བཤེས་པའི་གཏམ་དུ་བྱ་བ་བདེ་སྐྱིད་འབྱུང་གནས། རིག་འཛིན་འགྱུར་མེད་རྡོ་རྗེ།
བཤེས་པའི་གཏམ་དུ་བྱ་བ་བདེ་སྐྱིད་འབྱུང་གནས་ཞེས་བྱ་བ་བཞུགས་སོ། །རིག་འཛིན་འགྱུར་མེད་རྡོ་རྗེ།
བཤེས་པའི་གཏམ་དུ་བྱ་བ་བདེ་སྐྱིད་འབྱུང་གནས་ཞེས་བྱ་བ་བཞུགས་སོ། །
ༀ་སྭ་སྟི། བཤེས་པའི་གཏམ་དུ་བྱ་བ་བདེ་སྐྱིད་འབྱུང་གནས་ཞེས་བྱ་བ། ཐམས་ཅད་མཁྱེན་པ་ལ་ཕྱག་འཚལ་ལོ། །རྒྱལ་བ་ཀུན་གྱི་མཁྱེན་བརྩེ་ནུས་པ་ནི། །མཚུངས་མེད་བླ་མའི་གཟུགས་སུ་ཡོངས་བཞེངས་ནས། །ལྷར་བཅས་འགྲོ་བའི་ཉེར་འཚོའི་ཞིང་གྱུར་པ། །དེ་ལ་དངོས་པོ་ཀུན་གྱིས་ཕྱག་བགྱིའོ། །༡མངོན་པར་མཐོ་དང་ངེས་པར་ལེགས་པའི་ལམ། །ཚུལ་བཞིན་སྤྱོད་པ་ཉིད་ལས་སྲིད་ཞིའི་དཔལ། །དཀའ་བ་མེད་པར་འབྱུང་ཕྱིར་བླང་དོར་གྱི། །གནས་རྣམས་གསལ་བྱེད་ཉི་མའི་མེ་ལོང་བཞིན། །༢སྔོན་རབས་མཁས་པས་སྤེལ་བ་ཡི། །ལེགས་བཤད་རིན་ཆེན་ཡོད་བཞིན་དུ། །རྨོངས་བློའི་ངག་ཚིག་འཆིང་བུ་ལ། །རྒྱན་དུ་རེ་བ་བྱིས་བློའི་ཚུལ། །༣འོན་ཀྱང་མཁའ་ལྡིང་དབང་པོ་ནས། །བུང་བའི་བར་གྱི་འདབ་ལྡན་ཀུན། །ནམ་མཁའི་ལམ་བཞིན་ལྷག་པའི་སེམས། །དགེ་བར་མཚུངས་ཕྱིར་དོན་ལྡན་ཉིད། །༤མཁས་རྣམས་དོན་ལ་ཡིད་འཇུག་ཕྱིར། །ཧ་ཅང་སྤྲོས་པ་ཅི་ཕྱིར་དགོས། །བླུན་པོ་གྲགས་པའི་རྗེས་འབྲང་གིས། །མང་དུ་སྨྲོས་ཀྱང་དོན་མི་འགྱུར། །༥འོན་ཀྱང་དོན་བཟང་ཚིག་སྙན་པོར། །བརྗོད་པས་ཕོངས་ཀྱང་བཤེས་ཁྱོད་ཀྱི། །བཞེད་པ་སྐོང་ཕྱིར་ལྷག་པའི་སེམས། །བཟང་པོས་བརྗོད་ཕྱིར་གསན་པར་རིགས། །༦དགེ་བཅུའི་ཁྲིམས་ལྡན་དལ་འབྱོར་གྱིས། །མངོན་མཐོ་འཇིག་རྟེན་ཡ་རབས་ཉིད། །ཚུལ་གནས་ཐོས་བསམ་སྒོམ་པ་ཡིས། །འཚོ་བ་དམ་ཆོས་འཛིན་པའི་མཆོག །༧དེ་ཕྱིར་གཙུག་ལག་རྣམ་གཉིས་ལ། །རྣམ་དཔྱོད་མིག་གིས་ལེགས་གཞལ་ནས། །བླང་དོར་འཆོལ་བ་མེད་པར་སྤྱད། །དེ་ཡང་རིན་ཆེན་འཕྲེང་བ་ལས། །༨མི་ཡི་ཆོས་ལུགས་ལེགས་སྤྱད་ན། །ལྷ་ཡུལ་བགྲོད་པ་ཐག་མི་རིང་། །ལྷ་དང་མི་ཡི་ཐེམ་སྐས་ལ། །འཛེགས་
ན་ཐར་པ་གམ་ན་འདུག །༩ཅེས་གསུངས་ཕྱིར་ན་མངོན་མཐོའི་རྟེན། །ཕུན་ཚོགས་རྒྱུ་རྐྱེན་ཀུན་ཚང་བས། །ཕྱི་མའི་བདེ་སྐྱིད་རང་དབང་དུ། །སྤྱོད་པའི་ཚུལ་འདིར་བསམ་པར་བྱ། །༡༠ད་ལྟའི་ཕུན་ཚོགས་གང་ལགས་པ། །རྒྱུ་མེད་པར་ནི་སྟེས་དབང་གིས། །རྙེད་མིན་སྔོན་དགེའི་ལེགས་བྱས་རྒྱུ། །སད་པ་ལས་ནི་བྱུང་བའི་ཕྱིིར། །༡༡ཕྱི་མའི་རྟེན་དང་ལས་འབྲས་ལ། །ཡིད་ཆེས་ལྟ་བས་ཟིན་པ་ཡིས། །མི་དགེ་བཅུ་པོ་ལུས་དང་ངག །ཡིད་ཀྱིས་རྟག་ཏུ་བསྲུང་ཞིང་སྤོངས། །༡༢དཔེར་ན་གཤིན་པོའི་ཞིང་ས་ལ། །ས་བོན་གང་བཏབ་སྐྱེ་བ་བཞིན། །དགེ་ལས་བདེ་བ་ཐམས་ཅད་དེ། །མི་དགེ་བ་ལས་སྡུག་བསྔལ་འབྱུང་། །༡༣དེ་ཕྱིར་སྡིག་པ་ཆུང་ངུ་ཡང་། །སྲོག་བཞིན་འབད་པས་བསྲུང་བ་དང་། །དགེ་བ་དཀའ་ཡང་ཅི་ནུས་སུ། །བསྒྲུབ་པའི་སྤང་བླང་ཞིབ་པར་བྱ། །༡༤གང་དུ་དགེ་བའི་ལས་ལམ་ལ། །སྤྱད་པས་འཇིག་རྟེན་འདི་ཉིད་དུ། །རྫོགས་ལྡན་དུས་ཀྱི་བདེ་སྐྱིད་དཔལ། །འབྱུང་ཞེས་སངས་རྒྱས་རྣམས་ཀྱིས་བསྔགས། །༡༥དེ་ཕྱིར་སངས་རྒྱས་ཆོས་དང་ནི། །དགེ་འདུན་རྣམས་དང་ཕ་དང་མ། །དགེ་སྦྱོང་རིགས་ཀྱི་རྒན་པ་སོགས། །གུས་པས་བསྟེན་ཅིང་བཀུར་བར་བྱ། །༡༦ནད་པ་དང་ནི་ཕོངས་པ་དང་། །སྡུག་བསྔལ་ཅན་གྱི་འགྲོ་དག་ལ། །ཕན་པའི་ལྷག་བསམ་བཟང་པོ་ཡིས། །ཇི་ལྟར་ནུས་བཞིན་རྗེས་སུ་སྐྱོངས། །༡༧ཡི་གེ་འདྲི་མཆོད་སྦྱིན་པ་དང་། །ཉན་དང་ཀློག་འཛིན་དེ་སེམས་བསྒོམ། །འཆད་དང་ཁ་ཏོན་ཆོས་སྤྱོད་བཅུ། །བསོད་ནམས་འབྱུང་གནས་ཉིད་ཕྱིར་སྒྲུབས། །༡༨ཕྱག་འཚལ་མཆོད་འབུལ་སྡིག་བཤགས་དང་། །རང་གཞན་དགེ་ལ་ཡི་རང་སོགས། །ཡན་ལག་བདུན་ལྡན་ཐར་འདོད་ཀྱི། །ཉམས་ལེན་ཉིད་དེ་འབད་པར་བྱ། །༡༩ཚེ་འདི་དོན་གཉེར་སྐྱེ་བོ་ལ། །གཏན་གྱི་འདུན་མའི་སྐལ་བ་ཆད། །དེ་ཕྱིར་ཡུན་གྱི་བདེ་བ་ལ། །དམིགས་ཏེ་སྙིང་ནས་ཆོས་བཞིན་སྤྱོད། །༢༠ཇི་ལྟར་ཚེ་ནི་མར་མེ་བཞིན། །འཛད་མོད་གློ་བུར་རྐྱེན་གྱིས་ནི། །སྐད་ཅིག་ཉིད་ལའང་འཆི་བའི་ཕྱིར། །རྟག་འཛིན་མེད་པའི་བརྩོན་འགྲུས་བྱ། །༢༡འགྲོ་ཀུན་བདེ་གཤེགས་སྙིང་པོ་ཅན། །ཡིན་ཕྱིར་ཀུན་ཏུ་མི་བརྙས་ཏེ། །འཕགས་རྣམས་སྣ་ཚོགས་སྤྱོད་པའི་ཚུལ། །སྟོན་ཕྱིར་ཐབས་
ལ་མཁས་པར་བྱ། །༢༢བདག་ཉིད་རིགས་གཟུགས་ལང་ཚོ་དང་། །མཁས་ཤིང་བློ་གྲོས་ཆེའོ་ཞེས། །ཁེངས་པས་གཞན་ལ་བརྙས་མི་བྱ། །སེམས་དུལ་བ་ལས་ཡོན་ཏན་ཐོབ། །༢༣སྡུག་བསྔལ་རྒྱུ་དང་བཅས་པ་ལས། །ཐར་བར་བྱ་ཕྱིར་དད་པ་ཡིས། །རྩ་བར་རབ་ཏུ་བརྟན་བྱ་སྟེ། །འདི་ལས་དགེ་བའི་ཆོས་ཀུན་འབྱུང་། །༢༤ཚུལ་ཁྲིམས་དག་ཅིང་མང་དུ་ཐོས། །ཏིང་འཛིན་དབང་འབྱོར་བརྩེ་བ་ཅན། །བཤེས་གཉེན་དེ་འདྲ་སངས་རྒྱས་བཞིན། །གུས་པས་བསྟེན་ཅིང་བཀུར་བར་བྱ། །༢༥དེ་ལས་རང་སྐལ་འཚམས་པ་ཡི། །སོ་སོ་ཐར་དང་བྱང་སེམས་དང་། །རིག་པ་འཛིན་པའི་སྡེ་སྣོད་ཀྱི། །ཆོས་ཀྱི་བདུད་རྩི་ནོད་པར་བྱ། །༢༦དེ་ཡང་ཁེངས་འདོད་གྲགས་འདོད་དང་། །འགྲན་སེམས་དག་གིས་མ་ཡིན་ཏེ། །རང་དང་གཞན་གྱི་ཕན་བདེ་ཡི། །ཐར་པ་དོན་གཉེར་ཁོ་ནས་སོ། །༢༧མདོ་རྒྱུད་གཞུང་གི་དགོངས་པ་འགྲེལ། །ལུང་དང་རིགས་པས་བརྟགས་བཟོད་པའི། །གསུང་རབ་ཀུན་ལ་ངོམས་མེད་དུ། །ཐོས་པའི་ཕ་རོལ་ཕྱིན་པར་མཛོད། །༢༨སྤོང་བདུན་ཚུལ་ཁྲིམས་དག་པ་དང་། །གཞན་ཕན་བྱང་སེམས་འབྱོངས་པ་དང་། །སྣོད་བཅུད་དག་པར་རྒྱས་ཐེབས་པ། །འདི་གསུམ་ཉམས་ལེན་སྙིང་པོར་འདུ། །༢༩སྟོང་པ་ཉིད་དང་སྙིང་རྗེ་ཆེ། །ཆོས་རྣམས་ཀུན་གྱི་རྩ་བ་རུ། །གསུངས་ཕྱིར་ཐར་འདོད་ཐམས་ཅད་ཀྱི། །བསྒྲུབ་བྱའི་སྙིང་པོ་གཞན་ཡོད་མིན། །༣༠བདག་འཛིན་ཞེན་པས་འཁོར་བར་འཆིང་། །བདག་མེད་རྟོགས་པས་དེ་ལས་གྲོལ། །འདི་ཞེས་གང་ཟག་ངོས་བཟུང་མེད། །དེ་བཞིན་ཆོས་ཀུན་རང་བཞིན་མེད། །༣༡ཆོས་རྣམས་རང་བཞིན་མེད་པ་ལ། །རྒྱུ་འབྲས་ཐམས་ཅད་འགག་མེད་དུ། །འཆར་བ་འདི་ནི་སངས་རྒྱས་ཀྱི། །བསྟན་པའི་ལམ་དུ་གྲུབ་པ་ཡིན། །༣༢དེས་ན་འཁོར་འདས་ཆོས་རྣམས་ཀུན། །སྤྲོས་བྲལ་ཀ་ནས་དག་པ་ལ། །སྐུ་དང་ཡེ་ཤེས་ཡོན་ཏན་ཀུན། །ཡོངས་རྫོགས་ཐེག་དགུའི་རྩེ་མོ་སྟེ། །༣༣དེ་ལ་བརྟན་པ་མ་ཐོབ་བར། །ཉམས་ལེན་གནད་ཀྱི་རྐང་བསྒྲིལ་ནས། །རིམ་པ་བཞིན་དུ་བསླབས་པ་ཡིས། །ལམ་གྱི་གོམས་པ་འཐོབ་པར་བྱ། །༣༤གང་ཞིག་བརྟན་པ་ཐོབ་པ་ན། །ཁྲིགས་ཆགས་ཐམས་ཅད་རང་གྲོལ་ཕྱིར། །ལམ་གྱི་རྐང་གྲངས་མ་ངེས་པས། །གྲུབ་
པའི་སྤྱོད་པའང་སྐབས་འདིར་ཡིན། །༣༥རང་ཉིད་རྟོགས་པ་མངོན་གྱུར་ནས། །དག་པའི་འཁོར་ཚོགས་འབའ་ཞིག་ལ། །གནས་ལུགས་རྗེན་པར་སྟོན་པའི་ཚེ། །ལུས་ངག་སྤྱོད་ལ་མ་ལྟོས་མོད། །༣༦རྟོགས་པའི་གདེངས་ཚད་མ་ཐོབ་པར། །སྣ་ཚོགས་འཁོར་སློབ་སྐྱོང་བའི་ཚེ། །བཙུན་ཚུགས་བཟང་ཞིང་སྨྲ་ཚོད་ཟིན། །བསམ་པ་དགེ་ཞིང་གྲིམས་པར་བྱ། །༣༧འགྲོ་དོན་སྐྱོང་ཚེ་བསྡུ་དངོས་བཞིས། །སྙོམས་པར་སྐྱོང་ཞིང་ཐབས་མཁས་པས། །ཡང་དག་ལམ་ལ་འབྲེལ་ཐོགས་ཀུན། །རྣམ་ཀུན་དོན་ཡོད་ཉིད་དུ་འཁྲིད། །༣༨ཐེག་པ་ཐམས་ཅད་རང་ས་རུ། །བདེན་ཕྱིར་རིས་སུ་གཅོད་པ་ཡིས། །དམོད་ཅིང་ཁ་ཚོན་མི་བྱ་སྟེ། །སྡིག་པ་ཤིན་ཏུ་ལྕི་བར་གསུངས། །༣༩དབེན་པ་བསྟེན་ཚེ་ཚེ་འདི་ཡི། །བདེ་སྐྱིད་གཏམ་ལ་མ་ཆགས་པར། །ཟབ་མོའི་ལམ་གྱི་ཉམས་ལེན་ལ། །ཆོས་དང་རང་རྒྱུད་འདྲེས་པར་བྱ། །༤༠ཉམས་རྟོགས་སྐྱོང་ཚེ་བྱ་བྱེད་ཀུན། །ཆོས་བརྒྱད་འཆིང་བས་མ་བསླད་པར། །འགྱུར་མེད་གནས་ལུགས་ཇི་བཞིན་པར། །རང་ཤར་རང་གྲོལ་ཉིད་དུ་སྐྱོངས། །༤༡ཇི་ལྟར་འབྱོར་པའི་ཡོ་བྱད་ཀྱིས། །སྐུ་གཟུགས་གླེགས་བམ་གཙུག་ལག་རྟེན། །གསར་དུ་བསྒྲུབ་ཅིང་ཉམས་གསོ་ཡང་། །རང་གཞན་བསོད་ནམས་ཆེད་དུ་བྱ། །༤༢མདོར་ན་འཁོར་སློབ་འབྲེལ་བར་བཅས། །དགེ་བའི་རྒྱུ་དང་འབྲས་བུ་ལ། །ཅི་འགྱུར་ཉིད་ཀྱིས་དམིགས་བཟུང་ནས། །རྣམ་ཐར་ཆོས་བཞིན་ཅི་འཁྱོངས་སྒྲུབས། །༤༣ཡོན་ཏན་ལྡན་པ་ཀུན་གྱིས་བཀུར། །ཡོན་ཏན་མེད་པ་བརྙས་བྱའི་གཞི། །འབྱོར་ལྡན་སྐྱེ་བོ་ཀུན་གྱིས་བསྟོད། །དྲིན་གྱིས་བསྐྱངས་ལ་དེ་ལྟ་མིན། །༤༤ལྗོན་ཤིང་འབྲས་བུས་འཚོ་བ་ཡི། །སྤྲེའུས་ལྗོན་པ་ཉིད་ལ་འཚེ། །བྱས་པ་མི་བཟོ་ངན་པའི་འཁོར། །ཕན་འདོགས་པ་ལ་གནོད་ཅིང་འཚེ། །༤༥ལུགས་གཉིས་ཀྱིས་ནི་མངོན་མཐོ་བའི། །གོ་འཕང་འཛིན་པ་དེ་དང་དེའི། །བཟང་པོའི་སྤྱོད་པས་འཚོ་འགྱུར་ན། །རང་དང་གཞན་ལ་ཕན་བདེར་བྱེད། །༤༦གང་ཞིག་ཆེན་པོར་སྙེམ་བཞིན་དུ། །ངན་པར་སྤྱོད་པ་ཤིན་ཏུ་སྨད། །གཡང་ས་ཆེ་ལས་ལྷུངས་པ་ན། །འཚོ་བར་གྱུར་པ་ཅི་ཞིག་ཡོད། །༤༧གང་དུ་གཙོ་བོ་བསམ་པ་དང་། །སྦྱོར་བ་བཟང་པོར་སྤྱོད་པ་ན། །དེ་ལ་བརྟེན་པའི་འཁོར་
འབངས་ཀྱང་། །བཟང་པོའི་སྤྱོད་པས་བདེ་བར་འཚོ། །༤༨རྗེ་བོ་གདུག་སེམས་ངན་སྤྱོད་ཅན། །བརྟེན་པའི་འཁོར་ཡང་དུག་ཅན་གྱི། །མེ་ཏོག་མྱངས་པའི་སྦྲང་རྩི་བཞིན། །ཀུན་ཏུ་མ་རུངས་པ་ཉིད་བྱེད། །༤༩དེས་ན་ངན་སྤྱོད་ཕྲ་མོ་ཡང་། །དུག་ཅན་ཟས་བཞིན་སྤང་བ་དང་། །བཟང་པོའི་བགྱི་བ་འཆི་སོས་ཀྱི། །སྨན་བཞིན་བསྟེན་ལ་ནན་ཏན་བསླབ། །༥༠རྣམ་མང་སྐྱེ་བོ་ལུས་དབྱིབས་སོགས། །སྣ་ཚོགས་མཐོང་མོད་བསམ་པ་ནི། །ལྐོག་གྱུར་ཉིད་ཕྱིར་རྟོགས་པར་དཀའ། །དཔེར་ན་ཨ་མྲའི་འབྲས་བུ་བཞིན། །༥༡དང་པོར་ཚོད་མྱུལ་འདྲིས་པ་ན། །གླགས་ལྟ་གཡོ་སྒྱུའི་ཀུན་སྤྱོད་ཀྱིས། །བསླུ་ཕྱིར་འདྲིས་པར་མི་བྱ་སྟེ། །ངན་པ་སྤྲིན་བཞིན་མི་བརྟན་གཡོ། །༥༢འོན་ཀྱང་ནམ་མཁའ་མཐའ་མེད་བཞིན། །སེམས་ཅན་ཁམས་ཀྱང་དེ་བཞིན་ཏེ། །དེ་བཞིན་བཟང་ངན་གང་ལ་ཡང་། །ཧ་ཅང་འཛིན་ཞེན་མི་བྱའོ། །༥༣གང་ཞིག་བསྟེན་ན་ཉེས་པའི་སྐྱོན། །སྤོང་ཞིང་ཡོན་ཏན་འཕེལ་འགྱུར་བའི། །གྲོགས་དག་དགེ་བའི་བཤེས་ཡིན་ཕྱིར། །བསྟེན་ཅིང་འདྲིས་པ་ཉིད་དུ་བྱ། །༥༤ཡ་རབས་བཟང་པོ་གུད་པ་དང་། །ལོག་པར་ལྟུང་བ་རྣམས་ལ་ཡང་། །ཕན་དང་བདེ་བའི་ལྷག་བསམ་གྱིས། །ཇི་ལྟར་འོས་བཞིན་བསྟི་སྟང་བྱ། །༥༥གཡོ་དང་སྒྱུ་ཡི་སྤྱོད་པ་ཡིས། །བཟང་པོའི་ཚུལ་ལས་ཉམས་བྱེད་པ། །ལས་དེ་ལས་ནི་ལྡོག་ནུས་སམ། །མིན་ནའང་རིང་དུ་སྤང་བ་གཅེས། །༥༦གང་དང་ཉེ་བ་དེ་ལ་ནི། །ཚེར་མ་བཞིན་དུ་འཛུག་བྱེད་པའི། །མ་བསྡམས་བྱིས་པའི་སྐྱེ་བོ་དག །སྤངས་པས་ལུས་སེམས་བདེ་བ་ཐོབ། །༥༧དར་དང་འབྱོར་པ་མི་རྟག་པས། །གུད་ཅིང་ཕོངས་པར་གྱུར་ན་ཡང་། །དམ་པའི་ངང་ཚུལ་མི་གཏོང་བ། །བཟང་པོའི་གསེར་བཞིན་གསལ་བ་མཆོག །༥༨དང་པོར་ཧ་ཅང་མཛའ་བ་ཡང་། །ཕྱིས་ནས་འཁོན་ཅིང་སྡང་བའི་རྒྱུ། །དེ་ཕྱིར་བར་མའི་བཏང་སྙོམས་ཀྱི། །བརྟུལ་ཞུགས་ཉིད་ལ་གནས་པ་ཟབ། །༥༩འབྱོར་པའི་དུས་ན་ཀུན་ཀྱང་གཉེན། །རྒུད་ཚེ་གཉེན་གྱིས་སྤངས་པ་མང་། །དེ་ཕྱིར་བསོད་ནམས་བྱས་པ་ལ། །ཡི་རང་རྗེས་སུ་བསྒྲུབ་པ་གཅེས། །༦༠མཛའ་ཞིང་འདུད་བྱེད་ཕལ་ཆེ་བ། །རང་དོན་ཡིན་གྱིས་མ་མགུ་ན། །གནོད་པར་འགྱུར་ཕྱིར་དུས་ངན་
གྱི། །གྲོགས་ལ་རེ་ལྟོས་བློ་མི་གཏད། །༦༡སྐྱེ་བོ་ཕལ་ཆེར་ཅལ་སྒྲོག་གི །རྗེས་འབྲང་ཕྱིར་ན་བསྟོད་སྨད་གཏམ། །བདེན་པའི་ཟུངས་དང་འབྲེལ་དཀའ་བས། །བརྟགས་ཤིང་དཔྱད་པ་མཁས་པའི་ལུགས། །༦༢འཕྲལ་གྱི་བདེ་བས་ཡུན་གྱི་དཔལ། །འདོར་བ་ངན་པའི་སྐྱེ་བོ་སྟེ། །དགེ་བའི་སེམས་དང་སྤྱོད་པ་ལ། །ཞུམས་པ་མེད་དེ་བཟང་པོ་ཡིན། །༦༣དེ་ཕྱིར་བཟང་སེམས་འབའ་ཞིག་པས། །ཞིབ་མོར་དཔྱད་དེ་དགེ་བ་དང་། །བསྟུན་ནས་འཕྲལ་དུ་ཕན་པ་དང་། །ཡུན་དུ་བདེ་བར་ཅི་འགྱུར་སྒྲུབས། །༦༤སྡིག་པས་བསྒྲུབས་པའི་དགེ་བ་ཡང་། །དུག་དང་འདྲེས་པའི་ཟས་བཞིན་དུ། །སྡུག་བསྔལ་མི་བཟད་སྐྱེད་པའི་རྒྱུར། །མཐོང་ནས་སུ་ཞིག་དང་དུ་ལེན། །༦༥སྔར་འགྲས་བུ་བཞིན་འདུད་ན་ཡང་། །སྙིང་ནི་བསྲེ་བར་མི་བྱ་སྟེ། །སྦྲང་རྩིས་བསྐུས་པའི་དུག་བཞིན་དུ། །ནམ་ཞིག་སྐྱོན་དུ་འགྱུར་བ་ཡིིན། །༦༦ཧ་ཅང་རྩུབ་མོ་དགྲ་ལའང་མིན། །རང་ཉམས་བུས་ཀྱང་ལོན་མི་བྱ། །ནམ་ཞིག་ཕན་དང་གནོད་པའི་མཐའ། །མི་རྟོགས་ཞི་དུལ་དཀྱེལ་ཆེ་ཟབ། །༦༧ལུགས་ཀྱི་བྱ་བ་གང་ལ་ཡང་། །གྲོས་ཀྱིས་མཐའ་རྒྱ་མྱུལ་བ་ཟབ། །འགྲུབ་ན་ལེགས་མོད་མ་འགྲུབ་ཀྱང་། །རང་ལ་གྱོད་ཁ་ཆུང་བ་ཡིན། །༦༨རྒྱུད་ངན་ཐུབ་སྤྱོད་འཁོར་ལ་ཡང་། །མི་བྱ་འཛུམ་པའི་ངོ་དང་ནི། །སྙན་པའི་ཚིག་གིས་སྤྲོ་བསྲིངས་ནས། །ཐབས་ལ་མཁས་པས་བརྟེན་ཅིང་སྐྱོང་། །༦༩ལེགས་པར་བགྱིས་ལ་ཡི་རང་དང་། །ནོངས་ལ་སྨོད་ཅིང་འཆོས་པ་ཡང་། །སྐབས་སུ་འབབ་དང་འཚམས་པ་ཡིས། །གཞན་ཡིད་ཟུག་རྔུར་མེད་པར་བྱ། །༧༠ཚུལ་ངན་སྐྱེ་བོས་སྟེས་དབང་གིས། །རེ་ཞིག་ལེགས་པར་བྱས་ན་ཡང་། །ཧ་ཅང་གཟེངས་བསྟོད་མི་བྱ་སྟེ། །ཕྱིས་ནས་ངན་སྤྱོད་ཚོད་མི་དཔོགས། །༧༡བཟང་པོས་རེ་ཞིག་ནོངས་བགྱིས་ཀྱང་། །ཧ་ཅང་ཚར་གཅོད་མི་བྱ་སྟེ། །ཕྱིས་ནས་སོམ་ཉིས་ལེགས་པ་ཡང་། །ནེམ་ནུར་ཉིད་དུ་བྲིད་པར་འགྱུར། །༧༢རང་ཉིད་བཟའ་དང་བཏུང་བ་སོགས། །མཐུན་པའི་རྐྱེན་གྱིས་འཚོ་བཞིན་དུ། །གཞན་གྱི་བདེ་བའི་རྒྱུ་སོགས་ལ། །གནོད་པར་བྱེད་པ་རིགས་མ་ཡིན། །༧༣བདག་གི་བདེ་དང་སྡུག་བསྔལ་བ། །འདམ་ཁ་བྱེད་པ་ཇི་བཞིན་དཔེས། །གཞན་གྱི་བདེ་དང་སྡུག་
བསྔལ་བ། །མཚོན་པ་ཉིད་དུ་གོ་བར་མཛོད། །༧༤རང་གི་མཐུ་དཔལ་འཕེལ་བ་ལ། །གཞན་མཐུ་ཉམས་པར་མི་བྱེད་ཅིང་། །ལྷག་བསམ་གྱིས་ནི་གང་སྤེལ་བ། །དེ་ཡང་བདག་གི་བདེ་ལེགས་རྒྱུ། །༧༥བདག་ཉིད་ཡོན་ཏན་ཀུན་ལྡན་ཡང་། །བློ་ལྡན་གཞན་གྱི་ཚིག་དག་ལ། །བརྙས་ཤིང་འདོར་བར་མི་བྱ་སྟེ། །ང་རྒྱལ་བསྙེམས་པས་དོན་འགྲུབ་དཀའ། །༧༦ནོངས་པ་བདག་གིས་བགྱིས་པ་ལ། །གཞན་གྱིས་དམོད་ནའང་ཁྲོ་མི་བྱ། །ཅི་ཕྱིར་རང་སྐྱོན་ལས་བྱུང་ཕྱིར། །ཕྱིས་ནས་བག་ཡོད་ཉིད་དུ་བྱ། །༧༧མདོར་ན་ཆོས་དང་སྲིད་ཀྱི་དཔལ། །ཕུན་སུམ་ཚོགས་པ་གང་ལགས་པ། །རྣམ་དཔྱོད་མིག་གིས་ལེགས་བལྟས་ནས། །རིགས་པ་དག་ནི་བསྒྲུབ་པར་བྱ། །༧༨དེ་ལས་མངོན་པར་མཐོ་བ་དང་། །ངེས་པར་ལེགས་པའི་གོ་འཕང་ནི། །སྔོན་བྱོན་རྣམས་ཀྱིས་བརྙེས་པ་བཞིན། །རང་ཡང་དེ་འདྲར་འགྱུར་བ་ཡིན། །༧༩གཙུག་ལག་གཉིས་ཀྱིས་སྤྱོད་པའི་ཚུལ། །དེ་ཉིད་སྟོན་པའི་གསུང་རབ་དང་། །ལུགས་ཀྱི་རྗེས་སུ་འབྲང་ནས་ནི། །ལེགས་པ་ཉིད་ཀྱིས་མཐའ་བསྐྱང་ངོ་། །༨༠དེ་ཕྱིར་ཁྱོད་ཀྱིས་ཚུལ་འདི་ལས། །སྲིད་དང་ཞི་བའི་དཔལ་འབྱོར་གང་། །བསྒྲུབས་ནས་འཁོར་སློབ་ཐམས་ཅད་ཀྱང་། །དོན་དེ་ལ་ནི་སྦྱོར་བར་མཛོད། །༨༡གང་ཡང་སྔོན་རབས་མཁས་རྣམས་ཀྱིས། །མཛད་པའི་ལེགས་བཤད་བསྟན་ཆོས་ནི། །ད་ལྟའང་བལྟ་རུ་ཡོད་པའི་ཕྱིར། །འདིར་ནི་མང་དུ་སྨོས་ཅི་དགོས། །༨༢དེ་སྐད་དམ་པའི་རིགས་འཁྲུངས་ཤིང་། །ལེགས་བྱས་དཔལ་གྱི་འབྱོར་པ་ཅན། །གང་གིས་དོན་གཉེར་ཆེན་པོ་ཡིས། །བསྐུལ་བའི་བཞེད་པ་སྐོང་ཕྱིར་རོ། །༨༣དེ་ཡང་སྐྱེས་ཐོབ་བློ་གྲོས་དང་། །སྦྱངས་པའི་རྣམ་དཔྱོད་མི་གསལ་བས། །ནོངས་པར་གྱུར་གང་མཁས་རྣམས་ཀྱིས། །བཟོད་པ་ཉིད་དུ་མཛད་པར་འོས། །༨༤འདིས་ཐོབ་བསོད་ནམས་ཉིར་མོར་བྱེད་པ་ཡིས། །མི་མཐུན་རྒུད་པའི་མུན་པ་ཡོངས་བསལ་ནས། །ཕན་བདེའི་པདྨོ་ཀུན་དགར་རྒྱས་བྱེད་པའི། །བཀྲ་ཤིས་སྣང་བ་དམ་པས་ཀུན་ཁྱབ་ཤོག །༨༥ཅེས་མདོ་ཁམས་ཀཿཐོག་རྡོ་རྗེ་གདན་གྱི་ཆོས་སྟོན་པའི་ཁྲི་ལ་དབང་འབྱོར་པ་རྒྱལ་བའི་སྲས་པོ་བསོད་ནམས་ལྡེའུ་བཙན་གྱི་གསུང་གིས་བསྐུལ་བ་ལས་ཤཱཀྱའི་དགེ་བསྙེན་རིག་པ་འཛིན་པ་འགྱུར་མེད་རྡོ་རྗེས་སྤེལ་བའོ། །