གཉིས་པ་ཞར་ལ་ཤིང་རྟའི་སྲོལ་འབྱེད་བཤད་པ།
གཉིས་པ་ཞར་ལ་ཤིང་རྟའི་སྲོལ་འབྱེད་བཤད་པ་ལ།
གཞན་ལུགས་ལ་བོད་སྔ་མ་ཁ་ཅིག་གིས་ཀླུ་སྒྲུབ་ཀྱི་རིགས་ཚོགས་དང༌། ཕྱོགས་གླང་གི་བརྒྱད་སྟོང་དོན་བསྡུས་དང༌།དབྱིག་གཉེན་གྱི་གནོད་འཇོམས་དང༌། རྗེ་བཙུན་གྱི་མངོན་རྟོགས་རྒྱན་དང་བསྟན་བཅོས་བཞི་དང༌། ཀླུ་སྒྲུབ་སོགས་གང་ཟག་བཞི་ཤིང་རྟའི་སྲོལ་འབྱེད་འཇོག་པ་དང་ལུགས་གཉིས་ཡོད་པར་འདོད་ལ། དེ་དག་ཤིང་རྟའི་སྲོལ་འབྱེད་ཡིན་པའི་རྒྱུ་མཚན་ནི། དགོངས་འགྲེལ་གཞན་ལ་མ་ལྟོས་པར་ཡུམ་གྱི་དགོངས་པ་རེ་འགྲེལ་བས་ཤིང་རྟའི་སྲོལ་འབྱེད་དོ་ཞེས་འཆད་དོ། །བོད་ཕྱི་རབས་པ་རྗེ་བླ་མ་ཤར་ཙོང་ཁ་བ་ཆེན་པོའི་རྗེས་འབྲང་གི་པཎ་ཆེན་བསོད་ནམས་གྲགས་པས་ཤིང་རྟའི་སྲོལ་འབྱེད་ལ་ཀླུ་སྒྲུབ་དང་ཐོགས་མེད་གཉིས་སུ་གྲངས་ངེས་པར་གསུངས་ལ། ཀུན་མཁྱེན་འཇམ་དབྱངས་བཞད་པས། མིའི་ཤ་ཚུགས་ཅན་གྱི་འགྲེལ་བཤད་གཞན་ལ་མ་བརྟེན་པར་རྒྱལ་བའི་གསུང་རབ་ཀྱི་དགོངས་པ་ལེགས་པར་འགྲེལ་བའི་བྱང་འཕགས་ཀྱི་རྣམ་ཅན་དེ། ཤིང་རྟའི་སྲོལ་འབྱེད་ཀྱི་མཚན་ཉིད། དེ་ལ་གསུམ་ཡོད་དེ། དབུ་མ་བའི་ཤིང་རྟའི་སྲོལ་འབྱེད་ལ་ཡུམ་གྱི་དངོས་བསྟན་སྟོང་ཉིད་ཀྱི་སྲོལ་འབྱེད་ཀླུ་སྒྲུབ་དང༌། སྦས་དོན་མངོན་རྟོགས་དངོས་པོ་བརྒྱད་དུ་འགྲེལ་བ་རྒྱན་རྩོམ་པ་པོ་རྗེ་བཙུན་བྱམས་མགོན་དང༌། ཡུམ་གྱི་མདོའི་དོན་སེམས་ཙམ་དུ་འགྲེལ་པའི་སློབ་དཔོན་ཐོགས་མེད་གསུམ་ཡོད་པར་བཞེད་དོ། །དེས་ན་ལེགས་བཤད་སྙིང་པོ་ལས། བདེར་གཤེགས་གསུང་རབ་ཚུལ་གཉིས་ཤིང་རྟའི་སྲོལ། །ལེགས་པར་ཕྱེ་བས་རྒྱལ་བའི་བསྟན་པ་མཆོག །ས་གསུམ་འགྲོ་ལ་ཉི་ལྟར་གསལ་མཛད་པ། །ཀླུ་སྒྲུབ་ཐོགས་མེད་ཅེས་གསུངས་པ་ཡང་དྲང་ངེས་འབྱེད་པའི་མིའི་རྟེན་ཅན་ལ་དེ་གཉིས་ངེས་པར་བསྟན་པ་ཙམ་ཡིན་ཞེས་གསུངས་སོ། །སེ་ར་རྗེ་བཙུན་པས་ཤེར་ཕྱིན་འགྲེལ་ཚུལ་ལ་རྗེ་བཙུན་དང་ཀླུ་སྒྲུབ་ཞབས་གཉིས་བྱུང་གསུངས་པ་ལས་གསལ་བར་མ་གསུངས་པས་རྗེས་འབྲང་རྣམས་ལ་རྗེ་བཙུན་བྱམས་མགོན་ཤིང་རྟའི་སྲོལ་འབྱེད་འདོད་མི་འདོད་གཉིས་བྱུང་ལ། རང་ལུགས་ལ་ཤིང་རྟའི་སྲོལ་འབྱེད་ཀྱི་ཚད་སོགས་གསལ་བར་བསྟན་པའི་གཞུང་ལུགས་སྔར་བདག་གི་མ་མཐོང་མོད་རང་ལུགས་ཀྱི་གཞུང་རྣམས་ཀྱི་དགོངས་པ་ལ་བརྟགས་ན་རེ་ཞིག་འདི་ལྟར་བརྗོད་པར་བྱ་སྟེ། ཤིང་རྟའི་སྲོལ་དང་འདྲ་བར་རྒྱལ་བའི་གསུང་རབ་ཀྱི་དགོངས་པ་ལེགས་པར་འགྲེལ་བའི་སྲོལ་རྒྱ་ཆེར་གསར་དུ་ཕྱེས་པའམ་ཡུལ་དུས་དེ་དང་དེར་བཤད་སྲོལ་གསར་དུ་རྒྱ་ཆེར་ཕྱེས་པའི་བྱང་འཕགས་རྣམ་ཅན་དེ། ཤིང་རྟའི་སྲོལ་འབྱེད་ཀྱི་དོན་བཞག་པ་ལ་འགལ་བ་མེད་སྙམ་སྟེ། ཉ་ཊཱིཀ་ལས། ཡང་ན་ཤིང་རྟ་སོང་རྗེས་སུ་མིག་མེད་པ་རྣམས་ཕྱིན་ཡང་གཡང་དུ་ལྟུང་བའི་འཇིགས་པ་མེད་པ་ལྟར་རྒྱལ་བ་བྱམས་པ་སོགས་ཀྱིས་མཛད་པའི་བསྟན་བཅོས་ཀྱི་རྗེས་སུ་འཕགས་པའི་མིག་མ་ཐོབ་པ་སོ་སྐྱེ་རྣམས་ཀྱིས་ཞུགས་པས་ལམ་བདེ་བར་བགྲོད་ནས་ཕྱིན་པར་འགྱུར་བས་དེ་སྐད་ཟེར་རམ་སྙམ་མོ། །ཞེས་གསུངས་སོ། །མཚན་གཞི་ནི། ཐོགས་མེད་སྐུ་མཆེད་སོགས་ཤིང་རྟའི་སྲོལ་འབྱེད་ཡིན་ཏེ། གཞན་སྟོང་བརྒྱུད་འདེབས་ལས། ཐོགས་མེད་སྐུ་མཆེད་ཉེ་བརྒྱུད་ལ་མི་དགོས་ཀྱང་ལུགས་འདིའི་ཤིང་རྟའི་སྲོལ་འབྱེད་ཡིན་པའི་ཕྱིར་ངེས་པར་འཇུག་དགོས་ལ། ཞེས་གསུངས་པའི་ཕྱིར་རོ། །སངས་རྒྱས་སོ་སོའི་བསྟན་པའི་དབང་དུ་བྱས་པ་དང༌། འཇིག་རྟེན་གྱི་ཁམས་མཐའ་ཡས་པ་སོགས་ལ་ཤིང་རྟའི་སྲོལ་འབྱེད་གྲངས་མེད་པ་ཡོད་ཅེས་བྱའོ། །དེས་ན་ཤིང་རྟའི་སྲོལ་འབྱེད་ལ་གང་ཟག་ལས་བསྟན་བཅོས་ལ་ཤིང་རྟའི་སྲོལ་འབྱེད་ཀྱི་སྒྲ་བཤད་ཙམ་འཇུག་པ་ལས་ཤིང་རྟའི་སྲོལ་འབྱེད་མི་བཞག་སྟེ། ཉ་ཊཱིཀ་ལས། དེ་ལྟར་བཞི་པོ་འདིས་ཤིང་རྟའི་སྲོལ་དང་འདྲ་བར་ཡུམ་གྱི་དགོངས་པ་འགྲེལ་བའི་ཚུལ་འགྲེལ་བ་གཞན་ལ་མ་ལྟོས་པར་སྲོལ་འབྱེད་པར་བྱེད་དོ་ཞེས་ཆོས་རྗེ་བུ་སྟོན་གསུངས་ཏེ་སྒྲ་བཤད་དུ་སྣང་ངོ༌། །ཞེས་གསུངས་སོ། །དེ་མི་འཐད་པར་ཐལ། བསྟན་འགྱུར་དཀར་ཆག་ཏུ། རྒྱལ་བའི་ཡུམ་གྱི་དགོངས་འགྲེལ་ལ་ཤིང་རྟ་ཆེན་པོའི་སྲོལ་བཞིར་གྲགས་པ་ལས། དང་པོ། ཞེས་པ་ནས། ཤིང་རྟའི་སྲོལ་འབྱེད་གཉིས་པ་དབུ་མ་རིགས་པའི་ཚོགས་ནི། ཞེས་སོགས་གསུངས་པའི་ཕྱིར་ཟེར་ན་དཔྱད་པར་བྱའོ། །གྲུབ་མཐའ་རང་རང་གི་ཤིང་རྟའི་སྲོལ་འབྱེད་ཡིན་ན་ཤིང་རྟའི་སྲོལ་འབྱེད་ཡིན་དགོས་པ་ཡིན་མིན་དང་ཐེག་དམན་གྱི་ཤིང་རྟའི་སྲོལ་འབྱེད་འཇོག་པ་ཡིན་མིན་དང་ཐལ་རང་དང་དབུ་མ་རང་སྟོང་གཞན་སྟོང་གི་ཤིང་རྟའི་སྲོལ་འབྱེད་ལ་དཔྱད། བྱང་འཕགས་དགོས་པའི་རྒྱུ་མཚན་ནི། ཐེག་མཆོག་ཟིན་བྲིས་ལས། དེ་ཡང་གཞན་ལ་མ་ལྟོས་པར་བློ་གྲོས་ཀྱི་རྩལ་གྱིས་དགོངས་འགྲེལ་བྱེད་ནུས་པ་ནི་ས་ཐོབ་པའི་རྟགས་ལས་འབྱུང་སྟེ། རྒྱན་ལས། །བརྩེ་དང་སྙན་པར་སྨྲ་བ་དང༌། །བརྟན་པ་ཉིད་དང་ལག་བརྐྱང་དང༌། །དགོངས་པ་ཟབ་མོ་ངེས་འགྲེལ་བ། ། འདི་དག་བློ་ལྡན་རྣམས་ཀྱི་རྟགས། །ཞེས་གསུངས་སོ། །གོང་དུ་བཤད་པའི་བསྟན་བཅོས་དེ་རྣམས་ལས་རྒྱལ་བ་བྱམས་པས་མཛད་པའི་བསྟན་བཅོས་མངོན་རྟོགས་རྒྱན་ནི་འདིར་གང་བཤད་པར་བྱ་བའི་ཆོས་སོ། །