སྦྱིན་སྲེག་གལ་འགགས།
སྦྱིན་སྲེག་གལ་འགགས་བཞུགས་སོ། །སྦྱིན་བསྲེག་པའི་ངེས་ཚིག་གང་ཡིན། བསྲེག་པའི་དགོས་པ། བསྲེག་པའི་ཐབས། རོ་བསྲེགས་པའི་འབྲས་བུ་ཇི་ལྟར་ཐོབ་ཅེས་བརྒལ་བ་ལས། ངེས་ཚིག་ནི། སྤྱིར་རོ་ལ་གཉིས་ཉམས་སུ་མྱོང་བའི་རོ་དང་། ལྷག་མར་བོར་བའི་རོ། གོང་མ་ནི་ལྕེའི་རྣམ་པར་ཤེས་པས་རོ་ཁ་མངར་ལ་སོགས་པ་མྱངས་ནས་ཚོར་བ་ནི་ཉམས་སུ་མྱོང་བའི་རོ་ཞེས་བྱའོ། །ལྷག་མ་བོར་བའི་རོ་ནི་རྣམ་པར་ཤེས་པ་ཚེ་ཕ་རོལ་དུ་འཕོས་ནས་གཟུགས་ཀྱི་ཕུང་པོ་གདོས་པ་དང་བཅས་པ་ས་རྡོ་དང་འདྲ་བ་འཇིག་རྟེན་འདིར་བོར་ནས་ཨ་ཚ་ཨ་ན་མི་ཤེས་པ་དེ་ལ་རོ་ཞེས་བྱའོ། །བསྲེག་བྱའི་ངེས་ཚིག་གང་ཡིན་ཞེ་ན། བསྲེག་པ་ལ་རྣམ་པ་གསུམ་སྟེ། རྒྱུན་བསྲེག་པ་ནི་ལྟ་བའི་རྣམས་སྐབས་རྡོ་རྗེ་ལྟ་བུའི་ཡེ་ཤེས་ཀྱིས་ཆོ་ག་ཐམས་ཅད་མཉམ་པ་ཉིད་ཀྱི་ངང་དུ་རྟོགས་ཙ་ན་ཀུན་སྐད་ཅིག་མ་རྒྱུན་དང་བྲལ་བར་རྟོགས་པ་ནི་རྒྱུན་བསྲེགས་པ་བྱ་བ་ཡིན་ཏེ། དེ་ཡང་ཅིས་མངོན་ན། ཐབས་ཀྱི་ཞགས་པ་ལས། རྡོ་རྗེ་ལྟ་བུའི་ཡེ་ཤེས་ཀྱིས། །དངོས་དང་དངོས་མིན་བག་ཆགས་བསྲེགས། །དེ་མིན་ཡེ་ཤེས་མེད་ཞེས་བྱ། །ཞེས་པས་མངོན་ནོ། །སྤྱོད་ཡུལ་བསྲེག་པ་ཞེས་བྱ་བ་ནི། ཕྲིན་ལས་ཀྱི་གནས་སྐབས་ན་བདག་ཉིད་ལྷར་བསྒོམས་པའི་ཐུགས་ཀ་ནས། རཾ་ལས་ཡེ་ཤེས་ཀྱི་མེ་བྱུང་ནས་ཕྱི་ནང་གི་སྤྱོད་ཡུལ་བསྲེག་པ་ལས། སྤྱོད་ཡུལ་བསྲེགས་པ་ཞེས་བྱའོ། །དེ་ཡང་ལེ་ལག་ལས། སྲིད་གསུམ་བསྲེག་པ་མེ་ཡིན་ཏེ། །ཡིད་ཀྱི་ཡེ་ཤེས་མེ་རུ་འབར། །ཞེས་གསུངས་སོ། །རོ་བསྲེག་པའི་མིང་ནི་རྫས་བསྲེག་པ་ཞེས་བྱ་བ་ཡིན་ཏེ། ཅིའི་ཕྱིར་ཞེ་ན། ཕུང་པོ་རྡོ་དང་འདྲ་བའི་རྫས་འདི་དངོས་པོ་མེས་བསྲེག་པས་ན་རྫས་བསྲེག་པ་ཞེས་བྱ་སྟེ། དེ་ཡང་བསྐལ་པ་མེ་ལྟར་འབར་བའི་རྒྱུད་ལས། ལྷག་མར་བཅས་པའི་ཕུང་པོ་འདི། །ཡེ་ཤེས་མེ་ཡི་ཀློང་དུ་བསྲེག །ཅེས་དང་། ཀུན་འདུས་ལས། རོ་ཡི་རྫས་རྣམས་བསྲེག་སྦྱངས་ནས། །རོ་ལ་སྔགས་ཀྱིས་བཏབ་ནས་ཀྱང་། །ཤིན་ཏུ་དྲི་ཞིམ་སྣ་ཚོགས་ཀྱིས། །རོ་ལ་བྱུག་ཅིང་བསྐུ་བར་བྱ། །ཞེས་གསུངས་ཏེ་དེ་ནི་རོ་བསྲེག་པའི་ངེས་ཚིག་གོ། །རོ་བསྲེག་པའི་དགོས་ཆེད་ནི། སྤྱིར་འབྱུང་བ་ས་ལ་སྦང་བ་མི་འགལ་མོད། ཡུམ་སངས་རྒྱས་སྤྱན་མའི་རང་བཞིན་ཡིན། འབྱུང་བ་ཆུ་ལ་བསྐྱུར་དང་འགལ་བ་ཅི་ཡོད། ཡུམ་མཱ་ཀིའི་རང་བཞིན་ཡིན། རི་དང་སྤོ་ཡང་འབྱུང་བ་ལྔ་ལས་བྱུང་ཡིན་ན། ད་ལྟ་འབྱུང་བ་མེ་གཅིག་བུས་བསྲེག་པ་དགོས་པ་ཅི་ཡིན། དེ་ནི་འབྱུང་བ་རླུང་དང་ནམ་མཁའ་གཉིས་ལ་བསྐྱུར་དུ་མི་བཏུབ་པས། འབྱུང་བ་ས་ལ་སྦས་ན་སྲོག་ཆགས་ཀྱི་ཕུང་པོ་ཆེན་པོ་བསྐྱེད་པའི་ཉེས་དམིགས་ཡོད། ཆུ་ལ་བསྐྱུར་ན་ཐལ་བ་མ ཆོད་རྟེན་དུ་བཞེངས་པའི་གཞི་མེད་པར་འགྱུར། དེའི་ཕྱིར་མེ་ལ་སྲོག་ཆགས་བསྐྱེད་པའི་གཞིར་མེད་པ་དང་། ཐལ་བ་མཆོད་རྟེན་དུ་བཏབ་ན་བྱང་ཆུབ་ཐོབ་པའི་རྒྱུར་འགྱུར་བས་རོ་མེས་བསྲེག་པ་ལ་དགོས་པ་དེ་ལྟ་བུ་ཡོད། རོ་བསྲེག་པའི་ཐབས་ནི། ཆོ་ག་གཞུང་དུ་བྱེད་པ་ཡིན་ཏེ། དེ་ཡང་དང་པོ་སྤོས་ཆུ་དང་བདུད་རྩིས་བཀྲུས་པ་ལ་དགོས་པ་ཅི་ཡོད། སྤོས་ཆུས་བཀྲུ་བ་ནི་ཞི་བའི་ལྷ་ཚོགས་མཉེས་པར་བྱང་བའི་ཕྱིར་བཀྲུ་ལ། བདུད་རྩིས་ཁྲོ་བོའི་ཕྱིར་རོ། །འོ་ན་རོ་ལ་ཡི་གེ་བརྒྱ་པ་ལ་དགོས་པ་ཅི་ཡོད། རོ་ལ་བཏག་ནས་མེ་ལ་བསྲེགས་པ་མི་འགལ་ལམ། ཡི་གེ་འདོགས་པའི་དགོས་པ་ནི། རྟོག་པ་བཞི་བཅུ་རྩ་གཉིས་བསྲེག་པའི་དགོས་པ་ཡོད་པའི་ཕྱིར་དང་། ཡི་གེ་བཏགས་ནས་མེ་ལ་བསྲེག་པ་མི་འགལ་ཏེ། ཡི་གེ་ཡེ་ཤེས་ཀྱི་ལྷར་བསྐྱེད་ནས་མེ་དཔུང་འབར་བའི་གཞལ་ཡས་ཁང་དུ་བཞུགས་པ་མི་འགལ་ལོ། །ཡི་གེ་གདགས་གནས་ཀྱི་དགོས་པ་གང་། འདོགས་པའི་དགོས་པ་ནི་ཉི་དལ་རེ་བསམ། དེའི་སྟེང་དུ་གསུང་ཡི་གེ་བཀོད་པའི་འོད་ཟེར་གྱིས་རྟོག་པའི་གནས་ཀུན་བསྲེག་པར་བསམ་ཞིང་དགོས། འོ་སྤོས་མར་མགོ་ལ་བཀབ་པ་དགོས་པ་ཅི་ཡོད། དེ་ནི་ཀླད་པ་དུར་ཁྲོད་ཀྱི་གཞལ་ཡས་ཁང་དུ་བྱིན་གྱིས་བརླབ་པའི་དོན་ཡིན། འོ་ན་དཀར་བྱང་གནག་བྱང་གི་དགོས་པ་གང་། དཀར་བྱང་བཀླགས་ནས་རུའི་ལག་ཏུ་གཏད་པས་རུའི་དགོངས་པས་གཤིན་པོ་དེའི་དགེ་བ་ཅི་བྱས་པ་ཐམས་ཅད་སེམས་ཅན་ལ་བསྔོ་བའི་དགོས་པ་ཡོད། གནག་བྱང་བཤགས་པ་བྱས་ནས་ཐབ་ཏུ་བསྲེགས་པས་གཤིན་པོའི་སྡིག་པ་བསྲེགས་པའི་དགོས་པ་ཡོད། རོ་བསྲེག་པའི་དུས་སུ་ཆོ་ག་མཁན་གྱི་དགོངས་པ་ཇི་ལྟར་བྱེད། དེ་ནི་རུ་ཤར་དུ་བཞུགས། ལས་མཁན་བྱང་དུ། སྦྱིན་སྲེག་མཁན་ལྷོ་རུ། བཤགས་པ་མཁན་ནུབ་ཏུ་བཞུགས་ཞེས་པ་ཀུན་ལས་གསུངས་སོ། །འོ་ན་རོ་བསྲེག་པའི་མེ་ལྷ་གང་གིས་བྱེད། །སྤྱིར་མེ་ལྷ་ལ་གཉིས་ཡོད། འཇིག་རྟེན་པའི་མེ་ལྷ་དང་། །འདས་པའི་མེ་ལྷའོ། །རོ་བསྲེག་པའི་འཇིག་རྟེན་པའི་མེ་ལྷ་གང་ཡིན་ན་ཕྱོགས་སྐྱོང་འཇིག་རྟེན་སྐྱོང་གིས་མི་བྱེད་དེ། འཇིག་རྟེན་ལས་འདས་པའི་ལྷ་སྣང་བ་མཐའ་ཡས་ཡབ་ཡུམ་གྱིས་བྱེད་དོ། །དེ་ཡང་ཀུན་འདུས་ལས། མེ་ཡི་ལྷ་ནི་སྣང་མཐའ་ཡས། །མེ་ཡི་ལྷ་མོ་གོས་དཀར་མོ། །འབྱུང་བ་མེ་ལ་དབང་བསྒྱུར་ཞིང་། །སྲིད་གསུམ་བསྲེག་པར་ཞལ་འཆེས་མ། །ཐམས་ཅད་ཀུན་གྱི་འོད་མཆོག་ཡིན། །ཅེས་གསུངས་སོ། །འོ་ན་བསྲེག་པའི་བརྟག་པ་ལ་དུ་ཡོད། རྟགས་རྣམ་པ་དྲུག་ཡོད་དེ། མེ་འབར་བའི་སྒྲ་འུར་རྒྱངས་ཚེག་རྒྱངས་ཆེ་ན། གཤིན་པོ་དེ་ལ་སྒྲིབ་པ་ཆེ་བ་ཡིན་ཏེ། དམྱལ་བར་འགྲོ་བ་ཡིན་པས་སྦྱིན་སྲེག་མང་པོ་བྱ་དགོས། མེ་ཁོག་དལ་བར་བྱས་ནས་འུ་རུ་རུ་ཟེར་ན་སྒྲིབ་པ་མེད་དེ་ཤར་ཕྱོགས་རྡོ་རྗེ་རིགས་ཀྱི་ཞིང་ཁམས་སུ་སྐྱེ་བ་ཡིན། མེ་ལྕེ་མི་གསལ་བར་གྱུར་ཅིང་མདོག་ནག་ན་སྒྲིབ་པ་ཡོད་དོ། །ཡི་དྭགས་སུ་སྐྱེ་བ་ཡིན་པས་ལན་ཆགས་ཀྱི་གཏོར་མ་མང་དུ་བཏང་། མེ་ལྕེ་དཀར་བར་བྱས་ནས་མེ་ལྕེ་ཆད་ཅིང་འགྲོ་ན་ལྷོ་ཕྱོགས་རིན་ཆེན་རིགས་ཀྱི་ཞིང་ཁམས་སུ་སྐྱེ་བ་ཡིན་ནོ། །མེ་ལྕེ་སྔོ་ནག་ཏུ་བྱས་ནས་རླུང་གི་འཚུབ་མ་བཞིན་དུ་དྲག་པོར་འབར་ན། ལྷ་མ་ཡིན་གྱི་གནས་སུ་སྐྱེ་བ་ཡིན་པས་ཛབ྄་བཟླས་ཤིང་སྦྱིན་སྲེག་མང་དུ་བྱ། མེ་ལྕེ་དམར་ལ་རང་ལུགས་སུ་འབར་ན་ནུབ་ཕྱོགས་བདེ་བ་ཅན་གྱི་ཞིང་ཁམས་སུ་སྐྱེ། མེ་ལྕེ་རྩེ་མོ་མང་པོར་འབར་ན་སྒྲིབ་པ་ཡོད་པའི་ཞད་ཡིན་ཏེ། ཡུལ་མཐའ་འཁོབ་ཀྱི་ཀླ་ཀློར་སྐྱེ་བ་ཡིན་པས་ཕྲིན་ལས་རྣམ་བཞི་བྱ། རྩེ་མོ་གཅིག་ཏུ་འཁྱིལ་ནས་འབར་ན་འོག་མིན་བྱང་ཕྱོགས་དོན་ཡོད་གྲུབ་པའི་ཞིང་དུ་སྐྱེ་བ་ཡིན། མེ་འབར་དུ་མི་བཏུབ་པར་དུ་བ་འཚུབ་ཅིང་ནག་མུག་གེ་འདུག་ན་སྒྲིབ་པ་ཤས་ཡོད་པས་བྱོལ་སོང་དུ་སྐྱེ་བ་ཡིན་པས་རྣམ་པར་མི་རྟོག་པ་བསྒོམ་ཞིང་རུས་པའི་ཐལ་བ་ལ་སཙྪ་མང་དུ་གདབ། མེ་ལྕེ་རྡོ་རྗེ་འཁོར་ལོ་ལ་སོགས་པ་ཕྱག་མཚན་གྱི་དབྱིབས་སུ་འབར་ན་འོག་མིན་ལ་སོགས་པ་ལྷ་གནས་སུ་སྐྱེ་བས་ཚོགས་མཆོད་བསྟར་བར་བྱ། རོ་བསྲེགས་པའི་འབྲས་བུ་ནི་འཇིག་རྟེན་འདིར་ནད་དང་གདོན་ཉུང་སྡིག་པ་འདགས། ཕྱི་མ་རྣམ་པ་སྨིན་པའི་རིག་འཛིན་ཐོབ་པ་གདོན་མི་ཟའོ། །རོ་སྲེག་གི་གལ་འགགས་རྫོགས་སོ།། །།ས་མ་ཡ་ཐམ།། །།