བླ་མའི་རྣལ་འབྱོར་བྱིན་རླབས་འདུས་པ།

༄༅ ། །བླ་མའི་རྣལ་འབྱོར་བྱིན་རླབས་འདུས་པ་བཞུགས་སོ། །རང་སེམས་སྤྲོས་པ་བྲལ་བ་ལ། །རང་ངོ་ཤེས་པས་སྐྱབས་སུ་མཆི། །མ་རིག་འཁྲུལ་པའི་མ་རྣམས་ཀུན། །གདོད་མའི་ས་ལ་བཀོད་པར་བགྱི། །ཨཱ། རང་སྣང་དག་པ་དབྱིངས་ཀྱི་མཁར། །རང་རིག་སྤྲོས་བསྡུ་བྲལ་བ་ཡི། །རིག་རྩལ་མ་འགག་ཅིར་ཡང་འཆར། འཁོར་འདས་ཀུན་ཁྱབ་སྲིད་ཞིའི་དཔལ། །རིག་སྟོང་འཛིན་མེད་ཀློང་དུ་ཨཱཿ ཞེས་ད་ལྟའི་ཐད་ཀའི་ཐ་མལ་གྱི་ཤེས་པ་རྗེན་པ་བཟོ་བཅོས་དང་བྲལ་བའི་རིག་པ་སྟོང་གསལ་འདུས་མ་བྱས་པ་འདི་དཔལ་ལྡན་བླ་མའི་ཐུགས་སུ་ཐག་བཅད་དེ་དེའི་ངང་བསྐྱོང་ངོ་། །ཞེས་བསླབ་གསུམ་ལྡན་པ་བླ་མ་དམར་སྒྲིས་ནས་བསྐུལ་ངོར་༧ གང་ཤར་དབང་པོས་བྲིས།།