ཕྱོགས་སུ་འགྲོ་བ་རྨིས་སོ། །ཞེས་གསུངས་པས། སྒོ་མང་སློབ་དཔོན་བཞུ་ཁང་རབ་འབྱམས་པ་དགེ་ལེགས་ལྷུན་གྲུབ་ཀྱིས། དེ་མ་ཐག་ཏུ་སྣ་ལྔའི་འཇའ་གུར་ཕུབ། །མེ་ཏོག་ཆར་བབས་སྤོས་ཀྱི་དྲི་བཟང་ལྡང་། །རོལ་མོའི་སྒྲ་ཚོགས་ཀུན་གྱིས་ཐོས་པ་བྱུང་། །ཟླ་གཅིག་འདས་ཚེ་ཡབ་ཀྱི་མིང་ནས་བོས། །བྱང་
ཆུབ་སེམས་དཔའི་སྙིང་པོ་ཐོན་ཞེས་གསུངས། །ཟླ་བ་གསུམ་ནས་བཀའ་ལུང་དུ་མ་དང་། ལྷག་པར་ཁྲི་རྒྱོབ་མཆོད་པ་ཆེན་པོ་ཤོམས། །རཏྣས་གང་བའི་བུམ་པ་བཞི་བཞི་དང་། །དུང་དཀར་བཞི་རྣམས་ཕྱོགས་བཞིར་བུས་ཤིག་དང་། །བླ་མ་མཆོག་དེ་ཉི་ཟླ་བཞིན་དུ་ཕེབས། །ཞེས་སོགས་ངོ་མཚར་གསུང་དང་གྲུབ་རྟགས་སོགས། །བརྗོད་ཀྱིས་མི་ལང་དེར་འདུས་རྣམས་ལ་བསྟན། །ཕྱག་འཕྲེང་ཆིབས་པ་ངོས་འཛིན་སོགས་མཛད་པས། །ཀུན་ཀྱང་ངོ་མཚར་གནས་སུ་བཀོད་པ་ལགས། །ཞེས་དང་། མཁར་ནག་ལོ་ཙཱ་བས། བལྟམས་ནས་འཇལ་བྱེད་དང་པོ་ལ། །ཡབ་ཀྱི་མཚན་ནས་འབོད་པ་སོགས། །ཚུལ་འདི་ཟས་གཙང་སྲས་བཞིན་དུ། །ངོ་མཚར་བསྔགས་པའི་གནས་སུ་འགྱུར། །བསིལ་ཟེར་མིང་མཚུངས་གསུམ་པའི་སྐབས། །དོན་བཟང་ཚིག་འབྲུ་བཟང་པོ་ཡིས། །ཆོས་ཀྱི་ཁྲི་ཤོམ་མེ་ཏོག་ཁྲོམ། །རིན་ཅེན་གྱིས་གང་ཀ་ལ་ཤ །ཕྱོགས་བཞིར་བཞག་ནས་དུང་དཀར་བུས། །མཐོང་བ་དོན་ལྡན་སླར་གྱོན་པ། །ཡོན་ཏན་རྒྱ་མཚོའི་སྙིང་པོ་མཆོག་ནམ་མཁའི་ནོར་བུར་གསོལ་ཐོབ་ཅེས། །ཟབ་མོ་རྟེན་ཅིང་འབྲེལ་འབྱུང་གི །ཆོས་ཀྱི་འཁོར་ལོ་རབ་ཏུ་བསྐོར། །གཞལ་བྱ་ཀླུ་ལ་ཞག་གསུམ་དུ། །མནལ་བའི་ཚུལ་གྱིས་མཉམ་པར་བཞག །རྗེས་ཐོབ་ཏུ་ནི་བཞེངས་པའི་ཚེ། །ཡུམ་གྱིས་དེ་དོན་ཞུས་པ་ན། །དང་པོ་ཕྱག་ན་སྒྲོན་མེ་ཡིས། །ཕྱོགས་ཀུན་གསལ་བར་སྣང་བས་ཁྱབ། །གཉིས་པར་འཇའ་སྤྲིན་འཁྲིགས་པའི་ཁྲོད། །སངས་རྒྱས་བྱང་སེམས་གྲངས་མེད་གཟིགས། གསུམ་པར་རིན་ཅེན་ཁྲི་སྟེང་ནས། །བོད་ལ་ཕྱོགས་པ་རྨིས་སོ་གསུངས། །འགའ་ཞིག་
ཡི་དམ་རེ་རེ་གཉིས། །ཞལ་གཟིགས་བྱུང་ལ་ཡ་མཚན་བྱེད། །མགོན་འདིས་བགྲང་ཡས་ལྷག་པའི་ལྷ། །མངོན་སུམ་མཇལ་པས་ཁེངས་པ་མེད། །ཅེས་སོ། །དེ་ནས་ལོ་འཁོར་བའི་ཚེ། ཡབ་ཀྱི་མཆོད་ཁང་ལ་རབ་གནས་ཤིག་བྱེད་པའི་དུས། རྗེ་འདི་ཉིད་ཀྱང་དེར་ཕེབས་ཏེ་རྟེན་གྲལ་གྱི་སྐུ་རྣམས་ལ་ཞིབ་ཏུ་གཟིགས་ཤིང་། ཞབས་དྲུང་རིན་པོ་ཆེ་བསོད་ནམས་རྒྱ་མཚོའི་སྐུ་ལ་ཕྱག་མཛུབ་གཏད་ནས་འདི་ང་ཡིན་ཞེས་གསུངས། རྗེ་གོང་མས་ཡབ་ལ་གནང་བའི་ཕྱག་འཕྲེང་དེའི་མཚམས་འཛིན་འཕྱུགས་པ་རྣམས་འཆོས་པ་གནང་བས་ཀུན་ཡ་མཚན་དུ་བྱེད། ཕལ་ཆེར་གྱིས་འདི་ནི་ཞབས་དྲུང་ཐམས་ཅད་མཁྱེན་པ་བསོད་ནམས་རྒྱ་མཚོའི་སྐུའི་སྐྱེ་བ་འཁྲུལ་མེད་ཡིན་པ་འདྲ་ཞེས་གླེང་བ་ལ་བརྟེན་ནས། དེར་འཁོད་པ་མང་པོས་ཕྱག་དབང་ཞུས་པས། ཕྱག་གཉིས་ཀ་དང་ཡ་གཅིག་དང་ཆོས་ཀྱིས་དྲིལ་བ་སོགས་ཀྱི་སྒོ་ནས་དྲག་ཞན་གྱི་ཕྱག་དབང་གནང་ལུགས་ཀྱི་དབྱེ་བ་རྗེ་གོང་མ་ཇི་ལྟ་བ་བཞིན་དུ་གནང་། གུ་ཤྲིས་མཇལ་བར་འོངས་ཏེ། རྗེ་གོང་མའི་ཕྱག་འཕྲེང་དང་ཕྱག་རྗེས་ལ་འདྲ་མིན་བཅུ་གཅིག་ཙམ་དང་བསྲེས་ཏེ་གཟིགས་སུ་ཕུལ་བ། མ་འདྲེས་པ་སོ་སོར་ངོས་འཛིན་མཛད་པས་ཡིད་ཆེས་ཀྱི་གནས་སུ་གྱུར་ཏེ་དད་པ་ལྷག་པར་སྐྱེས། དེ་ནས་གསོལ་དཔོན་ཚུལ་ཁྲིམས་རྒྱ་མཚོ་དང་། ནང་སོ་དཀའ་བཅུ་པས་གོང་གི་སྐད་ཆའི་གནས་ཚུལ་ཐོས་ཏེ་བརྟག་དཔྱད་བྱེད་པ་དང་བཅས་མཇལ་བར་འོངས་པས། གསོལ་དཔོན་པ་སོགས་ཕྱག་ཕྱི་རྙིང་པ་རྣམས་ཀྱི་སྤྱི་བོར་ཕྱག་འཇོག་པ་དང་ལྷན་ཅིག་ཏུ། སོ་སོའི་མིང་ནས་བོས་ཏེ་ངོས་འཛིན་མཛད་པས་ཀུན་སྨྲ་མི་ཤེས་པའི་དད་པ་ཐོབ་བོ། །
ཁོང་རྣམས་ཀྱིས་ཕུལ་བའི་མཇལ་དར་མཆོད་ཤོམས་ཀྱི་རྟེན་རྣམས་ཀྱི་ན་བཟར་སྒྲོན་པ་གནང་། དེ་ནི་གསོལ་དཔོན་པ་དྲུང་འཁོར་རྙིང་པ་ཡིན་པ་དང་། ཞམ་འབྲིང་བའི་མཇལ་མིའི་ཐོག་མར་སོང་བས་དཔོན་སློབ་གསར་རྙིང་ཐམས་ཅད་ཞལ་འཛོམ་པ་དང་། དབུས་ཕྱོགས་ནོར་འཛིན་གྱི་ཐིག་ལེར་མྱུར་དུ་འབྱོན་པའི་རྟེན་འབྲེལ་གྱི་དགོས་པ་ཁྱད་པར་ཅན་ལ་དགོངས་པ་འདྲ། ལྕགས་ཡོས་ཀྱི་ལོ་ཐུ་མེད་ཀྱི་རྒྱལ་པོས་མཇལ་བར་བྱོན་པས། ན་ཚོད་ཕྲ་ཡང་ཞུམ་པ་དང་བག་ཚ་བ་མེད་པར། ཞལ་འཛུམ་པ་དང་བཅས་རྒྱལ་པོ་འཁོར་བཅས་བདེ་བར་གནས་སམ་ཞེས་གསུངས་པས། རྗེ་གོང་མ་དྲན་པའི་གདུང་ཤུགས་ཀྱིས་མཆི་མ་འཁྲུག་ཅིང་བ་སྤུ་ལྡང་བར་གྱུར། རྒྱལ་པོའི་ཕྱག་ཕྱིར་ལི་ཐང་གི་ལྷ་ཆེན་བཞེང་བའི་བལ་པོ་ཡོད་པར། མིང་ནས་བོས་ཏེ་ངོས་འཛིན་གནང་། ཚ་རྡོར་ནང་སོས་རྗེ་གོང་མའི་ཐུགས་དམ་རྟེན་མགོན་པོ་ཞལ་གྱི་ཐང་ཁ། ཕྱག་དཔེ། ཆིབས་པ་ཨ་བལ་སེར་པོ། ཟུར་གེ་སྔོན་པོ་རྣམས་ཁྱེར་ཡོངས་པ་དང་དུས་མཚུངས་པར། ས་གཡོ་ཞིང་འབྲུག་གི་སྒྲ་ཆེན་པོ་བསྒྲགས། ཕྱག་དཔེ་ཞལ་ཐང་རྣམས་ལ་ངོས་འཛིན་མཛད། ཨ་བལ་སེར་པོ་ལ་ཆིབས་ནས། གཟིམས་གུར་ལ་བསྐོར་བ་ལན་གསུམ་མཛད་དེ་དབུས་ལ་འདི་ལྟར་འགྲོ་ཞེས་བཀའ་སྩལ། ཆིབས་ལས་བཤོལ་ཏེ་གཟིམས་གུར་དུ་སྟན་ལ་བཞུགས་ཏེ། ཉམས་དགའ་ཞིང་བག་ཕེབས་པའི་གསུང་གླེང་མང་དུ་མཛད། གསོལ་ཇ་ཞལ་དཀར་གང་དེར་འདུས་པའི་སྐྱེ་བོ་མང་པོ་ཞིག་ལ་གནང་བས། ཐམས་ཅད་ཀྱི་སྐོམ་པ་སེལ་ནུས་པའི་ཡ་མཚན་པ་བྱུང་། དེ་སྐབས་རྟེན་ཞིག་ལ་རབ་གནས་ཞུ་མཁན་བྱུང་བར། རབ་གནས་
ཀྱི་ཆོ་ག་སོགས་སྔོན་ཆད་གཟིགས་རྟོག་མཛད་མ་མྱོང་ཡང་། ཐོག་མར་གསུང་གི་གདངས་དྲག་པོ་དང་བཅས་ཏེ། ཨོཾ་ཧཱུྃ་ཕཊ། ཅེས་བགེགས་སྤྲོད་པའི་ཚུལ་དང་། ཕྱག་རྒྱ་དང་གར་དབྱངས་མང་པོའི་རྣམ་པ་དང་། ལྷ་སྤྱན་འདྲེན་པ་དང་བསྟིམ་པའི་ཚུལ་མཛད་དོ། །རྗེ་གོང་མའི་སྐུ་ཞང་རིག་སྔགས་འཆང་བའི་འཁོར་ལོས་སྒྱུར་བ་ཀུན་བཟང་རྩེ་བ་བྱོན། གོང་མའི་ཐང་ཞུ་དང་ཕྱག་དྲིལ་གཟིགས་འབུལ་མཛད་པས། ཇི་ལྟ་བ་བཞིན་དུ་མཁྱེན་པར་གྱུར། གང་ཟག་ཐ་མལ་བའི་སྤྱོད་ཡུལ་ལས་འདས་པའི་འཕགས་ཆེན་དམ་པའི་མཛད་པ་རླབས་པོ་ཆེའི་སྙན་གྲགས་ཕྱོགས་ཀུན་ཏུ་ཁྱབ་པ་ལ་བརྟེན། རྒྱ་བོད་ཧོར་གསུམ་གྱི་སྐྱེ་བོ་མཐའ་ཀླས་པ་མཁོ་རྒུའི་འབྱོར་པ་ཇི་སྙེད་པ་དང་བཅས་ཏེ་དབྱར་གྱི་ཆར་སྤྲིན་ལྟ་བུར་འདུས། ཆོས་རྗེས་མདུང་རྩེ་བར་ཁྱེད་ཀྱི་ལག་གི་དངུལ་ཕོར་དེ་ཏའི་ཆིང་ནོ་ཡོན་གྱིས་ཕུལ་བ་ཡིན། ད་སྣེ་གདོང་རྩེར་འབུལ་དགོས་འདུག་བཀའ་ཕེབས། ཉིན་གཅིག་མཁའ་ལ་འཇའ་ཚོན་གྱི་དྲ་བ་རྨ་བྱའི་གདུགས་ལྟར་ཕུབ་པའི་སྣ་ལ་དར་དཀར་གྱི་ཐག་པ་བརྐྱངས་པ་འདྲ་བ་གསུམ་བྱུང་བའི་གཅིག་གཟིམས་གུར་གྱི་སྟེང་། གཅིག་སྒར་གྱི་དཀྱིལ། གཅིག་ཡབ་ཡུམ་གྱི་གུར་ལ་ཟུག །དེའི་ཉིན་མཇལ་བར་འོངས་པ་རྣམས་ལ། ཐུགས་རྗེ་ཆེན་པོ་ཕྱག་བཞི་པ་དང་། ཡི་གེ་ཧཱུྃ་ཡིག་དཀར་པོ་དང་། འོད་དཀར་པོའི་ཐིག་ལེ་དང་། རལ་པའི་ལྕང་ལོ་ཅན་ཕྱམ་རྩ་དཀར་པོ་བཞེས་པ་བླ་མ་ཉིད་ཀྱི་རྣམ་པ་ཅན་སོགས་མཐོང་ཚུལ་མི་འདྲ་བ་མང་དུ་བྱུང་བས། སྐྱེ་རྒུ་མཐའ་དག་རྗེ་གོང་མའི་མཆོག་གི་སྤྲུལ་སྐུ་ཐེ་ཚོམ་དང་བྲལ་བའི་ངེས་ཤེས་རྙེད་དེ། ཕྱག་དང་། སྐོར་བ་དང་བཤགས་
པ་དང་རྗེས་སུ་ཡི་རང་ལ་སོགས་དགེ་བ་བཅུའི་ལས་ལམ་དབྱར་གྱི་ཆུ་མཚོ་ལྟ་བུར་འཕེལ་བར་གྱུར་ཏོ། །ཕུན་ཚོགས་གྲུ་འཛིན་རི་བོའི་ཕོ་བྲང་ནས། །རབ་འབྱམས་རྒྱལ་བ་ཀུན་གྱི་སྙིང་རྗེའི་གཟུགས། །མཐའ་འཁོབ་གདུལ་དཀའི་འགྲོ་བ་འདྲེན་སླད་དུ། །སྣ་ཚོགས་སྒྱུ་དྲའི་རོལ་གར་དེ་རྨད་བྱུང་། །འཁོར་འདས་མཉམ་ཉིད་མི་གཡོ་ཆོས་ཀྱི་སྐུ། །མངོན་དུ་གྱུར་ཀྱང་བླུན་རྨོངས་འགྲོ་བའི་ངོར། །ཚེ་རིང་གནམ་གྱི་རིགས་སུ་སྲིད་འཛིན་པའི། །ངོ་མཚར་བཀོད་པའི་དགེ་མཚན་ཅི་ཡང་སྟོན། །འགྲོ་ལ་རྗེས་སུ་ཆགས་པའི་ཆུ་གཏེར་ལས། །ལེགས་འོངས་རྒྱལ་སྲས་ཟླ་ཚེས་གཞོན་ནུ་དག །སྤངས་རྟོགས་ཡོན་ཏན་ཆ་ཤས་གོང་འཕེལ་བའི། །སྙན་གྲགས་རྒྱ་མཚོའི་རླབས་བཞིན་ཡོལ་བ་མེད། །དགའ་བ་ཞེས་པ་ཆུ་ཕོ་འབྲུག་གི་ལོ་གསར་པའི་ཆོ་འཕྲུལ་གྱི་དུས་ཁྱད་པར་ཅན་གྱི་ཚེ། ཡེ་ཤེས་ཀྱི་མགོན་པོ་ཕྱག་དྲུག་པ། དམ་ཅན་ཆོས་ཀྱི་རྒྱལ་པོ། །དཔལ་ལྡན་ལྷ་མོ་འདོད་ཁམས་དབང་ཕྱུག་མ་རྣམས་ཞལ་གཟིགས། མཁར་སྔོན་པོར་མྱུར་དུ་འབྱོན་པ་ལེགས་པའི་གསུང་གི་སྣང་བ་སྩལ་བ་ལྟར། དེ་བཞིན་དུ་མཁར་སྔོན་པོར་ཕེབས་པ་འགབ་ཚུལ་ཉེ་འཁོར་དུ་ཡོད་པ་རྣམས་ལ་གསུངས་ཤིང་། རྒྱལ་པོ་རྒྱལ་མོ་སོགས་ལ་ཡང་རྒྱུ་མཚན་གནང་། ཉིན་གཅིག་ཕྱི་རོལ་ཏུ་ཕེབས་ནས་ཐག་ཧ་ཅང་མི་རིང་བ་ཞིག་ན། ས་ལ་ཕྱག་མཛུབ་གཏད་ནས་འདིའི་འོག་ན་ཁྲོ་ཡོད་གསུངས་པས། དེར་འདུས་པ་རྣམས་ཀྱིས་ས་ཁྲུ་དོ་ཙམ་གྱི་བར་དུ་བརྐོས་ཀྱང་མ་རྙེད། སུ་མི་ཐའི་ཇི་དེ་རང་གི་སྲས་སུ་སྐྱེས་བུ་དམ་པ་བྱོན་པའི་སྔུར་ལྟ་བུའི་རྣམ་པས། ཐུགས་རིག་ལ་སྟེང་ཤོང་ཡོང་འདུག་པས་ལ་ལ་ཞིག་གིས་
ཁྲོ་གར་ཡོད། སྨྱོན་པ་དེའི་བུས་ཟེར་བ་ལ་ཐ་སྙད་མི་ཡོང་ཞེས་གླེང་། ཕལ་ཆེ་བ་དག་གིས། རྗེ་ཐམས་ཅད་མཁྱེན་པའི་རྣམ་སྤྲུལ་དུ་ནི་གོར་མ་ཆག་པས་ཁྲོ་ངེས་པར་ཡོད་དོ་ཞེས། སླར་ཡང་ས་ཁྲུ་གང་ཙམ་ཞིག་བྲུས་པའི་འོག་ནས་ཁྲོ་ཤིན་ཏུ་ཆེ་བ་ཁ་ལ་མིས་སྐོར་བ་བྱེད་ཐུབ་པ་ཞིག་འཐོན་པ། སའི་སྟེང་དུ་འདྲེན་པ་ལ་ཤེས་རབ་ཀྱི་རྩལ་མགྲིན་བཟང་གི་གྲོགས་པོར་གྱུར་པ་དག་མང་བས། རེ་ཞིག་རྔོ་མ་ཐོགས་པར་ལུས་དེ་ནས་རྒྱ་ནང་དུ་ཁྲོ་ཆེན་པོ་འདི་སའི་སྟེང་དུ་འདྲེན་པའི་མི་ཞིག་ཐོང་ཞེས་ཡི་གེ་རྒྱབ་པས། རྒྱ་མི་གཉིས་ཀྱི་འོངས་ཏེ་དཀའ་ཚེགས་མེད་པར་དྲངས་ནས་སྒྱེད་བུའི་སྟེང་དུ་བཅུགས་པས། སྐྱེ་བོ་མང་པོས་བཟའ་བཏུང་གི་རིམ་པ་མངོན་པར་འདུ་བྱེད་པའི་གནས་སུ་བྱས་སོ། །ཧོར་ཟླ་བརྒྱད་པའི་ཚེས་བཅུའི་ཉིན། སྐུ་ཞང་རིན་པོ་ཆེ་ཀུན་བཟང་རྩེ་བ་དང་། མཉྫུ་ཆོས་རྗེས་གཙོས་པའི་བོད་སོག་གི་བནྡེ་མང་པོ་དང་། རྒྱལ་པོ་རྒྱལ་མོ་ཧོར་ཐའི་ཇི་སོགས་སྐྱེ་བོའི་ཚོགས་གྲངས་མེད་པ་གདན་འདྲེན་ལ་འབྱོར། ཚེས་བཅོ་ལྔའི་ཉིན་ཆིབས་པ་ཟུར་དགེ་སྔོན་པོ་ལ་ཆིབས་ཏེ། གདན་འདྲེན་པ་རྣམས་དང་ཆིབས་སྐྱེལ་པ་ཡབ་ཀྱིས་གཙོས་པའི་རྟ་པ་སྟོང་ཕྲག་ཙམ་གྱིས་བསྐོར་ཏེ་ཕེབས། ཕྱག་མཛུབ་གཏད་ནས་ལམ་འདི་ན་མཆོད་རྟེན་དཀར་པོ་ཞིག་ཡོད་གསུངས་པར། སྐུ་འཁོར་བ་འགའ་ཞིག་གིས་ཕྱོགས་དེར་ཕེབས་མྱོང་ལགས་སམ་ཞུས་པས། ངས་སྔོན་ཕྱོགས་དེར་འགྲོ་མྱོང་བ་ཡིན་ཞེས་སོགས་སྔོན་གནས་རྗེས་དྲན་གྱི་གསུང་ཁ་ཡར་བཀའ་སྩལ། དེའི་ཚེ་ཆ་དཀར་རྒྱལ་པོས་དཔོན་པོ་ཕུན་ཚོགས་ཀྱིས་གཙོས་པའི་རྟ་པ་ལྔ་བརྒྱ་ཙམ་ཟང་ཟིང་གི་དངོས་
པོ་མང་པོ་དང་བཅས་ཏེ་མངགས་པ་འབྱོར། ཕྱག་དབང་ཞུས་པས་ཕུན་ཚོགས་ཡོངས་པ་ཨེ་ཡིན་ཞེས་ངོས་འཛིན་མཛད། རྒྱ་མི་ཞིག་གིས་བླ་མ་ཁྱེད་སུ་ཡིན་ངས་ངོ་མ་ཤེས་ཞེས་ཚོད་བགམ་པར། ཁྱོད་རང་ང་ལ་ཐེ་ཚོམ་བྱེད་མི་དགོས། སྤྱན་རས་གཟིགས་སུ་མོས་ལ་གསོལ་བ་ཐོབ་ཅིག་ཅེས་གསུངས་པས་སྤོབས་པ་མེད་པར་གྱུར། མཆོད་རྟེན་དཀར་པོར་ཕེབས་པའི་ཚེ། དཀོན་ཅོག་ཐའི་ཇིས་གཙོས་པའི་རྟ་པ་ལྔ་བརྒྱ་ཙམ་བསུ་བ་ལ་འབྱོར་བས། བཀའ་ལས་རྟེན་འབྲེལ་ལེགས་འདི་ན་ངའི་ཁྲི་ཡོད་པས་རེ་ཞིག་སྡོད་གསུངས་ནས་ཁྲི་ཁར་བཞུགས་ཏེ། ཞུ་བ་པོ་མེད་པར་བླ་མའི་རྣལ་འབྱོར་གྱི་ཆོས་འབྲེལ་ཞིག་སྩལ། དེ་ནི་འགྲོ་བ་ཐམས་ཅད་ཀྱི་མི་བསླུ་བའི་སྐྱབས་གནས་ནི་དཀོན་ཅོག་རིན་པོ་ཆེ་རྣམ་པ་གསུམ་ཡིན་ལ། ངའི་མཚན་དང་ལྡན་པའི་རྒྱལ་རིགས་ཀྱི་བསུ་བ་ལ་འོངས་པ་དང་། ལུས་ཅན་ཀུན་གྱི་མཆོད་པའི་ཞིང་དམ་པ་ནི་རྒྱལ་བའི་བསྟན་པ་ཡིན་ལ། དེ་ཉིད་དཀར་འཇམ་དུ་འགྲོ་བའི་བརྡར་མཆོད་རྟེན་དཀར་པོའི་འཁྲིས་སུ་ཕེབས་པ་དང་ཕེབས་བསུ་བ་རྣམས་རྩེ་འཛོམས་བྱུང་བ། ཆོས་ཀྱི་འཁོར་ལོ་བསྐོར་བའི་བརྡར་དེར་རྗེ་གོང་མའི་བཞུགས་ཁྲི་ཡོད་པ་སོགས། ཐམས་ཅད་མཁྱེན་པ་བདེ་ཆེན་ཆོས་ཀྱི་རྒྱལ་པོ་འདི་ཉིད་ཀྱིས་བསྟན་པ་གསལ་བར་མཛད་པའི་རྟེན་འབྲེལ་ལོ། །དེ་ནས་རྗེ་གོང་མ་ཉིད་ཀྱིས་བྱིན་གྱིས་བརླབས་པའི་གནས་ཁྱད་པར་ཅན་དེར། གཉུག་མར་གནས་པའི་དགེ་འདུན་རྣམས་ཀྱིས་མཆོད་པའི་བྱེ་བྲག་དུ་མ་ཐོགས་པས་མདུན་བདར་ཏེ་ཕེབས། གོང་མའི་བཞུགས་ཁྲིའི་ཁར་ཞབས་ཀྱི་པདྨོ་རྣམ་པར་བཀོད་དེ། དེར་འཁོད་པའི་སྐྱ་སེར་གྱི་
ཁྲོམ་ཆེན་པོའི་དབུས་སུ་རྗེ་གོང་མའི་མཛད་པའི་རིམ་པ་མདོར་བསྡུས་ཙམ་དང་། མ་འོངས་པ་འབྱུང་འགྱུར་གྱི་ལུང་བསྟན་རགས་རིམ་ཞིག་འཇིགས་པ་མེད་པའི་གསུང་གིས་བཀའ་སྩལ། གཟིམས་ཆུང་དང་མགོན་ཁང་རྣམས་སུ་ཕེབས་ཏེ། མཆོད་ཤོམས། གཏོར་མ། ཞལ་འབག་སོགས་སོ་སོར་ངོས་འཛིན་གནང་། དེ་ནས་རེ་ཞིག་གི་བར་ཕྱག་བྲིས་འདྲི་ཀློག །ཕྱག་དཔེ་འཛིན་པ་སོགས་ཐུགས་གཉེར་གྱི་རིམ་པ་རྣམས། རིན་པོ་ཆེ་ཀུན་བཟང་རྩེ་ནས་ཀྱིས་ཕུལ་བས་འབད་རྩོལ་ལ་མ་ལྟོས་པར་དཀའ་ཚེགས་ཆུང་ངུས་མཁྱེན་པས། རིན་པོ་ཆེ་བ་དེ་ཆོས་རྗེ་དཀོན་གཉེར་དཔོན་པའི་ཞལ་ངོར་སོང་བ་དང་། དཀོན་གཉེར་དཔོན་པ་ལ་སྡེ་སྲིད་ཕག་མོ་གྲུ་པས་བཀུར་བཟོས་ཆེ་ཞིང་། སྣེའུ་གདོང་རྩེ་དང་གཞིས་ཀ་གོང་དཀར་གྱི་ཕོ་བྲང་ཡས་མས་གཉིས་ནི་ལུགས་གཉིས་ཀྱི་ཡོན་ཏན་ཅན་མཐའ་དག་འདུ་ས་ཁྱད་པར་ཅན་ཡིན་པས། རྣམ་དཔྱོད་ཀྱི་རྩལ་ཅུང་ཟད་ཙམ་ཡང་མི་ལྡན་པའི་བླ་ཆེན་གྱི་མིང་གོག་སྐམ་པོ་ཐམས་ཅད་ལ་ཁོང་པ་ཐུགས་མགུ་མཁན་ཞིག་མིན་པ་འདུག་ཀྱང་། རྗེ་འདི་ཉིད་ལ་ཞབས་དྲུང་རིན་པོ་ཆེ་བསོད་ནམས་རྒྱ་མཚོ་དེ་ཉིད་དང་ཁྱད་པར་མི་འདུག་ཅེས་གུས་པ་ཡིན་སྐད། མཁར་ནག་ལོ་ཙཱ་བས། དེ་ནས་བགྲང་བྱ་གསུམ་པའི་དུས། ཁུ་ཁོ་ཁོ་ཏོར་འགྲོ་ཞེས་གསུངས། །དེ་ན་དཔག་ཡས་སྐྱེ་བོའི་ཚོགས། །སྨིན་དང་གྲོལ་བའི་ལམ་ལ་བཀོད། སྙན་གྲགས་མ་ལ་ཡ་ཡི་དྲི། །བསྟན་སྐྱོང་བསེར་བུས་བསྐྱོད་པ་ལས། །འཇིག་རྟེན་གསུམ་དུ་ཁྱབ་པ་ན། །ཞེས་སོ། །དེ་སྐབས་ཕྱག་མཛོད་ཀྱི་ཁུར་ལེན་བྱེད་མི་གསོལ་དཔོན་ཚུལ་ཁྲིམས་རྒྱ་མཚོ་ཕྱག་གཡོག་ཏུ་འགྱུར་པར་མ་ཟད། དྲུང་འཁོར་དྲག་
ཞན་ཚང་མ་དང་འགྲོགས་ལུགས་མཁས་ཤིང་ལེགས་པས། རིན་པོ་ཆེ་ཀུན་བཟང་རྩེ་པ་དེ་སྐུ་ཞབས་སུ་ཅར་མར་བཞུགས་པ་གནང་། ཕྱག་མཛོད་གུ་ཤྲི་བླ་མ་ལ་གུས་ཞེན་ཆེ་བ་ནི་ཡོངས་སུ་གྲགས། འཇིག་རྟེན་ཕྱོགས་ཀྱི་མཛད་སྒོ་ཧ་ཅང་གི་ཞིབ་ཆ་མི་ཆེ་བ་ཞིག་ལ། ཕྱི་བླ་གང་ཆེ་ཞིང་ནང་ཕྱག་རྫས་ལ་རུ་ང་བ། མཐོན་པོའི་གཉའ་གཅོག་དམའ་བའི་སྐྱོང་བསྟར་སོགས་སྒར་གྱི་འཛིན་ཚུལ་དང་། སྦྱིན་བདག་གི་སྣེ་ལེན་ཞི་དྲག་གིས་འདུལ་ཐབས་ལ་མངའ་བརྙེས་པར་འགྲན་ཟླ་དང་བྲལ་ཞེས་ཀུན་མཐུན་པར་གླེང་ཡང་། ཆོས་ཕྱོགས་ནས་བླ་མ་ལ་སྐུ་ཡོན་དགོས་མི་དགོས་དང་། སྐུ་ཡོན་འབུལ་མཁན་ལ་ཡོན་ཏན་ཡོད་མེད་ཀྱི་རྣམ་དབྱེ་ཕྱེད་པོ་ཞིག་མེད་འདུག་པ་དང་། ལྷག་པར་རྗེ་གོང་མའི་དྲུང་འཁོར་ཀུན་བཟང་རྩེ་པས་གཙོས་པའི་དྲག་རིམ་ཞིག་དང་མཐོ་གནོན་གྱི་རྣམ་པས་ཐུགས་ཀ་མི་མཐུན་པའི་སྟབས་ཀྱིས། ཕྱག་མཛོད་བྱོན་ནས་བཟུང་རིན་པོ་ཆེ་པས་ཀྱང་སྐུ་ཞབས་སུ་བཅར་མ་བསྡད་པ་ཡིན་སྐད། ངེས་པའི་དོན་དུ་རྗེ་གོང་མ་དང་ཐུགས་རྒྱུད་གཅིག་པས། གསན་བསམ་མཛད་པ་ལ་མ་ལྟོས་ཀྱང་། རྒྱལ་བ་ཟས་གཙང་གི་སྲས་པོས་འོག་མིན་དུ་སངས་རྒྱས་ཟིན་ནས་འཇིག་རྟེན་དང་མཐུན་པར་བྱ་བའི་ཕྱིར་མཛད་པ་བཅུ་གཉིས་ཀྱི་ཚུལ་བསྟན་པ་སོགས། སྔོན་གྱི་མཁས་གྲུབ་དམ་པ་རྣམས་ཀྱང་ཐོས་བསམ་གྱི་ཕྱིར་དཀའ་སྤྱད་མང་དུ་མཛད་པས། སྐུ་གཞོགས་ཀྱི་ཚོ་འཛིན་དང་སྐུ་ཡོན་འབུལ་མཁན་ལ་རིན་པོ་ཆེ་ཀུན་བཟང་རྩེ་ནས་དེ་ཡུན་མི་ཐུང་ཙམ་ཞིག་བཞུགས་ཐུབ་ན། མཚན་ཉིད་པའི་སྟོན་པ་རིག་པའི་མདས་རང་གཞན་ཐམས་ཅད་ཐལ་མར་འབིགས་ནུས་པ་ཞིག་
མ་བྱུང་ནའང་། རྡོ་རྗེ་ཐེག་པའི་སྨིན་གྲོལ་གྱི་གདམས་པ་དང་ཕྲ་ཞིབ་ཕྱག་ལེན་ལ་བརྟེན་ནས། དོན་གཉིས་རླབས་པོ་ཆེ་ལྷུན་གྱིས་གྲུབ་པ་ཞིག་འོང་རྒྱུར་འདུག་ཀྱང་། དྲུང་དུ་ཉེ་བར་འཁོད་པ་མཐའ་དག་མཇུག་མ་མེད་པའི་རྡོ་རྗེའི་རྣ་ལྡན་ཤ་སྟག་ཏུ་སོང་བས། གསན་བསམ་གྱི་འཕྲོར་ལུས་སོ། །ཕྱག་མཛོད་ཆེན་པོ་མཚན་དངོས་དཔལ་ལྡན་རྒྱ་མཚོ། རྒྱ་ནག་གོང་མའི་ལུང་གི་གུ་ཤྲི། འཇིག་རྟེན་ཡོངས་ལ་ཕྱག་མཛོད་སེང་གེར་གྲགས་པའི་སྒྲ་སྐད་ཅན་དེས། དབུས་ཕྱོགས་སུ་རྗེ་གོང་མའི་དགོངས་པ་རྫོགས་ཐབས་རྣམས་ལེགས་པར་གྲུབ་ནས། མཆོག་གི་སྤྲུལ་པའི་སྐུ་སོག་ཡུལ་དུ་བྱོན་པའི་གཏམ་སྙན་རྣ་བའི་བཅུད་ལེན་དུ་གྱུར་པ་ལ་བརྟེན། རང་ཉིད་ན་ཚོད་ཡོལ་བ་ལ་མ་ལྟོས་པར། དགེ་བའི་བཤེས་གཉེན་བསྟེན་པ་ལ་བྱང་ཆུབ་སེམས་དཔའ་རྟག་ཏུ་ངུའི་རྣམ་པར་ཐར་པ་ལ་འགྲན་པར་ནུས་པའི་སྙིང་སྟོབས་ཀྱི་གོ་ཆ་བཙན་པོ་གྱོན་ནས། སྒར་དམངས་དང་བཅས་ཏེ་དབུས་ནས་བཏེག །དེ་དང་ཕྱོགས་མཐུན་པར། ཕོ་བྲང་ཆེན་པོ་སྣེའུ་གདོང་རྩེ་ནས་གོང་མ་མིའི་དབང་ཕྱུག་མི་ཕམ་དབང་གྱུར་རྒྱལ་པོ་ཞེས་བོད་ཤིང་སྒོ་ཅན་ཐམས་ཅད་ཀྱི་བླ་དཔོན་ཟུང་དུ་འཇུག་པའི་གཙུག་གི་ནོར་བུ་དེ་ཉིད་དང་། དེ་མཚུངས་ཕོ་བྲང་ཆེན་པོ་གོང་རི་དཀར་པོ་ནས། གངས་ཅན་པུ་རྣམས་ཀྱི་མགོན་གཅིག་བུ་རླངས་སྟོན་ཆོས་ཀྱི་རྒྱལ་པོ་ལྷ་གཟིགས་ངག་དབང་བསོད་ནམས་གྲགས་པ་རྒྱལ་མཚན་དཔལ་བཟང་པོ་དང་། ཤུན་ནས་ཞབས་དྲུང་གདུང་བརྒྱུད་རིན་པོ་ཆེ་གསུམ་གྱི་མི་སྣས་གཙོས། འོད་གསལ་ལྷ་ཡི་གདུང་འཛིན་ས་སྐྱོང་རྒྱ་རི་བ། བྱང་ཕྱོགས་མིའི་རྗེ་བོ་ས་སྐྱོང་དགའ་ལྡན་པ་སོགས་སྡེ་
དཔོན་ཆེ་ཕྲ་མང་པོ་དང་། སེར་འབྲས་དགེ་གསུམ་གྱིས་ཐོག་དྲངས་པའི་ཆོས་སྡེ་ཁག་རྣམས་ཀྱི་གདན་འདྲེན་པ་དང་བཅས་མཁར་སྔོན་པོར་འབྱོར།ཐོག་མར་མཇལ་བའི་ཚེ། སྔོན་གནས་རྗེས་དྲན་གྱིས་ངོས་འཛིན་གྱི་གསུང་དུ་མ་སྩལ་བས། ཕྱག་མཛོད་ཀྱིས་གཙོས་པའི་དྲུང་འཁོར་རྙིང་པ་རྣམས། རྗེ་གོང་མ་དྲན་པས་དགའ་བ་དང་སྐྱོ་བ་སྤེལ་མའི་རྣམ་འགྱུར་སྣ་ཚོགས་བསྟན། མཁར་ནག་ལོ་ཙཱ་བས། ཕྱག་མཛོད་དཔལ་ལྡན་རྒྱ་མཚོ་འདིས། །བྱང་འཕགས་བཞིན་དུ་ལུས་སྲོག་ལ། །ལྟོས་མེད་ཕྱོགས་དེར་འབྱོར་པ་ན། །ཡིད་ཆེས་གསུང་གི་ངོས་འཛིན་གྱིས། །འཁྲུལ་མེད་གོང་མ་རྗེས་སུ་དྲན། །ཚེས་པ་སྔ་ཕྱིའི་ཉི་མ་དང་། །དཀྱིལ་འཁོར་གཅིག་པ་ཇི་བཞིན་དུ། །མགོན་ཁྱོད་མཐོང་བ་དོན་ལྡན་དུ། །གཟུགས་སྐུ་སོ་སོ་ཐུགས་རྒྱུད་གཅིག །ཅེས་སོ། ཁྲི་རིན་པོ་ཆེ་རྒྱལ་ཁང་རྩེ་པ་དཔལ་འབྱོར་རྒྱ་མཚོས་རྭ་སྒྲེང་དུ་གནས་གཟིགས་ལ་ཕེབས་དུས། ཀ་གཉིས་མའི་ནང་དུ་ཕྱགས་མ་ཕུད་པར་བྱོན་པས། ཇོ་བོ་འཇམ་དཔལ་རྡོ་རྗེས། བརྩོན་འགྲུས་གཡུང་དྲུང་ཁྱོད་ངའི་དཀྱིལ་འཁོར་གྱི་ནང་དུ་མཆིལ་ལྷམ་མ་ཕུད་པར་ཡོང་བ་ཅི་ཡིན་ཞེས་གསུང་བྱོན་པས། ཁུ་སྟོན་ཡིན་པར་དོན་གྱིས་ལུང་བསྟན་ཅིང་། ཐམས་ཅད་མཁྱེན་པ་བསོད་རྣམས་རྒྱ་མཚོ་གཞིས་ཀ་བྲག་དཀར་དུ་ཕེབས་སྐབས་ཤིག །ཡང་དགོན་ཞབས་དྲུང་སོགས་དྲུང་འཁོར་འགའ་ཞིག་ལ། དེ་རིང་ངེད་རང་ཚོ་ཁུ་སྟོན་དང་མཇལ་བ་འདུག་གསུངས་པས། རྐྱང་ཐང་སྒང་གི་དཀྱིལ་ཙམ་དུ་ཞལ་སྔ་ནས་རྒྱལ་ཁང་རྩེ་པ་དང་མཇལ། དེ་ནུབ་ཡང་དགོན་ཞབས་དྲུང་གིས། དེ་རིང་ཁུ་སྟོན་དང་མཇལ་བ་མ་བྱུང་ལགས་ཞུས་པས། ངེད་རང་
དང་རྐྱང་ཐང་སྒང་དུ་ཕྲད་བྱུང་ཞེས། བོད་ཀྱི་མཁས་པ་ཆེན་པོར་ངོས་བཟུང་བ་དེ་ཉིད་དགའ་ལྡན་གི་ཁྲི་ཟུར་བཞུགས་མཛད་ནས། རྒྱལ་ཁང་རྩེར་བཞུགས་སྐབས་ཡིན་འདུག་པས། ཕྱག་མཛོད་གུ་ཤྲི་སོག་ཡུལ་དུ་སྤྱན་འདྲེན་ལ་འབྱོན་གདོང་། འཕྲལ་ཡུན་གྱི་གསུང་གླེང་མང་དུ་གནང་ཞིང་། ཁྱད་པར་ངེད་ན་ཚོད་མཐོས་པས་སོག་ཡུལ་དུ་སྐུ་ཞབས་སུ་སླེབ་པ་ཞིག་མི་ཡོང་འདུག་ཀྱང་། དིང་སང་དབུས་གཙང་དུ་རང་ཕྱོགས་ཀྱི་བླ་མའི་རྒན་མགོ་ངེད་རང་ཡིན་པ་ནས་ཞབས་དྲུང་རིན་པོ་ཆེར་མཚན་འབུལ་བའི་བབས་འབྲེལ་འདུག་པས། ཐམས་ཅད་མཁྱེན་པ་ཡོན་ཏན་རྒྱ་མཚོ་དཔལ་བཟང་པོ་ཞེས་མཚན་འབུལ་རྒྱུ་ཕུལ་བས། འདི་ནས་བཟུང་མཆོག་དམན་ཀུན་ལ་མཚན་འདི་ཉི་ཟླ་ལྟར་གྲགས་སོ། །དགུང་ལོ་བཅུ་བཞི་མ་བཞེས་ཀྱི་བར་དུ་གནོད་སྦྱིན་ཕྱོགས་ཀྱི་ཕང་པར་གནས་པའི་འགྲོ་བ་རྣམས་ཀྱི་དོན་དུ་བཞུགས་ཏེ། ཉིན་རེ་བཞིན་དུ་སོག་པོ་ཚོ་ཆེན་དྲུག་གི་འབུལ་བ་སོགས་ནི་རྒྱལ་པོ་ཆེན་པོས་དཔྱ་ཁྲལ་བསྡུ་བ་བཞིན་དང་། དཔལ་འབྱོར་ལོངས་སྤྱོད་རྣམ་ཐོས་ཀྱི་བུའི་ཁེངས་པ་འཕྲོག་ནུས་པ་སྟེ། དུས་ཚོད་དེའི་སྟོབས་མངའ་ཐང་ལ། ཀར་འབྲུག་སྤྲུལ་སྐུ་སོགས་ཀྱིས་གཙོས་པའི་བླ་ཆེན་སྒར་པའི་རིགས་འཇིག་རྟེན་གྱི་ཆོས་བརྒྱད་པོའི་ཉམས་ལེན་ལ་ཐུགས་དམ་གྱི་མཐིལ་དུ་མཛད་དེ། མར་ཆུར་ནས་སྲན་སོགས་ཀྱི་འབུལ་བ་ཕྲན་བུ་ལའང་། བརྒྱ་འབུལ་དུ་མིང་བཏགས་ནས། ཁྲོམ་ཆེན་པོའི་དབུས་སུ་ལེན་ཞིང་། མཐོང་བས་དོན་དང་ལྡན་པར་གྲགས་པ་ཀུན་ལ་མ་བྱུང་འདུག །སྔོན་དཔལ་ལྡན་ས་སྐྱ་པའི་དུས་རྒྱ་ཧོར་གྱི་འབྲེལ་ལམ་ཆེ་ཞིང་། བར་དུ་ཀརྨ་པ་དེ་བཞིན་གཤེགས་
པ་རྟ་མིང་རྒྱལ་པོ་དང་མཆོད་ཡོན་དུ་སོང་བ་སོགས་རྒྱ་ཧོར་གྱི་ཏི་ཤྲིར་གྱུར་པས། དངོས་སྤྱད་བཟང་རྔམས་ཆེ་ཆེ་མོ་མང་པོ་ལ་ལོངས་སུ་སྤྱད་པ་དང་། ལ་ལ་བོད་དང་བོད་ཁམས་རྣམས་སུ་ཇ་སྣམ་ཕྲུག་བྱུ་རུ་སྤོས་ཤེལ་གྱིས་གཙོ་བྱས། ནས་དང་ཚྭ་ཉིགས་ཀྱི་མཐའ་བརྟེན་པ་ལ་འབུལ་བ་ཆེན་པོར་བྱེད་པ་ཐམས་ཅད། སྔོན་གྱི་ཆོས་པ་བཟང་པོ་ཇོ་བོ་བཀའ་གདམས་པ་དང་། ཕྱག་རྫོགས་ཀྱི་སྒོམ་ཆེན་བྱ་བ་བཏང་ངེས་ཤིག་གིས་བརྟགས་ན། རྨི་ལམ་སྒྱུ་མའི་རོལ་རྩེད་དུ་འཆར་བས་བཟང་ངན་མ་མཆིས་མོད། དིང་དུས་ཀྱི་ཆོས་པ་རྒྱལ་པོ་ཀྲི་ཀྲིའི་རྨི་ལམ་ལུང་བསྟན་གྱིས་ཟིན་པ་རྣམས་ལ། རྣམ་དཀར་གྱི་འཕྲིན་ལས་ཀྱང་ཟང་ཟིང་གི་རྗེས་སུ་འགྲོ་ལྡོག་པ་ངོས་འཛིན་པ། རྗེ་མི་ལ་དང་། བ་རི་ལོ་ཙཱ་བའི་དཔེ་ལྟར་འཇིག་རྟེན་བླུན་རྨོངས་ཀྱི་སྣང་ངོར་གྲགས་པས། སྲིད་འབྱོར་གྱི་ཕུན་ཚོགས་ལ་ཐོབ་བྱའི་གཙོ་བོར་འཛིན་ཕྱིན། དངོས་པོ་ངན་ངོན་ཙམ་ལ་བཟང་པོར་རློམ་པ་ལས། རྒྱ་ཧོར་གྱི་དུས་ཀྱི་སྤྱོད་པ་ཁྱད་འཕགས་པ་དག་ལ་ལོངས་སུ་སྤྱོད་པར་རིགས་སམ་སྙམ་མོ། །ཕོ་བྲང་གོང་རི་དཀར་པོ་ནས་འཇང་འཚོ་བྱེད་ཤེས་རབ་རྒྱལ་མཚན་སོག་ཡུལ་དུ་གདན་འདྲེན་ལ་གནང་རྗེས། ཆིབས་ཁ་མྱུར་དུ་སྒྱུར་བ་ཡོད་ཚུལ་སོགས་ཀྱི་ཞུ་ཡིག་ཕུལ་བའི་ལན་དུ། དཔལ་ཕག་མོ་གྲུ་པ་ལྷ་གཟིགས་བཀའ་བརྒྱུད་རྣམ་པར་རྒྱལ་བས་འདི་ལྟར་གནང་སྟེ། ཚོགས་གཉིས་མི་ཟད་རྒྱན་གྱི་འཁོར་ལོའི་མཛོད། །དག་པ་གཉིས་ལྡན་སྐུ་དེ་བཻ་ཌཱུཪྱའི། །རང་བཞིན་རྡུལ་བྲལ་སྟོན་པ་སྨན་གྱི་བླས། ཁྱོད་ལ་དགེ་ལེགས་འདོད་རྒུར་སྒྱུར་དུ་གསོལ། །གང་གི་སྐྱེས་སྟོབས་ཤེས་རབ་རི་བྱི་ཡིས། །གཞུང་ལུགས་གངྒཱ་ཧུབ་ཀྱིས་དྲངས་གྱུར་ནས། །
སླར་ཡང་གསོ་རིག་ཡན་ལག་བརྒྱད་ལྡན་གྱི། །ཆབ་ཏུ་བྱས་ནས་འགྲོ་ལ་བྲིམས་མཁས་པ། །བློ་བཟང་དྲང་སྲོང་མཆོག་ཁྱོད་རིང་མོ་ནས། །ཡིད་ལ་གཅགས་ཤིང་མཛའ་བས་བཅིངས་གྱུར་པས། །ལྷག་བསམ་ཟླ་བའི་འོད་ཀྱི་བྱུགས་པ་བཞིན། །ཀུན་ཏུ་དཀར་བའི་འཕྲིན་འདི་རྒྱང་ནས་སྨྲས། ༣ །སྣང་རིག་རྗེས་སྦྱངས་ཡངས་པའི་ནམ་མཁའ་ལ། །གཤོག་རླབས་གཞོན་ནུའི་དུས་ནས་རབ་རྫོགས་པ། །རྣམ་དཔྱོད་མདོངས་མཐས་མཛེས་པའི་རྨ་བྱ་ཁྱོད། །རྒྱལ་སྲས་མཆོག་གི་སྤྱན་སྔར་རིང་གནས་མངགས། ༤ །དཔག་ཚད་འབུམ་ཕྲག་བརྗོད་ཀྱིས་མི་ལང་བའི། །རྒྱ་ཆེན་ནོར་འཛིན་ཁྱོན་དེ་སྙིང་སྟོབས་ཀྱི། །འཕུར་ལྡིང་དལ་གྱིས་རྒྱུ་བས་རབ་བགྲོད་པའི། །སྤྱོད་ཚུལ་ཟབ་མོ་དེ་ལ་གློ་བ་དགའ། ༥ །རིམ་གྱིས་གངས་ཅན་ལས་ཀྱང་བྱང་གི་ཕྱོགས། །སྟོབས་ཀྱི་འཁོར་ལོས་སྒྱུར་བ་སེ་ཆེན་གྱི། །རིགས་ཀྱི་ཐུ་བོ་གང་དེའི་ཕོ་བྲང་ཆེར། །བདེ་བར་སོན་དེ་མཆོག་ཏུ་སྐལ་བ་བཟང་། ༦ །གང་དེར་རྒྱལ་བ་རྣམས་ཀྱི་མཁྱེན་བརྩེའི་གཟུགས། །འགྲོ་བློའི་ལེགས་བྱས་མེ་ལོང་ལ་ཤར་བ། །ངོ་མཚར་གསང་བ་བསམ་གྱིས་མི་ཁྱབ་པའི། །སྒྱུ་འཕྲུལ་ཆེ་ལ་ཡོན་ཏན་རྒྱ་མཚོ་ཞེས། ༧ །སྙན་གྲགས་ལྷ་ཡི་རྔ་གསང་སྟོང་སྒྲོག་ཅིང་། །ས་གསུམ་ཐུགས་རྗེའི་ཆར་གྱིས་བྲན་པའི་ཚེ། །ཕན་བདེའི་ལོ་ཏོག་ཅི་ཡང་འཕེལ་འགྱུར་བས། །དགའ་བའི་རྨ་བྱ་ཁྱོད་ཀྱང་གར་གྱིས་ཤིག །༨གང་གིས་ཞབས་སེན་མཚན་བཟང་འཁོར་ལོ་ཡི། །རྩིབས་སྟོང་མངོན་པར་བཀྲ་བ་མཐའ་འཁོབ་ཀྱི། །རྒྱལ་རིགས་བྱེ་བའི་ཅོད་པན་དང་འགྲོགས་པ། ཁྲི་གཤོག་རྒྱལ་མོའི་མཚོ་ཁར་ཕག་གི་ལོར། ༩ །ཡན་ལག་བཞི་ལྡན་གསེར་ཀྱིས་སྲབ་
སྐྱོགས་ཅན། ཁ་ལོ་སྒྱུར་ཞིང་དགེ་བར་ལྷུན་ཆགས་ཞེས། །སེམས་ལ་འབབ་པ་མཛའ་བའི་འཕྲིན་ཡིག་དར། །རྣ་བར་འཇེབ་ཅིང་གཤིན་པ་སྙན་པོའི་གཏམ། ༡༠ །སྟོང་འཁུན་མཛེས་མའི་ལག་སོར་འདུ་བྱེད་ཀྱིས། །དིང་ཕོན་ཐགས་སུ་གྲུབ་པའི་པར་དང་བཅས། །ཕོ་ཉས་དགའ་བའི་འཛུམ་དང་ལྷན་ཅིག་ཏུ། །སོན་པས་ཀུན་དགའི་བདུད་རྩི་ཅི་ཡང་ཐོབ། ༡༡ །འདི་ན་ལྷ་གཟིགས་རླངས་ཀྱི་དྲང་སྲོང་ཅག །སྔོན་དུ་ཤུགས་དྲག་ནད་ཀྱིས་ཡུན་རིང་གཙེས། །འཇིག་རྟེན་ཕ་རོལ་མཐོང་བར་རྩོམ་ན་ཡང་། །བསླུ་མེད་མཆོག་གསུམ་ཐུགས་རྗེའི་ཐིགས་པ་ཡིས། ༡༢ །སྲོག་གི་རྟེན་དང་ལུས་ཀྱི་ཟུངས་གྱུར་པའི། །དིང་སང་དུས་ན་སྙོམ་དྭངས་བདེ་བ་དང་། །གཙུག་ལག་གཉིས་ལྡན་རྒྱལ་ཐབས་ཁྲི་འཕངས་ལ། །གཟུ་བོར་མཉམ་པར་འཇོག་པས་འཚོ་ཞིང་མཆིས། ༡༣ །ཀྭ་ཡེ་གཅིག་ཏུ་དཀར་བའི་ལྷག་བསམ་དང་། །གཟོད་མ་ཉིད་ནས་གཉེན་གཤིན་རྒན་པོའི་བློས། །གཅམ་བུ་བསྐྱུངས་ཏེ་ནན་ཏུར་ཆེན་པོ་ཡིས། །སླར་ཡང་མོལ་མཆིད་ཡང་དང་ཡང་སྨྲས་པ། ༡༤།གངས་ཅན་སྐྱེ་རྒུའི་བསོད་ནམས་རྒྱ་མཚོ་ཆེ། །དུས་ལས་མ་ཡོལ་ངོ་མཚར་རླབས་ཀྱི་འཛུམ། །དགེ་བར་བཞད་པའི་ཡོན་ཏན་རྒྱ་མཚོ་ནི། །ནམ་ཞིག་མངོན་སུམ་མཐོང་སྙམ་འདི་སྐད་ཞུས། ༡༥ །ཀྱེ་མ་སྙིགས་དུས་མར་ངོར་གྱུར་པས་ན། །ཐུབ་བསྟན་ཟླ་བའི་འོད་ཀྱང་འཕེལ་འགྲིབ་ཅན། །བློ་བཟང་རིང་ལུགས་གྲགས་པའི་དགའ་ཚལ་ཡང་། །སྨག་རུམ་མུན་པས་བྱུགས་ནས་རིང་ཞིག་ལོན། ༡༦།དེས་ན་རྒྱལ་བའི་འཕྲིན་ལས་འཇུག་པ་ནི། །བསམ་གྱིས་མི་ཁྱབ་ཐུགས་རྗེའི་ཉིན་བྱེད་འོད། །དཀྱིལ་འཁོར་ཡོངས་སུ་གང་བ་དང་པོའི་དགུང་། །ཤར་རིའི་སྤོ་ལ་འཆར་
བའི་དུས་མིན་ནམ། ༡༧ །ལྟ་བར་མི་མངོན་གཙུག་ཏོར་གཡས་འཁྱིལ་བ། །བུང་བ་ལྟར་གནག་ལྕང་ལོ་རིང་པོ་ཅན། །བྲེགས་ཤིང་རབ་ཏུ་འབྱུང་བའི་བྱེད་པོ་ནི། །སོ་སོ་སྐྱེ་བོའི་བླ་མས་འོས་པ་མིན། ༡༨ །རིགས་ཀྱི་མངོན་པར་མཐོ་བ་གངས་ལས་སྐྱེས། །སྙིང་སྟོབས་རྟུལ་ཕོད་དཔའ་བར་ལྷུན་ཆགས་པ། །གདོང་ལྔའི་དབང་པོ་གཞོན་ནུར་གྱུར་ཀྱང་དེ། །རི་དྭགས་ཕལ་གྱི་རྗེས་སུ་ཅི་ཕྱིར་འཇུག ༡༩།ཕན་དང་བདེ་བའི་འོད་སྟོང་གླིང་བཞི་ལ། །རིམ་གྱིས་མངོན་སུམ་གནང་བ་ཐོབ་པའི་ལྟས། །ལེགས་ལམ་ཐོག་མའི་སྐྱ་རེངས་དཀར་པོས་ཀྱང་། །གདུང་བའི་མུན་པ་དྲུངས་ནས་ཕྱུང་བར་མཛོད། ༢༠།རྒྱ་བོད་མཁས་མང་གསུང་གི་ཆུ་རྒྱུན་གྱིས། །ལན་བརྒྱར་བཀྲུས་པ་དབུས་གཙང་དག་པའི་ཞིང་། །འཕྲུལ་སྣང་སྤྲུལ་པའི་གཙུག་ལག་ཁང་འདིར་ནི། །རབ་ཏུ་བྱུང་ཞིང་ཞབས་ཀྱིས་བཅགས་པར་མཛོད། ༢༡།སྔོན་རབས་རྗེ་བཙུན་གོང་མས་འཚོ་བཞེས་པའི། །མི་འཇིགས་སེང་གེའི་ཁྲི་ལ་བསྐལ་བརྒྱའི་བར། །ཆོས་ཀྱི་འཁོར་ལོ་རྒྱུན་མི་འཆད་བསྐོར་བའི། །རྟེན་འབྲེལ་ཟབ་མོའི་ཚོགས་ཀྱང་སྒྲིག་པར་མཛོད། ༢༢།དུམ་བུ་བཅུ་གཉིས་ས་རྣམས་རྫོགས་ལྡན་གྱི། །དགའ་སྟོན་འདོད་རྒུར་བསྒྱུར་ལ་ལོངས་སྤྱོད་པའི། །རྒྱ་ཆེན་སྨོན་ལམ་ཇོ་བོའི་ཞལ་སྐྱིན་དུ། །བདེན་ཚིག་ས་བོན་གྲུང་པོ་སྨིན་པར་མཛོད།༢༣།མཐོང་བས་དོན་ལྡན་འཛུམ་ཞལ་མངོན་གྱུར་ཅིང་། །ཟབ་གསལ་གསུང་གི་བདུད་རྩི་མྱོང་བ་ཡི། །སྐལ་བཟང་དེ་འདྲ་རིང་པོར་མི་ཐོགས་པར། །བདག་གི་ལེགས་བྱས་མཐུ་ལས་སྣང་བར་མཛོད།༢༤ །དངོས་ཀུན་ཐམས་ཅད་མཁྱེན་པའི་རང་བཞིན་དུ། །དག་
པ་ཡེ་ཤེས་སྒྱུ་མ་ཆེན་པོའི་དཔྱིད། །མཆོག་དམན་བློ་དང་འཚམ་པའི་རོལ་རྩེད་ཀྱིས། །གདུལ་བྱའི་རེ་བ་ཐམས་ཅད་སྐོང་བར་མཛོད།༢༥ །དེ་ལྟར་རྒྱལ་སྲས་གཞོན་ནུ་མཆོག་དེ་ལ། །སྙིང་གི་པདྨོའི་ཁོང་ནས་སྦྲང་རྩིའི་བུ། །དད་པའི་གླུ་དབྱངས་རྒྱང་ནས་ལེན་པ་འདི། །ལན་གཅིག་མིན་པར་ནན་གྱིས་གསོལ་བར་གྱིས། ༢༦།དྲང་སྲོང་ཁྱོད་ཀྱང་ཞབས་ཀྱི་པདྨོ་ལ། །རྟག་ཏུ་འགྲོགས་པའི་སྐལ་བཟང་བསྟེན་པ་དང་། །དྲི་དང་གསོལ་བ་འདེབས་པའི་ལས་རྣམས་ལ། །ཡིད་ལས་སྐྱེས་བཞིན་སྤོབས་པ་དགེ་བར་གྱིས། ༢༧།བྱང་ཆུབ་མཆོག་ཏུ་བསྐྱེད་པའི་གཞན་ཕན་སེམས། །ཀུན་ལ་སྙོམས་པས་བཞི་བརྒྱ་རྩ་བཞིའི་ནད། །རྩད་ནས་ཕྱུང་སྟེ་གྲོ་རྣམས་དབུགས་དབྱུང་བའི། །ཐབས་ཚུལ་རྣམས་ལ་ཀུན་ཏུ་གཞོལ་བར་གྱིས།༢༨ །འབྱོར་པས་མཐོ་དང་ཀུན་ཏུ་ཉམ་ཆུང་བ། ཀུན་ལ་འདྲིས་པ་མིན་པར་སྙིང་སྙོམས་པའི། །ལྷག་བསམ་ཀུན་ཏུ་བཟང་པོའི་སྤྲིན་ཕུང་གིས། །གྲུ་ཆར་བཞིན་དུ་འཁོས་སུ་ཕེབས་པར་གྱིས།༢༩།བསླབ་གསུམ་ངུར་སྨྲིག་གོས་དང་མི་འབྲལ་ཞིང་། །དྲན་དང་ཤེས་བཞིན་དབང་པོ་བག་ཡོད་པའི། །ངང་ཚུལ་བཟང་པོ་སྲོག་གི་ཕྱིར་དུ་ཡང་། །མི་གཏོང་བརྟུལ་ཞུགས་བརྟན་པོ་བཟུང་བར་གྱིས།༣༠ །སློང་བའི་ཚོགས་ལ་དཔག་བསམ་ཤིང་བཞིན་དུ། །ཡོན་ཏན་དགོས་འདོད་གཏེར་ཆེན་ཁ་ཕྱེ་ནས། །གཞན་དྲིང་མི་འཇོག་རྣམ་དཀར་འཕྲིན་ལས་རྒྱུན། །འགྲོ་ཀུན་ཡི་རང་གནས་སུ་འབབ་པར་གྱིས།༣༡།ཤེས་རབ་གསུམ་གྱི་དཔྱད་པས་ཡོངས་དག་པ། །གྲགས་པའི་རྒྱལ་མཚན་འཛིན་ཁྱོད་རིང་ནས་དྲན། །ཨེ་མ་རེ་བ་ལས་ཀྱང་ཆེས་ལྷག་པའི། །ཡིད་ཀྱི་དགའ་སྟོན་ལས་ཀྱང་དགའ་སྟོན་ནོ། ༣༢། དེ་སྐད་རང་བློ་མཁས་པར་མ་སྦྱངས་པས། །
སྙན་ངག་རྒྱན་གྱི་ཆ་ལ་བཏང་སྙམས་ཀྱང་། །བྱམས་ལྡན་མ་མའི་ངག་གིས་བུ་ལ་བཞིན། །རང་བཞིན་གསོང་པོར་སྨྲས་འདིར་རྣ་བ་གཏོད། ༣༣།ཅེས་རི་མོ་རྟེན་དང་བཅས། ལྕགས་མོ་གླང་ལོ་ཆུ་སྟོད་ཟླ་བའི་དཀར་ཕྱོགས་རྒྱལ་བ་གསུམ་པའི་ཚེས་ལ་དགེ་ལེགས་སུ་བྲིས། ཞེས། ཞབས་དྲུང་རིན་པོ་ཆེར་བསྔགས་བརྗོད་དང་སྙན་འབུལ་སྙན་ཞིང་འཇེབ་པ་འདི་བཞིན་གནང་འདུག །དབུས་ཕྱོགས་སུ་ཕེབས་པར། དཔོན་སློབ་ཐམས་ཅད་ཇི་ལྟར་སོས་ཀྱི་དུས་སུ་ཉི་མའི་འོད་ཀྱིས་གདུངས་པའི་གླང་པོ་ཆེ། ཁྲུས་ཀྱི་རྫིང་བུར་འཇུག་པ་ལ་རིངས་པ་ལྟར། ཉིན་ཞག་རེ་རེའི་སྔ་ཕྱིའི་དུས་ཀྱི་ཁྱད་པར་ལ་ཡང་ལྟོས་པས། ཕེབས་གྲབས་ཀྱི་སྟ་གོན་སོགས་འབད་རྩོལ་ཆེན་པོས་གནང་ཞིང་། སྒར་པ་རྣམས་ད་ནི་དུས་ཚོད་དང་ཚེས་གྲངས་འདི་ལྟ་བུ་ལ་ཕེབས་རྒྱུ་ཡིན་ཞེས་དགའ་དགའ་ལྟར་གླེང་། རྒྱལ་པོ་རྒྱལ་མོ་སོགས་ཕྱོགས་དེར་འཁོད་པ་རྣམས་ཀྱིས། ཐབས་དུ་མའི་སྒོ་ནས་ཡར་ཕེབས་མི་ཐུབ་པའི་བཀག་ཆ་དངོས་དང་བརྒྱུད་པའི་སྒོ་ནས་མང་དུ་མཛད་པ་ལ། བློ་ཆུང་རྣམས་དཔལ་ཞུམ་པ་དང་མགོ་བོ་འཁོར་ནས། ཕན་ཚུན་ཐམས་ཅད་སུས་བཤད་དང་སུས་ལབས་བདེན་པའི་དཔེ་ལྟར་གྱུར་ཀྱང་། ཕྱག་མཛོད་གུ་ཤྲི་ཆེན་པོ་དེ་བློ་གྲོས་ཀྱི་དཀྱིལ་ཆེ་བ་དང་། ཁྱད་པར་ཧོར་སོག་གི་ལུགས་ཀ་ལ་མཁས་པས་ཐབས་མཁས་ཀྱི་འཕྲུལ་ཆེན་པོས། དབུས་ཕྱོགས་ནོར་འཛིན་ཡངས་པའི་རྒྱལ་ཁམས་སུ་ཕེབས་པ་ལ་མི་མཐུན་པའི་གེགས་མཐའ་དག་ལས་གྲོལ་བར་མཛད་པ་ནི་ཟླ་བ་སྒྲ་གཅན་ལས་ཐར་པའི་འོད་ལྟར་ཤེས་ལྡན་རྣམས་ཀྱི་ཡིད་དབང་དུ་ཁོད་
ནས་བཞད་པ་ཡིན་ནོ། །དེ་ལྟར་དངོས་གཞི་ཡར་ཕེབས་པ་ལ་བཀག་ཆ་མཛད་མ་ཐུབ་ཀྱང་། ཕེབས་རྫོངས་གྲ་མ་འགྲིག་པར་ཁག་བཏགས་པའི་ཞག་འཕུལ་ཉིན་འཕུལ་བྱུང་བར། རྫོང་པ་སོགས་མ་བསྒུགས་ན་རེ་འཁང་བྱུང་དོགས་ཀྱི་ཐུགས་རྣམ་པར་སྲབ་པའི་འཚབ་འཚུབ་དང་། རྫོངས་པའི་རྙེད་པ་ལ་སྲེད་པའི་ལྟོགས་བླ་མེ་འབར་གྱི་བློ་བྲིད་མཐའ་དག་ཇི་མི་སྙམ་པར་མཛད་ནས། ལྟོས་མེད་དུ་བཞུགས་སྒར་བཏེག་པས། ཉིན་ལམ་བཅུ་ཙམ་སོང་བ་ན། རྒྱལ་པོ་རྒྱལ་མོ་ཕེབས་རྫོངས་ཞུ་བར་བསྙེགས་ནས་བྱོན། སྒོ་མང་སློབ་དཔོན་ཞུ་ཁང་རབ་འབྱམས་པ་དགེ་ལེགས་ལྷུན་གྲུབ་ཀྱིས། དེ་སླད་རྒྱལ་དབང་བསོད་ནམས་རྒྱ་མཚོ་དེས། །ཕྱོགས་འདི་ཡལ་བར་བོར་བའི་མྱ་ངམ་བཞུགས། །དྲག་པོས་ད་དུང་བར་དུ་གདུངས་པའི་ཡིད། །གུས་ལྡན་སློབ་མར་བཅས་པ་རྗེས་གཟུང་སླད། །དགའ་ལྡན་རྡུལ་མང་བརྩེགས་པའི་ལྷུན་པོ་ཆེ། །མཁས་མང་ལེགས་བྲིས་འདུ་བའི་སུམ་རྩེན་གནས། །ལེགས་བཤད་རྔ་ཆེན་རྡུང་བའི་འདུན་ས་ཆེ། །དབུས་གཙང་དག་པའི་ལྷ་གནས་ཉམས་དགའ་བར། །ཐུགས་རྗེས་སྤྱན་སྟོང་མངའ་བའི་གཞོན་ནུ་ཞིག །རིང་ནས་སྨོན་པའི་རང་གི་བཞེད་པའི་དོན། །གྲུབ་པ་བཞིན་དུ་དགྱེས་པའི་འཛུམ་དང་བཅས། །མཛེས་བྱེད་ལོ་ལ་ཆིབས་ཀྱི་ཁ་ལོ་བསྒྱུར། །རྒྱལ་སྲས་བདུད་རྩིའི་གཏེར་གྱུར་པ། །རྨད་བྱུང་མཛད་པའི་འོད་དཀར་ཅན། །དབུས་གཙང་ཀུ་མུད་ཚལ་ཆེན་པོ། །སྤྲོ་ཕྱིར་སླར་ཡང་ཤར་བར་གྱུར། །ཅེས་དང་། མཁར་ནག་ལོ་ཙཱ་བས། །དགུང་ལོ་ཚེས་ཀྱི་བར་དག་ཏུ། །བྱང་ཕྱོགས་ཡངས་པའི་རྒྱལ་ཁམས་ཀྱི། །སྐྱེ་རྒུ་རྣམས་ཀྱི་དོན་མཛད་ནས། །ཐུགས་རྗེ་བོད་དུ་གཞོལ་བ་ནི། །གང་གཱའི་རྒྱུན་འདྲ་སུས་བཟློག་ནུས། །ཞེས་སོ། །
ས་ཐག་འདུམ་པའི་ཁྱད་དང་བཅས་རྒྱའི་ལྕགས་རི་དང་ཉེ་བའི་ཕྱི་ཕྱོགས་ཀྱི་ལམ་བརྒྱུད་དེ་མཚོ་ཁར་ཕེབས། དེར་དཔོན་པོ་ཁོ་ལོ་ཆེས། འདིར་ལོ་གསུམ་ཙམ་བཞུགས་ཀྱང་ཟླ་བ་གསུམ་ཙམ་གྱི་ཡུན་ཚད་ཀྱི་ཉམས་ལས་མི་ཡོང་བ་འདུག་པས། བཞུགས་དགོས་ཞུས་པར། ཕྱག་མཛོད་ཀྱི་གསུང་ལས། ཉི་མ་ལ་ཉེ་རིང་མེད་ཀྱང་བྲག་ཕུག་ཁ་བྱང་བལྟས་སུ་ཉི་མ་མི་འཆར་བ་ཆོས་ཉིད་ཡིན་པ་ལྟར། ངེད་དཔོན་སློབ་སེམས་ཅན་ལ་ཉེ་རིང་མེད་ཀྱང་འདིར་དེ་ཙམ་བཞུགས་ག་ནས་ཐུབ་ཅེས་ཐག་ཆོད་མཛད། ཕྱོགས་དེའི་སྐྱེ་རྒུ་རྣམས་ལ་ཐར་པ་དང་ཐམས་ཅད་མཁྱེན་པའི་ས་བོན་བསྐྲུན་ཏེ། ཟླ་བ་གཉིས་གསུམ་ཙམ་ནས་བཞུགས་སྒར་བཏེག །དེའི་ཚེ་དཔོན་པོ་ཁོ་ལོ་ཆེའི་ཐུགས་ལ་ཁོ་རང་གི་ཕེབས་རྫོངས་བྱས་མ་གྲུབ་གོང་ལ་ཐེགས་མི་ཡོང་བ་གཞིར་བཞག་གི་ལེ་ལོའི་དབང་དུ་བཏང་བས། སྒར་གྱི་ཞབས་ཕྱི་མ་ཟིན་པར་མཚོ་སྐྱ་རིང་སྔོ་རིང་གི་བར་དུ་བསྙེགས་ཏེ་ཕེབས་སྐྱེལ་དང་འབུལ་བ་མཛད་པར་བྱོན། དཔོན་པོས་ཕྱག་མཛོད་པར། ཁྱེད་དཔོན་སློབ་ངེས་པར་ཕེབས་རྒྱུ་ཡིན་ན་འཕྲོས་མི་གཏོང་བ་ཞེས་ཞུས་པས། །ལན་དུ་ཚེ་གྲངས་འདི་ཙམ་ཞིག་ལ་ཕེབས་རྒྱུ་ཡིན་ཞེས་ནི་ཡང་ཡང་བྱས། དེ་ལས་སྤྲོས་པའི་ངེད་དཔོན་སློབ་ཐེགས་པར་ཁྱེད་ལ་དགོངས་པ་ཞུ་གང་ཐུབ་ཅེས་གསུང་སྒམ་པོ་བྱོན་སྐད། །རིམ་གྱིས་ཕེབས་པས་ཁྲུམས་ཀྱི་ཟླ་བའི་ནང་དུ། མགོན་པོ་སྣང་བ་མཐའ་ཡས་ཀྱི་ཡེ་ཤེས་སྒྱུ་འཕྲུལ་འདྲ་བའི་གར་མཁན་དཔལ་མར་མེ་མཛད་ཀྱིས་ལུང་བསྟན་ཅིང་། འབྲོམ་སྟོན་ཆོས་ཀྱི་རྒྱལ་པོས་ཕྱག་བདར་ནས་བཏབ་པའི། བྱང་རྭ་སྒྲེང་རྒྱལ་བའི་དབེན་གནས་སུ་ཕེབས། མང་ཇ་འགྱེད་སོགས་གྱ་ནོམ་པས་དགེ་འདུན་ལ་
བསྙེན་བཀུར། ཆོས་ཁྲིའི་སྟེང་དུ་ཕེབས་ཏེ་བཀའ་གདམས་གླེགས་བམ་གྱི་ཆོས་གསུངས་པས། མེ་ཏོག་གི་ཆར་འཇའ་འོད་ཀྱི་གུར་སོགས་ཡ་མཚན་པའི་ལྟས་བསམ་གྱིས་མི་ཁྱབ་པ་བྱུང་བ་ན། འབྲོམ་རང་ཉིད་ཀྱི་གདན་སར་ཕེབས་ནས་གསང་ཆོས་གླེགས་བམ་གསུང་བ་ལ་ལྷ་རྣམས་ཀྱིས་མཆོད་པ་ཕུལ་བར་འདུག །ཐམས་ཅད་མཁྱེན་པ་དགེ་འདུན་རྒྱ་མཚོའི་རྣམ་ཐར་དུ། ངེད་རང་གིས་བཀའ་གདམས་གླེགས་བམ་གྱི་ཆོས་གང་འཆད་སར་ལྟས་ཡ་མཚན་པ་སྣ་ཚོགས་འབྱུང་བ་ནི་ཆོས་ཀྱི་ཆེ་བ་ཡིན་གསུང་བ། ཆོས་དང་གང་ཟག་གཉིས་ཟུང་དུ་འབྲེལ་བ་ཞིག་དགོས་པ་ཡིན་འདྲ། དེང་སང་ནི་གླེགས་བམ་འཆད་མཁན་རྣམས་ལ་དེ་འདྲ་བ་འབྱུང་བ་དཀའ་བར་སྣང་ངོ་། །དགའ་ལྡན་ཁྲི་རིན་པོ་ཆེ་ཟུར་པ་སངས་རྒྱས་རིན་ཅེན་གདན་འདྲེན་ལ་ཕེབས། དགའ་ལྡན་སྤྱི་སྒེར་བྱིངས་ཀྱི་སྔོན་ལ་འབྱོན་པ་དེ་ཕྱག་མཛོད་གུ་ཤྲིས་ཁྱེད་རང་བྱིངས་ལས་གཡེར་དུ་འཐོན་པ་ཞིག་མཛོད། རབ་བྱུང་གནང་བའི་མཁན་པོ་སོགས་བདག་རྐྱེན་གང་ལེགས་ཡོད་པའི་བན་རྩ་ངེད་རང་ནས་བྱེད། །ཅེས་ནང་སྦྱར་གྱི་ཡི་གེ་བཏང་བ་འོལ་ཁ་བའི་ཞེན་ཡིན་པར་གླེང་། དེ་ནས་དྭགས་པོའི་བཀའ་བརྒྱུད་ཀྱི་འབྱུང་གནས། གདན་ས་ཆེན་པོ་དཔལ་ཕག་མོ་གྲུའི་མཚོ་ཆེན་མ་དྲོས་པ་ལས་འོངས་པའི། ཕྱག་རྒྱ་ཆེན་པོའི་ཆུ་ཀླུང་གཅིག་ཏུ་འཁྱིལ་བ་སྟག་ལུང་དུ་ཕྱག་མཛོད་པ་དང་རྟགས་བརྒྱད་དཔོན་སོགས་དྲུང་འཁོར་ཆེ་བགྲེས་རྣམས་ཀྱི་ཆིབས་བསུ་དང་། དགེ་འདུན་ཚོགས་རྣམས་ཀྱིས་མཆོད་རྫས་དུ་མ་ཐོགས་ནས་སེར་སྦྲེངས་དང་བཅས་ཏེ་ཕེབས། སྤྱིར་འཇིག་རྟེན་གྱི་གཏམ་དཔེ་ལ་གཙང་ནག་པས། སྟག་ལུང་མཁས་པས་མ་བཟུང་ཞེས་གསུངས་པར་གྲགས་
ཀྱང་། ཁྲི་ཐོག་པ་ཞབས་དྲུང་ངག་དབང་རྣམ་རྒྱལ་དེ། གསུང་རབ་མཐའ་དག་ལ་གསན་གཟིགས་ཆེ་ཞིང་མཁས་བཙུན་བཟང་པོར་བཞུགས་ཞེས་སྙན་གྲགས་ཆེ། མཇལ་འཛོམ་གྱི་ཚེ་དྲུང་འཁོར་ཁྲོད་ནས་ཞབས་དྲུང་གོང་མ་ལས་གདུང་རུས་ཆེ་བ་དང་། སོག་པོའི་གཤེད་མོ་ལ་བརྟེན་པའི་ད་ལམ་རྩོད་པ་བཏང་ན་སྟག་ལུང་ཆོས་རྗེས་ཕྱག་འབུལ་ཡོང་ཞུས་པར། བླ་དཔོན་ཅི་རིགས་ཀྱི་བྱེད་པ་ལྟར། གནས་དུས་ལ་བརྟེན་པའི་དབང་གཤེད་དང་འགྲོ་འཚམས་སྤེལ་མར་སོང་ན། དཔལ་ལྡན་ས་སྐྱ་པ་དང་སྣེ་གདོང་གོང་མ་ལ་ཡང་བརྙས་ཆོས་བྱེད་པར་ཡ་ང་བག་ཚ་མེད་པ་ཚོ་དང་མི་འདྲ་བར། །ཕྱག་མཛོད་གུ་ཤྲི་དང་སྐུ་མདུན་རིན་པོ་ཆེ་གཉིས་རང་གི་ཚུགས་ཀ་ཟིན་ཅིང་གཞན་ལ་འགྲོ་འཚམས་མི་མཛད་པའི་ཡ་རབས་པས། རྗེ་གོང་མའི་དུས་མཇལ་འཛོམ་མཛད་པ་ཁོ་ནས་ཆོག་ཅེས་རྒྱལ་ཚོད་འཛིན་པ་མཛད། དེར་སྟག་ལུང་ལྷ་སྡེ་མི་སྡེ་ཐམས་ཅད་ཀྱིས་བསྙེན་བཀུར་གྱ་ནོམ་པ་བཏབ། ཕར་གདབ་ལན་གྱི་འབུལ་གནང་མང་འགྱེད་ཕུན་སུམ་ཚོགས་པ་མཛད། དེའི་ཚེ་ས་སྐྱོང་དགའ་ལྡན་པ་མི་དབང་གཡུལ་རྒྱལ་ནོར་བུ་ཡབ་སྲས་དང་། དགའ་ལྡན་ཕོ་བྲང་ནས་དཔོན་གཉེར་སྐུ་མདུན་རིན་པོ་ཆེ་ཆོས་བཟང་འཕྲིན་ལས་པ་སོགས་གདན་འདྲེན་པ་ཕལ་ཆེར་འབྱོར། སྐུ་མདུན་རིན་པོ་ཆེས་ཆིབས་པ་སྣང་སྲིད་ཀུན་ལྡན། ཨ་དྲུང་ཆོས་འཕེལ་རྒྱ་མཚོ་དང་བཅས་ཕུལ་བ་ལ་ཤིན་ཏུ་མཉེས་པ་བྱུང་སྐད། མཁར་ནག་ལོ་ཙཱ་བས། དེ་སླད་ཆིབས་ཁ་ཕྱོགས་འདིར་བསྒྱུར། །ལམ་བར་རིང་ཡང་སྤྲོ་བཞིན་དུ། །ཐུགས་རྗེས་ཁ་བ་ཅན་དུ་བྱོན། །རྭ་སྒྲེང་རྒྱལ་བའི་དབེན་གནས་སུ། །ཡོན་ཏན་
འབྱུང་གནས་སྤྲུལ་པའི་སྐུ། །ཕེབས་ནས་གླེགས་བམ་གསུངས་པས། །མེ་ཏོག་ཆར་སོགས་ལྟས་བཟང་བྱུང་། །སྟག་ལུང་ཆོས་རྗེས་བསྙེན་བཀུར་ཏེ། །ཞལ་འཛོམ་ཆོས་ཀྱི་གླེང་མོ་མཛད། །དེ་ནས་ས་སྐྱོང་དགའ་ལྡན་པ། །མཆོད་ཡོན་རྣམས་ཀྱི་བསུ་པའི་དཔེར། །ཐུབ་དབང་སེར་སྐྱར་གཤེགས་པའི་ཚེ། །ཤཱཀྱ་རྣམས་ཀྱི་མཇལ་དེ་འོས། །ཞེས་སོ། །ཕན་ཡུལ་ནང་དུ་ཕེབས་པ་ན། རྗེ་རྒྱལ་བ་གཉིས་པའི་ཆོས་ཀྱི་སེང་གེའི་ཁྲི་ལ་བཞུགས་པའི་ཞལ་སྔ་ནས་དགེ་འདུན་རྒྱལ་མཚན་པ་བསུ་བར་ཕེབས། ཞལ་སྔ་ནས་ཁྲི་རིན་པོ་ཆེས་ཕྱག་ཕུལ་བར་བཞེད་པ་མ་གནང་བར། ལ་ལ་དག་གིས་སྟག་ལུང་ཆོས་རྗེ་ཕྱག་འཚལ་དུ་མི་འཇུག །རང་རེའི་བླ་མ་བགྲེས་པོ་འདི་ཕྱག་འཚལ་དུ་བཅུག་ཅེས་ཕྱག་མཛོད་པ་ལ་ཁ་ཟེར།མཁར་ནག་ལོ་ཙཱ་བས། བོད་ཀྱི་ཆེ་རྒུས་ཕྱག་བཙལ་ཡང་། །ལྡང་བ་ཙམ་ཡང་མ་མཛད་པ། །རིགས་ཀྱི་སྙེམས་པ་མ་ཡིན་ཏེ། །མྱ་ངན་མེད་བྱིན་རྣམ་ཐར་བཞིན། །ཞེས་པ་འདི་དག་ལ་བསམ་པ་འདྲ། གདན་ས་ཆེན་པོ་དགའ་ལྡན་རྣམ་པར་རྒྱལ་བའི་གླིང་དུ། ཁྲིམས་ལྡན་ངུར་སྨྲིག་འཛིན་པའི་འདུས་པ་ལེགས་བཤད་ཀྱི་རྫ་རྔ་སྒྲོག་པ་ངང་པའི་ཁྱུ་ཆེན་པོ་དག་གིས་སྔུན་བསུས་ཏེ་ཕེབས། དེའི་ཚེ་ནམ་མཁའ་གཡའ་དག་པ་དང་མེ་ཏོག་གི་ཆར་ཆེན་པོ་བབས། གཙུག་ལག་ཁང་རྣམས་ཀྱི་གནས་གཟིགས་ཞིབ་པར་གནང་། ཁྱད་པར་དངུལ་གདུང་རིན་པོ་ཆེ་མཇལ་བའི་དུས། ཐམས་ཅད་མཁྱེན་པ་བློ་བཟང་གྲགས་པ་ཞལ་གཟིགས། གཉུག་མར་གནས་པ་དང་གློ་བུར་དུ་ལྷགས་པའི་དགེ་འདུན་རྣམས་ལ་མང་ཇ་འགྱེད་སོགས་ཟང་ཟིང་གི་དངོས་པོ་གྱ་ནོམ་པས་ཚིམ་པར་མཛད། །
ཚོགས་ཆེན་དུ་དམ་པའི་ཆོས་ཀྱི་འབྲེལ་བ་སྩལ། མཁར་ནག་ལོ་ཙཱ་བས། འཕན་ཡུལ་གཞུང་ནས་དགའ་ལྡན་དུ། །ཕེབས་ཚེ་དགེ་འདུན་ཚོགས་ཀྱིས་བསུས། །ཕྱག་ན་མཆོད་རྫས་སྣ་ཚོགས་ཐོགས། །སྙན་པའི་དབྱངས་ཀྱིས་གསོལ་བ་འདེབས། །དུས་དེར་ནམ་མཁའ་གཡའ་དག་ཀྱང་། །མེ་ཏོག་ཆར་པ་ཅི་ཡང་བབས། །བསྡུ་བ་རྣམ་བཞིས་ཚིམ་མཛད་ཅིང་། །དད་པའི་ལྗོན་པ་མཐའ་ཡས་བསྐྲུན། །ཡབ་རྗེའི་དངུལ་གདུང་མཇལ་བ་ན། །འཇམ་དཔལ་སྙིང་པོའི་གཟིགས་སྣང་བྱུང་། །བཀའ་དང་བསྟན་བཅོས་རིག་གནས་ལ། །སྦྱངས་ཤིང་མཁྱེན་རྣམས་ལེགས་བཤད་ཀྱི། །འབྲུག་སྒྲ་སྒྲོག་པས་ཤིན་ཏུ་མཛེས། །རྒྱལ་སྲས་མཆོག་གི་དམ་ཆོས་གསུངས། །ཞེས་སོ། །བོད་གངས་ཅན་གྱི་ལྟེ་བ་ར་ས་འཕྲུལ་སྣང་གི་གཙུག་ལག་ཁང་ཆེན་པོར་ཕེབས་པར་ཉེ་བ་ན། སྐྱ་སེར་གྱི་གདན་འདྲེན་མཐའ་ཡས་པའི་ཆིབས་རགས་བགྲང་བར་དཀའ་བ་དག་གིས། ཁྲོམ་ཁྲི་ཕྲག་མང་པོ་བརྒལ་ཏེ་ཚོགས་པ་རྣམས་ཀྱི་མིག་ལམ་དུ། ངོ་མཚར་བའི་བཀོད་པ་རྒྱ་མཚོའི་དགེ་མཚན་གྱིས། ཨེ་མ་མ་ལ། འདི་འདྲ་བའི་མིག་གི་དགའ་སྟོན་ནི་སྒྱུ་མ་མཁན་གྱི་སྤྲུལ་པ་ཞིག་ཡིན་ནམ་ཞེས་གླེང་ཞིང་། ཕལ་ཆེ་བ་དག་ནི། ཐམས་ཅད་མཁྱེན་པ་བསོད་ནམས་རྒྱ་མཚོ་དཔལ་བཟང་པོ་དེ་ཉིད་དྲན་པའི་གདུང་བའི་ཤུགས་ཀྱི་མིག་ནས་མཆི་མ་འཁྲུག་ཅིང་། ངག་ནས་གསོལ་འདེབས་ཀྱི་སྒྲ་ཆེན་པོ་དར་དིར་དུ་སྒྲོག་པར་གྱུར་ཏོ། །སྒོ་མང་སློབ་དཔོན་བཞུ་ཁང་རབ་འབྱམས་པ་དགེ་ལེགས་ལྷུན་གྲུབ་ཀྱིས། གཞོན་ནུར་གྱུར་ཀྱང་དབང་པོ་ཞི། །རྒྱན་གཞན་བྲལ་ཡང་མཆོག་ཏུ་མཛེས། །སྲིད་པར་གནས་ཀྱང་ཉོན་མོངས་མེད། །མགོན་
ཁྱོད་མཐོང་བ་སྐལ་བ་བཟང་། ཁྱོད་ཞལ་ཟླ་བ་མཐོང་བ་ཡི། །དགའ་བ་འཇིག་རྟེན་ལ་རྒྱས་པ། །དེ་འདྲ་སྲོག་ཆགས་འགུམ་པ་ནི། །སླར་ཡང་སོས་པ་དག་ལ་མེད། །མགོན་ཁྱོད་གདུལ་བྱའི་འཇིག་རྟེན་ལ། །སྙིང་རྗེས་ཀུན་ནས་བརྩེ་བ་ཙམ། །སྙིང་དུ་སྡུག་པའི་བུ་གཅིག་པའི། །མ་ལའང་དེ་འདྲ་སྐྱེ་མ་ལགས། །རྒྱལ་བ་ཀུན་གྱི་ཐུགས་རྗེ་ལ། །སྤྱན་རས་གཟིགས་ཞེས་སྙན་གྲགས་པའི། །གཏམ་སྙན་རྣ་བའི་ཨུཏྤལ་ལ། ཁྱེད་ཀྱིས་མིག་ལ་མངོན་སུམ་མཛོད། །ཅེས་དང་། མཁར་ནག་ལོ་ཙཱ་བས། ལྷ་མཆོག་ཇོ་བོ་བཞུགས་པའི་ས། །སྐྱིད་ཤོད་མཐིལ་དུ་ཕེབས་པ་ན། །བགྲང་བར་དཀའ་བའི་ཆིབས་རགས་ཀྱིས།ཁྲོམ་ཆེན་མིག་གི་དགའ་སྟོན་བསྒྲུབས། །ཞེས་སོ། །དེ་ནས་ས་སྐྱོང་བཀྲ་ཤིས་རབ་བརྟན་པའི་གསུང་ལས། དེ་དང་འབྲེལ་བར་བྱང་ཕྱོགས་ས་སྐྱོང་གི །ཕོ་བྲང་རྒྱ་བོད་ཀུན་གྱིས་གཏུགས་པའི་གནས། དགའ་ལྡན་ཁང་གསར་ཞེས་བྱ་ལྕང་ལོ་ཅན། །ནོར་ལྡན་དཔལ་མོ་མགྲོན་དུ་བོས་འདྲ་ཡོད། །ཅེས་བསྔགས་བརྗོད་མཛད་པའི་གཞིས་ཀ་དགའ་ལྡན་ཁང་གསར་དུ་སྤྱན་དྲངས། གཞི་ལེན་དང་ཤངས་ལེན་སོགས་གང་ལ་གང་འཚམ་དངོས་གཙང་ཞིང་དཔངས་མཐོ་བའི་དགའ་སྟོན་རྒྱ་ཆེན་པོ་མཛད། སྡེ་པ་ཆོས་རྗེའི་གཙུག་ཕུད་ཕུལ་ཞིང་། འབུལ་བར་སྔོན་རྗེ་གོང་མའི་དུས་སུ་ཞབས་དྲུང་བཀྲ་ཤིས་རབ་བརྟན་པ་ཞེས། ལུགས་གཉིས་ཀྱི་མཁྱེན་པའི་སྤྱན་ཡངས་པ་དེ་ལ་མཁས་པ་མཁས་པའི་དྲུང་དུ་མཛེས་པའི་དཔེ་ལྟར། གཙུག་ལག་ལུགས་བརྒྱའི་ཚུལ་ལ་འཇུག་པ་ཡངས་པའི་བློ་གྲོས་དང་ཁེངས་པ་ཕན་ཚུན་དུ་འགན་བཟོད་པའི་རིན་སྤུངས་ཞབས་དྲུང་ངག་དབང་འཇིགས་གྲགས་ཀྱིས། ཕོ་བྲང་སྣེའུ་གདོང་རྩེའི་ལྷ་གཟིགས་གདུང་བརྒྱུད་ངག་
དབང་བསོད་ནམས་གྲགས་པ་རྒྱལ་མཚན་དང་། རྒྱལ་བཟང་བ་དཔོན་གཡོག་གཟིགས་སྟབས་མ་གཅིག་པའི་རྒྱུ་ལ་བརྟེན། རྩེ་ནས་ཞལ་ཕྱོགས་བསྒྱུར་བ་གནང་གཞན་སྡེ་རྣམས་ཀྱིས་ཞབས་ནས་བཀུར་བའི་དཔུང་གཏོས་ཆེ་བ་ཡར་ཀླུང་དུ་འབྱོར་ནའང་། འགྲོ་ལྡིང་བའི་སྐབས། སྐྱིད་ཤོད་མིའི་རྗེ་བོ་རྡོ་རྗེ་འཇིགས་བྱེད་ཀྱི་རྣལ་འབྱོར་པར་སྙེམས་པའི་རྭ་རྩ་སྦོམ་པ་བཀྲ་ཤིས་རབ་བརྟན་པ་ལ་འཕྲིན་དུ་བྱ་བ་ཡོན་ཏན་གསུམ་གྱི་དོ་ཤལ་ཞེས་བྱ་བར། སྟོང་ཉིད་སྙིང་རྗེ་ཟུང་དུ་འཇུག་པའི་རྭ། །ཆོས་ཀྱི་དབྱིངས་ན་གདེངས་པའི་ཉམས་གཅིག་ཏུ། །དྲག་པོ་མེ་ཡི་རལ་པ་གསིག་པའི་གར། །འཇིགས་བྱེད་བདུད་ལས་རྣམ་པར་རྒྱལ་བ་མཆོད། །དེ་ཉིད་བསྐྱེད་པའི་རིམ་པ་ཟབ་མོ་ཡི། །རྣལ་འབྱོར་སྙིང་ལ་ལྕི་བའི་ཁུར་བསྣམས་ནས། །དངོས་གྲུབ་མཚན་ཉིད་ཡན་ལག་བརྒྱད་ལྡན་པའི། འབྱོར་བརྩེན་ལྷག་པའི་ལྷ་ཡིས་རྗེས་བཟུང་ལོ། །ཡ་མཚན་མགུར་ན་མཛེས་པའི་དོ་ཤལ་གྱིས། །འཕྲེང་བ་ཡོན་ཏན་གསུམ་གྱི་དོ་ཤལ་དུ། །འཕགས་པའི་སྤྱོད་པ་གཞན་དག་མེད་སེམས་པའི། །སྐད་སངས་སྒྲོག་པར་བྱ་དེ་རིགས་སམ་ཀྱེ། །རྟུལ་ཕོད་ལོངས་སུ་སྤྱོད་པ་བརྒྱན་པ་ཡི། །དཔུང་པ་གྲགས་པའི་ས་བོན་འདེབས་ནུས་པ། །མཐར་བྱེད་སྐྱེ་བའི་ལམ་སྟེར་མ་གྱུར་པ། །གང་དག་སྲིད་པའི་འཁོར་ལོ་རྨད་བྱུང་བཀྲ། །ཨེ་མ་རིག་པའི་མེ་ཏོག་སྣ་བ་རུ། །འབར་དང་སྒྱུ་རྩལ་གཞན་གསོས་གཞོན་ནུའི་གླུ། །བྱེ་བར་བསྒྲེངས་པའི་སྒྲ་དེས་ས་གསུམ་གྱི། །དཔལ་མོ་ཆགས་པས་མི་གཟིར་རྒྱུ་ཅི་ཞིག །ལྷ་གཟིགས་དབང་པོའི་ཆབ་སྲིད་གྲུ་བོ་ཆེ། །འཇིང་ཞིང་འདེགས་པའི་རྣམ་འགྱུར་ཆུ་བོ་ཡིས། །བྱེད་པོའི་རི་མོ་གཅིག་མིན་
མང་གཉེར་བར། །དབུ་འཕྲེང་སེམས་མེད་མ་ཡང་གད་མོ་དགོད། །ཅེས་སོགས་འཇམ་དཔལ་གཤིན་རྗེ་གཤེད་ཀྱི་རྗེས་སུ་བཟུང་བའི་སྙན་པ་དང་། བོད་ཤིང་སྒོ་ཅན་གྱི་རྒྱལ་སྲིད་འདི་འཆགས་འཇིག་ཇི་ལྟར་བྱེད་ཀྱང་ཁྱོད་ཀྱི་ལག་ཏུ་ཡོད་དོ་ཞེས། མདུན་ན་འདོན་གྱི་གཙོ་བོ་དང་། དཔའ་མཛངས་རྟུལ་ཕོད་པ་སོགས་ལ་བརྟེན། ཟོལ་གྱི་བསྟོད་པའམ་སྨད་པ་གང་རུང་དུ་སྙན་ངག་མཁན་གྱི་དགོངས་པའི་དབང་གིས་འཐེན་ཆོག་པའི་ཚིག་སྦྱོར་ངོ་མཚར་བ་དང་། མནངས་ཀྱི་དུས་ན་ལྷ་གཅིག་ཁྱོད་ཀྱི་སྲིད། །འཇིག་དང་མི་འཇིག་མངོན་སུམ་བརྟེན་པའི་སྲོག །སྦྱིན་པ་འཆི་མེད་བདུད་རྩིའི་འབབ་སྟེགས་མཁན། །འདི་ལས་གཞན་པ་བཙལ་དུ་ཡོད་དམ་ཅི། །ཚུལ་དེ་མི་བརྗེད་མཛའ་བས་བཅིངས་པའི་སེམས། གཡོ་མེད་བརྟན་པའི་ཕྱི་ཐག་རིང་པོ་པ། །བྱས་ཤེས་དྲིན་དུ་གང་བའི་དགའ་བྱེད་གྲོགས། །ཧ་ནུ་མནྠའི་བརྟུལ་ཞུགས་རྫོགས་པར་འཚལ། །དེའི་དོན། ལྷ་གཅིག་ཅེས་བོས་ནས་ཁྱོད་ཀྱི་སྡེ་སྲིད་འདི་དཔལ་ཕག་མོ་གྲུ་པའི་བཀའ་དྲིན་ལ་བརྟེན་ནས་བྱུང་བ་ཡིན་པས། ཚུལ་དེ་ལ་བྱས་ཤེས་དྲིན་དུ་གཟོ་བའི་སྒོ་ནས། རམ་ཎས་ལང་ཀའི་བདག་པོ་གསོད་པའི་གྲོགས་སྤྲེའུ་ཧ་ནུ་མནྠས་བྱས་པ་དང་མཚུངས་པ་ཞིག་གྱིས་ཞེས་བརྗོད་པ་འདི། སྐྱིད་ཤོད་ཞབས་དྲུང་བཀྲ་ཤིས་རབ་བརྟན་པ་མངའ་ཐང་མཐོ་བ་དང་། དགྲ་ཐོག་ལ་དཔའ་ཞིང་མཁྱེན་སྤྱོད་ཡངས་པར་སོང་བས། །རང་གཞན་ཀུན་གྱིས་བསྔགས་པའི་གནས་སུ་གྱུར་པ་དེ་ལ། ཞབས་དྲུང་རིན་པོ་ཆེ་བསོད་ནམས་རྒྱ་མཚོས། ཁྱོད་རང་འཇིགས་བྱེད་ཀྱི་རྣལ་འབྱོར་པ་ཡིན་པས་འདི་ཉེ་བར་མཁོ་བ་ཡོད་གསུངས་ནས། དངུལ་གྱིས་ཀ་པཱ་ལི་ཁ་གཅོད་ལ་གཡུ་ཕྲ་ཕྱུག་པོ་ཡོད་པ་ཞིག་
གནང་བ། འདི་སྐབས་སྡེ་པས་ཀ་པཱ་ལིས་གཙོས་པའི་ཟང་ཟིང་གི་དངོས་པོ་མང་པོ་དང་། ཆོས་ལུང་བདེ་ལེགས་ཀྱི་ས་ཆ་རྣམས་འབུལ་བ་མཛད། ཞབས་དྲུང་གཡུལ་རྒྱལ་བ་དེ། ཁོ་རང་གི་ཁུ་བོ་བཀྲ་ཤིས་རབ་བརྟན་པ་དང་། རིན་སྤུངས་ངག་དབང་འཇིག་གྲགས་ལྟ་བུའི་ཆོས་ཕྱོགས་ཀྱི་ཡོན་ཏན་འཇམ་དཔལ་དབྱངས་ལ་འགྲན་བཟོད་ཅིང་། །འཇིག་རྟེན་གྱི་ཆ་ནས་ཕ་རོལ་གྱི་དགྲ་དཔུང་འཇོམས་པ་ལ་དཔའ་བའི། ཨ་བོ་ཧོར་འདྲའི་སྤྱོད་ཚུལ་དང་ལྡན་པ་ཞིག་མིན་པར་གདའ་ཡང་། འཕྲལ་དུ་ཁ་ལ་ཟ་བྱུང་ན་ཕུགས་སྣ་ལ་སྒྱོགས་བྱུང་ནའང་བཟོད་སྙམ་པའི་ཧར་སྤྱོད་ཧུར་སྤྱོད་ཀྱི་རིགས་ཡེ་མི་མཛད་པར། །བརྟན་བརླིང་རང་ཚོད་ཆེ་ཞིང་སྲོང་བཙན་སྒམ་པོ་ལྟར་སྒམ་པའི་མཐར་ཐུག་པ། སྔོན་དུས་ཀྱི་སྡེ་སྲིད་ཁུངས་བཙན་རྣམས་ཀྱི་སྤྱན་ལྟོས་མ་ཉམས་པའི། དཀོན་ཅོག་ལ་གུས་ཤིང་རང་སྲིད་སྐྱོང་མཁས་པ། ཆོས་ཀྱིས་མཛེས་ཤིང་སྒྲིགས་ཀྱིས་སྤ་བ། ཡ་རབས་དམ་པའི་མཛད་སྤྱོད་ལྷུན་གྱིས་གྲུབ་པའི་ངང་ཚུལ་ཅན་ཞིག་ཡོད་པར་སྣང་། འདྲེན་བྱེད་ཕྲ་ལ་རིང་བ་ཞིག་ཡིན་ཞེས་གླེང་ཡང་། འདིའི་སྐབས་ཐུགས་སྙིང་ཁམས་དཔེ་མེད་བསྐྱེད་པ་ཡིན་སྐད་དོ། །ཚེས་བཅོ་ལྔའི་ཉིན་སེར་འབྲས་དགའ་སྐྱོར་སོགས་ཉེར་འཁོར་གྱི་དགོན་སྡེ་གྲངས་མེད་པའི་དགེ་འདུན་རྣམས་འདུས་ཏེ། ངུར་སྨྲིག་གི་གོས་རུང་བ་ཚད་དང་ལྡན་པའི་ཁ་དོག་གིས་ནམ་མཁའི་ལམ་ཀུན་ཀྱང་གསེར་གྱི་མདངས་འཛིན་པར་ནུས་པའི་སེར་སྦྲེངས་ཀྱི་འཕྲེང་བ་རིང་པོར་བསྟར། གདུགས་དང་། རྒྱལ་མཚན། བ་དན། རོལ་མོ། མེ་ཏོག་སོགས་མཆོད་པའི་ཚོགས་བསམ་གྱིས་མི་ཁྱབ་པས་ནོར་འཛིན་གྱི་ལྟོ་བ་དོག་པོར་བཀོད་པར། སྒོ་མང་སློབ་དཔོན་བཞུ་ཁང་
རབ་འབྱམས་པ་དགེ་ལེགས་ལྷུན་གྲུབ་ཀྱིས། ཁྱོད་ཀྱི་རྨད་བྱུང་མཛད་པའི་ཉིན་མོར་བྱེད། །གངས་ཅན་མཁའ་དབྱིངས་མཛེས་མའི་ལང་ཚོ་ལ། །རྟག་ཏུ་འོད་བརྒྱ་འགྱེད་པ་འདི་ཤར་ཚེ། །བདག་སོགས་རྨོངས་པའི་སྨག་རུམ་གང་དུ་འབྲོས། །གྲུ་འཛིན་རི་བོའི་ངོས་ལ་གཙུག་ལག་ཁང་། །མ་ཕམ་མདུན་ས་ས་ལ་འཕོས་འདྲ་བ། །བརྒྱ་ཕྲག་ངུར་བ་འཁྲིགས་པའི་ཆུ་གཏེར་དབུས། །དཔལ་ལྡན་འབྲས་སྤུངས་ཡིད་དགའ་ཆོས་འཛིན་དུ། །མཁྱེན་པ་གཅིག་གིས་དུས་གསུམ་གསལ་གཟིགས་ཀྱང་། །མཁས་པའི་ལེགས་བཤད་པདྨོའི་དྲ་བ་ཡིས། །རང་གི་ཐུགས་མཚོར་སླར་ཡང་མཛེས་བསྐྱེད་ན། །དེ་སླད་ཐུབ་བསྟན་འོ་མཚོ་རླབས་ཆེར་འགྱུར། །ལེགས་བཤད་གསར་པའི་ཆུ་འཛིན་འབྱུང་བའི་གནས། ཁྱོད་ཐུགས་རབ་དཀར་འོ་མའི་ཆུ་གཏེར་ཆེ། །གཞུང་ལུགས་ཟླ་ཟེར་བྱེ་བའི་གོས་གྱོན་ན། །བློ་བཟང་བསྟན་པའི་ལྷུན་པོ་ཅིས་མི་མཛེས། །ཞེས་དང་། མཁར་ནག་ལོ་ཙཱ་བས། སེ་འབྲས་དགེ་འདུན་འདུས་པའི་སྦྲེངས། །མཚར་དུ་དངར་བ་དེ་མཐོང་ཚེ། །བྱམས་པའི་འདུས་པ་དང་པོ་ཡང་། །ད་ལྟ་ཉིད་ནས་བྱུང་ངམ་སྙམ། །ཞེས་སོ། །བླ་བྲང་ཁག །ཁམས་ཚན་མི་ཚན་སོགས་ཀྱི་རྟ་པའི་བསུ་བ་དང་བཅས་ཏེ། རྒྱ་གར་འཕགས་ཡུལ་བའི་ཤྲཱི་དྷ་ནྱ་ཀ་ཊ་ཀ་གཉིས་པ། བོད་ཡུལ་གྱི་དཔལ་ལྡན་འབྲས་སྤུངས་དང་པོ་ཕྱོགས་ཐམས་ཅད་ལས་རྣམ་པར་རྒྱལ་བའི་གླིང་གྲུ་འཛིན་གཉིས་པ་དགའ་ལྡན་ཕོར་བྲང་གི་སེང་གེའི་ཁྲིར་ཕེབས། དེར་བསུ་བ་དང་ཕེབས་སྐྱེལ་ལ་འདུས་པའི་སྐྱ་སེར་གྱི་ཚོགས་ཆེན་པོ་ལ། སྐུ་མདུན་རིན་པོ་ཆེས་ཁུར་བཞེས་ནས་བུར་སྟོན། མར་སྟོན། ཤ་རྩམ་ནས། གྲོ་སྲན་རྣམས་ཀྱི་ཕོགས་ཟུར་གསོས་ནར་མ་སོགས་
དགའ་སྟོན་རྒྱ་ཆེན་པོ་བསྒྲུབས། གཞན་ཡང་གཟིམས་ཁང་གོང་། གྲྭ་ཚང་ཁག་བདུན། སློབ་དཔོན་ཚུལ་པ། ཁམས་ཚན་མི་ཚན་སྟར་དངུལ་སོགས་ཕྱུག་པོ་ཁག་མང་པོས་སོ་སོའི་གནས་ཁང་དུ་སྤྱན་དྲངས་ཏེ་བསྙེན་བཀུར་གྱ་ནོམ་པ་བསྟབ། སྔར་སྣེའུ་རྫོང་པའི་གཞིས་ཀ་རྡོ་ཁང་སྔོན་མོར་གྲགས་པ་ཆུང་ངུ་ཞིག་ལས་སྤྲོས་པའི་ཕོ་བྲང་གི་ལྟེ་བ་ལེགས་རྒྱུ་མེད་པ། རྗེ་གོང་མ་སོག་ཡུལ་དུ་ཐེགས་པའི་རྗེས་དགའ་ལྡན་ཕོ་བྲང་གསར་པ་འདི་ཉིད། སྐུ་མདུན་རིན་པོ་ཆེ་ཆོས་བཟང་འཕྲིན་ལས་ཞེས། ཞབས་དྲུང་གོང་མའི་གསོལ་དཔོན་སོགས། སྐུ་ཞབས་སུ་བཅར་བའི་ལས་ཚན་དང་། རྗེས་སུ་གཞིས་ཀྱི་ཕྱག་མཛོད་ཀྱི་གོ་སར་མངའ་གསོལ་བའི་བདག་རྐྱེན་ཡར་འཕེལ་དུ་གནང་ཞིང་། དགོངས་བཞེད་དང་མཐུན་པའི་ཕྱི་ནང་བར་གསུམ་གྱི་ཞབས་འདེགས་ཕུལ་དུ་ཕྱིན་པར་གྱུར་ནས། ཐུགས་ཀྱི་གཏད་སོ་ཐུན་མོང་མ་ཡིན་པར་གནང་། བབས་ནས་ཀྱང་མཁྱེན་དཔྱོད་ཤིན་ཏུ་ཡངས་པས། གྲྭ་ས་གསུམ་གྱིས་གཙོས་དཔལ་རི་བོ་དགའ་ལྡན་པའི་བསྟན་སྲིད་སྤྱིའི་སྲོག་ཤིང་ཏུ་གྱུར་ལ། སྡེ་དཔོན་རང་སྲིད་རྣམས་ཀྱི་བཀའ་བགྲོས་ཀྱི་སྙིང་པོ་འདྲི་བའི་ཡུལ། གཞན་སྲིད་ཀུན་གྱིས་ཀྱང་རེ་ལྟོས་དང་མཐོང་གཟོས་ཆེ་བ་དེ་ཉིད་ཀྱི་ཕྱག་རྗེས། འཆི་བ་མེད་པའི་ཁང་བཟང་ལ་ཅོ་འདྲི་བ་འདི་ཉིད་བསྐྲུན་པར་མཛད་ཅིང་། ཨར་པོའི་སྐབས། དབྱངས་ཅན་ངག་གི་དབང་ཕྱུག་ས་སྐྱོང་བཀྲ་ཤིས་རབ་བརྟན་པས་ཐུགས་ཁུར་མཉམ་བཞེས་ཀྱི་རྣམ་པས། ཞལ་བཀོད་དང་འུ་ལག་གཏོང་བ་སོགས་མཐུན་རྐྱེན་མང་དུ་བསྒྲུབས། ཞལ་བཀོད་ལ་ཕེབས་རེས་ཀྱི་སྡེ་པ་དཔོན་གཡོག་ཚང་མས་དན་འབག་མདའ་ནས་ཆིབས་ལས་བཤོལ་ཏེ་རྩིག་རྡོ་བསྐྱེད་པ། རྗེ་བཙུན་
མི་ལས་ས་མཁར་དགུ་ཐོག་རྩིག་པ་ལ་འགྲན་བཟོད་པ་ལྟ་བུ་མཛད་སྐད། དེ་ལྟ་བུའི་ཕོ་བྲང་འདིར་ཕེབས་ཙམ་ཉིད་ནས་ཐུགས་བག་ཕེབས་ཤིང་། སྔོན་གནས་རྗེས་སུ་དྲན་པའི་གསུང་མང་དུ་བྱོན་པར་སྣང་། མཁར་ལོས། དགའ་བའི་ཚལ་གྱི་དཔལ་ལྡན་པ། །ཕྱག་ན་པདྨོའི་ཕོ་བྲང་དུ། །ཕེབས་ཚེ་སྔ་དྲོ་དགོངས་ཁྱད་ལས། །གསལ་བའི་སྔོན་བྱུང་རྗེས་སུ་དྲན། །རྒྱ་ལེ་ཆོས་མཛད་ལ་སོགས་པས། །གཟབ་བཤོམས་གཟིམས་ཁང་གོང་ལ་སོགས། །སྤྱི་སྒེར་མང་པོས་མཆོད་པའི་ཚེ། །ཆོས་ཀྱི་གླེང་མོའི་སྤྲིན་དབྱངས་དང་། །བྱིན་རླབས་ཆར་པ་ཅི་ཡང་ཕབ། །ཅེས་སོ། །གངས་ཅན་འགྲོ་ལ་རྗེས་བརྩེའི་གཞན་གསོས་ཀྱིས། །ལས་སྨོན་མགྲིན་པའི་དབྱངས་སྙན་འཁོར་བ་ན། །འཇིག་རྟེན་དབང་ཕྱུག་སོས་ཀྱི་དཔལ་མོའི་བཞིན། །སཱ་ལའི་ལྗོངས་ཀྱི་ནོར་འཛིན་ལྟོ་བར་ངོམ། །རིགས་དུས་སྟོབས་འབྱོར་རྡོ་རྗེ་རྩེ་བརྒྱ་པས། །ཆེན་པོའི་ལྷ་མིན་དྲེགས་པའི་མངལ་ལྷུང་ཡང་། །བདག་བསྟོད་གཞན་སྨོད་གཙོར་འཛིན་མི་བསྲུན་ཡིད། །མི་ལྡན་ཁྱོད་ནི་ས་འདིའི་བརྒྱ་བྱིན་བཞིན། ཁུངས་ཅན་སྒྲོ་གཤོག་དང་བྲལ་ཕ་ཝང་རྣམས། །བཟང་པོར་རྫུ་བའི་གྱ་གྱུའི་ཐབས་འཕྲུལ་གྱིས། །རྩོད་མེད་ཡོངས་གྲགས་ཆེན་པོའི་བྱ་རྒོད་སྟེང་། །བགྲོད་འདོད་ངང་ཚུལ་མཐོང་ཚེ་ཁྱོད་ལ་དད། །དེ་ཡང་ཕྱག་མཛོད་གུ་ཤྲི་ཆེན་པོ་སོག་ཡུལ་དུ་གདན་འདྲེན་ལ་འབྱོན་སྐབས། སྐུ་མདུན་རིན་པོ་ཆེ་དང་བཀའ་བགྲོས་ཞིབ་ཏུ་བྱུང་བ་དང་། གཞན་ཡང་དྲུང་ཡིག་འཇམ་སྲས་ཆོས་ཀྱི་རྒྱ་མཚོ་སོགས། རྗེ་གོང་མའི་དྲུང་འཁོར་དང་ཞལ་སློབ་ཉམས་མྱོང་ཅན་མང་པོ་དག་མགྲིན་གཅིག་ཏུ། མཆོག་གི་སྤྲུལ་སྐུ་དབུས་སུ་ཕེབས་ནས་ཐེག་པ་ཆེན་པོའི་ཡོངས་འཛིན་
ཞིག་ནི་མེད་དུ་མི་རུང་བའི་ཡན་ལག་ཡིན་ལ། དེ་ཡང་དབུའི་གཙུག་ཕུད་འབུལ་བ་དང་རབ་ཏུ་བྱུང་བའི་མཁན་སློབ་ནི། གདན་ས་ཆེན་པོ་དགའ་ལྡན་ནས་ཁྲི་རིན་པོ་ཆེ་གདན་ཟུར་རྣམས་འོས་པ་གཞིར་བཅས་ཀྱང་། དབང་ལུང་མན་ངག་གི་རིགས་མང་པོ་གསན་པར། སྐུ་ན་སྨིན་པས་སྐུ་གཟུགས་ཀྱི་ལྕོགས་མི་ལྕོགས་ཀྱང་ཡོད་ཅིང་། ལྷག་ཏུ་མདོ་སྔགས་ཀྱི་གཞུང་བཤད་ལ་མཁྱེན་པ་ཆེ་བ་ལས་གཞན་མའི་རིགས་ལ་གསན་རྒྱ་མི་ཆེ་བས། དེ་ཕྱིར་དབུས་གཙང་དུ་བླ་མ་དཀྱུས་མ་ལས། ལུགས་གཉིས་ཀ་ནས་འོས་པ་ཞིག་མི་འདུག་པས། བ་སོ་སྤྲུལ་པའི་སྐུ་ལྷ་དབང་ཆོས་ཀྱི་རྒྱ་མཚོ་འདི་པ། འཇིག་རྟེན་ཕྱོགས་ནས་བླ་ཆེན་གྱི་གོས་དང་ཡང་ལྡན་ཞིང་། ཆོས་ཕྱོགས་ནས་རྗེ་གོང་མ་དང་། ཞལ་སྔ་ནས་བདེ་བ་ཅན་པ། དྲུང་པ་ལྷའི་བཙུན་པ་སོགས་ཡོངས་གྲགས་ཀྱི་བཤེས་གཉེན་མང་པོ་བསྟེན་ནས། མདོ་རྒྱུད་ཀྱི་བཤད་སྲོལ་དབང་ལུང་གདམས་པའི་མངའ་བདག་ཆེན་པོར་གྱུར་པ་འདི་སྤྱན་དྲངས་པ་འཐད་ཅེས་གླེང་ཞིང་། བཀའ་བགྲོས་མཐུན་པར་བརྟེན། སྒར་པ་དབུས་ཕྱོགས་སུ་ཕེབས་པ་དང་ལྷན་ཅིག་པར། བར་ཁམས་སུ་རྗེ་དྲུང་རིན་པོ་ཆེ་གདན་འདྲེན་པ་མངགས་པ་ལྟར་ཕེབས་རྩིས་ལ། མི་འགྱངས་པར་དག་པའི་ཞིང་དུ་གཤེགས་པ་སྟབས་མ་འགྲིག་འདུག །གཟའ་ཚེས་ཕུན་སུམ་ཚོགས་པར་ར་ས་འཕྲུལ་སྣང་གི་གཙུག་ལག་ཁང་ཆེན་པོར། སངས་རྒྱས་དངོས་དང་ཁྱད་པར་མ་མཆིས་པའི་ཇོ་བོ་ཤཱཀྱ་མུ་ནེའི་དྲུང་དུ། རབ་ཏུ་བྱུང་བའི་མཁན་པོ་དགའ་ལྡན་ཁྲི་རིན་པོ་ཆེ་ཟུར་པ་ཞལ་སྔ་ནས་སངས་རྒྱས་རིན་ཅེན་དང་། སློབ་དཔོན་ཁྲི་རིན་པོ་ཆེ། ལས་ཐོག་པ་ཞལ་སྔ་ནས་དགེ་
འདུན་རྒྱལ་མཚན་གྱིས་གནང་སྟེ། ལྕང་ལོའི་འཕྲེང་བ་རིང་དུ་དོར་ནས་རབ་ཏུ་བྱུང་བའི་དགེ་ཚུལ་གྱི་དངོས་པོ་བཞེས་ནས། འགྲོ་བ་ཀུན་གྱི་ཡོན་གནས་བླ་ན་མེད་པར་གྱུར་ཏེ། རྗེ་ཞལ་སྔ་ནས་སངས་རྒྱས་རིན་ཅེན་དེ་ལ། དྲུང་འཚོ་བ་འདན་པ་སོགས་མང་པོས་བདུད་ཀྱི་སྤྲུལ་པ་ཡིན་ཞེས་སྒྲོ་བཏགས་ཤིང་། ལྷ་རྩེ་དཔོན་མོས་གཏེར་ནས་བཏོན་པའི་ལུགས་སུ་བྱེད་པའི་རྫུན་གཏམ་གྱི་གླེགས་བམ་ཞིག་འདུག་པ་དེའི་ནང་ན། རྗེ་བླ་མའི་ཁྲི་ལ་བུདྡྷའི་མིང་ཅན་ཞིག་བྱུང་བ་ན། བསྟན་པ་ལ་འཕེལ་འགྲིབ་ཡོང་ཞིང་། དེ་བདུད་ཀྱི་སྤྲུལ་པ་ཡིན་པའི་ཕྱོགས་མང་མང་པོ་ཞིག་འདུག་པ་ལ། མཁས་པ་དང་། བཙུན་པ་དང་། གྲུབ་པ་དང་། བཟང་བ་དང་། རྟག་ཚུགས་ཟིན་པ་དང་། གཞན་ལ་འགྲམ་ཆུ་མི་ལྡང་བ་དང་། སྒམ་སྡིག་མོར་བྱེད་པ་མང་པོ་ཞིག་མགོ་འཁོར་ཏེ་བདེན་པར་བཟུང་ནས་རྗེ་སངས་རིན་པ་ལ་སྨོད་ནའང་། ཁོང་སྐུ་ཚེ་དེ་ལ་མདོ་སྔགས་ལ་སྦྱངས་པའི་དགེ་བཤེས་ཞིག་ཡིན་པ་ལས་སྤྲོས་པའི། དམ་པའི་རིགས་དང་བདུད་ཀྱི་རིགས་གཉིས་ཀ་མིན་པ་འདྲ་སྟེ། བདུད་ཀྱི་རིགས་ཀྱི་རྟགས་ཡོད་སྐད་མ་ཐོས་ཞིང་། ལ་ལ་ལྷ་ཟུར་ཕུད་ལྔ་པའི་སྐྱེ་བ་ཡིན་པ་འདྲ་ཟེར་བའི་ཕར་གཏམ་རྒྱུ་མཚན་དུ་བྱས་ནས་བདུད་ཡིན་ཟེར་ནའང་། ལྷ་ཟུར་ཕུད་ལྔ་པ་ཡིན་པའི་ངེས་པ་ཅི་ཡོད། གལ་ཏེ་ཡིན་དུ་སྲིད་ཀྱང་། ལྷ་དང་བདུད་གཉིས་མི་གཅིག་པས། རྒྱུ་མཚན་དེ་འདྲ་རང་གི་ནང་ཆ་སྟོན་པ་ཙམ་དུ་ཟད་ལ། ལྷ་ཟུར་ཕུད་ལྔ་པ་ལ་ཡང་དྲང་དོན་ངེས་དོན་གྱི་དགོངས་པ་ལེན་ཤེས་དགོས་པས། གཟུགས་མེད་ལ་གཟུགས་མ་འཆོས་པར་བཏང་སྙོམས་སུ་འཇོག་པ་ཞུ། རབ་བྱུང་གནང་བའི་དུས་དེར་དྲུང་འཁོར་རྣམས་ཀྱིས་བསྐུལ་ནས།
རྩེས་ཐང་བྱང་མ་ནས་དཔལ་འབྱོར་བསོད་ནམས་ལྷུན་གྲུབ་ཀྱིས་སྐུ་བསྟོད་ཅིག་རྩོམ་པ་མཛད། བདག་བསྟོད་གཞན་བསྟོད་མང་པོ་ཞིག་འདུག་པའི་ནང་ནས་ཚིག་སྤྱོར་ལེགས་པར་མཐོང་། འདི་ལྟ་སྟེ། རྗེ་བཙུན་ཐམས་ཅད་མཁྱེན་ཅིང་གཟིགས་པ་ཡོན་ཏན་རྒྱ་མཚོ་དཔལ་བཟང་པོ་ལ་བསྟོད་པ་བྱིན་རླབས་ཀྱི་ཟ་མ་ཏོག་ཅེས་བྱ་བ། རྗེ་བཙུན་བརྟན་པའི་འཁོར་ལོ་ལ་ཕྱག་འཚལ་ལོ། །སྤྱན་རས་གཟིགས་མགོན་རྒྱལ་བའི་འབྱུང་གནས་གང་། །བསོད་ནམས་ཡོན་ཏན་འབྲས་འབྱིན་དགེ་འདུན་ཞིང་། །མཁས་གྲུབ་རྒྱ་མཚོའི་དཔལ་གྱིས་དབང་པོའི་འགྲོར། །སྐུ་གསུམ་འདོད་རྒུར་སྩོལ་ལ་གསོལ་བ་འདེབས། །ལུང་རྟོགས་ཡོན་ཏན་ནོར་བུས་ཡོངས་གང་ཞིང་། །རྨད་བྱུང་འཕྲིན་ལས་རབས་འཕྲེང་ཕྱོགས་བཅུར་གཡོ། །ཐར་འདོད་ཀླུ་དབང་ཀུན་གྱི་རོལ་གནས་མཆོག །རྗེ་བཙུན་རྒྱལ་བ་རྒྱ་མཚོར་གསོལ་བ་འདེབས། །ཕྱག་ན་པདྨའི་ཐུགས་རྗེ་ཟླ་བས་འཕེལ། །སྨོན་ལམ་རི་དབང་མཆོག་གིས་བསྲུབས་པའི་མཐུས། ཐུབ་བསྟན་ཀུན་འགྲོའི་དབྱིངས་ན་རོལ་རྩེད་མཁན། །རྒྱལ་དབང་མཚན་མོའི་མགོན་ལ་གསོལ་བ་འདེབས། །ངེས་བྱུང་དྲི་ཡི་བཞོན་པས་ཉེར་བསྐུལ་ཏེ། །ཚངས་སྤྱོད་ལྷ་ལམ་ལངས་པར་རྟག་རྒྱུ་ཞིང་། །སྐྱེ་རྒུའི་རྨོངས་མུན་མཐའ་དག་དྲུངས་འབྱིན་པ། ཀུན་མཁྱེན་ཉིན་མོའི་མགོན་ལ་གསོལ་བ་འདེབས། །རྒྱ་ཆེན་ངོ་མཚར་སྤྱོད་པའི་ཆུ་གཏེར་དབུས། །རང་བདེ་མུན་པའི་གོ་སྐབས་རྒྱང་བསྲིངས་ཏེ། །གཞན་དོན་བང་རིམ་རྣམ་པར་བཀྲ་བ་ཅན། ཟླ་མེད་ལྷུན་པོའི་དབང་པོར་གསོལ་བ་འདེབས། །རྣམ་དཔྱོད་གོམ་པ་གཅིག་གི་རིག་གནས་ལྔའི། །ས་ཆེན་ལ་དགོངས་ཆོས་
མིན་སྟོབས་ལྡན་དཔུང་། །མཐར་མཛད་མཁྱེན་བརྩེའི་པད་དཀར་སྤྱན་ཡངས་པ། །སྐྱབས་མཆོག་མཐོ་རིས་གསལ་ལ་གསོལ་བ་འདེབས། །བདེ་བའི་བྱང་བར་གཞན་གྱིས་མི་མཚོན་པའི། །ཞལ་བཟང་བདུད་རྩིའི་འོད་ཅན་མཐོང་ཐོས་དང་། །དྲན་རེག་ཙམ་གྱིས་དོན་ལྡན་དགའ་བའི་མཐུས། །འགྲོ་ཀུན་ཐར་པར་འདྲེན་ལ་གསོལ་བ་འདེབས། ཁམས་གསུམ་མ་ལུས་ཐུགས་རྗེའི་འོད་རིས་ཀྱིས། ཁྱབ་པར་བྱུགས་ཏེ་ངོ་མཚར་མཛད་པའི་གར། །ཟས་གཙང་སྲས་པོ་གཞན་བཞིན་བསྒྱུར་མཁས་པས། །རྒྱལ་བ་གཉིས་པར་གྱུར་ལ་གསོལ་བ་འདེབས། །བཀྲ་ཤིས་འཁོར་ལོས་མཚན་པའི་ཞབས་མཐིལ་ཟུང་། །གསེར་ལྡན་དགའ་མའི་ཐོད་དུ་ངལ་བསོས་པའི། །རྣམ་ཕྲའི་རྡུལ་དང་ཆོས་འཁོར་བསྐོར་གནས་ཀྱང་། །དམ་པས་མཆོད་བྱར་མཛད་ལ་གསོལ་བ་འདེབས། །རྡུལ་གྱི་གྲངས་བརྒལ་ཡི་དམ་ལྷ་ཚོགས་ཀུན། །ཞལ་གཟིགས་མཐུ་ལྡན་སྲུང་མས་བཀའ་བཞིན་དུ། །རབ་འབྱམས་འཕྲིན་ལས་སྒྲུབ་པའི་མཐུ་སྟོབས་ཅན། །ཕུལ་བྱུང་སྐྱབས་ཀྱི་དམ་པར་གསོལ་བ་འདེབས། །ཆོས་ཀུན་གསལ་ལེར་གཟིགས་པའི་སྤྱན་སྟོང་ལྡན། །མཐའ་ཡས་ལུས་ཅན་སྒྲོལ་པའི་ཐབས་ལ་མཁས། །ཐམས་ཅད་མཁྱེན་ཞེས་བརྗོད་པ་དོན་ལྡན་པའི། །འདྲེན་མཆོག་ཐུགས་རྗེའི་གཏེར་ལ་གསོལ་བ་འདེབས། །རྒྱལ་བ་ཀུན་དངོས་རྗེ་བཙུན་བླ་མ་ལ། །ཤུགས་དྲག་དད་པས་མདོ་ཙམ་བསྟོད་པའི་མཐུས། །བྱང་ཆུབ་བར་དུ་སྐད་ཅིག་མི་འབྲལ་བར། །དགྱེས་བཞིན་རྗེས་སུ་འཛིན་པར་བྱིན་གྱིས་རློབས། །དེ་ཚེ་སྲིད་འབྱོར་མཐའ་དག་ཆུ་ཤིང་ལྟར། །སྙིང་པོ་མེད་པར་མཐོང་ནས་ཡིད་ཅན་རྣམས། །རང་ཉིད་གཅིག་པུས་སྒྲོལ་བའི་སྙིང་སྟོབས་ཀྱིས། །རྒྱས་སྲས་
སྤྱོད་ལ་སློབ་པར་བྱིན་གྱིས་རློབས། །རྣམ་དག་དབང་གིས་བདག་རྒྱུད་སྨིན་བྱས་ཤིང་། །ཟབ་ལམ་རིམ་གཉིས་མཆོག་གི་ལམ་བཟང་ནས། །སྐུ་གསུམ་གོ་འཕང་མཐོན་པོར་ཕྱིན་གྱུར་ཏེ། །སྣ་ཚོགས་ཐབས་ཀྱིས་འགྲོ་ཀུན་འདྲེན་གྱུར་ཅིག །རྩ་བརྒྱུད་བླ་མ་ཡི་དམ་ལྷ་ཚོགས་དང་། །མཐུ་ལྡན་སྲུང་མ་ཆོས་ཉིད་བདེན་པའི་མཐུས། །དགེ་ལེགས་ཡོན་ཏན་ནོར་བུའི་འབྱུང་གནས་མཆོག །རྒྱལ་བ་རྒྱ་མཚོ་བསྐལ་བརྒྱར་ཞབས་བརྟན་ཤོག །ཅེས་པ་འདི་ནི་མགོན་པོ་དེ་ཉིད་རྒྱལ་བའི་བསྟན་པ་ལ་ངུར་སྨྲིག་འཛིན་པའི་ཟློས་གར་ལྷུར་བཞེས་ཀྱི་ཚུལ་བསྟན་པའི་ཉིན། ཞབས་འབྲིང་བ་རྣམས་ཀྱིས་བསྐུལ་བ་དང་། རང་ཉིད་ཀྱང་དད་སྤྲོས་ཀུན་ནས་བླངས་ཏེ་རྗེའི་ཞབས་དྲུང་རང་དུ། ཤཱཀྱའི་དགེ་སློང་དཔལ་འབྱོར་བསོད་ནམས་ལྷུན་གྲུབ་ཀྱིས་སུག་བྲིས་སུ་བགྱིས་པའི་གནས་ནི་ཆོས་འཁོར་དཔལ་གྱི་ལྷ་སའོ། །འདིས་ཀྱང་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །ཅེས་སོ། །མཁར་ནག་ལོ་ཙཱ་བས། ཇོ་བོ་ཤཱཀྱ་མུ་ནིའི་དྲུང་། དགའ་ལྡན་གདན་ཟུར་རྣམ་གཉིས་ལས། །རབ་བྱུང་དབུ་སྐྱེས་དོར་ནས་ཀྱང་། །ངུར་སྨྲིག་རིན་ཅེན་རྒྱལ་མཚན་བཞེས། །སེར་འབྲས་སེང་གེའི་ཁྲིར་འཁོད་པ། །གསེར་གྱི་ས་གཞིར་ལྷུན་པོ་བཞིན། །མི་འཇིགས་བཞི་ཡི་བང་རིམ་གྱིས། །རབ་བརྗིད་མངོན་པར་མཐོ་ལ་འདུད། །སྙན་པར་གྲགས་པའི་གདོང་ལྔའི་སྒྲས། །ལྟ་ངན་རི་དྭགས་རྣམས་སྐྲག་ནས། །རང་རང་གྲུབ་མཐའི་གནས་མལ་དུ། །འཇིགས་བཅས་སྨོད་པའི་འཁུན་བུ་འབྱིན། །ཞེས་སོ། །དེའི་ཚེ་བོད་དུ་ཕེབས་པའི་ལེགས་ཇ་ཞུ་བར་བླ་ཆེན་རྣམས་ཀྱི་མི་སྣ་དབྱར་དུས་ཀྱི་སྤྲིན་ལྟར་
འདུས། ཁྱད་པར་སྒར་ཆེན་ནས་ཞྭ་དམར་ཐམས་ཅད་མཁྱེན་པ་གར་དབང་ཆོས་ཀྱི་དབང་ཕྱུག་ཅེས། ཆོས་ཕྱོགས་ཀྱི་སྐུ་ཡོན་དང་། འཇིག་རྟེན་གྱི་མཁྱེན་པ་མཐའ་དག་མཚུངས་པ་མེད་པའི་རྣམ་དཔྱོད་འཇིག་རྟེན་གྱི་མེས་པོ་ཚངས་པ་དང་ཁྱབ་འཇུག་གི་བློའི་ར་བ་ལས་ཀྱང་ཡོངས་སུ་བརྒལ་བ་དེས། ལེགས་བྱའི་ཞུ་ཤོག་འབུལ་བ་གནང་བ་འདི་ལྟ་སྟེ། སེམས་དཔའ་ས་བརྟོལ་ཐོག་མའི་དུས་ནས་སྙིང་རྗེའི་ཆུ་ཡི་དབང་གྱུར་དྲང་སྲོང་ང་རོ་སྙན་པ་དེ་ལས་མཆོག་གི་ཐུགས་ཀྱི་རྩ་བ་ཚུགས། །གྲངས་མེད་བསྐལ་པར་ལྟ་བའི་རི་བོ་རྒུལ་གྱི་དངོས་པོ་རྣམ་པར་འཐག་པ་ཨེ་ཝཾ་ཚོགས་ཀྱི་འཁོར་ལོས་སྟོབས་ཀྱི་ལུས་རབ་རྫོགས། ཁྲོ་སྲེག་གདུགས་སུ་འབར་བས་སྙིང་སྟོབས་ཟིལ་གྱིས་གནོན་པ་དེ་དག་ཐབས་ཀྱི་འཕྱང་མོར་ཟིན་ནས་དབུགས་ཀྱི་ངལ་གསོ་སྟོན་བྱེད་པའི། །མ་འདྲེས་ཡན་ལག་རྣམ་པར་བསྐྱོད་པ་ཡོངས་འདུའི་དབང་པོ་ཤཱཀྱའི་སྐྱེས་མཆོག་ཁྱོད་ཀྱིས་འཇིག་རྟེན་ཀུན་ཏུ་དགེ་ལེགས་འབྲས་བུ་སྦྱིན་པར་མཛོད། །བློ་བཟང་གྲགས་པ་བདེན་པའི་འོད་བརྒྱ་པ། །གསོང་པོའི་གཞུང་ལུགས་སྲུབས་ཤིང་དེས་འཕངས་པའི། །འབྱུང་གནས་བསོད་ནམས་ཡོན་ཏན་ཆུ་ཡི་གཏེར། །ལུགས་ཀྱི་ཀླུང་ཕྲན་བརྒྱ་ཡིས་གང་གྱུར་ཏམ། །ཤེས་བྱའི་གནད་དོན་རིག་གཞུང་འོད་ཀྱི་འཕྲེང་བ་ནི། །ཆུན་པོར་གྱུར་བ་དེ་ཚེ་གནས་ལྔ་དབང་པོའི་གཞུ། །འཚེར་བས་བསྟན་ལ་གསལ་བྱེད་རི་མོའི་བྱེད་པོ་ཅན། །བདག་ཀྱང་ལགས་གསུང་ཚོན་གྱིས་གཟིི་འོད་འབར་བར་གྱུར། །མཐོ་བཙུན་རྒྱལ་པོའི་གདུང་འཛིན་ཞིང་། །ཆོས་ལྡན་སྙན་པ་དང་ལྷན་ཅིག །ཕྱོགས་འདིར་ཆོས་ནོར་དགའ་སྟོན་གྱི། །མཁོ་རྒུ་ཡོངས་སུ་དར་བ་དེར། །བགྲང་བྱའི་ཁུར་གྱིས་མི་ལྕི་ཡང་། །བརྗོད་
བྱ་རྗོད་བྱེད་ཁུར་འཛིན་པ། །དགེ་སློང་ཆོས་ཀྱི་དབང་ཕྱུག་ཀྱང་། །དེ་ལ་ལེགས་པ་བརྗོད་པའི་སྒྲ། །སྨྲ་འདོད་སེམས་ཀྱི་ཚངས་པ་ཡི། །ལྟེ་བ་ཆུ་སྐྱེས་དབུ་མའི་སྲས། །སྙན་དངགས་དབྱངས་ཅན་ལྷ་མོ་འདིས། །རིག་པའི་པི་ཝཾ་རྒྱུད་ལ་དྲངས། ཁྲིམས་ནི་རྒྱུ་དང་མི་རྒྱུ་ས་བཞིན་ཏུ། །ཡོན་ཏན་ཀུན་གྱི་གཞི་རྟེན་ལེགས་པའི་ཕྱིར། །ཉིས་བརྒྱ་ལྔ་བཅུ་རྩ་གསུམ་བསླབ་པའི་གཞི། །མནོས་ནས་བསྟན་ལ་བྱི་དོར་བྱ་བར་རིགས། །རིག་པའི་གནས་ལ་མཁས་པར་མ་བྱས་ན། །འཕགས་མཆོག་གིས་ཀྱང་ཀུན་མཁྱེན་མི་འཐོབ་ཅེས། །གསུངས་ཕྱིར་རིག་སྟོབས་གཡེང་བ་མ་འདྲིང་པར། །ཤེས་བྱའི་གནས་ལ་སྦྱང་སྟོབས་མཆོག་ཏུ་མཛོད། །གསང་བའི་སྔགས་ཀྱི་དཀྱིལ་འཁོར་དངོས་གྲུབ་གཞིར། །གསུངས་པས་རྒྱུད་སྡེ་རྒྱ་མཚོ་རྟེན་བརྟེན་པའི། །རྒྱལ་བའ་ིའཁོར་ལོ་སྨིན་གྲོལ་དབང་དང་ལམ། །ངེས་གསང་འཕྱུག་མེད་ཆོ་གས་བཞེས་པར་མཛོད། །མཆོག་གི་ཉེ་རྒྱུ་སྒྲུབ་པ་ཁོ་ན་དེ། །ཤིན་ཏུ་ཟབ་པའི་རྫོགས་རིམ་དབང་གི་དོན། །གཉུག་མའི་དེ་ཉིད་ཕྱག་རྒྱ་ཆེན་པོ་ནི། །ལྷག་པར་བསྒོམས་ཏེ་ཐུགས་སུ་བྱོན་པར་མཛོད། །སྔོན་དུ་བོད་ན་སྙིང་རྗེའི་དབང་སྒྱུར་ཆོས་ཀྱི་རྒྱལ་པོ་དང་། །ལོ་ཙཱ་བརྩོན་ལྡན་སྲོག་གི་དཀའ་བ་ལེན་པ་དེ་རྣམས་ཀྱིས། །ཨ་ཏི་ཤ་ཞེས་གཙུག་ལག་རྒྱ་མཚོའི་བདག་པོ་སྤྱན་དྲངས་ནས། །སངས་རྒྱས་བསྟན་པ་མི་ནུབ་རྒྱལ་མཚན་ཕྱར་རོ་ཞེས་སུ་གྲགས། །དེ་ཡི་རྗེས་སུ་ཁ་ཆེ་ཟླ་བ་མགོན་དང་ཤཱཀྱ་ཤྲཱི། །སོ་མ་ནཱ་ཐ་སོགས་ཀྱིས་བོད་དུ་དཀའ་བའི་བསྟན་པ་སྤེལ། །དུས་དེར་ལོ་པཎ་མཁས་གྲུབ་བྱོན་དང་བསྟན་པའི་དར་ཚུལ་ལ། །བསམས་
ན་ད་ལྟ་མཆི་མ་བླག་པས་ཁྲུས་ཀྱང་རུང་བ་ཙམ། །དེ་ཕྱིར་མེ་ལོང་ནང་གི་གཟུགས་བརྙན་བཞིན། །འདྲེན་པའི་བསྟན་པ་དེ་ལྟར་གྱུར་པ་ན། །མཁས་བཙུན་བཟང་པོར་བསྟོད་པའི་སྙན་གྲགས་ཀྱིས། །ལུང་དང་རྟོགས་པའི་ཉིན་མོར་མཛད་པར་རིགས། །ལྕགས་ལས་གསེར་དུ་འགྱུར་བ་ལྟར། །ཉུང་ངུ་མང་པོར་བློས་སྤེལ་བས། །སྐྱེས་མཚན་དྲ་བས་སྦྲེལ་བ་ཡི། །ཡན་ལག་བསྐྱོད་པའི་གར་བཅས་ཏེ། །དོན་གྱི་ལུས་བཟང་སྟོབས་རྒྱས་ཤིང་། །རྗོད་བྱེད་རྒྱན་གྱི་གདུབ་བུ་འཁོར་། །སྙན་ངག་དབྱངས་ལྡན་ངང་མོ་འདི། །ཡོན་ཏན་རྒྱ་མཚོས་བསྟེན་པར་མཛོད། །ཤུ་བྷཾ་མ་སྟུ་སརྦ་ཛ་ག་ཏཾ། ཞེས་པ་བརྗོད་བྱའི་དོན་རིག་པའི་གནས་ལྔ་ལ་གསན་བསམ་མཛད་དགོས་ཚུལ་སོགས། སྙན་སྒྲོན་ལེགས་པོ་ཡིན་འདུག །ཚིག་སྦྱོར་ནི། བཀའ་གདམས་གླེགས་བམ་ལས། །འཇིག་རྟེན་དག་ནི་གྲགས་པའི་རྗེས་སུ་འབྲངས། །འཇིག་རྟེན་འདས་པ་གནས་ལུགས་སྤྱོད་པར་བྱེད། །ཅེས་པ་ལྟར། རྗེ་ཞྭ་དམར་པ་དེ་སྙན་ངག་མཁས་པར་གྲགས་ཀྱང་། གསུང་རྩོམ་གྱི་བབས་རོང་པ་གོང་ར་ལོ་ཙཱ་བའི་རྒྱུན་གྱི་ཁོབ་ཤག་གེ་བ་ལས་སྤྲོས་པའི། སྣར་ཐང་པ་དང་དཔལ་ཁང་པ་སོགས་ཀྱི་སྙན་ངག་འཇམ་པ་དང་། རིན་སྤུངས་པའི་ཤུགས་ཆེ་བ་ལྟ་བུའི་ཡིད་འཕྲོག་པ་ནི་མིན་པར་སེམས་སོ། །འོན་ཀྱང་དེའི་ལན་འགྲེལ་ཆགས་ཤིག་དགོས་རྒྱུར། དྲུང་འཁོར་རྣམས་རྒྱུ་དངོས་ཀྱི་འབྱོར་བ་རྣམ་ཐོས་ཀྱི་བུ་ལ་འགྲན་པར་ནུས་ཀྱང་། སྙན་ངག་སོགས་ཚིག་སྦྱོར་སྨྲ་བའི་ལྗགས་རྐྱོང་བ་ཉིན་མོའི་སྐར་མ་ལྟར་སོང་བས། དེའི་ལན་འདེབས་བྱེད་པ་པོ་སུ་འདྲ་ཞིག་འོས་ཞེས་གླེང་པ་ན། རྗེ་གོང་མའི་དཔོན་པོ་རྩེ་ཁ་བའི་སྡེ་པ་རྒྱལ་ཆེན་པ་ཞེས། །ཡིག་རིགས་སོགས་
ཡོན་ཏན་དང་ཤེས་རབ་ཀྱི་ནོར་ལ་སྤྱོད་པ་དེ་དང་། བཞུ་ཁང་རབ་འབྱམས་པ་དགེ་ལེགས་ལྷུན་གྲུབ་ཅེས་གསུང་འཇམ་ཞི་ཞིང་དུལ་དུལ་ལྟར་སྟོན་པ་དེ་གཉིས་བགྲོས་ཐོག་ནས་བྲིས་པ། བསྙེན་རྫོགས་གནང་དགོས་པའི་ལན་དུ་དགུང་ལོ་ཉི་ཤུ་མ་ལོན་ཞེས་པ་དང་། རིག་པའི་གནས་ལྔ་ལ་སྦྱང་དགོས་པའི་ལན་དུ། ཆོས་ཐམས་ཅད་སྔོན་དུ་ཐུགས་སུ་ཆུད་ཟིན་ཞེས་སོགས་འབྲེལ་མེད་རང་མཚང་སྟོན་པའི་ལན་མང་པོ་བཏབ་སྐད། མཁར་ནག་ལོ་ཙཱ་བས། དཔལ་ལྡན་བླ་མར་སྒར་ཆེན་ནས། འོད་དཔག་མེད་མངགས་ཅོད་པན་ཅན། །གར་དབང་ཆོས་ཀྱི་དབང་ཕྱུག་དང་། །སྤྲུལ་སྐུ་དཔག་བསམ་དབང་པོ་ཡིས། །བསྟོད་བསྔགས་དང་བཅས་ལེགས་ཇ་ཕུལ། །ཞེས་སོ། །དགའ་ལྡན་ཁྲི་གདན་ཟུར་གཉིས་ལ་རེ་ཞིག་གསུང་ཆོས་འབུལ་བར་བཞུགས་དགོས་ཚུལ་གནང་ཡང་། རྗེ་ཞལ་སྔ་ནས་ཟུར་པ་གསུང་ངག་དོག་པ་དང་། ཁྲི་རིན་པོ་ཆེ་ལས་ཐོག་པ་ཡང་གསན་རྒྱ་ཆེ་རྒྱུ་མེད་འདུག་པ་དང་བཅས་དགོངས་པ་ཞུ་བ་གནང་། རྗེའི་ཞལ་སྔ་ནས་ཁྲི་པའི་གསུང་ལས། དིང་སང་བཀྲ་ཤིས་ལྷུན་པོའི་པཎ་ཆེན་ཁྲི་ལས་ཐོག་པ་འདི་ངེད་རང་གི་སློབ་མ་ཡིན་པས། རྒྱུས་ཡོད་ཀྱི་ཞུ་བ་ལ་དབང་ལུང་གི་གསན་རྒྱ་མང་ཆེ་བ་ཡོད་པ་དང་། སྐུ་ན་གཞོན་པས་བཀའ་ཆོས་འབུལ་བར་ལྕོགས་པ་ཡང་བཟང་བ་ཡོད་པས། ཁོང་གིས་བཀའ་ཆོས་འབུལ་མཁན་གནང་ན་ཇི་ལྟར་ཡོང་ཞེས་འཆར་སྟོན་མཛད། དྲུང་འཚོ་འདན་པ་སོགས་འགའ་ཞིག་གིས་དགའ་ལྡན་ཁྲི་གདན་ཟུར།བ་སོ་སྤྲུལ་སྐུ་སོག་བླ་ཆེན་ཡོངས་གྲགས་ཤིག་སྟབས་མ་འགྲིག་ཕྱིན། བཀྲ་ཤིས་ལྷུན་པོའི་པཎ་ཆེན་ལས་སྔགས་པའི་སློབ་དཔོན་ནམ་མཁའ་
བཟང་པོ་འདི་འོས་པ་འདྲ་ཞེས་གླེང་། གཙང་སྟོད་བཀྲ་ཤིས་ལྷུན་པོ་ནས་མཁན་སློབ་ཚང་མ་མཇལ་བར་ཕེབས་པའི་ལམ་དུ། དཔོན་སློབ་པཎ་ཆེན་རིན་པོ་ཆེའི་གཟིགས་སྣང་ལ། མིག་འཕྲུལ་ལྟ་བུའི་ཁྱེའུ་དཀར་པོ་སོགས་ཡ་མཚན་པའི་ལྟས་བྱུང་བ་པཎ་ཆེན་རིན་པོ་ཆེའི་རྣམ་ཐར་དུ་གསལ། ཕྱག་རྟེན་ལ་འོག་རྟས་གཙོས་པའི་ཡོད་འབུལ་ལྟ་བུ་བྱས་ཞེས་རྣམ་ཐར་དུ་འདུག་པ་ལྟར། དངོས་བཤམས་ཡིད་སྤྲུལ་གྱི་མཆོད་པ་རྒྱ་ཆེན་པོ་དང་བཅས་ཏེ་ཐུགས་དྭངས་དྭངས་དོད་དོད་མཛད་པར་མཆིས། འགའ་ཞིག་གིས་སྐུ་ཆས་ཡོད་འབུལ་མཛད་པའི་གཙོ་བོ་ཆིབས་པ་ཡིན་པ་དེ་ཉམས་མཚར་ཞེས་མ་རེངས་པ་ཟེར་ནའང་། དེ་སྐབས་བཀྲ་ཤིས་ལྷུན་པོ་པཎ་ཆེན་དགེ་འདུན་གྲུབ་ཀྱི་བཞེད་པ་ལྟར་གྱི་བྱ་བྲལ་གྲྭ་སར་སོང་བ་དང་། པཎ་ཆེན་རིན་པོ་ཆེ་ཡང་དབེན་ས་པའི་རྒྱུན་གྱི་བྱ་བཏང་སྙོམས་ཆུང་གི་རྣམ་པར་ཕྱག་རྫས་རང་འབྱོར་རྒྱུ་མེད་འདུག་པ་རྣམ་ཐར་གྱི་བརྗོད་བྱ་དེ་ཀ་སྒྲོ་སྐུར་དང་བྲལ་བའོ། ། ཁྲི་རིན་པོ་ཆེ་དགེ་འདུན་རྒྱལ་མཚན་གྱི་འཆར་སྟོན་ལྟར་། ཞབས་དྲུང་རིན་པོ་ཆེ་དང་ཕྱག་མཛོད་རྣམ་གཉིས་བཀའ་བགྲོས་ཐུགས་རྩེ་མཐུན་ནས་ཁོང་དཔོན་སློབ་ལ་བཀའ་ཆོས་ཀྱི་སྙན་གསན་འབུལ་བ་གནང་། ཐུགས་དགྱེས་པ་ཆེན་པོའི་སྒོ་ནས་ཞལ་གྱིས་བཞེས་ཏེ། བཀྲ་ཤིས་ལྷུན་པོའི་སློབ་དཔོན་སོགས་ཕྱིར་སློག །དཔོན་སློབ་རྣམས་རེ་ཞིག་འབྲས་སྤུངས་སུ་གཞི་ཕབ་ནས་བཞུགས་ཏེ། གསུང་ཆོས་ཀྱི་རིམ་པ་འགྲོ་གང་ཆེ་ཕུལ། དཔོན་སློབ་རྣམས་ཕན་ཚུན་ཐུགས་ཡིད་གཅིག་འདྲེས་ལྟ་བུར་གྱུར། ཐོག་མར་མཇལ་སྐབས་བཀྲ་ཤིས་ལྷུན་པོ་སོགས་གཙང་ཕྱོགས་ཀྱི་པཎ་ཆེན་སྤྱིའི་གདན་བཟོས་ས་གདན་གྲུམ་
འཇགས་ཁ་གདན་ཙམ་ལ། བཀའ་ཆོས་གསན་ནས་བཞུགས་ཁྲི་སོགས་ཏི་ཤྲིར་འོས་པའི་བཀུར་བཟོས་ཇེ་མཐོར་གནང་། ཐམས་ཅད་མཁྱེན་པ་དེ་བཤེས་གཉེན་བསྟེན་ཚུལ་ལ་འབྲོམ་སྟོན་པ་དངོས་ཡིན་ཚུལ་སོགས་ཀྱི་རྒྱུ་མཚན་ཡང་ཡང་གསུང་བ་ཐོས། མཁར་ནག་ལོ་ཙཱ་བས། དེ་ཚེེ་བཀྲ་ཤིས་ལྷུན་པོ་ནས། །མཁྱེན་པའི་སྤྱན་སྟོང་རབ་ཡངས་པ། །དོན་གྱི་བརྒྱ་བྱིན་དབེན་ས་པ། སློབ་དཔོན་ཉེ་དབང་རྣམས་དང་བཅས། །འདིར་བྱོན་ཀུན་བཟང་མཆོད་སྤྲིན་བཏབ། །ཆོས་ཀུན་མཁྱེན་ནས་རིང་ལོན་ཀྱང་། །པཎ་ཆེན་ཐམས་ཅད་མཁྱེན་པ་ལ། །དབང་ལུང་གདམས་པའི་ཚོགས་རྣམས་གསན། །ཞེས་སོ། ། ཁྲོ་མོ་ཞེས་པ་ཤིང་འབྲུག་གི་ཆོ་འཕྲུལ་ཆེན་པོའི་སྨོན་ལམ་གྱི་མཆོད་པའི་གྲལ་དབུར་ཕེབས། དད་པ་དང་ལྡན་པ་མང་པོ་ཞལ་མཇལ་གསུང་ཐོས་ཀྱི་ཆེད་དང་། ལ་ལ་དག་དེ་ལོ་བྱང་འགྲུལ་གཏོས་ཆེན་པོ་སླེབས་པའི་གྲགས་པ་ལ་བརྟེན། རྙེད་པ་འཚོལ་བའི་ཕྱིར་དུ་འོངས་པ་སོགས་ཕྱི་ལུས་ཀྱི་རྣམ་འགྱུར་གཅིག་པ་ལ། ནང་སེམས་ཀྱི་འཁྱེར་སོ་ཐ་དད་པའི་ཚོགས་ཆེན་པོ། ཁྱམས་ར་སྟེང་གཤོང་བར་སྐོར་དང་བཅས་པར་མི་ཤོང་བ་དང་ལྷན་ཅིག་ཏུ། ཇོ་ཤཱཀ་རང་བྱུང་ལྔ་ལྡན་སོགས་རྒྱལ་དང་དེ་སྲས་མངོན་སུམ་དུ་བཞུགས་པ་དང་ཁྱད་པར་མ་མཆིས་པའི་དྲུང་དུ་སྨོན་ལམ་གྱི་མཚམས་སྦྱོར་དང་། འོ་སྐོལ་གྱི་སྟོན་པ་ཤཱཀྱའི་རྒྱལ་པོའི་འཁྲུངས་རབས་སོ་བཞི་པའི་ཆོས་ཐུན་རེ། ལྗགས་ཀློག་བཟང་ཞིང་སྒྲ་བརྗོད་དག་པ་དང་བཅས་ཏེ་གནང་བས། ཀུན་བོད་སྐད་ཀྱི་ནང་ནས་ཀྱང་སྟོད་ལུང་མདའི་སྐད་མ་ཉམས་པ་འདི་འདྲ་ཡ་མཚན་ཞེས་གླེང་། དིང་སང་དབུས་གཙང་གི་བླ་མ་སོག་ཡུལ་དུ་སྐྱེ་བ་བླངས་པར་
གྲགས་པ་རྣམས། བོད་སྐད་གཙང་མ་སྨྲ་བའི་ལྗགས་འདབ་ཆགས་ཐི་བའི་ལྕེ་ལ་འགྲན་བཟོད་པའི་ངང་ཚུལ་རྣམས་མཐོང་ན། ཡ་མཚན་པའི་གནས་ཤིན་ཏུ་ཡིན་པར་གདའ། སྨོན་ལམ་གྱི་རིན་ཚོགས་སུ་དཔོན་སློབ་གཞུང་སྒེར། འདེབས་འབྱར་གྱི་འགྲུལ་པ་ཁག་རྣམས་དང་བཅས་པས་མང་ཇ་དང་། གོས་དར་གསེར་དངུལ་ཇ་རས་སོགས་ཀྱི་འགྱེད་གྲངས་མེད་པ་བཏང་བས། གནོད་སྦྱིན་གྱི་བང་མཛོད་ལ་ལོངས་སྤྱོད་པ་ལྟ་བུར་གྱུར། མཁར་ནག་ལོ་ཙཱ་བས། ཁྲོ་ལོའི་ཆོ་འཕྲུལ་ཟླ་བ་ལ། །ལྷ་ས་སྨོན་ལམ་མཛད་པའི་ཚེ། །ཁྱམས་ཆེན་སྐོར་ལམ་ཚོགས་པས་གང་། །གངས་རི་དང་མཚུངས་ཕྱེ་མར་དང་། །ཆུ་གཏེར་ལ་འགྲན་མང་ཇ་དང་། །དཔག་བསམ་སྡོང་པོའི་འདོད་འཇོ་ལྟར། །ཅི་འདོད་འགྱེད་བཅས་ཚིམ་པར་སྩལ། །ཁྱེད་ལ་དད་པའི་དམིགས་སྐོར་དང་། །ཡི་གེ་དྲུག་པའི་བཟླས་བརྗོད་ཀྱིས། །འཇིག་རྟེན་དབང་ཕྱུག་ད་འགྲུབ་སྟེ། །བོད་པ་རྣམས་ཀྱི་ཁྱེད་ཞལ་མཇལ། །ཞེས་སོ། །དེ་ནས་ཕོ་བྲང་ཆེན་པོ་རྒྱལ་ཁབ་གོང་རི་དཀར་པོར། ལྷ་གཟིགས་མིའི་དབང་པོ་བཀའ་བརྒྱུད་རྣམ་པར་རྒྱལ་བའི་ལྷས་སྤྱན་དྲངས་ཏེ་ཕེབས། ཞབས་དྲུང་རིན་པོ་ཆེ་ངག་དབང་གྲགས་པ་དག་པའི་ཞིང་དུ་གཤེགས་པའི་དགོངས་རྫོགས་ཀྱི་གྲལ་དབུ་གནང་། གཞི་ལེན་དང་ཤངས་ལེན་རྒྱ་ཆེན་པོས་མཉེས་པར་མཛད། ལྷ་གཟིགས་མིའི་དབང་པོར་ཚེ་རྟ་ཟུང་འབྲེལ་གྱི་བཀའ་ཆོས་དང་། རྒྱ་ཧོར་གྱི་སིལ་སྙན་སྦུག་ཆོལ་སོགས་དངོས་སྤྱད་ཀྱི་རིགས་རྣམས་ཆེ་བ་མང་པོར་སྐུ་སྐྱོས་ཀྱི་ཚུལ་དང་འབུལ་བ་གནང་། མཆོད་ཡོན་ཐུགས་ཡིད་གཅིག་ཏུ་འདྲེས། ཞབས་དྲུང་རིན་པོ་ཆེ་འདི་འབྲུག་པ་ཁོ་ན་ལ་མོས་ཞེས་ཟེར་མཁན་མང་ཡང་། སྔར་རྒྱུན་
ལ་བརྟེན་པའི་རྗེ་འདི་ཉིད་ལ་ཐུགས་མོས་རེ་ཆེ་ཡོད་པ་འདྲ་སྟེ། སྔ་ཕྱིར་བཀའ་ཕེབས་གནང་བའི་ལྷོངས་ལ་ཡང་གུས་ཉམས་ཆེ་བ་འདུག །ཡར་ལམ་གཉོས་རྒྱལ་བ་ལྷ་ནང་པའི་གདུང་བརྒྱུད་གྱེ་རེ་ལྷའི་བཙུན་པ་སྲོང་བཙན་ཚངས་པས་བསྙེན་བཀུར་བ་བཞེས་ནས་ཆོས་དང་ཟང་ཟིང་གིས་ཚིམ་པར་མཛད་དེ་འབྲས་སྤུངས་སུ་ཕེབས། མཁར་ནག་ལོ་ཙཱ་བས། དེ་ནས་གཞིས་ཀ་གོང་དཀར་དུ། །མི་དབང་ཆེན་པོས་སྤྱན་དྲངས་ཏེ། །མཆོད་པའི་སྤྲིན་ཕུང་གཏིབས་ཀྱིས་མཆོད། །ཆོས་དང་ཟང་ཟིང་གནང་བས་ཚིམ། །དེ་ནས་གྱེ་རེ་ལྷ་བཙུན་པ། །སྲོང་བཙན་ཚངས་པས་གསོལ་བཏབ་པས། །ཟབ་དང་རྒྱ་ཆེའི་ཆོས་གསུངས་སླར། །སེར་འབྲས་སྐྱིད་ཤོད་ཕྱོགས་སུ་ཕེབས། །ཞེས་སོ། །དེ་ནས་རྗེ་གོང་མ་ན་རིམ་གྱི་གདན་ས་ཆོས་འཁོར་རྒྱལ་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་དུ་ཆིབས་ཁ་བསྒྱུར། དཔོན་སློབ་པཎ་ཆེན་རིན་པོ་ཆེས་ཀྱང་བཀའ་ཆོས་འབུལ་ཁྱད་ནས་ཞབས་ཕྱིར་ཕེབས། འཕྲིན་ཡིག་གར་མཁན་ཕོ་ཉར། རྒྱལ་བ་ཀུན་གྱི་མཁྱེན་བརྩེའི་གཏེར་གྱུར་པ། །སྣང་བ་མཐའ་ཡས་འགྲོ་མགོན་གཡུ་བྲག་པས། །ཡེ་ཤེས་རྣམ་པར་རོལ་པས་ལེགས་བསྐྲུན་པའི། །ཚལ་གུང་ཞེས་བྱ་དཔལ་ལྡན་ཧེ་རུ་ཀའི། །ཕོ་བྲང་དངོས་གྱུར་སྟོན་མཚན་ཀུན་གསལ་བའི། །དོ་ཤལ་ས་ལ་ལྷུང་འདྲའི་དགོན་སྡེ་ཟུང་། །ལུགས་གཉིས་ལྷན་ཅིག་སྤྱོད་པའི་འདུས་པའི་ཚོགས། བྱུ་རུའི་དོ་ཤལ་གཅལ་དུ་བཀྲམ་འདྲ་ཡོད། །ཅེས་བསྔགས་པའི་ཡུལ་གྱི་གཞིས་ཀ་ཚལ་ཟུར་ཁང་དང་། དེར་ཡང་མ་ཆགས་ཕྱིན་པ་མརྒད་མཚོར། །རབ་དཀར་ངང་མོའི་ཚོགས་ཀུན་རོལ་པ་བཞིན། །ཕུན་ཚོགས་ལོ་ཏོག་དགོད་པའི་ལྗངས་ཁྲོད་དུ། །བགྲང་ཡས་གྲོང་
ཁྱེར་བཀྲམ་པའི་ཡུལ་ལྗོངས་ཡོད། །དེ་ནས་གདུགས་གཅིག་བགྲོད་ལ་རབ་མཐོའི་མཁར། །སྙེག་འདྲའི་ས་འཛིན་རྩེ་ལ་དབང་པོའི་གནས། །འཕོས་འདྲ་ལྷ་མིའི་ཕུན་ཚོགས་དགའ་སྟོན་གྱི། །འབྱུང་གནས་བདེ་བ་ཆེན་པོའི་ཕོ་བྲང་ཡོད། །ཅེས་པ་ལྟར། སྐྱིད་ཤོད་ཡེར་ཕྱོགས་ཀྱི་ཡུལ་ལྗོངས་སུམ་རྩེན་གྱི་སྐྱེད་ཚལ་ས་ལ་འཕོས་པ་འདྲ་བ་བརྒྱུད་དེ་བཙན་རྫོང་གསང་སྔགས་བདེ་བ་ཆེན་པོ་དང་། །དེ་དག་ལམ་དུ་དྲག་ཏུ་གཤོག་བསྐྱོད་ལ། །མགྱོགས་པར་ཕྱིན་ལ་ལེགས་བྲིས་དགའ་ཚལ་ལ། །སྐྱོ་བ་སྟེར་བའི་ནོར་ལྡན་དགའ་མ་ནི། །མཛེས་སྡུག་སྤུ་ལོང་གཡོ་བའི་ཡུལ་ལྗོངས་ཡོད། །དེ་དག་དབུས་སུ་ཟླ་བ་བརྩེགས་པའི་སྤོར། །འཆི་མེད་བདག་པོའི་ཁང་བཟང་སྐྱེངས་བྱེད་ཅིང་། །ལུགས་གཉིས་ཀུན་གྱི་མདུན་ས་བྲག་དཀར་ཞེས། །ཕུན་ཚོགས་འདོད་དགུའི་འབྱུང་གནས་ཕོ་བྲང་ཡོད། །ཅེས་རྫོང་ཆེན་བཅུ་གསུམ་གྱི་ཡ་གྱལ་ཕོ་བྲང་ཆེན་པོ་བྲག་དཀར་རྣམས་སུ། བྱང་བརྒྱུད་རྒྱལ་པོར་གྲགས་པའི་སྟོབས་འབྱོར་དང་བསྙེམས་པ་ཕན་ཚུན་གཅིག་ལ་གཅིག་འགྲན་བཟོད་པའི། ས་སྐྱོང་བ་གཡུལ་རྒྱལ་ནོར་བུ་ཁུ་དབོན་གྱིས་གདན་དྲངས་ཏེ། རྫོང་གཞིས་རྣམས་སུ་ཞག་མང་ཙམ་རེ་བཞུགས། སྐྱིད་ཤོད་ལུང་པ་འདོད་དགུ་འཛོམ་ཞིང་། སྡེ་པ་དཔོན་གཡོག་ཕྱག་རྒྱུན་ལེགས་པས། ཞབས་ཏོག་དཔངས་མཐོ་ཞིང་དངོས་གཙང་བ་ཞུས། དཔོན་སློབ་རྣམས་མྱུར་དུ་ཕེབས་པ་ལ་རིངས་པའི་སྤྲོ་བ་མཐའ་དག་མཚོ་ལ་ཁ་བ་བབས་པ་ལྟར་གྱུར། ཞུགས་ཞག་མང་སར་དཔོན་སློབ་པཎ་ཆེན་རིན་པོ་ཆེས་ལྗགས་ལུང་གཙོ་བོར་གྱུར་པའི་བཀའ་ཆོས་འབུལ་བ་གནང་། མལ་གྲོ་བརྒྱུད། རིན་ཅེན་གླིང་ཆོས་སྡེ་བས་བསྙེན་
བཀུར་ཞིང་། ཚོགས་སུ་བཀའ་ཆོས་ཀྱི་འབྲེལ་པ་སྩལ། བདོག་པའི་སྐྱེས་ཀྱིས་ཀུན་རེ་བ་ཡོངས་སུ་བསྐང་། སྐྱོད་ཀྱི་ལ་བརྒྱུད་གར་མི་ཡོན་ཏན་གཡུང་དྲུང་གི་བསྟི་གནས་རྫིང་ཕྱིའི་ཆོས་སྡེར་ཕེབས། དེར་མཁན་ཆེན་ལུང་རིག་སྨྲ་བ་བློ་བཟང་རྒྱ་མཚོ། ཡོངས་གྲགས་ཀྱི་མཚན་འོལ་ཁ་སྦ་བ་ཞེས་པའི་སྐད་གྲགས་ཅན་དེས་གཙོས། སྤྱི་སྒེར་ཚང་མས་བཀུར་སྟི་གྱ་ནོམ་པ་བསྒྲུབས། རྫིང་ཕྱི་སྐྱ་སེར་རྣམས་ལ་ལུགས་གཉིས་ཀྱིས་ཚིམ་པར་མཛད་ནས་འོལ་ཁ་རྩེར་ཕེབས། དད་པའི་རྒྱན་གྱིས་མཛེས་ཤིང་གཏོང་བའི་ཕྱག་རིང་དུ་རྐྱོང་བའི་ནོར་འཛིན་དབང་མོ་འོལ་ཁ་དབོན་སས་གུས་འདུད་ཕུན་སུམ་ཚོགས་པ་བྱས། བླ་མ་དྲི་མ་མེད་པ་མཚོ་ལས་སྐྱེས་པའི་རྡོ་རྗེ་དང་། མཉམ་མེད་ཇོ་བོ་ཡབ་སྲས་ཀྱིས་ལུང་བསྟན་པའི་གནས་མཆོག་ཆོས་འཁོར་རྒྱལ་དུ་ཕེབས། དགེ་འདུན་ཚོགས་པ་རྣམས་ཀྱིས་འཕན་གདུགས་རྒྱལ་མཚན་བ་དན་རོལ་མོའི་རིགས་དུ་མ་དང་བཅས་པའི་སྔུན་བསུས། མཆོད་ཁང་ནང་རྟེན་ཐམས་ཅད་ཞིབ་པར་མཇལ་ཞིང་། རི་མཐིལ་གྱི་མགོན་ཁང་རྣམས་སུ། གཏོར་གསོས་སྙན་དར་བསྐང་གསོ་རྣམས་རྒྱས་པར་མཛད། ཚོགས་སུ་བཀའ་གདམས་གླེགས་བམ་གྱི་གསུང་ཆོས་དང་། ཟླ་སྦྲེལ་གྱི་བར་དུ་མང་འགྱེད་སོགས་ལུགས་གཉིས་ཀྱི་དགའ་སྟོན་མཐའ་ཀླས་པ་བྱུང་། ལྕང་ར། གྲུ་མདའ། བང་རིམ་པ་སོགས་དྭགས་ནང་གི་སྐྱ་སེར་རྣམས་མཇལ་བར་འོངས་ཏེ། གཞི་བྱེས་ཚང་མར་བསྙེན་བཀུར་རྒྱ་ཆེར་བསྒྲུབས། དེ་དག་རྣམས་ལ་སོ་སོའི་འདོད་ཆོས་ཅི་རིགས་པ་དང་། ཇ་གོས་དར་གྱི་གནང་སྦྱིན་བཟང་བ་མཛད། སླར་སྐྱིད་ཤོད་དུ་ཆིབས་ཁ་བསྒྱུར། སེ་ར་ཐེག་
ཆེན་གླིང་དུ་ཕེབས། སྤྱི་སྒེར་གྱི་ཀུན་ཏུ་བཟང་པོའི་མཆོད་སྤྲིན་ལ་འགྲན་བཟོད་པའི་ཞབས་ཏོག་ཞུས། བསྡུ་བ་རྣམ་པ་བཞིའི་སྒོ་ནས་སྡེ་ཆེན་པོ་དེ་ཉིད་ཀྱི་མཆོག་དམན་མཐའ་དག་ལེགས་པའི་ལམ་ལ་བཀོད། འབྲས་སྤུངས་སུ་ཕེབས། མཁར་ནག་ལོ་ཙཱ་བས། ས་སྐྱོང་གཡུལ་རྒྱལ་ནོར་བུ་ཡིས། །ཕོ་བྲང་ཀུན་ཏུ་སྤྱན་དྲངས་མཆོད། །མལ་གྲོ་བརྒྱུད་དེ་རིན་ཅེན་གླིང་། །དེར་མཆོད་ཆོས་འཁོར་རྫིང་ཕྱི་ནས། །མཁན་ཆེན་བློ་བཟང་རྒྱ་མཚོ་ནི། །འཁོར་དང་བཅས་པས་ཆིབས་བསུར་བྱོན། །ཞལ་གྱི་དཀྱིལ་འཁོར་མཇལ་མ་ཐག །མིག་དབང་ཚིམ་ཞིང་དད་གུས་འཕེལ། །གླིང་དུ་ཕེབས་ཚེ་སྤྱི་སྒེར་གྱིས། །བསོད་ནམས་ཕུང་པོ་དཔག་མེད་བསྐྲུན། །སྐྱ་སེར་སྟོང་ཕྲག་དུ་མ་ལ། །སྙན་པའི་གསུང་གིས་དམ་ཆོས་བསྟན། །དེ་ནས་སྟག་རྩེ་མཐོང་སྨོན་དུ། །མི་ཡི་དབང་མོས་སྤྱན་དྲངས་ཏེ། །མཆོད་ཅིང་འོལ་ཁའི་སྐྱེ་རྒུ་ལ། །དམ་པའི་ཆོས་ཀྱི་སྐྱེས་གནང་ངོ་། །ངོ་མཚར་ཆེ་ལྡན་ཆོས་འཁོར་རྒྱལ། །རྒྱལ་བས་ལུང་དུ་བསྟན་པའི་གནས། །གནས་མཆོག་དེ་རུ་ཕེབས་པའི་ཚེ། །ཚེ་དང་ལྡན་པ་རྣམས་ཀྱིས་མཆོད། །མཆོད་རྟེན་གསེར་སྐུ་མི་ཕམ་མགོན། །མགོན་ཁྱོད་ཕྱོགས་འདིའི་སྐྱེ་འགྲོའི་དཔལ། །དཔལ་ལྡན་བླ་མ་དམ་པ་ལ། །ལ་ལ་དད་ཅིང་ཐམས་ཅད་ཞུས། །གུས་ལྡན་དྭགས་པོའི་སྦྱིན་བདག་རྣམས། །རྣམ་ཐར་གཙང་མ་མཇལ་བར་འཚོགས། །ཚོགས་མཆོག་དགེ་འདུན་དང་བཅས་མཆོད། །མཆོད་འོས་མཆོད་རྣམས་སྐལ་བ་བཟང་། །སླར་ཡང་འོལ་ཁ་མལ་དྲོ་སོགས། །དབུ་རུའི་ཕྱོགས་སུ་སྐྱིད་ཤོད་དང་། །ཐེག་ཆེན་གླིང་དང་འབྲས་སྤུངས་སུ། །ཟབ་རྒྱས་ཆོས་ཀྱི་འཁོར་ལོ་བསྐོར། །ཞེས་སོ། །མེ་ཕོ་རྟའི་ལོ་
སྨན་ལྗོངས་སའི་ལྟེ་བ་ཡར་ཀླུང་གི་ཕྱོགས་སུ་ཆིབས་ཀྱི་ཁ་ལོ་བསྐྱོད། བོད་ཡུལ་གྱི་བློན་པོ་རིག་པ་ཅན་འབྱུང་བའི་ས་སྤྱད་རྣམ་པར་བཀྲ་བའི་འཕྱོང་རྒྱས་སྟག་རྩེར། ས་སྐྱོང་ཆེན་པོ་རིག་སྔགས་འཆང་བའི་འཁོར་ལོས་སྒྱུར་བ་ངག་དབང་བསོད་ནམས་གྲགས་པ་སྐུ་མཆེད་ཀྱིས་སྤྱན་དྲངས། རི་བོ་སྡེ་ཆེན། སྤྱན་གཡས་པ། ཕྱག་སྡེ་པ། དཔལ་རི་སྒྲུབ་སྡེ། བཀྲ་ཤིས་བདེ་ཆེན། ཆོས་ལམ་རིམ་པ། བདེ་སྟེང་པ་སོགས་གྲུབ་མཐའ་རིས་མེད་ཀྱི་དགོན་ཆེ་ཆུང་ཐམས་ཅད་སེར་སྦྲེངས། ཆིབས་བསུ། ཡུལ་པ་རྣམས་ཀྱི་བྲོ་གཞས་ཤོན་སོགས་རྩེད་སྣའི་རིགས་ཀུན་གྱི་མིག་གི་གཟིགས་མོར་ཚར་དུ་དངར་བར་གྱུར། རྩེར་བཞུགས་གྲལ་ཆེན་མོའི་ཉིན། གྲགས་པ་དོན་ལྡན་གྱི་གནས་ལྔ་རིག་པའི་པཎྜི་ཏ་ཆེན་པོ་ལོ་ཆེན་སངས་རྒྱས་དཔལ་བཟང་གི་ཞལ་སློབ་ཞང་མཁར་ནས་རིག་བྱེད་པ་འཇམ་དཔལ་རྡོ་རྗེ་དང་། རྒྱ་གར་རྡོ་རྗེ་གདན་ཚུན་བསྐོར་བའི། ཕལ་སྐད་ཀྱི་ལོ་ཙཱ་བ། རྒྱལ་བའི་བཀའ་འགྱུར་རོ་ཅོག་ལ་ཐོས་བསམ་བྱས་པའི་མཁར་ནག་ཆོས་མཛད་དཔལ་འབྱོར་རྒྱ་མཚོ་གཉིས་ཀྱིས། སྒྲ་རིག་པ་ལ་བརྟེན་པའི་འཕྲོས་གཏམ་རྒྱས་པར་ཕུལ། ནང་མ་དེར་དུས་སྟོན་གྱི་ཞབས་ཏོག །སྐུ་གསུང་ཐུགས་རྟེན་གྱིས་སྣ་དྲངས་བའི་འབུལ་བ་སོགས་རྒྱ་ཆེར་མཛད། ཞབས་དྲུང་སྐུ་མཆེད་ལ་ཚེ་རྟ་ཟུང་འབྲེལ་གྱི་བཀའ་དབང་དང་། གནང་སྦྱིན་རྒྱ་ཧོར་གྱི་དངོས་སྤྱད་ཀྱི་སྐྱེས་སྩལ། ཆོས་དབང་རིན་པོ་ཆེའི་ཟབ་གཏེར་གྱི་ལས་བྱང་ལེའུ་བརྒྱད་པའི་ཆོག་བསྒྲིགས་དང་བསྟུན་པའི་ཚེས་བཅུའི་གར་འཆམས་ཀྱི་རིམ་པ་ཟབ་རྒྱས་སུ་འབུལ་བ་གནང་། དགོན་སོ་སོའི་བླ་མ་གྲྭ་རིགས་རྣམས་ཀྱི་རེ་བ་ཡོངས་
སུ་བསྐང་། དེ་ནས་ཕེབས་ལམ་དུ་མཁར་ཐོག་དཔོན་སས་བསྙེར་བཀུར་གྱ་ནོམ་པ་ཞུས། བོད་ཤིང་སྒོ་ཅན་གྱི་རྒྱལ་ཁབ་ཕོ་བྲང་ཆེན་པོ་སྣེའུ་གདོང་རྩེར་ཕེབས། རྩེ་ཚོགས་པ། དཀོན་གཉེར། རས་ཆུང་ཕུག །རི་བོ་ཆོས་གླིང་། བཀྲ་ཤིས་ཆོས་སྡེ་སོགས་དགོན་ཆེ་ཕྲ་མཐའ་དག་གིས་བཀོད་པ་ཁྱད་པར་དུ་འཕགས་པའི་སེར་སྦྲེངས་དང་། རིན་ཅེན་རྒྱན་སྤྲོད་དང་བཅས་པའི་རྟ་པ་བརྒྱ་ཕྲག་བརྒལ་བའི་ཆིབས་བསུ་ཆོས་བཟང་ལྷའི་མདུན་སའི་དགའ་སྟོན་ལ་འགྲན་བཟོད་པར་གྱུར། མཆོད་ཡོན་གྱི་མཇལ་འཛོམས་བཀའ་འབྲེལ་མ་གསན་གོང་དུ། ཕྱག་རྩེ་སྤྲོད་དམ་ལྡེམ་མཇལ་གང་རུང་། བཞུགས་གདན་མཐོ་དམའི་མཉམ་མཉམ་ལ་དན་པས། ཕན་ཚུན་གྱི་མགྲོན་གཉེར་རྣམས་ཀྱིས་བཞུགས་ཁྲི་རྒྱག་པ་ལ་རྒྱུག་ཚད་ལ་གཞལ། བརྟན་བརྟན་ཁྲིག་ཁྲིག་གི་ལུགས་བྱས་ཀྱང་། སྣེའུ་གདོང་རྩེའི་མགྲོན་གཉེར་ཉམས་མྱོང་ཆེས་པས། བཞུགས་ཁྲིའི་བར་བར་ལ་གཡན་པ་སྲབ་མོ་བརྫངས་པས། མཇལ་ནས་ཇ་གཅིག་ཙམ་བཞེས་ཚེ་སྣེའུ་གདོང་ཞབས་དྲུང་བཞུགས་ཁྲི་མཐོ་བ་བྱུང་ཟེར། མི་ཆེན་པོའི་ཚུགས་ཀ་འཛིན་པའི་འོས་སྡེ་སྲིད་ཕག་མོ་གྲུ་པ་སྨོས་ཅི་དགོས། གཞན་མ་རྒྱ་ནག་གོང་མའི་ལུང་ལས་ཀྱི་མཐོ་བ་འདི་ལྟ་བུ་རྣ་བས་ཕྱག་གདན་ལ་རྩེག་པ་རིགས་མོད་ཀྱང་། སྤྱིར་བླ་ཆེན་དཔོན་ཆེན་གྱི་གྲལ་དུ་རང་བྱོན་མཛད་པའི་རིས་རྣམས་ཕྱག་གདན་ཡིག་བསྐུར་ང་ཆེ་དབང་བཙན་ལ་རྩེག་པ་ལས། སངས་རྒྱས་ཀྱི་མདོ་རྒྱུད་ནས་ལན་གཅིག་མ་ཡིན་པར་གསུངས་པའི་ལས་རྒྱུ་འབྲས་ཟེར་བའི་གལ་པོ་ཆེ་དེ་ལ་ཞིབ་ཆ་མཛད་ན་ལེགས་སམ་སྟེ། སྙན་སྒྲོན་ཕུལ་ཀྱང་ཐུགས་ལ་འཐད་པ་དཀའ་བར་སྣང་ངོ་། །རྩེ་ཞབས་དྲུང་རིན་པོ་ཆེ་ལྷ་
གཟིགས་མི་ཕམ་དབང་སྒྱུར་རྒྱལ་པོ་ལ་ཚེ་དབང་འབུལ་བ་གནང་བས། ཚེ་བུམ་དབུ་ཐོག་ཏུ་བཞག་པའི་སྐབས་བུམ་པ་དུམ་བུ་གཉིས་སུ་གད་པ་ནི་མཆོད་ཡོན་གཉིས་ཀའི་སྐུ་ཚལ་ལྟ་བ་འདྲའོ། །ཨྱོན་ཆེན་པོའི་ལུང་བསྟན་དུ་ཞབས་དྲུང་འདི་ཉིད་བྱང་ཆུབ་སེམས་དཔའ་ཡིན་པ་དང་། དགུང་ལོ་ཉེར་ལྔ་ལ་བར་ཆད་ཆེ་བར་གསུངས་པ་སོགས་ནི། བྱི་གླང་སྡེ་གཟར་གྱི་དུས་ཐོག་ཏུ་ཁེལ་བས་ངེས་ཤེས་འདྲོངས་པ་སྣང་ངོ་། །ཚོགས་མཁན་ཆེན་པ་རིན་ཅེན་རྒྱ་མཚོས་ཐོག་དྲངས། སྐྱ་སེར་མཆོག་དམན་མཐའ་དག་ལ་ལུགས་གཉིས་ཀྱི་སྒོ་ནས་རེ་བ་ཡོངས་སུ་བསྐང་། ཆོས་གྲྭ་ཆེན་པོ་དཔལ་གྱི་རྩེས་ཐང་དུ་ཕེབས། རྩེས་ཐང་ལྔ་མཆོད་པ་སྤྱི་སྒེར་གྱིས་ཞབས་ཏོག་བསྙེན་བཀུར་གྱི་མཐིལ་ལེན་ཞུས། འབྲས་བུ་གླིང་པ་དང་དེ་སྔོན་གྲྭ་ཚང་པ་རྣམས་ཀྱིས་མཛེས་མཚོན་ཙམ་བྱས། དད་མོས་ཅན་རྣམས་མཇལ་བ་དང་། མི་གུས་པ་རྣམས་ཀྱང་ཚོད་བརྟག་པ་དང་། བཏང་སྙོམས་པ་རྣམས་ལྟད་མོ་ལྟ་བ་སོགས་ལ་འོངས་ཏེ་ཁྲོམ་དམར་ནག་ཏུ་འཁྱིལ། དེའི་ཚེ་གུས་ཞེན་པ་ཞིག་གིས། གཟིམས་དྲེལ་ལ་སྐེ་རྒྱན། གཡེར་ཁ་ཁལ་ཁེབས་སོགས་གྲ་གཅིག་པ་ཞིག་བྱུང་ན་ཡོང་རྒྱུར་འདུག །ཀར་འབྲུག་སོགས་ཀྱང་འདི་ལྟར་བྱེད་ཞུས་པས། དེའི་ལན་དུ་ཕྱག་མཛོད་གུ་ཤྲིས་ང་རང་ཡང་དེ་ཀ་བསམ་སྟེ། བརྒྱ་ལ་བྱེད་དམ་སྟོང་ལ་བྱེད་ལྟ་བུར་འདུག་པས། ཚོད་མ་ཟིན་ཞེས་ཕ་རོལ་ཟིལ་གནོན་གྱི་གསུང་བྱོན་ཟེར། བོད་བཙན་པོའི་གདུང་བརྒྱུད། སྡེ་པ་ལྷ་རྒྱ་རི་པས་གདན་དྲངས། རོང་ཆད་དཀར་དང་། ཨེ་རེ་སྒོ་ཆོས་རྫོང་སྟེ་གཞིས་གོང་འོག་རྣམས་སུ་ཞབས་ཏོག་དང་འབུལ་ཆེན་ཡང་དག་པ་མཛད། སྡེ་བ་ཁུ་དཔོན་ལ་ཇི་
ལྟར་བཞེད་པའི་ཆོས་དང་། ཐུགས་ཡིད་རང་དབང་མེད་པར་འཕྲོག་པའི་རྒྱ་ཧོར་གྱི་སྤྱད་པ་མང་པོའི་གནང་སྦྱིན་མཛད། ཨེ་དགོན་བདུན་གྱིས་གཙོས་པའི་ཕྱོགས་དེའི་དགེ་ལུགས། རྙིང་ལུགས། སྨྱུང་གནས་རས་པ་སོགས། རིས་མེད་ཀྱི་དགོན་ཆེ་ཆུང་ཐམས་ཅད་ལ་ཆོས་དང་ཟང་ཟིང་གི་ཕན་པ་རྒྱ་ཆེན་པོ་སྩལ། ཐུ་མི་སམྦྷོ་ཊའི་གདུང་འཛིན་ཡར་རྒྱབ་དཔོན་ཆེན་གྱིས་གདན་དྲངས། སྲིད་གསུམ་རྣམ་རྒྱལ། རྒྱལ་ཆེན་གླིང་། དོལ་ལྷུན་གྲུབ་ལྷ་རྩེ་སོགས་སོ་སོར་བསྙེན་བཀུར་ཕུན་སུམ་ཚོགས་པ་ཞུས། བཞུགས་གྲལ་ཆེན་མོའི་ཉིན། གསོལ་སྡེར་སུམ་བརྒྱ་ཐམ་པ་ཞུས་པ། རྗེས་མ་གཙང་དུ་སྡེ་པ་ལྷུན་པོ་རྩེ་པས་གསོལ་སྡེར་ལྔ་བརྒྱ་བསྒྲིགས་པ་ཁ་གྲངས་མང་བ་ཙམ་ལས། རྒྱ་དཔངས་དངོས་དག་མི་དག་སོགས། ཡར་རྒྱབ་པས་ཞུས་པའི་ཟུར་ཙམ་དུ་ཡང་མི་སླེབས་འདུག །སྡེ་དཔོན་གང་གི་ནང་དུ་ཡང་འདི་འདྲ་བ་མ་བྱུང་ཞེས་དྲུང་འཁོར་རྣམས་གླེང་། ཕོ་བྲང་ཆེན་པོ་སྣེའུ་གདོང་རྩེ། གོང་དཀར། འཕྱོང་རྒྱས། ཡར་རྒྱབ། རྒྱ་རི་བ། ལྷུན་པོ་རྩེ་བ་སོགས་སྔ་ཕྱིའི་བཞུགས་གྲལ་ཆེན་མོའི་སྐབས་ཚོར། ཕྱག་མཛོད། སློབ་དཔོན་པའི་རིས་དང་ནང་སོ་རྣམ་པ་རྣམས་ལ་བང་ཁེབས་བཤུར་མ་གཏོང་བ་སོགས། ཆེན་པོའི་མདུན་སར་འོས་པའི་སྒྲིགས་བཅའ་བདར་ངོ་མཚར་ཞིང་བབས་ཆགས་པ་བྱུང་བར་སྣང་། སྡེ་པ་དཔོན་བློན་ལ་ཚེ་རྟའི་བཀའ་འབྲེལ་གནང་། རྒྱལ་ཆེན་གླིང་གི་གཞིས་ཀ་ལྕགས་རི་དང་བཅས་པར་ཕྱག་ནས་ཞུ་བ་སོགས་གུས་པའི་རྣམ་འགྱུར་མང་པོ་མཛད། ཕྱགས་ཕྱི་དྲུང་འཁོར་རྣམས་ཀྱི་ཁྲོད་ནས་སྡེ་པ་ཡར་རྒྱབ་པ་འདི་སྔར་ཕན་ས་ལུགས་སང་སང་ཡིན་པ་ལ། ད་ཆ་རང་ཕྱོགས་སུ་འགྱུར་བ་ལྟ་བུ་ཡིན་འདུག་པས། གནང་ཆ་དཔངས་ཆེ་བ་གནང་བ་
འགབ་ཅེས་གུས་པ་ལྟར། སྔར་གྱི་སྦྱིན་བདག་རྙིང་པ་རྔ་མ་ནག་པོའི་ཚོས་མདོག་ཅན་རྣམས་ལས། གནང་ཆ་བཅུ་འགྱུར་དགའ་བ་མཛད། མཆོད་ཡོན་ཐམས་ཅད་ཞག་གསུམ་གྱི་གསར་འགྲོགས་དེ་འདི་རེ་བྱུང་། བྱམས་པ་གླིང་གི་མཆོད་རྟེན་བོད་ཡུལ་ན་འགྲན་ཟླ་མེད་པ་དེས་གཙོས་པའི་གནས་གཟིགས་གནང་། ཇོ་གདན་ས་དགེ་ཀར་རྙིང་སོགས་གྲུབ་མཐའ་རིས་མེད་ཀྱི་སེར་སྦྲེངས་པ་ལ་མང་འགྱེད་ཀྱིས་ཚིམ་པ་མཛད། མཁར་ནག་ལོ་ཙཱ་བས། ཟིལ་གནོན་ལོ་ལ་གཡོན་རུའི་ཕྱོགས། །འཕྱོང་རྒྱས་སྟག་རྩེའི་ས་སྐྱོང་དང་། །མཁར་ཐོག་སྣེའུ་གདོང་རྩེ་ཡི། །གོང་མ་ཆེན་པོས་སྤྱན་དྲངས་མཆོད། །སྲས་ཡུམ་བློན་བཅས་ཚོགས་ཆེན་པོར། །ཚེ་དབང་ལ་སོགས་འདོད་ཆོས་གནང་། །དེ་ནས་རྩེས་ཐང་ལྔ་མཆོད་པས། །སྤྱན་དྲངས་ས་དགེ་ཀར་བཅས་ཀྱི། །སེར་སྦྲེངས་ཁྲོམ་ཆེན་ཚོགས་པ་ལ། །ཆོས་གསུངས་རྟེན་མཆོད་མཛད་པ་ན། །ངོ་མཚར་ལྟས་བཟང་བསམ་མི་ཁྱབ། །ངམ་ཤོད་བརྒྱུད་དེ་ཨེ་ཕྱོགས་སུ། །ཕོ་བྲང་རི་སྒོ་ཆད་ཀར་དུ། །འོད་གསལ་ལྷ་ཡི་གདུང་བརྒྱུད་པ། ཁུ་དབེན་སྲས་འབངས་ཆོས་སྡེས་མཆོད། །ཆོས་ནོར་གྱ་ནོམ་རྒྱ་ཆེན་སྩལ། །དེ་ན་ཡར་རྒྱབ་དཔོན་ཆེན་གྱིས། །སྤྱན་དྲངས་འབྱོར་བ་ཆེན་པོས་མཆོད། །གྲ་དོལ་རྣམས་ཀྱི་རྟེན་གཟིགས་མཛད། །ཀུན་ཏུ་བཟང་པོའི་མཆོད་སྤྲིན་སྤྲོས། །ཞེས་སོ། །རིམ་གྱིས་ཆོས་སྡེ་ཆེན་པོ་འབྲས་སྤུངས་སུ་ཕེབས། མི་རིང་བར། སྡེ་པ་སྐྱིད་ཤོད་པ་དང་། བླ་མ་དུང་དཀར་འབྲུག་གྲགས་སོགས་ཕུགས་སུ་འཚངས་པ་འདྲ་ཟེར། གང་ལྟར་དྲུང་འཁོར་ལ་ལ་དག་རང་ཉིད་བག་ཡངས་སུ་སྦྱོང་རྒྱུ་མ་བྱུང་བ་རྒྱུ་མཚན་དུ་བྱས་ཏེ། མི་བསྲུན་སྐྱེ་བོ་གདུག་པའི་སྦྲུལ་ལྟར་ལྕེ་གཉིས་
དང་ལྡན་པ་འགའ་ཞིག་གིས། རྐུན་པོ་རྣམས་ཀྱིས་ཁྱིར་བཏགས་པས། །ར་སྐྱེས་ཁུར་བ་བྲམ་ཟེས་བོར། །ཞེས་པའི་གཏམ་རྒྱུད་དང་མཚུངས་པའི་གཡོ་འཕྲུལ་གྱིས་དཔོན་སློབ་གཉིས་ཀྱི་བར་དུ་སེལ་བཅུག །འཕྲལ་གྱི་རྐྱེན་སོག་པོ་ཁ་ཐན་གྱིས་བྱས་ཏེ། ཕྱག་མཛོད་གུ་ཤྲི་ཆེན་པོ་ཟུར་དུ་བཞུགས་དགོས་བའི་བི་ན་ལ་ཀས་ནུས་པ་ཅུང་ཟད་ཐོན་པར་སྣང་ངོ་། །རེ་ཞིག་སྐུ་མཚམས་དམ་པར་བཅད་དེ་ཐུགས་དམ་ཟབ་མོའི་ཉམས་བཞེས་ལ་བརྩོན་པར་། མཁར་ནག་ལོ་ཙཱ་བས། དེ་ནས་དྷྱ་ན་ཀ་ཊ་ཀར། །ཐུགས་དམ་ཟབ་མོའི་ཉམས་བཞེས་ལ། །གཞོལ་བའི་བཅད་རྒྱ་དམ་པར་མཛད། །རིམ་གཉིས་ལམ་གྱིས་རྣལ་འབྱོར་འཕེལ། །ཞེས་སོ། །དེ་ནས་གཙང་ཕྱོགས་ཀྱི་གྲྭ་རིས་སྦྱིན་བདག་རྣམས་ཀྱིས་གསོལ་བ་བཏབ་སྟེ་ཞལ་བཞེས་གནང་བ་ལྟར། བཀྲ་ཤིས་ལྷུན་པོ་ནས་གདན་འདྲེན་པར་ཤར་རྩེ་དཔོན་སློབ་དགྲ་འདུལ་འབྱོར། འབྲས་སྤུངས་ནས་བཞུགས་སྒར་བཏེག་སྟེ་སྙུག་ལའི་ཐད་དུ་ཕེབས་པའི་ཚེ། དེར་ལེགས་བཤད་གླིང་པ་དང་། ཁུ་པེ་གྲ་ཚང་གཉིས། །དཔལ་ལྡན་ཤཱཀྱའི་རྗེས་སུ་ཞུགས་པའི་འདུས་སྡེ། ཁྲོ་བ་ལ་སླར་མི་ཁྲོ་བ་སོགས་དགེ་སྦྱོང་དུ་བྱེད་པའི་ཆོས་བཞི་ལ་སྤྱོད་པར་ཁས་འཆེ་ཡང་། བྱ་རོག་འུག་པའི་བརྟུལ་ཞུགས་ཡུན་རིང་དུ་འཛིན་པ་ཞིག་ཡོད་འདུག་ཅིང་། ཁྱད་པར་ལེགས་བཤད་གླིང་པ་རྣམས། ཁུ་པེ་གྲྭ་ཚང་བས་གཙོ་བྱས་ཕྱོགས་དེར་གྲུབ་མཐའ་མི་གཅིག་པ་རྣམས་འདོན་པ་ལ་མངོན་དུ་ཕྱོགས་ཤིང་། གསར་པ་ཆགས་འཇུག་པ་ནི་ལྟ་ག་ལ་ཞིག །ཐུབ་ན་དེའི་ཐད་ཀྱི་ནམ་མཁའ་ལ་བྱ་འཕུར་བ་ཡང་འགོག་པའི་ཀར་ལུགས་ཀྱི་སྤྱན་ལྟོས་དང་ཕྱག་ལེན་མཉམ་པ། འདི་སྐབས་ཀྱང་ཕེབས་ལམ་བཀག་པས། ལྔ་བརྒྱ་ཐ་མའི་མེ་ལོང་
དུ་ནང་རྟགས་ཀྱི་གཟུགས་བརྙན་མཐའ་དག་ཕྱི་རོལ་ཏུ་གསལ་ཏེ་ཕྱག་རྒྱ་བའི་ཆོས་ཀྱི་རང་ཚུགས་ཕྱི་མའི་ཆང་བུ་ལྟར་གྱུར་ཏོ། །དེ་ནས་ཐོན་སྡེ་དགོན་རྣམས་ཀྱིས། འབུལ་བ་ཞབས་ཏོག་བསྙེན་བཀུར་མཐའ་ཡས་པ་བྱུང་། སྡེ་པ་ཡབ་སྲས་ཀྱིས་ཐོག་དྲངས་པའི་མཆོག་དམན་གྱི་སྐྱེ་བོ་ཀུན་ཆོས་དང་ཟང་ཟིང་གི་སྒོ་ནས་རྫོགས་ལྡན་གྱི་དགའ་སྟོན་བསྐྲུན་པར་མཛད། འུ་ཡུག་བརྒྱུད་སྒར་པ་དམངས་སྐུ་མདུན་རིན་པོ་ཆེས་གཙོ་མཛད་དེ་ཆུ་ལྷོ་ཁར་བཏོན་ཆིབས་རགས་ཉུང་བསྡུས་ཤིག་ཟབ་བུ་ལུང་གི་གནས་མཇལ་ལ་ཕེབས། དེ་ནས་ཤངས་རི་བོ་དགེ་འཕེལ་གྱི་གནས་གཟིགས་མཛད། གདན་ས་འོག་རྩེ་གདོང་བླ་བྲང་ནས། དཔལ་ས་སྐྱ་བ་འཇམ་དབྱངས་ཀུན་དགའ་བསོད་ནམས་ལྷུན་གྲུབ་བཀྲ་ཤིས་གྲགས་པ་རྒྱལ་མཚན་དཔལ་བཟང་པོས་ལེགས་བྱའི་ཇ་འདྲེན་རྒྱས་པར་བཏང་། ཆུ་ལྷོ་ཁར་བཏོན་ཏེ་དབེན་ས་དགོན་པར་ཕེབས། སྒྲུབ་སྡེ་ཕོ་མོ་རྣམས་ལ་ཆོས་དང་ཟང་ཟིང་གིས་ཚིམ་པར་མཛད། བཀྲ་ཤིས་ལྷུན་པོར་ཕེབས་ཉིན། ཡོངས་རྫོགས་བསྟན་པའི་མངའ་བདག །པཎ་ཆེན་རིན་པོ་ཆེ་བློ་བཟང་ཆོས་ཀྱི་རྒྱལ་མཚན་དཔལ་བཟང་པོས་དབུ་གནང་། སློབ་དཔོན་རྣམ་པ་ཆེ་བགྲེས་སོགས་ཀྱིས་ཆིབས་བསུ་ལ་ཕེབས་ཏེ་ཞབས་ཐང་ལ་ཧྲོ་མེ་བཞུགས་པ་གཟིགས་པས། ཆིབས་ལས་བཤོལ་བ་གནང་བར། ལ་ལ་དག་བཤེས་གཉེན་བསྟེན་པའི་རྣམ་ཐར་དང་མཚུངས་པ་འདུག་ཅེས་བསྔགས་པ་བརྗོད། གཞན་ཕྱོགས་པ་རྣམས་ཀྱིས་འབྲས་སྤུངས་སྤྲུལ་སྐུ་དགེ་ལུགས་ཀྱི་བསྟན་པའི་བདག་པོ་ལྟ་བུ་ཡིན་ཟེར་བར། ཁོང་དཔོན་སློབ་ལ་ཆིབས་པ་འབེབས་པ་གནང་བ་ཞེས་ཉམས་མཚར་མཚར་བྱས་སྐད། དེའི་རྒྱུ་མཚན་ནི་ངོར་གྱི་མཁན་པོ་སོག་གདན་ས་གོང་འོག་
གི་དབུ་བླར་གྱུར་པའི་རིས་ལ་བདག་ཆེན་རིན་པོ་ཆེ་རྣམས་ཤིན་ཏུ་གུས་པ་ཡིན་འདུག་ཀྱང་། འཕྲལ་གྱི་སྣང་ཚུལ་དབུ་བླ་རྣམས་ཀྱིས་གདུང་བརྒྱུད་ཞལ་ངོར་ཕྱག་འབུལ་བ་སོགས་འཇམ་དབྱངས་འཁོན་གྱི་རིགས་སུ་འཁྲུངས་པ་རྣམས་འགྲན་གྱི་ཟླ་མེད་དུ་འཛིན་པར་གདའ། རིན་པོ་ཆེ་ལྷ་རྩེ་བར་འབྲུག་པ་ཐམས་ཅད་མཁྱེན་པ་དཔག་བསམ་དབང་པོས་བཀའ་ཆོས་གསན་པའི་སྙན་གསན་ཕུལ་བར། རིན་པོ་ཆེས་ངེད་ཀྱིས་བཀའ་ཆོས་འབུལ་བ་མི་ཡོང་། ངེས་པར་འབུལ་དགོས་ན་ངེད་ལ་བླ་མའི་བཀུར་གཟོས་མི་བྱེད་པའི་དན་ཁ་དགོས་ཆོས་རྣམས་མཎྜལ་གྱི་ཚུལ་དུ་འབུལ་གསུང་བ་སོགས་ཀར་འབྲུག་ལ་ཡང་མིག་ལྟོས་དེ་འདྲ་ཞིག་ཡོད་སྣང་བས་དེ་ལ་དཔེ་བྱས་པར་འདུག །དགེ་འདུན་སྟོང་ཕྲག་ཏུ་ཉེ་བའི་སེར་སྦྲེངས་དང་བཅས་ཏེ་ཆོས་གྲྭ་ཆེན་པོ་བཀྲ་ཤིས་ལྷུན་པོར་ཕེབས། སྤྱི་བླ་བྲང་ཕྱུག་པོ་ཁག་རྣམས་ཀྱིས་སོ་སོའི་གྲྭ་ཁང་དུ་གདན་དྲངས་ཏེ་བསྙེན་བཀུར་རྒྱ་ཆེར་བསྐྲུན། ཚོགས་སུ་མང་འགྱེད་དང་དཔོན་སློབ་པཎ་ཆེན་རིན་པོ་ཆེར་བརྒྱ་འབུལ་སོགས་སྐུ་སྐྱོས་ཀྱི་ཤངས་ལེན་རྒྱས་པར་མཛད། དར་བཞུགས་རང་རིགས་དང་དཀྱིལ་འཁོར་ཀུན་གྱི་ཁྱབ་བདག་པཎ་ཆེན་རིན་པོ་ཆེ་བློ་བཟང་ཆོས་ཀྱི་རྒྱལ་མཚན་ལ་བཀའ་དབང་བཀའ་ཆོས་ཀྱང་མང་དུ་གསན། དེ་སྔ་གཙང་སྡེ་སྲིད་ཕུན་ཚོགས་རྣམ་རྒྱལ་གྱི་ཡུམ་དཔོན་ས་ཡར་རྒྱབ་མ་ཇོ་མཇལ་དང་གཉེན་ཕྲད་ལ་འབྱོན་པའི་ཞོར་དུ་འབྲས་སྤུངས་ཀྱི་གནས་མཇལ་མཛད་བཀའ་ཆོས་གསན་པས་ཐུགས་དད་ཁྱད་པར་ཅན་འཁྲུངས་པས། འདི་རེས་སྡེ་པ་བགྲེས་པ་རྣམས་ཇི་ལྟར་མཛད་ཀྱང་། དཔོན་ས་ཡུམ་སྲས་གཉིས་རང་གུས་འདུད་ལྷུར་ལེན་རྩིས་ལ། དཔོན་ས་སྐུ་ཚེས་མ་ཟིན་པར་བརྟེན། རྫོང་དུ་གདན་འདྲེན་མ་ཞུས་ཀྱང་། ཇ་
ཞུས་དང་གཟན་མེ་ཤིང་གི་མཐུན་རྐྱེན་གང་ལེགས་མཛད། བཀྲ་ཤིས་ལྷུན་པོའི་ཐམས་ཅད་མཁྱེན་པ་དགེ་འདུན་གྲུབ་པ་དཔལ་བཟང་པོས་བཞེངས་པའི་བྱམས་ཆེན་དང་། དཔལ་ལྡན་ལྷ་མོའི་སྐུ་སོགས་གནས་གཟིགས་རྣམས་གནང་བ་རང་གཞན་བརྗེ་ནུས་པའི་ཆོས་པ་ངོ་མཚར་ཅན་ཇོ་བོ་བཀའ་གདམས་པའི་སྡེ་དཔལ་སྣར་ཐང་དང་། ཐམས་ཅད་མཁྱེན་པ་དགེ་འདུན་གྲུབ་ཀྱི་ཞལ་སློབ་པཎ་ཆེན་བཟང་བཀྲས་པས་བཏབ་པའི་གངས་ཅན་ཆོས་འཕེལ་ཞེས་སྔར་རིག་སྔགས་འཆང་བའི་སྡེ། དུས་ཕྱིས་ཇོ་བོ་མཚན་ཉིད་པའི་གྲྭ་སར་སོང་བ་དེ་དང་། པཎ་གྲུབ་གསུམ་གྱི་དངོས་སློབ་ཁྲོ་ཕུ་ལོ་ཙཱ་བ་བྱམས་པའི་དཔལ་གྱིས་བཞེངས་པའི་གཙུག་ལག་ཁང་རྣམས་ཞབས་ཀྱིས་བཅགས། གནས་དེ་དག་གི་སྐྱ་སེར་ཀུན་ལ་ཐར་པའི་ས་བོན་བསྐྲུན། བསྙེན་བཀུར་བ་དོན་དང་ལྡན་པར་མཛད། སྡེ་པ་སེར་མ་པས་ལྷུན་པོ་རྩེར་སྤྱན་དྲངས། བཞུགས་གྲལ་ཆེན་མོའི་ཉིན་གསོལ་སྡེར་ལྔ་བརྒྱ་ཙམ་བསྒྲིགས་པའི་ཞབས་ཏོག་རྒྱ་ཆེར་ཞུས། དེ་མཚུངས་ལྷུན་པོ་རྩེ་ཆོས་སྡེར་ཕེབས་ཏེ་ཚུལ་འབུལ་ཕར་གནང་འགྲན་བཟོད་པ་ལྟ་བུར་གྱུར། སྡེ་པ་རིན་ཆེན་རྩེ་པ་དང་སྲས་རྒྱུད་པ་མཆོད་ཡོན་གྱིས་གདན་དྲངས་རེ་བ་དོན་དང་ལྡན་པར་མཛད། དབུས་སུ་ཆིབས་ཁ་བསྒྱུར་བའི་ལམ་ནོར་དཔལ་འཁོར་བདེ་ཆེན་དུ་ཕེབས། དགེ་ལུགས་ཀྱི་གྲ་ཚང་ཁག་བདུན་གྱིས་བསྙེན་བཀུར་བཟང་འགྲན་ཞུས། གུར་པ་དང་རི་ལྡིང་པ་གཉིས་ཀྱིས་གར་འཆམས་ཀྱི་གཟིགས་མོ་རྒྱས་པར་ཕུལ། སྡེ་པ་རྒྱལ་རྩེ་བས་ཇ་འདྲེན་ཞུས། གནས་རྙིང་དུ་ཞབས་དྲུང་ངག་གི་དབང་པོ་ཁུ་དབོན་གྱིས་སྤྱན་དྲངས། རྒྱ་འཇམ་དཔལ་གསང་བའི་སྐུ་གདུང་བཞུགས་པའི་གསེར་གདུང་གིས་ཐོག་དྲངས་ཕྱི་ནང་གི་གནས་
གཟིགས་རྣམས་ཞིབ་པར་མཛད། གཙང་དུ་བཞུགས་རིང་སྡེ་པ་ཀརྨ་བསྟན་སྲུང་བ་སོགས་ཕྱོགས་ལྷུང་ཅན་མང་པོས་མི་གུས་པའི་རྣམ་འགྱུར་བྱུང་བར། ཐུགས་མ་རེངས་པས་རྒྱ་སྔགས་འཆང་ཆེན་པོའི་སྐུ་གདུང་གི་སྐུ་གཞོགས་སུ་བསྐང་གསོ་དང་། གཙང་པ་ཞལ་ངོ་རྣམས་ཀྱི་མཚན་ནས་སྨོས་པའི་བཞས་སྒྲ་མཛད་པར། གནས་རྙིང་ཞབས་དྲུང་ཐུགས་འཚབ་ནས། ཁྱེད་དཔོན་སློབ་དབུས་སུ་ཕེབས་པ་ལ་མ་ལྟོས་ནའང་། ངེད་ཚོ་ས་དོག་འདིར་སྡོད་དགོས་པས་དེ་འདྲ་མི་གནང་བཞུ་ཞེས་ཞུ་བ་ཕུལ། གནས་རྙིང་པ་སྡེ་དགོན་གྱིས་གུས་འདུད་དཔག་ཏུ་མེད་པ་མཛད་ཅིང་། ཕར་ལུགས་གཉིས་ཀྱི་བདག་རྐྱེན་ཚད་ལས་འདས་པ་གནང་། འབྲུག་ལུགས་ཀྱི་གདན་ས་ར་ལུང་དུ་ཕེབས། གདུང་བརྒྱུད་ངག་དབང་བསྟན་པའི་ཉི་མ་དང་དབོན་ངག་དབང་རྣམ་རྒྱལ་ཡབ་སྲས་ཀྱིས་གཞི་ལེན་རྒྱས་པར་བཏབ་ཆོས་རྗེ་སྐྲེ་ཆུང་འདི་ཞབས་དྲུང་རིན་པོ་ཆེ་ཐམས་ཅད་མཁྱེན་པ་བསོད་ནམས་རྒྱ་མཚོར་གཏིང་ནས་མོས་པ་ཞིག་ཡོད་འདུག་པས། འདི་སྐབས་ཞབས་ཏོག་རྒྱ་ཆེར་ཞུས། ངེད་རང་ཕྱག་འབུལ་རྒྱུ་ཡིན་པས། ཚུར་བཟོས་གནང་མ་གནང་ལ་ལྟོས་པ་མེད་ཀྱང་། ཀར་ལུགས་ནང་འདི་ལོད་དྲགས་པའི་སྟབས་ཀྱིས། འབྲས་སྤུངས་སྤྲུལ་སྐུས་ལྡང་བ་ཙམ་ཡང་མ་མཛད་པར་ཁྱོད་ཀྱིས་ཕྱག་ཕུལ་ཞེས་ངེད་ཚོ་སྒར་པའི་ཁྱུ་ནས་བཏོན་ཡོད་ཞུས་པར། དྲུང་འཁོར་སྟོང་འུར་ཅན་འགའ་ཞིག་གིས། རྗེ་གོང་མའི་དུས་ཀྱི་གནམ་དཔངས་ཕར་བཞག་ཇིང་གིར་གྱི་རིགས་སུ་འཁྲུངས་པ་ཙམ་གྱིས་ཀྱང་ཁོང་ལ་ལྡང་བ་གནང་མི་ཐུབ་ཅེས་ཐག་བཅད་པས་སྐྲེ་བོ་དཔོན་སློབ་མཇལ་བའི་སྤྲོས་པ་དང་བྲལ། གླུ་མ་བླངས་པའི་གྲེ་བ་ཞིག་དེ་རུ་འཛེར་སྐད། སྔོན་དཔལ་ལྡན་ས་སྐྱ་པས་བོད་ཀྱི་བདག་མཛད་པའི་ཚེ། དཔའ་
རྟགས་ཀྱི་གྲགས་སྙན་ཅན་དཔོན་ཆེན་ཨག་ལེན་གྱི་བརྒྱུད་པ་འབྲོག་ཁྲི་དཔོན་པས་གུས་འདུད་ཞུས། མཁར་ནག་ལོ་ཙཱ་བས། ཕུར་བུ་ཤར་ཚེ་ཚེ་ལྡན་རྣམས། །གཡས་རུ་རུ་ལག་འཛིན་མའི་གཞིར། །གཙང་གི་ས་བདག་ཆེ་ཆུང་དང་། །ཆོས་སྡེ་སོ་སོས་སྤྱན་དྲངས་ཏེ། །ཡུལ་ཕྱོགས་རང་རང་གུས་མཆོད་བྱས། །ཐོག་མར་ཐོན་དང་རྒྱལ་བྱེད་ཚལ། །འུ་ཡུག་ཤངས་དང་ཟ་ཕུ་ལུང་། །དེ་དག་ཏུ་ཕེབས་ཀུན་གྱིས་མཆོད། །སྦྱིན་པ་རྣམ་བཞིས་ཚིམ་པར་མཛད། །དགེ་འཕེལ་གནས་གཟིགས་རྩེ་གདོང་དུ། །ས་སྐྱ་བདག་ཆེན་ཇ་ཞུས་དང་། །ལྷོ་ཁར་དབེན་ས་ཆོས་རྗེས་མཆོད། །དེ་ནས་བཀྲ་ཤིས་ལྷུན་པོར་ཕེབས། །ཆིབས་བསུ་དང་བཅས་སེར་སྦྲེངས་དང་། །བཀོད་པ་ཁྱད་པར་འཕགས་པས་མཆོད། །གནས་ལྔ་རིག་པའི་པཎྜི་ཏ། །བློ་བཟང་ཆོས་ཀྱི་རྒྱལ་མཚན་ཞབས། །རྒྱལ་བ་ཡབ་སྲས་ཉི་ཟླ་ཟུང་། །ཞལ་བརྒྱས་ཆོས་ཀྱི་བདུད་རྩི་དང་། །ལོངས་སྤྱོད་ཆེན་པོས་དགེ་འདུན་རྣམས། །ཚིམ་མཛད་སྐལ་བཟང་ཅི་ཡང་སྤེལ། །བསམ་གྲུབ་རྩེ་ནས་ཇ་ཞུས་དང་། །སྣར་ཐང་གངས་ཅན་ཆོས་འཕེལ་དང་། །གནས་དང་ཁྲོ་ཕུའི་བར་དུ་ཕེབས། །དེ་ནས་སྲད་རྒྱུད་རིན་ཅེན་རྩེ། །ལྷུན་རྩེ་གནས་རྙིང་འབྲོང་རྩེ་དང་། ལྕང་ར་དཔལ་འཁོར་བདེ་ཆེན་དུ། །སྤྱན་དྲངས་སེར་སྦྲེངས་གར་འཆམས་ཕུལ། །ར་ལུང་རྟེན་མཆོད་མཛད་པའི་ཚེ། །འབྲུག་པའི་གདུང་བརྒྱུད་ཡབ་སྲས་ཀྱིས། །བསྙེན་བཀུར་ཡར་འབྲོག་སྣ་དཀར་རྩེ། །མཆོད་ཅིང་། །ཞེས་སོ། ། རིམ་གྱིས་རྒྱལ་ཁབ་ཆེན་པོ་གོང་རི་དཀར་པོར་ཕེབས། དེའི་ཚེ་ཞྭ་དམར་མཆོག་གི་སྤྲུལ་སྐུ་གདན་ས་ཐེལ་དུ་བཞུགས། མཇལ་འཛོམ་གནང་ཐུབ་ན་བསྟན་པ་སྤྱི་སྒེར་དང་བོད་འབངས་ཀྱི་བདེ་ཐབས་ལ་རླབས་ཆེ་བའི་དགོངས་གཞི་ཁྱད་པར་
ཅན་ལ་བརྟེན། དཔོན་སློབ་གཉིས་ཀ་མཇལ་འཛོམ་གནང་བཞེད་པའི་སྐོར་ཡང་གི་སྐབས། དྲུང་འཁོར་རྣམས་ཀྱིས་རྗེ་གོང་མས་སྒར་པ་དང་མཇལ་བར་བཀུར་བཟོས་སོགས་ཚུལ་ལྡན་མ་བྱུང་། ད་སྒོས་ཀྱང་རྗེ་ཞྭ་དམར་བ་ཐུགས་གཡོ་ཆེས་པས་སྔར་དང་འདྲ། སྙན་སྒྲོན་ཕུལ་ཀྱང་གསན་རིས་མིན་པས། ངེད་རང་རྣམས་ཡར་ལོག་ཕྱིན་ན་མཇལ་འཛོམ་གནང་ཐབས་དང་བྲལ་འགྲོ་ཞེས་ལྡེ་ཆུང་བ་ནང་སོ་ཕུ་ལུང་པ་དང་། དྲུང་འཚོ་ཚེ་འཛིན་མ་གཏོགས་དྲུང་འཁོར་ངོ་མ་རྣམས་ཀྱིས་འབྲས་སྤུངས་སུ་ལོག་ཕྱིན་པས། །མཇལ་ཕྲད་ནི་སོས་ཐན་དུས་ཀྱི་སྤྲིན་པ་ལྟར་གྱུར། མཁར་ནག་ལོ་ཙཱ་བས། དེ་ནས་གོང་དཀར་དུ། །སྤྱན་དྲངས་མི་དབང་ཡབ་སྲས་དང་། །བཀའ་བགྲས་གར་དབང་སྤྲུལ་པའི་སྐུ། །མཇལ་འཛོམ་མཛད་ན་བོད་འབངས་སྤྱི། །བདེ་བར་དགོངས་པའི་གླེང་མོ་གནང་། །ཕན་པར་བཞེད་པའི་ལྷག་བསམ་ལ། །སྡིག་ཏོའི་ཕྱོགས་ཀྱིས་ལོག་པར་བཀག །ཅེས་སོ། །སྙན་གྲགས་བསིར་བུས་རིང་ནས་དྲངས་པ་ཡི། །ལྷུན་གྲུབ་འཕྲིན་ལས་མ་ལ་ཡ་ཡི་དྲིས། །དབུས་གཙང་འཛིན་མའི་ཁྱོན་ཀུན་ཡོངས་ཁྱབ་ཚེ། །རྒུད་པའི་ཚ་གདུང་མིང་གི་ལྷག་མར་བྱས། །གྲུ་འཛིན་རི་བོའི་སྤོ་ནས་པད་དཀར་འཆང་། །རིན་ཅེན་རྒྱན་གྱི་འཕྲེང་བ་རིང་དོར་ནས། །ངུར་སྨྲིག་གོས་ཀྱིས་ཀླུབས་ཏེ་དབྱིག་འཛིན་ལྟོར། །བསོད་ནམས་ཞིང་དུ་བྱོན་ལ་སུ་མི་དད། །མི་བསྲུན་བསམ་སྦྱོར་འཆང་བའི་ཕྱི་ནང་བགེགས། །རང་གཞན་དུ་མར་སྤྲུལ་པའི་འཁྲུལ་འཁོར་གྱིས། །ལྔ་བརྒྱའི་རང་མཚང་སྟོན་རྣམས་མགོན་ཁྱོད་ཀྱི། །སྐྱོན་མིན་ཟས་གཙང་སྲས་ལ་ལེགས་ཀར་བཞིན། །དེ་ནས་འབྲས་སྤུངས་སུ་ཕེབས། རེ་ཞིག་ཐུགས་དམ་ཟབ་མོའི་ཉམས་བཞེས་ལྷུར་མཛད་ཅིང་བཞུགས་པའི་སྐབས། ཕྱོགས་ཀྱི་གསེར་ཡིག་པ་དང་
མཇལ་བར་འོངས་པ་འགའ་ཞིག་ལ་འདན་པ་འཚོ་བྱེད་དང་འོར་པ་ཆོས་མཛད་སོགས་ཀྱིས་སྒར་པའི་མཇལ་འཛོམ་གྱི་ཡིག་འཕྲུལ་འདྲ་ཡིན་འོང་སྙམ་ནས། བརྡུང་འཕྲོག་བྱས་ཏེ། ཕོ་བྲང་གི་ནང་དུ་རྒྱུ་འགྲུལ་བྱེད་པ་ལྷོ་བྲག་མར་པ་རྒྱ་གར་དུ་འབྱོན་པའི་ལམ་ལས་ཀྱང་བགྲོད་དཀའ་བ་བྱུང་། ར་བ་སྟོད་འཆད་ཉན་ལས་ཐོག་པ། ཁྲི་རིན་པོ་ཆེ་དཀོན་ཅོག་ཆོས་འཕེལ་གྱིས་མཇལ་བར་ཕེབས་པས། ཁོང་གཉིས་ཀྱིས་དབྱུག་པ་ཕྱར་ཏེ་བརྡེག་ཏུ་ཆས་པ་ན། ཁྲི་རིན་པོ་ཆེ་དེ་ཉིད་ཐུགས་དཀྱེལ་ཆེ་བས་ཞལ་མདངས་འགྱུར་བ་ཙམ་ཡང་མི་མཛད་པར་འཛུམ་གྱིས་བསུས་པས་ཐལ་མོ་ཡ་གཅིག་གི་དཔེར་སོང་། དུས་ཕྱིས་ཀྱང་མི་དེ་འདྲའི་རིས་འདུག་ཅེས་ཐུགས་ཁྲེལ་བའི་གསུང་འཕྲོས་ཡང་ཡང་གནང་། མཚོ་ཁ་ནས་དཔོན་པོ་ཁོ་ལོ་ཆེའི་སྲས། ལྷ་བཙུན་ཆེ་བ་དང་། སེ་ཆེན་ཐའི་ཇིས་གཙོས་པའི་འགྲུལ་པ་དང་དམག་དཔོན་ཆེ་བ་སླེབས། དེ་ཡང་ཤིང་སྦྲུལ་ལོ། ཕག་མོ་བ་དང་ཞོ་དཀར་ནག་སོགས་ཀྱིས་སྡེ་པ་སྐྱིད་ཤོད་པའི་སྒར་གཏོར། སྐྱིད་ཤོད་ཀྱི་དྲུང་འཁོར་མང་པོ་འཐབ་གྲལ་དུ་བཤོར་བའི་སྡེ་གཟར་ཤིན་ཏུ་ཚན་ཆེ་བ་ལངས། དེའི་རྩ་བ་ཡང་ཞྭ་དམར་བས་ལེགས་ཇའི་ཞུ་ཡིག་ཕུལ་བའི་ལན་བཞུ་ཁང་རབ་འབྱམས་པ་སོགས་ཀྱིས་ལོག་པར་བཏབ་པ་དེ་ལ། ཞྭ་དམར་བ་དང་དྲུང་ཡིག་འཇམ་དབྱངས་པ་སོགས་ཀྱིས་དགའ་ལྡན་ཕོ་བྲང་གི་དྲུང་འཁོར་རྣམས་ལ་ཡོན་ཏན་མེད་ཚུལ་གྱི་ངན་རྩོམ་ཁ་ཡར་ཞིག་དང་། རིང་པོར་མ་ལོན་པར་ཞྭ་དམར་བ་ལྷ་སར་ཕེབས་ཏེ། ཇོ་བོའི་སྙན་དར་གྱི་ཁ་ཡིག་ལ། གབ་ཚིག་ལ་བརྟེན་པའི་ངན་རྩོམ་གྱི་རྣམ་པ་མང་པོ་ཞིག་མཛད་པ་དེ་དཀོན་གཉེར་དབོན་ཕྱིས་འབྲས་སྤུངས་སུ་བསྐྱལ། དེའི་ནང་དུ། བྲག་ཏི་
ཞག་གསུམ་གྱི་གྲོང་ཁྱེར་ན། ཁོང་ར་གན་ཚོགས་པའི་རུ་རྣོན་ཚོ། །རྗེ་ཆོས་དབྱིངས་རི་དྭགས་ཐང་བཞུགས་ལ། །རྭ་རྣོ་རྟུལ་འགྲན་པ་ཅི་རང་ཡིན། །དེ་མི་འབྱུང་བ་ཇོ་བོ་ཁྱེད་རང་གི་ཤེས། །ཞེས་སོགས་ལ་ཤེས་རབ་ཆེ་ཆེ་མོ་མང་པོས་འབྲུ་གཉེར་བར། བྲག་ཏི་ཞག་གསུམ་སེ་འབྲས་དགེ་གསུམ། དགེ་ལུགས་གཡག་དང་ཀར་ལུགས་སེང་གེ་ལ་སྦྱར། རྣ་བ་རྣ་ཡི་ཨ་ལོང་དེ། །སོར་ཕྱེད་ཀྱིས་འཇལ་རིན་མི་གདའ་ཡང་། །ནམ་ཞིག་ཁྱབ་འཇུག་གི་འདོམ་པས་ཀྱང་། །མི་འཁྱུད་པ་ཞིག་བྱུང་ན་ཅུག་རང་བྱེད། །ཅེས་པ་ཀར་དགེའི་ཀུན་སློང་ད་ལྟ་སོར་གྱིས་འཇལ་རྒྱུ་མེད་པ་ལྟ་བུའི་ཆུང་བ་དེ། ཕུགས་འཕེལ་ནས་ལྷ་ཁྱབ་འཇུག་གི་འདོམ་པས་ཀྱང་མི་འཁྱུད་པའི་དོན་དང་། མདོར་ན་སྙན་དར་གྱི་ཁ་ཡིག་མཐའ་དག་ལ་འབྲུ་རྒྱབ་ནས། རང་ཕྱོགས་ལ་དམིགས་མ་དམིགས་ཅི་ལྟར་ནའང་། ཡིན་པར་ངོས་བཟུང་སྟེ་གླེང་བརྗོད་མང་པོ་བྱས། དེའི་ལན་ལ། སོག་པོས་སྒར་པའི་རྟ་དྲེའུ་ཕྱགས་པས་བསྟན་འགྲོའི་ཕན་བདེ་འཇོམས་པའི་གཞི་ཆེན་པོ་ཐིངས་པ་ཡིན་ཟེར། སྔོན་རྗེ་ཆོས་གྲགས་རྒྱ་མཚོས། རིན་སྤུངས་དོན་ཡོད་རྡོ་རྗེ་བསྐུལ་ནས། གཞིས་ཀ་སྣེལ་པ་ཡུལ་བཏོན། ས་ནག་མར་དགོན་པ་བཏབ་སྟེ། སེར་འབྲས་རྣམས་རང་ཤུགས་ཀྱིས་བསྐམ་འགྲོ་རྩིས་ཀྱི་གནང་སྒོ་ལ་བརྟེན། ཀུན་སློང་ཆེན་པོར་སོང་བ་དག་རིམ་གྱིས་མི་གསལ་བར་གྱུར་པ་རི་མོ་རྙིང་པ་གབ་པའི་ཞིག་གསོས་ལྟ་བུར་སོང་། གང་ལྟར་སྡེ་གཟར་སྔོན་མའི་ལན་དུ་ཞི་དྲག་གང་འོས་བྱེད་པར་འོངས་པར། ཞབས་དྲུང་གཡུལ་རྒྱལ་ནོར་བུ་དང་། སྐུ་མདུན་རིན་པོ་ཆེ་སོགས་འཇིག་རྟེན་གྱི་མེས་པོ་རྣམས་ཐུགས་རྩེ་མཐུན་པར་ཞི་བའི་ལབ་ཁོན་མཛད་རྩིས་ཐོག་ཏུ་ཁེལ་ན། རང་གཞན་ཐམས་ཅད་ལ་ལེགས་པ་ཞིག་ཡོང་རྒྱུ་ཡིན་འདྲ་
ཡང་། སྐྱིད་ཤོད་ཀྱི་སྡེ་པ་བསོད་ནམས་རྣམ་རྒྱལ་དང་འདན་པ་འཚོ་བྱེད་སོགས་མང་པོ་ཞིག་གིས་སྡེ་གཟར་བྱས་ན་ལེགས་པའི་གྲོས་ཤེད་ཀྱི་དབང་དུ་སོང་སྟེ། ཕར་རྒོལ་གྱི་དུས་ཟིང་བསླངས་པས། ཡར་གཙང་གི་དཔུང་ཆེན་པོ་སྐྱིད་ཤོད་ནོར་འཛིན་གྱི་ལྟེ་བར་འོངས། ས་ཆ་རྫོང་གཞིས་ཀྱི་བཅད་གྲས་དང་ཆད་ལས་བྱུང་། ཧོར་སོག་གི་དཔུང་ཆེན་པོ་དུས་མཐའི་རླུང་ལྟར་འཚུབ་པ་རྣམས་དྲག་པོ་མིག་གསུམ་པ་ཡང་འདར་ཞུམ་མེ་གཏོང་བའི་སྔགས་རྒན་རྣམས་ཀྱིས་སྐད་ཅིག་ལ་རང་ཡུལ་དུ་བསྐྲད། མཆོད་ཡོན་རྣམས་མཛད་དཀའ་བ་འགྱུར། དེ་ཡང་བཀའ་ཆེམས་སུ། གཉིས་སྐྱེས་ཀྱི་ཆ་ལུགས་མ་བླངས་པར། །འགུ་རུའི་ཚེ་དཔལ་རིང་བར་ལུས། །དཔལ་དེ་ཡི་ཕུན་ཚོགས་ཡིད་དབང་གི །དྲན་ཡུལ་དུ་གྱུར་པས་སྣང་པ་སྐྱོ། །ཞེས་པའི་དོན་བོད་དུ་ཕེབས་སྐབས་དབུ་སྐྲ་ལྕང་ལོ་ཅན་དང་སྐུ་ཆས་རབ་བྱུང་གི་རྟགས་སུ་ཡོད་འདུག་པ། ཇོ་བོ་རིན་པོ་ཆེའི་སྐུ་མདུན་དུ་དབུ་སྐྲ་མ་ཞུས་ཕན་བཅད་ཁྱིམ་པའི་རྟགས་ཅན་དུ་ཡོད་ན་སྐུ་ཚེ་མཐར་ཕྱིན་ཅིང་མངའ་ཐང་ཆེ་བར་འོང་རྒྱུ་ལ་རྟེན་འབྲེལ་འཕྱུགས་པས། བསྟན་པའི་འཕེལ་འགྲིབ་དང་ཞམ་འབྲིང་བ་ལ་བརྟེན་པའི་གྲ་འགྲིག་མི་འགྲིག་སྣ་ཚོགས་འབྱུང་བའི་ལུང་བསྟན་དུ་མངོན་ནོ། ། རིང་པོར་མ་ལོན་པར་སེ་ར་ཐེག་པ་ཆེན་པོའི་གླིང་དུ་ཕེབས། ཚོགས་སུ་སྤྱི་ཆོས་གནང་བ་དང་བཅས་རྒྱུན་རིང་ཙམ་བཞུགས། དེ་སྐབས་ལམ་པ་རབ་འབྱམས་པ་བསོད་ནམས་གྲགས་པས། དཔོན་སློབ་པཎ་ཆེན་རིན་པོ་ཆེར་འཇིགས་བྱེད་ཀྱི་འཁྲུལ་འཁོར་སོགས་ཕྱག་ལེན་མང་དུ་ཞུས། དཔོན་སློབ་རིན་པོ་ཆེར་མ་བཞུགས་པ་ཇོ་ནང་སྤྲུལ་སྐུ་ཀུན་དགའ་སྙིང་པོར་ཞུ་བར་ཕྱིན། ཇོ་ནང་སྤྲུལ་སྐུ་ལ་ཁོང་རང་གི་ཡབ་མེས་སོགས་
བླ་མ་གཞན་ནས་བརྒྱུད་པའི་འཇིགས་བྱེད་ཀྱི་ཆོས་བཀའ་རེ་མང་ཡོད་འདྲ་ཞིང་། སྲད་རྒྱུད་པའི་མགོན་ཁང་གི་ཤིང་སྒམ་ཆུང་ངུ་ཞིག་ནས་རྙེད་པའི་གདམས་པ་ཟབ་ཟབ་མོ་འདྲའི་དཔེ་ཆ་འབྱོར་བ་རྒྱུན་མེད་ཀྱང་རྫོགས་པར་ཞུས། དཔོན་སློབ་པཎ་ཆེན་རིན་པོ་ཆེའི་ཕྱག་ཏུ་ཕུལ། འདི་སྐོར་གྱི་ལོ་རྒྱུས་ཁུངས་དག་གི་ཞིབ་ཆ། གུ་གེ་གྲུབ་ཆེན་སྙིང་སྟོབས་རྒྱ་མཚོ་དང་། ལྷ་པའི་ཞབས་དྲུང་སྐུ་སྐྱེ་བློ་བཟང་བསྟན་པ་དར་རྒྱས་སོགས་མང་པོ་ཞིག་གི་ངག་ནས་གླེང་ངོ་། ། དེ་ནས་དཔོན་སློབ་པཎ་ཆེན་རིན་པོ་ཆེའི་བཀའ་ཤོག་བཀའ་ངག་དང་བཅས་ཏེ་རབ་འབྱམས་པ་སྐུ་ཞབས་སུ་རྫོང་སྟ་གནང་བས་རང་བཞུགས་ཐོག་འབྱོར། ཞུ་དོན་སྙིང་པོ་ཡར་གཙང་སོགས་ཀྱིས་རང་ཕྱོགས་ཀྱི་བསྟན་པ་ལ་རྨ་ཆེན་པོ་བྱུང་བ་འདི་ལ། ངེད་རང་ལྟ་བུས་སྐུ་རིམ་གྱི་ཕྱག་གཡོག་ཞུ་དགོས་རྒྱུར། བསམ་གྲུབ་རྩེའི་ཁ་འོག་ཏུ་སོང་བས་བྱེད་མ་བདེ་བས། རབ་འབྱམས་པ་འདི་པས་ཕྱག་གཡོག་ཞུས་ནས། སྐུ་རིམ་གནང་དགོས་ཚུལ་གྱི་རྒྱུ་མཚན་ཞིབ་པར་ཡོད་འདུག །དེ་ནས་རབ་འབྱམས་བསོད་གྲགས་པས་མགོ་བྱས་ཏེ། ཐུགས་དམ་བསྐང་གསོ་རྣམས་ཀྱི་སྟེང་དུ་བཀའ་རབ་འབྱམས་ཁ་ཤས། སྐུ་གཞོགས་གྲྭ་ཚང་ཕན་བདེ་ལེགས་བཤད་གླིང་པའི་གྲྭ་པ་རྒན་གྲྭ་ཁ་ཡར་དང་བཅས་ཁྱོན་གཅིག་ཏུ་འཚོགས་ནས་དྲུག་ཅུ་པ། ཡང་མགོན་རིན་པོ་ཆེ་དཔོན་སློབ་ཀྱིས་མགོན་པོ་ཕྱག་བཞི་པའི་སྒྲུབ་པ། གུང་རུ་དབྱངས་དཔོན་པ་མཐུ་སྟོབས་གསང་པའི་དབང་ཕྱུག །ཟུར་གྱི་སྔགས་འཆང་ཆེན་པོ་གཞོན་ནུ་དོན་གྲུབ། བྱར་པོ་སྔགས་འཆང་བ་རྣམས་ཀྱིས། མགོན་པོ་ཞལ་དང་། ཚེ་འཆར་གྱི་སྒྲུབ་པ་བཙུགས། སྒྲུབ་ཁག་མང་བས་གླིང་གསེབ་ཐམས་ཅད་རྔ་བརྡུང་འུར་ཆིལ་ལེ་བ་བྱུང་། དཀའ་བཅུ་ཨ་སྐྱག་ཟེར་
བའི་མཚན་ཉིད་པ་རྒན་པོ་ཞིག་གིས། སྟོན་པ་ཤཱཀྱ་ཐུབ་པས་བྱམས་པའི་ཏིང་ངེ་འཛིན་གྱི་སྒོ་ནས་བདུད་བཏུལ་བར་འདུག །འབྲོག་པ་ལྷ་གསོལ་འདྲ་བ་འདི་སུའི་ལུགས་ཡིན་ཞེས་ཟུར་ཟ་བ་བྱས་སྐད། སྒྲུབ་ཁག་སོ་སོས་གཏོར་ཟོར་འཕེན་པའི་ནུབ། དུས་མིན་དུ་རླུང་ཆེན་པོ་འཁྲུགས། གནམ་ས་རལ་བ་ལྟ་བུའི་འབྲུག་སྒྲ་དང་། དུས་ཀྱི་མེ་ལྕེ་འབབ་པ་ལྟ་བུའི་གློག་འཁྱུག་ཅིང་སེར་བ་དྲག་པོ་དང་བཅས་པོ་ཏ་ལའི་རྫོང་གི་ལྕགས་རི་ལ་འཁྱུག་བརྒྱབ་སྟེ། མངོན་བརྗོད་ཀྱི་ལྟས་འཕྲལ་དུ་བྱུང་། མཁར་ནག་ལོ་ཙཱ་བས། དེ་ནས་སེར་འབྲས་གདན་ས་ཆེར། །རེ་ཞིག་ཐུགས་དམ་ཟབ་བཞེས་མཛད། །མི་བསྲུན་སྐྱེ་བོའི་དམག་དཔུང་གིས། །དབུས་ཕྱོགས་སྲོག་ཆགས་སྡུག་བསྔལ་བར། །སྙིང་རྗེས་བསྐྱོད་པའི་སྔགས་ཁང་དུ། །འགལ་བྱེད་ལོ་ལ་གཏོར་ཟོར་གྱིས། །ཆོས་སྐྱོང་རྦད་པས་མུན་ཆེན་ནང་། །ལྷུན་སྟུག་སྤྲིན་འཁྲིགས་གློག་འཁྱུག་ཅིང་། །ནམ་མཁའ་རལ་འདྲའི་སྤྲིན་དབྱངས་དགོད། །ལྕེ་འབབ་སེར་ཞུན་འཕྱུར་བའི་རླབས། །རི་བོ་འདར་བའི་འུར་སྒྲ་ནི། །ཤིན་ཏུ་འཇིགས་པས་སྐྲག་བྱེད་པས། རིང་པོར་མ་ཐོགས་དགྲ་བོ་རྣམས། །ནང་ཞིག་སྡིག་པའི་ཚང་བཞིན་གྱུར། །དེ་སླད་འདྲེན་པ་འདི་ཡ་མཚན། །མཐུ་སྟོབས་ཆོས་ཀྱི་རྒྱ་མཚོར་གསོལ། །ཞེས་སོ། །དེ་ནས་འབྲས་སྤུངས་སུ་ཕེབས། སྔགས་ཁང་དུ་སྒྲུབ་པ་འཛུགས་པ་སོགས་སྐུ་རིམ་རྣམ་གྲངས་མང་དུ་མཛད། ཐང་ཅིག་དབྱངས་དཔོན་པས་དཔལ་ལྡན་ལྷ་མོ་དམག་ཟོར་མའི་གཏོར་སྒྲུབ་མཛད་དེ་ཟོར་འཕེན་པ་ལ་མངོན་དུ་ཕྱོགས་པ་ན། རབ་འབྱམས་པ་བསོད་ནམས་གྲགས་པ་དང་། བྲ་ཉི་རབ་འབྱམས་པ་རྣམས་ཀྱིས་ཕྲག་དོག་གིས་ཆོས་སྐྱོང་འདི་བཀའ་གཉན་པས་གཤགས་གཏོར་
ཙམ་ལས་ཟོར་མི་འགབ་བར་ཆད་འོང་སྙན་འབུལ་ཞུས་པར་བརྟེན། ཐུགས་ཐེ་ཚོམ་དུ་གྱུར་ནས་གཏོར་ཟོར་འཕངས་པ་འགབ་མི་འགབ་ཀྱི་ཕེབས་སྒོ་གནང་བས་དབྱངས་དཔོན་པ་ཐུགས་འུར་ཏེ། ངས་ཆོས་སྐྱོང་འདིའི་མན་ངག་ཐམས་ཅད་རྗེ་གོང་མ་དང་བ་སོ་རྗེ་དྲུང་གི་སྐུ་གཞོགས་སུ་ཞུན་ཐར་བཅད། བསྙེན་སྒྲུབ་ཚད་དུ་འཁྱོལ་བར་བྱས། བཟླས་པ་རྐྱང་པ་ཡང་བྱ་བ་ལྷག་སོང་བ་ཡིན། དན་འབག་ཡས་སྣ་མས་སྣ་ལ་ཐེམ་པ་བཅོལ་ནས་སྡོད་དགོས་པའི་དུས་ཚོད་འདི་ལ་ལས་སྦྱོར་མི་བྱེད་ན་ག་ཙ་ན་བྱེད། ལོ་གསུམ་ཚུན་གྱི་སྐུ་ཁག་ངེད་རང་གིས་འཁུར། ཁོང་ཚོས་གཤགས་གཏོར་བྱེད་ཟེར་བའི་ཉ་མགོ་ཅི་ནོན། གཤགས་ན་གཤགས་ལུགས་གཙུག་བྱེད། གཏོར་ན་གཏོར་ལུགས་གཙུག་བྱེད་ཅེས་སོགས་མང་དུ་ཞུས་ནས་གཏོར་མ་འཕེན་པར་ཐག་བཅད། ཤོ་ལ་འདེབས་པ་དང་། བྱང་དམར་ལ་འཇུག་པའི་ལས་སྦྱོར་མཛད་པས། ཡར་གཙང་སྐུར་གསུམ་གྱི་ཞལ་ངོ་རྣམས་ཀྱི་མཚན་བྱང་གི་ཁྲོད་ནས། ཡར་རྒྱབ་ཞབས་དྲུང་བདུད་འདུལ་གྲགས་པའི་མཚན་ཐོག་མར་བོར་ཏེ་རྟགས་མངོན་སུམ་དུ་བྱུང་། དེ་སྐབས་མངོན་སྤྱོད་ཀྱི་ལས་སྦྱོར་རྣམ་གྲངས་ཧ་ཅང་མང་བས། རྗེའི་ཞལ་སྔ་ནས་སྟག་ལུང་བྲག་པ་དེ་ཐུགས་ཅུང་ཟད་མ་རེངས་པར། ཐོག་མར་སྐྱེས་བུ་ཆེ་འབྲིང་ཆུང་གསུམ་གྱི་ལམ་ལ་གོ་རིམ་མ་ལོག་པར་ཁྲིད་ནས། རྡོ་རྗེ་ཐེག་པའི་མཆོག་ཐུན་གྱི་དངོས་གྲུབ་བསྒྲུབ་པའི་རིམ་པ་རྣམས་མཛད་དགོས་པ་ལ། སྐུ་ཡོན་གཞན་རྣམས་འབུལ་བའི་མགོ་བྲེས་ཙམ་ཡང་མ་དོད་པར། གཤིན་རྗེའི་འཁོར་ལོ་སོགས་དྲག་པོའི་ལས་སྦྱོར་ལ་བཙན་ཁྲིད་དུ་བྱེད་པ་འདི། དབེན་ས་རྗེ་དྲུང་གི་མཛད་ལུགས་ཐུགས་ལྷུས་མ་ཐིངས་གསུངས་སྐད། དགོས་པའི་དབང་གི་ལས་སྦྱོར་དེ་དག་གནང་དགོས་ངེས་
ཡིན་ཚེ། རྡོ་རྗེ་སློབ་དཔོན་གྱི་གཙོ་བོ་དབྱངས་དཔོན་པར་མཛད་བཅུག་ན། ཁོང་ཐམས་ཅད་མཁྱེན་པ་བསོད་ནམས་རྒྱ་མཚོ། རྗེ་དྲུང་ལྷ་དབང་པ། བྱང་བདག་པོ་ཡབ་སྲས། ཆོས་རྗེ་དྭགས་མ་བ། སྡེ་པ་ཡུག་ནས་སོགས། སྔགས་འཆང་ཁ་ཡོད་ལག་ཡོད་མང་པོ་ལ་མན་ངག་གི་ཞུན་ཐར་བཅད་པའི་ཁུངས་ལྡན་ཡིན་ནའང་། ཁོང་དང་ཡང་དགོན་རིན་པོ་ཆེ་སོགས་དཔྱོད་ལྡན་རྣམས་མཛད་མ་བདེ་བས་རེག་ལ་མ་འབྱར་ལྟ་བུར་སོང་། རབ་འབྱམས་པ་ཤེས་རབ་ཆེ་ཡང་། རྟོ་གེ་བ་རྒན་པོའི་ཉམས་ཀྱི་རྩིང་ཧྲལ་དང་། ཁོང་རང་གི་རང་བཞིན་ལས་གྲུབ་པའི་ཧང་རྒྱག་ཟུང་དུ་འབྲེལ་བའི། མཐོང་བརྒྱུད་ཀྱི་ཕྱག་ལེན་ལ་མ་ལྟོས་པའི་རང་བཟོ་མང་པོ་བྱེད་ཡོད་འདུག་གོ །དེ་ཡང་དཔོན་སློབ་པཎ་ཆེན་རིན་པོ་ཆེར་བཀའ་ཆོས་ཐོག་མར་གསན་པའི་ཚེ། རྡོ་རྗེ་འཕྲེང་བའི་སྙན་གསན་གནང་བར། སྔ་སོར་ངེད་རང་གིས་འདི་ཡོངས་རྫོགས་ཞུ་མྱོང་བ་ཞིག་མེད་པས། སླར་རྩོལ་བ་དང་རྟོག་འཇུག་སོགས་བྱེད་ཁྱད་ནས་ལོ་ལྔ་དྲུག་ཞིག་གི་བར་འགྱངས་ཆ་ཞུས། དེ་ནས་འབུལ་ཐུབ་པ་བྱེད་གསུང་བའི་ཞལ་ལེན་གནང་། རབ་འབྱམས་པ་བསོད་ནམས་གྲགས་པ་ཇོ་ནང་སྤྲུལ་སྐུ་ཀུན་དགའ་སྙིང་པོའི་དྲུང་དུ་རྡོ་རྗེ་འཕྲེང་བའི་དབང་ཞུ་བར་བཏང་བ་འདྲ་ཟེར། འགའ་ཞིག་ནི་བླ་མ་རིས་སུ་མ་བཅད་པའི་གསུམ་བཞི་ཞིག་ནས་ཁུ་བསྡུས་གསུང་བ་དངོས་སུ་ཐོས་ཞེས་གླེང་། གང་ལྟར་ལྕགས་ཕག་ནང་དུ་འབྲས་སྤུངས་སུ་ཕེབས་ཏེ། པཎ་ཆེན་ཆོས་ཀྱི་རྒྱལ་པོ་ཉིད་དཀྱིལ་འཁོར་རྒྱ་མཚོའི་གཙོ་བོར་བཞེངས་ནས་རྡོ་རྗེ་འཕྲེང་བའི་དབང་འབུལ་བ་གནང་། སྡེ་པ་སྣང་རྩེ་ནས་ཀྱིས་སྟོན་ཟེར་བའི་གསང་བའི་ལུང་བསྟན་དུ། ནུབ་ཕྱོགས་གཙང་གི་ཕྱོགས་ནས་དམགས་མཚོ་བརྡོལ། །གྲ་
དོལ་གཞུང་གསུམ་སྦྲང་མ་རླུང་ཁྱེར་འདྲ། །ཞེས་པའི་ལུང་བསྟན་ཐོག་ཏུ་བབས་ཏེ། དེ་ལོ་གཙང་ས་དཔོན་ཞང་ཐུགས་འདོད་མ་མཉམ་པར་བརྟེན། གཙང་དཔུང་གཏོས་ཆེ་བ་ཡར་རྒྱབ་ཏུ་འབྱོར། ཡར་རྒྱབ་པ་དཔོན་བློན་གསོལ་སྐལ་གྱི་སྟོང་དུ་བཞུགས་དགོས་པའི་གནས་གཤིས་ལ་བརྟེན། མཚན་མཐུ་སྟོབས་རྒྱ་མཚོ་ཞེས་བསྒྱུར། ལོ་འདི་བདག་གི་སྔ་ཕྱི་རྣམས་སུ་ལྷོ་བྱང་གི་འགྲུལ་པ་གཏོས་ཆེར་འོངས་ནས། བརྒྱ་འབུལ་སྟོང་འབུལ་གྲངས་ཀྱིས་མི་ཆོད་པ་ཕུལ། དེ་དག་ལ་སོ་སོར་འདོད་ཆོས་ཀྱི་རིམ་པ་གནང་། ཟང་ཟིང་གི་སྒོ་ནས་རེ་བ་བཀང་བ་སོགས། ལུགས་ཟུང་དང་འབྲེལ་བའི་མཛད་པ་འཕྲིན་ལས་བསམ་གྱིས་མི་ཁྱབ་བོ། །ཨེ་མ་དཔག་བསམ་ཡོངས་འདུའི་ལྗོན་པ་ལས། །འདོད་པའི་རེ་བ་མ་ལུས་ཡོངས་སྐོང་བ། །དངོས་པོའི་ངོ་བོ་ཙམ་གྱི་གཤིས་ལུགས་ལས། །ཕུལ་བྱུང་ཐུགས་རྗེ་ཆེན་པོས་བསྐུལ་བ་ཡིན། །རང་བདེའི་ཕུན་ཚོགས་འཆི་མེད་དགའ་ཚལ་ལས། །གཞན་ཕྱིར་མེ་འོབས་ལྟ་བུའི་འཁོར་བ་ལ། །དགའ་བར་སྤྱོད་འདི་འཕགས་ཆེན་དམ་པ་ཡི། །སྙིང་སྟོབས་མཆོག་ལས་གཞན་གྱི་སྤྱོད་ཡུལ་མིན། །འགྲོ་ལ་རྗེས་སུ་བརྩེ་བའི་སྙིང་རྗེའི་ལྷ། །མི་བསྲུན་དགྲ་ལ་ཁྲོས་པའི་སྒྱུ་དྲའི་གར། །བསྟན་ཚེ་གཞན་འཕྲུལ་གནས་ནས་འདོད་ལྷའི་བུ། །འཇིགས་ཏེ་ལུས་མེད་ཟོལ་གྱིས་རྫུ་ལ་བརྟེན། །གཙང་སྡེ་སྲིད་ཕུན་ཚོགས་རྣམ་རྒྱལ་ལྷ་སར་ཕེབས། ཚེ་དབང་བརྒྱ་རྩ་དང་ཡན་ལག་བརྒྱད་པའི་སྡོམ་པ་ཞུ་བའི་སྙན་གསན་བྱུང་བ།གནང་ཐུབ་ན་མཆོད་ཡོན་ཚང་མ་ལ་སླེབས་དཀྱུས་ཆེ་བ་ཡོང་རྒྱུ་ཡིན་འདྲ་ཡང་། རབ་འབྱམས་པ་བསོད་ནམས་གྲགས་པས། སྡེ་པ་གཙང་པ་བསྟན་དགྲ་ཡིན་པས་དེ་འདྲ་གནང་བ་མི་རིགས། མྱུར་དུ་
བསྒྲལ་བ་ཡིན་ཞེས་བཀག །རྒྱལ་དུ་ཕེབས་པའི་ལམ་ཞོར་བསམ་ཡས་ཀྱི་གནས་གཟིགས་གནང་བ་ཞིག་ལ། བསྟན་སྲུང་གནོད་སྦྱིན་ཆེན་པོ་དང་དཔེ་དཀར་ལྕོག་ཏུ་མཇལ་བར། དགྱེས་པའི་རྣམ་འགྱུར་མང་དུ་མཛད། རྒྱལ་དུ་དགུན་ཁ་བཞུགས་པ་ཞིག་ལ། དབྱར་དུས་ལྟར་དྲོ་ཞིང་ཆུ་རྣམས་ཀྱང་ལྷུང་ལྷུང་སྙན་པའི་སྒྲ་སྒྲོག་ཅིང་འབབ་པ་བྱུང་བར། དབུ་མཛད་དབྱངས་དཔོན་ཡེ་ཤེས་རྒྱ་མཚོས་ད་ལོ་དགུན་ཤིན་ཏུ་དྲོ་བ་འདི་ཐུགས་རྗེའི་ཤུགས་ཡིན་པར་འདུག་ཞུས་པས། འདི་ཙམ་ལ་གནང་ཅི་ཡོད། དིང་སང་མཐའ་དམག་གིས་བོད་ལ་གནོད་པ་ཆེ་བ་ཡོང་གྲབས་བྱུང་རེས་ཀྱི་ཁ་གནོན་བྱས་པ་ཡིན། ད་དུང་ཡང་ངེད་ཁམས་བཟང་རིན་སོག་པོས་བོད་ལ་གནོད་པ་མི་ཡོང་། ཆོས་རྗེ་ཞྭ་དམར་བས། གྱོད་ཁ་སྨྲས་ཀྱི་ཕྲུག་གུ་མ་སྐྱེས་དགོས། །ཞེས་བཀའ་བཀྱོན་མཛད་བྱུང་ཡང་། དེའི་གནོད་ལན་དགོས་པ་མ་བྱས། ཨྱོན་པདྨ་ཡིན་བྱས་ན་ཁ་ཆེས། ཨྱོན་པད་འདྲ་ཙམ་ཡིན་བྱས་ཀྱང་ཆོག་པ་ཡོད་ཅེས་ཀྱལ་ཀ་གསུངས། ཐེངས་གཅིག་ལྷ་སའི་མཆོད་ཁང་མཇལ་སྐབས། ལྷ་རྗེ་དགེ་བ་འབུམ་གྱིས་གཙུག་ལག་ཁང་ལ་ཞབས་ཏོག་མཛད་པའི་གསུང་འཕྲོས་ཞིག་ལ་བརྟེན་ནས། ལར་འཁོར་བ་འདིར་ལན་མང་པོ་ཞིག་འཁོར་ཙ་ན། འདི་རུ་སྐྱེ་བ་མ་བླངས་ཞེས་མཐའ་མི་འདུག་གསུང་སྐད། སྡེ་པ་སྐུ་རབ་པ་གྲུབ་མཐའི་ཀུན་སློང་ལ་བརྟེན་པའི་ཐུགས་རུ་ང་ཞིང་ཕྲག་དོག་པས། བསྟན་པ་ལ་རེ་གནོད་བྱུང་བས་དེ་ལ་དམིགས་པའི་ལས་སྦྱོར་གནང་རེས་ཀྱིས། ཁོང་པ་རྫོང་གཞིས་གསར་དུ་ལོན་པ་སོགས་བསོད་ནམས་ཡར་འགྲོར་བྱུང་བ་ན། རབ་འབྱམས་པ་བསོད་ནམས་གྲགས་པས། སྐུ་རབ་པ་འདི་ཙཱ་རི་ཞིང་
སྐྱོང་གིས་བསྐྱབས་པར་འདུག །ད་ཆ་ཐོག་མར་ཞིང་སྐྱོང་བསྒྲལ་དགོས་ཟེར་ནས་འཇིགས་བྱེད་ཀྱི་དྲག་པོའི་སྦྱིན་སྲེག་ཏུ་ལྡུགས་པ། རྒྱལ་དགའ་ཚལ་གྱི་མགོན་ཁང་པོ་ཏ་ལའི་ཆོས་འབྱུང་སྟེང་གི་མགོན་ཁང་དུ། རྗེ་གོང་མའི་དུས་བཙུགས་པའི་ཞིང་སྐྱོང་གི་གཏོར་མ་གཏོར་གྲལ་ནས་འདོན་པ་སོགས་རྩིང་སྤྱོད་སྣ་ཚོགས་པ་ཞིག་བྱས། རབ་འབྱམས་དང་། གཟིམས་ཁང་གོང་སྤྲུལ་པའི་སྐུ་གཉིས་སྦྱིན་སྲེག་ལྡུགས་མཁན་ཡིན་འདུག་པར། ཉིན་གཅིག་ཁོང་རྣམ་གཉིས་ཀྱིས་དགའ་ལྡན་ཕོ་བྲང་ནས་སྔགས་ཁང་དང་། གཟིམས་ཁང་གོང་དུ་དོན་གཅོད་ཅིག་ལ་བྱོན་པ། མཆོད་ཁང་གི་རྒྱབ་ནས་ཁོང་དཔོན་སློབ་གཉིས་ཀར་གཟིགས་པར། གཙུག་ལག་ཁང་གིས་པུ་ཤུ་ལ་སླེབ་ལ་ཁད་བྱས་པའི་མི་ནག་པོ་དར་ནག་གི་འཇོལ་བེར་གྱོན་པ་རྐང་ཐང་ཅན་རྟ་ནག་པོ་སྒ་སྲབ་སྤྲས་པ་ཞིག་གི་འཐུར་ཐག་ནས་བཟུང་སྟེ། བསྒུགས་ཤིག་ལྟ་བ་ཡིན་ནོ་ཟེར། དེའི་མོད་ལ་རང་ཡལ་དུ་སོང་། རིང་པོ་མ་ལོན་པར་སྤྲུལ་པའི་སྐུ་ལྷ་སར་གཤེགས་སྐབས། མི་ནག་རྟ་ནག་གི་ཆོ་འཕྲུལ་ཆེན་པོ་དང་། རབ་འབྱམས་པར་ཡང་རྗེས་སུ་གཙང་བའི་བཀའ་བཀྱོན་ཕོག་པ་སོགས། མེ་དང་སྨ་རའི་དཔེ་ཁོ་ན་བྱུང་། སྟོང་སྐོར་ཞབས་དྲུང་རྒྱལ་བ་རྒྱ་མཚོ། འཕགས་པ་ལྷའི་མཆོག་གི་སྤྲུལ་སྐུ་འཕགས་པ་ཆོས་ཀྱི་རྒྱལ་པོ། བ་སོ་སྤྲུལ་སྐུ། པད་མོ་སྤྲུལ་སྐུ། ཤེར་དབང་སྤྲུལ་སྐུ་སོགས་མདོ་སྟོད་མདོ་སྨད་དང་རྒྱ་སོག་གི་བླ་ཆེན་མང་པོ་ཕེབས། ཡུལ་བབས་དང་བསྟན་པའི་ཟང་ཟིང་གི་འབུལ་བ་གྲངས་མེད་པ་ཕུལ། ཆོས་དང་འཇིག་རྟེན་གྱི་རེ་བ་ཡོངས་སུ་བཀང་། འཕགས་པ་ལྷ་དང་། བ་སོ་སྤྲུལ་སྐུ་གཉིས་ཀྱི་གཙུག་ཕུད་བཞེས། རྡོ་རྗེ་འཇིགས་བྱེད་བཅུ་གསུམ་མའི་དབང་དང་། ཐམས་ཅདམཁྱེན་པ་དགེ་འདུན་རྒྱ་མཚོའི་བཀའ་
འབུམ་ཐོར་བུའི་ལྗགས་ལུང་གནང་། བདེ་མོ་སྤྲུལ་པའི་སྐུས་ཐོག་མར་མཇལ་དུས། ཐམས་ཅད་མཁྱེན་པ་དེ་རབ་ཏུ་བྱུང་བ་ཞིག་ཡིན་པ་གཞིར་བཅས་ལ། དེ་ཉིད་ནི་ཁྱིམ་པ་གོས་དཀར་ཅན་ཞིག་སྣང་ཞེས་གསུངས་པས། ཉེ་འཁོར་བ་རྣམས་ཀྱིས།ཁྱེད་རང་སྤྱན་འཁྲུལ་བ་ཡིན་མོད།རབ་ཏུ་བྱུང་བའི་རྟག་ཁོ་ན་ཡིན་འདུག་ཅེས་སྨྲ་སྐད། ཐེངས་གཅིག་ནི་ལྷ་ཁྲོ་བོ་ཞིག་གི་རྣམ་པར་གཟིགས་གསུང་བ་དང་། ཉིན་གཅིག་དགའ་ལྡན་ཕོ་བྲང་གི་རབ་གསལ་དུ་བཞུགས་པའི་ཚེ། བདེ་མོ་སྤྲུལ་སྐུས་ཁོང་རང་གཅིག་པུར་ཤར་རྒྱག་ལ་བྱོན་པས། གསུམ་གདན་ཞིག་གི་སྟེང་ན། དིང་སང་འབྲི་ཆ་ལ་ཇི་ལྟར་འབྱུང་བ་ལྟར་གྱི་འབྲོམ་སྟོན་པའི་སྐུའི་རྣམ་པ་དང་། དེ་དང་ཞལ་སྤྲོད་ཀྱི་ཚུལ་དུ་མི་གང་ཙམ་གྱི་མཐོ་བར་ཇོ་བོ་ཨ་ཏི་ཤ་ཁྲུ་གང་བ་ཞིག་འོད་ཀྱི་དཀྱིལ་ན་སྒོ་རེ་བཞུགས་པ་མཐོང་བས། རེ་ཞིག་སྨྲ་མ་ཤེས་པར་ཧུར་རེ་ལུས། བཀའ་ལས་སྤྲུལ་པའི་སྐུ་དེར་བཞུགས་ཤིག་གསུངས་པ་ན། ཉམས་སྣང་དེ་འགགས་ཚར་འདུག །དེ་ནས་རྒྱུ་མཚན་དེ་ལྟར་བྱུང་ཞུས་པས། སྤྱན་འཁྲུལ་པ་ཡིན་ཞེས་ཞལ་གྱིས་མི་བཞེས་སྐད། རྒྱལ་དང་འོལ་ཁ་ཕྱོགས་སུ་ཕེབས། ཡུན་རིང་བར་བཞུགས་ཤིང་མཐོང་ཐོས་དྲན་རེག་གི་སྒོ་ནས་འགྲོ་བ་རྣམས་སྨིན་གྲོལ་ལ་བཀོད། ཞབས་ཅུང་ཞིག་བསྙུན་པ་ལ་ཆབ་ཚན་གནང་། དེའི་ཚེ་སྐུ་མདུན་རིན་པོ་ཆེ་གཤེགས་པའི་གནས་ཚུལ་འབུལ་མི་སླེབས་པར། ཕྱག་མཛོད་བསོད་ནམས་རབ་བརྟན་ལ། དགོངས་རྫོགས་གཏོང་ལུགས་ཀྱི་བསླབ་སྟོན་དང་། ངེད་རང་རྐང་པའི་འཕྲོད་བསྟེན་གྲུབ་འཕྲལ་སླེབ་ཡོང་བཀའ་ཕེབས་གནང་། དགུང་ལོ་ཉེར་དྲུག་པ་ཤིང་སྟག་ཧོར་ཟླ་བཅུ་གཉིས་པའི་དུས་ཚེས་དགེ་བར་དཔལ་ལྡན་འབྲས་སྤུངས་ཆོས་ཀྱི་སྡེ་ཆེན་པོར། དོན་གྱི་སླད་དུ་མཚན་ནས་སྨོས་ཏེ་
པཎ་ཆེན་རིན་པོ་ཆེ་བློ་བཟང་ཆོས་ཀྱི་རྒྱལ་མཚན་པས་མཁན་པོ་དང་། པཎ་ཆེན་བསོད་ནམས་གྲགས་པའི་སྤྲུལ་སྐུ་བསོད་ནམས་དགེ་ལེགས་དཔལ་བཟང་གི་ལས་སྒོ་བ། གཞན་ཡང་གསང་སྟོན་དུས་བགོ་བ་སོགས་ལས་ཀྱི་ཁ་སྐོང་བའ་ིདགེ་འདུན་གྲངས་ཚང་བའི་དབུས་སུ། དར་ཆོག་ཉེས་མེད་ཕུན་ཚོགས་ཀྱི་སྒོ་ནས་ཚངས་པར་སྤྱོད་པའི་གཙོ་བོ་བསྙེན་པར་རྫོགས་པའི་སྡོམ་པ་བཞེས་ཏེ། ངུར་སྨྲིག་འཆང་བ་རྣམས་ཀྱི་རྒྱལ་མཚན་གྱི་ཏོག་དམ་པར་གྱུར། མཁར་ནག་ལོ་ཙཱ་བས། དེ་ནས་ཀུན་དགའི་གནམ་ལོ་ལ། །རྒྱལ་ཟླ་དྲག་ཚེས་འཕྲོོད་སྦྱོར་བཟང་། །དུས་དེར་དཔལ་ལྡན་འབྲས་སྤུངས་སུ། །པཎ་ཆེན་ཐམས་ཅད་མཁྱེན་པ་དང་། སྤྲུལ་སྐུ་བསོད་ནམས་དགེ་ལེགས་དཔལ། །མཁན་སློབ་དགེ་འདུན་ཁ་སྐོང་བཅས། །ཉེས་མེད་ཕུན་ཚོགས་བསྙེན་པར་རྫོགས། །ཞེས་སོ། །དེ་ཡང་ཞལ་སྔ་ནས་ཁྲི་རིན་པོ་ཆེ་སངས་རྒྱས་རིན་ཅེན། ཁྲི་རིན་པོ་ཆེ་དགེ་འདུན་རྒྱལ་མཚན། ཞལ་སྔ་ནས་ཆོས་གཉེར་གྲགས་པ། དཔོན་སློབ་པཎ་ཆེན་རིན་པོ་ཆེ། གཟིམས་ཁང་གོང་སྤྲུལ་པའི་སྐུ། འོལ་ཁ་ནས་དྲུང་པ་མཁས་བཙུན་པ། རྗེ་ནོར་བུ་བ་སོགས་རང་ཕྱོགས་ངོས་ཀྱི་བླ་མ་མང་པོ་ལ་མདོ་སྔགས་ཀྱི་ཆོས་ཚུལ་ཇི་སྙེད་པ་གསན་དེ་ཡང་སྤྱིར་དགེ་བའི་བཤེས་གཉེན་བསྟེན་ཚུལ་ལ། འབྲོམ་ཆོས་ཀྱི་རྒྱལ་པོ་དང་། རྗེ་བཙུན་མི་ལ་གཉིས་ཀྱི་རྣམ་པར་ཐར་པ་ལ་འགྲན་བཟོད་པའི། ཐ་ན་བཞད་གད་དང་ཀུ་རེ་ཙམ་གྱི་ཕྱིར་དུ་ཡང་མི་གུས་པའི་རྣམ་འགྱུར་ཡེ་མི་མཛད། རྗེ་ཞལ་སྔ་ནས་སངས་རྒྱས་རིན་ཅེན་གྱི་སྐུ་གདུང་ཞུགས་སུ་ཕུལ་བ། སྐུའི་སྟོད་ཀྱི་ཆ་ཆེར་མ་ཚིག་པའི་འཕྲལ་དུ་ལྟ་སྣང་ལེགས་རྒྱུ་མེད་པ་ཞིག་སྤྱན་འབེབས་ལ་ཁྱེར་ཡོངས་པ། དེར་འཁོར་མང་པོ་ཞིག་གིས་ཡ་ང་བའི་རྣམ་པ་བྱེད་པ་ལ། རྗེ་འདིས་ཕྱག་ཏུ་བཞེས་ཤིང་
དབུ་ཐོག་ཏུ་ཡུན་རིང་པོའི་བར་དུ་བཞག་ནས་སྨོན་ལམ་འདེབས་པ་གནང་། འོལ་ཁའི་དྲུང་པ་མཁས་བཙུན་པ་དེ། སྡེ་པ་འོལ་ཁ་པའི་མཆོད་གནས་དགོན་སྦུག་གི་བླ་ཆུང་ཡིན་ཀྱང་། ཁོང་པ་ལ་བཞུགས་གདན་མཉམ་པ་ཙམ་འདིང་ཞིང་གསོལ་ཇ་སོགས་སྔོན་ལ་བཞེས་སུ་བཅུག །དཔོན་སློབ་པཎ་ཆེན་རིན་པོ་ཆེ་དང་། གཟིམས་ཁང་གོང་སྤྲུལ་པའི་སྐུ་གཉིས་ལ་བཀུར་བཟོས་ཆེས་པས། དྲུང་འཁོར་རྙིང་པ་རྣམས་བཀའ་ཆོས་གསན་ཡང་འདི་འདྲ་རང་མི་རིགས་སྔར་ནས་སྲོལ་མེད་ཅེས་མ་རེངས་པ་ཆེན་པོ་བྱས། སྟོང་སྐོར་ཞབས་དྲུང་འཇམ་དབྱངས་རྒྱ་མཚོ་མཇལ་པར་བྱོན་དུས། ཐོག་མར་ཐམས་ཅད་མཁྱེན་པ་མ་གཏོགས་གཞན་ལ་མི་འདུད་པས། པཎ་ཆེན་རིན་པོ་ཆེར་ཕྱག་མི་འབུལ། སླར་བསྙེན་རྫོགས་སོགས་གསུང་ཆོས་ཞུ་རྒྱུ་ཡིན་པས་དེ་སྐབས་སྐྱག་བཀུར་ཞུ་རྒྱུ་ཡིན་ཚུལ་མགྲོན་གཉེར་རྒྱ་ཡགས་པ་བརྒྱུད་སྙན་དུ་ཕུལ་བར་མ་དགྱེས་པའི་བསྐོར་སྦྱངས་ཡན་གསུམ་གནང་སྟེ། ཕྱག་འཕྲལ་དུ་འབུལ་བཅུག་པར་ཡང་། དྲུང་འཁོར་རྣམས་ཀྱིས་སྟོང་སྐོར་བ་བདེན་ཞེས་གླེངས་འདུག་ཀྱང་། བཤེས་གཉེན་བསྟེན་ཚུལ་ལ་དགོངས་པར་མངོན། དེ་ཡང་ཁེངས་དྲེགས་ཁོན་འཛིན་གཡོ་རྒྱུ་སོགས། ཚུལ་མིན་གྱི་སྤྱོད་པས་མ་གོས་ཤིང་། ངོ་ཚ་ཤེས་ཤིང་བག་དང་ལྡན་པ། དྲང་ཞིང་གཞན་མགུ་བའི་ཐབས་ཚུལ་ལྷུར་མཛད་པའི་རྒྱལ་བའི་སྲས་ཀྱི་རྣམ་པར་ཐར་པ་འདི་ནི་མཁས་པ་རྣམས་མགུ་བ་བསྐྱེད་པའི་གནས་ཡིན་ལ། དེང་དུས་ཀྱི་སྐྱེ་བོ་ཕལ་ཆེ་བ་རྣམས་ཚུལ་དེའི་ལྡོག་ཕྱོགས་ཁོ་ན་ཉམས་སུ་བསྟར། ཕན་བཏགས་ན་ཆོག་མི་ཤེས་པར་གཅིག་བྱུང་ན་བརྒྱ་སྟོང་ལོང་དུ་རེ། བྱང་ཁོག་གི་ལྷ་ཁང་དུ་གློ་བའི་གྲོགས་པོ་པདྨ་ཁ་ཟུམ་པའི་ནང་དུ་བུང་བ་ཆུད་པ་ལྟ་བུར་གཡོ་བའི་བྱེད་པ་པོ་
རྣམས་ཀྱིས་ནི། གནོད་པ་མ་བྱས་པའམ་ལྟ་ཕྱོགས་ལེགས་པ་ཙམ་རེ་ལའང་མགུ་བ་ལྷུར་བྱེད་པར་སྣང་མོད། དེ་ལྟ་བུའི་ལྔ་བརྒྱ་མཐའ་མའི་ངང་ཚུལ་དང་ལྡན་པའི་སྐྱེས་བུ་མང་པོས། བྱས་པ་དྲིན་དུ་མི་གཟོ་བའི་སྒོ་ནས་ཐུགས་སུན་ཕྱུང་བ་བྱུང་ནའང་། འཕགས་ཆེན་དམ་པ་རྣམས་ནི། ཚུལ་དེ་ལྟ་བུའི་སྐྱེ་བོ་ལ་ལྷག་པར་རྗེས་སུ་བརྩེ་ཞིང་། སྙིང་སྟོབས་ཆེན་པོས་སྡུག་བསྔལ་མཐའ་དག་དང་དུ་ལེན་པ་ལ་རྣམ་པར་དཔའ་བ་ནི་ཆོས་ཉིད་ཡིན་ལ། གཞན་དག་རྣམས་ཚུལ་ངན་པར་སྤྱོད་པའང་ཤིན་ཏུ་བདེན་ཏེ། ཙཱུ་ཏའི་ཡུལ་དུ་སྐྱེས་ཕྱིན་ཆད་རྐང་པ་གཉིས་མི་འབྱུང་བ་ནི་རང་གི་རང་བཞིན་ཅན་ནོ། ། བོད་འདིར་དགྲ་གདོང་འཇིགས་གསུམ་གྱི་ཤིང་རྟའི་སྲོལ་འབྱེད་ཆེན་པོ། འཇིག་རྟེན་གྱི་མིག་གཅིག་པུ་རྗེ་བཙུན་རྭ་ཆེན་ཞབས་ཀྱི་པུར་རིལ་པོར་ནང་རྟེན་ལ་བཞུགས་ཤིང་། འཇིམ་པ་འཐེབ་སྐྱུ་རེ་ལ་རྒྱལ་བ་བཙོང་ཁ་པ་ཆེན་པོའི་རྫུ་འཕྲུལ་གྱིས་ཡ་མ་རཱ་ཛ་སྟོང་ཕྲག་རེ་བཟླས་ཏེ་ལྗགས་ཆབ་མཛད་པའི་སྐུ་བརྙན་བྱིན་རླབས་ཅན་དེའི་དྲུང་དུ། བཟླས་བརྗོད་ཀྱི་རིམ་པ་བགྲང་བ་ལས་འདས་པ་གནང་ཞིང་། སྤྱིར་དམ་པ་རྣམས་ནི། གདུལ་བྱའི་ངོར། མཁས་པ་དང་། གྲུབ་པ་དང་། བཙུན་པ་དང་། བཟང་བ་སོགས། སྣ་ཚོགས་སུ་སྟོན་པ་ལས། སྐུ་ཚེ་འདི་ལ་གཙོ་བོར་སྒྲུབ་པ་ཉམས་ལེན་གྱི་རིམ་པ་ལ་ཐུགས་གཞོལ་བ་ཞིག་གོ །བདེ་ཆེན་རྩེར་བཞུགས་པ་ཞིག་ལ། སྡེ་པའི་གཟིམས་ཆུང་ཤིང་རྩི་སོགས་ལེགས་ཤོས་དེ་ག་བཞུགས་མེ་གནང་པས། སྡེ་པས་བཞུགས་མེ་གཟིམས་ཆུང་ཤིང་རྩི་མེད་པ་འདིར་གནང་བ་ཞུ་ཞུས་པས། བཀའ་ལས་དེ་འདྲ་མི་དགོས། རྫོང་གཞིས་འདི་རྣམས་བདག་སུས་བྱེད་དང་བེད་སུས་སྤྱོད་མི་ཤེས་པས་གཙིགས་བྱས་ཞན་འདྲ་གསུངས་པར། ཐམས་ཅད་སྐུ་རྩད་ལྟ་བུར་གོ་ཡང་། རིང་པོར་མ་ལོན་པར་བདེ་
ཆེན་བྲག་དཀར་སོགས་སྡེ་སྲིད་གཙང་པར་ཤོར་བས། ཀུན་ཡིད་ཆེས་ཀྱི་གནས་སུ་གྱུར། འབྲས་སྤུངས་སུ། ལས་བྱེད་པས་ཇ་སྣེལ་པོ་ཞིག་གི་སྐོར་ལ་རྩེག་རྩེག་བྱས་པས། དངོས་པོ་མང་པོ་ཞིག་བཞུགས་མེའི་ནང་དུ་འདེབས་པ་གནང་བར། ཞབས་འབྲིང་བ་མང་པོས་ལྐོག་ཏུ། གནང་སྒོ་འདི་འདྲ་སྨྱོ་སྤྱོད་དང་ཁྱད་པར་མི་འདུག་ཅེས་སྐུར་པ་སྣ་ཚོགས་ཤིག་བཏབ། དེ་ཡང་སྐྱེ་བོ་དེ་དག་རྣམས་ཟང་ཟིང་གི་དངོས་པོ་ཕྲ་མོ་ཙམ་ལ་ཡང་། མིག་གི་འབྲས་བུ་ལྟར་གཅེས་པར་བཟུང་ནས། སྣོད་བརྒྱ་སྟོང་མང་པོ་གཅིག་ནང་དུ་གཅིག་བཅུག་པའི་ཕུགས་སུ། རྒྱས་བཏབ་སྟེ་ཅུང་ཟད་ཙམ་ཆུད་འཛའ་བར་གྱུར་ནའང་། ཐུགས་རྣམ་པར་སྲེད་པའི་པདྨ་སེར་སྣའི་མཚོ་ནང་དུ་འདར་བའི་ངང་ཚུལ་དེ། བྱང་ཆུབ་སེམས་དཔའ་སྲིད་འབྱོར་ཐམས་ཅད་ཆུ་ཤིང་ལྟར་གཟིགས་པ་རྣམས་ལ་རྒྱས་བཀབ་པར་འདུག །དེ་ནི་མྱུར་དུ་གཞན་དོན་དུ་གཤེགས་པ་དང་། གྲྭ་ས་ཕན་ཚུན་ལ་མི་རྟག་པའི་ངང་ཚུལ་འབྱུང་བའི་བརྡ་ཆོས་དེ་གཞན་གྱིས་མ་གོ་བར་སྣང་། དེ་ཡང་ཕྱག་མཛོད་གུ་ཤྲི་ཆེན་པོའི་རྗེས་སུ་རྗེ་གོང་མའི་དབོན་པོ་རྩེ་ཁ་ནས་ཆོས་རྗེ་སོགས་ཕྱག་མཛོད་ཁུར་ལེན་པ་ཁ་ཡར་བྱུང་བ། ཐམས་ཅད་མཁྱེན་པ་དགེ་འདུན་རྒྱ་མཚོའི་གསུང་མགུར་ལས། བླ་མའི་ཞབས་འབྲིང་ཉེ་གནས་ཕལ་མོ་ཆེ། །དཀོར་གྱིས་ཚིག་ནས་ལས་འབྲས་ཁྱད་དུ་གསོད། །ཡུན་དུ་འགྲོགས་པས་སྐྱོན་མཐོང་དད་པ་འགྲིབ། །ཅེས་གསུངས་པའི་དོན་དང་། རྗེ་བཙུན་མི་ལས། དད་པ་ཅན་གྱི་དད་རྫས་འདི། ས་ལ་བརྒྱབ་ན་ས་འགས། རྡོ་ལ་བརྒྱབ་ན་རྡོ་འགས་ཞེས་པ་ལྟར། གང་གི་འཕྲིན་ལས་ཀྱི་ཆ་ཤས་ལས་ཉེ་བར་གྲུབ་པའི་བདོག་པ་མང་པོར་ལོངས་སུ་སྤྱད་པའི་མེ་ལྕེས། ལུས་ངག་ཡིད་གསུམ་གྱི་ལྗོན་པ་རྣམ་པར་ཚིག་པས། ཚུལ་མིན་
ཡིད་བྱེད་ཀྱི་སོལ་བའི་མགལ་དུམ་ཆེས་ཆེར་སྤུངས་པ་མང་པོ་ཞིག་གིས། ཞབས་ཕྱིར་མི་འགྱུར་པའི་སྤྱོད་པ་མང་དུ་བྱས་ནའང་། རྒྱལ་པོ་དགེ་སྟོན། སྡིག་སྟོན་ལ་བརྩེ་བའི་ལོ་རྒྱུས་དང་། དེ་བཞིན་གཤེགས་པས། སྒྲ་གཅན་འཛིན་དང་ལྷས་བྱིན་གཉིས་ལ་ཉེ་རིང་མེད་ཅེས་བདེན་ཚིག་མཛད་པས། ལྷས་བྱིན་མ་བཞུ་བའི་ནད་ལས་གྲོལ་བ་སོགས་མདོ་ལས་བྱུང་བའི་གཏམ་རྒྱུད་ཀྱི་དོན་དང་མཚུངས་པས། དེ་དག་ལ་ལྷག་པར་བརྩེ་ཞིང་ཤིན་ཏུ་མ་རུངས་པ་འཇམ་པ་གསུམ་གྱིས་འདུལ་བར་མི་ནུས་པ་འགའ་ཞིག་ནི། རྒྱབ་རྩ་བྱེད་མཁན་དང་བཅས་པ་མཐའ་དག་ལ། མངོན་སྤྱོད་ཀྱི་ལས་སྦྱོར་གྱི་སྒོ་ནས་ཚར་གཅོད་པར་མཛད་དོ། །སྟོང་སྐོར་སྤྲུལ་སྐུ་འཇམ་དབྱངས་རྒྱ་མཚོས་གཙོས་པའི་སོག་ཡུལ་གྱི་འགྲུལ་པ་གཏོས་ཆེན་པོ་སླེབས། ཡོས་ལོའི་སྨོན་ལམ་ལ་ཟང་ཟིང་གི་ལོངས་སྤྱོད་གནོད་སྦྱིན་གྱི་ཡུལ་དུ་སླེབས་པ་དང་འདྲ་བར་གྱུར། མང་འགྱེད་དང་འབུལ་བ་རྣམ་གྲངས་མང་ཞིང་གྱ་ནོམ་པས། གྲྭ་ཚོགས་དང་བླ་ཚོགས་ཀྱང་ངང་གིས་འཕེལ། ཇ་སྣེལ་པོ་མང་ཉུང་གི་གླེང་བརྗོད་སྐོར་ལམ་གྱི་ཁྱོན་ཐམས་ཅད་དར་དིར་དུ་སོང་། འོན་ཀྱང་དེ་ལོ་ཚེ་འདི་བློས་བཏང་ནས་གཡའ་དང་གངས་ཀྱི་མཚམས་སུ་གཅིག་པུར་སྒྲུབ་པ་མཛད་པའི་རྣལ་འབྱོར་པ་མངའ་རིས་གྲུབ་ཆེན་བརྩོན་འགྲུས་སྙིང་པོར་རྙེད་པ་རྣམས་ནས་རྩམ་དུ་བསྒྲིལ་ནས་ཚོགས་ཆེན་དུ་བསྙེན་བཀུར་བ་སོགས་ཀྱི་ཕྱིར་དུ་བྱོན་པ། འབྲུམ་ནད་ཀྱིས་ལྷ་སར་གཤེགས་པ་དང་། སྤྲུལ་སྐུ་བསོད་ནམས་དགེ་ལེགས་དཔལ་བཟང་པོ་འབྲུམ་པ་དང་ཞིང་སྐྱོང་གི་གནོད་འཚེར་དོགས་པ་གཉིས་བསྡོངས་ནས་གཤེགས་པར་བརྟེན། སྨིན་ལམ་གྱི་སྒང་ཙམ་ནས་ཚོགས་དབུར་པཎ་ཆེན་རིན་པོ་ཆེ་བཞུགས་སུ་བཅུག །དཔོན་སློབ་བྱིངས་འབྲས་སྤུངས་སུ་ལོག་ཕེབས། མེ་འབྲུག་
ཟླ་བ་གསུམ་པའི་ནང་དུ། རྒྱ་ནག་གོང་མ་རྒྱལ་པོ་ཝུན་ཤུ་ཝང་སྟེ་ཏའི་ཝང་གིས་བླ་མ་བསོད་ནམས་བློ་གྲོས་སོགས་རྒྱ་མི་མང་པོ་མངགས། ཁྱབ་བདག་རྡོ་རྗེའི་སངས་རྒྱས་ཀྱི་ལས་ཀ་དང་ལས་ཞྭ་ལས་གོས་ཐམ་ཀ་ཕུལ། འབྲས་སྤུངས་སུ་རྒྱ་སྤྱི་ཁང་དུ་གདན་དྲངས་ཏེ། འབུལ་བ་དང་། རྩེད་སྣ་ཡ་མཚན་པ་མང་པོ་བྱས། རྒྱ་ནག་ཏུ་ཕེབས་དགོས་པའི་སྙན་གསན་ཕུལ། རྟེན་འབྲེལ་གྱི་སྒོ་ནས་ཞལ་བཞེས་མཛད། བླ་མ་བསོད་ནམས་བློ་གྲོས་ཀྱིས་རྒྱ་ཡུལ་དུ་བཞེངས་པའི་ལྷ་ཁང་ལ། དགའ་ལྡན་ཕོ་བྲང་གི་རྩེ་ནས་ཞལ་དེ་ཕྱོགས་སུ་གཟིགས་ཏེ་ཕྱག་ནས་གཏོར་བས། མཆོད་ཁང་གི་ཕྱི་ནང་ཐམས་ཅད་དུ་ནས་འཕྱག་རྒྱུ་ཡོད་པ་བྱུང་ཞིང་། རྟེན་འགའ་ཞིག་གི་ཐུགས་ཀར་མེ་ཏོག་དངོས་སུ་བཟུང་བ་སོགས། བློའི་ར་བ་ལས་འགོངས་པའི་རྫུ་འཕྲུལ་གྱི་བཀོད་པ་རྒྱ་ཆེན་པོ་བསྟན། གསང་ཡིབ་ཆབ་ཚན་ལ་ཕེབས་པའི་ཚེ་རྡོ་ལ་ཞབས་རྗེས་གསལ་བར་བྱུང་། མཁར་ནག་ལོ་ཙཱ་བས། སྟོང་སྐོར་སྤྲུལ་པའི་སྐུ་ལ་སོགས། །སོག་འགྲུལ་མང་པོས་ཡང་དག་མཆོད། །མེ་འབྲུག་ཤར་ཚེ་ཤར་ཕྱོགས་ནས། །ནག་པའི་ཟླ་བར་རྒྱ་ནག་གི །བཀྲ་ཤིས་ཁྲི་སྒོའི་ཁྲི་ཐོག་པ། འུན་ཤུ་ཝང་སྟེ་ཏ་ཡི་ཝང་། །རྒྱ་ལ་དབང་བྱེད་དབང་ལིའི་འཁོར། །རྒྱ་མི་མཆོད་རྫས་ཐོགས་པ་དང་། །རྒྱ་མི་བླ་མ་སློབ་དཔོན་རྣམས། །རྒྱ་མཚོའི་གོས་ཅན་སྟེང་འདི་ན། །རྒྱ་ཆེན་མཆོད་པར་རབ་ཏུ་བཤམས། །རྒྱ་ཡི་ལས་ཞྭ་ཞུ་ཐོར་བཅས། །རྒྱ་ནག་ཕྱོགས་ལ་ཕེབས་དགོས་ཞེས། །རྒྱ་བསྐྱེད་ཞུ་བ་ནན་ཏན་བཅས། །རྒྱ་ཕུབས་ཅན་གྱི་གཙུག་ལག་ཁང་། །རྒྱ་གར་ནས་བྱོན་རྟེན་རྣམས་ལ། །མཆོད་པས་ཕྱག་ནས་དངོས་སུ་བཟུང་། །དེ་ལ་རིང་བསྲེལ་མང་དུ་བྱོན། །ཞིང་བརྗེ་མྱ་ངན་འདའ་བའི་བརྡ། །དེ་བཞིན་གསང་ཡིབ་ཆབ་ཚན་ཁར། །རྡོ་ལ་ཞབས་རྗེས་
བཞག་ནས་སླར། །སེ་ར་འབྲས་སྤུངས་ཆོས་སྡེར་ཕེབས། །ཞེས་སོ། །དེ་ཡང་མཁྱེན་བརྩེ་ནུས་གསུམ་གྱི་མཛད་པའི་ཆ་ནས། འཕགས་པ་རིགས་གསུམ་གྱི་མགོན་པོའི་ཡོན་ཏན་མཐའ་དག་ཚང་བར་མངའ་བ་སྟེ། རྒྱལ་བའི་གསུང་རབ་ཀྱི་ཚིག་དོན་གང་ལ་ཡང་། དཀའ་ཚེགས་ལ་མ་ལྟོས་པར་བརྡ་ཙམ་བསྟན་པས་མཁྱེན། འགྲོ་བ་སྡུག་བསྔལ་གྱིས་གཟིར་བ་དག་ལ་ཕན་པར་འགྱུར་ན། རང་གི་བདེ་བ་གཏོང་བ་ལ་ཅུང་ཟད་ཙམ་ཡང་ཉམ་ང་བ་མི་མཛད། གཞན་གྱིས་སློང་ན་དངོས་པོ་རིན་ཐང་ཆེ་ཆུང་ལ་མ་ལྟོས་པ་དང་། ན་བཟའ་ཞལ་དཀར་སོགས་ཕྱག་ཐོགས་ཡོད་པ་ཞིག་ཀྱང་ཐེ་ཚོམ་མེད་པར་གནང་བའི་ནི་རྒྱལ་པོ་ཐམས་ཅད་སྒྲོལ་གྱི་ཁེངས་པ་འཕྲོག་ནུས། གནས་སྐབས་སུ་ཐུགས་ཆུང་བ་ལྟར་སྟོན་ཡང་། དོན་དུ་གང་ལ་ཡང་འཇིགས་པ་མེད་པར་སེང་གེ་ལྟ་བུ་སྟེ། དུས་དེར་སྐྱིད་ཤོད་ཀྱི་ལུང་པ་ཐམས་ཅད་སྡེ་སྲིད་གཙང་པའི་མངའ་འོག་ཏུ་ཆུད་པ་སོགས་མདོར་ན་དབུས་གཙང་ཕལ་ཆེར་ལ་ལུང་བསྒྱུར་བར་བརྟེན། གངས་ཅན་གྱི་ལྗོངས་འདིའི་སྟོབས་འབྱོར་གྱིས་དྲེགས་པའི་ཆེ་ཆེ་མོར་རློམ་པ་དང་། ཚེ་འདིའི་བྱ་བ་བཏང་བཏང་མོར་གྲགས་པ་སོགས་ཐམས་ཅད་ས་འདར་རྡོ་འདར་ལ་སོང་སྟེ་ཐུགས་ཤིང་སྡོང་གི་ཡལ་ག་ལྟར་འཁྱོགས་ཀྱང་། འཕྲལ་སྲིད་སྒྲུབ་ཀྱི་མདའ་ལྟར་དྲང་ཞིང་། ཞལ་པདྨའི་འདབ་མ་ལྟར་འཇམ་པས་ཞི་ཞིང་དུལ་དུལ་ལྟར་གྱུར་པའི་ཚེ། རྗེ་འདི་ཉིད་ཀྱིས་ཁྲོམ་དམར་ནག་འཁྱིལ་བའི་དབུས་སུ། གཙང་པ་དཔོན་བློན་གྱི་མཚན་ནས་སྨོས་ཏེ་ཁ་སྦྱོར་དབྱེ་པར་མཛད་ནས། མཐུ་སྟོབས་ཆེན་པོས་ཕྱོགས་ལས་རྣམ་པར་རྒྱལ་བའི་རང་བཞིན་ཅན་ནོ། །ནང་རྡོ་རྗེའི་རྣལ་འབྱོར་ལ་མངའ་བརྙེས་ཤིང་། བླ་མ་དང་ཡིད་དམ་གྱི་ལྷ་མང་པོའི་ཞལ་གཟིགས་གསུང་གི་གནང་བ་སྩལ་ནའང་། གཞན་ལ་འདི་ལྟ་བུ་བྱུང་ཞེས་
མི་གསུང་བ་ཐུགས་དཀྱེལ་ཆེ། གསུང་རབ་ཀྱི་དཀའ་གནད་འགར་མཁས་པ་རྣམས་དཔའ་ཞུམ་པར་མཛད་ཀྱང་། ཁོ་བོས་སློབ་གཉེར་མ་བྱས་ཞེས་དམན་ཆ་ཁོ་ན་ལེན། རྗེ་འདི་ཉིད་ཞབས་པད་བརྟེན་པའི་རིང་། དཔོན་པོ་ཁོ་ལོ་ཆེའི་སྲས་ཆེ་ཆུང་གཉིས་དམག་གི་དཔུང་ཚོགས་དང་བཅས་ལན་གྲངས་མང་པོ་ལྷགས་ཏེ། གཙང་སྐུར་སོགས་གཞན་སྡེ་རྣམས་ལ། གནད་འཕྲོད་ཀྱི་གཡུལ་རླབས་པོ་ཆེ་གཤོམ་རྩིས་ཀྱི་བོད་དང་ཁད་ཉེར་འབྱོར་བ་ན། ཆེད་གཏད་མི་སྣ་མངགས་ཏེ། འཇུན་སྟངས་ཀྱི་གསུང་སྒམ་པོས། དུས་ཟིང་གི་སྤྲོས་པ་ཐམས་ཅད་ཉེ་བར་ཞི་བར་མཛད་པར་བརྟེན། ཞབས་པད་བརྟེན་རིང་བོད་ལ་མཐའ་དམག་གིས་གནོད་པ་མ་བྱུང་བ་ནི། རྣམ་ཐར་ཆེ་ཤོས་གཅིག་ཏུ་སྣང་། རྒྱུ་མཚན་དེས་ན། དཔོན་སློབ་པཎ་ཆེན་རིན་པོ་ཆེ་མངའ་རིས་སུ་ཆིབས་ཁ་བསྒྱུར་གདོང་། དགའ་ལྡན་ཕོ་བྲང་ནས་ཕྱག་མཛོད་བསོད་ནམས་རབ་བརྟན་གྱིས། ད་ལོ་ཐུ་མེད་ཀྱི་ཐའི་ཇི་འདི་རྣམས་ཀྱི་མཛད་ལུགས། སྐྱིད་ཤོད་ཞབས་དྲུང་དང་། གྲྭ་སའི་ཐུགས་ཁུར་བཞེས་མཁན་ཅི་རིགས་ཀྱི་གསུང་ཚུལ། གཙང་སྡེ་སྲིད་ལ་སྐུ་དབང་བེད་སྤྱོད་ཀྱི་ཕེབས་སྒོ་འདྲ་ཡོད་འདུག་པ། འདི་ཚོ་ལ་བརྟེན་པའི་དུས་ཟིངས་ཤིག་བྱུང་དོགས་བློ་མཛངས་ཆེ་བར་བྱུང་། རང་ངོས་ཀྱི་ཤར་ཚོད་སྡེ་གཟར་ལངས་ན། སྔར་ཡང་མདའ་འདི་རིས་ཀྱིས་མིག་བཅར་བའི་སྣ་སུན་དང་བཅས་འཇམ་ཆགས་ཤིག་འདོད་པ་ཡིན་ཀྱང་། རང་དབང་འདུ་མི་འདུ་ཚོད་ཐིངས་དཀའ་བ་ནས། ད་ལོ་ཕྱོགས་ཕེབས་མ་གནང་བར་བཞུགས་ཡུལ་གནང་བ་ཨེ་འགབ་སོགས་བསླབ་སྟོན་ཞུས་པར་ཕེབས་སྒོར། རྙིང་མའི་ལུང་བསྟན་ན་བོད་སོག་པོས་འཛིན་པ་ཡོད་ཟེར་བ་འདུག་པ་དང་། ཐམས་ཅད་མཁྱེན་པ་ཡོན་ཏན་རྒྱ་མཚོ་དེ་ཞལ་བཞུགས་
ན། དུས་ཟིང་ལ་མི་དགྱེས་པ་དང་མཐའ་མི་ལ་གསུང་བཙན་པས་སྡེ་གཟར་སྙོལ་བ་གནང་འགྲོ་ཡང་། སོག་པོའི་རྒྱལ་བརྒྱུད་འདི་ཚོ་དབང་ཆེ་བ་དང་བཅས་ལྷུས་ཐིངས་པ་དཀའ་བ་འདུག་ཀྱང་། དཀོན་ཅོག་གི་ཐུགས་རྗེས་དུས་བདེ་བ་ཡོང་ལ་ཆེ། དད་ཀྱང་སེམས་མཛངས་པ་བྱུང་སྟེ། མངའ་རིས་བདག་པོའི་འབོད་མི་སླེབས་གྲུབ་པ་སོགས་ནས་བཤོལ་མི་ཐུབ་པ་འདྲ། འཇམ་གང་ཆགས་ཀྱི་ཐབས་མཛོད་ཕེབས་འདུག་པས་ཀྱང་ཤེས་ནུས་སོ། །ཧོར་ཟླ་བཅུ་གཉིས་པའི་བཅོ་ལྔའི་ཉིན། གཟུགས་སྐུའི་བཀོད་པ་ཆོས་དབྱིངས་སུ་བསྡུས་ཏེ་དགའ་ལྡན་གྱི་གནས་སུ་གཤེགས་སོ། །མཁར་ནག་ལོ་ཙཱ་བས། དགུང་ལོ་རྒྱུ་སྐར་གྲངས་ལྡན་སྐབས། །མེ་འབྲུག་རྒྱལ་ཟླའི་ཚེས་དབང་དུས། །དགོངས་པ་ཆོས་ཀྱི་དབྱིངས་སུ་ཐིམ། །བདུན་ཕྲག་གསུམ་པར་ཆོས་ཀྱི་སྐུ། །བུམ་ནང་མར་མེའི་འོད་གསལ་བཞིན། །ཀྱེ་མ་འདི་འདྲའི་རྣམ་དཔངས་ལ། །ཀྱེ་ཧུད་བདག་ཅག་འདི་ན་ལུས། །ཀྱེ་རྡོར་ལ་སོགས་རྒྱུད་དོན་བཞིན། །སྐྱེ་མཆེད་དྭངས་པའི་ལོངས་སྐུར་བཞེངས། །ཚད་མེད་བཞི་ཡིས་རབ་བསྐུལ་ཏེ། །ཞིང་འདིར་སླར་ཡང་སྤྲུལ་པའི་སྐུ། །སྟོན་ངེས་ཁྱོད་ལ་སྐྱབས་སུ་མཆི། །ཞེས་སོ། །རབ་འབྱམས་རྒྱལ་བའི་མཁྱེན་བརྩེ་ནུས་པ་ཀུན། །ལག་ན་པདྨའི་རྣམ་པར་ཤར་བ་དག །བཀོད་པ་རྒྱ་མཚོའི་ཞིང་གི་རྡུལ་སྙེད་དུ། །གྲངས་མེད་སྤྲུལ་པའི་རོལ་གར་ཅི་ཡང་སྟོན། །སྐལ་ངན་དུས་ཀྱི་མཚན་མོར་ཉེ་བ་ན། །མཐའ་ཀླས་འགྲོ་བའི་འདྲེན་པ་རྟ་ལྗང་ཅན། །ཆོས་དབྱིངས་ཟད་མི་ཤེས་པའི་ཐུན་འཚམས་ཀྱི། །ཕང་པར་བཞུགས་ནས་འགྲོ་རྣམས་འདོད་འདི་ཅི། །དེ་ལྟ་ན་ཡང་མ་རིག་སྣང་ཚུལ་ལས། །རླབས་ཆེན་སྤྱོད་ལ་དཔའ་བའི་རྒྱལ་སྲས་རྣམས། །འཁོར་བའི་ཕ་མཐའ་རྫོགས་མིན་དེ་སྲིད་དུ། དམན་ལམ་ཞི་བདེར་གོལ་བ་ག་ལ་
སྲིད། །དེ་ནས་དགུང་ཞག་ཞེ་དགུའི་བར་དུ། རྒྱུད་སྟོད་སྨད་གཉིས་ཀྱིས་གསང་བ་འདུས་པའི་མི་བསྐྱོད་རྡོ་རྗེའི་སྒྲུབ་པའི་མཆོད་པ་དང་། གྲྭ་ས་ཕན་ཚུན་སོགས་དགེ་འདུན་གྱི་སྡེ་རིས་མེད་པ་རྣམས་སུ་བསྙེན་བཀུར་བ་སོགས་དགོངས་རྫོགས་རྒྱ་ཆེན་པོ་བསྒྲུབས་སོ། །མེ་སྦྲུལ་སྟོན་མཇུག་དཔོན་སློབ་པཎ་ཆེན་རིན་པོ་ཆེས་རྒྱུད་སྡེ་དང་མཐུན་པའི་ཕྱག་ལེན་རྣམ་པར་དག་པས་སྐུ་གདུང་རིན་པོ་ཆེ་ཞུགས་སུ་ཕུལ་བར་དབུ་ཐོད་བམ་རིལ། ཐུགས་ལྗགས་སྤྱན་གསུམ་གདུང་རིང་བསྲེལ་མང་དུ་ཕེབས་ཤིང་། ཁར་ཁ་དཔོན་པོ་ཆོས་ཁུར་གྱིས་དབུ་ཐོད་དང་། ཐུ་མེད་ཀྱི་ཐའི་ཇི་བློ་བཟང་བསྟན་འཛིན་རྒྱ་མཚོས་ཐུགས་སོ་སོའི་ཡུལ་གྲུར་བསོད་ནམས་ཀྱི་ཞིང་དུ་གདན་དྲངས། གདུང་རིང་བསྲེལ་བཞུགས་པའི་མཆོད་སྡོང་འཛམ་བུ་གླིང་ན་ཁྱད་དུ་འཕགས་པ་ཞིག་ཁར་ཁ་ཆོས་ཁུར་དཔོན་པོས་སྦྱིན་བདག་བྱས་ཏེ་བཞེང་བའི་བཟོ་གྲྭ་ཚུགས་པ། སྡེ་གཟར་གྱི་སྟབས་ནས་མ་འགྲུབ་པ། སླར་ཤིང་གླང་ལོར་ཐུ་མེད་ཀྱི་དཔོན་པོ་ཧོང་ཐའི་ཇིས་སྦྱིན་བདག་བྱས། ཕྱག་མཛོད་ས་སྐྱོང་བ་བསོད་ནམས་རབ་བརྟན་གྱིས་ཐུགས་ཁུར་བཞེས། རི་མོ་དགོས་སྐྱེས་རྡོ་རྗེས་ཐིག་བཏབ། དོ་དམ་ཚ་བ་དཀའ་བཅུ་སངས་རྒྱས་ཤེས་རབ། དཔོན་པོ་བྱིང་པ་བློ་བཟང་། བལ་པོ་ནོར་བུ་ཚེ་རིང་སོགས་བཅུ་ཕྲག་གཉིས་ཙམ་གྱིས་གེགས་མེད་དུ་བཞེངས། འཇམ་དབྱངས་བླ་མ་ཁྲི་རིན་པོ་ཆེ་དཀོན་ཅོག་ཆོས་འཕེལ་དང་། སྒོ་མང་སློབ་དཔོན་སངས་རྒྱས་བཀྲ་ཤིས་གཉིས་ཀྱིས་གཟུངས་འཕུལ་གྱི་ཕྱག་ལེན་གནང་སྟེ་དཔལ་ལྡན་འབྲས་སྤུངས་ཀྱི་རྣམ་ཐར་སྒོ་གསུམ་དུ་བཞུགས་ཤིང་། རིགས་དང་དཀྱིལ་འཁོར་ཀུན་གྱི་བདག་པོ་མཁན་ཆེན་བློ་བཟང་ཆོས་ཀྱི་རྒྱལ་མཚན་དཔལ་བཟང་པོས་གཙོ་མཛད། སེར་འབྲས་ཀྱི་སློབ་དཔོན་ཁྲི་གདན་
ཟུར། སྐུ་གཞོགས་རྣམ་རྒྱལ་གྲྭ་ཚང་དང་བཅས་པས་རབ་ཏུ་གནས་ཤིང་། སྦྱིན་བདག་ཏུ་སོག་པོ་ཚོ་ཆེན་བཞི་བཅུའི་གུར་དཀར་པོའི་བདག་པོ་ཐུབ་པ་ཇུ་ནང་ཐའི་སུན་ཧོང་ཐའི་ཇི་བསྐོས་པས། རྟེན་འབྲེལ་ལེགས་ཚོགས་ཕུན་སུམ་ཚོགས་པ་འགྲིག་གོ ། སྨྲས་པ། ངོ་མཚར་རྨད་བྱུང་གཏམ་གྱི་སྦྱོར་བ་དང་། །ཚིག་འཕྲེང་འཛད་པ་མེད་པའི་པུ་སྟ་ཀ །ལོ་རྒྱུས་དེབ་གཏེར་དོན་གཉེར་དཔྱོད་ལྡན་རྣམས། །དགའ་བའི་གར་དང་བཅས་ཏེ་ད་ལོང་ཞིག །དམ་པ་མཆོག་གི་ཕུལ་བྱུང་མཛད་པའི་མཐའ། །འཇལ་པ་ཀུན་མཁྱེན་རྣམས་ཀྱང་སྒྱིད་སྐྱུར་ན། །སོམ་ཉིའི་དྲ་བར་ཆུད་པར་བདག་འདྲ་ཡིས། །བརྗོད་པ་ཆུ་ཤིང་འབྲས་བུ་འཚོལ་བ་བཞིན། །འོན་ཏང་ཚད་པའི་གདུང་བས་མནར་བ་རྣམས། །རྒྱ་མཚོ་རྫོགས་པར་འཐུངས་པའི་ནུས་བྲལ་ཡང་། །ཇི་ཙམ་ལོངས་སུ་སྤྱོད་ནུས་དེ་ཉིད་ཀྱི། འདོད་པའི་རེ་བ་ཡོངས་སུ་ཅིས་མི་སྐོང་། །ཐོར་བུའི་ལོ་རྒྱུས་བསྡུས་པའི་རྫ་རྔ་ཡིས། །དཔྱོད་ལྡན་རྨ་བྱའི་སྙིང་ལ་མི་འབབ་ཀྱང་། །ཡིག་ཚང་ཁུངས་ལྡན་ངག་རྒྱུན་མ་གཏོགས་པའི། །འབྲེལ་མེད་རང་བཟོ་བྲིས་པ་འདི་ན་མེད། །ཡོངས་གྲགས་མཁས་པའི་སློབ་དཔོན་བསྟེན་པའི་མཐུས། །བཅད་ལྷུག་སྙན་ངག་སྨྲ་ལ་ཐོགས་མེད་ཀྱང་། །མཁས་བླུན་ཀུན་གྱིས་བལྟ་བར་གོ་བདེ་ཕྱིར། །འབོལ་རྩོམ་གྲོང་པའི་ཚིག་ཏུ་ལྷུག་པར་བཀོད། །རྒྱལ་དང་རྒྱལ་བའི་སྲས་ཀྱི་རྟོགས་བརྗོད་འཕྲེང་། །ཚིག་གི་སྲད་བུར་བརྒྱུས་པའི་དགེ་བ་དེས། །ལུས་ཅན་མཐའ་དག་དུས་མཁྱེན་རྒྱལ་པོ་ཡི། །བསོད་ནམས་ཇི་བཞིན་ལོངས་སུ་སྤྱོད་གྱུར་ཅིག །ཅེས་པ་འཕགས་པ་འཇིག་རྟེན་དབང་ཕྱུག་ཐམས་ཅད་མཁྱེན་པ་ཡོན་ཏན་རྒྱ་མཚོ་དཔལ་བཟང་པོའི་རྣམ་པར་ཐར་པ་ནོར་བུའི་འཕྲེང་བ་ཞེས་བྱ་བ་འདི་ནི། གྲོང་སྨད་པ་འཕྲིན་ལས་རྒྱ་མཚོ་སོགས་དོན་གཉེར་ཅན་འགའ་ཞིག་གིས་
བསྐུལ་བའི་ངོར། སྐུ་ན་ཕྲ་མོའི་དུས་ཀྱི་རྣམ་ཐར་ངོ་མཚར་བའི་རིགས་ཟིན་བྲིས་སུ་བཀོད་པའི་ཤོག་རིལ་གཉིས་དང་། བཞུ་ཁང་རབ་འབྱམས་པ་དགེ་ལེགས་ལྷུན་གྲུབ་ཀྱིས་མཛད་པའི་རྣམ་ཐར་དད་པའི་གོ་འབྱེད། མཁར་ནག་ལོ་ཙཱ་བ་དཔལ་འབྱོར་རྒྱ་མཚོས་མཛད་པའི་རྣམ་ཐར་ཚིགས་བཅད་མ་རྣམས་ལ་གཞི་བྱས། དེའི་དུས་ཀྱི་དྲུང་འཁོར་རྙིང་པ་རྒྱུས་ཅན་འགའ་ཞིག་གི་ངག་སྒྲོས་ངེས་དག་གིས་ཟུར་བརྒྱན། འོན་ཀྱང་གསང་བ་བསམ་གྱིས་མི་ཁྱབ་པའི་རྣམ་པར་ཐར་པའི་རིགས་མང་པོ་དང་། ལོ་དུས་ཀྱི་ངེས་པ་སོགས་ནི་ཞིབ་ཏུ་བརྩད་བཅད་ཀྱང་། གྲྭ་རིགས་རྣམས་གདུལ་བྱ་ཆེ་ཆུང་དང་བཀའ་དྲིན་སྐྱོང་མི་སྐྱོང་གི་གླེང་བརྗོད་ལས། བླ་མའི་རྣམ་པར་ཐར་པ་དོན་དུ་གཉེར་བ་ཉུང་བའི་ཕྱིར། ཞིབ་པར་འདྲི་བའི་གནས་མ་རྙེད་ནའང་། གོང་དུ་སྨོས་པ་རྣམས་ལ་གཞི་བྱས་ཏེ། གཏམ་རྒྱུད་དེབ་གཏེར་སྨྲ་བའི་ཟ་ཧོར་གྱི་བཙུན་པ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེས། བཙོང་ཁའི་ཡུལ་དཀར་ཐང་མར་ཁུའི་མཚོ་མོར་སྦྱར་བའི་ཡི་གེའི་ཟློས་གར་སྒྱུར་བ་པོ་ནི་རིག་གནས་ཟད་མི་ཤེས་པའི་བང་མཛོད་འཛིན་པ་སློབ་དཔོན་མ་ཧཱ་པཎྜི་ཏ་དཔོན་དྲུང་རིན་པོ་ཆེ་སྨོན་འགྲོ་ལོ་ཙཱ་བ་ཡིན་ནོ། །མངྒ་ལཾ།། །།
ཤོག་སྟོང་།