རྒྱན་གྱི་བཤད་པ་ལ་འཇུག་པའི་ཡན་ལག །
བཤད་པ་ཉེ་བར་འགོད་པ། བཤད་པ་ཡོངས་སུ་རྫོགས་པའི་བྱ་བ་དང་གསུམ། དང་པོ་ལ། ཤེས་རབ་ཕ་རོལ་ཕྱིན་པ་ལ། ཞེས་སོགས་ཤོ་ལོ་ཀ་བརྒྱད། འདི་ལ་གཞུང་གི་འབྲེལ་དང་། སོ་སོའི་དཀའ་གནས་ལ་དཔྱད་པ་གཉིས། དང་པོ་ལ། མཁས་པ་སྔ་མའི་ལུགས་བརྗོད་པ་དང་། རང་ལུགས་བཞག་པ་གཉིས། དང་པོ་ལ་གསེར་གླིང་བས་བཏང་སྙོམས་ཀྱིས་བཤད་པ། འབུམ་ཕྲག་གསུམ་པ་ལོ་ཆེན་དང་བཅས་པས་འཇམ་པོས་བཤད་པ། ཤེར་འབྱུང་བློ་གྲོས་ཀྱིས་རྩུབ་མོས་བཤད་པ་མཛད་ཚུལ་དང་གསུམ། དང་པོ་ནི། དེའི་འགྲེལ་པར། མཆོད་བརྗོད་བཤད་པའི་རྣམ་གྲངས། རང་ཉིད་ཀྱི་ཤེས་རབ་ཀྱི་ཆེ་བ། གཞན་གྱིས་ཀྱང་འགྲེལ་པ་རྩོམ་རིག་པ། ཁེངས་པ་བསྐྱུངས་ཏེ་འགྲེལ་པ་རྩོམ་པ་ལ་སྤྲོ་བ་སྐྱེ་ཚུལ་ཏེ་ལྔ་པོ་རིམ་བཞིན་ཤླཽ་ཀ་གཅིག་དང་། བཞི་དང་། རེ་རེས་བསྟན་པར་བཞེད། གཉིས་པ་ནི། རྣམ་པར་དབྱེ་ཞེས་པ་ལས་འཕྲོས་ནས། འགྲེལ་པ་འདི་ཉིད་ཇི་ལྟར་རྩོམ་ན་བླ་མ་སྔ་མའི་མན་ངག་ལ་བརྟེན་ནས་རང་བཟོས་མ་བསླད་པར་འཆད་ཅེས་སྟོན་པ་ལ། འགྲོ་ལ་ཆགས་པས་ཞེས་སོགས་བྱུང་བར་བཞེད། གསུམ་པ་ནི། རྣམ་པར་དབྱེ་ཞེས་པ་ལས་འཕྲོས་ནས། ཐོགས་མེད་ལ་སོགས་པ་བླ་མ་སྔ་མའི་འགྲེལ་པ་མཐོང་བས་རང་བཟོའི་སྐྱོན་མེད་ཅེས་འཆད་པ་ལ། འགྲོ་ལ་ཞེས་སོགས་ཤོ་ལོ་ཀ་བཞི་དང་། དེ་རྣམས་ཀྱིས་རྒྱན་གྱི་དགོངས་པ་འགྲེལ་པ་ལ་རིམ་བཞིན། མ་རྟོགས། ལོག་རྟོག །ཐེ་ཚོམ། རྨོངས་པའི་དྲི་མ་རྣམས་སེལ་མ་ནུས་ལ། དོན་གསལ་འདི་དེ་ལྟར་མ་ཡིན་པས་ཟློས་སྐྱོན་མེད་ཅིང་འགྲེལ་པ་གཞན་རྣམས་ལས་ཡ་མཚན་ཆེ་བ་ཡིན་ནོ་ཞེས་འཆད་པ་ལ། དེ་ལྟར་ཞེས་སོགས་ཤོ་ལོ་ཀ་གསུམ་བྱུང་བར་བཞེད།
གཉིས་པ་ནི། འདིར་ནི་རོང་སྟོན་ཤེས་བྱ་ཀུན་རིག་གི་ཊཱི་ཀ་བར་མའི་བཞེད་པས་ཤོ་ལོ་ཀ་བརྒྱད་ཀྱི་དོན་བསྡུ་ན། མཆོད་པར་བརྗོད་ཅིང་རྩོམ་པར་དམ་བཅའ་བ། རྒྱན་གྱི་བཤད་པའི་རྣམ་གྲངས་བཀོད་པ། འགྲེལ་པ་ཇི་ལྟར་བརྩམས་པའི་ཚུལ་དང་གསུམ་དུ་འདུས་ཤིང་། དེ་དག་རིམ་བཞིན། ཤོ་ལོ་ཀ་གཅིག་དང་། བཞི་དང་། གསུམ་གྱིས་བསྟན་ཏོ། །གཉིས་པ་ལ། མཐའ་དཔྱད་པ་དང་། ངག་དོན་གཉིས། དང་པོ་ལ། དོན་གསལ་གྱི་དགོས་སོགས་ཆོས་བཞི་ངོས་བཟུང་། གཞུང་ལས་བསྟན་ཚུལ། འཕྲོས་དོན་གཞན་བཤད་པ་དང་གསུམ། དང་པོ་ནི། འོག་ཏུ་རྒྱན་རྩ་བའི་དགོས་འབྲེལ་འཆད་པར་འགྱུར་བ་ལས་དཔགས་ཏེ་ཤེས་སོ། །གཉིས་པ་ནི། ཤེས་རབ་ཕ་རོལ་ཕྱིན་པ་ལ། ཞེས་པས་བརྗོད་བྱ་དང་། ཉིང་དགོས་བསྟན། རྣམ་པར་དབྱེ་ཞེས་པས་དགོས་པ་བསྟན། འབྲེལ་བ་ཤུགས་ལ་བསྟན་ནོ། །གསུམ་པ་ནི། ཤེས་རབ་ཕ་རོལ་ཕྱིན་པ་ལ། ཞེས་སོགས་ཀྱི་སྐབས་ནས་བསྟན་པའི་ཤེར་ཕྱིན་དེ་གཞུང་གཞི་ལམ་འབྲས་བུའི་ཤེར་ཕྱིན་གསུམ་པོ་གང་ལ་བྱེད་སྙམ་ན། རང་ལུགས་ནི། མཆོད་བརྗོད་དང་རྩོམ་པར་དམ་བཅའ་གཉིས་ཀའི་སྐབས་ཀྱི་ཤེར་ཕྱིན་ལ་གསུམ་ཀ་ཡོད་པར་འདོད་དེ། འདི་བསྟན་བཅོས་ལུས་ཀྱི་བརྗོད་བྱ་དང་མཐུན་པའི་མཆོད་བརྗོད་གང་ཞིག །གསུམ་ཀ་ཡང་རྒྱན་འགྲེལ་པ་དང་བཅས་པའི་བརྗོད་བྱའི་གཙོ་བོ་ཡིན་པའི་ཕྱིར། གཉིས་པ་ནི། སློབ་དཔོན་སེང་གེ་བཟང་པོས་འགྲེལ་པ་དོན་གསལ་རྩོམ་པའི་ཐོག་མར་མཆོད་བརྗོད་དང་རྩོམ་པར་དམ་བཅའ་མཛད་པ་ཆོས་ཅན། དགོས་པ་ཡོད་དེ། བསྟན་བཅོས་རྩོམ་པའི་བར་ཆད་ཞི་བ་དང་། རྩོམ་པ་མཐར་ཕྱིན་པའི་ཆེད་ཡོད་པའི་ཕྱིར། འགྲོ་ལ་ཆགས་པས་ཀུན་ཆགས་མཛད། ཅེས་པའི་སྐབས་སུ་གཉིས་ཀྱི་དང་པོ་ལ། བསྟན་བཅོས་སྤྱིའི་མཐའ་དཔྱད་པ་དང་། འདིར་བསྟན་གྱི་བསྟན་བཅོས་ཆེན་པོ་ངོས་བཟུང་བ་གཉིས། དང་པོ་ལ། སྤྱིར་བསྟན་བཅོས་ལ། ས་སྡེ་ལས། དོན་མེད་དོན་ལོག་དོན་དང་ལྡན། །ངན་གཡོ་སྙིང་བྲལ་སྡུག་བསྔལ་སྤོང་། །ཐོས་རྩོད་སྒྲུབ་པ་ལྷུར་ལེན་པ། །བསྟན་བཅོས་རྣམ་པ་དགུ་ཡིན་ནོ། །ཞེས་པ་ལྟར་ཡིན་ལ། བསྡུ་ན། ལྟར་སྣང་དང་ཡང་དག་གཉིས་སུ་འདུ་ཞིང་། མཚན་ཉིད་ནི། གཙོ་བོར་བསྟན་བཅོས་རྩོམ་པའི་བསམ་པས་ཀུན་ནས་བསླངས་ཏེ། རང་གི་ཞེ་འདོད་ཀྱི་གྲུབ་མཐའ་གཞན་ལ་བསྟན་པའི་ཕྱིར་དུ་བསྡེབས་པ་ལུང་གི་བསྟན་བཅོས་སྤྱིའི་མཚན་ཉིད། བསྟན་བཅོས་གང་ཞིག །ཁྱད་ཆོས་བཞི་པོ་གང་རུང་དང་བྲལ་བ་བསྟན་བཅོས་ལྟར་སྣང་གི་མཚན་ཉིད། དེ་གང་ཞིག །ཁྱད་ཆོས་བཞི་དང་ལྡན་པ་བསྟན་བཅོས་རྣམ་དག་གི་མཚན་ཉིད། ཁྱད་ཆོས་བཞི་ནི། རྒྱུད་བླར། གང་ཞིག་རྒྱལ་བའི་བསྟན་པ་འབའ་ཞིག་གི །དབང་བྱས་རྣམ་གཡེང་མེད་ཡིད་ཅན་གྱིས་བཤད། །ཐར་པ་ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྤྱི་བོས་བླང་། །ཞེས་གསུངས་པས། བསམ་པ་ཀུན་སློང་གི་ཁྱད་པར། རྗོད་བྱེད་ཚིག་གི་ཁྱད་པར། བརྗོད་བྱ་དོན་གྱི་ཁྱད་པར། དགོས་པ་བྱེད་ལས་ཀྱི་ཁྱད་པར་རོ། །གཞན་ཡང་བསྟན་བཅོས་ཀྱི་སྒྲ་དོན་དབྱེ་བ་སོགས་དུ་མ་ཡོད་ཀྱང་འདིར་དེ་ཙམ་མོ། །གཉིས་པ་ནི། ཤེར་ཕྱིན་གྱི་མདོ་དང་མངོན་རྟོགས་རྒྱན་གཉིས་ཀ་ཡང་འདིར་བསྟན་གྱི་བསྟན་བཅོས་ཆེན་པོ་ཡིན་ཏེ། ཉི་ཁྲི་དེ་ཉིད་རྣམ་ངེས་དེ་ཤེར་ཕྱིན་གྱི་མདོ་དང་མངོན་རྟོགས་རྒྱན་གཉིས་ཀའི་རྣམ་བཤད་ཡིན་པའི་ཕྱིར། ཊཱི་ཀ་ལས། གང་གི་རྣམ་བཤད་མཛད་ཅེ་ན། བསྟན་བཅོས་ཆེན་པོ་མངོན་པར་རྟོགས་པའི་རྒྱན་མདོ་དང་བཅས་པའི་འོ། །ཞེས་སོ། །དེས་ན་འདིར་བསྟན་གྱི་བསྟན་བཅོས་ཆེན་པོ་ཡིན་ན་བསྟན་བཅོས་ཡིན་པས་མ་ཁྱབ་བོ། །ངག་དོན་ནི། འཕགས་པ་ཐོགས་མེད་ཆོས་ཅན། རྒྱན་གྱི་རྣམ་བཤད་མཛད་པ་ཡིན་ཏེ། རྒྱན་གྱི་རྣམ་བཤད་ཉི་ཁྲི་དེ་ཉིད་རྣམ་ངེས་མཛད་པའི་ཕྱིར།
༈ གཉིས་པ་བཤད་པ་ཉེ་བར་དགོད་པ་ལ། གུས་པས་འཇུག་པའི་ཡན་ལག་མཆོད་བརྗོད། བསྟན་བཅོས་ལ་འཇུག་པའི་ཡན་ལག་དགོས་འབྲེལ། བསྟན་བཅོས་ཀྱི་བརྗོད་བྱ་མངོན་རྟོགས་བཤད་པ་དང་གསུམ། དང་པོ་ལ། གཞུང་སྤྱིའི་འབྲེལ་དང་། སོ་སོའི་དཀའ་གནས་ལ་དཔྱད་པ་གཉིས། དང་པོ་ནི། མཆོད་བརྗོད་ཀྱི་ཚིགས་བཅད་འདི་མཚམས་སྦྱར་སོགས་འཆད་ཐབས་ལྔའི་སྒོ་ནས་འཆད་ཅིང་། མཚམས་སྦྱར་ལ། རྒྱུ་མཚན་གྱི། དགོས་པའི། རྩོད་པའི། དྲིས་ལན་གྱི། སྔར་འགྲེལ་གྱི་སྒོ་ནས་མཚམས་སྦྱར་བ་སོགས་དུ་མ་ཡོད་པའི་ནང་ནས་འདི་དགོས་པའི་མཚམས་སྦྱར་བ་ཡིན་ནོ། །འོ་ན་རྒྱན་རྩོམ་པའི་ཐོག་མར་སྤྱིར་མཆོད་བརྗོད། བྱེ་བྲག་མཁྱེན་གསུམ་ལ་མཆོད་པར་བརྗོད་པ་ལ་དགོས་པ་ཅི་ཡོད་ཅེ་ན། རང་ཉིད་དམ་པའི་སྤྱོད་པ་དང་མཐུན་ཞིང་དེ་ལ་གདུལ་བྱ་གཞན་འཇུག་པའི་དགོས་པ་ཡོད་ཅེས་འཆད་པ་ལ། འཕགས་པ་བྱམས་པ་ཞེས་སོགས་བྱུང་། མཁྱེན་གསུམ་གྱིས་མཚོན་པའི་དངོས་བརྒྱད་དོན་བདུན་ཅུ་དང་བཅས་པ་རྒྱན་གྱི་བརྗོད་བྱའི་གཙོ་བོར་རྟོགས་ནས་རྒྱན་གྱི་གདུལ་བྱ་ཡུམ་མཁྱེན་གསུམ་ལ་ཐོས་བསམ་སྒོམ་གསུམ་གྱིས་ཞུགས་ཏེ། མཐར་རྣམ་མཁྱེན་ཐོབ་ཕྱིར་བྱེ་བྲག་མཁྱེན་གསུམ་ལ་མཆོད་པར་བརྗོད་ཅེས་འཆད་པ་ལ། གཞན་དག་ཅེས་སོགས་བྱུང། མཆོད་བརྗོད་ཀྱི་དོན་བསྡུ་ན། མཁྱེན་གསུམ་གྱི་སྤངས་རྟོགས་དང་། མཛད་པ་ཕྲིན་ལས་ཀྱི་ཡོན་ཏན་བརྗོད་བྱར་འདུས་ཞེས་བསྡུས་དོན་འཆད་པ་ལ། འདིས་ནི་ཞེས་སོགས་བྱུང་། མཆོད་བརྗོད་ཀྱི་ཚིགས་བཅད་འདི་ལ་བརྟེན་ནས་རྒྱན་གྱི་གདུལ་བྱ་དབང་རྟུལ་མཁྱེན་གསུམ་ལ་དད་པ་སྐྱེ་བ་དང་། དབང་རྣོན་མཁྱེན་གསུམ་གྱིས་འཕགས་བཞིའི་བཞེད་དོན་སྒྲུབ་ཚུལ་གྱི་རྒྱུ་མཚན་མཐོང་བས་ཡུམ་ལ་དད་པ་སྐྱེ་བ་དངོས་ཀྱི་དགོས་པ་ཡིན་ཞེས་འཆད་པ་ལ། རེ་ཞིག་ཅེས་སོགས་བྱུང་། དེ་ལྟར་དད་པ་ལ་བརྟེན་ནས་གུས། གུས་པ་ལ་བརྟེན་ནས་ཞུགས། ཞུགས་པ་ལ་བརྟེན་ནས་ལེགས་པའི་མཆོག་ཐོབ་པར་འགྱུར་བ་བརྒྱུད་པའམ་མཐར་ཐུག་གི་དགོས་པ་ཡིན་ཞེས་འཆད་པ་ལ། དེ་ལ་ཞེས་སོགས་བྱུང་། དེ་རྣམས་ཀྱི་དོན་བསྡུ་ནི། དེའི་ཕྱིར་སོགས་སོ། །གལ་ཏེ་མཆོད་བརྗོད་ཀྱི་སྐབས་འདིར་མངོན་པར་རྟོགས་པ་བརྒྱད་ཀ་ལ་མི་བསྟོད་པར་མཁྱེན་གསུམ་ཁོ་ན་ལ་བསྟོད་པས་བསྟོད་གྲངས་ཉུང་བའི་སྐྱོན་ཡོད་ཅེ་ན། མཁྱེན་གསུམ་གྱིས་མངོན་རྟོགས་བརྒྱད་ཀ་བསྡུས་པས་དོན་གྱིས་བསྟོད་པར་འགྱུར་བའི་ཕྱིར་སྐྱོན་མེད་ཅེས་འཆད་པ་ནི། དེ་ལ་སོགས་སོ། །ཚིག་དོན་ལ། བསྟོད་པ་དང་། ཕྱག་འཚལ་བ་གཉིས། དང་པོ་ལ། གཞི་ཤེས། ལམ་ཤེས། རྣམ་མཁྱེན་ལ་བསྟོད་པ་དང་གསུམ། དང་པོ་ལ། བཤད་བྱའི་མདོ་དྲང་བ་དང་། དགོངས་འགྲེལ་གྱི་བསྟན་བཅོས་དང་སྦྱར་བ་གཉིས། དང་པོ་ནི། མདོ་ལས། དགེ་སློང་ལྔ་སྟོང་ཙམ་གྱི་དགེ་སློང་གི་དགེ་འདུན་ཆེན་པོ་དང་ཐབས་ཅིག་སྟེ། ཞེས་སོགས་སོ། །གཉིས་པ་ནི། དེ་ཉིད་རྟེན་གྱི་གང་ཟག །ཐབས་གཞི་ཤེས། འབྲས་བུ་མྱང་འདས་གསུམ་གྱི་སྒོ་ནས། ཤེར་ཕྱིན་གྱི་མདོའི་དོན་རྒྱན་རྩ་འགྲེལ་གྱི་ཚིག་སོ་སོ་དང་སྦྱར་ཏེ་འཆད་དོ། །གཉིས་པ་ལ་ཡང་གཉིས་ལས། མདོ་དྲང་བ་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མེད་གྲངས་མེད་པ་ཐམས་ཅད་ཀྱང་། སོགས་སོ། །གཉིས་པ་བསྟན་བཅོས་དང་སྦྱར་བ་ནི། རྟེན་གྱི་གང་ཟག །ཐབས་ལམ་ཤེས། འབྲས་བུ་འཇིག་རྟེན་གྱི་དོན་སྒྲུབ་པའི་མཛད་པ་གསུམ་གྱི་སྒོ་ནས་སྔར་ལྟར་རོ། །གསུམ་པ་ལ་ཡང་གཉིས་ལས། མདོ་དྲང་བ་ནི། དེ་ནས་དེའི་ཚེ་བཅོམ་ལྡན་འདས་ཉིད་ཀྱིས་གདན་སེང་གེའི་ཁྲི་བཤམས་ནས་སྐུ་དྲང་པོར་བསྲང་སྟེ། ཞེས་སོགས་སོ། །གཉིས་པ་བསྟན་བཅོས་དང་སྦྱར་བ་ནི། རྟེན་གྱི་ག །ང་ཟག །ཐབས་རྣམ་མཁྱེན། འབྲས་བུ་ཆོས་འཁོར་བསྐོར་བའི་མཛད་པ་གསུམ་གྱི་སྒོ་ནས་སྔར་ལྟར་རོ། །གཉིས་པ་ཕྱག་འཚལ་བ་ནི། ཉན་ཐོས་བྱང་ཆུབ་སེམས་དཔའ་ཞེས་སོགས་རྩ་འགྲེལ་ལོ། །བརྒལ་ལན་ལ། བརྒལ་བ་དང་། ལན་གཉིས། དང་པོ་ལ། གང་ལ་རྩོད་པའི་ཡུལ། གང་གིས་རྩོད་པའི་གང་ཟག །ཇི་ལྟར་རྩོད་པའི་ཚུལ་དང་གསུམ། དང་པོ་ནི། མཆོད་བརྗོད་ཀྱི་སྐབས་སུ་དངོས་སུ་མཁྱེན་གསུམ་ལ་བསྟོད་ཕྱག་བྱས་ནས་ཤུགས་ལ་མཁྱེན་གསུམ་བརྗོད་བྱར་བྱས་པའི་བསྟན་བཅོས་རྩོམ་པར་ཁས་བླངས་པ་ལའོ། །གཉིས་པ་ནི། སྒྲ་རྟོག་ཡུལ་ལ་དངོས་དབང་གིས་འཇུག་ཅིང་། གཞི་ལམ་རྣམ་གསུམ་འགལ་བར་ཁས་ལེན་པའི་གང་ཟག་གིས་སོ། །གསུམ་པ་ནི། མངོན་པར་རྟོགས་པའི་རྒྱན་དེས་ཡུལ་གཞི་ལམ་རྣམ་གསུམ་བརྗོད་བྱར་བྱེད་པར་ཐལ། ཡུལ་ཅན་མཁྱེན་པ་གསུམ་བརྗོད་བྱར་བྱེད་པ་གང་ཞིག །ཡུལ་གཏན་ལ་མ་ཕབ་པར་ཡུལ་ཅན་གཏན་ལ་འབེབས་མི་ནུས་པའི་ཕྱིར། འདོད་ན། གཞི་ཁོ་ན་བརྗོད་བྱར་བྱེད་ན། མངོན་པའི་མདོ་དང་ཟློས་པའི་སྐྱོན་ཡོད་དེ། དེ་ལས་གཞི་ཕུང་ཁམས་སྐྱེ་མཆེད་ཀྱི་ཆོས་རྣམས་རྒྱས་པར་བསྟན་ཟིན་པའི་ཕྱིར། ལམ་ཁོ་ན་བརྗོད་བྱར་བྱེད་ན་སྤང་བྱ་ཀུན་ནས་ཉོན་མོངས་པ་བརྗོད་བྱར་མ་བསྡུས་པར་ཐལ། དེའི་ཕྱིར། འདོད་ན། རྒྱན་ལ་བརྟེན་ནས་སྤང་གཉེན་གྱི་འབྲེལ་བ་ཁོང་དུ་མི་ཆུད་པར་འགྱུར། རྣམ་པ་ཁོ་ན་བརྗོད་བྱར་བྱེད་ན། རྣམ་གྲོལ་དོན་གཉེར་གྱི་སྐྱེས་བུ་ལ་མཁོ་བའི་དོན་ཅུང་ཟད་ཀྱང་མ་བསྟན་པར་ཐལ། རྣམ་པ་གཞི་མེད་ཙམ་བརྗོད་བྱར་བསྡུས་པའི་ཕྱིར། གསུམ་ཀ་བརྗོད་བྱར་བྱེད་ན། བསྟན་བཅོས་ལུས་རྫས་ཐ་དད་པ་གསུམ་དུ་འགྱུར་བ་དང་། མདོ་དང་ཟློས་སྐྱོན་ཡོད་པར་འགྱུར་ཏེ། མདོ་ལས་གཞི་ལམ་རྣམ་གསུམ་རྒྱས་པར་བསྟན་ཟིན་པའི་ཕྱིར། ཞེས་པའི་བརྒལ་བ་འཆད་པ་ནི། དེ་ལྟར་ཞེས་སོགས་སོ། །གཉིས་པ་ལ། བསྟན་བཤད་བསྡུ་བ་གསུམ། དང་པོ་ནི། རྒྱན་ལ་གཞི་ལམ་རྣམ་གསུམ་རེ་རེ་ཁོ་ན་བརྗོད་བྱར་བསྡུས་པར་ཐལ་བའི་སྐྱོན་ཡོད་པ་མ་ཡིན་ཏེ། དེས་གཞི་ལམ་རྣམ་གསུམ། གཞི་ལམ་རྣམ་གསུམ་གྱིས་མཁྱེན་གསུམ། མཁྱེན་གསུམ་གྱིས་མངོན་རྟོགས་བརྒྱད་ཀ་བསྡུས་པའི་རྒྱུ་མཚན་གྱིས་རྒྱན་འདི་མངོན་པར་རྟོགས་པ་མཐའ་དག་གི་རྒྱན་དུ་འཐད་པའི་ཕྱིར་ཞེས་འཆད་པ་ནི། དེ་ནི་སོགས་སོ། །འོན་ཀྱང་ལུས་རྫས་ཐ་དད་པ་གསུམ་དུ་འགྱུར་བའི་སྐྱོན་ཡོད་པ་མ་ཡིན་ཏེ། གཞི་ལམ་རྣམ་གསུམ་དེ་གཏན་ལ་ཕབ་པར་བྱ་བའི་ཡུལ། དེ་རྟོགས་པར་བྱེད་པའི་ལམ། ཐོབ་བྱ་འབྲས་བུ་གསུམ་གྱི་སྒོ་ནས་ལྡོག་པ་ཐ་དད་དུ་བསྟན་པ་ཡིན་གྱི། ནང་ཕན་ཚུན་འགལ་བའི་རྫས་གཞན་མ་ཡིན་པའི་ཕྱིར། ཞེས་པའི་ལན་ཤུགས་ལ་བསྟན། མདོ་དང་ཟློས་པའི་སྐྱོན་ཡོད་པ་མ་ཡིན་ཏེ། མདོ་དང་བསྟན་བཅོས་ལ་གནས་སྐབས་དང་མཐར་ཐུག་གི་དགོས་པ་མི་འདྲ་བའི་ཁྱད་པར་ཡོད་པའི་ཕྱིར། ཞེས་འཆད་པ་དགོས་འབྲེལ་ལོ། །གཉིས་པ་ལ། མདོ་དྲང་བ་དང་། དེའི་དོན་བཤད་པ་གཉིས། དང་པོ་ནི། ཡུམ་བར་མ་ལས་མཁྱེན་གསུམ་གྱིས་མངོན་པར་རྟོགས་པ་བརྒྱད་བསྡུས་ཚུལ་མདོར་བསྟན་པ། འདི་ལྟར་སོགས་སོ། །གཞི་ཤེས་ཀྱིས་ཐེག་དམན། ལམ་ཤེས་ཀྱིས་བྱང་འཕགས། རྣམ་མཁྱེན་གྱིས་སངས་རྒྱས་འཕགས་པའི་མངོན་རྟོགས་བསྡུས་ཚུལ་དྲི་ལན་གྱི་སྒོ་ནས་རྒྱས་པར་བཤད་པ་ལ། དྲི་བ་ནི། བཅོམ་ལྡན་འདས་སོགས་དང་། ལན་ནི། རབ་འབྱོར་སོགས་ཀྱིས་རིམ་བཞིན་འཆད། དེ་བཞིན་དུ་ཞེས་སོགས་དང་། རྒྱས་པ་ཞེས་སོགས་ཀྱིས་ཡུམ་བསྡུས་པའི་མདོ་དྲང་བ་དང་། རྒྱས་པའི་ལུང་ཁུངས་སོ་སོར་སྨོས། གཉིས་པ་ནི། མཁྱེན་གསུམ་གྱིས་མངོན་རྟོགས་གསུམ་བསྡུས་ཚུལ་གྱི་མདོའི་དོན་འཆད་པ་རིམ་བཞིན། དེ་ལ་སོགས་སོ། །གསུམ་པ་ནི། དེ་ལྟ་བས་ན་ཞེས་སོགས་སོ། །ངག་དོན་དུ་དྲིལ་ན། རྗེ་བཙུན་བྱམས་པ་མགོན་པོས་རྒྱན་རྩོམ་པའི་ཐོག་མར་ཡུལ་ཁྱད་པར་ཅན་ལ་མཆོད་པར་བརྗོད་པ་ཆོས་ཅན། དགོས་པ་ཡོད་དེ། རང་ཉིད་སྐྱེས་བུ་དམ་པའི་སྤྱོད་པ་དང་མཐུན་པ་དང་། གདུལ་བྱ་གཞན་ཡུམ་ལ་དང་བའི་སྒོ་ནས་ཐོས་བསམ་སྒོམ་གསུམ་གྱིས་འཇུག་པའི་ཆེད་ཡོད་པའི་ཕྱིར།